📜

नमो तस्स भगवतो अरहतो सम्मासम्बुद्धस्स

विनयपिटके

विमतिविनोदनी-टीका (दुतियो भागो)

५. पाचित्तियकण्डं

१. मुसावादवग्गो

१. मुसावादसिक्खापदवण्णना

१. मुसावादवग्गस्स ¶ ¶ पठमसिक्खापदे खुद्दकानन्ति एत्थ ‘‘खुद्दक-सद्दो बहु-सद्दपरियायो’’ति वदन्ति. तत्थाति तेसु वग्गेसु, खुद्दकेसु वा. ‘‘जानितब्बतो’’ति हेतुनो विपक्खेपि निब्बाने वत्तनतो अनेकन्तिकत्ते परेहि वुत्ते ‘‘न मया अयं हेतु वुत्तो’’ति ¶ तं कारणं पटिच्छादेतुं पुन ‘‘जातिधम्मतोति मया वुत्त’’न्तिआदीनि वदति. ‘‘सम्पजान’’न्ति वत्तब्बे अनुनासिकलोपेन निद्देसोति आह ‘‘जानन्तो’’ति.

२. सम्पजानमुसावादेति अत्तना वुच्चमानस्स अत्थस्स वितथभावं पुब्बेपि जानित्वा, वचनक्खणे च जानन्तस्स मुसावादभणने. तेनाह ‘‘जानित्वा’’तिआदि. मुसावादेति च निमित्तत्थे भुम्मं, तस्मा मुसाभणननिमित्तं पाचित्तियन्ति एवमेत्थ, इतो परेसुपि ईदिसेसु अत्थो वेदितब्बो.

३. वदन्ति ¶ एतायाति वाचाति आह ‘‘मिच्छा’’तिआदि. ‘‘धनुना विज्झती’’तिआदीसु विय ‘‘चक्खुना दिट्ठ’’न्ति पाकटवसेन वुत्तन्ति आह ‘‘ओळारिकेना’’ति.

११. गतो भविस्सतीति एत्थापि सन्निट्ठानतो वुत्तत्ता मुसावादो जातो. आपत्तिन्ति पाचित्तियापत्तिं, न दुब्भासितं. जातिआदीहि दसहि अक्कोसवत्थूहि परं दवा वदन्तस्स हि तं होति. चारेसुन्ति उपनेसुं. वत्थुविपरीतता, विसंवादनपुरेक्खारता, यमत्थं वत्थुकामो, तस्स पुग्गलस्स विञ्ञापनपयोगो चाति इमानेत्थ तीणि अङ्गानि. वत्थुविपरीतताय हि असति विसंवादनपुरेक्खारताय विञ्ञापितेपि मुसावादो न होति, दुक्कटमत्तमेव होति. तस्मा सापि अङ्गमेवाति गहेतब्बं. उत्तरिमनुस्सधम्मारोचनत्थं मुसा भणन्तस्स पाराजिकं, परियायेन थुल्लच्चयं, अमूलकेन पाराजिकेन अनुद्धंसनत्थं सङ्घादिसेसो, सङ्घादिसेसेनानुद्धंसनओमसवादादीसु पाचित्तियं, अनुपसम्पन्नेसु दुक्कटं, उक्कट्ठहीनजातिआदीहि दवा अक्कोसन्तस्स दुब्भासितं, केवलं मुसा भणन्तस्स इध पाचित्तियं वुत्तं.

मुसावादसिक्खापदवण्णना निट्ठिता.

२. ओमसवादसिक्खापदवण्णना

१३. दुतिये पुब्बे पतिट्ठितारप्पदेसं पुन अरे पत्तेति पठमं भूमियं पतिट्ठितनेमिप्पदेसे परिवत्तेत्वा पुन भूमियं पतिट्ठितेति अत्थो.

१५. पुब्बेति अट्ठुप्पत्तियं. पुप्फछड्डका नाम गब्भमलादिहारका. तच्छककम्मन्ति पासाणकोट्टनादिवड्ढकीकम्मं ¶ . हत्थमुद्दागणनाति अङ्गुलिसङ्कोचनेनेव गणना. अच्छिद्दकगणना नाम एकट्ठानदसट्ठानादीसु सारियो ठपेत्वा अनुक्कमेन गणना. आदि-सद्देन सङ्कलनपटउप्पादनवोक्लनभागहारादिवसेन पवत्ता पिण्डगणना गहिता. यस्स सा पगुणा, सो रुक्खम्पि दिस्वा ‘‘एत्तकानि एत्थ पण्णानी’’ति ¶ जानाति. यभ-मेथुनेति वचनतो आह ‘‘य-कार-भ-कारे’’तिआदि.

१६. न पुरिमेनाति मुसावादसिक्खापदेन. सोपि आपत्तियाति उपसग्गादिविसिट्ठेहिपि वदन्तो पाचित्तियापत्तियाव कारेतब्बो.

२६. दुब्भासितन्ति सामञ्ञतो वुत्तत्ता पाळियं अनागतेहिपि परम्मुखा वदन्तस्सपि दुब्भासितमेवाति आचरिया वदन्ति ततो लामकापत्तिया अभावा, अनापत्तियापेत्थ भवितुं अयुत्तत्ता. सब्बसत्ताति एत्थ वचनत्थविदूहि तिरच्छानादयोपि गहिता.

३५. अनुसासनीपुरेक्खारताय वा पापगरहिताय वा वदन्तानं चित्तस्स लहुपरिवत्तिभावतो अन्तरन्तरा कोपे उप्पन्नेपि अनापत्ति. कायविकारमत्तेनपि ओमसनसम्भवतो ‘‘तिसमुट्ठानं, कायकम्म’’न्ति च वुत्तं. परिवारे पन ‘‘चतुत्थेन आपत्तिसमुट्ठानेन…पे… दुब्भासितं आपज्जेय्याति. न हीति वत्तब्ब’’न्तिआदिना (परि. २७६) इतरानि समुट्ठानानि पटिक्खिपित्वा पञ्चमस्सेव वुत्तत्ता आह ‘‘दुब्भासितापत्ति पनेत्थ वाचाचित्ततो समुट्ठाती’’ति. दवकम्यताय हि कायवाचाचित्तेहि ओमसन्तस्सपि वाचाचित्तमेव आपत्तिया अङ्गं होति, न पन कायो विज्जमानोपि धम्मदेसनापत्ति विय केवलं कायविकारेनेव. ओमसन्तस्स पन किञ्चापि इध दुब्भासितापत्तिया अनापत्ति, अथ खो कायकीळापटिक्खेपसिक्खापदेन दुक्कटमेवाति दट्ठब्बं. उपसम्पन्नं जातिआदीहि अनञ्ञापदेसेन अक्कोसनं, तस्स जाननं, अत्थपुरेक्खारतादीनं अभावोति इमानेत्थ तीणि अङ्गानि.

ओमसवादसिक्खापदवण्णना निट्ठिता.

३. पेसुञ्ञसिक्खापदवण्णना

३६. ततिये भण्डनं जातं एतेसन्ति भण्डनजाता. पिसतीति पिसुणा, वाचा, समग्गे भिन्ने ¶ करोतीति अत्थो. ताय वाचाय समन्नागतो पिसुणो, तस्स कम्मं पेसुञ्ञन्ति एवमेत्थ अत्थो वेदितब्बो.

इधापि ¶ जातिआदीहि दसहि वत्थूहि पेसुञ्ञं उपसंहरन्तस्सेव पाचित्तियं, इतरेहि अक्कोसवत्थूहि दुक्कटं. अनक्कोसवत्थूहि पन उपसंहरन्तस्स दुक्कटमेवाति वदन्ति. जातिआदीहि अनञ्ञापदेसेन अक्कोसन्तस्स भिक्खुनो सुत्वा भिक्खुस्स उपसंहरणं, पियकम्यताभेदाधिप्पायेसु अञ्ञतरता, तस्स विजाननाति इमानेत्थ तीणि अङ्गानि.

पेसुञ्ञसिक्खापदवण्णना निट्ठिता.

४. पदसोधम्मसिक्खापदवण्णना

४५. चतुत्थे पुरिमब्यञ्जनेन सदिसन्ति ‘‘रूपं अनिच्च’’न्ति एत्थ अनिच्च-सद्देन सदिसं ‘‘वेदना अनिच्चा’’ति एत्थ अनिच्च-सद्दं वदति. अक्खरसमूहोति अविभत्तिको वुत्तो. पदन्ति विभत्तिअन्तं वुत्तं.

एकं पदन्ति गाथापदमेव सन्धाय वदति. पदगणनायाति गाथापदगणनाय. अपापुणित्वाति सद्धिं अकथेत्वा. एतेन गाथाय पच्छिमपादे वुच्चमाने सामणेरो पठमपादादिं वदति, आपत्तियेव, तस्मिं निस्सद्दे एव इतरेन वत्तब्बन्ति दस्सेति.

अट्ठकथानिस्सितोति सङ्गीतित्तयारुळ्हं पोराणट्ठकथं सन्धाय वदति. इदानिपि ‘‘यथापि दीपिको नाम, निलीयित्वा गण्हते मिगे’’ति (मि. प. ६.१.५; विसुद्धि. १.२१७; दी. नि. अट्ठ. २.३७४; म. नि. अट्ठ. १.१०७; पारा. अट्ठ. २.१६५; पटि. म. अट्ठ. २.१.१६३) एवमादिकं अट्ठकथावचनं अत्थेव, बुद्धघोसाचरियादीहि पोराणट्ठकथानयेन वुत्तम्पि इध सङ्गहेतब्बन्ति वदन्ति. पाळिनिस्सितोति उदानवग्गसङ्गहादिको. विवट्टूपनिस्सितन्ति निब्बाननिस्सितं. थेरस्साति नागसेनत्थेरस्स. मग्गकथादीनि पकरणानि.

४६. पाळियं अक्खरायातिआदि लिङ्गविपल्लासेन वुत्तं, अक्खरेनातिआदिना अत्थो गहेतब्बो.

४८. उपचारं ¶ मुञ्चित्वाति परिसाय द्वादसहत्थं मुञ्चित्वा एकतो ठितस्स वा निसिन्नस्स वा अनुपसम्पन्नस्स अकथेत्वा अञ्ञे उद्दिस्स भणन्तस्सापि ¶ अनापत्ति. सचे पन दूरे निसिन्नम्पि उद्दिस्स भणति, आपत्ति एव. ओपातेतीति सद्धिं कथेति. अनुपसम्पन्नता, वुत्तलक्खणधम्मं पदसो वाचनता, एकतो भणनञ्चाति इमानेत्थ तीणि अङ्गानि.

पदसोधम्मसिक्खापदवण्णना निट्ठिता.

५. सहसेय्यसिक्खापदवण्णना

५०-५१. पञ्चमे तत्रिदं निदस्सनन्ति सेसो. दिरत्ततिरत्तन्ति एत्थ दिरत्तग्गहणं वचनालङ्कारत्थं, निरन्तरं तिस्सोव रत्तियो वसित्वा चतुत्थदिवसादीसु सयन्तस्सेव आपत्ति, न एकन्तरिकादिवसेन सयन्तस्साति दस्सनत्थम्पीति दट्ठब्बं. दिरत्तविसिट्ठञ्हि तिरत्तं वुच्चमानं, तेन अनन्तरिकमेव तिरत्तं दीपेतीति. पञ्चहि छदनेहीति इट्ठकसिलासुधातिणपण्णेहि. वाचुग्गतवसेनाति पगुणवसेन. दियड्ढहत्थुब्बेधो वड्ढकीहत्थेन गहेतब्बो. एकूपचारो एकेन मग्गेन पविसित्वा अब्भोकासं अनुक्कमित्वा सब्बत्थ अनुपरिगमनयोग्गो, एतं बहुद्वारम्पि एकूपचारोव. तत्थ पन कुट्टादीहि रुन्धित्वा विसुं द्वारं योजेन्ति, नानूपचारो होति. सचे पन रुन्धति एव, विसुं द्वारं न योजेन्ति, ‘‘एतम्पि एकूपचारमेव मत्तिकादीहि पिहितद्वारो विय गब्भो’’ति गहेतब्बं. अञ्ञथा गब्भे पविसित्वा पमुखादीसु निपन्नानुपसम्पन्नेहि सहसेय्यापरिमुत्तिया गब्भद्वारं मत्तिकादीहि पिदहापेत्वा उट्ठिते अरुणे विवरापेन्तस्सपि अनापत्ति भवेय्याति.

तेसं पयोगे पयोगे भिक्खुस्स आपत्तीति एत्थ केचि ‘‘अनुट्ठहनेन अकिरियसमुट्ठाना आपत्ति वुत्ता तस्मिं खणे सयन्तस्स किरियाभावा. इदञ्हि सिक्खापदं सिया किरियाय समुट्ठाति, सिया अकिरियाय समुट्ठाति. किरियासमुट्ठानता चस्स तब्बहुलवसेन वुत्ताति वदति. यथा चेतं, एवं दिवासयनम्पि. अनुट्ठहनेन, हि द्वारासंवरणेन चेतं अकिरियसमउट्ठानम्पि होती’’ति वदन्ति. इदञ्च युत्तं विय दिस्सति, वीमंसित्वा गहेतब्बं.

‘‘उपरिमतलेन ¶ सद्धिं असम्बद्धभित्तिकस्सा’’ति इदं सम्बद्धभित्तिके वत्तब्बमेव नत्थीति दस्सनत्थं वुत्तं. उपरिमतले सयितस्स सङ्का एव नत्थीति ‘‘हेट्ठापासादे’’तिआदि वुत्तं. नानूपचारेति बहि निस्सेणिया आरोहणीये.

सभासङ्खेपेनाति ¶ सभाकारेन. ‘‘अड्ढकुट्टके’’ति इमिना सण्ठानं दस्सेति. यत्थ तीसु द्वीसु वा पस्सेसु भित्तियो बद्धा, छदनं वा असम्पत्ता अड्ढभित्ति, इदं अड्ढकुट्टकं नाम. वाळसङ्घाटो नाम परिक्खेपस्स अन्तो थम्भादीनं उपरि वाळरूपेहि कतसङ्घाटो. परिक्खेपस्स बहिगतेति एत्थ यस्मिं पस्से परिक्खेपो नत्थि, तत्थ सचे भूमितो वत्थु उच्चं होति, उभतो उच्चवत्थुतो हेट्ठा भूमियं निब्बकोसब्भन्तरेपि अनापत्ति एव तत्थ सेनासनवोहाराभावतो. अथ वत्थु नीचं भूमिसममेव सेनासनस्स हेट्ठिमतले तिट्ठति, तत्थ परिक्खेपरहितदिसाय निब्बकोसब्भन्तरे सब्बत्थ आपत्ति होति, परिच्छेदाभावतो परिक्खेपस्स बहि एव अनापत्तीति दट्ठब्बं. परिमण्डलं वातिआदि मज्झे उदकपतनत्थाय आकासङ्गणवन्तं सेनासनं सन्धाय वुत्तं. तत्थ अपरिच्छिन्नगब्भूपचारेति एकेकगब्भस्स द्वीसु पस्सेसु पमुखेन गमनं परिच्छिन्दित्वा दियड्ढहत्थुब्बेधतो अनूनं कुट्टं कत्वा आकासङ्गणेन पवेसं करोन्ति, एवं अकतोति अत्थो. गब्भपरिक्खेपोति चतुरस्सपासादादीसु समन्ता ठितगब्भभित्तियो सन्धाय वुत्तं.

पाटेक्कसन्निवेसाति एकेकदिसाय गब्भपाळियो इतरदिसासु गब्भपाळीनं अभावेन, भावेपि वा अञ्ञमञ्ञभित्तिच्छदनेहि असम्बन्धताय पाटेक्कसन्निवेसा नाम वुच्चति. तं…पे… सन्धाय वुत्तन्ति तत्थ पाचित्तियेन अनापत्तीति वुत्तं, न दुक्कटेन. तादिसाय हि गब्भपाळिया पमुखं तीसु दिसासु भित्तीनं अभावेन एकदिसाय गब्भभित्तिमत्तेन सब्बच्छन्नं चूळपरिच्छन्नं नाम होति. तस्मा दुक्कटमेव. यदि पन तस्स पमुखस्स इतरदिसासुपि एकिस्सं, सब्बासु वा भित्तिं करोन्ति, तदा सब्बच्छन्नउपड्ढपरिच्छन्नादिभावतो पाचित्तियमेव होतीति दट्ठब्बं. भूमियं विना जगतिया पमुखं सन्धायाति एत्थ उच्चवत्थुं अकत्वा भूमियं कतगेहस्स पमुखं सन्धाय अपरिक्खित्ते पाचित्तियेन अनापत्तीति इदं कथितं ¶ . उच्चवत्थुकं चे पमुखं होति, तेन वत्थुना परिक्खित्तसङ्ख्यमेव पमुखं गच्छतीति अधिप्पायो. तत्थाति अन्धकट्ठकथायं. जगतिया पमाणं वत्वाति पकतिभूमिया निपन्नो यथा जगतिया उपरि सयितं न पस्सति, एवं उच्चातिउच्चवत्थुस्स उब्बेधप्पमाणं वत्वा. एकदिसाय उजुकमेव दीघं कत्वा सन्निवेसितो पासादो एकसालसन्निवेसो. द्वीसु, तीसु वा चतूसुपि वा दिसासु सिङ्घाटकसण्ठानादिवसेन कता द्विसालादिसन्निवेसा वेदितब्बा. सालप्पभेददीपनमेव चेत्थ पुरिमतो विसेसोति. परिक्खेपो विद्धस्तोति पमुखस्स परिक्खेपं सन्धाय वदति.

५३. उपड्ढच्छन्नउपड्ढपरिच्छन्नं सेनासनं दुक्कटस्स आदिं वत्वा पाळियं दस्सितत्ता ततो ¶ अधिकं सब्बच्छन्नउपड्ढपरिच्छन्नादिकम्पि सब्बं पाळियं अवुत्तम्पि पाचित्तियस्सेव वत्थुभावेन दस्सितं सिक्खापदस्स पण्णत्तिवज्जत्ता, गरुके ठातब्बतो चाति वेदितब्बं. सत्त पाचित्तियानीति पाळियं वुत्तपाचित्तियद्वयं सामञ्ञतो एकत्तेन गहेत्वा वुत्तं.

५४. पाळियं ‘‘ततियाय रत्तिया पुरारुणा निक्खमित्वा पुन वसती’’ति इदं उक्कट्ठवसेन वुत्तं, अनिक्खमित्वा पन पुरारुणा उट्ठहित्वा अन्तोछदने निसिन्नस्सापि पुनदिवसे सहसेय्येन अनापत्ति एव. सेनम्बमण्डपवण्णं होतीति सीहळदीपे किर उच्चवत्थुको सब्बच्छन्नो सब्बअपरिच्छन्नो एवंनामको सन्निपातमण्डपो अत्थि, तं सन्धायेतं वुत्तं. एत्थ चतुत्थभागो चूळकं, द्वे भागा उपड्ढं, तीसु भागेसु द्वे भागा येभुय्यन्ति इमिना नयेन चूळकच्छन्नपरिच्छन्नतादीनि वेदितब्बानि. पाचित्तियवत्थुकसेनासनं, तत्थ अनुपसम्पन्नेन सह निपज्जनं, चतुत्थदिवसे सूरियत्थङ्गमनन्ति इमानेत्थ तीणि अङ्गानि.

सहसेय्यसिक्खापदवण्णना निट्ठिता.

६. दुतियसहसेय्यसिक्खापदवण्णना

५५. छट्ठे मातुगामेन सद्धिं चतुत्थदिवसे सयन्तस्सापि इमिना सिक्खापदेन एकाव आपत्ति. केचि पन पुरिमसिक्खापदेनापीति द्वे आपत्तियो वदन्ति, तं न युत्तं ‘‘अनुपसम्पन्नेना’’ति अनित्थिलिङ्गेन वुत्तत्ता नपुंसकेन ¶ पन चतुत्थदिवसे सयन्तस्स सदुक्कटपाचित्तियं वत्तुं युत्तं. किञ्चापेत्थ पाळियं पण्डकवसेनेव दुक्कटं वुत्तं, तदनुलोमिका पन पुरिसउभतोब्यञ्जनकेन सह सयन्तस्स इमिना दुक्कटं, पुरिमेन चतुत्थदिवसे सदुक्कटपाचित्तियं. इत्थिउभतोब्यञ्जनको इत्थिगतिकोवाति अयं अम्हाकं खन्ति. मतित्थिया अनापत्तीति वदन्ति. पाचित्तियवत्थुकसेनासनं, तत्थ मातुगामेन सद्धिं निपज्जनं, सूरियत्थङ्गमनन्ति इमानेत्थ तीणि अङ्गानि.

दुतियसहसेय्यसिक्खापदवण्णना निट्ठिता.

७. धम्मदेसनासिक्खापदवण्णना

६०. सत्तमे न यक्खेनातिआदीनं ‘‘अञ्ञत्र विञ्ञुना’’ति इमिना सम्बन्धो. अञ्ञत्र विञ्ञुना ¶ पुरिसविग्गहेन, न यक्खादिनापीति एवमत्थो गहेतब्बोति अधिप्पायो. तादिसेनपि हि सह ठिताय देसेतुं न वट्टति. तंतंदेसभासाय अत्थं यथारुचि वट्टति एव.

इरियापथापरिवत्तनं, पुरिसं वा द्वादसहत्थूपचारे अपक्कोसापनं एत्थ अकिरिया. वुत्तलक्खणस्स धम्मस्स छन्नं वाचानं उपरि देसना, वुत्तलक्खणो मातुगामो, इरियापथपअवत्तनाभावो, विञ्ञूपुरिसाभावो, अपञ्हविस्सज्जनाति इमानेत्थ पञ्च अङ्गानि.

धम्मदेसनासिक्खापदवण्णना निट्ठिता.

८. भूतारोचनसिक्खापदवण्णना

७७. अट्ठमे अन्तराति परिनिब्बानकालतो पुब्बेपि. अतिकड्ढियमानेनाति ‘‘वदथ, भन्ते, किं तुम्हेहि अधिगत’’न्ति एवं निप्पीळियमानेन अतिबद्धियमानेन. तथारूपे पच्चये सति वत्तब्बमेव. सुतपरियत्तिसीलगुणन्ति एत्थ अत्थकुसलता सुतगुणो, पाळिपाठकुसलता परियत्तिगुणोति दट्ठब्बं. ‘‘चित्तक्खेपस्स वा अभावा’’ति इमिना खित्तचित्तवेदनाट्टतापि अरियानं नत्थीति दस्सेति.

पुब्बे ¶ अवुत्तेहीति चतुत्थपाराजिके अवुत्तेहि. इदञ्च सिक्खापदं पण्णत्तिअजआननवसेन एकन्ततो अचित्तकसमुट्ठानमेव होति अरियानं पण्णत्तिवीतिक्कमाभावा. झानलाभीनञ्च सत्थु आणावीतिक्कमपटिघचित्तस्स झानपरिहानतो भूतारोचनं न सम्भवति. उत्तरिमनुस्सधम्मस्स भूतता, अनुपसम्पन्नस्स आरोचनं, तङ्खणविजानना, अनञ्ञापदेसोति इमानेत्थ चत्तारि अङ्गानि.

भूतारोचनसिक्खापदवण्णना निट्ठिता.

९. दुट्ठुल्लारोचनसिक्खापदवण्णना

७८. नवमे तत्थ भवेय्याति तत्थ कस्सचि मति एवं भवेय्य. अट्ठकथावचनमेव उपपत्तितो दळ्हं कत्वा पतिट्ठपेन्तो ‘‘इमिनापि चेत’’न्तिआदिमाह.

८२. आदितो पञ्च सिक्खापदानीति पाणातिपातादीनि पञ्च. सेसानीति विकालभोजनादीनि ¶ . सुक्कविस्सट्ठिआदि अज्झाचारोव. अन्तिमवत्थुं अनज्झापन्नस्स भिक्खुनो सवत्थुको सङ्घादिसेसो, अनुपसम्पन्नस्स आरोचनं, भिक्खुसम्मुतिया अभावोति इमानेत्थ तीणि अङ्गानि.

दुट्ठुल्लारोचनसिक्खापदवण्णना निट्ठिता.

१०. पथवीखणनसिक्खापदवण्णना

८६. दसमे अप्पपंसुमत्तिकाय पथविया अनापत्तिवत्थुभावेन वुत्तत्ता उपड्ढपंसुमत्तिकायपि पाचित्तियमेवाति गहेतब्बं. न हेतं दुक्कटवत्थूति सक्का वत्तुं जाताजातविनिमुत्ताय ततियपथविया अभावतो.

वट्टतीति इमस्मिं ठाने पोक्खरणिं खणाति ओकासस्स अनियमितत्ता वट्टति. इमं वल्लिं खणाति पथवीखणनं सन्धाय वुत्तत्ता इमिनाव सिक्खापदेन आपत्ति, न भूतगामसिक्खापदेन. उभयम्पि ¶ सन्धाय वुत्ते पन द्वेपि पाचित्तिया होन्ति. उदकपप्पटकोति उदके अन्तोभूमियं पविट्ठे तस्स उपरिभागं छादेत्वा तनुकपंसु वा मत्तिका वा पटलं हुत्वा पतमाना तिट्ठति, तस्मिं उदके सुक्खेपि तं पटलं वातेन चलमाना तिट्ठति, तं उदकपप्पटको नाम.

अकतपब्भारेति अवळञ्जनट्ठानदस्सनत्थं वुत्तं. तादिसे एव हि वम्मिकस्स सम्भवोति. मूसिकुक्करं नाम मूसिकाहि खनित्वा बहि कतपंसुरासि. अच्छदनन्तिआदिवुत्तत्ता उजुकं आकासतो पतितवस्सोदकेन ओवट्ठमेव जातपथवी होति, न छदनादीसु पतित्वा ततो पवत्तउदकेन तिन्तन्ति वेदितब्बं. मण्डपत्थम्भन्ति साखामण्डपत्थम्भं. उच्चालेत्वाति उक्खिपित्वा. ततोति पुराणसेनासनतो.

८८. महामत्तिकन्ति भित्तिलेपनं. जातपथविता, तथासञ्ञिता, खणनखणापनानं अञ्ञतरन्ति इमानेत्थ तीणि अङ्गानि.

पथवीखणनसिक्खापदवण्णना निट्ठिता.

निट्ठितो मुसावादवग्गो पठमो.

२. भूतगामवग्गो

१. भूतगामसिक्खापदवण्णना

८९. दुतियवग्गस्स ¶ पठमे निग्गहेतुं असक्कोन्तोति साखट्ठकविमाने साखाय छिज्जमानाय छिज्जन्ते तत्थ अछेदनत्थाय देवताय उपनीतं पुत्तं दिस्वापि कुठारिनिक्खेपवेगं निवत्तेतुं असक्कोन्तोति अत्थो. रुक्खधम्मेति रुक्खस्स पवत्तियं. रुक्खानं विय छेदनादीसु अकुप्पनञ्हि रुक्खधम्मो नाम.

उप्पतितन्ति उप्पन्नं. भन्तन्ति धावन्तं. वारयेति निग्गण्हेय्य. इतरोति उप्पन्नं कोधं अनिग्गण्हन्तो राजउपराजादीनं रस्मिमत्तग्गाहकजनो विय न उत्तमसारथीति अत्थो. विसटं सप्पविसन्ति सरीरे दाठावणानुसारेन वित्थिण्णं ब्यापेत्वा ठितं कण्हसप्पविसं विय. जहाति ओरपारन्ति पञ्चोरम्भागियसञ्ञोजनानि ततियमग्गेन जहाति. ‘‘ओरपार’’न्ति हि ओरिमतीरं वुच्चति ¶ . अथ वा सोति ततियमग्गेन कोधं विनेत्वा ठितो भिक्खु अरहत्तमग्गेन ओरपारं जहातीति अत्थो. तत्थ ओरं नाम सकत्तभावो, अज्झत्तिकानि वा आयतनानि. पारं नाम परअत्तभावो, बाहिरानि वा आयतनानि. तदुभये पन छन्दरागं जहन्तो ‘‘जहाति ओरिमपार’’न्ति वुच्चति.

९०. भवन्तीति वड्ढन्ति. अहुवुन्तीति बभूवु. तेनाह ‘‘जाता वड्ढिता’’ति. भूतानं गामोति महाभूतानं हरिततिणादिभावेन समग्गानं समूहो. तब्बिनिमुत्तस्स गामस्स अभावं दस्सेतुं ‘‘भूता एव वा गामो’’ति वुत्तं. पातब्य-सद्दस्स पा पानेति धात्वत्थं सन्धायाह ‘‘परिभुञ्जितब्बता’’ति. सा च पातब्यता छेदनादि एव होतीति आह ‘‘तस्सा…पे… भूतगामस्स जाता छेदनादिपच्चया’’ति.

९१. जात-सद्दो एत्थ विजातपरियायोति ‘‘पुत्तं विजाता इत्थी’’तिआदीसु विय पसूतवचनोति आह ‘‘पसूतानी’’ति, निब्बत्तपण्णमूलानीति अत्थो.

तानि ¶ दस्सेन्तोति तानि बीजानि दस्सेन्तो. कारियदस्सनमुखेनेव कारणञ्च गहितन्ति आह ‘‘बीजतो निब्बत्तेन बीजं दस्सित’’न्ति.

९२. ‘‘बीजतो सम्भूतो भूतगामो बीज’’न्ति इमिना उत्तरपदलोपेन ‘‘पदुमगच्छतो निब्बत्तं पुप्फं पदुम’’न्तिआदीसु वियायं वोहारोति दस्सेति. यं बीजं भूतगामो नाम होतीति निब्बत्तपण्णमूलं सन्धाय वदति. यथारुतन्ति यथापाठं.

‘‘सञ्चिच्चा’’ति वुत्तत्ता सरीरे लग्गभावं ञत्वापि उट्ठहति, ‘‘तं उद्धरिस्सामी’’तिसञ्ञाय अभावतो वट्टति. अनन्तक-ग्गहणेन सासपमत्तिका गहिता, नामञ्हेतं तस्सा सेवालजातिया. मूलपण्णानं अभावेन ‘‘असम्पुण्णभूतगामो नामा’’ति वुत्तं. सो बीजगामेन सङ्गहितोति. अवड्ढमानेपि भूतगाममूलकत्ता वुत्तं ‘‘अमूलकभूतगामे सङ्गहं गच्छती’’ति. नाळिकेरस्स आवेणिकं कत्वा वदति.

सेलेय्यकं ¶ नाम सिलाय सम्भूता एका गन्धजाति. पुप्फितकालतो पट्ठायाति विकसितकालतो पभुति. छत्तकं गण्हन्तोति विकसितं गण्हन्तो. मकुळं पन रुक्खत्तचं अकोपेन्तेनपि गहेतुं न वट्टति, फुल्लं वट्टति. हत्थकुक्कुच्चेनाति हत्थचापल्लेन.

‘‘पानीयं न वासेतब्ब’’न्ति इदं अत्तनो पिवनपानीयं सन्धाय वुत्तं, अञ्ञेसं पन वट्टति अनुग्गहितत्ता. तेनाह ‘‘अत्तना खादितुकामेना’’ति. येसं रुक्खानं साखा रुहतीति मूलं अनोतारेत्वा पण्णमत्तनिग्गमनमत्तेनपि वड्ढति. तत्थ कप्पियम्पि अकरोन्तो छिन्ननाळिकेरवेळुदण्डादयो कोपेतुं वट्टति.

‘‘चङ्कमितट्ठानं दस्सेस्सामी’’ति वुत्तत्ता केवलं चङ्कमनाधिप्पायेन वा मग्गगमनाधिप्पायेन वा अक्कमन्तस्स, तिणानं उपरि निसीदनाधिप्पायेन निसीदन्तस्स च दोसो नत्थि.

समणकप्पेहीति समणानं कप्पियवोहारेहि, अबीजनिब्बट्टबीजानिपि कप्पियभावतो ‘‘समणकप्पानी’’ति वुत्तानि. अबीजं नाम तरुणअम्बफलादीनि. निब्बट्टेतब्बं वियोजेतब्बं बीजं यस्मिं, तं पनसादि निब्बट्टबीजं नाम. कप्पियन्ति वत्वावाति पुब्बकालकिरियावसेन वुत्तेपि वचनक्खणेव अग्गिसत्थादिना बीजगामे वणं कातब्बन्ति वचनतो पन पुब्बे कातुं न वट्टति, तञ्च द्विधा अकत्वा छेदनभेदनमेव दस्सेतब्बं. करोन्तेन च भिक्खुना ‘‘कप्पियं करोही’’ति ¶ याय कायचि भासाय वुत्तेयेव कातब्बं. बीजगामपरिमोचनत्थं पुन कप्पियं कारेतब्बन्ति कारापनस्स पठममेव अधिकतत्ता. ‘‘कटाहेपि कातुं वट्टती’’ति वुत्तत्ता कटाहतो नीहताय मिञ्जाय वा बीजे वा यत्थ कत्थचि विज्झितुं वट्टति एव. भूतगामो, भूतगामसञ्ञिता, विकोपनं वा विकोपापनं वाति इमानेत्थ तीणि अङ्गानि.

भूतगामसिक्खापदवण्णना निट्ठिता.

२. अञ्ञवादकसिक्खापदवण्णना

९४. दुतिये अञ्ञं वचनन्ति यं दोसविभावनत्थं परेहि वुत्तवचनं तं तस्स अननुच्छविकेन अञ्ञेन वचनेन पटिचरति.

९८. यदेतं ¶ अञ्ञेनञ्ञं पटिचरणवसेन पवत्तवचनं, तदेव पुच्छितमत्थं ठपेत्वा अञ्ञं वदति पकासेतीति अञ्ञवादकन्ति आह ‘‘अञ्ञेनञ्ञं पटिचरणस्सेतं नाम’’न्ति. तुण्हीभूतस्सेतं नामन्ति तुण्हीभावस्सेतं नामं, अयमेव वा पाठो. अञ्ञवादकं आरोपेतुन्ति अञ्ञवादे आरोपेतुं. विहेसकन्ति विहेसकत्तं.

९९. पाळियं न उग्घाटेतुकामोति पटिच्छादेतुकामो.

१००. अनारोपिते अञ्ञवादकेति वुत्तदुक्कटं पाळियं आगतअञ्ञेनञ्ञपटिचरणवसेन युज्जति, अट्ठकथायं आगतनयेन पन मुसावादेन अञ्ञेनञ्ञं पटिचरन्तस्स पाचित्तियेन सद्धिं दुक्कटं, आरोपिते इमिनाव पाचित्तियं. केचि पन ‘‘मुसावादपाचित्तियेन सद्धिं पाचित्तियद्वय’’न्ति वदन्ति, वीमंसितब्बं. आदिकम्मिकस्सपि मुसावादे इमिनाव अनापत्तीति दट्ठब्बं. धम्मकम्मेन आरोपितता, आपत्तिया वा वत्थुना वा अनुयुञ्जियमानता, छादेतुकामताय अञ्ञेनञ्ञं पटिचरणं, तुण्हीभावो चाति इमानेत्थ तीणि अङ्गानि.

अञ्ञवादकसिक्खापदवण्णना निट्ठिता.

३. उज्झापनकसिक्खापदवण्णना

१०३. ततिये ¶ चिन्तायनत्थस्स झे-धातुस्स अनेकत्थताय ओलोकनत्थसम्भवतो वुत्तं ‘‘ओलोकापेन्ती’’ति. छन्दायाति लिङ्गविपल्लासोति आह ‘‘छन्देना’’ति.

१०५. भिक्खुं लामकतो चिन्तापनत्थं अञ्ञेसं तं अवण्णकथनं उज्झापनं नाम. अञ्ञेसं पन अवत्वा अञ्ञमञ्ञं समुल्लपनवसेन भिक्खुनो दोसप्पकासनं खिय्यनं नामाति अयमेतेसं भेदो.

१०६. अञ्ञं अनुपसम्पन्नं उज्झापेतीति अञ्ञेन अनुपसम्पन्नेन उज्झापेति. तस्स वा तं सन्तिकेति तस्स अनुपसम्पन्नस्स सन्तिके तं सङ्घेन सम्मतं उपसम्पन्नं खिय्यति. इधापि मुसावादेन उज्झापनादीनं सम्भवतो दुक्कटट्ठानानि च आदिकम्मिकस्स अनापत्ति च इमिना एव सिक्खापदेन वुत्ताति ¶ वेदितब्बं सब्बत्थ मुसावादपाचित्तियस्स अनिवत्तितो. धम्मकम्मेन सम्मतता, उपसम्पन्नता, अगतिगमनाभावो, तस्स अवण्णकामता, यस्स सन्तिके वदति. तस्स उपसम्पन्नता, उज्झापनं वा खिय्यनं वाति इमानेत्थ छ अङ्गानि.

उज्झापनकसिक्खापदवण्णना निट्ठिता.

४. पठमसेनासनसिक्खापदवण्णना

११०. चतुत्थे अपञ्ञातेति अप्पसिद्धे. इमं पन अट्ठ मासे मण्डपादीसु ठपनसङ्खातं अत्थविसेसं गहेत्वा भगवता पठममेव सिक्खापदं पञ्ञत्तन्ति अधिप्पायं ‘‘अनुजानामि, भिक्खवे, अट्ठमासे’’तिआदिवचनेन अनुपञ्ञत्तिसदिसेन पकासेत्वा विसुं अनुपञ्ञत्ति न वुत्ता. परिवारे पनेतं अनुजाननवचनं अनुपञ्ञत्तिट्ठानन्ति ‘‘एका अनुपञ्ञत्ती’’ति (परि. ६५-६७) वुत्तं.

नववायिमोति अधुना सुत्तेन वीतकच्छेन पलिवेठितमञ्चो. ओनद्धोति कप्पियचम्मेन ओनद्धो. ते हि वस्सेन सीघं न नस्सन्ति. ‘‘उक्कट्ठअब्भोकासिको’’ति इदं तस्स सुखपटिपत्तिदस्सनमत्तं, उक्कट्ठस्सापि पन चीवरकुटि वट्टतेव. कायानुगतिकत्ताति भिक्खुनो तत्थेव निसीदनभावं दीपेति, तेन च वस्सभयेन सयं अञ्ञत्थ गच्छन्तस्स आपत्तीति दस्सेति ¶ . अब्भोकासिकानं तेमनत्थाय नियमेत्वा दायकेहि दिन्नम्पि अत्तानं रक्खन्तेन रक्खितब्बमेव.

‘‘वलाहकानं अनुट्ठितभावं सल्लक्खेत्वा’’ति इमिना गिम्हानेपि मेघे उट्ठिते अब्भोकासे निक्खिपितुं न वट्टतीति दीपेति. तत्र तत्राति चेतियङ्गणादिके तस्मिं तस्मिं अब्भोकासे नियमेत्वा निक्खित्ता. मज्झतो पट्ठाय पादट्ठानाभिमुखाति यत्थ समन्ततो सम्मज्जित्वा अङ्गणमज्झे सब्बदा कचवरस्स सङ्कड्ढनेन मज्झे वालिका सञ्चिता होति. तत्थ कत्तब्बविधिदस्सनत्थं वुत्तं. उच्चवत्थुपादट्ठानाभिमुखं वा वालिका हरितब्बा. यत्थ वा पन कोणेसु वालिका सञ्चिता, तत्थ ततो पट्ठाय अपरदिसाभिमुखा हरितब्बाति केचि अत्थं वदन्ति. केचि पन ‘‘सम्मट्ठट्ठानस्स ¶ पदवळञ्जेन अविकोपनत्थाय सयं असम्मट्ठट्ठाने ठत्वा अत्तनो पादाभिमुखं वालिका हरितब्बाति वुत्त’’न्ति वदन्ति, तत्थ ‘‘मज्झतो पट्ठाया’’ति वचनस्स पयोजनं न दिस्सति.

१११. वङ्कपादतामत्तेन कुळीरपादकस्स सेसेहि विसेसो, न अटनीसु पादप्पवेसनविसेसेनाति दस्सेतुं ‘‘यो वा पन कोची’’तिआदि वुत्तं. तस्साति उपसम्पन्नस्सेव.

निसीदित्वा…पे… पाचित्तियन्ति एत्थ मेघुट्ठानाभावं ञत्वा ‘‘पच्छा आगन्त्वा उद्धरिस्सामी’’ति आभोगेन गच्छन्तस्स अनापत्ति, तेन पुनागन्तब्बमेव. कप्पं लभित्वाति ‘‘गच्छ, मा इध तिट्ठा’’ति वुत्तवचनं लभित्वा.

आवासिकानंयेव पलिबोधोति आगन्तुकेसु किञ्चि अवत्वा निसीदित्वा ‘‘आवासिका एव उद्धरिस्सन्ती’’ति गतेसुपि आवासिकानमेव पलिबोधो. महापच्चरिवादे पन ‘‘इदं अम्हाक’’न्ति अवत्वापि निसिन्नानमेवाति अधिप्पायो. ‘‘सन्थरित्वा वा सन्थरापेत्वा वा’’ति वुत्तत्ता अनाणत्तिया पञ्ञापितत्तापि दुक्कटे कारणं वुत्तं. उस्सारकोति सरभाणको. सो हि उद्धं उद्धं पाळिपाठं सारेति पवत्तेतीति उस्सारकोति वुच्चति.

११२. वण्णानुरक्खणत्थं कताति पटखण्डादीहि सिब्बित्वा कता. भूमियं अत्थरितब्बाति चिमिलिकाय सति तस्सा उपरि, असति सुद्धभूमियं अत्थरितब्बा. ‘‘सीहचम्मादीनं परिहरणेयेव पटिक्खेपो’’ति इमिना मञ्चपीठादीसु अत्थरित्वा पुन संहरित्वा ठपनादिवसेन ¶ अत्तनो अत्थाय परिहरणमेव न वट्टति, भूमत्थरणादिवसेन परिभोगो पन अत्तनो परिहरणं न होतीति दस्सेति. खन्धके हि ‘‘अन्तोपि मञ्चे पञ्ञत्तानि होन्ति, बहिपि मञ्चे पञ्ञत्तानि होन्ती’’ति एवं अत्तनो अत्तनो अत्थाय मञ्चादीसु पञ्ञपेत्वा परिहरणवत्थुस्मिं –

‘‘न, भिक्खवे, महाचम्मानि धारेतब्बानि सीहचम्मं ब्यग्घचम्मं दीपिचम्मं. यो धारेय्य, आपत्ति दुक्कटस्सा’’ति (महाव. २५५) –

पटिक्खेपो ¶ कतो. तस्मा वुत्तनयेनेवेत्थ अधिप्पायो दट्ठब्बो. दारुमयपीठन्ति फलकमयपीठमेव. पादकथलिकन्ति अधोतपादं यस्मिं घंसन्ता धोवन्ति, तं दारुफलकादि.

११३. ‘‘आगन्त्वा उद्धरिस्सामीति गच्छती’’ति वुत्तत्ता अञ्ञेनपि कारणेन अनोतापेन्तस्सपि आगमने सापेक्खस्स अनापत्ति. तेनेव मातिकाट्ठकथायं ‘‘मञ्चादीनं सङ्घिकता, वुत्तलक्खणे देसे सन्थरणं वा सन्थरापनं वा, अपलिबुद्धता, आपदाय अभावो, निरपेक्खता, लेड्डुपातातिक्कमो’’ति (कङ्खा. अट्ठ. पठमसेनासनसिक्खापदवण्णना) एवमेत्थ निरपेक्खताय सद्धिं छ अङ्गानि वुत्तानि.

पठमसेनासनसिक्खापदवण्णना निट्ठिता.

५. दुतियसेनासनसिक्खापदवण्णना

११६. पञ्चमे पावारो कोजवोति पच्चत्थरणत्थायेव ठपिता उग्गतलोमा अत्थरणविसेसा. एत्तकमेव वुत्तन्ति अट्ठकथासु वुत्तं. सेनासनतोति सब्बपच्छिमसेनासनतो.

११७. कुरुन्दट्ठकथायं वुत्तमेवत्थं सविसेसं कत्वा दस्सेतुं ‘‘किञ्चापि वुत्तो’’तिआदि आरद्धं. वत्तब्बं नत्थीति रुक्खमूलस्स पाकटत्ता वुत्तं. पलुज्जतीति विनस्सति.

११८. येन मञ्चं वा पीठं वा वीनन्ति, तं मञ्चपीठकवानं. सिलुच्चयलेणन्ति पब्बतगुहा. ‘‘आपुच्छनं पन वत्त’’न्ति इमिना आपत्ति नत्थीति दस्सेति. वुत्तलक्खणसेय्या, तस्सा ¶ सङ्घिकता, वुत्तलक्खणे विहारे सन्थरणं वा सन्थरापनं वा, अपलिबुद्धता, आपदाय अभावो, अनपेक्खस्स दिसापक्कमनं, उपचारसीमातिक्कमोति इमानेत्थ सत्त अङ्गानि.

दुतियसेनासनसिक्खापदवण्णना निट्ठिता.

६. अनुपखज्जसिक्खापदवण्णना

११९. छट्ठे ¶ अनुपविसित्वाति समीपं पविसित्वा.

१२२. उपचारं ठपेत्वाति दियड्ढहत्थूपचारं ठपेत्वा. सङ्घिकविहारता, अनुट्ठापनीयभावजाननं, सम्बाधेतुकामता, उपचारे निसीदनं वा निपज्जनं वाति इमानेत्थ चत्तारि अङ्गानि.

अनुपखज्जसिक्खापदवण्णना निट्ठिता.

७. निक्कड्ढनसिक्खापदवण्णना

१२६. सत्तमे कोट्ठकानीति द्वारकोट्ठकानि.

१२८. ‘‘सकलसङ्घारामतो निक्कड्ढितुं न वट्टती’’ति इदं अननुरूपतो वुत्तं. पापगरहिताय हि अकुपितचित्तेन निक्कड्ढापेन्तस्स इमिना सिक्खापदेन आपत्ति नत्थि ‘‘कुपितो अनत्तमनो’’ति वुत्तत्ता. अञ्ञापेक्खा आपत्ति न दिस्सति. पाळियं ‘‘अलज्जिं निक्कड्ढती’’तिआदीसु चित्तस्स लहुपरिवत्तिताय अन्तरन्तरा कोपे उप्पन्नेपि अनापत्ति अलज्जितादिपच्चयेनेव निक्कड्ढनस्स आरद्धत्ता. सङ्घिकविहारो, उपसम्पन्नस्स भण्डनकारकभावादिविनिमुत्तता, कोपेन निक्कड्ढनं वा निक्कड्ढापनं वाति इमानेत्थ तीणि अङ्गानि.

निक्कड्ढनसिक्खापदवण्णना निट्ठिता.

८. वेहासकुटिसिक्खापदवण्णना

१२९. अट्ठमं ¶ उत्तानमेव. सङ्घिको विहारो, असीसघट्टवेहासकुटि, हेट्ठापरिभोगता, अपटाणिदिन्ने आहच्चपादके निसीदनं वा निपज्जनं वाति इमानेत्थ चत्तारि अङ्गानि.

वेहासकुटिसिक्खापदवण्णना निट्ठिता.

९. महल्लकविहारसिक्खापदवण्णना

१३५. नवमे ¶ ‘‘महल्लको नाम विहारो सस्सामिको’’ति वुत्तत्ता सञ्ञाचिकाय कुटिया अनापत्तीति वदन्ति. यस्साति विहारस्स. सा अपरिपूरूपचारापि होतीति विवरियमानं कवाटं यं भित्तिं आहनति, सा सामन्ता कवाटवित्थारप्पमाणा उपचाररहितापि होतीति अत्थो. आलोकं वातपानं सन्धेति घटयतीति आलोकसन्धीति कवाटं वुच्चति. द्वारवातपानूपचारतो अञ्ञत्थ पुनप्पुनं लिम्पनादिं करोन्तस्स पिण्डगणनाय पाचित्तियं.

केचि पन ‘‘पाळियं पाचित्तियस्स अवुत्तत्ता दुक्कट’’न्ति वदन्ति. अधिट्ठातब्बन्ति संविधातब्बं. हरिते ठितो अधिट्ठाति. आपत्ति दुक्कटस्साति हरितयुत्ते खेत्ते ठत्वा छादेन्तस्स दुक्कटन्ति अत्थो. केचि पन ‘‘तादिसे खेत्ते विहारं करोन्तस्स दुक्कट’’न्ति वदन्ति, तं पाळिया न समेति.

१३६. उजुकमेव छादनन्ति छादनमुखवट्टितो पट्ठाय याव पिट्ठिवंसकूटागारकण्णिकादि, ताव इट्ठकादीहि उजुकं छादनं. इमिना पन येन सब्बस्मिं विहारे एकवारं छादिते तं छादनं एकमग्गन्ति गहेत्वा पाळियं ‘‘द्वे मग्गे’’तिआदि वुत्तं. परियायेन छादनम्पि इमिनाव नयेन योजेतब्बन्ति वदन्ति, तं ‘‘पुनप्पुनं छादापेसी’’ति इमाय पाळिया च ‘‘सब्बम्पि चेतं छदनं छदनूपरि वेदितब्ब’’न्ति इमिना अट्ठकथावचनेन च समेति.

पाळियं ‘‘मग्गेन छादेन्तस्स परियायेन छादेन्तस्सा’’ति इदञ्च इट्ठकादीहि, तिणपण्णेहि च छादनप्पकारभेददस्सनत्थं वुत्तं. केचि पन ‘‘पन्तिया छादितस्स छदनस्स उपरि छदनमुखवट्टितो पट्ठाय उद्धं उजुकमेव एकवारं छादनं एकमग्गन्ति गहेत्वा ‘द्वे मग्गे’तिआदि ¶ वुत्तं, न पन सकलविहारछादनं. एस नयो परियायेन छादनेपी’’ति वदन्ति, तं पाळिअट्ठकथाहि न समेति.

ततियाय मग्गन्ति एत्थ ततियायाति उपयोगत्थे सम्पदानवचनं, ततियं मग्गन्ति अत्थो. अयमेव वा पाठो. तिणपण्णेहि लब्भतीति तिणपण्णेहि छादेत्वा उपरि उल्लित्तावलित्तकरणं सन्धाय वुत्तं. केवलं ¶ तिणकुटिया हि अनापत्ति वुत्ता. तिण्णं मग्गानन्ति मग्गवसेन छादितानं तिण्णं छदनानं. तिण्णं परियायानन्ति एत्थापि एसेव नयो. महल्लकविहारता, अत्तनो वासागारता, उत्तरि अधिट्ठानन्ति इमानेत्थ तीणि अङ्गानि.

महल्लकविहारसिक्खापदवण्णना निट्ठिता.

१०. सप्पाणकसिक्खापदवण्णना

१४०. दसमे मातिकायं सप्पाणकउदकं तिणेन वा मत्तिकाय वा सिञ्चेय्य, छड्डेय्याति अत्थो. अथ वा उदकं गहेत्वा बहि सिञ्चेय्य, तस्मिञ्च उदके तिणं वा मत्तिकं वा आहरित्वा पक्खिपेय्याति अज्झाहरित्वा अत्थो वेदितब्बो. तेनाह ‘‘सकटभारमत्तञ्चेपी’’तिआदि. इदन्ति तिणमत्तिकपक्खिपनविधानं. वुत्तन्ति मातिकायं ‘‘तिणं वा मत्तिकं वा’’ति एवं वुत्तं, अट्ठकथासु वा वुत्तं.

इदञ्च सिक्खापदं बाहिरपरिभोगं सन्धाय वत्थुवसेन वुत्तं अब्भन्तरपरिभोगस्स विसुं वक्खमानत्ता. तदुभयम्पि ‘‘सप्पाणक’’न्ति कत्वा वधकचित्तं विनाव सिञ्चने पञ्ञत्तत्ता ‘‘पण्णत्तिवज्ज’’न्ति वुत्तं. वधकचित्ते पन सति सिक्खापदन्तरेनेव पाचित्तियं, न इमिनाति दट्ठब्बं. उदकस्स सप्पाणकता, ‘‘सिञ्चनेन पाणका मरिस्सन्ती’’ति जाननं, तादिसमेव च उदकं विना वधकचेतनाय केनचिदेव करणीयेन तिणादीनं सिञ्चनन्ति इमानेत्थ चत्तारि अङ्गानि.

सप्पाणकसिक्खापदवण्णना निट्ठिता.

निट्ठितो सेनासनवग्गो दुतियो.

‘‘भूतगामवग्गो’’तिपि एतस्सेव नामं.

३. ओवादवग्गो

१. ओवादसिक्खापदवण्णना

१४४. ततियवग्गस्स ¶ ¶ पठमे तिरच्छानभूतन्ति तिरोकरणभूतं, बाहिरभूतन्ति अत्थो. समिद्धोति परिपुण्णो. सहितत्थो अत्थयुत्तो. अत्थगम्भीरतादिना गम्भीरो.

१४५-१४७. परतोति उत्तरि. करोन्तोवाति परिबाहिरे करोन्तो. विभङ्गेति झानविभङ्गे. चरणन्ति निब्बानगमनाय पादं.

यदस्साति यं अस्स. धारेतीति अविनस्समानं धारेति. परिकथनत्थन्ति पकिण्णककथावसेन परिच्छिन्नधम्मकथनत्थं. तिस्सो अनुमोदनाति सङ्घभत्तादीसु दानानिसंसप्पटिसंयुत्ता निधिकुण्डसुत्तादि (खु. पा. ८.१ आदयो) -अनुमोदना, गेहप्पवेसमङ्गलादीसु मङ्गलसुत्तादि (खु. पा. ५.१ आदयो; सु. नि. मङ्गलसुत्त) -अनुमोदना, मतकभत्तादिअमङ्गलेसु तिरोकुट्टादि (खु. पा. ७.१ आदयो; पे. व. १४ आदयो) -अनुमोदनाति इमा तिस्सो अनुमोदना. कम्माकम्मविनिच्छयोति परिवारावसाने कम्मवग्गे (परि. ४८२ आदयो) वुत्तविनिच्छयो. समाधिवसेनाति समथपुब्बकवसेन. विपस्सनावसेन वाति दिट्ठिविसुद्धिआदिकाय सुक्खविपस्सनाय वसेन. अत्तनो सीलरक्खणत्थं अपरानपेक्खताय येन कामं गन्तुं चतस्सो दिसा अरहति, अस्स वा सन्ति, तासु वा साधूति चातुद्दिसो.

अभिविनयेति पातिमोक्खसंवरसङ्खाते संवरविनये, तप्पकासके वा विनयपिटके. विनेतुन्ति सिक्खापेतुं पकासेतुं. पगुणा वाचुग्गताति पाठतो च अत्थतो च पगुणा मुखे सन्निधापनवसेन वाचुग्गता कातब्बा. अत्थमत्तवसेनपेत्थ योजनं करोन्ति. अभिधम्मेति लक्खणरसादिवसेन परिच्छिन्ने नामरूपधम्मे. पुब्बे किर महाथेरा परियत्तिअनन्तरधानाय एकेकस्स गणस्स दीघनिकायादिएकेकधम्मकोट्ठासं निय्यातेन्ता ‘‘तुम्हे एतं पाळितो च अट्ठकथातो च परिहरथ, सक्कोन्ता उत्तरिपि उग्गण्हथा’’ति एवं सकलधम्मं गन्थवसेन निय्यातेन्ति, तत्थ ते च भिक्खू गन्थनामेन दीघभाणका मज्झिमभाणकाति वोहरीयन्ति, ते च ¶ अत्तनो भारभूतं कोट्ठासं परिच्चजित्वा अञ्ञं ¶ उग्गहेतुं न लभन्ति. तं सन्धायाह ‘‘सचे मज्झिमभाणको होती’’तिआदि.

तत्थ हेट्ठिमा वा तयो वग्गाति महावग्गतो हेट्ठिमा सगाथकवग्गो (सं. नि. १.१ आदयो), निदानवग्गो (सं. नि. २.१ आदयो), खन्धवग्गोति (सं. नि. ३.१ आदियो) इमे तयो वग्गा. तिकनिपाततो पट्ठाय हेट्ठाति एककनिपातदुकनिपाते सन्धाय वुत्तं. धम्मपदम्पि सह वत्थुना जातकभाणकेन अत्तनो जातकेन सद्धिं उग्गहेतब्बं. ततो ओरं न वट्टतीति महापच्चरिवादस्स अधिप्पायो. ततो ततोति दीघनिकायादितो. उच्चिनित्वा उग्गहितं सद्धम्मस्स ठितिया, भिक्खुनोपि पुब्बापरानुसन्धिआदिकुसलताय च न होतीति ‘‘तं न वट्टती’’ति पटिक्खित्तं. अभिधम्मे किञ्चि उग्गहेतब्बन्ति न वुत्तन्ति एत्थ यस्मा विनये कुसलत्तिकादिविभागो, सुत्तन्तेसु समथविपस्सनामग्गो च अभिधम्मपाठं विना न विञ्ञायति, अन्धकारे पविट्ठकालो विय होति, तस्मा सुत्तविनयानं गहणवसेन अभिधम्मग्गहणं वुत्तमेवाति विसुं न वुत्तन्ति वेदितब्बं. यथा ‘‘भोजनं भुञ्जितब्ब’’न्ति वुत्ते ‘‘ब्यञ्जनं खादितब्ब’’न्ति अवुत्तम्पि वुत्तमेव होति तदविनाभावतो, एवंसम्पदमिदं दट्ठब्बं.

परिमण्डलपदब्यञ्जनायाति परिमण्डलानि परिपुण्णानि पदेसु सिथिलधनितादिब्यञ्जनानि यस्सं, ताय. पुरस्स एसाति पोरी, नगरवासीनं कथाति अत्थो. अनेलगळायाति एत्थ एलाति खेळं तग्गळनविरहिताय. कल्याणवाक्करणोति एत्थ वाचा एव वाक्करणं, उदाहरणघोसो. कल्याणं मधुरं वाक्करणमस्साति कल्याणवाक्करणो. उपसम्पन्नाय मेथुनेनेव अभब्बो होति, न सिक्खमानासामणेरीसूति आह ‘‘भिक्खुनिया कायसंसग्गं वा’’तिआदि.

१४८. गरुकेहीति गरुकभण्डेहि. एकतोउपसम्पन्नायाति उपयोगत्थे भुम्मवचनं. भिक्खूनं सन्तिके उपसम्पन्ना नाम परिवत्तलिङ्गा वा पञ्चसतसाकियानियो वा. एता पन एकतोउपसम्पन्ना ओवदन्तस्स पाचित्तियमेव.

१४९. न निमन्तिता हुत्वा गन्तुकामाति निमन्तिता हुत्वा भोजनपरियोसाने गन्तुकामा न होन्ति, तत्थेव वसितुकामा होन्तीति ¶ अत्थो. यतोति भिक्खुनुपस्सयतो. याचित्वाति ‘‘तुम्हेहि आनीतओवादेनेव मयम्पि वसिस्सामा’’ति याचित्वा. तत्थाति तस्मिं भिक्खुनुपस्सये. अभिक्खुकावासे वस्सं वसन्तिया पाचित्तियं, अपगच्छन्तिया दुक्कटं.

इमासु ¶ कतरापत्ति परिहरितब्बाति चोदनं परिहरन्तो आह ‘‘सा रक्खितब्बा’’ति. सा वस्सानुगमनमूलिका आपत्ति रक्खितब्बा, इतराय अनापत्तिकारणं अत्थीति अधिप्पायो. तेनाह ‘‘आपदासु ही’’तिआदि.

ओवादत्थायाति ओवादे याचनत्थाय. द्वे तिस्सोति द्वीहि तीहि, करणत्थे चेतं पच्चत्तवचनं. पासादिकेनाति पसादजनकेन कायकम्मादिना. सम्पादेतूति तिविधं सिक्खं सम्पादेतु. असम्मतता, भिक्खुनिया परिपुण्णूपसम्पन्नता, ओवादवसेन अट्ठगरुधम्मदानन्ति इमानेत्थ तीणि अङ्गानि.

ओवादसिक्खापदवण्णना निट्ठिता.

२. अत्थङ्गतसिक्खापदवण्णना

१५३. दुतिये कोकनदन्ति पदुमविसेसं, तं किर बहुपत्तं वण्णसम्पन्नं. अयञ्हेत्थ अत्थो – यथा कोकनदसङ्खातं पदुमं, एवं फुल्लमुखपदुमं अवीतगुणगन्धं निम्मले अन्तलिक्खे आदिच्चं विय च अत्तनो तेजसा तपन्तं ततो एव विरोचमानं अङ्गेहि निच्छरणकजुतिया अङ्गीरसं सम्मासम्बुद्धं पस्साति. रजोहरणन्ति सरीरे रजं पुञ्छतीति रजोहरणन्ति पुञ्छनचोळस्स नामं. ओभासविस्सज्जनपुब्बका भासितगाथा ओभासगाथा नाम. विसुद्धिमग्गादीसु (विसुद्धि. २.३८६) पन ‘‘रागो रजो न च पन रेणु वुच्चती’’तिआदि ओभासगाथा वुत्ता, न पनेसा ‘‘अधिचेतसो’’ति गाथा. अयञ्च चूळपन्थकत्थेरस्स उदानगाथाति उदानपाळियं नत्थि, एकुदानियत्थेरस्स (थेरगा. १.६७ एकुदानियत्थेरगाथावण्णना) नायं उदानगाथाति तत्थ वुत्तं. इध पन पाळिया एव वुत्तत्ता थेरस्सापि उदानगाथाति गहेतब्बं. इध च अगरुधम्मेनापि ओवदतो ¶ पाचित्तियमेव. अत्थङ्गतसूरियता, परिपुण्णूपसम्पन्नता, ओवदनन्ति इमानेत्थ तीणि अङ्गानि.

अत्थङ्गतसिक्खापदवण्णना निट्ठिता.

३. भिक्खुनुपस्सयसिक्खापदवण्णना

१६२. ततियं ¶ उत्तानमेव. उपस्सयूपगमनं, परिपुण्णूपसम्पन्नता, समयाभावो, गरुधम्मेहि ओवदनन्ति इमानेत्थ चत्तारि अङ्गानि.

भिक्खुनुपस्सयसिक्खापदवण्णना निट्ठिता.

४. आमिससिक्खापदवण्णना

१६४. चतुत्थे आमिसनिरपेक्खम्पि आमिसहेतु ओवदतीतिसञ्ञाय भणन्तस्सपि अनापत्ति सचित्तकत्ता सिक्खापदस्स. सेसमेत्थ उत्तानमेव. उपसम्पन्नता, धम्मेन लद्धसम्मुतिता, अनामिसन्तरता, अवण्णकामताय एवं भणनन्ति इमानेत्थ चत्तारि अङ्गानि.

आमिससिक्खापदवण्णना निट्ठिता.

१६९. पञ्चमं चीवरदानसिक्खापदं उत्तानमेव.

६. चीवरसिब्बनसिक्खापदवण्णना

१७६. छट्ठे कथिनवत्तन्ति कथिनमासे चीवरं करोन्तानं सब्रह्मचारीनं सहायभावूपगमनं सन्धाय वुत्तं. वञ्चेत्वाति ‘‘तव ञातिकाया’’ति अवत्वा ‘‘एकिस्सा भिक्खुनिया’’ति एत्तकमेव वत्वा ‘‘एकिस्सा भिक्खुनिया’’ति सुत्वा ते अञ्ञातिकसञ्ञिनो अहेसुन्ति आह ‘‘अकप्पिये नियोजितत्ता’’ति. अञ्ञातिकाय भिक्खुनिया सन्तकता, निवासनपारुपनूपगता, वुत्तनयेन सिब्बनं वा सिब्बापनं वाति इमानेत्थ तीणि अङ्गानि.

चीवरसिब्बनसिक्खापदवण्णना निट्ठिता.

७. संविधानसिक्खापदवण्णना

१८३. सत्तमे ¶ पाळियं गच्छाम भगिनि गच्छामाय्याति भिक्खुपुब्बकं संविधानं, इतरं भिक्खुनिपुब्बकं ¶ . एकद्धानमग्गन्ति एकतो अद्धानसङ्खातं मग्गं. हिय्योति सुवे. परेति ततिये दिवसे.

द्विधा वुत्तप्पकारोति पादगमने पक्खगमनेति द्विधा वुत्तप्पकारो. उपचारो न लब्भतीति यो परिक्खित्तादिगामस्स एकलेड्डुपातादिउपचारो वुत्तो, सो इध न लब्भति आसन्नत्ता. एतेन च अन्तरघरेयेवेत्थ गामोति अधिप्पेतो, न सकलं गामखेत्तं. तत्थापि यत्थ उपचारो लब्भति, तत्थ उपचारोक्कमने एव आपत्तीति दस्सेति. तेनाह ‘‘रतनमत्तन्तरो’’तिआदि. उपचारोक्कमनञ्चेत्थ उपचारब्भन्तरे पविसनमेव होति. तत्थ अप्पविसित्वापि उपचारतो बहि अद्धयोजनब्भन्तरगतेन मग्गेन गच्छन्तोपि मग्गस्स द्वीसु पस्सेसु अद्धयोजनब्भन्तरगतं गामूपचारं सब्बं ओक्कमित्वा गच्छतिच्चेव वुच्चति. अद्धयोजनतो बहि गतेन मग्गेन गच्छन्तो न गामूपचारगणनाय कारेतब्बो, अद्धयोजनगणनायेव कारेतब्बो. एवञ्च सति अनन्तरसिक्खापदे नावायेव गामतीरपस्सेन गच्छन्तस्स गामूपचारगणनाय आपत्ति समत्थिता होति. न हि सक्का नावाय गामूपचारब्भन्तरे पविसितुं. तिण्णं मग्गानं सम्बन्धट्ठानं सिङ्घाटकं. एत्थन्तरे संविदहितेति एत्थ न केवलं यथावुत्तरथिकादीसु एव संविदहने दुक्कटं, अन्तरामग्गेपीति अधिप्पायो.

अद्धयोजनं अतिक्कमन्तस्साति असति गामे अद्धयोजनं अतिक्कमन्तस्स. यस्मिञ्हि गामखेत्तभूतेपि अरञ्ञे अद्धयोजनब्भन्तरे गामो न होति, तम्पि इध अगामकं अरञ्ञन्ति अधिप्पेतं, न विञ्झाटवादयो.

१८५. रट्ठभेदेति रट्ठविलोपे. चक्कसमारुळ्हाति इरियापथचक्कं, सकटचक्कं वा समारुळ्हा. द्विन्नम्पि संविदहित्वा मग्गप्पटिपत्ति, अविसङ्केतं, समयाभावो, अनापदा, गामन्तरोक्कमनं वा अद्धयोजनातिक्कमो वाति इमानेत्थ पञ्च अङ्गानि. एकतोउपसम्पन्नादीहि सद्धिं संविधाय गच्छन्तस्स पन मातुगामसिक्खापदेन आपत्ति.

संविधानसिक्खापदवण्णना निट्ठिता.

८. नावाभिरुहनसिक्खापदवण्णना

१८९. अट्ठमे ¶ एकं तीरं…पे… निरन्तरन्ति नदितो अद्धयोजनब्भन्तरे पदेसे निविट्ठगामेहि ¶ निरन्तरता वुत्ता. एकं अगामकं अरञ्ञन्ति तथा निविट्ठगामाभावेन वुत्तं. अगामकतीरपस्सेनातिआदि पन अतिरेकअद्धयोजनवित्थतं नदिं सन्धाय वुत्तं. ततो ऊनवित्थाराय हि नदिया मज्झेनापि गमने तीरद्वयस्सापि अद्धयोजनब्भन्तरे गतत्ता गामन्तरगणनाय, अद्धयोजनगणनाय च आपत्तियो परिच्छिन्दितब्बा. तेनेव ‘‘योजनवित्थता…पे… अद्धयोजनगणनाय पाचित्तियानी’’ति वुत्तं. तेनेव हि योजनतो ऊनाय नदिया अद्धयोजनब्भन्तरगततीरवसेनेव आपत्तिगणनं वुत्तमेव होति. ‘‘सब्बअट्ठकथासू’’तिआदिना वुत्तमेवत्थं समत्थेति. तत्थ किञ्चापि समुद्दतळाकादीसु पाचित्तियं न वुत्तं, तथापि कीळापुरेक्खारस्स तत्थ दुक्कटमेवाति गहेतब्बं, पठमं कीळापुरेक्खारस्सापि पच्छा नावाय निद्दुपगतस्स, योनिसो वा मनसि करोन्तस्स गामन्तरोक्कमनादीसुपि आपत्तिसम्भवतो पण्णत्तिवज्जता, तिचित्तता चस्स सिक्खापदस्स वुत्ताति वेदितब्बं. सेसं सुविञ्ञेय्यमेव.

नावाभिरुहनसिक्खापदवण्णना निट्ठिता.

९. परिपाचितसिक्खापदवण्णना

१९७. नवमे पाळियं ‘‘सिक्खमाना…पे… पञ्च भोजनानि ठपेत्वा सब्बत्थ अनापत्ती’’ति इदं इमिना सिक्खापदेन अनापत्तिं सन्धाय वुत्तं. पञ्चहि सहधम्मिकेहि कतविञ्ञत्तिपरिकथादीहि उप्पन्नं परिभुञ्जन्तस्स दुक्कटमेव. भिक्खुनिया परिपाचितता, तथा जाननं, गिहिसमारम्भाभावो, भोजनता, तस्स अज्झोहरणन्ति इमानेत्थ पञ्च अङ्गानि.

परिपाचितसिक्खापदवण्णना निट्ठिता.

१०. रहोनिसज्जसिक्खापदवण्णना

१९८. दसमे ¶ उपनन्दस्स चतुत्थसिक्खापदेनाति मातुगामेन रहोनिसज्जसिक्खापदं सन्धाय वुत्तं, तं पन अचेलकवग्गे पञ्चमम्पि उपनन्दं आरब्भ पञ्ञत्तेसु चतुत्थत्ता एवं वुत्तन्ति दट्ठब्बं.

रहोनिसज्जसिक्खापदवण्णना निट्ठिता.

निट्ठितो ओवादवग्गो ततियो.

४. भोजनवग्गो

१. आवसथपिण्डसिक्खापदवण्णना

२०६. चतुत्थवग्गस्स ¶ पठमे इमेसंयेवाति इमेसं पासण्डानंयेव. एत्तकानन्ति इमस्मिं पासण्डे एत्तकानं.

२०८. ‘‘गच्छन्तो वा आगच्छन्तो वा’’ति इदं अद्धयोजनवसेन गहेतब्बं. अञ्ञे उद्दिस्स पञ्ञत्तञ्च भिक्खूसु अप्पसन्नेहि तित्थियेहि सामञ्ञतोपि पञ्ञत्तम्पि भिक्खूनं न वट्टति एव. आवसथपिण्डता, अगिलानता, अनुवसित्वा भोजनन्ति इमानेत्थ तीणि अङ्गानि.

आवसथपिण्डसिक्खापदवण्णना निट्ठिता.

२. गणभोजनसिक्खापदवण्णना

२०९. दुतिये अभिमारेति अभिभवित्वा भगवन्तं मारणत्थाय पयोजिते धनुधरे. ननु ‘‘राजानम्पि मारापेसी’’ति वचनतो इदं सिक्खापदं अजातसत्तुनो काले पञ्ञत्तन्ति सिद्धं, एवञ्च सति पाळियं ‘‘तेन खो पन समयेन रञ्ञो मागधस्स…पे… ञातिसालोहितो आजीवकेसु पब्बजितो होति…पे… बिम्बिसारं एतदवोचा’’तिआदि विरुज्झतीति? न विरुज्झति. सो किर आजीवको बिम्बिसारकालतो पभुति अन्तरन्तरा भिक्खू निमन्तेत्वा दानं देन्तो अजातसत्तुकालेपि सिक्खापदे पञ्ञत्तेपि भिक्खूनं सन्तिके दूतं पाहेसि, भिक्खू च कुक्कुच्चायन्ता निवारेसुं. तस्मा आदितो पट्ठाय तं वत्थु दस्सितन्ति वेदितब्बं.

२१५. अञ्ञमञ्ञं ¶ विसदिसं रज्जं विरज्जं, विरज्जतो आगता वेरज्जका. ते च यस्मा जातिगोत्तादितो नानाविधा, तस्मा नानावेरज्जकेतिपि अत्थो.

२१७-८. इमस्स सिक्खापदस्स वत्थुवसेनेव विञ्ञत्तितो गणभोजनत्थता सिद्धाति तं अवत्वा पदभाजने असिद्धमेव निमन्तनतो गणभोजनं दस्सितन्ति वेदितब्बं. तेनाह ‘‘द्वीहाकारेही’’तिआदि. ¶ ‘‘येन केनचि वेवचनेना’’ति वुत्तत्ता ‘‘भोजनं गण्हथा’’तिआदिसामञ्ञनामेनापि गणभोजनं होति. यं पन पाळियं अद्धानगमनादिवत्थूसु ‘‘इधेव भुञ्जथा’’ति वुत्तवचनस्स कुक्कुच्चायनं, तम्पि ओदनादिनामं गहेत्वा वुत्तत्ता एव कतन्ति वेदितब्बं. एकतो गण्हन्तीति अञ्ञमञ्ञस्स द्वादसहत्थं अमुञ्चित्वा एकतो ठत्वा गण्हन्ति.

‘‘अम्हाकं चतुन्नम्पि भत्तं देही’’ति वुत्तत्ता पाळि (वण्णना) यं ‘‘त्वं एकस्स भिक्खुनो भत्तं देही’’तिआदिनो वुत्तत्ता च भोजननामेन विञ्ञत्तमेव गणभोजनं होति, तञ्च अञ्ञेन विञ्ञत्तम्पि एकतो गण्हन्तानं सब्बेसम्पि होतीति दट्ठब्बं. विसुं गहितं पन विञ्ञत्तं भुञ्जतो पणीतभोजनादिसिक्खापदेहि आपत्ति एव.

आगन्तुकपट्टन्ति अच्छिन्दित्वा अन्वाधिं आरोपेत्वा करणचीवरं सन्धाय वुत्तं. ठपेतीति एकं अन्तं चीवरे बन्धनवसेन ठपेति. पच्चागतं सिब्बतीति तस्सेव दुतियअन्तं परिवत्तित्वा आहतं सिब्बति. आगन्तुकपट्टं बन्धतीति चीवरेन लग्गं करोन्तो पुनप्पुनं तत्थ तत्थ सुत्तेन बन्धति. घट्टेतीति पमाणेन गहेत्वा दण्डादीहि घट्टेति. सुत्तं करोतीति गुणादिभावेन वट्टेति. वलेतीति अनेकगुणसुत्तं हत्थेन वा चक्कदण्डेन वा वट्टेति एकत्तं करोति. परिवत्तनं करोतीति परिवत्तनदण्डयन्तकं करोति, यस्मिं सुत्तगुळं पवेसेत्वा वेळुनाळिकादीसु ठपेत्वा परिब्भमापेत्वा सुत्तकोटितो पट्ठाय आकड्ढन्ति.

२२०. अनिमन्तितचतुत्थन्ति अनिमन्तितो चतुत्थो यस्स भिक्खुचतुक्कस्स, तं अनिमन्तितचतुत्थं. एवं सेसेसुपि. तेनाह ‘‘पञ्चन्नं चतुक्कान’’न्ति. सम्पवेसेत्वाति तेहि योजेत्वा. गणो भिज्जतीति निमन्तितसङ्घो न होतीति अत्थो.

अधिवासेत्वा ¶ गतेसूति एत्थ अकप्पियनिमन्तनाधिवासनक्खणे पुब्बपयोगे दुक्कटम्पि नत्थि, विञ्ञत्तितो पसवने पन विञ्ञत्तिक्खणे इतरसिक्खापदेहि दुक्कटं होतीति गहेतब्बं. निमन्तनं सादियथाति निमन्तनभत्तं पटिग्गण्हथ. तानि चाति कुम्मासादीनि च तेहि भिक्खूहि एकेन पच्छा गहितत्ता एकतो न गहितानि.

‘‘भत्तुद्देसकेन पण्डितेन भवितब्बं…पे… मोचेतब्बा’’ति एतेन भत्तुद्देसकेन अकप्पियनिमन्तने सादिते सब्बेसम्पि सादितं होति. एकतो गण्हन्तानं गणभोजनापत्ति च होतीति ¶ दस्सेति. दूतस्स द्वारे आगन्त्वा पुन ‘‘भत्तं गण्हथा’’ति वचनभयेन ‘‘गामद्वारे अट्ठत्वा’’ति वुत्तं. गणभोजनता, समयाभावो, अज्झोहरणन्ति इमानेत्थ तीणि अङ्गानि.

गणभोजनसिक्खापदवण्णना निट्ठिता.

३. परम्परभोजनसिक्खापदवण्णना

२२१. ततिये पाळियं भत्तपटिपाटि अट्ठिताति कुलपटिपाटिया दातब्बा भत्तपटिपाटि अट्ठिता न ठिता, अब्बोच्छिन्ना निरन्तरप्पवत्ताति अत्थो. बदरफलानि पक्खिपित्वा पक्कयागुआदिकं ‘‘बदरसाळव’’न्ति वुच्चति.

पाळियं परम्परभोजनेति येन पठमं निमन्तितो, तस्स भोजनतो परस्स भोजनस्स भुञ्जने. विकप्पनाव इध अनुपञ्ञत्तिवसेन मातिकायं अनारोपितापि परिवारे ‘‘चतस्सो अनुपञ्ञत्तियो’’ति (परि. ८६) अनुपञ्ञत्तियं गणिता. तत्थ किञ्चापि अट्ठकथायं महापच्चरिवादस्स पच्छा कथनेन परम्मुखाविकप्पना पतिट्ठपिता, तथापि सम्मुखाविकप्पनापि गहेतब्बाव. तेनेव मातिकाट्ठकथायम्पि ‘‘यो भिक्खु पञ्चसु सहधम्मिकेसु अञ्ञतरस्स ‘मय्हं भत्तपच्चासं तुय्हं दम्मी’ति वा ‘विकप्पेमी’ति वा एवं सम्मुखा’’तिआदि (कङ्खा. अट्ठ. परम्परभोजनसिक्खापदवण्णना) वुत्तं.

२२९. खीरं वा रसं वाति पञ्चभोजनामिसं भत्ततो उपरि ठितं सन्धाय वुत्तं. तञ्हि अभोजनत्ता उप्पटिपाटिया पिवतोपि अनापत्ति. तेनाह ‘‘भुञ्जन्तेना’’तिआदि.

विकप्पनाय ¶ अकरणतो अकिरियावसेन इदं वाचायपि समुट्ठितन्ति आह ‘‘वचीकम्म’’न्ति. परम्परभोजनता, समयाभावो, अज्झोहरणन्ति इमानेत्थ तीणि अङ्गानि.

परम्परभोजनसिक्खापदवण्णना निट्ठिता.

४. काणमातासिक्खापदवण्णना

२३१. चतुत्थे पाळियं पटियालोकन्ति पच्छिमदिसं, पच्छादिसन्ति अत्थो. अपाथेय्यादिअत्थाय ¶ पटियादितन्तिसञ्ञाय गण्हन्तस्सापि आपत्ति एव अचित्तकत्ता सिक्खापदस्स. अत्तनो अत्थाय ‘‘इमस्स हत्थे देही’’ति वचनेनापि आपज्जनतो ‘‘वचीकम्म’’न्ति वुत्तं. वुत्तलक्खणपूवमन्थता, असेसकता, अप्पटिप्पस्सद्धगमनता, अञ्ञातकादिता, अतिरेकपटिग्गहणन्ति इमानेत्थ पञ्च अङ्गानि.

काणमातासिक्खापदवण्णना निट्ठिता.

५. पठमपवारणासिक्खापदवण्णना

२३७. पञ्चमे ‘‘ति-कारं अवत्वा’’ति इमिना कातब्बसद्दसामत्थिया लद्धं इति-पदं कतकाले न वत्तब्बन्ति दस्सेति. इध पन अजानन्तेहि इति-सद्दे पयुत्तेपि अतिरित्तं कतमेव होतीति दट्ठब्बं.

२३८-९. ‘‘पवारितो’’ति इदञ्च कत्तुअत्थे निप्फन्नन्ति दस्सेतुं ‘‘कतपवारणो’’तिआदि वुत्तं. भुत्तावी-पदस्स निरत्थकभावमेव साधेतुं ‘‘वुत्तम्पि चेत’’न्तिआदि वुत्तं. ताहीति पुथुकाहि. सत्तुमोदकोति सत्तुं तेमेत्वा कतो अपक्को. सत्तुं पन पिसित्वा पिट्ठं कत्वा तेमेत्वा पूवं कत्वा पचन्ति, तं न पवारेति. ‘‘पटिक्खिपितब्बट्ठाने ठितमेव पटिक्खिपति नामा’’ति वुत्तत्ता यं यं अलज्जिसन्तकं वा अत्तनो अपापुणकसङ्घिकादिं वा पटिक्खेपतो पवारणा न होतीति दट्ठब्बं.

आसन्नतरं अङ्गन्ति हत्थपासतो बहि ठत्वा ओनमित्वा देन्तस्स सीसं आसन्नतरं होति, तस्स ओरिमन्तेन परिच्छिन्दितब्बं.

अपनामेत्वाति ¶ अभिमुखं हरित्वा. ‘‘इमं भत्तं गण्हा’’ति वदतीति किञ्चि अनामेत्वा वदति. केवलं वाचाभिहारस्स अनधिप्पेतत्ता गण्हथाति गहेतुं आरद्धं कटच्छुना अनुक्खित्तम्पि पुब्बेपि एवं अभिहटत्ता पवारणा होतीति ‘‘अभिहटाव होती’’ति वुत्तं. उद्धटमत्तेति भाजनतो वियोजितमत्ते. द्विन्नं समभारेपीति परिवेसकस्स च अञ्ञस्स च भत्तपच्छिभाजनवहने समकेपीति अत्थो.

रसं गण्हथाति एत्थ केवलं मंसरसस्स अपवारणाजनकस्स नामेन वुत्तत्ता पटिक्खिपतो ¶ पवारणा न होति. मच्छरसन्तिआदीसु मच्छो च रसञ्चाति अत्थस्स सम्भवतो वत्थुनोपि तादिसत्ता पवारणा होति, ‘‘इदं गण्हथा’’तिपि अवत्वा तुण्हीभावेन अभिहटं पटिक्खिपतोपि होति एव. करम्बकोति मिस्सकाधिवचनमेतं. यञ्हि बहूहि मिस्सेत्वा करोन्ति, सो ‘‘करम्बको’’ति वुच्चति.

‘‘उद्दिस्स कत’’न्ति मञ्ञमानोति एत्थ वत्थुनो कप्पियत्ता ‘‘पवारितोव होती’’ति वुत्तं. तञ्चे उद्दिस्स कतमेव होति, पटिक्खेपो नत्थि. अयमेत्थ अधिप्पायोति ‘‘येनापुच्छितो’’तिआदिना वुत्तमेवत्थं सन्धाय वदति. कारणं पनेत्थ दुद्दसन्ति भत्तस्स बहुतरभावेन पवारणासम्भवकारणं दुद्दसं, अञ्ञथा करम्बकेपि मच्छादिबहुभावे पवारणा भवेय्याति अधिप्पायो. यथा चेत्थ कारणं दुद्दसं, एवं परतो ‘‘मिस्सकं गण्हथा’’ति एत्थापि कारणं दुद्दसमेवाति दट्ठब्बं. यञ्च ‘‘इदं पन भत्तमिस्सकमेवा’’तिआदि कारणं वुत्तं, तम्पि ‘‘अप्पतरं न पवारेती’’ति वचनेन न समेति. विसुं कत्वा देतीति ‘‘रसं गण्हथा’’तिआदिना वाचाय विसुं कत्वा देतीति अत्थो गहेतब्बो. न पन कायेन रसादिं वियोजेत्वाति. तथा अवियोजितेपि पटिक्खिपतो पवारणाय असम्भवतो अप्पवारणापहोणकस्स नामेन वुत्तत्ता भत्तमिस्सकयागुं आहरित्वा ‘‘यागुं गण्हथा’’ति वुत्तट्ठानादीसु विय, अञ्ञथा वा एत्थ यथा पुब्बापरं न विरुज्झति, तथा अधिप्पायो गहेतब्बो.

नावा वा सेतु वातिआदिम्हि नावादिअभिरुहनादिक्खणे किञ्चि ठत्वापि अभिरुहनादिकातब्बत्तेपि गमनतप्परताय ठानं नाम न होति, जनसम्मद्देन पन अनोकासादिभावेन कातुं न वट्टति. अचालेत्वाति वुत्तट्ठानतो ¶ अञ्ञस्मिम्पि पदेसे वा उद्धं वा अपेसेत्वा तस्मिं एव पन ठाने परिवत्तेतुं लभति. तेनाह ‘‘येन पस्सेना’’तिआदि.

अकप्पियभोजनं वाति कुलदूसनादिना उप्पन्नं, तं ‘‘अकप्पिय’’न्ति इमिना तेन मिस्सं ओदनादि अतिरित्तं होति एवाति दस्सेति. तस्मा यं तत्थ अकप्पकतं कन्दफलादि, तं अपनेत्वा सेसं भुञ्जितब्बमेव.

सो पुन कातुं न लभतीति तस्मिञ्ञेव भाजने करियमानं पठमकतेन सद्धिं कतं होतीति पुन सो एव कातुं न लभति, अञ्ञो लभति. अञ्ञेन हि कततो अञ्ञो पुन कातुं ¶ लभति. अञ्ञस्मिं पन भाजने तेन वा अञ्ञेन वा कातुं वट्टति. तेनाह ‘‘येन अकतं, तेन कातब्बं, यञ्च अकतं, तं कातब्ब’’न्ति. एवं कतन्ति अञ्ञस्मिं भाजने कतं. सचे पन आमिससंसट्ठानीति एत्थ मुखादीसु लग्गम्पि आमिसं सोधेत्वाव अतिरित्तं भुञ्जितब्बन्ति वेदितब्बं.

२४१. वाचाय आणापेत्वा अतिरित्तं अकारापनतो अकिरियसमुट्ठानन्ति दट्ठब्बं. पवारितभावो, आमिसस्स अनतिरित्तता, काले अज्झोहरणन्ति इमानेत्थ तीणि अङ्गानि.

पठमपवारणासिक्खापदवण्णना निट्ठिता.

६. दुतियपवारणासिक्खापदवण्णना

२४३. छट्ठे ‘‘भुत्तस्मि’’न्ति मातिकायं वुत्तत्ता भोजनपरियोसाने पाचित्तियं. पवारितता, तथासञ्ञिता, आसादनापेक्खता, अनतिरित्तेन अभिहटपवारणा, भोजनपअयोसानन्ति इमानेत्थ पञ्च अङ्गानि.

दुतियपवारणासिक्खापदवण्णना निट्ठिता.

७. विकालभोजनसिक्खापदवण्णना

२४७. सत्तमे नटानं नाटकाति नटनाटका, सीताहरणादीनि.

२४८-९. खादनीये खादनीयत्थन्ति पूवादिखादनीये विज्जमानखादनीयकिच्चं खादनीयेहि कातब्बं जिघच्छाहरणसङ्खातं अत्थं पयोजनं नेव फरन्ति ¶ न निप्फादेन्ति. एकस्मिं देसे आहारकिच्चं साधेन्तं वा अञ्ञस्मिं देसे उट्ठितभूमिरसादिभेदेन आहारकिच्चं असाधेन्तम्पि वा सम्भवेय्याति आह ‘‘तेसु तेसु जनपदेसू’’तिआदि. केचि पन ‘‘एकस्मिं जनपदे आहारकिच्चं साधेन्तं सेसजनपदेसुपि विकाले न कप्पति एवाति दस्सनत्थं इदं वुत्त’’न्तिपि (सारत्थ. टी. पाचित्तियकण्ड ३.२४८-२४९) वदन्ति. पकतिआहारवसेनाति अञ्ञेहि यावकालिकेहि अयोजितं अत्तनो पकतियाव आहारकिच्चकरणवसेन. सम्मोहोयेव होतीति ¶ अनेकत्थानं नामानं, अप्पसिद्धानञ्च सम्भवतो सम्मोहो एव सिया. तेनेवेत्थ मयम्पि मूलकमूलादीनं परियायन्तरदस्सनेन अदस्सनं करिम्ह उपदेसतोव गहेतब्बतो.

यन्ति वट्टकन्दं. मुळालन्ति थूलतरुणमूलमेव, रुक्खवल्लिआदीनं मत्थकोति हेट्ठा वुत्तमेव सम्पिण्डेत्वा वुत्तं. अच्छिवादीनं अपरिपक्कानेव फलानि यावजीविकानीति दस्सेतुं ‘‘अपरिपक्कानी’’ति वुत्तं. हरीतकादीनं अट्ठीनीति एत्थ मिञ्जं यावकालिकन्ति केचि वदन्ति, तं न युत्तं अट्ठकथायं अवुत्तत्ता.

हिङ्गुरुक्खतो पग्घरितनिय्यासो हिङ्गु नाम. हिङ्गुजतुआदयो च हिङ्गुविकतियोव. तत्थ हिङ्गुजतु नाम हिङ्गुरुक्खस्स दण्डपत्तानि पचित्वा कतनिय्यासो. हिङ्गुसिपाटिका नाम हिङ्गुपत्तानि पचित्वा कतनिय्यासो. अञ्ञेन मिस्सेत्वा कतोतिपि वदन्ति. तकन्ति अग्गकोटिया निक्खन्तसिलेसो. तकपत्तिन्ति पत्ततो निक्खन्तसिलेसो. तकपण्णिन्ति पलासे भज्जित्वा कतसिलेसो. दण्डतो निक्खन्तसिलेसोतिपि वदन्ति. विकालता, यावकालिकता, अज्झोहरणन्ति इमानेत्थ तीणि अङ्गानि.

विकालभोजनसिक्खापदवण्णना निट्ठिता.

८. सन्निधिकारकसिक्खापदवण्णना

२५२-३. अट्ठमे तादिसन्ति असूपब्यञ्जनं. यावकालिकं वा यामकालिकं वा…पे… पाचित्तियन्ति एत्थ किञ्चापि पाळियं खादनीयभोजनीयपदेहि यावकालिकमेव सङ्गहितं, न यामकालिकं. तथापि ‘‘अनापत्ति यामकालिकं यामे निदहित्वा भुञ्जती’’ति इध चेव –

‘‘यामकालिकेन ¶ , भिक्खवे, सत्ताहकालिकं…पे… यावजीविकं तदहुपटिग्गहितं यामे कप्पति, यामातिक्कन्ते न कप्पती’’ति (महाव. ३०५) –

अञ्ञत्थ च वुत्तत्ता, ‘‘यामकालिक’’न्ति वचनसामत्थियतो च भगवतो अधिप्पायञ्ञूहि अट्ठकथाचरियेहि यामकालिकं सन्निधिकारककतं पाचित्तियवत्थुमेव वुत्तन्ति दट्ठब्बं. यन्ति पत्तं, घंसनकिरियापेक्खाय चेतं उपयोगवचनं. अङ्गुलिलेखा पञ्ञायतीति सिनेहाभावेपि पत्तस्स सुच्छविताय पञ्ञायति. यन्ति यावकालिकं, यामकालिकञ्च. अपरिच्चत्तमेवाति निरपेक्खताय ¶ अनुपसम्पन्नस्स अदिन्नं, अपरिच्चत्तञ्च यावकालिकादिवत्थुमेव सन्धाय वदति, न पन तग्गतपटिग्गहणं. न हि वत्थुं अपरिच्चजित्वा तत्थगतपटिग्गहणं परिच्चजितुं सक्का, न च तादिसं वचनमत्थि. यदि भवेय्य, ‘‘सचे पत्तो दुद्धोतो होति…पे… भुञ्जन्तस्स पाचित्तिय’’न्ति वचनं विरुज्झेय्य. न हि धोवनेन आमिसं अपनेतुं वायमन्तस्स पटिग्गहणे अपेक्खा वत्तति. येन पुनदिवसे भुञ्जतो पाचित्तियं जनेय्य, पत्ते पन वत्तमाना अपेक्खा तग्गतिके आमिसेपि वत्तति एवनामाति आमिसे अनपेक्खता एत्थ न लब्भति, ततो आमिसे अविजहितपटिग्गहणं पुनदिवसे पाचित्तियं जनेतीति इदं वुत्तं. अथ मतं ‘‘यदग्गेनेत्थ आमिसानपेक्खता न लब्भति. तदग्गेन पटिग्गहणानपेक्खापि न लब्भती’’ति. तथा सति यत्थ आमिसापेक्खा अत्थि, तत्थ पटिग्गहणापेक्खापि न विगच्छतीति आपन्नं, एवञ्च पटिग्गहणे अनपेक्खविस्सज्जनं विसुं न वत्तब्बं सिया. अट्ठकथायञ्चेतम्पि पटिग्गहणविजहनकारणत्तेन अभिमतं सिया, इदं सुट्ठुतरं कत्वा विसुं वत्तब्बं चीवरापेक्खाय वत्तमानायपि पच्चुद्धारेन अधिट्ठानविजहनं विय. एतस्मिञ्च उपाये सति गण्ठिकाहतपत्तेसु अवट्टनता नाम न सियाति वुत्तोवायमत्थो. तस्मा यं वुत्तं सारत्थदीपनियं ‘‘यं परस्स परिच्चजित्वा अदिन्नम्पि सचे पटिग्गहणे निरपेक्खनिस्सज्जनेन विजहितपटिग्गहणं होति, तम्पि दुतियदिवसे वट्टती’’तिआदि (सारत्थ. टी. पाचित्तियकण्ड ३.२५२-२५३), तं न सारतो पच्चेतब्बं.

पकतिआमिसेति ओदनादिकप्पिययावकालिके. द्वेति पुरेभत्तं पटिग्गहितं यामकालिकं पुरेभत्तं सामिसेन मुखेन भुञ्जतो सन्निधिपच्चया एकं, यामकालिकसंसट्ठताय यावकालिकत्तभजनेन अनतिरित्तपच्चया ¶ एकन्ति द्वे पाचित्तियानि. विकप्पद्वयेति सामिसनिरामिसपक्खद्वये. थुल्लच्चयञ्च दुक्कटञ्चाति मनुस्समंसे थुल्लच्चयं, सेसेसु दुक्कटं. यावकालिकयामकालिकता, सन्निधिभावो, तस्स अज्झोहरणन्ति इमानेत्थ तीणि अङ्गानि.

सन्निधिकारकसिक्खापदवण्णना निट्ठिता.

९. पणीतभोजनसिक्खापदवण्णना

२५९. नवमे पणीतसंसट्ठानि भोजनानि पणीतभोजनानीति पाळियं पन भोजनानि पुब्बे वुत्तत्ता पाकटानीति अदस्सितानि, तादिसेहि पणीतेहि मिस्सत्ता पणीतभोजनानि नाम होन्ति. तेसं पभेददस्सनत्थं ‘‘सेय्यथिदं सप्पि नवनीत’’न्तिआदि वुत्तं. सप्पिभत्तन्ति एत्थ किञ्चापि ¶ सप्पिना संसट्ठं भत्तं, सप्पि च भत्तञ्चातिपि अत्थो विञ्ञायति, अट्ठकथायं पन ‘‘सालिभत्तं विय सप्पिभत्तं नाम नत्थी’’तिआदिना वुत्तत्ता न सक्का अञ्ञं वत्थुं. अट्ठकथाचरिया एव हि ईदिसेसु ठानेसु पमाणं.

मूलन्ति कप्पियभण्डं वुत्तं. तस्मा अनापत्तीति एत्थ विसङ्केतेन पाचित्तियाभावेपि सूपोदनदुक्कटा न मुच्चतीति वदन्ति. ‘‘कप्पियसप्पिना, अकप्पियसप्पिना’’ति च इदं कप्पियाकप्पियमंससत्तानं वसेन वुत्तं.

२६१. महानामसिक्खापदं नाम उपरि चातुमासपच्चयपवारणासिक्खापदं (पाचि. ३०३ आदयो). अगिलानो हि अप्पवारितट्ठाने विञ्ञापेन्तोपि कालपरिच्छेदं, भेसज्जपरिच्छेदं वा कत्वा सङ्घवसेन पवारितट्ठानतो तदुत्तरि विञ्ञापेन्तेन, परिच्छेदब्भन्तरेपि न भेसज्जकरणीयेन रोगेन भेसज्जं विञ्ञापेन्तेन च समो होतीति ‘‘महानामसिक्खापदेन कारेतब्बो’’ति वुत्तं. पणीतभोजनता, अगिलानता, अकतविञ्ञत्तिया पटिलाभो, अज्झोहरणन्ति इमानेत्थ चत्तारि अङ्गानि.

पणीतभोजनसिक्खापदवण्णना निट्ठिता.

१०. दन्तपोनसिक्खापदवण्णना

२६३. दसमे ¶ घनबद्धोति घनमंसेन सम्बद्धो, कथिनसंहतसरीरोति अत्थो.

२६४. मुखद्वारन्ति मुखतो हेट्ठा द्वारं मुखद्वारं, गलनाळिकन्ति अत्थो. एवञ्च नासिकाय पविट्ठम्पि मुखद्वारं पविट्ठमेव होति, मुखे पक्खित्तमत्तञ्च अप्पविट्ठं. आहारन्ति अज्झोहरितब्बं कालिकं अधिप्पेतं, न उदकं. तञ्हि भेसज्जसङ्गहितम्पि अकालिकमेव पटिग्गहितस्सेव कालिकत्ता. उदके हि पटिग्गहणं न रुहति. तेनेव भिक्खुना तापितेन उदकेन चिरपटिग्गहितेन च अकप्पियकुटियं वुत्थेन च सह आमिसं भुञ्जन्तस्सापि सामपाकादिदोसो न होति. वक्खति हि ‘‘भिक्खु यागुअत्थाय…पे… उदकं तापेति, वट्टती’’तिआदि (पाचि. अट्ठ. २६५). भिक्खू पन एतं अधिप्पायं तदा न जानिंसु. तेनाह ‘‘सम्मा अत्थं असल्लक्खेत्वा’’तिआदि.

२६५. रथरेणुम्पीति ¶ रथे गच्छन्ते उट्ठहनरेणुसदिसरेणुं. तेन ततो सुखुमं आकासे परिब्भमनकं दिस्समानम्पि अब्बोहारिकन्ति दस्सेति. अकल्लकोति गिलानो.

‘‘गहेतुं वा…पे… तस्स ओरिमन्तेना’’ति इमिना आकासे उजुं ठत्वा परेन उक्खित्तं गण्हन्तस्सापि आसन्नङ्गभूतपादतलतो पट्ठाय हत्थपासो परिच्छिन्दितब्बो, न पन सीसन्ततो पट्ठायाति दस्सेति. तत्थ ‘‘ओरिमन्तेना’’ति इमस्स हेट्ठिमन्तेनाति अत्थो गहेतब्बो.

एत्थ च पवारणासिक्खापदट्ठकथायं ‘‘सचे भिक्खु निसिन्नो होति, आसनस्स पच्छिमन्ततो पट्ठाया’’तिआदिना (पाचि. अट्ठ. २३८-२३९) पटिग्गाहकानं आसन्नङ्गस्स पारिमन्ततो पट्ठाय परिच्छेदस्स दस्सितत्ता इधापि आकासे ठितस्स पटिग्गाहकस्स आसन्नङ्गभूतपादङ्गुलस्स पारिमन्तभूततो पण्हिपरियन्तस्स हेट्ठिमतलतो पट्ठाय, दायकस्स पन ओरिमन्तभूततो पादङ्गुलस्स हेट्ठिमतलतो पट्ठाय हत्थपासो परिच्छिन्दितब्बोति दट्ठब्बं. इमिनाव नयेन भूमियं निपज्जित्वा उस्सीसे निसिन्नस्स हत्थतो पटिग्गण्हन्तस्सपि आसन्नसीसङ्गस्स पारिमन्तभूततो गीवन्ततो पट्ठायेव ¶ हत्थपासो मिनितब्बो, न पादतलतो पट्ठाय. एवं निपज्जित्वा दानेपि यथानुरूपं वेदितब्बं. ‘‘यं आसन्नतरं अङ्ग’’न्ति हि वुत्तं.

पटिग्गहणसञ्ञायाति ‘‘मञ्चादिना पटिग्गहेस्सामी’’ति उप्पादितसञ्ञाय. इमिना ‘‘पटिग्गण्हामी’’ति वाचाय वत्तब्बकिच्चं नत्थीति दस्सेति. कत्थचि अट्ठकथासु, पदेसेसु वा. असंहारिमे फलकेति थाममज्झिमेन पुरिसेन असंहारिये. पुञ्छित्वा पटिग्गहेत्वाति पुञ्छितेपि रजनचुण्णसङ्काय सति पटिग्गहणत्थाय वुत्तं, नासति. तं पनाति पतितरजं अप्पटिग्गहेत्वा उपरि गहितपिण्डपातं. अनापत्तीति दुरुपचिण्णादिदोसो नत्थि. ‘‘अनुपसम्पन्नस्स दस्सामी’’तिआदिपि विनयदुक्कटपरिहाराय वुत्तं. तथा अकत्वा गहितेपि पटिग्गहेत्वा परिभुञ्जतो अनापत्ति एव. ‘‘अनुपसम्पन्नस्स दत्वा’’ति इदम्पि पुरिमाभोगानुगुणताय वुत्तं.

चरुकेनाति खुद्दकभाजनेन. अभिहटत्ताति दिय्यमानक्खणं सन्धाय वुत्तं. दत्वा अपनयनकाले पन छारिका वा बिन्दूनि वा पतन्ति, पुन पटिग्गहेतब्बं अभिहारस्स विगतत्ताति वदन्ति. तं यथा न पतति, तथा अपनेस्सामीति परिहरन्ते युज्जति. पकतिसञ्ञाय अपनेन्ते अभिहारो न छिज्जति, तं पटिग्गहितमेव होति. मुखवट्टियापि गहेतुं ¶ वट्टतीति अभिहरियमानस्स पत्तस्स मुखवट्टिया उपरिभागे हत्थं पसारेत्वा फुसितुं वट्टति.

पादेन पेल्लेत्वाति ‘‘पादेन पटिग्गहेस्सामी’’तिसञ्ञाय अक्कमित्वा. केचीति अभयगिरिवासिनो. वचनमत्तमेवाति पटिबद्धप्पटिबद्धन्ति सद्दमत्तमेव नानं, कायपटिबद्धमेव होति. तस्मा तेसं वचनं न गहेतब्बन्ति अधिप्पायो.

तेन आहरापेतुन्ति यस्स भिक्खुनो सन्तिकं गतं, तं इध आनेहीति आणापेत्वा तेन आहरापेतुं इतरस्स वट्टतीति अत्थो. न ततो परन्ति तदहेव सामं अप्पटिग्गहितं सन्धाय वुत्तं. तदहेव पटिग्गहितं पन पुनदिवसादीसु अप्पटिग्गहेत्वापि परिभुञ्जितुं वट्टतीति वदन्ति.

खिय्यन्तीति खयं गच्छन्ति, तेसं चुण्णेहि थुल्लच्चयअप्पटिग्गहणापत्तियो न होन्तीति अधिप्पायो. ‘‘नवसमुट्ठित’’न्ति एतेनेव उच्छुआदीसु ¶ अभिनवलग्गत्ता अब्बोहारिकं न होतीति दस्सेति. एसेव नयोति सन्निधिदोसादिं सन्धाय वदति. तेनाह ‘‘न ही’’तिआदि. तेन च पटिग्गहणङ्गेसु पञ्चसुपि समिद्धेसु अज्झोहरितुकामताय गहितमेव पटिग्गहितं नाम होति अज्झोहरितब्बेसु एव पटिग्गहणस्स अनुञ्ञातत्ताति दस्सेति. तथा बाहिरपरिभोगत्थाय गहेत्वा ठपिततेलादिं अज्झोहरितुकामताय सति पटिग्गहेत्वा परिभुञ्जितुं वट्टति.

केसञ्चीतिआदीसु अनुपसम्पन्नानं अत्थाय कत्थचि ठपियमानम्पि हत्थतो मुत्तमत्ते एव पटिग्गहणं न विजहति, अथ खो भाजने पतितमेव पटिग्गहणं विजहति. भाजनञ्च भिक्खुना पुनदिवसत्थाय अपेक्खितमेवाति तग्गतम्पि आमिसं दुद्धोतपत्तगतं विय पटिग्गहणं न विजहतीति आसङ्काय ‘‘सामणेरस्स हत्थे पक्खिपितब्ब’’न्ति वुत्तन्ति वेदितब्बं. ईदिसेसु हि युत्ति न गवेसितब्बा, वुत्तनयेनेव पटिपज्जितब्बं. ‘‘पत्तगता यागू’’ति इमिना पत्तमुखवट्टिया फुट्ठेपि कूटे यागु पटिग्गहिता, उग्गहिता वा न होति भिक्खुनो अनिच्छाय फुट्ठत्ताति दस्सेति. आरोपेतीति हत्थं फुसापेति. पटिग्गहणूपगं भारं नाम मज्झिमस्स पुरिसस्स उक्खेपारहं. न पिदहितब्बन्ति हत्थतो मुत्तं सन्धाय वुत्तं, हत्थगतं पन इतरेन हत्थेन पिदहतो, हत्थतो मुत्तम्पि वा अफुसित्वा उपरिपिधानं पातेन्तस्स न दोसो.

पटिग्गण्हातीति ¶ छायत्थाय उपरि धारयमाना महासाखा येन केनचि छिज्जेय्य, तत्थ लग्गरजं मुखे पातेय्य चाति कप्पियं कारापेत्वा पटिग्गण्हाति. कुण्डकेति महाघटे. तस्मिम्पीति चाटिघटेपि. गाहापेत्वाति अप्पटिग्गहितं कालिकं गाहापेत्वा.

दुतियत्थेरस्साति ‘‘थेरस्स पत्तं मय्हं देथा’’ति तेन अत्तनो परिच्चजापेत्वा दुतियत्थेरस्स देति. एत्थ पनाति पत्तपरिवत्तने. कारणन्ति एत्थ यथा ‘‘सामणेरा इतो अम्हाकम्पि देन्ती’’ति वितक्को उप्पज्जति, न तथाति कारणं वदन्ति, तञ्च युत्तं. यस्स पन तादिसो वितक्को नत्थि, तेन अपरिवत्तेत्वापि भुञ्जितुं वट्टति.

निच्चालेतुन्ति ¶ चालेत्वा पासाणसक्खरादिअपनयं कातुं. उद्धनं आरोपेतब्बन्ति अनग्गिकं उद्धनं सन्धाय वुत्तं. उद्धने पच्चमानस्स आलुळने उपरि अपक्कतण्डुला हेट्ठा पविसित्वा पच्चतीति आह ‘‘सामंपाकञ्चेव होती’’ति.

आधारके पत्तो ठपितोति अप्पटिग्गहितामिसो पत्तो पुन पटिग्गहणत्थाय ठपितो. एकग्गहणेनेवाति सामणेरानं गहितस्स पुन अच्छड्डनवसेन गहणेन. भुञ्जितुं वट्टतीति धूमवट्टिया तदहुपटिग्गहितत्ता वुत्तं. भत्तुग्गारोतिआदि अब्बोहारिकप्पसङ्गेन विकालभोजनविनिच्छयदस्सनं. समुद्दोदकेनाति अप्पटिग्गहितेन. हिमकरका नाम कदाचि वस्सोदकेन सह पतनका पासाणलेखा विय घनीभूतउदकविसेसा, तेसु पटिग्गहणकिच्चं नत्थि. तेनाह ‘‘उदकगतिका एवा’’ति. पुरेभत्तमेव वट्टतीति अप्पटिग्गहितापत्तीहि अब्बोहारिकम्पि विकालभोजनापत्तीहि सब्बोहारिकन्ति दस्सेति.

लग्गतीति मुखे च हत्थे च मत्तिकावण्णं दस्सेति. बहलन्ति हत्थमुखेसु अलग्गनकम्पि पटिग्गहेतब्बं. वासमत्तन्ति रेणुखीराभावं दस्सेति. आकिरति पटिग्गहेतब्बन्ति पुप्फरसस्स पञ्ञायनतो वुत्तं.

महाभूतेसूति पाणसरीरसन्निस्सितेसु पथवीआदिमहाभूतेसु. सब्बं वट्टतीति अत्तनो, परेसञ्च सरीरनिस्सितं सब्बं वट्टति. अकप्पियमंसानुलोमताय थुल्लच्चयादिं न जनेतीति अधिप्पायो. पततीति अत्तनो सरीरतो विच्छिन्दित्वा पतति. ‘‘रुक्खतो छिन्दित्वा’’ति वुत्तत्ता मत्तिकत्थाय पथविं खणितुं, अञ्ञम्पि यंकिञ्चि मूलपण्णादिविसभेसज्जं छिन्दित्वा छारिकं ¶ अकत्वापि अप्पटिग्गहितम्पि परिभुञ्जितुं वट्टतीति दट्ठब्बं. अप्पटिग्गहितता, अननुञ्ञातता, धूमादिअब्बोहारिकताभावो, अज्झोहरणन्ति इमानेत्थ चत्तारि अङ्गानि.

दन्तपोनसिक्खापदवण्णना निट्ठिता.

निट्ठितो भोजनवग्गो चतुत्थो.

५. अचेलकवग्गो

१. अचेलकसिक्खापदवण्णना

२७३. पञ्चमवग्गस्स ¶ पठमे मय्हं नामाति भिक्खुना भूमियं ठपेत्वा दिन्नम्पि सन्धाय वदति. अञ्ञतित्थियता, अननुञ्ञातता, अज्झोहरणीयता, अज्झोहरणत्थाय सहत्था अनिक्खित्तभाजने दानन्ति इमानेत्थ चत्तारि अङ्गानि.

अचेलकसिक्खापदवण्णना निट्ठिता.

२. उय्योजनसिक्खापदवण्णना

२७४. दुतिये अनाचारं आचरितुकामता, तदत्थमेव उपसम्पन्नस्स उय्योजना, तस्स उपचारातिक्कमोति इमानेत्थ तीणि अङ्गानि.

उय्योजनसिक्खापदवण्णना निट्ठिता.

३. सभोजनसिक्खापदवण्णना

२८१. ततिये पाळियं खुद्दके घरेति एत्थ खुद्दकं घरं नाम पञ्चहत्थतो ऊनकवित्थारं अधिप्पेतं. तत्थ च पिट्ठसङ्घाटतो हत्थपासे अविजहितेपि पिट्ठिवंसातिक्कमो होतीति आह ‘‘पिट्ठिवंसं अतिक्कमित्वा’’ति. यथा तथा वा कतस्साति पिट्ठिवंसं आरोपेत्वा वा अनारोपेत्वा वा कतस्स.

२८३. पाळियं ¶ वीतरागाति अपरियुट्ठितरागानं, अनागामीनञ्च सङ्गहो. सचित्तकन्ति अनुपविसित्वा निसीदनचित्तेन सचित्तकं. परियुट्ठितरागजायम्पतिकानं सन्निहितता, सयनिघरता, दुतियस्स भिक्खुनो अभावो, अनुपखज्ज निसीदनन्ति इमानेत्थ चत्तारि अङ्गानि.

सभोजनसिक्खापदवण्णना निट्ठिता.

२८४-२८९. चतुत्थपञ्चमानि वुत्तत्थानि.

६. चारित्तसिक्खापदवण्णना

२९८. छट्ठे ¶ ‘‘परियेसित्वा आरोचनकिच्चं नाम नत्थी’’ति वुत्तत्ता यो अपरियेसितब्बो उपसङ्कमितुं युत्तट्ठाने दिस्सति, सो सचेपि पकतिवचनस्स सवनूपचारं अतिक्कम्म ठितो उपगन्त्वा आपुच्छितब्बो. तेनाह ‘‘अपि च…पे… यं पस्सति, सो आपुच्छितब्बो’’तिआदि.

३०२. अनापत्तिवारे चेत्थ अन्तरारामादीनञ्ञेव वुत्तत्ता विहारतो गामवीथिं अनुञ्ञातकारणं विना अतिक्कमन्तस्सापि आपत्ति होति, न पन घरूपचारं अतिक्कमन्तस्सेव.

यं पन पाळियं ‘‘अञ्ञस्स घरूपचारं ओक्कमन्तस्स…पे… पठमं पादं उम्मारं अतिक्कामेती’’तिआदि वुत्तं. तं गामे पविट्ठं सन्धाय वुत्तं, तथापि अञ्ञस्स घरूपचारं अनोक्कमित्वा वीथिमज्झेनेव गन्त्वा इच्छितिच्छितघरद्वाराभिमुखे ठत्वा मनुस्से ओलोकेत्वा गच्छन्तस्सापि पाचित्तियमेव. तत्थ केचि ‘‘वीथियं अतिक्कमन्तस्स घरूपचारगणनाय आपत्तियो’’ति वदन्ति. अञ्ञे पन ‘‘यानि कुलानि उद्दिस्स गतो, तेसं गणनाया’’ति. पञ्चन्नं भोजनानं अञ्ञतरेन निमन्तनसादियनं, सन्तं भिक्खुं अनापुच्छना, भत्तियघरतो अञ्ञघरूपसङ्कमनं, मज्झन्हिकानतिक्कमो, समयापदानं अभावोति इमानेत्थ पञ्च अङ्गानि.

चारित्तसिक्खापदवण्णना निट्ठिता.

७. महानामसिक्खापदवण्णना

३०३. सत्तमे ¶ महानामोति सुक्कोदनस्स पुत्तो अनुरुद्धत्थेरस्स, सत्थु च जेट्ठभाता. आनन्दत्थेरो अमितोदनस्स पुत्तो, नन्दत्थेरो पन सुद्धोदनस्सेव.

३०५. पाळियं कालं आहरिस्सथाति अज्जतनं कालं वीतिनामेस्सथ, स्वे भेसज्जं हरिस्सथाति वा अत्थो. ‘‘अत्थि पवारणा भेसज्जपरियन्ता च रत्तिपरियन्ता चा’’ति ततियकोट्ठासे नियमितमेव भेसज्जं नियमितकालन्तरेयेव गहेतब्बं, न ततो बहि. इतरथा ¶ विसुं पयोजनं नत्थीति दट्ठब्बं. सपरियन्ता सङ्घपवारणा, तदुत्तरि भेसज्जविञ्ञत्ति, अगिलानताति इमानेत्थ तीणि अङ्गानि.

महानामसिक्खापदवण्णना निट्ठिता.

८. उय्युत्तसेनासिक्खापदवण्णना

३१५. अट्ठमे एकमेकन्ति एत्थ दुवङ्गिनीपि तिवङ्गिनीपि सेना सङ्गय्हति. उय्युत्तचतुरङ्गसेनादस्सनाय तथारूपपच्चयादिं विना गमनं, अननुञ्ञातोकासे दस्सनन्ति इमानेत्थ द्वे अङ्गानि.

उय्युत्तसेनासिक्खापदवण्णना निट्ठिता.

९. सेनावाससिक्खापदवण्णना

३१९. नवमे सेनाय चतुत्थो सूरियत्थङ्गमो, अगिलानताति इमानेत्थ द्वे अङ्गानि.

सेनावाससिक्खापदवण्णना निट्ठिता.

१०. उय्योधिकसिक्खापदवण्णना

३२२. दसमे पाळियं कति ते लक्खानि लद्धानीति कित्तका तया लद्धाति अत्थो. उय्योधिकादिदस्सनाय ¶ तथारूपपच्चयं विना गमनं, अननुञ्ञातोकासे दस्सनन्ति इमानेत्थ द्वे अङ्गानि.

उय्योधिकसिक्खापदवण्णना निट्ठिता.

निट्ठितो अचेलकवग्गो पञ्चमो.

६. सुरापानवग्गो

१. सुरापानसिक्खापदवण्णना

३२८. छट्ठवग्गस्स ¶ पठमे पाळियं किण्णपक्खित्ताति पिट्ठपूवादिं अपक्खिपित्वा किण्णसङ्खातं धञ्ञङ्कुरादिसुराबीजं पक्खिपित्वा कता. सम्भारसंयुत्ताति सासपादिअनेकसम्भारेहि सञ्ञुत्ता.

मधुकतालनाळिकेरादिपुप्फादिरसो चिरपरिवासितो पुप्फासवो नाम. तथा पनसादि फलासवो. मुद्दिकरसो मध्वासवो. उच्छुरसो गुळासवो. तिफलतिकटुकादिनानासम्भारानं रसो चिरपरिवासितो सम्भारसंयुत्तो. बीजतो पट्ठायाति यथावुत्तानं पिट्ठादीनं मज्जत्थाय भाजने पक्खित्तकालतो पट्ठाय.

३२९. लोणसोवीरकं सुत्तञ्च अनेकेहि दब्बसम्भारेहि अभिसङ्खतो भेसज्जविसेसो. उय्युत्तसिक्खापदानं अचित्तकलोकवज्जेसु लोकवज्जता पुब्बे वुत्तनयावाति तत्थ किञ्चिपि अवत्वा इध तेहि असाधारणवत्थुविसेससिद्धाय अचित्तकपक्खेपि अकुसलचित्तताय तं लोकवज्जतादिविसेसं दस्सेतुमेव ‘‘वत्थुअजाननताय चेत्था’’तिआदिना वुत्तन्ति वेदितब्बं. यं पनेत्थ वत्तब्बं, तं पठमपाराजिकवण्णनायं वित्थारतो सारत्थदीपनियं विरद्धट्ठानविसोधनवसेन वुत्तन्ति तत्थेव गहेतब्बं. मज्जभावो, तस्स पानञ्चाति इमानेत्थ द्वे अङ्गानि.

सुरापानसिक्खापदवण्णना निट्ठिता.

२. अङ्गुलिपतोदकसिक्खापदवण्णना

३३०. दुतिये ¶ हसाधिप्पायता, उपसम्पन्नस्स कायेन कायामसनन्ति इमानेत्थ द्वे अङ्गानि.

अङ्गुलिपतोदकसिक्खापदवण्णना निट्ठिता.

३. हसधम्मसिक्खापदवण्णना

३३८. ततिये ¶ पाळियं हसधम्मे हसधम्मसञ्ञीतिआदीसु उप्लवादिमत्तं किं हसधम्मो होतीति गहणवसेन सति करणीये करियमानं हसधम्मं हसधम्मोति गहणवसेन अत्थो वेदितब्बो. उस्सारेन्तोति उदके ठितं नावं तीरे आरोपेन्तो.

पतनुप्पतनवारेसूति उदकस्स उपरितले मण्डूकगतिया पतनुप्पतनवसेन गमनत्थं खित्ताय एकिस्सा कथलाय वसेन वुत्तं. उदकस्स उपरिगोप्फकता, हसाधिप्पायेन कीळनन्ति द्वे अङ्गानि.

हसधम्मसिक्खापदवण्णना निट्ठिता.

४. अनादरियसिक्खापदवण्णना

३४४. चतुत्थे सुत्तानुलोमन्ति महापदेसा. अट्ठकथातिपि वदन्ति. उपसम्पन्नस्स पञ्ञत्तेन वचनं, अनादरियकरणन्ति द्वे अङ्गानि.

अनादरियसिक्खापदवण्णना निट्ठिता.

५. भिंसापनसिक्खापदवण्णना

३४५. पञ्चमे उपसम्पन्नता, तस्स दस्सनसवनविसये भिंसापेतुकामताय वायमनन्ति द्वे अङ्गानि.

भिंसापनसिक्खापदवण्णना निट्ठिता.

६. जोतिसिक्खापदवण्णना

३५४. छट्ठे ¶ अलातं पतितन्ति अग्गिकपालतो बहि पतितं. विज्झातन्ति विज्झातं अलातं कपालग्गिम्हि पक्खिपित्वा जालेन्तस्स पाचित्तियं, तथा केवलं इन्धनं पातेन्तस्सपि विज्झातं कपालग्गिं मुखवातादिना उज्जालेन्तस्सपि. गिलानतादिकारणाभावो, विसिब्बेतुकामता, समादहनन्ति तीणि अङ्गानि.

जोतिसिक्खापदवण्णना निट्ठिता.

७. नहानसिक्खापदवण्णना

३५७. सत्तमे ¶ पाळियं नगरे थकितेति एत्थ रञ्ञा चिरं नहायितुकामेन ‘‘अहं बहि उय्याने कतारक्खो वसिस्सामि, नगरं थकेत्वा गोपेथा’’ति अनुञ्ञाता, ते थकिंसूति दट्ठब्बं. असम्भिन्नेनाति अनट्ठेन, तं दिवसं पुन अग्गहितालङ्कारेन पबुद्धमत्तेनाति अधिप्पायो. मज्झिमदेसे ऊनकद्धमासनहानं, समयादीनं अभावोति द्वे अङ्गानि.

नहानसिक्खापदवण्णना निट्ठिता.

८. दुब्बण्णकरणसिक्खापदवण्णना

३६८. अट्ठमे पटिलद्धनवचीवरेनाति एत्थ पुब्बे अकतकप्पं कतिपाहं निवासनत्थाय तावकालिकवसेन लद्धम्पि सङ्गय्हतीति वदन्ति.

३६९. ‘‘नवं नाम अकतकप्प’’न्ति सामञ्ञतो वुत्तत्ता अञ्ञेन भिक्खुना कप्पबिन्दुं दत्वा परिभुत्तं चीवरं, तेन वा, ततो लभित्वा अञ्ञेन वा केनचि दिन्नम्पि कतकप्पमेव नवं नाम न होतीति दट्ठब्बं. ‘‘निवासेतुं वा पारुपितुं वा’’ति वुत्तत्ता अंसबद्धकासावम्पि पारुपितब्बतो कप्पं कातब्बन्ति वदन्ति. चम्मकारनीलं नाम चम्मं नीलवण्णं कातुं योजियमानं नीलं. पकतिनीलमेवाति केचि. यथावुत्तचीवरस्स अकतकप्पता, अनट्ठचीवरादिता, निवासनादिताति तीणि अङ्गानि.

दुब्बण्णकरणसिक्खापदवण्णना निट्ठिता.

९. विकप्पनसिक्खापदवण्णना

३७४. नवमे ¶ येनाति येन सद्धिं, यस्स सन्तिकेति अत्थो. सामं विकप्पितस्स अपच्चुद्धारो, विकप्पनुपगचीवरता, अविस्सासेन परिभोगोति तीणि अङ्गानि.

विकप्पनसिक्खापदवण्णना निट्ठिता.

१०. चीवरअपनिधानसिक्खापदवण्णना

३७८. दसमे ¶ पाळियं अन्तमसो हसापेक्खोपीति अपि-सद्देन अथेय्यचित्तं कोधेन दुक्खापेतुकामं, अवण्णं पकासेतुकामञ्च सङ्गय्हति. तेनेव ‘‘तिवेदन’’न्ति वुत्तं. उपसम्पन्नस्स पत्तादीनं अपनिधानं, विहेसेतुकामतादीति द्वे अङ्गानि.

चीवरअपनिधानसिक्खापदवण्णना निट्ठिता.

निट्ठितो सुरापानवग्गो छट्ठो.

७. सप्पाणकवग्गो

१. सञ्चिच्चपाणसिक्खापदवण्णना

३८२. सत्तमस्स पठमे उसुं सरं असति खिपतीति इस्सासो. न हेत्थ किञ्चि जीवितं नाम विसुं तिट्ठतीति सम्बन्धो. तत्थ पाणेति सत्ते. अप्पमत्तेन वत्तं कातब्बन्ति यथा पाणकानं विहेसापि न होति, एवं सल्लक्खेत्वा ओतापनसम्मज्जनादिवत्तं कातब्बं. सेसं वुत्तनयमेव.

सञ्चिच्चपाणसिक्खापदवण्णना निट्ठिता.

२. सप्पाणकसिक्खापदवण्णना

३८७. दुतिये ¶ उदकसण्ठानकप्पदेसेति कद्दमपासाणादिभूमियं. तत्थाति आसित्ते कप्पियउदके. सेसं वुत्तनयमेव.

सप्पाणकसिक्खापदवण्णना निट्ठिता.

३. उक्कोटनसिक्खापदवण्णना

३९२. ततिये ‘‘तस्स भिक्खुनो सन्तिकं गन्त्वा’’ति वुत्तत्ता यस्स अधिकरणं सङ्घकम्मेन निहतं, तस्स सम्मुखे एव उक्कोटेन्तस्स पाचित्तियं. परम्मुखे पन दुक्कटमेव.

३९५. ‘‘धम्मकम्मे ¶ अधम्मकम्मसञ्ञी उक्कोटेति, अनापत्ती’’ति वुत्तत्ता अनादरियतादि विय उक्कोटनं सयं अकुसलं न होति, धम्मकम्मसञ्ञाय, पन विमतिया च उक्कोटनेनेव अकुसलं होति. यथाधम्मं निहतता, जानना, उक्कोटनाति तीणि अङ्गानि.

उक्कोटनसिक्खापदवण्णना निट्ठिता.

४. दुट्ठुल्लसिक्खापदवण्णना

३९९. चतुत्थे आपत्तिं आपज्जतियेवाति धुरनिक्खेपपक्खे वुत्तं. वत्थुपुग्गलोति आपन्नपुग्गलो. छादेतुकामताय हि सति एव अवस्सं अञ्ञस्स आरोचनं वुत्तं, वत्थुपुग्गलस्स च आरोचना नाम न होतीति पटिच्छादनमेवाति अधिप्पायो. कोटि छिन्ना होतीति छादेस्सामीति धुरनिक्खेपे सतिपि पुग्गलपरम्पराय गच्छन्ती आपत्तिकोटि छिज्जति.

४००. ‘‘अनुपसम्पन्नस्स सुक्कविस्सट्ठि च कायसंसग्गो चाति अयं दुट्ठुल्लअज्झाचारो नामा’’ति इदं दुट्ठुल्लारोचनसिक्खापदट्ठकथायं ‘‘अनुपसम्पन्नस्स…पे… आदितो पञ्च सिक्खापदानि दुट्ठुल्लो नाम अज्झाचारो, सेसानि अदुट्ठुल्लो. सुक्कविस्सट्ठिकायसंसग्गदुट्ठुल्लअत्तकामा पनस्स अज्झाचारो नामा’’ति (पाचि. अट्ठ. ८२) इमिना वचनेन विरुज्झतीति वीमंसितब्बं. पुग्गलपेमेन छादयतो चेत्थ ‘‘अञ्ञे गरहिस्सन्ती’’ति भयवसेन छादनक्खणे ¶ पटिघोव उप्पज्जतीति ‘‘दुक्खवेदन’’न्ति वुत्तन्ति दट्ठब्बं. उपसम्पन्नस्स दुट्ठुल्लापत्तिजाननं, पटिच्छादेतुकामताय धुरनिक्खेपोति द्वे अङ्गानि.

दुट्ठुल्लसिक्खापदवण्णना निट्ठिता.

५. ऊनवीसतिवस्ससिक्खापदवण्णना

४०२. पञ्चमे रूपसिप्पन्ति हेरञ्ञिकसिप्पं. गब्भे सयितकालेन सद्धिं वीसतिमं वस्सं परिपुण्णमस्साति गब्भवीसो.

४०४. निक्खमनीयपुण्णमासीति ¶ सावणमासस्स पुण्णमिया आसाळ्हीपुण्णमिया अनन्तरपुण्णमी. पाटिपददिवसेति पच्छिमिकाय वस्सूपनायिकाय. द्वादस मासे मातु कुच्छिस्मिं वसित्वा महापवारणाय जातं उपसम्पादेन्तीति अत्थो. ‘‘तिंस रत्तिन्दिवो मासो, द्वादसमासिको संवच्छरो’’ति (अ. नि. ३.७१; ८.४३; विभ. १०२३) वचनतो ‘‘चत्तारो मासा परिहायन्ती’’ति वुत्तं. वस्सं उक्कड्ढन्तीति वस्सं उद्धं कड्ढन्ति, ‘‘एकमासं अधिकमासो’’ति छड्डेत्वा वस्सं उपगच्छन्तीति अत्थो. तस्मा ततियो ततियो संवच्छरो तेरसमासिको होति. ते द्वे मासे गहेत्वाति निक्खमनीयपुण्णमासतो याव जातदिवसभूता महापवारणा. ताव ये द्वे मासा अनागता, तेसं अत्थाय अधिकमासतो लद्धे द्वे मासे गहेत्वा. तेनाह ‘‘यो पवारेत्वा वीसतिवस्सो भविस्सती’’तिआदि. ‘‘निक्कङ्खा हुत्वा’’ति इदं अट्ठारसन्नं वस्सानं एकअधिकमासे गहेत्वा ततो वीसतिया वस्सेसुपि चातुद्दसीअत्थाय चतुन्नं मासानं परिहापनेन सब्बदा परिपुण्णवीसतिवस्सतं सन्धाय वुत्तं. पवारेत्वा वीसतिवस्सो भविस्सतीति महापवारणादिवसे अतिक्कन्ते गब्भवस्सेन सह वीसतिवस्सो भविस्सतीति अत्थो. तस्माति यस्मा गब्भमासापि गणनूपगा होन्ति, तस्मा. एकवीसतिवस्सोति जातिया वीसतिवस्सं सन्धाय वुत्तं.

४०६. अञ्ञं उपसम्पादेतीति उपज्झायो, आचरियो वा हुत्वा उपसम्पादेति. सोपीति उपसम्पादेन्तोपि अनुपसम्पन्नो. ऊनवीसतिवस्सता, तं ञत्वा उपज्झायेन हुत्वा उपसम्पादनन्ति द्वे अङ्गानि.

ऊनवीसतिवस्ससिक्खापदवण्णना निट्ठिता.

६. थेय्यसत्थसिक्खापदवण्णना

४०९. छट्ठे ¶ थेय्यसत्थभावो, ञत्वा संविधानं, अविसङ्केतेन गमनन्ति तीणि अङ्गानि.

थेय्यसत्थसिक्खापदवण्णना निट्ठिता.

४१२. सत्तमं वुत्तनयमेव.

८. अरिट्ठसिक्खापदवण्णना

४१७. अट्ठमे ¶ अन्तरायन्ति अन्तरा वेमज्झे एति आगच्छतीति अन्तरायो, दिट्ठधम्मिकादिअनत्थो. आनन्तरियधम्माति अनन्तरे भवे फलनिब्बत्तने नियुत्ता चेतनादिधम्माति अत्थो. ‘‘न सग्गस्सा’’ति इदं भिक्खुनिदूसनकम्मस्स आनन्तरियत्ताभावतो वुत्तं. अरियसाविकासु, पन कल्याणपुथुज्जनभूताय च बलक्कारेन दूसेन्तस्स आनन्तरियसअसमेव. मोक्खन्तरायिकता पन लोलायपि पकतत्तभिक्खुनिया दूसकस्स तस्मिं अत्तभावे मग्गुप्पत्तिया अभावतो वुत्ता.

तस्मिं अत्तभावे अनिवत्तनका अहेतुकअकिरियनत्थिकदिट्ठियोव नियतमिच्छादिट्ठिधम्मा. पण्डकादीनं गहणं निदस्सनमत्तं. सब्बापि दुहेतुकाहेतुकपटिसन्धियो विपाकन्तरायिकाव दुहेतुकानम्पि मग्गानुप्पत्तितो.

अयन्ति अरिट्ठो. रसेन रसन्ति अनवज्जेन पच्चयपरिभुञ्जनरसेन पञ्चकामगुणपअभोगरसं समानेत्वा. उपनेन्तो वियाति घटेन्तो विय, सो एव वा पाठो.

अट्ठिकङ्कलूपमाति एत्थ अट्ठि एव निम्मंसताय कङ्कलन्ति च वुच्चति. पलिभञ्जनट्ठेनाति अवस्सं पतनट्ठेन. अधिकुट्टनट्ठेनाति अति विय कुट्टनट्ठेन. पाळियं ‘‘तथाहं भगवता…पे… नालं अन्तरायाया’’ति इदं वत्थुअनुरूपतो वुत्तं. एवं पन अग्गहेत्वा अञ्ञेनपि आकारेन यं किञ्चि भगवता वुत्तं विपरीततो गहेत्वा परेहि वुत्तेपि अमुञ्चित्वा वोहरन्तस्सापि वुत्तनयानुसारेन तदनुगुणं समनुभासनकम्मवाचं योजेत्वा आपत्तिया आरोपेतुं, आपत्तिया अदस्सनादीसु तीसु यं किञ्चि अभिरुचितं निमित्तं कत्वा उक्खेपनीयकम्मं ¶ कातुञ्च लब्भति. समनुभासनं अकत्वापि ‘‘मायस्मा एवं अवचा’’ति भिक्खूहि वुत्तमत्ते लद्धिया अप्पटिनिस्सज्जनपच्चयाय दुक्कटापत्तियापि उक्खेपनीयकम्मं कातुम्पि वट्टतेवाति दट्ठब्बं. धम्मकम्मता, समनुभासनाय अप्पटिनिस्सज्जनन्ति द्वे अङ्गानि.

अरिट्ठसिक्खापदवण्णना निट्ठिता.

९. उक्खित्तसम्भोगसिक्खापदवण्णना

४२४. नवमे ¶ ‘‘उक्खित्तो अनोसारितो’’ति वुत्तत्ता अरिट्ठस्स उक्खेपनीयकम्मं कतन्ति दट्ठब्बं.

४२५. पाळियं ‘‘एकच्छन्ने’’ति सामञ्ञतो वुत्तत्ता नानूपचारेपि एकच्छन्ने निपज्जने पण्णत्तिं अजानन्तस्स अरहतोपि उक्खित्तानुवत्तकानम्पि पाचित्तियमेव. अकतानुधम्मता, ञत्वा सम्भोगादिकरणन्ति द्वे अङ्गानि.

उक्खित्तसम्भोगसिक्खापदवण्णना निट्ठिता.

१०. कण्टकसिक्खापदवण्णना

४२८. दसमे पिरेति सम्बोधनत्थे निपातपदं. सेसं अनन्तरसिक्खापदद्वये वुत्तनयमेव.

कण्टकसिक्खापदवण्णना निट्ठिता.

निट्ठितो सप्पाणकवग्गो सत्तमो.

८. सहधम्मिकवग्गो

१. सहधम्मिकसिक्खापदवण्णना

४३४. अट्ठमवग्गस्स ¶ पठमे उपसम्पन्नस्स पञ्ञत्तेन वचनं, असिक्खितुकामस्स लेसेन एवं वचनन्ति द्वे अङ्गानि.

सहधम्मिकसिक्खापदवण्णना निट्ठिता.

२. विलेखनसिक्खापदवण्णना

४३८. दुतिये अलज्जिताति अलज्जिताय. एवं सेसेसुपि. सञ्चिच्च आपत्तिं आपज्जतीतिआदि भिक्खुभिक्खुनीनञ्ञेव वुत्तं अलज्जिलक्खणं, सामणेरादीनं, पन गहट्ठानञ्च साधारणवसेन यथासकं सिक्खापदवीतिक्कमनपटिगूहनादितो वेदितब्बं. लज्जिलक्खणेपि एसेव नयो. किञ्चापि ¶ कुक्कुच्चे उप्पन्नेपि मद्दित्वा करोन्तो, कप्पिये अकप्पियसञ्ञिताय करोन्तोपि तङ्खणिकाय अलज्जिताय एवं करोन्ति. तथापि कुक्कुच्चादिभेदे विसुं गहिताति दट्ठब्बं.

वज्जिपुत्तका दसवत्थुदीपका. परूपहारअञ्ञाणकङ्खापरवितारणादिवादाति एत्थ अरहत्तं पटिजानन्तानं कुहकानं सुक्कविस्सट्ठिं दिस्वा ‘‘मारकायिका देवता असुचिं उपसंहरन्ती’’तिगाहिनो परूपहारवादा नाम. अरहतो सब्बेसं इत्थिपुरिसादीनं नामादिअजानने अञ्ञाणं, तत्थ सन्निट्ठानभावेन कङ्खा, परतो सुत्वा नामादिजाननेन परवितारणो अत्थीतिवादिनो अञ्ञाणवादा, कङ्खावादा, परवितारणवादा च तेसं, महासङ्घिकादीनञ्च विभागो कथावत्थुप्पकरणे वुत्तो.

चत्तारो मग्गा च फलानि चाति एत्थ च-कारेन अभिञ्ञापटिसम्भिदापि सङ्गहिताति दट्ठब्बं. केचीति परियत्तिधरा धम्मकथिका. पुन केचीति पटिपत्तिधरा पंसुकूलिकत्थेरा. इतरे पनातिआदीसु अयं अधिप्पायो – धम्मकथिकत्थेरा पन पंसुकूलिकत्थेरेहि आभतं सुत्तं सुत्वा –

‘‘याव ¶ तिट्ठन्ति सुत्तन्ता, विनयो याव दिप्पति;

ताव दक्खन्ति आलोकं, सूरिये अब्भुट्ठिते यथा.

‘‘सुत्तन्तेसु असन्तेसु, पमुट्ठे विनयम्हि च;

तमो भविस्सति लोके, सूरिये अत्थङ्गते यथा.

‘‘सुत्तन्ते रक्खिते सन्ते, पटिपत्ति होति रक्खिता;

पटिपत्तियं ठितो धीरो, योगक्खेमा न धंसती’’ति. (अ. नि. अट्ठ. १.१.१३०) –

इदं सुत्तं आहरित्वा अत्तनोव वादं पतिट्ठपेन्ता पाराजिकानापज्जनवसेन ठिता पटिपत्तिसङ्गहिता परियत्तियेव मूलन्ति आहंसूति. तेनाह ‘‘सचे पञ्च भिक्खू चत्तारि पाराजिकानि रक्खणका…पे… सासनं वुड्ढिं विरुळ्हिं गमयिस्सन्ती’’ति. एतेन च परिक्खीणे काले लज्जिगणं अलभन्तेन विनयधरेन अलज्जिनोपि पकतत्ते सङ्गहेत्वा तेहि सह धम्मामिससम्भोगं संवासं करोन्तेन बहू कुलपुत्ते उपसम्पादेत्वा सासनं ¶ पग्गहेतुं वट्टतीति इदं सिज्झतीति दट्ठब्बं. गरहितुकामता, उपसम्पन्नस्स सन्तिके सिक्खापदविवण्णनन्ति द्वे अङ्गानि.

विलेखनसिक्खापदवण्णना निट्ठिता.

३. मोहनसिक्खापदवण्णना

४४४. ततिये पाळियं को पन वादो भिय्योति तेहि अञ्ञेहि भिक्खूहि दिट्ठद्वत्तिवारतो भिय्यो पन वित्थारेन उद्दिसियमाने पातिमोक्खे निसिन्नपुब्बता अत्थि चे, तत्थ किमेव वत्तब्बं, आपत्तिमोक्खो नत्थि एवाति अधिप्पायो. तञ्च यथाधम्मो कारेतब्बोति तन्ति कारणत्थे उपयोगवचनं, तायाति अत्थो. यथा धम्मो च विनयो च ठितो, तथा ताय आपत्तिया कारेतब्बोति वुत्तं होति. मोहारोपनं, तिक्खत्तुं सुतभावो, मोहेतुकामस्स मोहनन्ति तीणि अङ्गानि.

मोहनसिक्खापदवण्णना निट्ठिता.

४. पहारसिक्खापदवण्णना

४५१. चतुत्थे ¶ पाळियं कायपटिबद्धेन वाति एत्थ पासाणादिनिस्सग्गियपहारोपि सङ्गहितो.

४५२. रत्तचित्तोति कायसंसग्गरागेन वुत्तं. मेथुनरागेन पन पहारतो पुरिसादीसु दुक्कटमेव. मोक्खाधिप्पायेन दण्डकोटिया सप्पादिं घट्टेत्वा मण्डूकादिं मोचेन्तस्सपि अनापत्ति एव. कुपितता, उपसम्पन्नस्स न मोक्खाधिप्पायेन पहारोति द्वे अङ्गानि.

पहारसिक्खापदवण्णना निट्ठिता.

५. तलसत्तिकसिक्खापदवण्णना

४५७. पञ्चमे ¶ न पहरितुकामताय दिन्नत्ता दुक्कटन्ति एत्थ किमिदं दुक्कटं, पहारपच्चया, उदाहु उग्गिरणपच्चयाति? उग्गिरणपच्चयाव, न पहारपच्चया. न हि पहरितुकामताय असति तप्पच्चया काचि आपत्ति युत्ता, उग्गिरणस्स पन अत्तनो सभावेन असण्ठितत्ता तप्पच्चया पाचित्तियं न जातं, असुद्धचित्तेन कतपयोगत्ता च एत्थ अनापत्ति न युत्ताति दुक्कटं वुत्तन्ति गहेतब्बं.

४५८. पुब्बेति अनन्तरसिक्खापदे. सेसं अनन्तरसदिसमेव.

तलसत्तिकसिक्खापदवण्णना निट्ठिता.

६. अमूलकसिक्खापदवण्णना

४५९. छट्ठे ‘‘अत्तपरित्ताणं करोन्ता’’ति इदं न च वेरमूलिका अनुद्धंसनाति दस्सनत्थं वुत्तं. अनुद्धंसनक्खणे पन कोपचित्तमेव उप्पज्जति. तेनेव ‘‘दुक्खवेदन’’न्ति वुत्तं. सेसं वुत्तनयमेव.

अमूलकसिक्खापदवण्णना निट्ठिता.

७. कुक्कुच्चुप्पादनसिक्खापदवण्णना

४६४. सत्तमे ¶ उपसम्पन्नस्स अफासुकामता, कुक्कुच्चुप्पादनन्ति द्वे अङ्गानि.

कुक्कुच्चुप्पादनसिक्खापदवण्णना निट्ठिता.

८. उपस्सुतिसिक्खापदवण्णना

४७१. अट्ठमे सुय्यतीति सुति, वचनं. तस्सा समीपं उपस्सुति. सुय्यति एत्थाति सुतीति एवञ्हि अत्थे गय्हमाने सवनट्ठानसमीपे अञ्ञस्मिं अस्सवनट्ठाने तिट्ठतीति आपज्जति. अट्ठकथायञ्च उपस्सुति-सद्दस्सेव अत्थं दस्सेतुं ‘‘यत्थ ठत्वा’’तिआदि वुत्तं, न सुति-सद्दमत्तस्स.

४७३. एकपरिच्छेदानीति ¶ कदाचि अकिरियतो, कदाचि किरियतो समुट्ठानसामञ्ञेन वुत्तं. उपसम्पन्नेन चोदनाधिप्पायो, सवनन्ति द्वे अङ्गानि.

उपस्सुतिसिक्खापदवण्णना निट्ठिता.

९. खिय्यनसिक्खापदवण्णना

४७४. नवमे धम्मकम्मता, जाननं, छन्दं दत्वा खिय्यनन्ति तीणि अङ्गानि.

खिय्यनसिक्खापदवण्णना निट्ठिता.

१०. पक्कमनसिक्खापदवण्णना

४८१. दसमे विनिच्छयकथाय धम्मिकता, तं ञत्वा कम्मतो पट्ठाय एकसीमट्ठस्स समानसंवासिकस्स हत्थपासविजहनन्ति द्वे अङ्गानि.

पक्कमनसिक्खापदवण्णना निट्ठिता.

११. दुब्बलसिक्खापदवण्णना

४८४. एकादसमे ¶ उपसम्पन्नस्स धम्मेन लद्धसम्मुतिता, सङ्घेन सद्धिं चीवरं दत्वा खिय्यितुकामताय खिय्यनन्ति द्वे अङ्गानि.

दुब्बलसिक्खापदवण्णना निट्ठिता.

४८९. द्वादसमं वुत्तनयमेव.

निट्ठितो सहधम्मिकवग्गो अट्ठमो.

९. राजवग्गो

१. अन्तेपुरसिक्खापदवण्णना

४९९. नवमवग्गस्स ¶ पठमे पाळियं संसुद्धगहणिकोति एत्थ गहणीति गब्भासयसञ्ञितो मातु कुच्छिप्पदेसो, पुरिसन्तरसुक्कासम्फुट्ठताय संसुद्धगहणिको. अभिसित्तखत्तियता, उभिन्नम्पि सयनिघरतो अनिक्खन्तता, अप्पटिसंविदितस्स इन्दखीलातिक्कमोति तीणि अङ्गानि.

अन्तेपुरसिक्खापदवण्णना निट्ठिता.

२. रतनसिक्खापदवण्णना

५०६. दुतिये आवसथस्साति एत्थ अन्तोआरामे वा होतु अञ्ञत्थ वा, यत्थ कत्थचि अत्तनो वसनट्ठानं आवसथो नाम. छन्देनपि भयेनपीति वड्ढकिआदीसु छन्देन, राजवल्लभेसु भयेन. आकिण्णमनुस्सेपि जाते…पे… आसङ्कन्तीति तस्मिं निम्मनुस्सट्ठाने पच्छा आकिण्णमनुस्से जातेपि विसरित्वा गमनकाले अञ्ञस्स अदिट्ठत्ता तमेव भिक्खुं आसङ्कन्ति. पतिरूपं नाम कप्पियभण्डे सयं पंसुकूलं गहेत्वा अकप्पियभण्डे पतिरूपानं उपासकादीनं ¶ दस्सेत्वा चेतियादिपुञ्ञे नियोजनं वा दापेत्वा निरपेक्खगमनं वा. समादपेत्वाति याचित्वा. परसन्तकता, विस्सासग्गाहपंसुकूलसञ्ञानं अभावो, अननुञ्ञातकारणा उग्गहणादि चाति तीणि अङ्गानि.

रतनसिक्खापदवण्णना निट्ठिता.

३. विकालगामप्पविसनसिक्खापदवण्णना

५०८. ततिये पाळियं भयकथन्ति राजचोरादिभयं वा रोगामनुस्सदुब्भिक्खकन्तारादिभयं वा आरब्भ पवत्तं. विसिखाकथन्ति सुनिविट्ठादिवीथिकथं. कुम्भट्ठानकथन्ति उदकतित्थकथं, कुम्भदासीकथं वा. पुब्बपेतकथन्ति अतीतञातिकथं. नानत्तकथन्ति वुत्ताहि, वक्खमानाहि च विमुत्तं नानासभावं ¶ निरत्थककथं. लोकक्खायिकन्ति ‘‘अयं लोको केन निम्मितो’’तिआदिना लोकसभावक्खानवसेन पवत्तनकथा. एवं समुद्दक्खायिका वेदितब्बा. इति भवो इति अभवोति यं वा तं वा निरत्थककारणं वत्वा पवत्तितकथा इतिभवाभवकथा. एत्थ च भवो सस्सतं, वुड्ढि, कामसुखञ्चाति तिविधो, अभवो तब्बिपरीतवसेन. इति इमाय छब्बिधाय इतिभवाभवकथाय सद्धिं द्वत्तिंसतिरच्छानकथा नाम होन्ति. अथ वा पाळियं सरूपतो अनागतापि अरञ्ञपब्बतनदीदीपकथा इति-सद्देन सङ्गहेत्वा द्वत्तिंसतिरच्छानकथाति वुच्चन्ति. इति वाति एत्थ इति-सद्दो पकारत्थे. वा-सद्दो विकप्पत्थे. तस्मा एवं पकारं इतो अञ्ञं वा तादिसं निरत्थककथं कथेतीति अत्थो गहेतब्बो.

५१२. उस्साहं पटिप्पस्सम्भेत्वा विहारं गच्छन्ताति एत्थ गामूपचारतो बहि निक्खन्ते अन्तरारामादीनमुपचारं पविट्ठे सन्धाय वुत्तं. गामूपचारब्भन्तरे पन पटिपस्सद्धुस्साहानम्पि पुन तमेव वा अञ्ञं वा गामं पविसितुकामताय सति आपुच्छनकिच्चं नत्थि. ‘‘कुलघरे वा…पे… गन्तब्ब’’न्ति इदं पन पुरेभत्तं पविट्ठानं विकाले सञ्जाते विकाले गामप्पवेसस्स आपुच्छितब्बताय वुत्तं. अदिन्नादाने वुत्तनयेनाति दुतियलेड्डुपातं सन्धाय वुत्तं.

५१५. अन्तरारामन्तिआदीसूति एत्थ उस्सवदिवसादीसु मनुस्सेहि गामे पदक्खिणं कारेन्तं जिनबिम्बादिं पूजेतुकामेहि वा रोगवूपसमादियत्थं मनुस्सेहि याचितेहि वा भिक्खूहि सुप्पटिच्छन्नादिविधिं अकत्वापि वीथिमज्झेनेव गामं पदक्खिणं कातुं वट्टतीति वदन्ति, तं न ¶ गहेतब्बं अनापत्तिवारे अवुत्तत्ता, ‘‘मग्गा अनोक्कमित्वा…पे… पाचित्तिय’’न्ति (कङ्खा. अट्ठ. विकालगामप्पवेसनसिक्खापदवण्णना) पटिक्खित्तत्ता च. वेसालिं अनुपरियायित्वा परित्तं करोन्तेनापि आनन्दत्थेरेन सुप्पटिच्छन्नतादिं अकोपेन्तेनेव, अपञ्ञत्ते वा सिक्खापदे कतन्ति दट्ठब्बं. केचि पन ‘‘अन्तरारामादिगामन्तरे ठितेहि गरुट्ठानीयानं पच्चुग्गमनानुग्गमनादिवसेन गामवीथिं ओतरितुं वट्टती’’ति वदन्ति, तम्पि अन्तरघरं पविसन्तं पति कातुं न वट्टति एव. अन्तरारामादिकप्पियभूमिं पन उद्दिस्स गच्छन्तं पति कातुं वट्टतीति खायति, वीमंसितब्बं. सन्तं भिक्खुं अनापुच्छना ¶ , अननुञ्ञातकारणा विकाले गामप्पवेसोति द्वे अङ्गानि.

विकालगामप्पविसनसिक्खापदवण्णना निट्ठिता.

४. सूचिघरसिक्खापदवण्णना

५२०. चतुत्थे पाळियं वासिजटेति वासिदण्डके. अट्ठिमयादिसूचिघरता, करणकारापनादिवसेन अत्तनो पटिलाभोति द्वे अङ्गानि.

सूचिघरसिक्खापदवण्णना निट्ठिता.

५. मञ्चपीठसिक्खापदवण्णना

५२१. पञ्चमे पाळियं आसयतो, भिक्खवे, मोघपुरिसो वेदितब्बोति हीनज्झासयवसेन अयं तुच्छपुरिसोति ञातब्बो, हीनाय पच्चये लोलताय पुग्गलस्स तुच्छता ञातब्बाति अधिप्पायो. इमस्मिं सिक्खापदे, इतो परेसु च पञ्चसु अत्तना कारापितस्स पटिलाभे एव पाचित्तियं. परिभोगे पनस्स, अञ्ञेसञ्च दुक्कटमेव. पमाणातिक्कन्तमञ्चपीठता, अत्तनो करणकारापनवसेन पटिलाभोति द्वे अङ्गानि.

मञ्चपीठसिक्खापदवण्णना निट्ठिता.

६. तूलोनद्धसिक्खापदवण्णना

५२६. छट्ठे ¶ पोटकितूलन्ति तिणगच्छजातिकानं तूलं. सेसं वुत्तनयमेव.

तूलोनद्धसिक्खापदवण्णना निट्ठिता.

७. निसीदनसिक्खापदवण्णना

५३१-५३६. सत्तमे ¶ निसीदनस्स पमाणातिक्कन्तता, अत्तनो करणादिना पटिलाभोति द्वे अङ्गानि.

निसीदनसिक्खापदवण्णना निट्ठिता.

५३७-५४७. इमिना नयेन अट्ठमनवमदसमेसुपि अङ्गानि वेदितब्बानि. सेसं सब्बत्थ सुविञ्ञेय्यमेवाति.

निट्ठितो राजवग्गो नवमो.

खुद्दकवण्णनानयो निट्ठितो.

६. पाटिदेसनीयकण्डं

१. पठमपाटिदेसनीयसिक्खापदवण्णना

५५३. पाटिदेसनीयेसु ¶ ¶ पठमे पटिदेसेतब्बाकारदस्सनन्ति एवं आपत्तिं नवकस्स सन्तिके देसेतब्बाकारदस्सनं. इमिना लक्खणेन सम्बहुलानं आपत्तीनम्पि वुड्ढस्स सन्तिके च देसेतब्बाकारो सक्का विञ्ञातुन्ति. तत्रायं नयो – ‘‘गारय्हे, आवुसो, धम्मे आपज्जिं असप्पाये पाटिदेसनीये’’ति एवं सम्बहुलासु. वुड्ढस्स पन सन्तिके ‘‘गारय्हं, भन्ते, धम्मं…पे… गारय्हे, भन्ते, धम्मे’’ति योजना वेदितब्बा. तत्थ असप्पायन्ति सग्गमोक्खन्तरायकरन्ति अत्थो. अञ्ञातिकाय भिक्खुनिया अन्तरघरे ठिताय हत्थतो सहत्था यावकालिकग्गहणं, अज्झोहरणन्ति द्वे अङ्गानि.

पठमपाटिदेसनीयसिक्खापदवण्णना निट्ठिता.

५५८. दुतिये परिपुण्णूपसम्पन्नाय अननुञ्ञाताकारेन वोसासना, अनिवारेत्वा भोजनज्झोहारोति द्वे अङ्गानि.

५६३. ततिये सेक्खसम्मतता, घरूपचारे अनिमन्तितता, गिलानस्स अनिच्चभत्तादिं गहेत्वा भुञ्जनन्ति तीणि अङ्गानि.

५७०. चतुत्थे सासङ्कारञ्ञसेनासनता, अननुञ्ञातं यावकालिकं अप्पटिसंविदितं अज्झारामे पटिग्गहेत्वा अगिलानस्स अज्झोहरणन्ति द्वे अङ्गानि. सेसं उत्तानमेव.

पाटिदेसनीयवण्णनानयो निट्ठितो.

७. सेखियकण्डं

१. परिमण्डलवग्गवण्णना

५७६. सेखियेसु ¶ ¶ यस्मा वत्तक्खन्धके (चूळव. ३५६ आदयो) वुत्तवत्तानिपि सिक्खितब्बत्ता सेखियानेव, तस्मा पाराजिकादीसु वियेत्थ पाळियं परिच्छेदो न कतो. चारित्तनयदस्सनत्थञ्च ‘‘यो पन भिक्खु ओलम्बेन्तो निवासेय्य, दुक्कट’’न्ति अवत्वा ‘‘सिक्खा करणीया’’ति सब्बत्थ पाळि आरोपिता. पदभाजने पन ‘‘आपत्ति दुक्कटस्सा’’ति वुत्तत्ता सब्बत्थ अनादरियकरणे दुक्कटं वेदितब्बं.

अट्ठङ्गुलमत्तन्ति मत्त-सद्देन ततो किञ्चि अधिकं, ऊनम्पि सङ्गण्हाति. तेनेव निसिन्नस्स चतुरङ्गुलमत्तम्पि वुत्तं. न हि निसिन्नस्स चतुरङ्गुलप्पमाणं, ठितस्स अट्ठङ्गुलमेवाति सक्का नियमेतुं ऊनाधिकत्तसम्भवतो. तस्मा यथा सारुप्पं होति एवं अट्ठङ्गुलानुसारेन निवासनञ्ञेव अधिप्पेतन्ति गहेतब्बं. तेनेव वक्खति ‘‘यो पन भिक्खु सुक्खजङ्घो वा’’तिआदि. कुरुन्दियं ‘‘अजानन्तस्स अनापत्ती’’ति आदरं कत्वा उग्गण्हन्तस्सापि अजाननं सन्धाय वुत्तं. तेनापि निरन्तरं निवासनपारुपनवत्तं सिक्खितब्बं, असिक्खितो अनादरियमेव. परिमण्डलग्गहणेन उक्खिपित्वा निवासनम्पि पटिक्खित्तन्ति आह ‘‘उक्खिपित्वा वा ओतारेत्वा वा’’ति.

सचित्तकन्ति वत्थुविजाननचित्तेन सचित्तकं. सारत्थदीपनियं पन उपतिस्सत्थेरवादनयेन लोकवज्जत्तं गहेत्वा ‘‘वत्थुविजाननचित्तेन, पण्णत्तिविजाननचित्तेन च सचित्तक’’न्ति (सारत्थ. टी. सेखियकण्ड ३.५७६) वुत्तं. तत्थ च वत्थुविजाननं विसुं न वत्तब्बं. पण्णत्तिविजाननेन तस्सापि अन्तोगधभावतो इदं वत्थुं एवं वीतिक्कमन्तस्स आपत्तीति विजानन्तो हि पण्णत्तिं विजानातीति वुच्चति. उपतिस्सत्थेरवादे चेत्थ पण्णत्तिं अजानित्वा अपरिमण्डलनिवासनादिवत्थुमेव ¶ जानन्तस्स पण्णत्तिवीतिक्कमानादरियाभावा सब्बसेखियेसु अनापत्ति एव अभिमता, तञ्च न युत्तं कोसम्बक्खन्धके (महाव. ४५१ आदयो) वच्चकुटियं उदकावसेसं ठपेन्तस्स पण्णत्तिविजाननाभावेपि आपत्तिया वुत्तत्ता. वुत्तञ्हि तत्थ ‘‘तेन खो पन समयेन अञ्ञतरो भिक्खु आपत्तिं आपन्नो होति ¶ …पे… सो अपरेन समयेन तस्सा आपत्तिया अनापत्तिदिट्ठि होती’’तिआदि (महाव. ४५१). अट्ठकथायञ्चस्स ‘‘त्वं एत्थ आपत्तिभावं न जानासीति, आम न जानामीति. होतु आवुसो, एत्थ आपत्तीति, सचे होति, देसेस्सामीति. सचे पन ते, आवुसो, असञ्चिच्च असतिया कतं, नत्थि आपत्तीति. सो तस्सा आपत्तिया अनापत्तिदिट्ठि अहोसी’’ति (महाव. अट्ठ. ४५१) वुत्तं, तथा ‘‘अधम्मवादीति उक्खित्तानुवत्तकेसु अञ्ञतरो’’ति (महाव. अट्ठ. ४५७-४५८) च वुत्तं. खन्धकवत्तानञ्हि सेखियत्ता तत्थ वुत्तो नयो इमेसं, इध वुत्तो च तेसं साधारणोव होतीति. तेनेव ‘‘असञ्चिच्च असतिया कतं, नत्थि आपत्ती’’ति एवं इध वुत्तो आपत्तिनयो तत्थापि दस्सितो. तस्मा फुस्सदेवत्थेरवादे एव ठत्वा वत्थुविजाननचित्तेनेव सब्बसेखियानि सचित्तकानि, न पण्णत्तिविजाननचित्तेन. भिय्योकम्यतायसूपब्यञ्जनपटिच्छादनउज्झानसञ्ञीति द्वे सिक्खापदानि लोकवज्जानि अकुसलचित्तानि, सेसानि पण्णत्तिवज्जानि, तिचित्तानि, तिवेदनानि चाति गहणमेव युत्ततरं दिस्सति. तेनेवेत्थ ‘‘असञ्चिच्चाति पुरतो वा पच्छतो वा ओलम्बेत्वा निवासेस्सामीति एवं असञ्चिच्चा’’तिआदिना वत्थुअजाननवसेनेव अनापत्तिवण्णना कता, न पण्णत्तिविजाननचित्तवसेन.

अपिच ‘‘यस्स सचित्तकपक्खे चित्तं अकुसलमेव होति, तं लोकवज्ज’’न्ति (कङ्खा. अट्ठ. पठमपाराजिकवण्णना) इमिना लक्खणवचनेनापि चेतं सिज्झति. वत्थुविजाननचित्तवसेनेव हेत्थ ‘‘सचित्तकपक्खे’’ति वुत्तं. इतरथा पण्णत्तिविजाननचित्तवसेन सब्बसिक्खापदानम्पि सचित्तकपक्खे चित्तस्स अकुसलत्तनियमेन लोकवज्जत्तप्पसङ्गतो पण्णत्तिवज्जमेव न सिया, इदञ्च वचनं निरत्थकं सिया इमिना वचनेन निवत्तेतब्बस्स सिक्खापदस्स अभावा. न च सेखियेसु वत्थुविजाननचित्तेन सचित्तकपक्खे चित्तं पाणातिपातादीसु विय अकुसलमेवाति नियमो अत्थि, येनेत्थ लोकवज्जता पसज्जेय्य, ‘‘अनादरियं पटिच्चा’’ति चेतं पाळिवचनं वत्थुं जानित्वा तीहि चित्तेहि वीतिक्कममेव अनादरियं कत्वा वुत्तं, न पण्णत्तिं जानित्वा अकुसलचित्तेनेव वीतिक्कमन्ति गहेतब्बं. अञ्ञथा खन्धकपाळिया, अट्ठकथायञ्च पुब्बापरञ्च विरुज्झनतोति अम्हाकं खन्ति. यथा वा न विरुज्झति, तथा एत्थ अधिप्पायो गवेसितब्बो. अनादरियं, अनापत्तिकारणाभावो ¶ , अपरिमण्डलनिवासनन्ति ¶ इमानेत्थ तीणि अङ्गानि. यथा चेत्थ, एवं सब्बत्थ. केवलं तत्थ तत्थ वुत्तपटिपक्खकरणवसेन ततियङ्गयोजनमेव विसेसो.

५७७. दुतियादीसु गिहिपारुतन्ति सेतपटपारुतादि. विहारेपीति सङ्घसन्निपातबुद्धुपट्ठानादिकालं सन्धाय वुत्तं.

५७८. गण्ठिकं पटिमुञ्चित्वातिआदि पटिच्छादनविधिदस्सनं. गीवं पटिच्छादेत्वातिआदिना वुत्तत्ता सञ्चिच्च गीवं, मणिबन्धनञ्च अप्पटिच्छादेन्तस्स आपत्ति. एत्थापि परिमण्डलसिक्खापदस्स साधारणत्ता जाणुमण्डलतो हेट्ठा चतुरङ्गुलमत्तं ओतारेत्वा अनोलम्बेत्वा परिमण्डलमेव पारुपितब्बं.

५७९. विवरित्वा निसीदतोति विहारे विय एकंसपारुपनं सन्धाय वुत्तं. ‘‘वासत्थाय उपगतस्सा’’ति वुत्तत्ता वासाधिप्पायं विना धम्मदेसनपरित्तभणनादिअत्थाय सुचिरम्पि निसीदन्तेन सब्बं अन्तरघरवत्तं पूरेन्तेनेव निसीदितब्बं. निसीदनपटिसंयुत्तेसु एव च सिक्खापदेसु ‘‘वासूपगतस्सा’’ति अनापत्तिया वुत्तत्ता वासत्थाय अन्तरघरं उपगच्छन्तेनापि सुप्पटिच्छन्नतादिसब्बं अकोपेन्तेनेव गन्तब्बं. ‘‘वासूपगतस्सा’’ति हि वुत्तं, न पन उपगच्छमानस्साति. केचि पन ‘‘एकेकस्मिं पठमं गन्त्वा वासपरिग्गहे कते ततो अञ्ञेहि यथासुखं गन्तुं वट्टती’’ति वदन्ति. अपरे पन ‘‘गेहस्सामिकेहि ‘याव तुम्हे निवसिस्सथ, ताव तुम्हाकं इमं गेहं देमी’ति दिन्ने अञ्ञेहि अवासाधिप्पायेहि अन्तरारामे विय यथासुखं गन्तुं, निसीदितुञ्च वट्टती’’ति वदन्ति, तं सब्बं न गहेतब्बं तथावचनाभावा, दानलक्खणाभावा, तावत्तकेन विहारसङ्ख्यानुपगमनतो च. ‘‘याव निसीदिस्सथ, ताव तुम्हाकं इमं गेहं देमी’’ति देन्तोपि हि तावकालिकमेव देति वत्थुपरिच्चागलक्खणत्ता दानस्स.

५८२. चतुहत्थप्पमाणन्ति वड्ढकीहत्थं सन्धाय वुत्तन्ति वदन्ति.

५८४. उक्खित्तचीवरो ¶ हुत्वाति कटितो उद्धं कायबन्धनादिदस्सनवसेनेवुक्खिपनं सन्धाय वुत्तं पिण्डाय चरतो पत्तग्गहणादिमत्तस्स अनुञ्ञातत्ता. तेनेव ‘‘निसिन्नकाले पन धमकरण’’न्तिआदि वुत्तं. निसिन्नकाले हि खन्धे लग्गपत्तत्थविकादितो धमकरणं नीहरन्तस्स कटितो उद्धम्पि दिस्सति, तथा अदस्सेत्वा नीहरितब्बन्ति अधिप्पायो. आसने निसीदन्तस्सापि ¶ च पारुपितचीवरं किञ्चि उक्खिपित्वा सङ्घाटिं जङ्घपिण्डेहि अनुक्खिपित्वाव निसीदितब्बं. इमस्मिञ्ञेव पन सिक्खापदे ‘‘वासूपगतस्सा’’ति वुत्तत्ता निसीदनपटिसंयुत्तेसु छट्ठअट्ठमेसु अवुत्तत्ता वासूपगतेनापि सुसंवुतेन ओक्खित्तचक्खुनाव निसीदितब्बं. तेनेव मातिकाट्ठकथायम्पि तेसं विसेसं अवत्वा इधेव ‘‘वासूपगतस्स पन अनापत्ती’’ति (कङ्खा. अट्ठ. उक्खित्तकसिक्खापदवण्णना) वुत्ता.

परिमण्डलवग्गवण्णना निट्ठिता.

२. उज्जग्घिकवग्गवण्णना

५८६. दुतियवग्गादिउज्जग्घिकअप्पसद्देसु निसीदनपटिसंयुत्तेसुपि वासूपगतस्स अनापत्ति न वुत्ता, कायप्पचालकादीसु एव पन वुत्ता. पाळिपोत्थकेसु पनेतं केसुचि पेय्यालेन ब्यामोहितत्ता न सुट्ठु विञ्ञायति. यत्थ च अन्तरघरे धम्मं वा देसेन्तस्स, पातिमोक्खं वा उद्दिसन्तस्स महासद्देन यावपरिससावनेपि अनापत्ति एवाति दट्ठब्बं तथा आनन्दत्थेरमहिन्दत्थेरादीहि आचरितत्ता.

उज्जग्घिकवग्गवण्णना निट्ठिता.

३. खम्भकतवग्गवण्णना

६०३. पत्ते गहणसञ्ञा अस्स अत्थीति पत्तसञ्ञीति इममत्थं दस्सेतुं ‘‘पत्ते सञ्ञं कत्वा’’ति वुत्तं.

६०४. ओलोणीति एका ब्यञ्जनविकति. कञ्जिकतक्कादिरसोति केचि. मंसरसादीनीति आदि-सद्देन अवसेसा सब्बापि ब्यञ्जनविकति सङ्गहिता.

६०५. समभरितन्ति ¶ रचितं. हेट्ठा ओरोहतीति समन्ता ओकाससम्भवतो हत्थेन समं करियमानं हेट्ठा भस्सति. पत्तमत्थके ठपितानि पूवानि एव वटंसकाकारेन ठपितत्ता ‘‘पूववटंसक’’न्ति वुत्तानि. केचि पन ‘‘पत्तं गहेत्वा थूपीकतं पिण्डपातं रचित्वा दिय्यमानमेव गण्हतो आपत्ति, हत्थगते एव पन पत्ते दिय्यमाने थूपीकतम्पि गहेतुं वट्टती’’ति ¶ वदन्ति, तं न गहेतब्बमेव ‘‘समतित्तिक’’न्ति भावनपुंसकवसेन सामञ्ञतो वुत्तत्ता.

खम्भकतवग्गवण्णना निट्ठिता.

४. सक्कच्चवग्गवण्णना

६०८. चतुत्थवग्गादीसु सपदानन्ति एत्थ दानं वुच्चति अवखण्डनं, अपेतं दानतो अपदानं, सह अपदानेन सपदानं, अवखण्डनविरहितं अनुपटिपाटियाति वुत्तं होति. तेनाह ‘‘तत्थ तत्थ ओधिं अकत्वा’’तिआदि.

६११. विञ्ञत्तियन्ति सूपोदनविञ्ञत्तिसिक्खापदं सन्धाय वदति. ‘‘वत्तब्बं नत्थी’’ति इमिना पाळियाव सब्बं विञ्ञायतीति दस्सेति. तत्थ पाळियं असञ्चिच्चातिआदीसु वत्थुमत्तं ञत्वा भुञ्जनेन आपत्तिं आपज्जन्तस्सेव पुन पण्णत्तिं ञत्वा मुखगतं छड्डेतुकामस्स यं अरुचिया पविट्ठं, तं असञ्चिच्च पविट्ठं नाम, तत्थ अनापत्ति. तदेव पुन अञ्ञविहितताय वा अविञ्ञत्तमिदन्तिसञ्ञाय वा भुञ्जने ‘‘असतिया’’ति वुच्चति.

६१३. ‘‘अञ्ञस्सत्थाया’’ति इदमस्स सिक्खापदस्स अत्तनो अत्थाय विञ्ञापेत्वा सयं भुञ्जने एव पञ्ञत्तत्ता इमिना सिक्खापदेन अनापत्तिं सन्धाय वुत्तं. पञ्चसहधम्मिकानं पन अत्थाय अञ्ञातकअप्पवारितट्ठाने विञ्ञापेन्तो विञ्ञत्तिक्खणे अट्ठकथासु सुत्तानुलोमतो वुत्तअकतविञ्ञत्तिदुक्कटतो न मुच्चति. सञ्चिच्च भुञ्जनक्खणे सयञ्च अञ्ञे च मिच्छाजीवतो न मुच्चन्तीति गहेतब्बं.

६१५. ‘‘कुक्कुटण्डं अतिखुद्दक’’न्ति इदं असारुप्पवसेन वुत्तं, अतिमहन्ते एव आपत्तीति दट्ठब्बं. भुञ्जन्तेन पन चोरादिभयं पटिच्च महन्तम्पि अपरिमण्डलम्पि ¶ कत्वा सीघं भुञ्जनवसेनेत्थ आपदा. एवमञ्ञेसुपि यथानुरूपं दट्ठब्बं.

सक्कच्चवग्गवण्णना निट्ठिता.

५. कबळवग्गवण्णना

६१७. अनाहटे ¶ कबळे मुखद्वारविवरणे पन पयोजनाभावा ‘‘आपदासू’’ति न वुत्तं. एवमञ्ञेसुपि ईदिसेसु.

६१८. सब्बं हत्थन्ति हत्थेकदेसा अङ्गुलियो वुत्ता ‘‘हत्थमुद्दा’’तिआदीसु विय, तस्मा एकङ्गुलिम्पि मुखे पक्खिपितुं न वट्टति.

कबळवग्गवण्णना निट्ठिता.

६. सुरुसुरुवग्गवण्णना

६२७. पाळियं सीतीकतोति सीतपीळितो. सिलकबुद्धोति परिहासवचनमेतं. सिलकञ्हि किञ्चि दिस्वा ‘‘बुद्धो अय’’न्ति वोहरन्ति.

६२८. ‘‘अङ्गुलियो मुखे पवेसेत्वा भुञ्जितुं वट्टती’’ति इमिना सब्बं हत्थं अन्तोमुखे पक्खिपनसिक्खापदस्सपि पविट्ठङ्गुलिनिल्लेहनेन इमस्सपि सिक्खापदस्स अनापत्तिं दस्सेति. एसेव नयोति घनयागुआदीसु पत्तं हत्थेन, ओट्ठञ्च जिव्हाय निल्लेहितुं वट्टतीति अतिदिसति. तस्माति यस्मा घनयागुआदिविरहितं निल्लेहितुं न वट्टति.

६३४. विलीवच्छत्तन्ति वेणुपेसिकाहि कतं. मण्डलबद्धानीति दीघसलाकासु तिरियं वलयाकारेन सलाकं ठपेत्वा सुत्तेहि बद्धानि दीघञ्च तिरियञ्च उजुकमेव सलाकायो ठपेत्वा दळ्हबद्धानि चेव तिरियं ठपेत्वा दीघदण्डकेहेव सङ्कोचारहं कत्वा सुत्तेहेव तिरियं बद्धानि. तत्थजातकदण्डकेन कतन्ति सह दण्डकेन छिन्नतालपण्णादीहि कतं. छत्तपादुकायाति यस्मिं छत्तदण्डकोटिं पवेसेत्वा छत्तं उजुकं ठपेत्वा हेट्ठा छायाय निसीदन्ति, तिट्ठन्ति वा, तादिसे छत्ताधारे.

६३७. चापोति ¶ मज्झे वङ्ककाजदण्डसदिसा धनुविकति. कोदण्डोति विद्धदण्डा धनुविकति.

सुरुसुरुवग्गवण्णना निट्ठिता.

७. पादुकवग्गवण्णना

६४७. सत्तमवग्गे ¶ रुक्खतो पतितोति एकं ओलम्बनसाखं गहेत्वा पतितो. पाळियाति अत्तनो आचारप्पकासकगन्थस्स. धीरत्थूति धी अत्थु, निन्दा होतूति अत्थो. विनिपातनहेतुनाति विनिपातनस्स हेतुभावेन. त्वन्ति उपयोगत्थे पच्चत्तवचनं, तं इच्चेव वा पाठो. अस्माति पासाणो.

६४९. न कथेतब्बन्ति थेरेन अत्तनो कङ्खाट्ठानस्स पुच्छितत्ता वुत्तं. दहरस्स अत्थकोसल्लं ञातुं पुच्छितेन उच्चासने निसिन्नस्स आचरियस्स अनुयोगदाननयेन वत्तुं वट्टति.

६५२. खेळेन चेत्थ सिङ्घाणिकापि सङ्गहिताति एत्थ उदकगण्डुसकं कत्वा उच्छुकचवरादिञ्च मुखेनेव हरितुं उदकेसु छड्डेतुं वट्टतीति दट्ठब्बं. सेसं सब्बत्थ उत्तानमेव.

पादुकवग्गवण्णना निट्ठिता.

सेखियवण्णनानयो निट्ठितो.

६५५. अधिकरणसमथेसु च इध वत्तब्बं नत्थि.

इति समन्तपासादिकाय विनयट्ठकथाय विमतिविनोदनियं

भिक्खुविभङ्गवण्णनानयो निट्ठितो.

नमो तस्स भगवतो अरहतो सम्मासम्बुद्धस्स

भिक्खुनीविभङ्गवण्णना

१. पाराजिककण्डं

१. उब्भजाणुमण्डलिकसिक्खापदवण्णना

६५६. भिक्खुनीविभङ्गे ¶ ¶ मिगारमातुयाति मिगारमातु, विसाखायाति अत्थो. पाळियं ‘‘एहि भिक्खुनीति भिक्खुनी, तीहि सरणगमनेहि उपसम्पन्नाति भिक्खुनी’’ति इदं भिक्खुविभङ्गपाळिया समदस्सनत्थं अट्ठगरुधम्मप्पटिग्गहणेन लद्धूपसम्पदं महापजापतिगोतमिञ्चेव ताय सह निक्खन्ता भगवतो आणाय भिक्खूनञ्ञेव सन्तिके एकतोउपसम्पन्ना पञ्चसतसाकियानियो च सन्धाय वुत्तं. ता हि भगवता आनन्दत्थेरस्स याचनाय पब्बज्जं अनुजानन्तेन ‘‘एथ भिक्खुनियो, मम सासने तुम्हेपि पविसथा’’ति वुत्ता विय जाता. साकियानियो एव सरणसीलानि दत्वा कम्मवाचाय उपसम्पादितत्ता ‘‘तीहि सरणगमनेहि उपसम्पन्ना’’ति वुत्ता. न हि एताहि अञ्ञा एहिभिक्खुनिभावादिना उपसम्पन्ना नाम सन्ति. यं पन थेरीगाथासु भद्दाय कुण्डलकेसिया –

‘‘निहच्च ¶ जाणुं वन्दित्वा, सम्मुखा अञ्जलिं अकं;

‘एहि भद्दे’ति मं अवोच, सा मे आसूपसम्पदा’’ति. (थेरीगा. १०९) –

वुत्तं. यञ्च अपदानेपि –

‘‘आयाचितो तदा आह, ‘एहि भद्दे’ति नायको;

तदाहं उपसम्पन्ना, परित्तं तोयमद्दस’’न्ति. (अप. थेरी २.३.४४) –

वुत्तं. तम्पि ‘‘एहि त्वं भिक्खुनीनं सन्तिके पब्बज्जं, उपसम्पदञ्च गण्हाही’’ति भगवतो आणा उपसम्पदाय कारणत्ता उपसम्पदा अहोसीति इममत्थं सन्धाय वुत्तं. तथा हि वुत्तं थेरीगाथाट्ठकथायं ‘‘एहि भद्दे, भिक्खुनुपस्सयं ¶ गन्त्वा भिक्खुनीनं सन्तिके पब्बज्ज उपसम्पज्जस्सूति मं अवच आणापेसि, सा सत्थु आणा मय्हं उपसम्पदाय कारणत्ता उपसम्पदा आसि अहोसी’’ति (थेरीगा. अट्ठ. १११).

६५७. साधारणपाराजिकेहीति मेथुनादीहि चतूहि. तानि, पन अञ्ञानि च साधारणसिक्खापदानि यस्मा भिक्खुविभङ्गे वुत्तनिदानवत्थादीसु एव साधारणवसेन पञ्ञत्तानि, पच्छा पन तानि भिक्खुनीनं पातिमोक्खुद्देसं अनुजानन्तेन भगवता तासं सिक्खापच्चक्खानाभावेन ‘‘या पन भिक्खुनी छन्दसो मेथुनं धम्मं पटिसेवेय्या’’तिआदिना तदनुरूपवसेन परिवत्तेत्वा असाधारणसिक्खापदेहि सद्धिं संसन्देत्वा भिक्खुनिपातिमोक्खुद्देसवसेन एकतो सङ्गहितानि. यस्मा च नेसं भिक्खुविभङ्गे (पारा. ४४ आदयो) वुत्तनयेनेव सब्बोपि विनिच्छयो सक्का ञातुं, तस्मा तानि वज्जेत्वा असाधारणानं एव इध विभङ्गो वुत्तोति वेदितब्बं.

६५९. भिक्खूनं ‘‘कायसंसग्गं सादियेय्या’’ति अवत्वा ‘‘समापज्जेय्या’’ति वुत्तत्ता ‘‘भिक्खु आपत्तिया न कारेतब्बो’’ति वुत्तं. तब्बहुलनयेनाति किरियासमुट्ठानस्सेव बहुलभावतो, एतेन अकिरियासमुट्ठानापि अयं आपत्ति होतीति दस्सेति. किञ्चापि दस्सेति, मयं पनेत्थ एवं तक्कयाम ‘‘कायसंसग्गक्खणे सादियन्तिया किरियाय अभावेपि ततो पुब्बे पवत्तितानं पटिच्छन्नट्ठानगमनइङ्गिताकारदस्सनादिकिरियानं वसेनेव किरियासमउट्ठानमेव, परेहि मग्गे करियमानुपक्कमेन निच्चलस्स सादियतो सुक्कविस्सट्ठि विय पुब्बपयोगाभावेपि ¶ वा तस्मिञ्ञेव खणे परूपक्कमेन जनियमानाय अत्तनो कायचलनादिसङ्खाताय किरियाय, सा हि सादियमानेन तस्सा चित्तेनापि समुट्ठिता किरिया नाम होति अवायमित्वा परूपक्कमेन मेथुनसादियने विय, भिक्खूनं पन परूपक्कमजनितं किरियं अब्बोहारिकं कत्वा अत्तना करियमानपयोगवसेनेव ‘कायसंसग्गं समापज्जेय्या’ति एवं विसेसेत्वाव सिक्खापदस्स पञ्ञत्तत्ता सादियमानेपि न दोसो. इतरथा हि तब्बहुलनयेनेत्थ किरियत्ते गय्हमाने अञ्ञेसम्पि किरियाकिरियसिक्खापदानं किरियत्तग्गहणप्पसङ्गो सिया’’ति. तस्मा ¶ वीमंसित्वा गहेतब्बं. साति किरियासमुट्ठानता. तथेवाति कायसंसग्गरागी एव.

उब्भजाणुमण्डलिकसिक्खापदवण्णना निट्ठिता.

२. वज्जपटिच्छादिकसिक्खापदवण्णना

६६६. दुतिये पुरिमेनातिआदि सुन्दरीनन्दाय वज्जपटिच्छादने पञ्ञत्ततं सन्धाय वुत्तं. ‘‘अट्ठन्न’’न्ति वुत्तत्ता वज्जपटिच्छादनस्सापि पटिच्छादने पाराजिकमेवाति दट्ठब्बं. ‘‘धुरं निक्खित्तमत्ते’’ति वुत्तत्ता पण्णत्तिं अजानन्तियापि ‘‘इदं वज्जं न पकासेस्सामी’’ति छन्देन धुरं निक्खेपक्खणे पाराजिकन्ति दट्ठब्बं. तं पन पटिच्छादनं यस्मा ‘‘पेसला ञत्वा गरहिस्सन्ती’’ति भयेनेव होति, भयञ्च कोधचित्तसम्पयुत्तं, तस्मा इदं ‘‘दुक्खवेदन’’न्ति वुत्तं. यं पन सारत्थदीपनियं (सारत्थ. टी. पाराजिककण्ड ३.६६६) ‘‘किञ्चापि वज्जपटिच्छादनं पेमवसेन होति, तथापि सिक्खापदवीतिक्कमचित्तं दोमनस्सितमेव होती’’ति एवं पण्णत्तिवीतिक्कमचित्तेनेव छादनं दोमनस्सत्ते कारणं वुत्तं, तं अकारणं पण्णत्तिविजाननं विनापि आपज्जितब्बतोव.

वज्जपटिच्छादिकसिक्खापदवण्णना निट्ठिता.

६६९. ततियं उत्तानमेव.

४. अट्ठवत्थुकसिक्खापदवण्णना

६७५. चतुत्थे ¶ लोकस्सादसङ्खातं मित्तेहि अञ्ञमञ्ञं कातब्बं सन्थवं. वुत्तमेवत्थं परियायन्तरेन दस्सेतुं ‘‘कायसंसग्गरागेना’’ति वुत्तं.

तिस्सित्थियो मेथुनं तं न सेवेति या तिस्सो इत्थियो, तासु वुत्तं तं मेथुनं न सेवेय्य. अनरियपण्डकेति तयो अनरिये, तयो पण्डके च उपसङ्कमित्वा मेथुनं न सेवेति अत्थो. अनरियाति ¶ चेत्थ उभतोब्यञ्जनका अधिप्पेता. ब्यञ्जनस्मिन्ति अत्तनो वच्चमुखमग्गेपि. छेदो एव छेज्जं, पाराजिकं.

वण्णावण्णोति द्वीहि सुक्कविस्सट्ठि वुत्ता. गमनुप्पादनन्ति सञ्चरित्तं. ‘‘मेथुनधम्मस्स पुब्बभागत्ता पच्चयो होती’’ति इमिना कारियोपचारेन कायसंसग्गो मेथुनधम्मोति वुत्तोति दस्सेति. सब्बपदेसूति सङ्घाटिकण्णग्गहणादिपदेसु. कायसंसग्गरागो, सउस्साहता, अट्ठमवत्थुस्स पूरणन्ति तीणेत्थ अङ्गानि.

अट्ठवत्थुकसिक्खापदवण्णना निट्ठिता.

पाराजिकवण्णनानयो निट्ठितो.

२. सङ्घादिसेसकण्डं

१. पठमसङ्घादिसेससिक्खापदवण्णना

६७९. सङ्घादिसेसकण्डे ¶ ¶ ‘‘दुतियस्स आरोचेती’’ति एत्थापि द्वीसुपि अड्डकारकेसु यस्स कस्सचि दुतियस्स कथं यो कोचि आरोचेतीति एवमत्थो गहेतब्बोति आह ‘‘एसेव नयो’’ति.

गतिगतन्ति चिरकालप्पवत्तं. आपत्तीति आपज्जनं. ‘‘निस्सारणीय’’न्ति इदं कत्तुअत्थे सिद्धन्ति आह ‘‘निस्सारेती’’ति. आपन्नं भिक्खुनिं सङ्घतो वियोजेति, वियोजनहेतु होतीति अत्थो.

गीवायेवाति आणत्तिया अभावतो. तेसं अनत्थकामतायाति ‘‘चोरो’’ति वुत्तं मम वचनं सुत्वा केचि दण्डिस्सन्ति जीविता वोरोपेस्सन्तीति एवं सञ्ञाय. एतेन केवलं भयेन वा परिक्खारग्गहणत्थं वा सहसा ‘‘चोरो’’ति वुत्ते दण्डितेपि न दोसोति दस्सेति. राजपुरिसानञ्हि ‘‘चोरो अय’’न्ति उद्दिस्स कथने एव गीवा, भिक्खूनं, पन आरामिकादीनं वा सम्मुखा ‘‘असुको चोरो एवमकासी’’ति केनचि वुत्तवचनं निस्साय आरामिकादीसु राजपुरिसानं वत्वा दण्डापेन्तेसुपि भिक्खुस्स न गीवा राजपुरिसानं अवुत्तत्ता. येसञ्च वुत्तं, तेहि सयं चोरस्स अदण्डितत्ताति गहेतब्बं. ‘‘त्वं एतस्स सन्तकं अच्छिन्दा’’ति आणत्तोपि हि सचे अञ्ञेन अच्छिन्दापेति, आणापकस्स अनापत्ति विसङ्केतत्ता. ‘‘अत्तनो वचनकर’’न्ति इदं सामीचिवसेन वुत्तं. वचनं अकरोन्तानं राजपुरिसानम्पि ‘‘इमिना गहितपरिक्खारं आहरापेहि, मा चस्स दण्डं करोही’’ति उद्दिस्स वदन्तस्सापि दण्डे गहितेपि न गीवा एव दण्डग्गहणस्स पटिक्खित्तत्ता, ‘‘असुकभण्डं अवहरा’’ति आणापेत्वा विप्पटिसारे उप्पन्ने पुन पटिक्खिपने (पारा. १२१) विय.

दासादीनं ¶ सम्पटिच्छने विय तदत्थाय अड्डकरणे भिक्खूनम्पि दुक्कटन्ति आह ‘‘अकप्पियअड्डो नाम न वट्टती’’ति. केनचि पन भिक्खुना खेत्तादिअत्थाय वोहारिकानं सन्तिकं गन्त्वा अड्डे कतेपि तं खेत्तादिसम्पटिच्छने विय सब्बेसं अकप्पियं न होति पुब्बे एव सङ्घस्स सन्तकत्ता ¶ , भिक्खुस्सेव पन पयोगवसेन आपत्तियो होन्ति. दासादीनम्पि पन अत्थाय रक्खं याचितुं वोहारिकेन पुट्ठेन सङ्घस्स उप्पन्नं कप्पियक्कमं वत्तुं, आरामिकादीहि च अड्डं कारापेतुञ्च वट्टति एव. विहारवत्थादिकप्पियअड्डं पन भिक्खुनो सयम्पि कातुं वट्टति.

भिक्खुनीनं वुत्तोति रक्खं याचन्तीनं भिक्खुनीनं वुत्तो उद्दिस्सअनुद्दिस्सवसेन रक्खायाचनविनिच्छयो, न सब्बो सिक्खापदविनिच्छयो असाधारणत्ता सिक्खापदस्स. तेनाह ‘‘भिक्खुनोपी’’तिआदि. अनाकड्ढिताय अड्डकरणं, अड्डपरियोसानन्ति द्वे अङ्गानि.

पठमसङ्घादिसेससिक्खापदवण्णना निट्ठिता.

२. दुतियसङ्घादिसेससिक्खापदवण्णना

६८३. पाळियं दुतिये मल्लगणभटिपुत्तगणादिकन्तिआदीसु मल्लराजूनं गणो मल्लगणो. भटिपुत्ता नाम केचि गणराजानो, तेसं गणो. केचि पन ‘‘नारायनभत्तिको पुञ्ञकारगणो मल्लगणो. तथा कुमारभत्तिको च गणो भटिपुत्तगणो’’तिपि (सारत्थ. टी. संघादिसेसकण्ड ३.६८३) वदन्ति. धम्मगणोति सासने, लोके वा अनेकप्पकारपुञ्ञकारको गणो. गन्धविकतिकारको गणो गन्धिकसेणी. पेसकारादिगणो दुस्सिकसेणी. कप्पगतिकन्ति कप्पियभावगतं, पब्बजितपुब्बन्ति अत्थो.

६८५. पाळियं वुट्ठापेतीति उपसम्पादेति. अकप्पगतम्पि पब्बाजेन्तिया दुक्कटन्ति वदन्ति. खीणासवायपि आपज्जितब्बतो ‘‘तिचित्त’’न्ति वुत्तं. चोरिता, तं ञत्वा अननुञ्ञातकारणा वुट्ठापनन्ति द्वे अङ्गानि.

दुतियसङ्घादिसेससिक्खापदवण्णना निट्ठिता.

३. ततियसङ्घादिसेससिक्खापदवण्णना

६९२. ततिये ¶ ¶ परिक्खेपं अतिक्कामेन्तियाति गामन्तरस्स परिक्खेपं अतिक्कामेन्तिया. ‘‘गामन्तरं गच्छेय्या’’ति हि वुत्तं. विकालगामप्पवेसनसिक्खापदे विय ‘‘अपरिक्खित्तस्स उपचारं ओक्कमन्तिया’’ति अवत्वा ‘‘अतिक्कामेन्तिया’’ति पाळियं वुत्तत्ता गामं पविसन्तिया घरूपचारे ठितस्स दुतियलेड्डुपातसङ्खातस्स उपचारस्स अतिक्कमो नाम पठमलेड्डुपातट्ठानसङ्खातस्स परिक्खेपारहट्ठानस्स अतिक्कमो एवाति आह ‘‘परिक्खेपारहट्ठानं एकेन पादेन अतिक्कमती’’ति.

मज्झेति गाममज्झे. पच्छाति अपरकाले. ‘‘चतुगामसाधारणत्ता’’ति इमिना विहारतो चतूसु गामेसु यत्थ कत्थचि पविसितुं वट्टतीति एत्थ कारणमाह.

परतीरमेव अक्कमन्तियाति नदिं अनोतरित्वा ओरिमतीरतो लङ्घित्वा वा आकासादिना वा परतीरमेव अतिक्कामेन्तिया. ओरिमतीरमेव आगच्छति, आपत्तीति पारगमनाय ओतिण्णत्ता वुत्तं.

तादिसे अरञ्ञेति इन्दखीलतो बहिभावलक्खणे अरञ्ञे. ‘‘तेनेवा’’तिआदिना दस्सनूपचारे विरहिते सवनूपचारस्स विज्जमानत्तेपि आपत्ति होतीति दस्सेति. अञ्ञं मग्गं गण्हातीति मग्गमूळ्हत्ता गण्हाति, न दुतियिकं ओहियितुं. तस्मा अनापत्ति. अनन्तरायेन एकभावो, अनापदाय गामन्तरगमनादीसु एकन्ति द्वे अङ्गानि.

ततियसङ्घादिसेससिक्खापदवण्णना निट्ठिता.

४. चतुत्थसङ्घादिसेससिक्खापदवण्णना

६९४. चतुत्थे कारकगणस्साति इमस्स कम्मं कातब्बन्ति येहि सन्निट्ठानं कतं, ते सन्धाय वुत्तं. कम्मवाचक्खणे सहठितेति केचि. नेत्थारवत्तेति नित्थरणहेतुम्हि वत्ते.

६९८. पाळियं ¶ असन्ते कारकसङ्घेति एत्थ विज्जमानं सुदूरम्पि गन्त्वा आपुच्छितब्बं ¶ . अन्तराये पन सति सम्मा वत्तन्तं ओसारेतुं वट्टतीति. धम्मकम्मेन उक्खित्तता, अननुञ्ञातकारणा ओसारणन्ति द्वे अङ्गानि.

चतुत्थसङ्घादिसेससिक्खापदवण्णना निट्ठिता.

५. पञ्चमसङ्घादिसेससिक्खापदवण्णना

७०१. पञ्चमे तन्ति महाअट्ठकथायं अवचनं ‘‘अनवस्सुतोति जानन्ती पटिग्गण्हाती’’तिआदि पाळिया समेति. उभतो अवस्सुतभावो, उदकदन्तपोनतो अञ्ञं सहत्था गहेत्वा अज्झोहरणन्ति द्वे अङ्गानि.

पञ्चमसङ्घादिसेससिक्खापदवण्णना निट्ठिता.

६. छट्ठसङ्घादिसेससिक्खापदवण्णना

७०५. छट्ठे पटिग्गहो तेन न विज्जतीति तेनेव ‘‘न देती’’ति वुत्तकारणेन उय्योजिताय हत्थतो इतराय पटिग्गहोपि नत्थि. परिभोगपच्चयाति उय्योजिताय भोजनपरियोसानपच्चयाति अत्थो. मनुस्सपुरिसस्स अवस्सुतता, तं ञत्वा अननुञ्ञातकारणा उय्योजना, तेन इतरिस्सा गहेत्वा भोजनपरियोसानन्ति तीणि अङ्गानि.

छट्ठसङ्घादिसेससिक्खापदवण्णना निट्ठिता.

७०९-७२७. सत्तमतो यावदसमपरियोसानानि उत्तानानेव.

सङ्घादिसेसवण्णनानयो निट्ठितो.

३. निस्सग्गियकण्डं

२. दुतियनिस्सग्गियादिपाचित्तियसिक्खापदवण्णना

७३३. निस्सग्गियेसुपि ¶ ¶ पठमं उत्तानमेव.

७४०. दुतिये अय्याय दम्मीति एवं पटिलद्धन्ति निस्सट्ठपटिलद्धं, निस्सट्ठं पटिलभित्वापि यं उद्दिस्स दायकेहि दिन्नं, तत्थेव दातब्बं. तेनाह ‘‘यथादानेयेव उपनेतब्ब’’न्ति. अकालचीवरता, तं ञत्वा कालचीवरन्ति लेसेन भाजापनं, पटिलाभोति तीणि अङ्गानि.

७४३. ततिये मेतन्ति ममेवेतं चीवरं. उपसम्पन्नता, परिवत्तितविकप्पनुपगचीवरस्स सकसञ्ञाय अच्छिन्दनादीति द्वे अङ्गानि.

७४८-७५२. चतुत्थे आहटसप्पिं दत्वाति अत्तनो दत्वा. यमकं पचितब्बन्ति सप्पिञ्च तेलञ्च एकतो पचितब्बं. लेसेन गहेतुकामता, अञ्ञस्स विञ्ञत्ति, पटिलाभोति तीणि अङ्गानि.

७५३. पञ्चमे साति थुल्लनन्दा. अयन्ति सिक्खमाना. चेतापेत्वाति जानापेत्वाति इध वुत्तं, मातिकाट्ठकथायं पन ‘‘अत्तनो कप्पियभण्डेन ‘इदं नाम आहरा’ति अञ्ञं परिवत्तापेत्वा’’ति (कङ्खा. अट्ठ. अञ्ञचेतापनसिक्खापदवण्णना) वुत्तं.

७५८. छट्ठे पावारिकस्साति दुस्सवाणिजकस्स.

७६४. सत्तमे ¶ सञ्ञाचितकेनाति सयं याचितकेनपीति अत्थो.

७६९-७८९. अट्ठमतो यावद्वादसमा उत्तानमेव.

निस्सग्गियवण्णनानयो निट्ठितो.

४. पाचित्तियकण्डं

१. लसुणवग्गो

१. पठमलसुणादिसिक्खापदवण्णना

७९७. पाचित्तियेसु ¶ ¶ लसुणवग्गस्स पठमे बदरसाळवं नाम बदरफलानि सुक्खापेत्वा तेहि कत्तब्बब्यञ्जनविकति. आमकमागधलसुणञ्चेव, अज्झोहरणञ्चाति द्वे अङ्गानि.

७९९-८१२. दुतियादीनि उत्तानत्थानि.

८१५. छट्ठे पाळियं आसुम्भित्वाति पातेत्वा.

८१७. दधिमत्थूति दधिम्हि पसन्नोदकं. रसखीरादीनन्ति मंसरसखीरादीनं. भुञ्जन्तस्स भिक्खुनो हत्थपासे ठानं, पानीयस्स वा विधूपनस्स वा गहणन्ति द्वे अङ्गानि.

८२२. सत्तमे अविञ्ञत्तिया लद्धन्ति अत्तनो विञ्ञत्तिं विना लद्धं. पुब्बापरविरुद्धन्ति सयं करणे पाचित्तियन्ति इदं कारापने दुक्कटवचनेन विरुज्झनं सन्धाय वुत्तं. तेनाह ‘‘न ही’’तिआदि, ‘‘अविञ्ञत्तिया लद्ध’’न्तिआदिवचनेन वा विरुज्झनं सन्धाय वुत्तं. अञ्ञाय विञ्ञत्तिपि हि इमिस्सा अविञ्ञत्तिया लद्धमेवाति. आमकधञ्ञविञ्ञापनादि, तं भज्जनादिना अज्झोहरणन्ति द्वे अङ्गानि.

८२४. अट्ठमे निब्बिट्ठोति लद्धो. केणीति रञ्ञो दातब्बो आयो, आयुप्पत्तिट्ठानन्ति अत्थो ¶ . तेनाह ‘‘एकं ठानन्तर’’न्तिआदि. ठानन्तरन्ति च गामजनपदाणायत्तं. वळञ्जियमानतिरोकुट्टादिता, अनपलोकेत्वा उच्चारादीनं छड्डनादीति द्वे अङ्गानि.

८३०. नवमे ‘‘मत्थकच्छिन्ननाळिकेरम्पी’’ति वुत्तत्ता हरितूपरि छड्डनमेव पटिक्खित्तं. तेनाह ‘‘अनिक्खित्तबीजेसू’’तिआदि. यत्थ च छड्डेतुं वट्टति, तत्थ हरिते वच्चादिं कातुम्पि वट्टति एव. सब्बेसन्ति भिक्खुभिक्खुनीनं.

८३६-७. दसमे ¶ तेसंयेवाति येसं निच्चं पस्सति. आरामे ठत्वाति ठितनिसन्नट्ठाने एव ठत्वा समन्ततो गीवं परिवत्तेत्वापि पस्सति, अनापत्ति. ठितट्ठानतो गन्त्वा पस्सितुं न वट्टति. केचि पन ‘‘वट्टती’’ति वदन्ति. तं पन ‘‘दस्सनाय गच्छेय्य, पाचित्तिय’’न्ति सामञ्ञतो गमनस्स पटिक्खित्तत्ता, अनापत्तियम्पि गमनाय अवुत्तत्ता च न गहेतब्बं. नच्चादिता, अननुञ्ञातकारणा गमनं, दस्सनादि चाति तीणि अङ्गानि.

निट्ठितो लसुणवग्गो पठमो.

२. अन्धकारवग्गो

१. पठमादिसिक्खापदवण्णना

८४१. दुतियवग्गस्स पठमे दाने वाति दाननिमित्तं. रत्तन्धकारे पुरिसस्स हत्थपासे ठानादि, रहोपेक्खा, सहायाभावोति तीणि अङ्गानि.

८४२-८५०. दुतियादीनि उत्तानानि.

८५४. पञ्चमे पल्लङ्कस्स अनोकासेति ऊरुबद्धासनस्स अप्पहोनके. पुरेभत्तं अन्तरघरे पल्लङ्कप्पहोनकासने निसज्जा, अननुञ्ञातकारणा अनापुच्छा वुत्तपरिच्छेदातिक्कमोति द्वे अङ्गानि.

८६०-८७९. छट्ठादीनि ¶ उत्तानानि.

निट्ठितो अन्धकारवग्गो दुतियो.

३. नग्गवग्गो

१. पठमादिसिक्खापदवण्णना

८८३-८८७. ततियवग्गस्स पठमदुतियानि उत्तानानि.

८९३. ततिये विसिब्बेत्वाति विजटेत्वा. धुरं निक्खित्तमत्तेति विसिब्बनदिवसतो पञ्च दिवसे अतिक्कामेत्वा धुरं निक्खित्तमत्ते. अन्तोपञ्चाहे पन धुरनिक्खेपेपि अनापत्ति एव ‘‘अञ्ञत्र चतूहपञ्चाहा’’ति वुत्तत्ता ¶ . उपसम्पन्नाय चीवरं सिब्बनत्थाय विसिब्बेत्वा पञ्चहातिक्कमो, अननुञ्ञातकारणा धुरनिक्खेपोति द्वे अङ्गानि.

९००. चतुत्थे पञ्चन्नं चीवरानं अपरिवत्तनं, अननुञ्ञातकारणा पञ्चाहातिक्कमोति द्वे अङ्गानि.

९०३. पञ्चमं उत्तानमेव.

९०९. छट्ठे विकप्पनुपगस्स सङ्घे परिणतता, विना आनिसंसदस्सनेन अन्तरायकरणन्ति द्वे अङ्गानि.

९११. सत्तमं उत्तानमेव.

९१६. अट्ठमे कुम्भथूणं नाम कुम्भसद्दो, तेन कीळन्तीति कुम्भथूणिका. तेनाह ‘‘घटकेन कीळनका’’ति. दीघनिकायट्ठकथायं पन ‘‘चतुरस्सअम्बणकताळ’’न्ति वुत्तं. तञ्हि रुक्खसारादिमयं अन्तोछिद्दं चतूसु पस्सेसु चम्मोनद्धं वादितभण्डं, यं ‘‘बिम्बिसक’’न्तिपि वुच्चति, तं वादेन्तापि कुम्भथूणिका. तेनाह ‘‘बिम्बिसकवादितकातिपि वदन्ती’’ति.

९१८. पाळियं ¶ कप्पकतन्ति कप्पकतं निवासनपारुपनूपगं. समणचीवरता, अननुञ्ञातानं दानन्ति द्वे अङ्गानि.

९२१-९३१. नवमदसमानि उत्तानानेव.

निट्ठितो नग्गवग्गो ततियो.

४. तुवट्टवग्गो

१०. दसमसिक्खापदवण्णना

९७६. तुवट्टवग्गस्स दसमे चारिकाय अपक्कमनं पण्णत्तिवज्जमेव. पण्णत्तिविजाननचित्तेन सचित्तकतं सन्धाय पनेत्थ ‘‘लोकवज्ज’’न्ति दट्ठब्बं. सेसं सब्बत्थ उत्तानमेव.

निट्ठितो तुवट्टवग्गो चतुत्थो.

५. चित्तागारवग्गो

१. पठमादिसिक्खापदवण्णना

९७८. चित्तागारवग्गस्स ¶ पठमे पाटेक्का आपत्तियोति गीवाय परिवत्तनप्पयोगगणनाय.

१०१५. नवमे हत्थिआदीसु सिप्प-सद्दो पच्चेकं योजेतब्बो, तथा आथब्बणादीसु मन्त-सद्दो. तत्थ आथब्बणमन्तो नाम आथब्बणवेदविहितो परूपघातकरो मन्तो. खीलनमन्तो नाम वेरिमारणत्थाय सारदारुमयं खीलं मन्तेत्वा पथवियं आकोटनमन्तो. अगदप्पयोगो विसप्पयोजनं. नागमण्डलन्ति सप्पानं पवेसनिवारणत्थं मण्डलबन्धमन्तो. सेसं सब्बत्थ उत्तानमेव.

निट्ठितो चित्तागारवग्गो पञ्चमो.

१०२५-१११६. आरामवग्गे ¶ , गब्भिनिवग्गे च सब्बं उत्तानमेव.

८. कुमारिभूतवग्गो

१. पठमादिसिक्खापदवण्णना

१११९. अट्ठमवग्गस्स पठमे सब्बपठमा द्वे महासिक्खमानाति गब्भिनिवग्गे (पाचि. १०६७ आदयो) सब्बपठमं वुत्ता द्वे. सिक्खमाना इच्चेव वत्तब्बाति सम्मुतिकम्मादीसु अञ्ञथा वुत्ते कम्मं कुप्पतीति अधिप्पायो.

११६७. एकादसमे पारिवासियेन छन्ददानेनाति परिवुत्थेन नविकप्पवुत्थेन विगतेन छन्ददानेनाति अत्थो, छन्दविस्सज्जनमत्तेन वा.

११६८. ‘‘वुट्ठिताया’’ति एतेन ‘‘इदानि कम्मं न करिस्सामा’’ति धुरं निक्खिपित्वा कायेन अवुट्ठहित्वा निसिन्नायपि परिसाय कम्मं कातुं न वट्टतीति दस्सेति. तेनाह ‘‘छन्दं अविस्सज्जेत्वा अवुट्ठिताया’’ति. पाळियं पन ‘‘अनापत्ति अवुट्ठिताय परिसाया’’ति सामञ्ञतो वुत्तत्ता ¶ , उपोसथक्खन्धके च ‘‘न, भिक्खवे, पारिवासिकपारिसुद्धिदानेन उपोसथो कातब्बो अञ्ञत्र अवुट्ठिताय परिसाया’’ति (महाव. १८३) वुत्तत्ता, तदट्ठकथायम्पि ‘‘पारिवासियपारिसुद्धिदानं नाम परिसाय वुट्ठितकालतो पट्ठाय न वट्टति, अवुट्ठिताय पन वट्टती’’ति (महाव. अट्ठ. १८३) वुत्तत्ता च ‘‘कम्मं न करिस्सामी’’ति धुरं निक्खिपित्वा निसिन्नायपि कम्मं कातुं वट्टतीति गहेतब्बं. सेसं उत्तानमेव.

निट्ठितो कुमारिभूतवग्गो अट्ठमो.

११८१. छत्तवग्गो उत्तानो एव.

खुद्दकवण्णनानयो निट्ठितो.

५. पाटिदेसनीयकण्डं

पाटिदेसनीयसिक्खापदवण्णना

१२२८. पाटिदेसनीयादीसु ¶ ¶ पाळिविनिमुत्तकेसूति पाळियं अनागतेसु सप्पिआदीसु.

सत्ताधिकरणव्हयाति सत्ताधिकरणसमथनामका. तं अत्थविनिच्छयं तादिसंयेव यस्मा विदू वदन्तीति अत्थो. यथा निट्ठिताति सम्बन्धो. सब्बासवपहन्ति सब्बासवविघातकं अरहत्तमग्गं. पस्सन्तु निब्बुतिन्ति मग्गञाणेन निब्बानं सच्छिकरोन्तु, पप्पोन्तूति वा पाठो. तत्थ निब्बुतिन्ति खन्धपरिनिब्बानं गहेतब्बं.

इति समन्तपासादिकाय विनयट्ठकथाय विमतिविनोदनियं

भिक्खुनीविभङ्गवण्णनानयो निट्ठितो.

उभतोविभङ्गट्ठकथावण्णना निट्ठिता.

नमो तस्स भगवतो अरहतो सम्मासम्बुद्धस्स

महावग्गवण्णना

१. महाखन्धको

बोधिकथावण्णना

महावग्गे ¶ ¶ उभिन्नं पातिमोक्खानन्ति उभिन्नं पातिमोक्खविभङ्गानं. यं खन्धकं सङ्गायिंसूति सम्बन्धो. खन्धानं समूहो, खन्धानं वा पकासनतो खन्धको. खन्धाति चेत्थ पब्बज्जादिचारित्तवारित्तसिक्खापदपञ्ञत्तिसमूहो अधिप्पेतो. पदभाजनीये येसं पदानं अत्था येहि अट्ठकथानयेहि पकासिताति योजना. अथ वा ये अत्थाति योजेतब्बं. हि-सद्दो चेत्थ पदपूरणे दट्ठब्बो.

१. विसेसकारणन्ति ‘‘येन समयेन आयस्मतो सारिपुत्तत्थेरस्स सिक्खापदपञ्ञत्तियाचनहेतुभूतो ¶ परिवितक्को उदपादि, तेन समयेना’’तिआदिना वुत्तकारणं विय विसेसकारणं भुम्मवचननिवत्तनककारणन्ति अत्थो. एतस्साति अभिसम्बोधितो पट्ठाय सत्थु चरियाविभावनस्स विनयपञ्ञत्तियं किं पयोजनं? यदि विसेसकारणं नत्थीति अधिप्पायो. निदानदस्सनं पयोजनन्ति योजना. निदानन्तिचेत्थ सिक्खापदपञ्ञत्तिहेतुभूतं वत्थुपुग्गलादिकारणं अधिप्पेतं, न पञ्ञत्तिट्ठानमेव. तेनाह ‘‘या ही’’तिआदि.

उरुवेलायन्ति एत्थ उरु-सद्दो महन्तवाची. वेला-सद्दो तीरपरियायो. उन्नतत्तादिना वेला विय वेला. उरु महन्ती वेला उरुवेला, तस्सं. तेनाह ‘‘महावेलाय’’न्तिआदि. मरियादाति सीलादिगुणसीमा. पत्तपुटेनाति तालादीनं पण्णपुटेन.

‘‘पठमाभिसम्बुद्धो’’ति अनुनासिकलोपेनायं निद्देसोति आह ‘‘पठमं अभिसम्बुद्धो’’ति. पठमन्ति च भावनपुंसकनिद्देसो. तस्मा अभिसम्बुद्धो ¶ हुत्वा सब्बपठमं बोधिरुक्खमूले विहरतीति योजना दट्ठब्बा.

पाळियं अथ खोति एत्थ अथाति एतस्मिं समयेति अत्थो अनेकत्थत्ता निपातानं. सत्ताहन्ति अच्चन्तसंयोगे एतं उपयोगवचनं. अथ खोति अधिकारन्तरदस्सने निपातो. तेन विमुत्तिसुखपटिसंवेदनं पहाय पटिच्चसमुप्पादमनसिकारे अधिकतभावं दस्सेति. पटिच्चाति पटिमुखं गन्त्वा, अञ्ञमञ्ञं अपेक्खित्वाति अत्थो. एतेन कारणबहुता दस्सिता. सहितेति कारियबहुता. अनुलोमन्ति भावनपुंसकनिद्देसो. स्वेवाति सो एव पच्चयाकारो. पुरिमनयेन वा वुत्तोति ‘‘अविज्जापच्चया सङ्खारा’’तिआदिना नयेन वुत्तो पच्चयाकारो. पवत्तियाति संसारप्पवत्तिया.

पाळियं ‘‘अविज्जापच्चया’’तिआदीसु दुक्खादीसु अञ्ञाणं अविज्जा. लोकियकुसलाकुसलचेतना सङ्खारा. लोकियविपाकमेव विञ्ञाणं. लोकियवेदनादिक्खन्धत्तयं नामं, भूतुपादायभेदं रूपं. पसादविञ्ञाणभेदं सळायतनं. विपाकभूतो सब्बो फस्सो, वेदना च. रागो तण्हा. बलवरागो, तिविधा च दिट्ठि उपादानं. भवो पन दुविधो कम्मभवो, उपपत्तिभवो च. तत्थ कम्मभवो सासवकुसलाकुसलचेतनाव, उपपत्तिभवो उपादिन्नकक्खन्धा. तेसं उपपत्ति जाति. पाको जरा. भेदो मरणं. ते एव निस्साय सोचनं सोको. कन्दनं परिदेवो. दुक्खं कायिकं. दोमनस्सं चेतसिकं. अतिविय सोको उपायासो.

पच्चेकञ्च ¶ सम्भवति-सद्दो योजेतब्बो. तेनाह ‘‘इमिना नयेना’’तिआदि. ‘‘दुक्खरासिस्सा’’ति इमिना न सत्तस्स. नापि सुभसुखादीनन्ति दस्सेति.

हवेति ब्यत्तन्ति इमस्मिं अत्थे निपातो. ‘‘अनुलोमपच्चयाकारपटिवेधसाधका बोधिपक्खियधम्मा’’ति इदं पठमवारे किञ्चापि ‘‘अविज्जायत्वेव असेसविरागनिरोधा’’तिआदिना पटिलोमपच्चयाकारोपि आगतो, तथापि ‘‘यतो पजानाति सहेतुधम्म’’न्ति अनुलोमपच्चयाकारपटिवेधस्सेव कारणत्तेन वुत्तन्ति. यथा चेत्थ, एवं दुतियवारेपि ‘‘यतो खयं पच्चयानं अवेदी’’ति गाथाय वुत्तत्ता ‘‘पच्चयानं खयसङ्खात’’न्तिआदि ¶ वुत्तन्ति वेदितब्बं. नो कल्लो पञ्होति अयुत्तो न ब्याकातब्बो, अविज्जमानं अत्तानं सिद्धं कत्वा ‘‘को फुसती’’ति तस्स किरियाय पुट्ठत्ता ‘‘को वञ्झापुत्तो फुसती’’तिआदि वियाति अधिप्पायो. सोळस कङ्खाति ‘‘अहोसिं नु खो अहमतीतमद्धानं, ननु खो अहोसिं, किं नु खो अहोसिं, कथं नु खो अहोसिं, किं हुत्वा किं अहोसिं नु खो अहमतीतमद्धानं, भविस्सामि नु खो अहं अनागतमद्धानं, ननु खो भविस्सामि, किं नु खो भविस्सामि, कथं नु खो भविस्सामि, किं हुत्वा किं भविस्सामि नु खो अहं अनागतमद्धानं, अहं नु खोस्मि, नो नु खोस्मि, किं नु खोस्मि, कथं नु खोस्मि, अयं नु खो सत्तो कुतो आगतो, सो कुहिं गामी भविस्सती’’ति (म. नि. १.१८; सं. नि. २.२०) एवं आगता अतीते पञ्च, अनागते पञ्च, पच्चुप्पन्ने छाति सोळसविधा कङ्खा.

तत्थ किं नु खोति मनुस्सदेवादीसु, खत्तियादीसु वा अञ्ञतरं निस्साय कङ्खति. कथं नु खोति पन सण्ठानाकारादीसु इस्सरादिजनकं, कारणं वा निस्साय. किं हुत्वा किं अहोसिन्ति च मनुस्सादीसु पठमं किं हुत्वा पच्छा किं अहोसिन्ति कङ्खति. अहं नु खोस्मीतिआदि इदानि अत्तनो विज्जमानाविज्जमानतं, सरूपपकारादिकञ्च कङ्खति. वपयन्तीति विअपयन्ति ब्यपगच्छन्ति. तेनाह ‘‘अपगच्छन्ति निरुज्झन्ती’’ति.

३. तस्स वसेनाति तस्स पच्चयाकारपजाननस्स, पच्चयक्खयाधिगमस्स च वसेन. एकेकमेव कोट्ठासन्ति अनुलोमपटिलोमतो एकेकमेव कोट्ठासं. पाटिपदरत्तिया एवं मनसाकासीति रत्तिया तीसुपि यामेसु एवं इध खन्धकपाळिया आगतनयेन अनुलोमपटिलोमंयेव मनसाकासि.

अजपालकथावण्णना

४. तस्स ¶ सत्ताहस्स अच्चयेनाति पल्लङ्कसत्ताहस्स अपगमनेन. तम्हा समाधिम्हाति अरहत्तफलसमापत्तिसमाधिम्हा. अन्तरन्तरा एव हि पच्चयाकारमनसिकारो. अवसेसकालं पन सब्बं भगवा फलसमापत्तियापि वीतिनामेसि. तं सन्धाय ‘‘तम्हा समाधिम्हा’’ति वुत्तं. रतनचङ्कमेति ¶ भगवतो चिरं ठितस्स चङ्कमनाधिप्पायं ञत्वा देवताहि मापिते रतनचङ्कमे. रतनघरन्ति भगवतो निसीदनाधिप्पायं ञत्वा देवताहि मापितं रतनमयं गेहं.

तत्रापीति न केवलं रतनघरेयेव. तत्रापि अजपालनिग्रोधमूलेपि अभिधम्मं विचिनन्तो एव अन्तरन्तरा विमुत्तिसुखं पटिसंवेदेन्तोति अत्थो. तत्थापि हि अनन्तनयसमन्तपट्ठानं सम्मसतो सम्मासम्बुद्धस्स पीतिसमुट्ठिता छब्बण्णा बुद्धरस्मियो रतनघरे विय निच्छरिंसु एव. ‘‘हुंहु’’न्ति करोन्तोति ‘‘सब्बे हीनजातिका मं मा उपगच्छन्तू’’ति मानवसेन, समीपं उपगतेसु कोधवसेन च ‘‘अपेथा’’ति अधिप्पायनिच्छारितं हुंहुंकारं करोन्तो.

ब्रह्मञ्ञन्ति ब्राह्मणत्तं. अन्तन्ति निब्बानं. देवानं वा अन्तन्ति मग्गञाणानं वा अन्तभूतं अरहत्तफलं.

मुचलिन्दकथावण्णना

५. मुचलिन्दमूलेति एत्थ च मुचलिन्दो वुच्चति नीपरुक्खो, यो ‘‘निचुलो’’तिपि वुच्चति. उप्पन्नमेघोति सकलचक्कवाळगब्भं पूरेत्वा उप्पन्नो महामेघो. वद्दलिकाति वुट्ठिया एव इत्थिलिङ्गवसेन नामं. या च सत्ताहं पवत्तत्ता सत्ताहवद्दलिकाति वुत्ताति आह ‘‘सत्ताहं अविच्छिन्नवुट्ठिका अहोसी’’ति. सीतवातेन दूसितं दिनमेतिस्सा वद्दलिकायाति सीतवातदुद्दिनीति आह ‘‘उदकफुसितसम्मिस्सेना’’तिआदि. उब्बिद्धता नाम दूरभावेन उपट्ठानन्ति आह ‘‘मेघविगमेन दूरीभूत’’न्ति. इन्दनीलमणि विय दिब्बति जोतेतीति देवो, आकासो.

एतमत्थं विदित्वाति विवेकस्स सुखभावं विदित्वा. सब्बसो असन्तुट्ठिसमुच्छेदकत्ता मग्गञाणानं ‘‘चतुमग्गञाणसन्तोसेना’’ति वुत्तं. अकुप्पनभावोति अकुज्झनसभावो.

राजायतनकथावण्णना

६. पच्चग्घेति ¶ अभिनवे. अयमेव अत्थो पसत्थो, न पुरिमो. न हि बुद्धा महग्घं पत्तं परिभुञ्जन्ति.

ब्रह्मयाचनकथावण्णना

७. आलीयन्ति ¶ सेवीयन्तीति आलया. पञ्च कामगुणाति आह ‘‘सत्ता…पे… वुच्चन्ती’’ति. सुट्ठु मुदिताति अतिविय पमुदिता. ठानं सन्धायाति ठान-सद्दं अपेक्खित्वा. इमेसन्ति सङ्खारादीनं फलानं. पाळियं सब्बसङ्खारसमथोतिआदीनि निब्बानवेवचनानि. अपिस्सूति सम्पिण्डनत्थे निपातो. न केवलं एतदहोसि, इमापि गाथा पटिभंसूति अत्थो.

किच्छेन मे अधिगतन्ति पारमिपूरणं सन्धाय वुत्तं, न दुक्खापटिपदं. बुद्धानञ्हि चत्तारो मग्गा सुखापटिपदाव होन्ति. ह-इति ब्यत्तं, एकंसन्ति द्वीसु अत्थेसु निपातो, ब्यत्तं, एकंसेन वा अलन्ति वियोजेन्ति. हलन्ति वा एको निपातो.

८. पाळियं सहम्पतिस्साति सो किर कस्सपस्स भगवतो सासने सहको नाम थेरो पठमज्झानभूमियं ब्रह्मपति हुत्वा निब्बत्तो, तेन नं ‘‘सहम्पती’’ति सञ्जानिंसु. अस्सवनताति अस्सवनताय, अस्सवनेनाति अत्थो. सवनमेव हि सवनता यथा देवताति.

धम्मो असुद्धोति मिच्छादिट्ठिधम्मो. समलेहीति पूरणकस्सपादीहि छहि सत्थारेहि. अपापुराति देसनाहत्थेन विवर. द्वारन्ति अरियमग्गं सन्धाय वदति.

सेलेति घनसिलामये. तथूपमन्ति एत्थ तथा-सद्दो तं-सद्दत्थे दट्ठब्बो. तेन सो सेलपब्बतो उपमा यस्स. तं तथूपमन्ति अत्थो. तेन वा पब्बतादिना पकारेन उपमा अस्सातिपि अत्थो. धम्ममयन्ति लोकुत्तरधम्मभूतं. उट्ठाहीति धम्मदेसनत्थाय चारिकचरणत्थं इमम्हा आसना कायेन, अप्पोस्सुक्कभावतो वा चित्तेन उट्ठेहि, अयमेव वा पाठो. तेनेव ‘‘विचर, देसस्सू’’ति दुविधेपि कायचित्तपयोगे नियोजेसि. वीरातिआदि चत्तारि थुतिवसेन सम्बोधनानि.

९. बुद्धचक्खुनाति ¶ इन्द्रियपरोपरियत्तञाणेन, आसयानुसयञाणेन च. इमेसञ्हि द्विन्नं ‘‘बुद्धचक्खू’’ति नामं. स्वाकाराति सद्धिन्द्रियादयोव आकारा ¶ सुन्दरा येसं, ते स्वाकारा, सुविञ्ञापया, परलोकञ्च वज्जञ्च भयतो दस्सनसीला चाति दट्ठब्बं. उप्पलानि एत्थ सन्तीति उप्पलिनीति गच्छलतापि पोक्खरणीपि वुच्चति. इध पन पोक्खरणी. एवमितरेसुपि. उदकानुग्गतानीति उदकतो अनुग्गतानि. अन्तो निमुग्गानेव हुत्वा पुसन्ति वड्ढन्ति, तानि अन्तोनिमुग्गपोसीनि. अच्चुग्गम्माति उदकं अतिक्कमनवसेन उग्गन्त्वा.

अपारुताति विवटा. तेसन्ति सउपनिस्सयानं सत्तानं. द्वाराति अरियमग्गद्वारानि. इदञ्च अत्तनो सयम्भुञाणेन सउपनिस्सयानं तेसं मग्गुप्पत्तिदिट्ठतं सन्धाय वदति. विहिंससञ्ञीतिआदीसु एवमत्थो दट्ठब्बो – ‘‘अहञ्हि अत्तनो पगुणं सुप्पवत्तितम्पि इमं पणीतं धम्मं अजानन्तेसु मनुजेसु देसनाय विहिंसा कायवाचाकिलमथो होती’’ति एवं विहिंससञ्ञी हुत्वा न भासिं भासितुं न इच्छिं. इदानि पन हेतुसम्पन्ना अत्तनो सद्धाभाजनं विवरन्तु, पूरेस्सामि नेसं सङ्कप्पन्ति.

पञ्चवग्गियकथावण्णना

१०. आळारोति नामं. कालामोति गोत्तं. भगवतोपि खो ञाणं उदपादीति किं इदानेव उदपादि, ननु बोधिमूले तेकालिका, कालविनिमुत्ता च सब्बे धम्मा सब्बाकारतो दिट्ठाति? सच्चं दिट्ठा, तथापि नामादिवसेन अविकप्पिता एकचित्तक्खणिकत्ता सब्बञ्ञुतञ्ञाणस्स. न हि एकेन चित्तेन सब्बधम्मानं नामजातिआदिकं पच्चेकं अनन्तं विभागं विकप्पेतुं सक्का विकप्पानं विरुद्धानं सहानुप्पत्तितो, सब्बविकप्पारहधम्मदस्सनमेव पनानेन सक्का कातुं. यथा दिट्ठेसु पन यथिच्छिताकारं आरब्भ विकप्पो उप्पज्जति चक्खुविञ्ञाणेन दिट्ठे चित्तपटे विय. इधापि आळारं निस्साय आवज्जनानन्तरमेव सब्बाकारञाणं उदपादि. न केवलञ्च तं, अथ खो पञ्चवग्गिया एव पठमं धम्मं जानिस्सन्ति, तप्पमुखा च देवता, आळारो कालं कत्वा आकिञ्चञ्ञायतने, उदको च नेवसञ्ञानासञ्ञायतने निब्बत्तोति एवमादिकं सब्बम्पि निस्साय ञाणं उप्पज्जति एव. तं पन खणसम्पत्तिया दुल्लभभावं दस्सेतुं कमेन ओलोकेत्वा देवताय वुत्ते ञाणं विय कत्वा ¶ वुत्तं. सद्दगतिया हि बन्धत्ता एकेन ञाणेन ञातम्पि वुच्चमानं कमेन ञातं विय पटिभाति, देवतापि च भगवता ञातमेवत्थं आरोचेसि. तेनेव ‘‘भगवतोपि खो ञाणं उदपादी’’ति वुत्तन्ति दट्ठब्बं. एवमञ्ञत्थापि ईदिसेसु ‘‘लोकं वोलोकेन्तो असुकं अद्दस, तत्थ ¶ मयि गते किं भविस्सती’’ति एवमादिना सत्थु हितेसितासन्दस्सनवसप्पवत्तेसु. सब्बत्थ वचनगतियं कमवुत्तिते पञ्ञायमानेपि एकेनेव ञाणेन सकलावबोधो वेदितब्बो. बहुकारा खो मे पञ्चवग्गियाति उपकारस्सापि विज्जमानतं सन्धाय वुत्तं, न पन धम्मदेसनाय कारणत्तेन अनुपकारानम्पि देसनतो.

११. अन्तरा च गयं अन्तरा च बोधिन्ति गयाय, बोधिस्स च अन्तरे तिगावुते ठाने.

सब्बाभिभूति सब्बं तेभूमकधम्मं अभिभवित्वा ठितो. अनूपलित्तोति किलेसलेपेन अलित्तो. ततो एव सब्बञ्जहो. तण्हक्खये विमुत्तोति तण्हक्खये निब्बाने आरम्मणकरणवसएन विमुत्तो. एवं सयं सब्बधम्मे अत्तनाव जानित्वा. कमुद्दिसेय्यन्ति कं अञ्ञं ‘‘अयं मे आचरियो’’ति उद्दिसेय्यं.

कासिनं पुरन्ति बाराणसिं. आहञ्छन्ति आहनिस्सामि. अमताधिगमाय उग्घोसनतो अमतदुन्दुभिन्ति सत्थु धम्मदेसना वुत्ता, ‘‘अमतभेरिं पहरिस्सामी’’ति गच्छामीति अत्थो.

अरहसि अनन्तजिनोति अनन्तजिनोपि भवितुं युत्तोति अत्थो. अनन्तञाणताय अनन्तो जिनो च, अनन्तेन वा ञाणेन, अनन्तं वा दोसं जितवा, उप्पादवयन्तरहितताय वा अनन्तं निब्बानं अजिनि किलेसारयो मद्दित्वा गण्हीतिपि अनन्तजिनो.

हुपेय्यापीति एवम्पि भवेय्य, एवंविधे रूपकायरतने ईदिसेन ञाणेन भवितब्बन्ति अधिप्पायो. एवं नाम कथनञ्हिस्स उपनिस्सयसम्पन्नस्स अपरकाले दुक्खप्पत्तस्स भगवन्तं उपगम्म पब्बजित्वा मग्गफलपटिवेधाय पच्चयो जातो. तथाहेस भगवा तेन समागमत्थं पदसाव मग्गं पटिपज्जि.

१२. बाहुल्लिकोति ¶ पच्चयबाहुल्लिको. पधानविब्भन्तोति पधानतो दुक्करचरणतो परिहीनो. नत्थि एत्थ अगारियं, अगारस्स हितं कसिगोरक्खादिकम्मन्ति अनगारिया, पब्बज्जा, तं अनगारियं. पब्बजन्तीति उपगच्छन्ति. तदनुत्तरन्ति तं अनुत्तरं. ब्रह्मचरियपरियोसानन्ति मग्गब्रह्मचरियस्स परियोसानं, अरहत्तफलन्ति अत्थो. तस्स हि अत्थाय कुलपुत्ता पब्बजन्ति. दिट्ठेव धम्मेति इमस्मिं पच्चक्खे अत्तभावे. सयन्ति अपरप्पच्चया ¶ . अभिञ्ञा सच्छिकत्वाति अत्तनोव ञाणेन पच्चक्खं कत्वा. उपसम्पज्जाति पापुणित्वा.

इरियायाति दुक्करइरियाय. उत्तरिमनुस्सधम्मातिआदीसु मनुस्सधम्मतो लोकियञाणतो उपरि अरियं कातुं अलं समत्थो अलमरियो. ञाणदस्सनविसेसोति सब्बञ्ञुतञ्ञाणस्स पुब्बभागं अधिप्पेतं. नोति नु. भासितमेतन्ति एवरूपमेतं वाक्यभेदन्ति अत्थो. ते च ‘‘यदि एस पधानकाले ‘अहं अरहा’ति वदेय्य, मयञ्च सद्दहाम, न चानेन तदा वुत्तं. इदानि पन विज्जमानमेव गुणं वदती’’ति एकपदेन सतिं लभित्वा ‘‘बुद्धो जातो’’ति उप्पन्नगारवा आवुसोवादं पहाय ‘‘नो हेतं, भन्ते’’ति आहंसु. अञ्ञा चित्तन्ति अञ्ञाय अरहत्तप्पत्तिया चित्तं.

१३. अन्ताति कोट्ठासा द्वे भागा. कामेसु कामसुखल्लिकानुयोगोति वत्थुकामेसु किलेसकामसुखस्स अनुभवो. किलेसकामा एव वा आमिससुखेन अल्लीयनतो कामसुखल्लिकाति वुत्ताति दट्ठब्बा. गम्मोति गामवासीनं सन्तको. अत्तकिलमथानुयोगोति अत्तनो किलमथस्स कण्टकसेय्यादिदुक्खस्स अनुयोगो. उभो अन्तेति यथावुत्ते लोभो वा सस्सतो वा एको अन्तो, दोसो वा उच्छेदो वा एकोति वेदितब्बो.

चक्खुकरणीतिआदीसु अत्तना सम्पयुत्तञाणचक्खुं करोतीति चक्खुकरणी. दुतियं तस्सेव वेवचनं. उपसमोति किलेसुपसमो. अभिञ्ञा, सम्बोधो च चतुसच्चपटिवेधोव. निब्बानं असङ्खतधातु. एतेसम्पि अत्थाय संवत्ततीति पटिपदं थोमेति. सम्मादिट्ठीति ञाणं. सम्मासङ्कप्पोति वितक्को. सेसं धम्मतो सुविञ्ञेय्यमेव.

१४. एवं ¶ चत्तारोपि मग्गे एकतो दस्सेत्वा इदानि तेहि मग्गेहि पटिविज्झितब्बानि चत्तारि अरियसच्चानि दस्सेतुं ‘‘इदं खो पन, भिक्खवे’’तिआदिमाह. जातिपि दुक्खातिआदीसु तत्थ तत्थ भवे निब्बत्तमानानं सत्तानं सब्बपठमं रूपारूपधम्मप्पवत्ति इध जाति नाम, सा च तत्थ तत्थ भवेसु उपलब्भमानानं दुक्खादीनं वत्थुभावतो दुक्खा, एवं जरादीसु दुक्खवत्थुकताय दुक्खता वेदितब्बा. पञ्चुपादानक्खन्धा पन दुक्खदुक्खविपरिणामदुक्खसङ्खारदुक्खवसेन दुक्खा एव. पोनोभविकाति पुनब्भवकरणं पुनब्भवो उत्तरपदलोपेन, पुनब्भवो सीलमेतिस्साति पोनोभविका. नन्दिरागसहगताति एत्थ रूपादीसु नन्दति पियायतीति नन्दी, सा एव रागोति नन्दिरागोति भावप्पधानोयं निद्देसो, नन्दिरागत्तन्ति ¶ अत्थो. तेन सहगतानि नन्दिरागसहगता. तत्र तत्राति तस्मिं तस्मिं भवे. रूपादीसु छसु आरम्मणेसु कामस्सादनवसेन पवत्ता कामतण्हा नाम. सस्सतदिट्ठिया सह पवत्ता भवतण्हा. उच्छेददिट्ठिया सह पवत्ता विभवतण्हा. असेसविरागनिरोधोतिआदिना निब्बानमेव वुच्चति. तत्थ विरज्जनं विगमनं विरागो. निरुज्झनं निरोधो. उभयेनापि सुट्ठु विगमोव वुच्चति. असेसायपि तण्हाय विरागो, निरोधो च येन होति, सो असेसविरागनिरोधो, निब्बानमेव. यस्मा च तं आगम्म तण्हं, वट्टञ्च चजन्ति पटिनिस्सज्जन्ति विमुच्चन्ति न अल्लीयन्ति, तस्मा चागो पटिनिस्सग्गो मुत्ति अनालयोति वुच्चति.

१५. चक्खुन्तिआदीनि ञाणवेवचनानेव.

१६. यावकीवञ्चाति यत्तकं कालं. तिपरिवट्टन्ति सच्चञाण, किच्चञाण, कतञाणसङ्खातानं तिण्णं परिवट्टानं वसेन तिपरिवट्टं ञाणदस्सनं. एत्थ च ‘‘इदं दुक्खं अरियसच्चं, इदं दुक्खसमुदय’’न्ति एवं चतूसु सच्चेसु यथाभूतञाणं सच्चञाणं नाम. तेसु एव ‘‘परिञ्ञेय्यं पहातब्बं सच्छिकातब्बं भावेतब्ब’’न्ति एवं कत्तब्बकिच्चजाननञाणं किच्चञाणं नाम. ‘‘परिञ्ञातं पहीनं सच्छिकतं भावित’’न्ति तस्स किच्चस्स कतभावजाननञाणं कतञाणं नाम. द्वादसाकारन्ति तेसमेव एकेकस्मिं सच्चे तिण्णं तिण्णं आकारानं वसेन द्वादसाकारं.

अभिसम्बुद्धोति पच्चञ्ञासिन्ति अभिसम्बुद्धो अरहत्तं पत्तोति एवं न पटिजानिं. यतो च खोति यतो बोधिमूले निसिन्नकालतो पट्ठाय ¶ . अथाहन्ति ततो परं अहं. ञाणञ्च पन मेति पच्चवेक्खणञाणं सन्धाय वदति. अकुप्पा मेतिआदि तस्स पवत्तिआकारदस्सनं. तत्थ अकुप्पा मे विमुत्तीति अरहत्तफलं तस्स मग्गसङ्खातकारणतो च आरम्मणतो च अकुप्पता वेदितब्बा.

इमस्मिं पन वेय्याकरणस्मिन्ति निग्गाथसुत्ते. भञ्ञमानेति भणियमाने. धम्मचक्खुन्ति इध चतुसच्चधम्मेसु चक्खुकिच्चकरणतो सोतापत्तिमग्गो अधिप्पेतो. यं किञ्चीतिआदि निब्बानारम्मणत्तेपि किच्चवसेन असम्मोहतो पवत्तिदस्सनत्थं वुत्तं.

१७. धम्मचक्कन्ति पटिवेधञाणधम्मञ्चेव देसनाञाणधम्मञ्च पवत्तनट्ठेन चक्कन्ति धम्मचक्कं ¶ . ओभासोति सब्बञ्ञुतञ्ञाणानुभावेन पवत्तो चित्तपच्चयउतुसमुट्ठानो दससहस्सिलोकधातुं फरित्वा ठितो ओभासो.

१८. दिट्ठो अरियसच्चधम्मो एतेनाति दिट्ठधम्मो. एस नयो सेसेसुपि. अत्तनो पच्चक्खतो अधिगतत्ता न परं पच्चेति, परस्स सद्धाय एत्थ न पवत्ततीति अपरप्पच्चयो. एहि भिक्खूति एत्तके वुत्तमत्ते पब्बज्जा, उपसम्पदा च सिज्झति, तेनेव तत्थ इति-सद्देन परिच्छेदो दस्सितोति वदन्ति. केचि पन ‘‘सम्मा दुक्खस्स अन्तकिरियायाति वचनपरियोसाने एव उपसम्पदा सिज्झति, अट्ठकथायं पन ‘एहि भिक्खूति भगवतो वचनेना’ति इदं एहिभिक्खुसद्दोपलक्खितवचनं एहिभिक्खुवचनन्तिआदिपदवसेन वुत्तं मुसावादवग्गोतिआदीसु विया’’ति वदन्ति, तदेतं पठमपाराजिकट्ठकथायं ‘‘भगवा हि…पे… एहि भिक्खु, चर ब्रह्मचरियं सम्मा दुक्खस्स अन्तकिरियाया’’ति (पारा. अट्ठ. १.४५ भिक्खूपदभाजनीयवण्णना) इमिना वचनेन समेति. यत्तकञ्हि भगवता नियमेन वुच्चति, तत्तकं सब्बम्पि अङ्गमेव. सेक्खपुथुज्जनानञ्हि एतं परिपुण्णं वुच्चति, असेक्खानं पन ‘‘चर ब्रह्मचरिय’’न्ति परियोसानन्ति दट्ठब्बं सिक्खत्तयसमिद्धितो. लोकियसम्पदाहि उपरिभूता सेट्ठभूता सम्पदाति उपसम्पदा.

१९-२१. नीहारभत्तोति भिक्खूहि गामतो नीहरित्वा दिन्नभत्तो. कल्लं नूति युत्तं नु. एतं ममातिआदि यथाक्कमं तण्हामानदिट्ठिगाहानं दस्सनं.

२२-२३. तस्मा ¶ तिहाति एत्थ तिहाति निपातमत्तं, तस्माति अत्थो. निब्बिन्दतीति वुट्ठानगामिनिविपस्सनावसेन उक्कण्ठति. विरज्जतीति चतुन्नं मग्गानं वसेन न रज्जति. विमुच्चतीति फलवसेन विमुच्चति. विमुत्तस्मिन्तिआदि पच्चवेक्खणञाणदस्सनं. ब्रह्मचरियन्ति मग्गब्रह्मचरियं. करणीयं चतूसु सच्चेसु चतूहि मग्गेहि पच्चेकं कत्तब्बं परिञ्ञादिवसेन सोळसविधं किच्चं. नापरं इत्थत्तायाति इत्थभावाय सोळसकिच्चभावाय, किलेसक्खयाय वा अपरं पुन मग्गभावनाकिच्चं मे नत्थीति पजानाति. अथ वा इत्थत्तायाति इत्थभावतो वत्तमानक्खन्धसन्तानतो अपरं खन्धसन्तानं मय्हं न भविस्सतीति अत्थो.

पब्बज्जाकथावण्णना

१५. आळम्बरन्ति पणवं. विकेसिकन्ति विप्पकिण्णकेसं. विक्खेळिकन्ति विस्सन्दमानलालं ¶ . सुसानं मञ्ञेति सुसानं विय अद्दस सकं परिजनन्ति सम्बन्धो. उदानं उदानेसीति संवेगवसप्पवत्तं वचनं निच्छारेसि. उपस्सट्ठन्ति दुक्खेन सम्मिस्सं, दुक्खोतिण्णं सब्बसत्तकायजातन्ति अत्थो.

२६. इदं खो यसाति भगवा निब्बानं सन्धायाह. अनुपुब्बिं कथन्ति अनुपटिपाटिकथं. आदीनवन्ति दोसं. ओकारन्ति निहीनता निहीनजनसेवितत्ता. संकिलेसन्ति तेहि सत्तानं संकिलेसनं, संकिलेसविसयन्ति वा अत्थो. कल्लचित्तन्ति अरोगचित्तं. सामं अत्तनाव उक्कंसो उक्खिपनं एतिस्सन्ति सामुक्कंसिका, सच्चदेसना. तस्सा सरूपदस्सनं ‘‘दुक्ख’’न्तिआदि.

२७. अस्सदूतेति अस्सआरुळ्हे दूते. इद्धाभिसङ्खारन्ति इद्धिकिरियं. अभिसङ्खरेसि अकासि.

२८. यथादिट्ठन्ति पठममग्गेन दिट्ठं चतुस्सच्चभूमिं सेसमग्गत्तयेन पच्चवेक्खन्तस्स, पस्सन्तस्साति अत्थो. मातु नो जीवितन्ति एत्थ नोति निपातमत्तं, मातु जीवितन्ति अत्थो. यसस्स खीणासवत्ता ‘‘एहि भिक्खु, स्वाक्खातो धम्मो, चर ब्रह्मचरिय’’न्ति एत्तकेनेव भगवा उपसम्पदं अदासि. खीणासवानञ्हि एत्तकेनेव उपसम्पदा अनुञ्ञाता पुब्बेव दुक्खस्स परिक्खीणत्ता. चर ब्रह्मचरियन्ति सासनब्रह्मचरियसङ्खातं सिक्खापदपूरणं सन्धाय वुत्तं, न मग्गब्रह्मचरियं.

३०. सेट्ठानुसेट्ठीनन्ति ¶ सेट्ठिनो च अनुसेट्ठिनो च पवेणीवसेन आगता येसं कुलानं सन्ति, तेसं सेट्ठानुसेट्ठीनं कुलानं. ओरकोति लामको.

३२-३३. मा एकेन द्वेति एकेन मग्गेन द्वे भिक्खू मा अगमित्थ. विसुद्धे सत्ते, गुणे वा मारेतीति मारो. पापे नियुत्तो पापिमा.

सब्बपासेहीति सब्बकिलेसपासेहि. ये दिब्बा ये च मानुसाति ये दिब्बकामगुणनिस्सिता, मानुसककामगुणनिस्सिता च किलेसपासा नाम अत्थि, सब्बेहि तेहि. ‘‘त्वं बुद्धो’’ति देवमनुस्सेहि करियमानसक्कारसम्पटिच्छनं सन्धाय वदति.

अन्तलिक्खे ¶ चरन्ते पञ्चाभिञ्ञेपि बन्धतीति अन्तलिक्खचरो, रागपासो. मारो पन पासम्पि अन्तलिक्खचरं मञ्ञति. मानसोति मनोसम्पयुत्तो.

जानाति मन्ति सो किर ‘‘महानुभावो अञ्ञो देवपुत्तो निवारेतीति भीतो निवत्तिस्सति नु खो’’तिसञ्ञाय वत्वा ‘‘निहतो त्वमसि अन्तका’’ति वुत्ते ‘‘जानाति म’’न्ति दुम्मनो पलायि.

३४. परिवितक्को उदपादीति यस्मा एहिभिक्खुभावाय उपनिस्सयरहितानम्पि पब्बजितुकामता उप्पज्जिस्सति, बुद्धा च ते न पब्बाजेन्ति, तस्मा तेसम्पि पब्बज्जाविधिं दस्सेन्तो एवं परिवितक्केसीति दट्ठब्बं. उपनिस्सयसम्पन्ना पन भगवन्तं उपसङ्कमित्वा एहिभिक्खुभावेनेव पब्बजन्ति. ये पटिक्खित्तपुग्गलाति सम्बन्धो. सयं पब्बाजेतब्बोति एत्थ ‘‘केसमस्सुं ओहारेत्वा’’तिआदिवचनतो केसच्छेदनकासायच्छादनसरणदानानि पब्बज्जा नाम, तेसु पच्छिमद्वयं भिक्खूहि एव कातब्बं, कारेतब्बं वा. ‘‘पब्बाजेही’’ति इदं तिविधम्पि सन्धाय वुत्तं. खण्डसीमं नेत्वाति भण्डुकम्मारोचनपरिहरणत्थं. भिक्खूनञ्हि अनारोचेत्वा एकसीमाय ‘‘एतस्स केसे छिन्दा’’ति अञ्ञं आणापेतुम्पि न वट्टति. पब्बाजेत्वाति केसादिच्छेदनमेव सन्धाय वुत्तं ‘‘कासायानि अच्छादेत्वा’’ति विसुं वुत्तत्ता. पब्बाजेतुं न लभतीति सरणदानं सन्धाय वुत्तं, अनुपसम्पन्नेन भिक्खुआणत्तिया दिन्नम्पि सरणं न रुहति.

यसस्सीति परिवारसम्पन्नो. निज्जीवनिस्सत्तभावन्ति ‘‘केसा नाम इमस्मिं सरीरे पाटियेक्को कोट्ठासो अचेतनो अब्याकतो सुञ्ञो ¶ निस्सत्तो थद्धो पथवीधातू’’तिआदिनयं सङ्गण्हाति, सब्बं विसुद्धिमग्गे (विसुद्धि. १.३११) आगतनयेन गहेतब्बं. पुब्बेति पुब्बबुद्धुप्पादेसु. मद्दितसङ्खारोति विपस्सनावसेन वुत्तं. भावितभावनोति समथवसेनापि.

कासायानि तिक्खत्तुं वा…पे… पटिग्गाहापेतब्बोति एत्थ ‘‘सब्बदुक्खनिस्सरणत्थाय इमं कासावं गहेत्वा’’ति वा ‘‘तं कासावं दत्वा’’ति वा वत्वा ‘‘पब्बाजेथ मं, भन्ते, अनुकम्पं उपादाया’’ति एवं याचनपुब्बकं चीवरं पटिच्छापेति. अथापीतिआदि तिक्खत्तुं पटिग्गाहापनतो परं कत्तब्बविधिदस्सनं. अथापीति ततो परम्पीति अत्थो. केचि पन ‘‘चीवरं अप्पटिग्गाहापेत्वा पब्बजनप्पकारभेददस्सनत्थं ‘‘अथापी’’ति वुत्तं, अथापीति च अथ वाति अत्थो’’ति वदन्ति. ‘‘अदिन्नं न वट्टती’’ति इमिना पब्बज्जा न रुहतीति दस्सेति.

पादे ¶ वन्दापेत्वाति पादाभिमुखं नमापेत्वा. दूरे वन्दन्तोपि हि पादे वन्दतीति वुच्चति. उपज्झायेन वाति एत्थ यस्स सन्तिके उपज्झं गण्हाति, अयं उपज्झायो. आभिसमाचारिकेसु विनयनत्थं यं आचरियं कत्वा निय्यातेन्ति, अयं आचरियो. सचे पन उपज्झायो सयमेव सब्बं सिक्खापेति, अञ्ञस्मिं न निय्यातेति, उपज्झायोवस्स आचरियोपि होति, यथा उपसम्पदाकाले सयमेव कम्मवाचं वाचेन्तो उपज्झायोव कम्मवाचाचरियोपि होति.

अनुनासिकन्तं कत्वा दानकाले अन्तरा विच्छेदो न कातब्बोति आह ‘‘एकसम्बन्धानी’’ति.

‘‘आभिसमाचारिकेसु विनेतब्बो’’ति इमिना सेखियवत्तखन्धकवत्तेसु, अञ्ञेसु

च सुक्कविस्सट्ठिआदिलोकवज्जसिक्खापदेसु सामणेरेहि वत्तितब्बं, तत्थ अवत्तमानो अलज्जी, दण्डकम्मारहो च होतीति दस्सेति.

पब्बज्जाकथावण्णना निट्ठिता.

दुतियमारकथावण्णना

३५. पाळियं ¶ अनुत्तरं विमुत्तिं अनुपापुणाथाति ‘‘खीणासवा मयं, किं अम्हाकं पधानेना’’ति वासनादोसेन वोसानं अनापज्जित्वा पन्तेसु सेनासनेसु फलसमापत्तियाव वीतिनामनत्थं, तं दिस्वा अञ्ञेसम्पि दिट्ठानुगतिसमापज्जनत्थञ्च ओवदतीति वेदितब्बं.

दुतियमारकथावण्णना निट्ठिता.

भद्दवग्गियकथावण्णना

३६. इदं नेसं पुब्बकम्मन्ति तेसं तिंसजनानं एकतो अभिसमयस्स पुब्बकम्मं. अञ्ञम्पि तेसं पच्चेकं पुब्बबुद्धुप्पादेसु सद्धम्मस्सवनसरणगमनदानसीलसमाधिविपस्सनासमायोगवसेन बहुं विवट्टूपनिस्सयं कुसलं अत्थेवाति गहेतब्बं. इतरथा हि तदहेव पटिवेधो, एहिभिक्खुभावादिविसेसो च न सम्पज्जेय्य.

भद्दवग्गियकथावण्णना निट्ठिता.

उरुवेलपाटिहारियकथावण्णना

३७-३८. पाळियं ¶ अगरूति भारियं न सियाति अत्थो. उभिन्नं सजोतिभूतानन्ति उभोसु सजोतिभूतेसु. पत्ते पक्खिपीति तं नागं निहततेजं धम्मदेसनाय सन्तप्पेत्वा सरणसीलानि दत्वा सकलरत्तिं भगवन्तं पयिरुपासित्वा ठितं जटिलानं दस्सनत्थं पत्ते पक्खिपि, न अहितुण्डिको विय बलक्कारेनाति वेदितब्बं. यत्र हि नामाति यो नाम.

३९. अज्जण्होति अज्ज एकदिवसं. अग्गिसालम्हीति अग्यागारे. सुमनानं बुद्धानं मनसा सदिसो मनो अस्साति सुमनमनसो. अधिचित्तोति महाकरुणादीहि अधिचित्तो. उदिच्छरेति उल्लोकेसुं, परिवारेसुन्ति अत्थो. अनेकवण्णा अच्चियोति छब्बण्णरंसियो वुत्ता. अहं ते धुवभत्तेन पटिमाननं करिस्सामीति सेसो.

४०. अभिक्कन्ताय ¶ रत्तियाति परिक्खीणाय रत्तिया, मज्झरत्तिसमयेति अत्थो. अभिक्कन्तवण्णाति अभिरूपच्छविवण्णा. केवलकप्पन्ति एत्थ केवल-सद्दस्स अनवसेसत्थो, कप्प-सद्दस्स समन्तभावो, तस्मा अनवसेसं समन्ततो वनसण्डन्ति अत्थो. चतुद्दिसाति चतूसु दिसासु. यत्र हि नामाति यं नाम.

४३. अङ्गमगधाति अङ्गमगधरट्ठवासिनो. इद्धिपाटिहारियन्ति अभिञ्ञिद्धियेव पटिपक्खानं तित्थियानं, वेनेय्यसत्तगतदोसानञ्च हरणतो अपनयनतो पाटिहारियं, तं तं वा सत्तहितं पटिच्च हरितब्बं पवत्तेतब्बन्ति पटिहारियं, तदेव पाटिहारियं. इद्धि एव पाटिहारियं इद्धिपाटिहारियं.

४४. पंसुकूलं उप्पन्नं होतीति पुण्णाय दासिया सरीरं परिक्खिपित्वा छड्डितं साणमयं किमिकुलाकुलं परियेसनवसेन उप्पन्नं होति, यं भगवा भूमिं कम्पेन्तो पारुपित्वा पच्छा महाकस्सपत्थेरस्स अदासि, तं सन्धायेतं वुत्तन्ति वदन्ति. कत्थ नु खोतिआदिपरिवितक्को जटिलानं विविधपाटिहारियदस्सनत्थं कतो. पाणिना खणन्तो विय इद्धिया मत्तिकं अपनेत्वा दिन्नत्ता वुत्तं ‘‘पाणिना पोक्खरणिं खणित्वा’’ति.

४६. फालियन्तु, कस्सप, कट्ठानीति उरुवेलकस्सपेन निवेदिते एवमवोचाति दट्ठब्बं. एवं सेसेसुपि.

४९. अन्तरट्ठकासु ¶ हिमपातसमयेति एत्थ माघमासस्स अवसाने चतस्सो, फग्गुणमासस्स आदिम्हि चतस्सोति एवं उभिन्नं मासानं अन्तरे अट्ठरत्तियो अन्तरट्ठका नाम. तासु अन्तरट्ठकासु रत्तीसु हिमपातकाले. उम्मुज्जननिमुज्जनम्पि सहसा तदुभयकरणवसेन वुत्तं.

५०. उदकवाहकोति उदकोघो. रेणुहतायाति रजोकिण्णाय, अतिन्तायाति अत्थो. नावायाति कुल्लेन. इदं नु त्वं महासमणाति इध नु त्वं. ध-कारस्स द-कारं, अनुसारञ्च कत्वा ‘‘इदं नू’’ति वुत्तं ‘‘एकमिदाह’’न्तिआदीसु (दी. नि. १.१६५, २६५) विय. ‘‘इमस्मिं पदेसे त्वं नु खो ठितोसी’’ति पुच्छि. अयमहमस्मीति अयमहं इध ठितोस्मीति अत्थो.

५१. चिरपटिकाति ¶ चिरकालतो पट्ठाय. केसमिस्सं सब्बं परिक्खारं उदके पवाहेत्वातिपि योजेतब्बं. अरणिकमण्डलुआदिका तापसपरिक्खारा खारी नाम, तंहरणककाजं खारिकाजं नाम. अग्गिहुतमिस्सन्ति अग्गिपूजोपकरणसहितं.

५२-३. उपसग्गोति उपद्दवो. ‘‘अड्ढुड्ढानि पाटिहारियसहस्सानी’’ति इदं नागदमनादीनि पन्नरस पाटिहारियानि वज्जेत्वा वुत्तं अप्पकमधिकं गणनूपगं न होतीति.

५४. गयायन्ति गयानामिकाय नदिया अदूरभवत्ता गामो इत्थिलिङ्गवसेन गया नाम जातो, तस्सं. गयासीसेति एवंनामके पिट्ठिपासाणे.

‘‘यमिदं चक्खुसम्फस्सपच्चया…पे… सुखं वा’’तिआदिना चक्खुविञ्ञाणवीथिचित्तेसु सोमनस्सदोमनस्सउपेक्खावेदनामुखेन सेसारूपक्खन्धानम्पि आदित्ततं दस्सेति. एस नयो सेसेसुपि. मनोति भवङ्गचित्तं मनोद्वारस्स अधिप्पेतत्ता. मनोविञ्ञाणन्ति मनोद्वारवीथिपअयापन्नमेव गहितं.

उरुवेलपाटिहारियकथावण्णना निट्ठिता.

बिम्बिसारसमागमकथावण्णना

५५. यञ्ञा ¶ अभिवदन्तीति यागहेतु इज्झन्तीति वदन्ति. उपधीसूति एत्थ दुक्खसुखादीनं अधिट्ठानट्ठेन चत्तारो उपधी कामखन्धकिलेसअभिसङ्खारूपधीनं वसेन. तेसु खन्धूपधि इधाधिप्पेतोति आह ‘‘खन्धूपधीसु मलन्ति ञत्वा’’ति. यञ्ञाति यञ्ञहेतु. यिट्ठेति महायागे. हुतेति दिवसे दिवसे कत्तब्बे अग्गिपरिचरणे. किं वक्खामीति कथं वक्खामि.

५७-८. आसीसनाति मनोरथा. सिङ्गीसुवण्णनिक्खेनाति सिङ्गीसुवण्णस्स रासिना. सुवण्णेसु हि युत्तिकतं हीनं. ततो रसविद्धं सेट्ठं, ततो आकरुप्पन्नं सेट्ठं, ततो यंकिञ्चि दिब्बसुवण्णं सेट्ठं ¶ , तत्रापि चामीकरं, ततो सातकुम्भं, ततो जम्बुनदं, ततोपि सिङ्गीसुवण्णं सेट्ठं. तस्स निक्खं नाम पञ्चसुवण्णपरिमाणं. अट्ठसुवण्णादिभेदं अनेकविधम्पि वदन्ति. दससु अरियवासेसूति –

‘‘इध, भिक्खवे, भिक्खु पञ्चङ्गविप्पहीनो होति छळङ्गसमन्नागतो एकारक्खो चतुरापस्सेनो पणुन्नपच्चेकसच्चो समवयसट्ठेसनो अनाविलसङ्कप्पो पस्सद्धकायसङ्खारो सुविमुत्तचित्तो सुविमुत्तपञ्ञो’’ति (दी. नि. ३.३४८, ३६०; अ. नि. १०.१९) –

एवमागतेसु दससु अरियवासेसु. तत्थ पञ्चङ्गविप्पहीनोति पञ्चनीवरणेहि विप्पयुत्तता वुत्ता. छळङ्गसमन्नागतोति इट्ठादीसु छसु आरम्मणेसु सोमनस्सितादिपटिपक्खा छळङ्गुपेक्खा वुत्ता. एकारक्खोति उपट्ठितसतिता. सङ्खायसेवना अधिवासना परिवज्जना विनोदनासङ्खातानि चत्तारि अपस्सेना निस्सया एतस्साति चतुरापस्सेनो, एतेन च ते निस्सया दस्सिता. पणुन्नानि अपनीतानि दिट्ठिगतिकेहि पच्चेकं गहितानि दिट्ठिसच्चानि यस्स, सो पणुन्नपच्चेकसच्चो, तेन लोकियञाणेन दिट्ठिप्पहानं वुत्तं. कामेसना भवेसनाब्रह्मचरियेसनासङ्खाता एसना सम्मदेव अवया अनूना सट्ठा निसट्ठा अनेनाति समवयसट्ठेसनो. एतेन तिण्णं एसनानं अभावो वुत्तो. ‘‘अनाविलसङ्कप्पो’’ति इमिना कामवितक्कादीहि अनाविलचित्तता. ‘‘पस्सद्धकायसङ्खारो’’ति इमिना चतुत्थज्झानसमायोगेन विगतदरथता वुत्ता. ‘‘सुविमुत्तचित्तो’’ति इमिना मग्गो. ‘‘सुविमुत्तपञ्ञो’’ति इमिना पच्चवेक्खणञाणमुखेन फलञाणं वुत्तं. एते हि अरिया वसन्ति एत्थाति अरियवासाति वुच्चन्ति ¶ . ते पन वासा वुत्था वसिता सम्पादिता येन, सो वुत्थवासो, भगवा. दसबलोति दसहि कायबलेहि, ञाणबलेहि च उपेतो. यानि हेतानि –

‘‘काळावकञ्च गङ्गेय्यं, पण्डरं तम्बपिङ्गलं;

गन्धमङ्गलहेमञ्च, उपोसथछद्दन्तिमे दसा’’ति. (म. नि. अट्ठ. १.१४८; सं. नि. अट्ठ. २.२.२२; अ. नि. अट्ठ. ३.१०.२१; विभ. अट्ठ. ७६०; उदा. अट्ठ. ७५; बु. व. अट्ठ. १.३९; चूळनि. अट्ठ. ८१; पटि. म. अट्ठ. २.२.४४) –

एवं ¶ वुत्तानि दसहत्थिकुलानि पुरिमपुरिमतो दसबलगुणोपेतानि, तेसु सब्बजेट्ठानं दसन्नं छद्दन्तानं बलानि भगवतो कायस्स दसबलानि नाम. तञ्च काळावकसङ्खातानं पकतिहत्थीनं कोटिसहस्सस्स, मज्झिमपुरिसानं पन दसन्नं कोटिसहस्सानञ्च बलं होति, तं ‘‘नारायनसङ्घातबल’’न्तिपि वुच्चति.

यानि पनेतानि पाळियं ‘‘इध, सारिपुत्त, तथागतो ठानञ्च ठानतो अट्ठानञ्च अट्ठानतो यथाभूतं पजानाती’’तिआदिना (म. नि. १.१४८; अ. नि. १०.२१; विभ. ७६०; पटि. म. २.४४) वुत्तानि ठानाठानञाणबलं, कम्मविपाकञाणबलं, सब्बत्थगामिनिपटिपदाञाणबलं, अनेकधातुनानाधातुलोकञाणबलं, सत्तानं नानाधिमुत्तिकताञाणबलं, इन्द्रियपरोपरियत्तञाणबलं, झानविमोक्खसमाधिसमापत्तीनं संकिलेसवोदानवुट्ठानञाणबलं, पुब्बेनिवासञाणबलं, दिब्बचक्खुञाणबलं, आसवक्खयञाणबलन्ति दसबलञाणानि, इमानि भगवतो दसबलानि नाम. दसहि असेक्खेहि अङ्गेहीति अरहत्तफलसम्पयुत्तेहि पाळियं ‘‘असेक्खा सम्मादिट्ठि…पे… असेक्खो सम्मासमाधि, असेक्खं सम्माञाणं, असेक्खा सम्माविमुत्ती’’ति (दी. नि. ३.३४८, ३६०) एवं वुत्तेहि दसहि असेक्खधम्मेहि समन्नागतो. एत्थ च दस्सनट्ठेन वुत्ता सम्मादिट्ठि एव जाननट्ठेन सम्माञाणन्तिपि वुत्ता, वुत्तावसेसा पन फलचित्तसम्पयुत्ता सब्बे फस्सादिधम्मा सम्माविमुत्तीति वुत्ताति दट्ठब्बं.

बिम्बिसारसमागमकथावण्णना निट्ठिता.

सारिपुत्तमोग्गल्लानपब्बज्जाकथावण्णना

६०. सारीब्राह्मणिया ¶ पुत्तो सारिपुत्तो. मोग्गलीब्राह्मणिया पुत्तो मोग्गल्लानो. छन्नपरिब्बाजकस्साति सेतवत्थेन हिरिकोपीनं छादेत्वा विचरणकपरिब्बाजकस्स, तेन ‘‘नायं नग्गपरिब्बाजको’’ति दस्सेति. ‘‘उपञ्ञात’’न्ति इमस्स विवरणं ञातो चेवाति. ‘‘मग्ग’’न्ति इमस्स विवरणं उपगतो च मग्गोति. तेन च उपञ्ञातन्ति एत्थ ञात-सद्दो ञाणपरियायो. मग्गन्ति लिङ्गविपल्लासेन मग्गोव वुत्तो. उपसद्दो च उपगमनत्थो मग्गसद्देनपि सम्बन्धितब्बोति दस्सेति. इदं वुत्तं होति – यस्मा ¶ पिट्ठितो पिट्ठितो अनुबन्धनं नाम अत्थिकेहि उपञ्ञातं उपगतञाणञ्चेव होति, तेहि उपगतो पटिपन्नो मग्गो च, तस्मा यंनूनाहं अनुबन्धेय्यन्ति. उपञ्ञातं निब्बानन्ति उपपत्तिया अनुमानेन ञातं निब्बानं. ‘‘मग्ग’’न्ति इमस्स विवरणं मग्गन्तोति, अनुमानेन ञातं पच्चक्खतो दस्सनत्थाय गवेसन्तोति अत्थो.

निरोधो च निरोधूपायो च एकसेसेन निरोधोति वुत्तोति दस्सेन्तो ‘‘अथ वा’’तिआदिमाह. पटिपादेन्तोति निगमेन्तो.

इतो उत्तरीति इतो मया लद्धसोतापत्तितो उत्तरि इतरमग्गत्तयं यदिपि नत्थि, तथापि एसो एव मया गवेसितो निब्बानधम्मोति अत्थो.

६२-३. तदारम्मणायाति निब्बानारम्मणाय सोतापत्तिफलविमुत्तिया. तेसं आयस्मन्तानन्ति सपरिसानं तेसं द्विन्नं परिसानं तस्मिंयेव खणे भगवतो धम्मं सुत्वा अरहत्तं पापुणि, अग्गसावका पन अत्तनो ञाणकिच्चस्स महन्तताय कतिपाहच्चयेन. तेनाह ‘‘एव’’न्तिआदि. उसूयनकिरियाय कम्मभावं सन्धाय ‘‘उपयोगत्थेवा’’ति वुत्तं.

सारिपुत्तमोग्गल्लानपब्बज्जाकथावण्णना निट्ठिता.

उपज्झायवत्तकथावण्णना

६४. वज्जावज्जन्ति खुद्दकं, महन्तञ्च वज्जं. उत्तिट्ठपत्तन्ति एत्थ उत्तिट्ठं नाम पिण्डाय चरणं वुच्चति ‘‘उत्तिट्ठे नप्पमज्जेय्या’’तिआदीसु (ध. प. १६८) विय. उत्तिट्ठत्थाय ¶ गहितं पत्तं उत्तिट्ठपत्तं, तेनाह ‘‘पिण्डाय चरणकपत्त’’न्ति. तस्स उपनामे को दोसोति आह ‘‘तस्मिं ही’’तिआदि. तस्माति यस्मा मनुस्सा एतस्मिंयेव एते भुञ्जन्तीति उत्तिट्ठपत्ते उच्छिट्ठसञ्ञिनो, तस्मा उत्तिट्ठपत्तन्ति वुत्तं उत्तिट्ठ-सद्देनेव मनुस्सानं सञ्ञाय उच्छिट्ठतापि गम्मतीति. केचि पन ‘‘उच्छिट्ठसद्देन समानत्थो उत्तिट्ठसद्दो’’ति वदन्ति. ‘‘उत्तिट्ठा’’ति त्वापच्चयन्तोपि होतीति आह ‘‘उट्ठहित्वा’’ति. उपज्झायं गहेतुन्ति उपज्झायत्तं ¶ मनसा गहेतुं, याचनवचनेन तस्स अनुमतिं गहेतुन्ति वा अत्थो.

६५. पतिस्सयनं पतिस्सो, गरुं निस्साय वत्तनभावो, यंकिञ्चि गारवन्ति अत्थो. सह पतिस्सेन सप्पतिस्सो, परं जेट्ठं कत्वा तस्सोवादे वत्तनताति अत्थो. तेनाह ‘‘जेट्ठकभावञ्च उपट्ठपेत्वा’’ति. साहूति साधु सुन्दरं. लहूति अगरु, सुभरताति अत्थो. ओपायिकन्ति उपायपटिसंयुत्तं, एवं पटिपज्जनं नित्थरणूपायोति अत्थो. पतिरूपन्ति सामीचिकम्ममिदन्ति अत्थो. पासादिकेनाति पसादावहेन कायवचीपयोगेन सम्पादेहीति अत्थो. कायेनाति एतदत्थविञ्ञापकं हत्थमुद्दादिं दस्सेन्तो कायेन विञ्ञापेति. साधूति सम्पटिच्छनं सन्धायाति उपज्झायेन ‘‘साहू’’तिआदीसु वुत्तेसु सद्धिविहारिकस्स ‘‘साधू’’ति सम्पटिच्छनं वचनं सन्धाय ‘‘कायेन विञ्ञापेती’’तिआदि वुत्तन्ति अधिप्पायो. आयाचनदानमत्तेनाति सद्धिविहारिकस्स पठमं आयाचनमत्तेन, ततो उपज्झायस्स च ‘‘साहू’’तिआदिना वचनमत्तेनाति अत्थो.

६६. अस्साति सद्धिविहारिकस्स. द्वे चीवरानीति उत्तरासङ्गं, सङ्घाटिञ्च सन्धाय वदति. इतो पट्ठायाति ‘‘न उपज्झायस्स भणमानस्सा’’ति एत्थ न-कारतो पट्ठाय, तेन ‘‘नातिदूरे’’तिआदीसु न-कारपटिसिद्धेसु आपत्ति नत्थीति दस्सेति. सब्बत्थ दुक्कटापत्तीति आपदाउम्मत्तखित्तचित्तवेदनट्टतादीहि विना पण्णत्तिं अजानित्वापि वदन्तस्स गिलानस्सपि दुक्कटमेव. आपदासु हि अन्तरन्तरा कथा वत्तुं वट्टति. एवमञ्ञेसुपि न-कारपटिसिद्धेसु ईदिसेसु, इतरेसु पन गिलानोपि न मुच्चति. पाळियं ‘‘हेट्ठापीठं वा परामसित्वा’’ति इदं पुब्बे तत्थ ठपितपत्तादिना असङ्घट्टनत्थाय वुत्तं, चक्खुना ओलोकेत्वापि अञ्ञेसं अभावं ञत्वापि ठपेतुं वट्टति एव. आपत्तिया आसन्नन्ति आपत्तिकरणमेव.

गामेति अन्तोगामे तादिसे मण्डपादिम्हि. अन्तरघरेति अन्तोगेहे. पटिक्कमनेति आसनसालायं. धोतवालिकायाति उदकेन गतट्ठाने निरजाय परिसुद्धवालिकाय. निद्धूमेति जन्ताघरे जलियमानअग्गिधूमरहिते. जन्ताघरञ्हि नाम हिमपातबहुलेसु देसेसु तप्पच्चयरोगपीळादिनिवारणत्थं ¶ ¶ सरीरसेदापनट्ठानं. तत्थ किर अन्धकारपटिच्छन्नताय बहूपि एकतो पविसित्वा चीवरं निक्खिपित्वा अग्गितापपरिहाराय मत्तिकाय मुखं लिम्पित्वा सरीरं यावदत्थं सेदेत्वा चुण्णादीहि उब्बट्टेत्वा नहायन्ति. तेनेव पाळियं ‘‘चुण्णं सन्नेतब्ब’’न्तिआदि वुत्तं. उल्लोकन्ति उद्धं ओलोकनट्ठानं. उपरिभागन्ति अत्थो.

अञ्ञत्थ नेतब्बोति यत्थ विहरतो सासने अनभिरति उप्पन्ना, ततो अञ्ञत्थ कल्याणमित्तादिसम्पत्तियुत्तट्ठाने नेतब्बो. विसभागपुग्गलानन्ति लज्जिनो वा अलज्जिनो वा उपज्झायस्स अवड्ढिकामे सन्धाय वुत्तं. सचे पन उपज्झायो अलज्जी ओवादम्पि न गण्हाति, लज्जिनो च एतस्स विसभागा होन्ति, तत्थ उपज्झायं विहाय लज्जीहेव सद्धिं आमिसादिपरिभोगो कातब्बो. उपज्झायादिभावो हेत्थ न पमाणन्ति दट्ठब्बं. परिवेणं गन्त्वाति उपज्झायस्स परिवेणं गन्त्वा. ‘‘न सुसान’’न्ति इदं उपलक्खणं, उपचारसीमतो बहि गन्तुकामेन अनापुच्छा गन्तुं न वट्टति.

उपज्झायवत्तकथावण्णना निट्ठिता.

सद्धिविहारिकवत्तकथावण्णना

६७. सद्धिविहारिकवत्तकथायं सङ्गहेतब्बो अनुग्गहेतब्बोतिआदीसु अनादरियं पटिच्च धम्मामिसेहि असङ्गण्हन्तानं आचरियुपज्झायानं दुक्कटं वत्तभेदत्ता. तेनेव परिवारेपि ‘‘नदेन्तो आपज्जती’’ति (परि. ३२२) वुत्तं. सेसं सुविञ्ञेय्यमेव.

सद्धिविहारिकवत्तकथावण्णना निट्ठिता.

नसम्मावत्तनादिकथावण्णना

६८. नसम्मावत्तनादिकथायं वत्तं न पूरेय्याति ‘‘वत्तकरणकालो’’ति वत्थुविजाननवसेन ञत्वा मानकोसज्जादिवसेन वा उपज्झायादीसु ¶ अनादरेन वा ‘‘अकातुं न वट्टती’’ति अजाननताय वा न करेय्य, दुक्कटमेव. असञ्चिच्च असतियातिआदीहि च अकरोन्तस्स पन अनापत्ति. सब्बानि हि वत्तानि सेखियानेव, तस्मा सेखियेसु वुत्तनयेनेवेत्थ सब्बोपि विनिच्छयो वेदितब्बो. गेहस्सितपेमन्ति मेत्तापेमं.

सादियनं ¶ वा असादियनं वा न जानातीति ‘‘मयि सादियन्ते अकरोन्तानं आपत्ति होति, पटिक्खिपित्वा असादियन्ते आपत्ति न होती’’ति एवं न जानातीति अत्थो. ‘‘तेसु एको वत्तसम्पन्नो भिक्खु…पे… तेसं अनापत्ती’’ति वचनतो सचे कोचि ‘‘तुम्हाकं सद्धिविहारिके, अन्तेवासिके वा गिलाने उपट्ठहिस्सामि, ओवादानुसासनिआदिकं सब्बं कत्तब्बं करिस्सामी’’ति वदति, ते वा सद्धिविहारिकादयो ‘‘अप्पोस्सुक्का होथा’’ति वदन्ति, वत्तं वा न सादियन्ति, आचरियुपज्झायानम्पि अनापत्ति.

नसम्मावत्तनादिकथावण्णना निट्ठिता.

राधब्राह्मणवत्थुकथावण्णना

६९. राधब्राह्मणवत्थुस्मिं पाळियं उप्पण्डुप्पण्डुकजातोति सकलसरीरे सञ्जातपण्डुवण्णो. पण्डुवण्णस्स सकलसरीरे ब्यापितभावदस्सनत्थञ्हि विच्छावचनं कतं. अधिकारन्ति उपकारं. कतवेदिनोति अत्तनो कतं उपकारं पटिकिरियाय ञापका. उपसम्पदाकम्मवाचाय यं वत्तब्बं, तं परियोसाने वक्खाम. परिमण्डलेहीति परिपुण्णेहि.

७१-७३. पण्णत्तिवीतिक्कमन्ति सिक्खापदवीतिक्कमं. पाळियं पिण्डियालोपभोजनन्ति जङ्घपिण्डिमंसबलेन चरित्वा आलोपालोपवसेन परियिट्ठभोजनं. अतिरेकलाभोति भिक्खाहारतो अधिकलाभो. सङ्घभत्तादीनं विभागो सेनासनक्खन्धके आवि भविस्सति. विहारोति तिणकुटिकादिसहितो पाकारपरिच्छिन्नो सकलो सङ्घारामो. अड्ढयोगोति एकसालो दीघपासादो. हत्थिपिट्ठिगरुळसण्ठानो दीघपासादोतिपि वदन्ति. पासादोति चतुरस्सो उच्चो ¶ अनेकभूमकपासादो. हम्मियन्ति मुण्डच्छदनो चन्दिकङ्गणयुत्तो नातिउच्चो पासादो. गुहाति पब्बतगुहा. पूतिमुत्तन्ति गोमुत्तं.

राधब्राह्मणवत्थुकथावण्णना निट्ठिता.

आचरियवत्तकथावण्णना

७६. सहधम्मिकं वुच्चमानोति ‘‘एवं निवासेतब्ब’’न्तिआदिना सिक्खापदेन ओवदियमानो. वादं आरोपेत्वाति ‘‘ओलम्बित्वा निवासनादीसु को दोसो? यदि दोसो भवेय्य ¶ , परिमण्डलनिवासनादीसुपि दोसो सिया’’तिआदिना निग्गहं आरोपेत्वा. तंयेव तित्थायतनन्ति दिट्ठिसङ्खाततित्थमेव आयतनं दुक्खुप्पत्तिट्ठानन्ति तित्थायतनं. आयस्मतो निस्साय वच्छामीति आयस्मन्तं निस्साय वसिस्सामीति अत्थो.

आचरियवत्तकथावण्णना निट्ठिता.

पणामनाखमापनाकथावण्णना

८०. यं पुब्बे लक्खणं वुत्तं, तेनेव लक्खणेन निस्सयन्तेवासिकस्स आपत्ति न वेदितब्बाति सम्बन्धयोजना दट्ठब्बा. पोत्थकेसु पन ‘‘न तेनेव लक्खणेना’’ति एत्थ न-कारं छड्डेत्वा ‘‘तेनेव लक्खणेन निस्सयन्तेवासिकस्स आपत्ति वेदितब्बा’’ति लिखन्ति, तं पमादलिखितं. तथा हि तेनेव लक्खणेन आपत्तिभावे गय्हमाने निस्सयमुत्तकस्सापि अमुत्तकस्सापि आपत्ति एवाति वुत्तलक्खणेन आपत्तिं आपज्जेय्य. तथा च ‘‘निस्सयन्तेवासिकेन हि याव आचरियं निस्साय वसति, ताव सब्बं आचरियवत्तं कातब्ब’’न्ति इमिना अनन्तरवचनेन विरोधो सिया. विसुद्धिमग्गेपि च –

‘‘निस्सयाचरिय, उद्देसाचरिय, निस्सयन्तेवासिक, उद्देसन्तेवासिक, समानाचरियका पन याव निस्सयउद्देसा अनुपच्छिन्ना. ताव पटिजग्गितब्बा’’ति (विसुद्धि. १.४१) –

वुत्तं ¶ . तस्मा वुत्तनयेन इध परिगळितं न-कारं आनेत्वा तेनेव सद्धिविहारिकस्स वुत्तेनेव लक्खणेन निस्सयन्तेवासिकस्स आपत्ति न वेदितब्बाति एवमत्थो गहेतब्बो.

पणामनाखमापनाकथावण्णना निट्ठिता.

निस्सयपटिप्पस्सद्धिकथावण्णना

८३. निस्सयपटिप्पस्सद्धिकथायं ‘‘यो वा एकसम्भोगपरिभोगो, तस्स सन्तिके निस्सयो गहेतब्बो’’ति इमिना लज्जीसु एव निस्सयग्गहणं नियोजेति अलज्जीसु पटिक्खित्तत्ता. एत्थ च परिभोगसद्देन एककम्मादिको संवासो गहितो पच्चयपरिभोगस्स सम्भोग-सद्देन गहितत्ता, एतेन ¶ च सम्भोगसंवासानं अलज्जीहि सद्धिं न कत्तब्बतं दस्सेति. परिहारो नत्थीति आपत्तिपरिहारो नत्थि. तादिसोति यत्थ निस्सयो गहितपुब्बो, यो च एकसम्भोगपरिभोगो, तादिसो. तथा वुत्तन्ति ‘‘लहुं आगमिस्सामी’’ति वुत्तञ्चेति अत्थो. ‘‘चत्तारि पञ्च दिवसानी’’ति इदं उपलक्खणमत्तं. यदि एकाहद्वीहेन सभागता पञ्ञायति, ञातदिवसेन गहेतब्बोव. अथापि चतुपञ्चाहेनापि न पञ्ञायति, यत्तकेहि दिवसेहि पञ्ञायति, तत्तकानि अतिक्कमेतब्बानि. सभागतं ओलोकेमीति पन लेसो न कातब्बो.

दहरा सुणन्तीति एत्थ असुत्वापि आगमिस्सति, केनचि अन्तरायेन चिरायतीति सञ्ञाय सति लब्भतेव परिहारो. तेनाह ‘‘इधेवाहं वसिस्सामीति पहिणति, परिहारो नत्थी’’ति.

एकदिवसम्पि परिहारो नत्थीति गमने निरुस्साहं सन्धाय वुत्तं. सउस्साहस्स पन सेनासनपटिसामनादिवसेन कतिपाहे गतेपि न दोसो.

तत्रेव वसितब्बन्ति तत्र सभागट्ठाने एव निस्सयं गहेत्वा वसितब्बं. ‘‘तंयेव विहारं…पे… वसितुं वट्टती’’ति इमिना उपज्झाये सङ्गण्हन्तेयेव तंसमोधाने निस्सयपटिप्पस्सद्धि वुत्ता, तस्मिं पन कोधेन ¶ वा गणनिरपेक्खताय वा असङ्गण्हन्ते अञ्ञेसु गहितो निस्सयो न पटिप्पस्सम्भतीति दस्सेति.

आचरियम्हा निस्सयपटिप्पस्सद्धियं वुत्तो ‘‘कोचि आचरियो’’तिआदिको नयो उपज्झायपक्कमनादीसुपि नेत्वा तत्थ च वुत्तो इधापि नेत्वा यथारहं योजेतब्बो.

द्वे लेड्डुपाते अतिक्कम्म अञ्ञस्मिं विहारे वसन्तीति उपचारसीमतो बहि अञ्ञस्मिं विहारे अन्तेवासिकानं वसनट्ठानतो द्वे लेड्डुपाते अतिक्कम्म वसन्ति. तेन बहिउपचारेपि अन्तेवासिकादीनं वसनट्ठानतो द्विन्नं लेड्डुपातानं अन्तरे आसन्नपदेसे वसति, निस्सयो न पटिप्पस्सम्भतीति दस्सेति. अन्तोउपचारसीमायं पन द्वे लेड्डुपाते अतिक्कमित्वा वसतो निस्सयो न पटिप्पस्सम्भतेव.

निस्सयपटिप्पस्सद्धिकथावण्णना निट्ठिता.

उपसम्पादेतब्बपञ्चककथावण्णना

८४. उपज्झाचरियलक्खणकथायं ¶ न सामणेरो उपट्ठापेतब्बोति उपज्झायेन हुत्वा न पब्बाजेतब्बो. असेक्खस्स अयन्ति असेक्खो, लोकियलोकुत्तरो सीलक्खन्धो.

अन्तग्गाहिकायाति सस्सतुच्छेदकोट्ठासग्गाहिकाय. पच्छिमानि द्वेति अप्पस्सुतो होति, दुप्पञ्ञो होतीति इमानि द्वे अङ्गानि. पच्छिमानि तीणीति न पटिबलो उप्पन्नं कुक्कुच्चं धम्मतो विनोदेतुं, आपत्तिं न जानाति, आपत्तिया वुट्ठानं न जानातीति इमानि तीणि. कुक्कुच्चस्स हि पाळिअट्ठकथानयसङ्खातधम्मतो विनोदेतुं अपटिबलता नाम अब्यत्तता एव होतीति सापि आपत्तिअङ्गमेव वुत्ता.

अभिविसिट्ठो उत्तमो समाचारो आभिसमाचारो, वत्तपटिवत्तसीलं. तं आरब्भ पञ्ञत्ता खन्धकसिक्खापदसङ्खाता सिक्खा आभिसमाचारिका. सिक्खापदम्पि हि तं तत्थ पटिपूरणत्थिकेहि उग्गहणादिवसेन सिक्खितब्बतो ‘‘सिक्खा’’ति वुच्चति. मग्गब्रह्मचरियस्स आदिभूता कारणभूताति आदिब्रह्मचरियका सिक्खा, उभतोविभङ्गपरियापन्नसिक्खापदं. तेनेव ¶ विसुद्धिमग्गेपि ‘‘उभतोविभङ्गपरियापन्नसिक्खापदं आदिब्रह्मचरियकं, खन्धकवत्तपअयापन्नं आभिसमाचारिक’’न्ति (विसुद्धि. १.११) वुत्तं. तस्मा सेक्खपण्णत्तिय’’न्ति एत्थ सिक्खितब्बतो सेक्खा, भगवता पञ्ञत्तत्ता पण्णत्ति. सब्बापि उभतोविभङ्गपरियापन्ना सिक्खापदपण्णत्ति ‘‘सेक्खपण्णत्ती’’ति वुत्ताति गहेतब्बा. नामरूपपरिच्छेदेति एत्थ कुसलत्तिकादीहि वुत्तं जातिभूमिपुग्गलसम्पयोगवत्थारम्मणकम्मद्वारलक्खणरसादिभेदेहि वेदनाक्खन्धादिचतुब्बिधं सनिब्बानं नामं, भूतुपादायभेदं रूपञ्च परिच्छिन्दित्वा जाननपञ्ञा, तप्पकासको च गन्थो नामरूपपरिच्छेदो नाम. इमिना अभिधम्मत्थकुसलेन भवितब्बन्ति दस्सेति. सिक्खापेतुन्ति उग्गण्हापेतुं.

उपसम्पादेतब्बपञ्चककथावण्णना निट्ठिता.

अञ्ञतित्थियपुब्बवत्थुकथावण्णना

८६. तित्थियपरिवासकथायं आजीवकस्स वातिआदीसु अकिरियवादी आजीवको नाम, किरियवादिनो पन निगण्ठापि अञ्ञेपि नग्गतित्थिका अचेलकपदे सङ्गहिता. सब्बथा नग्गस्सेव ¶ तित्थियपरिवासो विहितो. सो च तेनेव नग्गवेसेन भिक्खूनं सन्तिकं आगतस्स, न पटिच्छादेत्वा आगतस्साति दस्सेतुं ‘‘सचे सोपी’’तिआदि वुत्तं. तत्थ सोपीति आजीवको.

आमिसकिञ्चिक्खसम्पदानं नाम अप्पमत्तकस्स देय्यधम्मस्स अनुप्पदानं. रूपूपजीविकाति अत्तनो रूपमेव निस्साय जीवन्तियो. वेसिया गोचरो बहुलं पवत्तिट्ठानं अस्साति वेसियागोचरो. एस नयो सब्बत्थ. योब्बन्नातीताति अनिविद्धा एव महल्लिकभावं पत्ता थुल्लकुमारी एवाति वुत्तं. आदायस्साति आदानस्स गहणस्स.

अञ्ञतित्थियपुब्बवत्थुकथावण्णना निट्ठिता.

पञ्चाबाधवत्थुकथावण्णना

८८-९. पञ्चाबाधादिवत्थूसु ¶ पाळियं सोम्हि अरोगो, विब्भमिस्सामीति सो अहं अरोगो, विब्भमिस्सामीति अत्थो. नखपिट्ठिप्पमाणन्ति कनिट्ठङ्गुलिनखपिट्ठि अधिप्पेता. ‘‘पटिच्छन्ने ठाने नखपिट्ठिप्पमाणं अवड्ढनकपक्खे ठितं होति, वट्टती’’ति वुत्तत्ता अप्पटिच्छन्नट्ठाने तादिसम्पि न वट्टति, पटिच्छन्नट्ठानेपि च वड्ढनकपक्खे ठितोपि न वट्टतीति सिद्धमेव होति. पाकटट्ठानेपि पन नखपिट्ठिप्पमाणतो ऊनतरं अवड्ढनकं वट्टतीति ये गण्हेय्युं, तेसं तं गहणं पटिसेधेतुं ‘‘मुखे पना’’तिआदि वुत्तं.

कोलट्ठिमत्तकोपीति बदरट्ठिप्पमाणोपि. अवड्ढनकपक्खे ठितोपि न वट्टतीति एत्थ पि-सद्देन कोलट्ठिमत्ततो खुद्दकतरोपि गण्डो न वट्टतीति दस्सेति. तेनाह ‘‘सच्छविं कारेत्वा’’ति, विज्जमानच्छविं कत्वाति अत्थो. ‘‘सञ्छवि’’न्ति वा पाठो, सञ्जातच्छविन्ति अत्थो. गण्डादीसु वूपसन्तेसुपि गण्डानं विवण्णम्पि होति, तं वट्टति.

पदुमपुण्डरीकपत्तवण्णन्ति रत्तपदुमसेतपदुमपुप्फदलवण्णं. कुट्ठे वुत्तनयेनेवाति पटिच्छन्नट्ठाने अवड्ढनकं वट्टति, अञ्ञत्थ न किञ्चिपि वट्टतीति वुत्तनयं दस्सेति. सोसब्याधीति खयरोगो. यक्खुम्मारोति कदाचि कदाचि आगन्त्वा भूमियं पातेत्वा हत्थमुखादिकं अवयवं भूमियं घंसनको यक्खोव रोगो.

पञ्चाबाधवत्थुकथावण्णना निट्ठिता.

राजभटवत्थुकथावण्णना

९०. न ¶ दानाहं देवस्स भटोति आपुच्छतीति रञ्ञा एव दिन्नट्ठानन्तरं सन्धाय वुत्तं. यो पन राजकम्मिकेहि अमच्चादीहि ठपितो, अमच्चादीनं एव वा भटो होति, तेन तं तं अमच्चादिम्पि आपुच्छितुं वट्टति.

राजभटवत्थुकथावण्णना निट्ठिता.

चोरवत्थुकथावण्णना

९१. तस्माति ¶ भगवा सयं यस्मा धम्मस्सामी, तस्मा अङ्गुलिमालं एहिभिक्खुभावेन पब्बाजेसि, भिक्खूनं पन सिक्खापदं पञ्ञपेन्तो एवमाहाति अधिप्पायो. एवं जानन्तीति सीलवा जातोति जानन्ति.

९२. उपरमन्ति विरमन्ति. भिन्दित्वाति अन्दुबन्धनं भिन्दित्वा. छिन्दित्वाति सङ्खलिकं छिन्दित्वा. मुञ्चित्वाति रज्जुबन्धनं मुञ्चित्वा. विवरित्वाति गामबन्धनादीसु गामद्वारादीनं विवरित्वा. अपस्समानानन्ति पुरिसगुत्तियं गोपकानं अपस्सन्तानं.

९५. पुरिमनयेनेवाति ‘‘कसाहतो कतदण्डकम्मो’’ति एत्थ वुत्तनयेनेव.

चोरवत्थुकथावण्णना निट्ठिता.

इणायिकवत्थुकथावण्णना

९६. पलातोपीति इणसामिकानं आगमनं ञत्वा भयेन पलातो. गीवा होतीति इणायिकभावं ञत्वा अनादरेन इणमुत्तके भिक्खुभावे पवेसितत्ता. उपड्ढुपड्ढन्ति थोकथोकं. दातब्बमेवाति इणायिकेन धनं सम्पटिच्छतु वा मा वा, दाने सउस्साहेनेव भवितब्बं. अञ्ञेहि च भिक्खूहि ‘‘मा धुरं निक्खिपाही’’ति वत्वा सहायकेहि भवितब्बन्ति दस्सेति. धुरनिक्खेपेन हिस्स भण्डग्घेन कारेतब्बता सियाति.

इणायिकवत्थुकथावण्णना निट्ठिता.

दासवत्थुकथावण्णना

९७. ‘‘दासचारित्तं ¶ आरोपेत्वा कीतो’’ति इमिना दासभावपरिमोचनत्थाय कीतकं निवत्तेति. तादिसो हि धनक्कीतोपि अदासो एव. तत्थ तत्थ चारित्तवसेनाति तस्मिं तस्मिं जनपदे दासपण्णज्झापनादिना ¶ अदासकरणनियामेन. अभिसेकादीसु सब्बबन्धनानि मोचापेन्ति, तं सन्धाय ‘‘सब्बसाधारणेना’’ति वुत्तं.

सयमेव पण्णं आरोपेन्ति, न वट्टतीति ता भुजिस्सित्थियो ‘‘मयम्पि वण्णदासियो होमा’’ति अत्तनो रक्खणत्थाय सयमेव राजूनं दासिपण्णे अत्तनो नामं लिखापेन्ति, तासं पुत्तापि राजदासाव होन्ति, तस्मा ते पब्बाजेतुं न वट्टति. तेहि अदिन्ना न पब्बाजेतब्बाति यत्तका तेसं सामिनो, तेसु एकेन अदिन्नेपि न पब्बाजेतब्बा.

भुजिस्से पन कत्वा पब्बाजेतुं वट्टतीति यस्स विहारस्स ते आरामिका दिन्ना, तस्मिं विहारे सङ्घं ञापेत्वा फातिकम्मेन धनानि दत्वा भुजिस्से कत्वा पब्बाजेतुं वट्टति. तक्कं सीसे आसित्तकसदिसाव होन्तीति केसुचि जनपदेसु अदासे करोन्ता तक्कं सीसे आसिञ्चन्ति, तेन किर ते अदासा होन्ति, एवमिदम्पि आरामिकवचनेन दानम्पीति अधिप्पायो. तथा दिन्नेपि सङ्घस्स आरामिकदासो एवाति ‘‘नेव पब्बाजेतब्बो’’ति वुत्तं. ‘‘तावकालिको नामा’’ति वुत्तत्ता कालपरिच्छेदं कत्वा वा पच्छापि गहेतुकामताय वा दिन्नं सब्बं तावकालिकमेवाति गहेतब्बं. निस्सामिकदासो नाम यस्स सामिकुलं अञ्ञातिकं मरणेन परिक्खीणं, न कोचि तस्स दायादो, सो पन समानजातिकेहि वा निवासगामवासीहि वा इस्सरेहि वा भुजिस्सो कतोव पब्बाजेतब्बो. देवदासापि दासा एव. ते हि कत्थचि देसे राजदासा होन्ति, कत्थचि विहारदासा, तस्मा पब्बाजेतुं न वट्टति. दासम्पि पब्बाजेत्वा सामिके दिस्वा पटिच्छादनत्थं अपनेन्तो पदवारेन अदिन्नादानापत्तिया कारेतब्बो, दासस्स पन पलायतो अनापत्ति.

दासवत्थुकथावण्णना निट्ठिता.

कम्मारभण्डुवत्थादिकथावण्णना

९८. भण्डुकम्मापुच्छानादिकथायं कम्मारभण्डूति दहरताय अमोळिबन्धो मुण्डिकसीसो कम्मारदारको ¶ एव वुत्तो. तुलाधारमुण्डकोति एत्थ तुलाधाराति तम्बसुवण्णादीनं तुलं हत्थेन धारेतीति ¶ कम्मारा ‘‘तुलाधारा’’ति वुत्ता, तेसु एको मुण्डिकसीसो दहरोति अत्थो. तेनाह ‘‘पञ्चसिखो तरुणदारको’’ति. एकाव सिखा पञ्च वेणियो कत्वा बन्धनेन पञ्चसिखाति वुच्चति, सा एतस्स अत्थीति पञ्चसिखो, तस्स सिखं छिन्दन्ता कञ्चि भिक्खुं अजानापेत्वाव पब्बाजेसुं. तेन भण्डुकम्मापलोकनं अनुञ्ञातं. सीमापरियापन्नेति बद्धसीमाय सति तदन्तोगधे, असति उपचारसीमन्तोगधेति अत्थो. एत्थ च किञ्चापि ‘‘अनुजानामि, भिक्खवे, सङ्घं अपलोकेतुं भण्डुकम्माया’’ति एत्तकमेव वुत्तं, न पन अनपलोकेन्तस्स आपत्ति वुत्ता, तथापि अट्ठकथायं ‘‘सब्बे आपुच्छिता अम्हेहीतिसञ्ञिनो…पे… पब्बाजेन्तस्सपि अनापत्ती’’ति वुत्तत्ता सञ्चिच्च अनापुच्छा केसे ओहारेन्तस्स दुक्कटमेवाति दट्ठब्बं. केसोरोपनम्पि समणपब्बजनवोहारं लभतीति आह ‘‘इमस्स समणकरण’’न्तिआदि. एकसिखामत्तधरोति एत्थ एकेन केसेन सिखा एकसिखाति वदन्ति, अप्पकेसाव सिखा एवं वुत्ताति गहेतब्बा. एककेसम्पि पन अनापुच्छा छिन्दितुं न वट्टतियेव.

१००. वामहत्थेनाति दक्खिणहत्थेन भुञ्जनतो वुत्तं.

१०३-४. निस्सयमुच्चनकस्स वत्तेसु पञ्चकछक्केसु पन ‘‘उभयानि खो पनस्स पातिमोक्खानि…पे… अनुब्यञ्जनसो’’ति एत्थ सब्बोपि चायं पभेदो मातिकाट्ठकथायं ञातायं ञातो होति. ‘‘आपत्तिं जानाति, अनापत्तिं जानाती’’ति इदञ्च अत्तना ञातट्ठानेसु आपत्तादिं सन्धाय वुत्तन्ति न गहेतब्बं.

कम्मारभण्डुवत्थादिकथावण्णना निट्ठिता.

राहुलवत्थुकथावण्णना

१०५. पोक्खरवस्सन्ति पोक्खरे पदुमगच्छे विय अतेमितुकामानं सरीरतो पवट्टनकवस्सं. तस्मिं किर वस्सन्ते तेमितुकामाव तेमेन्ति, न इतरे. ‘‘भिक्खं गण्हथा’’ति वत्वा गतो नाम नत्थीति अत्तनो सन्तके रज्जे सब्बम्पि सापतेय्यं सयमेव परिभुञ्जिस्सतीति गारवेन ¶ सुद्धोदनमहाराजापि न निमन्तेसि, गन्त्वा पन गेहे सकलरत्तिं महादानञ्चेव बुद्धप्पमुखस्स सङ्घस्स आसनपञ्ञत्तिट्ठानालङ्कारञ्च संविदहन्तोव वीतिनामेसि.

न ¶ कोचि…पे… पत्तं वा अग्गहेसीति भगवा अत्तनो पितु निवेसनमेव गमिस्सतीतिसञ्ञाय नग्गहेसि. कुलनगरेति ञातिकुलन्तके नगरे. पिण्डचारियवत्तन्ति अत्तनो ञातिगामेसुपि सपदानचारिकवत्तं. भिक्खाय चारो चरणं एतस्साति भिक्खाचारो, खत्तियो.

उत्तिट्ठेति उत्तिट्ठित्वा परेसं घरद्वारे उद्दिस्स ठत्वा गहेतब्बपिण्डे. नप्पमज्जेय्याति निमन्तनादिवसेन लब्भमानपणीतभोजनं पटिक्खिपित्वा पिण्डाय चरणवसेन तत्थ नप्पमज्जेय्य. धम्मन्ति अनेसनं पहाय सपदानं चरन्तो तमेव भिक्खाचरियधम्मं सुचरितं चरेय्य. सुखं सेतीति चतूहि इरियापथेहि सुखं विहरतीति अत्थो.

दुतियगाथायं न नं दुच्चरितन्ति वेसियादिभेदे अगोचरे चरणवसेन तं यथावुत्तं धम्मं दुच्चरितं न च चरे. सेसं वुत्तनयमेव. इमं पन गाथं सुत्वाति निवेसने निसिन्नेन भगवता ञातिसमागमे अत्तनो पिण्डाय चरणं निस्साय पवत्ताय गाथाय वुत्तं इमं दुतियगाथं सुत्वा.

धम्मपालजातकन्तिआदीसु पन ततो परकालेसुपि रञ्ञो पवत्ति परिनिब्बानं पापेत्वा यथापसङ्गवसेन दस्सेतुं वुत्ता. तेनाह ‘‘सोतापत्तिफलं सच्छिकत्वा’’तिआदि. सिरिगब्भं गन्त्वाति एत्थ यदि हि भगवा तदहेव गन्त्वा न पस्सेय्य, सा हदयेन फलितेन मरेय्याति अगमासीति दट्ठब्बं.

तं दिवसमेवाति तस्मिं राहुलमातुदस्सनदिवसेयेव. धम्मपदट्ठकथायं पन ‘‘सत्था कपिलपुरं गन्त्वा ततियदिवसे नन्दं पब्बाजेसी’’ति (ध. प. अट्ठ. १.१२ नन्दत्थेरवत्थु) वुत्तं. केसविस्सज्जनन्ति राजमोळिबन्धनत्थं कुमारकाले बन्धितसिखावेणिमोचनं, तं किर करोन्ता मङ्गलं करोन्ति. सारत्थदीपनियं पन ‘‘केसविस्सज्जनन्ति कुलमरियादवसेन केसोरोपन’’न्ति (सारत्थ. टी. महावग्ग ३.१०५) वुत्तं. पट्टबन्धोति ‘‘असुकराजा’’ति नळाटे सुवण्णपट्टबन्धनं. अभिनवपासादप्पवेसमङ्गलं घरमङ्गलं. छत्तुस्सापने मङ्गलं छत्तमङ्गलं. जनपदकल्याणीति ¶ जनपदम्हि कल्याणी परेहि असाधारणेहि पञ्चकल्याणादीहि सहितत्ता सा एवं वुत्ता. तुवटन्ति सीघं. अनिच्छमानन्ति मनसा अरोचेन्तं, वाचाय पन भगवता ‘‘पब्बजिस्ससि नन्दा’’ति वुत्ते गारवेन पटिक्खिपितुं अविसहन्तो ‘‘आमा’’ति अवोच. भगवा च एतेन लेसेन पब्बाजेसि.

ब्रह्मरूपवण्णन्ति ¶ ब्रह्मरूपसमानरूपं. त्यस्साति ते अस्स. निवत्तेतुं न विसहीति ‘‘मा नं निवत्तयित्था’’ति भगवता वुत्तत्ता नासक्खि. सत्तविधं अरियधनन्ति –

‘‘सद्धाधनं सीलधनं, हिरिओत्तप्पियं धनं;

सुतधनञ्च चागो च, पञ्ञा वे सत्तमं धन’’न्ति. (अ. नि. ७.५, ६) –

एवं वुत्तं सत्तविधं अरियधनं. अधिमत्तं राहुलेति राहुले पब्बजिते नन्दपब्बज्जाय उप्पन्नदुक्खतोपि अधिकतरं दुक्खं अहोसीति अत्थो. इतो पच्छाति इतो वुत्तसोकुप्पत्तितो अपरदिवसेसु अनागामीनं ञातिसिनेहपटिघचित्तुप्पादाभावा. पाळियं पुत्तपेमन्तिआदि रञ्ञा पुत्तसिनेहस्स तिब्बभावं दस्सेतुं वुत्तं. पुत्तसिनेहो हि अत्तना सहजातपीतिवेगसमुट्ठितानं रूपधम्मानं सकलसरीरं खोभेत्वा पवत्तनवसेन ‘‘छविं…पे… अट्ठिमिञ्जं आहच्च तिट्ठती’’ति वुत्तो. अत्तनो पियतराति भगवन्तं सन्धाय वदति. पुत्तेति राहुलं. सद्दहन्तेनाति तस्स वचनेन अवेमतिकेनाति अत्थो. विमतिया सति आपत्ति एव.

राहुलवत्थुकथावण्णना निट्ठिता.

सिक्खापददण्डकम्मवत्थुकथावण्णना

१०६. सामणेरसिक्खापदादीसु पाळियं सिक्खापदानीति सिक्खाकोट्ठासा. अधिसीलसिक्खानं वा अधिगमूपाया. पाणोति परमत्थतो जीवितिन्द्रियं. तस्स अतिपातनं पबन्धवसेन पवत्तितुं अदत्वा सत्थादीहि अतिक्कम्म अभिभवित्वा पातनं पाणातिपातो. पाणवधोति अत्थो. सो ¶ पन अत्थतो पाणे पाणसञ्ञिनो जीवितिन्द्रियुपच्छेदकउपक्कमसमुट्ठापिका वधकचेतनाव. तस्मा पाणातिपाता वेरमणि, वेरहेतुताय वेरसङ्खातं पाणातिपातादिपापधम्मं मणति नीहरतीति विरति ‘‘वेरमणी’’ति वुच्चति, विरमति एतायाति वा ‘‘विरमणी’’ति वत्तब्बे निरुत्तिनयेन ‘‘वेरमणी’’ति समादानविरति वुत्ता. एस नयो सेसेसुपि.

अदिन्नस्स आदानं अदिन्नादानं, थेय्यचेतनाव. अब्रह्मचरियन्ति असेट्ठचरियं, मग्गेन मग्गपटिपत्तिसमुट्ठापिका मेथुनचेतना. मुसाति अभूतवत्थु, तस्स वादो अभूततं ञत्वाव भूततो ¶ विञ्ञापनचेतना मुसावादो. पिट्ठपूवादिनिब्बत्तसुरा चेव पुप्फासवादिभेदं मेरयञ्च सुरामेरयं. तदेव मदनीयट्ठेन मज्जञ्चेव पमादकारणट्ठेन पमादट्ठानञ्च, तं याय चेतनाय पिवति, तस्स एतं अधिवचनं.

अरुणुग्गमनतो पट्ठाय याव मज्झन्हिका अयं अरियानं भोजनस्स कालो नाम, तदञ्ञो विकालो. भुञ्जितब्बट्ठेन भोजनन्ति इध सब्बं यावकालिकं वुच्चति, तस्स अज्झोहरणं इध उत्तरपदलोपेन ‘‘भोजन’’न्ति अधिप्पेतं. विकाले भोजनं अज्झोहरणं विकालभोजनं, विकाले वा यावकालिकस्स भोजनं अज्झोहरणं विकालभोजनन्तिपि अत्थो गहेतब्बो, अत्थतो विकाले यावकालिकअज्झोहरणचेतनाव.

सासनस्स अननुलोमत्ता विसूकं पटाणीभूतं दस्सनं विसूकदस्सनं, नच्चगीतादिदस्सनसवनानञ्चेव वट्टकयुद्धजूतकीळादिसब्बकीळानञ्च नामं. दस्सनन्ति चेत्थ पञ्चन्नम्पि विञ्ञाणानं यथासकं विसयस्स आलोचनसभावताय दस्सन-सद्देन सङ्गहेतब्बत्ता सवनम्पि सङ्गहितं. नच्चगीतवादित-सद्देहि चेत्थ अत्तनो नच्चनगायनादीनिपि सङ्गहितानीति दट्ठब्बं.

मालाति बद्धमबद्धं वा अन्तमसो सुत्तादिमयम्पि अलङ्कारत्थाय पिळन्धियमानं ‘‘माला’’त्वेव वुच्चति. गन्धन्ति वासचुण्णादिविलेपनतो अञ्ञं यं किञ्चि गन्धजातं. विलेपनन्ति पिसित्वा गहितं छविरागकरणञ्चेव गन्धजातञ्च. धारणं नाम पिळन्धनं. मण्डनं नाम ऊनट्ठानपूरणं. गन्धवसेन, छविरागवसेन च सादियनं विभूसनं नाम. मालादीसु वा धारणादीनि यथाक्कमं ¶ योजेतब्बानि. तेसं धारणादीनं ठानं कारणं वीतिक्कमचेतना.

उच्चाति उच्च-सद्देन समानत्थो निपातो, उच्चासयनं वुच्चति पमाणातिक्कन्तं आसन्दादि. महासयनं अकप्पियत्थरणेहि अत्थतं, सलोहितवितानञ्च. एतेसु हि आसनं, सयनञ्च उच्चासयनमहासयन-सद्देहि गहितानि उत्तरपदलोपेन. जातरूपरजतपटिग्गहणाति एत्थ रजत-सद्देन दारुमासकादि सब्बं रूपियं सङ्गहितं, मुत्तामणिआदयोपेत्थ धञ्ञखेत्तवत्थादयो च सङ्गहिताति दट्ठब्बा. पटिग्गहण-सद्देन पटिग्गाहापनसादियनानि सङ्गहितानि. नासनवत्थूति पाराजिकट्ठानताय लिङ्गनासनाय कारणं.

१०७. पाळियं सब्बं सङ्घारामं आवरणं करोन्तीति सब्बसङ्घारामे पवेसनिवारणं करोन्ति. सङ्घारामो आवरणं कातब्बोति सङ्घारामो आवरणो कातब्बो, सङ्घारामे वा आवरणं ¶ कातब्बन्ति अत्थो. तेनेव ‘‘तत्थ आवरणं कातु’’न्ति भुम्मवसेन वुत्तं. आहारं आवरणन्तिआदीसुपि एसेव नयो. ‘‘यत्थ वा वसती’’ति इमिना सामणेरस्स वस्सग्गेन लद्धं वा सकसन्तकमेव वा निबद्धवसनकसेनासनं वुत्तं. यत्थ वा पटिक्कमतीति आचरियुपज्झायानं वसनट्ठानं वुत्तं. तेनाह ‘‘अत्तनो’’तिआदि. अत्तनोति हि सयं, आचरियस्स, उपज्झायस्स वाति अत्थो. दण्डेन्ति विनेन्ति एतेनाति दण्डो, सो एव कत्तब्बत्ता कम्मन्ति दण्डकम्मं, आवरणादि. उदकं वा पवेसेतुन्ति पोक्खरणीआदिउदके पवेसेतुं.

सिक्खापददण्डकम्मवत्थुकथावण्णना निट्ठिता.

अनापुच्छावरणवत्थुआदिकथावण्णना

१०८. सद्धिविहारिकअन्तेवासिकानम्पीति उपसम्पन्ने सन्धाय वुत्तं. तेसुपि हि आचरियुपज्झायेसु यथा ओरमन्ति, तथा तेसं निग्गहं अकरोन्तेसु अञ्ञेहि आवरणादिनिग्गहकम्मं कातब्बमेव. सङ्गण्हन्तीति ‘‘परपरिसतो भिन्दित्वा गण्हिस्सामी’’ति दानादिचतूहि सङ्गहवत्थूहि (दी. नि. ३.२१०; अ. नि. ४.३२, २५६) उपलाळनवसेन ¶ सङ्गण्हन्ति. सो भिज्जतु वा मा वा, सङ्गण्हन्तस्स पयोगे आपत्ति एव. भिन्दित्वा गण्हितुं न वट्टतीति भिन्दितुम्पि न वट्टति, गण्हितुम्पि न वट्टतीति अत्थो. आदीनवं पन वत्तुं वट्टतीति सासनगारवेन वा परानुद्दयताय वा वत्तुं वट्टति, न परिसलोलताय.

‘‘सेनासनग्गाहो च पटिप्पस्सम्भती’’ति इमिना वस्सच्छेदं दस्सेति. उपसम्पन्नानम्पि पाराजिकसमापत्तिया सरणगमनादिसामणेरभावस्सापि विनस्सनतो सेनासनग्गाहो च पटिप्पस्सम्भति, सङ्घलाभम्पि ते न लभन्तीति वेदितब्बं. पुरिमिकाय पुन सरणानि गहितानीति सरणग्गहणेन सह तदहेवस्स वस्सूपगमनम्पि दस्सेति. पच्छिमिकाय वस्सावासिकन्ति वस्सावासिकलाभग्गहणदस्सनमत्तमेवेतं, ततो पुरेपि, पच्छापि वा वस्सावासिकञ्च चीवरमासेसु सङ्घे उप्पन्नं कालचीवरञ्च पुरिमिकाय उपगन्त्वा अविपन्नसीलो सामणेरो लभति एव. सचे पच्छिमिकाय गहितानीति पच्छिमिकाय वस्सूपगमनञ्च छिन्नवस्सतञ्च दस्सेति. तस्स हि कालचीवरे भागो न पापुणाति. तस्मा ‘‘अपलोकेत्वा लाभो दातब्बो’’ति वुत्तं.

वस्सावासिकलाभो ¶ पन यदि सेनासनसामिका दायका सेनासनगुत्तत्थाय पच्छिमिकाय उपगन्त्वा वत्तं कत्वा अत्तनो सेनासने वसन्तस्सपि वस्सावासिकं दातब्बन्ति वदन्ति, अनपलोकेत्वापि दातब्बोव. यं पन सारत्थदीपनियं ‘‘पच्छिमिकाय वस्सावासिकं लच्छतीति पच्छिमिकाय पुन वस्सं उपगतत्ता लच्छती’’ति (सारत्थ. टी. महावग्ग ३.१०८) वुत्तं, तम्पि वस्सावासिके दायकानं इमं अधिप्पायं निस्साय वुत्तञ्चे, सुन्दरं. सङ्घिकं, कालचीवरम्पि सन्धाय वुत्तञ्चे, न युज्जतीति वेदितब्बं.

न अजानित्वाति ‘‘सुरा’’ति अजानित्वा पिवतो पाणातिपातवेरमणिआदिसब्बसीलभेदं, सरणभेदञ्च न आपज्जति, अकुसलं पन सुरापानवेरमणिसीलभेदो च होति मालादिधारणादीसु वियाति दट्ठब्बं. इतरानीति विकालभोजनवेरमणिआदीनि. तानिपि हि सञ्चिच्च वीतिक्कमन्तस्स तं तं भिज्जति एव, इतरीतरेसं पन अभिज्जमानेन नासनङ्गानि न होन्ति. तेनेव ‘‘तेसु भिन्नेसू’’ति भेदवचनं वुत्तं.

अच्चयं ¶ देसापेतब्बोति ‘‘अच्चयो मं, भन्ते, अच्चगमा’’तिआदिना सङ्घमज्झे देसापेत्वा सरणसीलं दातब्बन्ति अधिप्पायो पाराजिकत्ता तेसं. तेनाह ‘‘लिङ्गनासनाय नासेतब्बो’’ति. अयमेव हि नासना इध अधिप्पेताति लिङ्गनासनाकारणेहि पाणातिपातादीहि अवण्णभासनादीनं सह पतितत्ता वुत्तं.

ननु च कण्टकसामणेरोपि मिच्छादिट्ठिको एव, तस्स च हेट्ठा दण्डकम्मनासनाव वुत्ता. इध पन मिच्छादिट्ठिकस्स लिङ्गनासना वुच्चति, को इमेसं भेदोति चोदनं मनसि निधायाह ‘‘सस्सतुच्छेदानञ्हि अञ्ञतरदिट्ठिको’’ति. एत्थ चायमधिप्पायो – यो हि ‘‘अत्ता इस्सरो वा निच्चो धुवो’’तिआदिना वा ‘‘अत्ता उच्छिज्जिस्सति विनस्सिस्सती’’तिआदिना वा तित्थियपरिकप्पितं यं किञ्चि सस्सतुच्छेददिट्ठिं दळ्हं गहेत्वा वोहरति, तस्स सा पाराजिकट्ठानं होति. सो च लिङ्गनासनाय नासेतब्बो. यो पन ईदिसं दिट्ठिं अग्गहेत्वा सासनिकोव हुत्वा केवलं बुद्धवचनाधिप्पायं विपरीततो गहेत्वा भिक्खूहि ओवदियमानोपि अप्पटिनिस्सज्जित्वा वोहरति, तस्स सा दिट्ठि पाराजिकं न होति, सो पन कण्टकनासनाय एव नासेतब्बोति.

अनापुच्छावरणवत्थुआदिकथावण्णना निट्ठिता.

पण्डकवत्थुकथावण्णना

१०९. पण्डकवत्थुस्मिं ¶ आसित्तउसूयपक्खपण्डका तयोपि पुरिसभावलिङ्गादियुत्ता अहेतुकपटिसन्धिका, ते च किलेसपरियुट्ठानस्स बलवताय नपुंसकपण्डकसदिसत्ता ‘‘पण्डका’’ति वुत्ता. तेसु आसित्तउसूयपण्डकानं द्विन्नं किलेसपरियुट्ठानं योनिसोमनसिकारादीहि वीतिक्कमतो निवारेतुम्पि सक्का, तेन ते पब्बाजेतब्बा वुत्ता. पक्खपण्डकस्स पन काळपक्खेसु उम्मादो विय किलेसपरिळाहो अवत्थरन्तो आगच्छति, वीतिक्कमं पत्वा एव च निवत्तति. तस्मा सो तस्मिं पक्खे न पब्बाजेतब्बोति वुत्तो. तदेतं विभागं दस्सेतुं ‘‘यस्स परेस’’न्तिआदि वुत्तं. तत्थ आसित्तस्साति मुखे आसित्तस्स अत्तनोपि असुचिमुच्चनेन ¶ परिळाहो वूपसम्मति. उसूयाय उप्पन्नायाति उसूयाय वसेन अत्तनो सेवेतुकामतारागे उप्पन्ने असुचिमुत्तिया परिळाहो वूपसम्मति.

‘‘बीजानि अपनीतानी’’ति वुत्तत्ता बीजेसु ठितेसु निमित्तमत्ते अपनीते पण्डको न होति. भिक्खुनोपि अनाबाधपच्चया तदपनयने थुल्लच्चयमेव, न पन पण्डकत्तं, बीजेसु पन अपनीतेसु अङ्गजातम्पि रागेन कम्मनियं न होति, पुमभावो विगच्छति, मस्सुआदिपुरिसलिङ्गम्पि उपसम्पदापि विगच्छति, किलेसपरिळाहोपि दुन्निवारवीतिक्कमो होति नपुंसकपण्डकस्स विय. तस्मा ईदिसो उपसम्पन्नोपि नासेतब्बोति वदन्ति. यदि एवं कस्मा बीजुद्धरणे पाराजिकं न पञ्ञत्तन्ति? एत्थ ताव केचि वदन्ति ‘‘पञ्ञत्तमेवेतं भगवता ‘पण्डको, भिक्खवे, अनुपसम्पन्नो न उपसम्पादेतब्बो, उपसम्पन्नो नासेतब्बो’ति वुत्तत्ता’’ति. केचि पन ‘‘यस्मा बीजुद्धरणक्खणे पण्डको न होति, तस्मा तस्मिं खणे पाराजिकं न पञ्ञत्तं. यस्मा पन सो उद्धटबीजो भिक्खु अपरेन समयेन वुत्तनयेन पण्डकत्तं आपज्जति, अभावको होति, उपसम्पदाय अवत्थु, ततो एव चस्स उपसम्पदा विगच्छति, तस्मा एस पण्डकत्तुपगमनकालतो पट्ठाय जातिया नपुंसकपण्डकेन सद्धिं योजेत्वा ‘उपसम्पन्नो नासेतब्बो’ति अभब्बोति वुत्तो, न ततो पुब्बे. अयञ्च किञ्चापि सहेतुको, भावक्खयेन पनस्स अहेतुकसदिसताय मग्गोपि न उप्पज्जती’’ति वदन्ति. अपरे पन ‘‘पब्बज्जतो पुब्बे उपक्कमेन पण्डकभावमापन्नं सन्धाय ‘उपसम्पन्नो नासेतब्बो’ति वुत्तं, उपसम्पन्नस्स पन पच्छा उपक्कमेन उपसम्पदापि न विगच्छती’’ति, तं न युत्तं. यदग्गेन हि पब्बज्जतो पुब्बे उपक्कमेन अभब्बो होति, तदग्गेन पच्छापि होतीति वीमंसित्वा गहेतब्बं.

इत्थत्तादि ¶ भावो नत्थि एतस्साति अभावको. पब्बज्जा न वारिताति एत्थ पब्बज्जागहणेनेव उपसम्पदापि गहिता. तेनाह ‘‘यस्स चेत्थ पब्बज्जा वारिता’’तिआदि. तस्मिंयेवस्स पक्खे पब्बज्जा वारिताति एत्थ पन अपण्डकपक्खेपि पब्बज्जामत्तमेव लभति, उपसम्पदा पन तदापि न वट्टति, पण्डकपक्खे पन आगते लिङ्गनासनाय नासेतब्बोति वेदितब्बं.

पण्डकवत्थुकथावण्णना निट्ठिता.

थेय्यसंवासकवत्थुकथावण्णना

११०. थेय्यसंवासकवत्थुम्हि ¶ कोलञ्ञाति कुले जाता, तत्थ वा विदिता ञाता पसिद्धा, तं वा जानन्ति कोलञ्ञाति ञातकानं नामं. थेय्याय लिङ्गग्गहणमत्तम्पि इध संवासो एवाति आह ‘‘तयो थेय्यसंवासका’’ति. न यथावुड्ढं वन्दनन्ति भिक्खूनं, सामणेरानं वा वन्दनं न सादियति.

यथावुड्ढं वन्दनन्ति अत्तना मुसावादेन दस्सितवस्सक्कमेन भिक्खूनं वन्दनं सादियति, दहरसामणेरो पन वुड्ढसामणेरानं, दहरभिक्खु च वुड्ढानं वन्दनं सादियन्तोपि थेय्यसंवासको न होति. इमस्मिं अत्थेति संवासत्थेनकत्थे.

‘‘भिक्खुवस्सानी’’ति इदं संवासत्थेनके वुत्तपाठवसेन वुत्तं, सयमेव पन पब्बजित्वा सामणेरवस्सानि गणेन्तोपि उभयत्थेनको एव. न केवलञ्च पुरिसोव, इत्थीपि भिक्खुनीसु एवं पटिपज्जति, थेय्यसंवासिकाव. आदिकम्मिकापि चेत्थ न मुच्चन्ति, उपसम्पन्नेसु एव पञ्ञत्तापत्तिं पटिच्च आदिकम्मिका वुत्ता, तेनेवेत्थ आदिकम्मिकोपि न मुत्तो.

राज…पे… भयेनाति एत्थ भय-सद्दो पच्चेकं योजेतब्बो. याव सो सुद्धमानसोति ‘‘इमिना लिङ्गेन भिक्खू वञ्चेत्वा तेहि संवसिस्सामी’’ति असुद्धचित्ताभावेन सुद्धचित्तो. तेन हि असुद्धचित्तेन लिङ्गे गहितमत्ते पच्छा भिक्खूहि सह संवसतु वा मा वा, लिङ्गत्थेनको होति. पच्छा संवसन्तोपि अभब्बो हुत्वा संवसति. तस्मा उभयत्थेनकोपि लिङ्गत्थेनके एव पविसतीति वेदितब्बं. यो पन राजादिभयेन सुद्धचित्तोव लिङ्गं गहेत्वा विचरन्तो पच्छा ‘‘भिक्खुवस्सानि गणेत्वा जीविस्सामी’’ति असुद्धचित्तं उप्पादेति, सो चित्तुप्पादमत्तेन थेय्यसंवासकोपि न होति सुद्धचित्तेन गहितलिङ्गत्ता. सचे पन सो भिक्खूनं सन्तिकं ¶ गन्त्वा सामणेरवस्सगणनादिं करोति, तदा संवासत्थेनको, उभयत्थेनको वा होतीति दट्ठब्बं. यं पन परतो सह धुरनिक्खेपेन ‘‘अयम्पि थेय्यसंवासको, वा’’ति वुत्तं, तं भिक्खूहि सङ्गम्म संवासाधिवासनवसेन धुरनिक्खेपं सन्धाय वुत्तं. तेन वुत्तं ‘‘संवासं नाधिवासेति यावा’’ति. तस्स ताव थेय्यसंवासको नाम न वुच्चतीति सम्बन्धो दट्ठब्बो. एत्थ च चोरादिभयं ¶ विनापि कीळाधिप्पायेन लिङ्गं गहेत्वा भिक्खूनं सन्तिके पब्बजितालयं दस्सेत्वा वन्दनादिं असादियन्तोपि ‘‘सोभति नु खो मे पब्बजितलिङ्ग’’न्तिआदिना सुद्धचित्तेन गण्हन्तोपि थेय्यसंवासको न होतीति दट्ठब्बं.

सब्बपासण्डियभत्तानीति सब्बसामयिकानं साधारणं कत्वा पञ्ञत्तभत्तानि, इदञ्च भिक्खूनञ्ञेव नियमितभत्तगहणे संवासोपि सम्भवेय्याति सब्बसाधारणभत्तं वुत्तं. संवासं पन असादियित्वा अभिक्खुकविहारादीसु विहारभत्तादीनि भुञ्जन्तोपि थेय्यसंवासको न होति एव. कम्मन्तानुट्ठानेनाति कसिआदिकम्मकरणेन. पत्तचीवरं आदायाति भिक्खुलिङ्गवेसेन सरीरेन धारेत्वा.

‘‘यो एवं पब्बजति, सो थेय्यसंवासको नाम होती’’ति इदं निदस्सनमत्तं, ‘‘थेय्यसंवासको’’ति पन नामं अजानन्तोपि ‘‘एवं कातुं न वट्टती’’ति वा ‘‘एवं करोन्तो समणो नाम न होती’’ति वा ‘‘यदि आरोचेस्सामि, छड्डेस्सन्ति म’’न्ति वा ‘‘येन केनचि पब्बज्जा मे न रुहती’’ति जानाति, थेय्यसंवासको होति. यो पन पठमं ‘‘पब्बज्जा एवं मे गहिता’’तिसञ्ञी केवलं अन्तरा अत्तनो सेतवत्थनिवासनादिविप्पकारं पकासेतुं लज्जन्तो न कथेति, सो थेय्यसंवासको न होति. अनुपसम्पन्नकालेयेवाति एत्थ अवधारणेन उपसम्पन्नकाले थेय्यसंवासकलक्खणं ञत्वा वञ्चनायपि नारोचेति, थेय्यसंवासको न होतीति दीपेति. सो परिसुद्धचित्तेन गहितलिङ्गत्ता लिङ्गत्थेनको न होति, लद्धूपसम्पदत्ता तदनुगुणस्सेव संवासस्स सादितत्ता संवासत्थेनकोपि न होति. अनुपसम्पन्नो पन लिङ्गत्थेनको होति, संवासारहस्स लिङ्गस्स गहितत्ता संवाससादियनमत्तेन संवासत्थेनको होति.

सलिङ्गे ठितोति सलिङ्गभावे ठितो. थेय्यसंवासको न होतीति भिक्खूहि दिन्नलिङ्गस्स अपरिच्चत्तत्ता लिङ्गत्थेनको न होति, भिक्खुपटिञ्ञाय अपरिच्चत्तत्ता संवासत्थेनको न होतीति. यं पन मातिकाट्ठकथायं ‘‘लिङ्गानुरूपस्स संवासस्स सादितत्ता न संवासत्थेनको’’ति (कङ्खा. अट्ठ. पठमपाराजिकवण्णना) कारणं वुत्तं, तम्पि इदमेव कारणं सन्धाय वुत्तं. इतरथा ¶ ¶ सामणेरस्सपि भिक्खुवस्सगणनादीसु लिङ्गानुरूपसंवासो एव सादितोति संवासत्थेनकता न सिया भिक्खूहि दिन्नलिङ्गस्स उभिन्नम्पि साधारणत्ता. यथा चेत्थ भिक्खु, एवं सामणेरोपि पाराजिकं समापन्नो सामणेरपटिञ्ञाय अपरिच्चत्तत्ता संवासत्थेनको न होतीति वेदितब्बो. सोभतीति सम्पटिच्छित्वाति कासावधारणे धुरं निक्खिपित्वा गिहिभावं सम्पटिच्छित्वा.

यो कोचि वुड्ढपब्बजितोति सामणेरं सन्धाय वुत्तं. महापेळादीसूति विलीवादिमयेसु घरद्वारेसु ठपितभत्तभाजनविसेसेसु, एतेन विहारे भिक्खूहि सद्धिं वस्सगणनादीनं अकरणं दस्सेति.

थेय्यसंवासकवत्थुकथावण्णना निट्ठिता.

तित्थियपक्कन्तककथावण्णना

तित्थियपक्कन्तकादिकथासु तेसं लिङ्गे आदिन्नमत्तेति वीमंसादिअधिप्पायं विना ‘‘तित्थियो भविस्सामी’’ति सन्निट्ठानवसेन लिङ्गे कायेन धारितमत्ते. सयमेवाति तित्थियानं सन्तिकं अगन्त्वा सयमेव सङ्घारामेपि कुसचीरादीनि निवासेति. आजीवको भविस्सामि…पे… गच्छतीति आजीवकानं सन्तिके तेसं पब्बजनविधिना ‘‘आजीवको भविस्सामी’’ति गच्छति. तस्स हि तित्थियभावूपगमनं पति सन्निट्ठाने विज्जमानेपि ‘‘गन्त्वा भविस्सामी’’ति परिकप्पितत्ता पदवारे दुक्कटमेव वुत्तं. दुक्कटन्ति पाळिया अवुत्तेपि मेथुनादीसु वुत्तपुब्बपयोगदुक्कटानुलोमतो वुत्तं. एतेन च सन्निट्ठानवसेन लिङ्गे सम्पटिच्छिते पाराजिकं, ततो पुरिमपयोगे थुल्लच्चयञ्च वत्तब्बमेव, थुल्लच्चयक्खणे निवत्तन्तोपि आपत्तिं देसापेत्वा मुच्चति एवाति दट्ठब्बं. यथा चेत्थ, एवं सङ्घभेदेपि लोहितुप्पादेपि भिक्खूनं पुब्बपयोगादीसु दुक्कटथुल्लच्चयपाराजिकाहि मुच्चनसीमा च वेदितब्बा. सासनविरुद्धतायेत्थ आदिकम्मिकानम्पि अनापत्ति न वुत्ता. पब्बज्जायपि अभब्बतादस्सनत्थं पनेते, अञ्ञे च पाराजिककण्डे विसुं सिक्खापदेन पाराजिकादिं अदस्सेत्वा इध अभब्बेसु एव वुत्ताति वेदितब्बं.

तं ¶ लद्धिन्ति तित्थियवेसे सेट्ठभावग्गहणमेव सन्धाय वुत्तं. तेसञ्हि तित्थियानं सस्सतादिग्गाहं गण्हन्तोपि लिङ्गे असम्पटिच्छिते तित्थियपक्कन्तको न होति, तं लद्धिं अग्गहेत्वापि ‘‘एतेसं वतचरिया सुन्दरा’’ति लिङ्गं सम्पटिच्छन्तो तित्थियपक्कन्तको होति एव ¶ . लद्धिया अभावेनाति भिक्खुभावे सालयताय तित्थियभावूपगमनलद्धिया अभावेन, एतेन च आपदासु कुसचीरादिं पारुपन्तस्सापि नग्गस्स विय अनापत्तिं दस्सेति.

उपसम्पन्नभिक्खुना कथितोति एत्थ सङ्घभेदकोपि उपसम्पन्नभिक्खुनाव कथितो, मातुघातकादयो पन अनुपसम्पन्नेनापीति दट्ठब्बं.

तित्थियपक्कन्तककथावण्णना निट्ठिता.

तिरच्छानवत्थुकथावण्णना

१११. उदकसञ्चारिकं मण्डूकभक्खं नागसरीरन्ति सम्बन्धितब्बं. विस्सरभयेनाति नागस्स सरीरं दिस्वा भिक्खुनो विरवनभयेन. कपिमिद्धादीसु नागसरीरं नुप्पज्जतीति तदुप्पत्तिसीमं दस्सेन्तो आह ‘‘विस्सट्ठो’’तिआदि.

तिरच्छानवत्थुकथावण्णना निट्ठिता.

मातुघातकादिकथावण्णना

११२. अपवाहनन्ति सोधनं. तिरच्छानादिअमनुस्सजातितो मनुस्सजातिकानञ्ञेव पुत्तेसु मेत्तादयोपि तिक्खविसदा होन्ति लोकुत्तरगुणा वियाति आह ‘‘मनुस्सित्थिभूता जनिका माता’’ति. यथा मनुस्सानञ्ञेव कुसलप्पवत्ति तिक्खविसदा, एवं अकुसलप्पवत्तिपीति आह ‘‘सयम्पि मनुस्सजातिकेनेवा’’तिआदि. आनन्तरियेनाति एत्थ चुतिअनन्तरं निरये पटिसन्धिफलं अनन्तरं नाम, तस्मिं अनन्तरे जनकत्तेन नियुत्तं आनन्तरियं, तेन. वेसिया पुत्तोति उपलक्खणमत्तं, कुलित्थिया अतिचारिनिया पुत्तोपि अत्तनो पितरं अजानित्वा घातेन्तो पितुघातकोव होति.

११४. अवसेसन्ति ¶ अनागामिआदिकं. यं पनेत्थ वत्तब्बं, तं मनुस्सविग्गहपाराजिके वुत्तमेव.

११५. अयं सङ्घभेदकोति पकतत्तं भिक्खुं सन्धाय वुत्तं. पुब्बे एव पाराजिकं समापन्नो ¶ वा वत्थादिदोसेन विपन्नोपसम्पदो वा सङ्घं भिन्दन्तोपि अनन्तरियं न फुसति, सङ्घो पन भिन्नोव होति, पब्बज्जा चस्स न वारिताति दट्ठब्बं.

‘‘दुट्ठचित्तेना’’ति वुत्तमेवत्थं विभावेति ‘‘वधकचित्तेना’’ति. लोहितं उप्पादेतीति तथागतस्स वेरीहि अभेज्जकायताय केनचि बलक्कारेन चम्मादिछेदं कत्वा बहि लोहितं पग्घरापेतुं न सक्का, आवुधादिपहारेन पन लोहितं ठानतो चलित्वा कुप्पमानं एकत्थ सञ्चितं होति, एत्तकेन पन पहारदायको लोहितुप्पादको नाम होति देवदत्तो विय. चेतियं पन बोधिं वा पटिमादिं वा भिन्दतो आनन्तरियं न होति, आनन्तरियसदिसं महासावज्जं होति. बोधिरुक्खस्स पन ओजोहरणसाखा चेव सधातुकं चेतियं बाधयमाना च छिन्दितब्बा, पुञ्ञमेवेत्थ होति.

मातुघातकादिकथावण्णना निट्ठिता.

उभतोब्यञ्जनकवत्थुकथावण्णना

११६. इत्थिउभतोब्यञ्जनकोति इत्थिन्द्रिययुत्तो, इतरो पन पुरिसिन्द्रिययुत्तो. एकस्स हि भावद्वयं सह नुप्पज्जति यमके (यम. ३.इन्द्रिययमक.१८८) पटिक्खित्तत्ता. दुतियब्यञ्जनं पन कम्मसहायेन अकुसलचित्तेनेव भावविरहितं उप्पज्जति. पकतित्थिपुरिसानम्पि कम्ममेव ब्यञ्जनलिङ्गानं कारणं, न भावो तस्स केनचि पच्चयेन पच्चयत्तस्स पट्ठाने अवुत्तत्ता. केवलं भावसहितानंयेव ब्यञ्जनलिङ्गानं पवत्तिदस्सनत्थं अट्ठकथासु ‘‘इत्थिन्द्रियं पटिच्च इत्थिलिङ्गादीनी’’तिआदिना (ध. स. अट्ठ. ६३२) इन्द्रियं ब्यञ्जनकआरणत्तेन वुत्तं, इध पन अकुसलबलेन इन्द्रियं विनापि ब्यञ्जनं उप्पज्जतीति वुत्तं. उभिन्नम्पि चेसं उभतोब्यञ्जनकानं यदा इत्थिया रागो उप्पज्जति, तदा पुरिसब्यञ्जनं पाकटं होति, इतरं पटिच्छन्नं. यदा पुरिसे रागो उप्पज्जति, तदा इत्थिब्यञ्जनं ¶ पाकटं होति, इतरं पटिच्छन्नं. तत्थ विचारणक्कमोति पटिसन्धिक्खणे एव इत्थिपुरिसलिङ्गानम्पि पातुभावप्पकासके कुरुन्दिवचने अयुत्ततापकासनत्थं अत्थविचारणक्कमो. अट्ठसालिनियञ्हि ‘‘इत्थिलिङ्गादीनि पन इत्थिन्द्रियं पटिच्च पवत्ते समुट्ठितानी’’तिआदि (ध. स. अट्ठ. ६३२) वुत्तं. नेवस्स पब्बज्जा अत्थीति योजना. यो च पटिक्खित्ते अभब्बे, भब्बे च पुग्गले ञत्वा पब्बाजेति, उपसम्पादेति वा, दुक्कटं. अजानन्तस्स सब्बत्थ अनापत्तीति वेदितब्बं.

उभतोब्यञ्जनकवत्थुकथावण्णना निट्ठिता.

अनुपज्झायकादिवत्थुकथावण्णना

११७. अनुपज्झायादिवत्थूसु ¶ सिक्खापदं अपञ्ञत्तन्ति ‘‘न, भिक्खवे, अनुपज्झायको उपसम्पादेतब्बो’’ति इधेव पञ्ञापियमानसिक्खापदं सन्धाय वुत्तं. ‘‘कम्मं पन न कुप्पती’’ति इदं उपज्झायाभावेपि ‘‘इत्थन्नामस्स उपसम्पदापेक्खो, इत्थन्नामेन उपज्झायेना’’ति मतस्स वा विब्भमन्तस्स वा पुराणउपज्झायस्स, अञ्ञस्स वा यस्स कस्सचि अविज्जमानस्सापि नामेन सब्बत्थ उपज्झायकित्तनस्स कतत्ता वुत्तं. यदि हि उपज्झायकित्तनं न करेय्य, ‘‘पुग्गलं न परामसती’’ति वुत्तकम्मविपत्ति एव सिया. तेनेव पाळियं ‘‘अनुपज्झायक’’न्ति वुत्तं. अट्ठकथायम्पिस्स ‘‘उपज्झायं अकित्तेत्वा’’ति अवत्वा ‘‘उपज्झायं अगाहापेत्वा सब्बेन सब्बं उपज्झायविरहितं’’इच्चेव अत्थोति वुत्तो. पाळियं सङ्घेन उपज्झायेनाति ‘‘अयं इत्थन्नामो सङ्घस्स उपसम्पदापेक्खो, इत्थन्नामो सङ्घं उपसम्पदं याचति सङ्घेन उपज्झायेना’’ति एवं कम्मवाचाय सङ्घमेव उपज्झायं कित्तेत्वाति अत्थो. एवं गणेन उपज्झायेनाति एत्थापि ‘‘अयं इत्थन्नामो गणस्स उपसम्पदापेक्खो’’तिआदिना योजना वेदितब्बा, एवं वुत्तेपि कम्मं न कुप्पति एव दुक्कटस्सेव वुत्तत्ता. अञ्ञथा ‘‘सो च पुग्गलो अनुपसम्पन्नो’’ति वदेय्य. तेनाह ‘‘सङ्घेना’’तिआदि. तत्थ पण्डकादीहि उपज्झायेहि करियमानेसु कम्मेसु पण्डकादिके विनाव यदि पञ्चवग्गादिगणो पूरति, कम्मं न कुप्पति, इतरथा कुप्पतीति वेदितब्बं.

अनुपज्झायकादिवत्थुकथावण्णना निट्ठिता.

अपत्तकादिवत्थुकथावण्णना

११८. अपत्तचीवरवत्थूसुपि ¶ पत्तचीवरानं अभावेपि ‘‘परिपुण्णस्स पत्तचीवर’’न्ति कम्मवाचाय सावितत्ता कम्मकोपं अवत्वा दुक्कटमेव वुत्तं. इतरथा सावनाय हापनतो कम्मकोपो एव सिया. केचि पन ‘‘पठमं अनुञ्ञातकम्मवाचाय उपसम्पन्ना विय इदानिपि ‘परिपुण्णस्स पत्तचीवर’न्ति अवत्वा कम्मवाचाय उपसम्पन्नापि सूपसम्पन्नाएवा’’ति वदन्ति, तं न युत्तं. अनुञ्ञातकालतो पट्ठाय हि अपरामसनं सावनाय हापनविपत्ति एव होति ‘‘इत्थन्नामो सङ्घं उपसम्पदं याचती’’ति पदस्स हापने विय. तम्पि हि पच्छा अनुञ्ञातं, ‘‘सङ्घं, भन्ते, उपसम्पदं याचामी’’तिआदिवाक्येन अयाचेत्वा तम्पि उपसम्पादेन्तो ‘‘अयं इत्थन्नामो सङ्घं उपसम्पदं याचती’’ति वत्वाव यदि कम्मवाचं करोति, कम्मं सुकतमेव होति ¶ , नो चे विपन्नं. सब्बपच्छा हि अनुञ्ञातकम्मवाचतो किञ्चिपि परिहापेतुं न वट्टति, सावनाय हापनमेव होति. अञ्ञे वा भिक्खू दातुकामा होन्तीति सम्बन्धो.

अनामट्ठपिण्डपातन्ति भिक्खूहि लद्धभिक्खतो अग्गहितग्गं पिण्डपातं. सामणेरभागसमकोति एत्थ किञ्चापि सामणेरानम्पि आमिसभागस्स समकमेव दिय्यमानत्ता विसुं सामणेरभागो नाम नत्थि, पत्तचीवरपरिकम्ममत्तपटिबद्धपब्बज्जताय पन सामणेरसदिसा एते पण्डुपलासाति दस्सनत्थं एवं वुत्तन्ति दट्ठब्बं. नियतासन्नपब्बज्जस्सेव चायं भागो दीयति. तेनेव ‘‘याव पत्तो पच्चती’’तिआदि वुत्तं. आमिसभागोति विहारे दिन्नं सङ्घभत्तं, तत्रुप्पादञ्च सन्धाय वुत्तं, न दायकानं गेहेसु तेहि दिय्यमानं. तेनेव सलाकभत्तादि पटिक्खित्तं, दायका विप्पटिसारिनो होन्तीति. भेसज्जन्तिआदिना पन गिहीनं भेसज्जकरणादिदोसो एत्थ न होतीति दस्सेति.

अपत्तकादिवत्थुकथावण्णना निट्ठिता.

हत्थच्छिन्नादिवत्थुकथावण्णना

११९. हत्थच्छिन्नादिवत्थूसु ¶ कण्णमूलेति सकलस्स कण्णस्स छेदं सन्धाय वुत्तं. कण्णसक्खलिकायाति कण्णचूळिकाय. यस्स पन कण्णाविद्धेति हेट्ठा कुण्डलादिठपनच्छिद्दं सन्धाय वुत्तं. तञ्हि सङ्घटनक्खमं. अजपदकेति अजपदनासिकट्ठिकोटियं. ततो हि उद्धं न विच्छिन्दति. सक्का होति सन्धेतुन्ति अविरूपसण्ठानं सन्धाय वुत्तं, विरूपं पन परिसदूसकतं आपादेति.

खुज्जसरीरोति वङ्कसरीरो. ब्रह्मुनो विय उजुकं गत्तं सरीरं यस्स, सो ब्रह्मुज्जुगत्तो, भगवा.

परिवटुमोति समन्ततो वट्टकायो, एतेन एवरूपा एव वामनका न वट्टन्तीति दस्सेति.

कूटकूटसीसोति अनेकेसु ठानेसु पिण्डिकमंसतं दस्सेतुं आमेडितं कतं. तेनाह ‘‘तालफलपिण्डिसदिसेना’’ति, तालफलानं मञ्जरी पिण्डि नाम. अनुपुब्बतनुकेन सीसेनाति चेतियथूपिका ¶ विय कमेन किसेन सीसेन, थूलवेळुपब्बं विय आदितो पट्ठाय यावपरियोसानं समथूलेन उच्चेन सीसेन समन्नागतो नाळिसीसो नाम. कप्पसीसोति गजमत्थकं विय द्विधा भिन्नसीसो. ‘‘कण्णिककेसो वा’’ति इमस्स विवरणं ‘‘पाणकेही’’तिआदि. मक्कटस्सेव नळाटेपि केसानं उट्ठितभावं सन्धायाह ‘‘सीसलोमेही’’तिआदि.

मक्कटभमुकोति नळाटलोमेहि अविभत्तलोमभमुको. अक्खिचक्कलेहीति कण्हमण्डलेहि. केकरोति तिरियं पस्सनको. उदकतारकाति ओलोकेन्तानं उदके पटिबिम्बिकच्छाया, उदकपुब्बुळन्ति केचि. अक्खितारकाति अभिमुखे ठितानं छाया, अक्खिगण्डकातिपि वदन्ति. अतिपिङ्गलक्खीति मज्जारक्खि. मधुपिङ्गलन्ति मधुवण्णपिङ्गलं. निप्पखुमक्खीति एत्थ पखुम-सद्दो अक्खिदललोमेसु निरूळ्हो, तदभावा निप्पखुमक्खि. अक्खिपाकेनाति अक्खिदल परियन्तेसु पूतिभावापज्जनरोगेन.

चिपिटनासिकोति ¶ अनुन्नतनासिको. पटङ्गमण्डूको नाम महामुखमण्डूको. भिन्नमुखोति उपक्कमुखपरियोसानो, सब्बदा विवटमुखो वा. वङ्कमुखोति एकपस्से अपक्कम्म ठितहेट्ठिमहनुकट्ठिको. ओट्ठच्छिन्नकोति उभोसु ओट्ठेसु यत्थ कत्थचि जातिया वा पच्छा वा सत्थादिना अपनीतमंसेन ओट्ठेन समन्नागतो. एळमुखोति निच्चपग्घरितलालामुखो.

भिन्नगलोति अवनतगतो. भिन्नउरोति अतिनिन्नउरमज्झो. एवं भिन्नपिट्ठिपि. सब्बञ्चेतन्ति ‘‘कच्छुगत्तो’’तिआदिं सन्धाय वुत्तं. एत्थ च विनिच्छयो कुट्ठादीसु वुत्तो एवाति आह ‘‘विनिच्छयो’’तिआदि.

वातण्डिकोति अण्डवातरोगेन उद्धुतबीजण्डकोसेन समन्नागतो, यस्स निवासनेन पटिच्छन्नम्पि उन्नतं पकासति, सोव न पब्बाजेतब्बो. विकटोति तिरियंगमनपादो, यस्स चङ्कमतो जाणुका बहि निगच्छन्ति. पण्होति पच्छतो परिवत्तनकपादो, यस्स चङ्कमतो जाणुका अन्तो पविसन्ति. महाजङ्घोति थूलजङ्घो. महापादोति महन्तेन पादतलेन युत्तो. पादवेमज्झेति पिट्ठिपादवेमज्झे, एतेन अग्गपादो च पण्हि च सदिसोति दस्सेति.

मज्झे सङ्कुटितपादत्ताति कुण्डपादताय कारणविभावनं. अग्गे सङ्कुटितपादत्ताति कुण्डपादताय सकुणपादस्सेव गमनविभावनं. पिट्ठिपादग्गेन चङ्कमन्तोति ‘‘पादस्स बाहिरन्तेनाति ¶ च अब्भन्तरन्तेना’’ति च इदं पादतलस्स उभोहि परियन्तेहि चङ्कमनं सन्धाय वुत्तं.

मम्मनन्ति ठानकरणविसुद्धिया अभावेन अयुत्तक्खरवचनं. वचनानुकरणेन हि सो मम्मनो वुत्तो. यो च करणसम्पन्नोपि एकमेवक्खरं हिक्कारबहुसो वदति, सोपि इधेव सङ्गय्हति. यो वा पन हिक्कं निग्गहेत्वापि अनामेडितक्खरमेव सिलिट्ठवचनं वत्तुं समत्थो, सो पब्बाजेतब्बो.

आपत्तितो न मुच्चतीति ञत्वा करोन्तोव न मुच्चति. जीवितन्तरायादिआपदासु अरुचिया कायसामग्गिं देन्तस्स अनापत्ति. अप्पत्तो ओसारणन्ति ओसारणाय अनरहोति अत्थो.

हत्थच्छिन्नादिवत्थुकथावण्णना निट्ठिता.

अलज्जिनिस्सयवत्थुकथावण्णना

१२०. निस्सयपटिसंयुत्तवत्थूसु ¶ भिक्खूहि समानो भागो दिट्ठिसीलादिगुणकोट्ठासो अस्साति भिक्खुसभागो, तस्स भावो भिक्खुसभागता.

अलज्जिनिस्सयवत्थुकथावण्णना निट्ठिता.

गमिकादिनिस्सयवत्थुकथावण्णना

१२१. निस्सयकरणीयोति एत्थ निस्सयग्गहणं निस्सयो, सो करणीयो यस्साति विसेसनस्स परनिपातो दट्ठब्बो. विस्समेन्तो वा…पे… अनापत्तीति गमनसउस्साहताय तथा वसन्तोपि अद्धिको एव, तत्थ निस्सयदायके असति अनापत्तीति अधिप्पायो. एतेन च परिस्समादिअभावे सेनासनादिसम्पदं पटिच्च वसतो आपत्तीति दस्सेति. तञ्च अगमनपच्चया दिवसे दिवसे आपज्जतीति वदन्ति. चीवररजनादिकिच्चत्थाय गरूहि पेसितस्सापि किच्चपरियोसानमेव वसितब्बं, न ततो परं. गरूहिपि तावकालिककिच्चत्थमेव पेसलदहरा पेसितब्बा, न निच्चकालकिच्चत्थन्ति दट्ठब्बं. ‘‘नावाय गच्छन्तस्स…पे… अनापत्ती’’ति ¶ वुत्तत्ता एवरूपं अविधेय्यतं विना निस्सयदायकरहितट्ठाने वस्सं उपगन्तुं न वट्टतीति दट्ठब्बं.

तस्स निस्सायाति तं निस्साय. आसाळ्हीमासे…पे… तत्थ गन्तब्बन्ति एत्थ पन सचेपि ‘‘असुको थेरो एत्थ आगमिस्सति आगमिस्सती’’ति आगमेन्तस्सेव वस्सूपनायिकदिवसो होति. होतु, वसितट्ठाने वस्सं अनुपगम्म यत्थ निस्सयो लब्भति, दूरेपि तत्थ गन्त्वा पच्छिमिकाय उपगन्तब्बं.

१२२. गोत्तेनपीति ‘‘आयस्मतो पिप्पलिस्स उपसम्पदापेक्खो’’ति एवं नामं अवत्वा गोत्तनामेनपीति अत्थो, तेन ‘‘कोनामो ते उपज्झायो’’ति पुट्ठेन गोत्तनामेन ‘‘आयस्मा कस्सपो’’ति वत्तब्बन्ति सिद्धं होति. तस्मा अञ्ञम्पि किञ्चि तस्स नामं पसिद्धं, तस्मिं वा खणे सुखग्गहणत्थं नामं पञ्ञापितं, तं सब्बं गहेत्वापि अनुस्सावना कातब्बा. यथा ¶ उपज्झायस्स, एवं उपसम्पदापेक्खस्सपि गोत्तादिनामेन, तङ्खणिकनामेन च अनुस्सावनं कातुं वट्टति. तस्मिम्पि खणे ‘‘अयं तिस्सो’’ति वा ‘‘नागो’’ति वा नामं करोन्तेहि अनुसासकसम्मुतितो पठममेव कातब्बं, एवं कत्वापि अन्तरायिकधम्मानुसासनपुच्छनकालेसु ‘‘किन्नामोसि, अहं भन्ते नागो नाम, कोनामो ते उपज्झायो, उपज्झायो मे भन्ते तिस्सो नामा’’तिआदिना विञ्ञापेन्तेन उभिन्नम्पि चित्ते ‘‘ममेदं नाम’’न्ति यथा सञ्ञा उप्पज्जति, एवं विञ्ञापेतब्बं. सचे पन तस्मिं खणे पकतिनामेन वत्वा पच्छा तिस्स-नामादिअपुब्बनामेन अनुस्सावेति, न वट्टति.

तत्थ च किञ्चापि उपज्झायस्सेव नामं अग्गहेत्वा येन केनचि नामेन ‘‘तिस्सस्स उपसम्पदापेक्खो’’तिआदिनापि पुग्गले परामट्ठे कम्मं सुकतमेव होति अनुपज्झायकादीनं उपसम्पदाकम्मं विय उपज्झायस्स अभावेपि अभब्बत्तेपि कम्मवाचाय पुग्गले परामट्ठे कम्मस्स सिज्झनतो. उपसम्पदापेक्खस्स पन यथासकं नामं विना अञ्ञेन नामेन अनुस्साविते कम्मं कुप्पति, सो अनुपसम्पन्नोव होति. तत्थ ठितो अञ्ञो अनुपसम्पन्नो विय गहितनामस्स वत्थुपुग्गलस्स तत्थ अभावा, एतस्स च नामस्स अनुस्सावनाय अवुत्तत्ता. तस्मा उपसम्पदापेक्खस्स पकतिनामं परिवत्तेत्वा अनुपुब्बेन नागादिनामेन अनुस्सावेतुकामेन पटिकच्चेव ‘‘त्वं नागो’’तिआदिना विञ्ञापेत्वा अनुसासनअन्तरायिकधम्मपुच्छनक्खणेसुपि तस्स च सङ्घस्स च यथा पाकटं होति, तथा पकासेत्वाव नागादिनामेन अनुस्सावेतब्बं. एकस्स बहूनि नामानि होन्ति, तेसु एकं गहेतुं वट्टति.

यं ¶ पन उपसम्पदापेक्खउपज्झायानं एकत्थ गहितं नामं, तदेव ञत्तिया, सब्बत्थ अनुस्सावनासु च गहेतब्बं. गहिततो हि अञ्ञस्मिं गहिते ब्यञ्जनं भिन्नं नाम होति, कम्मं विपज्जति. अत्थतो, हि ब्यञ्जनतो च अभिन्ना एव ञत्ति, अनुस्सावना च वट्टन्ति, उपज्झायनामस्स पन पुरतो ‘‘आयस्मतो तिस्सस्सा’’तिआदिना आयस्मन्त-पदं सब्बत्थ योजेत्वापि अनुस्सावेति, तथा अयोजितेपि दोसो नत्थि.

पाळियं पन किञ्चापि ‘‘इत्थन्नामस्स आयस्मतो’’ति पच्छतो ‘‘आयस्मतो’’ति पदं वुत्तं, तथापि ‘‘आयस्मा सारिपुत्तो अत्थकुसलो’’तिआदिना ¶ नामस्स पुरतो आयस्मन्त-पदयोगस्स दस्सनतो पुरतोव पयोगो युत्ततरो. तञ्च एकत्थ योजेत्वा अञ्ञत्थ अयोजितेपि एकत्थ पुरतो योजेत्वा अञ्ञत्थ पच्छतो योजनेपि सावनाय हापनं नाम न होति नामस्स अहापितत्ता. तेनेव पाळियम्पि ‘‘इत्थन्नामस्स आयस्मतो’’ति एकत्थ योजेत्वा ‘‘इत्थन्नामेन उपज्झायेना’’तिआदीसु ‘‘आयस्मतो’’ति न योजितन्ति वदन्ति. तञ्च किञ्चापि एवं, तथापि सब्बट्ठानेपि एकेनेव पकारेन योजेत्वा एव वा अयोजेत्वा वा अनुस्सावनं पसत्थतरन्ति गहेतब्बं.

गमिकादिनिस्सयवत्थुकथावण्णना निट्ठिता.

द्वेउपसम्पदापेक्खादिवत्थुकथावण्णना

१२३. एकतो सहेव एकस्मिं खणे अनुस्सावनं एतेसन्ति एकानुस्सावना, उपसम्पदापेक्खा, एते एकानुस्सावने कातुं. तेनाह ‘‘एकानुस्सावने कातु’’न्ति, इदञ्च एकं पदं विभत्तिअलोपेन दट्ठब्बं. एकेन वाति द्विन्नम्पि एकस्मिं खणे एकाय एव कम्मवाचाय अनुस्सावने एकेनाचरियेनाति अत्थो. ‘‘अयं बुद्धरक्खितो च अयं धम्मरक्खितो च आयस्मतो सङ्घरक्खितस्स उपसम्पदापेक्खो’’तिआदिना नयेन एकेन आचरियेन द्विन्नं एकस्मिं खणे अनुस्सावननयो दट्ठब्बो. इमिनाव नयेन तिण्णम्पि एकेन आचरियेन एकक्खणे अनुस्सावनं दट्ठब्बं.

पुरिमनयेनेव एकतो अनुस्सावने कातुन्ति ‘‘एकेन एकस्स, अञ्ञेन इतरस्सा’’तिआदिना पुब्बे वुत्तनयेन द्विन्नं द्वीहि वा, तिण्णं तीहि वा आचरियेहि, एककेन वा आचरियेन तयोपि एकतो अनुस्सावने कातुन्ति अत्थो, तञ्च खो एकेन उपज्झायेन. ‘‘न त्वेव नानुपज्झायेना’’ति इदं एकेन आचरियेन द्वीहि वा तीहि वा उपज्झायेहि ¶ द्वे वा तयो वा उपसम्पदापेक्खे एकक्खणे एकाय अनुस्सावनाय एकानुस्सावने कातुं न वट्टतीति पटिक्खेपपदं. न पन नानाचरियेहि नानुपज्झायेहि तयो एकानुस्सावने कातुं न वट्टतीति आह ‘‘सचे पन नानाचरिया नानुपज्झाया…पे… वट्टती’’ति. यञ्चेत्थ ¶ ‘‘तिस्सत्थेरो सुमनत्थेरस्स सद्धिविहारिकं, सुमनत्थेरो तिस्सत्थेरस्स सद्धिविहारिक’’न्ति एवं उपज्झायेहि अञ्ञमञ्ञं सद्धिविहारिकानं अनुस्सावनकरणं वुत्तं, तं उपलक्खणमत्तं. तस्मा सचे तिस्सत्थेरो सुमनत्थेरस्स सद्धिविहारिकं, सुमनत्थेरो नन्दत्थेरस्स सद्धिविहारिकं अनुस्सावेति, अञ्ञमञ्ञञ्च गणपूरका होन्ति, वट्टति एव. सचे पन उपज्झायो सयमेव अत्तनो सद्धिविहारिकं अनुस्सावेतीति एत्थ वत्तब्बमेव नत्थि, कम्मं सुकतमेव होति. अनुपज्झायकस्सपि येन केनचि अनुस्साविते उपसम्पदा होति, किमङ्गं पन सउपज्झायकस्स उपज्झायेनेव अनुस्सावनेति दट्ठब्बं. तेनेव नवट्टनपक्खं दस्सेतुं ‘‘सचे पना’’तिआदिमाह.

द्वेउपसम्पदापेक्खादिवत्थुकथावण्णना निट्ठिता.

उपसम्पदाविधिकथावण्णना

१२६. उपज्झाति उपज्झाय-सद्दसमानत्थो आकारन्तो उपज्झासद्दोति दस्सेति. उपज्झाय-सद्दो एव वा उपज्झा उपयोगपच्चत्तवचनेसु य-कारलोपं कत्वा एवं वुत्तो करणवचनादीसु उपज्झा-सद्दस्स पयोगाभावाति दट्ठब्बं. पाळियं अत्तनाव अत्तानं सम्मन्नितब्बन्ति अत्तनाव कत्तुभूतेन करणभूतेन अत्तानमेव कम्मभूतं पति सम्मननकिच्चं कातब्बं. अत्तानन्ति वा पच्चत्ते उपयोगवचनं, अत्तनाव अत्ता सम्मन्नितब्बोति अत्थो. न केवलञ्च एत्थेव, अञ्ञत्रापि तेरससम्मुतिआदीसु इमिनाव लक्खणेन अत्तनाव अत्ता सम्मन्नितब्बोव. अपिच सयं कम्मारहत्ता अत्तानं मुञ्चित्वा चतुवग्गादिको गणो सब्बत्थ इच्छितब्बो.

सच्चकालोति ‘‘निगूहिस्सामी’’ति वञ्चनं पहाय सच्चस्सेव ते इच्छितब्बकालो. भूतकालोति वञ्चनाय अभावेपि मनुस्सत्तादिवत्थुनो भूतताय अवस्सं इच्छितब्बकालो, इतरथा कम्मकोपादिअन्तरायो होतीति अधिप्पायो. मङ्कूति अधोमुखो. उद्धरतूति अनुपसम्पन्नभावतो उपसम्पत्तियं पतिट्ठपेतूति अत्थो.

सब्बकम्मवाचासु ¶ अत्थकोसल्लत्थं पनेत्थ उपसम्पदाकम्मवाचाय एवमत्थो दट्ठब्बो – सुणातूति सवनाणत्तियं पठमपुरिसेकवचनं. तञ्च ¶ किञ्चापि यो सङ्घो सवनकिरियाय नियोजीयति, तस्स सम्मुखत्ता ‘‘सुणाही’’ति मज्झिमपुरिसेकवचनेन वत्तब्बं, तथापि यस्मा सङ्घ-सद्दसन्निधाने पठमपुरिसपयोगोव सद्दविधूहि समाचिण्णो भगवन्तआयस्मन्तादिसद्दसन्निधानेसु विय ‘‘अधिवासेतु मे भवं गोतमो (पारा. २२). एतस्स सुगत कालो, यं भगवा सावकानं सिक्खापदं पञ्ञपेय्य (पारा. २१). पक्कमतायस्मा (पारा. ४३६). सुणन्तु मे आयस्मन्तो’’तिआदीसु विय. तस्मा इध पठमपुरिसपयोगो कतो. अथ वा गारववसेनेवेतं वुत्तं. गरुट्ठानीयेसु हि गारववसेन मज्झिमपुरिसपयोगुप्पत्तियम्पि पठमपुरिसपयोगं पयुज्जन्ति ‘‘देसेतु सुगतो धम्म’’न्तिआदीसु (दी. नि. २.६६; म. नि. २.३३८; सं. नि. १.१७२; महाव. ८) वियाति दट्ठब्बं. केचि पन ‘‘भन्ते, आवुसोति सद्दे अपेक्खित्वा इध पठमपुरिसपयोगो’’ति वदन्ति, तं न युत्तं ‘‘आचरियो मे भन्ते होहि, (महाव. ७७) इङ्घावुसो उपालि, इमं पब्बजितं अनुयुञ्जाही’’तिआदीसु (पारा. ५१७) तप्पयोगेपि मज्झिमपुरिसपयोगस्सेव दस्सनतो.

मेति यो सावेति, तस्स अत्तनिद्देसे सामिवचनं. भन्तेति आलपनत्थे वुड्ढेसु सगारववचनं. ‘‘आवुसो’’ति पदं पन नवकेसु. तदुभयम्पि निपातो ‘‘तुम्हे भन्ते, तुम्हे आवुसो’’ति बहूसुपि समानरूपत्ता. सङ्घोति अविसेसतो चतुवग्गादिके पकतत्तपुग्गलसमूहे वत्तति. इध पन पच्चन्तिमेसु जनपदेसु पञ्चवग्गतो पट्ठाय, मज्झिमेसु जनपदेसु दसवग्गतो पट्ठाय सङ्घोति गहेतब्बो. तत्रायं पिण्डत्थो – भन्ते, सङ्घो मम वचनं सुणातूति. इदञ्च नवकतरेन वत्तब्बवचनं. सचे पन अनुस्सावको सब्बेहि भिक्खूहि वुड्ढतरो होति, ‘‘सुणातु मे, आवुसो, सङ्घो’’ति वत्तब्बं. सोपि चे ‘‘भन्ते’’ति वदेय्य, नवकतरो वा ‘‘आवुसो’’ति, कम्मकोपो नत्थि. केचि पन ‘‘एकत्थ ‘आवुसो’ति वत्वा अञ्ञत्थ ‘भन्ते’ति वुत्तेपि नत्थि दोसो उभयेनापि आलपनस्स सिज्झनतो’’ति वदन्ति.

इदानि यमत्थं ञापेतुकामो ‘‘सुणातू’’ति सङ्घं सवने नियोजेति, तं ञापेन्तो ‘‘अयं इत्थन्नामो’’तिआदिमाह. तत्थ अयन्ति ¶ उपसम्पदापेक्खस्स हत्थपासे सन्निहितभावदस्सनं. तेन च हत्थपासे ठितस्सेव उपसम्पदा रुहतीति सिज्झति हत्थपासतो बहि ठितस्स ‘‘अय’’न्ति न वत्तब्बतो. तेनेव अनुसासकसम्मुतियं सो हत्थपासतो बहि ठितत्ता ‘‘अय’’न्ति न वुत्तो. तस्मा उपसम्पदापेक्खो अनुपसम्पन्नो हत्थपासे ठपेतब्बो. अयं इत्थन्नामोति अयं-सद्दो च अवस्सं पयुज्जितब्बो. सो च इमस्मिं पठमनामपयोगे एवाति गहेतब्बं ¶ . ‘‘इत्थन्नामो’’ति इदं अनियमतो तस्स नामदस्सनं. उभयेनपि अयं बुद्धरक्खितोतिआदिनामं दस्सेति. ‘‘उपसम्पदापेक्खो’’ति भिन्नाधिकरणविसये बहुब्बीहिसमआसो, उपसम्पदं मे सङ्घो अपेक्खमानोति अत्थो. तस्स च उपज्झायतं समङ्गिभावेन दस्सेतुं ‘‘इत्थन्नमस्स आयस्मतो’’ति वुत्तं. एतेन ‘‘अयं बुद्धरक्खितो आयस्मतो धम्मरक्खितस्स सद्धिविहारिकभूतो उपसम्पदापेक्खो’’ति एवमादिना नयेन नामयोजनाय सह अत्थो दस्सितोति. एत्थ च ‘‘आयस्मतो’’ति पदं अवत्वापि ‘‘अयं बुद्धरक्खितो धम्मरक्खितस्स उपसम्पदापेक्खो’’ति वत्तुं वट्टति. तेनेव पाळियं ‘‘इत्थन्नामेन उपज्झायेना’’ति एत्थ ‘‘आयस्मतो’’ति पदं न वुत्तं. यञ्चेत्थ वत्तब्बं, तं हेट्ठा वुत्तमेव.

ननु चेत्थ उपज्झायोपि उपसम्पदापेक्खो विय हत्थपासे ठितो एव इच्छितब्बो, अथ कस्मा ‘‘अयं इत्थन्नामो इमस्स इत्थन्नामस्स उपसम्पदापेक्खो’’ति एवं उपज्झायपरामसनेपि इम-सद्दस्स पयोगो न कतोति? नायं विरोधो उपज्झायस्स अभावेपि कम्मकोपाभावतो. केवलञ्हि कम्मनिप्फत्तिया सन्तपदवसेन अविज्जमानस्सपि उपज्झायस्स नामकित्तनं अनुपज्झायस्स उपसम्पदादीसुपि करीयति. तस्मा उपज्झायस्स असन्निहिततायपि तप्परामसनमत्तेनेव कम्मसिद्धितो ‘‘इमस्सा’’ति निद्दिसितुं न वट्टति.

परिसुद्धो अन्तरायिकेहि धम्मेहीति अभब्बतादिकेहि उपसम्पदाय अवत्थुकरेहि चेव पञ्चाबाधहत्थच्छिन्नादीहि च आपत्तिमत्तकरेहि अन्तरायिकेहि सभावेहि परिमुत्तो. एवं वुत्तो एव च आपत्तिमत्तकरेहि पञ्चाबाधादीहि अपरिमुत्तस्सपि उपसम्पदा रुहति, नाञ्ञथा. परिपुण्णस्स पत्तचीवरन्ति परिपुण्णमस्स उपसम्पदापेक्खस्स पत्तचीवरं. एवं वुत्ते एव अपत्तचीवरस्सापि उपसम्पदा रुहति, नाञ्ञथा. उपसम्पदं याचतीति ¶ ‘‘सङ्घं, भन्ते, उपसम्पदं याचामी’’तिआदिना (महाव. ७१, १२६) याचितभावं सन्धाय वुत्तं. एवं तेन सङ्घे अयाचितेपि ‘‘इत्थन्नामो सङ्घं उपसम्पदं याचती’’ति वुत्ते एव कम्मं अविपन्नं होति, नाञ्ञथा. उपज्झायेनाति उपज्झायेन करणभूतेन इत्थन्नामं उपज्झायं कत्वा कम्मभूतं उपसम्पदं दातुं निप्फादेतुं कत्तुभूतं सङ्घं याचतीति अत्थो. याचधातुनो पन द्विकम्मकत्ता ‘‘सङ्घं, उपसम्पद’’न्ति द्वे कम्मपदानि वुत्तानि.

यदि सङ्घस्स पत्तकल्लन्ति एत्थ पत्तो कालो इमस्साति पत्तकालं, अपलोकनादिचतुब्बिधसङ्घकम्मं, तदेव सकत्थे य-पच्चयेन ‘‘पत्तकल्ल’’न्ति वुच्चति. इध पन ञत्तिचतुत्थउपसम्पदाकम्मं अधिप्पेतं, तं कातुं सङ्घस्स पत्तकल्लं जातं. यदीति अनुमतिगहणवसेन कम्मस्स ¶ पत्तकल्लतं ञापेति. यो हि कोचि तत्थ अपत्तकल्लतं मञ्ञिस्सति, सो वक्खति. इममेव हि अत्थं सन्धाय अनुस्सावनासु ‘‘यस्सायस्मतो खमति…पे… सो भासेय्या’’ति (महाव. १२७) वुत्तं. तं पनेतं पत्तकल्लं वत्थुसम्पदा, अन्तरायिकेहि धम्मेहि चस्स परिसुद्धता, सीमासम्पदा, परिससम्पदा, पुब्बकिच्चनिट्ठापनन्ति इमेहि पञ्चहि अङ्गेहि सङ्गहितं.

तत्थ वत्थुसम्पदा नाम यथावुत्तेहि एकादसहि अभब्बपुग्गलेहि चेव अन्तिमवत्थुअज्झापन्नेहि च अञ्ञो परिपुण्णवीसतिवस्सो अनुपसम्पन्नभूतो मनुस्सपुरिसो, एतस्मिं पुग्गले सति एव इदं सङ्घस्स उपसम्पदाकम्मं पत्तकल्लं नाम होति, नासति. कतञ्च कुप्पमेव होति.

अन्तरायिकेहि धम्मेहि चस्स परिसुद्धता नाम यथावुत्तस्सेव उपसम्पदावत्थुभूतस्स पुग्गलस्स ये इमे भगवता पटिक्खित्ता पञ्चाबाधफुट्ठतादयो मातापितूहि अननुञ्ञाततापरियोसाना चेव हत्थच्छिन्नतादयो च दोसधम्मा कारकसङ्घस्स आपत्तादिअन्तरायहेतुताय ‘‘अन्तरायिका’’ति वुच्चन्ति तेहि अन्तरायिकेहि दोसधम्मेहि परिमुत्तत्ता, इमिस्सा च सति एव इदं कम्मं पत्तकल्लं नाम होति, नासति. कतं पन कम्मं सुकतमेव होति ठपेत्वा ऊनवीसतिवस्सपुग्गलं.

सीमासम्पदा ¶ पन उपोसथक्खन्धके (महाव. १४७-१४८) वक्खमाननयेन सब्बदोसविरहिताय बद्धाबद्धवसेन दुविधाय सीमाय वसेनेव वेदितब्बा. तादिसाय हि सीमाय सति एव इदं कम्मं पत्तकल्लं नाम होति, नासति. कतञ्च कम्मं विपज्जति.

परिससम्पदा पन ये इमे उपसम्पदाकम्मस्स सब्बन्तिमेन परिच्छेदेन कम्मप्पत्ता दसहि वा पञ्चहि वा अनूना पाराजिकं अनापन्ना, अनुक्खित्ता च समानसंवासका भिक्खू, तेसं एकसीमायं हत्थपासं अविजहित्वा ठानं, छन्दारहानञ्च छन्दस्स आनयनं, सम्मुखीभूतानञ्च अप्पटिक्कोसनं, उपसम्पदापेक्खरहितानं उपोसथक्खन्धके पटिक्खित्तानं गहट्ठादिअनउपसम्पन्नानञ्चेव पाराजिकुक्खित्तकनानासंवासकभिक्खुनीनञ्च वज्जनीयपुग्गलानं सङ्घस्स हत्थपासे अभावो चाति इमेहि चतूहि अङ्गेहि सङ्गहिता. एवरूपाय च परिससम्पदाय सति एव इदं पत्तकल्लं नाम होति, नासति. तत्थ पुरिमानं तिण्णं अङ्गानं अञ्ञतरस्सपि अभावे कतं कम्मं विपज्जति, न पच्छिमस्स.

पुब्बकिच्चनिट्ठापनं ¶ नाम यानिमानि ‘‘पठमं उपज्झं गाहापेतब्बो’’तिआदिना पाळियं वुत्तानि ‘‘उपज्झं गाहापनं, पत्तचीवराचिक्खनं, ततो तं हत्थपासतो बहि ठपेत्वा अनुसासकसम्मुतिकम्मकरणं, सम्मतेन च गन्त्वा अनुसासनं, तेन च पठमतरं आगन्त्वा सङ्घस्स ञापेत्वा उपसम्पदापेक्खं ‘आगच्छाही’ति हत्थपासे एव अब्भानं, तेन च भिक्खूनं पादे वन्दापेत्वा उपसम्पदायाचापनं, ततो अन्तरायिकधम्मपुच्छकसम्मुतिकरणं, सम्मतेन च पुच्छन’’न्ति इमानि अट्ठ पुब्बकिच्चानि, तेसं सब्बेसं याथावतो करणेन निट्ठापनं. एतस्मिञ्च पुब्बकम्मनिट्ठापने सति एव इदं सङ्घस्स उपसम्पदाकम्मं पत्तकल्लं नाम होति, नासति. एतेसु पन पुब्बकम्मेसु अकतेसुपि कतं कम्मं यथावुत्तवत्थुसम्पत्तिआदीसु विज्जमानेसु अकुप्पमेव होति. तदेवमेत्थ पत्तकल्लं इमेहि पञ्चहि अङ्गेहि सङ्गहितन्ति वेदितब्बं. इमिनाव नयेन हेट्ठा वुत्तेसु, वक्खमानेसु च सब्बेसु कम्मेसु पत्तकल्लता यथारहं योजेत्वा ञातब्बा.

इत्थन्नामं ¶ उपसम्पादेय्याति उपसम्पदानिप्फादनेन तंसमङ्गिं करेय्य करोतूति पत्थनायं, विधिम्हि वा इदं दट्ठब्बं. यथा हि ‘‘देवदत्तं सुखापेय्या’’ति वुत्ते सुखमस्स निप्फादेत्वा तं सुखसमङ्गिनं करेय्याति अत्थो होति, एवमिधापि उपसम्पदमस्स निप्फादेत्वा तं उपसम्पदासमङ्गिनं करेय्याति अत्थो. पयोजकब्यापारे चेतं यथा सुखयन्तं कञ्चि सुद्धकत्तारं कोचि हेतुकत्ता सुखहेतुनिप्फादनेन सुखापेय्याति वुच्चति, एवमिधापि उपसम्पज्जन्तं सुद्धकत्तारं पुग्गलं हेतुकत्तुभूतो सङ्घो उपसम्पदाहेतुनिप्फादनेन उपसम्पादेय्याति वुत्तो. एतेन च सुखं विय सुखदायकेन सङ्घेन पुग्गलस्स दिय्यमाना तथापवत्तपरमत्थधम्मे उपादाय अरियजनपञ्ञत्ता उपसम्पदा नाम सम्मुतिसच्चता अत्थीति समत्थितं होति. एत्थ च ‘‘इत्थन्नामो सङ्घं उपसम्पदं याचती’’ति वुत्तत्ता परिवासादीसु विय याचनानुगुणं ‘‘इत्थन्नामस्स उपसम्पदं ददेय्या’’ति अवत्वा ‘‘इत्थन्नामं उपसम्पादेय्या’’ति वुत्तत्ता इदं उपसम्पदाकम्मं दाने असङ्गहेत्वा कम्मलक्खणे एव सङ्गहितन्ति दट्ठब्बं. इमिना नयेन ‘‘इत्थन्नामं उपसम्पादेति, उपसम्पन्नो सङ्घेना’’ति एत्थापि अत्थो वेदितब्बो. केवलञ्हि तत्थ वत्तमानकालअतीतकालवसेन, इध पन अनामट्ठकालवसेनाति एत्तकमेव विसेसो.

एसा ञत्तीति ‘‘सङ्घो ञापेतब्बो’’ति वुत्तञापना एसा. इदञ्च अनुस्सावनानम्पि सब्भावसूचनत्थं वुच्चति. अवस्सञ्चेतं वत्तब्बमेव, ञत्तिकम्मे एव तं न वत्तब्बं. तत्थ पन य्य-कारे वुत्तमत्ते एव ञत्तिकम्मं निट्ठितं होतीति दट्ठब्बं. खमतीति रुच्चति. उपसम्पदाति सङ्घेन दिय्यमाना निप्फादियमाना उपसम्पदा यस्स खमति. सो तुण्हस्साति योजना. तुण्हीति ¶ च अकथनत्थे निपातो, अकथनको अस्स भवेय्याति अत्थो. खमति सङ्घस्स इत्थन्नामस्स उपसम्पदाति पकतेन सम्बन्धो. तत्थ कारणमाह ‘‘तस्मा तुण्ही’’ति. तत्थ ‘‘आसी’’ति सेसो. यस्मा ‘‘यस्स नक्खमति, सो भासेय्या’’ति तिक्खत्तुं वुच्चमानोपि सङ्घो तुण्ही निरवो अहोसि, तस्मा खमति सङ्घस्साति अत्थो. एवन्ति इमिना पकारेन. तुण्हीभावेनेवेतं सङ्घस्स रुच्चनभावं धारयामि बुज्झामि पजानामीति अत्थो. इति-सद्दो परिसमापनत्थे कतो, सो च कम्मवाचाय अनङ्गं. तस्मा अनुस्सावकेन ‘‘धारयामी’’ति एत्थ मि-कारपरियोसानमेव ¶ वत्वा निट्ठापेतब्बं, इति-सद्दो न पयुज्जितब्बोति दट्ठब्बं. इमिना नयेन सब्बत्थ कम्मवाचानमत्थो वेदितब्बो.

उपसम्पदाविधिकथावण्णना निट्ठिता.

चत्तारोनिस्सयादिकथावण्णना

१२८. एकपोरिसा वातिआदि सत्तानं सरीरच्छायं पादेहि मिनित्वा जाननप्पकारदस्सनं. छसत्तपदपरमता हि छाया ‘‘पोरिसा’’ति वुच्चति. इदञ्च उतुप्पमाणाचिक्खनादि च आगन्तुकेहि सद्धिं वीमंसित्वा वुड्ढनवभावं ञत्वा वन्दनवन्दापनादिकरणत्थं वुत्तं. एति आगच्छति, गच्छति चाति उतु, सोव पमियते अनेन संवच्छरन्ति पमाणन्ति आह ‘‘उतुयेव उतुप्पमाण’’न्ति. अपरिपुण्णाति उपसम्पदादिवसेन अपरिपुण्णा. यदि उतुवेमज्झे उपसम्पादितो, तदा तस्मिं उतुम्हि अवसिट्ठदिवसाचिक्खनं ‘‘दिवसभागाचिक्खन’’न्ति दस्सेति. तेनाह ‘‘यत्तकेहि दिवसेहि यस्स यो उतु अपरिपुण्णो, ते दिवसे’’ति. तत्थ यस्स तं खणं लद्धूपसम्पदस्स पुग्गलस्स सम्बन्धी यो उतु यत्तकेहि दिवसेहि अपरिपुण्णो, ते दिवसेति योजना.

छायादिकमेव सब्बं सङ्गहेत्वा गायितब्बतो कथेतब्बतो सङ्गीतीति आह ‘‘इदमेवा’’तिआदि. तत्थ एकतो कत्वा आचिक्खितब्बं. त्वं किं लभसीति त्वं उपसम्पादनकाले कतरवस्सं, कतरउतुञ्च लभसि, कतरस्मिं ते उपसम्पदा लद्धाति अत्थो. वस्सन्ति वस्सानउतु. इदञ्च संवच्छराचिक्खनं विना वुत्तम्पि न ञायतीति इमिना उतुआचिक्खनेनेव सासनवस्सेसु वा कलियुगवस्सादीसु वा सहस्सिमे वा सतिमे वा असुकं उतुं लभामीति दस्सितन्ति दट्ठब्बं. ‘‘छाया’’ति इदं पाळियं आगतपटिपाटिं सन्धाय वुत्तं. वत्तब्बकमतो पन कलियुगवस्सादीसु सब्बदेसपसिद्धेसु असुकवस्से असुकउतुम्हि असुकमासे ¶ असुके कण्हे वा सुक्के वा पक्खे असुकतिथिवारविसेसयुत्ते नक्खत्ते पुब्बण्हादिदिवसभागे एत्तके छायापमाणे, नाडिकापमाणे वा मया उपसम्पदा लद्धाति वदेय्यासीति एवं आचिक्खितब्बं. ‘‘इदं सुट्ठु उग्गहेत्वा आगन्तुकेहि ¶ वुड्ढपटिपाटिं ञत्वा पटिपज्जाही’’ति वत्तब्बं. पाळियं किस्स त्वन्ति किं त्वं एत्तकं कालं अकासीति अत्थो.

१३०. उपसम्पदं याचीति पब्बज्जञ्च उपसम्पदञ्च याचीति अत्थो. पस्सिस्सामीति एत्थ वदतीति सेसो, एवं उपरिपि. ‘‘ओसारेतब्बो’’ति इमिना पुरिमो उक्खित्तभावो विब्भमित्वा पुन लद्धूपसम्पदम्पि न मुञ्चति. तेन च सम्भुञ्जनादीसुपि भिक्खूनं पाचित्तियमेवाति दस्सेति. अनापत्ति सम्भोगे संवासेति एत्थ सहसेय्यापि सङ्गहिताति दट्ठब्बं. एत्थ चायमधिप्पायो – यस्मा अयं ओसारितत्ता पकतत्तो, तस्मा उक्खित्तसम्भोगादिपच्चयेन पाचित्तियेनेत्थ अनापत्तीति. यो पन आपत्तिट्ठाने अनापत्तिदिट्ठिताय आपत्तिं न पस्सति, तेनेव पटिकम्मम्पि न करोति, सो यस्मा एत्तावता अलज्जी नाम न होति. पण्णत्तिं ञत्वा वीतिक्कमं करोन्तो एव हि अलज्जी नाम होति. ‘‘सञ्चिच्च आपत्तिं आपज्जती’’तिआदि (परि. ३५९) हि वुत्तं. तस्मा एत्थ अलज्जिसम्भोगादिपच्चया दुक्कटापत्तिनियमो नत्थि. तेन सापेत्थ आपत्ति न वुत्ताति दट्ठब्बं. यो पनेत्थ इमं अधिप्पायं असल्लक्खेन्तेन केनचि ‘‘अनापत्ति सम्भोगे संवासे’’ति इमिना पाचित्तियेन अनापत्ति वुत्ता, अलज्जिसम्भोगपच्चया दुक्कटं पन आपज्जति एवाति आपत्तिनियमो वुत्तो, सो अलज्जित्ते सति एव वुत्तो, नासतीति दट्ठब्बं.

१३१. विनयम्हीतिआदिगाथासु निग्गहानन्ति निग्गहकरणेसु. पापिच्छेति पापपुग्गलानं निग्गहकरणेसु, लज्जीनं पग्गहेसु च पेसलानं सुखावहे महन्ते विनयम्हि यथा अत्थकारी अत्थानुगुणं करोन्तोव यस्मा योनिसो पटिपज्जति नाम होति, तस्मा उद्दानं पवक्खामीति सम्बन्धयोजना दट्ठब्बा. सेसं सब्बत्थ सुविञ्ञेय्यमेव.

चत्तारोनिस्सयादिकथावण्णना निट्ठिता.

इति समन्तपासादिकाय विनयट्ठकथाय विमतिविनोदनियं

महाखन्धकवण्णनानयो निट्ठितो.

२. उपोसथक्खन्धको

सन्निपातानुजाननादिकथावण्णना

१३२. उपोसथक्खन्धके ¶ ¶ तरन्ति ओतरन्ति एत्थाति तित्थं, लद्धि. इतोति सासनलद्धितो.

१३५. आपज्जित्वा वा वुट्ठितोति एत्थ देसनारोचनानम्पि सङ्गहो. तेनेव मातिकाट्ठकथायं ‘‘वुट्ठिता वा देसिता वा आरोचिता वा आपत्ति…पे… असन्ती नाम होती’’ति (कङ्खा. अट्ठ. निदानवण्णना) वुत्तं.

मनुजेनाति आसन्नेन सह. परेति दूरट्ठेपि परपुग्गले सन्धाय गिरं नो च भणेय्याति योजना.

‘‘आविकता हिस्स फासु होती’’ति (महाव. १३४) वुत्तत्ता गरुकापत्तिपि आविकरणमत्तेन वुट्ठातीति केचि वदन्ति, तं तेसं मतिमत्तं परिवासादिविधानसुत्तेहि विरुज्झनतो. अयं पनेत्थ अधिप्पायो – यथाभूतञ्हि अत्तानमाविकरोन्तं पेसला भिक्खू ‘‘अकामा परिवत्थब्ब’’न्तिआदिवचनं निस्साय अनिच्छमानम्पि नं उपायेन परिवासादीनि दत्वा अवस्सं सुद्धन्ते पतिट्ठापेस्सन्ति, ततो तस्स अविप्पटिसारादीनं वसेन फासु होति. पठमं पातिमोक्खुद्देसन्ति निदानुद्देसं दस्सेति. पुब्बे अविज्जमानं पञ्ञापेसीति. न केवलञ्च एतं, पुब्बे पञ्ञत्तम्पि पन पाराजिकादिसिक्खापदं सब्बं भगवा ‘‘तत्रिमे चत्तारो पाराजिका धम्मा उद्देसं आगच्छन्ती’’तिआदिना पाराजिकुद्देसादिवसेन विनयमातिकं कत्वा निदानुद्देसेन सह सयमेव सङ्गहेत्वा ‘‘पातिमोक्ख’’न्ति पञ्ञापेसीति दट्ठब्बं. तदेतं सब्बम्पि सन्धाय ‘‘अनुजानामि, भिक्खवे, पातिमोक्खं उद्दिसितु’’न्ति (महाव. १३३) वुत्तं.

१३६. एतं ३४ वेदितब्बन्ति यस्मिं तस्मिं चातुद्दसे वा पन्नरसे वाति एवं अत्थजातं.

सन्निपातानुजाननादिकथावण्णना निट्ठिता.

सीमानुजाननकथावण्णना

१३८. ‘‘पुरत्थिमाय ¶ दिसाया’’ति इदं निदस्सनमत्तं. तस्सं पन दिसायं निमित्ते असति यत्थ अत्थि, ततो पट्ठाय पठमं ‘‘पुरत्थिमाय अनुदिसाय, दक्खिणाय दिसाया’’तिआदिना समन्ता विज्जमानट्ठानेसु निमित्तानि कित्तेत्वा पुन ‘‘पुरत्थिमाय अनुदिसाया’’ति पठमकित्तितं कित्तेतुं वट्टति, तीहि निमित्तेहि सिङ्घाटकसण्ठानायपि सीमाय सम्मन्नितब्बतो. तिक्खत्तुं सीमामण्डलं सम्बन्धन्तेनाति विनयधरेन सयं एकस्मिंयेव ठाने ठत्वा केवलं निमित्तकित्तनवचनेनेव सीमामण्डलं समन्ता निमित्तेन निमित्तं बन्धन्तेनाति अत्थो. तं तं निमित्तट्ठानं अगन्त्वापि हि कित्तेतुं वट्टति. तियोजनपरमाय सीमाय समन्ततो तिक्खत्तुं अनुपरिगमनस्स एकदिवसेन दुक्करत्ता विनयधरेन सयं अदिट्ठम्पि पुब्बे भिक्खूहि यथाववत्थितं निमित्तं ‘‘पासाणो भन्ते’’तिआदिना केनचि वुत्तानुसारेन सल्लक्खेत्वा ‘‘एसो पासाणो निमित्त’’न्तिआदिना कित्तेतुम्पि वट्टति एव.

सुद्धपंसुपब्बतोति न केनचि कतो सयंजातोव वुत्तो. तथा सेसापि. इतरोपीति सुद्धपंसुपब्बतादिकोपि पब्बतो. हत्थिप्पमाणतोति एत्थ भूमितो उग्गतप्पदेसेन हत्थिप्पमाणं गहेतब्बं. चतूहि वा तीहि वाति सीमाभूमियं चतूसु, तीसु वा दिसासु ठितेहि. एकिस्सा एव पन दिसाय ठितेहि ततो बहूहिपि सम्मन्नितुं न वट्टति. द्वीहि पन द्वीसु दिसासु ठितेहिपि न वट्टति. तस्माति यस्मा एकेन न वट्टति, तस्मा. तं बहिद्धा कत्वाति कित्तितनिमित्तस्स असीमत्ता अन्तोसीमाय करणं अयुत्तन्ति वुत्तं. तेनाह ‘‘सचे’’तिआदि.

द्वत्तिंसपलगुळपिण्डप्पमाणता सण्ठानतो गहेतब्बा, न तुलगणनावसेन, भारतो पलपरिमाणञ्च मगधतुलाय गहेतब्बं. सा च लोकियतुलाय द्विगुणाति वदन्ति. अतिमहन्तोपीति भूमितो हत्थिप्पमाणं अनुग्गन्त्वा हेट्ठाभूमियं ओतिण्णघनतो अनेकयोजनप्पमाणोपि. सचे हि ततो हत्थिप्पमाणं कूटं उग्गच्छति, पब्बतसङ्ख्यमेव गच्छति.

अन्तोसारानन्ति ¶ तस्मिं खणे तरुणताय सारे अविज्जमानेपि परिणामेन भविस्समानसारेपि सन्धाय वुत्तं. तादिसानञ्हि सूचिदण्डकप्पमाणपरिणाहानं चतुपञ्चमत्तम्पि वनं वट्टति. अन्तोसारमिस्सकानन्ति अन्तोसारेहि ¶ रुक्खेहि सम्मिस्सानं. एतेन च साररुक्खमिस्सम्पि वनं वट्टतीति दस्सेति. चतुपञ्चरुक्खमत्तम्पीति साररुक्खे सन्धाय वुत्तं. वनमज्झे विहारं करोन्तीति रुक्खघटाय अन्तरे रुक्खे अच्छिन्दित्वा वतिआदीहि विहारपरिच्छेदं कत्वाव अन्तोरुक्खन्तरेसु एव परिवेणपण्णसालादीनं करणवसेन यथा अन्तोविहारम्पि वनमेव होति, एवं विहारं करोन्तीति अत्थो. यदि हि सब्बं रुक्खं छिन्दित्वा विहारं करेय्युं, विहारस्स अवनत्ता तं परिक्खिपित्वा ठितं वनं एकत्थ कित्तेतब्बं सिया. इध पन अन्तोपि वनत्ता ‘‘वनं न कित्तेतब्ब’’न्ति वुत्तं. सचे हि तं कित्तेन्ति, ‘‘निमित्तस्स उपरि विहारो होती’’तिआदिना अनन्तरे वुत्तदोसं आपज्जति. एकदेसन्ति वनेकदेसं, रुक्खविरहितट्ठाने कतविहारस्स एकपस्से ठितवनस्स एकदेसन्ति अत्थो.

सूचिदण्डकप्पमाणोति वंसदण्डप्पमाणो. लेखनिदण्डप्पमाणोति केचि. मातिकाट्ठकथायं पन अवेभङ्गियविनिच्छये ‘‘यो कोचि अट्ठङ्गुलसूचिदण्डकमत्तोपि वेळु…पे… गरुभण्ड’’न्ति (कङ्खा. अट्ठ. दुब्बत्तसिक्खापदवण्णना) वुत्तत्ता तनुतरो वेळुदण्डोति च सूचिदण्डोति च गहेतब्बं. वंसनळकसरावादीसूति वेळुपब्बे वा नळपब्बे वा कपल्लकादिमत्तिकभाजनेसु वाति अत्थो. तङ्खणम्पीति तरुणपोतके अमिलायित्वा विरुहनजातिके सन्धाय वुत्तं. ये पन परिणता समूलं उद्धरित्वा रोपितापि छिन्नसाखा विय मिलायित्वा चिरेन नवमूलङ्कुरुप्पत्तिया जीवन्ति, मीयन्तियेव वा, तादिसे कित्तेतुं न वट्टति. एतन्ति नवमूलसाखानिग्गमनं.

मज्झेति सीमाय महादिसानं अन्तो. कोणन्ति सीमाय चतूसु कोणेसु द्विन्नं द्विन्नं मग्गानं सम्बन्धट्ठानं. परभागे कित्तेतुं वट्टतीति तेसं चतुन्नं कोणानं बहि निक्खमित्वा ठितेसु मग्गेसु एकिस्सा दिसाय एकं, अञ्ञिस्सा दिसाय चापरन्ति एवं चत्तारोपि मग्गा चतूसु दिसासु कित्तेतुं वट्टतीति अधिप्पायो. एवं पन कित्तितमत्तेन कथं एकाबद्धता विगच्छतीति विञ्ञायतीति. परतो गतट्ठानेपि एते एव ते चत्तारो मग्गा. ‘‘चतूसु दिसासु गच्छन्ती’’ति हि वुत्तं. तस्मा एत्थ कारणं विचिनितब्बं.

‘‘उत्तरन्तिया भिक्खुनिया’’ति इदञ्च पाळियं (पाचि. ६९२) भिक्खुनीनं नदीपारगमने नदिलक्खणस्स आगतत्ता वुत्तं. भिक्खूनं अन्तरवासकतेमनमत्तम्पि वट्टति एव ¶ . ‘‘नदिचतुक्केपि एसेव नयो’’ति इमिना एकत्थ कित्तेत्वा अञ्ञत्थ परतो गतट्ठानेपि कित्तेतुं ¶ न वट्टतीति दस्सेति. तेनेव च ‘‘अस्सम्मिस्सनदियो चतस्सोपि कित्तेतुं वट्टती’’ति असम्मिस्स-ग्गहणं कतं. मूलेति आदिकाले. नदिं भिन्दित्वाति यथा उदकं अनिच्छन्तेहि कस्सकेहि महोघे निवत्तेतुं न सक्का, एवं नदिकूलं भिन्दित्वा.

उक्खेपिमन्ति दीघरज्जुना कुटेन उस्सिञ्चनीयं.

असम्मिस्सेहीति सब्बदिसासु ठितपब्बतेहि एव, पासाणादीसु अञ्ञतरेहि वा निमित्तन्तराब्यवहितेहि. सम्मिस्सेहीति एकत्थ पब्बतो, अञ्ञत्थ पासाणोति एवं ठितेहि अट्ठहिपि. ‘‘निमित्तानं सतेनापी’’ति इमिना एकिस्साय एव दिसाय बहुनिमित्तानि ‘‘पुरत्थिमाय दिसाय किं निमित्तं? पब्बतो भन्ते. पुन पुरत्थिमाय दिसाय किं निमित्तं? पासाणो भन्ते’’तिआदिना कित्तेतुं वट्टतीति दस्सेति. सिङ्घाटकसण्ठानाति तिकोणा. चतुरस्साति समचतुरस्सा, मुदिङ्गसण्ठाना पन आयतचतुरस्सा. एककोटियं सङ्कोचिता, तदञ्ञाय वित्थिण्णा वा होतीति. सीमाय उपचारं ठपेत्वाति आयतिं बन्धितब्बाय सीमाय नेसं विहारानं परिच्छेदतो बहि सीमन्तरिकप्पहोनकं उपचारं ठपेत्वा. बद्धा सीमा येसु विहारेसु, ते बद्धसीमा. पाटेक्कन्ति पच्चेकं. बद्धसीमासदिसानीति यथा बद्धसीमासु ठिता अञ्ञमञ्ञं छन्दादिं अनपेक्खित्वा पच्चेकं कम्मं कातुं लभन्ति, एवं गामसीमासु ठितापीति दस्सेति. आगन्तब्बन्ति सामीचिमत्तवसेन वुत्तं. तेनाह ‘‘आगमनम्पी’’तिआदि.

पब्बज्जूपसम्पदादीनन्ति एत्थ भण्डुकम्मापुच्छनं सन्धाय पब्बज्जागहणं. एकवीसति भिक्खूति निसिन्ने सन्धाय वुत्तं. इदञ्च कम्मारहेन सह अब्भानकारकानम्पि पहोनकत्थं वुत्तं. ‘‘निमित्तुपगा पासाणा ठपेतब्बा’’ति इदं यथारुचितट्ठाने रुक्खनिमित्तादीनं दुल्लभताय वड्ढित्वा उभिन्नं बद्धसीमानं सङ्करकरणतो च पासाणनिमित्तस्स च तदभावतो यत्थ कत्थचि आनेत्वा ठपेतुं सुकरताय च वुत्तं. तथा सीमन्तरिकपासाणा ठपेतब्बाति एत्थापि. चतुरङ्गुलप्पमाणापीति यथा खन्धसीमापरिच्छेदतो बहि निमित्तपासाणानं चतुरङ्गुलमत्तट्ठानं समन्ता निगच्छति, अवसेसं ठानं अन्तोखन्धसीमाय होतियेव, एवं तेसुपि ठपितेसु चतुरङ्गुलमत्ता सीमन्तरिका होतीति दट्ठब्बं.

सीमन्तरिकपासाणाति ¶ सीमन्तरिकाय ठपितनिमित्तपासाणा. ते पन कित्तेन्तेन पदक्खिणतो अनुपरियायन्तेनेव कित्तेतब्बा. कथं? खण्डसीमतो हि पच्छिमाय दिसाय पुरत्थाभिमुखेन ठत्वा ‘‘पुरत्थिमाय दिसाय किं निमित्त’’न्ति तत्थ सब्बानि निमित्तानि अनुक्कमेन ¶ कित्तेत्वा तथा उत्तराय दिसाय दक्खिणाभिमुखेन ठत्वा ‘‘दक्खिणाय दिसाय किं निमित्त’’न्ति अनुक्कमेन कित्तेत्वा तथा पुरत्थिमाय दिसाय पच्छिमाभिमुखेन ठत्वा ‘‘पच्छिमाय दिसाय किं निमित्त’’न्ति अनुक्कमेन कित्तेत्वा तथा दक्खिणाय दिसाय उत्तराभिमुखेन ठत्वा ‘‘उत्तराय दिसाय किं निमित्त’’न्ति तत्थ सब्बानि निमित्तानि अनुक्कमेन कित्तेत्वा पुन पच्छिमाय दिसाय पुरत्थाभिमुखेन ठत्वा पुरिमकित्तितं वुत्तनयेन पुन कित्तेतब्बं. एवं बहूनम्पि खण्डसीमानं सीमन्तरिकपासाणा पच्चेकं कित्तेतब्बा. ततोति पच्छा. अवसेसनिमित्तानीति महासीमाय बाहिरन्तरेसु अवसेसनिमित्तानि. उभिन्नम्पि न कोपेन्तीति उभिन्नम्पि कम्मं न कोपेन्ति.

कुटिगेहेति भूमियं कततिणकुटियं. उदुक्खलन्ति उदुक्खलावाटसदिसखुद्दकावाटं. निमित्तं न कातब्बन्ति तं राजिं वा उदुक्खलं वा निमित्तं न कातब्बं. इदञ्च यथावुत्तेसु निमित्तेसु अनागतत्तेन न वट्टतीति सिद्धम्पि अविनस्सकसञ्ञाय कोचि मोहेन निमित्तं करेय्याति दूरतोपि विपत्तिपरिहारत्थं वुत्तं. एवं उपरि ‘‘भित्तिं अकित्तेत्वा’’तिआदीसुपि सिद्धमेवत्थं पुनप्पुनं कथने कारणं वेदितब्बं. सीमाविपत्ति हि उपसम्पदादिसब्बकम्मविपत्तिमूलन्ति तस्सा सब्बं द्वारं सब्बथा पिदहनवसेन वत्तब्बं. सब्बं वत्वाव इध आचरिया विनिच्छयं ठपेसुन्ति दट्ठब्बं.

भित्तिन्ति इट्ठकदारुमत्तिकामयं. सिलामयाय पन भित्तिया निमित्तुपगं एकं पासाणं तंतंदिसाय कित्तेतुं वट्टति. अनेकसिलाहि चिनितं सकलभित्तिं कित्तेतुं न वट्टति ‘‘एसो पासाणो निमित्त’’न्ति एकवचनेन वत्तब्बतो. अन्तोकुट्टमेवाति एत्थ अन्तोकुट्टेपि निमित्तानं ठितोकासतो अन्तो एव सीमाति गहेतब्बं. पमुखे निमित्तपासाणे ठपेत्वाति गब्भाभिमुखेपि बहिपमुखे गब्भवित्थारप्पमाणे ठाने पासाणे ठपेत्वा सम्मन्नितब्बा. एवञ्हि गब्भपमुखानं अन्तरे ठितकुट्टम्पि उपादाय अन्तो च बहि च चतुरस्ससण्ठानाव सीमा होति. बहीति सकलस्स कुटिगेहस्स समन्ततो बहि.

अन्तो ¶ च बहि च सीमा होतीति मज्झे ठितभित्तिया सह चतुरस्ससीमा होति.

‘‘उपरिपासादेयेव होती’’ति इमिना गब्भस्स च पमुखस्स च अन्तरा ठितभित्तिया एकत्ता तत्थ च एकवीसतिया भिक्खूनं ओकासाभावेन हेट्ठा न ओतरति, उपरिभित्ति पन सीमट्ठाव होतीति दस्सेति. हेट्ठिमतले कुट्टोति हेट्ठिमतले चतूसु दिसासु ठितकुट्टो. सचे हि ¶ द्वीसु, तीसु वा दिसासु एव कुट्टो तिट्ठेय्य, हेट्ठा न ओतरति. हेट्ठापि ओतरतीति चतुन्नम्पि भित्तीनं अन्तो भित्तीहि सह एकवीसतिया भिक्खूनं पहोनकत्ता वुत्तं. ओतरमाना च उपरिसीमप्पमाणेन ओतरति, चतुन्नं पन भित्तीनं बाहिरन्तरपरिच्छेदे हेट्ठाभूमिभागे उदकपरियन्तं कत्वा ओतरति. न पन भित्तीनं बहि केसग्गमत्तम्पि ठानं. पासादभित्तितोति उपरितले भित्तितो. ओतरणानोतरणं वुत्तनयेनेव वेदितब्बन्ति उपरिसीमप्पमाणस्स अन्तोगधानं हेट्ठिमतले चतूसु दिसासु कुट्टानं तुलारुक्खेहि एकसम्बन्धतं तदन्तो पच्छिमसीमप्पमाणतादिञ्च सन्धाय वुत्तं. किञ्चापेत्थ निय्यूहकादयो निमित्तानं ठितोकासताय बज्झमानक्खणे सीमा न होन्ति, बद्धाय पन सीमाय सीमट्ठाव होन्तीति दट्ठब्बा. परियन्तथम्भानन्ति निमित्तगतपासाणत्थम्भे सन्धाय वुत्तं. ‘‘उपरिमतलेन सम्बद्धो होती’’ति इदं कुट्टानं अन्तरा सीमट्ठानं थम्भानं अभावतो वुत्तं. यदि हि भवेय्युं, कुट्टे उपरिमतलेन असम्बन्धेपि सीमट्ठत्थम्भानं उपरि ठितो पासादो सीमट्ठोव होति.

सचे पन बहूनं थम्भपन्तीनं उपरि कतपासादस्स हेट्ठा पथवियं सब्बबाहिराय थम्भपन्तिया अन्तो निमित्तपासाणे ठपेत्वा सीमा बद्धा होति, एत्थ कथन्ति? एत्थापि यं ताव सीमट्ठत्थम्भेहेव धारियमानानं तुलानं उपरिमतलं, सब्बं तं सीमट्ठमेव, एत्थ विवादो नत्थि. यं पन सीमट्ठत्थम्भपन्तिया, असीमट्ठाय बाहिरत्थम्भपन्तिया च समधुरं धारियमानानं तुलानं उपरिमतलं, तत्थ उपड्ढं सीमाति केचि वदन्ति. सकलम्पि गामसीमाति अपरे. बद्धसीमा एवाति अञ्ञे. तस्मा कम्मं करोन्तेहि गरुके निरासङ्कट्ठाने ठत्वा सब्बं तं आसङ्कट्ठानं सोधेत्वाव कम्मं कातब्बं, सन्निट्ठानकारणं वा गवेसित्वा तदनुगुणं कातब्बं.

तालमूलकपब्बतेति ¶ तालक्खन्धमूलसदिसे हेट्ठा थूलो हुत्वा कमेन किसो हुत्वा उग्गतो हि तालसदिसो नाम होति. वितानसण्ठानोति अहिच्छत्तकसण्ठानो. पणवसण्ठानोति मज्झे तनुको हेट्ठा च उपरि च वित्थिण्णो. हेट्ठा वा मज्झे वाति मुदिङ्गसण्ठानस्स हेट्ठा, पणवसण्ठानस्स मज्झे.

सप्पफणसदिसो पब्बतोति सप्पफणो विय खुज्जो, मूलट्ठानतो अञ्ञत्थ अवनतसीसोति अत्थो. आकासपब्भारन्ति भित्तिया अपरिक्खित्तपब्भारं. सीमप्पमाणोति अन्तोआकासेन सद्धिं पच्छिमसीमप्पमाणो. ‘‘सो च पासाणो सीमट्ठो’’ति इमिना ईदिसेहि सुसिरपासाणलेणकुट्टादीहि परिच्छिन्ने भूमिभागे एव सीमा पतिट्ठाति, न अपरिच्छिन्ने. ते पन सीमट्ठत्ता सीमा होन्ति, न सरूपेन सीमट्ठमञ्चादि वियाति दस्सेति. सचे पन सो सुसिरपासाणो ¶ भूमिं अनाहच्च आकासगतोव ओलम्बति, सीमा न ओतरति. सुसिरपासाणा पन सयं सीमापटिबद्धत्ता सीमा होन्ति. कथं पन पच्छिमप्पमाणरहितेहि एतेहि सुसिरपासाणादीहि सीमा न ओतरतीति इदं सद्धातब्बन्ति? अट्ठकथापमाणतो.

अपिचेत्थ सुसिरपासाणभित्तिअनुसारेन मूसिकादीनं विय सीमाय हेट्ठिमतले ओतरणकिच्चं नत्थि. हेट्ठा पन पच्छिमसीमप्पमाणे आकासे द्वङ्गुलमत्तबहलेहि पासाणभित्तिआदीहिपि उपरिमतलं आहच्च ठितेहि सब्बसो, येभुय्येन वा परिच्छिन्ने सति उपरि बज्झमाना सीमा तेहि पासाणादीहि अन्तरिताय तप्परिच्छिन्नाय हेट्ठाभूमियापि उपरिमतलेन सद्धिं एकक्खणे पतिट्ठाति नदिपारसीमा विय नदिअन्तरितेसु उभोसु तीरेसु, लेणादीसु अपनीतेसुपि हेट्ठा ओतिण्णा सीमा याव सासनन्तरधाना न विगच्छति. पठमं पन उपरि सीमाय बद्धाय पच्छा लेणादीसु कतेसुपि हेट्ठाभूमियं सीमा ओतरति एव. केचि तं न इच्छन्ति. एवं उभयत्थ पतिट्ठिता च सा सीमा एकाव होति गोत्तादिजाति विय ब्यत्तिभेदेसूति गहेतब्बं. सब्बा एव हि बद्धसीमा, अबद्धसीमा च अत्तनो अत्तनो पकतिनिस्सयभूते गामारञ्ञनदिआदिके खेत्ते यथापरिच्छेदं सब्बत्थ साकल्येन एकस्मिं खणे ब्यापिनी परमत्थतो अविज्जमानापि ते ते निस्सयभूते परमत्थधम्मे, तं तं किरियाविसेसम्पि वा उपादाय लोकियेहि, सासनिकेहि ¶ च यथारहं एकत्तेन पञ्ञत्तताय निस्सयेकरूपा एव. तथा हि एको गामो अरञ्ञं नदी जातस्सरो समुद्दोति एवं लोके,

‘‘सम्मता सा सीमा सङ्घेन (महाव. १४३). अगामके चे, भिक्खवे, अरञ्ञे समन्ता सत्तब्भन्तरा, अयं तत्थ समानसंवासा एकूपोसथा. समन्ता उदकुक्खेपा, अयं तत्थ समानसंवासा एकूपोसथा’’ति (महाव. १४७) –

आदिना सासने च एकवोहारो दिस्सति. न हि परमत्थतो एकस्स अनेकधम्मेसु ब्यापनमत्थि. कसिणेकदेसादिविकप्पासमानताय एकत्तहानितोति अयं नो मति.

अस्स हेट्ठाति सप्पफणपब्बतस्स हेट्ठा आकासपब्भारे. लेणस्साति लेणञ्चे कतं, तस्स लेणस्साति अत्थो. तमेव पुन लेणं पञ्चहि पकारेहि विकप्पेत्वा ओतरणानोतरणविनिच्छयं दस्सेतुं आह ‘‘सचे पन हेट्ठा’’तिआदि. तत्थ ‘‘हेट्ठा’’ति इमस्स ‘‘लेणं होती’’ति इमिना सम्बन्धो. हेट्ठा लेणञ्च एकस्मिं पदेसेति आह ‘‘अन्तो’’ति, पब्बतस्स अन्तो, पब्बतमूलेति अत्थो. तमेव अन्तो-सद्दं सीमापरिच्छेदेन विसेसेतुं ‘‘उपरिमस्स सीमापरिच्छेदस्स पारतो’’ति वुत्तं ¶ . पब्बतपादं पन अपेक्खित्वा ‘‘ओरतो’’ति वत्तब्बेपि सीमानिस्सयं पब्बतग्गं सन्धाय ‘‘पारतो’’ति वुत्तन्ति दट्ठब्बं. तेनेव ‘‘बहिलेण’’न्ति एत्थ बहि-सद्दं विसेसेन्तो ‘‘उपरिमस्स सीमापरिच्छेदस्स ओरतो’’ति आह. बहि सीमा न ओतरतीति एत्थ बहीति पब्बतपादे लेणं सन्धाय वुत्तं, लेणस्स बहिभूते उपरिसीमापरिच्छेदस्स हेट्ठाभागे सीमा न ओतरतीति अत्थो. अन्तो सीमाति लेणस्स च पब्बतपादस्स च अन्तो अत्तनो ओतरणारहट्ठाने न ओतरतीति अत्थो. ‘‘बहि सीमा न ओतरति, अन्तो सीमा न ओतरती’’ति चेत्थ अत्तनो ओतरणारहट्ठाने लेणाभावेन सीमाय सब्बथा अनोतरणमेव दस्सितन्ति गहेतब्बं. तत्थापि अनोतरन्ती उपरि एव होतीति. ‘‘बहि पतितं असीमा’’तिआदिना उपरिपासादादीसु अथिरनिस्सयेसु ठिता सीमापि तेसं विनासेन विनस्सतीति दस्सितन्ति दट्ठब्बं.

पोक्खरणिं ¶ खणन्ति, सीमायेवाति एत्थ सचे हेट्ठा उमङ्गनदिसीमप्पमाणतो अनूना पठममेव च पवत्ता होति. सीमा च पच्छा बद्धा नदितो उपरि एव होति, नदिं आहच्च पोक्खरणिया च खताय सीमा विनस्सतीति दट्ठब्बं. हेट्ठापथवितलेति अन्तरा भूमिविवरे.

सीमामाळकेति खण्डसीमङ्गणे. ‘‘वटरुक्खो’’ति इदं पारोहोपत्थम्भेन अतिदूरम्पि गन्तुं समत्थसाखासमङ्गिताय वुत्तं. सब्बरुक्खलतादीनम्पि सम्बन्धो न वट्टति एव. तेनेव नावारज्जुसेतुसम्बन्धोपि पटिक्खित्तो. ततोति साखतो. महासीमाय पथवितलन्ति एत्थ आसन्नतरम्पि गामसीमं अग्गहेत्वा बद्धसीमाय एव गहितत्ता गामसीमाबद्धसीमानं अञ्ञमञ्ञं रुक्खादिसम्बन्धेपि सम्भेददोसो नत्थि, अञ्ञमञ्ञं निस्सयनिस्सितभावेन पवत्तितोति गहेतब्बं. यदि हि तासम्पि सम्बन्धदोसो भवेय्य, कथं गामसीमाय बद्धसीमा सम्मन्नितब्बा सिया? यस्सा हि सीमाय सद्धिं सम्बन्धे दोसो भवेय्य, सा तत्थ बन्धितुमेव न वट्टति, बद्धसीमाउदकुक्खेपसीमासु बद्धसीमा विय, अत्तनो निस्सयभूतगामसीमादीसु उदकुक्खेपसीमा विय च. तेनेव ‘‘सचे पन रुक्खस्स साखा वा ततो निक्खन्तपारोहो वा बहिनदितीरे विहारसीमाय वा गामसीमाय वा पतिट्ठितो’’तिआदिना (महाव. अट्ठ. १४७) उदकुक्खेपसीमाय अत्तनो अनिस्सयभूतगामसीमादीहि एव सम्बन्धदोसो दस्सितो, न नदिसीमायं. एवमिधापीति दट्ठब्बं. अयञ्चत्थो उपरि पाकटो भविस्सति. आहच्चाति फुसित्वा.

महासीमं वा सोधेत्वाति महासीमागतानं सब्बेसं भिक्खूनं हत्थपासानयनबहिकरणादिवसेन ¶ सकलं महासीमं सोधेत्वा. एतेन सब्बविपत्तियो मोचेत्वा पुब्बे सुट्ठु बद्धानम्पि द्विन्नं बद्धसीमानं पच्छा रुक्खादिसम्बन्धेन उप्पज्जनको ईदिसो पाळिमुत्तको सम्भेददोसो अत्थीति दस्सेति. सो च ‘‘न, भिक्खवे, सीमाय सीमा सम्भिन्दितब्बा’’तिआदिना बद्धसीमानं अञ्ञमञ्ञं सम्भेदज्झोत्थरणं पटिक्खिपित्वा ‘‘अनुजानामि, भिक्खवे, सीमं सम्मन्नन्तेन सीमन्तरिकं ठपेत्वा सीमं सम्मन्नितु’’न्ति उभिन्नं (महाव. १४८) बद्धसीमानमन्तरा सीमन्तरिकं ठपेत्वाव बन्धितुं अनुजानन्तेन सम्भेदज्झोत्थरणं विय तासं अञ्ञमञ्ञं फुसित्वा तिट्ठनवसेन बन्धनम्पि न वट्टतीति सिद्धत्ता बद्धानम्पि तासं पच्छा अञ्ञमञ्ञं एकरुक्खादीहि ¶ फुसित्वा ठानम्पि न वट्टतीति भगवतो अधिप्पायञ्ञूहि सङ्गीतिकारकेहि निद्धारितो. बन्धनकाले पटिक्खित्तस्स सम्बन्धदोसस्स अनुलोमेन अकप्पियानुलोमत्ता.

अयं पन सम्बन्धदोसो – पुब्बे सुट्ठु बद्धानं पच्छा सञ्जातत्ता बज्झमानक्खणे विय असीमत्तं कातुं न सक्कोति. तस्मा रुक्खादिसम्बन्धे अपनीतमत्ते ता सीमा पाकतिका होन्ति. यथा चायं पच्छा न वट्टति, एवं बज्झमानक्खणेपि तासं रुक्खादिसम्बन्धे सति ता बन्धितुं न वट्टतीति दट्ठब्बं.

केचि पन ‘‘महासीमं वा सोधेत्वाति एत्थ महासीमागता भिक्खू यथा तं साखं वा पारोहं वा कायपटिबद्धेहि न फुसन्ति, एवं सोधनमेव इधाधिप्पेतं, न सकलसीमासोधन’’न्ति वदन्ति, तं न युत्तं अट्ठकथाय विरुज्झनतो. तथा हि ‘‘महासीमाय पथवितलं वा तत्थजातरुक्खादीनि वा आहच्च तिट्ठती’’ति एवं साखापारोहानं महासीमं फुसित्वा ठानमेव सम्बन्धदोसे कारणत्तेन वुत्तं, न पन तत्थ ठितभिक्खूहि साखादीनं फुसनं. यदि हि भिक्खूनं साखादि फुसित्वा ठानमेव कारणं सिया, तस्स साखं वा ततो निग्गतपारोहं वा महासीमाय पविट्ठं तत्रट्ठो कोचि भिक्खु फुसित्वा तिट्ठतीति भिक्खुफुसनमेव वत्तब्बं सिया. यञ्हि तत्थ महासीमासोधने कारणं, तदेव तस्मिं वाक्ये पधानतो दस्सेतब्बं. न हि आहच्च ठितमेव साखादिं फुसित्वा ठितो भिक्खु सोधेतब्बो आकासट्ठसाखादिं फुसित्वा ठितस्सापि सोधेतब्बतो, किं निरत्थकेन आहच्चट्ठानवचनेन. आकासट्ठसाखासु च भिक्खुनो फुसनमेव कारणत्तेन वुत्तं, सोधनञ्च तस्सेव भिक्खुस्स हत्थपासानयनादिवसेन सोधनं वुत्तं. इध पन ‘‘महासीमं सोधेत्वा’’ति सकलसीमासाधारणवचनेन सोधनं वुत्तं.

अपिच साखादिं फुसित्वा ठितभिक्खुमत्तसोधने अभिमते ‘‘महासीमाय पथवितल’’न्ति विसेससीमोपादानं ¶ निरत्थकं सिया यत्थ कत्थचि अन्तमसो आकासेपि ठत्वा साखादिं फुसित्वा ठितस्स विसोधेतब्बतो. छिन्दित्वा ¶ बहिट्ठका कातब्बाति तत्थ पतिट्ठितभाववियोजनवचनतो च विसभागसीमानं फुसनेनेव सकलसीमासोधनहेतुको अट्ठकथासिद्धोयं एको सम्बन्धदोसो अत्थेवाति गहेतब्बो. तेनेव उदकुक्खेपसीमाकथायम्पि (महाव. अट्ठ. १४७) ‘‘विहारसीमाय वा गामसीमाय वा पतिट्ठितो’’ति च ‘‘नदितीरे पन खाणुकं कोट्टेत्वा तत्थ बद्धनावाय न वट्टती’’ति च ‘‘सचे पन सेतु वा सेतुपादा वा बहितीरे पतिट्ठिता, कम्मं कातुं न वट्टती’’ति च एवं विसभागासु गामसीमासु साखादीनं फुसनमेव सङ्करदोसकारणत्तेन वुत्तं, न भिक्खुफुसनं. तथा हि ‘‘अन्तोनदियं जातरुक्खे बन्धित्वा कम्मं कातब्ब’’न्ति नदियं नावाबन्धनं अनुञ्ञातं उदकुक्खेपनिस्सयत्तेन नदिसीमाय सभागत्ता. यदि हि भिक्खूनं फुसनमेव पटिच्च सब्बत्थ सम्बन्धदोसो वुत्तो सिया, नदियम्पि बन्धनं पटिक्खिपितब्बं भवेय्य. तत्थापि हि भिक्खुफुसनं कम्मकोपकारणं होति, तस्मा सभागसीमासु पविसित्वा भूमिआदिं फुसित्वा वा अफुसित्वा वा साखादिम्हि ठिते तं साखादिं फुसन्तोव भिक्खु सोधेतब्बो. विसभागसीमासु पन साखादिम्हि फुसित्वा ठिते तं साखादिं अफुसन्तापि सब्बे भिक्खू सोधेतब्बा. अफुसित्वा ठिते पन तं साखादिं फुसन्तोव भिक्खु सोधेतब्बोति निट्ठमेत्थ गन्तब्बं.

यं पनेत्थ केचि ‘‘बद्धसीमानं द्विन्नं अञ्ञमञ्ञं विय बद्धसीमागामसीमानम्पि तदञ्ञासम्पि सब्बासं समानसंवासकसीमानं अञ्ञमञ्ञं रुक्खादिसम्बन्धे सति तदुभयम्पि एकसीमं विय सोधेत्वा एकत्थेव कम्मं कातब्बं, अञ्ञत्थ कतं कम्मं विपज्जति, नत्थेत्थ सभागविसभागभेदो’’ति वदन्ति, तं तेसं मतिमत्तं, सभागसीमानं अञ्ञमञ्ञं सम्भेददोसाभावस्स विसभागसीमानमेव तब्भावस्स सुत्तसुत्तानुलोमादिविनयनयेहि सिद्धत्ता. तथा हि ‘‘अनुजानामि, भिक्खवे, सीमं सम्मन्नितु’’न्ति गामसीमायमेव बद्धसीमं सम्मन्नितुं अनुञ्ञातं. तासं निस्सयनिस्सितभावेन सभागता, सम्भेदज्झोत्थरणादिदोसाभावो च सुत्ततोव सिद्धो. बन्धनकाले पन अनुञ्ञातस्स सम्बन्धस्स अनुलोमतो पच्छा सञ्जातरुक्खादिसम्बन्धोपि तासं वट्टति एव. ‘‘यं, भिक्खवे…पे… कप्पियं अनुलोमेति अकप्पियं पटिबाहति. तं वो कप्पती’’ति (महाव. ३०५) वुत्तत्ता. एवं ताव बद्धसीमागामसीमानं अञ्ञमञ्ञं सभागता, सम्भेदादिदोसाभावो च ¶ सुत्तसुत्तानुलोमतो सिद्धो. इमिना एव नयेन अरञ्ञसीमासत्तब्भन्तरसीमानं, नदिआदिउदकुक्खेपसीमानञ्च सुत्तसुत्तानुलोमतो अञ्ञमञ्ञं सभागता, सम्भेदादिदोसाभावो च सिद्धोति वेदितब्बो.

बद्धसीमाय ¶ पन अञ्ञाय बद्धसीमाय, नदिआदिसीमासु च बन्धितुं पटिक्खेपसिद्धितो चेव उदकुक्खेपसत्तब्भन्तरसीमानं नदिआदीसु एव कातुं नियमनसुत्तसामत्थियेन बद्धसीमागामसीमादीसु करणपटिक्खेपसिद्धितो च तासं अञ्ञमञ्ञं विसभागता, उप्पत्तिक्खणे, पच्छा च रुक्खादीहि सम्भेदादिदोससम्भवो च वुत्तनयेन सुत्तसुत्तानुलोमतो च सिज्झन्ति. तेनेव अट्ठकथायं (महाव. अट्ठ. १४८) विसभागसीमानमेव वटरुक्खादिवचनेहि सम्बन्धदोसं दस्सेत्वा सभागानं बद्धसीमागामसीमादीनं सम्बन्धदोसो न दस्सितो, न केवलञ्च न दस्सितो, अथ खो तासं सभागसीमानं रुक्खादिसम्बन्धेपि दोसाभावो पाळिअट्ठकथासु ञापितो एव. तथा हि पाळियं ‘‘पब्बतनिमित्तं पासाणनिमित्तं वननिमित्तं रुक्खनिमित्त’’न्तिआदिना वड्ढनकनिमित्तानि अनुञ्ञातानि. तेन नेसं रुक्खादीनं निमित्तानं वड्ढनेपि बद्धसीमागामसीमानं सङ्करदोसाभावो ञापितोव होति. द्विन्नं पन बद्धसीमानं ईदिसो सम्बन्धो न वट्टति. वुत्तञ्हि ‘‘एकरुक्खोपि च द्विन्नं सीमानं निमित्तं होति, सो पन वड्ढन्तो सीमासङ्करं करोति, तस्मा न कातब्बो’’ति ‘‘अनुजानामि, भिक्खवे, तियोजनपरमं सीमं सम्मन्नितु’’न्ति वचनतोपि चायं ञापितो. तियोजनपरमाय हि सीमाय समन्ता परियन्तेसु रुक्खलतागुम्बादीहि बद्धसीमागामसीमानं नियमेन अञ्ञमञ्ञं सम्बन्धस्स सम्भवतो ‘‘ईदिसं सम्बन्धनं विनासेत्वाव सीमा सम्मन्नितब्बा’’ति अट्ठकथायम्पि न वुत्तं.

यदि चेत्थ रुक्खादिसम्बन्धेन कम्मविपत्ति भवेय्य, अवस्समेव वत्तब्बं सिया. विपत्तिपरिहारत्थञ्हि आचरिया निरासङ्कट्ठानेसुपि ‘‘भित्तिं अकित्तेत्वा’’तिआदिना सिद्धमेवत्थं पुनप्पुनं अवोचुं. इध पन ‘‘वनमज्झे विहारं करोन्ति, वनं न कित्तेतब्ब’’न्तिआदिरुक्खलतादीहि निरन्तरे वनमज्झेपि सीमाबन्धनमेव अवोचुं. तथा थम्भानं उपरि कतपासादादीसु हेट्ठा थम्भादीहि एकाबद्धेसु उपरिमतलादीसु सीमाबन्धनं बहुधा वुत्तं. तस्मा बद्धसीमागामसीमानं रुक्खादिसम्बन्धो तेहि मुखतोव विहितो. अपिच गामसीमानम्पि पाटेक्कं बद्धसीमासदिसताय एकिस्सा गामसीमाय कम्मं ¶ करोन्तेहि दब्बतिणमत्तेनापि सम्बन्धा गामन्तरपरम्परा अरञ्ञनदिसमुद्दा च सोधेतब्बाति सकलदीपं सोधेत्वाव कातब्बं सिया. एवं पन असोधेत्वा पठममहासङ्गीतिकालतो पभुति कतानं उपसम्पदादिकम्मानं, सीमासम्मुतीनञ्च विपज्जनतो सब्बेसम्पि भिक्खूनं अनुपसम्पन्नसङ्कापसङ्गो च दुन्निवारो होति. न चेतं युत्तं. तस्मा वुत्तनयेनेव विसभागसीमानमेव रुक्खादीहि सम्बन्धदोसो, न बद्धसीमागामसीमादीनं सभागसीमानन्ति गहेतब्बं.

महासीमासोधनस्स दुक्करताय खण्डसीमायमेव येभुय्येन सङ्घकम्मकरणन्ति आह ‘‘सीमामाळके’’तिआदि ¶ . महासङ्घसन्निपाते पन खण्डसीमाय अप्पहोनकताय महासीमाय कम्मे करियमानेपि अयं नयो गहेतब्बोव.

‘‘उक्खिपापेत्वा’’ति इमिना कायपटिबद्धेनपि सीमं फुसन्तो सीमट्ठोव होतीति दस्सेति. पुरिमनयेपीति खण्डसीमतो महासीमं पविट्ठसाखानयेपि. सीमट्ठरुक्खसाखाय निसिन्नो सीमट्ठोव होतीति आह ‘‘हत्थपासमेव आनेतब्बो’’ति. एत्थ च रुक्खसाखादीहि अञ्ञमञ्ञं सम्बन्धासु एतासु खन्धसीमायं तयो भिक्खू, महासीमायं द्वेति एवं द्वीसु सीमासु सीमन्तरिकं अफुसित्वा, हत्थपासञ्च अविजहित्वा ठितेहि पञ्चहि भिक्खूहि उपसम्पदादिकम्मं कातुं वट्टतीति केचि वदन्ति. तं न युत्तं ‘‘नानासीमाय ठितचतुत्थो कम्मं करेय्य, अकम्मं, न च करणीय’’न्तिआदि (महाव. ३८९) वचनतो. तेनेवेत्थापि महासीमं सोधेत्वा माळकसीमायमेव कम्मकरणं विहितं. अञ्ञथा भिन्नसीमट्ठताय तत्रट्ठस्स गणपूरकत्ताभावा कम्मकोपोव होतीति.

यदि एवं कथं छन्दपारिसुद्धिआहरणवसेन महासीमासोधनन्ति? तम्पि विनयञ्ञू न इच्छन्ति, हत्थपासानयनबहिसीमाकरणवसेनेव पनेत्थ सोधनं इच्छन्ति, दिन्नस्सापि छन्दस्स अनागमनेन महासीमट्ठो कम्मं कोपेतीति. यदि चस्स छन्दादि नागच्छति, कथं सो कम्मं कोपेस्सतीति? द्विन्नं विसभागसीमानं सम्बन्धदोसतो. सो च सम्बन्धदोसो अट्ठकथावचनप्पमाणतो. न हि विनये सब्बत्थ युत्ति सक्का ञातुं बुद्धगोचरत्ताति वेदितब्बं. केचि पन ‘‘सचे द्वेपि सीमायो पूरेत्वा निरन्तरं ¶ ठितेसु भिक्खूसु कम्मं करोन्तेसु एकिस्सा एव सीमाय गणो च उपसम्पदापेक्खो च अनुस्सावको च एकतो तिट्ठति, कम्मं सुकतमेव होति. सचे पन कम्मारहो वा अनुस्सावको वा सीमन्तरट्ठो होति, कम्मं विपज्जती’’ति वदन्ति, तञ्च बद्धसीमागामसीमादिसभागसीमासु एव युज्जति, यासु अञ्ञमञ्ञं रुक्खादिसम्बन्धेसुपि दोसो नत्थि. यासु पन अत्थि, न तासु विसभागसीमासु रुक्खादिसम्बन्धे सति एकत्थ ठितो इतरट्ठानं कम्मं कोपेति एव अट्ठकथायं सामञ्ञतो सोधनस्स वुत्तत्ताति अम्हाकं खन्ति. वीमंसित्वा गहेतब्बं.

न ओतरतीति पणवसण्ठानपब्बतादीसु हेट्ठा पमाणरहितट्ठानं न ओतरति. किञ्चापि पनेत्थ बज्झमानक्खणे उद्धम्पि पमाणरहितं पब्बतादीनि नारोहति, तथापि तं पच्छा सीमट्ठताय सीमा होति. हेट्ठा पणवसण्ठानादि पन उपरि बद्धायपि सीमाय सीमासङ्ख्यं न गच्छति, तस्स वसेन न ओतरतीति वुत्तं, इतरथा ओरोहणारोहणानं साधारणवसेन ‘‘न ओतरती’’तिआदिना ¶ वत्तब्बतो. यं किञ्चीति निट्ठितसीमाय उपरि जातं विज्जमानं पुब्बे ठितं, पच्छा सञ्जातं, पविट्ठञ्च यंकिञ्चि सविञ्ञाणकाविञ्ञाणकं सब्बम्पीति अत्थो. अन्तोसीमाय हि हत्थिक्खन्धादिसविञ्ञाणकेसु निसिन्नोपि भिक्खु सीमट्ठोव होति. ‘‘बद्धसीमाया’’ति इदञ्च पकरणवसेन उपलक्खणतो वुत्तं. अबद्धसीमासुपि सब्बासु ठितं तं सीमासङ्ख्यमेव गच्छति.

एकसम्बद्धेन गतन्ति रुक्खलतादितत्रजातमेव सन्धाय वुत्तं. तादिसम्पि ‘‘इतो गत’’न्ति वत्तब्बतं अरहति. यं पन ‘‘इतो गत’’न्ति वा ‘‘ततो आगत’’न्ति वा वत्तुं असक्कुणेय्यं उभोसु बद्धसीमागामसीमासु, उदकुक्खेपनदिआदीसु च तिरियं पतितरज्जुदण्डादि, तत्थ किं कातब्बन्ति? एत्थ पन बद्धसीमाय पतिट्ठितभागो बद्धसीमा, अबद्धगामसीमाय पतिट्ठितभागो गामसीमा तदुभयसीमट्ठपब्बतादि विय. बद्धसीमतो उट्ठितवटरुक्खस्स पारोहे, गामसीमाय गामसीमतो उट्ठितवटरुक्खस्स पारोहे च बद्धसीमाय पतिट्ठितेपि एसेव नयो. मूलपतिट्ठितकालतो हि पट्ठाय ‘‘इतो गतं, ततो आगत’’न्ति वत्तुं असक्कुणेय्यतो सो भागो यथापविट्ठसीमासङ्ख्यमेव गच्छति, तेसं रुक्खपारोहानं अन्तरा पन आकासट्ठसाखा भूमियं सीमापरिच्छेदप्पमाणेन ¶ तदुभयसीमा होतीति केचि वदन्ति. यस्मा पनस्स साखाय पारोहो पविट्ठसीमाय पथवियं मूलेहि पतिट्ठहित्वापि याव साखं विना ठातुं न सक्कोति, ताव मूलसीमट्ठतं न विजहति. यदा पन विना ठातुं सक्कोति, तदापि पारोहमत्तमेव पविट्ठसीमट्ठतं समुपेति. तस्मा सब्बोपि आकासट्ठसाखाभागो पुरिमसीमट्ठतं न विजहति, ततो आगतभागस्स अविजहितत्ताति अम्हाकं खन्ति. उदकुक्खेपनदिआदीसुपि एसेव नयो. तत्थ च विसभागसीमाय एवं पविट्ठे सकलसीमासोधनं, सभागाय पविट्ठे फुसित्वा ठितमत्तभिक्खुसोधनञ्च सब्बं पुब्बे वुत्तनयमेव.

१४०. पारयतीति अज्झोत्थरति, नदिया उभोसु तीरेसु पतिट्ठमाना सीमा नदिअज्झोत्थरा नाम होतीति आह ‘‘नदिंअज्झोत्थरमान’’न्ति. अन्तोनदियञ्हि सीमा न ओतरति. नदिलक्खणे पन असति ओतरति, सा च तदा नदिपारसीमा न होतीति आह ‘‘नदिया लक्खणं नदिनिमित्ते वुत्तनयमेवा’’ति. अस्साति भवेय्य. अवस्सं लब्भनेय्या पन धुवनावाव होतीति सम्बन्धो. ‘‘न नावाया’’ति इमिना नावं विनापि सीमा बद्धा सुबद्धा एव होति, आपत्तिपरिहारत्था नावाति दस्सेति.

रुक्खसङ्घाटमयोति ¶ अनेकरुक्खे एकतो घटेत्वा कतसेतु. रुक्खं छिन्दित्वा कतोति पाठसेसो. ‘‘सब्बनिमित्तानं अन्तो ठिते भिक्खू हत्थपासगते कत्वा’’ति इदं उभिन्नं तीरानं एकगामखेत्तभावं सन्धाय वुत्तं. पब्बतसण्ठानाति एकतो उग्गतदीपसिखरत्ता वुत्तं.

सीमानुजाननकथावण्णना निट्ठिता.

उपोसथागारादिकथावण्णना

१४१. समूहनित्वाति विनासेत्वा, उद्धरित्वाति अत्थो. इदञ्च आपत्तिपरिहारत्थं वुत्तं.

१४२. यानि कानिचीति इध निमित्तानं सीमाय पाळियं सरूपतो अवुत्तत्ता वुत्तं.

उपोसथागारादिकथावण्णना निट्ठिता.

अविप्पवाससीमानुजाननकथावण्णना

१४३. अट्ठारसाति ¶ अन्धकविन्दविहारम्पि उपादाय वुच्चति. नेसं सीमाति तेसु महाविहारेसु. ‘‘मन’’न्ति इमस्स विवरणं ईसकन्ति, ईसकं वुळ्होति अत्थो. इममेवत्थं दस्सेतुं ‘‘अप्पत्तवुळ्हभावो अहोसी’’ति वुत्तं. अमनसिकरोन्तोति इद्धिया अनतिक्कमस्स कारणं वुत्तं.

१४४. सोति भिक्खुनिसङ्घो. द्वेपीति द्वे समानसंवासअविप्पवासायो. अविप्पवाससीमाति महासीमं सन्धाय वदति. तत्थेव येभुय्येन अविप्पवासाति.

‘‘अविप्पवासं अजानन्तापी’’ति इदं महासीमाय विज्जमानाविज्जमानत्तं, तस्सा बाहिरपरिच्छेदञ्च अजानन्तानं वसेन वुत्तं. एवं अजानन्तेहिपि अन्तोसीमाय ठत्वा कम्मवाचाय कताय सा सीमा समूहताव होतीति आह ‘‘समूहनितुञ्चेव बन्धितुञ्च सक्खिस्सन्ती’’ति. निरासङ्कट्ठानेति खण्डसीमारहितट्ठाने. इदञ्च महासीमाय विज्जमानायपि कम्मकरणसुखत्थं खण्डसीमा इच्छिताति तं चेतियङ्गणादिबहुसन्निपातट्ठाने न बन्धतीति वुत्तं. तत्थापि ¶ सा बद्धा सुबद्धा एव महासीमा विय. ‘‘पटिबन्धितुं पन न सक्खिस्सन्तेवा’’ति इदं खण्डसीमाय असमूहतत्ता, तस्सा अविज्जमानत्तस्स अजाननतो च महासीमाबन्धनं सन्धाय वुत्तं. खण्डसीमं पन निरासङ्कट्ठाने बन्धितुं सक्खिस्सन्तेव. सीमासम्भेदं कत्वाति खण्डसीमाय विज्जमानपक्खे सीमाय सीमं अज्झोत्थरणसम्भेदं कत्वा अविज्जमानपक्खेपि सम्भेदसङ्काय अनिवत्तनेन सम्भेदसङ्कं कत्वा. अविहारं करेय्युन्ति सङ्घकम्मानारहं करेय्युं. पुब्बे हि चेतियङ्गणादिनिरासङ्कट्ठाने कम्मं कातुं सक्का, इदानि तम्पि विनासितन्ति अधिप्पायो. न समूहनितब्बाति खण्डसीमं अजानन्तेहि न समूहनितब्बा. उभोपि न जानन्तीति उभिन्नं पदेसनियमं वा तासं द्विन्नम्पि वा अञ्ञतराय वा विज्जमानतं वा अविज्जमानतं वा न जानन्ति, सब्बत्थ सङ्का एव होति. ‘‘नेव समूहनितुं, न बन्धितुं सक्खिस्सन्ती’’ति इदं निरासङ्कट्ठाने ठत्वा समूहनितुं सक्कोन्तोपि महासीमं पटिबन्धितुं न सक्कोन्तीति इममत्थं सन्धाय वुत्तं. ‘‘न च सक्का…पे… कम्मवाचं कातु’’न्ति इदं सीमाबन्धनकम्मवाचं सन्धाय वुत्तं. तस्माति यस्मा बन्धितुं न सक्का, तस्मा न समूहनितब्बाति अत्थो.

केचि ¶ पन ‘‘ईदिसेसु विहारेसु छपञ्चमत्ते भिक्खू गहेत्वा विहारकोटितो पट्ठाय विहारपरिक्खेपस्स अन्तो च बहि च समन्ता लेड्डुपाते सब्बत्थ मञ्चप्पमाणे ओकासे निरन्तरं ठत्वा पठमं अविप्पवाससीमं, ततो समानसंवासकसीमञ्च समूहननवसेन सीमाय समुग्घाते कते तस्मिं विहारे खण्डसीमाय, महासीमायपि वा विज्जमानत्ते सति अवस्सं एकस्मिं मञ्चट्ठाने तासं मज्झगता ते भिक्खू ता समूहनेय्युं, ततो गामसीमा एव अवसिस्सेय्य. न हेत्थ सीमाय, तप्परिच्छेदस्स वा जाननं अङ्गं. सीमाय पन अन्तोठानं, ‘‘समूहनिस्सामा’’ति कम्मवाचाय करणञ्चेत्थ अङ्गं. अट्ठकथायं ‘खण्डसीमं पन जानन्ता अविप्पवासं अजानन्तापि समूहनितुञ्चेव बन्धितुञ्च सक्खिस्सन्ती’ति एवं महासीमाय परिच्छेदस्स अजाननेपि समूहनस्स वुत्तत्ता. गामसीमाय एव च अवसिट्ठाय तत्थ यथारुचि दुविधम्पि सीमं बन्धितुञ्चेव उपसम्पदादिकम्मं कातुञ्च वट्टती’’ति वदन्ति, तं युत्तं विय दिस्सति. वीमंसित्वा गहेतब्बं.

अविप्पवाससीमानुजाननकथावण्णना निट्ठिता.

गामसीमादिकथावण्णना

१४७. पाळियं ¶ ‘‘असम्मताय, भिक्खवे, सीमाया’’तिआदिना गामसीमा एव बद्धसीमाय खेत्तं, अरञ्ञनदिआदयो विय सत्तब्भन्तरउदकुक्खेपादीनं. सा च गामसीमा बद्धसीमाविरहितट्ठाने सयमेव समानसंवासा होतीति दस्सेति. या तस्स वा गामस्स गामसीमाति एत्थ गामसीमापरिच्छेदस्स अन्तो च बहि च खेत्तवत्थुअरञ्ञपब्बतादिकं सब्बं गामखेत्तं सन्धाय ‘‘गामस्सा’’ति वुत्तं, न अन्तरघरमेव. तस्मा तस्स सकलस्स गामखेत्तस्स सम्बन्धनीया गामसीमाति एवमत्थो वेदितब्बो. यो हि सो अन्तरघरखेत्तादीसु अनेकेसु भूमिभागेसु ‘‘गामो’’ति एकत्तेन लोकजनेहि पञ्ञत्तो गामवोहारो, सोव इध ‘‘गामसीमा’’तिपि वुच्चतीति अधिप्पायो, गामो एव हि गामसीमा. इमिनाव नयेन उपरि अरञ्ञं नदी समुद्दो जातस्सरोति एवं तेसु भूमिप्पदेसेसु एकत्तेन लोकजनपञ्ञत्तानमेव अरञ्ञादीनं अरञ्ञसीमादिभावो वेदितब्बो. लोके पन गामसीमादिवोहारो गामादीनं ¶ मरियादायमेव वत्तुं वट्टति, न गामखेत्तादीसु सब्बत्थ. सासने पन ते गामादयो इतरनिवत्तिअत्थेन सयमेव अत्तनो मरियादाति कत्वा गामो एव गामसीमा, अरञ्ञमेव अरञ्ञसीमा…पे… समुद्दो एव समुद्दसीमाति सीमावोहारेन वुत्ताति वेदितब्बा.

‘‘निगमस्स वा’’ति इदं गामसीमप्पभेदं सब्बं उपलक्खणवसेन दस्सेतुं वुत्तं. तेनाह ‘‘नगरम्पि गहितमेवा’’ति. ‘‘बलिं लभन्ती’’ति इदं येभुय्यवसेन वुत्तं, ‘‘अयं गामो एत्तको करीसभागो’’तिआदिना पन राजपण्णेसु आरोपितेसु भूमिभागेसु यस्मिं यस्मिं तळाकमातिकासुसानपब्बतादिके पदेसे बलिं न गण्हन्ति, सोपि गामसीमा एव. राजादीहि परिच्छिन्नभूमिभागो हि सब्बोव ठपेत्वा नदिलोणिजातस्सरे गामसीमाति वेदितब्बो. तेनाह ‘‘परिच्छिन्दित्वा राजा कस्सचि देती’’ति. सचे पन तत्थ राजा कञ्चि पदेसं गामन्तरेन योजेति, सो पविट्ठगामसीमतं एव भजति, नदिजातस्सरेसु विनासेत्वा तळाकादिभावं वा पूरेत्वा खेत्तादिभावं वा पापितेसुपि एसेव नयो.

ये पन गामा राजचोरादिभयपीळितेहि मनुस्सेहि छड्डिता चिरम्पि निम्मनुस्सा तिट्ठन्ति, समन्ता पन गामा सन्ति, तेपि पाटेक्कं गामसीमाव. तेसु हि राजानो समन्तगामवासीहि कसापेत्वा वा येहि केहिचि कसितट्ठानं लिखित्वा वा बलिं गण्हन्ति, अञ्ञेन वा गामेन एकीभावं वा उपनेन्ति. ये पन गामा राजूहिपि परिच्चत्ता गामखेत्तानन्तरिका महारञ्ञेन एकीभूता, ते अगामकारञ्ञसीमतं पापुणन्ति, पुरिमा गामसीमा ¶ विनस्सति. राजानो पन एकस्मिं अरञ्ञादिप्पदेसे महन्तं गामं कत्वा अनेकसहस्सानि कुलानि वासापेत्वा तत्थ वासीनं भोगगामाति समन्ता भूतगामे परिच्छिन्दित्वा देन्ति. पुराणनामं, पन परिच्छेदञ्च न विनासेन्ति, तेपि पच्चेकं गामसीमा एव. एत्तावता पुरिमगामसीमत्तं न विजहन्ति. सा च इतरा चातिआदि ‘‘समानसंवासा एकूपोसथा’’ति पाळिपदस्स अधिप्पायविवरणं. तत्थ हि सा च राजिच्छावसेन परिवत्तित्वा समुप्पन्ना अभिनवा, इतरा च अपरिवत्ता पकतिगामसीमा, यथा बद्धसीमाय सब्बं सङ्घकम्मं कातुं वट्टति, एवमेतापि सब्बकम्मारहतासदिसेन बद्धसीमासदिसा, सा समानसंवासा एकूपोसथाति ¶ अधिप्पायो. सामञ्ञतो ‘‘बद्धसीमासदिसा’’ति वुत्ते तिचीवराविप्पवाससीमं बद्धसीमं एव मञ्ञन्तीति तंसदिसतानिवत्तनमुखेन उपरि सत्तब्भन्तरसीमाय तंसदिसतापि अत्थीति दस्सननयस्स इधेव पसङ्गं दस्सेतुं ‘‘केवल’’न्तिआदि वुत्तं.

विञ्झाटविसदिसे अरञ्ञेति यत्थ ‘‘असुकगामस्स इदं खेत्त’’न्ति गामवोहारो नत्थि, यत्थ च न कसन्ति न वपन्ति, तादिसे अरञ्ञे. मच्छबन्धानं अगमनपथा निम्मनुस्सावासा समुद्दन्तरदीपकापि एत्थेव सङ्गय्हन्ति. यं यञ्हि अगामखेत्तभूतं नदिसमुद्दजातस्सरविरहितं पदेसं, तं सब्बं अरञ्ञसीमाति वेदितब्बं. सा च सत्तब्भन्तरसीमं विनाव सयमेव समानसंवासा बद्धसीमासदिसा. नदिआदिसीमासु विय सब्बमेत्थ सङ्घकम्मं कातुं वट्टति. नदिसमुद्दजातस्सरानं ताव अट्ठकथायं ‘‘अत्तनो सभावेनेव बद्धसीमासदिसा’’तिआदिना वुत्तत्ता सीमता सिद्धा. अरञ्ञस्स पन सीमता कथन्ति? सत्तब्भन्तरसीमानुजाननसुत्तादिसामत्थियतो. यथा हि गामसीमाय वग्गकम्मपरिहारत्थं बहू बद्धसीमायो अनुञ्ञाता, तासञ्च द्विन्नमन्तरा अञ्ञमञ्ञं असम्भेदत्थं सीमन्तरिका अनुञ्ञाता, एवमिधारञ्ञेपि सत्तब्भन्तरसीमा. तासञ्च द्विन्नं अन्तरा सीमन्तरिकाय पाळिअट्ठकथासुपि विधानसामत्थियतो अरञ्ञस्सपि सभावेनेव नदिआदीनं विय सीमाभावो तत्थ वग्गकम्मपरिहारत्थमेव सत्तब्भन्तरसीमाय अनुञ्ञातत्ताव सिद्धोति वेदितब्बो. तत्थ सीमायमेव हि ठिता सीमट्ठानं वग्गकम्मं करोन्ति, न असीमायं आकासे ठिता विय आकासट्ठानं. एवमेव हि सामत्थियं गहेत्वा ‘‘सब्बा, भिक्खवे, नदी असीमा’’तिआदिना पटिक्खित्तबद्धसीमानम्पि नदिसमुद्दजातस्सरानं अत्तनो सभावेनेव सीमाभावो अट्ठकथायं वुत्तोति गहेतब्बो.

अथस्स ठितोकासतोति अस्स भिक्खुस्स ठितोकासतो. सचेपि हि भिक्खुसहस्सं तिट्ठति, तस्स ठितोकासस्स बाहिरन्ततो पट्ठाय भिक्खूनं वग्गकम्मपरिहारत्थं सीमापेक्खाय उप्पन्नाय ¶ ताय सह सयमेव सञ्जाता सत्तब्भन्तरसीमा समानसंवासाति अधिप्पायो. यत्थ पन खुद्दके अरञ्ञे महन्तेहि भिक्खूहि परिपुण्णताय वग्गकम्मसङ्काभावेन सत्तब्भन्तरसीमापेक्खा नत्थि, तत्थ सत्तब्भन्तरसीमा न उप्पज्जति, केवलारञ्ञसीमायमेव, तत्थ सङ्घेन कम्मं कातब्बं. नदिआदीसुपि एसेव नयो. वक्खति हि ‘‘सचे नदी नातिदीघा होति, पभवतो ¶ पट्ठाय याव मुखद्वारा सब्बत्थ सङ्घो निसीदति, उदकुक्खेपसीमाकम्मं नत्थी’’तिआदि (महाव. अट्ठ. १४७). इमिना एव च वचनेन वग्गकम्मपरिहारत्थं सीमापेक्खाय सति एव उदकुक्खेपसत्तब्भन्तरसीमा उप्पज्जन्ति, नासतीति दट्ठब्बं.

केचि पन ‘‘समन्ता अब्भन्तरं मिनित्वा परिच्छेदकरणेनेव सीमा सञ्जायति, न सयमेवा’’ति वदन्ति, तं न गहेतब्बं. यदि हि अब्भन्तरपरिच्छेदकरणप्पकारेन सीमा उप्पज्जेय्य, अबद्धसीमा च न सिया भिक्खूनं किरियापकारसिद्धितो. अपिच वड्ढकीहत्थानं, पकतिहत्थानञ्च लोके अनेकविधत्ता, विनये ईदिसं हत्थप्पमाणन्ति अवुत्तत्ता च येन केनचि मिनिते च भगवता अनुञ्ञातेन नु खो हत्थेन मिनितं, न नु खोति सीमाय विपत्तिसङ्का भवेय्य. मिनन्तेहि च अणुमत्तम्पि ऊनमधिकं अकत्वा मिनितुं असक्कुणेय्यताय विपत्ति एव सिया. परिसवसेन चायं वड्ढमाना तेसं मिननेन वड्ढति वा हायति वा. सङ्घे च कम्मं कत्वा गते अयं भिक्खूनं पयोगेन समुप्पन्नसीमा तेसं पयोगेन विगच्छति न विगच्छति च. कथं बद्धसीमा विय याव सासनन्तरधाना न तिट्ठेय्य, ठितिया च पुराणविहारेसु विय सकलेपि अरञ्ञे कथं सीमासम्भेदसङ्का न भवेय्य. तस्मा सीमापेक्खाय एव समुप्पज्जति, तब्बिगमेन विगच्छतीति गहेतब्बं. यथा चेत्थ, एवं उदकुक्खेपसीमायम्पि नदिआदीसुपि.

तत्थापि हि मज्झिमपुरिसो न ञायति. तथा सब्बथामेन खिपनं उभयत्थापि च यस्सं दिसायं सत्तब्भन्तरस्स, उदकुक्खेपस्स वा ओकासो न पहोति, तत्थ कथं मिननं, खिपनं वा भवेय्य? गामखेत्तादीसु पविसनतो अखेत्ते सीमा पविट्ठा नामाति सीमा विपज्जेय्य. अपेक्खाय सीमुप्पत्तियं पन यतो पहोति, तत्थ सत्तब्भन्तरउदकुक्खेपसीमा सयमेव परिपुण्णा जायन्ति. यतो पन न पहोति, तत्थ अत्तनो खेत्तप्पमाणेनेव जायन्ति, न बहि. यं पनेत्थ अब्भन्तरमिननपमाणस्स, वालुकादिखिपनकम्मस्स च दस्सनं, तं सञ्जातसीमानं ठितट्ठानस्स परिच्छेदनत्थं कतं गामूपचारघरूपचारजाननत्थं लेड्डुसुप्पादिखिपनविधानदस्सनं विय. तेनेव मातिकाट्ठकथायं ‘‘सीमं वा सम्मन्नति उदकुक्खेपं वा परिच्छिन्दती’’ति वुत्तं (कङ्खा. अट्ठ. ऊनवीसतिवस्ससिक्खापदवण्णना). एवं कतेपि तस्स ¶ परिच्छेदस्स याथावतो ञातुं ¶ असक्कुणेय्यत्तेन पुथुलतो ञत्वा अन्तो तिट्ठन्तेहि निरासङ्कट्ठाने ठातब्बं, अञ्ञं बहि करोन्तेहि अतिदूरे निरासङ्कट्ठाने पेसेतब्बं.

अपरे पन ‘‘सीमापेक्खाय किच्चं नत्थि, मग्गगमननहानादिअत्थेहि एकभिक्खुस्मिम्पि अरञ्ञे वा नदिआदीसु वा पविट्ठे तं परिक्खिपित्वा सत्तब्भन्तरउदकुक्खेपसीमा सयमेव पभा विय पदीपस्स समुप्पज्जति, गामखेत्तादीसु तस्मिं ओतिण्णमत्ते विगच्छति. तेनेव चेत्थ द्विन्नं सङ्घानं विसुं कम्मं करोन्तानं सीमाद्वयस्स अन्तरा सीमन्तरिका अञ्ञं सत्तब्भन्तरं, उदकुक्खेपञ्च ठपेतुं अनुञ्ञातं, सीमापरियन्ते हि केनचि कम्मेन पेसितस्स भिक्खुनो समन्ता सञ्जातसीमा इतरेसं सीमाय फुसित्वा सीमासम्भेदं करेय्य, सो मा होतूति, इतरथा हत्थचतुरङ्गुलमत्तायपेत्थ सीमन्तरिकाय अनुजानितब्बतो. अपिच सीमन्तरिकाय ठितस्सापि उभयत्थ कम्मकोपवचनतोपि चेतं सिज्झति. तम्पि परिक्खिपित्वा सयमेव सञ्जाताय सीमाय उभिन्नम्पि सीमानं, एकाय एव वा सङ्करतो. इतरथा तस्स कम्मकोपवचनं न युज्जेय्य. वुत्तञ्हि मातिकाट्ठकथायं ‘परिच्छेदब्भन्तरे हत्थपासं विजहित्वा ठितोपि परिच्छेदतो बहि अञ्ञं तत्तकंयेव परिच्छेदं अनतिक्कमित्वा ठितोपि कम्मं कोपेती’ति (कङ्खा. अट्ठ. निदानवण्णना). किञ्च अगामकारञ्ञे ठितस्स कम्मकरणिच्छाविरहितस्सापि भिक्खुनो सत्तब्भन्तरपरिच्छिन्ने अज्झोकासे चीवरविप्पवासो भगवता अनुञ्ञातो, सो च परिच्छेदो सीमा. एवं अपेक्खं विना समुप्पन्ना. तेनेवेत्थ ‘अयं सीमा तिचीवरविप्पवासपरिहारम्पि लभती’ति (महाव. अट्ठ. १४७) वुत्तं. तस्मा कम्मकरणिच्छं विनापि वुत्तनयेन समुप्पत्ति गहेतब्बा’’ति वदन्ति, तं न युत्तं पदीपस्स पभा विय सब्बपुग्गलानम्पि पच्चेकं सीमासम्भवेन सङ्घे, गणे वा कम्मं करोन्ते तत्रट्ठानं भिक्खूनं समन्ता पच्चेकं समुप्पन्नानं अनेकसीमानं अञ्ञमञ्ञं सङ्करदोसप्पसङ्गतो. परिसवसेन चस्सा वड्ढि, हानि च सम्भवति. पच्छा आगतानं अभिनवसीमन्तरुप्पत्ति एव, गतानं समन्ता ठितसीमापि विनासो च भवेय्य.

पाळियं पन ‘‘समन्ता सत्तब्भन्तरा, अयं तत्थ समानसंवासा’’तिआदिना (महाव. १४७) एका एव सत्तब्भन्तरा, उदकुक्खेपा च अनुञ्ञाता, न चेसा सीमा सभावेन, कारणसामत्थियेन वा पभा विय पदीपस्स उप्पज्जति. किन्तु ¶ भगवतो अनुजाननेनेव, भगवा च इमायो अनुजानन्तो भिक्खूनं वग्गकम्मपरिहारेन कम्मकरणसुखत्थमेव अनुञ्ञासीति कथं नहानादिकिच्चेन पविट्ठानम्पि समन्ता तासं सीमानं समुप्पत्ति पयोजनाभावा? पयोजने च एकं एव पयोजनन्ति कथं पच्चेकं भिक्खुगणनाय अनेकसीमासमुप्पत्ति ¶ ? ‘‘एकसीमायं हत्थपासं अविजहित्वा ठिता’’ति (कङ्खा. अट्ठ. निदानवण्णना) वुत्तं. यं पन द्विन्नं सीमानं अन्तरा तत्तकपरिच्छेदेनेव सीमन्तरिकट्ठपनवचनं, तत्थ ठितानं कम्मकोपवचनञ्च, तम्पि इमासं सीमानं परिच्छेदस्स दुब्बोधताय सीमाय सम्भेदसङ्कं, कम्मकोपसङ्कञ्च दूरतो परिहरितुं वुत्तं.

यो च चीवराविप्पवासत्थं भगवता अब्भोकासे दस्सितो सत्तब्भन्तरपरिच्छेदो, सो सीमा एव न होति, खेत्ततळाकादिपरिच्छेदो विय अयमेत्थ एको परिच्छेदोव. तत्थ च बहूसु भिक्खूसु एकतो ठितेसु तेसं विसुं विसुं अत्तनो ठितट्ठानतो पट्ठाय समन्ता सत्तब्भन्तरपरिच्छेदब्भन्तरे एव चीवरं ठपेतब्बं. न परिसपरियन्ततो पट्ठाय. परिसपरियन्ततो पट्ठाय हि अब्भन्तरे गय्हमाने अब्भन्तरपरियोसाने ठपितचीवरं मज्झे ठितस्स अब्भन्तरतो बहि होतीति तं अरुणुग्गमने निस्सग्गियं सिया. सीमा पन परिसपरियन्ततोव गहेतब्बा. चीवरविप्पवासपरिहारोपेत्थ अब्भोकासपरिच्छेदस्स विज्जमानत्ता वुत्तो, न पन याव सीमापरिच्छेदं लब्भमानत्ता महासीमाय अविप्पवाससीमावोहारो विय. महासीमायम्पि हि गामगामूपचारेसु चीवरं निस्सग्गियं होति. इधापि मज्झे ठितस्स सीमापरियन्ते निस्सग्गियं होति. तस्मा यथावुत्तसीमापेक्खवसेनेवेतासं सत्तब्भन्तरउदकुक्खेपसीमानं उप्पत्ति, तब्बिगमेन विनासो च गहेतब्बाति अम्हाकं खन्ति. वीमंसित्वा गहेतब्बं. अञ्ञो वा पकारो इतो युत्ततरो गवेसितब्बो.

इध पन ‘‘अरञ्ञे समन्ता सत्तब्भन्तरा’’ति एवं पाळियं विञ्झाटविसदिसे अरञ्ञे समन्ता सत्तब्भन्तराति अट्ठकथायञ्च रुक्खादिनिरन्तरेपि अरञ्ञे सत्तब्भन्तरसीमाय विहितत्ता अत्तनो निस्सयभूताय अरञ्ञसीमाय सह एतस्सा रुक्खादिसम्बन्धे दोसाभावो पगेव अगामके रुक्खेति निस्सितेपि पदेसे चीवरविप्पवासस्स रुक्खपरिहारं विनाव अब्भोकासपरिहारोव अनुमतोति सिद्धोति वेदितब्बो.

उपचारत्थायाति ¶ सीमन्तरिकत्थाय सत्तब्भन्तरतो अधिकं वट्टति. ऊनकं पन न वट्टति एव सत्तब्भन्तरपरिच्छेदस्स दुब्बिजानत्ता. तस्मा सङ्घं विना एकेनापि भिक्खुना बहि तिट्ठन्तेन अञ्ञं सत्तब्भन्तरं अतिक्कमित्वा अतिदूरे एव ठातब्बं, इतरथा कम्मकोपसङ्कतो. उदकुक्खेपेपि एसेव नयो. तेनेव वक्खति ‘‘ऊनकं पन न वट्टती’’ति (महाव. अट्ठ. १४७). इदञ्चेत्थ सीमन्तरिकविधानं द्विन्नं बद्धसीमानं सीमन्तरिकानुजाननसुत्तानुलोमतो सिद्धन्ति दट्ठब्बं. किञ्चापि हि भगवता निदानवसेन एकगामसीमानिस्सितानं ¶ , एकसभागानञ्च द्विन्नं बद्धसीमानमेव अञ्ञमञ्ञं सम्भेदज्झोत्थरणदोसपरिहाराय सीमन्तरिका अनुञ्ञाता, तथापि तदनुलोमतो एकअरञ्ञसीमानदिआदिसीमञ्च निस्सितानं एकसभागानं द्विन्नं सत्तब्भन्तरसीमानम्पि उदकुक्खेपसीमानम्पि अञ्ञमञ्ञं सम्भेदज्झोत्थरणं, सीमन्तरिकं विना अब्यवधानेन ठानञ्च भगवता अनभिमतमेवाति ञत्वा अट्ठकथाचरिया इधापि सीमन्तरिकविधानमकंसु. विसभागसीमानम्पि हि एकसीमानिस्सितत्तं, एकसभागत्तञ्चाति द्वीहङ्गेहि समन्नागते सति एकं सीमन्तरिकं विना ठानं सम्भेदाय होति, नासतीति दट्ठब्बं. सीमन्तरिकविधानसामत्थियेनेव चेतासं रुक्खादिसम्बन्धोपि बद्धसीमानं विय अञ्ञमञ्ञं न वट्टतीति अयम्पि नयतो दस्सितो एवाति गहेतब्बं.

‘‘सभावेनेवा’’ति इमिना गामसीमा विय अबद्धसीमाति दस्सेति. सब्बमेत्थ सङ्घकम्मं कातुं वट्टतीति समानसंवासा एकूपोसथाति दस्सेति. येन केनचीति अन्तमसो सूकरादिना सत्तेन. महोघेन पन उन्नतट्ठानतो निन्नट्ठाने पतन्तेन खतो खुद्दको वा महन्तो वा लक्खणयुत्तो जातस्सरोव. एत्थापि खुद्दके उदकुक्खेपकिच्चं नत्थि, समुद्दे पन सब्बथा उदकुक्खेपसीमायमेव कम्मं कातब्बं सोधेतुं दुक्करत्ता.

पुन तत्थाति लोकवोहारसिद्धासु एतासु नदिआदीसु तीसु अबद्धसीमासु पुन वग्गकम्मपरिहारत्थं सासनवोहारसिद्धाय अबद्धसीमाय परिच्छेदं दस्सेन्तोति अधिप्पायो. पाळियं यं मज्झिमस्स पुरिसस्सातिआदीसु उदकं उक्खिपित्वा खिपीयति एत्थाति उदकुक्खेपो, उदकस्स पतनोकासो, तस्मा उदकुक्खेपा. अयञ्हेत्थ पदसम्बन्धवसेन अत्थो – परिसपरियन्ततो पट्ठाय समन्ता याव मज्झिमस्स पुरिसस्स ¶ उदकुक्खेपो उदकपतनट्ठानं, ताव यं तं परिच्छिन्नट्ठानं, अयं तत्थ नदिआदीसु अपरा समानसंवासा उदकुक्खेपसीमाति.

तस्स अन्तोति तस्स उदकुक्खेपपरिच्छिन्नस्स ठानस्स अन्तो. न केवलञ्च तस्सेव अन्तो, ततो बहिपि, एकस्स उदकुक्खेपस्स अन्तो ठातुं न वट्टतीति वचनं उदकुक्खेपपरिच्छेदस्स दुब्बिजानतो कम्मकोपसङ्का होतीति. तेनेव मातिकाट्ठकथायं ‘‘परिच्छेदब्भन्तरे हत्थपासं विजहित्वा ठितोपि परिच्छेदतो बहि अञ्ञं तत्तकंयेव परिच्छेदं अनतिक्कमित्वा ठितोपि कम्मं कोपेति इदं सब्बअट्ठकथासु सन्निट्ठान’’न्ति (कङ्खा. अट्ठ. निदानवण्णना) वुत्तं. यं पनेत्थ सारत्थदीपनियं ‘‘तस्स अन्तो हत्थपासं विजहित्वा ठितो कम्मं ¶ कोपेतीति इमिना बहिपरिच्छेदतो यत्थ कत्थचि ठितो कम्मं न कोपेती’’ति (सारत्थ. टी. महावग्ग ३.१४७) वत्वा मातिकाट्ठकथावचनम्पि पटिक्खिपित्वा ‘‘नेव पाळियं न अट्ठकथायं उपलब्भती’’तिआदि बहु पपञ्चितं, तं न सुन्दरं इध अट्ठकथावचनेन मातिकाट्ठकथावचनस्स नयतो संसन्दनतो सङ्घटनतो. तथा हि द्विन्नं उदकुक्खेपपरिच्छेदानमन्तरा विदत्थिचतुरङ्गुलमत्तम्पि सीमन्तरिकं अट्ठपेत्वा ‘‘अञ्ञो उदकुक्खेपो सीमन्तरिकाय ठपेतब्बो, ततो अधिकं वट्टति एव, ऊनकं पन न वट्टती’’ति एवं इधेव वुत्तेन इमिना अट्ठकथावचनेन सीमन्तरिकोपचारेन उदकुक्खेपतो ऊनके ठपिते सीमाय सीमासम्भेदतो कम्मकोपोपि वुत्तो एव. यदग्गेन च एवं वुत्तो, तदग्गेन तत्थ एकभिक्खुनो पवेसेपि सति तस्स सीमट्ठभावतो कम्मकोपो वुत्तो एव होति. अट्ठकथायं ‘‘ऊनकं पन न वट्टती’’ति कथनञ्चेतं उदकुक्खेपपरिच्छेदस्स दुब्बिजानन्तेनपि सीमासम्भेदसङ्कआपरिहारत्थं वुत्तं. सत्तब्भन्तरसीमानमन्तरा तत्तकपरिच्छेदेनेव सीमन्तरिकविधानवचनतोपि एतासं दुब्बिजानपरिच्छेदता, तत्थ च ठितानं कम्मकोपसङ्का सिज्झति. कम्मकोपसङ्कट्ठानम्पि आचरिया दूरतो परिहारत्थं कम्मकोपट्ठानन्ति वत्वाव ठपेसुन्ति गहेतब्बं.

तन्ति सीमं. ‘‘सीघमेव अतिक्कामेती’’ति इमिना तं अनतिक्कमित्वा अन्तो एव परिवत्तमानाय कातुं वट्टतीति दस्सेति. एतदत्थमेव हि वालुकादीहि सीमापरिच्छिन्दनं, इतरथा बहि परिवत्ता नु खो, नो वाति कम्मकोपसङ्का भवेय्याति. अञ्ञिस्सा अनुस्सावनाति केवलाय नदिसीमाय अनुस्सावना ¶ . अन्तोनदियं जातरुक्खे वाति उदकुक्खेपपरिच्छेदस्स बहि ठिते रुक्खेपि वा. बहिनदितीरमेव हि विसभागसीमत्ता अबन्धितब्बट्ठानं, न अन्तोनदी निस्सयत्तेन सभागत्ता. तेनेव ‘‘बहिनदितीरे विहारसीमाय वा’’तिआदिना तीरमेव अबन्धितब्बट्ठानत्तेन दस्सितं, न पन नदी. ‘‘रुक्खेपि ठितेही’’ति इदं अन्तोउदकुक्खेपट्ठं सन्धाय वुत्तं. न हि बहिउदकुक्खेपे भिक्खूनं ठातुं वट्टति.

रुक्खस्साति तस्सेव अन्तोउदकुक्खेपट्ठस्स रुक्खस्स. सीमं वा सोधेत्वाति यथावुत्तं विहारे बद्धसीमं, गामसीमञ्च तत्थ ठितभिक्खूनं हत्थपासानयनबहिसीमाकरणवसेनेव सोधेत्वा. यथा च उदकुक्खेपसीमायं कम्मं करोन्तेहि, एवं बद्धसीमायं, गामसीमायं वा कम्मं करोन्तेहिपि उदकुक्खेपसीमट्ठे सोधेत्वाव कातब्बं. एतेनेव सत्तब्भन्तरअरञ्ञसीमाहिपि उदकुक्खेपसीमाय, इमाय च सद्धिं तासं रुक्खादिसम्बन्धदोसोपि नयतो दस्सितोव होति. इमिनाव नयेन सत्तब्भन्तरसीमाय बद्धसीमागामसीमाहिपि सद्धिं, एतासञ्च सत्तब्भन्तरसीमाय ¶ सद्धिं सम्बन्धदोसो ञातब्बो. अट्ठकथायं पनेतं सब्बं वुत्तनयतो सक्का ञातुन्ति अञ्ञमञ्ञसमासन्नानमेवेत्थ दस्सितं.

तत्रिदं सुत्तानुलोमतो नयग्गहणमुखं – यथा हि बद्धसीमायं सम्मता विपत्तिसीमा होतीति तासं अञ्ञमञ्ञं रुक्खादिसम्बन्धो न वट्टति, एवं नदिआदीसु सम्मतापि बद्धसीमा विपत्तिसीमाव होतीति ताहिपि सद्धिं तस्सा रुक्खादिसम्बन्धो न वट्टतीति सिज्झति. इमिना नयेन सत्तब्भन्तरसीमाय गामनदिआदीहि सद्धिं, उदकुक्खेपसीमाय च अरञ्ञादीहि सद्धिं रुक्खादिसम्बन्धस्स न वट्टनकभावो ञातब्बो, एवमेता भगवता अनुञ्ञाता बद्धसीमा सत्तब्भन्तरउदकुक्खेपसीमा अञ्ञमञ्ञञ्चेव अत्तनो निस्सयविरहिताहि इतरीतरासं निस्सयसीमाहि च रुक्खादिसम्बन्धे सति सम्भेददोसमापज्जतीति सुत्तानुलोमनयो ञातब्बोव.

अत्तनो अत्तनो पन निस्सयभूतगामादीहि सद्धिं बद्धसीमादीनं तिस्सन्नं उप्पत्तिकाले भगवता अनुञ्ञातस्स सम्भेदज्झोत्थरणस्स अनुलोमतो रुक्खादिसम्बन्धोपि अनुञ्ञातोव होतीति दट्ठब्बं. यदि एवं उदकुक्खेपबद्धसीमादीनं अन्तरा कस्मा सीमन्तरिका न विहिताति? निस्सयभेदसभावभेदेहि ¶ सयमेव भिन्नत्ता. एकनिस्सयएकसभावानमेव हि सीमन्तरिकाय विनासं करोतीति वुत्तोवायमत्थो. एतेनेव नदिनिमित्तं कत्वा बद्धाय सीमाय सङ्घे कम्मं करोन्ते नदियम्पि याव गामखेत्तं आहच्च ठिताय उदकुक्खेपसीमाय अञ्ञेसं कम्मं कातुं वट्टतीति सिद्धं होति. या पनेता लोकवोहारसिद्धा गामारञ्ञनदिसमुद्दजातस्सरसीमा पञ्च, ता अञ्ञमञ्ञरुक्खादिसम्बन्धेपि सम्भेददोसं नापज्जति, तथा लोकवोहाराभावतो. न हि गामादयो गामन्तरादीहि, नदिआदीहि च रुक्खादिसम्बन्धमत्तेन सम्भिन्नाति लोके वोहरन्ति. लोकवोहारसिद्धानञ्च लोकवोहारतोव सम्भेदो वा असम्भेदो वा गहेतब्बो, नाञ्ञतो. तेनेव अट्ठकथायं तासं अञ्ञमञ्ञं कत्थचिपि सम्भेदनयो न दस्सितो, सासनवोहारसिद्धोयेव दस्सितोति.

एत्थ पन बद्धसीमाय ताव ‘‘हेट्ठा पथवीसन्धारकं उदकपरियन्तं कत्वा सीमागता होती’’तिआदिना (महाव. अट्ठ. १३८) अधोभागपरिच्छेदो अट्ठकथायं सब्बथा दस्सितो. गामसीमादीनं पन न दस्सितो. कथमयं जानितब्बोति? केचि तावेत्थ ‘‘गामसीमादयोपि बद्धसीमा विय पथवीसन्धारकं उदकं आहच्च तिट्ठती’’ति वदन्ति.

केचि ¶ पन तं पटिक्खिपित्वा ‘‘नदिसमुद्दजातस्सरसीमा, ताव तन्निस्सितउदकुक्खेपसीमा च पथविया उपरितले, हेट्ठा च उदकज्झोत्थरणप्पदेसे एव तिट्ठन्ति, न ततो हेट्ठा उदकस्स अज्झोत्थरणाभावा. सचे पन उदकोघादिना योजनप्पमाणम्पि निन्नट्ठानं होति, नदिसीमादयोव होन्ति, न ततो हेट्ठा. तस्मा नदिआदीनं हेट्ठा बहितीरमुखेन उमङ्गेन, इद्धिया वा पविट्ठो भिक्खु नदियं ठितानं कम्मं न कोपेति. सो पन आसन्नगामे भिक्खूनं कम्मं कोपेति. सचे पन सो उभिन्नं तीरगामानं मज्झे निसिन्नो होति, उभयगामट्ठानं कम्मं कोपेति. सचे पन तीरं गामखेत्तं न होति, अगामकारञ्ञमेव. तत्थ पन तीरद्वयेपि सत्तब्भन्तरसीमं विना केवलाय खुद्दकारञ्ञसीमाय कम्मं करोन्तानं कम्मं कोपेति. सचे सत्तब्भन्तरसीमायं करोन्ति, तदा यदि तेसं सत्तब्भन्तरसीमाय परिच्छेदो एतस्स निसिन्नोकासस्स परतो एकं सत्तब्भन्तरं अतिक्कमित्वा ठितो न कम्मकोपो ¶ . नो चे, कम्मकोपो. गामसीमायं पन अन्तोउमङ्गे वा बिले वा यत्थ पविसितुं सक्का, यत्थ वा सुवण्णमणिआदिं खणित्वा गण्हन्ति, गहेतुं सक्काति वा सम्भावना होति, तत्तकं हेट्ठापि गामसीमा, तत्थ इद्धिया अन्तो निसिन्नोपि कम्मं कोपेति. यत्थ पन पकतिमनुस्सानं पवेससम्भावनापि नत्थि, तं सब्बं याव पथविसन्धारकउदका अरञ्ञसीमाव, न गामसीमा. अरञ्ञसीमायम्पि एसेव नयो. तत्थपि हि यत्तके पदेसे पवेससम्भावना, तत्तकमेव उपरितले अरञ्ञसीमा पवत्तति. ततो पन हेट्ठा न अरञ्ञसीमा, तत्थ उपरितलेन सह एकारञ्ञवोहाराभावतो. न हि तत्थ पविट्ठं अरञ्ञं पविट्ठो ति वोहरन्ति. तस्मा तत्रट्ठो उपरि अरञ्ञट्ठानं कम्मं न कोपेति उमङ्गनदियं ठितो विय उपरिनदियं ठितानं. एकस्मिञ्हि चक्कवाळे गामनदिसमुद्दजातस्सरे मुञ्चित्वा तदवसेसं अमनुस्सावासं देवब्रह्मलोकं उपादाय सब्बं अरञ्ञमेव. ‘गामा वा अरञ्ञा वा’ति वुत्तत्ता हि नदिसमुद्दजातस्सरादिपि अरञ्ञमेव. इध पन नदिआदीनं विसुं सीमाभावेन गहितत्ता तदवसेसमेव अरञ्ञं गहेतब्बं. तत्थ च यत्तके पदेसे एकं ‘अरञ्ञ’न्ति वोहरन्ति, अयमेकारञ्ञसीमा. इन्दपुरञ्हि सब्बं एकारञ्ञसीमा. तथा असुरयक्खपुरादि. आकासट्ठदेवब्रह्मविमानानि पन समन्ता आकासपरिच्छिन्नानि पच्चेकं अरञ्ञसीमा समुद्दमज्झे पब्बतदीपका विय. तत्थ सब्बत्थ सत्तब्भन्तरसीमायं, अरञ्ञसीमायमेव वाति कम्मं कातब्बं. तस्मा इधापि उपरिअरञ्ञतलेन सद्धिं हेट्ठापथविया अरञ्ञवोहाराभावा विसुं अरञ्ञसीमाति गहेतब्बं. तेनेवेत्थ गामनदिआदिसीमाकथाय अट्ठकथायं ‘इद्धिमा भिक्खु हेट्ठापथवितले ठितो कम्मं कोपेती’ति (महाव. अट्ठ. १३८) बद्धसीमायं दस्सितनयो न दस्सितो’’ति वदन्ति.

इदञ्चेतासं ¶ गामसीमादीनं हेट्ठापमाणदस्सनं सुत्तादिविरोधाभावा युत्तं विय दिस्सति. वीमंसित्वा गहेतब्बं. एवं गहणे च गामसीमायं सम्मता बद्धसीमा उपरि गामसीमं, हेट्ठा उदकपरियन्तं अरञ्ञसीमञ्च अवत्थरतीति तस्सा अरञ्ञसीमापि खेत्तन्ति सिज्झति. भगवता च ‘‘सब्बा, भिक्खवे, नदी असीमा’’तिआदिना (महाव. अट्ठ. १४७) नदिसमुद्दजातस्सरा बद्धसीमाय अखेत्तभावेन वुत्ता, न पन अरञ्ञं. तस्मा अरञ्ञम्पि ¶ बद्धसीमाय खेत्तमेवाति गहेतब्बं. यदि एवं कस्मा तत्थ सा न बज्झतीति? पयोजनाभावा. सीमापेक्खानन्तरमेव सत्तब्भन्तरसीमाय सम्भवतो. तस्सा च उपरि सम्मताय बद्धसीमाय सम्भेदज्झोत्थरणानुलोमतो विपत्तिसीमा एव सिया. गामखेत्ते पन ठत्वा अगामकारञ्ञेकदेसम्पि अन्तोकरित्वा सम्मता किञ्चापि सुसम्मता, अगामकारञ्ञे भगवता विहिताय सत्तब्भन्तरसीमायपि अनिवत्तितो. तत्थ पन कम्मं कातुं पविट्ठानम्पि ततो बहि केवलारञ्ञे करोन्तानम्पि अन्तरा तीणि सत्तब्भन्तरानि ठपेतब्बानि, अञ्ञथा विपत्ति एव सियाति सब्बथा निरत्थकमेव अगामकारञ्ञे बद्धसीमाकरणन्ति वेदितब्बं.

अन्तोनदियं पविट्ठसाखायाति नदिया पथवितलं आहच्च ठिताय साखायपि, पगेव अनाहच्च ठिताय. पारोहेपि एसेव नयो. एतेन सभागं नदिसीमं फुसित्वा ठितेनपि विसभागसीमासम्बन्धसाखादिना उदकुक्खेपसीमाय सम्बन्धो न वट्टतीति दस्सेति. एतेनेव महासीमं, गामसीमञ्च फुसित्वा ठितेन साखादिना माळकसीमाय सम्बन्धो न वट्टतीति ञापितोति दट्ठब्बो.

अन्तोनदियंयेवाति सेतुपादानं तीरट्ठतं निवत्तेति. तेन उदकुक्खेपपरिच्छेदतो बहि नदियं पतिट्ठितत्तेपि सम्भेदाभावं दस्सेति. तेनाह ‘‘बहितीरे पतिट्ठिता’’तिआदि. यदि हि उदकुक्खेपतो बहि अन्तोनदियम्पि पतिट्ठितत्ते सम्भेदो भवेय्य, तम्पि पटिक्खिपितब्बं भवेय्य कम्मकोपस्स समानत्ता, न च पटिक्खित्तं. तस्मा सब्बत्थ अत्तनो निस्सयसीमाय सम्भेददोसो नत्थेवाति गहेतब्बं.

आवरणेन वाति दारुआदिं निखणित्वा उदकनिवारणेन. कोट्टकबन्धनेन वाति मत्तिकादीहि पूरेत्वा कतसेतुबन्धेन. उभयेनापि आवरणमेव दस्सेति. ‘‘नदिं विनासेत्वा’’ति वुत्तमेवत्थं विभावेति ‘‘हेट्ठा पाळि बद्धा’’ति, हेट्ठा नदिं आवरित्वा पाळि बद्धाति अत्थो. छड्डितमोदकन्ति अतिरित्तोदकं. ‘‘नदिं ओत्थरित्वा सन्दनट्ठानतो’’ति इमिना तळाकनदीनं अन्तरा ¶ पवत्तनट्ठाने न वट्टतीति दस्सेति. उप्पतित्वाति तीरादिभिन्दनवसेन विपुला हुत्वा. विहारसीमन्ति बद्धसीमं.

अगमनपथेति ¶ तदहेव गन्त्वा निवत्तितुं असक्कुणेय्ये. अरञ्ञसीमासङ्ख्यमेव गच्छतीति लोकवोहारसिद्धं अगामकारञ्ञसीमं सन्धाय वदति. तत्थाति पकतिया मच्छबन्धानं गमनपथेसु दीपकेसु.

तं ठानन्ति आवाटादीनं कतट्ठानमेव, न अकतन्ति अत्थो. लोणीति समुद्दोदकस्स उप्पत्तिवेगनिन्नो मातिकाकारेन पवत्तनको.

१४८. सम्भिन्दन्तीति यत्थ चतूहि भिक्खूहि निसीदितुं न सक्का, तत्तकतो पट्ठाय याव केसग्गमत्तम्पि अन्तोसीमाय करोन्तो सम्भिन्दति. चतुन्नं भिक्खूनं पहोनकतो पट्ठाय याव सकलम्पि अन्तो करोन्तो अज्झोत्थरन्तीति वेदितब्बं. संसट्ठविटपाति अञ्ञमञ्ञं सिब्बित्वा ठितमहासाखमूला, एतेन अञ्ञमञ्ञस्स अच्चासन्नतं दीपेति. साखाय साखं फुसन्ता हि दूरट्ठापि सिय्युं, ततो एकंसतो सम्भेदलक्खणं दस्सितं न सियाति तं दस्सेतुं विटपग्गहणं कतं. एवञ्हि भिक्खूनं निसीदितुं अप्पहोनकट्ठानं अत्तनो सीमाय अन्तोसीमट्ठं करित्वा पुराणविहारं करोन्तो सीमाय सीमं सम्भिन्दति नाम, न ततो परन्ति दस्सितमेव होति. बद्धा होतीति पोराणकविहारसीमं सन्धाय वुत्तं. अम्बन्ति अपरेन समयेन पुराणविहारपरिक्खेपादीनं विनट्ठत्ता अजानन्तानं तं पुराणसीमाय निमित्तभूतं अम्बं. अत्तनो सीमाय अन्तोसीमट्ठं करित्वा पुराणविहारसीमट्ठं जम्बुं कित्तेत्वा अम्बजम्बूनं अन्तरे यं ठानं, तं अत्तनो सीमाय पवेसेत्वा बन्धन्तीति अत्थो. एत्थ च पुराणसीमाय निमित्तभूतस्स गामट्ठस्स अम्बरुक्खस्स अन्तोसीमट्ठाय जम्बुया सह संसट्ठविटपत्तेपि सीमाय बन्धनकाले विपत्ति वा पच्छा गामसीमाय सह सम्भेदो वा कम्मविपत्ति वा न होतीति मुखतोव वुत्तन्ति वेदितब्बं.

पदेसन्ति सङ्घस्स निसीदनप्पहोनकप्पदेसं. ‘‘सीमन्तरिकं ठपेत्वा’’तिआदिना सम्भेदज्झोत्थरणं अकत्वा बद्धसीमाहि अञ्ञमञ्ञं फुसापेत्वा अब्यवधानेन बद्धापि सीमा असीमा एवाति दस्सेति. तस्मा एकद्वङ्गुलमत्तापि सीमन्तरिका वट्टति एव. सा पन दुब्बोधाति अट्ठकथासु चतुरङ्गुलादिका वुत्ताति दट्ठब्बं. द्विन्नं सीमानन्ति द्विन्नं बद्धसीमानं. निमित्तं होतीति निमित्तस्स सीमतो बाहिरत्ता बन्धनकाले ताव सम्भेददोसो नत्थीति अधिप्पायो ¶ . न केवलञ्च निमित्तकत्ता एव सङ्करं करोति ¶ , अथ खो सीमन्तरिकाय ठितो अञ्ञोपि रुक्खो करोति एव. तस्मा अप्पमत्तिकाय सीमन्तरिकाय वड्ढनका रुक्खादयो न वट्टन्ति एव. एत्थ च उपरि दिस्समानखन्धसाखादिपवेसे एव सङ्करदोसस्स सब्बत्थ दस्सितत्ता अदिस्समानानं मूलानं पवेसेपि भूमिगतिकत्ता दोसो नत्थीति सिज्झति. सचे पन मूलानिपि दिस्समानानेव पविसन्ति, सङ्करोव. पब्बतपासाणा पन दिस्समानापि भूमिगतिका एव. यदि पन बन्धनकाले एव एको थूलरुक्खो उभयम्पि सीमं आहच्च तिट्ठति, पच्छा बद्धा असीमा होतीति दट्ठब्बं.

सीमासङ्करन्ति सीमासम्भेदं. यं पन सारत्थदीपनियं वुत्तं ‘‘सीमासङ्करं करोतीति वड्ढित्वा सीमप्पदेसं पविट्ठे द्विन्नं सीमानं गतट्ठानस्स दुविञ्ञेय्यत्ता वुत्त’’न्ति (सारत्थ. टी. महावग्ग ३.१४८), तं न युत्तं गामसीमायपि सह सङ्करं करोतीति वत्तब्बतो. तत्थापि हि निमित्ते वड्ढिते गामसीमाबद्धसीमानं गतट्ठानं दुब्बिञ्ञेय्यमेव होति, तत्थ पन अवत्वा द्विन्नं बद्धसीमानमेव सङ्करस्स वुत्तत्ता यथावुत्तसम्बद्धदोसोव सङ्कर-सद्देन वुत्तोति गहेतब्बं. पाळियं पन निदानवसेन ‘‘येसं, भिक्खवे, सीमा पच्छा सम्मता, तेसं तं कम्मं अधम्मिक’’न्तिआदिना (महाव. १४८) पच्छा सम्मताय असीमत्ते वुत्तेपि द्वीसु गामसीमासु ठत्वा द्वीहि सङ्घेहि सम्भेदं वा अज्झोत्थरणं वा कत्वा सीमन्तरिकं अट्ठपेत्वा वा रुक्खपारोहादिसम्बन्धं अवियोजेत्वा वा एकस्मिं खणे कम्मवाचानिट्ठापनवसेन एकतो सम्मतानं द्विन्नं सीमानम्पि असीमता पकासिताति वेदितब्बं.

गामसीमादिकथावण्णना निट्ठिता.

उपोसथभेदादिकथावण्णना

१४९. अधम्मेन वग्गन्ति एत्थ एकसीमाय चतूसु भिक्खूसु विज्जमानेसु पातिमोक्खुद्देसोव अनुञ्ञातो, तीसु, द्वीसु च पारिसुद्धिउपोसथोव. इध पन तथा अकतत्ता ‘‘अधम्मेना’’ति वुत्तं. यस्मा पन छन्दपारिसुद्धि सङ्घे एव आगच्छति, न गणे, न पुग्गले, तस्मा ‘‘वग्ग’’न्ति वुत्तन्ति.

सचे ¶ पन द्वे सङ्घा एकसीमाय अञ्ञमञ्ञं छन्दं आहरित्वा एकस्मिं खणे विसुं सङ्घकम्मं करोन्ति, एत्थ कथन्ति? केचि पनेतं वट्टतीति वदन्ति, तं न गहेतब्बं वग्गकम्मत्ता ¶ . कम्मं करोन्तानञ्हि छन्दपारिसुद्धि अञ्ञत्थ न गच्छति तथा वचनाभावा, विसुं विसुं कम्मकरणत्थमेव सीमाय अनुञ्ञातत्ता चाति गहेतब्बं. विहारसीमायं पन सङ्घे विज्जमानेपि केनचि पच्चयेन खन्धसीमायं तीसु, द्वीसु वा पारिसुद्धिउपोसथं करोन्तेसु कम्मं धम्मेन समग्गमेव भिन्नसीमट्ठत्ताति दट्ठब्बं.

उपोसथभेदादिकथावण्णना निट्ठिता.

पातिमोक्खुद्देसकथावण्णना

१५०. एवमेतं धारयामीति. सुता खो पनायस्मन्तेहीति एत्थ ‘‘एवमेतं धारयामी’’ति वत्वा ‘‘उद्दिट्ठं खो आयस्मन्तो निदानं, सुता खो पनायस्मन्तेहि चत्तारो पाराजिका धम्मा’’तिआदिना वत्तब्बं. मातिकाट्ठकथायम्पि (कङ्खा. अट्ठ. निदानवण्णना) एवमेव वुत्तं. सुतेनाति सुतपदेन.

सवरभयन्ति वनचरकभयं. तेनाह ‘‘अटविमनुस्सभय’’न्ति. निदानुद्देसे अनिट्ठिते पातिमोक्खं निद्दिट्ठं नाम न होतीति आह ‘‘दुतियादीसु उद्देसेसू’’तिआदि. तीहिपि विधीहीति ओसारणकथनसरभञ्ञेहि. एत्थ च अत्थं भणितुकामताय वा भणापेतुकामताय वा सुत्तस्स ओसारणं ओसारणं नाम. तस्सेव अत्थप्पकासना कथनं नाम. केवलं पाठस्सेव सरेन भणनं सरभञ्ञं नाम. सज्झायं अधिट्ठहित्वाति ‘‘सज्झायं करोमी’’ति चित्तं उप्पादेत्वा. ओसारेत्वा पन कथेन्तेनाति सयमेव पाठं वत्वा पच्छा अत्थं कथेन्तेन.

पातिमोक्खुद्देसकथावण्णना निट्ठिता.

अधम्मकम्मपटिक्कोसनादिकथावण्णना

१५५. नवविधन्ति सङ्घगणपुग्गलेसु तयो, सुत्तुद्देसपारिसुद्धिअधिट्ठानवसेन तयो, चातुद्दसीपन्नरसीसामग्गीवसेन तयोति नवविधं. चतुब्बिधन्ति ¶ अधम्मेनवग्गादि चतुब्बिधं. दुविधन्ति भिक्खुभिक्खुनिपातिमोक्खवसेन दुविधं पातिमोक्खं. नवविधन्ति भिक्खूनं पञ्च, भिक्खुनीनं चत्तारोति नवविधं पातिमोक्खुद्देसं.

अधम्मकम्मपटिक्कोसनादिकथावण्णना निट्ठिता.

पक्खगणनादिउग्गहणानुजाननकथादिवण्णना

१५६. कतिमीति ¶ तिथि-सद्दापेक्खं इत्थिलिङ्गं दट्ठब्बं.

१६३. उतुवस्सेयेवाति हेमन्तगिम्हेसुयेव.

१६४. विञ्ञापेतीति एत्थ मनसा चिन्तेत्वा कायविकारकरणमेव विञ्ञापनन्ति दट्ठब्बं. पाळियं अञ्ञस्स दातब्बा पारिसुद्धीति पारिसुद्धिदायकेन पुन अञ्ञस्स भिक्खुनो सन्तिके दातब्बा. ‘‘भूतंयेव वा सामणेरभावं आरोचेती’’ति वुत्तत्ता ऊनवीसतिवस्सकाले उपसम्पन्नस्स, अन्तिमवत्थुअज्झापन्नसिक्खापच्चक्खातादीनं वा याव भिक्खुपटिञ्ञा वत्तति, ताव तेहि आहटापि छन्दपारिसुद्धि आगच्छति. यदा पन ते अत्तनो सामणेरादिभावं पटिजानन्ति, ततो पट्ठायेव नागच्छतीति दस्सितन्ति दट्ठब्बं. पाळियम्पि हि ‘‘दिन्नाय पारिसुद्धिया सङ्घप्पत्तो विब्भमति…पे… पण्डको पटिजानाति. तिरच्छानगतो पटिजानाति. उभतोब्यञ्जनको पटिजानाति, आहटा होति पारिसुद्धी’’ति वुत्तत्ता पण्डकादीनम्पि भिक्खुपटिञ्ञाय वत्तमानकालेसु छन्दपारिसुद्धिया आगमनं सिद्धमेव. तेनाह ‘‘एस नयो सब्बत्था’’ति. उम्मत्तकखित्तचित्तवेदनाट्टानं पन पकतत्ता अन्तरामग्गे उम्मत्तकादिभावे पटिञ्ञातेपि तेसं सङ्घप्पत्तमत्तेनेव छन्दादि आगच्छतीति दट्ठब्बं.

‘‘भिक्खूनं हत्थपास’’न्ति इमिना गणपुग्गलेसु छन्दपारिसुद्धिया अनागमनं दस्सेति. ‘‘सङ्घप्पत्तो’’ति हि पाळियं वुत्तं. बिळालसङ्खलिकपारिसुद्धीति बिळालगीवाय बन्धनसङ्खलिकसदिसा पारिसुद्धि नाम, यथा सङ्खलिका बिळाले आगच्छन्ते एव आगच्छति, न अनागच्छन्ते तप्पटिबद्धत्ता, एवमयं पारिसुद्धिपीति अत्थो. अथ वा यथा सङ्खलिकाय पठमवलयं दुतियवलयं ¶ पापुणाति, न ततियवलयं, एवमयम्पीति अधिप्पायो. उपलक्खणमत्तञ्चेत्थ बिळाल-ग्गहणं दट्ठब्बं.

पक्खगणनादिउग्गहणानुजाननकथादिवण्णना निट्ठिता.

छन्ददानकथादिवण्णना

१६५. पाळियं ¶ ‘‘सन्ति सङ्घस्स करणीयानी’’ति वत्तब्बे वचनविपल्लासेन ‘‘करणीय’’न्ति वुत्तं.

१६७. ‘‘तस्स सम्मुतिदानकिच्चं नत्थी’’ति इदं पाळियं एकदा सरन्तस्सेव सम्मुतिदानस्स वुत्तत्ता एकदा असरन्तस्स सम्मुतिअभावेपि तस्स अनागमनं वग्गकम्माय न होतीति वुत्तं. केचि पन ‘‘सोपि हत्थपासेव आनेतब्बो’’ति वदन्ति, तं न गहेतब्बं.

१६८. सङ्घसन्निपाततो पठमं कातब्बं पुब्बकरणं. सङ्घसन्निपाते कातब्बं पुब्बकिच्चन्ति दट्ठब्बं. पाळियं नो चे अधिट्ठहेय्य, आपत्ति दुक्कटस्साति एत्थ असञ्चिच्च असतिया अनापत्ति. यथा चेत्थ, एवं उपरिपि. यत्थ पन अचित्तकापत्ति अत्थि, तत्थ वक्खाम.

१६९. ‘‘पञ्ञत्तं होती’’ति इमिना ‘‘न सापत्तिकेन उपोसथो कातब्बो’’ति विसुं पटिक्खेपाभावेपि यथावुत्तसुत्तसामत्थियतो पञ्ञत्तमेवाति दस्सेति. इमिना एव नयेन –

‘‘अट्ठानमेतं, भिक्खवे, अनवकासो यं तथागतो अपरिसुद्धाय परिसाय उपोसथं करेय्य, पातिमोक्खं उद्दिसेय्या’’ति (चूळव. ३८६; अ. नि. ८.२०; उदा. ४५) –

आदिसुत्तनयतो च अलज्जीहिपि सद्धिं उपोसथकरणम्पि पटिक्खित्तमेव अलज्जिनिग्गहत्थत्ता सब्बसिक्खापदानन्ति दट्ठब्बं. ‘‘पारिसुद्धिदानपञ्ञापनेना’’ति इमिना सापत्तिकेन पारिसुद्धिपि न दातब्बाति दीपितं होति. उभोपि दुक्कटन्ति एत्थ सभागापत्तिभावं अजानित्वा केवलं आपत्तिनामेनेव देसेन्तस्स पटिग्गण्हन्तस्स अचित्तकमेव दुक्कटं होतीति वदन्ति ¶ . यथा सङ्घो सभागापत्तिं आपन्नो ञत्तिं ठपेत्वा उपोसथं कातुं लभति, एवं तयोपि ‘‘सुणन्तु मे, आयस्मन्ता, इमे भिक्खू सभागं आपत्तिं आपन्ना’’तिआदिना वुत्तनयानुसारेनेव गणञत्तिं ठपेत्वा द्वीहि अञ्ञमञ्ञं आरोचेत्वा उपोसथं कातुं वट्टति. एकेन पन सापत्तिकेन दूरं गन्त्वापि पटिकातुमेव वट्टति, असम्पापुणन्तेन ‘‘भिक्खुं लभित्वा पटिकरिस्सामी’’ति उपोसथो कातब्बो, पटिकरित्वा च पुन उपोसथो कत्तब्बो.

छन्ददानकथादिवण्णना निट्ठिता.

अनापत्तिपन्नरसकादिकथावण्णना

१७२. केनचि ६३ करणीयेन गन्त्वाति सीमापरिच्छेदतो बहिभूतं गामं वा अरञ्ञं वा गन्त्वाति अत्थो. एतेनेव उपोसथञत्तिया ठपनकाले समग्गा एव ते ञत्तिं ठपेसुन्ति सिद्धं. तेनेव पाळियं ‘‘उद्दिट्ठं सुउद्दिट्ठ’’न्ति सब्बपन्नरसकेसुपि वुत्तं. वग्गा समग्गसञ्ञिनोतिआदि पन ञत्तिया निट्ठिताय ‘‘किं सङ्घस्स पुब्बकिच्च’’न्तिआदीनं (महाव. १३४) वचनक्खणे बहिगतानं भिक्खूनं सीमाय पविट्ठत्ता भिक्खू तस्मिं खणे वग्गा होन्तीति वुत्तं. तेनाह ‘‘तेसं सीमं ओक्कन्तत्ता वग्गा’’तिआदि, एतेन पाराजिकुद्देसादिक्खणेपि वग्गसञ्ञीनं उद्दिसन्तानं आपत्ति एव, ञत्तिया पन पुब्बे निट्ठितत्ता कम्मकोपो नत्थीति दस्सितमेव होति. एवं उपरिपि सब्बवारेसु अधिप्पायो वेदितब्बो.

एत्थ च पाळियं ‘‘सब्बाय वुट्ठिताय…पे… तेसं सन्तिके पारिसुद्धि आरोचेतब्बा’’ति (महाव. १७४) वुत्तत्ता बहिसीमागताय परिसाय तेसु यस्स कस्सचि सन्तिके अनधिट्ठितेहि पारिसुद्धिं आरोचेतुं वट्टतीति वदन्ति.

अनापत्तिपन्नरसकादिकथावण्णना निट्ठिता.

लिङ्गादिदस्सनकथादिवण्णना

१७९. अञ्ञातकं ¶ नाम अदिट्ठपुब्बन्ति आह ‘‘अञ्ञेसं सन्तक’’न्ति. अञ्ञेसन्ति अत्तना अदिट्ठपुब्बानं. नानासंवासकभावन्ति लद्धिनानासंवासकभावं.

१८०. पाळियं अभिवितरन्ति समानसंवासकाभावं निच्छिनन्ति.

१८१. उपोसथकारकाति सङ्घुपोसथकारका. तेनेव ‘‘अञ्ञत्र सङ्घेना’’ति वुत्तं. सङ्घुपोसथट्ठानतो हि गच्छन्तेन अत्तचतुत्थेनेव गन्तब्बं, तिण्णं भिक्खूनं निसिन्नट्ठानतो पन गच्छन्तेन एकेन भिक्खुनापि सह गन्तुम्पि वट्टति. पाळियं ‘‘अभिक्खुको आवासो’’ति इदं निदस्सनमत्तं, सङ्घुपोसथट्ठानतो गणपुग्गलेहि सभिक्खुकोपि आवासो न गन्तब्बो ‘‘अञ्ञत्र सङ्घेना’’ति वुत्तत्ताति वदन्ति. उपोसथं करोन्तीति सङ्घुपोसथं वा गणुपोसथं वा. ‘‘तस्स सन्तिक’’न्ति इदं गणुपोसथट्ठानतो गच्छन्तं सन्धाय वुत्तं, अञ्ञथा ‘‘सब्बन्तिमेन परिच्छेदेन अत्तचतुत्थेन ¶ वा’’ति वचनेन विरुज्झनतो. आरञ्ञकेनाति एकचारिना. उपोसथन्तरायोति अत्तनो उपोसथन्तरायो.

१८३. पाळियं भिक्खुनिया निसिन्नपरिसायातिआदीसु भिक्खुनियातिआदि करणत्थे सामिवचनं.

लिङ्गादिदस्सनकथादिवण्णना निट्ठिता.

उपोसथक्खन्धकवण्णनानयो निट्ठितो.

३. वस्सूपनायिकक्खन्धको

वस्सूपनायिकअनुजाननकथादिवण्णना

१८४. वस्सूपनायिकक्खन्धके ¶ ¶ अपरस्मिं दिवसेति दुतिये पाटिपददिवसे.

१८५. अञ्ञत्थ अरुणं उट्ठापनेन वाति सापेक्खस्स अकरणीयेन गन्त्वा अञ्ञत्थ अरुणं उट्ठापनेन वा. परिहानीति गुणपरिहानि.

१८७. पाळियं सत्ताहं सन्निवत्तो कातब्बोति सकलं सत्ताहं बहि एव अवीतिनामेत्वा सत्ताहपरियोसानभूतं अरुणुट्ठानकालं पुन विहारेव सम्बन्धवसेन सत्ताहं विहारे सन्निवत्तं कातब्बं. सत्ताहपरियोसानकालो हि इध सत्ताह-सद्देन वुत्तो, तदपेक्खाय च ‘‘सन्निवत्तो’’ति पुल्लिङ्गेन वुत्तं. तीणि परिहीनानीति भिक्खुनीनं वच्चकुटिआदीनं पटिक्खित्तत्ता परिहीनानि.

१८९. न पलुज्जतीति अञ्ञेसं अप्पगुणत्ता, मम च मरणेन न विनस्सति.

वस्सूपनायिकअनुजाननकथादिवण्णना निट्ठिता.

पहितेयेवअनुजाननकथावण्णना

१९९. भिक्खूहि सद्धिं वसनकपुरिसोति अनञ्ञगतिकोति दस्सेति. गन्तब्बन्ति सङ्घकरणीयेन अप्पहितेपि गन्तब्बं. एत्थ च अनुपासकेहिपि सासनभावं ञातुकामेहि पहिते तेसं पसादवड्ढिं सम्पस्सन्तेहिपि सत्ताहकरणीयेन गन्तुं वट्टतीति गहेतब्बं.

रत्तिच्छेदविनिच्छयोति ¶ सत्ताहकरणीयेन गन्त्वा बहिद्धा अरुणुट्ठापनसङ्खातस्स रत्तिच्छेदस्स विनिच्छयो. गन्तुं वट्टतीति अन्तोउपचारसीमायं ठितेनेव सत्ताहकरणीयनिमित्तं सल्लक्खेत्वा इमिना निमित्तेन गन्त्वा ‘‘अन्तोसत्ताहे आगच्छिस्सामी’’ति आभोगं कत्वा गन्तुं वट्टति. पुरिमक्खणे आभोगं कत्वा गमनक्खणे विस्सरित्वा गतेपि दोसो ¶ नत्थि ‘‘सकरणीयो पक्कमती’’ति (महाव. २०७) वुत्तत्ता. सब्बथा पन आभोगं अकत्वा गतस्स वस्सच्छेदोति वदन्ति. यो पन सत्ताहकरणीयनिमित्ताभावेपि ‘‘सत्ताहब्भन्तरे आगमिस्सामी’’ति आभोगं कत्वा गन्त्वा सत्ताहब्भन्तरे आगच्छति, तस्स आपत्तियेव, वस्सच्छेदो नत्थि सत्ताहस्स सन्निवत्तत्ताति वदन्ति. वीमंसित्वा गहेतब्बं. भण्डकन्ति चीवरभण्डं. सम्पापुणितुं न सक्कोति, वट्टतीति तदहेव आगमने सउस्साहत्ता वस्सच्छेदो वा आपत्ति वा न होतीति अधिप्पायो. आचरियन्ति अगिलानम्पि निस्सयाचरियञ्च धम्माचरियञ्च, पगेव उपसम्पदाचरियउपज्झायेसु. वदति, वट्टतीति सत्ताहातिक्कमे आपत्तिअभावं सन्धाय वुत्तं, वस्सच्छेदो पन होति एव.

पहितेयेवअनुजाननकथावण्णना निट्ठिता.

अन्तरायेअनापत्तिवस्सच्छेदकथावण्णना

२००. पाळियं गण्हिंसूति गहेत्वा खादिंसु. परिपातिंसूति पलापेसुं, अनुबन्धिंसूति अत्थो.

२०१. सत्ताहवारेन अरुणो उट्ठापेतब्बोति एत्थ छदिवसानि बहिद्धा वीतिनामेत्वा सत्तमे दिवसे पुरारुणा एव अन्तोउपचारसीमाय पविसित्वा अरुणं उट्ठापेत्वा पुनदिवसे सत्ताहं अधिट्ठाय गन्तब्बन्ति अधिप्पायो. केचि पन ‘‘सत्तमे दिवसे आगन्त्वा अरुणं अनुट्ठापेत्वा तदहेव दिवसभागेपि गन्तुं वट्टती’’ति वदन्ति, तं न गहेतब्बं ‘‘अरुणो उट्ठापेतब्बो’’ति वुत्तत्ता. सत्तमे दिवसे तत्थ अरुणुट्ठापनमेव हि सन्धाय पाळियम्पि ‘‘सत्ताहं सन्निवत्तो कातब्बो’’ति वुत्तं. अरुणं अनुट्ठापेत्वा गच्छन्तो अन्तो अप्पविसित्वा बहिद्धाव सत्ताहं वीतिनामेन्तेन समुच्छिन्नवस्सो एव भविस्सति अरुणस्स बहि एव उट्ठापितत्ता. इतरथा ‘‘अरुणो उट्ठापेतब्बो’’ति वचनं निरत्थकं सिया ‘‘सत्ताहवारेन अन्तोविहारे पविसित्वा अरुणं अनुट्ठापेत्वापि गन्तब्ब’’न्ति वत्तब्बतो. अञ्ञेसु च ठानेसु अरुणुट्ठापनमेव ¶ वुच्चति. वक्खति हि चीवरक्खन्धके ‘‘एकस्मिं विहारे वसन्तो इतरस्मिं सत्ताहवारेन अरुणमेव उट्ठापेती’’ति (महाव. अट्ठ. ३६४).

अथापि ¶ यं ते वदेय्युं ‘‘सत्तमे दिवसे यदा कदाचि पविट्ठेन तंदिवसनिस्सितो अतीतअरुणो उट्ठापितो नाम होतीति इममत्थं सन्धाय अट्ठकथायं वुत्त’’न्ति, तं सद्दगतियापि न समेति. न हि उट्ठिते अरुणे पच्छा पविट्ठो तस्स पयोजको उट्ठापको भवितुमरहति. यदि भवेय्य, वस्सं उपगन्त्वा पनस्स अरुणं अनुट्ठापेत्वा तदहेव सत्ताहकरणीयेन पक्कन्तस्सापीति एत्थ ‘‘अरुणं अनुट्ठापेत्वा’’ति वचनं विरुज्झेय्य, तेनपि तंदिवससन्निस्सितस्स अरुणस्स उट्ठापितत्ता. आरञ्ञकस्सापि हि भिक्खुनो सायन्हसमये अङ्गयुत्तं अरञ्ञट्ठानं गन्त्वा तदा एव निवत्तन्तस्स अरुणो उट्ठापितो धुतङ्गञ्च विसोधितं सिया, न चेतं युत्तं अरुणुग्गमनकाले एव अरुणुट्ठापनस्स वुत्तत्ता. वुत्तञ्हि ‘‘कालस्सेव पन निक्खमित्वा अङ्गयुत्ते ठाने अरुणं उट्ठापेतब्बं. सचे अरुणुट्ठानवेलायं तेसं आबाधो वड्ढति, तेसं एव किच्चं कातब्बं, न धुतङ्गविसुद्धिकेन भवितब्ब’’न्ति (विसुद्धि. १.३१). तथा पारिवासिकादीनम्पि अरुणं अनुट्ठापेत्वा वत्तं निक्खिपन्तानं रत्तिच्छेदो वुत्तो. ‘‘उग्गते अरुणे निक्खिपितब्ब’’न्ति (चूळव. ९७) हि वुत्तं. सहसेय्यसिक्खापदेपि अनुपसम्पन्नेहि सह निवुत्थभावपरिमोचनत्थं ‘‘पुरारुणा निक्खमित्वा’’तिआदि वुत्तं. एवं चीवरविप्पवासादीसु च सब्बत्थ रत्तिपरियोसाने आगामिअरुणवसेनेव अरुणुट्ठापनं दस्सितं, न अतीतारुणवसेन. तस्मा वुत्तनयेनेवेत्थ अरुणुट्ठापनं वेदितब्बं अञ्ञथा वस्सच्छेदत्ता.

यं पन वस्सं उपगतस्स तदहेव अरुणं अनुट्ठापेत्वा सकरणीयस्स पक्कमनवचनं, तं वस्सं उपगतकालतो पट्ठाय यदा कदाचि निमित्ते सति गमनस्स अनुञ्ञातत्ता युत्तं, न पन सत्ताहवारेन गतस्स अरुणं अनुट्ठापेत्वा तदहेव गमनं ‘‘अरुणो उट्ठापेतब्बो’’ति वुत्तत्ता एव. यथा वा ‘‘सत्ताहं अनागताय पवारणाय सकरणीयो पक्कमति, आगच्छेय्य वा सो, भिक्खवे, भिक्खु तं आवासं, न वा आगच्छेय्या’’तिआदिना (महाव. २०७) पच्छिमसत्ताहे अनागमने अनुञ्ञातेपि अञ्ञसत्ताहेसु न वट्टति. एवं पठमसत्ताहे अरुणं अनुट्ठापेत्वा गमने अनुञ्ञातेपि ततो परेसु सत्ताहेसु आगतस्स अरुणं अनुट्ठापेत्वा ¶ गमनं न वट्टतीति निट्ठमेत्थ गन्तब्बं. इध आहटन्ति विहारतो बहि आगतट्ठाने आनीतं.

अन्तरायेअनापत्तिवस्सच्छेदकथावण्णना निट्ठिता.

वजादीसु वस्सूपगमनकथावण्णना

२०३. उपगन्तुं ६८ न वट्टतीति कुटिकादीनं अभावेन ‘‘इध वस्सं उपेमी’’ति एवं वचीभेदं कत्वा उपगन्तुं न वट्टति.

२०४. पाळियं पिसाचिल्लिकाति पिसाचदारका. पविसनद्वारं योजेत्वाति सकवाटद्वारं कत्वा. रुक्खं छिन्दित्वाति सुसिरट्ठानस्स उपरिभागं छिन्दित्वा. खाणुमत्थकेति सुसिरखाणुमत्थके. टङ्कितमञ्चो नाम दीघे मञ्चपादे विज्झित्वा अटनियो पवेसेत्वा कतो, सो हेट्ठुपरियवसेन पञ्ञत्तोपि पुरिमसदिसोव होति, तं सुसाने, देवताठाने च ठपेन्ति. चतुन्नं पासाणानं उपरि पासाणफलके अत्थरित्वा कतगेहम्पि ‘‘टङ्कितमञ्चो’’ति वुच्चति.

वजादीसुवस्सूपगमनकथावण्णना निट्ठिता.

अधम्मिककतिकादिकथावण्णना

२०५. महाविभङ्गेति चतुत्थपाराजिकवण्णनायं. परतो सेनासनक्खन्धकेपि अधम्मिकं कतिकवत्तं आवि भविस्सति एव.

२०७. यस्मा नानासीमायं द्वीसु आवासेसु वस्सं उपगच्छन्तस्स ‘‘दुतिये वसिस्सामी’’ति उपचारतो निक्खन्तमत्ते पठमो सेनासनग्गाहो पटिप्पस्सम्भति. तस्मा पाळियं ‘‘तस्स, भिक्खवे, भिक्खुनो पुरिमिका च न पञ्ञायती’’ति पठमं सेनासनग्गाहं सन्धाय वुत्तं. दुतिये सेनासनग्गाहे पन पुरिमिका पञ्ञायतेव, तत्थेव तेमासं वसन्तो पुरिमवस्संवुत्थो ¶ एव होति, ततो वा पन दुतियदिवसादीसु ‘‘पठमसेनासने वसिस्सामी’’ति उपचारातिक्कमे पुरिमिकापि न पञ्ञायतीति दट्ठब्बं.

२०८. पाळियं ‘‘सो सत्ताहं अनागताय पवारणाय सकरणीयो पक्कमती’’ति वुत्तत्ता पवारणादिवसेपि सत्ताहकरणीयं विना गन्तुं न वट्टतीति वेदितब्बं. कोमुदिया चातुमासिनियाति ¶ पच्छिम-कत्तिकपुण्णमाय. सा हि तस्मिं काले कुमुदानं अत्थिताय कोमुदी, चतुन्नं वस्सिकमासानं परियोसानत्ता चातुमासिनीति च वुच्चति.

अधम्मिककतिकादिकथावण्णना निट्ठिता.

वस्सूपनायिकक्खन्धकवण्णनानयो निट्ठितो.

४. पवारणाक्खन्धको

अफासुविहारकथादिवण्णना

२०९. पवारणाक्खन्धके ¶ ¶ पाळियं पिण्डाय पटिक्कमेय्याति पिण्डाय चरित्वा पटिक्कमेय्य. अवक्कारपातिन्ति अतिरेकपिण्डपातठपनकं एकं भाजनं. अविसय्हन्ति उक्खिपितुं असक्कुणेय्यं. विलङ्घनं उक्खिपनं विलङ्घो, सो एव विलङ्घको, हत्थेहि विलङ्घको हत्थविलङ्घकोति आह ‘‘हत्थुक्खेपकेना’’ति. अथ वा विलङ्घकेन उक्खेपकेन हत्थेनातिपि अत्थो, अञ्ञमञ्ञं संसिब्बितहत्थेहीति वुत्तं होति.

२१३. सचे पन वुड्ढतरो होतीति पवारणादायको भिक्खु वुड्ढतरो होति. एवञ्हि तेन तस्सत्थाय पवारितं होतीति एत्थ एवं तेन अप्पवारितोपि तस्स सङ्घप्पत्तिमत्तेन सङ्घपवारणाकम्मं समग्गकम्ममेव होतीति दट्ठब्बं. तेन च भिक्खुनाति पवारणादायकेन भिक्खुना.

२३४. बहूपि समानवस्सा एकतो पवारेतुं लभन्तीति एकस्मिं संवच्छरे लद्धूपसम्पदताय समानुपसम्पन्नवस्सा सब्बे एकतो पवारेतुं लभन्तीति अत्थो.

२३७. पाळियं मिच्छादिट्ठीति ‘‘नत्थि दिन्न’’न्तिआदि (दी. नि. १.१७१; म. नि. १.४४५; २.९४, ९५, २२५; ३.९१, ११६, १३६; सं. नि. ३.२१०; ध. स. १२२१) नयप्पवत्ता. अन्तग्गाहिकाति सस्सतुच्छेदसङ्खातस्स अन्तस्स गाहिका. यं खो त्वन्तिआदीसु यं पवारणं ठपेसि, तं दिट्ठेन ठपेसीति तं-सद्दं अज्झाहरित्वा योजेतब्बं.

२३९. वत्थुं पकासेन्तोति पुग्गले परिसङ्कुप्पत्तिया निमित्तभूतं वत्थुमत्तंयेव सन्धाय वुत्तं ¶ . यं पन वत्थुं सन्धाय ‘‘पुग्गलो पञ्ञायति, न वत्थू’’ति आह, न तं सन्धायेतं वुत्तं. यदि पन तस्स भिक्खुनो वसनट्ठाने पोक्खरणितो मच्छग्गहणादि दिस्सेय्य, तदा ‘‘वत्थु च पुग्गलो च पञ्ञायती’’ति वत्तब्बं भवेय्य. तेनाह ‘‘पुरिमनयेनेव चोरेही’’तिआदि. भिक्खुनो सरीरे मालागन्धञ्च अरिट्ठगन्धञ्च दिस्वा एवं ‘‘वत्थु च पुग्गलो च पञ्ञायती’’ति वुत्तन्ति वेदितब्बं.

अफासुविहारकथादिवण्णना निट्ठिता.

भण्डनकारकवत्थुकथावण्णना

२४०. द्वे ¶ चातुद्दसिका होन्तीति ततियपक्खे चातुद्दसिया सद्धिं द्वे चातुद्दसिका होन्ति. ‘‘भण्डनकारकानं तेरसे वा चातुद्दसे वा इमे पन्नरसीपवारणं पवारेस्सन्ती’’ति इमिना यथासकं उपोसथकरणदिवसतो पट्ठाय भिक्खूनं चातुद्दसीपन्नरसीवोहारो, न चन्दगतिसिद्धिया तिथिया वसेनाति दस्सेति. किञ्चापि एवं ‘‘अनुजानामि, भिक्खवे, राजूनं अनुवत्तितु’’न्ति (महाव. १८६) वचनतो पनेत्थ लोकियानं तिथिं अनुवत्तन्तेहिपि अत्तनो उपोसथक्कमेन चातुद्दसिं पन्नरसिं वा, पन्नरसिं चातुद्दसिं वा करोन्तेहेव अनुवत्तितब्बं, न पन सोळसमदिवसं वा तेरसमदिवसं वा उपोसथदिवसं करोन्तेहि. तेनेव पाळियम्पि ‘‘द्वे तयो उपोसथे चातुद्दसिके कातु’’न्ति वुत्तं. अञ्ञथा द्वादसियं, तेरसियं वा उपोसथो कातब्बोति वत्तब्बतो. ‘‘सकिं पक्खस्स चातुद्दसे, पन्नरसे वा’’तिआदिवचनम्पि उपवुत्थक्कमेनेव वुत्तं, न तिथिक्कमेनाति गहेतब्बं.

भण्डनकारकवत्थुकथावण्णना निट्ठिता.

पवारणासङ्गहकथावण्णना

२४१. ‘‘पवारेत्वा पन अन्तरापि चारिकं पक्कमितुं लभन्ती’’ति इमिना पवारणासङ्गहे कते अन्तरा पक्कमितुकामा सङ्घं सन्निपातापेत्वा पवारेतुं लभन्तीति दस्सेति.

पवारणासङ्गहकथावण्णना निट्ठिता.

पवारणाक्खन्धकवण्णनानयो निट्ठितो.

५. चम्मक्खन्धको

सोणकोळिविसकथादिवण्णना

२४२. चम्मक्खन्धके ¶ ¶ उण्णपावारणन्ति उभतो लोमानि उट्ठापेत्वा कतं उण्णमयं पावारणं, उभतो कप्पासपिचुं उट्ठापेत्वा वीतपावारोपि अत्थि, ततो निवत्तनत्थं ‘‘उण्णपावारण’’न्ति वुत्तं.

अड्ढचन्दपासाणेति सोपानमूले उपड्ढं अन्तो पवेसेत्वा ठपिते अड्ढपासाणे. पाळियं विहारपच्छायायन्ति विहारपच्चन्ते छायाय, विहारस्स वड्ढमानच्छायायन्तिपि वदन्ति.

२४३. भोगाति उपयोगत्थे पच्चत्तवचनं. अच्चायताति अतिआयता खरमुच्छना. सरवतीति मधुरसरसंयुत्ता. अतिसिथिला मन्दमुच्छना. वीरियसमथन्ति वीरियसम्पयुत्तसमथं. तत्थ च निमित्तं गण्हाहीति तस्मिञ्च समभावे सति यं आदासे मुखनिमित्तं विय निमित्तं उप्पज्जति, तं समथनिमित्तं, विपस्सनानिमित्तं, मग्गनिमित्तं, फलनिमित्तञ्च गण्हाहि निब्बत्तेहीति, एवमस्स अरहत्तपरियोसानं कम्मट्ठानं कथितं.

२४४. छठानानीति छ कारणानि. अधिमुत्तोति पटिविज्झित्वा ठितो. नेक्खम्माधिमुत्तोतिआदि सब्बं अरहत्तवसेन वुत्तं. अरहत्तञ्हि सब्बकिलेसेहि निक्खन्तत्ता नेक्खम्मं, तेहेव च पविवित्तत्ता पविवेको, ब्यापज्जाभावतो अब्यापज्जं, उपादानस्स खयन्ते उप्पन्नत्ता उपादानक्खयो, तण्हक्खयन्ते उप्पन्नत्ता तण्हक्खयो, सम्मोहाभावतो असम्मोहोति च वुच्चति.

केवलं सद्धामत्तकन्ति केवलं पटिवेधपञ्ञाय असम्मिस्सं सद्धामत्तकं. पटिचयन्ति पुनप्पुनं ¶ करणेन वड्ढिं. वीतरागत्ताति मग्गपटिवेधेन रागस्स विगतत्ता एव नेक्खम्मसङ्खातं अरहत्तं पटिविज्झित्वा सच्छिकत्वा ठितो होति. सेसपदेसुपि एसेव नयो. पविवेकाधिमुत्तोति ‘‘पविवेके अधिमुत्तो अह’’न्ति एवं अरहत्तं ब्याकरोतीति अत्थो.

सीलब्बतपरामासन्ति सीलञ्च वतञ्च परामसित्वा गहितग्गहणमत्तं. सारतो पच्चागच्छन्तोति सारभावेन जानन्तो. अब्यापज्जाधिमुत्तोति अब्यापज्जं अरहत्तं ब्याकरोति.

अमिस्सीकतन्ति ¶ अमिस्सकतं. किलेसा हि आरम्मणेन सद्धिं चित्तं मिस्सं करोन्ति, तेसं अभावा अमिस्सीकतं. भुसा वातवुट्ठीति बलववातक्खन्धो.

उपादानक्खयस्स चाति उपयोगत्थे सामिवचनं. दिस्वा आयतनुप्पादन्ति चक्खादिआयतनानं उप्पादञ्च वयञ्च दिस्वा. चित्तं विमुच्चतीति इमाय विपस्सनापटिपत्तिया फलसमापत्तिवसेन चित्तं विमुच्चति.

सोणकोळिविसकथादिवण्णना निट्ठिता.

दिगुणादिउपाहनपटिक्खेपकथावण्णना

२४५. सकटवाहेति द्वीहि सकटेहि परिच्छिन्ने वाहे. ‘‘वाहे’’ति बहुवचनस्स हिरञ्ञविसेसनत्तेपि सामञ्ञापेक्खाय ‘‘हिरञ्ञ’’न्ति एकवचनं कतं.

२४६. अद्दारिट्ठकवण्णाति अल्लारिट्ठफलवण्णा, तिन्तकाकपक्खवण्णातिपि वदन्ति. रजनन्ति उपलित्तं नीलादिवण्णं सन्धाय वुत्तं. तेनाह ‘‘चोळकेन पुञ्छित्वा’’ति. तञ्हि तथा पुञ्छिते विगच्छति. यं पन चम्मस्स दुग्गन्धापनयनत्थं काळरत्तादिरजनेहि रञ्जितत्ता काळरत्तादिवण्णं होति, तं चोळादीहि अपनेतुं न सक्का चम्मगतिकमेव, तस्मा तं वट्टतीति दट्ठब्बं.

खल्लकन्ति सब्बपण्हिपिधानचम्मं, अपरिगळनत्थं पण्हिउपरिभागे अपिधाय आरोपनबन्धनमत्तं वट्टति. विचित्राति सण्ठानतो विचित्रपटा अधिप्पेता, न वण्णतो सब्बसो अपनेतब्बेसु ¶ खल्लकादीसु पविट्ठत्ता. बिळालसदिसमुखत्ता महाउलूका ‘‘पक्खिबिळाला’’ति वुच्चति, तेसं चम्मं नाम पक्खलोममेव.

दिगुणादिउपाहनपटिक्खेपकथावण्णना निट्ठिता.

अज्झारामेउपाहनपटिक्खेपकथादिवण्णना

२५१. उण्णाहि ¶ कतपादुकाति एत्थ उण्णामयकम्बलेहि कता पादुका सङ्गय्हन्ति.

२५३. गङ्गामहकीळिकायाति गङ्गामहे कीळिकाय. तत्थ हि इत्थिपुरिसा यानेहि उदककीळं गच्छन्ति. पीठकसिविकन्ति फलकादिना कतं पीठकयानं. पटपोतलिकं अन्दोलिका. सब्बम्पि यानं उपाहनेनपि गन्तुं असमत्थस्स गिलानस्स अनुञ्ञातं.

२५४. वाळरूपानीति आहरिमानि वाळरूपानि. चतुरङ्गुलाधिकानीति उद्दलोमीएकन्तलोमीहि विसेसदस्सनं. चतुरङ्गुलतो हि ऊनानि किर उद्दलोमीआदीसु पविसन्ति. वानचित्रो उण्णामयत्थरणोति नानावण्णेहि उण्णामयसुत्तेहि भित्तिच्छेदादिवसेन वायित्वा कतचित्तत्थरणो. घनपुप्फकोति बहलरागो. पकतितूलिकाति तूलपुण्णा भिसि. विकतिकाति सीहरूपादिवसेन वानचित्राव गय्हति. उद्दलोमीति ‘‘उभतोदसं उण्णामयत्थरण’’न्ति दीघनिकायट्ठकथायं वुत्तं. कोसेय्यकट्टिस्समयन्ति कोसियसुत्तानं अन्तरा सुवण्णमयसुत्तानि पवेसेत्वा वीतं. सुवण्णसुत्तं किर ‘‘कट्टिस्सं, कसट’’न्ति च वुच्चति. तेनेव ‘‘कोसेय्यकसटमय’’न्ति आचरिय-धम्मपालत्थेरेन वुत्तन्ति वदन्ति. रतनपरिसिब्बितन्ति सुवण्णलित्तं. सुद्धकोसेय्यन्ति रतनपरिसिब्बनरहितं.

अजिनमिगचम्मानं अतिसुखुमत्ता दुपट्टतिपट्टानि कत्वा सिब्बन्तीति वुत्तं ‘‘अजिनप्पवेणी’’ति. रत्तवितानेनाति सब्बरत्तेन वितानेन. यं पन नानावण्णं वानचित्तं वा लेपचित्तं वा, तं वट्टति. उभतोलोहितकूपधानेपि एसेव नयो. ‘‘चित्रं वा’’ति इदं पन सब्बथा कप्पियत्ता वुत्तं, न पन उभतोउपधानेसु अकप्पियत्ता. न हि लोहितक-सद्दो चित्ते वत्तति, पटलिग्गहणेनेव चित्तकस्सपि अत्थरणस्स सङ्गहेतब्बप्पसङ्गतो, कासावं पन लोहितकवोहारं न गच्छति. तस्मा वितानेपि उभतोउपधानेपि वट्टति. सचे पमाणयुत्तन्तिआदि अञ्ञप्पमाणातिक्कन्तस्स बिब्बोहनस्स पटिक्खित्तभावदस्सनत्थं वुत्तं, न पन ¶ उच्चासयनमहासयनभावदस्सनत्थं तथा अवुत्तत्ता. तं पन उपधानं उपोसथिकानं ¶ गहट्ठानं वट्टति. उच्चासयनमहासयनमेव हि तदा तेसं न वट्टति. दीघनिकायट्ठकथादीसु किञ्चापि ‘‘ठपेत्वा तूलिकं सब्बानेव गोनकादीनि रतनपरिसिब्बितानि वट्टन्ती’’तिआदि वुत्तं, विनयट्ठकथायेव कप्पियाकप्पियभावे पमाणन्ति गहेतब्बं.

अज्झारामेउपाहनपटिक्खेपकथादिवण्णना निट्ठिता.

गिहिविकतानुञ्ञातादिकथावण्णना

२५६. अभिनिस्सायाति अपस्साय. विसुकायिकविप्फन्दितानन्ति पटिपक्खभूतानं दिट्ठिचित्तविप्फन्दितानन्ति अत्थो.

२५७. यतिन्द्रियन्ति मनिन्द्रियवसेन सञ्ञतिन्द्रियं.

२५८. पाळियं अट्ठकवग्गिकानीति सुत्तनिपाते (सु. नि. ७७२ आदयो) अट्ठकवग्गभूतानि सोळस सुत्तानि. एवं चिरं अकासीति एवं चिरकालं पब्बज्जं अनुपगन्त्वा अगारमज्झे केन कारणेन वासमकासीति अत्थो. सो किर मज्झिमवये पब्बजितो, तेन भगवा एवमाह. एतमत्थं विदित्वाति कामेसु दिट्ठादीनवा चिरायित्वापि घरावासेन पक्खन्दन्तीति एतमत्थं सब्बाकारतो विदित्वा.

आदीनवं लोकेति सङ्खारलोके अनिच्चतादिआदीनवं. निरुपधिन्ति निब्बानं. ‘‘अरियो न रमती पापे’’ति इमस्स हेतुमाह ‘‘पापे न रमती सुची’’ति. तत्थ सुचीति विसुद्धपुग्गलो.

२५९. काळसीहोति काळमुखवानरजाति. चम्मं न वट्टतीति निसीदनत्थरणं कातुं न वट्टति, भूमत्थरणादिवसेन सेनासनपरिभोगो वट्टतेव.

गिहिविकतानुञ्ञातादिकथावण्णना निट्ठिता.

चम्मक्खन्धकवण्णनानयो निट्ठितो.

६. भेसज्जक्खन्धको

पञ्चभेसज्जादिकथावण्णना

२६०. भेसज्जक्खन्धके ¶ ¶ पित्तं कोट्ठब्भन्तरगतं होतीति बहिसरीरे ब्यापेत्वा ठितं अबद्धपित्तं कोट्ठब्भन्तरगतं होति, तेन पित्तं कुपितं होतीति अधिप्पायो.

२६१-२. पाळियं नच्छादेन्तीति रुचिं न उप्पादेन्ति. सुसुकाति समुद्दे एका मच्छजाति, कुम्भिलातिपि वदन्ति. संसट्ठन्ति परिस्सावितं.

२६३. पिट्ठेहीति पिसितेहि. कसावेहीति तचादीनि उदके तापेत्वा गहितऊसरेहि. उब्भिदन्ति ऊसरपंसुमयं. लोणबिलन्ति लोणविसेसो.

२६४-५. छकणन्ति गोमयं. पाकतिकचुण्णन्ति अपक्ककसावचुण्णं, गन्धचुण्णं पन न वट्टति. पाळियं चुण्णचालिनिन्ति उदुक्खले कोट्टितचुण्णपरिस्सावनिं. सुवण्णगेरुकोति सुवण्णतुत्थादि. पाळियं अञ्जनूपपिसनन्ति अञ्जने उपनेतुं पिसितब्बभेसज्जं.

२६७-९. कबळिकाति उपनाहभेसज्जं. घरदिन्नकाबाधो नाम घरणिया दिन्नवसीकरणभेसज्जसमुट्ठितआबाधो. ताय छारिकाय पग्घरितं खारोदकन्ति परिस्सावने तच्छारिकं पक्खिपित्वा उदके अभिसिञ्चिते ततो छारिकतो हेट्ठा पग्घरितं खारोदकं. पाळियं अकटयूसेनाति अनभिसङ्खतेन मुग्गयूसेन. कटाकटेनाति मुग्गे पचित्वा अचालेत्वा परिस्सावितेन मुग्गयूसेनाति वदन्ति.

पञ्चभेसज्जादिकथावण्णना निट्ठिता.

गुळादिअनुजाननकथावण्णना

२७२-४. गुळकरणन्ति ¶ ¶ उच्छुसालं. अविस्सत्थाति सासङ्का.

२७६. अप्पमत्तकेपि वारेन्तीति अप्पमत्तके दिन्ने दायकानं पीळाति पटिक्खिपन्ति. पटिसङ्खापीति एत्तकेनपि यापेतुं सक्का, ‘‘अवसेसं अञ्ञेसं होतू’’ति सल्लक्खेत्वापि पटिक्खिपन्ति.

२७९. वत्थिपीळनन्ति यथा वत्थिगततेलादि अन्तोसरीरे आरोहन्ति, एवं हत्थेन वत्थिमद्दनं. सम्बाधे सत्थकम्मवत्थिकम्मानमेव पटिक्खित्तत्ता दहनकम्मं वट्टति एव.

गुळादिअनुजाननकथावण्णना निट्ठिता.

यागुमधुगोळकादिकथावण्णना

२८२-३. पाळियं दसस्स ठानानीति अस्स पटिग्गाहकस्स दस ठानानि कारणानि धम्मेनाति अत्थो. अनुप्पवेच्छतीति देति. वातञ्च ब्यपनेतीति सम्बन्धो, वातञ्च अनुलोमेतीति अत्थो. सग्गा ते आरद्धाति तया देवलोका आराधिता.

यागुमधुगोळकादिकथावण्णना निट्ठिता.

पाटलिगामवत्थुकथावण्णना

२८६. पाटलिगामे नगरं मापेन्तीति पाटलिगामस्स समीपे तस्सेव गामखेत्तभूते महन्ते अरञ्ञप्पदेसे पाटलिपुत्तं नाम नगरं मापेन्ति. यावता अरियं आयतनन्ति यत्तकं अरियमनुस्सानं ओसरणट्ठानं. यावता वणिप्पथोति यत्तकं वाणिजानं भण्डविक्कीणनट्ठानं, वसनट्ठानं वा, इदं तेसं सब्बेसं अग्गनगरं भविस्सतीति अत्थो. पुटभेदनन्ति सकटादीहि नानादेसतो आहटानं भण्डपुटानं विक्कीणनत्थाय मोचनट्ठानं. सरन्ति तळाकादीसुपि वत्तति ¶ , तन्निवत्तनत्थं ¶ ‘‘सरन्ति इध नदी अधिप्पेता’’ति वुत्तं सरति सन्दतीति कत्वा. विना एव कुल्लेन तिण्णाति इदं अप्पमत्तकउदकम्पि अफुसित्वा विना कुल्लेन पारप्पत्ता.

पाटलिगामवत्थुकथावण्णना निट्ठिता.

कोटिगामेसच्चकथावण्णना

२८७. पाळियं सन्धावितन्ति भवतो भवं पटिसन्धिग्गहणवसेन सन्धावनं कतं. संसरितन्ति तस्सेव वेवचनं. ममञ्चेव तुम्हाकञ्चाति मया च तुम्हेहि च, सामिवसेनेव वा मम च तुम्हाकञ्च सन्धावनं अहोसीति अत्थो गहेतब्बो. संसरितन्ति संसरि. भवतण्हा एव भवतो भवं नेतीति भवनेत्तीति वुत्ता.

२८९. ‘‘नीला होन्ती’’ति वुत्तमेवत्थं विवरितुं ‘‘नीलवण्णा’’तिआदि वुत्तं. नीलवण्णाति नीलविलेपना. एस नयो सब्बत्थ. पटिवट्टेसीति पहरि. अम्बकायाति अम्बाय. उपचारवचनञ्हेतं, मातुगामेनाति अत्थो. उपसंहरथाति उपनेथ, ‘‘ईदिसा तावतिंसा’’ति परिकप्पेथाति अत्थो. इदञ्च भिक्खूनं संवेगजननत्थं वुत्तं, न निमित्तग्गाहत्थं. लिच्छविराजानो हि सब्बे न चिरस्सेव अजातसत्तुना विनासं पापुणिस्सन्ति.

कोटिगामेसच्चकथावण्णना निट्ठिता.

सीहसेनापतिवत्थुआदिकथावण्णना

२९०. सन्धागारेति राजकिच्चस्स सन्धारणत्थाय निच्छिद्दं कत्वा विचारणत्थाय कतमहासभाय. गमिकाभिसङ्खारोति गमने वायामो. धम्मस्स च अनुधम्मन्ति तुम्हेहि वुत्तस्स कारणस्स अनुकारणं, तुम्हेहि वुत्तस्स अत्थस्स अनुरूपमेवाति अधिप्पायो. सहधम्मिको वादानुवादोति परेहि वुत्तकारणेन सकारणो हुत्वा तुम्हाकं वादो वा ¶ इतो परं तस्स अनुवादो वा. कोचि अप्पमत्तकोपि गारय्हं ठानं न आगच्छतीति किं तव वादे गारय्हकारणं नत्थीति वुत्तं होति.

२९३. अनुविच्चकारन्ति अनुविदिताकारं. रतनत्तयस्स सरणगमनादिकिरियं करोति. सहसा ¶ कत्वा मा पच्छा विप्पटिसारी अहोसीति अत्थो. पटाकं परिहरेय्युन्ति धजपटाकं उक्खिपित्वा ‘‘ईदिसो अम्हाकं सरणं गतो सावको जातो’’ति नगरे घोसेन्ता आहिण्डन्ति.

२९४. निमित्तकम्मस्साति मंसखादननिमित्तेन उप्पन्नपाणातिपातकम्मस्स.

सीहसेनापतिवत्थुआदिकथावण्णना निट्ठिता.

कप्पियभूमिअनुजाननकथावण्णना

२९५. अनुप्पगे एवाति पातोव. ओरवसद्दन्ति महासद्दं. तं पन अवत्वापीति पि-सद्देन तथावचनम्पि अनुजानाति. अट्ठकथासूति अन्धकट्ठकथाविरहितासु सेसट्ठकथासु. साधारणलक्खणन्ति अन्धकट्ठकथाय सह सब्बट्ठकथानं समानं.

चयन्ति अधिट्ठानउच्चवत्थुं. यतो पट्ठायाति यतो इट्ठकादितो पट्ठाय, यं आदिं कत्वा भित्तिं उट्ठापेतुकामाति अत्थो. ‘‘थम्भा पन उपरि उग्गच्छन्ति, तस्मा वट्टन्ती’’ति एतेन इट्ठकपासाणा हेट्ठा पतिट्ठापितापि यदि चयतो, भूमितो वा एकङ्गुलमत्तम्पि उग्गता तिट्ठन्ति, वट्टन्तीति सिद्धं होति.

आरामोति उपचारसीमापरिच्छिन्नो सकलो विहारो. सेनासनानीति विहारस्स अन्तो तिणकुटिआदिकानि सङ्घस्स निवासगेहानि. विहारगोनिसादिका नामाति सेनासनगोनिसादिका. सेनासनानि हि सयं परिक्खित्तानिपि आरामपरिक्खेपाभावेन ‘‘गोनिसादिकानी’’ति वुत्तानि. ‘‘उपड्ढपरिक्खित्तोपी’’ति इमिना ततो ऊनपरिक्खित्तो येभुय्येन अपरिक्खित्तो नाम, तस्मा अपरिक्खित्तसङ्ख्यमेव गच्छतीति दस्सेति. एत्थाति उपड्ढादिपरिक्खित्ते. कप्पियकुटिं लद्धुं वट्टतीति गोनिसादिया ¶ अभावेन सेसकप्पियकुटीसु तीसु या काचि कप्पियकुटि कातब्बाति अत्थो.

तेसं गेहानीति एत्थ भिक्खूनं वासत्थाय कतम्पि याव न देन्ति, ताव तेसं सन्तकंयेव भविस्सतीति दट्ठब्बं. विहारं ठपेत्वाति उपसम्पन्नानं वासत्थाय कतगेहं ठपेत्वाति अत्थो. गेहन्ति निवासगेहं, तदञ्ञं पन उपोसथागारादि सब्बं अनिवासगेहं चतुकप्पियभूमिविमुत्ता पञ्चमी कप्पियभूमि. सङ्घसन्तकेपि हि एतादिसे गेहे सुट्ठु परिक्खित्तारामत्तेपि ¶ अब्भोकासे विय अन्तोवुत्थादिदोसो नत्थि. येन केनचि छन्ने, परिच्छन्ने च सहसेय्यप्पहोनके भिक्खुसङ्घस्स निवासगेहे अन्तोवुत्थादिदोसो, न अञ्ञत्थ. तेनाह ‘‘यं पना’’तिआदि. तत्थ ‘‘सङ्घिकं वा पुग्गलिकं वा’’ति इदं किञ्चापि भिक्खुनीनं सामञ्ञतो वुत्तं, भिक्खूनं पन सङ्घिकं पुग्गलिकञ्च भिक्खुनीनं, तासं सङ्घिकं पुग्गलिकञ्च भिक्खूनं गिहिसन्तकट्ठाने तिट्ठतीति वेदितब्बं.

मुखसन्निधीति अन्तोसन्निहितदोसो हि मुखप्पवेसननिमित्तं आपत्तिं करोति, नाञ्ञथा. तस्मा ‘‘मुखसन्निधी’’ति वुत्तो.

तत्थ तत्थ खण्डा होन्तीति उपड्ढतो अधिकं खण्डा होन्ति. सब्बस्मिं छदने विनट्ठेति तिणपण्णादिवस्सपरित्तायके छदने विनट्ठे. गोपानसीनं पन उपरि वल्लीहि बद्धदण्डेसु ठितेसुपि जहितवत्थुका होन्ति एव. पक्खपासकमण्डलन्ति एकस्मिं पस्से तिण्णं गोपानसीनं उपरि ठिततिणपण्णादिच्छदनं वुच्चति.

अनुपसम्पन्नस्स दातब्बो अस्सातिआदिना अकप्पियकुटियं वुत्थम्पि अनुपसम्पन्नस्स दिन्ने कप्पियं होति, सापेक्खदानञ्चेत्थ वट्टति, पटिग्गहणं विय न होतीति दस्सेति.

२९९. पाळियं कन्तारे सम्भावेसीति अप्पभक्खकन्तारे सम्पापुणि.

कप्पियभूमिअनुजाननकथावण्णना निट्ठिता.

केणियजटिलवत्थुकथावण्णना

३००. जटिलोति ¶ आहरिमजटाधरो तापसवेसधारको यञ्ञयुत्तो लोकपूजितो ब्राह्मणो. पवत्तारो पावचनवसेन वत्तारो. येसं सन्तकमिदं, येहि वा इदं गीतन्ति अत्थो. गीतं पवुत्तं समिहितन्ति अञ्ञमञ्ञस्स परियायवचनं वुत्तन्ति अत्थो. तदनुगायन्तीति तं तेहि पुब्बे गीतं अनुगायन्ति. एवं सेसेसु च.

यावकालिकपक्कानन्ति पक्के सन्धाय वुत्तं, आमानि पन अनुपसम्पन्नेहि सीतुदके मद्दित्वा परिस्सावेत्वा दिन्नपानं पच्छाभत्तम्पि कप्पति एव. अयञ्च अत्थो महाअट्ठकथायं सरूपतो ¶ अवुत्तोति आह ‘‘कुरुन्दियं पना’’तिआदि. ‘‘उच्छुरसो निकसटो’’ति इदं पातब्बसामञ्ञेन यामकालिककथायं वुत्तं, तं पन सत्ताहकालिकमेवाति गहेतब्बं. इमे चत्तारो रसाति फलपत्तपुप्फउच्छुरसा चत्तारो.

पाळियं अग्गिहुत्तमुखाति अग्गिजुहनपुब्बका. छन्दसोति वेदस्स. सावित्ती मुखं पठमं सज्झायितब्बाति अत्थो. तपतन्ति विजोतन्तानं.

केणियजटिलवत्थुकथावण्णना निट्ठिता.

रोजमल्लादिवत्थुकथावण्णना

३०१. बहुकतो बुद्धे वाति बुद्धे कतबहुमानोति अत्थो. सो खो अहं, भन्ते आनन्द, ञातीनं दण्डभयतज्जितो अहोसिन्ति सेसो. एवञ्हि सति ‘‘एवाह’’न्ति पुन अहं-गहणं युज्जति. विवरीति ‘‘विवरतू’’ति चिन्तामत्तेन विवरि, न उट्ठाय हत्थेन.

३०३. अञ्ञतरोति सुभद्दो वुड्ढपब्बजितो. द्वे दारकाति सामणेरभूमियं ठिता द्वे पुत्ता. नाळियावापकेनाति नाळिया चेव थविकाय च. संहरथ इमेहि भाजनेहि तण्डुलादीनि सङ्कड्ढथाति अत्थो. भुसागारेति पलालमये अगारे, पलालपुञ्जं अब्भन्तरतो पलालं सङ्कड्ढित्वा अगारं कतं होति, तत्थाति अत्थो.

रोजमल्लादिवत्थुकथावण्णना निट्ठिता.

चतुमहापदेसकथावण्णना

३०५. परिमद्दन्ताति ¶ उपपरिक्खन्ता. द्वे पटा देसनामेनेव वुत्ताति तेसं सरूपदस्सनपदमेतं. नाञ्ञनिवत्तनपदं पत्तुण्णपटस्सापि देसनामेन वुत्तत्ता.

तुम्बाति भाजनानि. फलतुम्बो नाम लाबुआदि. उदकतुम्बो उदकघटो. किलञ्जच्छत्तन्ति वेळुविलीवेहि वायित्वा कतछत्तं. सम्भिन्नरसन्ति मिस्सीभूतरसं.

चतुमहापदेसकथावण्णना निट्ठिता.

भेसज्जक्खन्धकवण्णनानयो निट्ठितो.

७. कथिनक्खन्धको

कथिनानुजाननकथावण्णना

३०६. कथिनक्खन्धके ¶ ¶ सीसवसेनाति पधानवसेन. कथिनन्ति पञ्चानिसंसे अन्तोकरणसमत्थताय थिरन्ति अत्थो. सो नेसं भविस्सतीति युज्जतीति ‘‘सो तुम्हाक’’न्ति अवत्वा ‘‘नेस’’न्ति वचनं युज्जति. ये अत्थतकथिनाति न केवलं तुम्हाकमेव, ये अञ्ञेपि अत्थतकथिना, तेसं भविस्सतीति अत्थो. अथ वा वोति तदा सम्मुखीभूतेहि सद्धिं असम्मुखीभूते च अनागते च भिक्खू सब्बे एकतो सम्पिण्डेत्वा वुत्तं, तुम्हाकन्ति अत्थो. सो नेसन्ति एत्थ सो तेसन्ति योजेतब्बं. तेनाह ‘‘अत्थतकथिनानं वो, भिक्खवे, इमानि पञ्च कप्पिस्सन्ती’’ति. मतकचीवरन्ति मतस्स चीवरं. ‘‘वुत्थवस्सवसेना’’ति इदं पच्छिमवस्संवुत्थानम्पि साधारणन्ति आह ‘‘पुरिमिकाय वस्सं उपगन्त्वा पठमपवारणाय पवारिता लभन्ती’’ति. उपगता वा न लभन्तीति पच्छिमिकाय वुत्थवस्सेपि सन्धाय वुत्तं.

खलिमक्खितसाटकोति अहतवत्थं सन्धाय वुत्तं. ‘‘अकातुं न लब्भती’’ति इमिना अनादरिये सति दुक्कटन्ति दीपेति.

‘‘अपलोकेत्वा’’ति इदं अञ्ञेसं वस्संवुत्थभिक्खूनं अदत्वा दातुकामेहि कत्तब्बविधिदस्सनं. यदि एवं कम्मवाचाय एव दानं अवुत्तन्ति आह ‘‘कम्मवाचा पना’’तिआदि. कथिनचीवरं विय कम्मवाचाय दातुं न वट्टतीति अपलोकेत्वाव दातब्बन्ति अधिप्पायो.

३०८. महाभूमिकन्ति महाविसयं, चतुवीसतिआकारवन्तताय महावित्थारिकन्ति वुत्तं होति. पञ्चकन्ति पञ्चखण्डं. एसेव नयो सेसेसुपि. पठमचिमिलिकाति कथिनवत्थतो अञ्ञा ¶ अत्तनो पकतिचिमिलिका. कुच्छिचिमिलिकं कत्वा सिब्बितमत्तेनाति थिरजिण्णानं चिमिलिकानं एकतो कत्वा सिब्बनस्सेतं अधिवचनन्ति वदन्ति. महापच्चरियं, कुरुन्दियञ्च वुत्तवचनन्ति दस्सनं, ब्यञ्जनतो एव भेदो, न अत्थतोति दस्सनत्थं कतन्तिपि वदन्ति. पिट्ठिअनुवातारोपनमत्तेनाति दीघतो अनुवातस्स आरोपनमत्तेन. कुच्छिअनुवातारोपनमत्तेनाति पुथुलतो अनुवातस्स आरोपनमत्तेन. रत्तिनिस्सग्गियेनाति रत्तिअतिक्कन्तेन.

३०९. हतवत्थकसाटकेनाति ¶ अतिजिण्णसाटको. न हि तेनातिआदीसु तेन परिवारागतपाठेन इध आनेत्वा अवुच्चमानेन कथिनत्थारकस्स जानितब्बेसु न किञ्चि परिहायति, तस्स सब्बस्स इधेव वुत्तत्ताति अधिप्पायो.

३१०. माता वियाति मातिका, इवत्थे क-पच्चयो दट्ठब्बो. तेन सिद्धमत्थं दस्सेन्तो आह ‘‘मातिकाति मातरो’’तिआदि. अस्साति एतिस्सा मातिकाय. पक्कमनन्तिको कथिनुब्भारो एव हि सयं अत्तनो उप्पज्जतीति एवमभेदूपचारेन ‘‘मातिका’’ति वुत्तो उब्भारस्सेव पक्कमनन्ते समुप्पत्तितो, तब्बिनिमुत्ताय च मातिकाय अभावा, तप्पकासिकापि चेत्थ पाळि ‘‘मातिका’’ति वत्तुं युज्जति. सापि हि पक्कमनन्तिकुब्भारप्पकासनेन ‘‘पक्कमनन्तिका’’ति वुत्ता. एसेव नयो सेसुब्भारेसुपि. पक्कमनन्ति चेत्थ उपचारसीमातिक्कमनं दट्ठब्बं.

कथिनानुजाननकथावण्णना निट्ठिता.

आदायसत्तककथावण्णना

३११. ‘‘न पुन आगमिस्स’’न्ति इदं आवासपलिबोधुपच्छेदकारणदस्सनं. पञ्चसु हि चीवरमासेसु यदा कदाचि न पच्चेस्सन्ति चित्तेन उपचारसीमातिक्कमेन आवासपलिबोधो छिज्जति. पच्चेस्सन्ति बहिउपचारगतस्स पन यत्थ कत्थचि न पच्चेस्सन्ति चित्ते उप्पन्नमत्ते छिज्जति. पठमं चीवरपलिबोधो छिज्जतीति न पच्चेस्सन्ति पक्कमनतो पुरेतरमेव चीवरस्स निट्ठितत्ता वुत्तं. ‘‘कतचीवरमादाया’’ति हि वुत्तं. अत्थतकथिनस्स हि भिक्खुनो याव ‘‘सङ्घतो वा दायककुलादितो वा चीवरं लभिस्सामी’’ति चीवरासा वा लद्धवत्थानं सहायसम्पदादियोगं लभित्वा सङ्घाटिआदिभावेन ‘‘छिन्दित्वा करिस्सामी’’ति करणिच्छा वा पवत्तति, ताव चीवरपलिबोधो अनुपच्छिन्नो एव. यदा पन यथापत्थितट्ठानतो चीवरादीनं सब्बथा ¶ अलाभेन वा चीवरासा चेव लद्धानं कत्वा निट्ठानेन वा नट्ठविनट्ठादिभावेन वा चीवरे निरपेक्खताय वा करणिच्छा च विगच्छति, तदा चीवरपलिबोधो उपच्छिन्नो होति.

सो ¶ च इध ‘‘कतचीवरं आदाया’’ति वचनेन पकासितो. एवं उपरि सब्बत्थ पाळिवचनक्कमं निस्साय नेसं पठमं, पच्छा च उपच्छिज्जनं वुत्तन्ति दट्ठब्बं. सब्बथापि च इमेसं उभिन्नं पलिबोधानं उपच्छेदेनेव कथिनुब्भारो, न एकस्स. तेसञ्च पुब्बापरियेन, एकक्खणे च उपच्छिज्जनं दस्सेतुं इमा अट्ठ मातिका ठपिताति वेदितब्बा. अन्तोसीमायन्ति चीवरनिट्ठानक्खणेयेव छिन्नत्ता वुत्तं. नेविमं चीवरं कारेस्सन्ति चीवरे अपेक्खाय विगतत्ता करणपलिबोधस्सापि उपच्छिन्नतं दस्सेति. यो पन अप्पिच्छताय वा अनत्थिकताय वा सब्बथा चीवरं न सम्पटिच्छति, तस्स बहिसीमागतस्स सब्बथापि चीवरपलिबोधाभावेन न पच्चेस्सन्ति सन्निट्ठानमत्तेन सन्निट्ठानन्तिको कथिनुब्भारो वेदितब्बो. सो पनाति पलिबोधुपच्छेदो. अयं पनाति आसावच्छेदको कथिनुब्भारो विसुं वित्थारेत्वा वुत्तो, इध न वुत्तोति सम्बन्धो.

अनासाय लभतीति ‘‘यस्मिं कुले चीवरं लभिस्सामा’’ति आसा अनुप्पन्नपुब्बा, तत्थ चीवरासाय अनुप्पन्नट्ठाने यत्थ कत्थचि लभतीति अत्थो. आसाय न लभतीति आसीसितट्ठाने न लभतीति अत्थो. इध न वुत्तोति इध सवनन्तिकानन्तरे न वुत्तो. तत्थाति तस्मिं सीमातिक्कन्तिके. सीमातिक्कन्तिको नाम चीवरमासानं परियन्तदिवससङ्खाताय सीमाय अतिक्कमनतो सञ्जातो. केचि ‘‘बहिसीमाय कालातिक्कमो सीमातिक्कमो’’ति मञ्ञन्ति, तेसं अन्तोउपचारे चीवरकालातिक्कमेपि कथिनुब्भारो असम्मतो नाम सियाति न चेतं युत्तं. तस्मा यत्थ कत्थचि कालातिक्कमो सीमातिक्कमोति वेदितब्बो. एत्थ च पाळियं ‘‘कतचीवरो’’ति इदं उपलक्खणमत्तं, अकतचीवरस्सपि कालातिक्कमेन सीमातिक्कन्तिको होति, द्वे च पलिबोधा एकतो छिज्जन्ति. एवं अञ्ञत्थापि यथासम्भवं तंतं विसेसनाभावेपि कथिनुब्भारता, पलिबोधुपच्छेदप्पकारो च वेदितब्बो. ‘‘सहुब्भारे द्वेपि पलिबोधा अपुब्बं अचरिमं छिज्जन्ती’’ति इदं अकतचीवरस्स पच्चेस्सन्ति अधिट्ठानसम्भवपक्खं सन्धाय वुत्तं, तेसु अञ्ञतराभावेपि सहुब्भारोव होति.

३१२-३२५. समादायवारो आदायवारसदिसोव. उपसग्गमेवेत्थ विसेसो. तेनाह ‘‘पुन समादायवारेपि…पे… तेयेव दस्सिता’’ति ¶ . विप्पकतचीवरे पक्कमनन्तिकस्स अभावतो ‘‘यथासम्भव’’न्ति वुत्तं. तेनेव विप्पकतचीवरवारे छळेव उब्भारा वुत्ता, चीवरे हत्थगते ¶ च आसावच्छेदिकस्स असम्भवा, सो एतेसु वारेसु यत्थ कत्थचि न वुत्तो, विसुञ्ञेव वुत्तो. विप्पकतवारे चेत्थ आदायवारसमादायवारवसेन द्वे छक्कवारा वुत्ता.

ततो परं निट्ठानसन्निट्ठाननासनन्तिकानं वसेन तीणि तिकानि दस्सितानि. तत्थ ततियत्तिके अनधिट्ठितेनाति ‘‘पच्चेस्सं, न पच्चेस्स’’न्ति एवं अनधिट्ठितेन, न एवं मनसिकत्वाति अत्थो. ततियत्तिकतो पन परं एकं छक्कं दस्सितं. एवं तीणि तिकानि, एकं छक्कञ्चाति पठमं पन्नरसकं वुत्तं, इमिना नयेन दुतियपन्नरसकादीनि वेदितब्बानि.

पाळियं आसाद्वादसके बहिसीमागतस्स कथिनुद्धारेसु तेसम्पि चीवरासादिवसेन चीवरपलिबोधो याव चीवरनिट्ठाना तिट्ठतीति आह ‘‘सो बहिसीमागतो सुणाति ‘उब्भतं किर तस्मिं आवासे कथिनन्ति…पे… सवनन्तिको कथिनुद्धारो’’’ति. एत्थ च सवनक्खणे आवासपलिबोधो पठमं छिज्जति, निट्ठिते चीवरपलिबोधोति वेदितब्बो.

दिसंगमिकनवके दिसंगमिको पक्कमतीति न पच्चेस्सन्ति पक्कमति, इमिना आवासपलिबोधाभावो दस्सितो होति. तेनेव वस्संवुत्थावासे पुन गन्त्वा चीवरनिट्ठापितमत्ते निट्ठानन्तिको कथिनुद्धारो वुत्तो. ‘‘चीवरपटिविसं अपविलायमानो’’ति इमिना चीवरपलिबोधसमङ्गिकत्तमस्स दस्सेति, अपविलायमानोति आकङ्खमानो. सेसं सुविञ्ञेय्यमेव.

आदायसत्तककथावण्णना निट्ठिता.

कथिनक्खन्धकवण्णनानयो निट्ठितो.

८. चीवरक्खन्धको

जीवकवत्थुकथादिवण्णना

३२९. चीवरक्खन्धके ¶ ¶ कम्मविपाकन्ति कम्मपच्चयउतुचित्ताहारसमुट्ठितं अप्पटिबाहियरोगं सन्धाय वुत्तं कम्मजस्स रोगस्स अभावा.

३३०. पाळियं संयमस्साति सङ्गहणस्स. अविसज्जनस्साति अत्थो ‘‘यो संयमो सो विनासो’’तिआदीसु (पे. व. २३७) विय. एतस्स संयमस्स फलं उपजानामाति योजना. तमेव फलं दस्सेन्ती आह ‘‘वरमेतं…पे… आसित्त’’न्ति. केचि पन ‘‘संयमस्साति आनिसंसस्स, उपयोगत्थे चेतं सामिवचन’’न्ति (सारत्थ. टी. महावग्ग ३.३२९-३३०) अत्थं वदन्ति.

३३६. उस्सन्नदोसोति सञ्जातपित्तादिदोसो. सब्बत्थाति सकलसरीरे.

३३७. महापिट्ठियकोजवन्ति हत्थिपिट्ठियं अत्थरितब्बताय ‘‘महापिट्ठिय’’न्ति लद्धसमञ्ञं उण्णामयत्थरणं.

३३८-९. उपड्ढकासिनं खममानन्ति अड्ढकासिअग्घनकं. पाळियं किं नु खोति कतमं नु खो.

३४०-३४२. उपचारेति सुसानस्स आसन्ने पदेसे. छड्डेत्वा गताति किञ्चि अवत्वा एव छड्डेत्वा गता, एतेन ‘‘भिक्खू गण्हन्तू’’ति छड्डिते एव अकामा भागदानं विहितं, केवलं छड्डिते पन कतिकाय असति एकतो बहूसु पविट्ठेसु येन गहितं, तेन अकामभागो न ¶ दातब्बोति दस्सेति. समाना दिसा पुरत्थिमादिभेदा एतेसन्ति सदिसाति आह ‘‘एकदिसाय वा ओक्कमिंसू’’ति. धुरविहारट्ठानेति विहारस्स सम्मुखट्ठाने.

जीवकवत्थुकथादिवण्णना निट्ठिता.

भण्डागारसम्मुतिआदिकथावण्णना

३४३. विहारमज्झेति ¶ सब्बेसं जाननत्थाय वुत्तं. वण्णावण्णं कत्वाति पटिवीसप्पहोनकताजाननत्थं हलिद्दियादीहि खुद्दकमहन्तवण्णेहि युत्ते समे कोट्ठासे कत्वा. तेनाह ‘‘समे पटिवीसे ठपेत्वा’’ति. इदन्ति सामणेरानं उपड्ढपटिवीसदानं. फातिकम्मन्ति पहोनककम्मं. यत्तकेन विनयागतेन सम्मुञ्जनीबन्धनादिहत्थकम्मेन विहारस्स ऊनकता न होति, तत्तकं कत्वाति अत्थो. सब्बेसन्ति तत्रुप्पादवस्सावासिकं गण्हन्तानं सब्बेसं भिक्खूनं, सामणेरानञ्च. भण्डागारिकचीवरेपीति अकालचीवरं सन्धाय वुत्तं. एतन्ति उक्कुट्ठिया कताय समभागदानं. विरज्झित्वा करोन्तीति कत्तब्बकालेसु अकत्वा यथारुचितक्खणे करोन्ति.

एत्तकेन मम चीवरं पहोतीति द्वादसग्घनकेनेव मम चीवरं परिपुण्णं होति, न ततो ऊनेनाति सब्बं गहेतुकामोति अत्थो.

भण्डागारसम्मुतिआदिकथावण्णना निट्ठिता.

चीवररजनकथादिवण्णना

३४४. एवञ्हि कतेति वट्टाधारस्स अन्तो रजनोदकं, बहि छल्लिकञ्च कत्वा वियोजने कते. न उत्तरतीति केवलं उदकतो फेणुट्ठानाभावा न उत्तरति. रजनकुण्डन्ति पक्करजनट्ठपनकं महाघटं.

३४५. अनुवातादीनं दीघपत्तानन्ति आयामतो, वित्थारतो च अनुवातं. आदि-सद्देन द्विन्नं खन्धानं अन्तरा मातिकाकारेन ठपितपत्तञ्च ‘‘दीघपत्त’’न्ति दट्ठब्बं. आगन्तुकपत्तन्ति दिगुणचीवरस्स उपरि अञ्ञं पट्टं अप्पेन्ति, तं सन्धाय वुत्तं. तं किर इदानि न करोन्ति.

३४६. पाळियं ¶ नन्दिमुखियाति तुट्ठिमुखिया, पसन्नदिसामुखायाति अत्थो.

३४८. अच्छुपेय्यन्ति पतिट्ठपेय्यं. हतवत्थकानन्ति पुराणवत्थानं. अनुद्धरित्वावाति अग्गळे विय दुब्बलट्ठानं अनपनेत्वाव.

३४९-३५१. विसाखवत्थुम्हि ¶ कल्लकायाति अकिलन्तकाया. गतीति ञाणगति अधिगमो. अभिसम्परायोति ‘‘सकिदेव इमं लोकं आगन्त्वा दुक्खस्सन्तं करोती’’तिआदिना (सं. नि. ५.१०४८) वुत्तो ञाणाभिसम्परायो, मग्गञाणयुत्तेहि गन्तब्बगतिविसेसोति अत्थो. तं भगवा ब्याकरिस्सति. ‘‘ददाति दान’’न्ति इदं अन्नपानविरहितानं सेसपच्चयानं दानवसेन वुत्तं. सोवग्गिकन्ति सग्गसंवत्तनिकं.

३५९. अट्ठपदकच्छन्नेनाति अट्ठपदकसङ्खातजूतफलकलेखासण्ठानेन.

३६२. पाळियं नदीपारं गन्तुन्ति भिक्खुनो नदीपारगमनं होतीति अत्थो. अग्गळगुत्तियेव पमाणन्ति इमेहि चतूहि निक्खेपकारणेहि ठपेन्तेनपि अग्गळगुत्तिविहारे एव ठपेतुं वट्टतीति अधिप्पायो. निस्सीमागतन्ति वस्सानसङ्खातं कालसीमं अतिक्कन्तं, तं वस्सिकसाटिकचीवरं न होतीति अत्थो.

चीवररजनकथादिवण्णना निट्ठिता.

सङ्घिकचीवरुप्पादकथावण्णना

३६३. पञ्च मासेति अच्चन्तसंयोगे उपयोगवचनं. वड्ढिं पयोजेत्वा ठपितउपनिक्खेपतोति वस्सावासिकस्सत्थाय दायकेहि वड्ढिं पयोजेत्वा ठपितउपनिक्खेपतो. ‘‘इध वस्संवुत्थसङ्घस्सा’’ति इदं अभिलापमत्तं. इध-सद्दं पन विना ‘‘वस्संवुत्थसङ्घस्स देमा’’ति वुत्तेपि सो एव नयो. अनत्थतकथिनस्सापि पञ्च मासे पापुणातीति वस्सावासिकलाभवसेन उप्पन्नत्ता अनत्थतकथिनस्सापि वुत्थवस्सस्स पञ्च मासे पापुणाति. वक्खति हि ‘‘चीवरमासतो पट्ठाय याव हेमन्तस्स पच्छिमो दिवसो, ताव वस्सावासिकं देमाति वुत्ते कथिनं अत्थतं वा होतु अनत्थतं वा, अतीतवस्संवुत्थानमेव पापुणाती’’ति (महाव. अट्ठ. ३७९). ततो परन्ति पञ्चमासतो परं, गिम्हानस्स पठमदिवसतो पट्ठायाति ¶ अत्थो. ‘‘कस्मा? पिट्ठिसमये उप्पन्नत्ता’’ति इदं ‘‘उदाहु अनागतवस्से’’ति ¶ इमस्सानन्तरं दट्ठब्बं. पोत्थकेसु पन ‘‘अनत्थतकथिनस्सापि पञ्च मासे पापुणाती’’ति इमस्सानन्तरं ‘‘कस्मा पिट्ठिसमये उप्पन्नत्ता’’ति इदं लिखन्ति, तं पमादलिखितं पिट्ठिसमये उप्पन्नं सन्धाय ‘‘अनत्थतकथिनस्सापी’’ति वत्तब्बतो. वुत्थवस्से हि सन्धाय ‘‘अनत्थतकथिनस्सापी’’ति वुत्तं, न च पिट्ठिसमये उप्पन्नं वुत्थवस्सस्सेव पापुणातीति सम्मुखीभूतानं सब्बेसम्पि पापुणनतो. तेनेव वक्खति ‘‘सचे पन गिम्हानं पठमदिवसतो पट्ठाय एवं वदति, तत्र सम्मुखीभूतानं सब्बेसं पापुणाति. कस्मा? पिट्ठिसमये उप्पन्नत्ता’’ति (महाव. अट्ठ. १७९).

दुग्गहितानीति अग्गहितानि. सङ्घिकानेवाति अत्थो. इतोवाति थेरानं दातब्बतोव, इदानेवाति वा अत्थो.

सङ्घिकचीवरुप्पादकथावण्णना निट्ठिता.

उपनन्दसक्यपुत्तवत्थुकथावण्णना

३६४. ‘‘सत्ताहवारेन अरुणमेव उट्ठापेती’’ति इदं नानासीमाविहारेसु कत्तब्बनयेन एकस्मिम्पि विहारे द्वीसु सेनासनेसु निवुत्थभावदस्सनत्थं वुत्तं, अरुणुट्ठापनेनेव तत्थ वुत्थो होति, न पन वस्सच्छेदपरिहाराय. अन्तोउपचारसीमायपि यत्थ कत्थचि अरुणं उट्ठापेन्तो अत्तना गहितसेनासनं अप्पविट्ठोपि वुत्थवस्सो एव होति, गहितसेनासने पन निवुत्थो नाम न होति, तत्थ च अरुणुट्ठापने पन सति होति. तेनाह ‘‘पुरिमस्मिं बहुतरं निवसति नामा’’ति, एतेन च इतरस्मिं सत्ताहवारेनापि अरुणुट्ठापने सति एव अप्पकतरं निवसति नाम होति, नासतीति दीपितं होति. नानालाभेहीति विसुं विसुं निबद्धवस्सावासिकलाभेहि. नानूपचारेहीति नानापरिक्खेपनानाद्वारेहि. एकसीमाविहारेहीति द्विन्नं विहारानं एकेन पाकारेन परिक्खित्तत्ता एकाय उपचारसीमाय अन्तोगतेहि द्वीहि विहारेहि. सेनासनग्गाहो पटिप्पस्सम्भतीति पठमं गहितो पटिप्पस्सम्भति. तत्थाति यत्थ सेनासनग्गाहो पटिप्पस्सद्धो, तत्थ.

उपनन्दसक्यपुत्तवत्थुकथावण्णना निट्ठिता.

गिलानवत्थुकथावण्णना

३६५-६. भूमियं ¶ ¶ परिभण्डं अकासीति गिलानेन निपन्नभूमियं किलिट्ठट्ठानं धोवित्वा हरितूपलित्तं कारेसीति अत्थो. भेसज्जं योजेतुं असमत्थोति परेहि वुत्तविधिम्पि कातुं असमत्थो. पाळियं गिलानुपट्ठाकानं चीवरदाने सामणेरानं तिचीवराधिट्ठानाभावा ‘‘चीवरञ्च पत्तञ्चा’’तिआदि सब्बत्थ वुत्तं. सचेपि सहस्सं अग्घति, गिलानुपट्ठाकानञ्ञेव दातब्बन्ति सम्बन्धो.

गिलानवत्थुकथावण्णना निट्ठिता.

मतसन्तककथादिवण्णना

३६९. अञ्ञन्ति चीवरपत्ततो अञ्ञं. अप्पग्घन्ति अतिजिण्णादिभावेन निहीनं. ततोति अवसेसपरिक्खारतो. सब्बन्ति पत्तं, तिचीवरञ्च.

तत्थ तत्थ सङ्घस्सेवाति तस्मिं तस्मिं विहारे सङ्घस्सेव. पाळियं अविस्सज्जिकं अवेभङ्गिकन्ति आगतानागतस्स चातुद्दिसस्स सङ्घस्सेव सन्तकं हुत्वा कस्सचि अविस्सज्जिकं अवेभङ्गिकं भवितुं अनुजानामीति अत्थो.

३७१-२. अक्कनाळमयन्ति अक्कदण्डमयं. अक्कदुस्सानीति अक्कवाकेन कतदुस्सानि, पोत्थकगतिकानि दुक्कटवत्थुकानीति अत्थो. दुपट्टचीवरस्स वा मज्झेति यं निट्ठिते तिपट्टचीवरं होति, तस्स मज्झे पटलं कत्वा दातब्बानीति अत्थो.

३७४. ‘‘सन्ते पतिरूपे गाहके’’ति वुत्तत्ता गाहके असति अदत्वा भाजितेपि सुभाजितमेवाति दट्ठब्बं.

३७६. दक्खिणोदकं पमाणन्ति ‘‘एत्तकानि चीवरानि दस्सामी’’ति पठमं उदकं पातेत्वा पच्छा देन्ति. तं येहि गहितं, ते भागिनोव होन्तीति ¶ अधिप्पायो. परसमुद्देति जम्बुदीपे. तम्बपण्णिदीपञ्हि उपादायेस एवं वुत्तो.

मतसन्तककथादिवण्णना निट्ठिता.

अट्ठचीवरमातिकाकथावण्णना

३७९. पुग्गलाधिट्ठाननयेन ¶ वुत्तन्ति ‘‘सीमाय दान’’न्तिआदिना वत्तब्बे ‘‘सीमाय देती’’तिआदि पुग्गलाधिट्ठानेन वुत्तं. ‘‘अपिचा’’तिआदिना पठमलेड्डुपातभूतपरिक्खेपारहट्ठानतो बहि दुतियलेड्डुपातोपि उपचारसीमा एवाति दस्सेति. धुवसन्निपातट्ठानादिकम्पि परियन्ते ठितमेव गहेतब्बं. लोके गामसीमादयो विय लाभसीमा नाम विसुं पसिद्धा नाम नत्थि, केनायं अनुञ्ञाताति आह ‘‘नेव सम्मासम्बुद्धेना’’तिआदि. एतेन नायं सासनवोहारसिद्धा, लोकवोहारसिद्धा एवाति दस्सेति. ‘‘जनपदपरिच्छेदो’’ति इदं लोकपसिद्धसीमासद्दत्थवसेन वुत्तं. परिच्छेदब्भन्तरं पन सब्बं जनपदसीमाति गहेतब्बं, जनपदो एव जनपदसीमा. एवं रट्ठसीमादीसुपि. तेनाह ‘‘आणापवत्तिट्ठान’’न्तिआदि.

पथवीवेमज्झे गतस्साति याव उदकपरियन्ता खण्डसीमत्ता वुत्तं, उपचारसीमादीसु पन अबद्धसीमासु हेट्ठापथवियं सब्बत्थ ठितानं न पापुणाति, कूपादिपवेसारहट्ठाने ठितानञ्ञेव पापुणातीति हेट्ठा सीमाकथायं वुत्तनयेन तंतंसीमट्ठभावो वेदितब्बो. चक्कवाळसीमाय पन दिन्नं पथवीसन्धारकउदकट्ठानेपि ठितानं पापुणाति सब्बत्थ चक्कवाळवोहारत्ता.

बुद्धाधिवुत्थोति बुद्धेन भगवता निवुत्थो. पाकवट्टन्ति निबद्धदानं. वत्ततीति पवत्तति. तेहीति येसं सम्मुखे एस देति, तेहि भिक्खूहि. दुतियभागे पन थेरासनं आरुळ्हेति याव सङ्घनवका एकवारं सब्बेसं भागं दत्वा चीवरे अपरिक्खीणे पुन सब्बेसं दातुं दुतियभागे थेरस्स दिन्नेति अत्थो. पंसुकूलिकानम्पि वट्टतीति एत्थ ‘‘तुय्हं देमा’’ति अवुत्तत्ताति कारणं वदन्ति. यदि एवं ‘‘सङ्घस्स देमा’’ति वुत्तेपि ¶ वट्टेय्य, ‘‘भिक्खूनं देम, थेरानं देम, सङ्घस्स देमा’’ति (महाव. अट्ठ. ३७९) वचनतो भेदो न दिस्सति. वीमंसितब्बमेत्थ कारणं.

पारुपितुं वट्टतीति पंसुकूलिकानं वट्टति. भिक्खुसङ्घस्स च भिक्खुनीनञ्च दम्मीति वुत्ते पन न मज्झे भिन्दित्वा दातब्बन्ति एत्थ यस्मा भिक्खुनिपक्खे सङ्घस्स पच्चेकं अपरामट्ठत्ता भिक्खुनीनं गणनाय भागो दातब्बोति दायकस्स अधिप्पायोति सिज्झति, तथा दानञ्च भिक्खूपि गणेत्वा दिन्ने एव युज्जति. इतरथा हि कित्तकं भिक्खूनं दातब्बं, कित्तकं भिक्खुनीनन्ति न विञ्ञायति, तस्मा ‘‘भिक्खुसङ्घस्सा’’ति वुत्तवचनम्पि ‘‘भिक्खून’’न्ति वुत्तवचनसदिसमेवाति आह ‘‘भिक्खू च भिक्खुनियो च गणेत्वा दातब्ब’’न्ति. तेनाह ‘‘पुग्गलो ¶ …पे… भिक्खुसङ्घग्गहणेन अग्गहितत्ता’’ति. भिक्खुसङ्घ-सद्देन भिक्खूनञ्ञेव गहितत्ता, पुग्गलस्स पन ‘‘तुय्हञ्चा’’ति विसुं गहितत्ता च तत्थस्स अग्गहितता दट्ठब्बा, ‘‘भिक्खूनञ्च भिक्खुनीनञ्च तुय्हञ्चा’’ति वुत्तट्ठानसदिसत्ताति अधिप्पायो. पुग्गलप्पधानो हेत्थ सङ्घ-सद्दो दट्ठब्बो. केचि पन ‘‘भिक्खुसङ्घग्गहणेन गहितत्ता’’ति (सारत्थ. टी. महावग्ग ३.३७९) पाठं लिखन्ति, तं न सुन्दरं तस्स विसुं लाभग्गहणे कारणवचनत्ता. तथा हि विसुं सङ्घग्गहणेन गहितत्ताति विसुं पुग्गलस्सपि भागग्गहणे कारणं वुत्तं. यथा चेत्थ पुग्गलस्स अग्गहणं, एवं उपरि ‘‘भिक्खुसङ्घस्स च तुय्हञ्चा’’तिआदीसुपि सङ्घादि-सद्देहि पुग्गलस्स अग्गहणं दट्ठब्बं. यदि हि गहणं सिया, सङ्घतोपि, विसुम्पीति भागद्वयं लभेय्य उभयत्थ गहितत्ता.

पूजेतब्बन्तिआदि गिहिकम्मं न होतीति दस्सनत्थं वुत्तं. ‘‘भिक्खुसङ्घस्स हरा’’ति इदं पिण्डपातहरणं सन्धाय वुत्तं. तेनाह ‘‘भुञ्जितुं वट्टती’’ति. ‘‘अन्तोहेमन्ते’’ति इमिना अनत्थते कथिने वस्सानं पच्छिमे मासे दिन्नं पुरिमवस्संवुत्थानञ्ञेव पापुणाति, ततो परं हेमन्ते दिन्नं पच्छिमवस्संवुत्थानम्पि वुत्थवस्सत्ता पापुणाति. हेमन्ततो पन परं पिट्ठिसमये ‘‘वस्संवुत्थसङ्घस्सा’’ति एवं वत्वा दिन्नं अनन्तरे वस्से वा ततो परेसु वा यत्थ कत्थचि तस्मिं वुत्थवस्सानं सब्बेसं पापुणाति. ये पन सब्बथा अवुत्थवस्सा, तेसं न पापुणातीति दस्सेति. सब्बेसम्पीति हि तस्मिं भिक्खुभावे वुत्थवस्सानं सब्बेसम्पीति अत्थो ¶ दट्ठब्बो. ‘‘वस्संवुत्थसङ्घस्सा’’ति वुत्तत्ता सम्मुखीभूतानं सब्बेसन्ति एत्थापि एसेव नयो. अतीतवस्सन्ति अनन्तरातीतवस्सं.

उद्देसं गहेतुं आगतोति उद्देसे अग्गहितेपि अन्तेवासिकोवाति वुत्तं. गहेत्वा गच्छन्तोति परिनिट्ठितउद्देसो हुत्वा गच्छन्तो. ‘‘वत्तं कत्वा उद्देसपरिपुच्छादीनि गहेत्वा विचरन्तान’’न्ति इदं ‘‘उद्देसन्तेवासिकान’’न्ति इमस्सेव विसेसनं, तेन उद्देसकाले आगन्त्वा उद्देसं गहेत्वा गन्त्वा अञ्ञत्थ निवसन्ते अनिबद्धचारिके निवत्तेति.

अट्ठचीवरमातिकाकथावण्णना निट्ठिता.

चीवरक्खन्धकवण्णनानयो निट्ठितो.

९. चम्पेय्यक्खन्धको

कस्सपगोत्तभिक्खुवत्थुकथादिवण्णना

३८०. चम्पेय्यक्खन्धके ¶ ¶ तन्तिबद्धोति तन्ति वुच्चति ब्यापारो, तत्थ बद्धो, उस्सुक्कं आपन्नोति अत्थो. तेनाह ‘‘तस्मिं आवासे’’तिआदि.

३८७-८. हापनं वा अञ्ञथा करणं वा नत्थीति ञत्तिकम्मस्स ञत्तिया एकत्ता हापनं न सम्भवति, तस्सा एकत्ता एव पच्छा ञत्तिठपनवसेन, द्विक्खत्तुं ठपनवसेन च अञ्ञथा करणं नत्थि. परतोति परिवारे. तन्ति पब्बाजनीयकम्मं, तस्साति अत्थो.

कस्सपगोत्तभिक्खुवत्थुकथादिवण्णना निट्ठिता.

द्वेनिस्सरणादिकथावण्णना

३९५. एसाति ‘‘बालो’’तिआदिना निद्दिट्ठपुग्गलो, अप्पत्तोति सम्बन्धो. तत्थ कारणमाह ‘‘यस्मा’’तिआदि. तत्थ आवेणिकेन लक्खणेनाति पब्बाजनीयकम्मस्स निमित्तभावेन पाळियं वुत्तत्ता असाधारणभूतेन कुलदूसकभावेन. यदि हेस तं कम्मं अप्पत्तो, कथं पन सुनिस्सारितोति आह ‘‘यस्मा पनस्स आकङ्खमानो सङ्घो पब्बाजनीयकम्मं करेय्याति वुत्तं, तस्मा सुनिस्सारितो’’ति. तत्थ वुत्तन्ति कम्मक्खन्धके (चूळव. २७) वुत्तं.

एत्थ पन कुलदूसककम्मं कत्वा पब्बाजनीयकम्मकतस्स तेरसककण्डकट्ठकथायं ‘‘यस्मिं विहारे वसन्तेन यस्मिं गामे कुलदूसककम्मं कतं होति, तस्मिं विहारे वा तस्मिं गामे वा न वसितब्ब’’न्तिआदिना (पारा. अट्ठ. २.४३३) या सम्मावत्तना वुत्ता, सा इतरेनापि ¶ पूरेतब्बा. यं पन पटिप्पस्सद्धकम्मस्स कुलदूसकस्स तत्थेव अट्ठकथायं ‘‘येसु कुलेसु कुलदूसककम्मं कतं, ततो पच्चया न गहेतब्बा’’तिआदि वुत्तं, तं न पूरेतब्बं कुलसङ्गहस्स अकतत्ता. एवं सेसकम्मेसुपि. यदि एवं ‘‘तज्जनीयकम्मारहस्स ¶ नियसकम्मं करोति…पे… एवं खो, उपालि, अधम्मकम्मं होती’’तिआदिवचनं (महाव. ४०२) विरुज्झतीति? न विरुज्झति सङ्घसन्निट्ठानवसेन तज्जनीयादिकम्मारहत्तस्स सिज्झनतो. यस्स हि सङ्घो ‘‘तज्जनीयकम्मं करोमा’’ति सन्निट्ठानं कत्वा कम्मवाचं सावेन्तो पब्बाजनीयकम्मवाचं सावेति, तस्स कम्मं अधम्मकम्मं होति. सचे पन ‘‘तस्सेव पब्बाजनीयकम्ममेव करोमा’’ति सन्निट्ठानं कत्वा तदेव करोति, तस्स तं कम्मं धम्मकम्मन्ति वेदितब्बं.

एवमिध ‘‘निस्सारण’’न्ति अधिप्पेतस्स पब्बाजनीयकम्मस्स वसेन अत्थं दस्सेत्वा इदानि तदञ्ञेसं तज्जनीयादीनं वसेन निस्सारणे अधिप्पेते ‘‘अप्पत्तो निस्सारण’’न्ति इमस्स पटिपक्खवसेन सम्पत्तो निस्सारणं, ‘‘तञ्चे सङ्घो निस्सारेति. सुनिस्सारितो’’ति अत्थसम्भवं दस्सेतुं पुन ‘‘तञ्चे सङ्घो निस्सारेतीति सचे सङ्घो’’तिआदि वुत्तं. तत्थ तत्थाति तज्जनीयादिकम्मविसये, एकेनापि अङ्गेन निस्सारणा अनुञ्ञाताति योजना. पाळियं अप्पत्तो निस्सारणन्ति एत्थ आपन्नो आवेणिकवसेन तज्जनीयादिसङ्खातं निस्सारणं पत्तोति अत्थो गहेतब्बो.

द्वेनिस्सरणादिकथावण्णना निट्ठिता.

चम्पेय्यक्खन्धकवण्णनानयो निट्ठितो.

१०. कोसम्बकक्खन्धको

कोसम्बकविवादकथावण्णना

४५१. कोसम्बकक्खन्धके ¶ ¶ सचे होति, देसेस्सामीति विनयधरस्स वचनेन आपत्तिदिट्ठिं पटिलभित्वा एवमाह. तेनेव पाळियं ‘‘सो तस्सा आपत्तिया अनापत्तिदिट्ठि होती’’ति वुत्तं. नत्थि आपत्तीति उदकस्स ठपनभावं अजानित्वा वा ठपितं छड्डेत्वा विस्सरित्वा वा गमने असञ्चिच्च असतिया अनापत्तिपक्खोपि सम्भवतीति विनयधरो तत्थ अनापत्तिदिट्ठिं पटिलभित्वा एवमाह. तेनेव पाळियं ‘‘अञ्ञे भिक्खू तस्स आपत्तिया अनापत्तिदिट्ठिनो होन्ती’’ति वुत्तं. परिसायपिस्स अनापत्तिदिट्ठिया उप्पन्नत्ता ‘‘अञ्ञे’’ति बहुवचनं कतं. अनापत्तिदिट्ठि अहोसीति सुत्तन्तिकत्थेरस्स विनये अपकतञ्ञुताय विनयधरस्स वचनमत्तेन सो एवमहोसि, सा पनस्स आपत्ति एव उदकावसेसस्स ठपनभावं ञत्वा ठपितत्ता. वत्थुमत्तजानने एव हि सेखिया सचित्तका, न पण्णत्तिविजानने. तेनेव पाळियं ‘‘तस्सा आपत्तिया अनापत्तिदिट्ठि होती’’ति सब्बत्थ आपत्ति इच्चेव वुत्तं. ‘‘आपत्तिं आपज्जमानो’’ति इदं विनयधरत्थेरो ‘‘तया इदं उदकं ठपित’’न्ति अत्तना पुट्ठेन सुत्तन्तिकत्थेरेन ‘‘आमावुसो’’ति वुत्तवचनं सरित्वा पण्णत्तिअकोविदताय सञ्चिच्चेव अकासीति आपत्तिदिट्ठि हुत्वाव अवोच. तेनेव पाळियं ‘‘अञ्ञे भिक्खू तस्सा आपत्तिया आपत्तिदिट्ठिनो होन्ती’’ति वुत्तं.

४५३. ‘‘न ताव भिन्नो’’ति इदं उक्खिपनतदनुवत्तनमत्तेन सङ्घो भिन्नो नाम न होति, तं निस्साय पन उभयपक्खिकानं पक्खं परियेसित्वा अञ्ञमञ्ञं कोधवसेन कायवचीकलहवड्ढनेनेव होतीति इममत्थं सन्धाय वुत्तं. तेनाह ‘‘सो च खो कलहवसेना’’ति. सम्भमअत्थवसेनाति तुरितत्थवसेन.

४५४. अकारणेतिआदि ¶ अनुक्खिपित्वाव उपायेन सञ्ञापेत्वा हितेसिताय आपत्तितो मोचेतुं युत्तट्ठाने कोधचित्तवसेन विहेठनत्थाय कतभावं सन्धाय वुत्तं, न पन कम्मङ्गस्स अभावं सन्धाय. तेनेव ¶ पाळियं ‘‘आपत्ति एसा, भिक्खवे, नेसा अनापत्ति…पे… उक्खित्तो एसो भिक्खू’’तिआदि वुत्तं.

४५५. ‘‘अधम्मवादीनं पक्खे निसिन्नो’’ति इदं उपलक्खणमत्तं, धम्मवादीनं पक्खे निसीदित्वा अधम्मवादीनं लद्धिं गण्हन्तोपि धम्मवादीनं नानासंवासको होति एव. कम्मं कोपेतीति तं विना गणस्स अपूरणपक्खं सन्धाय वुत्तं. यत्थ वा तत्थ वाति धम्मवादीनं पक्खे वा अधम्मवादीनं पक्खे वाति अत्थो. इमे धम्मवादिनोति गण्हातीति तंतंपक्खगते भिक्खू याथावतो वा अयाथावतो वा ‘‘इमे धम्मवादिनो’’ति गण्हाति, अयं तंतंपक्खगतानं अत्तानं समानसंवासकं करोति.

४५६. उपदंसेन्तीति पवत्तेन्ति. पाळियं एत्तावताति ‘‘एत्तकपदेसं मुञ्चित्वा निसिन्ना मयं कोधचित्ते उप्पन्नेपि अञ्ञमञ्ञं अननुलोमिकं कायकम्मादिं पवत्तेतुं न सक्खिस्सामा’’ति सल्लेक्खेत्वा दूरे निसीदितब्बन्ति अधिप्पायो. तेनाह ‘‘उपचारं मुञ्चित्वा’’ति.

४५७. पाळियं भण्डनजातातिआदीसु कलहस्स पुब्बभागो भण्डनं नाम. हत्थपरामासादि कलहो नाम. विरुद्धवादो विवादो नाम.

४५८. परिपुण्णकोसकोट्ठागारोति एत्थ कोसो नाम सुवण्णमणिआदिभण्डागारसारगब्भो. कोट्ठं वुच्चति धञ्ञस्स आवसनट्ठानं, कोट्ठभूतं अगारं कोट्ठागारं, धञ्ञसङ्गहट्ठानं. अब्भुय्यासीति युद्धाय अभिमुखो निक्खमीति अत्थो. एकसङ्घातम्पीति एकयुद्धम्पि. धोवनन्ति धोवनुदकं.

४६३. परियादिन्नरूपाति कोधचित्तेन परिग्गहितसभावा.

४६४. तं न जानन्तीति तं कलहं न जानन्ति. ये उपनय्हन्तीति यथावुत्तं कोधाकारं चित्ते बन्धन्ति. पाकटपरिस्सयेति सीहादिके. पटिच्छन्नपरिस्सयेति रागादिके. पाळियं नत्थि बाले ९७ सहायताति बालं निस्साय सीलादिगुणसङ्खाता सहायता नत्थि, न सक्का लद्धुन्ति अत्थो.

४६६. अत्तकामरूपाति ¶ अत्तनो हितकामयमानसभावा. अनुरुद्धाति एकसेसनयेन तिण्णम्पि कुलपुत्तानं आलपनं, तेनेव बहुवचननिद्देसो कतो. खमनीयं सरीरं यापनीयं जीवितं ‘‘कच्चि वो सरीरञ्च धारेतुं, जीवितञ्च यापेतुं सक्का’’ति पुच्छति. तग्घाति एकंसत्थे निपातो, एकंसेन मयं भन्तेति अत्थो. यथा कथन्ति एत्थ यथाति निपातमत्तं, यथाकथन्ति वा एको निपातो कारणपुच्छनत्थो, केन पकारेनाति अत्थो. एकञ्च पन मञ्ञे चित्तन्ति एकस्स चित्तवसेन इतरेसम्पि पवत्तनतो सब्बेसं नो एकं विय चित्तन्ति अत्थो. कच्चि पन वो अनुरुद्धाति एत्थ वोति निपातमत्तं, पच्चत्तवचनं वा, कच्चि तुम्हेति अत्थो. अम्हाकन्ति निद्धारणे सामिवचनं, अम्हेसु तीसु यो पठमं पटिक्कमतीति अत्थो.

कोसम्बकविवादकथावण्णना निट्ठिता.

पालिलेय्यकगमनकथावण्णना

४६७. येन पालिलेय्यकन्ति पच्चत्ते उपयोगवचनं, यत्थ पालिलेय्यको गामो, तत्थ अवसरीति अत्थो. दहरपोतकेहीति भिङ्कच्छापेहि. ‘‘ओगाहि’’न्तिपि पाठो, नहानपोक्खरणिन्ति अत्थो.

उदानगाथायं पन – रथईससदिसदन्तस्स नागस्स हत्थिनो एतं विवेकनिन्नं चित्तं नागेन बुद्धनागस्स विवेकनिन्नचित्तेन समेति. कस्मा? यं यस्मा एकोव रमति वने, तस्मा एवं योजना दट्ठब्बा.

पालिलेय्यकगमनकथावण्णना निट्ठिता.

अट्ठारसवत्थुकथावण्णना

४६८. यथा धम्मो तथा तिट्ठाहीति यथा धम्मो च विनयो च ठितो, तथा तिट्ठ, धम्मवादीपक्खे तिट्ठाति अत्थो.

४७३. ‘‘यो ¶ पटिबाहेय्य, आपत्ति दुक्कटस्सा’’ति इदं सामग्गीभेदस्स अकारके सन्धाय वुत्तं. ये पन भेदकारका विरुद्धा अलज्जिनो ¶ , तेसं पटिबाहितुं वट्टति तेसं सन्तकस्सपि सेनासनस्स विनासनवचनतो. ‘‘विवित्तं कत्वापि दातब्ब’’न्ति वुत्तत्ता पन यथावुड्ढं वरसेनासनं अदत्वा वुड्ढानम्पि असञ्ञतानं सञ्ञतेहि विवित्तं कत्वा दातब्बन्ति दट्ठब्बं.

४७५. कम्मवाचाय ओसारेत्वाति एत्थ उक्खित्तस्स भिक्खुनो आपत्तियापन्नभावं पटिजानित्वा सम्मावत्तनेन उक्खेपकानं समुप्पन्नओसारणच्छन्दस्स पगेव ञातत्ता पटिप्पस्सम्भनकम्मवाचाय उक्खित्तानुवत्तका सयमेव नं ओसारेसुन्ति दट्ठब्बं.

४७६. अत्थतो अपगताति सामग्गीअत्थविरहिता, तुच्छब्यञ्जनाति अत्थो.

४७७. अप्पटिच्छन्नाचारोति अप्पटिच्छादेतब्बसुन्दराचारो. अनपगतन्ति कारणतो अनपेतं. आदातब्बतो गहेतब्बतो आदायन्ति आचरियवादो वुत्तोति आह ‘‘आदायं अत्तनो आचरियवाद’’न्ति.

अट्ठहि दूतङ्गेहीति ‘‘सोता च होति सावेता च उग्गहेता च धारेता च विञ्ञाता च विञ्ञापेता च कुसलो च सहितासहितस्स नो च कलहकारको’’ति (अ. नि. ८.१६) एवं वुत्तेहि अट्ठहि दूतङ्गेहि. सेसमेत्थ, हेट्ठा च सब्बत्थ सुविञ्ञेय्यमेवाति.

अट्ठारसवत्थुकथावण्णना निट्ठिता.

कोसम्बकक्खन्धकवण्णनानयो निट्ठितो.

इति समन्तपासादिकाय विनयट्ठकथाय विमतिविनोदनियं

महावग्गवण्णनानयो निट्ठितो.

नमो तस्स भगवतो अरहतो सम्मासम्बुद्धस्स

चूळवग्गवण्णना

१. कम्मक्खन्धको

तज्जनीयकम्मकथावण्णना

१. चूळवग्गस्स ¶ ¶ पठमे कम्मक्खन्धके ताव ‘‘बलवाबलव’’न्ति इदं एकपदं. ‘‘बलवबलव’’न्ति वत्तब्बे आकारं कत्वा ‘‘बलवाबलव’’न्ति वुत्तं. तञ्च ‘‘दुक्खदुक्ख’’न्तिआदीसु विय अतिसयत्थे वत्ततीति आह ‘‘सुट्ठु बलवं पटिवदथा’’ति, अति विय बलवं कत्वा पटिवचनं देथाति अत्थो.

२. पाळियं आपत्ति आरोपेतब्बाति एत्थ किञ्चापि ‘‘मा खो तुम्हे आयस्मन्तो एसो अजेसी’’तिआदिके भण्डनादिजनके वचने पञ्ञत्ता काचि आपत्ति नाम नत्थि मुसापेसुञ्ञादीसु एतस्स अप्पविट्ठत्ता, तथापि भिक्खूहि विसुं, सङ्घमज्झे च ‘‘मा, आवुसो, भिक्खू ¶ अञ्ञमञ्ञं पयोजेत्वा भण्डनादिं अकासि, नेदं अप्पिच्छतादीनं अत्थाय वत्तती’’ति एवं अपञ्ञत्तेन वुच्चमानस्स भिक्खुनो अनादरियेन अनोरमनपच्चया वा अञ्ञवादविहेसादिकरणपच्चया वा या आपत्ति होति, सा आपत्ति आरोपेतब्बा दिट्ठिविपन्नस्स वियाति एवमत्थो दट्ठब्बो.

यस्स पन इदं वचनं विनाव कायवाचाहि आपन्ना लहुकापत्ति अत्थि, तस्सपि आरोपेतब्बाव. यं पन कम्मवाचाय ‘‘अत्तना भण्डनकारका’’ति अत्तना-सद्दग्गहणं, ‘‘येपि चञ्ञे भिक्खू भण्डनकारका…पे… ते उपसङ्कमित्वा’’तिआदिवचनञ्च, तं वत्थुवसेन गहितं. यो पन सयमेव भण्डनकारको होति, अञ्ञे पन भण्डनकारके उपसङ्कमित्वा ‘‘मा खो तुम्हे’’तिआदिवचनं न वदति, तस्सापेतं कम्मं कातब्बमेव. करोन्तेहि च ‘‘सुणातु मे, भन्ते, सङ्घो, अयं इत्थन्नामो ¶ भिक्खु भण्डनकारको…पे… सङ्घे अधिकरणकारको. यदि सङ्घस्स पत्तकल्ल’’न्तिआदिनाव कम्मवाचा कातब्बा. यो च अञ्ञेपि भिक्खू कलहाय समादपेति, तस्सापि एवमेव कम्मवाचं कातुं वट्टति अञ्ञेसं समादापनस्सपि भण्डनकारकत्ते एव पविसनतो. अञ्ञेसं समादापनाकारम्पि वत्वाव, कम्मवाचं कातुकामेनपि च तेहि वुत्तवचनत्थमेव गहेत्वा तदनुगुणं योजेत्वाव कातब्बं, न इधागतवसेनेव सब्बेसम्पि इधागतवसेनेव वचनासम्भवा. भूतेन वत्थुना कतमेव हि अविपन्नं होति, नाञ्ञन्ति गहेतब्बं. एस नयो नियस्सकम्मादीसुपि.

तज्जनीयकम्मकथावण्णना निट्ठिता.

अधम्मकम्मद्वादसककथादिवण्णना

४. अप्पटिञ्ञाय कतन्ति वत्थुं वा आपत्तिं वा असम्पटिच्छापेत्वा कतं. यो पन सब्बेसं पस्सन्तानं एव वत्थुवीतिक्कमं कत्वा पच्छा कम्मकरणभयेन ‘‘न करोमी’’ति मुसा वदति, तस्स भिक्खूनं सम्मुखे वीतिक्कमकरणमेव पटिञ्ञा. तथतो जाननत्थमेव पटिञ्ञाय करणं अनुञ्ञातं. यत्थ पन सन्देहो होति, तत्थ सम्पटिच्छापेत्वाव कत्तब्बन्ति गहेतब्बं.

‘‘पाराजिकापत्तिया वा’’ति इदं लिङ्गनासननिमित्तताय पाराजिकस्स कम्मेन अतिकिच्छनीयतो वुत्तं. ‘‘सङ्घादिसेसापत्तिया वा’’ति इदं पन परिवासादिनिस्सारणकम्मस्स आवेणिकस्स ¶ विज्जमानत्ता वुत्तं. यं पन परतो ‘‘अधिसीले सीलविपन्नो होति…पे… तज्जनीयकम्मं करेय्या’’ति (चूळव. ६) वुत्तं, तं ‘‘आयतिं संवरे ठत्वा वुट्ठानं करोही’’ति ओवदियमानस्स अनादरियादिपच्चयलहुकापत्तिं सन्धाय वुत्तं. सीलविपत्तिमूलकञ्हि लहुकापत्तिं आपन्नो इध अभेदूपचारेन ‘‘अधिसीले सीलविपन्नो’’ति वुत्तो ‘‘अतिदिट्ठिया दिट्ठिविपन्नो’’ति एत्थ विय.

यथा च दिट्ठिं गहेत्वा वोहरन्तस्स ‘‘इतो दिट्ठितो ओरमाही’’ति अवत्वा कतकम्मं केवलाय दिट्ठिविपत्तिया कतत्ता अनापत्तिया कतं नाम अधम्मकम्मं होति, एवं सीलविपत्तिं आपज्जित्वा लज्जिधम्मे ¶ ओक्कन्ते यथाधम्मं वुट्ठाय संवरे ठातुकामस्स कतं तज्जनीयादिकम्मं केवलाय सीलविपत्तिया कतत्ता अदेसनागामिनिया कतं नाम अधम्मकम्मं होति. तेनेव नियस्सकम्मेपि ‘‘अपिस्सु भिक्खू पकता परिवासं देन्ता’’तिआदिना संवरे अट्ठानमेव कम्मनिमित्तभावेन वुत्तं. अदन्तं दमनत्थमेव हि तज्जनीयादिकम्मानि अनुञ्ञातानीति. केचि पन ‘‘अदेसनागामिनियाति इदं पाराजिकापत्तिंयेव सन्धाय वुत्तं, न सङ्घादिसेस’’न्ति (सारत्थ. टी. चूळवग्ग ३.४) वदन्ति, तं सुक्कपक्खे ‘‘देसनागामिनिया आपत्तिया कतं होती’’ति इमिना वचनेन विरुज्झति. सङ्घादिसेसस्सापि च परियायतो देसनागामिनिवोहारे गय्हमाने ‘‘आपत्तिया कतं होती’’ति वुत्तवारतो इमस्स वारस्स विसेसो न सिया, अट्ठकथायम्पेत्थ विसेसभावो न दस्सितो. तस्मा वुत्तनयेनेवेत्थ अधिप्पायो गहेतब्बो.

६. सब्बानिपीति तज्जनीयनियस्सपब्बाजनीयकम्मानि तीणिपि. अञ्ञकम्मस्स वत्थुनाति तज्जनीयतो अञ्ञस्स कम्मस्स वत्थुना अञ्ञकम्मकरणं नाम कोचि दोसोपि न होतीति अधिप्पायो. कारणमाह ‘‘कस्मा’’तिआदिना.

८. पन्नलोमाति पतितमानलोमा.

अधम्मकम्मद्वादसककथादिवण्णना निट्ठिता.

नियस्सकम्मकथादिवण्णना

११. नियस्सकम्मे पाळियं अपिस्सूति अपिचाति इमस्मिं अत्थे निपातसमुदायो. निस्साय ¶ ते वत्थब्बन्ति एत्थ केचि कल्याणमित्तायत्तवुत्तितं सन्धाय वुत्तन्ति वदन्ति, अञ्ञे पन निस्सयग्गहणमेवाति, उभयेनपिस्स सेरिविहारो न वट्टतीति दीपितन्ति दट्ठब्बं.

२१. पब्बाजनीयकम्मे ‘‘पब्बाजनीयकम्मं पटिप्पस्सम्भेतू’’ति इदं पक्कमनादिं अकत्वा सम्मावत्तन्तानं वसेन वुत्तं.

३३. पटिसारणीयकम्मे ¶ नेव भिक्खुवचनं, न गिहिवचनन्ति एत्थ परियायतोपि भिक्खू परखुंसनं न वदन्ति, गहट्ठा पन सरूपेनेव अक्कोसितुं समत्थापि उपकारीसु अकारणं एवरूपं न वदन्ति, त्वं गिहिगुणतोपि परिहीनोति अधिप्पायो.

३९. ‘‘अङ्गसमन्नागमो पुरिमेहि असदिसो’’ति इमिना तज्जनीयादीनं वुत्तकारणमत्तेन इदं कातुं न वट्टतीति दीपेति. इध वुत्तेन पन गिहीनं अलाभाय परिसक्कनादिना अङ्गेन तानिपि कातुं वट्टतीति गहेतब्बं. एत्थ च ‘‘सद्धं पसन्नं दायकं कारकं सङ्घुपट्ठाकं हीनेन खुंसेती’’ति वुत्तत्ता तादिसेसु गिहीसु खुंसनादीहि गिहिपटिसंयुत्तेहि एव अङ्गेहि कम्मारहता, न आरामिकचेटकादीसु खुंसनादीहि. तत्थापि दायकादीसु खमापितेसु कम्मारहता नत्थि, आपत्ति च यत्थ कत्थचि देसेतुं वट्टति. यो चे तिक्खत्तुं खमापियमानोपि न खमति, अकतकम्मेनपि दस्सनूपचारे आपत्ति देसेतब्बा. सो चे कालकतो होति, देसन्तरं वा गतो, गतदिसा न ञायति, अन्तरामग्गे वा जीवितन्तरायो होति, कतकम्मेनपि अकतकम्मेनपि सङ्घमज्झे यथाभूतं विञ्ञापेत्वा खमापेत्वा आपत्ति देसेतब्बाति वदन्ति. धम्मिकपटिस्सवस्स असच्चापने पन तेसं सन्तिकं गन्त्वा ‘‘मया असमवेक्खित्वा पटिस्सवं कत्वा सो न सच्चापितो, तं मे खमथा’’तिआदिना खमापने वचनक्कमो ञापेतब्बो.

४१. पाळियं मङ्कुभूतो नासक्खि चित्तं गहपतिं खमापेतुन्ति तिंसयोजनमग्गं पुन गन्त्वापि मानथद्धताय यथाभूतं दोसं आविकत्वा अखमापनेन ‘‘नाहं खमामी’’ति तेन पटिक्खित्तो मङ्कुभूतो खमापेतुं न सक्खि, सो पुनदेव सावत्थिं पच्चागन्त्वापि माननिग्गहत्थायेव पुनपि सत्थारा पेसितो पुरिमनयेनेव खमापेतुं असक्कोन्तो पुनागच्छि. अथस्स भगवा ‘‘असन्तं भावनमिच्छेय्या’’तिआदिनाव (ध. प. ७३) धम्मं देसेत्वा माननिम्मथनं कत्वा अनुदूतदानं अनुञ्ञासीति दट्ठब्बं.

४२. ‘‘नो ¶ चे खमति…पे… आपत्तिं देसापेतब्बो’’ति वुत्तत्ता पगेव गहट्ठो खमति चे, दस्सनूपचारे आपत्तिदेसनाकिच्चं नत्थीति गहेतब्बं.

४६. उक्खेपनीयकम्मेसु ¶ तीसु अरिट्ठवत्थुस्मिं आपत्तिं आरोपेत्वाति विसुं सङ्घमज्झेव पापिकाय दिट्ठिया अप्पटिनिस्सज्जनपच्चया दुक्कटं, समनुभासनपरियोसाने पाचित्तियं वा आपत्तिं आरोपेत्वा. एत्थापि कम्मवाचाय ‘‘तथाहं भगवता’’तिआदि वत्थुवसेन वुत्तं. येन येन पकारेन दिट्ठिगतिका वोहरिंसु, तेन तेन पकारेन योजेत्वा कम्मवाचा कातब्बा. गहणाकारं पन विनापि ‘‘सुणातु मे, भन्ते, सङ्घो, इत्थन्नामस्स भिक्खुनो पापिकं दिट्ठिगतं उप्पन्नं, सो तं दिट्ठिं अप्पटिनिस्सज्जति, यदि सङ्घस्स पत्तकल्ल’’न्ति एवं सामञ्ञतोपि कम्मवाचं कातुं वट्टति.

६५. ‘‘यं दिट्ठिं निस्साय भण्डनादीनि करोती’’ति इमिना दिट्ठिं निस्साय उप्पन्नानि एव भण्डनादीनि इध अधिप्पेतानि, न केवलानीति दस्सेति. यो पन ‘‘भण्डनादीनं करणे दोसो नत्थी’’ति दिट्ठिको हुत्वा भण्डनादिं करोति, सापिस्स दिट्ठि एव होति, तस्सपि अप्पटिनिस्सग्गे कम्मं कातुं वट्टति.

नियस्सकम्मकथादिवण्णना निट्ठिता.

कम्मक्खन्धकवण्णनानयो निट्ठितो.

२. पारिवासिकक्खन्धको

पारिवासिकवत्तकथावण्णना

७५. पारिवासिकक्खन्धके ¶ ¶ अन्तमसो मूलायपटिकस्सनारहादीनम्पीति आदि-सद्देन मानत्तारहमानत्तचारिकअब्भानारहे सङ्गण्हाति. ते हि पारिवासिकानं, पारिवासिका च तेसं पकतत्तट्ठाने एव तिट्ठन्ति. अधोतपादट्ठपनकन्ति यत्थ ठत्वा पादे धोवन्ति, तादिसं दारुफलकखण्डादिं. पादघंसनन्ति सक्खरकथलादिं. ‘‘वत्तं करोन्ती’’ति एत्तकमत्तस्सेव वुत्तत्ता सद्धिविहारिकादीहिपि अभिवादनादिं कातुं न वट्टति.

‘‘पारिसुद्धिउपोसथे करियमाने’’ति इदं पवारणादिवसेसु सङ्घे पवारेन्ते अनुपगतछिन्नवस्सादीहि करियमानपारिसुद्धिउपोसथम्पि सन्धाय वुत्तं. अत्तनो पाळियाति नवकानं पुरतो.

‘‘पारिवासिकस्सेवा’’ति इदं अब्भानारहपरियोसाने सब्बे गरुकट्ठे सन्धाय वुत्तं. तेसम्पि पच्चेकं ओणोजनस्स अनुञ्ञातत्ता तदवसेसा पकतत्ता एव तं न लभन्ति.

चतुस्सालभत्तन्ति भोजनसालाय पटिपाटिया दिय्यमानभत्तं. हत्थपासे ठितेनाति दायकस्स हत्थपासे पटिग्गहणरुहनट्ठानेति अधिप्पायो. महापेळभत्तेपीति महन्तेसु भत्तपच्छिआदिभाजनेसु ठपेत्वा दिय्यमानभत्तेसुपि.

७६. पापिट्ठतराति पाराजिकापत्तीति उक्कंसवसेन वुत्तं. सञ्चरित्तादिपण्णत्तिवज्जतो पन सुक्कविस्सट्ठादिका लोकवज्जाव, तत्थापि सङ्घभेदादिका पापिट्ठतरा एव.

‘‘कम्मन्ति ¶ पारिवासिककम्मवाचा’’ति एतेन कम्मभूता वाचाति कम्मवाचा-सद्दस्स अत्थोपि सिद्धोति वेदितब्बो. सवचनीयन्ति एत्थ ‘‘सदोस’’न्ति (सारत्थ. टी. चूळवग्ग. ३.७६) अत्थं वदति. अत्तनो वचने पवत्तनकम्मन्ति एवमेत्थ अत्थो दट्ठब्बो, ‘‘मा पक्कमाही’’ति वा ‘‘एहि विनयधरानं सम्मुखीभाव’’न्ति वा ¶ एवं अत्तनो आणाय पवत्तनककम्मं न कातब्बन्ति अधिप्पायो. एवञ्हि केनचि सवचनीये कते अनादरेन अतिक्कमितुं न वट्टति, बुद्धस्स सङ्घस्स आणा अतिक्कन्ता नाम होति.

रजोहतभूमीति पण्णसालाविसेसनं. पच्चयन्ति वस्सावासिकचीवरं. सेनासनं न लभतीति वस्सग्गेन न लभति.

अपण्णकपटिपदाति अविरद्धपटिपदा. सचे वायमन्तोपीति एत्थ अविसयभावं ञत्वा अवायमन्तोपि सङ्गय्हति.

८१. अविसेसेनाति पारिवासिकुक्खित्तकानं सामञ्ञेन. पञ्चवण्णच्छदनबद्धट्ठानेसूति पञ्चप्पकारच्छदनेहि छन्नट्ठानेसु.

ओबद्धन्ति उट्ठानादिब्यापारपटिबद्धं. पीळितन्ति अत्थो. मञ्चे वा पीठे वाति एत्थ वा-सद्दो समुच्चयत्थो, तेन तट्टिकाचम्मखण्डादीसु दीघासनेसुपि निसीदितुं न वट्टतीति दीपितं होति.

न वत्तभेददुक्कटन्ति वुड्ढतरस्स जानन्तस्सापि वत्तभेदे दुक्कटं नत्थीति दस्सेति. ‘‘वत्तं निक्खिपापेत्वा’’ति इदं पारिवासादिमेव सन्धाय वुत्तं.

पारिवासिकवत्तकथावण्णना निट्ठिता.

पारिवासिकक्खन्धकवण्णनानयो निट्ठितो.

३. समुच्चयक्खन्धको

सुक्कविस्सट्ठिकथावण्णना

९७. समुच्चयक्खन्धके ¶ ¶ वेदयामहन्ति जानापेमि अहं, आरोचेमीतिअत्थो. अनुभवामीतिपिस्स अत्थं वदन्ति. पुरिमं पन पसंसन्ति आरोपनवचनत्ता. आरोचेत्वा निक्खिपितब्बन्ति दुक्कटपरिमोचनत्थं वुत्तं. केचि पन ‘‘तदहेव पुन वत्तं समादियित्वा अरुणं उट्ठापेतुकामस्स रत्तिच्छेदपरिहारत्थम्पी’’ति वदन्ति.

‘‘सभागा भिक्खू वसन्ती’’ति वुत्तत्ता विसभागानं वसनट्ठाने वत्तं असमादियित्वा बहि एव कातुम्पि वट्टतीति दट्ठब्बं. ‘‘द्वे लेड्डुपाते अतिक्कमित्वा’’ति इदं विहारे भिक्खूनं सज्झायादिसद्दसवनूपचारविजहनत्थं वुत्तं. ‘‘महामग्गतो ओक्कम्मा’’ति इदं मग्गपटिपन्नानं भिक्खूनं उपचारातिक्कमनत्थं वुत्तं. गुम्बेन वातिआदि दस्सनूपचारविजहनत्थं.

‘‘सोपि केनचि कम्मेन पुरे अरुणे एव गच्छती’’ति इमिना आरोचनाय कताय सब्बेसुपि भिक्खूसु विहारगतेसु ऊने गणे चरणदोसो वा विप्पवासदोसो वा न होति आरोचितत्ता सहवासस्साति दस्सेति. तेनाह ‘‘अयञ्चा’’ तिआदि. अब्भानं कातुं न वट्टतीति कतम्पि अकतमेव होतीति अत्थो.

सुक्कविस्सट्ठिकथावण्णना निट्ठिता.

पटिच्छन्नपरिवासकथावण्णना

१०२. सुद्धस्साति सभागसङ्घादिसेसं अनापन्नस्स, ततो वुट्ठितस्स वा. अञ्ञस्मिन्ति सुद्धन्तपरिवासवसेन ¶ आपत्तिवुट्ठानतो अञ्ञस्मिं आपत्तिवुट्ठाने. पाळियं ‘‘पटिकस्सितो सङ्घेन उदायि भिक्खु अन्तरा एकिस्सा आपत्तिया…पे… मूलायपटिकस्सना’’ति इदं करणवसेन विपरिणामेत्वा मूलायपटिकस्सनाय पटिकस्सितोति योजेतब्बं. अथ वा ‘‘मूलाय पटिकस्सना खमति सङ्घस्सा’’ति उत्तरपदेन सह पच्चत्तवसेनेव योजेतुम्पि वट्टति.

‘‘उदायिं ¶ भिक्खुं अन्तरा एकिस्सा आपत्तिया…पे… मूलाय पटिकस्सित्वा’’ति एत्थ अन्तरा एकिस्सा आपत्तिया हेतुभूताय उदायिं भिक्खुं मूलाय पटिकस्सित्वा मूलदिवसे आकड्ढित्वा तस्सा अन्तरापत्तिया समोधानपरिवासं देतूति योजना. आविकारापेत्वा विस्सज्जेतब्बोति तस्स अतेकिच्छभावं तेनेव सङ्घस्स पाकटं कारेत्वा लज्जिगणतो वियोजनवसेन विस्सज्जेतब्बो.

सतं आपत्तियोति कायसंसग्गादिवसेन एकदिवसे आपन्ना सतं आपत्तियो. दससतन्ति सहस्सा आपत्तियो. रत्तिसतं छादयित्वानाति योजेतब्बो. सब्बपरिवासकम्मवाचावसानेति हेट्ठा दस्सितानं द्विन्नं सुद्धन्तपरिवासानं, तिण्णं समोधानपरिवासानञ्चाति इमेसं सब्बेसं परिवासानं कम्मवाचापरियोसाने. पुरिमनयेनेवाति पटिच्छन्नपरिवासे वुत्तनयेन.

विहारूपचारतोपीति बहिगामे भिक्खूनं विहारूपचारतोपि. ‘‘द्वे लेड्डुपाता अतिक्कमितब्बा’’ति इदं भिक्खूनं सवनूपचारातिक्कमनं वुत्तं. गामस्साति न वुत्तन्ति गामस्स उपचारं मुञ्चितुं वट्टतीति न वुत्तं. तेन गामूपचारे ठितापि तत्थ दस्सनसवनूपचारे अतिक्कमित्वा ठिता भिक्खू च भिक्खुनियो च तस्सा रत्तिच्छेदं न करोन्तीति दीपेति.

अनिक्खित्तवत्तभिक्खूनं वुत्तनयेनेवाति उपचारसीमाय पविट्ठानं वसेन रत्तिच्छेदं सन्धाय वुत्तं. तस्मिं गामेति भिक्खुनीनं निवासनगामे. अत्तानं दस्सेत्वाति यथा आरोचेतुं सक्का, तथा दस्सेत्वा. ‘‘सम्मन्नित्वा दातब्बा’’ति इमिना सम्मताय सहवासेपि रत्तिच्छेदो न होतीति दस्सेति.

मूलायपटिकस्सितस्साति मूलायपटिकस्सितस्स पुन परिवुत्थपरिवासस्साति अत्थो. तिस्सन्नन्ति मूलापत्तिया सह द्विन्नं अन्तरापत्तीनञ्च.

१०८. सचे ¶ पटिच्छन्नाति निक्खित्तवत्तेनापन्नापत्तिं सन्धाय वुत्तं. पाळियं पञ्चाहप्पटिच्छन्नवारे अन्तरापत्तिकथायं ‘‘एवञ्च पन, भिक्खवे, छारत्तं मानत्तं दातब्ब’’न्ति इदं मूलायपटिकस्सनाकम्मवाचानन्तरमेव दातुं वुत्तं न होति. मूलायपटिकस्सितस्स पन पञ्चदिवसानि परिवसित्वा याचितस्स ¶ मानत्तचरणकाले आपन्नाय ततियाय अन्तरापत्तिया अप्पटिच्छन्नाय मानत्तदानं सन्धाय वुत्तं. एवञ्च दिन्नमानत्तस्स एकेन छारत्तेन पुब्बे दिन्नमानत्ताहि तीहि आपत्तीहि सह चतस्सन्नम्पि आपत्तीनं मानत्तं चिण्णमेव होति. इमिना पन नयेन अब्भानारहकाले आपन्नाय अन्तरापत्तिया, पक्खप्पटिच्छन्नवारे अन्तरापत्तीसु च पटिपज्जनं वेदितब्बं. ‘‘एकाहप्पटिच्छन्नादिवसेन पञ्चा’’ति इदं एकाहप्पटिच्छन्नादीनं चतुन्नं पच्चेकपरिवासदानमानत्तदानअब्भानानि एकेकं कत्वा वुत्तं. ‘‘अन्तरापत्तिवसेन चतस्सो’’ति इदम्पि मानत्तदानअब्भानानि तस्मिं तस्मिं मूलायपटिकस्सने एकत्तं आरोपेत्वा वुत्तं.

पटिच्छन्नपरिवासकथावण्णना निट्ठिता.

समोधानपरिवासकथावण्णना

१२५. ‘‘यस्मा पटिच्छन्ना अन्तरापत्ती’’ति इदं समोधानपरिवासदानस्स कारणवचनं, न पन चिण्णपरिवुत्थदिवसानं मक्खितभावस्स, अप्पटिच्छन्नाय अन्तरापत्तिया मूलायपटिकस्सने कतेपि तेसं मक्खितभावसम्भवतो. तस्मा ‘‘मानत्तचिण्णदिवसापि परिवुत्थदिवसापि सब्बे मक्खिताव होन्ती’’ति इमस्सानन्तरं ‘‘समोधानपरिवासो चस्स दातब्बो’’ति एवमेत्थ योजना कातब्बा. तेनाह ‘‘तेनेवा’’तिआदि.

समोधानपरिवासकथावण्णना निट्ठिता.

अग्घसमोधानपरिवासकथावण्णना

१३४. ‘‘एकापत्तिमूलकञ्चा’’ति इमिना ‘‘एका आपत्ति एकाहप्पटिच्छन्ना, एका आपत्ति द्वीहप्पटिच्छन्ना’’तिआदिनयं दस्सेति. अप्पटिच्छन्नभावं दस्सेतुन्ति अजाननादिना पटिच्छन्नायपि आपत्तिया मानत्तारहतावचनेन अप्पटिच्छन्नभावं दस्सेतुं. ‘‘एकस्स, आवुसो, मासस्स भिक्खु मानत्तारहो’’ति ¶ (चूळव. १५३) हि वुत्तं. एत्थ एकस्स अजाननपटिच्छन्नमासस्स ¶ परिवासारहो न होति, केवलं आपत्तिया अप्पटिच्छन्नत्ता मानत्तारहो होतीति अधिप्पायो. पाळियं मक्खधम्मोति मद्दितुकामता. सङ्घादिसेसानं परिवासदानादिसब्बविनिच्छयस्स समुच्चयत्ता पनेस समुच्चयक्खन्धकोति वुत्तोति वेदितब्बो.

अग्घसमोधानपरिवासकथावण्णना निट्ठिता.

समुच्चयक्खन्धकवण्णनानयो निट्ठितो.

४. समथक्खन्धको

सतिविनयकथादिवण्णना

१९५. समथक्खन्धके ¶ ¶ खीणासवस्स विपुलसतिं निस्साय दातब्बो विनयो चोदनादिअसारुप्पानं विनयनुपायो सतिविनयो.

१९६. चित्तविपरियासकतोति कतचित्तविपरियासो. गग्गं भिक्खुं…पे… चोदेन्तीति एत्थ पन उम्मत्तकस्स इदं उम्मत्तकं, अज्झाचिण्णं. तदेव चित्तविपरियासेन कतन्ति चित्तविपरियासकतं. तेन उम्मत्तकेन चित्तविपरियासकतेन अज्झाचिण्णेन अनाचारेन आपन्नाय आपत्तिया गग्गं भिक्खुं चोदेन्तीति एवमत्थो दट्ठब्बो. पठमं मूळ्हो हुत्वा पच्छा अमूळ्हभावं उपगतस्स दातब्बो विनयो अमूळ्हविनयो.

२०२. धम्मवादीनं येभुय्यभावसम्पादिका किरिया येभुय्यसिकाति इमस्मिं अत्थे स-कारागमसहितो इक-पच्चयन्तोयं सद्दोति दस्सेतुं आह ‘‘यस्सा’’तिआदि. तत्थ यस्सा किरियायाति गूळ्हकविवट्टकादिना सलाकग्गाहापककिरियाय. येभुय्यभावं निस्सितसमथकिरिया येभुय्यसिकाति एवं येभुय्यसिकासद्दस्स अत्थो गहेतब्बो. एवञ्हि अयं अधिकरणसमथो नाम होति. यथावुत्तसलाकग्गाहेन हि धम्मवादीनं येभुय्यभावे सिद्धे पच्छा तं येभुय्यभावं निस्सायेव अधिकरणवूपसमो होति, न धम्मवादीनं बहुतरभावसाधककिरियामत्तेन.

२०७. ‘‘सेसमेत्थ तज्जनीयादीसु वुत्तनयमेवा’’ति एतेन तज्जनीयादिसत्तकम्मानि विय इदम्पि तस्सपापियसिकाकम्मं असुचिभावादिदोसयुत्तस्स, सङ्घस्स च विनिच्छये अतिट्ठमानस्स कत्तब्बं विसुं एकं निग्गहकम्मन्ति दस्सेति. एतस्मिञ्हि निग्गहकम्मे कते सो पुग्गलो ‘‘अहं ¶ सुद्धो’’ति अत्तनो सुद्धिया साधनत्थं सङ्घमज्झं ओतरितुं, सङ्घो चस्स विनिच्छयं दातुं न लभति, तं कम्मकरणमत्तेनेव च तं अधिकरणं वूपसन्तं होति.

कथं पनेतं कम्मं पटिप्पस्सम्भतीति? केचि पनेत्थ ‘‘सो तथा निग्गहितो निग्गहितोव होति, ओसारणं न लभति. तेनेव पाळियं ¶ ओसारणा न वुत्ता’’ति वदन्ति. अञ्ञे पन ‘‘पाळियं न उपसम्पादेतब्बन्तिआदिना सम्मावत्तनस्स वुत्तत्ता सम्मावत्तित्वा लज्जिधम्मे ओक्कन्तस्स ओसारणा अवुत्तापि तज्जनीयादीसु विय नयतो कम्मवाचं योजेत्वा ओसारणा कातब्बा एवा’’ति वदन्ति, इदं युत्तं. तेनेव अट्ठकथायं वक्खति ‘‘सचे सीलवा भविस्सति, वत्तं परिपूरेत्वा पटिप्पस्सद्धिं लभिस्सति. नो चे, तथानासितकोव भविस्सती’’ति (चूळव. अट्ठ. २३८). तस्सपापियसिकाकम्मन्ति च अलुत्तसमासोयेव. तेनाह ‘‘इदं ही’’ति आदि.

सतिविनयकथादिवण्णना निट्ठिता.

अधिकरणकथावण्णना

२१५. विरूपतो विपरिणामट्ठेन चित्तं दुक्खं विपच्चतीति आह ‘‘चित्तदुक्खत्थं वोहारो’’तिआदि. उपवदनाति चोदना. तत्थेवाति अनुवदने.

आदितो पट्ठाय च तस्स तस्स कम्मस्स विञ्ञातत्ताति वित्थारतो आगतकम्मवग्गस्स आदितो पट्ठाय वण्णनामुखेन विञ्ञातत्ता विनिच्छयो भविस्सतीति योजना.

२१६. पाळियं अज्झत्तं वाति अत्तनि वा अत्तनो परिसाय वा. बहिद्धा वाति परस्मिं वा परस्स परिसाय वा. अनवस्सवायाति अनुप्पादाय.

२२०. ‘‘विवादाधिकरणं कुसलं अकुसलं अब्याकत’’न्ति इदं पुच्छावचनं. विवादाधिकरणं सिया कुसलन्तिआदि विसज्जनं. एस नयो सेसेसुपि.

२२२. सम्मुतिसभावायपि आपत्तिया कारणूपचारेन अकुसलाब्याकतभावेन वुच्चमाने कुसलस्सापि आपत्तिकारणत्ता तदुपचारेन ‘‘आपत्ताधिकरणं सिया कुसल’’न्ति वत्तब्बं भवेय्य ¶ , तथा ¶ अवत्वा ‘‘नत्थि आपत्ताधिकरणं कुसल’’न्ति एवंवचनस्स कारणं दस्सेतुं ‘‘एत्थ सन्धायभासितवसेन अत्थो वेदितब्बो’’ति वुत्तं. एत्थ चायमधिप्पायो – यदि हि आपत्ति नाम परमत्थधम्मसभावा भवेय्य, तदा ‘‘आपत्ताधिकरणं सिया अकुसल’’न्तिआदिवचनं युज्जेय्य. यस्मा दुट्ठदोससिक्खापदट्ठकथादीसु दस्सितदोसप्पसङ्गतो परमत्थसभआवता न युत्ता, एकन्तसम्मुतिसभावा एव सा होति, तस्मा ‘‘सिया अकुसलं सिया अब्याकत’’न्तिपि निप्परियायतो न वत्तब्बा. यदि पन अकुसलअब्याकतधम्मसमुट्ठितत्तमेव उपादाय परियायतो ‘‘सिया अकुसलं सिया अब्याकत’’न्ति वुत्तं. तदा कुसलधम्मसमउट्ठितत्तम्पि उपादाय परियायतो ‘‘आपत्ताधिकरणं सिया कुसल’’न्तिपि वत्तब्बं भवेय्य. यतो चेतं वचनं आपत्तिया अकुसलाब्याकतूपचारारहत्तस्स कुसलूपचारानारहत्तस्स विसुं कारणसब्भावं सन्धाय भासितं, तस्मा यं तं कारणविसेसं सन्धाय इदं भासितं, तस्स वसेनेवेत्थ अत्थो वेदितब्बो.

इदानि पन यो अङ्गप्पहोनकचित्तमेव सन्धाय आपत्तिया अकुसलादिभावो वुत्तो, नाञ्ञं विसेसकारणं सन्धायाति गण्हेय्य, तस्स गाहे दोसं दस्सेन्तो ‘‘यस्मिं ही’’तिआदिमाह. तत्थ पथवीखणनादिकेति पथवीखणनादिनिमित्ते पण्णत्तिवज्जे. आपत्ताधिकरणे कुसलचित्तं अङ्गन्ति पण्णत्तिं अजानित्वा कुसलचित्तेन चेतियङ्गणादीसु भूमिसोधनादिवसेन पथवीभूतगामविकोपनादिकाले कुसलचित्तं कारणं होति. तस्मिं सतीति तस्मिं आपत्ताधिकरणे विज्जमाने कुसलचित्तसमुट्ठितत्तेन कुसलवोहारारहाय आपत्तिया विज्जमानायाति अधिप्पायो. सारत्थदीपनियं (सारत्थ. टी. चूळवग्ग ३.२२२) पन ‘‘तस्मिं सती’’ति इमस्स ‘‘तस्मिं कुसलचित्ते आपत्तिभावेन गहिते’’ति अत्थो वुत्तो, तं न युज्जति ‘‘यस्मि’’न्ति य-सद्देन परामट्ठस्सेव आपत्ताधिकरणस्स ‘‘तस्मि’’न्ति परामसितब्बतो.

न सक्का वत्तुन्ति यदि सम्मुतिसभावायपि आपत्तिया अकुसलादिसमुट्ठितत्तेन अकुसलादिवोहारो करीयति, तदा कुसलवोहारोपि कत्तब्बोति ‘‘नत्थि आपत्ताधिकरणं कुसल’’न्ति न सक्का वत्तुं, अञ्ञथा अकुसलादिभावोपिस्स पटिक्खिपितब्बोति अधिप्पायो. तस्माति ¶ यस्मा कुसलादीनं तिण्णं समानेपि आपत्तिया अङ्गप्पहोनकत्ते कुसलवोहारोव आपत्तिया पटिक्खित्तो, न अकुसलादिवोहारो, तस्मा नयिदं अङ्गप्पहोनकं चित्तं सन्धाय वुत्तन्ति ‘‘आपत्ताधिकरणं सिया अकुसलं सिया अब्याकतं, नत्थि आपत्ताधिकरणं कुसल’’न्ति इदं आपत्तिया समुट्ठापकत्तेन अङ्गप्पहोनकं कारणभूतं चित्तमत्तं सन्धाय न वुत्तं ¶ , अञ्ञथा ‘‘आपत्ताधिकरणं सिया कुसल’’न्तिपि वत्तब्बतोति अधिप्पायो. एतेन आपत्तिया अकुसलादिभावोपि केनचि निमित्तेन परियायतोव वुत्तो, न परमत्थतोति दस्सेति. यथाह ‘‘यं कुसलचित्तेन आपज्जति, तं कुसलं, इतरेहि इतर’’न्ति.

इदं पनातिआदीसु अयं अधिप्पायो – ‘‘आपत्ताधिकरणं सिया अकुसलं सिया अब्याकत’’न्ति इदञ्हि यं किञ्चि कदाचि कत्थचि कारणं भवन्तं अनियतकारणं सन्धाय वुत्तं न होति. यं पन सब्बसिक्खापदेसु आपत्तिया कारणं भवितुमरहति, इदमेव कारणं सन्धाय वुत्तं. अकुसलञ्हि पण्णत्तिं ञत्वा वीतिक्कमन्तस्स सब्बापत्तिया कारणं होति, लोकवज्जापत्तिया पन पण्णत्तिं अजानन्तस्सपि कारणं होति. केवलं पण्णत्तिवज्जापत्तीसु कुसलाब्याकतचित्तपवत्तिक्खणे एव अकुसलं न वत्तति, तदञ्ञत्थ सयमेव पवत्तति. अब्याकतं पन कायवचीभूतं कुसलाकुसलादीनं पवत्तिक्खणे निरोधसमापन्नस्स सहसेय्यापत्तियन्ति सब्बापत्तिया अङ्गमेव होति छन्नं आपत्तिसमुट्ठानानं कायवाचङ्गविरहितत्ताभावा. तस्मा इमेसं अकुसलाब्याकतानं सब्बापत्तिमूलकत्तमेव सन्धाय इदं आपत्तिया अकुसलत्तं, अब्याकतत्तञ्च वुत्तं. यत्थ पन पथवीखणनादीसु कुसलम्पि आपत्तिया कारणं होति, तत्थापि आपत्तिया तदुपचारेन कुसलत्तवोहारो अयुत्तो सावज्जानवज्जानं एकत्तवोहारस्स विरुद्धत्ता. यदग्गेन अञ्ञमञ्ञं विरुद्धा, तदग्गेन कारणकारियवोहारोपि नेसं अयुत्तो. तस्मा तत्थ विज्जमानम्पि कुसलं अब्बोहारिकं, कायवचीद्वारमेव आवेणिकं कारणन्ति.

तत्थ एकन्ततो अकुसलमेवाति अकुसलचित्तेन समुट्ठहनतो कारणूपचारतो एवं वुत्तं. तत्थाति लोकवज्जे. विकप्पो नत्थीति सिया-सद्दस्स विकप्पनत्थतं दस्सेति. अकुसलं होतीति अकुसलसमुट्ठिताय कारणूपचारेन अकुसलं होति. सहसेय्यादिवसेन आपज्जनतो ¶ अब्याकतं होतीति इत्थियादीहि सह पिट्ठिपसारणवसप्पवत्तकायद्वारसङ्खातरूपाब्याकतवसेनेव आपज्जितब्बतो कारणूपचारेनेव आपत्ति अब्याकतं होति. तत्थाति तस्मिं पण्णत्तिवज्जापत्ताधिकरणे. सञ्चिच्चासञ्चिच्चवसेनाति पण्णत्तिं ञत्वा, अञ्ञत्वा च आपज्जनवसेन इमं विकप्पभावं सन्धाय अकुसलत्तअब्याकतत्तसङ्खातं यथावुत्तं इमं विकप्पसभावं सन्धाय इदं वचनं वुत्तं.

यदि एवं असञ्चिच्चापज्जनपक्खे कुसलेनापि आपज्जनतो तम्पि विकप्पं सन्धाय ‘‘आपत्ताधिकरणं सिया कुसल’’न्तिपि कस्मा न वुत्तन्ति आह ‘‘सचे पना’’तिआदि. ‘‘अचित्तकान’’न्ति ¶ वुत्तमेवत्थं समुट्ठानवसेन विभावेतुं ‘‘एळकलोमपदसोधम्मादिसमुट्ठानानम्पी’’ति वुत्तं. अचित्तकसमुट्ठानानं ‘‘कुसलचित्तं आपज्जेय्या’’ति एतेन सावज्जभूताय आपत्तिया कारणूपचारेनापि अनवज्जभूतकुसलवोहारो अयुत्तोति दस्सेति. ‘‘न च तत्था’’तिआदिना कुसलस्स आपत्तिया कारणत्तं विज्जमानम्पि तथा वोहरितुं अयुत्तन्ति पटिक्खिपित्वा कायवाचासङ्खातं अब्याकतस्सेव कारणत्तं दस्सेति. तत्थ चलितप्पवत्तानन्ति चलितानं, पवत्तानञ्च. चलितो हि कायो, पवत्ता वाचा. एत्थ च कायवाचानमञ्ञतरमेव अङ्गं. तञ्च…पे… अब्याकतन्ति एवं अब्याकतस्स आपत्तिकारणभावेनेव वुत्तत्ता. ‘‘आपत्ताधिकरणं सिया अकुसलं सिया अब्याकत’’न्ति इदं कारणूपचारेन परियायतो वुत्तं, न निप्परियायतोति सिज्झति.

यं पन सारत्थदीपनियं (सारत्थ. टी. चूळव. ३.२२२) आपत्तिया निप्परियायतोव अकुसलादिसभावतं समत्थेतुं बहुं पपञ्चितं, तं न सारतो पच्चेतब्बं दुट्ठदोससिक्खापदट्ठकथायमेव पटिक्खित्तत्ता. तेनेवेत्थापि ‘‘यं चित्तं आपत्तिया अङ्गं होती’’तिआदिना अकुसलचित्तस्सापि आपत्तिया कारणत्तेन भिन्नताव दस्सिता. यं पनेत्थ वत्तब्बं, तं हेट्ठा दस्सितमेवाति इध न वित्थारयिम्ह. एवं वीतिक्कमतो यो वीतिक्कमोति एत्थ अकुसलचित्तेन ञत्वा वीतिक्कमन्तस्स कायवचीवीतिक्कमसमुट्ठिता आपत्तिवीतिक्कमोति वुत्तो. एस नयो अब्याकतवारेपि.

अधिकरणकथावण्णना निट्ठिता.

अधिकरणवूपसमनसमथकथादिवण्णना

२२८. पाळियं ¶ विवादाधिकरणं एकं समथं अनागम्मातिआदि पुच्छा. सियातिआदि विस्सज्जनं. सियातिस्स वचनीयन्ति एतेनेव वूपसमं सियाति वत्तब्बं भवेय्याति अत्थो. सम्मुखाविनयस्मिन्ति सम्मुखाविनयत्तस्मिन्ति भावप्पधानो निद्देसो दट्ठब्बो. एवं सब्बवारेसु. ‘‘कारको उक्कोटेती’’ति इदं उपलक्खणमत्तं, यस्स कस्सचि उक्कोटेन्तस्स पाचित्तियमेव. उब्बाहिकाय खीयनके पाचित्तियं न वुत्तं तत्थ छन्ददानस्स नत्थिताय.

२३५. वण्णावण्णायो कत्वाति खुद्दकमहन्तेहि सञ्ञाणेहि युत्तायो कत्वा. तेनाह ‘‘निमित्तसञ्ञं आरोपेत्वा’’ति.

२४२. किच्चाधिकरणं ¶ …पे… सम्मतीति एत्थ सम्मुखाविनयेन अपलोकनादिकम्मं सम्पज्जतीति अत्थो दट्ठब्बो.

अधिकरणवूपसमनसमथकथादिवण्णना निट्ठिता.

समथक्खन्धकवण्णनानयो निट्ठितो.

५. खुद्दकवत्थुक्खन्धको

खुद्दकवत्थुकथावण्णना

२४३. खुद्दकवत्थुक्खन्धके ¶ ¶ अट्ठपदाकारेनाति जूतफलके अट्ठगब्भराजिआकारेन. मल्लकमूलसण्ठानेनाति खेळमल्लकमूलसण्ठानेन. इदञ्च वट्टाधारकं सन्धाय वुत्तं, कण्टके उट्ठापेत्वा कतवट्टकपालस्सेतं अधिवचनं.

२४४. पुथुपाणिकन्ति मुट्ठिं अकत्वा विकसितहत्थतलेहि पिट्ठिपरिकम्मं वुच्चति. एतमेव सन्धाय ‘‘हत्थपरिकम्म’’न्ति वुत्तं.

२४५. मुत्तोलम्बकादीनन्ति आदि-सद्देन कुण्डलादिं सङ्गण्हाति. पलम्बकसुत्तन्ति ब्राह्मणानं यञ्ञोपचितसुत्तादिआकारं वुच्चति. वलयन्ति हत्थपादवलयं.

२४६. द्वङ्गुलेति उपयोगबहुवचनं, द्वङ्गुलप्पमाणं अतिक्कामेतुं न वट्टतीति अत्थो. एत्थ च दुमासस्स वा द्वङ्गुलस्स वा अतिक्कन्तभावं अजानन्तस्सापि केसमस्सुगणनाय अचित्तकापत्तियो होन्तीति वदन्ति.

कोच्छेनाति उसीरतिणादीनि बन्धित्वा समं छिन्दित्वा गहितकोच्छेन. चिक्कलेनाति सिलेसयुत्ततेलेन. उण्हाभितत्तरजसिरानम्पीति उण्हाभितत्तानं रजोकिण्णसिरानं. अद्दहत्थेनाति अल्लहत्थेन.

२४८-९. साधुगीतन्ति अनिच्चतादिपटिसञ्ञुत्तं गीतं. चतुरस्सेन वत्तेनाति परिपुण्णेन उच्चारणवत्तेन. तरङ्गवत्तादीनं सब्बेसम्पि सामञ्ञलक्खणं दस्सेतुं ‘‘सब्बेसं…पे… लक्खण’’न्ति ¶ वुत्तं. यत्तकाहि मत्ताहि अक्खरं परिपुण्णं होति, ततोपि अधिकमत्तायुत्तं कत्वा कथनं विकारकथनं नाम, तथा अकत्वा कथनमेव लक्खणन्ति अत्थो. बाहिरलोमिन्ति भावनपुंसकनिद्देसो, यथा बहिद्धा लोमानि दिस्सन्ति, एवं धारेन्तस्स दुक्कटन्ति अत्थो.

२५०. पाळियं ¶ तरुणञ्ञेव अम्बन्ति तरुणं असञ्जातबीजं एव अम्बफलं. पातापेत्वाति छिन्दापेत्वाव. ‘‘मत्तावण्णिता’’ति इदं ‘‘परे निन्दन्ती’’ति सासनहितेसिताय वुत्तं. न परियापुणिंसूति नासिक्खिंसु.

२५१. चत्तारि अहिराजकुलानीति सब्बेसं अहिभेदानं चतूसु एव सङ्गहतो वुत्तं. अत्तपरित्तं कातुन्ति अत्तनो परित्ताणं कातुं.

विरूपक्खेहि मे मेत्तन्ति विरूपक्खजातिकेहि नागेहि सह मय्हं मित्तभावो होतु, मेत्ता होतूति अत्थो, ते सुखिता निद्दुक्खा अवेरा होन्तूति अधिप्पायो. एवञ्हि मेत्ताफरणं होति. सेसेसुपि एसेव नयो. अपादकेहीति अहिकुलेहि सह सब्बसत्तेसु ओधिसो मेत्ताफरणदस्सनं. मा मं अपादको हिंसीति ताय मेत्ताय अत्तरक्खाविधानदस्सनं.

सब्बे सत्तातिआदि अत्तानं उपमं कत्वा सब्बसत्तेसु अनोधिसो मेत्ताफरणदस्सनं. तत्थ मा कञ्चि पापमागमाति कञ्चि सत्तं लामकं दुक्खहेतु, दुक्खञ्च मा आगच्छतु.

एवं मेत्ताय अत्तगुत्तिं दस्सेत्वा इदानि रतनत्तयानुस्सरणेन दस्सेतुं ‘‘अप्पमाणो’’तिआदि वुत्तं. तत्थ पमाणकरधम्मा अकुसला, तब्बिपाका च पमाणा, तप्पटिपक्खा सीलादयो गुणा, तब्बिपाका च लोकियलोकुत्तरफलानि अप्पमाणा, ते अस्स अत्थीति अप्पमाणो, अप्पमाणा वा अपरिमेय्यगुणा अस्सातिपि अप्पमाणो. पमाणवन्तानीति यथावुत्तपमाणकरधम्मयुत्तानि. अहिविच्छिकाति सरीसपानञ्ञेव पभेददस्सनं. उण्णनाभीति लोमसनाभिको मक्कटो. सरबूति घरगोळिका.

पटिक्कमन्तूति अपगच्छन्तु, मा मं विहेसयिंसूति अत्थो. सोहं नमोति एत्थ ‘‘करोमी’’ति पाठसेसो. यस्मा मया मेत्तादीहि तुम्हाकञ्च मय्हञ्च रक्खा कता, यस्मा च सोहं भगवतो नमो करोमि, विपस्सीआदीनं सत्तन्नम्पि नमो करोमि, तस्मा पटिक्कमन्तु भूतानीति योजना.

अञ्ञम्हीति ¶ कामरागे असुभमनसिकारादिना छेतब्बेति अत्थो. अङ्गजातन्ति बीजविरहितं पुरिसनिमित्तं. बीजे हि छिन्ने ओपक्कमिकपण्डको नाम अभब्बो होतीति वदन्ति. एके पन ‘‘बीजस्सापि छेदनक्खणे ¶ दुक्कटापत्ति एव कमेन पुरिसिन्द्रियादिके अन्तरहिते पण्डको नाम अभब्बो होति, तदा लिङ्गनासनाय नासेतब्बो’’ति वदन्ति. तादिसं वा दुक्खं उप्पादेन्तस्साति मुट्ठिप्पहारादीहि अत्तनो दुक्खं उप्पादेन्तस्स.

२५२. पाळियं तुय्हेसो पत्तोति ‘‘यो च अरहा चेव इद्धिमा च, तस्स दिन्नमेवा’’ति सेट्ठिना वुत्तं, तं सन्धाय वदति. तं पत्तं गहेत्वा तिक्खत्तुं राजगहं अनुपरियायीति एत्थ वेळुपरम्पराय बद्धपत्तस्स उपरिभागे आकासे नगरं तिक्खत्तुं अनुपरियायित्वा ठितभावं सन्धाय ‘‘पत्तं गहेत्वा’’ति वुत्तं, न पन थेरो हत्थेन पत्तं सयमेव अग्गहेसि. केचि पन वदन्ति ‘‘इद्धिबलेन तं पत्तं वेळुपरम्परतो मुञ्चित्वा थेरं अनुबन्धमानो अट्ठासि, सो च अनेन हत्थेन गहितो विय अहोसी’’ति. तथा ठितमेव पन सन्धाय ‘‘भारद्वाजस्स हत्थतो पत्तं गहेत्वा’’ति वुत्तं. ते च मनुस्सा…पे… अनुबन्धिंसूति ये च मनुस्सा पठमं पाटिहारियं नाद्दसंसु, ते अम्हाकम्पि पाटिहारियं दस्सेहीति थेरमनुबन्धिंसु. थेरो च सीहब्यग्घादिरूपं गहेत्वा विकुब्बनिद्धिं दस्सेति, ते च अच्छरियब्भुतजाता उच्चासद्दा महासद्दा अहेसुं. तेनाह ‘‘किं नु खो सो, आनन्द, उच्चासद्दो महासद्दो’’ति. इद्धिपाटिहारियं न दस्सेतब्बन्ति एत्थ ‘‘यो पकतिवण्णं विजहित्वा कुमारवण्णं वा दस्सेति, नागवण्णं वा…पे… विविधम्पि सेनाब्यूहं दस्सेती’’ति (पटि. म. ३.१३) एवमागता अत्तनो सरीरस्स विकारापादनवसप्पवत्ता विकुब्बनिद्धि अधिप्पेताति आह ‘‘अधिट्ठानिद्धि पन अप्पटिक्खित्ता’’ति. पकतिया एको बहुकं आवज्जति, सतं वा सहस्सं वा सतसहस्सं वा आवज्जेत्वा ञाणेन अधिट्ठाति ‘‘बहुको होमी’’ति (पटि. म. ३.१०) एवं दस्सिता अधिट्ठानवसेन निप्फन्ना अधिट्ठानिद्धि नाम. गिहिविकटानीति गिहिसन्तकानि.

२५३. पाळियं न अच्छुपियन्तीति न फुसितानि होन्ति. रूपकाकिण्णानीति इत्थिरूपादीहि आकिण्णानि.

२५४. भूमिआधारकेति दन्तादीहि कते वलयाधारके. एतस्स वलयाधारकस्स अनुच्चताय ठपिता पत्ता न परिपतन्तीति ‘‘तयो पत्ते ¶ ठपेतुं वट्टती’’ति वुत्तं. अनुच्चतञ्हि सन्धाय अयं ‘‘भूमिआधारको’’ति वुत्तो. दारुआधारकदण्डाधारकेसूति एकदारुना ¶ कतआधारके, बहूहि दण्डेहि कतआधारके च. एते च उच्चतरा होन्ति पत्तेहि सह पतनसभावा. तेन ‘‘सुसज्जितेसू’’ति वुत्तं. भमकोटिसदिसोति यत्थ धमकरणादिं पवेसेत्वा लिखन्ति, तस्स भमकस्स कोटिया सदिसो. तादिसस्स दारुआधारकस्स अवित्थिण्णताय ठपितोपि पत्तो पततीति ‘‘अनोकासो’’ति वुत्तो.

आलिन्दकमिड्ढिकादीनन्ति पमुखमिड्ढिकादीनं, उच्चवत्थुकानन्ति अत्थो. बाहिरपस्सेति पासादादीनं बहिकुट्टे. तनुकमिड्ढिकायाति वेदिकाय. सब्बत्थ पन हत्थप्पमाणतो अब्भन्तरे ठपेतुं वट्टति. आधारे पन ततो बहिपि वट्टति.

पाळियं ओट्ठोति मुखवट्टि. पत्तमाळकन्ति उपचिकानं अनुट्ठहनत्थाय भूमितो उच्चतरं कतं वेदिकाकारमाळकं. महामुखकुण्डसण्ठानाति महामुखचाटिसण्ठाना. लग्गेन्तस्स दुक्कटन्ति केवलं पत्तं लग्गेन्तस्स, न थविकाय लग्गेन्तस्साति वदन्ति. वीमंसितब्बं. अञ्ञेन पन भण्डकेनाति अञ्ञेन भारबन्धनेन भण्डकेन. ‘‘बन्धित्वा ओलम्बेतु’’न्ति वुत्तत्ता पत्तत्थविकाय अंसबद्धको यथा लग्गितट्ठानतो न परिगळति, तथा सब्बथापि बन्धित्वा ठपेतुं वट्टति. बन्धित्वापि उपरि ठपेतुं न वट्टतीति उपरि निसीदन्ता ओत्थरित्वा भिन्दन्तीति वुत्तं. तत्थ ठपेतुं वट्टतीति निसीदनसङ्काभावतो वुत्तं. बन्धित्वा वाति बन्धित्वा ठपितछत्ते वा. यो कोचीति भत्तपूरोपि तुच्छपत्तोपि.

२५५. परिहरितुन्ति दिवसे दिवसे पिण्डाय चरणत्थाय ठपेतुं. पत्तं अलभन्तेन पन एकदिवसं पिण्डाय चरित्वा भुञ्जित्वा छड्डेतुं वट्टति. तेनाह ‘‘तावकालिकं परिभुञ्जितुं वट्टती’’ति. पण्णपुटादीसुपि एसेव नयो. अभुं मेति अभूति मय्हं, विनासो मय्हन्ति अत्थो. पाळियं पिसाचो वतमन्ति पिसाचो वतायं, अयमेव वा पाठो. पिसाचिल्लिकाति पिसाचदारका. छवसीसस्स पत्तोति छवसीसमयो पत्तो. पकतिविकारसम्बन्धे चेतं सामिवचनं.

चब्बेत्वाति ¶ निट्ठुभित्वा. ‘‘पटिग्गहं कत्वा’’ति वुत्तत्ता उच्छिट्ठहत्थेन उदकं गहेत्वा पत्तं परिप्फोसित्वा धोवनघंसनवसेन हत्थं धोवितुं वट्टति, एत्तकेन पत्तं पटिग्गहं कत्वा हत्थो धोवितो नाम न होति. एकं उदकगण्डुसं गहेत्वाति पत्तं अफुसित्वा तत्थ उदकमेव उच्छिट्ठहत्थेन उक्खिपित्वा गण्डुसं कत्वा, वामहत्थेनेव वा पत्तं उक्खिपित्वा मुखेन गण्डुसं गहेतुम्पि वट्टति. बहि उदकेन विक्खालेत्वाति द्वीसु अङ्गुलीसु आमिसमत्तं विक्खालेत्वा बहि गहेतुम्पि वट्टति. पटिखादितुकामोति एत्थ न सयं खादितुकामोपि अञ्ञेसं खादनारहं ठपेतुं लभति ¶ . तत्थेव कत्वाति पत्तेयेव यथाठपितट्ठानतो अनुद्धरित्वा. लुञ्चित्वाति ततो मंसमेव निरवसेसं उप्पट्टेत्वा.

२५६. किण्णचुण्णेनाति सुराकिण्णचुण्णेन. मक्खेतुन्ति सूचिं मक्खेतुं. निस्सेणिम्पीति चतूहि दण्डेहि चीवरप्पमाणेन आयतचतुरस्सं कत्वा बद्धपटलम्पि. एत्थ हि चीवरकोटियो समकं बन्धित्वा चीवरं यथासुखं सिब्बन्ति. तत्थ अत्थरितब्बन्ति तस्सा निस्सेणिया उपरि चीवरस्स उपत्थम्भनत्थाय अत्थरितब्बं. कथिनसङ्खाताय निस्सेणिया चीवरस्स बन्धनकरज्जु कथिनरज्जूति मज्झिमपदलोपीसमासोति आह ‘‘याया’’तिआदि. तत्थ यस्मा द्विन्नं पटलानं एकस्मिं अधिके जाते तत्थ वलियो होन्ति, तस्मा दुपट्टचीवरस्स पटलद्वयम्पि समकं कत्वा बन्धनकरज्जु कथिनरज्जूति वेदितब्बं.

पाळियं कथिनस्स अन्तो जीरतीति कथिने बद्धस्स चीवरस्स परियन्तो जीरति. कथिननिस्सितञ्हि चीवरं इध निस्सयवोहारेन ‘‘कथिन’’न्ति वुत्तं ‘‘मञ्चा घोसन्ती’’तिआदीसु विय. अनुवातं परिभण्डन्ति कथिने बन्धनरज्जूहि चीवरस्स समन्ता परियन्तस्स अजीरणत्थं येहि केहिचि चोळकेहि दीघतो अनुवातं, तिरियतो परिभण्डञ्च सिब्बित्वा कातुं यत्थ रज्जुके पवेसेत्वा दण्डेसु पलिवेठेत्वा चीवरसमकं आकड्ढितुं सक्का, तादिसन्ति अत्थो. केचि पन ‘‘कथिनसङ्खातेसु किलञ्जादीसु एव अजीरणत्थाय अनुवातपरिभण्डकरणं अनुञ्ञात’’न्ति वदन्ति. तस्स मज्झेति पुराणकथिनस्सेव अन्तो. भिक्खुनो पमाणेनाति भिक्खुनो चीवरस्स पमाणेन. अञ्ञं निस्सेणिन्ति दीघतो च तिरियतो च अञ्ञं दण्डं ठपेत्वा बन्धितुं.

बिदलकन्ति ¶ दिगुणकरणसङ्खातकिरियाविसेसस्स अधिवचनं. तेनाह ‘‘दुगुणकरण’’न्ति. पवेसनसलाकन्ति वलीनं अग्गहणत्थाय पवेसनकवेळुसलाकादि. पाळियं पटिग्गहन्ति अङ्गुलिकञ्चुकं.

२५७. पाति नाम भण्डट्ठपनको भाजनविसेसो. पाळियं पटिग्गहथविकन्ति पातिआदिभाजनत्थविकं. चिनितुन्ति उच्चवत्थुपरियन्तस्स अपतनत्थाय इट्ठकादीहि चिनितुं. आलम्बनबाहन्ति आलम्बनरज्जुदण्डादि. परिभिज्जतीति कटसारादिकं कथिनमज्झे भङ्गं होति. उस्सापेत्वाति दण्डकथिनं सन्धाय वुत्तं.

२५८-९. उदकं ¶ अकप्पियन्ति सप्पाणकं. उपनन्धीति वेरं बन्धि. अद्धानमग्गो पटिपज्जितब्बोति एत्थ अद्धयोजनं अद्धानमग्गो नाम, तं पटिपज्जितुकामस्स सञ्चिच्च विहारूपचारातिक्कमने आपत्ति. असञ्चिच्च गतस्स पन यत्थ सरति, तत्थ ठत्वा सङ्घाटिकण्णादिं अनधिट्ठहित्वा गमने पदवारेन आपत्तीति वेदितब्बं. न सम्मतीति न पहोति.

२६०. अभिसन्नकायाति सेम्हादिदोससन्निचितकाया. तत्थ मज्झेति अग्गळपासकस्स मज्झे. उपरीति अग्गळपासकस्स उपरिभागे. उदकट्ठपनट्ठानन्ति उदकट्ठपनत्थाय परिच्छिन्दित्वा कतट्ठानं.

२६१. पाळियं उदपानन्ति कूपं. नीचवत्थुकोति कूपस्स समन्ता कूलट्ठानं, भूमिसमं तिट्ठतीति अत्थो. उदकेन ओत्थरिय्यतीति समन्ता वस्सोदकं आगन्त्वा कूपे पततीति अत्थो.

२६२. वाहेन्तीति उस्सिञ्चन्ति. अरहटघटियन्तं नाम चक्कसण्ठानं अनेकारं अरे अरे घटिकानि बन्धित्वा एकेन, द्वीहि वा परिब्भमियमानयन्तं.

२६३. आविद्धपक्खपासकन्ति कण्णिकमण्डलस्स समन्ता ठपितपक्खपासकं. मण्डलेति कण्णिकमण्डले. पक्खपासके ठपेत्वाति समन्ता चतुरस्साकारेन फलकादीनि ठपेत्वा.

२६४. नमतकं ¶ नाम सन्थतसदिसन्ति केचि वदन्ति. केचि पन ‘‘रुक्खतचमय’’न्ति. चम्मखण्डपरिहारेनाति अनधिट्ठहित्वा सयनासनविधिनाति अत्थो. पेळायाति अट्ठंससोळसंसादिआकारेन कताय भाजनाकाराय पेळाय. यत्थ उण्हपायासादिं पक्खिपित्वा उपरि भोजनपातिं ठपेन्ति भत्तस्स उण्हभावाविगमनत्थं, तादिसस्स भाजनाकारस्स आधारस्सेतं अधिवचनं. तेनेव पाळियं ‘‘आसित्तकूपधान’’न्ति वुत्तं. तस्स च पायासादीहि आसित्तकाधारोति अत्थो. इदञ्च आसित्तकूपधानं पच्चन्तेसु न जानन्ति कातुं, मज्झिमदेसेयेव करोन्ति. केचि पन ‘‘गिहिपरिभोगो अयोमयादि सब्बोपि आधारो आसित्तकूपधानमेव अनुलोमेती’’ति वदन्ति, एके पन ‘‘कप्पियलोहमयो आधारो मळोरिकमेव अनुलोमेती’’ति. वीमंसित्वा गहेतब्बं. पुब्बे पत्तगुत्तिया आधारो अनुञ्ञातो. इदानि भुञ्जितुं मळोरिका अनुञ्ञाता. छिद्दन्ति छिद्दयुत्तं. विद्धन्ति अन्तोविनिविद्धछिद्दं. आविद्धन्ति समन्ततो छिद्दं.

२६५. पत्तं निक्कुज्जितुन्ति एत्थ कम्मवाचाय असम्भोगकरणवसेनेव निक्कुज्जनं, न पत्तानं ¶ अधोमुखट्ठपनेन. तेनाह ‘‘असम्भोगं सङ्घेन करोतू’’तिआदि, तं वड्ढं कम्मवाचाय सङ्घेन सद्धिं असम्भोगं सङ्घो करोतूति अत्थो.

पत्तं निक्कुज्जेय्याति वड्ढस्स पत्तनिक्कुज्जनदण्डकम्मं करेय्य. असम्भोगं सङ्घेन करणन्ति सङ्घेन वड्ढस्स असम्भोगकरणं. यथा असम्भोगो होति, तथा करणन्ति अत्थो. निक्कुज्जितो…पे… असम्भोगं सङ्घेनाति एत्थ सङ्घेन असम्भोगो होतीति अत्थो दट्ठब्बो. एवं भगवता असम्भोगकरणस्स आणत्तत्ता, कम्मवाचाय च सावितत्ता, अट्ठकथायञ्च ‘‘कोचि देय्यधम्मो न गहेतब्बो’’ति वुत्तत्ता पत्ते निक्कुज्जिते तस्स सन्तकं ञत्वा गण्हन्तस्स दुक्कटमेवाति गहेतब्बं.

अच्चयोति ञायप्पटिपत्तिं अतिक्कमित्वा पवत्ति, अपराधोति अत्थो. मं अच्चगमाति मं अतिक्कम्म पवत्तो. तं ते मयं पटिग्गण्हामाति तं ते अपराधं मयं खमाम. भिक्खूनं अलाभाय परिसक्कतीतिआदीसु अलाभाय ¶ परिसक्कनादितो विरतोति एवमत्थो गहेतब्बो. असम्भोगं भिक्खुसङ्घेनाति एत्थ ‘‘कतो’’ति पाठसेसो.

२६८. याव पच्छिमा सोपानकळेवराति पठमसोपानफलकं सन्धाय वुत्तं. तञ्हि पच्छा दुस्सेन सन्थतत्ता एव वुत्तं. ‘‘पच्छिमं जनतं तथागतो अनुकम्पती’’ति इदं थेरो अनागते भिक्खूनं चेलपटिकस्स अक्कमनपच्चया अपवादं सिक्खापदपञ्ञत्तिया निवारणेन भगवतो अनुकम्पं सन्धायाह. अपगतगब्भाति विजातपुत्ता. तेनाह ‘‘मङ्गलत्थाया’’ति.

२६९-२७०. बीजनिन्ति चतुरस्सबीजनिं. एकपण्णच्छत्तन्ति तालपण्णादिना एकेन पत्तेन कतछत्तं.

२७४-५. अनुरक्खणत्थन्ति परिग्गहेत्वा गोपनत्थं. दीघं कारेन्तीति केसेहि सद्धिं अच्छिन्दित्वा ठपापेन्ति. चतुकोणन्ति यथा उपरि नलाटन्तेसु द्वे, हेट्ठा हनुकपस्से द्वेति चत्तारो कोणा पञ्ञायन्ति, एवं चतुरस्सं कत्वा कप्पापनं. पाळियं दाठिकं ठपापेन्तीति उत्तरोट्ठे मस्सुं अच्छिन्दित्वा ठपापेन्ति. रुधीति खुद्दकवणं.

२७७. पाळियं लोहभण्डकंसभण्डसन्निचयोति लोहभण्डस्स, कंसभण्डस्स च सन्निचयोति ¶ अत्थो. बन्धनमत्तन्ति वासिदण्डादीनं कोटीसु अपातनत्थं लोहेहि बन्धनं. तन्तकन्ति आयोगवायनत्थं तदाकारेन पसारिततन्तं.

२७८. ‘‘यत्थ सरति, तत्थ बन्धितब्ब’’न्ति एतेन असञ्चिच्च कायबन्धनं अबन्धित्वा पविट्ठस्स अनापत्तीति दस्सेति. मुरजवट्टिसण्ठानं वेठेत्वा कतन्ति एवं बहुरज्जुके एकतो कत्वा नानावण्णेहि सुत्तेहि कतन्ति केचि वदन्ति. एकवण्णसुत्तेनापि वलयघटकादिविकारं दस्सेत्वा वेठितम्पि मुरजमेव. विकारं पन अदस्सेत्वा मट्ठं कत्वा निरन्तरं वेठितं वट्टति. तेनेव दुतियपाराजिकसंवण्णनायं वुत्तं ‘‘बहुरज्जुके एकतो कत्वा एकेन निरन्तरं वेठेत्वा कतं ‘बहुरज्जुक’न्ति न वत्तब्बं, वट्टती’’ति. मुद्दिककायबन्धनं नाम चतुरस्सं अकत्वा ¶ सज्जितं. पामङ्गदसा चतुरस्सा. मुदिङ्गसण्ठानेनाति वरकसीसाकारेन. पासन्तोति दसापरियोसानं.

२७९. पाळियं गण्ठिकफलकं पासकफलकन्ति एत्थ दारुदन्तादिमयेसु फलकेसु गण्ठिकपासकानि अप्पेत्वा चीवरे ठपेतुं अनुञ्ञातं. कोट्टो विवरियतीति अनुवातो विवरियति.

२८०-१. पाळिकारकोति भिक्खूनं यथावुड्ढं पाळिया पतिट्ठापको. तस्सापि तथा पारुपितुं न वट्टति. पाळियं मुण्डवट्टीति मल्लादयो.

२८२. पमाणङ्गुलेनाति वड्ढकीअङ्गुलेन. केचि पन ‘‘पकतिअङ्गुलेना’’ति वदन्ति, तं चतुरङ्गुलपच्छिमकवचनेन न समेति. न हि पकतङ्गुलेन चतुरङ्गुलप्पमाणं दन्तकट्ठं कण्ठे अविलग्गं खादितुं सकाति.

२८५. पाळियं सकाय निरुत्तिया बुद्धवचनं दूसेन्तीति मागधभासाय सब्बेसं वत्तुं सुकरताय हीनजच्चापि उग्गण्हन्ता दूसेन्तीति अत्थो.

२८९. मा भिक्खू ब्याबाधयिंसूति लसुणगन्धेन भिक्खू मा बाधयिंसु.

२९१. अवलेखनपीठरोति ¶ अवलेखनकट्ठानं ठपनभाजनविसेसो. अपिधानन्ति पिधानफलकादि.

खुद्दकवत्थुकथावण्णना निट्ठिता.

खुद्दकवत्थुक्खन्धकवण्णनानयो निट्ठितो.

६. सेनासनक्खन्धको

विहारानुजाननकथावण्णना

२९५. सेनासनक्खन्धके ¶ ¶ सिसिरेति सिसिरकाले हिमपातवसेन सत्ताहवद्दलिकादिवस्सपातवस्सेन च उप्पन्नो खरो सीतसम्फस्सो अधिप्पेतोति आह ‘‘सम्फुसितको’’ति. ‘‘ततो’’ति इदं कत्तुअत्थे निस्सक्कवचनं, तेन च विहारेन वातातपो पटिहञ्ञतीति अत्थोति आह ‘‘विहारेन पटिहञ्ञती’’ति.

२९६. आविञ्छनछिद्दन्ति यत्थ अङ्गुलिं वा रज्जुसङ्खलिकादिं वा पवेसेत्वा कवाटं आकड्ढन्ता द्वारबाहं फुसापेन्ति, तस्सेतं अधिवचनं. सेनासनपरिभोगे अकप्पियं नाम नत्थीति दस्सनत्थं ‘‘सचेपि दीपिनङ्गुट्ठेना’’तिआदि वुत्तं. चेतिये वेदिकासदिसन्ति वातपानदारुं वा जालं वा अट्ठपेत्वा दारुट्ठाने चेतिये वेदिकाय पट्टादीनि विय इट्ठकादीहि उद्धं, तिरियञ्च पट्टिकादयो दस्सेत्वा चतुछिद्दयुत्तं कतं. थम्भकवातपानं नाम तिरियं दारूनि अदत्वा उद्धं ठपितदारूहि एव कतं. चोळकपादपुञ्छनं बन्धितुन्ति वातपानप्पमाणेन पादपुञ्छनसदिसं चोळकादिना बन्धित्वा वग्गुलिआदिप्पवेसननिवारणत्थं, कथेतुन्ति अत्थो. मिड्ढकन्ति मञ्चाकारेन कट्ठमत्तिकादीहि कतवेदिकाकारं.

२९७. चतुरस्सपीठन्ति समचतुरस्सं. अट्ठङ्गुलपादकं वट्टतीति अट्ठङ्गुलपादकमेव वट्टति. पमाणातिक्कन्तोपि वट्टतीति समचतुरस्समेव सन्धाय वुत्तं. आयतचतुरस्सा पन सत्तङ्गपञ्चङ्गापि उच्चपादा न वट्टन्ति. वेत्तेहेव चतुरस्सादिआकारेन कतं भद्दपीठन्ति आह ‘‘वेत्तमयं पीठ’’न्ति. दारुपट्टिकाय उपरीति अटनिआकारेन ठितदारुपटलस्स हेट्ठा उद्धं पादं कत्वा. पवेसनकालञ्हि सन्धाय ‘‘उपरी’’ति वुत्तं. एळकस्स पच्छिमपादद्वयं विय वङ्काकारेन ठितत्ता पनेतं ‘‘एळकपादपीठ’’न्ति वुत्तं. पलोठेन्तीति सह मञ्चेहि पवट्टेन्ति. रुक्खे ¶ , लता च मुञ्चित्वा अवसेसं गच्छादिकं सब्बम्पि तिणजाति एवाति आह ‘‘येसं केसञ्चि तिणजातिकान’’न्तिआदि.

उपदहन्तीति ¶ ठपेन्ति. सीसप्पमाणं नाम यत्थ गीवाय सह सकलं सीसं ठपेतुं सक्का, तस्स च मुट्ठिरतनं वित्थारप्पमाणन्ति दस्सेन्तो ‘‘वित्थारतो’’तिआदिमाह. इदञ्च बिम्बोहनस्स उभोसु अन्तेसु ठपेतब्बचोळप्पमाणदस्सनं. तस्स वसेन बिम्बोहनस्स वित्थारप्पमाणं परिच्छिज्जति, तं वट्टं वा चतुरस्सं वा कत्वा सिब्बितं यथा कोटितो कोटि वित्थारतो पुथुलट्ठानं मुट्ठिरतनप्पमाणं होति, एवं सिब्बितब्बं. इतो अधिकं न वट्टति, तं पन अन्तेसु ठपितचोळं कोटिया कोटिं आहच्च दिगुणं कतं तिकण्णं होति. तेसु तीसु कण्णेसु द्विन्नं कण्णानमन्तरं विदत्थिचतुरङ्गुलं होति, मज्झट्ठानं कोटितो कोटिं आहच्च मुट्ठिरतनं होति, इदमस्स उक्कट्ठप्पमाणं. तेनाह ‘‘तीसु कण्णेसू’’तिआदि.

‘‘कम्बलमेव…पे… उण्णभिसिसङ्ख्यमेव गच्छती’’ति सामञ्ञतो वुत्तत्ता गोनकादिअकप्पियम्पि उण्णमयत्थरणं भिसियं पक्खिपित्वा सयितुं वट्टतीति दट्ठब्बं.

मसूरकेति चम्ममयभिसियं. चम्ममयं पन बिम्बोहनं तूलपुण्णम्पि न वट्टति. पाळियं सेनासनपरिक्खारदुस्सन्ति सेनासनपरिक्खारकरणत्थाय दुस्सं. भिसिं ओनन्धितुन्ति भिसित्थविकाय पक्खिपित्वा बन्धितुं. परिभिज्जतीति मञ्चादितो सारियमाना पीठकोटिआदीसु निसीदन्तेहि घंसियमाना भिसि परिभिज्जति. ओनद्धमञ्चन्ति भिसिं एकाबद्धं कत्वा बद्धमञ्चं. पाळियं छविं उप्पाटेत्वा हरन्तीति भिसिच्छविं चोरा हरन्ति. फोसितुन्ति चोरेहि हरितस्स पच्छा हरितसञ्ञाणफुसितबिन्दूनि दातुं. भित्तिकम्मन्ति नानावण्णेहि विभित्तिराजिकरणं. हत्थकम्मन्ति हत्थेन यं किञ्चि सञ्ञाकरणं.

२९८. पाळियं न निपततीति न अल्लीयति. पटिबाहेत्वाति घंसित्वा. न निबन्धतीति अनिबन्धनीयो, न लग्गनकोति अत्थो.

२९९. ‘‘करोही’’ति वत्तुम्पि न लब्भतीति आणत्तिया एव पटिक्खित्तत्ता द्वारपालं ‘‘किं न करोसी’’तिआदिना परियायेन वत्तुं वट्टति. जातकपकरणन्ति जातकपटिसंयुत्तं इत्थिपुरिसादि यं किञ्चि रूपं अधिप्पेतं. ‘‘परेहि कारापेतु’’न्ति वुत्तत्ता बुद्धरूपम्पि सयं कातुं न लभति. पाळियं पञ्चपटिकन्ति जातिआदिपञ्चप्पकारवण्णमट्ठं.

३००. उपचारो ¶ ¶ न होतीति गब्भस्स बहि समन्ता अनुपरिगमनस्स ओकासो नप्पहोति. रुक्खं विज्झित्वाति तच्छितसारदारुं अग्गसमीपे विज्झित्वा. कत्वाति छिद्दे कत्वा. कप्पकतं विय सारखाणुके आकोटेत्वा एवं कतमेव ‘‘आहरिमं भित्तिपाद’’न्ति वुत्तं. उपत्थम्भनत्थं भूमियं पतिट्ठापेतुन्ति जिण्णभित्तिपादेन बहि समानभारं खाणुकप्पसीसेन उस्सापेत्वा मूलेन भूमियं पतिट्ठापेतुं. परित्ताणत्थन्ति उल्लित्तावलित्तकुटिया ओवस्सनट्ठानस्स परित्ताणत्थं. किटिकन्ति तालपण्णादीहि कतपदलं. मद्दितमत्तिकन्ति ओवस्सनछिद्दस्स पिदहनत्थं वुत्तं.

उभतोकुट्टं नीहरित्वा कतपदेसस्साति यथा बहि ठिता उजुकं अन्तो निसिन्ने न पस्सन्ति, एवं द्वाराभिमुखं पिदहनवसेन भित्तिञ्च अञ्ञतो द्वारञ्च योजेत्वा कतट्ठानं वदति. समन्ता परियागारोति समन्ततो आविद्धपमुखं. वंसं दत्वाति पुरिसप्पमाणे पादे निखणित्वा तेसं उपरि पिट्ठिवंससदिसं पस्सवंसं ठपेत्वा ओसारेत्वा. एकं दण्डकोटिं अतिउच्चाय विहारभित्तिकोटिया एकं कोटिं नीचे वंसपिट्ठियं ठपनवसेन दण्डके पसारेत्वा. चक्कलयुत्तो किटिकोति कवाटं विय विवरणथकनसुखत्थं चक्कलबन्धकिटिकं. पाळियं उग्घाटनकिटिकन्ति आपणादीसु अनत्थिककाले उक्खिपित्वा, उपरि च बन्धित्वा पच्छा ओतरणकिटिकं, कप्पसीसेहि वा उपत्थम्भनीहि उक्खिपित्वा पच्छा ओतरणकिटिकम्पि.

३०१. पानीयं ओतप्पतीति पानीयभाजनेसु ठपितपानीयं आतपेन सन्तप्पति.

३०३. तयो वाटेति तयो परिक्खेपे. वेळुवाटन्ति सब्बं दारुपरिक्खेपं सङ्गण्हाति. कण्टकवाटन्ति सब्बसाखापरिक्खेपं.

३०५. आलोको अन्तरधायीति यो बुद्धारम्मणाय पीतिया आनुभावेन महन्तो ओभासो अहोसि, येन चस्स पदीपसहस्सेन विय विगतन्धकारो मग्गो अहोसि, सो बहिनगरे छवसरीरसमाकुलं दुग्गन्धं बीभच्छं आमकसुसानं पत्तस्स भयेन पीतिवेगे मन्दीभूते अन्तरधायि.

सतं ¶ हत्थीति गाथाय हत्थिनो सतसहस्सानीति एवं पच्चेकं सहस्स-सद्देन योजेत्वा अत्थो ञातब्बो. पदवीतिहारस्साति ‘‘बुद्धं वन्दिस्सामी’’ति रतनत्तयं उद्दिस्स गच्छतो एकपदवीतिहारस्स ¶ , तप्पच्चयकुसलफलस्साति अत्थो. तस्स सोळसमो भागो कलं नाम, तं सोळसिं कलं यथावुत्ता हत्थिआदयो सब्बे नाग्घन्ति नारहन्ति, निदस्सनमत्तञ्चेतं. अनेकसतसहस्सभागम्पि नाग्घन्ति.

अन्धकारो अन्तरधायीति पुन बलवपीतिया आलोके समुप्पन्ने अन्तरधायि. आसत्तियोति तण्हायो. वयकरणन्ति देय्यधम्ममूलं नवकम्मं.

३०९. ददेय्याति नवकम्मं अधिट्ठातुं विहारे इस्सरियं ददेय्याति अत्थो. दिन्नोति नवकम्मं कातुं विहारो दिन्नो, विहारे नवकम्मं दिन्नन्ति वा अत्थो.

३१३-४. सन्थागारेति सन्निपातमण्डपे. ओकासेति निवासोकासे. उद्दिस्स कतन्ति सङ्घं उद्दिस्स कतं. गिहिविकटन्ति गिहीहि कतं पञ्ञत्तं, गिहिसन्तकन्ति अत्थो.

विहारानुजाननकथावण्णना निट्ठिता.

सेनासनग्गाहकथावण्णना

३१८. ‘‘छमासच्चयेन छमासच्चयेना’’ति इदं द्विक्खत्तुं पच्चयदानकालपरिच्छेददस्सनं, एवं उपरिपि. ‘‘तं न गाहेतब्ब’’न्ति वचनस्स कारणमाह ‘‘पच्चयेनेव हि त’’न्तिआदिना, पच्चयञ्ञेव निस्साय तत्थ वसित्वा पटिजग्गना भविस्सन्तीति अधिप्पायो.

उब्भण्डिकाति उक्खित्तभण्डा भविस्सन्ति. दीघसालाति चङ्कमनसाला. मण्डलमाळोति उपट्ठानसाला. अनुदहतीति पीळेति. ‘‘अदातुं न लब्भती’’ति इमिना सञ्चिच्च अददन्तस्स पटिबाहने पविसनतो दुक्कटन्ति दीपेति.

‘‘न ¶ गोचरगामो घट्टेतब्बो’’ति वुत्तमेवत्थं विभावेतुं ‘‘न तत्थ मनुस्सा वत्तब्बा’’तिआदि वुत्तं. वितक्कं छिन्दित्वाति ‘‘इमिना नीहारेन गच्छन्तं दिस्वा निवारेत्वा पच्चये दस्सन्ती’’ति एवरूपं वितक्कं अनुप्पादेत्वा. भण्डप्पटिच्छादनन्ति पटिच्छादनभण्डं. सरीरप्पटिच्छादनचीवरन्ति अत्थो. ‘‘सुद्धचित्तत्ताव अनवज्ज’’न्ति इदं पुच्छितक्खणे कारणाचिक्खनं ¶ सन्धाय वुत्तं न होति असुद्धचित्तस्सपि पुच्छितपञ्हविसज्जने दोसाभावा. एवं पन गते मं पुच्छिस्सन्तीतिसञ्ञाय अगमनं सन्धाय वुत्तन्ति दट्ठब्बं.

पटिजग्गितब्बानीति खण्डफुल्लपटिसङ्खरणसम्मज्जनादीहि पटिजग्गितब्बानि. मुद्दवेदिकायाति चेतियस्स हम्मियवेदिकाय घटाकारस्स उपरि चतुरस्सवेदिकाय. कस्मा पुच्छितब्बन्तिआदि यतो पकतिया लभति. तत्थापि पुच्छनस्स कारणसन्दस्सनत्थं वुत्तं.

पटिक्कम्माति विहारतो अपसक्कित्वा. तमत्थं दस्सेन्तो ‘‘योजनद्वियोजनन्तरे होती’’ति आह. उपनिक्खेपं ठपेत्वाति वड्ढिया कहापणादिं ठपेत्वा, खेत्तादीनि वा नियमेत्वा. इति सद्धादेय्येति एवं हेट्ठा वुत्तनयेन सद्धाय दातब्बे वस्सावासिकलाभविसयेति अत्थो.

वत्थु पनाति तत्रुप्पादे उप्पन्नरूपियं, तञ्च ‘‘ततो चतुपच्चयं परिभुञ्जथा’’ति दिन्नखेत्तादितो उप्पन्नत्ता कप्पियकारकानं हत्थे ‘‘कप्पियभण्डं परिभुञ्जथा’’ति दायकेहि दिन्नवत्थुसदिसं होतीति आह ‘‘कप्पियकारकानं ही’’तिआदि.

सङ्घसुट्ठुतायाति सङ्घस्स हिताय. पुग्गलवसेनाति ‘‘भिक्खू चीवरेन किलमन्ती’’ति एवं पुग्गलपरामासवसेन, न ‘‘सङ्घो किलमती’’ति एवं सङ्घपरामासवसेन.

‘‘कप्पियभण्डवसेना’’ति सामञ्ञतो वुत्तमेवत्थं विभावेतुं ‘‘चीवरतण्डुलादिवसेनेव चा’’ति वुत्तं. च-कारो चेत्थ पन-सद्दत्थे वत्तति, न समुच्चयत्थेति दट्ठब्बं. पुग्गलवसेनेव, कप्पियभण्डवसेन च अपलोकनप्पकारं दस्सेतुं ‘‘तं पन एवं कत्तब्ब’’न्तिआदि वुत्तं.

चीवरपच्चयं सल्लक्खेत्वाति सद्धादेय्यतत्रुप्पादादिवसेन तस्मिं वस्सावासे लब्भमानं चीवरसङ्खातं पच्चयं ‘‘एत्तक’’न्ति परिच्छिन्दित्वा. सेनासनस्साति सेनासनग्गाहापनस्स. ‘‘नवको वुड्ढतरस्स, वुड्ढो च ¶ नवकस्सा’’ति इदं सेनासनग्गाहस्स अत्तनाव अत्तनो गहणं असारुप्पन्ति वुत्तं, द्वे अञ्ञमञ्ञं गाहेस्सन्तीति अधिप्पायो. अट्ठपि सोळसपि जने सम्मन्नितुं वट्टतीति एककम्मवाचाय सब्बेपि एकतो सम्मन्नितुं वट्टति. निग्गहकम्ममेव हि सङ्घो सङ्घस्स न करोति. तेनेव सत्तसतिकक्खन्धके ‘‘उब्बाहिककम्मसम्मुतियं अट्ठपि जना एकतोव सम्मताति.

आसनघरन्ति ¶ पटिमाघरं. मग्गोति उपचारसीमब्भन्तरगते गामाभिमुखमग्गे कतसाला वुच्चति. एवं पोक्खरणीरुक्खमूलादीसुपि.

लभन्तीति तत्रवासिनो भिक्खू लभन्ति. विजटेत्वाति ‘‘एकेकस्स पहोनकप्पमाणेन वियोजेत्वा. आवासेसु पक्खिपित्वाति ‘‘इतो उप्पन्नं असुकस्मिं असुकस्मिञ्च आवासे वसन्ता पापेत्वा गण्हन्तू’’ति वाचाय उपसंहरित्वा. पविसितब्बन्ति महालाभे परिवेणे वसित्वाव लाभो गहेतब्बोति अधिप्पायो.

अयम्पीति एत्थ यो पंसुकूलिको पच्चयं विस्सज्जेति. तेनेव विस्सट्ठो अयं चीवरपच्चयोपीति योजना. पादमूले ठपेत्वा साटकं देन्तीति पच्चयदायका देन्ति. एतेन गहट्ठेहि पादमूले ठपेत्वा दिन्नम्पि पंसुकूलिकानम्पि वट्टतीति दस्सेति. अथ वस्सावासिकं देमाति वदन्तीति एत्थ पंसुकूलिकानं न वट्टतीति अज्झाहरित्वा योजेतब्बं. वस्संवुत्थभिक्खूनन्ति पंसुकूलिकतो अञ्ञेसं भिक्खूनं.

उपनिबन्धित्वा गाहापेतब्बन्ति इध रुक्खादीसु वसित्वा चीवरं गण्हथाति पटिबन्धं कत्वा गाहेतब्बं.

पाटिपदअरुणतोतिआदि वस्सूपनायिकदिवसं सन्धाय वुत्तं. अन्तरामुत्तकं पन पाटिपदं अतिक्कमित्वापि गाहेतुं वट्टति. निबद्धवत्तं ठपेत्वाति सज्झायमनसिकारादीसु निरन्तरकरणीयेसु कत्तब्बं कतिकवत्तं कत्वा. कसावपरिभण्डन्ति कसावरसेहि भूमिपरिकम्मं.

तिविधम्पीति परियत्तिपटिपत्तिपटिवेधवसेन तिविधम्पि. सोधेत्वाति आचारादीसु उपपरिक्खित्वा. एकचारिकवत्तन्ति भावनाकम्मं. तञ्हि गणसङ्गणिकं पहाय एकचारिकेनेव वत्तितब्बत्ता एवं वुत्तं. दसवत्थुककथा ¶ नाम अप्पिच्छकथा, सन्तुट्ठि, पविवेक, असंसग्ग, वीरियारम्भ, सील, समाधि, पञ्ञा, विमुत्ति, विमुत्तिञाणदस्सनकथाति इमा दस.

दन्तकट्ठखादनवत्तन्ति दन्तकट्ठमाळके निक्खित्तेसु दन्तकट्ठेसु ‘‘दिवसे दिवसे एकमेव दन्तकट्ठं गहेतब्ब’’न्तिआदिना (पारा. अट्ठ. १.१०९) अदिन्नादाने दन्तपोनकथायं वुत्तं वत्तं. पत्तं वा…पे… न कथेतब्बन्ति पत्तगुत्तत्थाय वुत्तं. विसभागकथाति तिरच्छानकथा. खन्धकवत्तन्ति ¶ वत्तक्खन्धके (चूळव. ३६५) आगतं पिण्डचारिकवत्ततो अवसिट्ठवत्तं तस्स ‘‘भिक्खाचारवत्त’’न्ति विसुं गहितत्ता.

इदानि यं दायका पच्छिमवस्संवुत्थानं वस्सावासिकं देन्ति, तत्थ पटिपज्जनविधिं दस्सेतुं ‘‘पच्छिमवस्सूपनायिकदिवसे पना’’ति आरद्धं. आगन्तुको सचे भिक्खूति चीवरे गाहिते पच्छा आगतो आगन्तुको भिक्खु. पत्तट्ठानेति वस्सग्गेन पत्तट्ठाने. पठमवस्सूपगताति आगन्तुकस्स आगमनतो पुरेतरमेव पच्छिमिकाय वस्सूपनायिकाय वस्सूपगता. लद्धं लद्धन्ति पुनप्पुनं दायकानं सन्तिका आगतागतसाटकं.

नेव वस्सावासिकस्स सामिनोति छिन्नवस्सत्ता वुत्तं. पठममेव कतिकाय कतत्ता ‘‘नेव अदातुं लभन्ती’’ति वुत्तं, दातब्बं वारेन्तानं गीवा होतीति अधिप्पायो. तेसमेव दातब्बन्ति वस्सूपगतेसु अलद्धवस्सावासिकानं एकच्चानमेव दातब्बं.

भतिनिविट्ठन्ति पानीयुपट्ठानादिभतिं कत्वा लद्धं. सङ्घिकं पनातिआदि केसञ्चि वाददस्सनं. तत्थ अपलोकनकम्मं कत्वा गाहितन्ति ‘‘छिन्नवस्सानं वस्सावासिकञ्च इदानि उप्पज्जनकवस्सावासिकञ्च इमेसं दातुं रुच्चती’’ति अनन्तरे वुत्तनयेन अपलोकनं कत्वा गाहितं सङ्घेन दिन्नत्ता विब्भन्तोपि लभति. पगेव छिन्नवस्सो. पच्चयवसेन गाहितं पन तेमासं वसित्वा गहेतुं अत्तना, दायकेहि च अनुमतत्ता भतिनिविट्ठम्पि छिन्नवस्सोपि विब्भन्तोपि न लभतीति केचि आचरिया वदन्ति. इदञ्च पच्छा वुत्तत्ता पमाणं. तेनेव वस्सूपनायिकदिवसे एव दायकेहि दिन्नवस्सावासिकं गहितभिक्खुनो वस्सच्छेदं अकत्वा वासोव हेट्ठा विहितो, न पानीयुपट्ठानादिभतिकरणवत्तं. यदि हि तं ¶ निविट्ठमेव सिया, भतिकरणमेव विधातब्बं. तस्मा वस्सग्गेन गाहितं छिन्नवस्सादयो न लभन्तीति वेदितब्बं.

‘‘सङ्घिकं होती’’ति एतेन वुत्थवस्सानम्पि वस्सावासिकभागो सङ्घिकतो अमोचितो तेसं विब्भमेन सङ्घिको होतीति दस्सेति. लभतीति ‘‘मम पत्तभागं एतस्स देथा’’ति दायके सम्पटिच्छापेन्तेनेव सङ्घिकतो वियोजितं होतीति वुत्तं.

वरभागं सामणेरस्साति तस्स पठमगाहत्ता, थेरेन पुब्बे पठमभागस्स गहितत्ता, इदानि गय्हमानस्स दुतियभागत्ता च वुत्तं.

सेनासनग्गाहकथावण्णना निट्ठिता.

उपनन्दवत्थुकथावण्णना

३१९. पाळियं ¶ उभयत्थ परिबाहिरोति कमेन उभयस्सपि मुत्तत्ता वुत्तं, न सब्बथा उभयतो परिबाहिरत्ता. तेनाह ‘‘पच्छिमे…पे… तिट्ठती’’ति.

३२०. यं तिण्णं पहोतीति मञ्चपीठविनिमुत्तं यं आसनं तिण्णं सुखं निसीदितुं पहोति, इदं पच्छिमदीघासनं. एत्थ मञ्चपीठरहितेसु असमानासनिकापि तयो निसीदितुं लभन्ति. मञ्चपीठेसु पन द्वे. अदीघासनेसु मञ्चपीठेसु समानासनिका एव द्वे निसीदितुं लभन्ति दुवग्गस्सेव अनुञ्ञातत्ता.

हत्थिनखो हेट्ठाभागे एतस्स अत्थीति हत्थिनखो, पासादो. पासादस्स नखो नाम हेट्ठिमभागो पादनखसदिसत्ता, सो सब्बदिसासु अनेकेहि हत्थिरूपेहि समलङ्कतो ठितो. तस्सूपरि कतो पासादो हत्थिकुम्भे पतिट्ठितो विय होतीति आह ‘‘हत्थिकुम्भे पतिट्ठित’’न्ति. सुवण्णरजतादिविचित्रानीति सङ्घिकसेनासनं सन्धाय वुत्तं. पुग्गलिकं पन सुवण्णादिविचित्रं भिक्खुस्स सम्पटिच्छितुमेव न वट्टति ‘‘न केनचि परियायेन जातरूपरजतं सादितब्ब’’न्ति (महाव. २९९) वुत्तत्ता. तेनेवेत्थ अट्ठकथायं ‘‘सङ्घिकविहारे वा पुग्गलिकविहारे वा’’ति न ¶ वुत्तं, गोनकादिअकप्पियभण्डविसये एव वुत्तं एकभिक्खुस्सापि तेसं गहणे दोसाभावा. गिहिविकटनीहारेनाति गिहीहि कतनीहारेन, गिहीहि अत्तनो सन्तकं अत्थरित्वा दिन्ननियामेनाति अत्थो. लब्भन्तीति निसीदितुं लब्भन्ति.

उपनन्दवत्थुकथावण्णना निट्ठिता.

अविस्सज्जियवत्थुकथावण्णना

३२१. अरञ्जरोति बहुउदकगण्हनिका महाचाटि, जलं गण्हितुमलन्ति अरञ्जरो.

थावरेन च थावरन्तिआदीसु पञ्चसु कोट्ठासेसु पुरिमद्वयं थावरं, पच्छिमत्तयं गरुभण्डन्ति वेदितब्बं. समकमेव देतीति एत्थ ऊनकं देन्तम्पि विहारवत्थुसामन्तं गहेत्वा दूरतरं दुक्खगोपं विस्सज्जेतुं वट्टतीति दट्ठब्बं. वक्खति हि ‘‘भिक्खूनं चे महग्घतरं…पे… सम्पटिच्छितुं वट्टती’’ति (चूळव. अट्ठ. ३२१). जानापेत्वाति भिक्खुसङ्घस्स ¶ जानापेत्वा, अपलोकेत्वाति अत्थो. ‘‘ननु तुम्हाकं बहुतरा रुक्खाति वत्तब्ब’’न्ति इदं सामिकेसु अत्तनो भण्डस्स महग्घतं अजानित्वा देन्तेसु तं ञत्वा थेय्यचित्तेन गण्हतो अवहारो होतीति वुत्तं.

विहारेन विहारो परिवत्तेतब्बोति सवत्थुकेन अञ्ञेसं भूमियं कतपासादादिना, अवत्थुकेन वा सवत्थुकं परिवत्तेतब्बं. अवत्थुकं पन अवत्थुकेनेव परिवत्तेतब्बं. केवलं पासादस्स भूमितो अथावरत्ता. एवं थावरेसुपि थावरविभागं ञत्वाव परिवत्तेतब्बं.

‘‘कप्पियमञ्चा सम्पटिच्छितब्बा’’ति इमिना सुवण्णादिविचित्तं अकप्पियमञ्चं ‘‘सङ्घस्सा’’ति वुत्तेपि सम्पटिच्छितुं न वट्टतीति दस्सेति. ‘‘विहारस्स देमा’’ति वुत्ते सङ्घस्स वट्टति, न पुग्गलस्स खेत्तादि वियाति दट्ठब्बं. एतेसूति मञ्चादीसु. कप्पियाकप्पियं वुत्तनयमेवाति आसन्दीतूलिकादिविनिच्छयेसु वुत्तनयमेव. अकप्पियं वाति आसन्दीआदि, पमाणातिक्कन्तं ¶ बिम्बोहनादि च. महग्घं कप्पियं वाति सुवण्णादिविचित्तं कप्पियवोहारेन दिन्नं.

‘‘काळलोह…पे… भाजेतब्बो’’ति वुत्तत्ता वट्टकंसलोहमयम्पि भाजनं पुग्गलिकम्पि सम्पटिच्छितुम्पि परिहरितुम्पि वट्टति पुग्गलपरिहरितब्बस्सेव भाजेतब्बत्ताति वदन्ति. तं उपरि ‘‘कंसलोहवट्टलोहभाजनविकति सङ्घिकपरिभोगेन वा गिहिविकटा वा वट्टती’’तिआदिकेन महापच्चरिवचनेन विरुज्झति. इमस्स हि ‘‘वट्टलोहकंसलोहानं येन केनचि कतो सीहळदीपे पादग्गण्हनको भाजेतब्बो’’ति वुत्तस्स महाअट्ठकथावचनस्स पटिक्खेपाय तं महापच्चरिवचनं पच्छा दस्सितं. तस्मा वट्टलोहकंसलोहमयं यं किञ्चि पादग्गण्हनकवारकम्पि उपादाय अभाजनीयमेव. गिहीहि दिय्यमानम्पि पुग्गलस्स सम्पटिच्छितुम्पि न वट्टति. पारिहारियं न वट्टतीति पत्तादिपरिक्खारं विय सयमेव पटिसामेत्वा परिभुञ्जितुं न वट्टति. गिहिसन्तकं विय आरामिकादयो चे सयमेव गोपेत्वा विनियोगकाले आनेत्वा पटिनेन्ति, परिभुञ्जितुं वट्टति. ‘‘पटिसामेत्वा भिक्खूनं देथा’’ति वत्तुम्पि वट्टति.

पण्णसूचि नाम लेखनीति वदन्ति. ‘‘अत्तना लद्धानिपी’’तिआदिना पटिग्गहणे दोसो नत्थि, परिहरित्वा परिभोगोव आपत्तिकरोति दस्सेति. यथा चेत्थ, एवं उपरि अभाजनीयवासिआदीसु अत्तनो सन्तकेसुपि.

अनामासम्पीति ¶ सुवण्णादिमयम्पि सब्बं तं आमसित्वापि परिभुञ्जितुं वट्टति. उपक्खरेति उपकरणे. अड्ढबाहुप्पमाणा नाम अड्ढबाहुमत्ता. अड्ढब्याममत्तातिपि वदन्ति. योत्तानीति चम्मरज्जुका.

अट्ठङ्गुलसूचिदण्डमत्तोपीति तसरदण्डादिसूचिआकारतनुदण्डकमत्तोपि. रित्तपोत्थकोपीति अलिखितपोत्थको. इदञ्च पण्णप्पसङ्गेन वुत्तं.

‘‘घट्टनफलकं घट्टनमुग्गरो’’ति इदं रजितचीवरं एकस्मिं मट्ठे दण्डमुग्गरे वेठेत्वा एकस्स मट्ठफलकस्स उपरि ठपेत्वा उपरि अपरेन मट्ठफलकेन निकुज्जित्वा एको उपरि अक्कमित्वा तिट्ठति. द्वे जना उपरि फलकं द्वीसु कोटीसु गहेत्वा अपरापरं आकड्ढनविकड्ढनं करोन्ति, एतं सन्धाय वुत्तं. हत्थे ठपापेत्वा हत्थेन पहरणं पन ¶ निट्ठितरजनस्स चीवरस्स अल्लकाले कातब्बं. इदं पन फलकमुग्गरेहि घट्टनं सुक्खकाले थद्धभावविमोचनत्थन्ति दट्ठब्बं. अम्बणन्ति एकदोणिकनावाफलकेहि पोक्खरणीसदिसं कतं. पानीयभाजनन्तिपि वदन्ति. रजनदोणीति एकदारुनाव कतं रजनभाजनं. उदकदोणीपि एकदारुनाव कतं उदकभाजनं.

भूमत्थरणं कातुं वट्टतीति अकप्पियचम्मं सन्धाय वुत्तं. तत्थ भूमत्थरणसङ्खेपेन सयितुम्पि वट्टतियेव. ‘‘पच्चत्थरणगतिक’’न्ति इमिना मञ्चादीसु अत्थरितब्बं महाचम्मं एळकचम्मं नामाति दस्सेति.

छत्तमुट्ठिपण्णन्ति तालपण्णं सन्धाय वुत्तं. पत्तकटाहन्ति पत्तपचनकटाहं.

अविस्सज्जियवत्थुकथावण्णना निट्ठिता.

नवकम्मदानकथावण्णना

३२३. पाळियं पिण्डनिक्खेपनमत्तेनातिआदीसु खण्डफुल्लट्ठाने मत्तिकापिण्डट्ठपनं पिण्डनिक्खेपनं नाम. नवकम्मन्ति नवकम्मसम्मुति. अग्गळवट्टि नाम कवाटबन्धो. छादनं नाम तिणादीहि गेहच्छादनं. बन्धनं नाम दण्डवल्लिआदीहि छदनबन्धनमेव. चतुहत्थविहारेति वित्थारप्पमाणतो वुत्तं. उब्बेधतो पन अनेकभूमकत्ता वड्ढकीहत्थेन वीसतिहत्थोपि ¶ नानासण्ठानविचित्तोपि होति. तेनस्स चतुवस्सिकं नवकम्मं वुत्तं. एवं सेसेसुपि.

पाळियं सब्बे विहारेति भुम्मत्थे उपयोगबहुवचनं. एकस्स सब्बेसु विहारेसु नवकम्मं देतीति अत्थो. सब्बकालं पटिबाहन्तीति नवकम्मिका अत्तनो गाहितं वरसेय्यं सम्पत्तानं यथावुड्ढं अकत्वा उतुकालेपि पटिबाहन्ति.

‘‘सचे सो आवासो जीरती’’तिआदि पाळिमुत्तकविनिच्छयो. मञ्चट्ठानं दत्वाति मञ्चट्ठानं पुग्गलिकं दत्वा. तिभागन्ति ततियभागं. एवं विस्सज्जनम्पि थावरेन थावरपरिवत्तनट्ठाने एव पविसति, न इतरथा सब्बसेनासनानं ¶ विनस्सनतो. सचे सद्धिविहारिकानं दातुकामो होतीति सचे सो सङ्घस्स भण्डकट्ठपनट्ठानं वा अञ्ञेसं भिक्खूनं वसनट्ठानं वा दातुं न इच्छति, अत्तनो सद्धिविहारिकानञ्ञेव दातुकामो होति, तादिसस्स तुय्हं पुग्गलिकमेव कत्वा जग्गाति न सब्बं तस्स दातब्बन्ति अधिप्पायो. तत्थ पन कत्तब्बविधिं दस्सेन्तो आह ‘‘कम्म’’न्तिआदि. एवञ्हीतिआदिम्हि वयानुरूपं ततियभागे वा उपड्ढभागे वा गहिते तं भागं दातुं लभतीति अत्थो.

येनाति तेसु द्वीसु भिक्खूसु येन. सो सामीति तस्सा भूमिया विहारकरणे सोव सामी, तं पटिबाहित्वा इतरेन न कातब्बन्ति अधिप्पायो. सो हि पठमं गहितो. अकतट्ठानेति चयादीनं अकतपुब्बट्ठाने. चयं वा पमुखं वाति सङ्घिकसेनासनं निस्साय ततो बहि चयं बन्धित्वा, एकं सेनासनं वा. बहिकुट्टेति कुट्टतो बहि, अत्तनो कतट्ठानेति अत्थो.

नवकम्मदानकथावण्णना निट्ठिता.

अञ्ञत्रपरिभोगपटिक्खेपादिकथावण्णना

३२४. वड्ढिकम्मत्थायाति यथा तम्मूलग्घतो न परिहायति, एवं कत्तब्बस्स एवं निप्फादेतब्बस्स मञ्चपीठादिनो अत्थाय.

चक्कलिकन्ति पादपुञ्छनत्थं चक्काकारेन कतं. परिभण्डकतभूमि वाति काळवण्णादिकतसण्हभूमि वा. सेनासनं वाति मञ्चपीठादि वा.

‘‘तथेव ¶ वळञ्जेतुं वट्टती’’ति इमिना नेवासिकेहि धोतपादादीहि वळञ्जनट्ठाने सञ्चिच्च अधोतपादादीहि वळञ्जन्तस्सेव आपत्ति पञ्ञत्ताति दस्सेति.

‘‘द्वारम्पी’’तिआदिना सामञ्ञतो वुत्तत्ता द्वारवातपानादयो अपरिकम्मकतापि न अपस्सयितब्बा. अजानित्वा अपस्सयन्तस्सपि इध लोमगणनाय आपत्ति.

अञ्ञत्रपरिभोगपटिक्खेपादिकथावण्णना निट्ठिता.

सङ्घभत्तादिअनुजाननकथावण्णना

३२५. उद्देसभत्तं ¶ निमन्तनन्ति इमं वोहारं पत्तानीति एत्थ इति-सद्दो आदिअत्थो, उद्देसभत्तं निमन्तनन्तिआदिवोहारं पत्तानीति अत्थो. तम्पीति सङ्घभत्तम्पि.

सङ्घभत्तादिअनुजाननकथावण्णना निट्ठिता.

उद्देसभत्तकथावण्णना

भोजनसालायाति भत्तुद्देसट्ठानं सन्धाय वुत्तं. एकवळञ्जन्ति एकद्वारेन वळञ्जितब्बं. नानानिवेसनेसूति नानाकुलस्स नानूपचारेसु निवेसनेसु.

निसिन्नस्सपि निद्दायन्तस्सपीति अनादरे सामिवचनं, वुड्ढतरे निद्दायन्ते नवकस्स गाहितं सुग्गहितन्ति अत्थो.

विस्सट्ठदूतोति यथारुचि वत्तुं लभनतो निरासङ्कदूतो. पुच्छासभागेनाति पुच्छावचनपटिभागेन. ‘‘एका कूटट्ठितिका नामा’’ति वुत्तमेवत्थं विभावेतुं ‘‘रञ्ञो वा ही’’तिआदि वुत्तं.

सब्बं पत्तस्सामिकस्स होतीति चीवरादिकम्पि सब्बं पत्तस्सामिकस्सेव होति, मया भत्तमेव सन्धाय वुत्तं, न चीवरादिन्ति वत्वा गहेतुं न वट्टतीति अत्थो.

अकतभागोनामाति ¶ आगन्तुकभागो नाम, अदिन्नपुब्बभागोति अत्थो.

किं आहरीयतीति अवत्वाति ‘‘कतरभत्तं वा तया आहरीयती’’ति दायकं अपुच्छित्वा. पकतिट्ठितिकायाति उद्देसभत्तट्ठितिकाय.

उद्देसभत्तकथावण्णना निट्ठिता.

निमन्तनभत्तकथावण्णना

विच्छिन्दित्वाति ¶ ‘‘भत्तं गण्हथा’’ति पदं अवत्वा. तेनेवाह ‘‘भत्तन्ति अवदन्तेना’’ति.

आलोपसङ्खेपेनाति एकेकपिण्डवसेन, एवञ्च भाजनं उद्देसभत्ते न वट्टति. तत्थ हि एकस्स पहोनकप्पमाणेनेव भाजेतब्बं.

आरुळ्हायेव मातिकं, सङ्घतो अट्ठ भिक्खूति एत्थ ये मातिकं आरुळ्हा, ते अट्ठ भिक्खूति योजेतब्बं. उद्देसभत्तनिमन्तनभत्तादिसङ्घिकभत्तमातिकासु निमन्तनभत्तमातिकाय ठितिवसेन आरुळ्हे भत्तुद्देसकेन वा सयं वा सङ्घतो उद्दिसापेत्वा गहेत्वा गन्तब्बं, न अत्तनो रुचिते गहेत्वाति अधिप्पायो. मातिकं आरोपेत्वाति ‘‘सङ्घतो गण्हामी’’तिआदिना वुत्तमातिकाभेदं दायकस्स विञ्ञापेत्वाति अत्थो.

पटिबद्धकालतो पन पट्ठायाति तत्थेव वासस्स निबद्धकालतो पट्ठाय.

निमन्तनभत्तकथावण्णना निट्ठिता.

सलाकभत्तकथावण्णना

उपनिबन्धित्वाति लिखित्वा. गामवसेनपीति येभुय्येन समलाभगामवसेनपि. बहूनि सलाकभत्तानीति तिंसं वा चत्तारीसं वा भत्तानि. ‘‘सचे होन्ती’’ति अज्झाहरित्वा योजेतब्बं.

सल्लक्खेत्वाति ¶ तानि भत्तानि पमाणवसेन सल्लक्खेत्वा. निग्गहेन दत्वाति दूरं गन्तुं अनिच्छन्तस्स निग्गहेन सम्पटिच्छापेत्वा दत्वा. पुन विहारं आगन्त्वाति एत्थ विहारं अनागन्त्वा भत्तं गहेत्वा पच्छा विहारे अत्तनो पापेत्वा भुञ्जितुम्पि वट्टति.

एकगेहवसेनाति वीथियम्पि एकपस्से घरपाळिया वसेन. उद्दिसित्वापीति असुककुले सलाकभत्तानि तुय्हं पापुणन्तीति वत्वा.

वारगामेति ¶ अतिदूरत्ता वारेन गन्तब्बगामे. सट्ठितो वा पण्णासतो वाति दण्डकम्मत्थाय उदकघटं सन्धाय वुत्तं. विहारवारोति सब्बभिक्खूसु भिक्खत्थाय गतेसु विहाररक्खणवारो.

तेसन्ति विहारवारिकानं. फातिकम्ममेवाति विहाररक्खणकिच्चस्स पहोनकपटिपादनमेव. एकस्सेव पापुणन्तीति दिवसे दिवसे एकेकस्सेव पापितानीति अत्थो.

रससलाकन्ति उच्छुरससलाकं. ‘‘सलाकवसेन गाहितत्ता पन न सादितब्बा’’ति इदं असारुप्पवसेन वुत्तं, न धुतङ्गभेदवसेन. ‘‘सङ्घतो निरामिससलाका…पे… वट्टतियेवा’’ति (विसुद्धि. १.२६) हि विसुद्धिमग्गे वुत्तं. अग्गभिक्खामत्तन्ति एककटच्छुभिक्खामत्तं. लद्धा वा अलद्धा वा स्वेपि गण्हेय्यासीति लद्धेपि अप्पमत्तताय वुत्तं. तेनाह ‘‘यावदत्थं लभति…पे… अलभित्वा ‘स्वे गण्हेय्यासी’ति वत्तब्बो’’ति.

तत्थाति तस्मिं दिसाभागे. तं गहेत्वाति तं वारगामे सलाकं अत्तनो गहेत्वा. तेनाति दिसंगमिकतो अञ्ञेन तस्मिं दिसंगमिके. देवसिकं पापेतब्बाति उपचारसीमाय ठितस्स यस्स कस्सचि वस्सग्गेन पापेतब्बा. एवं एतेसु अगतेसु आसन्नविहारे भिक्खूनं भुञ्जितुं वट्टति इतरथा सङ्घिकतो.

अम्हाकं गोचरगामेवाति सलाकभत्तदायकानं गामं सन्धाय वुत्तं. विहारे थेरस्स पत्तसलाकभत्तन्ति विहारे एकेकस्सेव ओहीनत्थेरस्स सब्बसलाकानं अत्तनो पापनवसेन पत्तसलाकभत्तं.

सलाकभत्तकथावण्णना निट्ठिता.

पक्खिकभत्तादिकथावण्णना

‘‘स्वे ¶ पक्खो’’ति अज्ज पक्खिकं न गाहेतब्बन्ति अट्ठमिया भुञ्जितब्बं सत्तमिया भुञ्जनत्थाय न गाहेतब्बं, दायकेहि नियमितदिवसेनेव गाहेतब्बन्ति अत्थो. तेनाह ‘‘सचे पना’’तिआदि. स्वे लूखन्ति अज्ज आवाहमङ्गलादिकरणतो अतिपणीतभोजनं करीयति, स्वे तथा न भविस्सति, अज्जेव भिक्खू भोजेस्सामीति अधिप्पायो.

पक्खिकभत्ततो ¶ उपोसथिकस्स भेदं दस्सेन्तो आह ‘‘उपोसथङ्गानि समादियित्वा’’तिआदि. निबन्धापितन्ति ‘‘असुकविहारे आगन्तुका भुञ्जन्तू’’ति नियमितं.

गमिको आगन्तुकभत्तम्पीति गामन्तरतो आगन्त्वा अवूपसन्तेन गमिकचित्तेन वसित्वा पुन अञ्ञत्थ गच्छन्तं सन्धाय वुत्तं. आवासिकस्स पन गन्तुकामस्स गमिकभत्तमेव लब्भति. ‘‘लेसं ओड्डेत्वा’’ति वुत्तत्ता लेसाभावे याव गमनपरिबन्धो विगच्छति, ताव भुञ्जितुं वट्टतीति ञापितन्ति दट्ठब्बं.

तण्डुलादीनि पेसेन्ति…पे… वट्टतीति अभिहटभिक्खत्ता वट्टति. तथा पटिग्गहितत्ताति भिक्खानामेन पटिग्गहितत्ता.

अविभत्तं सङ्घिकं भण्डन्ति कुक्कुच्चुप्पत्तिआकारदस्सनं. एवं कुक्कुच्चं कत्वा पुच्छितब्बकिच्चं नत्थि, अपुच्छित्वा दातब्बन्ति अधिप्पायो.

पक्खिकभत्तादिकथावण्णना निट्ठिता.

सेनासनक्खन्धकवण्णनानयो निट्ठितो.

७. सङ्घभेदकक्खन्धको

छसक्यपब्बज्जाकथादिवण्णना

३३०. सङ्घभेदकक्खन्धके ¶ ¶ पाळियं अनुपियं नामाति अनुपिया नाम. हेट्ठा पासादाति पासादतो हेट्ठा हेट्ठिमतलं, ‘‘हेट्ठापासाद’’न्तिपि पाठो. अभिनेतब्बन्ति वपितखेत्तेसु पवेसेतब्बं. निन्नेतब्बन्ति ततो नीहरितब्बं. निद्धापेतब्बन्ति सस्सदूसकतिणादीनि उद्धरितब्बं. उजुं कारापेतब्बन्ति पुञ्जं कारापेतब्बं, अयमेव वा पाठो.

३३२. परदत्तोति परेहि दिन्नपच्चयेहि पवत्तमानो. मिगभूतेन चेतसाति कत्थचि अलग्गताय मिगस्स विय जातेन चित्तेन.

३३३. मनोमयं कायन्ति झानमनेन निब्बत्तं ब्रह्मकायं, ‘‘किं नु खो अहं पसादेय्यं, यस्मिं मे पसन्ने बहुलाभसक्कारो उप्पज्जेय्या’’ति पठमं उप्पन्नपरिवितक्कस्स मन्दपरियुट्ठानताय देवदत्तस्स तस्मिं खणे झानपरिहानि नाहोसि, पच्छा एव अहोसीति दट्ठब्बं. तेनाह ‘‘सह चित्तुप्पादा’’तिआदि. द्वे वा तीणि वा मागधकानि गामखेत्तानीति एत्थ मगधरट्ठे खुद्दकं गामखेत्तं गावुतमत्तं, मज्झिमं पन दियड्ढगावुतमत्तं, महन्तं अनेकयोजनम्पि होति. तेसु मज्झिमेन गामखेत्तेन द्वे वा खुद्दकेन तीणि वा गामखेत्तानि, तस्स सरीरं तिगावुतप्पमाणो अत्तभावोति वुत्तं होति.

३३४. सत्थारोति गणसत्थारो. नास्सस्साति न एतस्स भवेय्य. तन्ति सत्थारं. तेनाति अमनापेन. सम्मन्नतीति चीवरादिना अम्हाकं सम्मानं करोति, परेहि वा अयं सत्था सम्मानीयतीति अत्थो.

३३५. नासाय ¶ पित्तं भिन्देय्युन्ति अच्छपित्तं वा मच्छपित्तं वा नासापुटे पक्खिपेय्युं. अस्सतरीति वळवाय कुच्छिस्मिं गद्रभस्स जाता. तस्सा हि गहितगब्भाय विजायितुमसक्कोन्तिया उदरं फालेत्वा पोतकं नीहरन्ति. तेनाह ‘‘अत्तवधाय गब्भं गण्हाती’’ति.

३३९. पोत्थनिकन्ति छुरिकं, ‘‘खर’’न्तिपि वुच्चति.

३४२. मा ¶ कुञ्जर नागमासदोति हे कुञ्जर बुद्धनागं वधकचित्तेन मा उपगच्छ. दुक्खन्ति दुक्खकारणत्ता दुक्खं. इतोति इतो जातितो. यतोति यस्मा, यन्तस्स वा, गच्छन्तस्साति अत्थो. मा च मदोति मदो तया न कातब्बोति अत्थो.

३४३. तिकभोजनन्ति तीहि भुञ्जितब्बं भोजनं, ततो अधिकेहि एकतो पटिग्गहेत्वा भुञ्जितुं न वट्टनकं गणभोजनपटिपक्खं भोजनन्ति अत्थो. कोकालिकोतिआदीनि देवदत्तपरिसाय गणपामोक्खानं नामानि. कप्पन्ति महानिरये आयुकप्पं, तं अन्तरकप्पन्ति केचि. केचि पन ‘‘असङ्ख्येय्यकप्प’’न्ति.

छसक्यपब्बज्जाकथादिवण्णना निट्ठिता.

सङ्घभेदककथावण्णना

३४५. परस्स चित्तं ञत्वा कथनं आदेसनापाटिहारियं. केवलं धम्मदेसना अनुसासनीपाटिहारियं. तदुभयम्पि धम्मी कथा नाम. ताय थेरो ओवदि. इद्धिविधं इद्धिपाटिहारियं नाम. तेन सहिता अनुसासनी एव धम्मी कथा. ताय थेरो ओवदि.

‘‘थुल्लच्चयं देसापेही’’ति इदं भेदपुरेक्खारस्स उपोसथादिकरणे थुल्लच्चयस्स उपोसथक्खन्धकादीसु पठममेव पञ्ञत्तत्ता वुत्तं, इतरथा एतेसं आदिकम्मिकत्ता अनापत्तियेव सिया.

३४६. सरसीति सरो. महिं विक्रुब्बतोति महिं दन्तेहि विलिखन्तस्स. इदञ्च हत्थीनं सभावदस्सनं. नदीसूति सरेसु. भिसं घसमानस्साति योजना. जग्गतोति यूथं पालेन्तस्स.

३४७. दूतेय्यं ¶ गन्तुन्ति दूतकम्मं पत्तुं, दूतकम्मं कातुन्ति अत्थो. सहितासहितस्साति युत्तायुत्तस्स, यं वत्तुं, कातुञ्च युत्तं, तत्थ कुसलो. अथ वा अधिप्पेतानाधिप्पेतस्स वचनस्स कुसलो, ब्यञ्जनमत्ते न तिट्ठति, अधिप्पेतत्थमेव आरोचेतीति अत्थो.

३५०. गाथासु ¶ जातूति एकंसेन. मा उदपज्जथ मा होतूति अत्थो. पापिच्छानं यथागतीति पापिच्छानं पुग्गलानं यादिसी गति अभिसम्परायो. तं अत्थजातं. इमिनापि कारणेन जानाथाति देवदत्तस्स ‘‘पण्डितो’’तिआदिना उपरि वक्खमानाकारं दस्सेति.

पमादं अनुचिण्णोति पमादं आपन्नो. आसीसायन्ति अवस्संभावीअत्थसिद्धियं. सा हि इध आसीसाति अधिप्पेता, न पत्थना. ईदिसे अनागतत्थे अतीतवचनं सद्दविदू इच्छन्ति.

दुब्भेति दुब्भेय्य. विसकुम्भेनाति एकेन विसपुण्णकुम्भेन. सोति सो पुग्गलो. न पदूसेय्य विसमिस्सं कातुं न सक्कोतीति अत्थो. भयानकोति विपुलगम्भीरभावेन भयानको. तेनापि दूसेतुं न सक्कुणेय्यतं दस्सेति. वादेनाति दोसकथनेन. उपहिंसतीति बाधति.

सङ्घभेदककथावण्णना निट्ठिता.

उपालिपञ्हाकथावण्णना

३५१. न पन एत्तावता सङ्घो भिन्नो होतीति सलाकग्गाहापनमत्तेन सङ्घभेदानिब्बत्तितो वुत्तं. उपोसथादिसङ्घकम्मे कते एव हि सङ्घो भिन्नो होति. तत्थ च उपोसथपवारणासु ञत्तिनिट्ठानेन, सेसकम्मेसु अपलोकनादिकम्मपरियोसानेन सङ्घभेदो समत्थोति दट्ठब्बो.

‘‘अभब्बता न वुत्ता’’ति इदं ‘‘भिक्खवे, देवदत्तेन पठमं आनन्तरियकम्मं उपचित’’न्तिआदिना आनन्तरियत्तं वदता भगवता तस्स अभब्बतासङ्खाता पाराजिकता न पञ्ञत्ता. एतेन आपत्ति विय अभब्बतापि पञ्ञत्तिअनन्तरमेव होति, न ततो पुरेति दस्सेति. इध पन आदिकम्मिकस्सपि अनापत्तिया अवुत्तत्ता देवदत्तादयोपि न मुत्ताति दट्ठब्बं.

तयो सतिपट्ठानातिआदीसु तयो एव सतिपट्ठाना, न ततो परन्ति एकस्स सतिपट्ठानस्स ¶ पटिक्खेपोव इध अधम्मो, न पन तिण्णं सतिपट्ठानत्तविधानं ¶ तस्स धम्मत्ता. एवं सेसेसुपि हापनकोट्ठासेसु. वड्ढनेसु पन छ इन्द्रियानीति अनिन्द्रियस्सपि एकस्स इन्द्रियत्तविधानमेव अधम्मो. एवं सेसेसुपि. न केवलञ्च एतेव, ‘‘चत्तारो खन्धा, तेरसायतनानी’’तिआदिना यत्थ कत्थचि विपरीततो पकासनं सब्बं अधम्मो. याथावतो पकासनञ्च सब्बं धम्मोति दट्ठब्बं. पकासनन्ति चेत्थ तथा तथा कायवचीपयोगसमुट्ठापिका अरूपक्खन्धाव अधिप्पेता, एवमेत्थ दसकुसलकम्मपथादीसु अनवज्जट्ठेन सरूपतो धम्मेसु, अकुसलकम्मपथादीसु सावज्जट्ठेन सरूपतो अधम्मेसु च तदञ्ञेसु च अब्याकतेसु यस्स कस्सचि कोट्ठासस्स भगवता पञ्ञत्तक्कमेनेव पकासनं ‘‘धम्मो’’ति च विपरीततो पकासनं ‘‘अधम्मो’’ति च दस्सितन्ति दट्ठब्बं. कामञ्चेत्थ विनयादयोपि यथाभूततो, अयथाभूततो च पकासनवसेन धम्माधम्मेसु एव पविसन्ति, विनयादिनामेन पन विसेसेत्वा विसुं गहितत्ता तदवसेसमेव धम्माधम्मकोट्ठासे पविसतीति दट्ठब्बं.

इमं अधम्मं धम्मोति करिस्सामातिआदि धम्मञ्च अधम्मञ्च याथावतो ञत्वाव पापिच्छं निस्साय विपरीततो पकासेन्तस्सेव सङ्घभेदो होति, न पन तथासञ्ञाय पकासेन्तस्साति दस्सनत्थं वुत्तं. एस नयो ‘‘अविनयं विनयोति दीपेन्ती’’तिआदीसुपि. तत्थ निय्यानिकन्ति उक्कट्ठन्ति अत्थो. ‘‘तथेवा’’ति इमिना ‘‘एवं अम्हाकं आचरियकुल’’न्तिआदिना वुत्तमत्थं आकड्ढति.

संवरो पहानं पटिसङ्खाति संवरविनयो, पहानविनयो, पटिसङ्खाविनयो च वुत्तो. तेनाह ‘‘अयं विनयो’’ति. ‘‘पञ्ञत्तं अपञ्ञत्त’’न्ति दुकं ‘‘भासितं अभासित’’न्ति दुकेन अत्थतो समानमेव, तथा दुट्ठुल्लदुकं गरुकदुकेन. तेनेव तेसं ‘‘चत्तारो सतिपट्ठाना…पे… इदं अपञ्ञत्तं नामा’’तिआदिना सदिसनिद्देसो कतो. सावसेसापत्तिन्ति अवसेससीलेहि सहितापत्तिं. नत्थि एतिस्सं आपन्नायं सीलावसेसाति अनवसेसापत्ति.

३५४. पाळियं समग्गानञ्च अनुग्गहोति यथा समग्गानं सामग्गी न भिज्जति, एवं अनुग्गहणं अनुबलप्पदानं.

३५५. सिया ¶ नु खोति सम्भवेय्य नु खो. तस्मिं अधम्मदिट्ठीति अत्तनो ‘‘अधम्मं धम्मो’’ति एतस्मिं दीपने अयुत्तदिट्ठि. भेदे अधम्मदिट्ठीति ‘‘अधम्मं धम्मो’’ति दीपेत्वा अनुस्सावनसलाकग्गाहापनादिना अत्तानं मुञ्चित्वा चतुवग्गादिकं सङ्घं एकसीमायमेव ठिततो ¶ चतुवग्गादिसङ्घतो वियोजेत्वा एककम्मादिनिप्फादनवसेन सङ्घभेदकरणे अधम्मदिट्ठिको हुत्वाति अत्थो. विनिधाय दिट्ठिन्ति या तस्मिं ‘‘अधम्मं धम्मो’’ति दीपने अत्तनो अधम्मदिट्ठि उप्पज्जति, तं विनिधाय पटिच्छादेत्वा ‘‘धम्मो एवाय’’न्ति विपरीततो पकासेत्वाति अत्थो. एवं सब्बत्थ अत्थो वेदितब्बो.

भेदे धम्मदिट्ठीति यथावुत्तनयेन सङ्घभेदने दोसो नत्थीति लद्धिको. अयं पन ‘‘अधम्मं धम्मो’’ति दीपने अधम्मदिट्ठिको हुत्वापि तं दिट्ठिं विनिधाय करणेन सङ्घभेदको अतेकिच्छो जातो. एवं भेदे वेमतिकोति इमस्स पन भेदे वेमतिकदिट्ठिया विनिधानम्पि अत्थि. सेसं सममेव. तस्मिं धम्मदिट्ठिभेदे अधम्मदिट्ठीति अयं पन भेदे अधम्मदिट्ठिं विनिधाय कतत्ता सङ्घभेदको अतेकिच्छो जातो. सुक्कपक्खे पन सब्बत्थ ‘‘अधम्मं धम्मो’’तिआदिदीपने वा भेदे वा धम्मदिट्ठिताय दिट्ठिं अविनिधायेव कतत्ता सङ्घभेदकोपि सतेकिच्छो जातो. तस्मा ‘‘अधम्मं धम्मो’’तिआदिदीपने वा सङ्घभेदे वा उभोसुपि वा अधम्मदिट्ठि वा वेमतिको वा हुत्वा तं दिट्ठिं, विमतिञ्च विनिधाय ‘‘धम्मो’’ति पकासेत्वा वुत्तनयेन सङ्घभेदं करोन्तस्सेव आनन्तरियं होतीति वेदितब्बं.

उपालिपञ्हाकथावण्णना निट्ठिता.

सङ्घभेदकक्खन्धकवण्णनानयो निट्ठितो.

८. वत्तक्खन्धको

आगन्तुकवत्तकथावण्णना

३५७. वत्तक्खन्धके ¶ ¶ पत्थरितब्बन्ति आतपे पत्थरितब्बं. पाळियं अभिवादापेतब्बोति वन्दनत्थाय वस्सं पुच्छनेन नवको सयमेव वन्दतीति वुत्तं. निल्लोकेतब्बोति ओलोकेतब्बो.

आगन्तुकवत्तकथावण्णना निट्ठिता.

आवासिकवत्तकथावण्णना

३५९. ‘‘यथाभाग’’न्ति ठपितट्ठानं अनतिक्कमित्वा मञ्चपीठादिं पप्फोटेत्वा पत्थरित्वा उपरि पच्चत्थरणं दत्वा दानम्पि सेनासनपञ्ञापनमेवाति दस्सेन्तो आह ‘‘पप्फोटेत्वा हि पत्थरितुं पन वट्टतियेवा’’ति.

आवासिकवत्तकथावण्णना निट्ठिता.

अनुमोदनवत्तकथावण्णना

३६२. पञ्चमे निसिन्नेति अनुमोदनत्थाय निसिन्ने. न महाथेरस्स भारो होतीति अनुमोदकं आगमेतुं न भारो. अज्झिट्ठोव आगमेतब्बोति अत्तना अज्झिट्ठेहि भिक्खूहि अनुमोदन्तेयेव निसीदितब्बन्ति अत्थो.

अनुमोदनवत्तकथावण्णना निट्ठिता.

भत्तग्गवत्तकथावण्णना

३६४. मनुस्सानं ¶ परिविसनट्ठानन्ति यत्थ अन्तोविहारेपि मनुस्सा सपुत्तदारा आवसित्वा भिक्खू नेत्वा भोजेन्ति. आसनेसु सतीति निसीदनट्ठानेसु ¶ सन्तेसु. इदं, भन्ते, आसनं उच्चन्ति आसन्ने समभूमिभागे पञ्ञत्तं थेरासनेन समकं आसनं सन्धाय वुत्तं, थेरासनतो पन उच्चतरे आपुच्छित्वापि निसीदितुं न वट्टति. यदि तं आसन्नम्पि नीचतरं होति, अनापुच्छापि निसीदितुं वट्टति. महाथेरस्सेव आपत्तीति आसनेन पटिबाहनापत्तिया आपत्ति. अवत्थरित्वाति पारुतसङ्घाटिं अवत्थरित्वा, अनुक्खिपित्वाति अत्थो.

पाळियं ‘‘उभोहि हत्थेहि…पे… ओदनो पटिग्गहेतब्बो’’ति इदं हत्थतले वा पच्छिपिट्ठिआदिदुस्सण्ठिताधारे वा पत्तं ठपेत्वा ओदनस्स गहणकाले पत्तस्स अपतनत्थाय वुत्तं, सुसज्जिते पन आधारे पत्तं ठपेत्वा एकेन हत्थेन तं परामसित्वापि ओदनं पटिग्गहेतुं वट्टति एव. उभोहि हत्थेहि…पे… उदकं पटिग्गहेतब्बन्ति एत्थापि एसेव नयो.

हत्थधोवनउदकन्ति भोजनावसाने उदकं. तेनाह ‘‘पानीयं पिवित्वा हत्था धोवितब्बा’’ति. तेन परियोसाने धोवनमेव पटिक्खित्तं, भोजनन्तरे पन पानीयपिवनादिना नयेन हत्थं धोवित्वा पुन भुञ्जितुं वट्टतीति दस्सेति. पोत्थकेसु पन ‘‘पानीयं पिवित्वा हत्था न धोवितब्बा’’ति लिखन्ति, तं पुरिमवचनेन न समेति परियोसाने उदकस्सेव ‘‘हत्थधोवनउदक’’न्ति वुत्तत्ता. सचे मनुस्सा धोवथ, भन्तेतिआदि निट्ठितभत्तं निसिन्नं थेरं सन्धाय वुत्तं. धुरे द्वारसमीपे.

भत्तग्गवत्तकथावण्णना निट्ठिता.

पिण्डचारिकवत्तकथादिवण्णना

३६६. पाळियं ठापेति वाति तिट्ठ भन्तेति वदन्ति.

३६७. अत्थि, भन्ते, नक्खत्तपदानीति नक्खत्तपदविसयानि ञातानि अत्थि, अस्सयुजादिनक्खत्तं जानाथाति अधिप्पायो. तेनाह ‘‘न जानाम, आवुसो’’ति. अत्थि, भन्ते ¶ , दिसाभागन्ति एत्थापि एसेव नयो. केनज्ज, भन्ते, युत्तन्ति केन नक्खत्तेन चन्दो युत्तोति अत्थो.

३६९. अङ्गणेति ¶ अब्भोकासे. एवमेव पटिपज्जितब्बन्ति उद्देसदानादि आपुच्छितब्बन्ति दस्सेति.

३७४. निबद्धगमनत्थायाति अत्तनोव निरन्तरगमनत्थाय. ऊहदिताति एत्थ हद-धातुस्स वच्चविस्सज्जनत्थतायाह ‘‘बहि वच्चमक्खिता’’ति.

पिण्डचारिकवत्तकथादिवण्णना निट्ठिता.

वत्तक्खन्धकवण्णनानयो निट्ठितो.

९. पातिमोक्खट्ठपनक्खन्धको

पातिमोक्खुद्देसयाचनकथावण्णना

३८३. पातिमोक्खट्ठपनक्खन्धके ¶ ¶ पाळियं नन्दिमुखियाति ओदातदिसामुखताय तुट्ठमुखिया. ‘‘उद्धस्तं अरुण’’न्ति वत्वापि ‘‘उद्दिसतु, भन्ते, भगवा’’ति पातिमोक्खुद्देसयाचनं अनुपोसथे उपोसथकरणपटिक्खेपस्स सिक्खापदस्स अपञ्ञत्तत्ता थेरेन कतन्ति दट्ठब्बं. कस्मा पन भगवा एवं तुण्हीभूतोव तियामरत्तिं वीतिनामेसीति? अपरिसुद्धाय परिसाय उपोसथादिसंवासकरणस्स सावज्जतं भिक्खुसङ्घे पाकटं कातुं, तञ्च आयतिं भिक्खूनं तथापटिपज्जनत्थं सिक्खापदं ञापेतुं. केचि पनेत्थ ‘‘अपरिसुद्धम्पि पुग्गलं तस्स सम्मुखा ‘अपरिसुद्धो’ति वत्तुं महाकरुणाय अविसहन्तो भगवा तथा निसीदी’’ति कारणं वदन्ति. तं अकारणं पच्छापि अवत्तब्बतो, महामोग्गल्लानत्थेरेनापि तं बाहायं गहेत्वा बहि नीहरणस्स अकत्तब्बतापसङ्गतो. तस्मा यथावुत्तमेवेत्थ कारणन्ति. तेनेव ‘‘अट्ठानमेतं, भिक्खवे, अनवकासो, यं तथागतो अपरिसुद्धाय परिसाय उपोसथं करेय्य, पातिमोक्खं उद्दिसेय्या’’ति (अ. नि. ८.२०; चूळव. ३८६; उदा. ४५) वत्वा ‘‘न च, भिक्खवे, सापत्तिकेन पातिमोक्खं सोतब्ब’’न्तिआदिना (चूळव. ३८६) सापत्तिकपरिसाय कत्तब्बविधि दस्सितो.

सङ्कस्सरसमाचारन्ति किञ्चिदेव असारुप्पं दिस्वा ‘‘इदं इमिना कतं भविस्सती’’ति परेहि सङ्काय सरितब्बसमाचारं, अत्तना वा ‘‘मम अनाचारं एते जानन्ती’’ति सङ्काय सरितब्बसमाचारं. समणवेसधारणेन, सङ्घिकपच्चयभागगहणादिना च जीविकं कप्पेन्तो ‘‘अहं समणो’’ति पटिञ्ञं अदेन्तोपि अत्थतो देन्तो विय होतीति ‘‘समणपटिञ्ञं ब्रह्मचारिपटिञ्ञ’’न्ति वुत्तं. अवस्सुतन्ति किलेसावस्सनेन तिन्तं. सञ्जातदुस्सिल्यकचवरत्ता कसम्बुजातं ¶ , असारताय वा कसम्बु विय जातं. बहिद्वारकोट्ठका निक्खामेत्वाति द्वारसालतो बहि निक्खमापेत्वा.

३८४. महासमुद्दे ¶ अभिरमन्तीति बहुसो दस्सनपविसनादिना महासमुद्दे अभिरतिं विन्दन्ति. न आयतकेनेव पपातोति छिन्नतटमहासोब्भो विय न आदितोव निन्नोति अत्थो. ठितधम्मोति अवट्ठितसभावो. पूरत्तन्ति पुण्णत्तं. नागाति सप्पजातिका.

पातिमोक्खुद्देसयाचनकथावण्णना निट्ठिता.

पातिमोक्खसवनारहकथादिवण्णना

३८६. उदाहरितब्बन्ति पाळिया अवत्वा तमत्थं याय कायचि भासाय उदाहटम्पि उदाहटमेवाति दट्ठब्बं.

पुरे वा पच्छा वाति ञत्तिआरम्भतो पुब्बे वा ञत्तिनिट्ठानतो पच्छा वा.

३८७. कतञ्च अकतञ्च उभयं गहेत्वाति यस्स कतापि अत्थि अकतापि. तस्स तदुभयं गहेत्वा. धम्मिकं सामग्गिन्ति धम्मिकं समग्गकम्मं. पच्चादियतीति उक्कोटनाधिप्पायेन पुन कातुं आदियति.

३८८. आकारादिसञ्ञा वेदितब्बाति आकारलिङ्गनिमित्तनामानि वुत्तानीति वेदितब्बानि.

पातिमोक्खसवनारहकथादिवण्णना निट्ठिता.

अत्तादानअङ्गकथादिवण्णना

३९८. पुन चोदेतुं अत्तना आदातब्बं गहेतब्बं अधिकरणं अत्तादानन्ति आह ‘‘सासनं सोधेतुकामो’’तिआदि. वस्सारत्तोति वस्सकालो. सोपि हि दुब्भिक्खादिकालो विय अधिकरणवूपसमत्थं लज्जिपरिसाय दूरतो आनयनस्स, आगतानञ्च पिण्डाय चरणादिसमाचारस्स दुक्करत्ता अकालो एव.

समनुस्सरणकरणन्ति ¶ अनुस्सरितानुस्सरितक्खणे पीतिपामोज्जजननतो अनुस्सरणुप्पादकं. विगतूपक्किलेस…पे… संवत्ततीति एत्थ यथा ¶ अब्भहिमादिउपक्किलेसविरहितानं चन्दिमसूरियानं सस्सिरीकता होति, एवमस्सापि चोदकस्स पापपुग्गलूपक्किलेसविगमेन सस्सिरीकता होतीति अधिप्पायो.

३९९. अधिगतं मेत्तचित्तन्ति अप्पनाप्पत्तं मेत्तझानं.

४००-१. ‘‘दोसन्तरो’’ति एत्थ अन्तर-सद्दो चित्तपरियायोति आह ‘‘न दुट्ठचित्तो हुत्वा’’ति.

कारुञ्ञं नाम करुणा एवाति आह ‘‘कारुञ्ञताति करुणाभावो’’ति. करुणन्ति अप्पनाप्पत्तं वदति. तथा मेत्तन्ति.

अत्तादानअङ्गकथादिवण्णना निट्ठिता.

पातिमोक्खट्ठपनक्खन्धकवण्णनानयो निट्ठितो.

१०. भिक्खुनिक्खन्धको

महापजापतिगोतमीवत्थुकथावण्णना

४०३. भिक्खुनिक्खन्धके ¶ ¶ ‘‘मातुगामस्स पब्बजितत्ता’’ति इदं पञ्चवस्ससततो उद्धं सद्धम्मस्स अप्पवत्तनकारणदस्सनं. सुक्खविपस्सकखीणासववसेन वस्ससहस्सन्तिआदि खन्धकभाणकानं मतं गहेत्वा वुत्तं. दीघनिकायट्ठकथायं पन ‘‘पटिसम्भिदाप्पत्तेहि वस्ससहस्सं अट्ठासि, छळभिञ्ञेहि वस्ससहस्सं, तेविज्जेहि वस्ससहस्सं, सुक्खविपस्सकेहि वस्ससहस्सं, पातिमोक्खेहि वस्ससहस्सं अट्ठासी’’ति (दी. नि. अट्ठ. ३.१६१) वुत्तं. अङ्गुत्तर (अ. नि. अट्ठ. ३.८.५१) -संयुत्तट्ठकथासुपि (सं. नि. अट्ठ. २.२.१५६) अञ्ञथाव वुत्तं, तं सब्बं अञ्ञमञ्ञविरुद्धम्पि तंतंभाणकानं मतेन लिखितसीहळट्ठकथासु आगतनयमेव गहेत्वा आचरियेन लिखितं ईदिसे कथाविरोधे सासनपरिहानिया अभावतो, सोधनुपायाभावा च. परमत्थविरोधो एव हि सुत्तादिनयेन सोधनीयो, न कथामग्गविरोधोति.

महापजापतिगोतमीवत्थुकथावण्णना निट्ठिता.

भिक्खुनीउपसम्पदानुजाननकथावण्णना

४०४-८. पाळियं यदग्गेनाति यस्मिं दिवसे. तदाति तस्मिंयेव दिवसे. विमानेत्वाति अवमानं कत्वा.

४१०-१. आपत्तिगामिनियोति आपत्तिं आपन्नायो. कम्मविभङ्गेति परिवारे कम्मविभङ्गे (परि. ४८२ आदयो).

४१३-५. पाळियं ¶ द्वे तिस्सो भिक्खुनियोति द्वीहि तीहि भिक्खुनीहि. न आरोचेन्तीति पातिमोक्खुद्देसकस्स न आरोचेन्ति.

४१६. दुस्सवेणियाति अनेकदुस्सपट्टे एकतो कत्वा कतवेणिया.

४१७. विसेसकन्ति ¶ पत्तलेखादिवण्णविसेसं. पकिणन्तीति विक्किणन्ति. नमनकन्ति पासुकट्ठिनमनकबन्धनं.

४२२-५. संवेल्लियन्ति कच्छं बन्धित्वा निवासनं. तयो निस्सयेति रुक्खमूलसेनासनस्स तासं अलब्भनतो वुत्तं.

४२६-८. अट्ठेव भिक्खुनियो यथावुड्ढं पटिबाहन्तीति अट्ठ भिक्खुनियो वुड्ढपटिपाटियाव गण्हन्तियो आगतपटिपाटिं पटिबाहन्ति, नाञ्ञाति अत्थो. अनुवादं पट्ठपेन्तीति इस्सरियं पवत्तेन्तीति अत्थं वदन्ति.

४३०. भिक्खुदूतेनाति भिक्खुना दूतभूतेन. सिक्खमानदूतेनाति सिक्खमानाय दूताय.

४३१. न सम्मतीति नप्पहोति. नवकम्मन्ति ‘‘नवकम्मं कत्वा वसतू’’ति अपलोकेत्वा सङ्घिकभूमिया ओकासदानं.

४३२-६. सन्निसिन्नगब्भाति दुविञ्ञेय्यगब्भा. महिलातित्थेति इत्थीनं साधारणतित्थे.

भिक्खुनीउपसम्पदानुजाननकथावण्णना निट्ठिता.

भिक्खुनिक्खन्धकवण्णनानयो निट्ठितो.

११. पञ्चसतिकक्खन्धको

खुद्दानुखुद्दकसिक्खापदकथावण्णना

४३७. पञ्चसतिकक्खन्धके ¶ ¶ पाळियं ‘‘अपावुसो, अम्हाकं सत्थारं जानासी’’ति इदं थेरो सयं भगवतो परिनिब्बुतभावं जानन्तोपि अत्तना सहगतभिक्खुपरिसाय ञापनत्थमेव, सुभद्दस्स वुड्ढपब्बजितस्स सासनस्स पटिपक्खवचनं भिक्खूनं विञ्ञापनत्थञ्च एवं पुच्छि. सुभद्दो हि कुसिनारायं भगवति अभिप्पसन्नाय खत्तियादिगहट्ठपरिसाय मज्झे भगवतो परिनिब्बानं सुत्वा हट्ठपहट्ठोपि भयेन पहट्ठाकारं वाचाय पकासेतुं न सक्खिस्सति, इधेव पन विजनपदेसे सुत्वा यथाज्झासयं अत्तनो पापलद्धिं पकासेस्सति, ततो तमेव पच्चयं दस्सेत्वा भिक्खू समुस्साहेत्वा धम्मविनयसङ्गहं कारेत्वा एतस्स पापभिक्खुस्स, अञ्ञेसञ्च ईदिसानं मनोरथविघातं, सासनट्ठितिञ्च करिस्सामीति जानन्तोव तं पुच्छीति वेदितब्बं. तेनेव थेरो ‘‘एकमिदाहं, आवुसो, समय’’न्तिआदिना सुभद्दवचनमेव दस्सेत्वा धम्मविनयं सङ्गायापेसि. नानाभावोति सरीरेन नानादेसभावो, विप्पवासोति अत्थो. विनाभावोति मरणेन वियुज्जनं. अञ्ञथाभावोति भवन्तरूपगमनेन अञ्ञाकारप्पत्ति.

४४१. ‘‘आकङ्खमानो…पे… समूहनेय्या’’ति इदं भगवा मया ‘‘आकङ्खमानो’’ति वुत्तत्ता एकसिक्खापदम्पि समूहनितब्बं अपस्सन्ता, समूहने च दोसं दिस्वा धम्मसङ्गहका भिक्खू ‘‘अपञ्ञत्तं न पञ्ञापेस्साम, पञ्ञत्तं न समुच्छिन्दिस्सामा’’तिआदिना पुन ‘‘पञ्ञत्तिसदिसाय अकुप्पाय कम्मवाचाय सावेत्वा समादाय वत्तिस्सन्ति, ततो याव सासनन्तरधाना अप्पटिबाहियानि सिक्खापदानि भविस्सन्ती’’ति इमिना अधिप्पायेन अवोचाति दट्ठब्बं. तेनेव महाथेरापि तथेव पटिपज्जिंसु.

गिहिगतानीति ¶ गिहीसु गतानि. खत्तियमहासारादिगिहीहि ञातानीति अत्थो. चितकधूमकालो अत्तनो पवत्तिपरियोसानभूतो एतस्साति धूमकालिकं.

४४३. ओळारिके ¶ निमित्ते करियमानेपीति ‘‘आकङ्खमानो, आनन्द, तथागतो कप्पं वा तिट्ठेय्य कप्पावसेसं वा’’ति एवं थूलतरे ‘‘तिट्ठतु, भगवा, कप्प’’न्ति याचनहेतुभूते ओकासनिमित्ते कम्मे करियमाने. मारेन परियुट्ठितचित्तोति मारेन आविट्ठचित्तो.

४४५. उज्जवनिकायाति पटिसोतगामिनिया. कुच्छितो लवो छेदो विनासो कुलवो, निरत्थकविनियोगो. तं न गच्छन्तीति न कुलवं गमेन्ति.

खुद्दानुखुद्दकसिक्खापदकथावण्णना निट्ठिता.

पञ्चसतिकक्खन्धकवण्णनानयो निट्ठितो.

१२. सत्तसतिकक्खन्धको

दसवत्थुकथावण्णना

४४६. सत्तसतिकक्खन्धके ¶ ¶ भिक्खग्गेनाति भिक्खुगणनाय. महीति हिमं.

४४७. अविज्जानिवुताति अविज्जानीवरणेन निवुता पटिच्छन्ना. अविद्दसूति अञ्ञाणिनो. उपक्किलेसा वुत्ताति तेसं समणब्राह्मणानं एते सुरापानादयो उपक्किलेसाति वुत्ता. नेत्तिया तण्हाय सहिता सनेत्तिका.

४५०-१. अहोगङ्गोति तस्स पब्बतस्स नामं. पटिकच्चेव गच्छेय्यन्ति यत्थ नं अधिकरणं वूपसमितुं भिक्खू सन्निपतिस्सन्ति, तत्थाहं पठममेव गच्छेय्यं. सम्भावेसुन्ति सम्पापुणिंसु.

४५२. अलोणिकन्ति लोणरहितं भत्तं, ब्यञ्जनं वा. आसुताति सब्बसम्भारसज्जिता, ‘‘असुत्ता’’ति वा पाठो.

४५३. उज्जविंसूति नावाय पटिसोतं गच्छिंसु. पाचीनकाति पुरत्थिमदिसाय जातत्ता वज्जिपुत्तके सन्धाय वुत्तं. पावेय्यकाति पावेय्यदेसवासिनो.

४५४. ननु त्वं, आवुसो, वुड्ढोति ननु त्वं थेरो निस्सयमुत्तो, कस्मा तं थेरो पणामेसीति भेदवचनं वदन्ति. गरुनिस्सयं गण्हामाति निस्सयमुत्तापि मयं एकं सम्भावनीयगरुं निस्सयभूतं गहेत्वाव वसिस्सामाति अधिप्पायो.

४५५. मूलादायकाति पठमं दसवत्थूनं दायका, आवासिकाति अत्थो. पथब्या सङ्घत्थेरोति ¶ लोके सब्बभिक्खूनं तदा उपसम्पदाय वुड्ढो. सुञ्ञताविहारेनाति सुञ्ञतामुखेन अधिगतफलसमापत्तिं सन्धाय वदति.

४५७. सुत्तविभङ्गेति पदभाजनीये. इदञ्च ‘‘यो पन भिक्खु सन्निधिकारकं खादनीयं वा भोजनीयं वा’’ति (पाचि. २५३) सुत्ते यावकालिकस्सेव परामट्ठत्ता ¶ सिङ्गीलोणस्स यावजीविकस्स सन्निधिकतस्स आमिसेन सद्धिं परिभोगे पाचित्तियं विभङ्गनयेनेव सिज्झतीति वुत्तं, तं पन पाचित्तियं विभङ्गे आगतभावं साधेतुं ‘‘कथं सुत्तविभङ्गे’’तिआदि वुत्तं. तत्थ हि लोणमेत्थ सन्निधिकतं, न खादनीयं भोजनीयन्ति लोणमिस्सभोजने वज्जिपुत्तका अनवज्जसञ्ञिनो अहेसुं. तथासञ्ञीनम्पि नेसं आपत्तिदस्सनत्थं ‘‘सन्निधिकारे असन्निधिकारसञ्ञी’’ति इदं सुत्तविभङ्गं उद्धटन्ति वेदितब्बं.

तेन सद्धिन्ति पुरेपटिग्गहितलोणेन सद्धिं. दुक्कटेनेत्थ भवितब्बन्ति ‘‘यावकालिकेन, भिक्खवे, यावजीविकं पटिग्गहित’’न्ति अवत्वा ‘‘तदहुपटिग्गहित’’न्ति वचनसामत्थियतो पुरेपटिग्गहितं यावजीविकं यावकालिकेन सद्धिं सम्भिन्नरसं कालेपि न कप्पतीति सिज्झति, तत्थ दुक्कटेन भवितब्बन्ति अधिप्पायो. दुक्कटेनपि न भवितब्बन्ति यदि हि सन्निधिकारपच्चया दुक्कटं मञ्ञथ, यावजीविकस्स लोणस्स सन्निधिदोसाभावा दुक्कटेन न भवितब्बं, अथ आमिसेन सम्भिन्नरसस्स तस्स आमिसगतिकत्ता दुक्कटं मा मञ्ञथ. तदा च हि पाचित्तियेनेव भवितब्बं आमिसत्तुपगमनतोति अधिप्पायो. न हि एत्थ यावजीविकन्तिआदिनापि दुक्कटाभावं समत्थेति.

पाळियं राजगहे सुत्तविभङ्गेतिआदीसु सब्बत्थ सुत्ते च विभङ्गे चाति अत्थो गहेतब्बो. तस्स तस्स विकालभोजनादिनो सुत्तेपि पटिक्खित्तत्ता विनयस्स अतिसरणं अतिक्कमो विनयातिसारो. ‘‘निसीदनं नाम सदसं वुच्चतीति आगत’’न्ति इदं विभङ्गे च आगतदस्सनत्थं वुत्तं. तं पमाणं करोन्तस्साति सुगतविदत्थिया विदत्थित्तयप्पमाणं करोन्तस्स, दसाय पन विदत्थिद्वयप्पमाणं कतं. अदसकम्पि निसीदनं वट्टति एवाति अधिप्पायो. सेसमिध हेट्ठा सब्बत्थ सुविञ्ञेय्यमेव.

दसवत्थुकथावण्णना निट्ठिता.

सत्तसतिकक्खन्धकवण्णनानयो निट्ठितो.

इति समन्तपासादिकाय विनयट्ठकथाय विमतिविनोदनियं

चूळवग्गवण्णनानयो निट्ठितो.

नमो तस्स भगवतो अरहतो सम्मासम्बुद्धस्स

परिवारवण्णना

महावग्गो

पञ्ञत्तिवारवण्णना

१. विसुद्धपरिवारस्स ¶ ¶ सीलक्खन्धादिधम्मक्खन्धसरीरस्स भगवतो विनयपरियत्तिसासने खन्धकानं अनन्तरं परिवारोति यो विनयो सङ्गहं समारुळ्हो, तस्स दानि अनुत्तानत्थवण्णनं करिस्सामीति योजना.

समन्तचक्खुनाति सब्बञ्ञुतञ्ञाणेन. अतिविसुद्धेन मंसचक्खुनाति रत्तिन्दिवं समन्ता योजनप्पमाणे अतिसुखुमानिपि रूपानि पस्सनतो अतिविय परिसुद्धेन पसादचक्खुना. ‘‘अत्थि तत्थ पञ्ञत्ती’’तिआदीसु अत्थि नु खो तत्थ पञ्ञत्तीतिआदिना अत्थो गहेतब्बोति आह ‘‘तत्थ पञ्ञत्ति…पे… केनाभतन्ति पुच्छा’’ति.

२. पुच्छाविस्सज्जनेति ¶ पुच्छाय विस्सज्जने. विनीतकथाति विनीतवत्थुकथा, अयमेव वा पाठो.

द्वङ्गिकेन एकेन समुट्ठानेनाति अङ्गद्वयसमुदायभूतेन एकेन. अङ्गद्वयविमुत्तस्स समुट्ठानस्स अभावेपि तेसु एकेनङ्गेन विना अयं आपत्ति न होतीति दस्सनत्थमेव ‘‘एकेन समुट्ठानेना’’ति वुत्तं. इदानि तेसु द्वीसु अङ्गेसु पधानङ्गं दस्सेतुमाह ‘‘एत्थ हि चित्तं अङ्गं होती’’तिआदि. यस्मा पन मग्गेनमग्गप्पटिपत्तिसङ्खाताय कायविञ्ञत्तिया सेवनचित्तेनेव सम्भवे सति अयं तं अङ्गद्वयं उपादाय भगवता पञ्ञत्ता आपत्तिसम्मुति होति, नासति. तस्मा तं चित्तं कायविञ्ञत्तिसङ्खातस्स कायस्स अङ्गं कारणं होति, न आपत्तिया. तस्स पन तंसमुट्ठितकायो एव अङ्गं अब्यवहितकारणं, चित्तं पन कारणकारणन्ति अधिप्पायो. एवं उपरिपि सब्बत्थ चित्तङ्गयुत्तसमुट्ठानेसु अधिप्पायो ¶ वेदितब्बो. ‘‘एकेन समुट्ठानेन समुट्ठाती’’तिआदिपरिवारवचनेनेव आपत्तिया अकुसलादिपरमत्थसभावता पाळिअट्ठकथासु परियायतोव वुत्ता, सम्मुतिसभावा एव आपत्तीति सिज्झति समुट्ठानसमुट्ठितानं भेदसिद्धितोति गहेतब्बं. इममत्थं सन्धायाति आपन्नाय पाराजिकापत्तिया केहिचिपि समथेहि अनापत्तिभावापादनस्स असक्कुणेय्यत्तसङ्खातमत्थं सन्धाय.

३. पोराणकेहि महाथेरेहीति सङ्गीतित्तयतो पच्छा पोत्थकसङ्गीतिकारकेहि छळभिञ्ञापअसम्भिदादिगुणसमुज्जलेहि महाथेरेहि. चतुत्थसङ्गीतिसदिसा हि पोत्थकारोहसङ्गीति.

१८८. महाविभङ्गेति भिक्खुविभङ्गे. सोळस वारा दस्सिताति येहि वारेहि आदिभूतेहि उपलक्खितत्ता अयं सकलोपि परिवारो सोळसपरिवारोति वोहरीयति, ते सन्धाय वदति.

पञ्ञत्तिवारवण्णना निट्ठिता.

समुट्ठानसीसवण्णना

२५७. पाळियं निब्बानञ्चेव पञ्ञत्तीति एत्थ यस्मा सङ्खतधम्मे उपादाय पञ्ञत्ता सम्मुतिसच्चभूता पुग्गलादिपञ्ञत्ति परमत्थतो अविज्जमानत्ता उप्पत्तिविनासयुत्तवत्थुधम्मनियतेन अनिच्चदुक्खलक्खणद्वयेन युत्ताति वत्तुं अयुत्ता, कारकवेदकादिरूपेन पन परिकप्पितेन अत्तसभावेन विरहितत्ता ‘‘अनत्ता’’ति वत्तुं युत्ता. तस्मा अयं पञ्ञत्तिपि असङ्खतत्तसामञ्ञतो ¶ वत्थुभूतेन निब्बानेन सह ‘‘अनत्ता इति निच्छया’’ति वुत्ता. अविज्जमानापि हि सम्मुति केनचि पच्चयेन अकतत्ता असङ्खता एवाति.

करुणासीतलत्तं, पञ्ञापभासितत्तञ्च भगवतो दस्सेतुं ‘‘बुद्धचन्दे, बुद्धादिच्चे’’ति एतं उभयं वुत्तं. हायति एतेनाति हानि, दुक्खस्स हानि दुक्खहानि, सब्बदुक्खापनूदनकारणन्ति अत्थो. पिटके तीणि देसयीति यस्मा अञ्ञेपि महावीरा सम्मासम्बुद्धा सद्धम्मं देसयन्ति, तस्मा ¶ अङ्गीरसो पिटकानि तीणि देसयीति योजना. महागुणन्ति महानिसंसं. एवं नीयति सद्धम्मोति यदि विनयपरियत्ति अपरिहीना तिट्ठति, एवं सति पटिपत्तिपटिवेधसद्धम्मोपि नीयति पवत्तीयति, न परिहायतीति अत्थो.

विनयपरियत्ति पन कथं तिट्ठतीति आह ‘‘उभतो चा’’तिआदि. परिवारेन गन्थिता तिट्ठतीति योजेतब्बं. तस्सेव परिवारस्साति तस्मिं एव परिवारे. समुट्ठानं नियतो कतन्ति एकच्चं समुट्ठानेन नियतं कतं. तस्मिं परिवारे किञ्चि सिक्खापदं नियतसमुट्ठानं अञ्ञेहि असाधारणं, तं पकासितन्ति अत्थो.

सम्भेदं निदानञ्चञ्ञन्ति सम्भेदो सिक्खापदानं अञ्ञमञ्ञसमुट्ठानेन संकिण्णता, निदानञ्च पञ्ञत्तिट्ठानं, अञ्ञं पुग्गलादिवत्थादि च. सुत्ते दिस्सन्ति उपरीति हेट्ठा वुत्ते, उपरि वक्खमाने च परिवारसुत्ते एव दिस्सन्ति. यस्मा च एवं, तस्मा सकलसासनाधारस्स विनयस्स ठितिहेतुभूतं परिवारं सिक्खेति, एवमेत्थ योजना दट्ठब्बा.

सम्भिन्नसमुट्ठानानीति अञ्ञेहि साधारणसमुट्ठानानि. आदिम्हि ताव पुरिमनयेति सब्बपठमे पञ्ञत्तिवारे आगतनयं सन्धाय वदति, तत्थ पन पञ्ञत्तिवारे ‘‘पठमं पाराजिकं कत्थ पञ्ञत्तन्ति, वेसालियं पञ्ञत्त’’न्तिआदिना (परि. १) निदानम्पि दिस्सति एव. परतोति आगतभावं पन सन्धाय परतो आगते सुत्ते दिस्सतीति वेदितब्बन्ति वुत्तं. तस्साति उभतोविभङ्गपरियापन्नस्स सिक्खापदस्स.

२५८. अनियता पठमिकाति आपत्तिं अपेक्खित्वाव इत्थिलिङ्गं कतं, पठमानियतं सिक्खापदन्ति अत्थो. पाळियं नानुबन्धे पवत्तिनिन्ति वुट्ठापितं पवत्तिनिं अननुबन्धनसिक्खापदं.

२६०. एळकलोमसिक्खापदवत्थुस्मिं ¶ ‘‘भिक्खुनियो एळकलोमानि धोवन्तियो रजन्तियो विजटेन्तियो रिञ्चन्ति उद्देसं परिपुच्छ’’न्ति (पारा. ५७६) आगतत्ता इमं रिञ्चन्ति-पदं गहेत्वा सिक्खापदं उपलक्खितन्ति दस्सेन्तो ‘‘विभङ्गे ‘रिञ्चन्ति उद्देस’न्ति आगतं एळकलोमधोवापनसिक्खापद’’न्ति आह.

वस्सिकसाटिकसिक्खापदन्ति ¶ असमये वस्सिकसाटिकपरियेसनसिक्खापदं (पारा. ६२६ आदयो). रतनसिक्खापदन्ति रतनं वा रतनसम्मतं वा पटिसामनसिक्खापदं (पाचि. ५०२ आदयो).

२६५. पाळियं बुद्धञाणेनाति पटिविद्धसब्बञ्ञुतञ्ञाणेन.

२६७. ‘‘न देसेन्ति तथागता’’ति एतेन छत्तपाणिस्स धम्मदेसनापटिक्खेपं दस्सेति.

२६९. अकतन्ति अञ्ञेहि अमिस्सीकतं, नियतसमुट्ठानन्ति अत्थो. अकतन्ति वा पुब्बे अनागतं, अभिनवन्ति अत्थो.

२७०. समुट्ठानञ्हि सङ्खेपन्ति एत्थ सङ्खिपन्ति सङ्गय्हन्ति सदिससमुट्ठानानि एत्थाति सङ्खेपो, समुट्ठानसीसं. नेति विनेति कायवचीदुच्चरितन्ति नेत्ति, विनयपाळि, सा एव धम्मोति नेत्तिधम्मोति आह ‘‘विनयपाळिधम्मस्सा’’ति.

समुट्ठानसीसवण्णना निट्ठिता.

अन्तरपेय्यालं

कतिपुच्छावारवण्णना

२७१. कति ¶ आपत्तियोति पाराजिकादीसु पञ्चसु आपत्तीसु मेथुनादिन्नादानादिअन्तोगधभेदं अपेक्खित्वा जातिवसेन एकत्तं आरोपेत्वा पुच्छा कता. कति आपत्तिक्खन्धाति अन्तोगधभेदं अपेक्खित्वा पच्चेकं रासट्ठेनाति एत्तकमेवेत्थ भेदो. विनीतानियेव ¶ विनीतवत्थूनीति आपत्तितो विरमणानि एव अविप्पटिसारपामोज्जादिधम्मानं कारणत्ता वत्थूनीति विनीतवत्थूनि, तानि एत्थ अत्थतो विरतिआदिअनवज्जधम्मा एव. वेरं मणतीति वेरहेतुत्ता ‘‘वेर’’न्ति लद्धनामं रागादिअकुसलपक्खं विनासेति.

धम्मस्सवनग्गं भिन्दित्वा गच्छतीति बहूसु एकतो निसीदित्वा धम्मं सुणन्तेसु तं धम्मस्सवनसमागमं कोपेत्वा उट्ठाय गच्छति. अनादरोवाति तुस्सितब्बट्ठाने तुट्ठिं, संविजितब्बट्ठाने संवेगञ्च अपवेदेन्तो एव. कायपागब्भियन्ति उन्नतिवसेन पवत्तनकायानाचारं.

२७४. मेत्ताय सम्भूतं मेत्तं, कायकम्मं. उभयेहिपीति नवकेहि, थेरेहि च. पियं करोतीति तं पुग्गलं पेमट्ठानं करोति, केसन्ति आह ‘‘सब्रह्मचारीन’’न्ति.

पुग्गलं पटिविभजित्वा भुञ्जतीति पकतेन सम्बन्धो. तमेव पुग्गलपटिविभागं दस्सेतुं ‘‘असुकस्सा’’तिआदि वुत्तं.

भुजिस्सभावकरणतोति तण्हादासब्यतो मोचेत्वा समथविपस्सनासु सेरिविहारिताकरणतोति अत्थो. निय्यातीति पवत्तति. सम्मादुक्खक्खयाय संवत्ततीति अत्थो.

कतिपुच्छावारवण्णना निट्ठिता.

छआपत्तिसमुट्ठानवारवण्णना

२७६. पठमेन आपत्तिसमुट्ठानेनाति केवलं कायेन. पाराजिकापत्तिया एकन्तसचित्तकसमुट्ठानत्ता ‘‘न हीति वत्तब्ब’’न्ति वुत्तं. सङ्घादिसेसादीनं ¶ दुक्कटपरियोसानानं पञ्चन्नं अचित्तकानम्पि सम्भवतो ‘‘सिया’’ति वुत्तं, आपज्जनं सिया भवेय्याति अत्थो. हीनुक्कट्ठेहि जातिआदीहि ओमसने एव दुब्भासितस्स पञ्ञत्तत्ता सा एकन्तवाचाचित्तसमुट्ठाना एवाति.

दुतियसमुट्ठाननये वाचाय एव समापज्जितब्बपाटिदेसनीयस्स अभावा ‘‘न ही’’ति वुत्तं.

ततिये ¶ पन वोसासमानरूपं भिक्खुनिं कायवाचाहि अनपसादनपच्चया पाटिदेसनीयसम्भवतो ‘‘सिया’’ति वुत्तं.

ओमसने पाचित्तियस्स अदिन्नादानसमुट्ठानत्तेपि तप्पच्चया पञ्ञत्तस्स दुब्भासितस्स पञ्चमेनेव समुप्पत्तीति दस्सेतुं चतुत्थवारे ‘‘दुब्भासितं आपज्जेय्याति न हीति वत्तब्ब’’न्ति वत्वा पञ्चमवारे ‘‘सियाति वत्तब्ब’’न्ति वुत्तं. कायविकारेनेव ओमसन्तस्स पनेत्थ दुब्भासितभावेपि कायकीळाभावाभावतो दुक्कटमेवाति दट्ठब्बं.

छट्ठवारे पन विज्जमानोपि कायो दुब्भासितस्स अङ्गं न होति, पञ्चमसमुट्ठाने एव छट्ठम्पि पविसतीति दस्सेतुं ‘‘न ही’’ति पटिक्खित्तं, न पन तत्थ सब्बथा दुब्भासितेन अनापत्तीति दस्सेतुं. न हि दवकम्यताय कायवाचाहि ओमसन्तस्स दुब्भासितापत्ति न सम्भवति. यञ्हि पञ्चमेनेव समापज्जति, तं छट्ठेनपि समापज्जति एव धम्मदेसनापत्ति वियाति गहेतब्बं. सेसं समुट्ठानवारे सुविञ्ञेय्यमेव.

छआपत्तिसमुट्ठानवारवण्णना निट्ठिता.

कतापत्तिवारवण्णना

२७७. दुतिये पन कतिवारे पठमसमुट्ठानेन आपज्जितब्बानं आपत्तीनं लहुदस्सनसुखत्थं कुटिकारादीनि एव समुद्धटानि, न अञ्ञेसं अभावा, सञ्चरित्तादीनम्पि विज्जमानत्ता. एवं दुतियसमुट्ठानादीसुपि. ‘‘कप्पियसञ्ञी’’ति इमिना अचित्तकत्तं दस्सेति. ‘‘कुटिं करोती’’ति इमिना वचीपयोगाभावं. उभयेनापि केवलं कायेनेव दुक्कटादीनं सम्भवं दस्सेति. एवं उपरिपि यथानुरूपं कातब्बं.

‘‘एकेन ¶ समुट्ठानेन समुट्ठहन्ती’’ति इदं इध विसेसेत्वा दस्सितानं कायतोव समुट्ठितानं वसेन वुत्तं, अविसेसतो पन ता आपत्तियो इतरसमुट्ठानेहिपि यथारहं समुट्ठहन्ति एव. एवं उपरिपि.

‘‘तिणवत्थारकेन चा’’ति इदं सङ्घादिसेसवज्जितानं चतुन्नं आपत्तीनं वसेन वुत्तं.

२७९. संविदहित्वा ¶ कुटिं करोतीति वाचाय संविदहति, सयञ्च कायेन करोतीति अत्थो.

कतापत्तिवारवण्णना निट्ठिता.

आपत्तिसमुट्ठानगाथावण्णना

२८३. ततियो पन गाथावारो दुतियवारेन वुत्तमेवत्थं सङ्गहेत्वा दस्सेतुं वुत्तो. तत्थ कायोव कायिकोति वत्तब्बे वचनविपल्लासेन ‘‘कायिका’’ति वुत्तं. तेनाह ‘‘तेन समुट्ठिता’’ति, कायो समुट्ठानं अक्खातोति अत्थो.

विवेकदस्सिनाति सब्बसङ्खतविवित्तत्ता, ततो विवित्तहेतुत्ता च नीवरणविवेकञ्च निब्बानञ्च दस्सनसीलेन. विभङ्गकोविदाति उभतोविभङ्गकुसलाति आलपनं. इध पनेवं अञ्ञो पुच्छन्तो नाम नत्थि, उपालित्थेरो सयमेव अत्थं पाकटं कातुं पुच्छाविसज्जनञ्च अकासीति इमिना नयेन सब्बत्थ अत्थो वेदितब्बो.

आपत्तिसमुट्ठानगाथावण्णना निट्ठिता.

विपत्तिपच्चयवारवण्णना

२८४. चतुत्थे पन विपत्तिपच्चयवारे सीलविपत्तिपच्चयाति सीलविपत्तिपअच्छादनपच्चया.

२८६. दिट्ठिविपत्तिपच्चयाति दिट्ठिविपत्तिया अप्पटिनिस्सज्जनपच्चया.

२८७. आजीवविपत्तिपच्चयाति ¶ एत्थ आगम्म जीवन्ति एतेनाति आजीवो, चतुपच्चयो, सोव मिच्छापत्तिया विपन्नत्ता विपत्तीति आजीवविपत्ति, तस्सा आजीवविपत्तिया हेतु, तदुप्पादनतपरिभोगनिमित्तन्ति अत्थो.

विपत्तिपच्चयवारवण्णना निट्ठिता.

अधिकरणपच्चयवारवण्णना

२९१. पञ्चमे ¶ अधिकरणपच्चयवारे किच्चाधिकरणपच्चयाति अपलोकनवचनञत्तिकम्मवाचासङ्खतकम्मवाचापच्चया. पञ्चाति एत्थ अधम्मिककतिकादिं अपलोकेत्वा करोन्तानं अनिमित्तन्ति अत्थो. पञ्चमे अधिकरणपच्चयवारे किच्चाधिकरणपच्चया अपलोकनावसाने दुक्कटं, अधिप्पायादिना ञत्तिकम्मादिं करोन्तानं थुल्लच्चयादि च सङ्गय्हतीति दट्ठब्बं. अवसेसा आपत्तियोति सोतापत्तिफलसमापत्तिआदयो. ‘‘नत्थञ्ञा आपत्तियो’’ति इदं विपत्तिआदिभागिनियो सावज्जापत्तियो सन्धाय वुत्तं.

अधिकरणपच्चयवारवण्णना निट्ठिता.

समथभेदं

अधिकरणपरियायवारवण्णना

२९३. छट्ठे ¶ परियायवारे अलोभो पुब्बङ्गमोतिआदि सासनट्ठितिया अविपरीततो धम्मवादिस्स विवादं सन्धाय वुत्तं. अट्ठारस भेदकरवत्थूनि ठानानीति धम्मादीसु अधम्मोतिआदिना गहेत्वा दीपनानि इधेव भेदकरवत्थूनि, तानि एव कायकलहादिविवादस्स कारणत्ता ठानानि, ओकासत्ता वत्थूनि, आधारत्ता भूमियोति च वुत्तानि. अब्याकतहेतूति असेक्खानं विवादं सन्धाय वुत्तं. द्वादस मूलानीति कोधो उपनाहो, मक्खो पलासो, इस्सा मच्छरियं, माया साठेय्यं, पापिच्छता महिच्छता, सन्दिट्ठिपरामासिता आधानग्गाहीदुप्पटिनिस्सज्जितानीति इमेसं छन्नं युगळानं वसेन छ धम्मा चेव लोभादयो छ हेतू चाति द्वादस धम्मा विवादाधिकरणस्स मूलानि.

२९४. चुद्दस मूलानीति तानेव द्वादस कायवाचाहि सद्धिं चुद्दस अनुवादाधिकरणस्स मूलानि.

२९५. पथवीखणनादीसु पण्णत्तिवज्जेसु कुसलाब्याकतचित्तमूलिका आपत्ति होतीति दस्सेतुं ‘‘अलोभो पुब्बङ्गमो’’तिआदि वुत्तं. सत्त आपत्तिक्खन्धा ठानानीतिआदि सत्तन्नं आपत्तिक्खन्धानं ¶ पटिच्छादनपच्चया आपत्तिसम्भवतो वुत्तं. ‘‘आपत्ताधिकरणपच्चया चतस्सो आपत्तियो आपज्जती’’ति (परि. २९०) हि वुत्तं. ‘‘छ हेतू’’ति इदं कुसलानं आपत्तिहेतुवोहारस्स अयुत्तताय वुत्तं, न पन कुसलहेतूनं अभावतो. ‘‘अलोभो पुब्बङ्गमो’’ति हि आदि वुत्तं. आपत्तिहेतवो एव हि पुब्बङ्गमनामेन वुत्ता.

२९६. चत्तारि कम्मानि ठानानीतिआदीसु अपलोकनवाचा, ञत्तिआदिवाचायो च कम्मानीति वुत्तं. ता एव हि एकसीमायं सामग्गिमुपगतानं कम्मप्पत्तानं अनुमतिया सावनकिरियानिप्फत्तिसङ्खातस्स सङ्घगणकिच्चसभावस्स किच्चाधिकरणस्स अधिट्ठानाभावेन ‘‘ठानवत्थुभूमियो’’ति वुच्चन्ति. एकं मूलं सङ्घोति येभुय्यवसेन वुत्तं. गणञत्तिअपलोकनानञ्हि ¶ गणोपि मूलन्ति. ञत्तितो वाति ञत्तिञत्तिदुतियञत्तिचतुत्थकम्मवाचानं ञत्तिरूपत्ता, ञत्तिपुब्बकत्ता च वुत्तं. कम्मञत्तिकम्मवाचाञत्तिवसेन हि दुविधासु ञत्तीसु अनुस्सावनापि कम्ममूलकन्त्वेव सङ्गय्हन्ति. ञत्तिविभागो चायं उपरि आवि भविस्सति.

‘‘इमे सत्त समथा…पे… परियायेना’’ति इदं पुच्छावचनं. ‘‘सिया’’ति इदं विसज्जनं. ‘‘कथञ्च सिया’’ति इदं पुन पुच्छा. विवादाधिकरणस्स द्वे समथातिआदि पुन विसज्जनं. तत्थ ‘‘वत्थुवसेना’’ति इदं ‘‘सत्त समथा दस समथा होन्ती’’ति इमस्स कारणवचनं. ‘‘परियायेना’’ति इदं ‘‘दस समथा सत्त समथा होन्ती’’ति इमस्स कारणवचनं. चतुब्बिधाधिकरणसङ्खातवत्थुवसेन च देसनाक्कमसङ्खातपरियायवसेन चाति अत्थो.

अधिकरणपरियायवारवण्णना निट्ठिता.

साधारणवारादिवण्णना

२९७. सत्तमे साधारणवारे साधारणाति विवादाधिकरणस्स वूपसमनकिच्चसाधारणा. एवं सब्बत्थ.

२९८. अट्ठमे तब्भागियवारे तब्भागियाति विवादाधिकरणस्स वूपसमनतो तप्पक्खिका.

साधारणवारादिवण्णना निट्ठिता.

समथासमथस्ससाधारणवारवण्णना

२९९. नवमे ¶ समथासमथसाधारणवारे ‘‘सब्बे समथा एकतोव अधिकरणं समेन्ति उदाहु नाना’’ति पुच्छन्तेन ‘‘समथा समथस्स साधारणा, समथा समथस्स असाधारणा’’ति वुत्तं. विवादादिअधिकरणक्कमेन तब्बूपसमहेतुभूते समथे उद्धरन्तो ‘‘येभुय्यसिका’’तिआदिमाह. सम्मुखाविनयं विना कस्सचि समथस्स असम्भवा सेसा छपि समथा सम्मुखाविनयस्स साधारणा वुत्ता, तेसं ¶ पन छन्नं अञ्ञमञ्ञापेक्खाभावतो ते अञ्ञमञ्ञं असाधारणा वुत्ता. तब्भागियवारेपि एसेव नयो.

समथासमथस्ससाधारणवारवण्णना निट्ठिता.

समथसम्मुखाविनयवारादिवण्णना

३०१-३. एकादसमवारेपि सम्मुखाविनयोतिआदि पुच्छा. येभुय्यसिका सतिविनयोतिआदि विसज्जनं. एवं विनयवारे कुसल-वारे ततो परेसुपि पुच्छाविसज्जनपरिच्छेदो वेदितब्बो.

तत्थ सम्मुखाविनयो सिया कुसलोतिआदीसु तस्मिं तस्मिं विनयकम्मे, विवादादिम्हि च नियुत्तपुग्गलानं समुप्पज्जनककुसलादीनं वसेन सम्मुखाविनयादीनं, विवादादीनञ्च कुसलादिभावो तेन तेन उपचारेन वुत्तो. यस्मा पनेतस्स सम्मुखाविनयो नाम सङ्घसम्मुखतादयो होन्ति, तेसञ्च अनवज्जसभावत्ता अकुसले विज्जमानेपि अकुसलत्तूपचारो न युत्तो आपत्ताधिकरणस्स अकुसलत्तूपचारो विय, तस्मा नत्थि सम्मुखाविनयो अकुसलोति अत्थो.

३०४. ततो परेसु यत्थ येभुय्यसिका लब्भति, तत्थ सम्मुखाविनयो लब्भतीतिआदि सम्मुखाविनयस्स इतरेहि समथेहि नियमेन संसट्ठतं, इतरेसं पन छन्नं अञ्ञमञ्ञं संसग्गाभावञ्च दस्सेतुं वुत्तं.

समथसम्मुखाविनयवारादिवण्णना निट्ठिता.

संसट्ठवारादिवण्णना

३०६. अधिकरणन्ति ¶ वा समथाति वा इमे धम्मा संसट्ठातिआदि समथानं अधिकरणेसु एव यथारहं पवत्तिं, अधिकरणानि विना तेसं विसुं अट्ठानञ्च दस्सेतुं वुत्तं. विनिब्भुजित्वा नानाकरणं पञ्ञापेतुन्ति अधिकरणतो समथेहि वियोजेत्वा असंसट्ठे कत्वा नानाकरणं अञ्ञमञ्ञं असंसट्ठताय ठितभावसङ्खातं नानत्तं पञ्ञापेतुं अधिकरणवूपसमक्खणे एव तेसं असंसग्गं पञ्ञापेतुं किं सक्काति पुच्छति.

अधिकरणन्तिआदि ¶ गारय्हवाददस्सनं. सो मा हेवन्ति यो एवं वदति, सो ‘‘मा एवं वदा’’ति वचनीयो अस्स, न च लब्भति समथानं अञ्ञत्र अधिकरणा वूपसमलक्खणन्ति पहानावत्थानसङ्खातं नानाकरणं पटिक्खिपति. लक्खणतो पन अधिकरणेहि समथानं नानाकरणं अत्थेवाति दट्ठब्बं. समथा अधिकरणेहि सम्मन्तीति अपलोकनादीहि चतूहि किच्चाधिकरणेहि सब्बेपि समथा निट्ठानं गच्छन्ति, नाञ्ञेहीति इममत्थं सन्धाय वुत्तं. तेनेव वक्खति ‘‘सम्मुखाविनयो विवादाधिकरणेन न सम्मति. अनुवाद…पे… आपत्ताधिकरणेन न सम्मति, किच्चाधिकरणेन सम्मती’’तिआदि (परि. ३११).

३०७-३१३. विवादाधिकरणं कतिहि समथेहि सम्मतीतिआदिको सम्मतिवारो. तदनन्तरो सम्मतिनसम्मतिवारो च अधिकरणेहि समथानं संसट्ठतं, विसंसट्ठतञ्च दस्सेतुं वुत्तो. समथा समथेहि सम्मन्तीतिआदिको समथाधिकरणवारो समथानं अञ्ञमञ्ञं, अधिकरणेहि च अधिकरणानञ्च अञ्ञमञ्ञं, समथेहि च वूपसमावूपसमं दस्सेतुं वुत्तो.

३१४. समुट्ठापेतिवारो पन अधिकरणेहि अधिकरणानं उप्पत्तिप्पकारदस्सनत्थं वुत्तो. न कतमं अधिकरणन्ति अत्तनो सम्भवमत्तेन एकम्पि अधिकरणं न समुट्ठापेतीति अत्थो. कथञ्चरहि समुट्ठापेतीति आह ‘‘अपि चा’’तिआदि. तत्थ जायन्तीति अनन्तरमेव अनुप्पज्जित्वा परम्परपच्चया जायन्तीति अधिप्पायो. ‘‘धम्मो अधम्मो’’तिआदिना उभिन्नं पुग्गलानं विवादपच्चया अञ्ञमञ्ञखेमभङ्गा होन्ति, तप्पच्चया तेसं पक्खं परियेसनेन कलहं वड्ढन्तानं विवादो कञ्चि महापरिसं सङ्घपरिणायकं लज्जिं आगम्म वूपसमं गच्छति. तथा अवूपसमन्ते पन विवादो कमेन वड्ढित्वा सकलेपि सङ्घे विवादं समुट्ठापेति, ततो अनुवादादीनीति एवं परम्परक्कमेन वूपसमकारणाभावे चत्तारि अधिकरणानि जायन्ति. तं सन्धायाह ¶ ‘‘सङ्घो विवदति विवादाधिकरण’’न्ति. सङ्घस्स विवदतो यो विवादो, तं विवादाधिकरणं होतीति अत्थो. एस नयो सेसेसुपि.

संसट्ठवारादिवण्णना निट्ठिता.

भजतिवारवण्णना

३१८. तदनन्तरवारे ¶ पन विवादाधिकरणं चतुन्नं अधिकरणानन्तिआदि अधिकरणानं वुत्तनयेन अञ्ञमञ्ञपच्चयत्तेपि संसग्गभावदस्सनत्थं वुत्तं. विवादाधिकरणं चतुन्नं अधिकरणानं विवादाधिकरणं भजतीतिआदीसु विवादाधिकरणं चतूसु अधिकरणेसु विवादाधिकरणभावमेव भजति, नाञ्ञाधिकरणभावं, चतूसु अधिकरणेसु विवादाधिकरणत्तमेव निस्सितं विवादाधिकरणमेव परियापन्नं विवादाधिकरणभावेनेव सङ्गहितन्ति एवमत्थो गहेतब्बो.

३१९. विवादाधिकरणं सत्तन्नं समथानं कति समथे भजतीतिआदि पन चतुन्नं अधिकरणानं वूपसमने सति नियतसमथे दस्सेतुं वुत्तं. तत्थ कति समथे भजतीति अत्तनो उपसमत्थाय कित्तके समथे उपगच्छति, कित्तके समथे आगम्म वूपसमं गच्छतीति अत्थो. कति समथपरियापन्नन्ति अत्तानं वूपसमेतुं कतिसु समथेसु तेहि समानवसेन पविट्ठं. कतिहि समथेहि सङ्गहितन्ति वूपसमं करोन्तेहि कतिहि समथेहि वूपसमकरणत्थं सङ्गहितं.

भजतिवारवण्णना निट्ठिता.

खन्धकपुच्छावारो

पुच्छाविस्सज्जनावण्णना

३२०. उपसम्पदक्खन्धकन्ति ¶ पब्बज्जाखन्धकं (महाव. ८४). सह निद्देसेनाति सनिद्देसं. ‘‘सन्निद्देस’’न्ति वा पाठो, सो एवत्थो. निदानेन च निद्देसेन च सद्धिन्ति एत्थ पञ्ञत्तिट्ठानपुग्गलादिप्पकासकं निदानवचनं निदानं नाम, तन्निदानं पटिच्च निद्दिट्ठसिक्खापदानि ¶ निद्देसो नाम, तेहि अवयवभूतेहि सहितं तंसमुदायभूतं खन्धकं पुच्छामीति अत्थो. उत्तमानि पदानीति आपत्तिपञ्ञापकानि वचनानि अधिप्पेतानि. तेसं…पे… कति आपत्तियो होन्तीति तेहि वचनेहि पञ्ञत्ता कति आपत्तिक्खन्धा होन्तीति अत्थो. ननु आपत्तियो नाम पुग्गलानञ्ञेव होन्ति, न पदानं, कस्मा पन ‘‘समुक्कट्ठपदानं कति आपत्तियो’’ति सामिवसेन निद्देसो कतोति आह ‘‘येन येन हि पदेना’’तिआदि. पाळियं उपोसथन्तिआदि उपोसथक्खन्धकादीनञ्ञेव (महाव. १३२ आदयो) गहणं.