📜

नमो तस्स भगवतो अरहतो सम्मासम्बुद्धस्स

कङ्खावितरणीपुराण-टीका

गन्थारम्भकथा

बुद्धं ¶ ¶ धम्मञ्च सङ्घन्ति-आदिना या पकासिता;

भदन्तबुद्धघोसेन, मातिकाट्ठकथा सुभा;

तस्सा हि लीनपदं वि-कासनकोयमारम्भो.

गन्थारम्भकथावण्णना

विप्पसन्नेनाति ¶ विविधप्पसन्नेन. कथं? ‘‘इतिपि सो…पे… बुद्धो भगवा, स्वाक्खातो…पे… विञ्ञूहि, सुप्पटिपन्नो…पे… लोकस्सा’’ति (अ. नि. ५.१०) एवमादिना. ‘‘चेतसा’’ति वुत्तत्ता तीसु वन्दनासु चेतोवन्दना अधिप्पेता. तन्निन्नतादिवसेन कायादीहि पणामकरणं वन्दना, गुणवसेन मनसापि तथाव करणं मानं, पच्चयप्पटिपत्तियादीहि पूजाकरणं पूजा, पच्चयादीनं अभिसङ्खरणं सक्कच्च करणं सक्कारो, तेसं. भाजनन्ति आधारो, अधिकरणं वा.

थेरा महाकस्सपादयो, तेसं वंसोति थेरवंसो, आगमाधिगमसम्पदाय तस्स वंसस्स पदीपभूताति थेरवंसप्पदीपा, तेसं थेरवंसप्पदीपानं. असंहीरत्ता थिरानं. विनयक्कमेति विनयपिटके, आरम्भानुरूपवचनमेतं. सुत्ताभिधम्मेसुपि ते थिरा एव. ‘‘बुद्धं धम्मञ्च सङ्घञ्च पुब्बाचरियसीहानञ्चा’’ति अवत्वा कस्मा विसुं वुत्तन्ति चे? पयोजनविसेसदस्सनत्थं. वत्थुत्तयस्स हि पणामकरणस्स अन्तरायनिवारणं पयोजनं ¶ अत्तनो निस्सयभूतानं आचरियानं पणामकरणस्स उपकारञ्ञुतादस्सनं. तेन बुद्धञ्च धम्मञ्च सङ्घञ्च वन्दित्वा, च-सद्देन पुब्बाचरियसीहानञ्च नमो कत्वाति योजना. अथ वा ‘‘वन्दित्वा’’ति चेतोवन्दनं दस्सेत्वा ततो ‘‘नमो कत्वा’’ति वाचावन्दना, ‘‘कतञ्जली’’ति कायवन्दनापि दस्सिताति योजेतब्बं.

इदानि अभिधानप्पयोजनं दस्सेतुं ‘‘पामोक्ख’’न्तिआदिमाह. तत्थ पामोक्खन्ति पधानं. सीलञ्हि सब्बेसं कुसलधम्मानं पधानं आदिभावतो. यथा च सत्तानं खज्जभोज्जलेय्यपेय्यवसेन चतुब्बिधोपि आहारो मुखेन पविसित्वा अङ्गमङ्गानि फरति, एवं योगिनोपि चातुभूमकं कुसलं सीलमुखेन पविसित्वा अत्थसिद्धिं सम्पादेति. तेन वुत्तं ‘‘मुख’’न्तिआदि. अथ वा मुखन्ति उपायो, तेन मोक्खप्पवेसाय निब्बानसच्छिकिरियाय मुखं उपायोति अत्थो. महेसिना यं पातिमोक्खं पकासितन्ति सम्बन्धो. महन्ते सीलादिक्खन्धे एसि गवेसीति महेसि.

सूरतेन निवातेनाति ‘‘तत्थ कतमं सोरच्चं? यो कायिको अवीतिक्कमो’’तिआदिना (ध. स. १३४९) सूरतेन, नीचवुत्तिना मानुद्धच्चवसेन अत्तानं अनुक्खिपनभावेन निवातेन. विनयाचारयुत्तेन चारित्तवारित्तेहि युत्तेन. ‘‘सोणत्थेरेन याचितो’’ति अवत्वा ‘‘सूरतेना’’तिआदि ¶ कस्मा वुत्तं, किं दुस्सीलेन वा दुट्ठेन वा अलज्जिना वा याचितेन वण्णना कातुं न वट्टतीति चे? न न वट्टति. थेरस्स वचनं पटिक्खिपितुं न सक्का, एवरूपगुणो थेरोव, याचनवसेन कत्तब्बो आदरेनाति दस्सेतुं वुत्तं.

नामेनाति अत्तनो गुणनामेन. सद्दलक्खणसुभतो, विनिच्छयसुभतो, विञ्ञेय्यसुभतो च सुभं.

गन्थारम्भकथावण्णना निट्ठिता.

निदानवण्णना

‘‘आविकता हिस्स फासु होति, तत्थायस्मन्ते पुच्छामि…पे… तुण्ही, एवमेतं धारयामी’’ति वत्वा ‘‘उद्दिट्ठं खो आयस्मन्तो निदान’’न्तिआदिना नयेन वुत्तं. एत्थेव यावततियानुसावनकथावसाने अथ ¶ खो उद्देसकाले ‘‘आविकता हिस्स फासु होती’’ति वत्वा ‘‘उद्दिट्ठं खो आयस्मन्तो निदानं. तत्थायस्मन्ते पुच्छामी’’तिआदिना नयेन आगतं. उपोसथक्खन्धकेपि एवमेव आगतं. तत्थ पुब्बे वुत्तं पच्छा आगतसुत्तेन विरुज्झति. तस्मा यथा न विरुज्झति, तथा उपपरिक्खित्वा गहेतब्बं. एवं न विरुज्झतीति एके. कथं? ‘‘आविकता हिस्स फासु होती’’ति वत्वा ‘‘उद्दिट्ठं खो आयस्मन्तो निदानं. तत्थायस्मन्ते पुच्छामी’’तिआदिना सुउद्दिट्ठं होतीति एतं उद्देसलक्खणं इधापि खन्धकेपि वुत्तत्ता. तस्मा ‘‘फासु होती’’ति वत्वा ‘‘तत्थायस्मन्ते पुच्छामी’’ति वुत्तट्ठाने अवुत्तम्पि आनेत्वा गहेतब्बं. कस्मा? इध निदानं न दस्सितं, उद्देसो उद्देसकाले उद्दिसितब्बलक्खणस्स तत्थ वुत्तत्ता. अपिच ‘‘निदानुद्देसो’’ति पदं उद्धरित्वा निदानुद्देसं दस्सेतुकामोपि ‘‘सुणातु मे, भन्ते, सङ्घो…पे… आविकता हिस्स फासु होती’’ति पाठवसेन आगतं निदानं निट्ठापेत्वा उपरि अट्ठकथावसेन योजेतब्बं पाळिं इध योजेत्वा ‘‘तत्थायस्मन्ते पुच्छामि…पे… धारयामी’’ति निदानपाळिं परिपुण्णं कत्वा पुन ‘‘तत्थ निदानुद्देसो’’ति उद्धटपदवसेन सङ्खेपतो निदानुद्देसलक्खणं दस्सेतुं ‘‘एवमेतं धारयामी’’ति वत्वा ‘‘उद्दिट्ठं खो आयस्मन्तो निदान’’न्तिआदि वुत्तं, तस्मा एवं उपरि च खन्धके च, अथ खो उद्देसकाले ‘‘आविकता हिस्स ¶ फासु होती’’ति वत्वा ‘‘उद्दिट्ठं खो आयस्मन्तो निदानं. तत्थायस्मन्ते पुच्छामी’’तिआदि निदानुद्देसोव दस्सितो, न निदानं.

सवनाणत्तिवचनन्ति एत्थ सङ्घनवकतरेन वत्तुं अयुत्तन्ति चे? युत्तमेव. ‘‘पातिमोक्खुद्देसकेन एवं वत्तब्ब’’न्ति भगवता वुत्तत्ता भगवतोव आणत्ति, न उद्देसकस्स. इध नवकतरवसेन वुत्तं. थेरोपि पन उद्दिसितुं लभतीति दस्सनत्थं ‘‘थेराधिकं पातिमोक्ख’’न्ति वुत्तं. इमिना सुत्तेन नवकतरो न लभतीति चे? तं दस्सेतुं ‘‘यो तत्थ भिक्खू’’तिआदि वुत्तं.

यथा चतुवग्गेन ठपेत्वा उपसम्पदापवारणाअब्भानानि सब्बं सङ्घकम्मं कातुं वट्टति, एवं ‘‘अतिरेकवीसतिवग्गेन इमं नाम कम्मं कातब्ब’’न्ति अवत्वा अतिरेकवचनत्ता अञ्ञं अत्थं सूचेति, किं तन्ति ‘‘चतुवग्गादिना’’तिआदि. तञ्हि तेहि एव सिद्धं. कथं? चतुवग्गेन उपसम्पदापवारणा…पे… वीसतिवग्गेन ¶ न किञ्चि सङ्घकम्मं कातुं न वट्टतीति. एत्थ ‘‘दसवग्गेन अब्भानकम्ममत्तं ठपेत्वा’’ति वदन्तेन चतुपञ्चवग्गेन करणीयानिपि दसवग्गेन कातुं अनुञ्ञातानि. तस्मा अतिरेकेन वट्टतीति दीपितं, ‘‘ठपेत्वा’’ति वचनेन ऊनतरेन न वट्टतीति दीपितमेव. तस्मा न वत्तब्बं अतिरेकवीसतिवग्गोति चे? वत्तब्बमेव. चतुपञ्चवग्गेन कत्तब्बं छसत्तअट्ठनववग्गेन कातब्बन्ति च, दसवग्गेन कातब्बं एकादसद्वादस…पे… एकूनवीसतिवग्गेन कातब्बन्ति च दीपितं. ऊनतरेन न वट्टतीति दीपितं पाकटतो. सब्बप्पकारेन पन अतिरेकवीसतिअनतिरेकवीसतिवग्गे वुत्तेपि दीपितं होतीति वजिरबुद्धित्थेरेन लिखितं. इतो पट्ठाय ‘‘लिखित’’न्ति वुत्ते वजिरबुद्धित्थेरेनाति गहेतब्बं.

सचे अनुपोसथेपि वट्टेय्य, ‘‘उपोसथं करेय्या’’ति न वदेय्य, यस्मा अनुपोसथे कातुं न वट्टति, तस्मा ‘‘अज्जुपोसथो’’ति वत्वा पुन ‘‘उपोसथं करेय्या’’ति वुत्तं. ‘‘पच्छिमकत्तिकपुण्णमा एवा’’ति अवधारणं ततो परं पवारणादिवसस्स नत्थिताय कतं. उद्धं पकतिउपोसथे वुत्तेन पकतिचारित्तेन सद्धिं इदम्पि.

‘‘निमित्तेन निमित्तं सम्बन्धित्वा’’ति न वत्तब्बं ‘‘तिविधसम्पत्तियुत्ता’’ति वुत्तत्ताति चे? वत्तब्बमेव. कस्मा? तिविधसम्पत्ति नाम निमित्तसम्पत्ति, परिसासम्पत्ति, कम्मवाचासम्पत्तीतिआदिं वत्वा ‘‘निमित्तसम्पत्ति नाम पब्बतनिमित्तं, पासाणनिमित्त’’न्तिआदि ¶ वुत्तं, न निमित्तेन निमित्तसम्बन्धनं वुत्तं. अपिच ‘‘तिविधसम्पत्तियुत्ता’’ति सम्पयोगङ्गेसु दस्सेत्वा पुन तमेव पहानङ्गेसु दस्सेतुं ‘‘निमित्तेन निमित्तं सम्बन्धित्वा’’ति वुत्तं. नदिसमुद्दजातस्सरेसु सम्मतसीमातो कम्मानि न विपज्जन्ति उदकुक्खेपसीमत्ताति ‘‘विपत्तिसीमायो नामा’’ति कस्मा वुत्ताति चे? सेसलक्खणानि सम्पादेत्वा नदियं सीमाय बद्धाय उदकपरियन्तं कत्वा सीमागतत्ता पुन तं नदिं अन्तो कत्वा तळाके कते सचे तस्सा सीमाय कम्मं कातुं वट्टेय्य, सीमातो कम्मानि न विपज्जेय्युं. यस्मा पन एवं कातुं न वट्टति, तस्मा ‘‘उदकुक्खेपसीमत्ता’’ति वुत्तं अकारणं.

वीसतिवग्गकरणीयत्ता सङ्घकम्मस्स कम्मारहेन सद्धिं एकवीसति भिक्खू निसीदितुं न सक्कोन्ती’’ति वुत्तं, सुखनिसज्जावसेन निसीदितुन्ति अधिप्पायो. ‘‘परिमण्डलाकारेन निसीदितु’’न्ति अट्ठकथायं वुत्तं. तियोजनं अतिक्कमित्वाति मज्झे ठत्वा दियड्ढं कत्वा तियोजनं. कोणतो ¶ हि कोणं तियोजनं अतिक्कामेति, आपत्तिञ्च आपज्जति, सीमा च असीमा होति. कित्तेत्वाति निमित्तानि सम्पन्नानिपि अञ्ञमञ्ञनामविपरियायेन, अनिमित्तानं नामेहि च कित्तेत्वाति अत्थो.

रासिकतं पंसुपि रुक्खेसु जातेसु सुद्धपंसुपब्बतो होति. गुळपिण्डपरिमाणो थूलताय, न तुलगणनाय. भूमियं पतिट्ठितो’’ति इमिना कुटसरावादीसु रोपितं पटिक्खिपति, ततो अपनेत्वा पन तङ्खणम्पि भूमियं रोपितो वट्टति. नवमूलसाखानिग्गमनं पन अकारणं. खन्धं छिन्दित्वा रोपिते पन एतं युज्जति. सूचिदण्डकप्पमाणो कनिट्ठङ्गुलिपरिमाणमत्तो. ‘‘अट्ठङ्गुलुब्बेधो’’ति इमिना उब्बेधो परिच्छिन्नो होति, ‘‘गोविसाणमत्तो’’ति इमिना परिणाहो. ‘‘एवं सन्तेपि गोविसाणपरिणाहे परिच्छेदो नत्थि, तस्मा खुद्दकोपि महन्तोपि वट्टति एवाति वदन्ति.

जातस्सरे परिपुण्णमेव उदकं निमित्तूपगं दिस्वा अपरिपुण्णं अन्तरा ठितिभूतं ‘‘जातस्सरे सम्मता’’ति वुत्तं विपत्तिं न आपज्जतीति ‘‘नदिया सम्मता, समुद्दे सम्मता, जातस्सरे सम्मता’’ति एत्थापि लोणी न गहिता. बद्धसीमं वा नदिसमुद्दजातस्सरे वा अनोक्कमित्वाति एत्थापि ‘‘नदिया वा, भिक्खवे, समुद्दे वा जातस्सरे वा’’ति (महाव. १४७) एत्थापि न गहिता. तस्मा लोणी न अबद्धसीमाति चे? अबद्धसीमाव. ‘‘योपि नदिं वा समुद्दं वा भिन्दित्वा निक्खन्तउदकेन कतो सोब्भो एतं लक्खणं पापुणाति, अयम्पि ¶ जातस्सरोयेवा’’ति (कङ्खा. अट्ठ. निदानवण्णना) वुत्तत्ता जातस्सरग्गहणेन गहिताति तत्थ तत्थ अवुत्ता. ‘‘यावतिका तस्मिं गामखेत्ते’’ति वुत्तत्ता अञ्ञम्पि गामं अन्तो कत्वा समानसंवासकसीमासम्मन्ननकाले तस्मिं गामे भिक्खू आगच्छन्तु वा मा वा, वट्टति. अविप्पवाससीमासम्मन्ननकाले आगन्तब्बमेव.

अगमनपथेसूति एत्थ एकदिवसेन गन्त्वा पच्चागन्तुं असक्कुणेय्यट्ठानेति वदन्ति, बद्धसीमाभावं पटिक्खिपित्वाति अत्थो.

‘‘समन्ता उदकुक्खेपा’’ति वुत्तत्ता सब्बदिसासु गहेतब्बमेवाति चे? यतो लब्भति, ततो गहेतब्बो ‘‘यस्मिं पदेसे पकतिवीचियो ओत्थरित्वा ¶ सण्ठहन्ति, ततो पट्ठाय कप्पियभूमि, तत्थ ठत्वा उपोसथादिकम्मं कातुं वट्टती’’ति वुत्तत्ता. अनुबन्धो अड्ढमासो अन्वड्ढमासो, अड्ढमासस्स वा अनु. यो पन केनचि अन्तमसो तिरच्छानेनपि खणित्वा अकतोति अधिप्पायो.

‘‘अञ्ञं तत्तकंयेव परिच्छेदं अनतिक्कमित्वा ठितोपि कम्मं कोपेती’’ति वुत्तत्ता अतिक्कमित्वा ठितो न कोपेतीति दीपितमेव होतीति उपतिस्सत्थेरो, तं पन ‘‘द्विन्नं उदकुक्खेपानं अन्तरे अञ्ञो एको उदकुक्खेपो उपचारत्थाय ठपेतब्बो’’ति वचनेन विरुज्झति. समन्तपासादिकायञ्हि ‘‘अञ्ञं तत्तकंयेवा’’ति पदं नत्थि. तस्मा तस्साधिप्पायो परियेसितब्बो. अन्तोउदकुक्खेपसीमाय उपचारत्थाय ठपितं उदकुक्खेपपरिच्छेदं अनतिक्कमित्वाति अत्थो गहेतब्बो. थेरेन अञ्ञथा पपञ्चित्वा लिखितं.

‘‘सभागवत्थुना लहुकापत्ति’’न्ति वुत्तत्ता सभागसङ्घादिसेसं आरोचेतुं वट्टतीति चे? न वट्टति देसनागामिनिं सन्धाय इध वुत्तत्ता. तस्मा एव समुच्चयक्खन्धके ‘‘सभागसङ्घादिसेसं आपन्नस्स पन सन्तिके आविकातुं न वट्टति. सचे आविकरोति, आपत्ति आविकता होति, दुक्कटा पन न मुच्चती’’ति (चूळव. अट्ठ. १०२) वुत्तं. यथा सङ्घेन ‘‘सुणातु मे, भन्ते, सङ्घो…पे… पटिकरिस्सती’’ति वत्वा उपोसथं कातुं लभति, एवं तीहि द्वीहिपि अञ्ञं सुद्धं पस्सित्वा ‘‘पटिकरिस्सामा’’ति वत्वा उपोसथं कातुं वट्टति. एकेनापि ‘‘परिसुद्धं लभित्वा पटिकरिस्सामी’’ति आभोगं कत्वा उपोसथं कातुं वट्टतीति. अट्ठकथायम्पि ‘‘सामन्तो भिक्खु एवमस्स वचनीयोति एत्थ सभागो एव वत्तब्बो. विसभागस्स हि वुच्चमाने भण्डनकलहसङ्घभेदादीनिपि होन्ति, तस्मा तस्स अवत्वा इतो वुट्ठहित्वा ¶ पटिकरिस्सामी’’ति आभोगं कत्वा उपोसथो कातब्बोति अन्धकट्ठकथायं वुत्त’’न्ति वत्वा तस्स अप्पटिक्खित्तत्ता वट्टतीति दीपितमेव. ‘‘यदा अञ्ञं सुद्धं भिक्खुं अनापत्तिकं पस्सिस्सति, तदा तस्स सन्तिके’’ति वुत्तत्ता लहुकस्सेव अनुञ्ञातत्ता समुच्चयक्खन्धके वुत्तत्ता सभागसङ्घादिसेसं पन ञत्तिया आरोचेत्वा उपोसथं कातुं न वट्टति.

देवब्रह्मा ¶ पन ‘‘तिरच्छानगतो’’ति पदं ठपेत्वा येन केनचि पदेन असङ्गहितापि इमिना सङ्गहिताति दस्सनत्थं ‘‘यस्स उपसम्पदा पटिक्खित्ता’’ति वुत्तं.

‘‘चातुमासिनियं पन पवारितानं सन्तिके अनुपगतेन वा छिन्नवस्सेन वा वुट्ठवस्सेन वा’’ति अवत्वा ‘‘अनुपगतेन वा छिन्नवस्सेन वा’’ति एत्तकमेव वुत्तं. वुट्ठवस्सो पन तस्मिं काले अनुपगतत्ता ‘‘अनुपगतो’’ति सङ्ख्यं गतोति. सब्बाय वुट्ठिताय सब्बे वुट्ठहित्वा गते सन्निपातेतुं न सक्का, एकच्चे सन्निपातेत्वा पारिसुद्धिं आरोचेतुं वट्टतीति वदन्ति. कस्मा? ञत्तिं ठपेत्वा कत्तब्बसङ्घकम्माभावा वग्गं न होतीति. पवारणायपि एसेव नयो. अयञ्हेत्थ विसेसो – सचे पुरिमिकाय उपगतेहि पच्छिमिकाय उपगता थोकतरा चेव होन्ति समसमा च, सङ्घपवारणाय च गणं पूरेन्ति, सङ्घपवारणावसेन ञत्ति ठपेतब्बाति. ‘‘एकोव भिक्खु होति…पे… अञ्ञेसं अनागतभावं ञत्वा’’ति वुत्तत्ता अधिट्ठानुपोसथं सीमं पविसित्वा कातुं न सक्काति वदन्ति.

‘‘किं सङ्घस्स पुब्बकिच्च’’न्ति इदं न ञत्तिं ठपेत्वा वत्तब्बं. तञ्हि ञत्तितो पुरेतरमेव करीयति. तस्मा ‘‘सुणातु मे, भन्ते, सङ्घो, किं सङ्घस्स पुब्बकिच्चं, यदि सङ्घस्स पत्तकल्ल’’न्ति वत्तब्बं सियाति. तथापि न वत्तब्बं. न हि तं ञत्तिया अन्तो करीयतीति. एवं सन्ते नेतं वत्तब्बन्ति आपज्जति पयोजनाभावाति चे? न, यथागतट्ठाने एव वत्तब्बतो, परपदापेक्खतायाति वुत्तं होति. इदं पुब्बकिच्चं अकत्वा उपोसथकम्मं करोन्तो सङ्घो, पुग्गलो वा ठपनक्खेत्तातिक्कमे आपज्जति. तस्मिञ्हि खेत्ते अतिक्कन्ते सम्मज्जनादिकरणे आपत्तिमोक्खो न होति उपोसथकम्मतो पुब्बे कत्तब्बकम्माकरणपच्चयत्ता तस्सा आपत्तिया. न सा कम्मपरियोसानापेक्खा एत्थागतसम्पजानमुसावादापत्ति विय, तस्मा पातिमोक्खुद्देसको भिक्खु ‘‘पारिसुद्धिं आयस्मन्तो आरोचेथा’’ति वत्तुकामो पठममेव पारिसुद्धापारिसुद्धिपच्चयं पुब्बकिच्चं सरापेति. तञ्हि कतं पारिसुद्धिपच्चयो होति, अकतं अपारिसुद्धिपच्चयो. तेनेव उभयापेक्खाधिप्पायेन कतं, न कतन्ति अवत्वा ‘‘किं सङ्घस्स पुब्बकिच्च’’मिच्चेवाह. तत्थ अकतपक्खे ताव पारिसुद्धिआरोचनक्कमनिदस्सनत्थं परतो ¶ ‘‘यस्स ¶ सिया आपत्ति, सो आविकरेय्या’’ति च, कतपक्खे ‘‘असन्तिया आपत्तिया तुण्ही भवितब्ब’’न्ति च वक्खति.

‘‘सब्बन्तिमेन परिच्छेदेन चतूहि भिक्खूहि सन्निपतित्वा’’ति च, ‘‘उपोसथकरणत्थं सन्निपतिते सङ्घे बहि…पे… अदेन्तेन छन्दो दातब्बो’’ति च वदन्ति. असन्निपतितेपि पन वट्टति. इदञ्हि छन्ददानसमयदस्सनत्थं वुत्तं. उपोसथकरणत्थं सन्निपतिते सङ्घे बहि उपोसथं कत्वा आगतस्स कत्तब्बाकारदस्सनत्थञ्च वुत्तं. पधानघरवासिनो पधानघरं पविसितुकामा अत्तनो सभागभिक्खूनं छन्दं दत्वा सचे सङ्घो सन्निपतति, ‘‘मय्हं छन्दो आरोचेतब्बो’’ति वत्वा पधानघरं पविसन्ति. अयं सीहळदीपे पयोगो. आरोचेन्तेन पन सन्निपतिते आरोचेतब्बं. पञ्चसु भिक्खूसु एकस्मिं विहारे वसन्तेसु एकस्स छन्दपारिसुद्धिं आहरित्वा चतुन्नं पातिमोक्खं उद्दिसितुं अनुञ्ञातत्ता सन्निपतिते छन्दो गहेतब्बो आरोचेतब्बोति वचनं निरत्थकं विय. ‘‘थेय्यसंवासको पटिजानातीति (महाव. १६५) वचनतो सामणेरेन आहटापि वट्टति. कम्मं न कोपेती’’ति च, ‘‘सचे पुब्बे छन्दं दत्वा बहिसीमागतो पुन पविसति, पच्छा छन्दग्गहणकिच्चं नत्थि, तस्स पयोगो सीमासम्मुतिवसेन वेदितब्बो’’ति च ‘‘छन्ददाने तिक्खत्तुं वचने इदं पयोजनं – पठमं समग्गभावं, दुतियं पच्छा विधातब्बभावं, ततियं छन्दहारकस्स दुक्कटमोचनं दीपेती’’ति (वजिर. टी. महावग्ग १६४) च लिखितं. बिळालसङ्खलिकाबद्धाव होति अन्तोगेहे एव सम्पयोजनत्ता, यथा सा न कत्थचि गच्छति, तथा सापि न कत्थचि गच्छतीति अधिप्पायो. इतरथा विसेसनं निरत्थकं होतीति आचरियेन गहितं.

‘‘न हि तं अकत्वा उपोसथं कातुं वट्टती’’ति पुब्बे दस्सितत्ता ‘‘इदम्पि हि उभय’’न्ति कस्मा वुत्तन्ति चे? सेसानि थेरेन आणत्तेन कातब्बानि दस्सितानि, इमे पन द्वे थेरेन वा पातिमोक्खुद्देसकेन वा ञत्तिट्ठपनकेन वा येन वा तेन वा कातब्बानीति च, सम्मज्जनादीनि तत्थ तत्थ तादिसानि पयोजनानि निप्फादेन्ति, इमे पन द्वे तत्थ तत्थ न किञ्चि कम्मं साधेन्ति, तस्मा ‘‘किं इमिना’’ति अवत्वा कातब्बमेवाति दस्सेतुञ्च ‘‘इदम्पि हि उभय’’न्तिआदि वुत्तं. ‘‘आयस्मन्तानं पादे वन्दती’’ति ¶ गणवसेन वत्वा पुग्गलवसेन न वुत्तं तेन आरोचेतब्बस्स अञ्ञस्स अभावा.

सङ्घस्स उद्दिट्ठं होतीति सङ्घेन उद्दिट्ठं होतीति अत्थो. समग्गस्स हि सङ्घस्साति एत्थ समग्गभावस्स कायसामग्गिकारणत्ता नत्थि दोसोति चे? तं न, उद्देसेपि सवनेपि समग्गभावस्स ¶ इच्छितब्बत्ता. ‘‘सुणातु मे, भन्ते’’ति हि इमिना चित्तसामग्गिं दीपेति सवने सब्बेहि एकीभूतभावतो.

सञ्चिच्च आपत्तिं आपज्जतीति एत्थ अनादरियवसेन आपज्जन्तो एव अलज्जी होति, न इतरोति. आपत्तिं परिगूहतीति एत्थ लज्जाय परिगूहन्तो अलज्जी न होति, ‘किं इमिना’ति अनादरियवसेन परिगूहन्तो होती’’ति च लिखितं.

‘‘सत्तन्नं आपत्तिक्खन्धान’’न्ति न वत्तब्बं, ‘‘छन्न’’न्ति वत्तब्बन्ति चे? सत्तन्नमेवाति वत्तब्बं. पाराजिकापत्तिं आपन्नो हि सचे अत्तनो सापत्तिकभावं पकासेति, सङ्घस्स च उपोसथो सम्पज्जति, तस्स च गिहिभावेन वा सामणेरभावेन वा सुद्धि होतीति.

एकच्चे आचरिया नाम धम्मभारिको किर आचरियो. कस्मा एवं वुत्तन्ति चे? यावततियानुसावना नाम तिक्खत्तुं वचनं. तथा पाठे अनागतत्ता केवलं ‘‘यावततियं अनुसावित’’न्ति पदमेव दिस्वा ‘‘यस्स सिया आपत्ति, सो आविकरेय्या’’ति इदं ‘‘सचे आपत्तिं आपन्ना, आविकरोथा’’ति इममत्थं दीपेति. ‘‘असन्तिया आपत्तिया तुण्ही भवितब्ब’’न्ति इदम्पि तमेवत्थं दीपेति. ‘‘तुण्हीभावेन खो पनायस्मन्ते परिसुद्धाति वेदिस्सामी’’ति इदम्पि तमेवाति एवमत्थं गहेत्वा वुत्तं किर.

अपरेति अत्थदस्सित्थेरो किर. एतं सन्धायाति एत्थ ‘‘सकिम्पि अनुसावित’’न्ति पदस्स वचनेन तिक्खत्तुं अनुसावना कातब्बाति एत्तकमेव दीपितं विय दिस्सति.

इममत्थं सन्धाय वुत्तन्ति कथं विञ्ञायतीति चे? ‘‘अयमेत्थ आचरियपरम्पराभतो विनिच्छयो’’ति वुत्तं.

‘‘सरमानेना’’ति ¶ इमिना सम्पजानमुसावादस्स सचित्तकत्तं दस्सेति. सङ्घमज्झे वातिआदि लक्खणवचनं किर. सङ्घुपोसथकरणत्थं सङ्घमज्झे चे निसिन्नो, तस्मिं सङ्घमज्झे आविकातब्बा. गणुपोसथकरणत्थञ्चे गणमज्झे निसिन्नो, तस्मिं गणमज्झे. एकस्सेव सन्तिके चे पारिसुद्धिउपोसथं कत्तुकामो, तस्मिं एकपुग्गले आविकातब्बाति, एतेन न केवलं सङ्घमज्झे एवायं मुसावादो सम्भवति, अथ खो एत्थ वुत्तलक्खणेन असतिपि ‘‘पारिसुद्धिं आयस्मन्तो आरोचेथा’’तिआदिविधाने गणुपोसथेपि सापत्तिको हुत्वा उपोसथं ¶ कत्तुकामो अनारोचेत्वा तुण्हीभूतोव चे करोति, अयं सम्पजानमुसावादापत्तिं आपज्जतीति इमस्सत्थस्स आविकरणतो लक्खणवचनं किरेतन्ति वुत्तन्ति तक्किका. अञ्ञथा ‘‘गणमज्झे वा’’ति न वत्तब्बन्ति तेसं अधिप्पायो. आरोचनाधिप्पायवसेन वुत्तन्ति आचरियस्स तक्को. आरोचेन्तो हि ‘‘सङ्घस्स आरोचेमी’’ति अधिप्पायेन आविकरोन्तो सङ्घमज्झे आविकरोति नाम, उभतोपस्से निसिन्नानं आरोचेन्तो गणमज्झे आविकरोति नाम, ‘‘एकस्सेव आरोचेस्सामी’’ति अधिप्पायेन आविकरोन्तो एकपुग्गले आविकरोति नाम. सचेपि वेमतिको होति…पे… पटिकरिस्सामीति एवं कते याव वेमतिको होति, ताव सभागापत्तिं पटिग्गहेतुं लभति, अञ्ञेसञ्च कम्मानं परिसुद्धो नाम होति. पुन निब्बेमतिको हुत्वा देसेतब्बं वा न वाति नेव पाळियं, न अट्ठकथायं अत्थि, देसिते पन दोसो नत्थि. तथा इतो वुट्ठहित्वा तं आपत्तिं पटिकरिस्सामीति एत्थ च सकलसङ्घे सभागापत्तिं आपन्ने, वेमतिके चाति लिखितं (वजिर. टी. महावग्ग १६९-१७०).

निदानवण्णना निट्ठिता.

पाराजिककण्डं

१. पठमपाराजिकवण्णना

इध ¶ ¶ पन ठत्वा सिक्खापदानं कमभेदो पकासेतब्बो. कथं – सब्बसिक्खापदानं यथासम्भवं देसनाक्कमो, पहानक्कमो, पटिपत्तिक्कमो, उप्पत्तिक्कमोति चतुब्बिधो कमो लब्भति. तत्थ भगवता राजगहे भिक्खूनं पातिमोक्खुद्देसं अनुजानन्तेन पातिमोक्खुद्देसस्स यो देसनाक्कमो अनुञ्ञातो, तं देसनाक्कमं अनुक्कमन्तोव महाकस्सपो पठमं पाराजिकुद्देसं पुच्छि, तदनन्तरं सङ्घादिसेसुद्देसं, तदनन्तरं अनियतुद्देसं, तदनन्तरं वित्थारुद्देसं. तदनन्तरं भिक्खुनिविभङ्गञ्च तेनेव अनुक्कमेन पुच्छि. ततो परं तयो आपत्तिक्खन्धे सङ्गहेतुं विना गणनपरिच्छेदेन सेखियधम्मे पुच्छि. आपत्तिक्खन्धे सभागतो पट्ठाय पुच्छन्तो वीसतिखन्धके पुच्छि. निदानुद्देसन्तोगधानं वा सरूपेन अनुद्दिट्ठानं पुच्छनत्थं खन्धके पुच्छि. एतेन खन्धके पञ्ञत्ता थुल्लच्चयापि सङ्गहिता होन्ति. पुच्छितानुक्कमेनेव आयस्मा उपालित्थेरो ब्याकासि. अयमेत्थ देसनाक्कमो. उभतोविभङ्गखन्धकतो पन उच्चिनित्वा तदा परिवारो विसुं पाळि कतो, इममेव वचनं सन्धाय अट्ठकथायं वुत्तं ‘‘एतेनेव उपायेन खन्धकं परिवारेपि आरोपयिंसू’’तिआदि (पारा. अट्ठ. १.पठममहासङ्गईतिकथा). अपिच पाळियं ‘‘एतेनेव उपायेन उभतोविभङ्गे पुच्छि. पुट्ठो पुट्ठो आयस्मा उपालि विस्सज्जेसी’’ति (चूळव. ४३९) एत्तकमेव वुत्तं. तस्मा थेरो उभतोविभङ्गे एव पुच्छि. विस्सज्जन्तो पन आयस्मा उपालि निरवसेसं दस्सेन्तो खन्धकपरिवारे अन्तो कत्वा देसेसि. गणसज्झायकाले पन तदा खन्धकपरिवारा विसुं पाळि कताति अयमेत्थ देसनाक्कमो.

यदि एवं निदानुद्देसो पठमदेसनाति चे? न, उपोसथक्खन्धके (महाव. १३३) ‘‘यानि मया भिक्खूनं सिक्खापदानि पञ्ञत्तानि, तानि नेसं पातिमोक्खुद्देसं अनुजानेय्य’’न्ति ¶ वचनतो, ‘‘यस्स सिया आपत्ती’’ति (महाव. १३४) वचनतो च. अकुसलाब्याकतानं आपत्तीनं दिट्ठधम्मसम्परायिकासवट्ठानियत्ता यथाभूतं सीलसंवरकेन परिवज्जनेन पहातब्बत्ता पहानक्कमोपेत्थ सम्भवति ‘‘तावदेव चत्तारि अकरणीयानि आचिक्खितब्बानी’’ति ¶ वचनतो. तथा ‘‘समादाय सिक्खति सिक्खापदेसू’’ति (म. नि. ३.७५; विभ. ५०८) वचनतो यथाभूतं आचिक्खनसिक्खनेन पटिपत्तिक्कमोपि सम्भवति. यथुद्देसक्कमं परियापुणितब्बपरियत्तिअत्थेनापि पटिपत्तिक्कमो, एवमिमेहि तीहि कमेहि देसेतब्बानमेतेसं सिक्खापदानं यथासम्भवं उप्पत्तिक्कमो सम्भवति. तथा हि यं यं साधारणं, तं तं भिक्खुं आरब्भ उप्पन्ने एव वत्थुस्मिं ‘‘या पन भिक्खुनी छन्दसो मेथुनं धम्म’’न्तिआदिना नयेन भिक्खुनीनम्पि पञ्ञत्तं. यतो भिक्खुनीनं तं अनुप्पन्नपञ्ञत्ति न सिया, ततो अनुप्पन्नपञ्ञत्ति तस्मिं नत्थीति (परि. २०१-२०२) परिवारवचनं न विरुज्झति. एत्तावता पुरिमेन कमत्तयेन यं पठमं देसेतब्बं, तं पाराजिकुद्देसे पठमुप्पन्नत्ता मेथुनधम्मपाराजिकं सब्बपठमं देसेतुकामो आयस्मा उपालित्थेरो ‘‘तत्र सुदं भगवा वेसालियं विहरती’’ति (पारा. २३) वेसालियमेव पापेत्वा ठपेसि.

इदानि सब्बेसं सिक्खापदानं पञ्ञापनविधानं वेदितब्बं. कथं? ‘‘एवञ्च पन, भिक्खवे, इमं सिक्खापदं उद्दिसेय्याथा’’ति (पारा. ३९, ४३) एवं सउद्देसअनुद्देसभेदतो दुविधं. तत्थ पातिमोक्खे सरूपतो आगता पञ्च आपत्तिक्खन्धा सउद्देसपञ्ञत्ति नाम. सापि द्विधा सपुग्गलापुग्गलनिद्देसभेदतो. तत्थ यस्सा पञ्ञत्तिया अन्तो आपत्तिया सह, विना वा पुग्गलो दस्सितो, सा सपुग्गलनिद्देसा. इतरा अपुग्गलनिद्देसा.

तत्थ सपुग्गलनिद्देसा द्विधा अदस्सितदस्सितापत्तिभेदतो. तत्थ अदस्सितापत्तिका नाम अट्ठ पाराजिका धम्मा वेदितब्बा. ‘‘पाराजिको होति असंवासो’’ति (पारा. ३९, ४४, ८९, ९१, १६७, १७१, १९५, १९७) हि पुग्गलोव तत्थ दस्सितो, नापत्ति. दस्सितापत्तिका नाम भिक्खुनिपातिमोक्खे आगता सत्तरस सङ्घादिसेसा धम्मा. ‘‘अयम्पि भिक्खुनी पठमापत्तिकं धम्मं आपन्ना निस्सारणीयं सङ्घादिसेस’’न्ति (पाचि. ६८३, ६८७) हि तत्थ आपत्ति दस्सिता सद्धिं पुग्गलेन.

तथा अपुग्गलनिद्देसापि अदस्सितदस्सितापत्तिभेदतो द्विधा. तत्थ अदस्सितापत्तिका नाम सेखिया धम्मा. वुत्तावसेसा दस्सितापत्तिकाति वेदितब्बा.

सापि ¶ ¶ द्विधा अनिद्दिट्ठकारकनिद्दिट्ठकारकभेदतो. तत्थ अनिद्दिट्ठकारका नाम सुक्कविसट्ठिमुसावादोमसवादपेसुञ्ञभूतगामअञ्ञवादकउज्झापनकगणभोजनपरम्परभोजनसुरामेरयअङ्गुलिपतोदकहसधम्मअनादरियतलघातकजतुमट्ठकसिक्खापदानं वसेन पञ्चदसविधा होन्ति. तत्थ निद्दिट्ठकारके मिस्सामिस्सभेदो वेदितब्बो – तत्थ उपयोगभुम्मविभत्तियो एकंसेन मिस्सा. अवसेसा मिस्सा च अमिस्सा च. सेय्यथिदं – पच्चत्तं ताव द्वीसु अनियतेसु उपयोगेन मिस्सं, द्वादससु पाटिदेसनीयेसु करणेन मिस्सं, ऊनपञ्चबन्धनपत्तसिक्खापदेसु सामिकरणेहि, ऊनवीसतिवस्से भुम्मेन, मोहनके उपयोगसामिभुम्मेहि. यस्मा ‘‘विवण्णक’’न्ति भावो अधिप्पेतो, न कत्ता, तस्मा विवण्णकसिक्खापदं यदा न सम्भवति, एवं पच्चत्तं पञ्चविधं मिस्सं होति. सेसेसु पठमानियतं ठपेत्वा आदिम्हि ‘‘यो पन भिक्खू’’ति एवमागतं पच्चत्तं वा, दुतियानियतं ठपेत्वा पणीतभोजनसमणुद्देसततियचतुत्थपाटिदेसनीयसिक्खापदेसु मज्झे ‘‘यो पन भिक्खू’’ति एवमागतं पच्चत्तं वा, दुब्बचकुलदूसकसंसट्ठसिक्खापदेसु आदिम्हि केवलं ‘‘भिक्खू’’ति आगतं पच्चत्तं वा, भेदानुवत्तकसिक्खापदे मज्झे आगतं पच्चत्तं वा अञ्ञाय विभत्तिया अमिस्समेव होति. तत्थ भेदानुवत्तकतुवट्टनद्वयसंसट्ठदुतियपाटिदेसनीयसिक्खापदेसु बहुवचनं, इतरत्थ सब्बत्थ एकवचनमेवाति वेदितब्बं.

तथा उपयोगो द्वीसु विकप्पनसिक्खापदेसु, तन्तवायसिक्खापदे च पच्चत्तेन मिस्सो, अभिहटसिक्खापदे करणेन, राजसिक्खापदे करणसामिपच्चत्तेहीति उपयोगो तिधा मिस्सो होति. करणञ्च कुटिकारमहल्लकदुतियकथिनद्वेभागनिसीदनसन्थतदुब्बण्णकरणसिक्खापदेसु छसु पच्चत्तेन मिस्सं, पठमततियकथिनअट्ठङ्गुलपादकनिसीदनकण्डुप्पटिच्छादिकवस्सिकसाटिकउदकसाटिकद्वेधम्मपच्चासीसनसिक्खापदेसु अट्ठसु सामिना मिस्सन्ति करणं द्विधा मिस्सं होति. अवसेसेसु छब्बस्सवस्सिकसाटिकद्वत्तिच्छदनावसथपिण्डमहानामगरुलहुपावुरणसिक्खापदेसु सत्तसु करणविभत्ति अञ्ञविभत्तिया अमिस्सा, अच्चेकएळकलोमसिक्खापदेसु सामिविभत्ति करणविभत्तिया मिस्सा. अतिरेकपत्तभेसज्जसिक्खापदेसु अग्गहितग्गहणेन सामिविभत्ति अमिस्साव होतीति वेदितब्बा. एवं ताव निद्दिट्ठकारकेसु सिक्खापदेसु –

पञ्चधा ¶ च तिधा चेव, द्विधा चेपि तथेकधा;

भिन्ना विभत्तियो पञ्च, सब्बेकादसधा सियुं.

एवं ¶ ताव यथावुत्तेसु सउद्देसपञ्ञत्तिसङ्खातेसु सिक्खापदेसु अग्गहितग्गहणेन पञ्ञासुत्तरेसु तिसतेसु नवुतिअनिद्दिट्ठकारके वज्जेत्वा निद्दिट्ठकारकानि अतिरेकसट्ठिद्विसतानि होन्ति. तेसु पच्चत्तकरणानि तिंसुत्तरानि द्विसतानि होन्ति. तेसु अमिस्सपच्चत्तकरणानि द्वादसुत्तरानि द्विसतानि, मिस्सपच्चत्तकरणानि अट्ठारस होन्ति. अवसेसेसु तिंसतिया सिक्खापदेसु मिस्सोपयोगकरणानि पञ्च होन्ति, मिस्सकरणानि चुद्दस, अमिस्सानि सत्त, मिस्सामिस्सकरणानि द्वे, अमिस्सानि द्वेति सब्बेसुपि निद्दिट्ठकारकेसु भेदानुवत्तकदुब्बचकुलदूसकपठमदुतियततियकथिनअभिहटकुटिकारमहल्लकविकप्पनद्वयद्वेभागछब्बस्सनिसीदनसन्थतएळकलोमातिरेकपत्तभेसज्जवस्सिकसाटिकतन्तवायअच्चेकछारत्तद्व पञ्चत्तिंसेसु ‘‘यो पन भिक्खू’’ति नत्थि. दुतियानियतपणीतभोजनसमणुद्देसततियचतुत्थपाटिदेसनीयेसु मज्झे अत्थि.

एत्तावता सउद्देसानुद्देसदुकं, सपुग्गलापुग्गलनिद्देसदुकं, पच्चेकदस्सितापत्तिदुकद्वयं, अनिद्दिट्ठकारकदुकं, तत्थ निद्दिट्ठकारकेसु पच्चत्तभुम्मदुकं, सयोपनायोपनदुकं, अयोपनमज्झेयोपनदुकं, एकानेकवचनदुकन्ति नव दुकानि दस्सितानि होन्ति. विसेसकारणं तस्मिं तस्मिं सिक्खापदे सम्पत्ते आविभविस्सति. एवं ताव सउद्देसपञ्ञत्तिं ञत्वा सेसविनयपिटके या काचि पञ्ञत्ति अनुद्देसपञ्ञत्तीति वेदितब्बा. सा पदभाजनन्तरापत्तिविनीतवत्थुपटिक्खेपपञ्ञत्तिअवुत्तसिद्धिसिक्खापदवसेन छब्बिधा होति.

तत्थ ‘‘येभुय्येन खयिते आपत्ति थुल्लच्चयस्स (परि. १५७-१५८), वट्टकते मुखे अच्छुपन्तस्स आपत्ति दुक्कटस्सा’’ति (पारा. ७३) एवमादिका पदभाजने सन्दिस्समानापत्ति पदभाजनसिक्खापदं नाम. ‘‘न च, भिक्खवे, सब्बमत्तिकामया कुटि कातब्बा, यो ¶ करेय्य, आपत्ति दुक्कटस्सा’’तिआदि (पारा. ८५) अन्तरापत्तिसिक्खापदं नाम. ‘‘अनुजानामि, भिक्खवे, दिवापटिसल्लीयन्तेन द्वारं संवरित्वा पटिसल्लीयितु’’न्ति (पारा. ७७) एवमादि विनीतवत्थुसिक्खापदं नाम. ‘‘सङ्घभेदको, भिक्खवे, अनुपसम्पन्नो न उपसम्पादेतब्बो’’ति (महाव. ११५) एवमादि पटिक्खेपसिक्खापदं नाम.

यस्मा पन तेन तेन पटिक्खेपेन ‘‘यो पन भिक्खु समग्गं सङ्घं अधम्मसञ्ञी भिन्देय्य, पाराजिको होति असंवासो. यो पन भिक्खु दुट्ठचित्तो भगवतो जीवमानकसरीरे लोहितं ¶ उप्पादेय्य, पाराजिको होति असंवासो’’ति सिक्खापदानि पञ्ञत्तानि होन्ति. यानि सन्धाय ‘‘एकस्स छेज्जका होति, चतुन्नं थुल्लच्चयं, चतुन्नञ्चेव अनापत्ति, सब्बेसं एकवत्थुका’’ति वुत्तं. ‘‘अत्थापत्ति तिट्ठन्ते भगवति आपज्जति, नो परिनिब्बुते’’ति (परि. ३२३) च वुत्तं. तेन न केवलं ‘‘न, भिक्खवे, जानं सङ्घभेदको अनुपसम्पन्नो उपसम्पादेतब्बो…पे… आपत्ति दुक्कटस्सा’’ति इदमेव सिक्खापदं पञ्ञत्तं होति साधकं होति. ‘‘पण्डको, भिक्खवे, अनुपसम्पन्नो न उपसम्पादेतब्बो, उपसम्पन्नो नासेतब्बो’’ति (महाव. १०९) एवमादीसु पन उपज्झायादीनं दुक्कटमेव पञ्ञत्तं, न पण्डकादीनं पाराजिकापत्ति. न हि तेसं भिक्खुभावो अत्थि. यतो सिया पाराजिकापत्ति. तथा ‘‘न अच्छिन्ने थेवे पक्कमितब्ब’’न्ति (महाव. ६६, ६७, ७८, ७९) एवमादिकञ्च पटिक्खेपसिक्खापदमेव नाम.

खन्धकेसु पञ्ञत्तदुक्कटथुल्लच्चयानि पञ्ञत्तिसिक्खापदं नाम. ‘‘तेन हि, सारिपुत्त, भेदानुवत्तके थुल्लच्चयं देसापेही’’ति (चूळव. ३४५) वुत्तं, थुल्लच्चयम्पि तत्थेव समोधानं गच्छति. इदं तेसं विभत्तिकम्मक्खणे अपञ्ञत्तत्ता अविज्जमानम्पि भगवतो वचनेन विसुद्धक्खणेपि विज्जमानं जातन्ति एके. ‘‘भेदानुवत्तके देसापेही’’ति वचनतो सेसभेदानुवत्तकानं ‘‘यो पन भिक्खु जानं सङ्घभेदकानं अनुवत्तेय्य, आपत्ति थुल्लच्चयस्सा’’ति सिक्खापदं पञ्ञत्तं होतीति वेदितब्बं. तथा सब्बानि खन्धकवत्तानि, विनयकम्मानि च तत्थेव समोधानं गच्छन्ति. यथाह ‘‘पञ्ञत्ते तं उपालि मया आगन्तुकानं भिक्खूनं आगन्तुकवत्तं…पे… एवं सुपञ्ञत्ते खो मया उपालि सिक्खापदे’’तिआदि. ‘‘या पन भिक्खुनी नच्चं वा गीतं वा वादितं वा दस्सनाय गच्छेय्य ¶ , पाचित्तिय’’न्ति (पाचि. ८३४) इमिना सुत्तेन भिक्खुनी नच्चेय्य वा गायेय्य वा वादेय्य वा, पाचित्तियन्ति एवमादिकं यं किञ्चि अट्ठकथाय दिस्समानं आपत्तिजातं विनयकम्मं वा अवुत्तसिद्धिसिक्खापदं नाम. छब्बिधम्पेतं छहि आकारेहि उद्देसारहं न होतीति अनुद्देससिक्खापदं नामाति वेदितब्बं. सेय्यथिदं – पञ्चहि उद्देसेहि यथासम्भवं विसभागत्ता थुल्लच्चयदुब्भासितानं सभागवत्थुकम्पि दुक्कटथुल्लच्चयद्वयं असभागापत्तिकत्ता अन्तरापत्तिपञ्ञत्तिसिक्खापदानं, नानावत्थुकापत्तिकत्ता पटिक्खेपसिक्खापदानं, केसञ्चि विनीतवत्थुपञ्ञत्तिसिक्खापदानञ्च अदस्सितापत्तिकत्ता, अदस्सितवत्थुकत्ता भेदानुवत्तकथुल्लच्चयस्स, अदस्सितापत्तिवत्थुकत्ता अवुत्तसिद्धिसिक्खापदानन्ति. एत्तावता ‘‘दुविधं सिक्खापदपञ्ञापनं सउद्देसानुद्देसभेदतो’’ति यं वुत्तं, तं समासतो पकासितं होति.

पञ्ञत्तियं ¶ ताव –

‘‘कारको इध निद्दिट्ठो, अपेक्खाय अभावतो;

पुब्बे वत्तब्बविधाना-भावतो च आदितो योपनेन सहा’’ति. –

अयं नयो वेदितब्बो. तस्सत्थो – ये ते अनिद्दिट्ठकारका पुब्बे वुत्तप्पभेदा सुक्कविसट्ठिआदयो सिक्खापदविसेसा, तेसु अधिप्पायकम्मवत्थुपुग्गलपयोगे अपेक्खाय भावतो कारको न निद्दिट्ठो तेसं सापेक्खभावदस्सनत्थं. तं सब्बं तस्मिं तस्मिं सिक्खापदे आविभविस्सति, इध पन पाराजिकपञ्ञत्तियं अपेक्खाय अभावतो कारको निद्दिट्ठो. यो पन कारको ‘‘निट्ठितचीवरस्मिं भिक्खुना उब्भतस्मि’’न्तिआदीसु (पारा. ४६२, ४७२, ४७५) विय पुब्बे वत्तब्बविधानाभावतो करणादिवसेन अनिद्दिसित्वा पच्चत्तवसेन निद्दिट्ठो अपेक्खाय अभावतो. तत्थ निद्दिसियमानो सेसदुतियानियतपणीतभोजनं समणुद्देसततियचतउत्थपाटिदेसनीयेसु विय मज्झे अनिद्दिसित्वा ‘‘न हेव खो पन…पे… ओभासितु’’न्तिआदि (पारा. ४५३) विय पुब्बे वत्तब्बविधानाभावतो एव आदिम्हि निद्दिट्ठो. आदिम्हि निद्दिसियमानोपि पुब्बे वुत्तप्पभेदेसु भेदानुवत्तकादीसु पञ्चत्तिंसेसु सिक्खापदेसु विय अनिद्दिसित्वा पुब्बे वत्तब्बविधानाभावतो एव ‘‘यो पन भिक्खू’’तिआदितोव योपन-सद्देन सह ¶ निद्दिट्ठो. एवं निद्दिसियमानोपि सो यस्मा ‘‘या पन भिक्खुनियो द्वे एकमञ्चे तुवट्टेय्यु’’न्तिआदि (पाचि. ९३३) आपत्ति विय परप्पभवं आपत्तिं न आपज्जति, तस्मा ‘‘यो पन भिक्खू’’ति एकवचनेन निद्दिट्ठो. मेथुनधम्मापत्तिपि परप्पभवा ‘‘द्वयंद्वयसमापत्ती’’ति (पारा. ३९) वचनतोति चे? तं न, अधिप्पायजाननतो. अनेकिस्सा एव भिक्खुनिया आपत्ति, न एकिस्साति नियमो तत्थ अत्थि, न एवं इध नियमोति अनियमिताधिप्पायो. लम्बीमुदुपिट्ठीनं कुतो ‘‘द्वयंद्वयसमापत्ती’’ति (पारा. ५५) वचनतो तेसं मेथुनधम्मापत्ति. अयमत्थो चतस्सो मेथुनधम्मपच्चयाति अट्ठवत्थुकं सन्धाय ‘‘छेज्जं सिया मेथुनधम्मपच्चया’’ति (परि. ४८१) च परिवारे वुत्तवचनेन साधेतब्बो.

भेदानुवत्तकसिक्खापदे तिण्णं उद्धं न समनुभासितब्बा, न सङ्घेन सङ्घं एकतो कातब्बन्ति. नयदस्सनत्थं आदितोव ‘‘भिक्खू होन्ती’’ति बहुवचननिद्देसं कत्वा पुन ‘‘एको वा द्वे वा तयो वा’’ति (पारा. ४१८) वुत्तं, अञ्ञथा न ततो उद्धं ‘‘अनुवत्तका होन्ती’’ति आपज्जति. ततो निदानविरोधो. पञ्चसतमत्ता हि तदनुवत्तका अहेसुं. यं पन सत्तसतिकक्खन्धके ‘‘सङ्घो चत्तारो पाचीनके भिक्खू, चत्तारो पावेय्यके भिक्खू सम्मन्नेय्य ¶ …पे… सम्मता’’तिआदि (चूळव. ४५६) ञत्तिदुतियकम्मं वुत्तं, तं ‘‘उब्बाहिकाय इमं अधिकरणं वूपसमेतु’’न्ति वुत्तत्ता तेहि कत्तब्बविधानं. सम्मुतिकरणमेव वा ततियं कत्वा कप्पति. न हि ते तेन कम्मेन कम्मारहा कम्मकता होन्ति. यस्स सङ्घो कम्मं करोति, सो कम्मारहोति लक्खणं. न च तदा सङ्घो तेसं अट्ठन्नम्पि भिक्खूनं कम्मं अकासि. भजापियमाना ते कम्मपत्तभावं भजन्ति. अधिकरणवूपसमकम्मस्स पत्ता युत्ता सङ्घेन कताति कत्वा कम्मपत्ता एव हि ते होन्ति. ‘‘ते भिक्खू भिक्खूहि यावततियं समनुभासितब्बा तस्स पटिनिस्सग्गाया’’ति (पारा. ४१८) वचनतो तेहि कत्तब्बविधानं. सम्मुतिकरणमेव कम्मं होतीति चे? तं न, अधिप्पायजाननतो, तस्स पटिनिस्सग्गाय एव ते भिक्खू कम्मारहा कातब्बा, न दोसागतिवसेनाति अयमेत्थ अधिप्पायो. न हि पाचीनकादीनं सम्मुतिया अधिकरणवूपसमसिद्धि विय तेसं समनुभासनकम्मेन तस्स पटिनिस्सग्गसिद्धि होति, सम्मुति नामेसा ¶ पठमं अनुमतिं गहेत्वा याचित्वाव करीयति, न तथा कम्मन्ति. कम्मकरणे पन तदत्थसिद्धि होतियेव. परसम्मुतिया बहुतराव सम्मन्नितब्बाति वेदितब्बं.

‘‘मेथुनधम्म’’न्ति एवं बाहुल्लनयेन लद्धनामकं सकपयोगेन वा परपयोगेन वा अत्तनो निमित्तस्स सकमग्गे वा परमग्गे वा परनिमित्तस्स वा सकमग्गे एव पवेसनपविट्ठट्ठितउद्धरणेसु यं किञ्चि एकं पटिसादियनवसेन सेवेय्य, पाराजिको होति असंवासोति. केचि पन ‘‘पवेसनादीनि चत्तारि वा तीणि वा द्वे वा एकं वा पटिसेवेय्य, पाराजिको होति. वुत्तञ्हेतं ‘सो चे पवेसनं सादियति, पविट्ठं सादियति, ठितं सादियति, उद्धरणं सादियति, आपत्ति पाराजिकस्सा’तिआदी’’ति (पारा. ५८) वदन्ति. तेसं मतेन चतूसुपि चतस्सो पाराजिकापत्तियो आपज्जति. तेयेव एवं वदन्ति – आपज्जतु मेथुनधम्मपाराजिकापत्ति, मेथुनधम्मपाराजिकापत्तिया तंभागियाति अत्तनो वीतिक्कमे पाराजिकापत्तियो, सङ्घादिसेसापत्तिञ्च आपज्जित्वा सिक्खं पच्चक्खाय गहट्ठकाले मेथुनादिकं पाराजिकं आपज्जित्वा पुन पब्बजित्वा उपसम्पज्जित्वा एकं सङ्घादिसेसापत्तिं एकमनेकं वा पटिकरित्वाव सो पुग्गलो यस्मा निरापत्तिको होति, तस्मा सो गहट्ठकाले सापत्तिकोवाति. अन्तिमवत्थुअज्झापन्नस्सापि अत्थेव आपत्ति. वुट्ठानदेसनाहि पन असुज्झनतो ‘‘पयोगे पयोगे आपत्ति पाराजिकस्सा’’ति न वुत्तं. गणनपयोजनाभावतो किञ्चापि न वुत्तं, अथ खो पदभाजने (पारा. ५८) ‘‘आपत्ति पाराजिकस्सा’’ति वचनेनायमत्थो सिद्धोति युत्तिञ्च वदन्ति.

यदि ¶ एवं मातिकायम्पि ‘‘यो पन भिक्खु मेथुनं धम्मं पटिसेवेय्य, पाराजिक’’न्ति वत्तब्बं भवेय्य, पाराजिकस्स अनवसेसवचनम्पि न युज्जेय्य. सब्बेपि हि आपत्तिक्खन्धे, भिक्खुगणनञ्च अनवसेसेत्वा तिट्ठतीति अनवसेसवचनन्ति कत्वा पवेसेव आपत्ति, न पविट्ठादीसु. तमेवेकं सन्धाय ‘‘यस्स सिया आपत्ती’’ति (महाव. १३४) पाराजिकापत्तिम्पि अन्तो कत्वा निदानुद्देसवचनं वेदितब्बं. तस्मा मातिकायं ‘‘पाराजिक’’न्ति अवत्वा ‘‘पाराजिको होती’’ति (पारा. ४२, ४४) पुग्गलनिद्देसवचनं तेन सरीरबन्धनेन उपसम्पदाय अभब्बभावदीपनत्थं. ‘‘आपत्ति पाराजिकस्सा’’ति पदभाजने वचनं अन्तिमवत्थुं अज्झापन्नस्सापि ¶ पाराजिकस्स असंवासस्स सतो पुग्गलस्स अथेय्यसंवासकभावदीपनत्थं. न हि सो संवासं सादियन्तोपि थेय्यसंवासको होति, तस्मा उपसम्पन्नो ‘‘भिक्खू’’त्वेव वुच्चति. तेनेवाह ‘‘असुद्धो होति पुग्गलो अञ्ञतरं पाराजिकं धम्मं अज्झापन्नो, तञ्चे सुद्धदिट्ठि समानो अनोकासं कारापेत्वा अक्कोसाधिप्पायो वदति, आपत्ति ओमसवादेन दुक्कटस्सा’’ति (पारा. ३८९) अनुपसम्पन्नस्स तदभावतो सिद्धो सो उपसम्पन्नो ‘‘भिक्खू’’त्वेव वुच्चतीति, तेन पदसोधम्मं, सहसेय्यञ्च जनेति, भिक्खुपेसुञ्ञादिञ्च जनेतीति वेदितब्बं (वजिर. टी. पाराजिक ३९).

निदाना मातिकाभेदो, विभङ्गो तन्नियामको;

ततो आपत्तिया भेदो, अनापत्ति तदञ्ञथाति. (वजिर. टी. पाराजिक ४३-४४) –

अयं नयो वेदितब्बो. तत्थ सुदिन्नवत्थु (पारा. २४ आदयो)-मक्कटिवत्थु (पारा. ४० आदयो)-वज्जिपुत्तकवत्थु (पारा. ४३) चाति तिप्पभेदवत्थु इमस्स सिक्खापदस्स निदानं नाम. ततो निदाना ‘‘यो पन भिक्खु भिक्खूनं…पे… असंवासो’’ति (पारा. ४४) इमिस्सा मातिकाय भेदो जातो. तत्थ हि ‘‘अन्तमसो तिरच्छानगताया’’ति (पारा. ४४) इत्थिलिङ्गवसेन ‘‘सच्चं, आवुसो, भगवता सिक्खापदं पञ्ञत्तं, तञ्च खो इत्थिया, नो पुरिसे, नो पण्डके, नो उभतोब्यञ्जनके चा’’ति मक्कटिपाराजिको विय अञ्ञोपि लेसं ओड्डेतुं सक्कोति, तस्मा तादिसस्स अलेसोकासस्स दस्सनत्थं इदं वुच्चति, मक्कटिसङ्खाता निदाना ‘‘अन्तमसो तिरच्छानगतायपी’’ति मातिकाय वचनभेदो, न इत्थिया एव मेथुनसिद्धिदस्सनतो. तस्मा विभङ्गो तन्नियामको तस्सा मातिकाय अधिप्पेतत्थनियामको विभङ्गोति. विभङ्गे हि ‘‘तिस्सो इत्थियो, तयो उभतोब्यञ्जनका, तयो पण्डका, तयो पुरिसा. मनुस्सित्थिया तयो मग्गे, तिरच्छानगतपुरिसस्स द्वे मग्गे’’तिआदिना (पारा. ५६) नयेन ¶ सब्बलेसोकासं पिदहित्वा नियमो कतो. एत्थाह – यदि एवं साधारणसिक्खापदवसेन वा लिङ्गपरिवत्तनवसेन वा न केवलं भिक्खूनं, भिक्खुनीनम्पि ‘‘सिक्खासाजीवसमापन्नो’’ति विभङ्गे वत्तब्बं सिया. तदवचनेन हि भिक्खुनी पुरिसलिङ्गपातुभावेन भिक्खुभावे ¶ ठिता एवं वदेय्य ‘‘नाहं उपसम्पदाकरणकाले भिक्खूनं सिक्खासाजीवसमापन्ना, तस्मा न अपच्चक्खातसिक्खापि मेथुनधम्मेन पाराजिका होमी’’ति. वुच्चते – यथा वुत्तं, तथा न वत्तब्बं अनिट्ठप्पसङ्गतो. तथा वुत्ते भिक्खुनीनम्पि सिक्खापच्चक्खानं अत्थीति आपज्जति. तञ्चानिट्ठं. इदमपरमनिट्ठं ‘‘सब्बसिक्खापदानि साधारणानेव नासाधारणानी’’ति. अपिचायं भिक्खूनं सिक्खासाजीवसमापन्नाव होतीति दस्सनत्थं ‘‘अनुजानामि, भिक्खवे, तंयेव उपज्झं तमेव उपसम्पदं तानि वस्सानि भिक्खूहि सङ्गमितु’’न्तिआदि (पारा. ६९) वुत्तं. ततो आपत्तिया भेदोति ततो विभङ्गतो ‘‘अक्खयिते सरीरे पाराजिकं, येभुय्येन खयिते थुल्लच्चय’’न्तिआदि (पारा. ७३, परि. १५७) आपत्तिया भेदो होति. अनापत्ति तदञ्ञथाति ततो एव विभङ्गतो येन आकारेन आपत्ति वुत्ता, ततो अञ्ञेनाकारेन अनापत्तिभेदोव होति. ‘‘सादियति, आपत्ति पाराजिकस्स, न सादियति, अनापत्ती’’ति हि विभङ्गे असति न पञ्ञायति. एत्तावता ‘‘निदाना मातिकाभेदो’’ति अयं गाथा समासतो वुत्तत्था होति. विसेसकारणं पन तस्मिं तस्मिं सिक्खापदे आविभविस्सति.

पठमपञ्ञत्ति ताव पठमबोधिं अतिक्कमित्वा पञ्ञत्तत्ता, आयस्मतो सुदिन्नस्स अट्ठवस्सिककाले पञ्ञत्तत्ता च रत्तञ्ञुमहत्तं पत्तकाले पञ्ञत्ता, दुतियपञ्ञत्ति बाहुसच्चमहत्तं पत्तकाले. सो हि आयस्मा मक्कटिपाराजिको यथा मातुगामप्पटिसंयुत्तेसु सिक्खापदेसु तिरच्छानगतित्थी न अधिप्पेता, तथा इधापीति सञ्ञाय ‘‘सच्चं, आवुसो…पे… तञ्च खो मनुस्सित्थिया, नो तिरच्छानगताया’’ति (पारा. ४१) आह. ततियपञ्ञत्ति लाभग्गमहत्तं पत्तकाले उप्पन्ना ‘‘यावदत्थं भुञ्जित्वा’’तिआदि (पारा. ४३) वचनतो, वेपुल्लमहत्तम्पि एत्थेव लब्भतीति इमं पठमपाराजिकसिक्खापदं तिविधम्पि वत्थुं उपादाय चतुब्बिधम्पि तं कालं पत्वा पञ्ञत्तन्ति वेदितब्बं.

तत्थ यो पनाति अनवसेसपरियादानपदं. भिक्खूति तस्स अतिप्पसङ्गनियमपदं. भिक्खूनं सिक्खासाजीवसमापन्नोति तस्स विसेसनवचनं. न हि सब्बोपि भिक्खुनामको, या भगवता याय कायचि उपसम्पदाय उपसम्पन्नभिक्खूनं हेट्ठिमपरिच्छेदेन सिक्खितब्बा सिक्खा विहिता ¶ , ‘‘एत्थ सह जीवन्ती’’ति यो च साजीवो वुत्तो, तं उभयं समापन्नोव होति. कदा पन समापन्नो होति? याय कायचि उपसम्पदाय उपसम्पन्नसमनन्तरमेव तदुभयं ¶ जानन्तोपि अजानन्तोपि तदज्झुपगतत्ता समापन्नोव नाम होति. सह जीवन्तीति याव सिक्खं न पच्चक्खाति, पाराजिकभावं वा न पापुणाति. यं पन वुत्तं अन्धकट्ठकथायं ‘‘सिक्खं परिपूरेन्तो सिक्खासमापन्नो साजीवं अवीतिक्कमन्तो साजीवसमापन्नो’’ति, तं उक्कट्ठपरिच्छेदवसेन वुत्तं. न हि सिक्खं अपरिपूरेन्तो, कामवितक्कादिबहुलो वा एकच्चं सावसेसं साजीवं वीतिक्कमन्तो वा सिक्खासाजीवसमापन्नो नाम न होति.

उक्कट्ठपरिच्छेदेन पन चतुक्कं लब्भति – ‘‘अत्थि भिक्खु सिक्खासमापन्नो सीलानि पच्चवेक्खन्तो न साजीवसमापन्नो अचित्तकं सिक्खापदं वीतिक्कमन्तो, अत्थि न सिक्खासमापन्नो कामवितक्कादिबहुलो साजीवसमापन्नो निरापत्तिको, अत्थि न सिक्खासमापन्नो न च साजीवसमापन्नो अनवसेसं आपत्तिं आपन्नो, अत्थि उभयसमापन्नो सिक्खं परिपूरेन्तो साजीवञ्च अवीतिक्कमन्तो’’ति. अयमेत्थ चतुत्थो भिक्खु उक्कट्ठो इध अधिप्पेतो सिया. न हि भगवा अनुक्कट्ठं वत्तुं युत्तोति चे? न, ‘‘तत्र यायं अधिसीलसिक्खा, अयं इमस्मिं अत्थे अधिप्पेता सिक्खा’’ति वचनविरोधतो, उक्कट्ठग्गहणाधिप्पाये सति ‘‘सिक्खाति तिस्सो सिक्खा’’ति एत्तकमेव वत्तब्बन्ति अधिप्पायो. सिक्खत्तयसमापन्नो हि सब्बुक्कट्ठो. ‘‘मेथुनं धम्मं पटिसेवेय्या’’ति परतो वचनं अपेक्खित्वा अधिसीलसिक्खाव वुत्ताति चे? न, तस्सापि अभब्बत्ता. न हि अधिसीलसिक्खं परिपूरेन्तो, साजीवञ्च अवीतिक्कमन्तो मेथुनधम्मं पटिसेवितुं भब्बो, तं सिक्खं अपरिपूरेन्तो, साजीवञ्च वीतिक्कमन्तोयेव हि पटिसेवेय्याति अधिप्पाया. तस्मा एवमेत्थ अत्थो गहेतब्बो. यस्मा सिक्खापदसङ्खातो साजीवो अधिसीलसिक्खमेव सङ्गण्हाति, न इतरसिक्खाद्वयं, तस्मा ‘‘तत्र यायं अधिसीलसिक्खा, अयं इमस्मिं अत्थे अधिप्पेता सिक्खा’’ति वुत्तं. तस्मा अधिसीलसिक्खाय सङ्गाहको साजीवो सिक्खासाजीवोति वुत्तो. इति साजीवविसेसनत्थं सिक्खाग्गहणं कतं. तदत्थदीपनत्थमेव विभङ्गे सिक्खं अपरामसित्वा ‘‘तस्मिं सिक्खति, तेन वुच्चति साजीवसमापन्नो’’ति (पारा. ४५) वुत्तं. तेन ¶ एकमेविदं अत्थपदन्ति दीपितं होति. तञ्च उपसम्पदूपगमनन्तरतो पट्ठाय सिक्खनाधिकारत्ता ‘‘सिक्खती’’ति च ‘‘समापन्नो’’ति च वुच्चति. यो एवं ‘‘सिक्खासाजीवसमापन्नो’’ति सङ्खं गतो, तादिसं पच्चयं पटिच्च अपरभागे साजीवसङ्खातमेव सिक्खं अपच्चक्खाय तस्मिंयेव दुब्बल्यं अनाविकत्वा मेथुनं धम्मं पटिसेवेय्याति अयमत्थो युज्जति.

किन्तु अट्ठकथानयो पटिक्खित्तो होति, सो च न पटिक्खेपारहो होति, अधिप्पायो पनेत्थ ¶ परियेसितब्बो. सब्बेसु सिक्खापदेसु इदमेव भिक्खुलक्खणं साधारणं यदिदं ‘‘भिक्खूनं सिक्खासाजीवसमापन्नो’’ति. खीणासवोपि सावको आपत्तिं आपज्जति अचित्तकं, तथा सेक्खो, पुथुज्जनो पन सचित्तकम्पि, तस्मा सेक्खासेक्खपुथुज्जनानं सामञ्ञमिदं भिक्खुलक्खणन्ति कत्वा केवलं सिक्खासमापन्नो, केवलं साजीवसमापन्नो, उभयसमापन्नो चाति सरूपेकदेसएकसेसनयेन ‘‘सिक्खासाजीवसमापन्नो’’त्वेव सम्पिण्डेत्वा उक्कट्ठग्गहणेन अनुक्कट्ठानं गहणसिद्धितो अट्ठकथायं उक्कट्ठोव वुत्तो. तमेव सम्पादेतुं ‘‘तस्मिं सिक्खति, तेन वुच्चति साजीवसमापन्नो’’ति एत्थ सिक्खासद्दस्स अवचने परिहारं वत्वा यस्मा पन सो सिक्खम्पि समापन्नो, तस्मा सिक्खासमापन्नोतिपि अत्थतो वेदितब्बोति च वत्वा ‘‘यं सिक्खं समापन्नो, तं अपच्चक्खाय, यञ्च साजीवं समापन्नो, तत्थ दुब्बल्यं अनाविकत्वा’’ति वुत्तन्ति अयमट्ठकथाय अधिप्पायो वेदितब्बो. एतस्मिं पन अधिप्पाये अधिसीलसिक्खाय एव गहणं सब्बत्थिकत्ता, सीलाधिकारतो च विनयस्साति वेदितब्बं. यथा च सिक्खापदं समादियन्तो सीलं समादियतीति वुच्चति, एवं सिक्खापदं पच्चक्खन्तो सीलं पच्चक्खातीति वत्तुं युज्जति, तस्मा तत्थ वुत्तं ‘‘यं सिक्खं समापन्नो, तं अपच्चक्खाया’’ति (पारा. अट्ठ. सिक्खापच्चक्खानविभङ्गवण्णना). एत्तावता समासतो ‘‘सिक्खासाजीवसमापन्नो’’ति एत्थ वत्तब्बविनिच्छयो निट्ठितो होति.

किं इमिना विसेसवचनेन पयोजनं, ननु ‘‘यो पन भिक्खु सिक्खं अपच्चक्खाय दुब्बल्यं अनाविकत्वा…पे… असंवासो’’ति एत्तकमेव वत्तब्बन्ति चे? न वत्तब्बं अनिट्ठप्पसङ्गतो. ‘‘यो पन सिक्खासाजीवसमापन्नो थेय्यसंवासादिको केवलेन समञ्ञामत्तेन, पटिञ्ञामत्तेन ¶ वा भिक्खु, तस्सापि सिक्खापच्चक्खानं अत्थि, सिक्खं अपच्चक्खाय च मेथुनं धम्मं पटिसेवन्तस्स पाराजिकापत्ति. यो वा पच्छा पाराजिकं आपत्तिं आपज्जित्वा न सिक्खासाजीवसमापन्नो, तस्स च, यो वा पक्खपण्डकत्ता पण्डकभावूपगमनेन न सिक्खासाजीवसमापन्नो, तस्स च तदुभयं अत्थीति आपज्जति. पण्डकभावपक्खे च पण्डको उपसम्पदाय न वत्थू’’ति वुत्तं. तस्मा इतरस्मिं पक्खे वत्थूति सिद्धं. तस्मिं पक्खे उपसम्पन्नो पण्डकभावपक्खे पण्डकत्ता न सिक्खासाजीवसमापन्नो, सो परिच्चजितब्बाय सिक्खाय अभावेन सिक्खं अपच्चक्खाय मुखेन परस्स अङ्गजातग्गहणनयेन मेथुनं धम्मं पटिसेवेय्य, तस्स कुतो पाराजिकापत्तीति अधिप्पायो. अयं नयो अपण्डकपक्खं अलभमानस्सेव परतो युज्जति, लभन्तस्स पन अरूपसत्तानं कुसलादिसमापत्तिक्खणे भवङ्गविच्छेदे सतिपि अमरणं विय पण्डकभावपक्खेपि भिक्खुभावो अत्थि. संवासं वा सादियन्तस्स न थेय्यसंवासकभावो अत्थि अन्तिमवत्थुअज्झापन्नस्स विय. न च सहसेय्यादिं जनेति ¶ . गणपूरको पन न होति अन्तिमवत्थुं अज्झापन्नो विय. न सो सिक्खासाजीवसमापन्नो. इतरस्मिं पन पक्खे होति, अयं इमस्स ततो विसेसो. किमयं सहेतुको, उदाहु अहेतुकोति? न अहेतुको. यतो उपसम्पदा तस्स अपण्डकपक्खे अनुञ्ञाता सहेतुकप्पटिसन्धिकत्ता. पण्डकभावपक्खेपि किस्स नानुञ्ञाताति चे? पण्डकभूतत्ता ओपक्कमिकपण्डकस्स विय.

अपिच ‘‘सिक्खासाजीवसमापन्नो’’ति इमिना तस्स सिक्खासमादानं दीपेत्वा तं समादिन्नं सिक्खं अपच्चक्खाय, तत्थ च दुब्बल्यं अनाविकत्वाति वत्तुं युज्जति, न अञ्ञथाति इमिना कारणेन यथावुत्तानिट्ठप्पसङ्गतो ‘‘यो पन भिक्खु भिक्खूनं सिक्खासाजीवसमापन्नो सिक्खं अपच्चक्खाया’’तिआदि वुत्तं. यथा चेत्थ, एवं ‘‘यो पन भिक्खु भिक्खूनं सिक्खासाजीवसमापन्नो सिक्खं अपच्चक्खाय दुब्बल्यं अनाविकत्वा गामा वा अरञ्ञा वा अदिन्नं…पे… यो पन भिक्खु भिक्खूनं सिक्खासाजीवसमापन्नो सिक्खं अपच्चक्खाय दुब्बल्यं अनाविकत्वा सुगतचीवरप्पमाणं चीवरं कारापेय्या’’ति सब्बत्थ योजेतब्बं.

‘‘अन्तमसो तिरच्छानगतायपी’’ति मनुस्सित्थिं उपादाय वुत्तं. न हि पगेव पण्डके, पुरिसे वाति वत्तुं युज्जति. सेसं तत्थ तत्थ वुत्तनयमेव ¶ . अयं ताव मातिकाय विनिच्छयो अञ्ञत्थापि यथासम्भवं योजेत्वा दीपेतब्बो.

सारिपुत्तबेलट्ठसीसानन्दादयोपि सिक्खापदपञ्ञत्तिकारणत्ता च आपत्तिआपज्जनतो च कस्मा महाविभङ्गे ञत्तिचतुत्थउपसम्पदायेव आगताति? पटिक्खित्ताय सरणगमनूपसम्पदाय अनुञ्ञातप्पसङ्गभयाति उपतिस्सत्थेरो. आपत्तिया भब्बतं सन्धाय तस्मिम्पि वुत्ते पुब्बे पटिक्खित्तापि भगवता पुन अनुञ्ञाताति भिक्खूनं मिच्छागाहो वा विमति वा उप्पज्जति, तस्मा न वुत्ताति वुत्तं होति.

‘‘अधम्मकम्मं वग्गकम्म’’ति (महाव. ३८७) वचनतो कुप्पकम्मम्पि कत्थचि ‘‘कम्म’’न्ति वुच्चति, तस्मा ‘‘अकुप्पेना’’ति वुत्तं. यस्मा अकुप्पकम्मम्पि एकच्चं न ठानारहं, येन अपत्तो ओसारणं सुओसारितोति वुच्चति, तस्मा ‘‘ठानारहेना’’ति वुत्तं. यदि एवं ‘‘ठानारहेना’’ति इदमेव वत्तब्बं इमिना अकुप्पसिद्धितोति चे? न, अट्ठानारहेन अकुप्पेन उपसम्पन्नो इमस्मिं अत्थे न अधिप्पेतो अनिट्ठप्पसङ्गतो. द्वीहि पनेतेहि एकतो वुत्तेहि ¶ अयमत्थो पञ्ञायति – केवलं तेन अकुप्पेन उपसम्पन्नो अयम्पि इमस्मिं अत्थे अधिप्पेतो भिक्खूति, ठानारहेन च अकुप्पेन च उपसम्पन्नो अयम्पि इमस्मिं अत्थे अधिप्पेतो भिक्खूति, कुप्पेन उपसम्पन्नो नाधिप्पेतोति.

‘‘पटिसन्धिग्गहणतो पट्ठाय अपरिपुण्णवीसतिवस्सो’’ति वुत्तत्ता ओपपातिकञ्चाति सोळसवस्सुद्देसिका ओपपातिका पटिसन्धितो पट्ठाय अपरिपुण्णवीसतिवस्साति वदन्ति. ‘सोळसवस्सुद्देसिका होन्ती’ति वुत्तत्ता पुन चत्तारि वस्सानि इच्छितब्बानि, ‘पटिसन्धिग्गहणतो पट्ठाया’ति इदं गब्भसेय्यकानं वसेन वुत्त’’न्ति एके. ‘‘केचि वदन्ती’’ति यत्थ यत्थ लिखीयति, तत्थ तत्थ विचारेत्वा अत्थं सुट्ठु उपलक्खये. ओपक्कमिके पण्डकभावो आरुळ्हनयेन वेदितब्बो. ‘‘पक्खपण्डको अपण्डकपक्खे पब्बाजेत्वा पण्डकपक्खे नासेतब्बो’’ति (वजिर. टी. महावग्ग १०९) लिखितं.

‘‘बिन्दुं अदत्वा चे निवासेति, थेय्यसंवासको न होती’’ति वदन्ति, वीमंसितब्बं. लिङ्गानुरूपस्साति सामणेरारहस्स संवासस्स सादितत्ताति अधिप्पायो.

राजभयादीहि ¶ गहितलिङ्गानं ‘‘गिही मं ‘समणो’ति जानन्तू’’ति वञ्चनचित्ते सतिपि भिक्खूनं वञ्चेतुकामताय च तेहि संवसितुकामताय च अभावा दोसो न जातोति. ‘‘यो एवं पब्बजति, सो थेय्यसंवासको नाम होती’’ति वा ‘‘एवं कातुं न लब्भती’’ति वा ‘‘एवं पब्बजितो सामणेरो न होती’’ति वा न जानाति, वट्टति. ‘‘जानाति, न वट्टती’’ति च लिखितं. ‘‘राजदुब्भिक्खादिअत्थाय चीवरं पारुपित्वा संवासं सादियन्तो थेय्यसंवासको होति. कस्मा? असुद्धचित्तत्ता. पुन सो ‘सुद्धं ब्रह्मचरियं करिस्सामि, किं एतेनाति विप्पटिसारेन वा पच्चयादिसुलभताय वा करिस्सामी’ति सुद्धमानसो हुत्वा याव सो संवासं नाधिवासेति, ताव थेय्यसंवासको न होति. एवं सुद्धचित्तुप्पत्तितो पट्ठाय संवासं सादियति चे, थेय्यसंवासको होतीति अधिप्पेतो. इतरथा सब्बं विरुज्झती’’ति एके.

‘‘नाभिपरामासादिना जातो तथारूपं पितरं घातेति चे, पितुघातको होती’’ति वदन्ति.

यो पन कायसंसग्गेन सीलविनासं पापेति, न सो भिक्खुनिदूसको ‘‘तिण्णं मग्गान’’न्ति ¶ वचनतो. भिक्खुनिं पन एकतोउपसम्पन्नं दूसेत्वापि भिक्खुनिदूसको होति, सोपि पाराजिको होतीति विनिच्छयो. भिक्खुनी पन थेय्यसंवासिका, मातुपितुअरहन्तघातिका, लोहितुप्पादिका, तित्थियपक्कन्तिका च होति, अट्ठकथासु अनागतं विनयधरा सम्पटिच्छन्ति.

‘‘सम्पजानमुसावादे पाचित्तिय’’न्ति (पाचि. २) वुत्तं मरियादं अवीतिक्कमन्तो तस्मिञ्च सिक्खापदे सिक्खतीति वुच्चति. सिक्खापदन्ति असभावधम्मो सङ्केतोव, इध पञ्ञत्ति अधिप्पेता. ‘‘मेथुनसंवरस्सेतं अधिवचन’’न्ति समन्तपासादिकायं वुत्तं, तं पनत्थं सन्धायाति लिखितं. सिक्खाति तं तं सिक्खापदं, सिक्खनभावेन पवत्तचित्तुप्पादो. साजीवन्ति पञ्ञत्ति. तदत्थदस्सनत्थं पुब्बे ‘‘मेथुनसंवरस्सेतं अधिवचन’’न्ति वुत्तं. यस्मा सिक्खाय गुणसम्मताय पुञ्ञसम्मताय तन्तिया अभावतो लोकस्स दुब्बल्याविकम्मं तत्थ न सम्भवति. पत्थनीया हि सा, तस्मा ‘‘यञ्च साजीवं ¶ समापन्नो, तस्मिं दुब्बलभावं अप्पकासेत्वा’’ति वुत्तं. आणाय हि दुब्बल्यं सम्भवतीति उपतिस्सो. दुब्बल्याविकम्मपदं सिक्खापच्चक्खानपदस्स ब्यञ्जनसिलिट्ठताय वा परिवारकभावेन वा वेदितब्बं. अथ वा यस्मा सिक्खापच्चक्खानस्स एकच्चं दुब्बल्याविकम्मं अकतं होति, तस्मा तं सन्धाय ‘‘सिक्खं अपच्चक्खाया’’ति पदस्स अत्थं विवरन्तो ‘‘दुब्बल्यं अनाविकत्वा’’ति आह. तत्थ सिया यस्मा न सब्बं दुब्बल्याविकम्मं सिक्खापच्चक्खानं, तस्मा ‘‘दुब्बल्यं अनाविकत्वा’’ति पठमं वत्वा तस्स अत्थनियमत्थं ‘‘सिक्खं अपच्चक्खाया’’ति वत्तब्बन्ति? तं न, कस्मा? अत्थानुक्कमाभावतो. ‘‘सिक्खासाजीवसमापन्नो’’ति हि वुत्तत्ता ‘‘यं सिक्खं समापन्नो, तं अपच्चक्खाय, यञ्च साजीवं समापन्नो, तत्थ दुब्बल्यं अनाविकत्वा’’ति वुच्चमाने अनुक्कमेनेव अत्थो वुत्तो होति, न अञ्ञथा, तस्मा इदमेव पठमं वुत्तन्ति. तेसंयेवाति चुद्दसन्नं.

‘‘सिक्खं अपच्चक्खाया’’ति सब्बसिक्खापदानं साधारणत्थं ‘‘अयमेत्थ अनुपञ्ञत्ती’’ति वुत्तं.

पवेसनं नाम अङ्गजातं पवेसेन्तस्स अङ्गजातेन सम्फुसनं. पविट्ठं नाम याव मूलं पवेसेन्तस्स विप्पकतकालो वायामकालो. सुक्कविसट्ठिसमये अङ्गजातं ठितं नाम. उद्धरणं नाम नीहरणकालो. विनयगण्ठिपदे पन ‘‘वायामतो ओरमित्वा ठानं ठितं नामा’’ति वुत्तं, तं ¶ असङ्करतो दस्सनत्थं वुत्तं. पवेसनपविट्ठउद्धरणकालेसुपि सुक्कविसट्ठि होतियेव. सादियनं नाम सेवनचित्तस्स अधिवासनचित्तस्स उप्पादनं.

उभतोविभङ्गे एव पञ्ञत्तानि सन्धाय ‘‘इदञ्हि सब्बसिक्खापदानं निदान’’न्ति वुत्तं. ‘‘विनयधरपञ्चमेन गणेन उपसम्पदा’’ति (महाव. २५९) वुत्तत्ता इध ततिया सहयोगेन वुत्ता. तस्मा वीसतिपि भिक्खू चे निसिन्ना, पञ्चमो विनयधरोव इच्छितब्बो, एवं सति पाराजिको चे विनयधरो, उपसम्पदाकम्मं कोपेतीति चे? न, परिवारावसाने कम्मवग्गे (परि. ४८२ आदयो) यं कम्मविपत्तिलक्खणं वुत्तं, तस्स तस्मिं नत्थिताय. ‘‘कथं वत्थुतो वा ञत्तितो वा अनुस्सावनतो वा सीमतो वा परिसतो वा’’ति एत्तकं वुत्तं, ननु अयं ‘‘परिसतो वा’’ति वचनेन सङ्गहितोति चे? न, ‘‘द्वादसहि आकारेहि परिसतो कम्मानि विपज्जन्ती’’ति (परि. ४८७) सुत्तस्स ¶ हि विभङ्गे तस्स अनामट्ठत्ताति अयमत्थो यस्मा तत्थ तत्थ सरूपेन वुत्तपाळिवसेनेव सक्का जानितुं, तस्मा नयमुखं दस्सेत्वा संखित्तोति लिखितं. ‘‘अङ्ग’’न्ति पदं उद्धरित्वा ‘‘सब्बसिक्खापदेसु आपत्तीनं अङ्गानङ्गं वेदितब्ब’’न्ति वुत्तं, इध पन ‘‘अङ्ग’’न्ति वुत्तं, कस्मा? समुट्ठनादीनं परिवारादीसु सङ्खेपेन आगतत्ता तत्थ गहेत्वा इधापि निद्दिट्ठानं अनङ्गानं ववत्थानाभावतो, सब्बत्थ सङ्खेपतो च वित्थारतो च अनङ्गत्ते वुच्चमाने अतिवित्थारताय तस्मिं तस्मिं सिक्खापदे अनूनं वत्तब्बतो चाति वेदितब्बो, सब्बापत्तीनं सङ्गाहकवसेनाति अत्थो.

यानि सिक्खापदानि ‘‘किरियानी’’ति वुच्चन्ति, तेसं वसेन कायवाचा सह विञ्ञत्तिया वेदितब्बा, अकिरियानं वसेन विना विञ्ञत्तिया वेदितब्बा. चित्तं पनेत्थ अप्पमाणं भूतारोचनसमुट्ठानस्स किरियत्ता, अचित्तकत्ता च. तत्थ किरिया आपत्तिया अनङ्गन्तरचित्तसमुट्ठाना वेदितब्बा. अविञ्ञत्तिजनकम्पि एकच्चं बाहुल्लनयेन ‘‘किरिय’’न्ति वुच्चति यथेव पठमपाराजिकं. विञ्ञत्तिया अभावेपि ‘‘सो चे सादियति, आपत्ति पाराजिकस्स, न सादियति, अनापत्ती’’ति हि वुत्तं, विञ्ञत्तिसङ्खातापि किरिया विना सेवनचित्तेन न होति वुत्तचित्तजत्ता, विकाररूपत्ता, चित्तानुपरिवत्तिकत्ता च. तस्मा किरियासङ्खातमिदं विञ्ञत्तिरूपं, इतरं चित्तजरूपं विय जनकचित्तेन विना न तिट्ठति, इतरं सद्दायतनं तिट्ठति, तस्मा किरियाय सति एकन्ततो तज्जनकं सेवनचित्तं अत्थि एवाति कत्वा न सादियति, अनापत्तीति न युज्जतीति. यस्मा विञ्ञत्तिजनकम्पि समानं सेवनचित्तं न सब्बकालं विञ्ञत्तिं जनेति, तस्मा विनापि विञ्ञत्तिया सयं उप्पज्जतीति कत्वा ‘‘सादियति, आपत्ति पाराजिकस्सा’’ति वुत्तं. नुप्पज्जति चे, न सादियति नाम, तस्स ¶ अनापत्ति. तेनेव भगवा ‘‘किंचित्तो त्वं भिक्खू’’ति (पारा. १३५) चित्तेनेव आपत्तिं परिच्छिन्दति, न किरियायाति वेदितब्बं.

एत्थ समुट्ठानग्गहणं कत्तब्बतो वा अकत्तब्बतो वा कायादिभेदापेक्खमेव आपत्तिं आपज्जति, न अञ्ञथाति दस्सनप्पयोजनं. तेसु किरियाग्गहणं कायादीनं सविञ्ञत्तिकाविञ्ञत्तिकभेददस्सनप्पयोजनं. सञ्ञाग्गहणं आपत्तिया अङ्गानङ्गचित्तविसेसदस्सनप्पयोजनं. तेन ¶ यं चित्तं किरियलक्खणे वा अकिरियलक्खणे वा सन्निहितं, यतो वा किरिया वा अकिरिया वा होति, न तं अविसेसेन आपत्तिया अङ्गं वा अनङ्गं वा होति. किन्तु याय सञ्ञाय ‘‘सञ्ञाविमोक्ख’’न्ति वुच्चति, ताय सम्पयुत्तं चित्तं अङ्गं, इतरं अनङ्गन्ति दस्सितं होति. इदानि येन चित्तेन सिक्खापदं सचित्तकं होति, तदभावा अचित्तकं, तेन तस्स अविसेसेन सावज्जताय ‘‘लोकवज्जमेवा’’ति वुत्तं. किन्तु सावज्जंयेव समानं एकच्चं लोकवज्जं, एकच्चं पण्णत्तिवज्जन्ति दस्सनप्पयोजनं चित्तलोकवज्जग्गहणं. चित्तमेव यस्मा ‘‘लोकवज्ज’’न्ति वुच्चति, तस्मा मनोकम्मम्पि सिया आपत्तीति अनिट्ठप्पसङ्गनिवारणप्पयोजनं कम्मग्गहणं.

यं पनेत्थ अकिरियलक्खणं कम्मं, तं कुसलत्तिकविनिमुत्तं सियाति अनिट्ठप्पसङ्गनिवारणप्पयोजनं कुसलत्तिकग्गहणं. या पनेत्थ अब्याकतापत्ति, तं एकच्चं अवेदनम्पि निरोधं समापन्नो आपज्जतीति वेदनात्तिकं एत्थ न लब्भतीति अनिट्ठप्पसङ्गनिवारणत्थं वेदनात्तिकग्गहणं. सिक्खापदञ्हि सचित्तकपुग्गलवसेन ‘‘तिचित्तं तिवेदन’’न्ति लद्धवोहारं अचित्तकेनापन्नम्पि ‘‘तिचित्तं तिवेदन’’मिचेव वुच्चति. तत्रिदं साधकसुत्तं – ‘‘अत्थापत्ति अचित्तको आपज्जति अचित्तको वुट्ठाति (परि. ३२४), अत्थापत्ति कुसलचित्तो आपज्जति कुसलचित्तो वुट्ठाती’’तिआदि (परि. ४७०). ‘‘सचित्तकं आपत्तिदीपनं, सञ्ञाविमोक्खं अनापत्तिदीपनं, अचित्तकं वत्थुअजाननं, नोसञ्ञाविमोक्खं वीतिक्कमनाजाननं. इदमेव तेसं नानात्त’’न्ति (वजिर. टी. पाराजिक ६१-६६ पकिण्णककथावण्णना) लिखितं.

सचित्तकपक्खेति एत्थ अयं ताव गण्ठिपदनयो – सचित्तकपक्खेति सुरापानादिअचित्तके सन्धाय वुत्तं. सचित्तकेसु पन यं एकन्तमकुसलेनेव समुट्ठाति, तञ्च उभयं लोकवज्जं नाम. सुरापानस्मिञ्हि ‘‘सुरा’’ति वा ‘‘पातुं न वट्टती’’ति वा जानित्वा पिवने अकुसलमेवाति. तत्थ ‘‘न वट्टतीति जानित्वा’’ति वुत्तवचनं न युज्जति पण्णत्तिवज्जस्सपि ¶ लोकवज्जतापसङ्गतो. इमं अनिट्ठप्पसङ्गं परिहरितुकामताय च वजिरबुद्धित्थेरेन लिखितं – ‘‘इध ‘सचित्तक’न्ति च ‘अचित्तक’न्ति च विचारणा वत्थुविजानने एव होति, न पञ्ञत्तिविजानने. यदि पञ्ञत्तिविजानने होति ¶ , सब्बसिक्खापदानि लोकवज्जानेव सियुं, न च सब्बसिक्खापदानि लोकवज्जानि. तस्मा वत्थुविजानने एव होतीति इदं युज्जति. कस्मा? यस्मा सेखियेसु पञ्ञत्तिविजाननमेव पमाणं, न वत्थुमत्तविजानन’’न्ति. अयं पनेत्थ अत्थो सिक्खापदसीसेन आपत्तिं गहेत्वा यस्स सिक्खापदस्स सचित्तकस्स चित्तं अकुसलमेव होति, तं लोकवज्जं, सचित्तकाचित्तकसङ्खातस्स अचित्तकस्स च सचित्तकपक्खे चित्तं अकुसलमेव होति, तम्पि सुरापानादिलोकवज्जन्ति इममत्थं सन्धाय ‘‘यस्सा सचित्तकपक्खे चित्तं अकुसलमेव होति, अयं लोकवज्जा नामा’’ति वुत्तं. ‘‘सचित्तकपक्खे’’ति हि इदं वचनं अचित्तकं सन्धायाह. न हि एकंसतो सचित्तकाय ‘‘सचित्तकपक्खे’’ति विसेसने पयोजनं अत्थीति, एवं सन्तेपि अनियमेन वुत्तञ्च नियमवसेन एव गहेतब्बन्ति अत्थो.

तिरच्छानानं पनाति पन-सद्देन थुल्लच्चयादिकारं निवत्तेति. किरियाति एत्थ ‘‘ठितं सादियती’’ति (पारा. ५८) वुत्तत्ता तं कथन्ति चे? ‘‘सादियती’’ति वुत्तत्ता किरिया एव. एवं सन्ते ‘‘कायकम्मं मनोकम्म’’न्ति वत्तब्बन्ति चे? न, पचुरवोहारवसेन ‘‘कायकम्म’’न्ति वुत्तत्ता. उब्भजाणुमण्डलिकाय लब्भति एवाति लिखितं. पुब्बे वुत्तनयेन संसन्देत्वा गहेतब्बं. ‘‘दुन्निक्खित्तस्स, भिक्खवे, पदब्यञ्जनस्स अत्थोपि दुन्नयो होती’’ति (अ. नि. २.२०) वदन्तेनापि अत्थस्स सुखग्गहणत्थमेव पदब्यञ्जनस्स सुनिक्खित्तभावो इच्छितो, न अक्खरवचनाय, तस्मा आह ‘‘अत्थञ्हि नाथो सरणं अवोचा’’तिआदि.

पठमपाराजिकवण्णना निट्ठिता.

२. दुतियपाराजिकवण्णना

गामा वा अरञ्ञा वाति लक्खणानुपञ्ञत्तिकत्ता आदिम्हि वुत्ता. सब्बस्मिञ्हि विनयपिटके गामो, गामूपचारो, गामक्खेत्तं, गामसीमा, गामसीमूपचारोति पञ्चविधो गामभेदो वेदितब्बो. तथा आरञ्ञकसीमाय एकं अगामकं अरञ्ञं, संविधानसिक्खापदानं (पाचि. १८० आदयो) एकं, सगामकं एकं ¶ , अविप्पवाससीमाय एकं, गणम्हाओहीयनकस्स (पाचि. ६९१) एकन्ति पञ्चविधो अरञ्ञभेदो वेदितब्बो. तत्थ अत्थि ¶ गामो न गामपरिहारं कत्थचि लभति, अत्थि गामो न गामकिच्चं करोति, तथा अत्थि अरञ्ञं न अरञ्ञपरिहारं कत्थचि लभति, अत्थि अरञ्ञं न अरञ्ञकिच्चं करोतीति अयम्पि भेदो वेदितब्बो.

तत्थ अविप्पवाससीमासम्मन्ननकम्मवाचाय ठपेत्वा ‘‘गामञ्च गामूपचारञ्चा’’ति (महाव. १४४) एत्थ गामो नाम परिक्खित्तो चे, परिक्खेपस्स अन्तो, अपरिक्खित्तो चे, परिक्खेपोकासतो अन्तो वेदितब्बो. अयं उदोसितसिक्खापदे ‘‘अन्तोगामो’’ति (पारा. ४७८) आगतो. सासङ्कसिक्खापदे ‘‘अन्तरघर’’न्ति (पारा. ६५४) आगतो अनासङ्कतो. यथाह ‘‘अन्तरघरे निक्खिपेय्याति समन्ता गोचरगामे निक्खिपेय्या’’ति (पारा. ६५४). तथा अन्तरघरप्पटिसंयुत्तानं सेखियानं अयमेव परिच्छेदो वेदितब्बो. ‘‘या पन भिक्खुनी एका गामन्तरं गच्छेय्या’’ति (पाचि. ६८७) एत्थापि अयमेव परिच्छेदो अधिप्पेतो ‘‘परिक्खित्तस्स गामस्स परिक्खेपं अतिक्कमन्तिया, अपरिक्खित्तस्स गामस्स उपचारं अतिक्कमन्तिया’’ति वुत्तत्ता.

येसु पुराणपोत्थकेसु ‘‘उपचारं ओक्कमन्तिया’’ति लिखितं, तं विकाले गामप्पवेसनसिक्खापदेसु आचिण्णं नयं गहेत्वा पमादेन लिखीयति, न पमाणं. येसु च पोत्थकेसु विकाले गामप्पवेसनसिक्खापदस्स विभङ्गे (पाचि. ५१३) ‘‘गामं पविसेय्याति परिक्खित्तस्स गामस्स परिक्खेपं अतिक्कमन्तस्स, अपरिक्खित्तस्स गामस्स उपचारं अतिक्कमन्तस्सा’’ति लिखीयति, सा पमादलेखा. उपचारं ओक्कमन्तस्साति तत्थ पाठो. वुत्तञ्हि समन्तपासादिकायं ‘‘अपरिक्खित्तस्स गामस्स उपचारो अदिन्नादाने वुत्तनयेनेव वेदितब्बो’’ति (पाचि. अट्ठ. ५१२). इध कङ्खावितरणियम्पि वुत्तं ‘‘सन्तं भिक्खुं अनापुच्छित्वाति…पे… उपचारं ओक्कमन्तस्सा’’तिआदि (कङ्खा. अट्ठ. विकालगामप्पवेसनसिक्खापदवण्णना).

यं पन कत्थचि पोत्थके ‘‘भिक्खुनिया गामन्तराधिकारे एकेन पादेन इतरस्स गामस्स परिक्खेपं वा अतिक्कमन्ते, उपचारं वा ओक्कन्ते थुल्लच्चयं, दुतियेन अतिक्कन्तमत्ते, ओक्कन्तमत्ते च सङ्घादिसेसो’’ति पाठो दिस्सति. तत्थ ‘‘ओक्कन्ते, ओक्कन्तमत्ते’’ति एतानि पदानि अधिकानि ¶ , केवलं लिखितकेहि अञ्ञेहि लिखितानि. कत्थचि पोत्थके ‘‘ओक्कन्तमत्ते चा’’ति पदं न दिस्सति, इतरं दिस्सति. तानि द्वे पदानि पाळिया विरुज्झन्ति. ‘‘अपरिक्खित्तस्स गामस्स उपचारं अतिक्कामेन्तिया’’ति (पाचि. ६९२) हि पाळि ¶ . तथा समन्तपासादिकाय (पाचि. अट्ठ. ६९२) विरुज्झन्ति. ‘‘परिक्खेपारहट्ठानं एकेन पादेन अतिक्कमति, थुल्लच्चयं, दुतियेन अतिक्कमति, सङ्घादिसेसो. अपिचेत्थ सकगामतो…पे… एकेन पादेन इतरस्स गामस्स परिक्खेपे वा उपचारे वा अतिक्कन्ते थुल्लच्चयं, दुतियेन अतिक्कन्तमत्ते सङ्घादिसेसो’’ति (पाचि. अट्ठ. ६९२) हि वुत्तं.

गण्ठिपदे चस्स ‘‘परिक्खेपं अतिक्कामेन्तिया’’ति वत्वा ‘‘उपचारेपि एसेव नयो’’ति वुत्तं. अनुगण्ठिपदे च ‘‘अपरिक्खित्तस्स गामस्स उपचारं ‘ओक्कमन्तिया’तिपि पोत्थकेसु एकच्चेसु दिस्सति, तं न गहेतब्ब’’न्ति वुत्तं. अपरम्पि वुत्तं ‘‘अपरिक्खित्तस्स गामस्स उपचारं ‘अतिक्कामेन्तिया’ति वचनेनापि एवं वेदितब्बं – विकाले गामप्पवेसने द्विन्नं लेड्डुपातानं एव वसेन उपचारो परिच्छिन्दितब्बो, इतरथा यथा एत्थ परिक्खेपारहट्ठानं परिक्खेपं विय कत्वा ‘अतिक्कामेन्तिया’ति वुत्तं, एवं तत्थापि ‘अपरिक्खित्तस्स गामस्स उपचारं अतिक्कामेन्तस्सा’ति वदेय्य. यस्मा पन तत्थ परिक्खेपारहट्ठानतो उत्तरिमेको लेड्डुपातो उपचारोति अधिप्पेतो. तस्मा तदत्थदीपनत्थं ‘अपरिक्खित्तस्स गामस्स उपचारं ओक्कमन्तस्सा’ति वुत्त’’न्ति.

यं पन अन्धकट्ठकथायं परिक्खेपारहट्ठानंयेव उपचारन्ति सल्लक्खेत्वा ‘‘परिक्खेपपअक्खेपारहट्ठानानं निन्नानाकरणदीपनत्थं उपचारं ओक्कमन्तस्सा’’ति वुत्तं, पाळिविसेसमसल्लक्खेत्वा ‘‘अपरिक्खित्तस्स गामस्स उपचारं अतिक्कमन्तस्स इध उपचारो परिक्खेपो यथा भवेय्य, तं उपचारं पठमं पादं अतिक्कामेन्तस्स आपत्ति दुक्कटस्स, दुतियं पादं अतिक्कामेन्तस्स आपत्ति पाचित्तियस्सा’’ति वुत्तं, तं न गहेतब्बमेव पाळिया विसेससम्भवतोति. पोराणगण्ठिपदे ‘‘उपचारं अतिक्कामेन्तिया भिक्खुनिया गामन्तरापत्ती’’ति वुत्तं. तस्मा इध कङ्खावितरणिया ‘‘एकेन पादेन इतरस्स…पे… अतिक्कन्तमत्ते सङ्घादिसेसो’’ति अयमेव पाठो वेदितब्बो. एत्तावता इमेसु यथावुत्तेसु ठानेसु यथावुत्तपरिच्छेदोव गामोति वेदितब्बो. इमस्स ¶ अत्थस्स दीपनत्थं ‘‘गामो नाम एककुटिकोपी’’तिआदि (पारा. ९२) वुत्तं. इमस्स वसेन असतिपि परिक्खेपातिक्कमे, उपचारोक्कमने वा अन्तरारामतो वा भिक्खुनुपस्सयतो वा तित्थियसेय्यतो वा पटिक्कमनतो वा तं गामं पविसन्तस्स अन्तरारामपरिक्खेपस्स, उपचारस्स वा अतिक्कमनवसेन गामपच्चया आपत्तियो वेदितब्बा.

गामूपचारो पन ‘‘ठपेत्वा गामञ्च गामूपचारञ्चा’’ति (महाव. १४४) एत्थ परिक्खित्तस्स ¶ गामस्स परिक्खेपोव, अपरिक्खित्तस्स गामस्स परिक्खेपोकासोव. वुत्तञ्हेतं अट्ठकथायं ‘‘गामूपचारोति परिक्खित्तस्स गामस्स परिक्खेपो, अपरिक्खित्तस्स गामस्स परिक्खेपोकासो. तेसु अधिट्ठिततेचीवरिको भिक्खु परिहारं न लभती’’ति (महाव. अट्ठ. १४४). किं पनेत्थ कारणं, येन अयं गामो, गामूपचारो च इध अञ्ञथा, अञ्ञत्थ तथाति? अट्ठुप्पत्तितो ‘‘तेन खो पन समयेन भिक्खू ‘भगवता तिचीवरेन अविप्पवाससम्मुति अनुञ्ञाता’ति अन्तरघरे चीवरानि निक्खिपन्ती’’ति (महाव. १४३) इमिस्सा हि अट्ठुप्पत्तिया ‘‘ठपेत्वा गामञ्च गामूपचारञ्चा’’ति (महाव. १४४) वुत्तं. तस्मा यत्थ अन्तरघरसञ्ञा, तत्थ अविप्पवाससीमा न गच्छतीति वेदितब्बा. तेन च उदोसितसिक्खापदे ‘‘अन्तोगामे चीवरं निक्खिपित्वा अन्तोगामे वत्थब्ब’’न्ति (पारा. ४७८) च ‘‘सभाये वा द्वारमूले वा, हत्थपासा वा न विजहितब्ब’’न्ति च वुत्तं. कप्पियभूमियं वसन्तोयेव हि कप्पियभूमियं निक्खित्तचीवरं रक्खति. सासङ्कसिक्खापदे पन ‘‘यस्मा यत्थ गामे चीवरं निक्खित्तं, तेन गामेन विप्पवसन्तो चीवरेन विप्पवसतीति वुच्चति, तस्मा पुन गामसीमं ओक्कमित्वा वसित्वा पक्कमती’’ति वुत्तं. तस्मिञ्हि सिक्खापदे गामसीमा गामो नामाति अधिप्पेतो. तत्थ विकाले गामप्पवेसनसिक्खापदविभङ्गे ‘‘परिक्खित्तस्स गामस्स परिक्खेपं अतिक्कमन्तस्स आपत्ति पाचित्तियस्सा’’ति (पाचि. ५१३) वचनतो परिक्खेपो न गामो. किन्तु गामूपचारोति लेसेन दस्सितं होति. इमस्मिं पन सिक्खापदविभङ्गे ‘‘गामूपचारो नामा’’ति आरभित्वा ‘‘अपरिक्खित्तस्स गामस्स घरूपचारे ठितस्स मज्झिमस्स पुरिसस्स लेड्डुपातो’’ति इमिना अपरिक्खित्तस्स परिक्खेपोकासो गामूपचारोति सिद्धं. तदत्थसम्भवतो तस्मिं घरूपचारे ठितस्स लेड्डुपातो गामूपचारोति कुरुन्दट्ठकथायं, महापच्चरियम्पि वुत्तं ¶ . उपचारो हि ‘‘गामो एकूपचारो नानूपचारो’’तिआदीसु द्वारं, ‘‘अज्झोकासो एकूपचारो’’ति एत्थ समन्ता सत्तब्भन्तरसङ्खातं पमाणं, तस्मा ‘‘गामूपचारोति परिक्खित्तस्स गामस्स परिक्खेपो, अपरिक्खित्तस्स गामस्स परिक्खेपोकासो’’ति अन्धकट्ठकथायं वुत्तन्ति वेदितब्बं. तथा कुरुन्दियं, महापच्चरियञ्च. तथा पाळियम्पि ‘‘अज्झारामो नाम परिक्खित्तस्स आरामस्स अन्तो आरामो, अपरिक्खित्तस्स उपचारो. अज्झावसथो नाम परिक्खित्तस्स आवसथस्स अन्तो आवसथो, अपरिक्खित्तस्स उपचारो’’तिआदीसु दिस्सति. महाअट्ठकथायं पन ‘‘गामूपचारो’’तिआदीसु दिस्सति. तस्मा दुतियो लेड्डुपातो उपचारोति अधिप्पेतो.

‘‘अपरिक्खित्तस्स गामस्स उपचारं ओक्कमन्तस्स आपत्ति पाचित्तियस्सा’’ति पाळिविसेससम्भवतो च पठमो लेड्डुपातो गामो एव, दुतियो गामूपचारोति वुत्तं. परिक्खित्तस्स ¶ पन गामस्स इन्दखीले ठितस्स मज्झिमस्स पुरिसस्स लेड्डुपातो गामूपचारोति वुत्तन्ति एत्थ भेदो नत्थि. एत्तावता परिक्खित्तस्स दुविधो उपचारो, अपरिक्खित्तस्स चतुब्बिधो उपचारो यत्थ सम्भवति, यत्थ च न सम्भवति, तं सब्बं दस्सितं होति.

गामखेत्तस्स च गामसीमाय च लक्खणं अट्ठकथायमेव वुत्तं. उभयञ्हि अत्थतो एकं. तत्थ गामसीमाय गामभावो सासङ्कसिक्खापदवसेन वेदितब्बो.

गामसीमूपचारो नाम मनुस्सानं कट्ठतिणपुप्फफलादिअत्थिकानं वनचरकानं वलञ्जनट्ठानं. इमस्स गामसीमूपचारभावो उदोसितसिक्खापदे, ‘‘अगामके अरञ्ञे समन्ता सत्तब्भन्तरा’’ति (पारा. ४९४) आगतट्ठाने खन्धके (महाव. १४७) च वेदितब्बो. एत्थ हि भगवा गामन्तवासीनं भिक्खूनं सीमं दस्सेन्तो ‘‘यं गामं वा निगमं वा उपनिस्साय विहरती’’ति (महाव. १४७) वत्वा दस्सेति. तदनन्तरमेव ‘‘अगामके’’तिआदिना सत्तब्भन्तरसीमं दस्सेति. तस्मा यो भिक्खु गामं वा निगमं वा उपनिस्साय न विहरति, केवलं नावायं वा थलमग्गेन वा अद्धानमग्गप्पटिपन्नो होति, तस्स तत्थ तत्थ सत्तब्भन्तरसीमा लब्भतीति वेदितब्बो. वुत्तञ्हि ‘‘एककुलस्स सत्थो होति ¶ , सत्थे चीवरं निक्खिपित्वा पुरतो वा पच्छतो वा सत्तब्भन्तरा न विजहितब्ब’’न्तिआदि (पारा. ४८९). इदमेव अरञ्ञं सन्धाय ‘‘आरञ्ञकसीमाय एकं अगामकं अरञ्ञ’’न्ति वुत्तं.

यं सन्धाय ‘‘अगामके अरञ्ञे अद्धयोजने अद्धयोजने आपत्ति पाचित्तियस्सा’’ति (पाचि. ४१४) पाळियं वुत्तं. इदं संविधानसिक्खापदानं एकं अगामकं अरञ्ञं नाम.

पुरिमेन पन सघरं सङ्गहितं, इमिना तमसङ्गहितन्ति. यं सन्धाय गणम्हा ओहीयनाधिकारे अट्ठकथायं (पाचि. अट्ठ. ६९२) ‘‘अगामके अरञ्ञेति एत्थ ‘निक्खमित्वा बहि इन्दखीला सब्बमेतं अरञ्ञ’न्ति एवं वुत्तं लक्खणं अरञ्ञं. तं पनेत केवलं गामाभावेन ‘अगामक’न्ति वुत्तं, न विञ्झाटविसदिसताया’’ति वुत्तं. यं सन्धाय ‘‘आरञ्ञकं नाम सेनासनं पञ्चधनुसतिकं पच्छिम’’न्ति (पारा. ६५४; पाचि. ५७३) वुत्तं. इदं आरञ्ञकसेनासनं नाम परिक्खित्तस्स परिक्खेपतो बहि, अपरिक्खित्तस्स पन परिक्खेपोकासतो बहि सरुक्खं वा अरुक्खं वा विहारे कुन्नदिसमाकिण्णम्पि अरञ्ञं नाम. तथा ‘‘गणम्हा ओहीयनकस्स एक’’न्ति वुत्तं. इदं अरञ्ञंव. इदं पन पुब्बे अगामकभावेन आगतट्ठाने वुत्तलक्खणमेव हुत्वा निक्खमित्वा बहि इन्दखीला दस्सनूपचारविजहने ¶ एकमेव आपत्तिं करोति, ततो उद्धं अनापत्ति. ‘‘संविधानसिक्खापदानं एक’’न्ति वुत्तं पन अद्धयोजने अद्धयोजने एकेकं आपत्तिं करोति, न ततो ओरं. इतरानि तीणि यथावुत्तपरिच्छेदतो ओरमेव तत्थ वुत्तविधिं न सम्पादेन्ति, परं सम्पादेन्ति. एवमेतेसं अञ्ञमञ्ञनानत्तं वेदितब्बं.

तत्थ पञ्चविधे गामे यो ‘‘परिक्खित्तस्स गामस्स इन्दखीले ठितस्स लेड्डुपातो’’ति (पारा. ९२) वुत्तो, सो न कत्थचि विनयपिटके उपयोगं गतो, केवलं अपरिक्खित्तस्स परिक्खेपोकासतो अपरो एको लेड्डुपातो गामूपचारो नामाति दीपनत्थं वुत्तो. परिक्खित्तस्सपि चे गामस्स एको लेड्डुपातो कप्पियभूमिसमानो उपचारोति वुत्तो, पगेव अपरिक्खित्तस्स परिक्खेपोकासतो एको. सो पन पाकटत्ता च अज्झोकासत्ता च ओक्कमन्तस्स आपत्तिं करोति ठपेत्वा ¶ भिक्खुनिया गामन्तरापत्तिं. भिक्खुनियो हि तस्मिं दुतियलेड्डुपातसङ्खाते गामूपचारे वसन्ती आपत्तिञ्च आपज्जन्ति, गामं पविसन्ती गामन्तरापत्तिञ्च. तासञ्हि ठितट्ठानं अरञ्ञसङ्ख्यं गच्छति ‘‘तावदेव छाया मेतब्बा…पे… तस्सा तयो च निस्सये, अट्ठ च अकरणीयानि आचिक्खेय्याथा’’ति (चूळव. ४३०) वचनतो. अरञ्ञप्पटिसंयुत्तानं सिक्खापदानं, विकालेगामप्पवेसनसिक्खापदस्स (पाचि. ५०८) च भिक्खुनीनं असाधारणत्ता च अन्तरारामभिक्खुनुपस्सयप्पटिक्कमनादीनं कप्पियभूमिभाववचनतो च ‘‘एका गणम्हा ओहीयेय्याति अगामके अरञ्ञे दुतियिकाय भिक्खुनिया दस्सनूपचारं वा सवनूपचारं वा विजहन्तिया आपत्ति थुल्लच्चयस्सा’’तिआदिसिक्खापदपञ्ञत्तितो (पाचि. ६९२) च भिक्खुनिक्खन्धकनयएन वा यस्मा परिक्खित्तस्स गामस्स इन्दखीलतो पट्ठाय अपरिक्खित्तस्स उपचारतो पट्ठाय नीयति, तत्थ अन्तरघरे निक्खित्तचीवरे सति चतुरङ्गसमोधानेन भिक्खू वसन्ति, तस्मा सगामकं नाम होति.

अविप्पवाससीमाय एकं नाम ‘‘न, भिक्खवे, भिक्खुनिया अरञ्ञे वत्थब्बं, या वसेय्य, आपत्ति दुक्कटस्सा’’ति (चूळव. ४३१) वचनतो भिक्खुनीनं अरञ्ञवासो नाम नत्थीति सिद्धं. ताय हि अरञ्ञे भिक्खुनुपस्सये सति अन्तोआवासेपि दुतियिकाय दस्सनसवनूपचारं विजहन्तिया आपत्ति. तस्मा अविप्पवाससीमाधिकारे ‘‘ठपेत्वा गामञ्च गामूपचारञ्चा’’ति (महाव. १४४) एत्थ यं ठानं ठपितं, तत्थेव भिक्खुनुपस्सयोपि कप्पति, न ततो परं.

तासञ्च ¶ अविप्पवाससीमाकम्मवाचायं ‘‘ठपेत्वा गामञ्च गामूपचारञ्चा’’ति वचनं नत्थीति कत्वा तेस्वेव गामगामूपचारेसु फरति. ततो परं दुतियेसु लेड्डुपातादीसु तासं अकप्पियभूमिकत्ता न समानसंवासकसीमा अरञ्ञे फरति भिक्खूनं गामगामूपचारं विय. तस्मा वुत्तं ‘‘भिक्खुनिया ठपेत्वा गामन्तरापत्ति’’न्ति.

एवं ताव पञ्चविधं गामभेदं, अरञ्ञभेदञ्च ञत्वा इदानि ‘‘अत्थि गामो न गामपरिहारं कत्थचि लभती’’तिआदिभेदो वेदितब्बो. तत्थ यो अट्ठकथायं ‘‘अमनुस्सो नाम यो सब्बसो वा मनुस्सानं अभावेन यक्खपरिग्गहभूतो’’ति वुत्तो, सो गामो न गामपरिहारं कत्थचि सिक्खापदे लभति. यञ्हि सन्धाय अट्ठकथायं ‘‘तं पनेतं बुद्धकाले, चक्कवत्तिकाले ¶ च नगरं होति, सेसकाले सुञ्ञं होति यक्खपरिग्गहित’’न्ति (पारा. अट्ठ. १.८४; दी. नि. अट्ठ. १.१५०) वुत्तं. यो पन पटिराजचोरादीहि विलुत्तत्ता, केवलं भयेन वा छड्डितो सघरोव अन्तरहितगामभूतो, सो ‘‘गामन्तरे गामन्तरे आपत्ति पाचित्तियस्सा’’ति (पाचि. १८३) वुत्तपाचित्तियं जनेति, विकाले गामप्पवेसनं, सेखिये चत्तारि जनेतीति वेदितब्बा. यो पन गामो यतो वा मनुस्सा केनचिदेव करणीयेन पुनपि आगन्तुकामा एव अपक्कन्ताति वुत्तो, अमनुस्सो सो पकतिगामसदिसोव.

अत्थि अरञ्ञं न अरञ्ञपरिहारं कत्थचि लभतीति एत्थ ‘‘अज्झोकासो एकूपचारो नाम अगामके अरञ्ञे समन्ता सत्तब्भन्तरा एकूपचारो, ततो परं नानूपचारो’’ति (पारा. ४९४) एत्थ य्वायं नानूपचारोति वुत्तो, तं वेदितब्बं. यो पन परिक्खित्तस्स एकलेड्डुपातसङ्खातो गामूपचारनामको गामो, यो वा सत्थो नातिरेकचातुमासनिविट्ठो, सो अत्थि गामो न गामकिच्चं करोति. न हि तं ठानं ओक्कमन्तो गामप्पवेसनापत्तिं आपज्जति. यं पन गामसीमाय परियापन्नं मनुस्सानं वलञ्जनट्ठानभूतं अरञ्ञं, तं अत्थि अरञ्ञं न अरञ्ञकिच्चं करोति नाम. न हि तत्थ आरञ्ञकसीमा लब्भतीति. एत्तावता ‘‘गामा वा अरञ्ञा वा’’ति इमिस्सा अनुपञ्ञत्तिया लक्खणानुपञ्ञत्तिभावो दस्सितो होति.

‘‘गोनिसादिनिविट्ठोपि गामो’’ति एत्थ सचे तस्स गामस्स गामखेत्तपरिच्छेदो अत्थि, सब्बोपि एको गामो. नो चे, उपचारेन वा परिक्खेपेन वा परिच्छिन्दितब्बो. सचे गामखेत्ते सति कानिचि तानि घरानि अञ्ञमञ्ञउपचारप्पहोनकं ठानं अतिक्कमित्वा दूरे दूरे कतानि होन्ति, विकाले गामप्पवेसे उपचारोव पमाणं. अन्तरघरप्पटिसंयुत्तेसु सेखियेसु, ¶ भिक्खुनिया गामन्तरापत्तीसु च घरानं परिक्खेपारहट्ठानं पमाणं, उपोसथादिकम्मानं गामखेत्तं पमाणं, आरञ्ञकसेनासनस्स आसन्नघरस्स दुतियलेड्डुपाततो पट्ठाय पञ्चधनुसतन्तरता पमाणन्ति एवं नो पटिभानन्ति आचरिया.

‘‘यम्पि एकस्मिंयेव गामखेत्ते एकं पदेसं ‘अयम्पि विसुंगामो होतू’ति परिच्छिन्दित्वा राजा कस्सचि देति, सोपि विसुंगामसीमा होतियेवा’’ति ¶ (महाव. अट्ठ. १४७) अट्ठकथावचनतो तं पविसन्तिया भिक्खुनिया गामन्तरापत्ति होति एव. सचे तत्थ विहारो वा देवकुलं वा सभा वा गेहं वा नत्थि, केवलं वत्थुमत्तकमेव होति, गामोति विनयकम्मं सब्बं तत्थ कप्पति. ‘‘अमनुस्सो गामो’’ति हि वुत्तं. तञ्च ठानं इतरस्स गामस्स परिक्खेपब्भन्तरे वा उपचारब्भन्तरे वा होति, विकाले गामप्पवेसनं आपुच्छित्वाव गन्तब्बं. नो चे, अरञ्ञं विय यथासुखं गन्तब्बं. तत्थ चे आरामो वा तित्थियसेय्यादीसु अञ्ञतरोवा होति, लद्धकप्पमेव. भिक्खुनुपस्सयो चे होति, गामं पिण्डाय पविसन्तिया भिक्खुनिया गामन्तरापत्ति परिहरितब्बा. ‘‘अरञ्ञं नाम ठपेत्वा गामञ्च गामूपचारञ्च अवसेसं अरञ्ञं नामा’’ति (पारा. ९२) एत्थ परिक्खेपे सति यथावुत्तपरिच्छेदं गाममेव ठपेत्वा अवसेसं तस्स उपचारं, ततो परञ्च अरञ्ञं नाम, परिक्खेपे असति यथावुत्तपरिच्छेदं गामूपचारमेव ठपेत्वा ततो परं अवसेसं अरञ्ञं नामाति अधिप्पायो. एवं सति ‘‘निक्खमित्वा बहि इन्दखीला सब्बमेतं अरञ्ञ’’न्ति (विभ. ५२९) वुत्तलक्खणे अगामके अरञ्ञे गणम्हाओहीयनापत्ति, तत्थ अविप्पवाससीमाय फरणं विकाले गामप्पवेसनापत्तिया अनापत्तीति एवमादिविनयविधि समेति, अञ्ञथा न समेति.

‘‘ठपेत्वा गामूपचारं अवसेसं अरञ्ञं नामा’’ति (महाव. १४४) वुत्ते गामूपचारतो परो अरञ्ञन्ति सिद्धे ‘‘ठपेत्वा गाम’’न्ति विसेसत्थो न दिस्सति, गामस्स पन अरञ्ञभावप्पसङ्गभया वुत्तन्ति चे? न, गामूपचारस्स अभावप्पसङ्गतो. सति हि गामे गामूपचारो होति, सो च तव मतेन अरञ्ञभूतो. कुतो दानि गामूपचारो. गामूपचारोपि चे अरञ्ञसङ्ख्यं गच्छति, परोव गामोति कत्वा न युत्तं गामस्स अरञ्ञभावप्पसङ्गतो च. तस्मा ‘‘गामा वा अरञ्ञा वा’’ति एत्थ गामूपचारोपि ‘‘गामो’’ त्वेव सङ्गहितो. तस्मा गामस्स अरञ्ञभावप्पसङ्गो न युज्जति. यदि एवं ‘‘ठपेत्वा गामं अवसेसं अरञ्ञं नामा’’ति एत्तकं वत्तब्बन्ति चे? न, अरञ्ञस्स परिच्छेदजाननप्पसङ्गतो. तथा हि वुत्तो ‘‘अरञ्ञपरिच्छेदो न पञ्ञायती’’ति नो लद्धि. गामूपचारपरियन्तो हि इध गामो नाम. यदि एवं ‘‘गामस्स च अरञ्ञस्स च परिच्छेददस्सनत्थं वुत्त’’न्ति अट्ठकथायं वत्तब्बं, ‘‘अरञ्ञस्स ¶ परिच्छेददस्सनत्थं वुत्त’’न्ति किमत्थं ¶ वुत्तन्ति चे? वुच्चते – अट्ठकथाचरियेन पठमगामूपचारंयेव सन्धाय वुत्तं ‘‘अरञ्ञपरिच्छेददस्सनत्थ’’न्ति सब्बसिक्खापदे हि बाहिरइन्दखीलतो पट्ठाय गामूपचारं अरञ्ञं नाम. गामपरिच्छेदवचने पयोजनं पनेत्थ नत्थि परिक्खेपेनेव पाकटभूतत्ता. दुतियगामूपचारोव गामस्स परिच्छेददस्सनत्थं वुत्तो परिक्खेपभावेन अपाकटत्ता. तत्थ पठमगामूपचारो चे अरञ्ञपरिच्छेददस्सनत्थं वुत्तो, तत्थ न वत्तब्बो. ‘‘निक्खमित्वा इन्दखीला सब्बमेतं अरञ्ञ’’न्ति वत्तब्बं. एवं सन्ते सुब्यत्ततरं अरञ्ञपरिच्छेदो दस्सितो होति, मिच्छागाहो च न होति.

‘‘मज्झिमस्स पुरिसस्स लेड्डुपातो’’ति हि वुत्ते अयं गामूपचारोव अरञ्ञं गामूपचारस्स विभङ्गत्ता. यदि अरञ्ञपरिच्छेददस्सनत्थं वुत्तं, अवुत्तकमेव, अरञ्ञतो परन्ति च मिच्छागाहो होतीति चे, ननु वुत्तं ‘‘पठममेव इदं परिक्खित्तस्स गामस्स उपचारनियमनत्थं वुत्त’’न्ति? अरञ्ञपरिच्छेददस्सनत्थं किञ्चापि ‘‘गामूपचारो’’तिआदि आरद्धं, इन्दखीले ठितस्स मज्झिमस्स पुरिसस्स लेड्डुपातोति पन एवं वचनप्पयोजनं. अपरिक्खित्तस्स च गामस्स य्वायं लेड्डुपातो उपचारो’’ति महाअट्ठकथायं वुत्तो, तस्स नियमनन्ति वुत्तं होति. कथं पञ्ञायतीति चे? ‘‘अरञ्ञं नामा’’ति पदं अनुद्धरित्वा ‘‘गामूपचारो नामा’’ति उद्धरणस्स कतत्ता. तत्थ ‘‘गामूपचारो नामा’’ति मातिकायं अविज्जमानं पदं उद्धरन्तो तयो अत्थवसे दस्सेति. सेय्यथिदं – अरञ्ञपरिच्छेददस्सनमेको अत्थो, अपरिक्खित्तस्स गामस्स उपचारेन सद्धिं परिच्छेददस्सनमेको, न केवलं अपरिक्खित्तस्सयेव उपचारो विनयाधिकारे सप्पयोजनो दस्सितब्बो, निप्पयोजनोपि परिक्खित्तस्स उपचारो इमिना परियायेन लब्भतीति अनुसङ्गप्पयोजनमेको अत्थोपि वेदितब्बो.

‘‘अपरिक्खित्तस्स गामस्स घरूपचारे ठितस्स मज्झिमस्स पुरिसस्स लेड्डुपातो’’ति इदं भगवा तयो अत्थवसे पटिच्च अभासि. सेय्यथिदं – अपरिक्खित्तस्स गामस्स परिच्छेददस्सनमेको, अविप्पवाससीमाधिकारे अयमेव गामूपचारोति दस्सनमेको, तत्थ ठितस्स दुतियो लेड्डुपातो सब्बत्थ गामप्पटिसंयुत्तेसु सिक्खापदेसु सकिच्चको उपचारोति दस्सनमेकोति एवं भगवा अत्तनो देसनाविलासप्पत्तिया एकेकपदुद्धारणेन तयो अत्थवसे दस्सेतीति वेदितब्बं.

तथा ¶ अविप्पवाससीमाकम्मवाचाय ‘‘ठपेत्वा गामञ्च गामूपचारञ्चा’’ति (महाव. १४४) एत्थापि ¶ परिक्खेपे सति गामं ठपेत्वा, असति गामूपचारं ठपेत्वाति अत्थो. परिक्खित्तस्स, अपरिक्खित्तस्स च मज्झे आरामे अविप्पवाससीमासम्मन्ननकाले अयं नयो अतिविय युज्जति. उभयपरिवज्जनतो पुब्बे वुत्तनयेन वा उभयत्थ उभयं लब्भतेव. ‘‘अन्तरारामेसु पन आचिण्णकप्पा भिक्खू अविप्पवाससीमं सम्मन्नन्ती’’ति गण्ठिपदे वुत्तं. ‘‘अन्तरघरप्पटिसंयुत्तानं सेखियानं अन्तरारामेसु असम्भवतो अन्तरारामो न गामसङ्खं गच्छति, तस्मा तत्थपि अविप्पवाससीमा रुहतेवा’’ति एके. ते भिक्खू दुतियस्स गामूपचारस्स गामसङ्खासभावतो तासं इमाय दुतियाय अविप्पवासकम्मवाचाय अभावं दस्सेत्वा पटिक्खिपितब्बा. अज्झारामो पन गामोपि समानो तित्थियसेय्यादि विय कप्पियभूमीति वेदितब्बो.

आपत्तिया परिच्छेदं, तथानापत्तियापि च;

दस्सेतुं गामसम्बन्ध-सिक्खापदविभावने.

गामगामूपचारा द्वे, दस्सिता इध तादिना;

सीमा सीमूपचारा तु, अनेकन्ताति नुद्धटा.

उपचारा च द्वे होन्ति, बाहिरब्भन्तरब्बसा;

परिक्खित्तापरिक्खित्त-भेदा चे चतुरो सियुं.

अयञ्हि उपचारसद्दो विनयपिटके ‘‘अनुजानामि, भिक्खवे, अगिलानेनपि आरामे आरामूपचारे छत्तं धारेतु’’न्ति (चूळव. २७०) एवमादीसु बाहिरे उपचारे दिस्सति. बाहिरो उपचारो नाम परिक्खेपतो, परिक्खेपारहट्ठानतो वा एको लेड्डुपातो. ‘‘अज्झारामो नाम परिक्खित्तस्स आरामस्स अन्तोआरामो, अपरिक्खित्तस्स उपचारो. अज्झावसथो नाम परिक्खित्तस्स आवसथस्स अन्तोआवसथो, अपरिक्खित्तस्स उपचारो’’तिआदीसु (पाचि. ५०६) पन उपचारसद्दो अब्भन्तरे उपचारे दिस्सति. अब्भन्तरो उपचारो च नाम परिक्खेपो, परिक्खेपारहट्ठानञ्च होति. इध पन परिक्खेपो ‘‘अज्झारामो, अज्झावसथो’’ति वा न वुच्चति, अन्तो एव आरामो, आवसथोति वा. तेसु बाहिरब्भन्तरभेदभिन्नेसु द्वीसु उपचारेसु अविप्पवाससीमाधिकारे ‘‘ठपेत्वा गामञ्च गामूपचारञ्चा’’ति (महाव. १४४) एत्थ गामूपचारो नाम अब्भन्तरूपचारो ¶ अधिप्पेतो, न बाहिरो. भिक्खुनिया अरञ्ञसञ्ञितताय तस्स बाहिरस्स, तस्सा गामन्तरापत्तिया ठानभूतत्ता च अब्भन्तरउपचारस्साति ¶ इदमेत्थ कारणद्वयं वेदितब्बं. तत्थ इध अदिन्नादानपाराजिकविभङ्गेयेव पठमो गामूपचारो दस्सितो, सो बाहिरो, दुतियो अब्भन्तरोति वेदितब्बो. पठमेन च अपरिक्खित्तस्स गामस्स दुतियलेड्डुपातसङ्खातो बाहिरो उपचारो, दुतियेन च परिक्खित्तस्स गामस्स परिक्खेपतो बाहिरसङ्खातो अब्भन्तरो उपचारो लेसेन दस्सितोति वेदितब्बो. एवं चत्तारोपि उपचारा इध भगवता देसनाविलासप्पत्तेन देसनालीलाय दस्सिता होन्तीति अयं नयो सुट्ठु लक्खेत्वा आचरियेहि सम्मन्तयित्वा यथानुरूपं तत्थ योजेतब्बो. इतरथा –

असम्बुधं बुद्धमहानुभावं;

धम्मस्स गम्भीरनयत्ततञ्च;

यो वण्णये नं विनयं अविञ्ञू;

सो दुद्दसो सासननासहेतु.

पाळिं तदत्थञ्च असम्बुधञ्हि;

नासेति यो अट्ठकथानयञ्च;

अनिच्छयं निच्छयतो परेहि;

गामोति तेयेव पुरक्खतो सो.

अनुक्कमेनेव महाजनेन;

पुरक्खतो पण्डितमानि भिक्खु;

अपण्डितानं विमतिं अकत्वा;

आचरियलीलं पुरतो करोति.

तत्थ हि पाळियं ‘‘गामस्स उपचारो गामूपचारो, गामसङ्खातो उपचारो गामूपचारो नामा’’ति उद्धरित्वा गामस्स उपचारं दस्सेन्तो ‘‘इन्दखीले ठितस्स मज्झिमस्स पुरिसस्स लेड्डुपातो’’ति (पारा. ९२) वत्वा पुन गामसङ्खातं उपचारं दस्सेन्तो ‘‘घरूपचारे ठितस्स मज्झिमस्स पुरिसस्स लेड्डुपातो’’ति वुत्तं. इममत्थं सन्धाय विकाले गामप्पवेसनगामन्तरअअप्पवाससम्मुतिआदीसु परिक्खेपारहट्ठानमेव गामूपचारन्ति वुत्तन्ति लिखितं.

अत्थतो ¶ एकन्ति एत्थ सङ्खासद्दं सङ्खातसद्देन समानयति. ‘‘आदियेय्या’’ति इदं पञ्चवीसतिया अवहारानं साधारणपदं. ठानाचावनवसेन च खीलादीनि सङ्कामेत्वा खेत्तादिग्गहणवसेन ¶ चाति अत्थो. ठानाचावने यथा सामिकस्स धुरनिक्खेपादिं अनोलोकेत्वाव आपत्ति, तथा इहापीति गहेतब्बा.

‘‘असुकं नाम भण्डं अवहरिस्सामी’’ति सब्बेसं एकासयत्ता ‘‘एकेनापी’’ति वुत्तं. यदि आणत्ति इच्छितब्बा, संविधावहारो नाम एको अवहारो परिहायितब्बो.

ओकासपरिकप्पे ठानाचावनाय गहितम्पि ओकासपरिकप्पितत्ता रक्खति. ओकासातिक्कमोव पमाणं पुब्बे असुद्धचित्तेन गहितत्ता. इदानि सुद्धचित्तेन गहितेपि होति एवाति वदन्ति, तं न सुन्दरं. एत्थ पन विनिच्छयो समन्तपासादिकं ओलोकेत्वा गहेतब्बो.

उद्धारो नत्थीति ठानाचावनं नत्थीति अत्थो.

उद्धतमत्ते अवहारो सकलस्स पयोगस्स निट्ठापितत्ता, न अत्थसाधकवसेन. उद्धारेयेव रक्खतीति एत्थ एव-सद्देन पातने न रक्खतीति अत्थे सिद्धेपि अत्थसाधकवसेन अत्थं दस्सेतुं ‘‘तं उद्धरित्वा’’तिआदि वुत्तं.

‘‘पथब्याराजपदेसराजादयो बहू, तेसं सङ्गण्हनत्थं ‘राजानो’ति बहुवचनं वुत्त’’न्ति लिखितं. किञ्चापि बहुवचनं कतं, इदं पन एकं बिम्बिसारमेवाति दट्ठब्बं. राजानोति किञ्चि अनिद्दिसित्वा साधारणवसेन किञ्चापि वुत्तं, इदं पन बिम्बिसारमेवाति.

पुब्बप्पयोगेति एत्थ गमनकाले मग्गसोधनाधिकरणे अपाचित्तियखेत्ते दुक्कटं, लताच्छेदनादीसु पाचित्तियमेव. गन्त्वा पन कुम्भिमत्थके जातलतादिच्छेदने सहपयोगत्ता दुक्कटं. ‘‘एकभण्डे एवं भारियमिदं, ‘त्वम्पि एकपस्सं गण्ह, अहम्पि एकपस्सं गण्हामी’ति संविदहित्वा उभयेसं पयोगेन ठानाचावने कते कायवाचाचित्तेहि समुट्ठाति. अञ्ञथा साहत्थिकं वा आणत्तिकस्स अङ्गं न होति ¶ , आणत्तिकं वा साहत्थिकस्साति वुत्तलक्खणेन विरुज्झती’’ति विनयगण्ठिपदे लिखितं. पि-सद्दो पनेत्थ तत्थेव लिखितो.

कायवाचासमुट्ठानं, यस्सा आपत्तिया सिया;

तत्र वाचङ्गं चित्तंव, कम्मं नस्सा विधीयति.

किरियाकिरियादिकं ¶ यञ्चे, यम्पि कम्मत्तयं भवे;

न युत्तं तं विरुद्धत्ता, कम्ममेकंव युज्जतीति. (वजिर. टी. पाराजिक १३१ पकिण्णककथावण्णना);

दुतियपाराजिकवण्णना निट्ठिता.

३. ततियपाराजिकवण्णना

यथा ञातपरिञ्ञा धम्मानं सभावजाननमेव ‘‘इदं रूपं, अयं वेदना’’ति, तीरणपरिञ्ञा पन धम्मसभावेन सद्धिं अनिच्चादिवसेन पवत्तमानं ‘‘रूपं अनिच्चन्ति वा’’तिआदि, एवमिध सद्धिं चेतेत्वा एकत्तेनापि पाणातिपाताभावा ‘‘जीविता वोरोपेय्या’’ति वुत्तं. ‘‘मनुस्सविग्गह’’न्ति वुत्तत्ता गब्भसेय्यकानं वसेन सब्बसुखुमअत्तभावतो पट्ठाय दस्सेतुं ‘‘कललतो पट्ठाया’’ति आह. एत्थ जीविता वोरोपेन्तो पच्चुप्पन्नतो वियोजेति. तत्थ खणपच्चुप्पन्नं न सक्का वोरोपेतुं, सन्ततिपच्चुप्पन्नं वा अद्धापच्चुप्पन्नं वा सक्का. कथं? तस्मिञ्हि उपक्कमे कते लद्धूपक्कमं जीवितदसकं निरुज्झमानं दुब्बलस्स परिहीनवेगस्स पच्चयो होति. सन्ततिपच्चुप्पन्नं यथा द्वे तयो जवनवारे जवित्वा निरुज्झति, अद्धापच्चुप्पन्नञ्च तदनुरूपं कत्वा निरुज्झति, तथा पच्चयो होति. ततो सन्ततिपच्चुप्पन्नं वा अद्धापच्चुप्पन्नं वा यथापरिच्छिन्नकालं अपत्वा अन्तराव निरुज्झति. एवं तदुभयम्पि वोरोपेतुं सक्का. तस्मा पच्चुप्पन्नं वियोजेति.

‘‘इमस्स पनत्थस्सा’’ति वोहारवसेन वुत्तमत्थं परमत्थवसेन आविभावत्थं ‘‘पाणो वेदितब्बो’’तिआदि वुत्तं. कायविञ्ञत्तिसहिताय चेतनाय पयुज्जतीति पयोगो, को सो? सरीरे सत्थादीनं गमनं पहरणन्ति कायवचीविञ्ञत्तिसहिताय चेतनाय परसरीरे सत्थपातनं. दूरे ठितन्ति दूरे वा तिट्ठतु, समीपे वा. हत्थतो ¶ मुत्तेन पहारो निस्सग्गियो. तत्थाति निस्सग्गियप्पयोगे. यो कोचि मरतूति एत्थ महाजनसमूहे न सक्का. यस्सूपरि सरो पतति, तस्सेव जीवितमरणं कातुं, न यस्स कस्सचि जीवितमरणं. आणापनन्ति वचीविञ्ञत्तिसहिताय चेतनाय अधिप्पेतत्थसाधनं. तेनेव ‘‘सावेतुकामो न सावेती’’ति (पारा. ५४) वुत्तं. आणत्तिनियामकाति आणत्तिकप्पयोगसाधिका. एतेसु हि अविरज्झितेसु एव आणत्तिपयोगो होति, न अञ्ञथा.

रूपूपहारोति ¶ एत्थ –

‘‘ममालाभेन एसित्थी, मरतू’’ति समीपगो;

दुट्ठचित्तो सचे याति, होति सो इत्थिमारको.

भिक्खत्थाय सचे याति, जानन्तोपि न मारको;

अनत्थिको हि सो तस्सा, मरणेन उपेक्खको.

वियोगेन च मे जाया, जननी च न जीवति;

इति जानं वियुञ्जन्तो, तदत्थिको होति मारको.

पब्बज्जादिनिमित्तञ्चे, याति जानं न मारको;

अनत्थिको हि सो तस्सा, मरणेन उपेक्खको.

हारकसद्दस्स भेदतो अत्थं वित्थारेत्वा उभयम्पि एकमेवाति दस्सेतुं ‘‘सत्थञ्च तं हारकञ्चा’’तिआदि वुत्तं. एतेन थावरप्पयोगं दस्सेति साहत्थिकादीसु पयोगेसु. ‘‘इति चित्तमनो’’ति उद्धरित्वापि इतिसद्दस्स अत्थो न ताव वुत्तो. किञ्चापि न वुत्तो, अधिकारवसेन पन आगतं इतिसद्दं योजेत्वा इति चित्तसङ्कप्पोति एत्थ ‘‘मरणसञ्ञी मरणचेतनो मरणाधिप्पायो’’ति वुत्तत्ता मरणंयेव वक्खतीति वेदितब्बो. वुत्तनयेनाति छप्पयोगवसेन. साहत्थिकनिस्सग्गियप्पयोगेसु सन्निट्ठापकचेतनाय सत्तमाय सह उप्पन्नकायविञ्ञत्तिया साहत्थिकता वेदितब्बा. आणत्तिके पन सत्तहिपि चेतनाहि सह वचीविञ्ञत्तिसम्भवतो सत्त सत्त सद्दा एकतो हुत्वा एकेकक्खरभावं गन्त्वा यत्तकेहि अक्खरेहि ¶ अत्तनो अधिप्पायं विञ्ञापेन्ति, तदवसानक्खरसमुट्ठापिकाय सत्तमचेतनाय सहजातवचीविञ्ञत्तिया आणत्तिकता वेदितब्बा.

ततियपाराजिकवण्णना निट्ठिता.

४. चतुत्थपाराजिकवण्णना

इधेव सङ्गहन्ति ‘‘इति जानामि, इति पस्सामी’’ति पदे कथन्ति चे, ‘‘इति जानामी’’तिआदिमाह ¶ . केवलं ‘‘पापिच्छताया’’ति (कङ्खा. अट्ठ. चतुत्थपाराजिकवण्णना) वचनतो मन्दत्ता मोमूहत्ता समुदाचरन्तस्स अनापत्तीति दीपितं. ‘‘अतीतकाले सोतापन्नोम्ही’’ति वदन्तो परियायेन वदति, ‘‘यो ते विहारे वसति, सो भिक्खु अरहा’’तिआदीसु (परि. १६५) विय सिक्खापदेपि ‘‘इति जानामी’’ति (पारा. १९५, १९७) पच्चुप्पन्नमेव वुत्तं.

चतुत्थपाराजिकवण्णना निट्ठिता.

मातुघातकपितुघातकअरहन्तघातका ततियपाराजिकं आपन्ना, भिक्खुनिदूसको, लम्बीआदयो च चत्तारो पठमपाराजिकं आपन्ना एवाति कत्वा कुतो चतुवीसतीति चे? न, अधिप्पायाजाननतो. मातुघातकादयो हि चत्तारो इधानुपसम्पन्ना एव अधिप्पेता, लम्बीआदयो चत्तारो किञ्चापि पठमपाराजिकेन सङ्गहिता, यस्मा पन एकेन परियायेन मेथुनधम्मं पटिसेविनो होन्ति, तस्मा विसुं वुत्ता. न लभति भिक्खूहीति एत्थ ‘‘उपोसथादिभेदं संवास’’न्ति एत्तकं वुत्तं. विनयट्ठकथायं ‘‘उपोसथप्पवारणापातिमोक्खुद्देससङ्घकम्मप्पभेद’’न्ति वुत्तं. पाळियं ‘‘संवासो नाम एककम्मं एकुद्देसो समसिक्खता’’ति (पारा. ५५, ९२, १७२, १९८) वुत्तं. तिविधेनापि सङ्घकम्मं कातुं न वट्टतीति पटिक्खित्तं. ‘‘न, भिक्खवे, गहट्ठेन निसिन्नपरिसाय पातिमोक्खं उद्दिसितब्ब’’न्तिआदि (महाव. १५४) पातिमोक्खप्पवारणासु एव आगतं, अञ्ञेसु च एवरूपेसु ठानेसु सेसं कम्मं कातुं नत्थि पटिक्खेपो. आचरियापि ‘‘सेसं कम्मं कातुं वट्टति, नत्थि आपत्ती’’ति वदन्ति. ‘‘अन्तिमवत्थु अज्झापन्नं अमूलकेन पाराजिकेन चोदेन्तस्स सङ्घादिसेसो, सङ्घादिसेसेन ¶ चोदेन्तस्स पाचित्तियन्ति भिक्खुनो विय वुत्तं, न अनुपसम्पन्नस्स विय दुक्कटं. तस्मा तेन सहसेय्या, तस्स पटिग्गहणञ्च भिक्खुस्स वट्टतीति आचरिया वदन्ती’’ति लिखितं. ‘‘यथा पुरे तथा पच्छाति ‘एककम्मं एकुद्देसो समसिक्खता’ति एवं वुत्तसंवासस्स अभब्बतामत्तं सन्धाय वुत्त’’न्ति वदन्ति, वीमंसितब्बं.

इदानि चतुन्नम्पि साधारणं पकिण्णकं – मेथुनधम्मं पटिसेवन्तो अत्थि कोचि पाराजिको होति असंवासो, अत्थि कोचि न पाराजिको होति असंवासो, अत्थि कोचि न पाराजिको संवासो दुक्कटवत्थुस्मिं वा थुल्लच्चयवत्थुस्मिं वा पटिसेवन्तो, अत्थि कोचि न पाराजिको पक्खपण्डको अपण्डकपक्खे उपसम्पन्नो पण्डकपक्खे मेथुनधम्मं पटिसेवन्तो. सो आपत्तिं नापज्जतीति न पाराजिको नाम. न हि अभिक्खुस्स आपत्ति नाम अत्थि. सो ¶ अनापत्तिकत्ता अपण्डकपक्खे आगतो किं असंवासो होति, न होतीति? होति. ‘‘अभब्बो तेन सरीरबन्धनेना’’ति (महाव. १२९) हि वुत्तं. ‘‘यो पन भिक्खु भिक्खूनं सिक्खासाजीवसमापन्नो…पे… असंवासो’’ति (पारा. ४४) वुत्तत्ता यो भिक्खुभावेन मेथुनं धम्मं पटिसेवति, सो एव अभब्बो. नायं अपाराजिकत्ताति चे? न, ‘‘ब्यत्तेन भिक्खुना पटिबलेन सङ्घो ञापेतब्बो’’ति (महाव. १२६) वुत्तट्ठाने यथा अभिक्खुना कम्मवाचाय सावितायपि कम्मं रुहति कम्मविपत्तिया असम्भवतो, एवंसम्पदमिदं दट्ठब्बं. तत्रायं विसेसो – उपसम्पन्नपुब्बो एवं चे कम्मवाचं सावेति, सङ्घो च तस्मिं उपसम्पन्नसञ्ञी एव चे, कम्मं रुहति, नाञ्ञथाति नो खन्तीति आचरियो.

गहट्ठो वा तित्थियो वा पण्डको वा कम्मवाचं सावेति, सङ्घेन कम्मवाचा न वुत्ता होति. ‘‘सङ्घो उपसम्पादेय्य सङ्घो उपसम्पादेति, उपसम्पन्नो सङ्घेना’’ति (महाव. १२७) हि वचनतो सङ्घेन कम्मवाचाय वत्तब्बताय सङ्घपरियापन्नेन, सङ्घपरियापन्नसञ्ञितेन वा एकेन वुत्ताय सङ्घेन वुत्ता होतीति वेदितब्बो, न गहट्ठतित्थियपण्डकादीसु अञ्ञतरेन. अयमेव सब्बकम्मेसु युत्ति दट्ठब्बा.

तथा अत्थि मेथुनं धम्मं पटिसेवन्तो कोचि नासेतब्बो, ‘‘यो भिक्खुनिदूसको, अयं नासेतब्बो’’ति (महाव. ११४-११५ अत्थतो समानं) वुत्तत्ता तेन एव सो अनुपसम्पन्नोव ¶ सहसेय्यापत्तिं वा अञ्ञं वा तादिसं जनेति, तस्स ओमसने च दुक्कटं होति. अभिक्खुनिया मेथुनधम्मं पटिसेवन्तो न नासेतब्बो, ‘‘अन्तिमवत्थुं अज्झापन्नो, भिक्खवे, अनुपसम्पन्नो न उपसम्पादेतब्बो’’ति पाळिया अभावतो, तेनेव सो उपसम्पन्नसङ्खं गच्छति, सहसेय्यापत्तिआदिं न जनेति, केवलं असंवासोति कत्वा गणपूरको न होति. एककम्मएकुद्देसो हि संवासोति वुत्तो, समसिक्खतापि संवासोति कत्वा सो तेन सद्धिं नत्थीति. पदसोधम्मापत्तिं पन जनेतीति कारणच्छाया दिस्सतीति. यथा भिक्खुनिया सद्धिं भिक्खुसङ्घस्स एककम्मादिनो संवासस्स अभावा भिक्खुनी असंवासा भिक्खुस्स, तथा भिक्खु च भिक्खुनिया, पदसोधम्मापत्तिं पन न जनेति. तथा अन्तिमवत्थुं अज्झापन्नोपि एकेच्चो ‘‘यो नासेतब्बोति वुत्तो’’ति इमिना निदस्सनेन सकारणच्छाया अज्झुपेक्खिता होतीति न गहणं गच्छति. अपिच ‘‘उभो नासेतब्बा, दूसको नासेतब्बो’’ति (पारा. ६६) वचनतो, ‘‘मेत्तियं भिक्खुनिं नासेथा’’ति (पारा. ३८४) वचनतो च यो सङ्घमज्झं पविसित्वा अनुविज्जकेन अनुविज्जियमानो पराजितो, सोपि अनुपसम्पन्नोव, न ओमसवादपाचित्तियं जनेतीति वेदितब्बो.

अपिचेत्थ ¶ सिक्खापच्चक्खातकचतुक्कं वेदितब्बं. अत्थि हि पुग्गलो सिक्खापच्चक्खातको न सिक्खासाजीवसमापन्नो, अत्थि पुग्गलो न सिक्खापच्चक्खातको सिक्खासाजीवसमापन्नो, अत्थि पुग्गलो सिक्खापच्चक्खातको चेव सिक्खासाजीवसमापन्नो च, अत्थि पुग्गलो नेव सिक्खापच्चक्खातको न सिक्खासाजीवसमापन्नो. तत्थ ततियो भिक्खुनी सिक्खापच्चक्खातका वेदितब्बा. सा हि याव न लिङ्गं परिच्चजति, कासावेसु सउस्साहाव समाना सामञ्ञा चवितुकामा सिक्खं पच्चक्खन्तीपि भिक्खुनी एव सिक्खासाजीवसमापन्नाव. वुत्तञ्हि भगवता ‘‘नत्थि, भिक्खवे, भिक्खुनिया सिक्खापच्चक्खान’’न्ति. कदा पन सा अभिक्खुनी होतीति? यदा सा विब्भन्ताति सङ्खं गच्छति. वुत्तञ्हि भगवता ‘‘यदेव सा विब्भन्ता, तदेव सा अभिक्खुनी’’ति (चूळव. ४३४). कित्तावता पन विब्भन्ता होतीति? सामञ्ञा चवितुकामा कासावेसु अनालया कासावं वा अपनेति, नग्गा वा गच्छति, तिणपण्णादिना वा पटिच्छादेत्वा गच्छति, कासावंयेव ¶ वा गिहिनिवासनाकारेन निवासेति, ओदातं वा वत्थं निवासेति, लिङ्गेनेव वा सद्धिं तित्थियेसु पविसित्वा केसलुञ्चनादिवतं समादियति, तित्थियलिङ्गं वा समादियति, तदा विब्भन्ता नाम होति. तत्थ या सलिङ्गे ठिताव तित्थियवतं समादियति, सा तित्थियपक्कन्तभिक्खु विय पच्छा पब्बज्जम्पि न लभति. सेसा पब्बज्जमेव लभति, न उपसम्पदं. पाळियं किञ्चापि ‘‘या, भिक्खवे, भिक्खुनी सकावासा तित्थायतनं सङ्कन्ता, सा आगता न उपसम्पादेतब्बा’’ति (चूळव. ४३४) वचनतो या पठमं विब्भमित्वा पच्छा तित्थायतनं सङ्कन्ता, सा आगता उपसम्पादेतब्बाति अनुञ्ञातं विय दिस्सति. सङ्गीतिआचरियेहि पन ‘‘चतुवीसति पाराजिकानी’’ति (पारा. अट्ठ. २.२३३) वुत्तत्ता न पुन सा उपसम्पादेतब्बा. तस्मा एव सिक्खापच्चक्खानं नानुञ्ञातं भगवता. अन्तिमवत्थुं अज्झापन्ना पन भिक्खुनी एव. पक्खपण्डकीपि भिक्खुनी एव. इमं नयं चतूसुपि योजेत्वा यथारहं कथेतब्बं.

पाराजिकवण्णना निट्ठिता.

सङ्घादिसेसकण्डं

१. सुक्कविस्सट्ठिसिक्खापदवण्णना

अञ्ञत्र ¶ ¶ सुपिनन्ताति स्वायं दुब्बलवत्थुकत्ता चेतनाय पटिसन्धिं आकड्ढितुं असमत्था, सुपिने उपट्ठितं निमित्तञ्हि दुब्बलं. पवत्ते पन अञ्ञेहि कुसलाकुसलेहि उपत्थम्भिता विपाकं देति. किञ्चापि विपाकं देति, अथ खो अविसये उप्पन्नत्ता अब्बोहारिकाव सुपिनन्तचेतनाति लिखितं. यं पनेत्थ ‘‘सुपिने उपट्ठितं निमित्तञ्हि दुब्बल’’न्ति वुत्तं, तं अनेकन्तं, न च आरम्मणदुब्बलताय चित्तप्पवत्ति दुब्बला अतीतानागतारम्मणाय, पञ्ञत्तारम्मणाय वा अदुब्बलत्ता. तस्मा दुब्बलवत्थुकत्ताति दुब्बलहदयवत्थुकत्ताति नो तक्कोति (वजिर. टी. पाराजिक २३६-२३७) आचरियो. अवत्थुकताय दुब्बलभावो युज्जतीति चे? न, अवत्थुकाय भावनापभवाय अतिरेकबलवसम्भवतो. भावनाबलसमप्पितञ्हि चित्तं अरूपम्पि समानं अतिभारम्पि करजकायं गहेत्वा एकचित्तक्खणेनेव ब्रह्मलोकम्पि पापेत्वा ठपेति, तप्पटिभागं अनप्पितम्पि कामावचरचित्तं करजकायं आकासे लङ्घनसमत्थं करोति. किं पनेत्थ तं अनुमानकरणं? येन चित्तस्सेव आनुभावोति पञ्ञायेय्य चित्तानुभावेन ठपनलङ्घनादिकिरियाविसेसनिब्बत्तिदस्सनतो. पकतिचित्तसमुट्ठानरूपं विय असंसट्ठत्ता, निक्खमनत्ता च वत्थिसीसं, कटि, कायोति तिधा सुक्कस्स ठानं पकप्पेन्ति आचरिया. सप्पविसं विय तं दट्ठब्बं, न च विसे ठाननियमो, कोधवसेन पस्सन्तस्स होति. एवमस्स न ठाननियमो, रागवसेन उपक्कमन्तस्स होतीति नो तक्कोति आचरियो.

‘‘दकसोतं अनोतिण्णेपी’’ति इदं ‘‘ओतिण्णमत्ते’’ति इमिना विरुज्झतीति चे, तं दस्सेतुं ‘‘ठानतो पन चुत’’न्तिआदिमाह. तस्सत्थो – निमित्ते उपक्कमं कत्वा सुक्कं ठाना चावेत्वा पुन विप्पटिसारवसेन दकसोतोरोहणं निवारेतुं न सक्का, तथापि अधिवासाधिप्पायेन ¶ अधिवासेत्वा अन्तरा दकसोततो उद्धं निवारेतुं असक्कुणेय्यताय ‘‘बहि निक्खन्ते वा’’ति वुत्तं, तस्मा ठाना चुतञ्हि अवस्सं ¶ दकसोतं ओतरतीति अट्ठकथाय अधिप्पायो. तस्मा उभयं समेतीति गहेतब्बो.

एत्थाह – कस्मा इमस्मिं सिक्खापदे ‘‘यो पन भिक्खू’’तिआदिना कारको न निद्दिट्ठोति? वुच्चते – अधिप्पायापेक्खाय भावतो कारको न निद्दिट्ठो तस्स सापेक्खभावदस्सनत्थं. कथं? कण्डुवनादिअधिप्पायचेतनावसेन चेतेन्तस्स कण्डुवनादिउपक्कमेन उपक्कमन्तस्स मेथुनरागवसेन ऊरुआदीसु दुक्कटवत्थूसु, वणादीसु थुल्लच्चयवत्थूसु च उपक्कमन्तस्स सुक्कविसट्ठिया सतिपि न सङ्घादिसेसो ‘‘अनापत्ति भिक्खु न मोचनाधिप्पायस्सा’’ति (पारा. २६३) वचनतो. तस्मा तदत्थदस्सनत्थं इध कारको न निद्दिट्ठो. अञ्ञथा ‘‘यो पन भिक्खु सञ्चेतनिकं सुक्कविसट्ठिं आपज्जेय्य, सङ्घादिसेसो’’ति निद्दिट्ठे कारके ‘‘चेतेति न उपक्कमति मुच्चति, अनापत्ती’’ति (पारा. २६२) वुत्तवचनविरोधो. तथा ‘‘सञ्चेतनिकाय सुक्कविसट्ठिया अञ्ञत्र सुपिनन्ता सङ्घादिसेसो’’ति भुम्मे निद्दिट्ठेपि सो एव विरोधो हेत्वत्थनियमसिद्धितो. तस्मा तदुभयम्पि वचनक्कमं अवत्वा ‘‘सञ्चेतनिका सुक्कविसट्ठि अञ्ञत्र सुपिनन्ता सङ्घादिसेसो’’ति वुत्तं. तत्थ निमित्तत्थे भुम्मवचनाभावतो हेत्वत्थनियमो न कतो होति. तस्मिं अकते सञ्चेतनिका सुक्कविसट्ठि अञ्ञत्र सुपिनन्ता सङ्घादिसेसोति, उपक्कमे असति अनापत्तीति अयमत्थो दीपितो होतीति वेदितब्बं.

इमस्मिं सिक्खापदे द्वे आपत्तिसहस्सानि होन्ति. कथं? अत्तनो हत्थादिभेदे अज्झत्तरूपे रागूपत्थम्भनवसेन अङ्गजाते कम्मनियप्पत्ते आरोग्यत्थाय नीलं मोचेन्तस्स एका आपत्ति, अज्झत्तरूपे एव रागूपत्थम्भे पीतकादीनं मोचनवसेन नवाति दस. एवं ‘‘सुखत्थाया’’तिआदीनं नवन्नं वसेनाति रागूपत्थम्भे अज्झत्तरूपवसेन सतं. एवमेवं वच्चप्पस्साववातउच्चालिङ्गपाणकदट्ठूपत्थम्भेसु च सतं सतं कत्वा सब्बं पञ्चसतं. यथा अज्झत्तरूपे पञ्चसतं, एवं बहिद्धारूपे वा अज्झत्तबहिद्धारूपे वा आकासे वा कटिं कम्पेन्तोति द्वे सहस्सानि आपत्तियो होन्तीति.

सुक्कविस्सट्ठिसिक्खापदवण्णना निट्ठिता.

२. कायसंसग्गसिक्खापदवण्णना

‘‘ओतिण्णो’’ति ¶ ¶ इमिनास्स सेवनाधिप्पायता दस्सिता. तेनेव ‘‘कायसंसग्गरागसमङ्गिस्सेतं अधिवचन’’न्ति वुत्तं. ‘‘विपरिणतेन…पे… सद्धि’’न्ति इमिनास्स वायामो दस्सितो. ‘‘सद्धि’’न्ति हि पदं संयोगं दीपेति, सो च संयोगो समागमो. केन चित्तेन? विपरिणतेन चित्तेन, न पत्तप्पटिग्गहणाधिप्पायादिनाति अधिप्पायो. ‘‘कायसंसग्गं समापज्जेय्या’’ति इमिनास्स वायमतो फस्सप्पटिविजानना दस्सिता होति. वायमित्वा फस्सं पटिविजानन्तो हि समापज्जति नाम. एवमस्स तिवङ्गसम्पत्ति दस्सिता होति. अथ वा ओतिण्णो विपरिणतेन चित्तेन यक्खादिना सत्तो विय. उपयोगत्थे वा एतं करणवचनं, ओतिण्णो विपरिणतं चित्तं कूपादिं विय सत्तो. अथ वा ‘‘रागतो उत्तिण्णो भविस्सामी’’ति भिक्खुभावं उपगतोपि यो पन भिक्खु ततो उत्तिण्णाधिप्पायतो विपरिणतेन चित्तेन हेतुभूतेन तमेव रागं ओतिण्णो. मातुगामेन अत्तनो समीपं वा आगतेन, अत्तना उपगतेन वा. एतेन मातुगामस्स सारत्तता वा होतु, विरत्तता वा, सा इध अप्पमाणं.

हत्थग्गाहं वाति एत्थ हत्थेन सब्बोपि उपादिन्नको कायो सङ्गहितो, न भिन्नसन्तानो तप्पटिबद्धो वत्थालङ्कारादि. वेणिग्गहणेन अनुपादिन्नको अभिन्नसन्तानो केसलोमनखग्गदन्तग्गादिको कम्मपच्चयउतुसमुट्ठानो गहितोति वेदितब्बं. तेनेवाह ‘‘अन्तमसो लोमेन लोमं फुसन्तस्सापी’’ति. तेन अञ्ञतरस्स वा…पे… परामसनन्ति एत्थ अनुपादिन्नकानम्पि सेसलोमादीनं अङ्गभावो वेदितब्बो. एवं सन्ते ‘‘फस्सं पटिजानन्तस्स सङ्घादिसेसो’’ति इमिना विरुज्झतीति चे? न, तदत्थजाननतो. फुट्ठभावं पटिविजानन्तोपि फस्सं पटिजानाति नाम, न कायविञ्ञाणुप्पत्तिया एव. अनेकन्तिकञ्हेत्थ कायविञ्ञाणं. तस्मा एव इध फस्सप्पटिविजाननं अङ्गन्त्वेव न वुत्तं. तस्मिञ्हि वुत्ते ठानमेतं विज्जति ‘‘न च मे लोमघट्टनेन कायविञ्ञाणं उप्पन्नं, तस्मिं ‘न फस्सं पटिजानामी’ति अनापन्नसञ्ञी सिया’’ति. ‘‘वेणी नाम कहापणमालादिसम्पयुत्तं, तत्थ ‘वेणिं गण्हिस्सामी’ति कहापणमालादिं एव गण्हाति, न लोमं, नत्थि सङ्घादिसेसो’’ति वदन्ति. वीमंसितब्बं.

कायसंसग्गसिक्खापदवण्णना निट्ठिता.

३. दुट्ठुल्लवाचासिक्खापदवण्णना

‘‘कदा ¶ ¶ ते माता पसीदिस्सती’’ति आयाचनं दुट्ठुल्लवाचाय सिखापत्तलक्खणदस्सनत्थं वुत्तं, न मेथुनुपसंहितेयेव दुट्ठुल्लवाचाति दस्सनत्थं. ‘‘उभतोब्यञ्जनकासी’’ति वचनं पन पुरिसनिमित्तेन असङ्घादिसेसवत्थुना मिस्सवचनं, पुरिसउभतोब्यञ्जनकस्स च इत्थिनिमित्तं पटिच्छन्नं, इतरं पाकटं. यदि तम्पि जनेति, कथं ‘अनिमित्तासी’तिआदीनि पदानि न सङ्घादिसेसं जनेन्ती’’ति एके, तं न युत्तं पुरिसस्सापि निमित्ताधिवचनत्ता. ‘‘मेथुनुपसंहिताहि सङ्घादिसेसो’’ति (पारा. २४८) मातिकायं लक्खणस्स वुत्तत्ता च मेथुनुपसंहिताहि ओभासने पटिविजानन्तिया सङ्घादिसेसो, अप्पटिविजानन्तिया थुल्लच्चयं, इतरेहि ओभासने पटिविजानन्तिया थुल्लच्चयं, अप्पटिविजानन्तिया दुक्कटन्ति एके, विचारेत्वा गहेतब्बं. एत्थाह – ‘‘सिखरणी’’तिआदीहि अक्कोसन्तस्स पटिघचित्तं उप्पज्जति, कस्मा ‘‘तिवेदन’’न्ति अवत्वा ‘‘द्विवेदन’’न्ति वुत्तन्ति? रागवसेन अयं आपत्ति, न पटिघवसेन. तस्मा रागवसेनेव पवत्तो अक्कोसो इध अधिप्पेतो. तस्मा ‘‘द्विवेदन’’न्ति वचनं सुवुत्तमेव.

दुट्ठुल्लवाचासिक्खापदवण्णना निट्ठिता.

४. अत्तकामसिक्खापदवण्णना

दुट्ठुल्लोभासने वुत्तप्पकारायाति दुट्ठुल्लादुट्ठुल्लजाननसमत्थाय. परस्स भिक्खुनो अत्तकामपारिचरियाय वण्णभणने दुक्कटं, ‘‘यो ते विहारे वसति, तस्स अग्गदानं मेथुनं धम्मं देही’’ति परियायवचनेपि दुक्कटं, ‘‘अत्तकामपारिचरियाय वण्णं भासेय्य, या मादिसं सीलवन्त’’न्ति च वुत्तत्ताति एके. पञ्चसु अङ्गेसु सब्भावा सङ्घादिसेसोवाति एके, विचारेत्वा गहेतब्बं. ‘‘इमस्मिं सिक्खापदद्वये कायसंसग्गे विय यक्खिपेतीसुपि दुट्ठुल्लत्तकआमवचने थुल्लच्चयन्ति वदन्ति. अट्ठकथासु पन नागत’’न्ति (वजिर. टी. पाराजिक २९५) लिखितं. उभतोब्यञ्जनको पन पण्डकगतिकोव.

अत्तकामसिक्खापदवण्णना निट्ठिता.

५. सञ्चरित्तसिक्खापदवण्णना

अलंवचनीयाति ¶ ¶ न वचनीया, निवारणे अलं-सद्दो, न अलंवचनीया नालंवचनीया. ‘‘पटिग्गण्हाति वीमंसति पच्चाहरति, आपत्ति सङ्घादिसेसस्सा’’ति (पारा. ३०५) वुत्तत्ता यस्स एकन्तेन सङ्घादिसेसो होति, तस्स पटिग्गण्हनवीमंसनपयोगा एते दुक्कटथुल्लच्चया नत्थीति वदन्तीति लिखितं. किञ्चापि एत्थ ‘‘इत्थी नाम मनुस्सित्थी, न यक्खी न पेती न तिरच्छानगता. पुरिसो नाम मनुस्सपुरिसो, न यक्खो न पेतो न तिरच्छानगतो’’ति पाळि नत्थि, तथापि कायसंसग्गादीसु ‘‘मातुगामो नाम मनुस्सित्थी’’ति (पारा. २८५) इत्थिववत्थानस्स कतत्ता इधापि मनुस्सित्थी एवाति पञ्ञायति. मेथुनपुब्बभागसामञ्ञतो इत्थिववत्थानेन पुरिसववत्थानं कतमेव होति. तेनेवाह ‘‘येसु सञ्चरित्तं समापज्जति, तेसं मनुस्सजातिकता’’ति (कङ्खा. अट्ठ. सञ्चरित्तसिक्खापदवण्णना). कायसंसग्गादीसु च पण्डकयक्खिपेतियो थुल्लच्चयवत्थुकाव वुत्ता, तथा इधापि, पण्डकसभावत्ता मनुस्सउभतोब्यञ्जनको च थुल्लच्चयवत्थुकोव होति. सेसा मनुस्सपुरिसअमनुस्सपण्डकउभतोब्यञ्जनकतिरच्छानगतपुरिसादयो दुक्कटवत्थुकाव मिच्छाचारदस्सनसभावतोति वेदितब्बं.

सञ्चरित्तसिक्खापदवण्णना निट्ठिता.

६. कुटिकारसिक्खापदवण्णना

किं भन्तेति एत्तकेपि वुत्ते. पुच्छितो यदत्थाय पविट्ठो, तं कथेतुं लभति पुच्छितपञ्ञत्ता भिक्खाचारवत्तेति लिखितं. हत्थकम्मं याचितो ‘‘उपकरणं, मूलं वा दस्सती’’ति याचति, वट्टति, न वट्टतीति? वट्टति सेनासने ओभासपरिकथादीनं लद्धत्ताति एके. तिहत्था वाति एत्थ वड्ढकिहत्थेन तिहत्था. ‘‘पमाणयुत्तो मञ्चोति पकतिविदत्थिया नवविदत्थिप्पमाणमञ्चो, सो तत्थ इतो च न सञ्चरति, तस्मा चतुहत्थवित्थारा न होती’’तिआदि लिखितं. अकुटिया पन वत्थुदेसनाकिच्चं नत्थि उल्लित्तावलित्तं कातुं वुत्तत्ता. ‘‘उल्लित्तादिभावो…पे… ‘छदनमेव सन्धाय वुत्तो’ति युत्तमिदं. कस्माति चे? यस्मा मत्तिकामयभित्तिं ¶ उट्ठापेत्वा उपरि उल्लित्तं वा अवलित्तं वा उभयं वा भित्तिया घटितं करोन्तस्स आपत्ति एव विनापि भित्तिलेपेना’’ति लिखितं. एवमेत्थ थम्भतुलापिट्ठसङ्घाटादि निरत्थकं सिया. तस्मा विचारेत्वाव गहेतब्बं. ‘‘उपोसथागारम्पि भविस्सति, अहम्पि वसिस्सामी’’ति वा ‘‘भिक्खूहि वा सामणेरेहि वा एकतो वसिस्सामी’’ति वा करोन्तस्स वट्टति एव. कस्मा? ‘‘अत्तुद्देस’’न्ति वुत्तत्ताति लिखितं.

इदं ¶ पन सिक्खापदं चतुत्थपाराजिकं विय निदानापेक्खं. न हि वग्गुमुदातीरिया भिक्खू सयमेव अत्तनो असन्तं उत्तरिमनुस्सधम्मं मुसावादलक्खणं पापेत्वा भासिंसु. अञ्ञमञ्ञञ्हि ते उत्तरिमनुस्सधम्मवण्णं भासिंसु. न च तावता पाराजिकवत्थु होति, तत्तकेन पन लेसेन भगवा तं वत्थुं निदानं कत्वा पाराजिकं पञ्ञपेसि, तथा इधापि. न हि निदाने ‘‘अदेसितवत्थुकायो सारम्भायो अपरिक्कमनायो’’ति वुत्तं. ‘‘अप्पमाणिकायो’’ति पन वुत्तत्ता पमाणमतिक्कमन्तस्स सङ्घादिसेसोव निदानापेक्खो. तत्थ सारम्भे अपरिक्कमने सङ्घादिसेसप्पसङ्गं विय दिस्समानं ‘‘विभङ्गो तंनियमको’’ति वुत्तत्ता विभङ्गे न निवारेति. तथा महल्लके.

एत्थाह – किमत्थं मातिकायं दुक्कटवत्थु वुत्तं, ननु विभङ्गे एव वत्तब्बं सियाति? एवमेतं. किं नु भिक्खू अभिनेतब्बा वत्थुदेसनाय, तेहि भिक्खूहि वत्थु देसेतब्बं, कीदिसं? अनारम्भं सपरिक्कमनन्ति. इतरञ्हि ‘‘सारम्भे चे भिक्खु वत्थुस्मिं अपरिक्कमने’’ति एवं अनुप्पसङ्गवसेन आगतत्ता वुत्तं. यस्मा वत्थु नाम अत्थि सारम्भं अपरिक्कमनं, अत्थि अनारम्भं सपरिक्कमनं, अत्थि सारम्भं सपरिक्कमनं, अत्थि अनारम्भं अपरिक्कमनन्ति बहुविधं, तस्मा बहुविधत्ता वत्थु देसेतब्बं अनारम्भं सपरिक्कमनं, नेतरन्ति वुत्तं होति. किमत्थिका पनेत्थ वत्थुदेसनाति चे? गरुकापत्तिपञ्ञापनहेतुपरिवज्जनुपायत्ता. वत्थुअदेसना हि गरुकापत्तिपञ्ञापनहेतुभूता. गरुकापत्तिपञ्ञापनं अकतविञ्ञत्तिगिहिपीळाजननं, अत्तदुक्खपरदुक्खहेतुभूतो च सारम्भभावोति एते वत्थुदेसनापदेसेन उपायेन परिवज्जिता होन्ति. न हि भिक्खू अकप्पियकुटिकरणत्थं गिहीनं वा पीळानिमित्तं, सारम्भवत्थुकुटिकरणत्थं वा वत्थुं देसेन्तीति. होन्ति चेत्थ –

‘‘दुक्कटस्स ¶ हि वत्थूनं, मातिकाय पकासना;

गरुकापत्तिहेतूनं, तेसं एवं पकासिता.

‘‘वत्थुस्स देसनुपायेन, गरुकापत्तिहेतुयो;

वज्जिता होन्ति यं तस्मा, सारम्भादि जहापित’’न्ति.

कुटिकारसिक्खापदवण्णना निट्ठिता.

७. विहारकारसिक्खापदवण्णना

किरियामत्ततो ¶ समुट्ठानभावतो अकिरियमेवेतं. तं देसनाअकरणवसेन. भिक्खू वा अनभिनेय्याति एत्थ वा-सद्दो अवधारणत्थोति वेदितब्बो. ‘‘आयस्मा छन्नो चेतियरुक्खं छेदापेसी’’ति (पारा. ३६५) आगतत्ता इदम्पि निदानापेक्खन्ति वेदितब्बं.

विहारकारसिक्खापदवण्णना निट्ठिता.

८. दुट्ठदोससिक्खापदवण्णना

‘‘कस्मा मम वन्दनादीनि…पे… ‘घटितेयेव सीसं एती’ति वुत्तत्ता अन्तिमवत्थुअज्झापन्नकं वन्दितुं न वट्टती’’ति वदन्ति, तं न गहेतब्बं. परिवारावसाने उपालिपञ्चके ‘‘कति नु खो, भन्ते, अवन्दिया’’तिआदिना (परि. ४६७) वुत्तपाळियं अवुत्तत्ता, ‘‘पच्छा उपसम्पन्नेन पुरे उपसम्पन्नो वन्दियो’’ति (परि. ४६८) वुत्तत्ता च, तस्मा एव इमिस्सं कङ्खावितरणियं ‘‘उपसम्पन्नोति सङ्ख्युपगमन’’न्ति वुत्तं. सुत्ताधिप्पायो पन एवं गहेतब्बो – अवन्दन्तो सामीचिप्पटिक्खेपसङ्खाताय चोदनाय चोदेति नामाति दस्सनत्थं वुत्तन्ति. तस्मा एव ‘‘एत्तावता च चोदना नाम होती’’ति वुत्तं. इध अधिप्पेतं आपत्तिआपज्जनाकारं दस्सेतुं ‘‘‘कस्मा मम वन्दनादीनि न करोसी’तिआदि वुत्त’’न्ति लिखितं.

कतूपसम्पदन्ति यस्स उपसम्पदा रुहति, तं, पण्डकादयो. ठपनक्खेत्तन्ति एत्थ सब्बसङ्गाहिकं, पुग्गलिकञ्चाति दुविधं पवारणाठपनं. तत्थ ¶ सब्बसङ्गाहिके ‘‘सुणातु मे, भन्ते, सङ्घो…पे… तेवाचिकं पवारे’’ति सु-कारतो याव रे-कारो. पुग्गलिकठपने पन ‘‘सङ्घं, भन्ते, पवारेमि…पे… पस्सन्तो पटी’’ति सं-कारतो याव अयं सब्बपच्छिमो टि-कारो, एत्थन्तरे एकपदेपि ठपेन्तेन ठपिता होति. उपोसथे पन इमिनानुसारेन विसेसो वेदितब्बो ‘‘करेय्या’’ति रे-कारे अनतिक्कमन्ते.

दुट्ठदोससिक्खापदवण्णना निट्ठिता.

९. अञ्ञभागियसिक्खापदवण्णना

अञ्ञभागो ¶ वा अस्स अत्थीति यथा सुवण्णस्सेदं सोवण्णमित्यत्र सुवण्णवा अनेन सुवण्णो इत्युच्चते. तं पटिमाय सरीरं, सिलापुत्तकस्स सरीरन्ति च निदस्सनं. छगलकस्स ‘‘दब्बो’’ति दिन्नं नामं ‘‘देसो’’ति वुच्चति. कस्मा? थेरं अनुद्धंसेतुं थेरस्सापि अपदिसितब्बत्ता. अञ्ञम्पि वत्थुं न थेरंयेव. लिस्सति सिलिस्सति वोहारमत्तेनेवन अत्थतो. ईसकं अल्लीयतीति लेसोति अधिप्पायो. लिससेलछकोलअल्लीभावे. तेन वुत्तं ‘‘ईसकं अल्लीयतीति लेसो’’ति. यस्मा देसलेसा अत्थतो निन्नानाकरणं, तस्मा ‘‘किञ्चिदेसं लेसमत्तं उपादाया’’ति पदं उद्धरित्वा ‘‘दस लेसा जातिलेसो’’तिआदि (पारा. ३९४) पदभाजने वुत्तं.

अट्ठुप्पत्तिवसेनेव आविभूतन्ति एत्थ किञ्च भिय्यो अनियमत्ता. न हि मेत्तियभूमजकानं विय अञ्ञेसं सब्बेसम्पि ‘‘छगलकमेवेत्थ अञ्ञभागियं अधिकरणं होति, अञ्ञं गोमहिंसादिकम्पि होति, न च मेत्तियभूमजका विय सब्बेपि नामलेसमत्तमेव उपादियन्ति, अञ्ञम्पि जातिलेसादिं उपादियन्ति, तस्मा अनियमत्ता न विभत्तं. किञ्च भिय्यो तथावुत्ते छगलकस्सेव अञ्ञभागियता सम्भवति, न अञ्ञस्स, येन सोव दस्सितो. लेसो च नाम लेसोव, न जातिआदि, येन सोव दस्सितोति एवं मिच्छागाहप्पसङ्गतोति वेदितब्बं. इध च…पे… सञ्ञिनोपीति इमस्मिं सिक्खापदे च अमूलकसिक्खापदे चाति अत्थो.

अञ्ञभागियसिक्खं ¶ यो, नेव सिक्खति युत्तितो;

गच्छे विनयविञ्ञूहि, अञ्ञभागियतंव सो. (वजिर. टी. पाराजिक ४०८);

अञ्ञभागियसिक्खापदवण्णना निट्ठिता.

११. भेदानुवत्तकसिक्खापदवण्णना

तिण्णं उद्धं कम्मारहा…पे… करोतीति एत्थ ‘‘इमे चत्तारो’’ति वा ‘‘इमञ्च इमञ्चा’’ति वा वत्वा कातुं न वट्टतीति लिखितं.

भेदानुवत्तकसिक्खापदवण्णना निट्ठिता.

१२. दुब्बचसिक्खापदवण्णना

दुक्खेन ¶ वत्तब्बो दुब्बचो. वुच्चमानो न सहति.

दुब्बचसिक्खापदवण्णना निट्ठिता.

निगमनवण्णना

‘‘नाममत्तवसेना’’ति पाठो. ‘‘नामगोत्तवसेना’’ति लिखितं. इदं वुत्तं होति – ‘‘अयं किरिया भिक्खूनं कातुं न वट्टती’’ति जानित्वा सचे छादेति, छन्नाव होतीति अत्थो. सभागमत्तमेवाति अवेरिसभागमत्तमेवाति अधिप्पायो.

वत्थु चेव गोत्तञ्चाति एत्थ वत्थूति वीतिक्कमनं असुचिमुच्चनं. गोत्तन्ति गं तायतीति गोत्तं, सजातितो अञ्ञत्थ गन्तुं अदत्वा गं बुद्धिं, वचनञ्च तायतीति अत्थो. वत्थु च सजातिमेव गच्छति. सजाति नामेत्थ अञ्ञेहि विसिट्ठाविसिट्ठभूता किरिया, न कायसंसग्गादि. नामञ्चेव आपत्ति चाति एत्थ आपत्तीति वीतिक्कमेनापन्नापत्तिया नामं.

पुन ¶ आगतागतानं भिक्खूनं आरोचेन्तेनाति एत्थ द्विन्नं आरोचेन्तेन ‘‘आयस्मन्ता धारेन्तु’’तिण्णं वा अतिरेकानं वा आरोचेन्तेन ‘‘आयस्मन्तो धारेन्तू’’ति एवं आरोचनविधानं वेदितब्बं. वत्तभेदञ्च रत्तिच्छेदञ्च अकत्वाति एत्थ ठपेत्वा नवकतरं पारिवासिकं अवसेसानं अन्तमसो मूलायपटिकस्सनारहादीनम्पि अभिवादनादिसादियने, पटिपाटिया निसीदने, ओवदने, कम्मिकानं गरहणे चातिआदीसु वत्तभेदो होति. दस्सनसवनविसयेसु अनारोचने च भिक्खूहि एकच्छन्ने वसने च अजानन्तस्सेव विहारे भिक्खूनं आगन्त्वा गमने चातिआदीसु रत्तिच्छेदो होति. नानासंवासकेहि विनयकम्माभावतो तेसं अनारोचने रत्तिच्छेदो न होति. ‘‘द्वे लेड्डुपाते अतिक्कमित्वा’’ति वचनतो अन्तो न वट्टति. निक्खित्तवत्तेनेव हुत्वा विचरन्तेन यस्स सन्तिके पुब्बे समादियित्वा आरोचितं, तस्सापि सन्तिके पच्छा निक्खिपनकाले आरोचेत्वाव निक्खिपितब्बं. तस्मा पुन समादानकालेपि सो चे ततो गच्छति, तं दिवसं अगन्त्वा दिवा आरोचेत्वापि यदि एवं अतीतदिवसं होति, ‘‘अरुणे उट्ठिते तस्स सन्तिके आरोचेत्वा वत्तं निक्खिपित्वा विहारं गन्तब्बन्ति तस्स सन्तिके आरोचेत्वा वत्तं निक्खिपितब्ब’’न्ति वुत्तं. अपिच ‘‘विहारं गन्त्वा यं सब्बपठमं ¶ भिक्खुं पस्सति, तस्स आरोचेत्वा निक्खिपितब्ब’’न्ति वुत्तं. सचे रत्तिच्छेदो होति, विहारसीमापरियापन्नानं सब्बेसं आरोचेतब्बं सिया. ‘‘तस्स आरोचेत्वा’’ति इदं पन पुब्बे अनारोचितं सन्धाय वत्तभेदरक्खणत्थं वुत्तं. तस्मा एव समन्तपासादिकायं (चूळव. अट्ठ. ९७) एवं वुत्तं ‘‘अञ्ञं विहारतो निक्खन्तं वा आगन्तुकं वा’’ति.

सुद्धन्तपरिवासे पन सचे ‘‘मासमत्तं असुद्धोम्ही’’ति अग्गहेसि, परिवसन्तो पुन ऊनं वा अधिकं वा सन्निट्ठानं करोति, तत्तकम्पि परिवसितब्बमेव, परिवासदानकिच्चं नत्थि. अयञ्हि सुद्धन्तपरिवासो नाम उद्धम्पि आरोहति, हेट्ठापि ओरोहति. इदमस्स लक्खणं.

समोदहित्वाति मूलापत्तिट्ठाने ठपेत्वा, पक्खिपित्वाति अत्थो. अप्पटिच्छन्ना चे अन्तरापत्ति, मूलाय पटिकस्सनं अकत्वा पुब्बे गहितपरिवासेनेव परिवसितब्बं. यो पन आपत्तिं आपज्जित्वा विब्भमित्वा पुन उपसम्पन्नो ¶ हुत्वापि पटिच्छादेति, यो च पुब्बे पटिच्छादेत्वा पच्छा न पटिच्छादेति, यो च उभयत्थ पटिच्छादेति, सब्बेसं पटिच्छन्नदिवसवसेन परिवासो दातब्बो. ‘‘पुरिमस्मिं आपत्तिक्खन्धे वा’’ति च ‘‘पच्छिमस्मिं आपत्तिक्खन्धे वा’’ति (चूळव. १६६ आदयो) च पाळियं वुत्तत्ता द्वे भिक्खू विसुद्धिकं आपन्ना होन्ति, ते सुद्धिकदिट्ठिनो होन्ति. एको छादेति, एको न छादेति. यो छादेति, सो दुक्कटं देसापेतब्बो. ‘‘उभोपि यथाधम्मं कारापेतब्बा’’ति (चूळव. १८१) वचनतो यं कञ्चि आपत्तिं छादेत्वा दुक्कटं आपज्जतीति वेदितब्बो.

तेसु गतेसु वा अगतेसु वा पुरिमनयेनेव पटिपज्जितब्बन्ति एत्थ ऊने गणे चरणं, अनुट्ठहनं एकरत्तम्पि गणेन विप्पवासं, सचे रत्तिया एकक्खणेन सङ्घो वसति, सचे सो पुरे अरुणमेव केनचि करणीयेन गतोति एत्थपि मानत्तेपि एवं जाते. ‘‘अयञ्च यस्मा गणस्स आरोचेत्वा, भिक्खूनञ्च अत्थिभावं सल्लक्खेत्वाव वसि, तेनस्स ऊने गणे चरणदोसो वा विप्पवासो वा न होती’’ति (चूळव. अट्ठ. ९७) समन्तपासादिकायं वुत्तं. तस्मा तेन आरोचिते मुहुत्तम्पि निसीदित्वा गतेपि विप्पवासो नत्थि. पारिवासिकस्स, उक्खित्तकस्स च पकतत्तेन तस्मिं वसनं उदकपातेन वारितं, तस्मा नानूपचारेपि एकच्छन्ने न वट्टति.

इदानि पाठविचारणा वेदितब्बा – ‘‘नव पठमापत्तिका चत्तारो यावततियका’’ति इदं सभावनियमवचनं. तेन वुट्ठानं अनियमन्ति दस्सेति. एकच्चापत्तिवुट्ठानञ्हि कम्मतोपि ¶ होति अकम्मतोपि, न एवं आपज्जनन्ति वुत्तं होति. अञ्ञतरं वा अञ्ञतरं वाति तेसं द्विधा भिन्नानम्पि वुट्ठानक्कमभेदाभावदीपकवचनं. यावतीहं, तावतीहन्ति एत्थ अहपरिच्छेदो अरुणवसेन. ‘‘जान’’न्ति इमिना जाननप्पटिच्छन्नस्स अकामा परिवत्थब्बन्ति दस्सेति. तेन भिक्खुना अकामा परिवत्थब्बन्ति तेन भिक्खुना वसता अकामा परिवत्थब्बं, न परिवत्तितलिङ्गेनाति दस्सनत्थं वुत्तं. परिवुत्थपरिवासेनाति आदिम्हि परिवुत्थपरिवासेनेव परिवासतो उत्तरि इतिवारेन आदितो भिक्खुनाव छारत्तं, परिवत्तितलिङ्गेन उद्धम्पि भिक्खुमानत्ताय पटिपज्जितब्बं, न परिवासे विय तप्पच्चया अचिण्णमानत्तो. चिण्णमानत्तोव अब्भेतब्बो, न इतरो, न परिवासे विय मानत्तारहे, पक्खमानत्तञ्च ¶ चरन्तिया भिक्खुनिया लिङ्गं परिवत्तातिक्कमे सति चिण्णमानत्तो भिक्खु होति, पुन भिक्खुमानत्तं गहेत्वा चिण्णमानत्तोव भिक्खु अब्भेतब्बोति दस्सेति.

यत्थ सियाति यस्सं समानसंवासकसीमायम्पि वीसतिगणो भिक्खुसङ्घो अत्थि. एकेनपि चे ऊनो वीसतिगणोति न युज्जति, ऊनो चे. न हि वीसतिगणो, सङ्घो चे ऊनो. तस्मा ‘‘एकेनपि चे ऊनो सङ्घो’’ति एत्तकमेव वत्तब्बन्ति चे? न, चतुवग्गपञ्चवग्गदसवग्गप्पसङ्गनिवारणप्पयोजनतो. तस्मा वीसतिवग्गो भिक्खुसङ्घो चे भिक्खुना एकेनपि ऊनो, नट्ठो दट्ठब्बो. केचि पन विनये अप्पकतञ्ञुनो ‘‘यथा अतिरेकचतुवग्गोपि सङ्घो चतुवग्गकरणीये कम्मे ‘चतुवग्गो’ति वुच्चति, तथा पञ्चवग्गदसवग्गकरणीये कम्मे अतिरेकपञ्चवग्गदसवग्गोपि ‘पञ्चवग्गदसवग्गो’ति वुच्चति. तस्मा ऊनोपि चतुवग्गपञ्चवग्गदसवग्गवीसतिवग्गोवा’’ति मञ्ञेय्युं, तेसं मञ्ञनानिवारणत्थं ‘‘एकेनपि चे ऊनो’’तिआदि वुत्तं. अथ वा वीसति भिक्खुसङ्घो चे, ठपेत्वा एकेनपि चे ऊनो अप्पकतत्तो, तं ठपेत्वा एकेनपि चेति एवमेत्थ अत्थो दट्ठब्बो. अयं तत्थ सामीचीति वचनं यं वुत्तं सब्बत्थ ‘‘तस्स आपत्तिया परिवासं देति, मूलाय पटिकस्सति, मानत्तं देति, अब्भेती’’ति, तस्स आविभावकरणत्थं वुत्तन्ति वेदितब्बं. तेन तेसु अयं यथावुत्ता सामीचि नियता इच्छितब्बा, न राजसिक्खापदादीसु विय अनियता. तत्थ हि केनचि अन्तरायेन तं सामीचिमकरोन्तेपि अनापत्तीति दीपितं होति.

सङ्घादिसेसवण्णना निट्ठिता.

अनियतकण्डं

१. पठमानियतसिक्खापदवण्णना

अनियते ¶ ¶ आदितोव इदं पकिण्णकं. सेय्यथिदं – इदं अनियतकण्डं निप्पयोजनं तत्थ अपुब्बाभावतोति चे? न, गरुकलहुकभेदभिन्नापत्तिरोपनारोपनक्कमलक्खणदीपनप्पयोजनतो. एत्थ हि ‘‘सा चे एवं वदेय्य ‘अय्यो मया…पे… सो च तं पटिजानाति, आपत्तिया कारेतब्बो’’’तिआदिना (पारा. ४४६) आपत्तिया गरुकाय, लहुकाय च आरोपनक्कमलक्खणं, ‘‘न कारेतब्बो’’ति इमिना अनारोपनक्कमलक्खणञ्च दस्सितं. लक्खणदीपनतो आदिम्हि, अन्ते वा उद्दिसितब्बन्ति चे? न, असम्भवतो. कथं न ताव आदिम्हि सम्भवति, येसमिदं लक्खणं, तेसं सिक्खापदानं अदस्सितत्ता. न अन्ते गरुकमिस्सकत्ता. तस्मा गरुकलहुकानं मज्झे एव उद्दिसितब्बतं अरहति उभयमिस्सकत्ता. या तत्थ पाचित्तियसङ्खाता लहुकापत्ति दस्सिता, सापि गरुकाति कथिता. तेनेवाह ‘‘मेथुनधम्मसन्निस्सितकिलेससङ्खातेन रहस्सादेना’’तिआदि. तस्मा गरुकानं एव अनन्तरं उद्दिट्ठन्तिपि एके. एवं सति पठमानियतमेवालं तावता लक्खणदीपनसिद्धितो, किं दुतियेनाति चे? न, ओकासनियमपच्चयमिच्छागाहनिवारणप्पयोजनतो. ‘‘पटिच्छन्ने आसने अलंकम्मनिये’’ति ओकासनियमतो हि तब्बिपरीते ओकासे इदं लक्खणं न विकप्पितन्ति मिच्छागाहो होति. तंनिवारणतो दुतियानियतम्पि सात्थकमेवाति अधिप्पायो. कस्मा? ओकासभेदतो, रहोभेददीपनतो, रहोनिसज्जस्सादभेददीपनतो. ओकासनियमभावे च रहोनिसज्जस्सादभेदो जातो. द्विन्नं रहोनिसज्जसिक्खापदानं नानात्तजाननञ्च सिया तथा कायसंसग्गभेददीपनतो. नालं कम्मनियेपि हि ओकासे अप्पटिच्छन्ने, पटिच्छन्नेपि वा निसिन्नाय वातपानकवाटच्छिद्दादीहि निक्खन्तकेसादिग्गहणेन कायसंसग्गो लब्भतीति एवमादयोपि नया वित्थारतो वेदितब्बा.

तत्रिदं ¶ मुखमत्तनिदस्सनं – ओकासभेदतोति अलंकम्मनियनालंकम्मनियभेदतो. पटिच्छन्नम्पि हि एकच्चं नालंकम्मनियं वातपानादिना अन्तरितत्ता ¶ , उभयप्पटिच्छन्नम्पि एकच्चं नालंकम्मनियं विजानतं अज्झोकासत्ता. रहोभेददीपनतोति एत्थ रहभावसामञ्ञेपि रहो द्विधा पटिच्छन्नापटिच्छन्नभेदतोति अधिप्पायो. रहोनिसज्जस्सादभेददीपनतोति मेथुनस्सादवसेन निसज्जा, दुट्ठुल्लस्सादवसेन निसज्जाति तादिसस्स भेदस्स दीपनतोति अत्थो. ‘‘इध आगतनयत्ता भिक्खुनिपातिमोक्खे इदं कण्डं परिहीनन्ति वेदितब्ब’’न्ति वदन्ति. ‘‘अट्ठुप्पत्तिया तत्थ अनुप्पन्नत्ता’’ति एके, तं अनेकन्तभावदीपनतो अयुत्तं. सब्बबुद्धकाले हि भिक्खूनं पञ्च, भिक्खुनीनं चत्तारो च उद्देसा सन्ति. पातिमोक्खुद्देसपञ्ञत्तिया असाधारणत्ता तत्थ निद्दिट्ठसङ्घादिसेसपाचित्तियानन्ति एके. तासञ्हि भिक्खुनीनं उब्भजाणुमण्डलिक (पाचि. ६५८) -अट्ठवत्थुक (पाचि. ६७५) -वसेन कायसंसग्गविसेसो पाराजिकवत्थु, ‘‘हत्थग्गहणं वा सादियेय्य, कायं वा तदत्थाय उपसंहरेय्या’’ति (पाचि. ६७५) वचनतो सादियनम्पि, ‘‘सन्तिट्ठेय्य वा’’ति (पाचि. ६७५) वचनतो ठानम्पि, ‘‘सङ्केतं वा गच्छेय्या’’ति (पाचि. ६७५) वचनतो गमनम्पि, ‘‘छन्नं वा अनुपविसेय्या’’ति (पाचि. ६७५) वचनतो पटिच्छन्नट्ठानप्पवेसोपि होति, तथा ‘‘रत्तन्धकारे अप्पदीपे, पटिच्छन्ने ओकासे अज्झोकासे एकेनेका सन्तिट्ठेय्य वा सल्लपेय्य वा’’ति (पाचि. ८३९) वचनतो दुट्ठुल्लवाचापि पाचित्तियवत्थुकन्ति कत्वा तासं अञ्ञथा अनियतकण्डस्स अवत्तब्बतापत्तितो न वुत्तन्ति तेसं अधिप्पायो. पकिण्णकं.

‘‘देसनावुट्ठानगामिनीनं आपत्तीनं वसेन अलज्जिआदयो लज्जीनं चोदेस्सन्ती’’ति आगतत्ता लज्जिपग्गहत्थाय पतिरूपायपि उपासिकाय वचनेन अकत्वा भिक्खुस्सेव पटिञ्ञाय कातब्बन्ति आपत्तियो पन लक्खणदस्सनत्थं पञ्ञत्तं वित्थारनयमेव गहेत्वा वत्तुं युत्तं ‘‘इमे खो पनायस्मन्तो द्वे अनियता धम्मा’’ति (पारा. ४४३) उद्देसदस्सनत्ताति लिखितं. सोतस्स रहोति एत्थ रहोति वचनसामञ्ञतो वुत्तं. दुट्ठुल्लसामञ्ञतो दुट्ठुल्लारोचनप्पटिच्छादनसिक्खापदेसु पाराजिकवचनं विय. तस्मा ‘‘चक्खुस्सेव पन रहो ‘रहो’ति इध अधिप्पेतो’’ति वुत्तं. कथं पञ्ञायतीति चे? ‘‘मातुगामो नाम…पे… अन्तमसो तदहुजातापि दारिका’’ति (पारा. ४४५) वुत्तत्ता दुट्ठुल्लोभासनं इध नाधिप्पेतन्ति दीपितमेवाति. अन्तोद्वादसहत्थेपीति ¶ पि-सद्देन अपिहितकवाटस्स गब्भस्स द्वारे निसिन्नोपीति अत्थो. अचेलकवग्गे रहोपटिच्छन्नासनसिक्खापदे (पाचि. २८८) ‘‘यो कोचि विञ्ञू पुरिसो दुतियो होती’’ति इमस्स अनुरूपतो ‘‘इत्थीनं पन सतम्पि अनापत्तिं न करोतियेवा’’ति वुत्तं. ‘‘अलंकम्मनियेति सक्का होति मेथुनं धम्मं पटिसेवितु’’न्ति (पारा. ४४५) विभङ्गे ¶ वचनतो रहोनिसज्जस्सादो चेत्थ मेथुनधम्मसन्निस्सितकिलेसो, न दुतिये विय दुट्ठुल्लवाचस्सादकिलेसो. तस्मा च पञ्ञायति सोतस्स रहो नाधिप्पेतोति.

तिण्णं धम्मानं अञ्ञतरेन वदेय्याति रहोनिसज्जसिक्खापदवसेन निसिन्नस्स तस्सानुसारेन पाचित्तियमेव अवत्वा पाराजिकसङ्घादिसेसायपि आपत्तिया भेददस्सनत्थं वुत्तं. पुन आपत्तिप्पटिजाननं अवत्वा कस्मा ‘‘निसज्जं भिक्खु पटिजानमानो’’ति वत्थुप्पटिजाननं वुत्तन्ति? वुच्चते – आपत्तिया चोदिते विनयधरेन ‘‘किस्मिं वत्थुस्मि’’न्ति पुच्छिते चुदितकेन ‘‘इमस्मिं वत्थुस्मि’’न्ति वुत्ते विनयधरेन ‘‘ईदिसं नाम अकासी’’ति पुच्छिते सो वत्थुं पटिजानमानोव कारेतब्बोति दस्सनत्थं ‘‘निसज्जं भिक्खु पटिजानमानो’’ति वुत्तं. यदि एवं निसज्जं पटिजानमानोपि आपत्तियाव कारेतब्बोति? अनुरूपमेव. एवं पन गहेतब्बं – तिण्णम्पि आपत्तीनं वत्थूनि अग्गहेत्वा इध सिक्खापदवसेन निसज्जमेव वुत्तं. तस्मिं गहितेपि हि आपत्ति गहिताव होतीति. येन वा साति एत्थ वा-सद्दो ‘‘तेन सो भिक्खु कारेतब्बो वा’’ति योजेतब्बो. सो च विकप्पत्थो. तस्मा ‘‘कारेतब्बो वा पटिजानमानो, न वा कारेतब्बो अप्पटिजानमानो’’ति अत्थो. तेन वुत्तं ‘‘पटिजानमानो वा’’तिआदि. रहोनिसज्जसिक्खापदवसेन निसज्जपच्चया आपत्तिया वुत्तत्ता सेसेसुपि सेससिक्खापदवसेन आपत्ति गहेतब्बा. ‘‘समुट्ठानादीनि पठमपाराजिकसदिसानेवा’’ति वुत्तत्ता इध दुट्ठुल्लोभासनस्स अनधिप्पेतभावो वेदितब्बो.

पठमानियतसिक्खापदवण्णना निट्ठिता.

२. दुतियानियतसिक्खापदवण्णना

सङ्घादिसेसेन ¶ वाति कायसंसग्गदुट्ठुल्लोभासनेन. तस्मा एवं कायसंसग्गवारो पाळियम्पि वुत्तो. अनन्धो अबधिरोति अनन्धो कायसंसग्गं पस्सति, अबधिरो दुट्ठुल्लं सुणाति, तस्मा एव अदिन्नादानसदिसानेवाति वुत्त’’न्ति लिखितं. एत्थ च कायवाचाचित्ततो समुट्ठानं कथन्ति चे? कायसंसग्गञ्हि समापज्जन्तो दुट्ठुल्लम्पि भणति, दुट्ठुल्लं भणन्तो निसीदति चाति सम्भवति, दुट्ठुल्लमेव वा सन्धाय वुत्तं. तञ्हि अदिन्नादानसमुट्ठानन्ति.

यो ¶ देसनं सब्बविदूपमोव;

नानानयाकारविचित्तभेदं;

ञातुं उपायान मनो सतिमा;

तं लाभहेतुं न करोति पुञ्ञन्ति.

दुतियानियतसिक्खापदवण्णना निट्ठिता.

अनियतवण्णना निट्ठिता.

निस्सग्गियकण्डं

१. चीवरवग्गो

१. कथिनसिक्खापदवण्णना

निस्सग्गियकण्डे ¶ ¶ तिण्णं कथिनसिक्खापदानं, वस्सिकसाटिकअच्चेकचीवरसासङ्कसिक्खापदानञ्च एकदेसनाय तथाकिण्णापत्तिक्खन्धाव वेदितब्बा –

कथिनं यस्स चत्तारो, सहजा समयद्वयं;

छन्नं सिक्खापदानञ्च, एकदेसविनिच्छयो.

तत्थ कथिनन्ति ‘‘सङ्घस्स अनुमोदनाय, गणस्स अनुमोदनाय, पुग्गलस्स अत्थारा सङ्घस्स अत्थतं होति कथिन’’न्ति (परि. ४१४) वचनतो तेसंयेव अनुमोदनादिधम्मानं सङ्गहो कथिनं नाम. यथाह ‘‘कथिनं जानितब्बन्ति तेसञ्ञेव धम्मानं सङ्गहो समवायो नामं नामकम्म’’न्तिआदि (परि. ४१२). तस्मा कथिनन्ति इदं बहूसु धम्मेसु नाममत्तं, न परमत्थतो एको धम्मो. को पनस्स अत्थारोति? तदेकदेसोव खीरस्स धारा विय. यथा चाह ‘‘अत्थारो एकेन धम्मेन सङ्गहितो वचीभेदेना’’ति. सहजा नाम अट्ठ मातिका, द्वे पलिबोधा, पञ्चानिसंसाति इमे पन्नरस धम्मा. समयद्वयं नाम कथिनत्थारसमयो, चीवरसमयो चाति. तत्थ कथिनत्थारसमयो वस्सानस्स पच्छिमो मासो. चीवरसमयो नाम अनत्थते कथिने अयं कत्तिकमासो, अत्थते चत्तारो हेमन्तिका चाति पञ्च मासा.

तत्थ अट्ठ मातिका नाम पक्कमनन्तिकादयो. ता सब्बापि अत्थारेन एकतो उप्पज्जन्ति नाम. तब्भावभाविताय अत्थारे सति उद्धारो सम्भवति. तत्थ कथिनत्थारेन एकुप्पादा ¶ एकनिरोधा अन्तरुब्भारो सहुब्भारो, अवसेसा कथिनुब्भारा एकुप्पादा, नानानिरोधा च. तत्थ एकनिरोधाति अत्थारेन सह निरोधा, अन्तरुब्भारसहुब्भारानं उद्धाराभावो एकक्खणे होतीति अत्थो. सेसा नाना निरुज्झन्ति नाम. तेसु हि उद्धारभावं पत्तेसुपि अत्थारो तिट्ठति एवाति अट्ठकथायं अत्थविभावना. सचे अत्थते कथिने भिक्खुस्मिं सापेक्खे ¶ तम्हा आवासा पक्कमन्ते सङ्घो अन्तरुब्भारं करोति, तस्स भिक्खुनो पठममेव मूलावासे निट्ठितचीवरपलिबोधाभावेपि सति अन्तरुब्भारे पलिबोधो छिज्जति सतिपि सापेक्खताय सउस्साहत्ता. इमिना परियायेन पक्कमनन्तिको कथिनुद्धारो अत्थारेन एकुप्पादो नानानिरोधो होति. तथा अन्तरुब्भारे सति सुणन्तस्सापि याव चीवरनिट्ठानं न गच्छति, ताव परिहारसम्भवतो निट्ठानन्तिको. याव सन्निट्ठानं न गच्छति, ताव परिहारसम्भवतो सन्निट्ठानन्तिको. याव न नस्सति, ताव परिहारसम्भवतो नासनन्तिको. याव न सुणाति, ताव परिहारसम्भवतो सवनन्तिको. याव चीवरासा न छिज्जति, ताव परिहारसम्भवतो आसावच्छेदिको. याव सीमं नातिक्कमति, ताव परिहारसम्भवतो सीमातिक्कन्तिको. अत्थारेन एकुप्पादो नानानिरोधो होतीति वेदितब्बो.

तत्थ अन्तरुब्भारसहुब्भारा द्वे अन्तोसीमायं एव सम्भवन्ति, न बहिसीमायं. पक्कमनसवनसीमातिक्कन्तिका बहिसीमायमेव सम्भवन्ति, न अन्तोसीमायं. निट्ठानसअआट्ठानासावच्छेदिका अन्तोसीमायञ्चेव बहिसीमायञ्च. अन्तरुब्भारो सङ्घायत्तो, पक्कमननिट्ठानसन्निट्ठानसीमातिक्कन्तिका पुग्गलाधीना, सेसा तदुभयविपरीता.

तत्थ ‘‘निट्ठितचीवरस्मि’’न्ति इमिना चीवरपलिबोधाभावमेव दीपेति. न आवासपलिबोधाभावं. ‘‘उब्भतस्मिं कथिने’’ति इमिना उभयपलिबोधाभावं दीपेति, तस्मा उभयपलिबोधाभावदीपनत्थं तदेव वत्तब्बन्ति चे? न, विसेसत्ता. कथं? कामञ्चेतं तस्मा ‘‘उब्भतस्मिं कथिने’’ति केसञ्चि कथिनुद्धारानं नानानिरोधत्ता, सङ्घपुग्गलाधीनानधीनत्ता च अन्तोबहिउभयसीमासु नियमानियमतो च उब्भतस्मिं कथिने सङ्घस्स, न पुग्गलस्स उब्भतं होति, तथापि ‘‘उब्भतस्मिं कथिने’’ति इदं सामञ्ञवचनं. तस्मा ‘‘निट्ठितचीवरस्मि’’न्ति इमिना नियमेति.

किं वुत्तं होति – सङ्घस्स अन्तरुब्भारेन उब्भतस्मिं कथिने अच्छिन्नचीवरपलिबोधो बहिसीमागतो पच्छा गन्त्वा अत्तनो सीमागतो अनिट्ठितचीवरो आनिसंसं लभति एवाति कत्वा ‘‘निट्ठितचीवरस्मि’’न्ति वुत्तन्ति वेदितब्बं. तत्थ आवासपलिबोधो नाम वसति वा तस्मिं ¶ आवासे, सापेक्खो वा पक्कमति. चीवरपलिबोधो नाम चीवरं अकतं ¶ विप्पकतं, चीवरासानुपच्छिन्ना, तब्बिपरीतेन अपलिबोधो वेदितब्बो. तत्थ अनत्थतकथिनानं चीवरकालसमये नियमतो चत्तारो आनिसंसा लब्भन्ति, असमादानचारो अनियमतो. तेन सासङ्कसिक्खापदं वुत्तं. कथं चत्तारो नियताति चे? ‘‘चीवरकालसमयो नाम अनत्थते कथिने वस्सानस्स पच्छिमो मासो’’ति (पारा. ६४९) वचनतो अनत्थतकथिनानं तस्मिं मासे यावदत्थचीवरं सिद्धं, तथा ततियकथिनसिक्खापदे (पारा. ४९७ आदयो) अकालचीवरं नाम पिट्ठिसमयतो पट्ठाय तं पटिग्गहेत्वा सङ्घतो लभितब्बं चे, याव चीवरकालसमयं निक्खिपित्वा भाजेत्वा गहेतब्बं. पुग्गलिकं चे, वस्सानस्स छट्ठपक्खस्स पञ्चमितो पट्ठाय याव चीवरकालसमयं अनधिट्ठितं अविकप्पितं वट्टति अच्चेकचीवरसिक्खापदेन अनुञ्ञातत्ता, न ततो परं. तदा उप्पन्नचीवरस्स पटिसिद्धत्ता पठमकथिनेन. तत्थ अट्ठकथायं वुत्तनयो सङ्घिकं सन्धाय, तथा पोराणगण्ठिपदे चाति वेदितब्बं.

पठमकथिने (पारा. ४५९ आदयो) पठमपञ्ञत्तिया, अविसेसेन वा एकादसमे दिवसे आपत्ति. वस्सानस्स हि अन्तोनिवारणत्थं अट्ठकथाय ‘‘निट्ठितचीवरस्मिं भिक्खुना उब्भतस्मिं कथिने’’ति (पारा. ४६२ आदयो) वुत्तं. एसेव नयो दुतिये, ततिये च. तेन चीवरकालतो पुरे वा अन्तो वा उप्पन्नं चीवरकालतो उद्धं एकदिवसम्पि परिहारं न लभति. यदि लभेय्य, अच्चेकचीवरसिक्खापदविरोधो. ‘‘याव चीवरकालसमयं निक्खिपितब्बं, ततो चे उत्तरि निक्खिपेय्य, निस्सग्गिय’’न्ति (पारा. ६४८) हि तत्थ वुत्तं. वस्सावासिकभावेन सङ्घतो लद्धं वुट्ठवस्सत्ता अत्तनो सन्तकभूतं अच्चेकचीवरं चीवरकालसमयं अतिक्कामयतो एव आपत्ति, न अच्चेकचीवरकालं अतिक्कामयतो आपत्तीति. ‘‘अनत्थते कथिने एकादसमासे उप्पन्न’’न्ति (पारा. ५००) वचनतो यो च तत्थ चीवरुप्पादो, सो च नेसं भविस्सतीति सिद्धं, अनामन्तचारगणभोजनसिक्खापदे ‘‘अञ्ञत्र समया’’ति (पाचि. २२२ आदयो) वुत्तत्ता सेसद्वयं सिद्धमेव. तस्मा ‘‘कालेपि आदिस्स दिन्नं, एतं अकालचीवर’’न्ति (पारा. ५००) वचनतो आदिस्स दिन्नचीवरं परिहारं न लभति.

अपरकत्तिकायमेव वा उब्भतस्मिं कथिने लभति, एवं ‘‘उब्भतस्मिं कथिने’’ति वुत्तत्ताति चे? न वत्तब्बं. छ ठानानि हि सापेक्खताय वुत्तानि ¶ . दुट्ठदोसद्वये अधिकरणचतुत्थं, पठमानियते सोतस्स रहो, ततियकथिने आदिस्स दिन्नं चीवरं, अच्चेकचीवरसिक्खापदे ¶ ‘‘सञ्ञाणं कत्वा निक्खिपितब्ब’’न्ति पदं, दुट्ठुल्लारोचनप्पटिच्छादनद्वये अधिकरणं, पाराजिकवचनञ्च, तीसु कथिनसिक्खापदेसु ‘‘अट्ठन्नं मातिकानं अञ्ञतराया’’ति वचनन्ति. तत्थ आदिस्स दिन्नं चीवरं सङ्घिकं भाजितब्बचीवरं सन्धाय वुत्तं, न पुग्गलिकं. सञ्ञाणं कत्वा निक्खिपितब्बन्ति वस्सावासिकचीवरं सन्धाय वुत्तं. अवुट्ठवस्सेन पच्छा दातब्बत्ता सञ्ञाणं कातब्बं, न ञातिप्पवारिततो लद्धं पुग्गलिकं सन्धाय. तस्मा दुविधं अच्चेकचीवरं सङ्घे निन्नं, पुग्गले निन्नञ्चाति सिद्धं. तत्थ सङ्घे परिणतं अच्चेकचीवरं वस्सूपनायिकदिवसतो पट्ठाय, पिट्ठिसमयतो पट्ठाय वा याव पवारणा निक्खिपितुं वट्टति एव सङ्घिकत्ता, पुग्गलिकम्पि ‘‘वस्संवुट्ठकाले गण्हथा’’ति दिन्नत्ता. तादिसञ्हि याव वस्संवुट्ठो न होति, ताव तस्सेव दायकस्स सन्तकं होति. एत्तको विसेसहेतु.

‘‘अनच्चेकचीवरे अनच्चेकचीवरसञ्ञी चीवरकालसमयं अतिक्कामेति, अनापत्ती’’ति वचनतो अच्चेकचीवरकस्सेव सो अपराधो. येन ‘‘विरोधो’’ति वचनं दस्सेय्याति न विनये विसेसहेतु परियेसितब्बो. बुद्धविसयत्ता पमाणन्ति चे? न, यदि एवं एत्थ अत्तनो सन्तकभूतम्पि अच्चेकचीवरं सञ्ञाणं कत्वा निक्खिपितब्बमेव, न अधिट्ठातब्बं न विकप्पेतब्बं न विस्सज्जेतब्बं. ततो ‘‘अनापत्ति, अन्तोसमये अधिट्ठेति विकप्पेति विस्सज्जेती’’तिआदिवचनविरोधो (पारा. ६५१) अधिवासेतब्बो सिया. तथा ‘‘वस्सानस्स पच्छिमे मासे कथिनुद्धारे कते तस्मिं मासे अत्थते कथिने कथिनुद्धारदिवसं अतिक्कामेति, निस्सग्गियं होती’’ति वचनतो निस्सग्गियं होतीति अयम्पि अत्थविरोधो अधिवासेतब्बो सिया. तस्मिञ्च ‘‘अनच्चेकचीवरे अनापत्ती’’ति वुत्तं, तञ्च अनधिट्ठितं अविकप्पितमेवाति एत्तको विसेसहेतु. अतिरेकचीवरञ्चेतं पठमसिक्खापदेनापत्ति, इतरं चे अनापत्तियेवाति इमस्स अत्थस्स अयं भगवतो विसेसहेतु. तथा अतिरेकदसाहानागतायेव कत्तिकपुण्णमाय सङ्घस्स वस्सावासिकत्थं अच्चेकचीवरं विय ददमानं न ¶ गहेतब्बं, दसाहानागताय एव गहेतब्बन्ति एत्तको विसेसहेतु. ततो अट्ठकथानयविरोधो च अधिवासेतब्बो सिया. तत्थ ‘‘अधिट्ठिततो पट्ठाय उप्पन्नं अच्चेकचीवरं न होती’’ति वत्वा अञ्ञथा नयो दस्सितो. पोराणगण्ठिपदे सो च नयो सङ्घिकं उपादाय वुत्तत्ता न विरुज्झतीति नेव सो च पटिक्खित्तो. यथा अनच्चेकचीवरं छट्ठितो पट्ठाय उप्पन्नं अतिरेकदसाहानागतायपि पटिग्गहेतब्बं, पटिग्गहेत्वा चीवरकालसमयं अतिक्कामयतोपि अनापत्तीति अयम्पि नयो अधिवासेतब्बो सिया. ततो पठमकथिनविरोधो. दसाहानागताय एव पटिग्गहेतब्बं, पटिग्गहेत्वा ¶ चीवरकालसमयं अतिक्कामयतो अनापत्तीति चे, तं द्वे दसाहे लभतीति एत्तको विसेसहेतु.

अन्तरा अनापत्तिक्खेत्तचीवरकालप्पविट्ठत्ता अधिट्ठहित्वा पच्चुद्धटं विय तं पुनपि दसाहे लभतीति चे? न, कालप्पवेसो अधिट्ठानं विय होतीति चे? न, ‘‘वस्सिकसाटिकं वस्सानं चातुमासं अधिट्ठातुं, ततो परं विकप्पेतु’’न्ति वचनविरोधं कत्वा, ततो परं दसाहं अविकप्पेन्तस्सापि अनापत्ति सिया. अपिच यं वुत्तं अट्ठकथायं ‘‘वस्सिकसाटिका अन्तोवस्से लद्धा चेव निट्ठिता च, अन्तोदसाहे अधिट्ठातब्बा, दसाहातिक्कमे निट्ठिता, तदहेव अधिट्ठातब्बा, दसाहे अप्पहोन्ते चीवरकालं नातिक्कामेतब्बा’’ति (पारा. अट्ठ. २.६३०). तेन आपत्तितो न मुच्चेय्य. कालप्पवेसो हि अधिट्ठानपरियायो न जातोति. एत्तावता यथावुत्तो अत्थविकप्पो पाळिनयेनेव पतिट्ठापितो होति.

अपिचेत्थ यं वुत्तं अट्ठकथायं ‘‘दसाहे अप्पहोन्ते चीवरकालं नातिक्कामेतब्बा’’ति, तत्थपि चीवरकाले उप्पन्नं, दसाहे अप्पहोन्ते चस्स करणं नत्थि, तं अच्चेकचीवरं अकालचीवरमिव चीवरकालं नातिक्कामेतब्बन्ति सिद्धमेतं. पाळितो च तञ्चे अन्तोकाले उप्पज्जति, दसाहे अप्पहोन्तेपि उप्पज्जति, एवं उप्पन्नं अच्चेकचीवरं अच्चेकचीवरमेव न होति. न हि तं कालविसेसवसेन अच्चेकचीवरसङ्खं गच्छति. वुत्तञ्हेतं ‘‘अच्चेकचीवरं नाम सेनाय वा गन्तुकामो होति, पवासं वा गन्तुकामो होति, गिलानो वा होति, गब्भिनी वा होति ¶ , अस्सद्धस्स वा सद्धा उप्पन्ना होति…पे… ‘वस्सावासिकं दस्सामी’ति एवं आरोचितं, एतं अच्चेकचीवरं नामा’’ति (पारा. ६४९). तस्मा यथा तं चीवरं नातिक्कामेतब्बं, तथा अनच्चेकचीवरम्पीति सिद्धं होति. तेन वुत्तं अट्ठकथायं ‘‘दसाहे अप्पहोन्ते चीवरकालं नातिक्कामेतब्बा’’ति. अपिच यदि एवं तं अच्चेकचीवरसिक्खापदमेव अच्चेकचीवरं चीवरकालं नातिक्कामेतब्बन्ति इमस्स पन अत्थविसेसस्स दस्सनत्थं भगवता पञ्ञत्तं.

महाअट्ठकथायं पन तं एवं वुत्तं – कामञ्चेदं ‘‘दसाहपरमं अतिरेकचीवरं धारेतब्ब’’न्ति इमिना सिद्धं, अट्ठुप्पत्तिवसेन पन अपुब्बं विय अत्थं दस्सेत्वा सिक्खापदं ठपितन्ति अत्थविसेसदीपनपयोजनतो. तस्मा तं तस्स अत्थविसेसदस्सनत्थं वुत्तन्ति सिद्धमेव. तस्मापि वेदितब्बमेव यं किञ्चि चीवरं चीवरकालसमयं नातिक्कामेतब्बन्ति. अपिच यं वुत्तं अट्ठकथायं ‘‘छट्ठितो पट्ठाय पन उप्पन्नं अनच्चेकचीवरम्पि पच्चुद्धारेत्वा ठपितचीवरम्पि ¶ एतं परिहारं लभती’’ति (पारा. अट्ठ. २.६४६-६४९). तेन ‘‘अनच्चेकचीवरे अनच्चेकचीवरसञ्ञी चीवरकालसमयं अतिक्कामेति, अनापत्ती’’ति (पारा. ६५०) इमिनापि अनच्चेकचीवरस्सापि अच्चेकचीवरपरिहारलाभं दीपेतीति.

एत्तावता यथावुत्तो दुतियो अत्थविकप्पो पाळिनयेन, अट्ठकथानयेन च पतिट्ठापितो होति. एवं ताव पकिण्णकाय अधिकथा परतो पाठतो वित्थारिता होतीति अपकिण्णकं.

चीवरपलिबोधो, आवासपलिबोधो चाति द्वे पलिबोधा. तेसु एकपलिबोधेपि सति अनामन्तचारादिआनिसंसं लभति, तं इध नत्थीति दस्सेतुं ‘‘निट्ठितचीवरस्मिं भिक्खुना उब्भतस्मिं कथिने’’ति वुत्तं. तस्मा एव ‘‘अत्थतकथिनस्स हि भिक्खुनो’’तिआदि वुत्तं. कथिनत्थारारहस्साति एत्थ ‘‘अट्ठहि अङ्गेहि समन्नागतो पुग्गलो भब्बो कथिनं अत्थरितुं – पुब्बकरणं जानाति, पच्चुद्धारं जानाति, अधिट्ठानं जानाति, अत्थारं जानाति, मातिकं जानाति, पलिबोधं जानाति, उद्धारं जानाति, आनिसंसं जानाती’’ति (परि. ४०९) वचनतो इमेहि अट्ठहि अङ्गेहि समन्नागतो पुग्गलो कथिनत्थारारहो नाम. पुब्बकरणं नाम धोवनविचारणच्छेदनसिब्बनरजनकप्पकरणं.

‘‘चीवरं ¶ नाम खोम’’न्तिआदिना पाळिवसेन जातिञ्च पमाणञ्च दस्सेत्वा इदानि अतिरेकचीवरं दस्सेतुं ‘‘यं पन वुत्तं अधिट्ठितविकप्पितेसू’’तिआदि वुत्तं. ठपितट्ठानं सल्लक्खेत्वा’’ति वुत्तेपि यस्मिं ठाने यं ठपितं, तस्मिं तं पच्छा होतु वा, मा वा, अधिट्ठानं रुहतेव. पुरे पच्छा ठपनट्ठानं न पमाणं.

अन्तिमवत्थुं अज्झापन्नस्स भिक्खुभावपरिच्चागवसेन सेतवत्थनिवासनं वा कासावचजनं वा हीनायावत्तनं.

एकादसमे अरुणुग्गमनेति अन्तिमं ठपेत्वा ततो पुरिमतरस्मिन्ति अत्थो वेदितब्बो. तत्थ अन्तिमं नाम अपरकत्तिकाय पठमारुणुग्गमनं. तञ्हि कालत्ता निस्सग्गियं न करोति. इध ‘‘निट्ठितचीवरस्मिं भिक्खुना’’ति करणवचनं निदानानपेक्खं निदाने करणाभावतो. तस्मा एव ‘‘दसाहपरम’’न्ति अयमेत्थ अनुपञ्ञत्तीति वुत्तं. ‘‘अनुजानामि, भिक्खवे, तिचीवरं अधिट्ठातुं न विकप्पेतु’’न्तिआदि (महाव. ३५८) वचनतो च इध ‘‘विकप्पेती’’ति अविसेसेन वुत्तवचनं विरुद्धं विय दिस्सति, न च विरुद्धं तथागता भासन्ति, ¶ तस्मा एवमस्स अत्थो वेदितब्बो – तिचीवरं तिचीवरसङ्खेपेन परिहारतो अधिट्ठातुमेव अनुजानामि, न विकप्पेतुं. वस्सिकसाटिकं पन चतुमासतो परं विकप्पेतुमेव, न अधिट्ठातुन्ति. एवञ्च पन सति यो तिचीवरे एकेन चीवरेन विप्पवसितुकामो होति, तस्स तिचीवराधिट्ठानं पच्चुद्धरित्वा विप्पवाससुखत्थं विकप्पनाय ओकासो दिन्नो होति, दसाहातिक्कमे च अनापत्तीति. एतेन उपायेन सब्बत्थ विकप्पनाय अपटिसिद्धभावो वेदितब्बोति लिखितं.

इमस्स पन सिक्खापदस्स अयं सङ्खेपविनिच्छयो – अनत्थते कथिने हेमन्तानं पठमदिवसतो पट्ठाय, अत्थते कथिने गिम्हानं पठमदिवसतो पट्ठाय उप्पन्नचीवरं सन्धाय ‘‘निट्ठितचीवरस्मि’’न्तिआदि वुत्तं. एत्थाह – ‘‘रजकेहि धोवापेत्वा सेतकं कारापेन्तस्सापि अधिट्ठानं अधिट्ठानमेवा’’ति (पारा. अट्ठ. २.४६५) वचनतो अरजितेपि अधिट्ठानं रुहतीति. तेन सूचिकम्मं कत्वा रजित्वा कप्पबिन्दुं दत्वा अधिट्ठातब्बन्ति नियमो कातब्बो, न कातब्बोति? कत्तब्बोव. पत्तो विय अधिट्ठितो यथा पुन सेतभावं वा तम्बभावं वा पत्तो अधिट्ठानं न विजहति, न च पन तादिसो ¶ यं अधिट्ठानं उपगच्छति, एवमेतं दट्ठब्बन्ति. ‘‘स्वे कथिनं उद्धरिस्सती’’ति लद्धचीवरं सचे अज्जेव न अधिट्ठाति, अरुणुग्गमने एव निस्सग्गियं होति. कस्मा? ‘‘निट्ठितचीवरस्मि’’न्तिआदिना (पारा. ४६२-४६३;) सिक्खापदस्स वुत्तत्ता. कथिनब्भन्तरे दसाहतो उत्तरिपि परिहारं लभति, कथिनतो पन पच्छा एकदिवसम्पि न लभति. यथा किं – यथा अत्थतकथिनो सङ्घो तिचीवरं अत्थतदिवसतो पट्ठाय याव उब्भारा आनिसंसं लभति, न ततो परं, एवं अत्थतदिवसतो पट्ठाय याव उब्भारा लभति, उद्धते पन कथिने एकदिवसम्पि न लभति. एत्थाह – उब्भतदिवसतो पट्ठाय पुन दसाहं लभतीति? न, कस्मा? ‘‘अनुजानामि, भिक्खवे, दसाहपरमं अतिरेकचीवरं धारेतु’’न्ति वचनतो. कथिनब्भन्तरेपि एकादसे अरुणुग्गमने निस्सग्गियन्ति आपन्नं. तं पन अतिप्पसङ्गं निवारेतुं ‘‘निट्ठितचीवरस्मि’’न्तिआदि वुत्तं, न कथिनदिवसानि अदिवसानीति दीपनत्थं. अयमत्थो तत्थ तत्थ आविभविस्सति. अथ वा वस्सिकसाटिका अनतिरित्तप्पमाणा नामं गहेत्वा वुत्तनयेनेव चत्तारो वस्सिके मासे अधिट्ठातब्बा, ततो परं पच्चुद्धरित्वा विकप्पेतब्बाति वुत्तं. एत्थ ‘‘पच्चुद्धरित्वा’’ति वचने उपोसथदिवसे एव पच्चुद्धरित्वा विकप्पेत्वा ठपितं होति, ततो परं हेमन्तस्स पठमदिवसतो पट्ठाय पच्चुद्धरणाभावा. एवं कथिनब्भन्तरे उप्पन्नचीवरम्पि वेदितब्बन्ति लिखितं.

कथिनसिक्खापदवण्णना निट्ठिता.

२. उदोसितसिक्खापदवण्णना

‘‘अत्थतकथिनस्स ¶ पञ्च मासे बद्धसीमायं यत्थ कत्थचि चीवरं निक्खिपित्वा पक्कमन्तस्स अनापत्ती’’ति अट्ठकथायं वुत्तं. ‘‘अबद्धसीमायपि वट्टती’’ति इदं अबद्धसीमायं कथिनत्थारञ्च आरञ्ञकसिक्खापदञ्च साधेतीति लिखितं. इदानि –

‘‘छिन्नं धुतङ्गं सासङ्क-सम्मतो सन्तरुत्तरं;

अचीवरस्सानापत्ति, पच्चुद्धारादिसिद्धितो’’ति. (वजिर. टी. पाराजिक ४७९) –

इदं पकिण्णकं वेदितब्बं.

तत्रायं ¶ चोदनापुब्बङ्गमविनिच्छयो – केचि ‘‘दिगुणं सङ्घाटि’’न्ति (महाव. ३४८) वचनतो ‘‘एकच्चिका सङ्घाटि नाधिट्ठातब्बा. सचे अधिट्ठाति, न रुहती’’ति वत्वा उपसम्पदापेक्खानम्पि दिगुणंयेव सङ्घाटिं दत्वा उपसम्पादेन्ति, ते इमिना सुत्तलेसेन सञ्ञापेतब्बा. भगवता हि ‘‘छिन्नकं सङ्घाटिं, छिन्नकं उत्तरासङ्गं, छिन्नकं अन्तरवासक’’न्ति पठमं अनुञ्ञातं. ततो ‘‘अञ्ञतरस्स भिक्खुनो तिचीवरे करियमाने सब्बं छिन्नकं नप्पहोति. द्वे छिन्नकानि एकं अछिन्नकं नप्पहोति, द्वे अछिन्नकानि एकं छिन्नकं नप्पहोती’’ति इमस्मिं वत्थुस्मिं ‘‘अनुजानामि, भिक्खवे, अन्वाधिकम्पि आरोपेतु’’न्ति (महाव. ३६०) अनुञ्ञातं, तस्मा एकच्चिकापि सङ्घाटि वट्टतीति सिद्धं. या छिज्जमानापि नप्पहोति, तस्सा कुतो दिगुणताति? अट्ठकथायम्पिस्स वुत्तं ‘‘अन्वाधिकम्पि आरोपेतुन्ति आगन्तुकपत्तम्पि दातुं, इदं पन अप्पहोनके आरोपेतब्बं. सचे पहोति, आगन्तुकपत्तं न वट्टति, छिन्दितब्बमेवा’’ति (महाव. अट्ठ. ३६०). कथिनं पन छिन्नकमेव वट्टति, आवेणिकलक्खणत्ता, ‘‘छिन्नकं दिगुणं नप्पहोती’’ति वचनाभावतो चाति सन्निट्ठानमेत्थ गन्तब्बन्ति.

धुतङ्गन्ति अनुपसम्पन्नानं तेचीवरिकधुतङ्गाभावतो तिचीवरेनेव तेचीवरिकोति, तेसं अधिट्ठानाभावतो ‘‘अधिट्ठितेनेवा’’ति वत्तब्बं होतूति चे? न, धुतङ्गभेदेन विरोधप्पसङ्गतो. चतुत्थचीवरसादियनेन हि धुतङ्गभेदो, न तिचीवरविप्पवासेन, नापि अतिरेकचीवरसादियनेन, नापि अतिरेकचीवरधारणेन. यस्मा पन भिक्खूनं एव भगवता अधिट्ठानवसेन नव चीवरानि ¶ अनुञ्ञातानि, जातिवसेन च वुत्तानि, न एवं अनुपसम्पन्नानं, तस्मा नेसं चीवरनियमाभावा न तं धुतङ्गं अनुञ्ञातं गहट्ठानं विय. तस्मा तस्स समादानविधाने अवचनतो च सन्निट्ठानमेत्थ गन्तब्बन्ति.

सासङ्कसम्मतोति कङ्खावितरणियं (कङ्खा. अट्ठ. सासङ्कसिक्खापदवण्णना) सासङ्कसिक्खापदे विसुं अङ्गानि न वुत्तानि, ‘‘सेसमेत्थ चीवरवग्गस्स दुतियसिक्खापदे वुत्तनयेनेव वेदितब्ब’’न्ति वुत्तं, न च पनेतं वुत्तं. तत्थ रत्तिविप्पवासो चतुत्थमङ्गं, इध छारत्तविप्पवासो, अयमेत्थ विसेसोति. तस्मा अङ्गसामञ्ञतो च सम्मुतिसामञ्ञतो च सासङ्कसिक्खापदमेविदन्ति इदं ¶ निप्पदेसं, तं सप्पदेसं मासपरमत्ता. तत्थ बहिगामेपि गामसीमं ओक्कमित्वा वसित्वा पक्कमन्तस्स अनापत्ति, इध न तथा. इध अनन्तरे अनन्तरे अरुणुग्गमने निस्सग्गियं, तत्थ सत्तमेति अयं इमेसं द्विन्नं विसेसो. अङ्गानि पन चीवरनिक्खेपनङ्गसम्पत्तितो विपरियायेन, इध वुत्तनयेन च सिद्धत्ता न वुत्तानि. तानि कामं न वुत्तानि, तथापि चतुत्थमङ्गं विसेसितब्बं, न पन विसेसितं. किं कारणं? इध वुत्तनिस्सज्जनक्कमेन निस्सज्जित्वा आपत्तिदेसनतो, तत्थापन्नापत्तिविमोक्खदीपनत्थं. संवच्छरविप्पवुत्थम्पि रत्तिविप्पवुत्थमेव, पगेव छारत्तविप्पवुत्थं. एवं सन्तेपि तत्थ यथावुत्तअङ्गसम्पत्तिया सति तत्थ वुत्तनयेनेव निस्सज्जितब्बं. हेमन्ते, गिम्हे वा निस्सज्जति चे? इध वुत्तनयेनापि निस्सज्जितुं वट्टतीति ञापनत्थं चतुत्थमङ्गं न विसेसितन्ति नो तक्कोति आचरियो. मासातिक्कन्तं, दसाहातिक्कन्तम्पि चीवरं ‘‘दसाहातिक्कन्त’’न्ति वत्वा निस्सट्ठमेव, न ऊनमासं हुत्वा ‘‘दसाहातिक्कन्त’’न्ति वत्वा, मासातिक्कन्त’’न्ति वत्वाति एके. तथापि सचे पच्चासाचीवरं होति, निस्सग्गियं. ‘‘दसाहातिक्कन्त’’न्ति वत्वा मूलचीवरं पन ‘‘मासातिक्कन्त’’न्ति वत्वा निस्सज्जितब्बं.

‘‘सन्तरुत्तर’’न्ति वा ‘‘सङ्घाटि’’न्ति वा ‘‘चीवर’’न्ति वा किं तिचीवरं, उदाहु अञ्ञम्पीति? किञ्चेत्थ – यदि तिचीवरमेव पटिसिद्धं, परियापन्नवसेन अच्छिन्नचीवरअअछन्दनधोवापनविञ्ञत्तिआदिविरोधो. अथ अञ्ञम्पि ‘‘निट्ठितचीवरस्मि’’न्ति एवमादिना विरोधोति? वुच्चते – न नियमतो वेदितब्बं यथासम्भवं गहेतब्बतो. तथा हि ‘‘चीवरं निक्खिपित्वा सन्तरुत्तरेन जनपदचारिकं पक्कमन्ती’’ति (पारा. ४७१) एवमादीसु तिचीवरमेव, ‘‘न, भिक्खवे, सन्तरुत्तरेन गामो पविसितब्बो (महाव. ३६२), सन्तरुत्तरपरमं ततो चीवरं सादितब्ब’’न्ति (पारा. ५२३-५२४) एवमादीसु यं किञ्चि, तथा ‘‘सगुणं कत्वा सङ्घाटियो दातब्बा, निवासनं दातब्बं, सङ्घाटि दातब्बा, हन्द ते, आवुसो ¶ , सङ्घाटि, देहि मे पट’’न्ति एवमादीसु. वुत्तञ्हेतं ‘‘सब्बञ्हि चीवरं सङ्घटितट्ठेन ‘सङ्घाटी’ति वुच्चती’’ति (पाचि. अट्ठ. ८९८). तथा ‘‘निट्ठितचीवरस्मि’’न्ति एत्थापीति एके. अन्तोसमये यावदत्थं चीवरं अनुञ्ञातं, तं सब्बं करियमानं कदा निट्ठानं गच्छिस्सति, तस्मा तिचीवरमेवाति एके.

अचीवरस्सानापत्ति ¶ पच्चुद्धारादिसिद्धितोति किं वुत्तं होति – उदोसितसिक्खापदस्स निप्पयोजनभावप्पसङ्गतो तिचीवरविप्पवासे तेचीवरस्स आपत्तीति एके. तत्थेतं वुच्चति न होति आपत्ति पच्चुद्धारादिसिद्धितो. ‘‘अनापत्ति अन्तोअरुणे पच्चुद्धरति विस्सज्जेती’’ति (पारा. ४९६) हि वुत्तं. अञ्ञथा पच्चुद्धरन्तस्स, अन्तोअरुणे विस्सज्जेन्तस्स च याव अञ्ञो नाधिट्ठाति, ताव आपत्तिं आपज्जति यथावुत्तनयेनेव. अञ्ञथा सत्तब्भन्तरेन विप्पवासस्साति विप्पवासतो यथारुतंयेव सति विप्पवासे विप्पवासतो, अविप्पवासे सति अविप्पवासतोति.

उदोसितसिक्खापदवण्णना निट्ठिता.

३. अकालचीवरसिक्खापदवण्णना

अपरिक्खित्तस्स परिक्खेपारहट्ठानस्स दुब्बिजानत्ता तं दस्सेतुं ‘‘अपिच भिक्खून’’न्तिआदि वुत्तं. विहारपरियन्ते निविट्ठधुवसन्निपातट्ठानतो वा परियन्ते ठितभोजनसालतो वा निबद्धवसनकआवासतो वाति एवं गहेतब्बं. सचे विहारे सन्निपतितभिक्खूहि सद्धिं एकाबद्धा हुत्वा योजनसतम्पि पूरेत्वा निसीदन्ति, योजनसतम्पि उपचारसीमा होतीति अत्थो. ‘‘समानसंवासकसीमाया’’ति वुत्ते खण्डसीमादीसु ठितानं न पापुणाति, तासं विसुं समानसंवासकसीमत्ताति च समानसंवासकअविप्पवाससीमानं इदं नानत्तं. ‘‘अविप्पवाससीमाय दम्मी’’ति दिन्नं पन गामे ठितानं न पापुणाति. कस्मा? ‘‘ठपेत्वा गामञ्च गामूपचारञ्चा’’ति (महाव. १४४) वचनतो. ‘‘समानसंवासकसीमाया’’ति दिन्नं पन यस्मिं ठाने अविप्पवाससीमा अत्थि, तत्थ ठितानम्पि. ‘‘तत्र ठितानञ्च पापुणाती’’ति च, ‘‘खण्डसीमायं ठत्वा ‘सीमट्ठकसङ्घो गण्हातू’ति वुत्ते उपचारसीमाय एव परिच्छिन्दित्वा दातब्ब’’न्ति च, ‘‘तेसं बहिसीमट्ठानम्पि पापुणाति याव कथिनस्सुब्भाराति अत्थो’’ति च, ‘‘अनत्थते पन कथिने अन्तोहेमन्ते सचे विहारं पविसित्वा ‘वस्संवुट्ठसङ्घस्स दम्मी’ति वदति, ये तत्थ वस्सच्छेदं अकत्वा पच्छिमवस्संवुट्ठा, तेसं बहिसीमट्ठानम्पि पापुणाती’’ति विनयधरा ¶ परिच्छिन्दन्ति, अट्ठकथायं पन अनागतं. तस्मा समन्तपासादिकायं ‘‘लक्खणञ्ञू वदन्ती’’ति (महाव. अट्ठ. ३७९) वुत्तन्ति च, ‘‘‘चीवरमासतो पट्ठाय याव ¶ हेमन्तस्स पच्छिमो दिवसो, ताव वस्सावासिकं देमा’ति वुत्ते कथिनं अत्थतं वा होतु, अनत्थतं वाति यं समन्तपासादिकावचनं (महाव. अट्ठ. ३७९), एत्थापि यदि अत्थतं, पुरिमवस्संवुट्ठा पञ्च मासे. यदि अनत्थतं, पच्छिमवस्संवुट्ठा चत्तारो मासे लभन्तीति विनिच्छयो’’ति च लिखितं.

‘‘येहि मय्हं यागु पीताति येहि निमन्तितेहि मय्हं यागु पीताति अधिप्पायो. तस्मा येहि निमन्तितेहि यागु पीता, तेसंयेव पापुणातीति वुत्तं. अञ्ञथा ‘येहि मय्हं यागु पीता’ति वुत्ते निमन्तिता वा होन्तु, अनिमन्तिता वा, येहि पीता, तेसं पापुणितब्बानी’’ति वदन्ति. एत्थ ‘‘निट्ठितचीवरस्मिं भिक्खुना उब्भतस्मिं कथिने’’ति वदन्तो ञापेति एत्थन्तरे तिण्णम्पि अकालचीवरानं उप्पत्तिअभावन्ति. कस्मा पन पदभाजने वित्थारितानीति? वुच्चते – इदं पन सिक्खापदं अधिट्ठानं सन्धाय न वुत्तं किन्तु पठमसिक्खापदे दसाहपरमं अनुजानित्वा तस्मिं अप्पहोन्ते सचे पच्चासा अत्थि, तमेव वड्ढेत्वा मासमनुजानन्तो इमम्पि अत्थविसेसं दीपेति. अकालचीवरं नाम सम्मुखीभूतेन भाजेतब्बं. तं पन ‘‘आकङ्खमानेन भिक्खुना पटिग्गहेतब्ब’’न्ति इमिना सिक्खापदेन वड्ढेत्वा वुत्तन्ति. तस्मा तीणिपि पदभाजने वित्थारितानीति.

‘‘खिप्पमेव कारेतब्बन्ति सीघं अन्तोदसाहेयेव कारेतब्ब’’न्ति इदं पन पहोनकभावे पुरिमसिक्खापदलक्खणेनाति दीपेतुं वुत्तं. तस्मा एवं ‘‘सीघ’’न्ति वा ‘‘लहु’’न्ति वा आदिना अवत्वापि ‘‘दसाहा’’ति वुत्तन्ति. अत्थतकथिनस्स एवं होतु, अनत्थते पन कथिने कथन्ति वुत्ते अनत्थतस्स पटिक्खेपतं दस्सेतीति वुत्तो अपस्सन्तो विघातं आपज्जतीति (वजिर. टी. पाराजिक ४९९-५००) लिखितं.

अकालचीवरसिक्खापदवण्णना निट्ठिता.

४. पुराणचीवरसिक्खापदवण्णना

‘‘साकियानियो विय सुद्धभिक्खुसङ्घे वा’’ति इदं ‘‘भिक्खुनी नाम उभतोसङ्घे उपसम्पन्ना’’ति ¶ (पारा. ५०५) इमिना विरुज्झतीति चे? न, अधिप्पायाजाननतो ¶ . भिक्खूनं सन्तिके उपसम्पदाय पटिक्खित्तत्ता तदनुप्पसङ्गभया एवं वुत्तन्ति वेदितब्बं.

एकेन वत्थुनाति येन केनचि पठमेन. अवुत्ता वा धोवतीति अवुत्ता धोवति, रजति आकोटेतीति अत्थो. ‘‘‘अवुत्ता’ति वचनतो अवादापेत्वा धोवनादीसु अनापत्ती’’ति लिखितं. इध चीवरं नाम निवासनपारुपनूपगमेव. यदि एवं ‘‘निवासनपारुपनूपगमेव वत्तब्ब’’न्ति चे? तं न वत्तब्बं ‘‘पुराणचीवर’’न्ति इमिनाव सिद्धत्ता. वुत्तञ्हेतं ‘‘पुराणचीवरं नाम सकिं निवत्थम्पि सकिं पारुतम्पी’’ति (पारा. ५०५).

पुराणचीवरसिक्खापदवण्णना निट्ठिता.

५. चीवरप्पटिग्गहणसिक्खापदवण्णना

उपचारो द्वादसहत्थो. अचित्तकत्ता कथं पंसुकूलं वट्टतीति चे? ताय तस्स भिक्खुनो अदिन्नत्ता, भिक्खुना च ततो भिक्खुनितो अग्गहितत्ता च.

चीवरप्पटिग्गहणसिक्खापदवण्णना निट्ठिता.

६. अञ्ञातकविञ्ञत्तिसिक्खापदवण्णना

ञातकप्पवारिते वा विञ्ञापेन्तस्साति एत्थ च सङ्घवसेन पवारितेसु पमाणमेव वट्टति. पुग्गलिकप्पवारणाय यं यं पवारेति, तं तंयेव विञ्ञापेतब्बन्ति लिखितं.

अञ्ञातकविञ्ञत्तिसिक्खापदवण्णना निट्ठिता.

७. ततुत्तरिसिक्खापदवण्णना

पकतिया सन्तरुत्तरेन चरति कथिनपलिबोधवसेन वा सासङ्कसिक्खापदवसेन वा. एत्थ सिया – ‘‘न मत्तं जानित्वा बहुं चीवरं विञ्ञापेस्सन्ति, दुस्सवाणिज्जं वा’’तिआदिना (पारा. ५२२) उज्झायन्तानं सुत्वा भगवापि छब्बग्गिये भिक्खू ¶ ‘‘कथञ्हि नाम तुम्हे मोघपुरिसा ¶ न मत्तं जानित्वा बहुं चीवरं विञ्ञापेस्सथा’’ति (पारा. ५२२) वत्वा सिक्खापदस्स पञ्ञत्तत्ता च इमिस्सं कङ्खावितरणियं ‘‘बहुचीवरविञ्ञापनवत्थुस्मिं पञ्ञत्त’’न्ति वुत्तत्ता, समन्तपासादिकायं ‘‘न हि अनच्छिन्नचीवरा अत्तनो अत्थाय साखापलासं भञ्जितुं लभन्ति, अच्छिन्नचीवरानं पन अत्थाय लभन्ती’’ति वुत्तत्ता च अञ्ञस्सत्थाय पमाणं विञ्ञापेतुं वट्टतीति चे? न, कस्मा? अञ्ञातकविञ्ञत्तिसिक्खापदस्स अट्ठुप्पत्तिया एव अञ्ञातकविञ्ञत्ति वारिता. तस्स सिक्खापदस्स अनापत्ति. पाळियं (पारा. ५२१) ‘‘अञ्ञस्सत्थाया’’ति इमिस्सा अनापत्तिपाळिया अञ्ञस्सत्थाय विञ्ञापेन्तो तस्स ञातकप्पवारिते एव विञ्ञापेति, न अञ्ञेति वचनतो च वारिता. तस्मा भगवापि ‘‘बहुं चीवरं विञ्ञापेस्सथा’’ति (पारा. ५२२) विगरहित्वा सिक्खापदं पञ्ञापेन्तो ‘‘अभिहट्ठुं पवारेय्या’’ति वुत्तनयेनेव पमाणतो गहणं अनुजानि, न अञ्ञस्सत्थाय पमाणतो विञ्ञापनं. यस्मा पनिमं सिक्खापदं अञ्ञस्सत्थाय विञ्ञापनवत्थुस्मिंयेव पञ्ञत्तं, तस्मा इध ‘‘अञ्ञस्सत्थाया’’ति न वुत्तं, न न लब्भतीति कत्वा.

अट्ठकथासु ‘‘अञ्ञातकप्पवारितट्ठाने पकतिया बहुम्पि वट्टति, अच्छिन्नकारणा पमाणमेव वट्टती’’ति वुत्तं. तं ‘‘अनापत्ति ञातकानं पवारितान’’न्ति (पारा. ५२६) वुत्तअनापत्तिपाळिया न समेतीति समन्तपासादिकायं (पारा. अट्ठ. २.५२६) वुत्तत्ता इधापि वुत्तनयेनेव ञातकप्पवारिते विञ्ञापेन्तस्स अत्तनो धनेन गण्हन्तस्स अनापत्तीति लिखितं. ‘‘अञ्ञस्सत्थाया’’ति निदानविरोधतो न वुत्तं, तथापि अनन्तरे वुत्तनयेनेव लब्भति एवाति वदन्ति.

ततुत्तरिसिक्खापदवण्णना निट्ठिता.

८. उपक्खटसिक्खापदवण्णना

पठमउपक्खटे ‘‘पुब्बे अप्पवारितो’’ति (पारा. ५२८) वचनतो तस्मिं खणे पवारितोपि अप्पवारितोव होतीति वेदितब्बं.

उपक्खटसिक्खापदवण्णना निट्ठिता.

९. दुतियउपक्खटसिक्खापदवण्णना

दुतियउपक्खटेन ¶ ¶ किं पयोजनन्ति चे? नत्थि पयोजनं, केवलं अट्ठुप्पत्तिवसेन पन पञ्ञत्तं भिक्खुनिया रहोनिसज्जसिक्खापदं विय. एवं सन्ते सङ्गीतिकारकेहि सङ्गीतिं अनारोपेतब्बं भवेय्य विनापि तेन तदत्थसिद्धितो, अनिस्सरत्ता, अनारोपेतुं अनुञ्ञातत्ता च. वुत्तञ्हेतं ‘‘आकङ्खमानो, आनन्द, सङ्घो…पे… समूहनेय्या’’ति (दी. नि. २.२१६; चूळव. ४४१). इदं सब्बमकारणं. न हि बुद्धा अप्पयोजनं वचनं निच्छारेन्ति, पगेव सिक्खापदं. तेनेवाह अट्ठकथायं ‘‘इमिनाव नयेन अत्थो वेदितब्बो. इदञ्हि पुरिमस्स अनुपञ्ञत्तिसदिस’’न्तिआदि. अनुपञ्ञत्ति च निप्पयोजनं नत्थि. तंसदिसञ्चेतं, न निप्पयोजनन्ति दस्सितं होति. एवं सन्ते को पनेत्थ अत्थविसेसोति? ततो आह ‘‘केवलं तत्थ एकस्स पीळा कता, इध द्विन्नं, अयमेत्थ विसेसो’’ति. इमिना अत्थविसेसेन को पनञ्ञो अतिरेकत्थो दस्सितोति? पोराणगण्ठिपदे ताव वुत्तं ‘‘एकस्मिम्पि वत्थुस्मिं उभिन्नम्पि पीळा कातुं न वट्टतीति अयमतिरेकत्थो दस्सितो’’ति. तेनेतं दीपेति ‘‘न केवलं पटिलद्धचीवरगणनाय एव आपत्तिगणना, पीळितपुग्गलसङ्खातवत्थुगणनायपी’’ति.

होन्ति चेत्थ –

‘‘वत्थुतो गणनायपि, सिया आपत्ति नेकता;

इति सन्दस्सनत्थञ्च, दुतियूपक्खटं इध.

‘‘कायसंसग्गसिक्खाय, विभङ्गे विय किन्तेतं;

एकित्थियापि नेकता, आपत्तीनं पयोगतो’’ति. (वजिर. टी. पाराजिक ५३२);

अपिचेतं सिक्खापदं तंजातिकेसु सिक्खापदेसु सब्बेसुपि गहेतब्बविनिच्छयस्स दस्सनप्पयोजनन्ति वेदितब्बं. आह च –

‘‘अञ्ञातिकाय बहुताय विमिस्सताय;

आपत्तियापि बहुता च विमिस्सता च;

इच्चेवमादिविधिसम्भवदस्सनत्थं ¶ ;

सत्था उपक्खटमिदं दुतियं अवोचा’’ति. (वजिर. टी. पाराजिक ५३२);

तस्सायं ¶ सङ्खेपतो अधिप्पायपुब्बङ्गमा विचारणा – पुराणचीवरं एकमेव भिक्खु भिक्खुनीहि द्वीहि, बहूहि वा धोवापेति, भिक्खुनिगणनाय पाचित्तियगणना. तथा द्विन्नं, बहूनं वा साधारणं एकमेव चीवरं अञ्ञत्र पारिवत्तका पटिग्गण्हाति, इधापि तथा द्विन्नं, बहूनं वा साधारणमेकं विञ्ञापेति, विञ्ञत्तपुग्गलगणनाय आपत्तिगणना. तथा अञ्ञेसुपि एवरूपेसु सिक्खापदेसु नयो नेतब्बो. अयं ताव बहुताय नयो.

विमिस्सताय पन ञातिकाय, अञ्ञातिकाय च एकं धोवापेति, एकतो निट्ठापने एकं पाचित्तियं. अथ ञातिका पठमं थोकं धोवित्वा ठिता, पुन अञ्ञातिका सुधोतं करोति, निस्सग्गियं पाचित्तियं. अथ अञ्ञातिका पठमं धोवति, पच्छा ञातिका सुधोतं करोति, अञ्ञातिकाय पयोगवसेन भिक्खुनो दुक्कटमेव. अञ्ञातिकाय, ञातिकाय च अञ्ञातिकसञ्ञी, वेमतिको, ञातिकसञ्ञी वा धोवापेति, यथावुत्तनयेन निस्सग्गियदुक्कटादिआपत्तिभेदगणना वेदितब्बा. तथा अञ्ञातिकाय, ञातिकाय च सन्तकं चीवरं उभोहि एकतो दिय्यमानं पटिग्गण्हाति, निस्सग्गियमेव. अथ अञ्ञातिकाय एव हत्थतो पटिग्गण्हाति, निस्सग्गियमेव. अथ ञातिकाय हत्थतो पटिग्गण्हाति, अनापत्ति. अथ उभोसु अञ्ञातिकादिसञ्ञी, वुत्तनयेनेव निस्सग्गियदुक्कटादिआपत्तिभेदगणना वेदितब्बा. तथा अञ्ञातिकविञ्ञत्तिआदीसुपि यथासम्भवं नयो नेतब्बो. अयं विमिस्सताय नयो.

आदिसद्देन पन अनेके अञ्ञातिका विञ्ञत्ता, विञ्ञत्तपुग्गलगणनाय दुक्कटं. एको देति, एको न देति, निस्सग्गियं. अथ अविञ्ञत्तो देति, न निसग्गियं. अथ विञ्ञत्ताविञ्ञत्तानं साधारणं विञ्ञत्तो देति, निस्सग्गियं. उभो देन्ति, निस्सग्गियमेव. अविञ्ञत्तो देति, निस्सग्गियेन अनापत्ति. विञ्ञत्तस्स वचनेन अविञ्ञत्तो देति, अनापत्ति एव. तथा उपक्खटादीसुपि यथासम्भवं नयो नेतब्बो.

एत्तावता सङ्खेपतो अञ्ञातिकायादिगाथा वुत्ताधिप्पाया होति. यं पनेत्थ भिक्खुनिया रहोनिसज्जसिक्खापदं निप्पयोजनताय निदस्सनं ¶ वुत्तं, तस्स पयोजनविसेसो तस्मिंयेव आविभविस्सतीति ¶ . एवमेव अञ्ञत्थपि वचनेन, विसेसअट्ठुप्पत्तिवसेन च सिक्खापदेसु ञातब्बं विसेसप्पयोजनन्ति.

दुतियउपक्खटसिक्खापदवण्णना निट्ठिता.

१०. राजसिक्खापदवण्णना

‘‘ठानं भञ्जति, आगतकारणं विनासेती’’ति वुत्तत्ता पुन चोदनं न लभतीति एके. आगमनस्स सात्थकं न होति, चीवरं न लभिस्सति पटिसन्थारस्स कतत्ताति एके. चोदनालक्खणं न होतीति कत्वा वुत्तन्ति एके. ‘‘धम्मदेसनाधिप्पायादिना न पटिसन्थारो कातब्बो’’ति उपतिस्सत्थेरो ‘‘‘आगतकारणं विनासेती’ति चोदनाठानानि भञ्जति, चोदेतुकामो अकत्तब्बमकासि, तप्पच्चया वत्तभेदे दुक्कट’’न्ति च वदति. धम्मसिरित्थेरो पन ‘‘आसने चे निसीदति, एकाय निसज्जाय द्वे ठानानि भञ्जति. आमिसं चे पटिग्गण्हाति, एकेन पटिग्गहणेन द्वे ठानानि भञ्जति. धम्मं चे भासति, धम्मदेसनासिक्खापदे वुत्तपरिच्छेदाय एकाय वाचाय द्वे ठानानि भञ्जति. तं सन्धाय ‘आगतकारणं विनासेती’ति वुत्त’’न्ति वदति. ‘‘एसो खो’’ति वुत्तेन सञ्ञत्तो एको, ‘‘अयं वेय्यावच्चकरोति…पे… अवुत्तेपि चोदेतुं वट्टती’’ति वुत्तो दुतियो, सचे पन दूतो गच्छन्तोव ‘‘अहं तस्स हत्थे दस्सामी’’तिआदिना वुत्तो ततियो, ‘‘अञ्ञं वा पेसेत्वा आरोचापेती’’ति वुत्तो चतुत्थोति यथा भिक्खुना निद्दिट्ठा चत्तारो, तथेव दूतेन निद्दिट्ठा चत्तारो. मुखवेवटिककप्पियकारको, परम्मुखकप्पियकारको चेति एतेसु अञ्ञातकअप्पवारितेसु विय पटिपज्जितब्बन्ति लिखितं.

राजसिक्खापदवण्णना निट्ठिता.

चीवरवग्गो पठमो.

२. एळकलोमवग्गो

१. कोसियसिक्खापदवण्णना

कारापेय्याति ¶ ¶ अत्तनो च परस्स च उभिन्नञ्च कोसियं एकतो गण्हित्वा वुत्तं, उभो वा एकतो करोन्तीति अत्थतो वेदितब्बं. तत्थ अत्तना कतं चे, ‘‘निस्सज्जनकाले सयं कतं निस्सग्गिय’’न्ति वत्तब्बं. उभोहि चे कतं, यथापाळिमेव.

कोसियसिक्खापदवण्णना निट्ठिता.

२. सुद्धकाळकसिक्खापदवण्णना

यथा पठमे ‘‘एकेनपि कोसियंसुना’’ति (कङ्खा. अट्ठ. कोसियसिक्खापदवण्णना) वुत्तं, तथा इध ‘‘एकेनपि अञ्ञेन अमिस्सितान’’न्ति वचनाभावतो अञ्ञेन मिस्सभावे सतिपि अपञ्ञायमानरूपकं चे, ‘‘सुद्धकाळक’’मिच्चेव वुच्चतीति वदन्ति.

सुद्धकाळकसिक्खापदवण्णना निट्ठिता.

३. द्वेभागसिक्खापदवण्णना

‘‘तुलयित्वा’’ति वचनतो यथा तुलाधारणाय काळकाधिका न होन्ति, तथा काळकानं द्वे भागा गहेतब्बा उक्कट्ठपरिच्छेदेन. ‘‘एकस्सापि काळकलोमस्स अतिरेकभावे निस्सग्गियन्ति वचनं तुलाधारणाय किञ्चापि न समेति, अचित्तकत्ता पन सिक्खापदस्स पुब्बे तुलाय धारयित्वा ठपितेसु एकम्पि लोमं तत्थ पतेय्य, निस्सग्गियन्ति अयमधिप्पायोति नो तक्को’’ति आचरियो. वुत्तपरिच्छेदेन अग्गहणं अकिरिया, सन्थतकरणं किरिया.

द्वेभागसिक्खापदवण्णना निट्ठिता.

४. छब्बस्ससिक्खापदवण्णना

‘‘ओरेन ¶ ¶ चे छन्नं वस्सान’’न्ति वुत्तत्ता छब्बस्से परिपुण्णे कातुं वट्टतीति निट्ठानदिवसतो पट्ठाय छन्नं वस्सानं परिच्छेदो वेदितब्बो. यानि पनेत्थ अतिरेकछब्बस्सवसेन वा सम्मुतिवसेन वा कतानि, सब्बानि तानि एकतो परिभुञ्जितुं वट्टन्तीति. गिलानस्स च एकं नप्पहोतीति अनेकम्पि वट्टति. यतो पट्ठाय रोगस्स मन्दताय सन्थतं आदाय गन्तुं सक्कोति, ततो पट्ठाय सम्मुति वा रोगो वा न रक्खतीति एके. अपिच छवस्सबुद्धनिम्मलं सिक्खापदं विचारेतुं गम्भीरत्ता. तस्मा छवस्से कम्मं कतन्ति.

छब्बस्ससिक्खापदवण्णना निट्ठिता.

५. निसीदनसिक्खापदवण्णना

कस्मा पनेत्थ ‘‘सन्थतं पन भिक्खुना’’ति सिक्खापदं अपञ्ञपेत्वा ‘‘निसीदनसन्थत’’न्ति पञ्ञत्तं, ननु एत्थ कारणेन भवितब्बन्ति? अत्थि कारणं, चीवरसञ्ञिताय सन्थतानं उज्झितत्ता तेसं अचीवरभावदस्सनत्थं तथा पञ्ञत्तं भगवताति वुत्तं होति. तस्मा ते भिक्खू तेचीवरिकधुतङ्गभेदभया सन्थते चतुत्थचीवरसञ्ञिताय सन्थतानि उज्झित्वा तेरस धुतङ्गानि समादयिंसु, भगवा च तेसं सन्थतं अनुजानि. ततो तेसं भिक्खूनं एवं होति ‘‘निसीदनचीवरसण्ठानम्पेतं निसीदनसन्थतं नो भगवता अनुञ्ञातं चतुत्थचीवरभावेन, पगेव कतसन्थतं वा’’ति. ततो ‘‘सन्थते तेसं चीवरसञ्ञिता न भविस्सती’’ति तदत्थं भगवता ‘‘सन्थत’’न्ति अपञ्ञपेत्वा ‘‘निसीदनसन्थत’’न्ति पञ्ञत्तन्ति अधिप्पायो. इमेसु पन पञ्चसु सन्थतेसु पुरिमानि तीणि विनयकम्मं कत्वा पटिलभित्वापि परिभुञ्जितुं न वट्टन्ति अकप्पियत्ता, पच्छिमानि द्वे वट्टन्तीति (वजिर. टी. पाराजिक ५६६-५६७) लिखितं. कथं पञ्ञायतीति चे? ‘‘अनापत्ति अञ्ञेन कतं पटिलभित्वा परिभुञ्जती’’ति (पारा. ५७०) वचनतोति वेदितब्बं.

निसीदनसिक्खापदवण्णना निट्ठिता.

६. एळकलोमसिक्खापदवण्णना

‘‘अद्धानमग्गप्पटिपन्नस्सा’’ति ¶ ¶ इमिना पकतिया दीघमग्गं पटिपन्नस्स उप्पन्नानिपि तियोजनपरममेव हरितब्बानि, पगेव अप्पटिपन्नस्साति दस्सेति. पटिपन्नस्स चे, अद्धानं नाम पटिपन्नस्स अकामा वस्संवुट्ठभिक्खुनिया मग्गप्पटिपत्ति वियाति दस्सेति. अद्धानमग्गप्पटिपन्नस्स निस्सग्गियन्ति वा सम्बन्धो. तेनेव वासाधिप्पायस्स पटिप्पस्सद्धगमनुस्साहत्ता ‘‘अप्पटिपन्नो’’ति सङ्खं गतस्स अनापत्तीति सिद्धं. इमस्मिं पन अत्थविकप्पे ‘‘भिक्खुनो पनेव एळकलोमानि उप्पज्जेय्युं…पे… असन्तेपि हारके अद्धानमग्गप्पटिपन्नस्स निस्सग्गियं पाचित्तिय’’न्ति योजना वेदितब्बा. यस्मा वा एळकलोमानं उप्पत्तिट्ठानतो पट्ठाय तियोजनपरमता अधिप्पेता, मग्गं अप्पटिपन्नस्स च तियोजनपरमता नत्थि, तस्मा ‘‘अद्धानमग्गप्पटिपन्नस्स उप्पज्जेय्यु’’न्ति वुत्तं. तेन अच्छिन्नं पटिलभित्वा हरतो च अनापत्तीति सिद्धं. पटिलाभो हि तेसं उप्पत्ति नामाति.

‘‘आकङ्खमानेन भिक्खुना पटिग्गहेतब्बानी’’ति इमिना अत्तना पटिग्गहितानंयेव तियोजनातिक्कमे आपत्तीति दस्सेति. तेन अनाकङ्खमानेन परसन्तकानि पटिग्गहितानि हरन्तस्स अनापत्तीति सिद्धं.

अङ्गेसु ‘‘अत्तनो सन्तकता’’ति नत्थि, अयमत्थो ‘‘भिक्खुनो उप्पज्जेय्यु’’न्ति इमिना, ‘‘अच्छिन्नं पटिलभित्वा’’ति इमिना च दीपितो होतीति वेदितब्बो. पोराणगण्ठिपदे च ‘‘अञ्ञं भिक्खुं हरापेन्तो गच्छति चे, द्विन्नम्पि अनापत्ती’’ति वुत्तं. तस्मा द्वे भिक्खू तियोजनपरमं पत्वा अञ्ञमञ्ञस्स भण्डं परिवत्तेत्वा चे हरन्ति, अनापत्तीति सिद्धं.

तियोजनपरमं सहत्था हरितब्बानीति तियोजनपरममेव अत्तना हरितब्बानि, तं किमत्थन्ति? सीमाय एतपरमतो. वुत्तञ्हेतं ‘‘अनुजानामि, भिक्खवे, तियोजनपरमं सीमं सम्मन्नितु’’न्ति (महाव. १४०). वासाधिप्पायेन, पच्चागमनाधिप्पायेन वा गच्छतो एतपरमता च. वुत्तञ्हेतं ‘‘छब्बग्गिया भिक्खू अतिमहतियो सीमायो सम्मन्नन्ति…पे… भिक्खू उपोसथं आगच्छन्ता उद्दिस्समानेपि पातिमोक्खे आगच्छन्ति, उद्दिट्ठमत्तेपि आगच्छन्ति, अन्तरापि परिवसन्ती’’ति (महाव. १४०).

असन्ते ¶ हारकेति आणत्तिया हारके असति. कम्बलस्स उपरि निसीदित्वा गच्छन्तस्स ¶ सचे एकम्पि लोमं चीवरे लग्गं होति, तियोजनातिक्कमे आपत्ति एव कम्बलतो विजटितत्ताति लिखितं. तं कम्बलस्स पटिग्गहितत्ता अत्तनो अत्थाय पटिग्गहितमेव होतीति युत्तं.

एळकलोमसिक्खापदवण्णना निट्ठिता.

८. जातरूपसिक्खापदवण्णना

‘‘निब्बत्तरुक्खच्छायापि रुक्खपरिच्छेदं अनतिक्कन्ता’’ति लिखितं.

जातरूपसिक्खापदवण्णना निट्ठिता.

९. रूपियसंवोहारसिक्खापदवण्णना

जातरूपरजतपरिवत्तनन्ति उक्कट्ठपरिच्छेदेन वुत्तं.

रूपियसंवोहारसिक्खापदवण्णना निट्ठिता.

१०. कयविक्कयसिक्खापदवण्णना

असन्ते पाचित्तियं देसेतब्बमेवाति एत्थ किं सुद्धिकं पाचित्तियं, उदाहु निस्सग्गियन्ति? निस्सग्गियं पाचित्तियमेव.

कयविक्कयसिक्खापदवण्णना निट्ठिता.

तत्रिदं पकिण्णकं

अट्ठमसिक्खापदं परेन अत्तनो अत्थाय दिय्यमानस्स वा पारिवत्तकभावेन दिय्यमानस्स वा पंसुकूलस्स वा रूपियस्स उग्गण्हनउग्गण्हापनसादियनानि पटिक्खिपति.

नवमं परस्स वा अत्तनो वा रूपियपरिवत्तनं पटिक्खिपति.

दसमं ¶ ¶ अरूपियपरिवत्तनं. ‘‘अरूपिये अरूपियसञ्ञी पञ्चन्नं सह अनापत्ती’’ति (पारा. ५९१; वि. वि. टी. १.५९१; वजिर. टी. पाराजिक ५८७) च वचनं इतरेहि सह आपत्तीति दीपेति. अरूपियञ्च दुक्कटवत्थु. तस्मा तस्स परिवत्तने सति निस्सग्गियन्ति एकन्तेन वुत्तं. पञ्चन्नं सह दुक्कटवत्थूनं परिवत्तने अनापत्तिप्पसङ्गतो अनापत्ति एवाति पोराणाति चे? न, कप्पियवत्थूनंयेव तत्थ आगतत्ता. यदि कप्पियवत्थु निस्सग्गियं, पगेव दुक्कटवत्थूति चे? न, आपत्तिगरुकलहुकभावेन वत्थुगरुकलहुकनियमाभावतो.

निस्सग्गियवत्थुतो हि मुत्तामणिवेळुरियादि महग्घप्पहोनकम्पि दुक्कटवत्थूति कत्वा निस्सग्गियवत्थुतो मुत्तादि लहुकं होति. लहुकेपि वत्थुस्मिं यथेव दुक्कटवत्थुनो पटिग्गहणे दुक्कटं, तथेव तस्स वा तेन वा चेतापनेपि दुक्कटं युत्तन्ति (पारा. अट्ठ. २.५८९) अट्ठकथाचरिया.

अथ वा यं वुत्तं ‘‘कप्पियवत्थूनंयेव तत्थ आगतत्ता’’ति, तत्थ किञ्चापि दुक्कटवत्थूनिपि अधिप्पेतानि, न पन पाळियं वुत्तानि अनापत्तिवारप्पसङ्गभयाति वुत्तं होति. मुत्तादीसुपि वुत्तेसु अनापत्तियं कप्पियकारकस्स आचिक्खति, ‘‘इदं मुत्तादि अम्हाकं अत्थि, अम्हाकञ्च इमिना च इमिना च वेळुरियादिना अत्थो’’ति भणति, दसमेन आपज्जतीति अधिप्पायो सिया. यस्मा च इदं कप्पियकारकस्स आचिक्खनादिसंवोहारो च, तस्मा तं नवमेन वुत्तन्ति वेदितब्बं. किञ्चापि कयविक्कयेव होति कप्पियवत्थूहि अनुञ्ञातं, इमिनाव नयेन किञ्चापि दुक्कटवत्थुपि दसमे अधिप्पेतं आपज्जति, अट्ठकथाविरोधतो पन नाधिप्पेतमिच्चेव गहेतब्बो.

का पनेत्थ कारणच्छायाति, पञ्चन्नं सह तत्थ अनापत्तिप्पसङ्गतो अनापत्ति एवाति चे? न, तत्थ अनागतत्ता. अनागतकारणा वुत्तन्ति चे? न, पञ्चन्नं सह आपत्तिवत्थुकस्स अनापत्तिवारलाभे विसेसकारणाभावा, अकप्पियत्ता पञ्चन्नं सहापि आपत्तिया भवितब्बन्ति सिद्धो अट्ठकथावादो.

अपरो नयो – यदि दुक्कटवत्थुना कयविक्कये निस्सग्गियं, कप्पियवत्थुम्हि वुत्तपरियायो तत्थ लब्भेय्य, न पन लब्भतीति नवमे एव तानि वत्तब्बानि. तस्मा संवोहारो नाम कयविक्कयोपि अञ्ञथा परिवत्तनं ¶ परियादियित्वा पवत्तो, कयविक्कयञ्च मोचेत्वा ¶ ‘‘इमिना इमं देही’ति चेतापेति, वट्टती’’ति अवत्वा दसमस्स अनापत्तिवारे वुत्तनयेनेव तेसं परिवत्तने निस्सग्गियानुमतिविरोधतो अट्ठकथायं वुत्तनयेनेव दुक्कटवत्थुना चेतापने दुक्कटमेव. नेसं कयविक्कयेन निस्सग्गियन्ति चे? न, सब्बस्सपि कयविक्कयत्ता. तेनेव वुत्तं ‘‘अन्धकट्ठकथायं पन ‘सचे कयविक्कयं समापज्जेय्य, निस्सग्गियं पाचित्तिय’न्ति भासितं, तं दुब्भासितं. कस्मा? न हि दानग्गहणतो अञ्ञो कयविक्कयो नाम अत्थी’’ति (पारा. अट्ठ. २.५८९), अत्तनो मतिया कयविक्कयलक्खणसम्मते दसमस्स अनापत्तिवारे वुत्तनयेनेव तेसं परिवत्तने निस्सग्गियानुमतिविरोधतो च. भवतु वा अत्तनो पटिसिद्धमिदं कारणं, दसमे अवस्समेव जानितब्बानीति तानि कयविक्कयानेवाति तेसं निस्सग्गियभावञ्च गतानीति एवम्पि सिद्धो अट्ठकथावादो.

एत्थाहु पोराणा – ‘‘अत्तनो सन्तकं रूपियं परहत्थगतं करोति अज्झाचरति, दुक्कटं. परस्स रूपियं अत्तनो हत्थगतं करोति, अट्ठमेन निस्सग्गियं. उग्गहितवत्थुपरिवत्तने कथं जातं? अब्बोहारिकं जातं. अथ परस्स रूपियं अत्तनो हत्थगतं पठमं करोति, रूपियप्पटिग्गहणस्स कतत्ता अट्ठमेन निस्सग्गियं. अत्तनो सन्तकं रूपियं परस्स हत्थगतं पच्छा करोति, संवोहारेन निस्सग्गिय’’न्ति. ‘‘रूपियस्स गहणमत्तेन अट्ठमेन आपत्ति, पच्छा परिवत्तने नवमेना’’ति हि तत्थ वुत्तं, तं पन युत्तं. ‘‘अज्झाचरति, दुक्कट’’न्ति दुवुत्तं. दुक्कटस्स अनियमप्पसङ्गतो निस्सज्जनविधानेसु दस्सितोव. किं वुत्तं होति – यदि द्वीहि निस्सग्गियेहि भवितब्बं, निस्सज्जनविधाने ‘‘अहं, भन्ते, रूपियं पटिग्गहेसिं, नानाप्पकारकञ्च रूपियसंवोहारं समापज्जि’’न्ति वत्तब्बं भवेय्य ‘‘रूपियं चेतापेती’’ति सब्बत्थ पाळियं रूपियप्पटिग्गहणस्स वुत्तत्ता.

एत्तावता यं पोराणगण्ठिपदे वुत्तं ‘‘दुक्कटवत्थुना कयविक्कयं परिहरन्तेन चतूसु निस्सग्गियवत्थूसु एकेकस्मिं गहिते अट्ठमेन निस्सग्गियं होति. दुक्कटवत्थुना दुक्कटवत्थुन्ति ‘‘इमिना इदं देही’’ति गहिते तेनेव निस्सग्गियं होति. ‘‘कयविक्कयम्पि नीहरित्वा गहिते दुक्कटं, चेतापितरूपियग्गहणे अट्ठमेन, परिवत्तने नवमेनातिआदिना अत्तना अनुग्गहेत्वा कप्पियवसेन नीहरित्वा पञ्चहि सहधम्मिकेहि सद्धिं परिवत्तेतुं ¶ वट्टती’’ति, तं विसोधितं होति. अपरम्पि तत्थ वुत्तं ‘‘निस्सज्जितब्बे असति कथं पाचित्तियं, दुन्निस्सट्ठरूपियम्पि ‘न छड्डेती’ति वदन्तस्स विस्सट्ठो उपासको तं गहेत्वा अञ्ञं चे भिक्खुनो देति, कप्पती’’ति, तञ्च दुवुत्तं. न हि गहितत्ता ततो अञ्ञं वत्थु होति. पुन अपरञ्च तत्थ वुत्तं ‘‘इमं ‘गण्हाही’ति ¶ वदन्तस्स सद्धादेय्यविनिपातदुक्कटं, ‘एतं देही’ति वदन्तस्स विञ्ञत्तिदुक्कट’’न्ति, तञ्च दुवुत्तं. तत्थ हि पयोगदुक्कटं युत्तं विय पञ्ञायति.

पकिण्णकं निट्ठितं.

एळकलोमवग्गो दुतियो.

३. पत्तवग्गो

१. पत्तसिक्खापदवण्णना

द्वे अपत्ता, तस्मा एते भाजनपरिभोगेन परिभुञ्जितब्बा, नअधिट्ठानूपगानविकप्पनूपगताति अत्थोति च. समणसारुप्पेन पक्कन्ति अयोपत्तो पञ्चहि पाकेहि पक्को होति, मत्तिकापत्तो द्वीहि. ‘‘भिक्खुनिया पत्तसन्निच्चयस्स वारितत्ता (वजिर. टी. पाराजिक ६०२) भिक्खुस्सपि तं ‘अननुरूप’न्ति कत्वा ‘पुराणपत्तं पच्चुद्धरित्वा’ति वुत्त’’न्ति च लिखितं, तं न युत्तं पाळियं ‘‘सन्निच्चयं करेय्याति अनधिट्ठितो अविकप्पितो’’ति (पाचि. ७३५) वुत्तत्ता. सो हि कथिनक्खन्धके (महाव. ३०६ आदयो) निच्चयसन्निधि विय एकोपि पुनदिवसे ‘‘सन्निच्चयो’’ति वुच्चति. अनन्तरसिक्खापदे पन ‘‘दुतियो वारितो’’ति अधिट्ठानं नियतं. तस्मा द्वे पत्ते अधिट्ठातुं न लभति. सचे एकतो अधिट्ठाति, द्वेपि अनधिट्ठिता होन्ति. विसुं विसुं अधिट्ठाति, दुतियो अनधिट्ठितो. विकप्पेतुं पन बहूपि लभति. काकणिकमत्तम्पीति एत्थ पि-कारो ‘‘एकपाकम्पि जनेती’’ति पाकं सम्पिण्डेति. अथ वा सचे एकपाकेनेव सारुप्पो, वट्टतीति पाकपरिमाणं न वुत्तन्ति गहेतब्बं. अपत्तत्ता अधिट्ठानूपगो ¶ न होति. अपच्चुद्धरन्तेन विकप्पेतब्बोति पुराणपत्तं अपच्चुद्धरन्तेन सो पत्तो विकप्पेतब्बोति अत्थोति लिखितं.

पत्तसिक्खापदवण्णना निट्ठिता.

२. ऊनपञ्चबन्धनसिक्खापदवण्णना

पवारितेति ¶ एत्थ सङ्घवसेन पवारितट्ठाने पञ्चबन्धनेनेव वट्टति, पुग्गलिकवसेन पवारितट्ठाने ऊनपञ्चबन्धनेनापि वट्टतीति लिखितं.

यो ऊनपञ्चबन्धनत्थं, वुत्तम्पि चेतं करो सो;

ऊनपञ्चबन्धनत्थं, पत्वान सन्तिके.

ऊनपञ्चबन्धनसिक्खापदवण्णना निट्ठिता.

३. भेसज्जसिक्खापदवण्णना

‘‘पटिसायनीयानि पटिग्गहेत्वा’’ति वदन्तेन पादमक्खनादीनं अत्थाय पटिग्गहेत्वा ठपेतुं वट्टतीति दीपितन्ति लिखितं. ‘‘येसं मंसं कप्पती’’ति वचनेन येसं मंसं न कप्पति, तेसं सप्पिआदि न कप्पतीति वदन्ता अजानित्वा वदन्ति. येसञ्हि मंसं कप्पति, तेसं सप्पीतिआदि सत्ताहकालिकनिस्सग्गियवत्थुपरिच्छेददस्सनत्थं वुत्तं. तथा पणीतभोजनसिक्खापदे येसं मंसं कप्पति, तेसंयेव खीरादि पणीतभोजनं, नेतरन्ति दस्सेतुं वुत्तन्ति. मधु नाम मधुकरिभमरमक्खिकानं आसयेसु निय्याससदिसं महामधु होति, तं यावजीविकन्ति च लिखितं.

भेसज्जसिक्खापदवण्णना निट्ठिता.

पत्तवग्गो ततियो.

निस्सग्गियपाचित्तियवण्णना निट्ठिता.

पाचित्तियकण्डं

४. भोजनवग्गो

२. गणभोजनसिक्खापदवण्णना

देवदत्तो ¶ ¶ काले विञ्ञापेत्वा भुञ्जति, तप्पच्चया भगवता ‘‘गणभोजने पाचित्तिय’’न्ति (पाचि. २०९) सिक्खापदं पञ्ञत्तं. पदभाजने पन ‘‘निमन्तिता भुञ्जन्ती’’ति (पाचि. २१८) निमन्तनमेव गहेत्वा विभत्तं. अन्धकट्ठकथायं पन वत्थुवसेन विञ्ञत्तिया याचनम्पि वुत्तन्ति लिखितं. कस्मा? परिवारे एव ‘‘गणभोजनं द्वीहाकारेहि पसवति विञ्ञत्तितो वा निमन्तनतो वा’’ति (परि. ३२२) वुत्तत्ता. तस्मा अट्ठुप्पत्तियंयेव पाकटत्ता पदभाजने न वुत्तन्ति वेदितब्बं. ‘‘‘एकतो गण्हन्ती’ति च गहितभत्तापि अञ्ञे याव गण्हन्ति, ताव चे तिट्ठन्ति, एकतो गण्हन्ति एव नामा’’ति च, ‘‘यो कोचि पब्बजितोति सहधम्मिकेसु, तित्थियेसु वाति अत्थो’’ति च, ‘‘समयाभावोति सत्तन्नं अनापत्तिसमयानं अभावो’’ति च, ‘‘समयलद्धकेन सह चत्तारो होन्ती’’ति च, ‘‘समयलद्धको सयमेव मुच्चति, सेसानं गणपूरकत्ता आपत्तिकरो होती’’ति च लिखितं.

एत्थाह – ‘‘पटिग्गहणमेव हेत्थ पमाण’’न्ति वुत्तं, अथ कस्मा पाळियं ‘‘गणभोजनं नाम यत्थ चत्तारो…पे… भुञ्जन्ती’’ति (पाचि. २१८) वुत्तन्ति? वुच्चते – तत्थ ‘‘भुञ्जन्ती’’ति पटिग्गहणनियमवचनं. न हि अप्पटिग्गहितकं भिक्खू भुञ्जन्तीति.

गणभोजनसिक्खापदवण्णना निट्ठिता.

३. परम्परभोजनसिक्खापदवण्णना

अञ्ञत्र ¶ समयाति पन निमन्तनतो पसवनतो भोजनापेक्खं पाचित्तियन्ति एके. एको भिक्खु पिण्डाय चरन्तो भत्तं लभति, तमञ्ञो चूपासको निमन्तेत्वा घरे निसीदापेसि, न च ताव भत्तं सम्पज्जति ¶ . सचे सो भिक्खु पिण्डाय चरित्वा लद्धभत्तं भुञ्जति, आपत्ति. कस्माति चे? ‘‘परम्परभोजनं नाम पञ्चन्नं भोजनानं अञ्ञतरेन भोजनेन निमन्तितो तं ठपेत्वा अञ्ञं पञ्चन्नं भोजनानं अञ्ञतरं भोजनं भुञ्जति, एतं परम्परभोजनं नामा’’ति (पाचि. २२७) वुत्तत्ता. पठमकथिनसदिसानि, इदं पन किरियाकिरिय’’न्ति पाठो.

परम्परभोजनसिक्खापदवण्णना निट्ठिता.

४. काणमातासिक्खापदवण्णना

द्वत्तिपत्तपूरा पटिग्गहेतब्बाति तथानीतपूवेहि अत्थिकेन उक्कट्ठपत्तप्पमाणवसेन गहेतब्बा. ‘‘मा खो त्वं एत्थ पटिग्गण्ही’’ति अपाथेय्यादिअत्थाय सज्जितसञ्ञाय अतिरेकप्पटिग्गहणेन आरोचने, असंविभागे च न मुच्चति अचित्तकत्ता सिक्खापदस्स. अथ उग्गहितकं गण्हाति, न मुच्चति एव. असंविभागे पन अनापत्ति अकप्पियत्ता. अचित्तकता पण्णत्तिजाननाभावेनेव, न वत्थुजाननाभावेनाति एके. ‘‘न पाथेय्यादिअत्थाय सज्जितभावजानन’’न्ति अङ्गेसु अवुत्तत्ता सचे सञ्चिच्च न वदति, पाचित्तियन्ति पोराणा वदन्ति. अतिरेकप्पटिग्गहणन्ति तत्थ पञ्चमंव अङ्गं वुत्तं, तस्मा अप्पटिग्गहितत्ता न पाचित्तियं, कत्तब्बाकरणतो पन दुक्कटं. अञ्ञथा किरियाकिरियं इदं आपज्जति. अनिवारणं, अनारोचनं वा छट्ठमङ्गं वत्तब्बं सिया.

काणमातासिक्खापदवण्णना निट्ठिता.

५. पठमपवारणासिक्खापदवण्णना

भुत्तावी पवारणं नाम पञ्चङ्गिकं. तेसु ‘‘असनं पञ्ञायत्ती’’ति एतेनेव ‘‘भुत्तावी’’ति एतस्स सिद्धत्ता विसुं अत्थसिद्धि न दिस्सति. दिस्सति चे, अङ्गानं छक्कत्तदस्सनन्ति ¶ (वजिर. टी. पाचित्तिय २३८-२३९) लिखितं. ‘‘भोजनं पञ्ञायती’’ति अभिहटं सन्धाय वुत्तं.

कोट्टेत्वा ¶ कतचुण्णम्पीति पि-कारेन कुण्डकं सम्पिण्डेति. समपाकभज्जितानं पन आतपसुक्खानं वा कुण्डकं वा ये केचि तण्डुला वाति एत्तकमेव वुत्तत्ता समपाकभज्जितानं वीहीनं, वीहिपलासानं वा तण्डुलचुण्णं पवारेति. तथा खरपाकभज्जितानं कुण्डकम्पि पवारेति. भज्जितसत्तुयो पिण्डेत्वा कतो अपक्कसत्तुमोदकोपि पवारेतीति लिखितं. सचे अवसिट्ठं नत्थि, न पवारेति. कस्मा? असनसङ्खातस्स विप्पकतभोजनस्स अभावतो.

अकप्पियमंसं पन किञ्चापि पटिक्खिपितब्बट्ठाने ठितं, खादियमानं पन मंसभावं न जहाति, तस्मा पवारेति. भोजनसालाय भुञ्जन्तो चे अत्तनो अपापुणनकोट्ठासं अभिहटं पटिक्खिपति, न पवारेति. कामं पटिक्खिपति, पत्ते पन आरामिका आकिरन्ति, तं भुञ्जितुं न वट्टति. इदञ्हि बुद्धप्पटिकुट्ठाय अनेसनाय उप्पन्नेयेव सङ्खं गच्छति. यथा हि सङ्घतो लद्धं पिण्डं दुस्सीलो देति, तञ्चे पटिक्खिपति, न पवारेति, एवंसम्पदमिदन्ति च, विभागो लज्जी चे देति, तं सो न अज्झोहरितुकामताय पटिक्खिपति, पवारेतीति च, ‘‘समंसरसं समच्छरस’’न्ति आपज्जनतो ‘‘मंसरस’’न्ति वुत्ते पन पटिक्खिपतो होति, ‘‘मंसस्स रसं मंसरस’’न्ति अयं विग्गहो नाधिप्पेतोति च वुत्तं. भत्तमिस्सकं यागुं आहरित्वा ‘‘यागुं गण्हथा’’ति वदति, न पवारेति. ‘‘भत्तं गण्हथा’’ति वुत्ते पवारेति. कस्मा? येनापुच्छितो, तस्स अत्थिताय. एत्थ पन ‘‘यागुमिस्सकं गण्हथा’’ति वदति, तत्र चे यागु बहुतरा वा होति, समसमा वा. भत्तं मन्दं, न पवारेति. यागु चे मन्दा, भत्तं बहुतरं, पवारेति. इदञ्च सब्बअट्ठकथासु वुत्तत्ता न सक्का पटिक्खिपितुं. कारणं पनेत्थ दुद्दसं. ‘‘भत्तमिस्सकं गण्हथा’’ति वदति. तत्र भत्तं बहुतरं वा समकं वा अप्पतरं वा होति, पवारेति एव. भत्तं वा यागुं वा अनामसित्वा ‘‘मिस्सकं गण्हथा’’ति वदति. तत्र चे भत्तं बहुतरं, समकं वा होति, पवारेति. अप्पतरं न पवारेति. तं सब्बं वीमंसितब्बन्ति.

फलं ¶ वा कन्दमूलादि वा पञ्चहि समणकप्पेहि कप्पियं अकतन्ति एत्थ कप्पियं अकारापितेहि कदलिफलादीहि सद्धिं अतिरित्तं कारापेत्वापि तं कदलिफलादिं ठपेत्वा अवसेसं भुञ्जितुं वट्टति. अमिस्सकरसत्ता पुन तानि कप्पियं कारापेत्वा अञ्ञस्मिं भाजने ठपेत्वा ¶ कारेत्वा भुञ्जितुं वट्टति. कस्मा? पुब्बे तेसु विनयकम्मस्स अनारुळ्हत्ताति वदन्ति.

पत्ते रजं पतितं अप्पटिग्गहितमेव होति. तस्मा पटिग्गहेत्वाव भिक्खा गण्हितब्बा. ‘‘अपटिग्गहेत्वा गण्हतो विनयदुक्कट’’न्ति (पाचि. अट्ठ. २६५) वुत्तत्ता एतमञ्ञेसम्पि न वट्टतीति वदन्ति. ‘‘तं पन पुन पटिग्गहेत्वा भुञ्जन्तस्स अनापत्ती’’ति एत्थापि एवमेव. इमस्मिं पन ‘‘अतिरित्तं कतं अनतिरित्तकतं होती’’ति एत्थापि एवमेव. इमस्मिं पन ‘‘अतिरित्तं कतं, अनतिरित्तं कतं होती’’तिआदीहि उपपरिक्खित्वा विनिच्छयो वेदितब्बोति दीपितं. अलमेतं सब्बन्ति इदम्पि ते अधिकं, इतो अञ्ञं न लच्छसीति अत्थो.

आहारत्थायाति विकाले एवाति एके. ‘‘पठमकथिनसदिसानि. इदं पन किरियाकिरिय’’न्ति पाठो. कायकम्मं अज्झोहरणतो. वचीकम्मं वाचाय ‘‘अतिरित्तं करोथ, भन्ते’’ति अकारापनतोति वेदितब्बं.

पठमपवारणासिक्खापदवण्णना निट्ठिता.

६. दुतियपवारणासिक्खापदवण्णना

‘‘भुत्तस्मिं पाचित्तिय’’न्ति (पाचि. २४३) मातिकायं वुत्तत्ता ‘‘भोजनपरियोसाने पाचित्तिय’’न्ति वुत्तं, न अज्झोहारे अज्झोहारे.

दुतियपवारणासिक्खापदवण्णना निट्ठिता.

७. विकालभोजनसिक्खापदवण्णना

जम्बुदीपस्स ¶ कालेन परिच्छेदोति एवं किर.

विकालभोजनसिक्खापदवण्णना निट्ठिता.

८. सन्निधिकारकसिक्खापदवण्णना

‘‘दुद्धोतो ¶ होती’’तिआदिना नयेन इध वुत्तत्ता, ‘‘दुद्धोतं पत्तं धोवित्वा पुन

तत्थ अच्छोदकं वा आसिञ्चित्वा, अङ्गुलिया वा घंसित्वा निस्नेहभावो जानितब्बो’’ति (पाचि. अट्ठ. २५३) समन्तपासादिकायं वुत्तत्ता च मत्तिकापत्तस्स कपालेन पीतो स्नेहो सन्निधिं करोतीति सिद्धन्ति लिखितं. सयं पटिग्गहेत्वा अपरिच्चत्तमेवाति एत्थ अपरिच्चत्तं नाम अनुपसम्पन्नानं निरपेक्खअपरिच्चत्तं अविजहितं. ‘‘पटिग्गहणन्ति एत्थ पटिग्गहितभावमविजहितमेव सन्निधिं जनेती’’ति धम्मसिरित्थेरो, तं ‘‘पटिग्गण्हाति, आपत्ति दुक्कटस्सा’’ति (पाचि. २५५) पाळिया विरुज्झति. तस्स पन पुन पटिग्गण्हनकिच्चाभावतो वीमंसितब्बं.

सन्निधिकारकसिक्खापदवण्णना निट्ठिता.

९. पणीतभोजनसिक्खापदवण्णना

‘‘तेसं मंसञ्च खीरदधीनि च इध अधिप्पेतानी’’ति इदं पाचित्तियवत्थुपरिच्छेदो, न पन कप्पियखीरादिपरिच्छेदो, तस्मा यस्स कस्सचि खीरादीनि वट्टन्तीति च, ‘‘महानामसिक्खापदेन कारेतब्बो’’ति सङ्घवसेन पवारिते भेसज्जत्थाय सप्पिआदिभेसज्जपञ्चकं विञ्ञापेति चे, तत्थ ‘‘न भेसज्जकरणीयेन भेसज्जं विञ्ञापेती’’ति एत्थ सङ्गहं गच्छति, तस्मा ‘‘तेन पाचित्तिय’’न्ति (वजिर. टी. पाचित्तिय २६१) च लिखितं.

पणीतभोजनसिक्खापदवण्णना निट्ठिता.

१०. दन्तपोनसिक्खापदवण्णना

‘‘सरीरावयवेना’’ति ¶ वुत्तत्ता मुखेन पटिग्गहणं अनुञ्ञातं. ‘‘चिञ्चादिपत्तेसु भूमियं अत्थतेसु न वट्टति, कल्लखेत्ते तत्थ वट्टती’’ति च, ‘‘सामं गहेत्वा’’ति इमिना न केवलं सप्पदट्ठंयेव, अञ्ञम्पि दट्ठं विसेसेति. सामं गहेत्वा परिभुञ्जितुं वट्टती’’ति च लिखितं.

दन्तपोनसिक्खापदवण्णना निट्ठिता.

भोजनवग्गो चतुत्थो.

५. अचेलकवग्गो

१. अचेलकसिक्खापदवण्णना

अचेलकादयो ¶ यस्मा, तित्थियाव मता इध;

तस्मा तित्थियनामेन, तिकच्छेदो कतो ततो.

अतित्थियस्स नग्गस्स, तथा तित्थियलिङ्गिनो;

गहट्ठस्सापि भिक्खुस्स, कप्पतीति विनिच्छयो.

अतित्थियस्स चित्तेन, तित्थियस्स च लिङ्गिनो;

सोतापन्नादिनो दातुं, कप्पतीतीध नो मति.

अचेलकसिक्खापदवण्णना निट्ठिता.

३. सभोजनसिक्खापदवण्णना

अनुपविसित्वा निसीदनचित्तेन सचित्तकताति वेदितब्बा.

सभोजनसिक्खापदवण्णना निट्ठिता.

४-५. रहोपटिच्छन्नरहोनिसज्जसिक्खापदवण्णना

चतुत्थं पठमानियते, पञ्चमं दुतियानियते वुत्तनयमेव. इध पञ्चमं उपनन्दस्स चतुत्थं होति.

रहोपटिच्छन्नरहोनिसज्जसिक्खापदवण्णना निट्ठिता.

६. चारित्तसिक्खापदवण्णना

सभत्तो ¶ ¶ समानोति निमन्तनभत्तोति पोराणा. सन्तं भिक्खुं, अनापुच्छा, पुरेभत्तं पच्छाभत्तं, अञ्ञत्र समयाति अयमेत्थ चतुब्बिधा अनुपञ्ञत्ति. तत्थ समया द्वे समया. भत्तियघरन्ति निमन्तितस्स घरं वा सलाकाभत्तादिदायकानं वा घरं. ‘‘समुट्ठानादीनि पठमकथिनसदिसानि, इदं पन किरियाकिरिय’’न्ति पाठो, ‘‘इध निमन्तना अकप्पियनिमन्तना’’ति एके.

पुरेभत्तञ्च पिण्डाय, चरित्वा यदि भुञ्जति;

सिया परम्परापत्ति, पच्छाभत्तं न सा सिया.

पच्छाभत्तञ्च गमिको, पुब्बगेहं यदि गच्छे;

एके आपत्तियेवाति, अनापत्तीति एकच्चे.

कुलन्तरस्सोक्कमने, आपत्तिमतयो हि ते;

समानभत्तपच्चासा, इति आहु इधापरे.

मता गणिकभत्तेन, समेन्ति नं निमन्तने;

विस्सज्जनं समानन्ति, एके सम्मुखतापरे.

सन्निट्ठानत्थिकेहेव, विचारेतब्बभेदतो;

विञ्ञू चारित्तमिच्चेव, सिक्खापदमिदं विदू. (वजिर. टी. पाचित्तिय २९४);

चारित्तसिक्खापदवण्णना निट्ठिता.

७. महानामसिक्खापदवण्णना

पणीतभोजनसिक्खापदे ‘‘महानामसिक्खापदेन कारेतब्बो’’ति (कङ्खा. अट्ठ. पणीतभोजनसिक्खापदवण्णना) यं वुत्तं, तस्सत्थो सङ्घवसेन पवारिते भेसज्जत्थाय सप्पिआदिभेसज्जपञ्चकं ¶ विञ्ञापेति चे, ‘‘नभेसज्जेन करणीयेन भेसज्जं विञ्ञापेती’’ति (पाचि. ३०९) वचनेन पाचित्तियन्ति (वजिर. टी. पाचित्तिय ३१०) लिखितं. ‘‘तया इमिनाव पवारितम्हा, अम्हाकञ्च इमिना च इमिना च अत्थो’’ति यथाभूतं आचिक्खित्वा विञ्ञापेतुं गिलानोव लभति, न इतरोति च, ‘‘अञ्ञस्स अत्थाया’’ति ¶ अस्स ञातकप्पवारिते, अत्तनो वा ञातकप्पवारितेति अत्थोति च, ‘‘अपरियन्तप्पवारणाय पवारिते’’ति सङ्घवसेन, पुग्गलवसेन च पवारेत्वा दायका. तस्मा ‘‘सङ्घप्पवारणता’’ति वत्वा ‘‘पुग्गलप्पवारणता’’ति न वुत्तन्ति च, ‘‘परियन्तातिक्कमो’’ति वचनेन गिलानो गहितो, तस्मा ‘‘गिलानागिलानता’’ति न वुत्तं. एवं सन्तेपि ‘‘सङ्घप्पवारणाय पवारणता’’ति पाठोति च लिखितं, वीमंसितब्बं.

महानामसिक्खापदवण्णना निट्ठिता.

८. उय्युत्तसेनासिक्खापदवण्णना

हत्थिआदीसु एकमेकन्ति अन्तमसो एकपुरिसारुळ्हहत्थिम्पि, एकं सरहत्थं पुरिसम्पि. समुट्ठानादीनि एळकलोमसदिसानि, इदं पन लोकवज्जं, अकुसलचित्तं तिवेदन’’न्ति पाठो.

उय्युत्तसेनासिक्खापदवण्णना निट्ठिता.

९. सेनावाससिक्खापदवण्णना

केनचि पलिबुद्धस्साति वेरिकेन वा इस्सरेन वा केनचि रुद्धस्स. सेनापरिक्खेपेन वा परिक्खेपारहट्ठानेन वा सञ्चरणट्ठानपरियन्तेन वा परिच्छिन्दितब्बा.

सेनावाससिक्खापदवण्णना निट्ठिता.

अचेलकवग्गो पञ्चमो.

६. सुरापानवग्गो

१. सुरापानसिक्खापदवण्णना

‘‘सुरा’’ति ¶ वा ‘‘न वट्टती’’ति वा जानित्वा पिवने अकुसलमेवाति लिखितं. अकुसलचित्तन्ति येभुय्येन तं सन्धाय किर वुत्तं. अथ कस्मा ¶ विनयट्ठकथायं ‘‘अकुसलेनेव पातब्बताया’’ति (पाचि. अट्ठ. ३२९) वुत्तन्ति चे? सचित्तकपक्खे अकुसलेनेव पातब्बतायाति.

सुरापानसिक्खापदवण्णना निट्ठिता.

२. अङ्गुलिपतोदकसिक्खापदवण्णना

कायसंसग्गसङ्घादिसेसापत्तिभावे समानेपि भिक्खुनियापि अनुपसम्पन्नेपि दुक्कटं, उपसम्पन्ने एव पाचित्तियन्ति एवं पुग्गलापेक्खं दस्सेतुं ‘‘अङ्गुलिपतोदके पाचित्तिय’’न्ति वुत्तं. सति करणीयेति एत्थ पुरिसं सति करणीये आमसतोति अधिप्पायो, न इत्थिं.

अङ्गुलिपतोदकसिक्खापदवण्णना निट्ठिता.

३. हसधम्मसिक्खापदवण्णना

‘‘चिक्खल्लं वा’’ति वचनतो सक्खरम्पि खिपनकीळाय कीळतो दुक्कटमेव. उपरिगोप्फके पाचित्तियं, अञ्ञत्थ दुक्कटन्ति पाचित्तियवत्थुअत्थवसेन ‘‘उदके हसधम्मे पाचित्तिय’’न्ति वुत्तं.

इदं सञ्ञाविमोक्खं चे, तिकपाचित्तियं कथं;

कीळितंव अकीळाति, मिच्छागाहेन तं सिया.

एत्तावता ¶ कथं कीळा, इति कीळायं एवायं;

अकीळासञ्ञी होतेत्थ, विनयत्थं समादये.

एकन्ताकुसलो यस्मा, कीळायाभिरतमनो;

तस्मा अकुसलं चित्तं, एकमेवेत्थ लब्भतीति. (वजिर. टी. पाचित्तिय ३३६);

हसधम्मसिक्खापदवण्णना निट्ठिता.

४. अनादरियसिक्खापदवण्णना

तस्स ¶ वचनन्ति ‘‘अयं उक्खित्तको वा वम्भितो वा गरहितो वा इमस्स वचनं अकतं भविस्सती’’ति अनादरियं करोति. धम्मन्ति कथायं धम्मो नस्सेय्य वा विनस्सेय्य वा अन्तरधायेय्य वा, तं वा असिक्खितुकामो अनादरियं करोति. ‘‘लोकवज्जं अतिक्कमित्वा ‘इदं अम्हाकं आचरियुग्गहो’ति वदन्तस्स न वट्टती’’ति (वजिर. टी. पाचित्तिय ३४४) लिखितं.

अनादरियसिक्खापदवण्णना निट्ठिता.

६. जोतिसिक्खापदवण्णना

‘‘विसिब्बनापेक्खो’’ति वुत्तत्ता अञ्ञस्स वट्टति, अञ्ञेसञ्च.

जोतिनेकमनेके वा, जालेन्ति मुनयो सह;

एको सोपेति नानेको, अधिप्पायविसेसतो.

जोतिसिक्खापदवण्णना निट्ठिता.

८. दुब्बण्णकरणसिक्खापदवण्णना

मोरक्खिमण्डलमङ्गुलपिट्ठीनन्ति ¶ न एकन्ततो, अधिकं, ओरञ्चाति वदन्ति. एककोणेपि वट्टति, एवं यत्थ कत्थचि एकबिन्दुपि वट्टतीति.

दुब्बण्णकरणसिक्खापदवण्णना निट्ठिता.

९. विकप्पनसिक्खापदवण्णना

‘‘समुट्ठानादीनि पठमकथिनसदिसानि, इदं पन किरियाकिरिय’’न्ति पाठो. एत्थ परिभोगेन कायकम्मं. अपच्चुद्धरणेन वचीकम्मं.

विकप्पनसिक्खापदवण्णना निट्ठिता.

१०. अपनिधानसिक्खापदवण्णना

ससूचिके ¶ सूचिघरे सूचिगणनाय आपत्तियोति पोराणा.

अपनिधानसिक्खापदवण्णना निट्ठिता.

सुरापानवग्गो छट्ठो.

७. सप्पाणकवग्गो

१. सञ्चिच्चसिक्खापदवण्णना

वत्थुगणनाय कम्मबन्धगणनाचेतनामारणानं, न कम्मबन्धगणनाय चेतनामारणा. एत्थ एकचेतनाय बहुपाणका मरन्तीति अयं विभागो वेदितब्बो.

सञ्चिच्चसिक्खापदवण्णना निट्ठिता.

२. सप्पाणकसिक्खापदवण्णना

सप्पाणकन्ति ¶ पाणकानं मरणवसेन पाचित्तियं, न सप्पाणकउदकपरिभोगवसेन पाचित्तियं, तस्मा एव ‘‘पण्णत्तिवज्ज’’न्ति वुत्तं. असुद्धचित्तत्ता पाचित्तियं, सुद्धचित्ते अनापत्ति. पदीपुज्जलने विय पण्णत्तिवज्जता वुत्ताति लिखितं.

जले पक्खिपनं पुब्बं, जलप्पवेसनं इदं;

एवं उभिन्नं नानात्तं, ञेय्यं ञाणवता सदाति. (वजिर. टी. पाचित्तिय ३८७)

सप्पाणकसिक्खापदवण्णना निट्ठिता.

५. ऊनवीसतिवस्ससिक्खापदवण्णना

अञ्ञं उपसम्पादेतीति –

उपज्झायो सचे सामं, कम्मवाचञ्च सावेति;

कम्मं रुहति इच्चेके, नेति विनयकोविदो.

दुक्कटं ¶ विहितं यस्मा, आचरियस्स गणस्स च;

तस्मा भिन्नाव आचरिय-उपज्झाया विसुं इधाति.

ऊनवीसतिवस्ससिक्खापदवण्णना निट्ठिता.

७. संविधानसिक्खापदवण्णना

इध एकतोउपसम्पन्ना, सिक्खमाना, सामणेरीति इमा तिस्सोपि सङ्गहं गच्छन्ति, इमासं पन तिस्सन्नं समयो रक्खति, अयमिमासं, मातुगामस्स च विसेसोति वेदितब्बं.

संविधानसिक्खापदवण्णना निट्ठिता.

९. उक्खित्तसम्भोगसिक्खापदवण्णना

‘‘तं ¶ दिट्ठिं अप्पटिनिस्सट्ठेनाति लद्धिनानासंवासकं सन्धाया’’ति लिखितं. तिचित्तन्ति एत्थ विपाकाब्याकतचित्तेन सहसेय्यं कप्पेय्याति एवमत्थो दट्ठब्बो. अञ्ञथा सचित्तकत्ता सिक्खापदस्स किरियाब्याकतं सन्धाय न युज्जति.

उक्खित्तसम्भोगसिक्खापदवण्णना निट्ठिता.

१०. कण्टकसिक्खापदवण्णना

‘‘अयं समणुद्देसो पाराजिको होति. सचे तं दिट्ठिं पटिनिस्सज्जति, सङ्घस्स आरोचेत्वा सङ्घानुमतिया पब्बाजेतब्बो’’ति पोराणगण्ठिपदे वुत्तं, तं न युत्तं. दण्डकम्मनासना हि इधाधिप्पेता. यदि सो पाराजिको होति, लिङ्गनासना नाम सिया. ‘‘ते पटिसेवतो नालं अन्तरायाया’’ति च दिट्ठि सत्थरि असत्थादिदिट्ठि न होति. सचे सा यस्स उप्पज्जति, सो पाराजिको होति, तस्मिम्पि एवमेव ¶ पटिपज्जितब्बं, संवरे अतिट्ठन्तो लिङ्गनासनाय नासेतब्बोति (वजिर. टी. पाचित्तिय ४२८) आचरियस्स तक्को.

कण्टकसिक्खापदवण्णना निट्ठिता.

सप्पाणकवग्गो सत्तमो.

८. सहधम्मिकवग्गो

४. पहारसिक्खापदवण्णना

अङ्गेसु न मोक्खाधिप्पायता विय अमरणाधिप्पायता वत्तब्बाति चे? न वत्तब्बा. कस्मा? यो भिक्खु सयं पहारं दातुकामो, सो अधिप्पायेन तस्स मरणे पयोगविरहोवाति कत्वा ¶ अमरणाधिकारत्ता केवलं अमरणाधिप्पायो एव सोति ता विय ता न वुत्ता. मोक्खाधिप्पायस्स पन कोपो नत्थि, तस्मा अनापत्तीति वुत्तं.

पहारसिक्खापदवण्णना निट्ठिता.

५. तलसत्तिकसिक्खापदवण्णना

तलमेव तलसत्तिकं. ‘‘पोथनसमत्थट्ठेन सत्तिक’’न्ति एके. यस्मा पहरितुकामताय पहरतो पुरिमेन पाचित्तियं, केवलं उच्चारेतुकामताय उग्गिरणमत्ते कते इमिना पाचित्तियं. इमिना पन विरज्झित्वा पहारो दिन्नो, तस्मा नपहरितुकामताय दिन्नत्ता दुक्कटं. किमिदं दुक्कटं पहारपच्चया, उदाहु उग्गिरणपच्चयाति? पहारपच्चया एव दुक्कटं, पुरिमं उग्गिरणपच्चया पाचित्तियन्ति सदुक्कटं पाचित्तियं युज्जति. पुरिमञ्हि उग्गिरणं, पच्छा पहारो. न च पच्छिमं पहारं निस्साय पुरिमं उग्गिरणं अनापत्तिवत्थुकं भवितुमरहतीति नो तक्कोति (वजिर. टी. पाचित्तिय ४५६) आचरियो.

तलसत्तिकसिक्खापदवण्णना निट्ठिता.

७. सञ्चिच्चसिक्खापदवण्णना

परो ¶ कुक्कुच्चं उप्पादेतु वा, मा वा, तं अप्पमाणं. ‘‘कुक्कुच्चुपादन’’न्ति ततियमङ्गं तस्स अधिप्पायवसेन वुत्तन्ति वेदितब्बं.

सञ्चिच्चसिक्खापदवण्णना निट्ठिता.

८. उपस्सुतिसिक्खापदवण्णना

उपस्सुतिन्ति यथा उपकुज्झं ‘‘समीपकुज्झ’’न्ति वुच्चति, तथा उपस्सुति ‘‘समीपस्सुती’’ति वेदितब्बा. यत्थ ठितो सुणाति, तं ठानन्ति अत्थो. सुतीति पनेत्थ परेसं वचनसद्दो च. सो हि सुय्यतीति सुति नाम. उपसुय्यति वा एत्थाति उपस्सुति. ओकासो हि सुति नाम. इमेसं सुत्वाति एत्थ ‘‘वचन’’न्ति पाठसेसो.

समुट्ठानादीनि ¶ अतीतद्वयसदिसानीति न गहेतब्बानि. थेय्यसत्थसमुट्ठानं. सिया किरियं गन्त्वा सवने. सिया अकिरियं ठितट्ठानं आगन्त्वा वदन्तानं अजानापनवसेन समुट्ठानतो. ‘‘सञ्ञाविमोक्खं, सचित्तकं, लोकवज्जं, कायकम्मं, वचीकम्मं, अकुसलचित्तं, दुक्खवेदन’’न्ति लिखितं.

उपस्सुतिसिक्खापदवण्णना निट्ठिता.

९. कम्मप्पटिबाहनसिक्खापदवण्णना

अप्पमत्तकविस्सज्जनकेन पन चीवरं करोन्तस्स सेनासनक्खन्धकवण्णनायं (चूळव. ३२८) वुत्तप्पभेदानि सूचिआदीनि अनपलोकेत्वापि दातब्बानि. ततो अतिरेकं देन्तेन अपलोकनकम्मं कातब्बं. एवं कतं पन अपलोकनं कम्मलक्खणमेवाति अधिप्पायो. एवं सब्बत्थ कम्मलक्खणं वेदितब्बं. गामसीमाविहारेसु ओसारणादीनि सङ्घकम्मानियेव न वट्टन्ति. विस्सज्जियवेभङ्गियानि पन वट्टन्ति. ‘‘सङ्घस्स सन्तक’’न्ति सामञ्ञतो अवत्वा ‘‘इमस्मिं विहारे सङ्घस्स सन्तक’’न्ति अपलोकेतब्बन्ति च, ‘‘समुट्ठानादीनि अदिन्नादानसदिसानि, इदं पन दुक्खवेदन’’न्ति पाठोति च लिखितं.

कम्मप्पटिबाहनसिक्खापदवण्णना निट्ठिता.

१०. छन्दंअदत्वागमनसिक्खापदवण्णना

सन्निपातं ¶ अनागन्त्वा चे छन्दं न देति, अनापत्तीति एके. दुक्कटन्ति एके धम्मकम्मन्तरायकरणाधिप्पायत्ता.

छन्दंअदत्वागमनसिक्खापदवण्णना निट्ठिता.

११. दुब्बलसिक्खापदवण्णना

अकप्पियेन वाति सुवण्णरजतमयमञ्चादिना. कप्पियमञ्चो सम्पटिच्छितब्बोति ‘‘सङ्घस्स देमा’’ति दिन्नं सन्धाय वुत्तं, तेहि पन ‘‘विहारस्स देमा’’ति वुत्ते सुवण्णरजतमयादिअकप्पियमञ्चापि ¶ सम्पटिच्छितब्बाति च, ‘‘अरञ्जरो बहुउदकगण्हनको’’ति च, ‘‘सङ्घिकपअभोगेन वाति सचे आरामिकादयो पटिसामेत्वा पटिदेन्ति, परिभुञ्जितुं वट्टती’’ति च, ‘‘कंसलोहादिभाजनं सङ्घस्स दिन्नम्पि पारिहारियं न वट्टती’’ति (चूळव. अट्ठ. ३२१) समन्तपासादिकायं वुत्तत्ता अत्तनो हत्थेन गहेत्वा पटिसामितुं न लभतीति च, ‘‘वेधको कायबन्धनस्साति वदन्ती’’ति च, ‘‘हिङ्गु हिङ्गुलिहरितालमनोसिला अञ्जनानी’’ति पाठोति च, ‘‘दारुमयो वा…पे… अपादकोपि समुग्गो’’ति पाठोति च, ‘‘दारुमयो तुम्बोति दारुमयो उदकतुम्बो’’ति च, ‘‘थम्भतुलासोपानफलकादीसू’’ति च लिखितं.

दुब्बलसिक्खापदवण्णना निट्ठिता.

१२. परिणामनसिक्खापदवण्णना

एको भिक्खु उक्खित्तकस्स दातुकामो होति, तस्स दानं निवारेत्वा अञ्ञस्स दापेति, अनापत्ति. तथा सद्धादेय्यविनिपातनं करोन्तस्स दापेति, अत्तनो निस्सितका इत्थन्नामस्स पत्तं दातुकामा आपुच्छन्ति, ‘‘विसभागो एसो, सभागस्स देही’’ति वदति. अनापत्ति अत्तनो भारभूतत्ता. तस्स पन दातुकामं अञ्ञस्स दापेति ¶ , आपत्ति एव. सब्बत्थ आपुच्छित्वा दातुकामं यथासुखं विचारेतुं लभति.

परिणामनसिक्खापदवण्णना निट्ठिता.

सहधम्मिकवग्गो अट्ठमो.

९. रतनवग्गो

१. अन्तेपुरसिक्खापदवण्णना

असयनिघरेति परिक्खित्तस्स बहिभूतेसु रुक्खमूलादीसु. ‘‘सचे खत्तियोव होति, नाभिसित्तो, अभिसित्तोव होति, न खत्तियो, रक्खती’’ति आचरियो ‘‘खत्तियता, अभिसित्तता’’ति ¶ आपत्तिया अङ्गभावेन वुत्तत्ता. समुट्ठानादीनि पठमकथिनसदिसानि, इदं पन किरियाकिरिय’’न्ति पाठो.

अन्तेपुरसिक्खापदवण्णना निट्ठिता.

२. रतनसिक्खापदवण्णना

सब्बोपि कथामग्गो भण्डागारिकसीसेन निक्खिपनं, गोपनञ्च पटिक्खिपित्वा पवत्तो.

रतनसिक्खापदवण्णना निट्ठिता.

३. विकालगामप्पवेसनसिक्खापदवण्णना

‘‘सन्तं भिक्खु’’न्ति च ‘‘अनापुच्छा’’ति च ‘‘तथारूपा अच्चायिकाति च इमाति एत्थ तिस्सो’’ति पाठो. ‘‘समुट्ठानादीनि कथिनसदिसानि, इदं पन किरियाकिरिय’’न्ति पाठो.

विकालगामप्पवेसनसिक्खापदवण्णना निट्ठिता.

४. सूचिघरसिक्खापदवण्णना

तं ¶ अस्साति तं भेदनकं अस्स पाचित्तियस्स अत्थि पठमं भेदनं कत्वा पच्छा देसेतब्बत्ता. एस नयो इतरेसुपि. वासिजटेति वासिदण्डके.

सूचिघरसिक्खापदवण्णना निट्ठिता.

५. मञ्चपीठसिक्खापदवण्णना

अट्ठङ्गुलपादकन्ति भावनपुंसकं. तुलासङ्घाते ठपनमेव अट्टकरणं.

मञ्चपीठसिक्खापदवण्णना निट्ठिता.

६. तूलोनद्धसिक्खापदवण्णना

किञ्चापि ¶ पटिलाभेयेव पाचित्तियं विय दिस्सति, परिभोगे एव पन आपत्ति दट्ठब्बा. ‘‘अञ्ञेन कतं पटिलभित्वा परिभुञ्जति, आपत्ति दुक्कटस्सा’’ति (पाचि. ५२९) वचनं एत्थ साधकं.

तूलोनद्धसिक्खापदवण्णना निट्ठिता.

७. निसीदनसिक्खापदवण्णना

किञ्चापि निसीदनस्स जाति न दिस्सति एत्थ, तथापि चीवरक्खन्धके अनुञ्ञातत्ता, ‘‘नव चीवरानि अधिट्ठातब्बानी’’ति एत्थ च परियापन्नत्ता चीवरजाति एवस्स जातीति वेदितब्बं. ‘‘लाभे सदसं, अलाभे अदसम्पि वट्टती’’ति एके, तं न युत्तं ‘‘निसीदनं नाम सदसं वुच्चती’’ति (पाचि. ५३१-५३२) तस्स सण्ठाननियमनतो.

निसीदनसिक्खापदवण्णना निट्ठिता.

रतनवग्गो नवमो.

सुद्धपाचित्तियवण्णना निट्ठिता.

पाटिदेसनीयकण्डं

१. पठमपाटिदेसनीयसिक्खापदवण्णना

यामकालिकादीसु ¶ ¶ आहारत्थाय एव दुक्कटं. तम्पि आमिसेन असम्भिन्नरसे, सम्भिन्ने पन एकरसे पाटिदेसनीयमेव.

पठमपाटिदेसनीयसिक्खापदवण्णना निट्ठिता.

२. दुतियपाटिदेसनीयसिक्खापदवण्णना

‘‘समुट्ठानादीनि कथिनसदिसानि, इदं पन किरियाकिरिय’’न्ति पाठो.

दुतियपाटिदेसनीयसिक्खापदवण्णना निट्ठिता.

४. चतुत्थपाटिदेसनीयसिक्खापदवण्णना

आरामे वा आरामूपचारे वा पटिग्गहेत्वा अज्झोहरन्तस्साति आरामे वा आरामूपचारे वा पटिग्गहेत्वा आरामे वा आरामूपचारे वा अज्झोहरन्तस्साति अत्थो.

बहारामे पटिग्गहितं अज्झारामे भुञ्जन्तस्स अनापत्ति. अङ्गेसु च ‘‘अज्झारामे वा आरामूपचारे वा पटिग्गहण’’न्ति गहेतब्बं. अज्झारामे हि दस्सिते आरामूपचारं दस्सितमेवाति. ‘‘समुट्ठानादीनि कथिनसदिसानि, इदं पन किरियाकिरिय’’न्ति पाठो.

चतुत्थपाटिदेसनीयसिक्खापदवण्णना निट्ठिता.

पाटिदेसनीयवण्णना निट्ठिता.

सेखियकण्डं

सेखियेसु ¶ ¶ सतिपि वीतिक्कमे अनादरियापेक्खस्सेव आपत्तीति दस्सनत्थं कारको न वुत्तो. अयञ्हि विनयधम्मता, यदिदं सापेक्खे कारकनिद्देसो, सो वुत्तनियमे विधि, भुम्मकरणञ्च. अट्ठङ्गुलाधिकम्पि ओतारेत्वा निवासेतुं वट्टति. ततो परं ओतारेन्तस्स दुक्कटन्ति महाअट्ठकथायं वुत्तं. आरामे वाति बुद्धुपट्ठानादिकाले. पारुपितब्बन्ति उत्तरासङ्गकिच्चवसेन वुत्तं.

ठत्वाति एत्थ गच्छन्तोपि परिस्सयाभावं ओलोकेतुं लभतियेवाति (वजिर. टी. पाचित्तिय ५८२) लिखितं. यथा वासूपगतस्स अन्तरघरे कायं विवरित्वा निसीदितुं वट्टति, तथा तस्स सन्तिके गन्तुकामस्सपि कायबन्धनं अबन्धित्वा सङ्घाटिं अपारुपित्वा गामप्पवेसनमनारोचेत्वा यथाकामं गन्तुं वट्टति. तस्मा अद्धानमग्गगमनकाले एको भिक्खु गामप्पवेसनवत्तं पूरेत्वा गामं पविसित्वा एकं आवसथं पुरतोव ठितं पत्वा परिक्खारं ठपेत्वा वासूपगतो चे होति, इतरेहि तस्स सन्तिकं यथासुखं गन्तुं वट्टति. को पन वादो चतूहपञ्चाहं वासमधिट्ठाय वसितभिक्खूनं सन्तिकं गन्तुञ्च वासूपगतानं सन्तिकं गन्तुञ्च वट्टतीति. बुद्धपूजम्पि यथासुखं गन्तुं वट्टति. वुत्तम्पि चेतं अट्ठकथायं ‘‘अनापत्ति कारणं पटिच्च तहं तहं ओलोकेती’’ति. तत्थ कारणं नाम आमिसपूजाति वेदितब्बाति लिखितं.

छब्बीसतिसारुप्पवण्णना निट्ठिता.

यस्मा ‘‘समतित्तिको पिण्डपातो पटिग्गहेतब्बो’’ति (पाचि. ६०२-६०३) वचनं पिण्डपातो समपुण्णो पटिग्गहेतब्बोति दीपेति, तस्मा अत्तनो हत्थगते पत्ते पिण्डपातो दिय्यमानो थूपीकतोपि चे होति, वट्टतीति दीपितो होति. सूपोदनविञ्ञत्तियं मुखे पक्खिपित्वा विप्पटिसारे उप्पन्ने पुन उग्गिरितुकामस्सापि सहसा चे पविसति, एत्थ असञ्चिच्च ¶ भुञ्जति नाम. विञ्ञत्तिकतञ्च अकतञ्च एकस्मिं ठाने ठितं सहसा अनुपधारेत्वा गहेत्वा भुञ्जति, अस्सतिया भुञ्जति नाम.

सयं ¶ यानगतो हुत्वा, यथा यानगतस्स चे;

अलं वत्थुं तथा नालं, सछत्तो छत्तपाणिनो.

‘‘सूपोदनविञ्ञत्तिसिक्खापदं थेय्यसत्थसमुट्ठानं, किरियं, सञ्ञाविमोक्खं, सचित्तकं, लोकवज्जं, कायकम्मं, वचीकम्मं, अकुसलचित्तं, दुक्खवेदन’’न्ति पाठो.

सेखियवण्णना निट्ठिता.

भिक्खुपातिमोक्खवण्णना निट्ठिता.

नमो तस्स भगवतो अरहतो सम्मासम्बुद्धस्स

भिक्खुनीपातिमोक्खवण्णना

पाराजिककण्डं

अभिलापमत्तमेवाति ¶ ¶ एत्थ दहरवसेन ‘‘भन्ते’’ति च वुड्ढवसेन ‘‘आवुसो’’ति च तत्थ दुविधो अभिलापो, इध पन वुड्ढदहरानं ‘‘अय्या’’ति एकमेव.

कायसंसग्गे वुत्तनयेनाति एत्थ तब्बहुलनयेन किरियसमुट्ठानता वुत्ता. ‘‘कायसंसग्गं समापज्जेय्या’’ति अवत्वा पन ‘‘सादियेय्या’’ति वुत्तत्ता अकिरियतोपि समुट्ठातीति वेदितब्बं. यथा चेत्थ, एवं हेट्ठा ‘‘मनुस्सित्थिया तयो मग्गे मेथुनं धम्मं पटिसेवन्तस्स आपत्ति पाराजिकस्सा’’तिआदिना (पारा. ५६) नयेन किरियसमुट्ठानतं वत्वा तदनन्तरं ‘‘भिक्खुपच्चत्थिका मनुस्सित्थिं भिक्खुस्स सन्तिकं आनेत्वा वच्चमग्गेन अङ्गजातं अभिनिसीदेन्ति, सो चे पवेसनं सादियती’’तिआदिना (पारा. ५८) नयेन अकिरियसमुट्ठानस्सपि वुत्तत्ता पठमपाराजिकायपि तब्बहुलनयेनेव किरियसमुट्ठानता वेदितब्बा. न हि पवेसनसादियनादिम्हि किरियसमुट्ठानता दिस्सति.

अङ्गजातचलनञ्चेत्थ ¶ न सारतो दट्ठब्बं ‘‘सो चे पवेसनं न सादियति, पविट्ठं न सादियति, ठितं न सादियति, उद्धरणं सादियति, आपत्ति पाराजिकस्सा’’ति (पारा. ५८) एत्थ ठितनसादियने पकतियापि परिपुण्णचलनत्ता. सादियनपच्चया पटिसेवनचलनञ्चेत्थ न दिस्सतेवाति तब्बहुलनयेनेव किरियसमुट्ठानता गहेतब्बा.

अपिच भिक्खुनियापि पठमपाराजिके तस्स सादियनस्स सरूपेन वुत्तत्ता तदनुरूपवसेन विभङ्गनयमनोलोकेत्वा ‘‘किरियसमुट्ठान’’मिच्चेव वुत्तं. यथा चेतेसु तब्बहुलनयेन किरियसमुट्ठानता वुत्ता, तथा सुरादीनं अकुसलेनेव पातब्बता. इतरथा ‘‘यं अकुसलेनेव ¶ आपज्जति, अयं लोकवज्जा, सेसा पण्णत्तिवज्जा’’ति वुत्ते लोकवज्जपण्णत्तिवज्जानं नियमलक्खणसिद्धि होति, तथा तं अवत्वा ‘‘यस्सा सचित्तकपक्खे चित्तं अकुसलमेव होति, अयं लोकवज्जा, सेसा पण्णत्तिवज्जा’’ति (कङ्खा. अट्ठ. पठमपाराजिकवण्णना) वुत्ते लोकवज्जवचनं निरत्थकं सिया वत्थुअजाननपक्खेपि अकुसलेनेव पातब्बत्ता. यस्मा तत्थ सुरापानवीतिक्कमस्स अकुसलचित्तुप्पादो नत्थि, तस्मा खन्धकट्ठकथायं ‘‘मज्जपाने पन भिक्खुनो अजानित्वापि बीजतो पट्ठाय मज्जं पिवन्तस्स पाचित्तियं. सामणेरो जानित्वाव पिवन्तो सीलभेदं आपज्जति, न अजानित्वा’’ति (महाव. अट्ठ. १०८) वुत्तं, न वुत्तं ‘‘वत्थुअजाननपक्खे पाणातिपातादीनं सिद्धिकरअकुसलचित्तुप्पादसदिसे चित्तुप्पादे सतिपि सामणेरो सीलभेदं नापज्जती’’ति. अभिनिवेसवचनं पाणातिपातादीहि समानगतिकत्ता सामणेरानं सुरापानस्स. ‘‘सुरामेरयिमे’’ति वत्थुं जानित्वा पातब्बतादिवसेन वीतिक्कमन्तस्स अकुसलस्स असम्भवो नत्थि. तेन वुत्तं ‘‘यस्सा सचित्तकपक्खे’’तिआदि.

किञ्चेत्थ – युत्तिवचनेन अरहन्तानं अप्पविसनतो सचित्तकाचित्तकपक्खेसु अकुसलनियमोति चे? न, धम्मतावसेन सेक्खानम्पि अप्पविसनतो. अचित्तकपक्खे अकुसलनियमाभावदस्सनत्थं सुपन्तस्स मुखे पक्खित्तजलबिन्दुमिव सुराबिन्दुआदयो उदाहरितब्बा. तब्बहुलनयेन हि अत्थे गहिते पुब्बेनापरं अट्ठकथाय समेति सद्धिं पाळिया चाति. आचरियापि सुरापाने अकुसलनियमाभावमेव वदन्ति. एकच्चे पन किरियसमुट्ठानता पनस्स तब्बहुलनयमेव, न पठमपाराजिके. कथं? कायसंसग्गसिक्खापदं पठमपाराजिकसमुट्ठानं. एत्थ भिक्खुस्स च भिक्खुनिया च कायसंसग्गभावे सति भिक्खुनी कायङ्गं अचोपयमानापि चित्तेनेव अधिवासेति, आपज्जति, न एवं भिक्खु. भिक्खु पन चोपयमानोव आपज्जति, एवमेव पठमपाराजिकेपि चोपने सति एव आपज्जति, नासति. पवेसनं ¶ सादियतीति एत्थ पवेसनसादियनं नाम सेवनचित्तुप्पादनं, मग्गेन वा मग्गप्पटिपन्नम्पि इच्छन्ति. तस्सापि कायचलनं एकन्तं अत्थि एव. एवं सन्तेपि वीमंसित्वा गहेतब्बन्ति वदन्तीति लिखितं

पाराजिकवण्णना निट्ठिता.

सङ्घादिसेसकण्डं

१. उस्सयवादिकासिक्खापदवण्णना

भिक्खुनीनं ¶ ¶ सङ्घादिसेसं पत्वा वुट्ठानविधयो सन्दस्सनत्थं ‘‘अयं भिक्खुनी…पे… आपन्ना’’ति पुग्गलनियमं कत्वा पाराजिकतो अधिप्पायन्ति ‘‘निस्सारणीयं सङ्घादिसेस’’न्ति आपत्तिनामग्गहणञ्च कतं. ‘‘समुट्ठानादीनि पठमकथिनसदिसानि, इदं पन किरियमेवा’’ति पाठो.

उस्सयवादिकासिक्खापदवण्णना निट्ठिता.

२. चोरिवुट्ठापिकासिक्खापदवण्णना

कत्थचि अगन्त्वा निसिन्नट्ठाने एव निसीदित्वा करोन्तिया वाचाचित्ततो, खण्डसीमादिगताय कायवाचाचित्ततो.

चोरिवुट्ठापिकासिक्खापदवण्णना निट्ठिता.

३. एकगामन्तरगमनसिक्खापदवण्णना

‘‘आभोगं विना’’ति वुत्तत्ता आभोगे सति अनापत्ति, इमस्मिं पन सिक्खापदे समन्तपासादिकायं उपचारातिक्कमे आपत्ति वुत्ता, इध ओक्कमे. द्वीसुपि वुत्तं अत्थतो एकमेव गामन्तरगमनसङ्घादिसेसं उपचारस्स सन्धाय वुत्तत्ता. गणम्हा ओहीयनस्स विरोधो. ‘‘अरञ्ञे’’ति इदं अत्थवसेन वुत्तं, गामन्तरेपि होति एव.

सिक्खापदा ¶ बुद्धवरेन वण्णिताति गाथाय वसेन, अट्ठकथायम्पि गामन्तरपरियापन्नं नदिपारन्ति वुत्तं.

एकगामन्तरगमनसिक्खापदवण्णना निट्ठिता.

‘‘छादनपच्चया ¶ पन दुक्कटं आपज्जती’’ति इदं –

‘‘आपज्जति गरुकं सावसेसं;

छादेति अनादरियं पटिच्च;

न भिक्खुनी नो च फुसेय्य वज्जं;

पञ्हामेसा कुसलेहि चिन्तिता’’ति. (परि. ४८१) –

इमाय विरुज्झति. तस्मा पमादलेखा विय दिस्सतीति गवेसितब्बो एत्थ अत्थो. भिक्खूनं मानत्तकथायं ‘‘परिक्खित्तस्स विहारस्स परिक्खेपतो, अपरिक्खित्तस्स परिक्खेपारहट्ठानतो द्वे लेड्डुपाते अतिक्कमित्वा’’ति (कङ्खा. अट्ठ. निगमनवण्णना) वुत्तं, इध पन ‘‘गामूपचारतो च भिक्खूनं विहारूपचारतो च द्वे लेड्डुपाते’’तिआदि वुत्तं. तत्र भिक्खूनं वुत्तप्पकारप्पदेसं अतिक्कमित्वा गामेपि तं कम्मं कातुं वट्टति, भिक्खुनीनं पन गामे न वट्टति. तस्मा एवं वुत्तन्ति एके. अपरे पन भिक्खूनम्पि गामे न वट्टति. भिक्खुविहारो नाम पुब्बे एव गामूपचारं अतिक्कमित्वा ठितो, तस्मा गामं अवत्वा विहारूपचारमेव हेट्ठा वुत्तं. भिक्खुनीनं विहारो गामे एव वट्टति, न बहि, तस्मा गामूपचारञ्च विहारूपचारञ्च उभयमेवेत्थ दस्सितं. तस्मा उभयत्थापि अत्थतो नानात्तं नत्थीति वदन्ति. यं युज्जति, तं गहेतब्बं.

सङ्घादिसेसवण्णना निट्ठिता.

निस्सग्गियकण्डं

दुतिये ¶ ¶ इध भाजापिताय लद्धचीवरं निस्सग्गियं होति, तं विनयकम्मं कत्वापि अत्तना न लब्भति.

ततिये ‘‘समुट्ठानादीनि अदिन्नादानसदिसानि, इदं पन दुक्खवेदन’’न्ति पाठो.

चतुत्थे पठमं विञ्ञत्तं अलभित्वा अञ्ञं ततो ऊनतरम्पि लभेय्य, निस्सग्गियमेव अङ्गसम्पत्तितो.

निस्सग्गियवण्णना निट्ठिता.

पाचित्तियकण्डं

१. पठमवग्गवण्णना

पठमे ¶ ¶ हरितपत्तवण्णो हरितको. चापलसुणं अमिञ्जको. अङ्कुरमत्तमेव हि तस्स होति. पलण्डुकादयो सभावेनेव वट्टन्ति. सूपसम्पाकादी विनापि अन्तमसो यागुभत्तेपि पक्खिपितुं वट्टतीति लिखितं, ‘‘भिक्खुनियापि गिलानाय पुरेभत्तमेव लसुणं कप्पति, न अगिलानाया’’ति अभयगिरीनं उग्गहोति.

दुतिये आबाधपच्चया भिक्खुनिसङ्घं आपुच्छित्वा संहरापेतुं वट्टति, भिक्खुस्स एत्थ च लसुणे च दुक्कटं.

सत्तमे ‘‘समुट्ठानादीनि अद्धानमग्गसिक्खापदसदिसानी’’ति पाठो.

नवमे कुट्टो नाम घरकुट्टो. पाकारो नाम परिक्खेपपाकारो.

छड्डितखेत्तेति पुराणखेत्ते. सङ्घसन्तके भिक्खुस्स छड्डेतुं वट्टति सङ्घपरियापन्नत्ता. भिक्खुनीनम्पि सङ्घसन्तके भिक्खुसङ्घसन्तके वुत्तनयेनेव वट्टति. एवं सन्तेपि सारुप्पवसेन कातब्बन्ति लिखितं.

दसमे ‘‘सयं तानि वत्थूनि करोन्तिया’’तिआदि इध सिक्खापदे नत्थि. कस्मा? एळकलोमसमुट्ठानत्ता. यदि एवं कस्मा वुत्तन्ति चे? सुत्तानुलोममहापदेसतो. यदि नच्चादीनि पस्सितुं वा सुणितुं वा न लभति, पगेव अत्तना कातुन्ति नयतो लब्भमानत्ता वुत्तं. इतरथा महापदेसा निरत्थका सियुं. ‘‘एवं अञ्ञत्थपि नयो नेतब्बो. समुट्ठानम्पि इध वुत्तमेव ¶ अग्गहेत्वा छसमुट्ठानवसेन गहेतब्ब’’न्ति आचरिया. इध वुत्तं समुट्ठानं नाम मूलभूतस्स अन्तरा वुत्तापत्तिया, तस्मा एळकलोमसमुट्ठानमेवाति अपरे. आरामे ठत्वाति न केवलं ठत्वा, ततो गन्त्वा पन सब्बिरियापथेहिपि लभति. आरामे ठिताति पन आरामपरियापन्नाति अत्थो. इतरथा निसिन्नापि न लभेय्याति.

पठमवग्गवण्णना निट्ठिता.

२. दुतियवग्गवण्णना

पञ्चमे ¶ उपचारो द्वादसहत्थो. ‘‘समुट्ठानादीनि कथिनसदिसानि, इदं पन किरियाकिरिय’’न्ति पाठो.

सत्तमे धुवपञ्ञत्तेति भिक्खुनीनं अत्थाय. कुलानीति कुलघरानि.

दुतियवग्गवण्णना निट्ठिता.

३. ततियवग्गवण्णना

चतुत्थे सङ्घाटिआदिवसेन अधिट्ठितानं सङ्घाटिचारं.

पञ्चमे ‘‘इदं पन किरियाकिरिय’’न्ति पाठो.

छट्ठे अञ्ञस्मिं परिक्खारे दुक्कटन्ति थालकादीनं वा सप्पितेलादीनं वा अञ्ञतरस्मिं.

ततियवग्गवण्णना निट्ठिता.

४. चतुत्थवग्गवण्णना

छट्ठे संसट्ठविहारसिक्खापदे ‘‘सेसमेत्थ पठमअरिट्ठसिक्खापदे वुत्तविनिच्छयसदिसमेवा’’ति पाठो.

चतुत्थवग्गवण्णना निट्ठिता.

५. पञ्चमवग्गवण्णना

‘‘चित्तागारं ¶ नाम यत्थ कत्थचि मनुस्सानं कीळितुं रमितुं कतं होती’’तिआदिना (पाचि. ९७९) पाळियं वुत्तत्ता चित्तागारादीनि सब्बेसं अत्थाय कतानि, न रञ्ञो एव.

सत्तमे एतेन निस्सज्जितुं कप्पियं वुत्तं. ‘‘निस्सज्जित्वा परिभुञ्जती’’ति (पाचि. १००७) पाळि च अत्थि. ‘‘समुट्ठानादीनि कथिनसदिसानि, इदं पन किरियाकिरिय’’न्ति पाठो. अट्ठमेपि एसोव पाठो.

पञ्चमवग्गवण्णना निट्ठिता.

६. छट्ठवग्गवण्णना

दसमे ¶ ‘‘समुट्ठानादीनि कथिनसदिसानि, इदं पन किरियाकिरिय’’न्ति पाठो.

छट्ठवग्गवण्णना निट्ठिता.

८. अट्ठमवग्गवण्णना

पठमदुतियततियेसु ‘‘गिहिगता’’ति वा ‘‘कुमारिभूता’’ति वा न वत्तब्बा. वदन्ति चे, कम्मं कुप्पति.

एकादसमे छन्दं अविस्सज्जेत्वाति ‘‘यथासुख’’न्ति अवत्वा. एत्थ पन अयं विनिच्छयो – ‘‘पारिवासिकछन्ददानेना’’ति इदं उद्धरित्वा ‘‘वुट्ठिताय परिसाया’’ति (पाचि. ११६८) पदभाजनं वुत्तं. एतस्स पन समन्तपासादिकायं ‘‘वुट्ठिताय परिसायाति छन्दं विस्सज्जेत्वा कायेन वा वाचाय वा छन्दविस्सज्जनमत्तेन वा वुट्ठिताया’’ति (पाचि. अट्ठ. ११६७) वुत्तं. इध छन्दस्स पन अविस्सट्ठत्ता कम्मं कातुं वट्टतीति वुत्तं. तस्मा छन्दं अविस्सज्जेत्वाव द्वादसहत्थपासे विहरित्वा पुन सन्निपातकरणञ्च वट्टतीति लिखितं.

अट्ठमवग्गवण्णना निट्ठिता.

९. नवमवग्गवण्णना

ततिये ¶ ‘‘सेसं वुत्तनयेन वेदितब्बं, इदं पन अकुसलचित्त’’न्ति पाठो.

चतुत्थे वुत्तनयेनाति ततिये वुत्तनयेन.

एकादसमे ‘‘समुट्ठानादीनि कथिनसदिसानि, इदं पन किरियाकिरिय’’न्ति पाठो.

द्वादसमे ‘‘समुट्ठानादीनि पदसोधम्मसदिसानि, इदं पन किरियाकिरिय’’न्ति पाठो.

तेरसमे ‘‘संकच्चिकं नाम अधक्खकं उब्भनाभि, तस्सा पटिच्छादनत्थाया’’ति (पाचि. १२२६) पाळियं वुत्तत्ता इधापि ‘‘अधक्खकउब्भनाभिसङ्खातस्स सरीरस्स पटिच्छादनत्थ’’न्ति ¶ पाठो. अपरिक्खेपे आपत्तिपरिच्छेदं समन्तपासादिकवसेन अग्गहेत्वा इध वुत्तनयेन गहेतब्बन्ति लिखितं.

नवमवग्गवण्णना निट्ठिता.

सुद्धपाचित्तियवण्णना निट्ठिता.

समुट्ठानविनिच्छयवण्णना

समुट्ठानानं विनिच्छये पन गिरग्गसमज्जादीनि ‘‘अचित्तकानि लोकवज्जानी’’ति वुत्तत्ता ‘‘नच्च’’न्ति वा ‘‘गन्ध’’न्ति वा अजानित्वापि दस्सनेन, विलिम्पनेन वा आपज्जनतो वत्थुअजाननचित्तेन अचित्तकानि. ‘‘नच्च’’न्ति वा ‘‘गन्ध’’न्ति वा जानित्वा पस्सन्तिया, विलिम्पन्तिया वा अकुसलत्ता एव लोकवज्जानि. चोरिवुट्ठापनादीनि ‘‘चोरी’’तिआदिना वत्थुं जानित्वा करणेयेव आपज्जनत्ता सचित्तकानि. उपसम्पदादीनं एकन्ताकुसलचित्तेनेव अकत्तब्बत्ता पण्णत्तिवज्जानि. ‘‘इध सचित्तकाचित्तकता पण्णत्तिजाननाजाननताय अग्गहेत्वा वत्थुजाननाजाननताय गहेतब्ब’’न्ति लिखितं. अधिप्पेतत्ता सङ्खेपतो दस्सनाभावा –

अचित्तकत्तं ¶ द्विधा मतं, वत्थुपण्णत्तिअञ्ञाणा;

वुत्तं ञाणं द्विधा इध, सकनामेन अञ्ञातं.

परनामञ्च जाननं, वत्थुस्सेकं बलक्कारे;

एकधा समचारिके, तस्मिं तप्पटिबन्धोति.

परनामेन जाननं, द्विधा मुत्तादिके एकं;

एकं लोमादिके मतन्ति, अयं भेदो वेदितब्बो.

सेसमेत्थ उत्तानं, अनुत्तानत्थे वुत्तविनिच्छयत्ता न उद्धटन्ति;

समुट्ठानविनिच्छयवण्णना निट्ठिता.

भिक्खुनीपातिमोक्खवण्णना निट्ठिता.

कङ्खावितरणीपुराणटीका निट्ठिता.

नमो तस्स भगवतो अरहतो सम्मासम्बुद्धस्स

कङ्खावितरणी-अभिनवटीका

गन्थारम्भकथा

तिलोकतिलकं ¶ ¶ बुद्धं, वन्दे सुद्धगुणाकरं;

करुणासीतलीभूत-हदयं महितोदयं.

तेनापि धम्मराजेन, लोकेकाचरियेन यो;

पूजितो तञ्च सद्धम्मं, वन्दे गम्भीरमुत्तमं.

मुनिन्दचन्दसद्धम्म-रंसीहि विमलेहि यो;

बोधितोहं सदा वन्दे, तं सङ्घं कुमुदाकरं.

विनये ¶ नयगम्भीरे, सब्बथा पारदस्सिना;

वादिना दुत्तरागाध-सब्बसत्थमहण्णवे.

या कता बुद्धघोसेन, थेरेन थिरचेतसा;

कङ्खावितरणी नाम, मातिकट्ठकथा सुभा.

थिरानेकगुणोघेन, थेरेन विनयञ्ञुना;

कल्याणाचारयुत्तेन, धीमता मुनिसूनुना;

विनयट्ठितिकामेन, सुमेधेनाभियाचितो.

तमहं वण्णयिस्सामि, सुविसुद्धमनाकुलं;

साधवो तं निसामेथ, सक्कच्चं मम भासतोति.

गन्थारम्भकथावण्णना

सब्बकुसलधम्मप्पमुखस्स विपुलोळारगुणविसेसावहस्स परमगम्भीरस्स पातिमोक्खस्स अत्थसंवण्णनं कत्तुकामोयमाचरियो पठमं ताव ‘‘बुद्धं धम्म’’न्तिआदिना रतनत्तयप्पणामकरणेन अत्तनो चित्तसन्तानं पुनाति. विसुद्धचित्तसन्ताननिस्सया हि पञ्ञा तिक्खविसदभावप्पत्तिया यथाधिप्पेतसंवण्णनाय परियोसानगमनसमत्था होतीति ¶ . अपिच रतनत्तयप्पणामेन विधुतसब्बकिब्बिसे चित्तसन्ताने भवन्तरूपचितानिपि अन्तरायिककम्मानि पच्चयवेकल्लतो यथाधिप्पेताय अत्थसंवण्णनाय नालमन्तरायकरणायातिपि आचरियस्स रतनत्तयवन्दना.

तत्थ बुद्धसद्दस्स ताव ‘‘बुज्झिता सच्चानीति बुद्धो, बोधेता पजायाति बुद्धो’’तिआदिना (महानि. १९२; चूळनि. पारायनत्थुतिगाथानिद्देस ९७; पटि. म. १.१६२) निद्देसनयेन अत्थो वेदितब्बो. अथ वा सवासनाय अञ्ञाणनिद्दाय अच्चन्तविगमतो, बुद्धिया वा विकसितभावतो बुद्धवाति बुद्धो जागरणविकसनत्थवसेन. अथ वा कस्सचिपि ञेय्यधम्मस्स अनवबुद्धस्स अभावेन, ञेय्यविसेसस्स च कम्मभावेन अग्गहणतो ¶ कम्मवचनिच्छाय अभावेन अवगमनत्थवसेनेव कत्तुनिद्देसो लब्भतीति बुद्धवाति बुद्धो यथा ‘‘दिक्खितो न ददाती’’ति. अत्थतो पन पारमितापरिभावितेन सयम्भुञाणेन सहवासनाय विगतविद्धस्तनिरवसेसुपक्किलेसो महाकरुणासब्बञ्ञुतञ्ञाणादिअपरिमेय्यगुणगणाधारोव खन्धसन्तानो बुद्धो. यथाह –

‘‘बुद्धोति यो सो भगवा सयम्भू अनाचरियको पुब्बे अननुस्सुतेसु धम्मेसु सामं सच्चानि अभिसम्बुज्झि, तत्थ च सब्बञ्ञुतं पत्तो, बलेसु च वसीभाव’’न्ति (महानि. १९२; चूळनि. पारायनत्थुतिगाथानिद्देस ९७; पटि. म. १.१६१),

तं बुद्धं.

धारेतीति धम्मो. अयञ्हि यथानुसिट्ठं पटिपज्जमाने अपायदुक्खे, संसारदुक्खे च अपतमाने धारेतीति, तन्निब्बत्तककिलेसविद्धंसनञ्चेत्थ धारणं. एवञ्च कत्वा अरियमग्गो, तस्स तदत्थसिद्धिहेतुताय निब्बानञ्चाति उभयमेव निप्परियायतो धारेति. अरियफलञ्च पन तंसमुच्छिन्नकिलेसपटिप्पस्सम्भनेन तदनुकूलताय, परियत्तिधम्मो च तदधिगमहेतुतायाति उभयम्पि परियायतो धारेतीति वेदितब्बं, तं धम्मं. च-सद्दो समुच्चयत्थो. तेन यथावुत्तं बुद्धं, इमञ्च धम्मं वन्दित्वाति बुद्धरतनेन सह वन्दनकिरियाय धम्मरतनं समुच्चिनोति.

न केवलं इदं द्वयमेवाति आह ‘‘सङ्घञ्चा’’ति. अरियेन दिट्ठिसीलसामञ्ञेन संहतो घटितोति सङ्घो, अट्ठअरियपुग्गलसमूहो. तेहि ¶ तेहि वा मग्गफलेहि किलेसदरथानं समुच्छेदपटिप्पस्सम्भनवसेन सम्मदेव घातितत्ता सङ्घो, पोथुज्जनिकसङ्घस्सापि पुब्बभागप्पटिपदाय ठितत्ता पुरिमचेतनाय विय दाने एत्थेव सङ्गहो दट्ठब्बो. सोपि हि किञ्चापि अरियेन दिट्ठिसीलसामञ्ञेन असंहतो, निय्यानिकपक्खियेन पन पोथुज्जनिकेन संहतत्ता दक्खिणेय्यपणिपातारहो सङ्घोयेवाति, तं सङ्घं. च-सद्दस्सत्थो एत्थापि वुत्तनयेनेव वेदितब्बो.

किंविसिट्ठं बुद्धं, धम्मं, सङ्घञ्चाति आह ‘‘वन्दनामानपूजासक्कारभाजन’’न्ति. इदञ्च विसेसनं पच्चेकं योजेतब्बं ‘‘वन्दनामानपूजासक्कारभाजनं. बुद्धं…पे… वन्दनामानपूजासक्कारभाजनं सङ्घञ्चा’’ति. तत्थ सदेवकेन लोकेन अरहतादीहि गुणेहि सेट्ठभावेन करियमानो पणामो वन्दना, सम्मानो मानो, गन्धपुप्फादीहि उपहारो पूजा, अभिसङ्खतपच्चयदानं ¶ सक्कारो, वन्दना च मानो च पूजा च सक्कारो च वन्दनामानपूजासक्कारा, तेसं महप्फलभावकरणेन भाजनत्ता आधारत्ता वन्दनामानपूजासक्कारभाजनं. इमिना रतनत्तयस्स अरहतादीहि गुणेहि असमभावं दस्सेति. तन्दस्सनम्पि तक्कतस्स निपच्चकारस्स ससन्तानपवनादिवसेन यथाधिप्पेताय अत्थसंवण्णनाय निप्फादनसमत्थभावदीपनत्थन्ति वेदितब्बं.

विप्पसन्नेन चेतसा वन्दित्वाति अरहतादिअनेकप्पकारगुणविसेसानुस्सरणवसेन विविधेन, विसेसेन वा पसन्नेन मनसा सद्धिं कायवाचाहि करणभूताहि अभिवन्दियाति अत्थो, तीहि द्वारेहि नमस्सित्वाति वुत्तं होति. तिविधा चायं वन्दना कायवचीमनोवन्दनानं वसेन. तत्थ बुद्धादिगुणारम्मणा कामावचरकुसलकिरियानं अञ्ञतरचेतना कायवचीविञ्ञत्तियो समुट्ठापेत्वा कायवचीद्वारवसेन उप्पन्ना कायवचीवन्दनाति वुच्चति, उभयविञ्ञत्तियो पन असमुट्ठापेत्वा मनोद्वारवसेन उप्पन्ना मनोवन्दनाति. इमस्स पदस्स ‘‘वण्णनं वण्णयिस्सामी’’ति इमिना सम्बन्धो.

एवं रतनत्तयस्स पणामं दस्सेत्वा इदानि अत्तनो निस्सयभूतानं अट्ठकथाचरियानञ्च पणामं दस्सेन्तो ‘‘थेरवंसप्पदीपान’’न्तिआदिमाह. तत्थ कतञ्जली पुब्बाचरियसीहानं नमो कत्वाति सम्बन्धो. कतो अञ्जलि करपुटो एतेनाति कतञ्जली. छन्दानुरक्खणत्थञ्हेत्थ दीघो ¶ , कतञ्जली हुत्वाति वुत्तं होति. पुब्बाचरिया पोराणट्ठकथाकारा तम्बपण्णिया महाथेरा, ते एव परिस्सयसहनतो, पटिपक्खभूतकिलेसहननतो, परवादिमिगेहि अपधंसनीयतो च सीहसदिसत्ता सीहाति पुब्बाचरियसीहा, तेसं पुब्बाचरियसीहानं. कीदिसा ते पुब्बाचरियसीहा, येसं तया नमो करीयतीति आह ‘‘थेरवंसप्पदीपान’’न्तिआदि. तत्थ थेरवंसप्पदीपानन्ति थिरेहि सीलक्खन्धादीहि समन्नागताति थेरा, महाकस्सपादयो, तेसं वंसो अन्वयोति थेरवंसो. एतेन भिन्नलद्धिकानं सत्तरसभेदानं महासङ्घिकादीनं वंसं पटिक्खिपति, थेरवंसपरियापन्ना हुत्वा पन आगमाधिगमसम्पन्नत्ता पञ्ञापज्जोतेन तस्स थेरवंसस्स दीपनतो थेरवंसप्पदीपा, पुब्बाचरियसीहा, तेसं थेरवंसप्पदीपानं. असंहीरत्ता थिरानं. विनयक्कमेति आरम्भानुरूपवचनमेतं, ते पन सुत्ताभिधम्मेसुपि थिरा एव.

एवं अट्ठकथाचरियानम्पि पणामं दस्सेत्वा इदानि संवण्णेतब्बधम्मविसेसस्स अभिधानानिसंसं, देसकसम्पत्तियो च दस्सेन्तो ‘‘पामोक्ख’’न्तिआदिमाह. तत्थ महेसिना यं पातिमोक्खं पकासितन्ति सम्बन्धो. तत्थ महेसिनाति महन्ते सीलादिके पञ्च धम्मक्खन्धे एसी ¶ गवेसीति महेसि. महन्तेहि एसितोति वा पुथुज्जनसेखासेखइसीहि विसिट्ठत्ता महन्तो इसीति वा महेसि, सम्मासम्बुद्धो, तेन महेसिना. पातिमोक्खन्ति सत्तापत्तिक्खन्धसंवरभूतं सिक्खापदसीलं, तद्दीपनतो उभतोविभङ्गसुत्तसङ्खातं गन्थपातिमोक्खमेव वा. किम्भूतन्ति आह ‘‘पामोक्ख’’न्तिआदि. पमुखे साधूति पमोक्खं, पमोक्खमेव पामोक्खं, वज्जपटिपक्खत्ता अनवज्जानं समाधिपञ्ञासङ्खातानं परित्तमहग्गतलोकुत्तरानं कुसलानं धम्मानं आदि पतिट्ठाभूतन्ति अत्थो. ‘‘सीले पतिट्ठाय नरो सपञ्ञो, चित्तं पञ्ञञ्च भावय’’न्ति (सं. नि. १.२३, १९२; पेटको. २२; मि. प. २.१.९) हि वुत्तं. मुखमिवाति मुखं, द्वारं. यथा हि सत्तानं खज्जभोज्जलेय्यपेय्यवसेन चतुब्बिधोपि आहारो मुखेन पविसित्वा अङ्गपच्चङ्गानि फरति, एवं योगिनोपि चातुभूमककुसलं सीलमुखेन पविसित्वा अत्थसिद्धिं सम्पादेति. तेन वुत्तं ‘‘मुखमिवाति मुख’’न्ति. अथ वा मुखं द्वारं मोक्खप्पवेसाय निब्बानसच्छिकिरियायाति अत्थो. वुत्तञ्हि –

‘‘अविप्पटिसारत्थानि ¶ खो, आनन्द, कुसलानि सीलानी’’ति (अ. नि. ११.१).

तथा –

‘‘अविप्पटिसारो पामोज्जत्थाय, पामोज्जं पीतत्थाय, पीति पस्सद्धत्थाय, पस्सद्धि सुखत्थाय, सुखं समाधत्थाय, समाधि यथाभूतञाणदस्सनत्थाय, यथाभूतञाणदस्सनं निब्बिदत्थाय, निब्बिदा विरागत्थाय, विरागो विमुत्तत्थाय, विमुत्ति विमुत्तिञाणदस्सनत्थाय, विमुत्तिञाणदस्सनं अनुपादापरिनिब्बानत्थाया’’ति (परि. ३६६) च.

एवं संवण्णेतब्बधम्मस्स अभिधानादिं दस्सेत्वा इदानि संवण्णनाय निमित्तं दस्सेतुं ‘‘सूरतेना’’तिआदिना चतुत्थगाथमाह. तत्थ सूरतेनाति सोभने रतोति सूरतो उ-कारस्स दीघं कत्वा, तेन सूरतेन, सोभने कायिकवाचसिककम्मे रतेनाति अत्थो, विनीतेनाति वुत्तं होति. निवातेनाति नीचवुत्तिना. सुचिसल्लेखवुत्तिनाति सुचिभूता किलेससल्लिखनसमत्था वुत्ति पटिपत्ति एतस्साति सुचिसल्लेखवुत्ति, तेन सुचिसल्लेखवुत्तिना, परिसुद्धाय अप्पिच्छवुत्तिया समन्नागतेनाति अत्थो. विनयाचारयुत्तेनाति वारित्तचारित्तसीलसम्पन्नेन. अथ वा विनयोति चेत्थ पातिमोक्खसंवरादिभेदो संवरविनयो. आचारोति आचारगोचरनिद्देसे आगतसमणसारुप्पाचारो ¶ . सोणत्थेरेनाति एत्थ सोणोति तस्स नामं. थिरेहि सीलक्खन्धादीहि समन्नागतत्ता थेरो. याचितोति अभियाचितो. थेरो हि पातिमोक्खस्स गम्भीरताय दुरवगाहतं, आचरियस्स च तंसंवण्णनाय सामत्थियं ञत्वा ‘‘पातिमोक्खस्स तया अत्थसंवण्णना कातब्बा. एवञ्हि सासनस्स सुचिरट्ठितिकता होती’’ति सानिसंसगारवेन याचनं अकासि. तदस्स याचनं अत्तनो संवण्णनाय निदानभूतं दस्सेन्तो ‘‘याचितो’’ति आह.

एत्थ च ‘‘सूरतेना’’ति इमिनास्स सोरच्चं वुच्चति. ‘‘निवातेना’’ति इमिना नीचमनता निवातवुत्तिता, याय निवातवुत्तिताय समन्नागतो पुग्गलो निहतमानो, निहतदप्पो, पादपुञ्छनचोळकसमो, भिन्नविसाणूसभसमो, उद्धटदाठसप्पसमो च हुत्वा सण्हो सखिलो सुखसम्भासो ¶ होति. ‘‘सुचिसल्लेखवुत्तिना’’ति इमिना इन्द्रियसंवरपच्चयसन्निस्सितआजीवपारिसुद्धिसीलं. ‘‘विनयाचारयुत्तेना’’ति इमिना पातिमोक्खसंवरसीलं वुत्तन्ति वेदितब्बं. एवमनेकगुणेहि तस्स अभित्थवनं यथावुत्तगुणसमन्नागतस्स सब्रह्मचारिनो अज्झेसनं न सक्का पटिबाहितुन्ति परमगम्भीरस्सापि पातिमोक्खस्स अत्थसंवण्णनायं पवत्ताति दस्सनत्थं. किञ्च – तादिसस्स अज्झेसनं निस्साय करियमाना अत्थसंवण्णना तस्स अज्झेसनाधिपच्चेन, ममञ्च उस्साहसम्पत्तिया न चिरेन परियोसानं गच्छतीति कतन्ति वेदितब्बं.

एवं संवण्णनाय निमित्तं दस्सेत्वा इदानि तस्सवने सोतुजनस्सादरं जनेतुं तप्पयोजनकरणप्पकारनिस्सयाभिधानादिं दस्सेन्तो ‘‘तत्था’’तिआदिगाथाद्वयमाह. तत्थ तत्थाति ‘‘यं महेसिना पातिमोक्खं पकासित’’न्ति वुत्तं, तस्मिं पातिमोक्खे. सञ्जातकङ्खानन्ति पदपदत्थविनिच्छयवसेन सञ्जातकङ्खानं, समुप्पन्नसंसयानन्ति अत्थो. कङ्खावितरणत्थायाति यथावुत्तसंसयस्स अतिक्कमनत्थाय. तस्साति पातिमोक्खस्स. वण्णीयति अत्थो कथीयति एतायाति वण्णना, अट्ठकथा, तं वण्णनं. इमस्स च ‘‘वण्णयिस्सामी’’ति इमिना सम्बन्धो. किंभूतन्ति आह ‘‘परिपुण्णविनिच्छय’’न्तिआदि. परिपुण्णविनिच्छयन्ति खन्धकपरिवारपदभाजनादिवसेन असाधारणविनिच्छयस्स च निदानादिवसेन सत्तरसप्पभेदस्स च सब्बसिक्खापदसाधारणविनिच्छयस्स पकासनतो सम्पुण्णविनिच्छयं.

महाविहारवासीनन्ति महामेघवनुय्यानभूमिभागे पतिट्ठितो विहारो महाविहारो, यो सत्थुनो महाबोधिना विभूसितो, तत्थ वसन्ति सीलेनाति महाविहारवासिनो, तेसं महाविहारवासीनं ¶ . वाचनामग्गनिस्सितन्ति कथामग्गनिस्सितं, अट्ठकथानिस्सितन्ति अत्थो, महाविहारवासीनं सीहळट्ठकथानयं इध निस्सायाति वुत्तं होति. वण्णयिस्सामीति पवत्तयिस्सामि. नामेनाति अत्तनो गुणनामेन. कङ्खावितरन्ति एतायाति कङ्खावितरणी, तं कङ्खावितरणिं. सुभन्ति अत्थब्यञ्जनसम्पन्नत्ता सुन्दरं, सद्दलक्खणसुभतो, विनिच्छयसुभतो, विञ्ञेय्यसुभतो च सुभं परिसुद्धं. एत्थ च ‘‘कङ्खावितरणत्थाया’’ति इमिना पयोजनं दस्सेति, पुरिपुण्णविनिच्छय’’न्ति इमिना ¶ संवण्णनाप्पकारं, ‘‘महाविहारवासीनं वाचनामग्गनिस्सित’’न्ति इमिना संवण्णनाय निस्सयविसुद्धिं निकायन्तरलद्धिसङ्करदोसविवज्जनतो, ‘‘वण्णयिस्सामी’’ति इमिना अत्तनो अज्झासयं दस्सेतीति दट्ठब्बं. ‘‘वत्तयिस्सामी’’तिपि पाठो.

गन्थारम्भकथावण्णना निट्ठिता.

निदानवण्णना

एवं रतनत्तयपणामादिसहितं सञ्ञादिकं दस्सेत्वा इदानि ‘‘पातिमोक्खस्स वण्णनं वण्णयिस्सामी’’ति वुत्तत्ता पातिमोक्खं ताव वचनत्थतो, सरूपभेदतो, गन्थभेदतो, उद्देसविभागतो, उद्देसपरिच्छेदतो च ववत्थपेत्वा तदुद्देसक्कमेनायं वण्णना भविस्सतीति दस्सेतुं ‘‘तत्थ पातिमोक्ख’’न्तिआदि आरद्धं.

तत्थ तत्थाति तस्मिं गाथापदे. पअतिमोक्खन्ति पकारतो अतिविय सीलेसु मुखभूतं. अतिपमोक्खन्ति तमेव पदं उपसग्गब्यत्तयेन वदति. अथ वा प अति मोक्खन्ति पदच्छेदो, तस्स उपसग्गब्यत्तयेनत्थमाह ‘‘अतिपमोक्ख’’न्ति. एवं पभेदतो पदवण्णनं कत्वा सद्दत्थतो वदति ‘‘अतिसेट्ठं अतिउत्तमन्ति अत्थो’’ति. एत्थ च सीलपातिमोक्खं सब्बगुणानं मूलभावतो सेट्ठं, गन्थपातिमोक्खं पन सेट्ठगुणसहचरणतो सेट्ठन्ति वेदितब्बं. उत्तमन्ति एत्थापि एसेव नयो. इतीति एवं. इमिना यथावुत्तवचनत्थं निदस्सेति. निदस्सनत्थो हि अयं इति-सद्दो ‘‘सब्बमत्थीति खो, कच्चान, अयमेको अन्तो, सब्बं नत्थीति खो, कच्चान, अयं दुतियो अन्तो’’तिआदीसु (सं. नि. २.१५; ३.९०) विय. इमिनाति आसन्नपच्चक्खवचनं इति-सद्देन अनन्तरनिदस्सितस्स, पटिग्गाहकेहि च सोतविञ्ञाणादिवीथिया ¶ पटिपन्नस्स वचनत्थस्स वचनतो. अथ वा इमिनाति आसन्नपच्चक्खभावकरणवचनं यथावुत्तस्स वचनत्थस्स अभिमुखीकरणतो. वचनत्थेनाति ‘‘अतिसेट्ठ’’न्ति सद्दत्थेन. एकविधम्पीति एककोट्ठासम्पि. सीलगन्थभेदतो दुविधं होतीति पुन सीलगन्थसङ्खातेन पभेदेन दुविधं होति, सीलपातिमोक्खं, गन्थपातिमोक्खञ्चाति दुविधं होतीति अत्थो.

इदानि ¶ तदुभयस्सापि सुत्ते आगतभावं दस्सेतुं ‘‘तथा ही’’तिआदि वुत्तं. तत्थ पाति रक्खतीति पाति, तं मोक्खेति मोचेति आपायिकादीहि दुक्खेहीति पातिमोक्खं, संवरणं संवरो, कायवाचाहि अवीतिक्कमो, पातिमोक्खमेव संवरो पातिमोक्खसंवरो, पातिमोक्खसंवरेन संवुतो समन्नागतो पातिमोक्खसंवरसंवुतो. विहरतीति वत्तति.

आदिमेतन्ति एतं सिक्खापदसीलं पुब्बुप्पत्तिअत्थेन आदि. वुत्तम्पि चेतं –

‘‘तस्मातिह त्वं, उत्तिय, आदिमेव विसोधेहि कुसलेसु धम्मेसु. को चादि कुसलानं धम्मानं? सीलञ्च सुविसुद्धं, दिट्ठि च उजुका’’ति (सं. नि. ५.३८२).

यथा हि नगरवड्ढकी नगरं मापेतुकामो पठमं नगरट्ठानं सोधेति, ततो अपरभागे वीथिचतुक्कसिङ्घाटकादिपरिच्छेदेन विभजित्वा नगरं मापेति, यथा वा पन रजको पठमं तीहि खारेहि वत्थं धोवित्वा परिसुद्धे वत्थे यदिच्छकं रङ्गजातं उपनेति, यथा वा पन छेको चित्तकारो रूपं लिखितुकामो आदितोव भित्तिपरिकम्मं करोति, ततो अपरभागे रूपं समुट्ठापेति, एवमेव योगावचरो आदितोव सीलं विसोधेत्वा अपरभागे समथविपस्सनादयो धम्मे सच्छिकरोति. तस्मा सीलं ‘‘आदी’’ति वुत्तं. ‘‘मुखमेत’’न्तिआदीनि वुत्तत्थानेव. आदिसद्देन ‘‘पातिमोक्खे च संवरो’’तिआदिपाळिं (दी. नि. २.९०; ध. प. १८५) सङ्गण्हाति.

सीलन्ति चारित्तवारित्तवसेन दुविधं विनयपिटकपरियापन्नं सिक्खापदसीलं, धम्मतो पन सीलं नाम पाणातिपातादीहि वा विरमन्तस्स, वत्तपटिपत्तिं वा पूरेन्तस्स चेतनादयो धम्मा वेदितब्बा. वुत्तञ्हेतं पटिसम्भिदायं ‘‘किं सीलन्ति चेतना सीलं चेतसिकं सीलं संवरो सीलं अवीतिक्कमो सील’’न्ति (पटि. म. १.३९) ‘‘उभयानि खो पनस्स पातिमोक्खानी’’ति भिक्खुभिक्खुनीपातिमोक्खवसेन उभयानि पातिमोक्खानि, द्वे मातिकाति अत्थो. अस्साति भिक्खुनोवादकस्स ¶ . वित्थारेनाति उभतोविभङ्गेन सद्धिं. स्वागतानीति सुट्ठु आगतानि. आदिसद्देन ‘‘पातिमोक्खं उद्दिसेय्या’’तिआदिपाळिं (महाव. १३४) सङ्गण्हाति. तत्थाति तेसु सीलगन्थपातिमोक्खेसु. योति ¶ अनियमनिद्देसो, यो कोचि पुग्गलो. नन्ति विनयपरियापन्नसीलं. रक्खतीति समादियित्वा अविकोपेन्तो पालेति. तं ‘‘पाती’’ति लद्धनामं पातिमोक्खसीले ठितं. मोचेतीति सहकारिकारणभावतो मोक्खेति. अपाये जातं आपायिकं, दुक्खं, तं आदि येसं तानि आपायिकादीनि. आदिसद्देन तदञ्ञं सब्बं संसारदुक्खं सङ्गण्हाति. अत्तानुवादादीहीति अत्तानं अनुवादो अत्तानुवादो, सो आदि येसं तानि अत्तानुवादादीनि, तेहि अत्तानुवादादीहि. आदिसद्देन परानुवाददण्डदुग्गतिभयानि सङ्गण्हाति. तस्स पातिमोक्खस्स जोतकत्ताति तस्स सीलपातिमोक्खस्स दीपनत्ता. आदिम्हि पन वुत्तो वचनत्थोति ‘‘अतिसेट्ठ’’न्तिआदिना आदिम्हि वुत्तो वचनत्थो. उभिन्नम्पि साधारणो होति सीलपातिमोक्खं सब्बगुणानं मूलभावतो सेट्ठं, गन्थपातिमोक्खं सेट्ठगुणसहचरणतो सेट्ठन्ति.

तत्थाति तेसु सीलपातिमोक्खगन्थपातिमोक्खेसु. ‘‘अयं वण्णना’’ति वक्खमानवण्णनमाह. गन्थपातिमोक्खस्स ताव युज्जतु, कथं सीलपातिमोक्खस्स युज्जतीति आह ‘‘गन्थे ही’’तिआदि. हीति कारणत्थे निपातो. तस्साति गन्थस्स. अत्थोति सीलं. वण्णितोव होतीति गन्थवण्णनामुखेन अत्थस्सेव वण्णनतो. इदं वुत्तं होति – यस्मा गन्थे वण्णिते तदविनाभावतो तस्सत्थो वण्णितो होति, तस्मा सीलपातिमोक्खस्सपि युज्जतीति.

एवं सरूपभेदतो ववत्थपेत्वा इदानि गन्थभेदतो ववत्थपेतुं ‘‘तं पनेत’’न्तिआदिमाह. तत्थाति तेसु भिक्खुपातिमोक्खभिक्खुनीपातिमोक्खेसु द्वीसु. उद्देसा परिच्छिज्जन्ति येहि वक्खमानवचनप्पबन्धेहि, ते उद्देसपरिच्छेदा, तेहि. ववत्थितन्ति असङ्करतो ठितं.

एवं गन्थभेदतो ववत्थपेत्वा इदानि उद्देसविभागतो ववत्थपेतुं ‘‘तत्था’’तिआदिमाह. उद्दिसीयति सरूपेन कथीयति एत्थ, एतेनाति वा उद्देसो, निदानस्स उद्देसोति निदानुद्देसो. एवं सेसेसुपि. वित्थारोव उद्देसो वित्थारुद्देसो.

इदानि निदानुद्देसादीनं परिच्छेददस्सनत्थं ‘‘तत्थ निदानुद्देसो’’तिआदि आरद्धं. तत्थ तत्थाति तेसु पञ्चसु उद्देसेसु. निदानुद्देसो उद्दिट्ठो ¶ होतीति सम्बन्धो. यं पनेत्थ निदानुद्देसपरिच्छेदं दस्सेन्तेन ‘‘सुणातु मे, भन्ते, सङ्घो…पे… आविकता हिस्स फासु होती’’ति ¶ इधागतनिदानपाळिं दस्सेत्वा तदनन्तरं उद्देसकाले वत्तब्बस्सापि ‘‘उद्दिट्ठं खो आयस्मन्तो निदान’’न्ति इमस्स पाठस्स योजनं अकत्वा ‘‘तत्थायस्मन्ते पुच्छामी’’तिआदिना अनुसावनादिकमेव योजेत्वा दस्सितं, तं पन अपरिपुण्णनिदानपाळिदस्सनपुब्बकनिदानुद्देसपरिच्छेददस्सनत्थं, खुद्दकपेय्यालवसेन वा पाकटत्ता तस्स अयोजनं कतन्ति वेदितब्बं, उद्देसकाले पन योजेत्वाव वत्तब्बं. वक्खति हि ‘‘तं पनेतं पाराजिकादीनं अवसाने दिस्सति, न निदानावसाने. किञ्चापि न दिस्सति, अथ खो उद्देसकाले ‘आविकता हिस्स फासु होती’ति वत्वा ‘उद्दिट्ठं खो आयस्मन्तो निदानं, तत्थायस्मन्ते पुच्छामी’तिआदिना नयेन वत्तब्बमेवा’’तिआदि. अवसेसे सुतेन सावितेति अवसिट्ठं पाराजिकुद्देसादिचतुक्कं ‘‘सुता खो पनायस्मन्तेहि चत्तारो पाराजिका धम्मा…पे… अविवदमानेहि सिक्खितब्ब’’न्ति एवं सुतवसेन साविते.

एतेनेव नयेन सेसा तयो पातिमोक्खुद्देसपरिच्छेदा वेदितब्बाति दस्सेतुं ‘‘पाराजिकुद्देसादीन’’न्तिआदिमाह. पाराजिकुद्देसादीनं परिच्छेदा योजेतब्बाति सम्बन्धो. निदानस्स आदितो पट्ठाय पाराजिकादीनि ओसापेत्वाति निदानं, पाराजिकञ्च, तदुभयं सङ्घादिसेसञ्च, तंतिकं अनियतञ्चाति एवं यथाक्कमं उद्दिसित्वा पाराजिकादीनि परियोसापेत्वा. योजेतब्बाति ‘‘अवसेसे सुतेन साविते उद्दिट्ठो होति पाराजिकुद्देसो’’तिआदिना योजेतब्बा. अवसेसं सुतेन सावेतब्बन्ति वचनतोति उपोसथक्खन्धके –

‘‘पञ्चिमे, भिक्खवे, पातिमोक्खुद्देसा निदानं उद्दिसित्वा अवसेसं सुतेन सावेतब्बं, अयं पठमो पातिमोक्खुद्देसो. निदानं उद्दिसित्वा चत्तारि पाराजिकानि उद्दिसित्वा अवसेसं सुतेन सावेतब्बं, अयं दुतियो पातिमोक्खुद्देसो’’तिआदीसु (महाव. १५०) –

एवं वुत्तत्ता. यस्मिं विप्पकतेति यस्मिं उद्देसे अपरियोसिते. अन्तरायो उप्पज्जतीति दससु अन्तरायेसु यो कोचि अन्तरायो उप्पज्जति ¶ . दस अन्तराया नाम – राजन्तरायो, चोरन्तरायो, अग्यन्तरायो, उदकन्तरायो, मनुस्सन्तरायो, अमनुस्सन्तरायो, वाळन्तरायो, सरीसपन्तरायो, जीवितन्तरायो, ब्रह्मचरियन्तरायोति. तत्थ सचे भिक्खूसु ‘‘उपोसथं करिस्सामा’’ति (महाव. अट्ठ. १५०) निसिन्नेसु राजा आगच्छति, अयं राजन्तरायो. चोरा आगच्छन्ति, अयं चोरन्तरायो. दवदाहो वा आगच्छति, आवासे वा अग्गि उट्ठहति, अयं ¶ अग्यन्तरायो. मेघो वा उट्ठहति, ओघो वा आगच्छति, अयं उदकन्तरायो. बहू मनुस्सा आगच्छन्ति, अयं मनुस्सन्तरायो. भिक्खुं यक्खो गण्हाति, अयं अमनुस्सन्तरायो. ब्यग्घादयो चण्डमिगा आगच्छन्ति, अयं वाळन्तरायो. भिक्खुं सप्पादयो डंसन्ति, अयं सरीसपन्तरायो. भिक्खु गिलानो वा होति, कालं वा करोति, वेरिनो वा तं मारेतुकामा गण्हन्ति, अयं जीवितन्तरायो. मनुस्सा एकं वा बहू वा भिक्खू ब्रह्मचरिया चावेतुकामा गण्हन्ति, अयं ब्रह्मचरियन्तरायो. इति यं वुत्तं ‘‘अन्तरायो उप्पज्जतीति दससु अन्तरायेसु यो कोचि अन्तरायो उप्पज्जती’’ति, तस्सत्थो पकासितो होतीति.

तेन सद्धिन्ति विप्पकतुद्देसेन सद्धिं. अवसेसं सुतेन सावेतब्बं उद्दिट्ठउद्देसापेक्खत्ता अवसेसवचनस्स. यथाह ‘‘निदानं उद्दिसित्वा’’तिआदि (महाव. १५०). तेनाह ‘‘निदानुद्देसे पना’’तिआदि. सुतेन सावेतब्बं नाम नत्थि उपोसथस्स अन्तरायोव होतीति अधिप्पायो. अनियतुद्देसो परिहायतीति भिक्खुनीनं अनियतसिक्खापदपञ्ञत्तिया अभावतो. तदभावो च ‘‘इदमेव लक्खणं तत्थापि अनुगत’’न्ति कत्वाति वेदितब्बं. सेसन्ति अवसेसुद्देसपरिच्छेददस्सनं. एतेसं द्विन्नं पातिमोक्खानन्ति सम्बन्धो. तावाति पठमं. इदन्ति इदानि वत्तब्बं बुद्धियं विपरिवत्तमानं सामञ्ञेन दस्सेति, इदं अक्खरपदनियमितगन्थितं वचनं वुच्चति कथीयतीति अत्थो. किं तन्ति आह, ‘‘सुणातु मेतिआदीन’’न्तिआदि.

तत्थ सुणातु मेतिआदीनन्ति ‘‘सुणातु मे, भन्ते, सङ्घो अज्जुपोसथो’’तिआदीनं भिक्खुपातिमोक्खे आगतानं सुत्तपदानं. अत्थनिच्छयन्ति ¶ अभिधेय्यत्थस्स चेव अधिप्पायत्थस्स च निच्छयनं, ववत्थापनन्ति अत्थो. इमाय हि अट्ठकथाय तेसं अभिधेय्यत्थो चेव अधिप्पायत्थो च अनेकधा ववत्थापीयति. अथ वा निच्छिन्नोति निच्छयो. गण्ठिट्ठानेसु खीलमद्दनाकारेन पवत्ता विमतिच्छेदकथा, अत्थो च निच्छयो च अत्थनिच्छयो, तं अत्थनिच्छयं, मया वुच्चमानं अत्थञ्च विनिच्छयञ्चाति वुत्तं होति. सीलसम्पन्नाति समन्ततो पन्नं पत्तं पुण्णन्ति सम्पन्नं, सीलं सम्पन्नमेतेसन्ति सीलसम्पन्ना, परिपुण्णसीलाति अत्थो. अथ वा सम्मदेव पन्ना गता उपागताति सम्पन्ना, सीलेन सम्पन्ना सीलसम्पन्ना, पातिमोक्खसंवरेन उपेताति अत्थो. अधिसीलअधिचित्तअधिपञ्ञासङ्खाता तिस्सोपि सिक्खितब्बट्ठेन सिक्खा, तं कामेन्तीति सिक्खाकामा. सुणन्तु मेति ते सब्बेपि भिक्खवो मम सन्तिका निसामेन्तु. इमिना अत्तनो संवण्णनाय सक्कच्चं सवने नियोजेति. सक्कच्चसवनपटिबद्धा हि सब्बापि सासनसम्पत्तीति. एत्थ च सीलसम्पन्नानं सिक्खाकामानंयेव भिक्खूनं गहणं तदञ्ञेसं ¶ इमिस्सा संवण्णनाय अभाजनभावतो. न हि ते विनयं सोतब्बं, पटिपज्जितब्बञ्च मञ्ञिस्सन्ति.

एत्थाति एतस्मिं गाथापदे, एतेसं वा गाथाय सङ्गहितानं ‘‘सुणातु मे’’तिआदीनं पदानमन्तरे. सवने आणत्तिवचनं सवनाणत्तिवचनं. किञ्चापि सवनाणत्तिवचनं, तथापि पातिमोक्खुद्देसकेन एवं वत्तब्बन्ति भगवता वुत्तत्ता भगवतो आणत्ति, न उद्देसकस्साति नवकतरेनापि इदं वत्तुं वट्टति सङ्घगारवेन, सङ्घबहुमानेन च सहितत्ता सगारवसप्पतिस्सवचनं. सङ्घो हि सुप्पटिपन्नतादिगुणविसेसयुत्तत्ता उत्तमं गारवप्पतिस्सवट्ठानं. इदञ्च सब्बं केन कत्थ कदा वुत्तन्ति आह ‘‘सब्बमेव चेत’’न्तिआदि. पातिमोक्खुद्देसं अनुजानन्तेनाति –

‘‘अनुजानामि, भिक्खवे, पातिमोक्खं उद्दिसितुं, एवञ्च पन, भिक्खवे, उद्दिसितब्बं, ब्यत्तेन भिक्खुना पटिबलेन सङ्घो ञापेतब्बो ‘सुणातु मे, भन्ते, सङ्घो’’’ति (महाव. १३३-१३४) –

एवमादिना ¶ अनुजानन्तेन. राजगहेति एवंनामके नगरे. तञ्हि मन्धातुमहागोविन्दादीहि परिग्गहितत्ता ‘‘राजगह’’न्ति वुच्चति. तं पनेतं बुद्धकाले, चक्कवत्तिकाले च नगरं होति, सेसकाले सुञ्ञं होति यक्खपरिग्गहितं, तेसं वसनट्ठानं हुत्वा तिट्ठति. तस्माति यस्मा इदं पातिमोक्खुद्देसकेन वत्तब्बवचनं, तस्मा. किं ते उभोपि पातिमोक्खं उद्दिसन्ति, येनेवं वत्तब्बन्ति आह ‘‘सङ्घत्थेरो वा ही’’तिआदि. थेराधिकन्ति थेराधीनं, थेरायत्तं भवितुन्ति अत्थो. ‘‘थेराधेय्य’’न्ति वा पाठो, सोयेवत्थो. तत्थाति तिस्सं परिसायं. ब्यत्तोति पञ्ञावेय्यत्तियेन समन्नागतो, पगुणमातिकोति अत्थो. पटिबलोति वत्तुं समत्थो, अभीतोति वुत्तं होति. एत्थ च किञ्चापि दहरस्सापि ब्यत्तस्स पातिमोक्खो अनुञ्ञातो, अथ खो एत्थायं अधिप्पायो – सचे थेरस्स पञ्च वा चत्तारो वा तयो वा पातिमोक्खुद्देसा नागच्छन्ति, द्वे पन अक्खण्डा सुविसदा वाचुग्गता होन्ति, थेरायत्तोव पातिमोक्खो. सचे पन एत्तकम्पि विसदं कातुं न सक्कोति, ब्यत्तस्स भिक्खुनो आयत्तोति.

इदानि ‘‘सङ्घो’’ति अविसेसेन वुत्तत्ता इधाधिप्पेतसङ्घं विसेसेत्वा दस्सेतुं ‘‘सङ्घोति इमिना पन पदेना’’तिआदिमाह किञ्चापीति अनुग्गहत्थे निपातो, तस्स यदि नामाति अत्थो वेदितब्बो. दक्खन्ति एताय सत्ता यथाधिप्पेताहि सम्पत्तीहि वड्ढन्तीति दक्खिणा, परलोकं सद्दहित्वा ¶ दातब्बं दानं, तं दक्खिणं अरहति, दक्खिणाय वा हितो, यस्मा नं महप्फलकारिताय विसोधेतीति दक्खिणेय्यो, दिट्ठिसीलसङ्घातेन संहतोति सङ्घो, दक्खिणेय्यो च सो सङ्घो चाति दक्खिणेय्यसङ्घो. सम्मुतिया चतुवग्गादिविनयपञ्ञत्तिया सिद्धो सङ्घो सम्मुतिसङ्घो. अविसेसेनाति ‘‘अरिया’’ति वा ‘‘पुथुज्जना’’ति वा अविसेसेत्वा सामञ्ञेन. सोति सम्मुतिसङ्घो. इधाति इमिस्सं उपोसथञत्तियं. अधिप्पेतो उपोसथञत्तिया अविसेसत्ता. ननु च सोपि पञ्चविधो होति, तत्थ कतमो इधाधिप्पेतोति अनुयोगं सन्धायाह ‘‘सो पनेसा’’तिआदि. कम्मवसेनाति विनयकम्मवसेन. पञ्च विधा पकारा अस्स सम्मुतिसङ्घस्साति पञ्चविधो. तथा हि विधयुत्तगतप्पकारसद्दे समानत्थे वण्णयन्ति. चतुन्नं ¶ वग्गो समूहोति चतुवग्गो, चतुपरिमाणयुत्तो वा वग्गो चतुवग्गो. एवं पञ्चवग्गादि.

इदानि येसं कम्मानं वसेनायं पञ्चविधो होति, तं विसेसेत्वा दस्सेतुं ‘‘तत्था’’तिआदिमाह. तत्थ तत्थाति पञ्चविधे सङ्घे. मज्झिमेसु जनपदेसु उपसम्पदकम्मस्स दसवग्गकरणीयत्ता वुत्तं ‘‘ठपेत्वा…पे… उपसम्पदञ्चा’’ति. ‘‘तथा’’ति इमिना ‘‘न किञ्चि सङ्घकम्मं कातुं न वट्टती’’ति इममत्थं अतिदिसति. यदि एवं किमत्थं अतिरेकवीसतिवग्गो वुत्तोति आह ‘‘सो पना’’तिआदि. अतिरेकतरेनाति चतुवग्गादिकरणीयं पञ्चवग्गादिना अतिरेकतरेन, दसवग्गकरणीयञ्च एकादसवग्गादिना अतिरेकतरेन. दस्सनत्थन्ति ञापनत्थं. इदमेव चानेन कत्तब्बं कम्मन्ति ‘‘कम्मवसेन पञ्चविधो’’ति वुत्तं. कम्मस्सानियमे कथमेतं युज्जेय्याति ईदिसी चोदना अनवकासाति दट्ठब्बं. इमस्मिं पनत्थेति उपोसथे.

उपोसथसद्दो पनायं पातिमोक्खुद्देससीलउपवासपञ्ञत्तिदिवसेसु वत्तति. तथा हेस ‘‘आयामावुसो कप्पिन, उपोसथं गमिस्सामा’’तिआदीसु (दी. नि. अट्ठ. १.१५०; म. नि. अट्ठ. ३.८५) तिमोक्खुद्देसे आगतो, ‘‘एवं अट्ठङ्गसमन्नागतो खो, विसाखे, उपोसथो उपवुत्थो’’तिआदीसु (अ. नि. ८.४३) सीले, ‘‘सुद्धस्स वे सदा फग्गु, सुद्धस्सुपोसथो सदा’’तिआदीसु (म. नि. १.७९) उपवासे, ‘‘उपोसथो नाम नागराजा’’तिआदीसु (दी. नि. २.२४६) पञ्ञत्तियं, ‘‘न, भिक्खवे, तदहुपोसथे सभिक्खुका आवासा’’तिआदीसु (महाव. १८१) दिवसे, इधापि दिवसेयेव वत्तमानो अधिप्पेतोति आह ‘‘अज्ज उपोसथदिवसो’’तिआदि. उपवसन्ति एत्थाति उपोसथो. उपवसन्तीति सीलेन वा सब्बसो आहारस्स अभुञ्जनसङ्खातेन अनसनेन वा खीरपानमधुपानादिमत्तेन वा उपेता हुत्वा वसन्तीति अत्थो.

सब्बेसम्पि ¶ वाक्यानं एव-कारत्थसहितत्ता ‘‘उपोसथो’’ति एतस्स ‘‘उपोसथो एवा’’ति अयमत्थो लब्भतीति आह ‘‘एतेन अनुपोसथदिवसं पटिक्खिपती’’ति. इमिना अवधारणेन निराकतं दस्सेति, अथ वा सद्दन्तरत्थापोहनवसेन सद्दो अत्थं वदतीति ‘‘उपोसथो’’ति एतस्स ‘‘अनुपोसथो न होती’’ति अयमत्थोति वुत्तं ‘‘एतेन अनुपोसथदिवसं पटिक्खिपती’’ति. ‘‘एस नयो पन्नरसो’’ति इमिना अञ्ञं उपोसथदिवसं ¶ पटिक्खिपतीति एत्थापि. एतेनाति ‘‘उपोसथो’’ति एतेन सद्देन. पञ्चदसन्नं तिथीनं पूरणवसेन पन्नरसो. पन्नरसोति इमिना अञ्ञं उपोसथदिवसं पटिक्खिपती’’ति संखित्तेन वुत्तमत्थं वित्थारतो दस्सेतुं ‘‘दिवसवसेन ही’’तिआदिमाह. चतुद्दसियं नियुत्तो चातुद्दसिको. एवं पन्नरसिको. सामग्गिउपोसथो नाम सङ्घसामग्गिकतदिवसे कातब्बउपोसथो. हेमन्तगिम्हवस्सानानं तिण्णं उतूनन्ति एत्थ हेमन्तउतु नाम अपरकत्तिकस्स काळपक्खपाटिपदतो पट्ठाय फग्गुनपुण्णमपरियोसाना चत्तारो मासा, गिम्हउतु नाम फग्गुनस्स कालपक्खपाटिपदतो पट्ठाय आसाळ्हपुण्णमपरियोसाना चत्तारो मासा, वस्सानउतु नाम आसाळ्हस्स काळपक्खपाटिपदतो पट्ठाय अपरकत्तिकपुण्णमपरियोसाना चत्तारो मासा. ततियसत्तमपक्खेसु द्वे द्वे कत्वा छ चातुद्दसिकाति हेमन्तस्स उतुनो ततिये च सत्तमे च पक्खे द्वे चातुद्दसिका, एवमितरेसं उतूनन्ति छ चातुद्दसिका. सेसा पन्नरसिकाति सेसा अट्ठारस पन्नरसिका. होन्ति चेत्थ –

‘‘कत्तिकस्स च काळम्हा, याव फग्गुनपुण्णमा;

‘हेमन्तकालो’ति विञ्ञेय्यो, अट्ठ होन्ति उपोसथा.

‘‘फग्गुनस्स च काळम्हा, याव आसाळ्हपुण्णमा;

‘गिम्हकालो’ति विञ्ञेय्यो, अट्ठ होन्ति उपोसथा.

‘‘आसाळ्हस्स च काळम्हा, याव कत्तिकपुण्णमा;

‘वस्सकालो’ति विञ्ञेय्यो, अट्ठ होन्ति उपोसथा.

‘‘उतूनं पन तिण्णन्नं, पक्खे ततियसत्तमे;

‘चातुद्दसो’ति पातिमोक्खं, उद्दिसन्ति नयञ्ञुनो’’ति.

पकतिया नबहुतरावासिकादिपच्चयेन कातब्बं पकतिचारित्तं. बहुतरावासिकादिपच्चये पन सति अञ्ञस्मिं चातुद्दसेपि कातुं वट्टति. तेनाह ‘‘सकि’’न्तिआदि. सकिन्ति एकस्मिं वारे ¶ . आवासिकानं अनुवत्तितब्बन्ति आवासिकेहि ‘‘अज्जुपोसथो चातुद्दसो’’ति पुब्बकिच्चे करियमाने अनुवत्तितब्बं, न पटिक्कोसितब्बं. आदिसद्देन ‘‘आवासिकेहि आगन्तुकानं अनुवत्तितब्ब’’न्ति (महाव. १७८) वचनं, ‘‘अनुजानामि, भिक्खवे, तेहि ¶ भिक्खूहि द्वे तयो उपोसथे चातुद्दसिके कातुं, कथं मयं तेहि भिक्खूहि पठमतरं पवारेय्यामा’’ति (महाव. २४०) वचनञ्च सङ्गण्हाति. एत्थ च पठमसुत्तस्स एकेकस्स उतुनो ततियसत्तमपक्खस्स चातुद्दसे वा अवसेसस्स पन्नरसे वा सकिं पातिमोक्खं उद्दिसितब्बन्ति पकतिचारित्तवसेनपि अत्थसम्भवतो ‘‘आगन्तुकेही’’तिआदीनि सुत्तानि दस्सितानीति वेदितब्बं. तथारूपपच्चये सतीति अञ्ञस्मिम्पि चातुद्दसिके उपोसथं कातुं अनुरूपे ‘‘आवासिका बहुतरा होन्ती’’ति एवमादिके पच्चये सति. अञ्ञस्मिम्पि चातुद्दसेति तिण्णं उतूनं ततियसत्तमपक्खचातुद्दसतो अञ्ञस्मिं चातुद्दसे.

न केवलं उपोसथदिवसाव होन्तीति आह ‘‘पुरिमवस्संवुट्ठानं पना’’तिआदि. मा इति चन्दो वुच्चति तस्स गतिया दिवसस्स मिनितब्बतो, सो एत्थ सब्बकलापारिपूरिया पुण्णोति पुण्णमा, पुब्बकत्तिकाय पुण्णमा पुब्बकत्तिकपुण्णमा, अस्सयुजपुण्णमा. सा हि पच्छिमकत्तिकं निवत्तेतुं एवं वुत्ता. तेसंयेवाति पुरिमवस्संवुट्ठानंयेव. भण्डनकारकेहीति कलहकारकेहि. पच्चुक्कड्ढन्तीति उक्कड्ढन्ति. भण्डनकारकेहि अनुवादवसेन अस्सयुजपुण्णमादिं परिच्चजन्ता पवारणं काळपक्खं, जुण्हपक्खन्ति उद्धं कड्ढन्तीति अत्थो. ‘‘सुणन्तु मे आयस्मन्तो आवासिका, यदायस्मन्तानं पत्तकल्लं, इदानि उपोसथं करेय्याम, पातिमोक्खं उद्दिसेय्याम, आगमे काळे पवारेय्यामा’’ति (महाव. २४०) ‘‘सुणन्तु मे आयस्मन्तो आवासिका, यदायस्मन्तानं पत्तकल्लं, इदानि उपोसथं करेय्याम, पातिमोक्खं उद्दिसेय्याम, आगमे जुण्हे पवारेय्यामा’’ति च एवं ञत्तिया पवारणं उक्कड्ढन्तीति वुत्तं होति.

अथाति अनन्तरत्थे निपातो. चतुद्दसन्नं पूरणो चातुद्दसो, दिवसो. यं सन्धाय ‘‘आगमे जुण्हे पवारेय्यामा’’ति ञत्तिं ठपयिंसु, तस्मिं पन आगमे जुण्हे कोमुदिया चातुमासिनिया अवस्सं पवारेतब्बं. न हि तं अतिक्कमित्वा पवारेतुं लब्भति. वुत्तञ्हेतं –

‘‘ते चे, भिक्खवे, भिक्खू भण्डनकारका कलहकारका विवादकारका भस्सकारका सङ्घे अधिकरणकारका तम्पि जुण्हं अनुवसेय्युं, तेहि, भिक्खवे, भिक्खूहि सब्बेहेव ¶ आगमे ¶ जुण्हे कोमुदिया चातुमासिनिया अकामा पवारेतब्ब’’न्ति (महाव. २४०).

तेनेवाह ‘‘पच्छिमवस्संवुट्ठानञ्च पच्छिमकत्तिकपुण्णमा एवा’’ति. यदि हि तं अतिक्कमित्वा पवारेय्य, दुक्कटापत्तिं आपज्जेय्य. वुत्तञ्हेतं ‘‘न च, भिक्खवे, अपवारणाय पवारेतब्बं अञ्ञत्र सङ्घसामग्गिया’’ति (महाव. २३३). विसुद्धिपवारणायोगतो पवारणादिवसा. पिसद्देन न केवलं पवारणादिवसायेव, अथ खो उपोसथदिवसापि होन्तीति दस्सेति. इदानि यो सो सामग्गिउपोसथदिवसो वुत्तो, तञ्च तप्पसङ्गेन सामग्गिपवारणादिवसञ्च दस्सेन्तो ‘‘यदा पना’’तिआदिमाह. ओसारिते तस्मिं भिक्खुस्मिन्ति उक्खित्तके भिक्खुस्मिं ओसारिते, तं गहेत्वा सीमं गन्त्वा आपत्तिं देसापेत्वा कम्मवाचाय कम्मप्पटिप्पस्सद्धिवसेन पवेसितेति वुत्तं होति. तस्स वत्थुस्साति तस्स अधिकरणस्स. तदा ठपेत्वा…पे… उपोसथदिवसो नाम होतीति सम्बन्धो. किं कारणन्ति आह ‘‘तावदेवा’’तिआदि. तत्थ तावदेवाति तं दिवसमेव. वचनतोति कोसम्बकक्खन्धके (महाव. ४७५) वुत्तत्ता. यत्थ पन पत्तचीवरादीनं अत्थाय अप्पमत्तकेन कारणेन विवदन्ता उपोसथं वा पवारणं वा ठपेन्ति, तत्थ तस्मिं अधिकरणे विनिच्छिते ‘‘समग्गा जातम्हा’’ति अन्तरा सामग्गिउपोसथं कातुं न लभन्ति. करोन्तेहि अनुपोसथे उपोसथो कतो नाम होति. कत्तिकमासब्भन्तरेति एत्थ कत्तिकमासो नाम पुब्बकत्तिकमासस्स काळपक्खपाटिपदतो पट्ठाय याव अपरकत्तिकपुण्णमा, ताव एकूनतिंसरत्तिदिवो, तस्सब्भन्तरे, ततो पच्छा वा पन पुरे वा न वट्टति. अयमेव यो कोचि दिवसोयेव. इधापि कोसम्बकक्खन्धके सामग्गिया सदिसाव सामग्गी वेदितब्बा. ये पन किस्मिञ्चिदेव अप्पमत्तके पवारणं ठपेत्वा समग्गा होन्ति, तेहि पवारणायमेव पवारणा कातब्बा, तावदेव न कातब्बा. करोन्तेहि अप्पवारणाय पवारणा कता होति. न कातब्बोयेवाति नियमेन यदि करोति, दुक्कटन्ति दस्सेति. तत्थ हि उपोसथकरणे दुक्कटं. वुत्तञ्हेतं ‘‘न, भिक्खवे, अनुपोसथे उपोसथो कातब्बो अञ्ञत्र सङ्घसामग्गिया’’ति (महाव. १८३).

‘‘पत्तकालमेव ¶ पत्तकल्ल’’न्ति इमिना सकत्थे भावप्पच्चयोति दस्सेति. नासतीति अन्वयतो वुत्तमेव ब्यतिरेकतो दळ्हं करोति.

अनुरूपाति अरहा अनुच्छविका, सामिनोति वुत्तं होति. सब्बन्तिमेनाति सब्बहेट्ठिमेन चत्तारो, न तेहि विना तं उपोसथकम्मं करीयति, न तेसं छन्दो वा पारिसुद्धि वा एति. अवसेसा ¶ पन सचेपि सहस्समत्ता होन्ति, सचे समानसंवासका, सब्बे छन्दारहाव होन्ति, छन्दपारिसुद्धिं दत्वा आगच्छन्तु वा, मा वा, कम्मं न कुप्पति. पकतत्ताति अनुक्खित्ता, पाराजिकं अनज्झापन्ना च. हत्थपासो नाम दियड्ढहत्थप्पमाणो.

सीमा च नामेसा कतमा, यत्थ हत्थपासं अविजहित्वा ठिता कम्मप्पत्ता नाम होन्तीति अनुयोगं सन्धाय सीमं दस्सेन्तो विभागवन्तानं सभावविभावनं विभागदस्सनमुखेनेव होतीति ‘‘सीमा च नामेसा’’तिआदिमाह. सम्भिन्दन्तेनाति मिस्सीकरोन्तेन. अज्झोत्थरन्तेनाति मद्दन्तेन, अन्तो करोन्तेनाति वुत्तं होति. इमा विपत्तिसीमायो नामाति सम्बन्धो. कस्मा विपत्तिसीमायो नामाति आह ‘‘एकादसही’’तिआदि. आकारेहीति कारणेहि. वचनतोति कम्मवग्गे (परि. ४८२ आदयो) कथितत्ता. सङ्घकम्मं नामेतं वीसतिवग्गकरणीयपरमन्ति आह ‘‘यत्थ एकवीसति भिक्खू निसीदितुं न सक्कोन्ती’’ति. यस्सं सीमायं हेट्ठिमपरिच्छेदेन कम्मारहेन सद्धिं एकवीसति भिक्खू परिमण्डलाकारेन निसीदितुं न सक्कोन्ति, अयं अतिखुद्दका नामाति अत्थो. एवरूपा च सीमा सम्मतापि असम्मता, गामखेत्तसदिसाव होति, तत्थ कतं कम्मं कुप्पति. एस नयो सेससीमासुपि.

सम्मताति बद्धा, वाचितकम्मवाचाति अत्थो. कम्मवाचाय वाचनमेव हि बन्धनं नाम. निमित्तं न उपगच्छतीति अनिमित्तुपगो, तं अनिमित्तुपगं, अनिमित्तारहन्ति वुत्तं होति. तचसाररुक्खो नाम तालनाळिकेरादिका. पंसुपुञ्जवालुकापुञ्जानन्ति पंसुरासिवालुकारासीनं मज्झे. निद्धारणे चेतं सामिवचनं. पोत्थकेसु पन कत्थचि ‘‘पंसुपुञ्जं वा वालुकापुञ्जं वा अञ्ञतर’’न्ति पाठो दिस्सति, सो पन अपाठो. न हि सो ‘‘अञ्ञतर’’न्ति इमिना युज्जतीति. अन्तराति निमित्तुपगनिमित्तानमन्तरा. एत्थ ¶ च या तीहि निमित्तेहि बज्झमाना अनिमित्तुपगेसु तचसाररुक्खादीसु अञ्ञतरं अन्तरा एकं निमित्तं कत्वा सम्मता, सा खण्डनिमित्ता नाम होति. या पन चतुपञ्चनिमित्तादीहि बज्झमाना इमेसु तचसाररुक्खादीसु अञ्ञतरं अन्तरा एकं निमित्तं कत्वा सम्मता, सा खण्डनिमित्ता नाम न होतीति विञ्ञायति निमित्तुपगानं निमित्तानं तिण्णं सब्भावतो. अट्ठकथासु पन अविसेसेन वुत्तं, तस्मा उपपरिक्खित्वा गहेतब्बं. सब्बेन सब्बन्ति सब्बप्पकारेन. निमित्तानं बहि ठितेन सम्मताति तेसं बहि ठितेन वाचितकम्मवाचा. निमित्तानि पन अन्तो च बहि च ठत्वा कित्तेतुं वट्टन्ति.

एवं सम्मतापीति निमित्तानि कित्तेत्वा कम्मवाचाय सम्मतापि. इमस्स ‘‘असम्मताव होती’’ति ¶ इमिना सम्बन्धो. सब्बा, भिक्खवे, नदी असीमाति या काचि नदीलक्खणप्पत्ता नदी निमित्तानि कित्तेत्वा ‘‘एतं बद्धसीमं करोमा’’ति कतापि असीमा, बद्धसीमा न होतीति अत्थो. अत्तनो सभावेन पन सा बद्धसीमासदिसा. सब्बत्थ सङ्घकम्मं कातुं वट्टति. समुद्दजातस्सरेसुपि एसेव नयो. ‘‘संसट्ठविटपा’’ति इमिना अञ्ञमञ्ञस्स आसन्नतं दीपेति. बद्धा होतीति पच्छिमदिसाभागे सीमं सन्धाय वुत्तं. तस्सा पदेसन्ति तस्सा एकदेसं. यत्थ ठत्वा भिक्खूहि कम्मं कातुं सक्का होति, तादिसं एकदेसन्ति वुत्तं होति. यत्थ पन ठितेहि कम्मं कातुं न सक्का, तादिसं पदेसं अन्तो करित्वा बन्धन्ता सीमाय सीमं सम्भिन्दन्ति नाम, न तु अज्झोत्थरन्ति नामाति गहेतब्बं. गण्ठिपदेसु पन ‘‘सम्भिन्दनं परेसं सीमाय एकं वा द्वे वा निमित्ते कित्तेत्वा लेखामत्तं गहेत्वा बन्धनं. अज्झोत्थरणं नाम परेसं सीमाय निमित्ते कित्तेत्वा तं सकलं वा तस्सेकदेसं वा अन्तो करोन्तेन तस्सा बहि एकिस्सं द्वीसु वा दिसासु निमित्ते कित्तेत्वा बन्धन’’न्ति वुत्तं.

पब्बतादीनं निमित्तानं सम्पदा निमित्तसम्पत्ति. पब्बतोव निमित्तं पब्बतनिमित्तं. एवं सेसेसुपि. एवं वुत्तेसूति उपोसथक्खन्धके (महाव. १३८ आदयो) सीमासम्मुतियं वुत्तेसु. इमेहि च पन अट्ठहि निमित्तेहि असम्मिस्सेहिपि अञ्ञमञ्ञमिस्सेहिपि सीमं सम्मन्नितुं वट्टति. तेनाह ‘‘तस्मिं तस्मिं दिसाभागे यथालद्धानि निमित्तुपगानि निमित्तानी’’ति. एकेन, पन द्वीहि वा निमित्तेहि सम्मन्नितुं ¶ न वट्टति, तीणि पन आदिं कत्वा वुत्तप्पकारानं निमित्तानं सतेनापि वट्टति. ‘‘पुरत्थिमाय दिसाय किं निमित्त’’न्ति विनयधरेन पुच्छितब्बं, ‘‘पब्बतो, भन्ते’’ति वुत्ते पुन विनयधरेनेव ‘‘एसो पब्बतो निमित्त’’न्ति एवं निमित्तं कित्तेतब्बं. ‘‘एतं पब्बतं निमित्तं करोम, निमित्तं करिस्साम, निमित्तं कतो, निमित्तं होतु, होति भविस्सती’’ति एवं पन कित्तेतुं न वट्टति. पासाणादीसुपि एसेव नयो. तेनाह ‘‘पुरत्थिमाय दिसाय किं निमित्त’’न्तिआदि. ‘‘पब्बतो, भन्ते, उदकं, भन्ते’’ति एवं पन उपसम्पन्नो वा आचिक्खतु, अनुपसम्पन्नो वा, वट्टतियेव. आदिसद्देन ‘‘पुरत्थिमाय अनुदिसाय किं निमित्तं? पासाणो, भन्ते, एसो पासाणो निमित्तं. दक्खिणाय दिसाय, दक्खिणाय अनुदिसाय, पच्छिमाय दिसाय, पच्छिमाय अनुदिसाय, उत्तराय दिसाय, उत्तराय अनुदिसाय किं निमित्तं? उदकं, भन्ते, एतं उदकं निमित्त’’न्ति इदं सङ्गण्हाति. एत्थ पन अट्ठत्वा पुन ‘‘पुरत्थिमाय दिसाय किं निमित्तं? पब्बतो, भन्ते, एसो पब्बतो निमित्त’’न्ति एवं पठमं कित्तितनिमित्तं कित्तेत्वाव ठपेतब्बं. एवञ्हि निमित्तेन निमित्तं घटितं होति. सम्मा कित्तेत्वाति अञ्ञमञ्ञनामविपरियायेन, अनिमित्तानं नामेन च अकित्तेत्वा यथावुत्तेनेव नयेन कित्तेत्वा. सम्मताति ‘‘सुणातु मे, भन्ते’’तिआदिना नयेन उपोसथक्खन्धके (महाव. १३९ आदयो) ¶ वुत्ताय परिसुद्धाय ञत्तिदुतियकम्मवाचाय बद्धा. तत्थ निमित्तानि सकिं कित्तितानिपि कित्तितानेव होन्ति. अन्धकट्ठकथायं पन तिक्खत्तुं सीममण्डलं सम्बन्धन्तेन निमित्तं कित्तेतब्ब’’न्ति (महाव. अट्ठ. १३८) वुत्तं.

तत्राति तेसु अट्ठसु निमित्तेसु. निमित्तुपगताति निमित्तयोग्यता. ‘‘हत्थिप्पमाणतो पट्ठाया’’ति वचनतो हत्थिप्पमाणोपि निमित्तुपगोयेव. हत्थी पन सत्तरतनो वा अड्ढट्ठरतनो (सारत्थ. टी. महावग्ग ३.१३८) वा. ततो ओमकतरोति ततो हत्थिप्पमाणतो खुद्दकतरो. सचे चतूसु दिसासु चत्तारो वा तीसु वा तयो पब्बता होन्ति, चतूहि, तीहि वा पब्बतनिमित्तेहेव सम्मन्नितुम्पि वट्टति, द्वीहि पन निमित्तेहि, एकेन वा सम्मन्नितुं न वट्टति. इतो परेसु पासाणनिमित्तादीसुपि एसेव नयो. तस्मा पब्बतनिमित्तं करोन्तेन पुच्छितब्बं ‘‘एकाबद्धो, न एकाबद्धो’’ति. सचे ¶ एकाबद्धो होति, न कातब्बो. तञ्हि चतूसु वा अट्ठसु वा दिसासु कित्तेन्तेनापि एकमेव निमित्तं कित्तितं होति. तस्मा यो एवं चक्कसण्ठानेन विहारं परिक्खिपित्वा ठितो पब्बतो, तं एकदिसाय कित्तेत्वा अञ्ञासु दिसासु तं बहिद्धा कत्वा अन्तो अञ्ञानि निमित्तानि कित्तेतब्बानि. सचे पब्बतस्स ततियभागं वा उपड्ढं वा अन्तोसीमाय कत्तुकामा होन्ति, पब्बतं अकित्तेत्वा यत्तकं पदेसं अन्तो कत्तुकामा, तस्स परतो तस्मिंयेव पब्बते जातरुक्खवम्मिकादीसु अञ्ञतरं निमित्तं कित्तेतब्बं. सचे योजनद्वियोजनप्पमाणं सब्बं पब्बतं अन्तो कत्तुकामा होन्ति, पब्बतस्स परतो भूमियं जातरुक्खवम्मिकादीनि निमित्तानि कित्तेतब्बानि (महाव. अट्ठ. १३८; वि. सङ्ग. अट्ठ. १५८).

सङ्खं गच्छतीति गणनं वोहारं गच्छतीति अत्थो. द्वत्तिंसपलगुळपिण्डपरिमाणोति थूलताय, न तुलगणनाय. तत्थ ‘‘एकपलं नाम दसकलञ्ज’’न्ति वदन्ति. इट्ठका महन्तापि न वट्टति. तथा अनिमित्तुपगपासाणानं रासि, पगेव पंसुवालुकारासि. भूमिसमो खलमण्डलसदिसो पिट्ठिपासाणो वा भूमितो खाणुको विय उट्ठितपासाणो वा होति, सोपि पमाणूपगो चे, वट्टति. ‘‘पिट्ठिपासाणो पन अतिमहन्तोपि पासाणसङ्खमेव गच्छतीति आह ‘‘पिट्ठिपासाणो पना’’तिआदि. तस्मा सचे महतो पिट्ठिपासाणस्स एकं पदेसं अन्तोसीमायं कत्तुकामा होन्ति, तं अकित्तेत्वा तस्सुपरि अञ्ञो पासाणो कित्तेतब्बो. सचे पिट्ठिपासाणुपरि विहारं करोन्ति, विहारमज्झेन च पिट्ठिपासाणो विनिविज्झित्वा गच्छति, एवरूपो पिट्ठिपासाणो न वट्टति. सचे हि तं कित्तेन्ति, निमित्तस्सुपरि विहारो होति, निमित्तञ्च ¶ नाम बहिसीमायं होति, विहारोपि बहिसीमायं आपज्जति. विहारं परिक्खिपित्वा ठितपिट्ठिपासाणो पन एकत्थ कित्तेत्वा अञ्ञत्थ न कित्तेतब्बो.

वननिमित्ते तिणवनं वा तचसाररुक्खवनं वा न वट्टतीति आह ‘‘अन्तोसारेही’’तिआदि. अन्तोसारा नाम अम्बजम्बुपनसादयो. अन्तोसारमिस्सकेहीति अन्तो सारो येसं ते अन्तोसारा, तेहि मिस्सका अन्तोसारमिस्सका, तेहि. चतुपञ्चरुक्खमत्तम्पीति हेट्ठिमपरिच्छेदनाह ¶ . उक्कंसतो पन योजनसतिकम्पि वनं वट्टति. एत्थ पन चतुरुक्खमत्तञ्चे, तयो सारतो, एको असारतो. पञ्चरुक्खमत्तञ्चे, तयो सारतो, द्वे असारतोति गहेतब्बं. सचे पन वनमज्झे विहारं करोन्ति, तं वनं न कित्तेतब्बं. एकदेसं अन्तोसीमायं कत्तुकामेहिपि वनं अकित्तेत्वा तत्थ रुक्खपासाणादयो कित्तेतब्बा, विहारं परिक्खिपित्वा ठितवनं एकत्थ कित्तेत्वा अञ्ञत्थ न कित्तेतब्बं (महाव. अट्ठ. १३८).

रुक्खनिमित्तेपि तचसाररुक्खो न वट्टतीति आह ‘‘अन्तोसारो’’ति. ‘‘भूमियं पतिट्ठितो’’ति इमिना कुटसरावादीसु ठितं पटिक्खिपति. ततो अपनेत्वा पन तङ्खणम्पि भूमियं रोपेत्वा कोट्ठकं कत्वा उदकं आसिञ्चित्वा कित्तेतुं वट्टति, नवमूलसाखानिग्गमनं अकारणं. खन्धं छिन्दित्वा रोपिते पन एतं युज्जति. सूचिदण्डकप्पमाणोति ‘‘सीहळदीपे लेखनदण्डप्पमाणो’’ति वदन्ति (सारत्थ. टी. महावग्ग ३.१३८), सो च कनिट्ठङ्गुलिपरिमाणोति दट्ठब्बो. इदं पन रुक्खनिमित्तं कित्तेन्तेन ‘‘रुक्खो’’तिपि, ‘‘साकरुक्खो, सालरुक्खो’’तिपि वत्तुं वट्टति. एकाबद्धं पन सुप्पतिट्ठितनिग्रोधसदिसं रुक्खं एकत्थ कित्तेत्वा अञ्ञत्थ कित्तेतुं न वट्टति.

मग्गनिमित्ते अरञ्ञखेत्तनदीतळाकमग्गादयो न वट्टन्तीति आह ‘‘जङ्घमग्गो वा होतू’’तिआदि. यो पन जङ्घमग्गो सकटमग्गतो ओक्कमित्वा पुन सकटमग्गमेव ओतरति, ये वा जङ्घमग्गसकटमग्गा अवलञ्जिता, ते न वट्टन्ति. तेनाह ‘‘जङ्घसत्थसकटसत्थेही’’तिआदि. एत्थ च सचे सकटमग्गस्स अन्तिमचक्कमग्गं निमित्तं करोन्ति, मग्गो बहिसीमाय होति. सचे बाहिरचक्कमग्गं निमित्तं करोन्ति, बाहिरचक्कमग्गोव बहिसीमाय होति, सेसं अन्तोसीमं भजतीति वेदितब्बं. सचेपि द्वे मग्गा निक्खमित्वा पच्छा सकटधुरमिव एकीभवन्ति, द्विधा भिन्नट्ठाने वा सम्बन्धट्ठाने वा सकिं कित्तेत्वा पुन न कित्तेतब्बा. एकाबद्धनिमित्तञ्हेतं होति.

सचे ¶ विहारं परिक्खिपित्वा चत्तारो मग्गा चतूसु दिसासु गच्छन्ति, मज्झे एकं कित्तेत्वा अपरं कित्तेतुं न वट्टति. एकाबद्धनिमित्तञ्हेतं. कोणं विनिविज्झित्वा गतं पन परभागे कित्तेतुं वट्टति. विहारमज्झेन ¶ विनिविज्झित्वा गतमग्गो पन न कित्तेतब्बो. कित्तिते पन निमित्तस्स उपरि विहारो होति. इमञ्च मग्गं कित्तेन्तेन ‘‘मग्गो पज्जो पथो’’तिआदिना (चूळनि. पारायनत्थुतिगाथानिद्देस १०१) वुत्तेसु दससु नामेसु येन केनचि नामेन कित्तेतुं वट्टति. परिखासण्ठानेन विहारं परिक्खिपित्वा गतमग्गो एकत्थ कित्तेत्वा अञ्ञत्थ कित्तेतुं न वट्टति.

यं पन अबद्धसीमालक्खणे नदिं वक्खामाति ‘‘यस्सा धम्मिकानं राजूनं काले’’तिआदिना (कङ्खा. अट्ठ. निदानवण्णना) उदकुक्खेपसीमायं नदिया वक्खमानत्ता वुत्तं. या पन नदी मग्गो विय सकटधुरसण्ठानेन वा परिखासण्ठानेन वा विहारं परिक्खिपित्वा गता, नं एकत्थ कित्तेत्वा अञ्ञत्थ कित्तेतुं न वट्टति. विहारस्स चतूसु दिसासु अञ्ञमञ्ञं विनिविज्झित्वा गते नदीचतुक्केपि एसेव नयो. असम्मिस्सनदियो पन चतस्सोपि कित्तेतुं वट्टति. सचे वतिं करोन्तो विय रुक्खपादे निखणित्वा वल्लिपलालादीहि नदीसोतं रुम्भन्ति, उदकम्पि अज्झोत्थरित्वा आवरणं पवत्ततियेव, निमित्तं कातुं वट्टति. यथा पन उदकं नप्पवत्तति, एवं सेतुम्हि कते अप्पवत्तमाना नदी निमित्तं कातुं न वट्टति. पवत्तनट्ठाने नदीनिमित्तं, अप्पवत्तनट्ठाने उदकनिमित्तं कातुं वट्टति.

या पन दुब्बुट्ठिकाले वा गिम्हे वा निरुदकभावेन नप्पवत्तति, सा वट्टति. महानदितो उदकमातिकं नीहरन्ति, सा कुन्नदीसदिसा हुत्वा तीणि सस्सानि सम्पादेन्ती निच्चं पवत्तति. किञ्चापि पवत्तति, निमित्तं कातुं न वट्टति. या पन मूले महानदितो निग्गतापि कालन्तरेन तेनेव निग्गतमग्गेन नदिं भिन्दित्वा सयमेव गच्छति, गच्छन्ती च परतो सुसुमारादिसमाकिण्णा नावादीहि सञ्चरितब्बा नदी होति, तं निमित्तं कातुं वट्टति.

असन्दमानन्ति अप्पवत्तमानं. सन्दमानं नाम ओघनदीउदकवाहकमातिकासु उदकं. वुत्तपरिच्छेदकालं अतिट्ठन्तन्ति ‘‘याव कम्मवाचापरियोसाना सण्ठमानक’’न्ति वुत्तपरिच्छेदकालं अतिट्ठन्तं. भाजनगतन्ति नावाचाटिआदीसु भाजनेसु गतं. यं पन अन्धकट्ठकथायं ‘‘गम्भीरेसु आवाटादीसु उक्खेपिमं उदकं निमित्तं न कातब्ब’’न्ति (महाव. अट्ठ. १३८; वि. सङ्ग. अट्ठ. १५८) वुत्तं, तं दुवुत्तं ¶ , अत्तनो मतिमत्तमेव. ठितं पन अन्तमसो सूकरखतायपि गामदारकानं कीळनवापियम्पि सचे याव कम्मवाचापरियोसानं तिट्ठति, अप्पं वा ¶ होतु, बहु वा, वट्टतियेव. तस्मिं पन ठाने निमित्तसञ्ञाकरणत्थं पासाणवालिकापंसुआदिरासि वा पासाणत्थम्भो वा दारुत्थम्भो वा कातब्बो.

एवं निमित्तसम्पत्तियुत्ततं दस्सेत्वा इदानि येहि आकारेहि बद्धा परिसासम्पत्तियुत्ता नाम होति, तं दस्सेतुं ‘‘परिसासम्पत्तिया युत्ता नामा’’तिआदिमाह. इमस्स पन कम्मस्स चतुवग्गकरणीयत्ता ‘‘चतूहि भिक्खूही’’ति वुत्तं. इमञ्च सीमं बन्धितुकामेहि सामन्तविहारेसु भिक्खू तस्स तस्स विहारस्स सीमापरिच्छेदं पुच्छित्वा बद्धसीमविहारानं सीमाय सीमन्तरिकं, अबद्धसीमविहारानं सीमाय उपचारं ठपेत्वा दिसाचारिकभिक्खूनं निस्सञ्चारसमये सचे एकस्मिं गामखेत्ते सीमं बन्धितुकामा, ये तत्थ बद्धसीमविहारा, तेसु भिक्खूनं ‘‘मयं अज्ज सीमं बन्धिस्साम, तुम्हे सकसकसीमापरिच्छेदतो मा निक्खमित्था’’ति पेसेतब्बं. ये अबद्धसीमविहारा, तेसु भिक्खू एकज्झं सन्निपातापेतब्बा, छन्दारहानं छन्दो आहरापेतब्बो. तेन वुत्तं ‘‘यावतिका तस्मिं गामखेत्ते’’तिआदि. तस्मिं गामखेत्तेति यस्मिं गामखेत्ते ठत्वा कम्मवाचं वाचेन्ति, तस्मिं गामखेत्ते. ‘‘सचे अञ्ञानिपि गामखेत्तानि अन्तो कत्तुकामा, तेसु गामेसु ये भिक्खू वसन्ति, तेहिपि आगन्तब्बं, अनागच्छन्तानं छन्दो आहरितब्बो’’ति महासुमत्थेरो आह. महापदुमत्थेरो पनाह ‘‘नानागामखेत्तानि नाम पाटियेक्कं बद्धसीमासदिसानि, न ततो छन्दपारिसुद्धि आगच्छति. अन्तोनिमित्तगतेहि पन भिक्खूहि आगन्तब्ब’’न्ति वत्वा पुन आह ‘‘समानसंवासकसीमासम्मन्ननकाले आगमनम्पि अनागमनम्पि वट्टति, अविप्पवाससीमासम्मन्ननकाले पन अन्तोनिमित्तगतेहि आगन्तब्बं. अनागच्छन्तानं छन्दो आहरितब्बो’’ति (महाव. अट्ठ. १३८).

इदानि येहि आकारेहि सम्मता कम्मवाचासम्पत्तियुत्ता नाम होति, तं दस्सेतुं ‘‘कम्मवाचासम्पत्तिया युत्ता नामा’’तिआदिमाह. आदिसद्देन. ‘‘यदि सङ्घस्स पत्तकल्लं, सङ्घो एतेहि निमित्तेहि सीमं सम्मन्नेय्य समानसंवासं एकूपोसथं, एसा ञत्ति. सुणातु ¶ मे, भन्ते, सङ्घो, यावता समन्ता निमित्ता कित्तिता, सङ्घो एतेहि निमित्तेहि सीमं सम्मन्नति समानसंवासं एकूपोसथं, यस्सायस्मतो खमति एतेहि निमित्तेहि सीमाय सम्मुति समानसंवासाय एकूपोसथाय, सो तुण्हस्स. यस्स नक्खमति, सो भासेय्य. सम्मता सीमा सङ्घेन एतेहि निमित्तेहि समानसंवासा एकूपोसथा, खमति सङ्घस्स, तस्मा तुण्ही, एवमेतं धारयामी’’ति (महाव. १३९) इमं पाळिसेसं सङ्गण्हाति. वुत्तायाति उपोसथक्खन्धके वुत्ताय. ञत्तिदोसअनुस्सावनदोसेहि विरहितत्ता परिसुद्धाय.

खण्डसीमा (महाव. अट्ठ. १३८; सारत्थ. टी. महावग्ग ३.१३८; वजिर. टी. महावग्ग १३८) ¶ नाम खुद्दकसीमा. समानसंवासकत्थं सम्मता सीमा समानसंवासकसीमा. अविप्पवासत्थं सम्मता सीमा अविप्पवाससीमा. इमासु पन तीसु सीमं सम्मन्नन्तेहि पब्बज्जुपसम्पदादीनं सङ्घकम्मानं सुखकरणत्थं पठमं खण्डसीमा बन्धितब्बा. तं पन बन्धन्तेहि वत्तं जानितब्बं. सचे हि बोधिचेतियभत्तसालादीनि सब्बवत्थूनि पतिट्ठापेत्वा कतविहारे बन्धन्ति, विहारमज्झे बहूनं समोसरणट्ठाने अबन्धित्वा विहारपच्चन्ते विवित्तोकासे बन्धितब्बा. अकतविहारे बन्धन्तेहि बोधिचेतियादीनं सब्बवत्थूनं ठानं सल्लक्खेत्वा यथा पतिट्ठितेसु वत्थूसु विहारपच्चन्ते विवित्तोकासे होति, एवं बन्धितब्बा. सा हेट्ठिमपरिच्छेदेन सचे एकवीसतिभिक्खू गण्हाति, वट्टति. ततो ओरं न वट्टति. परं भिक्खुसहस्सं गण्हन्तीपि वट्टति. तं बन्धन्तेहि सीमामाळकस्स समन्ता निमित्तुपगा पासाणा ठपेतब्बा, न खण्डसीमाय ठितेहि महासीमा बन्धितब्बा, न महासीमाय ठितेहि खण्डसीमा. खण्डसीमायमेव पन ठत्वा खण्डसीमा बन्धितब्बा, महासीमायमेव ठत्वा महासीमा.

तत्रायं बन्धनविधि – समन्ता ‘‘एसो पासाणो निमित्त’’न्ति एवं निमित्तानि कित्तेत्वा कम्मवाचाय सीमा सम्मन्नितब्बा. अथ तस्सा एव दळ्हीकम्मत्थं अविप्पवासकम्मवाचा कातब्बा. एवञ्हि ‘‘सीमं समूहनिस्सामा’’ति आगता समूहनितुं न सक्खिस्सन्ति. सीमं सम्मन्नित्वा बहि सीमन्तरिकपासाणा ठपेतब्बा, सीमन्तरिका पच्छिमकोटिया चतुरङ्गुलप्पमाणापि (महाव. अट्ठ. १३८; वि. सङ्ग. अट्ठ. १६३) वट्टति. सचे पन विहारो महा होति, द्वेपि तिस्सोपि ततुत्तरिपि खण्डसीमायो बन्धितब्बा.

एवं ¶ खण्डसीमं सम्मन्नित्वा महासीमासम्मुतिकाले खण्डसीमतो निक्खमित्वा महासीमायं ठत्वा समन्ता अनुपरियायन्तेहि सीमन्तरिकपासाणा कित्तेतब्बा. ततो अवसेसनिमित्ते कित्तेत्वा हत्थपासं अविजहन्तेहि कम्मवाचाय समानसंवासकसीमं सम्मन्नित्वा तस्सा दळ्हीकम्मत्थं अविप्पवासकम्मवाचापि कातब्बा. एवञ्हि ‘‘सीमं समूहनिस्सामा’’ति आगता समूहनितुं न सक्खिस्सन्ति. सचे पन खण्डसीमाय निमित्तानि कित्तेत्वा ततो सीमन्तरिकाय निमित्तानि कित्तेत्वा महासीमाय निमित्तानि कित्तेन्ति, एवं तीसु ठानेसु निमित्तानि कित्तेत्वा यं सीमं इच्छन्ति, तं पठमं बन्धितुं वट्टति. एवं सन्तेपि यथावुत्तनयेन खण्डसीमतोव पट्ठाय बन्धितब्बा. एवं बद्धासु पन सीमासु खण्डसीमायं ठिता भिक्खू महासीमायं कम्मं करोन्तानं न कोपेन्ति, महासीमायं वा ठिता खण्डसीमायं करोन्तानं. सीमन्तरिकाय पन ठिता उभिन्नम्पि न कोपन्ति. गामखेत्ते ठत्वा कम्मं करोन्तानं ¶ पन सीमन्तरिकाय ठिता कोपेन्ति. सीमन्तरिका हि गामखेत्तं भजति. अविप्पवाससीमासम्मन्नने कते सति सा च अविप्पवाससीमा नाम होति. तेनाह ‘‘तस्सायेव पभेदो’’ति. तस्सायेवाति बद्धसीमाय एव.

अयं पन विसेसो – ‘‘ठपेत्वा गामञ्च गामूपचारञ्चा’’ति (महाव. १४४) वचनतो अविप्पवाससीमा गामञ्च गामूपचारञ्च न ओतरति, समानसंवासकसीमा पन तत्थापि ओतरति. समानसंवासकसीमा चेत्थ अत्तनो धम्मताय गच्छति, अविप्पवाससीमा पन यत्थ समानसंवासकसीमा, तत्थेव गच्छति. न हि तस्सा विसुं निमित्तकित्तनं अत्थि. तत्थ सचे अविप्पवासाय सम्मुतिकाले गामो अत्थि, तं सा न ओतरति. सचे पन सम्मताय सीमाय पच्छा गामो निविसति, सोपि सीमासङ्खमेव गच्छति. यथा च पच्छा निविट्ठो, एवं पठमं निविट्ठस्स पच्छा वड्ढितप्पदेसोपि सीमासङ्खमेव गच्छति. सचेपि सीमासम्मुतिकाले गेहानि कतानि, ‘‘पविसिस्सामा’’ति आलयोपि अत्थि, मनुस्सा पन अप्पविट्ठा, पोराणगामं वा सगेहमेव छड्डेत्वा अञ्ञत्थ गता, अगामोयेव एस, सीमा ओतरति. सचे पन एकम्पि कुलं पविट्ठं वा अगतं वा अत्थि, गामोयेव, सीमा न ओतरति.

एवं ¶ बद्धसीमं दस्सेत्वा इदानि अबद्धसीमं दस्सेन्तो ‘‘अबद्धसीमा पना’’तिआदिमाह. गामो एव सीमा गामसीमा. गामग्गहणेन चेत्थ निगमनगरानम्पि सङ्गहो वेदितब्बो. यत्तके पदेसे तस्स गामस्स गामभोजका बलिं लभन्ति, सो पदेसो अप्पो वा होतु, महन्तो वा, एकं गामखेत्तं नाम. यम्पि एकस्मिंयेव गामखेत्ते एकं पदेसं ‘‘अयं विसुं गामो होतू’’ति परिच्छिन्दित्वा राजा कस्सचि देति, सोपि विसुंगामसीमा होतियेव. तस्मा सा च इतरा च पकतिगामसीमा बद्धसीमासदिसाव होति. केवलं पन तिचीवरविप्पवासपरिहारं न लभतीति (महाव. अट्ठ. १४७).

अगामके अरञ्ञेति विञ्झाटविसदिसे अरञ्ञे. तेनाह ‘‘अगामकं नामा’’तिआदि. अयं पन सीमा तिचीवरविप्पवासपरिहारम्पि लभति. मच्छबन्धानन्ति केवट्टानं. अगमनपथेसूति गन्तुं असक्कुणेय्यपथेसु. यत्थ तदहेव गन्त्वा तदहेव पच्चागन्तुं न सक्का होति, तादिसेसूति वुत्तं होति. तेसं गमनपरियन्तस्स ओरतो पन गामसीमासङ्खं गच्छति. तत्थ गामसीमं असोधेत्वा कम्मं कातुं न वट्टति. मज्झे ठितानं सब्बदिसासु सत्तब्भन्तराति मज्झे ठितानं भिक्खूनं ठितोकासतो सब्बदिसासु सत्तब्भन्तरा. तत्थाति तेसु अब्भन्तरेसु. तस्माति यस्मा परिसवसेन वड्ढति, तस्मा. उपचारत्थायाति सीमोपचारत्थाय. सीमाभावं पटिक्खिपित्वाति ¶ बद्धसीमाभावं पटिक्खिपित्वा. समानो संवासो एत्थाति समानसंवासा. एको उपोसथो एत्थाति एकूपोसथा. एत्थ च उपोसथस्स विसुं गहितत्ता अवसेसकम्मवसेन समानसंवासता वेदितब्बा. वुत्ताति अबद्धसीमापरिच्छेदं दस्सेतुं उपोसथक्खन्धके (महाव. १४९) वुत्ता. अनु अनु अड्ढमासं अन्वड्ढमासं, अड्ढमासे अड्ढमासेति अत्थो. एवं ‘‘अनुदसाह’’न्तिआदीसुपि. देवेति मेघे. वलाहकेसु विगतमत्तेसूति भावेनभावलक्खणे भुम्मं. सोतन्ति उदकप्पवाहो वुच्चति. तित्थेन वा अतित्थेन वा ओतरित्वाति पाठसेसो. तिमण्डलं पटिच्छादेत्वाति यथा तिमण्डलपटिच्छादनं होति, एवं निवासेत्वा. उत्तरन्तियाति यत्थ कत्थचि उत्तरन्तिया. भिक्खुनीविभङ्गे (पाचि. ६९२) भिक्खुनिया वसेन नदीलक्खणस्स पाळियं आगतत्ता ‘‘भिक्खुनिया’’ति वुत्तं, न पन विसेससब्भावतो.

केनचि ¶ खणित्वा अकतोति अन्तमसो तिरच्छानेनपि खणित्वा अकतो. नदिं वा समुद्दं वा भिन्दित्वाति नदीकूलं वा समुद्दवेलं वा भिन्दित्वा. एतं लक्खणन्ति ‘‘यत्थ नदियं वुत्तप्पकारे वस्सकाले उदकं सन्तिट्ठती’’ति (कङ्खा. अट्ठ. निदानवण्णना) वुत्तप्पकारलक्खणं. लोणीपि जातस्सरसङ्खमेव गच्छति. यत्थ पन वुत्तप्पकारे वस्सकाले वस्से पच्छिन्नमत्ते पिवितुं वा हत्थपादे धोवितुं वा उदकं न होति सुक्खति, अयं जातस्सरो गामखेत्तसङ्खमेव गच्छति.

उदकुक्खेपाति करणत्थे निस्सक्कवचनन्ति आह ‘‘उदकुक्खेपेना’’ति. कथं पन उदकं खिपितब्बन्ति आह ‘‘तत्था’’तिआदि. मज्झिमेन पुरिसेनाति थाममज्झिमेन पुरिसेन. अयं उदकुक्खेपो नामाति अयं उदकुक्खेपेन परिच्छिन्ना सीमा नामाति अत्थो. याव परिसा वड्ढति, ताव अयं सीमापि वड्ढति, परिसपरियन्ततो उदकुक्खेपोयेव पमाणं. सचे पन नदी नातिदीघा होति, पभवतो पट्ठाय याव मुखद्वारं सब्बत्थ सङ्घो निसीदति, उदकुक्खेपसीमाकम्मं नत्थि. सकलापि नदी एतेसंयेव भिक्खूनं पहोति.

पकतिवस्सकालेति पुब्बे वुत्तप्पकारे पकतिवस्सकाले. चतूसु मासेसूति वस्सानस्स चतूसु मासेसु. अतिवुट्ठिकाले ओघेन ओत्थतोकासो न गहेतब्बो. सो हि गामसीमासङ्खमेव गच्छति. अन्तोनदियं जातस्सरे जातपिट्ठिपासाणदीपकेसुपि अयमेव विनिच्छयो वेदितब्बो. सचे पन नदी परिपुण्णा होति समतित्थिका, उदकसाटिकं निवासेत्वापि अन्तोनदियंयेव कम्मं कातब्बं. सचे न सक्कोन्ति, नावायपि ठत्वा कातब्बं. गच्छन्तिया पन नावाय कातुं न वट्टति. कस्मा? उदकुक्खेपमत्तमेव हि सीमा, तं ¶ नावा सीघमेव अतिक्कामेति. एवं सति अञ्ञिस्सा सीमाय ञत्ति, अञ्ञिस्सा अनुस्सावना होति, तस्मा नावं अरित्तेन वा ठपेत्वा, पासाणे वा लम्बित्वा, अन्तोनदियं जातरुक्खे वा बन्धित्वा कम्मं कातब्बं. अन्तोनदियं बद्धअट्टकेपि अन्तोनदियं जातरुक्खेपि ठितेहि कम्मं कातुं वट्टति.

सचे पन रुक्खस्स साखा वा ततो निक्खन्तपारोहो वा बहिनदीतीरे विहारसीमाय वा गामसीमाय वा पतिट्ठितो, सीमं वा सोधेत्वा, साखं ¶ वा छिन्दित्वा कम्मं कातब्बं. बहिनदीतीरे जातरुक्खस्स अन्तोनदियं पविट्ठसाखाय वा पारोहे वा नावं बन्धित्वा कम्मं कातुं न वट्टति. करोन्तेहि सीमा वा सोधेतब्बा, साखं छिन्दित्वा वा तस्स बहिपतिट्ठितभागो नासेतब्बो. नदीतीरे पन खाणुकं कोट्टेत्वा तत्थ बन्धनावाय न वट्टतियेव.

नदियं सेतुं करोन्ति, सचे अन्तोनदियंयेव सेतु वा सेतुपादा वा, सेतुम्हि ठितेहि कम्मं कातुं वट्टति. सचे पन सेतु वा सेतुपादा वा बहितीरे पतिट्ठिता, कम्मं कातुं न वट्टति, सीमं सोधेत्वा कम्मं कातब्बं. अथ सेतुपादा अन्तो, सेतु पन उभिन्नम्पि तीरानं उपरिआकासे ठितो, वट्टति. जातस्सरेपि एसेव नयो.

‘‘यस्मिं पदेसे पकतिवीचियो ओत्थरित्वा सण्ठहन्ती’’ति एतेन यं पदेसं उद्धं वड्ढनकउदकं वा पकतिवीचियो वा वेगेन आगन्त्वा ओत्थरन्ति, तत्थ कम्मं कातुं न वट्टतीति (महाव. अट्ठ. १४७) दस्सेति. सचे ऊमिवेगो बाधति, नावाय वा अट्टके वा ठत्वा कातब्बं. तेसु विनिच्छयो नदियं वुत्तनयेनेव वेदितब्बो. सचे पन समुद्दो गामसीमं वा निगमसीमं वा ओत्थरित्वा तिट्ठति, समुद्दोव होति. तत्थ कम्मं कातुं वट्टति. ततो पट्ठाय कप्पियभूमीति ओत्थरित्वा सण्ठितउदकन्ततो पट्ठाय अन्तो नदीजातस्सरसमुद्दो नामाति अत्थो. दुब्बुट्ठिकालेति वस्सानहेमन्ते सन्धाय वुत्तं. सुक्खेसुपीति निरुदकेसुपि. यथा च वापिखणने, एवं आवाटपोक्खरणीआदीनं खणनेपि गामखेत्तं होतियेवाति दट्ठब्बं. वप्पं वा करोन्तीति लाबुतिपुसकादिवप्पं वा करोन्ति. तं ठानन्ति यत्थ वापिआदिकं कतं, तं ठानं. अञ्ञं पन कप्पियभूमि. सचे पन जातस्सरं पूरेत्वा थलं करोन्ति, एकस्मिं दिसाभागे पाळिं बन्धित्वा सब्बमेव नं महातळाकं वा करोन्ति, सब्बोपि अजातस्सरो होति. गामसीमासङ्खमेव गच्छति.

सचे ¶ नदिम्पि विनासेत्वा तळाकं करोन्ति, हेट्ठा पाळि बद्धा, उदकं आगन्त्वा तळाकं पूरेत्वा तिट्ठति, एत्थ कम्मं कातुं न वट्टति. उपरि पवत्तनट्ठाने छड्डितं उदकं नदिं ओत्थरित्वा सन्दनट्ठानतो पट्ठाय वट्टति. काचि नदी कालन्तरेन उप्पतित्वा गामनिगमसीमं ओत्थरित्वा पवत्तति, नदीयेव ¶ होति, कम्मं कातुं वट्टति. सचे विहारसीमं ओत्थरति ‘‘विहारसीमा’’त्वेव सङ्खं गच्छति. तस्माति यस्मा अन्तो गच्छति, तस्मा. समन्ता उदकुक्खेपपरिच्छेदो कातब्बोति पहोनकट्ठानं सन्धाय वुत्तं. यत्थ पन कुन्नदीआदीसु नप्पहोति, तत्थ पहोनकट्ठानतो उदकुक्खेपपरिच्छेदो कातब्बो. उपचारत्थायाति सीमोपचारत्थाय.

कस्मा पन अञ्ञमेकं सत्तब्भन्तरं, अञ्ञो एको उदकुक्खेपो च उपचारत्थाय ठपेतब्बोति आह ‘‘अयं ही’’तिआदि. इदं वुत्तं होति (सारत्थ. टी. महावग्ग ३.१४७; वि. वि. टी. महावग्ग २.१४७) – यस्मा अयं सत्तब्भन्तरसीमा च उदकुक्खेपसीमा च भिक्खूनं ठितोकासतो पट्ठाय लब्भति, ते च भिक्खू न सब्बदा एकसदिसा, कदाचि वड्ढन्ति, कदाचि परिहायन्ति. यदा च वड्ढन्ति, तदा सीमासङ्करो होति. तस्मा अञ्ञमेकं सत्तब्भन्तरं, अञ्ञो एको उदकुक्खेपो च उपचारत्थाय ठपेतब्बोति. यं पन महाअट्ठकथायं ‘‘ततो अधिकं वट्टतियेव, ऊनकं पन न वट्टती’’ति (महाव. अट्ठ. १४७) वुत्तं, तम्पि एतदत्थमेव, न पन तत्थ कतस्स कम्मस्स कुप्पत्ताति गहेतब्बं. परिच्छेदतो बहि अञ्ञं तत्तकंयेव परिच्छेदं अनतिक्कमित्वा ठितोपीति अत्तनो सत्तब्भन्तरेन, उदकुक्खेपेन वा यो तेसं सत्तब्भन्तरस्स, उदकुक्खेपस्स वा परिच्छेदो, ततो बहि अञ्ञं तत्तकंयेव परिच्छेदं अनतिक्कमित्वा ठितोपीति अत्थो. कथमेतं विञ्ञायतीति आह ‘‘इदं सब्बअट्ठकथासु सन्निट्ठान’’न्ति, इदं ‘‘कम्मं कोपेती’’ति महाअट्ठकथादीसु ववत्थानन्ति अत्थो. ‘‘इति इम’’न्तिआदि यथावुत्तस्स निगमनं. होति चेत्थ –

‘‘बद्धाबद्धवसेनेध, सीमा नाम द्विधा तहिं;

तिसम्पत्तियुत्ता वज्जि-तेकादस विपत्तिका;

बद्धसीमा तिधा खण्डा-दितो गामादितो परा’’ति.

सभागापत्ति च नामेसा दुविधा वत्थुसभागा, आपत्तिसभागाति. तत्थ इध वत्थुसभागा अधिप्पेता, नेतराति दस्सेतुं ‘‘यं सब्बो सङ्घो विकालभोजनादिना’’तिआदिमाह. लहुकापत्तिन्ति लहुकेन विनयकम्मेन विसुज्झनतो लहुका थुल्लच्चयपाचित्तियपाटिदेसनीयदुक्कटदुब्भासितसङ्खाता पञ्चापत्तियो. वत्थुसभागाय सङ्घादिसेसापत्तियापि सति उपोसथकम्मं पत्तकल्लं ¶ न होतियेव. यथाह ¶ ‘‘सभागसङ्घादिसेसं आपन्नस्स पन सन्तिके आवि कातुं न वट्टति. सचे आवि करोति, आपत्ति आविकता होति, दुक्कटा पन न मुच्चती’’ति (चूळव. अट्ठ. १०२). तस्सा पन अदेसनागामिनितो एवं वुत्तं. वत्थुसभागाति वत्थुवसेन समानभागा, एककोट्ठासाति वुत्तं होति. इममेव वत्थुसभागं देसेतुं न वट्टति ‘‘न, भिक्खवे, सभागा आपत्ति देसेतब्बा, यो देसेय्य, आपत्ति दुक्कटस्सा’’ति (महाव. १६९) वुत्तत्ता, न पन आपत्तिसभागं. तेनाह ‘‘विकालभोजनपच्चया आपन्नं पना’’तिआदि. आपत्तिसभागन्ति आपत्तिया समानभागं.

सामन्ता आवासाति सामन्तआवासं, समीपविहारन्ति अत्थो. सज्जुकन्ति तदहेवागमनत्थाय. पाहेतब्बोति पेसेतब्बो. इच्चेतं कुसलन्ति इति एतं सुन्दरं भद्दकं, लद्धकप्पन्ति वुत्तं होति. नो चे लभेथाति विहारानं दूरताय वा मग्गे परिपन्थादिना वा यदि न लभेथ. ‘‘तस्स सन्तिके पटिकरिस्सती’’ति इमिना वचनेन सभागापत्ति आवि कातुम्पि न लब्भतीति दीपितं होति. यदि लभेय्य, आवि कत्वापि उपोसथं करेय्य. यदि पन सब्बो सङ्घो सभागं सङ्घादिसेसं आपन्नो होति, ञत्तिं ठपेत्वा उपोसथं कातुं न वट्टति, उपोसथस्स अन्तरायोव होति. उभोपि दुक्कटं आपज्जन्ति ‘‘न, भिक्खवे, सभागा आपत्ति देसेतब्बा, यो देसेय्य, आपत्ति दुक्कटस्स. न, भिक्खवे, सभागा आपत्ति पटिग्गहेतब्बा, यो पटिग्गण्हेय्य, आपत्ति दुक्कटस्सा’’ति (महाव. १६९) वुत्तत्ता. विमति संसयो, तत्थ नियुत्तो वेमतिको. ‘‘पुन निब्बेमतिको हुत्वा देसेतब्बमेवा’’ति नेव पाळियं, न च अट्ठकथायं अत्थि, देसिते पन दोसो नत्थि. वुत्तनयेनेवाति ‘‘पारिसुद्धिं आयस्मन्तो आरोचेथा’’तिआदिना नयेन सापत्तिकस्स उपोसथकरणे पञ्ञत्तं दुक्कटं आपज्जन्तीति वुत्तनयेनेव. कस्मा सभागापत्तियेव वुत्ताति आह ‘‘एतासु ही’’तिआदि. विसभागापत्तीसु विज्जमानासुपि पत्तकल्लं होतियेवाति विसभागासु पन विज्जमानासु तेसंयेव पुग्गलानं आपत्ति, न सङ्घस्साति सङ्घस्स पत्तकल्लं होतियेव.

अन्तिमवत्थुअज्झापन्नको नाम चतुन्नं पाराजिकानं अञ्ञतरं अज्झापन्नको. पण्डकादीनं विनिच्छयो परतो पाराजिकुद्देसे आवि भविस्सति ¶ . तिरच्छानगतोति अन्तमसो सक्कं देवराजानं उपादाय यो कोचि नागमाणवकादिको अमनुस्सजातिको वेदितब्बो, न अस्सगोणादयो. तेनाह ‘‘एत्थ चा’’तिआदि. तत्थ एत्थाति एतिस्सं वज्जनीयपुग्गलकथायं. यस्स उपसम्पदा पटिक्खित्ताति ‘‘तिरच्छानगतो, भिक्खवे, अनुपसम्पन्नो, न उपसम्पादेतब्बो’’ति (महाव. १११) यस्स नागसुपण्णादिनो तिरच्छानगतस्स उपसम्पदा पटिक्खित्ता ¶ , सो इधापि तिरच्छानगतो नामाति अत्थो. तत्थ हि अन्तमसो देवे उपादाय नागमाणवकादिको यो कोचि अमनुस्सजातिको ‘‘तिरच्छानगतो’’ति अधिप्पेतो. वुत्तञ्हि समन्तपासादिकायं ‘‘तिरच्छानगतो, भिक्खवेति एत्थ नागो वा होतु सुपण्णमाणवकादीनं वा अञ्ञतरो, अन्तमसो सक्कं देवराजानं उपादाय यो कोचि अमनुस्सजातियो, सो सब्बोव इमस्मिं अत्थे ‘तिरच्छानगतो’ति वेदितब्बो’’ति (महाव. अट्ठ. १११). तित्थं वुच्चति लद्धि, तं एतेसं अत्थीति तित्थिका, तित्थिका एव तित्थिया, इतो अञ्ञलद्धिकाति अत्थो.

सुत्तस्स उद्देसो सुत्तुद्देसो. पारिसुद्धि एव उपोसथो पारिसुद्धिउपोसथो. एसेव नयो अधिट्ठानुपोसथोति एत्थापि. सोति पातिमोक्खुद्देसो. ओवादोव पातिमोक्खं, तस्स उद्देसो सरूपेन कथनं ओवादपातिमोक्खुद्देसो. ‘‘इमस्मिं वीतिक्कमे अयं नाम आपत्ती’’ति एवं आपत्तिवसेन आणापनं पञ्ञापनं आणा, सेसं अनन्तरसदिसमेव.

खन्ती परमं तपो तितिक्खा…पे… वुत्ता तिस्सो गाथायो नाम –

‘‘खन्ती परमं तपो तितिक्खा;

निब्बानं परमं वदन्ति बुद्धा;

न हि पब्बजितो परूपघाती;

न समणो होति परं विहेठयन्तो.

‘‘सब्बपापस्स अकरणं, कुसलस्स उपसम्पदा;

सचित्तपरियोदपनं, एतं बुद्धान सासनं.

‘‘अनूपवादो ¶ अनूपघातो, पातिमोक्खे च संवरो;

मत्तञ्ञुता च भत्तस्मिं, पन्तञ्च सयनासनं;

अधिचित्ते च आयोगो, एतं बुद्धान सासन’’न्ति.(दी. नि. २.९०; ध. प. १८३-१८५) –

इमा तिस्सो गाथायो.

तत्थ खन्ती परमं तपोति (दी. नि. अट्ठ. २.९०; ध. प. अट्ठ. २.१८५) अधिवासनखन्ति ¶ नाम परमं तपो. तितिक्खाति खन्तिया एव वेवचनं, तितिक्खासङ्खाता अधिवासनखन्ति उत्तमं तपोति अत्थो. निब्बानं परमं वदन्तीति सब्बाकारेन पन निब्बानं ‘‘परम’’न्ति वदन्ति बुद्धा. न हि पब्बजितो परूपघातीति यो अधिवासनखन्तिविरहितत्ता परं उपघातेति बाधति विहिंसति, सो पब्बजितो नाम न होति. चतुत्थपादो पन तस्सेव वेवचनं. ‘‘न हि पब्बजितो’’ति एतस्स हि ‘‘नसमणो होती’’ति वेवचनं. ‘‘परूपघाती’’ति एतस्स ‘‘परं विहेठयन्तो’’ति वेवचनं. अथ वा परूपघातीति सीलूपघाती. सीलञ्हि उत्तमट्ठेन ‘‘पर’’न्ति वुच्चति. यो च समणो परं यं कञ्चि सत्तं विहेठयन्तो परूपघाती होति, अत्तनो सीलविनासको, सो पब्बजितो नाम न होतीति अत्थो. अथ वा यो अधिवासनखन्तिया अभावा परूपघाती होति, परं अन्तमसो डंसमकसम्पि सञ्चिच्च जीविता वोरोपेति, सो न हि पब्बजितो. किं कारणा? मलस्स अपब्बाजितत्ता. ‘‘पब्बाजयमत्तनो मलं, तस्मा ‘पब्बजितो’ति वुच्चती’’ति (ध. प. ३८८) इदञ्हि पब्बजितलक्खणं. योपि न हेव खो उपघातेति न मारेति, अपिच दण्डादीहि विहेठेति, सो परं विहेठयन्तो समणो न होति. किं कारणा? विहेसाय असमितत्ता. ‘‘समितत्ता हि पापानं, ‘समणो’ति पवुच्चती’’ति (ध. प. २६५) इदञ्हि समणलक्खणं.

दुतियगाथाय सब्बपापस्साति सब्बाकुसलस्स. अकरणन्ति अनुप्पादनं. कुसलस्साति चतुभूमककुसलस्स. उपसम्पदाति उपसम्पादनं पटिलाभो. सचित्तपरियोदपनन्ति अत्तनो चित्तस्स वोदापनं पभस्सरभावकरणं सब्बसो परिसोधनं, तं पन अरहत्तेन होति. इति सीलसंवरेन सब्बपापं पहाय लोकियलोकुत्तराहि समथविपस्सनाहि कुसलं सम्पादेत्वा अरहत्तफलेन चित्तं परियोदापेतब्बन्ति एतं बुद्धानं सासनं ओवादो अनुसिट्ठि.

ततियगाथाय ¶ अनूपवादोति वाचाय कस्सचि अनुपवदनं. अनूपघातोति कायेन कस्सचि उपघातस्स अकरणं. पातिमोक्खेति यं तं पातिमोक्खं पअतिमोक्खं अतिपमोक्खं उत्तमं सीलं, पाति वा अगतिविसेसेहि, मोक्खेति दुग्गतिभयेहि. यो वा नं पाति, तं मोक्खेतीति ‘‘पातिमोक्ख’’न्ति वुच्चति, तस्मिं पातिमोक्खे च. संवरोति सत्तन्नं आपत्तिक्खन्धानं अवीतिक्कमलक्खणो संवरो. मत्तञ्ञुताति पटिग्गहणपरिभोगवसेन पमाणञ्ञुता. पन्तञ्च सयनासनन्ति जनसङ्घट्टनविरहितं निज्जनसम्बाधं विवित्तं, सेनासनञ्च. एत्थ च द्विहियेव पच्चयेहि चतुपच्चयसन्तोसो दीपितोति वेदितब्बो पच्चयसन्तोससामञ्ञेन इतरद्वयस्सापि लक्खणहारनयेन जोतितत्ता. अधिचित्ते च आयोगोति विपस्सनापादकं ¶ अट्ठसमापत्तिचित्तं, ततोपि मग्गफलचित्तमेव अधिचित्तं, तस्मिं यथावुत्ते अधिचित्ते आयोगो च अनुयोगो चाति अत्थो. एतं बुद्धान सासनन्ति एतं परस्स अनुपवदनं, अनुपघातनं, पातिमोक्खे संवरो, पटिग्गहणपरिभोगेसु मत्तञ्ञुता, अट्ठसमापत्तिवसिभावाय विवित्तसेनासनसेवनञ्च बुद्धानं सासनं ओवादो अनुसिट्ठीति. इमा पन तिस्सो गाथा सब्बबुद्धानं पातिमोक्खुद्देसगाथायो होन्तीति वेदितब्बा. तं बुद्धा एव उद्दिसन्ति, न सावका.

‘‘सुणातु मे, भन्ते, सङ्घो’’तिआदिना (महाव. १३४) नयेन वुत्तं आणापातिमोक्खं नाम. तं सावका एव उद्दिसन्ति, न बुद्धा सङ्घकम्मं करोन्ति, न च तत्थ परियापन्नाति आह ‘‘तं सावका एव उद्दिसन्ति, न बुद्धा’’ति. इमस्मिं अत्थेति ‘‘पातिमोक्खं उद्दिसेय्या’’ति एतस्मिं अत्थे.

अनुपगतो नाम तत्थेव उपसम्पन्नो, असतिया पुरिमिकाय अनुपगतो वा. चातुमासिनियन्ति चातुमासियं. सा हि चतुन्नं मासानं पारिपूरिभूताति चातुमासी, सा एव ‘‘चातुमासिनी’’ति वुच्चति, तस्सं चातुमासिनियं. पच्छिमकत्तिकपुण्णमासिनियन्ति अत्थो. कायसामग्गिन्ति कायेन समग्गभावं, हत्थपासूपगमनन्ति वुत्तं होति.

अयं पनेत्थ विनिच्छयो – सचे पुरिमिकाय पञ्च भिक्खू वस्सं उपगता, पच्छिमिकायपि पञ्च, पुरिमेहि ञत्तिं ठपेत्वा पवारिते पच्छिमेहि ¶ तेसं सन्तिके पारिसुद्धिउपोसथो कातब्बो, न एकस्मिं उपोसथग्गे द्वे ञत्तियो ठपेतब्बा. सचेपि पच्छिमिकाय उपगता चत्तारो, तयो, द्वे, एको वा होति, एसेव नयो. अथ पुरिमिकाय चत्तारो, पच्छिमिकायपि चत्तारो, तयो, द्वे, एको वा, एसेव नयो. अथ पुरिमिकाय तयो, पच्छिमिकाय तयो, द्वे वा, एसेव नयो. इदञ्हेत्थ लक्खणं – सचे पुरिमिकाय उपगतेहि पच्छिमिकाय उपगता थोकतरा चेव होन्ति समसमा च, सङ्घप्पवारणाय च गणं पूरेन्ति, सङ्घप्पवारणावसेन ञत्तिं ठपेत्वा पुरिमेहि पवारेतब्बा. सचे पन पुरिमिकाय तयो, पच्छिमिकाय एको होति, तेन सद्धिं ते चत्तारो होन्ति, चतुन्नं सङ्घञत्तिं ठपेत्वा पवारेतुं न वट्टति. गणञत्तिया पन सो गणपूरको होति, तस्मा गणवसेन ञत्तिं ठपेत्वा पुरिमेहि पवारेतब्बं, इतरेन तेसं सन्तिके पारिसुद्धिउपोसथो कातब्बो. सचे पुरिमिकाय द्वे, पच्छिमिकाय द्वे वा एको वा, एत्थापि एसेव नयो. सचे पुरिमिकाय एको, पच्छिमिकायपि एको, एकेन एकस्स सन्तिके पवारेतब्बं, एकेन पारिसुद्धिउपोसथो कातब्बो ¶ . सचे पुरिमवस्सूपगतेहि पच्छिमवस्सूपगता एकेनपि अधिकतरा होन्ति, पठमं पातिमोक्खं उद्दिसित्वा पच्छा थोकतरेहि तेसं सन्तिके पवारेतब्बं. कत्तिकचातुमासिनिपवारणाय पन सचे पठमं वस्सूपगतेहि महापवारणाय पवारितेहि पच्छा उपगता अधिकतरा वा समसमा वा होन्ति, पवारणाञत्तिं ठपेत्वा पवारेतब्बं. तेहि पवारिते पच्छा इतरेहि पारिसुद्धिउपोसथो कातब्बो. अथ महापवारणाय पवारिता बहू होन्ति, पच्छा वस्सूपगता थोका वा एको वा, पातिमोक्खे उद्दिट्ठे पच्छा तेसं सन्तिके तेन पवारेतब्बन्ति.

एकंसं उत्तरासङ्गं करित्वाति एकस्मिं अंसे साधुकं उत्तरासङ्गं करित्वाति अत्थो. अञ्जलिं पग्गहेत्वाति दसनखसमोधानसमुज्जलं अञ्जलिं उक्खिपित्वा. सचे पन तत्थ पारिवासिकोपि अत्थि, सङ्घनवकट्ठाने निसीदित्वा तत्थेव निसिन्नेन अत्तनो पाळिया पारिसुद्धिउपोसथो कातब्बो. पातिमोक्खे उद्दिसियमाने पन पाळिया अनिसीदित्वा पाळिं विहाय हत्थपासं अमुञ्चन्तेन निसीदितब्बं. पवारणायपि एसेव नयो.

सब्बं ¶ पुब्बकरणीयन्ति सम्मज्जनादिं नवविधं पुब्बकिच्चं. यथा च सब्बो सङ्घो सभागापत्तिं आपज्जित्वा ‘‘सुणातु मे, भन्ते, सङ्घो…पे… पटिकरिस्सती’’ति (महाव. १७१) ञत्तिं ठपेत्वा उपोसथं कातुं लभति, एवमेत्थापि तीहि ‘‘सुणन्तु मे आयस्मन्ता इमे भिक्खू सभागं आपत्तिं आपन्ना, यदा अञ्ञं भिक्खुं सुद्धं अनापत्तिकं पस्सिस्सन्ति, तदा तस्स सन्तिके तं आपत्तिं पटिकरिस्सन्ती’’ति गणञत्तिं ठपेत्वा, द्वीहिपि ‘‘अञ्ञं सुद्धं पस्सित्वा पटिकरिस्सामा’’ति वत्वा उपोसथं कातुं वट्टति. एकेनापि ‘‘परिसुद्धं लभित्वा पटिकरिस्सामी’’ति आभोगं कत्वा कातुं वट्टति. तदहूति तस्मिं अहु, तस्मिं दिवसेति अत्थो. नानासंवासकेहीति लद्धिनानासंवासकेहि. अनावासो नाम नवकम्मसालादिको यो कोचि पदेसो. अञ्ञत्र सङ्घेनाति सङ्घप्पहोनकेहि भिक्खूहि विना. अञ्ञत्र अन्तरायाति पुब्बे वुत्तं दसविधमन्तरायं विना. सब्बन्तिमेन पन परिच्छेदेन अत्तचतुत्थेन अन्तराये वा सति गन्तुं वट्टति. यथा च आवासादयो न गन्तब्बा, एवं सचे विहारे उपोसथं करोन्ति, उपोसथाधिट्ठानत्थं सीमापि नदीपि न गन्तब्बा. सचे पनेत्थ कोचि भिक्खु होति, तस्स सन्तिकं गन्तुं वट्टति. विस्सट्ठउपोसथापि आवासा गन्तुं वट्टति. एवं गतो अधिट्ठातुम्पि लभति. आरञ्ञकेनापि भिक्खुना उपोसथदिवसे गामे पिण्डाय चरित्वा अत्तनो विहारमेव आगन्तब्बं. सचे अञ्ञं विहारं ओक्कमति, तत्थ उपोसथं कत्वाव आगन्तब्बं, अकत्वा आगन्तुं न वट्टति. यं जञ्ञा ‘‘अज्जेव तत्थ गन्तुं सक्कोमी’’ति (महाव. अट्ठ. १८१) ¶ एवरूपो पन आवासो गन्तब्बो. तत्थ भिक्खूहि सद्धिं उपोसथं करोन्तेनापि हि इमिना नेव उपोसथन्तरायो कतो भविस्सतीति.

उदकं आसनेन चाति आसनेन सह पानीयपरिभोजनीयं उदकञ्चाति अत्थो. सङ्घसन्निपाततो पठमं कत्तब्बं पुब्बकरणं. पुब्बकरणतो पच्छा कत्तब्बम्पि उपोसथकम्मतो पठमं कत्तब्बत्ता पुब्बकिच्चं. उभयम्पि चेतं उपोसथकम्मतो पठमं कत्तब्बत्ता ‘‘पुब्बकिच्च’’मिच्चेव एत्थ वुत्तन्ति आह ‘‘एवं द्वीहि नामेहि नवविधं पुब्बकिच्चं दस्सित’’न्ति. किं तं कतन्ति पुच्छतीति आह ‘‘न ही’’तिआदि. तं अकत्वा उपोसथं कातुं न वट्टति ‘‘न, भिक्खवे, थेरेन आणत्तेन अगिलानेन न ¶ सम्मज्जितब्बं, यो न सम्मज्जेय्य, आपत्ति दुक्कटस्सा’’तिआदि (महाव. १५९) वचनतो. तेनेवाह ‘‘तस्मा थेरेन आणत्तेना’’तिआदि.

सचे पन आणत्तो सम्मज्जनिं तावकालिकम्पि न लभति, साखाभङ्गं कप्पियं कारेत्वा सम्मज्जितब्बं. तम्पि अलभन्तस्स लद्धकप्पियं होति. पानीयं परिभोजनीयं उपट्ठापेतब्बन्ति आगन्तुकानं अत्थाय पानीयपरिभोजनीयं उपट्ठापेतब्बं. आसनं पञ्ञापेतब्बन्ति पीठफलकादिआसनं पञ्ञापेतब्बं. सचे उपोसथागारे आसनानि नत्थि, संघिकावासतोपि आहरित्वा पञ्ञापेत्वा पुन हरितब्बानि. आसनेसु असति कटसारकेपि तट्टिकायोपि पञ्ञापेतुं वट्टति. तट्टिकासुपि असति साखाभङ्गानि कप्पियं कारेत्वा पञ्ञापेतब्बानि. कप्पियकारकं अलभन्तस्स लद्धकप्पियं होति. पदीपो कातब्बोति पदीपेतब्बो, पदीपुज्जलनं कातब्बन्ति वुत्तं होति. आणापेन्तेन पन ‘‘असुकस्मिं नाम ओकासे तेलं वा वट्टि वा कपल्लिका वा अत्थि, तं गहेत्वा करोही’’ति वत्तब्बो. सचे तेलादीनि नत्थि, परियेसितब्बानि. परियेसित्वा अलभन्तस्स लद्धकप्पियं होति. अपिच कपाले अग्गिपि जालेतब्बो. आणापेन्तेन च किञ्चि कम्मं करोन्तो वा सदाकालमेव एको वा भारनित्थरणको वा सरभाणकधम्मकथिकादीसु अञ्ञतरो वा न आणापेतब्बो, अवसेसा पन वारेन आणापेतब्बा. तेनाह ‘‘थेरेनापि पतिरूपं ञत्वा आणापेतब्ब’’न्ति.

बहि उपोसथं कत्वा आगतेनाति नदिया वा सीमाय वा यत्थ कत्थचि उपोसथं कत्वा आगतेन छन्दो दातब्बो, ‘‘कतो मया उपोसथो’’ति अच्छितुं न लभतीति अधिप्पायो. किच्चप्पसुतो वाति गिलानुपट्ठाकादिकिच्चप्पसुतो वा. सचे गिलानो छन्दपारिसुद्धिं दातुं न सक्कोति, मञ्चेन वा पीठेन वा सङ्घमज्झं आनेत्वा उपोसथो कातब्बो. सचे गिलानुपट्ठाकानं ¶ भिक्खूनं एवं होति ‘‘सचे खो मयं इमं गिलानं ठाना चावेस्साम, आबाधो वा अभिवड्ढिस्सति, कालकिरिया वा भविस्सती’’ति, न त्वेव सो गिलानो ठाना चावेतब्बो, सङ्घेन तत्थ गन्त्वा उपोसथो कातब्बो, न त्वेव वग्गेन सङ्घेन उपोसथो कातब्बो. करेय्य चे, आपत्ति दुक्कटस्स. सचे बहू तादिसा गिलाना होन्ति, सङ्घेन पटिपाटिया ठत्वा ¶ सब्बे हत्थपासे कातब्बा. सचे दूरे दूरे होन्ति, सङ्घो नप्पहोति, तं दिवसं उपोसथो न कातब्बो, न त्वेव वग्गेन सङ्घेन उपोसथो कातब्बो. ‘‘अनुजानामि, भिक्खवे, तदहुपोसथे पारिसुद्धिं देन्तेन छन्दम्पि दातुं, सन्ति सङ्घस्स करणीय’’न्ति (महाव. १६५) वुत्तत्ता भगवतो आणं करोन्तेन ‘‘छन्दं दम्मी’’ति वुत्तं. ‘‘छन्दहारको चे, भिक्खवे, दिन्ने छन्दे तत्थेव पक्कमति, अञ्ञस्स दातब्बो छन्दो’’तिआदिवचनतो (महाव. १६५) पुन अत्तनो छन्ददानपरिस्समविनोदनत्थं ‘‘छन्दं मे हरा’’ति वुत्तं. ‘‘छन्दहारको चे, भिक्खवे, दिन्ने छन्दे सङ्घप्पत्तो सञ्चिच्च न आरोचेति, आहटो होति छन्दो, छन्दहारकस्स आपत्ति दुक्कटस्सा’’ति (महाव. १६५) वुत्तत्ता दुक्कटतो तं मोचेतुं ‘‘छन्दं मे आरोचेही’’ति वुत्तं.

कायेन वा वाचाय वा उभयेन वा विञ्ञापेतब्बोति मनसा चिन्तेत्वा कायप्पयोगं करोन्तेन येन केनचि अङ्गपच्चङ्गेन वा, वाचं पन निच्छारेतुं सक्कोन्तेन तथेव वाचाय वा, उभयथापि सक्कोन्तेन कायवाचाहि वा विञ्ञापेतब्बो, जानापेतब्बोति अत्थो. ‘‘अयं अत्थो’’ति वचनतो पन याय कायचिपि भासाय विञ्ञापेतुं वट्टति, पारिसुद्धिदानेपि छन्ददाने वुत्तसदिसोव विनिच्छयो. तं पन देन्तेन पठमं सन्ती आपत्ति देसेतब्बा. न हि सापत्तिको समानो ‘‘पारिसुद्धिं दम्मि, पारिसुद्धिं मे हर, पारिसुद्धिं मे आरोचेही’’ति (महाव. १६४) वत्तुं लभति. ‘‘सन्ति सङ्घस्स करणीयानी’’ति वत्तब्बे वचनविपल्लासेन ‘‘सन्ति सङ्घस्स करणीय’’न्ति वुत्तं. तेसञ्च अत्तनो च छन्दपारिसुद्धिं देतीति एत्थ छन्दो च छन्दपारिसुद्धि च छन्दपारिसुद्धि, तं देतीति सरूपेकसेसनयेन अत्थो दट्ठब्बो. इतराति अञ्ञेसं छन्दपारिसुद्धि. बिळालसङ्खलिका छन्दपारिसुद्धीति एत्थ बिळालसङ्खलिका नाम बिळालबन्धनं. तत्थ हि सङ्खलिकाय पठमवलयं दुतियवलयंयेव पापुणाति, न ततियं, एवमयम्पि छन्दपारिसुद्धि दायकेन यस्स दिन्ना, ततो अञ्ञत्थ न गच्छतीति (सारत्थ. टी. महावग्ग ३.१६४; वि. वि. टी. महावग्ग २.१६४). तस्मा सा बिळालसङ्खलिकसदिसत्ता ‘‘बिळालसङ्खलिका’’ति वुत्ता. बिळालसङ्खलिकग्गहणञ्चेत्थ यासं कासञ्चि सङ्खलिकानं उपलक्खणमत्तन्ति दट्ठब्बं.

उतुक्खानन्ति ¶ ¶ तं तं किरियं अरति वत्तेतीति उतु, तस्स अक्खानं उतुक्खानं, उतुआचिक्खनन्ति अत्थो. यथा च तस्स आचिक्खनं, तं सरूपतो दस्सेतुं ‘‘हेमन्तादीन’’न्तिआदि वुत्तं. गणनाति कलना. भिक्खुनीनं अट्ठगरुधम्मेहि ओवदनं भिक्खुनोवादो. स्वे उपोसथोति आगन्त्वाति ‘‘स्वे उपोसथो होती’’ति वुत्ते अज्जेव आगन्त्वा पन्नरसिके उपोसथे पक्खस्स चातुद्दसियं, चातुद्दसिके तेरसियं आगन्त्वाति वुत्तं होति. महापच्चरियं पन ‘‘पक्खस्स तेरसियंयेव आगन्त्वा ‘अयं उपोसथो चातुद्दसिको वा पन्नरसिको वा’ति पुच्छितब्ब’’न्ति (पाचि. अट्ठ. १४९) वुत्तं. एवं पुच्छितेन च भिक्खुना सचे चातुद्दसियं उपोसथं करोन्ति, ‘‘चातुद्दसिको भगिनी’’ति वत्तब्बं. सचे पन्नरसियं करोन्ति, ‘‘पन्नरसिको भगिनी’’ति वत्तब्बं. ‘‘अनुजानामि, भिक्खवे, ठपेत्वा बालं, ठपेत्वा गिलानं, ठपेत्वा गमिकं अवसेसेहि ओवादं गहेतु’’न्ति (चूळव. ४१४) वुत्तत्ता ‘‘तं ठपेत्वा’’तिआदिमाह. तत्थ आरोचनविधानं अजानन्तो बालो. चातुद्दसिकपन्नरसिकेसु उपोसथेसु वा पाटिपदे वा गन्तुकामो गमियो, दुतियपक्खदिवसतो पन पट्ठाय ततो उद्धं गच्छन्तो इध गमियो नाम न होति. अरञ्ञे निवासो अस्साति आरञ्ञिको. सोपि ‘‘अहं अरञ्ञवासी, स्वे उपोसथो, विहारे न वसामी’’ति अप्पटिग्गहितुं न लभति. यदि न गण्हेय्य, दुक्कटं आपज्जेय्य. वुत्तञ्हेतं ‘‘न, भिक्खवे, ओवादो न गहेतब्बो, यो न गण्हेय्य, आपत्ति दुक्कटस्सा’’ति (चूळव. ४१४). तेन पन पच्चाहरणत्थाय सङ्केतो कातब्बो. वुत्तञ्हेतं ‘‘अनुजानामि, भिक्खवे, आरञ्ञिकेन भिक्खुना ओवादं गहेतुं, सङ्केतञ्च कातुं अत्र पतिहरिस्सामी’’ति (चूळव. ४१५). तस्मा आरञ्ञिकेन भिक्खुना सचे भिक्खुनीनं वसनगामे भिक्खा लब्भति, तत्थेव चरित्वा भिक्खुनियो दिस्वा आरोचेत्वा गन्तब्बं. नो चस्स तत्थ भिक्खा सुलभा होति, सामन्तगामे चरित्वा भिक्खुनीनं गामं आगम्म तथेव कातब्बं. सचे दूरं गन्तब्बं होति, सङ्केतो कातब्बो ‘‘अहं असुकं नाम तुम्हाकं गामद्वारे सभं वा मण्डपं वा रुक्खमूलं वा उपसङ्कमिस्सामि, तत्र आगच्छेय्याथा’’ति. भिक्खुनीहि तत्र गन्तब्बं, अगन्तुं न लब्भति. वुत्तञ्हेतं ‘‘न, भिक्खवे, भिक्खुनिया सङ्केतं ¶ न गन्तब्बं, या न गच्छेय्य, आपत्ति दुक्कटस्सा’’ति (चूळव. ४१५). उपोसथग्गेति उपोसथकरणट्ठाने. अट्ठहि अङ्गेहीति –

‘‘सीलवा होति, पातिमोक्खसंवरसंवुतो विहरति आचारगोचरसम्पन्नो, अणुमत्तेसु वज्जेसु भयदस्सावी समादाय सिक्खति सिक्खापदेसु. बहुस्सुतो होति सुतधरो सुतसन्निचयो, ये ते धम्मा आदिकल्याणा मज्झेकल्याणा परियोसानकल्याणा सात्थं सब्यञ्जनं केवलपरिपुण्णं परिसुद्धं ब्रह्मचरियं अभिवदन्ति, तथारूपास्स धम्मा बहुस्सुता ¶ होन्ति, धाता वचसा परिचिता, मनसा अनुपेक्खिता, दिट्ठिया सुप्पटिविद्धा. उभयानि खो पनस्स पातिमोक्खानि वित्थारेन स्वागतानि होन्ति सुविभत्तानि सुप्पवत्तीनि सुविनिच्छितानि सुत्तसो अनुब्यञ्जनसो. कल्याणवाचो होति कल्याणवाक्करणो. येभुय्येन भिक्खुनीनं पियो होति मनापो. पटिबलो होति भिक्खुनियो ओवदितुं. न खो पनेतं भगवन्तं उद्दिस्स पब्बजिताय कासायवत्थवसनाय गरुधम्मं अज्झापन्नपुब्बो होति. वीसतिवस्सो वा होति अतिरेकवीसतिवस्सो वा’’ति (पाचि. १४७) –

इमेहि अट्ठहि अङ्गेहि. पासादिकेनाति पसादावहेन निद्दोसेन कायवचीमनोकम्मेन. सम्पादेतूति तिविधं सिक्खं सम्पादेतु. यदा पन ताहि भिक्खुनीहि पातिमोक्खुद्देसकंयेव दिस्वा ओवादो याचितो, तदा उपोसथग्गे सन्निपतितेहि भिक्खुसङ्घेहि पुब्बकिच्चवसेन ‘‘अत्थि काचि भिक्खुनियो ओवादं याचमाना’’ति पुच्छिते ‘‘एवं वदेही’’ति अत्तना वत्तब्बवचनं अञ्ञेन कथापेत्वा ‘‘अत्थि कोचि भिक्खु भिक्खुनोवादको सम्मतो’’तिआदिं सयं वत्वा पुन सयमेव गन्त्वा भिक्खुनीनं आरोचेतब्बं. अञ्ञेन वा भिक्खुना तस्मिं दिवसे पातिमोक्खं उद्दिसापेतब्बं. इदन्ति ‘‘ताही’’ति बहुवचनं. एकतो सहेव.

ञत्तिट्ठपकेन वाति यत्थ तिण्णं वसनट्ठाने पातिमोक्खुद्देसो नत्थि, तत्थ ञत्तिट्ठपनकेन वा. इतरेन वाति यत्थ द्वे भिक्खू वसन्ति, एको वा, तत्थ इतरेन वा भिक्खुना सचे सयमेव सम्मतो, ‘‘अह’’न्ति वत्तब्बं ¶ . तथेवाति उपोसथग्गे वुत्तसदिसमेव. ‘‘आरोचेत्वावा’’ति इमिना अनारोचनं पटिक्खिपति. ‘‘न, भिक्खवे, ओवादो न आरोचेतब्बो, यो न आरोचेय्य, आपत्ति दुक्कटस्सा’’ति (चूळव. ४१५) वचनतो ओवादं गहेत्वा उपोसथग्गे अनारोचेतुं न वट्टति.

परिसुद्धभावन्ति आपत्तिया परिसुद्धतं. आरोचेथाति आवि करोथ. एत्थ सियाति ‘‘पातिमोक्खं उद्दिसिस्सामी’’ति एतस्मिं पदे अयमनुयोगो भवेय्य. किं तं, यं सियाति आह ‘‘सङ्घो उपोसथं करेय्या’’तिआदि. पुब्बेनापरं सन्धियतीति पुब्बवचनेन अपरं वचनं सन्धानं गच्छति. सामग्गियाति कायचित्तेहि सहितताय. गणस्साति उद्देसकं ठपेत्वा चतुवग्गे सेसभिक्खूनं. सङ्घस्स उद्दिट्ठं होतीति सङ्घेन उद्दिट्ठं होति. करणत्थे चेतं सामिवचनं. एत्थाति पातिमोक्खुद्देसे. लक्खणन्ति सभावो.

थेरा ¶ च नवा च मज्झिमा चाति एत्थ दसवस्सा, अतिरेकदसवस्सा च थेरा. ऊनपञ्चवस्सा नवा. पञ्चवस्सा, अतिरेकपञ्चवस्सा च मज्झिमा. अट्ठिं कत्वाति अत्तानं तेन पातिमोक्खेन अत्थिकं कत्वा, तं वा पातिमोक्खं ‘‘इदं मय्हं पातिमोक्ख’’न्ति अत्थिं कत्वा. मनसि करित्वाति चित्ते ठपेत्वा. सोतद्वारवसेनाति सोतद्वारिकजवनविञ्ञाणवसेन. सब्बचेतसा समन्नाहरामाति चित्तस्स थोकम्पि बहि गन्तुं अदेन्ता सब्बेन चित्तेन आवज्जेम, सल्लक्खेमाति अत्थो. मनसि करोमाति आवज्जेम, समन्नाहरामाति अत्थो. सो च खो मनसिकारो न एत्थ आरम्मणप्पटिपादनलक्खणो, अथ खो वीथिप्पटिपादनजवनप्पटिपादनमनसिकारपुब्बकचित्ते ठपनलक्खणोति आह ‘‘एकग्गचित्ता हुत्वा चित्ते ठपेय्यामा’’ति. न समेतीति न संगच्छति. कस्मा न संगच्छतीति आह ‘‘समग्गस्स ही’’तिआदि. किञ्च भिय्योति आह ‘‘पातिमोक्खुद्देसको चा’’तिआदि. सङ्घपरियापन्नोति सङ्घे परियापन्नो अन्तोगधो.

इदानि तं दस्सेतुन्ति सम्बन्धो. आयस्मन्तोति सन्निपतितानं पियवचनेन आलपनं.

अलज्जिताति ¶ अलज्जिताय, अलज्जनभावेनाति अत्थो. ततियत्थे हि इदं पच्चत्तवचनं. ‘‘अञ्ञाणता’’तिआदीसुपि एसेव नयो. कुक्कुच्चप्पकतताति कुक्कुच्चेन अभिभूतताय. सतिसम्मोसाति सतिविप्पवासतो. वीतिक्कमन्ति सिक्खापदवीतिक्कमनं.

सञ्चिच्चाति सञ्चेतेत्वा, अकप्पियभावं जानन्तोयेव वीतिक्कमचित्तं पेसेत्वाति अत्थो. परिगूहतीति निगूहति न देसेति न वुट्ठाति. लज्जाय परिगूहन्तो अलज्जी न होति, ‘‘किं इमिना’’ति अनादरियेन परिगूहन्तो अलज्जी होतीति दस्सेति. अगतिगमनञ्च गच्छतीति भण्डभाजनीयट्ठानादीसु छन्दागतिआदिभेदं अगतिगमनञ्च गच्छति. अलज्जिपुग्गलोति अज्झत्तिकसमुट्ठानलज्जाविरहितो पुग्गलो. एत्थ च ‘‘सञ्चिच्चा’’ति इमिना अनादरियवसेनेव आपत्तिं आपज्जन्तो, आपन्नञ्च आपत्तिं परिगूहन्तो, भण्डभाजनीयट्ठानादीसु अगतिगमनं गच्छन्तो च अलज्जी होति, न इतरोति दस्सेति.

मन्दोति मन्दपञ्ञो, अपञ्ञस्सेवेतं नामं. मोमूहोति अतिसंमूळ्हो. विराधेतीति न राधेति न साधेति. कुक्कुच्चेति विनयसंसये. कप्पियं चे कत्तब्बं सियाति विनयधरं पुच्छित्वा तेन वत्थुं ओलोकेत्वा मातिकं, पदभाजनं, अन्तरापत्तिं, अनापत्तिञ्च ओलोकेत्वा ‘‘कप्पति, आवुसो, मा एत्थ कङ्खी’’ति वुत्ते कत्तब्बं भवेय्य.

सहसेय्यचीवरविप्पवासादीनीति ¶ एत्थ सहसेय्या नाम अनुपसम्पन्नेन उत्तरिदिरत्ततिरत्तं सहसेय्यापत्ति, विप्पवासो नाम एकरत्तछारत्तवसेन विप्पवासो. आदिसद्देन सत्ताहातिक्कमादीसु आपत्तिं सङ्गण्हाति. सत्तन्नं आपत्तिक्खन्धानन्ति पाराजिकसङ्घादिसेसथुल्लच्चयपाचित्तियपाटिदेसनीयदुक्कटदुब्भासितसङ्खातानं सत्तन्नं आपत्तिक्खन्धानं.

देसेतु वा पकासेतु वाति सङ्घमज्झे वा गणमज्झे वा एकपुग्गले वा देसेतु वा पकासेतु वा. एत्थ च पाराजिकापत्तिदेसना नाम भिक्खुभावस्स परिच्चागो. वुट्ठानं पन देसनाविसेसत्ता ‘‘देसना’’ति दट्ठब्बं. पकासेतु वाति आरोचेतु वा.

एवं अनापन्ना वाति एवं छन्नं आकारानं अञ्ञतरेन अनापन्ना वा. वुट्ठिता वाति परिवासादिना वुट्ठिता वा. आरोचिता वाति आविकता ¶ वा. आरोचेन्तो च ‘‘तुय्हं सन्तिके एकं आपत्तिं आविकरोमी’’ति वा ‘‘आचिक्खामी’’ति वा ‘‘आरोचेमी’’ति वा ‘‘मम एकं आपत्तिं आपन्नभावं जानाही’’ति वा वदतु, ‘‘एकं गरुकं आपत्तिं आविकरोमी’’ति वा आदिना नयेन वदतु, सब्बेहिपि आकारेहि आरोचिताव होति. सचे पन गरुकापत्तिं आविकरोन्तो ‘‘लहुकापत्तिं आविकरोमी’’तिआदिना नयेन वदति, अनाविकता होति आपत्ति. वत्थुं आरोचेति, आपत्तिं आरोचेति, उभयं आरोचेति, तिविधेनापि आरोचिताव होति. असन्तिया आपत्तियाति भावेनभावलक्खणे भुम्मं. तुण्हीभावेनापि हीति एत्थ न केवलं ‘‘आम, मयं परिसुद्धा’’ति वुत्तेयेव, अथ खो तुण्हीभावेनापीति अपिसद्दस्स अत्थो वेदितब्बो.

किं तं यावततियानुसावितं नाम, कथञ्चेतं यावततियानुसावितं होतीति विचारणायं आचरियानं मतिभेदमुखेन तमत्थं दस्सेतुं ‘‘यावततियं अनुसावितं होतीति एत्था’’तिआदि वुत्तं. तत्थ यदेतं तिक्खत्तुं अनुसावितन्ति सम्बन्धो. अत्थब्यञ्जनभेदतोति अरीयति ञायतीति अत्थो, अभिधेय्यं, ब्यञ्जीयति अत्थो अनेनाति ब्यञ्जनं, अक्खरं, अत्थो च ब्यञ्जनञ्च अत्थब्यञ्जनानि, तेसं भेदो अत्थब्यञ्जनभेदो, ततो, अत्थस्स च ब्यञ्जनस्स च विसदिसत्ताति अत्थो.

इदानि तमेवत्थं विभावेतुं ‘‘अनुसावनञ्हि नामा’’तिआदिमाह. हीति कारणत्थे निपातो. तस्स पन ‘‘अभिन्न’’न्ति इमिना सम्बन्धो वेदितब्बो. तेनाति भिन्नत्ता. अस्साति ‘‘यस्स सिया’’तिआदिवचनत्तयस्स. अवस्सञ्चेतमेवं सम्पटिच्छितब्बं, अञ्ञथा अतिप्पसङ्गोपि ¶ सियाति दस्सेतुं ‘‘यदि चेत’’न्तिआदिमाह. एतन्ति ‘‘यस्स सिया’’तिआदिवचनत्तयं. अपरे ‘‘अनुसावित’’न्ति पदं न अतीतत्थं दीपेति, अथ खो अनागतत्थं. धात्वत्थसम्बन्धो कालन्तरविहितोपि पच्चयो कालन्तरे साधु होतीति विकप्पेसुं. तेनाह ‘‘अपरे ‘अनुसावित’न्ति पदस्सा’’तिआदि. उपरि उद्देसावसानेति पाराजिकुद्देसावसाने. अत्थयुत्तीनं अभावतोति अनागतत्थस्स च कारणस्स च अभावतो. इदानि तमेव विभावेतुं ‘‘इदं ही’’तिआदिमाह. कथमेतं विञ्ञायतीति आह ‘‘यदि चस्सा’’तिआदि. अयन्ति ¶ अनागतकालो. अनुसावितं हेस्सतीति वदेय्याति अनुप्पयोगं अनागतकालं कत्वा ‘‘अनुसावितं हेस्सती’’ति बुद्धो वदेय्य. अयं हेत्थाधिप्पायो – यदि चेत्थ धात्वत्थसम्बन्धो त-पच्चयो सिया, तथा सति धात्वत्थसम्बन्धो नाम विसेसनविसेस्यभावो, सो च अनुप्पयोगस्स समानत्थभावे सति उप्पज्जति, नासतीति ‘‘हेस्सती’’ति अनुप्पयोगं वदेय्य, न च वुत्तं. तस्मा अनागतं न दीपेति, अतीतकालमेव दीपेतीति. अनुसावियमानेति वचनतोति ‘‘अनुसावियमाने’’ति वत्तमानकालवचनतो. यदि एवं ‘‘यावततियं अनुसावितं होती’’ति किमिदन्ति आह ‘‘यावततिय’’न्तिआदि. किं तेन लक्खीयति, येनेतं लक्खणवचनमत्तं सियाति आह ‘‘तेना’’तिआदि. तेनाति लक्खणवचनमत्तेन हेतुना.

तदेतन्ति पातिमोक्खं. तं पनेतन्ति ‘‘तत्थायस्मन्ते पुच्छामी’’तिआदिकं यावततियानुसावनं. न दिस्सतीति नोपलब्भति. इममेव च अत्थन्ति इमं अम्हेहि वुत्तमेवत्थं. यदि हि ‘‘यस्स सिया आपत्ती’’तिआदिवचनत्तयं यावततियानुसावनं सिया, तदेव उपोसथक्खन्धके (महाव. १३२ आदयो) वदेय्य, न पन ‘‘सकिम्पि अनुसावितं होती’’तिआदिकन्ति अधिप्पायो. ननु चायं विनिच्छयो अट्ठकथासु न आगतो, अथ कुतो लद्धोति आह ‘‘अयमेत्था’’तिआदि. विनयट्ठानेसु कतपरिचयानं आचरियानं तं तं अत्थं ञापेन्ती पवेणि आचरियपरम्परा, ताय आभतो आनीतो आचरियपरम्पराभतो.

ननु सम्पजानमुसावादे पाचित्तियेन भवितब्बं, अथ कथं दुक्कटापत्ति होतीति आह ‘‘सा च खो न मुसावादलक्खणेना’’तिआदि. सम्पजानमुसावादे किं होतीति य्वायं ‘‘सम्पजानमुसावादो अस्स होती’’ति वुत्तो, सो आपत्तितो किं होति, कतरा आपत्ति होतीति अत्थो. दुक्कटं होतीति दुक्कटापत्ति होति. वचीद्वारे अकिरियसमुट्ठानापत्ति होतीति अस्स हि भिक्खुनो अधम्मिकाय पटिञ्ञाय तुण्हीभूतस्स निसिन्नस्स मनोद्वारे आपत्ति नाम नत्थि. यस्मा पन आविकातब्बं नाविकासि, तेनस्स वचीद्वारे अकिरियतो अयं ¶ आपत्ति समुट्ठातीति ¶ वेदितब्बा. इदानि वुत्तमेवत्थं पाळिया साधेतुं ‘‘वुत्तम्पि चेत’’न्तिआदिमाह. एतं उपालित्थेरेन परिवारे सेदमोचनगाथासु (परि. ४७९) वुत्तम्पि चाति अत्थो.

अनालपन्तो मनुजेन केनचि वाचाति केनचि मनुजेन वाचाय अनालपन्तो. गिरं नो च परे भणेय्याति ‘‘इति इमे सोस्सन्ती’’ति परपुग्गले सन्धाय सद्दम्पि न निच्छारेय्य. आपज्जेय्य वाचसिकन्ति वाचतो समुट्ठितं आपत्तिं आपज्जेय्य. पञ्हामेसा कुसलेहि चिन्तिताति एत्थ पञ्हामेसाति लिङ्गब्यत्तयेन वुत्तं, एसो पञ्हो कुसलेहि चिन्तितोति अत्थो. अयं पञ्हो इममेव मुसावादं सन्धाय वुत्तो.

तंतंसम्पत्तिया विबन्धनवसेन सत्तसन्तानस्स अन्तरे वेमज्झे एति आगच्छतीति अन्तरायो, दिट्ठधम्मिकादिअनत्थो, अतिक्कमनट्ठेन तस्मिं अन्तराये नियुत्तो, अन्तरायं वा फलं अरहति, अन्तरायस्स वा करणसीलोति अन्तरायिको. तेनाह ‘‘विप्पटिसारवत्थुताया’’तिआदि. तत्थ विप्पटिसारवत्थुतायाति विप्पटिसारो नाम पच्छानुतापवसेन चित्तविप्पटिसारो, तस्स कारणतायाति अत्थो. पठमज्झानादिपच्चयभूतअअप्पटिसारविरुद्धस्स विप्पटिसारस्स पच्चयत्ताति वुत्तं होति. पामोज्जादिसम्भवन्ति दुब्बलतरुणा पीति पामोज्जं, तं आदि येसं ते पामोज्जादयो, तेसं सम्भवो पटिलाभो पामोज्जादिसम्भवो, तं. आदिसद्देन पीतिप्पस्सद्धादीनं गहणं. पठमज्झानादीनन्ति एत्थादिसद्देन पन ‘‘दुतियस्स झानस्स अधिगमाय अन्तरायिको, ततियस्स झानस्स अधिगमाय अन्तरायिको, चतुत्थस्स झानस्स अधिगमाय अन्तरायिको, झानानं, विमोक्खानं, समाधीनं, समापत्तीनं, नेक्खम्मानं, निस्सरणानं, पविवेकानं, कुसलानं धम्मानं अधिगमाय अन्तरायिको’’ति (महाव. १३५) वुत्तदुतियज्झानादीनं सङ्गहो दट्ठब्बो. ‘‘तस्मा’’ति वुत्ते यंतंसद्दानं अब्यभिचारितसम्बन्धताय ‘‘यस्मा’’ति अयमत्थो उपट्ठितोयेव होतीति आह ‘‘तस्माति यस्मा’’तिआदि. जानन्तेनाति जानमानेन. इमिनास्स सम्पजानमुसावादस्स सचित्तकतं दस्सेति. विसुद्धिं अपेक्खतीति विसुद्धापेक्खो, तेन ¶ विसुद्धापेक्खेन. सा च विसुद्धि इध वुट्ठानादीति आह ‘‘वुट्ठातुकामेन विसुज्झितुकामेना’’ति. वुट्ठानगामिनितो सङ्घादिसेसतो वुट्ठातुकामेन, देसनागामिनितो विसुज्झितुकामेनाति अत्थो. सङ्घमज्झे वा गणमज्झे वा एकपुग्गले वाति उपोसथग्गे सङ्घस्स आरोचनवसेन सङ्घमज्झे वा तत्थेव उभतो निसिन्नानं आरोचनवसेन गणमज्झे वा अनन्तरस्स आरोचनवसेन एकपुग्गले वा पकासेतब्बा. इतो वुट्ठहित्वाति इतो उपोसथग्गतो वुट्ठाय. एत्थ पन सभागोयेव वत्तब्बो. विसभागस्स हि वुच्चमाने भण्डनकलहसङ्घभेदादीनिपि होन्ति. तस्मा तस्स अवत्वा ‘‘इतो वुट्ठहित्वा ¶ पटिकरिस्सामी’’ति आभोगं कत्वा उपोसथो कातब्बोति अन्धकट्ठकथायं (महाव. अट्ठ. १७०) वुत्तं.

करणत्थेति ततियाविभत्तिअत्थे. कत्तरि हेतं पच्चत्तवचनं होति फासुसद्दापेक्खाय. पच्चत्तवचनन्ति पठमावचनं. पठमज्झानादीनं अधिगमाय फासु होतीति अधिगमत्थं तस्स भिक्खुनो फासु होति सुखं होति संवरस्स अविप्पटिसारहेतुत्ता. तेनाह ‘‘अविप्पटिसारमूलकान’’न्तिआदि. पापपुञ्ञानं कताकतवसेन चित्तविप्पटिसाराभावो अविप्पटिसारो, सो मूलं कारणं येसं ते अविप्पटिसारमूला, अविप्पटिसारमूलायेव अविप्पटिसारमूलका, तेसं अविप्पटिसारमूलकानं. सुखप्पटिपदा सम्पज्जतीति सुखा पटिपदा समिज्झति, पठमज्झानादीनं सुखेन अधिगमो होतीति अधिप्पायो. होति चेत्थ –

‘‘निदाने ञत्तिट्ठपनं, पुब्बकिच्चस्स पुच्छनं;

निदानुद्देससवने, विसुद्धारोचने विधि;

अनारोचने चापत्ति, ञेय्यं पिण्डत्थपञ्चक’’न्ति.

इति कङ्खावितरणिया पातिमोक्खवण्णनाय

विनयत्थमञ्जूसायं लीनत्थप्पकासनियं

निदानवण्णना निट्ठिता.

पाराजिककण्डं

इदानि ¶ ¶ निदानुद्देसानन्तरं वुत्तस्स पाराजिकुद्देसस्स अत्थं संवण्णेतुं ‘‘इदानी’’तिआदि आरद्धं. निदानानन्तरन्ति भावनपुंसकनिद्देसो, निदानं अनन्तरं कत्वाति वुत्तं होति. तत्थाति पाराजिककण्डे. पातिमोक्खेति भिक्खुपातिमोक्खे. चत्तारोति गणनपरिच्छेदो ऊनातिरेकभावनिवत्तनतो. पाराजिकाति सजातिनामं. आपत्तियोति सब्बसाधारणनामं. उद्दिसीयतीति उद्देसो. भावप्पधानोयं निद्देसो. तेनाह ‘‘उद्दिसितब्बत’’न्ति.

१. पठमपाराजिकवण्णना

यो पनाति (पारा. अट्ठ. १.४५ भिक्खुपदभाजनीयवण्णना) एत्थ यस्मा पनाति निपातमत्तं, योति अत्थपदं, तञ्च अनियमेन पुग्गलं दीपेति. तस्मा तस्स अत्थं दस्सेन्तो ‘‘यो कोची’’ति आह. यस्मा पन यो योकोचि नाम, सो अवस्सं लिङ्गयुत्तजातिनामगोत्तसीलविहारगोचरवयेसु एकेनाकारेन पञ्ञायति, तस्मा तं तथा ञापेतुं ‘‘रस्सदीघादिना’’तिआदिमाह. आदिसद्देन नवकम्मादीनं गहणं. लिङ्गादिभेदेनाति लिङ्गीयतिञायति एतेनाति लिङ्गं, तं आदि येसं तेति लिङ्गादयो, तेसं भेदो लिङ्गादिभेदो, तेन लिङ्गादिभेदेन. एत्थादिसद्देन पन युत्तादीनं गहणं. इदं वुत्तं होति – लिङ्गवसेन यादिसो वा तादिसो वा होतु, दीघो वा रस्सो वा काळो वा ओदातो वा मङ्गुरच्छवि वा किसो वा थूलो वा. योगवसेन येन वा तेन वा युत्तो होतु, नवकम्मयुत्तो वा उद्देसयुत्तो वा वासधुरयुत्तो वा. जातिवसेन यंजच्चो वा तंजच्चो वा होतु, खत्तियो वा ब्राह्मणो वा वेस्सो वा सुद्धो वा. नामवसेन यथानामो वा तथानामो वा होतु, बुद्धरक्खितो वा धम्मरक्खितो वा सङ्घरक्खितो वा. गोत्तवसेन यथागोत्तो वा तथागोत्तो वा होतु, कच्चायनो वा वासिट्ठो वा कोसियो वा. सीलेसु यथासीलो वा तथासीलो वा होतु, नवकम्मसीलो वा उद्देससीलो वा वासधुरसीलो वा. विहारेसुपि यथाविहारी वा तथाविहारी वा ¶ होतु, नवकम्मविहारी वा उद्देसविहारी वा वासधुरविहारी वा ¶ . गोचरेसुपि यथागोचरो वा तथागोचरो वा होतु, नवकम्मगोचरो वा उद्देसगोचरो वा वासधुरगोचरो वा. वयेसुपि यो वा सो वा होतु थेरो वा नवो वा मज्झिमो वा, अथ खो सब्बोव इमस्मिं अत्थे ‘‘यो’’ति वुच्चतीति.

इदानि ‘‘भिक्खू’’ति पदं संवण्णेतुं ‘‘एहिभिक्खूपसम्पदा’’तिआदिमाह. तत्थ ‘‘एहि भिक्खू’’ति भगवतो वचनमत्तेन भिक्खुभावो एहिभिक्खूपसम्पदा. ‘‘बुद्धं सरणं गच्छामी’’तिआदिना (महाव. १०५) नयेन तिक्खत्तुं वाचं भिन्दित्वा वुत्तेहि तीहि सरणगमनेहि उपसम्पदा सरणगमनूपसम्पदा. ओवादप्पटिग्गहणूपसम्पदा (पारा. अट्ठ. १.४५) नाम –

‘‘तस्मातिह ते, कस्सप, एवं सिक्खितब्बं ‘तिब्बं मे हिरोत्तप्पं पच्चुपट्ठितं भविस्सति थेरेसु नवेसु मज्झिमेसू’ति, एवञ्हि ते कस्सप सिक्खितब्बं. तस्मातिह ते, कस्सप, एवं सिक्खितब्बं ‘यं किञ्चि धम्मं सुणिस्सामि कुसलूपसंहितं, सब्बं तं अट्ठिं कत्वा मनसि करित्वा सब्बचेतसा समन्नाहरित्वा ओहितसोतो धम्मं सुणिस्सामी’ति, एवञ्हि ते, कस्सप, सिक्खितब्बं. तस्मातिह ते, कस्सप, एवं सिक्खितब्बं ‘सातसहगता च मे कायगतासति न विजहिस्सती’ति, एवञ्हि ते, कस्सप, सिक्खितब्ब’’न्ति (सं. नि. २.१५४) –

इमिना ओवादप्पटिग्गहणेन महाकस्सपत्थेरस्स अनुञ्ञातउपसम्पदा.

पञ्हाब्याकरणूपसम्पदा नाम सोपाकस्स अनुञ्ञातउपसम्पदा. भगवा किर पुब्बारामे अनुचङ्कमन्तं सोपाकसामणेरं ‘‘‘उद्धुमातकसञ्ञा’ति वा सोपाक ‘रूपसञ्ञा’ति वा इमे धम्मा नानत्था नानाब्यञ्जना, उदाहु एकत्था ब्यञ्जनमेव नान’’न्ति (पारा. अट्ठ. १.४५) दस असुभनिस्सिते पञ्हे पुच्छि. सो ते ब्याकासि. भगवा तस्स साधुकारं दत्वा ‘‘कतिवस्सो त्वं, सोपाका’’ति पुच्छि. सत्तवस्सोहं भगवाति. ‘‘सोपाक, त्वं मम सब्बञ्ञुतञ्ञाणेन सद्धिं संसन्दित्वा पञ्हे ब्याकासी’’ति आरद्धचित्तो उपसम्पदं अनुजानि, अयं पञ्हाब्याकरणूपसम्पदा.

अट्ठगरुधम्मपटिग्गहणूपसम्पदा ¶ नाम महापजापतिया अट्ठगरुधम्मप्पटिग्गहणेन अनुञ्ञातउपसम्पदा.

दूतेनूपसम्पदा ¶ नाम अड्ढकासिया गणिकाय अनुञ्ञातउपसम्पदा.

अट्ठवाचिकूपसम्पदा नाम भिक्खुनिया भिक्खुनिसङ्घतो ञत्तिचतुत्थेन, भिक्खुसङ्घतो ञत्तिचतुत्थेनाति इमेहि द्वीहि कम्मेहि उपसम्पदा.

ञत्तिचतुत्थकम्मूपसम्पदा नाम भिक्खूनं एतरहि उपसम्पदा. ञत्तिचतुत्थेनाति तीहि अनुस्सावनाहि, एकाय च ञत्तियाति एवं ञत्तिचतुत्थेन. किञ्चापि हि ञत्ति सब्बपठमं वुच्चति, तिस्सन्नं पन अनुस्सावनानं अत्थब्यञ्जनभेदाभावतो अत्थब्यञ्जनभिन्नं ञत्तिं तासं चतुत्थन्ति कत्वा ‘‘ञत्तिचतुत्थ’’न्ति वुच्चति. अकुप्पेनाति अकोपेतब्बतं, अप्पटिक्कोसितब्बतञ्च उपगतेन. ठानारहेनाति कारणारहेन सत्थु सासनारहेन. उपसम्पन्नो नाम उपरिभावं समापन्नो, पत्तोति अत्थो. भिक्खुभावो हि उपरिभावो, तञ्चेस यथावुत्तेन कम्मेन समापन्नत्ता ‘‘उपसम्पन्नो’’ति वुच्चति. कस्मा पनेत्थ इमिनाव उपसम्पन्नो इध गहितो, नाञ्ञेहीति? वुच्चते – एहिभिक्खूपसम्पदा अन्तिमभविकानमेव, सरणगमनूपसम्पदा परिसुद्धानं, ओवादप्पटिग्गहणपञ्हाब्याकरणूपसम्पदा महाकस्सपसोपाकानं, न च ते भब्बा पाराजिकादिलोकवज्जं आपज्जितुं, अट्ठगरुधम्मप्पटिग्गहणादयो च भिक्खुनीनंयेव अनुञ्ञाता. अयञ्च भिक्खु, तस्मा ञत्तिचतुत्थेनेव उपसम्पदाकम्मेन उपसम्पन्नो इध गहितो, नाञ्ञेहीति वेदितब्बो. पण्णत्तिवज्जेसु पन सिक्खापदेसु अञ्ञेपि एहिभिक्खूपसम्पदाय उपसम्पन्नादयो सङ्गय्हन्ति (सारत्थ. टी. २.४५ भिक्खुपदभाजनीयवण्णना). वक्खति हि ‘‘पण्णत्तिवज्जेसु पन अञ्ञेपि सङ्गहं गच्छन्ती’’ति. इदानि ‘‘अकुप्पेन ठानारहेन उपसम्पन्नो’’ति संखित्तेन वुत्तमत्थं वित्थारेत्वा दस्सेतुं ‘‘तस्स पना’’तिआदिमाह.

तत्थाति तेसु पञ्चसु. वसति एत्थाति वत्थु, आधारो पतिट्ठा. तेनाह ‘‘उपसम्पदापेक्खो पुग्गलो’’ति. ऊनानि अपरिपुण्णानि वीसति वस्सानि अस्साति ऊनवीसतिवस्सो. एत्थ यं वत्तब्बं, तं उपरि सप्पाणकवग्गे ऊनवीसतिसिक्खापदे (कङ्खा. अट्ठ. ऊनवीसतिवस्ससिक्खापदवण्णना) वण्णयिस्साम. तेसूति पण्डकादीसु एकादससु अभब्बपुग्गलेसु. पण्डको (महाव. अट्ठ. १०९) पनेत्थ पञ्चविधो होति आसित्तपण्डको, उसूयपण्डको ¶ , ओपक्कमिकपण्डको, नपुंसकपण्डको, पक्खपण्डकोति. तेसु आसित्तपण्डकस्स च उसूयपण्डकस्स ¶ च पब्बज्जा न वारिता, इतरेसं तिण्णं वारिता. तेसुपि पक्खपण्डकस्स यस्मिं पक्खे पण्डको होति, तस्मिंयेवस्स पक्खे पब्बज्जा वारिताति. तयो चेत्थ पब्बज्जूपसम्पदानं अभब्बताय अवत्थू. तेनाह ‘‘आसित्तपण्डकञ्चा’’तिआदि. तत्थ यस्स परेसं अङ्गजातं मुखेन गहेत्वा असुचिना आसित्तस्स परिळाहो वूपसम्मति, अयं आसित्तपण्डको. यस्स परेसं अज्झाचारं पस्सतो उसूयाय उप्पन्नाय परिळाहो वूपसम्मति, अयं उसूयपण्डको. यस्स उपक्कमेन बीजानि अपनीतानि, अयं ओपक्कमिकपण्डको (वि. सङ्ग. अट्ठ. १३५; वि. वि. टी. महावग्ग २.१०९). यो पन पटिसन्धियंयेव अभावको उप्पन्नो, अयं नपुंसकपण्डको. एकच्चो पन अकुसलविपाकानुभावेन काळपक्खे पण्डको होति, जुण्हपक्खे पनस्स परिळाहो वूपसम्मति, अयं पक्खपण्डकोति वेदितब्बो.

थेय्येन संवासो एतस्साति थेय्यसंवासको. सो च न संवासमत्तस्सेव थेनको इधाधिप्पेतो, अथ खो लिङ्गस्स, तदुभयस्स च थेनकोपीति आह ‘‘थेय्यसंवासको पन तिविधो’’तिआदि. न भिक्खुवस्सानि गणेतीति (महाव. अट्ठ. ११०) ‘‘अहं दसवस्सो वा वीसतिवस्सो वा’’ति मुसा वत्वा भिक्खुवस्सानि न गणेति. न यथावुड्ढं भिक्खूनं वा सामणेरानं वा वन्दनं सादियतीति अत्तना मुसावादं कत्वा दस्सितवस्सानुरूपेन यथावुड्ढं वन्दनं नाधिवासेति. न आसनेन पटिबाहतीति ‘‘अपेहि, मे एतं पापुणाती’’ति आसनेन नप्पटिबाहति. न उपोसथादीसु सन्दिस्सतीति उपोसथप्पवारणादीसु न सन्दिस्सति. लिङ्गमत्तस्सेवाति एवसद्देन संवासं निवत्तेति. समानोति सन्तो. लिङ्गानुरूपस्स संवासस्साति सामणेरलिङ्गानुरूपस्स सामणेरसंवासस्स. सचे पन कासाये धुरं निक्खिपित्वा नग्गो वा ओदातवत्थनिवत्थो वा मेथुनसेवनादीहि अस्समणो हुत्वा कासायानि निवासेति, लिङ्गत्थेनको होति. सचे गिहिभावं पत्थयमानो कासायं ओवट्टिकं कत्वा, अञ्ञेन वा आकारेन गिहिनिवासनेन निवासेति ‘‘सोभति नु खो मे गिहिलिङ्गं, न सोभती’’ति वीमंसनत्थं, रक्खति ताव, ‘‘सोभती’’ति सम्पटिच्छित्वा पुन लिङ्गं सादियति, लिङ्गत्थेनको होति. ओदातं निवासेत्वा वीमंसनसम्पटिच्छनेसुपि एसेव नयो ¶ . सचेपि निवत्थकासावस्स उपरि ओदातं निवासेत्वा वीमंसति वा सम्पटिच्छति वा, रक्खति एव.

अन्तिमवत्थुअज्झापन्नकेपि एसेव नयोति पाराजिकं आपन्नके भिक्खुम्हिपि एसेव नयोति अत्थो. इदं वुत्तं होति – सचे कोचि भिक्खु कासाये सउस्साहोव ओदातं निवासेत्वा ¶ मेथुनं पटिसेवित्वा पुन कासायानि निवासेत्वा वस्सगणनादिभेदं सब्बं विधिं आपज्जति, अयं भिक्खूहि दिन्नलिङ्गस्स अपरिच्चत्तत्ता न लिङ्गत्थेनको, लिङ्गानुरूपस्स संवासस्स सादितत्ता नापि संवासत्थेनकोति. विदेसन्ति परदेसं. इदञ्च वञ्चेतुं सक्कुणेय्यट्ठानं दस्सेतुं वुत्तं. यो पन सदेसेपि एवं करोति, सोपि संवासत्थेनकोव. ‘‘संवासमत्तस्सेवा’’ति इमिना लिङ्गं पटिक्खिपति. सचे कोचि वुड्ढपब्बजितो (महाव. अट्ठ. ११०) भिक्खुवस्सानि गणेत्वा महापेळादीसु दिय्यमानभत्तं गण्हाति, सोपि थेय्यसंवासको होति. सयं सामणेरोव सामणेरप्पटिपाटिया कूटवस्सानि गणेत्वा गण्हन्तो थेय्यसंवासको न होति. भिक्खु पन भिक्खुपटिपाटिया कूटवस्सानि गणेत्वा गण्हन्तो भण्डग्घेन कारेतब्बो.

ननु संवासो नाम एककम्मं एकुद्देसो समसिक्खताति आह ‘‘भिक्खुवस्सगणनादिको ही’’तिआदि. इमिना न केवलं एककम्मादिकोव किरियभेदो संवासोति इधाधिप्पेतो, अथ खो तदञ्ञो भिक्खुवस्सगणनादिकोपीति दस्सेति. इमस्मिं अत्थेति थेय्यसंवासकाधिकारे. सिक्खं पच्चक्खायाति सिक्खं परिच्चजित्वा. इदं वुत्तं होति – सचे कोचि भिक्खु सिक्खं पच्चक्खाय लिङ्गं अनपनेत्वा दुस्सीलकम्मं कत्वा वा अकत्वा वा ‘‘न मं कोचि जानाती’’ति पुन सब्बं पुब्बे वुत्तं वस्सगणनादिभेदं विधिं पटिपज्जति, सो थेय्यसंवासको होतीति.

सचे पन कस्सचि राजा कुद्धो होति, सो ‘‘एवं मे सोत्थि भविस्सती’’ति सयमेव लिङ्गं गहेत्वा पलायति. तं दिस्वा रञ्ञो आरोचेन्ति. राजा ‘‘सचे पब्बजितो, न तं लब्भा किञ्चि कातु’’न्ति तस्मिं कोधं पटिविनेति. सो ‘‘वूपसन्तं मे राजभय’’न्ति सङ्घमज्झं अनोसरित्वाव ¶ गिहिलिङ्गं गहेत्वा आगतो पब्बाजेतब्बो. अथापि ‘‘सासनं निस्साय मया जीवितं लद्धं, हन्द दानि अहं पब्बजामी’’ति उप्पन्नसंवेगो तेनेव लिङ्गेन आगन्त्वा आगन्तुकवत्तं न सादियति, भिक्खूहि पुट्ठो वा अपुट्ठो वा यथाभूतमत्तानं आविकत्वाव पब्बज्जं याचति, लिङ्गं अपनेत्वा पब्बाजेतब्बो. सचे पन वत्तं सादियति, पब्बजितालयं दस्सेति, सब्बं पुब्बे वुत्तं वस्सगणनादिभेदं पटिपज्जति, अयं पन न पब्बाजेतब्बो.

इध पनेकच्चो दुब्भिक्खे जीवितुं असक्कोन्तो सयमेव लिङ्गं गहेत्वा सब्बपासण्डियभत्तानि ¶ भुञ्जन्तो दुब्भिक्खे वीतिवत्ते सङ्घमज्झं अनोसरित्वाव गिहिलिङ्गं गहेत्वा आगतोति सब्बं पुरिमसदिसमेव.

अपरो महाकन्तारं नित्थरितुकामो होति, सत्थवाहो च पब्बजिते गहेत्वा गच्छति. सो ‘‘एवं मं सत्थवाहो गहेत्वा गमिस्सती’’ति सयमेव लिङ्गं गहेत्वा सत्थवाहेन सद्धिं कन्तारं नित्थरित्वा खेमन्तं पत्वा सङ्घमज्झं अनोसरित्वाव गिहिलिङ्गं गहेत्वा आगतोति सब्बं पुरिमसदिसमेव.

अपरो रोगभये (महाव. अट्ठ. ११०; वि. सङ्ग. अट्ठ. १३८) उप्पन्ने जीवितुं असक्कोन्तो सयमेव लिङ्गं गहेत्वा सब्बपासण्डियभत्तानि भुञ्जन्तो रोगभये वूपसन्ते सङ्घमज्झं अनोसरित्वाव गिहिलिङ्गं गहेत्वा आगतोति सब्बं पुरिमसदिसमेव.

अपरस्स एको वेरिको कुद्धो होति, घातेतुकामो नं विचरति. सो ‘‘एवं मे सोत्थि भविस्सती’’ति सयमेव लिङ्गं गहेत्वा पलायति. वेरिको ‘‘कुहिं सो’’ति परियेसन्तो ‘‘पब्बजित्वा पलातो’’ति सुत्वा ‘‘सचे पब्बजितो, न तं लब्भा किञ्चि कातु’’न्ति तस्मिं कोधं पटिविनेति. सो ‘‘वूपसन्तं मे वेरिभय’’न्ति सङ्घमज्झं अनोसरित्वाव गिहिलिङ्गं गहेत्वा आगतोति सब्बं पुरिमसदिसमेव.

अपरो ञातिकुलं गन्त्वा सिक्खं पच्चक्खाय गिही हुत्वा ‘‘इमानि चीवरानि इध विनस्सिस्सन्ति, सचेपि इमानि गहेत्वा विहारं गमिस्सामि, अन्तरामग्गे मं ‘चोरो’ति गहेस्सन्ति, यंनूनाहं कायपरिहारियानि कत्वा गच्छेय्य’’न्ति चीवराहरणत्थं निवासेत्वा च पारुपित्वा च विहारं गच्छति. तं दूरतोव आगच्छन्तं दिस्वा सामणेरा च दहरा च अब्भुग्गच्छन्ति, वत्तं ¶ दस्सेन्ति. सो न सादियति, यथाभूतमत्तानं आविकरोति. सचे भिक्खू ‘‘न दानि मयं तं मुञ्चिस्सामा’’ति बलक्कारेन पब्बाजेतुकामा होन्ति, कासायानि अपनेत्वा पुन पब्बाजेतब्बो. सचे पन ‘‘न इमे मम हीनायावत्तभावं जानन्ती’’ति तंयेव भिक्खुभावं पटिजानित्वा सब्बं पुब्बे वुत्तवस्सगणनादिभेदं विधिं पटिपज्जति, अयं न पब्बाजेतब्बो. तेनाह ‘‘राजदुब्भिक्खकन्तार-रोगवेरीभयेन वा’’तिआदि. भयसद्दो चेत्थ पच्चेकं योजेतब्बो ‘‘राजभयेन, दुब्भिक्खभयेना’’तिआदिना. लिङ्गं आदियतीति वेसं गण्हाति. इधाति इमस्मिं सासने. संवासं नाधिवासेति, याव सो सुद्धमानसोति भिक्खूनं वञ्चेतुकामताय अभावतो यो सुद्धमानसो याव संवासं नाधिवासेति, ताव एस ‘‘गिही मं ¶ ‘समणो’ति जानन्तू’’ति वञ्चनचित्ते सतिपि भिक्खूनं वञ्चेतुकामताय अभावतो दोसो नत्थीति थेय्यसंवासको नामाति न वुच्चतीति अत्थो.

तित्थियेसु पक्कन्तको पविट्ठोति तित्थियपक्कन्तको. सो च न केवलं तत्थ पविट्ठमत्तेनेव तित्थियपक्कन्तको होति, अथ खो तेसं लद्धिग्गहणेन. तेनाह ‘‘यो पना’’तिआदि. ‘‘उपसम्पन्नो’’ति इमिना अनुपसम्पन्नो तित्थियपक्कन्तको न होतीति दस्सेति. वुत्तञ्हेतं कुरुन्दिअट्ठकथायं ‘‘अयञ्च तित्थियपक्कन्तको नाम उपसम्पन्नभिक्खुना कथितो, तस्मा सामणेरो सलिङ्गेन तित्थायतनं गतोपि पुन पब्बज्जञ्च उपसम्पदञ्च लभती’’ति (महाव. अट्ठ. ११०). कुसचीरादिकन्ति एत्थादिसद्देन फलकक्खण्डजटादीनं गहणं. सचेपि ‘‘अयं पब्बज्जा सेट्ठा’’ति सेट्ठभावं वा उपगच्छति, न मुच्चति, तित्थियपक्कन्तकोव होति. वतानीति उक्कुटिकप्पधानादीनि वतानि. सचे पन ‘‘सोभति नु खो मे तित्थियपब्बज्जा, ननु खो सोभती’’ति वीमंसनत्थं कुसचीरादीनि निवासेति, जटं वा बन्धति, खारिकाजं वा आदियति, याव न सम्पटिच्छति तं लद्धिं, ताव रक्खति, सम्पटिच्छितमत्ते तित्थियपक्कन्तको होति. अच्छिन्नचीवरो पन कुसचीरादीनि निवासेन्तो, राजभयादीहि वा तित्थियलिङ्गं गण्हन्तो लद्धिया अभावेन नेव तित्थियपक्कन्तको होति.

अवसेसो सब्बोपीति नागसुपण्णयक्खगन्धब्बादिको. यञ्हेत्थ वत्तब्बं, तं हेट्ठा वुत्तमेव.

यथा ¶ समानजातिकस्स (सारत्थ. टी. महावग्ग ३.११२) विकोपने कम्मं गरुतरं, न तथा विजातिकस्साति आह ‘‘मनुस्सजातिका’’ति. पुत्तसम्बन्धेन मातापितुसमञ्ञा, दत्तकित्तिमादिवसेनपि पुत्तवोहारो लोके दिस्सति, सो च खो परियायतोति निप्परियायसिद्धतं दस्सेतुं ‘‘जनेत्ती’’ति वुत्तं. जनेत्तीति जनिका, माताति अत्थो. यथा मनुस्सत्तभावे ठितस्सेव कुसलधम्मानं तिक्खविसदसूरभावापत्ति, यथा तं तिण्णम्पि बोधिसत्तानं बोधित्तयनिप्फत्तियं, एवं मनुस्सत्तभावे ठितस्सेव अकुसलधम्मानम्पि तिक्खविसदसूरभावापत्तीति आह ‘‘मनुस्सभूतेनेवा’’ति. सञ्चिच्चाति ‘‘पाणो’’ति सञ्ञाय सद्धिं वधकचेतनाय चेतेत्वा. अयं मातुघातको नामाति अयं आनन्तरियेन मातुघातककम्मेन मातुघातको नाम. येन पन मनुस्सित्थिभूतापि अजनिका पोसावनिकमाता वा महामाता वा चूळमाता वा जनिकापि वा अमनुस्सित्थिभूता माता घातिता, तस्स पब्बज्जा न वारिता, न च आनन्तरिको होति. येन सयं तिरच्छानभूतेन मनुस्सित्थिभूता ¶ माता घातिता, सोपि आनन्तरिको न होति. तिरच्छानगतत्ता पनस्स पब्बज्जा पटिक्खित्ता, कम्मं पनस्स भारियं होति, आनन्तरियं आहच्चेव तिट्ठति.

येन मनुस्सभूतो जनको पिता सयम्पि मनुस्सजातिकेनेव सता सञ्चिच्च जीविता वोरोपितो, अयं आनन्तरियेन पितुघातककम्मेन पितुघातको नामाति इममत्थं अतिदिसन्तो ‘‘पितुघातकेपि एसेव नयो’’ति आह. सचेपि हि वेसिया पुत्तो होति, ‘‘अयं मे पिता’’ति न जानाति, यस्स सम्भवेन निब्बत्तो, सो च तेन घातितो, ‘‘पितुघातको’’त्वेव सङ्खं गच्छति, आनन्तरियञ्च फुसति (महाव. अट्ठ. ११४).

एळकचतुक्कं (म. नि. अट्ठ. ३.१२८; अ. नि. अट्ठ. १.१.२७५; विभ. अट्ठ. ८०९; सारत्थ. टी. महावग्ग ३.११२), सङ्गामचतुक्कं, चोरचतुक्कञ्चेत्थ कथेतब्बं. ‘‘एळकं मारेमी’’ति अभिसन्धिनापि हि एळकट्ठाने ठितं मनुस्सभूतं मातरं वा पितरं वा मारेन्तो आनन्तरियं फुसति मारणाधिप्पायेनेव आनन्तरियवत्थुनो विकोपितत्ता. एळकाभिसन्धिना, पन मातापितिअभिसन्धिना वा एळकं मारेन्तो आनन्तरियं न फुसति आनन्तरियवत्थुअभावतो. मातापितिअभिसन्धिना मातापितरो मारेन्तो फुसतेव ¶ . एसेव नयो इतरस्मिम्पि चतुक्कद्वये. सब्बत्थ हि पुरिमं अभिसन्धिचित्तं अप्पमाणं, वधकचित्तं, पन तदारम्मणजीवितिन्द्रियञ्च आनन्तरियानानन्तरियभावे पमाणं.

अरहन्तघातकोपि मनुस्सअरहन्तवसेनेव वेदितब्बोति आह ‘‘येन अन्तमसो गिहिलिङ्गे ठितोपी’’तिआदि. अमनुस्सजातिकं पन अरहन्तं, मनुस्सजातिकं वा अवसेसं अरियपुग्गलं घातेत्वा आनन्तरिको न होति, पब्बज्जापिस्स न वारिता, कम्मं पन बलवं होति. तिरच्छानो मनुस्सअरहन्तम्पि घातेत्वा आनन्तरिको न होति, कम्मं पन भारियन्ति अयमेत्थ विनिच्छयो. यथा मातापितूसु, एवं अरहन्तेपि एळकचतुक्कादीनि वेदितब्बानि.

पकतत्तं भिक्खुनिन्ति परिसुद्धसीलं उभतोसङ्घे उपसम्पन्नं भिक्खुनिं. यो (महाव. अट्ठ. ११५) पन कायसंसग्गेन सीलविनासं पापेति, तस्स पब्बज्जा च उपसम्पदा च न वारिता. बलक्कारेन ओदातवत्थवसनं कत्वा अनिच्छमानंयेव दूसेन्तोपि भिक्खुनिदूसकोयेव, बलक्कारेन पन ओदातवत्थवसनं कत्वा इच्छमानं दूसेन्तो भिक्खुनिदूसको न होति. कस्मा? यस्मा गिहिभावे सम्पटिच्छितमत्तेयेव सा अभिक्खुनी होति ¶ . सकिं सीलविपन्नं पन पच्छा दूसेन्तो सिक्खमानसामणेरीसु च विप्पटिपज्जन्तो नेव भिक्खुनिदूसको होति, पब्बज्जं, उपसम्पदञ्च लभतीति.

धम्मतो उग्गतं अपगतं उद्धम्मं. उब्बिनयन्ति एत्थापि एसेव नयो. चतुन्नं कम्मानन्ति अपलोकनञत्तिञत्तिदुतियञत्तिचतुत्थसङ्खातानं चतुन्नं कम्मानं. इमेसञ्हि अञ्ञतरं सङ्घकम्मं एकसीमायं विसुं विसुं करोन्तेन सङ्घो भिन्नो नाम होति. तेन वुत्तं ‘‘चतुन्नं कम्मानं अञ्ञतरवसेन सङ्घं भिन्दती’’ति.

‘‘दुट्ठचित्तेना’’ति वुत्तमेवत्थं विभावेतुं ‘‘वधकचित्तेना’’ति वुत्तं. वधकचेतनाय हि दूसितं चित्तं इध दुट्ठचित्तं नाम. लोहितं उप्पादेतीति अन्तोसरीरेयेव लोहितं उप्पादेति, सञ्चितं करोतीति अधिप्पायो. न हि तथागतस्स अभेज्जकायताय परूपक्कमेन धम्मं भिन्दित्वा लोहितं पग्घरति, सरीरस्स पन अन्तोयेव एकस्मिं ठाने लोहितं समोसरति, आघातेन पकुप्पमानं सञ्चितं होति, तं सन्धायेतं ¶ वुत्तं. यो पन रोगवूपसमनत्थं जीवको विय सत्थेन फालेत्वा पूतिमंसञ्च लोहितञ्च नीहरित्वा फासुकं करोति, अयं लोहितुप्पादको न होति, बहुं पन सो पुञ्ञं पसवति (महाव. अट्ठ. ११५).

दुविधम्पि ब्यञ्जनन्ति यथावुत्तकम्मद्वयतो समुट्ठितं इत्थिनिमित्तं, पुरिसनिमित्तञ्चाति दुविधम्पि ब्यञ्जनं. इमिना च विग्गहेन ‘‘उभतोब्यञ्जनको’’ति असमानाधिकरणविसयो बाहिरत्थसमासोयं, पुरिमपदे च विभत्तिअलोपोति दस्सेति. सो दुविधो होति इत्थिउभतोब्यञ्जनको, पुरिसउभतोब्यञ्जनको चाति. तत्थ इत्थिउभतोब्यञ्जनकस्स इत्थिनिमित्तं पाकटं होति, पुरिसनिमित्तं पटिच्छन्नं. पुरिसउभतोब्यञ्जनकस्स पुरिसनिमित्तं पाकटं, इत्थिनिमित्तं पटिच्छन्नं. इत्थिउभतोब्यञ्जनकस्स इत्थीसु पुरिसत्तं करोन्तस्स इत्थिनिमित्तं पटिच्छन्नं होति, पुरिसनिमित्तं पाकटं होति. पुरिसउभतोब्यञ्जनकस्स पुरिसानं इत्थिभावं उपगच्छन्तस्स पुरिसनिमित्तं पटिच्छन्नं होति, इत्थिनिमित्तं पाकटं होति. इत्थिउभतोब्यञ्जनको सयञ्च गब्भं गण्हाति, परञ्च गण्हापेति. पुरिसउभतोब्यञ्जनको पन सयं न गण्हाति, परं गण्हापेतीति इदमेतेसं नानाकरणं.

अपरामसनानीति अग्गहणानि अवचनानि. ‘‘अयं इत्थन्नामो’’ति उपसम्पदापेक्खस्स अकित्तनन्ति यस्स उपसम्पदा करीयति, तस्स अकित्तनं, ‘‘सुणातु मे, भन्ते, सङ्घो, अयं धम्मरक्खितो आयस्मतो बुद्धरक्खितस्स उपसम्पदापेक्खो’’ति वत्तब्बे ‘‘अयं धम्मरक्खितो’’ति (परि. अट्ठ. ४८४) ¶ अवचनन्ति वुत्तं होति. ‘‘इत्थन्नामस्स उपसम्पदापेक्खो’’ति उपज्झायस्स अकित्तनन्ति ‘‘सुणातु मे, भन्ते, सङ्घो, अयं धम्मरक्खितो आयस्मतो बुद्धरक्खितस्स उपसम्पदापेक्खो’’ति वत्तब्बे ‘‘सुणातु मे, भन्ते, सङ्घो, अयं धम्मरक्खितो उपसम्पदापेक्खो’’ति वत्वा ‘‘आयस्मतो बुद्धरक्खितस्सा’’ति अवचनं. सब्बेन सब्बं ञत्तिया अनुच्चारणन्ति ञत्तिं अट्ठपेत्वा चतुक्खत्तुं कम्मवाचाय एव अनुस्सावनकम्मस्स करणं. सम्पन्नन्ति उपेतं.

हापनं परिच्चजनं. योपि एकं ञत्तिं ठपेत्वा सकिंयेव वा द्विक्खत्तुं वा अनुस्सावनं करोति, अयम्पि सावनं हापेतियेव. दुरुच्चारणं नाम अञ्ञस्मिं ¶ अक्खरे वत्तब्बे अञ्ञस्स वचनं. तस्मा कम्मवाचं करोन्तेन भिक्खुना य्वायं –

‘‘सिथिलं धनितञ्च दीघरस्सं;

गरुकं लहुकञ्चेव निग्गहीतं;

सम्बन्धववत्थितं विमुत्तं;

दसधा ब्यञ्जनबुद्धिया पभेदो’’ति. (दी. नि. अट्ठ. १.१९०; म. नि. अट्ठ. १.२९१; अ. नि. अट्ठ. २.३.६४, परि. अट्ठ. ४८५; वि. सङ्ग. अट्ठ. २५२) –

वुत्तो, अयं सुट्ठु उपलक्खेतब्बो. एत्थ हि सिथिलं नाम पञ्चसु वग्गेसु पठमततियं. धनितं नाम तेस्वेव दुतियचतुत्थं. दीघन्ति दीघेन कालेन वत्तब्बं आ-कारादि. रस्सन्ति ततो उपड्ढकालेन वत्तब्बं अ-कारादि. गरुकन्ति दीघमेव, यं वा ‘‘आयस्मतो बुद्धरक्खितत्थेरस्स यस्स नक्खमती’’ति एवं संयोगपरं कत्वा वुच्चति. लहुकन्ति रस्समेव, यं वा ‘‘आयस्मतो बुद्धरक्खितत्थेरस्स यस्स न खमती’’ति एवं असंयोगपरं कत्वा वुच्चति. निग्गहीतन्ति यं करणानि निग्गहेत्वा अविस्सज्जेत्वा अविवटेन मुखेन सानुनासिकं कत्वा वत्तब्बं. सम्बन्धन्ति यं परपदेन सम्बन्धित्वा ‘‘तुण्हिस्सा’’ति वा ‘‘तुण्हस्सा’’ति वा वुच्चति. ववत्थितन्ति यं परपदेन सम्बन्धं अकत्वा विच्छिन्दित्वा ‘‘तुण्ही अस्सा’’ति वा ‘‘तुण्ह अस्सा’’ति वा वुच्चति. विमुत्तन्ति यं करणानि अनिग्गहेत्वा विस्सज्जेत्वा विवटेन मुखेन अनुनासिकं अकत्वा वुच्चति.

तत्थ ‘‘सुणातु मे’’ति वत्तब्बे त-कारस्स थ-कारं कत्वा ‘‘सुणाथु मे’’ति वचनं सिथिलस्स ¶ धनितकरणं नाम, तथा ‘‘पत्तकल्लं एसा ञत्ती’’ति वत्तब्बे ‘‘पत्थकल्लं एसा ञत्ती’’तिआदिवचनञ्च. ‘‘भन्ते, सङ्घो’’ति वत्तब्बे भ-कार घ-कारानं ब-कार ग-कारे कत्वा ‘‘बन्ते संगो’’ति वचनं धनितस्स सिथिलकरणं नाम. ‘‘सुणातु मे’’ति विवटेन मुखेन वत्तब्बे ‘‘सुणंतु मे’’ति वा ‘‘एसा ञत्ती’’ति वत्तब्बे ‘‘एसं ञत्ती’’ति वा अविवटेन मुखेन अनुनासिकं कत्वा वचनं विमुत्तस्स निग्गहितवचनं नाम. ‘‘पत्तकल्ल’’न्ति अविवटेन मुखेन अनुनासिकं कत्वा वत्तब्बे ‘‘पत्तकल्ला’’ति विवटेन मुखेन अनुनासिकं अकत्वा वचनं निग्गहितस्स विमुत्तवचनं नाम. इति सिथिले कत्तब्बे धनितं, धनिते कत्तब्बे सिथिलं, विमुत्ते कत्तब्बे निग्गहितं, निग्गहिते कत्तब्बे विमुत्तन्ति इमानि चत्तारि ब्यञ्जनानि ¶ अन्तोकम्मवाचाय कम्मं दूसेन्ति. एवं वदन्तो हि अञ्ञस्मिं अक्खरे वत्तब्बे अञ्ञं वदति, दुरुत्तं करोतीति वुच्चति.

इतरेसु पन दीघरस्सादीसु छसु ब्यञ्जनेसु दीघट्ठाने दीघमेव. रस्सट्ठाने च रस्समेवाति एवं यथाठाने तं तदेव अक्खरं भासन्तेन अनुक्कमागतं पवेणिं अविनासेन्तेन कम्मवाचा कातब्बा. सचे पन एवं अकत्वा दीघे वत्तब्बे रस्सं, रस्से वा वत्तब्बे दीघं वदति, तथा गरुके वत्तब्बे लहुकं, लहुके वा वत्तब्बे गरुकं वदति, सम्बन्धे वा पन वत्तब्बे ववत्थितं, ववत्थिते वा वत्तब्बे सम्बन्धं वदति, एवं वुत्तेपि कम्मवाचा न कुप्पति. इमानि हि छ ब्यञ्जनानि कम्मं न कोपेन्ति.

यं पन सुत्तन्तिकत्थेरा ‘‘द-कारो त-कारमापज्जति, त-कारो द-कारमापज्जति, च-कारो ज-कारमापज्जति, ज-कारो च-कारमापज्जति, य-कारो क-कारमापज्जति, क-कारो य-कारमापज्जति, तस्मा द-कारादीसु वत्तब्बेसु त-कारादीनं वचनं न विरुज्झती’’ति वदन्ति, तं कम्मवाचं पत्वा न वट्टति. तस्मा विनयधरेन नेव द-कारो त-कारो कातब्बो…पे… न क-कारो य-कारो. यथापाळिया निरुत्तिं सोधेत्वा दसविधाय ब्यञ्जननिरुत्तिया वुत्तदोसे परिहरन्तेन कम्मवाचा कातब्बा. इतरथा हि सावनं हापेति नाम. ञत्तिं अट्ठपेत्वा पठमं अनुस्सावनकरणन्ति सम्बन्धो.

यावतिका भिक्खू कम्मप्पत्ताति यत्तका भिक्खू तस्स उपसम्पदाकम्मस्स पत्ता युत्ता अनुरूपा. ते च खो सब्बन्तिमेन परियायेन हत्थपासं अविजहित्वा एकसीमट्ठा पञ्च पकतत्ता भिक्खू. न हि तेहि विना तं कम्मं करीयति, न तेसं छन्दो एति. अवसेसा पन सचेपि सहस्समत्ता होन्ति, सचे एकसीमट्ठा एकस्मिं ठाने समानसंवासका, सब्बे छन्दारहाव ¶ होन्ति, छन्दं दत्वा आगच्छन्तु वा, मा वा, कम्मं न कुप्पति. पटिक्कोसनन्ति निवारणं. तिट्ठति एत्थ फलं तदायत्तवुत्तितायाति ठानं, कारणं. इध पन उपसम्पदाकम्मकरणस्स कारणत्ता उपसम्पदाकम्मवाचासङ्खातं भगवतो वचनं वुच्चति. तेनाह ‘‘कारणारहत्ता पन सत्थु सासनारहत्ता’’ति. यथा च ‘‘तं कत्तब्ब’’न्ति भगवता अनुसिट्ठं, तथाकरणं उपसम्पदाकम्मस्स कारणं होतीति ¶ ठानारहं नाम. केचि (सारत्थ. टी. २.४५) पन ‘‘ठानारहेनाति एत्थ ‘न, भिक्खवे, हत्थच्छिन्नो पब्बाजेतब्बो’तिआदि (महाव. ११९) सत्थुसासनं ठान’’न्ति वदन्ति. इधाति इमस्मिं पाराजिके. यथा च इध, एवं सब्बत्थापि लोकवज्जसिक्खापदेसु अयमेव अधिप्पेतोति वेदितब्बं. तेनाह ‘‘पण्णत्तिवज्जेसु पना’’तिआदि. अञ्ञेपीति एहिभिक्खूपसम्पन्नादयोपि. कथमेतं विञ्ञायति पण्णत्तिवज्जेसु सिक्खापदेसु अञ्ञेपि सङ्गहं गच्छन्तीति? अत्थतो आपन्नत्ता. तथा हि ‘‘द्वे पुग्गला अभब्बा आपत्तिं आपज्जितुं बुद्धा च पच्चेकबुद्धा च, द्वे पुग्गला भब्बा आपत्तिं आपज्जितुं भिक्खू च भिक्खुनियो चा’’ति (परि. ३२२) सामञ्ञतो वुत्तत्ता. एहिभिक्खूपसम्पन्नादयोपि असञ्चिच्च अस्सतिया अचित्तकं सहसेय्यापत्तिआदिभेदं पण्णत्तिवज्जं आपज्जन्तीति (सारत्थ. टी. २.४५) अत्थतो आपन्नं.

इदानि ‘‘भिक्खून’’न्ति इमं पदं विसेसत्थाभावतो विसुं अवण्णेत्वाव यं सिक्खञ्च साजीवञ्च समापन्नत्ता भिक्खूनं सिक्खासाजीवसमापन्नो होति, तं दस्सेन्तो ‘‘भिक्खूनं सिक्खासाजीवसमापन्नो’’तिआदिमाह. सिक्खितब्बाति सिक्खा, पातिमोक्खसंवरसीलं, सह जीवन्ति एत्थाति साजीवं, मातिकादिभेदा पण्णत्ति, सिक्खा च साजीवञ्च सिक्खासाजीवं, तदुभयं समापन्नो उपगतोति सिक्खासाजीवसमापन्नो. तेनाह ‘‘या भिक्खून’’न्तिआदि. एत्थ च ‘‘सिक्खा’’ति साजीवसहचरियतो अधिसीलसिक्खाव अधिप्पेताति आह ‘‘अधिसीलसङ्खाता’’ति. अधिकं उत्तमं सीलन्ति अधिसीलं, ‘‘अधिसील’’न्ति सङ्खाता अधिसीलसङ्खाता.

कतमं पनेत्थ सीलं, कतमं अधिसीलन्ति? वुच्चते – पञ्चङ्गदसङ्गसीलं ताव सीलमेव, न तं अधिसीलं. पातिमोक्खसंवरसीलं पन अधिसील’’न्ति वुच्चति. तञ्हि सूरियो विय पज्जोतानं, सिनेरु विय च पब्बतानं सब्बलोकियसीलानं अधिकञ्चेव उत्तमञ्च, बुद्धुप्पादेयेव च पवत्तति, न विना बुद्धुप्पादा. न हि तं पञ्ञत्तिं उद्धरित्वा अञ्ञो सत्तो पञ्ञापेतुं सक्कोति, बुद्धायेव पनस्स सब्बसो कायवचीद्वारज्झाचारसोतं छिन्दित्वा तस्स तस्स वीतिक्कमस्स अनुच्छविकं तं तं सीलसंवरं पञ्ञापेन्ति. पातिमोक्खसंवरसीलतोपि ¶ च मग्गफलसम्पयुत्तमेव सीलं अधिसीलं, तं पन इध न अधिप्पेतं. न हि तं समापन्नो मेथुनधम्मं पटिसेवति.

एतेति ¶ नानादेसजातिगोत्तादिभेदभिन्ना भिक्खू. सह जीवन्तीति एकुद्देसादिवसेन सह पवत्तन्ति. तेनाह ‘‘एकजीविका सभागवुत्तिनो’’ति. सिक्खापदसङ्खातन्ति पण्णत्तिसङ्खातं. सापि हि विरतिआदीनं दीपनतो ‘‘सिक्खापद’’न्ति वुच्चति. वुत्तम्पि चेतं ‘‘सिक्खापदन्ति यो तत्थ नामकायो पदकायो निरुत्तिकायो ब्यञ्जनकायो’’ति. तत्थाति तेसु. सिक्खं परिपूरेन्तोति अकत्तब्बपरिवज्जनकत्तब्बकरणवसेन वारित्तचारित्तसङ्खातं दुविधं सीलं परिपूरेन्तोति अत्थो, वारित्तसीलवसेन विरतिसम्पयुत्तचेतनं, चारित्तसीलवसेन विरतिविप्पयुत्तचेतनञ्च अत्तनि पवत्तेन्तोति वुत्तं होति. साजीवञ्च अवीतिक्कमन्तोति सिक्खापदञ्च अमद्दन्तो, सीलसंवरणं, साजीवानतिक्कमनञ्चाति इदमेव द्वयं इध समापज्जनं नामाति अधिप्पायो. तत्थ साजीवानतिक्कमो सिक्खापारिपूरिया पच्चयो. तस्सानतिक्कमनतो हि याव मग्गा सिक्खा परिपूरति. अपिचेत्थ ‘‘सिक्खं परिपूरेन्तो’’ति इमिना विरतिचेतनासङ्खातस्स सीलसंवरस्स विसेसतो सन्ताने पवत्तनकालोव गहितो, ‘‘अवीतिक्कमन्तो’’ति इमिना पन अप्पवत्तनकालोपि. सिक्खञ्हि परिपूरणवसेन अत्तनि पवत्तेन्तोपि निद्दादिवसेन अप्पवत्तेन्तोपि वीतिक्कमाभावा सिक्खनवसेन समापन्नोति वुच्चति.

यस्मा सिक्खापच्चक्खानस्स एकच्चं दुब्बल्याविकम्मं अत्थो होति, तस्मा तं सन्धाय ‘‘सिक्खं अपच्चक्खाया’’ति पदस्स अत्थं विवरन्तो ‘‘दुब्बल्यं अनाविकत्वा’’ति आहाति दस्सेतुं ‘‘सिक्खं अपच्चक्खाय दुब्बल्यं अनाविकत्वा’’तिआदिमाह. तत्थ सिया (पारा. अट्ठ. १.४५ सिक्खापच्चक्खानविभङ्गवण्णना), यस्मा न सब्बं दुब्बल्याविकम्मं सिक्खापच्चक्खानं, तस्मा ‘‘दुब्बल्यं अनाविकत्वा’’ति पठमं वत्वा तस्स अत्थनियमनत्थं ‘‘सिक्खं अपच्चक्खाया’’ति वत्तब्बन्ति? तं न, कस्मा? अत्थानुक्कमाभावतो. ‘‘सिक्खासाजीवसमापन्नो’’ति हि वुत्तत्ता यं सिक्खं समापन्नो, तं अपच्चक्खाय, यञ्च साजीवं समापन्नो, तत्थ दुब्बल्यं अनाविकत्वाति वुच्चमाने अनुक्कमेनेव अत्थो वुत्तो होति, न अञ्ञथा. तस्मा इदमेव पठमं वुत्तन्ति.

इदानि तदुभयमेव पाकटं कत्वा दस्सेतुं ‘‘तत्था’’तिआदिमाह. तदभावेनाति तेसं चित्तादीनं अभावेन. चवितुकामताचित्तेनाति अपगन्तुकामताचित्तेन ¶ . दवाति सहसा. यो हि ¶ अञ्ञं भणितुकामो सहसा ‘‘बुद्धं पच्चक्खामी’’ति भणति, अयं दवा वदति नाम. रवाति विरज्झित्वा. यो हि अञ्ञं भणितुकामो विरुज्झित्वा ‘‘बुद्धं पच्चक्खामी’’ति भणति, अयं रवा भणति नाम. पुरिमेन को विसेसोति चे? पुरिमं पण्डितस्सापि सहसावसेन अञ्ञभणनं, इदं पन मन्दत्ता मोमूहत्ता पक्खलन्तस्स ‘‘अञ्ञं भणिस्सामी’’ति अञ्ञभणनं. ‘‘अक्खरसमयानभिञ्ञातताय वा करणसम्पत्तिया अभावतो वा कथेतब्बं कथेतुमसक्कोन्तो हुत्वा अञ्ञं कथेन्तो रवा भणति नामा’’ति (सारत्थ. टी. २.५४) एके.

वज्जावज्जं उपनिज्झायतीति उपज्झायो, तं उपज्झायं. ‘‘एवं सज्झायितब्बं, एवं अभिक्कमितब्ब’’न्तिआदिना आचारसिक्खापनको आचरियो. अन्ते समीपे वसति सीलेनाति अन्तेवासी, विभत्तिअलोपेन यथा ‘‘वनेकसेरुका’’ति. समानो उपज्झायो अस्साति समानुपज्झायको. एवं समानाचरियको. सब्रह्मचारिन्ति भिक्खुं. सो हि ‘‘एककम्मं, एकुद्देसो, समसिक्खता’’ति इमं ब्रह्मं समानं चरति, तस्मा ‘‘सब्रह्मचारी’’ति वुच्चति. एवं वुत्तानन्ति एवं पदभाजनीये वुत्तानं. यथा हि लोके सस्सानं विरुहनट्ठानं ‘‘खेत्त’’न्ति वुच्चति, एवमिमानिपि बुद्धादीनि पदानि सिक्खापच्चक्खानस्स विरुहनट्ठानत्था ‘‘खेत्त’’न्ति वुच्चन्तीति आह ‘‘इमेसं द्वावीसतिया खेत्तपदान’’न्ति. यस्मा पनेतेसं वेवचनेहिपि सिक्खापच्चक्खानं होति, तस्मा ‘‘सवेवचनस्सा’’ति वुत्तं. विविधं एकस्मिंयेव अत्थे वचनं विवचनं, विवचनमेव वेवचनं, परियायनामं, सह वेवचनेहीति सवेवचनं, तस्स सवेवचनस्स. एत्थ च वण्णपट्ठाने (सारत्थ. टी. २.५२; वि. वि. टी. १.५३; वजिर. टी. ५३) आगतं नामसहस्सं, उपालिगाथासु (म. नि. २.७६) नामसतं, अञ्ञानि च गुणतो लब्भमानानि नामानि ‘‘बुद्धवेवचनानी’’ति वेदितब्बानि. सब्बानिपि धम्मस्स नामानि ‘‘धम्मवेवचनानी’’ति वेदितब्बानि. एस नयो सब्बत्थ.

तेसु यं किञ्चि वत्तुकामस्स यं किञ्चि वदतो सिक्खापच्चक्खानं होतीति तेसु द्वावीसतिया खेत्तपदेसु यं किञ्चि एकं पदं वत्तुकामस्स ततो अञ्ञं यं किञ्चि पदम्पि वचीभेदं कत्वा वदतो खेत्तपदन्तोगधत्ता सिक्खापच्चक्खानं ¶ होतीति अत्थो. इदं वुत्तं होति – सचे पनायं ‘‘बुद्धं पच्चक्खामी’’ति वत्तुकामो पदपच्चाभट्ठं कत्वा ‘‘पच्चक्खामि बुद्ध’’न्ति वा वदेय्य, मिलक्खभासादीसु वा अञ्ञतरभासाय तमत्थं वदेय्य, ‘‘बुद्धं पच्चक्खामी’’ति वत्तुकामो उप्पटिपाटिया ‘‘धम्मं पच्चक्खामी’’ति वा ‘‘सब्रह्मचारिं पच्चक्खामी’’ति वा वदेय्य, सेय्यथापि उत्तरिमनुस्सधम्मविभङ्गे ‘‘पठमं झानं समापज्जामी’’ति ¶ वत्तुकामो ‘‘दुतियं झान’’न्ति वदति. सचे ‘‘यस्स वदति, सो अयं भिक्खुभावं चजितुकामो एतमत्थं वदती’’ति एत्तकमत्तम्पि जानाति, विरद्धं नाम नत्थि, खेत्तमेव ओतिण्णं, पच्चक्खाताव होति सिक्खा. सक्कत्ता वा ब्रह्मत्ता वा चुतसत्तो विय चुतोव होति सासनाति.

अलन्ति (पारा. अट्ठ. १.५२) होतु, परियत्तन्ति अत्थो. किं नु मेति किं मय्हं किच्चं, किं करणीयं, किं साधेतब्बन्ति अत्थो. न ममत्थोति नत्थि मम अत्थो. सुमुत्ताहन्ति सुट्ठु मुत्तो अहं. पुरिमेहि चुद्दसहि पदेहीति बुद्धादीहि सब्रह्मचारिपरियन्तेहि पुरिमेहि चुद्दसहि पदेहि. यन्नूनाहं पच्चक्खेय्यन्ति एत्थ ‘‘यन्नूना’’ति परिवितक्कदस्सने निपातो. इदं वुत्तं होति – ‘‘सचाहं बुद्धं पच्चक्खेय्यं, साधु वत मे सिया’’ति. आदिसद्देन ‘‘पच्चक्खि’’न्ति वा ‘‘पच्चक्खिस्सामी’’ति वा ‘‘भविस्सामी’’ति वा ‘‘होमी’’ति वा ‘‘जातोम्ही’’ति वा ‘‘अम्ही’’ति वा एवंभूतानं गहणं. सचे पन ‘‘अज्ज पट्ठाय ‘गिही’ति मं धारेही’’ति वा ‘‘जानाही’’ति वा ‘‘सञ्जानाही’’ति वा ‘‘मनसि करोही’’ति वा वदति, अरियकेन वा वदति, मिलक्खकेन वा. एवमेतस्मिं अत्थे वुत्ते यस्स वदति, सचे सो जानाति, पच्चक्खाता होति सिक्खा. एस नयो सेसेसुपि ‘‘उपासको’’तिआदीसु सत्तसु पदेसु. एत्थ च अरियकं नाम मागधवोहारो. मिलक्खकं नाम अनरियको अन्धदमिळादि.

अक्खरलिखनन्ति ‘‘बुद्धं पच्चक्खामी’’तिआदिना अञ्ञेसं दस्सनत्थं अक्खरलिखनं. अधिप्पायविञ्ञापको अङ्गुलिसङ्कोचनादिको हत्थविकारो हत्थमुद्दा, हत्थसद्दो चेत्थ तदेकदेसेसु अङ्गुलीसु दट्ठब्बो ‘‘न भुञ्जमानो सब्बं हत्थं मुखे पक्खिपिस्सामी’’तिआदीसु (पाचि. ६१८) विय. तस्मा अधिप्पायविञ्ञापकस्स अङ्गुलिसङ्कोचनादिनो हत्थविकारस्स दस्सनं हत्थमुद्दादिदस्सनन्ति ¶ (सारत्थ. टी. २.५१) एवमेत्थ अत्थो दट्ठब्बो. आदिसद्देन सीसकम्पनदस्सनादिं सङ्गण्हाति.

उम्मत्तकखित्तचित्तवेदनाट्टानन्ति एत्थ उम्मत्तकोति पित्तुम्मत्तको. खित्तचित्तोति यक्खेहि कतचित्तविक्खेपो, यक्खुम्मत्तकोति वुत्तं होति. उभिन्नं पन विसेसो अनापत्तिवारे आविभविस्सति. वेदनाट्टोति बलवतिया दुक्खवेदनाय फुट्ठो मुच्छापरेतो, तेन विप्पलपन्तेन पच्चक्खातापि अपच्चक्खाताव होति. मनुस्सजातिको होतीति सभागो वा विसभागो वा गहट्ठो वा पब्बजितो वा विञ्ञू योकोचि मनुस्सो होति. उम्मत्तकादीनन्ति एत्थादिसद्देन खित्तचित्तवेदनाट्टदेवतातिरच्छानगतानं गहणं. तत्र उम्मत्तकखित्तचित्तवेदनाट्टतिरच्छानगतानं सन्तिके पच्चक्खातापि अजाननभावेन अपच्चक्खाताव होति. देवताय पन सन्तिके अतिखिप्पं जाननभावेन. देवता नाम महापञ्ञा तिहेतुकप्पटिसन्धिका अतिखिप्पं जानन्ति, चित्तञ्च नामेतं लहुपरिवत्तं, तस्मा ‘‘चित्तलहुकस्स पुग्गलस्स चित्तवसेनेव मा अतिखिप्पं विनासो अहोसी’’ति देवताय सन्तिके ¶ सिक्खापच्चक्खानं पटिक्खिपि. तेन वुत्तं ‘‘न च उम्मत्तकादीनं अञ्ञतरो’’ति. दूतेन वाति ‘‘मम सिक्खापच्चक्खानभावं कथेही’’ति मुखसासनवसेन दूतेन वा. पण्णेन वाति पण्णे लिखित्वा पहिणवसेन पण्णेन वा.

सचे ते सिक्खापच्चक्खानभावं जानन्तीति सम्बन्धो. आवज्जनसमयेति अत्थाभोगसमये. इमिना तं खणंयेव पन अपुब्बं अचरिमं दुज्जानन्ति दस्सेति. वचनानन्तरमेवाति वचनस्स अनन्तरमेव, आवज्जनसमयेवाति अत्थो. एव-सद्देन पन चिरेन जाननं पटिक्खिपति. उक्कण्ठितोति अनभिरतिया इमस्मिं सासने किच्छजीविकं पत्तो. अथ वा ‘‘अज्ज यामि, स्वे यामि, इतो यामि, एत्थ यामी’’ति उद्धं कण्ठं कत्वा विहरमानो विक्खित्तो, अनेकग्गोति वुत्तं होति. इदञ्च ‘‘अनभिरतो सामञ्ञा चवितुकामो’’तिआदीनं (पारा. ४५) उपलक्खणं. येन केनचि…पे… जानन्तीति सचे ते‘‘उक्कण्ठितो’’ति वा ‘‘गिहिभावं पत्थेती’’ति वा ‘‘अनभिरतो’’ति वा ‘‘सामञ्ञा चवितुकामो’’ति वा येन केनचि आकारेन सिक्खापच्चक्खानभावं जानन्ति. इदञ्हि सिक्खापच्चक्खानञ्च उपरि ¶ अभूतारोचनदुट्ठुल्लवाचाअत्तकामदुट्ठदोसभूतारोचनसिक्खापदानि च एकपरिच्छेदानि, आवज्जनसमये ञाते एव सीसं एन्ति. ‘‘किं अयं भणती’’ति कङ्खता चिरेन ञाते सीसं न एन्ति. तेनाह ‘‘अथ अपरभागे’’तिआदि. अथ द्विन्नं ठितट्ठाने द्विन्नम्पि नियमेत्वा ‘‘एतेसं आरोचेमी’’ति वदति, तेसु एकस्मिं जानन्तेपि द्वीसु जानन्तेसुपि पच्चक्खाताव होति सिक्खा. एवं सम्बहुलेसुपि वेदितब्बं. वुत्तनयेनाति ‘‘तस्स वचनानन्तर’’न्तिआदिना वुत्तेन नयेन. यो कोचि मनुस्सजातिकोति अन्तमसो नवकम्मिकं उपादाय यो कोचि मनुस्सो. वुत्तञ्हेतं समन्तपासादिकायं –

‘‘सचे पन अनभिरतिया पीळितो सभागे भिक्खू परिसङ्कमानो ‘यो कोचि जानातू’ति उच्चासद्दं करोन्तो ‘बुद्धं पच्चक्खामी’ति वदति, तञ्च अविदूरे ठितो नवकम्मिको वा अञ्ञो वा समयञ्ञू पुरिसो सुत्वा ‘उक्कण्ठितो अयं समणो गिहिभावं पत्थेति, सासनतो चुतो’ति जानाति, पच्चक्खाताव होति सिक्खा’’ति (पारा. अट्ठ. १.५१).

सचे ¶ वचनत्थं ञत्वापि ‘‘अयं उक्कण्ठितो’’ति वा ‘‘गिहिभावं पत्थेती’’ति वा न जानाति, अपच्चक्खाताव होति सिक्खा. सचे पन वचनत्थं अजानित्वापि ‘‘उक्कण्ठितो’’ति वा ‘‘गिहिभावं पत्थेती’’ति वा जानाति, पच्चक्खाताव होति सिक्खा. दवायपीति कीळाधिप्पायेनपि. चित्तादीनं वा वसेनाति चित्तादीनं वा छळङ्गानं वसेन. होति चेत्थ –

‘‘चित्तं खेत्तञ्च कालो च, पयोगो पुग्गलो तथा;

विजाननन्ति सिक्खाय, पच्चक्खानं छळङ्गिक’’न्ति.

सब्बसो वा पन अपच्चक्खानेनाति ‘‘बुद्धं पच्चक्खामी’’तिआदीसु येन येन परियायेन सिक्खापच्चक्खानं होति, ततो एकस्सपि पच्चक्खानस्स अभावेन. इमिना पन ‘‘इदं पदं सावेस्सामि, सिक्खं पच्चक्खामी’’ति एवं पवत्तचित्तुप्पादस्स अभावं दस्सेति. यस्स हि एवरूपो चित्तुप्पादो नत्थि, सो सब्बसो न पच्चक्खाति नामाति. सिक्खापच्चक्खानस्साति ‘‘बुद्धं पच्चक्खामी’’तिआदिसिक्खापच्चक्खानस्स. अत्थभूतं एकच्चं दुब्बल्यन्ति ‘‘बुद्धं पच्चक्खामी’’ति वदति विञ्ञापेति, एवम्पि, भिक्खवे, दुब्बल्याविकम्मञ्चेव होति, सिक्खा ¶ च पच्चक्खाता’’तिआदिना (पारा. ५३) वुत्तेहि येहि वचनेहि सिक्खापच्चक्खानञ्चेव होति दुब्बल्याविकम्मञ्च, तं ‘‘बुद्धं पच्चक्खामी’’तिआदिकं अत्थभूतं दुब्बल्यं अनाविकत्वा. ‘‘बुद्धं पच्चक्खामी’’तिआदिम्हि पन वुत्ते सिक्खापरिपूरणे दुब्बलभावस्सापि गम्यमानत्ता सिक्खापच्चक्खानस्स इदं दुब्बल्याविकम्मं अत्थोति दट्ठब्बं. एत्थ च ‘‘अत्थभूत’’न्ति इमिना ‘‘यन्नूनाहं बुद्धं पच्चक्खेय्य’’न्तिआदिकं दुब्बल्याविकम्मं पटिक्खिपति. येन हि सिक्खापच्चक्खानञ्चेव होति दुब्बल्याविकम्मञ्च, तदेव सिक्खापच्चक्खानस्स अत्थभूतं. येन पन दुब्बल्याविकम्ममेव होति, न सिक्खापच्चक्खानं, न तं तस्स अत्थभूतन्ति.

रागपरियुट्ठानेन सदिसभावापत्तिया मिथुनानं अयन्ति ‘‘मेथुनो’’ति धम्मोव वुच्चतीति आह ‘‘रागपरियुट्ठानेना’’तिआदि. तत्थ रागपरियुट्ठानेनाति रागस्स परियुट्ठानेन, मेथुनरागस्स पवत्तिया परियोनद्धचित्ततायाति अत्थो. धम्मोति अज्झाचारो. ‘‘पलम्बते विलम्बते’’तिआदीसु विय उपसग्गस्स कोचि अत्थविसेसो नत्थीति आह ‘‘सेवेय्या’’ति. अज्झापज्जेय्याति अभिभुय्य पज्जेय्य. सब्बन्तिमेनाति परनिम्मितवसवत्ति…पे… चातुमहाराजिकमनुस्सित्थिनागगरुळमाणविकादीनं सब्बासं अन्तिमेन. तिरच्छानगतायाति तिरच्छानेसु ¶ उप्पन्नाय. तेनाह ‘‘पटिसन्धिवसेना’’ति. पाराजिकाय वत्थुभूता एव चेत्थ तिरच्छानगतित्थी ‘‘तिरच्छानगता’’ति गहेतब्बा, न सब्बा. तत्रायं परिच्छेदो –

‘‘अपदानं अहिमच्छा, द्विपदानञ्च कुक्कुटी;

चतुप्पदानं मज्जारी, वत्थु पाराजिकस्सिमा’’ति. (पारा. अट्ठ. १.५५)

तत्थ अहिग्गहणेन सब्बापि अजगरगोनसादिभेदा दीघजाति सङ्गहिता. तस्मा दीघजातीसु यत्थ तिण्णं मग्गानं अञ्ञतरस्मिं सक्का तिलफलमत्तम्पि पवेसेतुं, सा पाराजिकवत्थु, अवसेसा दुक्कटवत्थूति वेदितब्बा. मच्छग्गहणेन सब्बापि मच्छकच्छपमण्डूकादिभेदा ओदकजाति सङ्गहिता. तत्रापि दीघजातियं वुत्तनयेनेव पाराजिकवत्थु च दुक्कटवत्थु च वेदितब्बं. अयं पन विसेसो – पतङ्गमुखमण्डूका नाम होन्ति, तेसं मुखसण्ठानं महन्तं, छिद्दं अप्पकं, तत्थ पवेसनं नप्पहोति, मुखसण्ठानं पन वणसङ्खेपं गच्छति, तस्मा तं थुल्लच्चयवत्थूति वेदितब्बं ¶ . कुक्कुटिग्गहणेन सब्बापि काककपोतादिभेदा पक्खिजाति सङ्गहिता. तत्रापि वुत्तनयेनेव पाराजिकवत्थु च दुक्कटवत्थु च वेदितब्बं. मज्जारिग्गहणेन सब्बापि रुक्खसुनखमङ्गुसगोधादिभेदा चतुप्पदजाति सङ्गहिता. तत्रापि वुत्तनयेनेव पाराजिकवत्थु च दुक्कटवत्थु च वेदितब्बं.

पाराजिको होतीति (पारा. अट्ठ. १.५५) पराजितो होति पराजयं अपन्नो. अयञ्हि पाराजिकसद्दो सिक्खापदापत्तिपुग्गलेसु वत्तति. तत्थ ‘‘अट्ठानमेतं, आनन्द, अनवकासो, यं तथागतो वज्जीनं वा वज्जिपुत्तकानं वा कारणा सावकानं पाराजिकं सिक्खापदं पञ्ञत्तं समूहनेय्या’’ति (पारा. ४३) एवं सिक्खापदे वत्तमानो वेदितब्बो. ‘‘आपत्तिं त्वं भिक्खु आपन्नो पाराजिक’’न्ति (पारा. ६७) एवं आपत्तियं. ‘‘न मयं पाराजिका, यो अवहटो, सो पाराजिको’’ति (पारा. १५५) एवं पुग्गले वत्तमानो वेदितब्बो. ‘‘पाराजिकेन धम्मेन अनुद्धंसेय्या’’तिआदीसु (पारा. ३८४) पन धम्मे वत्ततीति वदन्ति. यस्मा पन तत्थ ‘‘धम्मो’’ति कत्थचि आपत्ति, कत्थचि सिक्खापदमेव अधिप्पेतं, तस्मा सो विसुं न वत्तब्बो. तत्थ सिक्खापदं यो तं अतिक्कमति, तं पराजेति, तस्मा ‘‘पाराजिक’’न्ति वुच्चति. आपत्ति पन यो नं अज्झापज्जति, तं पराजेति, तस्मा ‘‘पाराजिका’’ति वुच्चति. पुग्गलो यस्मा पराजितो पराजयमापन्नो, तस्मा ‘‘पाराजिको’’ति वुच्चति. इध पन पुग्गलो वेदितब्बोति आह ‘‘पाराजिको होती’’तिआदि. इमिनापि ¶ इदं दस्सेति – ‘‘पराजितसद्दे उपसग्गस्स वुद्धिं कत्वा, त-कारस्स च क-कारं कत्वा पाराजिको होतीति निद्दिट्ठो’’ति.

अपलोकनादि चतुब्बिधम्पि सङ्घकम्मं सीमापरिच्छिन्नेहि पकतत्तेहि भिक्खूहि एकतो कत्तब्बत्ता एककम्मं नाम. आदिसद्देन एकुद्देससमसिक्खतानं गहणं. तत्थ पञ्चविधोपि पातिमोक्खुद्देसो एकतो उद्दिसितब्बत्ता एकुद्देसो नाम. नहापितपुब्बकादीनं विय ओदिस्स अनुञ्ञातं ठपेत्वा अवसेसं सब्बम्पि सिक्खापदं सब्बेहिपि लज्जिपुग्गलेहि समं सिक्खितब्बभावतो समसिक्खता नाम. यस्मा सब्बेपि लज्जिनो एतेसु ¶ एककम्मादीसु सह वसन्ति, न एकोपि ततो बहिद्धा सन्दिस्सति, तस्मा तानि सब्बानिपि गहेत्वा एककम्मादिको तिविधोपि संवासो नामाति आह ‘‘सो च वुत्तप्पकारो संवासो तेन पुग्गलेन सद्धिं नत्थि, तेन कारणेन सो पाराजिको पुग्गलो ‘असंवासो’ति वुच्चती’’ति (पारा. अट्ठ. १.५५).

इदानि यस्मा न केवलं मनुस्सित्थिया एव निमित्तं पाराजिकवत्थु, अथ खो अमनुस्सित्थितिरच्छानगतित्थीनम्पि. न च इत्थिया एव. अथ खो उभतोब्यञ्जनकपण्डकपुरिसानम्पि, तस्मा ते सत्ते, तेसञ्च यं यं निमित्तं वत्थु होति, तं तं निमित्तं, तत्थ च यथा पटिसेवन्तो पाराजिको होति, तञ्च सब्बं वित्थारेत्वा दस्सेतुं ‘‘अयं पनेत्थ विनिच्छयो’’तिआदिमाह. एत्थाति इमस्मिं सिक्खापदे. तेसूति ये तिंसमग्गा वुत्ता, तेसु. अत्तनो वाति लम्बिमुदुपिट्ठिके सन्धाय वुत्तं. सन्थतस्स वाति येन केनचि वत्थेन वा पण्णेन वा वाकपट्टेन वा चम्मेन वा तिपुसीसादीनं पट्टेन वा पलिवेठेत्वा, अन्तो वा पवेसेत्वा पटिच्छन्नस्स. अक्खायितस्स वाति सोणसिङ्गालादीहि अक्खादितस्स. येभुय्येन अक्खायितस्साति याव उपड्ढक्खायितो नाम न होति, एवं अक्खायितस्स. अल्लोकासेति तिन्तोकासे. सन्थतन्ति तेसंयेव वत्थादीनं येन केनचि पटिच्छन्नं. अयञ्हेत्थ सङ्खेपत्थो – न हेत्थ अनुपादिन्नकं अनुपादिन्नकेन छुपति, मुत्ति अत्थि, अथ खो उपादिन्नकेन वा अनुपादिन्नकं घट्टियतु, अनुपादिन्नकेन वा उपादिन्नकं, अनुपादिन्नकेन वा अनुपादिन्नकं, उपादिन्नकेन वा उपादिन्नकं. सचे यत्तके पविट्ठे पाराजिकं होतीति वुत्तं, तत्तकं सेवनचित्तेन पवेसेति, सब्बत्थायं पाराजिकापत्तिं आपन्नो नाम होतीति.

एवं सेवनचित्तेनेव पवेसेन्तस्स आपत्तिं दस्सेत्वा इदानि यस्मा तं पवेसनं नाम न केवलं अत्तूपक्कमेनेव, परूपक्कमेनापि होति. तत्रापि सादियन्तस्सेव आपत्ति पटिसेवनचित्तसमङ्गिस्स ¶ , न इतरस्साति दस्सेतुं ‘‘परेन वा’’तिआदिमाह. तत्थ परेनाति भिक्खुपच्चत्थिकादिना येन केनचि अञ्ञेन. पवेसनपविट्ठट्ठितउद्धरणेसूति एत्थ अग्गतो (सारत्थ. टी. २.५८) याव मूला पवेसनं पवेसनं नाम. अङ्गजातस्स यत्तकं ठानं पवेसनारहं, तत्तकं अनवसेसतो पविट्ठं पविट्ठं नाम. एवं ¶ पविट्ठस्स उद्धरणारम्भतो अन्तरा ठितकालो ठितं नाम. समन्तपासादिकायं पन मातुगामस्स सुक्कविसट्ठिं पत्वा सब्बथा वायामतो ओरमित्वा ठितकालं सन्धाय ‘‘सुक्कविसट्ठिसमये’’ति वुत्तं. उद्धरणं नाम याव अग्गा नीहरणकालो. सादियतीति सेवनचित्तं उपट्ठपेति. असाधारणविनिच्छयोति अदिन्नादानादीहि सब्बेहि सिक्खापदेहि असाधारणो विनिच्छयो.

साधारणविनिच्छयत्थन्ति परिवारवसेन साधारणविनिच्छयत्थं. मातिकाति माता, जनेत्तीति अत्थो. निददाति देसनं देसवसेन अविदितं विदितं कत्वा निदस्सेतीति निदानं. पञ्ञापीयतीति पञ्ञत्ति, तस्सा पकारो पञ्ञत्तिविधि अङ्गेति गमेति ञापेतीति अङ्गं, कारणं. समुट्ठहन्ति आपत्तियो एतेनाति समुट्ठानं, उप्पत्तिकारणं, तस्स विधि समुट्ठानविधि. वज्जकम्मप्पभेदञ्चाति एत्थ पभेदसद्दो पच्चेकं योजेतब्बो ‘‘वज्जप्पभेदं, कम्मप्पभेदञ्चा’’ति. तत्थ तत्थाति तस्मिं तस्मिं सिक्खापदे.

पञ्ञत्तिट्ठानन्ति पञ्ञत्तिट्ठपनस्स ठानं, सिक्खापदानं पञ्ञत्तिदेसोति अत्थो. पुग्गलोति एत्थ आदिकम्मिकोयेव अधिप्पेतोति आह ‘‘पुग्गलो नाम यं यं आरब्भ तं तं सिक्खापदं पञ्ञत्त’’न्ति, सो सो पुग्गलोति अधिप्पायो. होन्ति चेत्थ –

‘‘सुदिन्नो धनियो सम्बहुला वग्गुमुदन्तिका;

सेय्यसको उदायि चा-ळवका छन्नमेत्तिया.

‘‘देवदत्तस्सजिपुनब्बसु-छब्बग्गियोपनन्दञ्ञतरोपि च;

हत्थको चानुरुद्धो च, सत्तरस चूळपन्थको.

‘‘बेलट्ठसीसो चानन्दो, सागतोरिट्ठनामको;

नन्दत्थेरेन तेवीस, भिक्खूनं आदिकम्मिका.

‘‘सुन्दरीनन्दा ¶ थुल्लनन्दा, छब्बग्गियञ्ञतरापि च;

चण्डकाळी सम्बहुला, द्वे च भिक्खुनियो परा;

भिक्खुनीनं तु सत्तेव, होन्ति ता आदिकम्मिका’’ति.

तस्स तस्स पुग्गलस्साति यं यं सुदिन्नादिकं पुग्गलं आरब्भ सिक्खापदं पञ्ञत्तं, तस्स तस्स पुग्गलस्स. पञ्ञत्तीति पठमपञ्ञत्ति. पठमपञ्ञत्तिया पच्छा ¶ ठपिता पञ्ञत्ति अनुपञ्ञत्ति. अनुप्पन्ने दोसे ठपिता पञ्ञत्ति अनुप्पन्नपञ्ञत्ति. सब्बत्थ मज्झिमदेसे चेव पच्चन्तिमेसु जनपदेसु चाति सब्बेसु पदेसेसु ठपिता पञ्ञत्ति सब्बत्थपञ्ञत्ति. मज्झिमदेसेयेव ठपिता पञ्ञत्ति पदेसपञ्ञत्ति. भिक्खूनञ्चेव भिक्खुनीनञ्च साधारणभूता पञ्ञत्ति साधारणपञ्ञत्ति. सुद्धभिक्खूनमेव, सुद्धभिक्खुनीनं वा पञ्ञत्तं सिक्खापदं असाधारणपञ्ञत्ति. उभिन्नम्पि पञ्ञत्ति उभतोपञ्ञत्ति. विनयधरपञ्चमेनाति अनुस्सावनकाचरियपञ्चमेन. गुणङ्गुणूपाहनाति चतुप्पटलतो पट्ठाय कता उपाहना, न एकद्वितिपटला. चम्मत्थरणन्ति अत्थरितब्बं चम्मं. एतेसं वसेन चतुब्बिधा पदेसपञ्ञत्ति नामाति एतेसं वसेन चतुब्बिधा पञ्ञत्ति मज्झिमदेसेयेव पञ्ञत्ताति पदेसपञ्ञत्ति नाम. तेनेवाह ‘‘मज्झिमदेसेयेव ही’’तिआदि. यस्मा मज्झिमदेसेयेव यथावुत्तवत्थुवीतिक्कमे आपत्ति होति, न पच्चन्तिमजनपदे, तस्मा पदेसपञ्ञत्तीति अत्थो. धुवन्हानं पटिक्खेपमत्तन्ति निच्चनहानप्पटिसेधनमेव. एत्थ च मत्तसद्देन अञ्ञानि तीणि सिक्खापदानि पटिक्खिपति. तानि हि ‘‘अनुजानामि, भिक्खवे, सब्बपच्चन्तिमेसु जनपदेसु विनयधरपञ्चमेन गणेन उपसम्पद’’न्तिआदिना (महाव. २५९) चम्मक्खन्धके आगतानि. तेनेवाह ‘‘ततो अञ्ञा पदेसपञ्ञत्ति नाम नत्थी’’ति. सब्बानीति ततो अवसेसानि सब्बानि सिक्खापदानि. तस्माति यस्मा अनुप्पन्नपञ्ञत्ति अट्ठगरुधम्मवसेन भिक्खुनीनंयेव आगता, यस्मा च धुवन्हानं पटिक्खेपमत्तं ठपेत्वा पातिमोक्खे सब्बानि सिक्खापदानि सब्बत्थपञ्ञत्तियेव होन्ति, यस्मा च साधारणपञ्ञत्तिदुकञ्च एकतोपञ्ञत्तिदुकञ्च ब्यञ्जनमत्तं नानं, अत्थतो एकं, तस्मा. सब्बत्थाति सब्बेसु सिक्खापदेसु. आपत्तिभेदो हेत्थ उत्तरपदलोपेन ‘‘आपत्ती’’ति वुत्तोति आह ‘‘आपत्तीति पुब्बप्पयोगादिवसेन आपत्तिभेदो’’ति. सीलआचारदिट्ठिआजीवविपत्तीनन्ति एत्थ पठमा द्वे आपत्तिक्खन्धा सीलविपत्ति नाम, अवसेसा पञ्च आचारविपत्ति नाम, मिच्छादिट्ठि च अन्तग्गाहिकादिट्ठि च दिट्ठिविपत्ति नाम, आजीवहेतु पञ्ञत्तानि छ सिक्खापदानि आजीवविपत्ति नाम, इति इमासं सीलआचारदिट्ठिआजीवविपत्तीनं अञ्ञतराति अत्थो.

न ¶ केवलं यथावुत्तनयेनेव वुच्चन्तीति आह ‘‘यानि सिक्खापदसमुट्ठानानीतिपि वुच्चन्ती’’ति. एतानि हि किञ्चापि आपत्तिया समुट्ठानानि, न ¶ सिक्खापदस्स, वोहारसुखत्थं पनेवं वुच्चन्तीति. तत्थाति तेसु छसु समुट्ठानेसु. तेसूति सचित्तकाचित्तकेसु. एकं समुट्ठानं उप्पत्तिकारणं एतिस्साति एकसमुट्ठाना, एकेन वा समुट्ठानं एतिस्साति एकसमुट्ठाना. ‘‘द्विसमुट्ठाना’’तिआदीसुपि एसेव नयो.

समुट्ठानवसेनाति समुट्ठानसीसवसेन. पठमपाराजिकं समुट्ठानं एतिस्साति पठमपाराजिकसमुट्ठाना. तथा अदिन्नादानसमुट्ठाना’’तिआदीसुपि.

सयं पथविखणने कायेन, परे आणापेत्वा खणापने वाचाय च आपत्तिसम्भवतो ‘‘पथविखणनादीसु विया’’ति वुत्तं. आदिसद्देन अदिन्नादानादीनं परिग्गहो. पठमकथिनापत्ति कायवाचतो कत्तब्बं अधिट्ठानं वा विकप्पनं वा अकरोन्तस्स होति, नो करोन्तस्साति आह ‘‘पठमकथिनापत्ति विया’’ति. अञ्ञातिकाय भिक्खुनिया हत्थतो चीवरप्पटिग्गहणापत्ति तस्सा हत्थतो चीवरं पटिग्गण्हन्तस्स, परिवत्तकं अदेन्तस्स च होतीति किरियाकिरियतो समुट्ठाति. ‘‘सिया करोन्तस्सा’’तिआदीसु सियाति ‘‘सिया खो पन ते ब्राह्मण एवमस्सा’’तिआदीसु विय ‘‘कदाची’’ति इमिना समानत्थो निपातो. रूपियप्पटिग्गहणापत्ति सिया किरिया गहणेन आपज्जनतो, सिया अकिरिया पटिक्खेपस्स अकरणतोति आह ‘‘रूपियप्पटिग्गहणापत्ति विया’’ति. कुटिकारापत्ति वत्थुं देसापेत्वा पमाणातिक्कन्तकरणे करोन्तस्स सिया, अदेसापेत्वा पन पमाणातिक्कन्तकरणे पमाणयुत्तं वा करोन्तस्स च अकरोन्तस्स च सियाति आह ‘‘कुटिकारापत्ति विया’’ति.

सञ्ञाय अभावेन विमोक्खो अस्साति सञ्ञाविमोक्खोति मज्झेपदलोपसमासो दट्ठब्बोति आह ‘‘यतो वीतिक्कमसञ्ञाया’’तिआदि. इतरा नाम यतो वीतिक्कमसञ्ञाय अभावेन न मुच्चति, सा इतरसद्दस्स वुत्तप्पटियोगिविसयत्ता. या अचित्तकेन वा सचित्तकमिस्सकेन वा समुट्ठातीति या आपत्ति कदाचि अचित्तकेन वा कदाचि सचित्तकमिस्सकेन वा समुट्ठानेन समुट्ठाति. एत्थ च सञ्ञादुकं अनापत्तिमुखेन वुत्तं, सचित्तकदुकं आपत्तिमुखेनाति दट्ठब्बं.

यस्सा ¶ सचित्तकपक्खे चित्तं अकुसलमेव होतीति यस्सा सचित्तकाय आपत्तिया चित्तं अकुसलमेव होति, यस्सा च सचित्तकाचित्तकसङ्खाताय सुरापानादिअचित्तकाय आपत्तिया वत्थुविजाननचित्तेन ¶ सचित्तकपक्खे चित्तं अकुसलमेव होति, अयं लोकवज्जा. ‘‘सचित्तकपक्खे’’ति हि इदं वचनं सचित्तकाचित्तकं सन्धाय वुत्तं. न हि एकंसतो सचित्तकस्स ‘‘सचित्तकपक्खे’’ति विसेसने पयोजनं अत्थीति. यं पनेत्थ गण्ठिपदे ‘‘सुरापानस्मिञ्हि ‘सुरा’ति वा ‘न वट्टती’ति वा जानित्वा पिवने अकुसलमेवा’’ति वुत्तं. तत्थ ‘‘न वट्टतीति वा जानित्वा’’ति वुत्तवचनं न युज्जति पण्णत्तिवज्जस्सापि लोकवज्जभावप्पसङ्गतो. यस्सा पन ‘‘सचित्तकपक्खे चित्तं अकुसलमेवा’’ति नियमो नत्थि, सा पण्णत्तिवज्जाति इममत्थं दस्सेन्तो आह ‘‘सेसा पण्णत्तिवज्जा’’ति. तथा हि तस्सा वत्थुविजाननचित्तेन सचित्तकपक्खे चित्तं सिया कुसलं, सिया अकुसलं, सिया अब्याकतन्ति ‘‘अकुसलमेवा’’ति नियमो नत्थि. उभयत्थ आपज्जितब्बाति कायद्वारे, वचीद्वारे चाति उभयत्थ आपज्जितब्बा आपत्ति, ता पन अदिन्नादानादयो. ‘‘मनोद्वारे आपत्ति नाम नत्थी’’ति इदं येभुय्यवसेन वुत्तं उपनिक्खित्तसादियनादीसु आपत्तिसम्भवतोति दट्ठब्बं.

अकुसलचित्तो वा आपज्जतीति पाराजिकसुक्कविसट्ठिकायसंसग्गदुट्ठुल्लअत्तकामपारिचरियदुट्ठदोससङ्घभेदप्पहारदानतलसत्तिकादिभेदं आपत्तिं अकुसलचित्तो आपज्जति. अनुपसम्पन्नं पदसोधम्मं वाचेन्तो, मातुगामस्स धम्मं देसेन्तोति एवरूपं आपत्तिं कुसलचित्तो आपज्जति. असञ्चिच्चसहसेय्यादिं अब्याकतचित्तो आपज्जति. यं अरहा आपज्जति, सब्बं अब्याकतचित्तोव आपज्जति. तेनाह ‘‘कुसलाब्याकतचित्तो वा’’ति.

दुक्खवेदनासमङ्गी वाति दुट्ठदोसादिभेदं आपत्तिं आपज्जन्तो दुक्खवेदनासमङ्गी आपज्जति. मेथुनधम्मादिभेदं पन सुखवेदनासमङ्गी आपज्जति. यं सुखवेदनासमङ्गी आपज्जति, तंयेव मज्झत्तो हुत्वा आपज्जन्तो अदुक्खमसुखवेदनासमङ्गी आपज्जति. तेनाह ‘‘इतरवेदनाद्वयसमङ्गी वा’’ति. इदम्पि च तिकद्वयं येभुय्यवसेनेव वुत्तं. निपज्जित्वा ¶ निरोधसमापन्नो हि अचित्तको अवेदनो सहसेय्यापत्तिं आपज्जतीति. किञ्चापि एवं अनियमेन वुत्तं, विसेसो पनेत्थ अत्थीति दस्सेतुं ‘‘एवं सन्तेपी’’तिआदि वुत्तं. एवं सन्तेपीति हि विसेसाभिधाननिमित्ताभ्यूपगमेव युज्जति. सब्बेसं वसेन तीणि चित्तानीति कुसलाकुसलाब्याकतानं वसेन पदसोधम्मादीसु तीणि चित्तानि.

इदानि तं यथावुत्तनिदानादिवेदनात्तिकपरियोसानं सत्तरसप्पकारं इमस्मिं सिक्खापदे योजेतुं ‘‘इध पना’’तिआदिमाह. इधाति इमस्मिं पठमपाराजिकसिक्खापदे. वेसालियन्ति एवंनामके ¶ इत्थिलिङ्गवसेन पवत्तवोहारे नगरे. तञ्हि नगरं तिक्खत्तुं पाकारपरिक्खेपवड्ढनेन विसालीभूतत्ता ‘‘वेसाली’’ति वुच्चति. इदम्पि च नगरं सब्बञ्ञुतं सम्पत्तेयेव सम्मासम्बुद्धे सब्बाकारवेपुल्लत्तं पत्तन्ति वेदितब्बं. ‘‘सिक्खं अपच्चक्खाया’’ति च ‘‘अन्तमसो तिरच्छानगतायपी’’ति च द्वे अनुपञ्ञत्तियोति मक्कटिवज्जिपुत्तकवत्थूनं वसेन वुत्ता. ‘‘अन्तमसो तिरच्छानगताया’’ति च ‘‘सिक्खं अपच्चक्खाया’’ति च इमा द्वे अनुपञ्ञत्तियो. आपत्तिकरा च होतीति पठमपञ्ञत्तितो विसुंयेवापत्तिकरा च होति. अञ्ञवादकसिक्खापदादीसु वियाति अञ्ञवादकसिक्खापदादीसु ‘‘विहेसके’’तिआदिका (पाचि. ९८) वियाति अत्थो. आदिसद्देन उज्झापनकस्स परिग्गहो. एत्थ हि अञ्ञवादकादितो विसुंयेव विहेसकादीसुपि पाचित्तियं होति. यथाह ‘‘रोपिते विहेसके सङ्घमज्झे वत्थुस्मिं वा आपत्तिया वा अनयुञ्जियमानो तं नकथेतुकामो तं नउग्घाटेतुकामो तुण्हीभूतो सङ्घं विहेसेति, आपत्ति पाचित्तियस्सा’’तिआदि (पारा. १००). सुपिनन्ते विज्जमानापि मोचनस्सादचेतना अब्बोहारिकत्ता अनापत्तिकराति आह ‘‘अञ्ञत्र सुपिनन्तातिआदिका विया’’ति. तथा हि थिनमिद्धेन अभिभूतत्ता सुपिने चित्तं अब्बोहारिकं, चित्तस्स अब्बोहारिकत्ता ओपक्कमनकिरियापवत्तनिकापि चेतना अब्बोहारिका. वुत्तञ्हेतं ‘‘अत्थेसा, भिक्खवे, चेतना, सा च खो अब्बोहारिका’’ति (पारा. २३५), तस्मा ‘‘अञ्ञत्र सुपिनन्ता’’ति अयं अनुपञ्ञत्ति अनापत्तिकरा जाता. आदिसद्देन ‘‘अञ्ञत्र अधिमाना’’तिआदिकं (पारा. १९७) सङ्गण्हाति. अदिन्नादानादीसु वियाति अदिन्नादानादीसु ¶ ‘‘अरञ्ञा वा’’तिआदिका (पारा. ९१) वियाति अत्थो. एत्थ पन आदिसद्देन पठमपाराजिकादीनं सङ्गहो. एत्थ हि ‘‘तञ्च खो गामे, नो अरञ्ञे’’तिआदिना (पारा. ९०) नयेन लेसं ओड्डेन्तानं लेसपिदहनत्थं ‘‘अरञ्ञा वा’’तिआदिका अनुपञ्ञत्ति वुत्ताति उपत्थम्भकराव होति. तेनेव हि ‘‘ननु, आवुसो, तथेवेतं होती’’ति (पारा. ९०) भिक्खूहि वुत्तं.

वुत्तप्पकारे मग्गेति ‘‘मनुस्सामनुस्सतिरच्छानगतवसेना’’तिआदिना (कङ्खा. अट्ठ. पठमपाराजिकवण्णना) वुत्तप्पकारे तिंसमग्गे. इमस्स पन ‘‘छिन्ने’’ति इमिना सम्बन्धो. तचादीनि अनवसेसेत्वाति निमित्तप्पदेसे बहि ठितानि छविचम्मानि अनवसेसेत्वा. निमित्तसण्ठानमत्तं पञ्ञायतीति निमित्तमंसस्स पन अब्भन्तरे छविचम्मस्स च विज्जमानत्ता वुत्तं. चम्मखिलन्ति चम्मक्खण्डं. ‘‘उण्णिगण्डो’’तिपि (सारत्थ. टी. २.५५; वि. वि. टी. १.५५) वदन्ति. तञ्हि निमित्ते जातत्ता निमित्तमेव. तेनाह ‘‘सेवनचित्ते सति पाराजिक’’न्ति. सेवनचित्तेति मेथुनसेवनचित्ते. कायसंसग्गसेवनचित्ते पन सति सङ्घादिसेसोव ¶ . नट्ठो कायप्पसादो एत्थाति नट्ठकायप्पसादं, सुक्खपीळकं वा मतचम्मं वाति अत्थो. मते अक्खायिते, येभुय्येन अक्खायिते च पाराजिकापत्तिवचनतो (पारा. ६१) पन नट्ठकायप्पसादेपि इत्थिनिमित्ते पवेसेन्तस्स पाराजिकापत्तियेव. निमित्तसण्ठानमत्तम्पि अनवसेसेत्वाति निमित्ताकारेन ठितं यथावुत्तनिमित्तमंसादिम्पि अनवसेसेत्वा. वणसङ्खेपवसेनाति वणसङ्गहवसेन. वणे थुल्लच्चयञ्च ‘‘अमग्गेन अमग्गं पवेसेति, आपत्ति थुल्लच्चयस्सा’’ति (पारा. ६६) इमस्स सुत्तस्स वसेन वेदितब्बं. तस्मिञ्हि सुत्ते द्वीसु सम्भिन्नवणेसु एकेन वणेन पवेसेत्वा दुतियेन नीहरन्तस्स थुल्लच्चयं वुत्तं. वुत्तञ्हि समन्तपासादिकायं ‘‘इमस्स सत्तस्स अनुलोमवसेन सब्बत्थ वणसङ्खेपे थुल्लच्चयं वेदितब्ब’’न्ति (पारा. अट्ठ. १.६६). मनुस्सानं पन अक्खिआदयोपि वणसङ्गहं गच्छन्तीति वणेन एकपरिच्छेदं कत्वा दस्सेन्तो ‘‘तथा’’तिआदिमाह. तेसं वणसङ्गहो ‘‘नवद्वारो महावणो’’ति (मि. प. २.६.१) एवमादिसुत्तानुसारेन वेदितब्बो. तत्थ मनुस्सानन्ति इत्थिपुरिसपण्डकउभतोब्यञ्जनकवसेन चतुब्बिधानं मनुस्सानं. वत्थिकोसेसूति ¶ वत्थिपुटेसु पुरिसानं अङ्गजातकोसेसु. हत्थिअस्सादीनञ्च तिरच्छानानन्ति हत्थिअस्सगोणगद्रभओट्ठमहिंसादीनं तिरच्छानगतानं. तिरच्छानानं पनाति सब्बेसम्पि तिरच्छानगतानं. सब्बेसन्ति यथावुत्तमनुस्सादीनं सब्बेसं.

एवं जीवमानकसरीरे लब्भमानं आपत्तिविसेसं दस्सेत्वा इदानि मतसरीरे लब्भमानं आपत्तिविसेसं दस्सेतुं ‘‘मतसरीरे’’तिआदिमाह. वच्चमग्गपस्सावमग्गमुखमग्गानं चतूसु कोट्ठासेसु द्वे कोट्ठासे ठपेत्वा यदा अपरे द्वे कोट्ठासा खादिता, तदा उपड्ढक्खायितं नाम होति. न कुथितं होतीति उद्धुमातकादिभावेन कुथितं न होति, अल्लन्ति अत्थो. यदा पन सरीरं उद्धुमातकं होति कुथितं नीलमक्खिकसमाकिण्णं किमिकुलसमाकुलं नवहि वणमुखेहि पग्गळितपुब्बकुणपभावेन उपगन्तुम्पि असक्कुणेय्यं (पारा. अट्ठ. १.५९-६०), तदा पाराजिकवत्थुञ्च थुल्लच्चयवत्थुञ्च विजहति, दुक्कटवत्थुमेव होतीति आह ‘‘कुथिते दुक्कट’’न्ति. कुथितेति उद्धुमातकभावप्पत्ते. ईदिसे हि सरीरे यत्थ कत्थचि उपक्कमतो दुक्कटं. तथा वट्टकते मुखे अच्छुपन्तं अङ्गजातं पवेसेन्तस्साति (पारा. अट्ठ. १.७३) विवट्टे मुखे चत्तारि पस्सानि, तालुकञ्च अप्फुसन्तं अङ्गजातं पवेसेन्तस्स दुक्कटन्ति अत्थो. सचे पन हेट्ठा वा उपरि वा उभयपस्सेहि वा छुपन्तं पवेसेति, पाराजिकं. चतूहि पस्सेहि अच्छुपन्तं पवेसेत्वा अब्भन्तरे तालुकं छुपति, पाराजिकमेव. बहि निक्खन्तजिव्हाय वा दन्तेसु वा अङ्गजातं पवेसेन्तस्स थुल्लच्चयन्ति सम्बन्धो. जीवमानकसरीरेपि बहि निक्खन्तजिव्हाय थुल्लच्चयमेव. यदि पन बहि जिव्हाय पलिवेठेत्वा अन्तोमुखं पवेसेति, पाराजिकमेव. यदि पन दन्ता सुफुसिता, अन्तोमुखे ओकासो ¶ नत्थि, दन्ता च बहि ओट्ठमंसेन पटिच्छन्ना, तत्थ वातेन असम्फुट्ठं अल्लोकासं तिलफलमत्तम्पि पवेसेन्तस्स पाराजिकमेव. उप्पाटिते पन ओट्ठमंसे दन्तेसुयेव उपक्कमन्तस्स थुल्लच्चयं. योपि दन्तो बहि निक्खमन्तो तिट्ठति, न सक्का ओट्ठेहि पिदहितुं, तत्थापि एसेव नयो.

वेदनाय अट्टो पीळितो वेदनाट्टो. उम्मत्तकोति चेत्थ पित्तुम्मत्तको अधिप्पेतोति आह ‘‘यो पित्तवसेना’’तिआदि. पित्तवसेनाति ¶ बद्धपित्तवसेन. तस्मिञ्हि बद्धपित्ते पित्तकोसतो चलित्वा बहि निक्खमन्ते सत्ता उम्मत्तका होन्ति, विपल्लत्थसञ्ञा हिरोत्तप्पं छड्डेत्वा असारुप्पचरियं चरन्ति, लहुकगरुकानि सिक्खापदानि मद्दन्तापि न जानन्ति, भेसज्जकिरियायपि अतेकिच्छा होन्ति, एवरूपस्स उम्मत्तकस्स अनापत्ति. अबद्धपित्तं पन लोहितं विय सब्बङ्गगतं, तम्हि कुपिते सत्तानं कण्डुकच्छुसरीरकम्पादीनि होन्ति, तानि भेसज्जकिरियाय वूपसमन्ति. तेन वुत्तं ‘‘बद्धपित्तवसेना’’ति. खित्तचित्तो नाम विस्सट्ठचित्तो यक्खुम्मत्तको वुच्चतीति आह ‘‘यक्खेहि कतचित्तविक्खेपो खित्तचित्तो’’ति. यक्खा किर भेरवानि आरम्मणानि दस्सेत्वा मुखेन हत्थं पवेसेत्वा, हदयरूपं वा मद्दन्ता सत्ते विक्खित्तचित्ते विपल्लत्थसञ्ञे करोन्ति, एवरूपस्स खित्तचित्तस्स अनापत्ति. तेसं पन उभिन्नं अयं विसेसो – पित्तुम्मत्तको निच्चमेव उम्मत्तको होति, पकतिसञ्ञं न लभति. यक्खुम्मत्तको अन्तरन्तरा पकतिसञ्ञं पटिलभति. इध पन पित्तुम्मत्तको वा होतु, यक्खुम्मत्तको वा, यो सब्बसो मुट्ठस्सति किञ्चि न जानाति, अग्गिम्पि सुवण्णम्पि गूथम्पि चन्दनम्पि एकसदिसं मद्दन्तोव विचरति, एवरूपस्स अनापत्ति. अन्तरन्तरा पकतिसञ्ञं पटिलभित्वा ञत्वा करोन्तस्स पन आपत्तियेव. तेनाह ‘‘द्विन्नम्पि च एतेस’’न्तिआदि.

अधिमत्तवेदनायाति अधिकप्पमाणाय दुक्खवेदनाय. आदिकम्मे नियुत्तो आदिकम्मिको, यो च आदिकम्मे नियुत्तो, सो तस्मिं कम्मे आदिभूतो होतीति आह ‘‘यो’’तिआदि. इध पन सुदिन्नत्थेरो आदिकम्मिको, तस्स अनापत्ति. अवसेसानं मक्कटिसमणवज्जिपुत्तकादीनं आपत्तियेव. पटिपादनं सम्पादनं. करोन्तोयेव हि तं आपज्जतीति किरियं. इदं (सारत्थ. टी. २.६६) पन येभुय्यवसेन वुत्तं मेथुनधम्मे परूपक्कमे सति सादियन्तस्स अकिरियसमुट्ठानभावतो. मेथुनप्पटिसंयुत्ताय हि कामसञ्ञाय अभावेन मुच्चनतो सञ्ञाविमोक्खं. ‘‘अनापत्ति अजानन्तस्स, असादियन्तस्सा’’ति (पारा. ६६) हि वुत्तं. मेथुनचित्तेनेव नं आपज्जति, न विना चित्तेनाति सचित्तकं. रागवसेनेव आपज्जितब्बतो लोकवज्जं. कायद्वारेनेव समुट्ठानतो कायकम्मं. चित्तं पनेत्थ अङ्गमत्तं होति ¶ , न तस्स वसेन कम्मभावो लब्भति. लोभचित्तेनेव ¶ आपज्जितब्बतो अकुसलचित्तं. सुखसमङ्गी वा उपेक्खासमङ्गी वा आपज्जतीति द्विवेदनं. ननु समुट्ठानादीनि आपत्तिया होन्ति, न सिक्खापदस्स, अथ कस्मा सिक्खापदस्स समुट्ठानादीनि वुत्तानीति आह ‘‘इमानि च समुट्ठानादीनि नामा’’तिआदि. आपत्तिया होन्तीति अज्झाचारस्स होन्ति.

मुननतो अनुमुननतो मुति, ञाणं, तं एतस्स अत्थीति मुतिमा, ञाणवाति अत्थो.

पठमपाराजिकवण्णना निट्ठिता.

२. दुतियपाराजिकवण्णना

एत्थाति एतेसु द्वीसु. एककुटिकादिभेदो सब्बोपि गामोति वेदितब्बोति सम्बन्धो. तत्थ एककुटिकादिभेदोति यस्मिं गामे एका एव कुटि एकं गेहं सेय्यथापि मलयजनपदे, अयं एककुटिको गामो नाम. आदिसद्देन ‘‘द्विकुटिकोपि गामो, तिकुटिकोपि गामो, चतुक्कुटिकोपि गामो’’ति (पारा. ९२) वुत्तप्पभेदं सङ्गण्हाति. अभिनवनिविट्ठो एककुटिकादिगामो पन याव मनुस्सा पविसित्वा वासं न कप्पेन्ति, ताव गामसङ्खं न गच्छति. किंभूतोति आह ‘‘परिक्खित्तो वा’’तिआदि. तत्थ परिक्खित्तो नाम इट्ठकपाकारं आदिं कत्वा अन्तमसो कण्टकसाखाहिपि परिक्खित्तो. तब्बिपरीतो अपरिक्खित्तो. अमनुस्सो नाम यो सब्बसो वा मनुस्सानं अभावेन यक्खपरिग्गहभूतो, यतो वा मनुस्सा केनचि करणीयेन पुनपि आगन्तुकामा एव अपक्कन्ता, यतो पन निरपेक्खा हुत्वा पक्कमन्ति, सो गामसङ्खं न गच्छति. न केवलं एककुटिकादिभेदोवाति आह ‘‘अन्तमसो’’तिआदि. यो कोचि सत्थोपीति जङ्घसत्थसकटसत्थादीसु यो कोचि सत्थोपि. इमस्मिं सिक्खापदे निगमनगरानि विय गामग्गहणेनेव गामूपचारोपि सङ्गहितोति आह ‘‘ठपेत्वा गामञ्च गामूपचारञ्चा’’ति. अञ्ञथा पन मातिकाय अनवसेसतो अवहारट्ठानपरिग्गहो कतो नाम न होति, न च बुद्धा सावसेसं पाराजिकं पञ्ञापेन्ति.

तत्थाति तेसु गामगामूपचारेसु. द्वारेति निब्बकोसस्स उदकपतनट्ठानतो अब्भन्तरे. अन्तोगेहेति पमुखस्स अब्भन्तरे. कतपरिक्खेपोति ¶ पाकारवतिआदीहि कतपरिक्खेपो. सुप्पपतनादिपरिच्छेदो पनेत्थ अपरिक्खित्तघरं सन्धाय वुत्तो. न केवलं घरस्स पुरतो, अथ खो समन्ततो तत्तकोव परिच्छेदो घरूपचारो नामाति गहेतब्बं. ‘‘पुरतो’’तिआदिकं पन लोकियेहि ¶ तथाकरणतो वुत्तं. थाममज्झिमस्साति मज्झिमथामस्स, नेव अप्पथामस्स, न महाथामस्साति वुत्तं होति. ‘‘यथा तरुणमनुस्सा’’तिआदिना यथा मातुगामो काके उड्डापेन्तो उजुकमेव हत्थं उक्खिपित्वा लेड्डुं खिपति, यथा च उदकुक्खेपे उदकं खिपन्ति, एवं खित्तस्स लेड्डुस्स पतितट्ठानं पटिक्खिपति. पवत्तित्वाति लुठित्वा, परिवत्तित्वाति वुत्तं होति. तस्स सचे द्वे इन्दखीला होन्तीति (पारा. अट्ठ. १.९२) तस्स परिक्खित्तस्स गामस्स सचे अनुराधपुरस्सेव द्वे उम्मारा होन्ति. यस्स पन एको, तस्स गामद्वारबाहानं वेमज्झे ठितस्स लेड्डुपातब्भन्तरं गामूपचारो नाम. यत्र पन इन्दखीलो नत्थि, तत्र गामद्वारबाहानं वेमज्झं. यत्र द्वारबाहापि नत्थि, तत्थ उभोसु पस्सेसु वतिया वा पाकारस्स वा कोटिवेमज्झंव इन्दखीलट्ठानियत्ता इन्दखीलोति गहेतब्बं. यो पन गामो पुब्बे महा हुत्वा पच्छा कुलेसु नट्ठेसु अप्पको होति, सो घरूपचारतो लेड्डुपातेनेव परिच्छिन्दितब्बो. पुरिमपरिच्छेदो पनस्स परिक्खित्तस्सापि अपरिक्खित्तस्सापि अप्पमाणमेवाति. ननु चेतं अपरिक्खित्तस्स उपचारदस्सनं पदभाजनेन विरुद्धमिव दिस्सति. तत्थ हि ‘‘गामूपचारो नाम परिक्खित्तस्स गामस्स इन्दखीले ठितस्स मज्झिमस्स पुरिसस्स लेड्डुपातो’’ति (पारा. ९२) वत्वा ‘‘अपरिक्खित्तस्स गामस्स घरूपचारे ठितस्स मज्झिमस्स पुरिसस्स लेड्डुपातो’’ति (पारा. ९२) एत्तकमेव वुत्तं, न पन तं लेड्डुपातं गामसङ्खेपं कत्वा ततो परं गामूपचारोति वुत्तोति आह ‘‘पदभाजनेपि हि इमिनाव नयेन अत्थो वेदितब्बो’’ति.

अयमेत्थ अधिप्पायो – इध गामो नाम दुविधो होति परिक्खित्तो च अपरिक्खित्तो च (पारा. अट्ठ. १.९२). तत्र परिक्खित्तस्स परिक्खेपोयेव परिच्छेदो. तस्मा तस्स विसुं परिच्छेदं अवत्वा ‘‘गामूपचारो नाम परिक्खित्तस्स गामस्स इन्दखीले ठितस्स मज्झिमस्स पुरिसस्स लेड्डुपातो’’ति पाळियं वुत्तं. अपरिक्खित्तस्स पन गामस्स गामपरिच्छेदो वत्तब्बो. तस्मा तस्स ¶ गामस्स गामपरिच्छेददस्सनत्थं ‘‘अपरिक्खित्तस्स गामस्स घरूपचारे ठितस्स मज्झिमस्स पुरिसस्स लेड्डुपातो’’ति (पारा. ९२) वुत्तं. गामपरिच्छेदे च दस्सिते गामूपचारलक्खणं पुब्बे वुत्तनयेनेव सक्का ञातुन्ति पुन ‘‘तत्थ ठितस्स मज्झिमस्स पुरिसस्स लेड्डुपातो’’ति न वुत्तं, अत्थो पन तत्थापि अयमेव यथावुत्तोति. यो पन घरूपचारे ठितस्स लेड्डुपातंयेव ‘‘गामूपचारो’’ति वदति, तस्स घरूपचारो ‘‘गामो’’ति आपज्जति. ततो घरं घरूपचारो, गामो गामूपचारोति एस विभागो सङ्करीयति. असंकरतो चेत्थ विनिच्छयो वेदितब्बो. तस्मा पाळिञ्च अट्ठकथञ्च संसन्दित्वा वुत्तनयेनेवेत्थ गामो, गामूपचारो च वेदितब्बोति.

तत्थाति ¶ तेसु द्वीसु उपचारेसु. य्वायं उपचारो दस्सितोति सम्बन्धो. विकाले गामप्पवेसनादीसूति एत्थ आदिसद्देन असंकच्चिकागामप्पवेसनं (पाचि. १२२५) सङ्गण्हाति. यो पन परिक्खित्तस्स गामस्स उपचारो वुत्तो, सो न कत्थचि विनयपिटके उपयोगं गतो. केवलं अपरिक्खित्तस्स परिक्खेपोकासतो अपरो एको लेड्डुपातो गामूपचारो नामाति ञापनत्थं वुत्तो. एवं वुत्ते हि ञायति ‘‘परिक्खित्तस्सापि चे गामस्स एको लेड्डुपातो कप्पियभूमि समानो उपचारोति वुत्तो, पगेव अपरिक्खित्तस्स परिक्खेपोकासतो एको’’ति. इमेसं परिच्छेददस्सनत्थन्ति इमेसं गामारञ्ञानं परिच्छेददस्सनत्थं वुत्ता अट्ठकथायं. पाराजिकवत्थुन्ति पादग्घनकं. अवहरन्तस्साति गण्हन्तस्स.

अदिन्नन्ति (पारा. अट्ठ. ९२) दन्तपोनसिक्खापदे अत्तनो सन्तकम्पि अप्पटिग्गहितकं कप्पियं अज्झोहरणीयं वुच्चति, इध पन यं किञ्चि परपरिग्गहितं ससामिकं भण्डं, तदेतं तेहि सामिकेहि कायेन वा वाचाय वा न दिन्नन्ति अदिन्नं. अवहारप्पहोनकमेव पन दस्सेतुं ‘‘अञ्ञस्स मनुस्सजातिकस्स सन्तक’’न्ति वुत्तं. सङ्खासद्दस्सेव त-कारेन वड्ढेत्वा वुत्तत्ता ‘‘सङ्खा सङ्खातन्ति अत्थतो एक’’न्ति वुत्तं. तत्थ अत्थतो एकन्ति पदत्थतो एकं, अनत्थन्तरन्ति वुत्तं होति. कोट्ठासस्सेतं नामं भागतो ¶ सङ्खायति उपट्ठातीति कत्वा. पपञ्चसङ्खाति सत्तानं संसारे पपञ्चेन्ति चिरायन्तीति पपञ्चा, तण्हामानदिट्ठियो, यस्स वा उप्पन्ना, तं ‘‘रत्तो’’ति वा ‘‘मत्तो’’ति वा ‘‘मिच्छादिट्ठिनिविट्ठो’’ति वा पपञ्चेन्ति ब्यञ्जेन्तीति पपञ्चा, सङ्खा वुच्चति कोट्ठासो, पपञ्चाव सङ्खा पपञ्चसङ्खा, पपञ्चकोट्ठासाति अत्थो, तण्हामानदिट्ठियोति वुत्तं होति. थेय्यचित्तसङ्खातोति ‘‘थेय्यचित्तो’’ति कथितो. एको चित्तकोट्ठासोति विस्सासतावकालिकादिग्गाहवसप्पवत्तअथेय्यचित्तकोट्ठासतो अञ्ञो चित्तकोट्ठासो. थेय्यसङ्खातेनाति थेय्यभूतचित्तकोट्ठासेन. यदि एवं अथ कस्मा एतस्स विभङ्गे ‘‘थेय्यचित्तो अवहरणचित्तो’’ति (पारा. ९२) वुत्तन्ति आह ‘‘यो चा’’तिआदि. ब्यञ्जनं अनादियित्वाति ब्यञ्जने आदरं अकत्वाति अत्थो, सद्दत्थमनपेक्खित्वाति वुत्तं होति. अत्थमेवाति भावत्थमेव.

ते पन अवहाराति ते पञ्चवीसति अवहारा. सविञ्ञाणकाविञ्ञाणकवसेन नानाविधो भण्डो एतस्स पञ्चकस्साति नानाभण्डं, पञ्चन्नं अवहारानं समूहो पञ्चकं, पञ्चपरिमाणमस्साति वा पञ्चकं, नानाभण्डमेव पञ्चकं नानाभण्डपञ्चकं. सविञ्ञाणकवसेन एको भण्डो एतस्साति एकभण्डं. सेसं वुत्तनयमेव. साहत्थिकोव पञ्चकं ¶ साहत्थिकपञ्चकं. आदिपदवसेन चेतं नामं कुसलादित्तिकस्स कुसलत्तिकवोहारो विय. तस्मा साहत्थिकादिपञ्चकन्ति अत्थतो दट्ठब्बं. एस नयो सेसेसु पञ्चकद्वयेसु. एतस्सेवाति ‘‘आदियेय्या’’ति एतस्सेव मातिकापदस्स. इमेसं पदानं वसेनाति इमेसं पञ्चन्नं पदानं वसेन. एत्थ च पठमपदं अभियोगवसेन वुत्तं, दुतियपदं अञ्ञेसं भण्डं हरन्तस्स गच्छतो वसेन, ततियपदं उपनिक्खित्तभण्डवसेन, चतुत्थं सविञ्ञाणकवसेन, पञ्चमं थले निक्खित्तादिवसेन वुत्तन्ति वेदितब्बं.

इदानि नेसं अत्थयोजनं दस्सेतुं ‘‘तत्था’’तिआदिमाह. तत्थ तत्थाति तेसु द्वीसु पञ्चकेसु. इतरन्ति एकभण्डपञ्चकं. आरामन्ति पुप्फारामफलारामं. अभियुञ्जतीति (पारा. अट्ठ. १.१०२) परसन्तकं ‘‘मम सन्तकोव अय’’न्ति मुसा भणित्वा अभियुञ्जति चोदेति, अट्टं करोतीति अत्थो. सम्पजानमुसावादेपि अदिन्नादानस्स पुब्बपयोगत्ता दुक्कटन्ति आह ‘‘आपत्ति ¶ दुक्कटस्सा’’ति, दुक्कटसङ्खाता आपत्ति भवेय्याति अत्थो. अथ वा दुक्कटसञ्ञितस्स वीतिक्कमस्स आपज्जनन्ति अत्थो. एस नयो ‘‘आपत्ति थुल्लच्चयस्सा’’तिआदीसु. सामिकस्स विमतिं उप्पादेतीति विनिच्छयकुसलताय, बलवनिस्सितादिभावेन वा आरामसामिकस्स संसयं जनेति. कथं? तञ्हि तथा विनिच्छयप्पसुतं दिस्वा सामिको चिन्तेति ‘‘सक्खिस्सामि नु खो अहं इमं आरामं अत्तनो कातुं, न सक्खिस्सामि नु खो’’ति. एवं तस्स विमति उप्पज्जमाना तेन उप्पादिता होति. धुरं निक्खिपतीति यदा पन सामिको ‘‘अयं थद्धो कक्खळो जीवितब्रह्मचरियन्तरायम्पि मे करेय्य, अलं दानि मय्हं इमिना आरामेना’’ति धुरं निक्खिपति, उस्साहं ठपेति, अत्तनो सन्तककरणे निरुस्साहो होतीति अत्थो. आपत्ति पाराजिकस्स सचे सयम्पि कतधुरनिक्खेपो चाति अधिप्पायो. अथ पन सामिकेन धुरे निक्खित्तेपि अभियुञ्जको धुरं अनिक्खिपित्वाव ‘‘इमं सुट्ठु पीळेत्वा मम आणापवत्तिं दस्सेत्वा किङ्कारप्पटिस्साविभावे ठपेत्वा दस्सामी’’ति दातब्बभावे सउस्साहो, रक्खति ताव. अथापि अभियुञ्जको अच्छिन्दित्वा ‘‘न दानि इमं इमस्स दस्सामी’’ति धुरं निक्खिपति, सामिको पन धुरं न निक्खिपति, पक्खं परियेसति, कालं आगमेति, ‘‘लज्जिपरिसं ताव लभामि, पच्छा जानिस्सामी’’ति गहणेयेव सउस्साहो होति, रक्खतियेव. यदा पन ‘‘सोपि न दस्सामी’’ति, ‘‘सामिकोपि न लच्छामी’’ति एवं उभो धुरं निक्खिपन्ति, तदा अभियुञ्जकस्स पाराजिकं.

अञ्ञस्स भण्डं हरन्तोति वेतनेन वा मित्तभावेन वा अञ्ञस्स भण्डं हरन्तो. सीसे भारन्ति ¶ सीसे ठितभारं. सीसस्स ताव पुरिमगले गलवाटको, पिट्ठिगले केसञ्चि केसन्ते आवट्टो होति, गलस्सेव उभोसु पस्सेसु केसञ्चि केसा ओरुय्ह जायन्ति, ये ‘‘कण्णचूळिका’’ति वुच्चन्ति, तेसं अधोभागो चाति अयं हेट्ठिमको परिच्छेदो, ततो उपरि सीसं, एत्थन्तरे ठितभारन्ति वुत्तं होति. खन्धं ओरोपेतीति उभोसु पस्सेसु कण्णचूळिकाहि पट्ठाय हेट्ठा, कप्परेहि पट्ठाय उपरि, पिट्ठिगलावट्टतो च गलवाटकतो च पट्ठाय हेट्ठा, पिट्ठिवेमज्झावट्टतो च उरपरिच्छेदमज्झे, हदयावाटकतो च पट्ठाय उपरि खन्धो, तं ओरोपेति.

अयं ¶ पनेत्थ विनिच्छयो – यो भिक्खु ‘‘इदं गहेत्वा एत्थ याही’’ति (पारा. अट्ठ. १.१०१) सामिकेहि अनाणत्तो सयमेव ‘‘मय्हं इदं नाम देथ, अहं वो भण्डं वहामी’’ति तेसं भण्डं सीसेन आदाय गच्छन्तो थेय्यचित्तेन तं भण्डं आमसति, दुक्कटं. यथावुत्तसीसपरिच्छेदं अनतिक्कमन्तोव इतो चितो च घंसन्तो सारेतिपि पच्चासारेतिपि, थुल्लच्चयं. खन्धं ओरोपितमत्ते किञ्चापि सामिकानं ‘‘वहतू’’ति चित्तं अत्थि, तेहि पन अनाणत्तत्ता पाराजिकं. खन्धं पन अनोरोपेत्वापि सीसतो केसग्गमत्तम्पि चावेन्तस्स पाराजिकं. यमकभारस्स पन एको भागो सीसे पतिट्ठाति, एको पिट्ठियं, तत्थ द्विन्नं ठानानं वसेन विनिच्छयो वेदितब्बो. अयं पन सुद्धसीसभारस्सेव वसेन वुत्तो. यो चायं सीसभारे वुत्तो, खन्धभारादीसुपि अयमेव विनिच्छयो वेदितब्बो.

उपनिक्खित्तं भण्डन्ति सङ्गोपनत्थाय अत्तनो हत्थे परेहि ठपितभण्डं. अहं न गण्हामीति सम्बन्धो. अतीतत्थे चेतं वत्तमानवचनं, नाहं गहेसिन्ति अत्थो. दुक्कटं (पारा. अट्ठ. १.१११) सम्पजानमुसावादेपि अदिन्नादानस्स पुब्बपयोगत्ता. ‘‘किं तुम्हे भणथ, नेविदं मय्हं अनुरूपं, न तुम्हाक’’न्तिआदीनि वदन्तस्सापि दुक्कटमेव. सामिकस्स विमतिं उप्पादेतीति ‘‘रहो मया एतस्स हत्थे ठपितं, न अञ्ञो कोचि जानाति, दस्सति नु खो मे, नो’’ति सामिकस्स विमतिं उप्पादेति. धुरं निक्खिपतीति तस्स फरुसादिभावं दिस्वा उस्साहं ठपेति. तत्र सचायं भिक्खु ‘‘किलमेत्वा नं दस्सामी’’ति दाने सउस्साहो, रक्खति ताव. सचे सो दाने निरुस्साहो, भण्डसामिको पन गहणे सउस्साहो, रक्खतेव. यदि पन सो तस्मिं दाने निरुस्साहो, भण्डसामिकोपि ‘‘न मय्हं दस्सती’’ति धुरं निक्खिपति, एवं उभिन्नं धुरनिक्खेपेन भिक्खुनो पाराजिकं. यदिपि मुखेन ‘‘दस्सामी’’ति वदति, चित्तेन पन अदातुकामो, एवम्पि सामिकस्स धुरनिक्खेपेन भिक्खुनो पाराजिकं.

सहभण्डहारकं ¶ नेस्सामीति ‘‘सहभण्डहारकं भण्डं नेस्सामी’’ति चिन्तेत्वा. पठमं पादं अतिक्कामेतीति भण्डहारकं तज्जेत्वा तस्स गमनपथं वारेत्वा अत्तना रुचितमग्गं एकपादं अतिक्कामेति. थलट्ठन्ति (पारा. अट्ठ. १.९५) थले निक्खित्तं, भूमितले वा पासाणपब्बततलादीसु वा यत्थ कत्थचि पटिच्छन्ने वा अप्पटिच्छन्ने वा ठपितन्ति अत्थो. फन्दापेति, थुल्लच्चयन्ति यो फन्दापेति ¶ , तस्स पयोगे पयोगे थुल्लच्चयं, आमसने दुक्कटं, फन्दापने थुल्लच्चयञ्च विसुं विसुं थेय्यचित्तेन आमसनफन्दापनपयोगे करोन्तस्सेव होति. ‘‘एकपयोगेन गण्हन्तस्स पन उद्धारे पाराजिकमेव, न दुक्कटथुल्लच्चयानी’’ति वदन्ति. ठानाति ठितट्ठानतो. सचे तं थलट्ठं रासिकतं होति, अन्तोकुम्भियं भाजनगतकरणमुट्ठिच्छेदनविनिच्छयेन विनिच्छिनितब्बं. सचे एकाबद्धं सिलेसनिय्यासादि, पक्कमधुफाणितविनिच्छयेन विनिच्छिनितब्बं. सचे गरुकं होति भारबद्धं लोहपिण्डितेलमधुघटादि वा, कुम्भियं ठानाचावनविनिच्छयेन विनिच्छिनितब्बं. सङ्खलिकाबद्धस्स च ठानभेदो सल्लक्खेतब्बो. पत्थरित्वा ठपितं पन पावारत्थरणकटसारकादिं उजुकं गहेत्वा आकड्ढति, पारिमन्ते ओरिमन्तेन फुट्ठोकासं अतिक्कन्ते पाराजिकं. तथेव गहेत्वा परतो पेल्लति, पारिमन्ते फुट्ठोकासं ओरिमन्ते अतिक्कन्ते पाराजिकं. वामतो वा दक्खिणतो वा अपनामेन्तस्स वामन्तेन वा दक्खिणन्तेन वा फुट्ठोकासं दक्खिणन्ते वा वामन्ते वा अतिक्कन्ते पाराजिकं. वेठेत्वा उद्धरति, केसग्गमत्तं आकासगतं करोन्तस्स पाराजिकं.

सको हत्थो सहत्थो, तेन निब्बत्तो, तस्स वा सम्बन्धीति साहत्थिको, अवहारो. आणापनं आणत्ति, ताय आणत्तिया निब्बत्तो अवहारो आणत्तिको. निस्सज्जनं निस्सग्गो, सुङ्कघातट्ठाने, परिकप्पितोकासे च ठत्वा भण्डस्स बहि निपातनं, निस्सग्गोव निस्सग्गियो. किरियासिद्धितो पुरेतरमेव पाराजिकापत्तिसङ्खातं अत्थं साधेतीति अत्थसाधको. धुरस्स आलयसङ्खातस्स भारस्स निक्खिपनं परिच्चजनं निरुस्साहभावापज्जनं धुरनिक्खेपो. इदानि ब्यञ्जने आदरं अकत्वा तेसं अत्थमत्तमेव दस्सेन्तो ‘‘तत्थ साहत्थिको नामा’’तिआदिमाह. सहत्थाति सहत्थेन. करणत्थे हि इदं निस्सक्कवचनं. ‘‘असुकस्स भण्डं अवहरा’’ति अञ्ञं आणापेतीति एत्थापि आणत्तिक्खणे एव आपत्ति दट्ठब्बा. यदि एवं इमस्स, अत्थसाधकस्स च को विसेसोति? तं खणं एव गहणे नियुञ्जनं आणत्तिकपयोगो, कालन्तरेन गहणत्थं नियोगो अत्थसाधकोति (सारत्थ. टी. २.९२; वि. वि. टी. १.९२) अयमेतेसं विसेसोति. तेनेवाह ‘‘असुकस्स भण्डं यदा सक्कोसि, तदा तं अवहराति आणापेती’’ति.

सुङ्कघातपरिकप्पितोकासानन्ति ¶ सुङ्कघातञ्च परिकप्पितोकासो च सुङ्कघातपरिकप्पितोकासा, ¶ तेसं. तत्थ सुङ्कघातन्ति (पारा. अट्ठ. १.११३) रुक्खपब्बतादिसञ्ञाणेन नियमितस्स सुङ्कट्ठानस्सेतं अधिवचनं. तञ्हि यस्मा ततो राजदेय्यभागं सुङ्कं अदत्वा नीहरन्ता रञ्ञो सुङ्कं हनन्ति विनासेन्ति, तस्मा ‘‘सुङ्कघात’’न्ति वुत्तं.

कोचि परपरिवेणादीनि पविट्ठो किञ्चि लोभनेय्यभण्डं दिस्वा द्वारप्पमुखादिवसेन यं ठानं ‘‘सचे मं एत्थन्तरे पस्सिस्सन्ति, दट्ठुकामताय गहेत्वा विचरन्तो विय दस्सामि, नो चे पस्सिस्सन्ति, हरिस्सामी’’ति परिकप्पेति, अयं परिकप्पितोकासो. आणत्तिक्खणेयेव पाराजिकन्ति (पारा. अट्ठ. १.१२१) अत्थसाधकचेतनाक्खणेयेव पाराजिकं. सचेपि अवहारको सट्ठिवस्सातिक्कमेनपि तं भण्डं अवहरति, आणापको च अन्तरायेव कालं करोति, हीनाय वा आवत्तति, अस्समणोव हुत्वा कालं वा करिस्सति, हीनाय वा आवत्तिस्सति, अवहारकस्स पन अवहारक्खणेयेव पाराजिकं. पादग्घनकतेलन्ति (पारा. अट्ठ. १.९४) एत्थ पादो नाम कहापणस्स चतुत्थो भागो, तं अग्घतीति पादग्घनकं, पादग्घनकञ्च तं तेलञ्चाति पादग्घनकतेलं. उपाहना आदि येसं वत्थूनं तानि उपाहनादीनि. आदिसद्देन दुकूलसाटकचम्मक्खण्डादीनं गहणं. पक्खिपतीति थेय्यचित्तेन पक्खिपति. तेनाह ‘‘हत्थतो मुत्तमत्तेयेव पाराजिक’’न्ति सचे पन अत्तनोपि कुम्भियं अञ्ञो सप्पिं वा तेलं वा आकिरति, तत्र चायं थेय्यचित्तेन तेलपिवनकं भण्डं पक्खिपति, वुत्तनयेनेव पाराजिकं.

कायेन वा वाचाय वा पयुञ्जनं आणापनं पयोगो, आणत्तस्स भण्डग्गहणतो पुब्बत्ता पुब्बो, इति पुब्बो च सो पयोगो चाति पुब्बपयोगो. पयोगेन सह वत्तमानो अवहारो सहपयोगो. समं एकी हुत्वा विदहित्वा मन्तेत्वा अवहरणं संविधावहारो, अञ्ञमञ्ञं सञ्ञुप्पत्तिया कतावहारोति वुत्तं होति. पुब्बण्हादिकालपरिच्छेदेन सञ्जाननं सङ्केतो, तस्स कम्मं सङ्केतकम्मं. निमित्तस्स कम्मं निमित्तकम्मं, सञ्ञुप्पादनत्थं कस्सचि निमित्तस्स करणन्ति अत्थो. तत्थाति यथावुत्तेसु पुब्बपयोगादीसु पञ्चसु. खिलादीनि सङ्कामेत्वा खेत्तादिग्गहणवसेनाति खिलं, रज्जुं, वतिं, मरियादं वा पाकारं ¶ वा सङ्कामेत्वा खेत्तग्गहणवसेन, खिलं, रज्जुं, वतिं, मरियादं वा पाकारं वा सङ्कामेत्वा वत्थुग्गहणवसेन. सचे पन द्वीहि खिलेहि गहेतब्बं होति, पठमे खिले थुल्लच्चयं, दुतिये पाराजिकं (पारा. अट्ठ. १.१०४). सचे तीहि गहेतब्बं होति, पठमे दुक्कटं, दुतिये थुल्लच्चयं, ततिये पाराजिकं. एवं बहुकेसुपि अवसाने द्वे ठपेत्वा पुरिमेहि दुक्कटं, अवसाने द्विन्नं एकेन थुल्लच्चयं ¶ , इतरेन पाराजिकं. रज्जुपसारणादीसुपि एसेव नयो. यं पन समन्तपासादिकायं ‘‘तञ्च खो सामिकानं धुरनिक्खेपेना’’ति (पारा. अट्ठ. १.१०४) वुत्तं, तं ‘‘खेत्तं अभियुञ्जति, आपत्ति दुक्कटस्सा’’तिआदि (पारा. १०४) -अधिकारे वुत्तत्ता अभियोगवसेन गहणं सन्धायाति दट्ठब्बं. संविदहित्वाति एतस्सेव वेवचनं. संमन्तयित्वाति एकच्छन्दताय एकज्झासयताय भणित्वाति अत्थो. इमस्मिं अवहारे असम्मोहत्थं ‘‘एवं संविदहित्वा गतेसु ही’’तिआदिमाह. सञ्जाननकम्मन्ति पुब्बण्हादिकालपरिच्छेदवसेन सञ्ञाणकरणं. तेनाह ‘‘सचे ही’’तिआदि.

एत्थ च ‘‘पुरेभत्तं अवहरा’’ति वुत्ते (पारा. अट्ठ. १.११९) अज्ज वा पुरेभत्तं अवहरतु, स्वे वा, अनागते वा संवच्छरे, नत्थि विसङ्केतो, उभिन्नम्पि पाराजिकं. सचे पन ‘‘अज्ज पुरेभत्तं अवहरा’’ति वुत्ते स्वे अवहरति. ‘‘अज्जा’’ति नियमितं सङ्केतं अतिक्कम्म पच्छा अवहटं होति. सचे ‘‘स्वे पुरेभत्तं अवहरा’’ति वुत्ते अज्ज पुरेभत्तं अवहरति, ‘‘स्वे’’ति नियमितं तं सङ्केतं अपत्वा पुरे अवहटं होति, एवं अवहरन्तस्स अवहारकस्सेव पाराजिकं, मूलट्ठस्स अनापत्ति. ‘‘स्वेव पुरेभत्त’’न्ति वुत्ते तदहेव वा, स्वे पच्छाभत्तं वा अवहरन्तोपि तंसङ्केततो पुरे च पच्छा च अवहरति. यो पन एवंअकत्वा यथापरिच्छिन्नकालमेव अवहरति, अयं सङ्केततो अपुरे अपच्छा तं अवहरतीति वेदितब्बो. एस नयो पच्छाभत्तरत्तिन्दिवेसुपि, पुरिमयाममज्झिमयामपच्छिमयामकाळजुण्हमासउतुसंवच्छरादिवसेनापि एत्थ सङ्केतविसङ्केतता वेदितब्बा. परभण्डावहारसञ्ञुप्पादस्स हेतुत्ता अक्खिनिखणादीनेव निमित्तन्ति अक्खिनिखणादिनिमित्तं, तस्स करणं अक्खिनिखणादिनिमित्तकरणं. आदिसद्देन भमुकुक्खेपसीसकम्पनहत्थलङ्घनपाणिप्पहारअङ्गुलिफोटनगीवुन्नामनउक्कासनादिअनेकप्पकारं सङ्गण्हाति. सेसमेत्थ सङ्केतकम्मे वुत्तनयमेव.

थेनो ¶ वुच्चति चोरो, तस्स भावो थेय्यं, तेन अवहरणं थेय्यावहारो. पसय्ह अभिभवित्वा अवहरणं पसय्हावहारो. वत्थसुत्तादिकं परिच्छिज्ज कप्पनं परिकप्पो, तेन अवहरणं परिकप्पावहारो. तिणपण्णादीहि पटिच्छन्नस्स अवहारो पटिच्छन्नावहारो. कुसेन अवहारो कुसावहारो. कूटमानकूटकहापणादीहीति एत्थ कूटमानं (दी. नि. अट्ठ. १.१०; म. नि. अट्ठ. १.२९३; पु. प. अट्ठ. १७९) नाम हदयभेदसिखाभेदरज्जुभेदवसेन तिविधं मानकूटं. तत्थ हदयन्ति नाळिआदिमानभाजनानं अब्भन्तरं, तस्स भेदो छिद्दकरणं हदयभेदो, सो सप्पितेलादिमिननकाले लब्भति. तानि हि गण्हन्तो हेट्ठाछिद्देन मानेन ‘‘सणिकं ¶ आसिञ्चा’’ति वत्वा अन्तोभाजने बहुं पग्घरापेत्वा गण्हाति, ददन्तो च छिद्दं पिधाय सीघं पूरेत्वा देति.

सिखाभेदो पन तिलतण्डुलादिमिननकाले लब्भति. तानि हि गण्हन्तो सणिकं सिखं उस्सापेत्वा गण्हाति, ददन्तो वेगेन पूरेत्वा सिखं छिन्दन्तो देति.

रज्जुभेदो खेत्तवत्थुमिननकाले लब्भति. खेत्तादिं मिनन्ता हि अमहन्तम्पि महन्तं कत्वा मिनन्ति, महन्तम्पि अमहन्तं.

तम्बकंसादिमयो कूटो कहापणो कूटकहापणो. आदिसद्देन तुलाकूटकंसकूटवञ्चनादिं सङ्गण्हाति. तत्थ तुलाकूटं रूपकूटं, अङ्गकूटं, गहणकूटं, पटिच्छन्नकूटन्ति चतुब्बिधं होति. तत्थ रूपकूटं नाम द्वे तुला समरूपा कत्वा गण्हन्तो महतिया गण्हाति, ददन्तो खुद्दिकाय देति. अङ्गकूटं नाम गण्हन्तो पच्छाभागे हत्थेन तुलं अक्कमति, ददन्तो पुब्बभागे अक्कमति. गहणकूटं नाम गण्हन्तो मूले रज्जुं गण्हाति, ददन्तो अग्गे. पटिच्छन्नकूटं नाम तुलं सुसिरं कत्वा अन्तो अयचुण्णं पक्खिपित्वा गण्हन्तो तं पच्छाभागे करोति, ददन्तो अग्गभागे.

कंसो वुच्चति सुवण्णपाति, ताय वञ्चनं कंसकूटं. कथं? एकं सुवण्णपातिं कत्वा अञ्ञा द्वे तिस्सो लोहपातियो सुवण्णवण्णा करोन्ति. ततो जनपदं गन्त्वा किञ्चिदेव अड्ढं कुलं पविसित्वा ‘‘सुवण्णभाजनानि किणाथा’’ति वत्वा अग्घे पुच्छिते समग्घतरं दातुकामा होन्ति ¶ . ततो तेहि ‘‘कथं इमेसं सुवण्णभावो जानितब्बो’’ति वुत्ते ‘‘वीमंसित्वा गण्हथा’’ति सुवण्णपातिं पासाणे घंसित्वा सब्बा पातियो दत्वा गच्छति.

वञ्चनं नाम तेहि तेहि उपायेहि परेसं वञ्चनं. तत्रिदमेकं वत्थु – एको किर लुद्दको मिगञ्च मिगपोतकञ्च गहेत्वा आगच्छति, तमेको धुत्तो ‘‘किं भो मिगो अग्घति, किं मिगपोतको’’ति आह. ‘‘मिगो द्वे कहापणे, मिगपोतको एक’’न्ति वुत्ते एकं कहापणं दत्वा मिगपोतकं गहेत्वा थोकं गन्त्वा निवत्तेन्तो ‘‘न मे भो मिगपोतकेन अत्थो, मिगं मे देही’’ति आह. ‘‘तेन हि द्वे कहापणे देही’’ति आह. सो आह ‘‘ननु भो मया पठमं एको कहापणो दिन्नो’’ति. आम दिन्नो, इमं मिगपोतकं गण्ह, एवं सो च कहापणो ¶ , अयञ्च कहापणग्घनको मिगपोतकोति द्वे कहापणा भविस्सन्तीति. सो ‘‘कारणं वदती’’ति सल्लक्खेत्वा मिगपोतकं गहेत्वा मिगं अदासीति.

पसय्हाति (पारा. अट्ठ. १.१३८) परे अभिभुय्य. गामं घातेन्तीति गामघातका, गामं पहरन्ता चोरा, ते आदि येसं ते गामघातकादयो. आदिसद्देन चेत्थ पन्थघातकादीनं गहणं. उद्धारेयेव पाराजिकन्ति ‘‘सचे साटको भविस्सति, गण्हिस्सामी’’ति परिकप्पस्स पवत्तत्ता, साटकस्स च तत्थ सब्भावतो. पदवारेन कारेतब्बोति भूमियं अनिक्खिपित्वाव वीमंसितत्ता वुत्तं. भण्डदेय्यन्ति यं परस्स नट्ठं, तस्स मूलं वा तदेव वा भण्डं दातब्बन्ति अत्थो.

तस्साति यो एवं परिकप्पेति, तस्स. इमस्स ‘‘अवहारो होती’’ति इमिना सम्बन्धो.

परेसन्ति कीळन्तानं, पविसन्तानं वा परेसं मनुस्सानं. ‘‘पच्छा गण्हिस्सामी’’ति पंसुना वा पण्णेन वा पटिच्छादेतीति ‘‘सचे इदानेव ओनमित्वा गण्हिस्सामि, ‘किं समणो गण्हाती’ति मं जानित्वा विहेठेय्युं पच्छा गण्हिस्सामी’’ति पंसुना वा पण्णेन वा पटिच्छादेति. उद्धारो नत्थीति ठानाचावनं नत्थीति अत्थो. सामिकाति अन्तागामं पविसितुकामा भण्डसामिका मनुस्सा. उद्धारेति उद्धरणे, ठानाचावनेति अत्थो ¶ . ठानाचावनञ्चेत्थ हेट्ठा वुत्तनयानुसारेन वेदितब्बं. पवेसेतीति ठानाचावनवसेन पवेसेति, हेट्ठिमन्तेन फुट्ठोकासं केसग्गमत्तम्पि उपरिमन्तेन अतिक्कामेन्तो पवेसेतीति अत्थो.

समग्घतरन्ति अप्पग्घतरं. उद्धटमत्ते अवहारोति सकभावप्पयोगस्स निट्ठापितत्ता, न अत्थसाधकवसेन. उद्धारे रक्खति अत्तनो कोट्ठासे पातेतुकामताय उद्धटत्ता. एसेव नयो पातनेपि रक्खतीति एत्थापि. ‘‘उद्धारेयेव रक्खती’’ति इमिनाव पातने न रक्खतीति अत्थे सिद्धेपि अत्थसाधकवसेन अत्थं दस्सेतुं ‘‘तं उद्धरित्वा’’तिआदि वुत्तं. सचे पन द्वीसुपि कोट्ठासेसु पतितदण्डके अदस्सनं गमेति (पारा. अट्ठ. १.१३८), ततो अवसेसभिक्खूसु गतेसु इतरो ‘‘मय्हं, भन्ते, दण्डको न पञ्ञायती’’ति, ‘‘मय्हम्पि, आवुसो, न पञ्ञायती’’ति, ‘‘कतमो पन, भन्ते, मय्हं भागो’’ति. ‘‘अयं तुय्हं भागो’’ति अत्तनो भागं दस्सेति. तस्मिं विवदित्वा वा अविवदित्वा वा तं गण्हित्वा गते इतरो तस्स भागं उद्धरति, उद्धारे ¶ पाराजिकं. सचेपि तेन ‘‘अहं मम भागं तुय्हं न देमि, त्वं पन अत्तनो भागं ञत्वा गण्हा’’ति वुत्तेपि ‘‘नायं ममा’’ति जानन्तोपि तस्सेव भागं गण्हाति, उद्धारे पाराजिकं. सचे पन इतरो ‘‘अयं तुय्हं भागो, अयं मय्हं भागोति किं इमिना विवादेना’’ति चिन्तेत्वा ‘‘मय्हं वा पत्तो होतु, तुम्हाकं वा, यो वरभागो, तं तुम्हे गण्हथा’’ति वदति, दिन्नकं नाम गहितं होति, नत्थेत्थ अवहारो. सचे सो विवादभीरुको भिक्खु ‘‘यं तुय्हं रुच्चति, तं गण्हा’’ति वुत्तो अत्तनो पत्तं वरभागं ठपेत्वा लामकंयेव गहेत्वा गच्छति, ततो इतरस्स विचिनितावसेसं गण्हन्तस्सापि अवहारो नत्थेव. एवमिमानि पञ्च पञ्चकानि समोधानेत्वा इमे पञ्चवीसति अवहारा वेदितब्बा. निट्ठितो ‘‘आदियेय्या’’ति इमस्स पदस्स विनिच्छयो. तेनाह ‘‘इति यं वुत्तं…पे… यस्सत्थो पकासितो होती’’ति.

राजानोति किञ्चापि अविसेसेन वुत्तं, अपराधानुरूपं पन छेज्जभेज्जानुसासको पमाणभूतोव इधाधिप्पेतोति आह ‘‘राजानोति इदं बिम्बिसारंयेव सन्धाय वुत्त’’न्ति. सो हि धम्मिकराजत्ता यथापवेणियाव करोति. अञ्ञे पन काकणिकमत्तस्सपि सीसं छिन्देय्युं ¶ , बहुकस्सापि न वा किञ्चि करेय्युं. तेनाह ‘‘अञ्ञे पना’’तिआदि. हननं नाम पोथनञ्चेव छेदनञ्चाति आह ‘‘हत्थादीहि वा’’तिआदि. आदिसद्देन पादकसावेत्तअड्ढदण्डकानं गहणं. रज्जुबन्धनादीहीति आदिसद्देन अन्दुबन्धनसङ्खलिकाबन्धनघरबन्धननगरबन्धनपुरिसगुत्तीनं गहणं. नीहरेय्युन्ति रट्ठतो निक्खामेय्युं. चोरोसि…पे… थेनोसीति एत्थ ‘‘परिभासेय्यु’’न्ति पदं अज्झाहरितब्बं ऊनत्ता पदप्पयोगस्स. तेनाह ‘‘इमेहि वचनेहि परिभासेय्यु’’न्ति. यथारूपं पन यस्मा पादतो पट्ठाय होति, तस्मा ‘‘पादस्स वा पादारहस्स वा’’ति आह. पोराणकस्स कहापणस्स चतुत्थो भागो पादो, पादं अरहतीति पादारहो, तस्स पादस्स वा पादारहस्स वा. एत्थ च पादेन कहापणस्स चतुत्थभागं अकप्पियभण्डमेव दस्सेति, पादारहेन पादग्घनकं कप्पियभण्डं. एत्तावता हेट्ठिमन्तदस्सनेन सब्बाकारेन दुतियपाराजिकप्पहोनकवत्थु दस्सितं होतीति दट्ठब्बं. पोराणकस्साति (सारत्थ. टी. २.८८; वि. वि. टी. १.८८) पोराणसत्थानुरूपं उप्पादितस्स लक्खणसम्पन्नस्स नीलकहापणसदिसस्स कहापणस्स. एतेन रुद्रदामकादीनि पटिक्खिपति.

एवं असाधारणविनिच्छयं दस्सेत्वा इदानि साधारणविनिच्छयं दस्सेतुं ‘‘राजगहे’’तिआदिमाह. रञ्ञोति बिम्बिसाररञ्ञो. मासको नाम पोराणकस्स कहापणस्स वीसतिमो भागो. यो लोके ‘‘मञ्जेट्ठी’’तिपि वुच्चति. इदानि इमस्मिं अदिन्नादाने विनिच्छयं दस्सेतुं ‘‘सब्बत्था’’तिआदि वुत्तं. सब्बत्थाति ऊनमासकातिरेकमासकपञ्चमासकेसु. परिहीनापरिहीनवसेनाति अग्घस्स परिहीनापरिहीनवसेन. अयमेत्थ सङ्खेपो ¶ , वित्थारो पन एवं वेदितब्बो – इदञ्हि अदिन्नादानं विनिच्छिनन्तेन ओतिण्णे वत्थुस्मिं सहसा अविनिच्छिनित्वा पञ्च ठानानि ओलोकेतब्बानि. यानि सन्धाय पोराणा आहु –

‘‘वत्थुं कालञ्च देसञ्च, अग्घं परिभोगपञ्चमं;

तुलयित्वा पञ्चठानानि, धारेय्यत्थं विचक्खणो’’ति. (पारा. अट्ठ. १.९२);

तत्थ च वत्थूति भण्डं. अवहारकेन हि ‘‘मया इदं नाम अवहट’’न्ति वुत्तेपि आपत्तिं अनारोपेत्वाव तं भण्डं ससामिकं वा असामिकं वाति ¶ उपपरिक्खितब्बं. ससामिकेपि सामिकानं सालयभावो वा निरालयभावो वा उपपरिक्खितब्बो. सचे तेसं सालयकाले अवहटं, भण्डं अग्घापेत्वा आपत्ति कारेतब्बा. सचे निरालयकाले, न पाराजिकेन कारेतब्बो. भण्डसामिकेसु पन भण्डं आहरापेन्तेसु भण्डं दातब्बं. अयमेत्थ सामीचि. एवं वत्थु ओलोकेतब्बं.

कालोति अवहारकालो. तदेव हि भण्डं कदाचि समग्घं होति, कदाचि महग्घं. तस्मा तं भण्डं यस्मिं काले अवहटं, तस्मिंयेव काले यो तस्स अग्घो, तेन अग्घेन आपत्ति कारेतब्बा. एवं कालो ओलोकेतब्बो.

देसोति अवहारदेसो. तञ्हि भण्डं यस्मिं देसे अवहटं, तस्मिंयेव देसे यो तस्स अग्घो, तेन अग्घेन आपत्ति कारेतब्बा. भण्डुट्ठानदेसे हि भण्डं समग्घं होति, अञ्ञत्थ महग्घं. एवं देसो ओलोकेतब्बो.

अग्घोति (पारा. अट्ठ. १.९२) भण्डग्घो. नवभण्डस्स हि यो अग्घो, सो पच्छा परिहायति. यथा नवधोतो पत्तो अट्ठ वा दस वा अग्घति, सो पच्छा भिन्नो वा छिद्दो वा आणिगण्ठिकाहतो वा अप्पग्घो होति, तस्मा न सब्बदा भण्डं पकतिअग्घेनेव कातब्बन्ति. एवं अग्घो ओलोकेतब्बो.

परिभोगोति भण्डस्स परिभोगो. परिभोगेनापि हि वासिआदिभण्डस्स अग्घो परिहायति, तस्मा एवं उपपरिक्खितब्बं – सचे कोचि कस्सचि पादग्घनकं वासिं हरति, तत्र ¶ वासिसामिको पुच्छितब्बो ‘‘तया अयं वासि कित्तकेन कीता’’ति. ‘‘पादेन, भन्ते’’ति. ‘‘किं पन ते किणित्वाव ठपिता, उदाहु तं वलञ्जेसी’’ति? सचे वदति ‘‘एकदिवसं मे दन्तकट्ठं वा रजनछल्लि वा पत्तपचनदारु वा छिन्नं, घंसित्वा वा निसिता’’ति. अथस्स पोराणो अग्घो भट्ठोति वेदितब्बो. यथा च वासिया, एवं अञ्जनिया वा अञ्जनिसलाकाय वा कुञ्चिकाय वा पलालेन वा थुसेहि वा इट्ठकचुण्णेन वा एकवारं घंसित्वा धोवनमत्तेनापि अग्घो भस्सति. तिपुमण्डलस्स मकरदन्तच्छेदनेनापि परिमद्दनमत्तेनापि, उदकसाटिकाय सकिं निवासनपारुपनेनापि, परिभोगसीसेन ¶ अंसे वा सीसे वा ठपनमत्तेनापि, तण्डुलादीनं पप्फोटनेनापि ततो एकं वा द्वे वा अपनयनेनपि, अन्तमसो एकं पासाणसक्खरं उद्धरित्वा छड्डितमत्तेनापि, सप्पितेलादीनं भाजनन्तरपरिवत्तनेनपि, अन्तमसो ततो मक्खिकं वा किपिल्लिकं वा उद्धरित्वा छड्डितमत्तेनपि, गुळपिण्डकस्स मधुरभावजाननत्थं नखेन विज्झित्वा अणुमत्तं गहितमत्तेनपि अग्घो भस्सति. तस्मा यं किञ्चि पादग्घनकं वुत्तनयेनेव सामिकेन परिभोगेन ऊनं कतं होति, न तं अवहारको भिक्खु पाराजिकेन कारेतब्बोति. एवं परिभोगो ओलोकेतब्बो.

एवं इमानि तुलयित्वा पञ्च ठानानि धारेय्य अत्थं विचक्खणो आपत्तिं वा अनापत्तिं वा गरुकं वा लहुकं वा आपत्तिं यथाठाने ठपेय्याति.

एवं तत्थ विनिच्छयं दस्सेत्वा इदानि अनापत्तिं दस्सेन्तो ‘‘सकसञ्ञिस्सा’’तिआदिमाह. तत्थ सकसञ्ञिस्साति ‘‘मय्हं सन्तकं इदं भण्ड’’न्ति एवं सकसञ्ञिस्स परभण्डम्पि गण्हतो गहणे अनापत्ति, गहितं पन पुन दातब्बं. सचे सामिकेहि ‘‘देही’’ति वुत्तो न देति, तेसं धुरनिक्खेपे पाराजिकं. विस्सासग्गाहेति (पारा. अट्ठ. १.१३१) विस्सासग्गहणेपि अनापत्ति. विस्सासग्गाहलक्खणं पन इमिना सुत्तेन जानितब्बं –

‘‘अनुजानामि, भिक्खवे, पञ्चहङ्गेहि समन्नागतस्स विस्सासं गहेतुं, सन्दिट्ठो च होति, सम्भत्तो च आलपितो च जीवति च जानाति च ‘गहिते मे अत्तमनो’’’ति (महाव. ३५६).

तत्थ सन्दिट्ठोति दिट्ठमत्तकमित्तो. सम्भत्तोति दळ्हमित्तो. आलपितोति ‘‘मम सन्तकं यं इच्छसि, तं गण्हेय्यासि, आपुच्छित्वा गहणे कारणं नत्थी’’ति वुत्तो. जीवतीति अनुट्ठानसेय्याय ¶ सयितोपि याव जीवितिन्द्रियुपच्छेदं न पापुणाति. गहिते च अत्तमनोति गहिते तुट्ठचित्तो. एवरूपस्स सन्तकं ‘‘गहिते मे अत्तमनो भविस्सती’’ति जानन्तेन गहेतुं वट्टति. अनवसेसपरियादानवसेन चेतानि पञ्चङ्गानि वुत्तानि. विस्सासग्गाहो पन तीहि अङ्गेहि रुहति. कथं? सन्दिट्ठो, जीवति, गहिते अत्तमनो, सम्भत्तो, जीवति, गहिते अत्तमनो, आलपितो, जीवति, गहिते अत्तमनोति एवं.

यो ¶ पन जीवति, न च गहिते अत्तमनो होति, तस्स सन्तकं विस्सासभावेन गहितम्पि पुन दातब्बं. ददन्तेन च मतकधनं ताव ये तस्स धने इस्सरा गहट्ठा वा पब्बजिता वा, तेसं दातब्बं. अनत्तमनस्स सन्तकं तस्सेव दातब्बं. यो पन पठमंयेव ‘‘सुट्ठु कतं तया मम सन्तकं गण्हन्तेना’’ति वचीभेदेन वा चित्तुप्पादमत्तेन वा अनुमोदित्वा पच्छा केनचि कारणेन कुपितो, सो पच्चाहरापेतुं न लभति. यो च अदातुकामो, चित्तेन पन अधिवासेति, न किञ्चि वदति, सोपि पुन पच्चाहरापेतुं न लभति. यो पन ‘‘मया तुम्हाकं सन्तकं गहित’’न्ति वा ‘‘परिभुत्त’’न्ति वा वुत्तो गहितं वा होतु, परिभुत्तं वा, ‘‘मया पन तं केनचिदेव करणीयेन ठपितं, पाकतिकं कातुं वट्टती’’ति वदति, अयं पच्चाहरापेतुं लभति.

तावकालिकेति ‘‘पटिदस्सामि पटिकरिस्सामी’’ति एवं गण्हन्तस्स तावकालिकेपि गहणे अनापत्ति. गहितं पन सचे भण्डसामिको पुग्गलो वा गणो वा ‘‘तुय्हेवेतं होतू’’ति अनुजानाति, इच्चेतं कुसलं. नो चे अनुजानाति, आहरापेन्ते दातब्बं. सङ्घसन्तकं पन पटिदातुमेव वट्टति.

पेतपरिग्गहेति एत्थ पन पेत्तिविसये उपपन्नापि, कालं कत्वा तस्मिंयेव अत्तभावे निब्बत्तापि, चातुमहाराजिकादयो देवापि सब्बे ‘‘पेता’’त्वेव सङ्ख्यं गता, तेसं परिग्गहे अनापत्ति. देवताय पन उद्दिस्स बलिकम्मं करोन्तेहि रुक्खादीसु लग्गितसाटके वत्तब्बमेव नत्थि. तञ्च खो आरक्खकेहि अपरिग्गहिते, परिग्गहितं पन गहेतुं न वट्टति (सारत्थ. टी. २.१३१).

तिरच्छानगतपरिग्गहेति नागसुपण्णादीनं तिरच्छानगतानं परिग्गहे. सचेपि हि देवो वा नागसुपण्णो वा मनुस्सरूपेन आपणं पसारेति, ततो चस्स सन्तकं कोचि दिब्बचक्खुको भिक्खु तं ञत्वा गहेत्वा गच्छति, वट्टति.

पंसुकूलसञ्ञिस्साति ¶ ‘‘असामिकं इदं पंसुकूल’’न्ति एवसञ्ञिस्सापि गहणे अनापत्ति. सचे पन तं ससामिकं होति, आहरापेन्ते दातब्बं. उम्मत्तकादीनि पुब्बे वुत्तप्पकारानेव. आदिकम्मिको पनेत्थ धनियो ¶ . अवसेसानं पन रजकभण्डिकादिचोरानं छब्बग्गियादीनं आपत्तियेव.

सचित्तकेहि तीहि समुट्ठानेहि इदं समुट्ठातीति आह ‘‘अदिन्नादानसमुट्ठान’’न्ति. तथा हि साहत्थिकं कायचित्ततो समुट्ठाति. आणत्तिकं वाचाचित्ततो समुट्ठाति. साहत्तिकाणत्तिकं कायवाचाचित्ततो समुट्ठाति, तञ्च खो ‘‘भारियमिदं, त्वं एकपस्सं गण्ह, अहं एकपस्स’’न्ति संविधाय उभयेसं पयोगेन एकस्स वत्थुनो ठानाचावने लब्भति. ‘‘कायवचीकम्म’’न्ति अवचनं पन कायवाचानं ईदिसे ठाने अङ्गमत्तत्ता. याय पन चेतनाय समुट्ठापितो पयोगो साहत्थिको वा आणत्तिको वा पधानभावेन ठानाचावनं साधेति, तस्सा वसेन आपत्ति कारेतब्बा. अञ्ञथा साहत्थिकं वा आणत्तिकस्स अङ्गं न होति, आणत्तिकं वा साहत्थिकस्साति इदं विरुज्झति. ‘‘अदिन्नं आदियामी’’ति सञ्ञाय अभावेन मुच्चनतो सञ्ञाविमोक्खं. कायेन कतं कम्मं कायकम्मं, कायद्वारेन कतन्ति अत्थो. वचीकम्मन्ति एत्थापि एसेव नयो. तुट्ठो वा भीतो वा मज्झत्तो वा नं आपज्जतीति तिवेदनं. सेसं पठमसिक्खापदे वुत्तनयेनेव वेदितब्बं.

दुतियपाराजिकवण्णना निट्ठिता.

३. ततियपाराजिकवण्णना

सन्ति सहत्थे उपसग्गो. तेन सद्धिं उस्सुक्कवचनमेतं ‘‘सञ्चिच्चा’’ति आह ‘‘सञ्चेतेत्वा’’तिआदि. उस्सुक्कवचनन्ति एत्थ उस्सुक्कवचनं (सारत्थ. टी. २.१७२) नाम पुब्बकालकिरियावचनं. अयञ्हि समानकत्तुकेसु पुब्बापरकालकिरियावचनेसु पुब्बकालकिरियावचनस्स निरुत्तिवोहारो. इदानि ‘‘सद्धिं चेतेत्वा’’ति इमिना सङ्खेपेन वुत्तमेवत्थं पाकटं कत्वा दस्सेतुं ‘‘पाणो’’तिआदिमाह. तत्थ ‘‘पाणो’’ति सञ्ञाय सद्धिंयेवाति ‘‘पाणो’’ति सञ्ञं अविजहित्वा एव, ‘‘पाणो’’ति सञ्ञुप्पत्तिया अनन्तरन्ति वुत्तं होति. एवञ्च कत्वा कथं एकक्खणे एकस्स चित्तस्स उभयारम्मणभावोति एदिसी चोदना अनवकासाति दट्ठब्बं. केचि पन ‘‘ञातपरिञ्ञाय ¶ दिट्ठसभावेसु धम्मेसु तीरणपरिञ्ञाय तिलक्खणं आरोपेत्वा (सारत्थ. टी. २.१७२) ‘रूपं अनिच्च’न्तिआदिना सभावेन ¶ सद्धिं एकक्खणे अनिच्चादिलक्खणजाननं विय ‘पाणो’ति सञ्ञाय सद्धिंयेव ‘वधामि न’न्ति जानाती’’ति वदन्ति. अपरे पन आचरिया तत्थापि एवं न कथेन्ति. एत्थ च मनुस्सविग्गहो’’ति अवत्वा ‘‘पाणो’’ति वचनं ‘‘मनुस्सो अय’’न्ति अजानित्वा केवलं सत्तसञ्ञाय घातेन्तस्सापि पाराजिकभावदस्सनत्थं वुत्तं. चेतेत्वाति चिन्तेत्वा. पकप्पेत्वाति अभिविचारेत्वा, सन्निट्ठानं करित्वाति अत्थो.

इदानि मनुस्सअत्तभावं आदितो पट्ठाय दस्सेतुं ‘‘मनुस्सविग्गह’’न्तिआदिमाह. तत्थ कललतो पट्ठायाति पटिसन्धिविञ्ञाणेन सद्धिं उप्पन्नकललरूपतो पट्ठाय. कललरूपं नाम इत्थिपुरिसानं कायवत्थुभावदसकवसेन समतिंस रूपानि, नपुंसकानं कायवत्थुदसकवसेन वीसति. तत्थ इत्थिपुरिसानं कललरूपं जातिउण्णाय एकेन अंसुना उद्धटतेलबिन्दुमत्तं होति अच्छं विप्पसन्नं. वुत्तञ्हेतं अट्ठकथायं –

‘‘तिलतेलस्स यथा बिन्दु, सप्पिमण्डो अनाविलो;

एवंवण्णप्पटिभागं, ‘कलल’न्ति पवुच्चती’’ति. (सं. नि. अट्ठ. १.१.२३५; विभ. अट्ठ. २६; पारा. अट्ठ. २.१७२);

एवं परित्तकं वत्थुं आदिं कत्वा याव मरणकाला एत्थन्तरे अनुपुब्बेन वुड्ढिप्पत्तो अत्तभावो मनुस्सविग्गहो नामाति वुत्तं होति. इदञ्च येभुय्यवसेनेव वुत्तं. ओपपातिकसंसेदजापि हि मनुस्सा पाराजिकवत्थुयेव. कललकालेपीति पठमसत्ताहेपि. तत्थ हि सन्ततिवसेन पवत्तमानं कललसङ्खातं अत्तभावं जीविता वोरोपेतुं सक्का, न पन सब्बपठमं कललरूपं. पटिसन्धिचित्तेन हि सद्धिं तिंस कम्मजरूपानि निब्बत्तन्ति. तेसु पन ठितेसुयेव सोळस भवङ्गचित्तानि उप्पज्जित्वा निरुज्झन्ति. एतस्मिं अन्तरे गहितपटिसन्धिकस्स दारकस्स वा मातुया वा पनस्स अन्तरायो नत्थि. अयञ्हि मरणस्स अनोकासो नाम. भेसज्जसम्पदानेनाति गब्भपातनभेसज्जदानेन. ततो वा उद्धम्पीति अब्बुदपेसिकालादीसुपि. जीविता वियोजेय्याति सन्ततिविकोपनवसेन जीवितिन्द्रियतो अपनेय्य.

इमस्स ¶ पनत्थस्साति ‘‘सञ्चिच्च मनुस्सविग्गहं जीविता वोरोपेय्या’’ति (पारा. १७१) इमस्स अत्थस्स. आविभावत्थन्ति पकासनत्थं. पाणस्स अतिपातो पाणातिपातो, पाणवधो पाणघातोति वुत्तं होति. सत्तोति खन्धसन्तानो. तत्थ हि सत्तपञ्ञत्ति. जीवितिन्द्रियन्ति ¶ रूपारूपजीवितिन्द्रियं. रूपजीवितिन्द्रिये हि विकोपिते इतरम्पि तंसम्बन्धताय विनस्सतीति. याय चेतनायाति तस्मिं पाणे पाणसञ्ञिनो कायवचीद्वारानं अञ्ञतरद्वारप्पवत्ताय याय चेतनाय. मनोद्वारे पन पवत्ताय वधकचेतनाय पाणातिपातभावो नत्थि. सा चेतनाति सा जीवितिन्द्रियुपच्छेदकउपक्कमसमुट्ठापिका कायवचीद्वारानं अञ्ञतरद्वारप्पवत्ता वधकचेतना. इदं वुत्तं होति – याय चेतनाय पवत्तमानस्स जीवितिन्द्रियस्स निस्सयभूतेसु महाभूतेसु उपक्कमकरणहेतु तंमहाभूतपच्चया उप्पज्जनकमहाभूता नुप्पज्जिस्सन्ति (सारत्थ. टी. २.१७२), सा तादिसपयोगसमुट्ठापिका चेतना पाणातिपातो. लद्धूपक्कमानि हि महाभूतानि इतरभूतानि विय न विसदानीति समानजातिकानं कारणं न होन्तीति.

पाणातिपातो अस्स अत्थीति पाणातिपाती. संसग्गे अयमीकारो. तेनाह ‘‘वुत्तचेतनाय समङ्गिपुग्गलो’’ति. सको हत्थो सहत्थो, तेन निब्बत्तो पयोगो साहत्थिको. निस्सज्जनं निस्सग्गो, सोव निस्सग्गियो. एवं आणत्तिको. विज्जामयो मन्तपरिजप्पनयोगो. इद्धिमयो कम्मविपाकजिद्धिमयो.

इदानि यथावुत्तेयेव छ पयोगे विभजित्वा दस्सेतुं ‘‘तत्था’’तिआदि वुत्तं. तत्थ तत्थाति तेसु छसु पयोगेसु. साहत्थिकोति एत्थ हत्थो उपलक्खणभावेन गहितोति आह ‘‘कायेन वा’’तिआदि. तत्थ कायेनाति हत्थेन वा पादेन वा मुट्ठिना वा जाणुना वा येन केनचि अङ्गपच्चङ्गेन. कायेकदेसो हेत्थ हत्थादिकायो अवयवे समुदायोपचारो यथा ‘‘गामो दड्ढो’’ति. कायप्पटिबद्धेनाति कायतो अमोचितेन असिआदिना पहरणेन. पहरणन्ति कायविञ्ञत्तिसहिताय वधकचेतनाय अधिप्पेतत्थसाधनं. कायेन वा सत्तिआदीनं, कायप्पटिबद्धेन वा उसुयन्तपासाणादीनं निस्सज्जनन्ति यथासम्भवं योजेतब्बं. तत्थाति तेसु साहत्थिकनिस्सग्गियेसु ¶ . उद्दिस्सानुद्दिस्सभेदतोति उद्दिसित्वा च अनुद्दिसित्वा च पवत्तिभेदेन. उद्दिसनं उद्दिसो, सो एतस्स अत्थीति उद्दिसको, पयोगो, तस्मिं. बज्झति एतेनाति बद्धो, कम्ममेव बद्धो कम्मबद्धो, पाणातिपातोति अत्थो. अथ वा बन्धनं बद्धो, कम्मुना बद्धो कम्मबद्धो, सो अस्स होति, पाणातिपातकम्ममस्स सिद्धन्ति वुत्तं होति. उभयत्थापीति उद्दिसके, अनुद्दिसके चाति द्वीसुपि. पच्छा वा तेनेव रोगेन मरतूति योजना. पहरितक्खणेयेवाति मरणाय पहोनकप्पहारस्स लद्धक्खणेयेव कम्मबद्धो. यदि अवस्सं तेन मरतीति अधिप्पायो. सचे पन मरणाधिप्पायेन पहारं दत्वा तेन अमतस्स पुन अञ्ञेन चित्तेन पहारे दिन्ने पच्छापि पठमप्पहारेनेव मरति, तदाव कम्मबद्धो. अथ दुतियपहारेन मरति ¶ , नत्थि पाणातिपातो. उभयेहि मतेपि पठमप्पहारेनेव कम्मबद्धो, उभयेहिपि अमते नेवत्ति पाणातिपातो. एस नयो बहूहिपि एकस्स पहारे दिन्ने. तत्रापि हि यस्स पहारेन मरति, तस्सेव कम्मबद्धोति. आणापनं नाम वचीविञ्ञत्तिसहिताय वधकचेतनाय अधिप्पेतत्थसाधनं.

इदानि इमस्मिं आणत्तिकपयोगे सङ्केतविसङ्केतभावजाननत्थं छब्बिधं नियमं दस्सेन्तो ‘‘तत्था’’तिआदिमाह. तत्थ तत्थाति तस्मिं आणत्तिकपयोगे. आणत्तिनियामकाति आणत्तिकपयोगसाधिका. एतेसु हि अविरज्झितेसुयेव आणत्तिकपयोगो होति, न अञ्ञथाति.

पुग्गलोति मारेतब्बो पुग्गलो. तेनाह ‘‘यं ही’’तिआदि. आणापकस्स आपत्तीति आणापकस्स आणत्तिक्खणे आपत्ति, आणत्तस्स मारणक्खणे. आणापको मुच्चतीति आणत्तस्सेव कम्मबद्धो, वत्थुविसेसेन पनेत्थ कम्मविसेसो च आपत्तिविसेसो च होतीति. ‘‘पुरेभत्तं मारेही’’ति आणत्तो पुरेभत्तमेव मारेतीति ‘‘अज्ज स्वे’’ति अनियमेत्वा ‘‘पुरेभत्तं मारेही’’ति आणत्तो यदा कदाचि पुरेभत्तं मारेति. यो पन ‘‘अज्ज पुब्बण्हे’’ति वुत्तो मज्झन्हे वा सायन्हे वा स्वे वा पुब्बण्हे मारेति, विसङ्केतो होति, आणापकस्स नत्थि कम्मबद्धो. पुब्बण्हे मारेतुं वायमन्तस्स मज्झन्हे ¶ जातेपि एसेव नयो. एतेन नयेन सब्बकालप्पभेदेसु सङ्केतविसङ्केतता वेदितब्बा.

एवं वत्थुकालेसु सङ्केतविसङ्केततं दस्सेत्वा इदानि ओकासादीसु सङ्केतविसङ्केततं अतिदिसन्तो ‘‘इमिना नयेना’’तिआदिमाह. तत्थ ओकासोति (पारा. अट्ठ. २.१७४) गामो वा वनं वा गेहद्वारं वाति एवमादिको. आवुधन्ति असि वा उसु वा सत्ति वाति एवमादि. इरियापथोति मारेतब्बस्स गमनं वा निसज्जा वाति एवमादि. किरियाविसेसोति विज्झनं वा छेदनं वा भेदनं वा सङ्खमुण्डकं वाति एवमादि. इमेसु यथा यथा वधको आणत्तो, तथा तथा कते आणापकस्स आपत्ति, अञ्ञथा कते विसङ्केतो होति. तेनाह ‘‘इमिना नयेना’’तिआदि. तत्थ सब्बत्थाति ओकासादीसु चतूसु. होति चेत्थ –

‘‘यथाणत्तिवसेनेव, आणत्तेन कते सति;

आणापकस्स आपत्ति, विसङ्केतोञ्ञथा कते’’ति.

आणत्तियं ¶ पन अयं विसेसो – अधिट्ठायाति अधिट्ठहित्वा आणापेति ‘‘एवं विज्झ, एवं पहर, एवं घातेही’’ति (पारा. १७४) वुत्ताय पाळिया लब्भतीति ञातब्बो.

ओपतन्ति एत्थाति ओपातो, आवाटो, तस्स खणनं ओपातक्खणनं. अपस्सेनसंविधानन्ति (पारा. अट्ठ. २.१७७) अपस्सेनस्स संविधानं. निच्चपरिभोगो मञ्चो वा पीठं वा अपस्सेनफलकं वा दिवाट्ठाने निसीदन्तस्स अपस्सेनकत्थम्भो वा तत्थजातकरुक्खो वा चङ्कमे अपस्साय तिट्ठन्तस्स आलम्बनरुक्खो वा आलम्बनफलकं वा, सब्बम्पेतं अपस्सनीयट्ठेन अपस्सेनं नाम, तस्मिं अपस्सेने यथा अपस्सयन्तं विज्झति वा छिन्दति वा, तथा कत्वा वासिफरसुसत्तिआरकण्टकादीसु अञ्ञतरस्स सत्थस्स ठपनन्ति अत्थो.

उपनिक्खिपनं नाम समीपे निक्खिपनं. मनापस्स वा अमनापस्स वा रूपस्स उपहरणं समीपे ठपनं रूपूपहारो, अत्तना वा यक्खपेतादिवेसं गहेत्वा तिट्ठनं. आदिसद्देन सद्दूपहारादीनं गहणं. एत्थापीति थावरपयोगेपि ¶ . उद्दिस्सानुद्दिस्सभेदो वेदितब्बो, यतो तत्थपि पुब्बे वुत्तनयेनेव कम्मबद्धो होति. अयं पन विसेसो – मूलट्ठेन ओपातादीसु परेसं मूलेन वा मुधा वा दिन्नेसुपि यदि तप्पच्चया कोचि मरति, मूलट्ठस्सेव कम्मबद्धो. यदिपि तेन, अञ्ञेन वा तत्र ओपाते विनासेत्वा भूमिसमे कतेपि पंसुहारका वा पंसुं गण्हन्ता, मूलखणका वा मूलानि खणन्ता आवाटं करोन्ति, देवे वा वस्सन्ते कद्दमो जायति, तत्थ च कोचि ओतरित्वा वा लग्गित्वा वा मरति, मूलट्ठस्सेव कम्मबद्धो. यदि पन येन लद्धं, सो वा अञ्ञो वा वित्थततरं वा गम्भीरतरं वा करोति, तप्पच्चया च कोचि मरति, उभयेसम्पि कम्मबद्धो. यथा तु मूलानि मूलेहि संसन्दन्ति, तथा तत्थ थले कते मुच्चति. एवं अपस्सेनसंविधानादीसुपि याव तेसं पवत्ति, ताव यथासम्भवं कम्मबद्धो वेदितब्बो.

विज्जापरिजप्पनन्ति आथब्बणिकेहि, विज्जाधरेहि च मन्तपरिजप्पनं. कम्मविपाकजाय इद्धियाति सातिसयकम्मनिब्बत्ताय कम्मविपाकेन सहजाताय इद्धिया, कम्मस्स वा विपाकभावेन जाताय इद्धिया. पयोजनन्ति पवत्तनं, करणन्ति अत्थो, दाठावुधादीनं दाठाकोटनादीनमिव मारणत्थं कम्मविपाकजिद्धिविकारकरणन्ति वुत्तं होति.

कम्मसाधनो वायं हारकसद्दो बहुलंविधानेन तत्थापि ण्वुपच्चयस्स सिज्झनतोति आह ‘‘अथ वा’’तिआदि. जीवितहरणकं, उपनिक्खिपितब्बं वा सत्थमेव हारकन्ति (सारत्थ. टी. २.१७२) विकप्पद्वयेन ¶ वुत्तन्ति आह ‘‘सत्थञ्च तं हारकञ्चाति सत्थहारक’’न्ति. ‘‘हारकसत्थ’’न्ति वत्तब्बे विसेसनस्स परनिपातं कत्वा एवं वुत्तन्ति दट्ठब्बं. परियेसेय्याति गवेसेय्य. ‘‘यथा लभति, तथा करेय्या’’ति इमिना पन अधिप्पायत्थमाह, ‘‘उपनिक्खिपेय्या’’ति इमिना सिखापत्तमत्थं. इतरथा हि ‘‘परियेसेय्या’’ति इमस्स ‘‘उपनिक्खिपेय्या’’ति अयमत्थो अधिप्पेतो न सिया. परियिट्ठमत्तेयेवाति परियेसितमत्तेयेव. यदि एवं अथ कस्मा पाळियं ‘‘सत्थहारकं वास्स परियेसेय्याति असिं वा सत्तिं वा भेण्डिं वा लगुळं वा पासाणं वा सत्थं वा विसं वा रज्जुं वा’’ति (पारा. १७२) वुत्तन्ति आह ‘‘पदभाजने पना’’तिआदि. अस्साति ‘‘सत्थहारकं वास्स परियेसेय्या’’ति इमस्स पदस्स. ब्यञ्जनानुरूपतो परिपुण्णं कत्वा अत्थस्स अवुत्तत्ता ¶ ‘‘ब्यञ्जनं अनादियित्वा’’ति वुत्तं. ससति हिंसतीति सत्थं, ससन्ति हिंसन्ति एतेनाति वा सत्थं. आदिसद्देन ‘‘सत्तिं वा’’तिआदिपाळिसेसं सङ्गण्हाति. तत्थ लगुळन्ति मुग्गरो. सत्थन्ति वुत्तावसेसं यं किञ्चि समुखं वेदितब्बं.

यो एवं मरतीति यो सत्थं वा आहरित्वा, विसं वा खादित्वा, रज्जुया वा उब्बन्धित्वा, सोब्भादीसु वा पतित्वा, अञ्ञेहि वा अग्गिपवेसनउदकपवेसनादीहि उपायेहि मरति. ‘‘सो धनं वा लभती’’तिआदिना नयेनाति सो धनं वा लभति, यसं वा लभति, सग्गं वा गच्छति, धम्मो वास्स होतीति इमिना नयेन. किमनेन वेदितब्बन्ति आह ‘‘एतेना’’तिआदि. तत्थ एतेनाति ‘‘मरणवण्णं वा संवण्णेय्या’’ति एतेन वचनेन. नयिध एवन्ति इध मनुस्सविग्गहपाराजिके न एवं, न परियायकथाय मुच्चतीति अत्थो. तेनाह ‘‘संवण्णेय्या’’तिआदि.

‘‘सत्थं वा आहरा’’तिआदिनाति एत्थ आदिसद्देन ‘‘विसं वा खाद, रज्जुया वा उब्बन्धित्वा कालं करोहि, सोब्भे वा नरके वा पपाते वा पपता’’तिआदिं (पारा. १७२) सब्बं मरणूपायं सङ्गण्हाति. एत्थ च नरको (पारा. अट्ठ. २.१७२) नाम तत्थ तत्थ फलन्तिया भूमिया सयमेव निब्बत्ता महादरी, यत्थ हत्थीपि पतन्ति, चोरापि निलीयित्वा तिट्ठन्ति. पपातोति पब्बतन्तरे वा थलन्तरे वा एकतो छिन्नो. पापकेनाति लामकेन. दुज्जीवितेनाति दुक्खबहुलत्ता दुक्खेन जीवितेन. मतं ते जीविता सेय्याति तव मरणं जीविता सुन्दरतरं. चित्तमस्स अत्थीति चित्तो. तथा मनो. इति-सद्दो ‘‘सब्बमत्थीति खो, कच्चान, अयमेको अन्तो, सब्बं नत्थीति खो, कच्चान, अयं दुतियो अन्तो’’तिआदीसु (सं. नि. २.१५; ३.९०) विय ¶ निदस्सने दट्ठब्बो यथावुत्तस्स बुद्धियं विपरिवत्तमानस्स मरणस्स निदस्सनतो. तेनेवाह ‘‘मतं ते जीविता सेय्यो’’तिआदि.

ननु चेत्थ ‘‘मनो’’ति इदम्पि अत्थतो चित्तमेव, अथ कस्मा वुत्तन्ति आह ‘‘एत्थ चा’’तिआदि. चित्तस्स अत्थदीपनत्थं वुत्तन्ति नायं चित्तसद्दो ‘‘चित्तसङ्कप्पो’’तिआदीसु (पारा. १७१) विय विचित्तादिअत्थो, अथ खो विञ्ञाणवचनोति तस्स अत्थदीपनत्थं वुत्तं. इमिना पुनरुत्तिदोसाभावं दस्सेति. कथमेतं विञ्ञायतीति आह ‘‘तेनेवस्सा’’तिआदि. चित्तो ¶ नानाप्पकारको सङ्कप्पो अस्साति चित्तसङ्कप्पो. विचित्तत्थो हेत्थ चित्तसद्दो ‘‘नाहं, भिक्खवे, अञ्ञं एकनिकायम्पि समनुपस्सामि एवं चित्तं, यथयिदं, भिक्खवे, तिरच्छानगता’’तिआदीसु (सं. नि. ३.१००) विय. तेनाह ‘‘विचित्तसङ्कप्पो’’ति. एत्थापि इतिसद्दो आहरितब्बोति ‘‘चित्तसङ्कप्पो’’ति इमस्मिं पदेपि अधिकारवसेन इतिसद्दो आहरितब्बो. इदञ्हि ‘‘इति चित्तसङ्कप्पो’’ति एवं अवुत्तम्पि अधिकारतो वुत्तमेव होतीति. सङ्कप्पोति चेत्थ ‘‘तक्को वितक्को सङ्कप्पो’’तिआदीसु (ध. स. ७) विय न वितक्कस्सेव नामं, अथ खो तस्स च अञ्ञेसञ्चाति दस्सेतुं ‘‘सङ्कप्पोति चा’’तिआदि आरद्धं. संविदहनमत्तस्साति सञ्ञाचेतनावितक्कसङ्खातस्स सब्बस्स संविदहनस्स. सामञ्ञत्थो हेत्थ मत्तसद्दो ‘‘ब्राह्मणमत्तं भोजेती’’तिआदीसु विय. तेनाह ‘‘तञ्च संविदहन’’न्तिआदि. इमिना संविदहनं नामेत्थ न विधानन्ति दस्सेति. अधिप्पायो नाम वितक्को.

उच्चावचेन कारणेनाति (पारा. अट्ठ. २.१७२) महन्तामहन्तेन उपायेन. तत्थ मरणवण्णसंवण्णने ताव जीविते आदीनवदस्सनवसेन अवचाकारता, मरणे वण्णभणनवसेन उच्चाकारता वेदितब्बा. समादपने पन मुट्ठिजाणुनिप्पोथनादीहि मरणसमादपनवसेन उच्चाकारता, एकतो भुञ्जन्तस्स नखे विसं पक्खिपित्वा मरणादिसमादपनवसेन अवचाकारता वेदितब्बा.

एवं असाधारणविनिच्छयं वत्वा इदानि साधारणविनिच्छयं दस्सेतुं ‘‘वेसालिय’’न्तिआदिमाह. ओपातक्खणनादीसु दुक्कटन्ति एत्थ सचेपि जातपथविं खणति, पाणातिपातस्स पुब्बपयोगत्ता पयोगे पयोगे दुक्कटं. मनुस्सविग्गहो नागसुपण्णादिसदिसो तिरच्छानगतो तिरच्छानगतमनुस्सविग्गहो, यक्खो च पेतो च तिरच्छानगतमनुस्सविग्गहो च यक्खपेततिरच्छानगतमनुस्सविग्गहा, तेसं. ‘‘तथा’’ति इमिना थुल्लच्चयं अतिदिसति. इदानि ‘‘इमिना ¶ नयेना’’तिआदिना अपस्सेनसंविधानादीसुपि यथावुत्तआपत्तिभेदं अतिदिसति. सब्बत्थाति अपस्सेनसंविधानादीसु सब्बेसु पयोगेसु.

इदानि अनापत्तिं दस्सेतुं ‘‘असञ्चिच्चा’’तिआदिमाह. एत्थ च ‘‘असञ्चिच्चा’’ति (सारत्थ. टी. २.१७९) इदं मरणसंवत्तनिकउपक्कमस्स असल्लक्खणं सन्धाय वुत्तं ¶ , ‘‘अजानन्तस्सा’’ति इदं पन मरणसंवत्तनिकउपकरणस्स अजाननं सन्धाय, ‘‘नमरणाधिप्पायस्सा’’ति इदं उपक्कमं जानन्तस्सापि मरणाधिप्पायस्स अभावं. तेनाह ‘‘असञ्चिच्चा’’तिआदि. अचेतेत्वाति असल्लक्खेत्वा, विरज्झित्वाति वुत्तं होति.

मुसलुस्सापनवत्थुस्मिं वियाति ‘‘तेन खो पन समयेन अञ्ञतरो भिक्खु भत्तग्गे अन्तरघरे आसनं पञ्ञपेन्तो मुसले उस्सिते एकं मुसलं अग्गहेसि. दुतियो मुसलो परिपतित्वा अञ्ञतरस्स दारकस्स मत्थके अवत्थासि. सो कालमकासि. तस्स कुक्कुच्चं अहोसि…पे… किंचित्तो त्वं भिक्खूति. असञ्चिच्च अहं भगवाति. अनापत्ति भिक्खु असञ्चिच्चा’’ति (पारा. १८०) इमस्मिं वत्थुस्मिं विय.

विसगतपिण्डपातवत्थुस्मिं वियाति ‘‘तेन खो पन समयेन अञ्ञतरो पिण्डचारिको भिक्खु विसगतं पिण्डपातं लभित्वा पटिक्कमनं हरित्वा भिक्खूनं अग्गकारिकं अदासि. ते भिक्खू कालमकंसु. तस्स कुक्कुच्चं अहोसि…पे… किंचित्तो त्वं भिक्खूति. नाहं भगवा जानामीति. अनापत्ति भिक्खु अजानन्तस्सा’’ति (पारा. १८१) इमस्मिं वत्थुस्मिं विय.

भेसज्जवत्थुस्मिं वियाति ‘‘तेन खो पन समयेन अञ्ञतरा वञ्झा इत्थी कुलूपकं भिक्खुं एतदवोच ‘‘इङ्घाय्य भेसज्जं जानाहि, येनाहं विजायेय्य’न्ति. ‘सुट्ठु भगिनी’ति तस्सा भेसज्जं अदासि. सा कालमकासि. तस्स कुक्कुच्चं अहोसि…पे… अनापत्ति भिक्खु पाराजिकस्स, आपत्ति दुक्कटस्सा’’ति (पारा. १८७) इमस्मिं वत्थुस्मिं विय. इध आदिकम्मिका अञ्ञमञ्ञं जीविता वोरोपितभिक्खू, तेसं अनापत्ति. अवसेसानं मरणवण्णसंवण्णनकादीनं आपत्तियेव.

अथ कथं दुक्खवेदनन्ति, ननु राजानो चोरं दिस्वा हसमानापि ‘‘गच्छथ, नं घातेथा’’ति वदन्तीति? सच्चं हसमाना वदन्ति, सो पन हासो तेसं अञ्ञविसयो, सन्निट्ठापकचेतना ¶ दुक्खसम्पयुत्ताव. वुत्तञ्हेतं समन्तपासादिकायं ‘‘सचेपि हि सिरिसयनं आरुळ्हो रज्जसम्पत्तिसुखमनुभवन्तो राजा ‘चोरो देव आनीतो’ति वुत्ते ‘गच्छथ नं मारेथा’ति हसमानो भणति, दोमनस्सचित्तेनेव भणतीति ¶ वेदितब्बो. सुखवोकिण्णत्ता, पन अनुप्पबन्धाभावा च दुज्जानमेतं पुथुज्जनेही’’ति (पारा. अट्ठ. २.१७९).

ततियपाराजिकवण्णना निट्ठिता.

४. चतुत्थपाराजिकवण्णना

अनभिजानन्ति न अभिजानं. येन हि यो धम्मो अधिगतो, सो तस्स पाकटो होतीति आह ‘‘सकसन्ताने’’तिआदि. उत्तरिमनुस्सानन्ति पकतिमनुस्सेहि उत्तरितरानं मनुस्सानं, उक्कट्ठमनुस्सानन्ति अत्थो. धम्मन्ति महग्गतलोकुत्तरभूतं अधिगतधम्मं. अथ वा उत्तरिमनुस्सधम्माति उत्तरिमनुस्सधम्मो. मनुस्सधम्मो नाम विना भावनामनसिकारेन पकतिया मनुस्सेहि निब्बत्तेतब्बो दसकुसलकम्मपथधम्मो. सो हि मनुस्सानं चित्ताधिट्ठानमत्तेन इज्झनतो तेसं सो भावितधम्मो विय ठितोति तथा वुत्तो, मनुस्सग्गहणञ्चेत्थ तेसु बहुलं पवत्तनतो. झानादिकं पन तब्बिधुरन्ति ततुत्तरि, इति उत्तरि मनुस्सधम्माति उत्तरिमनुस्सधम्मो, तं उत्तरिमनुस्सधम्मन्ति एवम्पेत्थ अत्थो दट्ठब्बो. समुदाचरन्तोति आरोचेन्तो.

किञ्चापि लोकियलोकुत्तरा सब्बाव पञ्ञा ‘‘ञाण’’न्ति वुच्चति, इध पन महग्गतलोकुत्तराव वेदितब्बाति आह ‘‘महग्गतलोकुत्तरपञ्ञा जाननट्ठेन ञाण’’न्ति. किलेसेहि आरकत्ता परिसुद्धट्ठेन अरियन्ति आह ‘‘अरियं विसुद्धं उत्तम’’न्ति. अरियसद्दो चेत्थ विसुद्धपरियायो, न लोकुत्तरपरियायो. झानादिभेदेति आदिसद्देन ‘‘विमोक्खो, समाधि, समापत्ति, ञाणदस्सनं, मग्गभावना, फलसच्छिकिरिया, किलेसप्पहानं, विनीवरणता चित्तस्स, सुञ्ञागारे अभिरती’’ति (पारा. १९८) इमे सङ्गण्हाति. विञ्ञुस्स मनुस्सजातिकस्साति आरोचेतब्बपुग्गलनिदस्सनं. एतस्स हि आरोचिते आरोचितं होति, न देवब्रह्मानं, नापि पेतयक्खतिरच्छानगतानन्ति. आरोचेय्याति वदेय्य, विञ्ञापेय्याति वुत्तं होति. विना अञ्ञापदेसेनाति ‘‘यो ते विहारे वसति, सो भिक्खु पठमस्स झानस्स लाभी’’तिआदिना (पारा. २२०) नयेन अञ्ञापदेसं विनाति ¶ अत्थो. इधेवाति ‘‘इति जानामि, इति पस्सामी’’ति इमस्मिंयेव पदे. ‘‘तेन वुत्त’’न्तिआदि निगमनं.

समनुग्गाहीयमानोति ¶ चोदियमानो, यं वत्थु आरोचितं होति, तस्मिं वत्थुस्मिं ‘‘किं ते अधिगतं, किन्ति ते अधिगतं, कदा ते अधिगतं, कत्थ ते अधिगतं, कतमे ते किलेसा पहीना, कतमेसं त्वं धम्मानं लाभी’ति केनचि वुच्चमानो’’ति वुत्तं होति. असमनुग्गाहीयमानोति न केनचि वुच्चमानो.

‘‘भिक्खुभावे ठत्वा अभब्बो झानादीनि अधिगन्तु’’न्ति सिक्खापदातिक्कमस्स अन्तरायकरत्ता वुत्तं. भिक्खुभावो हिस्स सग्गन्तरायो चेव होति मग्गन्तरायो च (पारा. अट्ठ. २.१९८). वुत्तञ्हेतं ‘‘सामञ्ञं दुप्परामट्ठं, निरयायुपकड्ढती’’ति (सं. नि. १.८९; ध. प. ३११). अपरम्पि वुत्तं ‘‘सिथिलो हि परिब्बाजो, भिय्यो आकिरते रज’’न्ति (सं. नि. १.८९; ध. प. ३१३). भिक्खुभावोति पाराजिकं आपज्जित्वा ‘‘समणो अह’’न्ति पटिजाननतो वोहारमत्तसिद्धो भिक्खुभावो. दानादीहीति दानसरणसीलसंवरादीहि.

अजानमेवाति एत्थ एवाति अवधारणत्थे निपातो. ‘‘अजानमेव’’न्तिपि पठन्ति. तत्थ पन ‘‘एवं जानामि, एवं पस्सामी’’ति अवचन्ति योजेतब्बं. वचनत्थविरहतोति ‘‘पठमं झानं समापज्जि’’न्ति आदिवचनस्स (पारा. २०९) अत्थभूतेन झानादिना वज्जितत्ता तुच्छं उदकादिसुञ्ञं भाजनं विय. मुसाति विसंवादनपुरेक्खारस्स परविसंवादको वचीपयोगो, कायपयोगो वा. तेनाह ‘‘वञ्चनाधिप्पायतो मुसा’’ति. मुसा च वञ्चनाधिप्पायो च पुब्बभागक्खणे, तङ्खणे च. वुत्तञ्हि ‘‘पुब्बे वास्स होति ‘मुसा भणिस्स’न्ति, भणन्तस्स होति ‘मुसा भणामी’’’ति (पारा. २००). एतञ्हि द्वयं अङ्गभूतं, इतरं पन होतु वा, मा वा, अकारणमेतं. अभणिन्ति विञ्ञापनं अकासिं.

अञ्ञत्र अधिमानाति अधिगतो मानो, अधिको वा मानो अधिमानो, थद्धमानोति अत्थो, तं विनाति अत्थो. कस्स पनायं अधिमानो उप्पज्जति, कस्स नुप्पज्जति? अरियसावकस्स ताव नुप्पज्जति (पारा. अट्ठ. २.१९६). सो हि मग्गफलनिब्बानपहीनकिलेसावसिट्ठकिलेसपच्चवेक्खणेन सञ्जातसोमनस्सो ¶ अरियगुणप्पटिवेधे निक्कङ्खो, तस्मा सोतापन्नादीनं ‘‘अहं सकदागामी’’तिआदिवसेन मानो नुप्पज्जति. दुस्सीलस्स नुप्पज्जति. सो हि अरियगुणाधिगमे निरासोव. सीलवतोपि परिच्चत्तकम्मट्ठानस्स निद्दारामतादिमनुयुत्तस्स नुप्पज्जति, सुपरिसुद्धसीलस्स पन कम्मट्ठाने अप्पमत्तस्स नामरूपं ववत्थपेत्वा पच्चयपरिग्गहेन वितिण्णकङ्खस्स तिलक्खणं आरोपेत्वा सङ्खारे ¶ सम्मसन्तस्स आरद्धविपस्सकस्स उप्पज्जति. तेनाह ‘‘य्वाय’’न्तिआदि. तत्थ तिलक्खणं आरोपेत्वाति (सारत्थ. टी. २.१९६) कलापसम्मसनवसेन अनिच्चादिलक्खणत्तयं आरोपेत्वा. सम्मसन्तस्साति विपस्सन्तस्स. आरद्धविपस्सकस्साति उदयब्बयानुपस्सनाय आरद्धविपस्सकस्स. अपत्तेति अत्तनो सन्ताने उप्पत्तिवसेन अपत्ते, अनधिगतेति वुत्तं होति. पत्तसञ्ञितासङ्खातोति ‘‘पत्तो मया उत्तरिमनुस्सधम्मो’’ति एवंसञ्ञितासङ्खातो अधिमानो उप्पज्जति. उप्पन्नो च सुद्धसमथलाभिं वा सुद्धविपस्सनालाभिं वा अन्तरा ठपेति. सो हि दसपि वीसम्पि तिंसम्पि वस्सानि किलेससमुदाचारं अपस्सन्तो ‘‘अहं सोतापन्नो’’ति वा ‘‘सकदागामी’’ति वा ‘‘अनागामी’’ति वा मञ्ञति. समथविपस्सनालाभिं पन अरहत्तेयेव ठपेति. तस्स हि समाधिबलेन किलेसा विक्खम्भिता, विपस्सनाबलेन सङ्खारा सुपरिग्गहिता, तस्मा सट्ठिम्पि वस्सानि, असीतिम्पि वस्सानि, वस्ससतम्पि किलेसा न समुदाचरन्ति, खीणासवस्सेव चित्ताचारो होति. सो एवं दीघरत्तं किलेससमुदाचारं अपस्सन्तो अन्तरा अट्ठत्वाव ‘‘अरहा अह’’न्ति मञ्ञतीति. ‘‘तं अधिमानं ठपेत्वा’’ति इमिना ‘‘अञ्ञत्रा’’ति पदं अपेक्खित्वा ‘‘अधिमाना’’ति उपयोगत्थे निस्सक्कवचनन्ति दस्सेति.

पापिच्छतायाति पापा इच्छा एतस्साति पापिच्छो, तस्स भावो पापिच्छता, ताय, पापिकाय इच्छायाति अत्थो. या सा ‘‘इधेकच्चो दुस्सीलोव समानो ‘सीलवा’ति मं जनो जानातू’’तिआदिना (विभ. ८५१) नयेन वुत्ता, ताय असन्तगुणसम्भावनिच्छायाति वुत्तं होति. इमिना पन मन्दत्ता मोमूहत्ता समुदाचरन्तस्स अनापत्तीति दस्सेति. अयम्पीति पि-सद्देन न केवलं पुरिमा तयोवाति दस्सेति.

असन्तन्ति ¶ अभूतं. झानादिधम्मन्ति झानं, विमोक्खो, समाधि, समापत्ति, ञाणदस्सनं, मग्गभावना, फलसच्छिकिरिया, किलेसप्पहानं, विनीवरणता चित्तस्स, सुञ्ञागारे अभिरती’’ति (पारा. १९८) एवं वुत्तं उत्तरिमनुस्सधम्मं. यस्स आरोचेतीति (पारा. अट्ठ. २.२१५) वाचाय वा हत्थविकारादीहि वा अङ्गपच्चङ्गचोपनेहि विञ्ञत्तिपथे ठितस्स यस्स पुग्गलस्स आरोचेति. विञ्ञत्तिपथं पन अतिक्कमित्वा ठितो कोचि चे दिब्बेन चक्खुना (सारत्थ. टी. २.२१५), दिब्बाय च सोतधातुया दिस्वा च सुत्वा च जानाति, न पाराजिकं. योपि ‘‘किं अयं भणती’’ति संसयं वा आपज्जति, चिरं वीमंसित्वा वा पच्छा जानाति, ‘‘अविजानन्तो’’इच्चेव सङ्ख्यं गच्छति. यो पन झानादीनि अत्तनो अधिगमवसेन वा उग्गहपरिपुच्छादिवसेन वा न जानाति, केवलं ‘‘झान’’न्ति वा ‘‘विमोक्खो’’ति ¶ वा वचनमत्तमेव सुतं होति, सोपि तेन वुत्ते ‘‘झानं किर समापज्जी’’ति एस वदतीति यदि एत्तकमत्तम्पि जानाति, ‘‘जानाति’’च्चेव सङ्ख्यं गच्छति, तस्स वुत्ते पाराजिकमेव. सेसो पन एकस्स वा द्विन्नं वा बहूनं वा नियमितानियमितवसेन विसेसो सब्बो सिक्खापच्चक्खानकथायं वुत्तनयेनेव वेदितब्बो. परियायभासने पन ‘‘अह’’न्ति अवुत्तत्ता पटिविजानन्तस्स वुत्तेपि थुल्लच्चयं. विसंवादनाधिप्पायेन मुसावादपयोगस्स कतत्ता अप्पटिविजानन्तस्सापि दुक्कटन्ति आह ‘‘यो ते विहारे वसति…पे… दुक्कट’’न्ति. अनुल्लपनाधिप्पायस्साति उल्लपनाधिप्पायविरहितस्स, अभूतारोचनाधिप्पायविरहितस्साति अत्थो. उम्मत्तकादयो पुब्बे वुत्तनया एव. इध पन आदिकम्मिका वग्गुमुदातीरियभिक्खू, तेसं अनापत्ति.

चतुत्थपाराजिकवण्णना निट्ठिता.

पाराजिकनिगमनवण्णना

इधाति इमस्मिं भिक्खुपातिमोक्खे. उद्दिट्ठपाराजिकपरिदीपनमेवाति उद्दिट्ठानं चतुन्नं पाराजिकानं परिदीपनवचनमेव. अवधारणं पन न अञ्ञेसम्पीति दस्सनत्थं. तेनाह ‘‘समोधानेत्वा पना’’तिआदि. तत्थ समोधानेत्वाति तत्थ तत्थ आगतानि एत्थेव समोदहित्वा, पक्खिपित्वा रासिं कत्वाति अत्थो. पाळियं आगतानीति उद्देसपाळियं आगतानि ¶ . भिक्खुनीनं असाधारणानि चत्तारीति उब्भजाणुमण्डलिका, वज्जप्पटिच्छादिका, उक्खित्तानुवत्तिका, अट्ठवत्थुकाति इमानि भिक्खुनीनं भिक्खूहि असाधारणानि चत्तारि. पण्डकादीनञ्हि एकादसन्नं अभब्बभावो पाराजिकापत्तिसदिसत्ता पाराजिकोति आह ‘‘एकादसन्न’’न्तिआदि. अभब्बभावसङ्खातेहीति वत्थुविपन्नतादिना पब्बज्जूपसम्पदाय नअरहभावसङ्खातेहि. पण्डकतिरच्छानगतउभतोब्यञ्जनका (पारा. अट्ठ. २.२३३) हि तयो वत्थुविपन्ना अहेतुकप्पटिसन्धिका, तेसं सग्गो अवारितो, मग्गो पन वारितो. अभब्बा हि ते मग्गप्पटिलाभाय वत्थुविपन्नत्ता. पब्बज्जापि नेसं पटिक्खित्ता, तस्मा तेपि पाराजिकाव. थेय्यसंवासको, तित्थियपक्कन्तको, मातुघातको, पितुघातको, अरहन्तघातको, भिक्खुनिदूसको, लोहितुप्पादको, सङ्घभेदकोति इमे अट्ठ अत्तनो किरियाय विपन्नत्ता अभब्बट्ठानं पत्ताति पाराजिकाव. तेसु थेय्यसंवासको, तित्थियपक्कन्तको, भिक्खुनिदूसकोति इमेसं तिण्णं सग्गो अवारितो, मग्गो पन वारितोव. इतरेसं पञ्चन्नं उभयम्पि वारितं. ते हि अनन्तराव नरके निब्बत्तनकसत्ता. यदा भिक्खुनी विब्भमितुकामा हुत्वा कासावमेव ¶ वा गिहिवत्थं वा गिहिनिवासनाकारेन निवासेति, तदा पाराजिकमापन्ना नाम होतीति आह ‘‘गिहिभावं पत्थयमानाया’’तिआदि. सा हि अज्झाचारवीतिक्कमं अकत्वापि एत्तावता अस्समणी नाम होति.

दीघताय लम्बमानं अङ्गजातमेतस्साति लम्बी (सारत्थ. टी. २.२३३). न सो एत्तावता पाराजिको, अथ खो यदा अनभिरतिया पीळितो अत्तनो अङ्गजातं मुखे वा वच्चमग्गे वा पवेसेति, तदा पाराजिको होति. मुदुकता पिट्ठि एतस्साति मुदुपिट्ठिको, कतपरिकम्माय मुदुकाय पिट्ठिया समन्नागतो. सोपि यदा अनभिरतिया पीळितो अत्तनो अङ्गजातं अत्तनो मुखमग्गवच्चमग्गेसु अञ्ञतरं पवेसेति, तदा पाराजिको होति. परस्स अङ्गजातं मुखेन गण्हातीति यो अनभिरतिया पीळितो परस्स सुत्तस्स वा पमत्तस्स वा अङ्गजातं मुखेन गण्हाति. परस्स अङ्गजाते अभिनिसीदतीति यो अनभिरतिया पीळितो परस्स अङ्गजातं कम्मनियं दिस्वा अत्तनो वच्चमग्गेन तस्सूपरि निसीदति, तं अत्तनो वच्चमग्गं पवेसेतीति अत्थो. एतानि हि चत्तारि यस्मा ¶ उभिन्नं रागवसेन सदिसभावूपगतानं धम्मो ‘‘मेथुनधम्मो’’ति वुच्चति, तस्मा एकेन परियायेन मेथुनधम्मं अप्पटिसेवित्वायेव केवलं मग्गेन मग्गप्पवेसनवसेन आपज्जितब्बत्ता मेथुनधम्मपाराजिकस्स अनुलोमेन्तीति ‘‘अनुलोमपाराजिकानी’’ति वुच्चन्ति.

एत्थाह – मातुघातकपितुघातकअरहन्तघातका ततियपाराजिकं आपन्ना, भिक्खुनिदूसको, लम्बिआदयो चत्तारो च पठमपाराजिकं आपन्ना एवाति कत्वा कुतो चतुवीसतीति (सारत्थ. टी. २.२३३)? वुच्चते – मातुघातकादयो हि चत्तारो इध अनुपसम्पन्ना एव अधिप्पेता, लम्बिआदयो चत्तारो किञ्चापि पठमपाराजिकेन सङ्गहिता, यस्मा पन एकेन परियायेन मेथुनधम्मं अप्पटिसेविनो होन्ति, तस्मा विसुं वुत्ताति. दुतियविकप्पे कच्चित्थाति एत्थ कच्चि अत्थाति पदच्छेदो कातब्बो.

इति कङ्खावितरणिया पातिमोक्खवण्णनाय

विनयत्थमञ्जूसायं लीनत्थप्पकासनियं

पाराजिकवण्णना निट्ठिता.

सङ्घादिसेसकण्डं

पियवचनेन ¶ ¶ आलपनन्ति पियायितब्बवचनेनालपनं, साधूनं समालपनन्ति वुत्तं होति. साधवो हि परे ‘‘भोन्तो’’ति वा ‘‘देवानंपिया’’ति वा ‘‘भद्रभव’’न्ति वा ‘‘आयस्मन्तो’’ति वा समालपन्ति.

१. सुक्कविस्सट्ठिसिक्खापदवण्णना

सं-सद्दो विज्जमानत्थोति आह ‘‘संविज्जती’’ति. चेतनाति वीतिक्कमवसप्पवत्ता पुब्बभागचेतना, मोचनस्सादचेतनाति अत्थो. अस्साति सुक्कविस्सट्ठिया. अञ्ञपदत्थसमासेनेव सुक्कविस्सट्ठिया वुत्तत्ता इक-सद्दस्स विसुं अत्थो नत्थीति आह ‘‘सञ्चेतनाव सञ्चेतनिका’’ति. इदानि इक-सद्दोव अत्थिअत्थं पकासेतीति दस्सेन्तो ‘‘सञ्चेतना वा’’तिआदिमाह. संविज्जमाना चेतना सञ्चेतना. सुक्कस्साति सम्भवस्स. विसट्ठीति विस्सग्गो.

इदानि तं यस्मिं काले मोचेति, येनाधिप्पायेन मोचेति, येन चोपायेन मोचेति, यञ्च तस्स अधिप्पायस्स वत्थु, तं सब्बं सङ्खेपतो विभावेत्वा सरूपतो तं विसट्ठिं दस्सेतुं ‘‘रागूपत्थम्भादीसू’’तिआदिमाह. तत्थ रागस्स बलवभावो, रागेन वा अङ्गजातस्सूपत्थम्भो थद्धभावो रागूपत्थम्भो, सो आदि येसं ते रागूपत्थम्भादयो, तेसु रागूपत्थम्भादीसु. आदिसद्देन (पारा. २३८) वच्चूपत्थम्भपस्सावूपत्थम्भवातूपत्थम्भउच्चालिङ्गपाणकदट्ठूपत्थम्भानं गहणं. कम्मञ्ञतं पत्तेति मोचनकम्मक्खमताय कम्मनियतं पत्ते, अज्झत्तरूपादीसु उपक्कमारहभावं पत्तेति अत्थो. अरोगस्स भावो आरोग्यं, तं आदि येसं ते आरोग्यादयो, तेसु आरोग्यादीसु. आदिसद्देन सुखभेसज्जदानपुञ्ञयञ्ञसग्गबीजवीमंसदवानं गहणं. अज्झत्तरूपं अज्झत्तं उपादिन्नरूपं, तं आदि येसं ते अज्झत्तरूपादयो, तेसु. आदिसद्देन बहिद्धारूपअज्झत्तबहिद्धारूपआकासेकटिकम्पनानं ¶ गहणं. मोचने अस्सादो सुखवेदना मोचनस्सादो, मोचनत्थं पुब्बभागे पवत्तरागो, सम्पयुत्तअस्सादसीसेन चेत्थ रागो वुत्तो, तेन सम्पयुत्ता चेतना मोचनस्सादचेतना, ताय ¶ . इमिना मुच्चनस्सादो (पारा. अट्ठ. २.२४०) मुत्तस्सादो मेथुनस्सादो फस्सस्सादो कण्डुवनस्सादो दस्सनस्सादो निसज्जस्सादो वाचस्सादो गेहसितपेमं वनभङ्गियन्ति इमेहि सम्पयुत्ता चेतनायो पटिक्खिपति, ताहि निमित्ते उपक्कमन्तस्स मुत्तेपि अनापत्ति. ‘‘निमित्ते उपक्कमन्तस्सा’’ति इमिना पन ऊरुमद्दापनादीनि पटिक्खिपति. तेन हि सतिपि मोचनस्सादे निमित्ते उपक्कमाभावतो मुत्तेपि अनापत्ति. वुत्तञ्हेतं समन्तपासादिकायं ‘‘सा च खो निमित्ते उपक्कमन्तस्सेव, हत्थपरिकम्मपादपरिकम्मगत्तपरिकम्मकरणेन सचेपि असुचि मुच्चति, अनापत्ती’’ति.

आसयधातुनानात्ततोति पित्तसेम्हपुब्बलोहितासयानञ्चेव पथवीधातुआदीनञ्च चतुन्नं धातूनं, रससोणितादीनं वा सत्तन्नं धातूनं नानात्ततो. ठाना चावनाति सुक्कस्स यं ठानं, ततो चुति. सुक्कस्स हि वत्थिसीसं कटि कायोति (पारा. अट्ठ. २.२३७) तिधा ठानं पकप्पेन्ति. एको किराचरियो ‘‘वत्थिसीसं सुक्कस्स ठान’’न्ति आह, एको ‘‘कटी’’ति, एको ‘‘सकलो कायो’’ति. तेसु ततियस्स भासितं सुभासितं. केसलोमनखदन्तानञ्हि मंसविनिमुत्तट्ठानं, उच्चारपस्सावखेळसिङ्घाणिका, थद्धसुक्खचम्मानि च वज्जेत्वा अवसेसो छविमंसलोहितानुगतो सब्बोपि कायो कायप्पसादभावजीवितिन्द्रियाबद्धपित्तानं, सम्भवस्स च ठानमेव. तथा हि रागपरियुट्ठानेनाभिभूतानं हत्थीनं उभोहि कण्णचूळिकाहि सम्भवो निक्खमति.

एत्थ च ‘‘रागूपत्थम्भादीसू’’तिआदिना (पारा. अट्ठ. २.२३७) कालो दस्सितो. रागूपत्थम्भादिकालेसु हि अङ्गजातं कम्मनियं होति. यस्स कम्मनियत्ते सति मोचेति, इतो परं अञ्ञो कालो नत्थि. न हि विना रागूपत्थम्भादीहि पुब्बण्हादयो कालभेदा मोचने निमित्तं होन्ति. ‘‘आरोग्यादीसू’’तिआदिना पन अधिप्पायो दस्सितो. एवरूपेन हि अधिप्पायभेदेन मोचेति, न अञ्ञथा. ‘‘अज्झत्तरूपादीसू’’तिआदिना उपायो दस्सितो. अज्झत्तरूपे वा हि मोचेय्य, बहिद्धारूपे वा, उभयत्थ वा, आकासे वा कटिं कम्पेन्तो, इतो परं अञ्ञो उपायो नत्थि. नीलादिवसेना’’तिआदीहि पन दसहि नवमस्स अधिप्पायस्स वत्थु दस्सितं. वीमंसन्तो हि नीलादीसु अञ्ञतरवसेन वीमंसति, न तेहि विनिमुत्तन्ति. ‘‘ठाना चावना’’ति इमिना पन अत्थतो विस्सट्ठि दस्सिता ¶ . यथाह ‘‘विस्सट्ठीति ठानतो चावना वुच्चती’’ति (पारा. २३७). सा चायं तस्स सुक्कस्स ठाना चावना रागवसेन. वुत्तञ्हेतं ¶ कथावत्थुअट्ठकथायं ‘‘सुक्कविस्सट्ठि नाम रागसमुट्ठाना होती’’ति (कथा. अट्ठ. ३०७). अञ्ञत्र सुपिनन्ताति सुपिनो एव सुपिनन्तो, तं ठपेत्वाति वुत्तं होति. तेनाह ‘‘या सुपिने’’तिआदि. सङ्घादिसेसोति इमस्स आपत्तिनिकायस्स नामं. तेनाह ‘‘या अञ्ञत्र सुपिनन्ता’’तिआदि. आपत्तिनिकायोति आपत्तिसमूहो. किञ्चापि अयं एकाव आपत्ति, रुळ्हिसद्देन, पन अवयवे समूहवोहारेन वा ‘‘निकायो’’ति वुत्तो ‘‘एको वेदनाक्खन्धो, एको विञ्ञाणक्खन्धो’’तिआदीसु विय.

अस्साति (सारत्थ. टी. २.१६ संघादिसेसकण्ड) आपत्तिनिकायस्स. ननु च अयुत्तोयं निद्देसो ‘‘सङ्घो आदिम्हि चेव सेसे च इच्छितब्बो अस्सा’’ति. न हि आपत्तिनिकायस्स आदिम्हि चेव सेसे च सङ्घो इच्छितो, किञ्चरहि वुट्ठानस्साति इमं चोदनं मनसि निधाय यथा न विरुज्झति, तथा अधिप्पायं विवरितुं ‘‘किं वुत्तं होती’’तिआदिमाह. आपत्तितो वुट्ठानस्स आदिम्हि चेव सेसे च इच्छितो सङ्घो आपत्तियाव इच्छितो नाम होतीति अयमेत्थ अधिप्पायो. आपत्तिवुट्ठानन्ति आपत्तितो वुट्ठानं, अनापत्तिकभावूपगमनन्ति अत्थो.

दकसोतन्ति पस्सावमग्गं, अङ्गजातप्पदेसन्ति वुत्तं होति. यदि एवं अथ कस्मा अट्ठकथायं ‘‘दकसोतं ओतिण्णमत्ते’’ति वुत्तन्ति आह ‘‘ठानतो पन चुत’’न्तिआदि. अवस्समेव दकसोतं ओतरति अधिवासेत्वा अन्तरा निवारेतुं असक्कुणेय्यत्ता. दकसोतोरोहनतो (सारत्थ. टी. २.२३६-२३७) पट्ठाय पन उपादिन्नतो विनिमुत्तत्ता सम्भवरूपं उतुसमुट्ठानमेव अवसिस्सति, सेसं तिसमुट्ठानं नत्थीति वेदितब्बं. तस्माति यस्मा ठानतो चुतं दकसोतं ओतरति, तस्मा.

अमोचनाधिप्पायस्साति भेसज्जेन निमित्तं आलिम्पन्तस्स उच्चारादीनि वा करोन्तस्स. सुपिनं पस्सन्तस्साति (पारा. अट्ठ. २.२३७) धातुक्खोभतो वा अनुभूतपुब्बतो वा देवतोपसंहारतो वा पुब्बनिमित्ततो वाति इमेहि चतूहि कारणेहि सुपिनं पस्सन्तस्स. किं पनेतं पस्सन्तो सुत्तो पस्सति, पटिबुद्धो, उदाहु नेव सुत्तो, न पटिबुद्धोति? किञ्चेत्थ – यदि ¶ ताव सुत्तो पस्सति, अभिधम्मविरोधो आपज्जति. भवङ्गचित्तेन हि सुपति, तं रूपनिमित्तादिआरम्मणं वा रागादिसम्पयुत्तं वा न होति. सुपिनं पस्सन्तस्स च ईदिसानि चित्तानि उप्पज्जन्ति. अथ पटिबुद्धो पस्सति, विनयविरोधो आपज्जति. यञ्हि पटिबुद्धो पस्सति, तं सब्बोहारिकचित्तेन पस्सति. सब्बोहारिकचित्तेन च कते वीतिक्कमे अनापत्ति नाम ¶ नत्थि. सुपिनं पस्सन्तेन पन कतेपि वीतिक्कमे एकन्तं अनापत्ति एव. अथ नेव सुत्तो न पटिबुद्धो पस्सति, को नाम पस्सति, एवञ्च सति सुपिनस्स अभावोव आपज्जतीति? न अभावो, कस्मा? यस्मा कपिमिद्धपरेतो पस्सति. वुत्तञ्हेतं ‘‘कपिमिद्धपरेतो खो महाराज सुपिनं पस्सती’’ति (मि. प. ५.३.५). कपिमिद्धपरेतोति मक्कटनिद्दाय युत्तो. यथा हि मक्कटस्स निद्दा लहुपरिवत्ता होति, एवं या निद्दा पुनप्पुनं कुसलादिचित्तवोकिण्णत्ता लहुपरिवत्ता, यस्सा पवत्तियं पुनप्पुनं भवङ्गतो उत्तरणं होति, ताय युत्तो सुपिनं पस्सति. यस्स च एवं पस्सन्तस्स सुपिने मेथुनं धम्मं पटिसेवन्तस्स विय, कायसंसग्गादीनि आपज्जन्तस्स विय च सुपिनन्तेनेव कारणेन असुचि मुच्चति, तस्सपि अनापत्ति. सुपिने (पारा. अट्ठ. २.२६२) पन उप्पन्नाय अस्सादचेतनाय सचस्स विसयो होति, निच्चलेन भवितब्बं, न हत्थेन निमित्तं कीळापेतब्बं. कासावपच्चत्थरणरक्खणत्थं पन हत्थपुटेन गहेत्वा जग्गनत्थाय उदकट्ठानं गन्तुं वट्टति.

सुक्कविस्सट्ठिसिक्खापदवण्णना निट्ठिता.

२. कायसंसग्गसिक्खापदवण्णना

‘‘ओतिण्णो’’ति (सारत्थ. टी. २.२७०) इदं कम्मसाधनं, कत्तुसाधनं वा होतीति तदुभयवसेन अत्थं दस्सेन्तो ‘‘यक्खादीहि विय सत्ता’’तिआदिमाह. असमपेक्खित्वाति यथासभावं अनुपपरिक्खित्वा, यथा ते रतिजनका रूपादयो विसया अनिच्चदुक्खासुभानत्ताकारेन अवट्ठिता, तथा अपस्सित्वाति वुत्तं होति. परिणतेनाति परिवत्तेन. तेनाह ‘‘यथा परिवत्तमान’’न्तिआदि. वुत्तरागवसेनाति कायसंसग्गरागवसेन. तदहुजातायपीति तस्मिं अहनि जातं जननं एतिस्साति ¶ तदहुजाता, तस्मिं अहनि जाताति वा तदहुजाता, ताय, तं दिवसं जातायपीति अत्थो, जातमत्ताय अल्लमंसपेसिवण्णायपीति वुत्तं होति.

अस्साति ‘‘कायसंसग्गं समापज्जेय्या’’ति पदस्स. इदानि हत्थादीनं विभागदस्सनत्थं ‘‘तत्थ हत्थो नाम कप्परतो पट्ठाया’’तिआदिमाह. कप्परतो पट्ठायाति दुतियमहासन्धिं उपादाय. अञ्ञत्थ पन मणिबन्धतो पट्ठाय याव अग्गनखा हत्थो. विनन्धित्वा वा अविनन्धित्वा वा कतकेसकलापस्सेतं अधिवचनन्ति सम्बन्धो. तत्थ विनन्धित्वाति तीहि केसवट्टीहि ¶ गन्थित्वा. सुवण्णचीरकन्ति सुवण्णपाळिं. हत्थञ्च वेणिञ्च ठपेत्वा अवसेससरीरं अङ्गन्ति आह ‘‘अवसेसस्स सरीरस्सा’’तिआदि.

यो हि सेवनाधिप्पायोपि निच्चलेन कायेन केवलं फस्सं पटिविजानाति सादियति अनुभोति, तस्स चित्तुप्पादमत्ते आपत्तिया अभावतो अनापत्तीति आह ‘‘कायेन अवायमित्वा’’तिआदि. मोक्खाधिप्पायेनाति इत्थितो मुच्चितुकामताधिप्पायेन. असञ्चिच्चाति ‘‘इमिना उपायेन इमं फुसिस्सामी’’ति अचेतेत्वा. एवञ्हि अचेतेत्वा पत्तप्पटिग्गहणादीसु मातुगामस्स अङ्गे फुट्ठेपि अनापत्ति. असतियाति अञ्ञविहितो होति, ‘‘मातुगामं फुसिस्सामी’’ति सति नत्थि, एवं असतिया हत्थपादपसारणादिकाले फुसन्तस्स अनापत्ति. अजानन्तस्साति दारकवेसेन ठितं दारिकं ‘‘इत्थी’’ति अजानन्तो केनचिदेव करणीयेन फुसति, एवं ‘‘इत्थी’’ति अजानन्तस्स फुसतो अनापत्ति. असादियन्तस्साति कायसंसग्गं असादियन्तस्स बाहापरम्पराय नीतभिक्खुस्स विय अनापत्ति. इध पन उदायित्थेरो आदिकम्मिको. तस्स अनापत्ति आदिकम्मिकस्साति.

कायसंसग्गसिक्खापदवण्णना निट्ठिता.

३. दुट्ठुल्लवाचासिक्खापदवण्णना

दुट्ठुल्लवाचस्सादरागवसेनाति दुट्ठुल्ला वाचा दुट्ठुल्लवाचा, ताय अस्सादचेतना दुट्ठुल्लवाचस्सादो, तेन सम्पयुत्तरागवसेन. एत्थाधिप्पेतं ¶ मातुगामं दस्सेतुं ‘‘मातुगाम’’न्तिआदिमाह. दुट्ठुल्लादुट्ठुल्लसंलक्खणसमत्थन्ति असद्धम्मसद्धम्मप्पटिसंयुत्तं कथं जानितुं समत्थं. या पन महल्लिकापि बाला एळमूगा, अयं इधानधिप्पेता. वण्णो नाम द्वे मग्गे उद्दिस्स ‘‘इत्थिलक्खणेन सुभलक्खणेन समन्नागतासी’’तिआदिना (पारा. अट्ठ. २.२८५) थोमना. अवण्णो नाम द्वे मग्गे उद्दिस्स वुत्तविपरियायेन गरहना, ‘‘इत्थिलक्खणेन सुभलक्खणेन असमन्नागतासी’’तिआदीहि खुंसनाति वुत्तं होति. याचना नाम ‘‘देहि मे, अरहसि मे दातु’’न्ति (पारा. २८५) वचनं. आयाचना नाम ‘‘कदा ते माता पसीदिस्सति, कदा ते पिता पसीदिस्सति, कदा ते देवतायो पसीदिस्सन्ति, कदा ते सुखणो सुलयो सुमुहुत्तो भविस्सति, कदा ते मेथुनं धम्मं लभिस्सामी’’ति (पारा. २८५) वचनं ¶ . पुच्छनं नाम ‘‘कथं त्वं सामिकस्स देसि, कथं जारस्स देसी’’ति (पारा. २८५) वचनं. पटिपुच्छनं नाम ‘‘एवं किर त्वं सामिकस्स देति, एवं जारस्स देसी’’ति (पारा. २८५) वचनं. आचिक्खनं नाम पुट्ठस्स ‘‘एवं देहि, एवं देन्ता सामिकस्स पिया भविस्ससि, मनापा चा’’ति (पारा. २८५) भणनं. अनुसासनं नाम अपुट्ठस्स ‘‘एवं देहि, एवं देन्ता सामिकस्स पिया भविस्ससि, मनापा चा’’ति (पारा. २८५) भवनं. अक्कोसनं (पारा. २८५) नाम ‘‘अनिमित्तासि, निमित्तमत्तासि, अलोहितासि, धुवलोहितासि, धुवचोळासि, पग्घरन्तीसि, सिखरणीसि, इत्थिपण्डकासि, वेपुरिसिकासि, सम्भिन्नासि, उभतोब्यञ्जनकासी’’ति (पारा. २८५) वचनं. यस्मा मेथुनुपसंहिताय वाचाय अधिकं दुट्ठुल्लं नाम नत्थि, तस्मा ‘‘मेथुनुपसंहिताही’’ति इदं दुट्ठुल्लवाचाय सिखापत्तलक्खणदस्सनन्ति वुत्तं, न पन मेथुनुपसंहितायेव दुट्ठुल्लवाचत्ता. सिखरणीसीति (पारा. अट्ठ. २.२८५) बहिनिक्खन्तआणिमंसा. सम्भिन्नासीति सम्भिन्नवच्चमग्गपस्सावमग्गा. उभतोब्यञ्जनकासीति पुरिसनिमित्तेन, इत्थिनिमित्तेन चाति उभतोब्यञ्जनेहि समन्नागता.

एत्थ च वण्णभणने ताव ‘‘इत्थिलक्खणेन सुभलक्खणेन समन्नागतासी’’ति वदति, न ताव सीसं एति. ‘‘तव वच्चमग्गो च पस्सावमग्गो च सुभो सुभसण्ठानो दस्सनीयो, ईदिसेन नाम इत्थिलक्खणेन सुभलक्खणेन समन्नागतासी’’ति वदति, सीसं एति, सङ्घादिसेसो होतीति अत्थो.

अवण्णभणने ¶ पन ‘‘अनिमित्तासी’’तिआदीहि एकादसहि पदेहि अवण्णे अघटिते सीसं न एति, घटितेपि तेसु ‘‘सिखरणीसि सम्भिन्नासि उभतोब्यञ्जनकासी’’ति इमेहि तीहि घटितेयेव सङ्घादिसेसो.

याचनायपि ‘‘देहि मे’’ति एत्तकेनेव सीसं न एति, ‘‘मेथुनं धम्मं देही’’ति एवं मेथुनधम्मेन घटिते एव सङ्घादिसेसो.

‘‘कदा ते माता पसीदिस्सती’’तिआदीसु आयाचनवचनेसुपि एत्तकेनेव सीसं न एति, ‘‘कदा ते माता पसीदिस्सति, कदा ते मेथुनं धम्मं लभिस्सामी’’ति वा ‘‘तव मातरि पसन्नाय वा मेथुनं धम्मं लभिस्सामी’’तिआदिना पन नयेन मेथुनधम्मेन घटितेयेव सङ्घादिसेसो.

‘‘कथं त्वं सामिकस्स देसी’’तिआदीसु (पारा. २८५) पुच्छावचनेसुपि ‘‘मेथुनं धम्म’’न्ति ¶ वुत्तेयेव सङ्घादिसेसो. ‘‘एवं किर त्वं सामिकस्स देसी’’ति (पारा. २८५) पटिपुच्छावचनेसुपि एसेव नयो.

आचिक्खनाय च ‘‘एवं देही’’ति, ‘‘एवं ददमाना’’ति वुत्तेपि सीसं न एति, ‘‘मेथुनं धम्मं एवं देहि, एवं उपनेहि, एवं मेथुनं धम्मं ददमाना उपनयमाना सामिकस्स पिया होती’’तिआदिना पन नयेन मेथुनधम्मेन घटितेयेव सङ्घादिसेसो. अनुसासनिवचनेसुपि एसेव नयो.

अक्कोसवचनेसु पन एकादससु ‘‘सिखरणीसि सम्भिन्नासि उभतोब्यञ्जनकासी’’ति इमानि तीणियेव पदानि सुद्धानि सीसं एन्ति, इति इमानि च तीणि, पुरिमानि च वच्चमग्गपस्सावमग्गमेथुनधम्मपदानि तीणीति छ पदानि सुद्धानि आपत्तिकरानि, सेसानि ‘‘अनिमित्तासी’’तिआदीनि अनिमित्ते ‘‘मेथुनं धम्मं मे देही’’ति वा ‘‘अनिमित्तासि, मेथुनं धम्मं मे देही’’ति वा आदिना नयेन मेथुनधम्मेन घटितानेव आपत्तिकरानि होन्तीति वेदितब्बानि.

अधक्खकन्ति अक्खकतो पट्ठाय अधो. उब्भजाणुमण्डलन्ति जाणुमण्डलतो पट्ठाय उद्धं. उब्भक्खकन्ति अक्खकतो पट्ठाय उद्धं. अधोजाणुमण्डलन्ति जाणुमण्डलतो पट्ठाय अधो. अक्खकं, पन जाणुमण्डलञ्च एत्थेव दुक्कटखेत्ते सङ्गहं गच्छति भिक्खुनिया कायसंसग्गे विय ¶ . न हि बुद्धा गरुकापत्तिं सावसेसं पञ्ञापेन्तीति. कायप्पटिबद्धन्ति वत्थं वा पुप्फं वा आभरणं वा.

अत्थधम्मअनुसासनिपुरेक्खारानन्ति (पारा. अट्ठ. २.२८७) एत्थ ‘‘अनिमित्ता’’तिआदीनं पदानं अत्थं कथेन्तो, अट्ठकथं वा सज्झायं करोन्तो अत्थपुरेक्खारो नाम, पाळिं वाचेन्तो, सज्झायं वा करोन्तो धम्मपुरेक्खारो नाम, ‘‘इदानिपि अनिमित्तासि, उभतोब्यञ्जनकासि, अप्पमादं दानि करेय्यासि, यथा आयतिम्पि एवरूपा मा होहिसी’’ति भणन्तो अनुसासनिपुरेक्खारो नाम. इति अत्थञ्च धम्मञ्च अनुसासनिञ्च पुरक्खित्वा भणन्तानं अनापत्ति. यो पन भिक्खुनीनं पाळिं वाचेन्तो पकतिवाचनामग्गं पहाय हसन्तो हसन्तो ‘‘सिखरणीसि, सम्भिन्नासि, उभतोब्यञ्जनकासी’’ति पुनप्पुनं भणति, तस्स आपत्तियेव. इध आदिकम्मिको उदायित्थेरो, तस्स अनापत्ति आदिकम्मिकस्स. ननु ‘‘सिखरणी’’तिआदीहि अक्कोसन्तस्स पटिघचित्तं उप्पज्जतीति दुक्खवेदनायपि भवितब्बं, अथ ¶ कस्मा द्विवेदनन्ति? नायं दोसो. रागवसेन हि अयं आपत्ति, न पटिघवसेन, तस्मा रागवसेनेव पवत्तो अक्कोसो इधाधिप्पेतो, न पटिघवसेनापीति.

दुट्ठुल्लवाचासिक्खापदवण्णना निट्ठिता.

४. अत्तकामसिक्खापदवण्णना

अत्तकामपारिचरियावसेनाति अत्तकामपारिचरियाय रागवसेन. इधापि दुट्ठुल्लादुट्ठुल्लजाननसमत्थाव इत्थी अधिप्पेताति आह ‘‘दुट्ठुल्लोभासेन वुत्तप्पकाराय इत्थिया’’ति. समीपेति सवनूपचारे. ‘‘ठत्वा’’ति पाठसेसो. अत्तकामपारिचरियाति कामीयतीति कामो, मेथुनधम्मो, परिचरणं उपट्ठानं परिचरिया, साव पारिचरिया, कामेन पारिचरिया कामपारिचरिया, अत्तनो कामपारिचरिया अत्तकामपारिचरिया, अत्तनो अत्थाय मेथुनधम्मेन उपट्ठानन्ति अत्थो. अथ वा कामिताति कामा, पारिचरिया, अत्तनो कामा अत्तकामा, अत्तकामा च सा पारिचरिया चाति अत्तकामपारिचरिया, सयं मेथुनरागवसेन ¶ पत्थितउपट्ठानन्ति अत्थो. तेनाह ‘‘मेथुनधम्मसङ्खातेना’’तिआदि. एत्थ च पठमेन अत्थविकप्पेन कामहेतुपारिचरियासङ्खातं अत्थत्तयं दस्सेति, दुतियेन अधिप्पायपारिचरियासङ्खातं अत्थद्वयं. ब्यञ्जने (पारा. अट्ठ. २.२९१) पन आदरं अकत्वा अत्थमत्तमेव दस्सेतुं ‘‘अत्तनो कामं अत्तनो हेतुं अत्तनो अधिप्पायं अत्तनो पारिचरिय’’न्ति (पारा. २९२) पदभाजनं वुत्तं. ‘‘अत्तनो कामं अत्तनो हेतुं अत्तनो पारिचरिय’’न्ति हि वुत्ते जानिस्सन्ति पण्डिता ‘‘एत्तावता अत्तनो अत्थाय कामपारिचरिया वुत्ता’’ति, ‘‘अत्तनो अधिप्पायं अत्तनो पारिचरिय’’न्ति (पारा. २९२) वुत्तेपि जानिस्सन्ति ‘‘एत्तावता अत्तना इच्छितकामितट्ठेन अत्तकामपारिचरिया वुत्ता’’ति.

कल्याणेन भद्दकेन गुणेन समन्नागतत्ता कल्याणधम्मं. तेनाह ‘‘तदुभयेनापी’’तिआदि. अभिरमेय्याति तोसेय्य. एतदग्गन्ति एसा अग्गा. पारिचरियानन्ति पारिचरियानं मज्झे, निद्धारणे चेतं सामिवचनं. ननु दुट्ठल्लवाचासिक्खापदे (पारा. २८५) मेथुनयाचनं आगतं, अथ कस्मा इदं वुत्तं? नायं दोसो. तत्थ (सारत्थ. टी. २.२९१) हि दुट्ठुल्लवाचस्सादरागवसेन वुत्तं, इध पन अत्तनो मेथुनस्सादरागवसेनाति.

तस्मिंयेव खणेति भणितक्खणे. उभतोब्यञ्जनको पन पण्डकगतिकत्ता विसुं न वुत्तो ¶ . ‘‘इमस्मिं सिक्खापदद्वये कायसंसग्गे विय यक्खिपेतीसुपि दुट्ठुल्लत्तकामवचने थुल्लच्चय’’न्ति (वजिर. टी. पाराजिक २९५) वदन्ति. तस्मिंयेवाति पण्डकेयेव इत्थिसञ्ञिनो अत्तकामपारिचरियाय वण्णभणनेपि दुक्कटं. ‘‘यो ते विहारे वसति, तस्स अग्गदानं मेथुनं धम्मं देही’’ति परियायवचनेपि दुक्कटं. ‘‘अत्तकामपारिचरियाय वण्णं भासेय्य या मादिसं ‘सीलवन्त’न्ति वुत्तत्ता’’ति (वजिर. टी. पाराजिक २९५) एके. ‘‘पञ्चसु अङ्गेसु सब्भावा सङ्घादिसेसोवा’’ति अपरे. ‘‘मेथुनुपसंहितेना’’ति वुत्तत्ता ‘‘चीवरादीहि…पे… भासन्तस्स अनापत्ती’’ति वुत्तं.

अत्तकामसिक्खापदवण्णना निट्ठिता.

५. सञ्चरित्तसिक्खापदवण्णना

सञ्चरणं ¶ सञ्चरो, सो एतस्स अत्थीति सञ्चरी, सञ्चरणसीलोति वा सञ्चरी, तस्स भावो सञ्चरित्तं, सञ्चरणन्ति अत्थो. तञ्च परतो ‘‘इत्थिया वा पुरिसमति’’न्तिआदिवचनतो इत्थिपुरिसानं वेमज्झेति आह ‘‘इत्थिपुरिसानं अन्तरे सञ्चरणभाव’’न्ति. पटिग्गण्हनवीमंसनपच्चाहरणानीति एत्थ पटिग्गण्हनं नाम पुरिसेन वा इत्थिया वा उभिन्नं मातादीहि वा ‘‘भन्ते, इत्थन्नामं इत्थिं वा पुरिसं वा एवं भणाही’’ति वुत्ते तेसं वचनं ‘‘साधू’’ति वा ‘‘होतू’’ति वा ‘‘भणामी’’ति वा येन केनचि आकारेन वचीभेदं कत्वा, सीसकम्पनादीहि वा सम्पटिच्छनं. वीमंसनं नाम वुत्तप्पकारेन सासनं गहेत्वा तस्सा इत्थिया वा पुरिसस्स वा तेसं अवस्सं आरोचनकानं मातापितुभाताभगिनिआदीनं वा सन्तिकं गन्त्वा तस्स सासनस्स आरोचनं. पच्चाहरणं नाम तेन गन्त्वा आरोचिते सा इत्थी वा पुरिसो वा ‘‘साधू’’ति सम्पटिच्छतु वा, मा वा, लज्जाय वा तुण्ही होतु, पुन आगन्त्वा तस्सा इत्थिया वा पुरिसस्स वा तस्सा पवत्तिया आरोचनं. आपज्जेय्याति पटिपज्जेय्य.

इत्थिया वा पुरिसमतिं पुरिसस्स वा इत्थिमतिन्ति एत्थ ‘‘आरोचेय्या’’ति पाठसेसो दट्ठब्बो. तेनेवाह ‘‘तत्था’’तिआदि. जायाभावेति भरियाभावे. जारभावेति पतिभावे, निमित्तत्थे चेतं भुम्मवचनं. तस्मा भरियाभावनिमित्तं पतिभावनिमित्तं, भरियाभावहेतु पतिभावहेतु, भरियाभावपच्चया पतिभावपच्चया आरोचेतीति अत्थो. एस नयो ‘‘जायत्तने आरोचेती’’तिआदीसुपि. ‘‘जायत्तने वा जारत्तने वा’’ति हि इदं यदत्थं तं तेसं मतिं आरोचेति ¶ , तं दस्सनत्थं वुत्तं. इदानि पन पदभाजनियं (पारा. ३०२) वुत्तनयेनापि अत्थं दस्सेतुं ‘‘अपिचा’’तिआदिमाह. किञ्चापि इत्थिलिङ्गवसेन पदभाजनियं वुत्तं, ‘‘जायत्तने वा जारत्तने वा’’ति पन निद्देसस्स उभयलिङ्गसाधारणत्ता पुरिसलिङ्गवसेनापि योजेत्वा वत्तब्बन्ति आह ‘‘एतेनेव उपायेना’’तिआदि. मुहुत्तिकाति गणिका. ‘‘अन्तमसो तङ्खणिकायपी’’ति इदं निदस्सनमत्तन्ति आह ‘‘एतेनेव उपायेना’’तिआदि.

अञ्ञत्र ¶ नालंवचनीयायाति (सारत्थ. टी. २.३३९-३४०) देसचारित्तवसेन पण्णदानादिना अपरिच्चत्तं ठपेत्वा. सञ्चरित्तवसेन भिक्खुना वचनीया न होतीति नालंवचनीया, तं ठपेत्वाति केचि. अप्पेन वा बहुना वा धनेन कीता धनक्कीता. यस्मा पन सा न कीतमत्तायेव भरिया, संवासत्थाय पन कीतत्ता भरिया, तस्मास्स निद्देसे ‘‘धनेन किणित्वा वासेती’’ति (पारा. ३०४) वुत्तं. छन्दवासिनीति छन्देन अत्तनो रुचिया वसतीति छन्दवासिनी. यस्मा पन सा न अत्तनो छन्दमत्तेनेव भरिया होति, पुरिसेन पन सम्पटिच्छितत्ता, तस्मास्स निद्देसे ‘‘पियो पियं वासेती’’ति (पारा. ३०४) वुत्तं. आदिसद्देन ‘‘भोगवासिनी, पटवासिनी, ओदपत्तकिनी, ओभटचुम्बटा, दासी च भरिया च, कम्मकारी च भरिया च, धजाहटा, मुहुत्तिका’’ति (पारा. ३०४) इमेसं अट्ठन्नं आकारानं गहणं. यथा च ‘‘छन्दवासिनी’’तिआदीसु अञ्ञतरवसेन वदतो विसङ्केतो नत्थि, एवं पाळियं अवुत्तेसुपि ‘‘होहि किर इत्थन्नामस्स भरिया, जाया, पजापति, पुत्तमाता, घरणी, घरसामिनी, भत्तरन्धिका, सुस्सूसिका, परिचारिका’’ति (पारा. अट्ठ. २.३०५) एवमादीसु संवासपरिदीपकेसु वचनेसु अञ्ञतरवसेन वदन्तस्सापि विसङ्केतो नत्थि, तिवङ्गसम्पत्तिया आपत्तियेव.

मातुरक्खितं ब्रूहीति एत्थ मातुरक्खिता नाम मातरा रक्खिता, यथा पुरिसेन सह संवासं न कप्पेति, एवं मातरा रक्खिताति अत्थो. तेनेवस्स पदभाजनेपि ‘‘माता रक्खति गोपेति, इस्सरियं कारेति, वसं वत्तेती’’ति (पारा. ३०४) वुत्तं. पितुरक्खितादीसूति ‘‘पितुरक्खिता, मातापितुरक्खिता, भातुरक्खिता, भगिनिरक्खिता, ञातिरक्खिता, गोत्तरक्खिता, धम्मरक्खिता, सारक्खा, सपरिदण्डा’’ति (पारा. ३०३) एवं वुत्तेसु पितुरक्खितादीसु. यथा च एत्थ, एवं ‘‘पितुरक्खितं ब्रूही’’तिआदीसुपि नयो वेदितब्बो.

सङ्घस्स वा चेतियस्स वा गिलानस्स वा किच्चेन गच्छन्तस्साति (पारा. अट्ठ. २.३४०) एत्थ भिक्खुसङ्घस्स उपोसथागारं वा किञ्चि वा विप्पकतं होति. तत्थ कारुकानं भत्तवेतनत्थाय ¶ उपासको वा उपासिकाय सन्तिकं भिक्खुं पहिणेय्य, उपासिका वा उपासकस्स, एवरूपेन सङ्घकिच्चेन गच्छन्तस्स अनापत्ति. चेतियकम्मे करियमानेपि एसेव नयो. गिलानस्स ¶ भेसज्जत्थायपि उपासकेन वा उपासिकाय सन्तिकं, उपासिकाय वा उपासकस्स सन्तिकं पहितस्स गच्छतो अनापत्ति.

किञ्चापि एत्थ ‘‘इत्थी नाम मनुस्सित्थी, न यक्खी न पेती न तिरच्छानगता. पुरिसो नाम मनुस्सपुरिसो, न यक्खो’’तिआदि (सारत्थ. टी. २.३४१) नत्थि, तथापि मनुस्सजातिकाव इत्थिपुरिसा इध अधिप्पेताति आह ‘‘तेसं मनुस्सजातिकता’’ति. ननालंवचनीयताति यथावुत्तनयेन परिच्चत्ता अलंवचनीया. निवारणत्थो हि एत्थ अलं-सद्दो. न अलंवचनीया नालंवचनीया, न नालंवचनीया, तस्सा भावो ननालंवचनीयता, ‘‘अलंवचनीयता’’इच्चेव वुत्तं होति.

पण्णत्तिन्ति, इमं सिक्खापदं. कायविकारेनाति सीसुक्खिपनादिकायविकारेन. तथेव वीमंसित्वा तथेव पच्चाहरन्तस्साति हत्थमुद्दादिना कायविकारेन वीमंसित्वा पुन आगन्त्वा तथेव आरोचेन्तस्स. आगमिस्सतीति तव सन्तिके धम्मस्सवनादिअत्थं आगमिस्सति. केनचि वुत्तेति आसनसालादीसु निसिन्नस्स केनचि पुरिसेन वुत्ते. सचे हि खीणासवस्स मातापितरो कुज्झित्वा अलंवचनीया होन्ति, तञ्च भिक्खुं घरं उपगतं पिता वदति ‘‘माता ते, तात, मं महल्लकं छड्डेत्वा ञातिकुलं गता, गच्छ नं मं उपट्ठातुं पेसेही’’ति. सो चे गन्त्वा तं वत्वा पुन पितुनो तस्सा आगमनं वा अनागमनं वा आरोचेति, एवं आरोचेन्तस्स तस्सपि कायवाचतो समुट्ठाति. तेनाह ‘‘पण्णत्तिं अजानन्तस्स पना’’तिआदि. खीणासवस्सपीति एत्थ पि-सद्देन सेक्खपुथुज्जनानं वत्तब्बमेव नत्थीति दीपेति. पितुवचनेनाति अत्तनो पितुवचनेन. गन्त्वाति तस्सा समीपं गन्त्वा. पण्णत्तिं, अलंवचनीयभावञ्चाति उभयं अजानन्तस्सपि कायवाचतो समुट्ठाति. तदुभयन्ति पण्णत्तिं, अलंवचनीयभावञ्च. यं पन पण्णत्तिं जानित्वा एतेहेव तीहि नयेहि सञ्चरित्तं समापज्जतो कायचित्ततो, वाचाचित्ततो, कायवाचाचित्ततो च समुट्ठाति. इमानि तीणि पण्णत्तिजाननचित्तेन ‘‘सचित्तकसमुट्ठानानी’’ति वुत्तं, तं अयुत्तं. न हि पण्णत्तिं जानित्वापि ‘‘नालंवचनीया’’ति मञ्ञमानस्स सचित्तकेहि समुट्ठानेहि आपत्ति समुट्ठातीति वत्तुं युज्जति वीतिक्कमचेतनाय असम्भवतो.

सञ्चरित्तसिक्खापदवण्णना निट्ठिता.

६. कुटिकारसिक्खापदवण्णना

सञ्ञाचिकाय ¶ ¶ पनाति एत्थ सन्ति अत्तवाचको ततियत्थे निपातो, याचिकाति भावसाधनो, तेसञ्च मज्झेपदलोपसमासो. पनाति निपातमत्तमेव. तेनाह ‘‘सयं पवत्तितयाचना वुच्चती’’ति. या हि अत्तना पवत्तिता, सा अत्तनो नाम होतीति आह ‘‘तस्मा’’तिआदि. ननु न सक्का याचनायेव कुटिं कातुन्ति अनुयोगं सन्धाय तस्साधिप्पायत्थं दस्सेतुं ‘‘सयं याचितकेही’’तिआदिमाह. तत्थ सयं याचितकेहीति ‘‘वासिं देथ, फरसुं देथा’’तिआदिना (पारा. ३४२) सयं याचितकेहि. उपकरणेहीति वासियादीहि. परेन भण्डसामिकेन ‘‘मम इद’’न्ति अपरिच्चागारक्खणगोपनवसेन परिग्गहितं परपरिग्गहितकं, परसन्तकन्ति वुत्तं होति. मूलच्छेदवसेनाति मूलस्स छिन्दनवसेन, परसन्तकभावतो मोचेत्वा अत्तनो सन्तकं कत्वाति वुत्तं होति. एवञ्हि अञ्ञातकअप्पवारितट्ठानतो याचन्तस्स अञ्ञातकविञ्ञत्तिया दुक्कटं. तावकालिकं पन वट्टतीति तावकालिकं कत्वा याचितुं वट्टति. सककम्मं न याचितब्बाति पाणातिपातसिक्खापदरक्खणत्थं वुत्तं. ‘‘हत्थकम्मं देथा’’ति अनियमेत्वापि न याचितब्बा. एवं याचिता हि ते ‘‘साधु, भन्ते’’ति भिक्खुं उय्योजेत्वा मिगेपि मारेत्वा आहरेय्युं. नियमेत्वा पन ‘‘विहारे किञ्चि कत्तब्बं अत्थि, तत्थ हत्थकम्मं देथा’’ति याचितब्बा. ‘‘कुटि नाम उल्लित्ता वा होति, अवलित्ता वा उल्लित्तावलित्ता वा’’ति (पारा. ३४५) पदभाजने वुत्तत्ता ‘‘कुटिन्ति उल्लित्तादीसु अञ्ञतर’’न्ति वुत्तं. तत्थ उद्धं मुखं लित्ता उल्लित्ता. अन्तो लिम्पन्ता हि एवं लिम्पन्ति. अधो मुखं लित्ता अवलित्ता. बहि लिम्पन्ता हि एवं लिम्पन्ति. तेनाह ‘‘तत्थ उल्लित्ता नामा’’तिआदि. पिट्ठसङ्घाटोति द्वारबाहा. ‘‘सुधाय वा मत्तिकाय वा’’ति एतेन ठपेत्वा इमे द्वे लेपे अवसेसो भस्मागोमयादिभेदो अलेपोति दस्सेति.

यस्मा पन सञ्ञाचिकाय कुटिं करोन्तेनापि इध वुत्तनयेनेव पटिपज्जितब्बं, तस्मा ‘‘सयं वा करोन्तेन आणत्तिया वा कारापेन्तेना’’ति वुत्तं. एत्थ च ‘‘सयं वा करोन्तेना’’ति इमिना सामत्थियतो लब्भमानमत्थमाह, न तु पदत्थतो. ‘‘आणत्तिया वा कारापेन्तेना’’ति ¶ (पारा. अट्ठ. २.३४८-३४९) पन पदत्थतो. एवञ्च कत्वा यदि पन ‘‘करोन्तेन वा कारापेन्तेन वा’’ति वदेय्य, ब्यञ्जनं विलोमितं भवेय्य. न हि कारापेन्तो करोन्तो नाम होतीति एदिसी चोदना अनवकासाति दट्ठब्बं. नत्थि सामी पति एतिस्साति असामिका, तं ¶ असामिकं, अनिस्सरन्ति अत्थो. अनिस्सरता चेत्थ कारापनेनाति आह ‘‘कारेता दायकेन विरहित’’न्ति. उद्देसोति उद्दिसितब्बो.

तत्राति सामिस्मिं भुम्मवचनन्ति आह ‘‘तस्सा कुटिया’’ति. दीघसोति निस्सक्कवचनन्ति आह ‘‘दीघतो’’ति. बहिकुट्टेति कुट्टस्स बहि, थुसेन मिस्सको पिण्डो थुसपिण्डो, तस्स परियन्तो थुसपिण्डपरियन्तो, तेन, थुसमिस्सकमत्तिकापिण्डपरियन्तेनाति वुत्तं होति. थुसपिण्डस्सूपरि सेतकम्मं पन अब्बोहारिकं. अब्भन्तरे भवो अब्भन्तरिमो, तेन. यत्थाति यस्सं कुटियं. पमाणयुत्तोति पकतिविदत्थिया नवविदत्थिपमाणो. ‘‘तिरियं सत्तन्तरा’’ति (पारा. ३४८) उक्कंसतो पमाणस्स वुत्तत्ता ‘‘हेट्ठिमकोटिया चतुहत्थवित्थारा न होती’’ति वुत्तं.

सोधेत्वाति समतलसीममण्डलसदिसं कत्वा. पदभाजने वुत्तनयेन सङ्घं तिक्खत्तुं याचित्वाति ‘‘सङ्घं उपसङ्कमित्वा एकंसं उत्तरासङ्गं करित्वा वुड्ढानं भिक्खूनं पादे वन्दित्वा उक्कुटिकं निसीदित्वा अञ्जलिं पग्गहेत्वा एवमस्स वचनीयो ‘अहं, भन्ते, सञ्ञाचिकाय कुटिं कत्तुकामो असामिकं अत्तुद्देसं, सोहं, भन्ते, सङ्घं कुटिवत्थुओलोकनं याचामी’’’ति (पारा. ३४९) पदभाजने वुत्तनयेन तिक्खत्तुं याचित्वा. सङ्घेन वा सम्मताति पदभाजनियं (पारा. ३५०) वुत्तेन ञत्तिदुतियकम्मेन, अपलोकनकम्मवसेन वा सङ्घेन सम्मता. वत्थूति कुटिवत्थु. अनारम्भन्ति अनुपद्दवं. परितो कमति गच्छति एत्थाति परिक्कमनं, तेन सह वत्ततीति सपरिक्कमनं, सउपचारन्ति अत्थो. तेनाह ‘‘तेहि भिक्खूही’’तिआदि.

किपिल्लिकादीनन्ति एत्थ किपिल्लिका (पारा. अट्ठ. २.३५३) नाम रत्तकाळपिङ्गलादिभेदा या काचि, ता आदि येसं तानि किपिल्लिकादीनि, तेसं. आदिसद्देन उपचिकादीनं सङ्गहणं. आसयोति निबद्धवसनट्ठानं, सो आदि ¶ येसं ते आसयादयो, तेहि. आदिसद्देन चेत्थ निस्सितस्स गहणं. सोळसहि उपद्दवेहीति ‘‘किपिल्लिकानं वा आसयो होति, उपचिकानं वा उन्दूरानं वा अहीनं वा विच्छिकानं वा सतपदीनं वा हत्थीनं वा अस्सानं वा सीहानं वा ब्यग्घानं वा दीपीनं वा अच्छानं वा तरच्छानं वा येसं केसञ्चि तिरच्छानगतानं पाणानं वा आसयो होति, पुब्बण्णनिस्सितं वा होति, अपरण्णअब्भाघातआघातनसुसानउय्यानराजवत्थुहत्थिसालाअस्ससालाबन्धनागारपानागारसूनरच्छाचच्चरसभासंसरणनिस्सितं वा होती’’ति (पारा. ३५३) एवं वुत्तेहि सोळसहि उपद्दवेहि. तत्थ ¶ च अब्भाघातं (पारा. अट्ठ. २.३५३) नाम कारणाघरं. आघातनं नाम धम्मगन्धिका. सुसानन्ति महासुसानं. संसरणं नाम अनिब्बिज्झगमनीयो गतपच्चागतमग्गो.

आविज्झितुं सक्कुणेय्यतायाति छिन्नतटादीनमभावतो अनुपरियायितुं सक्कुणेय्यताय. तेन भिक्खुनाति कुटिकारकेन भिक्खुना. याचितेहीति ‘‘एकंसं उत्तरासङ्गं करित्वा वुड्ढानं भिक्खूनं पादे वन्दित्वा उक्कुटिकं निसीदित्वा अञ्जलिं पग्गहेत्वा एवमस्स वचनीयो ‘अहं, भन्ते, सञ्ञाचिकाय कुटिं कत्तुकामो असामिकं अत्तुद्देसं, सोहं, भन्ते, सङ्घं कुटिवत्थुदेसनं याचामी’’’ति (पारा. ३५१) तिक्खत्तुं याचितेहि. ञत्तिदुतियेन कम्मेनाति –

‘‘सुणातु मे, भन्ते, सङ्घो, अयं इत्थन्नामो भिक्खु सञ्ञाचिकाय कुटिं कत्तुकामो असामिकं अत्तुद्देसं, सो सङ्घं कुटिवत्थुदेसनं याचति. यदि सङ्घस्स पत्तकल्लं, सङ्घो इत्थन्नामस्स भिक्खुनो कुटिवत्थुं देसेय्य. एसा ञत्ति. सुणातु मे, भन्ते, सङ्घो, अयं इत्थन्नामो भिक्खु सञ्ञाचिकाय कुटिं कत्तुकामो असामिकं अत्तुद्देसं, सो सङ्घं कुटिवत्थुदेसनं याचति. सङ्घो इत्थन्नामस्स भिक्खुनो कुटिवत्थुं देसेति, यस्सायस्मतो खमति इत्थन्नामस्स भिक्खुनो कुटिवत्थुस्स देसना, सो तुण्हस्स. यस्स नक्खमति, सो भासेय्य. देसितं सङ्घेन इत्थन्नामस्स भिक्खुनो कुटिवत्थु, खमति सङ्घस्स, तस्मा तुण्ही, एवमेतं धारयामी’’ति –

एवं ¶ पदभाजने वुत्तेन ञत्तिदुतियेन कम्मेन. आळविका नाम आळविरट्ठे जाता दारका, ते पब्बजितकालेपि ‘‘आळविका’’त्वेव पञ्ञायिंसु. ते सन्धाय वुत्तं आळविके भिक्खू’’ति. लेपे घटितेति (पारा. अट्ठ. २.३५३) अन्तोलेपे वा अन्तोलेपेन सद्धिं भित्तिञ्च छदनञ्च एकाबद्धं कत्वा घटिते, बहिलेपे वा बहिलेपेन सद्धिं घटिते. द्वे च दुक्कटानि सारम्भअपरिक्कमनवसेन. उभयविपन्नाति उभयेहि देसनापमाणेहि विपन्ना विरहिता उभयविपन्ना, अदेसितवत्थुका पमाणातिक्कन्ताति अत्थो. तस्मिन्ति द्वारबन्धे वा वातपाने वा. लेपो न घटियतीति पुब्बे दिन्नलेपो द्वारबन्धेन वा वातपानेन वा सद्धिं न घटियति, एकाबद्धं हुत्वा न तिट्ठतीति वुत्तं होति. तन्ति द्वारबन्धं वा वातपानं वा परामसति. पठममेवाति लेपकिच्चस्स निट्ठितत्ता द्वारबन्धवातपानानं ठपनतो पुब्बेयेव, लेपस्स निट्ठितक्खणेयेवाति अधिप्पायो. ‘‘भिक्खु कुटिं करोति देसितवत्थुकं पमाणिकं सारम्भं सपरिक्कमनं, आपत्ति दुक्कटस्स. भिक्खु कुटिं करोति देसितवत्थुकं पमाणिकं अनारम्भं अपरिक्कमनं, आपत्ति दुक्कटस्सा’’ति (पारा. ३५५) पदभाजनियं वुत्तत्ता ‘‘केवलं सारम्भाया’’तिआदि वुत्तं. विप्पकतन्ति ¶ अनिट्ठितं. अञ्ञस्स ददतो चाति अञ्ञस्स पुग्गलस्स वा सङ्घस्स वा ददतो च. गुहा नाम इट्ठकगुहा वा सिलागुहा वा दारुगुहा वा भूमिगुहा वा. तिणकुटि नाम सत्तभूमिकोपि पासादो तिणच्छदनो ‘‘तिणकुटिका’’ति वुच्चति. अञ्ञस्साति आचरियस्स वा उपज्झायस्स वा सङ्घस्स वा. वासागारं ठपेत्वाति (पारा. अट्ठ. २.३६४) अत्तनो वसनत्थाय वासागारं ठपेत्वा. उपोसथागारादीसूति एत्थ आदिसद्देन जन्ताघरभोजनसालाअग्गिसालानं गहणं. हेट्ठिमपमाणसम्भवोति चतुहत्थवित्थिण्णता. अदेसापेत्वा करोतोति वत्थुं अदेसापेत्वा पमाणातिक्कन्तं, पमाणयुत्तं वा करोतो. एत्थ च वत्थुनो अदेसापनं अकिरिया. कुटिकरणं किरिया.

कुटिकारसिक्खापदवण्णना निट्ठिता.

७. विहारकारसिक्खापदवण्णना

महन्तं ¶ लाति गण्हातीति महल्लको, तं महल्लकं. यो च यं गण्हाति, सो तस्स अत्थीति आह ‘‘महन्तभावो एतस्स अत्थीति महल्लको’’ति. सो च महन्तभावो केन, कुतो चाति आह ‘‘ससामिकभावेना’’तिआदि. न केवलं ससामिकभावेनेवाति आह ‘‘यस्मा वा’’तिआदि. यदि एवं अथ कस्मा ‘‘महल्लको नाम विहारो ससामिको वुच्चती’’ति (पारा. ३६७) एत्तकमेव पदभाजने वुत्तन्ति आह ‘‘यस्मा पना’’तिआदि. विहरन्ति एत्थाति विहारो, आवासो. मातिकायं भिक्खू वा अनभिनेय्याति एत्थ वा-सद्दो ‘‘अयं वा सो महानागो’’तिआदीसु विय अवधारणत्थो.

कोसम्बियन्ति (सारत्थ. टी. २.३६५) एवंनामके नगरे. तस्स किर नगरस्स आरामपोक्खरणिआदीसु तेसु तेसु ठानेसु कोसम्बरुक्खाव उस्सन्ना अहेसुं, तस्मा तं ‘‘कोसम्बी’’ति सङ्खं गच्छति. ‘‘कुसुम्बस्स नाम इसिनो अस्समतो अविदूरे मापितत्ता’’ति एके. छन्नत्थेरं आरब्भाति यो अभिनिक्खमनकाले सद्धिं निक्खन्तो, यस्स च सत्थारा परिनिब्बानकाले ब्रह्मदण्डो (चूळव. ४४५) आणत्तो, तं छन्नत्थेरं आरब्भ. चेतियरुक्खन्ति चित्तीकतट्ठेन चेतियं, पूजारहानं देवट्ठानानमेतं अधिवचनं, ‘‘चेतिय’’न्ति सम्मतं रुक्खं चेतियरुक्खं. वत्थुनो अदेसनाय आपज्जनतो ‘‘अकिरियमत्ततो समुट्ठानभावो’’ति वुत्तं. मत्त-सद्देन किरियतो समुट्ठानतं पटिक्खिपति. केचि पन ‘‘वत्थुअदेसनाय, कुटिकरणेन च समुट्ठानतो किरियाकिरियतो समुट्ठाती’’ति वदन्ति. पमाणनियमाभावोव विसेसो.

विहारकारसिक्खापदवण्णना निट्ठिता.

८. दुट्ठदोससिक्खापदवण्णना

दूसीयतीति ¶ दुट्ठो, दूसेति परं विनासेतीति दोसो. तेनाह ‘‘दूसितो चेवा’’तिआदि. इदानि ‘‘दूसितो चेव दूसको चा’’ति इमिना ¶ सङ्खेपेन वुत्तमेवत्थं वित्थारेत्वा दस्सेतुं ‘‘उप्पन्ने हि दोसे’’तिआदिमाह. पकतिभावं जहापितोति (सारत्थ. टी. २.३८५-३८६) सोम्मभावं जहापितोति अत्थो, विकारमापादितोति वुत्तं होति. आकारनानात्तेनाति दूसिताकारस्स चेव दूसकाकारस्स चाति इमेसं द्विन्नं आकारानं नानाभावेन. नप्पतितोति पीतिसुखादीहि न अभिगतो अनुपगतो, न उपगतोति अत्थो. यो च पीतिसुखादीहि अनुपगतो, सो तेहि वज्जितो नाम होतीति आह ‘‘पीतिसुखादीहि विवज्जितो’’ति. यो च तेहि वज्जितो, न सो तेहि अभिसटो नाम होतीति आह ‘‘न अभिसटो’’ति, पीतिसुखादीहि न पत्थटोति अत्थो. नास्स मूलन्ति अमूलकं. तं पन अमूलकत्तं यस्मा चोदकवसेन अधिप्पेतं, न चुदितकवसेन, तस्मा तदत्थं दस्सेतुं ‘‘यं चोदकेना’’तिआदि वुत्तं. तत्थ यन्ति पाराजिकं. एतन्ति चुदितकस्स आपन्नानापन्नत्तं. इधाति इमस्मिं सिक्खापदे.

इदानि अत्तना वुत्तमेव दिट्ठादिं विवरितुं ‘‘एत्थ चा’’तिआदि वुत्तं. तथेवाति ‘‘पसादसोतेन वा दिब्बसोतेन वा’’ति इममत्थं अतिदिसति. परिसङ्कितं (पारा. अट्ठ. २.३८५-३८६) पन तिविधं दिट्ठपरिसङ्कितं, सुतपरिसङ्कितं, मुतपरिसङ्कितन्ति. तत्थ भिक्खुञ्च मातुगामञ्च तथारूपे ठाने दिस्वा ‘‘अद्धा इमेहि कत’’न्ति वा ‘‘करिस्सन्ती’’ति वा परिसङ्कितं, इदं दिट्ठपरिसङ्कितं नाम. अन्धकारे वा पटिच्छन्नोकासे वा भिक्खुस्स च मातुगामस्स च वचनं सुत्वा दुतियस्स अत्थिभावं अजानतो पुब्बे वुत्तनयेन परिसङ्कितं, इदं सुतपरिसङ्कितं नाम. धुत्तेहि इत्थीहि सद्धिं पच्चन्तविहारे मण्डपे वा सालादीसु वा पुप्फगन्धमंससुरादीनि अनुभवित्वा गतट्ठानं दिस्वा ‘‘केन नु खो इदं कत’’न्ति वीमंसन्तेन तत्र केनचि भिक्खुना गन्धादीहि पूजा कता होति, भेसज्जत्थाय अरिट्ठं वा पीतं, सो तस्स गन्धं घायित्वा ‘‘अयं सो भविस्सती’’ति परिसङ्कितं, इदं मुतपरिसङ्कितं नाम. एवं तिविधस्स परिसङ्कितस्स अभावो अपरिसङ्कितं. तेनाह ‘‘दिट्ठसुतमुतवसेन चेतसा अपरिसङ्कित’’न्ति. तञ्च पनेतं दिट्ठादिकं न केवलं अत्तनो वाति आह ‘‘अत्तनो वा परस्स वा’’ति. यस्मा ‘‘त्वं पण्डको’’तिआदिवचनेनापि चोदयतो आपत्तियेव, तस्मा ‘‘भिक्खुनो अनुरूपेसु एकूनवीसतिया अञ्ञतरेना’’ति वुत्तं. यदि एवं अथ कस्मा पदभाजने ¶ ‘‘पाराजिकेन धम्मेनाति चतुन्नं अञ्ञतरेना’’ति (पारा. ३८६) वुत्तन्ति आह ‘‘पदभाजने ¶ पना’’तिआदि. उपसग्गनिपातानं वाचकसद्दसन्निट्ठाने तदत्थजोतनभावेन पवत्तनतो ‘‘धंसेय्या’’ति वुत्तं. धंसनञ्चेत्थ अभिभवनं. तेनाह ‘‘अभिभवेय्या’’ति. ‘‘त्वं मेथुनं धम्मं पटिसेवी’’तिआदिना नयेन पवत्ताति ‘‘त्वं मेथुनं धम्मं पटिसेवि, अदिन्नं आदियि, मनुस्सं घातयित्थ, अभूतं आरोचयित्था’’ति एवं पवत्ता. एत्थ च ‘‘अस्समणोसी’ति अवन्दनकारणस्स अवुत्तत्ता अन्तिमवत्थुं अज्झापन्नो न वन्दितब्बो’’ति वदन्ति, तं न गहेतब्बं अवन्दियेसु अन्तिमवत्थुं अज्झापन्नस्स अवुत्तत्ता, ‘‘पच्छा उपसम्पन्नेन पुरे उपसम्पन्नो वन्दियो’’ति (परि. ४६८) वुत्तत्ता च. इदं पन अत्तना वत्तब्बं दस्सेतुं वुत्तं.

समीपेति द्वादसहत्थपमाणे पदेसे. सिक्खापच्चक्खानमेव हि हत्थमुद्दाय सीसं न एति, इदं पन अनुद्धंसनं, अभूतरोचनञ्च एतियेव. तेनाह ‘‘हत्थमुद्दाय एव वा’’ति. ब्रह्मचरियाति ब्रह्मं सेट्ठं पसत्थं चरियन्ति ब्रह्मचरियं, ब्रह्मूनं वा सेट्ठानं बुद्धपच्चेकबुद्धअरियसावकानं, ब्रह्मानञ्च चरियन्ति ब्रह्मचरियं, तम्हा ब्रह्मचरिया. तेनाह ‘‘सेट्ठचरिया’’ति. साधु वतस्स एकन्तेन भद्दकं भवेय्य. ‘‘तज्जनीयकम्मादिसत्तविधम्पि कम्मं करिस्सामा’’ति आपत्तिया चोदेन्तस्स अधिप्पायो कम्माधिप्पायो. ‘‘आपत्तितो वुट्ठापेस्सामा’’ति अधिप्पायो वुट्ठानाधिप्पायो. अनुविज्जनाधिप्पायोति वीमंसनाधिप्पायो, उपपरिक्खाधिप्पायो. अनुविज्जकेनाति सङ्घमज्झे ओतिण्णं अधिकरणं विनिच्छिनितुं निसिन्नेन विनयधरेन. किं ते दिट्ठन्ति तया किं दिट्ठं, पठमं पाराजिकं अज्झापज्जन्तो दिट्ठो, दुतियं ततियं चतुत्थं पाराजिकं आपज्जन्तो दिट्ठोति वुत्तं होति. आदिसद्देन ‘‘किन्ति ते दिट्ठं, कदा ते दिट्ठं, कत्थ ते दिट्ठ’’न्ति इमं नयं सङ्गण्हाति.

समनत्थाय पवत्तमानेहि समथेहि अधिकातब्बन्ति अधिकरणं. यथा हि समनवसेन समथानं विवादादीसु अधिकतभावो, एवं विवादादीनं तेहि अधिकत्तब्बताति. तेनाह ‘‘समथेहि अधिकरणीयभावेना’’तिआदि. इमिना हि अधिकरणसद्दस्स कम्मसाधनता वुत्ता. अधिकरणन्ति विवादाधिकरणं अनुवादाधिकरणं आपत्ताधिकरणं किच्चाधिकरणन्ति चतुब्बिधं अधिकरणं. विवादादीनि अधिकरणानि समेन्ति वूपसमेन्तीति ¶ समथा, सम्मुखाविनयादयो. अथ वा अधिकरीयन्ति एत्थाति अधिकरणं. के अधिकरीयन्ति? समथा. कथं अधिकरीयन्ति? समनवसेन. अधिकरणं समेन्ति वूपसमेन्तीतिपि समथाति एवम्पेत्थ अत्थो दट्ठब्बो. आपत्ताधिकरणं ठपेत्वा सेसाधिकरणेहि चोदनाय अभावतो ‘‘इदं पन पाराजिकसङ्खातं ¶ आपत्ताधिकरणमेव अधिप्पेत’’न्ति वुत्तं. आपत्तियेव अधिकरणं आपत्ताधिकरणं. अनुद्धंसितक्खणेयेव सङ्घादिसेसो, सो चे तङ्खणेयेव जानातीति अधिप्पायो.

मेत्तियभूमजकेति मेत्तियञ्च भूमजकञ्च. छब्बग्गियानं अग्गपुरिसा एते. सुद्धं वाति पाराजिकमनापन्नं वा. ‘‘सचे सो तङ्खणेयेव जानाती’’ति इमिना आवज्जनसमयमाह. तङ्खणेयेव जाननं नाम दुक्करं, समयेन आवज्जित्वा ञाते पन ञातमेव होति. पच्छा चे जानाति, सीसं न एति. सिक्खापच्चक्खानअभूतारोचनदुट्ठुल्लवाचाअत्तकामदुट्ठदोसभूतारोचनसिक्खापदानीति सब्बानेव हि इमानि एकपरिच्छेदानि. यस्मा पन परम्मुखा सत्तहिपि आपत्तिक्खन्धेहि वदतो दुक्कटमेव, तस्मा ‘‘परम्मुखा चोदेन्तस्स पन सीसं न एती’’ति वुत्तं. वुत्तनयापत्तियोति ‘‘वाचाय वाचाया’’तिआदिना वुत्तनया सङ्घादिसेसदुक्कटापत्तियो. तथेवाति वाचाय वाचायेव. वदन्तस्साति सत्तहिपि आपत्तिक्खन्धेहि उपसम्पन्नं सम्मुखा वदन्तस्स. वुत्तनयेनेवाति वाचाय वाचायेव. ओकासं कारेत्वा उपसम्पन्नं सम्मुखा वदन्तस्स वाचाय वाचाय पाचित्तियन्ति आह ‘‘ओकासं कारेत्वा वदन्तस्स पाचित्तियमेवा’’ति. एवसद्देन दुक्कटं निवत्तीयति. असम्मुखा सत्तहिपि आपत्तिक्खन्धेहि वदन्तस्स दुक्कटं. सत्तविधम्पि कम्मन्ति तज्जनीयं, नियसं, पब्बाजनीयं, पटिसारणीयं, तिविधञ्च उक्खेपनीयन्ति सत्तविधम्पि कम्मं.

उपोसथं वा पवारणं वा ठपेन्तस्स च ओकासकम्मं नत्थीति एत्थ उपोसथतो पुरे वा पच्छा वा ठपितोपि अट्ठपितो होति. खेत्ते ठपितो पन ठपितो होति, तस्मा ‘‘सुणातु मे, भन्ते, सङ्घो, अज्जुपोसथो पन्नरसो, यदि सङ्घस्स पत्तकल्लं, सङ्घो उपोसथं करेय्या’’ति एत्थ याव रे-कारं भणति, ताव ठपेतब्बो, इदं खेत्तं. य्य-कारे पन वुत्ते ठपेन्तेन पच्छा ठपितो नाम होति ¶ . ‘‘सुणातु मे’’ति अनारद्धे ठपेन्तेन पुरे ठपितो होति. पवारणाट्ठपनं पन सब्बसङ्गाहिकं, पुग्गलिकञ्चाति दुविधं. तत्थ सब्बसङ्गाहिके ‘‘सुणातु मे, भन्ते, सङ्घो…पे… सङ्घो तेवाचिकं पवारेय्या’’ति सु-कारतो याव रे-कारो, ताव अपरियोसिताव होति पवारणा, एत्थन्तरे एकपदेपि ठपेन्तेन ठपिता होति पवारणा. य्य-कारे पन पत्ते परियोसिताव होति, तस्मा ततो पट्ठाय ठपेन्तेन अट्ठपिता होति. पुग्गलिकट्ठपने पन ‘‘सङ्घं, भन्ते, पवारेमि…पे… ततियम्पि भन्ते सङ्घं पवारेमि दिट्ठेन वा…पे… पस्सन्तो पटी’’ति (महाव. २१०) सं-कारतो याव अयं सब्बपच्छिमो टि-कारो, ताव अपरियोसिताव होति पवारणा, एत्थन्तरे एकपदेपि ठपेन्तेन ठपिता होति पवारणा. ‘‘करिस्सामी’’ति वुत्ते पन परियोसिता होति, तस्मा ‘‘करिस्सामी’’ति एतस्मिं पदे सम्पत्ते ठपितापि ¶ अट्ठपिता होति. एसेव नयो द्वेवाचिकएकवाचिकसमानवस्सिकासु. एतासुपि हि टि-कारावसानंयेव ठपनक्खेत्तन्ति. तेनाह ‘‘ठपनक्खेत्तं पन जानितब्ब’’न्ति. ओसटे वत्थुस्मिन्ति चोदकेन अत्तना वत्तब्बे सङ्घमज्झे उदाहटे. इदञ्च इदञ्च करोतीति पाणातिपातं, अदिन्नादानञ्च करोति, जातरूपरजतञ्च पटिग्गण्हाति. असुको च असुको च अस्समणो, अनुपासकोति अक्कोसाधिप्पायेन परम्मुखा वदन्तस्स दुक्कटं, सम्मुखा वदन्तस्स पन पाचित्तियमेव. तेनाह ‘‘सचे पन ओदिस्स नियमेत्वा’’तिआदि. सङ्ख्युपगमनन्ति वोहारूपगमनं.

दुट्ठदोससिक्खापदवण्णना निट्ठिता.

९. अञ्ञभागियसिक्खापदवण्णना

अञ्ञभागस्साति अञ्ञकोट्ठासस्स, यं चोदेतुकामो, तस्स जातिआदितो अञ्ञस्स तिरच्छानजातिआदिकोट्ठासस्साति वुत्तं होति. इदन्ति नपुंसकनिद्देसेन छगलकादिं निद्दिसति, अयं छगलकादिकोति अत्थो, अधिकरणसद्दापेक्खाय वा नपुंसकनिद्देसो, इदं छगलकादिसङ्खातं अधिकरणन्ति वुत्तं होति. अञ्ञभागो वाति तिरच्छानजातिआदिभेदो अञ्ञो कोट्ठासो वा. अस्साति छगलकादिकस्स ¶ . अञ्ञभागियं छगलकादि. एत्थ च ‘‘अञ्ञभागसम्बन्धि अञ्ञभागिय’’न्ति पठमविग्गहस्स अत्थो, ‘‘अञ्ञभागवन्तं अञ्ञभागिय’’न्ति दुतियविग्गहस्स. ठपेत्वा पन तिरच्छानजातिआदिकं परमत्थतो विसुं छगलकादिके असतिपि ‘‘पटिमाय सरीर’’न्तिआदीसु विय अभेदेपि भेदकप्पनाय पवत्तलोकवोहारवसेन ‘‘अञ्ञभागस्स इदं, अञ्ञभागो वा अस्स अत्थी’’ति वुत्तन्ति दट्ठब्बं. अधिकरीयति एत्थाति अधिकरणं. तेनाह ‘‘आधारो वेदितब्बो’’ति. आधरीयति अस्मिन्ति आधारो, पतिट्ठानं. तेनाह ‘‘वत्थु अधिट्ठानन्ति वुत्तं होती’’ति.

इदानि ‘‘अञ्ञभागस्स इद’’न्तिआदिना सङ्खेपेन वुत्तमेवत्थं केवलं नयदस्सनत्थं अट्ठुप्पत्तियं आगतमेव गहेत्वा विभजन्तो ‘‘यो हि सो’’तिआदिमाह. तेन ननु अनागते एवं चोदेन्तानं पापभिक्खूनं लेसोकासपिदहनत्थं इदं सिक्खापदं पञ्ञत्तं, न पन मेत्तियभूमजकानं. तेसञ्हि आदिकम्मिकत्ता अनापत्ति, तस्मा सामञ्ञेन अत्थो विभजितब्बो. न पन ‘‘यो हि सो अट्ठुप्पत्तियं दब्बो मल्लपुत्तो’’तिआदिना विसेसेनाति एदिसी चोदना अनवकासाति दट्ठब्बं. हीति कारणत्थे निपातो, यस्माति वुत्तं होति. अट्ठुप्पत्तियन्ति ¶ अत्थस्स उप्पत्ति अत्थुप्पत्ति, अत्थुप्पत्तियेव अट्ठुप्पत्ति, तस्सं अट्ठुप्पत्तियं, सिक्खापदस्स निदानेति वुत्तं होति. छगलकोति सेतछगलको. सोति छगलको. इमस्स पन ‘‘होती’’ति इमिना सम्बन्धो. अञ्ञस्स…पे… छगलकभावस्स चाति ‘‘तिरच्छानजातिया चेव छगलकभावस्स चा’’ति सङ्खातस्स अञ्ञस्स भागस्स कोट्ठासस्स, पक्खस्साति अत्थो.

कुतोयमञ्ञो, यतो ‘‘अञ्ञस्स भागस्सा’’ति वुत्तन्ति आह ‘‘य्वायं…पे… ततो’’ति. तत्थ मनुस्सजाति चेव भिक्खुभावो चाति यो अयं भागो कोट्ठासो पक्खोति सम्बन्धो, ‘‘मनुस्सजाति चेव भिक्खुभावो चा’’ति सङ्खातो यो अयं भागो कोट्ठासो पक्खोति अत्थो. ततोति ‘‘मनुस्सजाति चेव भिक्खुभावो चा’’ति भागतो. सो वा अञ्ञभागोति यथावुत्ततिरच्छानजातिछगलकभावसङ्खातो सो अञ्ञभागो वा. अस्साति छगलकस्स. अत्थीति उपलब्भति. तस्माति यस्मा अञ्ञभागस्स छगलको होति, यस्मा च सो वा अञ्ञभागो अस्स ¶ अत्थि, तस्मा. अञ्ञभागियसङ्ख्यं लभतीति एत्थ ‘‘सो य्वाय’’न्ति इध सो-सद्दमेव आनेत्वा सो अञ्ञभागियसङ्खं लभतीति योजेतब्बं, ‘‘सो’’ति वा पाठसेसो दट्ठब्बो. च-सद्दो समुच्चयत्थो. सो पन अधिकरणसद्दतो परं दट्ठब्बो, ‘‘अधिकरण’’न्ति च वेदितब्बोति. तेसन्ति मेत्तियभूमजकानं. इमं मयं दब्बं मल्लपुत्तं नाम करोमाति छगलकं अजिकाय विप्पटिपज्जन्तं दिस्वा ‘‘मयं, आवुसो, इमं छगलकं दब्बं मल्लपुत्तं नाम करोमा’’ति वदन्तानं. नामकरणसञ्ञायाति नामकरणसङ्खाताय सञ्ञाय. एत्थापि ‘‘यो सो’’तिआदिकं आनेत्वा तस्सा नामकरणसञ्ञाय यो सो अट्ठुप्पत्तियं ‘‘दब्बो मल्लपुत्तो नामा’’ति छगलको वुत्तो, सो यस्मा आधारो वत्थु अधिट्ठानन्ति योजेतब्बं.

इदानि कथमेतं विञ्ञायति ‘‘अधिकरण’’न्ति चेत्थ आधारो वेदितब्बो, न विवादाधिकरणादीसु अञ्ञतरन्ति अनुयोगं सन्धायाह ‘‘तञ्हि सन्धाया’’तिआदि. तत्थ तन्ति तस्सा नामकरणसञ्ञाय अधिट्ठानभूतं छगलकं पच्चामसति. विवादाधिकरणादीसु अञ्ञतरं सन्धाय न वुत्तन्ति सम्बन्धो. तत्थ कारणं पुच्छति ‘‘कस्मा’’ति. कारणमाह ‘‘असम्भवतो’’ति. इदानि तमेव असम्भवं पाकटं कत्वा दस्सेतुं ‘‘न ही’’तिआदि वुत्तं. न हि उपादियिंसूति सम्बन्धो. उपादियिंसूति गण्हिंसु. किं चतुन्नं अधिकरणानम्पि लेसो अत्थि, येनेवं वुत्तन्ति आह ‘‘न च चतुन्नं अधिकरणान’’न्तिआदि. इदानि तमेव समत्थेतुं ‘‘जातिलेसादयो ही’’तिआदि वुत्तं. तत्थ जातियेव लेसो जातिलेसो. आदिसद्देन नामलेसादीनं गहणं. होति चेत्थ –

‘‘लेसा ¶ जातिनामगोत्त-लिङ्गापत्तिवसापि च;

पत्तचीवरुपज्झाया-चरियावासवसा दसा’’ति.

आपत्तिलेसो नाम लहुकं आपत्तिं आपज्जन्तो दिट्ठो होति. तञ्चे पाराजिकेन चोदेति ‘‘अस्समणोसि, असक्यपुत्तियोसी’’ति, आपत्ति वाचाय वाचाय सङ्घादिसेसस्साति (पारा. ३९६) एवं आपत्तिलेसम्पि पुग्गलस्मिंयेव आरोपेत्वा वुत्तत्ता ‘‘पुग्गलानंयेव लेसा वुत्ता’’ति वुत्तं ¶ . तञ्च ‘‘दब्बो मल्लपुत्तो’’ति नामन्ति मेत्तियभूमजकेहि छगलकस्स कतं तं ‘‘दब्बो मल्लपुत्तो’’ति नामञ्च. एवं असम्भवं दस्सेत्वा इदानि इमिनाव पसङ्गेन देसलेससद्दानं अत्थं संवण्णेतुं ‘‘एत्थ चा’’तिआदिमाह. एत्थाति एतेसु द्वीसु देसलेसेसु. देसो नाम जातिआदिभेदो वोहारो. तेनाह ‘‘जातिआदीसू’’तिआदि. अञ्ञम्पि वत्थुन्ति यस्मिं वत्थुस्मिं पतिट्ठितं, तं मुञ्चित्वा अञ्ञम्पि वत्थुं. कथं सिलिस्सतीति आह ‘‘वोहारमत्तेनेवा’’तिआदि, वोहारमत्तेनेव, न तु अत्थतोति अधिप्पायो. ‘‘ईसकं अल्लीयती’’ति इमिना ‘‘लेसो’’ति लिस अल्लीभावेति इमस्स रूपन्ति दस्सेति. किञ्चापि देसलेसानं वुत्तनयेन ब्यञ्जनतो नानाकरणं अत्थि, अत्थतो पन नत्थीति आह ‘‘जातिआदीनंयेव अञ्ञतरकोट्ठासस्सेतं अधिवचन’’न्ति.

यदि पन नामकरणसञ्ञाय आधारभूतं छगलकं सन्धाय ‘‘अञ्ञभागियस्स अधिकरणस्सा’’ति वुत्तं, अथ कस्मा पदभाजने तं अविभजित्वा ‘‘अञ्ञभागियस्स अधिकरणस्साति आपत्तञ्ञभागियं वा होति अधिकरणञ्ञभागियं वा’’तिआदि (पारा. ३९३) वुत्तन्ति आह ‘‘पदभाजने पना’’तिआदि. तन्ति आधारसङ्खातं अधिकरणं. आविभूतं पाकटं. अत्थुद्धारवसेनाति तेन वत्तब्बअत्थानं उद्धरणवसेन. ननु च ‘‘अत्थमत्तं पति सद्दा अभिनिविसन्ती’’ति न एकेन सद्देन अनेकत्था अभिधीयन्तीति? सच्चमेतं सद्दविसेसे अपेक्खिते, तेसं तेसं पन अत्थानं अधिकरणसद्दवचनीयतासामञ्ञं उपादाय वुच्चमानो अयं विचारो अधिकरणसद्दस्स अत्थुद्धारोति वुत्तो. तेनेवाह ‘‘अधिकरणन्ति वचनसामञ्ञतो अत्थुद्धारवसेन पवत्तानि चत्तारि अधिकरणानी’’ति. अञ्ञभागियताति अञ्ञपक्खियता. तब्भागियताति तप्पक्खियता. अपाकटा पदभाजनतो अञ्ञत्र दस्सितट्ठानाभावतो. अवसाने आपत्तञ्ञभागियेन चोदनञ्चाति ‘‘भिक्खु सङ्घादिसेसं अज्झापज्जन्तो दिट्ठो होति, सङ्घादिसेसे सङ्घादिसेसदिट्ठि होति, तञ्चे पाराजिकेन चोदेती’’तिआदिचोदनं सन्धाय वुत्तं ‘‘अधिकरणञ्ञभागिय’’न्ति. एकमेकञ्हि अधिकरणं इतरेसं तिण्णं तिण्णं अञ्ञभागियं अञ्ञपक्खियं ¶ अञ्ञकोट्ठासियं होति वत्थुविसभागत्ता. आदिसद्देन ¶ ‘‘कथं अधिकरणं अधिकरणस्स अञ्ञभागिय’’न्तिआदिको पदविभागो सङ्गहितो.

किञ्चि देसं लेसमत्तं उपादायाति एत्थ यं वत्तब्बं, तस्सापि असम्भवदस्सनप्पसङ्गेन हेट्ठा वुत्तत्ता ‘‘सेसा विनिच्छयकथा अट्ठमे वुत्तसदिसायेवा’’ति वुत्तं. तत्थ सेसा विनिच्छयकथाति ‘‘पाराजिकेनाति भिक्खुनो अनुरूपेसु एकूनविसतिया अञ्ञतरेना’’तिआदिका (कङ्खा. अट्ठ. दुट्ठदोससिक्खापदवण्णना) विनिच्छयकथा. वुत्तसदिसायेवाति एत्थ इमस्मिं सिक्खापदे या वत्तब्बा, तेन सिक्खापदेन साधारणभूता सा वुत्तसदिसायेवाति अधिप्पेता, न असाधारणभूता अपुब्बवण्णनाय अधिप्पेतत्ता. तेनेवाह ‘‘अयं पना’’तिआदि. पुरिमस्मिं सिक्खापदेपि तथासञ्ञिनो अनापत्तिकत्ता ‘‘इध चा’’ति वुत्तं. तथासञ्ञिनोपीति ‘‘पाराजिकंयेव अयं आपन्नो’’ति एवंसञ्ञिनोपि. इतिसद्दो आदिअत्थो वा पकारत्थो वा. तेन केनचि भिक्खुना अञ्ञो कोचि खत्तियजातिको पाराजिकं धम्मं अज्झापज्जन्तो दिट्ठो होति, अथ सो अञ्ञं अत्तनो वेरिं खत्तियजातिकं भिक्खुं पस्सित्वा तं खत्तियजातिलेसं गहेत्वा एवं चोदेति ‘‘खत्तियो मया दिट्ठो पाराजिकं धम्मं अज्झापज्जन्तो, त्वं खत्तियो पाराजिकं धम्मं अज्झापन्नोसि, अथ वा त्वं खो खत्तियो, न अञ्ञो, पाराजिकं धम्मं अज्झापन्नोसि, अस्समणोसि, असक्यपुत्तियोसि, नत्थि तया सद्धिं उपोसथो वा पवारणा वा सङ्घकम्मं वा’’ति, आपत्ति वाचाय वाचाय सङ्घादिसेसस्स. एत्थ च तेसं खत्तियानं अञ्ञमञ्ञं असदिसस्स तस्स तस्स दीघादिनो वा दिट्ठादिनो वा वसेन अञ्ञभागियता, खत्तियजातिपञ्ञत्तिया आधारवसेन अधिकरणता च वेदितब्बा. एस नयो नामलेसादीसुपि.

आपत्तिलेसे पन केनचि भिक्खुना कोचि भिक्खु लहुकं आपत्तिं आपज्जन्तो दिट्ठो होति, सो चेतं भिक्खुं पाराजिकेन चोदेति, आपत्ति वाचाय वाचाय सङ्घादिसेसस्स. यदि एवं कथं अञ्ञभागियं अधिकरणं होतीति? यञ्हि सो लहुकं आपत्तिं आपन्नो, तं पाराजिकस्स अञ्ञभागियं अधिकरणं, तस्स पन अञ्ञभागियस्स अधिकरणस्स लेसो नाम. यो सो सब्बखत्तियानं साधारणो खत्तियभावो विय सब्बापत्तीनं साधारणो आपत्तिभावो. एतेनेव उपायेन ¶ ‘‘केनचि भिक्खुना कोचि भिक्खु सङ्घादिसेसं अज्झापज्जन्तो दिट्ठो होती’’तिआदिकं विसेसं सङ्गण्हाति.

अञ्ञभागियसिक्खं ¶ यो, नेव सिक्खति युत्तितो;

गच्छे विनयविञ्ञूहि, अञ्ञभागियतंव सो. (वजिर. टी. पाराजिक ४०८);

अञ्ञभागियसिक्खापदवण्णना निट्ठिता.

१०. सङ्घभेदसिक्खापदवण्णना

सहितस्साति कायचित्तेहि एकीभूतस्स. तेनाह ‘‘चित्तेन च सरीरेन च अवियुत्तस्साति अत्थो’’ति. अस्साति ‘‘समग्गस्सा’’ति पदस्स. समानसंवासकोति समानो एकूपोसथादिभेदो संवासो अस्साति समानसंवासको, लद्धिनानासंवासकेन वा कम्मनानासंवासकेन वा विरहितो. कायसामग्गिदानतोति कायेन, कायस्स वा सामग्गिया सहितभावस्स दानतो, तेसु तेसु सङ्घकम्मेसु हत्थपासूपगमनतोति वुत्तं होति. कथं नामायं भिज्जेय्याति अयं सङ्घो केन नु खो उपायेन वग्गो भवेय्य. वायामेय्याति उस्साहं करेय्य, पक्खं परियेसेय्य, गणं बन्धेय्याति वुत्तं होति. अत्तनो फलं करोतीति करणं, यं किञ्चि कारणं, अधिकं करणन्ति अधिकरणं, विसेसकारणं, विसेसकारणञ्च सङ्घभेदस्साति वुत्तं ‘‘भेदनस्सा’’तिआदि. भेदकरवत्थुवसेन अट्ठारसविधन्ति –

‘‘इधुपालि भिक्खू अधम्मं ‘धम्मो’ति दीपेन्ति, धम्मं ‘अधम्मो’ति दीपेन्ति. अविनयं ‘विनयो’ति दीपेन्ति, विनयं ‘अविनयो’ति दीपेन्ति. अभासितं अलपितं तथागतेन ‘भासितं लपितं तथागतेना’ति दीपेन्ति, भासितं लपितं तथागतेन ‘अभासितं अलपितं तथागतेना’ति दीपेन्ति. अनाचिण्णं तथागतेन ‘आचिण्णं तथागतेना’ति दीपेन्ति, आचिण्णं तथागतेन ‘अनाचिण्णं तथागतेना’ति दीपेन्ति. अपञ्ञत्तं तथागतेन ‘पञ्ञत्तं तथागतेना’ति दीपेन्ति, पञ्ञत्तं तथागतेन ¶ ‘अपञ्ञत्तं तथागतेना’ति दीपेन्ति. अनापत्तिं ‘आपत्ती’ति दीपेन्ति, आपत्तिं ‘अनापत्ती’ति दीपेन्ति. लहुकं आपत्तिं ‘गरुका आपत्ती’ति दीपेन्ति, गरुकं आपत्तिं ‘लहुका आपत्ती’ति दीपेन्ति. सावसेसं आपत्तिं ‘अनवसेसा आपत्ती’ति दीपेन्ति, अनवसेसं आपत्तिं ‘सावसेसा आपत्ती’ति दीपेन्ति. दुट्ठुल्लं आपत्तिं ‘अदुट्ठुल्ला आपत्ती’ति दीपेन्ति, अदुट्ठुल्लं आपत्तिं ‘दुट्ठुल्ला आपत्ती’ति दीपेन्ती’’ति (चूळव. ३५२) –

एवं ¶ कम्मक्खन्धके वुत्तानं अट्ठारसन्नं भेदकरणानं वसेन अट्ठारसविधं. कारणञ्हि तदायत्तवुत्तिताय फलं एत्थ वसतीति ‘‘वत्थू’’ति वुच्चति. होन्ति चेत्थ –

‘‘धम्मविनयभासिता-चिण्णपञ्ञत्तिका दुका;

आपत्तिलहुदुट्ठुल्ल-सावसेसदुकानि च.

‘‘एतानट्ठारस ‘भेद-करवत्थू’ति वुच्चरे;

विपल्लासगहितानि, वादमूलूपनिस्सया’’ति.

पग्गय्हाति पग्गहितं अब्भुस्सितं पाकटं कत्वा. तिट्ठेय्याति यथासमादिन्नं, यथापग्गहितमेव च कत्वा अच्छेय्य. यस्मा पन एवं पग्गण्हता, तिट्ठता च तं दीपितञ्चेव अविनिस्सट्ठञ्च होति, तस्मा ‘‘दीपेय्य चेव नप्पटिनिस्सज्जेय्य चा’’ति वुत्तं. कीव दूरे सुत्वा गन्त्वा अवदन्तानं दुक्कटन्ति आह ‘‘सब्बन्तिमेन परिच्छेदेना’’तिआदि. पि-सद्दो चेत्थ अट्ठानप्पयुत्तो, तस्स ‘‘अड्ढयोजनमत्त’’न्ति इमिना सम्बन्धो वेदितब्बो. तत्थ ‘‘अड्ढयोजनमत्त’’न्ति इमिना एकविहारे वत्तब्बमेव नत्थीति दीपेति. ‘‘गन्त्वा’’ति इमिना दूतं वा पण्णं वा पेसेत्वा वदतोपि आपत्तिमोक्खो नत्थि, सयमेव पन गन्त्वा ‘‘गरुको खो, आवुसो, सङ्घभेदो, मा सङ्घभेदाय परक्कमी’’ति (पारा. अट्ठ. २.४११) निवारेतब्बोति दीपेति.

समागच्छतूति एकीभवतु. एकीभावो च समानलद्धिवसेन होतीति आह ‘‘एकलद्धिको होतू’’ति. एका लद्धि गहणं अस्साति एकलद्धिको, एकदिट्ठिकोति अत्थो. अञ्ञमञ्ञसम्पत्तियाति अञ्ञमञ्ञस्स समानदिट्ठिचित्ततासङ्खाताय सम्पत्तिया. ‘‘अञ्ञमञ्ञस्स गुणलाभादिकाय सम्पत्तिया’’ति ¶ केचि. असमग्गो हि विसुं पातिमोक्खं उद्दिसति, बहिसीमायं वा अनुपरिवेणियं वाति न एकुद्देसो. तेनाह ‘‘एकतो पवत्तपातिमोक्खुद्देसोति अत्थो’’ति. अप्पटिनिस्सज्जतो दुक्कटन्ति विसुं विसुं वदन्तानं गणनाय दुक्कटं. समनुभासनकम्मं कातब्बन्ति यावततियं समनुभासनकम्मं कातब्बं, ‘‘सुणातु मे, भन्ते, सङ्घो, अयं इत्थन्नामो भिक्खु समग्गस्स सङ्घस्स भेदाय परक्कमती’’तिआदिना (पारा. ४१३) पदभाजने वुत्ताहि ञत्तिचतुत्थाहि तीहि समनुभासनकम्मवाचाहि कम्मं कातब्बन्ति वुत्तं होति. ‘‘भेदाय परक्कमेय्या’’ति विसुं वुत्तत्ता भेदनसंवत्तनिकस्स अधिकरणस्स समादाय पग्गण्हनतो पुब्बेपि पक्खपरियेसनादिवसेन सङ्घभेदाय परक्कमन्तस्स समनुभासनकम्मं कातब्बन्ति ¶ वेदितब्बं. पटिनिस्सज्जन्तस्स अनापत्तिभावतो ‘‘सोत्थिभावो तस्स भिक्खुनो’’ति वुत्तं.

किञ्चापि भिक्खुनी सङ्घं न भिन्दति, अपिच खो भेदाय परक्कमतीति ‘‘साधारणपञ्ञत्ती’’ति वुत्तं. सङ्घादिसेसं अज्झापज्जन्तस्स ञत्तिया दुक्कटं, द्वीहि कम्मवाचाहि थुल्लच्चया च पटिप्पस्सम्भन्तीति आह ‘‘समनुभासनकम्मे’’तिआदि. तञ्च दुक्कटं ते च थुल्लच्चया पटिप्पस्सम्भन्तीति यञ्च ञत्तिपरियोसाने दुक्कटं आपन्नो, ये च द्वीहि कम्मवाचाहि थुल्लच्चये, ता तिस्सोपि आपत्तियो लिङ्गपरिवत्तेन असाधारणापत्तियो विय पटिप्पस्सम्भन्ति. सचे पनस्स ञत्तिपरियोसाने लज्जिधम्मो ओक्कमति, संवरो उप्पज्जति, तं पटिनिस्सज्जति, ञत्तिया दुक्कटं देसेत्वा मुच्चति. अथ तं न पटिनिस्सज्जति, भेदाय परक्कमति चेव भेदनसंवत्तनिकं अधिकरणं समादाय पग्गय्ह तिट्ठति च, ञत्तिदुक्कटं पटिप्पस्सम्भति, पठमकम्मवाचाय थुल्लच्चये पतिट्ठाति. एस नयो इतरकम्मवाचायम्पि. असमनुभासियमानस्स अप्पटिनिस्सज्जन्तस्सापि सङ्घादिसेसेन अनापत्ति. पटिनिस्सज्जन्तस्सापि ञत्तितो पुब्बे वा ञत्तिक्खणे वा ञत्तिपरियोसाने वा पठमाय वा अनुस्सावनाय दुतियाय वा ततियाय वा याव य्य-कारं न सम्पापुणाति, ताव पटिनिस्सज्जन्तस्स सङ्घादिसेसेन अनापत्ति. तेनाह ‘‘असमनुभासियमानस्स चा’’तिआदि.

एत्थ पन (पारा. अट्ठ. २.४१६) ‘‘देवदत्तो समग्गस्स सङ्घस्स भेदाय परक्कमि, तस्मिं वत्थुस्मि’’न्ति (परि. १७) परिवारे आगतत्ता देवदत्तो आदिकम्मिको, सो च खो ¶ सङ्घभेदाय परक्कमनस्सेव, न अप्पटिनिस्सज्जनस्स. न हि तस्स तं कम्मं कतं. कथमिदं जानितब्बन्ति चे? सुत्ततो. तथा हि ‘‘अरिट्ठो भिक्खु गद्धबाधिपुब्बो पापिकाय दिट्ठिया यावततियं समनुभासनाय न पटिनिस्सज्जि, तस्मिं वत्थुस्मि’’न्ति परिवारे आगतत्ता अरिट्ठस्स कम्मं कतन्ति पञ्ञायति, न तथा देवदत्तस्स. अथापिस्स कतेन भवितब्बन्ति कोचि अत्तनो रुचिमत्तेन वदेय्य, तथापि अप्पटिनिस्सज्जने आदिकम्मिकस्स अनापत्ति नाम नत्थि. न हि पञ्ञत्तं सिक्खापदं वीतिक्कमन्तस्स अञ्ञत्र ओदिस्स अनुञ्ञाततो अनापत्ति नाम दिस्सति. यम्पि अरिट्ठसिक्खापदस्स पदभाजने अनापत्तियं ‘‘आदिकम्मिकस्सा’’ति पोत्थकेसु लिखितं, तं पमादलिखितं, पमादलिखितभावो च तस्स ‘‘पठमं अरिट्ठो भिक्खु चोदेतब्बो, चोदेत्वा सारेतब्बो, सारेत्वा आपत्तिं आरोपेतब्बो’’ति (चूळव. ६५) एवं कम्मक्खन्धके आपत्तिरोपनतो वेदितब्बो.

इध ¶ भेदाय परक्कमने आदिकम्मिकस्स देवदत्तस्स यस्मा तं कम्मं न कतं (पारा. अट्ठ. २.४१६), तस्मास्स आपत्तियेव न जाता. सिक्खापदं पन तं आरब्भ पञ्ञत्तन्ति कत्वा ‘‘आदिकम्मिको’’ति वुत्तो. इति आपत्तिया अभावतोयेवस्स अनापत्ति वुत्ता. सा पनेसा किञ्चापि ‘‘असमनुभासियमानस्सा’’ति इमिनाव सिद्धा. यस्मा पन असमनुभासियमानो नाम यस्स केवलं समनुभासनं न करोन्ति, सो वुच्चति, न आदिकम्मिको. अयञ्च देवदत्तो आदिकम्मिकोयेव. तस्मा ‘‘आदिकम्मिकस्सा’’ति (पारा. ४१६) वुत्तं. एतेनेव उपायेन ठपेत्वा अरिट्ठसिक्खापदं सब्बसमनुभासनासु विनिच्छयो वेदितब्बो. कायवाचाचित्ततो समुट्ठानतो समनुभासनसमुट्ठानं. ‘‘पटिनिस्सज्जामी’’ति कायविकारं वा वचीभेदं वा अकरोन्तस्सेव पन आपज्जनतो अकिरियं. ‘‘नप्पटिनिस्सज्जामी’’ति सञ्ञाय अभावेन मुच्चनतो सञ्ञाविमोक्खं. ‘‘नप्पटिनिस्सज्जामी’’ति जाननचित्तेनेव सचित्तकं.

सङ्घभेदसिक्खापदवण्णना निट्ठिता.

११. भेदानुवत्तकसिक्खापदवण्णना

तस्सेवाति ¶ भेदाय परक्कमन्तस्सेव. खोति निपातमत्तं. पनाति विसेसे निपातो. यं वचनं समग्गेपि वग्गे अवयवभूते करोति भिन्दति, तं कलहकारकवचनं इध ‘‘वग्ग’’न्ति वुच्चतीति आह ‘‘वग्गं असामग्गिपक्खियवचनं वदन्ती’’ति. असामग्गिपक्खे भवा असामग्गिपक्खिया, कलहकारका, तेसं वचनं असामग्गिपक्खियवचनं, असामग्गिपक्खे वा भवं वचनं असामग्गिपक्खियवचनं. ‘‘न हि सङ्घो सङ्घस्स कम्मं करोती’’ति इदं निग्गहवसेन कत्तब्बं कम्मं सन्धाय वुत्तं, उब्बाहिकादिकम्मं पन बहूनम्पि कातुं वट्टतियेव. धम्मवादीति भूतवादी. विनयवादीति वूपसमवादी. जानाति नोति एत्थापि ‘‘छन्दञ्च रुचिञ्चा’’ति इदं आनेत्वा सम्बन्धितब्बं. तेनाह ‘‘अम्हाकं छन्दादीनि जानाती’’ति. भासतीति एत्थ ‘‘नो’’ति इदं विभत्तिविपरिणामेन युज्जति. तेनाह ‘‘एवं करोमाति अम्हेहि सद्धिं भासती’’ति. ‘‘एत’’न्ति इमिना तस्स कम्मं पच्चामट्ठन्ति आह ‘‘यं सो करोती’’तिआदि. सोति सङ्घभेदाय परक्कमन्तो. समेतायस्मन्तानन्ति एत्थ ‘‘चित्त’’न्ति अज्झाहरितब्बन्ति आह ‘‘आयस्मन्तानं चित्त’’न्ति. वुत्तसदिसायेवाति एत्थ यं वत्तब्बं, तं हेट्ठा अञ्ञभागियसिक्खापदट्ठकथाय वण्णनायं (कङ्खा. अट्ठ. अञ्ञभागियसिक्खापदवण्णना) वुत्तमेव.

भेदानुवत्तकसिक्खापदवण्णना निट्ठिता.

१२. दुब्बचसिक्खापदवण्णना

दुक्खेन ¶ वत्तब्बो अनुसासितुं असक्कुणेय्यो सभावो अस्साति दुब्बचजातिको, विलोमभावी. तेनाह ‘‘दुब्बचसभावो’’तिआदि. वत्तुं असक्कुणेय्योति किस्मिञ्चि वुच्चमाने असहनतो ओवदितुं असक्कुणेय्यो. उद्दिसीयतीति उद्देसो, पातिमोक्खो, तस्मिं परियापन्ना अन्तोगधा उद्देसपरियापन्ना, तेसु उद्देसपरियापन्नेसु. तेनाह ‘‘उद्देसे’’तिआदि. अथ सब्बानेव सिक्खापदानि कथं पातिमोक्खुद्देसपरियापन्नानीति आह ‘‘यस्स सिया आपत्ति, सो ‘आविकरेय्या’ति एवं सङ्गहितत्ता’’ति. ‘‘यस्स सिया आपत्ती’’ति इमिना ¶ सब्बापि आपत्तियो निदानुद्देसे सङ्गहिता एव होन्ति. सिक्खापदेसूति अधिसीलसिक्खाय अधिगमूपायभूतेसु विनयपञ्ञत्तीसूति अत्थो. सो पन पाकटोयेवाति अट्ठकथायं न वुत्तो. पञ्चहि सहधम्मिकेहीति भिक्खुभिक्खुनिसामणेरसामणेरिसिक्खमानाहि. सिक्खितब्बत्ताति लब्भमानवसेन सिक्खितब्बत्ता. तथा हि तेहि यथासकं सिक्खा सिक्खीयति, न सब्बा. बुद्धपञ्ञत्तेनाति बुद्धेन ठपितेन, विहितेनाति अत्थो. अथ वा सहधम्मिकेन सकारणेन वुच्चमानोति एवमेत्थ अत्थो दट्ठब्बो. वचनायाति निस्सक्के सम्पदानवचनन्ति आह ‘‘ततो मम वचनतो’’ति.

दुब्बचसिक्खापदवण्णना निट्ठिता.

१३. कुलदूसकसिक्खापदवण्णना

नगरस्सापि गामविसेसत्ता इध गामग्गहणेनेव नगरम्पि गहितन्ति आह ‘‘नगरम्पि गामे अन्तोगधमेवा’’ति, वा-सद्देन वा अनुत्तविकप्पत्थेन गहणन्ति एवं वुत्तं. एत्थ च अपाकारपरिक्खेपो सापणो निगमो, सपाकारापणं नगरं, तंतंविपरीतो गामोति इमेसं तिण्णं विसेसो दट्ठब्बो. कुलानि दूसेतीति खत्तियब्राह्मणवेस्ससुद्दवसेन चत्तारि कुलानि विकारं आपादेति. दूसेन्तो च न असुचिकद्दमादीहि दूसेति, अथ खो अत्तनो दुप्पटिपत्तिया तेसं पसादं विनासेति. तेनाह ‘‘पुप्फदानादीही’’तिआदि. तत्थ हरित्वा वा हरापेत्वा वा पक्कोसित्वा वा पक्कोसापेत्वा वा सयं वा उपगतानं (पारा. अट्ठ. २.४३६-४३७) यस्स कस्सचि अत्तनो सन्तकस्स पुप्फस्स कुलसङ्गहत्थाय दानं पुप्फदानं, तं आदि येसं ते पुप्फदानादयो, तेहि पुप्फदानादीहि. आदिसद्देन (पारा. ४३७) फलदानचुण्णमत्तिकादन्तकट्ठवेळुवेज्जिकाजङ्घपेसनिकानं गहणं. सद्धं विनासेन्तोति तथा अकरोन्तेसु ¶ अञ्ञेसु पेसलेसु भिक्खूसु अप्पसादं अदस्सनं गमेन्तो. पुप्फदानादीहि च तेहि कतसङ्गहेहि अञ्ञे पेसले तथा अकरोन्ते ते मनुस्सा इस्सन्ति न अल्लीयन्तीति सो तेसं पसादं विनासेति नामाति दट्ठब्बं. पापका समाचाराति बुद्धप्पटिकुट्ठत्ता लामका समाचारा ¶ . ते पन यस्मा कुलसङ्गहत्थं मालावच्छरोपनादयो इध अधिप्पेता, तस्मा ‘‘मालावच्छरोपनादयो’’ति वुत्तं. आरामादीनमत्थाय पन कप्पियवोहारादीहि रोपापनादिकं वट्टति. तत्थ मालावच्छन्ति तरुणपुप्फरुक्खं. तरुणका हि पुप्फरुक्खापि पुप्फगच्छापि ‘‘मालावच्छा’’त्वेव वुच्चन्ति, तस्स रोपनं मालावच्छरोपनं, तं आदि येसं ते मालावच्छरोपनादयो. आदिसद्देन चेत्थ रोपापनसिञ्चनसिञ्चापनओचिननओचिनापनगन्थनगन्थापनानं गहणं.

मातिकायं दिस्सन्तीति ये पच्चक्खतो पस्सन्ति, तेहि दिस्सन्ति. सुय्यन्तीति ये परतो सुणन्ति, तेहि सोतद्वारेन सुत्वा उपधारीयन्ति. दुट्ठानीति दूसितानि. अलं ते इध वासेनाति तव इध वासेन अलं, मा इध तव वासो होतूति अत्थो. वारणत्थो हि इध अलं-सद्दो. पब्बाजनीयकम्मकतोति चोदेत्वा सारेत्वा आपत्तिं आरोपेत्वा ‘‘सुणातु मे, भन्ते, सङ्घो, इमे अस्सजिपुनब्बसुका’’तिआदिना (पारा. ४३४) पदभाजने वुत्ताय ञत्तिचतुत्थकम्मवाचाय कतपब्बाजनीयकम्मो. यस्मिञ्च विहारे वसतीति गामतो बहिविहारमाह. नेव तस्मिं गामे…पे… चरितुं लभतीति सचेपि गामो वा निगमो वा द्वादसयोजनपरमो होति, तियोजनपरमो च विहारो होति, नेव तस्मिं गामे वा निगमे वा पिण्डाय चरितुं लभति, न विहारे वसितुं. तस्मिं विहारे वसन्तेन सामन्तगामेपि पिण्डाय न चरितब्बं, सामन्तविहारेपि वसन्तेन तस्मिं गामे पिण्डाय न चरितब्बं. सामन्तविहारे वसन्तेन पन सामन्तगामे चरितुं वट्टति. आपज्जितब्बा आपत्तियोति कुलसङ्गहत्थं अत्तनो सन्तकदाने दुक्कटं, इस्सरवताय सङ्घसन्तकदाने थुल्लच्चयं, पसय्ह दाने पाराजिकन्ति इमा आपत्तियो. मातिकायं ‘‘पक्कमता यस्मा’’ति पब्बाजनीयकम्मकतस्स वत्तवसेन वुत्तं. आदिम्हि पन पब्बाजनीयकम्मवसेन दट्ठब्बं. अस्सजिपुनब्बसुकेति अस्सजिञ्चेव पुनब्बसुकञ्च.

कुलदूसकसिक्खापदवण्णना निट्ठिता.

सङ्घादिसेसनिगमनवण्णना

पठमापत्तिकाति ¶ ¶ अवयवेन विग्गहो समुदायो समासत्थोति आह ‘‘पठमं आपत्ति एतेसन्ति पठमापत्तिका’’ति. वीतिक्कमनक्खणेयेवाति वत्थुवीतिक्कमनक्खणेयेव. एव-कारेन समनुभासनकम्मक्खणं पटिक्खिपति. अहस्स यत्तको परिच्छेदो यावतीहं. तेनाह ‘‘यत्तकानि अहानी’’ति. अहानीति च दिवसानीति अत्थो.

वत्थुवसेन वाति असुचिमोचनादिवीतिक्कममत्तवसेन वा. इदन्ति इदं वीतिक्कमं. नाममत्तवसेन वा अयं इत्थन्नामा आपत्तीति ‘‘अयं सङ्घादिसेसो नाम आपत्ती’’ति एवं विना वत्थुं नामवसेन वा. मत्तसद्देन चेत्थ वत्थुं पटिक्खिपति. पोत्थकेसु पन कत्थचि ‘‘नामगोत्तवसेन वा’’ति लिखन्ति, तं न सुन्दरं ‘‘अयं इत्थन्नामा आपत्ती’’ति वुत्तत्ता. इदानि नं कस्सचि न आरोचेस्सामीति सम्बन्धो. धुरं निक्खिपित्वाति आरोचने उस्साहं ठपेत्वा. न केवलं वत्थुनामवसेनेव आपत्तिसञ्ञी हुत्वा छादेन्तस्सेव, अथ खो योपि एवं अजानन्तो केवलं ‘‘आपत्तिं छादेमी’’ति आपत्तिसञ्ञाय छादेति, तस्सपि छन्ना होतीति वेदितब्बं. सचे पनेत्थ अनापत्तिसञ्ञी वा होति, अञ्ञापत्तिक्खन्धसञ्ञी वा वेमतिको वा हुत्वा ‘‘न दानि नं कस्सचि आरोचेस्सामी’’ति एवं छादेतुकामोव धुरं निक्खिपित्वा अरुणं उट्ठापेति, अच्छन्नाव होतीति आनेत्वा योजेतब्बं. अनापत्ति पन आपत्तिसञ्ञायपि अनापत्तिसञ्ञायपि छादेन्तेन अच्छादिताव होति. लहुकं वा ‘‘गरुका’’ति गरुकं वा ‘‘लहुका’’ति छादेति, अलज्जिपक्खे तिट्ठति, आपत्ति पन अच्छन्ना होति. गरुकं ‘‘लहुका’’ति मञ्ञमानो देसेति, नेव देसिता होति नच्छन्ना.

पकतो सभावभूतो अत्ता अस्साति पकतत्तो, न कम्मेहि विकतत्तोति अत्थो. तेनाह ‘‘अनुक्खित्तो समानसंवासको’’ति. वुत्तनयेनेवाति ‘‘न दानि नं कस्सचि आरोचेस्सामी’’तिआदिना वुत्तनेव नयेन. अथ ‘‘मय्हं सङ्घेन कम्मं कत’’न्ति (चूळव. अट्ठ. १०२) अपकतत्तसञ्ञी हुत्वा छादेति, अच्छन्नाव होति. अपकतत्तेन पन पकतत्तसञ्ञिना वा पकतत्तेन अपकतत्तसञ्ञिना वा छादितापि अच्छन्नाव होति. वुत्तम्पि चेतं –

‘‘आपज्जति ¶ गरुकं सावसेसं;

छादेति अनादरियं पटिच्च;

न ¶ भिक्खुनी नो च फुसेय्य वज्जं;

पञ्हामेसा कुसलेहि चिन्तिता’’ति. (परि. ४८१);

अयञ्हि पञ्हो उक्खित्तकेन कथितो.

दससु अन्तरायेसु यं वत्तब्बं, तं हेट्ठा वुत्तमेव. सचे पन यो भीरुकजातिकताय अन्धकारे अमनुस्सचण्डमिगभयेन अन्तरायिकसञ्ञी हुत्वा छादेति, अच्छन्नाव होति. यस्सपि पब्बतविहारे वसन्तस्स कन्दरं वा नदिं वा अतिक्कमित्वा आरोचेतब्बं होति, अन्तरामग्गे च चण्डवाळअमनुस्सादिभयं अत्थि, मग्गे अजगरा निपज्जन्ति, नदी पूरा होति, एतस्मिं सतियेव अन्तराये अन्तरायिकसञ्ञी हुत्वा छादेति, अच्छन्नाव होति. अन्तरायिकस्स पन अन्तरायिकसञ्ञाय वा अनन्तरायिकसञ्ञाय वा छादयतो अच्छन्नाव.

भिक्खुनोति सभागस्स भिक्खुनो. सचस्स मुखे अप्पमत्तको गण्डो वा होति, हनुकवातो वा विज्झति, दन्तो वा रुज्जति, भिक्खा वा मन्दा लद्धा होति, तावतकेन पन नेव वत्तुं न सक्कोति, न गन्तुं. अपिच खो ‘‘न सक्कोमी’’ति सञ्ञी होति, अयं पहु हुत्वा अप्पहुसञ्ञी नाम. इमिना छादितापि अच्छादिता. अप्पहुना पन वत्तुं वा गन्तुं वा असमत्थेन पहुसञ्ञिना वा अप्पहुसञ्ञिना वा छादितापि अच्छादिताव.

इदं उत्तानमेवाति इदं अङ्गद्वयं उत्तानत्थमेव. सचे पन ‘‘छादेस्सामी’’ति धुरनिक्खेपं कत्वा पुरेभत्ते वा पच्छाभत्ते वा पठमयामादीसु वा लज्जिधम्मं ओक्कमति, अन्तोअरुणेयेव आरोचेति, अयं छादेतुकामो न छादेति नाम.

यस्स पन अभिक्खुके ठाने वसन्तस्स आपत्तिं आपज्जित्वा सभागस्स भिक्खुनो आगमनं आगमेन्तस्स वा, सभागस्स सन्तिकं वा गच्छन्तस्स अड्ढमासोपि मासोपि अतिक्कमति, अयं नच्छादेतुकामो छादेति नाम. अयम्पि अच्छन्नाव होति.

यो ¶ पन आपन्नमत्तोव अग्गिं अक्कन्तपुरिसो विय सहसा अपक्कमित्वा सभागट्ठानं गन्त्वा आवि करोति, अयं नच्छादेतुकामोव न छादेति नाम. सभागमत्तमेव पमाणन्ति अवेरिसभागमत्तमेव पमाणं. अवेरिसभागस्स हि सन्तिके आरोचेतब्बं. यो पन विसभागो होति सुत्वा पकासेतुकामो, एवरूपस्स उपज्झायस्सपि सन्तिके न आरोचेतब्बा. तत्थ पुरेभत्तं ¶ आपत्तिं आपन्नो होतु, पच्छाभत्तं वा दिवा वा रत्तिं वा, याव अरुणं न उग्गच्छति, ताव आरोचेतब्बं. उद्धस्ते अरुणे पटिच्छन्ना होति, पटिच्छादनपच्चया च दुक्कटं आपज्जति. सङ्खेपतोति समासतो. वित्थारतो पन समन्तपासादिकायं वुत्तोति अधिप्पायो.

अकामा परिवत्थब्बन्ति अप्पटिकम्मकताय आपत्तिया सग्गमोक्खावरणभावतो अनिच्छन्तेनापि परिवसितब्बन्ति अत्थो. तेनाह ‘‘न कामेना’’तिआदि. परिवासं समादायाति परिवासवत्तं सङ्घमज्झे समादियित्वा. यदिपि चतुब्बिधो परिवासो अप्पटिच्छन्नपरिवासो, पटिच्छन्नपरिवासो, सुद्धन्तपरिवासो, समोधानपरिवासोति, तथापि अप्पटिच्छन्नपरिवासो इध न अधिप्पेतोति आह ‘‘तत्थ पटिच्छन्न…पे… तिविधो परिवासो’’ति. तत्थाति तस्मिं वाक्ये. पटिच्छन्नाय आपत्तिया सति दातब्बो परिवासो पटिच्छन्नविसयताय पटिच्छन्नपरिवासो. सुद्धन्ततो पट्ठाय दातब्बो परिवासो सुद्धन्तपरिवासो. समोदहित्वा दातब्बो परिवासो समोधानपरिवासो.

इदानि ते तिविधेयेव परिवासे सरूपतो दस्सेतुं ‘‘तत्था’’तिआदिमाह. हीति यस्मा. एकाहं पटिच्छन्ना एकाहप्पटिच्छन्ना. वुत्तनयेनाति ‘‘आपत्ति च होती’’तिआदिना वुत्तेन नयेन. एकाहप्पटिच्छन्नन्ति एत्थ इतिसद्दो ‘‘इति वा, इति एवरूपा विसूकदस्सना पटिविरतो’’तिआदीसु (दी. नि. १.१३, १९७) विय आदिअत्थो. तेन ‘‘सोहं, भन्ते, सङ्घं एकिस्सा आपत्तिया सञ्चेतनिकाय सुक्कविसट्ठिया एकाहप्पटिच्छन्नाय एकाहपरिवासं याचामी’’ति इमं पाळिसेसं (चूळव. १०२) सङ्गण्हाति. एवं परिवासं याचापेत्वाति एवं यावततियं याचापेत्वा. खन्धके आगतनयेनाति समुच्चयक्खन्धके (चूळव. ९७ आदयो) आगतनयेन. ततोति पक्खतो ¶ पट्ठाय. अतिरेकपक्खप्पटिच्छन्नन्ति पक्खस्स अतिरेको अतिरेकपक्खो, तं पटिच्छन्नन्ति अत्थो. ततोति तिंसतिमदिवसतो पट्ठाय. मासप्पटिच्छन्नन्ति सत्तानं आयुं मिनन्तो विय सियति अन्तं करोतीति मासो, तिंसरत्तिन्दिवो, तं पटिच्छन्नन्ति अत्थो. संवच्छरे पुण्णेति तं तं सत्तं, धम्मप्पवत्तिञ्च सङ्गम्म वदन्तो विय सरति पवत्ततीति संवच्छरो, द्वादस मासा, तस्मिं परिपुण्णे.

वत्थुकित्तनवसेन वाति नामेन सह वत्थुकित्तनवसेन वाति अत्थो. तेनेव हि उपरि ‘‘नाममत्तवसेन वा’’ति मत्तग्गहणं कतन्ति दट्ठब्बं. नाममत्तवसेनाति वत्थुकित्तनं विना केवलं नामस्सेव वसेन. तस्माति यस्मा दुविधे नामे ‘‘आपत्ती’’ति सब्बसाधारणं नामं, तस्मा ¶ . सुक्कविस्सट्ठीति सुक्कविस्सट्ठि नामायं. इतिसद्दो हेत्थ वचनीयत्थं निदस्सेति. निदस्सनमत्तञ्चेतं ‘‘सुक्कविस्सट्ठी’’ति कायसंसग्गादीनम्पि वत्थुआदिभावेन इच्छितब्बत्ता. वत्थु चेव गोत्तञ्चाति वीतिक्कमत्ता वत्थु चेव अनञ्ञसाधारणत्ता गोत्तञ्च. गं तायतीति गोत्तं, सजातितो अञ्ञत्थ कायसंसग्गादीसु गन्तुं अदत्वा बुद्धिं, वचनञ्च रक्खतीति अत्थो. सङ्घादिसेसोति सङ्घादिसेसो नामायं. एत्थ पन इतिसद्दो वचनवचनीयसमुदायं निदस्सेति. तेनाह ‘‘नामञ्चेव आपत्ति चा’’ति, सजातिसाधारणनामत्ता नामञ्चेव तेन तेन वीतिक्कमेनापज्जितब्बत्ता आपत्ति चाति अत्थो. इदम्पि निदस्सनमत्तमेव ‘‘आपत्तियो’’ति इमस्सापि नामादिभावेन इच्छितब्बत्ता. इतिसद्दो वा आदिअत्थो. एवञ्च कत्वा ‘‘कायसंसग्गन्तिआदिवचनेनापी’’तिआदिकम्पि समत्थितं होति.

तयिदं कम्मवाचाय केन वचनेन गहितन्ति अनुयोगं सन्धाय ‘‘तत्था’’तिआदिमाह. ‘‘आपत्ती’’ति सब्बसाधारणनामत्ता, वीतिक्कमेन आपज्जितब्बत्ता च नामञ्चेव आपत्ति च होतीति आह ‘‘आपत्तियोति वचनेनापी’’ति. तस्माति यस्मा इदं परिवासादिविनयकम्मं वत्थुवसेन, गोत्तवसेन, नामवसेन, आपत्तिवसेन च कातुं वट्टतियेव, तस्मा. एतेसूति वत्थुआदीसु, सुक्कविस्सट्ठिआदीसु वा. वत्तं समादातब्बन्ति यथावुत्तेसु द्वीसु पदेसु एकेनपि समादातब्बं. द्वीहि पन सुसमादिन्नंयेव. तेनेव वक्खति ‘‘समादानेपि एसेव नयो’’ति (कङ्खा. अट्ठ. निदानवण्णना).

आरोचेत्वाति ¶ –

‘‘अहं, भन्ते, एकं आपत्तिं आपज्जिं सञ्चेतनिकं सुक्कविस्सट्ठिं एकाहप्पटिच्छन्नं, सोहं सङ्घं एकिस्सा आपत्तिया सञ्चेतनिकाय सुक्कविस्सट्ठिया एकाहप्पटिच्छन्नाय एकाहपरिवासं याचिं, तस्स मे सङ्घो एकिस्सा आपत्तिया सञ्चेतनिकाय सुक्कविस्सट्ठिया एकाहप्पटिच्छन्नाय एकाहपरिवासं अदासि, सोहं परिवसामि, वेदयामहं, भन्ते, ‘वेदयती’ति मं सङ्घो धारेतू’’ति (चूळव. अट्ठ. १०२) –

एवमादिना तं तं योजनानुरूपं आरोचेत्वा. इमञ्च पनत्थं गहेत्वा याय कायचि भासाय आरोचेतुं वट्टतियेव (चूळव. अट्ठ. १०२). ‘‘पुन आगतागतानं भिक्खूनं आरोचेन्तेना’’ति इदं आगन्तुकं भिक्खुं सन्धाय वुत्तं. एत्थ च एकस्स आरोचेन्तेन अवसाने ¶ ‘‘वेदयतीति मं आयस्मा धारेतु’’, द्विन्नं ‘‘आयस्मन्ता धारेन्तु’’, तिण्णं ‘‘आयस्मन्तो धारेन्तू’’ति वत्तब्बं. वत्तभेदञ्च रत्तिच्छेदञ्च अकत्वाति ‘‘न, भिक्खवे, पारिवासिकेन भिक्खुना सादितब्बं पकतत्तानं भिक्खूनं अभिवादनं पच्चुपट्ठान’’न्तिआदिना (चूळव. ७५) पारिवासिकक्खन्धके यानि चतुनवुति वत्तानि वुत्तानि, तेसं भेदञ्च, यो च ‘‘तयो खो, उपालि, पारिवासिकस्स भिक्खुनो रत्तिच्छेदा सहवासो विप्पवासो अनारोचना’’ति (चूळव. ८३) रत्तिच्छेदो वुत्तो, तञ्च अकत्वा.

अयं हेत्थ विनिच्छयो – सचे (चूळव. अट्ठ. ७६) आगन्तुका मुहुत्तं विस्समित्वा वा अविस्समित्वा एव वा विहारमज्झेन गच्छन्ति, तेसम्पि आरोचेतब्बं. सचे तस्स अजानन्तस्सेव गच्छन्ति, अयञ्च गतकाले जानाति, गन्त्वा आरोचेतब्बं. सम्पापुणितुं असक्कोन्तस्स रत्तिच्छेदोव होति, न वत्तभेददुक्कटं. येपि अन्तोविहारं अप्पविसित्वा उपचारसीमं ओक्कमित्वा गच्छन्ति, अयञ्च नेसं छत्तसद्दं वा उक्कासितसद्दं वा खिपितसद्दं वा सुत्वाव आगन्तुकभावं जानाति, गन्त्वा आरोचेतब्बं. गतकाले जानन्तेनापि अनुबन्धित्वा आरोचेतब्बमेव. सम्पापुणितुं असक्कोन्तस्स रत्तिच्छेदोव होति, न वत्तभेददुक्कटं. योपि रत्तिंयेव आगन्त्वा रत्तिंयेव गच्छति, सोपिस्स रत्तिच्छेदं करोति. अञ्ञातत्ता ¶ पन वत्तभेददुक्कटं नत्थि. सचे अजानित्वाव अब्भानं करोति, अकतमेव होतीति कुरुन्दियं (चूळव. अट्ठ. ७६) वुत्तं. तस्मा अधिका रत्तियो गहेत्वा कातब्बं. अयं अपण्णकप्पटिपदा.

नदिआदीसु नावाय गच्छन्तम्पि परतीरे ठितम्पि आकासे गच्छन्तम्पि पब्बततलअरञ्ञादीसु दूरे ठितम्पि भिक्खुं दिस्वा सचे ‘‘भिक्खू’’ति ववत्थानं अत्थि, नावादीहि वा गन्त्वा, महासद्दं कत्वा वा वेगेन अनुबन्धित्वा वा आरोचेतब्बं, अनारोचेन्तस्स रत्तिच्छेदो चेव वत्तभेददुक्कटञ्च. सचे वायमन्तोपि सम्पापुणितुं वा सावेतुं वा न सक्कोति, रत्तिच्छेदोव होति, न वत्तभेददुक्कटं.

अञ्ञं कञ्चि विहारं गतेनपि भिक्खूनं आरोचेतब्बमेव (चूळव. अट्ठ. ७६). सचे सब्बे एकट्ठाने ठिते पस्सति, एकट्ठाने ठितेनेव आरोचेतब्बं. अथ रुक्खमूलादीसु विसुं विसुं ठिता होन्ति, तत्थ तत्थ गन्त्वा आरोचेतब्बं. सञ्चिच्च अनारोचेन्तस्स रत्तिच्छेदो च होति, वत्तभेदे च दुक्कटं. अथ विचिनन्तो एकच्चे न पस्सति, रत्तिच्छेदोव होति ¶ , न च वत्तभेददुक्कटं. सञ्चिच्च अनारोचेन्तस्स पन रत्तिच्छेदो चेव होति, वत्तभेदे च दुक्कटं.

तत्थेवाति माळकसीमायमेव. माळकतो पन भिक्खूसु निक्खन्तेसु एकस्सपि सन्तिके निक्खिपितुं वट्टति (चूळव. अट्ठ. ९७). माळकतो निक्खमित्वा सतिं पटिलभन्तेन सह गच्छन्तस्स सन्तिके निक्खिपितब्बं. तेनाह ‘‘एकपुग्गलस्स वा सन्तिके’’ति. सचे सोपि पक्कन्तो, अञ्ञस्स यस्स माळके नारोचितं, तस्स आरोचेत्वा निक्खिपितब्बं. पकतत्तट्ठानेति सङ्घकम्मानं अरहट्ठाने. द्वे लेड्डुपाते अतिक्कमित्वाति (सारत्थ. टी. चूळवग्ग ३.९७) भिक्खूनं सज्झायनसद्दसवनूपचारविजहनत्थं वुत्तं. महामग्गतो ओक्कम्माति मग्गप्पटिपन्नभिक्खूनं उपचारविजहनत्थं वुत्तं. गुम्बेन वा वतिया वा पटिच्छन्नट्ठानेति दस्सनूपचारविजहनत्थं वुत्तं. वत्तं समादियित्वा आरोचेतब्बन्ति वुत्तनयेनेव वत्तं समादियित्वा परिवासो आरोचेतब्बो. ‘‘आरोचेतब्ब’’न्ति पन सामञ्ञेन वुत्तं. आरोचेन्तेन च सचे नवकतरो होति, ‘‘आवुसो’’ति वत्तब्बं. सचे वुड्ढतरो, ‘‘भन्ते’’ति वत्तब्बं. सचे अञ्ञो कोचि भिक्खु केनचिदेव करणीयेन तं ठानं आगच्छति. सचे ¶ एस नं पस्सति, सद्दं वा तस्स सुणाति, आरोचेतब्बं. अनारोचेन्तस्स रत्तिच्छेदो चेव वत्तभेदो च. तेनाह ‘‘यम्पि अञ्ञं भिक्खुं पस्सति, तस्सापि आरोचेतब्बमेवा’’ति. अथ द्वादसहत्थं उपचारं ओक्कमित्वा अजानन्तस्सेव गच्छति, रत्तिच्छेदो होतियेव, वत्तभेदो पन नत्थि. उट्ठितेति उग्गते. यं सब्बपठमं भिक्खुन्ति विहारतो निक्खमन्तं वा आगन्तुकं वा सब्बपठमं यं अञ्ञं भिक्खुं पस्सति. तस्स आरोचेत्वा निक्खिपितब्बन्ति अनारोचेन्तस्स दुक्कटं सिया, तं सन्धाय वुत्तं, न तु रत्तिच्छेदं सन्धाय. इतरथा हि ‘‘विहारसीमापरियापन्नानं सब्बेसं आरोचेत्वा’’ति वदेय्य. याव रत्तियो पूरेन्तीति यत्तका रत्तियो आपत्ति पटिच्छन्ना होति, तत्तका रत्तियो याव पूरेन्ति, ताव परिवत्थब्बं. समन्तपासादिकायं पन ‘‘एवं यत्तकानि दिवसानि आपत्ति पटिच्छन्ना होति, तत्तकानि, ततो अधिकतरानि वा कुक्कुच्चविनोदनत्थाय परिवसित्वा’’ति वुत्तं. वित्थारोति पपञ्चो.

इतरेसु पन द्वीसूति सुद्धन्तपरिवासो, समोधानपरिवासोति द्विन्नं मज्झे. खन्धकेति समुच्चयक्खन्धके (चूळव. १५६ आदयो). चूळसुद्धन्तो महासुद्धन्तोति एत्थ यो उपसम्पदतो (चूळव. अट्ठ. १०२; वि. सङ्ग. अट्ठ. २४२) पट्ठाय अनुलोमक्कमेन वा आरोचितदिवसतो पट्ठाय पटिलोमक्कमेन वा ‘‘असुकञ्च असुकञ्च दिवसं वा पक्खं वा मासं वा संवच्छरं वा तव सुद्धभावं जानासी’’ति पुच्छियमानो ‘‘आम, भन्ते, जानामि ¶ , एत्तकं नाम कालं अहं सुद्धो’’ति वदति, तस्स दिन्नो सुद्धन्तपरिवासो ‘‘चूळसुद्धन्तो’’ति वुच्चति.

तं गहेत्वा परिवसन्तेन यत्तकं कालं अत्तनो सुद्धभावं जानाति, तत्तकं अपनेत्वा अवसेसं मासं वा द्वेमासं वा परिवसितब्बं. सचे ‘‘मासमत्तं असुद्धोम्ही’’ति सल्लक्खेत्वा परिवासं अग्गहेसि, परिवसन्तो च पुन अञ्ञं मासं सरति, तम्पि मासं परिवसितब्बमेव, पुन परिवासदानकिच्चं नत्थि. अथ ‘‘द्वेमासं असुद्धोम्ही’’ति सल्लक्खेत्वा अग्गहेसि, परिवसन्तो च ‘‘मासमत्तमेवाहं असुद्धोम्ही’’ति सन्निट्ठानं करोति, मासमेव परिवसितब्बं, पुन परिवासदानकिच्चं नत्थि. अयञ्हि सुद्धन्तपरिवासो उद्धम्पि आरोहति, हेट्ठापि ओरोहति, इदमस्स लक्खणं.

यो ¶ पन यथावुत्तेन अनुलोमप्पटिलोमवसेन पुच्छियमानोपि रत्तिपरियन्तं (चूळव. अट्ठ. १०२) न जानाति नस्सरति, रत्तिपरियन्ते वेमतिको वा होति, तस्स दिन्नो सुद्धन्तपरिवासो ‘‘महासुद्धन्तो’’ति वुच्चति. तं गहेत्वा गहितदिवसतो याव उपसम्पददिवसो, ताव रत्तियो गणेत्वा परिवसितब्बं. अयं उद्धं नारोहति, हेट्ठा पन ओरोहति. तस्मा सचे परिवसन्तो रत्तिपरिच्छेदे सन्निट्ठानं करोति ‘‘मासो वा संवच्छरो वा मय्हं आपन्नस्सा’’ति, मासं वा संवच्छरं वा परिवसितब्बं. एत्थ च किञ्चापि ‘‘एत्तकं कालं अहं सुद्धो’’ति वदन्तस्स चूळसुद्धन्तो दीयति, तथापि नियमेनेव जाननाभावा ‘‘दुविधोपि चेस…पे… दातब्बो’’ति वुत्तं. तस्स दानविधि खन्धके आगतोति तस्स दुविधस्सापि सुद्धन्तस्स दानविधि ‘‘तेन, भिक्खवे, भिक्खुना सङ्घं उपसङ्कमित्वा…पे… एवमस्स वचनीयो’’तिआदिना समुच्चयक्खन्धके (चूळव. १५६) आगतो. तस्मा तत्थ वुत्तनयेनेव वेदितब्बोति अधिप्पायो. एस नयो विनिच्छयकथा पन वित्थारतो समन्तपासादिकायं वुत्ताति एत्थापि.

ओधुनित्वा अवधुय पहाय समोधानो ओधानसमोधानो. चिरप्पटिच्छन्नानं अग्घेन समोधानो अग्घसमोधानो. मिस्सकानं समोधानो मिस्सकसमोधानो. इदानि तं तिविधम्पि समोधानपरिवासं सङ्खेपतो दस्सेतुं ‘‘तत्था’’तिआदिमाह. अन्तरापत्तिं आपज्जित्वा पटिच्छादेन्तस्साति यो परिवासं गहेत्वा अनिक्खित्तवत्तो हुत्वा परिवसन्तो अपरिनिट्ठितेयेव परिवासे अन्तरा वेमज्झे सङ्घादिसेसापत्तिं आपज्जित्वा पटिच्छादेति, तस्स. परिवुत्थदिवसेति लक्खणवचनमेतं, तेन ‘‘मानत्तचिण्णदिवसे चा’’तिपि वुत्तमेव होति. मक्खेत्वाति ञत्तिचतुत्थेन ¶ कम्मेन मूलाय पटिकस्सनवसेन मक्खेत्वा. समोदहित्वाति मूलापत्तिट्ठाने ठपेत्वा, पक्खिपित्वाति अत्थो. दातब्बपरिवासोति ‘‘सुणातु मे, भन्ते, सङ्घो’’तिआदिना ञत्तिचतुत्थेन कम्मेन दातब्बपरिवासो. इदं वुत्तं होति – यो पटिच्छन्नाय आपत्तिया परिवासं गहेत्वा परिवसन्तो (चूळव. अट्ठ. १०२; वि. सङ्ग. अट्ठ. २४३) वा मानत्तारहो वा मानत्तं चरन्तो वा अब्भानारहो वा अनिक्खित्तवत्तो अञ्ञं आपत्तिं आपज्जित्वा पुरिमापत्तिया समा वा ऊनतरा वा रत्तियो ¶ पटिच्छादेति, तस्स मूलाय पटिकस्सनेन ते परिवुत्थदिवसे च मानत्तचिण्णदिवसे च सब्बे ओधुनित्वा अदिवसे कत्वा पच्छा आपन्नापत्तिं मूलापत्तियं समोधाय परिवासो दातब्बोति.

सचे पन अन्तरापत्ति मूलापत्तितो अतिरेकप्पटिच्छन्ना होति (चूळव. अट्ठ. १०२), तं मूलापत्तिं कत्वा तत्थ इतरं समोधाय परिवासो दातब्बो. सचे पन अन्तरापत्ति अप्पटिच्छन्ना होति, मूलाय पटिकस्सनं अकत्वा पुब्बे गहितपरिवासेनेव परिवसितब्बं.

या एका वा…पे… सब्बचिरप्पटिच्छन्नायोति या एका वा आपत्ति सब्बचिरप्पटिच्छन्ना, या द्वे वा तिस्सो वा सम्बहुला वा आपत्तियो सब्बचिरप्पटिच्छन्नायोति अत्थो. तासन्ति सब्बचिरप्पटिच्छन्नानं आपत्तीनं. दानविधि पनस्स खन्धके वुत्तनयेनेव वेदितब्बो.

यस्स पन सतं आपत्तियो दसाहपटिच्छन्ना, अपरम्पि सतं आपत्तियो दसाहपटिच्छन्ना, अपरम्पि सतं आपत्तियो दसाहपटिच्छन्नाति एवं दसक्खत्तुं कत्वा आपत्तिसहस्सं दिवससतपटिच्छन्नं होति, तेन किं कातब्बन्ति? सब्बं समोदहित्वा दस दिवसे परिवसितब्बं. एवं एकेनेव दसाहेन दिवससतम्पि परिवसितमेव होति. वुत्तम्पि चेतं –

‘‘दससतं रत्तिसतं, आपत्तियो छादयित्वान;

दस रत्तियो वसित्वान, मुच्चेय्य पारिवासिको’’ति. (परि. ४७७);

अयं अग्घसमोधानो नाम.

इदानि ¶ मिस्सकसमोधानं निद्दिसितुं ‘‘मिस्सकसमोधानो नामा’’तिआदिमाह. तत्रायं नयो –

‘‘अहं, भन्ते, सम्बहुला सङ्घादिसेसा आपत्तियो आपज्जिं एकं सुक्कविस्सट्ठिं, एकं कायसंसग्गं, एकं दुट्ठुल्लवाचं, एकं अत्तकामं, एकं सञ्चरित्तं, एकं कुटिकारकं, एकं विहारकारकं, एकं दुट्ठदोसं, एकं अञ्ञभागियं, एकं सङ्घभेदं, एकं भेदानुवत्तकं, एकं दुब्बचं, एकं कुलदूसकं, सोहं, भन्ते, सङ्घं तासं आपत्तीनं समोधानपरिवासं याचामी’’ति –

तिक्खत्तुं ¶ याचापेत्वा तदनुरूपाय कम्मवाचाय परिवासो दातब्बो. एत्थ च ‘‘सङ्घादिसेसा आपत्तियो आपज्जिं नानावत्थुकायो’’तिपि ‘‘सङ्घादिसेसा आपत्तियो आपज्जि’’न्तिपि एवं पुब्बे वुत्तनयेन वत्थुवसेनपि गोत्तवसेनपि नामवसेनपि आपत्तिवसेनपि योजेत्वा कम्मवाचं कातुं वट्ठतियेवाति. अयं मिस्सकसमोधानो. सब्बपरिवासकम्मवाचावसाने पन निक्खित्तानिक्खित्तवत्तादिकथा पुरिमनयेनेव वेदितब्बा. तिविधेपि समोधानपरिवासे अत्थमत्तस्सेव वुत्तत्ता, विनिच्छयादीनं वा अनामट्ठत्ता ‘‘अयं तिविधेपि समोधानपरिवासे सङ्खेपकथा’’ति वुत्तं. महाविसयत्ता समोधानविचारणाय सा निरवसेसा कुतो लद्धब्बाति आह ‘‘वित्थारो’’तिआदि.

छारत्तन्ति रा सद्दो तीयति छिज्जति एत्थाति रत्ति, सत्तानं सद्दस्स वूपसमनकालोति अत्थो, छ रत्तियो समाहटा, छन्नं रत्तीनं वा समाहारो छरत्तं, छरत्तमेव छारत्तं, अवयवब्यतिरेकेन समुदायस्साभावतो छ रत्तियोति अत्थो वुत्तो.

परिवासं अदत्वा मानत्तमेव दातब्बन्ति यस्मा आपत्ति अप्पटिच्छन्ना, यस्मा च आपन्नभावेनेव मानत्तारहो होति, तस्मा परिवासं अदत्वा केवलं मानत्तमेव दातब्बं. यं पटिच्छन्नाय आपत्तिया परिवुत्थपरिवासस्स दीयति, इदं पटिच्छन्नमानत्तं नामाति आह ‘‘यस्स पटिच्छन्ना होती’’तिआदि. इदन्ति पटिच्छन्नमानत्तं. इधाति इमस्मिं वाक्ये. कथं पन तेसं द्विन्नं मानत्तानं दानविधि च विनिच्छयकथा च वेदितब्बाति आह ‘‘उभिन्नम्पि पना’’तिआदि.

अयन्ति वक्खमानं सन्धायाह. परिवासे वुत्तप्पकारं पदेसन्ति परिक्खित्तस्स विहारस्स परिक्खेपतो ¶ , अपरिक्खित्तस्स परिक्खेपारहट्ठानतो द्वे लेड्डुपाते अतिक्कमित्वा महामग्गतो ओक्कम्म गुम्बेन वा वतिया वा पटिच्छन्नट्ठानं. समादियित्वाति अन्तोअरुणेयेव समादियित्वा. आरोचेत्वाति –

‘‘अहं, भन्ते, एकं आपत्तिं आपज्जिं सञ्चेतनिकं सुक्कविस्सट्ठिं अप्पटिच्छन्नं, सोहं, भन्ते, सङ्घं एकिस्सा आपत्तिया सञ्चेतनिकाय सुक्कविस्सट्ठिया अप्पटिच्छन्नाय छारत्तं मानत्तं याचिं ¶ , तस्स मे सङ्घो एकिस्सा आपत्तिया सञ्चेतनिकाय सुक्कविस्सट्ठिया अप्पटिच्छन्नाय छारत्तं मानत्तं अदासि, सोहं मानत्तं चरामि, वेदयामहं, भन्ते, वेदयती’ति मं सङ्घो धारेतू’’तिआदिना (चूळव. अट्ठ. ९७) –

आपत्तिदिवसानुरूपं आरोचेत्वा. इमञ्च पन अत्थं गहेत्वा (चूळव. अट्ठ. ९७) याय कायचि भासाय आरोचेतुं वट्टतियेव. आरोचितकालतो पट्ठाय च एकं भिक्खुं ठपेत्वा सेसेहि सति करणीये गन्तुम्पि वट्टति. अरुणे उट्ठिते तस्स भिक्खुस्स सन्तिके वत्तं निक्खिपितब्बं. सचे सोपि केनचि कम्मेन पुरे अरुणेयेव गच्छति, अञ्ञं विहारतो निक्खन्तं वा आगन्तुकं वा यं पठमं पस्सति, तस्स सन्तिके आरोचेत्वा निक्खिपितब्बं. अयञ्च यस्मा गणस्स आरोचेत्वा, भिक्खूनञ्च अत्थिभावं सल्लक्खेत्वाव वसि, तेनस्स ऊने गणे चरणदोसो वा विप्पवासो वा न होति. सचे पन कञ्चि न पस्सति, विहारं गन्त्वा यं पठमं पस्सति, तस्स आरोचेत्वा निक्खिपितब्बं. तेनाह ‘‘ततो तेसु गतेसु वा अगतेसु वा पुरिमनयेन पटिपज्जितब्ब’’न्ति.

यत्थ सियाति यस्सं समानसंवासकसीमायं वीसतिगणो भिक्खुसङ्घो अत्थि. अव्हातब्बोति अब्भानकम्मवसेन पक्कोसितब्बो. अब्भानकम्मं पन कथन्ति आह ‘‘अब्भानकम्मं पना’’तिआदि. पाळिवसेनाति ‘‘सुणातु मे, भन्ते, सङ्घो’’तिआदिना (चूळव. १०१) पाळिवसेन. विनिच्छयवसेनाति ‘‘अब्भन्तेहि च पठमं अब्भानारहो कातब्बो. अयञ्हि निक्खित्तवत्तत्ता पकतत्तट्ठाने ठितो, पकतत्तस्स च अब्भानं कातुं न वट्टति, तस्मा वत्तं समादपेतब्बो. वत्ते समादिन्ने अब्भानारहो होति. तेनापि वत्तं समादियित्वा आरोचेत्वा अब्भानं याचितब्बं. अनिक्खित्तवत्तस्स पन वत्तसमानकिच्चं नत्थि. सो हि छारत्तातिक्कमेनेव अब्भानारहो होती’’तिआदिना (चूळव. अट्ठ. ९७) विनिच्छयवसेन. तं पनेतं सब्बं परिवासादिकम्मं पाळिवसेन (चूळव. ७५) च अट्ठकथावसेन (चूळव. अट्ठ. ७५, ९७) च ¶ सुविञ्ञेय्यत्ता अतिवित्थारभयेन न वित्थारयिम्ह, अत्थिकेहि पन ततोव गहेतब्बं. इमस्स ¶ पन कम्मस्स वीसतिवग्गकरणीयत्ता ततो ऊनतरेन कतं कुप्पति. तेनाह ‘‘एकेनापि चे…पे… अनब्भितो’’ति. अयन्ति अयं यथावुत्ता. सामीचीति वत्तं.

इति कङ्खावितरणिया पातिमोक्खवण्णनाय

विनयत्थमञ्जूसायं लीनत्थप्पकासनियं

सङ्घादिसेसवण्णना निट्ठिता.

अनियतकण्डं

१. पठमअनियतसिक्खापदवण्णना

‘‘मातुगामेना’’ति ¶ ¶ वत्वा पुन ‘‘एकाया’’ति वुत्तत्ता ‘‘मातुगामसङ्खाताय एकाय इत्थिया’’ति वुत्तं. रहोति अप्पकासं. अप्पकासता च यो अनापत्तिं करोति, तस्स अपच्चक्खभावतोति आह ‘‘चक्खुस्स रहो’’ति. ननु ‘‘रहो नाम चक्खुस्स रहो, सोतस्स रहो. चक्खुस्स रहो नाम न सक्का होति अक्खिं वा निखणियमाने, भमुकं वा उक्खिपियमाने, सीसं वा उक्खिपियमाने पस्सितुं. सोतस्स रहो नाम न सक्का होति पकतिकथा सोतु’’न्ति पदभाजनपाळियं सोतस्स रहोति आगतं, अथ कस्मा तं अवत्वा ‘‘चक्खुस्स रहो’’ति एत्तकमेव वुत्तन्ति आह ‘‘किञ्चापी’’तिआदि. इमिना पाळियं ‘‘सोतस्स रहो’’ति इदं अत्थुद्धारवसेन वुत्तन्ति दस्सेति. अथ कथमेतं विञ्ञायति ‘‘चक्खुस्सेव रहो इध अधिप्पेतो’’ति? ‘‘पटिच्छन्ने आसने’’ति वचनतो ‘‘सक्का होति मेथुनं धम्मं पटिसेवितु’’न्ति (पारा. ४४५) च वुत्तत्ता. तेनेवाह ‘‘सचेपी’’तिआदि. ‘‘पिहितकवाटस्सा’’ति (सारत्थ. टी. २.४४४-४४५) इमिना पटिच्छन्नभावतो चक्खुस्स रहोसब्भावं दस्सेति. अपिहितकवाटस्स (पारा. अट्ठ. २.४४४-४४५) पन द्वारे निसिन्नो अनापत्तिं करोति, न केवलं अपिहितकवाटस्स गब्भस्स द्वारे निसिन्नोव अनापत्तिं करोति, अन्तोद्वादसहत्थे ओकासे निसिन्नोपीति वेदितब्बो. तेनाह ‘‘यत्थ पन सक्का दट्ठु’’न्तिआदि. यस्मा निसीदित्वा निद्दायन्तो कपिमिद्धपरेतो कञ्चि कालं चक्खूनि उम्मीलेति, कञ्चि कालं निमीलेति, न च महानिद्दं ओक्कमति, तस्मा ‘‘निद्दायन्तोपि अनापत्तिं करोती’’ति वुत्तं. निपज्जित्वा निद्दायन्तो पन तादिसो न होतीति आह ‘‘निपज्जित्वा निद्दायन्तोपि न करोती’’ति, अनापत्तिं न करोतीति अत्थो. मेथुनस्स मातुगामो दुतियो न होति. इत्थियो हि अञ्ञमञ्ञिस्सा वज्जं पटिच्छादेन्ति. तेनेव वेसालियं (पारा. ७६-७७) महावने द्वारं विवरित्वा निपन्ने भिक्खुम्हि सम्बहुला इत्थियो यावदत्थं ¶ कत्वा पक्कमिंसु. तेनाह ‘‘इत्थीनं पन सतम्पि न करोती’’ति. तं कम्मन्ति अज्झाचारकम्मं. यस्मा निसीदित्वाव निपज्जति, तस्मा ¶ निपज्जनम्पि अन्तोकत्वा ‘‘निसज्जं कप्पेय्या’’ति वुत्तन्ति दस्सेतुं ‘‘एत्थ चा’’तिआदिमाह. तिण्णं धम्मानं अञ्ञतरेन कारेतब्बोति निसज्जं पटिजानमानस्स तिण्णं धम्मानं अञ्ञतरसमायोगो होतियेवाति वुत्तं. पाराजिकेन, पन सङ्घादिसेसेन च पाचित्तियेन च तेनाकारेन निसज्जं पटिजानमानोव कारेतब्बो. न अप्पटिजानमानोति निसज्जं अप्पटिजानमानो तिण्णं धम्मानं अञ्ञतरेन न कारेतब्बोति. अलज्जीपि हि पटिजानमानोव आपत्तिया कारेतब्बो. याव न पटिजानाति, ताव ‘‘नेव सुद्धो’’ति वा ‘‘न असुद्धो’’ति वा वत्तब्बो, वत्तानुसन्धिना पन कारेतब्बोति. वुत्तञ्हेतं –

‘‘पटिञ्ञा लज्जीसु कता, अलज्जीसु एवं न विज्जति;

बहुम्पि अलज्जी भासेय्य, वत्तानुसन्धितेन कारये’’ति. (परि. ३५९);

न केवलं तिण्णं धम्मानं अञ्ञतरेन चोदनायमेव एवं पटिञ्ञाय कारेतब्बो, अथ खो निसज्जादिना आकारेन सद्धिं चोदनायपीति दस्सेतुं ‘‘येन वा सा सद्धेय्यवचसा उपासिका वदेय्य, तेन सो भिक्खु कारेतब्बो’’ति वुत्तं. तेनेवाह ‘‘निसज्जादीसु आकारेसू’’तिआदि. एत्थ च ‘‘पटिजानमानो’’ति अवुत्तेपि अधिकारत्ता ‘‘पटिजानमानोव तेन सो भिक्खु कारेतब्बो’’ति वुत्तं. तथारूपाय (सारत्थ. टी. २.४४४-४४५) उपासिकाय वचने अञ्ञथत्ताभावतो दिट्ठं नाम तथापि होति, अञ्ञथापि होतीति दस्सने अञ्ञथत्तसम्भवं दस्सेति. अनेकंसिकताय न नियतोति अनियतो. तेनाह ‘‘तिण्णं आपत्तीन’’न्तिआदि.

रहोनिसज्जस्सादेन मातुगामस्स सन्तिकं गन्तुकामो अक्खिं अञ्जेति, दुक्कटं. निवासनं निवासेति, कायबन्धनं बन्धति, चीवरं पारुपति, सब्बत्थ पयोगे पयोगे दुक्कटं. गच्छति, पदवारे पदवारे दुक्कटं. गन्त्वान निसीदति, दुक्कटमेव. तेनाह ‘‘मेथुनधम्मसन्निस्सितकिलेससङ्खातेना’’तिआदि. एत्थ च रहोनिसज्जस्सादस्स असतिपि मेथुनरागभावे तप्पटिबद्धकिलेसत्ता वुत्तं ‘‘मेथुनधम्मसन्निस्सितकिलेससङ्खातेना’’ति. तेनेव सन्निस्सितग्गहणं कतं. रहस्सादेनाति ‘‘इत्थन्नामाय सद्धिं रहो निसीदित्वा हसितलपितादिकं करेय्य’’न्ति उप्पन्नअस्सादहेतु ¶ . निसज्जाय पाचित्तियं असति उपचारगते निपज्जित्वा अनिद्दायन्ते अनन्धे विञ्ञुपुरिसेति अधिप्पायो. सचे सा इत्थी केनचि करणीयेन उट्ठायुट्ठाय पुनप्पुनं ¶ निसीदति, निसज्जाय निसज्जाय पाचित्तियं. यं सन्धाय गतो, सा न दिट्ठा, अञ्ञा आगन्त्वा निसीदति, अस्सादे उप्पन्ने पाचित्तियं. सचे सम्बहुला आगच्छन्ति, मातुगामगणनाय पाचित्तियं. सचे उट्ठायुट्ठाय पुनप्पुनं निसीदन्ति, निसज्जागणनायपि पाचित्तियानि. अनियमेत्वा ‘‘दिट्ठदिट्ठाय सद्धिं रहस्सादं कप्पिस्सामी’’ति गन्त्वा निसिन्नस्सापि आगतागतानं वसेन, पुनप्पुनं निसज्जाय वसेन च वुत्तनयेनेव आपत्तियो वेदितब्बा. वुत्तप्पकारे पुरिसेति अनन्धे विञ्ञुपुरिसे. उपचारगते सतीति द्वादसहत्थब्भन्तरगते सति. सचे सुद्धचित्तेन गन्त्वा निसिन्नस्स सन्तिकं आगन्त्वा निसिन्नाय इत्थिया रहस्सादो उप्पज्जति, एवम्पि अनापत्ति.

पठमअनियतसिक्खापदवण्णना निट्ठिता.

२. दुतियअनियतसिक्खापदवण्णना

नहेव खो पन पटिच्छन्नन्ति एत्थ पन यम्पि बहि परिक्खित्तं अन्तो विवटं परिवेणङ्गणादि, तम्पि अन्तोगधन्ति वेदितब्बं. ‘‘एवरूपञ्हि ठानं अप्पटिच्छन्नेयेव गहित’’न्ति महापच्चरियं (पारा. अट्ठ. २.४५३) वुत्तं. सङ्घादिसेसेन वाति कायसंसग्गदुट्ठुल्लोभासनसङ्खातेन सङ्घादिसेसेन वा. तेनेव हि पदभाजने ‘‘सा चे एवं वदेय्य ‘अय्यो, मया दिट्ठो निसिन्नो मातुगामेन सद्धिं कायसंसग्गं समापज्जन्तो’’’तिआदि (पारा. ४५५) वुत्तं. इदं सिक्खापदं दुट्ठुल्लवाचावसेन आगतं. दुट्ठुल्लवाचञ्च सुत्वा तं मातुगामोपि न पटिच्छादेति. तथा हि दुट्ठुल्लवाचासिक्खापदे (पारा. २८३ आदयो) या पन ता इत्थियो हिरिमना, ता निक्खमित्वा भिक्खू उज्झापेसुं, तस्मा इध इत्थीपि अनापत्तिं करोतीति आह ‘‘इत्थीपी’’ति. अथ वा इध अप्पटिच्छन्नत्ता इत्थीपि अनापत्तिं करोति, पठमे पन पटिच्छन्नत्ता इत्थिसतम्पि अनापत्तिं न करोतीति एवमेत्थ अत्थो दट्ठब्बो. अनन्धो अबधिरोति एत्थ कायसंसग्गवसेन अनन्धो वुत्तो, दुट्ठुल्लवाचावसेन अबधिरो.

समुट्ठानादीसु ¶ इदं सिक्खापदं तिसमुट्ठानं – कायचित्ततो वाचाचित्ततो कायवाचाचित्ततो समुट्ठाति, किरियं, सञ्ञाविमोक्खं, सचित्तकं, लोकवज्जं, कायकम्मं, वचीकम्मं, अकुसलचित्तं, सुखमज्झत्तवेदनाहि द्विवेदनं. तेनाह ‘‘समुट्ठानादीनि पनेत्थ अदिन्नादानसदिसानेवा’’ति. एत्थ च कायसंसग्गं समापज्जन्तो दुट्ठुल्लम्पि भणति, दुट्ठुल्लं भणन्तो ¶ निसीदति चाति ‘‘कायवाचाचित्ततो च समुट्ठाती’’ति वुत्तं, दुट्ठुल्लमेव वा सन्धाय वुत्तन्ति गहेतब्बं.

दुतियअनियतसिक्खापदवण्णना निट्ठिता.

‘‘अनियतुद्देसो चायं दिट्ठादिसमूलकचोदनाय वत्थुं पटिजानमानोव आपत्तिया कारेतब्बो, न इतरोति आपत्तिरोपनारोपनलक्खणदस्सनत्थं वुत्तो’’ति वदन्ति.

इति कङ्खावितरणिया पातिमोक्खवण्णनाय

विनयत्थमञ्जूसायं लीनत्थप्पकासनियं

अनियतवण्णना निट्ठिता.

निस्सग्गियकण्डं

१. चीवरवग्गो

१. कथिनसिक्खापदवण्णना

निट्ठितचीवरस्मिन्ति ¶ (पारा. अट्ठ. २.४६२-४६३) ¶ निट्ठितञ्च तं चीवरञ्चाति निट्ठितचीवरं, निट्ठिते आनिसंसमूलके चीवरे, पच्चासाचीवरे चाति अत्थो. यस्मा पन तं चीवरं करणेनपि निट्ठितं होति नासनादीहिपि, तस्मा ‘‘सूचिकम्मपरियोसानेन वा’’तिआदि वुत्तं. तत्थ यं किञ्चि सूचिया कत्तब्बं पासकपट्टगण्ठिकपट्टपरियोसानकम्मं, तं सूचिकम्मपरियोसानं नाम, तेन. नट्ठन्ति चोरादीहि हटं. एतम्पि हि करणपलिबोधस्स निट्ठितत्ता ‘‘निट्ठित’’न्ति वुच्चति. विनट्ठन्ति उपचिकादीहि खादितं. दड्ढन्ति अग्गिना दड्ढं. चीवरासा वा उपच्छिन्नाति ‘‘असुकस्मिं नाम कुले चीवरं लभिस्सामी’’ति या चीवरासा उप्पन्ना होति, सा उपच्छिन्ना. एतेसम्पि करणपलिबोधस्सेव निट्ठितत्ता निट्ठितभावो वेदितब्बो. तेनाह ‘‘इमेसु वा’’तिआदि. एतेन चीवरपलिबोधाभावो वुत्तो. तेनाह ‘‘चीवरस्स करणपलिबोधे उपच्छिन्नेति अत्थो’’ति. कथमेतं विञ्ञायतीति आह ‘‘अत्थतकथिनस्स ही’’तिआदि. पञ्चानिसंसे अञ्ञत्थ गन्तुं अदत्वा सङ्गण्हनट्ठेन कथिनं, थिरन्ति अत्थो, अत्थतं कथिनं येन सो अत्थतकथिनो, तस्स अत्थतकथिनस्स. हीति कारणत्थे निपातो. ताव कथिनानिसंसं लभतीति एत्थ यो अत्थतकथिनो भिक्खूति अज्झाहरितब्बं, ताव सो अत्थतकथिनो भिक्खूति वेदितब्बो, अनामन्तचारादिकं कथिनानिसंसं लभतीति अत्थो. ‘‘अत्थतकथिनस्स भिक्खुनो’’ति इदं वा ‘‘अत्थतकथिनो भिक्खू’’ति विभत्तिविपरिणामं कत्वा योजेतब्बं. इदं वुत्तं होति – चीवरपलिबोधो आवासपलिबोधोति द्वे पलिबोधा. तेसु एकपलिबोधेपि सति यस्मा अनामन्तचारादिकं आनिसंसं लभति, नासति. कस्मा? ‘‘निट्ठितचीवरस्मि’’न्ति एतस्स चीवरस्स करणपलिबोधे उपच्छिन्नेति अयमत्थो ¶ विञ्ञायतीति. सङ्घस्साति सङ्घेन. कत्तरि चेतं सामिवचनं. उब्भतेति अट्ठन्नं मातिकानमञ्ञतरेन, अन्तरुब्भारेन वा उद्धटे.

तत्राति ¶ तस्मिं कथिने. उब्भारो उद्धरणं. पुरिमवस्संवुट्ठे तिंसमत्ते पावेय्यके भिक्खू उद्दिस्स ‘‘अनुजानामि, भिक्खवे, वस्संवुट्ठानं भिक्खूनं कथिनं अत्थरितु’’न्ति कथिनक्खन्धके (महाव. ३०६) भगवता कथिनस्स अनुञ्ञातत्ता ‘‘अयञ्हि कथिनत्थारो नाम…पे… अनुञ्ञातो’’ति वुत्तं. तत्थ पुरिमवस्संवुट्ठानन्ति वस्सच्छेदं अकत्वा पुरिमवस्संवुट्ठानन्ति अत्थो. एतेन वुट्ठवस्सवसेन ताव पुरिमिकाय वस्सं उपगतायेव कथिनत्थारं लभन्ति, न पच्छिमिकाय उपगताति दस्सेति. वुट्ठवस्सवसेन ताव एवं होतु, गणनवसेन तं कित्तका लभन्तीति आह ‘‘सो’’तिआदि. सोति कथिनत्थारो. सब्बन्तिमेन परिच्छेदेनाति गणनवसेन पच्छिमकोटिया. पञ्चन्नं जनानं वट्टतीति पच्छिमकोटिया चत्तारो कथिनदुस्सस्स दायका, एको पटिग्गाहकोति पञ्चन्नं जनानं वट्टति. केचि पन ‘‘पञ्चवग्गकरणीयत्ता ‘पञ्चन्नं जनानं वट्टती’ति वुत्त’’न्ति वदन्ति, तं तेसं मतिमत्तं ‘‘तत्र, भिक्खवे, य्वायं चतुवग्गो भिक्खुसङ्घो ठपेत्वा तीणि कम्मानि उपसम्पदं पवारणं अब्भान’’न्ति चम्पेय्यक्खन्धके (महाव. ३८८) वुत्तत्ता. तस्माति यस्मा वुट्ठवस्सवसेन पुरिमवस्संवुट्ठानं अनञ्ञातो, यस्मा च सब्बन्तिमेन परिच्छेदेन पञ्चन्नं जनानं वट्टति, तस्मा. यत्थाति यस्मिं विहारे. आनिसंसेति अनामन्तचारादिके कथिनानिसंसे. अथ पन चत्तारो भिक्खू वस्सं उपगता, एको परिपुण्णवस्सो सामणेरो सचे पच्छिमिकाय उपसम्पज्जति, गणपूरको चेव होति, आनिसंसञ्च लभति. तयो भिक्खू, द्वे सामणेरा, द्वे भिक्खू, तयो सामणेरा, एको भिक्खु, चत्तारो सामणेराति एत्थापि एसेव नयो.

खन्धके वुत्ताय ञत्तिदुतियकम्मवाचायाति –

‘‘सुणातु मे, भन्ते, सङ्घो, इदं सङ्घस्स कथिनदुस्सं उप्पन्नं. यदि सङ्घस्स पत्तकल्लं, सङ्घो इमं कथिनदुस्सं इत्थन्नामस्स भिक्खुनो ददेय्य कथिनं अत्थरितुं, एसा ञत्ति. सुणातु मे, भन्ते, सङ्घो, इदं सङ्घस्स कथिनदुस्सं उप्पन्नं, सङ्घो इमं कथिनदुस्सं इत्थन्नामस्स भिक्खुनो देति कथिनं अत्थरितुं. यस्सायस्मतो खमति इमस्स कथिनदुस्सस्स इत्थन्नामस्स भिक्खुनो दानं कथिनं अत्थरितुं, सो तुण्हस्स. यस्स नक्खमति, सो भासेय्य. दिन्नं इदं सङ्घेन कथिनदुस्सं इत्थन्नामस्स ¶ भिक्खुनो कथिनं अत्थरितुं, खमति सङ्घस्स, तस्मा तुण्ही, एवमेतं धारयामी’’ति (महाव. ३०७) –

एवं ¶ कथिनक्खन्धके वुत्ताय ञत्तिदुतियकम्मवाचाय. कथिनत्थारारहस्साति कथिनं अत्थरितुं भब्बस्स. सो च खो पुब्बकरणजाननादीहि अट्ठहि अङ्गेहि समन्नागतोति वेदितब्बो. वुत्तञ्हेतं विनयविनिच्छये ‘‘अट्ठधम्मकोविदो भिक्खु, कथिनत्थारमरहती’’ति. परिवारेपि (परि. ४०९) वुत्तं –

‘‘अट्ठहङ्गेहि समन्नागतो पुग्गलो भब्बो कथिनं अत्थरितुं. कतमेहि अट्ठहङ्गेहि समन्नागतो पुग्गलो भब्बो कथिनं अत्थरितुं? पुब्बकरणं जानाति, पच्चुद्धारं जानाति, अधिट्ठानं जानाति, अत्थारं जानाति, मातिकं जानाति, पलिबोधं जानाति, उद्धारं जानाति, आनिसंसं जानाति, इमेहि अट्ठहङ्गेहि समन्नागतो पुग्गलो भब्बो कथिनं अत्थरितु’’न्ति.

एत्थ च पुब्बकरणं नाम धोवनविचारणच्छेदनबन्धनसिब्बनरजनकप्पकरणं. पच्चुद्धारो नाम पुराणसङ्घाटिआदीनं पच्चुद्धरणं. अधिट्ठानं नाम कथिनचीवराधिट्ठानं. अत्थारो नाम कथिनत्थारो. मातिका नाम अट्ठ मातिका. पलिबोधो नाम आवासपलिबोधो चीवरपलिबोधोति द्वे पलिबोधा. उद्धारो नाम पक्कमनन्तिकादयो. आनिसंसो नाम पञ्चानिसंसा.

यं पन समन्तपासादिकायं (महाव. अट्ठ. ३०६) वुत्तं ‘‘कथिनं पन केन अत्थरितब्बं? यस्स सङ्घो कथिनचीवरं देति, सङ्घेन पन कस्स दातब्बं? यो जिण्णचीवरो होति, सचे बहू जिण्णचीवरा होन्ति, वुड्ढस्स दातब्बं. वुड्ढेसुपि यो महापरिसो तदहेव चीवरं कत्वा अत्थरितुं सक्कोति, तस्स दातब्बं. सचे वुड्ढो न सक्कोति, नवकतरो सक्कोति, तस्स दातब्बं. अपिच सङ्घेन महाथेरस्स सङ्गहं कातुं वट्टति, तस्मा ‘तुम्हे, भन्ते, गण्हथ, मयं कत्वा दस्सामा’ति वत्तब्ब’’न्ति, तम्पि कथिनत्थारारहंयेव गहेत्वाव दातब्बं. देन्तेन पन तीसु चीवरेसु यं यं जिण्णं ¶ होति, तं तदत्थाय दातब्बं. पकतिया दुपट्टचीवरस्स दुपट्टत्थायेव दातब्बं. सचेपिस्स एकपट्टचीवरं घनं होति, कथिनसाटको च पेलवो, सारुप्पत्थाय दुपट्टप्पहोनकमेव दातब्बं. ‘‘अहं अलभन्तो एकपट्टं पारुपामी’’ति वदन्तस्सापि दुपट्टं दातुं वट्टति. यो पन लोभपकतिको होति, तस्स न दातब्बं. तेनापि कथिनं अत्थरित्वा पच्छा सिब्बेत्वा ‘‘द्वे चीवरानि करिस्सामी’’ति न गहेतब्बं.

तेनाति कथिनत्थारकेन भिक्खुना. तदहेवाति तस्मिंयेव दिवसे. पञ्च वा अतिरेकानि वा ¶ खण्डानि छिन्दित्वाति यथा पञ्चखण्डिकादीनं सङ्घाटिआदीनं तिण्णं चीवरानं अञ्ञतरप्पहोनकानि महामण्डलअड्ढमण्डलादिवसेन पञ्च खण्डानि वा अतिरेकानि वा सत्तादिखण्डानि होन्ति, एवं छिन्दित्वा. तस्मिञ्च कथिनचीवरे करियमाने ‘‘अहं थेरो’’ति वा ‘‘बहुस्सुतो’’ति वा एकेनापि अकातुं न लब्भति. अनादरियेन अकरोन्तस्स दुक्कटं. तस्मा सब्बेहेव सन्निपतित्वा धोवनछेदनसिब्बनरजनानि निट्ठापेतब्बानि. तेनाह ‘‘सेसभिक्खूहिपि तस्स सहायेहि भवितब्ब’’न्ति. कतचीवरमेवाति निट्ठितपरिकम्ममेव कथिनदुस्सं. सब्बन्तिमेन परिच्छेदेन अन्तरवासकोपि छिन्दित्वाव कातब्बो अञ्ञथा अत्थारविपत्तितो. यथाह –

‘‘कथञ्च पन, भिक्खवे, अनत्थतं होति कथिनं? न उल्लिखितमत्तेन अत्थतं होति कथिनं…पे… न अञ्ञत्र पञ्चकेन वा अतिरेकपञ्चकेन वा तदहेव सञ्छिन्नेना’’ति (महाव. ३०८).

तेनेवाह ‘‘अच्छिन्नासिब्बितं पन न वट्टती’’ति. तेन भिक्खुनाति अत्थारकेन भिक्खुना. अत्थरितब्बन्ति अत्थरणं कातब्बं. तञ्च खो तथावचीभेदकरणमेवाति दट्ठब्बं. यथाह –

‘‘सचे सङ्घाटिया कथिनं अत्थरितुकामो होति, पोराणिका सङ्घाटि पच्चुद्धरितब्बा, नवा सङ्घाटि अधिट्ठातब्बा, ‘इमाय सङ्घाटिया कथिनं अत्थरामी’ति वाचा भिन्दितब्बा’’ति (परि. ४१३) –

वित्थारो. ‘‘भन्ते, आवुसो’’ति च ‘‘अनुमोदथ, अनुमोदाही’’ति च वचनभेदं सन्धाय ‘‘थेरानञ्चा’’तिआदि वुत्तं.

एवं ¶ अत्थारकेन पटिपज्जितब्बविधिं दस्सेत्वा इदानि अनुमोदकेहि पटिपज्जितब्बविधिं दस्सेतुं ‘‘तेहिपी’’तिआदि वुत्तं. ‘‘अनुमोदामा’’ति अत्तनाव अत्तनि गारववसेन वुत्तं. किञ्चापि एवं वुत्तं, तथापि एककेन ‘‘अनुमोदामा’’ति वत्तुं न वट्टति, ‘‘अनुमोदामि’’च्चेव वत्तब्बन्ति वदन्ति, वीमंसित्वा गहेतब्बं. इदानि कथिनानिसंसे दस्सेतुं भूमिं विचारयन्तो ‘‘पुरिमवस्संवुट्ठेसुपी’’तिआदिमाह. तत्थ तेसंयेवाति अत्थारकअनुमोदकानंयेव. वुत्तञ्हेतं परिवारे ‘‘द्विन्नं पुग्गलानं अत्थतं होति कथिनं अत्थारकस्स ¶ च अनुमोदकस्स चा’’ति (परि. ४०३). तेति अत्थारकअनुमोदका. ततो पट्ठायाति अत्थारानुमोदनतो पट्ठाय. याव कथिनस्सुब्भाराति न केवलं चीवरमासेयेव, अथ खो अट्ठन्नं मातिकानं अञ्ञतरेन वा अन्तरुब्भारेन वा याव कथिनस्सुब्भारा पञ्चानिसंसे लभन्ति, उद्धटे पन न लभन्तीति अत्थो.

इदानि ते पञ्चानिसंसे सरूपतो दस्सेतुं ‘‘अनामन्तचारो’’तिआदिमाह. तत्थ अनामन्तचारो नाम पञ्चन्नं भोजनानं अञ्ञतरेन निमन्तितस्स सन्तं भिक्खुं अनापुच्छा कुलेसु चारित्तापज्जनं. असमादानचारो नाम नामेनाधिट्ठितस्स चीवरस्स असमादानचरणं, नामेनाधिट्ठितानं तिण्णं चीवरानमञ्ञतरं चीवरं यत्थ कत्थचि निक्खिपित्वा अञ्ञत्थ अरुणुट्ठापनन्ति अत्थो, चीवरविप्पवासोति वुत्तं होति. यावदत्थचीवरन्ति यावता चीवरेन अत्थो होति, तावतकं अनधिट्ठितं अविकप्पितं चीवरधारणं, दसाहमतिक्कमित्वा चीवरस्स ठपनन्ति अत्थो. गणस्स भोजनं गणभोजनं. गणोति चेत्थ चत्तारो वा ततुत्तरि वा भिक्खू. तेसं विञ्ञत्तितो वा निमन्तनतो वा लद्धस्स ओदनादीनं पञ्चन्नं अञ्ञतरभोजनस्स सह गहणन्ति अत्थो. यो च तत्थ चीवरुप्पादोति तत्थ कथिनत्थतसीमाय मतकचीवरं वा होतु, सङ्घं उद्दिस्स दिन्नं वा सङ्घिकेन तत्रुप्पादेन आभतं वा येन केनचि आकारेन यं सङ्घिकं चीवरं उप्पज्जति, तं तेसं भविस्सतीति अत्थो. तेनाह ‘‘तस्मिं आवासे सङ्घस्स उप्पन्नचीवरञ्चा’’ति.

‘‘यं पन तत्थ सङ्घस्स उप्पन्नं पत्तादि वा अञ्ञं भण्डं वा, तं सब्बेसं पापुणाति. यं पन तत्रुप्पादेन तण्डुलादिना वत्थं चेतापितं, अत्थतकथिनानमेव तानि वत्थानि पापुणन्ति. वत्थेहि पन तण्डुलादीसु चेतापितेसु ¶ सब्बेसं तानि पापुणन्ती’’ति गण्ठिपदे वुत्तं, तम्पि चेतापितकालतो पट्ठाय चीवरुप्पादो न होतीति सुवुत्तन्ति दट्ठब्बं. अनत्थतकथिना पन इमेसु पञ्चसु आनिसंसेसु चीवरमासे असमादानचारं ठपेत्वा सेसानिसंसे लभन्ति. यदि असमादानचारोपि लब्भेय्य, पावेय्यका भिक्खू वस्संवुट्ठा ओकपुण्णेहि चीवरेहि न भगवन्तं उपसङ्कमेय्युं. यस्मा तं न लब्भति, तस्मा चीवरमासेपि चीवरं समादाय एव भगवन्तं उपसङ्कमिंसु.

एवं कथिनत्थारं दस्सेत्वा इदानि उब्भारं दस्सेन्तो ‘‘तं पनेतं कथिन’’न्तिआदिमाह. तत्थ मातिकाति मातरो, जनेत्तियोति अत्थो. कथिनुब्भारञ्हि एता अट्ठ जनेन्ति. तासु पक्कमनं अन्तो एतिस्साति पक्कमनन्तिका. एवं सेसापि वेदितब्बा. तत्थ यो भिक्खु अत्थतकथिनो ¶ कथिनचीवरं आदाय तस्मिं आवासे निरपेक्खो ‘‘न पच्चेस्स’’न्ति पक्कमति, तस्सेवं पक्कमतो कथिनुद्धारो अतिक्कन्तमत्ताय सीमाय होतीति पक्कमनन्तिको कथिनुद्धारोति वेदितब्बो.

यो पन आनिसंसचीवरं आदाय पक्कमति, तस्स बहिसीमागतस्स एवं होति ‘‘इधेविमं करिस्सामि, न पुन तं विहारं गच्छिस्सामी’’ति तस्मिं आवासे निरपेक्खो हुत्वा तं चीवरं कारेति, तस्स भिक्खुनो निट्ठानन्तिको कथिनुद्धारो.

यदि पन आनिसंसमूलचीवरं आदाय बहिसीमागतो ‘‘नेविमं चीवरं करिस्सामि, न च तं आवासं गच्छिस्सामी’’ति सन्निट्ठानं करोति, तदा सन्निट्ठानन्तिको कथिनुद्धारो.

तदेव आनिसंसचीवरं लद्धा तं आदाय बहिसीमं गन्त्वा ‘‘इधेविमं चीवरं करिस्सामि, न गच्छिस्सामी’’ति करोन्तस्स सचे तं चीवरं नस्सति विनस्सति डय्हति, नासनन्तिको कथिनुद्धारो होति.

सचे पन आनिसंसचीवरं लद्धा तस्मिं विहारे सापेक्खोव बहिसीमागतो ‘‘विहारे भिक्खूहि अन्तरुब्भारं कत’’न्ति सुणाति, तस्स सवनन्तिको कथिनुद्धारो होति.

आसाय अवच्छेदो एतिस्साति आसावच्छेदिका. यो पन येन केनचि ‘‘तुय्हं चीवरं दस्सामी’’ति वुत्तो तस्मिं चीवरे आसाय विहारे अपेक्खं पहाय बहिसीमागतो पुन तेन ‘‘न सक्कोमि दातु’’न्ति ¶ वुत्ते आसं छिन्दति, तस्स आसावच्छेदिको कथिनुद्धारो होति.

यो पन वस्संवुट्ठविहारतो अञ्ञं विहारं सापेक्खोव गन्त्वा आगच्छन्तो अन्तरामग्गेयेव कथिनुद्धारं वीतिनामेति, तस्स सीमातिक्कमनन्तिको कथिनुद्धारो.

सह उब्भारेनाति सहुब्भारा. आनिसंसचीवरं आदाय सापेक्खोव बहि गन्त्वा कथिनुद्धारं सम्भुणन्तस्स कथिनुद्धारो सहुब्भारोति वेदितब्बो.

‘‘एतस्मिं पन पक्कमनन्तिके कथिनुद्धारे पठमं चीवरपलिबोधो छिज्जती’’तिआदिना चीवरपलिबोधुपच्छेदादिकस्स विनिच्छयस्स वित्थारतो समन्तपासादिकायं (महाव. अट्ठ. ३११) वुत्तत्ता ¶ ८ ‘‘तत्थ वित्थारविनिच्छयो’’तिआदिमाह. अत्थारुब्भारानंयेव वा वित्थारविनिच्छयस्स तत्थागतत्ता एवं वुत्तन्ति दट्ठब्बं. सेसपलिबोधाभावन्ति अवसेसस्स पलिबोधस्स अभावं, आवासपलिबोधाभावन्ति अत्थो.

अस्साति कालस्स. दसाहपरमन्ति अच्चन्तसंयोगे उपयोगवचनन्ति आह ‘‘तं दसाहपरमं काल’’न्ति. अतिरेकन्ति अधिकं, सो च अधिकभावो अधिट्ठितविकप्पितचीवरतोति आह ‘‘अधिट्ठितविकप्पितेसू’’तिआदि. खोमन्ति (पारा. अट्ठ. २.६३६-६३८) खोमसुत्तेहि वायितं खोमपट्टचीवरं. तथा सेसानि. कम्बलं नाम मनुस्सलोमवाळलोमे ठपेत्वा सेसलोमेहि वायित्वा कतवत्थं. साणं नाम साणवाकेहि कतवत्थं. भङ्गं नाम खोमसुत्तादीहि पञ्चहि मिस्सेत्वा कतवत्थं. ‘‘पाटेक्कं वाकमयमेवा’’तिपि वदन्ति. तदनुलोमानं वाति दुकूलं पत्तुण्णं सोमारपट्टं चीनपट्टं इद्धिजं देवदिन्नन्ति तेसं खोमादीनंयेव अनुलोमानं छन्नं चीवरानं वा, तत्थ दुकूलं साणस्स अनुलोमं वाकमयत्ता. पत्तुण्णदेसे पाणकेहि सञ्जातवत्थं पत्तुण्णं. सोमारदेसे जातं वत्थं सोमारपट्टं. तथा चीनपट्टं. इमानि तीणिपि कोसेय्यस्स अनुलोमानि पाणकेहि कतसुत्तमयत्ता. इद्धिजं एहिभिक्खूनं पुञ्ञिद्धिया निब्बत्तचीवरं. तं पन खोमादीनमञ्ञतरं होतीति तेसंयेव अनुलोमं. देवेहि दिन्नं चीवरं देवदिन्नं, तं कप्परुक्खे निब्बत्तं जालिनिया देवकञ्ञाय अनुरुद्धत्थेरस्स ¶ दिन्नवत्थसदिसं, तम्पि खोमादीनंयेव अनुलोमं होति तेसु अञ्ञतरभावतो.

दीघतो वड्ढकिहत्थप्पमाणं, वित्थारतो ततो उपड्ढप्पमाणं विकप्पनुपगं पच्छिमं. अट्ठङ्गुलं सुगतङ्गुलेनाति एत्थ सुगतङ्गुलं नाम इदानि मज्झिमस्स पुरिमस्स तीणि अङ्गुलानि, तेन सुगतङ्गुलेन अट्ठङ्गुलं वड्ढकिहत्थप्पमाणन्ति अत्थो. चतुरङ्गुलवित्थतन्ति एत्थापि यथावुत्तानुसारेनेव अत्थो वेदितब्बो. येसं पन अधिट्ठानविकप्पनानं अभावतो अधिट्ठितविकप्पितेसु अपरियापन्नत्ता इदं अतिरेकचीवरं नाम होति.

तं अधिट्ठानविकप्पनं केनाकारेन जानितब्बन्ति अनुयोगं सन्धाय तं दस्सेतुं ‘‘यं पन वुत्त’’न्तिआदि आरद्धं. तत्थ यं पन वुत्तन्ति अतिरेकचीवरं दस्सेतुं ‘‘अधिट्ठितविकप्पितेसु अपरियापन्नत्ता’’ति अम्हेहि यं वुत्तन्ति अत्थो. तिचीवरं अधिट्ठातुन्ति नामं वत्वा अधिट्ठातुं. न विकप्पेतुन्ति सङ्घाटिआदिनामेन विकप्पेतुं न अनुजानामीति अत्थो. ‘‘इमं चीवरं विकप्पेमी’’ति पन विकप्पेतुं वट्टतियेव. सामञ्ञवचनं पन तिचीवरस्स कण्डुपटिच्छादिवस्सिकसाटिकानं विय कालवसेन विसेसाभावा चस्स विकप्पेतब्बताति दस्सनत्थं ¶ , न पन सब्बथा विकप्पनपटिसेधनत्थन्ति दट्ठब्बं. तथा हि पुराणचीवरं पच्चुद्धरित्वा नवस्स अधिट्ठानवचनतो, ‘‘अनापत्ति अधिट्ठेति विकप्पेती’’तिआदिवचनतो (पारा. ४६९) च तिचीवरस्सपि विकप्पनाय ओकासो दिन्नो. एस नयो सब्बत्थ. तिचीवरादीनि हि अधिट्ठहन्तेन ‘‘इमं सङ्घाटिं अधिट्ठामी’’तिआदिना तं तं नामं वत्वा अधिट्ठातब्बं. विकप्पेन्तेन पन ‘‘इमं सङ्घाटि’’न्तिआदिना तस्स तस्स चीवरस्स नामं अग्गहेत्वा ‘‘इमं चीवरं तुय्हं विकप्पेमी’’ति विकप्पेतब्बं. तिचीवरं वा होतु, अञ्ञं वा, यदि तं तं नामं गहेत्वा विकप्पेति, अविकप्पितं होति, अतिरेकचीवरट्ठानेयेव तिट्ठति. ततो परं विकप्पेतुन्ति चतुमासतो परं ‘‘इमं चीवरं विकप्पेमी’’ति विकप्पेतुं. इदञ्च परिभुञ्जितुं अनुञ्ञातं. केचि पन (सारत्थ. टी. २.४६९) ‘‘ततो परं विकप्पेत्वा याव आगामिसंवच्छरे वस्सानं चतुमासं, ताव ठपेतुं अनुञ्ञात’’न्ति वदन्ति. ततो परन्ति आबाधतो परं. ‘‘इमासञ्च पन वस्सिकसाटिककण्डुपटिच्छादीनं ततो परं विकप्पेत्वा परिभोगस्स अनुञ्ञातत्ता तथाविकप्पितं ¶ अञ्ञनामेन अधिट्ठहित्वा परिभुञ्जितब्ब’’न्ति गण्ठिपदेसु वुत्तं. अधिट्ठातब्बविकप्पेतब्बता जानितब्बाति अधिट्ठातब्बं विकप्पेतब्बन्ति एवं अधिट्ठानविकप्पना जानितब्बाति अत्थो.

पञ्चपरिमाणं अस्साति पञ्चकं, मुट्ठिस्स मुट्ठिहत्थस्स सम्बन्धं पञ्चकं मुट्ठिपञ्चकं. एस न यो मुट्ठित्तिकन्ति एत्थापि. पारुपनेनपि सक्का नाभिं पटिच्छादेतुन्ति आह ‘‘द्विहत्थोपि वट्टती’’ति. न केवलं अड्ढतेय्योव वट्टति, अथ खो द्विहत्थोपि वट्टतीति पि-सद्दस्स अत्थो दट्ठब्बो. अतिरेकञ्चाति सुगतचीवरप्पमाणम्पि ततो अधिकम्पि. पच्चुद्धरामीति ठपेमि, परिच्चजामीति वा अत्थो. ‘‘इमं चीवरं सङ्घाटिं अधिट्ठामी’’ति (सारत्थ. टी. २.४६९) एवम्पि वत्तुं वट्टति. कायविकारं करोन्तेनाति हत्थादिना चीवरं परामसन्तेन, चालेन्तेन वा. इदञ्हि अधिट्ठानं येन केनचि सरीरावयवेन अफुसन्तस्स न वट्टति. दुविधन्ति सम्मुखापरम्मुखभेदेन दुविधं. वाचा भिन्दितब्बाति वचनं निच्छारेतब्बं. अन्तोगब्भादीसूति अन्तोगब्भउपरिपासादेसु. सामन्तविहारेति यत्थ तदहेव गन्त्वा निवत्तेतुं सक्का, एवरूपे समीपविहारे. इदञ्च देसनासीसमत्तं, तस्मा दूरे ठितम्पि अधिट्ठातब्बन्ति वदन्ति. ‘‘ठपितट्ठानं सल्लक्खेत्वा’’ति इमिना चीवरसंलक्खणं वुत्तं. न हि ठपितट्ठानमत्तसल्लक्खणेन किञ्चि पयोजनं अत्थि.

अधिट्ठहित्वा ठपितवत्थेहीति पच्चत्थरणमुखपुञ्छनचोळपरिक्खारचोळवसेन अधिट्ठहित्वा ठपितवत्थेहि. अधिट्ठानतो पुब्बे सङ्घाटिआदिवोहारस्स अभावतो ‘‘इमं पच्चुद्धरामी’’ति पच्चत्थरणादीनं ¶ विसुं पच्चुद्धरणविधिं दस्सेति. पच्चत्थरणादिनामेन पन अधिट्ठातब्बत्ता ‘‘इमं पच्चत्थरणं पच्चुद्धरामी’’तिआदिना वुत्तेपि नेवत्थि दोसो. पुन अधिट्ठातब्बानीति सङ्घाटिआदिनामेन अधिट्ठातब्बानि. परिक्खारचोळकस्स पन परिक्खारचोळवसेन अधिट्ठहित्वा ठपितवत्थेहिपि सङ्घाटिआदिम्हि कते पच्चुद्धरित्वा पुन अधिट्ठातब्बन्ति नत्थि. पुब्बे कताधिट्ठानमेव अधिट्ठानं. अधिट्ठितेन पन तेन सद्धिं महन्ततरमेव दुतियं पट्टं वा खण्डं वा संसिब्बन्तेन अधिट्ठातब्बं, समे वा खुद्दके वा अधिट्ठानकिच्चं नत्थि. सुखपरिभोगत्थन्ति विप्पवासदोसाभावतो यत्थ कत्थचि ठपेत्वा धम्मस्सवनादिना किच्चेन अञ्ञत्थ अरुणं उट्ठापेत्वा आगन्त्वा निस्सज्जनं विनाव ¶ परिभुञ्जितुं सक्कुणेय्यताय सुखपरिभोगत्थं. परिक्खारचोळं अधिट्ठातुन्ति परिक्खारचोळं कत्वा अधिट्ठातुं.

अनतिरित्तपमाणाति ‘‘दीघसो छ विदत्थियो सुगतविदत्थिया, तिरियं अड्ढतेय्या’’ति (पाचि. ५४३) वुत्तप्पमाणतो अनधिकपमाणा. पच्चुद्धरित्वा विकप्पेतब्बाति वस्सिकसाटिकभावतो अपनेत्वा विकप्पेतब्बा, हेमन्तस्स पठमदिवसतो पट्ठाय अन्तोदसाहे वस्सिकसाटिकावस्सिकसाटिकभावतो अपनेत्वा ‘‘इमं चीवरं तुय्हं विकप्पेमी’’तिआदिना नयेन विकप्पेतब्बाति वुत्तं होति. अञ्ञथा हि ‘‘वस्सिकसाटिका वस्सानमासातिक्कमेनापि, कण्डुपटिच्छादि आबाधवूपसमेनापि अधिट्ठानं विजहती’’ति (कङ्खा. अट्ठ. कथिनसिक्खापदवण्णना) वक्खमानत्ता वस्सानमासतो परं असति अधिट्ठाने किं पच्चुद्धरेय्याति ‘‘पच्चुद्धरित्वा’’ति वचनमेव नोपपज्जेय्य.

केचि पन (सारत्थ. टी. २.४६९) ‘‘यथा कथिनमासब्भन्तरे उप्पन्नचीवरं कथिनमासातिक्कमे निस्सग्गियं होति, एवमयं वस्सिकसाटिकापि वस्सानमासातिक्कमे निस्सग्गिया होति. तस्मा कत्तिकपुण्णमदिवसे पच्चुद्धरित्वा ततो परं हेमन्तस्स पठमदिवसे विकप्पेतब्बाति एवमत्थो गहेतब्बो, पच्चुद्धरित्वा ततो परं विकप्पेतब्बाति पदयोजना वेदितब्बा’’ति च वदन्ति, तं न युत्तं. कथिनमासे उप्पन्नञ्हि चीवरं अतिरेकचीवरट्ठाने ठितत्ता अवसानदिवसे अनधिट्ठितं कथिनमासातिक्कमे निस्सग्गियं होति. अयं पन वस्सिकसाटिका अधिट्ठहित्वा ठपितत्ता न तेन सदिसाति वस्सानातिक्कमे कथं निस्सग्गियं होति अनधिट्ठितअविकप्पितमेव हि तं कालातिक्कमे निस्सग्गियं होति, तस्मा हेमन्तेपि वस्सिकसाटिका दसाहपरिहारं लभति. एवं कण्डुपटिच्छादिपि अधिट्ठानविजहनतो परं दसाहपरिहारं लभति. दसाहं पन अनतिक्कामेत्वा विकप्पेतब्बा. नहानत्थाय अनुञ्ञातत्ता वण्णभेदमत्तरत्तापि चेसा वट्टतीति वुत्तं. ‘‘द्वे पन न वट्टन्ती’’ति द्विन्नं अधिट्ठानाभावतो वुत्तं ¶ . ‘‘सचे वस्साने अपरा वस्सिकसाटिका उप्पन्ना होति, पुरिमवस्सिकसाटिकं पच्चुद्धरित्वा, विकप्पेत्वा च अधिट्ठातब्बा’’ति वदन्ति.

पमाणयुत्तन्ति ‘‘दीघसो सुगतविदत्थिया द्वे विदत्थियो, वित्थारतो दियड्ढं दसा विदत्थी’’ति (पाचि. ५३१ आदयो) इमिना पमाणेन युत्तं. पमाणिकाति ‘‘सुगतविदत्थिया ¶ दीघसो चतस्सो विदत्थियो, तिरियं द्वे विदत्थियो’’ति एवं वुत्तप्पमाणयुत्ता. पच्चुद्धरित्वा विकप्पेतब्बाति एत्थ यं वत्तब्बं, तं हेट्ठा वुत्तमेव. यस्मा भिक्खूनं तिचीवरे परिपुण्णे, अत्थे च सति परिस्सावनादीहि ‘‘अनुजानामि, भिक्खवे, परिक्खारचोळक’’न्ति (महाव. ३५७) बहूनं पत्तत्थविकपरिस्सावनादीनं सङ्गहवसेन परिक्खारचोळाधिट्ठानमनुञ्ञातं, तस्मा ‘‘परिक्खारचोळे गणना नत्थी’’तिआदि वुत्तं. भगवता हि यं यं भिक्खू लभन्ति, तं तं इमिना विधानेन अधिट्ठहित्वा पुन ‘‘येन येन परिस्सावनादिना अत्थो होति, तं तं कत्वा गण्हन्तू’’ति अनुकम्पाय अनुञ्ञातं. तेनेवाह ‘‘थविकापी’’तिआदि. आदिसद्देन ‘‘एतानि चीवरानि परिक्खारचोळानि अधिट्ठामी’’ति असम्मुखाधिट्ठानं सङ्गण्हाति. ‘‘सेनासनपरिक्खारत्थाय दिन्नपच्चत्थरणे चा’’ति इमिना अत्तनो सन्तकं पटिक्खिपति. केचि पन (सारत्थ. टी. २.४६९) ‘‘अनिवासेत्वा, अपारुपित्वा च केवलं पञ्चपीठेसुयेव अत्थरित्वा परिभुञ्जियमानं पच्चत्थरणं अत्तनो सन्तकम्पि अनधिट्ठितं वट्टती’’ति वदन्ति, तं अयुत्तं सेनासनपरिक्खारत्थाय दिन्न’’न्ति पच्चत्थरणस्स विसेसितत्ता. भिसिबिब्बोहनपावारकोजवानम्पि सेनासनपरिक्खारतोयेव अधिट्ठानकिच्चं नत्थीति वेदितब्बं.

अधिट्ठितञ्च पनेतं चीवरं परिभुञ्जतो कथं अधिट्ठानं विजहतीति आह ‘‘सब्बञ्च पनेत’’न्तिआदि. तत्थ अच्छिन्दित्वा गहणेनाति चोरादीहि अच्छिन्दित्वा गहणेन. हीनायावत्तनेनाति गिहिभावाय आवत्तनेन, विब्भमेनाति अत्थो, ‘‘सीलवन्तोव हुत्वा गिही भविस्सामी’’ति सेतवत्थनिवासनेनाति वुत्तं होति. ‘‘अन्तिमवत्थुं अज्झापन्नस्स सेतवत्थनिवासो वा कासायचजनं वा हीनायावत्तन’’न्ति केचि. ‘‘‘हीनायावत्तनेना’ति इमिना भिक्खुनिया एव अधिट्ठानविजहनं गहितं होति. सा हि यदा विब्भमति, तदा अस्समणी होति. भिक्खु पन विब्भमन्तोपि याव सिक्खं न पच्चक्खाति, ताव भिक्खुयेवाति अधिट्ठानं न विजहती’’ति अपरे. सिक्खापच्चक्खानेनाति लिङ्गे ठितस्सेव सिक्खाय पच्चक्खानेन. यो हि भिक्खुलिङ्गे ठितोव सिक्खं पच्चक्खाति, तस्स कायलग्गम्पि चीवरं अधिट्ठानं विजहतीति. कालङ्किरियायाति मरणेन. लिङ्गपरिवत्तनेनाति पुरिसलिङ्गस्स ¶ , इत्थिलिङ्गस्स वा परिवत्तनेन, पुरिसस्स इत्थिलिङ्गपातुभावेन, इत्थिया वा पुरिसलिङ्गपातुभावेनाति वुत्तं होति.

कनिट्ठङ्गुलिनखपिट्ठिप्पमाणेनाति ¶ हेट्ठिमपरिच्छेदं दस्सेति. ओरतोति अब्भन्तरतो. यो पन दुब्बलट्ठाने पठमं अग्गळं दत्वा पच्छा दुब्बलट्ठानं छिन्दित्वा अपनेति, अधिट्ठानं न भिज्जति. मण्डलपरिवत्तनेपि एसेव नयो. दुपट्टस्स पन एकस्मिं पटले छिद्दे वा जाते, गलिते वा अधिट्ठानं न भिज्जति. खुद्दकं चीवरं महन्तं करोति, महन्तं वा खुद्दकं करोति, अधिट्ठानं न भिज्जति. उभो कोटियो मज्झे करोन्तो सचे पन पठमं छिन्दित्वा पच्छा घटेति, अधिट्ठानं भिज्जति. अथ घटेत्वा छिन्दति, न भिज्जति. रजकेहि धोवापेत्वा सेतं करोन्तस्सापि अधिट्ठानं अधिट्ठानमेव. वस्सानमासातिक्कमेनापीति एत्थ पि-सद्दो सम्पिण्डनत्थो. तेन न केवलं पुब्बे वुत्तेन दानादिना अट्ठविधेनेव कारणेन वस्सिकसाटिका अधिट्ठानं विजहति, अथ खो वस्सानमासातिक्कमेनपीति एवमेत्थ अत्थो दट्ठब्बो. एस नयो आबाधवूपसमेनापीति एत्थापि. विकप्पनसिक्खापदेति (पाचि. ३७२ आदयो) पाचित्तिये सुरापानवग्गस्स नवमसिक्खापदे.

तं अतिक्कामयतोति एत्थ तन्ति चीवरं, कालं वा परामसतीति आह ‘‘तं यथावुत्तजातिप्पमाण’’न्तिआदि. अस्साति भिक्खुस्स. तस्स यो अरुणोति तस्स चीवरुप्पाददिवसस्स यो अतिक्कन्तो अरुणो. चीवरुप्पाददिवसेन सद्धिन्ति चीवरुप्पाददिवसस्स अरुणेन सद्धिं. दिवससद्देन चेत्थ तंदिवसनिस्सितो अरुणो वुत्तो. इदानि यस्स च निस्सज्जितब्बं, यथा च निस्सज्जितब्बं, तं दस्सेतुं ‘‘तं गहेत्वा’’तिआदि वुत्तं. तत्रायं नयोति तस्मिं निस्सज्जने अयं विधि. अञ्ञथापीति भासन्तरेनापि, याय कायचि भासायपीति अत्थो. पटिबलेनाति वत्तुं समत्थेन. आयतिं संवरेय्यासीति उपरि संवरमापज्जेय्यासि, संवुतकायवचीद्वारो भवेय्यासीति अत्थो. इमानि च ‘‘पस्ससी’’तिआदीनि यथाक्कमं पटिग्गाहकदेसकेहि वत्तब्बवचनानि. तथा हि ‘‘पस्ससी’’ति पटिग्गाहकेन वत्तब्बवचनं, ‘‘आम पस्सामी’’ति तदनुदेसकेन वत्तब्बवचनं. ‘‘आयतिं संवरेय्यासी’’ति तदनुप्पटिग्गाहकेन वत्तब्बवचनं, ‘‘साधु सुट्ठु संवरिस्सामी’’ति तदनुदेसकेन वत्तब्बवचनं. इमिना च अत्तनो आयतिं संवरे पतिट्ठितभावं दस्सेति. द्वीसु, पन सम्बहुलासु वाति द्वीसु वा सम्बहुलासु वा आपत्तीसु पुरिमनयेनेव वचनभेदो कातब्बो. ञत्तियं आपत्तिं सरति विवरतीति एत्थ ‘‘द्वे ¶ आपत्तियो’’ति वा ‘‘सम्बहुला आपत्तियो’’ति वा ¶ वचनभेदो कातब्बो. द्वीसु, बहूसु वा वचनभेदो कातब्बोति ‘‘सङ्घो इमानि चीवरानी’’ति वत्थुवसेन वचनभेदो कातब्बो.

एवं सङ्घस्स निस्सज्जनविधिं दस्सेत्वा गणस्स निस्सज्जनविधिं दस्सेतुं ‘‘गणस्स पन निस्सज्जन्तेना’’तिआदिमाह. तत्थ सेसं पुरिमसदिसमेवाति निस्सज्जनापत्तिप्पटिग्गहणनिस्सट्ठचीवरदानेसु ‘‘आयस्मन्तान’’न्तिआदिना वुत्तवचनभेदं विना अवसेसं सङ्घस्स निस्सज्जनादीसु वुत्तसदिसमेवाति अत्थो.

इदानि पुग्गलस्स निस्सज्जनविधिं दस्सेतुं ‘‘पुग्गलस्स पना’’तिआदि वुत्तं. तत्थ द्वीसु, तीसु वाति द्वीसु, तीसु वा आपत्तीसु चेव दातब्बचीवरेसु च. यथा च गणस्स निस्सज्जने, एवं द्विन्नं निस्सज्जनेपि पाळि वेदितब्बा. यदि हि विसेसो भवेय्य, यथेव ‘‘अनुजानामि, भिक्खवे, तिण्णं पारिसुद्धिउपोसथं कातुं, एवञ्च पन, भिक्खवे, कातब्बो – ब्यत्तेन भिक्खुना पटिबलेन ते भिक्खू ञापेतब्बा’’तिआदिना (महाव. १६८) नयेन तिण्णं पारिसुद्धिउपोसथं वत्वा ‘‘अनुजानामि, भिक्खवे, द्विन्नं पारिसुद्धिउपोसथं कातुं, एवञ्च पन, भिक्खवे, कत्तब्बो – थेरेन भिक्खुना एकंसं उत्तरासङ्ग’’न्तिआदिना नयेन विसुंयेव द्विन्नं पारिसुद्धिउपोसथो वुत्तो, एवं इधापि विसुं पाळिं वदेय्य. यस्मा पन नत्थि, तस्मा अवत्वाव गतोति गणस्स वुत्ता पाळियेवेत्थ पाळि. आपत्तिप्पटिग्गहणे पन अयं विसेसो – यथा गणस्स निस्सज्जित्वा आपत्तिया देसियमानाय आपत्तिप्पटिग्गाहको भिक्खु ञत्तिं ठपेति, एवं अट्ठपेत्वा द्वीसु अञ्ञतरेन यथा एकपुग्गलो पटिग्गण्हाति, एवं आपत्ति पटिग्गहेतब्बा. द्विन्नञ्हि ञत्तिट्ठपनं नाम नत्थि. यदि सिया, द्विन्नं पारिसुद्धिउपोसथं विसुं न वदेय्य. निस्सट्ठचीवरदानेपि यथा ‘‘इमं चीवरं आयस्मतो दम्मी’’ति एको वदति, एवं ‘‘मयं इमं चीवरं आयस्मतो देमा’’ति वत्तुं वट्टति. इतो गरुकतरानिपि हि ञत्तिदुतियकम्मानि अपलोकेत्वा कातब्बानीति वुत्तानि अत्थि, तेसं एतं अनुलोमं. तेनेवाह ‘‘द्विन्नं पना’’तिआदि. निस्सट्ठचीवरं पन दातब्बमेव, अदातुं न लब्भति. विनयकम्ममत्तमेव हेतं. न तं तेन सङ्घस्स वा गणस्स वा पुग्गलस्स वा दिन्नमेव होति. तेनाह ‘‘निस्सट्ठवत्थु’’न्तिआदि.

अनिस्सज्जित्वा ¶ परिभुञ्जन्तस्स दुक्कटन्ति सकिं निवत्थं वा सकिं पारुतं वा कायतो अमोचेत्वा दिवसम्पि चरति, एकमेव दुक्कटं. मोचेत्वा निवासेति वा पारुपति वा, पयोगे पयोगे दुक्कटं. दुन्निवत्थं वा दुप्पारुतं वा सण्ठापेन्तस्स अनापत्ति. अञ्ञस्स तं परिभुञ्जतोपि ¶ अनापत्ति. ‘‘अञ्ञेन कतं पटिलभित्वा परिभुञ्जती’’तिआदिवचनञ्चेत्थ (पारा. ५७०) साधकं. दसाहं अनतिक्कन्तेपि अतिक्कन्तसञ्ञिनो, वेमतिकस्स च दुक्कटन्ति एत्थापि ‘‘परिभुञ्जन्तस्सा’’ति आनेत्वा सम्बन्धितब्बं. अतिक्कन्ते अनतिक्कन्तसञ्ञिनोपीति दसाहं अतिक्कन्ते चीवरे ‘‘अनतिक्कन्तं इद’’न्ति एवं सञ्ञिनो, दसाहे वा अतिक्कन्ते ‘‘अनतिक्कन्तो दसाहो’’ति एवं सञ्ञिनो.

इदानि ‘‘अनधिट्ठिते अधिट्ठितसञ्ञिनो निस्सग्गिय’’न्तिआदिआपत्तिवारं सङ्गहेत्वा दस्सेन्तो ‘‘तथा’’तिआदिमाह. तथाति यथा दसाहं अतिक्कन्ते सञ्ञाभेदेन तिकपाचित्तियं, तथा अनधिट्ठितादीसु सत्तसु विकप्पेसु अधिट्ठितादिसञ्ञाभेदतोति अत्थो. तत्थ अविस्सज्जिते विस्सज्जितसञ्ञिनोति कस्सचि अदिन्ने अपरिच्चत्ते ‘‘दिन्नं परिच्चत्तं मया’’ति एवं सञ्ञिनो. अनट्ठे नट्ठसञ्ञिनोति अत्तनो चीवरेन सद्धिं बहूनि अञ्ञेसं चीवरानि एकतो ठपितानि, तानि चे चोरा हरन्ति, तत्रेस अत्तनो चीवरे अनट्ठे नट्ठसञ्ञी होति, तस्स नट्ठसञ्ञिनो. एस नयो अविनट्ठादीसुपि. अविलुत्तेति एत्थ पन गब्भं भिन्दित्वा पसय्हावहारवसेन अविलुत्तेति वेदितब्बं.

विस्सज्जितेति (पारा. अट्ठ. २.४६९) अञ्ञस्स दिन्ने. कथं पन दिन्नं होति, कथं गहितं? ‘‘इमं तुय्हं देमि, ददामि, दज्जामि, ओणोजेमि, परिच्चजामि, विस्सज्जामि, निस्सज्जामी’’ति वा वदति, ‘‘इत्थन्नामस्स देमि…पे… निस्सज्जामी’’ति वा वदति, सम्मुखापि परम्मुखापि दिन्नंयेव होति. ‘‘तुय्हं गण्हाही’’ति वुत्ते ‘‘मय्हं गण्हामी’’ति वदति, सुदिन्नं, सुग्गहितञ्च. ‘‘तव सन्तकं करोहि, तव सन्तकं होतु, तव सन्तकं करिस्ससी’’ति वुत्ते ‘‘मम सन्तकं करोमि, मम सन्तकं होतु, मम सन्तकं करिस्सामी’’ति वदति, दुद्दिन्नं, दुग्गहितञ्च. नेव दाता दातुं जानाति, न इतरो गहेतुं. सचे पन ‘‘तव सन्तकं करोही’’ति वुत्ते ‘‘साधु, भन्ते, मय्हं गण्हामी’’ति गण्हाति, सुग्गहितं, सचे पन एको ‘‘गण्हाही’’ति वदति, इतरो ‘‘न गण्हामी’’ति वदति, पुन सो ‘‘दिन्नं मया ¶ तुय्हं, गण्हाही’’ति वदति, इतरोपि ‘‘न मय्हं इमिना अत्थो’’ति वदति. ततो पुरिमोपि ‘‘मया दिन्न’’न्ति दसाहं अतिक्कामेति, पच्छिमोपि ‘‘मया पटिक्खित्त’’न्ति, कस्सापत्तीति? न कस्सचि. यस्स पन रुच्चति, तेन अधिट्ठहित्वा परिभुञ्जितब्बं. यो पन अधिट्ठाने वेमतिको, तेन किं कातब्बं? वेमतिकभावं आरोचेत्वा ‘‘सचे अनधिट्ठितं भविस्सति, एवं मे कप्पियं होती’’ति वत्वा वुत्तनयेनेव निस्सज्जितब्बं. न हि एवं जानापेत्वा विनयकम्मं करोन्तस्स मुसावादो होति.

यथा ¶ च इदं, एवं इतो परानिपीति यथा इदं अतिरेकचीवरधारणसिक्खापदं आचारविपत्ति, एवं इतो परानिपि सिक्खापदानि आचारविपत्तियेवाति अत्थो. तेनाह ‘‘उभतोपातिमोक्खेसू’’तिआदि. आजीवविपत्तिपच्चया पन ठपेत्वा दुब्भासितं छ आपत्तिक्खन्धा पञ्ञत्ताति –

‘‘आजीवहेतु आजीवकारणा पापिच्छो इच्छापकतो असन्तं अभूतं उत्तरिमनुस्सधम्मं उल्लपति, आपत्ति पाराजिकस्स. आजीवहेतु आजीवकारणा सञ्चरित्तं समापज्जति, आपत्ति सङ्घादिसेसस्स. आजीवहेतु आजीवकारणा ‘यो ते विहारे वसति, सो भिक्खु अरहा’ति भणति, पटिविजानन्तस्स आपत्ति थुल्लच्चयस्स. आजीवहेतु आजीवकारणा भिक्खु पणीतभोजनानि अगिलानो अत्तनो अत्थाय विञ्ञापेत्वा भुञ्जति, आपत्ति पाचित्तियस्स. आजीवहेतु आजीवकारणा भिक्खुनी पणीतभोजनानि अगिलाना अत्तनो अत्थाय विञ्ञापेत्वा भुञ्जति, आपत्ति पाटिदेसनीयस्स. आजीवहेतु आजीवकारणा भिक्खु सूपं वा ओदनं वा अगिलानो अत्तनो अत्थाय विञ्ञापेत्वा भुञ्जति, आपत्ति दुक्कटस्सा’’ति (परि. २८७) –

एवं पाराजिकादिवसेन ठपेत्वा दुब्भासितं आजीवविपत्तिपच्चया छ आपत्तिक्खन्धा पञ्ञत्ता. दिट्ठिविपत्तिपच्चया पाचित्तियदुक्कटवसेन द्वे आपत्तिक्खन्धा पञ्ञत्ताति समनुभासनाय पापिकाय दिट्ठिया अप्पटिनिस्सज्जने ञत्तिया दुक्कटं, कम्मवाचापरियोसाने पाचित्तियन्ति एवं दिट्ठिविपत्तिपच्चया ¶ पाचित्तियदुक्कटवसेन द्वे आपत्तिक्खन्धा पञ्ञत्ता. एत्थाति विपत्तिकथासु.

गणनुपगताति दिवसगणनं उपगतभावो. अञ्ञेहि ‘‘इमं चीवरं इत्थन्नामस्स देमा’’ति परहत्थे दिन्नम्पि ‘‘न ताव तं गणनुपगं, याव न हत्थं गच्छती’’ति (महाव. २५९) चम्मक्खन्धके वुत्तत्ता याव आहरित्वा वा न दिन्नं, ‘‘तुम्हाकं, भन्ते, चीवरं उप्पन्न’’न्ति पहिणित्वा वा अनारोचितं, ताव दिवसगणनं न उपेति, अनधिट्ठितं वट्टति. यदा पन आनेत्वा दिन्नं होति, ‘‘उप्पन्न’’न्ति वा सुतं, ततो पट्ठाय गणनुपगं होति, अन्तोदसाहे अधिट्ठातब्बं. कथिनसञ्ञितं समुट्ठानमस्साति कथिनसमुट्ठानं, ततियछट्ठसमुट्ठानवसेन द्विसमुट्ठानन्ति अत्थो. कायवाचाहि कत्तब्बअधिट्ठानविकप्पनानं अकरणेन कायवाचतो, चित्ते पन सति कायवाचाचित्ततो च समुट्ठातीति वुत्तं होति. अनधिट्ठानाविकप्पनवसेन आपज्जनतो ¶ अकिरियं. अजानन्तोपि आपज्जतीति नोसञ्ञाविमोक्खं. कायद्वारे च वचीद्वारे च कत्तब्बाकरणतो कायकम्मं वचीकम्मं.

कथिनसिक्खापदवण्णना निट्ठिता.

२. उदोसितसिक्खापदवण्णना

भिक्खुनाति भिक्खुस्साति अत्थो, सामिअत्थे चेतं करणवचनं. तेनाह ‘‘पुरिमसिक्खापदे विया’’तिआदि. अथ कस्मा करणवसेनेव करणवचनस्स अत्थं अग्गहेत्वा सामिवसेन अत्थो वेदितब्बोति आह ‘‘करणवसेन ही’’तिआदि. हीति कारणत्थे निपातो. छिन्नपलिबोधोति छिन्नचीवरावासपलिबोधो. एकाव रत्ति एकरत्तं, समासन्तगतस्स अत्थं. तिण्णं चीवरानं समाहारोति तिचीवरं. तेन तिचीवरेन, तीहि चीवरेहीति अत्थो. एकेन विप्पवुत्थोपि (पारा. अट्ठ. २.४७५-४७६) हि तिचीवरेन विप्पवुत्थो नाम होति पटिसिद्धपरियापन्नेन विप्पवुत्थत्ता, अवयवेपि वा समुदायवोहारतो. तेनाह ‘‘तिचीवराधिट्ठाननयेना’’तिआदि.

इदानि ¶ विप्पवासलक्खणववत्थापनत्थं ‘‘गामो एकूपचारो’’तिआदिमाह. तत्थ निवेसनन्ति उदोसितादीनं वसेन अकताय पतिस्सयविकतिया अधिवचनं. उदोसितोति (पारा. अट्ठ. २.४८२-४८७) यानादीनं भण्डानं साला. यो ‘‘उदवसितो’’तिपि वुच्चति. अट्टोति पटिराजादिपटिबाहनत्थं इट्ठकाहि कतो बहलभित्तिको चतुपञ्चभूमिको पतिस्सयविसेसो. ‘‘अट्टोति बहलभित्तिकगेहं, यस्स गोपानसियो अग्गहेत्वा इट्ठकाहि एव छदनं होती’’ति अपरे. ‘‘अट्टाकारेन करीयती’’तिपि वदन्ति. माळोति एककूटसङ्गहितो चतुरस्सपासादो, एककूटसङ्गहितो वा अनेककोणवन्तो पतिस्सयविसेसो. ‘‘माळोति वट्टाकारेन कतसेनासन’’न्ति अपरे. पासादोति दीघपासादो, अड्ढयोगादिभेदो अट्टमाळहम्मियवज्जितो सब्बो वा पासादो. हम्मियन्ति मुण्डच्छदनपासादो. ‘‘चन्दियङ्गणयुत्त’’न्ति अपरे. नावाति थलट्ठउदकट्ठवसेन द्विधा नावा. सत्थोति जङ्घसत्थो, सकटसत्थो वा. धञ्ञकरणन्ति (पारा. अट्ठ. २.४९१-४९४) खलं वुच्चति. आरामोति पुप्फारामो, फलारामो वा. विहारोति सपरिक्खित्तो वा अपरिक्खित्तो वा सकलो आवासो. ‘‘गेहम्पी’’ति केचि. निवेसनादीनि चेत्थ गामतो बहि निविट्ठानि गहितानि. अन्तोगामे ठितानं पन गामग्गहणेनेव गहितत्ता गामपरिहारोयेवाति. ‘‘निवेसनादयो हम्मियपरियोसाना ¶ गामपरिक्खेपतो बहि निविट्ठा’’ति अपरे. हत्थपासातिक्कमेति एत्थ हत्थपासो नाम अड्ढतेय्यरतनप्पमाणो पदेसो, तस्स अतिक्कमो हत्थपासातिक्कमो, तस्मिं हत्थपासातिक्कमे. हत्थपासब्भन्तरे पन वत्थुं वट्टति. तं पमाणं अतिक्कमित्वा सचेपि इद्धिमा भिक्खु आकासे अरुणं उट्ठापेति, निस्सग्गियमेव होति.

अयं पनेत्थ विनिच्छयो – सचे (पारा. अट्ठ. २.४७७-४७८) गामो एकस्स रञ्ञो वा भोजकस्स वा वसेन एककुलस्स होति, पाकारादिना परिक्खित्तत्ता एकूपचारो च, एवरूपे गामे चीवरं निक्खिपित्वा तस्मिं गामब्भन्तरे यथारुचितट्ठाने वसितब्बं, सचे अपरिक्खित्तो, यस्मिं घरे चीवरं निक्खित्तं होति, तस्मिं घरे वसितब्बं, तस्स घरस्स समन्ततो हत्थपासा वा न विजहितब्बं.

सचे ¶ गामो वेसालिकुसिनारादयो विय नानाराजूनं वा भोजकानं वा होति, वुत्तप्पकारेन परिक्खित्तो च, एवरूपे गामे यस्मिं घरे चीवरं निक्खित्तं होति, तस्मिं घरे वा वत्थब्बं, तस्स घरस्स हत्थपासा वा न विजहितब्बं. यस्सा वीथिया घरं होति, तस्सा वीथिया तस्स घरस्स सम्मुखाट्ठाने सभायं वा घरद्वारे वा वत्थब्बं, तेसं सभाद्वारानं हत्थपासा वा न विजहितब्बं.

सचे सो गामो अपरिक्खित्तो, यस्मिं घरे चीवरं निक्खित्तं, तत्थ वा तस्स हत्थपासे वा वत्थब्बं. निवेसने पन सचे एककुलस्स निवेसनं होति, परिक्खित्तञ्च, अन्तोनिवेसने चीवरं निक्खिपित्वा अन्तोनिवेसने वत्थब्बं. अपरिक्खित्तं चे होति, यस्मिं गब्भे चीवरं निक्खित्तं, तस्मिं वत्थब्बं, तस्स गब्भस्स हत्थपासा वा न विजहितब्बं.

सचे नानाकुलस्स निवेसनं होति, परिक्खित्तञ्च, यस्मिं गब्भे चीवरं निक्खित्तं, तस्मिं गब्भे वत्थब्बं, सब्बेसं साधारणद्वारमूले वा तेसं गब्भद्वारमूलानं हत्थपासा वा न विजहितब्बं. अपरिक्खित्तं चे, यस्मिं गब्भे चीवरं निक्खित्तं, तस्मिं गब्भे वत्थब्बं, तस्स गब्भस्स हत्थपासा वा न विजहितब्बं. एस नयो उदोसितादीसुपि.

सत्थो पन जङ्घसत्थो वा होतु, सकटसत्थो वा. सचे एककुलस्स सत्थो होति, सत्थे चीवरं निक्खिपित्वा पुरतो वा पच्छतो वा सत्तब्भन्तरा न विजहितब्बा, पस्सतो अब्भन्तरं न विजहितब्बं. सचे (पारा. अट्ठ. २.४८९) सत्थो गच्छन्तो गामं वा नदिं वा परियादियित्वा ¶ तिट्ठति, अन्तोपविट्ठेन सद्धिं एकाबद्धो हुत्वा ओरञ्च पारञ्च फरित्वा ठितो होति, सत्थपरिहारोव लब्भति. अथ गामे वा नदिया वा परियापन्नो होति अन्तोपविट्ठो, गामपरिहारो चेव नदिपरिहारो च लब्भति. सचे विहारसीमं अतिक्कमित्वा तिट्ठति, अन्तोसीमाय च चीवरं होति, विहारं गन्त्वा वसितब्बं. सचे बहिसीमाय चीवरं होति, सत्थसमीपेयेव वसितब्बं. सचे गच्छन्तो सकटे वा भग्गे, गोणे वा नट्ठे अन्तरा छिज्जति, यस्मिं कोट्ठासे चीवरं निक्खित्तं, तत्थ वसितब्बं.

खेत्तेपि (पारा. अट्ठ. २.४९०) सचे एककुलस्स खेत्तं होति, परिक्खित्तञ्च, अन्तोखेत्ते चीवरं निक्खिपित्वा अन्तोखेत्ते वत्थब्बं. सचे अपरिक्खित्तं, हत्थपासा ¶ चीवरं न विजहितब्बं. सचे नानाकुलस्स खेत्तं होति, परिक्खित्तञ्च, अन्तोखेत्ते चीवरं निक्खिपित्वा खेत्तद्वारमूले वा वत्थब्बं, तस्स हत्थपासा वा न विजहितब्बं. सचे अपरिक्खित्तं, चीवरं हत्थपासा न विजहितब्बं. एस नयो धञ्ञकरणारामेसु द्वीसुपि. विहारे पन निवेसने वुत्तसदिसोव विनिच्छयो.

रुक्खमूले पन यं मज्झन्हिके काले समन्ता छाया फरति, तस्मिं ठाने अविरळे पदेसे तस्स छायाय फुट्ठोकासस्स अन्तोयेव निक्खिपितब्बं. सचे विरळसाखस्स रुक्खस्स आतपेन फुट्ठोकासे ठपेति, अरुणुग्गमने च सो भिक्खु तस्स हत्थपासे न होति, अञ्ञस्मिं ठाने तस्स छायायपि होति, निस्सग्गियं होति. सचे नानाकुलस्स रुक्खो होति, चीवरस्स हत्थपासा न विजहितब्बं.

अज्झोकासे पन विञ्झाटविआदीसु अरञ्ञेसुपि समुद्दमज्झे मच्छबन्धानं अगमनपथदीपकेसुपि चीवरं ठपेत्वा ततो समन्ता सत्तब्भन्तरे पदेसे यत्थ कत्थचि वसितब्बं, इतो अञ्ञत्थ वसन्तो विप्पवुत्थो नाम होतीति दट्ठब्बं.

इमस्स पन वित्थारस्स इध अवुत्तत्ता, समन्तपासादिकायञ्च वुत्तत्ता ‘‘अयमेत्थ सङ्खेपो’’तिआदि वुत्तं. एत्थाति ‘‘तिचीवरेन विप्पवसेय्या’’ति एतस्मिं पदे. सङ्खेपोति सङ्खेपवण्णना. एत्थ पन पाळियं (पारा. ४७७) ‘‘गामो एकूपचारो नानूपचारो’’तिआदिना अविसेसेन मातिकं निक्खिपित्वापि गामनिवेसनउदोसितखेत्तधञ्ञकरणआरामविहारानं एकूपचारनानूपचारता ‘‘गामो एकूपचारो नाम एककुलस्स गामो होति परिक्खित्तो च अपरिक्खित्तो चा’’तिआदिना (पारा. ४७८) परिक्खित्तापरिक्खित्तवसेन ¶ विभत्ता. अट्टमाळपासादहम्मियनावासत्थरुक्खमूलअज्झोकासानं पन एवं अवत्वा ‘‘एककुलस्स अट्टो होति, नानाकुलस्स अट्टो होती’’तिआदिना (पारा. ४८४) नयेन एककुलनानाकुलवसेन च अन्ते ‘‘अज्झोकासो एकूपचारो नाम अगामके अरञ्ञे समन्ता सत्तब्भन्तरा एकूपचारो, ततो परं नानूपचारोति (पारा. ४९४) च एवं एकूपचारनानूपचारता विभत्ता. तस्मा गामादीसु परिक्खित्तं एकूपचारं, अपरिक्खित्तं ¶ नानूपचारन्ति च, अट्टादिसु यं एककुलस्स, तं एकूपचारं, यं नानाकुलस्स, तं नानूपचारन्ति च गहेतब्बं. अज्झोकासे वुत्तनयेन गहेतब्बं. उपचारोति हि ‘‘गामो एकूपचारो नानूपचारो’’तिआदीसु द्वारं, ‘‘अज्झोकासो एकूपचारो’’ति एत्थ समन्ता सत्तब्भन्तरसङ्खातं पमाणन्ति अपरे.

अञ्ञत्र भिक्खुसम्मुतियाति भिक्खुनो सङ्घेन दिन्ना सम्मुति भिक्खुसम्मुति, तं विनाति अत्थो. तेनाह ‘‘यं सङ्घो’’तिआदि. अविप्पवाससम्मुतिं देतीति अविप्पवासा सम्मुति, अविप्पवासाय वा सम्मुति अविप्पवाससम्मुति, तं ञत्तिदुतियेन कम्मेन देतीति अत्थो.

सन्तरुत्तरेनाति ‘‘अन्तर’’न्ति अन्तरवासको वुच्चति, ‘‘उत्तर’’न्ति उत्तरासङ्गो, सह अन्तरेन उत्तरं सन्तरुत्तरं, तेन सन्तरुत्तरेन, सह अन्तरवासकेन उत्तरासङ्गेनाति अत्थो. अन्तोअरुणे पच्चुद्धटेति निवत्तित्वा सम्पापुणितुमसक्कोन्तेन तत्थेव ठत्वा अन्तो अरुणे पच्चुद्धटे. पच्चागन्तब्बन्ति यथा रोगो न कुप्पति, तथा पुन चीवरस्स ठपितट्ठानं आगन्तब्बं. यतो पट्ठाय हि सत्थं वा परियेसति, ‘‘गच्छामी’’ति आभोगं वा करोति, ततो पट्ठाय वट्टति. ‘‘न दानि गमिस्सामी’’ति एवं पन धुरनिक्खेपं करोन्तेन पच्चुद्धरितब्बं ‘‘अतिरेकचीवरट्ठाने ठस्सती’’ति. तेनाह ‘‘तत्थेव वा ठितेन पच्चुद्धरितब्ब’’न्ति. सोति यस्स सम्मुति दिन्ना, सो रोगो. लद्धकप्पियमेव पुन सम्मुतिदानकिच्चं नत्थीति अधिप्पायो.

अधिट्ठितचीवरताति तिचीवराधिट्ठाननयेन अधिट्ठितचीवरता. विप्पवासो नाम यदि बद्धसीमायं चीवरं होति, ततो बहि अरुणुट्ठापनं. अथ अबद्धसीमायं, यथावुत्तगामादीनं बहि हत्थपासातिक्कमे अरुणुट्ठापनं. बद्धसीमायं पन यत्थ कत्थचि चीवरं ठपेत्वा अन्तोसीमायमेव यत्थ कत्थचि वसितुं वट्टति. इध अपच्चुद्धरणं अकिरियाति सम्बन्धो.

उदोसितसिक्खापदवण्णना निट्ठिता.

३. अकालचीवरसिक्खापदवण्णना

पुरिमसिक्खापदे ¶ ¶ विय एत्थापि भिक्खुनाति सामिअत्थे करणवचनन्ति आह ‘‘निट्ठितचीवरस्मिं भिक्खुना’’तिआदि. ‘‘अकालचीवरं नाम अनत्थते कथिने एकादसमासे उप्पन्नं, अत्थते कथिने सत्तमासे उप्पन्नं, कालेपि आदिस्स दिन्नं, एतं अकालचीवरं नामा’’ति (पारा. ५००) पदभाजनियं वुत्तत्ता ‘‘य्वायं अनत्थते कथिने’’तिआदिमाह. य्वायं चीवरकालो वुत्तोति सम्बन्धो. वस्सानस्साति वस्सानसङ्खातस्स उतुनो. पच्छिमो मासो नाम चीवरमासो. तस्मिञ्हि अनत्थतेपि कथिने उप्पन्नं चीवरं अनधिट्ठितं, अविकप्पितं ठपेतुं वट्टति. पञ्च मासाति पच्छिमकत्तिकमासो, हेमन्तिका चत्तारो चाति पञ्च मासा. अञ्ञदाति अनत्थते कथिने एकादसमासे, अत्थते कथिने सत्तमासे. कालेपीति ‘‘अनत्थते कथिने चीवरमासो, अत्थते कथिने पञ्च मासा’’ति यथावुत्तचीवरकालेपि. ‘‘आदिना नयेना’’ति इमिना ‘‘ददामि दज्जामी’’तिआदीनं (पारा. अट्ठ. २.४६९) सङ्गहो. किञ्चापि चेतानि सब्बानि ‘‘अकालचीवर’’न्ति वुत्तानि, तथापि पिट्ठिसमयेयेव उप्पन्नानि ‘‘अकालचीवर’’न्ति इधाधिप्पेतानि.

‘‘काले सङ्घस्स इदं अकालचीवर’’न्ति दिन्नं पन अकालचीवरसामञ्ञतो अत्थुद्धारवसेन वुत्तं. यथा पिट्ठिसमये उप्पन्नं चीवरं वुट्ठवस्सेहि, सेसेहि च सम्मुखीभूतेहि भाजेतुं लब्भतीति अकालचीवरं नाम जातं, तथेविदम्पीति तदिदं अकालचीवरसामञ्ञं. यदि एवं ‘‘पुग्गलस्स वा इदं तुय्हं ‘दम्मी’तिआदिना नयेन दिन्न’’न्ति कस्मा वुत्तं, न हि पुग्गलस्स आदिस्स दिन्नं केनचि भाजनीयं होतीति? नायं विरोधो, आदिस्स दानसामञ्ञतो लब्भमानमत्थं दस्सेतुं तथा वुत्तन्ति. अत्तनो वा धनेनाति अत्तनो कप्पाससुत्तादिना धनेन. इमस्स ‘‘उप्पज्जेय्या’’ति इमिना सम्बन्धो वेदितब्बो. ‘‘सीमाय देती’’तिआदि पुग्गलाधिट्ठाननयेन वुत्तं. एत्थ पन सीमाय दानं एका मातिका, कतिकाय दानं दुतिया…पे… पुग्गलस्स दानं अट्ठमा.

‘‘परिक्खेपारहट्ठानेना’’ति इमिना अपरिक्खित्तस्स विहारस्स धुवसन्निपातट्ठानादितो पठमलेड्डुपातस्स अन्तो उपचारसीमाति दस्सेति. इदानि ¶ दुतियलेड्डुपातस्सपि अन्तो उपचारसीमायेवाति दस्सेतुं ‘‘अपिचा’’तिआदि आरद्धं. धुवसन्निपातट्ठानम्पि सीमापरियन्तगतमेव वेदितब्बं. आवासे वड्ढन्ते वड्ढतीति सचे उपचारतो अबहिभूतो हुत्वा आवासो वड्ढतीति अधिप्पायो. महापच्चरियं पन ‘‘भिक्खूसुपि वड्ढन्तेसु वड्ढती’’ति वुत्तं. ‘‘सचे ¶ विहारे सन्निपतितभिक्खूहि सद्धिं एकाबद्धा हुत्वा योजनसतम्पि पूरेत्वा निसीदन्ति, योजनसतम्पि उपचारसीमाव होति, सब्बेसं लाभो पापुणाती’’ति (महाव. अट्ठ. ३७९) समन्तपासादिकायं वुत्तं. भिक्खुनीनं आरामपवेसनसेनासनापुच्छनानीति आगन्तुकगमिकानं भिक्खुनीनं आरामपवेसनापुच्छनं, सेनासनापुच्छनञ्चाति अत्थो. तथा हि आगन्तुकाय भिक्खुनिया आरामपवेसनं आपुच्छितब्बं, गमिकाय सङ्घिकं दसविधं सेनासनं. एत्थ च किञ्चापि ‘‘भिक्खुनीन’’न्ति वुत्तं, गमिकस्स पन भिक्खुस्सापि इमिस्सायेव सीमाय वसेन सेनासनापुच्छनं वेदितब्बं.

परिवासमानत्तारोचनन्ति पारिवासिकमानत्तचारीनं परिवासारोचनं, मानत्तारोचनञ्च. वस्सच्छेदनिस्सयसेनासनग्गाहादिविधानन्ति वस्सच्छेदविधानं, निस्सयग्गाहविधानं, सेनासनग्गाहविधानन्ति अत्थो. आदिसद्देन निस्सयपटिप्पस्सद्धि, लाभग्गाहो आगन्तुकवत्तं पूरेत्वा आरामपवेसनन्ति एवमादिकं सङ्गण्हाति. इमिस्साव सीमाय वसेनाति उपचारसीमायेवाति यथासम्भवं अन्तो, बहि च इमस्स सब्बस्स लब्भनतो वुत्तं.

लाभत्थाय ठपिता सीमा लाभसीमा (महाव. ३७९), सा च खो नेव सम्मासम्बुद्धेन अनुञ्ञाता, न धम्मसङ्गाहकत्थेरेहि ठपिता, अपिच खो लाभदायकेहि. तेनाह ‘‘यं राजराजमहामत्तादयो’’तिआदि. समन्ताति विहारस्स समन्ता. यन्ति सुङ्कसस्सादि. ‘‘सीमं ठपेन्ती’’ति पाठसेसो. एकस्स रञ्ञो आणापवत्तिट्ठानन्ति चोळभोगो केरळभोगोति एवं एकेकस्स रञ्ञो आणापवत्तिट्ठानं. द्विधा आपो गतो एत्थाति दीपो, ओघेन अनज्झोत्थतो भूमिभागो, सोव सीमा दीपसीमा. तेनाह समुद्दन्तेना’’तिआदि. चक्कवाळसीमा चक्कवाळपब्बतेनेव परिच्छिन्नाति आह ‘‘एकचक्कवाळपब्बतपरिक्खेपब्भन्तरं चक्कवाळसीमा’’ति.

सेसाति ¶ खण्डसीमादयो. खण्डसीमाय देमाति दिन्नन्ति खण्डसीमाय केनचि कम्मेन सन्निपतितं सङ्घं दिस्वा ‘‘खण्डसीमायं सङ्घस्स देमा’’ति दिन्नं. खण्डसीमाय ठिते रुक्खे वा पब्बते वा ठितोपि हेट्ठा वा पथविवेमज्झगतोपि खण्डसीमायेव ठितोति वेदितब्बो. समानसंवाससीमाय दिन्नन्ति ‘‘समानसंवाससीमाय दम्मी’’ति दिन्नं. एस नयो सेसेसुपि. खण्डसीमा सीमन्तरिकट्ठानं न पापुणाति तत्थ समानसंवाससीमाय अभावतोति अधिप्पायो. समानसंवासअविप्पवाससीमासु दिन्नस्स इदं नानात्तं – ‘‘अविप्पवाससीमाय दम्मी’’ति दिन्नं गामट्ठानं न पापुणाति. कस्मा? ‘‘ठपेत्वा गामञ्च गामूपचारञ्चा’’ति (महाव. १४४) वुत्तत्ता ¶ . ‘‘समानसंवाससीमाय दम्मी’’ति दिन्नं पन गामे ठितानम्पि पापुणातीति. अब्भन्तरसीमाउदकुक्खेपसीमासु दिन्नन्ति तत्थ उपोसथादिअत्थाय सन्निपतिते दिस्वा ‘‘इमिस्सा अब्भन्तरसीमाय देमा’’तिआदिना दिन्नं. जनपदरट्ठरज्जदीपचक्कवाळसीमासुपि गामसीमादीसु वुत्तसदिसोव विनिच्छयोति आह ‘‘जनपदसीमादीसू’’तिआदि. एकोपि गन्त्वा सब्बेसं सङ्गण्हितुं लभतीति एकोपि गन्त्वा इध वस्सग्गेन भाजेत्वा गहेत्वा आगन्तुं लभतीति अत्थो. एकोति सभागो एको भिक्खु, अयम्पि भागमेव गहेतुं लभति. तेनाह ‘‘सभागानं भागं गण्हाती’’ति.

एवं ताव यो सीमं परामसित्वा देति, तस्स दाने विनिच्छयं वत्वा इदानि यो ‘‘असुकसीमाया’’ति वत्तुं न जानाति, केवलं ‘‘सीमा’’ति वचनमत्तमेव जानन्तो विहारं आगन्त्वा ‘‘सीमाय दम्मी’’ति वा ‘‘सीमट्ठकसङ्घस्स दम्मी’’ति वा भणति, तत्थ विनिच्छयं दस्सेतुं ‘‘यो पन विहारं पविसित्वा’’तिआदिमाह. कतरन्ति कतरसीमं. अहमेतं भेदं न जानामीति अहं ‘‘असुका सीमा’’ति एतं विभागं न जानामि. उपचारसीमट्ठेहि भाजेतब्बं लाभस्स उपचारसीमाय परिच्छिन्नत्ताति अधिप्पायो. साति समानलाभकतिका.

यत्थ मय्हं धुवकारा करीयन्तीति (महाव. अट्ठ. ३७९) एत्थ यस्मिं विहारे तस्स चीवरदायकस्स सन्तकं सङ्घस्स पाकवत्तं वा वत्तति. यस्मिं विहारे भिक्खू अत्तनो भारं कत्वा सदा गेहे भोजेति, यत्थ वा अनेन आवासो वा कारितो, सलाकभत्तादीनि वा निबद्धानि, इमे धुवकारा ¶ नाम. येन पन सकलोपि विहारो पतिट्ठापितो, तत्थ वत्तब्बमेव नत्थि. तेनाह ‘‘यत्थ तस्स पाकवत्तं वा वत्तती’’तिआदि. तत्थ पाकवत्तन्ति दानवत्तं. वत्ततीति पवत्तति. यतोति यस्मा विहारा. यत्थाति यस्मिं विहारे. सब्बत्थाति सब्बेसु विहारेसु. मातिकं आरोपेत्वाति एकस्मिं विहारे भिक्खू बहुतरा, एकस्मिं थोकतरा, एकञ्च वत्थं, धुवकारट्ठानञ्च बहुकं, कत्थ देमाति पुच्छित्वा, यदि पन मञ्चो वा पीठं वा एकमेव होति, तं पुच्छित्वा यस्स वा विहारस्स, एकविहारेपि वा यस्स सेनासनस्स सो विचारेति, तत्थ दातब्बं. सचेपि ‘‘असुकभिक्खु गण्हतू’’ति वदति, वट्टति. अथ ‘‘मय्हं धुवकारे देथा’’ति वत्वा अविचारेत्वाव गच्छति, सङ्घस्सपि विचारेतुं वट्टति. एवं पन विचारेतब्बं – ‘‘सङ्घत्थेरस्स वसनट्ठाने देथा’’ति वत्तब्बं. सचे तत्थ सेनासनं परिपुण्णं होति, यत्थ नप्पहोति, तत्थ दातब्बं. सचे एको भिक्खु ‘‘मय्हं वसनट्ठाने सेनासनपरिभोगभण्डं नत्थी’’ति वदति, तत्थ दातब्बं.

सङ्घस्स ¶ दम्मीति दिन्नन्ति ‘‘इमानि चीवरानि सङ्घस्स दम्मी’’ति एवं दिन्नं. ततो बहिद्धापीति उपचारसीमातो बहिद्धापि. तेहि सद्धिन्ति उपचारसीमागतेहि सद्धिं. एकाबद्धानञ्च पापुणाति परिसावसेन वड्ढिता सीमा होतीति कत्वाति अधिप्पायो. तस्माति यस्मा उपचारसीमागतानं पापुणाति, यस्मा च ततो बहिद्धापि उपचारसीमोक्कन्तेहि एकाबद्धानं पापुणाति, तस्मा. तेसन्ति उपचारसीमागतानं, ततो बहिद्धा तेहि सद्धिं एकाबद्धानञ्च. गाहते सतीति अन्तेवासिकादिके गण्हन्ते सति. असम्पत्तानम्पीति उपचारसीमायं ठितेहि घण्टिं पहरित्वा कालं घोसेत्वा लाभभाजनट्ठानं असम्पत्तानम्पि उपचारसीमाय पविट्ठानं, तेहि वा सद्धिं एकाबद्धानं हुत्वा अत्तनो विहारद्वारे वा अन्तोविहारेयेव वा ठितानञ्चाति अत्थो. भागो दातब्बोति सङ्घनवकस्स दिन्नेपीति अधिप्पायो. दुतियभागे पन थेरासनं आरुळ्हे आगतानं पठमभागो न पापुणाति. दुतियभागतो वस्सग्गेन दातब्बं.

सचे पन ‘‘बहिउपचारसीमायं ठितानं देथा’’ति वदन्ति, न दातब्बं. यदि पन विहारो महा होति, थेरासनतो पट्ठाय वत्थेसु दीयमानेसु ¶ अलसजातिका महाथेरा पच्छा आगच्छन्ति, ‘‘भन्ते, वीसतिवस्सानं दीयति, तुम्हाकं ठितिका अतिक्कन्ता’’ति न वत्तब्बा. ठितिकं ठपेत्वा तेसं दत्वा पच्छा ठितिकाय दातब्बं.

‘‘असुकविहारे किर बहुचीवरं उप्पन्न’’न्ति सुत्वा योजनन्तरिकविहारतोपि भिक्खू आगच्छन्ति, सम्पत्तसम्पत्तानं ठितट्ठानतो पट्ठाय दातब्बं, अयमेत्थ सङ्खेपो. वित्थारो पन समन्तपासादिकाय चीवरक्खन्धकवण्णनायं (महाव. अट्ठ. ३७९) वुत्तनयेन वेदितब्बो.

एवं विहारं पविसित्वा ‘‘इमानि चीवरानि सङ्घस्स दम्मी’’ति दिन्नेसु विनिच्छयं वत्वा इदानि बहिउपचारसीमायं भिक्खुं दिस्वा ‘‘सङ्घस्स दम्मी’’ति दिन्नेसु विनिच्छयं दस्सेतुं ‘‘यं पना’’तिआदि वुत्तं. एकाबद्धपरिसाय पापुणातीति सचे योजनं फरित्वा परिसा ठिता होति, एकाबद्धा चे, सब्बेसं पापुणातीति अत्थो. एकाबद्धता चेत्थ द्वादसहत्थब्भन्तरतो परिच्छिन्दितब्बा. तेनाह ‘‘ये पना’’तिआदि.

उभतोसङ्घस्स दिन्नन्ति (महाव. अट्ठ. ३७९) ‘‘उभतोसङ्घस्स दम्मी’’ति दिन्नं. ‘‘द्वेधासङ्घस्स दम्मि, द्विन्नं सङ्घानं दम्मि, भिक्खुसङ्घस्स च भिक्खुनिसङ्घस्स च दम्मी’’ति वुत्तेपि उभतोसङ्घस्स दिन्नमेव होति. उपड्ढं भिक्खूनं, उपड्ढं भिक्खुनीनं दातब्बन्ति द्वे भागे समे ¶ कत्वा एको भागो भिक्खूनं, एको भागो भिक्खुनीनं दातब्बो. गहेतुं लभति उभतोसङ्घग्गहणेन गहितत्ताति अधिप्पायो. चेतियस्साति थूपादिनो. तञ्हि धातायतनादिभावेन चितत्ता, लोकस्स चित्तीकारट्ठानताय च ‘‘चेतिय’’न्ति वुच्चति. न कोचि विसेसोति आह ‘‘इध पन चेतियस्सा’’तिआदि.

‘‘उभतोसङ्घस्स च तुय्हञ्च चेतियस्स चा’’ति वुत्ते पन द्वावीसतिकोट्ठासे कत्वा दस भिक्खूनं, दस भिक्खुनीनं, एको पुग्गलस्स, एको चेतियस्स दातब्बो. तत्थ पुग्गलो सङ्घतोपि अत्तनो वस्सग्गेन पुन गहेतुं लभति, चेतियस्स एकोयेव. अयं पन वारो यथावुत्तेनेव नयेन ञायतीति कत्वा इध न वुत्तो. समन्तपासादिकायं (महाव. अट्ठ. ३७९) पन वुत्तोयेव.

न ¶ मज्झे भिन्दित्वा दातब्बं ‘‘भिक्खुनीन’’न्ति पुग्गलिकवसेन वुत्तत्ता. पुग्गलो विसुं न लभतीति पुब्बे विय विसुं पुग्गलिककोट्ठासं न लभति. पापुणनट्ठानतो एकमेव लभतीति अत्तनो वस्सग्गेन पत्तब्बट्ठानतो एकमेव कोट्ठासं लभति. कस्मा? भिक्खुसङ्घग्गहणेन गहितत्ता. ‘‘भिक्खुसङ्घस्स च भिक्खुनीनञ्च तुय्हञ्च चेतियस्स चा’’ति वुत्तेपि चेतियस्स एकपुग्गलपटिवीसो लब्भति, पुग्गलस्स विसुं न लब्भति. तस्मा एकं चेतियस्स दत्वा अवसेसं भिक्खू च भिक्खुनियो च गणेत्वा भाजेतब्बं. तेनाह ‘‘चेतियस्स चाति वुत्ते पना’’तिआदि.

तेहि सद्धिं पुग्गलचेतियपरामसनं अनन्तरनयसदिसमेवाति तेहि भिक्खूहि भिक्खुनीहि सद्धिं पुग्गलस्स च चेतियस्स च गहणं अनन्तरनयसदिसमेवाति अत्थो. ‘‘भिक्खूनञ्च भिक्खुनीनञ्च तुय्हञ्च, भिक्खूनञ्च भिक्खुनीनञ्च चेतियस्स च, भिक्खूनञ्च भिक्खुनीनञ्च तुय्हञ्च चेतियस्स चा’’ति वुत्तेपि चेतियस्स एकपटिवीसो लब्भति, पुग्गलस्स विसुं नत्थि, भिक्खू च भिक्खुनियो च गणेत्वाव भाजेतब्बन्ति वुत्तं होति. पुग्गलस्स विसुं न लब्भतीति पुग्गलस्स विसुं पटिवीसो न लब्भति, वस्सग्गेन एकोव लब्भतीति अत्थो. ‘‘भिक्खुसङ्घस्स च चेतियस्स चा’’ति वुत्ते पन चेतियस्स विसुं पटिवीसो लब्भतीति आह ‘‘चेतियस्स पन लब्भती’’ति. ‘‘भिक्खुसङ्घस्स च तुय्हञ्च चेतियस्स चा’’ति वुत्तेपि चेतियस्सेव विसुं लब्भति, न पुग्गलस्स. चेतियस्स पन लब्भतियेवाति ‘‘भिक्खूनञ्च चेतियस्स चा’’ति वुत्ते पन चेतियस्स विसुं पटिवीसो लब्भतीति ¶ अत्थो. ‘‘भिक्खूनञ्च तुय्हञ्च चेतियस्स चा’’ति वुत्तेपि चेतियस्सेव विसुं लब्भति, न पुग्गलस्स. भिक्खुनिसङ्घं आदिं कत्वापि एवमेव योजेतब्बं.

एत्थाह – यं पनेतरहि (महाव. अट्ठ. ३७९) पण्डितमनुस्सा सधातुकं पटिमं वा चेतियं वा ठपेत्वा बुद्धप्पमुखस्स उभतोसङ्घस्स दानं देन्ति, पटिमाय वा चेतियस्स वा पुरतो आधारके पत्तं ठपेत्वा दक्खिणोदकं दत्वा ‘‘बुद्धानं देमा’’ति, तत्थ यं पठमं खादनीयं भोजनीयं देन्ति, विहारं वा आहरित्वा ‘‘इदं चेतियस्स देमा’’ति पिण्डपातञ्च मालागन्धादीनि च देन्ति, तत्थ कथं पटिपज्जितब्बन्ति? वुच्चते – मालागन्धादीनि ताव चेतिये आरोपेतब्बानि, वत्थेहि पटाका, तेलेन ¶ पदीपा कातब्बा, पिण्डपातमधुफाणितादीनि पन यो निबद्धचेतियजग्गको होति पब्बजितो वा गहट्ठो वा, तस्स दातब्बानि. निबद्धजग्गके असति आहटभत्तं ठपेत्वा वत्तं कत्वा परिभुञ्जितुं वट्टति. उपकट्ठे काले भुञ्जित्वा पच्छापि वत्तं कातुं वट्टतियेव.

मालागन्धादीसु च यं किञ्चि ‘‘इदं हरित्वा चेतियपूजं करोथा’’ति वुत्ते दूरम्पि हरित्वा पूजेतब्बं. ‘‘भिक्खुसङ्घस्स हरा’’ति वुत्तेपि हरितब्बं. सचे पन ‘‘अहं पिण्डाय चरामि, आसनसालायं भिक्खू अत्थि, ते हरिस्सन्ती’’ति वुत्ते ‘‘भन्ते, तुय्हंयेव दम्मी’’ति वदति, भुञ्जितुं वट्टति. अथ पन ‘‘भिक्खुसङ्घस्स दस्सामी’’ति हरन्तस्स गच्छतो अन्तराव कालो उपकट्ठो होति, अत्तनो पापेत्वा भुञ्जितुं वट्टति.

वस्संवुट्ठसङ्घस्स दम्मीति वदतीति (महाव. अट्ठ. ३७९) ‘‘वस्संवुट्ठसङ्घस्स इमानि चीवरानि दम्मी’’ति वदति. तेसं बहिसीमट्ठानम्पि पापुणातीति अत्थते कथिने बहिसीमट्ठानम्पि याव कथिनस्स उब्भारा पापुणाति, तस्मा दिसापक्कन्तस्सापि सति पटिग्गाहके दातब्बं. अनत्थते पन कथिने अन्तोहेमन्ते, एवञ्च पन वत्वा दिन्नं पच्छिमवस्संवुट्ठानम्पि पापुणाति. यत्थ कत्थचीति येसु केसुचि विहारेसु. एवं वदतीति ‘‘वस्संवुट्ठसङ्घस्स दम्मी’’ति वदति. तत्र सम्मुखीभूतानं सब्बेसं पापुणाति पिट्ठिसमये उप्पन्नत्ता. सचे पन ‘‘वस्सं वसन्तानं दम्मी’’ति वदति, अन्तोवस्सेयेव वस्सं वसन्ताव लभन्ति, छिन्नवस्सा न लभन्ति. चीवरमासे पन ‘‘वस्सं वसन्तानं दम्मी’’ति वुत्ते पच्छिमिकाय वस्सूपगतानंयेव पापुणाति, पुरिमिकाय वस्सूपगतानञ्च छिन्नवस्सानञ्च न पापुणाति.

चीवरमासतो पट्ठाय याव हेमन्तस्स पच्छिमो दिवसो, ताव ‘‘वस्सावासिकं देमा’’ति वुत्ते ¶ कथिनं अत्थतं वा होतु, अनत्थतं वा, अतीतवस्संवुट्ठानंयेव पापुणाति. गिम्हानं पठमदिवसतो पट्ठाय वुत्ते पन मातिका आरोपेतब्बा ‘‘अतीतवस्सावासस्स पञ्च मासा अतिक्कन्ता, अनागतो चतुमासच्चयेन भविस्सति, कतरवस्सावासस्स देसी’’ति. सचे ‘‘अतीतवस्संवुट्ठानं दम्मी’’ति वदति, तंअन्तोवस्संवुट्ठानमेव पापुणाति, दिसा पक्कन्तानम्पि सभागा गण्हितुं लभन्ति.

सचे ¶ ‘‘अनागते वस्सावासिकं दम्मी’’ति वदति, तं ठपेत्वा वस्सूपनायिकदिवसे गहेतब्बं. अथ ‘‘अगुत्तो विहारो, चोरभयं अत्थि, न सक्का ठपेतुं, गण्हित्वा वा आहिण्डितु’’न्ति वुत्ते ‘‘सम्पत्तानं दम्मी’’ति वदति, भाजेत्वा गहेतब्बं. सचे वदति ‘‘इतो मे, भन्ते, ततिये वस्से वस्सावासिकं न दिन्नं, तं दम्मी’’ति, तस्मिं अन्तोवस्से वुट्ठभिक्खूनं पापुणाति. सचे ते दिसा पक्कन्ता, अञ्ञो विस्सासिको गण्हाति, दातब्बं. अथ एकोयेव अवसिट्ठो, सेसा कालङ्कता, सब्बं एकस्सेव पापुणाति. सचे एकोपि नत्थि, सङ्घिकं होति, सम्मुखीभूतेहि भाजितब्बं.

येहि निमन्तितेहि यागु पीताति (महाव. अट्ठ. ३७९) निमन्तितेहि येहि भिक्खूहि यागु पीता, येहि पन भिक्खाचारवत्तेन घरद्वारेन गच्छन्तेहि वा घरं पविट्ठेहि वा यागु लद्धा, येसं वा आसनसालतो पत्तं आहरित्वा मनुस्सेहि नीता, येसं वा थेरेहि पेसिता, तेसं न पापुणाति. सचे पन निमन्तितभिक्खूहि सद्धिं अञ्ञेपि बहू आगन्त्वा अन्तोगेहञ्च बहिगेहञ्च पूरेत्वा निसिन्ना, दायको च एवं वदति ‘‘निमन्तिता वा होन्तु, अनिमन्तिता वा, येसं मया यागु दिन्ना, सब्बेसं इमानि वत्थानि होन्तू’’ति, सब्बेसं पापुणाति. येहि पन थेरानं हत्थतो यागु लद्धा, तेसं न पापुणाति. अथ सो ‘‘येहि मय्हं यागु पीता, सब्बेसं होतू’’ति वदति, सब्बेसं पापुणाति. भत्तखज्जकादीहीति एत्थ आदिसद्देनपि चीवरसेनासनभेसज्जानं गहणं.

पुग्गलस्साति (महाव. अट्ठ. ३७९) सम्मुखासम्मुखभूतस्स पुग्गलस्स. तेनाह ‘‘इदं चीवर’’न्तिआदि. सचे पन ‘‘इदं तुम्हाकञ्चेव तुम्हाकं अन्तेवासिकानञ्च दम्मी’’ति एवं वदति, थेरस्स च अन्तेवासिकानञ्च पापुणाति. उद्देसं गहेतुं आगतो, गहेत्वा गच्छन्तो च अत्थि, तस्सापि पापुणाति. तुम्हेहि सद्धिं निबद्धचारिकभिक्खूनं दम्मी’’ति वुत्ते उद्देसन्तेवासिकानं वत्तं कत्वा उद्देसपरिपुच्छादीनि गहेत्वा विचरन्तानं सब्बेसं पापुणाति. एत्थाति अट्ठसु मातिकासु. यदि पन अयमेत्थ सङ्खेपकथा, वित्थारो पन कथं ञातब्बोति आह ¶ ‘‘समन्तपासादिकायं वुत्तो’’ति. समन्तपासादिकायं चीवरक्खन्धकवण्णनायं (महाव. अट्ठ. ३७९) वुत्तोति अत्थो.

‘‘ञातकेहि ¶ वा मे चीवरत्थाय पेसितं, मित्तेहि वा पेसितं, ते आभते चीवरे दस्सन्ती’’ति एवं ञातितो वा मित्ततो वा पच्चासा होतीति वेदितब्बं. कप्पियभण्डेनाति कप्पाससुत्तादिना अत्तनो धनेन. सण्हन्ति सुखुमं. अञ्ञं पच्चासाचीवरं लभित्वा एव कालब्भन्तरे कारेतब्बन्ति अञ्ञं मूलचीवरसदिसं पच्चासाचीवरं लभित्वायेव मासब्भन्तरे कारेतब्बं. तञ्च खो सतियायेव पच्चासाय, असतिया पन पच्चासाय मूलचीवरं दसाहं चे सम्पत्तं, तदहेव अधिट्ठातब्बं. तेनाह ‘‘सचे न लभती’’तिआदि. पच्चासाचीवरम्पि परिक्खारचोळं अधिट्ठातब्बन्ति पठमतरं उप्पन्नं थूलपच्चासाचीवरम्पि सन्धाय वुत्तं. पि-सद्देन न केवलं मूलचीवरमेवाति दस्सेति.

अकालचीवरसिक्खापदवण्णना निट्ठिता.

४. पुराणचीवरसिक्खापदवण्णना

‘‘अम्हाकमेव ञाती’’ति ञायतीति ञाति, साव ञातिका, न ञातिका अञ्ञातिका, ताय अञ्ञातिकाय. तेनाह ‘‘न ञातिकाया’’ति. मातितो वा पितितो वाति मातिपक्खतो वा पितिपक्खतो वा. याव सत्तमं युगन्ति (पारा. अट्ठ. २.५०३-५०५) याव सत्तमस्स पुरिसस्स, सत्तमाय वा इत्थिया आयुप्पमाणं, याव पितामहयुगं पितामहियुगं मातामहयुगं मातामहियुगन्ति वुत्तं होति. अथ वा याव सत्तमं युगन्ति याव सत्तमद्वन्दन्ति अत्थो. युगसद्दो चेत्थ एकसेसनयेन दट्ठब्बो ‘‘युगो च युगो च युगा’’ति. एवञ्हि तत्थ तत्थ द्वन्दं गहितं होति. केनचि आकारेन असम्बद्धायाति भातुभगिनिभागिनेय्यपुत्तपपुत्तादीसु येन केनचि आकारेन असम्बद्धाय. पिता, पितुपिता, तस्स पिता, तस्सापि पिताति एवं याव सत्तमा युगा, पिता, पितुमाता, तस्सा पिता च माता च भाता च भगिनी च, पुत्ता च, धीतरो चाति एवम्पि उद्धञ्च अधो च याव सत्तमा युगा, पिता, पितुभाता, पितुभगिनी, पितुपुत्ता, पितुधीतरो, तेसम्पि पुत्तधीतुपरम्पराति एवम्पि याव सत्तमा युगा, माता, मातुमाता, तस्सा माता, तस्सापि माताति एवं याव सत्तमा युगा, माता, मातुपिता, तस्स पिता च माता च भाता च भगिनी च पुत्ता च धीतरो चाति एवम्पि उद्धञ्च अधो ¶ च याव सत्तमा युगा, माता, मातुभाता, मातुभगिनी, मातुपुत्ता, मातुधीतरो ¶ , तेसम्पि पुत्तधीतुपरम्पराति एवम्पि याव सत्तमा युगा, ताव नेव मातुसम्बन्धेन, न पितुसम्बन्धेन या सम्बद्धा, सा ‘‘अञ्ञातिका नामा’’ति वुत्तं होति.

साकियानियो वियाति पञ्चसतमत्ता साकियानियो विय. निदस्सनमत्तञ्चेतं, तस्मा भिक्खुभावे ठत्वा परिवत्तलिङ्गा भिक्खुनियोपि इध सुद्धभिक्खुसङ्घे ‘‘उपसम्पन्ना’’ इच्चेव वेदितब्बा. उभतोसङ्घे वाति भिक्खुनिसङ्घे ञत्तिचतुत्थेन, भिक्खुसङ्घे ञत्तिचतुत्थेनाति एवं उभतोसङ्घे वा. पुराणचीवरन्ति एत्थ चीवरन्ति निवासनपारुपनुपगमेव अधिप्पेतन्ति आह ‘‘रजित्वा’’तिआदि. कप्पं कत्वाति कप्पबिन्दुं दत्वा. ‘‘इमिना अदिन्नकप्पं पाचित्तियवत्थु न होतीति दस्सेती’’ति (सारत्थ. टी. २.५०५) वदन्ति. परिभोगसीसेनाति कायेन फुसित्वा परिभोगसीसेन. अंसेति जत्तुम्हि. मत्थकेति सीसमत्थके. सचे पन पच्चत्थरणस्स हेट्ठा कत्वा निपज्जति, हत्थेहि वा उक्खिपित्वा आकासे वितानं कत्वा सीसेन असम्फुसन्तो गच्छति, अयं परिभोगो नाम न होति.

कायविकारं वा करोतीति यथा सा ‘‘धोवापेतुकामो अय’’न्ति जानाति, एवं कायविकारं करोति. ‘‘अन्तोद्वादसहत्थे ओकासे ठत्वा उपरि वा खिपती’’ति इमिना उपचारं मुञ्चित्वा ओरतो खिपन्तस्स अनापत्तीति दस्सेति. अञ्ञस्स वा हत्थे पेसेतीति अन्तोद्वादसहत्थे ओकासे ठत्वा सिक्खमानसामणेरसामणेरिउपासकइत्थियादीसु यस्स कस्सचि अञ्ञस्स हत्थे वा पेसेति. सोति उपासको च सामणेरो च. उपसम्पज्जित्वा धोवतीति एत्थ उपासको लिङ्गे परिवत्ते भिक्खुनीसु पब्बजित्वा उपसम्पज्जित्वा धोवति, सामणेरो लिङ्गे परिवत्ते भिक्खुनीसु उपसम्पज्जित्वा धोवतीति यथायोगं अत्थो गहेतब्बो. सचे पन भिक्खुनिया हत्थे दिन्नं होति, सचे लिङ्गे परिवत्ते धोवति, वट्टति.

एत्थ च एकस्स तिक्खत्तुं निस्सज्जनाभावतो तीणिपि कारेन्तस्स एकेन निस्सग्गियं, द्वीहि द्वे दुक्कटानि. द्वे कारेन्तस्स एकेन निस्सग्गियं, दुतियेन दुक्कटं. तेनाह ‘‘धोवनादीनि तीणी’’तिआदि. ‘‘एकेन वत्थुना’’ति ¶ पठमं कत्वा निट्ठापितं सन्धाय वुत्तं. सचे पन ‘‘इमं चीवरं रजित्वा धोवित्वा आनेही’’ति वुत्ते सा भिक्खुनी पठमं धोवित्वा पच्छा रजति, निस्सग्गियेन दुक्कटमेव, एवं सब्बेसु विपरीतवचनेसु नयो नेतब्बो. सचे पन ‘‘धोवित्वा आनेही’’ति वुत्ता धोवति चेव रजति च, धोवापनपच्चया एव आपत्ति, रजने अनापत्ति. एवं सब्बत्थ. तेनाह ‘‘सचे पन‘धोवा’ति वुत्ता’’तिआदि. भिक्खूनं वसेन एकतो उपसम्पन्नाय धोवापेन्तस्स यथावत्थुकमेवाति आह ‘‘भिक्खुनिसङ्घवसेना’’तिआदि.

अञ्ञस्स ¶ वा सन्तकन्ति अञ्ञस्स सन्तकं पुराणचीवरं धोवापेन्तस्साति अत्थो. निसीदनपच्चत्थरणन्ति अञ्ञस्स वा अत्तनो वा सन्तकं निसीदनञ्चेव पच्चत्थरणञ्च. निवासनपारुपनुपगस्सेव च इध ‘‘पुराणचीवर’’न्ति अधिप्पेतत्ता अत्तनो सन्तकम्पि निसीदनपच्चत्थरणं धोवापेन्तस्स दुक्कटमेव होति, न निस्सग्गियं. अवुत्ता वा धोवतीति उद्देसाय वा ओवादाय वा आगता किलिट्ठचीवरं दिस्वा ठपितट्ठानतो वा गहेत्वा, ‘‘देथ अय्य, धोविस्सामी’’ति आहरापेत्वा वा धोवति चेव रजति च आकोटेति च, अयं अवुत्ता धोवति नाम. यापि ‘‘इमं चीवरं धोवा’’ति दहरं वा सामणेरं वा आणापेन्तस्स भिक्खुनो वचनं सुत्वा ‘‘आहरथय्य, अहं धोविस्सामी’’ति धोवति, तावकालिकं वा गहेत्वा धोवित्वा रजित्वा देति, अयम्पि अवुत्ता धोवति नाम.

अञ्ञं वा परिक्खारन्ति उपाहनत्थविकपत्तत्थविकअंसबद्धककायबन्धनमञ्चपीठतट्टिकादिं यं किञ्चि. ‘‘उपचारे ठत्वा’’ति वचनतो पेसित्वा धोवनेपि अनापत्ति. उपचारेति अन्तोद्वादसहत्थे ओकासे.

पुराणचीवरसिक्खापदवण्णना निट्ठिता.

५. चीवरप्पटिग्गहणसिक्खापदवण्णना

छन्नन्ति खोमादीनं छन्नं चीवरानं मज्झे. उपचारं मुञ्चित्वाति द्वादसहत्थूपचारं मुञ्चित्वा. पि-सद्देन धम्मकथं कथेन्तस्स चतस्सो परिसा चीवरानि च नानाविरागवत्थानि च आहरित्वा पादमूले ठपेन्ति, उपचारे वा ठत्वा उपरि खिपन्ति, ‘‘सचे सादियति, पटिग्गहितमेवा’’ति एत्थ वत्तब्बमेव ¶ नत्थीति दस्सेति. खिपतूति दिवा वा रत्तिभागे वा खिपतु. पटिग्गहितमेव होतीति किञ्चापि ‘‘इदं भिक्खुनिया, इदं अञ्ञेस’’न्ति ञातुं न सक्का, तथापि अचित्तकभावेन गहितमेव होति. यस्स कस्सचि पन अनुपसम्पन्नस्साति सिक्खमानसामणेरसामणेरिउपासकउपासिकादीसु यस्स कस्सचि अनुपसम्पन्नस्स. ठपितन्ति भिक्खुनिया ठपितं. पंसुकूलं अधिट्ठहित्वाति ‘‘अस्सामिकं इद’’न्ति सञ्ञं उप्पादेत्वा. अस्सामिकञ्हि ‘‘पंसुकूल’’न्ति वुच्चति. इमिना ‘‘अम्हाकमत्थाय ठपित’’न्तिआदिकाय सञ्ञाय गहेतुं न वट्टतीति दस्सेति. अञ्ञत्र पारिवत्तकाति परिवत्तेतब्बं परिवत्तं, परिवत्तमेव पारिवत्तकं, परिवत्तेत्वा दिय्यमानं, तं विनाति अत्थो. तेनाह ‘‘यं अन्तमसो हरीटकक्खण्डम्पी’’तिआदि. ¶ आभोगं कत्वाति चित्तेन समन्नाहरित्वा. सचे भिक्खुनी वस्सावासिकम्पि देति, तम्पि यथावुत्तविधानं अकत्वा गहेतुं न वट्टतीति वेदितब्बं.

पटिलाभेनाति गहणेन. तिकपाचित्तियन्ति तीणि परिमाणानि अस्साति तिकं,तिकञ्च तं पाचित्तियञ्चाति तिकपाचित्तियं, अञ्ञातिकाय ञातिकसञ्ञिवेमतिकअञ्ञातिकसञ्ञीनं वसेन तीणि पाचित्तियानीति अत्थो. एकतोउपसम्पन्नायाति भिक्खुनीनं सन्तिके उपसम्पन्नाय. ताय हि हत्थतो अञ्ञत्र पारिवत्तका चीवरं पटिग्गण्हन्तस्स दुक्कटं, भिक्खूनं सन्तिके उपसम्पन्नाय पन पाचित्तियमेव. ‘‘पत्तत्थविकादिम्हि च अनधिट्ठातब्बपरिक्खारे’’ति इमिना भिसिच्छविम्पि सङ्गण्हाति. सा हि महन्तापि सेनासनसङ्गहितत्ता चीवरसङ्खं न गच्छतीति नेव अधिट्ठानुपगा, न विकप्पनुपगा च. वुत्तञ्हि समन्तपासादिकायं ‘‘सचेपि मञ्चप्पमाणा भिसिच्छवि होति, वट्टतियेवा’’ति (पारा. अट्ठ. २.५१४). ‘‘हत्थतो चीवरं पटिग्गण्हाती’’ति वचनतो पन अञ्ञातिकाय भिक्खुनिया पेसितग्गहणेपि अनापत्ति. पटिग्गहणतो, परिवत्तनाकरणतो च किरियाकिरियं.

चीवरप्पटिग्गहणसिक्खापदवण्णना निट्ठिता.

६. अञ्ञातकविञ्ञत्तिसिक्खापदवण्णना

गेहस्स ¶ पति जेट्ठोति गहपति, तं गहपतिं, इध पन अपब्बजितो यो कोचि मनुस्सो अधिप्पेतो. तेनाह ‘‘भिक्खूसु अपब्बजितमनुस्स’’न्ति. एसेव नयो गहपतानिन्ति एत्थापि. ‘‘विञ्ञापेय्या’’ति इदं सुद्धकत्तुअत्थे च हेतुकत्तुअत्थे च वत्ततीति आह ‘‘याचेय्य वा याचापेय्य वा’’ति. याचापनञ्चेत्थ अत्तनो अत्थायेवाति दट्ठब्बं. एवञ्च पन कत्वा ‘‘अनाणत्तिक’’न्ति इदं समत्थितं होति. अञ्ञत्र समयाति समेति एत्थ, एतेन वा संगच्छति सत्तो, सभावधम्मो वा सहजातादीहि, उप्पादादीहि वाति समयो, कालो, धम्मप्पवत्तिमत्तताय अत्थतो अभूतोपि हि कालो धम्मप्पवत्तिया अधिकरणं, करणं विय च कप्पनामत्तसिद्धेन रूपेन वोहरीयति, तं समयं ठपेत्वाति अत्थो. तेनाह ‘‘यो अच्छिन्नचीवरो वा होती’’तिआदि. तत्थ राजादीसु येहि केहिचि अच्छिन्नं चीवरं एतस्साति अच्छिन्नचीवरो. यथाह ‘‘अच्छिन्नचीवरो नाम भिक्खुस्स चीवरं अच्छिन्नं होति, राजूहि वा चोरेहि वा धुत्तेहि वा येहि केहिचि वा अच्छिन्नं होती’’ति. अग्गिआदीसु येन केनचि नट्ठं चीवरमेतस्साति नट्ठचीवरो. यथाह ‘‘नट्ठचीवरो नाम भिक्खुस्स चीवरं अग्गिना वा दड्ढं होति, उदकेन वा वूळ्हं होति, उन्दूरेहि वा उपचिकाहि वा खायितं होति ¶ , परिभोगजिण्णं वा होती’’ति (पारा. ५१९). समयाति अञ्ञत्रसद्दापेक्खाय उपयोगत्थे निस्सक्कवचनन्ति आह ‘‘तं समय’’न्ति. अञ्ञस्मिन्ति अञ्ञस्मिं समये.

तिकपाचित्तियन्ति अञ्ञातके अञ्ञातकसञ्ञिवेमतिकञ्ञातकसञ्ञीनं वसेन तीणि पाचित्तियानि. समयेति यथावुत्ते अच्छिन्नचीवरकाले च नट्ठचीवरकाले च. ञातकप्पवारिते वा विञ्ञापेन्तस्साति ञातके, पवारिते च ‘‘तुम्हाकं सन्थतं देथा’’ति याचन्तस्स. एत्थ (पारा. अट्ठ. २.५२१) च सङ्घवसेन पवारिते पमाणमेव याचितुं वट्टति, पुग्गलिकवसेन पवारिते पन यं यं पवारेन्ति, तं तमेव विञ्ञापेतब्बं. यो हि चतूहि पच्चयेहि पवारेत्वा सयमेव सल्लक्खेत्वा कालानुकालं चीवरादीनि दिवसे दिवसे यागुभत्तादीनि देति, एवं येन येन अत्थो, तं तं देति, तस्स विञ्ञापनकिच्चं नत्थि. यो पन पवारेत्वा बालताय ¶ वा सतिसम्मोसेन वा न देति, सो विञ्ञापेतब्बो. यो ‘‘मय्हं गेहं पवारेमी’’ति वदति, तस्स गेहं गन्त्वा यथासुखं निसीदितब्बं निपज्जितब्बं, न किञ्चि गहेतब्बं. यो पन ‘‘यं मय्हं गेहे अत्थि, तं पवारेमी’’ति वदति, यं तत्थ कप्पियं, तं विञ्ञापेतब्बं. गेहे पन निसीदितुं वा निपज्जितुं वा न लब्भति. तस्सेवत्थायाति ‘‘अञ्ञस्सा’’ति लद्धवोहारस्स तस्सेव बुद्धरक्खितस्स वा धम्मरक्खितस्स वा अत्थाय. अत्तनो धनेन गण्हन्तस्साति अत्तनो कप्पियभण्डेन कप्पियवोहारेनेव गण्हन्तस्स चेतापेन्तस्स, परिवत्तापेन्तस्साति अत्थो.

अञ्ञातकविञ्ञत्तिसिक्खापदवण्णना निट्ठिता.

७. ततुत्तरिसिक्खापदवण्णना

तं-सद्दो चेत्थ पकतत्थवचनो. चेति निपातमत्तं. चेति वा यदीति अत्थो, तस्स ‘‘पवारेय्या’’ति इमिना सम्बन्धो वेदितब्बो. पवारेय्य चेति यदि पवारेय्याति अत्थो. ‘‘अभीति उपसग्गो’’ति (सारत्थ. टी. २.५२३-५२४) इमिना तस्स अत्थविसेसाभावं दस्सेति. तेनाह ‘‘हरितुन्ति अत्थो’’ति. पवारसद्दस्स इच्छायं वत्तमानत्ता ‘‘इच्छापेय्या’’ति वुत्तं. इच्छं उप्पादेय्याति पच्चये इच्छं उप्पादेय्य. उपनिमन्तनायेतं अधिवचनं. तेनाह ‘‘यावत्तक’’न्तिआदि. नेक्खम्मन्ति पब्बज्जं. दट्ठूति दट्ठुं. छन्दानुरक्खणत्थञ्हेत्थ अनुनासिकलोपो. खेमतोति निब्भयतो. कायेन वा वाचाय वा अभिहरित्वा निमन्तेय्याति सम्बन्धो. यथा च कायेन अभिहरेय्य, वाचाय च, तं विधिं दस्सेतुं ‘‘उपनेत्वा’’तिआदि ¶ वुत्तं सअन्तरन्ति अन्तरवासकसहितं. उत्तरन्ति उत्तरासङ्गं. परमन्ति अवसानं. अस्स चीवरस्साति अस्स समुदायभूतस्स हरितब्बस्स चीवरस्स. तग्गुणसंविञ्ञाणो हि अयं बाहिरत्थसमासो यथा ‘‘लम्बकण्णो’’ति दट्ठब्बं. तेनाह ‘‘निवासनेना’’तिआदि. उक्कट्ठपरिच्छेदेन हि सब्बे तंपरमंयेव गहेतुं लभन्ति.

यस्मा ¶ अच्छिन्नसब्बचीवरेन तिचीवरमत्तकेनेव भिक्खुना एवं पटिपज्जितब्बं, अञ्ञेन पन अञ्ञथापि, तस्मा तं विभागं दस्सेतुं ‘‘तत्रायं विनिच्छयो’’तिआदि वुत्तं. अधिट्ठितचीवरस्साति तिचीवराधिट्ठाननयेन वा परिक्खारचोळवसेन वा येन केनचि अधिट्ठितचीवरस्स, इदञ्च येभुय्येन अधिट्ठहित्वा चीवरं परिभुञ्जतो वुत्तं, न पन अनधिट्ठितचीवरस्स चीवरे अच्छिन्ने अयं विधि न सम्भवतीति. यस्स वा तिचीवरतो अधिकम्पि चीवरं अञ्ञत्थ अत्थि, तत्थ नत्थि, तेनापि तदा तत्थ अभावतो द्वे सादितुं वट्टति. पकतियाव सन्तरुत्तरेन चरतीति (सारत्थ. टी. २.५२३-५२४) अत्थतकथिनत्ता वा सासङ्कसिक्खापदवसेन वा अविप्पवाससम्मुतिवसेन वा ततियस्स अलाभेन वा चरति. ‘‘द्वे नट्ठानी’’ति अधिकारत्ता वुत्तं ‘‘द्वे सादितब्बानी’’ति. एकं सादियन्तेनेव समो भविस्सतीति तिण्णं चीवरानं द्वीसु नट्ठेन एकं सादियन्तेन समो भविस्सति उभिन्नम्पि सन्तरुत्तरपरमताय अवट्ठानतो. यस्स एकंयेव होति अञ्ञेन केनचि कारणेन विनट्ठसेसचीवरत्ता.

पञ्चसु नट्ठेसूति तिचीवरं उदकसाटिका संकच्चिकाति इमेसु पञ्चसु चीवरेसु नट्ठेसु. ‘‘एकस्मिं वा नट्ठे’’ति वचनविपरिणामं कत्वा योजेतब्बं. ततो उत्तरीति सन्तरुत्तरपरमतो उत्तरि.

सेसकं आहरिस्सामीति द्वे चीवरानि कत्वा ‘‘सेसकं पुन आहरिस्सामी’’ति अत्थो. सेसकं तुय्हंयेव होतूति वुत्तस्साति दानसमये एवं वुत्तस्स. सचे पन ‘‘सेसकं आहरिस्सामी’’ति वत्वा गहेत्वा गमनसमयेपि ‘‘सेसकं तुय्हंयेव होतू’’ति वदन्ति, लद्धकप्पियमेव. न अच्छिन्ननट्ठकारणा दिन्नन्ति बाहुसच्चादिगुणवसेन दिन्नं. वुत्तनयेनाति ‘‘ञातकप्पवारिते वा विञ्ञापेन्तस्स, समये च अञ्ञस्स वा ञातकप्पवारिते तस्सेवत्थाय विञ्ञापेन्तस्स’’ति वुत्तनयेन.

ततुत्तरिसिक्खापदवण्णना निट्ठिता.

८. पठमउपक्खटसिक्खापदवण्णना

भिक्खुं ¶ ¶ पनेव उद्दिस्साति एत्थ पनाति निपातमत्तं, तथा एव-सद्दोपि. तेनाह ‘‘इत्थन्नामस्सा’’तिआदि. अपदिसित्वाति कथेत्वा, आरब्भाति वा अत्थो. अञ्ञातकस्स गहपतिस्साति अञ्ञातकगहपतिनाति अत्थो. करणत्थे हि इदं सामिवचनं. अट्ठकथायं पन इदं सुविञ्ञेय्यन्ति न विचारितं. चीवरं चेतापेन्ति परिवत्तेन्ति एतेनाति चीवरचेतापन्नं (सारत्थ. टी. २.५२८-५२९), चीवरमूलं, न-कारो पनेत्थ आगमो, ‘‘चीवरचेतापन’’न्तिपि पठन्ति. तं पन यस्मा हिरञ्ञादीसु अञ्ञतरं होति, तस्मा ‘‘हिरञ्ञादिक’’न्ति वुत्तं. तत्थ हिरञ्ञन्ति कहापणो वुच्चति. आदिसद्देन सुवण्णादीनं गहणं. उपक्खटन्ति उपट्ठापितं. तं उपक्खरणं तेसं तथा सज्जितन्ति आह ‘‘उपक्खटं होतीति सज्जितं होती’’ति. संहरित्वा ठपितन्ति रासिं कत्वा ठपितं. परिवत्तनञ्च अकतस्स कारापनं, कतस्स किणनन्ति आह ‘‘कारेत्वा वा किणित्वा वाति अत्थो’’ति. अच्छादेस्सामीति पारुपेस्सामीति वुत्तं होति. तेनाह ‘‘वोहारवचनमेत’’न्ति. वोहारवचनन्ति च उपचारवचनन्ति अत्थो.

‘‘तत्र चे सो भिक्खू’’तिआदीसु को पदसम्बन्धोति आह ‘‘यत्र सो गहपति वा’’तिआदि. पुब्बे अप्पवारितोति ‘‘दस्सामि, कीदिसेन ते, भन्ते, चीवरेन अत्थो, कीदिसं ते चीवरं चेतापेमी’’ति पुब्बे अवुत्तो. उपसङ्कमित्वाति गन्त्वा. पदभाजने पचुरवोहारवसेन ‘‘घरं गन्त्वा’’ति (पारा. ५२९) वुत्तं. एत्थ च पचुरवोहारवसेनाति येभुय्यवोहारवसेन. येभुय्येन हि घरसामिकं दट्ठुकामा तस्स घरं गच्छन्तीति तथेव बहुलवोहारो. विकप्पन्ति विसिट्ठो कप्पो विकप्पो, वि-सद्दो चेत्थ विसिट्ठत्थो. तेनाह ‘‘विसिट्ठकप्प’’न्ति. इमिना वचनत्थमाह. ‘‘अधिकविधान’’न्ति इमिना पन अधिप्पायत्थं. यथा पन तमापज्जतीति येनाकारेन तं विकप्पं आपज्जति. तं दस्सेतुन्ति तं आकारं दस्सेतुं.

‘‘साधू’’ति अयं सद्दो सम्पटिच्छनसम्पहंसनसुन्दरायाचनादीसु दिस्सति. तथा हेस ‘‘साधु, भन्तेति खो सो भिक्खु भगवतो भासितं ¶ अभिनन्दित्वा अनुमोदित्वा’’तिआदीसु (म. नि. ३.८६) सम्पटिच्छने दिस्सति, ‘‘साधु साधु सारिपुत्ता’’तिआदीसु (दी. नि. ३.३४९; म. नि. १.३४०) सम्पहंसने.

‘‘साधु ¶ धम्मरुचि राजा, साधु पञ्ञाणवा नरो;

साधु मित्तानमद्दुब्भो, पापस्साकरणं सुख’’न्तिआदीसु. (जा. २.१८.१०१) –

सुन्दरे, ‘‘साधु मे, भन्ते भगवा, संखित्तेन धम्मं देसेतू’’तिआदीसु (सं. नि. ३.६४-६८) आयाचने, इधापि आयाचनेयेव दट्ठब्बोति (दी. नि. अट्ठ. १.१८९; म. नि. अट्ठ. १.१ मूलपरियायसुत्तवण्णना; सु. नि. अट्ठ. १.११५ अग्गिकभारद्वाजसुत्तवण्णना; बु. वं. अट्ठ. १.४९) आह ‘‘साधूति आयाचने निपातो’’ति. तत्थ आयाचनेति अभिमुखं याचने, अभिपत्थनायन्ति अत्थो. परिवितक्के निपातोति सम्बन्धो. आलपतीति आमन्तेति. आयतादीसूति एत्थ आदिसद्देन वित्थतअप्पितसण्हानं गहणं. यस्मा पन न इमस्स आपज्जनमत्तेनेव आपत्ति सीसं एति, तस्मा ‘‘तस्स वचनेना’’तिआदि वुत्तं. पयोगेति सुत्तपरियेसनादिपयोगे.

महग्घं चेतापेतुकामं अप्पग्घन्ति वीसतिअग्घनकं चीवरं चेतापेतुकामं ‘‘अलं मय्हं तेन, दसअग्घनकं वा अट्ठग्घनकं वा देही’’ति वदन्तस्साति अत्थो. एवरूपन्ति एवं समभागं, इमिना समकन्ति वुत्तं होति. तञ्च खो अग्घवसेनेव, न पमाणवसेन. अग्घवड्ढनकञ्हि इदं सिक्खापदं.

पठमउपक्खटसिक्खापदवण्णना निट्ठिता.

९. दुतियउपक्खटसिक्खापदवण्णना

कस्मा इमिना नयेन अत्थो वेदितब्बोति आह ‘‘इदञ्ही’’तिआदि. हीति कारणत्थे निपातो. न कोचि विसेसोति आह ‘‘केवल’’न्तिआदि.

दुतियउपक्खटसिक्खापदवण्णना निट्ठिता.

१०. राजसिक्खापदवण्णना

राजतो ¶ भोग्गन्ति राजतो लद्धभोग्गं. राजभोग्गोति राजामत्तो. राजतो भोगोति रञ्ञा ¶ दिन्नं इस्सरियं. इमिनातिआदीति ‘‘इमिना चीवरचेतापन्नेन चीवरं चेतापेत्वा इत्थन्नामं भिक्खुं चीवरेन अच्छादेही’’ति इदं. आगमनसुद्धिन्ति मूलसुद्धिं. यदि हि इमिना कप्पियनीहारेन अपेसेत्वा ‘‘इदं इत्थन्नामस्स भिक्खुनो देही’’ति पेसेय्य, सोपि दूतो तं भिक्खुं उपसङ्कमित्वा एवं वदेय्य ‘‘इदं खो, भन्ते, आयस्मन्तं उद्दिस्स चीवरचेतापन्नं आभतं, पटिग्गण्हातु आयस्मा चीवरचेतापन्न’’न्ति (पारा. ५३८), तदा पटिक्खिपित्वापि कप्पियकारकं पुट्ठेन तं निद्दिसितुं न वट्टति. तेनाह ‘‘सचे ही’’तिआदि. अकप्पियवत्थुं आरब्भाति हिरञ्ञादिं आरब्भ. ईदिसेन दूतवचनेनाति ‘‘पटिग्गण्हातु आयस्मा चीवरचेतापन्न’’न्ति एवरूपेन दूतवचनेन. तस्माति यस्मा सम्पटिच्छितुं अकप्पियं होति, तस्मा. सुवण्णन्ति जातरूपं. रजतन्ति रूपियं. कहापणेनाति सुवण्णमयो वा रूपियमयो वा पाकतिको वा कहापणो. मासकोति लोहमासको वा होतु, दारुमासको वा होतु, जतुमासको वा होतु, यो यो यत्थ यत्थ जनपदे यदा यदा वोहारं गच्छति, अन्तमसो अट्ठिमयोपि चम्ममयोपि रुक्खफलबीजमयोपि समुट्ठापितरूपोपि असमुट्ठापितरूपोपि सब्बो इध मासकोति वेदितब्बो. एत्थ च यं वत्तब्बं, तं रूपियसिक्खापदे वक्खाम.

मुत्ताति हत्थिकुम्भजादिका अट्ठविधा मुत्ता. तथा हि हत्थिकुम्भं वराहदाठं, भुजङ्गसीसं, वलाहकं, वेळु, मच्छसिरो, सङ्खो, सिप्पीति अट्ठ मुत्तायोनियो. तत्थ या मच्छसङ्खसिप्पिजाता, सा सामुद्दिका, भुजङ्गजापि काचि सामुद्दिका होति. इतरा असामुद्दिका. यस्मा पन बहुलं सामुद्दिकाव मुत्ता लोके दिस्सन्ति, तत्थापि सिप्पिजाव, इतरा कदाचि. तस्मा सम्मोहविनोदनियं ‘‘मुत्ताति सामुद्दिकमुत्ता’’ति (विभ. अट्ठ. १७२) वुत्तं. मणीति ठपेत्वा वेळुरियादिके अन्तमसो जातिफलिकं उपादाय सब्बोपि नीलपीतादिवण्णभेदो मणीति वेदितब्बो, पचित्वा कतो पन काचमणियेवेको पत्तादिभण्डमूलत्थं सम्पटिच्छितुं वट्टति. वेळुरियो नाम वंसवण्णमणि. सङ्खोति धमनसङ्खो धोतविद्धो रतनमिस्सो, पानीयसङ्खो ¶ पन रतनामिस्सकतो, सो च अञ्जनादिभेसज्जत्थाय, भण्डमूलत्थाय च सम्पटिच्छितुं वट्टति. सिलाति धोतविद्धा रतनसंयुत्ता मुग्गवण्णा सिला. रतनेन पन अमिस्सा सत्थकनिसानादिअत्थाय पटिग्गण्हितुं वट्टति. एत्थ च ‘‘रतनसंयुत्ताति सुवण्णेन सद्धिं योजेत्वा पचित्वा कता’’ति वदन्ति. पवाळन्ति धोतम्पि अधोतम्पि सब्बं पवाळं. लोहितङ्कोति रत्तमणि. मसारगल्लन्ति कबरमणि. यं ‘‘मरकत’’न्तिपि वुच्चति.

सत्त धञ्ञानीति सानुलोमानि सालिआदीनि सत्त धञ्ञानि. नीवारादिउपधञ्ञस्स पन सालिआदिमूलधञ्ञन्तोगधत्ता ‘‘सत्त धञ्ञानी’’ति वुत्तं. दासिदासखेत्तवत्थुपुप्फारामफलारामादयोति ¶ एत्थ दासी नाम अन्तोजातधनक्कीतकरमरानीतप्पभेदा. तथा दासो. खेत्तं नाम यस्मिं पुब्बण्णं रुहति. वत्थु नाम यस्मिं अपरण्णं रुहति. यत्थ वा उभयम्पि रुहति, तं खेत्तं. तदत्थाय अकतभूमिभागो वत्थु. खेत्तवत्थुसीसेन चेत्थ वापितळाकादीनिपि सङ्गहितानेव. वस्सिकादीनं पुप्फनको पुप्फारामो. अम्बफलादीनं फलनको फलारामो. न केवलञ्च अत्तनोयेवत्थाय सम्पटिच्छितुं न वट्टति, सचेपि कोचि जातरूपरजतं आनेत्वा ‘‘इदं सङ्घस्स दम्मि, आरामं वा करोथ, चेतियं वा भोजनसालादीनं वा अञ्ञतर’’न्ति वदति, इदम्पि सम्पटिच्छितुं न वट्टति. ‘‘यस्स कस्सचि हि अञ्ञस्स अत्थाय सम्पटिच्छन्तस्स दुक्कटं होती’’ति (पारा. अट्ठ. २.५३८-५३९) महापच्चरियं वुत्तं. तेनाह ‘‘चेतियसङ्घगणपुग्गलानं वा अत्थाय सम्पटिच्छितुं न वट्टन्ती’’ति.

सचे पन सङ्घं वा गणं वा पुग्गलं वा अनामसित्वा ‘‘इदं हिरञ्ञसुवण्णं चेतियस्स देम, विहारस्स देम, नवकम्मस्स देमा’’ति वदन्ति, पटिक्खिपितुं न वट्टति. ‘‘इमे इदं भणन्ती’’ति कप्पियकारकानं आचिक्खितब्बं. ‘‘चेतियादीनं अत्थाय तुम्हे गहेत्वा ठपेथा’’ति वुत्ते पन ‘‘अम्हाकं गहेतुं न वट्टती’’ति पटिक्खिपितब्बं.

वेय्यावच्चकरोति किच्चकरो. इध पन सब्बो किच्चकरोव ‘‘वेय्यावच्चकरो’’ति अधिप्पेतोति आह ‘‘कप्पियकारको’’ति. एसो खोति ‘‘असुकवीथियं असुकघरे असुकनामो’’ति परम्मुखं वदति. इतरम्पीति परम्मुखानिद्दिट्ठम्पि. ‘‘अत्थो मे, आवुसो, चीवरेना’’ति एतं चोदनालक्खणनिदस्सनन्ति सम्बन्धो. तत्थ चोदनालक्खणनिदस्सनन्ति वाचाय ¶ चोदनालक्खणनिदस्सनं. तेनाह ‘‘सचे ही’’तिआदि. इदं वा वचनं वत्तब्बन्ति सम्बन्धो. एतस्स वा अत्थो याय कायचि भासाय वत्तब्बोति सम्बन्धो. ‘‘देहि मे चीवरं, आहर मे चीवरं, परिवत्तेहि मे चीवरं, चेतापेहि मे चीवर’’न्ति एतानि पन वचनानि एतेसं वा अत्थो याय कायचि भासाय न वत्तब्बो. तेनाह ‘‘देहि मे’’तिआदि. साधेय्याति निप्फादेय्य. इच्चेतं कुसलन्ति एवं यावततियं चोदनेन तस्स चीवरस्स यदेतं अभिनिप्फादनं, एतं कुसलं साधु सुट्ठूति अत्थो. तेनाह ‘‘एतं सुन्दर’’न्ति.

छक्खत्तुं परमो परिच्छेदो अस्साति छक्खत्तुपरमं. इदञ्हि ‘‘ठातब्ब’’न्ति इमिस्सा किरियाय विसेसनं, छक्खत्तुपरमं ठानं कातब्बन्ति अत्थो. तेनाह ‘‘भावनपुंसकवचनमेत’’न्ति, एतं भावे ठातब्बन्ति वुत्तधात्वत्थमत्ते साधेतब्बे नपुंसकलिङ्गवचनन्ति अत्थो. न निसीदितब्बन्ति ‘‘इध, भन्ते, निसीदथा’’ति वुत्तेपि न निसीदितब्बं ¶ . न आमिसं पटिग्गहेतब्बन्ति यागुखज्जकादिभेदं किञ्चि आमिसं ‘‘गण्हथ, भन्ते’’ति याचियमानेनापि न गण्हितब्बं. न धम्मो भासितब्बोति (पारा. अट्ठ. २.५३८-५३९) ‘‘मङ्गलं वा अनुमोदनं वा भासथा’’ति याचियमानेनापि न किञ्चि भासितब्बं. ठानं भञ्जतीति ठितिं विनासेति. ठत्वा चीवरं गहेतुं आगतेन हि तं उद्दिस्स तुण्हीभूतेन ठातब्बमेव, न निसज्जादिकं कातब्बं. इमिना पन तं कतन्ति ठानं विनासितं होति. तेनाह ‘‘आगतकारणं विनासेती’’ति. ‘‘आगतकारणं नाम ठानमेव, तस्मा ‘न कातब्ब’न्ति वारितस्स कतत्ता निसज्जादीसु कतेसु छसु ठानेसु एकं ठानं भञ्जती’’ति (सारत्थ. टी. २.५३७-५३९) अयमेत्थ अधिप्पायो. छक्खत्तुपरमं तुण्हीभूतेन उद्दिस्स ठातब्बं. ‘‘न अञ्ञं किञ्चि कातब्ब’’न्ति हि इदं ठानलक्खणं. तेनेवाह ‘‘इद’’न्तिआदि. तत्थ इदन्ति ‘‘चतुक्खत्तुं पञ्चक्खत्तुं, छक्खत्तुपरमं तुण्हीभूतेन उद्दिस्स ठातब्ब’’न्ति वचनं. एत्थ च ‘‘निसीदनादिम्हि कते पुन चीवरं गहेतुं न लभती’’ति केचि. ‘‘द्वे ठानानि परिहायन्ती’’ति अञ्ञे. ‘‘एकं ठानं परिहायती’’ति अपरे. उभयं करोतीति चोदेतिपि तिट्ठतिपि.

‘‘तत्र तत्र ठाने तिट्ठती’’ति इदं चोदकस्स ठितट्ठितट्ठानतो अपक्कम्म तत्र तत्र चीवरं उद्दिस्स ठानंयेव सन्धाय वुत्तं. एत्थाति एतेसु द्वीसु चोदनाट्ठानेसु.

किं ¶ पन सब्बकप्पियकारकेसु (पारा. अट्ठ. २.५३८-५३९; वि. सङ्ग. अट्ठ. ६५) एवं पटिपज्जितब्बन्ति? न पटिपज्जितब्बं. अयञ्हि कप्पियकारको नाम सङ्खेपतो दुविधो निद्दिट्ठो च अनिद्दिट्ठो च. तत्थ च निद्दिट्ठो दुविधो भिक्खुना निद्दिट्ठो, दूतेन निद्दिट्ठोति. अनिद्दिट्ठोपि दुविधो मुखवेवटिककप्पियकारको, परम्मुखकप्पियकारकोति. तेसु भिक्खुना निद्दिट्ठो सम्मुखासम्मुखवसेन चतुब्बिधो होति, तथा दूतेन निद्दिट्ठोपि.

कथं? इधेकच्चो भिक्खुस्स चीवरत्थाय दूतेन अकप्पियवत्थुं पहिणति, दूतो च तं भिक्खुं उपसङ्कमित्वा ‘‘इदं, भन्ते, इत्थन्नामेन तुम्हाकं चीवरत्थाय पहितं, गण्हथ न’’न्ति वदति. भिक्खु ‘‘इदं न कप्पती’’ति पटिक्खिपति. दूतो ‘‘अत्थि पन ते, भन्ते, वेय्यावच्चकरो’’ति पुच्छति, पुञ्ञत्थिकेहि च उपासकेहि ‘‘भिक्खूनं वेय्यावच्चं करोथा’’ति आणत्ता वा भिक्खूनं वा सन्दिट्ठा सम्भत्ता केचि वेय्यावच्चकरा होन्ति, तेसं अञ्ञतरो तस्मिं खणे भिक्खुस्स सन्तिके निसिन्नो होति, भिक्खु तं निद्दिसति ‘‘अयं भिक्खूनं वेय्यावच्चकरो’’ति ¶ . दूतो तस्स हत्थे अकप्पियवत्थुं दत्वा ‘‘थेरस्स चीवरं किणित्वा देही’’ति गच्छति, अयं भिक्खुना सम्मुखानिद्दिट्ठो.

नो चे भिक्खुस्स (पारा. अट्ठ. २.५३७; वि. सङ्ग. अट्ठ. ६५) सन्तिके निसिन्नो होति, अपिच खो भिक्खु निद्दिसति ‘‘असुकस्मिं नाम गामे इत्थन्नामो भिक्खूनं वेय्यावच्चकरो’’ति. सो गन्त्वा तस्स हत्थे अकप्पियवत्थुं दत्वा ‘‘थेरस्स चीवरं किणित्वा ददेय्यासी’’ति आगन्त्वा भिक्खुस्स आरोचेत्वा गच्छति, अयमेको भिक्खुना असम्मुखानिद्दिट्ठो.

न हेव खो सो दूतो अत्तना आगन्त्वा आरोचेति, अपिच खो अञ्ञं पहिणति ‘‘दिन्नं मया, भन्ते, तस्स हत्थे चीवरचेतापन्नं, चीवरं गण्हेय्याथा’’ति, अयं दुतियो भिक्खुना असम्मुखानिद्दिट्ठो.

न हेव खो अञ्ञं पहिणति, अपिच खो गच्छन्तोव भिक्खुं वदति ‘‘अहं तस्स हत्थे चीवरचेतापन्नं दस्सामि, तुम्हे चीवरं गण्हेय्याथा’’ति, अयं ततियो भिक्खुना असम्मुखानिद्दिट्ठोति एवं एको सम्मुखानिद्दिट्ठो तयो असम्मुखानिद्दिट्ठाति इमे चत्तारो भिक्खुना निद्दिट्ठवेय्यावच्चकरा नाम. एतेसु इमस्मिं राजसिक्खापदे वुत्तनयेनेव पटिपज्जितब्बं.

अपरो ¶ भिक्खु पुरिमनयेनेव दूतेन पुच्छितो नत्थिताय वा अविचारेतुकामताय वा ‘‘नत्थम्हाकं कप्पियकारको’’ति वदति, तस्मिञ्च खणे कोचि मनुस्सो आगच्छति, दूतो तस्स हत्थे अकप्पियवत्थुं दत्वा ‘‘इमस्स हत्थतो चीवरं गण्हेय्याथा’’ति वत्वा गच्छति, अयं दूतेन सम्मुखानिद्दिट्ठो.

अपरो दूतो गामं पविसित्वा अत्तना अभिरुचितस्स कस्सचि हत्थे अकप्पियवत्थुं दत्वा पुरिमनयेनेव आगन्त्वा वा आरोचेति, अञ्ञं वा पहिणति, ‘‘अहं असुकस्स नाम हत्थे चीवरचेतापन्नं दस्सामि, तुम्हे चीवरं गण्हेय्याथा’’ति वत्वा वा गच्छति, अयं ततियो दूतेन असम्मुखानिद्दिट्ठोति एवं एको सम्मुखानिद्दिट्ठो, तयो असम्मुखानिद्दिट्ठाति इमे चत्तारो दूतेन निद्दिट्ठवेय्यावच्चकरा नाम. एतेसु मेण्डकसिक्खापदे वुत्तनयेनेव पटिपज्जितब्बं.

वुत्तञ्हेतं ¶ –

‘‘सन्ति, भिक्खवे, मनुस्सा सद्धा पसन्ना, ते कप्पियकारकानं हत्थे हिरञ्ञं उपनिक्खिपन्ति ‘इमिना अय्यस्स यं कप्पियं, तं देथा’ति. अनुजानामि, भिक्खवे, यं ततो कप्पियं, तं सादितुं, न त्वेवाहं, भिक्खवे, केनचि परियायेन जातरूपरजतं सादितब्बं परियेसितब्बन्ति वदामी’’ति (महाव. २९९).

एत्थ च चोदनाय परिमाणं नत्थि. मूलं असादियन्तेन सहस्सक्खत्तुम्पि चोदनाय वा ठानेन वा कप्पियभण्डं सादितुं वट्टति. नो चे देति, अञ्ञं कप्पियकारकं ठपेत्वापि आहरापेतब्बं. सचे इच्छति, मूलसामिकानम्पि कथेतब्बं. नो चे इच्छति, न कथेतब्बं.

अपरो भिक्खु पुरिमनयेनेव दूतेन पुच्छितो ‘‘नत्थम्हाकं कप्पियकारको’’ति वदति, तदञ्ञो समीपे ठितो सुत्वा ‘‘आहर, भो, अहं अय्यस्स चीवरं चेतापेत्वा दस्सामी’’ति वदति. दूतो ‘‘हन्द, भो, ददेय्यासी’’ति तस्स हत्थे दत्वा भिक्खुस्स अनारोचेत्वाव गच्छति, अयं मुखवेवटिककप्पियकारको.

अपरो (पारा. अट्ठ. २.५३८-५३९; वि. सङ्ग. अट्ठ. ६५) भिक्खुनो उपट्ठाकस्स वा अञ्ञस्स वा हत्थे अकप्पियवत्थुं दत्वा ‘‘थेरस्स चीवरं ददेय्यासी’’ति एत्तोव पक्कमति, अयं परम्मुखकप्पियकारकोति ¶ इमे द्वे अनिद्दिट्ठकप्पियकारका नाम. एतेसु अञ्ञातकअप्पवारितेसु विय पटिपज्जितब्बं.

सचे सयमेव चीवरं आनेत्वा देन्ति, गहेतब्बं. नो चे, न किञ्चि वत्तब्बा. तेनाह ‘‘सचे’’तिआदि. कप्पियकारकेति सम्मुखासम्मुखवसेन चत्तारो कप्पियकारकेति अत्थो. ‘‘दायको सयमेवा’’ति इमिना भिक्खुं पटिक्खिपति, न दूतं. तस्मा दूतेन निद्दिट्ठोपि यथारुचि चोदेतुं वट्टति. मुखं विवरित्वा सयमेव कप्पियकारकत्तं उपगतोति मुखवेवटिककप्पियकारको. एवन्ति ‘‘एसो खो’’तिआदिना यथावुत्तेन आकारेन. दस्सिता होन्ति सङ्खेपतोति अधिप्पायो.

वुत्तचोदनाट्ठानपरिमाणतोति वुत्तचोदनापरिमाणतो च वुत्तट्ठानपरिमाणतो च. सन्तिकन्ति समीपं. तत्थाति एत्थ कथमयमत्थो लब्भतीति आह ‘‘समीपत्थे हि इदं भुम्मवचन’’न्ति ¶ . इदं वुत्तं होति – ‘‘गङ्गायं गोयूथानि चरन्ति, कूपे गग्गकूल’’न्तिआदीसु विय यस्मा समीपाधारे इदं सत्तमीविभत्तिवचनं, तस्मा अयमत्थो लब्भतीति. एवं अकरोन्तोति सामं वा अगच्छन्तो, दूतं वा अपाहेन्तो.

अज्जण्हो, भन्ते, आगमेहीति, भन्ते, अज्ज एकदिवसं अम्हाकं तिट्ठ, अधिवासेहीति अत्थो. तिकपाचित्तियन्ति अतिरेकेसु चोदनाट्ठानेसु अतिरेकसञ्ञिवेमतिकऊनकसञ्ञीनं वसेन तीणि पाचित्तियानि. तिक्खत्तुं चोदनाय छक्खत्तुं ठानेन, ऊनकतिक्खत्तुं चोदनाय ऊनकच्छक्खत्तुं ठानेन लद्धेपि अनापत्ति. अप्पितताति पतिट्ठापितता, ‘‘सञ्ञत्तो सो मया’’तिआदिना (पारा. ५३८) कथितताति वुत्तं होति.

राजसिक्खापदवण्णना निट्ठिता.

चीवरवग्गो पठमो.

२. एळकलोमवग्गो

१. कोसियसिक्खापदवण्णना

कोसियमिस्सकन्ति ¶ ‘‘कोसकारका’’ति लद्धवोहारानं पाणकानं कोसतो निब्बत्तं अंसु कोसियं, तेन मिस्सं कोसियमिस्सकं. तेन पन कोसियेन अप्पकेनापि मिस्सितं कोसियमिस्सकमेव, न इदं अब्बोहारिकन्ति वत्तुं लब्भा. तेनाह ‘‘एकेनापी’’तिआदि. कोसियंसुनाति किमिकोससम्भवेन अंसुना. ‘‘अन्तमसो’’तिआदिकं पन इमस्स सिक्खापदस्स अचित्तकत्ता वुत्तं. सन्थतं नाम सन्थरित्वा कतं अवायिमं. तेनाह ‘‘समे भूमिभागे’’तिआदि. इमस्सेव वचनस्स अनुसारेनाति इमस्सेव पठमसन्थतस्स निस्सज्जनविधानवचनानुसारेन. सब्बसन्थतन्ति सब्बसन्थतनिस्सज्जनविधानं.

अञ्ञस्सत्थाय कारापने दुक्कटत्ता अत्तनो अत्थाय कारापनवसेन ‘‘साणत्तिक’’न्ति वुत्तं. अत्तना विप्पकतपरियोसापननयेनाति ‘‘अत्तना विप्पकतं अत्तना परियोसापेति, निस्सग्गियं ¶ पाचित्तियं. अत्तना विप्पकतं परेहि परियोसापेति, निस्सग्गियं पाचित्तियं. परेहि विप्पकतं अत्तना परियोसापेति, निस्सग्गियं पाचित्तियं. परेहि विप्पकतं परेहि परियोसापेति, निस्सग्गियं पाचित्तिय’’न्ति (पारा. ५४५) इमिना नयेन. वितानादिकरणेति वितानभूमत्थरणसाणिपाकारभिसिबिब्बोहनकरणे. यथा च वितानादिकरणे, एवं तेनाकारेन परिभोगेपि अनापत्ति. ‘‘अवायिम’’न्ति (पारा. ५४४) वुत्तत्ता वायित्वा करोन्तस्सापि अनापत्ति.

कोसियसिक्खापदवण्णना निट्ठिता.

२. सुद्धकाळकसिक्खापदवण्णना

काळकानन्ति सभावेन वा रजनेन वा काळकानं. यथाह ‘‘काळकं नाम द्वे काळकानि जातिया काळकं वा रजनकाळकं वा’’ति. अञ्ञेहि अमिस्सितानन्ति अञ्ञेहि अमिस्सितकाळकानन्ति अत्थो. ‘‘यथा पठमे ‘एकेनापि कोसियंसुना’ति (कङ्खा. अट्ठ. कोसियसिक्खापदवण्णना) वुत्तं, तथा इधापि ¶ ‘एकेनापि अञ्ञेन अमिस्सेत्वा’ति अवुत्तत्ता अञ्ञेन पन मिस्सकभोगेपि अपञ्ञायमानरूपकं चे ‘सुद्धकाळक’मिच्चेव वुच्चती’’ति (वजिर. टी. पाराजिक ५४७) वदन्ति.

एत्थ च ‘‘इदं मे, भन्ते, सुद्धकाळकानं एळकलोमानं सन्थत’’न्तिआदिना (पारा. ५४९) निस्सज्जनविधानं वेदितब्बं. सेसन्ति पुब्बपयोगदुक्कटचतुक्कपाचित्तियादिकं. अङ्गेसु पन ‘‘सुद्धकाळकभावो’’ति अयं विसेसो.

सुद्धकाळकसिक्खापदवण्णना निट्ठिता.

३. द्वेभागसिक्खापदवण्णना

गहेतब्बाति यथा काळका अधिका न होन्ति, तथा गहेतब्बा. ठपेत्वा चेत्थ काळकओदाते अवसेसा गोचरियेसुयेव सङ्गहं गच्छन्तीति (सारत्थ. टी. २.५५२) दट्ठब्बं. एत्थ च द्वे भागाति उक्कट्ठपरिच्छेदो काळकानं अधिकग्गहणस्स पटिक्खेपवसेन सिक्खापदस्स पञ्ञत्तत्ता. तस्मा काळकानं भागद्वयतो अधिकं न वट्टति, ऊनकं वट्टति. तेनाह ¶ ‘‘एकस्सापी’’तिआदि. एकस्सापि काळकलोमस्स अतिरेकभावेति तुलाय धारयित्वा ठपितेसु अन्तमसो वातवेगेनपि पहितस्स एकस्सापि काळकलोमस्स अधिकभावे सतीति अत्थो. ‘‘ततियं ओदातानं, चतुत्थं गोचरियान’’न्ति इदं पन हेट्ठिमपरिच्छेदो तेसं अधिकग्गहणे पटिक्खेपाभावतो. तस्मा तेसं वुत्तप्पमाणतो अधिकम्पि वट्टति.

एत्थ च ‘‘इदं मे, भन्ते, सन्थतं अनादियित्वा द्वे तुले सुद्धकाळकानं एळकलोमानं, तुलं ओदातानं, तुलं गोचरियानं सन्थतं कारापितं निस्सग्गिय’’न्ति (पारा. ५५४) इमिना नयेन निस्सज्जनविधानं वेदितब्बं. आदाय च वुत्तपरिच्छेदेन अनादाय च करणतो किरियाकिरियं. सेसन्ति पुब्बपयोगदुक्कटचतुक्कपाचित्तियादिकं. अयं पन विसेसो – तुलं ओदातानं तुलं गोचरियानं आदियित्वा करणे, बहुतरं ओदातानं बहुतरं गोचरियानं आदियित्वा करणे ¶ , सुद्धं ओदातानं सुद्धं गोचरियानं आदियित्वा करणे च अनापत्तीति.

अङ्गेसु पन पठमङ्गं काळकानं द्वेभागतो अतिरेकभावोति दट्ठब्बं. इमानि तीणि न केवलं अनिस्सट्ठानेव परिभुञ्जितुं न वट्टन्तीति आह ‘‘इमानि पना’’तिआदि. ‘‘परिभुञ्जितुं न वट्टन्ती’’ति इमिना यदि परिभुञ्जति, दुक्कटन्ति दस्सेति.

द्वेभागसिक्खापदवण्णना निट्ठिता.

४. छब्बस्ससिक्खापदवण्णना

यं सन्थतसम्मुतिं देतीति सम्बन्धो. गिलानस्स भिक्खुनोति यस्स विना सन्थता न फासु होति, न सक्कोति च सन्थतं आदाय पक्कमितुं, एवंभूतस्स गिलानस्स भिक्खुनो. सन्थतसम्मुतिं देतीति ‘‘सुणातु मे, भन्ते, सङ्घो, अयं इत्थन्नामो भिक्खु गिलानो न सक्कोति सन्थतं आदाय पक्कमितु’’न्तिआदिना (पारा. ५६०) पदभाजने वुत्ताय ञत्तिदुतियकम्मवाचाय सन्थतसम्मुतिं देति.

साति सन्थतसम्मुति. वूपसन्तो वा पुन कुप्पतीति वूपसन्तो वा सो आबाधो पुन कुप्पति, अनुवस्सम्पि कातुं वट्टति, पुन सम्मुतिदानकिच्चं नत्थीति अधिप्पायो. न केवलं तस्मिंयेव रोगे कुप्पिते, अथ खो अञ्ञस्मिं रोगे कुप्पितेपि गतगतट्ठाने अनुवस्सं कातुं लभति. तेनेव हि समन्तपासादिकायं ‘‘सचे अरोगो हुत्वा पुन मूलब्याधिनाव गिलानो होति ¶ , सोयेव परिहारो, नत्थञ्ञं ‘सम्मुतिकिच्च’न्ति फुस्सदेवत्थेरो आह. उपतिस्सत्थेरो पन सो वा ब्याधि पटिकुप्पतु, अञ्ञो वा, सकिं ‘गिलानो’ति नामं लद्धं लद्धमेव, पुन ‘सम्मुतिकिच्चं नत्थी’ति आहा’’ति (पारा. अट्ठ. २.५५७) उपतिस्सत्थेरवादो पच्छा वुत्तो.

एत्थ च ‘‘इदं मे, भन्ते, सन्थतं ऊनकछब्बस्सानि कारापितं अञ्ञत्र भिक्खुसम्मुतिया निस्सग्गिय’’न्ति (पारा. ५६२) इमिना नयेन निस्सज्जनविधानं वेदितब्बं. ‘‘सेसं पठमसदिसमेवा’’ति इमिना ‘‘अत्तना कतं परेहि परियोसापेती’’तिआदिकं अतिदिट्ठं. अयं पन विसेसो – परिपुण्णे छब्बस्से वा अतिरेकछब्बस्से ¶ वा अनापत्ति. अङ्गेसु च छब्बस्सानं अन्तोभावो नानात्तं.

छब्बस्ससिक्खापदवण्णना निट्ठिता.

५. निसीदनसिक्खापदवण्णना

निसीदनसन्थतन्ति ‘‘निसीदनं नाम सदसं वुच्चती’’ति एत्थ पदभाजनियं (पारा. ५६८) वुत्तत्ता सदसं सन्थतं, एत्थ च निसीदनग्गहणं सन्थते चीवरसञ्ञानिवारणत्थं, यतो ते भिक्खू कम्बलचीवरसञ्ञाय सन्थतं छड्डेत्वा धुतङ्गानि समादियिंसु. सयनासनप्पयोजनत्ता सन्थतस्स ‘‘पुराणसन्थतं नामा’’तिआदि वुत्तं. यत्थाति यस्मिं सन्थते. विदत्थिमत्तन्ति सुगतविदत्थिमत्तं. उक्कट्ठपरिच्छेदो चायं ‘‘अनापत्ति अलभन्तो थोकतरं आदियित्वा करोती’’ति (पारा. ५७०) पदभाजने वुत्तत्ता. एकदेसेति इदानि कत्तब्बनवसन्थतस्स एकप्पदेसे. विजटेत्वाति विद्धंसेत्वा. अनादाति य-कारलोपेनायं निद्देसोति आह ‘‘सति पुराणसन्थते अग्गहेत्वा’’ति.

एत्थ च ‘‘इदं मे, भन्ते, निसीदनसन्थतं अनादियित्वा पुराणसन्थतस्स सामन्ता सुगतविदत्थिं कारापितं निस्सग्गिय’’न्ति (पारा. ५६८) इमिना नयेन निस्सज्जनविधानं वेदितब्बं. सन्थतविस्सज्जनवत्थुस्मिं पञ्ञत्तन्ति भगवता सन्थतानि विप्पकिण्णानि दिस्वा ‘‘सद्धादेय्यविनिपातने कारणं नत्थि, परिभोगुपायं नेसं दस्सेस्सामी’’ति (पारा. अट्ठ. २.५६६) सन्थतविस्सज्जनवत्थुस्मिं पञ्ञत्तं. किरियाकिरियत्ता इमस्स सिक्खापदस्स ‘‘सेसं ततियसदिसमेवा’’ति वुत्तं, द्वेभागसिक्खापदसदिसमेवाति अत्थो. अयं पन विसेसो – पुराणसन्थतस्स ¶ सामन्ता सुगतविदत्थिया आदाय करणे, अलभन्तस्स थोकतरं आदाय करणे, सब्बथा अलभन्तस्स अनादाय करणे च अनापत्तीति. अङ्गेसु पनेत्थ पठमङ्गपुराणसन्थतस्स सामन्ता सुगतविदत्थिअनादियनाति दट्ठब्बं.

निसीदनसिक्खापदवण्णना निट्ठिता.

६. एळकलोमसिक्खापदवण्णना

अद्धानमग्गप्पटिपन्नस्साति ¶ अद्धानमेव मग्गो अद्धानमग्गो, तं पटिपन्नस्साति अत्थो. तेनाह ‘‘अद्धानसङ्खात’’न्तिआदि. अद्धानसद्देन विसेसितत्ता पन ‘‘दीघमग्ग’’न्ति वुत्तं. अद्धानगमनसमयस्स विभङ्गे ‘‘अद्धयोजनं गच्छिस्सामीति भुञ्जितब्ब’’न्तिआदिवचनतो (पाचि. २१८) अद्धयोजनम्पि अद्धानमग्गो होति. एळकलोमानि चेतानि अद्धानमग्गतो अञ्ञत्थ उप्पन्नानि पटिग्गहेतुं न वट्टन्ति, यतो ‘‘अद्धानमग्गप्पटिपन्नस्सा’’तिआदिकं वुत्तन्ति अनुयोगं सन्धायाह ‘‘सब्बञ्चेत’’न्तिआदि. तत्थ सब्बञ्चेतन्ति ‘‘भिक्खुनो पनेव अद्धानमग्गप्पटिपन्नस्स एळकलोमानि उप्पज्जेय्यु’’न्तिआदिकं एतं सब्बं. वत्थुमत्तदीपनमेवाति ‘‘तेन खो पन समयेन अञ्ञतरस्स भिक्खुनो कोसलेसु जनपदे सावत्थिं गच्छन्तस्स अन्तरामग्गे एळकलोमानि उप्पज्जिंसू’’तिआदिकस्स (पारा. ५७१) वत्थुमत्तस्स दीपनमेव. यत्थ कत्थचीति अद्धानतो अञ्ञत्थापि यत्थ कत्थचि ठानेसु. सहत्थाति करणत्थे निस्सक्कवचनन्ति आह ‘‘सहत्थेना’’ति. लक्खणवचनञ्चेतं, तस्मा येन केनचि सरीरावयवेनाति अत्थो दट्ठब्बो. तेनाह ‘‘अत्तना हरितब्बानीति अत्थो’’ति. असन्ते हारकेति एत्थ पदानं अन्तोगधावधारणतो अवधारणत्थो लब्भतीति आह ‘‘असन्तेयेवा’’तिआदि.

एत्थ च ‘‘इमानि मे, भन्ते, एळकलोमानि तियोजनं अतिक्कामितानि निस्सग्गियानी’’तिआदिना (पारा. ५७३) निस्सज्जनविधानं वेदितब्बं. तिकपाचित्तियन्ति अतिरेकतियोजने अतिरेकतियोजनसञ्ञिवेमतिकऊनकसञ्ञीनं वसेन तीणि पाचित्तियानि. वासाधिप्पायेन गन्त्वा ततो परं हरणेति यत्थ गतो, तत्थ उद्देसपरिपुच्छादीनं वा पच्चयादीनं वा अलाभेन ततो परं अञ्ञत्थ हरणे, ततोपि अञ्ञत्थाति एवं योजनसतम्पि हरणे अनापत्ति. अच्छिन्नं वा निस्सट्ठं वाति चोरेहि अच्छिन्नं वा विनयकम्मकतं वा. कतभण्डन्ति कतं भण्डं कम्बलकोजवसन्थतादि यं किञ्चि अन्तमसो सुत्तकेन बद्धमत्तम्पि. तेनाह ‘‘अन्तमसो’’तिआदि. यो पन तनुकपत्तत्थविकन्तरे (पारा. अट्ठ. २.५७५) वा आयोगअंसबद्धककायबन्धनादीनं ¶ अन्तरेसु वा पिप्फलिकादीनं मलरक्खणत्थं सिपाटिकायं वा अन्तमसो वाताबाधिको कण्णच्छिद्देपि लोमानि पक्खिपित्वा गच्छति ¶ , आपत्तियेव. सुत्तकेन पन बन्धित्वा पक्खित्तं कतभण्डट्ठाने तिट्ठति, वेणिं कत्वा हरति, इदं निधानमुखं नाम, आपत्तियेव.

पठमप्पटिलाभोति अत्तनो अत्थाय एळकलोमानं पठमुप्पत्ति. एतेन अच्छिन्ननिस्सट्ठप्पटिलद्धानं पटिक्खेपो. अञ्ञस्स अजानन्तस्स याने पक्खिपित्वाति (पारा. अट्ठ. २.५७२) गच्छन्ते रथादिके वा हत्थिपिट्ठिआदीसु वा सामिकस्स अजानन्तस्सेव ‘‘हरिस्सती’’ति पक्खिपित्वा. अगच्छन्तेपि एसेव नयो. सचे पन अगच्छन्ते रथादिम्हि वा हत्थिपिट्ठिआदीसु वा ठपेत्वा आरोहित्वा सारेति, हेट्ठा वा गच्छन्तो चोदेति, पक्कोसन्तो वा अनुबन्धापेति, ‘‘अञ्ञं हरापेती’’ति (पारा. ५७५) वचनतो अनापत्ति. एत्थ च ‘‘अजानन्तस्स याने’’ति इमिना जानन्तस्स चे याने पक्खिपति, अञ्ञं हरापेति नामाति दस्सेति. अहरणपच्चाहरणन्ति हरणपच्चाहरणानमभावो.

एळकलोमसिक्खापदवण्णना निट्ठिता.

७. एळकलोमधोवापनसिक्खापदवण्णना

सक्केसूति ‘‘सक्या वत, भो कुमारा’’ति (दी. नि. १.२६७) उदानं पटिच्च ‘‘सक्या’’ति लद्धनामानं निवासो एकोपि जनपदो रुळ्हिसद्देन ‘‘सक्का’’ति वुच्चति, तस्मिं सक्केसु जनपदे. छब्बग्गिया नाम पण्डुकलोहितकादयो छमूलका, तेसं सिस्सा च.

एळकलोमधोवापनसिक्खापदवण्णना निट्ठिता.

८. जातरूपसिक्खापदवण्णना

रजतन्ति न केवलं रूपियमेव इधाधिप्पेतं, अथ खो यं किञ्चि वोहारगमनीयं कहापणादि च एतं अधिप्पेतन्ति आह ‘‘अपिचा’’तिआदि. तत्थ कहापणोति (पारा. अट्ठ. २.५८३-५८४) सुवण्णमयो वा रूपियमयो वा पाकतिको वा. लोहमासको नाम तम्बलोहादीहि कतमासको. दारुमासको नाम सारदारुना वा वेळुपेसिकाय वा ¶ अन्तमसो तालपण्णेनपि ¶ रूपं छिन्दित्वा कतमासको. जतुमासको नाम लाखाय वा निय्यासेन वा रूपं समुट्ठापेत्वा कतमासको. ‘‘ये वोहारं गच्छन्ती’’ति इमिना पन पदेन यो यो यत्थ यत्थ जनपदे यदा यदा वोहारं गच्छति, अन्तमसो अट्ठिमयोपि चम्ममयोपि रुक्खफलबीजमयोपि समुट्ठापितरूपोपि असमुट्ठापितरूपोपि सब्बो सङ्गहितो. तदेवाति जातरूपरजतमेव. हिरञ्ञं नाम कहापणो.

‘‘सादियती’’ति वुत्तमेवत्थं विभावेति ‘‘गण्हितुकामो होती’’ति. न केवलं कायवाचाहि पटिक्खित्तमेव पटिक्खित्तं होति, अथ खो मनसापि पटिक्खित्तं पटिक्खित्तमेव होतीति आह ‘‘कायवाचाही’’तिआदि. सचे पन कायवाचाहि अप्पटिक्खिपित्वा चित्तेन अधिवासेति, कायवाचाहि कत्तब्बस्स पटिक्खेपस्स अकरणतो अकिरियसमुट्ठानं कायवचीद्वारे आपत्तिं आपज्जति. मनोद्वारे पन आपत्ति नाम नत्थि.

एको सतं (पारा. अट्ठ. २.५८३-५८४) वा सहस्सं वा पादमूले ठपेति ‘‘तुय्हिदं होतू’’ति, भिक्खु ‘‘नयिदं कप्पती’’ति पटिक्खिपति. उपासको ‘‘परिच्चत्तं मया तुम्हाक’’न्ति गतो, अञ्ञो तत्थ आगन्त्वा पुच्छति ‘‘किं, भन्ते, इद’’न्ति. यं तेन च अत्तना च वुत्तं, तं आचिक्खितब्बं. सो चे वदति ‘‘गोपेस्सामि, भन्ते, गुत्तट्ठानं दस्सेथा’’ति, सत्तभूमिकम्पि पासादं अभिरुहित्वा ‘‘इदं गुत्तट्ठान’’न्ति आचिक्खितब्बं, ‘‘इध निक्खिपाही’’ति न वत्तब्बं. एत्तावता कप्पियञ्च अकप्पियञ्च निस्साय ठितं होति, द्वारं पिदहित्वा रक्खन्तेन वसितब्बं. सचे किञ्चि विक्कायिकभण्डं पत्तं वा चीवरं वा आगच्छति, ‘‘इदं गहेस्सथ, भन्ते’’ति वुत्ते ‘‘उपासक, अत्थि अम्हाकं इमिना अत्थो, वत्थु च एवरूपं नाम संविज्जति, कप्पियकारको नत्थी’’ति वत्तब्बं. सचे सो वदति ‘‘अहं कप्पियकारको भविस्सामि, द्वारं विवरित्वा देथा’’ति, द्वारं विवरित्वा ‘‘इमस्मिं ओकासे ठपित’’न्ति वत्तब्बं, ‘‘इमं गण्हा’’ति न वत्तब्बं. एवञ्च कप्पियञ्च अकप्पियञ्च निस्साय ठितमेव होति. सो चेतं गहेत्वा तस्स कप्पियभण्डं देति, वट्टति. सचे अधिकं गण्हाति, ‘‘न मयं तव भण्डं गण्हाम, निक्खमाही’’ति वत्तब्बो.

सङ्घमज्झेयेव ¶ निस्सज्जितब्बन्ति एत्थ यस्मा रूपियं नाम अकप्पियं, तस्मा ‘‘निस्सज्जितब्बं सङ्घस्स वा गणस्स वा पुग्गलस्स वा’’ति न वुत्तं. यस्मा पन तं पटिग्गहितमत्तमेव, न तेन किञ्चि कप्पियभण्डं चेतापितं, तस्मा उपायेन परिभोगदस्सनत्थं ‘‘सङ्घमज्झेयेव निस्सज्जितब्ब’’न्ति वुत्तं. आदि-सद्देन तेलादीनं गहणं. सोति यो गहट्ठो ‘‘सप्पि ¶ वा तेलं वा वट्टति उपासका’’तिआदिना नयेन वुत्तो, सो. अञ्ञेन लभित्वाति भिक्खुना वा आरामिकेन वा अत्तनो वस्सग्गेन लभित्वा. ततो निब्बत्तरुक्खच्छायापीति निस्सग्गियवत्थुना आहटबीजतो निब्बत्तरुक्खपरिच्छेदेन ठितच्छायापि, परिच्छेदातिक्कन्ता पन आगन्तुकत्ता वट्टति. नो चे छड्डेतीति अथ नेव गहेत्वा गच्छति, न छड्डेति, ‘‘किं मय्हं इमिना ब्यापारेना’’ति येनकामं पक्कमति. पञ्चङ्गसमन्नागतो ‘‘यो न छन्दागतिं गच्छेय्य, न दोसागतिं गच्छेय्य, न मोहागतिं गच्छेय्य, न भयागतिं गच्छेय्य, छड्डिताछड्डितञ्च जानेय्या’’ति (पारा. ५८४) एवं वुत्तपञ्चङ्गेहि समन्नागतो. सम्मन्नितब्बोति ‘‘सुणातु मे, भन्ते, सङ्घो, यदि सङ्घस्स पत्तकल्लं, सङ्घो इत्थन्नामं भिक्खुं रूपियछड्डकं सम्मन्नेय्या’’तिआदिना पदभाजने वुत्ताय ञत्तिदुतियकम्मवाचाय सम्मन्नितब्बो.

अनिमित्तं कत्वा गूथं विय छड्डेतब्बन्ति पतितट्ठानं सल्लक्खणवसेन निमित्तं अकत्वा गूथं विय छड्डेतब्बं, अक्खीनि निमीलेत्वाव नदिया वा पपाते वा वनगहने वा गूथं विय अनपेक्खेन पतितोकासं असमन्नाहरन्तेन पातेतब्बन्ति वुत्तं होति. तेनाह ‘‘गूथं विय छड्डेतब्ब’’न्ति. तिकपाचित्तियन्ति रूपियसञ्ञिवेमतिकअरूपियसञ्ञीनं वसेन तीणि पाचित्तियानि. अरूपिये रूपियसञ्ञिनोति खरपत्तादीसु सुवण्णादिसञ्ञिनो. रतनसिक्खापदनयेनाति ‘‘अज्झारामे वा अज्झावसथे वा’’ति (पाचि. ५०५) एत्थ वुत्तविधिना.

जातरूपसिक्खापदवण्णना निट्ठिता.

९. रूपियसंवोहारसिक्खापदवण्णना

कतादिवसेनाति ¶ कतअकतकताकतवसेन. सुवण्णादिचतुब्बिधम्पि निस्सग्गियवत्थु इध रूपियग्गहणेन गहितन्ति आह ‘‘जातरूपरजतपरिवत्तन’’न्ति. इदञ्च उक्कट्ठपरिच्छेदेन वुत्तन्ति दट्ठब्बं. तेनाह ‘‘पुरिमसिक्खापदेन ही’’तिआदि. परिवत्तनन्ति सादितरूपियस्स परिवत्तनं. पुरिमनयानुसारेनाति ‘‘अहं, भन्ते, नानप्पकारकं रूपियसंवोहारं समापज्जिं, इदं मे निस्सग्गिय’’न्तिआदिना (पारा. ५८९).

रूपियसंवोहारवत्थुस्मिन्ति पटिग्गहणस्सेव पटिक्खित्तत्ता पटिग्गहितपरिवत्तने दोसं अदिस्वा रूपियपरिवत्तने. तस्स वाति परिवत्तितस्स वा. धनस्स वाति अत्तनो मूलधनस्स वा ¶ . अत्तनो वा हि अरूपियेन परस्स रूपियं चेतापेय्य, अत्तनो वा रूपियेन परस्स अरूपियं, उभयथापि रूपियसंवोहारो कतोव होतीति.

रूपियसंवोहारसिक्खापदवण्णना निट्ठिता.

१०. कयविक्कयसिक्खापदवण्णना

रूपियसंवोहारस्स पन हेट्ठासिक्खापदेन गहितत्ता कप्पियभण्डानमेवेत्थ गहणन्ति आह ‘‘चीवरादीन’’न्तिआदि. तत्थ चीवरादीनं कप्पियभण्डानन्ति अन्तमसो दसिकसुत्तं उपादाय चीवरपिण्डपातसेनासनगिलानपच्चयानं येसं केसञ्चि कप्पियभण्डानं. कयं नाम परभण्डस्स गहणं. विक्कयं नाम अत्तनो भण्डस्स दानं. तेनाह ‘‘इमिना इमं देही’’तिआदि. परस्साति ठपेत्वा पञ्च सहधम्मिके अञ्ञस्स. एत्थ च ‘‘अहं, भन्ते, नानप्पकारकं कयविक्कयं समापज्जिं, इदं मे निस्सग्गियं, इमाहं सङ्घस्स निस्सज्जामी’’तिआदिना (पारा. ५९५) नयेन निस्सज्जितब्बं. तेनाह ‘‘वुत्तलक्खणवसेना’’तिआदि. ननु चेत्थ चीवरधोवने वा केसच्छेदने वा भूमिसोधनादिनवकम्मे वा परभण्डं अत्तनो हत्थगतं निस्सज्जितब्बं नाम नत्थि, तत्थ किं कातब्बन्ति आह ‘‘असन्ते पाचित्तियं देसेतब्बमेवा’’ति. यथा निस्सग्गियवत्थुम्हि परिभुत्ते वा नट्ठे वा पाचित्तियं देसेति, एवं इधापि देसेतब्बमेवाति अधिप्पायो.

इदं ¶ अम्हाकं अत्थीति इदं पटिग्गहितं तेलं वा सप्पि वा अम्हाकं संविज्जति. अम्हाकञ्च इमिना च इमिना च अत्थोति अम्हाकञ्च तदञ्ञेन इमिना च इमिना च अप्पटिग्गहितकेन अत्थो. ‘‘रूपियसंवोहारे वुत्तनयमेवा’’ति इमिना ‘‘तिकपाचित्तियं अकयविक्कये कयविक्कयसञ्ञिनो च वेमतिकस्स च दुक्कट’’न्ति इमं नयमतिदिसति.

कयविक्कयसिक्खापदवण्णना निट्ठिता.

एळकलोमवग्गो दुतियो.

३. पत्तवग्गो

१. पत्तसिक्खापदवण्णना

अविकप्पितोति ¶ ‘‘इमं पत्तं तुय्हं विकप्पेमी’’तिआदिना नयेन अविकप्पितो. अड्ढाळ्हकोदनं गण्हातीति मगधनाळिया द्विन्नं तण्डुलनाळीनं ओदनं गण्हाति. ‘‘मगधनाळि नाम अड्ढतेरसपला होती’’ति अन्धकट्ठकथायं वुत्तं. ‘‘सीहळदीपे पकतिनाळि महन्ता, दमिळनाळि खुद्दका, मगधनाळि पमाणयुत्ता, ताय मगधनाळिया दियड्ढनाळि एका सीहळनाळि होती’’ति (पारा. अट्ठ. २.६०२) महाअट्ठकथायं वुत्तं. अनुत्तण्डुलन्ति पाकतो उक्कन्तं तण्डुलं उत्तण्डुलं, न उत्तण्डुलं अनुत्तण्डुलं. सब्बसम्भारसङ्खतोति जीरकादिसब्बसम्भारेहि सङ्खतो. आलोपस्स चतुत्थभागप्पमाणं ब्यञ्जनं आलोपस्स अनुरूपब्यञ्जनं.

एवं उक्कट्ठपत्तं दस्सेत्वा इदानि मज्झिमोमकानि दस्सेतुं ‘‘उक्कट्ठतो’’तिआदिमाह. तत्रायं नयो – सचे नाळिकोदनादि सब्बम्पि पक्खित्तं वुत्तनयेनेव हेट्ठिमराजिसमं तिट्ठति, अयं मज्झिमो नाम पत्तो. सचे तं राजिं अतिक्कम्म थूपीकतं तिट्ठति, अयं मज्झिमोमको नाम पत्तो. सचे तं राजिं न सम्पापुणाति, अन्तोगधमेव होति, अयं मज्झिमुक्कट्ठो नाम पत्तो. सचे पत्तोदनादि सब्बम्पि पक्खित्तं हेट्ठिमराजिसमं तिट्ठति, अयं ओमको नाम पत्तो. सचे तं राजिं अतिक्कम्म थूपीकतं तिट्ठति, अयं ओमकोमको नाम पत्तो. सचे तं राजिं ¶ न सम्पापुणाति, अन्तोगधमेव होति, अयं ओमकुक्कट्ठो नाम पत्तोति. तेनाह ‘‘तेसम्पि वुत्तनयेनेव भेदो वेदितब्बो’’ति.

इदानि तेसु अधिट्ठानविकप्पनानधिट्ठानाविकप्पनुपगे दस्सेतुं ‘‘इच्चेतेसू’’तिआदिमाह. तत्थ उक्कट्ठुक्कट्ठोति उक्कट्ठतो उक्कट्ठो. ततो हि सो ‘‘अपत्तो’’ति वुत्तो. ओमकोमकोति ओमकतो ओमको. ततो हि सो ‘‘अपत्तो’’ति वुत्तो. एते पन भाजनपरिभोगेन परिभुञ्जितब्बा, न अधिट्ठानुपगा न विकप्पनुपगा, इतरे पन सत्त अधिट्ठहित्वा वा विकप्पेत्वा वा परिभुञ्जितब्बा. तेनाह ‘‘सेसा सत्त पत्ता पमाणयुत्ता नामा’’ति.

तस्माति ¶ यस्मा सत्त पत्ता पमाणयुत्ता, तस्मा. समणसारुप्पेन पक्कन्ति एत्थ अयोपत्तो पञ्चहि पाकेहि (पारा. अट्ठ. २.६०८) पक्को समणसारुप्पेन पक्को होति, मत्तिकापत्तो द्वीहि पाकेहि. सचे एको पाको ऊनो होति, न अधिट्ठानुपगो. यथा च समणसारुप्पेन पक्कोयेव अधिट्ठानुपगो, तथा उभोपि यं मूलं दातब्बं, तस्मिं दिन्नेयेव अधिट्ठानुपगा. यदि पन अप्पकम्पि अदिन्नं होति, न अधिट्ठानुपगा. तेनाह ‘‘सचे पना’’तिआदि. ‘‘काकणिकमत्तं नाम दियड्ढवीही’’ति वदन्ति. सचेपि पत्तसामिको वदति ‘‘यदा तुम्हाकं मूलं भविस्सति, तदा दस्सथ, अधिट्ठहित्वा परिभुञ्जथा’’ति, नेव अधिट्ठानुपगो होति. पाकस्स हि ऊनत्ता पत्तसङ्खं न गच्छति. मूलस्स सकलस्स वा एकदेसस्स वा अदिन्नत्ता सकभावं न उपेति, अञ्ञस्सेव सन्तको होति. तस्मा पाके च मूले च निट्ठितेयेव अधिट्ठानुपगो होति. यो अधिट्ठानुपगो, स्वेव विकप्पनुपगो च. तेनाह ‘‘अपच्चुद्धरन्तेना’’तिआदि. अपच्चुद्धरन्तेन विकप्पेतब्बोति पुराणपत्तं अपच्चुद्धरन्तेन नवो पत्तो विकप्पेतब्बोति अत्थो, ठपेतब्बोति अधिप्पायो. कङ्गुसित्थन्ति सत्तन्नं धञ्ञानं लामकधञ्ञसित्थन्ति आह ‘‘कङ्गुसित्थनिक्खमनमत्तेन छिद्देना’’ति.

पत्तसिक्खापदवण्णना निट्ठिता.

२. ऊनपञ्चबन्धनसिक्खापदवण्णना

अस्साति ¶ इमस्स पत्तस्स. तेन ऊनपञ्चबन्धनेनाति तेन ऊनपञ्चबन्धनेन पत्तेन उपलक्खितो हुत्वाति अत्थो. ऊनपञ्चबन्धनो हि पत्तो एत्थ लक्खणभावेन गहितो. तेनेवाह ‘‘इत्थम्भूतस्स लक्खणे करणवचन’’न्ति. तत्थ इत्थम्भूतस्साति कञ्चि पकारं पत्तस्स. लक्खीयते अनेनाति लक्खणं, तस्मिं करणवचनं, ततियाविभत्तीति अत्थो. ‘‘पकारो’’ति च सामञ्ञस्स भेदको विसेसो वुच्चति. तथा हि ऊनपञ्चबन्धनेन पत्तेनाति एत्थ भिक्खुभावसामञ्ञस्स ऊनपञ्चबन्धनपत्तभावो पकारो, तं भिक्खु आपन्नो, तस्स पत्तो लक्खणं. यदि अपरिपुण्णपञ्चबन्धनो पत्तो ऊनपञ्चबन्धनो नाम होति, अथ कस्मा इमस्स पदभाजनियं अबन्धनोपि वुत्तोति आह ‘‘तत्था’’तिआदि. तत्थ तत्थाति वाक्योपञ्ञासे. बन्धनोकासे सति वा असति वा बन्धनविरहितो पत्तो अबन्धनो, पञ्चबन्धनानं ओकासो अस्साति पञ्चबन्धनोकासो. अपत्तोति पत्तो नाम न होतीति अत्थो, पाकतिकं कातुं असमत्थोति वुत्तं होति. इदञ्च अञ्ञस्स विञ्ञापने कारणवचनं. तेनाह ‘‘तस्मा अञ्ञं विञ्ञापेतुं वट्टती’’ति.

बन्धनञ्च ¶ नामेतं यस्मा बन्धनोकासे सति होति, असति न होति, तस्मा तस्स लक्खणं, बन्धनविधिञ्च दस्सेतुं ‘‘यस्मिं पना’’तिआदि वुत्तं. मुखवट्टिसमीपे पन पत्तवेधकेन विज्झियमाने कपालस्स बहलत्ता भिज्जति, तस्मा हेट्ठा विज्झितब्बो. तेनाह ‘‘हेट्ठिमपरियन्ते’’तिआदि. सुखुमं वा छिद्दं कत्वा बन्धितब्बोति सुखुमे छिद्दे तिपुपट्टादीहि पयोजनं नत्थि, सुत्तं पक्खिपित्वाव अधिट्ठातब्बोति अधिप्पायो. न केवलं तिपुसुत्तकादिनाव बन्धितब्बोति आह ‘‘फाणित’’न्तिआदि. फाणितं झापेत्वा पासाणचुण्णेनाति पासाणचुण्णेन सद्धिं फाणितं पचित्वा तथापक्केन पासाणचुण्णेनाति अत्थो. निस्सज्जितब्बोति ‘‘अयं मे, भन्ते, पत्तो ऊनपञ्चबन्धनेन पत्तेन चेतापितो निस्सग्गियो, इमाहं सङ्घस्स निस्सज्जामी’’ति (पारा. ६१३) निस्सज्जितब्बो. तेनाह ‘‘निस्सज्जन्तेना’’तिआदि. सम्मतेनाति –

‘‘सुणातु मे, भन्ते, सङ्घो, यदि सङ्घस्स पत्तकल्लं, सङ्घो इत्थन्नामं भिक्खुं पत्तग्गाहापकं सम्मन्नेय्य, एसा ञत्ति ¶ . सुणातु मे, भन्ते, सङ्घो, सङ्घो इत्थन्नामं भिक्खुं पत्तग्गाहापकं सम्मन्नति, यस्सायस्मतो खमति इत्थन्नामस्स भिक्खुनो पत्तग्गाहापकस्स सम्मुति, सो तुण्हस्स. यस्स नक्खमति, सो भासेय्य. सम्मतो सङ्घेन इत्थन्नामो भिक्खु पत्तग्गाहापको, खमति सङ्घस्स, तस्मा तुण्ही, एवमेतं धारयामी’’ति (पारा. ६१४) –

एवं पदभाजने वुत्ताय ञत्तिदुतियकम्मवाचाय सम्मतेन. पत्तस्स विज्जमानगुणं वत्वाति ‘‘अयं, भन्ते, पत्तो पमाणयुत्तो सुन्दरो थेरानुरूपो’’तिआदिना (पारा. अट्ठ. २.६१५) विज्जमानानिसंसं वत्वा. पत्तपरियन्तोति परियन्ते ठितपत्तो. अदेसेति मञ्चपीठच्छत्तनागदन्तकादिके अदेसे. पत्तस्स हि निक्खिपनदेसो ‘‘अनुजानामि, भिक्खवे, आधारक’’न्तिआदिना नयेन खन्धके वुत्तोयेव. अपरिभोगेनाति यागुरन्धनरजनपचनादिना अयुत्तपरिभोगेन. अन्तरामग्गे पन ब्याधिम्हि उप्पन्ने अञ्ञस्मिं भाजने असति मत्तिकाय लिम्पित्वा यागुं पचितुं, उदकं वा तापेतुं वट्टति. विस्सज्जेतीति अञ्ञस्स देति. सचे पन सद्धिविहारिको वा अन्तेवासिको वा अञ्ञं वरपत्तं ठपेत्वा ‘‘अयं मय्हं सारुप्पो, अयं थेरस्सा’’ति गण्हाति, वट्टति. अञ्ञो वा तं गहेत्वा अत्तनो पत्तं देति, वट्टति. ‘‘मय्हमेव पत्तं आहरा’’ति वत्तब्बकिच्चं नत्थि.

ञातकप्पवारितेति एत्थ सङ्घवसेन पवारितट्ठाने पञ्चबन्धनेनेव वट्टति, पुग्गलवसेन पन पवारितट्ठाने ¶ ऊनपञ्चबन्धनेनापि. अकतविञ्ञत्ति नाम ‘‘वद, भन्ते, पच्चयेना’’ति एवं अकतट्ठाने विञ्ञत्ति.

ऊनपञ्चबन्धनसिक्खापदवण्णना निट्ठिता.

३. भेसज्जसिक्खापदवण्णना

उग्गहेत्वाति उग्गहितकं कत्वा, अप्पटिग्गहितं सयमेव गहेत्वाति अत्थो. सत्ताहातिक्कमेपि अनापत्तिकता चेत्थ अनज्झोहरणीयतं आपन्नत्ताति वेदितब्बं. कस्मा एतेन इदं दस्सितं होतीति आह ‘‘तानि ही’’तिआदि. भिसक्कस्स इमानि तेन अनुञ्ञातत्ताति भेसज्जानि, येसं ¶ केसञ्चि सप्पायानमेतं अधिवचनं. तेनाह ‘‘भेसज्जकिच्चं करोन्तु वा, मा वा, एवं लद्धवोहारानी’’ति. इदानि सत्ताहकालिकं निस्सग्गियवत्थुभूतं सप्पिनवनीतं दस्सेतुं ‘‘सप्पि नाम गवादीन’’न्तिआदि वुत्तं. आदिसद्देन अजिकादीनं गहणं. ‘‘येसं मंसं कप्पती’’ति इमिना पाकटेहि गोअजिकादीहि अञ्ञानिपि मिगरोहितादीनि सङ्गण्हाति. येसञ्हि खीरं अत्थि, सप्पिपि तेसं अत्थियेव. तं पन सुलभं वा होतु, दुल्लभं वा, असंमोहत्थं वुत्तं. मक्खिकामधुमेवाति खुद्दकभमरमधुकरीहि तीहि मक्खिकाहि कतं मधुमेव. उच्छुरसन्ति सुद्धोदकसम्भिन्नानं वसेन दुविधम्पि उच्छुरसं. ‘‘अगिलानस्स गुळोदक’’न्ति (महाव. २८४) पन उद्दिस्स अनुञ्ञातत्ता उदकसम्भिन्नो अगिलानस्स वट्टति. ‘‘अवत्थुकपक्का वा’’ति इमिना सवत्थुकपक्का न वट्टतीति दस्सेति. महापच्चरियं पन ‘‘एतं सवत्थुकपक्कं वट्टति, नो वट्टतीति पुच्छं कत्वा उच्छुफाणितं पच्छाभत्तं नोवट्टनकं नाम नत्थी’’ति वुत्तं, तं युत्तन्ति समन्तपासादिकायं (पारा. अट्ठ. २.६२३) वुत्तं. उच्छुविकतीति उच्छुम्हा निब्बत्ता रसलसिकादिका. पकतत्तानं पटिनिद्देसत्ता तं-सद्दस्स तेन पकतानं भेसज्जानं एव गहणं, न तेसं वत्थूनन्ति आह ‘‘तानि भेसज्जानी’’तिआदि. न तेसं वत्थूनीति तेसं सप्पिआदीनं कारणानि खीरादीनि अप्पटिग्गहेत्वाति अत्थो.

वसातेलन्ति (पारा. अट्ठ. २.६२३) ‘‘अनुजानामि, भिक्खवे, वसानि भेसज्जानि अच्छवसं मच्छवसं सुसुकावसं सूकरवसं गद्रभवस’’न्ति (महाव. २६२) एवं अनुञ्ञातवसानं तेलं. यानीति यानि भेसज्जानि. ‘‘अनुजानामि, भिक्खवे, वसानि भेसज्जानि अच्छवसं मच्छवसं सुसुकावसं सूकरवसं गद्रभवसं काले पटिग्गहितं काले निप्पक्कं ¶ काले संसट्ठं तेलपरिभोगेन परिभुञ्जितु’’न्ति एवं तेलत्थं वसापटिग्गहणस्स अनुञ्ञातत्ता ‘‘वसातेलं पना’’तिआदि वुत्तं. कालेति पुरेभत्तं. संसट्ठन्ति परिस्सावितं. तस्माति यस्मा अनुञ्ञातं, तस्मा. ‘‘अच्छवस’’न्ति वचनेन ठपेत्वा मनुस्सवसं सब्बेसं अकप्पियमंसानं वसाय अनुञ्ञातत्ता ‘‘ठपेत्वा मनुस्सवस’’न्ति वुत्तं.

सामं पचित्वाति कालेयेव सामं पचित्वा. निब्बत्तिततेलम्पीति कालेयेव अत्तना विवेचिततेलम्पि. तिविधम्पि चेतं कालेयेव वट्टति. वुत्तम्पि चेतं ‘‘काले चे, भिक्खवे, पटिग्गहितं काले निप्पक्कं काले ¶ संसट्ठं, तं चे परिभुञ्जेय्य, अनापत्ती’’ति. पच्छाभत्तं पन पटिग्गहेतुं वा कातुं वा न वट्टतियेव. वुत्तम्पि चेतं ‘‘विकाले चे, भिक्खवे, पटिग्गहितं विकाले निप्पक्कं विकाले संसट्ठं, तं चे परिभुञ्जेय्य, आपत्ति तिण्णं दुक्कटानं. काले चे, भिक्खवे, पटिग्गहितं विकाले निप्पक्कं विकाले संसट्ठं, तं चे परिभुञ्जेय्य, आपत्ति द्विन्नं दुक्कटानं. काले चे, भिक्खवे, पटिग्गहितं काले निप्पक्कं विकाले संसट्ठं, तं चे परिभुञ्जेय्य, आपत्ति दुक्कटस्सा’’ति (महाव. २६२). ‘‘सत्ताहं निरामिसपरिभोगेन वट्टती’’ति इमिना पन ‘‘काले पटिग्गहितं काले निप्पक्कं काले संसट्ठं तेलपरिभोगेन परिभुञ्जितु’’न्ति इदं निरामिसपरिभोगं सन्धाय वुत्तन्ति दस्सेति.

यं पनेत्थ (पारा. अट्ठ. २.६२३) सुखुमरजसदिसं मंसं वा न्हारु वा अट्ठि वा लोहितं वा होति, तं अब्बोहारिकं. सचे पन अनुपसम्पन्नो ताय पटिग्गहितवसाय तेलं कत्वा देति, तं कथन्ति आह ‘‘अनुपसम्पन्नेना’’तिआदि. तदहूति यस्मिं अहनि पटिग्गहितं, तदहु. पच्छाभत्ततो पट्ठाय पन सत्ताहं निरामिसमेव वट्टति. तत्रापि अब्बोहारिकं अब्बोहारिकमेव. यावकालिकवत्थूनं अञ्ञेसं वत्थुं पचितुं न वट्टतीति सम्बन्धो. तत्थ यावकालिकवत्थूनन्ति यावकालिकं वत्थु एतेसन्ति यावकालिकवत्थूनि, तेसं, यावकालिकवत्थुमन्तानन्ति अत्थो. अञ्ञेसन्ति वसातेलतो अञ्ञेसं सप्पिआदीनं. वत्थुन्ति खीरादिकं यावकालिकभूतं वत्थुं, पचितुं न वट्टतियेव, सामंपाकत्ताति अधिप्पायो.

निब्बत्तितसप्पिं वाति यावकालिकवत्थुतो विवेचितसप्पिं वा. यथा तत्थ दधिगतं वा तक्कगतं वा खयं गमिस्सति, एवं झापितं वाति अत्थो. नवनीतं वाति तक्कबिन्दूनिपि दधिगुळिकायोपि अपनेत्वा सुधोतनवनीतं पचितुं वट्टति सामंपक्काभावतोति अधिप्पायो. यदि सयंपचितसत्ताहकालिकेन सद्धिं आमिसं भुञ्जति, तं आमिसं सयंपचितसत्ताहकालिकेन मिस्सितं अत्तनो यावकालिकभावं सत्ताहकालिकेन गण्हापेति. तथा ¶ च यावकालिकं अपक्कम्पि सयंपक्कभावं उपगच्छतीति ‘‘तं पन तदहुपुरेभत्तम्पि सामिसं परिभुञ्जितुं न वट्टती’’ति वुत्तं. यथा सयंपक्कसत्ताहकालिकं वसातेलं, सयंभज्जितसासपादियावजीविकवत्थूनं तेलञ्च सामिसं तदहुपुरेभत्तम्पि न वट्टति, तथा नवनीतसप्पीति वेदितब्बं. वुत्तञ्च –

‘‘यावकालिकआदीनि ¶ , संसट्ठानि सहत्तना;

गाहापयन्ति सब्भाव’’न्ति च;

‘‘तेहेव भिक्खुना पत्तं, कप्पते यावजीविकं;

निरामिसंव सत्ताहं, सामिसे सामपाकता’’ति च.

खीरादितोति एत्थ आदिसद्देन तिलादीनं गहणं. सामिसानिपीति न केवलं निरामिसानेवाति अत्थो. पच्छाभत्ततो पन पट्ठाय न वट्टन्तियेव. सत्ताहातिक्कमेपि अनापत्ति सवत्थुकानं पटिग्गहितत्ता. ‘‘तानि पटिग्गहेत्वा’’ति (पारा. ६२२) हि वुत्तं. तेनाह ‘‘पच्छाभत्ततो पट्ठाया’’तिआदि. पच्छाभत्तं पटिग्गहितकेहि कतं पन अब्भञ्जनादीसु उपनेतब्बं, पुरेभत्तम्पि च उग्गहितकेहि कतं. उभयेसम्पि सत्ताहातिक्कमेपि अनापत्ति. अन्तोसत्ताहेति सत्ताहब्भन्तरे. अब्भञ्जनादीनन्ति एत्थ आदिसद्देन मुद्धनितेलअरुमक्खनघरधूपनादीनं गहणं. अधिट्ठहित्वाति ‘‘इदानि न मय्हं अज्झोहरणत्थाय भविस्सति, इदं सप्पि च तेलञ्च वसा च मुद्धनितेलत्थं वा अब्भञ्जनत्थं वा भविस्सति, मधु अरुमक्खनत्थं वा फाणितं घरधूपनत्थं वा भविस्सती’’ति एवं चित्तं उप्पादेत्वा.

को पनेत्थ यावकालिकयावजीविकवत्थूसु विसेसोति आह ‘‘यावजीविकानी’’तिआदि. याव अरुणस्स उग्गमना तिट्ठतीति सत्तमदिवसे कततेलं सचे याव अरुणुग्गमना तिट्ठतीति अत्थो. पाळियं अनागतसप्पिआदीनन्ति एत्थ ताव मिगरोहितादीनं सप्पि पाळियं अनागतसप्पि, तथा नवनीतं, नाळिकेरनिम्बकोसम्बकरमन्दसासपआदीनं तेलं पन पाळियं अनागततेलं, तथा मधुकपुप्फफाणितं पाळियं अनागतफाणितन्ति वेदितब्बं. न सब्बं मधुकपुप्फफाणितं फाणितगतिकन्ति आह ‘‘सीतुदकेना’’तिआदि. सीतुदकेन कतन्ति मधुकपुप्फानि सीतुदके पक्खिपित्वा अमद्दित्वा पुप्फरसे उदकगते सति तं उदकं गहेत्वा पचित्वा कतं. ‘‘फाणितगतिकमेवा’’ति इमिना सत्ताहकालिकन्ति दस्सेति, न पन निस्सग्गियवत्थुन्ति. तस्मा सत्ताहं अतिक्कामयतो दुक्कटन्ति वेदितब्बं. वुत्तम्पि चेतं समन्तपासादिकायं सीतुदकेन कतं मधुकपुप्फफाणितं पुरेभत्तं सामिसं वट्टति ¶ , पच्छाभत्ततो पट्ठाय ¶ सत्ताहं निरामिसमेव, सत्ताहातिक्कमे वत्थुगणनाय दुक्कट’’न्ति. सचे पन खीरं पक्खिपित्वा कतं, यावकालिकं. खण्डसक्खरं पन खीरजल्लिकं अपनेत्वा सोधेन्ति, तस्मा वट्टति, अम्बजम्बुपनसकदलिखज्जुरिचिञ्चादीनं सब्बेसं यावकालिकफलानं फाणितं यावकालिकमेवाति आह ‘‘अम्बफाणितादीनि यावकालिकानी’’ति.

कायिकपरिभोगं वट्टतीति कायस्स वा काये अरुनो वा मक्खनं वट्टति, अज्झोहरितुं पन न वट्टति. यन्ति सत्ताहातिक्कन्तं भेसज्जं. निरपेक्खो परिच्चजित्वाति अनपेक्खो सामणेरस्स दत्वा. तन्ति एवं परिच्चजित्वा पुन लद्धभेसज्जं. एवञ्हि दिन्नं भेसज्जं सचे सो सामणेरो अभिसङ्खरित्वा वा अनभिसङ्खरित्वा वा तस्स भिक्खुनो ददेय्य, गहेत्वा नत्थुकम्मं वा कातब्बं, अञ्ञं वा कञ्चि परिभोगं. तेनाह ‘‘अज्झोहरितुम्पि वट्टती’’ति. सचे सो बालो होति, दातुं न जानाति, अञ्ञेन भिक्खुना वत्तब्बो ‘‘अत्थि ते, सामणेर, भेसज्ज’’न्ति, ‘‘आम, भन्ते, अत्थी’’ति. ‘‘आहर, थेरस्स भेसज्जं करिस्सामा’’ति, एवम्पि वट्टति. वत्थुगणनायाति सप्पिआदिवत्थुगणनाय चेव सप्पिपिण्डादिवत्थुगणनाय च. मिस्सितेसु पन एकं निस्सग्गियं पाचित्तियं. एत्थ च ‘‘इदं मे, भन्ते, भेसज्जं सत्ताहातिक्कन्तं निस्सग्गियं, इमाहं सङ्घस्स निस्सज्जामी’’ति (पारा. ६२३) निस्सज्जनविधानं वेदितब्बं.

साधारणपञ्ञत्ति. सत्ताहं अनतिक्कन्तेपि अतिक्कन्तसञ्ञिनो चेव वेमतिकस्स च दुक्कटं. अतिक्कन्ते अनतिक्कन्तसञ्ञिनोपि वेमतिकस्सपि निस्सग्गियं पाचित्तियमेव, तथा अनधिट्ठिताविस्सज्जितानट्ठाविनट्ठादड्ढाविलुत्तेसु अधिट्ठितादिसञ्ञिनो. अन्तोसत्ताहं अधिट्ठिते, विस्सज्जिते, नट्ठे, विनट्ठे, दड्ढे, अच्छिन्ने, विस्सासेन गहिते उम्मत्तकादीनञ्च अनापत्ति. आचारविपत्ति. सप्पिआदीनं अत्तनो सन्तकता, गणनुपगता, सत्ताहातिक्कमोति इमानेत्थ तीणि अङ्गानि. कथिनसमुट्ठानं, अकिरियं, नोसञ्ञाविमोक्खं, अचित्तकं, पण्णत्तिवज्जं, कायकम्मं, वचीकम्मं, तिचित्तं, तिवेदनं. तेनाह ‘‘सेसं चीवरवग्गस्स पठमसिक्खापदे वुत्तनयेनेव वेदितब्ब’’न्ति (कङ्खा. अट्ठ. कथिनसिक्खापदवण्णना).

भेसज्जसिक्खापदवण्णना निट्ठिता.

४. वस्सिकसाटिकसिक्खापदवण्णना

पच्छिममासस्स ¶ ¶ पठमदिवसतो पट्ठायाति जेट्ठमूलपुण्णमासिया पच्छिमपाटिपददिवसतो पट्ठाय. तावाति ताव परिमाणे काले. जेट्ठमूलपुण्णमासिया पच्छिमपाटिपददिवसतो पट्ठाय याव कत्तिकपुण्णमा, इमस्मिं पञ्चमासेति अत्थो. कालो वस्सिकसाटिकायातिआदिनाति एत्थ आदिसद्देन ‘‘समयो वस्सिकसाटिकाय, अञ्ञेपि मनुस्सा वस्सिकसाटिकचीवरं देन्ती’’ति (पारा. ६२८) इमेसं गहणं. देथ मे वस्सिकसाटिकचीवरन्तिआदिकायाति एत्थ आदिसद्देन पन ‘‘आहरथ मे वस्सिकसाटिकचीवरं, परिवत्तेथ मे वस्सिकसाटिकचीवरं, चेतापेथ मे वस्सिकसाटिकचीवर’’न्ति इमेसं गहणं. अत्तनो अञ्ञातकअप्पवारितेसु तदुभयं करोन्तस्स किं होतीति आह ‘‘अञ्ञातकअप्पवारितट्ठाने’’तिआदि. ‘‘वत्तभेदे दुक्कट’’न्ति इदं वस्सिकसाटिकं पुब्बे अदेन्ते सन्धाय वुत्तं. ये पन पुब्बेपि देन्ति, तेसु वत्तभेदो नत्थि. वुत्तञ्हि समन्तपासादिकायं ‘‘ये मनुस्सा पुब्बेपि वस्सिकसाटिकचीवरं देन्ति, इमे पन सचेपि अत्तनो अञ्ञातकअप्पवारिता होन्ति, वत्तभेदो नत्थि तेसु सतुप्पादकरणस्स अनुञ्ञातत्ता’’ति (पारा. अट्ठ. २.६२८). अञ्ञातकविञ्ञत्तिसिक्खापदेन निस्सग्गियं पाचित्तियन्ति ‘‘यो पन भिक्खु अञ्ञातकं गहपतिं वा गहपतानिं वा चीवरं विञ्ञापेय्य अञ्ञत्र समया, निस्सग्गियं पाचित्तिय’’न्ति (पारा. ५१८) इमिना सिक्खापदेन निस्सग्गियं पाचित्तियं. इदं पन पकतिया वस्सिकसाटिकदायकेसुपि होतियेव.

गिम्हानं पच्छिमद्धमासस्स पठमदिवसतो पट्ठायाति एत्थ जेट्ठमूलकाळपक्खूपोसथस्स पच्छिमपाटिपददिवसतो पट्ठाय याव आसाळ्हिपुण्णमा, अयमद्धमासो गिम्हानं पच्छिमद्धमासो नाम, तस्स पठमदिवसतो पट्ठायाति अत्थो, अद्धमासस्स पठमपाटिपददिवसतो पट्ठायाति वुत्तं होति. कत्तिकमासस्स पच्छिमदिवसो नाम पच्छिमकत्तिकमासस्स पुण्णमा. एत्तावताति ‘‘मासो सेसो गिम्हानन्ति भिक्खुना वस्सिकसाटिकचीवरं परियेसितब्बं, अद्धमासो सेसो गिम्हानन्ति कत्वा निवासेतब्ब’’न्ति एत्तकेन गणनेन. परियेसनक्खेत्तन्ति परियेसनस्स खेत्तं. एतस्मिञ्हि मासे वस्सिकसाटिकं अलद्धं परियेसितुं वट्टति. करणनिवासनक्खेत्तम्पीति करणक्खेत्तञ्चेव निवासनक्खेत्तञ्च. पि-सद्देन परियेसनक्खेत्तं ¶ सम्पिण्डेति. एतस्मिञ्हि अद्धमासे परियेसितुं, कातुं, निवासेतुञ्च वट्टति, अधिट्ठातुंयेव न वट्टति. यं पन समन्तपासादिकायं कत्थचि पोत्थके ‘‘जेट्ठमूलपुण्णमासिया पच्छिमपाटिपददिवसतो पट्ठाय याव कालपक्खुपोसथो, अयमेको अद्धमासो परियेसनक्खेत्तञ्चेव करणक्खेत्तञ्च. एतस्मिञ्हि अन्तरे वस्सिकसाटिकं अलद्धं परियेसितुं ¶ , लद्धं कातुञ्च वट्टति, निवासेतुं, अधिट्ठातुञ्च न वट्टती’’ति (पारा. अट्ठ. २.६२८) वचनं दिस्सति, तं पमादलिखितं मातिकाय विरोधतोति दट्ठब्बं. ‘‘अद्धमासो सेसो गिम्हानन्ति कत्वा निवासेतब्ब’’न्ति (पारा. ६२७) हि पाळि. सब्बम्पीति परियेसनं, करणं, निवासनं, अधिट्ठानञ्चाति सब्बम्पि. इमिना इमे चत्तारो मासा परियेसनकरणनिवासनाधिट्ठानानं चतुन्नम्पि खेत्तन्ति दस्सेति. एतेसु हि चतूसु मासेसु अलद्धं परियेसितुं, लद्धं कातुं, निवासेतुं, अधिट्ठातुञ्च वट्टति.

वस्सं उक्कड्ढीयतीति संवच्छरं उद्धं कड्ढीयति वड्ढीयति, आरुय्हतीति अत्थो, वस्सानस्स पठममासं उक्कड्ढित्वा गिम्हानं पच्छिममासमेव करोन्तीति वुत्तं होति. वस्सूपनायिकदिवसे अधिट्ठातब्बाति वस्सानतो पुब्बेयेव दसाहस्स अतिक्कन्तत्ता वस्सूपनायिकदिवसेयेव अधिट्ठातब्बा. तञ्हि दिवसं अतिक्कामेतुं न वट्टति. अन्तोवस्से पन लद्धा चेव निट्ठिता च तस्मिंयेव अन्तोवस्से लद्धदिवसतो पट्ठाय दसाहं नातिक्कामेतब्बा, दसाहातिक्कमे निट्ठिता पन तदहेव अधिट्ठातब्बा. दसाहे अप्पहोन्ते चीवरकालं नातिक्कामेतब्बा. अयं ताव कताय परिहारो. अकताय पन को परिहारोति आह ‘‘सचे’’तिआदि. एकाहम्पि न लभति इतो अञ्ञस्स परिहारस्साभावतोति अधिप्पायो.

सो कुतो होतीति आह ‘‘याव हेमन्तस्स पठमदिवसो’’ति, जेट्ठमूलपुण्णमासितो पट्ठाय याव कत्तिकपुण्णमासिया पच्छिमपाटिपददिवसो, तावाति अत्थो. एतेसु सत्तसु पिट्ठिसमयमासेसूति पटिलोमक्कमेन वुत्तेसु कत्तिकपुण्णमासिया पच्छिमपाटिपदादीसु जेट्ठमूलपुण्णमासावसानेसु एतेसु सत्तसु पिट्ठिसमयनामकेसु मासेसु. सतुप्पादकरणेनाति ‘‘कालो वस्सिकसाटिकाया’’तिआदिना नयेन सतुप्पादकरणेन. विञ्ञापेन्तस्साति ‘‘देथ ¶ मे वस्सिकसाटिकचीवर’’न्तिआदिना (पारा. ६२८) नयेन विञ्ञत्तिं करोन्तस्स. तेन सिक्खापदेन अनापत्तीति अञ्ञातकविञ्ञत्तिसिक्खापदेन अनापत्ति, इमिना पन सिक्खापदेन आपत्तियेव असमयत्ता. वुत्तञ्हेतं भदन्तबुद्धदत्ताचरियेन –

‘‘कत्वा पन सतुप्पादं, वस्ससाटिकचीवरं;

निप्फादेन्तस्स भिक्खुस्स, समये पिट्ठिसम्मते.

‘‘होति ¶ निस्सग्गियापत्ति, ञातकाञ्ञातकादिनो;

तेसुयेव च विञ्ञत्तिं, कत्वा निप्फादने तथा’’ति.

एत्थ च ‘‘इदं मे, भन्ते, वस्सिकसाटिकचीवरं अतिरेकमासे सेसे गिम्हाने परियिट्ठं अतिरेकद्धमासे सेसे गिम्हाने कत्वा परिदहितं निस्सग्गिय’’न्ति इमिना (पारा. ६२८) नयेन निस्सज्जनविधानं वेदितब्बं.

वस्सिकसाटिकपरियेसनवत्थुस्मिन्ति पटिकच्चेव वस्सिकसाटिकपरियेसनवत्थुस्मिं. तिकपाचित्तियन्ति अतिरेकमासद्धमासेसु अतिरेकसञ्ञिवेमतिकऊनकसञ्ञीनं परियेसननिवासनवसेन तीणि पाचित्तियानि, एकसेसनिद्देसो चायं, सामञ्ञनिद्देसो वा. ऊनकमासद्धमासेसूति ऊनकमासे चेव ऊनकद्धमासे च. अतिरेकसञ्ञिनो, वेमतिकस्स वा दुक्कटन्ति एत्थ ‘‘परियेसननिवासनं करोन्तस्सा’’ति पाठसेसो. इदं वुत्तं होति – ‘‘ऊनकमासे सेसे गिम्हाने अतिरेकसञ्ञिनो, वेमतिकस्स वा परियेसन्तस्स दुक्कटं, ऊनकद्धमासे सेसे गिम्हाने च अतिरेकसञ्ञिनो, वेमतिकस्स वा निवासेन्तस्स दुक्कट’’न्ति. ‘‘तथा’’ति इमिना दुक्कटं अतिदिसति, तञ्च दुक्कटं उदकफुसितगणनाय अकत्वा न्हानपरियोसानवसेन पयोगे पयोगे कारेतब्बं, तञ्च खो विवटङ्गणे आकासतो पतितउदकेनेव न्हायन्तस्स, न न्हानकोट्ठकवापिआदीसु घटेहि आसित्तूदकेन न्हायन्तस्स. तेनेवाह ‘‘सतिया वस्सिकसाटिकाया’’तिआदि. पोक्खरणियादीसु पन नग्गस्स न्हायन्तस्स अनापत्तीति सम्बन्धो, पोक्खरणियादीसु पन सतियापि वस्सिकसाटिकाय नग्गस्स न्हायन्तस्स नत्थि दुक्कटापत्तीति अत्थो.

एवं ¶ अन्तरापत्तिया अनापत्तिं दस्सेत्वा इदानि निस्सग्गियेन अनापत्तिं दस्सेतुं ‘‘अच्छिन्नचीवरस्सा’’तिआदि वुत्तं. तत्थ अच्छिन्नचीवरस्साति अच्छिन्नसेसचीवरस्स. तस्सापि असमये निवासतो अनापत्ति. एस नयो नट्ठचीवरस्स वाति एत्थापि. यथा चेत्थ निवासेन्तानं तेसं अनापत्ति, एवं तत्थ परियेसन्तानम्पीति दट्ठब्बं. एत्थ पन महग्घवस्सिकसाटिकं ठपेत्वा न्हायन्तस्स चोरूपद्दवो आपदा नामाति आह ‘‘अनिवत्थ’’न्तिआदि. आपदासु वा निवासयतोति आपदासु विज्जमानासु असमये निवासेन्तस्स. यं पन समन्तपासादिकायं ‘‘अच्छिन्नचीवरस्साति एतं वस्सिकसाटिकंयेव सन्धाय वुत्तं. तेसञ्हि नग्गानं कायोवस्सापने अनापत्ति. एत्थ च महग्घवस्सिकसाटिकं निवासेत्वा न्हायन्तस्स चोरूपद्दवो आपदा नामा’’ति अच्छिन्नचीवरादिनो निस्सग्गियेन अनापत्तिं ¶ अदस्सेत्वा नग्गस्स न्हायतो दुक्कटेनेव अनापत्तिदस्सनं, तं युत्तं विय न दिस्सति. सब्बसिक्खापदेसु हि मूलापत्तिया एव आपत्तिप्पसङ्गे अनापत्तिदस्सनत्थं अनापत्तिवारो आरभीयति, न अन्तरापत्तियाति, तस्मा उपपरिक्खितब्बं. सचीवरताति अन्तरवासकउत्तरासङ्गेहि सचीवरता.

वस्सिकसाटिकसिक्खापदवण्णना निट्ठिता.

५. चीवरअच्छिन्दनसिक्खापदवण्णना

‘‘दत्वा’’ति यं किञ्चि पच्चासीसमानस्सेव दानमिह अधिप्पेतं, न निस्सट्ठदानन्ति आह ‘‘वेय्यावच्चादीनी’’तिआदि. सकसञ्ञायाति ‘‘सक’’न्ति सञ्ञाय. इमिना पाराजिकाभावं दस्सेति. चजित्वा दिन्नम्पि हि सकसञ्ञाय गण्हतो नत्थि पाराजिकं. अच्छिन्दन्तस्साति एकतो अबद्धानि, विसुं ठपितानि च बहूनि अच्छिन्दतो, ‘‘सङ्घाटिं आहर, उत्तरासङ्गं आहरा’’ति एवं आहरापयतो च. तेनाह ‘‘वत्थुगणनाय आपत्तियो’’ति. ‘‘मया दिन्नानि सब्बानि आहरा’’ति वदतोपि एकवचनेनेव सम्बहुला आपत्तियो. एकं चीवरं पन एकाबद्धानि च बहूनि अच्छिन्दतो एका आपत्ति. ‘‘अच्छिन्दा’’ति आणत्तिया दुक्कटन्ति ‘‘मया दिन्नानि सब्बानि गण्हा’’ति आणत्तिया एकं दुक्कटं, अच्छिन्नेसु पन ¶ एकवचनेनेव सम्बहुला पाचित्तियो. तेनाह ‘‘अच्छिन्नेसु वत्थुगणनाय आपत्तियो’’ति. अच्छिन्नेसूति तेनाणत्तेन अच्छिन्नेसु चीवरेसु. यत्थ पन पोत्थकेसु ‘‘अच्छिन्नेसु यत्तकानि आणत्तानि, तेसं गणनाय आपत्तियो’’ति पाठो, तत्थ यत्तकानि आणत्तानीति यत्तकानि चीवरानि गण्हितुं आणत्तानीति अत्थो. यं पन समन्तपासादिकायं ‘‘चीवरं ‘गण्हा’ति आणापेति, एकं दुक्कटं. आणत्तो बहूनि गण्हाति, एकं पाचित्तिय’’न्ति (पारा. अट्ठ. २.६३३) वुत्तं, तं एकाबद्धं सन्धाय. एवञ्च कत्वा समन्तपासादिकाय सद्धिं इमाय अट्ठकथाय न कोचि विरोधो. सचे पन ‘‘सङ्घाटिं गण्ह, उत्तरासङ्गं गण्हा’’ति आणापेति, वाचाय वाचाय दुक्कटं. अच्छिन्नेसु वत्थुगणनाय आपत्तियो. एत्थ च ‘‘इदं मे, भन्ते, चीवरं भिक्खुस्स सामं दत्वा अच्छिन्नं निस्सग्गिय’’न्ति (पारा. ६३३) इमिना नयेन निस्सज्जनविधानं वेदितब्बं.

तिकपाचित्तियन्ति उपसम्पन्ने उपसम्पन्नसञ्ञिवेमतिकअनुपसम्पन्नसञ्ञीनं वसेन तीणि पाचित्तियानि. अञ्ञं परिक्खारन्ति पत्तादिं अञ्ञं परिक्खारं, अन्तमसो सूचिम्पीति अत्थो. न ¶ केवलं अनुपसम्पन्नस्स चीवरंयेव अच्छिन्दतो दुक्कटन्ति आह ‘‘अनुपसम्पन्नस्स चा’’तिआदि. तत्थ यं किञ्चीति चीवरं वा होतु, पत्तादि, यं किञ्चि परिक्खारं वा. तस्स विस्सासं गण्हन्तस्साति यस्स दिन्नं, तस्स विस्सासेन गण्हन्तस्स, ततियत्थे चेतं उपयोगवचनं. उपसम्पन्नताति अच्छिन्दनसमये उपसम्पन्नभावो. किञ्चापि उपसम्पन्नभावो पाळियं, मातिकट्ठकथायञ्च दानग्गहणेसु दिस्सति, तथापि अनुपसम्पन्नकाले चीवरं दत्वा उपसम्पन्नकाले अच्छिन्दन्तस्स आपत्तितो अच्छिन्दनकालेयेव उपसम्पन्नता अङ्गन्ति वेदितब्बं.

चीवरअच्छिन्दनसिक्खापदवण्णना निट्ठिता.

६. सुत्तविञ्ञत्तिसिक्खापदवण्णना

छब्बिधं खोमसुत्तादिन्ति ‘‘सुत्तं नाम छ सुत्तानि खोमं कप्पासिकं कोसेय्यं कम्बलं साणं भङ्ग’’न्ति (पारा. ६३८) एवं वुत्तं छब्बिधं खोमसुत्तादिं. तत्थ ¶ खोमन्ति (पारा. अट्ठ. २.६३६-३८) खोमवाकेहि कतसुत्तं. कप्पासिकन्ति कप्पासतो निब्बत्तं. कोसेय्यन्ति कोसियंसूहि कन्तित्वा कतसुत्तं. कम्बलन्ति एळकलोमसुत्तं. साणन्ति साणवाकेन कतसुत्तं. भङ्गन्ति पाटेक्कं वाकसुत्तमेवाति एके. पञ्चहिपि मिस्सेत्वा कतसुत्तं पन ‘‘भङ्ग’’न्ति वेदितब्बं. तेसं अनुलोमन्ति तेसं खोमादीनं अनुलोमं दुकूलं पत्तुण्णं सोमारपट्टं चीनपट्टं इद्धिजं देवदिन्नन्ति छब्बिधं सुत्तं.

तुरीति वायनूपकरणो एको दण्डो, वीतवीतट्ठानं यत्थ संहरित्वा ठपेन्ति. वेमन्ति वायनूपकरणो एको दण्डो, सुत्तं पवेसेत्वा येन आकोटेन्तो घनभावं सम्पादेन्ति. तस्स सब्बप्पयोगेसु दुक्कटन्ति तन्तवायस्स ये ते तुरिवेमसज्जनादिका पयोगा, तेसु सब्बेसु पयोगेसु भिक्खुस्स दुक्कटं, तस्स तन्तवायस्स पयोगे पयोगे भिक्खुस्स दुक्कटन्ति वुत्तं होति. तुरिआदीनं अभावे तेसं करणत्थं वासिफरसुआदीनं मग्गननिसानरुक्खच्छेदनादिसब्बप्पयोगेपि एसेव नयो. तन्तूनं अत्तनो सन्तकत्ता वीतवीतट्ठानं पटिलद्धमेव होतीति आह ‘‘पटिलाभेन निस्सग्गियं होती’’ति, विकप्पनुपगपच्छिमचीवरप्पमाणे वीते निस्सग्गियं होतीति वुत्तं होति. तेनेव वक्खति ‘‘दीघतो विदत्थिमत्ते, तिरियञ्च हत्थमत्ते वीते निस्सग्गियं पाचित्तिय’’न्ति. एत्थ च ‘‘इदं मे, भन्ते, चीवरं सामं सुत्तं विञ्ञापेत्वा तन्तवायेहि वायापितं निस्सग्गिय’’न्ति इमिना नयेन निस्सज्जनविधानं वेदितब्बं.

तेनेवाति ¶ विञ्ञापिततन्तवायेनेव. एवं इध दुक्कटन्ति इधापि तन्तवायेनेव दीघतो विदत्थिमत्ते, तिरियं हत्थमत्ते वीते दुक्कटन्ति अत्थो. अकप्पियसुत्तमयेति विञ्ञापितसुत्तमये. इतरस्मिन्ति अविञ्ञत्तिसुत्तमये परिच्छेदे. ततो चे ऊनतराति वुत्तप्पमाणतो चे ऊनतरा, अन्तमसो (पारा. अट्ठ. २.६३६-६३८) अच्छिमण्डलप्पमाणापीति अधिप्पायो. कप्पियतन्तवायेनपि अकप्पियसुत्तं वायापेन्तस्स यथा पुब्बे निस्सग्गियं, एवमिध दुक्कटं. तेनेव कप्पियञ्च अकप्पियञ्च सुत्तं वायापेन्तस्स सचे पच्छिमचीवरप्पमाणा वा ऊनका वा अकप्पियसुत्तपरिच्छेदा होन्ति, तेसु परिच्छेदगणनाय दुक्कटं. कप्पियसुत्तपरिच्छेदेसु अनापत्ति. अथ एकन्तरिकेन वा सुत्तेन, दीघतो वा कप्पियं तिरियं अकप्पियं कत्वा वीतं होति, पमाणयुत्ते परिच्छेदे परिच्छेदे दुक्कटं.

यदि ¶ पन (पारा. अट्ठ. २.६३६-६३८) द्वे तन्तवाया होन्ति एको कप्पियो एको अकप्पियो, सुत्तञ्च अकप्पियं, ते चे वारेन विनन्ति, अकप्पियतन्तवायेन वीते पमाणयुत्ते परिच्छेदे परिच्छेदे पाचित्तियं, ऊनतरे दुक्कटं. इतरेन वीते उभयत्थ दुक्कटं. सचे द्वेपि वेमं गहेत्वा एकतो विनन्ति, पमाणयुत्ते परिच्छेदे परिच्छेदे पाचित्तियं. अथ सुत्तं कप्पियं, चीवरञ्च केदारबद्धादीहि सपरिच्छेदं, अकप्पियतन्तवायेन वीते परिच्छेदे परिच्छेदे दुक्कटं, इतरेन वीते अनापत्ति. सचे द्वेपि एकतो विनन्ति, पमाणयुत्ते परिच्छेदे परिच्छेदे दुक्कटं. अथ सुत्तम्पि कप्पियञ्च अकप्पियञ्च, ते चे वारेन विनन्ति, अकप्पियतन्तवायेन अकप्पियसुत्तमयेसु पच्छिमचीवरप्पमाणेसु परिच्छेदेसु वीतेसु परिच्छेदगणनाय पाचित्तियं, ऊनतरेसु कप्पियसुत्तमयेसु च दुक्कटं. कप्पियतन्तवायेन अकप्पियसुत्तमयेसु पमाणयुत्तेसु वा ऊनकेसु वा दुक्कटमेव, कप्पियसुत्तमयेसु अनापत्ति.

अथ एकन्तरिकेन वा सुत्तेन, दीघतो वा अकप्पियं तिरियं अकप्पियं कत्वा विनन्ति, उभोपि वा ते वेमं गहेत्वा एकतो विनन्ति, अपरिच्छेदे चीवरे पमाणयुत्ते परिच्छेदे परिच्छेदे दुक्कटं, सपरिच्छेदे परिच्छेदवसेन दुक्कटानि. तेनाह ‘‘एतेनेव उपायेना’’तिआदि.

एत्थ च तन्तवायो ताव अञ्ञातकअप्पवारिततो विञ्ञत्तिया लद्धो अकप्पियो, सेसो कप्पियो. सुत्तम्पि सामं विञ्ञापितं अकप्पियं, सेसं, ञातकादिवसेन उप्पन्नञ्च कप्पियन्ति वेदितब्बं. तिकपाचित्तियन्ति वायापिते वायापितसञ्ञिवेमतिकअवायापितसञ्ञीनं वसेन तीणि पाचित्तियानि. चीवरत्थाय विञ्ञापितसुत्तन्ति सामं वा अञ्ञेन वा चीवरत्थाय विञ्ञापितसुत्तं ¶ . किञ्चापि पाळियं ‘‘सामं सुत्तं विञ्ञापेत्वा’’ति वुत्तं, तथापि इध ‘‘चीवरत्थाय सामं विञ्ञापितसुत्त’’न्ति अवत्वा केवलं ‘‘चीवरत्थाय विञ्ञापितसुत्त’’न्ति अङ्गेसु वुत्तत्ता अञ्ञेन चीवरत्थाय विञ्ञापितसुत्तम्पि सङ्गहं गच्छतीति वेदितब्बं. अकप्पियविञ्ञत्तियाति ‘‘चीवरं मे, आवुसो, वायथा’’ति एवंभूताय अकप्पियविञ्ञत्तिया.

सुत्तविञ्ञत्तिसिक्खापदवण्णना निट्ठिता.

७. महापेसकारसिक्खापदवण्णना

चीवरसामिकेहि ¶ पुब्बे अप्पवारितो हुत्वाति ‘‘कीदिसेन ते, भन्ते, चीवरेन अत्थो, कीदिसं ते चीवरं वायापेमि, वद, भन्ते, यदिच्छसी’’ति चीवरसामिकेहि पुब्बे अवुत्तो हुत्वा. एत्थ च आयतादीहि तीहि सुत्तवड्ढनाकारेन सह वायनाकारं दस्सेति, सुवीतादीहि चतूहि वायनाकारमेव. ‘‘किञ्चिमत्तं अनुपदज्जेय्यामा’’तिआदि तस्स कत्तब्बाकारमत्तदस्सनं, न पन अङ्गदस्सनं सुत्तवड्ढनवसेनेव आपज्जितब्बत्ताति आह ‘‘न भिक्खुनो पिण्डपातदानमत्तेना’’तिआदि. एत्थ च ‘‘इदं मे, भन्ते, चीवरं पुब्बे अप्पवारितेन अञ्ञातकस्स गहपतिकस्स तन्तवाये उपसङ्कमित्वा चीवरे विकप्पं आपन्नं निस्सग्गिय’’न्ति (पारा. ६४३) इमिना नयेन निस्सज्जनविधानं वेदितब्बं. तिकपाचित्तियन्ति अञ्ञातके अञ्ञातकसञ्ञिवेमतिकञातकसञ्ञीनं वसेन तीणि पाचित्तियानि.

महापेसकारसिक्खापदवण्णना निट्ठिता.

८. अच्चेकचीवरसिक्खापदवण्णना

पठमपदस्साति ‘‘दसाहानागत’’न्ति पदस्स. पुरिमनयेनेवाति अच्चन्तसंयोगवसेनेव. तानि दिवसानीति तेसु दिवसेसु. अच्चन्तमेवाति निरन्तरमेव, तेसु दसाहेसु यत्थ कत्थचि दिवसेति वुत्तं होति. पवारणामासस्साति पुब्बकत्तिकमासस्स. सो हि इध पठमपवारणायोगतो ‘‘पवारणामासो’’ति वुत्तो. जुण्हपक्खपञ्चमितो पट्ठायाति सुक्कपक्खपञ्चमिं आदिं कत्वा. पवारणामासस्स जुण्हपक्खपञ्चमितोति वा पवारणामासस्स पकासनतो पुरिमस्स जुण्हपक्खस्स पञ्चमितो पट्ठायाति अत्थो. यो पनेत्थ ‘‘कामञ्चेस (सारत्थ. टी. २.६५०) ‘दसाहपरमं अतिरेकचीवरं धारेतब्ब’न्ति (पारा. ४६३) इमिनाव ¶ सिद्धो, अट्ठुप्पत्तिवसेन पन अपुब्बं विय अत्थं दस्सेत्वा सिक्खापदं ठपित’’न्ति पाठो दिस्सति, सो पमादपाठो ‘‘दसाहानागत’’न्ति इमिना विरोधतोति दट्ठब्बं. किञ्च ‘‘जुण्हपक्खपञ्चमितो पट्ठाया’’ति वुत्तत्ता अट्ठकथायेव पुब्बापरविरोधोपि सिया.

अच्चेकचीवरन्ति ¶ अच्चायिकचीवरं वुच्चति, सो च अच्चायिकभावो दायकस्स गमिकादिभावेनाति दस्सेतुं ‘‘गमिकगिलानगब्भिनिअभिनवुप्पन्नसद्धानं पुग्गलान’’न्तिआदि वुत्तं. तत्थ गमिको नाम ‘‘सेनाय वा गन्तुकामो होति, पवासं वा गन्तुकामो होती’’ति (पारा. ६४९) वुत्तो. अञ्ञतरेन ‘‘वस्सावासिकं दस्सामी’’ति एवं आरोचेत्वा दिन्नन्ति गमिकादीनं अञ्ञतरेन गमनादीहि कारणेहि दातुकामेन दूतं वा पेसेत्वा, सयं वा आगन्त्वा ‘‘वस्सावासिकं दस्सामी’’ति एवं आरोचेत्वा दिन्नं चीवरं. एत्थ च ‘‘इदं मे, भन्ते, अच्चेकचीवरं चीवरकालसमयं अतिक्कामितं निस्सग्गिय’’न्ति (पारा. ६४९) इमिना नयेन निस्सज्जनविधानं वेदितब्बं.

सेसन्ति ‘‘साधारणपञ्ञत्ती’’तिआदिकं. अयं पन विसेसो – तत्थ अतिरेकचीवरे अतिरेकचीवरसञ्ञिआदिनो दसाहातिक्कमो, इध अच्चेकचीवरे अच्चेकचीवरसञ्ञिआदिनो चीवरकालातिक्कमो. तथा अनच्चेकचीवरे अच्चेकचीवरसञ्ञिनो, वेमतिकस्स च दुक्कटं. जातिप्पमाणसम्पन्नस्स अच्चेकचीवरस्स अत्तनो सन्तकता, दसाहानागताय कत्तिकतेमासिकपुण्णमाय उप्पन्नभावो, अनधिट्ठितअविकप्पितता, चीवरकालातिक्कमोति चतुरङ्गभावोव एत्थ विसेसो.

अच्चेकचीवरसिक्खापदवण्णना निट्ठिता.

९. सासङ्कसिक्खापदवण्णना

उपसम्पज्जन्तिआदीसु वियाति ‘‘पठमं झानं उपसम्पज्ज विहरती’’ति (विभ. ५०८) इमस्स विभङ्गे ‘‘उपसम्पज्जा’’ति उद्धरितब्बे ‘‘उपसम्पज्ज’’न्ति उद्धटं. तदिह निदस्सनं कतं. आदिसद्देन पन ‘‘अनापुच्छं वा गच्छेय्या’’तिआदीनं (पाचि. १११, ११५) सङ्गहो दट्ठब्बो. उपगन्त्वाति उपसद्दस्सत्थमाह. वसित्वाति अक्खण्डं वसित्वा. ‘‘येन यस्स हि सम्बन्धो, दूरट्ठम्पि च तस्स त’’न्ति वचनतो ‘‘इमस्स…पे… इमिना सम्बन्धो’’ति वुत्तं. तत्थ इमस्साति ‘‘उपवस्स’’न्ति पदस्स. विनयपरियायेन अरञ्ञलक्खणं अदिन्नादानपाराजिके ¶ आगतं. तत्थ हि ‘‘गामा वा अरञ्ञा वा’’ति अनवसेसतो अवहारट्ठानपरिग्गहेन ¶ तदुभयं असङ्करतो दस्सेतुं ‘‘ठपेत्वा गामञ्चा’’तिआदि वुत्तं. गामूपचारो हि लोके गामसङ्खमेव गच्छतीति. इध पन सुत्तन्तपरियायेन ‘‘पञ्चधनुसतिकं पच्छिम’’न्ति (पारा. ६५४) आगतं आरञ्ञकं भिक्खुं सन्धाय. न हि सो विनयपरियायिके अरञ्ञे वसन्तो ‘‘आरञ्ञको पन्थसेनासनो’’ति (म. नि. १.६१) सुत्ते वुत्तो, तस्मा तत्थ आगतमेव लक्खणं गहेतब्बन्ति दस्सेन्तो ‘‘सब्बपच्छिमानि आरोपितेन आचरियधनुना’’तिआदिमाह. तत्थ ‘‘आचरियधनु नाम पकतिहत्थेन नवविदत्थिपमाणं. जियाय पन आरोपिताय चतुहत्थपमाण’’न्ति वदन्ति. गामस्साति परिक्खित्तस्स गामस्स. इन्दखीलतोति उम्मारतो. परिक्खेपारहट्ठानतोति परियन्ते ठितघरस्स उपचारे ठितस्स मज्झिमस्स पुरिसस्स पठमलेड्डुपाततो. कित्तकेन मग्गेन मिनितब्बन्ति आह ‘‘सचे’’तिआदि. मज्झिमट्ठकथायं पन ‘‘विहारस्सापि गामस्सेव उपचारं नीहरित्वा उभिन्नं लेड्डुपातानं अन्तरा मिनितब्ब’’न्ति वुत्तं. चोरानं निविट्ठोकासादिदस्सनेनाति आरामे, आरामूपचारे च चोरानं निविट्ठोकासादिदस्सनेन कारणेन. आदिसद्देन भुत्तोकासट्ठितोकासनिसिन्नोकासनिपन्नोकासानं गहणं. चोरेहि मनुस्सानं हतविलुत्ताकोटितभावदस्सनतोति आरामे, आरामूपचारे च हतविलुत्ताकोटितभावदस्सनतो.

अन्तरघरे निक्खिपेय्याति अन्तरे अन्तरे घरानि एत्थ, एतस्साति वा अन्तरघरं, गामो, तस्मिं ठपेय्याति अत्थो. तेनाह ‘‘आरञ्ञकस्सा’’तिआदि. तञ्चाति निक्खिपनञ्च. ‘‘महापवारणाय पवारितो होती’’ति इदं वस्सच्छेदं अकत्वा वुट्ठभावं दस्सेतुं वुत्तं, न पन पवारणाय अङ्गभावं. तेनेव हि ब्यतिरेकं दस्सेन्तेन समन्तपासादिकायं (पारा. अट्ठ. २.६५३-६५४) वुत्तं ‘‘सचे पच्छिमिकाय वा उपगतो होति छिन्नवस्सो वा, निक्खिपितुं न लभती’’ति. कत्तिकमासो नाम पुब्बकत्तिकमासस्स काळपक्खपाटिपदतो पट्ठाय याव अपरकत्तिकपुण्णमा, ताव एकूनत्तिंस रत्तिन्दिवा. एव-सद्देन कत्तिकमासतो परं न लभतीति दस्सेति. ऊनप्पमाणे ताव अरञ्ञलक्खणायोगतो न लभतु, कस्मा गावुततो अतिरेकप्पमाणे न लभतीति आह ‘‘यत्र ¶ ही’’तिआदि. निमन्तितो पन अद्धयोजनम्पि योजनम्पि गन्त्वा वसितुं पच्चेति, इदमप्पमाणं. सासङ्कसप्पटिभयमेव होतीति सासङ्कञ्चेव सप्पटिभयञ्च होति. एव-सद्देन अनासङ्कअप्पटिभयेहि अङ्गयुत्तेपि सेनासने वसन्तो निक्खिपितुं न लभतीति दस्सेति. एत्तावता पुरिमिकाय उपगन्त्वा अक्खण्डं कत्वा वुट्ठवस्सो यं गामं गोचरगामं कत्वा पञ्चधनुसतिकपच्छिमे आरञ्ञकसेनासने विहरति, तस्मिं गामे चीवरं ठपेत्वा सकलकत्तिकमासं तस्मिंयेव सेनासने तेन चीवरेन विना वत्थुं अनुजानित्वा ¶ इदानि विहारतो अञ्ञत्थ वसन्तस्स छारत्तं विप्पवासं अनुजानन्तो ‘‘सिया च तस्स भिक्खुनो’’तिआदिमाह. असमादानचारञ्हि अत्थतकथिना एव लभन्ति, नेतरेति एत्थ इदम्पि कारणं दट्ठब्बं. तत्थ छारत्तपरमं तेन भिक्खुना तेन चीवरेन विप्पवसितब्बन्ति यो भिक्खु विहारे वसन्तो ततो अञ्ञत्थ गमनकिच्चे सति अन्तरघरे चीवरं निक्खिपति, तेन भिक्खुना तेन चीवरेन छारत्तपरमं विप्पवसितब्बं, छ रत्तियो तम्हा विहारा अञ्ञत्थ वसितब्बाति वुत्तं होति. वुत्तञ्हि भदन्तेन बुद्धदत्ताचरियेन –

‘‘यं गामं गोचरं कत्वा, भिक्खु आरञ्ञके वसे;

तस्मिं गामे ठपेतुं तं, मासमेकं तु वट्टति.

‘‘अञ्ञत्थेव वसन्तस्स, छारत्तपरमं मतं;

अयमस्स अधिप्पायो, पटिच्छन्नो पकासितो’’ति.

तेनेवाह ‘‘ततो चे उत्तरि विप्पवसेय्याति छारत्ततो उत्तरि तस्मिं सेनासने सत्तमं अरुणं उट्ठापेय्या’’तिआदि. तथा असक्कोन्तेनाति गतट्ठानस्स दूरताय सेनासनं आगन्त्वा सत्तमं अरुणं उट्ठापेतुं असक्कोन्तेन. एवम्पि असक्कोन्तेन तत्रेव ठितेन पच्चुद्धरितब्बं ‘‘अतिरेकचीवरट्ठाने ठस्सती’’ति. वसित्वाति अरुणं उट्ठापेत्वा. भिक्खुसम्मुति उदोसितसिक्खापदे वुत्ताव.

सेसन्ति ‘‘अञ्ञत्र भिक्खुसम्मुतियाति अयमेत्थ अनुपञ्ञत्ती’’तिआदिकं. तत्थ हि अङ्गेसु यं रत्तिविप्पवासो चतुत्थमङ्गं, तं इध छारत्ततो उत्तरि विप्पवासो होतीति अयमेव विसेसो.

सासङ्कसिक्खापदवण्णना निट्ठिता.

१०. परिणतसिक्खापदवण्णना

ननु ¶ चायं सङ्घस्स परिणतो, न परिच्चत्तो, अथ कथं सङ्घसन्तको होतीति आह ‘‘सो ही’’तिआदि. तत्थ सोति लाभो. एकेन परियायेनाति परिणतभावसङ्खातेन एकेन परियायेन. ‘‘लभितब्ब’’न्ति इमिना लाभसद्दस्स कम्मसाधनमाह. चीवरादिवत्थुन्ति चीवरपिण्डपातसेनासनगिलानपच्चयभेसज्जपरिक्खारं ¶ अन्तमसो चुण्णपिण्डम्पि दन्तकट्ठम्पि दसिकसुत्तम्पि. परिणतन्ति सङ्घस्स निन्नं सङ्घस्स पोणं सङ्घस्स पब्भारं हुत्वा ठितन्ति अत्थो. येन पन कारणेन सो परिणतो होति, तं दस्सेत्वा तस्स अत्थं दस्सेतुं ‘‘दस्साम करिस्सामा’’तिआदि वुत्तं. अत्तनो परिणामेन्तस्साति ‘‘इदं मय्हं देही’’ति सङ्घस्स परिणतभावं ञत्वा अत्तनो परिणामेत्वा गण्हन्तस्स. पयोगेति परिणामनप्पयोगे. एत्थ च ‘‘इदं मे, भन्ते, जानं सङ्घिकं लाभं परिणतं अत्तनो परिणामिकं निस्सग्गिय’’न्ति इमिना नयेन निस्सज्जनविधानं वेदितब्बं.

सङ्घचेतियपुग्गलेसूति एत्थ च अन्तमसो सुनखं उपादाय यो कोचि सत्तो ‘‘पुग्गलो’’ति वेदितब्बो. अञ्ञसङ्घादीनन्ति अञ्ञसङ्घचेतियपुग्गलानं. इदं वुत्तं होति – ‘‘सङ्घस्स परिणतं अञ्ञस्स सङ्घस्स वा चेतियस्स वा पुग्गलस्स वा, चेतियस्स परिणतं अञ्ञस्स चेतियस्स वा सङ्घस्स वा पुग्गलस्स वा, पुग्गलस्स परिणतं अञ्ञस्स पुग्गलस्स वा सङ्घस्स वा चेतियस्स वा परिणामेन्तस्स दुक्कट’’न्ति.

इदानि अनापत्तिं दस्सेतुं ‘‘अपरिणतसञ्ञिनो’’तिआदिमाह. परिणते, अपरिणते च अपरिणतसञ्ञिनो चाति सम्बन्धो, परिणते, अपरिणते चाति उभयत्थापि अनापत्तीति अत्थो. वुत्तञ्हेतं ‘‘परिणते अपरिणतसञ्ञी अत्तनो परिणामेति, अनापत्ति. अपरिणते अपरिणतसञ्ञी अनापत्ती’’ति (पारा. ६६०). देय्यधम्मोति चत्तारो पच्चया. आदिसद्देन ‘‘पटिसङ्खारं वा लभेय्य, चिरट्ठितिको वा अस्स, यत्थ वा पन तुम्हाकं चित्तं पसीदति, तत्थ देथा’’ति (पारा. ६६१) वचनानं गहणं. सचे पन दायका ‘‘मयं ¶ सङ्घभत्तं कत्तुकामा, चेतियपूजं कत्तुकामा, एकस्स भिक्खुनो परिक्खारं दातुकामा, तुम्हाकं रुचिया दस्साम. भणथ, कत्थ देमा’’ति (पारा. अट्ठ. २.६६०) वदन्ति, एवं वुत्ते तेन भिक्खुना ‘‘यत्थ इच्छथ, तत्थ देथा’’ति वत्तब्बा.

परिणतसिक्खापदवण्णना निट्ठिता.

पत्तवग्गो ततियो.

इति कङ्खावितरणिया पातिमोक्खवण्णनाय

विनयत्थमञ्जूसायं लीनत्थप्पकासनियं

निस्सग्गियवण्णना निट्ठिता.

पाचित्तियकण्डं

१. मुसावादवग्गो

१. मुसावादसिक्खापदवण्णना

सम्पजानमुसावादेति ¶ ¶ एत्थ मुसाति अभूतं अतच्छं वत्थु, वादोति तस्स भूततो तच्छतो विञ्ञापनं, सम्पजानस्स मुसावादो सम्पजानमुसावादो, तस्मिं सम्पजानमुसावादेति अत्थो. तेनाह ‘‘पुब्बे’’तिआदि. सो च पन मुसावादो पुब्बभागक्खणे, तङ्खणे च विजानन्तस्स होति ‘‘पुब्बेवस्स होति ‘मुसा भणिस्स’न्ति, भणन्तस्स होति ‘मुसा भणामी’’’ति (पाचि. ४) वुत्तत्ताति आह ‘‘पुब्बेपि जानित्वा वचनक्खणेपि जानन्तस्सा’’ति. एतञ्हि द्वयं अङ्गभूतं, इतरं पन होतु वा, मा वा, अकारणमेतं. ननु चेतं भणनमेव ञायतीति आह ‘‘भणनञ्च नामा’’तिआदि. अभूतस्साति अतच्छस्स.

हत्थकं सक्यपुत्तन्ति एत्थ हत्थकोति तस्स थेरस्स नामं. सक्यानं पुत्तोति सक्यपुत्तो. बुद्धकाले किर सक्यकुलतो असीति पुरिससहस्सानि पब्बजिंसु, तेसं सो अञ्ञतरो. अवजानित्वा पटिजाननादिवत्थुस्मिन्ति एत्थ अवजानित्वा पटिजाननं नाम तित्थियेहि सद्धिं कथेन्तो अत्तनो वादे कञ्चि दोसं सल्लक्खेन्तो ‘‘नायं मम वादो’’ति अवजानित्वा पुन कथेन्तो कथेन्तो निद्दोसतं सल्लक्खेत्वा ‘‘ममेव अयं वादो’’ति पटिजानाति. आदिसद्देन पटिजानित्वा अवजाननं, अञ्ञेनञ्ञं पटिचरणं, सम्पजानमुसाभासनं, सङ्केतं कत्वा विसंवादकरणञ्च सङ्गण्हाति. इदानि आपत्तिभेददस्सनत्थं ‘‘उत्तरिमनुस्सधम्मारोचनत्थ’’न्तिआदि वुत्तं.

अनुपधारेत्वा सहसा भणन्तस्साति अवीमंसित्वा वेगेन दिट्ठम्पि ‘‘अदिट्ठं मे’’तिआदिना भणन्तस्स ¶ . ‘‘अञ्ञं भणिस्सामी’’ति अञ्ञं भणन्तस्साति यो मन्दत्ता मोमूहत्ता पक्खलन्तो ‘‘चीवर’’न्ति वत्तब्बे ‘‘चीर’’न्तिआदीनि भणति, अयं ‘‘अञ्ञं भणिस्सामी’’ति अञ्ञं भणति नाम. यो पन सामणेरेन ‘‘अपि, भन्ते, मय्हं उपज्झायं पस्सित्था’’ति ¶ वुत्तो केळिं कुरुमानो ‘‘तव उपज्झायो दारुसकटं योजेत्वा गतो भविस्सती’’ति वा सिङ्गालसद्दं सुत्वा ‘‘कस्सायं सद्दो’’ति वुत्तो ‘‘मातुया ते यानेन गच्छन्तिया कद्दमे लग्गचक्कं उद्धरन्तानं अयं सद्दो’’ति वा एवं नेव दवा, न रवा अञ्ञं भणति, सो आपत्तिं आपज्जतियेव. अञ्ञा पूरणकथा नाम होति – एको गामे थोकं तेलं लभित्वा विहारं आगतो सामणेरं भणति ‘‘त्वं अज्ज कुहिं गतो, गामो एकतेलो अहोसी’’ति वा, पच्छिकाय ठपितं पूवखण्डं लभित्वा ‘‘अज्ज गामे पच्छिकाहि पूवे चारेसु’’न्ति वा, अयं मुसावादोव होति. विसंवादनपुरेक्खारताति विसं वादेन्ति एतेनाति विसंवादनं, वञ्चनाधिप्पायवसप्पवत्तं चित्तं, तस्स पुरेक्खारता विसंवादनपुरेक्खारता, विसंवादनचित्तस्स पुरतो करणन्ति अत्थो.

मुसावादसिक्खापदवण्णना निट्ठिता.

२. ओमसवादसिक्खापदवण्णना

ओमसवादेति खुंसनगरहणवचने. यस्मा पन तं नेव कण्णसुखं, न हदयसुखं, तस्मा तेन कण्णञ्चेव हदयञ्च विज्झतीति आह ‘‘ओविज्झनवचने’’ति, जातिआदीहि घटेत्वा वचनेति वुत्तं होति. तेनाह ‘‘जातिनामा’’तिआदि. तत्थ जाति नाम ब्राह्मणादि उक्कट्ठा चेव चण्डालादि हीना च जाति. नामं नाम अवकण्णकादि हीनञ्चेव बुद्धरक्खितादि उक्कट्ठञ्च नामं. गोत्तं नाम कोसियादि हीनञ्चेव गोतमादि उक्कट्ठञ्च गोत्तं. कम्मं नाम पुप्फछड्डकादि हीनञ्चेव कसिवणिज्जादि उक्कट्ठञ्च कम्मं. सिप्पं नाम नळकारादि हीनञ्चेव मुद्दागणनादि उक्कट्ठञ्च सिप्पं. आबाधो नाम सब्बोपि रोगो हीनोयेव. अथ वा मधुमेहो उक्कट्ठो, सेसो हीनोति वेदितब्बो. लिङ्गं नाम अतिदीघादि हीनञ्चेव नातिदीघादि उक्कट्ठञ्च लिङ्गं. किलेसो नाम रागादिको सब्बोपि किलेसो. आपत्ति नाम सोतापत्तादिका उक्कट्ठा चेव पाराजिकादि अनुक्कट्ठा च आपत्ति. अक्कोसो नाम ‘‘ओट्ठोसी’’तिआदिको हीनो चेव ‘‘पण्डितोसी’’तिआदिको (पाचि. १५) उक्कट्ठो च अक्कोसो.

यथा ¶ ¶ तथाति पाळिआगतानागतपदानं येन केनचि आकारेन. इमस्मिं सिक्खापदे ठपेत्वा भिक्खुं भिक्खुनिआदयो सब्बे सत्ता अनुपसम्पन्नट्ठाने ठिताति आह ‘‘इध चा’’तिआदि. दवकम्यता नाम केळिहसाधिप्पायता. सब्बत्थाति उपसम्पन्नानुपसम्पन्नेसु चेव पाळिआगतानागतपदेसु चाति सब्बत्थ. अत्थधम्मअनुसासनिपुरेक्खारानन्ति एत्थ ‘‘चण्डालोसी’’तिआदिकाय पाळिया अत्थं वण्णेन्तो अत्थपुरेक्खारो नाम. पाळिं वाचेन्तो धम्मपुरेक्खारो नाम. अनुसिट्ठियं ठत्वा ‘‘इदानिपि चण्डालोसि, पापं मा अकासि. मा तमोतमपरायणो अहोसी’’तिआदिना (पाचि. अट्ठ. ३५) नयेन कथेन्तो अनुसासनिपुरेक्खारो नामाति वेदितब्बो.

ओमसवादसिक्खापदवण्णना निट्ठिता.

३. पेसुञ्ञसिक्खापदवण्णना

भिक्खुपेसुञ्ञेति पिसतीति पिसुणा, याय वाचाय समग्गे सत्ते अवयवभूते वग्गे भिन्ने करोति, सा वाचा पिसुणा, पिसुणा एव पेसुञ्ञं, ताय वाचाय समन्नागतो पिसुणो, तस्स कम्मं पेसुञ्ञं, भिक्खुस्स पेसुञ्ञं भिक्खुपेसुञ्ञं, तस्मिं भिक्खुपेसुञ्ञे, भिक्खुतो सुत्वा भिक्खुना, भिक्खुस्स वा उपसंहटपेसुञ्ञेति अत्थो. तेनाह ‘‘जातिआदीही’’तिआदि. तञ्च खो द्वीहि कारणेहि उपसंहरतीति आह ‘‘भिक्खुनो पियकम्यताय वा’’तिआदि. तत्थ भिक्खुनो पियकम्यतायाति यस्स तं भासति, तस्स भिक्खुनो ‘‘एवमहं एतस्स पियो भविस्सामी’’ति अत्तनो पियभावं पत्थयमानताय. भेदाधिप्पायेनाति ‘‘एवमयं तेन सद्धिं भिज्जिस्सती’’ति परस्स परेन भेदं इच्छन्तेन. अथ वा पियसुञ्ञकरणतो पेसुञ्ञं (सारत्थ. टी. पाचित्तिय ३.३६) निरुत्तिनयेन, याय वाचाय यस्स तं भासति, तस्स हदये अत्तनो पियभावं, परस्स च सुञ्ञभावं करोति, सा वाचा, ‘‘भिक्खुस्स पेसुञ्ञं भिक्खुपेसुञ्ञ’’न्तिआदिना एवम्पेत्थ अत्थो दट्ठब्बो. ‘‘वुत्तनयेनेवाति ‘‘जातिआदीहि अक्कोसवत्थूही’’तिआदिना वुत्तनयेन.

पाळिमुत्तकअक्कोसूपसंहारेति ¶ ‘‘चोरोसी’’तिआदिना अक्कोसस्स उपसंहारे. ‘‘अनक्कोसवत्थुभूतं पन पेसुञ्ञकरं तस्स किरियं, वचनं वा पियकम्यताय उपसंहरन्तस्स किञ्चापि इमिना सिक्खापदेन आपत्ति न दिस्सति, तथापि दुक्कटेन भवितब्ब’’न्ति (सारत्थ. टी. पाचित्तिय ३.३६) वदन्ति. पापगरहिताय वदन्तस्साति एकं अक्कोसन्तं, एकञ्च ¶ खमन्तं दिस्वा ‘‘अहो निल्लज्जो, ईदिसम्पि नाम भवन्तं पुन वत्तब्बं मञ्ञिस्सती’’ति एवं केवलं पापगरहिताय भणन्तस्स.

पेसुञ्ञसिक्खापदवण्णना निट्ठिता.

४. पदसोधम्मसिक्खापदवण्णना

पदसो धम्मं वाचेय्याति एकतो पदं पदं धम्मं वाचेय्य, कोट्ठासं कोट्ठासं वाचेय्याति अत्थो. यस्मा न केवलं तिस्सो सङ्गीतियो आरुळ्हधम्मंयेव पदसो वाचेन्तस्स आपत्ति, तस्मा ‘‘सङ्गीतित्तयं अनारुळ्हम्पी’’तिआदि वुत्तं. आदि-सद्देन (पाचि. अट्ठ. ४५) सीलूपदेस धुतङ्गपञ्हआरम्मणकथा बुद्धिकदण्डकञ्ञाणवत्थुअसुभकथादीनं गहणं. मेण्डकमिलिन्दपञ्हेसु थेरस्स सकप्पटिभाने अनापत्ति. यं रञ्ञो सञ्ञापनत्थं आहरित्वा वुत्तं, तत्थ आपत्ति. वण्णपिटकअङ्गुलिमालपिटकरट्ठपालगज्जितआळवकगज्जितगूळ्हमग्गगूळ्हवेस्सन्तरगूळ्हविनयवेदल्लपिटकादीनि पन अबुद्धवचनानियेव.

यस्मा पन तं पदं चतुब्बिधं होति, तस्मा तं दस्सेतुं ‘‘पदानुपदअन्वक्खरानुब्यञ्जनेसू’’ति वुत्तं. तत्थ पदन्ति एको गाथापादो अधिप्पेतो. अनुपदन्ति दुतियपादो. अन्वक्खरन्ति एकेकं अक्खरं. अनुब्यञ्जनन्ति पुरिमब्यञ्जनेन सदिसं पच्छाब्यञ्जनं. यं किञ्चि वा एकं अक्खरं अन्वक्खरं. अक्खरसमूहो अनुब्यञ्जनं. अक्खरानुब्यञ्जनसमूहो पदं. पठमं पदं पदमेव, दुतियं अनुपदन्ति एवमेत्थ नानाकरणं वेदितब्बं. एतेसु पदादीसु यं कञ्चि कोट्ठासं भिक्खुञ्च भिक्खुनिञ्च ठपेत्वा अवसेसपुग्गलेहि सद्धिं एकतो भणन्तस्स पदादिगणनाय पाचित्तियन्ति सम्बन्धो.

एत्थ ¶ गाथाबन्धेसु (पाचि. अट्ठ. ४५) ताव ‘‘मनोपुब्बङ्गमा धम्मा’’ति (ध. प. १, २) एकमेकं पदं सामणेरेन सद्धिं एकतो आरभित्वा एकतोयेव निट्ठापेन्तस्स पदगणनाय पाचित्तियं. थेरेन ‘‘मनोपुब्बङ्गमा धम्मा’’ति वुत्ते तं पदं अपापुणित्वा ‘‘मनोसेट्ठा मनोमया’’ति वचनकाले पत्तेन सामणेरेन एकतो भणन्तस्स अनुपदगणनाय. ‘‘रूपं अनिच्च’’न्तिआदि (म. नि. १.३५३, ३५६) वचनकाले तेन सद्धिं ‘‘रू’’ कारमत्तमेव वाचेन्तस्स अन्वक्खरगणनाय. एस नयो गाथाबन्धेपि. ‘‘रूपं, भिक्खवे, अनिच्चं, वेदना अनिच्चा’’ति (म. नि. १.३५३, ३५६) इमं सुत्तं वाचयमानो थेरेन ‘‘रूपं ¶ अनिच्च’’न्ति वुच्चमाने सामणेरो सीघपञ्ञताय ‘‘वेदना अनिच्चा’’ति इमं अनिच्चपदं थेरस्स ‘‘रूपं अनिच्च’’न्ति एतेन अनिच्चपदेन सद्धिं एकतो भणन्तो वाचं निच्छारेति, एवं वाचेन्तस्स अनुब्यञ्जनगणनाय पाचित्तियन्ति वेदितब्बं.

तिकपाचित्तियन्ति अनुपसम्पन्ने अनुपसम्पन्नसञ्ञिवेमतिकउपसम्पन्नसञ्ञीनं वसेन तीणि पाचित्तियानि. अनुपसम्पन्नेन सद्धिं एकतो उद्देसग्गहणे एकतो भणन्तस्स अनापत्तीति सम्बन्धो. एस नयो ‘‘सज्झायकरणे, तस्स सन्तिके उद्देसग्गहणे’’ति एत्थापि. तत्रायं विनिच्छयो – उपसम्पन्नो च अनुपसम्पन्नो च निसीदित्वा उद्दिसापेन्ति. आचरियो ‘‘निसिन्नानं भणामी’’ति तेहि सद्धिं एकतो वदति, आचरियस्सेव आपत्ति. अनुपसम्पन्नेन सद्धिं गण्हन्तस्स अनापत्ति. द्वेपि ठिता गण्हन्ति, एसेव नयो. दहरभिक्खु निसिन्नो, सामणेरो ठितो, ‘‘निसिन्नस्स भणामी’’ति भणतो अनापत्ति. सचे दहरो तिट्ठति, इतरो निसीदति, ‘‘ठितस्स भणामी’’ति भणतोपि अनापत्ति. सचे बहूनं भिक्खूनं अन्तरे एको सामणेरो निसिन्नो होति, तस्मिं निसिन्ने पदसो धम्मं वाचेन्तस्स अचित्तका आपत्ति. सचे सामणेरो उपचारं मुञ्चित्वा ठितो वा निसिन्नो वा होति, येसं वाचेति, तेसु अपरियापन्नत्ता एकेन दिसाभागेन पलायनकगन्थं नाम गण्हातीति सङ्खं गच्छति, तस्मा अनापत्ति.

सज्झायकरणेति अनुपसम्पन्नेन सद्धिं एकतो सज्झायकरणे. तस्स सन्तिके उद्देसग्गहणेति अनुपसम्पन्नस्स सन्तिके उद्देसग्गहणे. येभुय्येन पगुणगन्थं भणन्तस्साति सचे एकगाथाय एको ¶ पादो नागच्छति, अवसेसा आगच्छन्ति, अयं येभुय्येन पगुणगन्थो नाम. एतेन नयेन सुत्तेपि वेदितब्बो, तं भणन्तस्स. ओसारेन्तस्स चाति परिसामज्झे सुत्तं उच्चारेन्तस्स च.

पदसोधम्मसिक्खापदवण्णना निट्ठिता.

५. पठमसहसेय्यसिक्खापदवण्णना

इध ‘‘भिक्खुं ठपेत्वा अवसेसो अनुपसम्पन्नो नामा’’ति (पाचि. ५२) वचनतो तिरच्छानगतोपि अनुपसम्पन्नोयेव, सो च खो न सब्बो, मेथुनधम्मापत्तिया वत्थुभूतोवाति आह ‘‘अन्तमसो’’तिआदि. तस्स च परिच्छेदो मेथुनधम्मापत्तिया वुत्तनयेनेव वेदितब्बो. दिरत्ततिरत्तन्ति ¶ एत्थ दिरत्तवचनेन न कोचि विसेसत्थो लब्भति, केवलं लोकवोहारवसेन ब्यञ्जनसिलिट्ठताय, मुखारुळ्हताय एवं वुत्तन्ति वेदितब्बं. द्विन्नं वा तिण्णं वा रत्तीनन्ति पन वचनत्थमत्तदस्सनत्थं वुत्तं, निरन्तरतिरत्तदस्सनत्थं वा दिरत्तग्गहणं कतन्ति दट्ठब्बं. सहसेय्यन्ति एकतो सेय्यं. सेय्याति च कायप्पसारणसङ्खातं सयनम्पि वुच्चति ‘‘सयनं सेय्या’’ति कत्वा, यस्मिं सेनासने सयन्ति, तम्पि ‘‘सयन्ति एत्थाति सेय्या’’ति कत्वा. तदुभयम्पि इध सामञ्ञेन, एकसेसनयेन वा गहितन्ति आह ‘‘सब्बच्छन्नपरिच्छन्ने’’तिआदि.

तत्थ यं सेनासनं उपरि पञ्चहि छदनेहि (पाचि. अट्ठ. ५१), अञ्ञेन वा केनचि अन्तमसो वत्थेनापि सब्बमेव परिच्छन्नं, भूमितो पट्ठाय याव छदनं आहच्च, अनाहच्चापि वा सब्बन्तिमेन परियायेन दियड्ढहत्थुब्बेधेन पाकारेन वा अञ्ञेन वा केनचि अन्तमसो वत्थेनापि परिक्खित्तं, इदं सब्बच्छन्नसब्बपरिच्छन्नं नाम. यस्स पन उपरि बहुतरं ठानं छन्नं, अप्पं अच्छन्नं, समन्ततो च बहुतरं परिक्खित्तं, अप्पं अपरिक्खित्तं, इदं येभुय्येन छन्नं येभुय्येन परिच्छन्नं नाम. तस्मिं सब्बच्छन्नपरिच्छन्ने, येभुय्येन छन्नपरिच्छन्ने वा.

विदहेय्याति करेय्य, तञ्च खो अत्थतो सम्पादनन्ति आह ‘‘सम्पादेय्या’’ति. अयञ्हेत्थ सङ्खेपत्थो ‘‘सेनासनसङ्खातं सेय्यं पविसित्वा कायप्पसारणसङ्खातं ¶ सेय्यं कप्पेय्य विदहेय्य सम्पादेय्या’’ति. दियड्ढहत्थुब्बेधो वड्ढकिहत्थेन गहेतब्बो. एकूपचारोति वलञ्जनद्वारस्स एकत्तं सन्धाय वुत्तं. सतगब्भं वा चतुसालं एकूपचारं होतीति सम्बन्धो. तत्थ वाति पुरिमपुरिमदिवसे यत्थ वुट्ठं, तस्मिंयेव सेनासने वा. अञ्ञत्थ वा तादिसेति यथावुत्तलक्खणेन समन्नागते अञ्ञस्मिं पुब्बे अवुट्ठसेनासने वा. तेन वाति येन सह पुरिमपुरिमदिवसे वुट्ठं, तेन वा. अञ्ञेन वाति येन सह पुरिमपुरिमस्मिं दिवसे वुट्ठं, ततो अञ्ञेन वा. सङ्खेपोति सङ्खेपवण्णना. यदि एवं वित्थारो कथं वेदितब्बोति आह ‘‘वित्थारो पना’’तिआदि.

उपड्ढच्छन्नपरिच्छन्नादीसूति आदिसद्देन ‘‘सब्बच्छन्ने चूळकपरिच्छन्ने दुक्कटं, येभुय्येन छन्ने चूळकपरिच्छन्ने दुक्कटं, सब्बपरिच्छन्ने चूळकच्छन्ने दुक्कटं, येभुय्येन परिच्छन्ने चूळकच्छन्ने दुक्कट’’न्ति (पाचि. अट्ठ. ५३) अट्ठकथायं वुत्तानं गहणं. ततियाय रत्तिया पुरारुणा निक्खमित्वा पुन वसन्तस्साति ततियाय रत्तिया अरुणतो पुरेतरमेव निक्खमित्वा अरुणं बहि उट्ठापेत्वा चतुत्थदिवसे अत्थङ्गते सूरिये पुन वसन्तस्स. सब्बच्छन्नसब्बापरिच्छन्नादीसूति ¶ एत्थ पन आदिसद्देन ‘‘सब्बपरिच्छन्ने सब्बअच्छन्ने, येभुय्येन अच्छन्ने येभुय्येन अपरिच्छन्ने’’ति (पाचि. ५४) पाळियं आगतानं, ‘‘उपड्ढच्छन्ने चूळकपरिच्छन्ने अनापत्ति, उपड्ढपरिच्छन्ने चूळकच्छन्ने अनापत्ति, चूळकच्छन्ने चूळकपरिच्छन्ने अनापत्ती’’ति (पाचि. अट्ठ. ५३) अट्ठकथायं आगतानञ्च गहणं.

पठमसहसेय्यसिक्खापदवण्णना निट्ठिता.

६. दुतियसहसेय्यसिक्खापदवण्णना

मनुस्सित्थियाति जीवमानकमनुस्सित्थिया. ‘‘मतित्थी पन किञ्चापि पाराजिकवत्थुभूता, अनुपादिन्नपक्खे पन ठितत्ता सहसेय्यापत्तिं न करोती’’ति (वजिर. टी. पाचित्तिय ५५) वदन्ति. अदिस्समानरूपाहि पन यक्खिपेतीहि, मेथुनस्स अवत्थुभूताय ¶ च तिरच्छानगतित्थिया अनापत्ति. पठमदिवसेपीति पठमस्मिं विय सिक्खापदे न चतुत्थेयेव दिवसे, अथ खो इध पठमदिवसेपीति अत्थो. इमिना इध दिवसपरिच्छेदो नत्थीति दस्सेति. अङ्गेसु पन पाचित्तियवत्थुकसेनासनं, तत्थ मातुगामेन सह निपज्जनं, सूरियत्थङ्गमनन्ति तीणि अङ्गानीति अयम्पि विसेसो दट्ठब्बो.

दुतियसहसेय्यसिक्खापदवण्णना निट्ठिता.

७. धम्मदेसनासिक्खापदवण्णना

छप्पञ्चवाचाहीति छहि पञ्चहि वाचाहि. वाचापरिच्छेदो पनेत्थ कथं वेदितब्बोति आह ‘‘उत्तरि छप्पञ्चवाचाही’’तिआदि. सब्बत्थाति सुत्ते, अट्ठकथायञ्च. सचे अट्ठकथं, धम्मपदं, जातकादिवत्थुं वा कथेतुकामो होति, छप्पदमत्तमेव कथेतुं वट्टति. पाळिया सद्धिं कथेन्तेन एकं पदं पाळितो, पञ्च अट्ठकथातोति एवं छ पदानि अनतिक्कमित्वाव कथेतब्बो. पुरिसेनाति मनुस्सपुरिसेन. तेनाह ‘‘मनुस्सविग्गहं गहेत्वा पना’’तिआदि.

तिकपाचित्तियन्ति मातुगामे मातुगामसञ्ञिवेमतिकअमातुगामसञ्ञीनं वसेन तीणि पाचित्तियानि. अञ्ञस्स वा मातुगामस्साति एकस्स मातुगामस्स देसेत्वा निसिन्ने पुन आगतस्स अञ्ञस्स मातुगामस्स, एवं पन एकासने निसिन्नेन मातुगामसतस्सापि देसेतुं वट्टति ¶ . ‘‘विञ्ञुमनुस्सित्थिया’’ति वचनतो अविञ्ञित्थियापि देसयतो अनापत्ति. इरियापथपरिवत्ताभावोति अत्तनो वा मातुगामस्स वा इरियापथपरिवत्ताभावो. कप्पियकारकस्साभावोति विञ्ञुस्स कप्पियकारकस्साभावो, दुतियानियते वुत्तलक्खणस्स मनुस्सस्स अभावोति वुत्तं होति. किरियाकिरियन्ति एत्थ उत्तरि छप्पञ्चवाचाहि धम्मदेसना किरिया, कप्पियकारकस्स अग्गहणं अकिरियाति दट्ठब्बं.

धम्मदेसनासिक्खापदवण्णना निट्ठिता.

८. भूतारोचनसिक्खापदवण्णना

निप्परियायेनाति ¶ ‘‘पठमं झानं समापज्जि’’न्तिआदिना (पाचि. ७१) उजुकमेव. परियायेन आरोचितन्ति ‘‘यो ते विहारे वसि, सो भिक्खु पठमं झानं समापज्जि, समापज्जति, समापन्नो’’तिआदिना (पाचि. ७५) अञ्ञापदेसेन भणितं. परिनिब्बानकाले (पाचि. अट्ठ. ७७), पन अन्तरा वा अतिकड्ढियमानेन उपसम्पन्नस्स भूतं आरोचेतुं वट्टति. अनतिकड्ढियमानेनापि (सारत्थ. टी. पाचित्तिय ३.७७) तथारूपे कारणे सति आरोचेतुं वट्टतियेव. तेनेव अञ्ञतरेन दहरभिक्खुना उपवदितो अञ्ञतरो थेरो ‘‘आवुसो, उपरिमग्गत्थाय वायामं मा अकासि, खीणासवो तया उपवदितो’’ति आह. थेरेन च ‘‘अत्थि ते, आवुसो, इमस्मिं सासने पतिट्ठा’’ति पुट्ठो दहरभिक्खु ‘‘आम, भन्ते, सोतापन्नो आह’’न्ति अवोच. ‘‘कारको अय’’न्ति ञत्वापि पटिपत्तिया अमोघभावदस्सनेन समुत्तेजनाय, सम्पहंसनाय च अरिया अत्तानं पकासेन्तियेव. तेनाह ‘‘तथारूपे कारणे सति उपसम्पन्नस्स आरोचयतो’’ति. सुतपरियत्तिसीलगुणं पन अनुपसम्पन्नस्सपि आरोचेतुं वट्टति. कस्मा न इध उम्मत्तकादयो गहिताति आह ‘‘यस्मा पना’’तिआदि. आदिसद्देन खित्तचित्तवेदनाट्टानं गहणं. तस्मिं सतीति उम्मत्तकादिभावे सति. इध न गहिताति इमस्मिं सिक्खापदे पदभाजनियं न गहिता. अचित्तकन्ति पण्णत्तिजाननचित्ताभावेन अचित्तकं. कुसलाब्याकतचित्तेहि द्विचित्त’’न्ति इदं उक्कट्ठपरिच्छेदेन अरियपुग्गलेयेव सन्धाय वुत्तं. न हि पण्णत्तिं अजानन्ता झानलाभिनो पुथुज्जना वत्थुम्हि लोभवसेन अकुसलचित्तेनापि न आरोचेन्तीति. दुक्खवेदनाय वा अभावतो ‘‘द्विवेदन’’न्ति इमस्स अनुरूपं कत्वा एवं वुत्तन्ति दट्ठब्बं.

भूतारोचनसिक्खापदवण्णना निट्ठिता.

९. दुट्ठुल्लारोचनसिक्खापदवण्णना

द्विन्नं ¶ ‘आपत्तिक्खन्धानन्ति पाराजिकसङ्घादिसेससङ्खातानं द्विन्नं आपत्तिक्खन्धानं. आयतिं संवरत्थायाति ‘‘एवमेस परेसु हिरोत्तप्पेनापि आयतिं ¶ संवरं आपज्जिस्सती’’ति आयतिं संवरत्थाय. आपत्तीनञ्च कुलानञ्च परियन्तं कत्वा वा अकत्वा वाति ‘‘एत्तका आपत्तियो आरोचेतब्बा, एत्तकेसु कुलेसु आरोचेतब्बा’’ति एवं आपत्तीनञ्च कुलानञ्च परियन्तं कत्वा वा अकत्वा वा.

अदुट्ठुल्लायाति पाराजिकसङ्घादिसेसं ठपेत्वा अवसेसपञ्चापत्तिक्खन्धसङ्खाताय अदुट्ठुल्लाय आपत्तिया. अवसेसे छ आपत्तिक्खन्धेति सङ्घादिसेसवज्जिते सेसे छ आपत्तिक्खन्धे. पुरिमपञ्चसिक्खापदवीतिक्कमसङ्खातं दुट्ठुल्लन्ति पाणातिपातवेरमणिआदिकस्स आदितो पञ्चसिक्खापदस्स वीतिक्कमसङ्खातं दुट्ठुल्लं. इतरं अदुट्ठुल्लं वा अज्झाचारन्ति ततो अञ्ञं विकालभोजनादिकपञ्चकं, सुक्कविसट्ठिकायसंसग्गदुट्ठुल्लअत्तकामञ्चेति अदुट्ठुल्लं वा अज्झाचारं. वत्थुमत्तन्ति ‘‘अयं सुक्कविस्सट्ठिं आपन्नो, दुट्ठुल्लं, अत्तकामं, कायसंसग्गं आपन्नो’’ति एवं वत्थुमत्तं वा आरोचेन्तस्स. आपत्तिमत्तन्ति ‘‘अयं पाराजिकं आपन्नो, सङ्घादिसेसं, थुल्लच्चयं, पाचित्तियं, पाटिदेसनीयं, दुक्कटं, दुब्भासितं आपन्नो’’ति एवं आपत्तिमत्तं वा आरोचेन्तस्स. वुत्तलक्खणस्साति ‘‘पाराजिकं अनज्झापन्नस्सा’’ति कङ्खा. अट्ठ. दुट्ठुल्लारोचनसिक्खापदवण्णना) एवं वुत्तलक्खणस्स. सवत्थुकोति वत्थुना सह घटितो.

दुट्ठुल्लारोचनसिक्खापदवण्णना निट्ठिता.

१०. पथवीखणनसिक्खापदवण्णना

पासाणसक्खरकथलमरुम्बवालुकादीसूति एत्थ मुट्ठिप्पमाणतो उपरि पासाणाति वेदितब्बा. मुट्ठिप्पमाणा सक्खरा. कथलाति कपालखण्डानि. मरुम्बाति कटसक्खरा. वालुका वालिकायेव. अञ्ञतरस्स ततियभागो होतीति ततियो भागो होति. इदं वुत्तं होति – यतो पंसुं वा मत्तिकं वा आहरापेत्वा विसुं विसुं कते द्वे कोट्ठासा पंसु वा मत्तिका वा एको पासाणादीसु अञ्ञतरो होति, अयं मिस्सकपथवी नामाति. ओवट्ठो नाम देवेन ओवट्ठो (पाचि. ८६). वुत्तन्ति पदभाजनियं, सीहळट्ठकथायमेव वा वुत्तं ¶ . अधिकतरपासाणादिमिस्साति ¶ अधिकतरपासाणादीहि मिस्सा, अदड्ढापि वुत्तप्पमाणतो अधिकतरपासाणादिमिस्साति अधिप्पायो. वा-सद्दो अवुत्तविकप्पत्थो, तेन ऊनकचतुमासोवट्ठपथविं सङ्गण्हाति. सुद्धपासाणादिभेदायाति सुद्धा पासाणा एत्थाति सुद्धपासाणा, सा आदि यस्स भेदस्स सो सुद्धपासाणादि. आदि-सद्देन सुद्धसक्खरादीनं गहणं. सुद्धपासाणादिभेदो यस्सा सा सुद्धपासाणादिभेदा, ताय सुद्धपासाणादिभेदाय, सुद्धपासाणादिप्पकारायाति अत्थो.

सयं खणतीति एत्थ यो अन्तमसो पादङ्गुट्ठकेनपि खणति, उदकम्पि छड्डेन्तो भिन्दति, पादङ्गुट्ठकेनपि विलिखति, पत्तम्पि पचन्तो दहति, सो सब्बो खणतियेवाति वेदितब्बो. तेनाह ‘‘खणनभेदनविलेखनपचनादीहि विकोपेतीति. पत्तं पचन्तेन (पाचि. अट्ठ. ८७) हि पुब्बे पक्कट्ठानेयेव पचितब्बो. अदड्ढाय पथविया अग्गिं ठपेतुं न वट्टति. पत्तपचनकपालस्स पन उपरि अग्गिं ठपेतुं वट्टति. दारूनं उपरि ठपेति, सो अग्गि तानि दहन्तो गन्त्वा पथविं दहति, न वट्टति. इट्ठकपासाणादीसुपि एसेव नयो. तत्रापि हि इट्ठकादीनंयेव उपरि ठपेतुं वट्टति. कस्मा? तेसं अनुपादानत्ता. न हि तानि अग्गिस्स उपादानसङ्खं गच्छन्ति. सुक्खखाणुरुक्खादीसुपि अग्गिं दातुं न वट्टति. सचे पन ‘‘पथविं अपत्तमेव निब्बापेत्वा गमिस्सामी’’ति देति, वट्टति. पच्छा निब्बापेतुं न सक्कोति, अविसयत्ता अनापत्ति. वुत्तनयेनेवाति ‘‘खणनभेदनविलिखनपचनादीही’’ति वुत्तेनेव नयेन. नियमेत्वाति सन्निट्ठानं कत्वा. इतरोति आणापको.

‘‘पोक्खरणिं खणा’’ति (पाचि. अट्ठ. ८६) वदति, वट्टति. खतायेव पोक्खरणी नाम होति, तस्मा अयं कप्पियवोहारो. एस नयो ‘‘वापिं, तळाकं, आवाटं खणा’’तिआदीसुपि. ‘‘इमं ओकासं खण, इमस्मिं ओकासे पोक्खरणिं खणा’’ति पन वत्तुं न वट्टति. ‘‘कन्दं खण मूलं खणा’’ति अनियमेत्वा वत्तुं वट्टति. ‘‘इमं वल्लिं खण, इमस्मिं ओकासे कन्दं वा मूलं वा खणा’’ति वत्तुं न वट्टति. तेनाह ‘‘ओकासं अनियमेत्वा…पे… भणन्तस्सा’’ति. आतपेन सुक्खकद्दमो च फलति, तत्र यो हेट्ठा पथविया असम्बद्धो, तमेव अपनेतुं वट्टति. एस नयो गोकण्टकेपि ¶ . तेनाह ‘‘आतपेन…पे… असम्बद्ध’’न्ति. तत्थ गोकण्टको (पाचि. अट्ठ. ८६) नाम गावीनं खुरच्छिन्नकद्दमो वुच्चति. सचे पन हेट्ठिमतलेन भूमिसम्बन्धो, विकोपेतुं न वट्टति. भिज्जित्वा पतितनदितटन्ति भिज्जित्वा नदिसामन्ता पतितं ओमकचातुमासं ओवट्ठं नदितटं. सचे पन भिज्जित्वा उदकेयेव पकति, देवे अतिरेकचातुमासं ओवट्ठेपि उदकेयेव उदकस्स पतितत्ता ¶ वट्टति. महन्तम्पि नङ्गलच्छिन्नमत्तिकापिण्डन्ति महन्तम्पि कसितट्ठाने हेट्ठा पथविया असम्बद्धं नङ्गलच्छिन्नमत्तिकापिण्डं. एवमादिसद्देन कूटासिञ्चनयोग्गतनुककद्दमादीनं गहणं. असञ्चिच्च रुक्खादिपवट्टनेन भिन्दन्तस्साति पासाणरुक्खादीनि वा पवट्टेन्तस्स, कत्तरदण्डेन वा आहच्च आहच्च गच्छन्तस्स पथवी भिज्जति, सा ‘‘तेन भिन्दिस्सामी’’ति एवं सञ्चिच्च अभिन्नत्ता असञ्चिच्च भिन्ना नाम होति, इति असञ्चिच्च रुक्खादिप्पवट्टनेन भिन्दन्तस्स अनापत्ति. असतिया पादङ्गुट्ठकादीहि विलिखन्तस्साति यो अञ्ञविहितो केनचि सद्धिं किञ्चि कथेन्तो पादङ्गुट्ठकेन वा कत्तरयट्ठिया वा पथविं विलिखन्तो तिट्ठति, तस्स एवं असतिया पादङ्गुट्ठकादीहि विलिखन्तस्स अनापत्ति.

पथवीखणनसिक्खापदवण्णना निट्ठिता.

मुसावादवग्गो पठमो.

२. भूतगामवग्गो

१. भूतगामसिक्खापदवण्णना

‘‘भवन्ती’’ति (सारत्थ. टी. पाचित्तिय ३.९०) इमिना विरुळ्हमूले नीलभावं आपज्जित्वा वड्ढमानके तरुणगच्छे दस्सेति. ‘‘अहेसु’’न्ति इमिना पन वड्ढित्वा ठिते महन्ते रुक्खगच्छादिके दस्सेति. तेनाह ‘‘जायन्ती’’तिआदि. एत्थ च ‘‘भवन्ती’’ति इमस्स विवरणं ‘‘जायन्ति वड्ढन्ती’’ति, ‘‘अहेसु’’न्ति इमस्स ‘‘जाता वड्ढिता’’ति. गामोति समूहो. पतिट्ठितहरिततिणरुक्खादीनन्ति भूमियं पतिट्ठितस्स हरिततिणस्स चेव हरितरुक्खादीनञ्च. आदिसद्देन ओसधिगच्छलतादयो वेदितब्बा. निमित्तत्थे च भुम्मं. यो अत्थो सम्पज्जति, तमाह ‘‘भूतगामपातब्यताया’’तिआदिना.

ननु ¶ च रुक्खादयो चित्तरहितताय न जीवा, चित्तरहितता च परिफन्दाभावतो, छिन्नेपि विरुहनतो, विसदिसजातिकभावतो, चतुयोनियं अपरियापन्नतो च वेदितब्बा, वुड्ढि पन पवाळसिलालवणानम्पि विज्जतीति न तेसं जीवभावे कारणं, विसयग्गहणञ्च नेसं परिकप्पनामत्तं ¶ सुपनं विय चिञ्चादीनं, तथा दोहळादयो, अथ कस्मा भूतगामस्स पातब्यताय पाचित्तियं इच्छितन्ति? समणअसारुप्पतो, तन्निस्सितसत्तानुरक्खणतो च. तेनेवाह ‘‘जीवसञ्ञिनो हि मोघपुरिसा मनुस्सा रुक्खस्मि’’न्तिआदि (पाचि. ८९). सासपबीजकसेवालम्पीति सासपबीजकसङ्खातं सेवालम्पि, सासपसेवालं, बीजकसेवालम्पीति अत्थो. तत्थ सासपसेवालो नाम सासपमत्तो खुद्दकसेवालो. बीजकसेवालो नाम उपरि खुद्दकपत्तो हेट्ठा खुद्दकमूलो सेवालो.

मूलबीजखन्धबीजफळुबीजअग्गबीजबीजबीजानन्ति एत्थ मूलमेव बीजं मूलबीजं. एवं सेसेसुपि. तत्थ मूलबीजं हलिद्दिआदिकं. खन्धबीजं अस्सत्थादिकं. फळुबीजं उच्छुआदिकं. अग्गबीजं हिरिवेरादिकं. बीजंबीजं पुब्बण्णादिकं. भाजनगतन्ति सरावादिभाजनगतं. निक्खन्तं मूलमत्तं एतस्माति निक्खन्तमूलमत्तं. मत्त सद्देन चेत्थ पण्णस्स निक्खमनं पटिक्खिपति. एस नयो निक्खन्तअङ्कुरमत्तन्ति एत्थापि. सचे पन मूलञ्च पण्णञ्च निग्गतं, भूतगामसङ्खं गच्छति. विदत्थिमत्ता पत्तवट्टि निग्गच्छतीति विदत्थिमत्ता अनीलवण्णा पत्तवट्टि निक्खमति. तेनाह ‘‘निक्खन्ते’’तिआदि. हरितो न होतीति नीलवण्णो न होति. मुग्गादीनं पन पण्णेसु उट्ठितेसु, वीहिआदीनं वा अङ्कुरे हरिते भूतगामसङ्गहं गच्छन्ति. एस नयो अम्बट्ठिआदीसु.

भूतगामबीजगामेति एत्थ भूतगामतो वियोजितं विरुहनसमत्थमेव मूलबीजादिकं बीजगामो नामाति वेदितब्बं. उभयत्थाति भूतगामबीजगामेसु. अतथासञ्ञिस्साति अभूतगामाबीजगामसञ्ञिस्स. को पन वादो अभूतगामाबीजगामेसु अभूतगामाबीजगामसञ्ञिस्स. असञ्चिच्चाति पासाणरुक्खादीनि वा पवट्टेन्तस्स, साखं वा कड्ढन्तस्स, कत्तरदण्डेन वा भूमिं पहरित्वा गच्छन्तस्स तिणानि कुप्पन्ति. तानि तेन ‘‘विकोपेस्सामी’’ति एवं सञ्चिच्च अविकोपितत्ता असञ्चिच्च विकोपितानि नाम होन्ति. इति असञ्चिच्च विकोपेन्तस्स अनापत्ति.

असतियाति ¶ अञ्ञविहितो केनचि सद्धिं किञ्चि कथेन्तो पादङ्गुट्ठकेन वा हत्थेन वा तिणं वा लतं वा विकोपेन्तो तिट्ठति, एवं असतिया विकोपेन्तस्स अनापत्ति.

अजानित्वाति एत्थ अब्भन्तरे ‘‘बीजगामो’’ति वा ‘‘भूतगामो’’ति वा न जानाति, ‘‘विकोपेमी’’ति पन जानाति. एवं तिणे वा पलालपुञ्जे वा खणित्तिं वा कुदालं वा सङ्गोपनत्थाय ¶ ठपेति, डय्हमानहत्थो वा अग्गिं पातेति. तत्र चे तिणानि छिज्जन्ति वा डय्हन्ति वा, एवं अजानित्वा विकोपेन्तस्स अनापत्ति.

येन केनचि अग्गिनाति कट्ठग्गिगोमयग्गिआदीसु येन केनचि अग्गिना, अन्तमसो लोहखण्डेनपि आदित्तेन. ‘‘कप्पिय’’न्ति वत्वावाति याय कायचि भासाय ‘‘कप्पिय’’न्ति वत्वाव. एव-सद्देन पठमं अग्गिना फुसित्वा पच्छा ‘‘कप्पिय’’न्ति वत्तुं न वट्टती’’ति दस्सेति. ‘‘पठमं अग्गिं निक्खिपित्वा तं अनुद्धरित्वाव ‘कप्पिय’न्ति वुत्ते पन वट्टती’’ति (सारत्थ. टी. पाचित्तिय ३.९३) वदन्ति. एस नयो सेसेसुपि. तथेवाति ‘कप्पिय’न्ति वत्वाव. अस्समहिंससूकरमिगगोरूपानं पन खुरा अतिखिणा, तस्मा तेहि न कातब्बं, कतम्पि अकतं होतीति आह ‘‘ठपेत्वा गोमहिंसादीनं खुरे’’ति. हत्थिनखा पन खुरा न होन्ति, तस्मा तेहि वट्टति. तिरच्छानानन्ति सीहब्यग्घदीपिमक्कटानं, सकुन्तानञ्च. तेसञ्हि नखा तिखिणा होन्ति, तस्मा तेहि कातब्बं. ‘‘अन्तमसो छिन्दित्वा आहटेनपी’’ति इमिना येहि कातुं वट्टति, तेहि तत्थजातकेहि कातब्बन्ति एत्थ वत्तब्बमेव नत्थीति दस्सेति. ‘‘सत्थे वुत्तनयेनेवा’’ति इमिना छेदं वा वेधं वा दस्सेन्तेन ‘‘कप्पियन्ति वत्वावा’’ति वुत्तमतिदिसति. एत्थ च किञ्चापि ‘‘कप्पियन्ति वत्वाव कातब्ब’’न्तिआदिना कप्पियं करोन्तेन कत्तब्बाकारमेव दस्सितं, तथापि भिक्खुना ‘‘कप्पियं करोही’’ति वुत्तेयेव अनुपसम्पन्नेन ‘‘कप्पिय’’न्ति वत्वा अग्गिपरिजितादि कातब्बन्ति गहेतब्बं. अवचनं पन ‘‘पुनपि कप्पियं करोहीति कारेत्वाव परिभुञ्जितब्ब’’न्ति पठममेव वुत्तत्ता.

एकस्मिं…पे… कप्पिये कते सब्बं कतं होतीति एकंयेव ‘‘कप्पियं करोमी’’ति अधिप्पायेनपि कप्पिये कते एकाबद्धत्ता सब्बं कतं ¶ होति. दारुकं विज्झतीति जानित्वा वा अजानित्वा वा विज्झति वा विज्झापेति वा, वट्टतियेव. भत्तसित्थे विज्झतीति एत्थापि एसेव नयो. तं विज्झति, न वट्टतीति वल्लिआदीनं भाजनगतिकत्ताति अधिप्पायो. भिन्दापेत्वा कप्पियं कारेतब्बन्ति बीजतो मुत्तस्स कटाहस्स भाजनगतिकत्ता वुत्तं. अबीजन्ति अङ्कुरजननसमत्थबीजरहिततरुणम्बफलादि. तेनाह ‘‘यं पन फलं तरुणं होति, अबीज’’न्ति. निब्बत्तबीजं नाम बीजं निब्बत्तेत्वा विसुं कत्वा परिभुञ्जितुं सक्कुणेय्यं अम्बपनसादिफलं. तेनाह ‘‘बीजं अपनेत्वा परिभुञ्जितब्ब’’न्ति. तत्थ कप्पियकरणकिच्चं नत्थि, सयमेव कप्पियानीति अधिप्पायो.

भूतगामसिक्खापदवण्णना निट्ठिता.

२. अञ्ञवादकसिक्खापदवण्णना

यमत्थन्ति ¶ ‘‘त्वं किर दुक्कटापत्तिं आपन्नो’’तिआदिकं यं किञ्चि अत्थं. ततो अञ्ञन्ति पुच्छितत्थतो अञ्ञमत्थं. अञ्ञेनञ्ञं पटिचरणस्साति विनयधरेन यं वचनं दोसपुच्छनत्थं वुत्तं, ततो अञ्ञेन वचनेन पटिच्छादनस्स. पटिच्छादनत्थोपि हि चरसद्दो होति अनेकत्थत्ता धातूनं. वुत्तन्ति पाळियं वुत्तं.

सावसेसं आपत्तिं आपन्नोति एत्थ ठपेत्वा पाराजिकं सेसा सावसेसापत्ति नाम, तं आपन्नो. अनुयुञ्जियमानोति ‘‘किं, आवुसो, इत्थन्नामं आपत्तिं आपन्नोसी’’ति पुच्छियमानो. अञ्ञेन वचनेनाति ‘‘को आपन्नो? किं आपन्नो? किस्मिं आपन्नो? कथं आपन्नो? कं भणथ? किं भणथा’’ति अञ्ञेन वचनेन. अञ्ञन्ति ‘‘किं त्वं इत्थन्नामं आपत्तिं आपन्नोसी’’तिआदिकं अनुयुञ्जकवचनं. तथा तथा विक्खिपतीति तेन तेन पकारेन विक्खिपति. किं वुत्तं होति? सो (पाचि. अट्ठ. ९४) किञ्चि वीतिक्कमं दिस्वा ‘‘आवुसो, आपत्तिं आपन्नोसी’’ति सङ्घमज्झे आपत्तिया अनुयुञ्जियमानो ‘‘को आपन्नो’’ति वदति. ततो ‘‘त्व’’न्ति वुत्ते ‘‘अहं किं आपन्नो’’ति वदति. अथ ‘‘पाचित्तियं वा दुक्कटं वा’’ति वुत्ते ‘‘अहं किस्मिं आपन्नो’’ति ¶ वदति. ततो ‘‘अमुकस्मिं नाम वत्थुस्मि’’न्ति वुत्ते ‘‘अहं कथं आपन्नो, किं करोन्तो आपन्नोम्ही’’ति पुच्छति. अथ ‘‘इदं नाम करोन्तो आपन्नो’’ति वुत्ते ‘‘कं भणथा’’ति वदति. ततो ‘‘तं भणामा’’ति वुत्ते ‘‘किं भणथा’’ति एवमनेकेहि पकारेहि विक्खिपतीति वुत्तं होति.

यो पन भिक्खु सावसेसं आपत्तिं आपन्नो, तं न कथेतुकामो तुण्हीभावेन विहेसेतीति सम्बन्धो. विहेसेतीति चिरनिसज्जाचिरभासनेहि पिट्ठिआगिलायनतालुसोसादिवसेन सङ्घं विहेसेति, परिस्समं तेसं करोतीति अत्थो. परिस्समो हि विहेसा नाम. अञ्ञवादककम्मन्ति अञ्ञवादकस्स भिक्खुनो अञ्ञवादकारोपनत्थं कातब्बं ञत्तिदुतियकम्मं. विहेसककम्मन्ति एत्थापि एसेव नयो. तस्मिं सङ्घेन कतेति तस्मिं अञ्ञवादककम्मे च विहेसककम्मे च सङ्घेन ञत्तिदुतियकम्मवाचाय कते. तथा करोन्तानन्ति तं पकारं करोन्तानं, अञ्ञवादकञ्च विहेसकञ्च करोन्तानन्ति अत्थो.

‘‘विहेसकेति अयमेत्थ अनुपञ्ञत्ती’’ति अवचनञ्चेत्थ ‘‘आपत्तिकरा च होति अञ्ञवादकसिक्खापदादीसु विया’’ति (कङ्खा. अट्ठ. पठमपाराजिकवण्णना) वुत्तत्तायेव पञ्ञायतीति ¶ कत्वा. एस नयो उपरि सिक्खापदेसु. धम्मकम्मे तिकपाचित्तियन्ति धम्मकम्मे धम्मकम्मसञ्ञिवेमतिकअधम्मकम्मसञ्ञीनं वसेन तीणि पाचित्तियानि. अधम्मकम्मे तिकदुक्कटन्ति एत्थापि एसेव नयो. अनारोपितेति कम्मवाचाय अनारोपिते, अप्पतिट्ठापितेति अत्थो. गेलञ्ञेनाति येन कथेतुं न सक्कोति, मुखे तादिसेन ब्याधिना. सङ्घस्स भण्डनादीनि भविस्सन्तीति सङ्घमज्झे कथिते तप्पच्चया सङ्घस्स भण्डनं वा कलहो वा विग्गहो वा विवादो वा सङ्घभेदो वा सङ्घराजि वा भविस्सन्तीति इमिना वा अधिप्पायेन न कथेन्तस्स. एत्थ च अधम्मेनाति अभूतेन वत्थुना.

‘‘समुट्ठानादीनि अदिन्नादानसदिसानी’’ति अविसेसं अतिदिसित्वा विसेसं दस्सेतुं ‘‘इदं पना’’तिआदि वुत्तं. सिया किरियं अञ्ञेनञ्ञं पटिचरन्तस्स. सिया अकिरियं तुण्हीभावेन विहेसेन्तस्स.

अञ्ञवादकसिक्खापदवण्णना निट्ठिता.

३. उज्झापनकसिक्खापदवण्णना

येन ¶ वचनेनाति ‘‘छन्दाय इत्थन्नामो इदं नाम करोती’’तिआदिकेन येन वचनेन. तेनाह ‘‘छन्दाया’’तिआदि. तत्थ छन्दायाति छन्देन पक्खपातेन. ‘‘अक्खराय वाचेती’’तिआदीसु (पाचि. ४६) विय लिङ्गविपल्लासो एस. इदं नाम करोतीति अत्तनो सन्दिट्ठसम्भत्तानं पणीतं सेनासनं वा पञ्ञपेति, भत्तादिकं वाति अधिप्पायो. सेनासनपञ्ञापकादिभेदन्ति एत्थ आदिसद्देन भत्तुद्देसकयागुभाजकफलभाजकादीनं गहणं. अनेकत्थत्ता धातूनं झे-सद्दो ओलोकनत्थोपि होतीति आह ‘‘अवञ्ञाय ओलोकापेन्ती’’ति. चिन्तनत्थोयेव वा गहेतब्बोति आह ‘‘लामकतो वा चिन्तापेन्ती’’ति. तथेव वदन्ताति ‘‘छन्दाय इत्थन्नामो इदं नाम करोती’’तिआदीनि वदन्ता. वुत्तन्ति पाळियं वुत्तं. ‘‘खिय्यनके’’ति (पाचि. अट्ठ. १०५) अयमेत्थ अनुपञ्ञत्ति.

असम्मतस्साति सङ्घेन कम्मवाचाय असम्मतस्स. केवलं ‘‘तवेसो भारो’’ति सङ्घेन आरोपितभारस्स, भिक्खूनं वा फासुविहारत्थाय सयमेव भारं वहन्तस्स, यत्र वा द्वे तयो भिक्खू विहरन्ति, तत्र तादिसं कम्मं करोन्तस्साति अधिप्पायो. यस्स कस्सचीति उपसम्पन्नस्स वा अनुपसम्पन्नस्स वा यस्स कस्सचि. अनुपसम्पन्नस्स पन सम्मतस्स वा असम्मतस्स ¶ वाति एत्थ पन (पाचि. अट्ठ. १०६) किञ्चापि अनुपसम्पन्नस्स तेरस सम्मतियो दातुं न वट्टन्ति, तथापि यो उपसम्पन्नकाले लद्धसम्मुतिको पच्छा अनुपसम्पन्नभावे ठितो, तं सन्धाय ‘‘सम्मतस्स वा’’ति वुत्तं. यस्स पन ब्यत्तस्स सामणेरस्स केवलं सङ्घेन वा सम्मतेन वा भिक्खुना ‘‘त्वं इदं कम्मं करोही’’ति भारो कतो, तं सन्धाय ‘‘असम्मतस्स वा’’ति वुत्तं. यस्मा उज्झापनञ्च खिय्यनञ्च मुसावादवसेन पवत्तं, तस्मा आदिकम्मिकस्स इमिनाव अनापत्ति, मुसावादेन पन आपत्तियेवाति गहेतब्बं.

उज्झापनकसिक्खापदवण्णना निट्ठिता.

४. पठमसेनासनसिक्खापदवण्णना

मञ्चं ¶ वाति मसारको, बुन्दिकाबद्धो, कुळीरपादको, आहच्चपादकोति इमेसु चतूसु यं कञ्चि मञ्चं वा. पीठं वाति एत्थापि एसेव नयो. भिसिं वाति उण्णभिसि, चोळभिसि, वाकभिसि, तिणभिसि, पण्णभिसीति इमासु पञ्चसु भिसीसु यं कञ्चि भिसिं वा. तेनाह ‘‘मञ्चादीसू’’तिआदि. तत्थ ‘‘मञ्चसङ्खेपेना’’ति इमिना पीठसङ्खेपं पटिक्खिपति. कप्पियचम्मेनाति मिगाजेळकचम्मेन. एत्थ पन मिगचम्मे एणिमिगो, वातमिगो, पसदमिगो, कुरुङ्गमिगो, मिगमातुको, रोहितमिगोति एतेसंयेव चम्मानि वट्टन्ति, अञ्ञेसं पन –

मक्कटो काळसीहो च, सरभो कदलीमिगो;

ये च वाळमिगा केचि, तेसं चम्मं न वट्टतीति. (महाव. अट्ठ. २५९);

तत्थ वाळमिगाति सीहब्यग्घअच्छतरच्छा. न केवलञ्च एतेयेव, येसं पन चम्मं वट्टतीति वुत्तं, ते ठपेत्वा अवसेसा अन्तमसो गोमहिंसससबिळारादयोपि सब्बे इमस्मिं अत्थे ‘‘वाळमिगा’’त्वेव वेदितब्बा. एतेसञ्हि सब्बेसं चम्मं न वट्टति. तालीसपत्तन्ति सुद्धं तमालपत्तं, अञ्ञेन मिस्सं पन वट्टति. तिणवाकचोळेसु अकप्पियं नाम नत्थि. किं पनेत्थ बिब्बोहने विय निसीदितुञ्च निपज्जितुञ्च न वट्टतीति आह ‘‘तत्था’’तिआदि. न केवलञ्चेदमेवाति आह ‘‘पमाणपरिच्छेदोपि चेत्थ नत्थी’’ति, ‘‘एत्तकमेव कातब्ब’’न्ति भिसिया ¶ पमाणनियमोपि नत्थीति अत्थो. मञ्चभिसिपीठभिसिभूमत्थरणभिसिचङ्कमनभिसिपादपुञ्छनभिसीति एतासं पन अनुरूपतो सल्लक्खेत्वा अत्तनो रुचिवसेन पमाणं कातब्बं. अन्तो संवेल्लित्वा बद्धन्ति यथा वेमज्झं संखित्तं होति, एवं मज्झे सुट्ठु वेठेत्वा बद्धं.

ये अट्ठ मासाति सम्बन्धो. ‘‘अवस्सिकसङ्केता’’ति एतस्सेव विवरणं ‘‘वस्सानमासाति एवं अपञ्ञाता’’ति, अप्पतिता अप्पसिद्धाति अत्थो. ‘‘असञ्ञिता’’तिपि पाठो, तत्थ अविञ्ञाताति अत्थो. अट्ठ मासाति चत्तारो हेमन्तिका, चत्तारो गिम्हिका मासाति अट्ठ मासा. ओवस्सकमण्डपेति साखामण्डपपदरमण्डपानं यत्थ कत्थचि ओवस्सके मण्डपे. यत्थाति येसु जनपदेसु. सब्बत्थाति सब्बेसु जनपदेसु ¶ . काकादीनं निबद्धवासरुक्खमूलेति यत्थ धुवनिवासेन काका वा कुलाला वा अञ्ञे वा सकुन्ता कुलावके कत्वा वसन्ति, तादिसस्स काकादीनं निबद्धवासस्स यस्स कस्सचि रुक्खस्स हेट्ठा. यत्थ पन गोचरप्पसुता सकुन्ता विस्समित्वा गच्छन्ति, तस्स रुक्खस्स मूले निक्खिपितुं वट्टति. ‘‘कदाचिपी’’ति इमिना न केवलं वस्सिकसङ्केतेयेवाति दस्सेति. यत्थाति यस्मिं पदेसे. यदाति यस्मिं काले.

सोति यस्सत्थाय सन्थतो, सो. पकतिसन्थतेति पकतियाव सन्थते, यं नेवत्तना सन्थतं, न परेन सन्थरापितं, तस्मिन्ति वुत्तं होति. लज्जी होतीति लज्जनसीलो होति, परिक्खारविनासने भीतोति अत्थो. तेनाह ‘‘अत्तनो पलिबोधं विय मञ्ञती’’ति, इमिना अलज्जिं आपुच्छित्वा गन्तुं न वट्टतीति दस्सेति. निरपेक्खोति ‘‘आगन्त्वा उद्धरिस्सामी’’ति अपेक्खारहितो, इमिना सापेक्खो चे गच्छति, अनापत्तीति दस्सेति. तेनेव हि अनापत्तिवारे ‘‘ओतापेन्तो गच्छती’’ति (पाचि. ११३) वुत्तं. अञ्ञत्थ गच्छन्तोति तं मग्गं अतिक्कमित्वा अञ्ञत्थ गच्छन्तो. लेड्डुपातूपचारतो बहि ठितत्ता ‘‘पादुद्धारेन कारेतब्बो’’ति वुत्तं, अञ्ञत्थ गच्छन्तस्स पठमपादुद्धारे दुक्कटं, दुतियपादुद्धारे पाचित्तियन्ति अत्थो.

तिकपाचित्तियं सङ्घिके सङ्घिकसञ्ञिवेमतिकपुग्गलिकसञ्ञीनं वसेन. इमिनाव नयेन तिकदुक्कटम्पि वेदितब्बं. चिमिलिकादीनं अत्थो दुतियसिक्खापदे दस्सितोव. पादपुञ्छनी (पाचि. अट्ठ. ११२) नाम रज्जुकेहि वा पिलोतिकाहि वा पादपुञ्छनत्थं कता. फलकपीठं नाम फलकमयं पीठं. न केवलं चिमिलिकादीनियेव अज्झोकासे ठपेत्वा गच्छन्तस्स दुक्कटन्ति आह ‘‘यं वा पना’’तिआदि. यं किञ्चि दारुभण्डं, यं किञ्चि मत्तिकाभण्डन्ति ¶ सम्बन्धो. ‘‘अन्तमसो पत्ताधारकम्पी’’ति इमिना तालवण्टबीजनिपत्तपानीयउळउङ्कपानीयसङ्खादीसु वत्तब्बमेव नत्थीति दस्सेति.

अरञ्ञे (पाचि. अट्ठ. ११०) पण्णकुटीसु वसन्तानं सीलसम्पदाय पसन्नचित्ता मनुस्सा मञ्चपीठादीनि देन्ति ‘‘सङ्घिकपरिभोगेन परिभुञ्जथा’’ति, तत्थ किं कातब्बन्ति आह ‘‘आरञ्ञकेन पना’’तिआदि. तत्थ असति अनोवस्सकेति पब्भारादिअनोवस्सकट्ठाने असति. इदञ्च लक्खणवचनं ‘‘सभागानं ¶ अभावे’’ति च इच्छितब्बत्ता. आरञ्ञकेन हि भिक्खुना तत्थ वसित्वा अञ्ञत्थ गच्छन्तेन सामन्तविहारे भिक्खूनं पेसेत्वा गन्तब्बं. सभागानं अभावे अनोवस्सके निक्खिपित्वा गन्तब्बं. अनोवस्सके असति रुक्खे लग्गेत्वा गन्तब्बं.

न केवलं इदंयेव कत्वा गन्तुं वट्टतीति आह ‘‘यथा वा’’तिआदि. यथा वा उपचिकाहि न खज्जतीति यथा ठपिते उपचिकाहि सेनासनं न खज्जति, एवं तथा पासाणानं उपरि ठपनं कत्वाति अत्थो. इदं वुत्तं होति – चतूसु (पाचि. अट्ठ. ११६) पासाणेसु मञ्चं ठपेत्वा मञ्चे अवसेसमञ्चपीठानि आरोपेत्वा उपरि भिसिआदिकं रासिं कत्वा दारुभण्डं मत्तिकाभण्डं पटिसामेत्वा गमिकवत्तं पूरेत्वा गन्तब्बन्ति.

अब्भोकासिकेनापि ‘‘अहं उक्कट्ठअब्भोकासिको’’ति चीवरकुटिम्पि अकत्वा असमये अज्झोकासे पञ्ञपेत्वा निसीदितुं वा निपज्जितुं वा न वट्टतीति दस्सेन्तो आह ‘‘अब्भोकासिकेना’’तिआदि. सचे पन चतुग्गुणेनपि चीवरेन कतकुटि अतेमेन्तं रक्खितुं नेव सक्कोति, सत्ताहवद्दलिकादीनि भवन्ति, भिक्खुनो कायानुगतिकत्ता वट्टति. रुक्खमूलिकस्सापि एसेव नयो.

यस्मिं विस्सासग्गाहो रुहति, तस्स सन्तकं अत्तनो पुग्गलिकमिव होतीति आह ‘‘विस्सासिकपुग्गलिके’’ति. यस्मिं पन विस्सासो न रुहति, तस्स सन्तके दुक्कटमेव. अमनुस्सोति यक्खो वा पेतो वा. पलिबुद्धं होतीति उपद्दुतं होति.

पठमसेनासनसिक्खापदवण्णना निट्ठिता.

५. दुतियसेनासनसिक्खापदवण्णना

यं ¶ किञ्चि चम्मन्ति कप्पियाकप्पियं यं किञ्चि चम्मं. ननु ‘‘न, भिक्खवे, महाचम्मानि धारेतब्बानि सीहचम्मं ब्यग्घचम्मं दीपिचम्मं, यो धारेय्य, आपत्ति दुक्कटस्सा’’ति (महाव. २५५) खन्धके सीहचम्मादीनं पटिक्खेपो कतोति आह ‘‘सीहचम्मादीनञ्ही’’तिआदि. परिहरणेयेव पटिक्खेपोति अत्तनो सन्तकं ¶ कत्वा तं तं विहारं हरित्वा मञ्चपीठादीसु अत्थरित्वा परिभोगेयेव पटिक्खेपो, सेनासनसन्तकं कत्वा भूमत्थरणवसेन पन परिभोगे नेवत्थि दोसो. तेनाह ‘‘सेनासनपरिभोगे पन अकप्पियचम्मं नाम नत्थी’’ति. पावारेन्ति सञ्छादेन्ति सरीरं एतेनाति पावारो. कोजवोति उद्दलोमिएकन्तलोमिआदिकोजवत्थरणं. सेसन्ति भिसि निसीदनं तिणसन्थारो पण्णसन्थारोति अवसिट्ठं सेनासनं. तत्थ भिसीति मञ्चकभिसि वा पीठकभिसि वा. निसीदनन्ति सदसं वेदितब्बं. तिणसन्थारोति येसं केसञ्चि तिणानं सन्थारो. एस नयो पण्णसन्थारे. एत्थ च भिसि हेट्ठा वुत्तत्ता पाकटा. निसीदनं निसीदनसिक्खापदेनेव (पाचि. ५३१ आदयो) पाकटं. तिणसन्थारपण्णसन्थारानि पन लोकपसिद्धानियेव. तेनेवाह ‘‘पाकटमेवा’’ति.

नेव उद्धरेय्य, न उद्धरापेय्याति अत्तना वा उद्धरित्वा पतिरूपे ठाने न ठपेय्य, परेन वा तथा न कारेय्य. तेनाह ‘‘यथा ठपित’’न्तिआदि. तं ठपेन्तेन च ‘‘चतूसु पासाणेसू’’तिआदिना (पाचि. अट्ठ. ११६) पुब्बे वुत्तनयेनेव अन्तोगेहे अनोवस्सके निक्खिपितब्बं. सचे पन सेनासनं ओवस्सति, छदनत्थञ्च तिणं वा इट्ठका वा आनीता होन्ति. सचे उस्सहति, छादेतब्बं. नो चे सक्कोति, यो ओकासो अनोवस्सको, तत्थ निक्खिपितब्बं. सचे सब्बम्पि ओवस्सति, उस्सहन्तेन अन्तोगामे उपासकानं घरे ठपेतब्बं. सचे तेपि ‘‘सङ्घिकं नाम, भन्ते, भारियं, अग्गिदाहादीनं भायामा’’ति न सम्पटिच्छन्ति, अज्झोकासे पासाणानं उपरि मञ्चं ठपेत्वा सेसं पुब्बे वुत्तनयेनेव निक्खिपित्वा तिणेहि च पण्णेहि च पटिच्छादेतब्बं. यञ्हि तत्थ अङ्गमत्तम्पि अवसिस्सति, तं अञ्ञेसं तत्थ आगतानं भिक्खूनं उपकारं भविस्सतीति. उपचारन्ति सब्बपच्छिमसेनासनतो द्वे लेड्डुपाता.

अयमेत्थ आपुच्छितब्बानापुच्छितब्बविनिच्छयो – (पाचि. अट्ठ. ११८) या ताव भूमियं दीघसाला वा पण्णसाला वा होति, यं वा रुक्खत्थम्भेसु कतगेहं उपचिकानं उट्ठानट्ठानं होति, ततो पक्कमन्तेन आपुच्छित्वाव पक्कमितब्बं. तस्मिञ्हि कतिपयानि दिवसानि अजग्गियमाने वम्मिकाव सन्तिट्ठन्ति. यं पन पासाणपिट्ठियं वा पासाणत्थम्भेसु वा ¶ कतसेनासनं सिलुच्चयलेणं वा सुधालित्तसेनासनं वा, यत्थ उपचिकासङ्का नत्थि, ततो ¶ पक्कमन्तस्स आपुच्छित्वापि अनापुच्छित्वापि गन्तुं वट्टति. तेनाह ‘‘यत्थ पना’’तिआदि. सचे तादिसेपि सेनासने एकेन पस्सेन उपचिका आरोहन्ति, आपुच्छित्वाव गन्तब्बं. आपुच्छनं पन वत्तन्ति आपुच्छनं गमिकवत्तं. इदञ्च इतिकत्तब्बतादस्सनत्थं वुत्तं, न पन वत्तभेददुक्कटन्ति (सारत्थ. टी. पाचित्तिय ३.११८) दस्सनत्थं. केचि पन ‘‘दुक्कटन्ति दस्सनत्थ’’न्ति वदन्ति, तं न युज्जति वत्तक्खन्धकट्ठकथाय ‘‘यं पासाणपिट्ठियं वा पासाणत्थम्भेसु वा कतसेनासनं, यत्थ उपचिकानारोहन्ति, तं अनापुच्छन्तस्सापि अनापत्ती’’ति (चूळव. अट्ठ. ३६०) वुत्तत्ता. आपुच्छन्तेन पन भिक्खुम्हि (पाचि. अट्ठ. ११६) सति भिक्खु आपुच्छितब्बो, तस्मिं असति सामणेरो, तस्मिं असति आरामिको, तस्मिम्पि असति येन विहारो कारापितो, सो विहारसामिको, तस्स वा कुले यो कोचि आपुच्छितब्बो.

‘‘उपचारे’’ति एतस्सेव विवरणं ‘‘बहि आसन्ने’’ति, विहारस्स बहि आसन्नट्ठानेति अत्थो. उपट्ठानसालाय वाति भोजनसालायं वा. दुक्कटमेवाति वुत्तप्पकारञ्हि दसविधं सेय्यं अन्तोगब्भादिम्हि गुत्तट्ठाने पञ्ञपेत्वा गच्छन्तस्स यस्मा सेय्यापि सेनासनम्पि उपचिकाहि पलुज्जति, वम्मिकरासियेव होति, तस्मा पाचित्तियं वुत्तं. बहि पन उपट्ठानसालादीसु पञ्ञपेत्वा गच्छन्तस्स सेय्यामत्तमेव नस्सेय्य ठानस्स अगुत्तताय, न सेनासनं, तस्मा एत्थ दुक्कटं वुत्तं. मञ्चपीठं पन यस्मा न सक्का सहसा उपचिकाहि खायितुं, तस्मा तं विहारेपि सन्थरित्वा गच्छन्तस्स दुक्कटं वुत्तं. विहारूपचारे पन तं विहारचारिकं आहिण्डन्ता दिस्वाव पटिसामेन्ति.

उद्धरणानि कत्वाति एत्थ उद्धरित्वा गच्छन्तेन मञ्चपीठकवानं सब्बं अपनेत्वा (पाचि. अट्ठ. ११८) संहरित्वा चीवरवंसे लग्गेत्वा गन्तब्बं. पच्छा आगन्त्वा वसनकभिक्खुनापि पुन मञ्चपीठं वा पञ्ञपेत्वा सयित्वा गच्छन्तेन तथेव कातब्बं. अन्तोकुट्टतो सेय्यं बहिकुट्टे पञ्ञपेत्वा वसन्तेन गमनकाले पुन गहितट्ठानेयेव पटिसामेतब्बं. उपरिपासादतो ओरोपेत्वा हेट्ठापासादे वसन्तस्सापि एसेव नयो. रत्तिट्ठानदिवाट्ठानेसु मञ्चपीठं पञ्ञपेत्वापि गमनकाले पुन गहितट्ठानेयेव ठपेतब्बं. उद्धरापेत्वा गमनेपि एसेव नयो. आपुच्छित्वा गच्छन्तेन पन ¶ ‘‘भिक्खुम्हि सति भिक्खु आपुच्छितब्बो’’तिआदिना (पाचि. अट्ठ. ११६) हेट्ठा वुत्तनयेनेव आपुच्छित्वा गन्तब्बं.

दुतियसेनासनसिक्खापदवण्णना निट्ठिता.

६. अनुपखज्जसिक्खापदवण्णना

‘‘जान’’न्ति ¶ वुत्ते ‘‘अनुट्ठापनीयो ‘अय’न्ति जानन्तो’’ति अयं विसेसो कुतो लब्भतीति आह ‘‘तेनेवस्सा’’तिआदि. ननु पदभाजनेपि वुड्ढभावादिजाननमेव वुत्तं, न तु अनुट्ठापनीयभावन्ति अनुयोगं सन्धायाह ‘‘वुड्ढो ही’’तिआदि. बहूपकारतन्ति ‘‘भण्डागारिकत्तादिबहुउपकारभावं’’. न केवलं इदमेवाति आह ‘‘गुणविसिट्ठतञ्चा’’तिआदि, तेन बहूपकारत्तेपि गुणविसिट्ठत्ताभावे, गुणविसिट्ठत्तेपि बहूपकारत्ताभावे दातुं न वट्टतीति दस्सेति. ‘‘भण्डागारिकस्स बहूपकारतं, धम्मकथिकादीनं गुणविसिट्ठतञ्च सल्लक्खेत्वा’’ति (सारत्थ. टी. पाचित्तिय ३.११९-१२१) केचि. धुववासत्थायाति निच्चवासत्थाय. सम्मन्नित्वाति अपलोकनेन कम्मेन सम्मन्नित्वा. कामञ्चेत्थ गिलानस्सापि सङ्घोयेव अनुच्छविकं सेनासनं देति, गिलानो पन अपलोकेत्वा सङ्घेन अदिन्नसेनासनोपि न पीळेतब्बो अनुकम्पितब्बोति दस्सेतुं विसुं वुत्तो.

समन्ता दियड्ढो हत्थोति मज्झे पञ्ञत्तं मञ्चपीठं सन्धाय वुत्तं. एकपस्सेन चे पहोनकदिसा दिस्सति, ततो गहेतब्बं. पादधोवनपासाणतोति द्वारे निक्खित्तपादधोवनपासाणतो. निसीदन्तस्स वा निपज्जन्तस्स वा पाचित्तियन्ति एत्थ निसीदनमत्तेन, निपज्जनमत्तेनेव वा पाचित्तियं. पुनप्पुनं करोन्तस्साति उट्ठायुट्ठाय निसीदतो वा निपज्जतो वा.

सङ्घिके सङ्घिकसञ्ञिवेमतिकपुग्गलिकसञ्ञीनं वसेन तिकपाचित्तियं वेदितब्बं. तिकदुक्कटं पन पुग्गलिके सङ्घिकसञ्ञिवेमतिकअञ्ञपुग्गलिकसञ्ञीनं वसेन. विहारस्स उपचारेति तस्स बहि आसन्नप्पदेसे.

अनुपखज्जसिक्खापदवण्णना निट्ठिता.

७. निक्कड्ढनसिक्खापदवण्णना

अनेककोट्ठकानीति ¶ अनेकद्वारकोट्ठकानि. ‘‘निक्खमाति वचनं सुत्वा अत्तनो रुचिया चे निक्खमति, अनापत्ती’’ति (सारत्थ. टी. पाचित्तिय १२६) वदन्ति.

तस्स ¶ परिक्खारनिक्कड्ढनेति तस्स सन्तकं यं किञ्चि पत्तचीवरपरिस्सावनधम्मकरणमञ्चपीठभिसिबिब्बोहनादिभेदं अन्तमसो रजनछल्लिपि अत्थि, तस्स परिक्खारस्स निक्कड्ढने. तञ्चाति दुक्कटं परामसति. निक्कड्ढापनेपि एसेव नयो. गाळ्हं बन्धित्वा ठपितेसु पन एकाव आपत्ति.

भण्डनकारककलहकारकमेव सकलसङ्घारामतो निक्कड्ढितुं लभति. सो हि पक्खं लभित्वा सङ्घम्पि भिन्देय्य. अलज्जिआदयो पन अत्तनो वसनट्ठानतोयेव निक्कड्ढितब्बा. सकलसङ्घारामतो निक्कड्ढितुं न वट्टति. तेनाह ‘‘सकलसङ्घारामतोपी’’तिआदि.

निक्कड्ढनसिक्खापदवण्णना निट्ठिता.

८. वेहासकुटिसिक्खापदवण्णना

उपरिवेहासकुटियाति उपरिमतले असन्थतपदराय कुटिया. तेनाह ‘‘उपरि अच्छन्नतलाया’’तिआदि. या हि काचि उपरि अच्छन्नतला द्विभूमिककुटिका वा तिभूमिकादिकुटिका वा, सा ‘‘वेहासकुटी’’ति वुच्चति. इदञ्हि वेहासकुटिलक्खणं. यदि एवं कस्मा पदभाजने ‘‘मज्झिमस्स पुरिसस्स असीसघट्टा’’ति (पाचि. १३१) वुत्तन्ति आह ‘‘पदभाजने पना’’तिआदि. इध अधिप्पेतं कुटिं दस्सेतुन्ति इमस्मिं सिक्खापदे अधिप्पेतं वेहासकुटिं दस्सेतुं. मज्झिमस्स पुरिसस्साति पमाणमज्झिमस्स पुरिसस्स. सब्बहेट्ठिमाहि तुलाहि सीसं न घट्टेतीति असीसघट्टा. अङ्गे विज्झित्वाति अटनियो विज्झित्वा. पवेसितपादकन्ति पवेसितपादसिखं. तस्माति ‘‘भूमत्थे वा’’तिआदिना वुत्तमेवत्थं कारणभावेन पच्चामसति. यस्मा आहच्चपादकादीसु यथावुत्तो अत्थो होति, तस्माति वुत्तं होति.

सहसाति अभिभवित्वा अज्झोत्थरित्वा. अवेहासकुटिकायाति भूमियं कतपण्णसालादीसु, तत्थ अनापत्ति. न हि सक्का तत्थ परस्स पीळा ¶ कातुं. सीसघट्टायाति या सीसं घट्टा होति, तत्थापि अनापत्ति. न हि सक्का तत्थ हेट्ठापासादे अनोणतेन विचरितुं, तस्मा असञ्चरणट्ठानत्ता परपीळा न भविस्सति. उपरितलं वा पदरसञ्चितन्ति उपरिमतलं दारुफलकेहि घनसन्थतं. किञ्चि गण्हाति वाति उपरि नागदन्तकादीसु लग्गितं चीवरादिं यं किञ्चि गण्हाति वा. लग्गति वाति एत्थापि एसेव ¶ नयो. पटिपक्खभूता आणि पटाणि. यस्सा दिन्नाय निसीदन्तेपि पादा न निपतन्ति, एवंभूता आणि मञ्चपीठानं पादसिखासु दिन्ना होतीति अत्थो. तेनाह ‘‘पादसीसान’’न्तिआदि.

वेहासकुटिसिक्खापदवण्णना निट्ठिता.

९. महल्लकविहारसिक्खापदवण्णना

पिट्ठसङ्घाटस्साति द्वारबन्धस्स. सामन्ता अड्ढतेय्यहत्थो पदेसोति यस्स (पाचि. अट्ठ. १३५) वेमज्झे द्वारं होति, उपरिभागे च उच्चा भित्ति, तस्स तीसु दिसासु सामन्ता अड्ढतेय्यहत्थो पदेसो. खुद्दकस्स पन विहारस्स द्वीसु दिसासु. तत्रापि यं भित्तिं विवरियमानं कवाटं आहनति, सा अपरिपुण्णूपचारापि होति. सचे पन द्वारस्स अधोभागेपि लेपोकासो अत्थि, तम्पि लिम्पितुं वट्टति. अग्गळट्ठपनायाति एत्थ अग्गळसद्देन तंसम्बन्धतो द्वारफलकसहितं द्वारबन्धनं अधिप्पेतं. तेनाह ‘‘सकवाटकस्सा’’तिआदि. ‘‘निच्चलभावत्थाया’’ति इमिना तञ्च खो ठपनं इध निच्चलभावेनाति दस्सेति. को पनेत्थ अधिप्पायोति आह ‘‘कवाटञ्ही’’तिआदि. कम्पतीति चलति. याव द्वारकोसा अग्गळट्ठपनाय पुनप्पुनं लिम्पितब्बो वा लेपापेतब्बो वाति अग्गळट्ठपनत्थाय याव द्वारकोसा पुनप्पुनं अत्तना लिम्पितब्बो वा, परेहि लेपापेतब्बो वाति अत्थो.

ननु चायमत्थो नेव मातिकायं, न पदभाजने वुत्तो, अथ कुतो दट्ठब्बोति आह ‘‘तत्था’’तिआदि. किञ्चापीति यदिपि. अट्ठुप्पत्तियन्ति सिक्खापदस्स निदाने. अधिकारतोति अनुवत्तनतो. आलोकं सन्धेति पिधेतीति आलोकसन्धि. तेनाह ‘‘आलोकसन्धीति वातपानकवाटका वुच्चन्ती’’ति. तत्थ वातपानकवाटकाति वातपानफलका. अनुञ्ञातप्पदेसतो ¶ पन अञ्ञत्थ पुनप्पुनं विलिम्पितुं वा विलिम्पापेतुं वा न वट्टति. ‘‘मत्तिकाय कत्तब्बकिच्चं निट्ठापेत्वा पुन चतुत्थलेपे दिन्ने पाचित्तिय’’न्ति (सारत्थ. टी. पाचित्तिय ३.१३५) केचि. ‘‘पुनप्पुनं लेपदानस्स वुत्तप्पमाणतो अञ्ञत्थ पटिक्खित्तमत्तं ठपेत्वा पाचित्तियस्स अवुत्तत्ता दुक्कट’’न्ति अपरे.

अधिट्ठातब्बन्ति संविधातब्बं. अप्पहरितेति एत्थ अप्पसद्दो ‘‘अप्पिच्छो’’तिआदीसु (म. नि. १.२५२, ३३६; सं. नि. २.१४८) विय अभावत्थोति आह ‘‘अहरिते’’ति. सालिवीहिआदि ¶ (सारत्थ. टी. २.३०) पुब्बण्णं ‘‘पुरक्खतं सस्सफल’’न्ति कत्वा, तब्बिपरियायतो मुग्गमासादि अपरण्णं. वुत्तन्ति वपितं. ‘‘तस्मिं ठत्वा अधिट्ठहन्तो दुक्कटं आपज्जती’’ति इमिना यस्मिं पदेसे समन्ता वुत्तप्पमाणे परिच्छेदे पुब्बण्णादीनि न सन्ति, तत्थ विहारो कारेतब्बो. यत्थ पन सन्ति, तत्थ कारापेतुं न वट्टतीति दस्सेति. तथेवाति मुखवट्टिअन्तेन. तस्मिं ठातब्बं पतन्तस्स विहारस्स अपतनोकासत्ता, तस्स भिक्खुनो उपरि न पतेय्याति अधिप्पायो. यथापरिच्छिन्नस्स पन ओकासस्स अब्भन्तरं विहारस्स पतन्तस्स ओकासो होतीति अप्पहरितेपि तस्मिं ठत्वा अधिट्ठातुं न लभति. तेनाह ‘‘तस्स अन्तो अहरितेपि ठातुं न लभती’’ति.

ततो चे उत्तरीति तिण्णं मग्गानं वा परियायानं वा उपरि चतुत्थे मग्गे वा परियाये वाति अत्थो. तेनाह ‘‘मग्गेन छादियमाने’’तिआदि. तत्थ मग्गेन छादियमानेति अपरिक्खिपित्वा उजुकमेव छादियमाने. परियायेनाति परिक्खेपेन. तत्थ मग्गेन छादनं इट्ठकसिलासुधाहि लब्भति, परियायेन छादनं तिणपण्णेहीति आह ‘‘इट्ठकसिलासुधाही’’तिआदि. तस्मा यथा इच्छति, तथा द्वे मग्गे वा द्वे परियाये वा अधिट्ठहित्वा ततियं मग्गं वा परियायं वा ‘‘एवं छादेही’’ति आणापेत्वा पक्कमितब्बं. सचे न पक्कमति, तुण्हीभावेन ठातब्बं. सब्बम्पि चेतं छदनं छदनूपरि वेदितब्बं. उपरूपरिछन्नो हि विहारो चिरं अनोवस्सको होतीति मञ्ञमाना एवं छादेन्ति. तिणमुट्ठिगणनायाति तिणकरळगणनाय.

तिकपाचित्तियन्ति अतिरेकद्वत्तिपरियाये अतिरेकसञ्ञिवेमतिकऊनकसञ्ञीनं वसेन तीणि पाचित्तियानि. सेतवण्णादिकरणेति सेतवण्णकाळवण्णगेरुकपरिकम्ममालाकम्मलताकम्ममकरदन्तकपञ्चपटिकानं ¶ करणे. लेणगुहातिणकुटिकादीसूति एत्थ लेणन्ति द्वारबद्धं. गुहाति केवला पब्बतगुहा. तिणकुटिका पाकटा एव.

महल्लकविहारसिक्खापदवण्णना निट्ठिता.

१०. सप्पाणकसिक्खापदवण्णना

एकस्मिं घटे एकाव आपत्तीति एकस्मिं उदकघटे एकाव आपत्ति. एस नयो सब्बभाजनेसु ¶ . विच्छिन्दन्तस्साति धारं विच्छिन्दन्तस्स. एकेकं पक्खिपन्तस्साति एकेकं तिणं वा पण्णं वा मत्तिकं वा अञ्ञं वा कट्ठगोमयादिं पक्खिपन्तस्स. परियादानन्ति खयं.

‘‘पदीपे (सारत्थ. टी. पाचित्तिय ३.१४०) पतित्वा पटङ्गादिपाणका मरिस्सन्ती’’ति जानन्तस्सापि कुसलचित्तेन पदीपुज्जलनं विय ‘‘सिञ्चनेन पाणका मरिस्सन्ती’’ति पुब्बभागे जानन्तस्सापि ‘‘इदं जलं सिञ्चामी’’ति सिञ्चन्तस्स वधकचित्तं न होतीति आह ‘‘विना वधकचेतनाया’’तिआदि. एवञ्च कत्वा ‘‘पण्णत्तिवज्ज’’न्ति इदम्पि समत्थितं होति. तिचित्तन्ति कुसलाकुसलाब्याकतवसेन तिचित्तं. तथा हि पण्णत्तिं मद्दित्वा सिञ्चन्तस्स वा सिञ्चापेन्तस्स वा अकुसलचित्तेन होति, ‘‘आसनं धोविस्सामी’’ति चित्तेन धोवनत्थं सिञ्चन्तस्स वा सिञ्चापेन्तस्स वा कुसलचित्तेन होति, पण्णत्तिं अजानता अरहता सिञ्चनादिकरणे अब्याकतचित्तेन होतीति कुसलाकुसलाब्याकतचित्तवसेन तिचित्तं होति.

सप्पाणकसिक्खापदवण्णना निट्ठिता.

भूतगामवग्गो दुतियो.

३. ओवादवग्गो

१. ओवादसिक्खापदवण्णना

अट्ठङ्गसमन्नागतस्साति ‘‘सीलवा होती’’तिआदीहि (पाचि. १४७) अट्ठहि अङ्गेहि समन्नागतस्स. अनुञ्ञाताति इमस्स सिक्खापदस्स निदाने अनुञ्ञाता ¶ . ‘‘वस्ससतूपसम्पन्नाया’’तिआदि वक्खमानअट्ठगरुधम्मदस्सनं. तत्थ सामीचिकम्मन्ति मग्गसम्पदानबीजनपानीयापुच्छनादिकं अनुच्छविकं वत्तं. आदिसद्देन –

‘‘न भिक्खुनिया अभिक्खुके आवासे वस्सं वसितब्बं, अन्वद्धमासं भिक्खुनिया भिक्खुसङ्घतो द्वे धम्मा पच्चासीसितब्बा उपोसथपुच्छकञ्च ओवादूपसङ्कमनञ्च, वस्संवुट्ठाय भिक्खुनिया उभतोसङ्घे तीहि ठानेहि पवारेतब्बं दिट्ठेन ¶ वा सुतेन वा परिसङ्काय वा, गरुधम्मं अज्झापन्नाय भिक्खुनिया उभतोसङ्घे पक्खमानत्तं चरितब्बं, द्वे वस्सानि छसु धम्मेसु सिक्खितसिक्खाय सिक्खमानाय उभतोसङ्घे उपसम्पदा परियेसितब्बा, न भिक्खुनिया केनचि परियायेन भिक्खु अक्कोसितब्बो परिभासितब्बो, अज्जतग्गे ओवटो भिक्खुनीनं भिक्खूसु वचनपथो, अनोवटो भिक्खूनं भिक्खुनीसु वचनपथो’’ति (चूळव. ४०३; अ. नि. ८.५१) –

इमे सत्त धम्मे सङ्गण्हाति. गरुधम्मेति गरुके धम्मे. ते हि गारवं कत्वा भिक्खुनीहि सम्पटिच्छितब्बत्ता ‘‘गरुधम्मा’’ति वुच्चन्ति.

अञ्ञेन वा धम्मेनाति ठपेत्वा अट्ठ गरुधम्मे अञ्ञेन येन केनचि धम्मेन. भिक्खुनीसु उपसम्पन्नमत्तं वा ओवदतोति भिक्खुनीसु उपसम्पन्नमत्तं गरुधम्मेन ओवदतो वा. भिक्खूनं सन्तिके उपसम्पन्नाय यथावत्थुकमेव. ‘‘अधम्मकम्मे’’तिआदीसु भिक्खुनोवादसम्मुतिकम्मं ‘‘कम्म’’न्ति वेदितब्बन्ति आह ‘‘सम्मतस्सापी’’तिआदि. वग्गे भिक्खुनिसङ्घे ओवदतो तिकपाचित्तियन्ति वग्गे भिक्खुनिसङ्घे ओवदतो वग्गसञ्ञिवेमतिकसमग्गसञ्ञीनं वसेन तीणि पाचित्तियानि. तथा वेमतिकस्स चाति अधम्मकम्मे वेमतिकस्स च वग्गे भिक्खुनिसङ्घे ओवदतो तिकपाचित्तियन्ति अत्थो. एस नयो धम्मकम्मसञ्ञिनो चाति एत्थापि. यथा च वग्गे भिक्खुनिसङ्घे ओवदतो नव पाचित्तियानि, एवं अधम्मकम्मे अधम्मकम्मसञ्ञिनो समग्गे भिक्खुनिसङ्घे ओवदतो तस्मिं सङ्घे वग्गसञ्ञिवेमतिकसमग्गसञ्ञीनं वसेन तिकपाचित्तियं, तथा वेमतिकस्स च धम्मकम्मसञ्ञिनो चाति नव पाचित्तियानि. तेनाह ‘‘समग्गेपि भिक्खुनिसङ्घे नवा’’तिआदि. धम्मकम्मे पन अधम्मकम्मसञ्ञिनो वग्गं भिक्खुनिसङ्घं ओवदतो ¶ तिकदुक्कटं, तथा वेमतिकस्स, धम्मकम्मसञ्ञिनो चाति नव दुक्कटानि. समग्गं पन भिक्खुनिसङ्घं ओवदतो अट्ठाति सत्तरस दुक्कटानि. तेनाह ‘‘सचे पना’’तिआदि. अञ्ञं धम्मन्ति अञ्ञं सुत्तन्तं वा अभिधम्मं वा. ‘‘समग्गाम्हाय्या’’ति वचनेन हि ओवादं पच्चासीसन्ति. तस्मा ठपेत्वा ओवादं अञ्ञं धम्मं भणन्तस्स दुक्कटं. ओवादञ्च अनिय्यातेत्वाति ‘‘एसो भगिनि ओवादो’’ति अवत्वा. परिपुच्छं देतीति तस्सायेव पगुणाय गरुधम्मपाळिया अत्थं भणति. ओसारेहीति उच्चारेहि, कथेहीति अत्थो. ओसारेतीति अट्ठगरुधम्मपाळिं वदति. पञ्हं पुट्ठोति गरुधम्मनिस्सितं वा खन्धादिनिस्सितं वा पञ्हं भिक्खुनिया पुट्ठो.

ओवादसिक्खापदवण्णना निट्ठिता.

२. अत्थङ्गतसिक्खापदवण्णना

एकतोउपसम्पन्नन्ति ¶ भिक्खुनिसङ्घे उपसम्पन्नमत्तं. इतो परम्पि च यत्थ यत्थ ‘‘एकतोउपसम्पन्न’’न्ति वुच्चति, सब्बत्थ अयमेव अत्थो दट्ठब्बो.

अत्थङ्गतसिक्खापदवण्णना निट्ठिता.

३. भिक्खुनुपस्सयसिक्खापदवण्णना

संवासायाति उपोसथादिअत्थं. इतरन्ति उभतोसङ्घे उपसम्पन्नं.

भिक्खुनुपस्सयसिक्खापदवण्णना निट्ठिता.

४. आमिससिक्खापदवण्णना

तण्हादिट्ठीहि आमसितब्बतो आमिसं, चीवरादि, आमिसमेव हेतु आमिसहेतु. तेनाह ‘‘चीवरादीनं अञ्ञतरहेतू’’ति. आदिसद्देन पिण्डपातसेनासनगिलानपच्चयसक्कारगरुकारमाननवन्दनपूजनानं गहणं. अवण्णकामतायाति अयसकामतायेव.

धम्मकम्मेतिआदीसु ¶ भिक्खुनोवादसम्मुतिकम्मं ‘‘कम्म’’न्ति वेदितब्बं. तत्थ तिकपाचित्तियन्ति धम्मकम्मे धम्मकम्मसञ्ञिवेमतिकअधम्मकम्मसञ्ञीनं वसेन तीणि पाचित्तियानि. तथेव अधम्मकम्मे तिकदुक्कटं वेदितब्बं. असम्मतन्ति सम्मतेन वा सङ्घेन वा भारं कत्वा ठपितं उपसम्पन्नं. ननु ओवादसम्मुति उपसम्पन्नस्सेव दीयति, न सामणेरस्साति आह ‘‘तत्था’’तिआदि. सम्मतेन वा सङ्घेन वा ठपितो पन बहुस्सुतो सामणेरो ‘‘असम्मतो’’ति वेदितब्बो. पकतिया चीवरादिहेतु ओवदन्तं पन एवं भणन्तस्साति पकतिया चीवरादिहेतु ओवदन्तं ‘‘एस चीवरादिहेतु ओवदती’’ति सञ्ञाय एवं भणन्तस्स. ‘‘न चीवरादिहेतु ओवदती’’ति सञ्ञाय पन एवं भणन्तस्स दुक्कटं. अनामिसन्तरताति आमिसचित्ताभावो, ‘‘आमिसहेतु ओवदिस्सामी’’ति एवं पवत्तअज्झासयाभावोति अत्थो. चित्तपरियायो हेत्थ अन्तरसद्दो ‘‘यस्सन्तरतो न सन्ति कोपा’’तिआदीसु (उदा. २०) विय.

आमिससिक्खापदवण्णना निट्ठिता.

५. चीवरदानसिक्खापदवण्णना

पञ्चमसिक्खापदं ¶ उत्तानत्थमेव.

चीवरदानसिक्खापदवण्णना निट्ठिता.

६. चीवरसिब्बनसिक्खापदवण्णना

सूचिं पवेसेत्वा पवेसेत्वा नीहरणेति आरापथे आरापथे पाचित्तियं. ‘‘सिब्बिस्सामी’’ति पन विचारेन्तस्स, छिन्दन्तस्सापि दुक्कटं. सतक्खत्तुम्पि विज्झित्वा सकिं नीहरन्तस्साति सकलसूचिं अनीहरन्तो दीघसुत्तप्पवेसनत्थं सतक्खत्तुम्पि विज्झित्वा सकिं नीहरन्तस्स. ‘‘सिब्बा’’ति वुत्तोति सकिं ‘‘चीवरं सिब्बा’’ति वुत्तो. निट्ठापेतीति सब्बं सूचिकम्मं परियोसापेति. तस्स आरापथे आरापथे पाचित्तियन्ति आणत्तस्स सूचिं पवेसेत्वा पवेसेत्वा नीहरणे एकमेकं पाचित्तियं.

उदायित्थेरन्ति ¶ लाळुदायित्थेरं. वुत्तलक्खणं सिब्बनं वा सिब्बापनं वाति ‘‘सूचिं पवेसेत्वा’’तिआदिना वुत्तलक्खणं सिब्बनं वा सिब्बापनं वा.

चीवरसिब्बनसिक्खापदवण्णना निट्ठिता.

७. संविधानसिक्खापदवण्णना

संविदहित्वाति ‘‘एहि, असुकगामं गच्छामा’’ति वा ‘‘स्वे अहं गच्छामि, त्वम्पि आगच्छेय्यासी’’ति वा वत्वा. तञ्च खो संविदहनं अत्थतो सङ्केतकम्मन्ति आह ‘‘गमनकाले सङ्केतं कत्वाति अत्थो’’ति. अकप्पियभूमियं संविदहन्तस्साति अन्तोगामे, भिक्खुनिउपस्सयद्वारे, रथिकाय, अञ्ञेसु वा चतुक्कसिङ्घाटकहत्थिसालादीसु ठत्वा संविदहन्तस्स. तेनाह ‘‘तत्थ ठपेत्वा’’तिआदि. आसन्नस्सापीति अच्चासन्नस्सापि, रतनमत्तन्तरस्सापीति अधिप्पायो. अञ्ञस्स गामस्साति यतो निक्खमति, ततो अञ्ञस्स गामस्स. तं ओक्कमन्तस्साति तं अन्तरगामस्स उपचारं ओक्कमन्तस्स. सचे दूरं गन्तुकामो होति, गामूपचारगणनाय ओक्कमन्ते ओक्कमन्ते पुरिमनयेनेव आपत्ति. तेनाह ‘‘इति गामूपचारोक्कमनगणनाय पाचित्तियानी’’ति. तस्स तस्स पन गामस्स अतिक्कमने अनापत्ति. गामे असतीति अद्धयोजनब्भन्तरे गामे असति. तस्मिं पन गामे सति गामन्तरगणनायेव ¶ पाचित्तियानि. अद्धयोजनगणनाय पाचित्तियन्ति अद्धयोजने अद्धयोजने पाचित्तियं, एकमेकं अद्धयोजनं अतिक्कमन्तस्स ‘‘इदानि अतिक्कमिस्सामी’’ति पठमपादे दुक्कटं, दुतियपादे पाचित्तियन्ति अत्थो. इमस्मिञ्हि नये अतिक्कमने आपत्ति, ओक्कमने अनापत्ति.

विसङ्केतेनाति (पाचि. अट्ठ. १८५) एत्थ ‘‘पुरेभत्तं गमिस्सामा’’ति वत्वा पच्छाभत्तं गच्छन्ति, ‘‘अज्ज वा गमिस्सामा’’ति स्वे गच्छन्ति, एवं कालविसङ्केतेयेव अनापत्ति. द्वारविसङ्केते, पन मग्गविसङ्केते, वा सतिपि आपत्तियेव. आपदासूति रट्ठभेदे चक्कसमारुळ्हा जानपदा परियायन्ति, एवरूपासु आपदासु अनापत्ति. चक्कसमारुळ्हाति च इरियापथचक्कं वा सकटचक्कं वा ¶ समारुळ्हाति अत्थो. मातुगामसिक्खापदेनाति (पाचि. ४१३ आदयो) सप्पाणकवग्गे सत्तमसिक्खापदेन.

संविधानसिक्खापदवण्णना निट्ठिता.

८. नावाभिरुहनसिक्खापदवण्णना

कीळापुरेक्खारोति लोकस्सादमित्तसन्थववसेन कीळापुरेक्खारो. तथेवाति कीळावसेनेव. अगामकतीरपस्सेनाति अद्धयोजनब्भन्तरे गामानं अभावतो अगामकतीरपस्सेन. पाळियं ‘‘उद्धंगामिनिं वा अधोगामिनिं वा’’ति (पाचि. १८६) वचनतो पन वापिसमुद्दादीसु कीळापुरेक्खारतायपि गच्छन्तस्स अनापत्ति. तेनाह ‘‘समुद्दे पन यथासुखं गन्तुं वट्टती’’ति. विसङ्केतेनाति इधापि कालविसङ्केतेनेव अनापत्ति, तित्थविसङ्केतेन, पन नावाविसङ्केतेन वा गच्छन्तस्स आपत्तियेव.

सेसन्ति सद्धिं समुट्ठानादीहि अवसेसं, केचि पन ‘‘कीळापुरेक्खारो ‘संविदहित्वा’ति (सारत्थ. टी. पाचित्तिय ३.१८८) वचनतो इमं सिक्खापदं अकुसलचित्तं लोकवज्जं, तस्मा सेसं नाम ठपेत्वा ‘पण्णत्तिवज्जं तिचित्त’न्ति इदं द्वयं अवसेस’’न्ति वदन्ति, तं न गहेतब्बं. कीळापुरेक्खारताय हि अभिरुहित्वापि गामन्तरोक्कमने, अद्धयोजनातिक्कमे वा संवेगं पटिलभित्वा अरहत्तं वा सच्छिकरेय्य, निद्दं वा ओक्कमेय्य, कम्मट्ठानं वा मनसि करोन्तो गच्छेय्य, कुतो चस्स अकुसलचित्तसमङ्गिता, येनिदं सिक्खापदं अकुसलचित्तं, लोकवज्जञ्च सियाति.

नावाभिरुहनसिक्खापदवण्णना निट्ठिता.

९. परिपाचितसिक्खापदवण्णना

परिपाचितन्ति ¶ परिपाकमापादितं, यथा लभति, तथा कत्वा ठपितन्ति वुत्तं होति. तेनाह ‘‘नेव तस्सा’’तिआदि तस्साति यो परिभुञ्जेय्य, तस्स भिक्खुनो. भिक्खुस्स गुणं पकासेत्वाति ‘‘अय्यो भाणको, अय्यो बहुस्सुतो’’तिआदिना (पाचि. १९५) गुणं पकासेत्वा ¶ . पिण्डपातन्ति पञ्चन्नं भोजनानं अञ्ञतरं. कम्मसाधनोयं समारम्भसद्दोति आह ‘‘समारद्ध’’न्ति. पटियादितस्साति सम्पादितस्स. यस्मा ञातकप्पवारितेहि भिक्खुस्स अत्थाय असमारद्धोपि पिण्डपातो अत्थतो समारद्धोव होति यथासुखं हरापेतब्बतो, तस्मा ‘‘ञातकप्पवारितानं वा सन्तक’’न्ति वुत्तं.

उभयत्थाति परिपाचितापरिपाचितेसु. अवसेसेति भिक्खुनिपरिपाचितेपि यागुखज्जकफलाफलादिके सब्बत्थ. निमित्तोभासपरिकथाविञ्ञत्तिवसेन पन अवसेसेपि दुक्कटतो न मुच्चति.

परिपाचितसिक्खापदवण्णना निट्ठिता.

१०. रहोनिसज्जसिक्खापदवण्णना

उपरीति अचेलकवग्गे. उपनन्दस्स चतुत्थसिक्खापदेनाति अप्पटिच्छन्ने मातुगामेन सद्धिं रहोनिसज्जसिक्खापदेन (पाचि. २८४ आदयो). तञ्हि उपनन्दत्थेरं आरब्भ पञ्ञत्तेसु चतुत्थभावतो ‘‘उपनन्दस्स चतुत्थसिक्खापद’’न्ति वुत्तं. यदि एकपरिच्छेदं, अथ कस्मा विसुं पञ्ञत्तन्ति आह ‘‘अट्ठुप्पत्तिवसेन पन विसुं पञ्ञत्त’’न्ति. तत्थ अट्ठुप्पत्तिवसेनाति अत्थस्स उप्पत्तिवसेन, भिक्खुनिया एव रहोनिसज्जाय उप्पत्तिवसेनाति अत्थो. अयं हेत्थाधिप्पायो – चतुत्थसिक्खापदवत्थुतो इमस्स सिक्खापदस्स वत्थुनो पठमं उप्पन्नत्ता एकपरिच्छेदेपि इदं पठमं विसुं पञ्ञत्तन्ति.

रहोनिसज्जसिक्खापदवण्णना निट्ठिता.

ओवादवग्गो ततियो.

४. भोजनवग्गो

१. आवसथसिक्खापदवण्णना

‘‘अगिलानो’’ति ¶ एत्थ अन्तमसो द्विगावुतं गन्तुं समत्थो अधिप्पेतोति आह ‘‘अद्धयोजनम्पि गन्तुं समत्थेना’’ति. आवसथपिण्डोति ¶ आवसथे पिण्डो, सालादीसु अनोदिस्स यावदत्थं पञ्ञत्तं पञ्चन्नं भोजनानं अञ्ञतरं भोजनन्ति अत्थो. तेनाह ‘‘इमेसं वा’’तिआदि. तत्थ इमेसं वाति इमेसं पासण्डानं वा. एत्तकानं वाति इमस्मिं पासण्डे एत्तकानं पासण्डानं वा. पासण्डन्ति छन्नवुतिविधं समणपरिब्बाजकादिं. ते हि तण्हापासञ्चेव दिट्ठिपासञ्च डेन्ति ओड्डेन्तीति पासण्डाति वुच्चन्ति. अनोदिस्साति अनुद्दिसित्वा, अपरिच्छिन्दित्वाति अत्थो. सालादीसु यत्थ कत्थचीति सालारुक्खमूलअब्भोकासादीसु यत्थ कत्थचि ठानेसु. एकदिवसमेव भुञ्जितब्बोति एकदिवसं सकिंयेव भुञ्जितब्बो, एकस्मिं दिवसे पुनप्पुनं भुञ्जितुं न वट्टति. दुतियदिवसतो पट्ठायाति भुत्तदिवसस्स दुतियदिवसतो पट्ठाय. अज्झोहारे अज्झोहारे पाचित्तियन्ति आलोपे आलोपे कबळे कबळे पाचित्तियं. नानाकुलेहि (पाचि. अट्ठ. २०६) पन नानाट्ठानेसु पञ्ञत्तं, एकस्मिं ठाने एकदिवसं भुञ्जित्वा दुतियदिवसे अञ्ञत्थ भुञ्जितुं वट्टति, पटिपाटिं पन खेपेत्वा पुन आदितो पट्ठाय भुञ्जितुं न वट्टति. एकपूगनानापूगएकगामनानागामेसुपि एसेव नयो. योपि एककुलस्स वा नानाकुलानं वा एकतो पञ्ञत्तो तण्डुलादीनं अभावेन अन्तरन्तरा छिज्जति, सोपि न भुञ्जितब्बो. सचे पन ‘‘न सक्कोम दातु’’न्ति उपच्छिन्दित्वा पुन कल्याणचित्ते उप्पन्ने दातुं आरभन्ति, एतं पुन एकदिवसं भुञ्जितुं वट्टति.

तिकपाचित्तियन्ति अगिलाने अगिलानसञ्ञिवेमतिकगिलानसञ्ञीनं वसेन तीणि पाचित्तियानि. गिलानस्स गिलानसञ्ञिनोति गिलानस्स पन ‘‘गिलानो अह’’न्ति सञ्ञिनो अनुवसित्वा भुञ्जन्तस्स अनापत्ति. सकिं भुञ्जतीति एकदिवसं भुञ्जति. ‘‘गच्छन्तो वा’’ति इदं अद्धयोजनवसेन गहेतब्बं, तथा ‘‘पच्चागच्छन्तो’’ति (सारत्थ. टी. पाचित्तिय ३.२०८) इदम्पीति वदन्ति. केनचि उपद्दवेनाति नदिपूरचोरभयादिना केनचि उपद्दवेन. अञ्ञन्ति यागुखज्जकफलाफलादिभेदं यं किञ्चि अञ्ञं. अनुवसित्वाति पुन वसित्वा.

आवसथसिक्खापदवण्णना निट्ठिता.

२. गणभोजनसिक्खापदवण्णना

गणभोजनेति ¶ ¶ गणेन लद्धत्ता गणस्स सन्तके भोजने. तेनाह ‘‘गणस्स भोजने’’ति. ननु चेत्थ ‘‘गणस्स भोजने’’ति वुच्चति, सो च खो गणो ‘‘कत्थचि द्वीहि, कत्थचि तीही’’तिआदिना अनेकधा अधिप्पेतो, इध कतिहीति आह ‘‘इध चा’’तिआदि. तं पनेतं गणभोजनं द्वीहि पकारेहि पसवति निमन्तनतो वा विञ्ञत्तितो वाति आह ‘‘तेसं निमन्तनतो वा’’तिआदि. तत्थ निमन्तनतो वाति अकप्पियनिमन्तनतो वा. ओदनादीनं पञ्चन्नन्ति ओदनसत्तुकुम्मासमच्छमंसानं पञ्चन्नं.

‘‘ओदनेन निमन्तेमि, ओदनं मे गण्हथा’’तिआदिना नयेन येन केनचि वेवचनेन वा भासन्तरेन वा पञ्चन्नं भोजनानं नामं गहेत्वा निमन्तेतीति सम्बन्धो. चत्तारोति एकट्ठाने वा नानाट्ठानेसु वा ठिते चत्तारो भिक्खू. लक्खणवचनञ्चेतं, तस्मा चत्तारो वा ततो वा अधिके भिक्खूति अत्थो. वेवचनेन वाति भत्तअन्नादिपरियायसद्देन वा. भासन्तरेन वाति अन्धदमिळादिभासन्तरेन वा. पञ्चन्नं भोजनानं नामं गहेत्वाति पञ्चन्नं भोजनानं अञ्ञतरस्स नामं गहेत्वा. ओदनेन निमन्तेमीति तुम्हे भन्ते ओदनेन निमन्तेमि. आदिसद्देन ‘‘आकङ्खथ ओलोकेथ अधिवासेथ पटिमानेथ, सत्तुना निमन्तेमि, सत्तुं मे गण्हथ आकङ्खथ ओलोकेथ अधिवासेथ पटिमानेथा’’तिआदीनं (पाचि. अट्ठ. २१७-२१८) गहणं. एकतो वाति एकत्थ ठिते वा निसिन्ने वा भिक्खू दिस्वा ‘‘तुम्हे, भन्ते, ओदनेन निमन्तेमी’’तिआदिना एवं एकतो निमन्तिता. नानातो वा निमन्तिताति चत्तारि परिवेणानि वा विहारे वा गन्त्वा नानातो वा निमन्तिता. एकट्ठाने ठितेसुयेव वा एको पुत्तेन, एको पितराति एवम्पि निमन्तिता नानातोयेव निमन्तिता नाम होन्ति. एकतो गण्हन्तिति अञ्ञमञ्ञस्स द्वादसहत्थूपचारे ठिता गण्हन्ति.

कस्मा पन नानातो भुत्तेपि गणभोजनं होतीति आह ‘‘पटिग्गहणमेव हेत्थ पमाण’’न्ति. यदि एवं अथ कस्मा पाळियं ‘‘गणभोजनं नाम यत्थ चत्तारो भिक्खू पञ्चन्नं भोजनानं अञ्ञतरेन भोजनेन निमन्तिता भुञ्जन्ति, एतं गणभोजनं नामा’’ति (पाचि. २१८) वुत्तं? तं पटिग्गहणनियमनत्थमेव ¶ . न हि अप्पटिग्गहितकं भिक्खू भुञ्जन्तीति ‘‘भुञ्जन्ती’’ति पदं पटिग्गहणनियमवचनं होति. एकतो वा नानातो वा विञ्ञापेत्वाति चत्तारो भिक्खू एकतो ठिता वा निसिन्ना वा उपासकं दिस्वा ‘‘अम्हाकं चतुन्नम्पि भत्तं देही’’ति वा पाटेक्कं पविसित्वा ‘‘मय्हं भत्तं देहि, मय्हं भत्तं देही’’ति वा एकतो वा नानातो ¶ वा विञ्ञापेत्वा. तस्स दुविधस्सापीति यञ्च निमन्तनतो लद्धं गणभोजनं, यञ्च विञ्ञत्तितो लद्धं, तस्स दुविधस्सापि गणभोजनस्स. एवं पटिग्गहणेति एकतो पटिग्गहणे.

पादानम्पि फलितत्ताति (पाचि. अट्ठ. २१७-२१८) अन्तमसो पादानम्पि यथा महाचम्मस्स परतो मंसं दिस्सति, एवं फलितत्ता. न सक्का पिण्डाय चरितुन्ति वालिकाय वा सक्खराय वा फुट्ठमत्ते दुक्खुप्पत्तितो अन्तोगामे पिण्डाय चरितुं न सक्कोति. चीवरे करियमानेति साटकञ्च सुत्तञ्च लभित्वा चीवरे करियमाने. यं किञ्चि चीवरे कत्तब्बकम्मन्ति चीवरविचारणछिन्दनमोघसुत्तारोपनादि यं किञ्चि चीवरे कत्तब्बं कम्मं, अन्तमसो सूचिवेधनम्पीति अधिप्पायो. ‘‘अद्धयोजनम्पी’’तिआदि अवकंसतो वुत्तं. यो पन दूरं गन्तुकामो, तत्थ वत्तब्बमेव नत्थि, गच्छन्तो अद्धयोजनब्भन्तरे गावुतेपि भुञ्जितुं लभति, गतो पन एकदिवसं. यदा नावं अभिरुहितुकामो वा होति आरुळ्हो वा ओरुळ्हो वा, अयं नावाभिरुहनसमयो नामाति आह ‘‘नावाभिरुहनसमयेपि एसेव नयो’’ति. अयं पन विसेसो – अभिरुळ्हेन इच्छितट्ठानं गन्त्वापि याव न ओरोहति, ताव भुञ्जितब्बं. चत्तारो भिक्खूति अन्तिमपरिच्छेदो. यत्थ पन सतं वा सहस्सं वा सन्निपतितं, तत्थ वत्तब्बमेव नत्थि. तस्मा तादिसे काले ‘‘महासमयो’’ति अधिट्ठहित्वा भुञ्जितब्बं. यो कोचि पब्बजितोति सहधम्मिकेसु वा तित्थियेसु वा अञ्ञतरो.

ये च द्वे तयो एकतो गण्हन्तीति येपि अकप्पियनिमन्तनं सादियित्वा द्वे वा तयो वा एकतो गण्हन्ति, तेसम्पि अनापत्ति. पणीतभोजनसूपोदनविञ्ञत्तीहि पन आपत्तियेवाति वदन्ति, उपपरिक्खितब्बं. निच्चभत्तादीसूति निच्चभत्ते सलाकभत्ते पक्खिके उपोसथिके पाटिपदिके. तत्थ निच्चभत्तन्ति धुवभत्तं वुच्चति. ‘‘निच्चभत्तं गण्हथा’’ति वदन्ति ¶ , बहूनम्पि एकतो गण्हितुं वट्टति. सलाकभत्तादीसुपि एसेव नयो.

गणभोजनसिक्खापदवण्णना निट्ठिता.

३. परम्परभोजनसिक्खापदवण्णना

गणभोजने वुत्तनयेनेवाति भिक्खुं उपसङ्कमित्वा ‘‘तुम्हे, भन्ते, ओदनेन निमन्तेमि, ओदनं मे गण्हथा’’तिआदिना (पाचि. अट्ठ. २१७-२१८) नयेन येन केनचि वेवचनेन वा भासन्तरेन वा पञ्चन्नं भोजनानं अञ्ञतरस्स नामं गहेत्वा निमन्तेतीति वुत्तेनेव नयेन ¶ . निमन्तितस्साति अकप्पियनिमन्तनेन निमन्तितस्स. अविकप्पेत्वाति सम्मुखासम्मुखवसेन अविकप्पेत्वा, अपरिच्चजित्वाति अत्थो. अयञ्हि भत्तविकप्पना नाम सम्मुखापरम्मुखापि वट्टति. तेनाह ‘‘यो भिक्खु पञ्चसु सहधम्मिकेसू’’तिआदि.

अञ्ञत्र निमन्तनभोजनवत्थुस्मिन्ति अञ्ञत्र पठमं निमन्तिता हुत्वा अञ्ञस्मिं निमन्तने भुञ्जनवत्थुस्मिं. यदि तिविधा अनुपञ्ञत्ति, अथ कस्मा परिवारे ‘‘चतस्सो अनुपञ्ञत्तियो’’ति वुत्तन्ति आह ‘‘परिवारे पना’’तिआदि. विकप्पनम्पि गहेत्वाति विकप्पनानुजाननम्पि अनुपञ्ञत्तिसमानन्ति अनुपञ्ञत्तिभावेन गहेत्वा. एकसंसट्ठानीति एकस्मिं मिस्सितानि. इदं वुत्तं होति (पाचि. अट्ठ. २२९) – द्वे तीणि कुलानि निमन्तेत्वा एकस्मिं ठाने निसीदापेत्वा इतो चितो च आहरित्वा भत्तं आकिरन्ति, सूपब्यञ्जनं आकिरन्ति, एकमिस्सकं होति, एत्थ अनापत्तीति. सचे पन मूलनिमन्तनं हेट्ठा होति, पच्छिमं पच्छिमं उपरि, तं उपरितो पट्ठाय भुञ्जन्तस्स आपत्ति. हत्थं पन अन्तो पवेसेत्वा पठमनिमन्तनतो एकम्पि कबळं उद्धरित्वा भुत्तकालतो पट्ठाय यथा तथा वा भुञ्जन्तस्स अनापत्ति. द्वे तीणि निमन्तनानि एकतो वा कत्वा भुञ्जतीति द्वे तीणि निमन्तनानि एकतो पक्खिपित्वा मिस्सेत्वा एकं कत्वा भुञ्जतीति अत्थो. ‘‘सकलेन गामेन वा’’तिआदीसु सकलेन गामेन एकतो हुत्वा निमन्तितस्सेव यत्थ कत्थचि भुञ्जतो अनापत्ति. पूगेपि एसेव नयो. निमन्तियमानो वा ‘‘भिक्खं गहेस्सामी’’ति वदतीति ‘‘भत्तं गण्हा’’ति निमन्तियमानो ¶ ‘‘न मय्हं तव भत्तेन अत्थो, भिक्खं गहेस्सामी’’ति भणति. किरियाकिरियन्ति एत्थ भोजनं किरियं, अविकप्पनं अकिरियं.

परम्परभोजनसिक्खापदवण्णना निट्ठिता.

४. काणमातासिक्खापदवण्णना

पहेणकत्थायाति पण्णाकारत्थाय. पाथेय्यत्थायाति मग्गं गच्छन्तानं अन्तरामग्गत्थाय. सत्तूति बद्धसत्तु, अबद्धसत्तु च. द्वत्तिपत्तपूरे पटिग्गहेत्वाति मुखवट्टिया हेट्ठिमलेखाय समं पूरे द्वत्तिपत्तपूरे गहेत्वाति अत्थो. इमस्स चत्थस्स हेट्ठा वुत्तनयेनेव पाकटत्ता तत्थ कत्तब्बप्पकारमेव दस्सेतुं ‘‘एत्था’’तिआदिमाह. सेसन्ति ततो एकपत्ततो अञ्ञं पत्तं. सचे तयो पत्तपूरा गहिता द्वे, सचे द्वे गहिता, एकन्ति वुत्तं होति.

गमने ¶ वा पटिप्पस्सद्धेति अन्तरामग्गे उपद्दवं दिस्वा, अनत्थिकताय वा ‘‘मयं इदानि न पेसिस्साम न गमिस्सामा’’ति एवं गमने उपच्छिन्ने देन्तानन्ति अत्थो.

काणमातासिक्खापदवण्णना निट्ठिता.

५. पठमपवारणासिक्खापदवण्णना

भुत्तवाति कतभत्तकिच्चो. सासपमत्तम्पि अज्झोहरितन्ति एवं परित्तम्पि भोजनं सङ्खादित्वा वा असङ्खादित्वा वा गिलितं. पवारितोति पटिक्खेपितो. यो हि भुञ्जन्तो परिवेसकेन उपनीतं भोजनं अनिच्छन्तो पटिक्खिपति, सो तेन पवारितो पटिक्खिपितो नाम होति. ब्यञ्जनं पन अनादियित्वा अत्थमत्तमेव दस्सेतुं ‘‘कतप्पवारणो कतप्पटिक्खेपोति अत्थो’’ति वुत्तं. सोपि च पटिक्खेपो यस्मा न पटिक्खेपमत्तेन, अथ खो पञ्चङ्गवसेन. तेनस्स पदभाजने ‘‘असनं पञ्ञायती’’तिआदि (पाचि. २३९) वुत्तं.

भोजनं ¶ पञ्ञायतीति पञ्चन्नं भोजनानं अञ्ञतरं पत्तादीसु दिस्सति. तेनाह ‘‘पवारणप्पहोनकं चे भोजन’’न्तिआदि. सालीति (पाचि. अट्ठ. २३८-२३९) अन्तमसो नीवारं उपादाय सब्बापि सालिजाति. वीहीति सब्बापि वीहिजाति. यवगोधुमेसु भेदो नत्थि. कङ्गूति सेतरत्तकाळभेदा सब्बापि कङ्गुजाति. वरकोति अन्तमसो वरकचोरकं उपादाय सब्बापि सेतवण्णा वरकजाति. कुद्रूसकोति काळकोद्रवो चेव सामाकादिभेदा च सब्बापि तिणधञ्ञजाति.

नीवारवरकचोरका चेत्थ ‘‘धञ्ञानुलोमा’’ति वदन्ति. यागुन्ति अम्बिलयागुखीरयागुआदिभेदं यं किञ्चि यागुं. इमिनाव पायासस्सापि गहितत्ता ‘‘अम्बिलपायासादीसु अञ्ञतरं पचामाति वा’’ति न वुत्तं. पवारणं जनेतीति अनतिरित्तभोजनापत्तिनिबन्धनं पटिक्खेपं साधेति. सचे पन ओधि न पञ्ञायति, यागुसङ्गहं गच्छति, पवारणं न जनेति. पुन पवारणं जनेति घनभावगमनतो पट्ठाय भोजनसङ्गहितत्ताति अधिप्पायो.

उदककञ्जिकखीरादीनि आकिरित्वाति उदकञ्चेव कञ्जिकञ्च खीरादीनि च आकिरित्वा तेहि सद्धिं अमद्दित्वा भत्तमिस्सके कत्वा. तेनाह ‘‘यागुं गण्हथा’’तिआदि. सचे पन भत्ते उदककञ्जिकखीरादीनि आकिरित्वा मद्दित्वा ‘‘यागुं गण्हथा’’ति देन्ति, पवारणा ¶ न होति. यागुयापीति एवं यागुसङ्गहं गताय वा अञ्ञाय वा यागुयापि. सुद्धरसको, पन रसकयागु वा न जनेति.

पञ्चन्नं भोजनानं अञ्ञतरवसेन विप्पकतभोजनभावस्स उपच्छिन्नत्ता ‘‘द्वेपि खादितानि होन्ति…पे… न पवारेती’’ति वुत्तं. अकप्पियमंसं (पाचि. अट्ठ. २३८-२३९), अकप्पियभोजनञ्च बुद्धपटिकुट्ठं पटिक्खिपतो पवारणाय अवत्थुताय न पवारणा होतीति आह ‘‘यो पना’’तिआदि. यञ्हि भिक्खुनो खादितुं वट्टति, तं एव पटिक्खिपतो पवारणा होति. इदं पन जानन्तो अकप्पियत्ता पटिक्खिपति. अजानन्तोपि पटिक्खिपितब्बट्ठाने ठितमेव पटिक्खिपति नाम, तस्मा न पवारेति. सचे पन अकप्पियमंसं खादन्तो कप्पियमंसं वा भोजनं वा पटिक्खिपति, पवारेति. कस्मा? वत्थुताय. यञ्हि तेन पटिक्खित्तं, तं पवारणाय वत्थु. यं पन खादति, तं ¶ किञ्चापि पटिक्खिपितब्बट्ठाने ठितं, खादियमानं पन मंसभावं न जहति, तस्मा पवारेति. को पन वादो कप्पियमंसं खादतो कप्पियमंसभोजनप्पटिक्खेपे. एस नयो अकप्पियभोजनं खादतो कप्पियभोजनप्पटिक्खेपे.

भोजने सतीति पञ्चसु भोजनेसु एकस्मिम्पि भोजने सति. अञ्ञं वुत्तलक्खणं भोजनन्ति पत्तादिगततो अञ्ञं वुत्तलक्खणं पञ्चसु भोजनेसु एकम्पि भोजनं. ‘‘निरपेक्खो होती’’ति एतस्सेव विवरणं ‘‘यं पत्तादीसू’’तिआदि. न केवलं निरपेक्खो वाति आह ‘‘अञ्ञत्र वा’’तिआदि. सो पटिक्खिपन्तोपि न पवारेतीति तस्मिं चे अन्तरे अञ्ञं भोजनं अभिहटं, तं सो पटिक्खिपन्तोपि न पवारेति. कस्मा? विप्पकतभोजनभावस्स उपच्छिन्नत्ता.

‘‘उपनामेती’’ति (पाचि. अट्ठ. २३८-२३९) इमिना कायाभिहारं दस्सेति. हत्थे वा आधारके वाति एत्थ वा-सद्दो अवुत्तविकप्पत्थो, तेन ‘‘ऊरूसु वा’’ति विकप्पेति. दूरे निसिन्नस्स दहरभिक्खुस्स पत्तं पेसेत्वा ‘‘इतो ओदनं गण्हाही’’ति वदति, गण्हित्वा पन गतो तुण्ही तिट्ठति, तम्पि पटिक्खिपतो एसेव नयो. कस्मा? भिक्खुस्स दूरभावतो, दूतस्स च अनभिहरणतो. सचे पन गहेत्वा आगतो भिक्खु ‘‘इमं भत्तं गण्हा’’ति वदति, तं पटिक्खिपतो पवारणा होति. एवं वुत्तेपीति ‘‘भत्तं गण्हा’’ति वुत्तेपि.

भत्तपच्छिं गहेत्वा परिविसन्तस्साति एकेन हत्थेन भत्तपच्छिं गहेत्वा एकेन हत्थेन कटच्छुं ¶ गहेत्वा परिविसन्तस्स. अञ्ञो ‘‘अहं धारेस्सामी’’ति गहितमत्तकमेव करोतीति अञ्ञो आगन्त्वा ‘‘अहं पच्छिं धारेस्सामि, त्वं ओदनं देही’’ति वत्वा गहितमत्तकमेव करोति. अभिहटाव होतीति परिवेसकेनेव अभिहटाव होति. इदानि असति तस्स दातुकामाभिहारे गहणसमयेपि पटिक्खिपतो न होतीति दस्सेतुं ‘‘सचे पना’’तिआदि वुत्तं. उद्धटेति उद्धटे भत्ते. कटच्छुअभिहारोयेव हि तस्स अभिहारोति अधिप्पायो. अनन्तरस्स दिय्यमानेति अनन्तरस्स भिक्खुनो भत्ते दिय्यमाने. कायविकारेनाति ‘‘अङ्गुलिं वा हत्थं वा मच्छिकबीजनिं वा चीवरकण्णं वा ¶ चालेति, भमुकाय वा आकारं करोति, कुद्धो वा ओलोकेती’’ति (पाचि. अट्ठ. २३८-२३९) एवं वुत्तेन अङ्गुलिचलनादिना कायविकारेन. ‘‘अलं मा देही’’तिआदिना वचीविकारेनाति ‘‘अल’’न्ति वा ‘‘न गण्हामी’’ति वा ‘‘मा आकिरा’’ति वा ‘‘अपगच्छा’’ति वा एवं येन केनचि वचीविकारेन.

अभिहटे पन भत्ते पवारणाय भीतो हत्थे अपनेत्वा पुनप्पुनं पत्ते ओदनं आकिरन्तं ‘‘आकिर आकिर, कोट्टेत्वा पूरेही’’ति वदतो पवारणा न होति. एस नयो भत्तं अभिहरन्तं भिक्खुं सल्लक्खेत्वा ‘‘किं, आवुसो, इतोपि किञ्चि गण्हिस्ससि, दम्मि ते किञ्ची’’ति वदतोपि.

‘‘रसं पटिग्गण्हथा’’ति अप्पवारणाजनकस्स नामं गहेत्वा वुत्तत्ता ‘‘तं सुत्वा पटिक्खिपतो पवारणा नत्थी’’ति वुत्तं. मंसरसन्ति एत्थ पन न केवलं मंसस्स रसं ‘‘मंसरस’’मिच्चेव विञ्ञायति, अथ खो मंसञ्च रसञ्च मंसरसन्ति एवं पवारणाजनकनामवसेनापि. तस्मा तं पटिक्खिपतो पवारणाव होतीति आह ‘‘मंसरसन्ति वुत्ते पन पटिक्खिपतो पवारणा होती’’ति. परतो मच्छमंसं ब्यञ्जनन्ति एत्थापि एसेव नयो. यस्मिं इरियापथे पवारेति, तं अविकोपेन्तेनेव भुञ्जितब्बन्ति यो गच्छन्तो (पाचि. अट्ठ. २३८-२३९) पवारेति, तेन गच्छन्तेनेव भुञ्जितब्बं. कद्दमं वा उदकं वा पत्वा ठितेन अतिरित्तं कारेतब्बं. सचे अन्तरा नदी पूरा होति, नदितीरे गुम्बं अनुपरियायन्तेन भुञ्जितब्बं. अथ नावा वा सेतु वा अत्थि, तं अभिरुहित्वापि चङ्कमन्तेनेव भुञ्जितब्बं, गमनं न उपच्छिन्दितब्बं. एस नयो इतरइरियापथेसुपि. तं तं इरियापथं कोपेन्तेन अतिरित्तं कारेतब्बं. यो उक्कुटिकोव निसीदित्वा पवारेति, तेन उक्कुटिकेनेव भुञ्जितब्बं. तस्स पन हेट्ठा पलालपीठं वा किञ्चि वा निसीदनं दातब्बं. पीठके निसीदित्वा पवारितेन पन आसनं अचालेत्वाव चतस्सो दिसा परिवत्तन्तेन भुञ्जितुं लब्भति. मञ्चे निसीदित्वा पवारितेन इतो वा एत्तो वा संसरितुं न लब्भति. सचे पन सह ¶ मञ्चेन उक्खिपित्वा अञ्ञत्र नेन्ति, वट्टति. निपज्जित्वा पवारितेनापि निपन्नेनेव भुञ्जितब्बं. परिवत्तन्तेन येन पस्सेन निपन्नो, तस्स ठानं नातिक्कमेतब्बं.

अलमेतं सब्बन्ति एतं सब्बं अलं परियत्तं, इदम्पि ते अधिकं, इतो अञ्ञं न लच्छसीति अधिप्पायो. यो अतिरित्तं करोतीति यो ‘‘अलमेतं ¶ सब्ब’’न्ति अतिरित्तं करोति. पटिपक्खनयेनाति ‘‘कप्पियकतं, पटिग्गहितकतं, उच्चारितकतं, हत्थपासे कतं, भुत्ताविना कतं, भुत्ताविना पवारितेन आसना अवुट्ठितेन कतं ‘अलमेतं सब्ब’न्ति वुत्त’’न्ति (पाचि. २३९) इमेहि सत्तहि विनयकम्माकारेहि यं अतिरित्तं कप्पियं कतं, यञ्च गिलानातिरित्तं, तदुभयम्पि अतिरित्तन्ति एवं तस्सेव पटिपक्खनयेन. एत्थ च ‘‘अलमेतं सब्ब’’न्ति तिक्खत्तुं वत्तब्बं, अयं किर आचिण्णो. विनयधरा पन ‘‘सकिं एव वत्तब्ब’’न्ति वदन्ति.

कस्मा तं सो पुन कातुं न लभतीति आह ‘‘यञ्ही’’तिआदि. तत्थ यञ्हि अकतन्ति येन पठमं कप्पियं कतं, तेन यं अकतं, तं कातब्बं. पठमभाजने पन कातुं न लब्भति. येन च अकतन्ति अञ्ञेन भिक्खुना येन पठमं न कतं, तेन च कातब्बन्ति अत्थो. वुत्तन्ति सीहळट्ठकथासु वुत्तं. अञ्ञस्मिं पन भाजनेति यस्मिं पन भाजने पठमं कतं, ततो अञ्ञस्मिं पत्ते वा कुण्डे वा पच्छियं वा यत्थ कत्थचि पुरतो ठपेत्वा ओनामितभाजने.

अञ्ञत्र भुञ्जनवत्थुस्मिन्ति भुत्ताविना पवारितेन हुत्वा अञ्ञत्र भुञ्जनवत्थुस्मिं. तिकपाचित्तियन्ति अनतिरित्ते अनतिरित्तसञ्ञिवेमतिकअतिरित्तसञ्ञीनं वसेन तीणि पाचित्तियानि. अज्झोहरतो च दुक्कटन्ति अज्झोहरतो अज्झोहारे अज्झोहारे दुक्कटं. सचे पन आमिससंसट्ठानि होन्ति, आहारत्थायपि अनाहारत्थायपि पटिग्गहेत्वा अज्झोहरन्तस्स पाचित्तियमेव. तेसं अनुञ्ञातपरिभोगवसेनाति यामकालिकादीनं अनुञ्ञातपरिभोगवसेन, यामकालिकं पिपासाय सति पिपासच्छेदनत्थं, सत्ताहकालिकं यावजीविकञ्च तेन तेन उपसमेतब्बके आबाधे सति तस्स उपसमनत्थन्ति वुत्तं होति. इदम्पि अज्झोहरणतो कायकम्मं, वाचाय ‘‘अतिरित्तं करोथ भन्ते’’ति अकारापनेन वचीकम्मन्ति आह ‘‘समुट्ठानादीनि पठमकथिनसदिसानेवा’’ति. किरियाकिरियन्ति एत्थ पटिक्खिपित्वा भुञ्जनं किरियं. अतिरित्तस्स अकरणं अकिरियन्ति वेदितब्बं.

पठमपवारणासिक्खापदवण्णना निट्ठिता.

६. दुतियपवारणासिक्खापदवण्णना

सुत्वा ¶ ¶ वाति अञ्ञेन वा तेनेव वा आरोचितं सुत्वा. ‘‘भुत्तस्मिं पाचित्तिय’’न्ति (पाचि. २४३) वुत्तत्ता भोजनपरियोसाने पाचित्तिय’’न्ति वुत्तं.

दुतियपवारणासिक्खापदवण्णना निट्ठिता.

७. विकालभोजनसिक्खापदवण्णना

विकालेति एत्थ अरुणुग्गमनतो पट्ठाय याव मज्झन्हिको, अयं बुद्धादीनं अरियानं आचिण्णसमाचिण्णो भोजनस्स कालो नाम. तदञ्ञो विकालो ‘‘विगतो कालो’’ति कत्वा. तेनाह ‘‘विगते काले’’तिआदि. ठितमज्झन्हिकोपि (पाचि. अट्ठ. २४८-२४९) कालसङ्गहं गच्छति. ततो पट्ठाय पन खादितुं वा भुञ्जितुं वा न सक्का. सहसा पिवितुं सक्का भवेय्य, कुक्कुच्चकेन पन न कातब्बं. कालपरिच्छेदजाननत्थञ्च कालत्थम्भो योजेतब्बो. कालब्भन्तरेव भत्तकिच्चं कातब्बं. ‘‘यं किञ्चि…पे… खादनीयं वा’’ति इमिना यं ताव सक्खलिमोदकादि पुब्बण्णापरण्णमयं, तत्थ वत्तब्बमेव नत्थीति दस्सेति. भोजनीयं नाम पञ्च भोजनानि.

सति पच्चयेति पिपासादिकारणे विज्जमाने. रोमट्ठकस्साति रोमट्ठकस्स भिक्खुनो अज्झोहरित्वा उग्गिरित्वा मुखेव ठपितो बहि मुखद्वारा विनिग्गतो भोजनस्स मग्गा बहि निग्गतो ‘‘रोमट्ठो’’ति पवुच्चति. इध पन अज्झोहरित्वा उग्गिरित्वा मुखेव ठपितोति अधिप्पेतो. तेनाह ‘‘न च, भिक्खवे’’तिआदि. ठपेत्वा रोमट्ठकं सेसानं आगतं उग्गारं मुखे सन्धारेत्वा गिलन्तानं आपत्ति. सचे पन असन्धारेन्तमेव परगलं गच्छति, वट्टति.

विकालभोजनसिक्खापदवण्णना निट्ठिता.

८. सन्निधिकारकसिक्खापदवण्णना

‘‘कारो करणं किरियाति अत्थतो एक’’न्ति एतेन कारसद्दस्स भावत्थतं दस्सेति. सम्मा निधानं ठपनं सन्निधि. ‘‘पटिग्गहेत्वा एकरत्तं वीतिनामितस्सेतं ¶ नाम’’न्ति इमिना पटिग्गहेत्वा ¶ एकरत्तं वीतिनामिते इमस्स दुद्धोतभावं दस्सेति. किञ्चापि यामकालिकं खादनीयं, भोजनीयं वा न होति, ‘‘अनापत्ति यामकालिकं यामे निदहित्वा भुञ्जती’’तिआदि वचनतो पन तत्थापि यामातिक्कमे सन्निधिपच्चया पाचित्तियेन भवितब्बन्ति ‘‘यं किञ्चि यावकालिकं वा यामकालिकं वा’’ति वुत्तं. इदानि दुद्धोतभावमेव विभावेतुं ‘‘यं अङ्गुलिया’’तिआदि वुत्तं. तत्थ यं अङ्गुलिया घंसन्तस्स लेखा पञ्ञायतीति यं पत्तं धोतं अङ्गुलिया घंसन्तस्स पत्ते अङ्गुलिलेखा पञ्ञायति, सो पत्तो दुद्धोतो होतीति अत्थो. तेलवण्णपत्ते पन अङ्गुलिलेखा पञ्ञायति, सा अब्बोहारिका. स्नेहोति तेलं. सन्दिस्सतीति यागुया उपरि सन्दिस्सति. तादिसे पत्तेपीति पटिग्गहणं अविस्सज्जित्वा सयं वा अञ्ञेन वा भोजनं नीहरित्वा न सम्मा धोते पत्तेपि. पुनदिवसे भुञ्जन्तस्स पाचित्तियन्ति पत्ते लग्गं अविजहितप्पटिग्गहणं होतीति दुतियदिवसे भुञ्जन्तस्स पाचित्तियं. परिच्चत्ते पन पत्ते पुनदिवसे भुञ्जन्तस्स अनापत्ति.

यं पनाति यं भोजनं पन. अपरिच्चत्तमेव हीति अनपेक्खविस्सज्जनेन वा अनुपसम्पन्नस्स निरपेक्खदानेन वा अपरिच्चत्तमेव. कप्पिय भोजनन्ति अन्तमसो एकसित्थमत्तम्पि कप्पियभोजनं. अकप्पियेसूति अकप्पियमंसेसु. सेसेसूति मनुस्समंसतो अवसेसेसु हत्थिअस्ससुनखअहिसीहब्यग्घदीपिअच्छतरच्छमंसेसु चेव अप्पटिवेक्खिते उद्दिस्सकतमंसे च. पाळियं ‘‘सत्ताहकालिकं यावजीविकं आहारत्थाय पटिग्गण्हाति, आपत्ति दुक्कटस्सा’’तिआदिना (पाचि. २५५) सन्निहितेसु सत्ताहकालिकयावजीविकेसु पुरेभत्तम्पि आहारत्थाय अज्झोहरणेपि दुक्कटस्स वुत्तत्ता यामकालिकेपि आहारत्थाय अज्झोहरणेपि विसुं दुक्कटेनापि भवितब्बन्ति आह ‘‘आहारत्थाय अज्झोहरतो दुक्कटेन सद्धिं पाचित्तिय’’न्ति. सब्बविकप्पेसूति ‘‘कप्पियभोजनं भुञ्जन्तस्सा’’तिआदिना वुत्तेसु सब्बेसु विकप्पेसु अपरम्पि पाचित्तियं वड्ढति. इदं वुत्तं होति (पाचि. अट्ठ. २५३) – कप्पियभोजने द्वे पाचित्तियानि, मनुस्समंसे थुल्लच्चयेन सद्धिं द्वे पाचित्तियानि, अवसेसेसु पन अकप्पियमंसेसु दुक्कटेन सद्धिं द्वे पाचित्तियानि. यामकालिकं सति पच्चये सामिसेन मुखेन ¶ अज्झोहरतो द्वे पाचित्तियानि, निरामिसेन एकमेव. आहारत्थाय अज्झोहरतो विकप्पद्वयेपि दुक्कटेन सद्धिन्ति.

अवसेसेसूति यामकालिकादितो अवसेसेसु. पाचित्तियं वड्ढतियेवाति अपरम्पि पाचित्तियं वड्ढतियेव. इदं वुत्तं होति – सचे विकाले अज्झोहरति, पकतिभोजने सन्निधिपच्चया ¶ च विकालभोजनपच्चया च द्वे पाचित्तियानि, अकप्पियमंसेसु मनुस्समंसे थुल्लच्चयेन सद्धिं द्वे पाचित्तियानि, अवसेसेसु दुक्कटेन सद्धिं द्वेति.

बेलट्ठसीसो नाम जटिलसहस्सस्स अब्भन्तरे एको महाथेरो. तिकपाचित्तियन्ति सन्निधिकारके सन्निधिकारकसञ्ञिवेमतिकअसन्निधिकारकसञ्ञीनं वसेन तीणि पाचित्तियानि. संसट्ठानीति संसट्ठरसानि. सम्भिन्नरसं सन्धायेव हि ‘‘तदहुपटिग्गहितं काले कप्पती’’तिआदि वुत्तं. तेनाह ‘‘तस्मा’’तिआदि. एत्थ च असम्भिन्नरसन्ति अमिस्सितरसं. इदञ्च सीतलपायासादिना सह लद्धं सप्पिपिण्डादिकं सन्धाय वुत्तं. ‘‘सुधोतं वा’’ति इदं पन पिण्डपातेन सद्धिं लद्धं तक्कोलजातिफलादिं, यागुआदीसु पक्खिपित्वा दिन्नसिङ्गीवेरादिकञ्च सन्धाय वुत्तं.

तेनाति सत्ताहकालिकेन. तदहु पटिग्गहितं अस्साति तदहुपटिग्गहितं, तेन तदहुपटिग्गहितेन. एस नयो ‘‘द्वीहपटिग्गहितेना’’तिआदीसुपि. तस्माति यस्मा पुरेभत्तं पटिग्गहितम्पि वट्टति, तस्मा. पटिग्गहितं सत्ताहं कप्पतीति वुत्तन्ति ‘‘सत्ताहकालिकेन, भिक्खवे, यावजीविकं पटिग्गहितं सत्ताहं कप्पति, सत्ताहातिक्कन्ते न कप्पती’’ति (महाव. ३०५) भेसज्जक्खन्धके वुत्तं. किञ्चापि मुखे एकरत्तं न वुत्तं, तथापि मुखे पक्खित्तमेव यस्मा सन्निधि नाम होति, तस्मा ‘‘मुखसन्निधी’’ति वुत्तं.

चतस्सो कप्पियभूमियोति उस्सावनन्तिका, गोनिसादिका, गहपति, सम्मुतीति चतस्सो कप्पियकुटियो. तत्थ उस्सावनन्तिका (महाव. अट्ठ. २९५) नाम गेहे करियमाने सम्परिवारेत्वा ठितेहि ‘‘कप्पियकुटिं करोम, कप्पियकुटिं करोमा’’ति वा ‘‘कप्पियकुटि कप्पियकुटी’’ति वा वदन्तेहि ठपितपठमिट्ठकथम्भादिका सङ्घस्स वा एकस्स भिक्खुनो वा कुटि. यो पन आरामो येभुय्येन वा अपरिक्खित्तो होति, सकलोपि वा ¶ , सो ‘‘गोनिसादी’’ति वुच्चति. गहपतीति या ठपेत्वा भिक्खुं सेसेहि ‘‘कप्पियकुटिं देमा’’ति दिन्ना, तेसं वा सन्तका. सम्मुति नाम कम्मवाचाय सावेत्वा कता. कथं पनेतासं विनिच्छयो जानितब्बोति आह ‘‘तासं विनिच्छयो समन्तपासादिकायं वुत्तो’’ति.

सन्निधिकारकसिक्खापदवण्णना निट्ठिता.

९. पणीतभोजनसिक्खापदवण्णना

‘‘पणीतभोजनानी’’ति ¶ इदं मज्झे पदलोपं कत्वा निद्दिट्ठन्ति आह ‘‘पणीतसंसट्ठानी’’तिआदि. सब्बोपि ‘‘ओदको’’ति वुत्तलक्खणो मच्छोति ‘‘मच्छो नाम ओदको वुच्चती’’ति (पाचि. २६०) एवं विभङ्गे वुत्तलक्खणो, सब्बोपि मच्छो एव. यो कोचि उदके जातो मच्छो नामाति वुत्तं होति. महानामसिक्खापदेनाति –

‘‘अगिलानेन भिक्खुना चतुमासपच्चयपवारणा सादितब्बा अञ्ञत्र पुनपवारणाय अञ्ञत्र निच्चपवारणाय. ततो चे उत्तरि सादियेय्य, पाचित्तिय’’न्ति –

इमिना सिक्खापदेन (पाचि. ३०६). एत्थ हि सङ्घवसेन गिलानपच्चयपवारणाय पवारितट्ठाने सचे तत्थ रत्तीहि वा भेसज्जेहि वा परिच्छेदो कतो होति ‘‘एत्तिकायेव रत्तियो, एत्तकानि वा भेसज्जानि विञ्ञापेतब्बानी’’ति, ततो रत्तिपरियन्ततो वा भेसज्जपरियन्ततो वा उत्तरि नभेसज्जकरणीयेन वा भेसज्जं, अञ्ञभेसज्जकरणीयेन वा अञ्ञं भेसज्जं विञ्ञापेन्तस्स पाचित्तियं वुत्तं. तस्मा अगिलानो गिलानसञ्ञीपि हुत्वा पञ्च भेसज्जानि विञ्ञापेन्तो नभेसज्जकरणीयेन भेसज्जं विञ्ञापेन्तो नाम होतीति ‘‘महानामसिक्खापदेन कारेतब्बो’’ति वुत्तं.

यो पन नभेसज्जत्थाय विञ्ञापेति, अथ खो केवलं अत्तनो भुञ्जनत्थाय, सो सूपोदनविञ्ञत्तियायेव कारेतब्बो. वुत्तञ्हेतं समन्तपासादिकायं ‘‘सुद्धानि सप्पिआदीनि विञ्ञापेत्वा भुञ्जन्तो पाचित्तियं नापज्जति ¶ , सेखियेसु सूपोदनविञ्ञत्तिदुक्कटं आपज्जती’’ति (पाचि. अट्ठ. २५९). सूपोदनविञ्ञत्तिया कारेतब्बोति ‘‘न सूपं वा ओदनं वा अगिलानो’’तिआदिना (पाचि. ६१३) सिक्खापदेन कारेतब्बो, दुक्कटेन कारेतब्बोति वुत्तं होति. इमिनाति इमिना पणीतभोजनसिक्खापदेन.

‘‘सप्पिभत्तं देही’’ति वुत्ते किं होतीति आह ‘‘सप्पिभत्तं ‘देही’ति वुत्ते पना’’तिआदि. सूपोदनविञ्ञत्तिया दुक्कटमेव होतीति सम्बन्धो. कस्माति आह ‘‘यस्मा’’तिआदि. अथ यथा ‘‘पणीतभोजनानी’’ति, एवं ‘‘सप्पिभत्त’’न्ति इदम्पि कस्मा न विञ्ञायतीति चे? अनेकन्तिकत्ता. तथा हि ‘‘पणीतभोजनानी’’ति वुत्ते ‘‘पणीतसंसट्ठानि भोजनानि ¶ पणीतभोजनानी’’ति अयमत्थो एकन्ततो पञ्ञायति, ‘‘सप्पिभत्त’’न्ति वुत्ते पन ‘‘सप्पिमयं भत्तं सप्पिभत्त’’न्तिपि विञ्ञायमानत्ता ‘सप्पिसंसट्ठं भत्तं सप्पिभत्त’’न्ति अयमत्थो न एकन्ततो पञ्ञायति. एस नयो ‘‘नवनीतभत्तं देही’’तिआदीसुपि.

पुरिमनयेनेवाति ‘‘भत्तं दत्वा सप्पिं कत्वा भुञ्जा’’ति पुरिमेनेव नयेन. सचे पन ‘‘सप्पिना’’ति वुत्ते केवलं सेसेसु नवनीतादीसु अञ्ञतरेन देति, विसङ्केतमेव होति. अनापत्तीति विसङ्केतत्ता सब्बाहियेव आपत्तीहि अनापत्ति. ‘‘किञ्चापि अनापत्ति, अत्तनो पन पयोगेन निब्बत्तत्ता न भुञ्जितब्ब’’न्ति वदन्ति. कप्पियसप्पिनाति कप्पियमंससप्पिना. एस नयो अकप्पियसप्पिनाति एत्थापि. कप्पियाकप्पियता हि मंसानंयेव, न सप्पिआदीनं. ठपेत्वा एकं मनुस्सवसातेलं सब्बेसं खीरदधिसप्पिनवनीतवसातेलेसु अकप्पियं नाम नत्थि.

परिभोगेपि दुक्कटमेव इध अनधिप्पेतत्ताति अधिप्पायो. सचे असति अकप्पियसप्पिम्हि पुरिमनयेनेव अकप्पियनवनीतादीनि देति ‘‘सप्पिं कत्वा भुञ्जा’’ति, अकप्पियसप्पिनाव दिन्नं होति. यथा च ‘‘कप्पियसप्पिना देही’’ति वुत्ते अकप्पियसप्पिना देति, विसङ्केतं, एवं ‘‘‘अकप्पियसप्पिना’ति वुत्ते कप्पियसप्पिना देती’’ति एत्थापि पटिपाटिया एकमेकं वित्थारेत्वा वुच्चमानेपि अयमेवत्थो वत्तब्बो सिया, सो च सङ्खेपेनपि सक्का विञ्ञातुन्ति वित्थारनयं हित्वा इमिनाव ¶ नयेन सब्बपदेसु विनिच्छयो वेदितब्बोति वुत्तं. अयञ्हेत्थ सङ्खेपत्थो – येन येन विञ्ञत्ति होति, तस्मिं वा तस्स मूले वा लद्धे तं तं लद्धमेव होति. सचे पन अञ्ञं पाळिया आगतं वा अनागतं वा देति, विसङ्केतन्ति. नानाट्ठाने वाति तस्मिंयेव घरे सप्पिं, इतरस्मिं नवनीतन्तिआदिना नानाट्ठाने वा.

पणीतभोजनसिक्खापदवण्णना निट्ठिता.

१०. दन्तपोनसिक्खापदवण्णना

कायेनाति हत्थादीसु येन केनचि सरीरावयवेन, अन्तमसो पादङ्गुलियापि गण्हन्तो कायेन गण्हाति नामाति वेदितब्बो. दानेपि एसेव नयो. कायप्पटिबद्धेनाति पत्तादीसु येन केनचि सरीरसम्बद्धेन उपकरणेन. दानेपि एसेव नयो. कटच्छुआदीसु येन केनचि उपकरणेन दिन्नं कायप्पटिबद्धेन दिन्नंयेव होति. अञ्ञतरेनाति कायेन वा कायप्पटिबद्धेन वा निस्सग्गियेन वाति अत्थो. तत्थ निस्सग्गियेनाति (पाचि. अट्ठ. २६५) कायतो च कायप्पटिबद्धतो ¶ च मोचेत्वा हत्थपासे ठितस्स काये वा कायप्पटिबद्धे वा पातियमानञ्हि निस्सग्गियेन पयोगेन दिन्नं नाम होति. तस्साति पटिग्गहितकस्स. वुत्तविपल्लासवसेनाति वुत्तस्स पटिपक्खवसेन. इदं वुत्तं होति – यं कायकायप्पटिबद्धनिस्सग्गियानं अञ्ञतरेन दिय्यमाने कायेन वा कायप्पटिबद्धेन वा गण्हाति, एतं पटिग्गहितं नामाति.

संहारिमेनाति थाममज्झिमेन पुरिसेन संहारिमेन, इमिना असंहारिमे फलके वा पासाणे वा पटिग्गहणं न रुहतीति दस्सेति. धारेतुं समत्थेनाति सन्धारेतुं योग्गेन, इमिना सुखुमेसु तिन्तिणिकादिपण्णेसु पटिग्गहणं न रुहतीति दस्सेति. अतत्थजातकरुक्खपण्णेनाति जातट्ठानतो चुतेन पदुमिनिपण्णादिना, इमिना पन महन्तेपि तत्थजातके पदुमिनिपण्णे वा किंसुकपण्णादिम्हि वा पटिग्गहेतुं न वट्टति. न हि तं कायप्पटिबद्धसङ्खं गच्छतीति दस्सेति. यथा च ¶ तत्थजातके, एवं खाणुके बन्धित्वा ठपितमञ्चादिम्हिपि. ननु पटिबद्धप्पटिबद्धेनापि पत्ताधारादिना पटिग्गण्हन्तस्स पटिग्गहणं रुहति, अथ कस्मा कायकायप्पटिबद्धेहियेव पटिग्गहणं इध वुत्तं, न पटिबद्धप्पटिबद्धेनापीति आह ‘‘पटिबद्धप्पटिबद्धं नाम इध नत्थी’’ति. केचि पन ‘‘आधारकेन पटिग्गहणं कायप्पटिबद्धप्पटिबद्धेन पटिग्गहणं नाम होति, तस्मा न वट्टती’’ति वदन्ति, तं वचनमत्तमेव. अत्थतो पन सब्बम्पि तं कायप्पटिबद्धमेव होतीति दस्सेति.

अकल्लकोति गिलानो. मुखेन पटिग्गण्हातीति सहत्थेन गहेत्वा परिभुञ्जितुं असक्कोन्तो मुखेन पटिग्गण्हाति. अभिहटभाजनतो पतितरजम्पि वट्टति अभिहटत्ताति अधिप्पाहो.

तस्मिं ठत्वाति तादिसे हत्थपासे ठत्वा. यन्ति यं भारं. मज्झिमो पुरिसोति थाममज्झिमपुरिसो. विनये पञ्ञत्तं दुक्कटं विनयदुक्कटं. तं अनुपसम्पन्नस्स दत्वाति पिण्डाय चरित्वा विहारं वा आसनसालं वा गन्त्वा तं भिक्खं अनुपसम्पन्नस्स दत्वा, इदञ्च पुब्बाभोगस्स अनुरूपवसेन वुत्तं. यस्मा पन तं ‘‘अनुपसम्पन्नस्स दस्सामी’’ति चित्तुप्पादमत्तेन तंसन्तकं नाम न होति, तस्मा विनापि तस्स दानादिं पटिग्गहेत्वा परिभुञ्जितुं वट्टति.

अस्सुखेळसिङ्घाणिकादीसूति एत्थ अस्सु नाम अक्खिजलं. खेळो नाम लाला. सिङ्घाणिकाति अन्तोसीसतो पूतिसेम्हभावं आपन्नं मत्थलुङ्गं गलित्वा तालुमत्थकविवरेन ओतरित्वा ¶ नासापुटे पूरेत्वा ठितं वुच्चति, आदिसद्देन मुत्तकरीससेम्हदन्तमलअक्खिगूथकण्णगूथकानं, सरीरे उट्ठितलोणस्स च गहणं. ठानतोति अक्खिकूपादितो. अन्तरा चे गण्हाति, किं होतीति आह ‘‘उग्गहितकं नाम होती’’ति, दुट्ठु गहितकं नाम होतीति अत्थो. फलिनिन्ति फलवन्तं. तत्थजातकफलिनिसाखाय वाति तस्मिं रुक्खे जाताय फलिनिसाखाय वा. दुरुपचिण्णदुक्कटन्ति ‘‘न कत्तब्ब’’न्ति वारितस्स कतत्ता दुट्ठु आचिण्णं चरितन्ति दुरुपचिण्णं, तस्मिं दुक्कटं दुरुपचिण्णदुक्कटञ्च आपज्जतीति अत्थो.

आहरीयतीति आहारो, अज्झोहरितब्बं यं किञ्चि, इध पन चत्तारि कालिकानि अधिप्पेतानीति आह ‘‘यं किञ्ची’’तिआदि. तत्थ अरुणुग्गमनतो ¶ याव ठितमज्झन्हिका भुञ्जितब्बतो याव कालो अस्साति यावकालिकं. अरुणुग्गमनतो याव यामावसाना पिपासाय सति पिपासच्छेदनत्थं पातब्बतो यामो कालो अस्साति यामकालिकं. याव सत्ताहं निदहित्वा परिभुञ्जितब्बतो सत्ताहं कालो अस्साति सत्ताहकालिकं. यावजीवम्पि परिहरित्वा परिभुञ्जितब्बतो याव जीवं एतस्साति यावजीविकं. तेनाह ‘‘तत्था’’तिआदि.

वनमूलपत्तपुप्फफलादीति एत्थ ताव मूलं नाम मूलकखारकचच्चुतम्बकादीनं तेसु तेसु जनपदेसु पकतिआहारवसेन मनुस्सानं खादनीयत्थञ्चेव भोजनीयत्थञ्च फरणकं सूपेय्यपण्णमूलं. पत्तं नाम मूलकखारकचच्चुतम्बकादीनं तादिसंयेव पत्तं. पुप्फं नाम मूलकखारकादीनं तादिसंयेव पुप्फं. फलं नाम पनसलबुजादीनं तेसु तेसु जनपदेसु पकतिआहारवसेन मनुस्सानं खादनीयत्थञ्चेव भोजनीयत्थञ्च फरणकं फलं. आदिसद्देन कन्दमूलादीनं गहणं.

अम्बपानन्ति (महाव. अट्ठ. ३००) आमेहि वा पक्केहि वा अम्बेहि कतपानं. तत्थ आमेहि करोन्तेन अम्बतरुणादीनि भिन्दित्वा उदके पक्खिपित्वा आतपे आदिच्चपाकेन पचित्वा परिस्सावेत्वा तदहुपटिग्गहितेहि मधुसक्करकप्पूरादीहि योजेत्वा कातब्बं. एवं कतं पुरेभत्तमेव कप्पति. अनुपसम्पन्नेन कतं लभित्वा पन पुरेभत्तं पटिग्गहितं पुरेभत्तं सामिसपरिभोगेनापि वट्टति, पच्छाभत्तं निरामिसपरिभोगेन याव अरुणुग्गमना वट्टति. एस नयो सब्बपानेसु.

तेसु पन जम्बुपानन्ति जम्बुफलेहि कतपानं. चोचपानन्ति अट्ठिकेहि कदलिफलेहि कतपानं. मोचपानन्ति अनट्ठिकेहि कदलिफलेहि कतपानं. मधुकपानन्ति मधुकानं जातिरसेन कतपानं. तं पन उदकसम्भिन्नं वट्टति, सुद्धं न वट्टति. मुद्दिकापानन्ति मुद्दिका उदके मद्दित्वा अम्बपानं विय कतपानं ¶ . सालूकपानन्ति रत्तुप्पलनीलुप्पलादीनं सालूके मद्दित्वा कतपानं. फारुसकपानन्ति फारुसकेहि अम्बपानं विय कतपानं. इमिनाव नयेन वेत्तपानादीनि वेदितब्बानि. एतानि च पन सब्बानि पानानि अग्गिपाकानि न वट्टन्ति. तेनाह ‘‘सीतोदकेना’’तिआदि. अवसेसेसुपि ¶ अनुञ्ञातफलपत्तपुप्फरसेसूति धञ्ञफलपक्कसाकमधुकपुप्फरसतो अवसेसेसु ‘‘अनुजानामि, भिक्खवे, सब्बं फलरसं ठपेत्वा धञ्ञफलरस’’न्तिआदिना (महाव. ३००) अनुञ्ञातकेसु फलपत्तपुप्फरसेसुपि.

खादनीयत्थन्ति खादनीयेन कत्तब्बकिच्चं. नेव फरतीति न निप्फादेति. अनाहारेपि उदके आहारसञ्ञायाति ‘‘आहारं आहरेय्या’’ति पदस्स पदभाजने (पाचि. २६५) वुत्तमत्थं सम्मा असल्लक्खेत्वा ‘‘आहरीयतीति आहारो’’ति अनाहारेपि उदके आहारसञ्ञाय कुक्कुच्चायन्तानं. दन्तपोने च ‘‘मुखद्वारं आहटं इद’’न्ति सञ्ञायाति मुखद्वारं अनाहटम्पि दन्तपोनं ‘‘मुखद्वारं आहटं इदं दन्तपोन’’न्ति विपल्लत्थसञ्ञाय कुक्कुच्चायन्तानं. यथासुखं पातुन्ति पटिग्गहेत्वा वा अप्पटिग्गहेत्वा वा यथाकामं पातुं. दन्तपोनपरिभोगेनाति दन्तकट्ठपरिभोगेन, दन्तधोवनादिनाति अत्थो, इमिना तस्स पन रसं गिलितुं न वट्टतीति दस्सेति.

चत्तारि महाविकटानीति गूथं, मुत्तं, छारिका, मत्तिका (महाव. २६८) च ‘‘आसयादिवसेन विरूपानि जातानी’’ति कत्वा विकटानीति वा अपकतिभोजनत्ता विकटानि ‘‘विरूपानि जातानी’’ति वा अत्थो. सति पच्चयेति कारणे सति, सप्पदट्ठेति अत्थो. धूमादिअब्बोहारिकाभावोति धूमपुप्फगन्धदन्तखयादिअब्बोहारिकाभावो.

दन्तपोनसिक्खापदवण्णना निट्ठिता.

भोजनवग्गो चतुत्थो.

५. अचेलकवग्गो