📜

नमो तस्स भगवतो अरहतो सम्मासम्बुद्धस्स

विनयविनिच्छयटीका

(पठमो भागो)

गन्थारम्भकथा

(क)

आदिच्चवंसम्बरपातुभूतं ¶ ¶ ;

ब्यामप्पभामण्डलदेवचापं;

धम्मम्बुनिज्झापितपापघम्मं;

वन्दामहं बुद्ध महम्बुवन्तं.

(ख)

पसन्नगम्भीरपदाळिसोतं;

नानानयानन्ततरङ्गमालं;

सीलादिखन्धामितमच्छगुम्बं ¶ ;

वन्दामहं धम्म महासवन्तिं.

(ग)

सीलोरुवेलं धुतसङ्खमालं;

सन्तोसतोयं समथूमिचित्तं;

पधानकिच्चं अधिचित्तसारं;

वन्दामहं सङ्घ महासमुद्दं.

(घ)

ये तन्तिधम्मं मुनिराजपुत्ता;

यावज्जकालं परिपालयन्ता;

संवण्णनं निम्मलमानयिंसु;

ते पुब्बके चाचरिये नमामि.

(ङ)

यो ¶ धम्मसेनापतितुल्यनामो;

तथूपमो सीहळदीपदीपो;

ममं महासामिमहायतिन्दो;

पापेसि वुड्ढिं जिनसासनम्हि.

(च)

टीका कता अट्ठकथाय येन;

समन्तपासादिकनामिकाय;

अङ्गुत्तरायट्ठकथाय चेव;

सत्थन्तरस्सापि च जोतिसत्थं.

(छ)

निकायसामग्गिविधायकेन;

रञ्ञा परक्कन्तिभुजेन सम्मा;

लङ्किस्सरेनापि कतोपहारं;

वन्दे गरुं गारवभाजनं तं.

(ज)

नमस्समानोहमलत्थमेवं ¶ ;

वत्थुत्तयं वन्दितवन्दनेय्यं;

यं पुञ्ञसन्दोहममन्दभूतं;

तस्सानुभावेन हतन्तरायो.

(झ)

यो बुद्धघोसाचरियासभेन;

विञ्ञुप्पसत्थेनपि सुप्पसत्थो;

सो बुद्धदत्ताचरियाभिधानो;

महाकवी थेरियवंसदीपो.

(ञ)

अकासि यं विनयविनिच्छयव्हयं;

सउत्तरं पकरणमुत्तमं हितं;

अपेक्खतं विनयनयेसु पाटवं;

पुरासि यं विवरणमस्स सीहळं.

(ट)

यस्मा ¶ न दीपन्तरिकानमत्थं;

साधेति भिक्खूनमसेसतो तं;

तस्मा हि सब्बत्थ यतीनमत्थं;

आसीसमानेन दयालयेन.

(ठ)

सुमङ्गलत्थेरवरेन यस्मा;

सक्कच्च कल्याणमनोरथेन;

नयञ्ञुनारञ्ञनिवासिकेन;

अज्झेसितो साधुगुणाकरेन.

(ड)

आकङ्खमानेन चिरप्पवत्तिं;

धम्मस्स धम्मिस्सरदेसितस्स;

चोळप्पदीपेन ¶ च बुद्धमित्त-

त्थेरेन सद्धादिगुणोदितेन.

(ढ)

तथा महाकस्सपअव्हयेन;

थेरेन सिक्खासु सगारवेन;

कुदिट्ठिमत्तेभविदारकेन;

सीहेन चोळावनिपूजितेन.

(ण)

यो धम्मकित्तीति पसत्थनामो;

तेनापि सद्धेन उपासकेन;

सीलादिनानागुणमण्डितेन;

सद्धम्मकामेनिध पण्डितेन.

(त)

सद्धेन पञ्ञाणवता वळत्ता-;

मङ्गल्यवंसेन महायसेन;

आयाचितो वाणिजभाणुनापि;

वरञ्ञुना साधुगुणोदयेन.

(थ)

तस्मा ¶ तमारोपिय पाळिभासं;

निस्साय पुब्बाचरियोपदेसं;

हित्वा निकायन्तरलद्धिदोसं;

कत्वातिवित्थारनयं समासं.

(द)

अवुत्तमत्थञ्च पकासयन्तो;

पाठक्कमञ्चापि अवोक्कमन्तो;

संवण्णयिस्सामि तदत्थसारं;

आदाय गन्थन्तरतोपि सारं.

(ध)

चिरट्ठितिं ¶ पत्थयता जनानं;

हितावहस्सामलसासनस्स;

मया समासेन विधीयमानं;

संवण्णनं साधु सुणन्तु सन्तोति.

गन्थारम्भकथावण्णना

१-५

. सुविपुलामलसद्धापञ्ञादिगुणसमुदयावहं सकलजनहितेकहेतुजिनसासनट्ठितिमूलभूतं विनयप्पकरणमिदमारभन्तोयमाचरियो पकरणारम्भे रतनत्तयप्पणामपकरणाभिधानाभिधेय्यकरणप्पकारपयोजननिमित्तकत्तुपरिमाणादीनि दस्सेतुमाह ‘‘वन्दित्वा’’तिआदि. तत्थ रतनत्तयं नाम.

‘‘चित्तीकतं महग्घञ्च, अतुलं दुल्लभदस्सनं;

अनोमसत्तपरिभोगं, रतनं तेन वुच्चती’’ति. (दी. नि. अट्ठ. २.३३; सं. नि. अट्ठ. ३.५.२२३; खु. पा. अट्ठ. ६.३; सु. नि. अट्ठ. १.२२६; महानि. अट्ठ. ५०) –

निद्दिट्ठसभावं

‘‘बुद्धो ¶ सब्बञ्ञुतञ्ञाणं, धम्मो लोकुत्तरो नव;

सङ्घो मग्गफलट्ठो च, इच्चेतं रतनत्तय’’न्ति. –

विभावितप्पभेदं सकलभवदुक्खविनिवारणं तिभवेनेकपटिसरणं वत्थुत्तयं.

तस्स पणामो नाम पणामकिरियानिप्फादिका चेतना. सा तिविधा कायपणामो वचीपणामो मनोपणामोति. तत्थ कायपणामो नाम रतनत्तयगुणानुस्सरणपुब्बिका अञ्जलिकम्मादिकायकिरियावसप्पवत्तिका कायविञ्ञत्तिसमुट्ठापिका चेतना. वचीपणामो नाम तथेव पवत्ता नानाविधगुणविसेसविभावनसभावथोमनाकिरियावसप्पवत्तिका वचीविञ्ञत्तिसमुट्ठापिका ¶ चेतना. मनोपणामो नाम उभयविञ्ञत्तियो असमुट्ठापेत्वा केवलं गुणानुस्सरणेन चित्तसन्तानस्स तन्निन्नतप्पोणतप्पब्भारताय गारवबहुमाननवसप्पवत्तिसाधिका चेतना.

इमस्स ताव रतनत्तयपणामस्स दस्सनं यथाधिप्पेतत्थसाधनत्थं. गुणातिसययोगेन हि पणामारहे रतनत्तये कतो पणामो पुञ्ञविसेसभावतो इच्छितत्थाभिनिप्फत्तिविबन्धकेन उपघातकेन, उपपीळकेन च अपुञ्ञकम्मेन उपनीयमानस्स उपद्दवजालस्स विनिवारणेन यथालद्धसम्पत्तिनिमित्तकस्स पुञ्ञकम्मस्स अनुबलप्पदानेन च तब्बिपाकसन्ततिया आयुसुखबलादिवड्ढनेन च चिरकालप्पवत्तिहेतुकोति यथाधिप्पेतपकरणनिप्फत्तिनिबन्धनको होति. अथापि सोतूनञ्च वन्दनीयवन्दनापुब्बकेनारम्भेन अनन्तरायेन उग्गहणधारणादिक्कमेन पकरणावबोधप्पयोजनसाधनत्थं. अपिच सोतूनमेव विञ्ञातसत्थुकानं भगवतो यथाभूतगुणविसेसानुस्सवनेन समुपजातप्पसादानं पकरणे गारवुप्पादनत्थं, अविञ्ञातसत्थुकानं ¶ पन पकरणस्स स्वाख्यातताय तप्पभवे सत्थरि गारवुप्पादनत्थञ्च सोतुजनानुग्गहमेव पधानं कत्वा आचरियेहि गन्थारम्भे थुतिप्पणामपरिदीपकानं गाथावाक्यानं निक्खेपो विधीयति. इतरथा विनापि तन्निक्खेपं कायमनोपणामेनापि यथाधिप्पेतप्पयोजनसिद्धितो किमेतेन गन्थगारवकरेनाति अयमेत्थ सङ्खेपो. वित्थारतो पन पणामप्पयोजनं सारत्थदीपनियादीसु (सारत्थ. टी. १.गन्थारम्भकथावण्णना; वि. वि. टी. २.गन्थारम्भकथावण्णना) दस्सितनयेनेव ञातब्बं.

अभिधानकथनं पन वोहारसुखत्थं. अभिधेय्यस्स समुदितेन पकरणेन पटिपादेतब्बस्स कथनं पकरणस्स आरभितब्बसभावदस्सनत्थं. विदितानिन्दितसात्थकसुकरानुट्ठानाभि धेय्यमेव हि पकरणं परिक्खकजना आरभितब्बं मञ्ञन्तीति. करणप्पकारसन्दस्सनं सोतुजनसमुस्साहनत्थं. अनाकुलमसंकिण्णतादिप्पकारेन हि विरचितं पकरणं सोतारो सोतुमुस्सहन्तीति. पयोजनकथनं पन पकरणज्झायने सोतुजनसमुत्तेजनत्थं. असति हि पयोजनकथने अविञ्ञातप्पयोजना अज्झायने ब्यावटा न होन्तीति. निमित्तकथनं सरिक्खकजनानं पकरणे गारवुप्पादनत्थं. पसत्थकारणुप्पन्नेयेव हि पकरणे सरिक्खका गारवं जनेन्तीति.

कत्तुकथनं पुग्गलगरुकस्स पकरणे गारवो पुग्गलगारवेनपि होतूति. परिमाणकथनं असज्झायनादिपसुतानं ¶ सम्पहंसनत्थं. पकरणपरिमाणस्सवनेन हि ते सम्पहट्ठा ‘‘कित्तकमिदमप्पकं न चिरेनेव परिसमापेस्सामा’’ति सज्झायनादीसु वत्तन्तीति. आदि-सद्देन सक्कच्चसवननियोजनं सङ्गहितं, तं सब्बसम्पत्तिनिदानसुतमयञाणनिप्फादनत्थं. असक्कच्चं सुणमानस्स च सवनाभावतो तंहेतुकस्स ¶ सुतमयञाणस्सापि अभावोति. तथा हि विक्खित्तचित्तो पुग्गलो सब्बसम्पत्तिया वुच्चमानोपि ‘‘न मया सुतं, पुन भणितब्ब’’न्ति भणति.

तत्थ पठमगाथायं ताव ‘‘वन्दित्वा’’ति इमिना तिविधोपि पणामो अविसेसतो दस्सितो. विसेसतो पन ‘‘सेट्ठं, अप्पटिपुग्गलं, भवाभावकरं, निरङ्गण’’न्ति इमेहि चतूहि पदेहि वचीपणामो, ‘‘सिरसा’’ति इमिना कायप्पणामो, ‘‘बुद्धं, धम्मं, गणञ्चा’’ति इमेहि पन तीहि पदेहि पणामकिरियाय कम्मभूतं रतनत्तयं दस्सितन्ति दट्ठब्बं.

‘‘विनयस्सविनिच्छय’’न्ति इमिना अभिधानं दस्सितं अलुत्तसमासेन विनयविनिच्छयनामस्स दस्सनतो. तस्स अन्वत्थभावेन सद्दप्पवत्तिनिमित्तभूतं सकलेनानेन पकरणेन पटिपादेतब्बमभिधेय्यम्पि तेनेव दस्सितं. ‘‘समासेना’’ति च ‘‘अनाकुलमसंकिण्णं, मधुरत्थपदक्कम’’न्ति च एतेहि करणप्पकारो दस्सितो. ‘‘हितत्थाया’’ति च ‘‘पटुभावकरं विनयक्कमे’’ति च ‘‘अपारं ओतरन्तान’’न्तिआदिना च पयोजनं. ‘‘भिक्खूनं भिक्खुनीन’’न्ति इमिना बाहिरनिमित्तं दस्सितं. अब्भन्तरनिमित्तं पन बाहिरनिमित्तभूतभिक्खुभिक्खुनिविसया करुणा, सा आचरियस्स पकरणारम्भेनेव विञ्ञायतीति विसुं न वुत्ता. ‘‘पवक्खामी’’ति इमिना समानाधिकरणभावेन लब्भमानो ‘‘अह’’न्ति सुद्धकत्ता सामञ्ञेन दस्सितो. विसेसतो पन पकरणावसाने –

‘‘रचितो बुद्धदत्तेन, सुद्धचित्तेन धीमता;

सुचिरट्ठितिकामेन, सासनस्स महेसिनो’’ति. (उ. वि. ९६१) –

इमाय ¶ गाथाय चेव ‘‘इति तम्बपण्णियेन परमवेय्याकरणेन तिपिटकनयविधिकुसलेन परमकविवरजन हदयपदुमवनविकसनकरेन कविवरासभेन परमरतिकरवरमधुरवचनुग्गारेन उरगपुरेन बुद्धदत्तेन रचितोयं विनयविनिच्छयो’’ति (वि. वि. ३१८३) इमिना वाक्येन च ¶ दस्सितो – ‘‘मादिसापि कवी होन्ति, बुद्धदत्ते दिवङ्गते’’तिआदिना पच्छिमकेहि च पसत्थतरेहि कविवरेहि अभित्थुतगुणो भदन्तबुद्धदत्ताचरियो वेदितब्बो. हेतुकत्ता च तत्थेव वक्खमानो पकरणज्झेसने कताधीनो बुद्धसीहमहाथेरो, सो –

‘‘वुत्तस्स बुद्धसीहेन;

विनयस्स विनिच्छयो;

बुद्धसीहं समुद्दिस्स;

मम सद्धिविहारिकं;

कतोयं पन भिक्खूनं;

हितत्थाय समासतो’’ति. (वि. वि. ३१७७-३१७८) –

एवं दस्सितो.

उत्तरप्पकरणस्स हेतुकत्ता पन सङ्घपालमहाथेरो, सोपि –

‘‘खन्तिसोरच्चसोसिल्य-बुद्धिसद्धादयादयो;

पतिट्ठिता गुणा यस्मिं, रतनानीव सागरे.

‘‘विनयाचारयुत्तेन, तेन सक्कच्च सादरं;

याचितो सङ्घपालेन, थेरेन थिरचेतसा.

‘‘सुचिरट्ठितिकामेन ¶ , विनयस्स महेसिनो;

भिक्खूनं पाटवत्थाय, विनयस्सविनिच्छये;

अकासिं परमं एतं, उत्तरं नाम नामतो’’ति. (उ. वि. ९६५-९६८) –

एवं दस्सितो. न केवलमेते द्वेयेव महाथेरा हेतुकत्तारो, अथ खो महावंसादीसु –

‘‘बुद्धस्स ¶ विय गम्भीर-

घोसत्ता तं वियाकरुं;

‘बुद्धघोसो’ति यो सो हि;

बुद्धो विय महीतले’’ति. –

आदिना नयेन अभित्थुतगुणो तिपिटकपरियत्तिया अट्ठकथाकारो भदन्तबुद्धघोसाचरियो च अनुस्सुतिवसेन ‘‘हेतुकत्ता’’ति वेदितब्बो.

कथं? अयं किर भदन्तबुद्धदत्ताचरियो लङ्कादीपतो सजातिभूमिं जम्बुदीपमागच्छन्तो भदन्तबुद्धघोसाचरियं जम्बुदीपवासिकेहि पटिपत्तिपरायनेहि युत्तब्यत्तगुणोपेतेहि महाथेरवरेहि कताराधनं सीहळट्ठकथं परिवत्तेत्वा सकलजनसाधारणाय मूलभासाय तिपिटकपरियत्तिया अट्ठकथं लिखितुं लङ्कादीपं गच्छन्तं अन्तरामग्गे दिस्वा साकच्छाय समुपपरिक्खित्वा सब्बलोकातीतेन असदिसेन पण्डिच्चगुणेन रतननिधिदस्सने परमदलिद्दो विय बलवपरितोसं पत्वा अट्ठकथमस्स कातुकामतं ञत्वा ‘‘तुम्हे यथाधिप्पेतपरियन्तलिखितमट्ठकथं अम्हाकं पेसेथ, मयमस्सा पकरणं लिखामा’’ति तस्स सम्मुखा पटिजानित्वा तेन च ‘‘साधु तथा कातब्ब’’न्ति अज्झेसितो अभिधम्मट्ठकथाय अभिधम्मावतारं, विनयट्ठकथाय सउत्तरं विनयविनिच्छयपकरणञ्च अकासीति अनुस्सुय्यतेति.

‘‘समासेना’’ति ¶ इमिना च परिमाणम्पि सामञ्ञेन दस्सितं वित्थारपरिमाणे तस्स परिमाणसामञ्ञस्स विञ्ञायमानत्ता. विसेसतो पन परिच्छेदपरिमाणं गन्थपरिमाणन्ति दुविधं. तत्थ परिच्छेदपरिमाणं इमस्मिं पकरणे कथावोहारेन वुच्चति.

सेय्यथिदं? – पाराजिककथा सङ्घादिसेसकथा अनियतकथा निस्सग्गियकथा पाचित्तियकथा पाटिदेसनीयकथा सेखियकथाति भिक्खुविभङ्गकथा सत्तविधा, ततो अनियतकथं वज्जेत्वा तथेव भिक्खुनिविभङ्गकथा छब्बिधा, महाखन्धककथादिका भिक्खुनिक्खन्धककथावसाना वीसतिविधा खन्धककथा, कम्मकथा, कम्मविपत्तिकथा, पकिण्णकविनिच्छयो, कम्मट्ठानभावनाविधानन्ति विनयविनिच्छये कथापरिच्छेदो सत्ततिंस.

उत्तरप्पकरणे ¶ च वुत्तनयेन भिक्खुविभङ्गे सत्तविधा कथा, भिक्खुनिविभङ्गे छब्बिधा, तदनन्तरा विपत्तिकथा, अधिकरणपच्चयकथा, खन्धकपञ्हाकथा, समुट्ठानसीसकथा, आपत्तिसमुट्ठानकथा, एकुत्तरनयकथा, सेदमोचनकथा, विभङ्गद्वयनिदानादिकथा, सब्बङ्गलक्खणकथा, परिवारसङ्कलनकथाति छत्तिंस कथापरिच्छेदा.

निस्सन्देहे पन ‘‘अट्ठतिंस कथापरिच्छेदा’’ति वुत्तं, तं एकुत्तरनये अदस्सितेहिपि द्वादसकपन्नरसकनयेहि सह सोळसपरिच्छेदे गहेत्वा अप्पकं ऊनमधिकं गणनूपगं न होतीति कत्वा वुत्तन्ति दट्ठब्बं. उभयत्थ कथापरिच्छेदपरिमाणं तेसत्ततिविधं होति. निस्सन्देहे ‘‘पञ्चसत्ततिविधा’’ति वचने परिहारो वुत्तनयोव. गन्थपरिमाणं पन विनयविनिच्छये असीतिगन्थाधिकानि चत्तारि गन्थसहस्सानि ¶ , उत्तरे पञ्ञासगन्थाधिकानि नव गन्थसतानि होन्ति. तेन वुत्तं उत्तरावसाने –

‘‘गाथा चतुसहस्सानि, सतञ्च ऊनवीसति;

परिमाणतोति विञ्ञेय्यो, विनयस्सविनिच्छयो.

पञ्ञासाधिकसङ्खानि, नव गाथासतानि हि;

गणना उत्तरस्सायं, छन्दसानुट्ठुभेन तू’’ति. (उ. वि. ९६९-९७०);

इच्चेवं विनयविनिच्छयो उत्तरो चाति द्वे पकरणानि तिंसाधिकानि पञ्चगाथासहस्सानि. एत्थ च विनयविनिच्छयो नाम उभतोविभङ्गखन्धकागतविनिच्छयसङ्गाहकपकरणं. ततो परं परिवारत्थसङ्गाहकपकरणं उत्तरो नाम. तेनेव वक्खति –

‘‘यो मया रचितो सारो, विनयस्सविनिच्छयो;

तस्स दानि करिस्सामि, सब्बानुत्तरमुत्तर’’न्ति. (उ. वि. २)

तं कस्मा उत्तरनामेन वोहरियतीति? पञ्हुत्तरवसेन ठिते परिवारे तथेव सङ्गहेतब्बेपि तेन पकारेन पाराजिककथामत्तं दस्सेत्वा –

‘‘इतो ¶ पट्ठाय मुञ्चित्वा, पञ्हापुच्छनमत्तकं;

विस्सज्जनवसेनेव, होति अत्थविनिच्छयो’’ति. (उ. वि. १४) –

वत्वा पञ्हं पहाय ततो पट्ठाय उत्तरमत्तस्सेव दस्सितत्ता तथा वोहरीयन्ति.

‘‘तस्मा विनयनूपाय’’न्तिआदिना पन सोतुजनं सक्कच्चसवने नियोजेति. सक्कच्चसवनपटिबद्धा हि सब्बापि लोकियलोकुत्तरसम्पत्तीति अयमेत्थ समुदायत्थो. अयं पन अवयवत्थो – सो यस्मा अत्थयोजनक्कमेन पदयोजनं ¶ कत्वा वण्णिते सुविञ्ञेय्यो होति, तस्मा तथा पदयोजनं कत्वा अत्थवण्णनं करिस्साम –

सेट्ठं अप्पटिपुग्गलं बुद्धञ्चेव भवाभावकरं धम्मञ्चेव निरङ्गणं गणञ्चेव सिरसा वन्दित्वा भिक्खूनं भिक्खुनीनञ्च हितत्थाय समासेन समाहितो विनयस्सविनिच्छयं वक्खामीति योजना.

तत्थ सेट्ठन्ति सब्बे इमे पसत्था अयमेतेसं अतिसयेन पसत्थोति सेट्ठो. तथा हि सो भगवा ‘‘अहञ्हि ब्राह्मण जेट्ठो सेट्ठो लोकस्सा’’ति (पारा. ११) वेरञ्जब्राह्मणस्स अत्तनो जेट्ठसेट्ठभावस्स परिजाननविनिच्छयहेतुभूताहि झानादीहि निरतिसयगुणसम्पत्तीहि समन्नागतत्ता –

‘‘त्वमेव असि सम्बुद्धो, तुवं सत्था अनुत्तरो;

सदेवकस्मिं लोकस्मिं, नत्थि ते पटिपुग्गलो. (दी. नि. २.३७०);

तुवं बुद्धो तुवं सत्था, तुवं माराभिभू मुनि;

तुवं अनुसये छेत्वा, तिण्णो तारेसिमं पजं.

उपधी ते समतिक्कन्ता, आसवा ते पदालिता;

सीहोसि अनुपादानो, पहीनभयभेरवो. (म. नि. २.४००; सु. नि. ५५०-५५१; थेरगा. ८३९-९४०);

महावीर ¶ महापञ्ञ, इद्धिया यससा जल;

सब्बवेरभयातीत, पादे वन्दामि चक्खुमा’’ति. (सं. नि. १.१५९; ध. प. अट्ठ. १.५६); –

आदीही नानानयेहि सदेवकेन लोकेन अभित्थवियताय पसत्थतमो, तमेव सेट्ठं पसत्थतमन्ति अत्थो.

अप्पटिपुग्गलन्ति ¶ नत्थि एतस्स पटिपुग्गलो अधिको, सदिसो वाति अप्पटिपुग्गलो. तथा हि गुणवसेन अनन्तापरिमाणासु लोकधातूसु अत्तना अधिकस्स, सदिसस्स वा पुग्गलस्स अभावतो –

‘‘न मे आचरियो अत्थि, सदिसो मे न विज्जति;

सदेवकस्मिं लोकस्मिं, नत्थि मे पटिपुग्गलो’’ति. (महाव. ११) –

अत्तनाव अत्तनो अविपरीतो अप्पटिपुग्गलभावो पटिञ्ञातो, तस्मा तं अप्पटिपुग्गलं सब्बलोकुत्तमन्ति अत्थो.

बुद्धन्ति अनन्तमपरिमेय्यं ञेय्यमण्डलमनवसेसं बुद्धवाति बुद्धो, एतेन अनेककप्पकोटिसतसहस्सं सम्भतपुञ्ञञाणसम्भारानुभावसिद्धिधम्मरूपकायसिरिविलासपटिमण्डितो सद्धम्मवरचक्कवत्ती सम्मासम्बुद्धो दस्सितो. अथ वा चत्तारि सच्चानि सयं विचितोपचितपारमितापरिपाचितेन सवासनानवसेसकिलेसप्पहायकेन सयम्भुञाणेन बुज्झीति बुद्धो. यथाह –

‘‘अभिञ्ञेय्यं अभिञ्ञातं, भावेतब्बञ्च भावितं;

पहातब्बं पहीनं मे, तस्मा बुद्धोस्मि ब्राह्मणा’’ति. (म. नि. २.३९२, ३९९; सु. नि. ५६३; थेरगा. ८२८);

वित्थारो पनस्स ‘‘बुज्झिता सच्चानीति बुद्धो, बोधेता पजायाति बुद्धो’’तिआदिना (महानि. १९२; चूळनि. पारायनत्थुतिगाथानिद्देस ९७; पटि. म. १.१६२) निद्देसादीसु ¶ वुत्तनयेन वेदितब्बो. सद्दसिद्धि सासनिकानं अवगमनत्थे वत्तमाना बुध-धातुतो ‘‘भावकम्मेसु त’’ इति इतो तातिवत्तमाने ‘‘बुधगमादित्थे कत्तरी’’ति इमिना कच्चायनसुत्तेन कत्तरि तप्पच्चयविधानतो वेदितब्बा. लोकियानं पन बोधनत्थधातूनम्पि गमनत्थताय वुत्तत्ता गत्यत्थाकम्मकादि ¶ सुत्ततो कत्तरि त-प्पच्चयकरणेन वेदितब्बा.

अथ वा धातूनं अनेकत्थताय बुध-इच्चयं धातु जागरणविकसनत्थेसु वत्तमानो अकम्मकोति ‘‘पबुद्धो पुरिसो, पबुद्धं पदुम’’न्तिआदीसु विय बुद्धवा अञ्ञाणनिद्दाविगमेन ञाणचक्खूनि उम्मीलन्तो पबुद्धो, गुणेहि वा विकसितोति कत्तरि सिद्धेन बुद्ध-सद्देन ‘‘बुद्धो’’ति तिभवनेकचूळामणिपादपङ्कजरागरतनो भगवा लोकनाथो वुच्चति, इमस्मिं पक्खेपि गत्यत्थादिसुत्ते अकम्मकग्गहणेन पच्चयविधानं दट्ठब्बं.

अथ वा सकम्मकानं धातूनं कम्मवचनिच्छाय अभावे अकम्मकभावतो ‘‘फलं सयमेव पक्क’’न्तिआदीसु विय बोधनत्थेयेव बुध-धातुतो कत्तरि विधानं सिज्झति. अथ वा नीलगुणयोगेन पटादीसु नीलवोहारो विय भावसाधनं बुद्ध-सद्दं गहेत्वा बुद्धगुणयोगतो ‘‘बुद्धो’’ति वोहरीयति. एवमनेकधा सिद्धेन बुद्ध-सद्देन वुच्चमानं तं भगवन्तं तं धम्मराजन्ति अत्थो.

‘‘सेट्ठं अप्पटिपुग्गल’’न्ति पदद्वयं ‘‘बुद्ध’’न्ति एतस्स विसेसनं. एत्थ च ‘‘बुद्धं, सेट्ठं, अप्पटिपुग्गल’’न्ति इमेहि तीहि पदेहि नयतो ‘‘इतिपि सो भगवा अरहं सम्मासम्बुद्धो’’तिआदिना (दी. नि. १.१५७; ३.६; म. नि. १.१४७, १४४; ३.४३४; सं. नि. १.२४९; ५.४७९; अ. नि. ५.१४, ३०; ६.२५, २६; नेत्ति. ९३), ‘‘यो वदतं पवरो मनुजेसु, सक्यमुनी भगवा कतकिच्चो’’तिआदीहि (वि. व. ८८६) च अनेकेहि सुत्तपदेहि दस्सितदूराविदूरसन्तिकनिदानहेतुफलसत्तोपकारावत्थाधम्मत्थ- लोकुद्धारत्तिकत्तयसङ्गहितं सुपरिसुद्धं बुद्धगुणसमुदयं ¶ निरवसेसं दस्सेति. अयमेव हि बुद्धगुणानं निरवसेसतो दस्सनूपायो, यदिदं नयदस्सनं. इतरथा पटिपदवण्णनाय अपरिमितानं बुद्धगुणानं को हि नाम समत्थो परियन्तं गन्तुं. यथाह –

‘‘बुद्धोपि ¶ बुद्धस्स भणेय्य वण्णं;

कप्पम्पि चे अञ्ञमभासमानो;

खीयेथ कप्पो चिरदीघमन्तरे;

वण्णो न खीयेथ तथागतस्सा’’ति. (दी. नि. अट्ठ. ३.१४१; म. नि. अट्ठ. २.४२५; उदा. अट्ठ. ५३; अप. अट्ठ. २.७.२०; बु. वं. अट्ठ. ४.४; चरिया. अट्ठ. निदानकथा, पकिण्णककथा; दी. नि. टी. १.गन्थारम्भकथावण्णना; म. नि. टी. १.गन्थारम्भकथावण्णना; सं. नि. टी. १.१.गन्थारम्भकथावण्णना; अ. नि. टी. १.१.गन्थारम्भकथावण्णना; वजिर. टी. गन्थारम्भकथावण्णना; सारत्थ. टी. १.गन्थारम्भकथावण्णना; नेत्ति. टी. गन्थारम्भकथावण्णना);

एवमेतेहि तीहि पदेहि निरवसेसगुणसंकित्तनथुतिया वसेन ‘‘वन्दित्वा’’ति इमिना पणामस्स च वुत्तत्ता इमाय अड्ढगाथाय बुद्धरतनसङ्खातपठमवन्दनीयवत्थुविसया थुतिपणामसभावा वन्दना दस्सिताति दट्ठब्बं.

तदनन्तरं धम्मरतनस्स पणामं दस्सेतुमाह ‘‘भवाभावकरं धम्म’’न्ति. एत्थ भव-सद्देन द्वे भवा वुत्ता कम्मभवो, उपपत्तिभवोति. तत्थ कम्मभवो भवति एतस्मा फलन्ति ‘‘भवो’’ति वुच्चति. विपाकक्खन्धकटत्तारूपसङ्खातो पन उपपत्तिभवो अविज्जातण्हुपादानसङ्खारादिसहकारिकारणयुत्तेन कुसलाकुसलचेतनासङ्खातकम्मभवपच्चयेन यथारहं भवतीति ‘‘भवो’’ति वुच्चति. सो पन कामभवरूपभवअरूपभवसञ्ञीभवअसञ्ञीभवनेवसञ्ञीनासञ्ञीभव- एकवोकारभवचतुवोकारभवपञ्चवोकारभववसेन नवविधो. एवमेतेसु नवसु भवेसु दसविधोपि धम्मो अत्तानं धारेन्तस्स पुग्गलसन्तानस्स अनुपादिसेसनिब्बानधातुया परं अप्पटिसन्धिकतासाधनेन भवेसु ¶ , भवस्स वा अभावं करोतीति भवाभावकरो, तं, अपरापरजातिप्पबन्धस्स हेतुसमुग्घातेन अप्पवत्तिधम्मतापादकन्ति अत्थो.

धम्मन्ति अत्तानं धारेन्ते चतूसु अपायेसु, संसारे च अपतमाने धारेतीति धम्मो, सो चतुमग्गफलनिब्बानसङ्खातनवलोकुत्तरधम्मो च तप्पटिपादको नवङ्गसासनापरनामधेय्यचतुरासीतिसहस्सधम्मक्खन्धप्पभेदभिन्नो परियत्तिधम्मो चाति दसविधो. सोपि निप्परियायधम्मो, परियायधम्मो ¶ चाति दुविधो. तत्थ निप्परियायधम्मो नाम अपाये, संसारे वा पधानहेतुभूतानं उद्धम्भागियानं, ओरम्भागियानञ्च दसन्नं संयोजनानं समुच्छिन्दनेन मग्गधम्मो, तस्स तंकिच्चनिप्फत्तिनिमित्तभावेन निब्बानधम्मो चाति पञ्चविधोपि निप्परियायेन पुग्गलसन्तानं धारेतीति कत्वा ‘‘निप्परियायधम्मो’’ति वुच्चति. चत्तारि पन सामञ्ञफलानि पटिप्पस्सद्धिपहानेन मग्गानुगुणप्पवत्तिया, परियत्ति च मग्गनिब्बानाधिगमस्स मूलकारणभावतोति पञ्चविधोपि परियायधम्मो नाम.

एत्तावता ‘‘स्वाक्खातो भगवता धम्मो’’तिआदिना (सं. नि. १.२४९; अ. नि. ३.७६; दी. नि. ३.६; अ. नि. ६.१०, २५, २६), ‘‘रागविरागमनेजमसोक’’न्तिआदीहि (वि. व. ८८७) च सुत्तन्तेहि वुत्तस्स, तदट्ठकथादीसु च वण्णितस्स सरणानुस्सरणवसेनापि सग्गमोक्खसम्पत्तिपटिलाभकारणस्स अनवसेसस्स धम्मरतनगुणस्स नयतो उद्दिट्ठत्ता च ‘‘वन्दित्वा’’ति इमिना पणामस्स दस्सितत्ता च धम्मरतनसङ्खातस्स दुतियस्स वन्दनीयस्स थुतिपणामसभावा वन्दना दस्सिताति दट्ठब्बं.

तदनन्तरं ¶ सङ्घरतनस्स वन्दनासन्दस्सनत्थं वुत्तं ‘‘गणञ्चेव निरङ्गण’’न्ति. एत्थ ‘‘रागो अङ्गणं दोसो अङ्गणं मोहो अङ्गण’’न्ति (विभ. ९२४) वुत्तेहि रागादिअङ्गणेहि तदङ्गविक्खम्भनसमुच्छेदपटिप्पस्सद्धिनिस्सरणविमुत्तिवसेन निग्गतो विमुत्तोति निरङ्गणो, तं निरङ्गणं. अरियवंसे सीलसमाधिपञ्ञाविमुत्तिविमुत्तिञाणदस्सनसङ्खातेहि गुणगणेहि गणीयतीति गणो, तं.

एत्तावता ‘‘सुप्पटिपन्नो भगवतो सावकसङ्घो’’तिआदिना (सं. नि. १.२४९; अ. नि. ३.७६; दी. नि. ३.६; अ. नि. ६.१०, २५, २६;), ‘‘यत्थ च दिन्नं महप्फलमाहु, चतूसु सुचीसु पुरिसयुगेसू’’तिआदीहि (वि. व. ८८८) च तेहि तेहि सुत्तपदेहि वुत्तानं, तदट्ठकथादीसु च वण्णितानं विमलातुलनिखिलविसालपेसलसीलादिनानप्पकारानग्घसङ्घरतनगुणानं संकित्तनसभावाय थुतिया च ‘‘वन्दित्वा’’ति एतेन यथावुत्तसरूपपभेदपणामस्स वुत्तत्ता च सङ्घरतनसङ्खातततियवन्दनीयवत्थुविसया थुतिप्पणामसङ्खाता वन्दना दस्सिताति वेदितब्बा. सिरसाति अत्तप्पसादगारवावहन्तेन मुद्धना. वन्दित्वाति पणमित्वा थोमित्वा वा.

एवं ¶ पठमगाथाय वन्दनीयस्स रतनत्तयस्स थुतिप्पणामसङ्खातं वन्दनं दस्सेत्वा तदनन्तराय सन्दस्सेतब्बपयोजनादिपटिपादिकाय गाथाय ‘‘भिक्खून’’न्ति इमिना किञ्चापि संसारे भयं इक्खतीति ‘‘भिक्खू’’ति कल्याणपुथुज्जनेन सद्धिं अट्ठ अरियपुग्गला वुच्चन्ति, पाळियं (पारा. ४४-४५; विभ. ५१०) पन ‘‘भिन्नपटं धारेतीति भिक्खु, भिक्खनसीलोति भिक्खू’’तिआदिना भिक्खुसद्दस्स अत्थुद्धारवसेन निब्बचनन्तरानि दस्सेत्वा ¶ पातिमोक्खसंवरसंवरणारहस्सेव अधिप्पेतभावं दस्सेतुं ‘‘समग्गेन सङ्घेन ञत्तिचतुत्थेन कम्मेन अकुप्पेन ठानारहेन उपसम्पन्नो, अयं इमस्मिं अत्थे अधिप्पेतो भिक्खू’’ति दस्सिता सिक्खाकामा सासनावचारा कुलपुत्ता इधाधिप्पेता, तेसं भिक्खूनञ्च. भिक्खुनीनञ्चाति अट्ठवाचिकउपसम्पदाकम्मेन उभतोसङ्घे उपसम्पन्नातादिसायेव कुलधीतरो दस्सिता. एकतोपसम्पन्नापि सामञ्ञेन गय्हन्ति. एकतोपसम्पन्नाति च भिक्खुनिसङ्घे उपसम्पज्जित्वा याव भिक्खुसङ्घे न उपसम्पज्जन्ति, ताव, भिक्खुनी च लिङ्गपरिवत्तनेन भिक्खुनिभावप्पत्ता अधिप्पेता, तासं भिक्खुनीनञ्च.

हितत्थायाति सब्बसम्पत्तिनिप्फादकरणत्थाय हिनोति गच्छति यथाधिप्पेतफलसाधने पवत्ततीति हितन्ति अरोगतादिकारणं अमतोसधादि वुच्चति. इध पन सग्गमोक्खसम्पत्तिसिद्धिकारणं पातिमोक्खसंवरसीलरक्खनं वुच्चति, तदत्थाय.

समाहितो सम्मा आहितो पवत्तितो विनिच्छयमग्गो एतेनाति ‘‘समाहितो’’ति पकरणकारको दस्सितो. अथ वा सम्मा आहितं विनयविनिच्छये ठपितं पवत्तितं चित्तमेतस्साति ‘‘समाहितचित्तो’’ति वत्तब्बे उत्तरपदलोपेन ‘‘समाहितो’’ति वुत्तो. परमगम्भीरसुदुत्तरविनयपिटकत्थविनिच्छये पवत्तनारहस्स इमिना विसेसनेन अत्तनि समाहितचित्तप्पवत्तिनिमित्तभूतो अत्तनो ञाणस्स पदट्ठानभूतो समाधि दस्सितो तेन समाधिना समाहितो हुत्वाति अत्थो.

पवक्खामीति पकारेन वक्खामि, येन पकारेन विनयविनिच्छये वुत्ते अज्जतना मन्दसतिमतिवीरिया पटिपज्जनका गम्भीरतरं ¶ विनयपिटकत्थविनिच्छयं सुखेन उग्गण्हितुं, धारेतुञ्च सक्कोन्ति, तादिसेन पकारविसेसेन वक्खामीति अत्थो. समासेनाति समसनं संखिपनं समासो, तेन, संखित्तरुचिकानमुग्घाटितञ्ञूनं कताधिकारानं ञाणुत्तरानं पुग्गलानञ्च ¶ पपञ्चभीरुकानं गहणधारणे मन्दयन्तानं मन्दबुद्धीनञ्च उपकारकेन नातिवित्थारक्कमेनाति अत्थो. विनयस्साति विनयपिटकस्स. तञ्हि –

‘‘विविधविसेसनयत्ता;

विनयनतो चेव कायवाचानं;

विनयत्थविदूहि अयं;

विनयो ‘विनयो’ति अक्खातो’’ति. (दी. नि. अट्ठ. १.पठमसङ्गीतिकथा; पारा. अट्ठ. १.पठममहासङ्गीतिकथा; ध. स. अट्ठ. निदानकथा) –

वुत्तेहि अत्थविसेसेहि ‘‘विनयो’’ति वुच्चति. तस्स एवं सन्दस्सितसभावस्स ‘‘विनयो नाम सासनस्स आयू’’ति (दी. नि. अट्ठ. १.पठमसङ्गीतिकथा; पारा. अट्ठ. १.पठमसङ्गीतिकथा; खु. पा. अट्ठ. ५.पठममहासङ्गीतिकथा) सङ्गीतिकारकेहि महाकस्सपादीहि अभित्थुतगुणस्स विनयपिटकुत्तमस्स. विनिच्छयन्ति विसेसेन, विविधेन वा आकारेन विप्पटिपत्तिनीहरणवसेन चीयति विभजीयतीति ‘‘विनिच्छयो’’ति लद्धनामं विभजनं, विनयविनिच्छयं नाम पकरणन्ति वुत्तं होति. ‘‘विनयस्सविनिच्छय’’न्ति च अलुत्तसमासोयं ‘‘देवानंपियतिस्सो, कण्ठेकाळो’’तिआदीसु विय.

एवं दुतियगाथाय कत्तुनिमित्तपयोजनाभिधानाभिधेय्यपकरणप्पकारेकदेसं दस्सेत्वा सक्कच्चसवनकारणनिदस्सनमुखेनापि पकरणप्पकारादिं दस्सेतुमाह ‘‘अनाकुल’’मिच्चादि. तत्थ अनाकुलन्ति नत्थि एत्थ सद्दतो, अत्थतो, विनिच्छयतो वा आकुलं पुब्बापरविरोधो, मिस्सता ¶ वाति अनाकुलो, विनयविनिच्छयो, तं वदतो मे निबोधथाति सम्बन्धो. असंकिण्णन्ति निकायन्तरलद्धीहि असम्मिस्सं.

मधुरत्थपदक्कमन्ति पदानं कमो पदक्कमो, पदगति, सद्दानमुच्चारणन्ति अत्थो. मधुरो अत्थो च पदक्कमो च यस्स सो मधुरत्थपदक्कमो, तं –

‘‘पदासत्तं ¶ पदत्थानं, मधुरत्थमुदीरितं;

येन मज्जन्ति धीमन्तो, मधुनेव मधुब्बता’’ति. –

इमिना लक्खणेन सद्दानमत्थानञ्च वसेन पदासत्तापरनामधेय्यमाधुरियालङ्कारेन समलङ्कतत्ता मधुरत्थपदक्कमं.

पटुभावकरन्ति पटति गच्छति पजानातीति पटु, पञ्ञवा, पटुनो भावो, सद्दप्पवत्तिनिमित्तभूता पञ्ञा, तं पटुभावं पञ्ञाविसेसं करोति जनेतीति पटुभावकरो, तं, पञ्ञाविसेसजनकन्ति अत्थो. एतं विनयस्स विनिच्छयन्ति योजना. परमन्ति उत्तमं. विनयक्कमेति विनयपिटके, तदत्थे च, पवत्तिक्कमे पटुभावकरन्ति अत्थो.

एवं ततियगाथाय पकरणगुणापदेसेन सोतुजनं समुस्साहेत्वा इदानि ‘‘अपार’’न्तिआदिचतुत्थगाथाय पकरणञ्च तन्निस्सयं विनयपिटकञ्च नावासागरभावेन दस्सेत्वा तिरोभूतोपमेय्योपमानभेदेन रूपकालङ्कारेन पकरणगुणं पकासेन्तो सोतुजनं समुत्तेजेति. तत्थ अपारन्ति नत्थि पारं एतस्साति अपारो, विनयसागरो. सो हि पुरिमबुद्धुप्पादेसु सासनं पसीदित्वा विनयपिटके उग्गहणधारणपटिपादनपटिपत्तिवसेन अकताधिकारेहि पुग्गलेहि दुरधिगमनीयधम्मत्थनिरुत्तिपटिभानपरियन्तताय ‘‘अपारो’’ति वुच्चति.

ओतरन्तानन्ति ¶ सज्झायनसवनधारणादिवसेन अज्झोगाहन्तानं. सारन्ति निब्बानसम्पापकभावेन सारभूताय अरियमग्गसम्भाराय पुब्बभागपटिपत्तिया मूलभूतपातिमोक्खसंवरसङ्खातसीलसारप्पकासकताय सारं. विनयसागरन्ति विनयपिटकसङ्खातं सागरं. विनयो हि सिक्खापदपञ्ञत्तिया कालप्पत्तजाननस्सापि धम्मसेनापतिआदीनम्पि अविसयत्ता अतिगम्भीरातिवित्थिण्णभावेन सागरो वियाति सागरो, विनयो च सो सागरो चाति विनयसागरो, तं, अगाधापारगुणयोगतो सागरोपमं विनयपिटकन्ति अत्थो.

दुतियगाथाय ‘‘भिक्खूनं भिक्खुनीन’’न्ति वत्वापि ‘‘हितत्थाया’’ति इमिना सम्बन्धत्ता च वाक्यन्तरेहि अन्तरितभावेन दूरत्ता च तं अनादियित्वा एत्थ विनयसागरज्झोगाहनतदत्थपटिपज्जनारहकत्तुविसेससन्दस्सनत्थाय ¶ ‘‘भिक्खूनं भिक्खुनीन’’न्ति पुन वुत्तन्ति दट्ठब्बं. नावा विय भूतो नावाभूतो, तं, नावाट्ठानियं महानावासदिसन्ति अत्थो. मनोरमन्ति मनो रमति एत्थ, एतेनाति वा मनोरमो, तं, अज्झायनवोहारपसुतानं पटिपत्तिपरायनानञ्च साधूनं मनोरमन्ति अत्थो.

एत्तावता पकरणगुणसंकित्तनेन सोतुजनं समुत्तेजेत्वा इदानि सक्कच्चसवने नियोजेन्तो ‘‘तस्मा विनयनूपाय’’न्तिआदिमाह. तत्थ तस्माति यस्मा यथावुत्तं अनाकुलतादिविविधानग्घगुणालङ्कारपटिमण्डितं, तेन हेतुनाति अत्थो. विनयनूपायन्ति विविधाकारेन, विसेसनयतो वा कायवाचानं नयनं दमनं अकत्तब्बतो निवत्तेत्वा कत्तब्बेसु नियोजनं विनयनं, उपेच्च तं फलं आयति उप्पज्जतीति उपायो, हेतु, विनयनस्स उपायो विनयनूपायो, तं, कायजीवितानपेक्खानं सिक्खाकामानं पेसलानं भिक्खूनं भिक्खुनीनं कायवाचानं अननुलोमिकविप्फन्दितापनयनसङ्खातदमनस्स ¶ कारणभूतन्ति वुत्तं होति.

एत्तावता अत्तना कत्तुमिच्छिते पकरणे पण्डितानं पवत्तिहेतुभूतानं अनाकुलतादिगुणानं विभावनवसेन ‘‘अनाकुल’’न्तिआदिविसेसनानि वत्वा इदानि सक्कच्चसवनावबोधे विसयं विसेसितब्बं दस्सेतुमाह ‘‘विनयस्सविनिच्छय’’न्ति. एत्थ च दुतियगाथाय ‘‘विनयस्सविनिच्छय’’न्ति ‘‘पवक्खामी’’ति किरियाय कम्मदस्सनवसेन वुत्तं, तं इध आनेत्वा सम्बन्धियमानम्पि दूरसम्बन्धं होतीति तमनानेत्वा ‘‘निबोधथा’’ति इमिस्सा किरियाय कम्मसन्दस्सनत्थं ‘‘विनयस्सविनिच्छय’’न्ति वुत्तत्ता पुनरुत्तिदोसाभावोति दट्ठब्बं.

अविक्खित्तेन चित्तेनाति एत्थ विविधे आरम्मणे खित्तं पेसितं विक्खित्तं, उद्धच्चविचिकिच्छादिपरेतं असमाहितं चित्तं, न विक्खित्तं अविक्खित्तं, तप्पटिपक्खं समाहितं कुसलचित्तं, तेन, एतस्स पकरणुत्तमस्स सवनादिब्यापारं विना नानारम्मणेसु पवत्तिवसेन विक्खेपमनापन्नेन समाहितेन चित्तेनाति अत्थो. ‘‘अविक्खित्तेन…पे… निबोधथा’’ति वदन्तेन च ‘‘अविक्खित्तस्सायं धम्मो, नायं धम्मो विक्खित्तस्सा’’ति वचनतो विक्खित्तस्स धम्मेसु दायादाभावतो अत्तनो पकरणत्थभूताय अधिसीलसिक्खाय सम्मापटिपज्जनापदेसो कतो होति.

वदतो ¶ मेति एत्थ ‘‘गारवेन चा’’ति पाठसेसो. तत्थायमत्थो – भासमाने मयि गारवेन, यथावुत्तेन कारणेन चाति सामिभुम्मानमविसेसताय ‘‘मे’’ति सामिवचनस्स ‘‘मयी’’ति अत्थसम्भवतो अयमत्थो वुत्तो. पकरणस्स अनाकुलतादिगुणसमन्नागतत्ता च वत्तरि मयि गारवेन च समाहितेन चेतसाति अधिप्पायो. निबोधथाति वाक्यत्थपदत्थं सन्धायभासितत्थभावत्थादिवसेन ¶ निसेसतो बोधथ, सक्कच्चं सुत्वा विनयविनिच्छयं बुज्झथ विजानाथाति अत्थो, चिन्ताभावनामयञाणानं मूलभूतपकरणविसयं सुतमयञाणं निप्फादेथाति अधिप्पायो.

गन्थारम्भकथावण्णना निट्ठिता.

भिक्खुविभङ्गो

पाराजिककथा

पठमपाराजिककथावण्णना

६. एवं ¶ पञ्चहि गाथाहि रतनत्तयपणामादिं दस्सेत्वा इदानि यथापटिञ्ञातविनिच्छयं दस्सेतुमाह ‘‘तिविधे’’तिआदि. तत्थ ‘‘तिविधे’’तिआदिना पठमपाराजिकसिक्खापदविनिच्छयं दस्सेति. तिविधेति वच्चपस्सावमुखमग्गानं वसेन तिप्पकारे मग्गेति इमिना सम्बन्धो. तिलमत्तम्पीति तिलबीजमत्तम्पि अङ्गजातन्ति सम्बन्धो. मग्गेति वच्चपस्सावानं निक्खमनद्वारताय, अन्नपानपित्तसेम्हादीनं पवेसननिक्खमनद्वारताय च मग्गवोहारगते सरीरप्पदेसे, अल्लोकासेति सम्बन्धो. ‘‘मग्गेसु तिलमत्तम्पि, तीसु सेवनचेतनो’’ति वत्तब्बेपि ‘‘तिविधे’’ति पकारवाचिविधसद्दोपादानेन सजातिसङ्गहवसेन तीहि रासीहि सङ्गहेत्वा पभेदवसेन तिंसविधो मग्गो दस्सितो होति.

सेय्यथिदं? पाराजिकवत्थुभूतमुखादिमग्गानं निस्सयभूते सत्ते दस्सेतुं ‘‘तिस्सो इत्थियो मनुस्सित्थी ¶ अमनुस्सित्थी तिरच्छानगतित्थी’’तिआदिना (पारा. ५६) नयेन पाळियं दस्सितमनुस्सामनुस्सतिरच्छानगतित्थीनं पच्चेकं तिण्णं मग्गानं वसेन नव मग्गा, तथेव दस्सितानं तिण्णं उभतोब्यञ्जनकानं वसेन नव मग्गा, तिण्णं पन पण्डकानं मुखमग्गवच्चमग्गानं वसेन पच्चेकं द्वे द्वे मग्गाति छ मग्गा, तथा तिण्णं पन पुरिसानन्ति एवं तिंसविधो होति.

सेवनचेतनोति सेवने मेथुनपयोगे चेतना अस्साति विग्गहो, मेथुनरागूपसंहिताय चेतनाय समन्नागतोति ¶ अत्थो. अल्लोकासेति तिंसमग्गानमञ्ञतरे मग्गे पकतिवातेन असंफुट्ठे अल्लपदेसे, इमिना बाहिरं पाराजिकक्खेत्तं न होतीति दीपेति. विसेसनस्स विसेसापेक्खत्ता दुतियगाथाय ‘‘ससिक्खो सो’’ति पदद्वयं आहरित्वा ‘‘सेवनचेतनो ससिक्खो सो भिक्खू’’ति योजेतब्बं.

अङ्गे सरीरे जातन्ति अङ्गजातं, पुरिसनिमित्तं. सतिपि अवसेससरीरावयवानं तथाभावे रुळ्हिवसेन तदेव तथा वुत्तं. पवेसेन्तोति द्वयंद्वयसमापत्तिसङ्खातकायिककिरियं निप्फादेन्तो. पराजितोति दुल्लभाय खणसम्पत्तिया लद्धब्बतो दुल्लभा लोकियलोकुत्तरगुणसम्पत्तिसुखतो परिहापेत्वा किलेससपत्तेहि पराजयमापादितोति अत्थो.

अयमेत्थ योजना – ससिक्खो सेवनचेतनो तिविधे मग्गे अल्लोकासे अङ्गजातं तिलमत्तम्पि पवेसेन्तो सो भिक्खु पराजितो होतीति. एत्तावता –

‘‘यो पन भिक्खु भिक्खूनं सिक्खासाजीवसमापन्नो सिक्खं अपच्चक्खाय दुब्बल्यं अनाविकत्वा मेथुनं धम्मं पटिसेवेय्य, अन्तमसो तिरच्छानगतायपि, पाराजिको होति असंवासो’’ति (पारा. ४४) –

भगवता पञ्ञत्तसिक्खापदं सङ्गहितन्ति दट्ठब्बं.

७. एवं इमिस्सा गाथाय अत्तूपक्कममूलकं पाराजिकं दस्सेत्वा इदानि ‘‘भिक्खुपच्चत्थिका मनुस्सित्थिं भिक्खुस्स सन्तिके आनेत्वा वच्चमग्गेन (पारा. ५८) अङ्गजाते ¶ अभिनिसीदेन्ती’’तिआदिनयप्पवत्तं परोपक्कममूलकं पाराजिकञ्च दस्सेतुमाह ‘‘पवेसन’’न्तिआदि. तत्थ पवेसनन्ति भिक्खुपच्चत्थिकेहि सुत्तपमत्तादिमनुस्सित्थिआदीनमञ्ञतरं आनेत्वा यथावुत्तमग्गानमञ्ञतरं ¶ मग्गं यथा पविसति, तथा भिक्खुनो अङ्गजाते अभिनिसीदापने सम्भवन्तं मग्गप्पवेसनमाह. पवेसनं सादियन्तो ससिक्खो सोति योजना. एत्थ ‘‘पवेसनं सादियति अधिवासेति, तस्मिं खणे सेवनचित्तं उपट्ठापेती’’ति (पारा. अट्ठ. १.५८) अट्ठकथावचनतो अग्गतो याव मूलं पवेसेन्तेसु अस्सादचित्तं उपट्ठापेन्तो तङ्खणेयेव सासनतो चुतोति अत्थो. पविट्ठन्तिआदीसु पदेसुपि एवमेव योजना.

पविट्ठन्ति पविट्ठक्खणो. ‘‘पविट्ठ’’न्तिआदिना ताय ताय किरियाय उपलक्खितो खणो गहेतब्बो. तेनेवेत्थ अच्चन्तसंयोगे उपयोगवचनं कतं. ठितन्ति एत्थ ‘‘सुक्कविस्सट्ठिसमये’’ति अट्ठकथावचनस्स सब्बथा ब्यापाररहितं कालं सन्धाय वुत्तत्ता सुक्कविस्सट्ठिसमयोपि गहेतब्बो. तेनेव गण्ठिपदे वुत्तनयेन पविट्ठस्स च याव उद्धरणारम्भो, ताव सम्भवन्तो ठितकालोपि गहेतब्बो. उद्धरणन्ति नीहरणकालो.

वाति विकप्पे, अपीति समुच्चये, सो वा-सद्देन विकप्पितानं पक्खानं तुल्यबलतं जोतेति. इति इमेहि द्वीहिपि ‘‘सो चे पवेसनं सादियति, पविट्ठं सादियती’’तिआदिना (पारा. ५८) पाळियं आगतनयेन लब्भमानं पवेसनादिएकक्खणम्पि सादियनपच्चया आपज्जमानं पाराजिकं दस्सेति. ससिक्खोति सिक्खाय सह वत्ततीति ससिक्खो, अपच्चक्खातसिक्खोति अत्थो. सादियन्तोति सेवनचित्तं उपट्ठापेन्तो. सो भिक्खु. ठपेत्वा किरियन्ति अत्तूपक्कमनं विना. चुतोति ‘‘भिक्खुपच्चत्थिकेहि कतमिदं, न मया’’ति लेसेन न मुच्चति, सादियनचित्ते सति सासनतो चुतोयेव होतीति अधिप्पायो.

एत्थ ¶ च ससिक्खोति इदं ‘‘सिक्खं अपच्चक्खाय दुब्बल्यं अनाविकत्वा’’ति (पारा. ४४) सिक्खापदपाठस्स अत्थदस्सनवसेन निद्दिट्ठं. तस्स पदभाजने (पारा. ४५), तदट्ठकथाय च विभत्तं सिक्खापच्चक्खानं सङ्खेपतो एवं वेदितब्बं – चित्तखेत्तकालपयोगपुग्गलविजाननवसेन सिक्खापच्चक्खानं होति, न तदभावेन. उपसम्पन्नभावतो चवितुकामताचित्तेनेव हि सिक्खापच्चक्खानं होति, न दवा वा रवा वा वदन्तस्स. एवं चित्तवसेन सिक्खापच्चक्खानं होति, न तदभावेन.

तथा ¶ ‘‘बुद्धं पच्चक्खामि, धम्मं पच्चक्खामि, सङ्घं पच्चक्खामि, सिक्खं, विनयं, पातिमोक्खं, उद्देसं, उपज्झायं, आचरियं, सद्धिविहारिकं, अन्तेवासिकं, समानुपज्झायकं, समानाचरियकं, सब्रह्मचारिं पच्चक्खामी’’ति एवं वुत्तानं बुद्धादीनं चतुद्दसन्नं, ‘‘गिहीति मं धारेहि, उपासको, आरामिको, सामणेरो, तित्थियो, तित्थियसावको, अस्समणो, असक्यपुत्तियोति मं धारेही’’ति एवं वुत्तानं गिहिआदीनं अट्ठन्नञ्चाति इमेसं बावीसतिया खेत्तपदानं यस्स कस्सचि सवेवचनस्स वसेन तेसु यं किञ्चि वत्तुकामस्स यं किञ्चि वदतो सिक्खापच्चक्खानं होति, न रुक्खादीनं अञ्ञतरस्स नामं गहेत्वा सिक्खं पच्चक्खन्तस्स. एवं खेत्तवसेन सिक्खापच्चक्खानं होति, न तदभावेन.

तत्थ यदेतं ‘‘पच्चक्खामी’’ति च ‘‘मं धारेही’’ति चाति वुत्तं वत्तमानकालवचनं, यानि च ‘‘अलं मे बुद्धेन, किं नु मे बुद्धेन, न ममत्थो बुद्धेन, सुमुत्ताहं बुद्धेना’’तिआदिना नयेन आख्यातवसेन कालं अनामसित्वा पुरिमेहि चुद्दसहि पदेहि सद्धिं योजेत्वा वुत्तानि ‘‘अलं मे’’तिआदीनि चत्तारि पदानि, तेसंयेव सवेवचनानं वसेन पच्चक्खानं होति, न ‘‘पच्चक्खासि’’न्ति वा ‘‘पच्चक्खिस्स’’न्ति वा ¶ ‘‘मं धारेसी’’ति वा ‘‘मं धारेस्सती’’ति वा ‘‘यं नूनाहं पच्चक्खेय्य’’न्ति वातिआदीनि अतीतानागतपरिकप्पवचनानि भणन्तस्स. एवं वत्तमानकालवसेन चेव अनामट्ठकालवसेन च पच्चक्खानं होति, न तदभावेन.

पयोगो पन दुविधो कायिको च वाचसिको च. तत्थ ‘‘बुद्धं पच्चक्खामी’’तिआदिना नयेन याय कायचि भासाय वचीभेदं कत्वा वाचसिकपयोगेनेव पच्चक्खानं होति, न अक्खरलिखनं वा हत्थमुद्दादिदस्सनं वा कायपयोगं करोन्तस्स. एवं वाचसिकपयोगेनेव पच्चक्खानं होति, न तदभावेन.

पुग्गलो पन दुविधो यो च पच्चक्खाति, यस्स च पच्चक्खाति. तत्थ यो पच्चक्खाति, सो सचे उम्मत्तकखित्तचित्तवेदनट्टानं अञ्ञतरो न होति. यस्स पन पच्चक्खाति, सो सचे मनुस्सजातिको होति, न च उम्मत्तकादीनं अञ्ञतरो, सम्मुखीभूतो च सिक्खापच्चक्खानं होति. न हि असम्मुखीभूतस्स दूतेन वा पण्णेन वा आरोचनं रुहति. एवं यथावुत्तस्स पुग्गलस्स वसेन पच्चक्खानं होति, न तदभावेन.

विजाननम्पि ¶ नियमितानियमितवसेन दुविधं. तत्थ यस्स, येसं वा नियमेत्वा ‘‘इमस्स, इमेसं वा आरोचेमी’’ति वदति. सचे ते यथा पकतिया लोके मनुस्सा वचनं सुत्वा आवज्जनसमये जानन्ति, एवं तस्स वचनानन्तरमेव तस्स ‘‘अयं उक्कण्ठितो’’ति वा ‘‘गिहिभावं पत्थयती’’ति वा येन केनचि आकारेन सिक्खापच्चक्खानभावं जानन्ति, पच्चक्खाताव होति सिक्खा. अथ अपरभागे ‘‘किं इमिना वुत्त’’न्ति चिन्तेत्वा जानन्ति, अञ्ञे वा जानन्ति, अपच्चक्खाताव होति सिक्खा. अनियमेत्वा आरोचेन्तस्स पन सचे वुत्तनयेन यो कोचि मनुस्सजातिको वचनत्थं जानाति, पच्चक्खाताव होति सिक्खा. एवं विजाननवसेन पच्चक्खानं ¶ होति, न तदभावेन. यो पन अन्तमसो दवायपि पच्चक्खाति, तेन अपच्चक्खाताव होति सिक्खा.

इति इमेसं वुत्तप्पकारानं चित्तादीनं वसेन अपच्चक्खातसिक्खो ‘‘ससिक्खो’’ति वुत्तो.

८-१०. ‘‘इदानि सन्थतेन सन्थतस्स घट्टने उपादिन्नकघट्टनाभावतो दोसो नत्थी’’ति पापभिक्खूनं लेसकप्पनं पटिक्खिपितुं ‘‘भिक्खुपच्चत्थिका मनुस्सित्थिं भिक्खुस्स सन्तिके आनेत्वा वच्चमग्गेन, पस्सावमग्गेन, मुखेन अङ्गजातं अभिनिसीदेन्ति सन्थताय असन्थतस्सा’’तिआदिना (पारा. ६१) नयेन पाळियं वुत्तसन्थतवारानमत्थं सङ्गण्हन्तो आह ‘‘सन्थतेना’’तिआदि. तत्थ सन्थतेनाति चम्मचोळतिपुपट्टादीहि पटिच्छादितेन. ‘‘पवेसेन्तो’’ति इमिना सन्थतवारस्स परोपक्कमं निस्साय दस्सनमुपलक्खणन्ति अत्तूपक्कमेपि योजेतब्बतं दस्सेति, तस्स वक्खमानेन ‘‘पराजितो’’ति इमिना सम्बन्धो. ‘‘तथेवा’’ति इमिना पवेसेन्तोतिआदिप्पकारं परामसति.

एवं पवेसेन्तो कदा पराजितो होतीति आह ‘‘उपादिन्नेना’’तिआदि. एत्थ उपादिन्नेनाति तण्हादिट्ठीहि उपेतेन कम्मुना अत्तनो फलभावेनेव आदिन्नं गहितन्ति उपादिन्नं, एतेन अत्तनो अङ्गजातस्स, वत्थुपुग्गलानं मग्गस्स च घट्टनट्ठानगतं कायप्पसादं दस्सेति. इमिनाव अङ्गजातगतं अनट्ठकायप्पसादं चम्मखिलं, पिळकादि च गहेतब्बं. ‘‘उपादिन्नकं नाम कायिन्द्रिय’’न्ति गण्ठिपदे वुत्तं. तब्बिपरियायेन ‘‘अनुपादिन्नक’’न्ति तप्पटिच्छादकं चोळादि वुत्तं. उपादिन्नेन उपादिन्ने, अनुपादिन्ने वा पाराजिकक्खेत्ते घट्टिते, अनुपादिन्नकेन ¶ वा उपादिन्ने अनुपादिन्ने वा पाराजिकक्खेत्ते ¶ घट्टितेति योजना. एत्थ च करणवचनन्तानि पदानि ‘‘अङ्गजातेना’’ति इमस्स विसेसनानि.

एत्तावता सन्थतचतुक्कवसेन अत्तूपक्कमे सति पाराजिकक्खेत्ते पाराजिकं दस्सेत्वा इदानि परूपक्कमेपि दस्सेतुमाह ‘‘सचे’’तिआदि. एत्थाति एतेसु चतूसु विकप्पेसु. पाराजिकक्खेत्ते पविट्ठे तूति एत्थ तु-सद्देन पवेसनट्ठितुद्धारक्खणत्तयं समुच्चिनोति. यंतं-सद्दानं निच्चसम्बन्धत्ता हि ‘‘सो’’ति तं-सद्दोपादाने ‘‘यो’’ति यं-सद्दोपि अज्झाहरितब्बो, सामत्थियेन सम्पिण्डनत्थो अपिसद्दो च. अयमेत्थ अत्थयोजना – भिक्खुपच्चत्थिकेहि आनेत्वा भिक्खुनो अङ्गजाते अभिनिसीदापितमनुस्सित्थिआदीनं तीसु मग्गेसु अञ्ञतरमग्गसङ्खातं पाराजिकक्खेत्तं पविट्ठे वा तु-सद्देन सम्पिण्डितपवेसनट्ठितुद्धारानमञ्ञतरक्खणे वा सचे यो सादियति, सप्पमुखादिप्पवेसनकाले विय अनुत्तसित्वा कामरागपिपासाभिभूतो यदि सादियति, सोपि भिक्खु पराजितो होतीति योजना. ‘‘सचे सादियती’’ति इमिना सासङ्कवचनेन न सादियति, अनापत्तीति सूचितं होति.

‘‘पाराजिकक्खेत्ते’’ति इमिना ब्यवच्छिन्ने अञ्ञस्मिं ठाने वीतिक्कमन्तस्स इमस्मिंयेव विकप्पे सम्भवन्तियो इतरापत्तियो दस्सेतुमाह ‘‘खेत्ते’’तिआदि. ‘‘एत्था’’ति आनेत्वा सम्बन्धनीयं. ‘‘खेत्ते’’ति सामञ्ञनिद्देसेपि हेट्ठा ‘‘पाराजिकक्खेत्ते’’ति विसेसितत्ता, उपरिथुल्लच्चयादीनञ्च विधीयमानत्ता अञ्ञथानुपपत्तिलक्खणाय सामत्थिया थुल्लच्चयदुक्कटानं खेत्तेति अयमत्थो लब्भति. ‘‘कण्णच्छिद्दक्खिनासासू’’तिआदिना नयेन वक्खमानेसु जीवमानकसरीरगतथुल्लच्चयदुक्कटक्खेत्तेसूति वुत्तं होति.

इमेसु ¶ द्वीसु खेत्तेसु ‘‘सन्थतादिना सन्थतादिं पवेसेन्तस्स उपादिन्नादीहि उपादिन्नादीनं घट्टने अधिवासेन्तस्स अनापत्ती’’ति वत्तुमसक्कुणेय्यताय पाराजिकक्खेत्ते वुत्तसब्बविकप्पे एत्थ योजेन्तेहि एवं योजेतब्बं – थुल्लच्चयक्खेत्ते सन्थते वा असन्थते वा सन्थतेन वा असन्थतेन वा अङ्गजातेन सेवन्तस्स उपादिन्ने वा अनुपादिन्ने वा उपादिन्नेन, तथा अनुपादिन्नेन वा घट्टिते थुल्लच्चयं तस्स विनिद्दिसेति. एवं दुक्कटक्खेत्ते सन्थते वा…पे… घट्टिते दुक्कटञ्च तस्स विनिद्दिसेति योजेतब्बं.

इह ¶ सब्बत्थ तीसुपि खेत्तेसु उपादिन्न-सद्देन अनट्ठकायप्पसादं अङ्गजातञ्च तत्थजातचम्मखिलपिळका च गय्हन्ति, दुक्कटक्खेत्ते पन अङ्गुलिआदिइतरावयवापि. तीसुपि खेत्तेसु अनुपादिन्न-सद्देन अङ्गजातादिपटिच्छादितवत्थादयो च गय्हन्ति, दुक्कटक्खेत्ते पन निमित्ते नट्ठकायप्पसादचम्मखिलपिळकरोमादीनि. इमानि च अनुपादिन्नानि. अङ्गजातेतरोपादिन्नावयवे च तीसुपि खेत्तेसु पवेसेन्तस्स दुक्कटमेव.

११. एत्तावता जीवमानसरीरे सन्थतासन्थतवसेन पच्चेकं तिविधेसुपि पाराजिकथुल्लच्चयदुक्कटक्खेत्तेसु सन्थतासन्थतवसेनेव दुविधेन निमित्तेन सेवन्तस्स परोपक्कमे सति सादियन्तस्स लब्भमानपाराजिकथुल्लच्चयदुक्कटापत्तियो यथासम्भवं दस्सेत्वा इदानि ‘‘मतसरीरे पन तथा तथा सेवन्तानं दोसो नत्थी’’ति पापभिक्खूनं लेसोकासपटिबाहनत्थं पाळियं दस्सितेसु यथावुत्तेसु तीसु खेत्तेसु लब्भमाना तिस्सो आपत्तियो दस्सेतुमाह ‘‘मते’’तिआदि.

तत्थ ¶ ‘‘मते’’ति एतस्स ‘‘मनुस्सित्थिआदीनं सरीरे’’ति अज्झाहरित्वा अत्थयोजना कातब्बा. इमिना ‘‘अक्खायिते’’तिआदिना दस्सितानं निमित्तानं निस्सयं दस्सितं होति. ‘‘निमित्तमत्तं सेसेत्वा’’तिआदिना नयेन वक्खमानगाथायं विय सकलसरीरे खादितेपि निमित्तस्स विज्जमानाविज्जमानभावोयेव आपत्तियाभावाभावस्स पमाणन्ति ‘‘अक्खायिते’’ति एतेन ‘‘मते’’ति एतं अविसेसेत्वा ‘‘निमित्ते’’ति अज्झाहरित्वा तं तेन विसेसितब्बं. अथ वा ‘‘निमित्तमत्त’’न्तिआदिना वक्खमानगाथाय ‘‘निमित्ते’’ति पदं आनेत्वा योजेतब्बं.

अक्खायितेति सब्बथा अक्खायिते पाराजिकवत्थुभूते निमित्ते. येभुय्यक्खायितेपि चाति किञ्चि किञ्चि खादित्वा बहुकावसिट्ठे निमित्ते. ‘‘यस्स चतूसु भागेसु तिभागमत्तं खादितं, तं निमित्तं येभुय्यक्खायितं नामा’’ति वदन्ति. मेथुनन्ति रागपरियुट्ठानेन सदिसभावापत्तिया मिथुनानं इदं मेथुनं, मतित्थिआदीनं रागपरियुट्ठानेन सदिसत्ताभावेपि तत्थ वीतिक्कमो रुळ्हिया ‘‘मेथुन’’न्ति वुच्चति.

पाराजिकोतिपराजितो, पराजयमापन्नोति अत्थो. अयञ्हि पाराजिक-सद्दो सिक्खापदापत्तिपुग्गलेसु वत्तति. तत्थ ‘‘अट्ठानमेतं आनन्द अनवकासो, यं तथागतो वज्जीनं ¶ वा वज्जिपुत्तकानं वा कारणा सावकानं पाराजिकं सिक्खापदं पञ्ञत्तं समूहनेय्या’’ति (पारा. ४३) एवं सिक्खापदे वत्तमानो वेदितब्बो. ‘‘आपत्ति त्वं भिक्खु आपन्नो पाराजिक’’न्ति (पारा. ६७) आपत्तिया. ‘‘न मयं पाराजिका, यो अवहटो, सो पाराजिको’’ति (पारा. १५५) एवं पुग्गले. ‘‘पाराजिकेन धम्मेन अनुद्धंसेय्या’’तिआदीसु (पारा. ३८४) पन धम्मे वत्ततीति वदन्ति. यस्मा पन ¶ तत्थ धम्मोति कत्थचि आपत्ति, कत्थचि सिक्खापदमेव अधिप्पेतं, तस्मा सो विसुं न वत्तब्बो.

तत्थ सिक्खापदं यो तं अतिक्कमति तं पराजेति, तस्मा ‘‘पाराजिक’’न्ति वुच्चति. आपत्ति पन यो नं अज्झापज्जति तं पराजेति, तस्मा ‘‘पाराजिका’’ति वुच्चति. पुग्गलो यस्मा पराजितो पराजयमापन्नो, तस्मा ‘‘पाराजिको’’ति वुच्चति. सिक्खापदापत्तीसु पाराजिक-सद्दो पराजेतीति ‘‘पाराजिको’’ति कत्तुसाधनो, पुग्गले पन पराजीयतीति कम्मसाधनोति वेदितब्बो. ‘‘नरो’’ति इमिना पुब्बे वुत्तभिक्खुयेव अधिप्पेतो. सामञ्ञजोतना विसेसे अवतिट्ठतीति.

१२. येभुय्यक्खायितेति चतूसु कोट्ठासेसु एककोट्ठासावसेसं कत्वा खादिते. उपड्ढक्खायितेति समभागावसेसं खादिते. थूलो अच्चयो थुल्लच्चयो, सोयेव आपज्जीयतीति आपत्तीति थुल्लच्चयापत्ति. पाचित्तियादयो सन्धायेत्थ थुल्लच्चयवोहारो, न पाराजिकसङ्घादिसेसेति दट्ठब्बं. सेसेति अवसेसे उपकच्छकादीसु. वुत्तञ्हि अट्ठकथायं ‘‘अवसेससरीरे उपकच्छकादीसु दुक्कट’’न्ति (पारा. अट्ठ. १.५९-६०). दुट्ठु कतन्ति दुक्कटं, दुक्कट-सद्दो नियतनपुंसकत्ता इत्थिलिङ्गस्सापि आपत्ति-सद्दस्स सलिङ्गेन विसेसनं होति.

१३. निमित्तमत्तं सेसेत्वा खायितेपीति एत्थ तिण्णमञ्ञतरं निमित्तं सेसेत्वा सकलसरीरे खादितेपि. पि-सद्दो ब्यतिरेके, पगेव इतरेति दीपेति. तस्मिं निमित्ते अक्खायिते वा येभुय्यक्खायिते वाति द्विधा वुत्तेसु तीसु निमित्तेसु अञ्ञतरस्मिं निमित्ते मेथुनं सेवतोपि पराजयो पाराजिकापत्ति होतीति अधिप्पायो ¶ . सेवतोपीति एत्थ पि-सद्दो अपेक्खायं. तस्मा न केवलं हेट्ठा वुत्तानमेवाति अपेक्खति. सन्थतादयो विकप्पा यथावुत्तनयेन एत्थापि योजेतब्बा.

१४. ‘‘उद्धुमातादिसम्पत्ते’’ति ¶ एत्थ ‘‘यदा पन सरीरं उद्धुमातकं होति कुथितं नीलमक्खिकासमाकिण्णं किमिकुलसमाकुलं नवहि वणमुखेहि पग्घरितपुब्बकुणपभावेन उपगन्तुम्पि असक्कुणेय्यं, तदा पाराजिकवत्थुञ्च थुल्लच्चयवत्थुञ्च जहति, तादिसे सरीरे यत्थ कत्थचि उपक्कमतो दुक्कटमेवा’’ति (पारा. अट्ठ. १.५९-६०) अट्ठकथावचनतो सब्बत्थापि चाति अक्खायितादिसब्बविकप्पोपगतानि पाराजिकथुल्लच्चयदुक्कटक्खेत्तानि गहितानीति दट्ठब्बं. तत्थापि वीतिक्कमो अनापत्ति न होतीति दस्सेतुमाह ‘‘दुक्कट’’न्ति. ‘‘खायितक्खायित’’न्तिआदीसु खायितक्खायितञ्च नामेतं सब्बं मतसरीरकेयेव वेदितब्बं, न जीवमानेति योजेतब्बं.

१५. जीवमाने कथन्ति आह ‘‘छिन्दित्वा पना’’तिआदि. तत्थ वणसङ्खेपतोति वणसङ्गहतो. तस्मिन्ति यत्थ ठितं निमित्तं उप्पाटितं, तस्मिं पदेसे. एत्थ दुतियो पन-सद्दो इध अदस्सितं अट्ठकथायं आगतनयेन विञ्ञायमानं अत्थविसेसं जोतेति. अट्ठकथायहि ‘‘यदिपि निमित्तं सब्बसो खायितं, छविचम्मम्पि नत्थि, निमित्तसण्ठानं पञ्ञायति, पवेसनं जायति, पाराजिकमेवा’’ति एवं अजीवमाने वुत्तविनिच्छयानुसारेन जीवमानेपि छविचम्ममत्तं चे सब्बसो उप्पाटितं, निमित्तसण्ठानं पञ्ञायति, पवेसनक्खमं होति, तत्थ सेवन्तस्स पाराजिकमेवाति विञ्ञायमानमत्थं जोतेतीति वुत्तं होति.

१६. ततो ¶ निमित्ततोति सम्बन्धो. पतितायाति पतितायं, अयमेव वा पाठो. निमित्ततोति निमित्तप्पदेसतो पतितायं मंसपेसियन्ति सम्बन्धो. छिन्दित्वा वा तच्छेत्वा वा पतितायं तस्सं निमित्तमंसपेसियन्ति अत्थो. मेथुनरागेन उपक्कमन्तस्स दुक्कटं विनिद्दिसेति योजना.

१७. ‘‘नखपिट्ठिप्पमाणेपी’’तिआदिगाथाय ‘‘छिन्दित्वा’’तिआदिका अट्ठकथा आनेत्वा सम्बन्धितब्बा. सतीति एत्थ ‘‘अवसिट्ठे’’ति पाठसेसो. जीवमानेति एत्थ ‘‘सरीरे’’ति पाठसेसो. जीवमानसरीरे पन छिन्दित्वा तच्छेत्वा निमित्ते उप्पाटिते नखपिट्ठिप्पमाणेपि मंसे, न्हारुम्हि वा अवसिट्ठे सति मेथुनं पटिसेवन्तो पराजितोति योजना.

१८. ‘‘कण्णच्छिद्दक्खी’’ति गाथाय ‘‘जीवमाने’’ति आनेत्वा सम्बन्धितब्बं, ‘‘सरीरे’’ति ¶ पाठसेसो. ‘‘अस्सगोमहिसादीन’’न्तिआदिना अस्सादीनं वक्खमानत्ता पारिसेसतो ‘‘मनुस्सान’’न्ति लब्भति. मनुस्सानं जीवमानसरीरे कण्ण…पे… वणेसु वाति योजना. वत्थिकोसेति मुत्तपथब्भन्तरे. वणेसु वाति सत्थकादीहि कतवणेसु. अङ्गजातन्ति तिलमत्तम्पि अङ्गजातेकदेसं. रागाति मेथुनरागेन.

१९. अवसेससरीरस्मिन्ति कण्णच्छिद्दादियथावुत्तसरीरावयववज्जितसरीरप्पदेसे. तेनाह ‘‘उपकच्छूरुकादिसू’’ति उपकच्छं नाम बाहुमूलन्तरं. ऊरुकादिसूति ऊरुवेमज्झादीसु. आदि-सद्देन वुत्तावसेसं सरीरप्पदेसं सङ्गण्हाति. ‘‘अङ्गजात’’न्ति आनेत्वा सम्बन्धितब्बं. ‘‘पवेसेत्वा’’ति सामत्थिया लब्भति, अङ्गजातं तिलबीजमत्तं पवेसेत्वाति ¶ वुत्तं होति. वसा मेथुनरागस्स सेवमानस्साति मेथुनरागेन वीतिक्कमन्तस्साति अत्थो. ‘‘सन्थतेना’’तिआदिना वुत्तप्पकारो एत्थापि योजेतब्बो.

२०. अस्सगोमहिसादीनन्ति आदि-सद्देन गोकण्णगवजादयो सङ्गहिता. अस्सादयो पाकटायेव. ‘‘मतान’’न्ति वक्खमानत्ता ‘‘जीवमानान’’न्ति सामत्थिया लब्भति. सेवन्ति ‘‘वसा मेथुनरागस्सा’’ति अनुवत्तमानत्ता मेथुनरागवसेन तिलबीजमत्तम्पि अङ्गजातप्पदेसं पवेसेन्तो थुल्लच्चयं फुसेति योजना. एत्थ च ‘‘ओट्ठगद्रभदन्तीनं, अस्सगोमहिसादिन’’न्ति पाठेन भवितब्बं. एवञ्हि सति अट्ठकथावसाने निद्दिट्ठेन पकारत्थवाचिना आदि-सद्देन थुल्लच्चयवीतिक्कमारहनासावत्थिकोसवन्तो अवुत्ता सब्बेपि सत्ता गय्हन्ति. ‘‘अस्सगोमहिसादीन’’न्ति पठमपादावसाने निद्दिट्ठेन आदि-सद्देन ओट्ठगद्रभदन्तीनम्पि सङ्गहो होतीति तेसं पुनवचनं निरत्थकं सियाति.

२१. तथा सेवमानस्स दुक्कटन्ति सम्बन्धो. सब्बतिरच्छानन्ति तिरियं अञ्चन्ति वड्ढन्तीति तिरच्छा, सब्बे च ते तिरच्छाचाति सब्बतिरच्छा, तेसं सब्बतिरच्छानं. ‘‘तथा’’ति इमिना ‘‘वसा मेथुनरागस्सा’’तिआदीनं परामट्ठत्ता सब्बतिरच्छानानं अक्खिआदीसु तिलबीजमत्तम्पि अङ्गजातप्पदेसं मेथुनरागेन पवेसेन्तस्स दुक्कटन्ति वुत्तं होति. एत्थापि सन्थतादिविकप्पे निद्दोसभावो न सक्का वत्तुन्ति तम्पि योजेतब्बं.

२२. एवं तिरच्छानानं जीवमानकसरीरे लब्भमाना आपत्तियो दस्सेत्वा तेसंयेव मतसरीरेपि ¶ सम्भवनकआपत्तियो दस्सेतुमाह ‘‘तेस’’न्तिआदि. ‘‘तेस’’न्ति ¶ इमिना मनुस्सतिरच्छानगतानं गहणन्ति वदन्ति. मनुस्सानं मतामतसरीरे पाराजिकथुल्लच्चयदुक्कटक्खेत्तेसु तिस्सन्नं आपत्तीनं दस्सितत्ता, पुन गहणे पयोजनाभावा ते वज्जेत्वा अनुवत्तमानसब्बतिरच्छानन्ति इमिना योजेतब्बं, तेसं सब्बतिरच्छानगतानन्ति अत्थो. अल्लसरीरेसूति उद्धुमातकादिभावमसम्पत्तेसु अल्लमतसरीरेसु तिविधे खेत्तस्मिं असन्थते, सन्थते वा सति मेथुनरागस्स वसा सेवतो तिविधापि आपत्ति सियाति अनुवत्तमानपदेहि सह योजना.

तिविधे खेत्तस्मिन्ति मतमनुस्ससरीरे वुत्तनयेन अक्खायितयेभुय्यक्खायितभेदे मग्गत्तयसङ्खाते पाराजिकक्खेत्ते च येभुय्यक्खायितउपड्ढक्खायितभेदे तस्मिंयेव मग्गत्तयसङ्खाते च, अक्खायितयेभुय्यक्खायितभेदे कण्णच्छिद्दक्खिनासावत्थिकोसवणसङ्खाते च थुल्लच्चयक्खेत्ते उपड्ढक्खायितयेभुय्यक्खायितभेदे तस्मिंयेव कण्णच्छिद्दक्खिनासावत्थिकोसवणसङ्खाते च, अक्खायितयेभुय्यक्खायितउपड्ढक्खायित येभुय्यक्खायितभेदे अवसेससरीरसङ्खाते दुक्कटक्खेत्ते चाति तिविधेपि खेत्ते. सतीति विज्जमाने. सन्थते वा असन्थते वा मेथुनरागस्स वसा सेवतो यथारहं पाराजिकथुल्लच्चयदुक्कटसङ्खाता तिविधा आपत्ति भवेय्याति अत्थो.

एतेसमेव च उद्धुमातादिभावं सम्पत्ते सरीरे सन्थतादिवुत्तविकप्पयुत्तेसु तीसु मग्गेसु यत्थ कत्थचि मेथुनरागेन सेवतो आपज्जितब्बदुक्कटञ्च उद्धुमातादिसम्पत्ते सब्बत्थापि च दुक्कटन्ति मनुस्ससरीरे वुत्तनयेन विञ्ञातुं सक्काति इमस्मिं तिरच्छानगतसरीरे विसेसमत्तं दस्सेतुं ‘‘तेसं अल्लसरीरेसू’’तिआदीनं वुत्तत्ता दुक्कटं पुब्बे ¶ वुत्तनयेन वेदितब्बं. यथाह अट्ठकथायं ‘‘कुथितकुणपे पन पुब्बे वुत्तनयेनेव सब्बत्थ दुक्कट’’न्ति.

२३. बहि छुपन्तस्साति योजना. निमित्तं मुत्तकरणं. ‘‘इत्थिया’’ति सामञ्ञेन वुत्तेपि चतुत्थगाथाय ‘‘तिरच्छानगतित्थिया’’ति वक्खमानत्ता पारिसेसतो इमिना मनुस्सामनुस्सित्थीनमेव गहणं, इमिना अमनुस्सित्थियापि गहणस्स. इमिस्सानन्तरगाथाय इतो ‘‘इत्थिया’’ति अनुवत्तिते तत्रापि अमनुस्सित्थियापि गहणं सियाति तम्पि वज्जेत्वा कायसंसग्गसङ्घादिसेसस्स वत्थुभूतं मनुस्सित्थिमेव दस्सेतुं तत्थ वुत्तं ‘‘इत्थिया’’तिअधिकवचनमेव ञापकन्ति वेदितब्बं.

महाअट्ठकथायं ¶ (पारा. अट्ठ. १.५९-६०) ‘‘इत्थिनिमित्तं मेथुनरागेन मुखेन छुपति, थुल्लच्चय’’न्ति सामञ्ञेन वुत्तत्ता च धम्मक्खन्धके ‘‘न च भिक्खवे रत्तचित्तेन अङ्गजातं छुपितब्बं, यो छुपेय्य, आपत्ति थुल्लच्चयस्सा’’ति (महाव. २५२) सामञ्ञवचनतो च उद्धुमातादिभावमसम्पत्ताय अल्लमतमनुस्सित्थिया च अक्खायिते वा येभुय्यक्खायिते वा निमित्ते सति पाराजिकवत्थुभावतो तत्थापि बहि छुपन्तस्स थुल्लच्चयन्ति अयमत्थोपि मतामतविसेसं अकत्वा ‘‘इत्थिया’’ति इमिनाव सामञ्ञवचनेन गहेतब्बो.

२४. निमित्तेनाति अत्तनो अङ्गजातेन. मुखेनाति पकतिमुखेन. निमित्तं इत्थियाति जीवमानकमनुस्सित्थिया अङ्गजातं. यस्मा पन कायसंसग्गसिक्खापदविनीतवत्थूसु मतित्थिवत्थुम्हि मतित्थिया सरीरे कायसंसग्गरागेन यो छुपति, तस्स ‘‘अनापत्ति भिक्खु सङ्घादिसेसस्स, आपत्ति ¶ थुल्लच्चयस्सा’’ति (पारा. २८१) वुत्तत्ता मतमनुस्सित्थी न गहेतब्बा. तथेव यक्खिवत्थुम्हि कायसंसग्गरागेन यक्खिनिया सरीरं येन फुट्ठं, तस्स ‘‘अनापत्ति भिक्खु सङ्घादिसेसस्स, आपत्ति थुल्लच्चयस्सा’’ति वुत्तत्ता, इधेव उपरि दुतियसङ्घादिसेसे ‘‘पण्डके यक्खिपेतीसु, तस्स थुल्लच्चयं सिया’’ति (वि. वि. ३४१) वक्खमानत्ता च अमनुस्सित्थीपि न गहेतब्बा. तेन वुत्तं ‘‘जीवमानकमनुस्सित्थिया अङ्गजात’’न्ति. अन्तो पवेसेतुकामताय सति कायसंसग्गरागासम्भवतो ‘‘कायसंसग्गरागेना’’ति इमिना च बहि छुपितुकामता विञ्ञायतीति ‘‘बही’’ति अनुवत्तनं विनापि तदत्थो लब्भति. गरुकन्ति सङ्घादिसेसो.

२५. तथेव बहि छुपन्तस्साति योजना, अन्तो अप्पवेसेत्वा बहियेव छुपन्तस्साति वुत्तं होति. उभयरागेनाति कायसंसग्गरागेन, मेथुनरागेन वा. पुरिसस्सापीति जीवमानकपुरिसस्सपि. पि-सद्दो न केवलं वुत्तनयेन इत्थिया निमित्तं फुसन्तस्सेव आपत्ति, अथ खो पुरिसस्सापीति दीपेति. ‘‘निमित्त’’न्ति मुत्तकरणमेव वुच्चति. ‘‘जीवमानकपुरिसस्सा’’ति अयं विसेसो कुतो लब्भतीति चे? ‘‘कायसंसग्गरागेन वा मेथुनरागेन वा जीवमानकपुरिसस्स वत्थिकोसं अप्पवेसेन्तो निमित्तेन निमित्तं छुपति, दुक्कट’’न्ति इतो अट्ठकथावचनतो (पारा. अट्ठ. १.५९-६०) लब्भति.

२६. अचिरवतितरन्तानं गुन्नं पिट्ठिं अभिरुहन्ता छब्बग्गिया भिक्खू मेथुनरागेन अङ्गजातेन ¶ अङ्गजातं छुपिंसूति इमस्मिं वत्थुम्हि ‘‘न च भिक्खवे रत्तचित्तेन अङ्गजातं छुपितब्बं, यो छुपेय्य, आपत्ति थुल्लच्चयस्सा’’ति (महाव. २५२) आगतनयं दस्सेतुमाह ¶ ‘‘निमित्तेना’’तिआदि. एत्थापि ‘‘तथा’’ति इमस्सानुवत्तनतो ‘‘बही’’ति लब्भति. अत्तनो निमित्तेन तिरच्छानगतित्थिया निमित्तं मेथुनरागतो बहि छुपन्तस्स थुल्लच्चयं होतीति योजना.

२७. ‘‘मेथुनरागतो’’ति इमिना ब्यवच्छिन्नमत्थं दस्सेतुमाह ‘‘कायसंसग्गरागेना’’तिआदि. एत्थापि ‘‘कायसंसग्गरागेना’’तिवचनसामत्थिया बहि छुपनं वेदितब्बं. निमित्तस्साति पस्सावमग्गस्स. छुपनेति फुसने.

२८. तमावट्टकतेति एत्थ ‘‘तं आवट्टकते’’ति पदच्छेदो. आवट्टकतेति विवटे. ‘‘मुखे’’ति सम्बन्धिसद्दत्ता, अञ्ञस्स सम्बन्धिनो च अनिद्दिट्ठत्ता सुतानुलोमिकानं सुतसम्बन्धस्सेव बलवत्ता च पुरिमानन्तरगाथाय ‘‘तिरच्छानगतित्थिया मुखे’’ति किञ्चापि सुतस्सेव सम्बन्धो विञ्ञायति, तथापि इमाय गाथाय विनीतवत्थुम्हि (पारा. ७३) ‘‘अञ्ञतरो भिक्खु सिवथिकं गन्त्वा छिन्नसीसं पस्सित्वा वट्टकते मुखे अच्छुपन्तं अङ्गजातं पवेसेसी’’ति दस्सितछिन्नसीसवत्थुस्स सङ्गहितत्ता मनुस्समुखमेव गहेतब्बं सिया. तिरच्छानगतानं, पन अमनुस्सानञ्च मुखे तथा पवेसो निद्दोसोति वत्तुमसक्कुणेय्यत्ता तत्थापि इदमेव उपलक्खणन्ति पाराजिकप्पहोनकानं सब्बेसं मुखेति दट्ठब्बं. तं अङ्गजातं. तत्थ आवट्टकते पाराजिकप्पहोनकानं मुखे आकासगतं कत्वा कत्थचि अफुसापेत्वा नीहरन्तस्स उक्खिपन्तस्स दुक्कटन्ति योजना. अथ वा तिरच्छानानं आवट्टकते मुखेति योजेत्वा तदञ्ञसङ्गहो उपलक्खणवसेन कातब्बो.

२९. तथाति ¶ ‘‘आकासगतं कत्वा’’ति यथावुत्तप्पकारं परामसति. चतूहि पस्सेहीति सहत्थे करणवचनं. ‘‘पस्सेही’’ति सम्बन्धिसद्दत्ता ‘‘निमित्तस्सा’’ति सामत्थिया लब्भति. ‘‘इत्थिया’’ति सामञ्ञसद्दत्ता ‘‘सब्बस्सा’’ति पाठसेसो. जातिवाचकत्ता एकवचनं. ‘‘चतूहि पस्सेहि, हेट्ठिमत्तल’’न्ति च इमेसं सम्बन्धिपदस्स अनिद्देसेपि मेथुनपाराजिकाधिकारत्ता च सन्थतचतुक्कस्स अट्ठकथावसाने इमाय गाथाय सङ्गहितस्स इमस्स विनिच्छयस्स परियोसाने ‘‘यथा च इत्थिनिमित्ते वुत्तं, एवं सब्बत्थ लक्खणं वेदितब्ब’’न्ति (पारा. अट्ठ. १.६१-६२) निमित्तविनिच्छयस्सातिदेसस्स ¶ कतत्ता च सामत्थियेन ‘‘निमित्तस्सा’’ति लब्भति. इदमेव ‘‘पवेसेत्वा’’ति एतस्स आधारवसेन गहेतब्बं. ‘‘अङ्गजात’’न्ति अनुवत्तति.

एवं वाक्यं पूरेत्वा ‘‘यथा आवट्टकते मुखे अङ्गजातं पवेसेत्वा तमाकासगतं कत्वा नीहरन्तस्स दुक्कटं, तथा सब्बस्सा इत्थिया निमित्ते पस्सावमग्गसङ्खाते अङ्गजातं पवेसेत्वा तस्स चतूहि पस्सेहि सह हेट्ठिमत्तलं चत्तारो पस्से, हेट्ठिमत्तलञ्च अच्छुपन्तं आकासगतं कत्वा नीहरन्तस्स दुक्कट’’न्ति योजेत्वा अत्थो वत्तब्बो.

३०. उप्पाटितोट्ठमंसेसूति उप्पाटितं ओट्ठमंसं येसन्ति विग्गहो. तेसु दन्तेसु. बहिनिक्खन्तकेसु वाति पकतिया ओट्ठमंसतो बहि निक्खमित्वा ठितेसु वा दन्तेसु. वायमन्तस्साति अङ्गजातेन छुपन्तस्स.

३१. अट्ठिसङ्घट्टनं कत्वाति निमित्तमंससन्निस्सयानि अट्ठीनि सङ्घट्टेत्वा. मग्गेति अट्ठिसङ्घातमये मग्गे. दुविधरागतोति ¶ मेथुनरागेन वा कायसंसग्गरागेन वा. वायमन्तस्साति अङ्गजातं पवेसेत्वा चारेन्तस्स.

३२. आलिङ्गन्तस्साति परिस्सजन्तस्स. हत्थगाहादीसु हत्थो नाम कप्परतो पट्ठाय याव अग्गनखा. हत्थस्स, तप्पटिबन्धस्स च गहणं हत्थग्गाहो. अवसेससरीरस्स, तप्पटिबन्धस्स च परामसनं परामासो. निस्सन्देहे पन ‘‘मातुगामस्स सरीरस्स वा तप्पटिबन्धस्स वा हत्थेन गहणं हत्थग्गाहो’’ति वुत्तं, तं अट्ठकथाय न समेति. तस्मा यथावुत्तनयस्सेव अट्ठकथासु आगतत्ता सोयेव सारतो पच्चेतब्बो. परामसेपि ‘‘हत्थेन सरीरस्स, तप्पटिबन्धस्स च परामसन’’न्ति यं तत्थ वुत्तं, तम्पि न युज्जति. अवसेससरीरावयवेनापि परामसतो दुक्कटमेव होतीति. चुम्बनादीसूति आदि-सद्देन वेणिग्गाहादिं सङ्गण्हाति. ‘‘अयं नयो’’ति एतेन ‘‘इत्थिया मेथुनरागेन हत्थग्गाहादीसु दुक्कट’’न्ति इममत्थं अतिदिसति.

३३. मनुस्सामनुस्सेहि अञ्ञेसु तिरच्छानगतेसु हेट्ठिमपरिच्छेदेन मेथुनधम्मपाराजिकवत्थुभूते ¶ सत्ते दस्सेतुमाह ‘‘अपदे’’तिआदि. ‘‘अपदे, द्विपदे, चतुप्पदे’’ति इमेहि विसेसनेहि विसेसितब्बं ‘‘सत्तनिकाये’’ति इदं वत्तब्बं. अपदे सत्तनिकाये. अहयोति थलचरेसु उक्कट्ठपरिच्छेदतो हत्थिगिलनके अजगरे उपादाय हेट्ठिमपरिच्छेदेन नागा च. मच्छाति जलजेसु उपरिमकोटिया पञ्चसतयोजनिकानि तिमिरपिङ्गलादिमच्छे उपादाय हेट्ठिमन्ततो पाठीनपावुसादयो मच्छा च. द्विपदे सत्तनिकाये. कपोताति उपरिमकोटिया गरुळे उपादाय हेट्ठिमन्ततो कपोताकपोतपक्खी च. पारावताति केचि. चतुप्पदे सत्तनिकाये. गोधाति उपरिमकोटिया हत्थिं ¶ उपादाय हेट्ठिमन्ततो गोधा चाति इमे सत्ता. हेट्ठाति हेट्ठिमपरिच्छेदतो. पाराजिकस्सवत्थूति मेथुनधम्मपाराजिकस्स वत्थूनीति पाठसेसो.

३४. सेवेतुकामता मेथुनसेवाय तण्हा, ताय मेथुनरागसङ्खाताय सम्पयुत्तं चित्तं सेवेतुकामताचित्तं. मग्गेति वच्चमग्गादीनं अञ्ञतरे मग्गे. मग्गस्स अत्तनो मुत्तकरणस्स पवेसनं. पब्बज्जाय, पातिमोक्खसंवरसीलस्स वा अन्ते विनासे भवोति अन्तिमो, पाराजिकापन्नो पुग्गलो, तस्स वत्थु अन्तिमभावस्स कारणत्ता पाराजिकापत्ति अन्तिमवत्थूति वुच्चति, तदेव पठमं चतुन्नं पाराजिकानं आदिम्हि देसितत्ता पठमन्तिमवत्थु, तस्स पठमन्तिमवत्थुनो, पठमपाराजिकस्साति वुत्तं होति.

३५. सामन्ता आपत्तिसमीपे भवं सामन्तं, पाराजिकापत्तिया समीपे पुब्बभागे भवन्ति अत्थो. सेसानं पन तिण्णम्पीति अवसेसानं अदिन्नादानादीनं तिण्णं पाराजिकधम्मानं. थुल्लच्चयं सामन्तमिति उदीरितन्ति सम्बन्धो. कथमुदीरितं? ‘‘फन्दापेति, आपत्ति थुल्लच्चयस्सा’’ति (पारा. ९४) दुतिये, ‘‘मनुस्सं उद्दिस्स ओपातं खणति, पतित्वा दुक्खवेदनं उप्पादेति, आपत्ति थुल्लच्चयस्सा’’ति, ततिये, ‘‘पटिविजानन्तस्स आपत्ति पाराजिकस्स, अप्पटिविजानन्तस्स आपत्ति थुल्लच्चयस्सा’’ति (पारा. २१५) चतुत्थे समुदीरितं.

एत्थ च चतुत्थपाराजिकस्स थुल्लच्चयापत्तिया सामन्तापत्तिभावो यस्स उत्तरिमनुस्सधम्मं समुल्लपति, सो याव न पटिविजानाति, ताव समुल्लपनपच्चया थुल्लच्चयापत्तिसम्भावे, समुल्लपिते तस्मिं समुल्लपितमत्थे पटिविजानन्ते पाराजिकापत्तिसम्भावे च युज्जति. सो ¶ च ‘‘अप्पटिविजानन्तस्स वुत्ते थुल्लच्चय’’न्ति इमिनाव सङ्गहितोति दट्ठब्बं.

३६. अजानन्तस्स ¶ वातूपत्थद्धं अङ्गजातं दिस्वा अत्तनो रुचिया वीतिक्कमं कत्वा मातुगामेसु गच्छन्तेसु अजानमानस्स, महावने दिवा निद्दुपगतभिक्खुनो विय परेहि किरियमानं अजानन्तस्साति वुत्तं होति. तथेवाति इमिना ‘‘अनापत्तीति ञातब्ब’’न्ति इदमाकड्ढति. अस्सादियन्तस्साति भिक्खुपच्चत्थिकेसु अभिभवित्वा वीतिक्कमं करोन्तेसु च कारापेन्तेसु च, सप्पमुखं पविट्ठकाले विय उत्तसित्वा अनधिवासेन्तस्स च, महावने दिवाविहारोपगतभिक्खुनो विय परोपक्कमं ञत्वापि काये आदित्तअग्गिना विय उत्तसित्वा अनधिवासेन्तस्साति अत्थो. ‘‘अजानन्तस्सा’’ति एत्थ अपि-सद्दो योजेतब्बो. बुद्धसासने खीरसागरसलिलनिम्मले सब्बपठमं पातुभूतत्ता आदि च तं वीतिक्कमसङ्खातं कम्मञ्चाति आदिकम्मं, तं एतस्स अत्थीति आदिकम्मी, एत्थ सुदिन्नो भिक्खु, तस्स आदिकम्मिनोति गहेतब्बो. उपरिपि इमेसं पदानं आगतागतट्ठाने इमिनाव नयेन अत्थो वेदितब्बो. इध च उपरि सब्बसिक्खापदेसु च निदानादिवसेन सत्तरसविधो साधारणविनिच्छयो पकिण्णके सङ्खेपतो, उत्तरे वित्थारतो च आवि भविस्सति. तस्मा एत्थ न दस्सितोति वेदितब्बं.

३७-३८. विनयेति विनयपिटके. अनयूपरमेति नेति पापेति सीलसम्पदं समाधिसम्पदं पञ्ञासम्पदञ्चाति नयो, कायवचीद्वारेहि अवीतिक्कमसङ्खातो संवरो, तप्पटिपक्खो असंवरो अनयो नाम, तस्स उपरमो निवत्ति एत्थाति अनयूपरमो, विनयो, तत्थ अनयूपरमे विनये.

ततो ¶ एव परमे उक्कट्ठे. अनयस्स वा उपरमे निवत्तने परमे उक्कट्ठेति गहेतब्बं. परा उत्तमा मा सासनसिरी एत्थाति परमो, विनयोति एवम्पि गहेतब्बं. ‘‘विनयो नाम सासनस्स आयू’’ति (दी. नि. अट्ठ. १.पठमसङ्गीतिकथा; पारा. अट्ठ. १.पठमसङ्गीतिकथा; खु. पा. अट्ठ. ५.महासङ्गीतिकथा; थेरगा. अट्ठ. १.२५१) वचनतो उत्तमसासनसम्पत्तियुत्तेति अत्थो.

सुजनस्साति सोभणो जनो सुजनो, सिक्खाकामो अधिसीलसिक्खाय सोभमानो पियसीलो कुलपुत्तो, तस्स नयने नयनूपमे विनयेति सम्बन्धो. अनयूपरमत्ता, परमत्ता च सुजनस्स कुलपुत्तस्स नयने नयनूपमे. सुखानयनेति लोकियलोकुत्तरभेदं सुखं आनेतीति सुखानयनं, तस्मिं. इदञ्च ‘‘नयने’’ति एतस्स विसेसनं.

एतं ¶ विसेसनं किमत्थन्ति चे? उपमाभावेन गहितपकतिनयनतो इध सम्भवन्तं विसेसं दस्सेतुन्ति वेदितब्बं. कतरो सो विसेसोति चे? पकतिनयनं रागदोसादिकिलेसूपनिस्सयो हुत्वा दिट्ठधम्मिकसम्परायिकदुक्खस्स च पच्चयो होति. इदं पन विनयनयनं इमस्स कुलपुत्तस्स एवं अहुत्वा एकंसेन मोक्खावहनसुखस्सेव पच्चयो होतीति इमस्स विसेसस्स दस्सनत्थं. यथा विनयमविराधेत्वा पटिपज्जनेन सिज्झनकसीलसंवरमूलकअविप्पटिसारादिअनुपादिसेसपरिनिब्बानावसा- नफलसम्पत्तिवसेन उप्पज्जनकलोकियलोकुत्तरसुखावहने विनयेति वुत्तं होति.

पधानरतोति एत्थ ‘‘अपी’’ति पाठसेसो. पधाने विनयाभियोगे रतोपि, विनये अज्झायनसवनचिन्तनादिवसेन वायमन्तोपीति अत्थो. अथ वा ‘‘विरागो सेट्ठो धम्मान’’न्ति (ध. प. २७३; नेत्ति. १७०; कथा. ८७२) वचनतो पधानं निब्बानं, तस्मिं रतोति अत्थो ¶ . सारमतेति ‘‘सार’’न्ति अधिमते. अथ वा सारं अफेग्गुमतं महाविहारवासीनं आचरियमतं एत्थाति ‘‘सारमतो’’ति विनयविनिच्छयो वुत्तो, तस्मिं. इधाति इमस्मिं विनयविनिच्छये. रतोति अच्चन्ताभिरतो. ‘‘न रतो’’ति एत्थ न-कारं ‘‘रमते’’ति ओसानपदेन योजेत्वा यो पन न रमतेति सम्बन्धो.

थेरनवमज्झिमभिक्खुभिक्खुनीनं अन्तरे यो पन पुग्गलो निच्चपरिवत्तनसवनानुस्सरणचिन्तनवसेन न रमते न कीळति, सो पुग्गलो विनये पधानरतोपि विनयपिटके अज्झयनसवनादिवसेन युत्तपयुत्तोपि पटु होति किं, न होतेवाति दस्सेति. विनयपिटके पाटवमाकङ्खन्तेहि पठमं तावेत्थ सक्कच्चं अभियोगो कातब्बोति अधिप्पायो.

इममेवत्थं आनिसंसपारंपरियपयोजनेन सह दस्सेतुमाह ‘‘इम’’न्तिआदि. इमन्ति वुच्चमानं विनयविनिच्छयं, ‘‘अवेदी’’ति इमिना सम्बन्धो. ‘‘यो’’ति पाठसेसो. यो कुलपुत्तो सतिसम्पजञ्ञसद्धासम्पन्नो इमं विनयविनिच्छयं सम्मा अवेदि अञ्ञासि. किं भूतन्ति आह ‘‘हितविभावन’’न्ति. लोकियलोकुत्तरसम्पत्तिया मूलसाधनत्ता सीलमिध हितं नाम, तं विभावेति पकासेतीति हितविभावनोति विग्गहो. ‘‘सीले पतिट्ठाय…पे… विजटये जट’’न्ति (सं. नि. १.२३, १९२; मि. प. २.१.९) वुत्तत्ता सब्बकिलेसजटाविजटनलोकुत्तरञाणस्स पदट्ठानसोपचारसाभिञ्ञारूपारूपअट्ठसमाधीनं पदट्ठानताय सब्बलोकियलोकुत्तरगुणसम्पदानं ¶ मूलभूतेसु चतुपारिसुद्धिसीलेसु पधानं पातिमोक्खसंवरसीलं, तप्पकासकत्ता अयं विनयविनिच्छयो ‘‘हितविभावनो’’ति वुत्तो.

भावनन्ति ¶ भावीयति पुनप्पुनं चेतसि निवेसीयतीति भावनो, भावनीयोति वुत्तं होति. हितविभावकत्तायेव हितत्थीहि पुनप्पुनं चित्ते वासेतब्बोति वुत्तं होति, तं एवंविधं विनयविनिच्छयं. सुरसम्भवन्ति रसीयति अस्सादीयतीति रसो, सद्दरसो अत्थरसो करुणादिरसो विमुत्तिरसो च, सोभणो रसो एतस्साति सुरसो, विनयविनिच्छयो, तं सुरसं. भवं भवन्तं, सन्तन्ति वुत्तं होति, सुरसं समानं, सुरसं भूतन्ति अत्थो. किं वुत्तं होति? ‘‘सिलेसो पसादो समता मधुरता सुखुमालता अत्थब्यत्ति उदारता ओजो कन्ति समाधी’’ति एवं वुत्तेहि कविजनेहि अस्सादेतब्बसिलेसादिदसविधसद्दजीवितगुणसङ्खातसद्दरससम्पत्तीहि च सभावाख्यानं उपमा रूपकं दीपकं आवुत्तीति एवमादिक्कमनिद्दिट्ठपञ्चतिंसअत्थालङ्कारेसु अनुरूपसभावाख्यानादिप्पधानअत्थालङ्कारसङ्खातअत्थरससम्पत्तीहि च यथासम्भवं पकासितब्बकरुणारसअब्भुतरससन्तरसादीहि च युत्तत्ता सुरसं इमं विनयविनिच्छयन्ति वुत्तं होति.

अथ वा इमिना पकरणेन पधानतो विधीयमानपातिमोक्खसंवरसीलस्स एकन्तेन समाधिसंवत्तनिकत्ता समाधिस्स च पञ्ञाय पदट्ठानत्ता पञ्ञाय च निब्बानपापनतो मूलकारणं हुत्वा कमेन निब्बानामतफलरससम्पदायकं इमं विनयविनिच्छयं परमस्सादनीयरूपेन धितिविमुत्तिरसेन सुरसभूतन्ति वुत्तं होतीति च वेदितब्बं. सम्भवन्ति एत्थ सं वुच्चति सुखं कायिकं चेतसिकञ्च, तं भवति एतस्माति सम्भवो, विनयविनिच्छयो, तं, कायचित्तसुखानं मूलकारणभूतं, वुत्तनयेन सुरसत्ता च यथावुत्तरससम्पदसारमहुस्सवेन सम्भूतमानसिकसुखस्स, तंसमुट्ठानरूपनिस्सयकायिकसुखस्स च पभवभूतन्ति अत्थो. एत्तावता ¶ इमस्स विनयविनिच्छयस्स सम्मा विञ्ञातब्बताय कारणं दस्सितं होति.

एवं नानागुणरतनाकरं इमं विनयविनिच्छयं सम्पजानन्तो सो कुलपुत्तो किं होतीति चे? पालिना उपालिना समो भवति. पालिनाति सासनं पालेतीति ‘‘पालो’’ति विनयो वुच्चति, वुत्तञ्हि ‘‘विनयो नाम सासनस्स आयू’’ति (दी. नि. अट्ठ. १.पठमसङ्गीतिकथा; पारा. अट्ठ. १.पठमसङ्गीतिकथा; खु. पा. अट्ठ. ५.महासङ्गीतिकथा; थेरगा. अट्ठ. १.२५१) सो ¶ अस्स अत्थीति पाली, परियत्तिपटिपत्तिपटिवेधवसेन तिविधसासनस्स जीवितभूतविनयपञ्ञत्तिसङ्खातसासनधरत्ता ‘‘पाली’’ति लद्धनामेन उपालिना, ‘‘एतदग्गं भिक्खवे मम सावकानं भिक्खूनं विनयधरानं यदिदं उपाली’’ति (अ. नि. १.२१९, २२८) चतुपरिसमज्झे निसिन्नेन सद्धम्मवरचक्कवत्तिना सम्मासम्बुद्धेन मुखपदुमं विकासेत्वा पकासितएतदग्गट्ठानेन विसेसतो सायनरक्खनकभावेन पटिलद्धपालीतिनामधेय्येन उपालिमहाथेरेन समो होतीति वुत्तं होति.

कस्मिं विसये समो भवतीति चे? सासने. सासनेति यथावुत्ते तिविधे सासने, तत्रापि थावरजङ्गमसकलवत्थुवित्थाराधरमण्डलसदिसे पटिपत्तिपटिवेधद्वयधारे परियत्तिसासने, तत्थापि विनयकथाधिकारत्ता लब्भमाने विनयपिटकसङ्खातपरियत्तिसासनेकदेसे समो भवतीति अत्थो.

किंभूते सासने? मारबलिसासने. मारस्स बलि मारबलि, मारगोचरो, तस्स सासनं हिंसकं मारबलिसासनं, तस्मिं. खन्धादीसु पञ्चसु मारेसु पधानभूतकामरागादिपभवकिलेसमारस्स गोचरभावेन बलिसङ्खातइत्थिसरीरादिनिस्सयफोट्ठब्बादिविसयस्स परिच्चजापनत्थं ‘‘यो पन भिक्खु…पे… असंवासो’’तिआदिना (पारा. ४४) नयेन वुत्तत्ता तस्स ¶ मारबलिस्स हिंसकं होतीति मारबलिसासननामधेय्यविनयपञ्ञत्तिसङ्खातसासनेति अत्थो.

अथ वा ‘‘बळिसेनपि जालेन, हत्थेन कुमिनेन वा’’ति उदकट्ठकथाय वक्खमानत्ता बळिस-सद्देन मच्छमारणकण्टकमाह, तं मारस्स बळिसं असति खिपति वज्जेतीति मारबळिसासनं, तस्मिं, ‘‘समन्तपासो मारस्सा’’ति वुत्तत्ता संसारसागरे परिवत्तमानकसंकिलेसदासपुथुज्जनसङ्खातमच्छे गण्हितुं मारमहाकेवट्टेन पक्खित्तबळिससङ्खातइत्थिरूपसद्दादिपञ्चकामगुणा- मिसावुतकामरागादिकिलेसमहाबळिसं तदङ्गप्पहानवीतिक्कमप्पहानादिवसेन पजहन्ते विनयपञ्ञत्तिसङ्खाते सासनेति अधिप्पायो.

एत्थ च सारमते इध इमस्मिं विनयविनिच्छये यो पन न रमते, सो पुग्गलो अनयूपरमे ¶ ततो एव परमे उत्तमे सुजनस्स सुखानयने नयने नयनुपमे विनये रतो अभिरतो पधानरतोपि विनये अज्झायनादीसु योगमापज्जन्तोपि पटु होति पटुतरो होति किं, न होतेव. तस्मा विनये पाटवत्थिना एत्थेव सक्कच्चाभियोगो कातब्बोति सङ्खेपतो साधिप्पाया अत्थयोजना वेदितब्बा. अथ वा पधाने चतुब्बिधे सम्मप्पधाने वीरिये रतो अभिरतो यो पन नरो सारमते इध इमस्मिं विनयविनिच्छये यतो रमते, अतो तस्मा सो अनयूपरमे सुजनस्स सुखानयने विनये पटु होति कुसलो होतीति योजनाति नो खन्ति.

हितविभावनं हितप्पकासकं भावनं भावनीयं आसेवितब्बं सुरसम्भवं सुरसं समानं सुरसं भूतं सम्भवं सुखहेतुकं इमं विनयविनिच्छयं यो अवेदि अञ्ञासि, सो पुग्गलो मारबळिसासने मारविसयप्पहानकरे, अथ वा मारबळिसस्स ¶ मारस्स वत्थुकामामिसावुतकिलेसकामबळिसस्स असने वज्जमाने सासने तिविधेपि जिनसासने, तत्थापि पटिपत्तिपटिवेधानं पतिट्ठानभूते परियत्तिसासने, तत्रापि सकलसासनस्स जीवितसमाने विनयपञ्ञत्तिसङ्खातपरियत्तिसासनेकदेसे पालिना विनयपरियत्तियं एतदग्गे ठपनेन सासनपालने तंमूलभावतो पालसङ्खातविनयपरियत्तिया पसत्थतरेन उपालिना उपालिमहाथेरेन समो भवतीति योजना.

इति विनयत्थसारसन्दीपनिया

विनयविनिच्छयवण्णनाय

पठमपाराजिककथावण्णना निट्ठिता.

दुतियपाराजिककथावण्णना

३९. इदानि दुतियं पाराजिकविनिच्छयं दस्सेतुमाह ‘‘आदियन्तो’’तिआदि. तत्थ ‘‘थेय्यचित्तेना’’ति पाठसेसो. सो च पच्चत्तेकवचनन्तेहि सब्बपदेहि योजेतब्बो, थेय्यचित्तेन आदियन्तो पराजितोति सम्बन्धो. परसन्तकं आरामादिं अभियुञ्जित्वा सामिकं पराजेत्वा थेय्यचित्तेन गण्हन्तो तदत्थाय कते पुब्बपयोगे दुक्कटं, सामिकस्स विमतुप्पादने थुल्लच्चयञ्च ¶ आपज्जित्वा तस्स च अत्तनो च धुरनिक्खेपेन पातिमोक्खसंवरसीलसम्पत्तिया अदायादो हुत्वा पराजितो होतीति वुत्तं होति.

‘‘तथा’’ति च ‘‘अपी’’ति च ‘‘पराजितो’’ति च ‘‘थेय्यचित्तेना’’ति इमिना सह एकतो कत्वा ‘‘हरन्तो’’तिआदीहि चतूहिपि पदेहि योजेतब्बं. थेय्यचित्तेन हरन्तोपि तथा पराजितोति योजना सीसादीहि परसन्तकं भण्डं हरन्तो थेय्यचित्तेन भण्डस्स आमसने ¶ दुक्कटञ्च फन्दापने थुल्लच्चयञ्च आपज्जित्वा सीसतो खन्धोहरणादिपयोगं करोन्तोपि तथा पराजितो होतीति अत्थो.

थेय्यचित्तेन अवहरन्तोपि तथा पराजितोति योजना. अयं पनेत्थ अत्थो – अञ्ञेहि सङ्गोपनादिं सन्धाय अत्तनि उपनिक्खित्तभण्डं ‘‘देहि मे भण्ड’’न्ति चोदियमानो ‘‘न मया गहित’’न्तिआदिना मुसा वत्वा थेय्यचित्तेन गण्हन्तोपि तस्स विमतुप्पादने थुल्लच्चयमापज्जित्वा तथेव धुरनिक्खेपेन पराजितो होतीति. ‘‘नाहं अग्गहेसि’’न्तिआदिना अवजानित्वा पटिक्खिपित्वा हरन्तो ‘‘अवहरन्तो’’ति वुत्तो.

थेय्यचित्तेन इरियापथं विकोपेन्तोपि तथा पराजितोति योजना. यं पन अञ्ञेसं भण्डहरणकमनुस्सादीनमञ्ञतरं ‘‘तेन भण्डेन सह गण्हामी’’ति भण्डं हरन्तं थेय्यचित्तेन निवारेत्वा अत्तना इच्छितदिसाभिमुखं कत्वा तस्स पकतिइरियापथं विकोपेन्तोपि पठमपादुद्धारेन थुल्लच्चयमापज्जित्वा दुतियपदवारातिक्कमेन तथेव पराजितो होतीति अत्थो.

थेय्यचित्तेन ठाना चावेन्तोपि तथा पराजितोति योजना. थलादीसु ठितं भण्डं थेय्यचित्तेन अवहरितुकामताय ठितट्ठानतो अपनेन्तोपि दुतियपरियेसनादीसु आमसनावसानेसु सब्बेसुपि पयोगेसु दुक्कटानि च फन्दापने थुल्लच्चयञ्च आपज्जित्वा उपरि वक्खमानप्पकारेसु विय ठितट्ठानतो केसग्गमत्तम्पि अपनेन्तो तथेव पराजितो होतीति अत्थो.

एवमेताय गाथाय ‘‘आदियेय्य हरेय्य अवहरेय्य इरियापथं विकोपेय्य ठानाचावेय्य सङ्केतं वीतिनामेय्या’’ति ¶ (पारा. ९२) पदभाजनागतेसु छसु पदेसु आदो पञ्च पदानि सङ्गहेत्वा ¶ छट्ठं पदं कस्मा न सङ्गहितन्ति चे? अयं गाथा न तंपदभाजनं दस्सेतुं वुत्ता, अथ खो तेसं पदानं विनिच्छयं सन्धाय अट्ठकथासु (पारा. अट्ठ. १.९२) वुत्तपञ्चवीसतिअवहारे दस्सेतुं तदवयवभूतपञ्चपञ्चकानि दस्सेतुकामेन वुत्ता, तस्मा एत्थ छट्ठं पदं न वुत्तन्ति दट्ठब्बं. अथ वा वक्खमाने ततियपञ्चके निस्सग्गियावहारपदेन, पञ्चमपञ्चके परिकप्पावहारपदेन च सङ्गय्हमानत्ता एत्थ नानेकभण्डपञ्चकद्वयं असङ्करतो दस्सेतुं छट्ठं पदं न गहितन्ति वेदितब्बं.

४०. इमस्मिं अदिन्नादानपाराजिके वत्थुम्हि ओतिण्णे कत्तब्बविनिच्छयस्स पञ्चवीसतिअवहारानं अङ्गानि होन्ति, ते च नानाभण्डपञ्चकं एकभण्डपञ्चकं साहत्थिकपञ्चकं पुब्बपयोगपञ्चकं थेय्यावहारपञ्चकन्ति निद्दिट्ठा पञ्चपञ्चकभेदा, तत्थ इमाय गाथाय नानेकभण्डपञ्चकद्वयप्पभेदे दस अवहारे सङ्गहेत्वा अवसेसपञ्चकत्तयं दस्सेतुं ‘‘तत्था’’ति आरद्धं. तत्थ तत्थाति तिस्सं गाथायं. नानेकभण्डानन्ति नाना, एको च भण्डो येसन्ति विग्गहो. सविञ्ञाणकअविञ्ञाणकभण्डवसेन नानाभण्डपञ्चकञ्च सविञ्ञाणकभण्डवसेनेव एकभण्डपञ्चकञ्च वेदितब्बं. पञ्च परिमाणा येसन्ते पञ्चका, तेसं. अवहाराति अवहरणानि, चोरकम्मानीति वुत्तं होति. एतेति अनन्तरगाथाय ‘‘आदियन्तो’’तिआदिना निद्दिट्ठा आदियन्तादयो. पटिपत्तिसन्ताने विसेसं विनिच्छयं भावेति उप्पादेतीति विभावी, विनयधरो, तेन विभाविना. विञ्ञातब्बाति परेसं आरामादिसविञ्ञाणकवत्थूनि वा दासमयूरादिं केवलं सविञ्ञाणकवत्थुमत्तं वा अवहरितुं कता यथावुत्तसरूपा आदियनादयो ठानाचावनपरियोसाना ¶ पञ्च अवहारा यथावुत्तनानाभण्डएकभण्डविसया हुत्वा पवत्तन्तीति नानाभण्डपञ्चकं एकभण्डपञ्चकन्ति दस अवहारा भवन्तीति विनयधरेन ओतिण्णस्स वत्थुनो विनिच्छयोपकारकत्ता तथतो ञातब्बाति अत्थो.

४१. एवं पञ्चवीसति अवहारे दस्सेतुं वत्तब्बेसु पञ्चसु पञ्चकेसु नानेकभण्डपञ्चकानि द्वे दस्सेत्वा इदानि अवसेसपञ्चकत्तयं दस्सेतुमाह ‘‘साहत्था’’तिआदि. तत्थ साहत्थोति सको हत्थो, तेन निब्बत्तो, तस्स वा सम्बन्धीति साहत्थो, अवहारो, चोरेन सहत्था कतो अवहारोति अत्थो. आणत्तिको चेवाति आणत्तिया निब्बत्तो आणत्तिको, अवहारो, चोरस्स ‘‘इमं नाम भण्डं गण्हा’’ति यस्स कस्सचि आणापनेन ¶ सिद्धो अवहारो च. निस्सग्गोति निस्सज्जनं निस्सग्गो, अवहारो, सुङ्कघातट्ठाने, परिकप्पितोकासे वा ठत्वा भण्डस्स बहि पातनन्ति वुत्तं होति.

अत्थसाधकोति पाराजिकापत्तिसङ्खातं अत्थं साधेतीति अत्थसाधको, सो अवहारो च यथाणत्तिकं अविराधेत्वा एकंसेन अवहरन्तस्स ‘‘असुकस्स भण्डं अवहरा’’ति अविसेसेन वा अवहरितब्बवत्थुविसेसो गहणकालो गहणदेसो गहणाकारो चाति एवमादिविसेसानमञ्ञतरेन विसेसेत्वा वा आणापनञ्च एकंसेन पादग्घनकतेलपिवनकं उपाहनादिकिञ्चिवत्थुं तेलभाजनादीसु पातनादिप्पयोगो चाति एवमादिप्पयोगो च किरियासिद्धिया पुरेतरमेव पाराजिकसङ्खातस्स अत्थस्स साधनतो अत्थसाधको अवहारो चाति वुत्तं होति.

धुरनिक्खेपनञ्चाति ¶ धुरस्स निक्खेपनं धुरनिक्खेपनं, तञ्च अवहारो, परसन्तकानं आरामादीनं अभियोगविसये च उपनिक्खित्तस्स भण्डादिनो विसये च चोरस्स सामिनो विस्सज्जने च सामिनो च, यदा कदाचि यथाकथञ्चि गण्हिस्सामीति गहणे निरुस्साहभावसङ्खातो धुरनिक्खेपावहारो चाति वुत्तं होति. इति इदं धुरनिक्खेपनञ्च यथावुत्तप्पकारं साहत्थादिचतुक्कञ्च पञ्चन्नं अवहारानं समूहो पञ्चकं, साहत्थादिपञ्चकं ‘‘साहत्थपञ्चक’’न्ति वुच्चति. आदि-सद्दो लुत्तनिद्दिट्ठोति वेदितब्बं.

४२. पुब्बसहपयोगा चाति एत्थ ‘‘पुब्बपयोगो सहपयोगो’’ति पयोग-सद्दो पच्चेकं योजेतब्बो. ‘‘आणत्तिवसेन पुब्बपयोगो वेदितब्बो’’ति अट्ठकथावचनतो (पारा. अट्ठ. १.९२) यथाणत्तिकमविराधेत्वा गण्हतो ‘‘असुकस्स इत्थन्नामं भण्डं अवहरा’’ति आणापनं पुब्बपयोगो नाम अवहारो. कायेन, वाचाय वा पयुज्जनं आणापनं पयोगो, आणत्तस्स भण्डग्गहणतो पुब्बत्ता पुब्बो च सो पयोगो चाति पुब्बपयोगो अवहारोति दट्ठब्बं. ‘‘ठानाचावनवसेन सहपयोगो वेदितब्बो’’ति अट्ठकथावचनस्स उपलक्खणपदत्ता ठानाचावनञ्च परायत्तभूमिगहणे खीलसङ्कमनादिकञ्च सहपयोगो अवहारोति वेदितब्बो.

संविदाहरणन्ति बहूहि एकतो हुत्वा ‘‘इदं नाम भण्डं अवहरिस्सामा’’ति संविदहित्वा सब्बेहि, एकतो वा सब्बेसं अनुमतिया एकेन वा गन्त्वा परसन्तकस्स थेय्यचित्तेन हरणसङ्खातो संविदावहारो च. समं एकी हुत्वा विसुं एकेनापि थेय्यचित्तेन पादे वा पादारहे ¶ वा गहिते कतमन्तनानं सब्बेसम्पि पाराजिकं होतीति दट्ठब्बं ¶ . संविदहित्वा मन्तेत्वा अवहरणं संविदाहरणं. निरुत्तिनयेन सद्दसिद्धि वेदितब्बा. ‘‘संविदाहरण’’न्ति ‘‘संविदावहारो’’ति इमस्स वेवचनं. ‘‘सम्बहुला संविदहित्वा एको भण्डं अवहरति, आपत्ति सब्बेसं पाराजिकस्सा’’ति (पारा. ११८) वचनतो एवं सहकतमन्तनेसु एकेनापि थेय्यचित्तेन पादे वा पादारहे वा गहिते कतमन्तनानं सब्बेसं पाराजिकं होतीति दट्ठब्बं.

सङ्केतकम्मन्ति पुब्बण्हादिकालपरिच्छेदेन सञ्जाननं सङ्केतो, तेन कतं कम्मं अवहरणं सङ्केतकम्मं नाम. तं पन पुरेभत्तादीसु कञ्चि कालं परिच्छिन्दित्वा ‘‘इमस्मिं काले इत्थन्नामं भण्डं अवहरा’’ति वुत्ते तस्मिंयेव काले तंयेव यथावुत्तं भण्डं अवहरति चे, सङ्केतकारकस्स सङ्केतक्खणेयेव पाराजिकन्ति सङ्खेपतो वेदितब्बं.

नेमित्तन्ति परभण्डावहारस्स हेतुत्ता अक्खिनिखणनादि निमित्तं नाम, तेन निब्बत्तं नेमित्तं, अवहरणसङ्खातकम्मं अवहारो. ‘‘मया अक्खिम्हि निखणिते वा भमुम्हि उक्खित्ते वा इत्थन्नामं भण्डं अवहरा’’ति आणत्तेन तं निमित्तं दिस्वा वुत्तमेव भण्डं वुत्तनियाममविराधेत्वा गहितं चे, निमित्तकारकस्स निमित्तकरणक्खणेयेव पाराजिकं होति. वुत्तनियामं विराधेत्वा गहितं चे, निमित्तकारको मुच्चति, अवहारकस्सेव पाराजिकं. पुब्बपयोगो आदि यस्स तं पुब्बपयोगादि, पुब्बपयोगादि च तं पञ्चकञ्चाति विग्गहो.

४३. थेय्यञ्च पसय्हञ्च परिकप्पो च पटिच्छन्नो च कुसो च थेय्यपसय्हपरिकप्पपटिच्छन्नकुसा, ते आदी उपपदभूता येसं अवहारानं ते थेय्य…पे… कुसादिका ¶ , अवहारा, इमिना थेय्यावहारो च…पे… कुसावहारो चाति वुत्तं होति. तत्थ थेय्यावहारोति थेनो वुच्चति चोरो, तस्स भावो थेय्यं, एत्थ न-कारलोपो निरुत्तिनयेन दट्ठब्बो, तेन अवहरणं थेय्यावहारो, सन्धिच्छेदादिवसेन अदिस्समानेन गहणञ्च कूटमानकूटकहापणादीहि वञ्चेत्वा गहणञ्च थेय्यावहारो.

पसय्ह अभिभवित्वा अवहरणं पसय्हावहारो, गामविलोपका विय सामिके अभिभवित्वा गहणञ्च राजभटादयो विय अभिभवित्वा निबद्धकरग्गहणे अधिकग्गहणञ्च पसय्हावहारो.

वत्थसुत्तादिकं ¶ परिच्छिज्ज कप्पेत्वा अवहरणं परिकप्पावहारो, सो च भण्डोकासपरिकप्पवसेन दुविधो होति. तत्थ निक्खित्तभण्डं अन्धकारप्पदेसं पविसित्वा सुत्तादिभण्डानि तत्थ निक्खित्तानि, ते पेळादयो गण्हन्तस्स ‘‘वत्थानि चे गण्हिस्सामि, सुत्तानि चे न गण्हिस्सामी’’तिआदिना नयेन परिकप्पेत्वा उक्खिपनं भण्डपरिकप्पपुब्बकत्ता भण्डपरिकप्पावहारो नाम. आरामपरिवेणादीनि पविसित्वा लोभनीयं भण्डं दिस्वा गब्भपासादतलपमुखमाळकपाकारद्वारकोट्ठकादिं यं किञ्चि ठानं परिकप्पेत्वा ‘‘एत्थन्तरे दिट्ठो चे, ओलोकेतुं गहितं विय दस्सामि, नो चे, हरिस्सामी’’ति परिकप्पेत्वा आदाय गन्त्वा परिकप्पितट्ठानातिक्कमो ओकासपरिकप्पपुब्बकत्ता ओकासपरिकप्पावहारो नामाति सङ्खेपतो वेदितब्बो.

तिणपण्णादीहि ¶ पटिच्छन्नस्स भण्डस्स अवहरणं पटिच्छन्नावहारो, उय्यानादीसु कीळमानेहि वा सङ्घपरिविसन्तेहि वा मनुस्सेहि ओमुञ्चित्वा ठपितं अलङ्कारादिकं यं किञ्चि भण्डं दिस्वा ‘‘ओणमित्वा गण्हन्ते आसङ्कन्ती’’ति ठत्वा तिणपण्णपंसुवालुकादीहि पटिच्छादेत्वा सामिकेसु परियेसित्वा अदिस्वा सालयेसु गतेसु पच्छा थेय्यचित्तेन गहणञ्च तदेव भण्डं कद्दमादीसु थेय्यचित्तेन अङ्गुट्ठादीहि पीळेत्वा ओसीदापेत्वा हेट्ठाभागेन फुट्ठट्ठानं उपरिभागेन अतिक्कमनञ्च पटिच्छन्नावहारोति वुत्तं होति.

कुसेन अवहारो कुसावहारो, थेय्यचित्तेन कुसं सङ्कामेत्वा परकोट्ठासस्स अग्घेन महन्तस्स वा समसमस्स वा गहणन्ति अत्थो. यो पन भिक्खु कुसपातनेन सङ्घस्स चीवरेसु भाजियमानेसु अत्तनो कोट्ठासेन समं वा अधिकं वा ऊनकं वा अग्घेन पञ्चमासकं वा अतिरेकपञ्चमासकं वा अग्घनकं अञ्ञस्स कोट्ठासं अवहरितुकामो अत्तनो कोट्ठासे पतितं कुसं परकोट्ठासे पातेतुकामो उद्धरति, तङ्खणे च परस्स कोट्ठासे पातितक्खणे च न पाराजिकं अनापज्जित्वा परकोट्ठासतो परनामलिखितं कुसं उक्खिपेन्तो ततो केसग्गमत्तम्पि अपनामेति, पाराजिको होति. यदि पठमं परकोट्ठासतो कुसं उद्धरति, उद्धटक्खणे च अत्तनो कोट्ठासे पातितक्खणे च सकनामलिखितं कुसं उद्धरणक्खणे च पाराजिकं अनापज्जित्वा परकोट्ठासे पातनक्खणे हत्थतो केसग्गमत्तम्पि मुत्ते पाराजिको होति.

यदि ¶ द्वेपि कुसे पटिच्छादेत्वा सब्बेसु भिक्खूसु सकसककोट्ठासं आदाय गतेसु यस्मिं कुसं पटिच्छादेसि, तस्स सामिकेन आगन्त्वा ‘‘मय्हं कुसो कस्मा न ¶ दिस्सती’’ति वुत्ते चोरो ‘‘मय्हम्पि कुसो न दिस्सती’’ति वत्वा अत्तनो कोट्ठासं तस्स सन्तकं विय दस्सेत्वा तस्मिं विवदित्वा वा अविवदित्वा वा गहेत्वा गते इतरं कोट्ठासं उद्धरति चे, उद्धटक्खणेयेव पाराजिको होति. यदि परो ‘‘मय्हं कोट्ठासं तुय्हं न देमि, त्वं तुय्हं कोट्ठासं विचिनित्वा गण्हाही’’ति वदति, एवं वुत्ते सो अत्तनो अस्सामिकभावं जानन्तोपि परस्स कोट्ठासं उद्धरति, उद्धटक्खणे पाराजिको होति. यदि परो विवादभीरुकत्ता ‘‘किं विवादेना’’ति चिन्तेत्वा ‘‘मय्हं वा पत्तं होतु तुय्हं वा, वरकोट्ठासं त्वं गण्हाही’’ति वदेय्य, दिन्नकं नाम गहितं होतीति पाराजिकं न होतीति. यदि ‘‘तव रुच्चनकं गण्हाही’’ति वुत्तो विवादभयेन अत्तनो पत्तं वरभागं ठपेत्वा लामकभागं गहेत्वा गतो, चोरो पच्छा गण्हन्तो विचितावसेसं नाम अग्गहेसीति पाराजिको न होति. एवं कुसावहारविनिच्छयो वेदितब्बो. अयमेत्थ पञ्चवीसतिया अवहारेसु सङ्खेपो, वित्थारो पन समन्तपासादिकाय विनयसंवण्णनाय वुत्तनयेनेव वेदितब्बो.

४४. एत्तावता अदिन्नादानपाराजिकस्स विनिच्छयावयवरूपेन उग्गहेतब्बे पञ्चवीसति अवहारे दस्सेत्वा इदानि अदिन्नादानविनिच्छये सम्पत्ते सहसा आपत्तिं अनारोपेत्वा पठमं ओलोकेतब्बानि पञ्च ठानानि दस्सेतुं ‘‘वत्थुकालग्घदेसे चा’’तिआदि आरद्धं.

तत्थ वत्थु नाम अवहटभण्डं. किं वुत्तं होति? अवहारकेन ‘‘मया इत्थन्नामं भण्डं अवहट’’न्ति वुत्तेपि तस्स भण्डस्स सस्सामिकअस्सामिकभावं उपपरिक्खित्वा सस्सामिकं ¶ चे, अवहारकाले तेसं सालयभावं वा निरालयभावं वा नियमेत्वा सालयकाले चे गहितं, भण्डं अग्घापेत्वा मासकं वा ऊनमासकं वा होति, दुक्कटेन, अतिरेकमासकं वा ऊनपञ्चमासकं वा होति, थुल्लच्चयेन, पञ्चमासकं वा अतिरेकपञ्चमासकं वा होति, पाराजिकेन कातब्बो. सामिकानं निरालयकाले चे गहितं, नत्थि पाराजिकं. भण्डसामिके पन भण्डं आहरापेन्ते तं वा भण्डं तदग्घनकं वा दातब्बन्ति.

कालो नाम अवहारकालो. भण्डं नामेतं कदाचि महग्घं होति, कदाचि समग्घं. तस्मा ¶ अवहटभण्डस्स अग्घं परिच्छिन्दन्तेहि अवहटकालानुरूपं कत्वा परिच्छिन्दनत्थं कालविनिच्छयो कातब्बोति वुत्तं होति.

अग्घो नाम अवहटभण्डस्स अग्घो. एत्थ च सब्बदा भण्डानं अग्घो समानरूपो न होति, नवभण्डं महग्घं होति, पुराणं चे समग्घं. तस्मा अवहारकाले भण्डस्स नवभावं वा पुराणभावं वा नियमेत्वा अग्घो परिच्छिन्दितब्बोति अधिप्पायो.

देसो चाति भण्डावहारदेसो. एत्थ च सब्बस्सापि भण्डस्स उट्ठानदेसे समग्घं हुत्वा अञ्ञत्थ महग्घत्ता अवहटभण्डे अग्घं परिच्छिन्दित्वा तदनुरूपा आपत्तियो नियमन्तेहि अग्घं परिच्छिन्दनत्थाय अवहारदेसं नियमेत्वा तस्मिं देसे अग्घवसेन तदनुरूपा आपत्तियो कारेतब्बाति अधिप्पायो.

परिभोगो नाम अवहटभण्डे अवहारतो पुब्बे परेहि कतपरिभोगो. एत्थ च यस्स कस्सचि भण्डस्स परिभोगेन अग्घो परिहायतीति भण्डसामिकं पुच्छित्वा तस्मिं ¶ भण्डे नवेपि एकवारम्पि येन केनचि पकारेन परिभुत्ते परिहापेत्वा अग्घो परिच्छिन्दितब्बोति वुत्तं होति.

एवमादिना नयेन एतानि पञ्च ठानानि उपपरिक्खित्वाव विनिच्छयो कातब्बोति दस्सेतुमाह ‘‘पञ्चपि ञत्वा एतानि कत्तब्बो पण्डितेन विनिच्छयो’’ति.

४५. एत्तावता अदिन्नादानविनिच्छयावयवभूते पञ्चवीसति अवहारे च पञ्चट्ठानावलोकनञ्च दस्सेत्वा इदानि अनागते पापभिक्खूनं लेसोकासपिदहनत्थं परसन्तकं यं किञ्चि वत्थुं यत्थ कत्थचि ठितं येन केनचि पकारेन गण्हतो मोक्खाभावं दस्सेतुकामेन तथागतेन या पनेता –

भूमट्ठञ्च थलट्ठञ्च;

आकासट्ठ मथापरं;

वेहासट्ठो ¶ दकट्ठञ्च;

नावा यानट्ठमेव च.

भारा राम विहारट्ठं;

खेत्त वत्थुट्ठमेव च;

गामा रञ्ञट्ठ मुदकं;

दन्तपोनो वनप्पति.

हरणको पनिधि चेव;

सुङ्कघातकं पाणका;

अपदं द्विपदञ्चेव;

चतुप्पदं बहुप्पदं.

ओचरकोणिरक्खो च;

संविदाहरणम्पि च;

सङ्केतकम्मं निमित्त-

मिति तिं सेत्थ मातिका. –

निक्खित्ता ¶ , तासं यथाक्कमं पदभाजने, तदट्ठकथाय च आगतनयेन विनिच्छयं दस्सेतुकामो पठमं ताव भूमट्ठे विनिच्छयं दस्सेतुमाह ‘‘दुतियं वापी’’तिआदि.

तत्थ दुतियं थेय्यचित्तेन परियेसतो दुक्कटन्ति सम्बन्धो. एवं सब्बपदेसु. उपरि सञ्जाताहि रुक्खलताहि, इट्ठकपासाणादीहि च सञ्छन्नं महानिधिं उद्धरितुकामेन ‘‘मया एकेनेव न सक्का’’ति अत्तनो अञ्ञं सहायं परियेसितुं थेय्यचित्तेन सयितट्ठाना उट्ठानादीसु सब्बपयोगेसु दुक्कटं होतीति अत्थो. कुदालं भूमिखणनत्थाय पिटकं वापि पंसुउद्धरणत्थाय यं किञ्चि भाजनं. इमेसु द्वीसु कुदालस्स चे दण्डो नत्थि, दण्डत्थाय रुक्खतो दण्डं छिन्दतो च कुदालो चे न होति, कुदालकरणत्थाय अयोबीजं उद्धरणत्थाय अकप्पियपथविं खणन्तस्सपि पच्छिकरणत्थाय पण्णानि छिन्दतोपि पिटकवायनत्थाय वल्लिं छिन्दतोपि ¶ उभयत्थापि परियेसने मुसा भणतोपि दुक्कटञ्चेव पाचित्तियञ्च, इतरपयोगेसु दुक्कटमेवाति वेदितब्बं.

गच्छतोति दुतियादिं परियेसित्वा लद्धा वा अलद्धा वा निधिट्ठानं गच्छन्तस्स पदे पदे दुक्कटन्ति अत्थो. एत्थ च ‘‘थेय्यचित्तो दुतियं वा परियेसती’’तिआदि पाळियं (पारा. ९४) ‘‘थेय्यचित्तो’’ति वुत्तत्ता, इध ‘‘थेय्यचित्तेना’’ति वचनतो ‘‘इमं निधिं लभित्वा बुद्धपूजं वा करिस्सामि, सङ्घभत्तं वा करिस्सामी’’ति एवमादिना नयेन कुसलचित्तप्पवत्तिया सति अनापत्तीति दट्ठब्बं. पुब्बयोगतोति अदिन्नादानस्स पुब्बपयोगभावतो, दुतियपरियेसनादीसु पुब्बपयोगेसु दुक्कटन्ति अत्थो.

दुक्कटञ्च ¶ अट्ठविधं होति पुब्बपयोगदुक्कटं सहपयोगदुक्कटं अनामासदुक्कटं दुरुपचिण्णदुक्कटं विनयदुक्कटं ञातदुक्कटं ञत्तिदुक्कटं पटिस्सवदुक्कटन्ति. तत्थ ‘‘थेय्यचित्तो दुतियं वा कुदालं वा पिटकं वा परियेसति गच्छति वा, आपत्ति दुक्कटस्सा’’ति वुत्तं पुब्बपयोगदुक्कटं नाम. इध पाचित्तियट्ठाने पाचित्तियं, इतरेसु पुब्बपयोगेसु दुक्कटं. ‘‘तत्थजातकं कट्ठं वा लतं वा छिन्दति, आपत्ति दुक्कटस्सा’’ति वुत्तं सहपयोगदुक्कटं. इध अदिन्नादानसहितपयोगत्ता पाचित्तियवत्थुम्हि, इतरत्र च दुक्कटमेवाति अयमेत्थ विसेसो. मुत्तामणिआदीसु दससु रतनेसु, सालिआदीसु सत्तसु धञ्ञेसु, सब्बेसु च आवुधभण्डादीसु आमसनपच्चया दुक्कटं अनामासदुक्कटं. कदलिनाळिकेरपनसादिरुक्खट्ठमेव फलं आमसन्तस्स वुत्तं दुक्कटं दुरुपचिण्णदुक्कटं. उपचरणं उपचिण्णं, परामसनन्ति अत्थो. दुट्ठु उपचिण्णं दुरुपचिण्णं, दुरुपचिण्णे दुक्कटं दुरुपचिण्णदुक्कटं. भिक्खाचारकाले पत्ते रजस्मिं पतिते पत्तं अप्पटिग्गहेत्वा वा अधोवित्वा वा भिक्खापटिग्गहणेन दुक्कटं विनयदुक्कटं, विनये पञ्ञत्तं दुक्कटं विनयदुक्कटं. किञ्चापि अवसेसदुक्कटानिपि विनये पञ्ञत्तानेव, तथापि रुळ्हिया मयूरादिसद्देहि मोरादयो विय इदमेव तथा वुच्चति. ‘‘सुत्वा न वदन्ति, आपत्ति दुक्कटस्सा’’ति वुत्तं ञातदुक्कटं नाम. एकादससु समनुभासनासु ‘‘ञत्तिया दुक्कट’’न्ति वुत्तं ञत्तिदुक्कटं. ‘‘तस्स भिक्खवे भिक्खुनो पुरिमिका च न पञ्ञायति, पटिस्सवे च आपत्ति दुक्कटस्सा’’ति (महाव. २०७) वुत्तं पटिस्सवदुक्कटं नाम. इमेसु अट्ठसु दुक्कटेसु इध आपज्जितब्बं दुक्कटं पुब्बपयोगदुक्कटं नाम. तेनाह ‘‘पुब्बयोगतो’’ति. गाथाबन्धसुखत्थं ¶ उपसग्गं अनादियित्वा ‘‘पुब्बपयोगतो’’ति वत्तब्बे ‘‘पुब्बयोगतो’’ति वुत्तन्ति गहेतब्बं.

एत्थ ¶ च किञ्चापि इमेसु दुक्कटेसु असङ्गहितानि उभतोविभङ्गागतानि दिवासेय्यादिदुक्कटानि चेव खन्धकागतानि च बहूनि दुक्कटानि सन्ति, तानि पनेत्थ विनयदुक्कटेयेव सङ्गहितब्बानि. ‘‘विनये पञ्ञत्तं दुक्कटं विनयदुक्कट’’न्ति हि सारत्थदीपनियं (सारत्थ. टी. २.९४) वुत्तन्ति. अट्ठकथायं (पारा. अट्ठ. १.९४) पन रजोकिण्णदुक्कटस्सेव ‘‘विनयदुक्कट’’न्ति गहणं उपलक्खणमत्तं. इतरथा अट्ठ दुक्कटानीति गणनापरिच्छेदोयेव निरत्थको सियाति पुब्बपयोगे दुक्कटादीनम्पि विनयदुक्कटेयेव सङ्गहेतब्बभावेपि कतिपयानि दस्सेत्वा इतरेसमेकतो दस्सनत्थं तेसं विसुं गहणं सुत्तङ्गसङ्गहितत्तेपि गेय्यगाथादीनं अट्ठन्नं विसुं दस्सनं वियाति वेदितब्बं.

४६. तत्थजातकं कट्ठं वाति तस्मिं चिरनिहितनिधूपरि जातं अल्लं सुक्खं कट्ठं वा. लतं वाति तादिसं वल्लिं वा. इदं उपलक्खणं तिणादीनं खुद्दकगच्छानञ्च गहेतब्बत्ता. उभयत्थापीति अल्ले च सुक्खे चाति वुत्तं होति. अल्लरुक्खादीनि छिन्दतो पाचित्तियं अहुत्वा दुक्कटमत्तस्स भवने कारणं दस्सेति ‘‘सहपयोगतो’’ति. अवहारेन सहितपयोगत्ता पाचित्तियट्ठानेपि दुक्कटमेवाति वुत्तं होति. ‘‘सहपयोगतो उभयत्थापि दुक्कट’’न्ति वदन्तो पठमगाथाय दस्सितपुब्बपयोगतो इमाय दस्सितसहपयोगस्स विसेसं दस्सेति.

४७. पथविन्ति कप्पियं वा अकप्पियं वा पथविं. अकप्पियपथविं खणतो सहपयोगत्ता दुक्कटमेव. ब्यूहतोति पंसुं एकतो रासिं करोन्तस्स. ‘‘वियूहति एकपस्से रासिं करोती’’ति अट्ठकथावचनतो ऊह-इच्चेतस्स धातुनो वितक्के उप्पन्नत्तेपि धातूनमनेकत्थत्ता वि-उपसग्गवसेन ¶ इध रासिकरणे वत्ततीति गहेतब्बं. रासिभूतं पंसुं कुदालेन वा हत्थेन वा पच्छिया वा उद्धरन्तस्स च अपनेन्तस्स च पयोगगणनाय दुक्कटं पंसुमेव वाति एत्थ अवुत्तसमुच्चयत्थेन वा-सद्देन सङ्गहितन्ति दट्ठब्बं. आमसन्तस्साति निधिकुम्भिं हत्थेन परामसन्तस्स. वाति समुच्चये. दुक्कटन्ति दुट्ठु कतं किरियं सत्थारा वुत्तं विराधेत्वा खलित्वा कतत्ताति दुक्कटं. वुत्तञ्चेतं परिवारे (परि. ३३९) –

‘‘दुक्कटन्ति ¶ हि यं वुत्तं, तं सुणोहि यथातथं;

अपरद्धं विरद्धञ्च, खलितं यञ्च दुक्कट’’न्ति.

दुट्ठु वा विरूपं कतं किरियाति दुक्कटं. वुत्तम्पि चेतं परिवारे (परि. ३३९) –

‘‘यं मनुस्सो करे पापं, आवि वा यदि वा रहो;

‘दुक्कट’न्ति पवेदेन्ति, तेनेतं इति वुच्चती’’ति.

एवं ‘‘तत्थजातक’’न्तिआदिगाथाद्वयागतं छेदनदुक्कटं खणनदुक्कटं ब्यूहनदुक्कटं उद्धरणदुक्कटं आमसनदुक्कटन्ति पञ्चसु सहपयोगदुक्कटेसु पुरिमपुरिमपयोगेहि आपन्ना दुक्कटापत्तियो पच्छिमं पच्छिमं दुक्कटं पत्वा पटिपस्सम्भन्ति, तंतंपयोगावसाने लज्जिधम्मं ओक्कमित्वा ओरमति चे, तंतंदुक्कटमत्तं देसेत्वा परिसुद्धो होति. धुरनिक्खेपमकत्वा फन्दापेन्तस्स थुल्लच्चयं पत्वा आमसनदुक्कटं पटिपस्सम्भतीति महाअट्ठकथायं (पारा. अट्ठ. १.९४) वुत्तं. यथापाळिया गय्हमाने पुरिमपुरिमापत्तीनं पटिपस्सद्धि ‘‘ञत्तिया दुक्कटं, द्वीहि ¶ कम्मवाचाहि थुल्लच्चया पटिपस्सम्भन्ती’’ति पाळियं (पारा. ४१४, ४२१, ४२८, ४३९) आगतत्ता अनुस्सावनाय एव लब्भतीति दट्ठब्बं. इमस्स पन सुत्तस्स अनुलोमवसेन महाअट्ठकथायं वुत्ता इमस्मिं अदिन्नादानसिक्खापदेपि आपत्तिपटिपस्सद्धि पमाणन्ति निट्ठमेत्थ गन्तब्बं.

४८. ‘‘फन्दापेति, आपत्ति थुल्लच्चयस्स. ठाना चावेति, आपत्ति पाराजिकस्सा’’ति (पारा. ९४) वुत्तं ठानाचावने पाराजिकञ्च तस्स सामन्तापत्तिभूतं थुल्लच्चयञ्च ठानभेदविञ्ञापनमुखेन वत्तब्बन्ति इदानि तं दस्सेतुमाह ‘‘मुखेपास’’न्तिआदि. तत्थ मुखे कुम्भिमुखवट्टियं. पासं पवेसेत्वाति बन्धनं पासं पक्खिपित्वा. खाणुकेति अयोखाणुम्हि, खदिरखाणुके वा. बद्धकुम्भिया ठानभेदो बन्धनानं वसा ञेय्योति सम्बन्धो.

४९. इदानि ठानभेदं दस्सेति ‘‘द्वे’’तिआदिना. ‘‘एकस्मिं खाणुके’’ति इमिना द्वीसु दिसासु वा तीसु चतूसु वा दिसासु खाणुके खणित्वा बद्धखाणुगणनाय सम्भवन्तो ठानभेदो ¶ उपलक्खितो होति. वलयं…पे… कताय वा द्वे ठानानीति योजना. वाति समुच्चये उपलक्खितो होति.

५०. एवं ठानभेदं दस्सेत्वा इदानि ठानवसेन आपज्जितब्बा आपत्तियो दस्सेतुमाह ‘‘उद्धरन्तस्सा’’तिआदि. सङ्खलिन्ति दामं. थुल्लच्चयन्ति एकस्स सन्तिके देसेतब्बासु आपत्तीसु थूलत्ता, अच्चयत्ता च थुल्लच्चयं नाम. वुत्तञ्हेतं परिवारे –

‘‘थुल्लच्चयन्ति ¶ यं वुत्तं;

तं सुणोहि यथातथं;

एकस्स मूले यो देसेति;

यो च तं पटिगण्हति;

अच्चयो तेन समो नत्थि;

तेनेतं इति वुच्चती’’ति. (परि. ३३९);

एत्थ च थूलच्चयन्ति वत्तब्बे ‘‘सम्पराये च (सं. नि. १.४९) सुग्गति, तं होति कटुकप्फल’’न्तिआदीसु (ध. प. ६६) विय लकारस्स द्वित्तं, संयोगे ऊकारस्स रस्सो च वेदितब्बो. ततो सङ्खलिकभेदतो परं. ठाना चावेतीति ठितट्ठानतो केसग्गमत्तम्पि अपनेति. एत्थ च नावट्ठकथायं ‘‘उद्धं वा अधो वा तिरियं वा अन्तमसो केसग्गमत्तम्पि सङ्कामेति, आपत्ति पाराजिकस्सा’’ति (पारा. ९९) वुत्तनयेन ‘‘तिरिय’’न्ति वुत्ता चतस्सो दिसा, उद्धमधो चाति छट्ठानानि. तासु एकं दिसं अपनीयमानाय कुम्भिया तंदिसाभिमुखं इतरदिसायं ठितपस्से ओरिमदिसाय ठितपस्सेन फुट्ठोकासस्स केसग्गमत्तम्पि अनतिक्कन्ते फन्दापनवसेन थुल्लच्चयं होति, अतिक्कन्ते ठाना चावितत्ता पाराजिकं होतीति वेदितब्बो. इममेव सन्धायाह ‘‘ठाना चावेति चे चुतो’’ति. एसेव नयो फन्दनरहिताय निधिकुम्भिया ठानाचावनेपि.

५१. एवं पठमं बन्धनं छिन्दित्वा पच्छा कुम्भिग्गहणे नयं दस्सेत्वा इदानि पठमं कुम्भिं अपनेत्वा पच्छा बन्धनापनयने नयं दस्सेतुमाह ‘‘पठम’’न्तिआदि. सो नयोति ‘‘पठमुद्धारे थुल्लच्चयं, दुतियुद्धारे पाराजिक’’न्ति तमेवत्थमतिदिसति.

५२. वलयन्ति ¶ ¶ कुम्भिया बद्धसङ्खलिकाय मूले पवेसितं वलयं. मूले घंसन्तो इतो चितो च सारेतीति योजना. घंसन्तोति फुसापेन्तो. इतो चितो च सारेतीति ओरतो च पारतो च सञ्चालेति. रक्खतीति एत्थ ‘‘सीलं भिक्खु’’न्ति पाठसेसो, पाराजिकं नापज्जतीति वुत्तं होति. तत्थाति तस्मिं मूले. खेगतं करोन्तोवाति सब्बपस्सतो मूलं अफुसापेत्वा आकासगतं करोन्तोव. पराजितोति ठानाचावनस्स कतत्ता पराजयमापन्नो होति.

५३. कुम्भिमत्थके जातन्ति योजना. चिरकालं निहितत्ता मूलेहि कुम्भिं विनन्धित्वा ठितन्ति अत्थो. समीपे जातं रुक्खं छिन्दतोति योजना. एत्थ च ‘‘तत्थजातकं कट्ठं वा’’तिआदिकाय गाथाय निधिमत्थके भूमियं ठितरुक्खलतादिं छिन्दन्तस्स आपत्ति वुत्ता, इमाय पन गाथाय भूमिं निखणित्वा ओतिण्णकाले निधिं विनन्धित्वा ठितमूलं अल्लरुक्खं, खाणुकं वा गहेत्वा आहाति पुनरुत्तिदोसाभावो वेदितब्बो. ‘‘अतत्थज’’न्ति इमिना सहपयोगाभावमाह. इमिनाव पुरिमगाथाय वुत्तं कट्ठलतादीनि निधिसम्बन्धानि चे, यथावुत्तदुक्कटस्स वत्थूनि, समीपानि चे, पाचित्तियस्सेव वत्थूनीति दीपेति.

५४. इदानि एवं परियेसित्वा दिट्ठनिधिभाजनं ठितट्ठानतो अचालेत्वा अन्तोठितं भण्डमत्तं गण्हतो विनिच्छयं दस्सेतुमाह ‘‘अन्तोकुम्भिगत’’न्तिआदि. तत्थ फन्दापेतीति अन्तोचाटिया पक्खित्ते अत्तनो भाजने पक्खिपितुं रासिकरणादिवसेन फन्दापेति. अपब्यूहति वाति हेट्ठा ठितं गण्हितुं उपरि ठितानि अपनेन्तो वियूहति वा. अथ वा अपब्यूहन्तोति (पारा. अट्ठ. १.९४) अट्ठकथावचनस्स द्विधा करोन्तोति ¶ गण्ठिपदे अत्थो वुत्तोति अत्तनो भाजने पक्खिपितुं इतो चितो च रासिं करोन्तोति अत्थो वेदितब्बो. तत्थेवाति अन्तोकुम्भियमेव.

५५. हरन्तोति अवहरन्तो. मुट्ठिं छिन्दतीति अत्तनो भाजनं पक्खिपित्वा गण्हितुं असक्कुणेय्यो अन्तोकुम्भिम्हि हत्थं ओतारेत्वा कुम्भिगतभण्डेन यथा अबद्धं होति, तथा मुट्ठिया परिच्छिन्दति, कुम्भिगतं मुट्ठिया गण्हन्तो कुम्भिगतेन मुट्ठिगतं यथा असम्मिस्सं होति, तथा परिच्छिन्दित्वा पादग्घनकं वा अतिरेकपादग्घनकं वा गण्हातीति वुत्तं होति. अत्तनो भाजने गतं कत्वा वा छिन्दतीति योजना. अत्तनो भाजनगतं कत्वा कुम्भिगतेन यथा ¶ असम्मिस्सं होति, तथा परिच्छिन्दतीति अत्थो, सचे अत्तनो भाजनगतं हुत्वा कुम्भिगतेन असम्मिस्सं भण्डं पञ्चमासकं वा अतिरेकपञ्चमासकं वा अग्घति, पाराजिकोति वुत्तं होति.

५६. हारं वाति मुत्ताहारं वा. पामङ्गं वाति सुवण्णमयं, रजतमयं वा पामङ्गं दामं. सुत्तारुळ्हन्ति सुत्ते आरुळ्हं सुत्तारुळ्हं, सुत्तञ्च सुत्तारुळ्हञ्च सुत्तारुळ्हन्ति एकदेससरूपेकसेसो दट्ठब्बो. ‘‘सुत्तेन आवुतस्सापि सुत्तमयस्सापि एतं अधिवचन’’न्ति अट्ठकथावचनतो (पारा. अट्ठ. १.९४) पठममुत्ताहारं विना सुवण्णरजतपवाळादिमणिकं वा सुत्तेसु आवुणित्वा कता नानावलियो चेव सुत्तमयानि च भण्डानि गहेतब्बानि. कुम्भिया ठितन्ति पाठसेसो. फन्दापेतीति थेय्यचित्तेन गण्हितुकामताय चालेति. यथावत्थुन्ति वीतिक्कमानुरूपं थुल्लच्चयं होतीति अधिप्पायो. ठाना चावेतीति ठितट्ठानतो केसग्गमत्तम्पि अतिक्कामेति ¶ . चुतोति पातिमोक्खसंवरसीला परिहीनोति अत्थो.

अपरिपुण्णाय कुम्भियाएकदेसट्ठं भण्डं ततो ततो केसग्गमत्तम्पि ठानं अपनेत्वा तत्थेव अन्तोकुम्भिया अञ्ञं ठानं नेन्तस्स च तत्थेव आकासगतं करोन्तस्स च ‘‘अत्तनो भाजनगतं वा करोति, मुट्ठिं वा छिन्दती’’ति (पारा. ९४) एतेहि सदिसत्ता वत्थुम्हि पादं अग्घन्ते पाराजिका होतीति महाअट्ठकथायं (पारा. अट्ठ. १.९४) इदं सन्निट्ठानं. भाजनतले कोटिं ठपेत्वा कमेन सकलभाजनकुच्छिं तेनेव पूरेत्वा मुखवट्टिया एका कोटि निक्खित्ता चे, तथाठपितस्स हारादिनो सकलभाजनं अट्ठानन्ति कोटिं गहेत्वा उजुकं उक्खिपन्तस्स ओसानकोटि भाजनतलतो केसग्गमत्तम्पि आकासगतं करोतो च मुखवट्टियं घंसित्वा आकड्ढन्तस्स सकलभाजनोदरं खेपेत्वा मुखवट्टिया ठपितकोटिया फुट्ठट्ठानं अपराय कोटिया केसग्गमत्तम्पि अतिक्कामयतो च भाजनकुच्छिया उपड्ढं वत्थादिना केनचि पूरेत्वा तस्सोपरि ठपितहारादिसुत्तारुळ्हस्स ठितोकासमेव ठानन्ति ततो केसग्गमत्तं अपनेन्तस्सपि पाराजिकं होतीति वुत्तं होति.

५७. सप्पिआदीसूति भाजनगतेसु सप्पिआदिद्रववत्थूसु यं किञ्चि. पादपूरणन्ति पादं पूरेतीति पादपूरणं, पादग्घनकन्ति अत्थो. पिवतो पराजयोति सम्बन्धो. कदाति चे? एकेनेव ¶ पयोगेन पीतमत्ते पादपूरणेति योजना. ‘‘मुखगतं विना’’ति पाठसेसो. तत्थ एकेनेव पयोगेनाति धुरनिक्खेपमकत्वा एकाबद्धं कत्वा आकड्ढेत्वा ¶ पिवनपयोगेन. ‘‘मुखगतं विना’’ति इमिना सचे गलगतेनेव पादो पूरति, अन्तोगलं पविट्ठेति वुत्तं होति. मुखगतेन पूरति, मुखगतं भाजनगतेन वियोजेत्वा ओट्ठेसु पिहितेसूति वुत्तं होति. वेळुनळादीहि आकड्ढेत्वा पिवन्तस्स नाळगतेन पूरति, नाळगतं भाजनगतेन वियोजेत्वा नाळिकोटियं अङ्गुलिया पिहितायन्ति वुत्तं होति. इदं ‘‘अत्तनो भाजनगतं वा करोति, मुट्ठिं वा छिन्दती’’ति (पारा. ९४) वुत्तनयस्स अनुलोमवसेन महापच्चरियादीसु (पारा. अट्ठ. १.९४) अट्ठकथासु वुत्तनयेन गहेतब्बन्ति अधिप्पायो.

‘‘एकेनेव पयोगेन पीतमत्ते पराजयो’’ति इमिना सप्पिआदीसु महग्घेसु तत्तकेनेव पादपूरणञ्चे होति, एकवारमेव मुखेन वा सप्पिआदिना वा भाजनगतेन एकाबद्धभावे छिन्नमत्तेपि अत्तनो भाजने कुम्भिं पणामेत्वा पक्खित्तेन कुम्भिगते छिन्नमत्तेपि पाराजिको होतीति गहेतब्बं.

५८. ‘‘धुरनिक्खेपं कत्वा पुनप्पुनं पिवन्तस्स न पराजयो’’ति इमिना धुरनिक्खेपमकत्वा पुनप्पुनं पिवतो पराजयोति सामत्थिया वुत्तं होति. धुरनिक्खेपं अकत्वा पुनप्पुनं मुखेन गहेत्वा वा पुटादीहि वा गहेत्वा पादपूरणमत्तं पिवन्तस्स पराजयो होतीति गहेतब्बं.

५९-६०. सचे खिपति थेय्यचित्तोति सम्बन्धो. यं किञ्चि भण्डकन्ति तेलपिवनारहं दुकूलसाटकचम्मखण्डादिकं भण्डं. तेलकुम्भियं परस्साति लब्भति. तं निक्खित्तभण्डं. धुवन्ति एकंसेन. तावदे विनस्सतीति सम्बन्धो. तावदेति तस्मिं खणेयेव. कतरस्मिं खणेति आह ‘‘हत्थतो मुत्तमत्ते’’ति, तेलस्स पीतकालं अनागम्म पुब्बपयोगत्ता ¶ पठममेव होतीति अधिप्पायो. विनस्सतीति सीलविनासं पापुणाति. आविञ्जेत्वाति पणामेत्वा. गाळेतीति पग्घरापेति. ‘‘साळेती’’तिपि पठन्ति, सोयेव अत्थो. साळ सवनेति धातु. तथाति ‘‘थेय्यचित्तो विनस्सती’’ति आकड्ढति, थेय्यचित्तेन एवं करोन्तस्स पाराजिको होतीति वुत्तं होति.

६१. तन्ति तेलस्स ओकिरणभावं ञत्वा पठममेव तुच्छभाजने थेय्यचित्तेन निक्खित्तं पादग्घनकतेलपिवनकं ¶ तं वत्थादिभण्डं. ‘‘उद्धरन्तोवा’’ति सावधारणवचनेन ‘‘पीतमत्ते पराजयो’’ति दस्सितं महाअट्ठकथामतं पटिक्खित्तं होति. धंसितोति ‘‘सासनकप्परुक्खा पातितो, पाराजिकापन्नोति अधिप्पायो. ‘‘थेय्यचित्तो’’ति आकड्ढनत्थं ‘‘तथा’’ति आनेत्वा सम्बन्धनीयं. इमिना सुद्धचित्तेन गोपनत्थाय तुच्छभाजने वत्थादिं निक्खिपित्वा अञ्ञेन तं अनोलोकेत्वा तेले आसित्ते पच्छा सुद्धचित्तेनेव उद्धरतो न दोसोति दीपितं होति.

६२. तत्थेवाति ठितट्ठानेयेव. भिन्दतोति ठाना अचावेत्वा तिणज्झापकस्स विय भिक्खुनो ठानाचावनाधिप्पायं विना पासाणादिना केनचि पहरित्वा भिन्दतो. ‘‘मन्तोसधानुभावेन भिन्दतो’’ति च वदन्ति. छड्डेन्तस्साति अछड्डेतुकामस्सापि सतो परिपुण्णतेलघटादीसु चापल्लेन वालुकं वा उदकं वा ओकिरित्वा उत्तरापेन्तस्साति अत्थो. ‘‘उदकमातिकं घटाभिमुखं कत्वा ओपिलापेन्तस्सा’’ति वदन्ति. ठानाचावनाधिप्पाये सतिपि थेय्यचित्ताभावेन पाराजिका न विज्जति, भण्डदेय्यं ¶ पन होतीति सन्निट्ठानं. झापेन्तस्साति कट्ठानि पक्खिपित्वा झापेन्तस्स. अपरिभोगं करोन्तस्साति उच्चारपस्सावादिमोकिरित्वा अपरिभोगं करोन्तस्स. दुक्कटन्ति एतेसु भिन्दनादीसु चतूसुपि ठानेसु पदभाजनियं दुक्कटमेव आगतत्ता वुत्तं.

भूमट्ठकथावण्णना.

६३. इदानि थलट्ठे विनिच्छयं दस्सेतुमाह ‘‘ठपित’’न्तिआदि. तत्थ पत्थरित्वाति अत्थरित्वा. एत्थ च-सद्दो अवुत्तसम्पिण्डनत्थो, तेन थले रासिकतधञ्ञादीसु विनिच्छयो निमिकुम्भिया वुत्तविनिच्छयानुसारेन विञ्ञातुं सक्काति तं सरूपतो अवुत्तं समुच्चिनोति. अत्थरणादिकन्ति पच्चत्थरणादिकं. वेठेत्वा उद्धरन्तस्साति किलञ्जसंहरणनियामेन वट्टेत्वा संहरित्वा उद्धरन्तस्स. मुत्ते ठानाति कमेन संहरित्वा ठितट्ठानतो केसग्गमत्तम्पि मुत्ते सति. पराभवोति सासनतो परिहीनो.

६४. एवं अत्थरित्वा ठपितवत्थादीनं संहरित्वा गहणे विनिच्छयं दस्सेत्वा तिरियतो आकड्ढने विनिच्छयं दस्सेतुमाह ‘‘ओरिमन्तेना’’तिआदि. पि, वाति पकारन्तरमेव समुच्चिनोति. उजुकं कड्ढतोपि वाति अत्थरित्वा ठपितवत्थादिकं चतूसु दिसासु एकं दिसं उजुकमाकड्ढतो ¶ च पाराजिकं होति. कदाति चे? एत्थापि ओरिमन्तेन फुट्ठमोकासं पारिमन्ततो अतिक्कन्ते पाराजिकन्ति योजना. ओरिमन्तेन फुट्ठमोकासन्ति गहेत्वा आकड्ढन्तस्स अत्तनो ठितदिसागतपरियन्तेन फुसित्वा ठितट्ठानं. पारिमन्ततोति पारिमन्तेन, करणत्थे तो-पच्चयो.

थलं ¶ नाम पटिच्छन्नापटिच्छन्नभूमिपासादपब्बततलादीनि, तत्रट्ठं धञ्ञादिभण्डं थलट्ठं नाम होति. तत्थ सब्बत्थ विनिच्छयो वुत्तनयेन वेदितब्बो.

थलट्ठकथावण्णना.

६५-६. परिच्छेदाति ठानपरिच्छेदा. सेसं सुविञ्ञेय्यमेव.

६७-८. खेगतन्ति आकासगतं. अस्साति मोरस्स. तन्ति मोरं.

६९. ठानाति यथापरिच्छिन्ना छब्बिधा ठाना. तस्साति मोरस्स फन्दापनेति योजना. तस्साति वा भिक्खुस्स थुल्लच्चयमुदीरितं.

७०. अग्गहेत्वा हत्थेन लेड्डुखिपनादिपयोगेन मोरं तासेत्वा ठितट्ठानतो अपनेति. अत्तनो ठानाति मोरस्स अत्तनो छप्पकारट्ठाना. सयं ठानाति भिक्खु सकट्ठाना, समणभावतोति वुत्तं होति.

७१-२. इदानि ‘‘ठाना चावेति चे मोर’’न्ति दस्सितं ठानाचावनं विभावेतुमाह ‘‘फुट्ठोकास’’न्तिआदि.

७३. करे निलीयतीति पसारितहत्थतले निसीदति.

७५. उड्डेत्वाति आकासं उप्पतित्वा.

७६. अङ्गे ¶ निलीनन्ति अंसकूटादिसरीरावयवे निलीनं. पादेति अत्तनो पठमुद्धारपादे. दुतिये पादे.

७७. पादानन्ति ¶ द्विन्नं पादानं. कलापस्साति भूमियं फुसियमानस्स कलापग्गस्स.

७८. ततो पथवितोति तीहि अवयवेहि पतिट्ठितपथविप्पदेसतो, न पठमतो तत्थ दुक्कटत्ता, न दुतियतो तत्थ थुल्लच्चयत्ता, ततिया पन ठाना केसग्गमत्तम्पि चावयतो पाराजिकन्ति वुत्तं होति.

एत्तावता –

‘‘पञ्जरे ठितं मोरं सह पञ्जरेन उद्धरति, पाराजिकं. यदि पन पादं नग्घति, सब्बत्थ अग्घवसेन कत्तब्बं. अन्तोवत्थुम्हि चरन्तं मोरं थेय्यचित्तो पदसा बहिवत्थुं नीहरन्तो द्वारपरिच्छेदं अतिक्कामेति, पाराजिकं. वजे ठितबलिबद्दस्स हि वजो विय अन्तोवत्थु तस्स ठानं. हत्थेन पन गहेत्वा अन्तोवत्थुस्मिम्पि आकासगतं करोन्तस्स पाराजिकमेव. अन्तोगामे चरन्तम्पि गामपरिच्छेदं अतिक्कामेन्तस्स पाराजिकं. सयमेव निक्खमित्वा गामूपचारे वा वत्थूपचारे वा चरन्तं पन थेय्यचित्तो कट्ठेन वा कथलाय वा उत्रासेत्वा अटवीभिमुखं करोति, मोरो उड्डेत्वा अन्तोगामे वा अन्तोवत्थुम्हि वा छदनपिट्ठे वा निलीयति, रक्खति. सचे पन अटवीभिमुखो उड्डेति वा गच्छति वा, ‘अटविं पवेसेत्वा गहेस्सामी’ति परिकप्पे असति पथवितो केसग्गमत्तम्पि उप्पतितमत्ते वा दुतियपदवारे वा पाराजिकं. कस्मा? यस्मा गामतो निक्खमन्तस्स ठितट्ठानमेव ठानं होती’’ति (पारा. अट्ठ. १.९६) –

अट्ठकथागतो ¶ विनिच्छयो उपलक्खितोति वेदितब्बं. कपिञ्जरादिपरसन्तकसकुणेसु च एसेव विनिच्छयो दट्ठब्बो.

७९. पत्तेति द्वारे भिक्खाय ठितं भिक्खुनो हत्थगते पत्ते. तस्स थेय्यचित्तस्स.

८०. अनुद्धरित्वावाति ¶ पत्ते पतितं सुवण्णादिं हत्थेन अनुक्खिपित्वाव पठमपदवारे थुल्लच्चयं गम्ममानत्ता न वुत्तं.

८१. हत्थेति हत्थतले. वत्थेति चीवरे. मत्थकेति सिरसि. गाथाछन्दवसेन वा-सद्दे आकारस्स रस्सत्तं. पतिट्ठितन्ति पतितं. तन्ति छिज्जमानं तं सुवण्णखण्डादि. यदि आकासे गच्छन्तं, पतन्तं वा हत्थेन गण्हाति. गहितहत्थे ठितट्ठानमेव ठानं, ततो केसग्गमत्तम्पि अपनेन्तस्स पाराजिकं. तथा गहेत्वा थेय्यचित्तेन गच्छतो दुतियपादुद्धारे. वत्थादीसु पतितेपि एसेव नयो.

आकासट्ठकथावण्णना.

८२. मञ्चपीठादीसूति एत्थ आदि-सद्देन मञ्चपीठसदिसे वेहासभूते अट्टवितानादयो सङ्गण्हाति. आमासम्पीति हत्थेन वा कायेन वा आमसितब्बं वत्थादिञ्च. अनामासम्पीति तथा अपरामसितब्बं सुवण्णादिं. आमसन्तस्साति हत्थादीहि परामसन्तस्स. ‘‘दुक्कट’’न्ति इमिना फन्दापने थुल्लच्चयञ्च ठानाचावने पाराजिकञ्च हेट्ठा थलट्ठे वुत्तनयेन विञ्ञातुं सक्काति अतिदिसति. ठानपरिच्छेदो पन मञ्चादीहि एव उक्खिपन्तस्स चतुन्नं पादानं वसेन, तत्रट्ठमेव गण्हन्तस्स मञ्चस्स चतूसु पादसीसेसु फुसित्वा ¶ मज्झे अफुसित्वा ठितस्स खलिमक्खितथद्धसाटकस्स चतुन्नं पादसीसानं वसेन, अटनीसु फुसित्वा ठितस्स अटनीनं वसेन वा वेदितब्बो.

८३. वंसेति चीवरवंसे, इमिना चीवरनिक्खेपनत्थाय ठपितरुक्खदण्डसलाकारज्जुआदयो उपलक्खिता. ओरतोति अत्तनो ठितदिसाभिमुखतो. भोगन्ति संहरित्वा चीवरं तस्स नामेत्वा ठपितमज्झट्ठानं. अन्तन्ति नामेत्वा एकतो कतं, उभयानं वा अन्तं. पारतो कत्वाति वंसतो परभागे कत्वा.

८४. चीवरेन फुट्ठोकासोति चीवरेन फुट्ठट्ठानं. तस्साति तथा ठपितस्स चीवरस्स. सो सकलो चीवरवंसो ठानं न तु होतीति मतोति सम्बन्धो.

८५-६. ओरिमन्तेन ¶ फुट्ठं वा तं ओकासन्ति सम्बन्धो. चीवरभोगं गहेत्वा थेय्यचित्तेन अत्तनो अभिमुखं आकड्ढतो अत्तनो ठितदिसाय चीवरवंसे चीवरेन फुसित्वा ठितट्ठानपरियन्तं इतरेन अतिक्कामयतो चुतीति सम्बन्धो. इतरेन पारिमन्तेन भित्तिदिसाय चीवरस्स फुट्ठोकासपरियन्तं इतरेन फुट्ठं तं ओकासं ओरिमन्तेन अतिक्कामयतो वा चुतीति योजना. इतरेनाति पारिमन्तेन भित्तिपस्से चीवरवंसे फुसित्वा ठितचीवरपरियन्तेन. फुट्ठं चीवरवंसोकासं. ओरिमन्तेनाति अत्तनो ठितदिसाय चीवरवंसे फुसित्वा ठपितचीवरप्पदेसेन. अतिक्कामयतोति केसग्गमत्तम्पि अतिक्कामेन्तस्स.

एवं दीघन्ताकड्ढने सम्भवन्तं विकप्पं दस्सेत्वा इदानि तिरियन्तेन अतिक्कमनविधिं दस्सेतुमाह ‘‘दक्खिणन्तेना’’तिआदि. पुनाति अथ वा. दक्खिणन्तेन फुट्ठट्ठानं वामन्तेन ¶ अतिक्कामयतो चुतीति योजना. चीवरं हरितुं चीवराभिमुखं ठितस्स अत्तनो दक्खिणपस्से चीवरकोटिया फुट्ठं चीवरट्ठितप्पदेसं वामपस्से चीवरन्तेन अतिक्कामयतो पाराजिकमेवाति अत्थो. वामन्तेन फुट्ठट्ठानं इतरेन अतिक्कामयतो वा चुतीति योजना. वामन्तेन फुट्ठट्ठानन्ति चीवराभिमुखं ठितस्स वामपस्से चीवरन्तेन फुट्ठं चीवरट्ठितप्पदेसं. इतरेन दक्खिणपस्से चीवरन्तेन अतिक्कामयतो वा चुति पाराजिका होतीति अत्थो.

८७. वंसतोति चीवरेन फुसित्वा ठितचीवरवंसप्पदेसतो. ‘‘केसग्गमत्त’’न्ति कत्थचि पोत्थके लिखन्ति, तं न गहेतब्बं. ‘‘उक्खित्ते’’ति भुम्मेकवचनन्तेन समानाधिकरणत्ता पच्चत्तेकवचनन्तता न युज्जतीति. ‘‘केसग्गमत्ते उक्खित्ते’’ति कत्थचि पाठो दिस्सति, सो च पमाणं.

८८. विमोचेन्तो थुल्लच्चयं फुसेति योजना. चीवरवंसे फुसापेत्वा, अफुसापेत्वा वा रज्जुया बन्धित्वा ठपितचीवरं गण्हितुकामो थेय्यचित्तेन बन्धनं मोचेन्तो थुल्लच्चयं आपज्जतीति अत्थो. मुत्तेति मुत्तमत्ते. पाराजिको होति ठाना चुतभावतोति अधिप्पायो.

८९. वेठेत्वाति एत्थ ‘‘वंसमेवा’’ति सामत्थियतो लब्भति. चीवरवंसं पलिवेठेत्वा तत्थेव ठपितचीवरं निब्बेठेन्तस्स भिक्खुनोपि अयं नयोति सम्बन्धो. निब्बेठेन्तस्साति विनिवेठेन्तस्स. अयं नयोति ‘‘निब्बेठेन्तस्स थुल्लच्चयं, निब्बेठिते पाराजिक’’न्ति यथावुत्तनयमतिदिसति ¶ . वलयं छिन्दतो वापि अयं नयोति सम्बन्धो. ‘‘भिक्खुनो, वंसे, ठपितं, चीवर’’न्ति च आनेत्वा योजेतब्बं. चीवरवंसे पवेसेत्वा ¶ ठपितं चीवरवलयं यथा छिन्नमत्ते ठाना चवति, तथा छिन्दन्तस्स भिक्खुनो छेदने थुल्लच्चयं, छिन्ने पाराजिकन्ति अत्थो. मोचेन्तस्साप्ययं नयोति एत्थापि ‘‘वलय’’न्ति इमिना सद्धिं ‘‘भिक्खुनो’’तिआदिपदानि योजेतब्बानि. चीवरवंसे ठपितं चीवरं वलयं मोचेन्तस्सापि थुल्लच्चयपाराजिकानि पुब्बे वुत्तनयानेव.

इह पुरिमेन अपि-सद्देन यथावुत्तपकारद्वये सम्पिण्डिते इतरेन अपि-सद्देन अवुत्तसम्पिण्डनमन्तरेन अत्थविसेसाभावतो अवुत्तमत्थं सम्पिण्डेति, तेन ‘‘आकासगतं वा करोति, नीहरति वा’’ति पकारद्वयं सङ्गण्हाति. तेन रुक्खमूले पवेसेत्वा ठपितनिधिसङ्खलिकवलयमिव चीवरवंसे सब्बट्ठानेहिपि अफुसापेत्वा चीवरवलयं आकासगतं करोन्तस्सापि चीवरवंसकोटिया बहि नीहरन्तस्सापि थुल्लच्चयपाराजिकानि वुत्तनयेनेव ञातब्बानीति एतेयेव सङ्गण्हाति. ‘‘वलयं छिन्दतो वापि, मोचेन्तस्स वापि, वलयं आकासगतं वा करोति, नीहरति वा’’ति इमेसु चतूसु विकप्पेसु एकम्पि तथा अकत्वा चीवरवलयं चीवरवंसे घंसेत्वा इतो चितो च सञ्चारेन्तस्स चीवरवलयस्स सब्बोपि चीवरवंसो ठानन्ति ‘‘ठानाचावनं नत्थी’’ति वुत्तब्यतिरेकवसेन दस्सितब्बन्ति गहेतब्बं.

९०. ठपितस्स हीति एत्थ पसिद्धिसूचकं हि-सद्दं आनेत्वा ‘‘चीवरे विय ही’’ति योजेत्वा विसेसत्थजोतकं तु-सद्दं आनेत्वा ‘‘ठपितस्स तू’’ति योजेतब्बं. अथ वा निपातानमनेकत्थत्ता यथाठाने ठितानमेव विसेसत्थे हि-सद्दो, पसिद्धियं तु-सद्दो च योजेतब्बो. विनिच्छयो वेदितब्बोति योजना. दीघतो वा तिरियतो वा पसारेत्वा ¶ चीवरवंसे निक्खित्तस्स चीवरस्स विनिच्छयो पन संहरित्वा चीवरवंसे ठपितचीवरविनिच्छयो विय वुत्तो, ‘‘ओरिमन्तेन…पे… पाराजिकं भवे’’ति गाथात्तये वुत्तनयेन वेदितब्बोति अत्थो.

९१. सिक्कायाति ओलम्बिकाधारे. यं भण्डकन्ति सम्बन्धो. पक्खिपित्वाति निवेसेत्वा. लग्गितं होतीति ओलम्बितं होति. ‘‘सिक्कातो तं हरन्तो वा चुतो’’ति एतस्मिं विकप्पे ¶ सिक्काय फुट्ठट्ठानवसेन ठानाचावनं वेदितब्बं. दुतियविकप्पे सिक्काय, बन्धनट्ठानस्स च भित्तिपस्से फुट्ठट्ठानं यदि सिया, तस्स च वसेन ठानाचावनं वेदितब्बं.

९२-३. कुन्तादीति आदि-सद्देन भिन्दिवालादि दीघवत्थु गहेतब्बं. तट्टिकाखाणुका विय भित्तियं पटिपाटिया निवेसितानि मिगसिङ्गानि वा सूलानि वा नागदन्ता नाम. अग्गे वाति कुन्तफलकोटियं वा. बुन्दे वाति कुन्तदन्तमूले वा. परिकड्ढतोति उजुकं आकड्ढतो.

फुट्ठोकासन्ति तस्मिं तस्मिं नागदन्ते फुट्ठट्ठानं अतिक्कामयतो केसग्गमत्तेन पराजयो सियाति सम्बन्धो, ठपितट्ठपितट्ठानं विहाय केसग्गमत्तम्पि अतिक्कामयतो पाराजिकन्ति अत्थो. केसग्गेन अन्तरेन हेतुना पराजयोति गहेतब्बं, केसग्गमत्तम्पि अपनयनहेतु पाराजिकं होतीति अत्थो.

९४-५. एवं दीघतो आकड्ढने, उक्खिपने च विनिच्छयं दस्सेत्वा तिरियं आकड्ढने, परतो नयने च विनिच्छयं दस्सेतुमाह ‘‘पाकाराभिमुखो’’तिआदि. आकड्ढतीति अत्तनो ¶ ठितट्ठानाभिमुखं आविञ्छति. ओरिमन्तफुट्ठोकासन्ति ओरिमन्तेन फुट्ठोकासं, अत्तनो दिसाय कुन्तदण्डेन फुट्ठोकासन्ति अत्थो. एत्थ अच्चयनकिरियासम्बन्धे सामिवचनप्पसङ्गे उपयोगवचनं. ‘‘सकम्मकधातुप्पयोगे उपयोगवचनस्स मागधिकवोहारे दस्सनतो कम्मत्थेयेव उपयोगवचन’’न्ति एके वदन्ति, एतं कच्चायनलक्खणेन समानं. इतरन्तच्चयेति इतरन्तेन कतो अच्चयोति इतरन्तच्चयो, मज्झेपदलोपसमासो, पारिमन्तेन कत्तब्बातिक्कमे कतेति अत्थो. केसग्गेन चुतोति योजना. यथावुत्तोयेव अत्थो.

परतो पेल्लन्तस्साति परतो कत्वा पेल्लन्तस्स, भित्तिपस्साभिमुखं कत्वा निप्पीळेन्तस्साति अत्थो. तथेवाति ‘‘केसग्गेन चुतो’’ति आकड्ढति. ठपितेपि च कुन्तादिम्हि अयं नयोति योजना. ‘‘केसग्गेना’’तिआदिना अयमेव विनिच्छयनयो वत्तब्बोति अत्थो.

९६. तालस्स फलं चालेन्तस्स अस्स भिक्खुनो येन फलेन वत्थु पञ्चमासकं पूरति, तस्मिं फले बन्धना मुत्ते पाराजिकं भवेति योजना.

९७. तालस्स ¶ पिण्डिं छिन्दतीति तालफलकण्णिकं छिन्दति. याय वत्थु पूरति, तस्सा छिन्नमत्ताय ‘‘अस्स पाराजिकं सिया’’ति हेट्ठा वुत्तनयो इधापि योजेतब्बो. तालपिण्डि सचे आकासगता होति, पिण्डिमूलमेव ठानं. पण्णदण्डे वा पण्णे वा अपस्साय ठिता चे, ठितट्ठानेहि सह पिण्डिमूलं गहेत्वा ठानभेदं ञत्वा ठानाचावनेन पाराजिकम्पि दट्ठब्बं. एसेव नयोति ‘‘येन वत्थु पूरति, तस्मिं बन्धना मुत्ते अस्स पाराजिकं सिया’’ति यथावुत्तो एव नयो. एतेसु सब्बेसु ¶ ठानेसु पाराजिकवीतिक्कमतो पुब्बभागानन्तरप्पयोगे थुल्लच्चयञ्च सहपयोगे पाचित्तियट्ठाने दुक्कटञ्च ततोपि पुब्बपयोगे पाचित्तियट्ठाने पाचित्तियञ्च दुक्कटञ्च गमनदुतियपरियेसनादिअवसेसपयोगेसु अदिन्नादानपुब्बकत्ता दुक्कटञ्च असम्मुय्हन्तेहि वेदितब्बं.

वेहासट्ठकथावण्णना.

९८. उदके निधिट्ठानं गच्छतोति सम्बन्धो. अगम्भीरोदके निधिट्ठानं पदवारेन गच्छतो पदे पदे पुब्बपयोगे दुक्कटं होतीति योजना. गम्भीरे पन तथाति ‘‘पदवारेन गच्छतो दुक्कट’’न्ति यथावुत्तमतिदिसति. गच्छतोति तरतो, हत्थं अचालेत्वा तरन्तस्स पदवारगणनाय, हत्थेन च वायमन्तस्स ‘‘पदवारेना’’ति इदं उपलक्खणन्ति कत्वा हत्थवारगणनाय पदवारगणनाय दुक्कटानि वेदितब्बानि. तेन वुत्तं अट्ठकथायं ‘‘गम्भीरे हत्थेहि वा पादेहि वा पयोगं करोन्तस्स हत्थवारेहि वा पदवारेहि वा पयोगे पयोगे दुक्कट’’न्ति (पारा. अट्ठ. १.९८).

उम्मुज्जनादिसूति एत्थ आदि-सद्देन निमुज्जनं सङ्गण्हाति. एत्थापि ‘‘तथा’’ति अनुवत्तमानत्ता पयोगे पयोगे दुक्कटन्ति अयमत्थो वेदितब्बो. निहितकुम्भिया गहणत्थं निमुज्जनुम्मुज्जनेसुपि हत्थवारेन, पदवारेन, हत्थपदवारेहि च दुक्कटमेवाति वुत्तं होति. तेनाह अट्ठकथायं ‘‘एसेव नयो कुम्भिगहणत्थं निमुज्जनुम्मुज्जनेसू’’ति (पारा. अट्ठ. १.९८).

इमिस्सा गाथाय ‘‘निधिट्ठानं गच्छतो दुक्कट’’न्ति वचनतो तथा गच्छन्तस्स उदकसप्पचण्डमच्छदस्सनेन भायित्वा पलायन्तस्स गमनस्स अतदत्थत्ता अनापत्तीति ब्यतिरेकेन ¶ विञ्ञायति. एत्थ दुतियपरियेसनादिसब्बपयोगेसु पाचित्तियट्ठाने ¶ पाचित्तियञ्च पाचित्तियेन सह दुक्कटञ्च अवसेसपयोगेसु सुद्धदुक्कटञ्च सहपयोगे भाजनामसने अनामासदुक्कटञ्च फन्दापने थुल्लच्चयञ्च ठानाचावने पाराजिकञ्च निधिकुम्भिया वुत्तनयेन विञ्ञातुं सक्काति न वुत्तन्ति दट्ठब्बं. तत्थ ठानभेदो पञ्चधा होति, इध पीळेत्वा ओसारेतुं सक्कुणेय्यत्ता अधोदिसाय सह छब्बिधं होतीति अयमेतेसं विसेसो.

९९. तत्थ जातकपुप्फेसूति तस्मिं जले रुळ्हेसु उप्पलादिकुसुमेसु, निद्धारणे भुम्मं. येन पुप्फेनाति निद्धारितब्बं. छिन्दतोति एत्थ वत्तमानकालवसेन अत्थं अग्गहेत्वा ‘‘छिन्नवतो’’ति भूतवसेन अत्थो गहेतब्बो. एवं अग्गहिते अन्तिमस्स पयोगस्स याव अनुपरमो, थुल्लच्चयारहत्ता पाराजिकवचनस्स वत्थुविरोधिताय च इमस्सेव पच्छिमकुसुमस्स कन्तनकाले पुप्फनाळपस्से तचमत्तेपि अच्छिन्ने पाराजिकं नत्थीति दस्सेतुं ‘‘एकनाळ…पे… परिरक्खती’’ति एत्थेव अनन्तरे वुच्चमाननयस्स विरुद्धत्ता च इमं विनिच्छयं दस्सेतुं लिखितस्स ‘‘यस्मिं पुप्फे वत्थु पूरति, तस्मिं छिन्नमत्ते पाराजिक’’न्ति (पारा. अट्ठ. १.९८) अट्ठकथावचनस्स विरुद्धत्ता च वत्तमानकालमगहेत्वा भूतकालस्सेव गहेतब्बत्ता ‘‘कदा देवदत्त आगतोसी’’ति पञ्हस्स ‘‘एसोहमागच्छामि, आगच्छन्तं मा मं विज्झा’’ति उत्तरे विय वत्तमानसमीपे वत्तमानेवाति भूते वत्तमानब्यपदेसतो वुत्तन्ति दट्ठब्बं.

१००. ‘‘उप्पलजातिया’’ति इमिना ‘‘पदुमजातिया’’ति ब्यतिरेकतो वुत्तत्ता ‘‘पदुमजातिकानं पन दण्डे छिन्ने अब्भन्तरे सुत्तं अच्छिन्नम्पि रक्खती’’ति (पारा. अट्ठ. १.९८) अट्ठकथानयो सङ्गहितोति ¶ दट्ठब्बं. एकनाळस्स वा पस्सेति ‘‘नाळस्स एकपस्से’’ति वत्तब्बे गाथाबन्धसुखत्थं वुत्तन्ति वेदितब्बं. ततोति नाळतो.

१०१. भारबद्धकुसुमेसु विनिच्छयस्स वक्खमानत्ता छिन्दित्वा ठपितेसूति अबद्धकुसुमवसेन गहेतब्बं. पुब्बे वुत्तनयेनाति तत्रजातककुसुमेसु वुत्तविनिच्छयानुसारेन. ‘‘येन पुप्फेन पूरति, तस्मिं छिन्नमत्ते’’ति अवत्वा गहितमत्ते पाराजिकन्ति योजना चेत्थ विसेसो.

१०२. भारं कत्वा बद्धानि भारबद्धानीति मज्झपदलोपीसमासो. पुप्फानीति पादग्घनकानि ¶ उप्पलादिकुसुमानि. छस्वाकारेसूति उदके ओसीदापेतुं सक्कुणेय्यत्ता अधोदिसाय सह चतस्सो दिसा, उद्धन्ति इमासु छसु दिसासु, निद्धारणे भुम्मं. केनचि आकारेनाति निद्धारेतब्बदस्सनं. ठानाचावनस्स साधकतमत्ता करणेयेव करणवचनं. नस्सतीति पादग्घनकपुप्फानं ठानाचावनेन पाराजिकमापज्जित्वा लोकियलोकुत्तरानं अनवसेसगुणानं पतिट्ठानभूतं पातिमोक्खसंवरसीलं नासेत्वा सयं गुणमरणेन मीयतीति अत्थो.

१०३. पुप्फानं कलापन्ति पादग्घनकउप्पलादिकुसुमकलापं. उदकं चालेत्वाति यथा वीचि उट्ठाति, तथा चालेत्वा. पुप्फट्ठानाति पुप्फानं ठितट्ठाना. चावेतीति कलापं केसग्गमत्तम्पि अपनेति. ‘‘पुप्फं ठाना चावेती’’ति कत्थचि पोत्थकेसु पाठो दिस्सति. पुप्फकलापस्सेव गहितत्ता पुरिमोयेव गहेतब्बो.

१०४. ‘‘एत्थ गतं गहेस्सामी’’ति सह पाठसेसेन योजना. परिकप्पेतीति ‘‘एत्थ गतं गहेस्सामी’’ति ठानं परिच्छिन्दित्वा ¶ तक्केति. रक्खतीति ठानाचावनेपि सति सो परिकप्पो पाराजिकापत्तितो तं भिक्खुं रक्खति. गतट्ठानाति पुप्फकलापेन गतं सम्पत्तञ्च तं ठानञ्चाति विग्गहो. ‘‘उद्धरन्तो’’ति एतेन ‘‘पुप्फानं कलाप’’न्ति आनेत्वा सम्बन्धितब्बं. ‘‘कतट्ठाना’’तिपि पाठो, कता पुप्फानं ठाना उद्धरन्तोति सम्बन्धो. उदकं चालेत्वा वीचियो उट्ठापेत्वा वीचिप्पहारेन उदकपिट्ठेन परिकप्पितट्ठानं सम्पत्तं पुप्फकलापं ठितट्ठाना उद्धरन्तो केसग्गमत्तम्पि ठाना चावेन्तोति अत्थो. ‘‘ठाना’’ति इदं ‘‘भट्ठो’’ति इमिना सम्बन्धनीयं. भट्ठो नाम पवुच्चतीति अत्तना समादाय रक्खियमाना पातिमोक्खसंवरसीलसङ्खातसब्बगुणरतनङ्कुराभिनिब्बत्तट्ठाना पतितो नाम होतीति पवुच्चति.

१०५. जलतो अच्चुग्गतस्साति एत्थ ‘‘पुप्फस्सा’’ति सामत्थिया लब्भति. जलपिट्ठितो अच्चुग्गतस्स पुप्फस्स सकलजलं ठानं, कद्दमपिट्ठितो पट्ठाय उदकपिट्ठिपरियन्तं पुप्फदण्डेन फरित्वा ठितं सब्बमुदकं ठानन्ति वुत्तं होति. उप्पाटेत्वाति पुप्फग्गं आकड्ढित्वा उप्पीळेत्वा. ततोति तस्मा पुप्फट्ठानभूतसकलजलरासितो. उजुन्ति उजुं कत्वा. उद्धरतोति उप्पाटेन्तस्स.

१०६. नाळन्तेति उप्पाटितपुप्फनाळस्स मूलकोटिया. जलतोति उदकपिट्ठितो. मुत्तमत्ते ¶ केसग्गमत्तं दूरं कत्वाति पाठसेसयोजना कातब्बा. ‘‘जलतो’’ति पठमततियपादेसु द्विक्खत्तुं वचनं अत्थाविसेसेपि पदावुत्तिअलङ्कारे अड्ढयमकवसेन वुत्तत्ता पुनरुत्तिदोसो न होतीति वेदितब्बं. ‘‘मुत्तमत्ते, अमुत्ते’’ति च सम्बन्धितब्बं, अत्थानं वा विसेसतो उभयत्थ वुत्तन्ति वेदितब्बं. तस्मिं नाळन्तेति सम्बन्धो.

१०७. तस्स ¶ नामेत्वा उप्पाटितस्स. सह गच्छेन उप्पाटितस्सापि अयमेव विनिच्छयो. इध पन सब्बपुप्फपण्णनाळानि मूलतो पभुति पठमं ठितट्ठानतो अपनामनवसेन ठानाचावनं वेदितब्बं. एवं पुप्फादीनि उप्पाटेन्तस्स भूतगामविकोपनापत्तिया ठाने सहपयोगदुक्कटं होतीति वेदितब्बं.

१०८-९. बळिसादिमच्छग्गहणोपकरणानं वचनतो, जले ठितमतमच्छानं विनिच्छयस्स च वक्खमानत्ता मच्छेति जीवमानकमच्छानं गहणं. उपलक्खणवसेन वा अवुत्तसमुच्चयत्थ वा-सद्देन वा खिपकादीनि मच्छवधोपकरणानि वुत्तानेवाति दट्ठब्बं. वत्थूति पादो. तस्मिं मच्छे. उद्धटोयेव उद्धटमत्तो, मच्छो, तस्मिं. जलाति उदकतो केसग्गमत्तम्पि अपनेत्वा उक्खित्तमत्तेति वुत्तं होति.

११०. पुप्फानं विय मच्छानम्पि ठितट्ठानमेव ठानन्ति अग्गहेत्वा सकलजलं ठानं कत्वा कस्मा वुत्तन्ति आह ‘‘ठानं सलिलजानं ही’’तिआदि. सलिले जाता सलिलजा, इति पकरणतो मच्छायेव वुच्चन्ति. अत्थप्पकरणसद्दन्तरसन्निधानादीहि सद्दा विसेसत्थं वदन्तीति. हीति पसिद्धियं. केवलन्ति अवधारणे, जलमेवाति वुत्तं होति. इमिना बहिउदकं निवत्तितं होति. सकलं जलमेव ठानं यस्मा, तस्मा सलिलट्ठं जला विमोचेन्तो पाराजिको होतीति हेतुहेतुमन्तभावेन योजना वेदितब्बा. आपन्नं पराजेतीति पाराजिका, आपत्ति, सा एतस्स अत्थीति पाराजिको, पुग्गलो.

१११. नीरं उदकं. वारिम्हि जले जातो वारिजो, इति पकरणतो मच्छोव गय्हति. एतेनेव आकासे उप्पतितमच्छो ¶ , गोचरत्थाय च थलमुग्गतकुम्मादयो उपलक्खिताति वेदितब्बं. तेसं गहणे विनिच्छयो आकासट्ठथलट्ठकथाय वुत्तनयेन वेदितब्बो. भण्डग्घेन विनिद्दिसेति दुक्कटादिवत्थुनो ¶ भण्डस्स अग्घवसेन दुक्कटथुल्लच्चयपाराजिकापत्तियो वदेय्याति अत्थो.

११२. तळाकेति सरस्मिं, इमिना च वापिपोक्खरणिसोब्भादिजलासया सङ्गय्हन्ति. नदियाति निन्नगाय, इमिना च कन्दरादयो सङ्गय्हन्ति. निन्नेति आवाटे. मच्छविसं नामाति एत्थ नाम-सद्दो सञ्ञायं. मच्छविसनामकं मदनफलादिकं दट्ठब्बं. गतेति विसपक्खिपके मच्छघातके गते.

११४. सामिकेसूति विसं योजेत्वा गतेसु मच्छसामिकेसु. आहरन्तेसूति आहरापेन्तेसु. भण्डदेय्यन्ति भण्डञ्च तं देय्यञ्चाति विग्गहो, अत्तना गहितवत्थुं वा तदग्घनकं वा भण्डं दातब्बन्ति अत्थो.

११५. मच्छेति मतमच्छे. सेसेति नमतमच्छे.

११६. अमतेसु गहितेसूति पकरणतो लब्भति, निमित्तत्थे चेतं भुम्मं. अनापत्तिं वदन्तीति अदिन्नादानापत्तिया अनापत्तिं वदन्ति, मारणप्पत्तिया पाचित्तियं होतेव. अयञ्च विनिच्छयो अरक्खितअगोपितेसु अस्सामिकतळाकादीसु वेदितब्बो.

उदकट्ठकथावण्णना.

११७. नावन्ति एत्थ ‘‘नावा नाम याय तरती’’ति (पारा. ९९) वचनतो जलतारणारहं अन्तमसो एकम्पि वहन्तं रजनदोणिवेणुकलापादिकं ¶ वेदितब्बं. नावट्ठं नाम भण्डं यं किञ्चि इन्द्रियबद्धं वा अनिन्द्रियबद्धं वा. ‘‘थेनेत्वा गण्हिस्सामी’’ति इमिना ‘‘थेय्यचित्तस्सा’’ति इममत्थं विञ्ञापेति. पादुद्धारेति दुतियपरियेसनादिअत्थं गच्छन्तस्स पदे पदे. दोसाति दुक्कटापत्तियो. वुत्ताति ‘‘नावट्ठं भण्डं अवहरिस्सामी’ति थेय्यचित्तो दुतियं वा परियेसति गच्छति वा, आपत्ति दुक्कटस्सा’’ति (पारा. ९९) पदभाजनियं भगवता वुत्ता, इमिना पुब्बपयोगसहपयोगदुक्कटानि, फन्दापने थुल्लच्चयं, ठानाचावने पाराजिकञ्च उपलक्खणवसेन दस्सितन्ति वेदितब्बं.

११८. चण्डसोतेति ¶ वेगेन गच्छन्ते उदकप्पवाहे, ‘‘चण्डसोते’’ति इमिना बन्धनं विना सभावेन अट्ठितभावस्स सूचनतो ‘‘बन्धनमेव ठान’’न्ति वुत्तट्ठानपरिच्छेदस्स कारणं दस्सितन्ति वेदितब्बं. यस्मा चण्डसोते बद्धा, तस्मा बन्धनमेकमेव ठानं मतन्ति वुत्तं होति. तस्मिन्ति बन्धने. धीरा विनयधरा.

११९-१२०. ‘‘निच्चले उदके नाव-मबन्धनमवट्ठित’’न्ति इमिना छधा ठानपरिच्छेदस्स लब्भमानत्ते कारणं दस्सेति. नावं कड्ढतो तस्स पाराजिकन्ति सम्बन्धो. पुनपि किं करोन्तोति आह ‘‘एकेनन्तेन सम्फुट्ठ’’न्तिआदि. तं नावं अतिक्कामयतोति सम्बन्धो. एत्थापि ‘‘कड्ढितवतो अतिक्कमितवतो’’ति भूतवसेन अत्थो योजेतब्बो. यमेत्थ वत्तब्बं, तं हेट्ठा वुत्तनयमेव.

१२१. एवं चतुपस्साकड्ढने विनिच्छयं दस्सेत्वा इदानि उद्धं, अधो च उक्खिपनओसीदापनेसु विनिच्छयं दस्सेतुमाह ‘‘तथा’’तिआदि. तथाति ‘‘तस्स पाराजिक’’न्ति आकड्ढति. कस्मिं ¶ कालेति आह ‘‘उद्धं केसग्गमत्तम्पी’’तिआदि. अधोनावातलन्ति नावातलस्स अधो अधोनावातलं, तस्मिं उद्धं केसग्गमत्तम्पि उदकम्हा विमोचितेति इमिना सम्बन्धो. तेन फुट्ठं केसग्गमत्तम्पि मुखवट्टिया विमोचितेति योजना. तेनाति अधोनावातलेन फुट्ठे उदके मुखवट्टिया करणभूताय केसग्गमत्तम्पि विमोचितेति गहेतब्बं.

१२२. तीरे बन्धित्वा पन निच्चले जले ठपिता या नावा, तस्सा नावाय ठानं बन्धनञ्च ठितोकासो चाति द्विधा मतन्ति योजना.

१२३. पुब्बं पठमं बन्धनस्स विमोचने थुल्लच्चयं होतीति योजना. केनचुपायेनाति ‘‘पुरतो पच्छतो वापी’’तिआदिक्कमेन यथावुत्तोपायछक्केसु येन केनचि उपायेनाति अत्थो. ठाना चावेति नावं.

१२४. पठमं ठाना चावेत्वाति ‘‘पुरतो पच्छतो वा’’तिआदिना यथावुत्तेसु छसु आकारेसु अञ्ञतरेन आकारेन नावं ठपितट्ठानतो पठमं चावेत्वा. एसेव च नयोति नावाय ¶ पठमं ठितट्ठानतो चावने थुल्लच्चयं, पच्छा बन्धनमोचने पाराजिकन्ति एसेव नयो नेतब्बोति अत्थो. एत्थ च ‘‘तीरे बन्धित्वा निच्चले उदके ठपितनावाय बन्धनञ्च ठितोकासो चाति द्वे ठानानि, तं पठमं बन्धना मोचेति, थुल्लच्चयं. पच्छा छन्नं आकारानं अञ्ञतरेन ठाना चावेति, पाराजिकं. पठमं ठाना चावेत्वा पच्छा बन्धनमोचनेपि एसेव नयो’’ति (पारा. ९९) अट्ठकथायं वुत्तविनिच्छयो सङ्गहितो. आमसनफन्दापनेसु दुक्कटथुल्लच्चयानि हेट्ठा कुम्भियं वुत्तनयेनेव ञातुं सक्कुणेय्यत्ता न वुत्तानीति वेदितब्बं. एवमुपरिपि.

१२५. उस्सारेत्वाति ¶ उदकतो थलं आरोपेत्वा. निकुज्जित्वाति अधोमुखं कत्वा. थले ठपिताय नावाय मुखवट्टिया फुट्ठोकासो एव ठानन्ति योजना. हीति विसेसो, तेन जलट्ठतो थलट्ठाय नावाय वुत्तं विसेसं जोतेति.

१२६. एत्थ अधो ओसीदापनस्स अलब्भमानताय तं विना इतरेसं पञ्चन्नं आकारानं वसेन ठानाचावनं दस्सेतुमाह ‘‘ञेय्यो’’तिआदि. यतो कुतोचीति तिरियं चतस्सन्नं, उपरिदिसाय च वसेन यं किञ्चि दिसाभिमुखं केसग्गमत्तम्पि अतिक्कमेन्तो.

१२७. उक्कुज्जितायपीति उद्धंमुखं ठपितायपि. घटिकानन्ति दारुखण्डानं. ‘‘तथा’’ति इमिना ‘‘ञेय्यो ठानपरिच्छेदो’’तिआदिना वुत्तनयं अतिदिसति. सो पन उक्कुज्जित्वा भूमियं ठपितनावाय युज्जति. घटिकानं उपरि ठपिताय पन नागदन्तेसु ठपितकुन्ते वुत्तविनिच्छयो युज्जति.

१२८. ‘‘थेय्या’’ति इदं ‘‘पाजेन्तस्सा’’ति विसेसनं. तित्थेति तित्थासन्नजले. अरित्तेनाति केनिपातेन. फियेनाति पाजनफलकेन. पाजेन्तस्साति पेसेन्तस्स. ‘‘तं पाजेती’’तिपि पाठो दिस्सति, तं नावं यो पाजेति, तस्स पराजयोति अत्थो.

१२९-३०. छत्तन्ति आतपवारणं. पणामेत्वाति यथा वातं गण्हाति, तथा पणामेत्वा. उस्सापेत्वाव चीवरन्ति चीवरं उद्धं उच्चारेत्वा वा. गाथाछन्दवसेन ‘व’इति रस्सत्तं. लङ्कारसदिसन्ति पसारितपटसरिक्खकं. समीरणन्ति मालुतं. न दोसो तस्स विज्जतीति इदं वातस्स ¶ ¶ अविज्जमानक्खणे एवं करोतो पच्छा आगतेन वातेन नीतनावाय वसेन वुत्तं. वायमाने पन वाते एवं करोन्तस्स आपत्तियेवाति दट्ठब्बं.

१३१-२. सयमेव उपागतन्ति सम्बन्धो. गामसमीपे तित्थं गामतित्थं. तन्ति नावं. ठानाति छत्तेन वा चीवरेन वा गहितवातेन गन्त्वा गामतित्थे ठितट्ठाना. अचालेन्तोति फन्दापनम्पि अकरोन्तो, इमिना थुल्लच्चयस्सापि अभावं दस्सेति. ‘‘अचावेन्तो’’तिपि पाठो, ठितट्ठानतो केसग्गमत्तम्पि अनपनेन्तोति अत्थो, इमिना पाराजिकाभावं दस्सेति. किणित्वाति मूलेन विक्किणित्वा. सयमेव च गच्छन्तिन्ति एत्थ च-कारो वत्तब्बन्तरसमुच्चये. तथा पणामितछत्तेन वा उस्सापितचीवरेन वा गहितवातेन अत्तना गच्छन्तिं. ठाना चावेतीति अत्तना इच्छितदिसाभिमुखं कत्वा पाजनवसेन गमनट्ठाना चावेति.

नावट्ठकथावण्णना.

१३३-४. यन्ति एतेनाति यानं. रमयतीति रथो. वहति, वुय्हति, वहन्ति एतेनाति वा वय्हं. ‘‘उपरि मण्डपसदिसं पदरच्छन्नं, सब्बपालिगुण्ठिमं वा छादेत्वा’’ति (पारा. अट्ठ. १.१००) अट्ठकथायं वुत्तनयेन कतं सकटं वय्हं नाम. सन्दमानिकाति ‘‘उभोसु पस्सेसु सुवण्णरजतादिमया गोपानसियो दत्वा गरुळपक्खकनयेन कता सन्दमानिका’’ति (पारा. अट्ठ. १.१००) अट्ठकथायं वुत्तनयेन कतयानविसेसो. ठाना चावनयोगस्मिन्ति ठाना चावनप्पयोगे.

१३५-६. दसट्ठानाचावनवसेन पाराजिकं वदन्तेहि पठमं ठानभेदस्स ञातब्बत्ता तं दस्सेत्वा आपत्तिभेदं दस्सेतुमाह ¶ ‘‘यानस्स दुकयुत्तस्सा’’तिआदि. दुकयुत्तस्साति दुकं गोयुगं युत्तस्स यस्साति, युत्ते यस्मिन्ति वा विग्गहो. दस ठानानीति द्विन्नं गोणानं अट्ठ पादा, द्वे च चक्कानीति एतेसं दसन्नं पतिट्ठितट्ठानानं वसेन दस ठानानि वदेय्याति अत्थो. एतेनेव नयेन चतुयुत्तादियाने अट्ठारसाति ठानभेदस्स नयो दस्सितो होति. यानं पाजयतोति सकटादियानं पेसयतो. ‘‘धुरेति युगासन्ने’’ति अट्ठकथाय गण्ठिपदे वुत्तं. रथीसाय युगेन सद्धिं बन्धनट्ठानासन्नेति वुत्तं होति. ‘‘धुर’’न्ति च युगस्सेव नामं. ‘‘धुरं छड्डेत्वा, धुरं आरोपेत्वा’’ति (पारा. अट्ठ. १.१००) अट्ठकथावचनतो तंसहचरियाय सम्बन्धनट्ठानम्पि ¶ धुरं नाम. इध पन गङ्गा-सद्दो विय गङ्गासमीपे धुरसमीपे पाजकस्स निसज्जारहट्ठाने धुरस्स वत्तमानता लब्भति.

गोणानं पादुद्धारे तस्स थुल्लच्चयं विनिद्दिसेति योजना. इदञ्च गोणानं अविलोमकालं सन्धाय वुत्तं. विलोमकाले सम्भवन्तं विसेसं जोतेतुं ‘‘थुल्लच्चयं तु’’ इच्चत्र तु-सद्देन अट्ठकथायं ‘‘सचे पन गोणा ‘नायं अम्हाकं सामिको’ति ञत्वा धुरं छड्डेत्वा आकड्ढन्ता तिट्ठन्ति वा फन्दन्ति वा, रक्खति ताव. गोणे पुन उजुकं पटिपादेत्वा धुरं आरोपेत्वा दळ्हं योजेत्वा पाचनेन विज्झित्वा पाजेन्तस्स वुत्तनयेनेव तेसं पादुद्धारेन थुल्लच्चय’’न्ति वुत्तविसेसो सङ्गहितोति दट्ठब्बो. चक्कानं हीति एत्थ अधिकेन हि-सद्देन ‘‘सचेपि सकद्दमे मग्गे एकं चक्कं कद्दमे लग्गं होति, दुतियं चक्कं गोणा परिवत्तेन्ता पवत्तेन्ति, एकस्स पन ठितत्ता न ताव अवहारो होति. गोणे पन पुन उजुकं पटिपादेत्वा पाजेन्तस्स ¶ ठितचक्के केसग्गमत्तं फुट्ठोकासं अतिक्कन्ते पाराजिक’’न्ति (पारा. अट्ठ. १.१००) अट्ठकथायं वुत्तविसेसो दस्सितो होतीति दट्ठब्बं.

१३७-९. एत्तावता युत्तयानविनिच्छयं दस्सेत्वा इदानि अयुत्तयानविनिच्छयं दस्सेतुमाह ‘‘अयुत्तकस्सा’’तिआदि. धुरेन उपत्थम्भनियं ठितस्स तस्स अयुत्तकस्सापि च यानकस्स उपत्थम्भनिचक्ककानं वसेन तीणेव ठानानि भवन्तीति योजना. तत्थ अयुत्तकस्साति गोणेहि अयुत्तकस्स. धुरेनाति यथावुत्तनयेन धुरयुत्तट्ठानसमीपदेसेन, सकटसीसेनाति वुत्तं होति. उपत्थम्भनियन्ति सकटसीसोपत्थम्भनिया उपरि ठितस्स. उपत्थम्भयति धुरन्ति उपत्थम्भनी. सकटस्स पच्छिमभागोपत्थम्भनत्थं दीयमानं दण्डद्वयं पच्छिमोपत्थम्भनी नाम, पुरिमभागस्स दीयमानस्स उपत्थम्भनी पुरिमोपत्थम्भनी नामाति अयमुपत्थम्भनीनं विसेसो. इध पुरिमोपत्थम्भनी अधिप्पेता. ‘‘उपत्थम्भनिचक्ककानं वसेन तीणेव ठानानी’’ति इदं हेट्ठा अकप्पकताय उपत्थम्भनिया वसेन वुत्तं, कप्पकताय पन वसेन ‘‘चत्तारी’’ति वत्तब्बं.

‘‘तथा’’ति इमिना ‘‘ठानानि तीणेवा’’ति आकड्ढति, दारुचक्कद्वयवसेन तीणि ठानानीति अत्थो. ‘‘दारून’’न्ति इमिना बहुवचननिद्देसेन रासिकतदारूनं दारुकस्स एकस्सापि फलकस्सापि गहणं वेदितब्बं. ‘‘भूमियम्पि धुरेनेव, तथेव ठपितस्स चा’’ति इमिना ¶ तीणियेव ठानानीति अतिदिसति. एत्थ धुरचक्कानं पतिट्ठितोकासवसेन तीणि ठानानि. एत्थ च उपरिट्ठपितस्स चाति च-कारं ‘‘भूमियं ठपितस्सा’’ति एत्थापि योजेत्वा समुच्चयं कातुं सक्काति. तत्थ अधिकवचनेन च-कारेन अट्ठकथायं ‘‘यं पन अयुत्तकं धुरे एकाय, पच्छतो ¶ च द्वीहि उपत्थम्भनीहि उपत्थम्भेत्वा ठपितं, तस्स तिण्णं उपत्थम्भनीनं, चक्कानञ्च वसेन पञ्च ठानानि. सचे धुरे उपत्थम्भनी हेट्ठाभागे कप्पकता होति, छ ठानानी’’ति (पारा. अट्ठ. १.१००) वुत्तविनिच्छयं सङ्गण्हाति.

पुरतो पच्छतो वापीति एत्थ ‘‘कड्ढित्वा’’ति पाठसेसो. अपि-सद्देन ‘‘उक्खिपित्वापी’’ति अवुत्तं समुच्चिनोति. यो पन पुरतो कड्ढित्वा ठाना चावेति, यो वा पन पच्छतो कड्ढित्वा ठाना चावेति, यो वा पन उक्खिपित्वा ठाना चावेतीति योजना. तिण्णन्ति इमे तयो गहिता, ‘‘तेस’’न्ति सामत्थिया लब्भति, तेसं तिण्णं पुग्गलानन्ति वुत्तं होति. कदा किं होतीति आह ‘‘थुल्लच्चयं तु…पे… पराजयो’’ति. ‘‘ठाना चावे’’ति इदं ‘‘थुल्लच्चय’’न्ति इमिनापि सम्बन्धनीयं. तु-सद्दस्स विसेसजोतनत्थं उपात्तत्ता सावसेसट्ठानाचावने फन्दापनथुल्लच्चयं, निरवसेसट्ठानाचावने पन कते ठानाचावनपाराजिका वुत्ता होतीति दट्ठब्बं.

१४०. अक्खानं सीसकेहीति अक्खस्स उभयकोटीहि. ‘‘जात्याख्यायमेकस्मिं बहुवचनमञ्ञतराय’’मिति वचनतो एकस्मिं अत्थे बहुवचनं युज्जति. ‘‘ठितस्सा’’ति एतस्स विसेसनस्स ‘‘यानस्सा’’ति विसेसितब्बं सामत्थिया लब्भति. ‘‘ठानानि द्वे’’ति वुत्तत्ता यथा सकटधुरं भूमिं न फुसति, एवं उच्चतरेसु द्वीसु तुलादिदारूसु द्वे अक्खसीसे आरोपेत्वा ठपितं यानमेव गय्हति.

१४१. कड्ढन्तोति द्विन्नं अक्खसीसानं आधारभूतेसु दारूसु घंसित्वा इतो चितो च कड्ढन्तो. उक्खिपन्तोति उजुं ठितट्ठानतो उच्चारेन्तो. फुट्ठोकासच्चयेति फुट्ठोकासतो ¶ केसग्गमत्तातिक्कमे. अञ्ञस्साति यथावुत्तप्पकारतो इतरस्स. यस्स कस्सचि रथादिकस्स यानस्स.

१४२. अक्खुद्धीनन्ति चतुन्नं अक्खरुद्धनकआणीनं. अक्खस्स उभयकोटीसु चक्कावुणनट्ठानतो ¶ अन्तो द्वीसु सकटबाहासु अक्खरुद्धनत्थाय द्वे अङ्गुलियो विय आकोटिता चतस्सो आणियो अक्खुद्धि नाम. धुरस्साति धुरबन्धनट्ठानासन्नस्स रथसीसग्गस्स. तं यानं. वा-सद्देन पस्से वा गहेत्वा कड्ढन्तो, मज्झे वा गहेत्वा उक्खिपेन्तोति किरियन्तरं विकप्पेति. गहेत्वाति एत्थ ‘‘कड्ढन्तो’’ति पाठसेसो. ठाना चावेतीति उद्धीसु गहेत्वा कड्ढन्तो अत्तनो दिसाय उद्धिअन्तेन फुट्ठट्ठानं इतरेन उद्धिपरियन्तेन केसग्गमत्तम्पि अतिक्कामेति.

‘‘उद्धीसु वा’’ति सासङ्कवचनेन अनुद्धिकयानस्सापि विज्जमानत्तं सूचितं होति. अट्ठकथायं ‘‘अथ उद्धिखाणुका न होन्ति, सममेव बाहं कत्वा मज्झे विज्झित्वा अक्खसीसानि पवेसितानि होन्ति, तं हेट्ठिमतलस्स समन्ता सब्बं पथविं फुसित्वा तिट्ठति, तत्थ चतूसु दिसासु, उद्धञ्च फुट्ठट्ठानातिक्कमवसेन पाराजिकं वेदितब्ब’’न्ति (पारा. अट्ठ. १.१००) वुत्तविनिच्छयञ्च ब्यतिरेकवसेन सङ्गण्हाति.

१४३. नाभियाति नाभिमुखेन. एकमेव सिया ठानन्ति एकं नाभिया फुट्ठट्ठानमेव ठानं भवतीति अत्थो. ‘‘एकमस्स सिया ठान’’न्ति पोत्थकेसु दिस्सति, ततो पुरिमपाठोव सुन्दरतरो. परिच्छेदोपीति एत्थ पि-सद्दो विसेसत्थजोतको, परिच्छेदो पनाति अत्थो. पञ्चधाति नाभिया चतुपस्सपरियन्तं, उद्धञ्च पञ्चधा, ठानाचावनाकारो होतीति अत्थो.

१४४. ठानानि ¶ द्वेति नेमिया, नाभिया च फुट्ठट्ठानवसेन द्वे ठानानि. अस्साति चक्कस्स. तेसं द्विन्नं ठानानं. भित्तिआदिं अपस्साय ठपितचक्कस्सापि हि अट्ठकथायं वुत्तो अयम्पि विनिच्छयो वुत्तो, योपि इमिना च पाठेन दस्सितो होति.

१४५. अनारक्खन्ति सामिकेन असंविहितारक्खं. अधोदेत्वाति गोणे अपेसेत्वा. वट्टति, पाराजिकं न होतीति अधिप्पायो. सामिके आहरापेन्ते पन भण्डदेय्यं होति.

यानट्ठकथावण्णना.

१४६. भारट्ठकथाय सीसक्खन्धकटोलम्बवसाति एवंनामकानं सरीरावयवानं वसेन भारो ¶ चतुब्बिधो होति. तत्थ सीसभारादीसु असम्मोहत्थं सीसादीनं परिच्छेदो वेदितब्बो – सीसस्स ताव पुरिमगले गलवाटको पिट्ठिगले केसञ्चि केसन्ते आवट्टो होति, गलस्सेव उभोसु पस्सेसु केसञ्चि केसावट्टा ओरुय्ह जायन्ति, ये ‘‘कण्णचूळिका’’ति वुच्चन्ति, तेसं अधोभागो चाति अयं हेट्ठिमपरिच्छेदो, ततो उपरि सीसं, एत्थन्तरे ठितभारो सीसभारो नाम.

उभोसु पस्सेसु कण्णचूळिकाहि पट्ठाय हेट्ठा, कप्परेहि पट्ठाय उपरि, पिट्ठिगलावट्टतो च गलवाटकतो च पट्ठाय हेट्ठा, पिट्ठिवेमज्झावट्टतो च उरपरिच्छेदमज्झे हदयआवाटतो च पट्ठाय उपरि खन्धो, एत्थन्तरे ठितभारो खन्धभारो नाम.

पिट्ठिवेमज्झावट्टतो ¶ , पन हदयआवाटतो च पट्ठाय हेट्ठा याव पादनखसिखा, अयं कटिपरिच्छेदो, एत्थन्तरे समन्ततो सरीरे ठितभारो कटिभारो नाम.

कप्परतो पट्ठाय पन हेट्ठा याव हत्थनखसिखा, अयं ओलम्बकपरिच्छेदो, एत्थन्तरे ठितभारो ओलम्बको नाम.

भरतीति भारो, भरति एतेन, एतस्मिन्ति वा भारो, इति यथावुत्तसीसादयो अवयवा वुच्चन्ति. भारे तिट्ठतीति भारट्ठं. इति सीसादीसु ठितं भण्डं वुच्चति. ‘‘भारोयेव भारट्ठ’’न्ति (पारा. अट्ठ. १.१०१) अट्ठकथावचनतो भरीयतीति भारो, कम्मनि सिद्धेन भार-सद्देन भण्डमेव वुच्चति.

१४७. सिरस्मिंयेवाति यथापरिच्छिन्ने सिरसि एव. सारेतीति अनुक्खिपन्तो इतो चितो च सारेति. थुल्लच्चयं सियाति फन्दापनथुल्लच्चयं भवेय्य.

१४८. खन्धन्ति यथापरिच्छिन्नमेव खन्धं. ओरोपितेति ओहारिते. सीसतोति एत्थ ‘‘उद्ध’’न्ति पाठसेसो, यथापरिच्छिन्नसीसतो उपरीति अत्थो. केसग्गमत्तम्पीति केसग्गमत्तं दूरं कत्वा. पि-सद्दो पगेव ततो अधिकन्ति दीपेति. मोचेन्तोपीति केसग्गेन अफुसन्तं अपनेन्तो. एत्थापि पि-सद्देन न केवलं खन्धं ओरोपेन्तस्सेव पाराजिकं, अपिच खो मोचेन्तोपि ¶ पराजितोति हेट्ठा वुत्तमपेक्खति. पसिब्बकादियमकभारं पन सीसे च पिट्ठियञ्चाति द्वीसु ठानेसु ठितत्ता द्वीहि ठानेहि अपनयनेन पाराजिकं होति, तञ्च ‘‘सीसतो मोचेन्तो’’ति इमिनाव एकदेसवसेन सङ्गहितन्ति दट्ठब्बं.

१४९-५०. एवं ¶ सीसभारे विनिच्छयं दस्सेत्वा तदनन्तरं उद्देसक्कमेसु खन्धभारादीसु विनिच्छये दस्सेतब्बेपि अवसाने वुत्तओलम्बकभारे विनिच्छयं दस्सेत्वा आद्यन्तभारानं वुत्तनयानुसारेन सेसेसुपि विनिच्छयं अतिदिसितुमाह ‘‘भार’’न्तिआदि. सुद्धमानसोति पातरासादिकारणेन अथेय्यचित्तो, हत्थगतभारं थेय्यचित्तेन भूमियं ठपननिस्सज्जनादिं करोन्तस्स हत्थतो मुत्तमत्ते पाराजिकन्ति इदमेतेन उपलक्खितन्ति दट्ठब्बं.

एत्थ वुत्तनयेनेवाति सीसभारओलम्बकभारेसु वुत्तानुसारेन. सेसेसुपि भारेसूति खन्धभारादिकेसुपि. मतिसारेन सारमतिना. वेदितब्बो विनिच्छयोति यथापरिच्छिन्नेसु ठानेसु ठितं पादग्घनकं यं किञ्चि वत्थुं थेय्यचित्तेन ‘‘गण्हिस्सामी’’ति आमसन्तस्स दुक्कटं, ठाना अचावेत्वा फन्दापेन्तस्स थुल्लच्चयं, यथापरिच्छिन्नट्ठानातिक्कमनवसेन वा उद्धंउक्खिपनवसेन वा ठाना चावेन्तस्स पाराजिकं होतीति अयं विनिच्छयो वेदितब्बोति अत्थो.

भारट्ठकथावण्णना.

१५१-३. इदानि आरामट्ठविनिच्छयं दस्सेतुमाह ‘‘दुक्कट’’न्तिआदि. आरामन्ति चम्पकादिपुप्फारामञ्च अम्बादिफलारामञ्चाति द्वीसु आरामेसु यं कञ्चि आरामं. आरमन्ति एत्थ पुप्फादिकामिनोति विग्गहो, तं आरामं, अभि-सद्दयोगे उपयोगवचनं. अभियुञ्जतोति परायत्तभावं जानन्तो ‘‘मम सन्तक’’न्ति अट्टं कत्वा गण्हितुं थेय्यचित्तेन सहायादिभावत्थं दुतियकपरियेसनादिवसेन अभियुञ्जन्तस्स दुक्कटं मुनिना वुत्तन्ति इमिना सम्बन्धनीयं, अदिन्नादानस्स पुब्बपयोगत्ता सहपयोगगणनाय दुक्कटन्ति भगवता ¶ वुत्तन्ति अत्थो. धम्मं चरन्तोति अट्टं करोन्तो. परं सामिकं पराजेति चे, सयं सासनतो पराजितोति योजना.

तस्साति भण्डसामिनो. विमतिं जनयन्तस्साति ‘‘इमिना सह अट्टं कत्वा मम सन्तकं लभिस्सामि ¶ वा, न वा’’ति संसयं उप्पादेन्तस्स चोरस्स. योपि धम्मं चरन्तो सयं परज्जति, तस्स च थुल्लच्चयन्ति योजना.

सामिनो धुरनिक्खेपेति ‘‘अयं थद्धो कक्खळो जीवितब्रह्मचरियन्तरायम्पि मे करेय्य, अलं दानि मय्हं इमिना आरामेना’’ति सामिनो धुरनिक्खेपे सति, अत्तनो ‘‘न दस्सामी’’ति धुरनिक्खेपे चाति योजना. एवं उभिन्नं धुरनिक्खेपे पाराजिकं. तस्साति अभियुञ्जन्तस्स. सब्बेसं कूटसक्खीनञ्चाति च-कारो लुत्तनिद्दिट्ठोति वेदितब्बो. चोरस्स अस्सामिकभावं ञत्वापि तदायत्तकरणत्थं यं किञ्चि वदन्ता कूटसक्खिनो, तेसं सब्बेसम्पि भिक्खूनं पाराजिकं होतीति अत्थो.

आरामट्ठकथावण्णना.

१५४. विहारट्ठकथायं विहारन्ति उपलक्खणत्ता ‘‘परिवेणं वा, आवासं वा’’ति च गहेतब्बं. सङ्घिकन्ति चातुद्दिसं सङ्घं उद्दिस्स भिक्खूनं दिन्नत्ता सङ्घसन्तकं. कञ्चीति खुद्दकं, महन्तं वाति अत्थो. अच्छिन्दित्वान गण्हितुं अभियुञ्जन्तस्स पाराजिका न सिज्झतीतिपि पाठसेसयोजना. हेतुं दस्सेति ‘‘सब्बेसं धुरनिक्खेपाभावतो’’ति, सब्बस्सेव चातुद्दिसिकसङ्घस्स धुरनिक्खेपस्स असम्भवतोति अत्थो. ‘‘विहार’’न्ति एत्तकमेव अवत्वा ‘‘सङ्घिक’’न्ति विसेसनेन दीघभाणकादिभेदस्स गणस्स, एकपुग्गलस्स वा दिन्नविहारादिं अच्छिन्दित्वा गण्हन्ते धुरनिक्खेपसम्भवा पाराजिकन्ति वुत्तं होति. एत्थ विनिच्छयो आरामे विय ¶ वेदितब्बो. इमेसु तत्रट्ठभण्डे विनिच्छयो भूमट्ठथलट्ठआकासट्ठवेहासट्ठेसु वुत्तनयेन ञातुं सक्काति न वुत्तोति वेदितब्बो.

विहारट्ठकथावण्णना.

१५५-६. खेत्तट्ठे सीसानीति वल्लियो. निदम्पित्वानाति यथा धञ्ञमत्तं हत्थगतं होति, तथा कत्वा. असितेनाति दात्तेन. लायित्वाति दायित्वा. सब्बकिरियापदेसु ‘‘सालिआदीनं सीसानी’’ति सम्बन्धनीयं. सालिआदीनं सीसानि निदम्पित्वा गण्हतो यस्मिं बीजे गहिते वत्थु पूरति, तस्मिं बन्धना मोचिते तस्स पाराजिकं भवेति योजना. असितेन लायित्वा गण्हतो ¶ यस्मिं सीसे गहिते…पे… भवे, करेन छिन्दित्वा गण्हतो यस्सं मुट्ठियं गहितायं…पे… भवेति योजना. बीजेति वीहादिफले. वत्थु पूरतीति पादग्घनकं होतीति. मुट्ठियन्ति सीसमुट्ठियं, बीजमुट्ठियं वा. बन्धना मोचितेति बन्धनट्ठानतो मोचिते.

१५७. दण्डो वाति वत्थुपूरकवीहिदण्डो वा. अच्छिन्नो रक्खतीति सम्बन्धो. तचो वाति तस्स दण्डस्स एकपस्से छल्लि वा अच्छिन्नो रक्खतिच्चेव सम्बन्धो. वा-ग्गहणेन इधावुत्तं अट्ठकथागतं (पारा. अट्ठ. १.१०४) ‘‘वाको’’ति इदं सङ्गण्हाति. वाको नाम दण्डे वा तचे वा बाहिरं. इधापि तचो वा अच्छिन्नो रक्खतीति योजना. वीहिनाळम्पि वाति गहितधञ्ञसालिसीसेन पतिट्ठितं वीहिकुद्रूसादिगच्छानं नाळं, तचगब्भोति वुत्तं होति. दीघन्ति दीघं चे होति. ‘‘अनिक्खन्तोवा’’ति इमिना ‘‘दण्डो’’ति सम्बन्धो. ‘‘ततो’’ति पाठसेसो. ततो ¶ दीघवीहिनाळतो सबीजवीहिसीसदण्डो सब्बसो छिन्नो छिन्नकोटिया केसग्गमत्तम्पि बहि अनिक्खन्तोति अत्थो. रक्खतीति तं भिक्खुं दुक्कटथुल्लच्चयपाराजिकवत्थूनं अनुरूपापत्तितो पालेति. मुत्तो चे, न रक्खतीति अत्थो.

वुत्तञ्चेतं अट्ठकथायं ‘‘वीहिनाळं दीघम्पि होति, याव अन्तोनाळतो वीहिसीसदण्डको न निक्खमति, ताव रक्खति. केसग्गमत्तम्पि नाळतो दण्डकस्स हेट्ठिमतले निक्खन्तमत्ते भण्डग्घवसेन कारेतब्बो’’ति (पारा. १.१०४). तथा इमिनाव विनिच्छयेन अट्ठकथायं ‘‘लायितब्बवत्थुपूरकवीहिसीसमुट्ठिया मूले छिन्नेपि सीसेसु अच्छिन्नवीहिसीसग्गेहि सद्धिं जटेत्वा ठितेसु रक्खति, जटं विजटेत्वा वियोजितेसु यथावुत्तपाराजिकादिआपत्तियो होन्ती’’ति एवमादिको विनिच्छयो च सूचितोति गहेतब्बो.

१५८. मद्दित्वाति वीहिसीसानि मद्दित्वा. पप्फोटेत्वाति भुसादीनि ओफुनित्वा. इतो सारं गण्हिस्सामीति परिकप्पेतीति योजना. इतोति वीहिसीसतो. सारं गण्हिस्सामीति सारभागं आदियिस्सामि. सचे परिकप्पेतीति योजना. रक्खतीति वत्थुपहोनकप्पमाणं दात्तेन लायित्वा वा हत्थेन छिन्दित्वा वा ठाना चावेत्वा गहितम्पि याव परिकप्पो न निट्ठाति, ताव आपत्तितो रक्खतीति अत्थो.

१५९. मद्दनेपीति वीहिसीसमद्दनेपि. उद्धरणेपीति पलालापनयनेपि. पप्फोटनेपीति भुसादिकचवरापनयनेपि ¶ . दोसो नत्थीति अग्घवसेन पाराजिकादिआपत्तियो न भवन्ति, सहपयोगदुक्कटं पन होतेव. अत्तनो…पे… पराजयोति ¶ अत्तनो पठमं परिकप्पिताकारेन सब्बं कत्वा सारभागं गण्हितुं अत्तनो भाजने पक्खित्तमत्ते यथावुत्तपाराजिकादयो होन्तीति अत्थो.

१६०. एत्तावता ‘‘खेत्तट्ठं नाम भण्डं खेत्ते चतूहि ठानेहि निक्खित्तं होति भूमट्ठं थलट्ठं आकासट्ठं वेहासट्ठ’’न्ति (पारा. १०४) वुत्तानि खेत्तट्ठानि चत्तारि यथावुत्तसदिसानीति तानि पहाय ‘‘तत्थजातक’’न्तिआदि पाळियं आगते तत्रजाते विनिच्छयं दस्सेत्वा इदानि ‘‘खेत्तं नाम यत्थ पुब्बण्णं वा अपरण्णं वा जायती’’ति (पारा. १०४) एवमागते खेत्तेपि विनिच्छयं दस्सेतुमाह ‘‘जान’’न्तिआदि. जानन्ति परसन्तकभावं जानन्तो. खीलन्ति अप्पितक्खरं वा इतरं वा पासाणादिखीलं. सङ्कामेतीति परायत्तभूमिं सामिका यथा पस्सन्ति, तथा वा अञ्ञथा वा अत्तनो सन्तकं कातुकामताय केसग्गमत्तम्पि ठानं यथा ससन्तकं होति, तथा थेय्यचित्तेन निखणतीति अत्थो.

१६१. तं पाराजिकत्तं तस्स कदा होतीति आह ‘‘सामिकानं तु धुरनिक्खेपने सती’’ति. ‘‘होती’’ति पाठसेसो. तु-सद्देन ‘‘अत्तनो वा’’ति विसेसस्स सङ्गहितत्ता सामिनो निरालयभावसङ्खातधुरनिक्खेपे च ‘‘सामिकस्स न दस्सामी’’ति अत्तनो धुरनिक्खेपे च तस्स पाराजिकत्तं होतीति अत्थो. एवमुदीरितन्ति ‘‘केसग्गमत्तम्पी’’ति एवं नियमितं कथितं.

१६२. या पनाति या भूमि पन. तेसु द्वीसु खीलेसु. आदो थुल्लच्चयन्ति पठमे खीले सङ्कामिते सो भिक्खु थुल्लच्चयं आपज्जति. दुतियेति दुतिये खीले सङ्कामिते पराजयो ¶ होतीति योजना. बहूहि खीलेहि गहेतब्बट्ठाने परियन्तखीलेसु द्वीसु विनिच्छयो च एतेनेव वुत्तो होति. एत्थ पन अन्ते खीलद्वयं विना अवसेसखीलनिखणने च इतरेसु तदत्थेसु सब्बपयोगेसु च दुक्कटं होतीति विसेसो.

१६३-४. ‘‘ममेदं सन्तक’’न्ति ञापेतुकामोति सम्बन्धो. परसन्तकाय भूमिया परायत्तभावं ञत्वाव थेय्यचित्तेन केसग्गमत्तम्पि ठानं गण्हितुकामताय ‘‘एत्तकं ठानं मम सन्तक’’न्ति ¶ रज्जुया वा यट्ठिया वा मिनित्वा परस्स ञापेतुकामोति अत्थो. येहि द्वीहि पयोगेहीति सब्बपच्छिमकेहि रज्जुपसारणयट्ठिपातनानमञ्ञतरेहि द्वीहि पयोगेहि. तेसूति निद्धारणे भुम्मं.

इध रज्जुं वापीति विकप्पत्थवा-सद्देन ‘‘यट्ठिं वा’’ति योजेतब्बेपि अवुत्तसमुच्चयत्थं अधिकवचनभावेन वुत्तपि-सद्देन इधावुत्तमरियादवतीनं विनिच्छयस्स ञापितत्ता यथावुत्तरज्जुयट्ठिविनिच्छयेसु विय परसन्तकाय भूमिया केसग्गमत्तम्पि ठानं थेय्यचित्तेन गण्हितुकामताय वतिपादे निखणित्वा वा साखामत्तेन वा वतिं करोन्तस्स मरियादं वा बन्धन्तस्स पाकारं वा चिनन्तस्स पंसुमत्तिका वा वड्ढेन्तस्स पुब्बपयोगे पाचित्तियट्ठाने पाचित्तियञ्च दुक्कटञ्च सहपयोगे केवलदुक्कटञ्च पच्छिमपयोगेसु द्वीसु पठमपयोगे थुल्लच्चयञ्च अवसानपयोगे पाराजिकञ्च होतीति विनिच्छयोपि सङ्गहितोति दट्ठब्बं.

खेत्तट्ठकथावण्णना.

१६५. वत्थट्ठादीसु वत्थट्ठस्साति एत्थ ‘‘वत्थु नाम आरामवत्थु विहारवत्थू’’ति (पारा. १०५) पदभाजने वुत्तत्ता पुप्फादिआरामे ¶ कातुं सङ्खरित्वा ठपितभूमि च पुब्बकतारामानं विनासे तुच्छभूमि च विहारं कातुं अभिसङ्खता भूमि च नट्ठविहारभूमि चाति एवं विभागवति वसति एत्थ उपरोपो वा विहारो वाति ‘‘वत्थू’’ति वुच्चति इच्चेवं दुविधं वत्थुञ्च ‘‘वत्थुट्ठं नाम भण्डं वत्थुस्मिं चतूहि ठानेहि निक्खित्तं होति भूमट्ठं थलट्ठं आकासट्ठं वेहासट्ठ’’न्ति (पारा. १०५) वचनतो एवं चतुब्बिधं भण्डञ्चाति इदं द्वयं वत्थु च वत्थुट्ठञ्च वत्थुवत्थुट्ठन्ति वत्तब्बे एकदेससरूपेकसेसवसेन समासेत्वा, उ-कारस्स च अकारं कत्वा ‘‘वत्थट्ठस्सा’’ति दस्सितन्ति गहेतब्बं. यथावुत्तदुविधवत्थुनो, वत्थट्ठस्स च भण्डस्साति अत्थो. खेत्तट्ठेति एत्थापि अयमेव समासोति खेत्ते च खेत्तट्ठे चाति गहेतब्बं. नावट्ठादिवोहारेपि एसेव नयो. गामट्ठेपि चाति ‘‘गामट्ठं नाम भण्डं गामे चतूहि ठानेहि निक्खित्तं होति भूमट्ठं…पे… वेहासट्ठ’’न्ति (पारा. १०६) वुत्ते चतुब्बिधे गामट्ठभण्डेपीति अत्थो.

वत्थट्ठगामट्ठकथावण्णना.

१६६. अरञ्ञट्ठकथायं ¶ ‘‘तिणं वा’’तिआदिपदानं ‘‘तत्थजातक’’न्ति पदेन सम्बन्धो. तत्थजातकन्ति ‘‘अरञ्ञं नाम यं मनुस्सानं परिग्गहितं होती’’ति (पारा. अट्ठ. १.१०७) वचनतो तत्थजातं यं किञ्चि मनुस्ससन्तकं सामिकानं अकामा अगहेतब्बतो सारक्खे अरञ्ञे उप्पन्नन्ति अत्थो. तिणं वाति परेहि लायित्वा ठपितं वा अत्तना लायितब्बं वा गेहच्छादनारहं तिणं वा. पण्णं वाति एवरूपमेव गेहच्छादनारहं तालपण्णादिपण्णं वा. लतं वाति तथारूपमेव वेत्तलतादिकं वल्लिं वा. या पन दीघा होति ¶ , महारुक्खे च गच्छे च विनिविज्झित्वा वा वेठेत्वा वा गता, सा मूले छिन्नापि अवहारं न जनेति, अग्गे छिन्नापि. यदा पन अग्गेपि मूलेपि छिन्ना होति, तदा अवहारं जनेति. सचे पन वेठेत्वा ठिता होति, वेठेत्वा ठिता पन रुक्खतो मोचितमत्ता अवहारं जनेतीति अयमेत्थ विसेसो. सामिकेन अविस्सज्जितालयं छल्लिवाकादिअवसेसभण्डञ्च इमिनाव उपलक्खित्वा सङ्गहितन्ति वेदितब्बं. कट्ठमेव वाति दारुं वा. भण्डग्घेनेव कातब्बोति एत्थ अन्तोभूतहेतुत्थवसेन कारेतब्बोति अत्थो गहेतब्बो. तेनाह अट्ठकथायं ‘‘भण्डग्घेन कारेतब्बो’’ति. अवहटतिणादिभण्डेसु अग्घवसेन मासकं वा ऊनमासकं वा होति, दुक्कटं. अतिरेकमासकं वा ऊनपञ्चमासकं वा होति, थुल्लच्चयं. पञ्चमासकं वा अतिरेकपञ्चमासकं वा होति, पाराजिकं. पाराजिकं चे अनापन्नो, आमसनदुक्कटं, फन्दापनथुल्लच्चयञ्च कारेतब्बोति अत्थो. गण्हन्तोति अवहरन्तो.

१६७-७४. इदानि ‘‘कट्ठमेव वा’’ति वुत्तरुक्खदारूसु विनिच्छयं दस्सेतुमाह ‘‘महग्घे’’तिआदि. महग्घेति पञ्चमासकं वा अतिरेकपञ्चमासकं वा अग्घकं हुत्वा महग्घे. नस्सतीति थेय्यचित्तसमङ्गी हुत्वा छिन्नमत्तेपि पाराजिकं आपज्जति. पि-सद्दो अवधारणे. ‘‘कोचिपी’’ति इमिना अद्धगतोपि अल्लं वा होतु पुराणं वा, तच्छेत्वा ठपितं न गहेतब्बमेवाति अत्थो.

मूलेति उपलक्खणमत्तं. ‘‘अग्गे च मूले च छिन्नो होती’’ति (पारा. अट्ठ. १.१०७) अट्ठकथावचनतो मूलञ्च अग्गञ्च छिन्दित्वाति गहेतब्बो. अद्धगतन्ति जिण्णगळितपतिततचं, चिरकालं ठितन्ति वुत्तं होति.

लक्खणेति ¶ अत्तनो सन्तकं ञापेतुं रुक्खक्खन्धे तचं छिन्दित्वा कतसल्लक्खणे. छल्लियोनद्धेति ¶ समन्ततो अभिनवुप्पन्नाहि छल्लीहि परियोनन्धित्वा अदस्सनं गमिते. अज्झावुत्थञ्चाति एत्थ ‘‘गेह’’न्ति पाठसेसो. गेहं कतञ्च अज्झावुत्थञ्चाति योजना. गेहं कातुं अरञ्ञसामिकानं मूलं दत्वा रुक्खे किणित्वा छिन्नदारूहि तं गेहं कतञ्च परिभुत्तञ्चाति अत्थो. विनस्सन्तञ्चाति एत्थापि ‘‘अवसिट्ठं दारु’’न्ति पाठसेसो. तं गेहं कत्वा अवसिट्ठं वस्सातपादीहि विविधा जीरित्वा विनस्समानं, विपन्नदारुन्ति वुत्तं होति. गण्हतो न दोसो कोचीति सम्बन्धो. ‘‘सामिका निरालया’’ति गण्हतो काचिपि आपत्ति नत्थीति अत्थो. किंकारणन्ति चे? अरञ्ञसामिकेहि मूलं गहेत्वा अञ्ञेसं दिन्नत्ता, तेसञ्च निरालयं छड्डितत्ताति इदमेत्थ कारणं.

वुत्तञ्हेतं अट्ठकथायं ‘‘गेहादीनं अत्थाय रुक्खे छिन्दित्वा यदा तानि कतानि, अज्झावुत्थानि च होन्ति, दारूनिपि अरञ्ञे वस्सेन च आतपेन च विनस्सन्ति, ईदिसानिपि दिस्वा ‘छड्डितानी’ति गहेतुं वट्टति. कस्मा? यस्मा अरञ्ञसामिका एतेसं अनिस्सरा. येहि अरञ्ञसामिकानं देय्यधम्मं दत्वा छिन्नानि, ते एव इस्सरा, तेहि च तानि छड्डितानि, निरालया तत्थ जाता’’ति (पारा. अट्ठ. १.१०७). एवम्पि सति पच्छा सामिकेसु आहरापेन्तेसु भण्डदेय्यं होतीति दट्ठब्बं.

यो चाति अरञ्ञसामिकानं देय्यधम्मं पविसन्तो अदत्वा ‘‘निक्खमन्तो दस्सामी’’ति रुक्खे गाहापेत्वा निक्खमन्तो यो च भिक्खु. आरक्खट्ठानं पत्वाति अरञ्ञपालका यत्थ निसिन्ना अरञ्ञं रक्खन्ति, तं ठानं पत्वा. ‘‘चिन्तेन्तो’’ति किरियन्तरसापेक्खत्ता ‘‘अतिक्कमेय्या’’ति सामत्थियतो ¶ लब्भति. तस्मा चित्ते कम्मट्ठानादीनि कत्वाति एत्थ आदि-सद्देन पकारत्थेन कुसलपक्खिया वितक्का सङ्गय्हन्ति. अञ्ञं चिन्तेन्तो वा आरक्खनट्ठानं पत्वायेव अतिक्कामेय्याति योजेत्वा अत्थो वत्तब्बो. तत्थ अञ्ञं चिन्तेन्तो वाति अञ्ञं विहितो वा, इमिना यथावुत्तवितक्कानं सङ्गहो. अस्साति एत्थ ‘‘देय्य’’न्ति कितयोगे कत्तरि सामिवचनत्ता अनेनाति अत्थो.

‘‘योचा’’ति एत्थ अवुत्तसमुच्चयत्थेन च-सद्देन अरञ्ञपविसनकाले यथावुत्तनयेन मूलं अदत्वा अरञ्ञं पविसित्वा दारूनि गहेत्वा गमनकाले ‘‘अरञ्ञपालका सचे याचन्ति, दस्सामी’’ति परिकप्पेत्वा गन्त्वा तेहि अयाचितत्ता अदत्वा गच्छन्तोपि तथेव आगन्त्वा आरक्खकेसु ¶ कीळापसुतेसु वा निद्दायन्तेसु वा बहि निक्खन्तेसु वा तत्थ ठत्वा आरक्खके परियेसित्वा अदिस्वा गच्छन्तोपि तथेव आगन्त्वा तत्थ नियुत्तइस्सरजनेहि अत्तनो हत्थतो दातब्बं दत्वा वा अत्तानं सम्मानं कत्वा वा पालके सञ्ञापेत्वा वा पालके ओकासं याचित्वा तेहि दिन्नोकासो वा गच्छन्तोपीति एत्तका वुत्तेन सदिसत्ता सङ्गहिताति दट्ठब्बा.

वराहाति सूकरा. वग्घाति ब्यग्घा. अच्छाति इस्सा. तरच्छाति काळसीहा. आदि-सद्देन दीपिमत्तहत्थिसीहादयो वाळमिगा सङ्गय्हन्ति. एतेयेव वराहादयो समागमवसेन मरणादिअनिट्ठसमीपचारिताय उप अनिट्ठसमीपे दवन्ति पवत्तन्तीति ‘‘उपद्दवा’’ति वुच्चन्ति. आरक्खट्ठानं आगतकाले दिट्ठवराहादिउपद्दवतोति वुत्तं होति. मुच्चितुकामतायाति मोक्खाधिप्पायेन. ‘‘तथेवा’’ति इमिना पविसनकाले देय्यधम्मं अदत्वा ‘‘निक्खमनकाले दस्सामी’’ति ¶ पविसित्वा दारुं गहेत्वा आरक्खट्ठानं पत्तोति पुरिमगाथाय सामत्थियतो लब्भमानोयेवत्थो दस्सितो. तं ठानन्ति तं आरक्खट्ठानं. अतिक्कामेतीति ‘‘इदं तं ठान’’न्तिपि असल्लक्खणमत्तभयुपद्दवो हुत्वा पलायन्तो अतिक्कमति, भण्डदेय्यं पन होतीति योजना.

सुङ्कघाततोति एत्थापि पि-सद्दो लुत्तनिद्दिट्ठोति वेदितब्बो, सुङ्कगहणट्ठानतोपीति अत्थो. सुङ्कस्स रञ्ञो दातब्बभागस्स घातो मुसित्वा गहणमत्तो, सुङ्को हञ्ञति एत्थाति वा सुङ्कघातोति विग्गहो. सुङ्कघातसरूपं परतो आवि भविस्सति. तस्माति सुङ्कघाततो तस्स गरुकत्ता एव. तन्ति तं सुङ्कघातट्ठानं. अनोक्कम्म गच्छतोति अपविसित्वा गच्छन्तस्स. दुक्कटं उद्दिट्ठं ‘‘सुङ्कं परिहरति, आपत्ति दुक्कटस्सा’’ति (पारा. ११३).

एतन्ति यथावुत्तआरक्खट्ठानं. थेय्यचित्तेन परिहरन्तस्साति थेय्यचित्तेन परिहरित्वा दूरतो गच्छन्तस्स. आकासेनपि गच्छतो पाराजिकमनुद्दिट्ठं सत्थुनाति सम्बन्धो.

ननु च ‘‘इदं पन थेय्यचित्तेन परिहरन्तस्स आकासेन गच्छतोपि पाराजिकमेवा’’ति (पारा. अट्ठ. १.१०७) अट्ठकथायं वुत्तवचनं विना पाळियं ‘‘अरञ्ञट्ठ’’न्ति मातिकापदस्स विभङ्गे ‘‘तत्थजातकं कट्ठं वा लतं वा तिणं वा पञ्चमासकं वा अतिरेकपञ्चमासकं वा अग्घनकं थेय्यचित्तो आमसति, आपत्ति दुक्कटस्स. फन्दापेति, आपत्ति ¶ थुल्लच्चयस्स. ठाना चावेति, आपत्ति पाराजिकस्सा’’ति (पारा. १०६) सामञ्ञवचनतो सुङ्कघाते ‘‘सुङ्कं परिहरति, आपत्ति दुक्कटस्सा’’ति वचनं विय एत्थ आरक्खट्ठानं ¶ परिहरन्तस्स विसुं वुत्तपाराजिकापत्तिवचने असतिपि ‘‘अट्ठकथाय’’न्ति अवत्वा ‘‘सत्थुना’’ति कस्मा आहाति? वुच्चते – अट्ठकथाचरियेन तथेव वुत्तत्ता आह. कस्मा पन अट्ठकथाचरियेन ‘‘अपञ्ञत्तं न पञ्ञपेस्साम, पञ्ञत्तं न समुच्छिन्दिस्सामा’’ति (पारा. ५६५) पाळिपाठं जानन्तेनपि पाळियं अवुत्तपाराजिकं निद्दिट्ठन्ति? एत्थ विनिच्छयं भिक्खूहि पुट्ठेन भगवता वुत्तनयस्स महाअट्ठकथाय आगतत्ता तस्सेव नयस्स समन्तपासादिकायं निद्दिट्ठभावं जानन्तेन इमिनापि आचरियेन इध ‘‘सत्थुना’’ति वुत्तन्ति गहेतब्बं.

अथ वा ‘‘सुङ्कं परिहरति, आपत्ति दुक्कटस्सा’’ति वत्वा आरक्खट्ठानविनिच्छये अवचनं यथावुत्तविसयस्स अदिट्ठभावेन वा सिया, इमस्स तथा अनवज्जता वा सिया, वुत्तानुसारेन सुविञ्ञेय्यता वा सियाति तयो विकप्पा. तेसु पठमविकप्पो सब्बञ्ञुभावबाधनतो दुब्बिकप्पमत्तं होति. दुतियविकप्पो लोकवज्जस्स इमस्स अनवज्जभावो नाम अनुपपन्नोति अनादातब्बो. पारिसेसतो ततियविकप्पो युज्जति.

तत्थ ‘‘वुत्तानुसारेना’’ति किमेत्थ वुत्तं नाम, तदनुसारेन इमस्सापि सुविञ्ञेय्यता कथन्ति चे? पठमनिद्दिट्ठे अरञ्ञट्ठनिद्देसे सामञ्ञेन ‘‘ठाना चावेति, आपत्ति पाराजिकस्सा’’ति (पारा. १०६) इदं वुत्तं, न पन थेय्यचित्तेन आरक्खट्ठानपरिहरणञ्च. ‘‘गमनकाले ‘मूलं दत्वा गमिस्सामी’ति पुब्बपरिकप्पितनियामेन अदत्वा गच्छतो परिकप्पावहारोव होती’’ति च ‘‘तं पन येन केनचि आकारेन परिकप्पितट्ठानं पहाय गमनं ठानाचावनं नाम होतेवाति तेन वत्थुना पाराजिकमेव होती’’ति ¶ च ‘‘ठाना चावेति, आपत्ति पाराजिकस्सा’ति इमिना च विञ्ञातत्थमेव होती’’ति च विसुं न वुत्तं. सुङ्कट्ठानपरिहरणं पन ठानपरिहरणसभावत्ता सभावतो ईदिसंव सन्तम्पि इदं विय परिकप्पितट्ठानं न होतीति वक्खमानराजसम्मतट्ठानतो अञ्ञं परिकप्पितट्ठानं समानम्पि थेय्यचित्तुप्पत्तिमत्तेन तं परिहरित्वा गच्छन्तस्स थेय्यचित्तेन अत्तनो पत्तं गण्हन्तस्स विय पाराजिकाय अवत्थुतञ्च दुक्कटस्सेव वत्थुभावञ्च विञ्ञापेतुं ‘‘सुङ्कं परिहरति, आपत्ति दुक्कटस्सा’’ति वुत्तन्ति भगवतो अधिप्पायञ्ञुना अट्ठकथाचरियेन ‘‘पाराजिकमेवा’’ति (पारा. अट्ठ. १.१०७) वुत्तत्ता ¶ तेन अट्ठकथायं वुत्तनीहारमेव दस्सेतुं अयमाचरियोपि ‘‘सत्थुना पाराजिकमनुद्दिट्ठ’’न्ति आहाति निट्ठमेत्थ गन्तब्बं.

तस्माति यस्मा एवं परिहरित्वा थेय्यचित्तेन दूरतो वज्जेत्वा गच्छन्तस्सापि पाराजिकप्पहोनकताय अच्चन्तभारियं होति, तस्मा. एत्थाति इमस्मिं अरञ्ञारक्खट्ठाने. ‘‘विसेसेना’’ति इदं ‘‘अप्पमत्तेन होतब्ब’’न्ति इमिना हेतुभावेन सम्बन्धनीयं. सतिसम्पन्नचेतसाति च पियसीलेनाति च ‘‘भिक्खुना’’ति एतस्स विसेसनं. असिक्खाकामस्स भिक्खुनो इमस्स ओवादस्स अभाजनताय तं परिवज्जेतुमाह ‘‘पियसीलेना’’ति. पियसीलस्सापि सतिविरहितस्स पमत्तट्ठाने सरणासम्भवा इमस्स अभाजनताय तं वज्जेतुमाह ‘‘सतिसम्पन्नचेतसा’’ति.

अरञ्ञट्ठकथावण्णना.

१७५-६. तोयदुल्लभकालस्मिन्ति तोयं दुल्लभं यस्मिं सो तोयदुल्लभो, तोयदुल्लभो च सो कालो चाति तोयदुल्लभकालो, तस्मिं. आवज्जेत्वा वाति उदकभाजनं नामेत्वा वा. पवेसेत्वा वाति अत्तनो ¶ भाजनं तस्मिं पक्खिपित्वा वा. छिद्दं कत्वापि वाति उदकभाजने ओमट्ठादिभेदं छिद्दं कत्वा वा गण्हन्तस्स भण्डग्घेन विनिद्दिसेति वक्खमानेन सम्बन्धनीयं.

तथाति यथा तोयदुल्लभकालस्मिं भाजने रक्खितगोपितं उदकं अवहरन्तस्स पाराजिकं वुत्तं, तेनेव नीहारेन. वापियं वाति परसन्तकाय सारक्खाय वापियं वा. तळाके वाति तादिसे जातस्सरे वा. एवं सारक्खानं पोक्खरणिआदीनं एतेहि वा अवुत्तसमुच्चयेन वा-सद्देन वा गहणं वेदितब्बं. अत्तनो भाजनं पवेसेत्वा गण्हन्तस्साति उपलक्खणपदन्ति भाजनगतजले च इध च तेलभाजने विय मुखेन वा वंसादीहि वा आकड्ढित्वा थेय्यचित्तेन पिवन्तस्स यथावत्थुकमापत्तिविधानं वेदितब्बं.

१७७. मरियादन्ति वापिआदीनं पाळिवट्टबन्धं. छिन्दतोति कुदालादीहि पंसुआदीनि उद्धरित्वा द्विधा करोन्तस्स. विसेसत्थावजोतकेन तु-सद्देन ‘‘मरियादं छिन्दित्वा दुब्बलं कत्वा तस्स ¶ छिन्दनत्थाय वीचियो उट्ठापेतुं उदकं सयं ओतरित्वा वा गोमहिंसे वा अञ्ञे मनुस्से वा कीळन्ते दारके वा ओतारेत्वा वा अत्तनो धम्मताय ओतिण्णे तासेत्वा वा उदके ठितं रुक्खं छिन्दित्वा वा छेदापेत्वा वा पातेत्वा वा पातापेत्वा वा जलं खोभेति, ततो उट्ठिताहि वीचीहि मरियादे छिन्नेपि तेनेव छिन्नो होति. एवमेव गोमहिंसादयो मरियादं आरोहन्तेनापि अञ्ञेहि आरोहापेन्तेनापि तेसं खुरेहि मरियादे छिन्नेपि, उदकनिद्धमनादिं पिदहित्वा वा पिदहापेत्वा वा वापिमरियादाय नीचट्ठानं बन्धित्वा वा बन्धापेत्वा वा अतिरेकजलापगमनमग्गतो नीहरितब्बोदकं वारेत्वा वा बाहिरतो उदकं पवेसेत्वा वा पूरेति, ओघेन मरियादे ¶ छिन्नेपि तेनेव छिन्नं होती’’ति (पारा. अट्ठ. १.१०८ अत्थतो समानं) एवमादिकं अट्ठकथागतविसेसं सङ्गण्हाति. अदिन्नादानपुब्बतोति अदिन्नादानस्स पुब्बपयोगत्ता. भूतगामेन सद्धिम्पीति भूतगामेनपि सद्धिं. अपि-सद्देन पथविखणनं सम्पिण्डेति. मरियादं छिन्दन्तो तत्थजातं तिणादिं छिन्दति, भूतगामपाचित्तियेन सद्धिं दुक्कटं. जातपथविं छिन्दति, पथविखणनपाचित्तियेन सद्धिं दुक्कटं आपज्जतीति अधिप्पायो.

१७८. कातब्बोति एत्थ ‘‘भण्डग्घेन आपत्तिया’’ति पाठसेसो. अन्तोभूतहेत्वत्थवसेन कारेतब्बोति गहेतब्बो. अन्तो ठत्वा छिन्दन्तो बहिअन्तेन, बहि ठत्वा छिन्दन्तो अन्तोअन्तेन, उभयत्थापि ठत्वा छिन्दन्तो मज्झतो भण्डग्घेन आपत्तिया कारेतब्बोति योजना. अयं पनेत्थ अत्थो – अन्तोवापियं ठत्वा मरियादं छिन्दित्वा उदके बहि निक्खमिते निक्खन्तउदकग्घेन दुक्कटथुल्लच्चयपाराजिकासु यथापन्नाय आपत्तिया कारेतब्बो. बहि ठत्वा मरियादं छिन्दित्वा अन्तोवापियं पविसन्तोदकस्स ठितट्ठानतो चावितक्खणे निक्खन्तउदकग्घेन आपत्तिया कारेतब्बो. कदाचि अन्तो कदाचि बहि ठत्वा मरियादं मज्झे ठपेत्वा छिन्दन्तो मज्झे ठितट्ठानं छिन्दित्वा उदकस्स नीहटक्खणे नीहटउदकस्स अग्घेन आपत्तिया कारेतब्बोति.

उदकट्ठकथावण्णना.

१७९-८०. वारेनाति वारेन वारेन सामणेरा अरञ्ञतो यं दन्तकट्ठं सङ्घस्सत्थाय आनेत्वा सचे आचरियानम्पि आहरन्ति, याव ते दन्तकट्ठं पमाणेन छिन्दित्वा सङ्घस्स च आचरियानञ्च ¶ न निय्यादेन्ति, ताव अरञ्ञतो ¶ आभतत्ता तं सब्बं सङ्घस्स च सकसकआचरियानञ्च आभतं दन्तकट्ठं तेसमेव च दन्तकट्ठहारकानं सामणेरानं सन्तकं होतीति अत्थयोजना.

१८१. तस्माति यस्मा तेसमेव सामणेरानं सन्तकं होति, तस्मा. तं अरञ्ञतो आभतं दन्तकट्ठञ्च सङ्घस्स गरुभण्डञ्च दन्तकट्ठन्ति सम्बन्धो. सङ्घिकाय भूमियं उप्पन्नं सङ्घेन रक्खितगोपितत्ता गरुभण्डभूतं दन्तकट्ठञ्चाति वुत्तं होति. गण्हन्तस्स चाति अधिकच-कारेन इहावुत्तस्स अट्ठकथागतस्स गणपुग्गलगिहिपरिबद्ध आरामुय्यानसञ्जातछिन्नाछिन्नरक्खितगोपितदन्तकट्ठस्स समुच्चितत्ता तञ्च थेय्यचित्तेन गण्हन्तस्स अवहटदन्तकट्ठस्स अग्घवसेन आपत्तियो वत्तब्बाति अयमत्थो दीपितो होति.

१८२. तेहि दन्तकट्ठहारकेहि सामणेरेहि. निय्यादितन्ति महासङ्घस्स पटिपादितं.

१८३. सङ्घिककालतो पट्ठाय थेय्यचित्तेन गण्हतोपि अवहाराभावे कारणं दस्सेतुमाह ‘‘अरक्खत्ता’’तिआदि. तत्थ अरक्खत्ताति सङ्घिकभावेन लद्धेपि रक्खितगोपितदन्तकट्ठे विय सङ्घेन कतारक्खायाभावा. यथावुड्ढमभाजेतब्बतोति सङ्घिकत्तस्सापि सतो यथावुड्ढं पटिपाटिमनतिक्कम्म भाजेतब्बफलपुप्फादीनं विय भाजेतब्बताभावतो. सब्बसाधारणत्ता चाति सङ्घपरियापन्नानं सब्बेसमेव साधारणत्ता.

इदन्ति सङ्घस्स निय्यादितदन्तकट्ठं. अञ्ञं वियाति अञ्ञं गणपुग्गलादिसन्तकं रक्खितगोपितदन्तकट्ठं विय. एवं चोरिकाय गण्हतो अवहाराभावे कारणेन साधितेपि थेय्यचित्तेन ¶ सकपरिक्खारम्पि गण्हतो दुक्कटस्स वुत्तत्ता तथा गण्हन्तो दुक्कटा न मुच्चतीति दट्ठब्बं. वत्तं पन जानितब्बं – सङ्घिकदन्तकट्ठं गण्हन्तेन पधानघरादीसु पविसित्वा चिरेन ओसरन्तेन बहि वीतिनामेतब्बदिवसे गणेत्वा तंपमाणेन गहेतब्बं, मग्गं गच्छन्तेन एकं द्वे दन्तकट्ठानि थविकाय पक्खिपित्वा गन्तब्बं, तत्थेव वसन्तेन दिवसे खादितब्बदन्तकट्ठं गहेतब्बन्ति.

दन्तकट्ठकथावण्णना.

१८४. ‘‘अग्गिं ¶ वा देती’’तिआदीसु ‘‘रुक्खे’’ति पकरणतो लब्भति ‘‘रुक्खो विनस्सती’’ति वक्खमानत्ता, रुक्खो च ‘‘वनप्पति नाम यो मनुस्सानं परिग्गहितो होति रुक्खो परिभोगो’’ति (पारा. ११०) पाळियं आगतत्ता च अट्ठकथाय (पारा. अट्ठ. १.११०) च वुत्तनयेन अम्बलबुजपनसादिको मनुस्सानं परिभोगारहो मनुस्सायत्तो रक्खितगोपितोयेव गहेतब्बो. अग्गिं वा देतीति चोरिकाय अग्गिं आलिम्पेति वा. सत्थेन रुक्खे समन्ततो आकोटेतीति वासिफरसुआदिसत्थेन रुक्खतचं छिन्दन्तो समन्ततो आवाटं दस्सेति. मण्डूककण्टकनामकं विसं वा रुक्खे आकोटेतीति चोरिकाय रुक्खं नासेतुकामो रुक्खे मण्डूककण्टकनामकं विसं पवेसेति.

१८५. येन वा तेन वाति यथावुत्तेन वा अवुत्तेन वा येन केनचि उपायेन. रुक्खो विनस्सतीति अग्गिं दत्वा झापितो धञ्ञकलापो विय, तेलकुम्भी विय च विनाव ठानाचावनेन यथाट्ठितमेवनस्सति. ‘‘डय्हती’’ति इदं ‘‘अग्गिं देती’’ति इदं सन्धाय वुत्तं. विनस्सतीति मण्डूककण्टकाकोटनादिअवसेसपयोगं सन्धाय वुत्तन्ति दट्ठब्बं ‘‘थेय्यचित्तो छिन्दति, पहारे पहारे आपत्ति दुक्कटस्स, एकं पहारं ¶ अनागते आपत्ति थुल्लच्चयस्स, तस्मिं पहारे आगते आपत्ति पाराजिकस्सा’’ति (पारा. ११०) ठानाचावनेन पाराजिकस्स आगतत्ता. पकासितन्ति एत्थ ‘‘अट्ठकथाय’’न्ति लब्भति. पाठागतं पाराजिकं पन पारिसेसतो च सूचीयतीति तब्बाचकस्स वा सङ्गाहकस्स वा वचनस्स इहाविज्जमानत्ता तत्थ विनिच्छयो पासंसिकोपि इहावुत्तो.

वनप्पतिकथावण्णना.

१८६-७. ‘‘हरणकं नाम अञ्ञस्स हरणकं भण्डं. थेय्यचित्तो आमसति, आपत्ति दुक्कटस्स. फन्दापेति, आपत्ति थुल्लच्चयस्स. ठाना चावेति, आपत्ति पाराजिकस्सा’’ति (पारा. १११) वुत्तहरणकनिद्देसे ‘‘ठाना चावेति, आपत्ति पाराजिकस्सा’’ति (पारा. १११) पाठे ‘‘ठान’’न्ति गहितसीसादिट्ठानप्पभेदवसेन अट्ठकथाय (पारा. अट्ठ. १.११०) आगतविनिच्छयं दस्सेतुमाह ‘‘छिन्दित्वा मोचेत्वा गण्हतो’’ति. किरियानं सकम्मकत्ता ‘‘अलङ्कार’’न्ति पाठसेसो. छिन्दित्वाति गीवेय्यकादिं. मोचेत्वाति कण्णपिळन्धनादिं.

सीसादीहि ¶ मोचितमत्तस्मिन्ति एत्थापि विसेसितब्बदस्सनत्थं ‘‘अलङ्कारस्मि’’न्ति तमेव भुम्मेकवचनन्तवसेन गहेतब्बं. आकड्ढनविकड्ढनन्ति एत्थ अभिमुखं कड्ढनं आकड्ढनन्ति कत्वा अत्तनो समीपमाविञ्छनं आकड्ढनं, विपरीतं कड्ढनं विकड्ढनन्ति कत्वा तब्बिपरीतं विकड्ढनं.

१८८-९. वलयन्ति अवङ्कं मट्ठहत्थूपगं. कटकम्पि वाति अनेकवङ्के योजेत्वा बुब्बुळादीनि दस्सेत्वा वा अदस्सेत्वा ¶ वा कतं हत्थूपगं. अग्गबाहुन्ति कप्परतो पट्ठाय अग्गहत्थं. अपरापरं चारेतीति इतो चितो च सञ्चारेति. ‘‘सारेती’’ति वा पाठो, सोयेव अत्थो. तं वलयं वा कटकं वा. आकासगतं करोतीति सब्बदिसाहि यथा हत्थं न फुसति, तथा आकासगतं करोति. निधिवलयस्स पवेसितरुक्खमूले सब्बदिसाहि अफुसन्तं आकासगतकरणे पाराजिकं होति, इध ‘‘रक्खती’’ति कस्मा वुत्तन्ति आह ‘‘सविञ्ञाणकतो’’तिआदि. इदन्ति वलयं कटकञ्च.

१९०. ‘‘निवत्थं वत्थ’’न्ति इमिना चीवरम्पि गय्हति. परस्स वत्थसामिकस्स. परोपीति वत्थसामिकोपि. तन्ति चोरेन अच्छिज्जमानं अत्तना निवत्थवत्थं. लज्जाय सहसा न मुञ्चतीति लज्जाय सीघतरं न परिच्चजति.

१९१. चोरोपि आकड्ढति, सो परोपि आकड्ढतीति योजना. सो परो चोरतो अञ्ञो, वत्थसामिकोति अत्थो. परस्साति वत्थसामिकस्स.

१९२. ‘‘ठाना चावेय्या’’ति पाठे ठान-सद्देन सङ्गहितसीसादिट्ठानतो हरीयतेति हरणकन्ति वुत्तालङ्कारादिभण्डस्स चावनेन पाराजिकं दस्सेत्वा इदानि तदेव हरणकं हारकेन सह हरन्तस्स हारकस्स ठितट्ठानतो अपनयनेन ठानाचावनञ्च ‘‘ठाना चावेय्या’’ति इमिनाव सङ्गय्हतीति तत्थापि विनिच्छयं दस्सेतुमाह ‘‘सभण्डहारक’’न्तिआदि. भण्डं हरति नेतीति भण्डहारको, पुरिसादिको, तेन सहाति सभण्डहारकं, अलङ्कारवत्थादीनि आदाय गच्छन्तेहि इत्थिपुरिसादिपाणेहि सहेव. भण्डन्ति तेहि हरियमानत्ता हरणकसङ्खातवत्थाभरणादिभण्डं ¶ . नेन्तस्साति ‘‘नेन्तो अस्सा’’ति पदच्छेदो. नेन्तोति ठितट्ठानतो चावेत्वा अत्तना इच्छितदिसाभिमुखं पापेन्तो. अस्स पठमे पादे अतिक्कन्ते थुल्लच्चयं आपज्जित्वाति ¶ पाठसेसयोजना. अस्साति इमस्स भण्डहारकस्स. पठमपादे अतिक्कन्ते अत्तना पठमं गन्तब्बदिसतो चोरस्साभिमतदिसं गते थुल्लच्चयं आपज्जित्वा दुतिये अतिक्कन्ते चुतो सियाति योजना.

१९३. थेय्यचेतनो सचे तज्जेत्वा परस्स हत्थतो भण्डं पातापेति, परस्स हत्थतो भण्डे मुत्तमत्ते तज्जेत्वा पातापकस्स पराजयोति योजना. भण्डे मुत्तमत्तेति भण्डे हत्थतो केसग्गमत्तम्पि मुत्तक्खणे.

१९४. अथापीति अथ वा. परिकप्पेत्वा पातापेति वाति एत्थ ‘‘यं मय्हं रुच्चति, तं गण्हिस्सामी’’ति वा ‘‘एवरूपं चे होति, गण्हिस्सामी’’ति विसेसेत्वा वा परिकप्पेत्वा तज्जेत्वा पातेति, दुक्कटं. एवं पातितं भण्डं तस्स चोरस्स आमसने दुक्कटं वुत्तन्ति योजना.

१९५. यथावत्थुन्ति भण्डस्स अग्घानुरूपं, थुल्लच्चयं होतीति अधिप्पायो. छड्डितेपीति तस्स चोरभावं जानित्वा भीततसितेन अत्तना नीयमाने भण्डे छड्डितेपि सति. तेनेव ठानाचावनं कारापितन्ति पाराजिकन्ति न गहेतब्बन्ति आह ‘‘न दोसो’’ति. ‘‘तिट्ठ तिट्ठा’’ति वुत्ते पन उत्तसित्वा छड्डनं तस्स आणत्तिया विना होतीति तत्थ तस्स अनापत्तीति अधिप्पायो. तथा वदतो पन अदिन्नादानपुब्बपयोगत्ता दुक्कटमेव.

१९६. तन्ति तं छड्डितं भण्डं. तदुद्धारेति तस्स छड्डितस्स भण्डस्स उद्धारे पाराजिकं. पाराजिकं कदा सियाति ¶ आह ‘‘सामिके सालये गते’’ति. निरालयं छड्डितं पन गण्हतो असति थेय्यचित्ते न दोसोति ब्यतिरेकतो दस्सेति.

१९७. सामिकस्स सालयकाले गण्हन्तस्सापि पाराजिकाभावप्पकारं दस्सेतुमाह ‘‘गण्हतो’’ति. पुब्बगाथाय ‘‘त’’न्ति इधानुवत्तते. सकसञ्ञायगण्हतोति ‘‘तिट्ठ तिट्ठा’’ति वचनतो उत्तसित्वा सालयं छड्डितं तं वत्थुं सकसञ्ञाय गण्हन्तस्स. गहणेति सकसञ्ञाय गहणहेतु, सकसञ्ञाय गहितभण्डं अत्तनो गहणकारणा भिक्खुं अवहारापत्तितो रक्खतीति अधिप्पायो ¶ . तेनाह ‘‘गहणे पन रक्खती’’ति. भण्डदेय्यं पन होतीति योजना. ‘‘तथा’’ति इमिना गहणे रक्खतीति अतिदिसति.

१९८-९. धुरनिक्खेपं कत्वाति ‘‘मय्हं किमेतेन भण्डेन, जीवितरक्खनमेव वरतर’’न्ति निरालयो हुत्वा. तेनाह ‘‘भीतो चोरा पलायती’’ति. चोराति एत्थ च हेतुम्हि निस्सक्कं. गण्हतोति एत्थ ‘‘त’’न्ति पाठसेसो, तथा छड्डितं तं भण्डन्ति अत्थो. उद्धारे दुक्कटन्ति वत्थुम्हि अनवज्जेपि थेय्यचित्तवसेन दुक्कटं होति, असति थेय्यचित्ते दुक्कटम्पि न होतीति वुत्तं होति. आहरापेन्तेति एत्थ भावलक्खणे भुम्मं, तस्मिं भण्डसामिनि आहरापेन्ते सतीति अत्थो.

२००. निरालयेन छड्डितवत्थुनो गहणे भण्डदेय्यञ्च अदेन्तस्स पराजयो च कस्माति आह ‘‘तस्सा’’तिआदि. अञ्ञासूति महापच्चरियादीसु इतरासु अट्ठकथासु.

हरणककथावण्णना.

२०१. उपनिधिकथाय ¶ ‘‘न गण्हामी’’ति सम्पजानमुसावादं भासतोति योजना. येन केनचि रहसि ‘‘इदं मय्हं भण्डं पटिसामेत्वा देही’’ति निय्यादितं भण्डं पच्छा सामिकेन ‘‘देहि मे तं भण्ड’’न्ति वुत्ते अच्चन्तमुपगन्तुं ‘‘नाहं गण्हामी’’ति सम्पजानमुसावादं भासतोति अत्थो. गण्हामीति अग्गहेसिं. अच्चन्ता हेसो अतीते वत्तमानप्पयोगोयं. ‘‘सम्पजानमुसावादे पाचित्तिय’’न्ति (पाचि. २) इमस्स सिक्खापदस्स विसये कस्मा दुक्कटं वुत्तन्ति आह ‘‘अदिन्नादानपुब्बकत्ता’’तिआदि. तत्थ अदिन्नादानपुब्बकत्ताति अदिन्नादानस्स सहपयोगवसेन पुब्बङ्गमत्ता, न पुब्बपयोगत्ता. न हि अदिन्नादानस्स पुब्बपयोगे पाचित्तियट्ठाने दुक्कटमत्थीति. तेनेवाह अट्ठकथायं ‘‘अदिन्नादानस्स पयोगत्ता’’ति.

२०२. एतस्साति एतस्स समीपे. किं नु दस्सतीति दस्सति किं नु. विमतुप्पादेति हेतुम्हि भुम्मं. तस्साति यस्स भिक्खुनो सन्तिके उपनिक्खित्तं, तस्स.

२०३. तस्मिन्ति ¶ यस्मिं उपनिक्खित्तं, तस्मिं भिक्खुम्हि. दाने निरुस्साहेति अत्तनि निक्खित्तस्स भण्डस्स सामिकस्स दानविसये उस्साहरहिते सति, ‘‘न दानि तं दस्सामी’’ति धुरनिक्खेपे कतेति अधिप्पायो. तेनेवाह ‘‘उभिन्नं धुरनिक्खेपे’’ति. परोति भण्डसामिको. धुरन्ति ‘‘येन केनचि आकारेन गण्हिस्सामी’’ति उस्साहं. निक्खिपेति निक्खिपेय्य.

२०४. चित्तेनादातुकामोवाति एत्थ ‘‘यो तस्सा’’ति पाठसेसो. चेति अपि-सद्दत्थे. यो चोरो चित्तेन अदातुकामोव, तस्स चोरस्स ‘‘दस्सामी’’ति मुखेन ¶ वदतोपीति योजना. अथ वा अदातुकामोति एत्थ ‘‘हुत्वा’’ति पाठसेसो. चेति वुत्तत्थो. एवाति ‘‘पराजयो’’ति इमिना युज्जति. चित्तेन अदातुकामो हुत्वा मुखेन ‘‘दस्सामी’’ति वदतोपि सामिनो धुरनिक्खेपे सति पराजयो होतेवाति योजना.

उपनिधिकथावण्णना.

२०५. सुङ्कघातस्साति ‘‘सुङ्कघातं नाम रञ्ञा ठपितं होति पब्बतखण्डे वा नदीतित्थे वा गामद्वारे वा’’ति (पारा. ११३) पाळियं आगतस्स ‘‘सुङ्कं ततो हनन्ति…पे… विनासेन्ती’’ति (पारा. अट्ठ. १.११३) अट्ठकथायं निरुत्तस्स ‘‘इतो पट्ठाय नीयमाने भण्डे एत्तकतो एत्तकं राजभागं गहेतब्ब’’न्ति राजादीहि तंतंपदेससामिकेहि नियमितस्स पब्बतखण्डादिट्ठानस्स. बहीति सुङ्कगहणत्थाय परिकप्पितसीमतो बहि. पातेतीति एत्थ ‘‘थेय्यचित्तो’’ति पकरणतो लब्भति. ‘‘राजारहं भण्ड’’न्ति पाठसेसो. यतो कुतोचि भण्डतो पञ्चमासकं वा अतिरेकपञ्चमासकं वा अग्घनको भागो राजादिदेससामिकस्स दातब्बो होति, तादिसं भण्डं थेय्यचित्तो यथा बहि पतति, एवं खिपतीति अत्थो. धुवं पततीति एत्थापि ‘‘त’’न्ति पाठसेसो, ‘‘भण्ड’’न्ति पकरणतो लब्भति. यथा खित्तं तं भण्डं एकन्तेन बहि पततीति. हत्थतो मुत्तमत्ते तस्मिं भण्डे.

२०६. ‘‘धुवं पतती’’ति एत्थ ब्यतिरेकं दस्सेतुमाह ‘‘तं रुक्खे’’तिआदि. तन्ति थेय्याय बहि पातेतुं खित्तं भण्डं पटिहतं हुत्वाति योजना. वातक्खित्तम्पि वाति पाठो ¶ गहेतब्बो. ‘‘वातक्खित्तो’’ति लिङ्गविपल्लासो वा दट्ठब्बो.

२०७. पच्छाति ¶ पतितट्ठाने थोकं चिरायित्वा, इमिना थोकम्पि चिरायितमत्ते पयोगसाधियं कारियं सिद्धमेवाति पाराजिकस्स कारणं सम्पन्नमेवाति दस्सेति. तेनाह ‘‘पाराजिकं सिया’’ति.

२०८. ‘‘ठत्वा’’तिआदिना पतितट्ठाने अचिरायित्वा गतेपि तस्मिं बहि पतितट्ठानतो इतरत्रापि चिरायितेन बहि पातनप्पयोगेन साधियं कारियं सिद्धमेवाति पाराजिककारणस्स सिद्धतं दस्सेति. तेनेवाह ‘‘पराजयो’’ति. ‘‘अतिट्ठमान’’न्तिआदिना यत्थ कत्थचि अचिरायनेन पयोगस्स निरत्थकतं दस्सेति. तेनेवाह ‘‘रक्खती’’ति.

२०९. तन्ति अट्ठकथावचनं.

२१०. सयं वा वट्टेतीति अन्तो ठितो सयं वा हत्थेन वा पादेन वा यट्ठिया वा बहिसीमाय निन्नट्ठानं परिवट्टेति. अट्ठत्वाति पवट्टितमत्ते अन्तो कत्थचिपि अट्ठत्वा. वट्टमानन्ति पवट्टन्तं. गतन्ति बहिसीमं केसग्गमत्तट्ठानम्पि अन्तोसीममतिक्कममत्तं.

२११. तं भण्डं सचे अन्तो ठत्वा ठत्वा बहि गच्छतीति योजना. यदि अन्तोसीमाय ठत्वा ठत्वा बहिसीमं गच्छतीति अत्थो. रक्खतीति अन्तोसीमाय पठमगतिनिवत्तनेनेव एतस्स भिक्खुनो पयोगवेगस्स निवत्तत्ता, ततो उपरि निवत्तनारहकारणस्स अलद्धभावेन अत्तना च गतत्ता तथा बहिसीमप्पत्तं तं भण्डं तंमूलकपयोजकं ¶ भिक्खुं आपत्तिया रक्खतीति अधिप्पायो. सुद्धचित्तेन ठपितेति ‘‘एवं ठपिते वट्टित्वा गमिस्सती’’ति थेय्यचित्तेन विना ‘‘केवलं ठपेस्सामी’’ति चित्तेन बहिसीमाभिमुखं निन्नट्ठानं ओतारेत्वा ठपिते. सयं वट्टतीति भण्डं सयमेव निन्नट्ठानं निन्नं हुत्वा बहिसीमं चे पवट्टन्तं गच्छति. वट्टतीति आपत्तिया अकरणतो वट्टति.

२१२. गच्छन्तेति चोरस्स पयोगं विना अत्तनाव गच्छन्ते. तन्ति राजदेय्यपञ्चमासकअतिरेकपञ्चमासकमत्तं सुङ्कवन्तं भण्डं. नीहटेपि नावहारोति योजना. केवलं थेय्यचित्तस्स आपत्तिया अनङ्गभावतो, यानादिपयोजककायवचीपयोगस्स अभावतो, भण्डट्ठपितयानादिनो ¶ अत्तनाव बहिसीमप्पत्तत्ता, तेनेव भण्डस्सापि गतत्ता च भिक्खुनो अवहारो नत्थीति अत्थो.

२१३. पयोगेन विनाति चोरस्स सकपयोगमन्तरेन. अवहारो न विज्जतीति एत्थ युत्ति वुत्तनयाव.

२१४. मणिन्ति पादारहं सुङ्कदातब्बमणिरतनं, एतेनेव उपलक्खणपदत्ता यंकिञ्चि भण्डं सङ्गहितमेव. पाराजिकं सियाति यानस्स अत्तना पाजितत्ताति अधिप्पायो. सीमातिक्कमनेति सुङ्कग्गहणस्स नियमितट्ठानातिक्कमने.

२१५. मतन्ति ‘‘एत्तकभण्डतो एत्तकं गहेतब्ब’’न्ति राजूहि अनुमतं. सेसो कथामग्गोति ‘‘सुङ्कट्ठानं पत्वा सुङ्किकेसु निद्दायमानेसु, कीळन्तेसु, बहिगतेसु वा परियेसित्वा अदिस्वा गच्छतो न दोसो, भण्डदेय्यं ¶ होती’’ति एवमादिको विनिच्छयकथामग्गो. अरञ्ञट्ठकथासमोति ‘‘यो चारक्खट्ठानं पत्वा’’तिआदिना (वि. वि. १७०) यथावुत्तअरञ्ञट्ठकथाय सदिसो,

‘‘कम्मट्ठानं चित्ते कत्वा;

चिन्तेन्तो अञ्ञविहितो;

सुङ्कट्ठानं पत्वा गच्छे;

भण्डदेय्यं होतेवस्सा’’ति. –

आदिना नयेन वुच्चमानसदिसोयेव. तेनेव गतत्थताय इदानि न विचारीयतीति अधिप्पायो.

सुङ्कघातकथावण्णना.

२१६. ‘‘पाणो ¶ नाम मनुस्सपाणो वुच्चती’’ति (पारा. ११४) पाळितो च ‘‘तम्पि भुजिस्सं हरन्तस्स अवहारो नत्थी’’ति (पारा. अट्ठ. १.११४) अट्ठकथावचनतो च परदासमनुस्सोयेव अधिप्पेतोति तमेव दस्सेतुमाह ‘‘अन्तोजात’’न्तिआदि. गेहदासिया कुच्छिम्हि दासस्स जातो अन्तोजातो नाम, तं वा. धनेन कीतो धनक्कीतो, तं वा. दिन्नं वा पन केनचीति मातुलअय्यकादीसु येन केनचि दासं कत्वा दिन्नं वा. दासन्ति पच्चेकं सम्बन्धनीयं. करमरानीतं वा दासन्ति परविसयं विलुम्पित्वा आनेत्वा दासभावाय गहितसङ्खातं करमरानीतदासं वा. हरन्तस्स पराजयोति एत्थ ‘‘चोरिकाय हरिस्सामी’’ति आमसने दुक्कटं, फन्दापने थुल्लच्चयं आपज्जित्वा ठितट्ठानतो केसग्गमत्तम्पि अतिक्कामयतो पाराजिकं होतीति अधिप्पायो.

२१७. भुजिस्सं वाति यस्स कस्सचि मनुस्सस्स अदासभूतं. मानुसन्ति मनुस्सजातिकं सत्तं. आठपितन्ति उपनिक्खित्तं.

२१८. तन्ति ¶ अन्तोजातादीसु दासेसु यं कञ्चि दासं. पलायितुकामोवाति पलापेतुकामो नीहरितुकामो. अथ वा तं दासं भुजेहि उक्खिपित्वा अयं पलायितुकामोतिपि अत्थो गहेतब्बो. भुजेहीति उभोहि हत्थेहि. तं ठितट्ठानतोति तस्स ठितट्ठानं तंठितट्ठानं, ततो तंठितट्ठानतो, चोरेन अत्तना ठितट्ठानतोति अत्थो न गहेतब्बोति दस्सेतुमेवं वुत्तं. किञ्चि सङ्कामेतीति केसग्गमत्तम्पि ततो अञ्ञं ठानं पापेति. भुजेहि वाति एत्थ वा-सद्दो वक्खमानपकारन्तरापेक्खो, ‘‘सङ्कामेति वा’’ति योजेतब्बं.

२१९. तज्जेत्वाति भयकरेन वचनेन लेसेन, इङ्गितेन वा तासेत्वा नेन्तस्स तस्साति सम्बन्धो. पदवारतोति पदवारेन युत्ता थुल्लच्चयादयो आपत्तियो होन्तीति योजना. पठमपदवारयुत्ता थुल्लच्चयापत्ति, दुतियपदवारयुत्ता पाराजिकापत्ति होतीति अत्थो.

२२०. हत्थादीसूति आदि-सद्देन केसवत्थादिं सङ्गण्हाति. तन्ति दासं. कड्ढतोपीति आकड्ढतोपि. पराजयोति ‘‘पदवारतो’’ति अनुवत्तमानत्ता पठमपदवारे थुल्लच्चयं, दुतियपदवारे अतिक्कन्ते पाराजिकन्ति अत्थो. अयं नयोति ‘‘पदवारतो युत्ता थुल्लच्चयादयो आपत्तियो होन्ती’’ति वुत्तनयो.

२२१. वेगसावाति ¶ वेगेनेव, चोरस्स वचनेन कातब्बविसेसरहितेन बलवगमनवेगेनाति वुत्तं होति. इमिना अनापत्तिभावस्स कारणं दस्सेति.

२२२. सणिकन्ति ¶ मन्दगतिया. वदतीति ‘‘गच्छ, याहि, पलाया’’तिआदिकं वचनं कथेति. सोपि चाति यो मन्दगतिया गच्छन्तो एवं वुत्तो, सोपि च.

२२३. पलायित्वाति सामिकं पहाय गन्त्वा. अञ्ञन्ति सामिकायत्तट्ठानतो अञ्ञं ठानं. सापणं वीथिसन्निवेसयुत्तं निगमम्पि वा. ततोति पलायित्वा पविट्ठगामादितो. तन्ति पलायित्वा पविट्ठं तं दासं.

पाणकथावण्णना.

२२४. थेय्याति थेय्यचित्तेन. सप्पकरण्डन्ति सप्पसयनपेळं. यथावत्थुन्ति थुल्लच्चयमाह. ठानतोति सप्पपेळाय ठितट्ठानतो. चावनेति केसग्गमत्तातिक्कमे.

२२५. करण्डन्ति सप्पपेळं. उग्घाटेत्वाति विवरित्वा. करण्डतलतोति अन्तोपेळाय तलतो. नङ्गुट्ठेति नङ्गुट्ठपरियन्ते.

२२६. घंसित्वाति पेळापस्से फुसापेत्वा. सप्पकरण्डस्स मुखवट्टितोति करण्डपुटमुखवट्टितो. तस्स नङ्गुट्ठे मुत्तमत्तेति योजना.

२२७. नामतोति नामेन, नामं वत्वाति वुत्तं होति. पक्कोसन्तस्साति अव्हायन्तस्स. तस्साति पक्कोसकस्स.

२२८. तथाति करण्डं विवरित्वा. मण्डूकमूसिकानं रवं कत्वा नामेन पक्कोसन्तस्साति योजना. वा-सद्देन लाजाविकिरणअच्छरपहारादिकं सङ्गण्हाति.

२२९. मुखन्ति ¶ सप्पकरण्डस्स मुखं. एवमेव च करोन्तस्साति मण्डूकसञ्ञं, मूसिकसञ्ञं कत्वा वा लाजा विकिरित्वा ¶ वा अच्छरं पहरित्वा वा नामं वत्वा पक्कोसन्तस्स. येन केनचीति वुत्तनीहारतो येन वा तेन वा.

२३०. न पक्कोसति चेति यथावुत्तनयेन योजेत्वा नामं वत्वा न पक्कोसति. तस्साति करण्डमुखविवरकस्स भिक्खुस्स.

अपदकथावण्णना.

२३१. हत्थिन्ति हत्थिम्हि, भुम्मत्थे एव उपयोगवचनं.

२३२. सालायन्ति हत्थिसालायं. वसति एत्थाति वत्थु, राजागारं, तस्स अन्तो अन्तोवत्थु, अन्तोराजगेहन्ति अत्थो. अङ्गणेति अन्तोराजङ्गणे. पि-सद्दो ‘‘अन्तोनगरे’’ति अवुत्तम्पि सम्पिण्डेति. वत्थु चाति च-सद्देन अङ्गणं समुच्चिनोति. सकलं अङ्गणं ठानन्ति हत्थिनो विचरणयोग्गं अङ्गणट्ठानं सन्धायाह, सकलसालाति गहेतब्बं.

२३३. अबद्धस्साति यथावुत्तसालाराजवत्थङ्गणापेक्खाय वुत्तं. अबद्धस्स हि हत्थिनो सकलसालादयो ठानं, तदतिक्कमे ठानाचावनं होतीति अत्थो. हीति अवधारणे वा. ‘‘बद्धस्स ही’’ति योजनाय विसेसत्थोव दट्ठब्बो, बद्धस्स पनाति वुत्तं होति. बद्धस्स पनाति सालादीसु सन्निहितस्स पन. ठितट्ठानञ्चाति सालादीसु ठितट्ठानञ्च, चतूहि पादेहि अक्कन्तट्ठानन्ति वुत्तं होति. बन्धनञ्चाति गीवाय वा पच्छा पादद्वयबन्धनवलये वा उभयत्थ वा बन्धनट्ठानञ्च. तस्माति यस्मा ठितट्ठानञ्च बन्धनञ्च ठानन्ति छ वा पञ्च वा ठानानि लब्भन्ति, तस्मा. तेसं ठानानं. कारयेति एत्थ ‘‘आपत्ति’’न्ति सामत्थिया लब्भतीति. हरतोति हत्थिसालादितो चोरिकाय हरन्तस्स ¶ . कारयेति आमसने दुक्कटं, ठानभेदगणनाय याव पच्छिमट्ठाना पुरिमेसु थुल्लच्चयानि, अन्तिमट्ठाना केसग्गमत्तम्पि चावने पाराजिकं कारेय्याति अत्थो.

२३४. ठितट्ठानन्ति ¶ चतूहि पादेहि अक्कन्तट्ठानं, इदञ्च अबद्धहत्थिं सन्धाय वुत्तं. बद्धस्स विनिच्छयो सालादीसु बद्धस्स वुत्तविनिच्छयसदिसोति गतत्थताय न वुत्तो.

२३५. एकं ठानन्ति सयितट्ठानमत्तं. तस्मिन्ति गजे. तस्साति भिक्खुस्स. तुरङ्गमहिसादीसु द्विपदे च बहुप्पदे च.

२३६. एसेव नयो ञेय्यो, वत्तब्बं किञ्चिपि नत्थीति योजना. तत्थ तुरङ्गा अस्सा. महिसा लुलाया. आदि-सद्देन गोगद्रभओट्ठादिचतुप्पदानं सङ्गहो. नत्थि किञ्चिपि वत्तब्बन्ति अस्ससालाराजागारङ्गणबहिनगरादीसु अबन्धितसयनअस्सादीनं ठानभेदो यथावुत्तसदिसत्ता न वुत्तो.

बन्धित्वा ठपितअस्सस्स पन सचे सो चतूसु पादेसु बद्धो होति, बन्धनानं, खुरानञ्च गणनाय अट्ठ ठानानि, सचे मुखे च बद्धो होति, नव ठानानि, मुखेयेव बद्धो, पञ्च ठानानीति ठानभेदो च तथेव ससमिगसूकरादिचतुप्पदेसु बन्धित्वा ठपितेसु बद्धबद्धट्ठानेहि सह चतूहि पादेहि अक्कन्तट्ठानवसेन लब्भमानो ठानभेदो च गोमहिसेसु बद्धेसु एवमेव लब्भमानो ठानभेदो च वजादीसु पदेसेसु पवेसितेसु द्वारेसु रुक्खसूचियो अपनेत्वा वा अनपनेत्वा वा नामं वत्वा वा अवत्वा वा पक्कोसन्तस्स, साखाभङ्गतिणादीनि दस्सेत्वा पक्कोसित्वा वा अपक्कोसित्वा वा पलोभेन्तस्स तासेत्वा निक्खमन्तस्स ¶ सप्पकरण्डके सप्पस्स वुत्तनयेन लब्भमानो विसेसो च नेतब्बो. इह सब्बत्थ ठानभेदेसु बहुकेसुपि उपन्तट्ठानेसु थुल्लच्चयं, अन्तट्ठाने पाराजिकं वुत्तसदिसन्ति इमस्स सब्बस्स विनिच्छयस्स ‘‘एसेव नयो’’ति इमिनाव गतत्ता, आहटतो अविञ्ञायमानस्स कस्सचि विसेसस्साभावा च वुत्तं ‘‘नत्थि किञ्चिपि वत्तब्ब’’न्ति.

द्विपदेपीति ‘‘द्विपदं नाम मनुस्सा पक्खजाता’’ति (पारा. ११५) पाळियं वुत्ता मनुस्सा च मयूरादिलोमपक्खा च वग्गुलिआदिचम्मपक्खा च भमरादिअट्ठिपक्खा चाति एवमादिके सत्ते च. बहुप्पदेति ‘‘बहुप्पदं नाम विच्छिका सतपदी उच्चालिङ्गपाणका’’ति (पारा. ११७) पाळियं वुत्तबहुप्पदसत्ते चाति अत्थो.

एत्तावता ¶ पापभिक्खूनं लेसोकासपिदहनत्थं पदभाजने वुत्तभूमट्ठादितिंसविनिच्छयमातिकाकथासु पञ्चवीसति मातिकाकथा दस्सेत्वा अवसिट्ठासु पञ्चमातिकाकथासु संविदावहारो, सङ्केतकम्मं, निमित्तकम्मन्ति मातिकत्तयकथा पठममेव अदिन्नादानविनिच्छयसम्भारभूतानं पञ्चवीसतिया अवहारानं दस्सनट्ठाने ठत्वा –

‘‘पुब्बसहपयोगो च, संविदाहरणम्पि च;

सङ्केतकम्मं नेमित्तं, पुब्बयोगादिपञ्चक’’न्ति. (वि. वि. ४२) –

इमिना सङ्गहिताति तं पहाय अवसेसे ओचरको, ओणिरक्खकोति कथाद्वये ओचरणककथाय आणत्तिकप्पयोगत्ता, तञ्च ओणिरक्खकेन करियमानं ठानाचावनं साहत्थिकेन वा आणत्तिकेन वा पयोगेन होतीति तस्सापि ‘‘साहत्थाणत्तिको चेवा’’ति साहत्थिकपञ्चके पठममेव सङ्गहितत्ता च थलट्ठवेहासट्ठकथादीसु ¶ सङ्गहितत्ता च तञ्च द्वयं न वुत्तन्ति वेदितब्बं.

तत्थ ‘‘ओचरको नाम भण्डं ओचरित्वा आचिक्खती’’ति (पारा. ११८) पाळियं वुत्तो चोरापनपुरिसो ‘‘ओचरको’’ति वेदितब्बो. ओचरतीति ओचरको, तत्थ तत्थ गन्त्वा अन्तो अनुपविसतीति वुत्तं होतीति. ‘‘ओणिरक्खो नाम आहटं भण्डं गोपेन्तो’’ति (पारा. ११८) पाळियं वुत्तो मुहुत्तं अत्तनि ठपितस्स परभण्डस्स रक्खको ‘‘ओणिरक्खो’’ति वेदितब्बो. ओणितं रक्खतीति ओणिरक्खो, यो परेन अत्तनो वसनट्ठाने आभतं भण्डं ‘‘इदं ताव भन्ते मुहुत्तं ओलोकेथ, यावाहं इदं नाम किच्चं कत्वा आगच्छामी’’ति वुत्तो रक्खति, तस्सेतं अधिवचनं.

द्विचतुबहुप्पदकथावण्णना.

२३७. ‘‘पञ्चहि आकारेहि अदिन्नं आदियन्तस्स आपत्ति पाराजिकस्सा’’तिआदिना (पारा. १२२) नयेन पाळियं आगतानि पञ्चङ्गानि सङ्गहेतुमाह ‘‘परेस’’न्तिआदि. तत्थ ‘‘परेसं सन्तकं धन’’न्ति इमिना परमनुस्ससन्तकता, ‘‘परेसन्ति विजानित्वा’’ति इमिना परायत्तभावस्स जाननं, ‘‘गरुक’’न्ति इमिना पादं वा अतिरेकपादं वा अग्घनकता, ‘‘थेय्यचित्तेना’’ति ¶ इमिना थेय्यचित्तता, ‘‘ठाना चावेती’’ति इमिना पञ्चवीसतिया अवहारानं अञ्ञतरस्स समङ्गिताति एवमेत्थ पञ्चङ्गसङ्गहो वेदितब्बो.

२३८. एत्तावता तिंसमातिकाकथाविनिच्छयं सङ्गहेत्वा इदानि ‘‘अनापत्ति ससञ्ञिस्स विस्सासग्गाहे तावकालिके पेतपरिग्गहे तिरच्छानगतपरिग्गहे पंसुकूलसञ्ञिस्सा’’तिआदिना ¶ (पारा. १३१) नयेन पाळियं आगतं अनापत्तिवारं सङ्गहेतुमाह ‘‘अनापत्ती’’तिआदि. तत्थ ससञ्ञिस्साति परसन्तकम्पि ‘‘ससन्तक’’न्ति सुद्धसञ्ञाय गण्हन्तस्स अनापत्तीति सब्बत्थ योजेतब्बं. एवं गहितं सामिकेहि दिस्वा याचिते अदेन्तस्स उभिन्नं धुरनिक्खेपेन पाराजिकं.

तिरच्छानपरिग्गहेति तिरच्छानेहि परिग्गहितवत्थुम्हि. सचेपि हि नागगरुळमाणवकमाणविकापि मनुस्सवेसेन आपणं पसारेत्वा निसिन्ना होन्ति, भिक्खु च थेय्यचित्तेन तेसं सन्तकं गण्हाति, अनापत्तीति वुत्तं होति. सीहब्यग्घदीपिपभुतीहि वाळमिगेहि गहितगोचरं पठमं मोचापेन्तस्स तं मुञ्चित्वा अत्तनोपि हिंसनतो थोकं खायिते वारेन्तस्स दोसो नत्थि. सेनादीसु तिरच्छानेसु येन केनचि गहितं गोचरं मोचापेतुं वट्टति. वुत्तञ्हेतं अट्ठकथायं ‘‘सेनादयोपि आमिसं गहेत्वा गच्छन्ते पातापेत्वा गण्हितुं वट्टती’’ति (पारा. अट्ठ. १.१३१). एवमेव धम्मनिदेड्डुभादीहि गहितमण्डूकादयो जीवितरक्खनत्थाय मोचापेतुं वट्टतीति वेदितब्बं.

तावकालिकग्गाहेति ‘‘पटिकरिस्सामी’’ति तावकालिकं गण्हन्तस्स एवं गहितं सचे भण्डसामिको पुग्गलो वा गणो वा ‘‘तुम्हेव गण्हथा’’ति अनुजानेय्य, वट्टति. नानुजानेय्य, न गण्हेय्य, दातब्बं. अदेन्तस्स उभिन्नं धुरनिक्खेपेन पाराजिकं. ‘‘सङ्घसन्तकं पन पटिदातुमेव वट्टती’’ति अट्ठकथायं वुत्तं.

विस्सासग्गाहेति ‘‘अनुजानामि भिक्खवे पञ्चहङ्गेहि समन्नागतस्स विस्सासं गहेतुं, सन्दिट्ठो च होति, सम्भत्तो च, आलपितो च, जीवति च, गहिते च अत्तमनो ¶ होती’’ति (महाव. ३५६) पाळियं आगतं पञ्चहङ्गेहि समन्नागतस्स सन्तकं विस्सासेन गण्हन्तस्स गहणे विनिच्छयो यथावुत्तसुत्तवण्णनायं वेदितब्बो. यथाह समन्तपासादिकायं –

तत्थ ¶ सन्दिट्ठोति दिट्ठमत्तकमित्तो. सम्भत्तोति दळ्हमित्तो. आलपितोति ‘‘मम सन्तकं यं इच्छसि, तं गण्हेय्यासि, आपुच्छित्वा गहणे कारणं नत्थी’’ति वुत्तो. जीवतीति अनुट्ठानसेय्याय सयितोपि याव जीवितिन्द्रियुपच्छेदं न पापुणाति. गहिते च अत्तमनोति गहिते तुट्ठचित्तो होति, एवरूपस्स सन्तकं ‘‘गहिते मे अत्तमनो भविस्सती’’ति जानन्तेन गहेतुं वट्टति. अनवसेसपरियादानवसेन चेतानि पञ्चङ्गानि वुत्तानि, विस्सासग्गाहो पन तीहङ्गेहि रुहति – सन्दिट्ठो, जीवति, गहिते अत्तमनो, सम्भत्तो, जीवति, गहिते अत्तमनो, आलपितो, जीवति, गहिते अत्तमनोति.

यो पन जीवति, न च गहिते अत्तमनो होति, तस्स सन्तकं विस्सासग्गाहेन गहितम्पि पुन दातब्बं. ददमानेन च मतकधनं ताव ये तस्स धने इस्सरा गहट्ठा वा पब्बजिता वा, तेसं दातब्बं. अनत्तमनस्स सन्तकं तस्सेव दातब्बं. यो पन पठमंयेव ‘‘सुट्ठु कतं तया मम सन्तकं गण्हन्तेना’’ति वचीभेदेन वा चित्तुप्पादमत्तेन वा अनुमोदित्वा पच्छा केनचि कारणेन कुपितो पच्चाहरापेतुं न लभति. योपि अदातुकामोव, चित्तेन पन अधिवासेति, न किञ्चि वदति, सोपि पुन पच्चाहरापेतुं न लभति. यो पन ‘‘मया तुम्हाकं ¶ सन्तकं गहितं वा परिभुत्तं वा’’ति वुत्ते ‘‘गहितं वा होतु परिभुत्तं वा, मया पन तं केनचिदेव करणीयेन ठपितं, तं पाकतिकं कातुं वट्टती’’ति वदति, अयं पच्चाहरापेतुं लभतीति (पारा. अट्ठ. १.१३१).

पेतपरिग्गहेति पेत्तिविसयुप्पन्ना च मरित्वा तस्मिंयेव अत्तभावे निब्बत्ता च चातुमहाराजिकादयो देवा च इमस्मिं अत्थे पेता नाम, तेसं सन्तकं गण्हन्तस्स च अनापत्तीति अत्थो. सचेपि हि सक्को देवराजा आपणं पसारेत्वा निसिन्नो होति, दिब्बचक्खुको च भिक्खु तं ञत्वा सतसहस्सग्घनकम्पि वत्थं तस्स विरवन्तस्सेव अच्छिन्दित्वा गण्हितुं वट्टति. देवपूजत्थं रुक्खादीसु मट्ठवत्थादीनि गण्हतो निद्दोसताय किमेव वत्तब्बं. पंसुकूलसञ्ञाय गण्हतोपि अनापत्ति. तथा गहितम्पि सचे सस्सामिकं होति, सामिके आहरापेन्ते दातब्बन्ति उपलक्खणतो वेदितब्बं.

२३९. एत्थाति ¶ दुतियपाराजिकविनिच्छये. च-सद्देन अवुत्तसमुच्चयत्थेन अवसेससिक्खापदविनिच्छये सङ्गण्हाति. वत्तब्बोति मातिकट्ठकथादीसु विय अवसाने कथेतब्बो. पाळिमुत्तविनिच्छयोति समुट्ठानादिको तंतंसिक्खापदपाळियं अनागतो उपालित्थेरादीहि ठपितो विनिच्छयो.

२४०. पराजितानेकमलेनाति अपरिमेय्यकप्पकोटिसतसहस्सोपचितपारमितासम्भूतेन सब्बञ्ञुतञ्ञाणपदट्ठानेन आसवक्खयञाणेन सह वासनाय समुच्छेदप्पहानेन पराजिता रागादयो अनेककिलेसमला येन सो पराजितानेकमलो, तेन पराजितानेकमलेन ¶ . जिनेन यं दुतियं पाराजिकं वुत्तं, अस्स दुतियपाराजिकस्स च अत्थो मया समासेन वुत्तो. असेसेन अतिवित्थारनयेन वत्तुं तस्स अत्थं कथेतुं को हि समत्थोति योजना. एत्थ च-सद्दो पठमपाराजिकसमुच्चयत्थो. हि-सद्दो अवधारणे, तेन असेसेन तदत्थं वत्तुं समत्थो नत्थेव अञ्ञत्र तथागताति दीपेति.

इति विनयत्थसारसन्दीपनिया

विनयविनिच्छयवण्णनाय

दुतियपाराजिककथावण्णना निट्ठिता.

ततियपाराजिककथावण्णना

२४१-२. एवमतिसुखुमनयसमाकुलं दुतियपाराजिकं दस्सेत्वा इदानि ततियपाराजिकं दस्सेतुमाह ‘‘मनुस्सजाति’’न्तिआदि. तत्थ मनुस्सजातिन्ति जायतीति जाति, रूपारूपपटिसन्धि, मनुस्सेसु जाति यस्स सो मनुस्सजाति, मनुस्सजातिको मनुस्सविग्गहोति वुत्तं होति, तं मनुस्सजातिं.

एत्थ च मनुस्सेसूति कुसलाकुसलमनस्स उस्सन्नत्ता मनुस्ससङ्खातेसु नरेसु. ‘‘यं मातुकुच्छिस्मिं पठमं ¶ चित्तं उप्पन्न’’न्ति (पारा. १७२) पदभाजने वुत्तनयेन मातुकुच्छिम्हि पठमं उप्पज्जमानपटिसन्धिचित्तञ्च तंसम्पयुत्तवेदनासञ्ञासङ्खारसङ्खातखन्धत्तयञ्च तंसहजातानि –

‘‘तिलतेलस्स यथा बिन्दु, सप्पिमण्डो अनाविलो;

एवं वण्णप्पटिभागं, ‘कलल’न्ति पवुच्चती’’ति. (पारा. अट्ठ. २.१७२; विभ. अट्ठ. २६) –

वुत्तानि ¶ जातिउण्णंसुम्हि पसन्नतिलतेले वा सप्पिमण्डे वा ओतारेत्वा उक्खिपित्वा विधुनिते अग्गे लम्बमानबिन्दुप्पमाणकललसङ्खातानि सभावकानं कायभाववत्थुदसकवसेन तिंस रूपानि च अभावकानं कायवत्थुदसकवसेन वीसति रूपानि चाति अयं नामरूपपटिसन्धि इध ‘‘जाती’’ति गहिता. ‘‘यस्सा’’ति इमिना अञ्ञपदेन ‘‘याव मरणकाला एत्थन्तरे एसो मनुस्सविग्गहो नामा’’ति (पारा. १७२) पदभाजने वुत्तनयेन पठमभवङ्गतो पट्ठाय चुतिचित्तासन्नभवङ्गपरियन्तसन्तानसङ्खातसत्तो गहितो. इमिना मनुस्सविग्गहस्स पटिसन्धितो पट्ठाय पाराजिकवत्थुभावं दस्सेति.

जानन्तोति ‘‘सत्तो अय’’न्ति जानन्तो. जीविता यो वियोजयेति यो भिक्खु जीवितिन्द्रिया वियोजेय्य वोरोपेय्य, तस्स जीवितिन्द्रियं उपच्छिन्देय्य उपरोधेय्याति वुत्तं होति. तेनाह पदभाजने ‘‘जीविता वोरोपेय्याति जीवितिन्द्रियं उपच्छिन्दति उपरोधेती’’ति (पारा. १७२).

तञ्च जीवितिन्द्रियं रूपारूपवसेन दुविधं होति. तत्थ अरूपजीवितिन्द्रियं अविग्गहत्ता उपक्कमविसयं न होति. रूपजीवितिन्द्रियुपच्छेदेन पन तदायत्तवुत्तिताय तंसमकालमेव ओच्छिज्जमानताय एत्थ सामञ्ञेन उभयम्पि गहेतब्बं. इदञ्च अतीतानागतं न गहेतब्बं तस्स अविज्जमानत्ता. उपक्कमविसयारहं पन पच्चुप्पन्नमेव गहेतब्बं. तञ्च खणसन्ततिअद्धावसेन तिविधं होति.

तत्थ उप्पादट्ठितिभङ्गवसेन खणत्तयपरियापन्नो भावो खणपच्चुप्पन्नं नाम. तं सरसभङ्गभूतत्ता सयं भिज्जमानं उपक्कमसाधियं विनासवन्तं न होति. आतपे ठत्वा गब्भं पविट्ठस्स ¶ अन्धकारविगमन्तरञ्च सीतेन ओवरकं पविट्ठस्स विसभागउतुसमुट्ठानेन ¶ सीतपनूदन्तरञ्च रूपसन्तति सन्ततिपच्चुप्पन्नं नाम. पटिसन्धिचुतीनमन्तराळप्पवत्ति खन्धसन्तति अद्धापच्चुप्पन्नं नाम. इमस्मिं द्वये उपक्कमसम्भवो, तंवसेन उपच्छिज्जमानं जीवितं सन्तानपरिहानिपच्चयभावतो सन्ततिअद्धापच्चुप्पन्नद्वयं यथापरिच्छिन्नकालमप्पत्वा उपक्कमवसेन अन्तरायेव निरुज्झति, तस्मा सन्ततिअद्धापच्चुप्पन्नरूपजीवितिन्द्रियञ्च तंनिरोधेन निरुज्झमानअरूपजीवितिन्द्रियञ्चाति उभयं एत्थ ‘‘जीविता’’ति गहितन्ति वेदितब्बं. इदमेव सन्धायाह पदभाजने ‘‘सन्ततिं विकोपेती’’ति (पारा. १७२).

इमिस्साव पाणातिपातभावे आपत्तिभावतो एत्थ ठत्वा अट्ठकथायं (पारा. अट्ठ. २.१७२) पाणपाणातिपातपाणातिपातीपाणातिपातप्पयोगानं विभागो दस्सितो. तत्थ पाणोति वोहारतो सत्तो, परमत्थतो उपच्छिज्जमानं जीवितिन्द्रियं, तं ‘‘जीविता’’ति इमिना वुत्तं. पाणातिपातो नाम वधकचेतना, सो च ‘‘वियोजये’’ति इमिना सन्दस्सितो. पाणातिपाती नाम पुग्गलो, सो च ‘‘यो’’ति इमिना सन्दस्सितो. पाणातिपातप्पयोगो पन –

‘‘वुत्ता पाणातिपातस्स;

पयोगा छ महेसिना’’ति –

आदिना नयेन इधेव वक्खमानविभागत्ता वक्खमाननयेनेव दट्ठब्बो.

अस्स सत्थं निक्खिपेय्य वाति योजना. अस्साति मनुस्सजातिकस्स. ‘‘हत्थपासे’’ति पाठसेसो. हत्थपासो नाम समीपोति. अस्साति समीपसम्बन्धे सामिवचनं. सत्थन्ति एत्थ जीवितविहिं सनुपकरणभावेन सम्मता धारावन्तअसिआदि च धारारहितयट्ठिभिन्दिवाललगुळादि च ¶ उपलक्खणवसेन गहेतब्बा. ससति हिंसतीति सत्थं. तेनेवाह पदभाजने ‘‘असिं वा सत्तिं वा भिन्दिवालं वा लगुळं वा पासाणं वा सत्थं वा विसं वा रज्जुं वा’’ति. इधावुत्तं करपालिकाछुरिकादि समुखं ‘‘सत्थं वा’’ति इमिना सङ्गहितं. निक्खिपेय्याति यथा भोगहेतुं लभति, तथा उपनिक्खिपेय्य, अत्तवधाय इच्छितक्खणे यथा गण्हाति, तथा समीपे तेनेव चित्तेन ठपेय्याति वुत्तं होति. इमिना थावरप्पयोगो सन्दस्सितो.

मरणे ¶ गुणं वा वदेय्याति योजना, मरणत्थाय मरणे गुणं वण्णेतीति अत्थो. ‘‘जीविते आदीनवं दस्सेति, मरणे गुणं भणती’’ति (पारा. १७२) पदभाजने वुत्तत्ता ‘‘किं तुय्हिमिना पापकेन दुज्जीवितेन, यो त्वं न लभसि पणीतभोजनानि भुञ्जितु’’मिच्चादिना नयेन मरणत्थाय जीविते अवण्णं वदन्तो च ‘‘त्वं खोसि उपासक कतकल्याणो अकतपापो, मतं ते जीविता सेय्यो, इतो त्वं कालकतो विविधविहङ्गमविकूजिते परमसुरभिकुसुमभूसिततरुवरनिचिते परमरतिकरलळितगतिभासितविलपितसुरयुवतिगणविचरिते वरनन्दने अच्छरासङ्घपरिवारितो विचरिस्ससी’’तिआदिना नयेन मरणत्थाय मरणानिसंसं दस्सेन्तो च ‘‘मरणे गुणं वदेय्य’’इच्चेव वुच्चति.

मरणूपायं देसेय्याति योजना. मरणाधिप्पायेनेव ‘‘सत्थं वा आहर, विसं वा खाद, रज्जुया वा उब्बन्धित्वा कालङ्करोही’’ति पदभाजने वुत्तसत्थहरणानि च अवुत्तम्पि सोब्भनरकपपातादीसु पपतनञ्चाति एवमादिकं मरणूपायं आचिक्खेय्य. ‘‘होति अयम्पी’’ति पदच्छेदो, अपीति पुब्बे वुत्तद्वयं समुच्चिनोति. द्वेधा भिन्नसिला विय असन्धेय्योव ¶ सो ञेय्योति द्विधा भिन्नपासाणो विय भगवतो पटिपत्तिपटिवेधसासनद्वयेन सो पच्चुप्पन्ने अत्तभावे सन्धातुमसक्कुणेय्योवाति ञातब्बोति अत्थो.

२४३. थावरादयोति आदि-सद्देन विज्जामयइद्धिमयपयोगद्वयं सङ्गहितं.

२४४. तत्थाति तेसु छसु पयोगेसु. सको हत्थो सहत्थो, तेन निब्बत्तो साहत्थिको, पयोगो. इध हत्थग्गहणं उपलक्खणं, तस्मा हत्थादिना अत्तनो अङ्गपच्चङ्गेन निप्फादितो वधप्पयोगो साहत्थिकोति वेदितब्बो.

२४५. ‘‘त्वं तं एवं पहरित्वा मारेही’’ति भिक्खुनो परस्स यं आणापनं, अयमाणत्तिको नयोति योजना. आणत्तिको नयोति आणत्तियेव आणत्तिको. नेति पवत्तेतीति नयो, पयोगस्सेतं नामं.

२४६. दूरन्ति दूरट्ठं. कायेन पटिबद्धेनाति एत्थ कायेकदेसो हत्थादि कायो अवयवे समुदायोपचारतो ‘‘गामो दड्ढो’’ति यथा. कायपटिबद्धं चापादिकं पटिबद्धं नाम पुब्बपदलोपेन ¶ ‘‘देवदत्तो दत्तो’’ति यथा. वा-सद्दो लुत्तनिद्दिट्ठो, कायेन वा कायपटिबद्धेन वाति वुत्तं होति, ‘‘उसुआदिनिपातन’’न्ति इमिना सम्बन्धो. विधानं विधि, पयोगोति अत्थो.

२४७. असञ्चारिमुपायेनाति असञ्चारिमेन निच्चलेन उपायेन. ओपतन्ति एत्थाति ओपातो, सो आदि येसं अपस्सेनविसभेसज्जसंविधानादीनं ते ओपातादयो, तेसं ¶ विधानं ओपातादिविधानं, ओपातक्खणनादिकिरिया.

२४८. विज्जायाति आथब्बनवेदागतमरणमन्तसङ्खातविज्जाय. जप्पनन्ति यथा परो न सुणाति, तथा पुनप्पुनं वचनं.

२४९. मारणे समत्था या कम्मविपाकजा इद्धि, अयं इद्धिमयो पयोगो नामाति समुदीरितोति योजना. कम्मविपाके जाता कम्मविपाकजा, इद्धि, या ‘‘नागानं नागिद्धि सुपण्णानं सुपण्णिद्धि यक्खानं यक्खिद्धी’’तिआदिना (पारा. अट्ठ. २.१७२) बहुधा अट्ठकथायं वुत्ता. तत्थ दिट्ठदट्ठफुट्ठविसानं नागानं दिस्वा, डंसित्वा, फुसित्वा च परूपघातकरणे नागिद्धि वेदितब्बा. एवं सेसानम्पि. इद्धियेव इद्धिमयो, भावनामयो इद्धिप्पयोगो पनेत्थ न गहेतब्बो. वुत्तञ्हेतं अट्ठकथायं –

‘‘केचि पन भावनामयिद्धियापि परूपघातकरणं वदन्ति. सह परूपघातकरणेन च आदित्तघरूपरि खित्तस्स उदकघटस्स भेदनं विय इद्धिविनासञ्च इच्छन्ति, तं तेसं इच्छामत्तमेव. कस्मा? यस्मा तं कुसलवेदनावितक्कपरित्तत्तिकादीहि न समेति. कथं? अयञ्हि भावनामयिद्धि नाम चतुत्थज्झानमया कुसलत्तिके कुसला चेव अब्याकता च, पाणातिपातो अकुसलो. वेदनात्तिके अदुक्खमसुखसम्पयुत्ता, पाणातिपातो दुक्खसम्पयुत्तो. वितक्कत्तिके अवितक्कअविचारा, पाणातिपातो सवितक्कसविचारो. परित्तत्तिके ¶ महग्गता, पाणातिपातो परित्तोयेवा’’ति (पारा. अट्ठ. २.१७२).

२५०. तत्थाति तेसु छब्बिधेसु पयोगेसु. उद्देसोपीति उद्दिसनं उद्देसो, तंसहितो पयोगोपि ¶ उद्देसोति वुत्तं होति ‘‘कुन्ते पवेसेही’’ति यथा. एवं वत्तब्बताय च अनुद्देसोति तब्बिपरीतवचनमेव ञापकन्ति वेदितब्बं. एत्थ एकेको उद्देसोपि अनुद्देसोपि होतीति तेसमयं भेदो पन दुविधो होतीति परिदीपितोति योजना. इमेसु छसु पयोगेस्वेव एकेकस्सेव उद्दिस्सानुद्दिस्सकिरियमानताय दुविधभावतो तेसं द्वादसविधो भेदो पदभाजने च अट्ठकथाय च दीपितो, तत्थ विनिच्छयमिदानि दस्सयिस्सामीति अधिप्पायो.

२५१. बहूसुपीति मनुस्सेसु बहूसुपि. तेन कम्मेनाति पहारदानसङ्खातेन कम्मेन. बज्झतीति अपायं नेतुं कम्मपासेन कम्मन्तरं निवारेत्वा बज्झतीति अत्थो.

२५२. पहारेपीति पहरणेपि. देहिनोति मनुस्सविग्गहस्स. तस्साति पहटस्स.

२५३. पहटमत्ते वाति पहटक्खणे वा. पच्छाति तप्पच्चया कालन्तरे वा. उभयथापि च मतेति द्विन्नं आकारानमञ्ञतरेन मतेपि. हन्ता वधको. पहटमत्तस्मिन्ति तस्मिं मरणारहपहारस्स लद्धक्खणेयेव, मरणतो पुब्बभागेयेवाति मत्तसद्देन दीपेति. मरणत्थाय च अञ्ञत्थाय च दिन्नेसु अनेकेसु पहारेसु मरणत्थाय ¶ दिन्नप्पहारेनेव यदा कदाचि मरिस्सति, पहारदानक्खणेयेव पाराजिकं होति. अमरणाधिप्पायेन दिन्नप्पहारबलेन चे मरेय्य, न होतीति वुत्तं होतीति.

२५४. द्वे पयोगाति उद्दिस्सानुद्दिस्सकिरियाभेदभिन्ना साहत्थिकाणत्तिका द्वे पयोगा.

२५५. करणस्साति किरियाय. विसेसोति नानत्तं. आणत्तिनियामकाति आणत्तिं नियामेन्ति ववत्थापेन्तीति आणत्तिनियामका.

२५६. तत्थाति तेसु आणत्तिनियामकेसु छसु आकारेसु. योब्बनादि चाति आदि-सद्देन थावरियमन्दखिड्डवुद्धादिअवत्थाविसेसो सङ्गहितो.

२५७. यं मातिकाय निद्दिट्ठं सत्थं, तं कतमं?. सत्तमारणन्ति सत्ते मारेन्ति एतेनाति सत्तमारणं, असिआदिवधोपकरणं.

२५८. विज्झनन्ति ¶ उसुआदीहि विज्झनं. भेदनन्ति ककचादीहि द्विधाकरणं. छेदनन्ति खग्गादीहि द्विधाकरणं. ताळनन्ति मुग्गरादीहि आघातनं. एवमादिविधोति एवमादिप्पकारो. अनेकोति बहुको भेदो. करणस्स विसेसो किरियाविसेसोति अत्थो.

२५९-६०. ‘‘पुरतो पहरित्वान मारेही’’ति यो भासितो आणापकेन, तेन आणत्तेन पच्छतो…पे… मारितेति योजना. वत्थाणत्ति विसङ्केताति एत्थ ‘‘यं ‘मारेही’ति…पे… ततो’’ति वत्थुविसङ्केतो दस्सितो. ‘‘पुरतो…पे… मारिते’’ति आणत्तिविसङ्केतो दस्सितो. मूलट्ठोति आणापको. मूलन्ति हि पुब्बकिरियानुरूपं आणापनं, तत्थ ठितोति मूलट्ठो.

२६१. इमिना ¶ विसङ्केते आणापकस्स अनापत्तिं दस्सेत्वा सङ्केते अविराधिते उभिन्नम्पि पाराजिकं दस्सेतुमाह ‘‘वत्थु’’न्तिआदि. तं वत्थुं अविरज्झित्वा मारिते उभयेसं…पे… उदीरितो, यथाणत्ति च मारिते…पे… उदीरितोति योजना. मारिते वत्थुस्मिन्ति सामत्थिया लब्भति. उभयेसन्ति आणापकआणत्तानं. यथाकालन्ति आणापकस्स आणत्तिक्खणं, आणत्तस्स मारणक्खणञ्च अनतिक्कमित्वा. बन्धनं बन्धो, कम्मुना बन्धो कम्मबन्धो. अथ वा बज्झति एतेनाति बन्धो, कम्ममेव बन्धो कम्मबन्धो.

२६४. विसङ्केतो नाति विसङ्केतो नत्थि, द्विन्नम्पि यथाकालपरिच्छेदं कम्मबन्धोयेवाति अत्थो.

२६५. सब्बसोति सब्बेसु कालभेदेसु, सब्बसो वेदितब्बोति वा सम्बन्धो. सब्बसोति सब्बप्पकारेन. विभाविनाति पण्डितेन. सो हि अत्थं विभावेतीति तथा वुत्तो.

२६६-७-८. ‘‘इमं गामे ठित’’न्ति इदं तं सञ्जानितुं वुत्तं, न मारणक्खणट्ठाननियमत्थायाति ‘‘यत्थ कत्थचि ठित’’न्ति वत्वापि ‘‘नत्थि तस्स विसङ्केतो’’ति आह. तस्साति आणापकस्स. ‘‘तत्था’’ति वा पाठो, तस्सं आणत्तियन्ति अत्थो. ‘‘गामेयेव ठितं वेरिं मारेही’’ति सावधारणं आणत्तो वने चे ठितं मारेति वा ‘‘वनेयेव ठितं वेरिं मारेही’’ति सावधारणं वुत्तो गामे ठितं चे मारेति वाति योजना. ‘‘भिक्खुना सावधारण’’न्ति ¶ च पोत्थकेसु लिखन्ति, तं अग्गहेत्वा ‘‘वने वा ¶ सावधारण’’न्ति पाठोयेव गहेतब्बो. विगतो सङ्केतो आणत्तिनियामो एत्थाति विसङ्केतो.

२६९. सब्बदेसेसूति गामवनअङ्गणगेहादीसु सब्बेसु ठानेसु. भेदतोति नानत्ततो.

२७०. ‘‘सत्थेन पन मारेही’’ति येन केनचि यो आणत्तो, तेन येन केनचि सत्थेन मारिते विसङ्केतो नत्थीति योजना.

२७१-२. इमिना वासिना हीति एत्थ हीति पदपूरणे. ‘‘इमिना असिना मारेय्या’’ति वुत्तो अञ्ञेन असिना मारेति वा ‘‘त्वं इमस्स असिस्स एताय धाराय मारय’’ इति वुत्तो तं वेरिं सचे इतराय धाराय मारेति वा थरुना मारेति वा तुण्डेन मारेति वा, तथा मारिते विसङ्केतोयेव होतीति योजना. थरुनाति खग्गमुट्ठिना. तुण्डेनाति खग्गतुण्डेन. ‘‘विसङ्केतोवा’’ति सङ्केतविराधेनेव पाराजिकं न होतीति दस्सनपदमेतं.

२७३. सब्बावुधकजातिसूति इधावुत्तकरपालिकाछुरिकादिसब्बपहरणसामञ्ञेसु. विसेसतोति भेदतो.

२७४. परेनाति भिक्खुना. सोति आणत्तो. निसिन्नं नं मारेति, विसङ्केतो न विज्जतीति ‘‘गच्छन्तमेव मारेही’’ति सावधारणं अवुत्तत्ता ‘‘निसिन्नोपि सोयेवा’’ति तं मारेन्तस्स विसङ्केतो न होति, अवधारणं अन्तरेन कथनं तं सञ्जानापेतुं वुच्चतीति इरियापथनियामकं न होतीति अधिप्पायो.

२७५-६. असति ¶ सावधारणे विसङ्केताभावं दस्सेत्वा इदानि सावधारणे इरियापथन्तरेसु विसङ्केतं दस्सेतुमाह ‘‘निसिन्नंयेवा’’तिआदि. ‘‘निसिन्नंयेव मारेही’’ति वुत्तो गच्छन्तं मारेति, विसङ्केतन्ति ञातब्बं. ‘‘गच्छन्तंयेव मारेही’’ति वुत्तो निसिन्नं मारेति, विसङ्केतन्ति ञातब्बन्ति योजना. इममेव योजनाक्कमं सन्धायाह ‘‘यथाक्कम’’न्ति.

२७७. विज्झित्वाति सरादीहि विज्झित्वा.

२७८. छिन्दित्वाति ¶ असिआदीहि छिन्दित्वा. पुन सोति पयोगो.

२७९. करणेसूति विज्झनादिकिरियाविसेसेसु.

२८०-१. एत्तावता आणत्तिनियामकनिद्देसं दस्सेत्वा इदानि दीघादिलिङ्गवसेनापि सम्भवन्तं विसङ्केतं दस्सेतुमाह ‘‘दीघ’’न्तिआदि. ‘‘दीघं…पे… थूलं मारेहीति अनियमेत्वा आणापेती’’ति (पारा. अट्ठ. २.१७४) अट्ठकथावचनतो एव-कारं विना ‘‘दीघं मारेही’’ति अनियमेत्वा केनचि यो आणत्तो होति, सोपि आणत्तो यं किञ्चि तादिसं सचे मारेति, नत्थि तत्थ विसङ्केतो, उभिन्नम्पि पराजयोति योजना. एवं ‘‘रस्स’’न्तिआदिसब्बपदेहिपि पच्चेकं योजना कातब्बा. अनियमेत्वाति विसङ्केताभावस्स हेतुदस्सनं. एवकारो वाक्यालङ्कारो. तत्थाति आणत्तिकप्पयोगे. ‘‘उभिन्नम्पि पराजयो’’ति वुत्तत्ता आणापकं विना अञ्ञं यथावुत्तक्खणं मनुस्सविग्गहं ‘‘यं किञ्चि तादिस’’न्ति इमिना दस्सेति.

सचे आणापको आणापेत्वा अत्तानमेव मारेति, आणापको दुक्कटं आपज्जित्वा मरति, आणत्तस्स ¶ पाराजिकं. आणापकेन अत्तानमुद्दिस्स आणत्तिया कताय आणत्तो अजानित्वा तादिसं अञ्ञं मारेति, ओकासस्स अनियमितत्ता आणापको मुच्चति, इतरो कम्मुना बज्झति. यदि ‘‘अमुकस्मिं रत्तिट्ठाने वा दिवाट्ठाने वा निसिन्नं ईदिसं मारेही’’ति ओकासं नियमेत्वा आणापेति, तत्थ आणापकतो अञ्ञस्मिं मारिते उभिन्नम्पि पाराजिकं. ततो बहि मारिते वधकस्सेव कम्मबन्धो. आणापको अत्तानमेव उद्दिस्स आणापेति, इतरो च तमेव तत्थ मारेति, आणापकस्स दुक्कटं, आणत्तस्स पाराजिकं. सचे अञ्ञत्थ मारेति, मूलट्ठो मुच्चति. अजानित्वा अञ्ञं तत्थ वा अञ्ञत्थ वा मारेति, वधको पाराजिकं आपज्जति, मूलट्ठो मुच्चति. आनन्तरियवत्थुम्हि आनन्तरियेन सद्धिं योजेतब्बं.

२८२. यो मनुस्सं कञ्चि उद्दिस्स सचे ओपातं खणति, तथा ओपातं खणन्तस्स तस्स दुक्कटं नाम आपत्ति होतीति अज्झाहारयोजना. योजना च नामेसा यथारुतयोजना, अज्झाहारयोजनाति दुविधा. तत्थ पाठागतपदानमेव योजना यथारुतयोजना, ऊनपूरणत्थमज्झाहारपदेहि सह पाठागतपदानं योजना अज्झाहारयोजनाति वेदितब्बा. ‘‘खणन्तस्स ¶ च ओपात’’न्ति पोत्थकेसु पाठो दिस्सति. ‘‘खणन्तस्स तथोपात’न्ति पाठो सुन्दरो’’ति निस्सन्देहे वुत्तं. ‘‘आवाटन्ति एतस्स ‘ओपात’न्ति परियायो’’ति च वुत्तं. ततोपि –

‘‘मनुस्सं कञ्चि उद्दिस्स;

यो चे खणतिवाटकं;

खणतो तं तथा तस्स;

होति आपत्ति दुक्कट’’न्ति. –

पाठो ¶ सुन्दरतरो. जातपथविं खणन्तस्स पाराजिकपयोगत्ता पयोगगणनाय दुक्कटं.

२८३. तत्थाति तस्मिं आवाटे. तस्साति पतितस्स मनुस्सविग्गहस्स. दुक्खस्सुप्पत्तियाति दुक्खुप्पत्तिहेतु. तस्साति येन आवाटो खतो, तस्स भिक्खुनो. पतित्वा सो चे मरति, तस्मिं मते तस्स भिक्खुनो पाराजिकं भवेति योजना.

२८४. अञ्ञस्मिन्ति यं समुद्दिस्स आवाटो खतो, ततो अञ्ञस्मिं. अनुद्दिस्सकन्ति किरियाविसेसनं, अनुद्दिस्सकं कत्वाति अत्थो. ओपातविसेसनं चे, ‘‘अनुद्दिस्सको ओपातो’’ति पदच्छेदो. ‘‘अग्गमक्खायती’’तिआदीसु (सं. नि. ५.१३९; अ. नि. ४.३४; १०.१५; इतिवु. ९०; नेत्ति. १७०) विय ओ-कारट्ठाने अ-कारो, म-कारागमो च दट्ठब्बो, अनोदिस्सको ओपातो खतो होतीति अत्थो.

२८५. ‘‘एत्थ पतित्वा यो कोचि मरतू’’ति अनोदिस्सको ओपातो सचे खतो होति, यत्तका निपतित्वा मरन्ति चे, अस्स तत्तका दोसा होन्तीति योजना. ‘‘यो कोची’’ति इमिना अत्तनो मातापितरो च सङ्गहिता. दोसाति कम्मबन्धदोसा, पाराजिकं पन एकमेव. अस्साति येन अनोदिस्स ओपातो खतो, तस्स.

२८६. आनन्तरियवत्थुस्मिं मतेति पाठसेसो, ‘‘तत्थ पतित्वा’’ति अधिकारो, अरहन्ते, मातरि, पितरि च तस्मिं पतित्वा मते कालकतेति अत्थो. आनन्तरियकन्ति एत्थ सकत्थे, कुच्छिते ¶ , सञ्ञायं वा क-पच्चयो दट्ठब्बो. ‘‘तथा’’ति इमिना ‘‘आनन्तरियवत्थुस्मि’’न्ति इमस्मिं समासपदे ¶ अवयवभूतम्पि ‘‘वत्थुस्मि’’न्ति इदञ्च ‘‘तत्थ पतित्वा मते’’ति इदञ्च आकड्ढति. थुल्लच्चयादीनं वत्थुस्मिं तत्थ पतित्वा मते थुल्लच्चयादयो होन्तीति योजना. तस्मिं आवाटे पतित्वा यक्खादीसु मतेसु, पाराजिकवत्थुनो दुक्खुप्पत्तियञ्च थुल्लच्चयं, मनुस्सविग्गहे मते पाराजिकं, तिरच्छाने मते पाचित्तियन्ति वुत्तं होति.

२८७. पाणातिपाता द्वेति द्विन्नं मतत्ता द्वे पाणातिपाता, एकेन पाराजिकं, इतरेन कम्मबन्धोयेव. एकोवेकेकधंसनेति मातु वा दारकस्स वा मरणे एको पाणातिपातोव.

२८८. चोरेहि अनुबद्धो एत्थ आवाटे पतित्वा मरिस्सति चे, ओपातखणकस्सेव पाराजिकं होति किराति योजना. किराति अनुस्सवने अरुचिसूचकं.

२८९-९०. वेरिनो भिक्खुतो अञ्ञे वेरिपुग्गला. तत्थ तस्मिं ओपाते सचे मनुस्सं पातेत्वा मारेन्ति, तथा वेरिनो तत्थ सयमेव पतितं मनुस्सं बहि नीहरित्वा सचे मारेन्ति, तत्थ ओपपातिका मनुस्सा ओपाते निब्बत्तित्वा ततो निक्खन्तुं असक्कोन्ता मता चे सियुं, सब्बत्थ च यथावुत्तसब्बवारेसु ओपातखणकस्सेव पराजयोति योजना. निब्बत्तित्वा हीति एत्थ हीति पदपूरणे. यत्थ यत्थ निपातसद्दानं अत्थो न दस्सितो, तत्थ तत्थ पदपूरणमत्तता वेदितब्बा.

२९१. यक्खादयोति आदि-सद्देन तिरच्छानानं सङ्गहो. वत्थुवसाति थुल्लच्चयपाचित्तियानं वत्थुभूतयक्खतिरच्छानानं वसा. थुल्लच्चयादयोति आदि-सद्देन पाचित्तियसङ्गहो.

२९३. अयं ¶ नयोति ‘‘अनापत्ती’’ति यथावुत्तो नयो.

२९४-५. बज्झन्तीति सचे अवस्सं बज्झन्ति. तत्थाति तस्मिं पासे. ‘‘हत्थतो मुत्तमत्तस्मि’’न्ति इमिना पयोगस्स अत्थसाधकतं दीपेति.

२९६. यं ¶ पन उद्दिस्स पासो ओड्डितो, ततो अञ्ञस्स बन्धने तु अनापत्ति पकासिताति योजना.

२९७. मुधा वापीति अमूलेन वापि. मूलट्ठस्सेवाति पासकारकस्सेव. कम्मबन्धोति पाणातिपातो. बज्झति एतेनाति बन्धो, कम्ममेव बन्धो कम्मबन्धो. पाराजिकमत्ते वत्तब्बेपि याव सो वत्तति, ताव तत्थ बज्झित्वा मतसत्तेसु पठममतस्स वसेन पाराजिकं, अवसेसानं पाणातिपातसङ्खातस्स अकुसलरासिनो सम्भवतो तं सब्बं सङ्गहेत्वा सामञ्ञेन द्वयम्पि दस्सेतुमाह ‘‘कम्मबन्धो’’ति.

२९८. ‘‘सचे येन लद्धो, सो उग्गळितं वा पासं सण्ठपेति, तस्स पस्सेन वा गच्छन्ते दिस्वा वतिं कत्वा सम्मुखे पवेसेति, थद्धतरं वा पासयट्ठिं ठपेति, दळ्हतरं वा पासरज्जुं बन्धति, थिरतरं वा खाणुकं आकोटेती’’ति (पारा. अट्ठ. २.१७६) अट्ठकथागतं विनिच्छयं सङ्गहितुमाह ‘‘पासमुग्गळितम्पि वा’’ति. एत्थ अवुत्तसमुच्चयत्थेन पि-सद्देन ‘‘सण्ठपेती’’तिआदिका ‘‘बन्धती’’ति दस्सितकिरियावसाना पयोगा दस्सिता. थिरं वापीति एत्थ अपि-सद्दो अट्ठकथाय अवसिट्ठं ‘‘खाणुकं आकोटेती’’ति किरियं समुच्चिनोति उभयत्थपि पकारन्तरविकप्पत्थत्ताति गहेतब्बा. एवन्ति ¶ एवं सति. येन पासो लद्धो, तेनापि एवं पासे कतविसेसे सतीति वुत्तं होति. उभिन्नन्ति पासकारकस्स च इदानि लभित्वा पटिजग्गन्तस्स चाति उभयेसं.

२९९-३००. योति पासकारको, लद्धपासकोति इमेसं यो कोचि. उग्गळापेत्वाति विघाटेत्वा, यथा तत्थ पाणिनो न बज्झन्ति, एवं कत्वाति अत्थो. तत्थ चाति पुन सण्ठपिते पासे च. को विमुच्चति? येन लद्धो, सो.

३०१-२. गोपेत्वाति गोपनहेतु मोक्खो न होतीति योजना. ‘‘सीहं दिस्वा भयं होती’’तिआदीसु विय हेतुम्हि त्वा-पच्चयो दट्ठब्बो. तमञ्ञो…पे… न च मुच्चतीति एत्थ न चाति नेव. नासेत्वा सब्बसो वाति सो यथा यस्स कस्सचि सत्तस्स विनासोपकरणं न होति, तथा छिन्दनादीहि नासेत्वा. तं पासयट्ठिं. को विमुच्चति? पासकारको.

३०३. सूलं ¶ रोपेन्तस्साति सूलं निखणन्तस्स. सज्जेन्तस्साति सण्ठपेन्तस्स.

३०४. असञ्चिच्चाति एत्थ ‘‘कतेन पयोगेना’’ति पाठसेसो, ‘‘मतेपि अनापत्ती’’ति एतेहि सम्बन्धो. ‘‘इमिनाहं उपक्कमेन इमं मारेस्सामी’’ति अचेतेत्वा अपकप्पेत्वा अवधकचेतनो हुत्वा कतेन अञ्ञत्थिकेनपि उपक्कमेन परे मतेपि आपत्ति नत्थीति अत्थो, मुसलुस्सापनादिवत्थूसु (पारा. १८०) विय अयं सत्तोतिसञ्ञी हुत्वा ‘‘इमिना उपक्कमेन इमं मारेस्सामी’’ति वीतिक्कमसमुट्ठापकचेतनासम्पयुत्तविकप्परहितो हुत्वा अञ्ञत्थिकेन पयोगेन मनुस्से मतेपि पाराजिकं नत्थीति वुत्तं होति.

अजानन्तस्साति ¶ ‘‘इमिना अयं मरिस्सती’’ति अजानन्तस्स उपक्कमेन परे मतेपि अनापत्ति, विसगतपिण्डपातवत्थुम्हि (पारा. १८१) विय ‘‘इदं कारण’’न्ति अजानित्वा कतेन मनुस्से मतेपि अनापत्तीति वुत्तं होति. ‘‘तथा’’ति इमिना ‘‘अनापत्ती’’ति आकड्ढति. अमरणचित्तस्स अमरणिच्छासहितचित्तस्स उपक्कमेन परे मतेपि अनापत्ति वुद्धपब्बजितादिवत्थूसु (पारा. १८०) वियाति अत्थो. उम्मत्तकादयो वुत्तसरूपायेव.

३०५. ‘‘मनुस्सपाणिम्ही’’ति इमिना मनुस्सभावो अङ्गभावेन दस्सितो. ‘‘सचस्स चित्तं मरणूपसंहित’’न्ति इमिना मरणूपसंहितचित्तता दस्सिता.

इति विनयत्थसारसन्दीपनिया

विनयविनिच्छयवण्णनाय

ततियपाराजिककथावण्णना निट्ठिता.

चतुत्थपाराजिककथावण्णना

३०६-७. एवं नातिसङ्खेपवित्थारनयेन ततियपाराजिकविनिच्छयं दस्सेत्वा इदानि चतुत्थपाराजिकविनिच्छयं दस्सेतुमाह ‘‘असन्त’’न्तिआदि. तत्थ ‘‘असन्त’’न्ति अपेक्खित्वा ‘‘अत्तनी’’ति च ‘‘झानादिभेद’’न्ति अपेक्खित्वा ‘‘उत्तरिमनुस्सधम्म’’न्ति च ‘‘समुदाचरेय्या’’ति अपेक्खित्वा ‘‘यो भिक्खू’’ति च सामत्थिया लब्भतीति अज्झाहरित्वा ‘‘अत्तनि असन्त’’न्तिआदिना नयेन योजेतब्बं.

अत्तनि ¶ असन्तन्ति तस्मिं अत्तभावे अत्तनो सन्ताने अनुप्पादितताय अविज्जमानं. अत्तस्सितमेव कत्वाति अत्तुपनायिकं कत्वा अत्तनि विज्जमानं विय कत्वा तं उपनेत्वा ¶ . भवं अधिट्ठाय च वत्तमानन्ति पटिसन्धितो पट्ठाय च वत्तन्तं भवं चित्तेन अधिट्ठहित्वा तक्केत्वा, चित्ते ठपेत्वाति वुत्तं होति. अञ्ञापदेसञ्च विनाति ‘‘यो ते विहारे वसतीध भिक्खू’’तिआदिना नयेन वक्खमानं परियायकथं ठपेत्वा. अधिमानञ्च विनाति अदिट्ठे दिट्ठसञ्ञितादिसभावं अधिगतमानसङ्खातं ‘‘अधिगतउत्तरिमनुस्सधम्मो अहम्ही’’ति अधिमानञ्च ठपेत्वा. झानादिभेदन्ति झानादयो भेदा विसेसा यस्स तं झानादिभेदं, ‘‘उत्तरिमनुस्सधम्मो नाम झानं विमोक्खो समाधि समापत्ति ञाणदस्सनं मग्गभावना फलसच्छि किरिया किलेसप्पहानं विनीवरणता चित्तस्स सुञ्ञागारे अभिरती’’ति (पारा. १९८, १९९) पदभाजने वुत्तं झानादिधम्मविसेसन्ति अत्थो. ‘‘उत्तरिमनुस्सधम्मन्ति उत्तरिमनुस्सानं झायीनञ्चेव अरियानञ्च धम्म’’न्ति (पारा. अट्ठ. २.१९७) अट्ठकथाय वुत्तं झानलाभीहि चेव अट्ठहि अरियपुग्गलेहि च अधिगतत्ता तेसं सन्तकन्ति सङ्ख्यं गतं उत्तरिमनुस्सधम्मं.

विञ्ञत्तिपथे ठितस्स कायेन वा वाचाय वा यो भिक्खु समुदाचरेय्याति अज्झाहरित्वा योजेतब्बं. विञ्ञत्तिपथे ठितस्साति द्वादसहत्थब्भन्तरे पदेसे ठितस्स ‘‘इत्थिया वा पुरिसस्स वा गहट्ठस्स वा पब्बजितस्स वा’’ति (पारा. १९८) पदभाजने वुत्तस्स यस्स कस्सचि. कायेन वाति हत्थमुद्दादिवसेन कायेन वा. ‘‘सिक्खापच्चक्खानं हत्थमुद्दाय सीसं न ओतरति, इदं अभूतारोचनं हत्थमुद्दायपि ओतरती’’ति (पारा. अट्ठ. २.२१५) अट्ठकथायं वुत्तत्ता इध हत्थमुद्दादिहत्थविकारो च अङ्गपच्चङ्गचोपनञ्च ‘‘कायेना’’ति इमिना गहेतब्बं. वाचाय वाति यो सवनूपचारे ठितो तेन विञ्ञातुं सक्कुणेय्येन येन केनचि वोहारेन वा. यो भिक्खूति यो उपसम्पन्नो थेरो वा नवो ¶ वा मज्झिमो वा. समुदाचरेय्याति ‘‘पठमं झानं समापज्जामी’’तिआदिवचनप्पकारेसु यं कञ्चि पकारं वदेय्य. तदत्थेति तेन वुत्तवाक्यस्स अत्थे. ञातेवाति ञाते एव. मातुगामं वा पुरिसं वा यं किञ्चि उद्दिस्स वुत्ते, तेनेव वा अनुद्दिस्स वुत्ते सवनूपचारे ठितेन येन केनचि मनुस्सभूतेन वचनसमनन्तरमेव ‘‘अयं पठमज्झानलाभी’’तिआदिके यथावुत्ते अत्थप्पकारे ञातेयेव. ‘‘सो’’ति अज्झाहरित्वा ‘‘सो पुन रुळ्हिभावे अभब्बो’’ति योजेतब्बं, अत्तनि अविज्जमानगुणं सन्तं विय कत्वा इच्छाचारे ठत्वा एवं कथितपुग्गलो सीले पतिट्ठाय उपरूपरि लब्भमानलोकियलोकुत्तरगुणेहि बुद्धिसङ्खातं सासने बुद्धिमधिगन्तुं अनरहोति अत्थो ¶ . किं वियाति आह ‘‘यथेव…पे… रुळिभावे’’ति. ‘‘यथा’’ति एतेन सम्बन्धो ‘‘तथा’’ति, यथा तालो मत्थकच्छिन्नो अभब्बो पुन विरुळ्हिया, सोपि पाराजिकं आपन्नो तथेव दट्ठब्बोति अत्थो.

३०८-९. इदानि ‘‘ञातेव अभब्बो’’ति च ‘‘अञ्ञापदेसञ्च विना’’ति च एतस्मिं वाक्यद्वये ब्यतिरेकत्थवसेन सम्भवन्तं आपत्तिभेदं दस्सेतुमाह ‘‘असन्तमेवा’’तिआदि.

अनन्तरन्ति ‘‘पठमं झानं समापज्जामी’’तिआदिवचनसमनन्तरमेव. सोति द्वादसहत्थब्भन्तरे ठत्वा येन तं वचनं सुतं, सो परो पुग्गलो. जानाति चेति ‘‘अयं पठमज्झानलाभी’’तिआदिवसेन तेन वुत्तवचनप्पकारेन अत्थं अविराधेत्वा अचिरेनेव सचे जानातीति अत्थो. यो पन झानादीनं अत्तना अलद्धभावेन वा आगमे उग्गहपरिपुच्छादिवसेन अपरिचितत्ता वा झानादिसरूपं अजानन्तोपि ¶ केवलं ‘‘झानं विमोक्खो समाधि समापत्ती’’तिआदिवचनानं सुतपुब्बत्ता तेन ‘‘पठमं झानं समापज्जामी’’तिआदिवचने वुत्ते ‘‘झानं किर एस समापज्जती’’ति यदि एत्तकमत्थम्पि जानाति, सोपि ‘‘जानाति’’च्चेव अट्ठकथायं (पारा. अट्ठ. २.२१५) वुत्तोति गहेतब्बो. चुतो हीति हि-सद्दो अवधारणे, अत्तना वुत्ते तेन तत्तकेयेव ञाते सो असन्तगुणदीपको पापपुग्गलो फलसम्पत्तिसम्पन्नं इमं सासनामतमहापादपं आरुय्हापि फलं अपरिभुञ्जित्वा विराधेत्वा पतित्वा मतो नाम होतीति वुत्तं होति. इमस्सेवत्थस्स ‘‘असन्त’’मिच्चादिना पठमं वुत्तस्सपि ब्यतिरेकत्थं दस्सेतुं अनुवादवसेन वुत्तत्ता पुनरुत्तिदोसो न होतीति दट्ठब्बं.

इदानि तं ब्यतिरेकत्थं दस्सेतुमाह ‘‘नो चे…पे… होती’’ति. यस्स सो आरोचेति, सो चे न जानाति, अस्स असन्तगुणदीपकस्स मुसावादिनो.

‘‘अञ्ञापदेसञ्च विना’’ति इमिना दस्सितब्यतिरेकत्थस्स भावाभावे सम्भवन्तं आपत्तिभेदं दस्सेतुमाह ‘‘यो ते’’तिआदि. यो भिक्खु ते तव इध इमस्मिं विहारे वसतीति योजना. दीपितेति अत्तनो अधिप्पाये पकासिते. जानाति चेति यो तथा वुत्तवचनं अस्सोसि, सो ‘‘एस अञ्ञापदेसेन अत्तनो झानलाभितं दीपेती’’ति वा ‘‘एसो झानलाभी’’ति ¶ वा वचनसमनन्तरमेव सचे जानाति. अस्साति एवं कथितवचनवतो तस्स भिक्खुनो. तं तेन वुत्तवचनं. दुक्कटमेव होति, न थुल्लच्चयन्ति अत्थो. अत्तनो आवासकारानं दायकानं अञ्ञस्स पवत्तिं कथेन्तस्स विय अत्तनोयेव असन्तगुणं सन्तमिव ¶ कत्वा कथनाकारो इमाय गाथाय अत्थतो वुत्तोति दट्ठब्बो.

एत्थ च झानलाभीति चाति अवुत्तसमुच्चयत्थेन च-सद्देन पाळियं (पारा. २२०) आगता अवसेसपरियायवारा च सङ्गहिताति दट्ठब्बं. तथा झानलाभीति एत्थ झानग्गहणेन विमोक्खादीनञ्च उपलक्खितत्ता झानादिदसविधउत्तरिमनुस्सधम्मविसयपरियायकथं सुतवता तङ्खणे तदत्थे ञाते परियायसमुल्लापकेन आपज्जितब्बं थुल्लच्चयञ्च अविञ्ञाते वा चिरेन विञ्ञाते वा आपज्जितब्बं दुक्कटञ्च इमाय गाथाय अत्थतो दस्सितमेवाति दट्ठब्बं.

३१०. एतन्ति यथावुत्तप्पकारं झानादिभेदं उत्तरिमनुस्सधम्मं. अधिमानाति ‘‘अधिगतोह’’न्ति एवं उप्पन्नमाना, अधिकमानाति अत्थो, ‘‘अयं धम्मो मया अधिगतो’’ति दळ्हमुप्पन्नेन मानेन कथेन्तस्साति वुत्तं होति. वुत्तो अनापत्तिनयोति आपत्तिया अभावो अनापत्ति, सा एव नयो नेतब्बो बुज्झितब्बोति कत्वा, अनापत्तीति वुत्तं होति. ‘‘अधिमानेना’’ति एवं वुत्तो भगवताति अत्थो, ‘‘अधिगतधम्मोह’’न्ति अधिमानेन ‘‘अहं पठमज्झानलाभी’’तिआदीनि वदन्तस्स अनापत्तीति वुत्तं होति.

अयमधिमानो कस्स होति, कस्स न होतीति चे? अरियानं न होति मग्गपच्चवेक्खणादीहि पञ्चहि पच्चवेक्खणाहि सञ्जातसोमनस्सानं वितिण्णकङ्खत्ता. दुस्सीलस्सापि न होति तस्स अरियगुणाधिगमे निरुस्साहत्ता. सुसीलस्सापि कम्मट्ठानानुयोगरहितस्स निद्दारामतादिमनुयुत्तस्स न होति विस्सट्ठभावनाभियोगत्ता. सुपरिसुद्धाय सीलसम्पत्तिया पतिट्ठाय समथभावनामनुयुत्तस्स रूपारूपसमापत्तियं पत्तासिनो वा विपस्सनाभियुत्तस्स ¶ सोपक्किलेसोदयब्बयञाणलाभिनो वा उप्पज्जति. सो समथविपस्सनाभावनाहि किलेससमुदाचारस्स अभावे उप्पन्ने ते विसेसभागिनो भवितुं अदत्वा ठितिभागिनो कत्वा ठपेतीति वेदितब्बो.

पनाति अपि-सद्दत्थो. ‘‘एव’’न्ति इमिना ‘‘अनापत्तिनयो वुत्तो’’ति पच्चामसति. ‘‘अवत्तुकामस्सा’’ति इदञ्च पाळियं आगतं ‘‘अनुल्लपनाधिप्पायस्सा’’ति ¶ (पारा. २२२, २२५) इदञ्च अनत्थन्तरं. अवत्तुकामस्साति एवं वुत्तोति योजना. कोहञ्ञेन पापिच्छापकतस्स ‘‘झानादीनं लाभिम्ही’’ति वदन्तस्स अज्झासयो उल्लपनाधिप्पायो नाम, तथा अहुत्वा सब्रह्मचारीसु अञ्ञं ब्याकरोन्तस्स एवमेव अनापत्तिभावो वुत्तो भगवताति अत्थो. आदिकस्सापि एवं वुत्तोति योजना. ‘‘अनापत्ति आदिकम्मिकस्सा’’ति (पारा. २२२) आदिकम्मिकस्सापि अनापत्तिभावो वुत्तो भगवताति अत्थो. इमस्मिं सिक्खापदे वग्गुमुदातीरिया भिक्खू आदिकम्मिका. अवुत्तसमुच्चयत्थेन तथा-सद्देन इध अवुत्तउम्मत्तकखित्तचित्तवेदनट्टा गहिता.

३११. पापिच्छताति ‘‘एवं मं जनो सम्भावेस्सती’’ति झानलाभितादिहेतुकाय सम्भावनाय सम्भावनानिमित्तस्स पच्चयपटिलाभस्स पत्थनासङ्खाताय पापिकाय लामिकाय इच्छाय समन्नागतभावो च. तस्साति यं झानादिभेदभिन्नं उत्तरिमनुस्सधम्मं समुल्लपि, तस्स धम्मस्स. असन्तभावोति अत्तसन्ताने पच्चुप्पन्नजातियं अनुप्पादितभावेन अविज्जमानभावो. मनुस्सकस्स आरोचनञ्चेवाति वुत्तवचनस्स अत्थं तङ्खणे जाननकस्स मनुस्सजातिकस्स ‘‘पठमं झानं समापज्जि’’न्तिआदिना नयेन सवनूपचारे ¶ ठत्वा आरोचनञ्च. नञ्ञापदेसेन आरोचनञ्चाति सम्बन्धो. ‘‘यो ते विहारे वसति, सो भिक्खु पठमं झानं समापज्जी’’तिआदिना (पारा. २२०) नयेन पवत्तअञ्ञापदेसं विना उजुकमेव आरोचनञ्च. तदेव ञाणन्ति तदा एव ञाणं, अचिरायित्वा वुत्तक्खणेयेव जाननन्ति अत्थो. एत्थाति इमस्मिं चतुत्थपाराजिकापत्तियं. धीरा विनयधरा.

३१२. पठमे दुतिये चन्तेति मनुस्सविग्गहपाराजिकवज्जिते यथावुत्तपाराजिकत्तये. परियायो न विज्जतीति पाराजिकापत्तिपथं परियायवचनं न लभति. ‘‘न पनेतरे’’ति इदं एत्थापि योजेतब्बं, इतरे पन ततियपाराजिके परियायो न विज्जतीति अत्थो. ‘‘मरणवण्णं वा संवण्णेय्या’’ति (पारा. १७२) च ‘‘अम्भो पुरिस किं तुय्हिमिना’’तिआदिना (पारा. १७१) च ‘‘यो एवं मरति, सो धनं वा लभती’’तिआदिना (पारा. १७५) च परियायेन वदन्तस्स पाराजिकमेवाति वुत्तं होति. आणत्ति पाराजिकहेतुआणत्तिकप्पयोगो. न पनेतरेति पठमचतुत्थपाराजिकद्वये पन पाराजिकहेतुभूता आणत्ति न लभतीति अत्थो.

३१३. आदीति ¶ पठमपाराजिकं. एकसमुट्ठानन्ति एककारणं. समुट्ठाति आपत्ति एतस्माति समुट्ठानं, कारणं कायादि. तं पन छब्बिधं कायो, वाचा, कायवाचा, कायचित्तं, वाचाचित्तं, कायवाचाचित्तन्ति. तेसं विनिच्छयं उत्तरे (उ. वि. ३२५ आदयो) यथागतट्ठानेयेव च वण्णयिस्साम. तत्रिदं एकसमुट्ठानं एकं कायचित्तं समुट्ठानं एतस्साति कत्वा. तेनाह ‘‘दुवङ्गं कायचित्ततो’’ति. ‘‘तं समुट्ठान’’न्ति अज्झाहारो. येन समुट्ठानेन पठमपाराजिकापत्ति उप्पज्जति, तंसमुट्ठानसङ्खातं ¶ कारणं. अङ्गजातसङ्खातं कायञ्च सेवनचित्तञ्चाति द्वयं अङ्गं अवयवं एतस्साति दुवङ्गं, तदुभयसभावन्ति अत्थो यथा ‘‘दुवङ्गं चतुत्थज्झान’’न्ति. सेसाति अवसिट्ठानि तीणि पाराजिकानि. तिसमुट्ठानाति कायचित्तं, वाचाचित्तं, कायवाचाचित्तन्ति तिसमुट्ठाना तीणि समुट्ठानानि एतेसन्ति कत्वा. तेसन्ति तेसं तिण्णं समुट्ठानानं. अङ्गानीति अवयवानि. सत्त कायो, चित्तं, वाचा, चित्तं, कायो, वाचा, चित्तन्ति, तंसभावाति वुत्तं होति.

३१४. आदीति मेथुनधम्मपटिसेवनचित्तसम्पयुत्तचेतनासभावं पठमपाराजिकं. सुखोपेक्खायुतं उदीरितन्ति योजना. इट्ठालम्बणपटिलाभादिसोमनस्सहेतुम्हि सति सुखवेदनासम्पयुत्तं होति, तस्मिं असति उपेक्खावेदनाय सम्पयुत्तं होतीति वुत्तन्ति अत्थो.

ततियं दुक्खवेदनन्ति ततियं मनुस्सविग्गहपाराजिकं दोसचित्तसम्पयुत्तचेतनासभावत्ता दुक्खवेदनाय सम्पयुत्तन्ति अत्थो.

दुतियन्ति अदिन्नादानचेतनालक्खणं दुतियपाराजिकं. लोभेन परसन्तकं चोरिकाय गण्हन्तस्स सोमनस्ससम्पयुत्तं होति, कोधेन अभिभूतस्स विलुम्पित्वा वा विलुम्पापेत्वा वा गण्हतो दोमनस्ससम्पयुत्तं होति, सोमनस्सं, दोमनस्सञ्च विना अग्गहेतुकामो विय हुत्वा उदासीनस्स गण्हतो उपेक्खासम्पयुत्तं होतीति ‘‘तिवेदनमुदीरित’’न्ति आह.

चतुत्थञ्चाति उत्तरिमनुस्सधम्मसमुल्लपनचेतनालक्खणं चतुत्थपाराजिकञ्च. सम्भावनिच्छाय पच्चयासाय वा तुट्ठतुट्ठस्सेव ‘‘अहं पठमं झानं समापज्जामी’’तिआदिना नयेन ¶ अत्तनो उत्तरिमनुस्सधम्मलाभितं वदन्तस्स सोमनस्ससम्पयुत्तं होति, अञ्ञपुग्गलेसु पटिहतचित्तस्स कलहपुरेक्खारताय वदतो दोमनस्ससम्पयुत्तं होति, पच्चयालाभेन जिघच्छादिदुक्खं ¶ सहितुमसक्कुणेय्यताय उदासीनस्स वदतो उपेक्खासम्पयुत्तं होतीति ‘‘तिवेदनमुदीरित’’न्ति आह.

३१५. अट्ठ चित्तानीति लोभसहगतानि अट्ठ चित्तानि लब्भरेति योजना, लब्भन्तीति अत्थो, चेतनासभावेन पठमपाराजिकेन सम्पयुत्तानीति वुत्तं होति. एवमुपरिपि. दुवेति पटिघसम्पयुत्तानि द्वे चित्तानि. दस चित्तानीति लोभसहगतानि अट्ठ, द्वे पटिघसम्पयुत्तानीति. लब्भरेति सम्पयुत्तभावेन लब्भन्ति.

३१६. तस्माति यस्मा यथावुत्तचित्तेहि सम्पयुत्तं, तेन हेतुना. क्रियाति करणेन आपज्जितब्बत्ता किरिया. वीतिक्कमसञ्ञाय अभावेन मुच्चनतो सञ्ञाय विमोक्खो एतस्साति सञ्ञाविमोक्खं. लोकवज्जन्ति लोकेन अकुसलभावतो वज्जनीयन्ति दीपितं पकासितं.

३१७. आपत्तियंयेवाति एवकारेन न सिक्खापदेति दस्सेति. इदं विधानन्ति समुट्ठानादिकं इदं यथावुत्तं विधानं. विभाविनाति पञ्ञवता विनयधरेन.

३१८-९. मुदुपिट्ठि चाति लता विय नमित्वा करणं दस्सेत्वा नच्चितुं समवाहित्वा मुदुकतपिट्ठिको च. लम्बी चाति पलम्बमानेन दीघेन अङ्गजातेन युत्तो. लम्बतीति लम्बं, अङ्गजातं, तं यस्स अत्थि सो लम्बी. इमे द्वेपि कामपरिळाहातुरभावे सति अत्तनो अङ्गजातं अत्तनो ¶ मुखं, वच्चमग्गञ्च पवेसेत्वा वीतिक्कमितुमरहत्ता पाराजिकापन्नसदिसत्ता परिवज्जिता. मुखग्गाहीति मुखेन गहणं मुखग्गाहो, सो एतस्स अत्थीति मुखग्गाही, परस्स अङ्गजातं मुखेन गण्हन्तोति अत्थो. निसीदकोति परस्स अङ्गजाते अत्तनो वच्चमग्गेन निसीदन्तो. इमे द्वे सहवासिकानं सीलविनासनतो अञ्ञेहि संवसितुं अनरहाति पाराजिकापन्नसदिसत्ता विवज्जिता. तेसन्ति असंवासतासामञ्ञेन चत्तारो पाराजिकापन्ने सङ्गण्हाति. ‘‘तेसञ्च मग्गेनमग्गपटिपत्तिसामञ्ञेन पठमपाराजिकापन्नस्सेव अनुलोमिकाति गहेतब्बा’’ इच्चेवं निस्सन्देहे वुत्तं. इमिना च अकतवीतिक्कमानम्पि मुदुपिट्ठिआदीनं चतुन्नं अनुलोमपाराजिकभावो वुत्तोति विञ्ञायति.

समन्तपासादिकायं ¶ पन –

‘‘अपरानिपि लम्बी, मुदुपिट्ठिको, परस्स अङ्गजातं मुखेन गण्हाति, परस्स अङ्गजाते अभिनिसीदतीति इमेसं चतुन्नं वसेन चत्तारि अनुलोमपाराजिकानीति वदन्ति. एतानि हि यस्मा उभिन्नं रागवसेन सदिसभावूपगतानं धम्मो ‘मेथुनधम्मो’ति वुच्चति, तस्मा एतेन परियायेन मेथुनं धम्मं अप्पटिसेवित्वायेव केवलं मग्गेन मग्गप्पवेसनवसेन आपज्जितब्बत्ता मेथुनधम्मपाराजिकस्स अनुलोमेन्तीति ‘अनुलोमपाराजिकानी’ति वुच्चन्ती’’ति (पारा. अट्ठ. २.२३३) –

वुत्तत्ता च तब्बण्णनाय च सारत्थदीपनियं –

‘‘लम्बंदीघताय पलम्बमानं अङ्गजातमेतस्साति लम्बी. सो एत्तावता न पाराजिको, अथ खो यदा अनभिरतिया पीळितो अत्तनो अङ्गजातं मुखे ¶ वा वच्चमग्गे वा पवेसेति, तदा पाराजिको होति. मुदुका पिट्ठि एतस्साति मुदुपिट्ठिको, कतपरिकम्माय मुदुकाय पिट्ठिया समन्नागतो. सोपि यदा अनभिरतिया पीळितो अत्तनो अङ्गजातं अत्तनो मुखे पवेसेति तदा पाराजिको होति. परस्स अङ्गजातं मुखेन गण्हातीति यो अनभिरतिया पीळितो परस्स सुत्तस्स वा पमत्तस्स वा अङ्गजातं अत्तनो मुखेन गण्हाति. परस्स अङ्गजाते अभिनिसीदतीति यो अनभिरतिया पीळितो परस्स अङ्गजातं कम्मनियं दिस्वा अत्तनो वच्चमग्गेन तस्सूपरि अभिनिसीदति, तं अत्तनो वच्चमग्गं पवेसेतीति अत्थो. लम्बीआदयो चत्तारो किञ्चापि पठमपाराजिकेन सङ्गहिता, यस्मा पन उभिन्नं रागपरियुट्ठानसङ्खातेन परियायेन मेथुनं धम्मं अप्पटिसेविनो होन्ति, तस्मा विसुं वुत्ता’’ति (सारत्थ. टी. २.२३३) –

वुत्तत्ता च कतवीतिक्कमायेवेते ‘‘पाराजिका’’ति गहेतब्बा.

भिक्खुनीनञ्च चत्तारीति एत्थ ‘‘असाधारणानी’’ति पाठसेसो, भिक्खूहि असाधारणानि भिक्खुनीनमेव नियतानि उब्भजाणुमण्डलिका, वज्जपटिच्छादिका, उक्खित्तानुवत्तिका, अट्ठवत्थुकाति ¶ चत्तारि पाराजिकानि च. विब्भन्ता भिक्खुनी सयन्ति एत्थ ‘‘तेसं अनुलोमिका’’ति आनेत्वा सम्बन्धितब्बं. तेसं चतुन्नं पाराजिकानं अनुलोमिका सयं विब्भन्ता भिक्खुनी चाति योजना. चित्तवसिका हुत्वा अत्तना ¶ निवत्थचीवरम्पि हि मातुगामानं निवासननीहारेन सयमेव निवासेत्वा गिहिवेसं रोचेत्वा गहितमत्ते सासनतो चुता भिक्खुनी चाति वुत्तं होति. एवंकरणेन गिहिभावापन्नतासामञ्ञेन संवासारहा न होन्तीति इमेसं चतुन्नं पाराजिकानं अनुलोमिका जाता.

तथाति यथा इमे दस्सिता तेन असंवासारहताय, भिक्खुभावाय अभब्बताय च पाराजिकाव, तथा एकादस अभब्बपुग्गलापि होन्तीति अत्थो. एकादसाभब्बाति मातुघातको, पितुघातको, अरहन्तघातको, सङ्घभेदको, लोहितुप्पादको, पण्डको, तिरच्छानगतो, उभतोब्यञ्जनको, थेय्यसंवासको, भिक्खुनिदूसको, तित्थियपक्कन्तकोति एकादस. सब्बेते चतुवीसति एते सब्बे चतुवीसति पुग्गला समोधानतो वेदितब्बाति अधिप्पायो.

३२०. इमे चतुवीसति पाराजिका पुग्गला सीसच्छिन्नोव जीवितुं इध भिक्खुभावाय अभब्बाति वुत्ताति योजना.

३२१. इमेसं एकादसन्नं अभब्बताय हेतुदस्सनत्थमाह ‘‘पण्डको चा’’तिआदि. पण्डको चाति आसित्तपण्डको, उसूयपण्डको, पक्खपण्डको, ओपक्कमिकपण्डको, नपुंसकपण्डकोति वुत्तो पञ्चविधो पण्डको च. तिरच्छानोति तिरियं अञ्छति गच्छतीति ‘‘तिरच्छानो’’ति गहितो नागसुपण्णादिको सब्बतिरच्छानयोनिको च. यक्खादयो सब्बे अमनुस्सापि इध तिरच्छानेयेव सङ्गहिताति वेदितब्बा. उभतोब्यञ्जनोपि चाति इत्थिपुरिसब्यञ्जनसाधकेहि उभतो कम्मतो जातानि थनादिकानि ब्यञ्जनानि यस्साति निरुत्तो इत्थिउभतोब्यञ्जनो ¶ , पुरिसउभतोब्यञ्जनोति दुविधो उभतोब्यञ्जनो च. वत्थुविपन्नाति तब्भावभाविताय भिक्खुभावो वसति एत्थाति वत्थु, पुग्गलानं भिक्खुभावारहता, सा पन पब्बज्जाक्खन्धकागतसब्बदोसविरहितगुणसम्पयुत्तता, तं विपन्नं पण्डकभावादियोगेन येसं ते ‘‘वत्थुविपन्ना’’ति गहेतब्बा. हि-सद्दो हेतुम्हि. यस्मा वत्थुविपन्ना, तस्मा इध अत्तभावे पब्बज्जाय अभब्बाति वुत्तं होति. ‘‘अहेतुपटिसन्धिका’’ति वचनेन ¶ इमेसं विपाकावरणयुत्तभावमाह, इमिना एतेसं मग्गाधिगमस्स वारितभावो दस्सितोति वेदितब्बं.

३२२. पञ्चानन्तरिकाति कम्मावरणेन युत्तताय सग्गमोक्खसम्पत्तितो परिहायित्वा मरणानन्तरं अपायपटिसन्धियं नियता मातुघातकादयो पञ्चानन्तरिका च. थेय्यसंवासोपि चाति लिङ्गत्थेनको, संवासत्थेनको, उभयत्थेनकोति तिविधो थेय्यसंवासको च. दूसकोति पकतत्ताय भिक्खुनिया मेथुनं पटिसेवित्वा तस्सा दूसितत्ता भिक्खुनिं दूसेतीति ‘‘भिक्खुनिदूसको’’ति वुत्तो च. तित्थिपक्कन्तको चाति तित्थियानं लद्धिं, वेसञ्च रोचेत्वा तं गहेत्वा तेसमन्तरं पविट्ठो च. इति अट्ठ पन किरियानट्ठाति योजना. इतीति इदमत्थत्ता इमेति वुत्तं होति. ते इमेति सम्बन्धो. ते इमे अट्ठ पन मातुवधादिकिरियाय इहत्तभावे भिक्खुभावाय अनरहा हुत्वा नट्ठाति अत्थो. एत्तावता एकादसअभब्बानं अभब्बताय कारणं दस्सितं होति.

३२३. मया पाराजिकानं सारभूतो यो अयं विनिच्छयो वुत्तो, तस्स विनिच्छयस्स अनुसारेन अनुगमनेन सेसोपि विनिच्छयो बुधेन पण्डितेन असेसतोव विञ्ञातुं सक्काति योजना.

३२४. पटुभावकरे ¶ परमे विविधेहि नयेहि युत्ते विनयपिटके परमत्थनयं अभिपत्थयता अयं सततं परियापुणितब्बोति योजना. तत्थ विविधेहि नानप्पकारेहि. नयेहीति नीयन्ति वुत्तानुसारेन उदीरियन्तीति ‘‘नया’’ति वुत्तेहि चक्कपेय्यालादीहि नयेहि. परमत्थनयन्ति परमो च सो अत्थो चाति परमत्थो, परमो वा विसेसेन निच्छितब्बो अत्थो परमत्थो, सोयेव विनिच्छयत्थिकानं बुद्धिया नेतब्बोति परमत्थनयो, विनिच्छयूपायो नीयति एतेनाति कत्वा ‘‘परमत्थनयो’’ति वुच्चति, तं परमत्थनयं. अभिपत्थयताति विनयपिटके विनिच्छयं वा तदुपायं वा पत्थयता, इच्छन्तेनाति अत्थो. ‘‘परियापुणितब्बो अय’’न्ति पदच्छेदो. म-कारो आगमसन्धिजो, ओ-कारस्स अ-कारादेसो. परियापुणितब्बोति पठितब्बो, सोतब्बो चिन्तेतब्बो धारेतब्बोति वुत्तं होति. अयन्ति विनयविनिच्छयो.

इति विनयत्थसारसन्दीपनिया

विनयविनिच्छयवण्णनाय

चतुत्थपाराजिककथावण्णना निट्ठिता.

सङ्घादिसेसकथावण्णना

३२५. एवं ¶ नानानयपटिमण्डितस्स पाराजिककण्डस्स विनिच्छयं दस्सेत्वा इदानि तदनन्तरमुद्दिट्ठस्स तेरसकण्डस्स विनिच्छयं दस्सेतुमाह ‘‘मोचेतुकामता’’तिआदि. मोचेतुं कामेतीति मोचेतुकामो, तस्स भावो मोचेतुकामता, ताय सम्पयुत्तं चित्तं मोचेतुकामताचित्तं. एत्थ ‘‘मोचेतुकामता’’ति इमिना एकादससु रागेसु ‘‘मोचनस्सादो’’ति वुत्तं इमस्स सङ्घादिसेसस्स मूलकारणं सुक्कमोचनविसयं रागमाह.

एकादस ¶ रागा नाम ‘‘मोचनस्सादो, मुच्चनस्सादो, मुत्तस्सादो, मेथुनस्सादो, फस्सस्सादो, कण्डुवनस्सादो, दस्सनस्सादो, निसज्जस्सादो, वाचस्सादो, गेहस्सितपेमं, वनभङ्गिय’’न्ति एवमागता. इध मोचनं नाम सम्भवधातुमोचनं, तदत्थाय तब्बिसयरागसम्पयुत्तवेदना मोचनस्सादो नाम. तेनाह अट्ठकथायं ‘‘मोचेतुं अस्सादो मोचनस्सादो’’ति. मुच्चमाने अस्सादो मुच्चनस्सादो, सम्भवधातुम्हि मुच्चमाने तंरागसम्पयुत्ता वेदना मुच्चनस्सादो नाम. एतेनेव नयेन मुत्तस्सादादिवाचस्सादावसानेसु पदेसु अत्थक्कमो वेदितब्बो. इमेहि नवहि पदेहि अस्सादसीसेन कुन्तयट्ठिञायेन तंसहचरितो रागो दस्सितो. यथाह अट्ठकथायं ‘‘नवहि पदेहि सम्पयुत्तअस्सादसीसेन रागो वुत्तो’’ति.

गेहस्सितपेमन्ति एत्थ गेहट्ठा मातुआदयो आधेय्यआधारवोहारेन ‘‘गेहा’’ति वुच्चन्ति. ‘‘मञ्चा उक्कुट्ठिं करोन्ती’’तिआदीसु विय तन्निस्सितो सिनेहपरियायो रागो ‘‘गेहस्सितपेम’’न्ति वुत्तो. इमिना पदेन रागस्स सभावो सन्दस्सितो. वनतो भञ्जित्वा आभतं यं किञ्चि फलपुप्फादि वनभङ्गियं नाम. इध पन रागवसेन पटिबद्धचित्तं मातुगामेहि विरहदुक्खापनयनत्थं (पारा. अट्ठ. २.२४०) तेसं ठाने ठपेत्वा दस्सनफुसनवसेन विन्दितुं रागीहि गहेतब्बतो तेहि पिळन्धितमालसहितं तम्बूलन्ति एवमादि ‘‘वनभङ्गिय’’न्ति अधिप्पेतं. इमिना पत्थितविसयगोचरो रागो तदायत्तवत्थुवसेन सन्दस्सितो. यथाह अट्ठकथायं ‘‘एकेन पदेन सरूपेनेव रागो, एकेन ¶ पदेन वत्थुना वुत्तो. वनभङ्गो हि रागस्स वत्थु, न रागोयेवा’’ति (पारा. अट्ठ. २.२४०).

‘‘मोचेतुकामता’’ति ¶ इदमेव अवत्वा ‘‘चित्त’’न्ति वचनेन वीतिक्कमसाधिकाय कायविञ्ञत्तिया समुट्ठापकं रागसम्पयुत्तं चित्तविसेसं दस्सेति. तेन चित्तेन समुट्ठापियमानं विञ्ञत्तिसङ्खातं वीतिक्कमं ‘‘वायामो’’ति इमिना दस्सेति. वायामो नाम तंचित्तसम्पयुत्तवीरियं. एत्थ पन ‘‘सेम्हो गुळो’’तिआदीसु विय फले हेतूपचारञायेन वीतिक्कमस्स विसेसहेतुभूतवीरियवाचकेन च पदेन वीतिक्कमोव वुत्तोति दट्ठब्बं. अज्झत्तबाहिरवत्थुघट्टनं, आकासे कटिकम्पनन्ति सुक्कमोचनत्थो वायामोति अत्थो. सुक्कस्स मोचनं सुक्कमोचनं.

एत्थ च सुक्कस्साति ‘‘सुक्कन्ति दस सुक्कानि नीलं पीतकं लोहितकं ओदातं तक्कवण्णं दकवण्णं तेलवण्णं खीरवण्णं दधिवण्णं सप्पिवण्ण’’न्ति (पारा. २३७) पदभाजने वुत्तानि सत्तानं पित्तादिआसयभेदेन, पथविधातुआदीनं चतुन्नं वा रससोणितमंसमेदअट्ठिअट्ठिमिञ्जानं छन्नं देहधातूनं वा भेदेन अनेकधा भिन्ने दसविधे सुक्के अञ्ञतरस्स सुक्कस्साति अत्थो. मोचनं विस्सट्ठीति परियायं, पकतिया ठितसकट्ठानतो मोचनन्ति अत्थो. यथाह पदभाजने ‘‘विस्सट्ठीति ठानतो चावना वुच्चती’’ति (पारा. २३७). इह ‘‘ठानं नाम वत्थिसीससङ्खातं मुत्तकरणमूल’’न्ति केचि. ‘‘कटी’’ति अपरे. ‘‘सकलकायो’’ति अञ्ञे. इमेसं तिण्णं वचनेसु ‘‘ततियस्स भासितं सुभासित’’न्ति (पारा. अट्ठ. २.२३७) अट्ठकथायं ततियवादस्स कतपासंसत्ता केसलोमनखदन्तानं मंसविनिमुत्तट्ठानञ्च मुत्तकरीसखेळसिङ्घाणिकाथद्धसुक्खचम्मञ्च वज्जेत्वा अवसेसं सकलसरीरं कायप्पसादभावजीवितिन्द्रियअबद्धपित्तानं ¶ विय सम्भवधातुया च ठानन्ति वेदितब्बं.

‘‘सुक्कमोचन’’न्ति इमिनाकिं वुत्तं होतीति? ‘‘आरोग्यत्थाय, सुखत्थाय, भेसज्जत्थाय, दानत्थाय, पुञ्ञत्थाय, यञ्ञत्थाय, सग्गत्थाय, बीजत्थाय, वीमंसत्थाय, दवत्थाय मोचेती’’ति (पारा. २३७) वुत्तदसविधअधिप्पायन्तोगधअञ्ञतरअधिप्पायो हुत्वा ‘‘रागूपत्थम्भे, वच्चूपत्थम्भे, पस्सावूपत्थम्भे, वातूपत्थम्भे, उच्चालिङ्गपाणकदट्ठूपत्थम्भे मोचेती’’ति (पारा. २३७) वुत्तपञ्चविधकालानमञ्ञतरकाले ‘‘अज्झत्तरूपे, बहिद्धारूपे, अज्झत्तबहिद्धारूपे, आकासे कटिं कम्पेन्तो मोचेती’’ति (पारा. २३७) वुत्तचतुरुपायानमञ्ञतरेन उपायेन यथावुत्तरागपिसाचवसेन विवसो हुत्वा यथावुत्तनीलादिदसविधसम्भवधातूनमञ्ञतरं यथावुत्तट्ठानतो खुद्दकमक्खिकाय पिवनमत्तम्पि सचे मोचेतीति सङ्खेपतो ¶ गहेतब्बं. एत्थ च उच्चालिङ्गपाणका नाम लोमसपाणा, येसं लोमे अल्लिने अङ्गजातं कम्मनियं होति.

अञ्ञत्र सुपिनन्तेनाति सुपिनो एव सुपिनन्तो, निस्सक्कवचनप्पसङ्गे करणवचनतो सुपिनन्ताति अत्थो. सुपिना नाम ‘‘वातादिधातुक्खोभवसेन वा पुब्बानुभूतइत्थिरूपादिविसयवसेन वा इट्ठानिट्ठदेवतानुभावेन वा पुञ्ञेन पटिलभितब्बअत्थस्स, अपुञ्ञेन पत्तब्बानत्थस्स च पुब्बनिमित्तवसेन वा होती’’ति (पारा. अट्ठ. २.२३७) वुत्तेसु चतूसु कारणेसु एकेन कारणेन कपिनिद्दाय सुपिने दिस्समानारम्मणतो यं सुक्कमोचनं होति, तं अविसयं सुक्कमोचनं विनाति वुत्तं होति.

सङ्घादिसेसोव सङ्घादिसेसता. सङ्घादिसेसं आपज्जित्वा ततो वुट्ठातुकामस्स कुलपुत्तस्स आदिम्हि परिवासदानत्थं ¶ , मज्झे च मूलायपटिकस्सनेन विना वा सह वा मानत्तदानत्थं, अवसाने अब्भानत्थञ्च सङ्घो एसितब्बोति ‘‘सङ्घो आदिम्हि चेव सेसे च इच्छितब्बो अस्साति सङ्घादिसेसो’’ति (पारा. अट्ठ. २.२३७; कङ्खा. अट्ठ. सुक्कविस्सट्ठिसिक्खापदवण्णना) वुत्तत्ता सङ्घादिसेसा नाम, सुक्कविस्सट्ठिसङ्घादिसेसापत्ति होतीति अत्थो. यथाह पदभाजने ‘‘सङ्घोव तस्सा आपत्तिया परिवासं देति, मूलाय पटिकस्सति, मानत्तं देति, अब्भेति, न सम्बहुला, न एकपुग्गलो, तेन वुच्चति ‘सङ्घादिसेसो’ति. तस्सेव आपत्तिनिकायस्स नामं नामकम्मं अधिवचनं, तेनपि वुच्चति ‘सङ्घादिसेसो’’ति (पारा. २३७). एत्थ च परिवासादिकथा सङ्घादिसेसावसाने आगतट्ठानेयेव आवि भविस्सति.

३२६. एत्तावता मूलसिक्खापदागतं अत्तूपक्कममूलकं आपत्तिं दस्सेत्वा इदानि इमिस्सा सङ्घादिसेसापत्तिया परूपक्कमेनपि आपज्जनं दस्सेतुमाह ‘‘परेना’’तिआदि. उपक्कमापेत्वाति अङ्गजातस्स गहणं वा घट्टनं वा कारेत्वा.

३२७. सञ्चिच्चाति ‘‘उपक्कमामि मोचेस्सामी’’ति चेतेत्वा पकप्पेत्वा. उपक्कमन्तस्साति अज्झत्तरूपादीसु तीसु यत्थ कत्थचि घट्टेन्तस्स. समुद्दिट्ठन्ति ‘‘चेतेति उपक्कमति न मुच्चति, आपत्ति थुल्लच्चयस्सा’’ति (पारा. २६२) पदभाजने भगवता वुत्तन्ति अधिप्पायो.

३२८. इमिस्सं ¶ गाथायं ‘‘अत्तनो अङ्गजातं उपक्कमन्तस्सा’’ति इमिना अज्झत्तरूपे वा बहिद्धारूपे वा अज्झत्तबहिद्धारूपे वा अत्तनो अङ्गजातं घट्टेन्तस्साति इमस्स अत्थस्स वुत्तत्ता ¶ अङ्गजातघट्टनेन विनाभावतो इमिना असङ्गय्हमानस्सापि आकासे कटिकम्पनेन सुक्कमोचने सङ्घादिसेसस्स पठमगाथायं ‘‘वायामो’’ति सामञ्ञवचनेन सङ्गहितत्ता तं ठपेत्वा ‘‘तेन खो पन समयेन अञ्ञतरस्स भिक्खुनो मोचनाधिप्पायस्स आकासे कटिं कम्पेन्तस्स असुचि मुच्चि…पे… असुचि न मुच्चि. तस्स कुक्कुच्चं अहोसि…पे… अनापत्ति भिक्खु सङ्घादिसेसस्स, आपत्ति थुल्लच्चयस्सा’’ति आकासेकटिकम्पनवत्थुम्हि वुत्तत्ता अमुत्ते थुल्लच्चयं सङ्गहेतुमाह ‘‘सञ्चिच्चा’’तिआदि.

तत्थ सञ्चिच्चाति ‘‘उपक्कमामि मोचेस्सामी’’ति जानित्वा सञ्जानित्वाति अत्थो. ‘‘उपक्कमन्तस्सा’’ति सामञ्ञतो तं विसेसेतुं ‘‘आकासे कम्पनेनपी’’ति आह, कटिकम्पनेनाति गहेतब्बं. कथमिदं लब्भतीति चे? इमाय कथाय सङ्गहेतब्बवत्थुम्हि ‘‘आकासे कटिं कम्पेन्तस्सा’’ति (पारा. २६६) पाठे ‘‘कटिं कम्पेन्तस्सा’’ति वचनसहचरस्स ‘‘आकासे’’ति वचनस्स सन्निधानबलेन लब्भति अत्थप्पकरणसद्दन्तरसन्निधाना सद्दानं विसेसत्थदीपनतो.

३२९. वत्थिन्ति मुत्तवत्थिं, मुत्तकरणस्स वत्थिन्ति अत्थो. कीळाय पूरेत्वाति गामदारको विय कीळितुकामताय मुत्तवत्थिं दळ्हं गहेत्वा पूरेत्वाति अत्थो. यथाह वत्थिवत्थुम्हि अट्ठकथायं ‘‘ते भिक्खू वत्थिं दळ्हं गहेत्वा पूरेत्वा पूरेत्वा विस्सज्जेन्ता गामदारकाविय पस्सावमकंसू’’ति (पारा. अट्ठ. २.२६४). ‘‘न वट्टती’’ति सामञ्ञेन कस्मा वुत्तन्ति? तस्मिं वत्थुस्मिं वुत्तनयेन मोचनाधिप्पायेन दळ्हं गहेत्वा पूरेत्वा पूरेत्वा विस्सज्जेन्तस्स सुक्के मुत्ते मोचनाधिप्पायो चेतेति, उपक्कमति, मुच्चतीति अङ्गानं सम्पन्नत्ता सङ्घादिसेसस्स ¶ , अमुत्ते थुल्लच्चयस्स सम्भवतो उभयसङ्गहत्थमाह.

३३०. उपनिज्झायनवत्थुम्हि ‘‘न च भिक्खवे सारत्तेन मातुगामस्स अङ्गजातं उपनिज्झायितब्बं, यो उपनिज्झायेय्य, आपत्ति दुक्कटस्सा’’ति (पारा. २६६) पाळियं ‘‘मातुगामस्सा’’ति सामञ्ञेन वुत्तत्ता ‘‘तिस्सन्न’’न्ति वदति. तिस्सन्नं पन इत्थीनन्ति मनुस्सामनुस्सतिरच्छानगतवसेन तिस्सन्नं इत्थीनं. ‘‘अङ्गजात’’न्ति विसेसेत्वा वुत्तत्ता ‘‘निमित्त’’न्ति ¶ मुत्तकरणमेव वुच्चति, पटसतेनापि पटिच्छादितं वा अप्पटिच्छादितं वा योनिमग्गन्ति अत्थो. तेनाह अट्ठकथायं ‘‘सचेपि पटसतं निवत्था होति, पुरतो वा पच्छतो वा ठत्वा ‘इमस्मिं नाम ओकासे निमित्त’न्ति उपनिज्झायन्तस्स दुक्कटमेव. अनिवत्थानं गामदारिकानं निमित्तं उपनिज्झायन्तस्स पन किमेव वत्तब्ब’’न्ति (पारा. अट्ठ. २.२६६). पुरतो वाति एत्थ ‘‘ठत्वा’’ति पाठसेसो.

३३१. एकेन…पे… पस्सतो एकं दुक्कटन्ति सम्बन्धो. ‘‘एकेन पयोगेन एकं दुक्कट’’न्ति वचनतो अनेकेहि पयोगेहि अनेकानि दुक्कटानीति ब्यतिरेकतो लब्भति. यथाह अट्ठकथायं ‘‘इतो चितो च विलोकेत्वा पुनप्पुनं उपनिज्झायन्तस्स पयोगे पयोगे दुक्कट’’न्ति (पारा. अट्ठ. २.२६६). इमिस्सा अट्ठकथाय ‘‘इतो चितो चा’’ति वुत्तत्ता उम्मीलननिमीलनन्ति एत्थ ‘‘विविधा तं अनोलोकेत्वा तमेव ओलोकेन्तस्सा’’ति लब्भति.

३३२. अमोचनाधिप्पायस्स मुत्तस्मिं अनापत्ति पकासिताति योजना. मोचनाधिप्पायं विना भेसज्जकरणत्थं सुद्धचित्तेन अङ्गजाते भेसज्जलेपं करोन्तस्स वा सुद्धचित्तेनेव उच्चारपस्सावादिं करोन्तस्स वा मुत्तेपि अनापत्तीति ¶ इदं ‘‘अनापत्ति सुपिनन्तेन नमोचनाधिप्पायस्सा’’तिआदिना (पारा. २६३) नयेन अनापत्तिवारे वुत्तमेवाति अत्थो.

इमस्मिं पाठे ‘‘अनुपक्कमन्तस्सा’’ति अवुत्तेपि इमस्स पाठस्स पुरतो ‘‘चेतेति न उपक्कमति मुच्चति, अनापत्ती’’ति (पारा. २६२) च ‘‘न चेतेति न उपक्कमति मुच्चति, अनापत्ती’’ति (पारा. २६२) च वचनतो तं सङ्गहेतुमाह ‘‘अनुपक्कमतोपि च मुत्तस्मिं अनापत्ति पकासिता’’ति. मोचनस्सादरागेन पीळितो हुत्वा ‘‘अहो वत मे मुच्चेय्या’’ति चिन्तेत्वा वा एवरूपमोचनस्सादरागपीळापुब्बङ्गमचित्ते असतिपि केवलं कामवितक्कमत्तेन उपहतो हुत्वा तादिसअज्झत्तिकबाहिरवत्थूसु घट्टनवसेन वा आकासे कटिकम्पनवसेन वा उपक्कमं अकरोन्तस्स तादिसचिन्ताबलेन वा कामवितक्कबलेन वा सुक्के मुत्तेपि अनापत्तीति इदं यथावुत्तपाठवसेन पकासितन्ति अत्थो.

सुपिनन्तेन मुत्तस्मिं, अनापत्ति पकासिताति एत्थ अन्तसद्दत्थाभावतो सुपिनेति अत्थो. सुपिने मेथुनं धम्मं पटिसेवन्तस्स वा मातुगामेहि कायसंसग्गं आपज्जन्तस्स वा सुक्के मुत्तेपि ¶ अविसयत्ता अनापत्ति पाळियं ‘‘अनापत्ति भिक्खु सुपिनन्तेना’’ति (पारा. २६३) इमिना पकासिताति अत्थो.

एत्थ ठत्वा अट्ठकथायं ‘‘सुपिने पन उप्पन्नाय अस्सादचेतनाय सचस्स विसयो होति, निच्चलेन भवितब्बं. न हत्थेन निमित्तं कीळापेतब्बं. कासावपच्चत्थरणरक्खनत्थं पन हत्थपुटेन गहेत्वा जग्गनत्थाय उदकट्ठानं गन्तुं वट्टती’’ति (पारा. अट्ठ. २.२६२) वुत्तत्ता अण्डपालिका किकीसकुणा विय, वालपालिका चमरी विय, एकनेत्तपालको पुरिसो विय च कायजीवितेपि अपेक्खं पहाय सीलं ¶ रक्खितुकामेन सिक्खाकामेन निब्बानगामिनिपटिपत्तिं पूरेतुकामेन कुलपुत्तेन ‘‘अञ्ञत्र सुपिनन्ता’’ति (पारा. २३७) वदतो तथागतस्स अधिप्पायानुकूलं अट्ठकथातो ञत्वा अप्पमत्तेन पटिपज्जितब्बन्ति अयमत्रानुसासनी.

सुक्कविस्सट्ठिकथावण्णना.

३३३. मनुस्सित्थिन्ति मनुस्सजातिकं इत्थिं, ‘‘मातुगामो नाम मनुस्सित्थी, न यक्खी, न पेती, न तिरच्छानगता, अन्तमसो तदहुजातापि दारिका, पगेव महत्तरी’’ति (पारा. २७१) पदभाजने वुत्तत्ता तदहुजातकुमारिकाभावेनपि ठितं जीवमानकमनुस्समातुगामन्ति वुत्तं होति. ‘‘मनुस्सित्थि’’न्ति सामञ्ञवचनेन जीवमानकमनुस्सित्थिन्ति अयं विसेसो कुतो लब्भतीति? विनीतवत्थुम्हि (पारा. २८१ आदयो) मतित्थिया कायं फुसन्तस्स थुल्लच्चयवचनतो पारिसेसतो लब्भति. आमसन्तोति ‘‘हत्थग्गाहं वा वेणिग्गाहं वा अञ्ञतरस्स वा अञ्ञतरस्स वा अङ्गस्स परामसन’’न्ति (पारा. २७०) वुत्तत्ता हत्थादिअङ्गपच्चङ्गफुसनादिनानप्पकारानं अञ्ञतरेन पकारेन आमसन्तोति अत्थो. अत्तनो कायेन इत्थिया कायस्स संसग्गे मिस्सीभावे रागो कायसंसग्गरागो. सङ्घादिसेसो एतस्स अत्थीति सङ्घादिसेसिको, कायसंसग्गसङ्घादिसेसो आपन्नो होतीति वुत्तं होति.

३३४. कायसंसग्गरागेन इत्थिया अन्तमसो लोमम्पि अत्तनो सरीरे लोमेन फुसन्तस्स भिक्खुनो सङ्घादिसेसापत्ति होतीति योजना. एत्थ (पारा. अट्ठ. २.२७४) ‘‘लोमगणनाय सङ्घादिसेसा होन्ती’’ति कुरुन्दट्ठकथामतस्स अट्ठितत्ता ¶ , ‘‘कोट्ठासगणनाय न होति, इत्थिगणनाय होती’’ति महाअट्ठकथामतस्स ठितत्ता सङ्घसन्तके मञ्चपीठे पच्चत्थरणादिना केनचि ¶ अप्पटिच्छादिते फुसन्तस्स विय लोमगणनाय अहुत्वा फुट्ठलोमानं बहुत्तेपि एकस्मिं पयोगे एका एव आपत्ति, बहूसु पयोगेसु पयोगगणनाय आपत्तियो होन्तीति सन्निट्ठानं.

३३५. इत्थियाति मनुस्सित्थिया. सम्फुट्ठोति हत्थादिसरीरावयवे संसग्गं समापन्नो. सेवनचेतनो वायमित्वा कायसंसग्गरागेन अत्तनो कायं चालेत्वाति अत्थो. सङ्घादिसेसताति एत्थ सकत्थे तद्धितप्पच्चयो. ‘‘सङ्घादिसेसिता’’ति पन पाठो सुन्दरो, सङ्घादिसेसस्स अत्थिता विज्जमानभावोति अत्थो. सङ्घादिसेसापत्तिया सब्भावसङ्खाता अत्थिता ईपच्चयत्थे पुग्गले सङ्घादिसेसीसद्दपवत्तिनिमित्तं होतीति भावपच्चयो तंअत्थवसेन लब्भति. यथाहु ‘‘यस्स गुणस्स हि भावा दब्बे सद्दसन्निवेसो, तदभिधाने त्ततादयो’’ति.

३३६. एकेन हत्थेन गहेत्वाति (कङ्खा. अट्ठ. कायसंसग्गसिक्खापदवण्णना) एत्थ ‘‘कायसंसग्गरागेना’’ति आनेत्वा सम्बन्धितब्बं. ‘‘मनुस्सित्थि’’न्ति अज्झाहारो. तं मनुस्सित्थिं. तत्थ तत्थाति इत्थिया तस्मिं तस्मिं सरीरावयवे. ‘‘एकावापत्ती’’ति पठमं गहितहत्थस्स अनपनीतत्ता वुत्तं. गहितहत्थं पन मोचेत्वा पुनप्पुनं फुसन्तस्स पयोगगणनाय आपत्ति होतीति ब्यतिरेकतो लब्भति.

३३७. एकेन हत्थेन अग्गहेत्वा सीसतो याव पादं, पादतो याव सीसञ्च काया हत्थं अमोचेत्वा दिवसम्पि तं इत्थिं फुसन्तस्स एकावापत्तीति योजना. एत्थापि ‘‘अमोचेत्वा’’ति ¶ ब्यतिरेकतो मोचेत्वा फुसन्तस्स पयोगगणनाय अनेकापत्तियोति लब्भति.

३३८. एकतो गहितपञ्चङ्गुलीनं गणनाय सचे आपत्ति सिया, एकस्स मातुगामस्स सरीरं रागचित्तेन फुसन्तस्स द्वत्तिंसकलापकोट्ठासतो ब्यतिरेकस्स सरीरस्साभावा द्वत्तिंसकलापकोट्ठासगणनाय आपत्तिया भवितब्बं, तथा अभावतो इदम्पि न होतीति दस्सनत्थं ‘‘न हि कोट्ठासतो सिया’’ति आह.

३४०-१. इत्थिया विमतिस्सापि अत्तनो कायेन इत्थिया कायं फुसतो तस्स थुल्लच्चयं सिया, इत्थिया पण्डकादिसञ्ञिनोपि अत्तनोपि कायेन ¶ इत्थिया कायं फुसतो तस्स थुल्लच्चयं सिया. आदि-सद्देन पुरिसतिरच्छानगतानं सङ्गहो. इत्थिया इत्थिसञ्ञिनो अत्तनो कायेन इत्थिया कायसम्बद्धं फुसतो तस्स थुल्लच्चयं सिया. पण्डके पण्डकसञ्ञिनो अत्तनो कायेन पण्डकस्स कायं फुसतो तस्स थुल्लच्चयं सिया. यक्खिपेतीसु यक्खिपेतिसञ्ञिनो अत्तनो कायेन तासं कायं फुसतो तस्स थुल्लच्चयं सियाति योजना. एत्थ ‘‘पण्डकग्गहणेन उभतोब्यञ्जनकोपि गय्हती’’ति वजिरबुद्धिटीकायं वुत्तं. ‘‘इत्थिया वेमतिकस्सापि पण्डकादिसञ्ञिनोपि अत्तनो कायेन इत्थिया कायसम्बद्धं फुसतो तस्स थुल्लच्चयं सिया’’ति न योजेतब्बं. कस्मा? तथा योजनायं पाळियं दुक्कटं वुत्तं, न थुल्लच्चयन्ति अनिट्ठप्पसङ्गतो.

‘‘दुक्कटं कायसंसग्गे, तिरच्छानगतित्थिया’’ति इमिना विनीतवत्थुम्हि आगतनये सङ्गहितेपि तेनेव नयेन पण्डके ¶ विमतिइत्थिसञ्ञितादिअञ्ञमतिपक्खे च पुरिसतिरच्छानगतेसु पुरिसतिरच्छानगतसञ्ञिविमतिपण्डकादिअञ्ञमतिपक्खे च इति इमेसं तिण्णं कायपटिबद्धामसनादीसु च पदभाजने वुत्तसब्बदुक्कटापत्तियो उपलक्खिताति दट्ठब्बं.

३४२. अत्तनो कायेन पटिबद्धेन इत्थिया कायेन पटिबद्धं फुसन्तस्स भिक्खुनो पन दुक्कटन्ति योजना. एत्थ पि-सद्दो वुत्तदुक्कटानं समुच्चयत्थो. च-सद्देन पन अवुत्तसमुच्चयत्थेन ‘‘निस्सग्गियेन कायं आमसति. निस्सग्गियेन कायपटिबद्धं आमसति. निस्सग्गियेन निस्सग्गियं आमसति, आपत्ति दुक्कटस्सा’’ति (पारा. २७६) पाळियं आगतदुक्कटानं सङ्गहो वेदितब्बो.

३४३-४. न केवलं पदभाजनागतइत्थिसरीरादिकमेव अनामासं, विनीतवत्थूसु दारुधीतलिकवत्थुअनुलोमतो पोत्थलिकादिइत्थिरूपकञ्च निस्सग्गियवारानुलोमतो असरीरट्ठं मातुगामेहि परिभुत्तवत्थाभरणादिञ्च विभङ्गक्खन्धकादीसु वुत्तनयानुसारेन अट्ठकथागतं अवसेसं अनामासवत्थुञ्च आमसन्तस्स आपत्तिं सङ्गहेतुमाह ‘‘इत्थीन’’न्तिआदि.

‘‘इत्थीनं इत्थिरूपञ्चा’’ति इदं ‘‘इत्थिकाय इत्थिधनं (पारा. ३४), सद्धानं सद्धापरायन’’न्तिआदीसु विय लोकवोहारवसेन वुत्तं. इत्थीनं दारुलोहमयादिकं इत्थिरूपञ्चाति योजना. आदि-सद्देन हेट्ठिमपरिच्छेदतो मत्तिकाय, पिट्ठेन वा कतं मातुगामरूपं सङ्गण्हाति. मातुगामरूपं येन केनचि दिन्नं सब्बरतनमयं विना अवसेसं सादियित्वा ¶ भिन्दित्वा ¶ समणसारुप्पपरिक्खारं कारापेतुं, अफुसित्वा परिभुञ्जितब्बे वा योजेतुं वट्टति.

‘‘वत्थ’’न्ति इमिना निवासनपारुपनद्वयम्पि सामञ्ञेन गहितं. इदञ्च मातुगामेन परिभुञ्जितुं ठपितम्पि अनामासमेव, चीवरत्थाय दिन्नं सम्पटिच्छित्वा गण्हितुं वट्टति. हेट्ठिमपरिच्छेदेन तिणचुम्बटकं, अङ्गुलिया पण्णमुद्दिकं उपादाय अलङ्कारमेव. एत्थ च वालकेसवट्टकेसेसु पवेसनकदन्तसूचिआदि कप्पियभण्डं दिय्यमानं समणसारुप्पपरिक्खारत्थाय गहेतब्बं.

तत्थजातफलं खज्जन्ति रुक्खे ठितं खादितब्बं पनसनाळिकेरादिफलञ्च मनुस्सेहि रासिकतं परिभुञ्जितब्बफलञ्च ‘‘मनुस्सेहि रासिकतेसुपि एसेव नयो’’ति (पारा. अट्ठ. २.२८१) अट्ठकथायं वुत्तत्ता अनामासन्ति उपलक्खणतो इमिनाव गहेतब्बं. अरञ्ञे रुक्खतो पतितं फलं ‘‘अनुपसम्पन्नस्स दस्सामी’’ति गहेतुं वट्टति. ‘‘मुग्गादिं तत्थजातक’’न्ति उपलक्खणपदत्ता गच्छतो वियुत्तम्पि गहेतब्बं. मुग्गादिन्ति एत्थ ‘‘अपरण्ण’’न्ति पाठसेसो.

सब्बानि धञ्ञानीति ‘‘सालि वीहि यवो कङ्गु, कुद्रूसवरकगोधुमा’’ति वुत्तानि सत्त धञ्ञानि. खेत्तमग्गेन गच्छता सालिसीसे हत्थेन अफुसन्तेन गन्तब्बं. सचे मग्गो सम्बाधो होति, सरीरे धञ्ञं फुसन्तेपि मग्गत्ता न दोसो. वीथियं, गेहङ्गणे वा धञ्ञेसु पसारितेसु अपसक्कित्वा चे गन्तुं न सक्का, ‘‘मग्गं अधिट्ठाय गन्तब्ब’’न्ति (पारा. अट्ठ. २.२८१) अट्ठकथावचनतो ‘‘इमं मग्गं गमिस्सामी’’ति गन्तुं वट्टति. ‘‘कुलगेहे धञ्ञमत्थके चे आसनं पञ्ञापेत्वा दिन्नं होति, निसीदितुं वट्टती’’ति (पारा. अट्ठ. २.२८१ अत्थतो समानं) अट्ठकथायं वुत्तं. ‘‘आसनसालायं धञ्ञे विप्पकिण्णे अनुक्कमित्वा एकमन्ते पीठकं पञ्ञापेत्वा ¶ निसीदितब्बं. सचे मनुस्सा तस्मिं धञ्ञमत्थके आसनं पञ्ञापेत्वा देन्ति, निसीदितुं वट्टती’’ति (पारा. अट्ठ. २.२८१ अत्थतो समानं) अट्ठकथायं वुत्तत्ता अत्तना तत्थ आसनं पञ्ञापेत्वा निसीदितुं न वट्टति.

३४५. धमनसङ्खादिं सब्बं पञ्चङ्गतुरियम्पि चाति सम्बन्धो. धमनसङ्खो नाम सद्दकरणसङ्खो ¶ . आदि-सद्देन वंससिङ्गताळादीनं सङ्गहो. पञ्चङ्गतुरियन्ति आततं, विततं, आततविततं, घनं, सुसिरन्ति पञ्चङ्गसङ्खातं तुरियं. तत्थ आततं नाम चम्मपरियोनद्धेसु भेरिआदीसु एकतो आकड्ढित्वा ओनद्धं एकतलतुरियं. विततं नाम उभतो आकड्ढित्वा ओनद्धं उभयतलतुरियं. आततविततं नाम उभयतो च मज्झतो च सब्बतो परियोनन्धितं. घनं सम्मादि. सम्मन्ति ताळं, घण्टाकिङ्कणिआदीनम्पि एत्थेव सङ्गहो. सुसिरन्ति वंसादि.

इध (पारा. अट्ठ. २.२८१) कुरुन्दट्ठकथायं वुत्तनयेन भेरिपोक्खरञ्च भेरितलचम्मञ्च वीणा च वीणापोक्खरचम्मञ्च दण्डो च अनामासं. ‘‘पूजं कत्वा चेतियङ्गणादीसु ठपितभेरियो अचालेन्तेन अवसेसट्ठानं सम्मज्जितब्बं. कचवरछड्डनकाले कचवरं विय गहेत्वा एकस्मिं ठाने ठपेतब्ब’’न्ति महापच्चरियं वुत्तं. तुरियभण्डेसु यं किञ्चि अत्तनो दीयमानं तं परिवत्तेत्वा कप्पियपरिक्खारं गहेतुं अधिवासेतब्बं. दोणि वा पोक्खरं वा दन्तकट्ठनिक्खिपनत्थाय, चम्मञ्च सत्थकोसकरणत्थाय गहेतब्बं.

रतनानि च सब्बानीति मुत्ता मणि वेळुरियो सङ्खो सिला पवाळं रजतं जातरूपं लोहितङ्को मसारगल्लन्ति (पारा. अट्ठ. २.२८१) वुत्तानि सब्बानि रतनानि च. एत्थ च विद्धा, अविद्धा वा सामुद्दिकादी सब्बापि मुत्ता अनामासा. भण्डमूलत्थञ्च गण्हितुं ¶ न वट्टति. अन्तमसो जातिफलिकं उपादाय नीलपीतादिभेदो सब्बोपि मणि धोतविद्धो अनामासो. आहताकारेनेव ठितो अविद्धाधोतो मणि पत्तादि भण्डमूलत्थं अधिवासेतुं वट्टतीति वुत्तं. महापच्चरियं पन पटिक्खित्तं. पचित्वा कतो काचमणियेवेको वट्टति. वेळुरिये च मणिसदिसोयेव विनिच्छयो.

धमनसङ्खो ‘‘सब्बं धमनसङ्खादि’’न्तिआदिगाथाय तुरियेसु गहितो. रतनखचितो सङ्खो अनामासो. पानीयसङ्खो धोतोपि अधोतोपि आमासो. अवसेससङ्खो पन अञ्जनादिभेसज्जत्थं, पत्तादिभण्डमूलभावेन च अधिवासेतुं वट्टति. सुवण्णेन एकतो विलियापेत्वा कता मुग्गवण्णा सिला अनामासा. सेसा सिला खुद्दकनिसानादिकम्मत्थं अधिवासेतुं वट्टति. ‘‘पवाळं धोतमधोतञ्च विद्धमविद्धञ्च सब्बथा अनामासं, नापि अधिवासेतब्ब’’न्ति महापच्चरियं वुत्तत्ता पवाळपटिमाचेतियानि चेव पोत्थकेसु पवेसेतब्बआणिया ¶ मूले, अग्गेच पवेसेतब्बं पदुमादिआकारेन कतं वट्टञ्च न गहेतब्बं न फुसितब्बं.

बीजतो पट्ठाय रजतं, जातरूपञ्च कतं वा होतु अकतं वा, सब्बसो अनामासं, न च सादितब्बं. इमिना कतं पटिमादिकञ्च आरकूटलोहञ्च अनामासन्ति वक्खति. कताकतसुवण्णरजतानं असादियितब्बताय इध अट्ठकथाय आगतत्ता उत्तरेन राजपुत्तेन कारेत्वा आहटं सुवण्णचेतियं न वट्टतीति महापदुमत्थेरेन पटिक्खित्तन्ति सुवण्णपटिमाचेतियपोत्थकावच्छादकमणिपदुमवट्टादि यं किञ्चि न सादितब्बमेव, न च आमसितब्बं. एतेन कतं सेनासनोपकरणं पन परिभुञ्जितुं वट्टति. धम्ममण्डपे कतम्पि ¶ पटिजग्गितुं वट्टति. लोहितवण्णो मणि, मसारगल्लमणि च सब्बथा अनामासो, न च अधिवासेतब्बोति महापच्चरियं वुत्तं.

३४६. सब्बमावुधभण्डन्ति खग्गादि सब्बं आवुधोपकरणं पत्तादिकप्पियपरिक्खारमूलत्थाय दीयमानं सत्थवाणिजाय अकातब्बत्ता न गहेतब्बं, ‘‘इमं गण्हथा’’ति दिन्नं भिन्दित्वा खण्डाखण्डिकं कत्वा ‘‘खुरादिकप्पियपरिक्खारं कारेस्सामी’’ति सादितुं वट्टति. सङ्गामभूमियं मग्गे पतितखग्गादिं दिस्वा पासाणेन भिन्दित्वा ‘‘खुरादिकप्पियभण्डानि कारेस्सामी’’ति गण्हितुं वट्टति. उसुसत्तिआदिकं फलतो दण्डं अपनेत्वा कप्पियपरिक्खारकारापनत्थाय गहेतब्बं.

जियाति धनुगुणो. च-कारेन इमिस्सा गाथाय अवुत्तं अङ्कुसतोमरादिं परहिं सोपकरणं सङ्गण्हाति. धनुदण्डकोति जियाविरहितो धनुदण्डको. इदं परहिंसोपकरणभण्डादिकं विहारे सम्मज्जितब्बट्ठाने ठपितं चे, सामिकानं वत्वा तेहि अग्गहितं चे, अचालेन्तेन सम्मज्जितब्बं.

जालञ्चाति मच्छजालपक्खिजालादिजालञ्च. जालं दीयमानं छत्तवेठनत्थं, आसनचेतियादिमत्थके बन्धनादिपयोजने सति तदत्थञ्च गहेतब्बं. सरवारणं नाम फलकादिकं अञ्ञेहि अत्तनो विज्झनत्थाय विस्सट्ठसरनिवारणं विनासनोपरोधकारणं होतीति भण्डमूलत्थं सादितुं ¶ वट्टति. ‘‘दन्तकट्ठाधारफलकादि यदिच्छितं करोमी’’ति मुट्ठिं अपनेत्वा गहेतुं वट्टति.

३४७. चेतियन्ति एत्थ ‘‘सुवण्णचेतिय’’न्ति इदं ‘‘सुवण्णपटिबिम्बादी’’ति अनन्तरं वुत्तत्ता लब्भति. सुवण्णग्गहणञ्चुपलक्खणन्ति रजतमयञ्च गहेतब्बं. आरकूटकन्ति सुवण्णवण्णं लोहविसेसमाह ¶ . ‘‘अनामास’’न्ति इदं ‘‘असम्पटिच्छियं वा’’ति एतस्स उपलक्खणं.

३४८. सब्बं वादितमिति सम्बन्धो. ओनहितुन्ति चम्मवरत्ततन्तीहि बन्धितुं. ओनहापेतुन्ति तथेव अञ्ञेहि कारापेतुं. वादापेतुन्ति अञ्ञेहि वादापेतुं. वादेतुन्ति अत्तना वादेतुं. वादितन्ति वादनीयं यथा ‘‘करणीयं कारित’’न्ति, वादनारहं तुरियभण्डन्ति अत्थो. इदञ्च ओनहनादिकिरियाय कम्मं.

३४९. उपहारं करिस्सामाति पूजं करिस्साम. इति अनुमतिग्गहणत्थाय. वत्तब्बाति ते वत्तारो वत्तब्बाति योजना.

३५०-१. धुत्तिया इत्थियाति विपन्नाचाराय लोळित्थिया. सयं फुसियमानस्साति भिक्खुनो पयोगं विना इत्थिया अत्तनाव फुसियमानस्स. कायेन अवायमित्वाति तस्सा सरीरसम्फस्सानुभवनत्थं अत्तनो कायं अचालेत्वा. फस्सं पटिविजानतोति फस्सं अनुभवन्तस्स.

असञ्चिच्चाति एत्थ ‘‘फुसने’’ति पाठसेसो, ‘‘इमिना उपायेन इमं फुसामी’’ति अचेतेत्वा. किं वुत्तं होति? ‘‘इमिना पत्तपटिग्गहणादिना उपायेन एतिस्सा सरीरसम्फस्सं अनुभविस्सामी’’ति अचिन्तेत्वा पत्तथालकतट्टकपण्णपुटभेसज्जादिं पटिग्गण्हापेन्तिया हत्थे अत्तनो हत्थेन फुसनादीसु अनापत्तीति वुत्तं होति. ‘‘अस्सतिया’’ति इदं पन इमिनाव सङ्गहितत्ता इध विसुं न वुत्तं, मातुगामस्स सरीरे फुसनभावं अजानित्वा अञ्ञविहितो हुत्वा सतिं अनुपट्ठपेत्वा हत्थपादपसारणादीसु फुसन्तस्साति अत्थो.

अजानन्तस्साति ¶ दारकाकारं दारिकं ‘‘मातुगामो’’ति अजानित्वा केनचि करणीयेन फुसन्तस्स ¶ . मोक्खाधिप्पायिनो चाति ‘‘मोक्खाधिप्पायो कायेन वायमति, फस्सं पटिविजानाति, अनापत्ति. मोक्खाधिप्पायो कायेन वायमति, न च फस्सं पटिविजानाति, अनापत्ति. मोक्खाधिप्पायो न च कायेन वायमति, फस्सं पटिविजानाति, अनापत्ति. मोक्खाधिप्पायो न च कायेन वायमति, न च फस्सं पटिविजानाति, अनापत्ती’’ति (पारा. २७९) वुत्तमोक्खाधिप्पायवतो चतुब्बिधस्स पुग्गलस्साति वुत्तं होति. ‘‘अनापत्ती’’ति इमिना सम्बन्धो.

इमेसु यो मातुगामेन आलिङ्गनादिपयोगेन अज्झोत्थरयमानो तं अत्तनो सरीरतो अपनेत्वा मुञ्चितुकामो हत्थचालेन, मुट्ठिआदीहि वा पटिपणामनं, पहरणादिकञ्च पयोगं करोति, अयं पठमो पुग्गलो. अत्तानमज्झोत्थरितुं आगच्छन्तिं इत्थिं दिस्वा पहरणाकारादिसब्बपयोगं दस्सेत्वा तासेत्वा अत्तनो सरीरं फुसितुं अदेन्तो दुतियो. इत्थिया अज्झोत्थरित्वा आलिङ्गितो चोपनरहितं मं ‘‘अनत्थिको’’ति मन्त्वा ‘‘सयमेव पलायिस्सती’’ति, ‘‘अचोपनमेव मोक्खोपायो’’ति ञत्वा निच्चलोव हुत्वा फस्सं पटिविजानन्तो ततियो. अत्तानं अज्झोत्थरितुमागच्छन्तिं इत्थिं दिस्वा दुतियो विय तासेतुं कायप्पयोगं अकत्वा ‘‘अगते पातेस्सामि, पहरित्वा तासेस्सामी’’ति वा चिन्तेत्वा निच्चलोव हुत्वा तिट्ठन्तो चतुत्थोति वेदितब्बो.

३५२. पठमेनाति एत्थ ‘‘पाराजिकेना’’ति पाठसेसो, कायचित्तसमुट्ठानन्ति वुत्तं होति. इध चित्तं नाम ¶ कायसंसग्गरागसम्पयुत्तं चित्तं, सुक्कविस्सट्ठिम्हि मोचेतुकामताय सम्पयुत्तं चित्तं.

कायसंसग्गकथावण्णना.

३५३-४. दुट्ठुल्लवाचस्सादेनाति दुट्ठु कुच्छितभावं उलति गच्छतीति दुट्ठुल्ला, दुट्ठुल्ला च सा वाचा चाति दुट्ठुल्लवाचा, वच्चमग्गपस्सावमग्गे मेथुनधम्मपटिसंयुत्ता वाचा, यथाह ‘‘दुट्ठुल्ला नाम वाचा वच्चमग्गपस्सावमग्गमेथुनधम्मपटिसंयुत्ता वाचा’’ति (पारा. २८५), दुट्ठुल्लवाचाय अस्सादो दुट्ठुल्लवाचस्सादो, तथापवत्तवचीविञ्ञत्तिसमुट्ठापकचित्तसम्पयुत्ता चेतना, तेन सम्पयुत्तो रागो इध सहचरियेन ‘‘दुट्ठुल्लवाचस्सादो’’ति वुत्तो, तेन, दुट्ठुल्लवाचस्सादसम्पयुत्तेन ¶ रागेनाति अत्थो. इमिना ‘‘ओभासन्तस्सा’’ति वक्खमानओभासनस्स हेतु दस्सितो.

इत्थिया इत्थिसञ्ञिनो भिक्खुनोति योजना. इत्थिया इत्थिसञ्ञिनोति ‘‘मातुगामो नाम मनुस्सित्थी, न यक्खी, न पेती, न तिरच्छानगता, विञ्ञू पटिबला सुभासितदुब्भासितं दुट्ठुल्लादुट्ठुल्लं आजानितु’’न्ति पदभाजने निद्दिट्ठसरूपाय सुभासितदुब्भासितं जानन्तिया मनुस्सित्थिया इत्थिसञ्ञिनो भिक्खुनोति अत्थो. ‘‘द्विन्नं मग्गान’’न्ति एतस्स सम्बन्धीवसेन ‘‘इत्थिया’’ति इदं सामिवसेन योजेतब्बं, यथावुत्तसरूपस्स मातुगामस्स वच्चमग्गपस्सावमग्गन्ति अत्थो. वण्णावण्णवसेन चाति ‘‘वण्णं भणति नाम द्वे मग्गे थोमेति वण्णेति पसंसति. अवण्णं भणति नाम द्वे मग्गे खुंसेति वम्भेति गरहती’’ति निद्देसे वुत्तनयेन उभो मग्गे उद्दिस्स थोमनगरहणवसेनाति वुत्तं होति.

मेथुनस्स ¶ याचनादयो मेथुनयाचनादयो, तेहि मेथुनयाचनादीहि, ‘‘याचतिपि आयाचतिपि पुच्छतिपि पटिपुच्छतिपि आचिक्खतिपि अनुसासतिपि अक्कोसतिपी’’ति (पारा. २८५) उद्देसे वुत्तमेथुनयाचनादिवसेनाति वुत्तं होति. इमेहि द्वीहि ‘‘ओभासन्तस्सा’’ति वुत्तओभासना दस्सिता. ओभासन्तस्साति उद्देसयन्तस्स, पकासेन्तस्साति अत्थो. ‘‘विञ्ञु’’न्ति इमिना ओभासनकिरियाय कम्ममाह, इमिना विसेसितब्बं ‘‘मनुस्सित्थि’’न्ति इदं पकरणतो लब्भति, यथादस्सितपदभाजनागतसरूपं विञ्ञुं पटिबलं मनुस्सित्थिन्ति वुत्तं होति. अन्तमसो हत्थमुद्दायपीति ओभासने अन्तिमपरिच्छेददस्सनं. दुट्ठुल्लवचनस्सादभावे सति यो वच्चमग्गपस्सावमग्गपटिबद्धं गुणदोसं वा मेथुनधम्मयाचनादिवसेन वा दुट्ठुल्लादुट्ठुल्लं जानन्तिं मनुस्सित्थिं हेट्ठिमपरिच्छेदेन हत्थमुद्दायपि वदेय्याति अत्थो.

इमस्मिं गाथाद्वये दुट्ठुल्लवाचस्सादेन इत्थिया इत्थिसञ्ञिनो विञ्ञुं तं इत्थिं द्विन्नं मग्गानं वण्णवसेन अन्तमसो हत्थमुद्दायपि ओभासन्तस्स भिक्खुनो गरुकं सियाति एकं वाक्यं, तथा ‘‘द्विन्नं मग्गानं अवण्णवसेना’’ति इमिना च ‘‘मेथुनयाचनादीही’’ति इमिना च योजनाय वाक्यद्वयन्ति एवं योजनावसेन तीणि वाक्यानि होन्ति.

तत्थ ¶ पठमवाक्ये वण्णवचनेन सङ्गहितं थोमनादिकथं कथेन्तस्स सङ्घादिसेसो होति. ‘‘इत्थिलक्खणेन सुभलक्खणेन समन्नागतासी’’ति एत्तकमेव थोमनत्थं वदतो सङ्घादिसेसो न होति, ‘‘तव वच्चमग्गो च पस्सावमग्गो च ईदिसो सुभो सुसण्ठानो, तेन नाम ¶ ईदिसेन इत्थिलक्खणेन सुभलक्खणेन समन्नागतासी’’ति वदन्तस्स होति. ‘‘वण्णेति, पसंसती’’ति पदद्वयञ्च ‘‘थोमेती’’ति पदस्स परियायो.

दुतियवाक्ये अवण्णपदसङ्गहितं खुंसनादित्तये खुंसनं नाम पतोदोपमेहि फरुसवचनेहि तुदनं. यथाह अट्ठकथायं ‘‘खुंसेतीति वाचापतोदेन घट्टेती’’ति (पारा. अट्ठ. २.२८५). पतुज्जतेनेनाति ‘‘पतोदो’’तिअगच्छन्ते अस्सादयो पवत्तेतुं विज्झनकपाचनदण्डो वुच्चति. वम्भनं नाम अपसादनं. अपसादनं नाम गुणतो परिहापनं. यथाह ‘‘वम्भेतीति अपसादेती’’ति (पारा. अट्ठ. २.२८५). गरहा नाम दोसारोपनं. यथाह ‘‘गरहतीति दोसं देती’’ति (पारा. अट्ठ. २.२८५). इमं खुंसनादिपटिसंयुत्तवचनं वक्खमानेसु ‘‘सिखरणीसि, सम्भिन्नासि, उभतोब्यञ्जनासी’’ति इमेसु तीसु पदेसु अञ्ञतरेन योजेत्वा कथेन्तस्सेव सङ्घादिसेसो, न इतरस्स.

ततियवाक्ये मेथुनयाचनादिवचनेहि सङ्गहितं आयाचनादिं करोन्तस्सापि सङ्घादिसेसो. ‘‘याचति नाम देहि मे अरहसि मे दातु’’न्तिआदिना (पारा. २८५) नयेन एकेकं पदं ‘‘देहि मे मेथुनं धम्म’’न्तिआदिवसेन मेथुनधम्मपदेन सह घटेत्वा मेथुनधम्मं याचन्तस्सेव होति.

‘‘कदा ते माता पसीदिस्सति, कदा ते पिता पसीदिस्सति, कदा ते देवतायो पसीदिस्सन्ति, कदा ते सुखणो सुलयो सुमुहुत्तो भविस्सती’’तिआदिआयाचनपदनिद्देसे एकेकं पदं तत्थेव ओसाने वुत्तेन ‘‘कदा ते मेथुनं धम्मं लभिस्सामी’’ति पदेन घटेत्वा मेथुनं याचन्तस्सेव होति.

‘‘कथं ¶ त्वं सामिकस्स देसि, कथं जारस्स देसी’’ति (पारा. २८५) पुच्छानिद्देसवचनेसु च अञ्ञतरं मेथुनधम्मपदेन घटेत्वा पुच्छन्तस्सेव होति.

‘‘एवं ¶ किर त्वं सामिकस्स देसि, एवं जारस्स देसी’’ति (पारा. २८५) पटिपुच्छानिद्देसवचनेसु अञ्ञतरं मेथुनधम्मपदेन घटेत्वा विसेसेत्वा पटिपुच्छन्तस्सेव होति.

‘‘कथं ददमाना सामिकस्स पिया होती’’ति पुच्छतो मातुगामस्स ‘‘एवं देहि, एवं देन्ती सामिकस्स पिया भविस्सति मनापा चा’’ति आणत्तिवचने, अनुसासनिवचने च एसेव नयो.

३५५. अक्कोसनिद्देसागतेसु ‘‘अनिमित्तासि निमित्तमत्तासि अलोहितासि धुवलोहितासि धुवचोळासि पग्घरन्तीसि सिखरणीसि इत्थिपण्डकासि वेपुरिसिकासि सम्भिन्नासि उभतोब्यञ्जनासी’’ति एकादससु पदेसु ‘‘सिखरणीसि सम्भिन्नासि उभतोब्यञ्जनासी’’ति पदत्तयं पच्चेकं आपत्तिकरं, इमिना पदत्तयेन सह पुब्बे वुत्तानि वच्चमग्गपस्सावमग्गमेथुनधम्मपदानि तीणि चाति छप्पदानं पच्चेकं आपत्तिकरत्ता इतो परानि अनिमित्तादीनि अट्ठ पदानि ‘‘अनिमित्तासि मेथुनधम्मं देही’’तिआदिना नयेन मेथुनधम्मपदेन सह घटेत्वा वुत्तानेव आपत्तिकरानीति वेदितब्बानि, ‘‘मेथुनयाचनादीही’’ति एत्थ आदि-सद्दसङ्गहितेसु ‘‘अनिमित्तासी’’तिआदीसु एकादससु अक्कोसपदेसु अन्तोगधत्तेपि केवलं आपत्तिकरत्ता गरुतरं पदत्तयं विसुं सङ्गहेतब्बन्ति ञापेतुमाह ‘‘सिखरणीसी’’तिआदि.

सिखरणीसीति एत्थ ‘‘सिखरणी असी’’ति पदच्छेदो. ‘‘असी’’ति पच्चेकं योजेतब्बं. तु-सद्दो केवलयुत्तम्पि आपत्तिकरं ¶ होतीति विसेसं जोतेति. केवलेनापि अक्कोसवचनेनाति योजना. सिखरणीसीति बहि निक्खन्तआणिमंसा भवसि. सम्भिन्नासीति मिस्सीभूतवच्चमग्गपस्सावमग्गा. उभतोब्यञ्जनासीति इत्थिनिमित्तेन, पुरिसनिमित्तेन चाति उभतोब्यञ्जनेहि समन्नागता. ‘‘अयं इत्थी, अयं पुरिसो’’ति ब्यञ्जयतीति ब्यञ्जनं, मुत्तकरणानि. सुणन्तियाति एत्थ ‘‘विञ्ञुमनुस्सित्थिया’’ति अधिकारतो लब्भति, इमिना अक्कोसितब्बवत्थु दस्सितं होति. भासितं सुणन्तिया सुभासितदुब्भासितं जानन्तिया मनुस्सित्थिया विसये पवत्तअक्कोसवचनेन सङ्घादिसेसो होतीति अत्थो.

३५६. पुनप्पुनं ओभासन्तस्स वाचानं गणनाय गरुका सियुन्ति योजना. एत्थ ‘‘एकं ¶ इत्थि’’न्ति अज्झाहरितब्बं. एकवाचाय बहू ओभासन्तस्स च इत्थीनं गणनाय गरुका सियुन्ति योजना. एत्थापि ‘‘इत्थियोपी’’ति लब्भति.

३५७. सा चे नप्पटिजानातीति एत्थ ‘‘यं सुणन्तिं मनुस्सित्थिं द्विन्नं मग्गानं वण्णावण्णवसेन ओभासति, सा चे न पटिजानाती’’ति सामत्थिया लब्भमानं आदाय योजेतब्बं. अत्तनो भासितं दुट्ठुल्लं वुत्तसमनन्तरमेव अत्थवसेन सचे न जानातीति अत्थो. तस्साति तस्स दुट्ठुल्लभासितभिक्खुस्स. उब्भजाणुं, अधक्खकं वा आदिस्स भणने चापि तस्स थुल्लच्चयं सियाति योजना. भणनेति द्विन्नं मग्गानं वण्णादिकथने, ‘‘भणतो’’तिपि लिखन्ति, भणन्तस्स, भणनहेतूति अत्थो. हेतुम्हि अयमन्तपच्चयो ‘‘असम्बुध’’न्तिआदीसु (पारा. अट्ठ. १.गन्थारम्भकथा) विय. उब्भजाणुन्ति जाणुतो उद्धं. अक्खेकन्ति अक्खकतो हेट्ठा.

३५८. उब्भक्खकन्ति ¶ अक्खकतो उद्धं. अधोजाणुमण्डलन्ति जाणुमण्डलतो अधो. उद्दिसन्ति उद्दिस्स. ‘‘उद्दिस्सुब्भक्खं वा तथा, अधोजाणुमण्डल’’न्ति च लिखन्ति, सो पाठो सुन्दरो. वण्णादिभणने दुक्कटन्ति सम्बन्धो. ‘‘विञ्ञुमनुस्सित्थिया’’ति अधिकारतो लब्भति. कायपटिबद्धे वण्णादिभणने दुक्कटन्ति एत्थापि एसेव नयो. वच्चमग्गपस्सावमग्गा सङ्घादिसेसक्खेत्तं, अधक्खकं उब्भजाणुमण्डलं थुल्लच्चयक्खेत्तं, उद्धक्खकं अधोजाणुमण्डलं दुक्कटक्खेत्तन्ति इमेसु तीसु खेत्तेसु अक्खकञ्चेव जाणुमण्डलञ्च थुल्लच्चयदुक्कटानं द्विन्नं अवधिभूतं कत्थ सङ्गय्हतीति? दुक्कटक्खेत्तेयेव सङ्गय्हति. यथाह अट्ठकथायं ‘‘अक्खकं, पन जाणुमण्डलञ्च एत्थेव दुक्कटक्खेत्ते सङ्गहं गच्छती’’ति (पारा. अट्ठ. २.२८६).

३५९. पण्डके यक्खिपेतीसु द्विन्नं मग्गानं वण्णादिभणने तस्स भणन्तस्स थुल्लच्चयं भवेति अधिकारवसेन आगतपदेहि सह योजेतब्बं. पण्डकादीसूति आदि-सद्देन यक्खिपेतीनं गहणं.

३६०. उब्भक्खक…पे… अयं नयोति ‘‘पण्डकादीसू’’ति इमिना योजेतब्बं. अयं नयोति ‘‘दुक्कटमेव होती’’ति वुत्तो नयो. सब्बत्थाति सङ्घादिसेसथुल्लच्चयदुक्कटक्खेत्तवसेन सब्बेसु खेत्तेसु.

३६१. अत्थपुरेक्खारो ¶ हुत्वा ओभासतोपि अनापत्तीति योजना. मातुगामानं ‘‘अनिमित्तासी’’तिआदीसु पदेसु अत्थकथनं पुरेक्खत्वा ‘‘अनिमित्तासी’’तिआदिपदं भणन्तस्स वा मातुगामेहि सह अट्ठकथं सज्झायन्तानं वा अनापत्तीति अत्थो. धम्मपुरेक्खारो हुत्वा ओभासतो अनापत्तीति योजना. पाळिधम्मं वाचेन्तस्स वा तासं ¶ सुणन्तीनं सज्झायनं वा पुरेक्खत्वा ‘‘अनिमित्तासी’’तिआदीसु पदेसु यं किञ्चि पब्बजितस्स वा इतरस्स वा मातुगामस्स कथेन्तस्स अनापत्तीति. पुरेक्खत्वानुसासनिन्ति ‘‘इदानि अनिमित्तासि…पे… उभतोब्यञ्जनासि, अप्पमादं दानि करेय्यासि, यथा आयतिम्पि एवरूपा नाहोसी’’ति अनुसासनिं पुरेक्खत्वा.

३६२. उम्मत्तकादीनन्ति पित्तुम्मत्तकयक्खुम्मत्तकवसेन द्विन्नं उम्मत्तकानञ्च आदि-सद्दसङ्गहितस्स इमस्मिं आदिकम्मिकस्स उदायित्थेरस्स च अनापत्तीति वुत्तं होति. ‘‘इदं सिक्खापदं तिसमुट्ठानं कायचित्ततो च वाचाचित्ततो च कायवाचाचित्ततो च समुट्ठाति. किरियं, सञ्ञाविमोक्खं, सचित्तकं, लोकवज्जं, कायकम्मं, वचीकम्मं, अकुसलचित्त’’न्ति (पारा. अट्ठ. २.२८७) अट्ठकथायं वुत्तपकिण्णकविनिच्छयं दस्सेति ‘‘समुट्ठानादयो…पे… तुल्यावा’’ति. वेदनाय अदिन्नादानेन असमत्ता ‘‘वेदनेत्थ द्विधा मता’’ति आह, सुखोपेक्खावेदनावसेन द्विधा मताति अत्थो.

दुट्ठुल्लवाचाकथावण्णना.

३६३. कामपारिचरियायाति मेथुनधम्मसङ्खातेन कामेन पारिचरियाय, मेथुनधम्मेन पारिचरियायाति अत्थो. अथ वा कामिता पत्थिताति कामा, मेथुनरागवसेन पत्थिताति अत्थो, कामा च सा पारिचरिया चाति कामपारिचरिया, तस्सा कामपारिचरियायातिपि गहेतब्बं, मेथुनरागचित्तेन अभिपत्थितपारिचरियायातिअत्थो. ‘‘वण्णं भासतो’’ति इमिना सम्बन्धो, ‘‘एतदग्गं भगिनि पारिचरियानं या मादिसं सीलवन्तं कल्याणधम्मं ब्रह्मचारिं एतेन धम्मेन परिचरेय्या’’ति अत्तनो मेथुनधम्मेन पारिचरियाय ¶ गुणं आनिसंसं कथेन्तस्साति वुत्तं होति. तस्मिंयेव खणेति तस्मिं भणितक्खणेयेव. सा चे जानातीति यं उद्दिस्स अभासि, सचे सा वचनसमनन्तरमेव जानाति.

३६४. सा ¶ मनुस्सित्थी नो जानाति चे, तस्स थुल्लच्चयन्ति सम्बन्धो. यक्खिपेतिदेवीसु जानन्तीसु, पण्डके च जानन्ते अत्तकामपारिचरियाय वण्णं भासतो तस्स भिक्खुनो थुल्लच्चयं होतीति योजना. सेसेति पुरिसतिरच्छानगतविसये, यक्खिआदीनं अजाननविसये च अत्तकामपारिचरियाय वण्णं भासतो तस्स आपत्ति दुक्कटं होतीति योजना.

३६५. चीवरादीहीति चीवरपिण्डपातादीहि. वत्थुकामेहीति तण्हाय वत्थुभावेन वत्थू च कामितत्ता कामाति च सङ्खातेहि पच्चयेहि.

३६६. रागो एव रागता. ‘‘रागिता’’ति वा पाठो, रागो अस्स अत्थीति रागी, तस्स भावो रागिता, अत्तकामपारिचरियाय रागोति अत्थो. ओभासोति अत्तकामपारिचरियाय गुणभणनं. तेन रागेनाति कामपारिचरियाय रागेन. खणे तस्मिन्ति भणितक्खणे. विजाननन्ति यं मनुस्सित्थिं उद्दिस्स अत्तकामपारिचरियाय वण्णं भणति, ताय तस्स वचनत्थस्स विजाननन्ति वुत्तं होति.

३६७. पञ्चङ्गानीति मनुस्सित्थिता, तंसञ्ञिता, पारिचरियाय रागिता, तेन रागेन ओभासनं, खणे तस्मिं विजाननन्ति इमानि एत्थ अत्तकामपारिचरियसिक्खापदे पञ्च अङ्गानि ¶ , पञ्च आपत्तिकारणानीति अत्थो. अस्साति अत्तकामपारिचरियसिक्खापदस्स.

अत्तकामपारिचरियकथावण्णना.

३६८. ‘‘पटिग्गण्हाती’’तिआदिकिरियात्तयोपादानसामत्थियेन तिक्खत्तुं पटिपादनकं ‘‘यो भिक्खू’’ति च ‘‘गरु होती’’ति पदसामत्थियेन ‘‘तस्सा’’ति च लब्भमानत्ता तिविधेहि सह ‘‘यो भिक्खु पुरिसस्स सन्देसं पटिग्गण्हाति, वीमंसति पच्चाहरति चे, तस्स गरु होती’’ति एकं वाक्यं होति. एवं ‘‘इत्थियापि वा’’ति इमिना योजनायपि एकं वाक्यं होतीति इमिस्सा गाथाय वाक्यद्वयं युज्जति.

इध सन्देसक्कमञ्च योजनाक्कमञ्च जाननत्थं पठमं ताव इत्थीनञ्च भरियानञ्च पभेदो च सरूपञ्च विभावीयति – तेसु इत्थियो दसविधा होन्ति. यथाह पदभाजने ‘‘दस इत्थियो ¶ मातुरक्खिता पितुरक्खिता मातापितुरक्खिता भातुरक्खिता भगिनिरक्खिता ञातिरक्खिता गोत्तरक्खिता धम्मरक्खिता सारक्खा सपरिदण्डा’’ति. भरिया च दसविधा होन्ति. यथाह पदभाजने ‘‘दस भरियायो धनक्कीता छन्दवासिनी भोगवासिनी ओदपत्तकिनी ओभटचुम्बटा दासी च भरिया च कम्मकारी च भरिया च धजाहटा मुहुत्तिका’’ति (पारा. ३०३). इमासं पभेदो च सरूपानि च सङ्खेपतो एवं वेदितब्बानि –

पुरिसेहि सह यथा संवासं न करोति, एवं मातरा रक्खिता मातुरक्खिता. यथाह ‘‘मातुरक्खिता नाम माता रक्खति गोपेति इस्सरियं कारेति वसं वत्तेती’’ति. पितुरक्खितादीसुपि एसेव नयो. तत्थ यस्मिं कोण्डञ्ञादिगोत्ते जाता, तस्मिंयेव गोत्ते जातेहि ¶ रक्खिता गोत्तरक्खिता. यथाह ‘‘गोत्तरक्खिता नाम सगोत्ता रक्खन्ती’’तिआदि. एकं सत्थारं उद्दिस्स पब्बजितेहि वा एकगणपरियापन्नेहि वा रक्खिता धम्मरक्खिता नाम. यथाह ‘‘धम्मरक्खिता नाम सहधम्मिका रक्खन्ती’’तिआदि (पारा. ३०४). सारक्खा नाम ‘‘गब्भेपि परिग्गहिता होति ‘मय्हं एसा’ति अन्तमसो मालागुळपरिक्खित्तापी’’ति पाळियं वुत्तसरूपा. सपरिदण्डा नाम ‘‘केहिचि दण्डो ठपितो होति ‘यो इत्थन्नामं इत्थिं गच्छति, तस्स एत्तको दण्डो’’ति वुत्तसरूपाति अयं दसन्नं इत्थीनं सरूपसङ्खेपो. इमासु दससु सारक्खसपरिदण्डानं द्विन्नं परपुरिससेवायं मिच्छाचारो होति, इतरासं न होति. इमा दसपि पञ्चसीलं रक्खन्तेहि अगमनीया.

दससु भरियासु ‘‘धनक्कीता नाम धनेन किणित्वा वासेती’’ति वुत्तत्ता भरियभावाय अप्पकं वा बहुं वा धनं दत्वा गहिता धनक्कीता नाम. ‘‘छन्दवासिनी नाम पियो पियं वासेती’’ति वुत्तत्ता अत्तरुचिया संवसितेन पुरिसेन सम्पटिच्छिता छन्दवासिनी नाम. ‘‘भोगवासिनी नाम भोगं दत्वा वासेती’’ति वुत्तत्ता उदुक्खलमुसलादिगेहोपकरणं लभित्वा भरियभावं गच्छन्ती जनपदित्थी भोगवासिनी नाम. ‘‘पटवासिनी नाम पटं दत्वा वासेती’’ति वुत्तत्ता निवासनमत्तं वा पारुपनमत्तं वा लद्धा भरियभावं गच्छन्ती दलिद्दित्थी पटवासिनी नाम. ओदपत्तकिनी नाम ‘‘उदकपत्तं आमसित्वा वासेती’’ति (पारा. ३०४) वुत्तत्ता ‘‘इदं उदकं विय संसट्ठा अभेज्जा होथा’’ति वत्वा एकस्मिं उदकपत्ते पुरिसेन सद्धिं हत्थं ओतारेत्वा भरियभावं नीतो मातुगामो वुच्चति. ‘‘ओभटचुम्बटा नाम चुम्बटं ओरोपेत्वा ¶ वासेती’’ति (पारा. ३०४) वुत्तत्ता सीसतो चुम्बटं ओरोपेत्वा भरियभावमुपनीता कट्ठहारिकादिइत्थी ओभटचुम्बटा नाम. दासी ¶ च भरिया च नाम ‘‘दासी चेव होति भरिया चा’’ति (पारा. ३०४) वुत्तत्ता भरियं कत्वा वासिता ‘‘तस्सेव दासी च भरिया चा’’ति वुत्ता. कम्मकारी च भरिया च नाम ‘‘कम्मकारी चेव होति भरिया चा’’ति (पारा. ३०४) वुत्तत्ता पधानित्थिनिरपेक्खेन कुटुम्बकिच्चं कारेत्वा भरियभावं नीता भरिया कतकम्मा ‘‘कम्मकारी च भरिया चा’’ति वुत्ता. ‘‘धजाहटा नाम करमरानीता वुच्चती’’ति (पारा. ३०४) वुत्तत्ता धजं उस्सापेत्वा गच्छन्तिया महासेनाय सद्धिं गन्त्वा परविसयं विलुम्पन्तेन पच्छिन्दित्वा आनेत्वा भरियभावमुपनीता इत्थी धजाहटा नाम. ‘‘मुहुत्तिका नाम तङ्खणिका वुच्चती’’ति (पारा. ३०४) वुत्तत्ता अचिरकालं संवासत्थाय गहिता इत्थी मुहुत्तिका नामाति अयं दसन्नं भरियानं सरूपसङ्खेपो. यथावुत्तासु दससु इत्थीसु अञ्ञतरं दसन्नं भरियानं अञ्ञतरट्ठाने ठपनत्थमधिप्पेतभावं वत्तुं पुरिसेन ‘‘गच्छ भन्ते इत्थन्नामं मातुरक्खितं ब्रूहि ‘होहि किर इत्थन्नामस्स भरिया धनक्कीता’ति’’आदिना नयेन दिन्नसन्देसं ‘‘साधु उपासका’’तिआदिना नयेन वचीभेदं कत्वा वा सीसकम्पनादिवसेन वा पटिग्गण्हातीति आह ‘‘पटिग्गण्हाति सन्देसं पुरिसस्सा’’ति.

एत्थ पुरिसस्साति उपलक्खणत्ता ‘‘पुरिसस्स माता भिक्खुं पहिणती’’तिआदिना (पारा. ३२१) नयेन पाळियं वुत्तपुरिसस्स मातापितुआदयो च गहेतब्बा. वीमंसतीति एवं पटिग्गहितसासनं तस्सायेव एकंसेन अविराधेत्वा वदन्तस्स मातापितुआदीनमञ्ञतरस्स वा आरोचेतीति अत्थो. एत्थापि वीमंसतीति उपलक्खणत्ता ‘‘पटिग्गण्हाति अन्तेवासिं वीमंसापेत्वा अत्तना पच्चाहरति, आपत्ति सङ्घादिसेसस्सा’’ति (पारा. ३३८) वुत्तत्ता वीमंसापेतीतिपि गहेतब्बं. पच्चाहरतीति तथा आहटं सासनं सुत्वा तस्सा इत्थिया ¶ सम्पटिच्छिते च असम्पटिच्छिते च लज्जाय तुण्हीभूताय च तं पवत्तिं पच्चाहरित्वा आचिक्खतीति वुत्तं होति. इधापि पच्चाहरतीति उपलक्खणत्ता ‘‘पटिग्गण्हाति वीमंसति अन्तेवासिं पच्चाहरापेति, आपत्ति सङ्घादिसेसस्सा’’ति (पारा. ३३८) वुत्तत्ता पच्चाहरापेतीति च गहेतब्बं.

‘‘इत्थियापि वा’’ति इमिना योजेत्वा गहितदुतियवाक्ये च एवमेव अत्थो वत्तब्बो. तत्थ सन्देसक्कमो पन ‘‘मातुरक्खिता भिक्खुं पहिणति ‘गच्छ भन्ते इत्थन्नामं ब्रूहि ‘होमि इत्थन्नामस्स ¶ भरिया धनक्कीता’ति’’आदिपाळिनयेन (पारा. ३३०) दट्ठब्बो. एत्थापि ‘‘वीमंसापेति पच्चाहरापेती’’ति इदञ्च वुत्तनयेनेव गहेतब्बं. इमिना नियामेन दसन्नं इत्थीनं नामं विसुं विसुं वत्वा दसन्नं भरियानं अञ्ञतरत्थाय दीयमानसन्देसक्कमो योजेतब्बो. इधापि इत्थियापि वाति उपलक्खणत्ता ‘‘मातुरक्खिताय माता भिक्खुं पहिणति ‘गच्छ भन्ते इत्थन्नामं ब्रूहि ‘होतु इत्थन्नामस्स भरिया धनक्कीता’’तिआदिपाळिवसेन (पारा. ३२४) इत्थिया मातुपितुआदीनञ्च सन्देसक्कमो योजेतब्बो.

३७०. तं पवत्तिं. सञ्चरित्ता सञ्चरणहेतु. न मुच्चतीति इत्थिपुरिसानं अन्तरे सासनं पटिग्गहेत्वा सञ्चरणहेतु आपज्जितब्बसङ्घादिसेसतो न मुच्चतीति अत्थो.

३७१. अञ्ञं वाति मातापितुरक्खितादीसु अञ्ञतरं वा. ‘‘भासतो’’ति लिखन्ति. ‘‘पेसितो’’ति इमिना विरुद्धत्ता तं पहाय ‘‘भासती’’ति पाठो गहेतब्बो. पाठसेसो वा कातब्बो. ‘‘यो अञ्ञं भासति चे, तस्स भासतोति योजना’’ति निस्सन्देहे वुत्तं. ‘‘मातरा रक्खितं इत्थिं ‘गच्छ ब्रूही’ति यो पेसितो होति, तस्स पितुरक्खितं ¶ वा अञ्ञं वा भासतो विसङ्केतोवा’’ति, ‘‘मातरा…पे… ब्रूही’ति पेसितो हुत्वा पितुरक्खितं वा अञ्ञं वा भासतो विसङ्केतोवा’’ति योजना युत्ततराति अम्हाकं खन्ति.

३७२. पटिग्गण्हनतादीहीति पटिग्गण्हनमेव पटिग्गण्हनता. आदि-सद्देन वीमंसनपच्चाहरणानि गहितानि. सञ्चरित्तेति सञ्चरणे. समापन्नेति गते सति. गरुकापत्तिमादिसेति एत्थ ‘‘तस्सा’’ति सेसो. आदिसेति कथेय्य.

३७३. द्वीहि थुल्लच्चयं वुत्तन्ति एत्थ द्वीहि द्वीहि अङ्गेहि सञ्चरित्ते समापन्ने थुल्लच्चयं वुत्तन्ति गहेतब्बं. ‘‘पटिग्गण्हाति वीमंसति न पच्चाहरति, आपत्ति थुल्लच्चयस्स. पटिग्गण्हाति न वीमंसति पच्चाहरति, आपत्ति थुल्लच्चयस्स. न पटिग्गण्हाति वीमंसति पच्चाहरति, आपत्ति थुल्लच्चयस्सा’’ति (पारा. ३३८) द्वीहि द्वीहि अङ्गेहि थुल्लच्चयं वुत्तन्ति अत्थो. पण्डकादीसूति पण्डकयक्खिपेतीसु. तीहिपि अङ्गेहि सञ्चरित्ते समापन्ने थुल्लच्चयं वुत्तन्ति योजना.

एकेनेवाति ¶ एकेनेव अङ्गेन. सब्बत्थाति मातुरक्खितादीसु सब्बमातुगामेसु च विनीतवत्थुम्हि ‘‘तेन खो पन समयेन अञ्ञतरो पुरिसो अञ्ञतरं भिक्खुं आणापेसि ‘गच्छ भन्ते इत्थन्नामं इत्थिं वीमंसा’ति. सो गन्त्वा मनुस्से पुच्छि ‘कहं इत्थन्नामा’ति. सुत्ता भन्तेति…पे… मता भन्तेति. निक्खन्ता भन्तेति. अनित्थी भन्तेति. इत्थिपण्डका भन्तेति. तस्स कुक्कुच्चं अहोसि. अनापत्ति भिक्खु सङ्घादिसेसस्स, आपत्ति दुक्कटस्सा’’ति (पारा. ३४१) आगतासु सुत्तादीसु पञ्चसु च.

३७४. अनापत्ति पकासिताति चेतियादीसु कत्तब्बं निस्साय इत्थिया पुरिसस्स, पुरिसेन च इत्थिया दिन्नसासनं पटिग्गहेत्वा ¶ वीमंसित्वा पच्चाहरित्वा आरोचेन्तस्स अनापत्तिभावो ‘‘अनापत्ति सङ्घस्स वा चेतियस्स वा गिलानस्स वा करणीयेन गच्छति, उम्मत्तकस्स आदिकम्मिकस्सा’’ति (पारा. ३४०) पाळियं वुत्ताति अत्थो.

३७५. तथा तस्साति मनुस्सजातिकाय तस्सा. ननालंवचनीयताति ‘‘ममाय’’न्ति वा निग्गहपग्गहे वा निरासङ्कं वत्तुं नाहरतीति अलंवचनीया, अस्सामिका, सा हि केनचि ‘‘मय्हं एसा’’ति वत्तुं वा निरासङ्केन निग्गहपग्गहवचनं वा वत्तुं असक्कुणेय्या, अलंवचनीया न भवतीति नालंवचनीया, सस्सामिका, सा हि सामिकेन तथा कातुं सक्कुणेय्याति नालंवचनीया, नालंवचनीया न भवतीति ननालंवचनीया, अलंवचनीयपदेन वुत्ता अस्सामिका एव, पटिसेधा द्वे पकतिमत्थं गमयन्तीति, ननालंवचनीयाय भावो ननालंवचनीयता, निरासङ्केन अवचनीयता अस्सामिकभावोति वुत्तं होति. सञ्चरित्तवसेन भिक्खुना वचनीया न होतीति वा ‘‘अलंवचनीया’’तिपि गहेतब्बमेव. पटिग्गण्हनतादीनं वसाति एत्थ चकारो लुत्तनिद्दिट्ठो. ततो पटिग्गण्हनवीमंसनपच्चाहरणसङ्खातानं तिण्णं अङ्गानं वसेन च पुब्बे वुत्तमनुस्सित्थिता ननालंवचनीयताति वुत्तानं द्विन्नं अङ्गानं वसेन च इदं सिक्खापदं आपत्तिकारणेहि पञ्चहि अङ्गेहि युत्तन्ति अत्थो.

३७६. इदं सञ्चरित्तसिक्खापदं. अथ वा लिङ्गविपल्लासेन च अयं सङ्घादिसेसोति गहेतब्बो. कायतो, वाचतो, कायवाचतो, कायचित्ततो, वाचाचित्ततो, कायवाचाचित्ततो वा उप्पज्जनतो छसमुट्ठानं. ततो एव अचित्तकमुदीरितं. मिस्सकसमुट्ठानञ्हि अचित्तकं. अवसेसचित्तेसुपि ¶ यस्मिं चित्ते असति अचित्तकं नाम होति, तं दस्सेतुमाह ‘‘अलंवचनियत्तं ¶ वा’’तिआदि. गाथाबन्धवसेन रस्सो, ‘‘अलंवचनीयत्त’’न्ति गहेतब्बं. यो सन्देसं पेसेति, तस्मिं पटिबद्धभावन्ति अत्थो. पण्णत्तिं वाति सञ्चरित्तसिक्खापदसङ्खातं पण्णत्तिं वा अजानतो अचित्तकमुदीरितन्ति सम्बन्धो.

३७७. सासनन्ति मातुगामस्स, पुरिसस्स वा सासनं. कायविकारेनाति सीसकम्पनादिना कायविकारेन. गहेत्वाति पटिग्गहेत्वा. तं उपगम्माति पटिग्गहितसासनं यस्स वत्तब्बं होति, तं मातुगामं, पुरिसं वा उपगम्म. वीमंसित्वाति तं किच्चं तीरेत्वा. हरन्तस्साति पच्चाहरन्तस्स. कायतो सियाति वचीभेदं विना पटिग्गहणादीनं कायेनेव कतत्ता कायसमुट्ठानतोव सङ्घादिसेसो होतीति अत्थो.

३७८. इत्थिया वचनं सुत्वाति योजना. यथा निसिन्नोवाति पकतिया निसिन्नट्ठानेयेव निसिन्नो. तं वचनं. तत्थेवागतस्सेवाति यत्थ निसिन्नो इत्थिया सासनं पटिग्गण्हि, तमेव आसनं अविजहित्वा अत्तना निसिन्नट्ठानमेव आगतस्स सन्निसितब्बपुरिसस्सेव, एत्थ ‘‘आरोचेत्वा’’ति पाठसेसो. पुन ‘‘आरोचेन्तस्सा’’ति इदं तत्थेवागताय तस्सा एव इत्थिया एवं योजेतब्बं. सासनं दत्वा गन्त्वा पुन तत्थेव आगतस्स मातुगामस्सेव ञातमनन्तरं कायिककिरियं विना वचनेनेव आरोचेन्तस्साति अत्थो. इदं इत्थिया सासनं पटिग्गहणादिवसेन वुत्तं.

अथ वा पुरिसस्स वचनं सुत्वा यथानिसिन्नोव तं वचनं इत्थिया आरोचेत्वा पुन तत्थेवागतस्सेव पुरिसस्स ¶ आरोचेन्तस्साति एवं पुरिससन्देसं पटिग्गहणादिवसेनापि योजना कातब्बा. एत्थ च तत्थेवागतस्साति उपलक्खणं. सासनवचनमत्तेनेव पटिग्गहेत्वा, किच्चन्तरेन गन्त्वा वा यदिच्छावसेन दिट्ठट्ठाने वा वत्वा पुनपि तत्थेव दिट्ठट्ठाने पुन आरोचेन्तस्स च वचनेनेव समुट्ठानभावो वेदितब्बो.

३७९. ‘‘अलं…पे… अजानतो’’ति अचित्तकत्तकारणं वुत्तमेव, कस्मा पुन ‘‘अजानन्तस्स पण्णत्ति’’न्ति वुत्तन्ति चे? तदुभयस्सापि विसुं कारणाभावं विञ्ञापेतुं वुत्तन्ति वेदितब्बं. नं विधिन्ति सासनं पटिग्गहेत्वा आहरित्वा आरोचेत्वा पच्चाहरित्वा आरोचनसङ्खातं ¶ विधानं. अरहतोपीति खीणासवस्सपि, सेखपुथुज्जनानं पगेवाति अयमत्थो सम्भावनत्थेन अपि-सद्देन जोतितो.

३८०. जानित्वाति अलंवचनीयभावं वा पण्णत्तिं वा उभयमेव वा जानित्वा. तथाति कायवाचतो करोन्तस्साति इमिना योजेतब्बं. सचित्तकेहीति यथावुत्तचित्तेन सचित्तकेहि. तेहेवाति कायादीहि तेहि एव, ‘‘तीहेवा’’तिपि पाठो.

सञ्चरित्तकथावण्णना.

३८१-२. सयंयाचितकेहेवाति एत्थ ‘‘उपकरणेही’’ति पाठसेसो, ‘‘पुरिसं देथा’’तिआदिना नयेन अत्तनाव याचित्वा गहितेहि उपकरणेहेवाति अत्थो. यथाह ‘‘सञ्ञाचिका नाम सयं याचित्वा पुरिसम्पि पुरिसत्तकरम्पि गोणम्पि सकटम्पि वासिम्पि परसुम्पि कुठारिम्पि कुदालम्पि निखादनम्पी’’ति ¶ . एत्थ एव-कारेन अयाचितं निवत्तेति. तेन अस्सामिकन्ति दीपितं होति. ‘‘कुटिक’’न्ति इमिना ‘‘कुटि नाम उल्लित्ता वा होति अवलित्ता वा उल्लित्तावलित्ता वा’’ति (पारा. ३४९) वुत्तत्ता भूमितो पट्ठाय भित्तिच्छदनानि पटिच्छादेत्वा मत्तिकाय वा सुधाय वा द्वारवातपानादिअलेपोकासं ठपेत्वा अन्तो लित्तभावेन उल्लित्तानामकं वा तथा बहि लित्तभावेन अवलित्तानामकं वा अन्तो च बहि च लित्तभावेन उल्लित्तावलित्तानामकं वा कुटिन्ति वुत्तं होति.

अप्पमाणिकन्ति ‘‘तत्रिदं पमाणं, दीघसो द्वादसविदत्थियो सुगतविदत्थिया, तिरियं सत्तन्तरा’’ति (पारा. ३४८) दीघपुथुलानं वुत्तप्पमाणेन अतिरेकत्ता अप्पमाणिकन्ति अत्थो.

एत्थ च तिलक्खणं पटिविज्झित्वा तीणि किलेसमूलानि उप्पाटेत्वा कालत्तयवत्त सब्बधम्मे पटिविज्झित्वा तिभुवनेकपटिसरणभूतस्स भगवतो धम्मराजस्स अङ्गुलं पमाणमज्झिमपुरिसस्स अङ्गुलतो तिवङ्गुलं होति, एका विदत्थि तिस्सो विदत्थियो होन्ति, एकं रतनं तीणि रतनानि होन्तीति एवं नियमिता सुगतविदत्थि च वड्ढकिरतनेन दियड्ढरतनप्पमाणा होति. यथाह अट्ठकथायं ‘‘सुगतविदत्थि नाम इदानि मज्झिमस्स पुरिसस्स तिस्सो विदत्थियो वड्ढकिहत्थेन दियड्ढो हत्थो होती’’ति (पारा. अट्ठ. २.३४८-३४९). तस्मा ¶ सुगतविदत्थिया द्वादस वड्ढकिहत्थेन अट्ठारस हत्था होन्ति. ‘‘दीघसो द्वादस विदत्थियो सुगतविदत्थियाति बाहिरिमेन मानेना’’ति (पारा. ३४९) पदभाजने वुत्तत्ता अन्तिमं सुधालेपं अग्गहेत्वा थुसमत्तिकपरियन्तेन वा महामत्तिकपरियन्तेन वा बाहिरन्ततो अट्ठारसहत्थप्पमाणं, ‘‘तिरियं सत्तन्तराति अब्भन्तरिमेन मानेना’’ति (पारा. ३४९) ¶ पदभाजने वुत्तत्ता अब्भन्तरिमेन पुथुलतो द्वादसङ्गुलाधिकदसहत्थप्पमाणञ्च कुटिया पमाणन्ति गहेतब्बं. एवं ठितपमाणतो दीघतो पुथुलतो वा उभतो वा केसग्गमत्ताधिकापि कुटि आपत्तिया अङ्गं होतीति दस्सेतुं ‘‘अप्पमाणिक’’न्ति आहाति सङ्खेपतो वेदितब्बं.

अत्तुद्देसन्ति उद्दिसितब्बोति उद्देसो, अत्ता उद्देसो एतिस्साति अत्तुद्देसा, कुटि, तं अत्तुद्देसं. ‘‘अत्तुद्देसन्ति अत्तनो अत्थाया’’ति पदभाजने वुत्तत्ता ‘‘मय्हं एसा वासत्थाय भविस्सती’’ति अत्तानं उद्दिसित्वाति अत्थो. ‘‘करोन्तस्सा’’ति इदं ‘‘कारयमानेनाति करोन्तो वा कारापेन्तो वा’’ति पदभाजने वुत्तनयेन पयोजककत्तुनो च गहेतब्बत्ता उपलक्खणन्ति गहेतब्बं. तथाति तेनेव पकारेन, येहि अस्सामिकतादीहि पकारेहि युत्तं पमाणातिक्कन्तं कुटिं करोन्तस्स आपत्ति, तेहेव पकारेहि युत्तं अदेसितवत्थुकम्पि कुटिं करोन्तस्साति. इमिना अप्पमाणिकं विय अदेसितवत्थुकम्पि विसुंयेव आपत्तिया पधानङ्गन्ति. वसति एत्थाति वत्थु, भूमि, सा अदेसिता एतिस्साति अदेसितवत्थुका, कुटि, तं अदेसितवत्थुकं.

किं वुत्तं होति? तेन कुटिकारेन भिक्खुना कुटिवत्थुं सोधेत्वा समतलं कारेत्वा सङ्घं उपसङ्कमित्वा वुड्ढानं भिक्खूनं पादे वन्दित्वा उक्कुटिकं निसीदित्वा अञ्जलिं पग्गहेत्वा ‘‘अहं भन्ते सञ्ञाचिकाय कुटिं कत्तुकामो अस्सामिकं अत्तुद्देसं, सोहं भन्ते सङ्घं कुटिवत्थुओलोकनं याचामी’’ति तिक्खत्तुं वत्वा याचितेन सङ्घेन वा सङ्घेन ञत्तिदुतियाय कम्मवाचाय सम्मतेहि ब्यत्तेहि ¶ पटिबलेहि द्वीहि भिक्खूहि वा तेन सद्धिं गन्त्वा कुटिवत्थुं ओलोकेत्वा सारम्भभावं वा अपरिक्कमनभावं वा उभयमेव वा पस्सन्तेहि ‘‘मायिध करी’’ति निवारेत्वा अनारम्भं चे होति सपरिक्कमनं, आगन्त्वा सङ्घस्स आरोचिते कुटिकारकेनेव भिक्खुना पुब्बे वुत्तनयेन सङ्घं उपसङ्कमित्वा वुड्ढानं भिक्खूनं पादे वन्दित्वा उक्कुटिकं निसीदित्वा अञ्जलिं पग्गहेत्वा ‘‘अहं भन्ते सञ्ञाचिकाय कुटिं कत्तुकामो अस्सामिकं अत्तुद्देसं, सोहं भन्ते सङ्घं कुटिवत्थुदेसनं याचामी’’ति तिक्खत्तुं वत्वा याचिते वुड्ढानुमतेन ब्यत्तेन भिक्खुना पटिबलेन ञत्तिदुतियाय कम्मवाचाय देसेत्वा निय्यादितकुटिवत्थुस्स ¶ अभावा अदेसितवत्थुकं, तेनेव अस्सामिकतादिपकारेन युत्तं यथावुत्तप्पकारं कुटिकं अत्तना याचितेहि उपकरणेहि करोन्तस्स, कारापेन्तस्स चाति वुत्तं होति.

द्वे सङ्घादिसेसा होन्तीति ‘‘भिक्खू वा अनभिनेय्य वत्थुदेसनाय, पमाणं वा अतिक्कामेय्य, सङ्घादिसेसो’’ति (पारा. ३४८) तुल्यबलतासूचकेन वा-सद्देन सम्पिण्डित्वा वुत्तअङ्गद्वयसहितत्ता द्वे सङ्घादिसेसा होन्तीति अत्थो. यथाह ‘‘भिक्खु कुटिं करोति अदेसितवत्थुकं पमाणातिक्कन्तं अनारम्भं सपरिक्कमनं, आपत्ति द्विन्नं सङ्घादिसेसान’’न्ति (पारा. ३५५) च ‘‘भिक्खुकुटिं करोति अदेसितवत्थुकं अनारम्भं सपरिक्कमनं, आपत्ति सङ्घादिसेसस्सा’’ति (पारा. ३५४) च ‘‘भिक्खु कुटिं करोति पमाणातिक्कन्तं अनारम्भं सपरिक्कमनं, आपत्ति सङ्घादिसेसस्सा’’ति (पारा. ३५५) च वुत्तत्ता द्वीसु अङ्गेसु एकं चे, एकोव सङ्घादिसेसो ¶ होतीति. तं पन ‘‘सचे एकविपन्ना सा, गरुकं एककं सिया’’ति वक्खति.

सारम्भादीसूति एत्थ सारम्भ-सद्दो सोपद्दवपरियायो. यथाह अट्ठकथायं ‘‘सारम्भं अनारम्भन्ति सउपद्दवं अनुपद्दव’’न्ति (पारा. अट्ठ. २.३४८-३४९). एत्थ ‘‘सेतं छागमारभेथ यजमानो’’ति पयोगे विय आ-पुब्बस्स रभस्स हिंसत्थेपि दिस्समानत्ता कत्तुसाधनो आरम्भ-सद्दो हिंसकानं किपिल्लिकादिसत्तानं वाचको भवतीति तंसहितट्ठानं सारम्भं नाम होति. तेनेव पदभाजनेपि वुत्तं ‘‘सारम्भं नाम किपिल्लिकानं वा आसयो होति, उपचिकानं वा, उन्दूरानं वा, अहीनं वा, विच्छिकानं वा, सतपदीनं वा, हत्थीनं वा, अस्सानं वा, सीहानं वा, ब्यग्घानं वा…पे… आसयो होती’’ति (पारा. ३५३).

आदि-सद्देन अपरिक्कमनं सङ्गण्हाति. ‘‘सपरिक्कमनं नाम सक्का होति यथायुत्तेन सकटेन अनुपरिगन्तुं, समन्ता निस्सेणिया अनुपरिगन्तुं, एतं सपरिक्कमनं नामा’’ति (पारा. ३५३) वुत्तलक्खणविपरियायतो निब्बकोसस्स उदकपातट्ठाने एकं चक्कं ठपेत्वा इतरं चक्कं बहि ठपेत्वा कुटिं परिक्खिपित्वा आवज्जियमानस्स गोयुत्तसकटस्स वा निस्सेणियं ठत्वा कुटिं छादयमानानं निस्सेणिया वा परतो गमितुमसक्कुणेय्यत्ता अपरिक्कमनन्ति वेदितब्बं.

एवं ¶ वुत्तसारम्भअपरिक्कमनसङ्खातअङ्गद्वयेन युत्तं चे, द्वे दुक्कटानि होन्ति. यथाह ‘‘भिक्खु कुटिं करोति देसितवत्थुकं पमाणिकं सारम्भं अपरिक्कमनं, आपत्ति द्विन्नं दुक्कटान’’न्ति (पारा. ३५५). एकं चे, एकमेव होति. यथाह ‘‘भिक्खु कुटिं करोति देसितवत्थुकं पमाणिकं सारम्भं सपरिक्कमनं, आपत्ति ¶ दुक्कटस्स. भिक्खु कुटिं करोति देसितवत्थुकं पमाणिकं अनारम्भं अपरिक्कमनं, आपत्ति दुक्कटस्सा’’ति (पारा. ३५५) एतं तयम्पि ‘‘सारम्भादीसु दुक्कट’’न्ति सामञ्ञेन सङ्गहितन्ति दट्ठब्बं.

एकं अङ्गं पमाणिकत्तं वा देसितवत्थुकत्तं वा विपन्नं एतिस्साति एकविपन्ना. पुब्बे वुत्तत्थानं सङ्घादिसेसादिपदानमत्थो वुत्तनयेनेव वेदितब्बो. साति यथावुत्तलक्खणकुटि.

३८३. इदानि इमस्मिं सिक्खापदे अट्ठुप्पत्तियं ‘‘ते याचनबहुला विञ्ञत्तिबहुला विहरन्ति ‘पुरिसं देथ पुरिसत्तकरं देथा’’तिआदिपाळिया (पारा. ३४२) अट्ठकथायं (पारा. अट्ठ. २.३४२) आगतं कप्पियाकप्पियविनिच्छयं सङ्खेपतो दस्सेतुमाह ‘‘पुरिस’’न्तिआदि. कम्मसहायत्थायाति किस्मिञ्चि कम्मे सहायभावाय, कम्मकरणत्थायाति वुत्तं होति. ‘‘इत्थन्नामं कम्मं कातुं पुरिसं लद्धुं वट्टती’’ति याचितुं वट्टतीति अत्थो. यथाह अट्ठकथायं ‘‘कम्मकरणत्थाय ‘पुरिसं देथा’ति याचितुं वट्टती’’ति (पारा. अट्ठ. २.३४२). मूलच्छेज्जवसेनाति सामिकानं आयत्तभावसङ्खातमूलस्स छिन्दनवसेन, अत्तनो आयत्तभावकरणवसेनाति वुत्तं होति.

३८४. अवज्जन्ति वज्जरहितं, निद्दोसन्ति अत्थो. मिगलुद्दकमच्छबन्धकादीनं सककम्मं वज्जकम्मं नाम. तस्मा मिगलुद्दकादयो हत्थकम्मं याचन्तेन पन ‘‘तुम्हाकं हत्थकम्मं देथा’’ति, ‘‘हत्थकम्मं दातब्ब’’न्ति सामञ्ञेन अवत्वा ‘‘इत्थन्नामं कम्मं दातब्ब’’न्ति विसेसेत्वायेव याचितब्बं. लुद्दके वा इतरे वा निक्कम्मे अयाचित्वापि यथारुचि कम्मं कारापेतुं वट्टति. हत्थकम्मयाचनाय सब्बथापि कप्पियभावं दीपेतुं तंतंसिप्पिके याचित्वा महन्तम्पि पासादं कारापेन्तेन ¶ हत्थकम्मे याचिते अत्तनो अनोकासभावं ञत्वा अञ्ञेसं करोन्तानं दातब्बं मूलं दिय्यमानं अधिवासेतुं वट्टतीति वित्थारतो अट्ठकथायं (पारा. अट्ठ. २.३४२ अत्थतोसमानं) वुत्तत्ता कुसलानं अत्थं अपरिहापेन्तेन कप्पियेन सारुप्पेन पयोगेन याचितब्बं. याचितकम्मं कातुं असमत्थेहि करोन्तानं दिय्यमानं हत्थकम्ममूलं कम्मं कारापेत्वा ¶ कम्मकारके दस्सेत्वा दापेतब्बं. एवं याचनाय अनवज्जभावे अट्ठकथागतं कारणं दस्सेतुमाह ‘‘हत्थकम्मम्पी’’तिआदि. पि-सद्दो अवधारणे, पदपूरणे वा. हि-सद्दो हेतुम्हि. यस्मा इदं हत्थकम्मं किञ्चि वत्थु न होति, तस्मा अनवज्जमेव हत्थकम्मं याचितुं पन वट्टतीति.

३८५. ञातकादिकेति ञातकपवारिते. ठपेत्वाति वज्जेत्वा. गोणमायाचमानस्साति अञ्ञातकअप्पवारिते तावकालिकं विना केवलं कम्मकरणत्थाय गोणं याचन्तस्स. तेसुपीति ञातकादीसुपि मूलच्छेज्जेन गोणमायाचनस्स दुक्कटन्ति योजना. ‘‘तावकालिकनयेन सब्बत्थ वट्टती’’ति (पारा. अट्ठ. २.३४२) अट्ठकथावचनतो याव कम्मकरणकालं, ताव नियमेत्वा ञातकअञ्ञातकपवारितअप्पवारिते सब्बेपि याचितुं वट्टति. तथा याचित्वा वा अयाचित्वा वा गहितो चे, रक्खित्वा पटिजग्गित्वा सामिकानं निय्यादेतब्बो, गोणे वा नट्ठे विसाणे वा भिन्ने सामिकेसु असम्पटिच्छन्तेसु भण्डदेय्यं.

३८६. देमाति एत्थ ‘‘तुम्हाक’’न्ति पाठसेसो. ‘‘विहारस्स देमा’ति वुत्ते पन ‘आरामिकानं आचिक्खथ पटिजग्गनत्थाया’ति वत्तब्ब’’न्ति (पारा. अट्ठ. २.३४२) अट्ठकथायं वुत्तं. सकटविनिच्छयस्सापि ¶ गोणविनिच्छयेन समानत्ता तं अवत्वा विसेसमत्तमेव दस्सेतुमाह ‘‘सकटं…पे… वट्टती’’ति. ‘‘तुम्हाकं देमाति वुत्ते’’ति आनेत्वा सम्बन्धितब्बं. यथाह अट्ठकथायं ‘‘तुम्हाकमेव देमाति वुत्ते दारुभण्डं नाम सम्पटिच्छितुं वट्टती’’ति (पारा. अट्ठ. २.३४२).

३८७. कुठारादीसूति एत्थ आदि-सद्देन निखादनं सङ्गण्हाति. अयं नयो वेदितब्बोति पाठसेसो. ‘‘सकटं गोणो विय तावकालिकं अकत्वा अञ्ञातकअप्पवारिते न याचितब्बं, मूलच्छेज्जवसेन अञ्ञातकअप्पवारिते न याचितब्बं, तावकालिकं याचितब्ब’’न्ति विनिच्छयो च ‘‘सकटं…पे… वट्टती’’ति विसेसविनिच्छयो चाति अयं नयो वासिआदीसु च वेदितब्बोति अत्थो. अनज्झावुत्थकन्ति केनचि ‘‘ममेत’’न्ति अपरिग्गहितं, ‘‘रक्खितगोपितट्ठानेयेव हि विञ्ञत्ति नाम वुच्चती’’ति अट्ठकथावचनतो अरक्खितागोपितकन्ति वुत्तं होति. अट्ठकथाय वल्लिआदिविनिच्छयम्पि वत्वा ‘‘अनज्झावुत्थकं पन यं किञ्चि आहरापेतुं वट्टती’’ति (पारा. अट्ठ. २.३४२) वुत्तत्ता सब्बन्ति ¶ इध वुत्तगोणादिकञ्च वक्खमानवल्लिआदिकञ्च गहेतब्बं. इमिना पुब्बे वुत्तविनिच्छयस्स रक्खितगोपितविसयत्तं दीपितं होति. हरापेतुम्पि वट्टतीति एत्थ अपि-सद्देन पगेव केनचि हरित्वा दिन्नन्ति दीपेति.

३८८. वल्लिआदिम्हीति आदि-सद्देन वेत्तमुञ्जतिणमत्तिका सङ्गण्हाति. एत्थ मुञ्जपब्बजतिणं विना गेहच्छादनतिणं तिणं नाम. गरुभण्डप्पहोनकेति ‘‘वल्लि अड्ढबाहुमत्तापी’’तिआदिना नयेन वुत्तलक्खणे गरुभण्डप्पहोनके. परेसं सन्तकेयेवाति अवधारणेन न अनज्झावुत्थके दुक्कटन्ति ब्यतिरेकतो दीपेति.

३८९. पच्चयेसूति ¶ चीवरपिण्डपातसेनासनसङ्खातेसु तीसु पच्चयेसु. एव-कारेन गिलानपच्चयसङ्खाते चतुत्थपच्चये विञ्ञत्ति वट्टतीति दीपेति. विञ्ञत्ति नाम ‘‘आहर, देही’’ति इच्छितपच्चये नामं वत्वा याचना. अट्ठकथायं वुत्तं ‘‘सब्बेन सब्बं न वट्टती’’ति (पारा. अट्ठ. २.३४२) सावधारणत्थं दस्सेतुं ‘‘न च वट्टती’’ति वुत्तत्ता नेव वट्टतीति अत्थो गहेतब्बो.

विञ्ञत्तिया अलब्भमानभावेन समत्ता पच्चयेसु तीसु अनन्तरं सहनिद्दिट्ठपच्चयत्तयतो ततियपच्चयेयेव लब्भमानविसेसं दस्सेतुं ‘‘ततिये परिकथोभासनिमित्तानि च लब्भरे’’ति वुत्तत्ता अवसिट्ठद्वये पन परिकथादयो न लब्भन्तीति वुत्तं होति. अवुत्ते चतुत्थपच्चयेपि समुच्चयत्थेन च-कारेन परिकथादित्तयं लब्भतीति सिद्धत्ता ‘‘तीस्वेवा’’ति एव-कारेन ब्यतिरेकमुखेन विञ्ञत्तिया च अनुञ्ञातत्ता चतुत्थे गिलानपच्चये परिकथोभासनिमित्तकम्मविञ्ञत्तियो वट्टन्तीति सिद्धं. एत्तावता चतुत्थे पच्चये परिकथादयो चत्तारोपि वट्टन्ति, ततियपच्चये विञ्ञत्तिं विना सेसत्तयं वट्टति, पुरिमपच्चयद्वये सब्बम्पि न वट्टतीति वुत्तन्ति दट्ठब्बं.

सेनासनपच्चये परिकथादिकन्ति उपोसथागारादिकरणारहट्ठानं ओलोकेत्वा उपासकानं सुणन्तानं ‘‘इमस्मिं वत ओकासे एवरूपं सेनासनं कातुं वट्टती’’ति वा ‘‘युत्त’’न्ति वा ‘‘अनुरूप’’न्ति वा पवत्ता कथा परिकथा नाम. ‘‘उपासका तुम्हे कत्थ वसथा’’ति पुच्छित्वा ‘‘पासादे भन्ते’’ति वुत्ते ‘‘भिक्खूनं पन उपासका पासादो न वट्टती’’तिआदिना नयेन पवत्ता ¶ कथा ओभासो नाम. उपासकेसु पस्समानेसु भूमियं रज्जुं पसारेत्वा भूमिं भाजेत्वा खाणुके आकोटेत्वा ‘‘किमिदं भन्ते’’ति वुत्ते ¶ ‘‘एत्थ आवासं करोम उपासका’’तिआदिका कथा निमित्तकथा नाम. गिलानपच्चये च इमिना नयेन यथारहं वेदितब्बं. सब्बमेतं अट्ठकथाय (पारा. अट्ठ. २.३४२) वुत्तं.

३९०-३. इदानि कुटिकारस्स भिक्खुनो आपत्तिदस्सनत्थमाह ‘‘अदेसिते’’तिआदि. तं उत्तानत्थमेव. निसेन्तस्साति पासाणे घंसित्वा तिखिणं करोन्तस्स. पाचित्तिया सहाति ‘‘भूतगामपातब्यताय पाचित्तिय’’न्ति (पाचि. ९०) वुत्तपाचित्तियेन सद्धिं.

आपत्तिन्ति पाचित्तियट्ठाने पाचित्तियञ्चेव दुक्कटञ्च इतरत्र सुद्धपयोगदुक्कटञ्चाति आपत्तिं.

या पनाति या कुटि. पठमे दुतियेति एत्थ ‘‘पिण्डेही’’ति करणबहुवचनं विभत्तिवचनविपरिणामवसेन ‘‘पिण्डे’’ति भुम्मेकवचनन्तं कत्वा योजेतब्बं, ‘‘निक्खित्ते’’ति अज्झाहरितब्बं, भावलक्खणे भुम्मं, निक्खित्ते सतीति अत्थो.

३९४. ‘‘सचे अञ्ञस्सा’’ति पदच्छेदो. विप्पकतन्ति आरद्धमनिट्ठितं. ‘‘अनापत्ती’’ति इदं निट्ठिते आपज्जितब्बसङ्घादिसेसाभावं सन्धायाह. पुब्बपयोगमत्तेन हि पाचित्तियदुक्कटानिपि होन्ति, तानि पन देसेतब्बानि. ‘‘तथा’’ति इमिना ‘‘अनापत्ती’’ति आकड्ढति, तेन सङ्घादिसेसापत्तिया अभावतो पुब्बभागे आपन्नानं पाचित्तियदुक्कटानं देसेतब्बता च दीपिता होति. तं कुटिन्ति तं विप्पकतकुटिं.

३९५. अञ्ञं भोजनसालादिं. तथाति अनापत्तिमाह.

३९६. ‘‘करोतो’’ति ¶ इमिना ‘‘कारापयतो’’तिपि लब्भति. उभयेनापि ‘‘क्रियतो’’ति इमस्स कारणं दस्सेति. ‘‘अप्पमाणिक’’न्ति इमिना सङ्घादिसेसस्स अङ्गं दस्सेति.

३९७. तन्ति ¶ ‘‘अप्पमाणिक’’न्ति एवं पच्चामसति. ‘‘क्रियाक्रियतो’’ति इदं कुटिया करणञ्च वत्थुदेसनाय अकरणञ्च उपादाय वुत्तं.

कुटिकारसिक्खापदवण्णना.

३९८. वत्थुं अदेसेत्वाति सम्बन्धो, ‘‘तेन विहारकारकेन भिक्खुना विहारवत्थुं सोधेत्वा सङ्घं उपसङ्कमित्वा’’तिआदिना (पारा. ३६७) पदभाजने आगतनयेन विहारं कारापेन्तेन भिक्खुना विहारवत्थुं सोधेत्वा समतलं कारेत्वा सङ्घं उपसङ्कम्म वुड्ढानं भिक्खूनं पादे वन्दित्वा उक्कुटिकं निसीदित्वा अञ्जलिं पग्गहेत्वा ‘‘अहं भन्ते महल्लकं विहारं कत्तुकामो सस्सामिकं अत्तुद्देसं, सोहं भन्ते सङ्घं विहारवत्थुओलोकनं याचामी’’ति तिक्खत्तुं याचित्वा लद्धे वुड्ढे वा भिक्खू ञत्तिदुतियाय कम्मवाचाय सङ्घेन सम्मते वा भिक्खू नेत्वा कतपरिकम्मं विहारवत्थुं दस्सेत्वा कुटिवत्थुओलोकने विय गतभिक्खूहि ओलोकेत्वा सारम्भादिभावं उपपरिक्खित्वा अनारम्भसपरिक्कमनभावं ञत्वा आगन्त्वा सङ्घस्स आरोचिते पुन तेन सङ्घं उपसङ्कमित्वा वुड्ढानं भिक्खूनं पादे वन्दित्वा उक्कुटिकं निसीदित्वा अञ्जलिं पग्गहेत्वा ‘‘अहं भन्ते महल्लकं विहारं कत्तुकामो सस्सामिकं अत्तुद्देसं, सोहं भन्ते सङ्घं विहारवत्थुदेसनं याचामी’’ति तिक्खत्तुं याचित्वा सङ्घेन ञत्तिदुतियाय कम्मवाचाय विहारवत्थु देसेतब्बं ¶ , तथा अकत्वाति वुत्तं होति. इह सारम्भादि पठमसिक्खापदे वुत्तनयेनेव वेदितब्बं.

महल्लकन्ति ‘‘सस्सामिकभावेन सञ्ञाचिककुटितो महन्तभावो एतस्स अत्थीति महल्लको. यस्मा वा वत्थुं देसापेत्वा पमाणातिक्कमेनापि कातुं वट्टति, तस्मा पमाणमहन्ततायपि महल्लको’’ति (पारा. अट्ठ. २.३६६) अट्ठकथायं वुत्तनयेन महन्तभावेन युत्तन्ति अत्थो. विहारन्ति ‘‘विहारो नाम उल्लित्तो वा होति अवलित्तो वा उल्लित्तावलित्तो वा’’ति (पारा. ३७१) पदभाजने वुत्तप्पकारं सेनासनन्ति अत्थो. विहरन्ति अस्मिन्ति विग्गहो. उल्लित्तादिसरूपं पुरिमसिक्खापदे वुत्तनयमेव. तं विहारं यो करेय्याति योजना. करेय्य वा कारापेय्य वाति पुब्बे वुत्तनयमेव. अत्तवासत्थन्ति अत्तनो वासं पटिच्च, इमिना परस्स वासत्थाय करोति, अनापत्तीति ब्यतिरेकतो विञ्ञायति. ‘‘गरुक’’न्ति एत्थ वत्थुदेसनाय अकारापनेन ‘‘एकोव सङ्घादिसेसो होती’’ति पुब्बे वुत्तविकप्पत्तयं ¶ न गहेतब्बं. इदञ्च वक्खति ‘‘पमाणा…पे… सङ्घादिसेसता’’ति (वि. वि. ३९९ आदयो).

३९९. क्रियासमुट्ठानाभावन्ति पमाणातिक्कमेपि आपत्तिया असम्भवतो किरियासमुट्ठानस्स इध अभावो ञातब्बो. क्रिय…पे… लक्खयेति एत्थ ब्यतिरेकतो अदेसितवत्थुकताय अकिरियासमुट्ठानता अनुञ्ञाता.

महल्लकविहारकथावण्णना.

४०१-३. तेसूति चतुवीसतिया पाराजिकेसु. भिक्खुनो अनुरूपानि एकूनवीसतीति भिक्खुनीनं पटिनियता उब्भजाणुमण्डलिकादयो ¶ चत्तारो तदनुलोमाय विब्भन्तभिक्खुनिया सह पञ्च पाराजिके विना भिक्खुनो अनुरूपा सेसा एकूनवीसति पाराजिका.

इमस्मिं सिक्खापदे पदभाजने ‘‘पाराजिकेन धम्मेनाति चतुन्नं अञ्ञतरेना’’ति (पारा. ३८६) वुत्तनयस्स इध ‘‘एकूनवीसती’’ति वचनं विरुज्झतीति चे? न विरुज्झति. कस्मा? यस्मा पदभाजनं पातिमोक्खुद्देसागतमत्तं गहेत्वा पवत्तं, इदं पन बुद्धानुमतिं गहेत्वा विनयपरियत्तिपवत्तकानं आचरियानं मतं गहेत्वा पवत्तं, तस्मा न विरुज्झतीति गहेतब्बं. आचरियो सब्बपाराजिकानं ‘‘ब्रह्मचरिया चावेय्य’’न्ति (पारा. ३८५) वुत्तअनुद्धंसनस्स एकन्तसाधनत्ता भिक्खुनीनं पटिनियतसानुलोमपाराजिकपञ्चकं विना अवसेसं सब्बं सङ्गण्हि, तेनेव विनयट्ठकथाय गण्ठिपदविवरणे ‘‘चतुन्नं अञ्ञतरेनाति पातिमोक्खुद्देसे एव आगते गहेत्वा वुत्तं, इतरेसं अञ्ञतरेनापि अनुद्धंसेन्तस्स सङ्घादिसेसोवा’’ति वुत्तं. तस्मा ‘‘अनुद्धंसेय्या’’ति (पारा. ३८४) पाठे अधिप्पायं गहेत्वा पवत्तत्ता इमेसं आचरियानं मतं पमाणन्ति गहेतब्बं. ‘‘तेसु अञ्ञतरेना’’ति वक्खमानत्ता ‘‘एकूनवीसती’’ति एत्थ ‘‘यानी’’ति सामत्थिया लब्भति.

अञ्ञतरेन अमूलकेनाति योजना. अमूलकेनाति चोदकस्स दस्सनादीहि चोदनामूलेहि विरहितत्ता अमूलकं, पाराजिकं, तेन. यथाह अट्ठकथायं ‘‘यं पाराजिकं चोदकेन चुदितकम्हि पुग्गले नेव दिट्ठं न सुतं न परिसङ्कितं, इदं एतेसं दस्सनसवनपरिसङ्कासङ्खातानं ¶ मूलानं अभावेन अमूलकं नामा’’ति (पारा. अट्ठ. २.३८५-३८६). एत्थ च मंसचक्खुना वा दिब्बचक्खुना वा दिट्ठं दिट्ठं नाम ¶ . पकतिसोतेन वा दिब्बसोतेन वा सुतं सुतं नाम. चित्तेन परिसङ्कितं परिसङ्कितं नाम. तं तिविधं दिट्ठसुतमुतपरिसङ्कितवसेन.

तत्थ तादिसे कम्मनिये ओकासे मातुगामेन सद्धिं भिक्खुनो अञ्ञथियं पयोगं दिस्वा अञ्ञथा गहेत्वा ‘‘वीतिक्कमनं नु खोयमकासी’’ति गहणं दिट्ठपरिसङ्कितं नाम. कुट्टतिरोहिते भिक्खुम्हि मातुगामस्स सद्दं सुत्वा तत्थ अञ्ञस्स विञ्ञुपुरिसस्स सब्भावं अजानित्वा ‘‘वीतिक्कमनं नु खोयमकासी’’ति एवं गहणं सुतपरिसङ्कितं नाम. विहारपरियन्ते तरुणमातुगामपुरिसानं दिवसं वीतिनामेत्वा गतट्ठाने विप्पकिण्णपुप्फानि ओलोकेत्वा, मंससुरगन्धञ्च घायित्वा ‘‘इदं कस्स कम्म’’न्ति उपपरिक्खन्तेन भिक्खुनो चेतियपूजितमालागन्धस्स पीतारिट्ठस्स भिक्खुनो सरीरगन्धं घायित्वा ‘‘तं एतस्स कम्मं नु खो’’ति किरियमानसंसयो मुतपरिसङ्कितं नाम. एवरूपस्स दिट्ठसुतपरिसङ्कितमूलकस्स अभावतो अमूलकेन पाराजिकेनाति अयमेत्थ सङ्खेपो, वित्थारो पन समन्तपासादिकाय (पारा. अट्ठ. २.३८५-३८६) वुत्तनयेन दट्ठब्बो.

चोदेतीति ‘‘पाराजिकं धम्मं आपन्नोसी’’तिआदिवचनेन सयं चोदेति. चोदापनं पन वक्खति. चावनचेतनो हुत्वाति ‘‘अप्पेव नाम नं इमम्हा ब्रह्मचरिया चावेय्य’’न्ति उप्पन्नेन परं सासना चावेतुकामेन चित्तेन समन्नागतो हुत्वा. ‘‘सुद्धं वा असुद्धं वा’’ति इदं ‘‘चोदेती’’ति इमिना वुत्तचोदनाकिरियाय कम्मनिद्देसो, ‘‘अञ्ञं भिक्खु’’न्ति सेसो, पाराजिकमनापन्नं वा आपन्नं वा अञ्ञं भिक्खुन्ति अत्थो. योति मातिकागतभिक्खु, ‘‘दुट्ठो दोसो अप्पतीतो’’ति इदं अज्झाहरितब्बं, उप्पन्नेन दोसलेसेन ¶ सयं दूसितो, परञ्च दूसेन्तो पीतिसुखादीहि अपगतो यो भिक्खूति अत्थो. वक्खमानेन ‘‘तस्सा’’ति इमिना सम्बन्धो.

‘‘कते ओकासम्ही’’ति पदच्छेदो, ओकासं ‘‘कारापेत्वा’’ति (पारा. ३८९) पाठतो अन्तोनीतहेत्वत्थताय ‘‘कते’’ति ‘‘कारिते’’ति एतस्स परियायो होति, ‘‘ओकासं मे करोहि, अहं तं वत्तुकामो’’ति ओकासे कारापितेति अत्थो. ‘‘अकते ओकासे’’ति पदच्छेदो ¶ , पुब्बे वुत्तोयेवत्थो. दुक्कटापत्तिया सहाति ओकासस्स अकारापितत्ता दुक्कटापत्तिया सद्धिं.

४०४-५. कोण्ठोसीति धुत्तोसि. जेट्ठब्बतिकोसीति कालीदेवीवतनियुत्तोसि. कालीदेवी किर सिरिदेविया जेट्ठा, तस्मा तस्सा वतधरो जेट्ठब्बतिको वुच्चति. तं पन वतं समादियित्वा पूरेन्तो सकलसरीरे मसिं मक्खेत्वा काकपत्तानि मुट्ठियं कत्वा कालीदेविं फलके लिखापेत्वा तं काजकोटियं बन्धित्वा उच्छिट्ठोदकादिअसुचिसन्निचितओलिगल्लं पविसित्वा ‘‘दुस्सीलोसि निस्सीलोसि सीलविरहितोसी’’ति थोमेन्तो विचरतीति.

दुस्सीलत्ता एव हीनज्झासयताय पापधम्मो लामकसभावोसि. पूतिना कम्मेन सीलविपत्तिया अन्तो पविट्ठत्ता अन्तोपूति. छहि द्वारेहि रागादिकिलेसानुस्सवनेन तिन्तत्ता अवस्सुतो. सेसमेत्थ उत्तानत्थमेव. गरुकं निद्दिसेति एत्थ ‘‘कतोकासम्ही’’ति च ‘‘तथेव अकतोकासे, दुक्कटापत्तिया सहा’’ति च आनेत्वा सम्बन्धितब्बं. एवमुत्तरत्रापि.

४०६. सम्मुखाति ¶ चुदितकस्स सम्मुखा, अविदूरेति अत्थो. हत्थमुद्दायाति मुत्तपाणादिवसेन. तं हत्थमुद्दाय कथितं. परोति यं चोदेसि, सो चुदितको परो. भिक्खुनोति चोदकस्स भिक्खुनो.

४०७. सम्मुखे ठत्वाति चुदितकस्स आसन्ने ठत्वा. ‘‘चोदापेन्तस्सा’’ति एतस्स कम्मभावतो परोति इदं उपयोगन्तवसेन सम्बन्धितब्बं. एवमुत्तरत्र. केनचीति अञ्ञेन केनचि पुग्गलेन. तस्स चोदकस्स. ‘‘चोदापेन्तस्सा’’ति पुन वचनं नियमत्थं.

४०८. सोपीति उग्गहापितत्ता चोदनं करोन्तो इतरो पयोज्जकपुग्गलोपि. तेसं द्विन्नम्पीति पयोजकपयोज्जकानं द्विन्नम्पि.

४०९. वुत्तट्ठानं पण्णं वा सन्देसं वा हरन्तो दूतो नाम, सो ‘‘पण्णं वा सासनं वा पेसेत्वा’’ति इमिना सङ्गय्हतीति तस्मिं विसुं अवत्तब्बेपि ‘‘दुत’’न्ति वचनेन निस्सट्ठदूतमाह ¶ . पण्णं वा अदत्वा ‘‘एवञ्च एवञ्च वदा’’ति सासनञ्च अदत्वा ‘‘तं चोदेही’’ति अत्थमत्तमेव दत्वा निस्सट्ठो भिक्खु इध ‘‘निस्सट्ठदूतो’’ति गहेतब्बो.

अथ वा ‘‘दूत’’न्ति इमिना चोदेतुं उग्गहापेत्वा, तमनुग्गहापेत्वा वा निस्सट्ठो भिक्खु दूतोयेव गहेतब्बो. ‘‘पण्ण’’न्ति इमिना पब्बजितस्स वा अपब्बजितस्स वा कस्सचि हत्थे चोदनं लिखित्वा दिन्नपण्णं गहेतब्बं. सासनन्ति ‘‘पाराजिकं आपन्नो’’तिआदिना नयेन वत्वा पेसियमानं सासनं गहेतब्बं. इदं तयम्पि दूरे निसीदित्वा अञ्ञेहि कारापनतो ‘‘चोदापेन्तस्सा’’ति आह. ‘‘पर’’न्ति आनेत्वा सम्बन्धितब्बं. एत्थ ओकासकारापनं नत्थि.

४१०. तथाति ¶ यथा अमूलकेन पाराजिकेन सम्मुखा ओकासे कारिते, अकारिते च, तथा अमूलकेहि सङ्घादिसेसेहीति वुत्तं होति. ‘‘वुत्ते सम्मुखा परे’’ति भुम्मवसेन अधिकतेन योजेतब्बं, चोदेति चोदापेतीति वुत्तं होतीति. पाचित्तियापत्तीति ओकासे कारिते केवला, अकारिते दुक्कटेन सहाति गहेतब्बं. सम्मुखा सेसापत्तीहि परे वुत्ते चावनसञ्ञिनो दुक्कटं होतीति योजना. ओकासाकारापनेनपि दुक्कटमेव होति.

४११. अक्कोसनाधिप्पायस्साति खुंसनाधिप्पायस्स. अकतोकासन्ति अकारितोकासं, ‘‘पर’’न्ति इमिना योजेतब्बं. अत्तनाति चोदकेन, ‘‘सयं अकारितोकास’’न्ति इमिना योजेतब्बं. सह पाचित्तियेनाति ‘‘ओमसवादे पाचित्तिय’’न्ति (पारा. १४) वुत्तपाचित्तियेन सह. वदन्तस्साति चोदेन्तस्स वा चोदापेन्तस्स वा, एत्थ ‘‘सम्मुखा’’ति इदं वक्खमानस्स ‘‘असम्मुखा’’ति एतस्स विपरियायतो लब्भति, च-कारेन कारितोकासपक्खे दुक्कटेन पाचित्तियसम्बन्धी.

४१२. असम्मुखा वदन्तस्साति एत्थ ‘‘अक्कोसनाधिप्पायस्सा’’ति आनेत्वा सम्बन्धितब्बं. ‘‘अकतोकासमत्तना’’ति नानुवत्तति. सत्तहि आपत्तीहीति पाराजिकसङ्घादिसेसथुल्लच्चयपाचित्तियपाटिदेसनीयदुक्कटदुब्भासितसङ्खातेसु सत्तसु आपत्तिक्खन्धेसु येन केनचीति वुत्तं होति. ‘‘तथा’’ति इमिना ‘‘असम्मुखा’’ति इदं सङ्गण्हाति. कम्मन्ति तज्जनीयादिसत्तविधं कम्मं.

४१३. उम्मत्तकादीनन्ति ¶ आदि-सद्देन ‘‘अनापत्ति सुद्धे असुद्धदिट्ठिस्स असुद्धे असुद्धदिट्ठिस्स उम्मत्तकस्स आदिकम्मिकस्सा’’ति ¶ (पारा. ३९०) वुत्ते सङ्गण्हाति. पञ्चङ्गसंयुतन्ति यं चोदेति, तस्स ‘‘उपसम्पन्नो’’ति सङ्ख्यूपगमनं, तस्मिं सुद्धसञ्ञिता, येन पाराजिकेन चोदेति, तस्स दिट्ठादिवसेन अमूलकता, चावनाधिप्पायेन सम्मुखा चोदना, तस्स तङ्खणविजाननन्ति इमेहि पञ्चहि अङ्गेहि युत्तं होति.

४१५. इदन्ति ‘‘सिक्खापद’’न्ति सेसो, ‘‘सिक्खापद’’न्ति च इमिना तप्पटिपादनीया आपत्तियेव गय्हति. तिसमुट्ठानन्ति कायचित्ततो, वाचाचित्ततो, कायवाचाचित्ततोति सचित्तकेहि तीहि समुट्ठानतो तिसमुट्ठानं. तेनेवाह ‘‘सचित्त’’न्ति. पटिघचित्तानं द्विन्नं अञ्ञतरेन सहितत्ता सचित्तकं. तंसम्पयुत्ताय दोमनस्सवेदनाय वसेन दुक्खवेदनं.

दुट्ठदोसकथावण्णना.

४१६. लेसमत्तन्ति ‘‘अञ्ञम्पि वत्थुं लिस्सति सिलिस्सति वोहारमत्तेनेव ईसकं अल्लीयतीति लेसो, जातिआदीनंयेव अञ्ञतरकोट्ठासस्सेतं अधिवचन’’न्ति (पारा. अट्ठ. २.३९१) अट्ठकथाय दस्सितनिब्बचनेसु ‘‘लेसो नाम दस लेसा जातिलेसो नामलेसो’’तिआदिना (पारा. अट्ठ. ३९४) नयेन पदभाजने वुत्तेसु जातिनामगोत्तादीसु दससु लेसेसु अञ्ञतरलेसमत्तन्ति वुत्तं होति.

तत्थ जाति नाम खत्तियब्राह्मणादिजाति. नामं नाम इमस्मिं सिक्खापदे ‘‘छगलको दब्बो मल्लपुत्तो नाम, छगलिका मेत्तिया भिक्खुनी नामा’’ति ठपितं नामं विय चोदकेहि ठपितनामञ्च बुद्धरक्खितादिसकनामञ्चाति दुविधं नामं. गोत्तं नाम गोतममोग्गल्लानादिगोत्तं. लिङ्गं नाम ¶ दीघतादिसण्ठाननानत्तञ्च कण्हतादिवण्णनानत्तञ्चाति इदं दुविधलिङ्गं. आपत्तिलेसो नाम लहुकादिरूपेन ठितपाचित्तियादिआपत्ति. पत्तो नाम लोहपत्तादि. चीवरं नाम पंसुकूलादि. उपज्झायो नाम चुदितकस्स उपज्झायो. आचरियो नाम चुदितकस्स पब्बज्जाचरियादिको. सेनासनं नाम चुदितकस्सेव निवासपासादादिकं.

चोदेय्याति अञ्ञखत्तियजातिकं पुग्गलं पाराजिकं अज्झापज्जन्तं दिस्वा अत्तनो वेरिखत्तियजातिकं ¶ पुग्गलं ‘‘खत्तियो मया दिट्ठो, पाराजिकं धम्मं अज्झापन्नोसी’’तिआदिना नयेन चोदेति. गरुकापत्ति नाम सङ्घादिसेसो. सचे चावनचेतनोति ‘‘अप्पेव नाम नं इमम्हा ब्रह्मचरिया चावेय्य’’न्ति (पारा. ३९२) वुत्तत्ता सचे इमं सासना चावेय्यामीति अधिप्पायो हुत्वा चोदेतीति वुत्तं होति, इमिना ब्यतिरेकवसेन न अञ्ञाधिप्पायोति वुत्तमेव होतीति पुरिमसिक्खापदट्ठकथायं दस्सितेसु ‘‘चावनाधिप्पायो अक्कोसाधिप्पायो’’ति (पारा. अट्ठ. २.३८९) एवमादिनानप्पकाराधिप्पायेसु आपत्तिया अङ्गभूतं चावनाधिप्पायं दस्सेत्वा सेसाधिप्पाये पटिक्खिपति.

४१७. तथासञ्ञीति अयं पाराजिकमज्झापन्नोयेवाति तथासञ्ञी. ‘‘चोदेति वा चोदापेति वा’’ति वुत्तत्ता ‘‘तथासञ्ञी’’ति इदं ‘‘चोदापेती’’ति इमिनापि योजेतब्बं. सेसोति एत्थ ‘‘पाराजिकानि वुत्तानी’’तिआदिं कत्वा ‘‘सचित्तं दुक्खवेदन’’न्ति परियन्तं कत्वा दस्सितपठमसिक्खापदविनिच्छयसङ्गाहककथापबन्धेन वुत्तसब्बविनिच्छयेसु तंसिक्खापदनियतं ‘‘अमूलकेना’’ति इदञ्च इमस्मिं सिक्खापदे ‘‘भिक्खुमन्तिमवत्थुना…पे… अनापत्ति सिया’’ति वुत्तमत्थञ्च ¶ ठपेत्वा अवसिट्ठसब्बविनिच्छयोति अत्थो. अनन्तरसमो मतो हेट्ठा अनन्तरं वुत्तसिक्खापदेनेव सदिसोति वेदितब्बो.

दुतियदुट्ठदोसकथावण्णना.

४१८. समग्गस्स सङ्घस्साति ‘‘समग्गो नाम सङ्घो समानसंवासको समानसीमायं ठितो’’ति पदभाजने वुत्तत्ता चित्तेन च कायेन च एकीभूतस्स सङ्घस्साति वुत्तं होति. च-कारो पदपूरणो, एव-कारत्थो वा, नसमग्गस्साति ब्यतिरेकत्थो वेदितब्बो. भेदत्थं वायमेय्याति ‘‘इमे कथं कदा भिज्जिस्सन्ती’’ति रत्तिन्दिवं चिन्तेत्वा उपायं गवेसित्वा पक्खपरियेसनादिं करेय्याति अत्थो. वुत्तञ्हि पाळियं ‘‘भेदाय परक्कमेय्याति कथं इमे नाना अस्सु विना अस्सु वग्गा अस्सूति पक्खं परियेसति गणं बन्धती’’ति (पारा. ४१२).

भेदहेतुन्ति ‘‘इधुपालि भिक्खु अधम्मं ‘धम्मो’ति दीपेति, धम्मं ‘अधम्मो’ति दीपेती’’तिआदिना (परि. ४५९) नयेन खन्धके वुत्तं अट्ठारसभेदकरवत्थुसङ्खातं सङ्घभेदकारणमाह ¶ . इदमेव हि पदभाजने वुत्तं ‘‘भेदनसंवत्तनिकं वा अधिकरणन्ति अट्ठारसभेदकरवत्थूनी’’ति. गहेत्वाति पग्गय्ह. तिट्ठेय्याति नप्पटिनिस्सज्जेय्य. परिदीपयन्ति एत्थ परिदीपेन्तो, न पटिनिस्सज्जन्तोति अत्थो. यथाह ‘‘तिट्ठेय्याति न पटिनिस्सज्जेय्या’’ति.

४१९. भिक्खूहीति तस्स सङ्घभेदकस्स परक्कमनं पस्सन्तेहि वा दूरे चे, ठितं पवत्तिं सुणन्तेहि वा लज्जीहि सुपेसलेहि सेसभिक्खूहि. वुत्तञ्हेतं ‘‘भिक्खूहीति अञ्ञेहि भिक्खूहि. ये पस्सन्ति ये सुणन्ति, तेहि वत्तब्बो’’ति ¶ (पारा. ४१२). तस्स वदन्तेहि एवं वत्तब्बन्ति वचनाकारदस्सनत्थमाह ‘‘मायस्मा समग्गस्स सङ्घस्स भेदाय परक्कमि, भेदनसंवत्तनिकं वा अधिकरणं समादाय पग्गय्ह अट्ठासि, समेतायस्मा सङ्घेन, समग्गो हि सङ्घो सम्मोदमानो अविवदमानो एकुद्देसो फासु विहरती’’ति (पारा. ४११) पाठं, तं एकदेससङ्गहवसेन उपलक्खेतुमाह ‘‘भेदत्थं…पे… भेदकारण’’न्ति. इति वत्तब्बोति योजना.

४२०. वुच्चमानो हीति एत्थ हि-सद्दो अपि-सद्दत्थो. ‘‘पी’’ति वा पाठो, तेहि लज्जिभिक्खूहि ‘‘मायस्मा’’तिआदिना नयेन विसुं तिक्खत्तुं वुत्तोपीति अत्थो. निस्सज्जेय्य न चेव नन्ति तं भेदाय परक्कमनं अप्पटिनिस्सज्जनपच्चया दुक्कटापत्तिं आपज्जित्वापि न विस्सज्जेय्याति अत्थो. वुत्तञ्हेतं ‘‘नो चे पटिनिस्सज्जति, आपत्ति दुक्कटस्सा’’ति (पारा. ४१२). तथा हि अप्पटिनिस्सज्जन्तो हत्थेसु, पादेसु च गहेत्वा सङ्घमज्झे आनेत्वा तथेव तिक्खत्तुं वुत्तोपि तं अविस्सज्जेत्वा दुक्कटापत्तिं आपन्नोति इमिना च सङ्गहितो. वुत्तञ्हेतं भगवता ‘‘सो भिक्खु सङ्घमज्झम्पि आकड्ढित्वा वत्तब्बो ‘मायस्मा…पे… फासु विहरती’ति. दुतियम्पि वत्तब्बो. ततियम्पि वत्तब्बो. सचे पटिनिस्सज्जति, इच्चेतंकुसलं. नो चे पटिनिस्सज्जति, आपत्ति दुक्कटस्सा’’ति. इदं उभयत्थ दुक्कटं सामञ्ञेन वक्खति ‘‘तिक्खत्तुं पन वुत्तस्स, अपरिच्चजतोपि त’’न्ति.

समनुभासितब्बोति एत्थ ‘‘सो भिक्खू’’ति आनेत्वा सम्बन्धितब्बं, ‘‘यावततिय’’न्ति सेसो, यथाह ‘‘सो भिक्खु ¶ भिक्खूहि यावततियं समनुभासितब्बो’’ति (पारा. ४११), तथा सङ्घमज्झेपि तिक्खत्तुं वुच्चमानोपि नो विस्सज्जेत्वा दुक्कटं आपन्नो सो आधानग्गाही भिक्खु ¶ सङ्घेन तिक्खत्तुं वुत्तं कम्मवाचं वत्वा समनुभासितब्बोति अत्थो. यथाह अट्ठकथायं ‘‘यावततियं समनुभासितब्बोति याव ततियं समनुभासनं, ताव समनुभासितब्बो, तीहि समनुभासनकम्मवाचाहि कम्मं कातब्ब’’न्ति (पारा. अट्ठ. २.४११). तन्ति भेदाय परक्कमनं, भेदनसंवत्तनिकं अधिकरणं पग्गहेत्वा ठानञ्च. अच्चजन्ति, ञत्तिचतुत्थाय कम्मवाचाय वुच्चमानायपि अच्चजन्तो. गरुकं फुसेति ततियाय कम्मवाचाय ‘‘सो भासेय्या’’ति य्यकारप्पत्ताय सङ्घादिसेसं आपज्जति.

४२१. सङ्घस्स भेदाय परक्कमन्तं भिक्खुं दिस्वा, सुत्वा, ञत्वा च अवदन्तस्स भिक्खुनो दुक्कटन्ति योजना.

४२२. कीवदूरे वसन्तेहि सुत्वा गन्त्वा वत्तब्बन्ति आह ‘‘गन्त्वा’’तिआदि. अद्धयोजनमेव अद्धयोजनता, ततो अधिकं वा. गिलानं पटिच्च अद्धयोजनं वुत्तं, इतरं पटिच्च ‘‘अधिकं दूरम्पि पन गन्तब्ब’’न्ति वुत्तं. तेनेवाह ‘‘सचे सक्कोती’’ति. तावदेति तदा एव, अचिरायित्वाति अत्थो.

४२३. तिक्खत्तुं पन वुत्तस्साति ‘‘मायस्मा’’तिआदिना नयेन विसुञ्च सङ्घमज्झे च तिक्खत्तुं वुत्तस्सापि अपरिच्चजन्तस्स. तं भेदाय परक्कमादिकं. भेदप्पवत्तिया सुतक्खणे सयं अगन्त्वा पण्णं वा सासनं वा पेसेन्तस्स आपत्तिं दस्सेतुमाह ‘‘दूतं वा’’तिआदि. यथाह अट्ठकथायं ¶ (पारा. अट्ठ. २.४११) ‘‘दूतं वा पण्णं वा पेसेत्वा वदतोपि आपत्तिमोक्खो नत्थी’’तिआदि.

४२५. य्यकारे पन सम्पत्तेति ‘‘यस्स नक्खमति, सो भासेय्या’’ति (पारा. ४१३) ततियकम्मवाचाय अन्ते य्यकारे उच्चारिते. पस्सम्भन्तीति पटिप्पस्सम्भन्ति, वूपसमन्तीति अत्थो. दुक्कटादयोति ञत्तिया दुक्कटं, द्वीहि कम्मवाचाहि द्वे च थुल्लच्चया. यथाह ‘‘सङ्घादिसेसं अज्झापज्जन्तस्स ञत्तिया दुक्कटं, द्वीहि कम्मवाचाहि थुल्लच्चया पटिप्पस्सम्भन्ती’’ति (पारा. ४१४). तस्मा ञत्तिया पुब्बे बहि च सङ्घमज्झे च तिक्खत्तुं वुत्तेपि अप्पटिनिस्सज्जनेन आपन्नानि द्वे दुक्कटानि देसेतब्बानीति विञ्ञायति.

इमिस्सा ¶ कम्मवाचाय किं आपन्नापत्तियो पटिप्पस्सम्भन्ति, उदाहु अनापन्नाति विचारणाय ‘‘यो अवसाने पटिनिस्सज्जिस्सति, सो ता आपत्तियो न आपज्जति, तस्मा अनापन्ना पटिप्पस्सम्भन्ती’’ति (पारा. अट्ठ. २.४१४) महासुमत्थेरस्स वादं ‘‘किमनापन्नानं पटिप्पस्सद्धिया’’ति पटिबाहित्वा ‘‘लिङ्गपरिवत्तने असाधारणापत्तियो विय आपन्ना पटिप्पस्सम्भन्ती’’ति महापदुमत्थेरस्स वादो ठितो.

४२६. अकते पन कम्मस्मिन्ति यथावुत्तसमनुभासनकम्मे अकते. अपरिच्चजतोपि चाति तं सङ्घभेदाय परक्कमनं अपरिच्चजन्तस्सापि. ‘‘सङ्घादिसेसेना’’ति इमिना कम्मं अकत्वा सङ्घमज्झे च बहि च तिक्खत्तुं वुच्चमानस्स अप्पटिनिस्सज्जनेन दुक्कटं पन होतीति ब्यतिरेकतोव दस्सेति.

४२७. पुब्बे वाति ञत्तिया पुब्बे विसुं, सङ्घमज्झे वा तिक्खत्तुं वुच्चमानेपि. तङ्खणेपीति ञत्तिक्खणे वा. ञत्तिया ¶ अनिट्ठितायपि पच्छापि, इमस्स अवधिं दस्सेति ‘‘असम्पत्ते य्यकारस्मि’’न्ति. पटिनिस्सज्जतोपि च तस्स सङ्घादिसेसेन अनापत्ति पकासिताति पठमगाथाय पच्छिमड्ढं इधानेत्वा योजेतब्बं.

४२८. एत्तावता ‘‘अनापत्ति असमनुभासन्तस्स पटिनिस्सज्जन्तस्स उम्मत्तकस्स खित्तचित्तस्स वेदनाट्टस्स आदिकम्मिकस्सा’’ति (पारा. ४१६) पाठे ‘‘पटिनिस्सज्जन्तस्सा’’ति पदेन गहितेसु ‘‘ञत्तितो’’तिआदीसु विनिच्छयं दस्सेत्वा तं निगमेतुं ‘‘पटिनिस्सज्जतो वापि त’’न्ति आह. निगमनत्थजोतको एवं-सद्दो सामत्थिया लब्भति, एवं ‘‘ञत्तितो’’तिआदिना यथावुत्तनयेन पटिनिस्सज्जन्तस्स वाति अत्थो. तन्ति सङ्घभेदप्पयोगं. असमनुभासतो वाति असमनुभासियमानस्स. ‘‘असमनुभासियतो’’ति वत्तब्बे विकरणपच्चयलोपेन ‘‘असमनुभासतो’’ति वुत्तन्ति दट्ठब्बं. यथाह अट्ठकथायं ‘‘असमनुभासन्तस्साति असमनुभासियमानस्सा’’ति (पारा. अट्ठ. २.४१६). ‘‘सङ्घादिसेसेन अनापत्ति पकासिता’’ति अनुवत्तमानत्ता इच्छितत्थे सिद्धेपि पुन ‘‘अनापत्ति पकासिता’’ति वचने पुनरुत्तता आपज्जतीति? नापज्जति, पदावुत्ति नाम अलंकारो होतीति.

४२९. इमस्स ¶ सिक्खापदस्स अत्थुप्पत्तियं सङ्घभेदत्थं पञ्च वत्थूनि याचन्तेन देवदत्तेन ‘‘साधु भन्ते भिक्खू यावजीवं मच्छमंसं न खादेय्युं, यो मच्छमंसं खादेय्य, वज्जं नं फुसेय्या’’ति (पारा. ४०९) वुत्ते ‘‘अलं देवदत्त मया तिकोटिपरिसुद्धं मच्छमंसं अनुञ्ञातं अदिट्ठं असुतं अपरिसङ्कित’’न्ति (पारा. ४०९) अनुञ्ञातेसु मच्छमंसेसु कप्पियाकप्पियविनिच्छयं पुब्बे अनोकासाभावेन अवत्वा पकतं सिक्खापदविनिच्छयं निट्ठापेत्वा इदानि पत्तावसेसं तं दस्सेतुं ‘‘यञ्ही’’तिआदि आरद्धं ¶ . ‘‘तं तस्सा’’ति वक्खमानत्ता ‘‘य’’न्ति इदं ‘‘भिक्खु’’न्ति इमिना च ‘‘मच्छमंस’’न्ति एतेन च योजेतब्बं. मच्छन्ति ओदकं. मंसन्ति थलजानं मंसं. निब्बेमतिकोति ‘‘मं उद्दिस्स कत’’न्ति वा ‘‘सङ्घं उद्दिस्स कत’’न्ति वा उप्पन्नाय विमतिया विरहितो.

४३०. समुद्दिस्स कतन्ति सङ्घं वा अत्तानं वा उद्दिस्स कतं. ‘‘ञत्वा’’ति इमिना अजानित्वा भुञ्जन्तस्स अनापत्तिभावमाह.

४३१. हत्थीनं अस्सानं अच्छानं मनुस्सानं अहीनं कुक्कुरानं दीपीनं सीहानं ब्यग्घानं तरच्छानं मंसं अकप्पियं होतीति योजना.

४३२. सचित्तकता आपत्तियायेव युज्जति, इध पन तंहेतुकं मंसमेव हेतुम्हि फलूपचारेन सचित्तकन्ति गहितं. एत्थ चित्तं नाम अत्तानं वा सङ्घं वा उद्दिस्स कतभावजाननचित्तं. सेसन्ति अनुद्दिस्सकतं अकप्पियमंसं. अचित्तकन्ति वुत्तनयमेव.

४३३. पुच्छित्वायेवाति अकप्पियमंसपरिहारत्थं दससु मंसेसु नामञ्च उद्दिस्सकतस्स परिहारत्थं उभयस्सापि पटिलद्धाकारञ्च पुच्छित्वायेवाति अत्थो. ओदकेसु मच्छेसु अकप्पियाभावतो लद्धाकारोव ञातब्बो. मंसे दिट्ठमत्तेयेव ‘‘इदं असुकमंस’’न्ति जानन्ति चे, अपुच्छितेपि दोसो नत्थि. दायकेसु मंसस्साभावे लद्धनियामे अपुच्छितेपि दोसो नत्थि. यथा वा तथा वा विमतिया उप्पन्नाय अप्पटिग्गाहेत्वा निसिन्ने ‘‘कस्मा न पटिग्गण्हथा’’ति पुच्छिते विमतिया उप्पन्नाकारं वत्वा ‘‘मयं तुम्हे वा इतरे भिक्खू वा उद्दिस्स न करिम्हा’’ति ¶ वत्वा ‘‘अम्हाकमेव सन्धाय कतं, पण्णाकारत्थाय कतं, अतिथीनं वा अत्थाय कत’’न्तिआदिना ¶ अत्तना लद्धप्पकारं वत्वा ‘‘संसयं अकत्वा पटिग्गहेतब्ब’’न्ति वदेय्युं चे, पटिग्गहेतुं वट्टतीति सब्बमिदं अट्ठकथाय वुत्तं.

भिक्खूनं एतं वत्तन्ति योजना. वत्तट्ठाति सम्मासम्बुद्धेन महाकरुणाय देसितं पातिमोक्खसंवरसीलं विसोधेत्वा पटिपज्जने पतिट्ठिता. ‘‘विनयञ्ञुनो’’ति इमिना विनयं अजानित्वा उपदेसप्पमाणेनेव वत्तं पूरेन्तेहि वत्तस्स विरोधोपि सियाति ते निवत्तेति. ‘‘वत्तट्ठा’’ति विसेसनेन विनयं ञत्वापि अपूरणे निवत्तेति. उभयेनपि अत्तना वुत्तविनिच्छयस्स परिसुद्धभावं दीपेति.

४३४. इदं समनुभासनन्ति यथावुत्तसिक्खापदमाह. समनुभासनेन साधेतब्बा आपत्ति समनुभासना कारणूपचारेन. अञ्ञथा एकसमुट्ठानादिभावो न युज्जति. एकसमुट्ठानं कायवाचाचित्तसङ्खातं एकं समुट्ठानं एतस्साति कत्वा. कायकम्मन्ति हत्थमुद्दावसेन कायेन कातब्बस्स पटिनिस्सज्जनस्स अकतत्ता कायकम्मं. वचीकम्मन्ति वचसा कातब्बस्स अकतत्ता वचीकम्मं. अक्रियन्ति यथावुत्तनयेन ‘‘सङ्घभेदोपक्कमनिवारणाय परक्कमनं पटिनिस्सज्जामी’’ति कायविकारेन वा वचीभेदेन वा अविञ्ञापनतो अकिरियं नाम होतीति वुत्तं होति.

सङ्घभेदकथावण्णना.

४३५. किञ्चिपि वत्तब्बन्ति ‘‘एको वा द्वे वा तयो वा’ति वुत्तसङ्घभेदानुवत्तकभिक्खुं पस्सन्तेहि सुणन्तेहि लज्जिभिक्खूहि ¶ विसुञ्च सङ्घमज्झे च नेत्वा तिक्खत्तुंयेव सङ्घभेदानुवत्तनस्स अकत्तब्बतं वत्वा ततो अनोरमन्तानं ञत्तिचतुत्थाय कम्मवाचाय समनुभासनकम्मं कातब्ब’’न्ति इदञ्च ‘‘ततियानुस्सावनाय य्य-कारप्पत्ताय आपज्जनकसङ्घादिसेसतो पुब्बे आपन्ना दुक्कटथुल्लच्चया पटिप्पस्सम्भन्ती’’ति इदञ्च अनापत्तिपकारो चाति इमं साधारणविनिच्छयं सन्धायाह. वचनप्पकारभेदो पन अत्थेव, सो सङ्खेपतो मातिकाय (पारा. ४१८-४१९) वित्थारतो पदभाजने (पारा. ४१८-४१९) आगतनयेन वत्तब्बो. अस्साति दुतियसङ्घभेदसिक्खापदस्स. ‘‘समुट्ठाना…पे… मता’’ति इमिना साधारणविनिच्छयो अतिदिट्ठोति दट्ठब्बं.

दुतियसङ्घभेदकथावण्णना.

४३६. उद्देसपरियापन्नेति ¶ एत्थ ‘‘सिक्खापदे’’ति सेसो, निदानपाराजिकसङ्घादिसेसअनियतवित्थारसङ्खाते पञ्चविधउद्देसलक्खणपातिमोक्खे अन्तोगधसिक्खापदविसयेति अत्थो. ‘‘उद्देसपरियापन्ने सिक्खापदे’’ति इमिना ‘‘अवचनीयमत्तानं करोती’’ति इमस्स विसयं दस्सेति. भिक्खु दुब्बचजातिकोति एत्थ ‘‘यो’’ति अज्झाहारो. ‘‘दुब्बचजातिकोति दुब्बचसभावो, वत्तुं असक्कुणेय्योति अत्थो’’ति (पारा. अट्ठ. २.४२५-४२६) अट्ठकथाय वुत्तदोवचस्सताय हेतुभूतपापिच्छतादीहि एकूनवीसतिया धम्मेहि समन्नागतो हुत्वा अत्तनि वुत्तं अनुसिट्ठिं सादरमग्गहणेन नासनता दोवचस्ससभावोति अत्थो. वुत्तञ्हेतं पदभाजने ‘‘दुब्बचजातिको होतीति दुब्बचो होति दोवचस्सकरणेहि धम्मेहि समन्नागतो अक्खमो अप्पदक्खिणग्गाही अनुसासनि’’न्ति (पारा. ४२६).

अवचनीयमत्तानं ¶ करोतीति ‘‘मा मं आयस्मन्तो किञ्चि अवचुत्थ कल्याणं वा पापकं वा, अहम्पायस्मन्ते न किञ्चि वक्खामि कल्याणं वा पापकं वा, विरमथायस्मन्तो मम वचनाया’’ति (पारा. ४२५) वुत्तनयेन अत्तानं अवचनीयं करोति. गरुकं सियाति एत्थ ‘‘तस्सा’’ति इदं अज्झाहारनयसम्बन्धेन लब्भति. तत्रायं योजना – दुब्बचजातिको यो भिक्खु उद्देसपरियापन्ने सिक्खापदे अत्तानं अवचनीयं करोति, तस्स गरुकं सियाति.

किं वुत्तं होति? यो भिक्खु अत्तनो दोवचस्सतं पस्सन्तेहि, सुणन्तेहि च लज्जिभिक्खूहि ‘‘मा आयस्मा अत्तानं अवचनीयं अकासि…पे… अञ्ञमञ्ञवुट्ठापनेना’’ति (पारा. ४२५) वुत्तनयेन तिक्खत्तुं वुत्तोपि दुक्कटं आपज्जित्वापि न विस्सज्जेति, ‘‘सो भिक्खु सङ्घमज्झम्पि आकड्ढित्वा वत्तब्बो’’ति (पारा. ४२६) वुत्तत्ता हत्थे गहेत्वा आकड्ढित्वापि सङ्घमज्झं नेत्वा तथेव तिक्खत्तुं वुत्ते दुक्कटं आपज्जित्वापि न विस्सज्जेति, तस्स दुब्बचजातिकस्स ञत्तिचतुत्थाय कम्मवाचाय करियमाने समनुभासनकम्मे ततियाय कम्मवाचाय य्यकारप्पत्ताय पुब्बे वुत्तनयेनेव ञत्तिया दुक्कटं, द्वीहि कम्मवाचाहि थुल्लच्चये च पटिप्पस्सम्भयमानो सङ्घादिसेसो होतीति वुत्तं होति.

४३७. दुब्बचेति एत्थ ‘‘सिक्खापदे’’ति सेसो, तथा सङ्घभेदकवण्णनेति एत्थापि. सङ्घभेदो एव सङ्घभेदको, तं वण्णेति कथेतीति सङ्घभेदकवण्णनं, किं तं? सिक्खापदं, तञ्च ¶ पठममेव सङ्घभेदकसिक्खापदं गहेतब्बं, तस्मिं वुत्तनयेनाति योजना. यथाह अट्ठकथायं ‘‘समुट्ठानादीनि पठमसङ्घभेदसदिसानेवा’’ति (पारा. अट्ठ. २.४२५-४२६). ‘‘सब्बो विनिच्छयो’’ति एतेन इध दस्सितेन ¶ ‘‘गरुकं सिया’’ति एतेन सङ्गहितं सङ्घादिसेसावसानविनिच्छयं वज्जेत्वा ‘‘अकते पना’’तिआदिगाथात्तयेन वुत्तअनापत्तिप्पकारे च ‘‘इदमेकसमुट्ठान’’न्तिआदिगाथाय वुत्तसमुट्ठानादिके च अतिदिसति.

दुब्बचकथावण्णना.

४३८. यो कुलदूसको भिक्खु, सो छन्दगामितादीहि पापेन्तो भिक्खुहि कम्मे करियमाने तं छन्दगामितादीहि पापनं अच्चजन्तो गरुकं फुसे सङ्घादिसेसं आपज्जतीति योजना. ‘‘कुलदूसकोति कुलानि दूसेति पुप्फेन वा फलेन वा चुण्णेन वा मत्तिकाय वा दन्तकट्ठेन वा वेळुया वा वेज्जिकाय वा जङ्घपेसनिकेन वा’’ति (पारा. ४३७) वचनतो सद्धासम्पन्नकुलानि लाभं निस्साय पुप्फदानादीहि सङ्गण्हित्वा तथा अकरोन्तेसु लज्जिभिक्खूसु कुलानं सद्धादूसनतो कुलदूसको, भिक्खु.

छन्दगामितादीहि पापेन्तोति कुलदूसनकम्मं करोन्तं दिस्वा वा सुत्वा वा अवचनतो आपज्जितब्बदुक्कटतो मुच्चनत्थाय ‘‘आयस्मा खो…पे… अलन्ते इध वासेना’’ति वदन्ते लज्जी पेसले भिक्खू ‘‘छन्दगामिनो च भिक्खू…पे… एकच्चं न पब्बाजेन्ती’’ति छन्दगामितादीहि चतूहि अगतिगमनेहि योजेन्तोति अत्थो. कम्मे करियमानेति यथावुत्तनयेन अत्तानं गरहन्तानं भिक्खूनं करियमानं अक्कोसनञ्च परिभासनञ्च ये पस्सन्ति, ये च सुणन्ति, तेहि ‘‘मायस्मा एवं अवच, न च भिक्खू छन्दगामिनो…पे… अलन्ते इध वासेना’’ति तिक्खत्तुं वुच्चमानोपि दुक्कटं आपज्जित्वापि अप्पटिनिस्सज्जन्तं हत्थे गहेत्वा आकड्ढित्वा सङ्घमज्झं आनेत्वा ‘‘मायस्मा एवं अवचा’’तिआदिना नयेनेव ¶ पुनपि तिक्खत्तुं वुत्ते दुक्कटं आपज्जित्वापि अप्पटिनिस्सज्जन्तस्स ञत्तिचतुत्थाय कम्मवाचाय समनुभासनकम्मे करियमानेति वुत्तं होति. गरुकं फुसेति ञत्तिया दुक्कटं, द्वीहि कम्मवाचाहि थुल्लच्चये च पटिप्पस्सम्भेन्तो ततियकम्मवाचाय अन्ते य्यकारे सम्पत्ते सङ्घादिसेसं आपज्जतीति वुत्तं होति.

४३९-४०. ‘‘कुलानि ¶ दूसेति पुप्फेन वा’’तिआदिना (पारा. ४३७) नयेन वुत्तकुलदूसनोपकरणभूतचुण्णपण्णादीसु विनिच्छयं दस्सेतुमाह ‘‘चुण्ण’’न्तिआदि. चुण्णन्ति सिरीसपण्णादिचुण्णं. पण्णन्ति तम्बूलपण्णतालपण्णादिखादितब्बाखादितब्बपण्णं. फलन्ति तालपनसादिफलं. पुप्फन्ति चम्पकादिपुप्फं. वेळुन्ति अन्दोळिकापाटं किरण्डादिकं वेळुं. कट्ठन्ति गेहदारुं, इन्धनञ्च. मत्तिकन्ति पाकतिकं, पञ्चवण्णं वा मत्तिकं.

अत्तनो सन्तकं, तावकालिकादिवसेन गहितं वा चुण्णं…पे… मत्तिकं कुलसङ्गहणत्थाय ददतो कुलदूसनदुक्कटं होतीति सम्बन्धो. थेय्याति चोरिका. ‘‘ददतो’’ति इदं सामिवचनं ‘‘कातब्बो’’ति पच्चत्तवचनन्तं विसेसितब्बमपेक्खित्वा ‘‘ददन्तो’’ति विभत्तिविपरिणामेन पच्चत्तवचनन्तं अनुवत्तेतब्बं. कातब्बोति एत्थ कारेतब्बोति अत्थो. इमिना सङ्घसन्तकं, गणसन्तकं, अञ्ञपुग्गलसन्तकञ्च चुण्णादिं कुलसङ्गहत्थं चोरिकाय देन्तो भण्डग्घेन कारेतब्बोति इमं विनिच्छयं दस्सेति. सङ्घञ्ञसन्तकेति सङ्घञ्ञसन्तकचुण्णादिकेति अत्थो. एत्थ अञ्ञ-सद्देन गणपुग्गलानं गहणं.

४४१. सङ्घिकं गरुभण्डं वाति सङ्घसन्तकं गरुभण्डपहोनकं वा पण्णादिकं. सेनासननियामितन्ति ‘‘एत्तका फलरुक्खादयो सेनासने नवकम्मत्थाया’’ति एवं नियमितं ¶ वा. इस्सरवताये वाति एवकारेन ‘‘थेय्या’’ति इदं निवत्तितं.

४४२. हरित्वा वाति अत्तनायेव हरित्वा वा. ‘‘पुप्फं देन्तस्सा’’ति इमिना सम्बन्धो. एस नयो उपरिपि. हरापेत्वा वाति अञ्ञस्स हत्थे पेसेत्वा वा. पक्कोसित्वा वाति आमन्तेत्वा वा पक्कोसापेत्वा वाति उपलक्खणतो लब्भति. आगतस्स वाति अत्तना एव आगतस्स वा. ‘‘कुलसङ्गहणत्थाया’’ति वचनेन ‘‘एवरूपे अधिप्पाये असति वट्टती’’ति वुत्तत्ता ‘‘चेतियं पूजं करोन्तापि ‘पूजेस्सामा’ति पुप्फानि गहेत्वा गच्छन्तापि तत्थ तत्थ सम्पत्तानं चेतियपूजनत्थाय देन्ति, एतम्पि पुप्फदानं नाम न होती’’तिआदिकं (पारा. अट्ठ. २.४३६-४३७) अट्ठकथागतं सब्बं विनिच्छयं दस्सितं होति.

४४३. एवं उस्सग्गं दस्सेत्वा अपवादं दस्सेतुमाह ‘‘हरित्वा वा’’तिआदि. ‘‘हरापेत्वा’’ति इमिना योजेतब्बस्स वा-सद्दस्स अवुत्तसम्पिण्डनत्थताय ‘‘पक्कोसित्वा वा पक्कोसापेत्वा ¶ वा, आगतानं वा’’ति च सङ्गय्हति. आगतस्सेवाति एवकारेन हरित्वा दानादिं निवत्तेति.

४४४. तञ्चाति मातापितुआदीनं तं पुप्फदानञ्च. वत्थुपूजत्थन्ति रतनत्तयपूजनत्थं. न पनञ्ञथाति अञ्ञेन पकारेन दातुं न वट्टति. येन पकारेन दातुं न वट्टति, कोयं पकारोति आह ‘‘सिवादी’’तिआदि. सिवादिपूजनत्थन्ति महिस्सरादिदेवतापूजनत्थञ्च. मण्डनत्थन्ति पिळन्धनत्थं. एवं अदातब्बप्पकारनियमनेन ‘‘इमं विक्किणित्वा जीविकं कप्पेस्सन्ती’’ति मातापितुआदीनं दातुं वट्टतीति वदन्ति.

४४५. ‘‘फलादीसु ¶ …पे… विनिच्छयो’’ति इमिना ‘‘हरित्वा वा हरापेत्वा वा’’तिआदिना पुब्बे वुत्तविनिच्छयो फलपण्णादीसु सब्बत्थ समानोति दस्सेति.

४४६. ‘‘पुप्फादिभाजने’’ति पुप्फफलादीनं भाजनकाले. सम्मतेनाति पुप्फादिभाजनत्थं खन्धके वुत्तनयेन सङ्घेन सम्मतेन भिक्खुना. अस्साति भाजनट्ठानं आगतस्स. इतरेनाति सङ्घसम्मुतिं विना पुप्फादीनि भाजापेन्तेन. ञापेत्वा दातब्बन्ति सब्बं सङ्घं जानापेत्वा दातब्बं.

४४७. उपड्ढभावन्ति एकेन भिक्खुना लद्धब्बभागतो उपड्ढं. ‘‘थोकं थोक’’न्ति इमिना उपड्ढतोपि अप्पतरं गहितं.

४४८. परिब्बयविहीनस्साति तण्डुलादिजीवितवुत्तिवयमूलरहितस्स. सम्पत्तिस्सरियस्सापीति अत्तनो समीपमुपगतस्स इस्सरस्स च. ‘‘दातब्बं तु सकं फल’’न्ति इमिना सम्बन्धो. ‘‘परिब्बयविहीनानं, दातुं सपरसन्तक’’न्ति खुद्दसिक्खाय आगतं, इध ‘‘सकं फल’’न्ति वुत्तं. तत्थ परवचनेन विस्सासिकानं गहणं, इध पन विस्सासग्गाहेन गहेत्वा दीयमानम्पि ससन्तकमेवाति ‘‘सक’’न्ति वुत्तन्ति गहेतब्बं.

४४९-५०. यत्र सङ्घारामे सङ्घेन फलरुक्खपरिच्छेदं कत्वा कतिका कताति योजना, ‘‘आगन्तुकानं एत्तकं फलं दातब्ब’’न्ति फलपरिच्छेदं कत्वा वा ‘‘एत्तकेसु रुक्खेसु फलं दातब्ब’’न्ति ¶ रुक्खपरिच्छेदं कत्वा वा सङ्घेन कतिका येन पकारेन कताति अत्थो. तत्रागतस्सपीति एवं ठपितकतिकवत्तं तं सङ्घारामं फलत्थाय आगतस्सापि.

यथापरिच्छेदन्ति ¶ सङ्घेन तथाकतफलरुक्खपरिच्छेदमनतिक्कम्म. ददतोति ओचिनित्वा ठपितफलं, कप्पियकारकेहि ओचिनापेत्वा वा देन्तस्स. ओचितफले च कप्पियकारके च असति फलत्थाय आगतेसु वत्तितब्बविधिं दस्सेतुमाह ‘‘दस्सेतब्बापि वा’’तिआदि. ‘‘वत्वा’’ति सेसो. च-कारं अपि-सद्देन एकतो कत्वा ‘‘अपिचा’’ति योजना. एवं वत्वा सङ्घेन परिच्छिन्नरुक्खा दस्सेतब्बाति इमिना ‘‘इध फलानि सुन्दरानि, इतो गण्हथा’ति एवं पन न वत्तब्ब’’न्ति (पारा. अट्ठ. २.४३६-४३७) अट्ठकथा ब्यतिरेकतो दस्सिता होति.

४५१. ‘‘खणित्वा’’ति एतेन ‘‘खणापेत्वा’’ति इदम्पि सङ्गहितं, ‘‘कप्पियभूमि’’न्ति वक्खमानत्ता पथविन्ति एत्थ ‘‘अकप्पिय’’न्ति लब्भति. तेनेवाह ‘‘पाचित्तियेना’’ति. ‘‘मालागच्छ’’न्ति इमिना पुप्फूपगे तरुणगच्छे च मल्लिकासुमनादिगुम्बगागच्छे च सङ्गण्हाति. यथाह अट्ठकथाय ‘‘तरुणका हि पुप्फरुक्खापि पुप्फगच्छापि ‘मालावच्छा’त्वेव वुच्चन्ती’’ति (पारा. अट्ठ. २.४३१). आदि-सद्देन फलूपगरुक्खे च भेसज्जरसे ओसधगच्छे च सङ्गण्हाति. ‘‘रोपापने’’ति वक्खमानत्ता ‘‘सय’’न्ति इदं ‘‘रोपने’’ति इमिना युज्जति.

‘‘सयं खणित्वा’’ति कस्मा न युज्जतीति? ‘‘खणापेत्वा’’ति वक्खमानस्स अभावा च ‘‘यो पन भिक्खु पथविं खणेय्य वा खणापेय्य वा, पाचित्तिय’’न्ति (पाचि. ८५) वचनतो खणापने पाचित्तियेन भवितब्बत्ता च ‘‘खणित्वा’’ति इमिना च खणनखणापनानं द्विन्नमेव गहेतब्बत्ता न युज्जति. कुलदूसनेति कुलदूसननिमित्तं. अकप्पियपथविं खणित्वा, खणापेत्वा च सयं मालागच्छादिरोपने कते अस्स मालागच्छादिरोपकस्स ¶ भिक्खुनो अकप्पियपथवीखणनपच्चयेन पाचित्तियेन सद्धिं कुलदूसने कुलदूसननिमित्तं दुक्कटं होतीति योजना.

४५२. ‘‘तथा’’ति ¶ इमिना ‘‘सयं रोपने’’ति इदं विना अवसेसप्पकारं सङ्गण्हाति. ‘‘अकप्पियेन वाक्येना’’ति इदं ‘‘अकप्पियपथविं खणापेत्वा’’ति इमिना च ‘‘रोपापने’’ति इमिना च युज्जति. ‘‘इमं भूमिं खण, इमं गच्छं रोपेही’’तिआदिकं अकप्पियं वोहारं वत्वा अकप्पियपथविं खणापेत्वा मालागच्छादिरोपनं कारापेन्तस्सापि तथेव पाचित्तियञ्च दुक्कटञ्च होतीति अत्थो.

खणनरोपनेहि द्वीहि पाचित्तियदुक्कटानि अवसिट्ठेहि तदत्थिकेहि सब्बवोहारपयोगभेदेहि किं होतीति आह ‘‘सब्बत्था’’तिआदि. कुलदूसनेति निमित्ते, विसये वा भुम्मं. अकप्पियेन वाक्येन पन पथविं खणापेत्वा अकप्पियेन वाक्येन रोपापनेपि तथा पाचित्तियेन सह कुलदूसने भिक्खुनो दुक्कटं वुत्तं. सब्बत्थ इतो परेसुपि तदत्थिकेन सब्बवोहारब्यापारेसु कुलदूसननिमित्तं भिक्खुनो दुक्कटं वुत्तन्ति योजना.

४५३. कप्पियभूमिया अत्तना खणने, अकप्पियवोहारेन खणापने च पाचित्तियाभावतो दुक्कटंयेव वुत्तन्ति आह ‘‘उभयत्थ चा’’तिआदि. एत्थ ‘‘एव’’न्ति सेसो, सो यथावुत्तमत्थं निगमेति. एवं यथावुत्तनयेन कप्पियभूमियम्पि मालागच्छादिरोपनरोपापनसङ्खातेसु द्वीसु ठानेसु च भिक्खुनो दुक्कटं वुत्तन्ति योजना.

४५४. सदुक्कटा ¶ पाचित्तीति ‘‘आवाटं खण, गच्छं रोपेही’’ति एकवारं आणत्ते बहू आवाटे खणित्वा बहूसु गच्छेसु रोपितेसुपि आणत्तिया एकत्ता दुक्कटेन सह पाचित्तियं होतीति अयमत्थो अकप्पियभूमिं सन्धाय वुत्तो. ‘‘सुद्धं वा दुक्कट’’न्ति इदं अकप्पियभूमियं कप्पियेन वोहारेन आवाटं खणापकस्स च कप्पियभूमियं अकप्पियवोहारेन आवाटं खणापकस्स च ‘‘इमं गच्छं रोपेही’’ति एकवाराणत्तपच्चया आपज्जितब्बं कुलदूसनदुक्कटं सन्धाय वुत्तं.

४५५. कप्पियेनेव वाक्येनाति एत्थ कप्पियवाक्यं नाम ‘‘एत्थ आवाटं जान, एत्थ आवाटं जानितब्बं, एत्थ आवाटेन भवितब्ब’’न्ति एवरूपं वाक्यञ्च ‘‘इमं गच्छं एत्थ जान, अयं गच्छो एत्थ जानितब्बो’’तिआदिवाक्यञ्च. एवकारेन अकप्पियवोहारञ्च कप्पियाकप्पियमिस्सकवोहारञ्च निवत्तेति. परियायोभासनिमित्तकम्मं पन ‘‘इतरत्तयं वट्टती’’ति ¶ (पारा. अट्ठ. २.४३१) अट्ठकथावचनतो वट्टति. उभयत्थ च भूमियाति कप्पियाकप्पियभूमीसु द्वीसु. रोपनेति एत्थ सम्बन्धतो, पकरणतो च ‘‘मालागच्छादीन’’न्ति लब्भति.

‘‘वाक्येना’’ति वुत्तत्ता ‘‘रोपापने’’ति वत्तब्बो, ‘‘रोपने’’ति किमत्थमाहाति चे? सुद्धकत्तुनिद्देसेन पयोजकस्सापि सङ्गहेतब्बतो गाथाबन्धवसेन वुत्तं. इमिना उपरिगाथाय ‘‘सयं रोपेतु’’न्ति एत्थ ‘‘सय’’न्ति इमिना विसेसेत्वा ‘‘रोपापेतु’’न्ति इदं निवत्तेति. ‘‘परिभोगत्थाय हि कप्पियभूमियं वा अकप्पियभूमियं वा कप्पियवोहारेन रोपापने अनापत्ती’’ति (पारा. अट्ठ. २.४३१) अट्ठकथाविनिच्छयो इमाय गाथाय सङ्गहितोति वेदितब्बो. कोचि दोसोति पाचित्तियञ्च दुक्कटञ्चाति वुत्तदोसेसु एकोपि दोसो न विज्जतीति अत्थो.

४५६-७. ‘‘सयं ¶ रोपेतु’’न्ति इदं ‘‘आरामादीनमत्थाया’’ति इमिना सम्बन्धितब्बं.

आदि-सद्देन वनादिं सङ्गण्हाति. सयं रोपितस्स वाति एत्थ वा-सद्देन ‘‘रोपापितस्सा’’ति इदं सङ्गण्हाति, एतस्स विसेसनत्थं ‘‘कप्पियेन वोहारेना’’ति पाठसेसो. अयं पन विनिच्छयो ‘‘आरामत्थाय पन वनत्थाय च छायत्थाय च अकप्पियवोहारमत्तमेव न वट्टति, सेसं वट्टती’’ति (पारा. अट्ठ. २.४३१) अट्ठकथागतनयेन वेदितब्बो. अन्तो आरामभूसनत्थाय, बहि अरञ्ञत्थाय विय छायत्थाय सुद्धचित्तेन ‘‘इमं जाना’’तिआदिकप्पियवोहारेन रोपापितरुक्खे च कप्पियभूमियञ्च अत्तना कते वा अकप्पियवोहारेन कारापिते वा अकप्पियभूमियञ्च कप्पियवोहारेन अत्तना कारापिते वा अञ्ञेहि कते वा आवाटे अत्तना रोपिते रुक्खे च फलं परिभुञ्जितुं इच्छति चे, परिभुञ्जितुं वट्टतीति अत्थो.

आरामादीनमत्थाय कप्पियभूमियं सयं रोपितस्स वा कप्पियभूमियं वा अकप्पियभूमियं वा कप्पियवोहारेन रोपापितस्स वा रुक्खस्स यञ्च फलं, तं फलं परिभुञ्जितुं भिक्खूनं वट्टतीति योजना. कत्थचि पोत्थकेसु ‘‘आरामादीनमत्थाया’’ति गाथाय लिखितट्ठाने ¶ ‘‘कुलसङ्गहणत्थाया’’तिआदिगाथा दिस्सति. सा पाळिक्कमविरुद्धत्ता अट्ठानप्पयुत्ता, ‘‘पुप्फान’’न्तिआदिगाथाय पुरतो वुच्चमाना पन ठानप्पयुत्ता होति.

४५८. सब्बत्थाति आरामादिअत्थाय पुब्बे विय अत्तना रोपितेसु, रोपापितेसु च सब्बेसु मालागच्छादीसु. अकप्पियोदकेनेव पाचित्तीति ‘‘यो पन भिक्खु जानं सप्पाणकं ¶ उदकं तिणं वा मत्तिकं वा सिञ्चेय्य वा सिञ्चापेय्य वा, पाचित्तिय’’न्ति (पाचि. १४०) वुत्ता पाचित्ति एव, न दुक्कटन्ति अत्थो.

४५९. इदानि दुक्कटेन सद्धिं पाचित्तियविसयं दस्सेति ‘‘कुल…पे… दुक्कट’’न्ति. सिञ्चतोति कप्पियोदकेनेव सिञ्चतो, सिञ्चापयतो च.

४६०. तेसंयेव द्विन्नं पन अत्थायाति कुलदूसनपरिभोगानं द्विन्नमत्थाय. सिञ्चने सिञ्चापनेति एत्थ ‘‘मालागच्छादीन’’न्ति पकरणतो लब्भति. दुक्कटन्ति एत्थ ‘‘केवल’’न्ति सेसो.

४६१. ओचिनापनेति अञ्ञेहि पुप्फानं ओचिनापने. सयमोचिनने चापीति अत्तनाव ओचिनने च. सपाचित्तियदुक्कटन्ति ‘‘भूतगामपातब्यताय पाचित्तिय’’न्ति (पाचि. ९०) वुत्तत्ता पुप्फोचिननहेतु पाचित्तियञ्च कुलदूसनदुक्कटञ्च होतीति वुत्तं होति.

४६२. पूजादिअत्थाय, कुलसङ्गहत्थाय च पुप्फानं ओचिननओचिनापनानि कारापेन्तस्स आपत्तिया आपज्जनप्पकारं दस्सेतुमाह ‘‘पुप्फान’’न्ति. ‘‘पुप्फानं गणनाय पाचित्तियं होती’’ति वुत्तत्ता पुप्फमोचिनतोति एत्थ ‘‘विसुं विसु’’न्ति सेसो. एकेकपुप्फं ओचिनन्तस्स पुप्फगणनाय पाचित्तियं होतीति अत्थो. ‘‘एकेन पयोगेन बहूनि पुप्फानि ओचिनन्तस्स पन पयोगगणनाय होती’’ति अट्ठकथायं वुत्तं इध ब्यतिरेकतो लब्भति. ‘‘ओचिनतो’’ति इमिना ‘‘ओचिनापयतो’’ति इदञ्च किरियासामञ्ञे विसेसस्स अन्तोगधभावतो वा उपलक्खणतो वा दस्सितन्ति.

तत्थ ¶ च पुप्फानि विसुं विसुं वत्वा ओचिनापेन्तस्स पुप्फानं गणनाय होतीति इदमेव ¶ आपज्जति. एकवारमाणत्तेन बहूनि पुप्फानि बहूसु च वारेसु ओचितेसु आणत्तिगणनाय होतीति विनिच्छयो दट्ठब्बो. इदं सब्बप्पकारं अनन्तरवुत्तगाथाय दस्सितविधिम्हि च दट्ठब्बन्ति ञापेतुमाह ‘‘कुलत्थं चे सदुक्कटा’’ति. कुलत्थन्ति कुलसङ्गहत्थं. ‘‘सदुक्कटा’’ति वुत्तत्ता पाचित्तियञ्च दुक्कटञ्च पुप्फगणनाय होतीति सिद्धं. यथाह अट्ठकथायं ‘‘पुप्फगणनाय दुक्कटपाचित्तियानी’’ति (पारा. अट्ठ. २.४३१).

४६३. गन्थनं गन्थो, तेन निब्बत्तं गन्थिमं. एस नयो सब्बत्थ. गन्थिमादिसरूपं सयमेव वक्खति. सङ्गहणं सङ्गहो, पुप्फानं सङ्गहोति विग्गहो.

४६४. इमानि गन्थिमादीनि सरूपतो दस्सेतुमाह ‘‘तत्थ दण्डेन दण्डं वा’’तिआदि. तत्थ तत्थाति तेसु छसु पुप्फसङ्गहेसु. ‘‘दण्डेन दण्डं वा’’ति इदं सदण्डउप्पलादिकुसुमं सन्धायाह. ‘‘वण्टेनपि च वण्टक’’न्ति इदं सवण्टकरत्तकुसुमादिं सन्धायाह. करणं सब्बन्ति कतं सब्बं. इध सब्बत्थ कप्पियविधिविभागं ‘‘सब्बमेत’’मिच्चादिगाथायं वक्खति.

४६५. सुत्तादीहि गोप्फेत्वाति एत्थ ‘‘वस्सिकपुप्फादीनी’’ति सेसो. सुत्तेन वा कदलिवाकादीहि वा वस्सिकादिपुप्फे गन्थित्वा कतपुप्फविकारो गोप्फिमं नाम. एकतो वण्टानि यस्साति विग्गहो. उभतोवण्टिकाति एत्थापि एसेव नयो. अप्पत्थे वा सकत्थे वा क-कारो दट्ठब्बो. इत्थिलिङ्गविसये क-कारतो पुब्बाकारस्स इ-कारादेसो.

सब्बपुप्फानं वण्टानि एकदिसाय कत्वा गन्थितपुप्फावलि एकतोवण्टिका नाम, वण्टानि उभयदिसाय कत्वा गन्थितपुप्फावलि ¶ उभतोवण्टिका नामाति तं गोप्फिमं एवं दुविधं होतीति अत्थो. ‘‘वाकं वा वल्लिं वा रज्जुं वा दिगुणं कत्वा तत्थ नीपकदम्बादिवण्टरहितानि पुप्फानि वेठेत्वा गहणं गोप्फिमं नामा’’ति (पारा. अट्ठ. २.४३१ अत्थतो समानं) अट्ठकथाय वुत्तं.

४६६. बुन्देसूति मूलेसु. मकुलादिकन्ति एत्थ आदि-सद्देन वण्टरहितमधुकादिपुप्फञ्च वण्टसहितमल्लिकादिपुप्फञ्च सङ्गहितं. सूचिआदीहीति एत्थ आदि-सद्देन तालहीरादिं सङ्गण्हाति ¶ . मालाविकतीति पुप्फमालाविकति. सूचिआदीहि मकुलादिकं पुप्फं बुन्देसु विज्झित्वा आवुता मालाविकति वेधिमं नामाति वुच्चतीति योजना.

४६७. ‘‘वेठिमं नाम पुप्फदामपुप्फहत्थकेसु दट्ठब्ब’’न्ति (पारा. अट्ठ. २.४३१) अट्ठकथाय दस्सितप्पकारेसु पठमप्पकारं दस्सेति ‘‘वेठेत्वा कतं मालागुणेहि वा’’ति. धम्मदेसनाय वा पटिमाय वा धातुया वा पूजं कत्तुकामा मुद्धनि उजुकं कत्वा मालादामकलापं ओलम्बित्वा अग्गे घटिकाकारदस्सनत्थं मालावलियो अनेकक्खत्तुं परिक्खिपन्ता वेठेन्ति, इदं एवरूपं मालागुणकरणम्पि वेठिमं नामाति वुत्तं होति.

अञ्ञप्पकारं दस्सेति ‘‘वाकादीहि च बद्धं वा’’ति, ‘‘बन्धित्वा’’तिपि पाठो, ‘‘कत’’न्ति इमिना सम्बन्धो. एकच्चे उप्पलादिदीघदण्डकुसुमानि अट्ठ वा नव वा दस वा कलापं कत्वा तेसमेव दण्डानं वाकेहि वा अञ्ञेन येन केनचि दण्डकग्गे ठपेत्वा वा विसुं वा बन्धित्वा उप्पलहत्थादिं करोन्ति, तञ्च वेठिमं नामाति वुत्तं होति. एतं द्वयम्पि न वट्टति.

कप्पियकारकेहि ¶ ओचिनित्वा ठपितपुप्फानि साटके पक्खिपित्वा भण्डिकं कत्वा बन्धितुं न वट्टति. तेसुयेव पुप्फेसु अच्छिन्नेन दण्डेन वा तस्मिंयेव दण्डे अच्छिन्नवाकेन वा कलापं कत्वा बन्धितुं, अंसभण्डिकाय पक्खिपित्वा गहेतुञ्च वट्टति. यथाह अट्ठकथायं ‘‘तेसंयेव पन वाकेन वा दण्डेन बन्धितुं अंसभण्डिकं वा कातुं वट्टती’’ति. ‘‘वाकेन वा दण्डेन वा’ति च इदं अच्छिन्दित्वा परिक्खिपित्वा बन्धनं सन्धाय वदन्ती’’ति सीहळगण्ठिपदे वुत्तं. पदुमादिपुप्फानि पदुमादिपण्णेसु नाळेहि पवेसेत्वा नाळेहि बहि कत्वा पण्णेन पुप्फानि पटिच्छादेत्वा पण्णग्गे बन्धितुं वट्टति. ‘‘दण्डे पन बन्धितुं न वट्टती’’ति (पारा. अट्ठ. २.४३१) च अट्ठकथायमेव वुत्तं.

४६८. पुप्फमालाहि पूरणेति पुप्फावलीहि पूरणे. इदं कत्थ लब्भतीति आह ‘‘बोधि’’न्तिआदि. पुप्फपटं नाम मालावलियो तन्तं विय पसारेत्वा वत्थं वायन्तेहि विय तिरियञ्च मालावलीहि वायितपटं वुच्चति. इदं पुप्फपटं मालावलीहि दीघसो पूरणं सन्धाय ¶ पुरिमे गहितं, तिरियतो वायनं सन्धाय वक्खमाने वायिमेपि गहितन्ति पुनरुत्ताभावो वेदितब्बो. पटादीनन्ति आदि-सद्देन चेतियधातुकरण्डकवेदिकादीनं गहणं.

परिक्खेपेसु लब्भतीति बोधिक्खन्धादीनं पुनप्पुनं परिक्खिपनेसु लब्भति. बोधिक्खन्धादयो पुप्फावलीहि परिक्खिपन्तेहि पठमवद्धट्ठाने पुप्फावलिया अनतिक्कामिते पुरिमं नाम ठानं याव पापुणाति, ताव अञ्ञेन गहेत्वा परिक्खिपन्तेन आहरित्वा पुनपि तस्मिं ठाने पत्ते अञ्ञस्स दानवसेन बोधिक्खन्धं, चेतियं, धातुकरण्डकं वा पुप्फकञ्चुकेन छादेतुं ¶ वट्टतीति अट्ठकथाय वुत्तं. सचेपि द्वेयेव भिक्खू उभोसु पस्सेसु ठत्वा परियायेन हरन्ति, वट्टतियेवाति वदन्ति. पुप्फपटवायनत्थं पसारियमानपुप्फावलीसु च एसेव विनिच्छयो.

दीघपुप्फावलिं नागदन्तेसु पक्खिपित्वा पुन पक्खिपितुं न वट्टति. ‘‘नागदन्तेसु पन पुप्फवलयं पवेसेतुं वट्टती’’ति वुत्तत्ता अञ्ञेहि वलयं कत्वा दिन्नपुप्फावलिवलयं धातुकरण्डथुपिकाय पवेसेतुं वट्टति. ‘‘मालागुणेहि पन बहूहिपि कतं पुप्फदामं लभित्वा आसनमत्थकादीसु बन्धितुं वट्टती’’ति वुत्तत्ता पुप्फदामपुप्फावलीनं पुप्फरहिताय सुत्तकोटिया रज्जुदण्डादीसु बन्धितुं वट्टति.

४६९. पुप्फरूपं नाम ‘‘गोप्फिमपुप्फेहेव हत्थिअस्सादिरूपकानि करोन्ति, तानिपि वायिमट्ठाने तिट्ठन्ती’’ति (पारा. अट्ठ. २.४३१) वुत्तत्ता तंतंरूपसण्ठानं कत्वा पुप्फावलियो निवेसेत्वा करियमानं हत्थिअस्सादिरूपं. इमस्मिं अट्ठकथापाठे ‘‘तानिपि वायिमट्ठाने तिट्ठन्ती’’ति वुत्तत्ता च ‘‘अञ्ञेहि कतपरिच्छेदे पन पुप्फानि ठपेन्तेन हत्थिअस्सादिरूपकम्पि कातुं वट्टती’’ति (पारा. अट्ठ. २.४३१) अट्ठकथापाठस्स सारत्थदीपनियं ‘‘पुप्फानि ठपेन्तेनाति अगन्थितानि पाकतिकपुप्फानि ठपेन्तेन. पुप्फदामं पन पूजनत्थाय भूमियं ठपेन्तेन फुसापेत्वा वा अफुसापेत्वा वा दिगुणं कत्वा ठपेतुं न वट्टती’’ति (सारत्थ. टी. २.४३१) वुत्तत्ता च इमं हत्थिआदिरूपं पूरेन्तेन मालावलिं अञ्ञेहि कतपरिच्छेदे सम्बन्धित्वा पासाणआसनमञ्चपीठहत्थिरूपादिमत्थके ठपेत्वा पूजनप्पकारो वायिमन्ति विञ्ञायति.

पुप्फपटन्ति ¶ ¶ पुब्बे वुत्तप्पकारं पुप्फपटं पूरेन्तेन एकापि पुप्फावलि परिवत्तेत्वा न ठपेतब्बा, वायन्तेन अञ्ञेहि पूरितेपि एकापि पुप्फावलि न पातेतब्बा, इदं पूरिमवायिमानं नानाकरणं. आदिग्गहणेन पुप्फजालं सङ्गण्हाति, तं करोन्तस्स जालच्छिद्दगणनाय दुक्कटं होति. ‘‘भित्तिच्छत्तबोधित्थम्भादीसुपि एसेव नयो’’ति वुत्तत्ता छत्तादीसु च पुप्फजालं न दातब्बं.

४७०. इमस्स सिक्खापदस्स साधारणत्ता ‘‘भिक्खूनं भिक्खुनीनञ्चा’’ति आह. बुद्धस्सपीति एत्थ पि-सद्दो सम्भावने, ‘‘पूजत्थ’’न्ति वत्तब्बं, बुद्धस्स पूजत्थायपि कातुं वा कारापेतुं वा न वट्टतीति अत्थो. धम्मसङ्घरतनानिपि उपलक्खणतो सङ्गय्हन्ति. सेसे किमेव वत्तब्बन्ति ब्यतिरेकत्थो.

४७१. ‘‘तथा’’ति इमिना ‘‘सयं परेहि वा कारापेतुं भिक्खूनञ्च भिक्खुनीनञ्च बुद्धस्सपी’’ति अनन्तरगाथाय वुत्तमतिदिसति. कलम्बकन्ति द्विन्नं धनुकानमन्तरे ओलम्बकदामं. यथाह अट्ठकथायं ‘‘कलम्बकोति अड्ढचन्दनागदन्तन्तरे घटिकादामओलम्बको वुत्तो’’ति (पारा. अट्ठ. २.४३१). एत्थ च घटिकादामओलम्बको नाम अन्ते घटिकाकारयुत्तो यमकदामओलम्बको. कातुन्ति बन्धितुं न वट्टतीति योजना. एकेकपुप्फदामं पन निक्खन्तसुत्तकोटिया पबन्धित्वा ओलम्बितुं वट्टति. पुप्फदामद्वयं सङ्घटितुकामेनपि निक्खन्तसुत्तकोटियाव सुत्तकोटि सङ्घटितुं वट्टति. अड्ढचन्दकमेव वाति ‘‘अड्ढचन्दाकारेन मालागुणपरिक्खेपो’’ति अट्ठकथाय वुत्तसरूपं वा.

एत्थ च अड्ढचन्दाकारेन मालागुणपरिक्खेपो नाम अड्ढचन्दाकारेन मालागुणस्स पुनप्पुनं हरणपच्चाहरणवसेन पूरेत्वा परिक्खिपनं. तेनेव तं पूरिमे पविट्ठं. तस्मा एतम्पि ¶ अड्ढचन्दाकारं पुनप्पुनं हरणपच्चाहरणवसेन पूरितं न वट्टति, एकवारं पन अड्ढचन्दाकारेन मालागुणं हरितुं वट्टतीति वदन्ति. कातुं न वट्टतीति सम्बन्धो. ‘‘तदुभयम्पि पूरिमेयेव पविट्ठ’’न्ति (पारा. अट्ठ. २.४३१) अट्ठकथायं वुत्तं. अञ्ञेहि पूरितन्ति अञ्ञेहि आयतं पसारेत्वा पूरितं पुप्फपटं. वायितुम्पि चाति तिरियं एकपुप्फावलिम्पि वायितुं ‘‘न वट्टती’’ति इमिनाव सम्बन्धो.

४७२. पिट्ठकाचमयन्ति ¶ तण्डुलपिट्ठादीहि कतञ्चेव काचमत्तिकाय च कतं पुप्फदामं. भेण्डुपुप्फमयम्पि चाति भेण्डुदण्डकेहि मल्लिकासुमनचम्पकादिसदिसं कत्वा छिद्देहि कतदामञ्च. ‘‘गेण्डुपुप्फमय’’न्तिपि लिखन्ति. खरपत्तमयन्ति एत्थ खरपत्तं नाम कुङ्कुट्ठखचितं पुप्फपटन्ति वदन्ति. कातुन्ति गन्थनगन्थापनादीनि कातुं. भेण्डुखरपत्तदामानं पटिक्खित्तत्ता चेलादीहि कतदामम्पि न वट्टति अकप्पियानुलोमत्ताति वदन्ति.

४७३. हीरादीहीति तालनाळिकेरहीरादीहि. आदि-सद्देन तिणसलाकादिं सङ्गण्हाति. पटाकत्थन्ति पटाकाकारेन पूजनत्थं. ‘‘विज्झन्तस्सा’’ति इमिना कण्टकेहि विज्झनं, हीरादीहि आवुणनञ्च सङ्गहितं.

४७५. असोकपिण्डिआदीनन्ति असोकपुप्फमञ्जरिकादीनं. आदि-सद्देन अट्ठकथायं (पारा. अट्ठ. २.४३१) एतेहेव सद्धिं दस्सितं जालवितानं, छिद्दानि दस्सेत्वा कतवेदिका, नागदन्तकं, पुप्फचङ्कोटकापिधानं, तालपण्णवलयादिञ्च सङ्गण्हाति. धम्मरज्जुयाति एत्थ सारत्थदीपनियं ‘‘धम्मरज्जु नाम चेतियं वा बोधिं वा पुप्फपवेसनत्थ आवज्जित्वा बद्धरज्जू’ति महागण्ठिपदे, मज्झिमगण्ठिपदे च वुत्तं, तस्मा तथा बद्धाय रज्जुया चेतियस्स च अन्तरे पुप्फानि पवेसेतुं वट्टतीति ¶ विञ्ञायति. गण्ठिपदे पन ‘धम्मरज्जुन्ति सिथिलवट्टितं रज्जुं कत्वा बोधिं वा चेतियं वा परिक्खिपित्वा धम्मासने वा लम्बित्वा तत्थ पुप्फानि पवेसेन्ती’ति वुत्तं, तस्मा सिथिलवट्टिताय रज्जुया अन्तरेपि पुप्फानि पवेसेतुं वट्टतीति विञ्ञायति, वीमंसित्वा युत्ततरं गहेतब्बं. उभयत्थापि पनेत्थ नेवत्थि विरोधोति अम्हाकं खन्ती’’ति (सारत्थ. टी. २.४३१) लिखितं.

४७६. विज्झन्तस्सपीति पि-सद्देन धम्मासनवितानादीसु पुप्फपूजनत्थं सयं कण्टकहीरादिप्पवेसनं सङ्गण्हाति. ‘‘वितानादीसु पुप्फपूजनत्थं कण्टकहीरादिप्पवेसनं न वट्टती’ति इदं अट्ठकथाचरियप्पमाणतो गहेतब्ब’’न्ति सारत्थदीपनियं वुत्तं.

४७७. कप्पियवचनं नाम ‘‘एवं जान, एवं कते सोभेय्य, यथा एतानि पुप्फानि न विकिरियन्ति, तथा करोही’’तिआदि (पारा. अट्ठ. २.४३१) अट्ठकथागतं कप्पियवचनं. वत्थुपूजनेति रतनत्तयपूजने. निमित्तादीसु निमित्तं नाम पुप्फानि च गन्थनवाके ¶ च गहेत्वा गन्थितुं जानन्तानं समीपे ठपनं. ओभासो नाम ‘‘तुम्हेहि पिळन्धितकुसुमानि कस्मा न विकिरन्ती’’ति वुत्ते ‘‘गन्थितत्ता’’ति चे वदति, ननु पूजनकपुप्फानि गन्थितुं न वट्टतीतिआदिवचनानि. परियायो नाम पण्डितेहि पुप्फानि यथा न विकिरियन्ति, तथा गन्थित्वा पूजेतुं मनापन्तिआदिवचनं. पकासिता अट्ठकथायं.

४७८. ‘‘कुलानि दूसेति पुप्फेन वा’’तिआदिपाठे (पारा. ४३७) ‘‘वेज्जिकाय वा जङ्घपेसनिकेन वा’’ति (पारा. ४३७) वुत्तं वेज्जकम्मादिं कुलदूसनतो विसुं कत्वा ‘‘न केवलं…पे… कुदाचन’’न्ति कस्मा वुत्तन्ति? विसुं कातुं न वुत्तं. योजना पनेत्थ एवं वेदितब्बा ¶ ‘‘न केवलमिदमेव वुत्तप्पकारं पुप्फदानादिकुलदूसनं कुदाचनं अकत्तब्बं, अथ खो वेज्जकम्मादि कुलदूसनम्पि कुदाचनं न कत्तब्ब’’न्ति. वेज्जकम्मादीति एत्थ आदि-सद्देन वक्खमानपरित्तोदकसुत्तदानअनामट्ठपिण्डदानदूतेय्यजङ्घपेसनिके सङ्गण्हाति.

४७९. ‘‘कुदाचनं न कत्तब्ब’’न्ति सामञ्ञेन निसेधेत्वा इदानि ‘‘कत्तब्ब’’मिच्चादिना अपवादविधिं दस्सेति. पञ्चन्नं सहधम्मिनन्ति भिक्खुभिक्खुनिसिक्खमानसामणेरसामणेरीनं पञ्चन्नं सह सद्धिं चरितब्बो पब्बज्जासासनधम्मो एतेसं अत्थीति ‘‘सहधम्मिका’’ति सङ्खं गतानं. अकतविञ्ञत्तिं कत्वापीति अञ्ञातकअप्पवारिते भेसज्जं याचित्वापि ‘‘वदेय्याथ भन्ते येनत्थो’’ति एवं अकतट्ठाने विञ्ञत्ति अकतविञ्ञत्ति. अत्तनो धनेति ससन्तकविसये.

४८०. ‘‘तथा’’ति सहधम्मिकानं वुत्तमतिदिसति. तदुपट्ठाकजन्तुनोति तेसं द्विन्नं मातापितूनं वेय्यावच्चकरस्स. भण्डुकस्साति गिहिलिङ्गे ठितस्सापि पब्बज्जापेक्खस्स. अत्तनो वेय्यावच्चकरस्सपीति अत्तनो कम्मकरस्सपि. एत्तकानञ्च जनानं पञ्चसहधम्मिकानं विय अकतविञ्ञत्तियापि भेसज्जं कातब्बन्ति वुत्तं होति.

४८१. जेट्ठभाताति अत्तनो पुब्बजो भाता. कनिट्ठोति अनुजो भाता. तथा भगिनियो दुवेति जेट्ठकनिट्ठा द्वे भगिनियो. चूळमाताति मातु कनिट्ठा. चूळपिताति पितु कनिट्ठो. महामाताति मातु जेट्ठा. महापिता पितु जेट्ठभाता.

४८२. पितुच्छाति पितुभगिनी जेट्ठकनिट्ठा. मातुलोति मातु भाता. जेट्ठकनिट्ठे द्वे पितुच्छा ¶ , द्वे मातुले ¶ च एकतो कत्वा ‘‘दसा’’ति वुत्तं. भेसज्जं कातुं वट्टतीति सम्बन्धो.

४८४. ‘‘दस्सन्ति मे इमे’’ति आभोगं कत्वा वा दातब्बन्ति योजना.

४८५. एतेसं दसन्नं ञातीनं. याव सत्तमा कुलाति एत्थ कुलपरिच्छेदो कथं गहेतब्बोति? ‘‘सपुत्तदारं भातु कुटुम्बं एकं कुलं, एवं तस्स पुत्तस्स वा धीतु वा कुटुम्बं एकं कुल’’न्ति एवमादिना नयेन याव सत्तमा कुलपरिवट्टा गहेतब्बा. ‘‘सपुत्तपतिभगिनिया कुटुम्बं एकं कुलं, तथा तस्स पुत्तस्स वा धीतु वा कुटुम्बं एकं कुल’’न्तिआदिना नयेन याव सत्तमा कुलपरिवट्टा गहेतब्बा. चूळमातादीनम्पि कुलपरम्परा इमिना नियामेन गहेतब्बाति वदन्ति. कुलदूसनं न रूहतीति ‘‘दातुं पुप्फं पनञ्ञस्स, आगतस्सेव ञातिनो’’तिआदिना (वि. वि. ४४३) नयेन कथितविधिना एतेसु पवत्तन्तस्स कुलदूसनं न रुहतीति वुत्तं होति.

४८६. भातुजायाति अत्तनो जेट्ठस्स वा कनिट्ठस्स वा भातु भरिया. भगिनिसामिकोति अत्तनो जेट्ठाय वा कनिट्ठाय वा भगिनिया सामिको.

४८७. भातुनोति जेट्ठस्स, कनिट्ठस्स च भातुनो. अनु पच्छा जाताति अनुजा, कनिट्ठभगिनी. ‘‘अनुजा’’ति उपलक्खणन्ति जेट्ठायपि सङ्गहो. जेट्ठकनिट्ठभातूनं भरिया च जेट्ठकनिट्ठभगिनीनं सामिका च सचे अञ्ञातका होन्तीति योजना. देथाति एत्थ ‘‘इमं भेसज्ज’’न्ति पाठसेसो.

४८८. तेसम्पि ¶ भातुभगिनीनं. ‘‘पुत्तान’’न्ति इमिना धीतूनम्पि सङ्गहो. कत्वाति वत्वा. तुम्हाकं मातापितूनं देथाति एत्थापि ‘‘इमं भेसज्ज’’न्ति पकरणतो लब्भति. मातापितूनन्ति उभयसङ्गाहकवचनतो ‘‘तुय्हं मातु वा, तुय्हं पितु वा’’ति यथासम्भवं विसुं विसुञ्च वत्तब्बं. तेसन्ति च तुम्हाकन्ति च सामिवचनं. पुत्तानन्ति च मातापितूनन्ति च सम्पदानवचनं.

४८९. भेसज्जकरणारहानं ¶ वत्तब्बताय ‘‘अकल्लको’’ति इदं इस्सरादिपदेहि पच्चेकं योजेतब्बं. अकल्लकोति आतुरो. कल्लं वुच्चति सुखं, तं एतस्स अत्थीति कल्लको, न कल्लको अकल्लको. ञातिजनुज्झितो वाति ञातिजनेन परिच्चत्तो वा.

४९०. एतेसं सब्बेसन्ति इस्सरादिआतुरानं सब्बेसमेतेसं जनानं. ‘‘साधुना’’ति वक्खमानत्ता अपच्चासीसता सताति एत्थ सताति किरियापदं. ‘‘इमस्मिं कते इमे मय्हं एवरूपं दस्सन्ती’’ति अत्तनो अत्थाय पच्चासीसनं अकरोन्तेनाति अत्थो. भिक्खुसङ्घस्स उपकारतं पच्चासीसन्तेन कातुं वट्टति. पटिसन्थारोति आमिसपटिसन्थारो, धम्मपटिसन्थारोति दुविधो पटिसन्थारो. एत्थ आमिसपटिसन्थारो गय्हति. भेसज्जं आमिसेनपि होतीति धम्मकथाय सङ्गहोपि युज्जतेव. पटिसन्थरणं पटिसन्थारो. पटिलद्धामिसस्स च धम्मस्स च तेसु च अत्तनि च पतिरूपेनाकारेन समं अत्थरणं पवत्तनन्ति अत्थो.

अपरो नयो – आमिसस्स च धम्मस्स च अलाभेन अत्तनो, परस्स च अन्तरे सम्भवन्तस्स छिद्दस्स विवरस्स भेदस्स पटिसन्थरणं पिदहनं सङ्गहणं पटिसन्थारो. अयञ्हि लोकसन्निवासो अलब्भमानेन आमिसेन च धम्मेन ¶ चाति द्वीहि छिद्दो, तस्स तं छिद्दं यथा न पञ्ञायति, एवं पीठस्स विय पच्चत्थरणेन आमिसेन, धम्मेन च पटिसन्थरणं ‘‘आमिसपटिसन्थारो, धम्मपटिसन्थारो’’ति वुच्चतीति. साधुनाति सामीचिप्पटिपन्नतादिअरियधम्मे पतिट्ठितुकामेन अरियाचारेन भिक्खुनाति अत्थो. ‘‘अधुना’’ति इदं इमिस्सा पटिपत्तिया सब्बकालं पटिपज्जितब्बतायपि पापजनकण्हकसंगामे इमस्मिं विपन्नकाले विसेसेन अप्पमत्तेन पवत्तेतब्बन्ति अधिप्पायेन वुत्तं.

४९१-२. केनचीति उपलक्खणत्ता उपासकेन वा उपासिकाय वाति अत्थो. हत्थेनाति हत्थावयवा अङ्गुलियो वुत्ता समुदाये पवत्तस्स वोहारस्स अवयवे पवत्तनतो. कत्वाति एत्थ ‘‘परित्त’’न्ति पाठसेसो, करोतिस्स किरियासामञ्ञे वत्तनतो भणित्वाति अत्थो. तेसमेव च सन्तकन्ति परित्तं भणापेन्तानमेव सन्तकं सुत्तोदकं. एवं वुत्तत्ता ‘‘अत्तनो सुत्तोदकं आहरित्वा पुञ्ञत्थाय इदं हत्थेन चालेत्वा, आमसित्वा वा परित्तं भणथा’’ति वुत्ते केनचि परित्तोदकं सुत्तं कातब्बं. केनचि ‘‘परित्तोदकसुत्तानि देथा’’ति वुत्ते ¶ भिक्खुना तेसमेव सन्तकं जलं हत्थेन चालेत्वा सुत्तकं मद्दित्वा परित्तं कत्वा दातब्बन्ति योजना.

४९३. अनामट्ठोपीति हत्थेन अनामसितोपि, अपब्बजितस्स हत्थतो लद्धा अत्तना वा अञ्ञेन वा भिक्खुना अगहितग्गोति वुत्तं होति.

४९४. चोरदामरिकस्स चाति गामविलोपकस्स चोरस्स च.

४९५. पण्डुपलासस्साति ¶ पब्बज्जापेक्खस्स भण्डुकस्स, पण्डुवण्णो पलासो पण्डुपलासो, सो वियाति पण्डुपलासो, तंसदिसे तब्बोहारो ‘‘सीहोयं माणवको’’तिआदीसु विय. यथा पण्डुपलासो रुक्खा पतनाभिमुखो तिट्ठति नियतपातो, एवमयम्पि गिहिलिङ्गतो अपगमाभिमुखो पब्बज्जूपगमने नियतोव तिट्ठतीति ‘‘पण्डुपलाससदिसो’’ति वेदितब्बो.

थालकेपि चाति अत्तनो परिभोगथालकेपि. इदञ्च निदस्सनमत्तं, पत्तोपि गहितोयेवाति दट्ठब्बं. ठपेत्वाति एत्थ ‘‘पिण्डपात’’न्ति उपयोगवसेन सम्बन्धनीयं. तं पनाति अत्तनो परिभोगथालके ठपेत्वा दिय्यमानं पिण्डपातं. ‘‘मातापितून’’न्ति (पारा. अट्ठ. २.४३६-४३७) अट्ठकथावचनतो एत्थ ‘‘पितुनो’’ति उपलक्खणन्ति मातापितूनम्पीति अत्थो. सचे एकसेसो इच्छितो, ‘‘पितूनम्पी’’ति पाठो युज्जति.

४९६. जङ्घपेसनियन्ति गिहीनं दूतेय्यसासनहरणकम्मं ‘‘जङ्घपेसनिय’’न्ति वुच्चति. अपि चाति वुत्तसमुच्चयो.

४९७. एत्तावता सामञ्ञविधिं दस्सेत्वा इदानि अपवादविधिं दस्सेतुं ‘‘भण्डू’’तिआदि वुत्तं. सासनन्ति सन्देसं. हरितुन्ति वुत्तट्ठानं नेतुं.

४९८. अट्ठविधेनपीति पुप्फदानादिजङ्घपेसनियावसानेन अट्ठप्पकारेनपि. कुलदूसनकम्मेनाति कुलानं सद्धाविनासकेन अनाचारकम्मेन. लद्धन्ति एत्थ ‘‘भोजन’’न्ति इदं ‘‘भुञ्जितु’’न्ति च ‘‘अज्झोहारेसू’’ति च वुत्तत्ता, ‘‘सेसेसुपि अयं नयो’’ति वक्खमानत्ता ¶ च लब्भति. पञ्चसु सहधम्मिकेसु एकेनापि कुलदूसनेन कम्मेन उप्पादितपच्चयो ¶ सब्बेसम्पि न वट्टतीति ‘‘पञ्चन्नं सहधम्मीनं न च वट्टती’’ति सब्बपटिसेधो कतो.

४९९. सब्बत्थाति ‘‘अज्झोहारेसू’’ति एतस्स विसेसनं, सब्बेसूति अत्थो. ‘‘अज्झोहारे अज्झोहारे’’ति अट्ठकथागतं सङ्गण्हाति. ‘‘अज्झोहारेसू’’ति इदं परगलं कातब्बं आमिसं सन्धायाह. सेसपच्चये पटिच्च परिभोगवसेनेव ‘‘सेसेसू’’ति आह, अनज्झोहरणीयेसु सेसपच्चयेसूति अत्थो. किं वुत्तं होति? चीवरपच्चये सरीरतो मोचेत्वा परिभोगगणनाय, सेनासनपच्चये निब्बकोसे उदकपतनट्ठानतो अब्भन्तरं पविट्ठवारगणनाय, मञ्चपीठादिसेनासने निसीदनसयनादिपरिभोगगणनाय, अनज्झोहरित्वा अब्भञ्जनालेपनादिवसेन कातब्बभेसज्जे सरीरतो मोचेत्वा वारगणनायाति वुत्तं होति. अयं नयोति ‘‘दुक्कटं परिदीपित’’न्ति वुत्तो नयो.

५००. ‘‘उप्पन्नपच्चया’’ति इदं ‘‘अभूतारोचनेना’’ति इदमपेक्खित्वा वुत्तं. ‘‘कत्वा रूपियवोहार’’न्ति इदमपेक्खित्वा ‘‘उप्पादितपच्चया’’ति योजना कातब्बा. रूपियवोहारविनिच्छयो निस्सग्गिये आवि भविस्सति. अभूतारोचनविनिच्छयो चतुत्थपाराजिके वुत्तो. समानाति पकासिताति कुलदूसनकम्मेन उप्पादितपच्चयेहि सदिसाति अट्ठकथायं वुत्ताति अत्थो. इमिना तत्थापि विनिच्छयो एत्तकोयेवाति अतिदिसति.

५०१. ‘‘संसारवासो दुक्ख’’न्ति ञत्वा निब्बानाधिगमे मानसं बन्धित्वा निब्बानगामिनिं पटिपदं सन्धाय सासनावतिण्णेन सिक्खाकामेन कुलपुत्तेन सेवितक्खणेयेव जीवितहरणसमत्थविसमिस्सपूतिमुत्तं ¶ विय वज्जनीयं अकप्पियपच्चयं उप्पादेतुं करियमानं अकप्पियोपायप्पकारं एकतो दस्सेतुमाह ‘‘विञ्ञत्ती’’तिआदि. तत्थ विञ्ञत्ति याचना. अनुप्पदानन्ति पिण्डपटिपिण्डदानं. वेज्जकम्मं वुत्तनयमेव. अनेसनं नाम अप्पिच्छताय अननुरूपेन पयोगेन पच्चयपरियेसनं.

पारिभट्यता नाम इस्सरे सेवितुं परिवारेत्वा तेसं चित्तरुचितं विलपन्तानं परिभटानं सेवकजनानं विय लाभत्थिकस्स भिक्खुनो पच्चयदायकेसु पवत्तीति वेदितब्बो. परि समन्ततो भटति सेवतीति परिभटो, इस्सरजनानं समीपावचरो सेवकजनो, परिभटो वियाति ¶ परिभटो, भिक्खु, परिभटस्स कम्मं पारिभट्यं, तस्स भावो पारिभट्यता. अथ वा परिभटति धाति विय कुलदारके अङ्के करणादिवसेन धारेतीति परिभटो, परिभटस्स कम्मं पारिभट्यं, तस्स भावो पारिभट्यताति लाभासाय भिक्खुनो कुलदारकेसु अननुलोमिका पवत्ति वुच्चति.

मुग्गसूपता नाम पक्कमुग्गा विय पक्कापक्कबीजमिस्सा लाभासाय दायकानं चित्ताराधनत्थाय सच्चालीकमिस्सकता. यथा मुग्गेसु पच्चमानेसु कोचिदेव न पच्चति, बहवो पच्चन्ति, एवमेव यस्स दायकेहि सद्धिं कथेन्तस्स किञ्चिदेव सच्चं होति, असच्चमेव बहुकं होति, अयं वुच्चति मुग्गसूपसदिसत्ता ‘‘मुग्गसूपो’’ति, तस्स कम्मं मुग्गसूपं, तस्स भावो मुग्गसूपता. वत्थुविज्जकं नाम कूपवत्थुगेहवत्थुआदीनं आचिक्खनं. वत्थुविज्जायकानं कतं वत्थुविज्जकं.

५०२. जङ्घपेसनियं, दूतकम्मञ्च वुत्तनयमेव. कुलदूसनन्ति वुत्तावसेसं. अभूतारोचनञ्च वुत्तनयमेव. बुद्धपटिकुट्ठन्ति ¶ बुद्धेहि पटिक्कोसितं गरहितं यथावुत्तं मिच्छाजीवञ्च अवुत्तञ्च अङ्गविज्जानक्खत्तविज्जाउक्कापातदिसाडाहभूमिचालादिभेदं मिच्छाजीवनूपायं सब्बं. विवज्जयेति विसमिव, गूथमुत्तं विय च आरका परिवज्जेय्याति अत्थो. ‘‘सिक्खाकामो कुलपुत्तो’’ति सामत्थिया लब्भति.

५०३. पटिनिस्सज्जतोपि तन्ति समनुभासनकम्मतो पुब्बे वा ञत्तिचतुत्थासु कम्मवाचासु अन्तकम्मवाचाय य्य-कारं अप्पत्ताय वा कुलदूसनकम्मं पजहन्तस्साति वुत्तं होति. सङ्घभेदसमन्ति पठमसङ्घभेदेन समन्ति.

कुलदूसनकथावण्णना.

५०४. ‘‘जान’’न्ति इमस्स ‘‘भिक्खुना’’ति एतस्स विसेसनत्ता जानताति गहेतब्बं. पाळिया लिखिते सीहळगण्ठिपदे पन एवरूपं आपत्तिं आपन्नोस्मीति ञत्वाति अत्थो वुत्तो. यावतीहन्ति यत्तकानि अहानि, ‘‘छादिता’’ति इमिना सम्बन्धो, छादनकिरियाअच्चन्तसंयोगे उपयोगवचनं. छादिताति ‘‘अहं इत्थन्नामं आपत्तिं आपन्नो’’ति सब्रह्मचारीनं अनारोचनदिवसेन ¶ पटिच्छादिता. आपत्तीति सङ्घादिसेसापत्ति. अकामाति अरुचियाव सङ्घादिसेसं आपज्जित्वा अकतपटिकम्मस्स सग्गमोक्खानं अन्तरायकरत्ताति अधिप्पायो. परिवत्थब्बन्ति परिवासं समादाय वत्थब्बं. कित्तकं कालन्ति आह ‘‘तावतीह’’न्ति, तत्तकानि अहानीति वुत्तं होति. आपज्जित्वा यत्तकानि अहानि पटिच्छादेति, तत्तकानेव अहानीति अत्थो.

५०५-६. आपत्ति कित्तकेन पटिच्छन्ना होतीति आह ‘‘आपत्ति चा’’तिआदि. तत्थ आपत्ति चाति सङ्घादिसेसापत्ति च. अनुक्खित्तो चाति उक्खेपनीयकम्मेन सयं अनिस्सारितो ¶ च. पहू चाति सयं सब्रह्मचारीनं सन्तिकं गन्त्वा आरोचेतुं पहोति च. अनन्तरायिको चाति गमनविबन्धकेन राजचोरादिअन्तरायेन विरहितो च. चतुस्व पीति एत्थ ‘‘एतेसू’’ति सेसो, एतेसु चतूसूति अत्थो. तंसञ्ञीति आपत्तिसञ्ञी अनुक्खित्तसञ्ञी पहुसञ्ञी अनन्तरायिकसञ्ञीति वुत्तं होति. तस्स एवंसञ्ञिनो इमेसु चतूसु तथासञ्ञिनो पुग्गलस्स. छादेतुकामताति आचरियादीसु गारवेन वा गरहादिभया वा ‘‘न आरोचेस्सामी’’ति पटिच्छादेतुकामता च. छादनन्ति तथा चिन्तेत्वा ‘‘अहं इत्थन्नामं आपन्नो’’ति अवत्वा पटिच्छादनञ्चाति इमेहि दसहि अङ्गेहि. ‘‘भिक्खुना’’ति कत्तुनिद्देसत्ता छन्नाति एत्थ छादिताति अत्थो. कालविधिं दस्सेति ‘‘अरुणुग्गमनेना’’ति, आपत्तिआपन्नदिवसं खेपेत्वा अरुणुट्ठानेन सद्धिं छन्ना होतीति अत्थो.

द्वेभाणवारवण्णना निट्ठिता.

५०७. एवं पटिच्छन्नसङ्घादिसेसपटिकम्मत्थं ‘‘अकामा परिवत्थब्ब’’न्ति विहितस्स परिवासस्स को भेदो, को पवत्तिक्कमोति आह ‘‘तिविधो’’तिआदि. सो परिवासो तिविधो दीपितोति सम्बन्धो. केनाति आह ‘‘तिविधापेतचेतसा’’ति. ‘‘तिस्सो विधा, सेय्योहमस्मीति विधा, सदिसोहमस्मीति विधा, हीनोहमस्मीति विधा’’ति (दी. नि. ३.३०५) वुत्तविधाय माननामधेय्यतो तिविधमानतो अपगतचित्तेन सम्मासम्बुद्धेनाति अत्थो.

पटिच्छन्ना आपत्ति एतस्साति पटिच्छन्नो. अरिसादीनं आगतिगणत्ता तत्थ पक्खिपनेन अ-कारपच्चयो दट्ठब्बो. तेनेव वक्खति ‘‘पटिच्छन्नाय दातब्बो’’तिआदि.

सुद्धन्तोति ¶ ¶ ‘‘उभो कोटियो सोधेत्वा दातब्बपरिवासो सुद्धन्तो नामा’’ति पाळिगण्ठिपदे वुत्तत्ता उपसम्पदाकालसङ्खातो सुद्धो पुब्बन्तो, आरोचितकालसङ्खातो सुद्धो अपरन्तो च परिवाससमादानकाले वा परिवसनकाले वा उपपरिक्खित्वा दिट्ठा सुद्धा अन्ता अनापत्तिकालसङ्खाता उभो कोटियो अस्साति कत्वा सुद्धन्तनामको परिवासो च. एत्थ च भेदादिं वक्खति.

सम्मा दिवसादीनं ओधानं पक्खेपो यत्थ सो समोधानो, परिवासो. दिवसेसु दिवसे वा आपत्तीसु आपत्तियो वा सब्बा नानावत्थुका आपत्तियो एकतो कत्वा ओधाय दातब्बपरिवासोति अत्थो. एत्थापि भेदादिं वक्खति.

५०८. तत्राति तेसु तीसु परिवासेसु. ‘‘यो’’ति सेसो. इतीति एवमत्थो दट्ठब्बो. यो पटिच्छन्नपरिवासो, अयन्ति एवं पकासितोति योजना.

५०९-१०. परिवासदानकाले वुच्चमानाय कम्मवाचाय पधानलक्खणं दस्सेतुमाह ‘‘वत्थुगोत्तवसेना’’तिआदि. तत्थ ‘‘वत्थू’’ति सुक्कमोचनादिको वीतिक्कमो वुच्चति. अयमेव सुक्कविस्सट्ठिआदिकं गं वाचं सञ्ञञ्च तायति रक्खतीति कत्वा ‘‘गोत्त’’न्ति वुच्चति. तञ्हि सजातियसाधारणविजातियविनिवत्तनवसेन अञ्ञत्थ गन्तुं अदत्वा वाचं सद्दं, तब्बिसयं सञ्ञञ्च रक्खति. इदं वत्थुगोत्तद्वयवाचकं सुक्कविस्सट्ठिकायसंसग्गविसेसवचनञ्च ‘‘नानावत्थुका’’ति सामञ्ञवचनञ्चाति इमिना वचनद्वयेनाति वुत्तं होति. वुत्तञ्हेतं अट्ठकथायं ‘‘सुक्कविस्सट्ठिं कायसंसग्ग’न्तिआदिवचनेनापि ‘नानावत्थुकायो’तिआदिवचनेनापि वत्थुचेव ¶ गोत्तञ्च सङ्गहित’’न्ति (चूळव. अट्ठ. १०२). नामापत्तिवसेन वाति एत्थ सङ्घादिसेसोति सजातिसाधारणनामं, आपत्तीति सब्बसाधारणनामन्ति द्वीहि नामेहि तंतंवीतिक्कमवसेन आपज्जितब्बतो तदेव आपत्तीति एवमुभिन्नं नामापत्तीनं वसेन वाति अत्थो.

कम्मवाचा हि कातब्बाति ‘‘वत्थुगोत्तवसेनापी’’ति एत्थ अपि-सद्दो ‘‘नामापत्तिवसेन वा’’ति एत्थ सङ्घादिसेसोति सजातिसाधारणनामं, आपत्तीति सब्बसाधारणनामन्ति द्वीहि नामेहीति इदं समुच्चिनोतीति उभयं एकतो योजेत्वा कम्मवाचा कातब्बाति. ‘‘नामापत्तिवसेन ¶ वा’’ति एत्थ विकप्पत्थेन वा-सद्देन, ‘‘अहं भन्ते सम्बहुला सङ्घादिसेसा आपत्तियो आपज्जिं एकाहपटिच्छन्नायो’ति एवं नाममत्तवसेन वा योजना कातब्बा’’ति अट्ठकथाय वुत्तविसेसनिवत्तनत्थमत्तसद्दवसेन च वत्थुगोत्तविरहितेन केवलेन नामापत्तिमत्तेन पयोजेत्वा कातब्बायेवाति वुत्तं होति. कम्मवाचाय करणप्पकारो पन समुच्चयक्खन्धके आगतनयेन आपन्नपुग्गलनामेन च एकाहपटिच्छन्नादिवचनेन च योजेत्वा दट्ठब्बो. तस्स दातब्बोति योजना. ‘‘परिवासो’’ति पकरणतो लब्भति, पटिच्छन्नापत्तिकस्स पुग्गलस्स परिवासो दातब्बोति अत्थो.

तेन चाति लद्धपरिवासेन अन्तोसीमाय उक्कुटिकं निसिन्नेन पग्गहितञ्जलिना भिक्खुना च. समादियित्वाति एत्थापि ‘‘वत्त’’न्ति सामत्थिया लब्भति. ‘‘समादानेप्ययं नयो’’ति (वि. वि. ५१४) वक्खमानत्ता ‘‘वत्तं समादियामि, परिवासं समादियामी’’ति इमेसं द्विन्नं अञ्ञतरं वा द्वयमेव वा तिक्खत्तुं वत्वा पारिवासिकक्खन्धके वुत्तवत्तपूरणत्थं समादियित्वाति वुत्तं होति. आदितो सङ्घस्स आरोचेतब्बन्ति योजना. तथा ¶ वत्तं समादियित्वा निसिन्नेन पठमं सङ्घस्स ‘‘अहं भन्ते एकं आपत्तिं आपज्जिं सञ्चेतनिकं सुक्कविस्सट्ठिं एकाहपटिच्छन्नं, सोहं सङ्घं एकिस्सा आपत्तिया सञ्चेतनिकाय सुक्कविस्सट्ठिया एकाहपटिच्छन्नाय एकाहपरिवासं याचिं, तस्स मे सङ्घो एकिस्सा आपत्तिया सञ्चेतनिकाय सुक्कविस्सट्ठिया एकाहपटिच्छन्नाय एकाहपरिवासं अदासि, सोहं परिवसामि, वेदयामाहं भन्ते, वेदयतीति मं सङ्घो धारेतू’’ति एवं आरोचेतब्बं.

‘‘इमञ्च पनत्थं गहेत्वा याय कायचि वाचाय आरोचेतुं वट्टतियेवा’’ति (चूळव. अट्ठ. १०२) अट्ठकथावचनतो याय कायचि भासायपि आरोचेतुं वट्टति.

५११. पुनप्पुनागतानन्ति एत्थ ‘‘भिक्खून’’न्ति सेसो. पुब्बे आरोचनट्ठानं असम्पत्तानं आगन्तुकानं भिक्खूनम्पि. आरोचेन्तोवाति एकस्स आरोचने सो चे वुड्ढतरो होति, ‘‘भन्ते’’ति वत्वा पुब्बे वुत्तनयेनेव वत्वा, नवको चे, ‘‘आवुसो’’ति वत्वा अवसाने ‘‘मं आयस्मा धारेतू’’ति, द्वे चे होन्ति, ‘‘मं आयस्मन्ता धारेन्तू’’ति, तयो चे, ‘‘मं आयस्मन्तो धारेन्तू’’ति वत्वा आरोचेन्तोव. रत्तिया छेदं अकत्वाति ‘‘पकतत्तेन भिक्खुना सद्धिं एकच्छन्ने’’तिआदिना (चूळव. ८१) नयेन वुत्तएकसेनासने पकतत्तेन भिक्खुना सद्धिं अरुणुट्ठापनवसेन ¶ करियमानेन सहवासेन वा ‘‘पकतत्तभिक्खूहि विना एककेन वासो’’ति वुत्तविप्पवासेन वा ‘‘आगन्तुकानं आरोचनाय अकरण’’न्ति वुत्तअनारोचनेन वा सम्भवन्तं रत्तिच्छेदमकत्वा. वत्तभेदं अकत्वा वा पारिवासिकक्खन्धके पारिवासिकस्स पञ्ञत्तवत्ततो एकम्पि अहापेत्वा च. सदा वसेति परिवासं वसितुं ¶ परिकप्पिता सब्बदिवसा याव खिणन्ति, ताव वसेय्याति अत्थो.

५१२. तत्थ परिवासो विसोधेतुं न सक्का चेति तस्स विहारस्स महन्तत्ता आगते आगन्तुकभिक्खू परियेसित्वा आरोचेन्तेन रत्तिच्छेदं अकत्वा परिवासं सोधेतुं न सक्का चे होति. तं वत्तं निक्खिपित्वानाति तथा समादिन्नं वत्तं उपरि वक्खमाननयेन निक्खिपित्वा.

५१३. कत्थ निक्खिपेय्याति आह ‘‘तत्था’’तिआदि. तत्थेव सङ्घमज्झे वाति अत्तनो यस्मिं वत्तं समादिन्नं, तस्मिंयेव सङ्घमज्झे वा. पुग्गले वाति भिक्खूसु उट्ठाय तत्थ तत्थ गतेसु अन्तोसीमाययेव ओहीने एकभिक्खुम्हि वा असतिया बहिसीमं गतेन सरितक्खणे अत्तना सद्धिं गच्छन्ते तस्सायेव परिसाय परिवासदाने सम्मुखीभूते पुग्गले वा आगन्तुकभिक्खु चे, तस्स वा सन्तिके आरोचेत्वा वत्तं निक्खिपितब्बन्ति वुत्तं होति. कथं निक्खिपे’ति आह ‘‘निक्खिपामी’’तिआदि. ‘‘तथा’’ति इमिना ‘‘निक्खिपामी’’ति एतं पच्चामसति. तं वत्तन्ति अत्तना समादिन्नं तं वत्तं.

५१४. अयं नयोति ‘‘एकपदेनापि द्वीहि पदेहि वा पना’’ति एवं अनन्तरोदितनयो.

५१५-२०. पकतत्तोति वुच्चतीति सग्गमोक्खावरणाभावेन पकतो पुब्बसरूपेनेव ठितो अत्ता एतस्साति ‘‘पकतत्तो’’ति कथीयति. पच्चूसकालस्मिन्ति अरुणतो पुरिमकाले.

परिक्खित्तविहारस्साति एत्थ पाकारादीहि परिक्खित्तं एकम्पि सेनासनं विहरन्ति अस्मिन्ति कत्वा तथा वुच्चति. द्वे ¶ लेड्डुपाते अतिक्कम्माति योजना. लेड्डुपातद्वयस्स अवधिं दस्सेति ‘‘परिक्खेपतो बही’’ति, ‘‘अपरिक्खित्ततो परिक्खेपारहट्ठाना बही’’ति च.

परिक्खेपारहट्ठानं ¶ नाम कतमन्ति? विसुद्धिमग्गे (विसुद्धि. १.३१) धुतङ्गनिद्देसे ‘‘मज्झिमट्ठकथायं पन विहारस्सापि गामस्सेव उपचारं नीहरित्वा उभिन्नं लेड्डुपातानं अब्भन्तरा मिनितब्ब’न्ति वुत्तं. इदमेत्थपमाण’’न्ति वुत्तत्ता अपरिक्खित्तस्स पठमलेड्डुपातं होति, गामे वुत्तेन विधिना विहारपरियन्ते ठितभत्तसालगिलानसालादिसेनासने चे परिक्खेपो अत्थि, तत्थ वा, नत्थि चे, निब्बकोसस्स उदकपातट्ठाने ठितेन मातुगामेन छड्डितभाजनधोवनोदकपतनट्ठाने वा सेनासनतो दूरे चेतियङ्गणे, बोधियङ्गणे वा ठत्वा बलमज्झिमस्स पुरिसस्स हत्थं पसारेत्वा अत्तनो बलप्पमाणेन खित्तस्स मुट्ठिया गहितपासाणस्स पतनट्ठानं विहारूपचारो नाम, तदेव पाकारादीहि परिक्खेपारहट्ठानं नाम. तत्थ ठत्वा तथेव खित्तस्स पासाणस्स पतनट्ठानं एको लेड्डुपातो, तत्थापि ठत्वा तथेव खित्तस्स पासाणस्स पतनट्ठानं एको लेड्डुपातोति एवं द्वे लेड्डुपाता गहेतब्बा.

मग्गतो ओक्कमित्वाति मग्गतो अपसक्कित्वा. गुम्बेनाति रुक्खगहनेन वा लतागहनेन वा. वतियाति कण्टकसाखादीहि कताय वतिया.

वत्तमादायाति पुब्बे वुत्तनयेन वत्तं समादियित्वा. आरोचेत्वाति यथावुत्तनयेन आरोचेत्वा.

निक्खिपित्वाति पुब्बे वुत्तनयेन वत्तं निक्खिपित्वा. भिक्खूति अत्तना सद्धिं हत्थपासदानत्थाय आगतो भिक्खु. यस्स कस्सचीति एत्थ ‘‘सन्तिके’’ति सेसो.

आरोचेत्वा ¶ वाति अत्तनो नवकतरो चे, ‘‘आवुसो’’ति, वुड्ढो चे, ‘‘भन्ते’’ति वत्वा यथावुत्तनयेनेव आरोचेत्वा. सेसन्ति अवसेसविनिच्छयं. समुच्चयस्साति चूळवग्गागतस्स ततियसमुच्चयक्खन्धकस्स. अट्ठकथायचाति ‘‘सचे अञ्ञो कोचि भिक्खु केनचिदेव करणीयेना’’तिआदिना (चूळव. अट्ठ. १०२) अट्ठकथागतविनिच्छयेनापि.

विभावयेति ‘‘सचे यं भिक्खुं तत्थ आगतं पस्सति, भासमानस्स सद्दं सुणाति, तस्स आरोचेतब्बं. तथा अकरोन्तस्स रत्तिच्छेदो च वत्तभेदो च होति दुक्कटं आपज्जति. सचे सो द्वादसरतनब्भन्तरं पत्वा तस्स अजानन्तस्सेव पक्कन्तो होति, रत्तिच्छेदोव होति, न वत्तभेदो ¶ . सचे अत्तना सद्धिं आगतो केनचिदेव करणीयेन गतो होति, विहारं गन्त्वा यं पठमं पस्सति, तस्स सन्तिके आरोचेत्वा वत्तं निक्खिपितब्बं. एवं परिकप्पितदिवसे पुण्णे कुक्कुच्चविनोदनत्थं अतिरेके च दिवसे वत्तं पूरेत्वा परियोसाने वत्ते असमादिन्ने मानत्तारहो न होतीति सङ्घं उपसङ्कम्म वत्तं समादियित्वा खन्धके आगतनयेनेव मानत्तं याचितब्बं. अनिक्खित्तवत्तेन चरितुकामस्स पुन वत्तसमादानं कातब्बं न होती’’ति एत्तको विसेसो, इमं अट्ठकथागतं विनिच्छयं पकासेय्याति वुत्तं होतीति.

पटिच्छन्नपरिवासकथावण्णना.

५२१. न जानतीति एत्थ छन्दवसेन रस्सो कतो. आपत्तीनञ्च रत्तीनं, परिच्छेदं न जानतीति बहू सङ्घादिसेसे आपज्जित्वापि ‘‘एत्तकाहं आपत्तियो आपन्नो’’ति अत्तनो आपन्नसङ्घादिसेसापत्तीनं परिच्छेदं ¶ न जानाति, ‘‘मया आपन्नापत्ति एत्तके दिवसे पटिच्छन्ना’’ति दिवसपरिच्छेदं न जानाति.

५२२. इदानि तस्स पभेदं दस्सेतुमाह ‘‘एसेवा’’तिआदि. परिसुद्धेहीति सकलसंकिलेसप्पहानेन परिसुद्धसन्तानेहि उपालित्थेरादिपुब्बाचरियेहि. एसोव सुद्धन्तोति एसो यथावुत्तसरूपो सुद्धन्तपरिवासो. चूळसुद्धन्तनामो चाति ‘‘यो उपसम्पदतो पट्ठाय अनुलोमक्कमेन वा’’तिआदिना (चूळव. अट्ठ. १०२) अट्ठकथायं वुत्तनयेन उपसम्पदमाळकतो पट्ठाय अनुलोमवसेन वा आरोचितदिवसतो पट्ठाय पटिलोमवसेन वा सरन्ते ‘‘कित्तकानि दिवसानि परिसुद्धोति सरसी’’ति विनयधरेहि पुच्छिते ‘‘एत्तकं कालं परिसुद्धोस्मी’’ति वुत्तवतो तेन वुत्तसुद्धदिनानि परियन्तं कत्वा दिन्नो याव उपसम्पन्नदिवसो, ताव बहुदिवसेसु नेतब्बं महासुद्धन्तं सन्धाय इतरदिनानं पूरेतब्बत्ता चूळसुद्धन्तो नामाति वुत्तं होति.

‘‘अयञ्हि सुद्धन्तपरिवासो नाम उद्धम्पि आरोहति, हेट्ठापि ओरोहति, इदमस्स लक्खण’’न्ति (चूळव. अट्ठ. १०२) वुत्तत्ता इमं परिवासं परिवसनतो पच्छा दिवसं सरन्तो परिकप्पेत्वा योजेत्वा गहितदिवसतो वड्ढेति वा हापेति वा, उभयत्थापि ‘‘पुन परिवासदानकिच्चं नत्थी’’ति (चूळव. अट्ठ. १०२) वचनतो पुब्बे दिन्नपरिवासोयेव पमाणं ¶ . ‘‘एतस्स अप्पटिच्छन्नं ‘पटिच्छन्ना’ति वा अचिरपटिच्छन्नं ‘चिरपटिच्छन्ना’ति वा असम्बहुलम्पि ‘सम्बहुला’ति वा विपरीततो गहेत्वा विनयकम्मं करोन्तस्स आपत्तितो वुट्ठानं होति, पटिच्छन्नं ‘अप्पटिच्छन्ना’तिआदिविपरियायेन न होती’’ति (चूळव. अट्ठ. १०२ अत्थतो समानं) अट्ठकथागतनयो वेदितब्बो.

महासुद्धन्तनामकोति ¶ ‘‘यो पन यथावुत्तेन अनुलोमपटिलोमनयेन पुच्छियमानोपि रत्तिपरियन्तं न जानाति, नेव सरति, वेमतिको वा होति, तस्स दिन्नो सुद्धन्तपरिवासो महासुद्धन्तोति वुच्चती’’ति (चूळव. अट्ठ. १०२) अट्ठकथायं निद्दिट्ठसरूपो महासुद्धन्तो नाम. ‘‘अयं उद्धं नारोहति, हेट्ठा पन ओरोहती’’ति वुत्तत्ता अयं परिवासो याव उपसम्पन्नदिवसो, ताव पूरेतब्बतो ततो उद्धं नारोहति. अन्तराळे अत्तनो सुद्धकालं परिकप्पेत्वा सरति चे, ततो पट्ठाय निवत्तनतो दिवसहानं पन होतेव.

५२३. ‘‘अञ्ञतरो भिक्खु सम्बहुला सङ्घादिसेसा आपत्तियो आपन्नो होति, सो आपत्तिपरियन्तं न जानाति, रत्तिपरियन्तं न जानाती’’ति (चूळव. १५६) आगतवत्थुम्हि इमस्स परिवासस्स अनुञ्ञातत्ता तं वत्थुं सङ्गहेतुं ‘‘आपत्तीनं चा’’तिआदिं वत्वापि ‘‘आपत्तिपरियन्तं पन ‘एत्तका अहं आपत्तियो आपन्नो’ति जानातु वा मा वा, अकारणमेत’’न्ति (चूळव. अट्ठ. १०२) पटिसेधेत्वा अट्ठकथायं पधानभावेन वुत्तरत्तिपरियन्तस्स अपरिजाननमत्तमेव पमाणन्ति दस्सेतुमाह ‘‘दुविधोपी’’तिआदि. दुविधोपि अयं सुद्धन्तपरिवासो एकच्चं रत्तिपरिच्छेदं, सकलं वा रत्तिपरिच्छेदं अजानतो वा विमतिस्स वा दातब्बोति योजना.

सुद्धन्तपरिवासकथावण्णना.

५२४. इतरोपि सो समोधानपरिवासो तिधा मतोति योजना. धातुसद्दानं अनेकत्थत्ता ‘‘ओधान’’न्ति मक्खनं वुच्चति. तेनाह अट्ठकथायं ‘‘ओधुनित्वा ¶ मक्खेत्वा’’ति (चूळव. अट्ठ. १०२). ‘‘समोधान’’न्ति पक्खेपो वुच्चति. यथाह अट्ठकथायं ‘‘समोदहित्वा’’ति. ओधानञ्च समोधानञ्च ओधानसमोधानं, तं यत्थ सो परिवासो ‘‘ओधानसमोधानो’’ति वेदितब्बो. अरिसादिगणे अन्तोगधत्ता हेत्थ, उपरि च एवरूपे ठाने अ-कारपच्चयो दट्ठब्बो ¶ . परिवुत्थदिवसानं मक्खनञ्च मूलापत्तियं अन्तरापत्तीनं पक्खिपनञ्च यस्मिं सो परिवासोति वुत्तं होति. तेनेवेत्थ ‘‘दिवसे परिवुत्थे तु, ओधुनित्वा पदीयते’’ति वक्खति. यथाह अट्ठकथायं ‘‘परिवुत्थदिवसे ओधुनित्वा मक्खेत्वा पुरिमाय आपत्तिया मूलदिवसपरिच्छेदे पच्छा आपन्नं आपत्तिं समोदहित्वा’’ति (चूळव. अट्ठ. १०२).

अग्घपुब्बको मिस्सकपुब्बको समोधानपरिवासोति योजना, अग्घसमोधानपरिवासो मिस्सकसमोधानपरिवासोति वुत्तं होति. अग्घो च मिस्सको च अग्घमिस्सका, ते पुब्बका एतस्साति अग्घमिस्सकपुब्बको, समोधानो. अग्घेन समोधानं अग्घसमोधानं, तं यत्थ सो अग्घसमोधानो, आपन्नासु बहूसु सब्बचिरपटिच्छन्नापत्तीनं दिवसगणनग्घेनेव पच्छा आपन्नआपत्तीनं पक्खेपयुत्तपरिवासोति अत्थो. यथाह अट्ठकथायं ‘‘अग्घसमोधानो नाम सम्बहुलासु आपत्तीसु या एका वा द्वे वा तिस्सो वा सम्बहुला वा आपत्तियो सब्बचिरपटिच्छन्नायो, तासं अग्घेन समोधाय तासं रत्तिपरिच्छेदवसेन अवसेसानं ऊनतरपटिच्छन्नानं आपत्तीनं परिवासो दिय्यति, अयं वुच्चति अग्घसमोधानो’’ति (चूळव. अट्ठ. १०२). मिस्सकानं नानावत्थुकानं आपत्तीनं समोधानं मिस्सकसमोधानं, तं यत्थ सो परिवासो मिस्सकसमोधानो. मिस्सकानं नानावत्थुकानं आपत्तीनं एकतो पक्खेपयुत्तो परिवासोति अत्थो. यथाह अट्ठकथायं ‘‘मिस्सकसमोधानो ¶ नाम यो नानावत्थुका आपत्तियो एकतो कत्वा दिय्यती’’ति (चूळव. अट्ठ. १०२).

५२५-७. एवं तिविधे समोधानपरिवासे पठमपरिवासस्स विसेसनभूतताय अवयवानं द्विन्नं ओधानसमोधानसद्दानं अत्थानुवादेन तदुभयओधानसमोधानसरूपं विधातुमाह ‘‘आपज्जित्वा…पे… पकासितो’’ति. तत्थ पठमस्स ओधान-सद्दसङ्खातस्स अवयवस्स अत्थसरूपानुवादमाह ‘‘आपज्जित्वा…पे… पदीयते’’ति. दुतियावयवसङ्खातसमोधान-सद्दस्स अत्थसरूपानुवादमाह ‘‘पुरिमापत्तिया…पे… भिक्खुनो’’ति. तेनेव उभयत्थानुवादे ‘‘भिक्खुनो’’ति पदद्वयस्स, ‘‘पदीयते दातब्बो’’ति किरियापदद्वयस्स च विसुं विसुं गहितत्ता पुनरुत्तिदोसाभावो वेदितब्बो. एवं अवयवत्थानुवादेन विधातब्बसमुदायं दस्सेतुमाह ‘‘एसोधानसमोधानपरिवासो पकासितो’’ति. एत्थ छादेन्तस्स हीति हि-सद्दो हेतुम्हि. एसोधानसमोधानोति एत्थ एत-सद्दसम्बन्धेन ‘‘यो’’ति लब्भति.

तत्रायं ¶ योजना – आपज्जित्वा…पे… ओधुनित्वा यो यस्मा पदीयते, पुरिमापत्तिया…पे… यो यस्मा दातब्बो, तस्मा एसोधानसमोधानपरिवासो पकासितोति.

तत्थ अन्तरापत्तिं आपज्जित्वाति पटिच्छन्नापत्तिया परिवसन्तो वा मानत्तारहो वा मानत्तं चरन्तो वा अब्भानारहो वा हुत्वा कदाचि अञ्ञं सङ्घादिसेसापत्तिं आपज्जित्वा. छादेन्तस्साति पठमं आपन्नापत्तियापटिच्छादितकालेन समं वा ऊनं वा कालं पटिच्छादेन्तस्स. ‘‘मूलायपटिकस्सनेन ते परिवुत्थदिवसे च मानत्तचिण्णदिवसे ¶ च सब्बे ओधुनित्वा’’ति (चूळव. अट्ठ. १०२) अट्ठकथावचनतो एत्थ ‘‘परिवुत्थे’’ति उपलक्खणत्ता ‘‘मानत्तचिण्णे चा’’ति गहेतब्बं. ओधुनित्वाति च मूलायपटिकस्सनवसेन मक्खेत्वा, अदिवसे कत्वाति अधिप्पायो.

यो यस्मा पदीयते, सो परिवासो सट्ठिवस्सानि परिवसित्वा मानत्तारहो हुत्वापि अन्तरापत्तिं आपज्जित्वा एकाहम्पि पटिच्छादिते मूलायपटिकस्सनेन ते दिवसे सब्बे मक्खेत्वा तानेव सट्ठिवस्सानि पुनपि यस्मा पदीयतेति अत्थो. यथाह अट्ठकथायं ‘‘सट्ठिवस्सानि परिवसित्वा मानत्तारहो हुत्वापि हि एकदिवसं अन्तरापत्तिं पटिच्छादेत्वा पुनपि सट्ठिवस्सानि परिवासारहो होती’’ति (चूळव. अट्ठ. १०२).

पुरिमापत्तियाति तेन आपन्नासु सम्बहुलासु आपत्तीसु सब्बापत्तीनं पुरेतरमेव पटिच्छन्नाय आपत्तिया. मूलदिवसेति पठमं वीतिक्कमदिवसे. विनिच्छितेति ‘‘असुकसंवच्छरे असुकमासे असुकदिवसे’’ति नियमिते. समोधाय पक्खिपित्वा दातब्बोति सम्बन्धो. विधानतो याचमानस्साति विधानतो सङ्घेन दातब्बोति योजेतब्बं, समुच्चयक्खन्धके वुत्तेन विधिना याचमानस्स तत्थेव वुत्तविधिना सङ्घेन दातब्बोति अत्थो. ‘‘एसो ओधानसमोधानपरिवासो’’ति पदच्छेदो.

५२८-९. तथा वुच्चतीति सम्बन्धो. तासं अग्घवसेन हीति हि-सद्दो हेतुम्हि. ‘‘सोति तंसद्दसम्बन्धेन ‘‘यो’’ति लब्भति. तत्रायं योजना – सम्बहुला…पे… तासं अग्घवसेन ततो ऊनपटिच्छन्नानं आपत्तीनं ¶ समोधाय यो यस्मा पदातब्बो परिवासो, तस्मा सो यथा अवयवत्थवसेन ¶ ‘‘ओधानसमोधानो’’ति परिवासो वुत्तो, तथा ‘‘अग्घसमोधानो’’ति वुच्चतीति.

तत्थ सम्बहुलासूति यासं आपत्तीनं परिवसितुकामो, तासु सम्बहुलासु आपत्तीसु, निद्धारणे भुम्मं. ‘‘एका वा’’तिआदि निद्धारियनिद्देसो. तासं आपत्तीनं. अग्घवसेनाति गणनवसेन, रत्तिपरिच्छेदवसेनाति वुत्तं होति. यथाह अट्ठकथायं ‘‘तासं रत्तिपरिच्छेदवसेना’’ति (चूळव. अट्ठ. १०२). ‘‘पदातब्बो’’ति इमिना सम्बन्धो. ततोति चिरपटिच्छन्नापत्तितो. ऊनपटिच्छन्नानं आपत्तीनन्ति एत्थ उपयोगत्थे सामिवचनं, ऊनपटिच्छन्नायो आपत्तियो समोधायाति वुत्तं होति.

५३०. नाना सुक्कविस्सट्ठिआदीनि वत्थूनि यासं ता नानावत्थुका, नानावत्थुका सञ्ञा यासं आपत्तीनं ता नानावत्थुकसञ्ञायो. सब्बाति एत्थ ‘‘या’’ति सेसो, सुक्कविस्सट्ठिआदिकुलदूसनावसाना या सब्बा तेरस सङ्घादिसेसा आपत्तियोति अत्थो. ता सब्बाति एत्थ पि-सद्दो वत्तब्बो. दातब्बोति एत्थ ‘‘परिवासो’’ति आनेत्वा सम्बन्धितब्बं. ता सब्बापि एकतो कत्वा दातब्बो परिवासोति योजना. तस्स तेरस सङ्घादिसेसापत्तियोपि एकतो कत्वाति अत्थो. ‘‘अहं भन्ते सम्बहुला सङ्घादिसेसा आपत्तियो आपज्जिं एकं सुक्कविस्सट्ठिं…पे… एकं कुलदूसकं, सोहं भन्ते सङ्घं तासं आपत्तीनं समोधानपरिवासं याचामी’’ति तिक्खत्तुं याचनाय च तदनुरूपाय ञत्तिया च कम्मवाचासु च नामं ¶ वत्वा दातब्बपरिवासो मिस्सको मतो ‘‘मिस्सकसमोधानपरिवासो’’ति ञातो. द्वे, तिस्सो, चतस्सो, अतिरेका च आपन्नस्सापि परिवासं देन्तेन इमिना नियामेन वत्थुं, नामं विसेसेत्वा गहेतब्बं.

समोधानपरिवासकथावण्णना.

५३१. परिवुत्थपरिवासस्साति तिविधे परिवासे अञ्ञतरस्स वसेन परिवुत्थपरिवासस्स. उत्तरि छ रत्तियोति परिवासतो उत्तरि छ रत्तियो, छ दिवसेति वुत्तं होति, ‘‘चरितु’’न्ति सेसो, चरणकिरियाय अच्चन्तसंयोगे उपयोगवचनं. मानत्तं देय्यन्ति योजना, ‘‘सङ्घेना’’ति सामत्थिया ¶ लब्भति. समुच्चयक्खन्धके वुत्तनयेन योजेत्वा छारत्तञ्च दातब्बो, भिक्खुमाननविधि भिक्खुस्स दातब्बोति अत्थो.

‘‘परिवुत्थपरिवासस्सा’’ति इमिना पटिच्छन्नमानत्तं पकतं, तत्थ पभेदे असति कस्मा ‘‘पटिच्छन्नापटिच्छन्नवसा दुवे’’ति वुत्तन्ति? पकतभेदमनपेक्खित्वा छारत्तमानत्ते लब्भमानविसयभेदं दस्सेतुं वुत्तं. एवञ्हि सति समोधानमानत्ते च ‘‘छारत्तं मानत्तं देतू’’ति (चूळव. १२८) पाळियं वुत्तत्ता तम्पि गहेत्वा ‘‘तिधा’’ति कस्मा न वुत्तन्ति? तम्पि पटिच्छन्नापत्तिया परिवुत्थपरिवासस्सेव दातब्बमानत्तन्ति पटिच्छन्नमानत्तवचनेनेव सङ्गहितत्ता विसुं न वुत्तं. तेनेव चतुब्बिधे मानत्ते इमेहि द्वीहि विना दस्सेतब्बेसु द्वीसु मानत्तेसु पक्खमानत्तमत्तं ‘‘छादेन्तिया’’तिआदिगाथाय दस्सेत्वा समोधानमानत्तं विसुं न दस्सितन्ति दट्ठब्बं.

५३४-६. विनिद्दिट्ठप्पकारन्ति ‘‘परिक्खित्तविहारस्सा’’तिआदिना यथावुत्तगाथाद्वयेन निद्दिट्ठप्पकारं. आदियित्वान तं ¶ तेसन्ति एत्थ ‘‘सन्तिके’’ति वक्खमानतो लब्भति. तेसं चतुन्नं सम्मुखा उक्कुटिकं निसीदित्वा अञ्जलिं पग्गहेत्वा तं वत्तं समादियित्वाति अत्थो. ‘‘तं तेसं सन्तिके’’ति इदं ‘‘आरोचेत्वा’’ति इमिनापि युज्जति. तेसमेव सम्मुखा निसिन्नेन ‘‘अहं भन्ते एकं आपत्तिं आपज्जिं सञ्चेतनिकं सुक्कविस्सट्ठि’’न्तिआदिना नयेन समुच्चयक्खन्धकागतं आरोचनं कत्वा. इमिना अन्तोअरुणे दिट्ठानं अञ्ञेसम्पि आरोचनं उपलक्खितं.

निक्खिपे सन्तिके तेसं वत्तन्ति एत्थ ‘‘अरुणे उट्ठिते’’ति अज्झाहरितब्बं. अरुणे उग्गते तेसं भिक्खूनं सम्मुखा यथावुत्तनयेनेव निसीदित्वा ‘‘वत्तं निक्खिपामि, मानत्तं निक्खिपामी’’ति इमेसु द्वीसु एकं वा द्वयमेव वा वत्वा वत्तं निक्खिपे.

५३७. तस्स मानत्तस्स. रत्तिच्छेदादिकोति एत्थ आदि-सद्देन वत्तभेदो गहितो. अट्ठकथावसेन पाळिवसेनाति योजना.

५३८. वीसतिया ¶ भिक्खूनं वग्गो समूहो वीसतिवग्गो, सो एव वीसतिवग्गिको. अब्भेय्याति ओसारेय्य, अब्भन्तरं करेय्याति अत्थो. विधिनाति समुच्चयक्खन्धकागतक्कमेन. अब्भितोति संवासेन अन्तो कतो, पकतत्तोति पकतिसभावो, आपत्तिं अनापन्नकालसदिसो होतीति अत्थो.

५३९. आपत्तिं छादेन्तिया भिक्खुनियाति योजना, ‘‘आपज्जित्वा’’ति सेसो, आपत्तिं आपज्जित्वा ‘‘आपत्ति चा’’तिआदिना (वि. वि. ५०५) नयेन पुब्बे दस्सितेहि दसहि अङ्गेहि पटिच्छादेन्तिया भिक्खुनिया अत्तनो आपत्तिं छादेन्तिया भिक्खुनिया. न च आपत्तीति एत्थ ‘‘अत्तनो’’ति इमिना अञ्ञिस्सा ¶ आपत्तिं पटिच्छादेन्तिया वज्जपटिच्छादिकासङ्खातपाराजिकापत्तीति दीपितं होति. ‘‘भिक्खुनिया’’ति इमिना भिक्खुस्स दुक्कटापत्तिभावं दीपेति.

५४१. विरुद्धमत्थं नयति पजहतीति विनयो, विनिच्छयो, तं विनयपिटकत्थविनिच्छयविसेसविसयं सम्मोहसङ्खातं विरुद्धं पच्चत्थिकं तदङ्गवसेन पजहनतो विनयनयसङ्खातं ततो एव अतिबुद्धिदीपनं, अतिसयेन बुद्धिं दीपेतीति अतिबुद्धिदीपनं, तं विनयत्थविनिच्छयकं ञाणपदीपं विसेसेन जालेन्तं. विविधेहि नयेहि युत्तताय विविधनययुतं. विनयनयेति विनयपिटकस्स परसन्तानपापने, विनयवण्णनायन्ति वुत्तं होति.

इति विनयत्थसारसन्दीपनिया

विनयविनिच्छयवण्णनाय

सङ्घादिसेसकथावण्णना निट्ठिता.

अनियतकथावण्णना

५४२-३. इदानि ¶ सङ्घादिसेसकथानन्तरं अनियतकथं दस्सेतुमाह ‘‘रहोनिसज्जस्सादेना’’तिआदि. रहसि निसज्जा रहोनिसज्जा, तस्सा अस्सादो रहोनिसज्जस्सादो, तेन रहोनिसज्जस्सादेन, मेथुनधम्मसन्निस्सितेन किलेसेनाति अत्थो. वुत्तञ्हि अट्ठकथायं ‘‘रहोनिसज्जस्सादोति मेथुनधम्मसन्निस्सितकिलेसो वुच्चती’’ति (पारा. अट्ठ. २.४५१). ‘‘रहो नाम चक्खुस्स रहो सोतस्स रहो. चक्खुस्स रहो नाम न सक्का होति अक्खिं वा निखणियमाने भमुकं वा उक्खिपियमाने सीसं वा उक्खिपियमाने पस्सितुं. सोतस्स रहो नाम न सक्का होति पकतिकथा सोतु’’न्ति (पारा. ४४५) पदभाजने वुत्तरहेसु ¶ चक्खुस्स रहो एव इधाधिप्पेतो. यथाह अट्ठकथायं ‘‘किञ्चापि पाळियं ‘सोतस्स रहो’ति आगतं, चक्खुस्स रहेनेव पन परिच्छेदो वेदितब्बो’’ति (पारा. अट्ठ. २.४४४-४४५).

चक्खुस्स रहत्ता ‘‘पटिच्छन्न’’न्ति इमम्पि पटिच्छन्नत्ता एव ‘‘अलंकम्मनिय’’न्ति इमम्पि सङ्गण्हाति. निसज्जसद्दोपादानेन ‘‘आसने’’ति इदम्पि गहितमेव. ‘‘मातुगामस्स सन्तिकं गन्तुकामो’’ति इमिना ‘‘मातुगामेन सद्धि’’न्ति इदम्पि गहितमेव. एवं सामत्थिया लब्भमानपदोपादानेन यो पन भिक्खु मातुगामेन सद्धिं एको एकाय रहो पटिच्छन्ने आसने अलंकम्मनिये निसज्जस्सादेनाति वुत्तं होति. चक्खुस्स रहभावेन कुट्टादिपटिच्छन्ने तेनेव मेथुनसेवनकम्मस्स अनुरूपे आसने तदहुजातायपि मनुस्सित्थिया सह निसज्जस्सादरागेन समन्नागतो हुत्वाति अत्थो. एत्थ ‘‘मातुगामस्सा’’ति तदहुजातम्पि इत्थिं गण्हातीति कुतो लब्भतीति? ‘‘मातुगामो नाम मनुस्सित्थी, न यक्खी, न पेती, न तिरच्छानगता, अन्तमसो तदहुजातापि दारिका, पगेव महत्तरी’’ति (पारा. ४४५) पदभाजनतो लब्भति.

‘‘निवासेती’’ति इमिना ‘‘कायबन्धनं बन्धति, चीवरं पारुपती’’ति इदं लक्खीयति. सब्बत्थाति यथावुत्तं पयोगतो पुब्बापरपयोगे सङ्गण्हाति. तेनेव ‘‘पयोगे च पयोगे चा’’ति विच्छापयोगो कतो. निसीदतो चस्स दुक्कटन्ति योजना. ‘‘उभिन्नम्पि निसज्जाय पाचित्तिय’’न्ति वक्खमानत्ता दुक्कटं सन्धाय एककस्स निसीदतोति गहेतब्बं.

५४४. निसज्जाय ¶ उभिन्नम्पीति एत्थ ‘‘सकि’’न्ति सेसो, उभिन्नं निसज्जापूरणवसेन अञ्ञमञ्ञस्स पुरे वा पच्छा वा एकक्खणे ¶ वा मातुगामस्स वा भिक्खुस्स वा एकवारं निसज्जायाति वुत्तं होति. वुत्तञ्हेतं पाळियं ‘‘मातुगामे निसिन्ने भिक्खु उपनिसिन्नो वा होती’’तिआदि (पारा. ४४५). होति पाचित्तियन्ति योजना. पयोगगणनाय च होन्ति पाचित्तियानीति गहेतब्बं, मातुगामस्स वा भिक्खुनो वा उभिन्नं वा उट्ठायुट्ठाय पुनप्पुनं उपनिसीदनपयोगगणनाय चाति अत्थो. ‘‘आपत्तीहिपि तीहिपी’’ति वक्खमानत्ता पाचित्तियग्गहणं पाराजिकसङ्घादिसेसानं उपलक्खणं होति, तीसु एकं होतीति वुत्तं होति. एत्थ ‘‘पयोगगणनाया’’ति इदं पाराजिकाय न लब्भति एकपयोगेनेव सिज्झनतो. कायसंसग्गसङ्घादिसेसो, पन सरीरतो पुनप्पुनं वियुज्जित्वा फुसनेन पाचित्तियञ्च यथावुत्तनयेनेव लब्भति.

बहूसुपि मातुगामेसु बहुकानि पाचित्तियानि होन्तीति योजना. बहूसु मातुगामेसु निसिन्नेसु निसिन्नानं गणनाय एकेनेव पयोगेन बहूनि पाचित्तियानि च सङ्घादिसेसा च होन्ति. ‘‘पयोगगणनाय चा’’ति इमस्स एत्थापि युज्जमानत्ता तासु विसुं विसुं उट्ठायुट्ठाय पुनप्पुनं निसीदन्तीसु, सयञ्च उट्ठायुट्ठाय पुनप्पुनं निसीदतो तासं गणनाय आपज्जितब्बापत्तियो पयोगगणनाय च बहू होन्तीति इदं लब्भति. एत्थापि पन पाराजिकं न लब्भति, सङ्घादिसेसो, पाचित्तियञ्च लब्भति.

५४५. समीपे ठितोपि अन्धो अनापत्तिं न करोतीति सोतस्स रहभावे असतिपि पधानभूतस्स ‘‘चक्खुस्स रहो’’ति इमस्स अङ्गस्स विज्जमानत्ता वुत्तं ‘‘अन्तोद्वादसहत्थके’’ति, इमिना सवनूपचारे विज्जमानेपीति वुत्तं होति. इत्थीनं तु सतम्पि च न करोति अनापत्तिन्ति ¶ योजना, विञ्ञुनो पुरिसस्स असन्निहितभावेनाति अधिप्पायो. ‘‘इत्थीनम्पि सतम्पि चा’’ति लिखन्ति, ततोपि अयमेव पाठो सुन्दरो. पि-सद्दो वा तु-सद्दत्थे दट्ठब्बो.

५४६. निपज्जित्वाति एत्थ ‘‘समीपे’’ति सेसो, ‘‘निद्दायन्तोपी’’ति एतस्स विसेसकेन ‘‘निपज्जित्वा’’ति इमिना निसीदित्वा निद्दायन्तोति इमस्स निवत्तितत्ता समीपे निसीदित्वा निद्दायन्तोपि अनन्धो मनुस्सपुरिसो अनापत्तिं करोतीति लब्भति. ‘‘केवल’’न्ति विसेसनेन बलवनिद्दूपगतो ¶ गहितोति तथा अहुत्वा अन्तरन्तरा आपन्नापन्ने विनिच्छिनित्वा पवत्तमानाय कपिनिद्दाय निद्दायन्तोपि अनापत्तिं करोतीति अयमत्थो लब्भति. ‘‘पिहितद्वारगब्भस्सा’’ति वत्तब्बे मज्झपदलोपीसमासवसेन ‘‘पिहितगब्भस्सा’’ति वुत्तं. ‘‘द्वारे’’ति इमिना द्वारेकदेसभूतं उम्मारं वा तंसमीपं वा उपचारेन वुत्तन्ति दट्ठब्बं. सचे गब्भो पिहितद्वारो न होति, अनापत्तीति ब्यतिरेकतो दस्सितं.

५४७. इमस्मिं अनियतसिक्खापदे पाळियं अनापत्तिवारे असतिपि ‘‘यो पन भिक्खु मातुगामेन सद्धिं रहो पटिच्छन्ने आसने निसज्जं कप्पेय्य, पाचित्तिय’’न्ति (पाचि. २८५) पञ्चमस्स अचेलकवग्गस्स चतुत्थसिक्खापदे अनापत्तिवारे ‘‘अनापत्ति यो कोचि विञ्ञू पुरिसो दुतियो होति, तिट्ठति न निसीदति, अरहोपेक्खो, अञ्ञविहितो निसीदति, उम्मत्तकस्स आदिकम्मिकस्सा’’ति (पाचि. २८८) वुत्ते अनापत्तिवारे सङ्गहेतुमाह ‘‘अनन्धे सती’’तिआदि. ‘‘एतस्स समीपे’’ति पकरणतो लब्भति. इध पुल्लिङ्गनिद्देसेन पुरिसो लब्भति, ‘‘तेनापि अबालेन भवितब्बं, मनुस्सजातिकेन भवितब्ब’’न्ति इदञ्च ¶ ‘‘विञ्ञुस्मि’’न्ति इमिना लब्भति. अन्धसदिसनिद्दूपगतपटिपक्खवाचिअनन्धपदेन ‘‘अनिद्दायन्ते’’ति लब्भति, मनापामनापं जानन्ते अनिद्दायन्ते मनुस्सपुरिसे दस्सनूपचारस्स अन्तो विज्जमानेति अत्थो.

‘‘निसज्जपच्चया दोसो नत्थी’’ति इमिना सम्बन्धो, एवरूपे रहो आसने मातुगामेन सद्धिं निसिन्नपच्चया आपत्ति नत्थीति अत्थो. ‘‘ठितस्सा’’ति इमिनापि तदेव पदं योजेतब्बं. विञ्ञुम्हि पटिबले मनुस्सपुरिसे असन्निहितेपि तथाविधे रहो आसने मातुगामे आसने निसिन्नेपि सयानेपि ठितेपि सयं ठितस्स निसज्जाय अभावा तप्पच्चया आपत्ति न होतीति अत्थो. अरहसञ्ञिनो निसज्जपच्चया दोसो नत्थीति रहो आसने मातुगामेन सद्धिं निसज्जन्तस्सापि ‘‘रहो’’ति सञ्ञारहितस्स निसीदतो निसज्जपच्चया अनापत्तीति अत्थो. विक्खित्तचेतसो निसज्जपच्चया दोसो नत्थीति योजना.

५४८. एत्तावता पाचित्तियापत्तिमत्ततो अनापत्तिप्पकारं दस्सेत्वा इदानि इमस्स सिक्खापदस्स अनियतवोहारहेतुभूताहि तीहि आपत्तीहि अनापत्तिपकारं दस्सेतुमाह ‘‘न दोसो’’तिआदि. आपत्तीहिपि तीहिपीति ‘‘निसज्जं भिक्खु पटिजानमानो तिण्णं धम्मानं अञ्ञतरेन ¶ कारेतब्बो पाराजिकेन वा सङ्घादिसेसेन वा पाचित्तियेन वा’’ति (पारा. ४४४) पाळियं वुत्ताहि ‘‘पठमपाराजिकापत्तिकायसंसग्गसङ्घादिसेसापत्तिपाचित्तियापत्ती’’ति इमाहि तीहिपि आपत्तीहीति वुत्तं होतीति.

पठमानियतकथावण्णना.

५४९. वत्तब्बभावेनाधिकतदुतियानियतविनिच्छयतो पठमानियते वुत्तविनिच्छयेहि समं विनिच्छयं पहाय तत्थ ¶ अवुत्तं इमस्सेव विनिच्छयविसेसं दस्सेतुमाह ‘‘अनन्धा’’तिआदि. इध दुट्ठुल्लवाचासङ्घादिसेसस्सापि गहितत्ता ततो अनापत्तिकरं दस्सेतुं ‘‘अबधिरो’’ति वुत्तं. अनन्धो अबधिरोति ‘‘पुरिसो’’ति इदं सन्धाय वुत्तं. ‘‘इत्थी’’ति इदं सन्धाय ‘‘अनन्धाबधिरा’’ति गहेतब्बं. एवमुपरिपि. तेनापि सवनूपचारन्तोगधेन भवितब्बन्ति दस्सेतुं ‘‘अन्तोद्वादसहत्थट्ठो’’ति वुत्तं.

५५०. ‘‘अन्धो अबधिरो अनापत्तिं न करोती’’ति इदं कायसंसग्गसङ्घादिसेसं सन्धाय वुत्तं. ‘‘बधिरो वापि चक्खुमा, न करोति अनापत्ति’’न्ति इदं पन दुट्ठुल्लवाचासङ्घादिसेसं सन्धाय वुत्तन्ति एवमेत्थ सन्धाय भासितत्थो वेदितब्बो.

पुरिमानियतकथाय अवुत्तविसेसस्स दुतियानियतकथाय वत्तुमिच्छितत्ता अयम्पि विसेसो इध वत्तब्बो. कोयं विसेसो, यो इध वत्तब्बोति चे? तत्थ ‘‘पटिच्छन्ने आसने अलंकम्मनिये’’ति (पारा. ४४४) वुत्तं आसनङ्गद्वयं इध ‘‘न हेव खो पन पटिच्छन्नं आसनं होति नालंकम्मनिय’’न्ति (पारा. ४५३) निसेधेत्वा ‘‘अलञ्च खो होति मातुगामं दुट्ठुल्लाहि वाचाहि ओभासितु’’न्ति (पारा. ४५३) इदं अपुब्बङ्गं वुत्तं. तत्र मातुगामोति अन्तमसो तदहुजातापि दारिका गहिता, इध ‘‘मातुगामो नाम मनुस्सित्थी, न यक्खी, न पेती, न तिरच्छानगता, विञ्ञू पटिबला सुभासितदुब्भासितं दुट्ठुल्लादुट्ठुल्लं आजानितु’’न्ति (पारा. ४५४) विञ्ञू पटिबलो मातुगामोव वुत्तो. तत्थ ‘‘पाराजिकेन वा सङ्घादिसेसेन वा पाचित्तियेन वा’’ति (पारा. ४४४) तिस्सो आपत्तियो वुत्ता, इध ‘‘निसज्जं भिक्खु पटिजानमानो द्विन्नं धम्मानं अञ्ञतरेन ¶ कारेतब्बो सङ्घादिसेसेन वा पाचित्तियेन वा’’ति (पारा. ४५३) द्वेयेव आपत्तियो वुत्ता. सङ्घादिसेसेसु च तत्थ ‘‘सा चे एवं वदेय्य ‘अय्यो ¶ मया दिट्ठो निसिन्नो मातुगामेन सद्धिं कायसंसग्गं समापज्जन्तो’ति, सो च तं पटिजानाति, आपत्तिया कारेतब्बो’’ति (पारा. ४४८) कायसंसग्गसङ्घादिसेसोव वुत्तो, इध सो च वुत्तो, ‘‘सा चे एवं वदेय्य ‘अय्यस्स मया सुतं निसिन्नस्स मातुगामं दुट्ठुल्लाहि वाचाहि ओभासेन्तस्सा’ति, सो च तं पटिजानाति, आपत्तिया कारेतब्बो’’ति (पारा. ४५५) दुट्ठुल्लवाचासङ्घादिसेसो च वुत्तो. एत्तको उभिन्नमनियतानं विसेसो.

अयं कस्मा न वुत्तोति? अयं सम्बोधवत्थुविसेसो वत्तुमिच्छितो पन अट्ठकथागतविनिच्छयविसेसतोति तस्मा न वुत्तोति दट्ठब्बो. तिसमुट्ठानमेविदं कायचित्तवाचाचित्तकायवाचाचित्तवसेन तीणि समुट्ठानानि एतस्साति कत्वा.

इमेहिपि द्वीहि अनियतसिक्खापदेहि सिक्खापदन्तरेसु पञ्ञत्तायेव आपत्तियो, अनापत्तियो च दस्सिता, न कोचि आपत्तिविसेसो वुत्तो, तस्मा किमेतेसं वचनेनाति? वुच्चते – विनयविनिच्छयलक्खणं ठपेतुं भगवता उप्पन्ने वत्थुम्हि द्वे अनियता पञ्ञत्ता. कथं? एवरूपायपि सद्धेय्यवचनाय उपासिकाय वुच्चमानो पटिजानमानोव आपत्तिया कारेतब्बो, न अप्पटिजानमानो, तस्मा ‘‘याय कायचि आपत्तिया येन केनचि चोदिते पटिञ्ञातकरणंयेवङ्गं कातब्ब’’न्ति इमेहि सिक्खापदेहि विनिच्छयलक्खणं ठपितन्ति वेदितब्बं. अथ कस्मा भिक्खुनीनं अनियतं ¶ न वुत्तन्ति? इदमेव लक्खणं सब्बत्थ अनुगतन्ति न वुत्तं.

दुतियानियतकथावण्णना.

इति विनयत्थसारसन्दीपनिया

विनयविनिच्छयवण्णनाय

अनियतकथावण्णना निट्ठिता.

निस्सग्गियकथावण्णना

५५१. एवं अनियतकथं दस्सेत्वा इदानि निस्सग्गियकथं दस्सेतुमाह ‘‘खोम’’न्तिआदि ¶ . खोमन्ति एवंनामकं चीवरं. खोमन्ति गच्छविसेसस्स नामं, तस्स वाकेहि कतचीवरं कारणोपचारवोहारवसेन ‘‘खोम’’न्ति वुत्तं. कप्पासन्ति कप्पाससुत्तमयं चीवरं, इदम्पि वुत्तनयेनेव ‘‘कप्पास’’न्ति वुच्चति. कोसेय्यं नाम कोसकारकिमिकोसं, कोसेन निब्बत्तं सुत्तं कोसेय्यं. इध पन तेन कोसेय्यसुत्तेन निब्बत्तं चीवरं ‘‘कोसेय्य’’न्ति वुत्तं. साणन्ति साणवाकसुत्तेहि वायित्वा कतचीवरं. इदञ्च खोमं विय दट्ठब्बं. भङ्गन्ति खोमसुत्तादीनि सब्बानि, एकच्चानि वा मिस्सेत्वा कतचीवरं. इदम्पि करणप्पकारेन लद्धनामकं. ‘‘भङ्गं नाम एका गच्छजाति, तस्सा वाकमयसुत्तेहि वायित्वा कतचीवर’’न्ति केचि. इमस्मिं पक्खे खोमं विय गहेतब्बं. कम्बलन्ति मनुस्सलोमवाळलोमं विना सेसलोमेहि वायित्वा कतचीवरं वुत्तन्ति. इदं ‘‘चीवरं नाम छन्नं चीवरानं अञ्ञतरं चीवर’’न्ति (पारा. ४६३) पदभाजने च ‘‘खोमं कप्पासिकं कोसेय्यं कम्बलं साणं भङ्ग’’न्ति (पारा. अट्ठ. २.४६२-४६३) अट्ठकथाय च वुत्तं सन्धायाह. ‘‘जातितो’’ति ¶ इदं पमाणादिभेदस्स वक्खमानत्ता वुत्तं. जातितोति खोमादिसामञ्ञतो. सामञ्ञञ्हि ‘‘जाती’’ति वुच्चति. दीघरस्सथूलसुखुमनीलपीतादिभेदभिन्नानं सब्बेसं वत्थावयवानं सङ्गाहिकखोमसुत्तमयतासामञ्ञं जातीति वुत्तं होति. एवं सेसेसुपि.

५५२. दुकूलन्ति एवंनामकं रुक्खवाकमयचीवरं. पत्तुण्णन्ति पत्तुण्णदेसे सञ्जातवत्थं. ‘‘पत्तुण्णं कोसेय्यविसेसो’’ति अभिधानकोसे वुत्तं. चिनन्ति चिनदेसे उप्पन्नवत्थं. सोमारपट्टकन्ति सोमारदेसे उप्पन्नवत्थं. ‘‘सोमारचिनपटक’’न्तिपि लिखन्ति, सोयेवत्थो. इद्धिजन्ति एहिभिक्खूनं पुञ्ञिद्धिया निब्बत्तं चीवरं. देवदिन्नन्ति देवताहि दिन्नं चीवरं. तञ्हि कप्परुक्खे निब्बत्तं, जालिनिया देवकञ्ञाय अनुरुद्धत्थेरस्स दिन्नवत्थसदिसं. तस्साति जातितो छब्बिधस्स कप्पियचीवरस्स. इदं छब्बिधचीवरं यथारहं अनुलोमिकं वुत्तन्ति अत्थो. दुकूलञ्हि साणस्स अनुलोमं वाकमयत्ता, पत्तुण्णादीनि कोसेय्यस्स अनुलोमानि पाणकेहि कतसुत्तमयत्ता, इद्धिजम्पि खोमादीनंयेव अञ्ञतरं होतीति तेसं अनुलोमं, देवदिन्नम्पि खोमादीनंयेव अनुलोमं होति तेसं अञ्ञतरभावतो. यथाह –

‘‘साणस्स तु दुकूलञ्हि, इद्धिजं देवदिन्नकं;

खोमादीनंवसिट्ठंतु, कोसेय्यस्सानुलोमिक’’न्ति.

५५३. तिण्णं ¶ चीवरानं समाहारो तिचीवरन्ति पमाणयुत्तं सङ्घाटिआदिनामेन अधिट्ठितचीवरस्सेव नामत्ता तदेव वुच्चति. गणनवसेन यं किञ्चि चीवरत्तयं न वत्तब्बं. समुद्देकदेसोपि यथा ‘‘समुद्दो’’ति वुच्चति, एवं अधिट्ठितेसु तीसु चीवरेसु अञ्ञतरं ‘‘तिचीवर’’न्ति वुच्चति. परिक्खारचोळन्ति ¶ सङ्घाटिआदिविसिट्ठनामेहि अनधिट्ठितं ‘‘अनुजानामि भिक्खवे आयामेन अट्ठङ्गुलं सुगतङ्गुलेन चतुरङ्गुलवित्थतं पच्छिमं चीवर’’न्ति (पारा. ३५८) अनुञ्ञातं पच्छिमचीवरपरियन्तं कत्वा कताकतस्स यस्स कस्सचि चीवरस्स रुळ्हिसञ्ञा.

मुखं सन्दमानलालं पुञ्छति एतेनाति मुखपुञ्छनन्ति कपोलतो निच्चं सन्दमानलालानं पुञ्छनत्थाय अनुञ्ञातस्स चीवरविसेसस्स नामं. निसीदन्ति एत्थाति निसीदनन्ति च भिक्खूनं अत्थरित्वा निसीदितुं अनुञ्ञातस्स चीवरस्स नामं. अधिट्ठेय्याति ‘‘इमं कण्डुप्पटिच्छादि’’न्तिआदिना (वि. वि. ५८५) वक्खमाननयेन नामं गहेत्वा अधिट्ठेय्याति अत्थो. पच्चत्थरणमेव चाति सङ्घिके मञ्चपीठे सरीरसम्फुसनेन आपज्जितब्बाय आपत्तिया मोचनत्थाय तत्थ अत्थरित्वा परिभोगत्थाय अनुञ्ञातं पच्चत्थरणचीवरञ्च.

५५४. एकाहन्ति वसनकिरियाय अच्चन्तसंयोगे उपयोगवचनं. तिचीवरन्ति तिचीवरेन. विप्पवसेय्याति ‘‘सङ्घाटिया वा उत्तरासङ्गेन वा अन्तरवासकेन वा’’ति (पारा. ४७६) वुत्तत्ता एकदेसे समुदायोपचारवसेन अवयवस्स वचनतो तिण्णं चीवरानं अञ्ञतरेनातिपि वुत्तं होति. ‘‘तथा’’ति इमिना ‘‘विना’’ति इदं पच्चामसति. अधिट्ठाति अधिट्ठायाति गहेतब्बं ‘‘पटिसङ्खा योनिसो’’ति (म. नि. १.२२, २३; अ. नि. ६.५८) यथा, एत्थ ‘‘वळञ्जियमान’’न्ति सेसो, अधिट्ठाय वळञ्जियमानं निसीदनं तथा विना चतुमासं न वसेय्याति योजना.

५५५. कप्पियन्ति कप्पियकारणं नीलादिवण्णभेदकरणं. कप्पियन्ति च कारणे कारियूपचारेन गहेतब्बं. बिन्दुं दत्वाति ‘‘नीलं वा कद्दमं वा काळसामं वा’’ति (पाचि. ३६८) वुत्तलोहमलादिना ¶ येन केनचिपि मङ्गुलपिट्ठिप्पमाणादिकं बिन्दुं दत्वा. तत्थाति तेसु अधिट्ठातब्बेसु तिचीवरादीसु, निद्धारणे भुम्मं. तिचीवरन्ति निद्धारितब्बं. उपपन्नन्ति युत्तं. पमाणेनाति अनन्तरं वक्खमानेन पमाणेन. अधिट्ठातब्बन्ति ‘‘इमं सङ्घाटिं अधिट्ठामी’’तिआदिना ¶ वक्खमाननयेन नामं वत्वा अधिट्ठातब्बं. एवकारेन पन नामं वत्वा न विकप्पेतब्बन्ति दस्सेति. एस नयो सेसचीवरेसुपि. वुत्तञ्हेतं भगवता ‘‘अनुजानामि भिक्खवे तिचीवरं अधिट्ठातुं, न विकप्पेतु’’न्तिआदि (महाव. ३५८). तस्मा तिचीवरादीनि अधिट्ठहन्तेन ‘‘इमं सङ्घाटिं अधिट्ठामी’’तिआदिना नामं वत्वा अधिट्ठातब्बं. विकप्पेन्तेन पन ‘‘इमं सङ्घाटि’’न्तिआदिना तस्स चीवरस्स नामं अग्गहेत्वा ‘‘इमं चीवरं तुय्हं विकप्पेमी’’ति विकप्पेतब्बं. तिचीवरं वा होतु अञ्ञं वा, यदि तं तं नामं गहेत्वा विकप्पेति, अविकप्पितं होति अतिरेकचीवरट्ठाने तिट्ठति. तं चीवरन्ति सम्बन्धो.

५५६-७. ‘‘उपपन्नं पमाणेना’’ति एत्थ वुत्तप्पमाणं दस्सेतुमाह ‘‘पच्छिमन्तेना’’तिआदि. सङ्घटितट्ठेन सङ्घाटि. वत्थखण्डानि सिब्बनकम्मेन सङ्घटेत्वा कतत्ता ‘‘सङ्घाटी’’ति चीवरानं सामञ्ञनामं. इध पन रुळ्हिया अन्तरवासकादिविसेसनामब्यतिरित्ते चीवरविसेसे वत्तति. मुट्ठिपञ्चकाति एत्थ एकादीनमट्ठारसन्तानं सङ्ख्यासद्दानं सङ्ख्येय्ये वत्तमानत्ता पञ्चसद्दो चीवरप्पमाणप्पकरणतो लब्भमानहत्थसङ्खातरतनेयेव पवत्तति, तेनेव मुट्ठिसद्दोपि उत्तरपदलोपेन मुट्ठिरतने वत्तति. पञ्चन्नं पूरणो पञ्चमो, मुट्ठिया पञ्चमो मुट्ठिपञ्चमो. मुट्ठिपञ्चमो परिमाणमेतिस्साति ‘‘मुट्ठिपञ्चमका’’ति वत्तब्बे म-कारलोपेन ‘‘मुट्ठिपञ्चका’’ति सङ्घाटि वुत्ता.

मुट्ठित्तिकाति ¶ एत्थ वुत्तनयेन सङ्ख्येय्ये वत्तमानो ति-सद्दो चीवरप्पमाणप्पकरणतो लब्भमानहत्थसङ्खातरतनेयेव वत्तति, तेनेव मुट्ठिसद्दोपि उत्तरपदलोपेन मुट्ठिरतने वत्तति. तिण्णं पूरणो ततियो, मुट्ठिया ततियो मुट्ठिततियो, मुट्ठिततियो परिमाणमेतिस्साति ‘‘मुट्ठिततियका’’ति वत्तब्बे तिय-पच्चयलोपेन ‘‘मुट्ठित्तिका’’ति सङ्घाटियेव वुच्चति. एवमुपरिपि. तिरियन्ति तिरियतो.

उत्तमन्तेनाति उक्कट्ठपरिमाणन्तेन. सत्थुनो चीवरूनापीति ‘‘तत्रिदं सुगतस्स सुगतचीवरप्पमाणं, दीघसो नव विदत्थियो सुगतविदत्थिया, तिरियं छ विदत्थियो’’ति (पाचि. ५४८) वुत्तप्पमाणसुगतचीवरतो ऊनापि. पि-सद्दो सम्भावने, उक्कट्ठपरिच्छेदेन तत्तकम्पि वट्टति, ततो चे ऊनं वत्तब्बमेव नत्थीति अत्थो. अन्तद्वयसन्दस्सनेन उभयमज्झे यं पहोनकरुच्चनकप्पमाणं, तं गहेतब्बन्ति दस्सेति.

५५८. मुट्ठिपञ्चकसद्दो ¶ पुब्बे वुत्तनयेनिध दीघन्ते वत्तति. मुट्ठिपञ्चको दीघन्तो यस्स, यस्मिं वा पमाणेति विग्गहो, दीघन्ततो मुट्ठिपञ्चकप्पमाणेनाति वुत्तं होति. ‘‘मुट्ठिपञ्चम’’न्तिपि लिखन्ति. तिरियन्ततोति वित्थारन्ततो. अड्ढहत्थो अड्ढो उत्तरपदलोपेन, सो तेय्यो ततियो यस्स पमाणस्साति गहेतब्बं, तं, अड्ढतेय्यरतनप्पमाणं होतीति अत्थो. द्विहत्थं वाति द्वे हत्था यस्स पमाणस्साति विग्गहो, द्विरतनप्पमाणं वा होतीति अत्थो. इदञ्च ‘‘तिरियं द्विहत्थोपि वट्टति. पारुपनेनपि हि सक्का नाभिं पटिच्छादेतु’’न्ति (पारा. अट्ठ. २.४६९) अट्ठकथागतत्ता वुत्तं. ‘‘सेसे अन्तरवासके’’ति इदं यथावुत्तपरिमाणेन परिमितचीवरनिदस्सनं.

५५९. अहताहतकप्पानन्ति ¶ एत्थ ‘‘वत्थान’’न्ति सेसो. अहतानं वत्थानन्ति नववत्थानं. अहततो किञ्चि ऊनानि अहतकप्पानि, तेसं नववोहारूपगानं कतिपयधोतानं वत्थानन्ति वुत्तं होति. सङ्घाटीति सङ्घाटिनामकचीवरं. दिगुणाति दुपट्टकता.

५६०. उतुद्धटानन्ति अतिक्कन्तदिवसानं, बहुकालं निवासेत्वा परिच्चत्तानन्ति वुत्तं होति. अथ वा यानि उतुतो उद्धटानि, तेसं वत्थानन्ति गहेतब्बं, तिण्णं उतूनमञ्ञतरं अतिक्कमित्वा ठितानं पुराणवत्थानन्ति वुत्तं होति. चीवरानन्ति चीवरत्थानि वत्थानेव गहितानि. चतुग्गुणाति चतुपट्टा. सेसा दुवेति अन्तरवासकउत्तरासङ्गा द्वे. यथासुखन्ति यथारुचि. पंसुकूलन्ति सुसानादीसु पतितपिलोतिकचीवरं.

५६१. ‘‘तीणिपी’’तिआदीसु ‘‘तिचीवरे कयिरमाने सब्बं छिन्नकं नप्पहोती’’ति पाळियं आगतवत्थुम्हि ‘‘अनुजानामि भिक्खवे द्वे छिन्नकानि एकं अछिन्नक’’न्ति (महाव. ३६०) आदिवचनतो ‘‘चीवर’’न्ति सेसो. छिन्दितब्बन्ति वत्थानि छिन्दित्वा सिब्बेत्वा कातब्बं. पहोति चेति वत्थानि छिन्दित्वा करणे यदि चीवरस्स पहोति. सब्बेसूति तीसु चीवरेसु. अप्पहोन्तेसूति वत्थानं छिन्दित्वा सिब्बनेन अप्पहोन्तेसु. अन्वाधिकन्ति वत्थे ऊनातिरेकं अपनेत्वा आगन्तुकपत्तसङ्खातं अनुवातं चीवरस्स परियन्ते, मज्झे च यथारहं दीघरस्सपरिमाणयुत्तं अल्लियापेतब्बन्ति वुत्तं होति.

५६२. अच्छिन्नं वाति यथावुत्तनयेन अच्छिन्नं वा. अनादिन्नन्ति अनादिन्नआगन्तुकपत्तं ¶ . तिचीवरन्ति तीसु चीवरेसु एकेकन्ति वुत्तं होति. दुब्भोगेनाति दुट्ठु परिभोगेन ¶ . यथा परिभुत्तं नस्सति, तथा किलिट्ठानं धोवनादिमकत्वा निवासनादिना परिभोगेन.

५६३-४. कुसिन्ति आयामतो च वित्थारतो च अनुवातं चीवरमज्झे तादिसमेव दीघपत्तञ्च. वुत्तञ्हेतं चीवरक्खन्धअट्ठकथायं ‘‘कुसीति आयामतो च वित्थारतो च अनुवातादीनं दीघपत्तानमेतं अधिवचन’’न्ति (महाव. अट्ठ. ३४५). अड्ढकुसिन्ति अनुवातसदिसं चीवरमज्झे तत्थ तत्थ रस्सपत्तं. वुत्तम्पि चेतं ‘‘अड्ढकुसीति अन्तरन्तरा रस्सपत्तानं नाम’’न्ति (महाव. अट्ठ. ३४५). मण्डलन्ति एकेकस्मिं खण्डे महामण्डलं. वुत्तम्पि चेतं ‘‘मण्डलन्ति पञ्चखण्डिकचीवरस्स एकेकस्मिं खण्डे महामण्डल’’न्ति (महाव. अट्ठ. ३४५). अड्ढमण्डलन्ति मण्डलस्स अन्तो निवेसियमानं खुद्दकमण्डलं. वुत्तम्पि चेतं ‘‘अड्ढमण्डलन्ति खुद्दकमण्डल’’न्ति (महाव. अट्ठ. ३४५). विवट्टन्ति मण्डलं, अड्ढमण्डलञ्चाति द्वे एकतो कत्वा सिब्बितं वेमज्झे खण्डं. वुत्तम्पि चेतं ‘‘विवट्टन्ति मण्डलञ्च अड्ढमण्डलञ्च एकतो कत्वा सिब्बितं मज्झिमखण्ड’’न्ति (महाव. अट्ठ. ३४५). अनुविवट्टन्ति मज्झिमखण्डस्स उभोसु पस्सेसु सिब्बितं तथेव द्विमण्डलपत्तं खण्डद्वयं. वुत्तम्पि चेतं ‘‘अनुविवट्टन्ति तस्स उभोसु पस्सेसु द्वे खण्डानी’’ति (महाव. अट्ठ. ३४५). बाहन्तन्ति तेसं अनुविवट्टानं बाहिरपस्से सिब्बितं बाहिरखण्डद्वयं. वुत्तम्पि चेतं ‘‘बाहन्तन्ति तेसं अनुविवट्टानं बहि एकेकं खण्ड’’न्ति (महाव. अट्ठ. ३४५).

पञ्चन्नं समाहारो पञ्चकं, दस्सितप्पकारपञ्चखण्डेहि सिब्बितचीवरं पञ्चकं नाम. आदि-सद्देन सत्तखण्डादीहि सिब्बितचीवरानं गहणं. तेनेवेत्थाह ‘‘कत्तब्बं तु तिचीवर’’न्ति. सत्तखण्डस्स चीवरस्स एकं मज्झिमखण्डं विवट्टनाममेव होति, तस्स उभोसु पस्सेसु द्वे द्वे खण्डानि ¶ चूळानुविवट्टमहानुविवट्टसङ्खातानि अनुविवट्टनामानेव होन्ति. वुत्तञ्चेतं अट्ठकथायं ‘‘अथ वा अनुविवट्टन्ति विवट्टस्स एकपस्सतो द्विन्नं, एकपस्सतो द्विन्नन्ति चतुन्नम्पि खण्डानमेतं नाम’’न्ति (महाव. अट्ठ. ३४५). बाहन्तन्ति द्वीसु परियन्तेसु सिब्बनीयं बाहिरखण्डद्वयं, तञ्च सङ्घटेत्वा बाहमत्थके ठपियमानत्ता ‘‘मञ्चा उक्कुट्ठिं करोन्ती’’तिआदीसु विय आधेय्ये आधारोपचारवसेन बाहाति च चीवरस्स परियन्तावयवत्ता ‘‘अन्त’’न्ति च वुच्चति. वुत्तम्पि चेतं ‘‘बाहन्तन्ति सुप्पमाणं चीवरं पारुपन्तेन संहरित्वा बाहाय ¶ उपरि ठपिता उभो अन्ता बहिमुखा तिट्ठन्ति, तेसं एतं नाम’’न्ति (महाव. अट्ठ. ३४५). इदं सत्तखण्डचीवरमेव महाअट्ठकथायं विहितन्ति इदानिपि तदेव वट्टति. वुत्तम्पि चेतं ‘‘अयमेव हि नयो महाअट्ठकथायं वुत्तो’’ति. भिक्खुना कुसिं…पे… बाहन्तम्पिचाति सब्बं विधिं दस्सेत्वाव छिन्नं पञ्चकादिप्पभेदकं समणसारुप्पं तिचीवरं कत्तब्बन्ति योजना.

५६५-६. यथावुत्तविधिं अविराधेत्वा चीवरं कप्पबिन्दुं दत्वा सङ्घाटिआदिनामेन अधिट्ठाय परिभुञ्जन्तस्स अधिट्ठानं कथं भिज्जतीति आह ‘‘दानेना’’तिआदि. दानेनाति अञ्ञस्स दानेन. अच्छिज्जगाहेनाति अञ्ञेन अच्छिन्दित्वा गहणेन. विस्सासग्गहणेन चाति अत्तनि विस्सासेन अञ्ञस्स गहणेन. हीनायावत्तनेनाति सिक्खं अप्पच्चक्खाय गिहिभावूपगमनेन अञ्ञस्स दाने विय चीवरे निरालयभावेनेव परिच्चत्ता.

केचि पन ‘‘हीनायावत्तनेनाति भिक्खुनिया गिहिभावूपगमनेनाति एवमत्थं गहेत्वा भिक्खु पन विब्भन्तोपि याव सिक्खं न पच्चक्खाति, ताव भिक्खुयेवाति अधिट्ठानं न विजहती’’ति ¶ वदन्ति, तं न गहेतब्बं ‘‘भिक्खुनिया हीनायावत्तनेना’’ति विसेसेत्वा अवुत्तत्ता, भिक्खुनिया च गिहिभावूपगमने अधिट्ठानविजहनं विसुं वत्तब्बन्ति नत्थि तस्सा विब्भमनेनेव अस्समणिभावतो.

सिक्खायाति भिक्खुसिक्खाय. पहानेनाति पच्चक्खानेन. सिक्खापच्चक्खानं पनेत्थ सचे भिक्खुलिङ्गे ठितो सिक्खं पच्चक्खाति, तस्स कायलग्गम्पिचीवरं अधिट्ठानं विजहतीति दस्सनत्थं गहितं. ‘‘सिक्खाय च पहानतो’’ति च लिखन्ति, तं ‘‘हीनायावत्तनेनापि, सिक्खाय च पहानतो’’ति पाठक्कमे सति युज्जति. यथावुत्तो पन पाठो ‘‘सिक्खाय च पहानेन, हीनायावत्तनेनपी’’ति पाठक्कमे युज्जति. यथा तथा वा होतु, न कोचि विरोधो.

पच्चुद्धारेनाति चीवरस्स पच्चुद्धरणेन. ‘‘कालकिरियाया’’ति अट्ठकथावचनतो विनासेनाति चीवरसामिकस्स जीवितविनासोव वुच्चतीति. लिङ्गस्स परिवत्तनाति भिक्खुस्स इत्थिलिङ्गपरिवत्तना, भिक्खुनिया पुरिसलिङ्गपरिवत्तनाति एवं उभयथा लिङ्गस्स परिवत्तनेन. सब्बं ¶ नवविधम्पि चीवरं. अधिट्ठानन्ति एत्थ ‘‘इमेहि अट्ठही’’ति सेसो. वुत्तोवायमत्थो अट्ठकथायं ‘‘तत्थ पुरिमेहि अट्ठहि सब्बचीवरानि अधिट्ठानं विजहन्ती’’ति (पारा. अट्ठ. २.४६९). भिज्जतीति पजहति. छिद्दस्स भावो छिद्दभावो, तस्मिं, छिद्दे सति छिद्दे जातेति वुत्तं होति. तिचीवरन्ति तीसु चीवरेसु अञ्ञतरन्ति वुत्तं होति. तिचीवरमेव वाति गहेतब्बं. वुत्तञ्च ‘‘छिद्दभावेन पन तिचीवरस्सेवा’’ति.

५६७. कीवप्पमाणे छिद्दे जातेति आह ‘‘कनिट्ठस्सा’’तिआदि. ‘‘कनिट्ठ…पे… माणक’’न्ति इमिना हेट्ठिमपरिच्छेदं दस्सेति.

५६८. एको ¶ तन्तुपीति दीघतो वा तिरियतो वा एकम्पि सुत्तं.

५६९. जिण्णट्ठाने अग्गळं देन्तेन तेचीवरिकेन वत्तितब्बविधिं दस्सेतुमाह ‘‘पठम’’न्तिआदि. पठमन्ति छिन्नट्ठानस्स छिन्दनतो पुब्बेयेव. अग्गळं दत्वाति वत्थखण्डं अल्लियापेत्वा. रक्खतीति एत्थ ‘‘अधिट्ठान’’न्ति अनुवत्तते, ‘‘तेचीवरिको भिक्खू’’ति लब्भति, एवं वत्थखण्डं अल्लियापेन्तो तेचीवरिको भिक्खु अधिट्ठानं रक्खतीति वुत्तं होति. विपरियायेन अधिट्ठानं भिन्दतीति लब्भति. पठमं द्वे कोटियो घटेत्वाति योजना. मज्झे जिण्णं अधिट्ठितचीवरं मज्झे छिन्दन्तो ततो पुब्बेयेव द्वे कोटियो एकतो घटेत्वा सिब्बित्वा. पच्छाति कोटिघटनतो पच्छा. छिन्दतीति मज्झं उभयकोटिं कातुं छिन्दति. रक्खतीति वुत्तप्पकारमेव.

५७०. तिचीवरे कत्थ जातं छिद्दमधिट्ठानं भिन्दतीति आह ‘‘चतुरङ्गुला’’तिआदि. चत्तारि च अट्ठ च चतुरट्ठं, चतुन्नं अट्ठन्नं वा अङ्गुलानं समाहारो चतुरट्ठङ्गुलं, तस्माति गहेतब्बं. चतुरङ्गुला अट्ठङ्गुलाति योजना. ओरन्ति अब्भन्तरं. एकञ्च द्वे च एकद्वे, तेसं एकद्विन्नं, ‘‘चीवरान’’न्ति पकरणतो लब्भति, एकस्स चीवरस्स, द्विन्नञ्च चीवरानन्ति योजना. यथासङ्ख्यानुद्देसवसेन एकस्स तिरियतो चतुरङ्गुलतो ओरं, द्विन्नं तिरियतो अट्ठङ्गुलतो ओरन्ति योजना. वाक्यद्वयेपि ‘‘छिद्दं भिन्दतेवा’’ति योजेतब्बं.

एकस्स चीवरस्साति अन्तरवासकचीवरस्स. तिरियतोति वित्थारतो. चतुरङ्गुलं ओरन्ति चतुरङ्गुलतो ¶ अब्भन्तरे छिद्दं अधिट्ठानं भिन्दति. द्विन्नन्ति उत्तरासङ्गसङ्घाटीनं. तिरियतोति ¶ वित्थारतो. अट्ठङ्गुलतो ओरन्ति अट्ठङ्गुलतो अब्भन्तरे. तिण्णम्पि दीघतो विदत्थिया ओरं छिद्दं अधिट्ठानं भिन्दतेवाति योजना. एत्थ विदत्थि वड्ढकिविदत्थि गहेतब्बा. एवं वुत्तपरिच्छेदब्भन्तरे छिद्दे जाते तस्स चीवरस्स अतिरेकचीवरत्ता दसाहमनतिक्कमित्वा सूचिकम्मं कत्वा अधिट्ठातब्बं. तथा अकरोन्तेन पन परिक्खारचोळं अधिट्ठातब्बं.

५७१. ‘‘निसीदनस्सा’’ति ‘‘निसीदनचीवरस्सा’’ति वत्तब्बे उत्तरपदलोपेन वुत्तन्ति दट्ठब्बं. दियड्ढाति एत्थ विसेसितब्बा विदत्थि ‘‘द्वे विदत्थियो’’ति च ‘‘सुगतस्स विदत्थिया’’ति च वुत्तसामत्थिया लब्भति. अड्ढेन दुतिया दियड्ढा, दुतियं अड्ढमेतस्साति ‘‘दुतियड्ढा’’ति वत्तब्बे तिय-पच्चयलोपेन ‘‘दियड्ढा’’ति वुत्तं, अड्ढदुतियाति वुत्तं होति. ‘‘सुगतस्स विदत्थिया’’ति पमाणनियमस्स कतत्ता वड्ढकिविदत्थिया तिस्सो विदत्थियो एका सुगतविदत्थि होति. इदं निसीदनचीवरं दीघतो वड्ढकिहत्थेन तिहत्थं, वित्थारतो छळङ्गुलाधिकद्विहत्थप्पमाणं होति. ‘‘दसा विदत्थी’’ति (पाचि. ५३३) वुत्तत्ता दियड्ढहत्था दसाति वेदितब्बा.

५७२. चतस्सोति एत्थापि ‘‘विदत्थियो’’ति सामत्थियाव लब्भति. ‘‘कण्डुप्पटिच्छादिया’’ति विभत्तिपरिणामेन दीघतोति योजना.

५७३. अड्ढं तेय्यं ततियं यस्सा सा अड्ढतेय्या, अड्ढततियाति वुत्तं होति.

५७४. ततो उत्तरिं तदुत्तरिं, तस्स तस्स वुत्तप्पमाणतो अतिरेकं. अधिकच्छेदनन्ति अधिकस्स पमाणातिरित्तट्ठानस्स छेदनं अस्स पाचित्तियस्स देसनायाति ¶ अधिकच्छेदनं, वुत्तप्पमाणतो अधिकट्ठानं छिन्दित्वा देसेतब्बं पाचित्तियं. उदीरितं वुत्तं पाळियाति अत्थो.

५७५. अप्पमाणेनाति गुणवसेन अप्पमाणेन सम्मासम्बुद्धेन.

५७६. सब्बं वट्टतीति सम्बन्धो. ‘‘सब्ब’’न्ति इमिना अट्ठकथाय आगतं नीलादिं सङ्गण्हाति. महन्तादिभेदं सब्बं पच्चत्थरणचीवरं वट्टति.

५७७. ‘‘मुखपुञ्छनचोळं ¶ एक’’न्ति पदच्छेदो. एकं धोवित्वा याव सुक्खापीयति, ताव अञ्ञेन मुखपुञ्छनेन भवितब्बत्ता आह ‘‘द्वेपि वट्टन्ति सब्बथा’’ति.

५७९. पमाणतो, गणनतो च अतीताति पमाणगणनातीता. ‘‘पमाणातीता’’ति वचनेन विनयधरानं अप्पमाणगुणतं दस्सेति, ‘‘गणनातीता’’ति इमिना अतिक्कन्तगणनतं. पकतं विनये पठमं कतं बुद्धेन भगवता पञ्ञत्तं जानन्तीति पकतञ्ञू, विनयधरा, ते पकतञ्ञुनो. अपरिमाणगुणमणिगणभूसितउपालिदासकादिमहाथेराचरियपरम्परागता सङ्ख्यापथातीता विनयधराति वुत्तं होति.

५८०. सुगतट्ठङ्गुलायामन्ति वड्ढकिरतनप्पमाणदीघं. चतुरङ्गुलवित्थतन्ति वड्ढकिविदत्थिप्पमाणवित्थारं. विकप्पनुपगं पच्छिमं चीवरं नाम होति. पच्छिमं चीवरन्ति परिस्सावनपटादीनं विसेसनं, पच्छिमचीवरप्पमाणन्ति वुत्तं होति.

५८१. परिस्सावपटन्ति उदकपरिस्सावनत्थं पटं. पत्तत्थविकन्ति पत्तकञ्चुकं. पोत्थकत्थविकन्ति पोत्थककञ्चुकं ¶ . आदिग्गहणेन पच्छिमप्पमाणादिं यं किञ्चि पटं, दण्डपटञ्च सङ्गण्हाति.

५८२. अधिट्ठातुन्ति परिक्खारचोळं अधिट्ठातुं. ठपितेति अनधिट्ठाय ठपिते. महापच्चरियं पन ‘‘अनापत्ती’’ति (पारा. अट्ठ. २.४६९) आह. नत्थि दोसताति दोसो एव दोसता. ‘‘अत्तनो सन्तकभावतो मोचेत्वा ठपितं सन्धाय महापच्चरियं अनापत्ति वुत्ता’’ति वदन्ति. ‘‘इमिना भेसज्जं चेतापेस्सामि, इदं मातुया दस्सामी’’ति ठपेन्तेन अधिट्ठातब्बं. ‘‘इदं भेसज्जस्स, मातुया’’ति विभजित्वा ससन्तकभावतो मोचिते अधिट्ठानकिच्चं नत्थीति अधिप्पायो. होति चेत्थ –

‘‘यं वत्थं भिक्खुना लद्धं, कतं मातादिसन्तकं;

निस्सग्गियं न होतीति, तमाहु विनयञ्ञुनो’’ति.

५८३. वस्समासे चतुरोति वस्साने चतुरो मासे, अधिट्ठानकिरियाय चत्तारो मासे अविच्छेदोति ¶ अच्चन्तसंयोगे उपयोगवचनं. वस्सिके चत्तारो मासे निवासेतब्बा साटिका वस्सिकसाटिका.

५८४. कण्डुं पटिच्छादेतीति कण्डुप्पटिच्छादि, कण्डुरोगातुरस्स भिक्खुनो तप्पटिच्छादनत्थमनुञ्ञातचीवरस्सेतमधिवचनं. होन्ति चेत्थ –

‘‘मातिकट्ठकथायस्सा, कण्डुच्छादिकसाटिया;

न कालातिक्कमे वुत्तं, अधिट्ठानविवट्टनं.

अधिट्ठानपहानङ्गे-सु वुत्तत्ता विसेसतो;

वीमंसितब्बं विञ्ञूहि, तत्थ यं कारणं सिया’’ति.

५८६. ‘‘असम्मुखे ¶ एतन्ति चा’’ति वचनेनेव सम्मुखे ‘‘इम’’न्ति विञ्ञायति. विचक्खणो पच्चुद्धरेय्याति योजना.

५८७. अधिट्ठितन्ति अधिट्ठानं.

५८८. इति सब्बमिदन्ति एवं वुत्तं इदं तिचीवरादीनं पमाणादिसब्बविधानं. तेचीवरिकभिक्खुनोति तिचीवराधिट्ठानेन अधिट्ठिततेचीवरिकस्स विनयतेचीवरिकस्स. तिण्णं चीवरानं समाहारो तिचीवरं, तिण्णं तिचीवरानं समाहारोति ‘‘तितिचीवर’’न्ति वत्तब्बे एकदेससरूपेकसेसनयेन ‘‘तिचीवर’’न्ति नवचीवरानि सङ्गहितानि, तिचीवरे नियुत्तो तेचीवरिकोति विनयतेचीवरिको वुच्चति. धुतङ्गतेचीवरिकस्सापि तिचीवरे इदमेव विधानन्ति सोपि सङ्गय्हति. अञ्ञेसु वा पन छसु चीवरेसु परिक्खारचोळं एकं अंसकासावमेव वट्टति. तथा वत्वावाति ‘‘इमं परिक्खारचोळं अधिट्ठामी’’तिआदिना नयेन वत्वा. तं परिक्खारचोळं. परिक्खारचोळमस्स अत्थि, तत्थ वा नियुत्तोति परिक्खारचोळिको.

५८९. ‘‘तिचीवरं पन परिक्खारचोळं अधिट्ठातुं वट्टति, न वट्टती’’ति अनुयोगं कत्वा ‘‘वट्टती’’ति ¶ (पारा. अट्ठ. २.४६९) अट्ठकथाय वुत्तत्ता इध ‘‘तिचीवर’’न्ति चीवरत्तयमेव वुत्तं. ‘‘सुखपरिहारत्थं एकम्पि विकप्पेतब्ब’’न्ति वचनतो एकदेसे समुदायोपचारवसेन एकम्पि विकप्पेतब्बमेव होति.

परिक्खारचोळं कातुम्पि वट्टतीति बद्धसीमतो बहि वसन्तेन एककेन तेचीवरिकेन अन्तोअरुणे असतिया तीसु चीवरेसु हत्थपासे अकतेसु निस्सग्गियं पाचित्तियं होतीति, विनयकम्मं कातुं सभागपुग्गलानं दुल्लभत्ता ¶ च सुखपरिहारत्थं तीसु एकं वा सब्बानि एव वा तिचीवरनामेन कताधिट्ठानानि पच्चुद्धरित्वा परिक्खारचोळनामेन अधिट्ठातुम्पि वट्टतीति वुत्तं होति.

एवं अग्गहेत्वा ‘‘सचे तिचीवरं परिक्खारचोळाधिट्ठानं लभेय्य, उदोसितसिक्खापदे परिहारो निरत्थको भवेय्या’’ति (पारा. अट्ठ. २.४६९) वुत्तं महापदुमत्थेरस्स मतं दस्सेतुमाह ‘‘एवं चुदोसिते’’तिआदि. एवं चेति एवं तिचीवरं परिक्खारचोळं अधिट्ठहित्वा परिहरितुं वट्टति चे. उदोसितेति इमस्स सिक्खापदस्स अनन्तरे दुतियकथिनसिक्खापदे. वुत्तो परिहारोति ‘‘एककुलस्स गामो होति परिक्खित्तो च. अन्तोगामे चीवरं निक्खिपित्वा अन्तोगामे वत्थब्ब’’न्तिआदिना (पारा. ४७८) नयेन पदभाजनावसाने वुत्तो, इध च ‘‘गामादीसु पदेसेसू’’तिआदिना नयेन अनन्तरं वक्खमानो तिचीवरस्स परिहरणविधि. निरत्थकोति परिक्खारचोळनामेन अधिट्ठितचीवरस्स तेन विधिना तिचीवरं अपरिहरन्तस्सापि भिक्खुनो अनापत्तिभावतो निप्पयोजनोति अत्थो.

५९०. तप्परिहरितुमाह ‘‘न’’इच्चादि. न निरत्थकोति योजना. हेतुं दस्सेतुमाह ‘‘तेचीवरिकस्सेवा’’तिआदि. यो तिचीवरनामेन अधिट्ठानं अपच्चुद्धरित्वा सतिं उपट्ठपेत्वा अन्तोअरुणे चीवरं हत्थपासतो अमोचेत्वा अरुणं उट्ठापेति, तादिसस्स तेचीवरिकस्सेव तस्मिं सिक्खापदे उदोसितपरिहारस्स भगवता देसितत्ताति अत्थो. यस्मा तादिसस्सेव तेचीवरिकस्स उदोसितसिक्खापदे परिहारो वुत्तो, तस्मा. तं सब्बम्पीति तं नवविधं सब्बम्पि चीवरं. परिक्खारचोळस्साति परिक्खारचोळनामेन अधिट्ठहित्वा चीवरं परिभुञ्जितुकामस्स परिक्खारचोळनामेन अधिट्ठातुं वट्टति.

५९१. इमिना ¶ उदोसितपरिहारस्स अनिरत्थकभावं साधेत्वा इदानि ‘‘तिचीवरं परिक्खारचोळनामेनापि ¶ अधिट्ठातुं वट्टती’’ति इमस्स अधिकत्थस्स महाकारुणिकेन अनुञ्ञातभावे किरियन्तरानुजाननसङ्खातअधिकवचनस्स ञापकहेतुभावं दस्सेतुमाह ‘‘अधिट्ठेती’’तिआदि. इमस्मिंयेव सिक्खापदे अनापत्तिवारे ‘‘अनापत्ति अन्तोदसाहं अधिट्ठेति, विकप्पेती’’ति पाठे अनापत्तिभावे ‘‘अधिट्ठेती’’ति एत्तकेनेव परियत्ते (पारा. ४६९) ‘‘विकप्पेती’’ति किरियन्तरानुजाननेन पकारन्तरेनापि दोसो नत्थीति अधिप्पायस्स विञ्ञापितत्ताति अत्थो.

५९२. एवं करोन्तस्साति तिचीवरनामेन अधिट्ठानं पच्चुद्धरित्वा परिक्खारचोळनामेन अधिट्ठहन्तस्स. इदानि अतिप्पसङ्गं दस्सेतुकामस्स चोदकस्स अधिप्पायं दस्सेतुमाह ‘‘एव’’न्तिआदि. मूलाधिट्ठानं पहाय कातब्बप्पकारन्तरस्सापि विज्जमानत्ता तिचीवरं पच्चुद्धरित्वा मुखपुञ्छनादिकं कत्वा अधिट्ठहतोपि दोसो न सियाति कस्मा नापज्जतीति अत्थो. नइति अतिप्पसङ्गनिवारणे.

५९३. किच्चविधानतोति तेसं मुखपुञ्छनादीनं अत्तनो अत्तनो किच्चस्स साधनतो, तादिसं किच्चविसेसापेक्खं विना तंतंनामेन अधिट्ठातुं न युज्जतीति अधिप्पायो. अकिच्चस्साति मुखपुञ्छनादिकिच्चरहितस्स. अधिकस्साति पच्चुद्धरित्वा पठमं अधिट्ठानस्स विजहितत्ता अतिरेकस्स. अस्साति तिचीवरस्स. अधिट्ठानं तु युज्जतीति दसाहं अनतिक्कमित्वा परिक्खारचोळनामेन अधिट्ठानं पन युज्जति.

५९४. निधानस्स ¶ मुखं उपायोति निधानमुखं, अन्तरवासकादितंतंचीवरनामेन अधिट्ठानतो अतिरेकं यं किञ्चि चीवरं यथा ठपितं आपत्तिं न करोति, तथा निधानस्स उपायोति अत्थो. एतं परिक्खारचोळाधिट्ठानं. महापच्चरियन्ति ब्राह्मणतिस्सभये भिक्खुसङ्घं जम्बुदीपं नेतुं सक्कस्स देवानमिन्दस्स आणत्तिया विसुकम्मेन निम्मितमहापच्चरियं निसीदित्वा लिखितत्ता तंनामकायं विनयट्ठकथायं, ‘‘महापच्चरियादिसू’’तिपि लिखन्ति.

५९५. परिक्खारचोळनामेन अधिट्ठानविधानस्स वुत्तप्पमाणं कतमन्ति आह ‘‘चीवर’’न्तिआदि. ‘‘निदाने उप्पत्तितो’’ति पदच्छेदो. ‘‘चीवरं परिपुण्ण’’न्ति निदाने ‘‘तिचीवरं सम्पुण्णं विज्जति, इदमतिरेकचीवरं किं कातब्ब’’न्ति भिक्खूहि भगवतो आरोचितवत्थुम्हि ¶ . उप्पत्तितोति परिक्खारचोळाधिट्ठानस्स उप्पन्नत्ता, अनुञ्ञातत्ताति अत्थो. ‘‘तेन खो पन समयेन भिक्खूनं परिपुण्णं होति तिचीवरं, अत्थो च होति परिस्सावनेहिपि थविकाहिपि. भगवतो एतमत्थं आरोचेसुं. अनुजानामि भिक्खवे परिक्खारचोळक’’न्ति (महाव. ३५७) एत्थ पाळियं एवं विप्पवाससुखत्थं नामेनाधिट्ठिततिचीवरं अधिट्ठानं पच्चुद्धरित्वा परिक्खारचोळनामेन अधिट्ठातुं वट्टतीति साधनेन तदेकसाधनत्ता एव एकम्पि चीवरं विकप्पेतुं वट्टतीति वुत्तमेव होति. तेनेवाह अट्ठकथायं ‘‘एवञ्च सति यो तिचीवरे एकेन चीवरेन विप्पवसितुकामो होति, तस्स तिचीवराधिट्ठानं पच्चुद्धरित्वा विप्पवाससुखत्थं विकप्पनाय ओकासो दिन्नो होती’’ति (पारा. अट्ठ. २.४६९).

५९६-८. एत्तावता कप्पियचीवरञ्च तत्थ कत्तब्बञ्च दस्सेत्वा इदानि अकप्पियचीवरं दस्सेतुमाह ‘‘कुसवाकादी’’तिआदि. कुसन्ति दब्बतिणं. वाकन्ति रुक्खादीनं वाकं. आदि-सद्देन ¶ फलकं गहितं, चीर-सद्दो चीवरपरियायो, इमस्मिं कुसादयो गन्थेत्वा कते चीवरेयेव वत्तति. केसजं कम्बलन्ति मनुस्सकेसेहि वीतकम्बलञ्च. वालजं कम्बलन्ति अस्सवालचमरवालेहि वीतकम्बलञ्च. उलूकपक्खन्ति कोसियसकुणपत्तं. इध पन तं गन्थेत्वा कतचीवरमेव गहेतब्बं. अजिनक्खिपेति अजिनदीपिचम्मे. ‘‘धारयतो थुल्लच्चय’’न्ति पच्चेकं सम्बन्धो.

कदलिदुस्सेति कदलिवाकमयवत्थे. एरकदुस्सेति एरकमयवत्थे. अक्कदुस्सेति अक्कदण्डे वा तेसं सुत्तानि वा गहेत्वा कतवत्थे. पोत्थकेति मकचिवाकमयवत्थे. तिरीटे वाति एवंनामके रुक्खतचे. वेठनेति सीसवेठने. कञ्चुकेति कवचे.

सब्बनीलकेति केवलनीलके. एस नयो मञ्जेट्ठादीसु. महानामरत्तेति तनुपदुमदलवण्णरत्ते. महारङ्गरत्तेति सतपदिवण्णरत्ते.

५९९. अच्छिन्नदसकेति अच्छिन्ना दसा यस्स, तस्मिं चीवरे. एस नयो दीघदसेपि. फलदसेति फलसदिसगन्थिता दसा यस्स, तस्मिं. पुप्फदसेति कण्णिकं बन्धित्वा विकासेत्वा कता दसा यस्स, तस्मिं चीवरेति अत्थो. अच्छिन्नचीवरस्साति नग्गं कत्वा चोरेहि विलुत्तचीवरस्स ¶ . एत्थाति कुसवाकादीसु, सब्बनीलादीसु च. किञ्चीति एकम्पि अकप्पियं नत्थि अननुलोमिकं नत्थि. ‘‘नग्गेन एतेसु अकप्पियचीवरेसु यंकिञ्चि लद्धं, तेन हिरिकोपिनं पटिच्छादेत्वा पच्छा कप्पियचीवरे लद्धे तं अधिवासेत्वा इदं अकप्पियचीवरं परिच्चजितब्बं. सब्बनीलकादिवत्थेसु लद्धेसु कप्पियरजनेन रजित्वा, तं वण्णं नासेत्वा वा कप्पियवत्थानि उभयपस्सेसु ¶ अल्लियापेत्वा, पटिच्छादेत्वा वा निवासेतुं वट्टती’’ति अट्ठकथायं वुत्तं.

६००. ‘‘अन्तोदसाह’’न्ति इदं ‘‘अधिट्ठेती’’तिआदीहि सब्बपदेहिपि योजेतब्बं. विस्सज्जेतीति अञ्ञस्स देति. इध दानं दुविधं सम्मुखादानं, परम्मुखादानन्ति. पटिग्गाहकं दिस्वा ‘‘इदं तुय्हं दम्मी’’ति दानं सम्मुखादानं नाम. परम्मुखा ‘‘इदं इत्थन्नामस्स दम्मी’’ति दिन्नं परम्मुखादानं. ‘‘इदं त्वं गण्हाही’’ति वा ‘‘तुय्हं गण्हाही’’ति वा वुत्ते ‘‘मय्हं गण्हामी’’ति सचे वदति, दानगहणद्वयम्पि सुद्धं. ‘‘इदं तव सन्तकं करोहि, तव सन्तकं होतु, तव सन्तकं होती’’ति दायकेन वुत्ते गण्हन्तोपि ‘‘मम सन्तकं करोमि, मम सन्तकं होतु, मम सन्तकं होती’’ति वदति चे, दानं, गहणञ्च असुद्धं होति. ‘‘तव सन्तकं करोही’’ति वुत्ते पन ‘‘साधु भन्ते मय्हं गण्हामी’’ति वत्वा गण्हाति, गहणं सुद्धं. ‘‘इदं तुय्हं गण्हाही’’ति वुत्ते ‘‘अहं न गण्हामी’’ति वदति, पुन ‘‘दिन्नं मया, तुय्हं गण्हाही’’ति वुत्ते इतरोपि पुन पटिक्खिपति, तं चीवरं कस्सचि असन्तकत्ता दसाहातिक्कमेनापि निस्सग्गियं न होतीति पच्छा तेसु द्वीसु यो इच्छति, तेन अधिट्ठाय परिभुञ्जितब्बन्ति सब्बमिदं अट्ठकथाय (पारा. अट्ठ. २.४६९ अत्थतो समानं) वुत्तं.

अधिट्ठितचीवरे अधिट्ठाने वेमतिकेन अत्तनो विमतिं पठमं आवि कत्वा ‘‘सचे अनधिट्ठितं, एवं कते कप्पियं होती’’ति चिन्तेत्वा निस्सज्जेत्वा विनयकम्मं करोन्तस्स मुसावाददोसो नापज्जति. यथाह अट्ठकथायं ‘‘न हि एवं जानापेत्वा विनयकम्मं करोन्तस्स मुसावादो होती’’ति (पारा. अट्ठ. २.४६९). ‘‘केचि ‘तथा वेमतिकचीवरं अञ्ञेन ¶ विस्सासेन गहेत्वा पुन दातब्ब’न्ति वदन्ति, तं न सुन्दर’’न्ति (पारा. अट्ठ. २.४६९ थोकं विसदिसं) तत्थेव वुत्तं.

विनस्सतीति चोरादीहि विनस्सति. ‘‘नस्सति, डय्हति, अच्छिन्दित्वा गण्हन्ती’’ति इमानिपि ¶ विनासप्पकारत्ता ‘‘विनस्सती’’ति इमिनाव सङ्गय्हन्ति. तत्थ ‘‘नस्सती’’ति इदं चोरादीहि हटं सन्धाय वुत्तं, ‘‘विनस्सती’’ति इदं उन्दूरखायितादिं सन्धाय वुत्तं, ‘‘डय्हती’’ति अग्गिना दड्ढं सन्धाय. विस्सासेति एत्थ सन्दिट्ठो च सम्भत्तो च आलपितो च जीवति च गहिते चत्तमनो होतीति पञ्चङ्गसमन्नागतेन अत्तनि विस्सासेन अञ्ञेन गहितेति अत्थो. पकासिताति ‘‘अनापत्ति अन्तोदसाहं अधिट्ठेती’’तिआदिना (पारा. ४६९) नयेन वुत्ता.

६०१. इदं पन समुट्ठानं नामेन कथिनसमुट्ठानं नामाति अत्थो. इदं कथिनसमुट्ठानं नाम कायवाचतो च कायवाचाचित्ततो च समुट्ठाति. अतिरेकचीवरभावस्स जाननचित्तेन पण्णत्तिजाननचित्ते असतिपि आपत्तिसम्भवतो अचित्तं. अनधिट्ठानतो, अविकप्पनतो च अक्रियं. कम्मट्ठानमनुयुञ्जन्तो वा चेतियादिं वन्दन्तो वा एकादसमं अरुणं उट्ठापेति, कुसलचित्तो आपज्जति, कलहादिपसुतो वा वीतिक्कमं जानन्तो वा उट्ठापेति, अकुसलचित्तो आपज्जति, खीणासवो पन असतिया वा पण्णत्तिं अजानन्तो वा तथा करोन्तो अब्याकतचित्तो आपज्जतीति तिचित्तं. वुत्तनयेन कम्मट्ठानादिमनुयुञ्जन्तस्स सोमनस्सचित्तसमङ्गिनो सुखवेदना, उपेक्खाचित्तसमङ्गिनो उपेक्खावेदना, कलहादिपसुतस्स दोमनस्सचित्तसमङ्गिनो दुक्खवेदना होतीति तिवेदनं. एस नयो उपरिपि एवरूपे ठाने योजेतब्बो.

पठमकथिनकथावण्णना.

६०२. गामादीसु ¶ पदेसेसु तिपञ्चसूति तिचीवरानि निक्खिपित्वा विप्पवासेन दोसं, उप्पज्जनट्ठानञ्च दस्सेतुं ‘‘गामो एकूपचारो’’तिआदिना (पारा. ४७७) नयेन पाळियं वुत्तगामनिवेसनउदोसितअट्टमाळपासादहम्मियनावासत्थखेत्तधञ्ञकर- णआरामविहाररुक्खमूलअज्झोकाससङ्खातेसु पन्नरससु चीवरनिक्खेपट्ठानेसूति वुत्तं होति. एत्थ गामो नाम एककुटिकादिगामो.

निवेसनं नाम गामतो बहि चतुसालादिको गेहो. तेनाह गण्ठिपदे ‘‘गामनिवेसनानं विसेसं वदन्ता ‘पुन एकपरिच्छेदं कत्वा निवेसिता बहुगेहा निवेसनं नाम होन्ती’ति वदन्ति, तस्मा इदं निवेसनादि सब्बं ‘गामतो बही’ति गहेतब्ब’’न्ति. इदञ्च तत्थेव वुत्तं ‘‘निवेसनादिकं ¶ अन्तोगामे चे होति, गामे वुत्तपरिहारस्सेव लब्भनतो अन्तोगामतो बही’ति गहेतब्ब’’न्ति.

अट्ठकथायं ‘‘उदोसितोति यानादीनं भण्डानं साला’’ति (पारा. अट्ठ. २.४८२-४८७) वुत्तसरूपं उदोसितं नाम. ‘‘अट्टोति पटिराजादिपटिबाहनत्थं इट्ठकाहि कतो बहलभित्तिको चतुपञ्चभूमिको पतिस्सयविसेसो’’ति (पारा. अट्ठ. २.४८२-४८७) वुत्तसरूपो अट्टो नाम. ‘‘माळोति एककूटसङ्गहितो चतुरस्सपासादो’’ति (पारा. अट्ठ. ४८२-४८७) वुत्तो एककण्णिकसङ्गहितो चतुरस्सगेहो माळो नाम. पासादोति दीघपासादो. हम्मियन्ति मुण्डच्छदनपासादो. नावाति यानप्पत्ति. सत्थन्ति जङ्घसत्थसकटसत्थवसेन दुविधो जनसमूहो, सो च निविट्ठानिविट्ठवसेन पच्चेकं दुविधो. तत्थ निविट्ठे वतिआदिपरिक्खेपोपि होतेव.

खेत्तन्ति ¶ यवखेत्तादिखेत्तं. धञ्ञकरणं खलं. आरामो पुप्फारामो, फलारामो च. विहारोति एकम्पि सेनासनं वुच्चति. ‘‘रुक्खो नाम यं मज्झन्तिके काले समन्ता छाया फरती’’ति (पारा. ४९४) वुत्तप्पमाणपरिच्छन्नो रुक्खो. अज्झोकासो नाम सत्तब्भन्तरो, सो विञ्चाटविआदिअगामकारञ्ञे च मच्छबन्धानं अगमनपथे समुद्ददीपे च लब्भति. मच्छबन्धानं अगमनपथो नाम उदकपिट्ठिया गन्त्वा पुन तदहेव गेहं आगन्तुं असक्कुणेय्यताय दूरो समुद्दप्पदेसो वुच्चति.

अयं गामादिको पच्चेकं एकूपचारो, नानूपचारोति दुविधो. तत्थ अज्झोकासं विना गामादिको तंतंराजादिसामिककुलानं एकत्थनानत्थवसेन एककुलसन्तको चे होति, एकूपचारो. नानाकुलसन्तको चे, नानूपचारो होति. वुत्तञ्हेतं ‘‘गामो एकूपचारो नाम एककुलस्स गामो होती’’तिआदि (पारा. ४७८). अट्ठकथायम्पि वुत्तं ‘‘एककुलस्स गामोति एकस्स रञ्ञो वा भोजकस्स वा गामो’’ति च ‘‘नानाकुलस्स गामोति नानाराजूनं वा भोजकानं वा गामो वेसालीकुसिनारादिसदिसो’’ति (पारा. अट्ठ. २.४७९) च.

एककुलेन कारापितो विहारो एकूपचारो, नानाकुलेहि कारापितो नानूपचारो होति. यथाह गण्ठिपदे ‘‘विहारे एककुलनानाकुलवोहारो कारापकानं वसेन वुत्तो’’ति. अज्झोकासे पन ¶ उपचारभेदो अब्भन्तरवसेन वेदितब्बो. वुत्तञ्चेतं पाळियं ‘‘अज्झोकासो एकूपचारो नाम अगामके अरञ्ञे समन्ता सत्तब्भन्तरा एकूपचारो. ततो परं नानूपचारो’’ति. इध एकं अब्भन्तरं अट्ठवीसतिरतनं होति. यथाह ¶ अट्ठकथायं ‘‘एकं अब्भन्तरं अट्ठवीसतिहत्थ’’न्ति (पारा. अट्ठ. २.४८९). एवं सङ्खेपतो वुत्तसरूपप्पभेदानि पन्नरस ठानानि दस्सेतुमाह ‘‘गामादीसु पदेसेसु तिपञ्चसू’’ति. अयमेत्थ सङ्खेपो, वित्थारो पन पाळिअट्ठकथावण्णनतो वेदितब्बो.

‘‘तिचीवरेन विप्पवासेय्याति सङ्घाटिया वा उत्तरासङ्गेन वा अन्तरवासकेन वा. अन्तोगामे चीवरं निक्खिपित्वा’’ति (पारा. ४७६, ४७८) वचनतो एत्थ तिचीवरन्ति तिण्णं चीवरानमञ्ञतरमेव चीवरं वत्तब्बं. एकरत्तन्ति विप्पवासकिरियाय अच्चन्तसंयोगे उपयोगवचनं. अपि-सद्देन किं पन दिरत्तादिकन्ति दस्सेति.

सङ्घसम्मुतिया विनाति तिचीवरं परिहरितुं असमत्थेन गिलानेन भिक्खुना सङ्घं वन्दित्वा उक्कुटिकं निसीदित्वा अञ्जलिं पग्गय्ह ‘‘अहं भन्ते गिलानो, न सक्कोमि तिचीवरं आदाय पक्कमितुं, सोहं भन्ते सङ्घं तिचीवरेन अविप्पवाससम्मुतिं याचामी’’ति तिक्खत्तुं याचितेन सङ्घेन तस्स ञत्तिदुतियाय कम्मवाचाय दिन्नं अविप्पवाससम्मुतिं विनाति वुत्तं होति. तथा लद्धसम्मुतिकस्स गिलानस्स भिक्खुनो तस्मिं गेलञ्ञे अवूपसन्ते वा वूपसन्तेपि चीवरनिक्खेपट्ठानं आगमनकाले वा उप्पन्ने अञ्ञेपि रोगे अवूपसन्ते ताययेव सम्मुतिया न दोसो.

६०३. भिक्खुनोति अलद्धसम्मुतिकस्स भिक्खुनो. तेन चीवरेन. विप्पवत्थुं न वट्टतीति विना वसितुं न वट्टति. किं वुत्तं होति? ‘‘एककुलस्स गामो होति परिक्खित्तो च, अन्तोगामे चीवरं निक्खिपित्वा अन्तोगामे वत्थब्बं. अपरिक्खित्तो होति, यस्मिं घरे चीवरं निक्खित्तं होति, तस्मिं घरे वत्थब्बं, हत्थपासा वा न विजहितब्बं. नानाकुलस्स ¶ गामो होति परिक्खित्तो च, यस्मिं घरे चीवरं निक्खित्तं होति, तस्मिं घरे वत्थब्बं सभाये वा द्वारमूले वा, हत्थपासा वा न विजहितब्ब’’न्तिआदिना (पारा. ४७८) नयेन पाळिया वुत्तट्ठानतो बहि अरुणं उट्ठापेतुं न वट्टतीति वुत्तं होति.

इमस्मिं ¶ पाठे ‘‘परिक्खित्तो’’ति इदं पाकारेन वा वतिया वा परिखाय वा परिक्खित्तं सन्धाय वुत्तं. हत्थपासा वाति एत्थ हत्थपासा नाम अड्ढतियरतनं होति. यथाह अट्ठकथायं ‘‘तं घरं समन्ततो हत्थपासा न विजहितब्बं, अड्ढतेय्यरतनप्पमाणा पदेसा उद्धं न विजहितब्बन्ति वुत्तं होती’’ति (पारा. अट्ठ. २.४७७-४७८).

विप्पवसन्तस्स को दोसोति आह ‘‘होति…पे… अरुणुग्गमे’’ति. अनुञ्ञातट्ठानतो हि बहि चीवरेन विना अरुणं उट्ठापेन्तस्स तं चीवरं निस्सज्जितब्बं होति, तंहेतुका पाचित्तियापत्तिपि होतीति अत्थो. तेनेव वक्खति ‘‘निस्सज्जित्वा…पे… विञ्ञुना’’ति.

६०४. न्हायन्तस्सेवाति चीवरस्स हत्थपासतो दूरे नहायन्तस्सेव, अनादरे सामिवचनं.

६०६. अच्छिन्नं विलुत्तं चीवरं यस्स सो अच्छिन्नचीवरो, भिक्खु, तस्स ठानं अच्छिन्नचीवरट्ठानं, तस्मिं.

६०७. निवासेत्वाति एत्थ ‘‘अन्तरवासक’’न्ति च गहेत्वाति एत्थ ‘‘इतरानी’’ति च सेसो. इदञ्च गन्तब्बट्ठाने, आसन्ने मग्गे च मनुस्ससम्बाधे असति कत्तब्बदस्सनं. इतरत्थ निवासेत्वा, पारुपित्वा च सङ्घाटिं अंसे कत्वाव गन्तब्बं होति. विहारे सभागेसु अलब्भमानेसु आसनसालम्पि गन्त्वा सभागस्स सन्तिके विनयकम्मं कत्तब्बन्ति ¶ अट्ठकथायं (पारा. अट्ठ. २.४९५ अत्थतो समानं) वुत्तं. ‘‘निस्सज्जित्वा’’ति इमिना ‘‘इदं मे भन्ते चीवरं रत्तिविप्पवुत्थं अञ्ञत्र भिक्खुसम्मुतिया निस्सग्गियं, इमाहं सङ्घस्स निस्सज्जामी’’ति सङ्घे वा ‘‘इदं मे भन्ते चीवरं…पे… अहं आयस्मन्तानं निस्सज्जामी’’ति तिण्णं, द्विन्नं वा सन्तिके वा ‘‘इदं मे आवुसो…पे… इमाहं आयस्मतो निस्सज्जामी’’ति एकस्स सन्तिके वा वत्वा निस्सज्जित्वाति वुत्तं होति. विञ्ञुनाति एवं निस्सग्गियवत्थुनिस्सज्जनादिनानप्पकारविधिजाननकेन ञाणवताति अत्थो.

६०८. तं निस्सग्गियचीवरं.

६०९. ‘‘अदेन्तस्स च निस्सट्ठं दुक्कट’’न्ति इमिना ‘‘ब्यत्तेन भिक्खुना पटिबलेन आपत्ति ¶ पटिग्गहेतब्बा, निस्सट्ठचीवरं दातब्ब’’न्ति वुत्तत्ता इमं विधिं जाननताय ब्यत्तेन यथाविधिं कातुं समत्थताय पटिबलेन खन्धके (चूळव. २३९) आगतनयेन आपत्तिं पटिग्गहेत्वा निस्सट्ठचीवरं हत्थेन गहेत्वा निसीदापेत्वा सचे सङ्घो होति, ‘‘सुणातु मे भन्ते सङ्घो, इदं चीवरं इत्थन्नामस्स भिक्खुनो निस्सग्गियं सङ्घस्स निस्सट्ठं, यदि सङ्घस्स पत्तकल्लं, सङ्घो इमं चीवरं इत्थन्नामस्स भिक्खुनो ददेय्या’’ति, सचे तयो होन्ति, ‘‘सुणन्तु मे आयस्मन्ता, इदं चीवरं इत्थन्नामस्स भिक्खुनो निस्सग्गियं आयस्मन्तानं निस्सट्ठं, यदायस्मन्तानं पत्तकल्लं, आयस्मन्ता इमं चीवरं इत्थन्नामस्स भिक्खुनो ददेय्यु’’न्ति, सचे एकको होति, ‘‘इमं चीवरं आयस्मतो दम्मी’’ति दातब्बं, निस्सट्ठचीवरं ‘‘अत्तनोयेव दिन्न’’न्ति सुद्धसञ्ञाय गहेत्वा अदेन्तस्स दुक्कटं होतीति वुत्तं होति.

तस्स सन्तकभावं ञत्वा लेसेन विलुम्पन्तस्स पन भण्डग्घवसेन दुक्कटथुल्लच्चयपाराजिकापत्तियो होन्ति. यथाह ¶ अट्ठकथायं ‘‘तस्स सन्तकभावं पन ञत्वा लेसेन अच्छिन्दन्तो भण्डं अग्घापेत्वा कारेतब्बो’’ति (पारा. अट्ठ. २.४६९). परियापुतन्ति ‘‘न भिक्खवे निस्सट्ठचीवरं न दातब्बं, यो न ददेय्य, आपत्ति दुक्कटस्सा’’ति (पारा. ४७०) पाळियं वुत्तन्ति अत्थो.

६१०-१. थेरे दहरे चाति एतेसु उभोसुपि मग्गं गच्छन्तेसूति योजना. ‘‘थेरे’’ति इमिना अनिस्सितभावमाह, ‘‘दहरे चा’’ति इमिना निस्सितभावं. ओहीनेति ओसक्किते. सचे सो थेरो निस्सयाचरियो भवेय्याति अधिप्पायेनाह ‘‘गरु’’न्ति. तस्मिं दहरे. वत्थन्ति तस्स हत्थे ठितचीवरं. न पस्सम्भतीति धुरनिक्खेपं अकत्वा गमने सउस्साहत्ता निस्सयपटिप्पस्सद्धि न होतीति अधिप्पायो. तेनेव ‘‘मुहुत्त’’न्तिआदिमाह.

६१४. पच्चुद्धारे अन्तोयेवारुणेति इमिना सम्बन्धो, दहरभिक्खुनो दूरभावञ्च अरुणुग्गमनञ्च ञत्वा चीवरस्स अनिस्सग्गियत्थं तस्स हत्थे ठितभावं सल्लक्खेत्वा पुरारुणा पच्चुद्धरेति अत्थो. विस्सज्जेतीति अञ्ञस्स देति. विनस्सतीति चोरादीहि नस्सति.

दुतियकथिनकथावण्णना.

६१६. अकालचीवरन्ति ¶ ‘‘अकालचीवरं नाम अनत्थते कथिने एकादसमासे उप्पन्नं, अत्थते कथिने सत्तमासे उप्पन्नं, कालेपि आदिस्स दिन्न’’न्ति (पारा. ५००) वचनतो अनत्थतकथिने विहारे ‘‘चीवरमासो’’ति यो पुब्बकत्तिककाळपक्खपाटिपदतो पट्ठाय याव अपरकत्तिकपुण्णमी, ताव मासो वुच्चति, ततो परेसु एकादससु मासेसु ¶ उप्पन्नञ्च अत्थतकथिने विहारे यो चीवरमासो, हेमन्ता च चत्तारो मासाति पञ्चमासतो बहि सत्तसु मासेसु उप्पन्नञ्च अत्थतकथिने पञ्च मासा यथापरिच्छिन्नकाले सङ्घस्स च ‘‘इदं अकालचीवरं दम्मी’’ति पुग्गलस्स च ‘‘इदं तुय्हं दम्मी’’ति दिन्नञ्चेति इदं अकालचीवरन्ति अत्थो. ‘‘उप्पन्न’’न्ति सेसो, ‘‘उप्पज्जेय्य सङ्घतो वा गणतो वा ञातितो वा मित्ततो वा पंसुकूलतो वा अत्तनो वा धनेना’’ति (पारा. ५००) वचनतो सङ्घस्स वा ‘‘इदं सुत्तन्तिकगणस्स देम, इदं आभिधम्मिकगणस्स देमा’’तिआदिना नयेन गणस्स वा दिन्नतो अत्तनो वस्सग्गेन वा ञातिआदितो वा सुसानादिपंसुकूलखेत्ततो वा अत्तनो सन्तकेन सुत्तकप्पासादिकप्पियवत्थुतो वा उप्पन्नचीवरन्ति अत्थो.

मासपरमं निक्खिपेति मासो परमं पमाणं एतस्स निक्खिपनस्साति मासपरमं, निक्खिपनन्ति किरियाविसेसनं कातब्बं, मासपरमं निक्खिपनं करेय्याति वुत्तं होति. ‘‘आकङ्खमानेन भिक्खुना पटिग्गहेतब्बं, पटिग्गहेत्वा खिप्पमेव कारेतब्बं, नो चस्स पारिपूरी, मासपरमं तेन भिक्खुना तं चीवरं निक्खिपितब्बं ऊनस्स पारिपूरिया’’ति (पारा. ५००) वचनतो एवं उप्पन्नं चीवरं इच्छन्तेन पटिग्गहेत्वा सचे पहोति, दसाहमनतिक्कामेत्वा कारेतब्बं. सचे नप्पहोति, ऊनस्स परिपूरणत्थं मासपरमं ठपेतब्बन्ति अत्थो.

कदा एवं निक्खिपितब्बन्ति आह ‘‘सति पच्चासाया’’ति, ‘‘पच्चासा होति सङ्घतो वा गणतो वा ञातितो वा मित्ततो वा पंसुकूलतो वा अत्तनो वा धनेना’’ति (पारा. ५००) वुत्तसङ्घादितो अत्तनो वस्सग्गादितो लभेय्य, तेन ‘‘इमस्स ऊने परिपुण्णे कारेस्सामी’’ति पच्चासाय सति एवं निक्खिपितब्बन्ति अत्थो. ततो उद्धं ठपेतुं ¶ न वट्टतीति मासतो अतिरेककालं निक्खिपितुं न वट्टति, निस्सग्गियपाचित्तियं होतीति अत्थो.

यदि एवं ‘‘तदहुप्पन्ने मूलचीवरे पच्चासाचीवरं उप्पज्जति, दसाहा कारेतब्बं…पे… वीसे ¶ उप्पन्ने मूलचीवरे पच्चासाचीवरं उप्पज्जति, दसाहा कारेतब्ब’’न्ति (पारा. ५००) कस्मा आहाति? पच्चासाचीवरस्स दसदिवसे अतिक्कम्म ठपेतुं अयुत्तत्ता, मूलचीवरस्स तग्गतिकत्ता एवं वुत्तं. यथाह अट्ठकथायं ‘‘मूलचीवरस्स उप्पन्नदिवसतो याव वीसतिमो दिवसो, ताव उप्पन्नं पच्चासाचीवरं मूलचीवरं अत्तनो गतिकं करोती’’ति (पारा. अट्ठ. २.५००).

ततियकथिनकथावण्णना.

६१८-९. भिक्खुनिया यो धोवापेतीति सम्बन्धो. ‘‘भिक्खुनी नाम उभतोसङ्घे उपसम्पन्ना’’ति (पारा. ५००) वचनतो भिक्खुनिसङ्घे ञत्तिचतुत्थाय कम्मवाचाय, भिक्खुसङ्घे ञत्तिचतुत्थाय कम्मवाचायाति अट्ठवाचिकाय उपसम्पन्ना भिक्खुनी नाम. भुत्तन्ति भिक्खुना अत्तना परिभुत्तं रजितं आदिन्नकप्पं, ‘‘परिभोगं करिस्सामी’’ति अन्तमसो सीसं ठपेत्वा सयनमत्तेनापि पुराणभूतं चीवरन्ति अत्थो. यथाह अट्ठकथायं ‘‘रजित्वा कप्पं कत्वा एकवारम्पि निवत्थं वा पारुतं वा अन्तमसो परिभोगसीसेन अंसे वा मत्थके वा कत्वा मग्गं गतो होति, उस्सीसकं वा कत्वा निपन्नो होति, एतम्पि पुराणचीवरमेवा’’ति (पारा. अट्ठ. २.५०३-५०५). वत्थन्ति कारिये कारणोपचारवसेन चीवरमेव आह.

अञ्ञातिकायाति ‘‘अञ्ञातिका नाम मातितो वा पितितो वा याव सत्तमा पितामहयुगा असम्बद्धा’’ति वचनतो ¶ अत्तनो वा तस्सा वा मातु वा पितु वा परम्पराय याव सत्तमा युगा, एत्थन्तरे येन केनचि ञातकेन असम्बद्धभावेन अञ्ञातिकायाति अत्थो. यथा चाह अट्ठकथायं ‘‘पितामहोयेव पितामहयुगं. ततो उद्धं सब्बेपि पुब्बपुरिसा पितामहग्गहणेनेव गहिता. एवं याव सत्तमो पुरिसो, ताव या असम्बद्धा’’ति (पारा. अट्ठ. २.५०३-५०५). आकोटापेतीति पहरापेति.

ततो धोवापनादितो. निस्सग्गियापत्तीति निस्सग्गियस्स आपत्ति निस्सग्गियापत्ति, निस्सग्गियस्स चीवरस्स नामेन विसिट्ठा पाचित्तियापत्ति होतीति अत्थो. इदञ्च तिण्णं पयोगानं अन्ते आपज्जितब्बाय आपत्तिया दस्सनं. तस्स नियोगेन धोवनादिं करोन्तिया भिक्खुनिया तदत्थं सब्बपुब्बपयोगगणनाय भिक्खुनो दुक्कटं होतीति गहेतब्बो. यथाह अट्ठकथायं ‘‘याव नं धोवित्वा उक्खिपति, ताव भिक्खुनिया पयोगे पयोगे भिक्खुस्स दुक्कट’’न्ति ¶ (पारा. अट्ठ. २.५०३-५०५). पठमेनाति तीणिपि कारापेन्तस्स यं पठमं कारापेति, तेनाति अत्थो. दीपितन्ति ‘‘अञ्ञातिकाय अञ्ञातिकसञ्ञी पुराणचीवरं धोवापेति रजापेति आकोटापेति, निस्सग्गियेन आपत्ति द्विन्नं दुक्कटान’’न्तिआदिना (पारा. ५०६) देसितं. इमिना नयेन द्वे कारापेन्तस्स पठमेन निस्सग्गियापत्ति, दुतियेन दुक्कटन्ति अयमत्थो सङ्गय्हति.

६२०. ‘‘धोवनत्थाय देती’’ति इमिना ‘‘भुत्तं वत्थ’’न्ति अधिकारतो लब्भति.

६२१. सामणेरनिद्देसेपीति ‘‘सामणेरा’’ति निद्देसो नाम यस्स, तस्मिम्पि, अत्तना परिभुत्तं वत्थं धोवनत्थाय देतीति योजना, अत्तनो परिभुत्तं चीवरं धोवनत्थाय ¶ सामणेरस्स देतीति अत्थो. पि-सद्दो समुच्चयत्थो. उपसम्पज्जाति पुब्बकिरियाय ‘‘धोवती’’ति अपरकिरिया सामत्थिया लब्भति.

६२२. दहरानञ्च भिक्खूनन्ति अत्तनो नवकतरानं भिक्खूनं. निय्यादिते दिन्ने. एस नयोति ‘‘एकेन पाचित्तियं, अवसिट्ठेहि द्वीहि वा एकेन वा सब्बपयोगेसु दुक्कटं होती’’ति नयो.

६२३. चीवरेति परिभुत्तचीवरे.

६२४. ‘‘धोवनप्पच्चयायेवा’’ति इमिना इतरद्वयस्स तस्स अनाणत्तिया कतत्ता ततो अनापत्तिभावमाह.

६२६. ञातिकाति एत्थ ‘‘पटिसङ्खा योनिसो’’तिआदीसु (म. नि. १.२२-२३, ४२२; अ. नि. ६.५८; ८.९; महानि. २०६; ध. स. १३५५; विभ. ५१८) विय गाथाबन्धवसेन य-कारलोपो, ञातिकाय भिक्खुनियाति अत्थो. ‘‘ञातिका अञ्ञातिसञ्ञिस्सा’’ति पदच्छेदो. पच्चत्थरणन्ति मञ्चपीठे अत्थरितब्बं पच्चत्थरणचीवरञ्च.

६२७. ‘‘भिक्खुनीनं वसेना’’ति इदं भिक्खुसङ्घेपि उपसम्पन्ना चे, पाचित्तियसम्भवा वुत्तं ¶ . यथाह अट्ठकथायं ‘‘भिक्खूनं सन्तिके उपसम्पन्नाय पन यथावत्थुकमेवा’’ति (पारा. अट्ठ. २.५०६). भिक्खुनिसङ्घे पठमं उपसम्पज्जित्वा पच्छा भिक्खुसङ्घे चे उपसम्पज्जति, केवलं भिक्खुसङ्घे उपसम्पन्नाति न वुच्चतीति ता भगवति धरमाने पठमं पब्बजिता पञ्चसता साकियानियो वुच्चन्ति. यथाह अट्ठकथायं ‘‘भिक्खूनं सन्तिके उपसम्पन्ना नाम पञ्चसता साकियानियो’’ति (पारा. अट्ठ. २.५०६). भिक्खुनो ¶ लिङ्गे परिवत्ते तस्सेव उपसम्पन्नकम्मस्स अनुञ्ञातत्ता सोपि गहेतब्बोयेव.

६२८. अवुत्ता धोवतीति ‘‘इमं चीवरं धोवा’’ति अवुत्ता चीवरं किलिट्ठं दिस्वा अवत्वा ठपितट्ठानतो चीवरं गहेत्वा वा सयमेव वत्वा याचनादिनयेन वा अनाणत्तिया च गहेत्वा चीवरधोवनादिं करेय्य चे. अपरिभुत्तं वाति हेट्ठा वुत्तनयेन अपरिभुत्तं चीवरं. अञ्ञं वाति उपाहनत्थविकपत्तत्थविकपोत्थकत्थविकमञ्चपीठादिं यं किञ्चि परिक्खारं.

पुराणचीवरधोवापनकथावण्णना.

६२९. विकप्पनुपगं पच्छिमं उपादाय किञ्चि चीवरं गण्हतोति योजना, एत्थ ‘‘अञ्ञातिकाय भिक्खुनिया हत्थतो’’ति च ‘‘ञातिकाय अञ्ञातिकसञ्ञिस्सा’’ति च ‘‘एकतोउपसम्पन्नाय हत्थतो गण्हाती’’ति च वक्खमानवचनसामत्थिया लब्भमानतो पुब्बे वुत्तनयेन अञ्ञातिकाय उभतोसङ्घे उपसम्पन्नाय भिक्खुनिया हत्थतो विकप्पनुपगरतनविदत्थिप्पमाणवत्थतो पट्ठाय यं किञ्चि चीवरं गण्हन्तस्साति अत्थो. ‘‘आपत्ती’’ति सामञ्ञेन वुत्तेपि ‘‘निस्सग्गिया पाचित्तियापत्ती’’ति पकरणतो च ‘‘निस्सग्गियापत्ती’’ति वक्खमानतो च लब्भति. ठपेत्वा पारिवत्तकन्ति ‘‘पारिवत्तकं परित्तेन वा विपुलं, विपुलेन वा परित्त’’न्ति (पारा. ५१४) वचनतो महापच्चरियं ‘‘अन्तमसो हरीतकखण्डेनापी’’ति (पारा. अट्ठ. २.५१४) वुत्तत्ता च हेट्ठिमन्ततो हरीतकखण्डम्पि दत्वा गहेतब्बं तिचीवरञ्च पारिवत्तकं नाम होति, तं ठपेत्वाति वुत्तं होति. परिवत्तनं परिवत्तं, तं एतस्स अत्थीति पारिवत्तकं, कयविक्कयेन गहेतब्बं चीवरन्ति अत्थो.

६३०. गहणत्थाय ¶ पयोगेति गण्हितुं हत्थपसारणादिप्पयोगे. परियापुतन्ति ‘‘पटिग्गण्हाति पयोगे दुक्कट’’न्ति (पारा. ५१२) देसितं.

६३१. अनुपसम्पन्नहत्थेति ¶ भिक्खुभिक्खुनितो अञ्ञे सब्बे अनुपसम्पन्ना गहिता. यथाह अट्ठकथायं ‘‘सचे पन सिक्खमानासामणेरसामणेरिउपासकउपासिकानं हत्थे पेसितं पटिग्गण्हाति, अनापत्ती’’ति (पारा. अट्ठ. २.५१२).

६३२. एकतोति एत्थ भिक्खुनिसङ्घतोति गहेतब्बं. अञ्ञस्मिं पक्खे पाचित्तियमेव. यथाह अट्ठकथायं ‘‘भिक्खूनं सन्तिके उपसम्पन्नाय पन पाचित्तियमेवा’’ति (पारा. अट्ठ. २.५१३).

६३३. ‘‘पारिवत्तकं दस्सामी’’ति आभोगं कत्वा गण्हाति, दोसो न विज्जतीति योजना.

६३४. अञ्ञं परिक्खारन्ति थविककायबन्धनादि अविकप्पियं वा अविकप्पनुपगं वा परिक्खारमेव गहेतब्बं. विकप्पनुपगं पन न वट्टति. यथाह अट्ठकथायं ‘‘विकप्पनुपगं पच्छिमचीवरप्पमाणं पन पटपरिस्सावनम्पि न वट्टती’’ति (पारा. अट्ठ. २.५१४). चीवरपटिग्गण्हनं किरिया, पारिवत्तकस्स अदानं अकिरियाति किरियाय च अकिरियाय च आपज्जितब्बतो क्रियाक्रियं.

चीवरपटिग्गहणकथावण्णना.

६३५. ‘‘अञ्ञातकं अप्पवारित’’न्ति पदच्छेदो. ‘‘गहपतिं वा गहपतानिं वा’’ति पाठसेसो. वुत्तञ्हि भगवता ‘‘अञ्ञातकं गहपतिं वा गहपतानिं वा’’ति (पारा. ५१६, ५१८). पुब्बे वुत्तनयेन याव सत्तमा पितामहयुगा सम्बद्धञ्ञातिकताय अभावतो अञ्ञातकं. ‘‘यं मय्हं गेहे ¶ अत्थि, तं पवारेमी’’तिआदिना नयेन अप्पवारितं. ‘‘गहपति नाम यो कोचि अगारं अज्झावसती’’ति (पारा. ५१९) पाळियं वुत्तं गहपतिं वा. ‘‘गहपतानी नाम या काचि अगारं अज्झावसती’’ति (पारा. ५१९) पाळियं वुत्तं घरणिं वाति अत्थो.

होति निस्सग्गियापत्तीति ‘‘अञ्ञत्र समया विञ्ञापेति, पयोगे दुक्कटं, पटिलाभेन निस्सग्गियं होती’’ति (पारा. ५१९) पाळियं वुत्तेसु सब्बेसु पुब्बपयोगेसु दुक्कटेन सद्धिं निस्सग्गियपाचित्तियं ¶ होतीति वुत्तं होति. अञ्ञत्र समयाति ‘‘तत्थायं समयो, अच्छिन्नचीवरो वा होति भिक्खु नट्ठचीवरो वा’’ति (पारा. ५१८) मातिकाय, ‘‘अच्छिन्नचीवरो नाम भिक्खुस्स चीवरं अच्छिन्नं होति राजूहि वा चोरेहि वा धुत्तेहि वा येहि केहिचि वा अच्छिन्नं होति. नट्ठचीवरो नाम भिक्खुस्स चीवरं अग्गिना वा दड्ढं होति, उदकेन वा वूळ्हं होति, उन्दूरेहि वा उपचिकाहि वा खायितं होती’’ति (पारा. ५१९) पदभाजने च निद्दिट्ठसरूपकालतो अञ्ञत्राति अत्थो.

६३६. तिकपाचित्तियं वुत्तन्ति ‘‘अञ्ञातके अञ्ञातकसञ्ञी, वेमतिको, ञातकसञ्ञी अञ्ञत्र समया चीवरं विञ्ञापेति, निस्सग्गियं पाचित्तिय’’न्ति (पारा. ५२०) पाचित्तियत्तयं भगवता वुत्तं. ‘‘ञातके अञ्ञातिसञ्ञिस्सा’’ति पदच्छेदो. तत्थाति तस्मिं ञातके. वेमतिकस्साति ‘‘ञातको नु खो, अञ्ञातको’’ति वेमतिकस्स. द्विकदुक्कटं तथेवाति योजना. ‘‘तथेवा’’ति ‘‘वुत्त’’न्ति इदं आकड्ढति, ‘‘ञातके अञ्ञातकसञ्ञी, वेमतिको अञ्ञत्र समया चीवरं विञ्ञापेति, आपत्ति दुक्कटस्सा’’ति (पारा. ५२०) देसितन्ति अत्थो.

६३७-८. समये ¶ विञ्ञापेन्तस्स अनापत्तीति योजना. एत्थ ‘‘चीवरं अञ्ञातकअप्पवारित’’न्ति आनेत्वा सम्बन्धितब्बं, यथापरिच्छिन्नकालद्वयतो अञ्ञतरस्मिं काले अञ्ञातकअप्पवारितं चीवरं विञ्ञापेन्तस्स अनापत्तीति अत्थो. ञातके वा पवारितेति एत्थापि ‘‘अत्तनो’’ति अज्झाहारो, ‘‘समये’’ति इमिना योजेतब्बं, अत्तनो ञातकपवारिते असमयेपि चीवरं विञ्ञापेन्तस्स अनापत्तीति अत्थो. अञ्ञस्सत्थायाति एत्थ ‘‘अत्तनो’’ति सेसो, अत्तनो ञातके, पवारिते वा विञ्ञापेन्तस्स अनापत्तीति योजना, अञ्ञं भिक्खुं निस्साय अत्तनो ञातके वा पवारिते वा चीवरं विञ्ञापेन्तस्स अनापत्तीति वुत्तं होति. इतरं पक्खं दस्सेति ‘‘तस्स ञातके वा पवारिते वा’’ति. तस्साति ‘‘अञ्ञस्सा’’ति वुत्तस्स, ‘‘विञ्ञापेन्तस्स अनापत्ती’’ति इमिना योजेतब्बं. वाति पुरिमविकप्पापेक्खं. यं सन्धाय चीवरं विञ्ञापेति, तस्स ञातके वा पवारिते वा तंयेव सन्धाय चीवरं विञ्ञापेन्तस्स अनापत्तीति वुत्तं होति.

‘‘अत्तनो वा धनेना’’ति वुत्तं अनापत्तिअङ्गं उम्मत्तकादिनोति एत्थ आदि-सद्देन सङ्गय्हति ¶ , अत्तनो सन्तकं सुत्तकप्पासादिकं कप्पियवत्थुं दत्वा गण्हितुकामताय अकप्पियवोहारेन याचन्तस्स च अनापत्तीति अत्थो.

अञ्ञातकविञ्ञत्तिकथावण्णना.

६३९. अप्पवारितमञ्ञातिन्ति एत्थ ‘‘गहपतिं वा गहपतानिं वा’’ति इदं सामत्थिया लब्भति. ततुत्तरिन्ति ततो सन्तरुत्तरपरमतो उत्तरिन्ति गहेतब्बं, ‘‘सन्तरुत्तरपरमं तेन भिक्खुना ततो चीवरं सादितब्ब’’न्ति (पारा. ५२३) वुत्तत्ता ¶ अच्छिन्नचीवरेन सादितब्बअन्तरवासकउत्तरासङ्गमत्तेन अधिकन्ति अत्थो.

‘‘ततो चे उत्तरि सादियेय्या’’ति (पारा. ५२३) वचनतो ‘‘सादियन्तस्सा’’ति वत्तब्बं, एवं वत्तब्बे ‘‘विञ्ञापेन्तस्सा’’ति कस्मा वुत्तन्ति? अच्छिन्नचीवरानं भिक्खूनं छब्बग्गियेहि भिक्खूहि चीवरविञ्ञापनवत्थुस्मिं ‘‘कथञ्हि नाम तुम्हे मोघपुरिसा न मत्तं जानित्वा बहुं चीवरं विञ्ञापेस्सथा’’ति (पारा. ५२२) छब्बग्गिये भिक्खू गरहित्वा इमस्स सिक्खापदस्स पञ्ञत्तत्ता ‘‘सादितब्ब’’न्ति एत्थ विञ्ञापेतब्बन्ति अत्थो होति, तेनेव इमस्मिं पदभाजने ‘‘ततो चे उत्तरि सादियेय्याति ततुत्तरि विञ्ञापेती’’ति (पारा. ५२४) च आपत्तिभेदसन्दस्सनट्ठाने ‘‘अञ्ञातके अञ्ञातकसञ्ञी ततुत्तरि चीवरं विञ्ञापेति, निस्सग्गियं पाचित्तिय’’न्तिआदिवचनतो (पारा. ५२५) च वुत्तं. यदि एवं सिक्खापदेयेव ‘‘सादितब्बं, सादियेय्या’’ति च उभयत्थ ‘‘विञ्ञापेतब्बं, विञ्ञापेय्या’’ति च कस्मा न वुत्तन्ति? अच्छिन्नचीवरभावं ञत्वा अविञ्ञापितेपि अभिहरित्वा दिय्यमानम्पि अधिवासेन्तेन एवमेव सादितब्बन्ति न वुत्तं. इमस्सेव च अधिकविञ्ञापननिसेधनत्थं वदन्तेनापि ‘‘तञ्चे अञ्ञातको गहपति वा गहपतानी वा बहूहि चीवरेहि अभिहट्ठुं पवारेय्य, सन्तरुत्तरपरमं तेन भिक्खुना ततो चीवरं सादितब्ब’’न्ति सादितब्बनियमप्पधानं वुत्तं. तस्मा अच्छिन्नचीवरेन अत्तना वा तं सन्धाय अञ्ञेन वा विञ्ञापेन्तेनपि अविञ्ञापेन्तेपि दिय्यमानं सादियन्तेनापि सन्तरुत्तरपरमतं नातिक्कमितब्बन्ति इमस्मिं सिक्खापदे सन्धाय भासितत्थोति सल्लक्खेतब्बन्ति एत्तकं ञापेतुं ‘‘सादियन्तस्सा’’ति अवत्वा ‘‘विञ्ञापेन्तस्सा’’ति वुत्तन्ति आचरियाभिसन्धि वेदितब्बा.

६४०. इदानि ¶ ¶ विञ्ञापने च अधिवासने च उभयत्थेव नियमं दस्सेतुं ‘‘सचे तीणि नट्ठानि होन्ति, द्वे सादितब्बानि. द्वे नट्ठानि, एकं सादितब्बं. एकं नट्ठं, न किञ्चि सादितब्ब’’न्ति (पारा. ५२४) पदभाजने वुत्तविनिच्छयं दस्सेतुमाह ‘‘यस्सा’’तिआदि. ‘‘यस्स तीणिपि नट्ठानि, द्वे वा नट्ठानि, एकं वा नट्ठ’’न्ति सम्बन्धित्वा यथाक्कमं ‘‘तेन द्वे सादितब्बानि, एकं सादितब्बं, न किञ्चिपि सादितब्ब’’न्ति योजना कातब्बा. यस्स तीणिपि चीवरानि नट्ठानि, बहु च दिय्यति, तेन द्वेयेव चीवरानि सादितब्बानि. द्वे चीवरानि नट्ठानि, एकं सादितब्बं. एकञ्चे नट्ठं, न सादितब्बं, अवसिट्ठं पच्छा धम्मेन समेन लद्धनीहारेन गहेतब्बन्ति अत्थो. यथाह अट्ठकथायं ‘‘सेसं सभागट्ठानतो परियेसिस्सती’’ति. ‘‘भिक्खुनिया पन पञ्चसुपि नट्ठेसु द्वे सादितब्बानि, चतूसु नट्ठेसु एकं सादितब्बं, तीसु नट्ठेसु किञ्चि न सादितब्ब’’न्ति (पारा. अट्ठ. २.५२२-५२४) अट्ठकथायं वुत्तं.

६४१-२. सेसकं आहरन्तस्स अनापत्तीति ञातब्बन्ति योजना. एवमुपरिपि योजेतब्बं. चीवरं योजेत्वा अतिरेकं वत्थं पच्चाहरित्वा ‘‘दस्सामी’’ति बहुम्पि गहेत्वा गच्छन्तस्स अनापत्तीति अत्थो. अतिरेकम्पि तुम्हेयेव गण्हथाति दिन्नं गण्हतोपि अनापत्ति. न अच्छिन्नकारणा दिन्नेति योजना, अच्छिन्नचीवरभावं अनुद्दिस्स बहूनं चीवरानं गहणनिमित्तेनापि अनापत्तीति अत्थो. एवमेव ‘‘न नट्ठकारणा देन्ती’’ति इदम्पि दस्सितमेव. अच्छिन्नचीवरे निस्साय ततुत्तरिचीवरविञ्ञापनवत्थुम्हि इमस्स सिक्खापदस्स पञ्ञत्तत्ता अनापत्तिवारे ‘‘अञ्ञस्सत्थाया’’ति न गहितं.

ततुत्तरिकथावण्णना.

६४३. कल्याणकम्यताहेतूति ¶ सुन्दरस्स महग्घस्स कामतं पटिच्च चीवरे विकप्पनं आपज्जेय्याति योजना, ‘‘कीदिसेन ते भन्ते चीवरेन अत्थो’’ति पुब्बे अप्पवारितो ‘‘आयतं वा होतु वित्थतं वा अप्पितं वा सण्हं वा’’ति (पारा. ५२९) पदभाजने वुत्तविसिट्ठकप्पं अधिकविधानं करोतीति अत्थो. तस्स लाभा निस्सग्गियं भवेति तथा अप्पवारितेन हुत्वा कतेन अधिकविधानेन निप्फन्नचीवरस्स लाभप्पयोगेन दुक्कटनिस्सग्गियपाचित्तिया होन्ति.

६४४. महग्घं ¶ …पे… विञ्ञापेतीति वीसतिअग्घनकं चीवरं दातुकामम्हि उपासके, ‘‘अलं मय्हं एतेन, दसग्घनकं वा अप्पग्घनकं वा देही’’ति वदति.

६४५. ‘‘ञातके अञ्ञातिसञ्ञिस्सा’’ति पदच्छेदो.

पठमोपक्खटकथावण्णना.

६४६. पठमसिक्खापदे एकेन उपासकेन पीळा लद्धा, इध द्वीहीति एत्तकं नानाकरणं. सेसं पठमसिक्खापदसदिसमेवाति आह ‘‘दुतियो…पे… विनिच्छयो’’ति. उपक्खटपदेन लक्खितं सिक्खापदं उपक्खटं, दुतियञ्च तं उपक्खटञ्चाति दुतियोपक्खटं, तस्मिं दुतियोपक्खटे. अस्साति दुतियोपक्खटस्स.

दुतियोपक्खटकथावण्णना.

६४७. रञ्ञा वाति राजतो वा. राजतो भोग्गं भुञ्जितब्बं अस्स अत्थीति ‘‘राजभोग्गो’’ति वुत्तो, राजतो भत्तवेत्तनलाभितो यतो कुतोचि दायका आभतन्ति सम्बन्धो. न च वट्टतीति एत्थ ‘‘निस्सग्गियपाचित्तियभावतो’’ति ¶ अज्झाहरितब्बं. इध उत्तरिकरणीयं ‘‘तिक्खत्तु’’न्तिआदिगाथाय (वि. वि. ६७१) वक्खति.

६४८. चीवरचेतापन्नवसेन अधिगतरजतादि येन केनचि परियायेनापि न सादितब्बन्ति दस्सेतुमाह ‘‘रजतं वा’’तिआदि. धवलसभावताय राजतीति रजतं, सज्झु. जातं रूपं वण्णायतनमेतस्साति जातरूपं, सुवण्णं. किञ्चीति अप्पमत्तकम्पि. अत्तनो वा अत्थाय परस्स वा अत्थाय दिय्यमानं किञ्चि गण्हितुं न वट्टतीति योजना.

६४९. अत्तनो पटिग्गहणे आपत्तिया रूपियगहणसिक्खापदे वक्खमानत्ता अञ्ञस्स अत्थाय गहणे आपत्तिदस्सनत्थमाह ‘‘अञ्ञस्सत्थाया’’तिआदि. तत्थ अञ्ञस्सत्थायाति अञ्ञस्स पुग्गलस्स, गणस्स, सङ्घस्स, चेतियस्स, नवकम्मस्स वा अत्थाय. निद्दिट्ठन्ति आहरित्वा ‘‘इमं गण्हथा’’ति वुत्तं रजतं, जातरूपं वा अञ्ञं वा यं किञ्चि निस्सग्गियदुक्कटवत्थुं ¶ पटिग्गण्हतो तस्स भिक्खुनो दुक्कटं होतीति महापच्चरियं वुत्तन्ति योजना.

६५०-१. वुत्तमेवत्थं सरूपतो विभावेतुमाह ‘‘नेत्वा’’तिआदि. नेत्वाति आनेत्वा. अकप्पियं भण्डन्ति ‘‘रजतं जातरूपं वा’’ति यथावुत्तमेव अकप्पियभण्डं. इत्थन्ति वक्खमानप्पकारेन. न च वट्टतीति एत्थ च-कारेन वट्टति चाति अनुञ्ञातं कतन्ति. यथाह अट्ठकथायं –

‘‘सचे पन ‘नयिदं भिक्खूनं सम्पटिच्छितुं वट्टती’ति पटिक्खित्ते ‘वड्ढकीनं वा कम्मकरानं वा हत्थे भविस्सति, केवलं तुम्हे सुकतदुक्कटं जानाथा’ति वत्वा तेसं हत्थे दत्वा पक्कमति, वट्टति. अथापि ‘मम मनुस्सानं हत्थे भविस्सति, मय्हमेव ¶ वा हत्थे भविस्सति, केवलं तुम्हे यं यस्स दातब्बं, तदत्थाय पेसेय्याथा’ति वदति, एवम्पि वट्टती’’ति (पारा. अट्ठ. २.५३८-५३९).

६५२. विहारस्साति एत्थ ‘‘नवकम्मस्सा’’ति (पारा. अट्ठ. २.५३८-५३९) अट्ठकथायं वुत्तत्ता वत्तब्बं गाथाबन्धवसेन न वुत्तं.

६५४. रजतं जातरूपं वा सङ्घस्साति एत्थ ‘‘चत्तारो पच्चये परिभुञ्जथाति दिन्न’’न्ति सेसो. यथाह अट्ठकथायं ‘‘सचे पन कोचि बहुम्पि हिरञ्ञसुवण्णं आनेत्वा ‘इदं सङ्घस्स दम्मि, चत्तारो पच्चये परिभुञ्जथा’ति वदति, तं चे सङ्घो सम्पटिच्छति, पटिग्गहणेपि परिभोगेपि आपत्ती’’ति (पारा. अट्ठ. २.५३८-५३९). एवं आभतं तस्मिं सङ्घे यो कोचि भिक्खु ‘‘नयिदं कप्पती’’ति सचे पटिक्खिपति, ‘‘अयं सङ्घस्स लाभन्तरायं करोती’’ति वदन्तस्सेव आपत्ति होति. यथाह अट्ठकथायं ‘‘यो हि तं चोदेति, स्वेव सापत्तिको होति, तेन पन एकेन बहू अनापत्तिका कता’’ति (पारा. अट्ठ. २.५३८-५३९). इध स्वेव सापत्तिकोति एत्थ ‘‘दुक्कटापत्तिकोति वुत्तं होती’’ति गण्ठिपदे वुत्तं. इमिस्सा गाथाय ‘‘सङ्घस्सा’’ति अलिखित्वा ‘‘भिक्खुनो’’ति च लिखन्ति, तं न सुन्दरं. इदानि दस्सितअट्ठकथापाठे ‘‘सङ्घो सम्पटिच्छती’’ति (पारा. अट्ठ. २.५३८-५३९) वुत्तत्ता ‘‘सङ्घस्सा’’ति पाठो सुन्दरो.

६५५. तळाकस्साति ¶ वापिया. सस्सुप्पत्तिनिदानतो तळाकं खेत्तं, ततो तस्स गहणं वा परिभोगो वा न च वट्टतीति योजना. तळाकस्स चाति एत्थ च-कारेन खेत्तवत्थु सङ्गहितं. न च वट्टतीति एत्थ चकारेन वट्टति चाति दस्सितं होति.

६५६. तं ¶ कतमन्ति आह ‘‘चत्तारो’’तिआदि. सब्बम्पीति तळाकपोक्खरणिखेत्तादि सब्बम्पि.

६५८-९. अपरिच्छिन्नभागस्मिन्ति ‘‘इमस्मिं भूमिभागे कतस्स कम्मेहि एत्तको भागो देय्यो’’ति एवं पुब्बे अनियमितआये भूमिभागे. अकतपुब्बं नवसस्सं नाम. एत्तकं भागं देथाति एत्तकं कहापणभागं देथ. उट्ठापेतीति उप्पादेति.

‘‘कसथ वपथा’’ति अकप्पियं वाचं वत्वाति योजना. वपथाति चाति एत्थ च-सद्दो इध अवुत्तं तंकत्तुयोगकाले वुच्चमानं अकप्पियवचनन्तरं समुच्चिनोति. उप्पादितञ्चाति एत्थ च-सद्दो कहापणं समुच्चिनोति. सब्बन्ति तथा उप्पादितकहापणञ्च एवं अकप्पियवोहारेन उप्पादितञ्चाति सब्बं.

६६०. कसथादिकं वचनं अवत्वा ‘‘एत्तिकाय भूमिया एत्तको नाम भागो’’ति भूमिं यो च पतिट्ठापेति, तस्सेवेतमकप्पियन्ति वक्खमानेन योजेतब्बं. च-सद्दो ‘‘यो पना’’ति वक्खमानपुग्गलन्तरापेक्खो.

६६१-२. भूमिया सयमेव पमाणस्स जाननत्थं तूति योजना, ‘‘एत्तके भूमिभागे अम्हेहि सस्सं कतं, एत्तकं नाम भागं गण्हथा’’ति कसकेहि वुत्ते तेसं वचनं असद्दहित्वा सयमेव खेत्तभूमिया पमाणं ञातुकामतायाति अत्थो. तु-सद्दो इममेव विसेसं जोतेति. यो पन मिनाति, तस्सेवेतमकप्पियन्ति वक्खमानेन योजेतब्बं. रज्जुयापि च दण्डेनाति एत्थ पादेनापि मिनितुं न वट्टतीति वदन्ति. ‘‘रक्खती’’तिआदिकिरियापदेहिपि एवमेव योजेतब्बं.

खले ¶ ठत्वा रक्खतीति धञ्ञकरणे ठत्वा अञ्ञे गण्हितुं अदत्वा पालेति. कथं रक्खितुं ¶ वट्टति, कथं रक्खितुं न वट्टतीति? तं पन वीहिं ‘‘इदं वा एत्तकं वा मा गण्ह, इदं गहेतुं न लब्भती’’ति वा ‘‘इतो अपनेहि, इध पुञ्जं करोही’’ति वा एवमादिना पयोगेन चे रक्खति, तं अकप्पियं. सचे ‘‘मयि ठिते रक्खितं होती’’ति रक्खति, गण्हन्ते वा पस्सित्वा ‘‘किं करोथा’’ति भणति, वट्टति. रूपियपटिग्गहणसिक्खापदे द्वारं पिदहित्वा रक्खन्तेन वसितब्बन्ति हि वुत्तन्ति गण्ठिपदे वुत्तनयेन वेदितब्बो. अञ्ञस्मिम्पि गण्ठिपदे वुत्तं ‘‘थेनेत्वा गण्हन्ते सति एतं भो पवत्तिं भिक्खुसङ्घस्स किं आरोचेस्सामीति पटिपुच्छितुं वट्टतीति वदन्ती’’ति. नीहरापेतीति एत्थापि सचे परियायेन वदति, वट्टतीति वदन्ति. तस्सेवेतमकप्पियन्ति इदं खेत्तमिननादिं करोन्तेन लद्धब्बतो अञ्ञस्स अभिनवुप्पादितस्स अभावा अञ्ञेसं वट्टतीति द्वीसु गण्ठिपदेसु वुत्तं.

६६३. ‘‘एत्तकेहि वीहीहि इदं आहरथा’’ति वुत्ता सचे आहरन्तीति योजना. एत्थ ‘‘तस्सेवेतमकप्पिय’’न्ति इदं धञ्ञस्स विचारितत्ता वुत्तं. यथाह अट्ठकथायं ‘‘तस्सेव अकप्पियं. कस्मा? धञ्ञस्स विचारितत्ता’’ति (पारा. अट्ठ. २.५३८-५३९).

६६४. हिरञ्ञेनाति कहापणेन. ‘‘तमकप्पिय’’न्ति इदं कहापणानं विचारितत्ता वुत्तं. यथाह अट्ठकथायं ‘‘सब्बेसं अकप्पियं. कस्मा? कहापणानं विचारितत्ता’’ति (पारा. अट्ठ. २.५३८-५३९).

६६५. पेसकारकदासं वाति पेसकारकसङ्खातं दासं वा, पेसकारो तन्तवायो. आरामिकानं नामेन देन्तेति ‘‘आरामिकं दम्मि, वेय्यावच्चकरं दम्मी’’तिआदिना नयेन देन्ते.

६६६. खीरं ¶ दधि तक्कं सप्पि नवनीतन्ति पञ्चगोरसा.

६६७. अजिकादीसूति आदि-सद्देन महिसं सङ्गण्हाति.

६६९. पटिसिद्धेपीति पटिक्खित्तेपि. मूलं दत्वाति कप्पियभण्डमूलं दत्वा. कुक्कुटादयो पन ‘‘सुखेन वसन्तू’’ति अरञ्ञेयेव विस्सज्जेतब्बं. यथाह अट्ठकथायं ‘‘कुक्कुटसूकरे ¶ ‘सुखं जीवन्तू’ति अरञ्ञे विस्सज्जेतुं वट्टती’’ति (पारा. अट्ठ. २.५३८-५३९). सूकरमयूरादीसुपि लद्धेसु तेसं अनुरूपेयेव विसये विस्सज्जेतब्बा.

६७१. ‘‘तिक्खत्तु’’न्तिआदिगाथाय को सम्बन्धो? ‘‘रञ्ञा वा राजभोग्गेना’’तिआदिगाथाय सङ्गहितनयेन राजराजामच्चब्राह्मणगहपतादीसु येन केनचि अत्तना वा चीवरचेतापन्नेन चीवरं चेतापेत्वा ‘‘इत्थन्नामं भिक्खुं चीवरेन अच्छादेही’’ति वत्वा तं चीवरचेतापन्नसङ्खातं चीवरमूलं दत्वा पहितदूतेन वा भिक्खुं उपसङ्कमित्वा ‘‘इदं खो भन्ते आयस्मन्तं उद्दिस्स चीवरचेतापन्नं आभतं, पटिग्गण्हातु आयस्मा चीवरचेतापन्न’’न्ति यदि वुच्चेय्य, भिक्खुना ‘‘न खो मयं आवुसो चीवरचेतापन्नं पटिग्गण्हाम, चीवरञ्च खो मयं पटिग्गण्हाम कालेन कप्पिय’’न्ति वुत्ते सचे तेन ‘‘अत्थि पनायस्मतो कोचि वेय्यावच्चकरो’’ति वुत्ते चीवरत्थिकेन भिक्खुना ‘‘एसो खो आवुसो भिक्खूनं वेय्यावच्चकरो’’ति आरामिके वा उपासके वा दस्सिते यदि सो तस्स अत्तना आहरित्वा ‘‘इमस्स भिक्खुनो चीवरेन अत्थे सति इमिना चीवरं चेतापेत्वा अच्छादेही’’ति वत्वा तं भिक्खुं उपसङ्कमित्वा ‘‘यं खो भन्ते आयस्मा वेय्यावच्चकरं निद्दिसि, सञ्ञत्तो सो मया, उपसङ्कमतु आयस्मा कालेन, चीवरेन ¶ तं अच्छादेस्सती’’ति यदि वदेय्य, तेन चीवरत्थिकेन भिक्खुना किं कातब्बन्ति भगवता वुत्तन्ति आहाति अयमिमिस्सा गाथाय सम्बन्धो.

तिक्खत्तुं चोदना वुत्ताति ‘‘चीवरत्थिकेन भिक्खवे भिक्खुना वेय्यावच्चकरो उपसङ्कमित्वा द्वत्तिक्खत्तुं चोदेतब्बो सारेतब्बो ‘अत्थो मे आवुसो चीवरेना’’ति तिक्खत्तुं चोदना कातब्बाति वुत्ता.

छक्खत्तुं ठानमब्रवीति ‘‘द्वत्तिक्खत्तुं चोदयमानो सारयमानो तं चीवरं अभिनिप्फादेय्य, इच्चेतं कुसलं, नो चे अभिनिप्फादेय्य, चतुक्खत्तुं पञ्चक्खत्तुं छक्खत्तुपरमं तुण्हीभूतेन उद्दिस्स ठातब्ब’’न्ति (पारा. ५३८) वुत्तत्ता तिक्खत्तुं उपसङ्कमित्वा ‘‘अत्थो मे आवुसो चीवरेना’’ति कताय चोदनाय न निप्पज्जेय्य, तेन पुन गन्त्वा यं किञ्चि अवत्वा ‘‘न आसने निसीदितब्बं, न आमिसं पटिग्गहेतब्बं, न धम्मो भासितब्बो’’ति (पारा. ५३९) वचनतो ठानभञ्जनकं निसज्जादिं किञ्चि अकत्वा ‘‘किं कारणं आगतोसी’’ति पुच्छिते ‘‘जानाहि ¶ , आवुसो’’ति एत्तकमत्तं वत्वा उक्कट्ठपरिच्छेदेन छक्खत्तुं ठानं सद्धम्मवरचक्कवत्तिना भगवता देसितन्ति वुत्तं होति.

यदि चोदेतियेवाति सचे ठानं अकत्वा चोदनामत्तं करोति, छ अब्रवीति योजना, ‘‘चोदना’’ति सामत्थियतो लब्भति, छक्खत्तुं चोदेत्वा सकिम्पि न ठातब्बन्ति वुत्तं होति.

छचोदनं अकत्वा यो ठानमेव करोति, तेन कति ठानानि कातब्बानीति आह ‘‘चोदनादिगुणा ठिती’’ति, ‘‘कातब्बा’’ति सेसो, ‘‘अब्रवी’’ति इमिना योजेतब्बं, ‘‘चतुक्खत्तुं चोदेत्वा चतुक्खत्तुं ठातब्बं, पञ्चक्खत्तुं चोदेत्वा द्विक्खत्तुं ठातब्बं, छक्खत्तुं चोदेत्वा न ¶ ठातब्ब’’न्ति (पारा. ५३९) वचनतो, ‘‘छक्खत्तुपरम’’न्ति (पारा. ५३९) वचनतो च छक्खत्तुं चोदनाय दिगुणा द्वादसक्खत्तुका ठिति होतीति सिद्धत्ता चोदनमेव अकत्वा ठानमत्तमेव करोन्तस्स द्वादसक्खत्तुं वुत्तनयेन ठातब्बमेवाति वुत्तं होति. ततो परं कातब्बं अदस्सेत्वा एत्तकेनेव निवत्तेतब्बन्ति ञापेन्तो ‘‘ततो चे उत्तरि वायममानो तं चीवरं अभिनिप्फादेति, पयोगे दुक्कटं, पटिलाभेन निस्सग्गिय’’न्ति (पारा. ५३९) वुत्तनया आपत्ति होतीति दस्सेति.

६७२. ‘‘अचोदेत्वा लद्धे’’ति इदं उपलक्खणं ‘‘अट्ठत्वा लद्धे’’ति च गय्हमानत्ता.

राजसिक्खापदकथावण्णना.

चीवरवग्गो पठमो.

६७३. ‘‘एकेनापी’’ति इमिना किं पन द्वीहि, बहूहि वाति वुत्तं होति. मिस्सेत्वाति अन्तमसो वातेन आहटेनापि कोसियंसुना मिस्सेत्वा. सन्थतन्ति ‘‘सन्थतं नाम सन्थरित्वा कतं होति अवायिम’’न्ति (पारा. ५४४) पदभाजने च ‘‘समे भूमिभागे कोसियंसूनि उपरूपरि सन्थरित्वा कञ्जिकादीहि सिञ्चित्वा कतं होती’’ति (पारा. अट्ठ. २.५४२) अट्ठकथाय च वुत्तसरूपं कञ्जिकं सिञ्चित्वा कोसियंसूनि अत्थरित्वा याव बहलमिच्छति, ताव वड्ढेत्वा निसीदननिपज्जनादिअत्थं कातब्बं सन्थतन्ति अत्थो. कोसियंसुनाति कोसियकिमिकोसियस्स इदन्ति कोसियं, सुत्तं, तस्स सुत्तस्स अंसु, तेन कोसियंसुनाति अत्थो ¶ . कारापेन्तस्साति उपलक्खणत्ता ¶ ‘‘करोन्तस्सा’’तिपि गहेतब्बं. वुत्तञ्हेतं ‘‘कारापेय्याति एकेनापि कोसियंसुना मिस्सेत्वा करोति वा कारापेति वा’’ति (पारा. ५४४). तेनेवाह ‘‘परत्थाय करोन्तस्स कारापेन्तस्सा’’ति.

६७५. भूमत्थरणन्ति परिकम्मकताय भूमिया छविरक्खनत्थाय अत्थरितब्बं अत्थरणं. भिसि नाम मञ्चभिसि, पीठभिसीति द्वयं. बिब्बोहनं उपधानं.

कोसियकथावण्णना.

६७६. काळकेळकलोमानन्ति ‘‘काळकं नाम द्वे काळकानि जातिया काळकं वा रजनकाळकं वा’’ति (पारा. ५४९) वचनतो एवं काळकानं एळकलोमानं. सुद्धानन्ति इतरवण्णेहि एळकलोमेहि अमिस्सानं. यथाह अट्ठकथायं ‘‘सुद्धकाळकानन्ति सुद्धानं काळकानं, अञ्ञेहि अमिस्सितकाळकानन्ति अत्थो’’ति (पारा. अट्ठ. २.५४७). करेय्याति करोन्तस्स च कारापेन्तस्स चाति वुत्तं होति. यथाह ‘‘कारापेय्याति करोति वा कारापेति वा’’ति. आपत्ति होतीति ‘‘पयोगे दुक्कटं, पटिलाभेन निस्सग्गिय’’न्ति पाळियं वुत्तं पुब्बपयोगदुक्कटञ्च निस्सग्गियपाचित्तियञ्च आह.

सुद्धकाळककथावण्णना.

६७७. ओदातं तुलं वा बहुं वा सब्बमेव वा गहेत्वानाति योजना. कपिलम्पि वाति एत्थापि एवमेव योजेतब्बं. एत्थ सब्बमेव वाति सन्थतस्स गहेतब्बं सब्बमेव वा लोमं. करोन्तस्साति एत्थ ‘‘सन्थत’’न्ति अधिकारतो ¶ लब्भति. ‘‘नव’’न्ति इदं ‘‘करोन्तस्सा’’ति पदसामत्थियेन लब्भति, नवं सन्थतं करोन्तस्साति अत्थो, ‘‘अनापत्ती’’ति इमिना सम्बन्धो. कपिलम्पि वाति वाकारेन पकारन्तरेनापि करोन्तस्स अनापत्तिं सङ्गण्हाति. सेय्यथिदं? ‘‘नवं पन भिक्खुना सन्थतं कारयमानेन द्वे भागा सुद्धकाळकानं एळकलोमानं आदातब्बा ततियं ओदातानं चतुत्थं गोचरियान’’न्ति (पारा. ५५३) मातिकाय अनुञ्ञातप्पकारो वेदितब्बो.

एत्थ ¶ ‘‘ओदातं कपिलम्पि वा’’ति एतस्स ‘‘बहुं वा’’ति विसेसनेन काळकानं एळकलोमानं यथावुत्तभागद्वयतो अधिकं एळकलोमम्पि न गहेतब्बन्ति दीपेति केवलानं काळकानं एळकलोमानं अग्गहेतब्बताय पठमसिक्खापदेनेव वुत्तत्ता. ‘‘सब्बमेव वा’’ति इमिनापि पुरिमसिक्खापदे विय इमे ओदातादयो सब्बे केवला न गहेतब्बा न होन्तीति दस्सितं होति. ‘‘अनापत्ती’’ति इमिना एवं अकत्वा अञ्ञेन पकारेन करोन्तस्स आपत्ति होतीति ब्यतिरेकतो दीपितं होति.

सेय्यथिदं? वुत्तञ्हेतं भगवता ‘‘अनादा चे भिक्खु द्वे भागे सुद्धकाळकानं एळकलोमानं ततियं ओदातानं चतुत्थं गोचरियानं नवं सन्थतं कारापेय्य, निस्सग्गियं पाचित्तिय’’न्ति. यत्तकप्पमाणेहि एळकलोमेहि नवं सन्थतं कातुकामो होति, ते लोमे चतुभागं तुलयित्वा द्वे तुले वा ऊने वा काळकलोमे गहेत्वा एकं तुलं ओदातेहि वा एकं तुलं गोचरियेहि वा काळकेहि वा ऊने कत्वा द्वीहिपि अधिके वा कत्वा काळकलोमे वज्जेत्वा द्वीसु एकं वा द्वे एव वा गहेत्वा कातुञ्च कारापेतुञ्च वट्टतीति वुत्तं होति ¶ . एवं अनापत्तिदस्सनेन सब्बोपि सिक्खापदत्थो सङ्गहितोति दट्ठब्बो.

६७८. ‘‘अनुक्कमेना’’ति इमिना इममेव अग्गहेत्वा पुरिमानन्तरं वुत्तसिक्खापदद्वयञ्च गहेतब्बन्ति दीपेति. निस्सज्जित्वा लद्धानिपीति योजना. ‘‘अपी’’ति इमिना ‘‘अञ्ञेन कतं पटिलभित्वा परिभुञ्जति, आपत्ति दुक्कटस्सा’’ति (पारा. ५५५) वुत्तदुक्कटञ्च ‘‘निस्सग्गियं चीवरं अनिस्सज्जित्वा परिभुञ्जति, आपत्ति दुक्कटस्सा’’ति (पारा. ४६८) पठमनिस्सग्गियसिक्खापदे वुत्तनयेन इहापि ‘‘निस्सग्गियं सन्थतं अनिस्सज्जित्वा परिभुञ्जति, आपत्ति दुक्कटस्सा’’ति वुत्तम्पि धम्मसङ्गहकारकेहि पेय्यालवसेन संखित्तं तं दुक्कटञ्चाति इदं द्वयं सङ्गहितन्ति दट्ठब्बं.

६७९. ततियं तु क्रियाक्रियन्ति इदं ततियसिक्खापदं पन ‘‘द्वे भागा सुद्धकाळकान’’न्तिआदिना (पारा. ५५४) वुत्तनयेन अग्गहेत्वा काळकानं अतिरेकग्गहणवसेन अननुञ्ञातप्पकारेन करणतो किरियाकिरियं नाम. यथाह अट्ठकथायं ‘‘आदाय च अनादाय च करणतो किरियाकिरिय’’न्ति (पारा. अट्ठ. २.५५२).

द्वेभागकथावण्णना.

६८०. छन्नं ¶ वस्सानं ओरेनाति पुब्बे सन्थतस्स कतदिवसतो पट्ठाय उपरि छन्नं वस्सानं अब्भन्तरेति अत्थो. होति निस्सग्गियापत्तीति छब्बस्सन्तरे कतसन्थतं निस्सग्गियं होति, कारकस्स च पाचित्तियं होतीति अत्थो. भिक्खुसम्मुतिं ठपेत्वाति सन्थतं गहेत्वा अद्धानमग्गं पटिपज्जितुं असमत्थस्स गिलानस्स ‘‘अहं भन्ते गिलानो ¶ न सक्कोमि सन्थतं आदाय पक्कमितुं, सोहं भन्ते सङ्घं सन्थतसम्मुतिं याचामी’’ति (पारा. ५५९) सङ्घमज्झे निसज्ज अञ्जलिं पग्गहेत्वा तिक्खत्तुं याचिते ञत्तिदुतियाय कम्मवाचाय गतट्ठाने छब्बस्सानं अन्तोपि सन्थतं कातुं सङ्घेन दिन्नसम्मुतिं विनाति अत्थो.

६८२. छब्बस्सानि करोन्तस्साति एत्थ ‘‘यदा परिपुण्णानि, तदा’’ति सेसो, छब्बस्सेसु परिपुण्णेसु सन्थतं करोन्तस्साति अत्थो. यथाह अट्ठकथायं ‘‘यदा छब्बस्सानि परिपुण्णानि होन्ति, तदा सन्थतं करोती’’ति (पारा. अट्ठ. २.५५७). तदुद्धम्पीति छब्बस्सतो उपरिपि. वितानेति विताननिमित्तं करोन्तस्स. साणिपाकारेति पाकारसदिसतिरोकरणीयनिमित्तं करोन्तस्स. निस्सज्जित्वा कतेपि चाति पुराणसन्थते अञ्ञस्स दत्वा अञ्ञस्मिं सन्थते ओरतो छन्नं वस्सानं कतेपि च अनापत्तीति योजना. अयमनापत्तिवारो नेव पाळियं, न अट्ठकथासु दिस्सति, तस्मा सो आचरियपरम्पराभतो आचरियेन दस्सितोति विञ्ञायति. साधारणविनिच्छयं पन ‘‘अनन्तरस्सिमस्सापि, विसेसो नुपलब्भती’’ति वक्खति.

छब्बस्सकथावण्णना.

६८३. अनादायाति नवं निसीदनसन्थतं करोन्तेन भिक्खुना तस्स विवण्णकरणत्थाय पाळियं ‘‘पुराणसन्थतस्स सामन्ता सुगतविदत्थि आदातब्बा दुब्बण्णकरणाया’’ति (पारा. ५६७) या आदातुं वुत्ता, तं पुराणसन्थतस्स छिन्नमुखावत्ततो सुगतविदत्थिं अदत्वा. एवमेतं वुत्तन्ति कथं विञ्ञायतीति? ‘‘अनादानवसेनस्स, सुगतस्स विदत्थिया’’ति वक्खमानेन विञ्ञायति. सन्थतेति एत्थ ‘‘पुराणे’’इति च कारेतुं कतञ्चाति एत्थ ‘‘नवं निसीदनं सन्थत’’न्ति च सेसो ¶ , पुराणे सन्थते असन्ते सामन्ता सुगतविदत्थिं अनादाय नवं निसीदनसन्थतं करोन्तस्स अनापत्ति. अञ्ञस्सत्थाय नवं निसीदनसन्थतं कारेतुं, नवं निसीदनसन्थतं अञ्ञेन कतं पटिलभित्वा परिभुञ्जितुञ्च अनापत्तीति योजना.

‘‘अञ्ञस्सत्थाय ¶ कारेतु’’न्ति इदमेत्थ पाचित्तियेनेव अनापत्तिदस्सनन्ति गहेतब्बं. तस्मा ‘‘अञ्ञस्सत्थाय करोति वा कारापेति वा, आपत्ति दुक्कटस्सा’’ति (पारा. ५६९) वुत्तत्ता च अट्ठकथाय, तब्बण्णनासु च अदिस्समानत्ता वा तं न वत्तब्बं. ‘‘अनापत्ति छब्बस्सानि करोति…पे… अञ्ञस्सत्थाय करोति वा कारापेति वा’’ति (पारा. ५६४) अनन्तरसिक्खापदे वुत्तमोलोकेत्वा वा दुक्कटस्स च विहितत्ता पाचित्तियेन अनापत्तिभावं सन्धाय लिखितन्ति विञ्ञायति. कतञ्च परिभुञ्जितुन्ति एत्थ ‘‘अञ्ञेना’’ति वत्तब्बं, इमिना ‘‘अञ्ञेन कतं पटिलभित्वा परिभुञ्जति, अनापत्ती’’ति पाठोव दस्सितो.

६८४. सुगतस्स विदत्थिया अनादानवसेन च अस्स सन्थतस्स करणेन च सत्थारा एतं सिक्खापदं किरियाकिरियं वुत्तन्ति योजना.

६८५. ननु च इमस्स सिक्खापदस्स अट्ठकथाय ‘‘समुट्ठानादीनि किरियाकिरियत्ता इमस्स सिक्खापदस्स द्वेभागसिक्खापदसदिसानी’’ति (पारा. अट्ठ. २.५६७) वुत्तानि, इह ‘‘सञ्चरित्तसमा’’ति कस्मा वुत्तानीति? वुच्चते – द्वेभागसिक्खापदे ‘‘समुट्ठानादीनिपि कोसियसिक्खापदसदिसानेवा’’ति (पारा. अट्ठ. २.५५२) अट्ठकथाय वुत्तानि, कोसियसिक्खापदे समुट्ठानादीनं सञ्चरित्तेन समभावस्स वुत्तत्ता, मूलमेव सरित्वा किरियाकिरियसङ्खातविसेसस्स ¶ विसुं दस्सितत्ता अवसिट्ठविनिच्छयमत्तं सन्धाय एवं वुत्तन्ति गहेतब्बं. इमं विसेसं मुञ्चित्वा अवसिट्ठविनिच्छयेन द्वीसु सिक्खापदेसु साधारणविनिच्छयस्स अविसेसतं दस्सेतुमाह ‘‘अनन्तरस्सा’’तिआदि.

निसीदनसन्थतकथावण्णना.

६८६-७. गच्छन्तेति तियोजनपूरणट्ठानं अतिक्कम्म गच्छन्ते. यानेति सकटादिके. लोमानीति एळकलोमानि. सामिकस्साति यानादिसामिनो. अजानतोति अनादरे सामिवचनं. अद्धानमग्गपटिपन्नो यो पन भिक्खु एळकलोमं लभित्वा ‘‘तियोजनपरमं सहत्था हारेतब्बानी’’ति (पारा. ५७३) अनुञ्ञातत्ता तियोजनब्भन्तरे सहत्थेनापि हरित्वा तियोजनातिक्कमे परेसं यानादीसु सामिकेसु अजानन्तेसु ‘‘एते हरिस्सन्ती’’ति चिन्तेत्वा यदि ठपेय्याति अत्थो. तेसूति येसु एळकलोमानि ठपितानि, तेसु यानादीसु तियोजनमतीतेसु ¶ भिक्खुस्स पयोगं विनापि तियोजनं अतिक्कन्तेसु तस्स भिक्खुनो आपत्ति होतीति योजना, तस्स भिक्खुनो ‘‘पठमं पादं तियोजनं अतिक्कामेति, आपत्ति दुक्कटस्स. दुतियं पादं अतिक्कामेति, निस्सग्गियं पाचित्तिय’’न्ति (पारा. ५७३) वुत्तत्ता दुक्कटपाचित्तिया होन्तीति अत्थो.

अयं नयोति भिक्खुनो पयोगं विना यत्थ एळकलोमानि ठपितानि, तेसु यानादीसु तियोजनं अतिक्कमन्तेसु आपत्ति होतीति अयमत्थो दट्ठब्बोति अत्थो.

६८८. अगच्छन्तेति तियोजनब्भन्तरे ठिते. ‘‘अभिरूहित्वा’’ति इदं अनापत्तिकारणेसु एकं दस्सेतुमाह. ‘‘भूमियञ्हि ¶ ठत्वा देन्तो, अव्हायन्तो वा पुरतो गच्छति, एसेवनयो’’ति अट्ठकथायं वुत्तं. अनापत्तिवारे ‘‘अञ्ञं हरापेती’’ति वचनतो अत्तना पेसिते अञ्ञस्मिं हरन्ते वट्टतीति दस्सेतुमाह ‘‘सचे सारेति वट्टती’’ति. तेनेवाह ‘‘तं पनञ्ञं हरापेति, वचनेन विरुज्झती’’ति.

६९०. कण्णच्छिद्देसूति अत्तनो कण्णबिलेसु.

६९१. अनापत्तिवारे ‘‘कतभण्ड’’न्ति वुत्तत्ता तत्थ अन्तमसो सुत्तकेन बद्धमत्तम्पि कतभण्डमेवाति आह ‘‘सुत्तकेन च बन्धित्वा’’ति. वेणिं कत्वाति कुद्रूससीसपलालवेणिसदिसं वेणिं कत्वा. आपत्ति परिदीपिताति ‘‘वेणिं कत्वा हरति, इदं निधानमुखं नाम, आपत्तियेवा’’ति (पारा. अट्ठ. २.५७५) अट्ठकथायं वुत्तं.

६९२. सुङ्कघातन्ति एत्थ ‘‘तं ठान’’न्ति सेसो, यदि तं ठानं सुङ्कघातन्ति योजना, तियोजनोसानट्ठानं यदि सुङ्कघातट्ठानं भवेय्याति अत्थो. अनुप्पत्वाति तं ठानं पत्वा. चोरादीहि उपद्दुतो वा गच्छति, यो अञ्ञविहितो वा गच्छतीति योजना. आपत्तीति एत्थ आपत्ति तस्स गच्छतोति लब्भति. एत्थ ‘‘आपत्ती’’ति इमिना सिक्खापदेन आपत्तिमाह. इमिस्सा अचित्तकताय तेसं द्विन्नम्पि होति. अदिन्नादानपाराजिकं पन सचित्तकताय एतेसं न होति. तेनाह अट्ठकथायं ‘‘या हि तत्थ आपत्ति, सा इध अनापत्ति. या इध आपत्ति, सा तत्थ अनापत्ती’’ति (पारा. अट्ठ. २.५७२). थेय्यचित्तेन हरतो भण्डग्घवसेन पाराजिकथुल्लच्चयदुक्कटेसु ¶ एकं होति. तेनाह अट्ठकथायं ¶ ‘‘अदिन्नादाने पन सुङ्कघाते आपत्ति होती’’ति (पारा. अट्ठ. २.५७२).

६९३. तियोजनन्ति एत्थ हरणकिरियाय अच्चन्तसंयोगे उपयोगवचनं. ‘‘हरन्तस्सा’’ति इमस्स कम्मदीपकं ‘‘लोमानी’’ति इदं पकरणतो लब्भति. ‘‘अनापत्ति पकासिता’’ति इदं सब्बत्थ वक्खमानेन सम्बन्धनीयं. तानियेव पच्चाहरन्तस्साति योजना. तियोजनन्ति एत्थ तंयेव तियोजनन्ति लब्भति. अत्तना गतं तियोजनं पुन तानेव लोमानि गहेत्वा पच्चागच्छन्तस्साति अत्थो.

६९४. निवासत्थाय वा गन्त्वाति तियोजनब्भन्तरे वा सीमाय वा आवासे वसितुकामताय गन्त्वा. ततो परं हरन्तस्साति तस्मिं आवासे उद्देसादिं अलभित्वा ततो परं अञ्ञस्मिं आवासे वसितुकामताय पुनपि तियोजनं हरन्तस्साति अत्थो. इमिनाव नयेन ततोपि अञ्ञं ठानं, ततोपि अञ्ञन्ति सुद्धचित्तेन गतगतट्ठानतो पुनपि परम्परं ठानं गमनवसेन योजनसतम्पि हरतो दोसो नत्थीति इदम्पि वुत्तं होति. यथाह अट्ठकथायं ‘‘एवं योजनसतम्पि हरन्तस्स अनापत्ती’’ति (पारा. अट्ठ. २.५७५). अच्छिन्नं वापि लभित्वा हरतोपीति ‘‘चोरावहटपरिच्चत्तं लभित्वा हरन्तस्स. इध सब्बत्थेव ‘‘निवासत्थाय वा गन्त्वा’’तिआदिके अनापत्तिवारे पठमलद्धट्ठानतो पभुति अतिरेकतियोजनम्पि हरन्तस्स अनापत्तीति अत्थो विञ्ञायति. निस्सट्ठं लभित्वाति निस्सज्जित्वा विनयकम्मं कत्वा दिन्नं लभित्वा.

६९५. अञ्ञेनाति तानि हारिना अञ्ञेन. कतभण्डकन्ति ‘‘कम्बलकोजवसन्थतादिं यं किञ्चि अन्तमसो सुत्तकेन ¶ बद्धमत्तम्पी’’ति (पारा. अट्ठ. २.५७५) अट्ठकथायं वुत्तएळकलोमेहि कतभण्डकं.

६९६. इदं समुट्ठानन्ति इदं एळकलोमसमुट्ठानं. पण्णत्तिं अजाननताय वा ञत्वापि चीवरादिपरिक्खारेसु लोमस्स अल्लिनभावं अजानित्वापि वा तियोजनं अतिक्कामेन्तस्स अरहतोपि इमाय आपत्तिया सम्भवतो ‘‘अचित्त’’न्ति आह.

एळकलोमकथावण्णना.

६९७. एळकलोमधोवापनकथा ¶ उत्तानायेव.

एळकलोमधोवापनकथावण्णना.

६९८. गण्हेय्य वाति एत्थ ‘‘यो’’ति सेसो. ‘‘गण्हेय्य वा गण्हापेय्य वा’’ति इमिना ‘‘तत्थत्तनो पनत्थाया’’ति वक्खमानत्ता च ‘‘निस्सज्जित्वा’’तिआदिवचनतो च अत्तनो अत्थाय उग्गण्हेय्य वा उग्गण्हापेय्य वाति वुत्तं होति. वाकारेन ‘‘उपनिक्खित्तं वा सादियेय्या’’ति इदं सङ्गण्हाति, ‘‘इदं अय्यस्स होतू’’ति उपनिक्खित्तं चे सादियतीति अत्थो.

रजतन्ति अञ्ञत्थ सज्झु वुच्चति, इध पन वोहारूपगकहापणादि वुच्चति. वुत्तञ्हेतं पाळियं ‘‘रजतं नाम कहापणो लोहमासको दारुमासको जतुमासको, ये वोहारं गच्छन्ती’’ति (पारा. ५८४). इध कहापणादीनं सरूपं अट्ठकथायं –

‘‘तत्थ कहापणोति सोवण्णमयो वा रूपियमयो वा पाकतिको वा. लोहमासकोति तम्बलोहादीहि कतमासको. दारुमासकोति ¶ सारदारुना वा वेळुपेसिकाय वा अन्तमसो तालपण्णेपि रूपं छिन्दित्वा कतमासको. जतुमासकोति लाखाय वा निय्यासेन वा रूपं समुट्ठापेत्वा कतमासको. ‘ये वोहारं गच्छन्ती’ति इमिना पन पदेन यो यो यत्थ यत्थ जनपदे यदा यदा वोहारं गच्छति, अन्तमसो अट्ठिमयोपि चम्ममयोपि रुक्खफलबीजमयोपि समुट्ठापितरूपोपि असमुट्ठापितरूपोपि सब्बो सङ्गहितो’’ति (पारा. अट्ठ. २.५८३-५८४) –

वुत्तनयेन वेदितब्बं.

एत्थ च पाकतिको नाम एतरहि पकतिकहापणो. रुक्खफलबीजमयोति तिन्तिणिकादिरुक्खानं फलबीजेन कतो.

जातरूपकं सुवण्णं. यथाह पाळियं ‘‘जातरूपं नाम सत्थुवण्णो वुच्चती’’ति (पारा. ५८४). निस्सज्जित्वाति ¶ एत्थ ‘‘तेना’’ति लब्भति, ‘‘भिक्खुना’’ति इमिना युज्जति, एवं सादितभिक्खुनाति अत्थो. निस्सज्जित्वाति अत्तना उग्गहितं वा परेन उग्गहापितं वा उपनिक्खिपितस्स सादियनवसेन सादितं वा रजतं वा जातरूपं वा ‘‘तेन भिक्खुना सङ्घं उपसङ्कमित्वा एकंसं उत्तरासङ्गं करित्वा वुड्ढानं भिक्खूनं पादे वन्दित्वा उक्कुटिकं निसीदित्वा अञ्जलिं पग्गहेत्वा’’ति (पारा. ५८४) वचनतो सङ्घमज्झे उपसङ्कमित्वा वुड्ढानं भिक्खूनं पादे वन्दित्वा उक्कुटिकं निसीदित्वा अञ्जलिं पग्गय्ह ‘‘अहं भन्ते रूपियं पटिग्गहेसिं, इदं मे निस्सग्गियं, इमाहं निस्सज्जामी’’ति निस्सज्जित्वाति वुत्तं होति.

आपत्ति ¶ देसेतब्बावाति अत्तना एव आपन्नं निस्सग्गियं पाचित्तियं तस्मिं सङ्घमज्झे एवमेव निसीदित्वा देसेतब्बा. एवं देसिता आपत्ति सङ्घानुमतेन ब्यत्तेन पटिबलेन भिक्खुना पटिग्गहेतब्बा. वुत्तञ्हेतं ‘‘ब्यत्तेन भिक्खुना पटिबलेन आपत्ति पटिग्गहेतब्बा’’ति (पारा. ५८४).

६९९. रजतन्ति रूपियं. जातरूपन्ति सुवण्णं. इमिना पदद्वयेन कताकतं सब्बं सङ्गण्हाति. उभिन्नं मासकोति जातरूपमासको, रजतमासकोपि चाति वुत्तं होति. इध रजतमासकोति ‘‘रजत’’न्ति पदभाजने (पारा. ५८४) वुत्तकहापणादि पञ्चप्पकारो मासको गहितो. यथाह अट्ठकथायं ‘‘वुत्तप्पकारो सब्बोपि रजतमासको’’ति (पारा. अट्ठ. २.५८३-५८४). इध ‘‘जातरूपमासको’’ति विसुं गहितत्ता कहापणपदेन सुवण्णकहापणं वज्जेत्वा इतरद्वयमेव वत्तब्बं. ‘‘निस्सग्गियावह’’न्ति इदं अत्तनो अत्थाय उग्गण्हनउग्गण्हापनसादियनानि करोन्तं सन्धायाह. ‘‘तत्था’’तिआदिना वक्खमाननयेन दुक्कटावहञ्च होतेव.

७००-१. मुत्तादीनं इमस्मिं सिक्खापदविभङ्गे अवुत्तत्तेपि पाचित्तियकण्डे नवमवग्गे दुतियस्स रतनसिक्खापदस्स पदभाजने ‘‘रतनं नाम मुत्ता मणि वेळुरियो सङ्खो सिला पवालं रजतं जातरूपं लोहितङ्को मसारगल्ल’’न्ति (पाचि. ५०६) वुत्तानं दसन्नं रतनानं इमस्मिं सिक्खापदे निस्सग्गियवत्थुं कत्वा वुत्तं रजतं, जातरूपञ्च वज्जेत्वा अवसिट्ठानं अट्ठन्नं रतनानं दुक्कटवत्थुभावो इमस्स अट्ठकथायं ववत्थापितोति दस्सनत्थमाह ‘‘मुत्ता…पे… मसारगल्ल’’न्ति. एत्थ वेळुरियो गाथाबन्धवसेन न वुत्तो ¶ , सो एकयोगनिद्दिट्ठानं ¶ सत्तन्नं रतनानं गहणेनेव गय्हति. मुत्तादयो यथादस्सितसरूपायेव. ब्रह्मजालादिसुत्तन्तवसेनापि ‘‘अकप्पिया’’ति सिद्धानं सत्तधञ्ञादीनं पटिग्गहणे आपत्तिं दस्सेतुमाह ‘‘धञ्ञानी’’तिआदि.

७०२. रतनसिक्खापदेयेव ‘‘रतनसम्मत’’न्ति आगतं कप्पियवत्थुं पटिग्गण्हतो अनापत्तिभावं दस्सेतुमाह ‘‘मुग्गमासादिक’’न्तिआदि.

७०३-४. एवं तिप्पकारेन ठितं वत्थुं गण्हतो अधिप्पायनानत्तेन सम्भवन्तं आपत्तिप्पभेदं दस्सेतुमाह ‘‘तत्था’’तिआदि. तत्थाति तेसु तीसु निस्सग्गियादिवत्थूसु. सङ्घादीनन्ति सङ्घगणपुग्गलचेतियादीनं. तन्ति निस्सग्गियवत्थुं. सब्बत्थायाति सब्बेसं अत्थायाति विग्गहो. अत्तनो अत्थाय च सङ्घादीनमत्थाय च दुक्कटवत्थुं गण्हन्तस्सापि दुक्कटमेव होतीति अत्थो. अवुत्तसमुच्चयेनेत्थ च-सद्देन ‘‘सब्बम्पि निक्खिपनत्थाय भण्डागारिकसीसेन सम्पटिच्छतो उपरि रतनसिक्खापदे आगतवसेन पाचित्तिय’’न्ति (पारा. अट्ठ. २.५८३-५८४) अट्ठकथाय वुत्तविनिच्छयविसेसस्स सङ्गहो कतो.

७०५. कहापणादीनन्ति आदि-सद्देन सुवण्णादीनं सङ्गहो. ‘‘सहस्स’’न्ति इदं उपलक्खणं, सहस्सम्पीति वुत्तं होति.

७०६. थविकादीसूति आदि-सद्देन सिथिलपूरितानि भाजनानि गहितानि. ‘‘सिथिलबद्धेसू’’ति विसेसनेन ब्यतिरेकवसेन ‘‘घनबद्धे, पन घनपूरिते वा एकाव आपत्ती’’ति (पारा. अट्ठ. २.५८३-५८४) अट्ठकथासेसं दीपेति.

७०७. उपनिक्खित्तसादियनकम्मं ¶ दस्सेतुमाह ‘‘इद’’न्तिआदि. गण्हितुकामोपीति एत्थ ‘‘होतू’’ति सेसो. निसेधेतब्बमेवाति कायेन वा वाचाय वा ‘‘इदं न कप्पती’’ति पटिक्खिपितब्बमेव, एवं सति अनापत्तियेवाति अत्थो. अयमत्थो अट्ठकथायं ‘‘कायवाचाहि वा अप्पटिक्खिपित्वापि सुद्धचित्तो हुत्वा ‘नयिदं अम्हाकं कप्पती’ति न सादियति, अनापत्तियेवा’’ति (पारा. अट्ठ. २.५८३-५८४) आगतोयेव.

७०८. तं ¶ वत्थुन्ति तथा पटिक्खित्तं वत्थुं. ठपेत्वा यदि गच्छतीति ‘‘तुम्हे गण्हथ वा, मा वा, दिन्नं दिन्नमेवा’’ति सचे सो ठपेत्वाव गच्छति. यथा तं न विनस्सति, तथा तं गोपयितब्बन्ति योजना. ‘‘अञ्ञो तत्थ आगन्त्वा पुच्छती’’तिआदिना अट्ठकथाय वुत्तनयेन तत्थागतेन कप्पियकारकेन ‘‘किमिद’’न्ति पुच्छिते सरूपं आवि कत्वा ‘‘गोपयिस्सामहं भन्ते, गुत्तट्ठानं दस्सेथा’’ति वुत्ते ‘‘इमं गहेत्वा एही’’ति अवत्वा सत्तभूमिकम्पि पासादं अभिरुहित्वा ‘‘इध ठपेही’’ति अवत्वा ‘‘इदं गुत्तट्ठान’’न्ति सुरक्खितट्ठानं दस्सेत्वा तत्थ ठपिते अग्गळं दत्वा रक्खितब्बन्ति वुत्तं होति.

७०९. गुत्तट्ठानं गहेत्वा गच्छन्तस्स कप्पियकारकस्स अवत्तब्बवोहारं दस्सेतुमाह ‘‘आहरेदमिद’’न्तिआदि. अकप्पियन्ति एत्थ ‘‘वचन’’न्ति लब्भति. एवं अकप्पियवचनं अवत्वा सुरक्खितट्ठाने आहरित्वा ठपिते किं कातब्बन्ति? विक्कायिके पत्तचीवरादिकप्पियभण्डे आहटे ‘‘अम्हाकं इमिना अत्थो, इमस्स एवरूपं मूलम्पि अत्थि, कप्पियकारको एव नत्थी’’ति वत्वा तेन ‘‘अहं कप्पियकारको, मय्हं दस्सेथा’’ति वुत्ते सचे रुच्चति, द्वारं विवरित्वा ‘‘इदं गण्हा’’ति अवत्वा ‘‘एत्थ ठपित’’न्ति दस्सेत्वा तस्मिं तस्स अग्घप्पमाणं ¶ गहेत्वा देन्ते अधिवासेतब्बं. अतिरेकं गण्हन्ते ‘‘मयं तुम्हाकं भण्डं न गण्हाम, गच्छथा’’ति नीहरित्वा अग्गळं दत्वा कप्पियकारके लद्धे ‘‘अम्हाकं एवरूपेन अत्थो, इदं नाम मूलं अत्थी’’ति वत्वा तेन किणित्वा दिन्ने अधिवासेतब्बन्ति अट्ठकथायं वुत्तनयेन पटिपज्जितब्बं.

७१०. ठपेत्वा रूपियग्गाहन्ति अनन्तरसिक्खापदे वक्खमानसरूपं सुवण्णादिरूपियं पटिग्गहेत्वा निस्सज्जित्वा देसितापत्तिकं पुग्गलं ठपेत्वा. निस्सट्ठपरिवत्तितन्ति एत्थ निस्सज्जित्वा आपत्तिया देसिताय ‘‘सचे तत्थ आगच्छति आरामिको वा उपासको वा’’तिआदिना (पारा. ५८४) पदभाजने वुत्तनयेन तत्थागतं कप्पियकारकं ‘‘आवुसो इमं जाना’’ति वत्वा ‘‘इमिना किं आहरिय्यतू’’ति तेन वुत्ते ‘‘इमं वा इमं वा आहरा’’ति अवत्वा ‘‘कप्पियं आचिक्खितब्बं सप्पि वा तेलं वा मधु वा फाणितं वा’’ति (पारा. ५८४) वुत्तत्ता भिक्खूनं कप्पियवत्थुमत्ते आचिक्खिते तेन निस्सट्ठवत्थुं परिवत्तेत्वा आहटं कप्पियभण्डन्ति अत्थो.

७११. अत्तनो ¶ पत्तभागम्पीति तथा आहटे कप्पियभण्डे सङ्घस्स भाजियमाने अत्तनो वस्सग्गेन अत्तनो पत्तकोट्ठासम्पि. पटिग्गाहकभिक्खुनोति रूपियं पटिग्गहेत्वा आपज्जित्वा निस्सज्जित्वा देसितापत्तिकस्स भिक्खुनो न वट्टतीति सम्बन्धो. अञ्ञतोति अत्ततो अञ्ञस्मा पब्बजितमनुस्सामनुस्सतिरच्छानगतित्थिपुरिसानं अञ्ञतरतो. लद्धन्ति तेहि अत्तना लद्धकोट्ठासतो दिन्नवसेनपि लद्धं तं वत्थुं.

७१२. यं किञ्चि पच्चयन्ति तं वत्थुं परिवत्तेत्वा गहितेसु चतूसु पच्चयेसु अञ्ञतरम्पि पच्चयं. अन्तमसो पथविं खणित्वा ¶ उप्पादितोदकम्पि दारूहि आदित्तअग्गिम्पि तेलेन जलितपदीपम्पि रुक्खे वा गेहे वा पकतिछायम्पि तालपण्णम्पि उपभोगपरिभोगारहं अञ्ञम्पि यं किञ्चीति अट्ठकथाय वुत्तनयं इमिनाव सङ्गहितन्ति गहेतब्बं. यथाह अट्ठकथायं ‘‘अन्तमसो मक्कटादीहि ततो हरित्वा अरञ्ञे ठपितं वा तेसं हत्थतो गळित्वा तिरच्छानपरिग्गहितम्पि पंसुकूलम्पि न वट्टतियेवा’’तिआदि (पारा. अट्ठ. २.५८३-५८४), ‘‘रूपियपटिग्गाहकस्स पन केनचि परियायेन ततो उप्पन्नपच्चयपरिभोगो न वट्टती’’ति (पारा. अट्ठ. २.५८५) चाति. भिक्खुनोति रूपियपटिग्गाहकस्स भिक्खुस्स.

७१३. अज्झारामे वाति उपरि वक्खमानलक्खणेन परिच्छिन्ने अज्झारामे वा. तं रूपियं, ‘‘पतितं दिस्वा’’ति सेसो. अज्झावसथेपि वाति वक्खमानलक्खणे अन्तोआवासे च. निक्खिपन्तस्साति ‘‘यस्स भविस्सति, सो हरिस्सती’’ति वुत्ते ठाने तस्मिं वत्थुस्मिं गणनञ्च उपलक्खणञ्च सल्लक्खेत्वा ठपेन्तस्स.

७१४. तिकपाचित्तियं वुत्तन्ति ‘‘रूपिये रूपियसञ्ञी, वेमतिको, अरूपियसञ्ञी रूपियं पटिग्गण्हाति, निस्सग्गियं पाचित्तिय’’न्ति (पारा. ५८६) भगवता पाचित्तियं वुत्तं. दुक्कटन्ति एत्थ ‘‘द्विकदुक्कट’’न्ति सामत्थिया लब्भति.

७१५. क्रियाक्रियन्ति गहणेन आपज्जनतो किरियं. पटिक्खेपस्स अकरणतो अकिरियन्ति.

रूपियपटिग्गहणकथावण्णना.

७१६-७. निस्सग्गियस्सापि ¶ वत्थुन्ति ‘‘निस्सग्गियपाचित्तियस्स वत्थू’’ति पठमसिक्खापदे निद्दिट्ठेसु रजतादीसु चतूसु अञ्ञतरं ¶ वत्थुं. दुक्कटस्स च वत्थुं वाति पठमं दस्सितमुत्तादिदुक्कटवत्थूसु अञ्ञतरं वा, इहोभयत्थ हेतुफलसम्बन्धे सामिवचनं. कप्पियस्स च वत्थुं वाति यथादस्सितेसु एव मुग्गमासादिकप्पियवत्थूसु अञ्ञतरं वा, इह अवयवावयविसम्बन्धे सामिवचनं. अवयवावयवीनं अभेदेपि भेदूपचारवसेन यथा ‘‘सिलापुत्तकस्स सरीर’’न्ति कप्पियवत्थुन्ति वुत्तं होति ‘‘कप्पियेन वत्थुना’’ति वक्खमानत्ता. इदानेत्थ दुक्कटवत्थुनो, कप्पियवत्थुनो च निस्सग्गियवत्थुना परिवत्तितत्ता आपत्ति होतीति गहेतब्बं. निस्सग्गियवत्थुना यो परिवत्तेति, तस्स आपत्तीति योजना.

दुक्कटस्स वत्थुना, कप्पियेन च वत्थुना वत्थुं निस्सग्गियस्स परिवत्तेति, आपत्तीति योजना. इध उभयत्थापि परिवत्तितस्स निस्सग्गियवत्थुत्ता आपत्ति होति. एवं तीसुपि ठानेसु ‘‘आपत्ती’’ति सामञ्ञवचनेन निस्सग्गियपाचित्तियमेव वुत्तन्ति पकरणतो लब्भति.

७१८. दुक्कटस्सेव वत्थुना दुक्कटस्स च वत्थुं वा परिवत्तेति, दुक्कटन्ति योजना. ‘‘वत्थुं वा कप्पियस्सा’’ति इदं वुत्तनयमेव, कप्पियवत्थुन्ति वुत्तं होति. इमस्स कप्पियवत्थुनोपि दुक्कटवत्थुना परिवत्तितत्ता दुक्कटं होतीति गहेतब्बं.

७१९. ‘‘वत्थुना कप्पियस्सा’’ति इदम्पि वुत्तनयमेव. कप्पियवत्थुनापि परिवत्तिते दुक्कटवत्थुवसेन दुक्कटं होतीति आह ‘‘तथा’’ति.

७२०. ‘‘तथा’’ति इमिना ‘‘वत्थुनो’’ति इदं आकड्ढति. ‘‘निस्सग्गियस्सा’’ति इमिना पाचित्तियमाह. पुब्बन्ति पठमं, पुब्बे ¶ वुत्तरूपियपटिग्गहणसिक्खापदेति वुत्तं होति. इमिनाति रूपियसंवोहारसिक्खापदेन. परिवत्तनं वारितन्ति सम्बन्धो.

७२१. रूपियन्ति च सञ्ञिस्साति ‘‘रूपियं नाम सत्थुवण्णो कहापणो लोहमासको दारुमासको जतुमासको, ये वोहारं गच्छन्ती’’ति (पारा. ५८९) पदभाजने वुत्तेसु रूपियसञ्ञितेसु वत्थूसु ‘‘अञ्ञतर’’न्ति सञ्ञिस्स. अरूपियेति खरपत्तादिम्हि. तेन अरूपियेन. ‘‘चेतापेन्तस्स अरूपिय’’न्ति पदच्छेदो. ‘‘अरूपिये रूपियसञ्ञी रूपियं चेतापेति ¶ , निस्सग्गियं पाचित्तिय’’न्ति (पारा. ५९१) वुत्तत्ता रूपियपरिवत्तने दुक्कटस्स अभावतो, पाचित्तियस्स च सम्भवतो रूपियं न गहेतब्बं. अरूपिये रूपियं इति सञ्ञिस्स च विमतिस्स च अरूपियं चेतापेन्तस्स तेन द्वे दुक्कटानि होन्तीति योजना.

७२२. अरूपिये अरूपियन्ति सञ्ञिस्साति एत्थ ‘‘अरूपियं परिवत्तेन्तस्सा’’ति सेसो. पञ्चहीति सहत्थे करणवचनं, ‘‘सहधम्मिकेही’’ति सेसो, पञ्चहि सहधम्मिकेहि सद्धिन्ति अत्थो. वदतोति वोहरतो, कयविक्कयं करोन्तस्साति अत्थो. भिक्खुभिक्खुनिसामणेरसामणेरिसिक्खमानासङ्खातेहि पञ्चहि सहधम्मिकेहि अरूपियं परिवत्तेन्तस्स अनापत्तीति अत्थो.

७२३. संवोहारेन समुट्ठानतो क्रियसमुट्ठानं.

रूपियसंवोहारकथावण्णना.

७२४. कप्पियं नाम ‘‘चीवरपिण्डपातसेनासनगिलानपच्चयभेसज्जपरिक्खारा, अन्तमसो चुण्णपिण्डोपि दन्तकट्ठम्पि दसिकसुत्तम्पी’’ति ¶ पदभाजने वुत्तानि कप्पियवत्थूनि. यथाह अट्ठकथायं ‘‘चीवरादीनं कप्पियभण्डानं वसेन अनेकविध’’न्ति. कप्पियेनेवाति तेनेव कप्पियेन वत्थुना. ‘‘कयविक्कयं समापज्जेय्याति ‘इमिना इमं देहि, इमिना इमं आहर, इमिना इमं परिवत्तेहि, इमिना इमं चेतापेही’ति अज्झाचरती’’ति (पारा. ५९५) वचनतो ‘‘परिवत्तयतो’’ति इमस्स ‘‘कयविक्कयं समापज्जतो’’ति परियायो.

तत्थ अञ्ञस्स हत्थतो कप्पियवत्थुना परिवत्तेत्वा गहणं कयो नाम. अत्तनो हत्थतो कप्पियवत्थुं परिवत्तेत्वा दानं विक्कयो. यथाह अट्ठकथायं ‘‘इमिना इमं देही’तिआदिना हि नयेन परस्स कप्पियभण्डं गण्हन्तो कयं समापज्जति, अत्तनो कप्पियं देन्तो विक्कय’’न्ति. ‘‘ठपेत्वा सहधम्मिके’’ति वुत्तत्ता परिवत्तयतोति एत्थ अञ्ञेहि सद्धिन्ति लब्भति. एत्थ अञ्ञे नाम गिहिनो इत्थिपुरिसा, सासनतो बाहिरा पब्बजिता च. तस्मा अयं कयविक्कयो अन्तमसो मातापितूहिपि न कातब्बोयेव. यथाह अट्ठकथायं ‘‘अयञ्हि कयविक्कयो ¶ ठपेत्वा पञ्च सहधम्मिके अवसेसेहि गिहिपब्बजितेहि अन्तमसो मातापितूहिपि सद्धिं न वट्टती’’ति (पारा. अट्ठ. २.५९५).

७२५. अकप्पियस्स वत्थुस्साति इमस्मिं सिक्खापदे वुत्तचीवरादिकप्पियवत्थुतो अञ्ञस्स निस्सग्गियदुक्कटवत्थुस्स. तेनेवाति अकप्पियवत्थुनायेव. ‘‘कप्पियस्स चा’’ति पाठसेसो, तेनेव अकप्पियेन वत्थुना कप्पियस्स वत्थुस्स परिवत्तनञ्चाति योजना. एवञ्हि पाठसेसे अकते अकप्पियेन वत्थुना कप्पियस्स परिवत्तनं कयविक्कये सङ्गहेतब्बं सिया, तं न युज्जति तस्स रूपियसंवोहारेयेव सङ्गहितत्ता, इध च ‘‘कप्पियवत्थुस्सेव कप्पियवत्थुना ¶ परिवत्तनं कयविक्कयो’’ति नियमितत्ता. निद्दिट्ठन्ति ‘‘अकप्पियभण्डपरिवत्तनञ्हि कयविक्कयसङ्गहं न गच्छती’’ति (पारा. अट्ठ. २.५९४) अट्ठकथायं निद्दिट्ठन्ति अत्थो.

७२६. तस्माति यस्मा अञ्ञत्र सहधम्मिकेहि कप्पियवत्थुस्सापि कयविक्कयो न वट्टति, अकप्पियस्स, कप्पियस्स च वत्थुनो अकप्पियेनेव वत्थुना परिवत्तनञ्च रूपियसंवोहारे सङ्गहितत्ता कयविक्कयसङ्गहं न गच्छति, तस्मा.

७२९. इदं नामाति ओदनादिकप्पियवत्थुमेव आह.

७३०-१. ‘‘गहेत्वा’’तिआदिगाथाय वत्थुलक्खणस्स उदाहरणं दस्सेत्वाव आपत्तिभेदं दस्सेतुमाह ‘‘विघासाद’’न्तिआदि. छल्लिन्ति रुक्खतचं. वल्लिन्ति लतं. कट्ठन्ति इन्धनदारुं. दारुन्ति गेहसम्भारादिदारुं. विपल्लासेनापि वत्तब्बं ‘‘वल्लिं वा पन छल्लिं वा, दारुं वा कट्ठमेव वा’’ति. वत्थूनन्ति तथा वत्वा आहरापितानं छल्लिआदिवत्थूनं. कयविक्कये आपत्तियो होन्तीति योजना, निस्सग्गियपाचित्तियापत्तियो होन्तीति वुत्तं होति.

७३२. ‘‘इति एवा’’ति पदच्छेदो, ‘‘पिवित्वा’’तिआदिना नयेन पुब्बकाले विहितपच्चयन्तं अकत्वा वुत्तनयेनेवाति अत्थो.

७३३. भूमिया लिम्पनेति योजनायं पन सेनासनभूमियं परिभण्डकरणकाळकादिवण्णकरणवसेन ¶ लेपने. वत्थुधोवनेति चीवरादिवत्थूनं धोवने. एत्थाति तेसु वुत्तप्पकारेसु. एतेसं गहणस्स उपलक्खणत्ता एवरूपेसु अञ्ञेसु ठानेसु.

७३४. अयन्ति ¶ भूमिसोधनादिवसेन आपन्ना पाचित्तियापत्ति.

७३५. ठपेत्वा भण्डसामिकन्ति एत्थ ब्यतिरेकवसेन अञ्ञस्स कप्पियकारस्साति लब्भति.

७३६. भासतो अनापत्तीति योजना. सेसमेत्थ उत्तानमेव.

कयविक्कयकथावण्णना.

कोसियवग्गो दुतियो.

७३७. कप्पिया पत्ता मत्तिकायोमया जातितो दुवेति योजना. वण्णाति पमाणानि. यथाह अट्ठकथायं ‘‘तयो पत्तस्स वण्णाति तीणि पत्तस्स पमाणानी’’ति (पारा. अट्ठ. २.६०२). तेनाह ‘‘उक्कट्ठो मज्झिमोमको’’ति.

७३८. द्विन्नं तण्डुलनाळीनन्ति सुकोट्टितानं अखण्डानं पुराणसालितण्डुलानं द्वे नाळियो गहेतब्बा. यथाह अट्ठकथायं ‘‘अनुपहतपुराणसालितण्डुलानं सुकोट्टितपरिसुद्धान’’न्ति (पारा. अट्ठ. २.६०२). भत्तन्ति अवस्सावितं अनुत्तण्डुलं अकिलिन्नं अपिण्डितं सुविसदं कुन्दमकुलरासिसदिसं सुपक्कोदनमेव गहेतब्बं. यथाह अट्ठकथायं ‘‘अनुत्तण्डुलं अकिलिन्नं अपिण्डितं सुविसदं कुन्दमकुलरासिसदिसं अवस्सावितोदन’’न्ति (पारा. अट्ठ. २.६०२). मगधनाळियाति मगधरट्ठे नाळिया, सा नाळि तिलानं अट्ठपसतानि गण्हाति. तेनाहु पोराणा –

‘‘खारिदसद्वयं ¶ वाहो, खारी दोणट्ठकद्वयं;

द्विअट्ठनाळियो दोणो, नाळेका पसतट्ठकं;

लक्खं तिलानं पसतं, एतं वुत्तं पमाणतो’’ति.

‘‘मगधनाळि ¶ नाम अड्ढतेरसपला होती’’ति (पारा. अट्ठ. २.६०२) अन्धकट्ठकथायं वुत्तं. तब्बण्णनाय ‘‘अड्ढतेरसपलानि मासेहि गहेतब्बानी’’ति वुत्तं. केचि पनाहु –

‘‘चतुप्पसतिका मुट्ठि, पलञ्चेतं चतुग्गुणं;

कुडुवप्पसतञ्चेव, चत्तारि चेव नाळि तु.

‘‘सोयेव पत्थो चत्तारो, पत्था अळ्हकमुच्चते;

अळ्हकानम्पि चत्तारि, ‘दोणो’ति परिकित्तितो’’ति.

आचरिया पन ‘‘अट्ठपसता मागधनाळी’’ति पुब्बपक्खमेव रोचयन्ति.

खादनञ्च चतुब्भागन्ति तस्मिं भत्ते चतुधा विभत्ते एकभागमत्तं हत्थहारियघनमुग्गसूपन्ति अत्थो. यथाह अट्ठकथायं ‘‘तस्स ओदनस्स चतुत्थभागप्पमाणो नातिघनो नातितनुको हत्थहारियो सब्बसम्भारसङ्खतो मुग्गसूपो पक्खिपितब्बो’’ति (पारा. अट्ठ. २.६०२).

ब्यञ्जनञ्च तदूपियन्ति याव चरिमालोपं, ताव सब्बालोपानुरूपं मच्छमंसादिब्यञ्जनञ्च. यथाह अट्ठकथायं ‘‘आलोपस्स आलोपस्स अनुरूपं यावचरिमालोपप्पहोनकं मच्छमंसादिब्यञ्जनं पक्खिपितब्ब’’न्ति. एत्थ च आलोपस्स आलोपस्स अनुरूपन्ति ‘‘ब्यञ्जनस्स मत्ता नाम ओदनचतुत्थभागो’’ति (म. नि. अट्ठ. २.३८७) ब्रह्मायुसुत्तस्स अट्ठकथायं वुत्तत्ता आलोपस्स चतुत्थभागप्पमाणं ब्यञ्जनं आलोपस्स अनुरूपन्ति गहेतब्बं. इध पन सूपस्सेव ओदनचतुत्थभागप्पमाणं ¶ दस्सेत्वा एतस्स लक्खणे दस्सिते इतरस्सापि दस्सितमेव होतीति ब्यञ्जनस्स तथा विसेसेत्वा पमाणं न दस्सितं. ओदने पक्खिपितब्बानि सप्पितेलतक्करसकञ्जिकादीनि गणनूपगानि न होन्ति.

७३९. तं सब्बन्ति यथावुत्तभत्तादिनिरवसेसं. गण्हतीति वक्खमानेहि तीहि पकारेहि गण्हाति. तस्साति उक्कट्ठस्स पत्तस्स. उपड्ढोति तस्मिं पत्ते गण्हनकदब्बसम्भारगाही पत्तो तंसहचरियेन ¶ ‘‘उपड्ढो’’ति वुत्तो. तदुपड्ढो चाति एत्थापि एसेव नयो. तस्स मज्झिमस्स पत्तस्स उपड्ढो तदुपड्ढोति गहेतब्बं.

७४०. इमेसु तीसु पत्तेसु उक्कट्ठस्स वुत्तं ओदनादि सब्बं यस्मिं पत्ते पक्खित्तं, तस्स मुखवट्टिमत्थके पुञ्जियमानं हीरकं हेट्ठाभागे फुसति, सो उक्कट्ठमज्झिमो नाम, हीरतो अतिरेकं तिट्ठति, सो उक्कट्ठोमको नाम, अन्तोपत्ते मुखवट्टिया हेट्ठिमन्तं अप्पत्वा तिट्ठति, सो उक्कट्ठुक्कट्ठो नाम, एवं मज्झिमो च ओमको च पच्चेकं तिविधो होतीति सब्बे नव पत्ता होन्तीति दस्सेतुमाह ‘‘उक्कट्ठस्सा’’तिआदि. तस्सेवाति उक्कट्ठस्सेव. ओमको च मज्झिमो चाति ओमकमज्झिमा. इध मज्झिमो च ओमको च उक्कट्ठस्सेव भेदो. एस नयो इतरद्वयेपि. ‘‘एव’’न्ति इमिना यथा ‘‘उक्कट्ठुक्कट्ठो उक्कट्ठोमको उक्कट्ठमज्झिमो’’ति योजेतब्बो, एवं मज्झिमोमकानम्पि यथाक्कमयोजनं दस्सेति ‘‘मज्झिमो मज्झिमुक्कट्ठो मज्झिमोमको, ओमकुक्कट्ठो ओमकमज्झिमो ओमकोमको चा’’ति.

७४१. तेसूति ¶ नवसु पत्तेसु. तस्माति अपत्तभावतो. न गच्छन्तीति उक्कट्ठुक्कट्ठञ्च ओमकोमकञ्चाति द्वे अपेक्खित्वा बहुवचनं कतं. एते भाजनसङ्खेपेन परिभुञ्जितब्बाति. यथाह अट्ठकथायं ‘‘तस्मा एते भाजनपरिभोगेन परिभुञ्जितब्बा’’ति (पारा. अट्ठ. २.६०२).

७४२. पत्तलक्खणसंयुतन्ति एत्थ पत्तलक्खणं नाम यथावुत्तपमाणयुत्तता, ‘‘अयोपत्तो पञ्चहि पाकेहि पक्को मत्तिकापत्तो द्वीहि पाकेहि पक्को’’ति (पारा. अट्ठ. २.६०८) वुत्ता पाकसम्पत्ति, किणित्वा गण्हाति चे, तस्स दातब्बमूलस्स असेसेत्वा दिन्नभावो, छिद्दाभावो, छिन्नराजीनं अभावोति पञ्चविधं. होति चेत्थ –

‘‘पमाणयुत्तता पाक-सम्पत्ति दिन्नमूलता;

अच्छिद्दाराजिता चेति, पत्तलक्खणपञ्चक’’न्ति.

‘‘अधिट्ठाय वा विकप्पेत्वा वा’’ति वा-सद्दो योजेतब्बो. अधिट्ठायाति पठमं परिभुत्ते पत्ते सति तं पच्चुद्धरित्वा अधिट्ठातब्बपत्तो हत्थपासे चे होति, वक्खमाननयेन ‘‘इमं पत्तं अधिट्ठामी’’ति ¶ वचीभेदकरणवसेन वाचाय वा वचीभेदं अकत्वा एवमेव चिन्तेत्वा हत्थेन गहेत्वा फन्दापेन्तेन कायेन वा दूरे चे हत्थपासा होति, ठपितट्ठानं सल्लक्खेत्वा ‘‘एतं पत्तं अधिट्ठामी’’ति वाचा भिन्दितब्बाति अट्ठकथायं (पारा. अट्ठ. २.६०८ अत्थतो समानं) वुत्तनयेन एककेन वा पच्छा सतिसम्मोसे सरापेत्वा कुक्कुच्चं वूपसमेतुं समत्थस्स पुग्गलस्स सन्निधाने वा अधिट्ठायाति वुत्तं होति. ‘‘अञ्ञस्स सन्तिके अधिट्ठाने अयमानिसंसो – सचस्स ‘अधिट्ठितो नु खो मे, नो’ति विमति उप्पज्जति, इतरो सारेत्वा विमतिं छिन्दिस्सती’’ति ¶ (पारा. अट्ठ. २.६०८) अयमत्थो अट्ठकथायं वुत्तो. ‘‘द्वे पत्ते अधिट्ठातुं न लभती’’ति गण्ठिपदे वुत्तं.

विकप्पेत्वाति (पाचि. ३७३; पारा. अट्ठ. २.६०८; कङ्का. अट्ठ. विकप्पनसिक्खापदवण्णना) त्थ विकप्पेतब्बस्स पत्तस्स एकत्तबहुत्तं, सन्निहितासन्निहितत्तञ्च सल्लक्खेत्वा एकं चे सन्निहितं, ‘‘इमं पत्तं तुय्हं विकप्पेमी’’ति वा ‘‘इमं पत्तं तिस्सस्स भिक्खुनो विकप्पेमी’’ति वा आदिना नयेन एकं विकप्पेत्वाति वुत्तं होति. एत्थ ‘‘परिभुञ्जेय्या’’ति वुत्तत्ता, ‘‘मय्हं सन्तकं परिभुञ्जेहि वा विस्सज्जेहि वा यथापच्चयं वा करोही’’ति तेन अपच्चुद्धटे परिभुञ्जितुं अयुत्तत्ता ‘‘विकप्पेत्वा’’ति पच्चुद्धटविसेसो गहेतब्बो.

७४३. धारेय्याति अनधिट्ठहित्वा, अविकप्पेत्वा च परिभुञ्जितब्बो. तं कालं पत्तं अतिक्कामयतोति योजना. ‘‘निस्सग्गिय’’न्ति इमिनापि ‘‘पत्त’’न्ति इदं युज्जति. पत्त-सद्दो मागधिकानं द्विलिङ्गको, तस्मा एवं वुत्तो.

७४४. अधिट्ठितविकप्पितेसु अनन्तोगधत्ता अतिरेकभावं दस्सेतुमाह ‘‘यं पत्त’’न्तिआदि.

७४५. सम्मुखेति अड्ढतेय्यहत्थप्पदेसतो अन्तो ठितं पत्तं. दूरस्मिन्ति अड्ढतेय्यरतनतो परभागे ‘‘अन्तोगब्भे वा उपरिपासादे वा सामन्तविहारे वा’’ति अट्ठकथायं वुत्तप्पकारे दूरेपि. यत्थ कत्थचि विकप्पनकालेपि सन्तिकदूरवचनभेदा एवमेव योजेत्वा वत्तब्बा. ‘‘विकप्पेतुं ¶ पन बहूनिपि लब्भती’’ति गण्ठिपदे वुत्तं. अयं नयोति ‘‘इमं पत्तं पच्चुद्धरामी’’तिआदिनयो.

७४६. वाचाकायवसेन ¶ दुविधे अधिट्ठाने वाचाधिट्ठानं दस्सेत्वा कायाधिट्ठानं दस्सेतुमाह ‘‘आभोग’’न्तिआदि. आभोगन्ति ‘‘इमं पत्तं अधिट्ठामी’’ति आभोगं. ‘‘मनसा’’ति इमिना न वचसाति वुत्तं होति. कायविकारोव कायविकारकं, हत्थेन फन्दापनादिकायकिरियाति अत्थो. एतेनेव कायाधिट्ठानं हत्थेन अपत्तब्बे दूरे न कातब्बन्ति दस्सेति.

७४७-८. ‘‘जहति अधिट्ठान’’न्ति पदच्छेदो. दानतोति अञ्ञस्स दानेन. भेदकतोति भिज्जनेन. नासतोति पत्तसामिकस्स कालकिरियाय. विब्भमतोति सिक्खं अपच्चक्खाय गिहिभावूपगमनेन. उद्धारतोति पच्चुद्धरणेन. पच्चक्खतोति सिक्खापच्चक्खानेन. परिवत्तनतोति लिङ्गपरिवत्तनेन. गाहतोति विस्सासग्गहणेन, अच्छिन्दित्वा गहणेन च.

कङ्गुसित्थप्पमाणेनाति सत्तन्नं धञ्ञानं खुद्दकतरस्स कङ्गुनो सित्थप्पमाणेन. खेनाति मुखवट्टिया द्वङ्गुलतो हेट्ठा आकासपरियायेन छिद्देन. आणिया वाति अयोमयाय आणिया वा.

७५०-१. मणिपत्तोति मणिना कतो. वेळुरियुब्भवोति मरकतमणिमयो. फलिकुब्भवोति फलिकपासाणेन कतो. काचमयोति काचमत्तिकामयो. कंसमयोति कंसलोहेन कतो. तिपुमयोति काळतिपुमयो. सीसमयोति सेततिपुमयो. विपल्लासेन च वदन्ति. सज्झुमयोति रजतमयो.

७५२. घटकटाहोति घटकपालं. सीसकटाहोति छवसीसकपालं. तुम्बन्ति अलाबु. अस्साति एकादसविधस्स ¶ पत्तस्स. अनुलोमिकन्ति अकप्पियवसेन अनुलोमं. तत्थाति तस्मिं एकादसविधे. तम्बमयं लोहमयं थालकं पन वट्टतीति योजना, पत्तोयेव न वट्टति, तम्बलोहमया थालका पन वट्टन्तीति अत्थो.

७५३. तट्टिकादीनीति ¶ आदि-सद्देन वट्टकादीनं सङ्गहो. वट्टकन्ति च अड्ढचन्दाकारो लोहादिमयो भाजनियविसेसो. पुग्गलस्साति भिक्खुस्स. गिही च सङ्घो च गिहिसङ्घा, तेसं सन्तका गिहिसङ्घिका.

७५४. यं किञ्चि पत्तन्ति सत्तसु पत्तेसु यं किञ्चि पत्तं. वोदकं कत्वाति विगतोदकं कत्वा. पटिसामेय्याति निक्खेपारहट्ठाने निक्खिपनवसेन, थविकाय पक्खिपित्वा बन्धनवसेन वा सङ्गोपेय्य.

७५५. ओतापेतुन्ति आतपे, अग्गिम्हि वा तापेतुं. उण्हेति तस्मिंयेव उण्हे. न निदहेतब्बोति न झापेतब्बो. सीसापनयनमेव न वट्टतीति न निदहेतब्बोति अत्थो अधिकनिवारणेनेव विञ्ञायति.

७५६. मिड्ढन्तेति मिड्ढिया अन्ते. परिभण्डन्तेति पमुखे महामिड्ढिया अन्ते. ‘‘वित्थिण्णेति अन्तमसो द्विपत्तमत्तोकासवित्थारे’’ति केचि. ठपेतुं पन वट्टतीति योजना, वलयादिआधारेन विनापि ठपेतुं वट्टतीति अत्थो. ‘‘मिड्ढिया पमुखे मिड्ढिया च खरभूमिपदेसादीसु च वलयमत्थके ठपेतुं वट्टती’’ति वदन्ति.

७५७. दारुआधारकेति उदुक्खलसदिसे दारुमये आधारे. द्वे पत्ते ठपेतुम्पि वट्टतीति पत्तमत्थके अपरस्सापि पत्तस्स ठपनवसेन द्वे पत्ते ठपेतुम्पि वट्टति. अपि-सद्देन ¶ एकस्मिं वत्तब्बमेव नत्थीति दस्सेति. अयमेव नयोति ‘‘द्वेपि पत्ते ठपेतुं वट्टती’’ति अयं नयो. दण्डभूमिआधारकेसूति एत्थ दण्डाधारो नाम बहूहि दण्डेहि कतो. भूमिआधारको नाम भूमियं कतो आलवालवलयाकारो सिलिट्ठाधारो. ‘‘दन्तवेत्तलतादिमयो भूमिआधारको’’ति केचि.

७५८-९. तट्टिकायाति तालपण्णादीहि कततट्टिकाय. पोत्थकेति मकचिवाकमये वा रुक्खवाकमये वा अत्थरणे. कटसारकेति तालपण्णादीहि वीते अत्थरणे. परिभण्डकतायाति कतगोमयपरिभण्डाय. अपि-सद्देन सुधाकम्मं कत्वा पासाणेन घंसित्वा मट्ठकताय भूमिया वत्तब्बमेव नत्थीति दस्सेति. वालुकासु वाति लेड्डुपासाणसक्खरकपालादिअमिस्सासु सण्हसुखुमवालुकासूति ¶ वुत्तं होति. तेनेवाह ‘‘तथारूपासू’’तिआदि. रजम्हि सन्तेपि असन्तेपि विसुंयेव ‘‘खरभूमिया न ठपेतब्ब’’न्ति वुत्तत्ता ‘‘सरजाया’’ति इमिना रजोकिण्णं सण्हभूमिमाह. खरभूमियाति फरुसभूमिया.

७६०. लग्गेतुन्ति ओलम्बेतुं. दण्डकोटिया, नागदन्तकोटिया च पत्तमुखेन पक्खिपित्वा ठपनम्पि लग्गनं नाम. छत्तङ्कमञ्चपीठेसूति छत्ते, अङ्के, मञ्चपीठे च.

७६१. अटनीसूति अङ्गेसु. बन्धित्वाति थविकाय अंसवद्धनकादिना येन केनचि बन्धित्वा. ओलम्बेतुम्पीति लग्गेतुम्पि. ‘‘ठपेतुं उपरी’’ति पदच्छेदो.

७६२. मञ्चपीठट्टकेति मञ्चपीठेसु ठपितपत्ता यथा न पतन्ति, तथा अटनिमत्थके दारुना परिक्खेपे कते मञ्चपीठट्टका ¶ नाम होन्ति, तादिसे मञ्चपीठट्टके ठपेतुं वट्टतीति अत्थो. भत्तपूरोपीति भत्तस्स पूरोपि. अपि-सद्देन यागुतेलपरिपूरितस्सापि सङ्गहो. तुच्छपत्ते विनिच्छयो यथावुत्तोयेव. पूरणं पूरो, भत्तस्स पूरो भत्तपूरो.

तिभाणवारवण्णना निट्ठिता.

७६३. कवाटन्ति द्वारकवाटफलकं. ‘‘सेनासने द्वारकवाटवातपानकवाटादी’’तिआदीसु द्वारफलकं ‘‘कवाट’’न्ति हि वुत्तं. न पणामेय्याति न नामेय्य न चालेय्य, न च पिदहेय्याति अत्थो. पत्तं हत्थे यस्स सो पत्तहत्थोति भिन्नाधिकरणोयं बाहिरत्थसमासो ‘‘वजिरपाणी’’तिआदीसु विय. ‘‘पणामेय्य अस्सा’’ति पदच्छेदो.

७६४. न नीहरेय्य पत्तेन चलकानीति रसं पिवित्वा पातितमधुकफलट्ठिकादि छड्डितानि बहि छड्डेतुं पत्तेन न नीहरेय्य. अट्ठिकानि वाति पनसट्ठिकोलट्ठिआदिअट्ठिकानि वा. उच्छिट्ठमुदकन्ति मुखधोवनादिकं उच्छिट्ठमुदकं. पत्तेन नीहरन्तस्साति योजना, बहि छड्डेतुं तं पत्ते आसिञ्चित्वा हरन्तस्साति वुत्तं होति. इतरथा उच्छिट्ठपत्तधोवनोदकम्पि तेनेव पत्तेन बहि न नीहरितब्बं सिया.

७६५. पटिग्गहेति ¶ मुखधोवनोदकन्ति पटिग्गहो, खेळमल्लकोव. मुखतो नीहटन्ति मुखेन छड्डितं मंसखण्डादि यं किञ्चि.

७६६. विनस्सतीति विब्भमेन वा सिक्खापच्चक्खानेन वा कालकिरियाय वा विनस्सति. अथ वा योति पच्चत्तवचनं ‘‘यस्सा’’ति सामिवसेन परिणामेत्वा यस्स भिक्खुनो ¶ पत्तो भेदेन वा अच्छेदेन वा चोरिकाय हरणेन वा नस्सति, तस्स अनापत्तीति योजना.

७६७. पठमस्साति पत्तवग्गस्स पठमं सङ्गहितत्ता पठमस्स. पत्तस्साति पत्तसिक्खापदस्स. पठमेनाति चीवरवग्गस्स पठमं सङ्गहितत्ता पठमेन कथिनेनाति सम्बन्धो. महेसिनाति महन्ते सीलक्खन्धादयो गुणे एसि गवेसीति महेसि. पठमस्स पत्तस्स समुट्ठानादयो सब्बे इध अनिद्दिट्ठविनिच्छया पठमेन कथिनेन समा सदिसा इति महेसिना मता अनुमता अनुञ्ञाताति योजना.

पठमपत्तकथावण्णना.

७६८. पञ्च बन्धनानि ऊनानि यस्स सो पञ्चबन्धनऊनो, पत्तो, तस्मिं, अबन्धनञ्च एकद्वितिचतुबन्धनञ्च ‘‘पञ्चबन्धनऊन’’न्ति गहितं. यथाह पाळियं ‘‘ऊनपञ्चबन्धनो नाम पत्तो अबन्धनो वा एकबन्धनो वा द्विबन्धनो वा तिबन्धनो वा चतुबन्धनो वा’’ति (पारा. ६१३). बन्धने अकतेपि बन्धनारहो वक्खमानलक्खणराजियुत्तोपि ‘‘ऊनपञ्चबन्धनोयेवा’’ति गहेतब्बो. एत्थ अबन्धनो नाम यस्स बन्धनमेव नत्थि, सो. तेनेवाह अट्ठकथायं ‘‘यस्मा अबन्धनस्सपि पत्तस्स पञ्च बन्धनानि न पूरेन्ति सब्बसो नत्थिताया’’ति (पारा. अट्ठ. २.६१२-६१३). द्वङ्गुलप्पमाणतो ऊनराजियुत्तो अबन्धनोकासोपि ‘‘अबन्धनोयेवा’’ति गहेतब्बो. यथाह पाळियं ‘‘अबन्धनोकासो नाम पत्तो यस्स द्वङ्गुला राजि न होती’’ति (पारा. ६१३).

७६९. उद्दिट्ठन्ति ‘‘बन्धनोकासो नाम पत्तो यस्स द्वङ्गुला राजि होती’’ति (पारा. ६१३) पदभाजने वुत्तं. द्वङ्गुलाय राजिया एकञ्च बन्धनन्ति योजना. ‘‘मुखवट्टितो हेट्ठा भट्ठा’’ति ¶ अट्ठकथावचनतो (पारा. अट्ठ. २.६१२-६१३) ‘‘सब्बापि राजियो मुखवट्टितो पट्ठाय ¶ हेट्ठा भट्ठायेव गहेतब्बा’’ति निस्सन्देहे वुत्तं. मुखवट्टिं विना अञ्ञत्थापि ऊनपञ्चबन्धने वा ऊनपञ्चबन्धनोकासे वा सति सोपि पत्तो ऊनपञ्चबन्धनो न होतीति न सक्का वत्तुं, तस्मा ‘‘मुखवट्टितो पट्ठाया’’ति (पारा. अट्ठ. २.६१२-६१३) अट्ठकथायं नियमेत्वा वचनं वीमंसितब्बं. इध पन तथा नियमो न दस्सितो, तस्मा अयमेव विनिच्छयो सामञ्ञेन वुत्ताय पाळिया अञ्ञदत्थु संसन्दति समेति. च-कारस्स अवुत्तसमुच्चयत्थत्ता द्वङ्गुलद्वङ्गुलाहि द्वीहि द्वे बन्धनानि च तीणि बन्धनानि चाति इदम्पि वुत्तमेव होति. यथाह अट्ठकथायं ‘‘यस्स पन द्वे राजियो, एकायेव वा चतुरङ्गुला, तस्स द्वे बन्धनानि दातब्बानि. यस्स तिस्सो, एकायेव वा छळङ्गुला, तस्स तीणि बन्धनानि दातब्बानी’’ति (पारा. अट्ठ. २.६१२-६१३).

ऊनपञ्चबन्धनपत्तेसु अन्तिमपत्तस्स विभागं दस्सेतुमाह ‘‘बन्धनानि चा’’तिआदि. मुखवट्टिया अट्ठङ्गुलप्पमाणानं चतुन्नं राजीनं चत्तारि बन्धनानि चाति वुत्तं होति. चकारो पुब्बे वुत्तस्सेव समुच्चयं करोति. अट्ठङ्गुलराजिया तथाति मुखवट्टितो पट्ठाय अट्ठङ्गुलायामं भट्ठाय राजिया द्वङ्गुलद्वङ्गुलमत्ते ठाने तेनेव नीहारेन बद्धानि चत्तारि बन्धनानि चाति अत्थो.

७७०. एवं ऊनपञ्चबन्धनपत्तं दस्सेत्वा इदानि परिपुण्णपञ्चबन्धनपत्तं दस्सेतुमाह ‘‘पञ्च वा’’तिआदि. मुखवट्टिया द्वङ्गुलद्वङ्गुलायामं ओतिण्णा पञ्च राजियो च. वा-सद्देन पञ्चबन्धनविकप्पा दस्सिता. एका वापि दसङ्गुलाति मुखवट्टितो दसङ्गुलायामा एका वा राजि होति. अपि-सद्देन तस्सा राजिया बन्धनो पञ्चबन्धनपक्खो दस्सितो. अयं पत्तोति ¶ यस्स पञ्च राजियो वा तत्थ बन्धनानि पञ्चबन्धनानि वा, दसङ्गुला एका राजि वा तत्थ बन्धनानि पञ्चबन्धनानि वा सन्ति, अयं पत्तो पञ्चबन्धनो नाम.

७७१. एत्तावता मत्तिकापत्ते विनिच्छयं दस्सेत्वा इदानि अयोपत्ते दस्सेतुमाह ‘‘अयोपत्तो’’तिआदि. छिद्दानि पटिच्छादेतुं बन्धितब्बानि अयोपट्टानि लोहमण्डलकानि नाम. ‘‘भण्डी’’तिपि तस्सेव परियायो. भण्डितब्बं बन्धित्वा छिद्दे पटिच्छादितेपि यत्थ असण्हताय आमिसं तिट्ठति, तादिसोपि अपत्तोयेवाति आह ‘‘मट्ठो वट्टती’’ति. अयोचुण्णेन वाणियाति एत्थापि ‘‘मट्ठो वट्टती’’ति सम्बन्धनीयं.

७७२. तस्स ¶ निस्सग्गियं सङ्घस्स निस्सट्ठं तं पत्तं तस्मिं अनुकम्पाय अगण्हन्तस्साति योजना, ‘‘सङ्घमज्झे निस्सज्जितब्बो’’ति (पारा. ६१३) वचनतो सङ्घमज्झे निस्सट्ठं तस्स तं पत्तं तस्मिं पत्तनिस्सज्जके पुग्गले अनुकम्पाय अगण्हन्तस्स.

७७३. दीयमाने तु पत्तस्मिन्ति ऊनपञ्चबन्धनेन पत्तेन विञ्ञापितनवपत्ते भिक्खुम्हि तं पत्तं सङ्घमज्झे निस्सज्जित्वा आपत्तिं देसेत्वा निसिन्ने चतस्सो अगतियो अगमनं, गहितागहितजाननन्ति इमेहि पञ्चहि अङ्गेहि समन्नागतेन भिक्खुना पठमं सङ्घं याचित्वा ञत्तिदुतियाय कम्मवाचाय सङ्घेन पत्तगाहकं कत्वा सम्मतेन निस्सट्ठपत्तं हत्थेन गहेत्वा तस्मिं सङ्घे सङ्घत्थेरतो पट्ठाय अनुक्कमेन उपसङ्कम्म विञ्ञायमानं गुणं वत्वा पणामिते. यस्साति तस्मिं सङ्घमज्झे निसिन्नस्स यस्स ¶ भिक्खुनो, रोचनत्थयोगे सम्पदानवचनं. सो दीयमानो पत्तो. तं दीयमानं पत्तं.

७७४. दीपितोति ‘‘अपत्तकस्स न गाहेतब्बो’’ति (पारा. ६१५) वुत्तो. तत्थाति तस्सं भिक्खुपरिसायं. पत्तपरियन्तोति एत्थ ‘‘एवं परिवत्तेत्वा परियन्ते ठितपत्तो’’ति (पारा. अट्ठ. २.६१५) अट्ठकथायं वुत्तत्ता तेन पत्तपरिवत्तनेन आगतो वा सब्बेहि अग्गहितत्ता आगतो सो एव वा पत्तो परियन्तो नाम होतीति अत्थो. तस्स भिक्खुनोति पत्तं निस्सज्जित्वा निसिन्नस्स तस्स भिक्खुनो.

७७५. तन्ति अत्तनो दिन्नं तं परियन्तपत्तं. अप्पदेसेति मञ्चपीठादिअट्ठाने. यथाह अट्ठकथायं ‘‘मञ्चपीठछत्तनागदन्तादिके अदेसे’’ति (पारा. अट्ठ. २.६१५). विस्सज्जेतीति अञ्ञस्स देति. अत्तना अदापेत्वा अञ्ञेन तं पत्तं सयमेव अत्तनो गहेत्वा अञ्ञं अनुरूपं पत्तं दिय्यमानं गण्हितुं वट्टतीति अट्ठकथायं वुत्तं. अभोगेन परिभुञ्जतीति यागुरन्धनादिवसेन परिभुञ्जति. यथाह अट्ठकथायं ‘‘अभोगेनाति यागुरन्धनरजनपचनादिना’’ति (पारा. अट्ठ. २.६१५). ‘‘अन्तरामग्गे पन ब्याधिम्हि उप्पन्ने अञ्ञस्मिं भाजने असति मत्तिकाय लिम्पित्वा यागुं वा पचितुं उदकं वा तापेतुं वट्टती’’ति (पारा. अट्ठ. २.६१५) अट्ठकथायं वुत्तत्ता तादिसे ठाने तथापि परिभुञ्जितुं वट्टतीति एत्थ विसेसो.

७७६. नट्ठेति ¶ अत्तनो परिभुञ्जियमाने पत्ते चोरग्गहणादिना नट्ठे. भिन्नेति भेदमुपगते. अनापत्तीति अञ्ञं पत्तं विञ्ञापेन्तस्स अनापत्ति. पकासिताति ‘‘अनापत्ति नट्ठपत्तस्स भिन्नपत्तस्स ञातकानं पवारितानं अञ्ञस्सत्थाय ¶ अत्तनो धनेना’’तिआदिना (पारा. ६१७) नयेन पाळियं देसिता. इध ‘‘अञ्ञस्सत्थाया’’ति वुत्तत्ता अत्तनो वळञ्जियमाने पत्ते सतिपि अञ्ञस्सत्थाय पत्तं विञ्ञापेतुं वट्टति. ञातकादीनं गण्हतोति एत्थ ‘‘सन्तक’’न्ति लब्भति. अत्तनो धनेनाति योजना. एत्थ धनं नाम सुत्तवत्थादि कप्पियवत्थु.

७७७. एत्थ विञ्ञापनं क्रियं.

दुतियपत्तकथावण्णना.

७७८. सप्पिआदिं भेसज्जन्ति एत्थ पाळियं ‘‘सेय्यथिदं? सप्पि नवनीतं तेलं मधु फाणित’’न्ति (पारा. ६२२) उद्दिसित्वा ‘‘सप्पि नाम गोसप्पि वा अजिकासप्पि वा महिंससप्पि वा, येसं मंसं कप्पति, तेसं सप्पी’’ति (पारा. ६२३) निद्दिट्ठं घतञ्च ‘‘तेसंयेव नवनीत’’न्ति (पारा. ६२३) निद्दिट्ठं नवनीतञ्च ‘‘तिलतेलं सासपतेलं मधुकतेलं एरण्डकतेलं वसातेल’’न्ति (पारा. ६२३) निद्दिट्ठं तेलञ्च ‘‘मधु नाम मक्खिकामधू’’ति (पारा. ६२३) निद्दिट्ठं मधुञ्च ‘‘फाणितं नाम उच्छुम्हा निब्बत्त’’न्ति (पारा. ६२३) निद्दिट्ठं गुळादिफाणितञ्चाति एतस्मिं पञ्चभेसज्जरासिम्हि यं यं भेसज्जन्ति अत्थो. पुरेभत्तन्ति पुरेभत्ते. पटिगय्हाति पटिग्गहेत्वा.

७७९. तं पुरेभत्तं पटिग्गहितं भेसज्जं. सत्ताहन्ति एत्थ ‘‘वट्टती’’ति किरियाय अच्चन्तसंयोगे उपयोगवचनं. ‘‘सत्ताहं अतिक्कमन्तस्सा’’ति पदच्छेदो. ‘‘सत्ताहातिक्कमे तस्सा’’ति वा पाठो. सत्ताहस्स अतिक्कमो सत्ताहातिक्कमो, तस्मिं सत्ताहातिक्कमे. तस्साति भेसज्जपटिग्गाहकस्स भिक्खुनो. ‘‘निस्सग्गिय’’न्ति इमिना पाचित्तियमेव दस्सितं. निस्सग्गियवत्थु भाजनगणनाय आपत्तिं करोति. एकस्मिं भाजनेपि विसुं विसुं ठपितानि नवनीतपिण्डगुळपिण्डसक्करमधुपटलानिपि ¶ अत्तनो गणनाय आपत्तिं करोन्ति.

७८०. गण्हित्वाति पटिग्गहेत्वा. सन्निधीयतीति सन्निधि, सन्निहितवत्थु, तस्स कारकं करणं ¶ अपरापरदिवसत्थाय ठपनं, तं कत्वा, पच्छाभत्तं पटिग्गहितं यथा अपरं दिवसं गच्छति, तथा कत्वा निक्खिपित्वाति अत्थो. निरामिसं सायतोति आमिसेन अमिस्सेत्वा भुञ्जन्तस्स.

७८१. उग्गहितन्ति अप्पटिग्गहापेत्वा हत्थेन गहितं. सरीरभोगेति बहि सरीरपरिभोगेनेव.

७८२. गहितं पटिग्गहितं. तापेत्वाति विलीयापेत्वा.

७८३. ‘‘सयं तापेति…पे… न होति सो’’ति इदं सुधोतनवनीतं सन्धाय वुत्तं, दुद्धोतेन पन दधिगुळिकादिसहितेन सामंपाको होतेव. नवनीतस्स यं सयं तापनं, सो सामंपाको न होतीति योजना.

७८४. येन केनचीति उपसम्पन्नेन, अनुपसम्पन्नेन वा.

७८५. ‘‘सयं करोती’’ति इमिना अनुपसम्पन्नं निवत्तेति. तेन कतं पन तदहु पुरेभत्तं सामिसम्पि वट्टति. यथाह अट्ठकथायं ‘‘पुरेभत्तं पटिग्गहितखीरेन वा दधिना वा कतसप्पि अनुपसम्पन्नेन कतं सामिसम्पि तदहु पुरेभत्तं वट्टती’’ति (पारा. अट्ठ. २.६२२).

७८६. सवत्थुकस्साति एत्थ वत्थु नाम खीरदधि.

७८७. अस्साति पटिग्गहितखीरदधीहि कतसप्पिमाह. ‘‘पटिग्गहेत्वा तानी’’ति वुत्तत्ताति इदं ‘‘यानि खो पन तानि ¶ गिलानानं भिक्खूनं पटिसायनीयानि भेसज्जानि, सेय्यथिदं? सप्पि नवनीतं तेलं मधु फाणितं, तानि पटिग्गहेत्वा’’ति (पारा. ६२२) इमस्मिं मातिकापाठे ‘‘यानी’’ति वुत्तसप्पिआदीनमेव ‘‘तानि पटिग्गहेत्वा’’ति वुत्तत्ताति वुत्तं होति, तत्थ खीरदधीनं अवुत्तत्ताति अधिप्पायो.

७८८. कप्पियसप्पिम्हीति ¶ कप्पियमंसानं सत्तानं घते. अकप्पियसप्पिम्हीति अकप्पियमंसानं सत्तानं घते, पटिग्गहेत्वा सत्ताहे अतिक्कन्तेति वुत्तं होति.

७८९. तेन सप्पिना अकप्पियेन भवितब्बन्ति इदं दुक्कटं कथं होतीति आह ‘‘सब्बा’’तिआदि. अकप्पियं मंसं येसं ते अकप्पियमंसा, मनुस्सादयो, सब्बे च ते अकप्पियमंसा चाति सब्बाकप्पियमंसा, तेसं.

७९०-१. एवं चे वट्टति, ‘‘येसं मंसं कप्पति, तेसं सप्पी’’ति कस्मा पाळियं वुत्तन्ति चोदनं समुट्ठापेत्वा तं परिहरितुमाह ‘‘येस’’न्तिआदि. तत्थ ‘‘येसञ्हि कप्पति मंसं, तेसं सप्पी’’ति इदं वचनं किं पयोजनं साधेतीति वुत्तं होति. इदानि परिच्छेदनियमनसङ्खातं तंपयोजनञ्च तब्बिसयञ्च दस्सेतुमाह ‘‘पणीतभोजनस्सा’’तिआदि. पणीतभोजनस्स परिच्छेदनियामनन्ति योजना. सत्ताहकालिके पञ्चविधे भेसज्जेति वुत्तं होति, निद्धारणे भुम्मं. निस्सग्गियस्स वत्थूनन्ति निद्धारितब्बदस्सनं. निस्सग्गियस्साति एत्थ तंहेतुकस्स पाचित्तियस्साति अत्थो. वत्थूनन्ति सप्पिनवनीतद्वयमेव वुत्तं. सत्ताहकालिके निस्सग्गियपाचित्तियस्स वत्थु नाम एतेसमेव सप्पिनवनीतानि, पणीतभोजनञ्च तेसमेव खीरदधिसप्पिनवनीतानीति दस्सेतुं तथा वुत्तं, न अकप्पियमंससत्तानं सप्पिआदिनिवारणत्थं ¶ वुत्तन्ति अयं पाळियं तथागता धिप्पेतो अत्थोति वुत्तं होति.

७९२. गहितुग्गहितादिके उग्गहितपटिग्गहितादिके नवनीतेपि सब्बो विनिच्छयो सप्पिम्हि वुत्तनयेनेव वेदितब्बोति योजना. आदि-सद्देन पुरेभत्तं, पच्छाभत्तं पटिग्गहितखीरदधीहि, उग्गहितखीरदधीहि च कतं नवनीतं, तादिसमेव अकप्पियमंसनवनीतञ्च सङ्गहितं. सब्बो विनिच्छयोति आपत्तिआदिकं सब्बविनिच्छयं सङ्गण्हाति. यथाह अट्ठकथायं ‘‘सब्बो आपत्तानापत्तिपरिभोगापरिभोगनयो’’ति (पारा. अट्ठ. २.६२२).

७९३-४. भिक्खूनं आकिरन्तीति एत्थ ‘‘पत्ते’’ति सामत्थिया लब्भति. आदिच्चपक्कन्ति आतपे विलीनं. संसट्ठं परिस्सावितं.

७९५-६. तिलतेलं सासपतेलं मधुकतेलं एरण्डकतेलं. गहितन्ति पटिग्गहितं. पुरेभत्तं सामिसम्पि ¶ निरामिसम्पि सायितब्बन्ति योजना. तेसं वसाति सत्ताहातिक्कन्तानं तेसं तेलानं वसेन, तेलभाजनगणनायाति वुत्तं होति.

७९८. तेसं तिण्णम्पीति एरण्डमधुकसासपबीजानं तिण्णं.

७९९. निस्सग्गियं पाचित्तियं.

८००. सासपादीनन्ति एत्थ आदि-सद्देन पटिलोमेन मधुकेरण्डकानं गहणं. गहेत्वाति पटिग्गहेत्वा. भिक्खुना तेलत्थायेव गहेत्वा ठपितानं सासपादीनं सत्ताहातिक्कमे दुक्कटं सियाति योजना.

८०१-२. नाळिकेरञ्च ¶ करञ्जञ्च नाळिकेरकरञ्जानि, तेसं, नाळिकेरफलानं, नत्तमालट्ठीनञ्च तेलन्ति सम्बन्धो. कुरुवकस्साति अतसिबीजस्स. निम्बञ्च कोसम्बकञ्च निम्बकोसम्बकानि, तेसं, पुचिमन्दबीजस्स च फन्दनबीजस्स च तेलन्ति सम्बन्धो. भल्लातकस्साति एवंनामकस्स रुक्खबीजस्स. समयच्चयेति सत्ताहातिक्कमे.

८०३. यावकालिकभेदञ्चाति एत्थ ‘‘यावकालिक’’न्ति भेदो विसेसनं यस्साति विग्गहो, ‘‘इदं वत्थु’’न्ति एतस्स अज्झोहरणीयविसेसितब्बस्स विसेसनं. यावजीविकन्तिपि तस्सेव विसेसनं. सेसन्ति ‘‘सामंपाकसवत्थुक पुरेभत्तपच्छाभत्तपटिग्गहितउग्गहितकवत्थुविधानं सब्ब’’न्ति (पारा. अट्ठ. २.६२२) अट्ठकथायं दस्सितं सेसं विसेसप्पकारजातमाह. एत्थापीति इमस्मिं तेलविनिच्छयेपि.

८०४. अच्छस्स इसस्स. मच्छस्स जलजस्स. वराहस्स सूकरस्स. सुसुकासङ्खातस्स मकरस्स. मच्छवचनेनेव मकरस्स सङ्गहितत्तेपि वाळमच्छभावेन विसुं गहणन्ति अट्ठकथायं वुत्तं. गद्रभस्स खरस्स. इमेसं पञ्चन्नं सत्तानं वसेन पञ्चविधानं वसानं तेलञ्च पञ्चप्पकारं होतीति अत्थो.

८०५. कप्पियाकप्पियस्स चाति कप्पियाकप्पियमंसस्स सत्तस्साति वुत्तं होति, सब्बमेव ¶ वसातेलं वट्टतीति इमिना सम्बन्धो. एत्थ ‘‘अनुजानामि भिक्खवे वसानि भेसज्जानि अच्छवसं मच्छवसं सुसुकावसं सूकरवसं गद्रभवस’’न्ति (महाव. २६२) अनुञ्ञातपाठे अच्छवसाग्गहणेन मनुस्सेहि अञ्ञेसं सब्बाकप्पियमंससत्तानं वसाय अनुञ्ञातत्ता ¶ तं सङ्गहेतुं अकप्पियग्गहणं कतन्ति दट्ठब्बं. यथाह अट्ठकथायं ‘‘अच्छवस’न्ति वचनेन ठपेत्वा मनुस्सवसं सब्बेसं अकप्पियमंसानं वसा अनुञ्ञाता’’ति (पारा. अट्ठ. २.६२३). एत्थ अकप्पियमंससत्तानं मंसानं अकप्पियभावो ‘‘मंसेसु हि दस मनुस्सहत्थिअस्ससुनखअहिसीहब्यग्घदीपिअच्छतरच्छानं मंसानि अकप्पियानि. वसासु एका मनुस्सवसाव. खीरादीसु अकप्पियं नाम नत्थी’’ति (पारा. अट्ठ. २.६२३) अट्ठकथावचनतो वेदितब्बो. अकप्पियवचनेन मनुस्सवसायपि गय्हमानत्ता तस्मिं नीहरितुमाह ‘‘ठपेत्वा’’ति.

८०६. पुरेभत्तन्ति पुरेभत्ते. संसट्ठं परिस्सावितं. ‘‘पुरेभत्त’’न्ति इदं ‘‘पटिग्गहेत्वान, पक्कं, संसट्ठ’’न्ति इमेहि पदेहि पच्चेकं योजेतब्बं. यथाह पाळियं ‘‘काले पटिग्गहितं काले निप्पक्कं काले संसट्ठं तेलपरिभोगेन परिभुञ्जितु’’न्ति (महाव. २६२).

८०७. तं कत्वा देतीति अपटिग्गहितवसं गहेत्वा पचित्वा तेलं देतीति अत्थो. तेनाह अट्ठकथायं ‘‘अनुपसम्पन्नेहि कतं निब्बट्टितवसातेलं पुरेभत्तं पटिग्गहितं पुरेभत्तं सामिसम्पि वट्टती’’ति (पारा. अट्ठ. २.६२३). ततो उद्धं सत्ताहमनतिक्कम्माति गहेतब्बं. यथाह अट्ठकथायं ‘‘पच्छाभत्ततो पट्ठाय सत्ताहं निरामिसमेव वट्टती’’ति (पारा. अट्ठ. २.६२३). इध उभयत्थापि काले, विकाले च कप्पियाकप्पियमंसवसानं तेलं दिय्यमानं सुखुममंसचुण्णादिकं अब्बोहारिकं. यथाह अट्ठकथायं ‘‘यं पन तत्थ सुखुमरजसदिसं मंसं वा न्हारु वा अट्ठि वा लोहितं वा होति, तं अब्बोहारिक’’न्ति (पारा. अट्ठ. २.६२३).

८०८. पटिग्गहेतुन्ति एत्थ ‘‘वस’’न्ति च कातुन्ति एत्थ ‘‘तेल’’न्ति च पकरणतो लब्भति. कातुन्ति एत्थ पचितुं परिस्सावितुन्ति ¶ उभयमेवाति अत्थो. ‘‘न वट्टती’’ति इदं पटिग्गहणादिपयोगत्तये विसुं विसुं दुक्कटत्ता वुत्तं. यथाह पाळियं ‘‘विकाले चे भिक्खवे पटिग्गहितं विकाले निप्पक्कं विकाले संसट्ठं, तं चे परिभुञ्जेय्य, आपत्ति तिण्णं दुक्कटान’’न्ति ¶ (महाव. २६२). इमानि हि तीहि पयोगेहि तीणि दुक्कटानि होन्ति. सेसोति उग्गहितकपटिग्गहितकसवत्थुकविसयो विनिच्छयो च भाजनगणनाय आपत्तिभेदो चाति एवंपकारो वत्तब्बविसेसो.

८०९. गहितन्ति पटिग्गहितं. मधुकरीकतन्ति मधुमक्खिकाखुद्दकमक्खिकाभमरमक्खिकासङ्खाताहि तीहि मधुकरीहि कतं.

८१०. वत्थूनं गणनाति मधुपटलेन ठितं चे, पटलगणनाय, पीळेत्वा भाजने पक्खिपित्वा ठपितं चे, भाजनगणनाय, सिलेसमिव पत्थिन्नं चे, महाभमरमधुखण्डपिण्डवसेन, विसुं विसुं कते तेसं गणनायाति अत्थो.

८११. घनाघनन्ति एत्थ गुळञ्च नानप्पकारा सक्करा च घनपक्कं नाम. पक्कतनुकं फाणितं अघनपक्कं नाम. उच्छुसिलेसो अपक्कघनं नाम. उच्छुदण्डतो पीळितरसो अपक्काघनं नाम. ‘‘फाणितं नाम उच्छुम्हा निब्बत्त’’न्ति (पारा. ६२३) साधारणपाळिवचनतो, ‘‘फाणितं नाम उच्छुरसं उपादाया’’ति (कङ्खा. अट्ठ. भेसज्जसिक्खापदवण्णना; वि. सङ्ग अट्ठ. ९८) अट्ठकथावचनतो च इह रसादीहि उच्छुपानम्पि सङ्गहितं. केचि उच्छुनो चतुकालिकत्तं वण्णयन्ति, तं न सारतो पच्चेतब्बं.

८१२. फाणितन्ति वुत्तप्पकारे तस्मिं फाणिते अञ्ञतरं. गहितं पटिग्गहितं.

८१३. असंसट्ठेनाति ¶ अपरिस्सावितेन. कतफाणितन्ति परिस्सावेत्वा अत्तना कतफाणितं. पुरेभत्तं गहितेनाति पुरेभत्तं पटिग्गहितेन. ‘‘सयं कत’’न्ति (पारा. अट्ठ. २.६२३) वुत्तत्ता कतन्ति उच्छुरसो गहेतब्बो.

८१६. कत्वाति पचित्वा फाणितं कत्वा.

८१७. पच्छाभत्तं कतञ्चापीति पच्छाभत्तं अत्तना च कतं अनुपसम्पन्नेन च कतं फाणितम्पि.

८१८. कतं ¶ …पे… सीतवारिनाति सीतुदके मधुकपुप्फानि पक्खिपित्वा ठपेत्वा मद्दित्वा परिस्सावितरसेन कतं मधुकफाणितं.

८१९. अस्साति मधुकफाणितस्स. दुक्कटन्ति तदाधारभाजनगणनाय दुक्कटं. खीरं पक्खिपित्वा कतं मधुकफाणितं यावकालिकं चे होति, कथं खण्डसक्कराकतं सत्ताहकालिकं होतीति विचारणायं खीरजल्लिकं धोवित्वा धोवित्वा गय्हमानत्ता वट्टतीति परिहरन्ति. यथाह अट्ठकथायं ‘‘खण्डसक्करं पन खीरजल्लिकं अपनेत्वा अपनेत्वा सोधेन्ति, तस्मा वट्टती’’ति (पारा. अट्ठ. २.६२३). ‘‘बीजतो पट्ठाय न वट्टती’’ति पटिक्खित्तमधुकपुप्फमेरयं विना आमकञ्च पक्कञ्च मधुकपुप्फं पुरेभत्तं वट्टतीति अट्ठकथायं वुत्तं.

८२०. सब्बेसं पन फलानन्ति कदलिखज्जूरिआदिफलानं.

८२१. सामञ्ञजोतनाय विसेसेपि अवट्ठानतो ‘‘कालिका’’ति इमिना ‘‘पच्छाभत्तं सति पच्चये’’ति वचनसामत्थिया यावकालिकवज्जा तयो कालिका गहेतब्बा ¶ , ‘‘पुरेभत्तं यथासुख’’न्ति वचनसामत्थिया चत्तारोपि गहेतब्बा. यावकालिकवज्जा तयो कालिका पच्छाभत्तं विकाले पच्चये पिपासादिकारणे सति केवलम्पि पच्चेकम्पि मिस्सेत्वापि परिभुञ्जितुं भिक्खुस्स वट्टन्ति. कालिका चत्तारोपि पुरेभत्तं काले यावमज्झन्हा केवलम्पि मिस्सेत्वापि यथासुखं असतिपि पच्चये परिभुञ्जितुं भिक्खुस्स वट्टन्तीति योजना.

८२२. अरुआदीनीति वणादीनि. ‘‘मक्खेतुं न वट्टती’’ति इमिना बाहिरपरिभोगोपि निवारितो.

८२३. अनापत्तिवारे ‘‘अन्तोसत्ताह’’न्ति अधिकारे ‘‘अनुपसम्पन्नस्स चत्तेन वन्तेन मुत्तेन अनपेक्खो दत्वा पटिलभित्वा परिभुञ्जती’’ति (पारा. ६२५) वुत्तत्ता चजित्वाति एत्थ ‘‘अन्तोसत्ताहं अनुपसम्पन्नस्सा’’ति वत्तब्बं. लभित्वाति एत्थ ‘‘सत्ताहातिक्कमेपी’’ति सामत्थिया लब्भति. तेनाह महापदुमत्थेरो ‘‘अन्तोसत्ताहे दिन्नस्स हि पुन परिभोगे आपत्तियेव नत्थि, सत्ताहातिक्कन्तस्स पन परिभोगे अनापत्तीति दस्सनत्थमिदं वुत्त’’न्ति. लभित्वाति ¶ गहिततेलेन अनुपसम्पन्नेन सक्कच्चं, असक्कच्चं वा दिन्नं लभित्वा. सायितुन्ति एत्थ ‘‘लभती’’ति सेसो.

८२४. ‘‘अनापत्ति अधिट्ठेती’’ति द्विन्नं पदानं अन्तरे ‘‘अन्तोसत्ताह’’न्ति सेसो, सब्बपदेहिपि युज्जति. अधिट्ठेतीति सत्ताहब्भन्तरे सप्पिञ्च तेलञ्च वसञ्च मुद्धनि तेलं वा अब्भञ्जनं वा, मधुं अरुमक्खनं, फाणितं घरधूपनं भविस्सतीति अधिट्ठेति. अधिट्ठितेन अनधिट्ठितं चे मिस्सं होति, पुनपि अधिट्ठातब्बं. विस्सज्जेतीति अन्तोसत्ताहे अञ्ञस्स उपसम्पन्नस्स देति. सचे तथा दिन्नं अञ्ञेन अप्पटिग्गहितत्ता ¶ , तेन पटिग्गहितम्पि इतरस्स दिन्नत्ता तेसं अनापत्तीति अट्ठकथायं (पारा. अट्ठ. २.६२५ अत्थतो समानं) वुत्तं.

विनस्सतीति सत्ताहब्भन्तरे येन केनचि आकारेन यथा अपरिभोगं होति, तथा चोरिकाय हरणादिवसेन नस्सति. यथाह अट्ठकथायं ‘‘विनस्सतीति अपरिभोगं होती’’ति (पारा. अट्ठ. २.६२५). अच्छिन्दित्वा गण्हतीति अञ्ञो तस्मिं सत्ताहब्भन्तरे विलुम्पित्वा गण्हाति. विस्सासं गण्हतीति तस्मिंयेव सत्ताहब्भन्तरे अञ्ञो विस्सासं गण्हाति.

८२५. अकथिनचित्तेन सत्थुना समुट्ठानादयो सब्बेव पठमेन कथिनेन समा पकासिताति योजना. अकथिनचित्तेनाति महाकरुणारसेन तिन्तताय अकक्कसचित्तेन, अविहिंसाभिरतचित्तेनाति वुत्तं होति. सत्थुनाति दिट्ठधम्मिकसम्परायिकादीहि अत्थेहि सदेवकं लोकं अनुसासतीति सत्था, तेन सब्बञ्ञुना दसबलेन सम्मासम्बुद्धेन.

भेसज्जसिक्खापदकथावण्णना.

८२६. गिम्हानन्ति एत्थ ‘‘मासान’’न्ति सामत्थिया लब्भति, निद्धारणे सामिवचनं, गिम्हेसु चतूसु मासेसूति अत्थो. निद्धारितब्बं दस्सेति ‘‘मासो सेसो’’ति, एत्थ ‘‘वत्तब्बे काले’’ति सेसो. फग्गुनमासकण्हपक्खपाटिपदतो पट्ठाय जेट्ठमासपुण्णमिपरियोसानेसु तीसु मासेसु अतिक्कन्तेसूति अत्थो. सेसमासो नाम जेट्ठमासस्स कण्हपक्खपाटिपदतो पट्ठाय आसाळ्हिमासपुण्णमिपरियोसानो. गिम्हानं मासो सेसोति वत्तब्बे कालेति अत्थो.

इमस्मिं ¶ ¶ पच्छिमे गिम्हमासे जेट्ठमासस्स कण्हपक्खो वस्सिकसाटिका चे न लद्धा, परियेसितुं लद्धं कातुं खेत्तं, अधिट्ठाननिवासनानं अखेत्तं. आसाळ्हिपुरिमपक्खो परियेसनकरणनिवासनानं खेत्तं, अधिट्ठातुं अखेत्तं. आसाळ्हिकण्हपक्खपाटिपदतो याव पच्छिमकत्तिकपुण्णमी, इदं चतुन्नम्पि खेत्तन्ति अयमेत्थ सङ्खेपो.

परियेसेय्याति ‘‘ये मनुस्सा पुब्बे वस्सिकसाटिकं देन्ती’’तिआदिना (पारा. ६२८) पदभाजने वुत्तनयेन पुब्बे वस्सिकसाटिकदायकं उपसङ्कम्म ‘‘देथ मे वस्सिकसाटिकचीवर’’न्तिआदिना वचनेन अविञ्ञापेत्वा ‘‘कालो वस्सिकसाटिकाय समयो वस्सिकसाटिकाय, अञ्ञेपि मनुस्सा वस्सिकसाटिकं देन्ती’’ति एवं सतुप्पादमत्तकरणेन परियेसेय्य.

साटिकन्ति वस्सिकसाटिकं. ‘‘अद्धमासो सेसो’’ति इदं ‘‘गिम्हान’’न्ति इमिनाव युज्जति. तत्थ ‘‘वत्तब्बे काले’’ति अज्झाहरितब्बं, आसाळ्हिमासस्स पुरिमपक्खेति अत्थो. कत्वाति एत्थ ‘‘लद्ध’’न्ति सामत्थिया लब्भति. यथावुत्तनयेन सतुप्पादेन वा अवसेसानं सद्धासम्पन्नकुलानं वा सन्तिका लद्धं सिब्बनरजनकप्पबिन्दुदानवसेन निट्ठापेत्वाति वुत्तं होति. परिदहेति निवासेय्य.

८२७-८. पिट्ठिसम्मते समयेति ‘‘कत्तिकपुण्णमासिया पन पच्छिमपाटिपददिवसतो पट्ठाय याव जेट्ठमूलपुण्णमा इमे सत्त मासा पिट्ठिसमयो नामा’’ति (पारा. अट्ठ. २.६२८) एवं दस्सितेसु सत्तसु मासेसु. ञातकाञ्ञातकादिनो सतुप्पादं कत्वाति योजना. आदि-सद्देन पवारितापवारितानं सङ्गहो. यथाह अट्ठकथायं ‘‘अञ्ञातकअप्पवारितट्ठानतो’’ति.

तेसुयेवाति ¶ ञातकअञ्ञातकपवारितअप्पवारितेसु. ‘‘तथा’’ति इमिना ‘‘होति निस्सग्गियापत्ती’’ति इदं दस्सितं. सा आपत्ति अञ्ञातकअप्पवारितेसु अञ्ञातकविञ्ञत्तिसिक्खापदेन होति. यथाह अट्ठकथायं ‘‘देथ मे वस्सिकसाटिकचीवर’न्तिआदिना नयेन विञ्ञत्तिं कत्वा निप्फादेन्तस्स अञ्ञातकविञ्ञत्तिसिक्खापदेन निस्सग्गियं पाचित्तिय’’न्ति (पारा. अट्ठ. २.६२८). ञातकपवारितेसु तेन सिक्खापदेन अनापत्ति, पिट्ठिसमयत्ता इमिना ¶ आपत्ति होति. अञ्ञातकअप्पवारितेसु च वक्खमाननयेन वत्तभेददुक्कटेन सद्धिं होतीति दट्ठब्बं.

८२९-३०. अञ्ञातकादिनो कत्वा पन सतुप्पादन्ति योजना. आदि-सद्देन अप्पवारितानं सङ्गहो. कुच्छिसञ्ञिते समयेति यथावुत्तपिट्ठिसमये सत्तमासे विना इतरे पञ्च मासा वुत्ता. यथाह अट्ठकथायं ‘‘जेट्ठमूलपुण्णमासिया पन पच्छिमपाटिपददिवसतो पट्ठाय याव कत्तिकपुण्णमा इमे पञ्च मासा कुच्छिसमयो नामा’’ति (पारा. अट्ठ. २.६२८). वत्थन्ति वस्सिकसाटिकं. अदिन्नपुब्बेसूति येहि वस्सिकसाटिका न दिन्नपुब्बा, तेसु, इमिना वत्तभेदस्स कारणमाह. इह वत्तभेदो नाम ‘‘ये मनुस्सा पुब्बे वस्सिकसाटिकचीवरं देन्ती’’तिआदिवचनतो (पारा. ६२८) दिन्नपुब्बेसु कातब्बस्स सतुप्पादस्स अदिन्नपुब्बेसु करणं. ब्यतिरेकतो दिन्नपुब्बेसु नत्थीति दीपितं होति.

तत्राति अञ्ञातकादिम्हि. ‘‘निस्सग्गिय’’न्ति इमिना अञ्ञातकविञ्ञत्तिसिक्खापदेन आपत्तिं आह. यथाह कुच्छिसमयचतुक्के ‘‘विञ्ञत्तिम्पि कत्वा निप्फादेन्तस्स अञ्ञातकविञ्ञत्तिसिक्खापदेन निस्सग्गियं पाचित्तिय’’न्ति. अयं पाचित्तियापत्ति पकतिया वस्सिकसाटिकदायकेसुपि होतीति इदं ¶ अट्ठकथायं ‘‘इदं पन पकतिया वस्सिकसाटिकदायकेसुपि होतियेवा’’ति (पारा. अट्ठ. २.६२८) वचनतो विञ्ञायति.

८३१. ओवस्सापेतीति आकासतो पतितउदकेनेव कायं तेमेति, इमिना ‘‘घटादीहि ओसिञ्चितुं वट्टती’’ति दीपितं होति. ‘‘निब्बकोसम्बुना नहायितुं वट्टती’’ति गण्ठिपदेसु वुत्तं. सतिपि चीवरेति वस्सिकसाटिकाय सतियापि. ‘‘परियोसाने दुक्कट’’न्ति इमिना बिन्दुगणनायाति दीपेति. विवटङ्गणेति रुक्खादिना केनचि अनावटट्ठाने.

८३२. मासस्मिन्ति गिम्हानं पच्छिममासस्मिं.

८३३. ‘‘अच्छिन्नचीवरस्साति एतं वस्सिकसाटिकमेव सन्धाय वुत्त’’न्ति (पारा. अट्ठ. २.६३०) अट्ठकथायं वुत्तं. वस्सिकसाटिकं निवासेत्वा नहायन्तस्स चोरुपद्दवो आपदा नाम. न्हानकोट्ठकन्ति नहानत्थाय कतकोट्ठकं. ‘‘वापी’’ति इमिना पोक्खरणिजातस्सरादयो ¶ उपलक्खिता. न्हायन्तस्साति नग्गो हुत्वा नहायन्तस्साति पकरणतो लब्भति. ‘‘आकासतो पतितउदकेनेवा’’ति (पारा. अट्ठ. २.६२९) अट्ठकथायमेव वुत्तं.

८३४. क्रियन्ति अकाले परियेसनकरणअधिट्ठाननिवासनेहि आपज्जितब्बतो किरियं. कायेन च वाचाय च विञ्ञापनादिं करोन्तस्स कायकम्मं वचीकम्मं होति.

वस्सिकसाटिककथावण्णना.

८३५. ‘‘यो ¶ पन भिक्खु भिक्खुस्स सामं चीवरं दत्वा’’ति (पारा. ६३२) वचनतो सामन्ति एत्थ ‘‘भिक्खू’’ति च दत्वाति एत्थ ‘‘भिक्खुस्स’’इति च लब्भति. चीवरन्ति छन्नं चीवरानं अञ्ञतरं चीवरं विकप्पनुपगं पच्छिमं. ‘‘कुपितो अनत्तमनो अच्छिन्देय्या’’ति (पारा. ६३२) वचनतो अच्छिन्दन्तस्साति एत्थ ‘‘कुपितस्स अनत्तमनस्सा’’ति सेसो, कुपितस्स अनत्तमनस्स अच्छिन्दन्तस्स वा अच्छिन्दापेन्तस्स वाति अत्थो. तन्ति अत्तना दिन्नचीवरं. ‘‘सकसञ्ञाया’’ति इमिना पाराजिकाय अवत्थुभावं दीपेति.

८३६. तथाति एकायेव आपत्तीति दीपेति.

८३७. वत्थानन्ति चीवरानं. अस्साति भिक्खुस्स.

८४१. सङ्घाटिं गण्ह, उत्तरासङ्गं गण्हाति योजना.

८४२. विकप्पनुपगं पच्छिमन्ति एत्थ ‘‘चीवर’’न्ति लब्भति. आयामतो वड्ढकिहत्थं तिरियं तथा विदत्थिप्पमाणं वत्थखण्डं हेट्ठिमपरिच्छेदतो विकप्पनुपगं नाम. अञ्ञं किञ्चि परिक्खारन्ति योजना, अन्तमसो सुचिम्पीति वुत्तं होति. परं पुग्गलं. छिन्दापेन्तस्साति अच्छिन्दापेन्तस्स. कारितन्तस्स द्विकम्मकत्ता ‘‘पर’’न्ति च ‘‘परिक्खार’’न्ति च कम्मद्वयगहणं. अञ्ञन्ति परिक्खारविसेसनं. दुक्कटं वत्थुगणनाय, वचनगणनाय च.

८४४. एवन्ति ¶ यथा अनुपसम्पन्ने अनुपसम्पन्नसञ्ञिनो दुक्कटं, एवं अनुपसम्पन्ने…पे… वेमतिकस्सापि दुक्कटन्ति योजना. अच्छिन्दन्तस्साति एत्थ यथावुत्तं ‘‘अनुपसम्पन्ने’’ति इदं विभत्तिविपरिणामेन सामिवचनं कत्वा ‘‘दिन्न’’न्ति अज्झाहारेन सह योजेतब्बं, ‘‘चीवर’’न्ति पकरणतो ¶ लब्भति, अनुपसम्पन्नस्स दिन्नं चीवरं अच्छिन्दन्तस्साति वुत्तं होति.

८४५. सो वाति यस्स चीवरं दिन्नं, सो एव वा भिक्खु. तुट्ठो वा दुट्ठो वा सो देतीति योजना. विस्सासमेव वाति विस्सासं कत्वा गण्हतोति योजना.

८४६. एत्थाति इमस्मिं सिक्खापदे.

चीवरच्छिन्दनकथावण्णना.

८४७. विञ्ञापेत्वाति वत्थवायापनं सन्धाय याचित्वा. छब्बिधं सुत्तन्ति पदभाजने ‘‘खोमं कप्पासिकं कोसेय्यं कम्बलं साणं भङ्ग’’न्ति (पारा. ६३८) आगतं छप्पकारं सुत्तं. कम्बलन्ति एळकलोमसुत्तं. सानुलोमानि छप्पकारसुत्तानि हेट्ठा चीवरविनिच्छये वुत्तानुसारेन वेदितब्बानि. चीवरत्थं वत्थं ‘‘चीवर’’न्ति वुत्तं. तन्तवायेहीति कप्पियाकप्पियेहि पेसकारेहि. पोत्थकेसु ‘‘वायापेतुं न वट्टती’’ति पाठो दिस्सति, ‘‘सचे’’ति इमिना अयुज्जमानत्ता सो अपाठो. ‘‘वायापेति न वट्टती’’ति पाठो युज्जतीति सचे वायापेतीति योजना, अत्तनो अत्थाय यदि वायापेय्याति अत्थो.

८४८. तथा अकप्पियो. कीदिसोति आह ‘‘अञ्ञातकादिको’’ति. अञ्ञातकादिकोति अञ्ञातको आदि यस्स सो अञ्ञातकादिको. आदि-सद्देन अप्पवारितो गहितो. यो भिक्खु तन्तवायस्स अञ्ञातको, तेन अप्पवारितो च, तस्स अञ्ञातकादिको भिक्खुना विञ्ञत्तो सो तन्तवायो अकप्पियोति अत्थो.

८४९. अकप्पियेनाति ¶ विञ्ञापितेन. वायापेन्तस्साति एत्थ ‘‘पयोगे पयोगे दुक्कटं, पटिलाभेना’’ति सेसो. यथाह ‘‘वायापेति, पयोगे पयोगे दुक्कटं. पटिलाभेन निस्सग्गिय’’न्ति (पारा. ६३८).

८५०. कित्तके ¶ वीते निस्सग्गियं होतीति आह ‘‘विदत्थिमत्ते’’तिआदि. हत्थमत्तेति रतनमत्ते. पदभाजने ‘‘पटिलाभेन निस्सग्गिय’’न्ति वुत्तं, इध ‘‘वीते निस्सग्गिय’’न्ति कस्मा आहाति? अट्ठकथायं वुत्तत्ता. तत्थापि तथा कस्मा वुत्तन्ति? तदनन्तरं अत्तनो सन्तकत्ता वीतवीतट्ठानं पटिलद्धमेव होति, पदभाजनेपि इमिना अधिप्पायेन पटिलाभेन निस्सग्गियं वुत्तं, तस्मा याव चीवरं वड्ढति, ताव इमिना पमाणेन आपत्तियो वड्ढन्ति. फलकेपि चाति एत्थ फलकं नाम तुरिवीतट्ठानं, यत्थ संहरित्वा ठपेन्ति. फलके फलकेपि च निस्सग्गियं वुत्तन्ति योजना.

८५१. तेनेवाति विञ्ञत्ततन्तवायेनेव. कप्पियं सुत्तन्ति अविञ्ञत्तिया लद्धसुत्तं. कप्पियेन तन्तवायेन अकप्पियसुत्तं वायापेन्तस्स तथेव दुक्कटन्ति योजना.

८५२. एकन्तरिकतो वा कप्पियाकप्पियेहेव सुत्तेहि वीते दुक्कटन्ति योजना, अन्तरन्तरा अकप्पियसुत्तानं पसारणेन, वायनेन च दुक्कटं होतीति अत्थो. दीघतो वा तिरियतो वा कप्पियाकप्पियेहेव सुत्तेहि वीते दुक्कटन्ति योजना, दीघतो कप्पियसुत्तं पसारेत्वा तिरियं अकप्पियसुत्तेन वीते दुक्कटं होतीति अत्थो. वाग्गहणेन वुत्तविपरियायतोपि योजेतब्बं. दीघतो अकप्पियसुत्तं पसारेत्वा तिरियतो कप्पियसुत्तेन ¶ वीतेति अयमेत्थ विपरियायो. वीतेति एत्थ ‘‘फलके फलके’’ति अनुवत्तेतब्बं.

८५३. कप्पियाकप्पियेहि तन्तवायेहि कप्पियाकप्पियसुत्तं मिस्सेत्वा कते वीते फलके फलके तस्स भिक्खुस्स दुक्कटन्ति योजना. वेति निपातमत्तं, अथ वा वे तस्मिं कते वीतेति अत्थो.

८५४-५. ते कप्पियाकप्पियतन्तवाया परिच्छेदं दस्सेत्वा वारेनेव अकप्पियसुत्तं सचे विनन्तीति योजना. अकप्पियेन तन्तवायेन वीते. छन्दानुरक्खनत्थं ‘‘विते’’ति वुत्तं. पमाणस्मिन्ति विकप्पनुपगपच्छिमप्पमाणस्मिं. तदूनेति ततो विकप्पनुपगपच्छिमप्पमाणतो ऊने. इतरेनाति कप्पियतन्तवायेन. उभयत्थाति पमाणस्मिं, तदूने च दुक्कटं एवाति योजना.

८५६. सचे ¶ कप्पियाकप्पियतन्तवाया द्वेपि वेमं उभयकोटिया गहेत्वा एकतोव विनन्ति वाति योजना. तिरियं सुत्तं पवेसेत्वा येन आकोटेन्तो घनभावं सम्पादेन्ति, तं वेमं वुच्चति.

८५७. सब्बत्थ भेदेति कप्पियाकप्पियसुत्ततन्तवायेहि कते पमाणतदूनएकन्तरिकदीघतिरियप्पकारे सब्बत्थ वारभेदे. आपत्तिभेदोति अकप्पियसुत्तेहि आयामवित्थारतो अकप्पियतन्तवायेन वीतप्पदेसे पमाणयुत्ते पाचित्तियं, इतरत्र दुक्कटन्ति भेदो.

८५८. कप्पियो तन्तवायो नाम ञातको वा पवारितो वा कप्पियमूलेन पयोजितो वा.

८५९. ‘‘अनापत्ति ¶ चीवरं सिब्बेतुं, आयोगे, कायबन्धने, अंसबद्धके, पत्तत्थविकाय, परिस्सावने, ञातकानं, पवारितानं, अञ्ञस्सत्थाय, अत्तनो धनेना’’तिआदिकं (पारा. ६४०) अनापत्तिवारं दस्सेतुमाह ‘‘अनापत्ती’’तिआदि. इध निद्दिट्ठोव लक्खणेन अनिद्दिट्ठम्पि वेदितब्बं. एत्थ चीवरं सिब्बेतुं सुत्तं विञ्ञापेन्तस्स अनापत्तीति योजना. धनं नाम तण्डुलादि कप्पियवत्थु. ‘‘परिस्सावने’’तिआदीसु निमित्तत्थे भुम्मं, परिस्सावनादिनिमित्तं सुत्तञ्च तन्तवाये च विञ्ञापेन्तस्स अनापत्तीति वुत्तं होति.

सुत्तविञ्ञत्तिकथावण्णना.

८६०. अप्पवारितञ्ञातीनन्ति अप्पवारितानं अञ्ञातीनं, ‘‘कीदिसेन ते भन्ते चीवरेन अत्थो, कीदिसं ते चीवरं वायापेमी’’ति (पारा. ६४३) पदभाजने वुत्तनयेन अप्पवारितानं अञ्ञातीनन्ति अत्थो. समेच्चाति उपगन्त्वा. विकप्पन्ति विसिट्ठं कप्पं अधिकविधानं. आपज्जतीति करोति, ‘‘इदं खो आवुसो चीवरं मं उद्दिस्स विय्यति, आयतञ्च करोथ, वित्थतञ्च अप्पितञ्च सुवीतञ्च सुप्पवायितञ्च सुविलेखितञ्च सुवितच्छितञ्च करोथा’’तिआदिना (पारा. ६४२) नयेन दायकानं अधिप्पायतो अधिकतरआयतादिकरणत्थं विधानं करोतीति वुत्तं होति.

तत्थ ¶ आयतन्ति दीघं. वित्थतन्ति पुथुलं. अप्पितन्ति घनं. सुवीतन्ति सुट्ठु वीतं सब्बट्ठानेसु समं कत्वा वीतं. सुप्पवायितन्ति सुट्ठु पवायितं सब्बट्ठाने समं कत्वा तन्ते पसारितं. सुविलेखितन्ति लेखनिया सुट्ठु विलिखितं. सुवितच्छितन्ति कोच्छेन सुट्ठु वितच्छितं, सुविनिद्धोतन्ति अत्थो.

८६१. सुत्तवड्ढनप्पकारं ¶ दस्सेतुमाह ‘‘दीघायतप्पितत्थाया’’ति. तेन च पदभाजने ‘‘तस्स वचनेन आयतं वा वित्थतं वा अप्पितं वा करोति, पयोगे दुक्कटं, पटिलाभेन निस्सग्गियं होती’’ति (पारा. ६४३) एतं आयतादित्तयमेव वुत्तं. सुत्तवड्ढनके कतेति एत्थ अनन्तरं वत्तब्बेन ‘‘पयोगे दुक्कटं पटिलाभेना’’ति पाठसेसेन सह योजना कातब्बा, दायकेहि तुलयित्वा दिन्नप्पमाणतो सुत्तं वड्ढितुं तेन कतेन सब्बेनापि पयोगेन भिक्खुनो दुक्कटञ्च पटिलाभेन निस्सग्गियपाचित्तियञ्च होतीति अत्थो.

८६२. ञातकादीनं तन्तवायेसु चीवरे विकप्पं आपज्जन्तस्स अनापत्तिं विनिद्दिसेति योजना. अत्तनो धनेनाति एत्थ ‘‘पयोजितेसू’’ति सेसो, तन्तवायेसूति एतस्स विसेसनं. अत्तनो धनेन पयोजितेसु तन्तवायेसु चीवरे विकप्पं आपज्जन्तस्स अनापत्तिं विनिद्दिसेति योजना, अत्तनो सन्तकं कप्पियवत्थुं गहेत्वा विनन्तेसु विकप्पं आपज्जन्तस्साति अत्थो. अञ्ञस्सत्थाय विनन्तेसु विकप्पं आपज्जन्तस्साति सह पाठसेसेन योजना दट्ठब्बा.

८६३. महग्घं कत्तुकामिनो तन्तवायेहि अप्पग्घं वायापेन्तस्स अनापत्तिं विनिद्दिसेति योजना.

पेसकारकथावण्णना.

८६४. वस्संवुत्थे भिक्खू उद्दिस्साति पुरिमिकाय वस्सूपगते भिक्खू उद्दिसित्वा. पवारणाय पुब्बेव यं चीवरं दीयतीति सम्बन्धो. इदं वुत्तं होति – ‘‘दसाहानागतं कत्तिकतेमासिकपुण्णम’’न्ति ¶ (पारा. ६४८) पाळियं वुत्तं महापवारणाउपोसथदिवसस्स पुरेतरमेव पुब्बकत्तिकमासस्स जुण्हपक्खपञ्चमियं यं चीवरं ‘‘अच्चेकचीवरं नाम सेनाय वा गन्तुकामो होती’’तिआदिना (पारा. ६४९) पदभाजनागतेसु गमिकगिलानगब्भिनिअभिनवुप्पन्नसद्धादीसु ¶ अञ्ञतरेन दूतं पेसेत्वा वा अत्तना वा आगन्त्वा ‘‘वस्सावासिकं दम्मी’’ति वत्वा दिय्यतीति. तं होतच्चेकचीवरन्ति तं अच्चायिकचीवरं नाम होति.

८६५. पुरे पवारणायेवाति महापवारणाय पुरेतरमेव पञ्चमितो पट्ठाय यस्मिं किस्मिञ्चि दिवसे. भाजेत्वा यदि गय्हतीति एत्थ ‘‘येना’’ति च न कातब्बोति एत्थ ‘‘तेना’’ति च करोति चेति एत्थ ‘‘सो वस्सच्छेद’’न्ति च सामत्थिया लब्भति. भाजेत्वा यदि येन गय्हति, तेन वस्सच्छेदो न कातब्बो. सो वस्सच्छेदं करोति चे, तं भाजेत्वा गहितचीवरं सङ्घिकं होतीति योजना, छिन्नवस्सेन तं चीवरं सङ्घस्सेव दातब्बन्ति वुत्तं होति.

८६६. ‘‘अन्तोसमयमेवा’’ति इदं ‘‘अधिट्ठेती’’तिआदीहि पदेहि पच्चेकं योजेतब्बं. पदभाजने ‘‘चीवरकालसमयो नाम अनत्थते कथिने वस्सानस्स पच्छिमो मासो, अत्थते कथिने पञ्चमासा’’ति वुत्तसमयब्भन्तरेयेव तं अच्चेकचीवरं.

८६७. कथिने तु अनत्थतेति यस्मिं कथिनं अनत्थतं, तस्मिं विहारेति वुत्तं होति. तु-सद्दो विसेसत्थजोतको. अनधिट्ठाय अविकप्पेत्वा परिहरीयति एत्थ अच्चेकचीवरन्ति परिहारो, मासो, एको च सो मासो ¶ चाति एकमासो, पुब्बकत्तिकमासस्स पाटिपददिवसतो पट्ठाय याव अपरकत्तिकमासस्स पुण्णमी, अयं चीवरकालसमयोति वुत्तो मासो. दसन्नं अहानं समाहारो दसाहं, तं परमं अधिकं एतस्साति दसाहपरमो, मासो. ‘‘दसाहानागतं कत्तिकतेमासिकपुण्णम’’न्ति (पारा. ६४८) पाळियं वुत्तपुब्बकत्तिकपुण्णमिपरियन्तदसाहाधिकोति अत्थो. कथिने अनत्थते तु दसाहपरमो एकमासोव तस्स अच्चायिकवत्थस्स परिहारो मतोति योजना.

८६८. अत्थते कथिनेति कथिनत्थतविहारेति वुत्तं होति. तस्स अच्चायिकवत्थस्साति सम्बन्धो. दसाहपरमा पञ्च मासाति सम्बन्धो. अनत्थतकथिने विहारे यथावुत्तचीवरकालसमयसङ्खातवस्सानावसानमासो च कथिनुद्धारदिवससङ्खातपच्छिमकत्तिककाळपक्खपाटिपदतो याव फग्गुनमासपुण्णमी, ताव हेमन्ता चत्तारो मासा चाति पञ्च मासा. पकासिताति ‘‘अनत्थते कथिने वस्सानस्स पच्छिमो मासो, अत्थते कथिने पञ्च मासा’’ति ¶ (पारा. ६४९) दीपिता. दसाहपरमाति वुत्तत्थोयेव. अत्थते कथिने दसाहपरमा पञ्च मासा तस्स अच्चायिकवत्थस्स परिहारो कालोति मुनिन्देन पकासिताति योजना.

अयमुभयत्थ वुत्ता दसाहपरमता अट्ठकथायं ‘‘अनत्थते कथिने एकादसदिवसाधिको मासो, अत्थते कथिने एकादसदिवसाधिका पञ्च मासा’’ति (पारा. अट्ठ. २.६५०) वुत्तपाठेन यथा न विरुज्झति, तथा विचारेत्वा गहेतब्बा. एवञ्हि पाठे सति न विरुज्झति –

‘‘तस्सच्चायिकवत्थस्स ¶ , कथिने तु अनत्थते;

परिहारेकमासेका-दसाहपरमो मतो.

अत्थते कथिने तस्स, पञ्च मासा पकासिता;

परिहारो दिनेनेका-दसाहपरमा पना’’ति.

८६९. पठमेन कथिनेनाति योजना. ‘‘अक्रियं अचित्त’’न्ति पदच्छेदो. अक्रियन्ति अन्तोसमये अधिट्ठानादिअकरणं.

अच्चेकचीवरकथावण्णना.

८७०-१. भिक्खूति सासङ्कसम्मते सप्पटिभये आरञ्ञकसेनासने वसन्तं भिक्खुमाह. यथाह ‘‘यानि खो पन तानि आरञ्ञकानि सेनासनानि सासङ्कसम्मतानि सप्पटिभयानि, तथारूपेसु भिक्खु सेनासनेसु विहरन्तो’’ति (पारा. ६५३). पुब्बकत्तिकपुण्णमं वसित्वाति सम्बन्धो. पुब्बकत्तिकपुण्णमा नाम अस्सयुजमासस्स जुण्हपक्खपन्नरसी, एत्थ पन सहचरियनयेन तदुपलक्खिता पुरिमिका तयो वस्सानमासा वुच्चन्ति. पुण्णमन्ति एत्थ वासकिरियाय अच्चन्तसंयोगे उपयोगवचनं. पुरिमिकाय वस्सं उपगन्त्वा अच्छिन्नवस्सो हुत्वा तयो मासे वसित्वाति अत्थो. यथाह अट्ठकथायं ‘‘यस्मा पन यो वस्सं उपगन्त्वा याव पठमकत्तिकपुण्णमं वसती’’ति (पारा. अट्ठ. २.६५३-६५४).

‘‘चीवर’’न्ति तिण्णं चीवरानं अञ्ञतरं वुच्चति. गामे ठपेत्वाति सम्बन्धो, एत्थ ‘‘कत्तिकपुण्णम’’न्ति ¶ च ‘‘आकङ्खमानो’’ति च सेसो, अपरकत्तिकमासे कत्तिकचोरभयेन चीवरं पटिसामेतुकामो भिक्खु आरञ्ञकसेनासनस्स सामन्ता गोचरगामे निक्खिपित्वाति अत्थो. यथाह ‘‘उपवस्सं ¶ खो पन कत्तिकपुण्णमं…पे… आकङ्खमानो तिण्णं चीवरानं अञ्ञतरं चीवरं अन्तरघरे निक्खिपेय्या’’ति (पारा. ६५३).

‘‘समन्ता गोचरगामे’’ति इदं ‘‘अन्तरघरे निक्खिपेय्याति समन्ता गोचरगामे निक्खिपेय्या’’ति (पारा. ६५४) पदभाजने वुत्तत्ता वुत्तं. ‘‘अपरकत्तिकमासे’’ति च ‘‘कत्तिकपुण्णमन्ति कत्तिकचातुमासिनी वुच्चती’’ति (पारा. ६५४) पदभाजनियवसेन वुत्तं. इधापि हि ‘‘कत्तिकपुण्णम’’न्ति अपरकत्तिकजुण्हपक्खपन्नरसिया वुच्चमानायापि सहचरियनयेन तंसहचरितो चतुत्थो मासो वुत्तो.

एत्तावता पुरिमिकाय वस्सं उपगन्त्वा महापवारणाय पवारेत्वा वुत्तलक्खणे आरञ्ञकसेनासने वसन्तस्स आरञ्ञकस्स भिक्खुनो पच्छिमकत्तिकमासे कत्तिकचोरभये सति तिण्णं चीवरानं अञ्ञतरं गोचरगामे ठपेत्वा आरञ्ञकङ्गं पूरयतो चीवरेन विप्पवासो तस्मिं मासे न होतीति अनुञ्ञातभावो दीपितो. तदेव पकासेतुं निक्खेपोपायसन्दस्सनमुखेन वक्खति ‘‘कत्तिकेयेव मासस्मिं…पे… वट्टती’’ति.

इदानि अस्मिंयेव मासे ततो अञ्ञत्थ तस्स भिक्खुनो केनचि करणीयेन गच्छतो गामे ठपितेन तेन चीवरेन विप्पवसतो निद्दोसभावं अनुजानन्तेन भगवता ‘‘सिया च तस्स भिक्खुनो…पे… तेन चीवरेन विप्पवसितब्ब’’न्ति (पारा. ६५३) वुत्तमत्थं दस्सेतुमाह ‘‘पच्चये…पे… सम्मुति’’न्ति. पच्चये सति तादिसेति ‘‘सिया पच्चयो, सिया करणीय’’न्ति (पारा. ६५४) वचनतो तादिसे किच्चे सतीति अत्थो. छारत्तपरमन्ति छ रत्तियो परमा यस्स वासकम्मस्स तं छारत्तपरमं, किरियाविसेसनं, छारत्तपरमं वासकम्मं कातब्बन्ति अत्थो. तेन विना वसितब्बन्ति गामे निक्खित्तेन तेन चीवरेन विना तम्हा आवासा अञ्ञत्थ वसितब्बं. तदेव ¶ पाकटं कातुं वक्खति ‘‘अञ्ञत्थेव वसन्तस्स, छारत्तपरमं मत’’न्ति.

ततोति छारत्ततो. उत्तरि वसतोति सत्तमं अरुणं उट्ठापेत्वा वसन्तस्साति अत्थो. यथाह ¶ ‘‘ततो चे उत्तरि विप्पवसेय्याति सत्तमे अरुणुग्गमने निस्सग्गिय’’न्ति (पारा. ६५४). दोसोति निस्सग्गियपाचित्तियं. ‘‘विना सङ्घस्स सम्मुति’’न्ति इमिना किं वुत्तं होति? उदोसितसिक्खापदे अनुपञ्ञत्तिं कत्वा कोसम्बियं गिलानभिक्खुनो ‘‘अनुजानामि भिक्खवे गिलानस्स भिक्खुनो तिचीवरेन अविप्पवाससम्मुतिं दातु’’न्ति (पारा. ४७३) अनुञ्ञातत्ता गिलानस्स भिक्खुनो सङ्घेन ञत्तिदुतियाय कम्मवाचाय पुरिममेव या अविप्पवाससम्मुति दिन्ना, तं विनाति वुत्तं होति. तेन लद्धसम्मुतिकेन याव रोगो वूपसम्मति, ताव चिरम्पि तेन चीवरेन विना वसितुं वट्टतीति अधिप्पायो. यथाह अट्ठकथायं ‘‘अञ्ञत्र भिक्खुसम्मुतियाति या उदोसितसिक्खापदे कोसम्बकसम्मुति अनुञ्ञाता, तस्सा सम्मुतिया अञ्ञत्र. सचे सा लद्धा होति, छारत्तातिरेकम्पि विप्पवसितुं वट्टती’’ति (पारा. अट्ठ. २.६५३-६५४).

८७२-३. चीवरनिक्खेपं दस्सेतुमाह ‘‘कत्तिकेयेव…पे… पकासितो’’ति. कत्तिकेयेव मासस्मिन्ति चतुन्नं वस्सानानं मासानं पच्छिमे कत्तिकमासेयेव इदमेकङ्गं. पठमाय पवारितोति दुतियमङ्गं, इध पठमाय वस्सूपनायिकाय वस्सं उपगन्त्वा पवारितोति योजना, महापवारणाय पवारितोति वुत्तं होति. यथाह अट्ठकथायं ‘‘पुरिमिकाय उपगन्त्वा महापवारणाय पवारितो होती’’ति (पारा. अट्ठ. २.६५३-६५४). पच्छिमेन पमाणेन युत्तेति ततियमङ्गं. सेनासनेति एतस्स विसेसनं. इह आरञ्ञकसेनासनस्स पच्छिमप्पमाणं ¶ नाम पाकारेन वा वतिया वा परिखाय वा परिक्खित्तस्स गामस्स इन्दखीलसङ्खातगामद्वारकोट्ठकुम्मारतो वा अपरिक्खित्तस्स गामस्स परिक्खेपारहट्ठानसङ्खाते परियन्तगेहस्स उपचारे ठितस्स थाममज्झिमस्स पुरिसस्स बलप्पमाणेन विस्सट्ठलेड्डुपातद्वयतो वा पट्ठाय परिक्खित्तस्स विहारस्स सपरिक्खेपं वा अपरिक्खित्तस्स विहारस्स यस्सं दिसायं गामो होति, तत्थ गामपरियन्तसेनासनं वा चेतियं वा बोधिं वा अवधिं कत्वा विहारगमनीयेन पकतिमग्गेन विदत्थिगम्भीरं आरोपितेन आचरियधनुना पमितपञ्चधनुसतपमाणदूरन्ति सङ्खेपतो गहेतब्बं.

सासङ्कसम्मतेति चतुत्थमङ्गं, ‘‘इह सप्पटिभये’’ति सेसो. ‘‘सासङ्कसम्मतानि सप्पटिभयानी’’ति (पारा. ६५३) हि पाळि. इदं द्वयम्पि ‘‘सेनासने’’ति एतस्स विसेसनं. आरामआरामूपचारेसु चोरानं निसिन्नसयितट्ठितभुत्तपीतट्ठानादीनं दिस्समानताय आसङ्कासहिते तत्थेव आरामादीसु पहटमारितविलुत्तमनुस्सानं दिस्समानताय विसेसेन सहभयताय ¶ सप्पटिभये आरञ्ञके सेनासनेति अत्थो. वसन्तो भिक्खु. वसन्तोवाति एत्थ एवकारो अट्ठानप्पयुत्तो. तस्मा ततो आनेत्वा चतुरङ्गसमायोगे एवाति योजेतब्बो. चतुरङ्गसमायोगे एवाति यथावुत्तानं चतुन्नं अङ्गानं समायोगे सन्निपाते सति एव. एत्थ एवकारेन तस्स अङ्गस्स अभावे अलब्भमानतं दीपेति. पकासितोति ‘‘तत्रायं अङ्गसम्पत्ती’’तिआदिकाय (पारा. अट्ठ. २.६५३-६५४) अट्ठकथाय वुत्तो.

८७४. तं चीवरं. मासमेकन्ति वस्सानस्स पच्छिममाससङ्खातं एकं मासं. यो गामो सचे पुरिमबद्धाय अविप्पवाससीमाय ¶ अन्तो होति, तत्थ मासतो अतिरेकम्पि ठपेतुं वट्टतीति (वजिर. टी. पाराजिक ६५३ अत्थतो समानं) वजिरबुद्धित्थेरेन वुत्तं.

८७५. अञ्ञत्थेवाति यस्स आरञ्ञकसेनासनस्स गोचरगामे चीवरं निक्खित्तं, ततो आरञ्ञकसेनासनतो बहि एव. अयं अधिप्पायोति ‘‘यं गाम’’न्तिआदिकाय दियड्ढगाथाय पटिपादितत्थद्वयसङ्खातो अधिप्पायो. अस्साति सासङ्कसिक्खापदस्स. एवं इमिना सिक्खापदेन ‘‘चीवरेन विना कत्तिकमासे अरञ्ञे वसेय्या’’ति अनुञ्ञातत्ता ‘‘छारत्तपरमं तेन भिक्खुना तेन चीवरेन विप्पवसितब्ब’’न्ति (पारा. ६५३) इमिना गोचरगामे तं ठपेत्वा तस्मिं आरञ्ञकावासे वसित्वा केनचि करणीयेन ततो आवासतो गन्त्वा बहि वसतो दिवसपरिच्छेदस्स विञ्ञायमानत्तायेवाह ‘‘पटिच्छन्नो पकासितो’’ति.

८७६. ‘‘सचे गोचरगामतो पुरत्थिमाय दिसाय सेनासनं, अयञ्च पच्छिमं दिसं गतो होती’’तिआदिना (पारा. अट्ठ. २.६५६) अट्ठकथायं कथितनियामेन विनिच्छयं दस्सेतुमाह ‘‘सेनासनमथागन्त्वा’’तिआदि. सेनासनन्ति अत्तना निवुत्थं आरञ्ञकसेनासनं. आगन्त्वाति बहि गतट्ठानतो आगन्त्वा. गोचरगामे चीवरं निक्खिपित्वा ततो पुरत्थिमाय दिसाय आरञ्ञकसेनासने विहरतो विहारा निक्खम्म ततो गोचरगामतो पच्छिमदिसाय दूरट्ठानं गतस्स आगतट्ठानतो तं सेनासनं आगन्त्वा विदूरत्ता सत्तमं अरुणं उट्ठापेतुं असक्कोन्तस्स भिक्खुनो किं विहितन्ति अयमेत्थ योजना.

८७७. गामसीमम्पि ¶ वागन्त्वाति यत्थ चीवरं निक्खित्तं, तं गामसीमम्पि पुरारुणायेव आगन्त्वा. यत्थ कत्थचीति (पारा. अट्ठ. २.६५६) सभादेवालयद्वारकोट्ठकादीसु यत्थ कत्थचि कप्पियट्ठाने ¶ . ‘‘यत्थ कत्थची’’ति सामञ्ञेन वुत्तत्ता तस्सा गामसीमाय अन्तो आरञ्ञकङ्गारक्खनारहं दूरट्ठानं लद्धं चे, अङ्गभेदं अकत्वा तत्थ अरुणं उट्ठापेतब्बं. धुतङ्गे विज्जमानेपि आपत्तिं अनापज्जितुं अन्तोगामेपि अरुणं उट्ठापेत्वा चीवरपवत्तियेव ञातब्बा. यथाह अट्ठकथायं ‘‘गामसीमम्पि ओक्कमित्वा सभायं वा यत्थ कत्थचि वा वसित्वा चीवरप्पवत्तिं ञत्वा पक्कमितुं वट्टती’’ति (पारा. अट्ठ. २.६५६).

८७८. एवञ्चापि असक्कोन्तोति अङ्गभेदं अकत्वा, कत्वा वा अन्तोगामसीमाय अरुणं उट्ठापेतुम्पि गन्तुं असक्कोन्तो. ञत्वाति अत्तनो चीवरस्स ठपितट्ठानं सल्लक्खेत्वा. तत्थेवाति एत्थ ‘‘ठितो’’ति लब्भति. खिप्पन्ति सीघं, पुरारुणाति वुत्तं होति. अतिरेके ठानेति योजना, यथाह अट्ठकथायं ‘‘अतिरेकचीवरट्ठाने ठस्सती’’ति (पारा. अट्ठ. २.६५६), ‘‘अतिरेकचीवरट्ठाने तिट्ठती’’ति चिन्तेत्वाति अत्थो.

८७९. विस्सज्जेतीति सत्तमअरुणुट्ठानतो पुरेतरमेव अञ्ञस्स देति. उपरिपि एवमेव वत्तब्बं.

८८०. सासङ्कसम्मते एवंनामके सिक्खापदे समुट्ठानादयो सब्बे तेन दुतियेन कथिनेन समा इति मुनिन्देन मता अनुमता अनुञ्ञाताति योजना.

सासङ्ककथावण्णना.

८८१. जानन्ति ‘‘सङ्घस्स देमा’’ति वचनेन परिणामितभावं येन केनचि आकारेन जानन्तो. यथाह पदभाजने ¶ ‘‘सामं वा जानाती’’तिआदि (पारा. ६५९). परिणतन्ति एत्थ पदभाजने ‘‘परिणतं नाम ‘दस्साम करिस्सामा’ति वाचा भिन्ना होती’’ति वुत्तनियामेन सङ्घस्स परिणतन्ति अत्थो. लाभन्ति लभितब्बं चीवरादि यं किञ्चि. यथाह ‘‘लाभो नाम चीवरपिण्डपातसेनासनगिलानपच्चयभेसज्जपरिक्खारा, अन्तमसो चुण्णपिण्डोपि दन्तकट्ठम्पि दसिकसुत्तम्पी’’ति. अत्तनो परिणामेय्याति ‘‘बहू आवुसो सङ्घस्स दायका, बहू सङ्घस्स भत्ता, मयं तुम्हे निस्साय तुम्हे सम्पस्सन्ता इध विहराम. तुम्हे चे अम्हाकं न दस्सथ, अथ को चरहि अम्हाकं दस्सति. देथावुसो अम्हाकं इमानि चीवरानी’’ति (पारा. ६५७) पाळिया ¶ आगतनयेन अत्तनो परिणामेय्याति वुत्तं होति. तस्स निस्सग्गियन्ति एत्थ ‘‘पयोगे दुक्कटं, पटिलाभेना’’ति सेसो. निस्सग्गियन्ति इदं परिणते परिणतसञ्ञिं सन्धाय वुत्तं. वेमतिकस्स पन दुक्कटं होति. यथाह ‘‘परिणते वेमतिको अत्तनो परिणामेति, आपत्ति दुक्कटस्सा’’ति. अपरिणतसञ्ञिनो अनापत्ति. यथाह ‘‘परिणते अपरिणतसञ्ञी अत्तनो परिणामेति, अनापत्ती’’ति.

८८२. ‘‘अञ्ञस्स देही’’ति सचे परिणामेतीति तथा सङ्घस्स परिणतभावं जानन्तो ‘‘अञ्ञस्स देही’’ति यदि परिणामेति. सुद्धिकं पाचित्तियन्ति निस्सज्जितब्बवत्थुरहितं केवलं पाचित्तियमत्तन्ति अत्थो. सुद्धचित्तेनाति सवासनानवसेसकिलेसप्पहानेन परिसुद्धचित्तेन भगवता. पाचित्तियमुदीरितन्ति पाचित्तियेसु अट्ठमस्स सहधम्मिकवग्गस्स अवसाने ‘‘यो पन भिक्खु जानं सङ्घिकं लाभं परिणतं पुग्गलस्स परिणामेय्य, पाचित्तिय’’न्ति (पाचि. ४९०) देसितं.

८८३. एकं ¶ चीवरन्ति सङ्घस्स परिणतचीवरतो एकं चीवरं. चीवरं वाति एत्थ वा-सद्दो पच्चयन्तरविकप्पत्थो. वा पनाति एत्थ वा-सद्दो अत्थविकप्पत्थो. एकं चीवरं वा अञ्ञं वा पच्चयं परस्स, एकं पन अत्तनो वा परिणामेय्य चेति योजना. सद्धिन्ति एकतो, एकक्खणेति वुत्तं होति. द्वे पाचित्तियो सद्धिं सियुन्ति योजना, अञ्ञस्स परिणामनेन सुद्धपाचित्तियञ्च अत्तनो परिणामनेन निस्सग्गियपाचित्तियञ्चाति द्वे पाचित्तियो एकक्खणे होन्तीति अत्थो.

८८४. परिणामेत्वा ठपिते विनिच्छयं दस्सेत्वा परिच्चजित्वा दिन्ने विनिच्छयं दस्सेतुमाह ‘‘सङ्घस्सा’’तिआदि. ‘‘पराजयो’’ति इदं पादप्पहोनकं वत्थुं सन्धाय वुत्तं. यथावत्थुवसेन पन दुक्कटथुल्लच्चयापि वत्तब्बा.

८८५. अञ्ञस्स चेतियस्स पोणं परिणतं अञ्ञस्स चेतियस्स वा सङ्घस्स वा पुग्गलस्स वापि पन परिणामेय्याति योजना. सङ्घस्स पुग्गलस्साति पदद्वयेपि एवमेव योजेतब्बं. यथाह ‘‘सङ्घस्स परिणतं अञ्ञसङ्घस्स वा चेतियस्स वा पुग्गलस्स वा परिणामेति ¶ , आपत्ति दुक्कटस्सा’’तिआदि (पाचि. ४९२). अञ्ञस्स पुग्गलस्स पोणं अञ्ञस्स पुग्गलस्स परिणामेय्याति.

८८६. इमस्स सब्बसत्तविसयतं दस्सेतुमाह ‘‘यो पना’’तिआदि.

८८७. इदं परिणतसिक्खापदं. तिसमुट्ठानन्ति कायचित्तवाचाचित्तकायवाचाचित्तसङ्खातेहि तीहि सचित्तकसमुट्ठानेहि समुट्ठानतो तिसमुट्ठानं. परिणामनपच्चया आपज्जितब्बतो क्रियं. सङ्घादीनं परिणतन्तिसञ्ञाय अभावेन ¶ विमुच्चनतो सञ्ञाविमोक्खं. कायविञ्ञत्तिवचीविञ्ञत्तीहि परिणामेतब्बतो कायकम्मं वचीकम्मं.

परिणतकथावण्णना.

पत्तवग्गो ततियो.

८८८. ये इमं विनिच्छयं तरन्ति, ते पञ्ञत्तिमहासमुद्दं तरन्तीति योजना. पञ्ञत्तिसङ्खातं विनयपिटकमेव महासमुद्दो वियाति पञ्ञत्तिमहासमुद्दो, तं. एवं समुदायं दस्सेत्वा तदवयवे दस्सेतुमाह ‘‘नेका’’तिआदि. नेकानि नानप्पकारानि वत्तानि सेनासनवत्तादीनि खन्धकागतानि उग्गा उत्तुङ्गा तरङ्गमाला महावीचिपरम्परा यस्साति विग्गहो, नानप्पकारखन्धकवत्तसङ्खातमहातरङ्गपरम्पराय सज्जितन्ति अत्थो. सीलं पातिमोक्खसंवरादिकमेव अन्तो वेलावलयो यस्स सो सीलन्तो, तं, पातिमोक्खसंवरसीलादिचतुपारिसुद्धिसीलमेव पटिपादेतब्बताय अन्तं वेलावलयभूतन्ति अत्थो. आपत्तियो सत्तापत्तिक्खन्धा, सीलाचारदिट्ठिआजीवविपत्तियो च गाहका मकरादयो यस्साति विग्गहो, सीलाचाराजीवदिट्ठिसम्पत्तिसङ्खातमुदुसत्तनासकआपत्तिविपत्तिसङ्खा- तमातङ्गमकरादिचण्डसत्तवन्तन्ति अत्थो. एवं अयं गाथा समुदायावयवानं सब्बेसमेव रूपकालङ्कारेन विरचिताति दट्ठब्बा.

इति विनयत्थसारसन्दीपनिया

विनयविनिच्छयवण्णनाय

निस्सग्गियकथावण्णना निट्ठिता.

पाचित्तियकथावण्णना

८८९. एवं ¶ नातिवित्थारसङ्खेपतो निस्सग्गियविनिच्छयं दस्सेत्वा इदानि तदनन्तरं निद्दिट्ठस्स पाचित्तियकण्डस्स विनिच्छयं ¶ दस्सेतुं ‘‘सम्पजानमुसावादे’’तिआदि आरद्धं. सम्पजानमुसावादेति अत्तनो वचनस्स मुसाभावं ञत्वा, अदिट्ठं ‘‘दिट्ठ’’न्तिआदिना नयेन मुसावादे सम्पजानन्तस्स मुसाभणनेतिपि अत्थो गहेतब्बो. यथाह अट्ठकथायं ‘‘जानित्वा जानन्तस्स च मुसाभणने’’ति (पाचि. अट्ठ. २). ‘‘मुसावादे’’ति हि निमित्तत्थे भुम्मं, मुसावादनिमित्तन्ति अत्थो.

दवा भणन्तस्साति योजना. अनुपपरिक्खित्वा वेगेन दिट्ठम्पि ‘‘अदिट्ठं मे’’ति वदन्तस्साति अत्थो. यथाह ‘‘दवा भणति नाम सहसा भणती’’ति पदभाजनीअट्ठकथायं ‘‘सहसा भणतीति अवीमंसित्वा अनुपधारेत्वा वेगेन दिट्ठम्पि ‘अदिट्ठं मे’ति भणती’’ति (पाचि. अट्ठ. ११). रवा भणन्तस्साति ‘‘चीवर’’न्ति वत्तुकामस्स ‘‘चीर’’न्ति वचनं विय मन्दत्ता मोमूहत्ता ‘‘अञ्ञं भणिस्सामी’’ति अञ्ञं भणन्तस्स. यथाह ‘‘रवा भणति नाम ‘अञ्ञं भणिस्सामी’ति अञ्ञं भणती’’ति.

८९०. अञ्ञत्थाति चतुत्थपाराजिकादीसु. अत्तना अलद्धं उत्तरिमनुस्सधम्मं ‘‘लद्धं मया’’ति मुसा यस्स भणति, तेन तङ्खणमेव सुत्वा तदत्थे ञाते पाराजिकस्स, अञ्ञाते कालन्तरेन ञाते च परियायवचने च ञाते थुल्लच्चयस्स, परियायवचने अविञ्ञाते दुक्कटस्स, दुट्ठदोससिक्खापदे पाराजिकं अनापन्नस्स ‘‘आपन्नो’’ति मुसाभणने सङ्घादिसेसस्स, ओमसवादसिक्खापदे दुब्भासितस्स च वुत्तत्ता आह ‘‘मुसावादस्स कारणा पञ्च आपत्तियो’’ति. इमाय पाचित्तिया सद्धिं छ आपत्तिक्खन्धा होन्ति.

सम्पजानमुसावादकथावण्णना.

८९१-३. वुत्तेसु ¶ जातिआदीसु दससु अक्कोसवत्थूसूति योजना, पदभाजने वुत्तेसु जातिनामगोत्तकम्मसिप्पआबाधलिङ्गकिलेसआपत्तिअक्कोसानं वसेन दससु अक्कोसवत्थूसूति अत्थो ¶ . तेसु किलेसं विना सब्बेते हीनुक्कट्ठवसेन द्विप्पकारा होन्ति. यथाह पदभाजने ‘‘जाति नाम द्वे जातियो हीना च जाति उक्कट्ठा च जाती’’तिआदि.

तत्थ चण्डालादिजाति हीना, खत्तियब्राह्मणजातियो उक्कट्ठा. नामेसु अवकण्णकजवकण्णकादिनामानि दासनामत्ता हीनानि, बुद्धरक्खितादिनामानि उक्कट्ठानि. कोसियादिगोत्तं हीनं, गोतमादिगोत्तं उक्कट्ठं. कम्मेसु वड्ढकिमणिकारादिकम्मानि हीनानि, कसिवाणिज्जागोरक्खकम्मानि उक्कट्ठानि. सिप्पेसु नळकारकुम्भकारादिसिप्पं हीनं, मुद्दागणनादिसिप्पं उक्कट्ठं. आबाधेसु सब्बेपि आबाधा हीना, अपिच मधुमेहो पीळाजनकत्ताभावा उक्कट्ठो. लिङ्गेसु अतिदीघतादयो हीना, नातिदीघतादयो उक्कट्ठा. सब्बेपि किलेसा हीना. सब्बापत्तियोपि हीना, अपिच सोतापत्तिसमापत्ति उक्कट्ठा. अक्कोसेसु ‘‘ओट्ठोसि मेण्डोसि गोणोसी’’तिआदिको हीनो, ‘‘पण्डितोसि ब्यत्तोसी’’तिआदिको उक्कट्ठो.

अञ्ञत्रञ्ञापदेसेनाति परियायकथनेन विना. ओमसन्तस्साति वचनपतोदेन ओविज्झन्तस्स. सम्बुद्धेन पकासिताति ‘‘चण्डालोसि वेनोसि नेसादोसि रथकारोसि पुक्कुसोसी’ति भणति, आपत्ति वाचाय वाचाय पाचित्तियस्सा’’ति सामं सब्बधम्मावबोधतो ‘‘सम्बुद्धो’’ति पञ्ञातेन भगवता देसिता.

८९४. तेहेवाति ¶ जातिआदीहि अक्कोसवत्थूहेव. अञ्ञापदेसेन भूतेन वा…पे… आपन्नमेव वा अनुपसम्पन्नं अक्कोसन्तस्स दुक्कटं सम्बुद्धेन पकासितन्ति सम्बन्धो. इध भूताभूतपदानि तेहीति अपेक्खित्वा बहुवचनन्तानि योजेतब्बानि. एतेन ‘‘सन्ति इधेकच्चे’’तिआदिदुतियवारत्थं (पाचि. २६) दस्सेन्तेन दुक्कटसाधनत्थेन तदेककारियं ततियं येनूनवारञ्च चतुत्थं न मयन्तिआदिवारञ्च सङ्गहितन्ति दट्ठब्बं. यथाह अट्ठकथायं ‘‘सन्ति इधेकच्चे’ति वारे पन परिहरित्वा वुत्तभावेन दुक्कटं. एसेव नयो ‘येनून…पे… न मय’न्ति वारेसुपी’’ति (पाचि. अट्ठ. २६).

पाळिमुत्तपदेहिपीति एत्थापि तथेव ‘‘भूतेन वा’’तिआदीनि पदानि सम्बन्धितब्बानि. ‘‘चोरोसि, गण्ठिभेदकोसी’’तिआदि पाळिमुत्तपदं नाम. सब्बत्थाति सब्बेसु चतूसु वारेसु, पाळिमुत्तपदेसु ¶ च. वुत्तञ्हि ‘‘अनुपसम्पन्ने पन चतूसुपि वारेसु दुक्कटमेव. ‘चोरोसि, गण्ठिभेदकोसी’तिआदिवचनेहि पन उपसम्पन्नेपि अनुपसम्पन्नेपि सब्बवारेसु दुक्कटमेवा’’ति (पाचि. अट्ठ. २६). ‘‘अनुपसम्पन्न’’न्ति इमिना ‘‘इमस्मिञ्च सिक्खापदे ठपेत्वा भिक्खुं भिक्खुनिआदयो सब्बे सत्ता अनुपसम्पन्नट्ठाने ठिता’’ति (पाचि. अट्ठ. २६) अट्ठकथायं वुत्ता अनुपसम्पन्ना सङ्गहिता. तेनेवेत्थापि वक्खति ‘‘पविट्ठानुपसम्पन्नट्ठाने इध च भिक्खुनी’’ति.

८९५. दवकम्यताति एत्थ ‘‘पटिसङ्खा योनिसो’’तिआदीसु (म. नि. १.२२, २३, ४२२; अ. नि. ६.५८; ९.९; महानि. २०६; विभ. ५१८) विय य-कारलोपो. सब्बत्थाति सब्बेसु वुत्तपाचित्तियवत्थूसु च दुक्कटवत्थूसु चाति सब्बत्थेव. दुब्भासितमुदीरितन्ति ‘‘चण्डालोसि…पे… पुक्कुसोसी’ति भणति, आपत्ति ¶ वाचाय वाचाय दुब्भासितस्सा’’ति (पाचि. ३२) वुत्तन्ति अत्थो. परम्मुखा पन पाचित्तियवत्थूहि च दुक्कटवत्थूहि च अक्कोसने दुक्कटमेव. तथा दवकम्यताय परम्मुखा वदन्तस्सापि दुब्भासितमेवाति आचरिया वदन्ति.

८९६-७. अत्थं पुरक्खत्वा वदतो भिक्खुस्स अनापत्तीति योजना. धम्मो नाम ‘‘चण्डालोसी’’तिआदिपाळियेव. यथाह अट्ठकथायं ‘‘पाळिं वाचेन्तो धम्मपुरेक्खारो’’ति (पाचि. अट्ठ. ३५). अनुसासनी नाम ‘‘इदानिपि चण्डालोसि, मा पापधम्मं अकासि, मा तमो तमपरायनो अहोसी’’तिआदिना (पाचि. अट्ठ. ३५) नयेन अट्ठकथायं वुत्तसरूपायेव अनुसासनीपुरेक्खताय ठत्वा वदन्तस्स चित्तस्स लहुपरिवत्तितभावतो अन्तरा कोधे उप्पन्नेपि अनापत्ति.

एत्थाति इमस्मिं ओमसवादसिक्खापदे. पटिघसम्पयुत्तचित्तेनेव आपज्जितब्बत्ता मानसिकदुक्खवेदनाव होति.

ओमसवादकथावण्णना.

८९८. दुविधाकारतो भिक्खुपेसुञ्ञे आपत्ति सियाति योजना. पिसतीति पिसुणा, वाचा ¶ , समग्गे सत्ते अवयवभूते वग्गे भिन्ने करोतीति अत्थो. पिसुणा एव पेसुञ्ञं, ताय वाचाय समन्नागतो पुग्गलो सहचरियनयेन पिसुणो, तस्स कम्मं पेसुञ्ञं, भिक्खूनं पेसुञ्ञं भिक्खुपेसुञ्ञं, तस्मिं भिक्खुपेसुञ्ञे. पदभाजने ‘‘उपसम्पन्नो उपसम्पन्नस्स सुत्वा उपसम्पन्नस्स पेसुञ्ञं उपसंहरति ‘इत्थन्नामो तं ‘चण्डालो…पे… पुक्कुसो’ति भणती’ति आपत्ति…पे… पाचित्तियस्सा’’ति (पाचि. ३९) वुत्तत्ता सयं उपसम्पन्नो हुत्वा उपसम्पन्नस्स जातिआदीसु दससु अक्कोसवत्थूसु अञ्ञतरेन अञ्ञं उपसम्पन्नं ¶ परम्मुखा अक्कोसन्तस्स सुत्वा तस्स सन्तिकं गन्त्वा वक्खमानसरूपेसु अत्तनो पियकामताभेदाधिप्पायसङ्खातेसु द्वीसु कारणेसु अञ्ञतरकारणं पटिच्च ‘‘असुको तुय्हं एवं वदती’’ति पेसुञ्ञं हरति, तस्स पेसुञ्ञकथननिमित्तं पाचित्तियं होतीति अत्थो.