📜

नमो तस्स भगवतो अरहतो सम्मासम्बुद्धस्स

विनयपिटके

विनयविनिच्छय-टीका (दुतियो भागो)

पाटिदेसनीयकथावण्णना

१८३०-१. एवं ¶ ¶ नातिसङ्खेपवित्थारनयेन द्वेनवुति पाचित्तियानि दस्सेत्वा तदनन्तरं निद्दिट्ठे पाटिदेसनीये दस्सेतुमाह ‘‘यो चन्तरघर’’न्तिआदि. तत्थ अन्तरघरन्ति रथिकादिमाह. यथाह ‘‘अन्तरघरं नाम रथिका ब्यूहं सिङ्घाटकं घर’’न्ति.

यो ¶ पन भिक्खु अन्तरघरं पविट्ठाय अञ्ञातिकाय भिक्खुनिया हत्थतो यं किञ्चि खादनं, भोजनम्पि वा सहत्था पटिग्गण्हेय्य, तस्स भिक्खुनो गहणे दुक्कटं, भोगे अज्झोहारे पाटिदेसनीयं सियाति योजना.

इतो पट्ठाय चतस्सो गाथा उप्पटिपाटिया पोत्थकेसु लिखिता, तासं अयं पटिपाटि – ‘‘एत्थन्तरघर’’न्ति ततिया, ‘‘तस्मा भिक्खुनिया’’ति चतुत्थी, ‘‘रथिकादीसू’’ति पञ्चमी ¶ , ‘‘रथिकायपि वा’’ति छट्ठी. पटिपाटि पनायं मातिकट्ठकथक्कमेन वेदितब्बा. इमाय पटिपाटिया तासं अत्थवण्णना होति –

१८३२-३. पुरिमगाथाद्वयेन पदभाजनागतसामञ्ञविनिच्छयं दस्सेत्वा इदानि अट्ठकथागतं विसेसं दस्सेतुमाह ‘‘एत्था’’तिआदि. तत्थ एत्थाति इमस्मिं पठमपाटिदेसनीयसिक्खापदे. तस्साति अञ्ञातिकभिक्खुनिया. वाक्यतोति ‘‘अन्तरघरं पविट्ठाया’’ति वचनतो. हि-सद्दो हेतुम्हि. यस्मा भिक्खुस्स ठितट्ठानं नप्पमाणन्ति अट्ठकथाय (पाचि. अट्ठ. ५५३) वण्णितं, तस्मा आरामादीसु ठत्वा देन्तिया भिक्खुनिया हत्थतो वीथिआदीसु ठत्वा यो पटिग्गण्हेय्य चे, एवं पटिग्गण्हतो तस्स भिक्खुनो न दोसोति योजना. परिभोगस्स पटिग्गहणमूलकत्ता न दोसो. ‘‘पटिग्गण्हतो’’ति इमिना परिभोगे पाटिदेसनीयाभावो च दीपितो होति.

१८३४. सचे भिक्खुनी रथिकादीसु ठत्वा भोजनं देति, भिक्खु अन्तरारामे ठत्वा पटिग्गण्हाति चे, तस्स आपत्तीति योजना. गाथाबन्धवसेन ‘‘भिक्खुनि भोजन’’न्ति रस्सत्तं. आपत्तीति च पटिग्गहणपरिभोगेसु दुक्कटपाटिदेसनीयापत्तियो सन्धाय वुत्तं.

१८३५. रथिकादीसु ठत्वा भिक्खुनी भोजनं देति चे, तं रथिकायपि वा…पे… अयं नयोति योजना. तत्थ रथिकाति रच्छा. ब्यूहन्ति अनिब्बिज्झित्वा ठिता गतपच्चागतरच्छा. सन्धि नाम घरसन्धि. सिङ्घाटकन्ति चतुक्कोणं वा तिकोणं वा मग्गसमोधानट्ठानं. अयं नयोति ‘‘आपत्ती’’ति अनन्तरगाथाय वुत्तनयो.

१८३७. आमिसेन ¶ ¶ असम्भिन्नरसं सन्धाय इदं दुक्कटं भासितं. आमिसेन सम्भिन्ने एकरसे यामकालिकादिम्हि पटिग्गहेत्वा अज्झोहारे पाटिदेसनीयापत्ति सियाति योजना.

१८३८. एकतोउपसम्पन्नहत्थतोति भिक्खुनीनं सन्तिके उपसम्पन्नाय हत्थतो. यथाह ‘‘एकतोउपसम्पन्नायाति भिक्खुनीनं सन्तिके उपसम्पन्नाया’’ति (पाचि. अट्ठ. ५५३). भिक्खूनं सन्तिके उपसम्पन्नाय पन यथावत्थुकमेवाति.

१८३९. अञ्ञातिकाय ञातिकसञ्ञिस्स, तथेव विमतिस्स च दुक्कटन्ति योजना.

१८४०. अञ्ञातिकाय दापेन्तिया भूमिया निक्खिपित्वा ददमानाय वा अन्तरारामादीसु ठत्वा देन्तिया पटिग्गण्हतो भिक्खुस्स अनापत्तीति योजना. अन्तरारामादीसूति एत्थ आदि-सद्देन भिक्खुनुपस्सयतित्थियसेय्यापटिक्कमनादिं सङ्गण्हाति. पटिक्कमनं नाम भोजनसाला.

१८४१. गामतो बहि नीहरित्वा देतीति योजना.

१८४२. हत्थतोति एत्थ ‘‘गहणे’’ति सेसो. तथाति अनापत्ति. समुट्ठानं इदं सिक्खापदं एळकलोमेन समं मतन्ति योजना.

पठमपाटिदेसनीयकथावण्णना.

१८४३-४. अवुत्तेति वक्खमाननयेन अवुत्ते. एकेनपि च भिक्खुनाति सम्बन्धो. अपसक्काति अपगच्छ. आदि-अत्थवाचिना इति-सद्देन ‘‘अपसक्क ताव, भगिनि, याव भिक्खू भुञ्जन्ती’’ति वाक्यसेसो सङ्गहितोति दट्ठब्बो. इमिना अपसादनाकारो ¶ सन्दस्सितो. ‘‘एकेनपि च भिक्खुना’’ति इमिना अवकंसो दस्सितो. उक्कंसो पन ‘‘तेहि भिक्खूहि सा भिक्खुनी अपसादेतब्बा’’ति पाळितोपि दट्ठब्बो. ‘‘आमिस’’न्ति सामञ्ञवचनेपि पञ्चन्नं भोजनानं अञ्ञतरस्सेव गहणं. यथाह ‘‘पञ्चन्नं भोजनानं अञ्ञतरेना’’ति. भोगेति च एकतोउपसम्पन्नन्ति च वुत्तत्थमेव.

१८४५. तथेवाति ¶ दुक्कटं. तत्थाति अनुपसम्पन्नाय.

१८४६. अत्तनो भत्ते दिन्नेपि इमिना सिक्खापदेन अनापत्ति, पुरिमसिक्खापदेन पन आपत्तिसम्भवा ‘‘न देती’’ति वुत्तं. यथाह ‘‘अत्तनो भत्तं दापेति, न देतीति एत्थ सचेपि अत्तनो भत्तं देति, इमिना सिक्खापदेन अनापत्तियेव, पुरिमसिक्खापदेन आपत्ती’’ति (पाचि. अट्ठ. ५५८). तथाति अनापत्ति. उभयसिक्खापदेहिपि अनापत्तिं दस्सेतुमाह ‘‘पदेति चे’’ति. यथाह ‘‘अञ्ञेसं भत्तं देति, न दापेतीति एत्थ पन सचेपि दापेय्य, इमिना सिक्खापदेन आपत्ति भवेय्य, देन्तिया पन नेव इमिना, न पुरिमेन आपत्ती’’ति.

१८४७. भिक्खुनी यं न दिन्नं, तं दापेति, यत्थ वा न दिन्नं, तत्थ दापेति, तम्पि सब्बेसं मित्तामित्तानं समं दापेति, तत्थापि अनापत्ति.

१८४८. सिक्खमाना वा सामणेरिका वा ‘‘इध सूपं देथ, ओदनं देथा’’ति वोसासन्ती विधानं करोन्ती ठिता, तं अनपसादेन्तस्स अनापत्ति. पञ्चेव भोजनानि विना अञ्ञं वोसासन्तिं भिक्खुनिं अनपसादेन्तस्स अनापत्ति. अनपसादेन्तस्स उम्मत्तकादिनोपि अनापत्तीति योजना.

१८४९. समुट्ठानन्ति ¶ एत्थ ‘‘इमस्सा’’ति सेसो. भोजनं किरियं, वोसासन्तिया अनिवारणं अकिरियन्ति एवमिदं क्रियाक्रियं.

दुतियपाटिदेसनीयकथावण्णना.

१८५०-१. सेक्खन्ति सम्मतेति ‘‘सेक्खसम्मतं नाम कुलं यं कुलं सद्धाय वड्ढति, भोगेन हायति, एवरूपस्स कुलस्स ञत्तिदुतियेन कम्मेन सेक्खसम्मुति दिन्ना होती’’ति (पाचि. ५६७) वुत्तं इदं कुलं सेक्खसम्मतं नाम. तेनाह ‘‘लद्धसम्मुतिके कुले’’ति. लद्धा सम्मुति येनाति विग्गहो. घरूपचारं ओक्कन्ते निमन्तितोपि अनिमन्तितोव होतीति आह ‘‘घरूपचारोक्कमना पुब्बेवा’’ति. यथाह ‘‘अनिमन्तितो नाम अज्जतनाय वा स्वातनाय ¶ वा अनिमन्तितो, घरूपचारं ओक्कमन्ते निमन्तेति, एसो अनिमन्तितो नामा’’ति (पाचि. ५६७).

‘‘अगिलानो नाम यो सक्कोति पिण्डाय चरितु’’न्ति वुत्तत्ता भिक्खाय चरितुं समत्थो अगिलानो नाम. गहेत्वाति सहत्था पटिग्गहेत्वा. ‘‘आमिस’’न्ति इमिना सम्बन्धो. यथाह ‘‘खादनीयं वा भोजनीयं वा सहत्था पटिग्गहेत्वा’’ति (पाचि. ५६७). गहणेति एत्थ ‘‘आहारत्थाया’’ति सेसो.

१८५३. तत्थाति असेक्खसम्मते कुले. तथेव परिदीपितन्ति दुक्कटं परिदीपितं.

१८५४. निमन्तितस्स वाति एत्थ वा-सद्देन निमन्तितस्स अवसेसं गण्हाति. यथाह ‘‘निमन्तितस्स वा गिलानस्स वा सेसकं भुञ्जती’’ति. अञ्ञेसं भिक्खा तत्थ दीयतीति योजना. तत्थाति तस्मिं सेक्खसम्मते कुले.

१८५५. यत्थ ¶ कत्थचीति आसनसालादीसु यत्थ कत्थचि. निच्चभत्तादिके वापीति एत्थ आदि-सद्देन सलाकभत्तपक्खिकउपोसथिकपाटिपदिकभत्तानं गहणं.

१८५६. द्वारेति एत्थ ‘‘ठपेत्वा’’ति सेसो. सम्पत्तेति एत्थ ‘‘पच्छा’’ति सेसो. यथाह ‘‘सचेपि अनागते भिक्खुम्हि पठमंयेव नीहरित्वा द्वारे ठपेत्वा पच्छा सम्पत्तस्स देन्ति, वट्टती’’ति (पाचि. अट्ठ. ५६९).

१८५७. महापच्चरिया(पआचि. अट्ठ. ५६९) गतविनिच्छयं दस्सेतुमाह ‘‘भिक्खु’’न्तिआदि. समुट्ठानेळकूपमन्ति समुट्ठानतो एळकलोमसिक्खापदसदिसन्ति अत्थो.

ततियपाटिदेसनीयकथावण्णना.

१८५८-९. ‘‘पञ्चन्नं पटिसंविदितं, एतं अप्पटिसंविदितं नामा’’ति वचनतो च इधापि ‘‘सहधम्मिकञापित’’न्ति वक्खमानत्ता च अगहट्ठ-सद्देन परिब्बाजकानं गहणं. वुत्तमेव ¶ नयं वोहारन्तरेन दस्सेतुमाह ‘‘इत्थिया पुरिसेन वा’’ति. ‘‘यानि खो पन तानि आरञ्ञकानि सेनासनानी’’ति (पाचि. ५७३) वचनतो आरामन्ति आरञ्ञकाराममाह. सचे एवमारोचितं पटिसंविदितन्ति हि वुत्तं पदभाजनेति (पाचि. ५७३) योजना. पटिसंविदितन्ति पगेव निवेदितं.

१८६०. पच्छा यथारोचितं तमेव वा तस्स च परिवारं कत्वा अञ्ञं बहुं वा आहरीयतु, तम्पि पटिसंवेदितं नामाति योजना.

१८६१. यागुया विदितं कत्वाति एत्थ ‘‘तं ठपेत्वा’’ति इदं सामत्थिया लब्भति. इदम्पि विदितं कुरुन्दियं वट्टतीति वुत्तन्ति योजना.

१८६२. पनाति ¶ अपि-सद्दत्थो. अञ्ञानिपि कुलानीति योजना. एत्थ ‘‘असुकं नाम कुलं पटिसंवेदितं कत्वा खादनीयादीनि गहेत्वा गच्छतीति सुत्वा’’ति (पाचि. अट्ठ. ५७३) अट्ठकथासेसो. तेनाति कतपटिसंवेदितेन. तम्पि च सब्बं वट्टतीति योजना.

१८६३. एवं यं अनारोचितन्ति ‘‘आरामं वा उपचारं वा पविसित्वा’’तिआदिना नयेन यं पठमं अनिवेदितं. ‘‘एव’’न्ति इदं ‘‘यं आराममनाभत’’न्ति इमिनापि योजेतब्बं. एवन्ति ‘‘तस्स परिवारं कत्वा’’तिआदिना पकारेन. ‘‘तं असंविदितं नामा’’ति इदं ‘‘सहधम्मिकञापित’’न्ति इमिनापि योजेतब्बं. यथाह ‘‘पञ्चन्नं पटिसंविदितं, एतं अप्पटिसंविदितं नामा’’ति (पाचि. ५७३). अट्ठकथायञ्च ‘‘पञ्चन्नं पटिसंविदितन्ति पञ्चसु सहधम्मिकेसु यं किञ्चि पेसेत्वा ‘खादनीयं वा भोजनीयं वा आहरिस्सामा’ति पटिसंविदितं कतम्पि अप्पटिसंविदितमेवाति अत्थो’’ति (पाचि. अट्ठ. ५७३) वुत्तं.

१८६४. कारापेत्वाति एत्थ ‘‘पटिसंविदित’’न्ति सेसो.

१८६५. भिक्खुना वा गन्त्वा अन्तरामग्गे गहेतब्बन्ति योजना. एवमकत्वाति ‘‘बहिआरामं पेसेत्वा’’तिआदिना वुत्तविधानं अकत्वा. उपचारतोति एत्थ भुम्मत्थे तो-पच्चयो वेदितब्बो.

१८६८. ‘‘पटिसंविदिते’’तिआदीनं ¶ पदानं ‘‘अनापत्ते वा’’ति इमिना सम्बन्धो. पटिसंविदितेति एत्थ ‘‘गिलानस्सा’’ति सेसो. पटिसंविदिते अनापत्ति, गिलानस्सापि अनापत्ति, अप्पटिसंविदितेपि तस्स पटिसंविदितस्स अवसेसके वा गिलानस्स अवसेसके वा अनापत्ति एवाति सम्बन्धो ¶ . यथाह अनापत्तिवारे ‘‘पटिसंविदितस्स वा गिलानस्स वा सेसकं भुञ्जती’’ति (पाचि. ५७५). बहारामे पटिग्गहेत्वा अन्तोयेव भुञ्जतो अस्स अनापत्तीति योजना. गहेत्वा वाति एत्थ वा-सद्दो ‘‘तस्सा’’तिआदीसुपि योजेतब्बो.

१८६९. तत्थाति तस्मिं आरञ्ञकारामे. खादतो अनापत्ति एवाति योजना, तत्थ ‘‘अञ्ञेन कप्पियं कत्वा दिन्नानी’’ति सेसो.

चतुत्थपाटिदेसनीयकथावण्णना.

इति विनयत्थसारसन्दीपनिया विनयविनिच्छयवण्णनाय

पाटिदेसनीयकथावण्णना निट्ठिता.

सेखियकथावण्णना

१८७०. एवं पाटिदेसनीयविनिच्छयं दस्सेत्वा तदनन्तरं उद्दिट्ठानं सेखियानं विनिच्छयं दस्सेतुमाह ‘‘यो अनादरियेनेवा’’तिआदि. योति थेरो वा नवो वा मज्झिमो वा. एत्थ अनादरियं नाम सञ्चिच्च आपत्तिआपज्जनं, निवासनादिवत्थस्स उग्गहणे निरुस्साहञ्च. पच्छतोपि वाति एत्थ वा-सद्देन ‘‘पस्सतोपि वा’’ति इदं सङ्गण्हाति. तस्स चाति एत्थ च-सद्दो वक्खमानसमुच्चयो.

१८७१. न केवलं वुत्तनयेन निवासेन्तस्सेव होति, खन्धकागतहत्थिसोण्डादिआकारेनापि निवासेन्तस्स दुक्कटं होतीति आह ‘‘हत्थिसोण्डादी’’तिआदि. हत्थिसोण्डादिनिवासनं परतो खुद्दकवत्थुक्खन्धके (चूळव. २८०) आवि ¶ भविस्सति. परिमण्डलन्ति समन्ततो मण्डलं कत्वा. वत्थब्बन्ति निवत्थब्बं निवासेतब्बन्ति अत्थो.

१८७२. जाणुमण्डलतो ¶ हेट्ठाति एत्थ ‘‘जङ्घट्ठिसीसतो पट्ठाया’’ति सेसो. अट्ठङ्गुलप्पमाणकन्ति वड्ढकिअङ्गुलेन अट्ठङ्गुलमत्तन्ति आचरिया. ‘‘यो पन सुक्खजङ्घो वा महापिण्डिकमंसो वा होति, तस्स सारुप्पत्थाय जाणुमण्डलतो अट्ठङ्गुलाधिकम्पि ओतारेत्वा निवासेतुं वट्टती’’ति (पाचि. अट्ठ. ५७६) अट्ठकथं सङ्गण्हितुमाह ‘‘ततो ऊनं न वट्टती’’ति.

१८७३. असञ्चिच्च अपरिमण्डलं निवासेन्तस्स अनापत्तीति योजना. एवमुपरिपि. असञ्चिच्चाति ‘‘अपरिमण्डलं निवासेस्सामी’’ति एवं असञ्चिच्च, अथ खो ‘‘परिमण्डलंयेव निवासेस्सामी’’ति विरज्झित्वा अपरिमण्डलं निवासेन्तस्स अनापत्ति. असतिस्सापीति अञ्ञविहितस्सापि तथा निवासेन्तस्स अनापत्ति. अजानन्तस्साति केवलं परिमण्डलं निवासेतुं अजानन्तस्स अनापत्ति. अपिच निवासनवत्तं उग्गहेतब्बं. उग्गहितवत्तोपि सचे ‘‘आरुळ्ह’’न्ति वा ‘‘ओरुळ्ह’’न्ति वा न जानाति, तस्सापि अनापत्तियेव. गिलानस्साति यस्स जङ्घाय वा पादे वा वणो होति, तस्स उक्खिपित्वा वा ओतारेत्वा वा निवासेन्तस्स अनापत्ति. पादोति चेत्थ पादसमीपं अधिप्पेतं. आपदासूति वाळा वा चोरा वा अनुबन्धन्ति, एवरूपासु आपदासु अनापत्ति.

परिमण्डलकथावण्णना.

१८७४. उभो कोणे समं कत्वाति पारुपनस्स एकंसे कतस्स पिट्ठिपस्से, उदरपस्से च ओलम्बमाने उभो ¶ कण्णे हत्थिपिट्ठे गण्डा विय समं कत्वा. परिमण्डलं कत्वाति एतस्सेव अत्थपदं. सादरन्ति भावनपुंसकनिद्देसो. सादरं वा पारुपितब्बन्ति योजना, सादरं पारुपनं कत्तब्बन्ति अत्थो. एवं अकरोन्तस्साति पारुपनवत्ते आदरं जनेत्वा एवं अपारुपन्तस्स.

१८७५. ‘‘परिमण्डलं निवासेस्सामीति सिक्खा करणीया’’ति (पाचि. ५७६) वा ‘‘परिमण्डलं पारुपिस्सामीति सिक्खा करणीया’’ति (पाचि. ५७७) वा ‘‘अन्तरघरे’’ति अविसेसेत्वा वुत्तत्ता आह ‘‘अविसेसेन वुत्त’’न्ति. इदं सिक्खापदद्वयं यस्मा अविसेसेन वुत्तं, तस्मा घरे, विहारे वा कातब्बं परिमण्डलन्ति योजना. घरेति अन्तरघरे. विहारे वाति बुद्धुपट्ठानादिकालं ¶ सन्धाय वुत्तं. परिमण्डलं कत्तब्बन्ति परिमण्डलमेव निवासेतब्बं पारुपितब्बन्ति अत्थो.

दुतियं.

१८७६. उभो कोणे समं कत्वाति सम्बन्धो. गीवमेव च अनुवातेन छादेत्वाति योजना.

१८७७. तथा अकत्वाति यथावुत्तविधानं अकत्वा. जत्तूनिपीति उभो अंसकूटानिपि. उरम्पि चाति हदयम्पि. विवरित्वाति अप्पटिच्छादेत्वा. यथाकामन्ति इच्छानुरूपं. गच्छतोति एत्थ ‘‘अन्तरघरे’’ति सेसो. अन्तरघरं नाम गामे वा होतु विहारे वा, पचित्वा भुञ्जित्वा गिहीनं वसनट्ठानं.

ततियं.

१८७८-९. ‘‘मणिबन्धतो’’ति इमिनापि ‘‘हेट्ठा’’ति योजेतब्बं. वासूपगस्साति एत्थ ‘‘कायं विवरित्वा निसीदतो’’ति ¶ सेसो. वासूपगो नाम रत्तिवासत्थाय उपगतो, एतेन वासत्थाय अन्तरघरं उपगच्छन्तेन सुप्पटिच्छन्नेनेव उपगन्तब्बन्ति दीपितं होति, एतेनेव वासूपगतस्स सन्तिकं उपगतस्स यथाकामं गमने न दोसोति च वुत्तमेव होति. तेनाह गण्ठिपदे ‘‘एकदिवसम्पि वासूपगतस्स सन्तिकं यथासुखं गन्तुं वट्टति, को पन वादो चतुपञ्चाहं वासमधिट्ठाय वसितभिक्खूनं सन्तिक’’न्ति.

चतुत्थं.

१८८०. सुविनीतेनाति हत्थपादानं अकीळापनेनेव सुट्ठु विनीतेन.

पञ्चमं.

१८८१. गाथाबन्धवसेन ‘‘सतीमता’’ति दीघो कतो. अविकारेनाति तंतदवलोकासहितेन ¶ . युगं मत्ता पमाणं एतस्साति युगमत्तं, रथयुगं चतुहत्थप्पमाणं, तत्तकं पदेसं. पेक्खिनाति ओलोकेन्तेन. ‘‘भिक्खुना ओक्खित्तचक्खुना’’ति पदच्छेदो.

१८८२. अन्तरघरे यत्थ कत्थचिपि एकस्मिम्पि ठाने ठत्वाति योजना. एवं वुत्तेपि तथारूपे अन्तराये सति गच्छतोपि ओलोकेतुं लब्भति. एकस्मिं पन ठाने ठत्वाति एत्थ गच्छन्तोपि परिस्सयाभावं ओलोकेतुं लब्भतियेव. ‘‘तथा गामे पूज’’न्ति गण्ठिपदेसु वुत्तं. पि-सद्दो पन-सद्दत्थो, ओलोकेतुं पन वट्टतीति वुत्तं होति.

१८८३. ओलोकेन्तो तहं तहन्ति यो अनादरियं पटिच्च तं तं दिसाभागं पासादं कूटागारं वीथिं ओलोकेन्तो.

सत्तमं.

१८८४. एकतो ¶ वापीति एकअंसकूटतो वा. उभतो वापीति उभयंसकूटतो वा. इन्दखीलकतो अन्तोति गामद्वारिन्दखीलतो अन्तो, घरेति वुत्तं होति.

नवमं.

१८८५. तथा निसिन्नकालेपीति इन्दखीलस्स अन्तो निसिन्नकालेपि. कुण्डिकं नीहरन्तेन च चीवरं अनुक्खिपित्वा दातब्बा कुण्डिकाति योजना. कुण्डिकन्ति च उपलक्खणमत्तं. धम्मकरणादीसुपि एसेव नयो.

दसमं.

पठमो वग्गो.

१८८६. गन्तुञ्चेव निसीदितुञ्च न वट्टतीति योजना. च-सद्दो किरियासमुच्चयो. हसनीयस्मिं वत्थुस्मिन्ति हासजनके कारणे. सितमत्तन्ति मन्दहासं.

पठमदुतियानि.

१८८७. अप्पसद्देनाति ¶ ‘‘कित्तावता अप्पसद्दो होति? द्वादसहत्थे गेहे आदिम्हि सङ्घत्थेरो, मज्झे दुतियत्थेरो, अन्ते ततियत्थेरोति एवं निसिन्नेसुयं सङ्घत्थेरो दुतियत्थेरेन सद्धिं मन्तेति, दुतियत्थेरो तस्स सद्दञ्चेव सुणाति, कथञ्च ववत्थपेति. ततियत्थेरो पन सद्दमेव सुणाति, कथं न ववत्थपेति. एत्तावता अप्पसद्दो होती’’ति (पाचि. ५८८) वुत्तअप्पसद्दयुत्तेन. सचे ¶ पन ततियत्थेरो कथञ्च ववत्थपेति, महासद्दो नाम होतीति.

ततियं.

१८८८. कायप्पचालकं कत्वाति कायं चालेत्वा चालेत्वा. उपरिपि एसेव नयो. हत्थस्स वुत्तलक्खणत्ता ‘‘बाहू’’ति मणिबन्धतो याव अंसकूटा गहेतब्बा.

१८८९. उजुं पग्गहेत्वाति उजुं ठपेत्वा. आसितब्बन्ति निसीदितब्बं. ‘‘समेन इरियापथेन तू’’ति पदच्छेदो.

१८९०. इत्थम्भूते करणवचनं. गमनपटिसंयुत्तेसु सिक्खापदेसु गमनस्स असम्भवोति आह ‘‘निसीदनेन युत्तेसू’’ति.

पञ्चमछट्ठसत्तमट्ठमनवमानि.

दुतियो वग्गो.

१८९१. खम्भं कत्वाति कटिया एकपस्से वा द्वीसु वा पस्सेसु कप्परसन्धितो आभुजित्वा हत्थं ठपेत्वा. यथाह – ‘‘खम्भकतो नाम कटियं हत्थं ठपेत्वा कतखम्भो’’ति (पाचि. अट्ठ. ५९६). उक्कुटिकाय वा गच्छतोति योजना. उक्कुटिका वुच्चति पण्हियो उक्खिपित्वा अग्गपादेहि वा अग्गपादे उक्खिपित्वा पण्हीहि एव वा भूमिं फुसन्तस्स गमनं.

१८९२. दुस्सपल्लत्थिकायाति आयोगपल्लत्थिकाय. अन्तरघरे निसीदन्तस्स तस्स दुक्कटं होतीति योजना.

१८९३. दुतिये ¶ चाति ‘‘न खम्भकतो अन्तरघरे निसीदिस्सामी’’ति (पाचि. ५९७) सिक्खापदे च. चतुत्थे चाति ‘‘न ओगुण्ठितो ¶ अन्तरघरे निसीदिस्सामी’’ति (पाचि. ५९९) सिक्खापदे च. छट्ठेति ‘‘न पल्लत्थिकाय अन्तरघरे’’इच्चादि (पाचि. ६०१) सिक्खापदे च. इति एवं सारुप्पा समणाचारानुच्छविका छब्बीसति सिक्खापदानि पकासितानि.

पठमदुतियततियचतुत्थपञ्चमछट्ठानि.

१८९४. विञ्ञुना भिक्खुना सक्कच्चं सतियुत्तेन, पत्तसञ्ञिना च हुत्वा समसूपोव पिण्डपातो गहेतब्बोति योजना. एवं एताय गाथाय सिक्खापदत्तयं सङ्गहितं. सक्कच्चन्ति सतिं उपट्ठपेत्वा. ‘‘सतियुत्तेना’’ति इदं ‘‘सक्कच्च’’न्ति एतस्स अत्थपदं. ‘‘सतिं उपट्ठपेत्वा’’ति (पाचि. अट्ठ. ६०२) हि अट्ठकथायं वुत्तं. पत्ते सञ्ञा पत्तसञ्ञा, सा अस्स अत्थीति पत्तसञ्ञी, अनञ्ञविहितेन अत्तनो भाजनेयेव उपनिबद्धसञ्ञिनाति अत्थो.

१८९५. भत्तचतुब्भागोति भत्तस्स चतुब्भागप्पमाणो. ततो अधिकं गण्हतो दुक्कटं.

१८९६. ‘‘रसरसे’’ति वत्तब्बे ‘‘रसेरसे’’ति गाथाबन्धवसेन वुत्तं. द्वे सूपे ठपेत्वा अवसेसानि ओलोणिसाकसूपेय्यमच्छरसमंसरसादीनि रसरसाति वेदितब्बानि. एत्थ च ‘‘ओलोणीति दधिकतं गोरस’’न्ति केचि. ‘‘एका ब्यञ्जनविकती’’ति अपरे. ‘‘यो कोचि सुद्धो कञ्जिकतक्कादिरसो’’ति अञ्ञे. साकसूपेय्यग्गहणेन या काचि सूपेय्यसाकेहि कता ब्यञ्जनविकति वुत्ता. मंसरसादीनीति आदि-सद्देन अवसेसा सब्बापि ब्यञ्जनविकति सङ्गहिताति दट्ठब्बं. ञातकादीनन्ति एत्थ ‘‘सन्तकं गण्हन्तस्सा’’ति सेसो. अञ्ञत्थायाति एत्थ ‘‘कतं गण्हन्तस्सा’’ति सेसो. धनेनाति एत्थ ‘‘अत्तनो’’ति च ¶ ‘‘कीत’’न्ति च ‘‘गण्हन्तस्सा’’ति च सेसो. ञातकादीनं सन्तकं गण्हन्तस्स, अञ्ञत्थाय कतं गण्हन्तस्स, अत्तनो धनेन कीतं गण्हन्तस्स अनापत्तीति अत्थो.

सत्तमट्ठमनवमानि.

१८९७. अधिट्ठानूपगस्स ¶ पत्तस्स मुखवट्टिया अन्तोलेखापमाणेन पूरितोव गहेतब्बोति योजना.

१८९८. अनापत्तिविसयं दस्सेत्वा आपत्तिविसयं दस्सेतुमाह ‘‘तत्था’’तिआदि. तत्थाति अधिट्ठानूपगे पत्ते. थूपीकतं कत्वाति एत्थ ‘‘दिय्यमान’’न्ति सेसो. यथावुत्तलेखातिक्कमो यथा होति, एवं थूपीकतं दिय्यमानं गण्हतो आपत्ति दुक्कटन्ति सम्बन्धो. इमिना पठमं थूपीकतस्स अधिट्ठानूपगपत्तस्स पच्छा पटिग्गहणञ्च पठमपटिग्गहितपत्ते पच्छा भोजनस्स थूपीकतस्स पटिग्गहणञ्च निवारितन्ति वेदितब्बं.

१८९९. कालिकत्तयमेव च थूपीकतं वट्टतेवाति योजना. सेसेति अनधिट्ठानूपगे पत्ते. सब्बन्ति चतुब्बिधं कालिकं थूपीकतं वट्टतीति योजना.

१९००. पेसेतीति एत्थ ‘‘भिक्खू’’ति सेसो. भिक्खु भिक्खूनं यदि पेसेतीति योजना. ‘‘विहारं पेसेतुं वट्टती’’ति (पाचि. अट्ठ. ६०५) अट्ठकथाय अधिप्पायं दस्सेतुं ‘‘भिक्खून’’न्ति वचनेन पटिग्गहणं अविजहित्वा भिक्खुना एव पेसितं गण्हन्तानं भिक्खूनं अनापत्तीति दीपितं होति. अञ्ञथा ‘‘पूरेतुं वट्टती’’ति एत्तकमेव वत्तब्बन्ति विञ्ञायति.

१९०१. पक्खिप्पमानन्ति मुखवट्टितो उच्चं कत्वा मज्झे पक्खिपियमानं. फलादिकन्ति आदि-सद्देन ओदनादिम्पि सङ्गण्हाति. हेट्ठा ¶ ओरोहतीति समन्ता ओकाससम्भवतो चालियमानं मुखवट्टिप्पमाणतो हेट्ठा भस्सति.

१९०२. तक्कोलकादीनन्ति एत्थ आदि-सद्देन पूगफलादीनं सङ्गहो. ठपेत्वाति भत्तमत्थके निक्खिपित्वा. वटंसकन्ति अवटंसकं.

१९०३. पूवस्साति विकारसम्बन्धे सामिवचनं, पूववटंसकन्ति वुत्तं होति. पूवस्स यावकालिकत्ता आह ‘‘इदं थूपीकतं सिया’’ति.

१९०४. पण्णानं विसुं भाजनत्ता आह ‘‘वट्टती’’ति.

१९०५. अस्साति ¶ भिक्खुस्स. तं तु सब्बन्ति ‘‘थूपीकतत्ता न वट्टती’’ति वुत्तं तं पन सब्बं. गहितं सुगहितन्ति विराधेत्वा पटिग्गहितं चे, सुप्पटिग्गहितं.

दसमं.

ततियो वग्गो.

१९०६. ‘‘उपरि ओधि’’न्ति पदच्छेदो. उपरीति भत्तस्स उपरि. ओधिन्ति परिच्छेदं. पटिपाटियाति अत्तनो दिसाय परियन्ततो पट्ठाय अनुक्कमेन.

१९०७. अञ्ञेसन्ति एत्थ ‘‘देन्तो’’ति सेसो. अत्तनो भत्तं अञ्ञेसं देन्तो अञ्ञस्स भाजने आकिरं आकिरन्तो पन पटिपाटिं विनापि तहिं तहिं ओमसति चे, नत्थि दोसोति योजना. उत्तरिभङ्गकं तथा आकिरन्तो तत्थ तत्थ ओमसति, नत्थि दोसोति योजना ¶ . भुञ्जनत्थाय गण्हन्तोपि चेत्थ वत्तब्बो. उत्तरिभङ्गं नाम ब्यञ्जनं.

ततियं.

१९०८. मत्थकं ओमद्दित्वा परिभुञ्जतो दोसोति योजना. ‘‘थूपकतोति मत्थकतो, वेमज्झतो’’ति (पाचि. अट्ठ. ६१०) अट्ठकथावचनतो मत्थकन्ति एत्थ भत्तमत्थकमाह. ओमद्दित्वाति हत्थेन भत्तं अवमद्दित्वा.

१९०९. सेसके परित्तेपि चाति अवसिट्ठे अप्पकेपि च. संकड्ढित्वानाति तस्मिं तस्मिं ठाने ठितं संहरित्वा. एकतो पन मद्दित्वा भुञ्जतो अनापत्तीति योजना.

पञ्चमं.

१९१०. भिय्योकम्यताहेतूति पुन गण्हितुकामताहेतु. सूपं वाति मुग्गादिसूपं वा. ब्यञ्जनं वाति उत्तरिभङ्गं वा.

छट्ठं.

१९११. विञ्ञत्तियन्ति ¶ सूपोदनविञ्ञत्तियं. ‘‘ञातकानं वा पवारितानं वा अञ्ञस्स अत्थाय वा अत्तनो धनेन वा’’ति इदं अनापत्तियं अधिकं. गिलानोपि हुत्वा परेसं पत्तं उज्झानसञ्ञाय ओलोकेन्तस्स आपत्ति होतीति आह ‘‘उज्झाने गिलानोपि न मुच्चती’’ति. उज्झानेति निमित्तत्थे भुम्मं.

१९१२. दस्सामीति इमस्स भत्तं ओलोकेत्वा ‘‘यं तत्थ नत्थि, तं दस्सामी’’ति वा ‘‘दापेस्सामी’’ति वा. अवमञ्ञित्वा उज्झायनचित्तं उज्झानं, उज्झाने सञ्ञा उज्झानसञ्ञा, सा ¶ अस्स अत्थीति विग्गहो. नउज्झानसञ्ञिनो च अनापत्तीति ञातब्बन्ति योजना.

सत्तमट्ठमानि.

१९१३. ‘‘तेसं मज्झप्पमाणेना’’ति इमिना असारुप्पवसेन खुद्दकपटिक्खेपो कतोति वेदितब्बो. ‘‘नातिमहन्त’’न्ति च अतिमहन्तस्सेव पटिक्खित्तत्ता खुद्दके आपत्ति न दिस्सतीति. कबळोति आलोपो.

१९१४. मूलखादनीयादिके सब्बत्थ खज्जके पनाति योजना. फलाफलेति खुद्दके, महन्ते च फले.

नवमं.

१९१५. दसमे नत्थि किञ्चि वत्तब्बं.

दसमं.

चतुत्थो वग्गो.

१९१६. ‘‘अनाहटे’’ति एतस्स अत्थपदं ‘‘मुखद्वारं अप्पत्ते’’ति. यथाह ‘‘अनाहटेति अनाहरिते, मुखद्वारं असम्पापितेति अत्थो’’ति (पाचि. अट्ठ. ६१७). ‘‘मुखद्वारं विवरन्तस्सा’’ति एत्तके वुत्ते मुखद्वार-सद्दस्स सम्बन्धिसद्दत्ता कस्साति अपेक्खाय ‘‘मुखद्वारं विवरिस्सामी’’ति ¶ अत्तनोपदेकवचनेन ब्यञ्जितमेवत्थं पकासेतुं अत्तनो-गहणं कतन्ति वेदितब्बं. च-सद्दो एवकारत्थो, अप्पत्ते वाति योजेतब्बो, असम्पत्तेयेवाति अत्थो.

पठमं.

१९१७. सकलं ¶ हत्थन्ति एत्थ हत्थ-सद्दो तदेकदेसेसु अङ्गुलीसु दट्ठब्बो. ‘‘हत्थमुद्दा’’तिआदीसु विय समुदाये पवत्तवोहारस्स अवयवेपि पवत्तनतो एकङ्गुलिम्पि मुखे पक्खिपितुं न वट्टति.

१९१८. अस्साति भिक्खुनो. ब्याहरन्तस्साति कथेन्तस्स.

दुतियततियानि.

१९२०. पिण्डुक्खेपकन्ति पिण्डं उक्खिपित्वा उक्खिपित्वा. इधापि खज्जकफलाफलेसु अनापत्ति. कबळच्छेदकम्पि वाति कबळं छिन्दित्वा. इध खज्जकफलाफलेहि सद्धिं उत्तरिभङ्गेपि अनापत्ति. गण्डे कत्वाति एत्थ फलाफलमत्तेयेव अनापत्ति.

चतुत्थपञ्चमछट्ठानि.

१९२१-२. हत्थं निद्धुनित्वानाति हत्थं निद्धुनित्वा भत्तं भुञ्जतोति च सम्बन्धो. सित्थावकारकन्ति सित्थानि अवकिरित्वा अवकिरित्वा. जिव्हानिच्छारकं वापीति जिव्हं निच्छारेत्वा निच्छारेत्वा. चपु चपूति वाति ‘‘चपु चपू’’ति एवं सद्दं कत्वा. सत्तमेति ‘‘न हत्थनिद्धुनक’’न्ति सिक्खापदे. अट्ठमेति ‘‘न सित्थावकारक’’न्ति सिक्खापदे. कचवरुज्झनेति कचवरापनयने.

सत्तमट्ठमनवमदसमानि.

पञ्चमो वग्गो.

१९२३. ‘‘सुरु ¶ सुरू’’ति एवं सद्दं कत्वा न भोत्तब्बन्ति योजना. हत्थनिल्लेहकं वापीति हत्थं निल्लेहित्वा निल्लेहित्वा.

१९२४. फाणितं ¶ , घनयागुं वा अङ्गुलीहि गहेत्वा अङ्गुलियो मुखे पवेसेत्वापि तं भोत्तुं वट्टतीति योजना.

१९२५. एकाय अङ्गुलिकायपि पत्तो न लेहितब्बोव. जिव्हाय एकओट्ठोपि न निल्लेहितब्बकोति योजना. बहि ओट्ठञ्च जिव्हाय न लेहितब्बं. ओट्ठे लग्गं सित्थादिं यं किञ्चि उभोहि ओट्ठमंसेहियेव गहेत्वा अन्तो कातुं वट्टति.

पठमदुतियततियचतुत्थानि.

१९२६-८. न च गहेतब्बं, पटिक्कूलवसेन पटिक्खित्तन्ति योजना. हि-इति ‘‘यस्मा’’ति एतस्स अत्थे, तेनेव वक्खति ‘‘तस्मा’’ति. ‘‘पानीयथालक’’न्ति इदं उपलक्खणमत्तं सङ्खादीनम्पि तथा नगहेतब्बत्ता. सरावं वाति तट्टकं वा.

अनामिसेन हत्थेनाति आमिसरहितेन हत्थेकदेसेन. यथाह ‘‘सचे पन हत्थस्स

एकदेसो आमिसमक्खितो न होति, तेन पदेसेन गहेतुं वट्टती’’ति (पाचि. अट्ठ. ६३१). आमिसमक्खितेनेव हत्थेन ‘‘धोविस्सामी’’ति वा ‘‘धोवापेस्सामी’’ति वा गण्हन्तस्स पन अनापत्ति.

पञ्चमं.

१९२९. उद्धरित्वाति ससित्थका पत्तधोवना सित्थकानि उद्धरित्वा तं पत्तधोवनोदकं घरा बहि अन्तरघरे छड्डेन्तस्स अनापत्ति. भिन्दित्वाति ससित्थके पत्तधोवने सित्थकानि मद्दित्वा उदकेन सम्भिन्दित्वा उदकगतिकानेव कत्वा तं उदकं घरा बहि अन्तरघरे छड्डेन्तस्स अनापत्ति. गहेत्वाति ससित्थकं पत्तधोवनोदकं गहेत्वा पटिग्गहे छड्डेन्तस्स अनापत्ति. ससित्थकं पत्तधोवनोदकं घरा ¶ बहि नीहरित्वा अन्तरघरे छड्डेन्तस्स अनापत्तीति अज्झाहारयोजना ¶ वेदितब्बा. एत्थ पटिग्गहो नाम खेळमल्लादिको उच्छिट्ठहत्थधोवनभाजनविसेसो.

छट्ठं.

१९३०. छत्तं यं किञ्चीति ‘‘छत्तं नाम तीणि छत्तानि सेतच्छत्तं किलञ्जच्छत्तं पण्णच्छत्तं मण्डलबद्धं सलाकबद्ध’’न्ति (पाचि. ६३४) वुत्तेसु तीसु छत्तेसु अञ्ञतरं. एत्थ च सेतच्छत्तन्ति वत्थपलिगुण्ठितं पण्डरच्छत्तं. किलञ्जच्छत्तन्ति विलीवच्छत्तं. पण्णच्छत्तन्ति तालपण्णादीहि येहि केहिचि कतं. ‘‘मण्डलबद्धं सलाकबद्ध’’न्ति इदं पन तिण्णम्पि छत्तानं पञ्जरदस्सनत्थं वुत्तं. तानि हि मण्डलबद्धानि चेव होन्ति सलाकबद्धानि च. ‘‘यं किञ्ची’’ति अनवसेसपरिग्गहवचनेन ‘‘यम्पि च तत्थजातदण्डेन कतं एकपण्णच्छत्तं होति, तम्पि छत्तमेवा’’ति (पाचि. अट्ठ. ६३४) अट्ठकथाय वुत्तं छत्तविसेसं गण्हाति. हत्थेनाति एत्थ ‘‘अमुञ्चित्वा’’ति सेसो. सरीरावयवेनाति एत्थ ‘‘गहेत्वा’’ति सेसो. वा-सद्दो अपि-सद्दत्थो. अंसकूटादिसरीरावयवेन गहेत्वापि हत्थेन अमुञ्चित्वा धारेन्तस्साति अत्थो.

सचे पनस्स अञ्ञो छत्तं धारेति, छत्तपादुकाय वा ठितं होति, पस्से वा ठितं होति,

हत्थतो अपगतमत्ते छत्तपाणि नाम न होति, तस्स धम्मं देसेतुं वट्टति. ‘‘न छत्तपाणिस्स अगिलानस्सा’’ति वचनतो, इध ‘‘सब्बत्थ अगिलानस्सा’’ति वक्खमानत्ता च एत्थ ‘‘अगिलानस्सा’’ति लब्भति. धम्मपरिच्छेदो चेत्थ पदसोधम्मे वुत्तनयेनेव वेदितब्बो. एवमुपरिपि.

सत्तमं.

१९३१. दण्डपाणिम्हीति ¶ एत्थ दण्डो पाणिम्हि अस्साति विग्गहो. कित्तकप्पमाणो दण्डोति आह ‘‘चतुहत्थप्पमाणो’’तिआदि. मज्झिमहत्थतोति पमाणमज्झिमस्स पुरिसस्स हत्थतो, यो ‘‘वड्ढकिहत्थो’’ति वुच्चति.

अट्ठमं.

१९३२. सत्थपाणिस्साति ¶ एत्थापि विग्गहो वुत्तनयोव. वक्खमानं सकलं धनुविकतिं, सरविकतिञ्च ठपेत्वा अवसेसं खग्गादि सत्थं नाम. खग्गं सन्नहित्वा ठितोपि सत्थपाणि नु खोति आसङ्काय निवत्तनत्थमाह ‘‘सत्थपाणी’’तिआदि. ‘‘न होति असि’’न्ति पदच्छेदो.

नवमं.

१९३३-५. सरेन सद्धिं धनुं वा सुद्धधनुं वा सुद्धसरं वा सजियं धनुदण्डं वा निजियं धनुदण्डं वा गहेत्वा ठितस्सापि वा निसिन्नस्सापि वा निपन्नस्सापि वा सचे यो तथा पदसोधम्मे वुत्तलक्खणं सद्धम्मं देसेति, तस्स आपत्ति दुक्कटं होतीति योजना. सचे पनस्स धनु खन्धे पटिमुक्कं होति, याव न गण्हाति, ताव वट्टति. जियाय सह वत्ततीति सजियं.

दसमं.

छट्ठो वग्गो.

१९३६. पादुकारुळ्हकस्साति पादुकं आरुळ्हो पादुकारुळ्हो, सोयेव पादुकारुळ्हको, तस्स. कथं आरुळ्हस्साति आह ‘‘अक्कमित्वा’’तिआदि. अक्कमित्वा ठितस्साति ¶ छत्तदण्डके अङ्गुलन्तरं अप्पवेसेत्वा केवलं पादुकं अक्कमित्वा ठितस्स. पटिमुक्कस्स वाति पटिमुञ्चित्वा ठितस्स. एतं द्वयम्पि ‘‘पादुकारुळ्हकस्सा’’ति एतस्स अत्थपदं. यथाह ‘‘न पादुकारुळ्हस्स अगिलानस्स धम्मो देसेतब्बो. यो अनादरियं पटिच्च अक्कन्तस्स वा पटिमुक्कस्स वा ओमुक्कस्स वा अगिलानस्स धम्मं देसेति, आपत्ति दुक्कटस्सा’’ति (पाचि. ६३८).

पठमं.

१९३७-४०. उपाहनगतस्सापीति अक्कन्तादिआकारेन उपाहनारुळ्हस्स च. यथाह ‘‘अक्कन्तस्स वा पटिमुक्कस्स वा’’ति. सब्बत्थाति छत्तपाणिआदीसु सब्बसिक्खापदेसु. अगिलानस्साति इदं योजेतब्बन्ति सेसो. याने वा गतस्स अगिलानस्स धम्मं देसेति, दुक्कटन्ति योजना. तत्थ याने वा गतस्साति सचे द्वीहि जनेहि हत्थसङ्घातेन गहितो, साटके ¶ वा ठपेत्वा वंसेन वय्हति, अयुत्ते वा वय्हादिके याने, विसङ्खरित्वा वा ठपिते चक्कमत्तेपि निसिन्नो होति, यानगतोत्वेव सङ्ख्यं गच्छति.

सयनेपि वा अन्तमसो कटसारके वा छमाय वा निपन्नस्सापि अगिलानस्साति योजना. यथाह ‘‘सयनगतस्साति अन्तमसो कटसारकेपि पकतिभूमियम्पि निपन्नस्सा’’ति (पाचि. अट्ठ. ६४१). उच्चे पीठे वा उच्चे मञ्चेपि वा निसिन्नेन, ठितेन वा निपन्नस्स देसेतुं न वट्टतीति योजना. ‘‘ठत्वा’’ति इमिना ‘‘निसीदित्वा’’ति इदञ्च सङ्गहितमेव. सयनेसु गतस्स च देसेन्तेन सयनेसु गतेनापि समाने वापि उच्चे वा निपन्नेनेव वट्टतीति योजना.

१९४१. ‘‘तथेव ¶ चा’’ति इमिना ‘‘वट्टती’’ति इदं गहितं.

दुतियततियचतुत्थानि.

१९४२. ‘‘पल्लत्थिकाय निसिन्नस्सा’’ति वत्तब्बे गाथाबन्धवसेन यकारस्स लोपं कत्वा ‘‘पल्लत्थिका निसिन्नस्सा’’ति वुत्तं, आयोगपल्लत्थिकाय वा हत्थपल्लत्थिकाय वा दुस्सपल्लत्थिकाय वा याय कायचि पल्लत्थिकाय निसिन्नस्साति अत्थो. वेठितसीसस्साति दुस्सवेठनेन वा मोलिआदीहि वा यथा केसन्तो न दिस्सति, एवं वेठितसीसस्स.

१९४३. यदि केसन्तं विवरापेत्वा देसेति, वट्टतीति योजना. ‘‘अयमेव विनिच्छयो’’ति इमिना ‘‘सीसं विवरापेत्वा देसेति, वट्टती’’ति अनापत्तिवारोपि वुत्तो होति.

पञ्चमछट्ठसत्तमानि.

१९४४-५. अट्ठमे ‘‘आसने निसिन्नस्साति अन्तमसो वत्थम्पि तिणानिपि सन्थरित्वा निसिन्नस्सा’’ति (पाचि. अट्ठ. ६४५) इदञ्च नवमे ‘‘उच्चे आसनेति अन्तमसो भूमिप्पदेसेपि उन्नते ठाने निसिन्नस्स देसेतुं न वट्टती’’ति (पाचि. अट्ठ. ६४७) इदञ्च दसमे ‘‘सचेपी’’तिआदिना वक्खमानविनिच्छयञ्च ठपेत्वा वत्तब्बविसेसाभावा आह ‘‘अट्ठमे नवमे ¶ वापि, दसमे नत्थि किञ्चिपी’’ति. एत्थ ‘‘वत्तब्ब’’न्ति सेसो. थेरुपट्ठानं गन्त्वान ठितं दहरं आसने निसिन्नो थेरो चे पञ्हं पुच्छतीति अज्झाहारयोजना. कथेतब्बमुपायं दस्सेतुमाह ‘‘तस्स पस्से पनञ्ञस्स, कथेतब्बं विजानता’’ति. एत्थ ‘‘ठितस्सा’’ति सेसो ¶ . तस्स समीपवत्तिनो कस्सचि अभावे सज्झायं अधिट्ठहित्वापि वत्तुं वट्टति.

अट्ठमनवमदसमानि.

सत्तमो वग्गो.

१९४६. गच्छतो पुरतोति एत्थ ‘‘पच्छतो गच्छन्तेना’’ति सेसो. पच्छतो गच्छन्तेन पुरतो गच्छतो पञ्हं न वत्तब्बन्ति योजना. सचे पुरतो गच्छन्तो पञ्हं पुच्छति, किं कातब्बन्ति आह ‘‘पच्छिमस्सा’’तिआदि.

१९४७. उग्गहितं धम्मं पुरतो गच्छन्तेन सद्धिं पच्छतो गच्छन्तो सज्झायति, वट्टतीति योजना. सममेव गच्छतो युगग्गाहं कथेतुं वट्टतीति योजना. युगग्गाहन्ति अञ्ञमञ्ञं. अञ्ञमञ्ञ-सद्दपरियायो हि युगग्गाह-सद्दो.

पठमं.

१९४८. सकटमग्गे एकेकस्स चक्कस्स पथेन गच्छन्तो एकेकस्स चक्कस्स पथेन समं गच्छतो धम्मं देसेतुं वट्टति. उप्पथेनापि गच्छन्तो उप्पथेन समं गच्छन्तस्स धम्मं देसेतुं वट्टतीति अज्झाहारयोजना. उप्पथेनाति अमग्गेन. एवं अनापत्तिविसये दस्सिते तब्बिपरियायतो आपत्तिविसयो दस्सितोयेवाति वेदितब्बो.

दुतियं.

१९४९. ततिये नत्थि वत्तब्बन्ति ‘‘न ठितो अगिलानो उच्चारं वा पस्सावं वा करिस्सामी’’ति (पाचि. ६५१) एतस्स विनिच्छयो यथारुतवसेन ¶ सुविञ्ञेय्योति कत्वा वुत्तं. सचे पटिच्छन्नं ठानं गच्छन्तस्स सहसा उच्चारो वा पस्सावो वा निक्खमति, असञ्चिच्च ¶ कतो नाम, अनापत्ति. अयमेत्थ विसेसो दट्ठब्बो. सिङ्घाणिकाय खेळेनेव सङ्गहितत्तेपि बात्तिंसकोट्ठासेसु विसुंयेव दस्सितो एको कोट्ठासोति सिक्खापदेसु अवुत्तम्पि सङ्गहेत्वा आह ‘‘उच्चारादिचतुक्क’’न्ति.

१९५०. एत्थ हरितं नाम इदन्ति दस्सेतुमाह ‘‘जीवरुक्खस्सा’’तिआदि. रुक्खस्साति उपलक्खणं जीवमानकतिणलतादीनम्पि हरितेयेव सङ्गहितत्ता. ‘‘दिस्समानं गच्छती’’ति वचनेनेव अदिस्समानगतं अहरितन्ति ब्यतिरेकतो विञ्ञायति. साखा वा भूमिलग्गा दिस्समाना गच्छति, तं सब्बं हरितमेवाति योजना.

१९५१. सहसा वच्चं निक्खमतेवाति सम्बन्धो. अस्स भिक्खुनो. वच्चन्ति उपलक्खणं पस्सावादीनम्पि दस्सितत्ता. वट्टतीति एत्थ ‘‘गिलानट्ठाने ठितत्ता’’ति सेसो.

१९५२. पलालण्डुपके वापीति पलालचुम्बटकेपि. एत्थ ‘‘अप्पहरितं अलभन्तेना’’ति सेसो. किस्मिञ्चीति सुक्खतिणादिम्हि किस्मिञ्चि. तं वच्चं पच्छा हरितं ओत्थरति, वट्टतीति योजना.

१९५३. एतीति पविसति. एत्थाति इमस्मिं सिक्खापदे. ‘‘खेळेन एव चा’’ति पदच्छेदो.

ततियचतुत्थानि.

१९५४. वच्चकुटिसमुद्दादिउदकेसूति एत्थ आदि-सद्देन सब्बं अपरिभोगजलं सङ्गण्हाति. तेनेव ‘‘तेसं अपरिभोगत्ता’’ति अपरिभोगत्तमेव कारणमाह.

१९५५. उदकोघेति ¶ एत्थ ‘‘जाते’’ति सेसो. अजलन्ति अजलट्ठानं. जलेति परिभोगारहजले. इधापि थलकतो उदकं ओत्थरति, अनापत्ति.

पञ्चमं.

अट्ठमो वग्गो.

१९५६-७. पकिण्णकविनिच्छयं ¶ दस्सेतुमाह ‘‘समुट्ठानादयो’’तिआदि. ञेय्याति वक्खमाननयेन वेदितब्बा. एत्थाति एतेसु सेखियेसु. उज्जग्घिका आदि येसन्ति विग्गहो, तग्गुणसंविञ्ञाणोयं बाहिरत्थसमासो, उज्जग्घिकाअप्पसद्दपटिसंयुत्तानि चत्तारि सिक्खापदानीति अत्थो. छमा च नीचासनञ्च ठानञ्च पच्छा च उप्पथो च छमानीचासनट्ठानपच्छाउप्पथा, ते सद्दा एतेसं सिक्खापदानं अत्थीति तप्पटिसंयुत्तानि सिक्खापदानि छमा…पे… उप्पथवा, छमादिपदवन्तानि पञ्च सिक्खापदानीति अत्थो. एत्थ ठान-सद्देन ठा-धातुस्सेव रूपत्ता सिक्खापदागतो ठित-सद्दो गहितो. ‘‘दससू’’ति वत्तब्बे वण्णलोपेन, विभत्तिविपल्लासेन वा ‘‘दसा’’ति वुत्तं. समनुभासने समुट्ठानादीहि एतेसु दससु सिक्खापदेसु समुट्ठानादयो तुल्या वुत्ताति योजना.

किं वुत्तं होति? इमानि दस सिक्खापदानि समनुभासनसमुट्ठानानि, एकेकमेत्थ किरियं, सञ्ञाविमोक्खं, सचित्तकं, लोकवज्जं, कायकम्मं, वचीकम्मं, अकुसलचित्तं, दुक्खवेदनन्ति वुत्तं होति.

१९५८-९. ‘‘छत्त’’न्तिआदीनि सिक्खापदानं उपलक्खणपदानि. एतानि एकादस सिक्खापदानि समुट्ठानादिना पन धम्मदेसनेन तुल्याव सदिसा एवाति योजना. इदं वुत्तं ¶ होति – इमानि एकादस सिक्खापदानि धम्मदेसनासमुट्ठानानि, किरियाकिरियानि, सञ्ञाविमोक्खानि, सचित्तकानि, लोकवज्जानि, वचीकम्मानि, अकुसलचित्तानि, दुक्खवेदनानीति.

सूपोदनेन विञ्ञत्तीति सूपोदन-सद्देन लक्खितं विञ्ञत्तिसिक्खापदं. विञ्ञत्तिसिक्खापदानं बहुत्ता इदमेव विसेसितं. थेय्यसत्थसमं मतन्ति समुट्ठानादीहि थेय्यसत्थसिक्खापदेन समानं मतन्ति अत्थो. इदं वुत्तं होति – सूपोदनविञ्ञत्तिसिक्खापदं थेय्यसत्थसमुट्ठानं, किरियं, सञ्ञाविमोक्खं, सचित्तकं, लोकवज्जं, कायकम्मं, वचीकम्मं, अकुसलचित्तं, दुक्खवेदनन्ति.

१९६०. अवसेसा तिपञ्ञासाति अवसेसानि तेपञ्ञाससिक्खापदानि. समाना पठमेन तूति पठमेन पाराजिकेन समुट्ठानादितो समानानीति अत्थो, पठमपाराजिकसदिससमुट्ठानानीति ¶ वुत्तं होति. ‘‘अनापत्ति आपदासू’’ति पदच्छेदो. परिमण्डलं निवासेत्वा, पारुपित्वा चरन्तानं चोरुपद्दवादि आपदा नाम. अपि-सद्देन नदिसन्तरणादिं सङ्गण्हाति. सेखियेसु सब्बेसूति येभुय्यवसेन वुत्तं.

१९६१. ‘‘न उज्झानसञ्ञी परेसं पत्तं ओलोकेस्सामी’’तिआदीनं (पाचि. ६१४) इमस्स अनापत्तिवारस्स असम्भवतो न पनागतोति पाळियं न वुत्तो. तस्सापि यथावत्थुकाव आपत्तियो दट्ठब्बा.

इति विनयत्थसारसन्दीपनिया

विनयविनिच्छयवण्णनाय

सेखियकथावण्णना निट्ठिता.

१९६२. यो ¶ इमं विनिच्छयं विदित्वा ठितो, सो हि यस्मा विनये विसारदो होति, विनीतमानसो च होति, परेहि दुप्पधंसियो च होति, ततो तस्मा कारणा समाहितो सततं इमं विनयविनिच्छयं सिक्खेय्याति योजना.

तत्थ इमं विनिच्छयं विदित्वाति सब्बलोकियलोकुत्तरगुणसम्पत्तिनिदानं इमं विनयविनिच्छयं अत्थतो, गन्थतो, विनिच्छयतो च सक्कच्चं ञत्वा. विसारदोति सारज्जनं सारदो, विगतो सारदो अस्साति विसारदो, विनयपरियत्तिया, आपत्तादिविभागे च निब्भयो निरासङ्कोति वुत्तं होति. न केवलं इमस्स जानने एसोव आनिसंसो, अथ खो विनीतमानसो च होति, संयतचित्तो होतीति अत्थो. सोति इमं विनिच्छयं सक्कच्चं विदित्वा ठितो भिक्खु. परेहीति इमं अजानन्तेहि अञ्ञेहि. दुप्पधंसियो च होतीति अनभिभवनीयो च होति.

ततोति तस्मा विनये विसारदतादिसब्बगुणसम्पन्नहेतुत्ता. हीति यस्माति अत्थो. सिक्खेति सज्झायनसवनादिवसेन सिक्खेय्य, उग्गण्हेय्याति अत्थो. ‘‘सतत’’न्ति इमिना सब्बत्थककम्मट्ठाने विय एत्थापि सतताभियोगो कातब्बोति दस्सेति. विक्खित्तस्स यथाभूतपटिवेधाभावतो तप्पटिपक्खाय एकग्गताय नियोजेन्तो आह ‘‘समाहितो’’ति, सम्मा विनयविनिच्छये ¶ आहितो पतिट्ठितो एकग्गचित्तोति वुत्तं होति. यथाह ‘‘अविक्खित्तस्सायं धम्मो, नायं धम्मो विक्खित्तस्सा’’ति.

१९६३. एवं इमाय गाथाय वुत्तमेवत्थं पकारन्तरेनापि दस्सेतुमाह ‘‘इम’’न्तिआदि. तेति अपेक्खित्वा ‘‘ये’’ति ¶ लब्भति. ये थेरा वा नवा वा मज्झिमा वा. परमन्ति अमतमहानिब्बानप्पत्तिया मूलकारणस्स सीलस्स पकासनतो उत्तमं. असंकरन्ति निकायन्तरलद्धीहि असम्मिस्सं. संकरन्ति वुत्तप्पकारगुणोपेतत्ता कायचित्तसुखकारणं सम्मुखं करोतीति संकरं. सवनामतन्ति सद्दरसादियोगेन कण्णरसायनं. अमतन्ति ततोयेव अमतं सुमधुरं. अमतमहानिब्बानावहत्ता वा फलूपचारेन अमतं. इमं विनयविनिच्छयं. अवेच्चाति सक्कच्चं विदित्वा. अधिकेति अधिसीलादिसिक्खत्तयप्पकासनेन उक्कट्ठे. हितेति लोकियलोकुत्तरसुखहेतुत्तेन हिते. हिनोति अत्तनो फलन्ति ‘‘हित’’न्ति सुखहेतु वुच्चति. कलिसासनेति लोभादिकिलेसविद्धंसने. सासनेति विनयपरियत्तिसङ्खातसासनेकदेसे. पटुत्तन्ति ब्यत्तभावं. न यन्ति न गच्छन्ति. के तेति कतमे ते. ‘‘न केचि सन्ति चा’’ति निस्सन्देहे इमिस्सा गाथाय अत्थो लिखितो.

एवं एत्थ अत्थयोजना वेदितब्बा – परमं उत्तमं असंकरं निकायन्तरलद्धीहि असम्मिस्सं संकरं सकललोकियलोकुत्तरसुखाभिनिप्फादकं सवनामतं सोतरसायनं इमं विनिच्छयप्पकरणं अवेच्च सक्कच्चं विदित्वा अधिके अधिसीलादिसिक्खत्तयप्पकासनेन उक्कट्ठे हिते लोकियलोकुत्तरसुखहेतुभूते कलिसासने सकलसंकिलेसविद्धंसके सासने विनयपिटकसङ्खाते परियत्तिसासने ये पटुत्तं न यन्ति, ते के नामाति योजना, ये इमं पकरणं अवेच्च विदित्वा ठिता, ते एकंसतो विनयपिटके पटुत्तं पापुणन्ति येवाति अधिप्पायो.

इति विनयत्थसारसन्दीपनिया

विनयविनिच्छयवण्णनाय

भिक्खुविभङ्गकथावण्णना निट्ठिता.

भिक्खुनिविभङ्गो

१९६४. एवं ¶ भिक्खुविभङ्गपाळिया, अट्ठकथाय च आगतं विनिच्छयसारं नातिसङ्खेपवित्थारनयेन ¶ दस्सेत्वा इदानि तदनन्तराय भिक्खुनिविभङ्गपाळिया, तदट्ठकथाय च आगतविनिच्छयसारं दस्सेतुमारभन्तो आह ‘‘भिक्खुनीन’’न्तिआदि. तस्मिं अपीति एत्थ अपि-सद्दो वुत्तापेक्खायं. ‘‘समासेना’’ति इदं गन्थवसेन सङ्खिपनं सन्धाय वुत्तं. ‘‘किञ्चिमत्त’’न्ति इदं अत्थवसेनाति वेदितब्बं.

पाराजिककथावण्णना

१९६५. छन्दसोति मेथुनसेवनरागपटिसंयुत्तेन छन्देन. एतेन ‘‘छन्दे पन असति बलक्कारेन पधंसिताय अनापत्ती’’ति (कङ्खा. अट्ठ. मेथुनधम्मसिक्खापदवण्णना) अट्ठकथा सूचिता होति. सा समणी पाराजिका नाम होतीति पवुच्चतीति योजना.

१९६६-७. ‘‘सजीवस्स अपि अजीवस्सा’’ति पदच्छेदो. ‘‘सन्थतं वा असन्थत’’न्ति इदं ‘‘अङ्गजात’’न्ति इमस्स विसेसनं. अत्तनो तिविधे मग्गेति अत्तनो वच्चपस्सावमुखमग्गानं अञ्ञतरस्मिं मग्गे. एत्थ ‘‘सन्थते वा असन्थते वा’’ति सेसो, ‘‘अल्लोकासे’’ति इमिना सम्बन्धो. ‘‘येभुय्यअक्खायितादिक’’न्ति पदच्छेदो. आदि-सद्देन अक्खायितं सङ्गण्हाति.

मनुस्सपुरिसादीनं नवन्नं सजीवस्सपि अजीवस्सपि यस्स कस्सचि सन्थतं वा असन्थतं वा येभुय्यक्खायितादिकं अङ्गजातं अत्तनो सन्थते वा असन्थते वा तिविधे मग्गे अल्लोकासे तिलफलमत्तम्पि पवेसेन्ती पराजिताति योजना.

१९६८. साधारणविनिच्छयन्ति ¶ भिक्खुभिक्खुनीनं साधारणसिक्खापदविनिच्छयं.

१९६९-७०. अधक्खकन्ति एत्थ अक्खकानं अधोति विग्गहो. उब्भजाणुमण्डलन्ति जाणुमण्डलानं उब्भन्ति विग्गहो. उब्भ-सद्दो उद्धं-सद्दपरियायो. इध ‘‘अत्तनो’’ति सेसो. अवस्सुतस्साति कायसंसग्गरागेन तिन्तस्स. अवस्सुताति एत्थापि एसेव नयो. याति वुत्तत्ता ‘‘सा’’ति लब्भति. सरीरन्ति एत्थ ‘‘यं किञ्ची’’ति सेसो. परोपक्कममूलकं पाराजिकं दस्सेतुमाह ¶ ‘‘तेन वा फुट्ठा’’ति. एत्थ ‘‘यथापरिच्छिन्ने काये’’ति च ‘‘सादियेय्या’’ति च वत्तब्बं.

या पन भिक्खुनी अवस्सुता अवस्सुतस्स मनुस्सपुग्गलस्स यं किञ्चि सरीरं अत्तनो अधक्खकं उब्भजाणुमण्डलं यं सरीरकं, तेन सरीरकेन छुपेय्य, तेन मनुस्सपुरिसेन यथापरिच्छिन्ने काये फुट्ठा सादियेय्य वा, सा पाराजिका सियाति योजना.

१९७१-२. ‘‘गहितं उब्भजाणुना’’ति इमिना कप्परतो उद्धं पाराजिकक्खेत्तमेवाति दीपेति. अत्तनो यथावुत्तप्पकारेन कायेनाति योजना, अत्तनो ‘‘अधक्खक’’न्तिआदिवुत्तप्पकारेन कायेनाति अत्थो. तथा अवस्सुताय अवस्सुतस्स पुरिसस्स कायपटिबद्धं फुसन्तिया थुल्लच्चयं होति. अत्तनो यथापरिच्छिन्नकायपटिबद्धेन तथा अवस्सुताय अवस्सुतस्स पुरिसस्स कायं फुसन्तिया थुल्लच्चयं होति.

१९७३. अत्तनो अवसेसेन कायेन अवस्सुताय अवस्सुतस्स पुरिसपुग्गलस्स कायं फुसन्तिया थुल्लच्चयं ¶ होति. एवं अत्तनो पयोगे च पुरिसस्स पयोगे च तस्सा भिक्खुनियायेव थुल्लच्चयं होतीति योजना.

१९७४. यक्खपेततिरच्छानपण्डकानं कायं ‘‘अधक्खकं उब्भजाणुमण्डल’’न्ति यथापरिच्छिन्नं तथेव अत्तनो कायेन उभतोअवस्सवे सति फुसन्तिया अस्सा भिक्खुनिया थुल्लच्चयं, तथेव यक्खादीनं पयोगेपि तस्सायेव थुल्लच्चयं होतीति योजना.

१९७५. एकतोवस्सवे चापीति भिक्खुनिया वसेन एकतोअवस्सवे चापि. थुल्लच्चयमुदीरितन्ति पाराजिकक्खेत्तभूतेन अत्तनो कायेन मनुस्सपुरिसस्स कायं फुसन्तिया थुल्लच्चयं अट्ठकथायं (पाचि. अट्ठ. ६६२) वुत्तन्ति अत्थो. अवसेसे च सब्बत्थाति यथावुत्तपाराजिकक्खेत्ततो अवसेसे थुल्लच्चयक्खेत्ते सब्बत्थ एकतोअवस्सवे सति दुक्कटं होतीति अत्थो. कायपटिबद्धेन कायपटिबद्धामसनादीसु सब्बत्थ उभतोअवस्सवे वा एकतोअवस्सवे वा दुक्कटमेव होति.

१९७६. ‘‘उब्भक्खकमधोजाणुमण्डल’’न्ति ¶ यं अपाराजिकक्खेत्तं इध दस्सितं, एत्थ एकतोअवस्सवे दुक्कटं होति. कप्परस्स च हेट्ठापि एत्थेव अधोजाणुमण्डले सङ्गहं गतन्ति योजना.

१९७७-९. भिक्खु भिक्खुनिया सद्धिं सचे कायसंसग्गं केलायति सेवतीति योजना. भिक्खुनिया नासो सियाति सीलविनासो पाराजिकापत्ति सियाति अत्थो. गेहपेमन्ति एत्थ ‘‘गेहसितपेम’’न्ति वत्तब्बे गाथाबन्धवसेन सित-सद्दलोपो, अत्थो पनस्स भिक्खुविभङ्गे वुत्तनयोव.

१९८०. अविसेसेनाति ¶ ‘‘भिक्खुनिया’’ति वा ‘‘भिक्खुस्सा’’ति वा विसेसं अकत्वा.

१९८१. यस्साति भिक्खुस्स वा भिक्खुनिया वा. यत्थाति भिक्खुनियं वा भिक्खुस्मिं वा. मनोसुद्धन्ति कायसंसग्गादिरागरहितं. तस्स भिक्खुस्स वा भिक्खुनिया वा तत्थ भिक्खुनियं वा भिक्खुस्मिं वा विसये नदोसता अनापत्तीति अत्थो.

१९८२. भिन्दित्वाति सीलभेदं कत्वा. भिक्खुनिया अपकतत्ता आह ‘‘नेव होति भिक्खुनिदूसको’’ति.

१९८३. अथाति वाक्यारम्भे. न होतापत्ति भिक्खुनोति एत्थ भिक्खुनीहि कायसंसग्गसङ्घादिसेसमाह.

१९८४. ‘‘खेत्ते’’ति वक्खमानं ‘‘फुट्ठा’’ति इमिना योजेत्वा ‘‘पाराजिक’’न्तिआदीहि, ‘‘थुल्लच्चयं खेत्ते’’तिआदीहि च सम्बन्धितब्बं. ‘‘पाराजिक’’न्ति वक्खमानत्ता फुट्ठाति एत्थ ‘‘पाराजिकक्खेत्ते’’ति सेसो.

१९८५. तथाति निच्चलापि सादियति. खेत्तेति थुल्लच्चयादीनं खेत्ते. कायेन निच्चलायपि चित्तेन सादियन्तिया आपत्ति कस्मा वुत्ताति आह ‘‘वुत्तत्ता…पे… सत्थुना’’ति ¶ , भिक्खुपातिमोक्खे विय ‘‘कायसंसग्गं समापज्जेय्या’’ति अवत्वा इध ‘‘कायसंसग्गं सादियेय्या’’ति वुत्तत्ताति अधिप्पायो.

१९८६. तस्सा आपत्तिया. क्रियसमुट्ठानन्ति किरियाय समुट्ठानं. एवं सतीति सादियनमत्तेनेव आपज्जितब्बभावे सति. इदन्ति ‘‘किरियसमुट्ठान’’मितिविधानं. तब्बहुलेनेव नयेनाति ¶ किरियसमुट्ठानबाहुल्लेन नयेन खदिरवनादिवोहारो वियाति दट्ठब्बं.

१९८७. तस्सा भिक्खुनिया असञ्चिच्च विरज्झित्वा आमसन्तिया अनापत्ति, ‘‘अयं पुरिसो’’ति वा ‘‘इत्थी’’ति वा अजानित्वा आमसन्तिया अनापत्ति, पुरिसस्स आमसने सति फस्सं असादियन्तिया वा अनापत्तीति योजना.

१९८८. खित्तचित्तायाति यक्खुम्मत्ताय. उम्मत्तिकाय वाति पित्तकोपेन उम्मादप्पत्ताय. इदञ्च ‘‘असुची’’ति वा ‘‘चन्दन’’न्ति वा विसेसतं अजाननमेव पमाणं.

उब्भजाणुमण्डलकथावण्णना.

१९८९-९०. ‘‘पाराजिकत्तं जानन्ती’’ति इमिना अवसेसापत्तिं जानित्वा छादेन्तिया पाराजिकाभावं दीपेति. सलिङ्गे तु ठितायाति पब्बज्जालिङ्गेयेव ठिताय. इति धुरे निक्खित्तमत्तस्मिन्ति योजना. इति-सद्दो निदस्सने. इतराय पुब्बेयेव आपन्नत्ता तमपेक्खित्वा ‘‘सा चा’’ति आह.

१९९१. वुत्ताविसिट्ठं सब्बं विनिच्छयं सङ्गहेतुमाह ‘‘सेस’’न्तिआदि. तत्थाति दुट्ठुल्लपटिच्छादने.

वज्जपटिच्छादिकथावण्णना.

१९९२-५. सङ्घेनाति समग्गेन सङ्घेन. उक्खित्तकोति आपत्तिया अदस्सनादीसु उक्खित्तको. ‘‘उक्खेपने ठितो’’ति इमिना उक्खेपनीयकम्मकतस्स अनोसारितभावं दीपेति. या ¶ दिट्ठि एतस्साति यंदिट्ठिको, सो उक्खित्तको भिक्खु याय दिट्ठिया समन्नागतो होतीति अधिप्पायो ¶ . ‘‘तस्सा दिट्ठिया गहणेना’’ति इमिना अनुवत्तप्पकारो दस्सितो. तं उक्खित्तकं भिक्खुन्ति योजना. सा भिक्खुनी अञ्ञाहि भिक्खुनीहि विसुम्पिच सङ्घमज्झेपि ‘‘एसो खो अय्ये भिक्खु समग्गेन सङ्घेन उक्खित्तो’’तिआदिना (पाचि. ६६९) नयेन तिक्खत्तुं वुच्चमानाति योजना. तं वत्थुं अचजन्ती गहेत्वा यदि तथेव तिट्ठतीति योजना. एत्थ ‘‘यावततियं समनुभासितब्बा’’ति सेसो. तस्स कम्मस्स ओसानेति ततियाय कम्मवाचाय य्यकारप्पत्तवसेन अस्स समनुभासनकम्मस्स परियोसाने. असाकियधीतराति असाकियधीता, पच्चत्ते करणवचनं. ‘‘पुन अप्पटिसन्धेया’’ति इमिना पुन तेनेव च अत्तभावेन भिक्खुनिभावे पटिसन्धातुं अनरहता वुत्ता.

१९९६. तिकदुक्कटं निद्दिट्ठन्ति अधम्मकम्मे अधम्मकम्मसञ्ञा, वेमतिका, धम्मकम्मसञ्ञाति एतासं वसेन तिकदुक्कटं वुत्तं. समनुभासने वुत्ता समुट्ठानादयो सब्बे इध वत्तब्बाति योजना.

उक्खित्तानुवत्तिककथावण्णना.

१९९७. ‘‘हत्थग्गहणं वा सादियेय्याति हत्थो नाम कप्परं उपादाय याव अग्गनखा. एतस्स असद्धम्मस्स पटिसेवनत्थाय उब्भक्खकं अधोजाणुमण्डलं गहणं सादियति, आपत्ति थुल्लच्चयस्सा’’ति (पाचि. ६७६) वुत्तत्ता आह ‘‘अपाराजिकखेत्तस्सा’’तिआदि. ‘‘त’’न्ति वक्खमानत्ता ‘‘य’’न्ति लब्भति. अपाराजिकक्खेत्तस्स यस्स कस्सचि अङ्गस्स यं गहणं, तं हत्थग्गहणन्ति पवुच्चतीति योजना. हत्थे गहणं हत्थग्गहणं.

१९९८. यस्स कस्सचीति वुत्तप्पकारेन यस्स कस्सचि चीवरस्स यं गहणन्ति योजना.

१९९९. असद्धम्म-सद्देन ¶ मेथुनस्सापि वुच्चमानत्ता ततो विसेसेतुमाह ‘‘कायसंसग्ग ¶ …पे… कारणा’’ति. भिक्खुनी कायसंसग्गसङ्खातस्स असद्धम्मस्स कारणा पुरिसस्स हत्थपासस्मिं तिट्ठेय्य वाति योजना.

२०००. ततोति तस्स असद्धम्मस्स कारणा. तत्थाति हत्थपासे. पुरिसेनाति एत्थ ‘‘कत’’न्ति सेसो, ‘‘सङ्केत’’न्ति इमिना सम्बन्धो. ‘‘आगमनं अस्सा’’ति पदच्छेदो. इच्छेय्याति वुत्तेपि न गमनिच्छामत्तेन, अथ खो भिक्खुनिया पुरिसस्स हत्थपासं, पुरिसेन च भिक्खुनिया हत्थपासं ओक्कन्तकालेयेव वत्थुपूरणं दट्ठब्बं. यथाह ‘‘सङ्केतं वा गच्छेय्याति एतस्स असद्धम्मस्स पटिसेवनत्थाय पुरिसेन ‘इत्थन्नामं आगच्छा’ति वुत्ता गच्छति, पदे पदे आपत्ति दुक्कटस्स. पुरिसस्स हत्थपासं ओक्कन्तमत्ते आपत्ति थुल्लच्चयस्सा’’ति (पाचि. ६७६) च ‘‘पुरिसस्स अब्भागमनं सादियति, आपत्ति दुक्कटस्स. हत्थपासं ओक्कन्तमत्ते आपत्ति थुल्लच्चयस्सा’’ति (पाचि. ६७६) च. एत्थ च इत्थन्नामं आगच्छाति इत्थन्नामं ठानं आगच्छाति अत्थो.

२००१. तदत्थायाति तस्सेव कायसंसग्गसङ्खातअसद्धम्मस्स सेवनत्थाय. पटिच्छन्नट्ठानञ्चाति वत्थादिना येन केनचि पटिच्छन्नओकासं. पुरिसस्स हत्थपासे ठिता तदत्थाय कायं उपसंहरेय्य वाति योजना.

२००२. हत्थग्गहणादीनं वुत्तप्पकारानं अट्ठन्नं वत्थूनं पूरणेन ‘‘अट्ठवत्थुका’’ति सङ्खाता अयं भिक्खुनी विनट्ठा होति सीलविनासेन, ततोयेव अस्समणी होति अभिक्खुनी होतीति योजना.

२००३. अनुलोमेन ¶ वाति हत्थग्गहणादिपटिपाटिया वा. पटिलोमेन वाति तब्बिपरियतो पटिलोमेन वा. एकन्तरिकाय वाति एकमेकं अन्तरित्वा पुन तस्सापि करणवसेन एकन्तरिकाय वा. अनुलोमेन वा पटिलोमेन वा तथेकन्तरिकाय वा अट्ठमं वत्थुं परिपूरेन्ती चुताति योजना.

२००४. एतदेव अत्थं ब्यतिरेकमुखेन समत्थेतुमाह ‘‘अथादितो’’तिआदि. सतक्खत्तुम्पीति ¶ बहुक्खत्तुम्पि. सत-सद्दो हेत्थ बहु-सद्दपरियायो. पाराजिका नेव सियाति योजना, इमिना तंतंवत्थुमूलकं दुक्कटथुल्लच्चयं आपज्जतीति वुत्तं होति.

२००५. या पन आपत्तियो आपन्ना, देसेत्वा ताहि मुच्चतीति योजना. धुरनिक्खेपनं कत्वाति ‘‘न पुनेवं करिस्सामी’’ति धुरं निक्खिपित्वा. देसिता गणनूपिकाति देसिता देसितगणनमेव उपेति, पाराजिकस्स अङ्गं न होतीति अत्थो. तस्मा या एकं आपन्ना, धुरनिक्खेपं कत्वा देसेत्वा पुन किलेसवसेन आपज्जति, पुन देसेति, एवं अट्ठ वत्थूनि पूरेन्तीपि पाराजिका न होति.

२००६. सउस्साहाय देसिताति पुन आपज्जने अनिक्खित्तधुराय भिक्खुनिया देसितापि आपत्ति देसनागणनं न उपेति. किं होतीति आह ‘‘देसितापि अदेसिता’’ति, तस्मा पाराजिकापत्तिया अङ्गमेव होतीति अधिप्पायो.

२००८. अयं अत्थोति ‘‘असद्धम्मो नाम कायसंसग्गो’’ति अयं अत्थो. उद्दिसितोति पकासितो.

२००९. अयमत्थो ¶ केन वचनेन उद्दिसितोति आह ‘‘विञ्ञू…पे… साधकं वचनं इद’’न्ति. इदं वचनन्ति ‘‘विञ्ञू पटिबलो कायसंसग्गं समापज्जितु’’न्ति (पाचि. ६७६) इदं वचनं. साधकं पमाणं.

अट्ठवत्थुककथावण्णना.

२०१०. अवस्सुता, वज्जपटिच्छादिका, उक्खित्तानुवत्तिका, अट्ठवत्थुकाति इमा चतस्सो पाराजिकापत्तियो महेसिना असाधारणा भिक्खुनीनमेव पञ्ञत्ताति योजना.

इति विनयत्थसारसन्दीपनिया

विनयविनिच्छयवण्णनाय

पाराजिककथावण्णना निट्ठिता.

सङ्घादिसेसकथावण्णना

२०११. एवं ¶ भिक्खुनिविभङ्गे आगतं पाराजिकविनिच्छयं वत्वा इदानि तदनन्तरुद्दिट्ठं सङ्घादिसेसविनिच्छयं दस्सेतुमाह ‘‘या पन भिक्खुनी’’तिआदि. उस्सयवादाति कोधुस्सयमानुस्सयवसेन विवदमाना. ततोयेव अट्टं करोति सीलेनाति अट्टकारी. एत्थ च ‘‘अट्टो’’ति वोहारिकविनिच्छयो वुच्चति, यं पब्बजिता ‘‘अधिकरण’’न्तिपि वदन्ति. सब्बत्थ वत्तब्बे मुखमस्सा अत्थीति मुखरी, बहुभाणीति अत्थो. येन केनचि नरेन सद्धिन्ति ‘‘गहपतिना वा गहपतिपुत्तेन वा’’तिआदिना (पाचि. ६७९) दस्सितेन येन केनचि मनुस्सेन सद्धिं. इधाति इमस्मिं सासने. किराति पदपूरणे, अनुस्सवने वा.

२०१२. सक्खिं ¶ वाति पच्चक्खतो जाननकं वा. अट्टं कातुं गच्छन्तिया पदे पदे तथा दुक्कटन्ति योजना.

२०१३. वोहारिकेति विनिच्छयामच्चे.

२०१४. अनन्तरन्ति तस्स वचनानन्तरं.

२०१५. इतरोति अट्टकारको. पुब्बसदिसोव विनिच्छयोति पठमारोचने दुक्कटं, दुतियारोचने थुल्लच्चयन्ति वुत्तं होति.

२०१६. ‘‘तव, ममापि च कथं तुवमेव आरोचेही’’ति इतरेन वुत्ता भिक्खुनीति योजना. यथाकामन्ति तस्सा च अत्तनो च वचने यं पठमं वत्तुमिच्छति, तं इच्छानुरूपं आरोचेतु.

२०१८-९. उभिन्नम्पि यथा तथा आरोचितकथं सुत्वाति योजना. यथा तथाति पुब्बे वुत्तनयेन केनचि पकारेन. तेहीति वोहारिकेहि. अट्टे पन च निट्ठितेति अट्टकारकेसु एकस्मिं पक्खे पराजिते. यथाह ‘‘पराजिते अट्टकारके अट्टपरियोसानं नाम होती’’ति. अट्टस्स परियोसानेति एत्थ ‘‘तस्सा’’ति सेसो. तस्स अट्टस्स परियोसानेति योजना.

२०२०-२३. अनापत्तिविसयं ¶ दस्सेतुमाह ‘‘दूतं वापी’’तिआदि. पच्चत्थिकमनुस्सेहि दूतं वापि पहिणित्वा सयम्पि वा आगन्त्वा या पन आकड्ढीयतीति योजना. अञ्ञेहीति गामदारकादीहि अञ्ञेहि. किञ्चि परं अनोदिस्साति योजना. इमिस्सा ओदिस्स वुत्ते तेहि गहितदण्डे तस्सा च गीवाति सूचितं होति. या रक्खं याचति ¶ , तत्थ तस्मिं रक्खायाचने तस्सा अनापत्ति पकासिताति योजना. अञ्ञतो सुत्वाति योजना. उम्मत्तिकादीनन्ति एत्थ आदि-सद्देन आदिकम्मिका गहिता.

समुट्ठानं कथिनेन तुल्यन्ति योजना. सेसं दस्सेतुमाह ‘‘सकिरियं इद’’न्ति. इदं सिक्खापदं. किरियाय सह वत्ततीति सकिरियं अट्टकरणेन आपज्जनतो. ‘‘समुट्ठान’’न्ति इमिना च समुट्ठानादिविनिच्छयो उपलक्खितोति दट्ठब्बो.

अट्टकारिकाकथावण्णना.

२०२४-५. जानन्तीति ‘‘सामं वा जानाति, अञ्ञे वा तस्सा आरोचेन्ती’’ति (पाचि. ६८४) वुत्तनयेन जानन्ती. चोरिन्ति याय पञ्चमासग्घनकतो पट्ठाय यं किञ्चि परसन्तकं अवहरितं, अयं चोरी नाम. वज्झं विदितन्ति ‘‘तेन कम्मेन वधारहा अय’’न्ति एवं विदितं. सङ्घन्ति भिक्खुनिसङ्घं. अनपलोकेत्वाति अनापुच्छा. राजानं वाति रञ्ञा अनुसासितब्बट्ठाने तं राजानं वा. यथाह ‘‘राजा नाम यत्थ राजा अनुसासति, राजा अपलोकेतब्बो’’ति. गणमेव वाति ‘‘तुम्हेव तत्थ अनुसासथा’’ति राजूहि दिन्नं गामनिगममल्लगणादिकं गणं वा. मल्लगणं नाम पानीयट्ठपनपोक्खरणिखणनादिपुञ्ञकम्मनियुत्तो जनसमूहो. एतेनेव एवमेव दिन्नगामवरा पूगा च सेनियो च सङ्गहिता. वुट्ठापेय्याति उपसम्पादेय्य. कप्पन्ति च वक्खमानलक्खणं कप्पं. सा चोरिवुट्ठापनन्ति सम्बन्धो. उपज्झाया हुत्वा या चोरिं उपसम्पादेति, सा भिक्खुनीति अत्थो. उपज्झायस्स भिक्खुस्स दुक्कटं.

२०२६. पञ्चमासग्घनन्ति एत्थ पञ्चमासञ्च पञ्चमासग्घनकञ्च पञ्चमासग्घनन्ति एकदेससरूपेकसेसनयेन पञ्चमासस्सापि ¶ गहणं. अतिरेकग्घनं वापीति एत्थापि एसेव नयो.

२०२७. पब्बजितं ¶ पुब्बं याय सा पब्बजितपुब्बा. वुत्तप्पकारं चोरकम्मं कत्वापि तित्थायतनादीसु या पठमं पब्बजिताति अत्थो.

२०२८-३०. इदानि पुब्बपयोगदुक्कटादिआपत्तिविभागं दस्सेतुमाह ‘‘वुट्ठापेति च या चोरि’’न्तिआदि. इध ‘‘उपज्झाया हुत्वा’’ति सेसो. इदं कप्पं ठपेत्वाति योजना. सीमं सम्मन्नति चाति अभिनवं सीमं सम्मन्नति, बन्धतीति वुत्तं होति. अस्साति भवेय्य. ‘‘दुक्कट’’न्ति इमिना च ‘‘थुल्लच्चयं द्वय’’न्ति इमिना च योजेतब्बं.

कम्मन्तेति उपसम्पदकम्मस्स परियोसाने, ततियाय कम्मवाचाय य्यकारप्पत्तायाति वुत्तं होति.

२०३१. अजानन्तीति चोरिं अजानन्ती. (इदं सिक्खापदं.)

२०३२. चोरिवुट्ठापनं नामाति इदं सिक्खापदं चोरिवुट्ठापनसमुट्ठानं नाम. वाचचित्ततोति खण्डसीमं अगन्त्वा करोन्तिया वाचाचित्तेहि. कायवाचादितो चेवाति गन्त्वा करोन्तिया कायवाचाचित्ततो च समुट्ठाति. यथाह ‘‘केनचिदेव करणीयेन पक्कन्तासु भिक्खुनीसु अगन्त्वा खण्डसीमं वा नदिं वा यथानिसिन्नट्ठानेयेव अत्तनो निस्सितकपरिसाय सद्धिं वुट्ठापेन्तिया वाचाचित्ततो समुट्ठाति, खण्डसीमं वा नदिं वा गन्त्वा वुट्ठापेन्तिया ¶ कायवाचाचित्ततो समुट्ठाती’’ति (पाचि. अट्ठ. ६८३). क्रियाक्रियन्ति अनापुच्छावुट्ठापनवसेन किरियाकिरियं.

चोरिवुट्ठापनकथावण्णना.

२०३३-४. गामन्तरन्ति अञ्ञं गामं. या एका सचे गच्छेय्याति सम्बन्धो. नदीपारन्ति एत्थापि एसेव नयो. नदिया पारं नदीपारं. ‘‘एका वा’’ति उपरिपि योजेतब्बं. ओहीयेय्याति विना भवेय्य. इध ‘‘अरञ्ञे’’ति सेसो. अरञ्ञलक्खणं ‘‘इन्दखील’’इच्चादिना वक्खति. ‘‘एका वा रत्तिं विप्पवसेय्य, एका वा गणम्हा ओहीयेय्या’’ति सिक्खापदक्कमो, एवं सन्तेपि गाथाबन्धवसेन ‘‘रत्तिं विप्पवसेय्या’’ति अन्ते वुत्तं ¶ . तेनेव विभागविनिच्छये देसनारुळ्हक्कमेनेव ‘‘पुरेरुणोदयायेवा’’तिआदिं वक्खति. सा पठमापत्तिकं गरुकं धम्मं आपन्ना सियाति योजना. पठमं आपत्ति एतस्साति पठमापत्तिको, वीतिक्कमक्खणेयेव आपज्जितब्बोति अत्थो. ‘‘गरुकं धम्म’’न्ति इमिना सम्बन्धो. सकगामा निक्खमन्तियाति भिक्खुनिया अत्तनो वसनगामतो निक्खमन्तिया.

२०३५. ततो सकगामतो.

२०३६-७. एकेन पदवारेन इतरस्स गामस्स परिक्खेपे अतिक्कन्ते, उपचारोक्कमे वा थुल्लच्चयन्ति योजना. अतिक्कन्ते ओक्कन्तेति एत्थ ‘‘परिक्खेपे उपचारे’’ति अधिकारतो लब्भति.

२०३८-९. निक्खमित्वाति अत्तनो पविट्ठगामतो निक्खमित्वा. अयमेव नयोति ‘‘एकेन पदवारेन थुल्लच्चयं, दुतियेन गरुकापत्ती’’ति अयं नयो.

वतिच्छिद्देन ¶ वा खण्डपाकारेन वाति योजना. ‘‘तथा’’ति इमिना ‘‘पाकारेना’’ति एत्थापि वा-सद्दस्स सम्बन्धनीयतं दस्सेति. ‘‘भिक्खुविहारस्स भूमि तासमकप्पिया’’ति वक्खमानत्ता विहारस्स भूमिन्ति भिक्खुनिविहारभूमि गहिता. ‘‘कप्पियन्ति पविट्ठत्ता’’ति इमिना वक्खमानस्स कारणं दस्सेति. कोचि दोसोति थुल्लच्चयसङ्घादिसेसो वुच्चमानो यो कोचि दोसो.

२०४०. तासन्ति भिक्खुनीनं. ‘‘अकप्पिया’’ति इमिना तत्थापि पविट्ठाय गामन्तरपच्चया आपत्तिसम्भवमाह.

२०४१. ‘‘पठमं पादं अतिक्कामेन्तिया’’ति (पाचि. ६९२) वुत्तत्ता ‘‘हत्थि…पे… अनापत्ति सियापत्ति, पदसा गमने पना’’ति वुत्तं.

२०४२. ‘‘यं किञ्चि…पे… आपत्ति पविसन्तिया’’ति वुत्तस्सेवत्थस्स उपसंहारत्ता न पुनरुत्तिदोसो.

२०४३-४. लक्खणेनुपपन्नायाति ¶ ‘‘नदी नाम तिमण्डलं पटिच्छादेत्वा यत्थ कत्थचि उत्तरन्तिया भिक्खुनिया अन्तरवासको तेमियती’’ति (पाचि. ६९२) वुत्तलक्खणेन समन्नागताय नदिया. या पारं तीरं गच्छतीति योजना.

पठमं पादं उद्धरित्वान तीरे ठपेन्तियाति ‘‘इदानि पदवारेन अतिक्कमती’’ति वत्तब्बकाले पठमं पादं उक्खिपित्वा परतीरे ठपेन्तिया. ‘‘दुतियपादुद्धारे सङ्घादिसेसो’’ति (पाचि. अट्ठ. ६९२) अट्ठकथावचनतो ‘‘अतिक्कमे’’ति इमिना उद्धारो गहितो.

२०४५. अन्तरनदियन्ति नदिवेमज्झे. भण्डित्वाति कलहं कत्वा. ओरिमं तीरन्ति आगतदिसाय तीरं. तथा पठमे थुल्लच्चयं ¶ , दुतिये गरु होतीति अत्थो. इमिना सकलेन वचनेन ‘‘इतरिस्सा पन अयं पक्कन्तट्ठाने ठिता होति, तस्मा परतीरं गच्छन्तियापि अनापत्ती’’ति अट्ठकथापि उल्लिङ्गिता.

२०४६. रज्जुयाति वल्लिआदिकाय याय कायचि रज्जुया.

२०४७. पिवितुन्ति एत्थ ‘‘पानीय’’न्ति पकरणतो लब्भति. अवुत्तसमुच्चयत्थेन अपि-सद्देन भण्डधोवनादिं सङ्गण्हाति. अथाति वाक्यारम्भे निपातो. ‘‘नहानादिकिच्चं सम्पादेत्वा ओरिममेव तीरं आगमिस्सामी’’ति आलयस्स विज्जमानत्ता आह ‘‘वट्टती’’ति.

२०४८. पदसानदिं ओतरित्वानाति योजना. सेतुं आरोहित्वा तथा पदसा उत्तरन्तिया अनापत्तीति योजना.

२०४९. गन्त्वानाति एत्थ ‘‘नदि’’न्ति सेसो. उत्तरणकाले पदसा यातीति योजना.

२०५०. वेगेनाति एकेनेव वेगेन, अन्तरा अनिवत्तित्वाति अत्थो.

२०५१. ‘‘निसीदित्वा’’ति इदं ‘‘खन्धे वा’’तिआदीहिपि योजेतब्बं. खन्धादयो चेत्थ सभागानमेव गहेतब्बा. हत्थसङ्घातने वाति उभोहि बद्धहत्थवलये वा.

२०५२-३. पासन्ति ¶ हत्थपासं. ‘‘आभोगं विना’’ति इमिना ‘‘गमिस्सामी’’ति आभोगे कते अजानन्तिया अरुणे ¶ उट्ठितेपि अनापत्तीति दीपितं होति. यथाह ‘‘सचे सज्झायं वा सवनं वा अञ्ञं वा किञ्चि कम्मं कुरुमाना ‘पुरेअरुणेयेव दुतियिकाय सन्तिकं गमिस्सामी’ति आभोगं करोति, अजानन्तिया एव चस्सा अरुणो उग्गच्छति, अनापत्ती’’ति (पाचि. अट्ठ. ६९२). नानागब्भे वत्तब्बमेव नत्थीति दस्सेतुमाह ‘‘एकगब्भेपि वा’’ति. एकगब्भेपि वा दुतियिकाय हत्थपासं अतिक्कम्म अरुणं उट्ठपेन्तिया भिक्खुनिया आपत्ति सियाति योजना.

२०५४. दुतियापासन्ति दुतियिकाय हत्थपासं. ‘‘गमिस्सामी’’ति आभोगं कत्वा गच्छन्तिया सचे अरुणं उट्ठेति, न दोसोति योजना.

२०५५-६. अञ्ञत्थ पञ्चधनुसतिकस्स (पारा. ६५४) पच्छिमस्स आरञ्ञकसेनासनस्स वुत्तत्ता ततो निवत्तेतुमाह ‘‘इन्दखीलमतिक्कम्मा’’तिआदि. एत्थाति इमस्मिं सिक्खापदे. दीपितन्ति अट्ठकथाय ‘‘अरञ्ञेति एत्थ निक्खमित्वा बहि इन्दखीला सब्बमेतं अरञ्ञ’’न्ति (पाचि. अट्ठ. ६९२) एवं वुत्तलक्खणमेव अरञ्ञं दस्सितन्ति अत्थो.

दुतियिकाय दस्सनूपचारं विजहन्तिया तस्साति योजना. ‘‘जहिते’’ति इदं अपेक्खित्वा ‘‘उपचारे’’ति विभत्तिविपरिणामो कातब्बो.

२०५७. साणिपाकारपाकारतरुअन्तरिते ठाने असति दस्सनूपचारे सतिपि सवनूपचारे आपत्ति होतीति योजना.

२०५८-६०. एत्थ कथन्ति यत्थ दूरेपि दस्सनं होति, एवरूपे अज्झोकासे आपत्तिनियमो कथं कातब्बोति ¶ अत्थो. अनेकेसु ठानेसु ‘‘सवनूपचारातिक्कमे’’ति वुच्चमानत्ता तत्थ लक्खणं ठपेतुमाह ‘‘मग्ग…पे… एवरूपके’’ति. एत्थ ‘‘ठाने’’ति सेसो. कूजन्तियाति यथावण्णववत्थानं न होति, एवं अब्यत्तसद्दं करोन्तिया.

एवरूपके ठाने धम्मस्सवनारोचने विय च मग्गमूळ्हस्स सद्देन विय च ‘‘अय्ये’’ति कूजन्तिया ¶ तस्सा सद्दस्स सवनातिक्कमे भिक्खुनिया गरुका आपत्ति होतीति योजना. ‘‘भिक्खुनिया गरुका होती’’ति इदं ‘‘दुतियिकं न पापुणिस्सामी’’ति निरुस्साहवसेन वेदितब्बं. तेनेव वक्खति ‘‘ओहीयित्वाथ गच्छन्ती’’तिआदि. एत्थाति ‘‘गणम्हा ओहीयेय्या’’ति इमस्मिं.

२०६१. अथ गच्छन्ती ओहीयित्वाति योजना. ‘‘इदानि अहं पापुणिस्सामि’’ इति एवं सउस्साहा अनुबन्धति, वट्टति, दुतियोपचारातिक्कमेपि अनापत्तीति वुत्तं होति.

२०६२. ‘‘गच्छतु अयं’’ इति उस्साहस्सच्छेदं कत्वा ओहीना चे, तस्सा आपत्तीति अज्झाहारयोजना.

२०६३. इतरापीति गन्तुं समत्थापि. ओहीयतु अयन्ति चाति निरुस्साहप्पकारो सन्दस्सितो. वुत्तत्थमेव समत्थयितुमाह ‘‘सउस्साहा न होति चे’’ति.

२०६४-५. पुरिमा एककं मग्गं यातीति योजना. एकमेव एककं. तस्माति यस्मा एकिस्सा इतरा पक्कन्तट्ठाने तिट्ठति, तस्मा. तत्थाति तस्मिं गणम्हाओहीयने. पि-सद्दो एवकारत्थो. अनापत्ति एव पकासिताति योजना.

२०६६-७. गामन्तरगतायाति गामसीमगताय. ‘‘नदिया’’ति इमिना सम्बन्धो. आपत्तियोचतस्सोपीति रत्तिविप्पवास गामन्तरगमन नदिपारगमन गणम्हाओहीयन सङ्खाता चतस्सो ¶ सङ्घादिसेसापत्तियो. गणम्हाओहीयनमूलकापत्तिया गामतो बहि आपज्जितब्बत्तेपि गामन्तरोक्कमनमूलकापत्तिया अन्तोगामे आपज्जितब्बत्तेपि एकक्खणेति गामूपचारं सन्धायाह.

२०६८-९. या सद्धिं याता दुतियिका, सा च पक्कन्ता वा सचे होति, विब्भन्ता वा होति, पेतानं लोकं याता वा होति, कालकता वा होतीति अधिप्पायो, पक्खसङ्कन्ता वा होति, तित्थायतनसङ्कन्ता वा होतीति अधिप्पायो, नट्ठा वा होति, पाराजिकापन्ना वा होतीति ¶ अधिप्पायो. एवरूपे काले गामन्तरोक्कमनादीनि…पे… अनापत्तीति ञातब्बन्ति योजना. उम्मत्तिकायपि एवं चत्तारिपि करोन्तिया अनापत्तीति योजना.

२०७०. ‘‘अगामके अरञ्ञे’’ति इदं गामाभावेन वुत्तं, न विञ्झाटविसदिसताय.

२०७१. गामभावतो नदिपारगमनगणम्हाओहीयनापत्ति न सम्भवति, तस्सापि सकगामत्ता गामन्तरगमनमूलिकापत्ति च दिवसभागत्ता रत्तिविप्पवासमूलिकापत्ति च न सम्भवतीति आह ‘‘सकगामे…पे… न विज्जरे’’ति. यथाकामन्ति यथिच्छितं, दुतियिकाय असन्तियापीति अत्थो.

२०७२. समुट्ठानादयो पठमन्तिमवत्थुना तुल्याति योजना.

गामन्तरगमनकथावण्णना.

२०७३. सीमासम्मुतिया चेवाति ‘‘समग्गेन सङ्घेन धम्मेन विनयेन उक्खित्तं भिक्खुनिं कारकसङ्घं अनापुच्छा तस्सेव कारकसङ्घस्स छन्दं अजानित्वा ओसारेस्सामी’’ति नवसीमासम्मन्नने च. द्वीहि कम्मवाचाहि दुवे थुल्लच्चया होन्तीति योजना.

२०७४. कम्मस्स ¶ परियोसानेति ओसारणकम्मस्स अवसाने. तिकसङ्घादिसेसन्ति ‘‘धम्मकम्मे धम्मकम्मसञ्ञा ओसारेति, आपत्ति सङ्घादिसेसस्स. धम्मकम्मे वेमतिका, धम्मकम्मे अधम्मकम्मसञ्ञा ओसारेति, आपत्ति सङ्घादिसेसस्सा’’ति (पाचि. ६९७) तिकसङ्घादिसेसं वुत्तं. कम्मन्ति च उक्खेपनीयकम्मं. अधम्मे तिकदुक्कटन्ति ‘‘अधम्मकम्मे धम्मकम्मसञ्ञा ओसारेति, आपत्ति दुक्कटस्स. अधम्मकम्मे वेमतिका, अधम्मकम्मसञ्ञा ओसारेति, आपत्ति दुक्कटस्सा’’ति तिकदुक्कटं वुत्तं.

२०७५. गणस्साति तस्सेव कारकगणस्स. वत्ते वा पन वत्तन्तिन्ति तेचत्तालीसप्पभेदे नेत्तारवत्ते वत्तमानं. तेचत्तालीसप्पभेदं पन वत्तक्खन्धके (चूळव. ३७६) आवि भविस्सति. नेत्तारवत्तेति कम्मतो नित्थरणस्स हेतुभूते वत्ते.

२०७७. ओसारणं ¶ क्रियं. अनापुच्छनं अक्रियं.

चतुत्थं.

२०७८-९. अवस्सुताति मेथुनरागेन तिन्ता. एवमुपरिपि. ‘‘मनुस्सपुग्गलस्सा’’ति इमिना यक्खादीनं पटिक्खेपो. ‘‘उदके…पे… दुक्कट’’न्ति वक्खमानत्ता आमिसन्ति अञ्ञत्र दन्तपोना अज्झोहरणीयस्स गहणं. पयोगतोति पयोगगणनाय.

२०८०. एकतोवस्सुतेति पुमित्थिया सामञ्ञेन पुल्लिङ्गनिद्देसो. कथमेतं विञ्ञायतीति? ‘‘एकतोअवस्सुतेति एत्थ भिक्खुनिया अवस्सुतभावो दट्ठब्बोति महापच्चरियं वुत्तं. महाअट्ठकथायं पनेतं न वुत्तं, तं ¶ पाळिया समेती’’ति (पाचि. अट्ठ. ७०१) वुत्तत्ता विञ्ञायति. एत्थ च एतं न वुत्तन्ति ‘‘भिक्खुनिया अवस्सुतभावो दट्ठब्बो’’ति एतं नियमनं न वुत्तं. तन्ति तं नियमेत्वा अवचनं. पाळिया समेतीति ‘‘एकतोअवस्सुते’’ति (पाचि. ७०१-७०२) अविसेसेत्वा वुत्तपाळिया, ‘‘अनवस्सुतोति जानन्ती पटिग्गण्हाती’’ति (पाचि. ७०३) इमाय च पाळिया समेति. यदि हि पुग्गलस्स अवस्सुतभावो नप्पमाणं, किं ‘‘अनवस्सुतोति जानन्ती’’ति इमिना वचनेन. ‘‘अनापत्ति उभो अनवस्सुता होन्ति, अनवस्सुता पटिग्गण्हाती’’ति एत्तकमेव वत्तब्बं सिया. अज्झोहारपयोगेसु बहूसु थुल्लच्चयचयो थुल्लच्चयानं समूहो सिया, पयोगगणनाय बहूनि थुल्लच्चयानि होन्तीति अधिप्पायो.

२०८१. सम्भवे, ब्यभिचारे च विसेसनं सात्थकं भवतीति ‘‘मनुस्सविग्गहान’’न्ति इदं विसेसनं यक्खपेततिरच्छानपदेहि योजेतब्बं. उभतोअवस्सुते सति मनुस्सविग्गहानं यक्खपेततिरच्छानानं हत्थतो च पण्डकानं हत्थतो च तथाति योजना. तथा-सद्देनेत्थ ‘‘यं किञ्चि आमिसं पटिग्गण्हाति, दुक्कटं. अज्झोहारपयोगेसु थुल्लच्चयचयो सिया’’ति यथावुत्तमतिदिसति.

२०८२. एत्थाति इमेसु यक्खादीसु. एकतोअवस्सुते सति आमिसं पटिग्गण्हन्तिया दुक्कटं. सब्बत्थाति सब्बेसु मनुस्सामनुस्सेसु एकतो, उभतो वा अनवस्सुतेसु. उदके दन्तकट्ठकेति ¶ उदकस्स, दन्तकट्ठस्स च गहणे. परिभोगे चाति पटिग्गहणे चेव परिभोगे च.

२०८३-४. उभयावस्सुताभावेति भिक्खुनिया, पुग्गलस्स च उभिन्नं अवस्सुतत्ते असति यदि आमिसं पटिग्गण्हाति ¶ , न दोसोति योजना. अयं पुरिसपुग्गलो. न च अवस्सुतोति नेव अवस्सुतोति ञत्वा. या पन आमिसं पटिग्गण्हाति, तस्सा च उम्मत्तिकादीनञ्च अनापत्ति पकासिताति योजना. ‘‘या गण्हाति, तस्सा अनापत्ती’’ति वुत्तेपि परिभुञ्जन्तियाव अनापत्तिभावो दट्ठब्बो.

पञ्चमं.

२०८५. उय्योजनेति ‘‘किं ते अय्ये एसो पुरिसपुग्गलो करिस्सति अवस्सुतो वा अनवस्सुतो वा, यतो त्वं अनवस्सुता, इङ्घ अय्ये यं ते एसो पुरिसपुग्गलो देति खादनीयं वा भोजनीयं वा, तं त्वं सहत्था पटिग्गहेत्वा खाद वा भुञ्ज वा’’ति (पाचि. ७०५) वुत्तनयेन नियोजने. एकिस्साति उय्योजिकाय. इतरिस्साति उय्योजिताय. पटिग्गहेति अवस्सुतस्स हत्थतो आमिसपटिग्गहणे. दुक्कटानि चाति उय्योजिकाय दुक्कटानि. भोगेसूति उय्योजिताय तथा पटिग्गहितस्स आमिसस्स परिभोगेसु. थुल्लच्चयगणो सियाति उय्योजिकाय थुल्लच्चयसमूहो सियाति अत्थो.

२०८६-७. भोजनस्सावसानस्मिन्ति उय्योजिताय भोजनपरियन्ते. सङ्घादिसेसताति उय्योजिकाय सङ्घादिसेसापत्ति होति.

यक्खादीनन्ति एत्थ आदि-सद्देन पेतपण्डकतिरच्छानगता गहिता. तथेव पुरिसस्स चाति अवस्सुतस्स मनुस्सपुरिसस्स. ‘‘गहणे उय्योजने’’ति पदच्छेदो. गहणेति उय्योजिताय गहणे. उय्योजनेति उय्योजिकाय अत्तनो उय्योजने. तेसन्ति उदकदन्तपोनानं. परिभोगेति उय्योजिताय परिभुञ्जने. दुक्कटं परिकित्तितन्ति उय्योजिकाय दुक्कटं वुत्तं.

२०८८. सेसस्साति ¶ ¶ उदकदन्तपोनतो अञ्ञस्स परिभुञ्जितब्बामिसस्स. ‘‘गहणुय्योजने’’तिआदि वुत्तनयमेव.

२०८९-९०. या पन भिक्खुनी ‘‘अनवस्सुतो’’ति ञत्वा उय्योजेति, ‘‘कुपिता वा न पटिग्गण्हती’’ति उय्योजेति, ‘‘कुलानुद्दयता वापि न पटिग्गण्हती’’ति उय्योजेति, तस्सा च उम्मत्तिकादीनञ्च अनापत्ति पकासिताति योजना. यथाह ‘‘अनापत्ति ‘अनवस्सुतो’ति जानन्ती उय्योजेति, ‘कुपिता न पटिग्गण्हती’ति उय्योजेति, ‘कुलानुद्दयताय न पटिग्गण्हती’ति उय्योजेती’’तिआदि (पाचि. ७०८).

छट्ठं.

२०९१. सत्तमन्ति ‘‘या पन भिक्खुनी कुपिता अनत्तमना एवं वदेय्य बुद्धं पच्चक्खामी’’तिआदिनयप्पवत्तं (पाचि. ७१०) सत्तमसिक्खापदञ्च. अट्ठमन्ति ‘‘या पन भिक्खुनी किस्मिञ्चिदेव अधिकरणे पच्चाकता’’तिआदिनयप्पवत्तं (पाचि. ७१६) अट्ठमसिक्खापदञ्च.

सत्तमट्ठमानि.

२०९२. नवमेति ‘‘भिक्खुनियो पनेव संसट्ठा विहरन्ती’’तिआदिसिक्खापदे (पाचि. ७२२) च. दसमेति ‘‘या पन भिक्खुनी एवं वदेय्य संसट्ठाव अय्ये तुम्हे विहरथ, मा तुम्हे नाना विहरित्था’’तिआदिसिक्खापदे (पाचि. ७२८) च.

नवमदसमानि.

२०९३. तेन महाविभङ्गागतेन दुट्ठदोसद्वयेन च तत्थेव आगतेन तेन सञ्चरित्तसिक्खापदेन चाति इमेहि तीहि सद्धिं इधागतानि छ सिक्खापदानीति एवं नव पठमापत्तिका ¶ . इतो भिक्खुनिविभङ्गतो चत्तारि यावततियकानि ततो महाविभङ्गतो चत्तारि यावततियकानीति ¶ एवं अट्ठ यावततियकानि, पुरिमानि नव चाति सत्तरस सङ्घादिसेससिक्खापदानि मया चेत्थ दस्सितानीति अधिप्पायो.

इति विनयत्थसारसन्दीपनिया विनयविनिच्छयवण्णनाय

सङ्घादिसेसकथावण्णना निट्ठिता.

निस्सग्गियकथावण्णना

२०९४-५. एवं सत्तरससङ्घादिसेसे दस्सेत्वा इदानि तदनन्तरानि निस्सग्गियानि दस्सेतुमाह ‘‘अधिट्ठानुपगं पत्त’’न्तिआदि. ‘‘अधिट्ठानुपगं पत्त’’न्ति इमिना पदेन केनचि कारणेन अनधिट्ठानुपगे पत्ते अनापत्तिभावं दीपेति. ‘‘तस्सा’’ति त-सद्दापेक्खाय भिक्खुनीति एत्थ ‘‘या’’ति लब्भति. पत्तसन्निधिकारणाति अनधिट्ठाय, अविकप्पेत्वा एकरत्तम्पि पत्तस्स निक्खित्तकारणा.

२०९६. इध इमस्मिं सिक्खापदे सेसो सब्बो विनिच्छयो कथामग्गोति योजना, अवसेससब्बविनिच्छयकथामग्गोति अत्थो. पत्तसिक्खापदेति महाविभङ्गपठमपत्तसिक्खापदे.

२०९७. विसेसोव विसेसता.

पठमं.

२०९८. अकालेति ‘‘अनत्थतकथिने विहारे एकादस मासा, अत्थतकथिने विहारे सत्त मासा’’ति (पाचि. ७४० अत्थतो समानं) एवं ¶ वुत्ते अकाले. विकप्पन्तरं दस्सेतुमाह ‘‘दिन्नं कालेपि केनची’’तिआदि. वुत्तविपरियायेन कालनियमो वेदितब्बो. केनचि अकाले यं चीवरं दिन्नं, कालेपि यं चीवरं आदिस्स दिन्नं, तं अकालचीवरं नामाति योजना. आदिस्स दानप्पकारं दस्सेतुमाह ‘‘सम्पत्ता भाजेन्तू’’ति. नियामितन्ति ‘‘सम्पत्ता भाजेन्तू’’ति एवं वत्वा दिन्नञ्च ‘‘इदं गणस्स, इदं तुय्हं दम्मी’’ति वत्वा वा दातुकामताय पादमूले ठपेत्वा वा दिन्नञ्च आदिस्स दिन्नं नामाति अत्थो. यथाह ‘‘सम्पत्ता भाजेन्तू’ति वत्वा वा ‘इदं ¶ गणस्स, इदं तुम्हाकं दम्मी’ति वत्वा वा दातुकम्यताय पादमूले ठपेत्वा वा दिन्नम्पि आदिस्स दिन्नं नाम होती’’ति (पाचि. अट्ठ. ७४०).

२०९९. अकालचीवरन्ति वुत्तप्पकारं अकालचीवरं.

२१००. अत्तना पटिलद्धन्ति ततो यं चीवरं अत्तना वस्सग्गेन पटिलद्धं. निस्सज्जित्वा पटिलद्धकाले कत्तब्बविधिं दस्सेतुमाह ‘‘लभित्वा…पे… नियोजये’’ति. यथादाने नियोजयेति यथा दायकेन दिन्नं, तथा उपनेतब्बं, अकालचीवरपक्खेयेव ठपेतब्बन्ति वुत्तं होति.

२१०१. तस्साति ‘‘यथादाने नियोजये’’ति वचनस्स. विनयकम्मं कत्वा पटिलद्धम्पि तं पुन सेवितुं न च वट्टतीति अयमधिप्पायोति योजना.

२१०२. कालचीवरे अकालवत्थसञ्ञाय दुक्कटन्ति योजना. उभयत्थपीति अकालचीवरेपि कालचीवरेपि. वेमतिकाय तथा दुक्कटन्ति योजना.

२१०३. उभयत्थपि ¶ चीवरे कालचीवरे च अकालचीवरे चाति उभयचीवरेपि कालचीवरसञ्ञाय भाजापेन्तिया नदोसोति योजना. सचित्तकसमुट्ठानत्तयं सन्धायाह ‘‘तिसमुट्ठानता’’ति.

दुतियं.

२१०४. सचे सयं अच्छिन्दति अञ्ञाय भिक्खुनिया सद्धिं चीवरं परिवत्तेत्वा पच्छा ‘‘तुय्हं चीवरं त्वमेव गण्ह, मय्हं चीवरं देही’’ति एवं यदि सयं अच्छिन्दति. एत्थ ‘‘सकसञ्ञाया’’ति सेसो. सकसञ्ञाय गहितत्ता पाचित्तियं, दुक्कटञ्च वुत्तं, इतरथा भण्डग्घेन कारेतब्बो.

२१०५. इतरेसूति अबन्धनञ्च आणत्तिबहुत्तञ्च सङ्गण्हाति. तेनाह ‘‘वत्थूनं पयोगस्स वसा सिया’’ति.

२१०६. ‘‘तिकपाचित्ती’’ति ¶ इदमपेक्खित्वा ‘‘उद्दिट्ठा’’ति सम्बन्धनीयं, उपसम्पन्नाय उपसम्पन्नसञ्ञा, वेमतिका, अनुपसम्पन्नसञ्ञाति एतासं वसेन तिकपाचित्ति वुत्ताति अत्थो. अञ्ञस्मिं परिक्खारेति उपसम्पन्नानुपसम्पन्नानं अञ्ञस्मिं परिक्खारे. इतरिस्साति अनुपसम्पन्नाय. तिकदुक्कटन्ति अनुपसम्पन्नाय उपसम्पन्नसञ्ञावेमतिकाअनुपसम्पन्नसञ्ञानं वसेन तिकदुक्कटं उद्दिट्ठं.

२१०७. ताय वा दीयमानं ताय अञ्ञाय भिक्खुनिया दुट्ठाय वा तुट्ठाय वा दीयमानं गण्हन्तिया, तस्सा विस्सासमेव वा गण्हन्तिया अनापत्तीति योजना. ‘‘तिसमुट्ठानता मता’’ति इदं वुत्तत्थमेव.

ततियं.

२१०८. या ¶ पन भिक्खुनी ‘‘किं ते, अय्ये, अफासु, किं आहरीयतू’’ति वुत्ता अञ्ञं विञ्ञापेत्वा तं आहटं पटिक्खिपित्वा तञ्च अञ्ञञ्च गण्हितुकामा सचे अञ्ञं विञ्ञापेति, तस्सा विञ्ञत्तिदुक्कटं, लाभा निस्सग्गियं सियाति साधिप्पाययोजना. विञ्ञत्तिया दुक्कटं विञ्ञत्तिदुक्कटं.

२१०९-११. तिकपाचित्तियं वुत्तन्ति ‘‘अञ्ञे अञ्ञसञ्ञा, अञ्ञे वेमतिका, अञ्ञे अनञ्ञसञ्ञा अञ्ञं विञ्ञापेत्वा अञ्ञं विञ्ञापेति, निस्सग्गियं पाचित्तिय’’न्ति (पाचि. ७५१) तिकपाचित्तियं वुत्तं. अनञ्ञे द्विकदुक्कटन्ति अनञ्ञे अञ्ञसञ्ञाय, वेमतिकाय च वसेन द्विकदुक्कटं. ‘‘अनञ्ञेनञ्ञसञ्ञाया’’तिआदिना अनापत्तिविसयो दस्सितो. ‘‘अनञ्ञे अनञ्ञसञ्ञाया’’ति पदच्छेदो. अनञ्ञे अनञ्ञसञ्ञाय विञ्ञापेन्तिया अनापत्ति. तस्मिं पठमविञ्ञापिते अप्पहोन्ते वा तञ्ञेव वा विञ्ञापेन्तिया अनापत्ति. अञ्ञेनपि अत्थे सति तेन सद्धिं अञ्ञं विञ्ञापेन्तिया अनापत्ति. इदं वुत्तं होति – सचे पठमं सप्पि विञ्ञत्तं, ‘‘आमकमंसं पचितब्ब’’न्ति च वेज्जेन वुत्तत्ता तेलेन अत्थो होति, ततो ‘‘तेलेनापि मे अत्थो’’ति एवं अञ्ञञ्च विञ्ञापेतीति. आनिसंसञ्च दस्सेत्वा ततो अञ्ञं विञ्ञापेन्तियापि अनापत्तीति ञातब्बन्ति योजना. इदं वुत्तं होति – सचे कहापणस्स ¶ सप्पि आभतं होति, इमिना मूलेन दिगुणं तेलं लब्भति, तेलेनापि च इदं किच्चं निप्पज्जति, तस्मा तेलमाहराति एवं आनिसंसं दस्सेत्वा विञ्ञापेतीति.

चतुत्थं.

२११२-३. पुब्बं ¶ अञ्ञं चेतापेत्वाति योजना, अत्तनो कप्पियभण्डेन ‘‘इदं नाम आहरा’’ति पुब्बं अञ्ञं परिवत्तापेत्वाति अत्थो. एवन्ति एत्थ ‘‘वुत्ते’’ति सेसो. धनेन निब्बत्तं धञ्ञं, अत्तनो धनेन निप्फादितत्ता तेलादि इध ‘‘धञ्ञ’’न्ति अधिप्पेतं, न वीहादि. एवं वुत्ते मय्हं अञ्ञं धञ्ञं आनेत्वा देति इति सञ्ञाय पच्छा अञ्ञं चेतापेय्याति योजना, न मे इमिना अत्थो, अञ्ञं आहराति वुत्ते इदञ्च दत्वा अञ्ञञ्च आहरित्वा देतीति सञ्ञाय ‘‘न मे इदं रुच्चति, अञ्ञं आहरा’’ति पच्छा अञ्ञं परिवत्तापेय्याति अत्थो. चेतापनपयोगेनाति आणत्ताय चेतापनवसेन. मूलट्ठायाति आणापिकाय. तेन च अञ्ञेन वा मूलेन आभतं होतु, तस्स लाभे निस्सग्गियं होतीति योजना.

२११४. सेसन्ति तिकपाचित्तियादिकं विनिच्छयविसेसं.

पञ्चमं.

२११५-६. अञ्ञदत्थाय दिन्नेनाति उपासकेहि ‘‘एवरूपं गहेत्वा भाजेत्वा परिभुञ्जथा’’ति अञ्ञस्सत्थाय दिन्नेन. ‘‘सङ्घिकेन परिक्खारेना’’ति इमिना सम्बन्धो. परिक्खारेनाति कप्पियभण्डेन. सङ्घिकेनाति सङ्घस्स परिच्चत्तेन. इधाति इमस्मिं सासने. तस्साति याय चेतापितं. निस्सग्गियं सियाति एत्थ निस्सट्ठपटिलद्धं यथादाने उपनेतब्बन्ति वत्तब्बं. यथाह ‘‘निस्सट्ठं पटिलभित्वा यथादाने उपनेतब्ब’’न्ति (पाचि. ७६१). इदं हेट्ठा वुत्तत्थाधिप्पायमेव. एत्थाति इमस्मिं सिक्खापदे. ‘‘अनञ्ञदत्थिके अञ्ञदत्थिकसञ्ञा, आपत्ति दुक्कटस्स. अनञ्ञदत्थिके वेमतिका, आपत्ति दुक्कटस्सा’’ति वुत्तत्ता आह ‘‘अनञ्ञदत्थिके निद्दिट्ठं ¶ द्विकदुक्कट’’न्ति. इमिना च ‘‘अञ्ञदत्थिके तिकपाचित्तिय’’न्ति इदं वुत्तमेव. ‘‘अञ्ञदत्थिके अञ्ञदत्थिकसञ्ञा, वेमतिका, अनञ्ञदत्थिकसञ्ञा अञ्ञं चेतापेति, निस्सग्गियं पाचित्तिय’’न्ति (पाचि. ७६१) हि वुत्तं.

२११७. सेसकन्ति ¶ यदत्थाय दिन्नं, तं चेतापेत्वा आहरित्वा अतिरित्तं मूलं अञ्ञदत्थाय उपनेन्तिया अनापत्तीति योजेतब्बं. सामिके पुच्छित्वाति ‘‘तुम्हेहि चीवरत्थाय दिन्नं, अम्हाकञ्च चीवरं संविज्जति, तेलादीहि पन अत्थो’’ति एवं सामिके पुच्छित्वा. तन्ति तं चेतापन्नं. आपदासूति भिक्खुनीहि विहारं पहाय गमनारहमुपद्दवो गहितो. यथाह ‘‘आपदासूति तथारूपेसु उपद्दवेसु भिक्खुनियो विहारं छड्डेत्वा पक्कमन्ति, एवरूपासु आपदासु यं वा तं वा चेतापेतुं वट्टती’’ति (पाचि. अट्ठ. ७६२).

२११८. सयं याचितकं विनाति ‘‘संयाचितक’’न्ति पदं विना, एत्तकमेव विसदिसन्ति वुत्तं होति.

छट्ठसत्तमानि.

२११९. अधिकवचनं दस्सेतुमाह ‘‘महाजनिकसञ्ञाचिकेना’’ति. पदताधिकाति पदमेव पदता. महाजनिकेनाति गणस्स परिच्चत्तेन. सञ्ञाचिकेनाति सयं याचितकेन.

२१२०. अनन्तरसमा मताति इध ‘‘पुग्गलिकेना’’ति पदं विना समुट्ठानादिना सद्धिं सब्बे विनिच्छया अनन्तरसिक्खापदसदिसा मताति अत्थो. ‘‘या पन भिक्खुनी अञ्ञदत्थिकेन परिक्खारेन अञ्ञुद्दिसिकेन पुग्गलिकेना’’ति हि ¶ सिक्खापदं. पुग्गलिकेनाति एकभिक्खुनिया परिच्चत्तेन. ‘‘किञ्चिपी’’ति लिखन्ति. ‘‘कोचिपी’’ति पाठो सुन्दरो ‘‘विसेसो’’ति इमिना तुल्याधिकरणत्ता.

अट्ठमनवमदसमानि.

पठमो वग्गो.

२१२१-२. चत्तारि कंसानि समाहटानि, चतुन्नं कंसानं समाहारो वा चतुक्कंसं, चतुक्कंसतो अतिरेकं अतिरेकचतुक्कंसं, तेन अतिरेकचतुक्कंसग्घनकं पावुरणमाह, उपचारेन ‘‘अतिरेकचतुक्कंस’’न्ति वुत्तं. कंसपरिमाणं पनेत्थ सयमेव वक्खति ‘‘कहापणचतुक्कं तु, कंसो नाम पवुच्चती’’ति. तस्मा अतिरेकसोळसकहापणग्घनकन्ति अत्थो. गरुपावुरणन्ति सीतकाले पारुपितब्बपावुरणं. चेतापेय्याति विञ्ञापेय्य. चत्तारि सच्चानि ¶ समाहटानि, चतुन्नं वा सच्चानं समाहारो चतुसच्चं, तं पकासेति सीलेनाति चतुसच्चप्पकासी, तेन, चतुन्नं अरियसच्चानं निद्दिसकेन सम्मासम्बुद्धेन. पयोगेति ‘‘देही’’ति एवं विञ्ञापनपयोगे. लाभेति पटिलाभे.

चतुन्नं समूहो चतुक्कं, कहापणानं चतुक्कं कहापणचतुक्कं. कहापणो चेत्थ तंतंकाले, तंतंपदेसे च वोहारूपगो गहेतब्बो. इमा वुत्तप्पकारा निस्सग्गियावसानापत्तियो ‘‘ञातकानञ्च सन्तके’’ति अनापत्तिविसये वक्खमानत्ता ‘‘यदा येन अत्थो, तदा तं वदेय्याथा’’ति एवं निच्चपवारणं अकत्वा तस्मिं काले किस्मिञ्चि गुणे पसीदित्वा ‘‘वदेय्याथ येन अत्थो’’ति एवं पवारितट्ठाने सम्भवन्तीति दट्ठब्बा.

२१२३-५. ऊनकचतुक्कंसे ¶ अतिरेकसञ्ञा, आपत्ति दुक्कटस्स. ऊनकचतुक्कंसे वेमतिका, आपत्ति दुक्कटस्सा’’ति वुत्तत्ता आह ‘‘ऊनके तु चतुक्कंसे, उद्दिट्ठं द्विकदुक्कट’’न्ति. इमिना ‘‘अतिरेकचतुक्कंसे अतिरेकसञ्ञा, वेमतिका, ऊनकसञ्ञा चेतापेति, निस्सग्गियं पाचित्तिय’’न्ति तिकपाचित्तियञ्च दस्सितं होति.

गरुकन्ति गरुपावुरणं. तदूनं वाति चतुक्कंसतो ऊनकं वा. ञातकानञ्चाति एत्थ च-सद्देन पवारितानं सङ्गहो. यथाह अनापत्तिवारे ‘‘ञातकानं, पवारितान’’न्ति (पाचि. ७८७). एत्थ च ‘‘अतिरेकचतुक्कंसम्पी’’ति वत्तब्बं ‘‘तदूनं वा’’ति इमिना चतुक्कंसूनस्स वुत्तत्ता. ‘‘अप्पमेव वा’’ति इमिना अतिरेकचतुक्कंसेपि महग्घतरं वुत्तन्ति वेदितब्बं.

एकादसमं.

२१२६-७. ‘‘लहुपावुरणं पन भिक्खुनिया चेतापेन्तिया अड्ढतेय्यकंसपरमं चेतापेतब्ब’’न्ति (पाचि. ७८९) वचनतो लहुपावुरणन्ति एत्थ ‘‘चेतापेन्तिया भिक्खुनिया’’ति च अड्ढतेय्यकंसग्घनन्ति एत्थ ‘‘चेतापेतब्ब’’न्ति च सेसो. लहुपावुरणन्ति उण्हकाले पावुरणं. तिण्णं पूरणो तेय्यो, अड्ढो तेय्यो अस्साति अड्ढतेय्यो, अड्ढतेय्यो च सो कंसो चाति अड्ढतेय्यकंसो, तं अग्घतीति अड्ढतेय्यकंसग्घनं, दसकहापणग्घनकन्ति अत्थो. ततोति अड्ढतेय्यकंसग्घनकतो. यं पन पावुरणं अड्ढतेय्यकंसग्घनकं, तं लहुपावुरणं ¶ . ततो अड्ढतेय्यकंसग्घनकतो लहुपावुरणतो. उत्तरिन्ति अतिरेकं. अड्ढतेय्यकंसग्घनकं यं पावुरणं या भिक्खुनी चेतापेति ¶ , तस्स पावुरणस्स पटिलाभे तस्सा भिक्खुनिया निस्सग्गियपाचित्तिया वुत्ताति योजना.

‘‘अनन्तरसमं सेस’’न्ति इदं समत्थेतुमाह ‘‘नत्थि काचि विसेसता’’ति. विसेसोयेव विसेसता.

द्वादसमं.

२१२८. इदानि पातिमोक्खुद्देसे आगतेसु समतिंसनिस्सग्गियेसु केसञ्चि अत्तनो अवचने कारणञ्च अवुत्तेहि सद्धिं वुत्तानं गहणञ्च दस्सेतुमाह ‘‘साधारणानी’’तिआदि. हि यस्मा भिक्खुनीनं भिक्खूहि साधारणानि यानि सिक्खापदानि सेसानि इध वुत्तेहि अञ्ञानि, तानि अट्ठारस सिक्खापदानि चेव इध वुत्तसरूपानि द्वादस सिक्खापदानि चेति इच्चेवं निस्सग्गियपाचित्तियसिक्खापदानि समतिंसेव होन्तीति योजना.

इति विनयत्थसारसन्दीपनिया विनयविनिच्छयवण्णनाय

निस्सग्गियकथावण्णना निट्ठिता.

पाचित्तियकथावण्णना

२१२९-३०. एवं तिंस निस्सग्गियपाचित्तियानि दस्सेत्वा इदानि सुद्धपाचित्तियानि दस्सेतुमाह ‘‘लसुण’’न्तिआदि. लसुणन्ति एत्थ इति-सद्दो लुत्तनिद्दिट्ठो. ‘‘लसुणं’’इति भण्डिकं वुत्तं अट्ठकथायं (पाचि. अट्ठ. ७९३-७९५). चतुपञ्चमिञ्जादिप्पभेदं भण्डिकं लसुणं नाम, न ततो ऊनं. तेनाह ‘‘न एकद्वितिमिञ्जक’’न्ति. पक्कलसुणतो, सीहळदीपसम्भवतो च विसेसमाह ‘‘आमकं मागधंयेवा’’ति. मगधेसु जातं मागधं, ‘‘वुत्त’’न्ति इमिना सम्बन्धो. यथाह ‘‘मगधरट्ठे जातलसुणमेव ¶ हि इध लसुणन्ति अधिप्पेत’’न्ति (पाचि. अट्ठ. ७९५). तं ‘‘खादिस्सामी’’ति गण्हतीति सम्बन्धो. वुत्तप्पकारं पाचित्तियञ्च अज्झोहारवसेनाति दस्सेतुमाह ‘‘अज्झोहारवसेनेव, पाचित्तिं परिदीपये’’ति.

२१३१. तदेव ¶ वक्खति ‘‘द्वे तयो’’तिआदिना. सद्धिन्ति एकतो. सङ्खादित्वाति गलबिलं अप्पवेसेत्वा दन्तेहि संचुण्णियन्ती खादित्वा. अज्झोहरति परगलं करोति.

२१३२. तत्थाति तस्मिं भण्डिकलसुणे. ‘‘मिञ्जानं गणनाया’’ति इमिना अज्झोहारपयोगगणनायेव दीपिता. यथाह ‘‘भिन्दित्वा एकेकं मिञ्जं खादन्तिया पन पयोगगणनाय पाचित्तियानी’’ति (पाचि. अट्ठ. ७९५).

२१३३. सभावतो वट्टन्तेवाति योजना.

२१३५. यथावुत्तपलण्डुकादीनं नानत्तं दस्सेतुमाह ‘‘एका मिञ्जा’’तिआदि. इध मिञ्जानं वसेनेव नानत्तं दस्सितं. अट्ठकथायं पन वण्णवसेनापि. यथाह ‘‘पलण्डुको पण्डुवण्णो होति. भञ्जनको लोहितवण्णो. हरितको हरितपण्णवण्णो’’ति (पाचि. अट्ठ. ७९७).

२१३६. ‘‘साळवे उत्तरिभङ्गके’’ति पदच्छेदो. ‘‘बदरसाळवादीसू’’ति (पाचि. अट्ठ. ७९७) अट्ठकथावचनतो एत्थ बदर-सद्दो सेसो. बदरसाळवं नाम बदरफलानि सुक्खापेत्वा चुण्णेत्वा कातब्बा खादनीयविकति. उम्मत्तिकादीनन्ति एत्थ आदि-सद्देन आदिकम्मिका गहिता. यथाह ‘‘उम्मत्तिकाय आदिकम्मिकाया’’ति (पाचि. ७९७).

पठमं.

२१३७. सम्बाधेति ¶ पटिच्छन्नोकासे. तस्स विभागं दस्सेतुमाह ‘‘उपकच्छेसु मुत्तस्स करणेपि वा’’ति.

२१३८. अस्सा तथा पाचित्तीति सम्बन्धो. ‘‘न लोमगणनाया’’ति इमिना ‘‘पयोगगणनाया’’ति इदमेव समत्थयति.

२१३९. आबाधेति कण्डुआदिके रोगे. यथाह – ‘‘आबाधपच्चयाति कण्डुकच्छुआदिआबाधपच्चया’’ति ¶ (पाचि. अट्ठ. ८०१). मग्गसंविधानसमा मताति भिक्खुनिया संविधाय एकद्धानसिक्खापदेन सदिसा मता ञाताति अत्थो.

दुतियं.

२१४०. पदुमस्स वा पुण्डरीकस्स वा अन्तमसो केसरेनापि कामरागेन मुत्तकरणस्स तलघातने मुत्तकरणम्पि पहारदाने पाचित्ति होतीति योजना. केसरेनापीति अपि-सद्देन महापदुमपण्णेहि वत्तब्बमेव नत्थीति दीपेति. यथाह – ‘‘अन्तमसो उप्पलपत्तेनापीति एत्थ पत्तं ताव महन्तं, केसरेनापि पहारं देन्तिया आपत्तियेवा’’ति (पाचि. अट्ठ. ८०३).

२१४१. तत्थाति तस्मिं मुत्तकरणतले.

ततियं.

२१४२. या पन भिक्खुनी कामरागपरेता कामरागेन पीळिता अत्तनो ब्यञ्जने मुत्तपथे उप्पलपत्तम्पि पवेसेति, न वट्टति पाचित्ति होतीति योजना. पि-सद्देन ‘‘केसरमत्तम्पि पन पवेसेन्तिया आपत्तियेवा’’ति (पाचि. अट्ठ. ८१२) अट्ठकथा उल्लिङ्गिता.

२१४३-४. यद्येवं ¶ ‘‘जतुमट्ठके पाचित्तिय’’न्ति कस्मा वुत्तन्ति आह ‘‘इदं…पे… जतुमट्ठक’’न्ति. इदं जतुमट्ठकं वत्थुवसेनेव वुत्तन्ति ‘‘अथ खो सा भिक्खुनी जतुमट्ठकं आदियित्वा धोवितुं विस्सरित्वा एकमन्तं छड्डेसि. भिक्खुनियो मक्खिकाहि सम्परिकिण्णं पस्सित्वा एवमाहंसु ‘कस्सिदं कम्म’न्ति. सा एवमाह ‘मय्हिदं कम्म’न्ति. या ता भिक्खुनियो अप्पिच्छा, ता उज्झायन्ति खिय्यन्ति विपाचेन्ति ‘कथञ्हि नाम भिक्खुनी जतुमट्ठकं आदियिस्सती’’ति (पाचि. ८०६) आगतवत्थुवसेनेव वुत्तं, न तं विना अञ्ञस्स वट्टकस्स सम्भवतोति अधिप्पायो. जतुमट्ठकं नाम जतुना कतो मट्ठदण्डको.

दण्डन्ति ¶ एत्थ ‘‘यं किञ्ची’’ति सेसो. यथाह ‘‘अन्तमसो उप्पलपत्तम्पि मुत्तकरणं पवेसेती’’ति (पाचि. ८०८). एतम्पि च अतिमहन्तं, केसरमत्तम्पि पन पवेसेन्तिया आपत्ति एव. एळालुकन्ति कक्कारिफलं वा. तस्मिन्ति अत्तनो मुत्तकरणे.

२१४५. आबाधपच्चयाति मुत्तकरणप्पदेसे जातवणादिम्हि वणट्ठाननिरुपनादिपच्चया.

चतुत्थं.

२१४६. अग्गपब्बद्वयाधिकन्ति अग्गपब्बद्वयतो केसग्गमत्तम्पि अधिकं. यथाह ‘‘अन्तमसो केसग्गमत्तम्पि अतिक्कामेति, आपत्ति पाचित्तियस्सा’’ति (पाचि. ८१२). दकसुद्धिं करोन्तियाति मुत्तकरणट्ठाने धोवनं करोन्तिया. यथाह ‘‘उदकसुद्धिकं नाम मुत्तकरणस्स धोवना वुच्चती’’ति (पाचि. ८१२).

२१४७. ‘‘तीणी’’ति ¶ इमिना एकङ्गुलिया पब्बद्वयस्स पवेसेत्वा धोवने दोसाभावं दीपेति. दीघतोति अङ्गुलिया दीघतो. तीणि पब्बानि गम्भीरतो मुत्तकरणे पवेसेत्वा उदकसुद्धिं आदियन्तिया पाचित्तियं भवेति योजना.

२१४८. तिस्सो, चतस्सो वा अङ्गुलियो एकतो कत्वा वित्थारेन पवेसने एकपब्बेपि पविट्ठे ‘‘द्वङ्गुलपब्बपरम’’न्ति नियमितप्पमाणातिक्कमतो आह ‘‘एकपब्बम्पि या पना’’ति. या पन भिक्खुनी चतुन्नं वापि अङ्गुलीनं तिस्सन्नं वापि अङ्गुलीनं एकपब्बम्पि वित्थारतो पवेसेति, तस्सा पाचित्तियं सियाति योजना.

२१४९. इतीति एवं. सब्बप्पकारेनाति गम्भीरपवेसनादिना सब्बेन पकारेन. अभिब्यत्ततरं कत्वाति सुपाकटतरं कत्वा. अयमत्थोति ‘‘एकिस्सङ्गुलिया तीणी’’तिआदिना वुत्तो अयमत्थो.

२१५०. द्वङ्गुलपब्बे दोसो नत्थीति योजना. उदकसुद्धिपच्चये पन सतिपि फस्ससादियने ¶ यथावुत्तपरिच्छेदे अनापत्ति. अधिकम्पीति द्वङ्गुलपब्बतो अधिकम्पि. उदकसुद्धिं करोन्तिया दोसो नत्थीति योजना.

२१५१. तथा उदकसुद्धिं करोन्तीनं उम्मत्तिकादीनं अनापत्ति पकासिताति योजना.

पञ्चमं.

२१५२. भुञ्जतो पन भिक्खुस्साति पञ्चन्नं भोजनानं अञ्ञतरं भुञ्जतो भिक्खुस्स. यथाह ‘‘भुञ्जन्तस्साति पञ्चन्नं भोजनानं अञ्ञतरं भोजनं भुञ्जन्तस्सा’’ति (पाचि. ८१७). पानीयं वा विधूपनं ¶ वाति वक्खमानं पानीयं, बीजनीयञ्च. उपतिट्ठेय्याति ‘‘हत्थपासे तिट्ठती’’ति (पाचि. ८१७) वचनतो एत्थ उप-सद्दो हत्थपाससङ्खातं समीपं वदतीति वेदितब्बं.

२१५३. वत्थकोणादि या काचि ‘‘बीजनी’’ति वुच्चतीति योजना, इमिना ‘‘बीजनिकिच्चं सम्पादेस्सामी’’ति अधिट्ठाय गहितचीवरकोणप्पकारं यं किञ्चि ‘‘बीजनी’’ति वुच्चतीति अत्थो.

२१५४. ‘‘अथ खो सा भिक्खुनी तस्स भिक्खुनो भुञ्जन्तस्स पानीयेन च विधूपनेन च उपतिट्ठित्वा अच्चावदति. अथ खो सो भिक्खु तं भिक्खुनिं अपसादेति ‘मा, भगिनि, एवरूपं अकासि, नेतं कप्पती’ति. ‘पुब्बे मं त्वं एवञ्च एवञ्च करोसि, इदानि एत्तकं न सहसी’ति पानीयथालकं मत्थके आसुम्भित्वा विधूपनेन पहारं अदासी’’ति (पाचि. ८१५) इमस्मिं वत्थुम्हि भिक्खूहि आरोचिते ‘‘कथञ्हि नाम, भिक्खवे, भिक्खुनी भिक्खुस्स पहारं दस्सती’’तिआदीनि (पाचि. ८१५) वत्वा ‘‘या पन भिक्खुनी भिक्खुस्स भुञ्जन्तस्स पानीयेन वा विधूपनेन वा उपतिट्ठेय्य, पाचित्तिय’’न्ति (पाचि. ८१६) वुत्तत्ता पहारपच्चया नु खोति आसङ्कं निवत्तेतुमाह ‘‘हत्थपासे इध ठानपच्चयापत्ति दीपिता’’ति. एत्थ च आसुम्भित्वाति पातेत्वा. इधाति इमस्मिं सिक्खापदे. ‘‘न, भिक्खवे, भिक्खुनिया भिक्खुस्स पहारो दातब्बो. या ददेय्य, आपत्ति दुक्कटस्सा’’ति (चूळव. ४२०) भिक्खुनिक्खन्धके ¶ वुत्तं गहेत्वा आह ‘‘पहारपच्चया वुत्तं, खन्धके दुक्कटं विसु’’न्ति. इमिना वुत्तस्सेवत्थस्स कारणं दस्सितं होति.

२१५५. हत्थपासं जहित्वाति एत्थ ‘‘भोजनं भुञ्जतो’’ति च खादनं खादतोति एत्थ ‘‘हत्थपासे’’ति च वत्तब्बं ¶ . भोजनं भुञ्जतो हत्थपासं जहित्वा उपतिट्ठन्तिया वा खादनं खादतो हत्थपासे उपतिट्ठन्तिया वा होति आपत्ति दुक्कटन्ति योजना.

२१५६. देतीति पानीयं वा सूपादिं वा ‘‘इमं पिवथ, इमिना भुञ्जथा’’ति देति. तालवण्टं ‘‘इमिना बीजन्ता भुञ्जथा’’ति देति. दापेतीति अञ्ञेन उभयम्पि दापेति. इदं सिक्खापदं समुट्ठानतो एळकलोमेन समं मतन्ति योजना.

छट्ठं.

२१५७. विञ्ञत्वाति सयं विञ्ञत्वा, अञ्ञाय वा विञ्ञापेत्वा. ‘‘विञ्ञत्वा वा विञ्ञापेत्वा वा’’ति (पाचि. ८२१) हि सिक्खापदं. आमकं धञ्ञन्ति अपक्कं अभट्ठं सालिआदिकं सत्तविधं धञ्ञं. यथाह – ‘‘आमकधञ्ञं नाम सालि वीहि यवो गोधुमो कङ्गु वरको कुद्रूसको’’ति (पाचि. ८२२). कोट्टेत्वाति मुसलेहि कोट्टेत्वा. यदि परिभुञ्जतीति योजना.

२१५८-६०. ‘‘भुञ्जिस्सामीति पटिग्गण्हाति, आपत्ति दुक्कटस्साति इदं पयोगदुक्कटं नाम, तस्मा न केवलं पटिग्गहणेयेव दुक्कटं होती’’तिआदिना (पाचि. अट्ठ. ८२२) अट्ठकथागतं विभागं दस्सेतुमाह ‘‘न केवलं तु धञ्ञान’’न्तिआदि. पनाति अपि-सद्दत्थे, सुक्खापनेपीति अत्थो. भज्जनत्थायाति एत्थ ‘‘वद्दलिदिवसे’’ति सेसो. ‘‘कपल्लसज्जने उद्धनसज्जने’’ति पच्चेकं योजेतब्बं. दब्बिसज्जनेति कटच्छुसम्पादने. तत्थ कपल्लके धञ्ञपक्खिपनेति योजना. ‘‘घट्टनकोट्टने’’ति वत्तब्बे गाथाबन्धवसेन न-कारलोपं कत्वा ‘‘घट्टकोट्टने’’ति वुत्तं.

२१६१-३. पमाण-सद्दस्स ¶ आवत्तलिङ्गसङ्ख्यत्ता आह ‘‘भोजनञ्चेव विञ्ञत्तिपमाण’’न्ति ¶ . आवत्तलिङ्गसङ्ख्यत्तं नाम नियतलिङ्गेकत्तबहुत्तं. तथा हेत्थ पमाण-सद्दो नियतनपुंसकलिङ्गे नियतेकत्तं वुच्चति. एत्थ इमस्मिं सिक्खापदे भोजनञ्चेव विञ्ञत्ति चाति इदं द्वयं हि यस्मा पमाणं, तस्मा सयं विञ्ञत्वा वा अञ्ञतो भज्जनादीनि कारापेत्वा वा अञ्ञाय पन विञ्ञापेत्वा सयं भज्जनादीनि कत्वा वा या पन भिक्खुनी अज्झोहरति, तस्सा अज्झोहारपयोगेसु पाचित्तियो सियुन्ति योजना.

महापच्चरियं (पाचि. अट्ठ. ८२३) वुत्तं विनिच्छयं दस्सेतुमाह ‘‘मातरं वा’’तिआदि. मातरं वापि याचित्वाति एत्थ वा-सद्दो अत्थन्तरविकप्पने. पि-सद्दो सम्भावने. मातरं वा पितरं वा अञ्ञं वा ञातकं वा पवारितं वा आमकधञ्ञं याचित्वा वा अञ्ञाय कारापेत्वा वा या परिभुञ्जति, तस्सा पाचित्तीति योजना.

२१६४. अविञ्ञत्तिया लद्धं सयं वा भज्जनादीनि कत्वा वा अञ्ञाय कारापेत्वा वा या परिभुञ्जति, तस्सा दुक्कटन्ति योजना.

२१६५. अञ्ञाय पन विञ्ञत्तिया लद्धं ताय कारापेत्वापि सयं कत्वा वा अज्झोहरन्तिया तथा आपत्ति दुक्कटन्ति योजना. इदञ्च महापच्चरियागतनयं गहेत्वा वुत्तं. महाअट्ठकथायं पन ‘‘अञ्ञाय विञ्ञत्तं भुञ्जन्तिया दुक्कट’’न्ति (पाचि. अट्ठ. ८२२) वुत्तत्ता विञ्ञत्तियापि अञ्ञाय लद्धं आमकं धञ्ञं ताय कारापेत्वा वा सयं कत्वा वा परिभुञ्जन्तस्सापि दुक्कटमेव वुत्तन्ति वेदितब्बं.

२१६६-७. सेदकम्मादिअत्थायाति ¶ वातरोगादिना आतुरानं सेदनादिपटिकारत्थाय. इध ‘‘अञ्ञातकअप्पवारितट्ठानेपी’’ति सेसो. भिक्खूनम्पि एसेव नयो. ठपेत्वा सत्त धञ्ञानि ञातकपवारितट्ठाने सेसविञ्ञत्तियापि अनापत्तीति ञातब्बन्ति योजना. सेसविञ्ञत्तियाति मुग्गमासअलाबुकुम्भण्डकादीनं वुत्तधञ्ञावसेसानं विञ्ञत्तिया.

सालिआदीनं सत्तन्नं धञ्ञानं दुक्कटस्स वुत्तत्ता, अनामासत्ता च सब्बेन सब्बं न वट्टन्तीति दस्सेतुमाह ‘‘ञातकानम्पी’’तिआदि.

२१६८. लद्धन्ति ¶ लब्भमानं. नवकम्मेसूति नवकम्मत्थाय, निमित्तत्थे भुम्मं. एत्थ ‘‘सम्पटिच्छितु’’न्ति सेसो. ‘‘अविञ्ञत्तिया लब्भमानं पन नवकम्मत्थाय सम्पटिच्छितुं वट्टती’’ति (पाचि. अट्ठ. ८२३) महापच्चरियं वुत्तं.

सत्तमं.

२१६९. सङ्कारन्ति कचवरं. विघासकं वाति उच्छिट्ठकमच्छकण्टकमंसट्ठिचलकमुखधोवनादिकं यं किञ्चि. छड्डेय्य वाति एत्थ ‘‘सय’’न्ति सेसो ‘‘छड्डापेय्य परेही’’ति वक्खमानत्ता. कुट्टस्स तिरो तिरोकुट्टं, तस्मिं, कुट्टस्स परभागेति अत्थो. ‘‘पाकारेपि अयं नयो’’ति वक्खमानत्ता कुट्टन्ति वा ब्यतिरित्ता भित्ति गहेतब्बा.

२१७१. एकाति एत्थ आपत्तीति सेसो. ‘‘तस्सा’’ति इमिना सम्बन्धो.

२१७२. छड्डनेति एत्थ पि-सद्दो लुत्तनिद्दिट्ठो. दन्तकट्ठस्स छड्डनेपि भिक्खुनिया पाचित्ति परिदीपिताति योजना.

२१७३-४. सब्बत्थाति ¶ वुत्तप्पकारेसु सब्बेसु विकप्पेसु. अनापत्तिविसयं दस्सेतुमाह ‘‘अवलञ्जेपी’’तिआदि. अवलञ्जे ठाने अनोलोकेत्वा छड्डेन्तियापि वा वलञ्जे ठाने ओलोकेत्वापि वा पन छड्डेन्तिया अनापत्तीति योजना. छड्डनं क्रियं. अनोलोकनं अक्रियं.

अट्ठमं.

२१७५-६. या पन भिक्खुनी खेत्ते वा नाळिकेरादिआरामे वा यत्थ कत्थचि रोपिमे हरितट्ठाने तानि विघासुच्चारसङ्कारमुत्तसङ्खातानि चत्तारि वत्थूनि सचे सयं छड्डेति वा, तथा परे छड्डापेति वा, तस्सा भिक्खुनिया आपत्तिविनिच्छयो वुत्तनयो ‘‘एकेक’’मिच्चादिना यथावुत्तपकारोति योजना.

२१७७-८. या पन भिक्खुनी हरिते खेत्ते निसीदित्वा भुञ्जमाना वा तथा हरिते तत्थ ¶ खेत्ते उच्छुआदीनि खादन्ति खादमाना गच्छन्ती वा यदि उच्छिट्ठं उदकं वा चलकादिं वा छड्डेति, तस्सा पाचित्तियं होतीति योजना. चलकं नाम वमिकरं.

२१७९. तादिसे हरिते ठाने अन्तमसो मत्थकछिन्नं नाळिकेरम्पि जलं पिवित्वा छड्डेन्तिया आपत्ति सियाति योजना.

२१८०. सब्बेसन्ति भिक्खुभिक्खुनीनं.

२१८१. लायितम्पि खेत्तं पुन रोहणत्थाय मनुस्सा रक्खन्ति चे, तत्थ तस्मिं खेत्ते विघासुच्चारादीनि छड्डेन्तिया अस्सा भिक्खुनिया यथावत्थुकमेव हि पाचित्तियमेवाति ¶ योजना. ‘‘अस्सा यथावत्थुक’’न्ति इमिना भिक्खुस्स दुक्कटन्ति वुत्तमेव होति.

२१८२. छड्डिते खेत्तेति मनुस्सेहि उद्धटसस्से खेत्ते. यथाह – ‘‘मनुस्सेसु सस्सं उद्धरित्वा गतेसु छड्डितखेत्तं नाम होति, तत्थ वट्टती’’ति (पाचि. अट्ठ. ८३०). एवं अकतेपि खेत्ते सामिके आपुच्छित्वा कातुं वट्टति. यथाह ‘‘सामिके अपलोकेत्वा छड्डेती’’ति (पाचि. ८३२). इध खेत्तपालका, आरामादिगोपका च सामिका एव. सङ्घस्स खेत्ते, आरामे च सचे ‘‘तत्थ कचवरं न छड्डेतब्ब’’न्ति कतिका नत्थि, भिक्खुस्स छड्डेतुं वट्टति सङ्घपरियापन्नत्ता, न भिक्खुनीनं. तासं पन भिक्खुसङ्घे वुत्तनयेन न वट्टति, न तस्स भिक्खुस्स, एवं सन्तेपि सारुप्पवसेन कातब्बन्ति. सब्बन्ति उच्चारादि चतुब्बिधं.

नवमं.

२१८३. एत्थ ‘‘नच्चं नाम यं किञ्चि नच्चं. गीतं नाम यं किञ्चि गीतं. वादितं नाम यं किञ्चि वादित’’न्ति (पाचि. ८३५) वचनतो ‘‘यं किञ्ची’’ति सेसो. या पन भिक्खुनी यं किञ्चि नच्चं वा यं किञ्चि गीतं वा यं किञ्चि वादितं वा दस्सनत्थाय गच्छेय्याति योजना. तत्थ यं किञ्चि नच्चन्ति नटादयो वा नच्चन्तु सोण्डा वा, अन्तमसो मोरसुकमक्कटादयोपि, सब्बम्पेतं नच्चमेव. यं किञ्चि गीतन्ति नटादीनं वा गीतं होतु अरियानं परिनिब्बानकाले रतनत्तयगुणूपसंहितं साधुकीळितगीतं वा असञ्ञतभिक्खूनं ¶ धम्मभाणकगीतं वा, सब्बम्पेतं गीतमेव. यं किञ्चि वादितन्ति घनादिवादनीयभण्डवादितं वा होतु कुटभेरिवादितं वा अन्तमसो उदरभेरिवादितम्पि ¶ , सब्बम्पेतं वादितमेव. ‘‘दस्सनसवनत्थाया’’ति वत्तब्बे विरूपेकसेसनयेन ‘‘दस्सनत्थाया’’ति वुत्तं. पञ्चन्नं विञ्ञाणानं यथासकं विसयस्स आलोचनसभावताय वा ‘‘दस्सनत्थाय’’ इच्चेव वुत्तं.

२१८४. पुब्बपयोगदुक्कटेन सह पाचित्तियं दस्सेतुमाह ‘‘दस्सनत्थाय नच्चस्सा’’तिआदि. गीतस्साति एत्थ ‘‘वादितस्सा’’ति पकरणतो लब्भति.

२१८५. एकपयोगेनाति एकदिसावलोकनपयोगेन. तेनेव वक्खति ‘‘अञ्ञस्मिम्पि…पे… सियु’’न्ति. पस्सतीति एत्थ ‘‘नच्च’’न्ति सेसो. तेसन्ति येसं नच्चं पस्सति. पि-सद्देन वादितम्पि सम्पिण्डेति. यथाह ‘‘तेसंयेव गीतवादितं सुणाति, एकमेव पाचित्तिय’’न्ति (पाचि. अट्ठ. ८३६).

२१८६. अञ्ञतोति अञ्ञस्मिं दिसाभागे.

२१८७. ‘‘विसुं पाचित्तियो सियु’’न्ति इदमेव पकासेतुमाह ‘‘पयोगगणनायेत्थ, आपत्तिगणना सिया’’ति. एत्थाति इमस्मिं नानादिसाभागे. नच्चगीतवादितानं दस्सनसवने अट्ठकथागतं विनिच्छयं दस्सेतुमाह ‘‘नच्चितु’’न्तिआदि.

२१८८. ‘‘नच्च इती’’ति पदच्छेदो, ‘‘नच्चाही’’तिपि पाठो. उपट्ठानन्ति भेरिसद्दपूजं. सम्पटिच्छितुन्ति ‘‘साधू’’ति अधिवासेतुं. इमस्स उपलक्खणवसेन वुत्तत्ता नच्चगीतेपि एसेव नयो.

२१८९-९०. सब्बत्थाति नच्चनादीसु सब्बत्थ. उपट्ठानं करोमाति तुम्हाकं चेतियस्स नच्चादीहि उपहारं करोमाति. उपट्ठानं पसत्थन्ति उपट्ठानकरणं नाम सुन्दरन्ति.

या ¶ आरामेयेव च ठत्वा पस्सति वा सुणाति वाति योजना, इध ‘‘अन्तरारामे वा’’तिआदि ¶ सेसो. ‘‘आरामे ठत्वा अन्तरारामे वा बहिआरामे वा नच्चादीनि पस्सति वा सुणाति वा, अनापत्ती’’ति (पाचि. अट्ठ. ८३७) अट्ठकथाय वुत्तं. ‘‘ठत्वा’’ति वुत्तेपि सब्बेसुपि इरियापथेसु लब्भति. आरामे ठत्वाति न केवलं ठत्वाव, ततो गन्त्वापि सब्बिरियापथेहिपि लभति. ‘‘आरामे ठिता’’ति (पाचि. ८३७) पन आरामपरियापन्नदस्सनत्थं वुत्तं. इतरथा निसिन्नापि न लभेय्याति गण्ठिपदादीसु वुत्तं. भिक्खूनम्पि एसेव नयो.

२१९१. या अत्तनो ठितोकासं आगन्त्वा पयोजितं पस्सति वा सुणाति वाति योजना. ठितोकासन्ति एत्थ गतिनिवत्तिसामञ्ञेन सयितनिसिन्नम्पि गय्हति. तथारूपा हि कारणा गन्त्वा पस्सन्तिया वापीति योजना. कारणं नाम सलाकभत्तादिकारणं. यथाह ‘‘सति करणीयेति सलाकभत्तादीनं वा अत्थाय अञ्ञेन वा केनचि करणीयेन गन्त्वा गतट्ठाने पस्सति वा सुणाति वा, अनापत्ती’’ति (पाचि. अट्ठ. ८३७).

२१९२. मग्गं गच्छन्ती पटिपथे नच्चं अट्ठत्वा पस्सतीति एवं पस्सन्तियापि च तथा अनापत्तीति अज्झाहारयोजना. पटिपथेति गमनमग्गाभिमुखे. आपदासुपीति तादिसेन उपद्दवेन उपद्दुता समज्जट्ठानं पविसति, एवं पविसित्वा पस्सन्तिया वा सुणन्तिया वा अनापत्ति.

२१९३. इदं सिक्खापदं समुट्ठानतो एळकलोमसिक्खापदेन समं मतं ‘‘समान’’न्ति विञ्ञातं.

दसमं.

लसुणवग्गो पठमो.

२१९४-५. इध ¶ इमस्मिं सासने या पन भिक्खुनी रत्तन्धकारस्मिं अप्पदीपे पुरिसेन सद्धिं एकिका सचे सन्तिट्ठति, तस्सा पाचित्तियं वुत्तन्ति योजना. रत्तन्धकारस्मिन्ति रत्तियं. रत्तिपरियायो हि रत्तन्धकार-सद्दो. यथाह पदभाजने ‘‘रत्तन्धकारेति ओग्गते सूरिये’’ति (पाचि. ८४०). अप्पदीपेति पज्जोतचन्दसूरियअग्गीसु एकेनापि अनोभासिते, इमिना ¶ रत्तिक्खेत्तं दस्सेति. ‘‘सन्तिट्ठती’’ति इमिना गमननिसिन्नसयनसङ्खातं इरियापथत्तिकञ्च उपलक्खितन्ति दट्ठब्बं. वुत्तञ्हि वजिरबुद्धिना ‘‘सन्तिट्ठेय्याति एत्थ ठानापदेसेन चतुब्बिधोपि इरियापथो सङ्गहितो, तस्मा पुरिसेन सद्धिं चङ्कमनादीनि करोन्तियापि पाचित्तियञ्च उपलब्भती’’ति (वजिर. टी. पाचित्तिय ८३९ थोकं विसदिसं). पुरिसेन सद्धिन्ति सन्तिट्ठितुं, सल्लपितुञ्च विञ्ञुना मनुस्सपुरिसेन सद्धिं.

रहस्सादवसेन पुरिसस्स हत्थपासं समागन्त्वा तेन सद्धिं सल्लपन्तिया वा पाचित्तियं वुत्तन्ति योजना.

२१९६-७. या पन भिक्खुनी सचे मनुस्सपुरिसस्स हत्थपासं विजहित्वा सन्तिट्ठति वा सल्लपति वा, यक्खपेततिरच्छानगतानं हत्थपासं अविजहित्वा सन्तिट्ठति वा सल्लपति वा, तस्सा दुक्कटं परिदीपितन्ति योजना.

विञ्ञुग्गहणेन अविञ्ञू पुरिसो अनापत्तिं न करोतीति दीपेति.

२१९८. अञ्ञविहितायाति रहोअस्सादतो अञ्ञं चिन्तेन्तिया. यथाह ‘‘रहोअस्सादतो अञ्ञविहिताव हुत्वा’’ति (पाचि. अट्ठ. ८४१). चतुत्थेन, छट्ठेन च समुट्ठानेन समुट्ठानतो ¶ थेय्यसत्थसमुट्ठानं. सन्तिट्ठनसल्लपनवसेन क्रियं. सञ्ञाय विमोक्खो एतस्मिन्ति सञ्ञाविमोक्खकं.

पठमं.

२१९९. पटिच्छन्ने ओकासेति कुट्टादीसु येन केनचि पटिच्छन्ने ओकासे. इदं वचनं.

दुतियं.

२२००. ततिये ‘‘अज्झोकासे’’ति च चतुत्थे ‘‘रथिकाय, ब्यूहे, सिङ्घाटके’’ति पदानि च वज्जेत्वा अवसेसं सन्धायाह ‘‘अपुब्बं नत्थि किञ्चिपी’’ति. एत्थ ‘‘वत्तब्ब’’न्ति सेसो. एत्थ ¶ च रथिकायाति रच्छाय. ब्यूहेति अनिब्बिद्धरच्छाय. सिङ्घाटकेति चच्चरे ओकासे, तिकोणं वा चतुकोणं वा मग्गसमोधानट्ठानेति वुत्तं होति.

ततियचतुत्थानि.

२२०१-२. ‘‘या पन भिक्खुनी पुरेभत्तं कुलानि उपसङ्कमित्वा आसने निसीदित्वा सामिके अनापुच्छा पक्कमेय्य, पाचित्तिय’’न्ति (पाचि. ८५५) वचनतो या पन भिक्खुनी पुरेभत्तं कुलानि उपसङ्कमित्वा छदनन्तो आसने निसीदित्वा सामिके अनापुच्छा अनोवस्सकप्पदेसं अतिक्कमेति, या च अज्झोकासे वा निसीदित्वा सचे उपचारं अतिक्कमेति, तस्सा पठमे पदे दुक्कटं होति, दुतिये पदे पाचित्ति परियापुताति योजना. ‘‘आसने’’ति इमिना पल्लङ्कमाभुजित्वा निसीदनारहमासनं अधिप्पेतं. यथाह – ‘‘आसनं नाम पल्लङ्कस्स ओकासो वुच्चती’’ति (पाचि. ८५६). अनोवस्सप्पदेसन्ति निब्बकोसब्भन्तरं. अब्भोकासे आपत्तिखेत्तं दस्सेतुमाह ‘‘उपचारम्पि वा सचे’’ति. उपचारन्ति द्वादसहत्थप्पमाणं ¶ पदेसं. यथाह गण्ठिपदे ‘‘उपचारो द्वादसहत्थो’’ति.

२२०३. ‘‘तथा’’ति इमिना ‘‘दुक्कटं समुदीरित’’न्ति इदं पच्चामसति. आपुट्ठे अनापुट्ठसञ्ञाय आपुट्ठे विचिकिच्छतो पक्कमन्तिया तथा दुक्कटन्ति योजना. एत्थ च ‘‘भिक्खुनिया’’ति सम्बन्धिनिया समानत्ता ‘‘विचिकिच्छन्तिया’’ति वत्तब्बे लिङ्गविपल्लासवसेन ‘‘विचिकिच्छतो’’ति वुत्तन्ति दट्ठब्बं.

२२०४. गिलानायाति या तादिसेन गेलञ्ञेन आपुच्छितुं न सक्कोति. आपदासूति घरे अग्गि उट्ठितो होति चोरा वा, एवरूपे उपद्दवे अनापुच्छा पक्कमन्तिया अनापत्ति.

पञ्चमं.

२२०५-६. ‘‘गच्छन्तिया वजन्तिया’’ति च निसीदननिपज्जनावसानदस्सनत्थं वुत्तं. पाचित्तियं पन पच्छाभत्तं सामिके ‘‘इध निसीदाम वा सयाम वा’’ति अनापुच्छित्वा निसिन्ननिपन्नपच्चया ¶ होतीति वेदितब्बं. पच्छाभत्तं सामिके अनापुच्छा आसने निसीदित्वा गच्छन्तिया एका पाचित्ति होतीति योजना. एस नयो ‘‘निपज्जित्वा’’तिआदीसुपि.

यथा पन तत्थ असंहारिमे अनापत्ति, एवमिध धुवपञ्ञत्ते वा अनापत्तीति.

छट्ठं.

२२०७. तिसमुट्ठानन्ति सचित्तकेहि तीहि समुट्ठानेहि समुट्ठानतो.

अट्ठमं.

२२०८. या ¶ पन भिक्खुनी अत्तानम्पि वा परम्पि वा निरयब्रह्मचरियेहि अभिसपेय्य, तस्सा वाचतो वाचतो सिया पाचित्तीति योजना. तत्थ अभिसपेय्याति सपथं करेय्य, ‘‘निरये निब्बत्तामि, अवीचिम्हि निब्बत्तामी’’ति अत्तानं वा ‘‘निरये निब्बत्ततु, अवीचिम्हि निब्बत्ततू’’ति परं वा ‘‘गिहिनी होमि, ओदातवत्था होमी’’ति अत्तानं वा ‘‘गिहिनी होतु, ओदातवत्था होतू’’ति परं वा अभिसपेय्याति वुत्तं होति.

२२१०. अक्कोसति अत्तानं वा परं वाति सम्बन्धो. तिकपाचित्तियन्ति उपसम्पन्नाय उपसम्पन्नसञ्ञावेमतिकाअनुपसम्पन्नसञ्ञावसेन. सेसायाति अनुपसम्पन्नाय. अनुपसम्पन्नाय उपसम्पन्नसञ्ञा, वेमतिका, अनुपसम्पन्नसञ्ञा अक्कोसति, दुक्कटन्ति एवं तिकदुक्कटं.

२२११. अत्थधम्मानुसासनिं पुरक्खत्वा वदन्तीनं अनापत्तीति योजना. यथाह अट्ठकथायं ‘‘अत्थपुरेक्खारायाति अट्ठकथं कथेन्तिया. धम्मपुरेक्खारायाति पाळिं वाचेन्तिया. अनुसासनिपुरेक्खारायाति ‘इदानिपि त्वं एदिसा, साधु विरमस्सु, नो चे विरमसि, अद्धा पुन एवरूपानि कम्मानि कत्वा निरये उप्पज्जिस्ससि, तिरच्छानयोनिया उप्पज्जिस्ससी’ति एवं अनुसासनियं ठत्वा वदन्तिया अनापत्ती’’ति (पाचि. अट्ठ. ८७८).

नवमं.

२२१२. वधित्वाति ¶ सत्थादीहि पहरित्वा. वधित्वा वाति एत्थ वा-सद्दो पाळियं ‘‘वधित्वा वधित्वा’’ति (पाचि. ८८०) वुत्तं आमेडितं सूचेति.

२२१३. एत्थाति ¶ इमस्मिं सिक्खापदे. कायवाचाचित्तसमुट्ठानं धुरनिक्खेपसमुट्ठानं नाम, समनुभासनसमुट्ठानन्तिपि एतस्सेव नामं.

दसमं.

अन्धकारवग्गो दुतियो.

२२१४. या पन भिक्खुनी नग्गा अनिवत्था अपारुता हुत्वा नहायति, अस्सा सब्बपयोगे दुक्कटं. तस्स नहानस्स वोसाने परियोसाने सा भिक्खुनी जिनवुत्तं जिनेन भगवता भिक्खुनीनं पञ्ञत्तं दोसं पाचित्तियापत्तिं समुपेति आपज्जतीति योजना. भिक्खुनि दोसन्ति एत्थ गाथाबन्धवसेन रस्सो कतो.

२२१५. अच्छिन्नचीवराति अच्छिन्नउदकसाटिकचीवरा. नट्ठचीवराति चोरादीहि नट्ठउदकसाटिकचीवरा. आपदासु वाति ‘‘महग्घं इमं दिस्वा चोरापि हरेय्यु’’न्ति एवरूपासु आपदासु वा नग्गाय नहायन्तिया न दोसो.

पठमं.

२२१६. दुतियेति ‘‘उदकसाटिकं पन भिक्खुनिया कारयमानाया’’तिआदिसिक्खापदे (पाचि. ८८८).

दुतियं.

२२१७-८. दुस्सिब्बितं चीवरन्ति असक्कच्चसिब्बितं चीवरं. विसिब्बेत्वाति दुस्सिब्बितं पुन सिब्बनत्थाय सयं वा विगतसिब्बनं कत्वा. ‘‘विसिब्बापेत्वा’’ति सेसो. यथाह ‘‘विसिब्बेत्वा वा विसिब्बापेत्वा वा’’ति (पाचि. ८९३). अनन्तरायाति दससु अन्तरायेसु ¶ अञ्ञतरन्तरायरहिता. तं विसिब्बितं, विसिब्बापितं वा चीवरं. ‘‘अनन्तराया तं ¶ पच्छा’’ति वत्तब्बे गाथाबन्धवसेन रस्सो कतो. न सिब्बेय्याति एत्थापि ‘‘न सिब्बापेय्या’’ति सेसो. यथाह ‘‘नेव सिब्बेय्य, न सिब्बापनाय उस्सुक्कं करेय्या’’ति (पाचि. ८९३).

चतुपञ्चाहन्ति एत्थ ‘‘उत्तरिछप्पञ्चवाचाहि (पाचि. ६२-६४), उत्तरिदिरत्ततिरत्त’’न्तिआदीसु (पाचि. ५१-५२) विय अप्पसङ्ख्याय बहुसङ्ख्यायं अन्तोगधत्तेपि उभयवचनं लोकवोहारवसेन वचनसिलिट्ठतायाति दट्ठब्बं. धुरेति सिब्बनुस्साहे. निक्खित्तमत्तेति विस्सट्ठमत्ते.

२२१९. तिकपाचित्तियं वुत्तन्ति उपसम्पन्नाय उपसम्पन्नसञ्ञा, वेमतिका, अनुपसम्पन्नसञ्ञाति तीसु वारेसु तिकपाचित्तियं वुत्तं. सेसायाति अनुपसम्पन्नाय. तिकदुक्कटन्ति वारत्तये दुक्कटत्तयं.

२२२०. उभिन्नन्ति उपसम्पन्नानुपसम्पन्नानं. अञ्ञस्मिन्ति चीवरतो अञ्ञस्मिं. अन्तरायेपि वा सतीति राजचोरादिअन्तरायानं दसन्नं अञ्ञतरे सति.

२२२१. ‘‘धुरनिक्खेपनं नाम, समुट्ठानमिदं मत’’न्ति इदं अट्ठकथाय ‘‘धुरनिक्खेपसमुट्ठान’’न्ति (पाचि. अट्ठ. ८९३) वुत्तमेव गहेत्वा वुत्तं, तेरससु समुट्ठानसीसेसु ‘‘धुरनिक्खेपसमुट्ठान’’न्ति विसुं समुट्ठानसीसं नाम नत्थि. मातिकट्ठकथायञ्च ‘‘समनुभासनसमुट्ठान’’न्ति (कङ्खा. अट्ठ. चीवरसिब्बनसिक्खापदवण्णना, अत्थतो समानं) वुत्तं, तं समुट्ठानसीसेसु अन्तोगधमेव. तस्मा ‘‘धुरनिक्खेपसमुट्ठान’’न्ति इदं समनुभासनसमुट्ठानस्सेव परियायोति गहेतब्बं.

ततियं.

२२२२. पञ्च ¶ अहानि पञ्चाहं, पञ्चाहमेव पञ्चाहिकं. ‘‘अतिक्कमेय्या’’ति किरियाय द्विकम्मकत्ता ‘‘पञ्चाहिक’’न्ति च ‘‘सङ्घाटिचार’’न्ति च उपयोगत्थे एव उपयोगवचनं. सङ्घटितट्ठेन सङ्घाटि, इति वक्खमानानं पञ्चन्नं चीवरानमेवाधिवचनं, सङ्घाटीनं ¶ चारो सङ्घाटिचारो, परिभोगवसेन वा ओतापनवसेन वा परिवत्तनन्ति अत्थो. ‘‘पञ्चाहिकं सङ्घाटिचारं अतिक्कमेय्याति पञ्चमं दिवसं पञ्च चीवरानि नेव निवासेति न पारुपति न ओतापेति पञ्चमं दिवसं अतिक्कामेति, आपत्ति पाचित्तियस्सा’’ति (पाचि. ८९९) वचनतो पञ्चदिवसब्भन्तरे यं किञ्चि अकत्वा अतिक्कामेन्तिया चीवरगणनाय पाचित्ति होतीति दस्सेतुमाह ‘‘यातिक्कमेय्या’’तिआदि.

२२२३. तिचीवरन्ति अन्तरवासकउत्तरासङ्गसङ्घाटिसङ्खातं तिचीवरञ्च. संकच्चीति थनवेठनसङ्खातं चीवरञ्च. दकसाटीति उतुनिकाले निवासेतब्बउदकसाटिचीवरञ्च. इति इमे पञ्च. पञ्च तूति पञ्च चीवरानि नाम.

२२२४-५. तिकपाचित्तीति पञ्चाहातिक्कन्तसञ्ञा, वेमतिका, अनतिक्कन्तसञ्ञाति विकप्पत्तये पाचित्तियत्तयं होति. पञ्चाहानतिक्कन्ते अतिक्कन्तसञ्ञावेमतिकानं वसेन द्विकदुक्कटं.

‘‘पञ्चमे दिवसे’’तिआदि अनापत्तिवारसन्दस्सनं. निसेवतीति निवासेति वा पारुपति वा. ओतापेतीति एत्थ वा-सद्दो लुत्तनिद्दिट्ठो, ओतापेति वाति अत्थो. आपदासुपीति महग्घं चीवरं, न सक्का होति चोरभयादीसु परिभुञ्जितुं, एवरूपे उपद्दवे अनापत्ति.

चतुत्थं.

२२२६. अञ्ञिस्सा ¶ सङ्कमेतब्बचीवरं अनापुच्छा गहेत्वा या परिभुञ्जति, तस्सा पाचित्तियं सियाति योजना, अञ्ञिस्सा उपसम्पन्नाय सन्तकं पञ्चन्नं चीवरानं अञ्ञतरं तस्सा अवत्वा आदाय पुन तस्सा दातब्बं, अदत्वा या भिक्खुनी पटिसेवति, तस्सा पाचित्तियं होतीति अत्थो. ‘‘सङ्कमेतब्बचीवरं सङ्कमनीय’’न्ति परियायसद्दा एते. यथाह ‘‘चीवरसङ्कमनीयन्ति सङ्कमेतब्बचीवरं, अञ्ञिस्सा सन्तकं अनापुच्छा गहितं पुन पटिदातब्बचीवरन्ति अत्थो’’ति (पाचि. अट्ठ. ९०३).

२२२७. तिकपाचित्तियं वुत्तन्ति ‘‘उपसम्पन्नाय उपसम्पन्नसञ्ञा…पे… वेमतिका ¶ …पे… अनुपसम्पन्नसञ्ञा चीवरसङ्कमनीयं धारेति, आपत्ति पाचित्तियस्सा’’ति (पाचि. ९०५) एवं तिकपाचित्तियं पाळियं वुत्तं. सेसायाति अनुपसम्पन्नाय. ‘‘तिकदुक्कट’’न्ति इदञ्च वुत्तनयमेव. आपदासूति सचे अपारुतं वा अनिवत्थं वा चोरा हरन्ति, एवरूपासु आपदासु वा.

२२२८. एतं समुट्ठानं कथिनेन तुल्यन्ति योजना. गहणं, परिभोगो च क्रियं. अनापुच्छनं अक्रियं.

पञ्चमं.

२२२९. लभितब्बं तु चीवरन्ति लभितब्बं विकप्पनुपगं चीवरं. निवारेतीति यथा ते दातुकामा न देन्ति, एवं अन्तरायं परक्कमति. पाचित्तिं परिदीपयेति सचे तस्सा वचनेन ते न देन्ति, भिक्खुनिया पाचित्तियं वदेय्याति अत्थो.

२२३०. एत्थ पठमं ‘‘सङ्घस्सा’’ति वुत्तत्ता गणस्साति द्वे तयोव गहेतब्बा. लाभेति एत्थ ‘‘निवारिते’’ति सेसो. सचे अञ्ञं परिक्खारं निवारेति, तथेव दुक्कटन्ति योजना. अञ्ञन्ति विकप्पनुपगचीवरतो अञ्ञं. परिक्खारन्ति ¶ यं किञ्चि थालकादीनं वा सप्पितेलादीनं वा अञ्ञतरं.

२२३१. आनिसंसं निदस्सेत्वाति ‘‘कित्तकं अग्घनकं दातुकामत्थाति पुच्छति, ‘एत्तकं नामा’ति वदन्ति, ‘आगमेथ ताव, इदानि वत्थु महग्घं, कतिपाहेन कप्पासे आगते समग्घं भविस्सती’’ति एवं आनिसंसं दस्सेत्वा. न दोसताति न दोसो, अनापत्तीति अत्थो.

छट्ठं.

२२३२-३. धम्मिकं समग्गेन सङ्घेन सन्निपतित्वा करियमानं चीवरानं विभङ्गं भाजनं या भिक्खुनी पटिसेधेय्य पटिबाहेय्य, तस्सा एवं पटिसेधेन्तिया पाचित्तियं होतीति योजना. अधम्मे धम्मसञ्ञाय दुक्कटं परिदीपितन्ति योजना. उभो वेमतिकाय वाति उभोसु वेमतिकाय. गाथाबन्धवसेन सु-सद्दलोपो. धम्मिके अधम्मिके चीवरविभङ्गे वेमतिकाय पटिबाहन्तिया ¶ दुक्कटं परिदीपितन्ति योजना. यथाह ‘‘धम्मिके वेमतिका पटिबाहति, आपत्ति दुक्कटस्स. अधम्मिके वेमतिका पटिबाहति, आपत्ति दुक्कटस्सा’’ति. आनिसंसं निदस्सेत्वाति ‘‘एकिस्सा एकं साटकं नप्पहोति, आगमेथ ताव, कतिपाहेनेव उप्पज्जिस्सति, ततो भाजेस्सामी’’ति (पाचि. ९१४) एवं आनिसंसं दस्सेत्वा.

सत्तमं.

२२३५-६. निवासनुपगं वा तथा पारुपनुपगं वा कप्पबिन्दुकतं वा यं किञ्चि चीवरं पञ्च सहधम्मिके च मातापितरोपि मुञ्चित्वा अञ्ञस्स यस्स कस्सचि गहट्ठस्स वा परिब्बाजकस्स वा ¶ यदि ददेय्य, तस्सापि पाचित्तियं परियापुतन्ति योजना. एत्थ च ‘‘पितरो’’ति माता च पिता च मातापितरोति वत्तब्बे विरूपेकसेसवसेन निद्देसो दट्ठब्बो.

२२३७. एत्थ इमस्मिं सिक्खापदे ता पन पाचित्तियो चीवरानं गणनाय वसेन गणेतब्बाति योजना.

२२३८. ताव सम्पटिच्छितो कालो एतस्साति तावकालिकं, चीवरं. ‘‘अञ्ञस्सा’’ति पुब्बे वुत्तस्स दूरत्ता पुनपि ‘‘अञ्ञेस’’न्ति आह, सोयेवत्थो.

अट्ठमं.

२२३९. या पन भिक्खुनी ‘‘सचे मयं सक्कोम, दस्साम करिस्सामाति एवं वाचा भिन्ना होती’’ति वुत्ताय दुब्बलाय चीवरपच्चासाय चीवरस्स विभङ्गं निसेधेत्वा चीवरे कालं अतिक्कमेय्य, अस्सा दोसता पाचित्तियापत्ति होतीति योजना. चीवरे कालन्ति ‘‘चीवरकालसमयो नाम अनत्थते कथिने वस्सानस्स पच्छिमो मासो, अत्थते कथिने पञ्चमासा’’ति (पाचि. ९२२) पदभाजने वुत्तं चीवरकालं. अतिक्कमेय्याति ‘‘अनत्थते कथिने वस्सानस्स पच्छिमं दिवसं, अत्थते कथिने कथिनुद्धारदिवसं अतिक्कामेती’’ति वुत्तविधिं अतिक्कामेय्य.

२२४०. ‘‘अदुब्बलचीवरे ¶ दुब्बलचीवरसञ्ञा, आपत्ति दुक्कटस्सा’’ति वचनतो सुदुब्बलन्ति चेतसाति एत्थ सु-सद्दो पदपूरणे. उभोसूति दुब्बले, अदुब्बले च. कङ्खिताय वाति वेमतिकाय वा.

२२४१. आनिसंसं निदस्सेत्वाति ‘‘किञ्चापि ‘न मयं अय्ये सक्कोमा’ति वदन्ति, इदानि पन तेसं कप्पासो आगमिस्सति, सद्धो पसन्नो पुरिसो आगमिस्सति ¶ , अद्धा दस्सती’’ति (पाचि. अट्ठ. ९२१) एवं अट्ठकथाय वुत्तनयेन आनिसंसं दस्सेत्वा.

नवमं.

२२४२. धम्मिकं कथिनुद्धारन्ति ‘‘धम्मिको नाम कथिनुद्धारो समग्गो भिक्खुनिसङ्घो सन्निपतित्वा उद्धरती’’ति (पाचि. ९२९) वुत्तं कथिनुद्धारं.

२२४३. यस्साति यस्स कथिनस्स. अत्थारमूलको आनिसंसो नाम ‘‘यो च तत्थ चीवरुप्पादो, सो नेसं भविस्सती’’ति (महाव. ३०६) अनुञ्ञातो तस्मिं विहारे उप्पज्जनकचीवरवत्थानिसंसो. उद्धारमूलको नाम अन्तरुब्भारं कारापेन्तेहि उपासकेहि दिय्यमानचीवरवत्थानिसंसो.

२२४५. समानिसंसोपीति अत्थारआनिसंसेन समानिसंसोपि उब्भारो. सद्धापालनकआरणाति पसादानुरक्खनत्थाय दातब्बोति योजना. आनिसंसं निदस्सेत्वाति ‘‘भिक्खुनिसङ्घो जिण्णचीवरो, कथिनानिसंसमूलको महालाभो’’ति एवरूपं आनिसंसं दस्सेत्वा.

२२४६. समुट्ठानादिना सद्धिं सेसं पन विनिच्छयजातं असेसेन सब्बाकारेन सत्तमेन सिक्खापदेन समं मतं ‘‘सदिस’’न्ति विञ्ञातं. किञ्चिपि अप्पकम्पि अपुब्बं तत्थ वुत्तनयतो अञ्ञं नत्थीति योजना.

दसमं.

नग्गवग्गो ततियो.

२२४७. ‘‘या ¶ ¶ पन भिक्खुनियो द्वे एकमञ्चे तुवट्टेय्युं, पाचित्तिय’’न्ति (पाचि. ९३३) पञ्ञत्तसिक्खापदे विनिच्छयं दस्सेतुमाह ‘‘एकाया’’तिआदि. एकायाति एकाय भिक्खुनिया. अपराति अञ्ञा उपसम्पन्ना. निपज्जेय्युन्ति एत्थ ‘‘एकमञ्चे’’ति सेसो. द्वेति द्वे भिक्खुनियो.

२२४८-९. ‘‘एकाय चा’’तिआदि अनापत्तिवारनिद्देसो. उभो वापि समं निसीदन्तीति योजना. एळकेनाति एळकलोमसिक्खापदेन.

पठमं.

२२५०-१. पावारकटसारादिन्ति एत्थ भुम्मेकवचनं. ‘‘संहारिमेसू’’ति इमिना समानाधिकरणत्ता बहुवचनप्पसङ्गे वचनविपल्लासेनेत्थ एकवचननिद्देसोति दट्ठब्बो. पावारो च कटसारो च ते आदि यस्साति विग्गहो, निद्धारणे चेतं भुम्मं. एककन्ति निद्धारितब्बनिदस्सनं. एकमेव एककं. संहारिमेसु पावारादीसु अञ्ञतरन्ति अत्थो. ‘‘पावारोति कोजवादयो’’ति वदन्ति. कटसारोति कटोयेव. आदि-सद्देन अत्थरित्वा सयनारहं सब्बं सङ्गण्हाति. तेनेवाति यं अत्थतं, तेनेव. पारुपित्वा सचे या पन द्वे सहेव निपज्जन्ति, तासं पाचित्तियं सियाति योजना. एत्थ च अत्थरणपावुरणकिच्चे एकस्सेव निद्दिट्ठत्ता एकस्स अन्तस्स अत्थरणञ्च एकस्स अन्तस्स पारुपनञ्च विञ्ञायति. यथाह ‘‘संहारिमानं पावारत्थरणकटसारकादीनं एकं अन्तं अत्थरित्वा एकं पारुपित्वा तुवट्टेन्तीनमेतं अधिवचन’’न्ति (पाचि. अट्ठ. ९३७).

एकस्मिं एकत्थरणे वा एकपावुरणे वा निपज्जने सति तासं द्विन्नं भिक्खुनीनं दुक्कटन्ति सम्बन्धो. द्विकदुक्कटं वुत्तन्ति ¶ ‘‘नानत्थरणपावुरणे एकत्थरणपावुरणसञ्ञा…पे… वेमतिका, आपत्ति दुक्कटस्सा’’ति (पाचि. ९३९) वुत्तं दुक्कटद्वयं.

२२५२. ववत्थानं निदस्सेत्वाति मज्झे कासावं वा कत्तरयट्ठिं वा अन्तमसो कायबन्धनम्पि ¶ ठपेत्वा निपज्जन्ति, अनापत्तीति अत्थो. सेसं समुट्ठानादिविधानं. आदिनाति इमस्मिंयेव वग्गे पठमसिक्खापदेन. तुल्यन्ति समानं.

दुतियं.

२२५३. अञ्ञिस्सा भिक्खुनिया. अफासुकारणाति अफासुकरणहेतु. अनापुच्छाति अनापुच्छित्वा. तस्सा पुरतो च चङ्कमनादयो यदि करेय्य, एवं करोन्तिया पाचित्तियापत्ति होतीति योजना. चङ्कमनादयोति एत्थ आदि-सद्देन ‘‘तिट्ठति वा निसीदति वा सेय्यं वा कप्पेति उद्दिसति वा उद्दिसापेति वा सज्झायं वा करोती’’ति (पाचि. ९४३) पदभाजने वुत्तानं सङ्गहो.

२२५४. निवत्तनानं गणनायाति चङ्कमन्तिया चङ्कमस्स उभयकोटिं पत्वा निवत्तन्तिया निवत्तनगणनाय. पयोगतोयेवाति पयोगगणनायेव, इरियापथपरिवत्तनगणनायेवाति वुत्तं होति. दोसाति पाचित्तियापत्तियो.

२२५५. पदानं गणनावसाति एत्थ आदि-सद्दो लुत्तनिद्दिट्ठो. यथाह ‘‘पदादिगणनाया’’ति (पाचि. अट्ठ. ९४३). तिकपाचित्तियं वुत्तन्ति उपसम्पन्नाय उपसम्पन्नसञ्ञा, वेमतिका, अनुपसम्पन्नसञ्ञाति विकप्पत्तयस्स वसेन पाचित्तियत्तयं वुत्तं. सेसायाति अनुपसम्पन्नाय.

२२५६. न ¶ च अफासुकामायाति आपुच्छित्वा तस्सा भिक्खुनिया पुरतो चङ्कमनादीनि करोन्तिया अनापत्तीति योजना.

२२५७. क्रियाक्रियन्ति चङ्कमनादिकरणं किरियं. आपुच्छाय अकरणं अकिरियं. पापमानसन्ति अकुसलचित्तं.

ततियं.

२२५८-९. अनन्तरायाति वक्खमानेसु राजन्तरायादीसु दससु अन्तरायेसु अञ्ञतररहिता ¶ भिक्खुनी. दुक्खितन्ति गिलानं. यथाह ‘‘दुक्खिता नाम गिलाना वुच्चती’’ति (पाचि. ९४८). सहजीविनिन्ति सद्धिविहारिनिं. यथाह ‘‘सहजीविनी नाम सद्धिविहारिनी वुच्चती’’ति. अञ्ञाय वा नुपट्ठापेय्याति अञ्ञाय भिक्खुनिया, सिक्खमानाय, सामणेरिया वा गिहिनिया वा उपट्ठानं न कारापेय्य. नुपट्ठेय्य सयम्पि वाति या उपट्ठानं न करेय्य. धुरे निक्खित्तमत्ते वाति ‘‘नेव उपट्ठेस्सामि, न उपट्ठापनाय उस्सुक्कं करिस्सामी’’ति धुरे उस्साहे निक्खित्तमत्तेयेव. तस्साति उपज्झायाय.

अन्तेवासिनिया वापीति पब्बज्जाउपसम्पदाधम्मनिस्सयवसेन चतुब्बिधासु अन्तेवासिनीसु अञ्ञतराय. इतरायाति अनुपसम्पन्नाय.

२२६०. गिलानायाति सयं गिलानाय. ‘‘गवेसित्वा अलभन्तिया’’ति पदच्छेदो, अञ्ञं उपट्ठायिकं परियेसित्वा अलभमानायाति अत्थो. ‘‘आपदासु उम्मत्तिकादीन’’न्ति पदच्छेदो. गाथाबन्धवसेन वण्णलोपोपि दट्ठब्बो. आपदासूति तथारूपे उपद्दवे सति. धुरनिक्खेपनोदयन्ति ¶ धुरनिक्खेपसमुट्ठानं. यदेत्थ वत्तब्बं, तं हेट्ठा वुत्तमेव.

चतुत्थं.

२२६१-२. पुग्गलिकस्स अत्तायत्तपरायत्तवसेन अनियमितत्ता ‘‘सक’’न्ति इमिना नियमेति. सकं पुग्गलिकन्ति अत्तनो पुग्गलिकं. दत्वाति एत्थ ‘‘भिक्खुनिया’’ति सेसो. सकवाटन्ति परिवत्तकद्वारकवाटसहितं. उपस्सयन्ति गेहं. द्वारादीसूति एत्थ आदि-सद्देन गब्भपमुखानं सङ्गहो, निद्धारणे चेतं भुम्मं. बहूनिपीति निद्धारेतब्बनिदस्सनं. बहूनिपि द्वारानि वा बहू गब्भे वा बहूनि पमुखानि वा. तन्ति यस्सा उपस्सयो दिन्नो, तं भिक्खुनिं. निक्कड्ढन्तियाति अतिक्कामेन्तिया. तस्साति या निक्कड्ढति, तस्सा.

२२६३. एत्थाति निक्कड्ढने. एसेव नयोति ‘‘पयोगगणनाय आपत्ती’’ति दस्सितनयो. एत्थ पयोगो नाम आणापनं, इमिना ‘‘एकायाणत्तिया अनेकेसु द्वारेसु अतिक्कामितेसुपि एकाव आपत्ति होती’’ति एवमादिकं अट्ठकथागतविनिच्छयं (पाचि. अट्ठ. ९४३, ९५२ अत्थतो समानं) सङ्गण्हाति.

२२६४. तेसु ¶ विनिच्छयेसु एकं विनिच्छयविसेसं दस्सेतुमाह ‘‘एत्तकाव इमं द्वारा’’तिआदि. द्वारगणनाय आपत्तियो द्वारगणनापत्तियो.

२२६५. अकवाटम्हाति अकवाटबन्धतो उपस्सया निक्कड्ढन्तिया दुक्कटन्ति योजना. सेसायाति अनुपसम्पन्नाय. तिकदुक्कटन्ति अनुपसम्पन्नाय उपसम्पन्नसञ्ञाय, वेमतिकाय, अनुपसम्पन्नसञ्ञाय च वसेन तिकदुक्कटं. उभिन्नन्ति उपसम्पन्नानुपसम्पन्नानं. परिक्खारेसूति पत्तचीवरादीसु परिक्खारेसु ¶ . सब्बत्थाति सब्बेसु पयोगेसु, निक्कड्ढियमानेसु, निक्कड्ढापियमानेसु चाति वुत्तं होति.

२२६६. एत्थ इमस्मिं सिक्खापदे समुट्ठानादिविनिच्छयेन सह सेसं विनिच्छयजातं असेसेन सब्बप्पकारेन सङ्घिका विहारस्मा निक्कड्ढनसिक्खापदेन समं मतं ‘‘सदिस’’न्ति सल्लक्खितन्ति योजना.

पञ्चमं.

२२६७. छट्ठेति ‘‘या पन भिक्खुनी संसट्ठा विहरेय्य गहपतिना वा गहपतिपुत्तेन वा’’तिआदिमातिकाय (पाचि. ९५६) निद्दिट्ठे छट्ठसिक्खापदे. इध वत्तब्बन्ति इमस्मिं विनयविनिच्छये कथेतब्बं. अरिट्ठस्स सिक्खापदेनाति अरिट्ठसिक्खापदेन. विनिच्छयोति समुट्ठानादिको.

छट्ठं.

२२६८. सासङ्कसम्मतेति एत्थ ‘‘सप्पटिभये’’ति सेसो. उभयम्पि हेट्ठा वुत्तत्थमेव. अन्तोरट्ठेति यस्स विजिते विहरति, तस्सेव रट्ठे. सासङ्कसम्मते सप्पटिभये अन्तोरट्ठे सत्थेन विना चारिकं चरन्तिया भिक्खुनिया आपत्ति सियाति योजना.

२२६९. एवं चरन्तिया सगामकट्ठाने गामन्तरप्पवेसे च अगामके अरञ्ञे अद्धयोजने च विनयञ्ञुना भिक्खुना पाचित्तियनयो पाचित्तियापत्तिविधानक्कमो ञेय्यो ञातब्बोति योजना.

२२७०. सह ¶ सत्थेन चरन्तिया न दोसोति योजना. खेमट्ठाने चरन्तिया, आपदासु वा चरन्तिया न दोसोति योजना.

सत्तमं.

२२७१. अट्ठमे ¶ नवमे वापीति ‘‘या पन भिक्खुनी तिरोरट्ठे’’तिआदिके (पाचि. ९६६) अट्ठमसिक्खापदे च ‘‘या पन भिक्खुनी अन्तोवस्सं चारिकं चरेय्य, पाचित्तिय’’न्ति (पाचि. ९७०) वुत्तनवमसिक्खापदे च. अनुत्तानं न विज्जति, सब्बं उत्तानमेव, तस्मा एत्थ मया न विचारीयतीति अधिप्पायो.

अट्ठमनवमानि.

२२७२. ‘‘या पन भिक्खुनी वस्संवुत्था चारिकं न पक्कमेय्य अन्तमसो छप्पञ्चयोजनानिपि, पाचित्तिय’’न्ति (पाचि. ९७४) वुत्तसिक्खापदे विनिच्छयं दस्सेतुमाह ‘‘पाचित्ती’’तिआदि. अहं न गमिस्सामि न पक्कमिस्सामीति धुरनिक्खेपे कते पाचित्तीति योजना. तथाति पाचित्ति.

२२७३. वस्संवुत्थाय पवारेत्वा अन्तमसो पञ्च योजनानि गन्तुं वट्टति. एत्थ अपि-सद्दस्स सम्भावनत्थतं दस्सेतुमाह ‘‘छसू’’तिआदि. इध इमस्मिं अनापत्तिवारे छसु योजनेसु यदत्थि वत्तब्बं, तं किन्नु नाम सिया, नत्थि किञ्चि वत्तब्बन्ति अत्थो. पवारेत्वा छ योजनानि गच्छन्तिया अनापत्तिभावो अवुत्तसिद्धोवाति दीपेति.

२२७४. तीणि योजनानि. तेनेवाति येन गता, तेनेव मग्गेन. अञ्ञेन मग्गेनाति गतमग्गतो अञ्ञेन पथेन.

२२७५. दसविधे अन्तरायस्मिं सतीति वक्खमानेसु अन्तरायेसु अञ्ञतरस्मिं सति. तस्सा अनापत्तीति योजना. आपदासूति अट्टादिकारणेन केनचि पलिबुद्धादिभावसङ्खातासु आपदासु. गिलानायाति सयं गिलानाय. दुतियाय भिक्खुनिया अलाभे वा अपक्कमन्तिया अनापत्ति.

२२७६. राजा ¶ ¶ च चोरा च अमनुस्सा च अग्गि च तोयञ्च वाळा च सरीसपा चाति विग्गहो. मनुस्सोति एत्थ गाथाबन्धवसेन पुब्बपदलोपो ‘‘लाबूनि सीदन्ती’’तिआदीसु (जा. १.१.७७) विय. जीवितञ्च ब्रह्मचरिया च जीवितब्रह्मचरियन्ति समाहारद्वन्दे समासो, तस्स जीवितब्रह्मचरियस्स. अन्तराया एव अन्तरायिका. एतेसं दसन्नं अञ्ञतरस्मिं अपक्कमन्तिया अनापत्ति. यथाह ‘‘अन्तरायेति दसविधे अन्तराये. ‘परं गच्छिस्सामी’ति निक्खन्ता, नदिपूरो पन आगतो, चोरा वा मग्गे होन्ति, मेघो वा उट्ठाति, निवत्तितुं वट्टती’’ति (पाचि. अट्ठ. ९७६).

२२७७. अपक्कमनं अक्रियं. अनादरियेन आपज्जनतो आह ‘‘दुक्खवेदन’’न्ति.

दसमं.

तुवट्टवग्गो चतुत्थो.

२२७८-८०. राजागारन्ति रञ्ञो कीळनघरं. चित्तागारन्ति कीळनचित्तसालं. आरामन्ति कीळनउपवनं. कीळुय्यानन्ति कीळनत्थाय कतं उय्यानं. कीळावापिन्ति एत्थ किञ्चापि पाळियं (पाचि. ९७९) पोक्खरणी वुत्ता, सा पन सब्बजलासयानं कीळाय कतानं उपलक्खणवसेन वुत्ताति आह ‘‘कीळावापि’’न्ति, कीळनत्थाय कतवापिन्ति अत्थो. ‘‘नानाकार’’न्ति इदं यथावुत्तपदेहि पच्चेकं योजेतब्बं. सब्बसङ्गाहिकवसेन ‘‘तानी’’ति वुत्तं. नानाकारं राजागारं चित्तागारं आरामं कीळुय्यानं वा कीळावापिं दट्ठुं गच्छन्तीनं तानि सब्बानि एकतो दट्ठुं गच्छन्तीनं तासं भिक्खुनीनं पदे पदे दुक्कटं मुनिना निद्दिट्ठन्ति योजना.

पञ्चपीति ¶ राजागारादीनि पञ्चपि. एकायेव पाचित्ति आपत्ति परिदीपिताति योजना. तं तं दिसाभागं गन्त्वा पस्सन्ति चे, पाटेक्कापत्तियो पयोगगणनाय सियुन्ति योजना.

२२८१. गमनबाहुल्लेन आपत्तिबाहुल्लं पकासेत्वा गीवापरिवत्तनसङ्खातेन पयोगबाहुल्लेनापि ¶ आपत्तिबाहुल्लं पकासेतुमाह ‘‘पयोगबहुतायापि, पाचित्तिबहुता सिया’’ति. सब्बत्थाति यत्थ भिक्खुनिया पाचित्तियं वुत्तं, तत्थ सब्बत्थ.

२२८२. ‘‘अवसेसोपि अनापत्ती’’ति पदच्छेदो. अनापत्ति च कथामग्गो च अनापत्तिकथामग्गो, तेसं विनिच्छयो अनापत्तिकथामग्गविनिच्छयो, ‘‘अनापत्ति आरामे ठिता पस्सती’’तिआदिको (पाचि. ९८१) अनापत्तिविनिच्छयो च अट्ठकथागतो (पाचि. अट्ठ. ९८१) अवसेसविनिच्छयो चाति अत्थो. ‘‘आरामे ठिता’’ति एतेन अज्झारामे राजागारादीनि करोन्ति, तानि पस्सन्तिया अनापत्तीति अयमनापत्तिवारो दस्सितो. एतेनेव अन्तोआरामे तत्थ तत्थ गन्त्वा नच्चादीनि विय राजागारादीनिपि पस्सितुं लभतीतिपि सिद्धं. आदि-सद्देन ‘‘पिण्डपातादीनं अत्थाय गच्छन्तिया मग्गे होन्ति, तानि पस्सति, अनापत्ति. रञ्ञो सन्तिकं केनचि करणीयेन गन्त्वा पस्सति, अनापत्ति. केनचि उपद्दुता पविसित्वा पस्सति, अनापत्ती’’ति एते अनापत्तिवारा सङ्गहिता. नच्चदस्सन…पे… सहाति समुट्ठानादिना विनिच्छयेन सह नच्चदस्सनसिक्खापदसदिसोव.

पठमं.

२२८३. मानतो ¶ पमाणतो अतीता अपेता मानातीता, आसन्दी, तं. वाळेहि उपेतो वाळूपेतो, पल्लङ्को, तं. ‘‘आसन्दी नाम अतिक्कन्तप्पमाणा वुच्चती’’ति वचनतो हेट्ठा अट्टनिया वड्ढकिहत्थतो उच्चतरपादो आयामचतुरस्सो मञ्चपीठविसेसो आसन्दी नाम समचतुरस्सानं अतिक्कन्तप्पमाणानम्पि अनुञ्ञातत्ता. ‘‘पल्लङ्को नाम आहरिमेहि वाळेहि कतो’’ति (पाचि. ९८४) वचनतो पमाणयुत्तोपि एवरूपो न वट्टति. आहरित्वा यथानुरूपट्ठाने ठपेतब्बवाळरूपानि आहरिमवाळा नाम, संहरिमवाळरूपयुत्तोति वुत्तं होति. मानातीतं आसन्दिं वा वाळूपेतं पल्लङ्कं वा सेवन्तीनं अभिनिसीदन्तीनं, अभिनिपज्जन्तीनञ्च यासं भिक्खुनीनं सत्था पाचित्तियापत्तिं आह.

२२८४. तासं निसीदनस्सापि निपज्जनस्सापि पयोगबाहुल्लवसेन पाचित्तियानं गणना होति इति एवं निद्दिट्ठा एवं अयं गणना अच्चन्तयसेन अनन्तपरिवारेन भगवता वुत्ताति ¶ योजना. एत्थ च इच्चेवन्ति निपातसमुदायो, इति-सद्दो निदस्सने, एवं-सद्दो इदमत्थे दट्ठब्बो.

२२८५. पादे आसन्दिया छेत्वाति आसन्दिया पादे पमाणतो अधिकट्ठानछिन्दनेन छेत्वा. पल्लङ्कस्स पादे वाळका पल्लङ्कवाळका, ते हित्वा अपनेत्वा, अनापत्तीति सेवन्तीनं अनापत्ति.

दुतियं.

२२८६-७. छन्नन्ति खोमादीनं छन्नं, निद्धारणे सामिवचनं. अञ्ञतरं सुत्तन्ति निद्धारितब्बनिदस्सनं. हत्थाति हत्थेन, करणत्थे चेतं निस्सक्कवचनं. अञ्चितन्ति हत्थायामेन आकड्ढितं ¶ . तस्मिन्ति तस्मिं अञ्छिते सुत्तप्पदेसे. तक्कम्हीति कन्तनसूचिम्हि. वेठितेति पलिवेठिते.

सुत्तकन्तनतो सब्बपुब्बपयोगेसूति सुत्तकन्तनतो पुब्बेसु कप्पासविचिननादिसब्बपयोगेसु. हत्थवारतोति हत्थवारगणनाय. यथाह ‘‘कप्पासविचिननं आदिं कत्वा सब्बपुब्बपयोगेसु हत्थवारगणनाय दुक्कट’’न्ति (पाचि. अट्ठ. ९८८).

२२८८. कन्तितं सुत्तन्ति पठममेव कन्तितं दसिकसुत्तादिं. पुन कन्तन्तियाति कोटिया कोटिं सङ्घाटेत्वा पुन कन्तन्तिया.

ततियं.

२२८९. तण्डुलानं कोट्टनं तु आदिं कत्वा गिहीनं वेय्यावच्चं करोन्तिया सब्बपुब्बपयोगेसु दुक्कटन्ति योजना.

२२९०. यागुआदिसु निप्फादेतब्बेसु तदाधारानि भाजनानि गणेत्वाव पाचित्तिं परिदीपये, खज्जकादीसु रूपानं गणनाय पाचित्तिं परिदीपयेति योजना. यागुआदिसूति एत्थ ¶ आदि-सद्देन भत्तसूपादीनं सङ्गहो. खज्जकादीसूति आदि-सद्देन मच्छमंसादिउत्तरिभङ्गानं सङ्गहो.

२२९१. ‘‘सचेपि मातापितरो आगच्छन्ति, यंकिञ्चि बीजनिं वा सम्मज्जनिदण्डं वा कारापेत्वा वेय्यावच्चकरट्ठाने ठपेत्वाव यं किञ्चि पचितुं वट्टती’’ति अट्ठकथागतं विनिच्छयं दस्सेतुमाह ‘‘सचे’’तिआदि. सचेति एत्थ ‘‘मातापितरो आगच्छन्ती’’ति सेसो. अत्तनो एवमागतानं मातापितूनम्पि ¶ किञ्चि कम्मं अकारेत्वा किञ्चि कम्मं कातुं न वट्टतीति योजना. अपि-सद्दो सम्भावने, तेन अञ्ञेसं कथायेव नत्थीति दीपेति.

२२९२-३. सङ्घस्स यागुपाने वेय्यावच्चं करोन्तिया अनापत्तीति योजना. ‘‘सङ्घभत्तेपी’’तिआदीसुपि एसेव नयो. अत्तनो वेय्यावच्चकरस्स वाति सम्बन्धो. यथाह ‘‘यागुपानेति मनुस्सेहि सङ्घस्सत्थाय करियमाने यागुपाने वा सङ्घभत्ते वा तेसं सहायिकभावेन यं किञ्चि पचन्तिया अनापत्ति. चेतियपूजाय सहायिका हुत्वा गन्धमालादीनि पूजेति, वट्टती’’ति (पाचि. अट्ठ. ९९३).

चतुत्थं.

२२९४. ‘‘या पन भिक्खुनी ‘एहाय्ये इमं अधिकरणं वूपसमेही’ति वुच्चमाना ‘साधू’ति पटिस्सुणित्वा सा पच्छा अनन्तरायिकिनी नेव वूपसमेय्य न वूपसमाय उस्सुक्कं करेय्य, पाचित्तिय’’न्ति (पाचि. ९९५) सिक्खापदस्स विनिच्छयं दस्सेतुमाह ‘‘पाचित्ति धुरनिक्खेपे’’तिआदि. धुरनिक्खेपेति न दानि तं वूपसमेस्सामि, अञ्ञाहि वा न वूपसमापेस्सामी’’ति एवं धुरस्स उस्साहस्स निक्खेपे पाचित्तीति योजना. चीवरसिब्बने यथा पञ्चाहपरिहारो लब्भति, इध पन तथा एकाहम्पि परिहारो न लब्भतीति योजना.

२२९५. सेसन्ति ‘‘धुरं निक्खिपित्वा पच्छा विनिच्छिनन्ती आपत्तिं आपज्जित्वाव विनिच्छिनाती’’तिआदिकं विनिच्छयजातं. तत्थ चीवरसिब्बने वुत्तनयेनेव वेदितब्बन्ति योजना.

पञ्चमं.

२२९६-७. या ¶ ¶ पन भिक्खुनी गिहीनं वा सहधम्मिके ठपेत्वा अञ्ञेसं परिब्बाजकपरिब्बाजिकानं वा दन्तपोनोदकं विना अञ्ञं यं किञ्चि अज्झोहरणीयं खादनीयं, भोजनीयं वा कायेन वा कायपटिबद्धेन वा निस्सग्गियेन वा ददाति, तस्सा पाचित्तियं होतीति योजना.

२२९८-९. इध इमस्मिं सिक्खापदे मुनिना दन्तकट्ठोदके दुक्कटं वुत्तन्ति योजना. या पन भिक्खुनी कायादीहि सयं न देति अञ्ञेन दापेति, तस्सा च कायादीहि अदत्वा भूमियं निक्खिपित्वा देन्तियापि या बाहिरलेपं वा देति, तस्सापि उम्मत्तिकाय च न दोसो अनापत्तीति योजना.

छट्ठं.

२३००-१. आवसथचीवरन्ति ‘‘उतुनियो भिक्खुनियो परिभुञ्जन्तू’’ति दिन्नं चीवरं. या भिक्खुनी यं ‘‘आवसथचीवर’’न्ति नियमितं चीवरं, तं चतुत्थे दिवसे धोवित्वा अन्तमसो उतुनिया सामणेराय वा अदत्वा सचे परिभुञ्जेय्य, तस्सा पाचित्तियं वुत्तन्ति योजना. तिकपाचित्तियं सियाति ‘‘अनिस्सज्जिते अनिस्सज्जितसञ्ञा…पे… वेमतिका…पे… निस्सज्जितसञ्ञा परिभुञ्जति, आपत्ति पाचित्तियस्सा’’ति (पाचि. १००६) वुत्तं पाचित्तियं होतीति योजना.

२३०२-३. तस्मिं चीवरे निस्सज्जिते अनिस्सज्जितसञ्ञाय वा वेमतिकाय वा तस्सा भिक्खुनिया द्विकदुक्कटं वुत्तन्ति योजना. अञ्ञासं उतुनीनं अभावे अदत्वापि परिभुञ्जन्तिया अनापत्ति. पुन परिययेति पुन उतुनिवारे यथाकालं परिभुञ्जन्तिया अनापत्ति. अच्छिन्नचीवरादीनञ्च अनापत्तीति योजना. परिययेति गाथाबन्धवसेन रस्सत्तं ¶ . अच्छिन्नचीवरादीनन्ति एत्थ आदि-सद्देन नट्ठचीवरादीनं सङ्गहो. आपदासुपीति महग्घचीवरं सरीरतो मोचेत्वा सुप्पटिसामितम्पि चोरा हरन्ति, एवरूपासु आपदासु परिभुञ्जन्तिया अनापत्तीति योजना.

सत्तमं.

२३०४. सकवाटकं ¶ विहारन्ति कवाटबन्धविहारं, द्वारकवाटयुत्तं सुगुत्तसेनासनन्ति वुत्तं होति. रक्खनत्थाय अदत्वाति ‘‘इमं जग्गेय्यासी’’ति एवं अनापुच्छित्वा.

२३०५-६. ‘‘होति पाचित्तियं तस्सा, चारिकं पक्कमन्तिया’’ति वुत्तमेव पकासेतुमाह ‘‘अत्तनो गामतो’’तिआदि. अत्तनो गामतोति अत्तनो वसनकगामतो. तथा इतरस्साति अपरिक्खित्तस्स विहारस्स परिक्खेपं उपचारं. तन्तिआदिपदत्तये भुम्मत्थे उपयोगवचनं वेदितब्बं. परिक्खित्तस्स विहारस्स परिक्खेपे पठमेन पदेन समतिक्कन्ते दुक्कटं, तथा इतरस्स अपरिक्खित्तस्स विहारस्स तस्मिं उपचारे अतिक्कन्ते दुक्कटं. दुतियेन पदेन परिक्खेपे, उपचारे समतिक्कन्तमत्ते पाचित्तीति योजना.

२३०७. अकवाटबन्धनस्मिं कवाटबन्धरहिते विहारे तथा अनिस्सज्जन्तिया दुक्कटं परिदीपितं. जग्गिकं अलभन्तियाति एत्थ ‘‘परियेसित्वा’’ति सेसो. जग्गिकन्ति विहारपटिजग्गिकं.

२३०८. आपदासूति रट्ठे भिज्जन्ते आवासे छड्डेत्वा गच्छन्ति, एवरूपासु आपदासु. गिलानायाति वचीभेदं कातुं असमत्थायाति.

अट्ठमं.

२३०९-१०. हत्थी ¶ च अस्सो च रथो च हत्थिअस्सरथा, ते आदि येसं ते हत्थिअस्सरथादयो, तेहि. आदि-सद्देन धनु थरूति पदद्वयं गहितं. संयुत्तन्ति यथावुत्तेहि हत्थिअस्सादिपदेहि संयोजितं, ‘‘हत्थीनं सिप्पं हत्थिसिप्प’’न्तिआदिना कतसमासन्ति अत्थो, ‘‘हत्थिसिप्पं अस्ससिप्पं रथसिप्पं धनुसिप्पं थरुसिप्प’’न्ति एवं वुत्तं यं किञ्चि सिप्पन्ति वुत्तं होति. हत्थिसिक्खादिसिप्पं सन्दीपको गन्थो वच्चवाचकानं अभेदोपचारेन एवं वुत्तोति गहेतब्बं. तेनेव वक्खति ‘‘पदादीनं वसेनिधा’’ति. परूपघातकं मन्तागदयोगप्पभेदकं किञ्चीति परेसं अन्तरायकरं खिलनवसीकरणसोसापनादिभेदं आथब्बणमन्तञ्च विसयोगादिप्पभेदकञ्च यं किञ्चि सिप्पन्ति अत्थो.

एत्थ ¶ च खिलनमन्तो नाम दारुसारखिलं मन्तेत्वा पथवियं पवेसेत्वा मारणमन्तो. वसीकरणमन्तो नाम परं अत्तनो वसे वत्तापनकमन्तो. सोसापनकमन्तो नाम परसरीरं रसादिधातुक्खयेन सुक्खभावं पापनकमन्तो. आदि-सद्देन विदेस्सनादिमन्तानं सङ्गहो. विदेस्सनं नाम मित्तानं अञ्ञमञ्ञस्स वेरिभावापादनं. इध इमस्मिं सासने या भिक्खुनी हत्थि…पे… किञ्चि यस्स कस्सचि सन्तिके पदादीनं वसेन परियापुणेय्य अधीयेय्य चे, तस्सा पाचित्तियं होतीति योजना.

२३११. लेखेति लिखितसिप्पे. धारणाय चाति धारणसत्थे, यस्मिं वुत्तनयेन पटिपज्जन्ता बहूनिपि गन्थानि धारेन्ति. गुत्तियाति अत्तनो वा परेसं वा गुत्तत्थाय. परित्तेसु च सब्बेसूति यक्खपरित्तचोरवाळादिसब्बेसु परित्तेसु च.

नवमं.

२३१२. दसमेति ¶ ‘‘या पन भिक्खुनी तिरच्छानविज्जं वाचेय्य, पाचित्तिय’’न्ति (पाचि. १०१८) समुद्दिट्ठे दसमसिक्खापदे. इदं दसमसिक्खापदं.

दसमं.

चित्तागारवग्गो पञ्चमो.

२३१३. सभिक्खुकं आरामन्ति यत्थ भिक्खू रुक्खमूलेपि वसन्ति, तं पदेसं. जानित्वाति ‘‘सभिक्खुक’’न्ति जानित्वा. यं किञ्चीति भिक्खुं वा सामणेरं वा आरामिकं वा यं किञ्चि.

२३१४-५. ‘‘सभिक्खुको नाम आरामो यत्थ भिक्खू रुक्खमूलेपि वसन्ती’’ति (पाचि. १०२५) वचनतो आह ‘‘सचे अन्तमसो’’तिआदि. या पन भिक्खुनी अन्तमसो रुक्खमूलस्सपि अनापुच्छा सचे परिक्खेपं अतिक्कामेति, तस्सा पठमे पादे दुक्कटं, अपरिक्खित्ते तस्स विहारस्स उपचारोक्कमे वापि भिक्खुनिया दुक्कटं, दुतिये पादे अतिक्कामिते पाचित्ति सियाति योजना.

२३१६. अभिक्खुके ¶ आरामे सभिक्खूति सञ्ञाय उभोसुपि सभिक्खुकाभिक्खुकेसु आरामेसु जातकङ्खाय सञ्जातविचिकिच्छाय, वेमतिकायाति अत्थो. तस्सा आपत्ति दुक्कटं होतीति योजना.

२३१७. सीसानुलोकिका या भिक्खुनी गच्छति, तस्सा च अनापत्ति पकासिताति योजना. एवमुपरिपि. ता भिक्खुनियो यत्थ सन्निपतिता होन्ति, तासं सन्तिकं ‘‘गच्छामी’’ति गच्छति. यथाह ‘‘यत्थ भिक्खुनियो पठमतरं ¶ पविसित्वा सज्झायं वा चेतियवन्दनादीनि वा करोन्ति, तत्थ तासं सन्तिकं गच्छामीति गन्तुं वट्टती’’ति (पाचि. अट्ठ. १०२७).

२३१८. ‘‘सन्तं भिक्खुं अनापुच्छा’’ति वचनेनेव अभिक्खुकं आरामं किञ्चि अनापुच्छा पविसन्तिया अनापत्तीति दीपितं होति. आराममज्झतो वा मग्गो होति, तेन गच्छन्तियापि. आपदासूति येन केनचि उपद्दुता होति, एवरूपासु आपदासु पविसन्तिया.

पठमं.

२३२०. अक्कोसेय्याति दसन्नं अक्कोसवत्थूनं अञ्ञतरेन सम्मुखा, परम्मुखा वा अक्कोसेय्य वा. परिभासेय्य वाति भय’मस्स उपदंसेय्य वा. तिकपाचित्तियन्ति ‘‘उपसम्पन्ने उपसम्पन्नसञ्ञा…पे… वेमतिका…पे… अनुपसम्पन्नसञ्ञा अक्कोसति वा परिभासति वा, आपत्ति पाचित्तियस्सा’’ति (पाचि. १०३१) तिकपाचित्तियं वुत्तं. सेसेति अनुपसम्पन्ने. तिकदुक्कटं तस्सा होतीति योजना.

२३२१. ‘‘पुरक्खत्वा’’तिआदीसु यं वत्तब्बं, तं ‘‘अभिसपेय्या’’ति (पाचि. ८७५) वुत्तसिक्खापदे वुत्तनयमेव.

दुतियं.

२३२२-३. सङ्घन्ति भिक्खुनिसङ्घं. परिभासेय्याति ‘‘बाला एता, अब्यत्ता एता, नेता जानन्ति कम्मं वा कम्मदोसं वा कम्मविपत्तिं वा कम्मसम्पत्तिं वा’’ति (पाचि. १०३५) आगतनयेन ¶ परिभासेय्याति अत्थो. इतरायाति एत्थ उपयोगत्थे करणवचनं. एकं भिक्खुनिं वा सम्बहुला भिक्खुनियो ¶ वा तथेव इतरं अनुपसम्पन्नं वा परिभासन्तिया तस्सा दुक्कटं परिदीपितन्ति योजना.

ततियं.

२३२४-६. या निमन्तनपवारणा उभोपि गणभोजनसिक्खापदे (पाचि. २१७-२१९), पवारणसिक्खापदे (पाचि. २३८-२३९) च वुत्तलक्खणा, ताहि उभोहि निमन्तनपवारणाहि या च भिक्खुनी सचे निमन्तितापि वा पवारितापि वा भवेय्य, सा पुरेभत्तं यागुञ्च यामकालिकादिकालिकत्तयञ्च ठपेत्वा यं किञ्चि आमिसं यावकालिकं अज्झोहरणत्थाय पटिग्गण्हाति चे, तस्सा गहणे दुक्कटं सिया, अज्झोहारवसेन एत्थ इमस्मिं सिक्खापदे पाचित्ति परिदीपिताति योजना.

एत्थ च निमन्तिता नाम ‘‘पञ्चन्नं भोजनानं अञ्ञतरेन भोजनेन निमन्तिता’’ति गणभोजनसिक्खापदे वुत्तलक्खणा. पवारणा च ‘‘पवारितो नाम असनं पञ्ञायति, भोजनं पञ्ञायति, हत्थपासे ठितो अभिहरति, पटिक्खेपो पञ्ञायती’’ति पवारणसिक्खापदे वुत्तलक्खणाति वेदितब्बा.

२३२७. कालिकानि च तीणेवाति यामकालिकादीनि तीणि कालिकानि एव.

२३२८-९. निमन्तितपवारितानं द्विन्नं साधारणापत्तिं दस्सेत्वा अनापत्तिं दस्सेतुमाह ‘‘निमन्तिता’’तिआदि. इध इमस्मिं सासने या पन भिक्खुनी निमन्तिता अप्पवारिता सचे यागुं पिवति, वट्टति अनापत्तीति अत्थो. सामिकस्साति येन निमन्तिता, तस्स निमन्तनसामिकस्सेव. अञ्ञभोजनन्ति ¶ येन निमन्तिता, ततो अञ्ञस्स भोजनं. सचे सा भुञ्जति, तथा वट्टतीति योजना.

कालिकानि च तीणेवाति यामकालिकादीनि तीणि कालिकानेव. पच्चये सतीति पिपासादिपच्चये सति.

२३३०. इमस्स ¶ सिक्खापदस्स इदं समुट्ठानं अद्धानेन तुल्यन्ति योजना. पवारिताय, अप्पवारिताय वा निमन्तिताय वसेन किरियाकिरियतं दस्सेतुमाह ‘‘निमन्तिता’’तिआदि. निमन्तिता पन सामिकं अनापुच्छा भुञ्जति चे, तस्सा वसेन इदं सिक्खापदं किरियाकिरियं होति. एत्थ भुञ्जनं क्रियं. सामिकस्स अनापुच्छनं अक्रियं.

२३३१. ‘‘कप्पियं कारापेत्वा’’तिआदिं पवारितमेव सन्धायाह. या यदि परिभुञ्जति, तस्सा च पाचित्ति सिया किरियतो होतीति योजना. सियाति अवस्सं. पवारणसिक्खापदे वुत्तनयेन कप्पियं कारेत्वा वा अकारापेत्वा वा परिभुञ्जन्तिया तस्सा परिभोगेनेव इमिना सिक्खापदेन अवस्सं आपत्ति होतीति अत्थो.

चतुत्थं.

२३३२. ‘‘या पन भिक्खुनी कुलमच्छरिनी अस्स, पाचित्तिय’’न्ति (पाचि. १०४३) इमस्मिं सिक्खापदे विनिच्छयं दस्सेतुमाह ‘‘भिक्खुनीन’’न्तिआदि. कुलसन्तिके भिक्खुनीनं अवण्णं वदन्तिया पाचित्तीति सम्बन्धो, कुलस्स सन्तिके ‘‘भिक्खुनियो दुस्सीला पापधम्मा’’ति भिक्खुनीनं अवण्णं भासन्तियाति अत्थो. कुलस्सावण्णनं वापीति ‘‘तं कुलं अस्सद्धं अप्पसन्न’’न्ति भिक्खुनीनं सन्तिके कुलस्स अवण्णं अगुणं वदन्तिया पाचित्तीति सम्बन्धो.

२३३३. सन्तं ¶ भासन्तिया दोसन्ति अमच्छरायित्वा कुलस्स वा भिक्खुनीनं वा सन्तं दोसं आदीनवं कथेन्तिया.

पञ्चमं.

२३३४-५. ओवाददायकोति अट्ठहि गरुधम्मेहि ओवादं देन्तो. वस्सं उपगच्छन्तियाति वस्सं वसन्तिया.

२३३६. भिक्खूति ओवाददायका भिक्खू.

छट्ठं.

२३३८. या ¶ सा भिक्खुनी वस्सं वुत्था पुरिमं वा पच्छिमं वा तेमासं वुत्था ततो अनन्तरं उभतोसङ्घे भिक्खुनिसङ्घे च भिक्खुसङ्घे च ‘‘नाहं पवारेस्सामी’’ति धुरं निक्खिपति चेति योजना.

सत्तमं.

२३४१. ओवादादीनमत्थायाति अट्ठगरुधम्मस्सवनादीनमत्थाय. आदि-सद्देन उपोसथपुच्छनपवारणानं गहणं.

२३४२. ओवादादीनमत्थाय अगमनेन अक्रियं. कायिकन्ति कायकम्मं.

अट्ठमं.

२३४३. ‘‘अन्वद्धमासं भिक्खुनिया भिक्खुसङ्घतो द्वे धम्मा पच्चासीसितब्बा उपोसथपुच्छनञ्च ओवादूपसङ्कमनञ्च, तं अतिक्कामेन्तिया पाचित्तिय’’न्ति (पाचि. १०५९) इमस्मिं सिक्खापदे विनिच्छयं दस्सेतुमाह ‘‘न याचिस्सामी’’तिआदि. तं उत्तानत्थमेव.

नवमं.

२३४६-७. पसाखो ¶ नाम नाभिया हेट्ठा, जाणुमण्डलानं उपरि पदेसो. तथा हि यस्मा रुक्खस्स साखा विय उभो ऊरू पभिज्जित्वा गता, तस्मा सो पसाखोति वुच्चति, तस्मिं पसाखे. सञ्जातन्ति उट्ठितं. गण्डन्ति यं किञ्चि गण्डं. रुधितन्ति यं किञ्चि वणं. सङ्घं वाति भिक्खुनिसङ्घं वा. गणं वाति सम्बहुला भिक्खुनियो वा. एकेनाति एत्थ ‘‘पुरिसेना’’ति सेसो, सहत्थे इदं करणवचनं. यथाह ‘‘पुरिसेन सद्धिं एकेनेका’’ति. पुरिसोति च मनुस्सपुरिसोव गहेतब्बो.

धोवाति एत्थ आदि-अत्थे वत्तमानेन इति-सद्देन ‘‘आलिम्पापेय्य वा बन्धापेय्य वा मोचापेय्य वा’’ति (पाचि. १०६३) सिक्खापदागतानं इतरेसं तिण्णं सङ्गण्हनतो ‘‘आलिम्प ¶ बन्ध मोचेही’’ति आणत्तित्तयं सङ्गहितं. तेनेव वक्खति ‘‘दुक्कटानिच्छ पाचित्तियो छ चा’’ति.

या पन भिक्खुनी पसाखे जातं गण्डं वा रुधितं वा सङ्घं वा गणं वा अनापुच्छित्वा एकेन पुरिसेन एकिका ‘‘भिन्द फालेहि धोव आलिम्प बन्ध मोचेही’’ति सब्बानि कातब्बानि आणापेति, तस्सा छ दुक्कटानि, कतेसु भिन्दनादीसु छसु किच्चेसु तस्सा छ पाचित्तियो होन्तीति योजना.

२३४८-९. एत्थाति गण्डे वा वणे वा. ‘‘यं कातब्बं अत्थि, तं सब्बं त्वं करोहि’’इति सचे एवं या आणापेतीति योजना. तस्सा एकाय आणापनवाचाय छ दुक्कटानि च पाचित्तियच्छक्कञ्चेति द्वादसापत्तियो सियुन्ति योजना.

२३५१. आपुच्छित्वा ¶ वाति सङ्घं वा गणं वा आपुच्छित्वा. दुतियन्ति दुतियिकं. विञ्ञुं दुतियं गहेत्वापि वाति योजना.

दसमं.

आरामवग्गो छट्ठो.

२३५३. ‘‘गणपरियेसनादिस्मि’’न्ति वत्तब्बे छन्दानुरक्खनत्थं निग्गहितागमो. गब्भिनिन्ति आपन्नसत्तं, कुच्छिपविट्ठसत्तन्ति अत्थो. वुट्ठापेन्तियाति उपसम्पादेन्तिया. कम्मवाचाहीति द्वीहि कम्मवाचाहि.

२३५४-५. कम्मवाचाय ओसानेति ततियकम्मवाचाय परियोसाने, य्यकारप्पत्तेति अत्थो. गब्भिनिसञ्ञाय न च गब्भिनियाति अगब्भिनिया गब्भिनिसञ्ञाय च. उभो सञ्जातकङ्खायाति उभोसु समुप्पन्नसंसयाय, गब्भिनिया, अगब्भिनिया च वेमतिकायाति अत्थो. गाथाबन्धवसेनेत्थ सु-सद्दलोपो. तथा वुट्ठापेन्तिया उपज्झायाय आपत्ति दुक्कटं होतीति योजना. आचरिनिया तस्साति उपज्झाया गब्भिनिं वुट्ठापेति, तस्सा कम्मवाचं सावेन्तिया ¶ आचरिनिया च. गणस्साति उपज्झायाचरिनीहि अञ्ञस्स भिक्खुनिगणस्स च. तथा दुक्कटं दीपितन्ति योजना.

२३५६. ‘‘द्वीसु अगब्भिनिसञ्ञाया’’ति पदच्छेदो. द्वीसूति गब्भिनिया, अगब्भिनिया च.

पठमं.

२३५७. दुतियेति ‘‘या पन भिक्खुनी पायन्तिं वुट्ठापेय्य, पाचित्तिय’’न्ति (पाचि. १०७३) सिक्खापदे. इमस्मिं सिक्खापदे पायन्ती ¶ नाम माता वा होति धाति वाति अयं विसेसो.

दुतियं.

२३५८. या पन भिक्खुनी द्वे वस्सानि छसु धम्मेसु असिक्खितसिक्खं सिक्खमानं सचे वुट्ठापेय्य, पाचित्ति सियाति योजना. तत्थ द्वे वस्सानीति पवारणवसेन द्वे संवच्छरानि. छसु धम्मेसूति पाणातिपातावेरमणिआदीसु विकालभोजनावेरमणिपरियोसानेसु छसु धम्मेसु. असिक्खितसिक्खन्ति ‘‘पाणातिपातावेरमणिं द्वे वस्सानि अवीतिक्कम्म समादानं समादियामी’’तिआदिना (पाचि. १०७९) नयेन अनादिन्नसिक्खापदं वा एवं समादियित्वापि कुपितसिक्खं वा. सिक्खमानं तेसु छसु धम्मेसु सिक्खनतो वा ते वा सिक्खासङ्खाते धम्मे माननतो एवं लद्धनामं अनुपसम्पन्नं. वुट्ठापेय्याति उपसम्पादेय्य. आपत्ति सियाति पठमसिक्खापदे वुत्तनयेनेव कम्मवाचापरियोसाने पाचित्ति आपत्ति सिया, पाचित्ति होतीति अत्थो.

२३५९. ‘‘धम्मकम्मे धम्मकम्मसञ्ञा वुट्ठापेति, आपत्ति पाचित्तियस्स. धम्मकम्मे वेमतिका वुट्ठापेति, आपत्ति पाचित्तियस्स. धम्मकम्मे अधम्मकम्मसञ्ञा वुट्ठापेति, आपत्ति पाचित्तियस्सा’’ति एवं धम्मकम्मे सत्थुना तिकपाचित्तियं वुत्तं. ‘‘अधम्मकम्मे धम्मकम्मसञ्ञा, आपत्ति दुक्कटस्स. अधम्मकम्मे वेमतिका आपत्ति दुक्कटस्स. अधम्मकम्मे अधम्मकम्मसञ्ञा वुट्ठापेति, आपत्ति दुक्कटस्सा’’ति (पाचि. १०८२) एवं अधम्मे पन कम्मस्मिं सत्थुना तिकदुक्कटं दीपितं.

२३६०. अखण्डतो ¶ खण्डं अकत्वा.

२३६१. सचे ¶ उपसम्पदापेक्खा पब्बज्जाय सट्ठिवस्सापि होति, तस्सा इमा छ सिक्खायो द्वे वस्सानि अवीतिक्कमनीया पदातब्बा, इमा अदत्वा न कारये नेव वुट्ठापेय्याति योजना.

ततियं.

२३६२. चतुत्थे नत्थि वत्तब्बन्ति वक्खमानविसेसतो अञ्ञं वत्तब्बं नत्थीति यथावुत्तनयमेवाति अधिप्पायो. ‘‘इधा’’तिआदिना इमस्मिं सिक्खापदे लब्भमानविसेसं दस्सेति. इध इमस्मिं सिक्खापदे सङ्घेन सम्मतं तं सिक्खमानं वुट्ठापेन्तिया भिक्खुनिया अनापत्ति होतीति योजना.

२३६३. द्वे वस्सानि छसु धम्मेसु सिक्खितसिक्खाय सिक्खमानाय भिक्खुनिसङ्घेन उपसम्पदतो पठमं ञत्तिदुतियाय कम्मवाचाय या वुट्ठानसम्मुति दातब्बा होति, सा वुट्ठानसम्मुति सचे पठमं अदिन्ना होति. तत्थ तस्मिं उपसम्पदमाळकेपि पदातब्बायेवाति योजना.

२३६४. ततियञ्चाति ततियसिक्खापदञ्च. चतुत्थञ्चाति इदं चतुत्थसिक्खापदञ्च. पठमेन समं ञेय्यन्ति पठमेन सिक्खापदेन समुट्ठानादिना विनिच्छयेन समानन्ति ञातब्बं. चतुत्थं पन सिक्खापदं वुट्ठापनसम्मुतिं अदापेत्वा वुट्ठापनवसेन क्रियाक्रियं होति.

चतुत्थं.

२३६५. गिहिगतन्ति पुरिसन्तरगतं, पुरिससमागमप्पत्तन्ति अत्थो. परिपुण्णद्वादसवस्सा परिपुण्णा उत्तरपदलोपेन. किञ्चापि न दोसोति योजना. वुट्ठापेन्तियाति उपज्झाया हुत्वा उपसम्पादेन्तिया.

२३६६. सेसन्ति ¶ ¶ वुत्तं. असेसेन सब्बसो.

पञ्चमं.

२३६८. दुक्खितं सहजीविनिन्ति एत्थ ‘‘सिक्खापद’’न्ति सेसो. तुवट्टकवग्गस्मिं ‘‘दुक्खितं सहजीविनि’’न्ति इमेहि पदेहि युत्तं यं सिक्खापदं वुत्तं, तेन सिक्खापदेन अट्ठमं समं ञेय्यं, न विसेसता विसेसो नत्थीति योजना. अट्ठमन्ति ‘‘या पन भिक्खुनी सहजीविनिं वुट्ठापेत्वा द्वे वस्सानि नेव अनुग्गण्हेय्य न अनुग्गण्हापेय्य, पाचित्तिय’’न्ति (पाचि. ११०८) वुत्तसिक्खापदं. तत्थ सहजीविनिन्ति सद्धिविहारिनिं. नेव अनुग्गण्हेय्याति सयं उद्देसादीहि नानुग्गण्हेय्य. न अनुग्गण्हापेय्याति ‘‘इमिस्सा अय्ये उद्देसादीनि देही’’ति एवं न अञ्ञाय अनुग्गण्हापेय्य. पाचित्तियन्ति धुरे निक्खित्तमत्ते पाचित्तियं.

अट्ठमं.

२३६९. या काचि भिक्खुनी वुट्ठापितपवत्तिनिं द्वे वस्सानि नानुबन्धेय्य चे, तस्सा पाचित्ति परियापुता कथिताति योजना. वुट्ठापेतीति वुट्ठापिता, पवत्तेति सुसिक्खापेतीति पवत्तिनी, वुट्ठापिता च सा पवत्तिनी चाति वुट्ठापितपवत्तिनी, उपज्झायायेतं अधिवचनं, तं, उपज्झायं. नानुबन्धेय्याति चुण्णेन, मत्तिकाय, दन्तकट्ठेन, मुखोदकेनाति एवं तेन तेन करणीयेन उपट्ठहेय्य.

२३७०. ‘‘द्वे वस्सानि अहं नानुबन्धिस्सामी’’ति धुरं निक्खिपति चे, एवं धुरे निक्खित्तमत्तस्मिं पन तस्सा पाचित्तियं सियाति योजना.

२३७१. या ¶ पन भिक्खुनी उपज्झायं बालं वा अलज्जिं वा नानुबन्धति, तस्सा, गिलानाय वा आपदासु वा उम्मत्तिकाय वा नानुबन्धन्तिया न दोसोति योजना.

२३७२. अनुपट्ठानेन होतीति आह ‘‘अक्रियं वुत्त’’न्ति.

नवमं.

२३७३-५. या ¶ काचि भिक्खुनी सहजीविनिं सद्धिविहारिनिं वुट्ठापेत्वा उपसम्पादेत्वा तं गहेत्वा अन्तमसो छप्पञ्चयोजनानिपि न गच्छेय्य न चञ्ञं आणापेय्य ‘‘इमं, अय्ये, गहेत्वा गच्छा’’ति अञ्ञञ्च न नियोजेय्य चे, धुरे निक्खित्तमत्तस्मिं ‘‘न दानि गच्छिस्सामि, अञ्ञञ्च गहेत्वा गन्तुं न नियोजेस्सामी’’ति उस्साहे विस्सट्ठमत्ते तस्सा पाचित्तियं सियाति योजना.

अन्तरायस्मिं सति वा दुतियं अलभन्तिया वा आपदासु वा गिलानाय वा उम्मत्तिकाय वा न दोसोति योजना.

दसमं.

गब्भिनिवग्गो सत्तमो.

२३७६. गिहिगतेहि तीहेवाति अनन्तरे गब्भिनिवग्गे गिहिगतपदयुत्तेहि पञ्चमछट्ठसत्तमेहि तीहेव सिक्खापदेहि. सदिसानीति इध वीसतिवस्सवचनञ्च कुमारिभूतवचनञ्च तत्थ द्वादसवस्सवचनञ्च गिहिगतवचनञ्च ठपेत्वा अवसेसेहि विनिच्छयेहि यथाक्कमं सदिसानेवाति.

२३७७. महूपपदाति महा उपपदो यासं सिक्खमानानं ता महूपपदा. उपपदं नाम पदानमेव युज्जति, न अत्थानन्ति ¶ ‘‘यास’’न्ति अञ्ञपदेन सिक्खमानादिपदानं गहणं, सद्दत्थानमभेदोपचारस्स पन इच्छितत्ता सिक्खमानपदगहितानमेत्थ गहणं वेदितब्बं, महासिक्खमानाति वुत्तं होति. आदितोति एत्थ ‘‘वुत्ता’’ति सेसो, गब्भिनिवग्गे तिस्सन्नं गिहिगतानं पुरिमेसु ततियचतुत्थसिक्खापदेसु आगता द्वे सिक्खमानाति अत्थो. गिहिगताय ‘‘परिपुण्णद्वादसवस्सा’’ति च कुमारिभूताय ‘‘परिपुण्णवीसतिवस्सा’’ति च वस्सवसेन नानाकरणस्स वुत्तत्ता ताहि द्वीहि महासिक्खमानाय वस्सवसेनेव नानाकरणं दस्सेतुमाह ‘‘गता वीसतिवस्साति, विञ्ञातब्बा विभाविना’’ति, अतिक्कन्तवीसतिवस्सा महासिक्खमाना नाम होतीति अत्थो.

२३७८. ता द्वे महासिक्खमाना सचे गिहिगता वा होन्तु, न च पुरिसगता वा होन्तु ¶ , सम्मुतिआदिसु कम्मवाचाय ‘‘सिक्खमाना’’ति वत्तब्बाति योजना. एत्थ च सम्मुति नाम ञत्तिदुतियाय कम्मवाचाय कातब्बाय सिक्खाय सम्मुति चेव वुट्ठानसम्मुति च. आदि-सद्देन उपसम्पदाकम्मं गहितं.

२३७९. इमासं द्विन्नं सम्मुतिदानादीसु ञत्तिया च कम्मवाचाय च वत्तब्बं दस्सेत्वा इदानि अवत्तब्बं दस्सेतुमाह ‘‘न ता’’तिआदि. ता एता उभोपि महासिक्खमाना ‘‘कुमारिभूता’’ति वा तथा ‘‘गिहिगता’’ति वा कम्मवाचाय न वत्तब्बा यस्मा, तस्मा एवं वत्तुं न वट्टतीति योजना. ‘‘न वत्तब्बा’’ति इमिना तथा चे कम्मवाचा वुच्चेय्य, तं कम्मं कुप्पतीति दीपेति. इध पन-सद्दो यस्मा-पदत्थोति तदत्थवसेन योजना दस्सिता.

२३८०. सम्मुतिन्ति ¶ सिक्खमानसम्मुतिं. दसवस्सायाति एत्थ ‘‘गिहिगताया’’ति सेसो. यथाह – ‘‘गिहिगताय दसवस्सकाले सिक्खासम्मुतिं दत्वा द्वादसवस्सकाले उपसम्पदा कातब्बा’’ति (पाचि. अट्ठ. १११९). सेसासुपीति एकादसवस्सकाले दत्वा तेरसवस्सकाले कातब्बा, द्वादस, तेरस, चुद्दस, पन्नरस, सोळस, सत्तरस, अट्ठारसवस्सकाले सिक्खासम्मुतिं दत्वा वीसतिवस्सकाले कातब्बाति एवं अट्ठारसवस्सपरियन्तासु सेसासुपि सिक्खमानासु. अयं नयोति ‘‘सम्मुतिया दिन्नसंवच्छरतो आगामिनि दुतिये संवच्छरे उपसम्पादेतब्बा’’ति अयं नयो. तेनेव वुत्तं ‘‘एकादसवस्सकाले दत्वा तेरसवस्सकाले कातब्बा’’तिआदि.

२३८१. ‘‘कुमारिभूता’’तिपि ‘‘गिहिगता’’तिपि वत्तुं वट्टतीति अट्ठकथायं वुत्ताति योजना.

२३८२. या पन परिपुण्णवीसतिवस्सा सामणेरी ‘‘कुमारिभूता’’ति वुत्ता, सा कम्मवाचाय ‘‘कुमारिभूता’’इच्चेव वत्तब्बा, अञ्ञथा पन न वत्तब्बा ‘‘गिहिगता’’ति वा ‘‘पुरिसन्तरगता’’ति वा न वत्तब्बाति योजना. यथाह ‘‘कुमारिभूता पन ‘गिहिगता’ति न वत्तब्बा, ‘कुमारिभूता’इच्चेव वत्तब्बा’’ति.

२३८३. एता तु पन तिस्सोपीति महासिक्खमाना गिहिगता, कुमारिभूताति वुत्ता पन ¶ एता तिस्सोपि. अपि-सद्देन गिहिगता कुमारिभूता द्वे सकसकनामेनापि वत्तुं वट्टन्तीति दीपेति. ‘‘कुमारिभूतसिक्खमानाया’’ति पाळियं अवुत्तत्ता न वट्टतीति कोचि मञ्ञेय्याति ¶ आह ‘‘न संसयो’’ति. तथा वत्तब्बताहेतुदस्सनत्थमाह ‘‘सिक्खासम्मुतिदानतो’’ति.

पठमदुतियततियानि.

२३८४-५. या पन भिक्खुनी ऊनद्वादसवस्साव उपसम्पदावसेन अपरिपुण्णद्वादसवस्सा एव सयं उपज्झाया हुत्वा परं सिक्खमानं सचे वुट्ठापेति, पुब्बे वुत्तनयेनेव गणपरियेसनादिदुतियानुस्सावनपरियोसानेसु आपन्नानं दुक्कटानं अनन्तरं कम्मवाचानं ओसाने ततियानुस्सावनाय य्यतारप्पत्ताय तस्सा पाचित्ति परिदीपिताति योजना.

चतुत्थं.

२३८६. पञ्चमेति ‘‘या पन भिक्खुनी परिपुण्णद्वादसवस्सा सङ्घेन असम्मता वुट्ठापेय्य, पाचित्तिय’’न्ति (पाचि. ११४२) सिक्खापदे. कायचित्तवाचाचित्तकायवाचाचित्तवसेन तिसमुट्ठानं. क्रियाक्रियन्ति वुट्ठापनं किरियं, सङ्घसम्मुतिया अग्गहणं अकिरियं.

पञ्चमं.

२३८७. सङ्घेनाति भिक्खुनिसङ्घेन. उपपरिक्खित्वाति अलज्जिभावादिं उपपरिक्खित्वा. अलं तावाति एत्थ ‘‘ते अय्ये’’ति सेसो. वारिताति एत्थ ‘‘साधूति पटिस्सुणित्वा’’ति सेसो. ‘‘अलं ताव ते, अय्ये, उपसम्पादितेना’’ति वारिता ‘‘साधू’’ति पटिस्सुणित्वा एत्थ एतस्मिं पवारणे पच्छा खीयति ‘‘अहमेव नून बाला, अहमेव नून अलज्जिनी’’तिआदिना अवण्णं पकासेति, दोसता पाचित्तियापत्ति होतीति योजना.

२३८८. छन्ददोसादीहि ¶ करोन्तियाति एत्थ ‘‘पकतिया’’ति सेसो. पकतिया छन्ददोसादीहि अगतिगमनेहि निवारणं करोन्तिया सचे उज्झायति, न दोसोति योजना.

छट्ठं.

२३८९-९०. लद्धे ¶ चीवरेति सिक्खामानाय ‘‘सचे मे त्वं, अय्ये, चीवरं दस्ससि, एवाहं तं वुट्ठापेस्सामी’’ति वत्वा याचिते तस्मिं चीवरे लद्धे. पच्छाति चीवरलाभतो पच्छा. असन्ते अन्तरायिकेति दसन्नं अन्तरायानं अञ्ञतरस्मिं अन्तराये अविज्जमाने. वुट्ठापेस्सामिनाहन्ति अहं तं न समुट्ठापेस्सामीति धुरनिक्खेपने तस्सा पाचित्तियं होतीति योजना.

२३९१. इदन्ति इदं सिक्खापदं. अवुट्ठापनेन अक्रियं.

सत्तमं.

२३९२. अट्ठमन्ति ‘‘या पन भिक्खुनी सिक्खमानं ‘सचे मं त्वं, अय्ये, द्वे वस्सानि अनुबन्धिस्ससि, एवाहं तं वुट्ठापेस्सामी’’तिआदि (पाचि. ११५५) सिक्खापदं. नवमेति ‘‘या पन भिक्खुनी पुरिससंसट्ठं कुमारकसंसट्ठं चण्डिं सोकावासं सिक्खमानं वुट्ठापेय्य, पाचित्तिय’’न्ति (पाचि. ११५९) वुत्तसिक्खापदे. ‘‘वत्तब्बं नत्थी’’ति इदं सद्दत्थविसेसमन्तरेन विनिच्छयस्स सुविञ्ञेय्यत्ता वुत्तं. तेनेवाह ‘‘उत्तानमेविद’’न्ति.

सद्दत्थो पन एवं वेदितब्बो – पुरिससंसट्ठन्ति परिपुण्णवीसतिवस्सेन पुरिसेन अननुलोमिकेन कायवचीकम्मेन संसट्ठं. कुमारकसंसट्ठन्ति ऊनवीसतिवस्सेन कुमारेन तथेव संसट्ठं. चण्डिन्ति कोधनं. सोकावासन्ति सङ्केतं कत्वा ¶ आगच्छमाना पुरिसानं अन्तो सोकं पवेसेतीति सोकावासा, तं सोकावासं. अथ वा घरं विय घरसामिका, अयम्पि पुरिससमागमं अलभमाना सोकं आविसति, इति यं आविसति, स्वास्सा आवासो होतीति सोकावासा. तेनेवस्स पदभाजने ‘‘सोकावासा नाम परेसं दुक्खं उप्पादेति, सोकं आविसती’’ति (पाचि. ११६०) द्वेधा अत्थो वुत्तो. पाचित्तियन्ति एवरूपं वुट्ठापेन्तिया वुत्तनयेनेव कम्मवाचापरियोसाने उपज्झायाय पाचित्तियं.

२३९३. ‘‘नत्थि अजानन्तिया’’ति पच्छेदो, सिक्खमानाय पुरिससंसट्ठादिभावं अजानन्तियाति अत्थो.

अट्ठमनवमानि.

२३९४. विजातमातरा ¶ वा जनकपितरा वा सामिना परिग्गाहकसामिना वा नानुञ्ञातं उपसम्पदत्थाय अननुञ्ञातं तं सिक्खमानं वुट्ठापेन्तिया तस्सा पाचित्तियापत्ति सियाति योजना.

२३९५. न भिक्खुनाति भिक्खुना द्विक्खत्तुं न पुच्छितब्बं, सकिमेव पुच्छितब्बन्ति वुत्तं होति. यथाह ‘‘भिक्खुनीहि द्विक्खत्तुं आपुच्छितब्बं पब्बज्जाकाले च उपसम्पदाकाले च, भिक्खूनं पन सकिं आपुच्छितेपि वट्टती’’ति (पाचि. अट्ठ. ११६२).

२३९६-७. अत्थितन्ति अत्थिभावं. चतूहि समुट्ठाति, चत्तारि वा समुट्ठानानि एतस्साति चतुसमुट्ठानं. कतमेहि चतूहि समुट्ठातीति आह ‘‘वाचतो…पे… कायवाचादितोपि चा’’ति. कथं वाचादीहि चतूहि समुट्ठाति? अब्भानकम्मादीसु केनचिदेव करणीयेन खण्डसीमायं निसिन्ना ¶ ‘‘पक्कोसथ सिक्खमानं, इधेव नं उपसम्पादेस्सामा’’ति उपसम्पादेति, एवं वाचतो समुट्ठाति. ‘‘उपस्सयतो पट्ठाय उपसम्पादेस्सामी’’ति वत्वा खण्डसीमं गच्छन्तिया कायवाचतो समुट्ठाति. द्वीसुपि ठानेसु पण्णत्तिं जानित्वा वीतिक्कमं करोन्तिया वाचाचित्ततो, कायवाचाचित्ततो च समुट्ठाति. उपसम्पादनं क्रियं, अनापुच्छनं अक्रियं.

दसमं.

२३९८. एत्थ इमस्मिं सासने या भिक्खुनी पारिवासिकेन छन्ददानेन सिक्खमानं सचे वुट्ठापेति, तस्सा पाचित्तियं सियाति योजना. तत्थ पारिवासिकेन छन्ददानेनाति चतुब्बिधं पारिवासियं परिसपारिवासियं, रत्तिपारिवासियं, छन्दपारिवासियं, अज्झासयपारिवासियन्ति.

तत्थ परिसपारिवासियं नाम भिक्खू केनचिदेव करणीयेन सन्निपतिता होन्ति, अथ मेघो वा उट्ठहति, उस्सारणा वा करीयति, मनुस्सा वा अज्झोत्थरन्ता आगच्छन्ति, भिक्खू ‘‘अनोकासो अयं, अञ्ञत्र गच्छामा’’ति छन्दं अविस्सज्जेत्वाव उट्ठहन्ति. इदं परिसपारिवासियं. किञ्चापि परिसपारिवासियं, छन्दस्स पन अविस्सट्ठत्ता कम्मं कातुं वट्टति.

पुन ¶ भिक्खू ‘‘उपोसथादीनि करिस्सामा’’ति रत्तिं सन्निपतित्वा ‘‘याव सब्बे सन्निपतन्ति, ताव धम्मं सुणिस्सामा’’ति एकं अज्झेसन्ति, तस्मिं धम्मकथं कथेन्तेयेव अरुणो उग्गच्छति. सचे ‘‘चातुद्दसिकं उपोसथं करिस्सामा’’ति निसिन्ना, ‘‘पन्नरसो’’ति कातुं वट्टति. सचे पन्नरसिकं कातुं ¶ निसिन्ना, पाटिपदे अनुपोसथे उपोसथं कातुं न वट्टति. अञ्ञं पन सङ्घकिच्चं कातुं वट्टति. इदं पन रत्तिपारिवासियं नाम.

पुन भिक्खू ‘‘किञ्चिदेव अब्भानादिसङ्घकम्मं करिस्सामा’’ति निसिन्ना होन्ति, तत्रेको नक्खत्तपाठको भिक्खु एवं वदति ‘‘अज्ज नक्खत्तं दारुणं, मा इदं कम्मं करोथा’’ति, ते तस्स वचनेन छन्दं विस्सज्जेत्वा तत्थेव निसिन्ना होन्ति, अथञ्ञो आगन्त्वा –

‘‘नक्खत्तं पटिमानेन्तं, अत्थो बालं उपच्चगा’’ति. (जा. १.१.४९) –

वत्वा ‘‘किं नक्खत्तेन, करोथा’’ति वदति. इदं छन्दपारिवासियञ्चेव अज्झासयपारिवासियञ्च. एतस्मिं पारिवासिये पुन छन्दपारिसुद्धिं अनाहरित्वा कम्मं कातुं न वट्टति. इदं सन्धाय वुत्तं ‘‘पारिवासिकेन छन्ददानेना’’ति.

पाचित्तियं सियाति एवं वुट्ठापेन्तिया वुत्तनयेनेव कम्मवाचापरियोसाने पाचित्तियं सियाति अत्थो.

२३९९. छन्दं अविहाय वा अविस्सज्जेत्वाव अवुट्ठिताय परिसाय तु यथानिसिन्नाय परिसाय वुट्ठापेन्तिया अनापत्तीति योजना. वा-सद्दो एवकारत्थो.

एकादसमं.

२४००. द्वादसेति ‘‘या पन भिक्खुनी अनुवस्सं वुट्ठापेय्य, पाचित्तिय’’न्ति (पाचि. ११७१) सिक्खापदे. तेरसेति ‘‘या पन भिक्खुनी एकं वस्सं द्वे वुट्ठापेय्य, पाचित्तिय’’न्ति (पाचि. ११७५) सिक्खापदे.

द्वादसमतेरसमानि.

कुमारिभूतवग्गो अट्ठमो.

२४०१. अगिलानाति ¶ ¶ छत्तुपाहनेन वूपसमेतब्बरोगरहिता. यथाह ‘‘अगिलाना नाम यस्सा विना छत्तुपाहना फासु होती’’ति. छत्तञ्च उपाहना च छत्तुपाहनं. तत्थ छत्तं वुत्तलक्खणं, उपाहना वक्खमानलक्खणा. धारेय्याति उभयं एकतो धारेय्य. विसुं धारेन्तिया हि दुक्कटं वक्खति.

२४०२. दिवसन्ति अच्चन्तसंयोगे उपयोगवचनं. सचे धारेतीति योजना.

२४०३. कद्दमादीनीति एत्थ आदि-सद्देन महावालुकादीनं गहणं.

२४०४. सचे गच्छतीति सम्बन्धो. दिस्वा गच्छादिकन्ति छत्ते लग्गनयोग्गं नीचतरं गच्छादिकं दिस्वा. आदि-सद्देन गुम्बादीनं गहणं. दुक्कटन्ति उपाहनमत्तस्सेव धारणे दुक्कटं.

२४०५. अपनामेत्वाति सीसतो अपनामेत्वा. ओमुञ्चित्वाति पादतो ओमुञ्चित्वा. होति पाचित्तियन्ति पुन पाचित्तियं होति.

२४०६. पयोगगणनायेवाति छत्तुपाहनस्स अपनेत्वा अपनेत्वा एकतो धारणपयोगगणनाय. तिकपाचित्तियं वुत्तन्ति ‘‘अगिलाना अगिलानसञ्ञा, वेमतिका, गिलानसञ्ञा छत्तुपाहनं धारेति, आपत्ति पाचित्तियस्सा’’ति (पाचि. ११८१) एवं तिकपाचित्तियं वुत्तं. ‘‘गिलाना अगिलानसञ्ञा, गिलाना वेमतिका, छत्तुपाहनं धारेति, आपत्ति दुक्कटस्सा’’ति (पाचि. ११८२) एवं द्विकदुक्कटं तथेव वुत्तन्ति सम्बन्धो.

२४०७. यत्थ ¶ भिक्खू वा भिक्खुनियो वा निवसन्ति, तस्मिं आरामे वा उपचारे वा अपरिक्खित्तस्स आरामस्स उपचारे वा. आपदासूति रट्ठभेदादिआपदासु.

पठमं.

२४०८. भिक्खुनियाति एत्थ ‘‘अगिलानाया’’ति सेसो, पादेन गन्तुं समत्थाय अगिलानाय ¶ भिक्खुनियाति अत्थो. यथाह ‘‘अगिलाना नाम सक्कोति पदसा गन्तु’’न्ति (पाचि. ११८७). यानं नाम रथादि, तं हेट्ठा वुत्तसरूपमेव.

२४०९. आपदासूति रट्ठभेदादिआपदासु. छत्तुपाहनसिक्खापदे आरामे, आरामूपचारे च अनापत्ति वुत्ता, इध तथा अवुत्तत्ता सब्बत्थापि आपत्तियेव वेदितब्बा.

दुतियं.

२४१०. ‘‘यं किञ्चिपि कटूपिय’’न्ति इदं ‘‘सङ्घाणि’’न्ति एतस्स अत्थपदं. यथाह – ‘‘सङ्घाणि नाम या काचि कटूपगा’’ति. सङ्घाणि नाम मेखलादिकटिपिळन्धनं. कटूपियन्ति कटिप्पदेसोपगं.

२४१२. कटिसुत्तं नाम कटियं पिळन्धनरज्जुसुत्तकं.

२४१३. इध इमस्मिं सिक्खापदे चित्तं अकुसलं, इदं पन सिक्खापदं लोकवज्जं, इति इदं उभयमेव विसेसता पुरिमसिक्खापदतो इमस्स नानाकरणं.

ततियं.

२४१४. सीसूपगादिसु ¶ यं किञ्चि सचे या धारेति, तस्सा तस्स वत्थुस्स गणनाय आपत्तियो सियुन्ति योजना. सीसं उपगच्छतीति सीसूपगं, सीसे पिळन्धनारहन्ति अत्थो. आदि-सद्देन गीवूपगादीनं गहणं. यथाह – ‘‘इत्थालङ्कारो नाम सीसूपगो गीवूपगो हत्थूपगो पादूपगो कटूपगो’’ति.

२४१५. न च दोसोति योजना. ‘‘सदिसन्ति परिदीपित’’न्ति वत्तब्बे इति-सद्दो लुत्तनिद्दिट्ठो.

चतुत्थं.

२४१६. येन ¶ केनचि गन्धेनाति चन्दनतगरादिना येन केनचि गन्धकक्केन. सवण्णावण्णकेन चाति वण्णेन सह वत्ततीति सवण्णकं, हलिद्दिकक्कादि, नत्थि एतस्स उब्बट्टनपच्चया दिस्समानो वण्णविसेसोति अवण्णकं, सासपकक्कादि, सवण्णकञ्च अवण्णकञ्च सवण्णावण्णकं, तेन सवण्णावण्णकेन च. उब्बट्टेत्वा न्हायन्तिया न्हानोसाने पाचित्तियापत्ति पकासिताति योजना.

२४१७. सब्बपयोगेति सब्बस्मिं पुब्बपयोगे. आबाधपच्चयाति दद्दुकुट्ठादिरोगपच्चया.

२४१८. छट्ठन्ति ‘‘या पन भिक्खुनी वासितकेन पिञ्ञाकेन नहायेय्य, पाचित्तिय’’न्ति (पाचि. १२०३) सिक्खापदं.

पञ्चमछट्ठानि.

२४१९. या पन भिक्खुनी अञ्ञाय भिक्खुनिया सचे उब्बट्टापेय्य वा सम्बाहापेय्य वा, तस्सा भिक्खुनिया तथा पाचित्तियापत्ति होतीति योजना.

२४२०. एत्थ ¶ इमस्मिं उब्बट्टने, सम्बाहने च हत्थं अमोचेत्वा उब्बट्टने एका आपत्ति सिया, हत्थं मोचेत्वा मोचेत्वा उब्बट्टने पयोगगणनाय सियाति योजना.

२४२१. आपदासूति चोरभयादीहि सरीरकम्पनादीसु. गिलानायाति अन्तमसो मग्गगमनपरिस्समेनापि आबाधिकाय.

२४२२. अट्ठमसिक्खापदे ‘‘सिक्खमानाया’’ति च नवमसिक्खापदे ‘‘सामणेरिया’’ति च दसमसिक्खापदे ‘‘गिहिनिया’’ति च विसेसं वज्जेत्वा अवसेसविनिच्छयो सत्तमेनेव समानोति दस्सेतुमाह ‘‘अट्ठमादीनि तीणिपी’’ति.

सत्तमट्ठमनवमदसमानि.

२४२३. अन्तोउपचारस्मिन्ति ¶ द्वादसरतनब्भन्तरे. ‘‘भिक्खुस्स पुरतो’’ति इदं उपलक्खणं. तस्मा पुरतो वा होतु पच्छतो वा पस्सतो वा, समन्ततो द्वादसरतनब्भन्तरेति निदस्सनपदमेतं. छमायपीति अनन्तरहिताय भूमियापि. या निसीदेय्याति सम्बन्धो. न वट्टति पाचित्तियापत्ति होतीति अत्थो.

२४२४. तिकपाचित्तियं वुत्तन्ति अनापुच्छिते अनापुच्छितसञ्ञा, वेमतिका, आपुच्छितसञ्ञाति तीसु विकप्पेसु पाचित्तियत्तयं वुत्तं. आपुच्छिते अनापुच्छितसञ्ञा, वेमतिका वा भिक्खुस्स पुरतो निसीदेय्याति विकप्पद्वये दुक्कटद्वयं होति. आपदासूति रट्ठभेदादिआपदासु. आपुच्छितुञ्च ठातुञ्च असक्कोन्तिया गिलानाय.

२४२५. निपज्जनं क्रियं. अनापुच्छनं अक्रियं.

एकादसमं.

२४२६. ओकासो ¶ कतो येन सो ओकासकतो, न ओकासकतो अनोकासकतो, तं, अकतोकासन्ति अत्थो, ‘‘असुकस्मिं नाम ठाने पुच्छामी’’ति अत्तना पुच्छितब्बविनयादीनं नामं गहेत्वा ओकासं कारापनकाले अधिवासनवसेन अकतोकासन्ति वुत्तं होति. दोसताति पाचित्तियापत्ति. एकस्मिं पिटके ओकासं कारापेत्वा अञ्ञस्मिं पिटके पञ्हं पुच्छन्तियापि पाचित्तियं होतीति दस्सेतुमाह ‘‘विनये चा’’तिआदि.

पुच्छन्तियापि चाति एत्थ पि-सद्देन ‘‘अभिधम्मं पुच्छन्तियापी’’ति इदञ्च अनुत्तसमुच्चयत्थेन च-सद्देन ‘‘सुत्तन्ते ओकासं कारापेत्वा विनयं वा अभिधम्मं वा पुच्छति, आपत्ति पाचित्तियस्स. अभिधम्मे ओकासं कारापेत्वा सुत्तन्तं वा विनयं वा पुच्छति, आपत्ति पाचित्तियस्सा’’ति इदञ्च सङ्गहितं.

२४२७. अनोदिस्साति ‘‘असुकस्मिं नाम पुच्छामी’’ति एवं अनियमेत्वा केवलं ‘‘पुच्छितब्बं अत्थि, पुच्छामि अय्या’’ति एवं वत्वा.

द्वादसमं.

२४२८-९. संकच्चिकन्ति ¶ थनवेठनचीवरं, तं पन पारुपन्तिया अधक्खकं उब्भनाभिमण्डलं पटिच्छादेन्तिया पारुपितब्बं. तेनाह मातिकट्ठकथायं ‘‘असंकच्चिकाति अधक्खकउब्भनाभिमण्डलसङ्खातस्स सरीरस्स पटिच्छादनत्थं अनुञ्ञातसंकच्चिकचीवररहिता’’ति (कङ्खा. अट्ठ. असंकच्चिकसिक्खापदवण्णना). ‘‘संकच्चिकाय पमाणं तिरियं दियड्ढहत्थन्ति पोराणगण्ठिपदे वुत्त’’न्ति (वजिर. टी. पाचित्तिय १२२४-१२२६) वजिरबुद्धित्थेरो. परिक्खेपोक्कमेति परिक्खेपस्स अन्तोपवेसने. उपचारोक्कमेपीति ¶ अपरिक्खित्तस्स गामस्स दुतियलेड्डुपातब्भन्तरपवेसनेपि. एत्थाति इमस्मिं सिक्खापदे. एसेव नयोति ‘‘पठमे पादे दुक्कटं, दुतिये पाचित्तिय’’न्ति यथावुत्तोयेव नयो मतो विञ्ञातोति अत्थो.

२४३०. आपदासुपीति महग्घं होति संकच्चिकं, पारुपित्वा गच्छन्तिया च उपद्दवो उप्पज्जति, एवरूपासु आपदासु अनापत्ति.

२४३१. सेसन्ति इध सरूपतो अदस्सितञ्च. वुत्तनयेनेवाति मातिकापदभाजनादीसु वुत्तनयेनेव. सुनिपुणस्मिं धम्मजातं, अत्थजातञ्च विभावेति विविधेनाकारेन पकासेतीति विभावी, तेन विभाविना.

तेरसमं.

छत्तुपाहनवग्गो नवमो.

एवं नवहि वग्गेहि भिक्खुनीनं भिक्खूहि असाधारणानि छन्नवुति सिक्खापदानि दस्सेत्वा इतो परेसु मुसावादवग्गादीसु सत्तसु वग्गेसु भिक्खूहि साधारणसिक्खापदानि भिक्खुपातिमोक्खविनिच्छयकथाय वुत्तनयेनेव वेदितब्बानीति तानि इध न दस्सितानि.

सब्बानेव भिक्खुनीनं खुद्दकेसु छन्नवुति, भिक्खूनं द्वेनवुतीति अट्ठासीतिसतं सिक्खापदानि. ततो परं सकलं भिक्खुनिवग्गं, परम्परभोजनं, अनतिरित्तभोजनं, अनतिरित्तेन अभिहट्ठुं पवारणं, पणीतभोजनविञ्ञत्ति, अचेलकसिक्खापदं, दुट्ठुल्लपअच्छादनं, ऊनवीसतिवस्सउपसम्पादनं, मातुगामेन सद्धिं संविधाय अद्धानगमनं, राजन्तेपुरप्पवेसनं ¶ , सन्तं ¶ भिक्खुं अनापुच्छा विकाले गामप्पवेसनं, निसीदनं, वस्सिकसाटिकन्ति इमानि बावीसति सिक्खापदानि अपनेत्वा सेसानि सतञ्च छसट्ठि च सिक्खापदानि भिक्खुनिपातिमोक्खुद्देसमग्गेन उद्दिट्ठानीति वेदितब्बानि.

तत्रायं सङ्खेपतो असाधारणसिक्खापदेसु समुट्ठानविनिच्छयो – गिरग्गसमज्जा, चित्तागारसिक्खापदं, सङ्घाणि, इत्थालङ्कारो, गन्धवण्णको, वासितकपिञ्ञाको, भिक्खुनिआदीहि उम्मद्दनपरिमद्दनानीति इमानि दस सिक्खापदानि अचित्तकानि, लोकवज्जानि, अकुसलचित्तानि. अयं पनेत्थ अधिप्पायो – विनापि चित्तेन आपज्जितब्बत्ता अचित्तकानि, चित्ते पन सति अकुसलेनेव आपज्जितब्बत्ता लोकवज्जानि चेव अकुसलचित्तानि च. अवसेसानि अचित्तकानि पण्णत्तिवज्जानेव. चोरिवुट्ठापनं, गामन्तरं, आरामसिक्खापदं, गब्भिनिवग्गे आदितो पट्ठाय सत्त, कुमारिभूतवग्गे आदितो पट्ठाय पञ्च, पुरिससंसट्ठं, पारिवासियछन्ददानं, अनुवस्सवुट्ठापनं, एकन्तरिकवुट्ठापनन्ति इमानि एकूनवीसति सिक्खापदानि सचित्तकानि, पण्णत्तिवज्जानि. अवसेसानि सचित्तकानि लोकवज्जानेवाति.

इति विनयत्थसारसन्दीपनिया विनयविनिच्छयवण्णनाय

पाचित्तियकथावण्णना निट्ठिता.

पाटिदेसनीयकथावण्णना

२४३२. एवं पाचित्तियविनिच्छयं दस्सेत्वा इदानि पाटिदेसनीयं दस्सेतुमाह ‘‘अगिलाना’’तिआदि. या पन भिक्खुनी ¶ अगिलाना सयं अत्तना विञ्ञत्तिया लद्धं सप्पिं सचे ‘‘भुञ्जिस्सामी’’ति गण्हति, तस्सा एवं गहणे दुक्कटं परिदीपितन्ति योजना. तत्थ यस्सा विना सप्पिना फासु होति, सा अगिलाना नाम. सप्पिन्ति पुब्बे वुत्तविनिच्छयं पाळिआगतं गोसप्पिआदिकमेव.

२४३३. तिपाटिदेसनीयन्ति अगिलाना अगिलानसञ्ञा, वेमतिका, गिलानसञ्ञाति तीसु ¶ विकप्पेसु तीणि पाटिदेसनीयानि. गिलाना द्विकदुक्कटन्ति गिलानाय द्विकदुक्कटं. गिलाना अगिलानसञ्ञा, वेमतिका वाति द्वीसु विकप्पेसु द्वे दुक्कटानि.

२४३४-५. गिलाना हुत्वा सप्पिं विञ्ञापेत्वा पच्छा वूपसन्तगेलञ्ञा हुत्वा सेवन्तिया परिभुञ्जन्तियापि च गिलानाय अवसेसं परिभुञ्जन्तिया वा ञातकादितो ञातकपवारितट्ठानतो विञ्ञत्तं भुञ्जन्तिया वा अञ्ञस्सत्थाय विञ्ञत्तं परिभुञ्जन्तिया वा अत्तनो धनेन गहितं भुञ्जन्तिया वा उम्मत्तिकाय वा अनापत्तीति योजना.

पठमं.

२४३६. सेसेसु दुतियादीसूति ‘‘या पन भिक्खुनी अगिलाना तेलं…पे… मधुं…पे… फाणितं…पे… मच्छं…पे… मंसं…पे… खीरं…पे… दधिं विञ्ञापेत्वा भुञ्जेय्य, पटिदेसेतब्बं ताय भिक्खुनिया गारय्हं अय्ये धम्मं आपज्जिं असप्पायं पाटिदेसनीयं, तं पटिदेसेमी’’ति (पाचि. १२३६) एवं दुतियादीसु सत्तसु पाटिदेसनीयेसु. नत्थि काचि विसेसताति तेलादिपदानि विना अञ्ञो कोचि विसेसो नत्थीति अत्थो.

२४३७. पाळियं ¶ अनागतेसु सब्बेसु सप्पिआदीसु अट्ठसु अञ्ञतरं विञ्ञापेत्वा भुञ्जन्तियापि दुक्कटन्ति योजना.

इति विनयत्थसारसन्दीपनिया विनयविनिच्छयवण्णनाय

पाटिदेसनीयकथावण्णना निट्ठिता.

सिक्खाकरणीयकथावण्णना

२४३८. पाटिदेसनीयानन्तरं उद्दिट्ठानि पञ्चसत्तति सेखियानि महाविभङ्गे वुत्तविनिच्छयानेवाति तदेव अतिदिसन्तो आह ‘‘सेखिया पन ये धम्मा’’तिआदि. ये पन पञ्चसत्तति ¶ सेखिया धम्मा पाटिदेसनीयानन्तरं उद्दिट्ठा, तेसं अत्थविनिच्छयो महाविभङ्गे वुत्तोवाति योजना, अत्थिकेहि ततोव गहेतब्बो, न पुन इध दस्सेस्सामीति अधिप्पायो.

इति विनयत्थसारसन्दीपनिया विनयविनिच्छयवण्णनाय

सिक्खाकरणीयकथावण्णना निट्ठिता.

२४३९-४०. सविभङ्गानं उभतोविभङ्गसहितानं उभतोपातिमोक्खानं भिक्खूनं, भिक्खुनीनञ्च पातिमोक्खानं अट्ठकथासारो सब्बट्ठकथानं सारभूतो यो सो अत्थो विसेसतो समन्तपासादिकायं वुत्तो. तं सब्बं सारभूतं अत्थं समादाय यो विनयस्सविनिच्छयो भिक्खूनं, भिक्खुनीनञ्च हितत्थाय मया कतो विरचितोति सम्बन्धो.

२४४१. नो अम्हाकं पटिभाणजं पटिभाणतो जातं इमं तु इमं विनयविनिच्छयं पन ये जन्तुनो सत्ता सुणन्ति ¶ , ते जन्तुनो जनस्स सत्तलोकस्स हिते अधिसीलसिक्खापकासकत्ता उपकारके सुमतस्स सोभणन्ति बुद्धादीहि मतस्स, सोभणेहि वा बुद्धादीहि मतस्स पटिविद्धस्स अमतमहानिब्बानस्स अयने अञ्जसभूते जनस्स तायने कायिकवाचसिकवीतिक्कमपटिपक्खत्ता अपायभयनिवारणट्ठेन ताणभूते विनये विनयपिटके पकतञ्ञुनो यथासभावं जानन्ता तञ्ञुनो भवन्ति तं तं कप्पियाकप्पियं सेवितब्बासेवितब्बं जानन्ता भवन्तेवाति अत्थो.

२४४२. बहवो सारभूता नया एत्थाति बहुसारनयो, तस्मिं बहुसारनये. परमे उत्तमे विनये विनयपिटके विसारदतं वेसारज्जं असंहीरञाणं अभिपत्थयता विसेसतो इच्छन्तेन बुद्धिमता ञाणातिसयमन्तेन यतिना सब्बकालं तिविधसिक्खापरिपूरणे असिथिलपवत्तसम्मावायामेन भिक्खुना इमस्मिं विनयविनिच्छये परमा उत्तरितरा महती आदरता करणीयतमा विसेसेन कातब्बायेवाति अत्थो.

२४४३. इच्चेवं सीलविसुद्धिसाधने विनयपिटके वेसारज्जहेतुताय इमस्स विनयविनिच्छयस्स सीलविसुद्धिआदिसत्तविसुद्धिपरम्पराय अधिगन्तब्बस्स अमतमहानिब्बानस्स पत्तियापि मूलभूततं दस्सेतुमाह ‘‘अवगच्छती’’तिआदि.

यो ¶ पन भिक्खु अत्थयुत्तं महता पयोजनत्थेन, अभिधेय्यत्थेन च समन्नागतं इमं विनयस्सविनिच्छयं अवगच्छति अवेच्च याथावतो जानाति, सो अपरम्परं मरणाभावा अमरं जरायाभावा अजरं रागादिकिलेसरजपटिपक्खत्ता अरजं अनेकप्पकाररोगानं अप्पवत्तिहेतुत्ता अरुजं सन्तिपदं सब्बकिलेसदरथपरिळाहानं वूपसमहेतुत्ता ¶ सन्तिसङ्खातं निब्बानपदं अधिगच्छति सीलविसुद्धिआदिसत्तविसुद्धिपरम्पराय गन्त्वा पटिविज्झतीति योजना.

इति विनयत्थसारसन्दीपनिया विनयविनिच्छयवण्णनाय

भिक्खुनिविभङ्गकथावण्णना निट्ठिता.

खन्धककथा

महावग्गो

महाखन्धककथा

पब्बज्जाकथावण्णना

२४४४. इच्चेवं ¶ ¶ नातिसङ्खेपवित्थारवसेन विभङ्गद्वये, तदट्ठकथाय च आगतं विनिच्छयं दस्सेत्वा इदानि खन्धकागतं विनिच्छयं दस्सेतुमारभन्तो आह ‘‘सीलक्खन्धादी’’तिआदि. तत्थ सीलक्खन्धादियुत्तेनाति सीलसमाधिपञ्ञाविमुत्तिविमुत्तिञाणदस्सनसङ्खातेहि पञ्चहि खन्धेहि गुणरासीहि युत्तेन समन्नागतेन. सुभक्खन्धेनाति सुवण्णालिङ्गसदिसवट्टक्खन्धताय सुभो सुन्दरो खन्धो एतस्साति सुभक्खन्धो, भगवा, तेन. इमिना बात्तिंसलक्खणानमेकदेसभूतस्स समवट्टक्खन्धतालक्खणस्स परिदीपकेन वचनेन लक्खणाहारनयेन बात्तिंसलक्खणादिका सब्बापि रूपकायसिरी सन्दस्सिताति वेदितब्बा.

खन्धकेति खन्धानं समूहो खन्धको, खन्धानं वा कायनतो दीपनतो खन्धको. ‘‘खन्धा’’ति चेत्थ पब्बज्जूपसम्पदादिविनयकम्मसङ्खाता, चारित्तवारित्तसिक्खापदसङ्खाता च पञ्ञत्तियो अधिप्पेता. पब्बज्जादीनि हि भगवता पञ्ञत्तत्ता ‘‘पञ्ञत्तियो’’ति वुच्चन्ति. पञ्ञत्तियञ्च खन्ध-सद्दो दिस्सति ‘‘दारुक्खन्धो (सं. नि. ४.२४१) अग्गिक्खन्धो (पटि. म. १.११६) उदकक्खन्धो’’तिआदीसु (अ. नि. ६.३७) विय. अपिच भागरासत्थता ¶ चेत्थ युज्जतियेव तासं पञ्ञत्तीनं भागसो, रासितो च विभत्तत्ता. तस्मिं खन्धके. पि-सद्दो वुत्तापेक्खाय पञ्चसतिकसत्तसतिकक्खन्धके द्वे वज्जेत्वा ¶ पब्बज्जक्खन्धकादिके भिक्खुनिखन्धकपरियोसाने वीसतिविधे खन्धके वुत्तविनिच्छयस्स इध वक्खमानत्ता. तदेव सन्धायाह ‘‘खन्धकेपि पवक्खामि, समासेन विनिच्छय’’न्ति.

२४४५. ‘‘मातरा पितरा’’ति इमिना जनकायेव अधिप्पेता. ‘‘भण्डुकम्मं, समणकरणं, पब्बाजनन्ति च परियाय-सद्दा’’ति ‘‘अनुजानामि, भिक्खवे, सङ्घं अपलोकेतुं भण्डुकम्माया’’ति (महाव. ९८) इमिस्सा पाळिया अट्ठकथाय (महाव. अट्ठ. ९८) वुत्तं. आपुच्छित्वाति एत्थ ‘‘सङ्घ’’न्ति सेसो.

२४४६. वावटोति पसुतो, युत्तपयुत्तोति अत्थो. ‘‘पब्बाजेत्वा आनय इति चा’’ति पदच्छेदो. एत्थ च तिधा पब्बाजनं वेदितब्बं केसच्छेदनं, कासायअच्छादनं, सरणदानन्ति, इमानि तीणि करोन्तो ‘‘पब्बाजेती’’ति वुच्चति. तेसु एकं, द्वे वापि करोन्तो तथा वोहरीयतियेव. तस्मा ‘‘पब्बाजेत्वानया’’ति इमिना केसे छिन्दित्वा कासायानि अच्छादेत्वा आनेहीति अयमत्थो दीपितोति दट्ठब्बो.

२४४७. अवुत्तोति उपज्झायेन अनुय्योजितो. सो दहरो सचे तं सयमेव केसच्छेदनकासायच्छादनेहि पब्बाजेति, वट्टतीति योजना.

२४४८. तत्थाति अत्तनो समीपे. खण्डसीमं नेत्वाति भण्डुकम्मारोचनपरिहारत्थं वुत्तं. तेन सभिक्खुके विहारे अञ्ञम्पि भिक्खुं ‘‘एतस्स केसे छिन्दा’’ति वत्तुं न वट्टति. पब्बाजेत्वाति केसच्छेदनं सन्धाय वदति.

२४५०. ‘‘पुरिसं ¶ भिक्खुतो अञ्ञो, पब्बाजेति न वट्टती’’ति इदं सरणदानं सन्धाय वुत्तं. तेनेवाह ‘‘सामणेरो’’तिआदि.

२४५१. उभिन्नम्पि थेरथेरीनं ‘‘इमेहि चीवरेहि इमं अच्छादेही’’ति आणत्तिया सामणेरोपि ¶ वा होतु, तथा सामणेरी वा होतु, ते उभो सामणेरसामणेरी कासायानि दातुं लभन्तीति योजना.

२४५२-४. पब्बाजेन्तेन भिक्खुनाति एत्थ ‘‘तचपञ्चककम्मट्ठानं दत्वा’’ति वत्तब्बं एवञ्हि कत्वा केसापनयनस्स अट्ठकथायं वुत्तत्ता. वुत्तञ्हि तत्थ ‘‘आवुसो, सुट्ठु उपधारेहि, सतिं उपट्ठापेहीति वत्वा तचपञ्चककम्मट्ठानं आचिक्खितब्बं. आचिक्खन्तेन च वण्णसण्ठानगन्धासयोकासवसेन असुचिजेगुच्छपटिक्कूलभावं, निज्जीवनिस्सत्तभावं वा पाकटं करोन्तेन आचिक्खितब्ब’’न्तिआदि. किमत्थमेवं करीयतीति चे? सचे उपनिस्सयसम्पन्नो होति, तस्स खुरग्गेयेव अरहत्तपापुणनत्थं. वुत्तञ्चेतं अट्ठकथायं –

‘‘ये हि केचि खुरग्गे अरहत्तं पत्ता, सब्बे ते एवरूपं सवनं लभित्वा कल्याणमित्तेन आचरियेन दिन्ननयं निस्साय, नो अनिस्साय, तस्मास्स आदितोव एवरूपी कथा कथेतब्बा’’ति (महाव. अट्ठ. ३४).

एतेनेव ब्यतिरेकतो इतो अञ्ञा अनिय्यानिककथा न कथेतब्बाति दीपितं होति. गोमयादिनाति गोमयचुण्णादिना. आदि-सद्देन मत्तिकादीनं गहणं. पीळका वाति थुल्लपीळका वा. कच्छु वाति सुखुमकच्छु वा. नियंपुत्तन्ति ¶ अत्तनो पुत्तं. ‘‘भिक्खुना’’ति इमस्स पदस्स दूरत्ता ‘‘यतिना’’ति आह.

२४५५-६. कस्मा पन एवं नहापेतब्बोति आह ‘‘एत्तकेनापी’’तिआदि. सोति पब्बज्जापेक्खो. उपज्झायकादिसूति एत्थ आदि-सद्देन आचरियसमानुपज्झायकादीनं गहणं. पापुणन्ति हीति एत्थ हि-सद्दो यस्मा-पदत्थे वत्तति. यस्मा एत्तकेनापि उपज्झायादीसु सगारवो होति, यस्मा च एवरूपं उपकारं लभित्वा कुलपुत्ता उप्पन्नं अनभिरतिं पटिविनोदेत्वा सिक्खायो परिपूरेत्वा निब्बानं पापुणिस्सन्ति, तस्मा एवरूपो उपकारो कातब्बोति अत्थो.

२४५८. एकतोति सब्बानि चीवरानि एकतो कत्वा.

२४५९. अथाति ¶ अधिकारन्तरारम्भे निपातो. तस्स हत्थे अदत्वापि उपज्झायो वा आचरियो वापि सयमेव तं पब्बज्जापेक्खं अच्छादेति, वट्टतीति योजना.

२४६०. अदिन्नचीवरस्स अग्गहेतब्बत्ता आह ‘‘अपनेत्वा ततो सब्बं, पुन दातब्बमेव त’’न्ति. ततोति तस्स सरीरतो. तन्ति चीवरं.

२४६१-२. एतदेव आह ‘‘भिक्खुना’’तिआदिना. अदिन्नं न वट्टतीति एत्थ पब्बज्जा न रुहतीति वदन्ति. तस्सेव सन्तकं वापि चीवरं अदिन्नं न वट्टति अत्तसन्तके आचरियुपज्झायानं अत्तनो सन्तके चीवरे का कथा वत्तब्बमेव नत्थीति अत्थो. भिक्खूति ये तत्थ सन्निपतिता. कारापेत्वान उक्कुटिन्ति एत्थ सब्बधात्वत्थानुगतो करोति-सद्दो गहितोति उक्कुटिकं निसीदापेत्वाति अत्थो गहेतब्बो, ‘‘उक्कुटिक’’न्ति (महाव. अट्ठ. ३४) अट्ठकथापाठो गाथाबन्धसुखत्थं इध क-कारलोपेन निद्दिट्ठो.

२४६४. एकपदं ¶ वापीति बुद्धमिच्चादिकं एकम्पि वा पदं. एकक्खरम्पि वाति बुकारादिअक्खरेसु एकम्पि वा अक्खरं. पटिपाटिन्ति ‘‘बुद्ध’’मिच्चादिकं पदपन्तिं.

२४६५. अकत्तब्बप्पकारन्तरं दस्सेतुमाह ‘‘तिक्खत्तुं यदि वा’’तिआदि. तथा सेसेसूति यदि वा ‘‘धम्मं सरण’’न्ति तिक्खत्तुं देति, ‘‘सङ्घं सरण’’न्ति यदि वा तिक्खत्तुं देति, एवम्पि तीणि सरणानि अदिन्नानेव होन्ति.

२४६६. अनुनासिकन्तानि कत्वा दातब्बानीति सम्बन्धो. अनुनासिकन्तं कत्वा दानकाले अन्तराविच्छेदं अकत्वा दातब्बानीति दस्सेतुं ‘‘एकाबद्धानि वा पना’’ति वुत्तं. विच्छिन्दित्वा पदपटिपाटितो म-कारन्तं कत्वा दानसमये विच्छेदं कत्वा. मन्तानीति ‘‘बुद्धं सरणं इच्चादिना म-कारन्तानि. ‘‘बुद्धं सरणं गच्छामी’’तिआदिना नयेन निग्गहितन्तमेव कत्वा न दातब्बन्ति ‘‘अथा’’ति आह.

२४६७. सुद्धि नाम आचरियस्स ञत्तिया, कम्मवाचाय च उच्चारणविसुद्धि. पब्बज्जाति सामणेरसामणेरिपब्बज्जा. उभतोसुद्धिया विनाति उभतोसुद्धिं विना आचरियन्तेवासीनं ¶ उभिन्नं तीसु सरणत्तयदानग्गहणेसु उच्चारणसुद्धिं विना, एकस्सापि अक्खरस्स विपत्तिसब्भावे न होतीति अत्थो.

२४६८-९. ‘‘पब्बज्जागुणमिच्छता’’ति इदं ‘‘आचरियेन, अन्तेवासिकेना’’ति पदद्वयस्स विसेसनं दट्ठब्बं, अन्तेवासिकस्स पब्बज्जागुणं इच्छन्तेन आचरियेन, अत्तनो पब्बज्जागुणं इच्छन्तेन अन्तेवासिकेन च बु-द्ध-कारादयो वण्णा बु-कार ध-कारादयो वण्णा अक्खरा ठानकरणसम्पदं कण्ठतालुमुद्धदन्तओट्ठनासिकाभेदं ठानसम्पदञ्च ¶ अक्खरुप्पत्तिसाधकतमजिव्हामज्झादिकरणसम्पदञ्च अहापेन्तेन अपरिहापेन्तेन वत्तब्बाति योजना. कस्मा इदमेव दळ्हं कत्वा वुत्तन्ति आह ‘‘एकवण्णविनासेना’’तिआदि. हि-सद्दो यस्मा-पदत्थे, यस्मा एकस्सापि वण्णस्स विनासेन अनुच्चारणेन वा दुरुच्चारणेन वा पब्बज्जा न रुहति, तस्मा एवं वुत्तन्ति अधिप्पायो.

२४७०. यदि सिद्धाति सासङ्कवचनेन उभतोउच्चारणसुद्धिया दुक्करत्तं दीपेत्वा ‘‘अप्पमत्तेहि भवितब्ब’’न्ति उभिन्नं आचरियन्तेवासिकानं अनुसिट्ठि दिन्ना होति. सरणगमनतोवाति अवधारणेन सामणेरपब्बज्जा उपसम्पदा विय ञत्तिचतुत्थेन कम्मेन न होति, इदानिपि सरणगमनेनेव सिज्झतीति दीपेति. हि-सद्दो पसिद्धियं. यथाह –

‘‘यस्मा सरणगमनेन उपसम्पदा परतो पटिक्खित्ता, तस्मा सा एतरहि सरणगमनमत्तेनेव न रुहति. सामणेरस्स पब्बज्जा पन यस्मा परतोपि ‘अनुजानामि, भिक्खवे, इमेहि तीहि सरणगमनेहि सामणेरपब्बज्ज’न्ति (महाव. १०५) अनुञ्ञाता एव, तस्मा सा एतरहिपि सरणगमनमत्तेनेव रुहती’’ति (महाव. अट्ठ. ३४).

सरणगमनतो एव पब्बज्जा यदिपि किञ्चापि सिद्धा निप्फन्ना, तथापि अस्स सामणेरस्स ‘‘इदञ्चिदञ्च मया पूरेतब्बं सील’’न्ति ञत्वा परिपूरणत्थाय भिक्खुना दस सीलानि दातब्बानीति योजना. यथाह ‘‘अनुजानामि, भिक्खवे, सामणेरानं दस सिक्खापदानि, तेसु च सामणेरेहि सिक्खितुं. पाणातिपाता वेरमणी’’तिआदि (महाव. १०६).

पब्बज्जाकथावण्णना.

२४७१. उपज्झायन्ति ¶ ¶ वज्जावज्जे उपनिज्झायतीति उपज्झायो, तं, भगवता वुत्तेहि अङ्गेहि समन्नागतो परिपुण्णदसवस्सो पुग्गलो. निवासेत्वा च पारुपित्वा च सिरसि अञ्जलिं पग्गहेत्वा अत्तनो अभिमुखे उक्कुटिकं निसीदित्वा ‘‘उपज्झायो मे, भन्ते, होही’’ति तिक्खत्तुं वत्वा आयाचनाय कताय ‘‘साहु, लहु, ओपायिकं, पटिरूपं, पासादिकेन सम्पादेही’’ति इमेसु पञ्चसु पदेसु अञ्ञतरं कायेन वा वाचाय वा उभयेन वा विञ्ञापेत्वा तस्मिं सम्पटिच्छिते पितुट्ठाने ठत्वा अत्रजमिव तं गहेत्वा वज्जावज्जं उपपरिक्खित्वा दोसेन निग्गण्हित्वा सद्धिविहारिके सिक्खापेन्तो उपज्झायो नाम.

विज्जासिप्पं, आचारसमाचारं वा सिक्खितुकामेहि आदरेन चरितब्बो उपट्ठातब्बोति आचरियो, तं, उपज्झाये वुत्तलक्खणसमन्नागतोयेव पुग्गलो. वुत्तनयेनेव निसीदित्वा ‘‘आचरियो मे, भन्ते, होहि, आयस्मतो निस्साय वच्छामी’’ति तिक्खत्तुं वत्वा आयाचनाय कताय ‘‘साहू’’तिआदीसु पञ्चसु अञ्ञतरं वत्वा तस्मिं सम्पटिच्छिते पितुट्ठाने ठत्वा पुत्तट्ठानियं अन्तेवासिं सिक्खापेन्तो आचरियो नाम.

एत्थ च साहूति साधु. लहूति अगरु, मम तुय्हं उपज्झायभावे भारियं नत्थीति अत्थो. ओपायिकन्ति उपायपटिसंयुत्तं, तं उपज्झायग्गहणं इमिना उपायेन त्वं मे इतो पट्ठाय भारो जातोसीति वुत्तं होति. पटिरूपन्ति अनुरूपं ते उपज्झायग्गहणन्ति अत्थो. पासादिकेनाति पसादावहेन कायवचीपयोगेन. सम्पादेहीति तिविधं सिक्खं निप्फादेहीति अत्थो. कायेन वाति हत्थमुद्दादिं दस्सेन्तो कायेन वा. नामविसेसं विना पूरेतब्बवत्तानं समताय उभोपि एकतो वुत्ता.

एतानि ¶ वत्तानि उपज्झायस्स सद्धिविहारिकेन, आचरियस्स अन्तेवासिकेनापि एवमेव कातब्बानेवाति. वसताति वसन्तेन. पियसीलेनाति पियं सीलमेतस्साति पियसीलो, तेन, सीलं परिपूरितुकामेनाति वुत्तं होति.

२४७२-३. आसनं पञ्ञपेतब्बन्ति एत्थ ‘‘कालस्सेव वुट्ठाय उपाहना ओमुञ्चित्वा एकंसं उत्तरासङ्गं करित्वा’’ति (महाव. ६६) वुत्ता पुब्बकिरिया वत्तब्बा. आसनं पञ्ञपेतब्बन्ति ¶ दन्तकट्ठखादनट्ठानं सम्मज्जित्वा निसीदनत्थाय आसनं पञ्ञपेतब्बं. इमिना च यागुपानट्ठानादीसुपि आसनानि पञ्ञपेतब्बानेवाति दस्सितं होति.

दन्तकट्ठं दातब्बन्ति महन्तं, मज्झिमं, खुद्दकन्ति तीणि दन्तकट्ठानि उपनेत्वा ततो यं तीणि दिवसानि गण्हाति, चतुत्थदिवसतो पट्ठाय तादिसमेव दातब्बं. सचे अनियमं कत्वा यं वा तं वा गण्हाति, अथ यादिसं लभति, तादिसं दातब्बं.

मुखोदकं दातब्बन्ति मुखधोवनोदकं मुखोदकन्ति मज्झेपदलोपीसमासो, तं देन्तेन सीतञ्च उण्हञ्च उदकं उपनेत्वा ततो यं तीणि दिवसानि वळञ्जेति, चतुत्थदिवसतो पट्ठाय तादिसमेव मुखधोवनोदकं दातब्बं. सचे अनियमं कत्वा यं वा तं वा गण्हाति, अथ यादिसं लभति, तादिसं दातब्बं. सचे दुविधम्पि वळञ्जेति, दुविधम्पि उपनेतब्बं. ‘‘मुखोदकं मुखधोवनट्ठाने ठपेत्वा अवसेसट्ठानानि सम्मज्जितब्बानि. सम्मज्जन्तेन च वच्चकुटितो पट्ठाय सम्मज्जितब्बं. थेरे वच्चकुटिं गते परिवेणं सम्मज्जितब्बं, एवं परिवेणं असुञ्ञं होती’’ति अट्ठकथायं (महाव. अट्ठ. ६४ अत्थतो समानं) वुत्तनयेनेव सम्मज्जितब्बं.

ततो ¶ उत्तरिं कत्तब्बं दस्सेतुमाह ‘‘तस्स कालेना’’तिआदि. तस्साति उपज्झायस्स वा आचरियस्स वा. कालेनाति यागुपानकाले. इधापि ‘‘आसनं पञ्ञपेतब्ब’’न्ति सेसो. यथाह ‘‘थेरे वच्चकुटितो अनिक्खन्तेयेव आसनं पञ्ञपेतब्बं. सरीरकिच्चं कत्वा आगन्त्वा तस्मिं निसिन्नस्स ‘सचे यागु होती’तिआदिना नयेन वुत्तं वत्तं कातब्ब’’न्ति (महाव. अट्ठ. ६४).

यागु तस्सुपनेतब्बाति एत्थ ‘‘भाजनं धोवित्वा’’ति सेसो. यथाह – ‘‘भाजनं धोवित्वा यागु उपनामेतब्बा’’ति (महाव. ६६). सङ्घतो वाति सलाकादिवसेन सङ्घतो लब्भमाना वा. कुलतोपि वाति उपासकादिकुलतो वा.

‘‘पत्ते वत्तञ्च कातब्ब’’न्ति इदं ‘‘यागुं पीतस्स उदकं दत्वा भाजनं पटिग्गहेत्वा नीचं कत्वा साधुकं अप्पटिघंसन्तेन धोवित्वा पटिसामेतब्बं, उपज्झायम्हि वुट्ठिते आसनं उद्धरितब्बं ¶ . सचे सो देसो उक्लापो होति, सो देसो सम्मज्जितब्बो’’ति (महाव. ६६) आगतवत्तं सन्धायाह. दिवा भुत्तपत्तेपि कातब्बं एतेनेव दस्सितं होति.

वत्तं ‘‘गामप्पवेसने’’ति इदं ‘‘सचे उपज्झायो गामं पविसितुकामो होति, निवासनं दातब्बं, पटिनिवासनं पटिग्गहेतब्ब’’न्तिआदिनयप्पवत्तं (महाव. ६६) वत्तं सन्धायाह. ‘‘कातब्ब’’न्ति इदं सब्बपदेहि योजेतब्बं.

२४७४. चीवरे यानि वत्तानीति गामं पविसितुकामस्स चीवरदाने, पटिनिवत्तस्स चीवरग्गहणसङ्घरणपटिसामनेसु महेसिना यानि वत्तानि वुत्तानि, तानि च कातब्बानि. सेनासने तथाति ‘‘यस्मिं विहारे उपज्झायो विहरती’’तिआदिना ¶ (महाव. ६६) वुत्तनयेन ‘‘सेनासने कत्तब्ब’’न्ति दस्सितं सेनासनवत्तञ्च.

पादपीठकथलिकादीसु तथाति योजना. उपज्झाये गामतो पटिनिवत्ते च जन्ताघरे च ‘‘पादोदकं पादपीठं पादकथलिकं उपनिक्खिपितब्ब’’न्ति (महाव. ६६) एवमागतं वत्तञ्च कातब्बं. आदि-सद्देन ‘‘उपज्झायो पानीयेन पुच्छितब्बो’’तिआदिवत्तं (महाव. ६६) सङ्गण्हाति.

२४७५. एवं सब्बत्थ वत्तेसु पाटियेक्कं दस्सियमानेसु पपञ्चोति खन्धकं ओलोकेत्वा सुखग्गहणत्थाय गणनं दस्सेतुकामो आह ‘‘एवमादीनी’’तिआदि. रोगतो वुट्ठानागमनन्तानीति आचरियुपज्झायानं रोगतो वुट्ठानागमनपरियोसानानि. सत्ततिंससतं सियुन्ति सत्ततिंसाधिकसतवत्तानीति अत्थो.

तानि पन वत्तानि खन्धकपाळिया (महाव. ६६) आगतक्कमेन एवं यथावुत्तगणनाय समानेतब्बानि – दन्तकट्ठदानं, मुखोदकदानं, आसनपञ्ञापनं, सचे यागु होति, भाजनं धोवित्वा यागुया उपनामनं, यागुं पीतस्स उदकं दत्वा भाजनं पटिग्गहेत्वा नीचं कत्वा साधुकं अप्पटिघंसन्तेन धोवित्वा पटिसामनं, उपज्झायम्हि वुट्ठिते आसनस्स उद्धरणं, सचे सो देसो उक्लापो होति, तस्स सम्मज्जनं, सचे उपज्झायो गामं पविसितुकामो होति, तस्स निवासनदानं, पटिनिवासनपटिग्गहणं, कायबन्धनदानं, सगुणं कत्वा ¶ सङ्घाटिदानं, धोवित्वा सोदकपत्तस्स दानं, सचे उपज्झायो पच्छासमणं आकङ्खति, तिमण्डलं पटिच्छादेन्तेन परिमण्डलं निवासेत्वा कायबन्धनं बन्धित्वा सगुणं कत्वा सङ्घाटियो पारुपित्वा ¶ गण्ठिकं परिमुञ्चित्वा धोवित्वा पत्तं गहेत्वा उपज्झायस्स पच्छासमणेन गमनं, नातिदूरनच्चासन्ने गमनं, पत्तपरियापन्नस्स पटिग्गहणं, न उपज्झायस्स भणमानस्स अन्तरन्तरा कथाओपातनं, उपज्झायस्स आपत्तिसामन्ता भणमानस्स च निवारणं, निवत्तन्तेन पठमतरं आगन्त्वा आसनपञ्ञापनं, पादोदकपादपीठपादकथलिकानं उपनिक्खिपनं, पच्चुग्गन्त्वा पत्तचीवरपटिग्गहणं, पटिनिवासनदानं, निवासनपटिग्गहणं, सचे चीवरं सिन्नं होति, मुहुत्तं उण्हे ओतापनं, नेव उण्हे चीवरस्स निदहनं, मज्झे यथा भङ्गो न होति, एवं चतुरङ्गुलं कण्णं उस्सारेत्वा चीवरस्स सङ्घरणं, ओभोगे कायबन्धनस्स करणं, सचे पिण्डपातो होति, उपज्झायो च भुञ्जितुकामो होति, उदकं दत्वा पिण्डपातस्स उपनामनं, उपज्झायस्स पानीयेन पुच्छनं, भुत्ताविस्स उदकं दत्वा पत्तं पटिग्गहेत्वा नीचं कत्वा साधुकं अप्पटिघंसन्तेन धोवित्वा वोदकं कत्वा मुहुत्तं उण्हे ओतापनं, न च उण्हे पत्तस्स निदहनं, पत्तचीवरं निक्खिपितब्बं –

पत्तं निक्खिपन्तेन एकेन हत्थेन पत्तं गहेत्वा एकेन हत्थेन हेट्ठामञ्चं वा हेट्ठापीठं वा परामसित्वा पत्तस्स निक्खिपनं, न च अनन्तरहिताय भूमिया पत्तस्स निक्खिपनं, चीवरं निक्खिपन्तेन एकेन हत्थेन चीवरं गहेत्वा एकेन हत्थेन चीवरवंसं वा चीवररज्जुं वा पमज्जित्वा पारतो अन्तं ओरतो भोगं कत्वा चीवरस्स निक्खिपनं, उपज्झायम्हि वुट्ठिते आसनस्स उद्धरणं, पादोदकपादपीठपादकथलिकानं पटिसामनं, सचे सो देसो उक्लापो होति, तस्स सम्मज्जनं, सचे उपज्झायो न्हायितुकामो होति, न्हानस्स पटियादनं, सचे सीतेन अत्थो होति, सीतस्स सचे उण्हेन अत्थो होति, उण्हस्स पटियादनं, सचे उपज्झायो जन्ताघरं पविसितुकामो होति, चुण्णस्स ¶ सन्नयनं, मत्तिकातेमनं, जन्ताघरपीठं आदाय उपज्झायस्स पिट्ठितो पिट्ठितो गन्त्वा जन्ताघरपीठं दत्वा चीवरं पटिग्गहेत्वा एकमन्तं निक्खिपनं, चुण्णदानं, मत्तिकादानं, सचे उस्सहति, जन्ताघरं पविसितब्बं –

जन्ताघरं पविसन्तेन मत्तिकाय मुखं मक्खेत्वा पुरतो च पच्छतो च पटिच्छादेत्वा जन्ताघरप्पवेसो, न थेरानं भिक्खूनं अनुपखज्ज निसीदनं, न नवानं भिक्खूनं आसनेन पटिबाहनं, जन्ताघरे उपज्झायस्स परिकम्मस्स करणं, जन्ताघरा निक्खमन्तेन जन्ताघरपीठं आदाय ¶ पुरतो च पच्छतो च पटिच्छादेत्वा जन्ताघरा निक्खमनं, उदकेपि उपज्झायस्स परिकम्मकरणं, न्हातेन पठमतरं उत्तरित्वा अत्तनो गत्तं वोदकं कत्वा निवासेत्वा उपज्झायस्स गत्ततो उदकस्स पमज्जनं, निवासनदानं, सङ्घाटिदानं, जन्ताघरपीठं आदाय पठमतरं आगन्त्वा आसनस्स पञ्ञापनं, पादोदकपादपीठपादकथलिकानं उपनिक्खिपनं, उपज्झायस्स पानीयेन पुच्छनं, सचे उद्दिसापेतुकामो होति, उद्दिसापनं, सचे परिपुच्छितुकामो होति, परिपुच्छनं, यस्मिं विहारे उपज्झायो विहरति, सचे सो विहारो उक्लापो होति, सचे उस्सहति, तस्स सोधनं, विहारं सोधेन्तेन पठमं पत्तचीवरस्स नीहरित्वा एकमन्तं निक्खिपनं, निसीदनपच्चत्थरणस्स नीहरित्वा एकमन्तं निक्खिपनं, भिसिबिब्बोहनस्स नीहरित्वा एकमन्तं निक्खिपनं, मञ्चस्स नीचं कत्वा साधुकं अप्पटिघंसन्तेन असङ्घट्टेन्तेन कवाटपीठं नीहरित्वा एकमन्तं निक्खिपनं, पीठस्स नीचं कत्वा साधुकं अप्पटिघंसन्तेन असङ्घट्टेन्तेन कवाटपीठं नीहरित्वा एकमन्तं निक्खिपनं, मञ्चपटिपादकानं नीहरित्वा एकमन्तं निक्खिपनं, खेळमल्लकस्स नीहरित्वा एकमन्तं निक्खिपनं, अपस्सेनफलकस्स नीहरित्वा एकमन्तं निक्खिपनं, भूमत्थरणस्स यथापञ्ञत्तस्स सल्लक्खेत्वा नीहरित्वा एकमन्तं निक्खिपनं ¶ , सचे विहारे सन्तानकं होति, उल्लोका पठमं ओहारणं, आलोकसन्धिकण्णभागानं पमज्जनं, सचे गेरुकपरिकम्मकता भित्ति कण्णकिता होति, चोळकं तेमेत्वा पीळेत्वा पमज्जनं, सचे काळवण्णकता भूमि कण्णकिता होति, चोळकं तेमेत्वा पीळेत्वा पमज्जनं, सचे अकता होति भूमि, उदकेन परिप्फोसित्वा पमज्जनं ‘‘मा विहारो रजेन उहञ्ञी’’ति, सङ्कारं विचिनित्वा एकमन्तं छड्डनं, भूमत्थरणस्स ओतापेत्वा सोधेत्वा पप्फोटेत्वा अतिहरित्वा यथापञ्ञत्तं पञ्ञापनं, मञ्चपटिपादकानं ओतापेत्वा पमज्जित्वा अतिहरित्वा यथाट्ठाने ठपनं, मञ्चस्स ओतापेत्वा सोधेत्वा पप्फोटेत्वा नीचं कत्वा साधुकं अप्पटिघंसन्तेन असङ्घट्टेन्तेन कवाटपीठं अतिहरित्वा यथापञ्ञत्तं पञ्ञापनं, पीठस्स ओतापेत्वा सोधेत्वा पप्फोटेत्वा नीचं कत्वा साधुकं अप्पटिघंसन्तेन असङ्घट्टेन्तेन कवाटपीठं अतिहरित्वा यथापञ्ञत्तं पञ्ञापनं, भिसिबिब्बोहनस्स ओतापेत्वा सोधेत्वा पप्फोटेत्वा अतिहरित्वा यथापञ्ञत्तं पञ्ञापनं, निसीदनपच्चत्थरणस्स ओतापेत्वा सोधेत्वा पप्फोटेत्वा अतिहरित्वा यथापञ्ञत्तं पञ्ञापनं, खेळमल्लकस्स ओतापेत्वा पमज्जित्वा अतिहरित्वा यथाट्ठाने ठपनं, अपस्सेनफलकस्स ओतापेत्वा पमज्जित्वा अतिहरित्वा यथाट्ठाने ठपनं, पत्तचीवरं निक्खिपितब्बं –

पत्तं ¶ निक्खिपन्तेन एकेन हत्थेन पत्तं गहेत्वा एकेन हत्थेन हेट्ठामञ्चं वा हेट्ठापीठं वा परामसित्वा पत्तस्स निक्खिपनं, न च अनन्तरहिताय भूमिया पत्तस्स निक्खिपनं, चीवरं निक्खिपन्तेन एकेन हत्थेन चीवरं गहेत्वा एकेन हत्थेन ¶ चीवरवंसं वा चीवररज्जुं वा पमज्जित्वा पारतो अन्तं ओरतो भोगं कत्वा चीवरस्स निक्खिपनं, सचे पुरत्थिमाय सरजा वाता वायन्ति, पुरत्थिमानं वातपानानं थकनं, तथा पच्छिमानं, तथा उत्तरानं, तथा दक्खिणानं वातपानानं थकनं, सचे सीतकालो होति, दिवा वातपानानं विवरणं, रत्तिं थकनं, सचे उण्हकालो होति, दिवा वातपानानं थकनं, रत्तिं विवरणं, सचे परिवेणं उक्लापं होति, परिवेणस्स सम्मज्जनं, सचे कोट्ठको उक्लापो होति, कोट्ठकस्स सम्मज्जनं, सचे उपट्ठानसाला उक्लापा होति, तस्सा सम्मज्जनं, सचे अग्गिसाला उक्लापा होति, तस्सा सम्मज्जनं, सचे वच्चकुटि उक्लापा होति, तस्सा सम्मज्जनं, सचे पानीयं न होति, पानीयस्स उपट्ठापनं, सचे परिभोजनीयं न होति, परिभोजनीयस्स उपट्ठापनं, सचे आचमनकुम्भिया उदकं न होति, आचमनकुम्भिया उदकस्स आसिञ्चनं, सचे उपज्झायस्स अनभिरति उप्पन्ना होति, सद्धिविहारिकेन वूपकासनं वूपकासापनं वा, धम्मकथाय वा तस्स करणं, सचे उपज्झायस्स कुक्कुच्चं उप्पन्नं होति, सद्धिविहारिकेन विनोदनं विनोदापनं वा, धम्मकथाय वा तस्स करणं, सचे उपज्झायस्स दिट्ठिगतं उप्पन्नं होति, सद्धिविहारिकेन विवेचनं विवेचापनं वा, धम्मकथाय वा तस्स करणं, सचे उपज्झायो गरुधम्मं अज्झापन्नो होति परिवासारहो, सद्धिविहारिकेन उस्सुक्ककरणं ‘‘किन्ति नु खो सङ्घो उपज्झायस्स परिवासं ददेय्या’’ति, सचे उपज्झायो मूलायपटिकस्सनारहो होति, सद्धिविहारिकेन उस्सुक्ककरणं ‘‘किन्ति ¶ नु खो सङ्घो उपज्झायं मूलाय पटिकस्सेय्या’’ति, सचे उपज्झायो मानत्तारहो होति, सद्धिविहारिकेन उस्सुक्ककरणं ‘‘किन्ति नु खो सङ्घो उपज्झायस्स मानत्तं ददेय्या’’ति, सचे उपज्झायो अब्भानारहो होति, सद्धिविहारिकेन उस्सुक्ककरणं ‘‘किन्ति नु खो सङ्घो उपज्झायं अब्भेय्या’’ति, सचे सङ्घो उपज्झायस्स कम्मं कत्तुकामो होति तज्जनीयं वा नियस्सं वा पब्बाजनीयं वा पटिसारणीयं वा उक्खेपनीयं वा, सद्धिविहारिकेन उस्सुक्ककरणं ‘‘किन्ति नु खो सङ्घो उपज्झायस्स कम्मं न करेय्य, लहुकाय वा परिणामेय्या’’ति, कतं वा पनस्स होति सङ्घेन कम्मं तज्जनीयं वा नियस्सं वा पब्बाजनीयं वा पटिसारणीयं वा उक्खेपनीयं वा, सद्धिविहारिकेन उस्सुक्ककरणं ‘‘किन्ति नु खो उपज्झायो सम्मा वत्तेय्य, लोमं पातेय्य, नेत्थारं वत्तेय्य, सङ्घो तं कम्मं पटिप्पस्सम्भेय्या’’ति, सचे उपज्झायस्स चीवरं धोवितब्बं होति ¶ , सद्धिविहारिकेन धोवनं उस्सुक्ककरणं वा ‘‘किन्ति नु खो उपज्झायस्स चीवरं धोवियेथा’’ति, सचे उपज्झायस्स चीवरं कातब्बं होति, सद्धिविहारिकेन करणं उस्सुक्ककरणं वा ‘‘किन्ति नु खो उपज्झायस्स चीवरं करियेथा’’ति, सचे उपज्झायस्स रजनं पचितब्बं होति, सद्धिविहारिकेन पचनं उस्सुक्ककरणं वा ‘‘किन्ति नु खो उपज्झायस्स रजनं पचियेथा’’ति, सचे उपज्झायस्स चीवरं रजेतब्बं होति, सद्धिविहारिकेन रजनं उस्सुक्ककरणं वा ‘‘किन्ति नु खो उपज्झायस्स चीवरं रजियेथा’’ति, चीवरं रजन्तेन साधुकं सम्परिवत्तकं सम्परिवत्तकं रजनं, न च अच्छिन्ने थेवे पक्कमनं, उपज्झायं अनापुच्छा न एकच्चस्स पत्तदानं, न एकच्चस्स पत्तपटिग्गहणं, न एकच्चस्स चीवरदानं, न एकच्चस्स चीवरपटिग्गहणं, न एकच्चस्स परिक्खारदानं, न एकच्चस्स परिक्खारपटिग्गहणं, न एकच्चस्स केसच्छेदनं, न एकच्चेन केसानं छेदापनं, न एकच्चस्स परिकम्मकरणं, न एकच्चेन परिकम्मस्स कारापनं, न एकच्चस्स वेय्यावच्चकरणं, न एकच्चेन वेय्यावच्चस्स ¶ कारापनं, न एकच्चस्स पच्छासमणेन गमनं, न एकच्चस्स पच्छासमणस्स आदानं, न एकच्चस्स पिण्डपातस्स नीहरणं, न एकच्चेन पिण्डपातनीहरापनं, न उपज्झायं अनापुच्छा गामप्पवेसनं, न सुसानगमनं, न दिसापक्कमनं, सचे उपज्झायो गिलानो होति, यावजीवं उपट्ठानं, वुट्ठानमस्स आगमनन्ति तेसु कानिचि वत्तानि सविभत्तिकानि, कानिचि अविभत्तिकानि, तेसु अविभत्तिकानं विभागे वुच्चमाने यथावुत्तगणनाय अतिरेकतरानि होन्ति, तं पन विभागं अनामसित्वा पिण्डवसेन गहेत्वा यथा अयं गणना दस्सिताति वेदितब्बा.

२४७६. अकरोन्तस्साति एत्थ ‘‘वत्त’’न्ति सेसो. अनादरवसेनेव वत्तं अकरोन्तस्स भिक्खुनो तेन वत्तभेदेन वत्ताकरणेन सब्बत्थ सत्ततिंसाधिकसतप्पभेदट्ठाने तत्तकंयेव दुक्कटं पकासितन्ति योजना.

उपज्झायाचरियवत्तकथावण्णना.

२४७७. एवं उपज्झायाचरियवत्तानि सङ्खेपेन दस्सेत्वा उपज्झायाचरियेहि सद्धिविहारिकन्तेवासीनं कातब्बवत्तानि दस्सेतुमाह ‘‘उपज्झायस्स वत्तानी’’तिआदि. उपज्झायस्स वत्तानीति उपज्झायेन सद्धिविहारिकस्स युत्तपत्तकाले कत्तब्बत्ता उपज्झायायत्तवत्तानीति ¶ अत्थो. तथा सद्धिविहारिकेति यथा सद्धिविहारिकेन उपज्झायस्स कातब्बानि, तथा उपज्झायेन सद्धिविहारिके कातब्बानि.

उपज्झायाचरियवत्तेसु गामप्पवेसे पच्छासमणेन हुत्वा नातिदूरनच्चासन्नगमनं, न अन्तरन्तरा कथाओपातनं, आपत्तिसामन्ता भणमानस्स निवारणं, पत्तपरियापन्नपटिग्गहणन्ति चत्तारि वत्तानि, न एकच्चस्स पत्तदानादिअनापुच्छादिसापक्कमनावसानानि वीसति पटिक्खेपा चेति एतानि ¶ चतुवीसति वत्तानि ठपेत्वा अवसेसानि तेरसाधिकसतवत्तानि सन्धायाह ‘‘सतं तेरस होन्तेवा’’ति, तेरसाधिकसतवत्तानि होन्तीति अत्थो. आचरियेन अन्तेवासिकेपि च कातब्बवत्तानि तथा तत्तकानेवाति अत्थो.

सद्धिविहारिकन्तेवासिकवत्तकथावण्णना.

२४७८. उपज्झायाचरियेहि सद्धिविहारिकन्तेवासिकानं निस्सयपटिप्पस्सद्धिप्पकारं दस्सेतुमाह ‘‘पक्कन्ते वापी’’तिआदि. पक्कन्ते वापि विब्भन्ते वापि पक्खसङ्कन्ते वापि मते वापि आणत्तिया वापि एवं पञ्चधा उपज्झाया सद्धिविहारिकेन गहितो निस्सयो पटिप्पस्सम्भतीति योजना. पक्कन्तेति तदहु अपच्चागन्तुकामताय दिसं गते. विब्भन्तेति गिहिभावं पत्ते. पक्खसङ्कन्तकेति तित्थियायतनं गते. मतेति कालकते. आणत्तियाति निस्सयपणामनेन.

२४७९-८०. आचरियम्हापि अन्तेवासिकेन गहितनिस्सयस्स भेदनं छधा छप्पकारेन होतीति योजना. कथन्ति आह ‘‘पक्कन्ते चा’’तिआदि. तं उपज्झायतो निस्सयभेदे वुत्तनयमेव. विसेसं पन सयमेव वक्खति ‘‘आणत्तिय’’न्तिआदिना. आणत्तियन्ति एत्थ विसेसत्थजोतको पन-सद्दो लुत्तनिद्दिट्ठो. उभिन्नम्पि धुरनिक्खेपनेपि चाति आचरियस्स निस्सयपणामने पन उभिन्नं आचरियन्तेवासिकानंयेव अञ्ञमञ्ञनिरालयभावे सति निस्सयभेदो होति, न एकस्साति अत्थो. तमेवत्थं ब्यतिरेकतो दळ्हीकरोति ‘‘एकेकस्सा’’तिआदिना. एकेकस्स वा उभिन्नं वा आलये सति न भिज्जतीति योजना. यथाह –

‘‘आणत्तियं ¶ ¶ पन सचेपि आचरियो मुञ्चितुकामोव हुत्वा निस्सयपणामनाय पणामेति, अन्तेवासिको च ‘किञ्चापि मं आचरियो पणामेति, अथ खो हदयेन मुदुको’ति सालयोव होति, निस्सयो न पटिप्पस्सम्भतियेव. सचेपि आचरियो सालयो, अन्तेवासिको निरालयो ‘न दानि इमं निस्साय वसिस्सामी’ति धुरं निक्खिपति, एवम्पि न पटिप्पस्सम्भति. उभिन्नं सालयभावे पन न पटिप्पस्सम्भतियेव. उभिन्नं धुरनिक्खेपेन पटिप्पस्सम्भती’’ति (महाव. अट्ठ. ८३).

अयं पन विसेसो आचरियाणत्तिया निस्सयभेदेयेव दस्सितो, न उपज्झायाणत्तिया. सारत्थदीपनियं पन ‘‘सचेपि आचरियो मुञ्चितुकामोव हुत्वा निस्सयपणामनाय पणामेतीतिआदि सब्बं उपज्झायस्स आणत्तियम्पि वेदितब्ब’’न्ति वुत्तं.

२४८१. एवं पञ्च साधारणङ्गानि दस्सेत्वा असाधारणङ्गं दस्सेतुमाह ‘‘उपज्झायसमोधान-गतस्सापि च भिज्जती’’ति. तत्थ समोधानगमनं सरूपतो, पभेदतो च दस्सेतुमाह ‘‘दस्सनं सवनञ्चाति, समोधानं द्विधा मत’’न्ति. अयमेत्थ सङ्खेपो, वित्थारो पन समन्तपासादिकायं (महाव. अट्ठ. ८३) गहेतब्बो. गन्थवित्थारभीरूनं अनुग्गहाय पन इध न वित्थारितो.

२४८२-३. सभागे दायके असन्ते अद्धिकस्स च गिलानस्स च ‘‘गिलानेन मं उपट्ठहा’’ति याचितस्स गिलानुपट्ठाकस्स च निस्सयं विना वसितुं दोसो नत्थीति योजना ¶ . ‘‘गिलानुपट्ठाकस्सा’’ति वत्तब्बे गाथाबन्धवसेन रस्सत्तं. इमिना सभागे निस्सयदायके सन्ते एकदिवसम्पि परिहारो न लब्भतीति दीपेति. अत्तनो वने फासुविहारतं जानताति अत्तनो समथविपस्सनापटिलाभस्स वने फासुविहारं जानन्तेनपि. ‘‘सभागे दायके असन्ते’’ति पदच्छेदो. सब्बमेतं विधानं अन्तोवस्सतो अञ्ञस्मिं काले वेदितब्बं. अयमेत्थ सङ्खेपो, वित्थारो पन समन्तपासादिकाय गहेतब्बो.

निस्सयपटिप्पस्सम्भनकथावण्णना.

२४८४. कुट्ठमस्स ¶ अत्थीति कुट्ठी, तं. ‘‘गण्डि’’न्तिआदीसुपि एसेव नयो. रत्तसेतादिभेदेन येन केनचि कुट्ठेन वेवण्णियं पत्तसरीरन्ति अत्थो. यथाह –

‘‘रत्तकुट्ठं वा होतु काळकुट्ठं वा, यं किञ्चि किटिभदद्दुकच्छुआदिप्पभेदम्पि सब्बं कुट्ठमेवाति वुत्तं. तञ्चे नखपिट्ठिप्पमाणम्पि वड्ढनकपक्खे ठितं होति, न पब्बाजेतब्बो. सचे पन निवासनपारुपनेहि पकतिपटिच्छन्नट्ठाने नखपिट्ठिप्पमाणं अवड्ढनकपक्खे ठितं होति, वट्टति. मुखे, पन हत्थपादपिट्ठेसु वा सचेपि अवड्ढनकपक्खे ठितं नखपिट्ठितो खुद्दकपमाणम्पि न वट्टतियेवाति कुरुन्दियं वुत्तं. तं तिकिच्छापेत्वा पब्बाजेन्तेनापि पकतिवण्णे जातेयेव पब्बाजेतब्बो’’ति (महाव. अट्ठ. ८८).

नखपिट्ठिप्पमाणन्ति एत्थ ‘‘कनिट्ठङ्गुलिनखपिट्ठि अधिप्पेता’’ति तीसुपि गण्ठिपदेसु वुत्तं.

गण्डिन्ति ¶ मेदगण्डादिगण्डभेदवन्तं. यथाह ‘‘मेदगण्डो वा होतु अञ्ञो वा, यो कोचि कोलट्ठिमत्तकोपि चे वड्ढनकपक्खे ठितो गण्डो होति, न पब्बाजेतब्बो’’तिआदि (महाव. अट्ठ. ८८). कोलट्ठीति बदरट्ठि. किलासिन्ति किलासवन्तं. यथाह – ‘‘किलासोति नभिज्जनकं नपग्घरणकं पदुमपुण्डरीकपत्तवण्णं कुट्ठं, येन गुन्नं विय सबलं सरीरं होती’’ति (महाव. अट्ठ. ८८). च-सद्दो सब्बेहि उपयोगवन्तेहि पच्चेकं योजेतब्बो. सोसिन्ति खयरोगवन्तं. यथाह – ‘‘सोसोति सोसब्याधि. तस्मिं सति न पब्बाजेतब्बो’’ति (महाव. अट्ठ. ८८). अपमारिकन्ति अपमारवन्तं. यथाह – ‘‘अपमारोति पित्तुम्मारो वा यक्खुम्मारो वा. तत्थ पुब्बवेरिकेन अमनुस्सेन गहितो दुत्तिकिच्छो होति, अप्पमत्तकेपि पन अपमारे सति न पब्बाजेतब्बो’’ति.

राजभटन्ति रञ्ञो भत्तवेतनभटं वा ठानन्तरं पत्तं वा अप्पत्तं वा राजपुरिसं. यथाह – ‘‘अमच्चो वा होतु महामत्तो वा सेवको वा किञ्चि ठानन्तरं पत्तो वा अप्पत्तो वा, यो कोचि रञ्ञो भत्तवेतनभटो. सब्बो ‘राजभटो’ति सङ्ख्यं गच्छती’’ति. चोरन्ति मनुस्सेहि अप्पमादनं गामघातपन्थघातादिकम्मेन पाकटं चोरञ्च. लिखितकन्ति यं कञ्चि चोरिकं वा अञ्ञं वा गरुं राजापराधं कत्वा पलातं, राजा च नं पण्णे वा पोत्थके वा ‘‘इत्थन्नामो ¶ यत्थ दिस्सति, तत्थ गहेत्वा मारेतब्बो’’ति वा ‘‘हत्थपादादीनिस्स छिन्दितब्बानी’’ति वा ‘‘एत्तकं नाम दण्डं हरापेतब्बो’’ति वा लिखापेति, एवरूपं लिखितकं.

‘‘कारभेदक’’न्ति गाथाबन्धवसेन रस्सो कतो. कारभेदकन्ति दातब्बकरस्स वा कतचोरकम्मस्स वा कारणा ¶ काराघरे पक्खित्तो वा निगळबन्धनादीहि बद्धो वा, ततो सो मुच्चित्वा पलायति, एवरूपं काराभेदकञ्च. यथाह – ‘‘कारा वुच्चति बन्धनागारं, इध पन अन्दुबन्धनं वा होतु सङ्खलिकबन्धनं वा रज्जुबन्धनं वा गामबन्धनं वा निगमबन्धनं वा नगरबन्धनं वा पुरिसगुत्ति वा जनपदबन्धनं वा दीपबन्धनं वा, यो एतेसु यं किञ्चि बन्धनं छिन्दित्वा भिन्दित्वा मुञ्चित्वा विवरित्वा वा पस्समानानं वा अपस्समानानं वा पलायति, सो ‘काराभेदको’ति सङ्ख्यं गच्छती’’ति (महाव. अट्ठ. ९२).

२४८५. कसाहतन्ति इणं गहेत्वा दातुं असमत्थत्ता ‘‘अयमेव ते दण्डो होतू’’ति कसादिना दिन्नप्पहारं अवूपसन्तवणं. यथाह –

‘‘यो वचनपेसनादीनि अकरोन्तो हञ्ञति, न सो कतदण्डकम्मो. यो पन केणिया वा अञ्ञथा वा किञ्चि गहेत्वा खादित्वा पुन दातुं असक्कोन्तो ‘अयमेव ते दण्डो होतू’ति कसाहि हञ्ञति, अयं कसाहतो कतदण्डकम्मो. यो च कसाहि वा हतो होतु अद्धदण्डकादीनं वा अञ्ञतरेन, याव अल्लवणो होति, ताव न पब्बाजेतब्बो’’ति (महाव. अट्ठ. ९४).

लक्खणाहतन्ति एकंसं कत्वा पारुतेन उत्तरासङ्गेन अप्पटिच्छादनीयट्ठाने तत्तेन लोहेन आहतं असच्छविभूतलक्खणेन समन्नागतं. यथाह –

‘‘यस्स पन नलाटे वा उरादीसु वा तत्तेन लोहेन लक्खणं आहतं होति, सो सचे भुजिस्सो, याव अल्लवणो होति, ताव न पब्बाजेतब्बो. सचेपिस्स वणा रुळ्हा होन्ति छविया ¶ समपरिच्छेदा, लक्खणं पन पञ्ञायति, तिमण्डलं निवत्थस्स उत्तरासङ्गे ¶ कते पटिच्छन्नोकासे चे होति, पब्बाजेतुं वट्टति. अप्पटिच्छन्नोकासे चे, न वट्टती’’ति (महाव. अट्ठ. ९५).

इणायिकञ्चाति मातापितुपितामहादीहि वा अत्तना वा गहितइणं. यथाह –

‘‘इणायिको नाम यस्स पितिपितामहेहि वा इणं गहितं होति, सयं वा इणं गहितं होति, यं वा आठपेत्वा मातापितूहि किञ्चि गहितं होति, सो तं इणं परेसं धारेतीति इणायिको. यं पन अञ्ञे ञातका आठपेत्वा किञ्चि गण्हन्ति, सो न इणायिको. न हि ते तं आठपेतुं इस्सरा. तस्मा तं पब्बाजेतुं वट्टती’’ति (महाव. अट्ठ. ९६).

दासन्ति अन्तोजातो, धनक्कीतो, करमरानीतो, सयं वा दासब्यं उपगतोति चतुन्नं दासानं अञ्ञतरं. दासविनिच्छयो पनेत्थ समन्तपासादिकाय (महाव. अट्ठ. ९७) वित्थारतो गहेतब्बो. पब्बाजेन्तस्स दुक्कटन्ति ‘‘कुट्ठि’’न्तिआदीहि उपयोगवन्तपदेहि पच्चेकं योजेतब्बं.

२४८६. हत्थच्छिन्नन्ति हत्थतले वा मणिबन्धे वा कप्परे वा यत्थ कत्थचि छिन्नहत्थं. अट्ठच्छिन्नन्ति यथा नखं न पञ्ञायति, एवं चतूसु अङ्गुट्ठकेसु अञ्ञतरं वा सब्बे वा यस्स छिन्ना होन्ति, एवरूपं. पादच्छिन्नन्ति यस्स अग्गपादेसु वा गोप्फकेसु वा जङ्घाय वा यत्थ कत्थचि एको वा द्वे वा पादा छिन्ना होन्ति. हत्थपादछिन्नस्सापि पाळियं (महाव. ११९) आगतत्ता सोपि इध वत्तब्बो, यथावुत्तनयेनेव तस्स दुक्कटवत्थुता पञ्ञायतीति न वुत्तोति दट्ठब्बं.

कण्णनासङ्गुलिच्छिन्नन्ति ¶ एत्थ ‘‘कण्णच्छिन्नं नासच्छिन्नं कण्णनासच्छिन्नं अङ्गुलिच्छिन्न’’न्ति योजना. कण्णच्छिन्नन्ति यस्स कण्णमूले वा कण्णसक्खलिकाय वा एको वा द्वे वा कण्णा छिन्ना होन्ति. यस्स पन कण्णावट्टे छिन्ना होन्ति, सक्का च होन्ति सङ्घाटेतुं, सो कण्णं सङ्घाटेत्वा पब्बाजेतब्बो. नासच्छिन्नन्ति यस्स अजपदके वा अग्गे वा एकपुटे वा यत्थ कत्थचि नासा छिन्ना होति. यस्स पन नासिका सक्का होति सन्धेतुं, सो ¶ तं फासुकं कत्वा पब्बाजेतब्बो. कण्णनासच्छिन्नन्ति तदुभयच्छिन्नं. अङ्गुलिच्छिन्नन्ति यस्स नखसेसं अदस्सेत्वा एका वा बहू वा अङ्गुलियो छिन्ना होन्ति. यस्स पन सुत्ततन्तुमत्तम्पि नखसेसं पञ्ञायति, तं पब्बाजेतुं वट्टति. कण्डरच्छिन्नमेव चाति यस्स कण्डरनामका महान्हारू पुरतो वा पच्छतो वा छिन्ना होन्ति, येसु एकस्सापि छिन्नत्ता अग्गपादेन वा चङ्कमति, मूलेन वा चङ्कमति, न वा पादं पतिट्ठापेतुं सक्कोति.

२४८७. काणन्ति पसन्नन्धो वा होतु पुप्फादीहि वा उपहतपसादो, यो द्वीहि वा एकेन वा अक्खिना न पस्सति, तं काणं. कुणिन्ति हत्थकुणी वा पादकुणी वा अङ्गुलिकुणी वा, यस्स एतेसु हत्थादीसु यं किञ्चि वङ्कं पञ्ञायति, सो कुणी. खुज्जञ्चाति यो उरस्स वा पिट्ठिया वा पस्सस्स वा निक्खन्तत्ता खुज्जसरीरो, तं खुज्जं. यस्स पन किञ्चि किञ्चि अङ्गपच्चङ्गं ईसकं वङ्कं, तं पब्बाजेतुं वट्टति. महापुरिसो एव हि ब्रह्मुजुगत्तो, अवसेसो सत्तो अखुज्जो नाम नत्थि.

वामनन्ति यो जङ्घवामनो वा कटिवामनो वा उभयवामनो वा, तं. तत्थ जङ्घवामनस्स कटितो पट्ठाय हेट्ठिमकायो ¶ रस्सो होति, उपरिमकायो परिपुण्णो. कटिवामनस्स कटितो पट्ठाय उपरिमकायो रस्सो होति, हेट्ठिमकायो परिपुण्णो होति. उभयवामनस्स उभोपि काया रस्सा होन्ति. येसं कायरस्सत्ता भूतानं विय परिवटुमो महाकुच्छिघटसदिसो अत्तभावो होति. तं तिविधम्पि पब्बाजेतुं न वट्टति.

फणहत्थकन्ति यस्स वग्गुलिपक्खका विय अङ्गुलियो सम्बद्धा होन्ति, तं. एतं पब्बाजेतुकामेन अङ्गुलन्तरिकायो फालेत्वा सब्बं अन्तरचम्मं अपनेत्वा फासुकं कत्वा पब्बाजेतब्बो. यस्सापि छ अङ्गुलियो होन्ति, तं पब्बाजेतुकामेन अधिकं अङ्गुलिं छिन्दित्वा फासुकं कत्वा पब्बाजेतब्बो.

खञ्जन्ति यो नतजाणुको वा भिन्नजङ्घो वा मज्झे संकुटितपादत्ता कुण्डपादको वा पिट्ठिपादमज्झेन चङ्कमन्तो अग्गे संकुटितपादत्ता कुण्डपादको वा पिट्ठिपादग्गेन चङ्कमन्तो अग्गपादेनेव चङ्कमनखञ्जो वा पण्हिकाय चङ्कमनखञ्जो वा पादस्स बाहिरन्तेन चङ्कमनखञ्जो वा पादस्स अब्भन्तरन्तेन चङ्कमनखञ्जो वा गोप्फकानं उपरि भग्गत्ता सकलेन ¶ पिट्ठिपादेन चङ्कमनखञ्जो वा, तं पब्बाजेतुं न वट्टति. एत्थ नतजाणुकोति अन्तोपविट्ठआनतपादो. पक्खहतन्ति यस्स एको हत्थो वा पादो वा अड्ढसरीरं वा सुखं न वहति.

सीपदिन्ति भारपादं. यस्स पादो थूलो होति सञ्जातपीळको खरो, सो न पब्बाजेतब्बो. यस्स पन न ताव खरभावं गण्हाति, सक्का होति उपनाहं बन्धित्वा उदकआवाटे पवेसेत्वा उदकवालिकाय पूरेत्वा ¶ यथा सिरा पञ्ञायन्ति, जङ्घा च तेलनाळिका विय होन्ति, एवं मिलापेतुं सक्का, तस्स पादं ईदिसं कत्वा तं पब्बाजेतुं वट्टति. सचे पुन वड्ढति, उपसम्पादेन्तेनापि तथा कत्वाव उपसम्पादेतब्बो. पापरोगिनन्ति यो अरिसभगन्दरपित्तसेम्हकाससोसादीसु येन केनचि रोगेन निच्चातुरो अतेकिच्छरोगो जेगुच्छो अमनापो, तं.

२४८८. जराय दुब्बलन्ति यो जिण्णभावेन दुब्बलो अत्तनो चीवररजनादिकम्मम्पि कातुं असमत्थो, तं. यो पन महल्लकोपि बलवा होति अत्तानं पटिजग्गितुं सक्कोति, सो पब्बाजेतब्बो. अन्धन्ति जच्चन्धं. पधिरञ्चेवाति यो सब्बेन सब्बं न सुणाति, तं. यो पन महासद्दं सुणाति, तं पब्बाजेतुं वट्टति. मम्मनन्ति यस्स वचीभेदो वत्तति, सरणगमनं परिपुण्णं भासितुं न सक्कोति, तादिसं मम्मनम्पि पब्बाजेतुं न वट्टति. यो पन सरणगमनमत्तं परिपुण्णं भासितुं सक्कोति, तं पब्बाजेतुं वट्टति. अथ वा मम्मनन्ति खलितवचनं, यो एकमेव अक्खरं चतुपञ्चक्खत्तुं वदति, तस्सेतमधिवचनं. पीठसप्पिन्ति छिन्निरियापथं. मूगन्ति यस्स वचीभेदो नप्पवत्तति.

२४८९. अत्तनो विरूपभावेन परिसं दूसेन्तेन परिसदूसके (महाव. अट्ठ. ११९) दस्सेतुमाह ‘‘अतिदीघो’’तिआदि. अतिदीघोति अञ्ञेसं सीसप्पमाणनाभिप्पदेसो. अतिरस्सोति वुत्तप्पकारो उभयवामनो विय अतिरस्सो. अतिकाळो वाति झापितखेत्ते खाणुको विय अतिकाळवण्णो. मट्ठतम्बलोहनिदस्सनो अच्चोदातोपि वाति सम्बन्धो, दधितक्कादीहि मज्जितमट्ठतम्बलोहवण्णो अतीव ओदातसरीरोति अत्थो.

२४९०. अतिथूलो ¶ वाति भारियमंसो महोदरो महाभूतसदिसो. अतिकिसोति मन्दमंसलोहितो ¶ अट्ठिसिराचम्मसरीरो विय. अतिमहासीसो वाति योजना. अतिमहासीसो वाति पच्छिं सीसे कत्वा ठितो विय. ‘‘अतिखुद्दकसीसेन असहितेना’’ति पदच्छेदो. असहितेनाति सरीरस्स अननुरूपेन. ‘‘अतिखुद्दकसीसेना’’ति एतस्स विसेसनं. असहितेन अतिखुद्दकसीसेन समन्नागतोति योजना. यथाह – ‘‘अतिखुद्दकसीसो वा सरीरस्स अननुरूपेन अतिखुद्दकेन सीसेन समन्नागतो’’ति.

२४९१. कुटकुटकसीसोति तालफलपिण्डिसदिसेन सीसेन समन्नागतो. सिखरसीसकोति उद्धं अनुपुब्बतनुकेन सीसेन समन्नागतो, मत्थकतो संकुटिको मूलतो वित्थतो हुत्वा ठितपब्बतसिखरसदिससीसोति अत्थो. वेळुनाळिसमानेनाति महावेळुपब्बसदिसेन. सीसेनाति दीघसीसेन. यथाह – ‘‘नाळिसीसो वा महावेळुपब्बसदिसेन सीसेन समन्नागतो’’ति (महाव. अट्ठ. ११९).

२४९२. कप्पसीसोपीति मज्झे दिस्समानआवाटेन हत्थिकुम्भसदिसेन द्विधाभूतसीसेन समन्नागतो. पब्भारसीसो वाति चतूसु पस्सेसु येन केनचि पस्सेन ओणतेन सीसेन समन्नागतो. वणसीसकोति वणेहि समन्नागतसीसो. कण्णिककेसो वाति पाणकेहि खायितकेदारे सस्ससदिसेहि तहिं तहिं उट्ठितेहि केसेहि समन्नागतो. थूलकेसोपि वाति तालहीरसदिसेहि केसेहि समन्नागतो.

२४९३. पूतिसीसोति ¶ दुग्गन्धसीसो. निल्लोमसीसो वाति लोमरहितसीसो. जातिपण्डरकेसकोति जातिफलितेहि पण्डरकेसो वा. जातिया तम्बकेसो वाति आदित्तेहि विय तम्बवण्णेहि केसेहि समन्नागतो. आवट्टसीसकोति गुन्नं सरीरे आवट्टसदिसेहि उद्धग्गेहि केसावट्टेहि समन्नागतो.

२४९४. सीसलोमेकबद्धेहि भमुकेहि युतोपीति सीसलोमेहि सद्धिं एकाबद्धलोमेहि भमुकेहि समन्नागतो. सम्बद्धभमुको वाति एकाबद्धउभयभमुको, मज्झे सञ्जातलोमेहि भमुकेहि समन्नागतोति अत्थो. निल्लोमभमुकोपि वाति भमुलोमरहितो. निल्लोमभमुकोपि वाति पि-सद्देन अवुत्तसमुच्चयत्थेन मक्कटभमुको सङ्गहितो.

२४९५. महन्तखुद्दनेत्तो ¶ वाति एत्थ नेत्त-सद्दो महन्तखुद्द-सद्देहि पच्चेकं योजेतब्बो, महन्तनेत्तो वा खुद्दकनेत्तो वाति अत्थो. महन्तनेत्तो वाति अतिमहन्तेहि नेत्तेहि समन्नागतो. खुद्दकनेत्तो वाति महिंसचम्मे वासिकोणेन पहरित्वा कतछिद्दसदिसेहि अतिखुद्दकक्खीहि समन्नागतो. विसमलोचनोति एकेन महन्तेन, एकेन खुद्दकेन अक्खिना समन्नागतो. केकरो वापीति तिरियं पस्सन्तो. एत्थ अपि-सद्देन निक्खन्तक्खिं सम्पिण्डेति, यस्स कक्कटकस्सेव अक्खितारका निक्खन्ता होन्ति. गम्भीरनेत्तोति यस्स गम्भीरे उदपाने उदकतारका विय अक्खितारका पञ्ञायन्ति. एत्थ च उदकतारका नाम उदकपुब्बुळं. अक्खितारकाति अक्खिगेण्डका. विसमचक्कलोति एकेन उद्धं, एकेन अधोति एवं विसमजातेहि अक्खिचक्केहि समन्नागतो.

२४९६. जतुकण्णो ¶ वाति अतिखुद्दिकाहि कण्णसक्खलीहि समन्नागतो. मूसिककण्णो वाति मूसिकानं कण्णसदिसेहि कण्णेहि समन्नागतो. हत्थिकण्णोपि वाति अननुरूपाहि महन्ताहि हत्थिकण्णसदिसाहि कण्णसक्खलीहि समन्नागतो. छिद्दमत्तककण्णो वाति यस्स विना कण्णसक्खलीहि कण्णच्छिद्दमेव होति. अविद्धकण्णकोति कण्णबन्धत्थाय अविद्धेन कण्णेन समन्नागतो.

२४९७. टङ्कितकण्णो वाति गोभत्तनाळिकाय अग्गसदिसेहि कण्णेहि समन्नागतो, गोहनुकोटिसण्ठानेहि कण्णेहि समन्नागतोति अत्थो. पूतिकण्णोपि वाति सदा पग्घरितपुब्बेन कण्णेन समन्नागतो. पूतिकण्णोपीति अपि-सद्देन कण्णभगन्दरिको गहितो. कण्णभगन्दरिकोति निच्चपूतिना कण्णेन समन्नागतो. अविद्धकण्णो परिसदूसको वुत्तो, कथं योनकजातीनं पब्बज्जाति आह ‘‘योनकादिप्पभेदोपि, नायं परिसदूसको’’ति, कण्णावेधनं योनकानं सभावो, अयं योनकादिप्पभेदो परिसदूसको न होतीति वुत्तं होति.

२४९८. अतिपिङ्गलनेत्तोति ¶ अतिसयेन पिङ्गलेहि नेत्तेहि समन्नागतो. मधुपिङ्गलं पन पब्बाजेतुं वट्टति. निप्पखुमक्खि वाति अक्खिदलरोमेहि विरहितअक्खिको. पखुम-सद्दो हि लोके अक्खिदलरोमेसु निरुळ्हो. अस्सुपग्घरनेत्तो वाति पग्घरणस्सूहि नेत्तेहि समन्नागतो. पक्कपुप्फितलोचनोति पक्कलोचनो पुप्फितलोचनोति योजना. परिपक्कनेत्तो सञ्जातपुप्फनेत्तोति अत्थो.

२४९९. महानासोति सरीरस्स अननुरूपाय महतिया नासाय समन्नागतो. अतिखुद्दकनासिकोति तथा ¶ अतिखुद्दिकाय नासाय समन्नागतो. चिपिटनासो वाति चिपिटाय अन्तो पविट्ठाय विय अल्लिनासाय समन्नागतो. चिपिटनासो वाति अवुत्तविकप्पत्थेन वा-सद्देन दीघनासिको सङ्गय्हति. सो च सुकतुण्डसदिसाय जिव्हाय लेहितुं सक्कुणेय्याय नासिकाय समन्नागतो. कुटिलनासिकोति मुखमज्झे अप्पतिट्ठहित्वा एकपस्से ठितनासिको.

२५००. निच्चविस्सवनासो वाति निच्चपग्घरितसिङ्घाणिकनासो वा. महामुखोति यस्स पटङ्गमण्डुकस्सेव मुखनिमित्तंयेव महन्तं होति, मुखं पन लाबुसदिसं अतिखुद्दकं. पटङ्गमण्डुको नाम महामुखमण्डुको. वङ्कभिन्नमुखो वापीति एत्थ ‘‘वङ्कमुखो वा भिन्नमुखो वापी’’ति योजना. वङ्कमुखोति भमुकस्स, नलातस्स वा एकपस्से निन्नताय वङ्कमुखो. भिन्नमुखो वाति मक्कटस्सेव भिन्नमुखो. महाओट्ठोपि वाति उक्खलिमुखवट्टिसदिसेहि ओट्ठेहि समन्नागतो.

२५०१. तनुकओट्ठो वाति भेरिचम्मसदिसेहि दन्ते पिदहितुं असमत्थेहि ओट्ठेहि समन्नागतो. भेरिचम्मसदिसेहीति भेरिमुखचम्मसदिसेहि. तनुकओट्ठो वाति एत्थ वा-सद्देन महाधरोट्ठो वा तनुकउत्तरोट्ठो वा तनुकअधरोट्ठो वाति तयो विकप्पा सङ्गहिता. विपुलुत्तरओट्ठकोति महाउत्तरोट्ठो. ओट्ठछिन्नोति यस्स एको वा द्वे वा ओट्ठा छिन्ना होन्ति. उप्पक्कमुखोति पक्कमुखो. एळमुखोपि वाति निच्चपग्घरणमुखो.

२५०२-३. सङ्खतुण्डोपीति बहि सेतेहि अन्तो अतिरत्तेहि ओट्ठेहि समन्नागतो. दुग्गन्धमुखोति दुग्गन्धकुणपमुखो. महादन्तोपीति अट्ठकदन्तसदिसेहि समन्नागतो ¶ . अच्चन्तन्ति अतिसयेन. ‘‘हेट्ठा उपरितो वापि, बहि निक्खन्तदन्तको’’ति इदं ‘‘असुरदन्तको’’ति एतस्स अत्थपदं. असुरोति दानवो. ‘‘सिप्पिदन्तो वा ओट्ठदन्तो वा’’ति गण्ठिपदे लिखितो. यस्स पन सक्का होन्ति ओट्ठेहि पिदहितुं, कथेन्तस्सेव पञ्ञायति, नो अकथेन्तस्स, तं पब्बाजेतुं वट्टति. अदन्तोति दन्तरहितो. पूतिदन्तोति पूतिभूतेहि दन्तेहि समन्नागतो.

२५०४. ‘‘अतिखुद्दकदन्तको’’ति इमस्स ‘‘यस्सा’’तिआदि अपवादो. यस्स दन्तन्तरे काळकदन्तसन्निभो ¶ कलन्दकदन्तसदिसो दन्तो सुखुमोव ठितो चे, तं तु पब्बाजेतुं वट्टतीति योजना. पब्बाजेतुम्पीति एत्थ पि-सद्दो तु-सद्दत्थो.

२५०५. यो पोसोति सम्बन्धो. महाहनुकोति गोहनुसदिसेन हनुना समन्नागतो. ‘‘रस्सेन हनुना युतो’’ति इदं ‘‘चिपिटहनुको वा’’ति इमस्स अत्थपदं. यथाह – ‘‘चिपिटहनुको वा अन्तोपविट्ठेन विय अतिरस्सेन हनुकेन समन्नागतो’’ति (महाव. अट्ठ. ११९). चिपिटहनुको वापीति एत्थ पि-सद्देन ‘‘भिन्नहनुको वा वङ्कहनुको वा’’ति विकप्पद्वयं सङ्गण्हाति.

२५०६. निम्मस्सुदाठिको वापीति भिक्खुनिसदिसमुखो. अतिदीघगलोपि वाति बकगलसदिसेन गलेन समन्नागतो. अतिरस्सगलोपि वाति अन्तोपविट्ठेन विय गलेन समन्नागतो. भिन्नगलो वा गण्डगलोपि वाति योजना, भिन्नगलट्ठिको वा गण्डेन समन्नागतगलोपि वाति अत्थो.

२५०७. भट्ठंसकूटो ¶ वाति मातुगामस्स विय भट्ठेन अंसकूटेन समन्नागतो. भिन्नपिट्ठि वा भिन्नउरोपि वाति योजना, सुदीघहत्थो वा सुरस्सहत्थो वाति योजना, अतिदीघहत्थो वा अतिरस्सहत्थो वाति अत्थो. वा-सद्देन अहत्थएकहत्थानं गहणं. कच्छुसमायुतो वा कण्डुसमायुतो वाति योजना. वा-सद्देन ‘‘दद्दुगत्तो वा गोधागत्तो वा’’ति इमे द्वे सङ्गण्हाति. तत्थ गोधागत्तो वाति यस्स गोधाय विय गत्ततो चुण्णानि पतन्ति.

२५०८. महानिसदमंसोति इमस्स अत्थपदं ‘‘उद्धनग्गुपमायुतो’’ति. यथाह – ‘‘महाआनिसदो वा उद्धनकूटसदिसेहि आनिसदमंसेहि अच्चुग्गतेहि समन्नागतो’’ति (महाव. अट्ठ. ११९). महानिसदमंसो वाति एत्थ वा-सद्देन भट्ठकटिको सङ्गहितो. वातण्डिकोति अण्डकोसेसु वुद्धिरोगेन समन्नागतो. महाऊरूति सरीरस्स अननुरूपेहि महन्तेहि सत्तीहि समन्नागतो. सङ्घट्टनकजाणुकोति अञ्ञमञ्ञं सङ्घट्टेहि जाणूहि समन्नागतो.

२५०९. भिन्नजाणूति यस्स एको वा द्वे वा जाणू भिन्ना होन्ति. महाजाणूति महन्तेन ¶ जाणुना समन्नागतो. दीघजङ्घोति यट्ठिसदिसजङ्घो. विकटो वाति तिरियं गमनपादेहि समन्नागतो, यस्स चङ्कमतो जाणुका बहि निग्गच्छन्ति. पण्हो वाति पच्छतो परिवत्तपादेहि समन्नागतो, यस्स चङ्कमतो जाणुका अन्तो पविसन्ति. ‘‘पन्तो’’ति च ‘‘सण्हो’’ति च एतस्सेव वेवचनानि. उब्बद्धपिण्डिकोति हेट्ठा ओरुळ्हाहि वा उपरि आरुळ्हाहि वा महतीहि जङ्घपिण्डिकाहि समन्नागतो.

२५१०. यट्ठिजङ्घोति ¶ यट्ठिसदिसाय जङ्घाय समन्नागतो. महाजङ्घोति सरीरस्स अननुरूपाय महतिया जङ्घाय समन्नागतो. महापादोपि वाति सरीरस्स अननुरूपेहि महन्तेहि पादेहि समन्नागतो. अपि-सद्देन थूलजङ्घपिण्डिको सङ्गहितो, भत्तपुटसदिसाय थूलाय जङ्घपिण्डिया समन्नागतोति अत्थो. पिट्ठिकपादो वाति पादवेमज्झतो उट्ठितजङ्घो. महापण्हिपि वाति अननुरूपेहि अतिमहन्तेहि पण्हीहि समन्नागतो.

२५११. वङ्कपादोति अन्तो वा बहि वा परिवत्तपादवसेन दुविधो वङ्कपादो. गण्ठिकङ्गुलिकोति सिङ्गिवेरफणसदिसाहि अङ्गुलीहि समन्नागतो. ‘‘अन्धनखो वापी’’ति एतस्स अत्थपदं ‘‘काळपूतिनखोपि चा’’ति. यथाह – ‘‘अन्धनखो वा काळवण्णेहि पूतिनखेहि समन्नागतो’’ति (महाव. अट्ठ. ११९).

२५१२. इच्चेवन्ति यथावुत्तवचनीयनिदस्सनत्थोयं निपातसमुदायो. अङ्गवेकल्लताय बहुविधत्ता अनवसेसं वेकल्लप्पकारं सङ्गण्हितुमाह ‘‘इच्चेवमादिक’’न्ति.

परिसदूसककथावण्णना.

२५१४. पत्तचीवरन्ति एत्थ ‘‘सामणेरस्सा’’ति अधिकारतो लब्भति. अन्तो निक्खिपतोति ओवरकादीनं अन्तो निक्खिपन्तस्स. सब्बपयोगेसूति पत्तचीवरस्स आमसनादिसब्बपयोगेसु.

२५१५-६. दण्डकम्मं कत्वाति दण्डकम्मं योजेत्वा. दण्डेन्ति विनेन्ति एतेनाति दण्डो, सोयेव कत्तब्बत्ता कम्मन्ति ¶ दण्डकम्मं, आवरणादि. अनाचारस्स दुब्बचसामणेरस्स केवलं ¶ हितकामेन भिक्खुना दण्डकम्मं कत्वा दण्डकम्मं योजेत्वा यागुं वा भत्तं वा वा-सद्देन पत्तं वा चीवरं वा दस्सेत्वा ‘‘दण्डकम्मे आहटे त्वं इदं लच्छसि’’ इति भासितुं वट्टतीति योजना. किराति पदपूरणत्थे निपातो.

२५१७. धम्मसङ्गाहकत्थेरेहि ठपितदण्डकम्मं दस्सेतुमाह ‘‘अपराधानुरूपेना’’तिआदि. तं अपराधानुरूपदण्डकम्मं नाम वालिकासलिलादीनं आहरापनमेवाति योजेतब्बं. आदि-सद्देन दारुआदीनं आहरापनं गण्हाति. तञ्च खो ‘‘ओरमिस्सती’’ति अनुकम्पाय, न ‘‘नस्सिस्सति विब्भमिस्सती’’तिआदिनयप्पवत्तेन पापज्झासयेन.

२५१८-९. अकत्तब्बं दण्डकम्मं दस्सेतुमाह ‘‘सीसे वा’’तिआदि. सीसे वाति एत्थ ‘‘सामणेरस्सा’’ति अधिकारतो लब्भति. पासाणादीनीति एत्थ आदि-सद्देन इट्ठकादीनं गहणं. सामणेरं उण्हे पासाणे निपज्जापेतुं वा उण्हाय भूमिया निपज्जापेतुं वा उदकं पवेसेतुं वा भिक्खुनो न वट्टतीति योजना.

भगवता अनुञ्ञातदण्डकम्मं दस्सेतुमाह ‘‘इधा’’तिआदि. इधाति इमस्मिं दण्डकम्माधिकारे. आवरणमत्तन्ति ‘‘मा इध पाविसी’’ति निवारणमत्तं. पकासितन्ति ‘‘अनुजानामि, भिक्खवे, यत्थ वा वसति, यत्थ वा पटिक्कमति, तत्थ आवरणं कातु’’न्ति (महाव. १०७) भासितं.

‘‘यत्थ वा वसति, यत्थ वा पटिक्कमतीति यत्थ वसति वा पविसति वा, उभयेनापि अत्तनो परिवेणञ्च वस्सग्गेन पत्तसेनासनञ्च वुत्त’’न्ति (महाव. अट्ठ. १०७) अट्ठकथाय वुत्तत्ता याव योजितं ¶ दण्डकम्मं करोन्ति, ताव अत्तनो पुग्गलिकपरिवेणं वा वस्सग्गेन पत्तसेनासनं वा पविसितुं अदत्वा निवारणं आवरणं नाम. अट्ठकथायं ‘‘अत्तनो’’ति वचनं ये आवरणं करोन्ति, ते आचरियुपज्झाये सन्धाय वुत्तन्ति विञ्ञायति. केचि पनेत्थ ‘‘अत्तनो’’ति इदं यस्स आवरणं करोन्ति, तं सन्धाय वुत्तन्ति गहेत्वा तत्थ विनिच्छयं वदन्ति. केचि उभयथापि अत्थं गहेत्वा उभयत्थापि आवरणं कातब्बन्ति वदन्ति. वीमंसित्वा यमेत्थ युत्ततरं, तं गहेतब्बं.

निवारणकथावण्णना.

२५२०. पक्खो ¶ च ओपक्कमिको च आसित्तो चाति विग्गहो. एत्थ च ‘‘अनुपोसथे उपोसथं करोती’’तिआदीसु यथा उपोसथदिने कत्तब्बकम्मं ‘‘उपोसथो’’ति वुच्चति, तथा मासस्स पक्खे पण्डकभावमापज्जन्तो ‘‘पक्खो’’ति वुत्तो. अथ वा पक्खपण्डको पक्खो उत्तरपदलोपेन यथा ‘‘भीमसेनो भीमो’’ति. इदञ्च पापानुभावेन कण्हपक्खेयेव पण्डकभावमापज्जन्तस्स अधिवचनं. यथाह ‘‘अकुसलविपाकानुभावेन काळपक्खे काळपक्खे पण्डको होति, जुण्हपक्खे पनस्स परिळाहो वूपसम्मति, अयं पक्खपण्डको’’ति (महाव. अट्ठ. १०९).

यस्स उपक्कमेन बीजानि अपनीतानि, अयं ओपक्कमिकपण्डको. यस्स परेसं अङ्गजातं मुखेन गहेत्वा असुचिना आसित्तस्स परिळाहो वूपसम्मति, अयं आसित्तपण्डको. उसूयकोति यस्स परेसं अज्झाचारं पस्सतो उसूयाय उप्पन्नाय परिळाहो वूपसम्मति, अयं उसूयपण्डको. यो पटिसन्धियंयेव अभावको उप्पन्नो, अयं नपुंसकपण्डको.

२५२१. तेसूति ¶ तेसु पञ्चसु पण्डकेसु. ‘‘पक्खपण्डकस्स यस्मिंपक्खे पण्डको होति, तस्मिंयेवस्स पक्खे पब्बज्जा वारिता’’ति (महाव. अट्ठ. १०९) कुरुन्दियं वुत्तत्ता ‘‘तिण्णं निवारिता’’ति इदं तस्स पण्डकस्स पण्डकपक्खं सन्धाय वुत्तन्ति गहेतब्बं.

२५२२. ‘‘नासेतब्बो’’ति इदं लिङ्गनासनं सन्धाय वुत्तं. यथाह ‘‘सोपि लिङ्गनासनेनेव नासेतब्बो’’ति (महाव. अट्ठ. १०९). एस नयो उपरिपि ईदिसेसु ठानेसु.

पण्डककथावण्णना.

२५२३. थेनेतीति थेनो, लिङ्गस्स पब्बजितवेसस्स थेनो लिङ्गथेनो. संवासस्स भिक्खुवस्सगणनादिकस्स थेनो संवासथेनो. तदुभयस्स चाति तस्स लिङ्गस्स, संवासस्स च उभयस्स थेनोति सम्बन्धो. एस तिविधोपि थेय्यसंवासको नाम पवुच्चतीति योजना.

२५२४-६. तत्थ तेसु तीसु थेय्यसंवासकेसु यो सयमेव पब्बजित्वा भिक्खुवस्सानि न गण्हति, यथावुड्ढं वन्दनम्पि नेव गण्हति, अपि-सद्देन आसनेन नेव पटिबाहति उपोसथपवारणादीसु ¶ नेव सन्दिस्सतीति सङ्गण्हनतो तदुभयम्पि न करोति, अयं लिङ्गमत्तस्स पब्बजितवेसमत्तस्स थेनतो चोरिकाय गहणतो लिङ्गत्थेनो सियाति योजना.

यो च पब्बजितो हुत्वा भिक्खुवस्सानि गण्हति, सो यथावुड्ढवन्दनादिकं संवासं सादियन्तोव संवासत्थेनको मतोति योजना. यथाह – ‘‘भिक्खुवस्सगणनादिको हि सब्बोपि किरियभेदो इमस्मिं अत्थे ‘संवासो’ति वेदितब्बो’’ति (महाव. अट्ठ. ११०).

वुत्तनयोयेवाति ¶ उभिन्नं पच्चेकं वुत्तलक्खणमेव एतस्स लक्खणन्ति कत्वा वुत्तं. अयं तिविधोपि थेय्यसंवासको अनुपसम्पन्नो न उपसम्पादेतब्बो, उपसम्पन्नो नासेतब्बो, पुन पब्बज्जं याचन्तोपि न पब्बाजेतब्बो. ब्यतिरेकमुखेन थेय्यसंवासलक्खणं नियमेतुं अट्ठकथाय (महाव. अट्ठ. ११०) वुत्तगाथाद्वयं उदाहरन्तो आह ‘‘यथाह चा’’ति. यथा अट्ठकथाचरियो राजदुब्भिक्खादिगाथाद्वयमाह, तथायमत्थो ब्यतिरेकतो वेदितब्बोति अधिप्पायो.

२५२७-८. राजदुब्भिक्खकन्तार-रोगवेरिभयेहि वाति एत्थ भय-सद्दो पच्चेकं योजेतब्बो ‘‘राजभयेन दुब्भिक्खभयेना’’तिआदिना. चीवराहरणत्थं वाति अत्तना परिच्चत्तचीवरं पुन विहारं आहरणत्थाय. इध इमस्मिं सासने. संवासं नाधिवासेति, याव सो सुद्धमानसोति राजभयादीहि गहितलिङ्गताय सो सुद्धमानसो याव संवासं नाधिवासेतीति अत्थो.

यो हि राजभयादीहि विना केवलं भिक्खू वञ्चेत्वा तेहि सद्धिं वसितुकामताय लिङ्गं गण्हाति, सो असुद्धचित्तताय लिङ्गग्गहणेनेव थेय्यसंवासको नाम होति. अयं पन तादिसेन असुद्धचित्तेन भिक्खू वञ्चेतुकामताय अभावतो याव संवासं नाधिवासेति, ताव थेय्यसंवासको नाम न होति. तेनेव ‘‘राजभयादीहि गहितलिङ्गानं ‘गिही मं समणोति जानन्तू’ति वञ्चनाचित्ते सतिपि भिक्खूनं वञ्चेतुकामताय अभावा दोसो न जातो’’ति तीसुपि गण्ठिपदेसु वुत्तं.

केचि ¶ पन ‘‘वूपसन्तभयता इध सुद्धचित्तता’’ति वदन्ति, एवञ्च सति सो वूपसन्तभयो याव संवासं नाधिवासेति, ताव थेय्यसंवासको नाम न होतीति अयमत्थो विञ्ञायति. इमस्मिञ्च अत्थे विञ्ञायमाने अवूपसन्तभयस्स संवाससादियनेपि थेय्यसंवासकता ¶ न होतीति आपज्जेय्य, न च अट्ठकथायं अवूपसन्तभयस्स संवाससादियने अथेय्यसंवासकता दस्सिता. ‘‘सब्बपासण्डियभत्तानि भुञ्जन्तो’’ति च इमिना अवूपसन्तभयेनापि संवासं असादियन्तेनेव वसितब्बन्ति दीपेति. तेनेव तीसुपि गण्ठिपदेसु वुत्तं ‘‘यस्मा विहारं आगन्त्वा सङ्घिकं गण्हन्तस्स संवासं परिहरितुं दुक्करं, तस्मा ‘सब्बपासण्डियभत्तानि भुञ्जन्तो’ति इदं वुत्त’’न्ति. तस्मा राजभयादीहि गहितलिङ्गता चेत्थ सुद्धचित्तताति गहेतब्बं.

ताव एस थेय्यसंवासको नाम न वुच्चतीति योजना. अयमेत्थ सङ्खेपो, वित्थारो पन ‘‘तत्रायं वित्थारनयो’’ति अट्ठकथायं (महाव. अट्ठ. ११०) आगतनयेन वेदितब्बो.

थेय्यसंवासककथावण्णना.

२५२९-३०. यो उपसम्पन्नो भिक्खु ‘‘अहं तित्थियो भविस्स’’न्ति सलिङ्गेनेव अत्तनो भिक्खुवेसेनेव तित्थियानं उपस्सयं याति चेति सम्बन्धो. तित्थियेसु पक्कन्तको पविट्ठो तित्थियपक्कन्तको. तेसं लिङ्गे निस्सितेति तेसं तित्थियानं वेसे गहिते.

२५३१. ‘‘अहं तित्थियो भविस्स’’न्ति कुसचीरादिकं यो सयमेव निवासेति, सोपि पक्कन्तको तित्थियपक्कन्तको सियाति योजना.

२५३२-४. नग्गो ¶ तेसं आजीवकादीनं उपस्सयं गन्त्वाति योजना. केसे लुञ्चापेतीति अत्तनो केसे लुञ्चापेति. तेसं वतानि आदियति वाति योजना. वतानि आदियतीति उक्कुटिकप्पधानादीनि वा वतानि आदियति. तेसं तित्थियानं मोरपिञ्छादिकं लिङ्गं सञ्ञाणं सचे गण्हाति वा तेसं पब्बज्जं, लद्धिमेव वा सारतो वा एति उपगच्छति वाति योजना. ‘‘अयं पब्बज्जा सेट्ठाति सेट्ठभावं वा उपगच्छती’’ति (महाव. अट्ठ. ११० तित्थियपक्कन्तककथा) अट्ठकथायं वुत्तं. एस तित्थियपक्कन्तको होति एव, न पन विमुच्चति तित्थियपक्कन्तभावतो. नग्गस्स गच्छतोति ‘‘आजीवको भविस्स’’न्ति कासायादीनि अनादाय नग्गस्स आजीवकानं उपसंगच्छतो.

२५३५. थेय्यसंवासको ¶ अनुपसम्पन्नवसेन वुत्तो, नो उपसम्पन्नवसेन. इमिना ‘‘उपसम्पन्नो भिक्खु कूटवस्सं गण्हन्तोपि अस्समणो न होति. लिङ्गे सउस्साहो पाराजिकं आपज्जित्वा भिक्खुवस्सादीनि गणेन्तोपि थेय्यसंवासको न होती’’ति अट्ठकथागतविनिच्छयं दीपेति. तथा वुत्तोति योजना. ‘‘उपसम्पन्नभिक्खुना’’ति इमिना अनुपसम्पन्नं निवत्तेति. तेन च ‘‘सामणेरो सलिङ्गेन तित्थायतनं गतोपि पुन पब्बज्जञ्च उपसम्पदञ्च लभती’’ति कुरुन्दट्ठकथागतविनिच्छयं दस्सेति.

तित्थियपक्कन्तकस्स किं कातब्बन्ति? न पब्बाजेतब्बो, पब्बाजितोपि न उपसम्पादेतब्बो, उपसम्पादितो च कासायानि अपनेत्वा सेतकानि दत्वा गिहिभावं उपनेतब्बो. अयमत्थो च ‘‘तित्थियपक्कन्तको भिक्खवे अनुपसम्पन्नो ¶ न उपसम्पादेतब्बो, उपसम्पन्नो नासेतब्बो’’ति (महाव. ११०) पाळितो च ‘‘सो न केवलं न उपसम्पादेतब्बो, अथ खो न पब्बाजेतब्बोपी’’ति (महाव. अट्ठ. ११० तित्थियपक्कन्तककथा) अट्ठकथावचनतो च वेदितब्बो.

तित्थियपक्कन्तककथावण्णना.

२५३६. इधाति इमस्मिं पब्बज्जूपसम्पदाधिकारे. मनुस्सजातिकतो अञ्ञस्स तिरच्छानगतेयेव अन्तोगधत्तं दस्सेतुमाह ‘‘यक्खो सक्कोपि वा’’ति. तिरच्छानगतो वुत्तोति एत्थ इति-सद्दो लुत्तनिद्दिट्ठो. ‘‘तिरच्छानगतो, भिक्खवे, अनुपसम्पन्नो न उपसम्पादेतब्बो, उपसम्पन्नो नासेतब्बो’’ति (महाव. १११) वचनतो पब्बज्जापि उपलक्खणतो निवारितायेवाति कत्वा वुत्तं ‘‘पब्बाजेतुं न वट्टती’’ति. तेन तिरच्छानगतो च भगवतो अधिप्पायञ्ञूहि अट्ठकथाचरियेहि न पब्बाजेतब्बोति (महाव. अट्ठ. १११) वुत्तं.

तिरच्छानकथावण्णना.

२५३७. पञ्चानन्तरिके पोसेति मातुघातको, पितुघातको, अरहन्तघातको, लोहितुप्पादको, सङ्घभेदकोति आनन्तरियकम्मेहि समन्नागते पञ्च पुग्गले.

तत्थ ¶ मातुघातको (महाव. अट्ठ. ११२) नाम येन मनुस्सित्थिभूता जनिका माता सयम्पि मनुस्सजातिकेनेव सता सञ्चिच्च जीविता वोरोपिता, अयं आनन्तरियेन मातुघातककम्मेन मातुघातको, एतस्स पब्बज्जा च उपसम्पदा च पटिक्खित्ता. येन पन मनुस्सित्थिभूतापि अजनिका पोसावनिकमाता वा चूळमाता वा महामाता वा जनिकापि वा नमनुस्सित्थिभूता ¶ माताघातिता, तस्स पब्बज्जा न वारिता, न च आनन्तरियो होति. येन सयं तिरच्छानभूतेन मनुस्सित्थिभूता माता घातिता, सोपि आनन्तरियो न होति, तिरच्छानगतत्ता पनस्स पब्बज्जा पटिक्खित्ताव. पितुघातकेपि एसेव नयो. सचेपि हि वेसिया पुत्तो होति, ‘‘अयं मे पिता’’ति न जानाति, यस्स सम्भवेन निब्बत्तो, सो चे अनेन घातितो, ‘‘पितुघातको’’त्वेव सङ्ख्यं गच्छति, आनन्तरियञ्च फुसति.

अरहन्तघातकोपि मनुस्सअरहन्तवसेनेव वेदितब्बो. मनुस्सजातियञ्हि अन्तमसो अपब्बजितम्पि खीणासवं दारकं वा दारिकं वा सञ्चिच्च जीविता वोरोपेन्तो अरहन्तघातकोव होति, आनन्तरियञ्च फुसति, पब्बज्जा चस्स वारिता. अमनुस्सजातिकं पन अरहन्तं, मनुस्सजातिकं वा अवसेसं अरियपुग्गलं घातेत्वा आनन्तरियो न होति, पब्बज्जापिस्स न वारिता, कम्मं पन बलवं होति. तिरच्छानो मनुस्सअरहन्तम्पि घातेत्वा आनन्तरियो न होति, कम्मं पन भारियं.

यो देवदत्तो विय दुट्ठचित्तेन वधकचित्तेन तथागतस्स जीवमानकसरीरे खुद्दकमक्खिकाय पिवनकमत्तम्पि लोहितं उप्पादेति, अयं लोहितुप्पादको नाम, एतस्स पब्बज्जा च उपसम्पदा च वारिता. यो पन रोगवूपसमनत्थं जीवको विय सत्थेन फालेत्वा पूतिमंसञ्च लोहितञ्च नीहरित्वा फासुं करोति, बहुं सो पुञ्ञं पसवति.

यो देवदत्तो विय सासनं उद्धम्मं उब्बिनयं कत्वा चतुन्नं कम्मानं अञ्ञतरवसेन सङ्घं भिन्दति, अयं सङ्घभेदको नाम, एतस्स पब्बज्जा च उपसम्पदा च वारिता. ‘‘मातुघातको, भिक्खवे, अनुपसम्पन्नो न उपसम्पादेतब्बो, उपसम्पन्नो ¶ नासेतब्बो’’तिआदिकाय (महाव. ११२) पाळिया उपसम्पदापटिक्खेपो पब्बज्जापटिक्खेपस्स उपलक्खणन्ति आह ‘‘पब्बाजेन्तस्स दुक्कट’’न्ति.

उभतोब्यञ्जनञ्चेव ¶ भिक्खुनिदूसकञ्च तथा पब्बाजेन्तस्स दुक्कटन्ति सम्बन्धो. उभतोब्यञ्जनन्ति क-कारलोपेन निद्देसो. इत्थिनिमित्तुप्पादनकम्मतो च पुरिसनिमित्तुप्पादनकम्मतो च उभतो ब्यञ्जनमस्स अत्थीति उभतोब्यञ्जनको. सो दुविधो होति इत्थिउभतोब्यञ्जनको, पुरिसउभतोब्यञ्जनकोति.

तत्थ इत्थिउभतोब्यञ्जनकस्स (महाव. अट्ठ. ११६) इत्थिनिमित्तं पाकटं होति, पुरिसनिमित्तं पटिच्छन्नं. पुरिसउभतोब्यञ्जनकस्स पुरिसनिमित्तं पाकटं होति, इत्थिनिमित्तं पटिच्छन्नं. इत्थिउभतोब्यञ्जनकस्स इत्थीसु पुरिसत्तं करोन्तस्स इत्थिनिमित्तं पटिच्छन्नं होति, पुरिसनिमित्तं पाकटं होति. पुरिसउभतोब्यञ्जनकस्स पुरिसानं इत्थिभावं उपगच्छन्तस्स पुरिसनिमित्तं पटिच्छन्नं होति, इत्थिनिमित्तं पाकटं होति. इत्थिउभतोब्यञ्जनको सयञ्च गब्भं गण्हाति, परञ्च गब्भं गण्हापेति. पुरिसउभतोब्यञ्जनको सयं न गण्हाति, परं गण्हापेतीति इदमेतेसं नानाकरणं. इमस्स पन दुविधस्सापि उभतोब्यञ्जनकस्सनेव पब्बज्जा अत्थि, न उपसम्पदाति इदमिध सन्निट्ठानं वेदितब्बं.

यो पकतत्तं भिक्खुनिं (महाव. अट्ठ. ११५) तिण्णं मग्गानं अञ्ञतरस्मिं दूसेति, अयं भिक्खुनिदूसको नाम, एतस्स पब्बज्जा च उपसम्पदा च वारिता. यो पन कायसंसग्गेन सीलविनासं पापेति, तस्स पब्बज्जा च उपसम्पदा च न वारिता. बलक्कारेन पन ओदातवत्थवसनं कत्वा अनिच्छमानंयेव दूसेन्तोपि भिक्खुनिदूसकोयेव. बलक्कारेन पन ओदातवत्थवसनं ¶ कत्वा इच्छमानं दूसेन्तो भिक्खुनिदूसको न होति. कस्मा? यस्मा गिहिभावे सम्पटिच्छितमत्तेयेव सा अभिक्खुनी होति. सकिं सीलविपन्नं पन पच्छा दूसेन्तो नेव भिक्खुनिदूसको होति, पब्बज्जम्पि उपसम्पदम्पि लभति.

२५३८. पाळिअट्ठकथाविमुत्तं आचरियपरम्पराभतविनिच्छयं दस्सेतुमाह ‘‘एकतो’’तिआदि. ‘‘एकतो’’ति इमिना भिक्खुसङ्घस्सापि गहणं भवेय्याति तं परिवज्जेतुं ‘‘भिक्खुनीनं तु सन्तिके’’ति वुत्तं. एतेन तंदूसकस्स भब्बतं दीपेति. सो नेव भिक्खुनिदूसको सिया, ‘‘उपसम्पदं लभतेव च पब्बज्जं, सा च नेव पराजिता’’ति इदं दुतियगाथाय इधानेत्वा योजेतब्बं. केवलं भिक्खुनिसङ्घे उपसम्पन्ना नाम न होतीति अधिप्पायेनेव वुत्तं. ‘‘सा च नेव पराजिता’’ति इमिना तस्सा च पुन पब्बज्जूपसम्पदाय भब्बतं ¶ दीपेति. अयमत्थो अट्ठकथागण्ठिपदेपि वुत्तोयेव ‘‘भिक्खुनीनं वसेन एकतोउपसम्पन्नं दूसेत्वा भिक्खुनिदूसको न होति, पब्बज्जादीनि लभति, सा च पाराजिका न होतीति विनिच्छयो’’ति.

२५३९. ‘‘सिक्खमानासामणेरीसु च विप्पटिपज्जन्तो नेव भिक्खुनिदूसको होति, पब्बज्जम्पि उपसम्पदम्पि लभती’’ति (महाव. अट्ठ. ११५) अट्ठकथागतविनिच्छयं दस्सेतुमाह ‘‘सचे अनुपसम्पन्नदूसको’’ति. ‘‘उपसम्पदं लभतेव च पब्बज्ज’’न्ति इदं यथाठानेपि योजेतब्बं. सा च नेव पराजिताति इदं पन अट्ठकथाय अनागतत्ता च अनुपसम्पन्नाय उपसम्पन्नविकप्पाभावा च न योजेतब्बं. असति हि उपसम्पन्नविकप्पे पराजितविकप्पासङ्गहो पटिसेधो निरत्थकोति सा पब्बज्जूपसम्पदानं भब्बायेवाति दट्ठब्बा. इमे ¶ पन पण्डकादयो एकादस पुग्गला ‘‘पण्डको, भिक्खवे, अनुपसम्पन्नो न उपसम्पादेतब्बो, उपसम्पन्नो नासेतब्बो’’तिआदिवचनतो (महाव. १०९) अभब्बायेव, नेसं पब्बज्जा च उपसम्पदा च न रुहति, तस्मा न पब्बाजेतब्बा. जानित्वा पब्बाजेन्तो, उपसम्पादेन्तो च दुक्कटं आपज्जति. अजानित्वापि पब्बाजिता, उपसम्पादिता च जानित्वा लिङ्गनासनाय नासेतब्बा.

एकादसअभब्बपुग्गलकथावण्णना.

२५४०. नूपसम्पादनीयोवाति न उपसम्पादेतब्बोव. अनुपज्झायकोति असन्निहितउपज्झायो वा अग्गहितउपज्झायग्गहणो वा. करोतोति अनुपज्झायकं उपसम्पादयतो. दुक्कटं होतीति आचरियस्स च गणस्स च दुक्कटापत्ति होति. न कुप्पति सचे कतन्ति सचे अनुपज्झायकस्स उपसम्पदाकम्मं कतं भवेय्य, तं न कुप्पति समग्गेन सङ्घेन अकुप्पेन ठानारहेन कतत्ता.

२५४१. एकेति अभयगिरिवासिनो. ‘‘न गहेतब्बमेवा’’ति अट्ठकथाय दळ्हं वुत्तत्ता वुत्तं. तं वचनं. एत्थ च उपज्झाये असन्निहितेपि उपज्झायग्गहणे अकतेपि कम्मवाचायं पन उपज्झायकित्तनं कतंयेवाति दट्ठब्बं. अञ्ञथा ‘‘पुग्गलं न परामसती’’ति वुत्ताय कम्मविपत्तिया सम्भवतो कम्मं कुप्पेय्य. तेनेव ‘‘उपज्झायं अकित्तेत्वा’’ति अवत्वा ‘‘उपज्झं अग्गाहापेत्वा’’ति (महाव. अट्ठ. ११७) अट्ठकथायं वुत्तं. यथा च अपरिपुण्णपत्तचीवरस्स ¶ उपसम्पदाकाले कम्मवाचायं ‘‘परिपुण्णस्स पत्तचीवर’’न्ति असन्तं वत्थुं कित्तेत्वा कम्मवाचाय कतायपि उपसम्पदा रुहति, एवं ‘‘अयं बुद्धरक्खितो आयस्मतो धम्मरक्खितस्स उपसम्पदापेक्खो’’ति असन्तं पुग्गलं कित्तेत्वा केवलं सन्तपदनीहारेन कम्मवाचाय ¶ कताय उपसम्पदा रुहतियेवाति दट्ठब्बं. तेनेवाह ‘‘न कुप्पति सचे कत’’न्ति. ‘‘न, भिक्खवे, अनुपज्झायको उपसम्पादेतब्बो, यो उपसम्पादेय्य, आपत्ति दुक्कटस्सा’’ति (महाव. ११७) एत्तकमेव वत्वा ‘‘सो च पुग्गलो अनुपसम्पन्नो’’ति अवुत्तत्ता, कम्मविपत्तिलक्खणस्स च असम्भवतो ‘‘न गहेतब्बमेव त’’न्ति वुत्तं.

सेसेसु सब्बत्थपीति सङ्घगणपण्डकथेय्यसंवासकतित्थियपक्कन्तकतिरच्छानगतमातुपितुअरहन्तघातकभिक्खुनिदूसकसङ्घभेदकलोहितुप्पादकउभतोब्यञ्जनकसङ्खातेहि उपज्झायेहि उपसम्पादितेसु सब्बेसु तेरससु विकप्पेसु. वुत्तञ्हि भगवता ‘‘न, भिक्खवे, सङ्घेन उपज्झायेन उपसम्पादेतब्बो, यो उपसम्पादेय्य, आपत्ति दुक्कटस्सा’’तिआदि. न केवलं एतेसुयेव तेरससु, अथ ‘‘अपत्तकअचीवरकअचीवरपत्तकयाचितकपत्तयाचितकचीवरयाचितकपत्तचीवरका’’ति एतेसु छसु विकप्पेसु अयं नयो योजेतब्बोति. सेस-ग्गहणेन एतेसम्पि सङ्गहो. वुत्तञ्हेतं भगवता ‘‘न, भिक्खवे, अपत्तको उपसम्पादेतब्बो, यो उपसम्पादेय्य, आपत्ति दुक्कटस्सा’’तिआदि (महाव. ११८). अयं नयोति ‘‘न कुप्पति सचे कत’’न्ति वुत्तनयो.

२५४२. पञ्चवीसतीति चतुवीसति पाराजिका, ऊनवीसतिवस्सो चाति पञ्चवीसति. वुत्तञ्हि ‘‘न, भिक्खवे, जानं ऊनवीसतिवस्सो पुग्गलो उपसम्पादेतब्बो. यो उपसम्पादेय्य, यथाधम्मो कारेतब्बो’’ति (महाव. ९९). ओसारोति उपसम्पदासङ्खातो ओसारो. तेनेव चम्पेय्यक्खन्धके ‘‘तञ्चे सङ्घो ओसारेति, एकच्चो सोसारितो’’तिआदिपाठस्स (महाव. ३९६) अट्ठकथायं ‘‘ओसारेतीति उपसम्पदाकम्मवसेन ¶ पवेसेती’’ति (महाव. अट्ठ. ३९६) वुत्तं. ‘‘नासनारहो’’ति इमिना ‘‘पण्डको, भिक्खवे, अनुपसम्पन्नो न उपसम्पादेतब्बो’’तिआदिवचनतो (महाव. १०९) उपसम्पादितस्सापि सेतकानि दत्वा गिहिभावं पापेतब्बतं दीपेति.

२५४३. हत्थच्छिन्नादि ¶ बात्तिंसाति चम्पेय्यक्खन्धके –

‘‘हत्थच्छिन्नो, भिक्खवे, अप्पत्तो ओसारणं, तञ्चे सङ्घो ओसारेति, सोसारितो. पादच्छिन्नो…पे… हत्थपादच्छिन्नो… कण्णच्छिन्नो… नासच्छिन्नो… कण्णनासच्छिन्नो… अङ्गुलिच्छिन्नो… अळच्छिन्नो… कण्डरच्छिन्नो… फणहत्थको… खुज्जो… वामनो… गलगण्डी… लक्खणाहतो… कसाहतो… लिखितको… सीपदिको… पापरोगी… परिसदूसको… काणो… कुणी… खञ्जो… पक्खहतो… छिन्निरियापथो… जरादुब्बलो… अन्धो… मूगो… पधिरो… अन्धमूगो… अन्धपधिरो… मूगपधिरो… अन्धमूगपधिरो, भिक्खवे, अप्पत्तो ओसारणं, तञ्चे सङ्घो ओसारेति, सोसारितो’’ति (महाव. ३९६) बात्तिंस.

कुट्ठिआदि च तेरसाति महाखन्धके आगता –

‘‘कुट्ठिं गण्डिं किलासिञ्च, सोसिञ्च अपमारिकं;

तथा राजभटं चोरं, लिखितं कारभेदकं.

‘‘कसाहतं नरञ्चेव, पुरिसं लक्खणाहतं;

इणायिकञ्च दासञ्च, पब्बाजेन्तस्स दुक्कट’’न्ति. –

यथावुत्ता तेरस.

एवमेते पञ्चचत्तालीस वुत्ता. तेसु कसाहतलक्खणाहतलिखितकानं तिण्णं उभयत्थ आगतत्ता अग्गहितग्गहणेन द्वाचत्तालीसेव दट्ठब्बा.

‘‘हत्थच्छिन्नादिबात्तिंस ¶ , कुट्ठिआदि च तेरसा’’ति ये पुग्गला वुत्ता, तेसं. ओसारो अप्पत्तोति उपसम्पदाअननुरूपाति अत्थो. कतो चेति अकत्तब्बभावमसल्लक्खन्तेहि भिक्खूहि यदि उपसम्पदासङ्खातो ओसारो कतो भवेय्य. रूहतीति सिज्झति, ते पुग्गला उपसम्पन्नायेवाति अधिप्पायो. आचरियादयो पन आपत्तिं आपज्जन्ति. यथाह चम्पेय्यक्खन्धकट्ठकथायं ¶ – ‘‘हत्थच्छिन्नादयो पन द्वत्तिंस सुओसारिता, उपसम्पादिता उपसम्पन्नाव होन्ति, न ते लब्भा किञ्चि वत्तुं. आचरियुपज्झाया, पन कारकसङ्घो च सातिसारा, न कोचि आपत्तितो मुच्चती’’ति (महाव. अट्ठ. ३९६).

२५४४-५. ‘‘अनुजानामि, भिक्खवे, द्वे तयो एकानुस्सावने कातुं, तञ्च खो एकेन उपज्झायेना’’ति (महाव. १२३) वचनतो सचे तयो आचरिया एकसीमायं निसिन्ना एकस्स उपज्झायस्स नामं गहेत्वा तिण्णं उपसम्पदापेक्खानं विसुं विसुंयेव कम्मवाचं एकक्खणे वत्वा तयो उपसम्पादेन्ति, वट्टतीति दस्सेतुमाह ‘‘एकूपज्झायको होती’’तिआदि.

‘‘तयो’’ति इदं अट्ठुप्पत्तियं ‘‘सम्बहुलानं थेरान’’न्ति (महाव. १२३) आगतत्ता वुत्तं. एकतोति एकक्खणे. अनुसावनन्ति कम्मवाचं. ओसारेत्वाति वत्वा. कम्मन्ति उपसम्पदाकम्मं. न च कुप्पतीति न विपज्जति. कप्पतीति अविपज्जनतो एवं कातुं वट्टति.

२५४६-७. ‘‘अनुजानामि, भिक्खवे, द्वे तयो एकानुस्सावने कातु’’न्ति (महाव. १२३) वचनतो सचे एको आचरियो ‘‘बुद्धरक्खितो च धम्मरक्खितो च सङ्घरक्खितो च आयस्मतो सारिपुत्तस्स उपसम्पदापेक्खो’’ति उपसम्पदापेक्खानं ¶ पच्चेकं नामं गहेत्वा कम्मवाचं वत्वा द्वे तयोपि उपसम्पादेति, वट्टतीति दस्सेतुमाह ‘‘एकूपज्झायको होती’’तिआदि.

उपसम्पदं अपेक्खन्तीति ‘‘उपसम्पदापेक्खा’’ति उपसम्पज्जनका वुच्चन्ति. तेसं नामन्ति तेसं उपसम्पज्जन्तानञ्चेव उपज्झायानञ्च नामं. अनुपुब्बेन सावेत्वाति योजना, ‘‘बुद्धरक्खितो’’तिआदिना यथावुत्तनयेन कम्मवाचायं सकट्ठाने वत्वा सावेत्वाति वुत्तं होति. तेनाति एकेन आचरियेन. एकतोति द्वे तयो जने एकतो कत्वा. अनुसावेत्वाति कम्मवाचं वत्वा. कतं उपसम्पदाकम्मं.

२५४८. अञ्ञमञ्ञानुसावेत्वाति ¶ अञ्ञमञ्ञस्स नामं अनुसावेत्वा, गहेत्वाति अत्थो, अञ्ञमञ्ञस्स नामं गहेत्वा कम्मवाचं वत्वाति वुत्तं होति.

२५४९. तं विधिं दस्सेतुमाह ‘‘सुमनो’’तिआदि. सुमनोति आचरियो. तिस्सथेरस्स उपज्झायस्स. सिस्सकं सद्धिविहारिकं. अनुसावेतीति कम्मवाचं सावेति. तिस्सोति पठमं उपज्झायभूतस्स गहणं. सुमनथेरस्साति पठमं आचरियत्थेरमाह. इमे द्वे एकसीमायं निसीदित्वा एकक्खणे अञ्ञमञ्ञस्स सद्धिविहारिकानं कम्मवाचं वदन्ता अत्तनो अत्तनो सद्धिविहारिकं पटिच्च उपज्झायापि होन्ति, अन्तेवासिके पटिच्च आचरियापि होन्ति, अञ्ञमञ्ञस्स गणपूरका च होन्तीति वुत्तं होति. यथाह –

‘‘सचे पन नानाचरिया नानाउपज्झाया होन्ति, तिस्सत्थेरो सुमनत्थेरस्स सद्धिविहारिकं, सुमनत्थेरो तिस्सत्थेरस्स सद्धिविहारिकं अनुस्सावेति ¶ , अञ्ञमञ्ञञ्च गणपूरका होन्ति, वट्टती’’ति (महाव. अट्ठ. १२३).

२५५०. इधाति इमस्मिं उपसम्पदाधिकारे. पटिक्खित्ताति ‘‘न त्वेव नानुपज्झायेना’’ति (महाव. १२३) पटिसिद्धा. लोकियेहि आदिच्चपुत्तो मनूति यो पठमकप्पिको मनुस्सानं आदिराजा वुच्चति, तस्स वंसे जातत्ता आदिच्चो बन्धु एतस्साति आदिच्चबन्धु, भगवा, तेन.

महाखन्धककथावण्णना.

उपोसथक्खन्धककथावण्णना

२५५१-२. या एकादसहि सीमाविपत्तीहि वज्जिता तिसम्पत्तिसंयुता निमित्तेन निमित्तं घटेत्वा सम्मता, सा अयं बद्धसीमा नाम सियाति योजना. तत्थ अतिखुद्दका, अतिमहती, खण्डनिमित्ता, छायानिमित्ता, अनिमित्ता, बहिसीमे ठितसम्मता, नदिया सम्मता, समुद्दे सम्मता, जातस्सरे सम्मता, सीमाय सीमं सम्भिन्दन्तेन सम्मता, सीमाय सीमं अज्झोत्थरन्तेन सम्मताति ‘‘इमेहि एकादसहि आकारेहि सीमतो कम्मानि विपज्जन्ती’’ति ¶ (परि. ४८६) वचनतो इमा एकादस विपत्तिसीमायो नाम, विपन्नसीमाति वुत्तं होति.

तत्थ अतिखुद्दका नाम यत्थ एकवीसति भिक्खू निसीदितुं न सक्कोन्ति. अतिमहती नाम या अन्तमसो केसग्गमत्तेनापि तियोजनं अतिक्कमित्वा सम्मता. खण्डनिमित्ता नाम अघटितनिमित्ता वुच्चति. पुरत्थिमाय दिसाय निमित्तं कित्तेत्वा अनुक्कमेनेव दक्खिणाय, पच्छिमाय, उत्तराय दिसाय कित्तेत्वा पुन पुरत्थिमाय दिसाय पुब्बकित्तितं ¶ पटिकित्तेत्वा ठपेतुं वट्टति, एवं अखण्डनिमित्ता होति. सचे पन अनुक्कमेन आहरित्वा उत्तराय दिसाय निमित्तं कित्तेत्वा तत्थेव ठपेति, खण्डनिमित्ता नाम होति. अपरापि खण्डनिमित्ता नाम या अनिमित्तुपगं तचसाररुक्खं वा खाणुकं वा पंसुपुञ्जवालिकापुञ्जानं वा अञ्ञतरं अन्तरा एकं निमित्तं कत्वा सम्मता. छायानिमित्ता नाम पब्बतच्छायादीनं यं किञ्चि छायं निमित्तं कत्वा सम्मता. अनिमित्ता नाम सब्बेन सब्बं निमित्तानि अकित्तेत्वा सम्मता. बहिसीमे ठितसम्मता नाम निमित्तानि कित्तेत्वा निमित्तानं बहि ठितेन सम्मता.

नदिया समुद्दे जातस्सरे सम्मता नाम एतेसु नदिआदीसु सम्मता. सा हि एवं सम्मतापि ‘‘सब्बा, भिक्खवे, नदी असीमा, सब्बो समुद्दो असीमो, सब्बो जातस्सरो असीमो’’ति (महाव. १४८) वचनतो असम्मताव होति. सीमाय सीमं सम्भिन्दन्तेन सम्मता नाम अत्तनो सीमाय परेसं सीमं सम्भिन्दन्तेन सम्मता. सचे हि पोराणकस्स विहारस्स पुरत्थिमाय दिसाय अम्बो चेव जम्बू चाति द्वे रुक्खा अञ्ञमञ्ञं संसट्ठविटपा होन्ति, तेसु अम्बस्स पच्छिमदिसाभागे जम्बू, विहारसीमा च जम्बुं अन्तो कत्वा अम्बं कित्तेत्वा बद्धा होति, अथ पच्छा तस्स विहारस्स पुरत्थिमाय दिसाय विहारे कते सीमं बन्धन्ता भिक्खू तं अम्बं अन्तो कत्वा जम्बुं कित्तेत्वा बन्धन्ति, सीमाय सीमं सम्भिन्ना होति. सीमाय सीमं अज्झोत्थरन्तेन सम्मता नाम अत्तनो सीमाय परेसं सीमं अज्झोत्थरन्तेन सम्मता. सचे हि परेसं बद्धसीमं सकलं वा तस्सा पदेसं वा अन्तो कत्वा अत्तनो सीमं सम्मन्नति, सीमाय सीमा अज्झोत्थरिता नाम होतीति. इति इमाहि एकादसहि विपत्तिसीमाहि वज्जिताति अत्थो.

तिसम्पत्तिसंयुताति ¶ निमित्तसम्पत्ति, परिसासम्पत्ति, कम्मवाचासम्पत्तीति इमाहि तीहि सम्पत्तीहि ¶ समन्नागता. तत्थ निमित्तसम्पत्तियुत्ता नाम ‘‘पब्बतनिमित्तं, पासाणनिमित्तं, वननिमित्तं, रुक्खनिमित्तं, मग्गनिमित्तं, वम्मिकनिमित्तं, नदिनिमित्तं, उदकनिमित्त’’न्ति (महाव. १३८) एवं वुत्तेसु अट्ठसु निमित्तेसु तस्मिं तस्मिं दिसाभागे यथालद्धानि निमित्तुपगानि निमित्तानि ‘‘पुरत्थिमाय दिसाय किं निमित्तं? पब्बतो, भन्ते, एसो पब्बतो निमित्त’’न्तिआदिना नयेन सम्मा कित्तेत्वा सम्मता.

परिसासम्पत्तियुत्ता नाम सब्बन्तिमेन परिच्छेदेन चतूहि भिक्खूहि सन्निपतित्वा यावतिका तस्मिं गामखेत्ते बद्धसीमं वा नदिसमुद्दजातस्सरे वा अनोक्कमित्वा ठिता भिक्खू, ते सब्बे हत्थपासे वा कत्वा, छन्दं वा आहरित्वा सम्मता.

कम्मवाचासम्पत्तियुत्ता नाम ‘‘सुणातु मे, भन्ते सङ्घो, यावता समन्ता निमित्ता कित्तिता’’तिआदिना (महाव. १३९) नयेन वुत्ताय परिसुद्धाय ञत्तिदुतियकम्मवाचाय सम्मता. एवं एकादस विपत्तिसीमायो अतिक्कमित्वा तिविधसम्पत्तियुत्ता निमित्तेन निमित्तं घटेत्वा सम्मता सीमा बद्धसीमाति वेदितब्बा.

२५५३-४. खण्डसमानसंवासअविप्पवासा आदयो आदिभूता, आदिम्हि वा यासं सीमानं ता खण्डसमानसंवासाविप्पवासादी, तासं, ताहि वा पभेदो खण्डसमानसंवासादिभेदो, ततो खण्डसमानसंवासादिभेदतो, खण्डसीमा, समानसंवाससीमा, अविप्पवाससीमाति इमासं सीमानं एताहि वा करणभूताहि, हेतुभूताहि वा जातेन विभागेनाति वुत्तं होति. समानसंवासाविप्पवासानमन्तरे खण्डा परिच्छिन्ना ताहि असङ्करा ¶ सीमा खण्डसीमा नाम. समानसंवासेहि भिक्खूहि एकतो उपोसथादिको संवासो एत्थ करीयतीति समानसंवासा नाम. अविप्पवासाय लक्खणं ‘‘बन्धित्वा’’तिआदिना वक्खति. इति बद्धा तिधा वुत्ताति एवं बद्धसीमा तिप्पभेदा वुत्ता.

उदकुक्खेपाति हेतुम्हि निस्सक्कवचनं. सत्तन्नं अब्भन्तरानं समाहारा सत्तब्भन्तरा, ततोपि च. अबद्धापि तिविधाति सम्बन्धो. तत्थाति तासु तीसु अबद्धसीमासु. गामपरिच्छेदोति सब्बदिसासु सीमं परिच्छिन्दित्वा ‘‘इमस्स पदेसस्स एत्तको करो’’ति एवं करेन नियमितो गामप्पदेसो. यथाह – ‘‘यत्तके पदेसे तस्स गामस्स भोजका बलिं हरन्ति ¶ , सो पदेसो अप्पो वा होतु महन्तो वा, ‘गामसीमा’त्वेव सङ्ख्यं गच्छति. यम्पि एकस्मिंयेव गामक्खेत्ते एकं पदेसं ‘अयं विसुं गामो होतू’ति परिच्छिन्दित्वा राजा कस्सचि देति, सोपि विसुंगामसीमा होतियेवा’’ति (महाव. अट्ठ. १४७).

‘‘गामपरिच्छेदो’’ति इमिना च नगरपरिच्छेदो च सङ्गहितो. यथाह – ‘‘गामग्गहणेन चेत्थ नगरम्पि गहितमेव होती’’ति (महाव. अट्ठ. १४७). निगमसीमाय विसुंयेव वुत्तत्ता तस्सा इध सङ्गहो न वत्तब्बो. वुत्तञ्हि पाळियं ‘‘यं गामं वा निगमं वा उपनिस्साय विहरति. या तस्स वा गामस्स गामसीमा, निगमस्स वा निगमसीमा, अयं तत्थ समानसंवासा एकुपोसथा’’ति (महाव. १४७). इमिस्सा विसुंयेव लक्खणस्स वुत्तत्ता गामसीमालक्खणेनेव उपलक्खिता.

२५५५. ‘‘जातस्सरे’’तिआदीसु जातस्सरादीनं लक्खणं एवं वेदितब्बं – यो पन केनचि खणित्वा अकतो सयंजातो सोब्भो समन्ततो आगतेन उदकेन पूरितो ¶ तिट्ठति, यत्थ नदियं वक्खमानप्पकारे वस्सकाले उदकं सन्तिट्ठति, अयं जातस्सरो नाम. योपि नदिं वा समुद्दं वा भिन्दित्वा निक्खन्तउदकेन खणितो सोब्भो एतं लक्खणं पापुणाति, अयम्पि जातस्सरोयेव. समुद्दो पाकटोयेव.

यस्सा धम्मिकानं राजूनं काले अन्वड्ढमासं अनुदसाहं अनुपञ्चाहं अनतिक्कमित्वा देवे वस्सन्ते वलाहकेसु विगतमत्तेसु सोतं पच्छिज्जति, अयं नदिसङ्ख्यं न गच्छति. यस्सा पन ईदिसे सुवुट्ठिकाले वस्सानस्स चतुमासे सोतं न पच्छिज्जति, यत्थ तित्थेन वा अतित्थेन वा सिक्खाकरणीये आगतलक्खणेन तिमण्डलं पटिच्छादेत्वा अन्तरवासकं अनुक्खिपित्वा उत्तरन्तिया भिक्खुनिया एकद्वङ्गुलमत्तम्पि अन्तरवासको तेमियति, अयं समुद्दं वा पविसतु तळाकं वा, पभवतो पट्ठाय नदी नाम.

समन्ततोति समन्ता. मज्झिमस्साति थाममज्झिमस्स पुरिसस्स. उदकुक्खेपोति वक्खमानेन नयेन थामप्पमाणेन खित्तस्स उदकस्स वा वालुकाय वा पतितट्ठानेन परिच्छिन्नो अन्तोपदेसो. यथा अक्खधुत्ता दारुगुळं खिपन्ति, एवं उदकं वा वालुकं वा हत्थेन गहेत्वा थाममज्झिमेन पुरिसेन सब्बथामेन खिपितब्बं, तत्थ यत्थ एवं खित्तं उदकं वा ¶ वालुका वा पतति, अयं उदकुक्खेपो नामाति. उदकुक्खेपसञ्ञितोति ‘‘उदकुक्खेपो’’ति सल्लक्खितो.

२५५६. अगामके अरञ्ञेति विञ्झाटविसदिसे गामरहिते महाअरञ्ञे. समन्ततो सत्तेवब्भन्तराति अत्तनो ठितट्ठानतो परिक्खिपित्वा सत्तेव अब्भन्तरा यस्सा सीमाय परिच्छेदो, अयं सत्तब्भन्तरनामिका सीमा नाम.

२५५७. गुळुक्खेपनयेनाति ¶ अक्खधुत्तकानं दारुगुळुक्खिपनाकारेन. उदकुक्खेपकाति उदकुक्खेपसदिसवसेन.

२५५८. इमासं द्विन्नं सीमानं वड्ढनक्कमं दस्सेतुमाह ‘‘अब्भन्तरूदकुक्खेपा, ठितोकासा परं सियु’’न्ति. ठितोकासा परन्ति परिसाय ठितट्ठानतो परं, परिसपरियन्ततो पट्ठाय सत्तब्भन्तरा च मिनितब्बा, उदकुक्खेपो च कातब्बोति अत्थो.

२५५९-६०. अन्तोपरिच्छेदेति उदकुक्खेपेन वा सत्तब्भन्तरेहि वा परिच्छिन्नोकासस्स अन्तो. हत्थपासं विहाय ठितो वा परं तत्तकं परिच्छेदं अनतिक्कम्म ठितो वाति योजना, सीमन्तरिकत्थाय ठपेतब्बं एकं उदकुक्खेपं वा सत्तब्भन्तरं एव वा अनतिक्कम्म ठितोति अत्थो.

कम्मं विकोपेतीति अन्तो ठितो कम्मस्स वग्गभावकरणतो, बहि तत्तकं पदेसं अनतिक्कमित्वा ठितो अञ्ञस्स सङ्घस्स गणपूरणभावं गच्छन्तो सीमाय सङ्करभावकरणेन कम्मं विकोपेति. इति यस्मा अट्ठकथानयो, तस्मा सो अन्तोसीमाय हत्थपासं विजहित्वा ठितो हत्थपासे वा कातब्बो, सीमन्तरिकत्थाय परिच्छिन्नोकासतो बहि वा कातब्बो. तत्तकं परिच्छेदं अनतिक्कमित्वा ठितो यथाठितोव सचे अञ्ञस्स कम्मस्स गणपूरको न होति, कम्मं न कोपेतीति गहेतब्बं.

२५६१-२. सण्ठानन्ति तिकोटिसण्ठानं. निमित्तन्ति पब्बतादिनिमित्तं. दिसकित्तनन्ति ‘‘पुरत्थिमाय दिसाय किं निमित्त’’न्तिआदिना दिसाकित्तनं. पमाणन्ति तियोजनपरमं पमाणं ¶ . सोधेत्वाति यस्मिं गामक्खेत्ते सीमं बन्धति, तत्थ वसन्ते ¶ उपसम्पन्नभिक्खू बद्धसीमविहारे वसन्ते सीमाय बहि गन्तुं अदत्वा, अबद्धसीमविहारे वसन्ते हत्थपासं उपनेतब्बे हत्थपासं नेत्वा अवसेसे बहिसीमाय कत्वा सब्बमग्गेसु आरक्खं विदहित्वाति वुत्तं होति. सीमन्ति खण्डसीमं.

कीदिसन्ति आह ‘‘तिकोण’’न्तिआदि. पणवूपमन्ति पणवसण्ठानं मज्झे संखित्तं उभयकोटिया वित्थतं. ‘‘वितानाकारं धनुकाकार’’न्ति आकार-सद्दो पच्चेकं योजेतब्बो. धनुकाकारन्ति आरोपितधनुसण्ठानं, ‘‘मुदिङ्गूपमं सकटूपम’’न्ति उपमा-सद्दो पच्चेकं योजेतब्बो. मुदिङ्गूपमन्ति मज्झे वित्थतं उभयकोटिया तनुकं तुरियविसेसं मुदिङ्गन्ति वदन्ति, तादिसन्ति अत्थो. सीमं बन्धेय्याति योजना.

२५६३. पब्बतादिनिमित्तुपगनिमित्तानि दस्सेतुमाह ‘‘पब्बत’’न्तिआदि. इति अट्ठ निमित्तानि दीपयेति योजना. तत्रेवं सङ्खेपतो निमित्तुपगता वेदितब्बा – सुद्धपंसुसुद्धपासाणउभयमिस्सकवसेन (कङ्खा. अट्ठ. निदानवण्णना; महाव. अट्ठ. १३८) तिविधोपि हि पब्बतो हत्थिप्पमाणतो पट्ठाय उद्धं निमित्तुपगो, ततो ओमकतरो न वट्टति. अन्तोसारेहि वा अन्तोसारमिस्सकेहि वा रुक्खेहि चतुपञ्चरुक्खमत्तम्पि वनं निमित्तुपगं, ततो ऊनतरं न वट्टति. पासाणनिमित्ते अयगुळम्पि पासाणसङ्ख्यमेव गच्छति, तस्मा यो कोचि पासाणो उक्कंसेन हत्थिप्पमाणतो ओमकतरं आदिं कत्वा हेट्ठिमपरिच्छेदेन द्वत्तिंसपलगुळपिण्डपरिमाणो निमित्तुपगो, न ततो खुद्दकतरो. पिट्ठिपासाणो पन अतिमहन्तोपि वट्टति. रुक्खो जीवन्तोयेव अन्तोसारो भूमियं पतिट्ठितो अन्तमसो उब्बेधतो अट्ठङ्गुलो ¶ परिणाहतो सूचिदण्डप्पमाणोपि निमित्तुपगो, न ततो ओरं वट्टति. मग्गो जङ्घमग्गो वा होतु सकटमग्गो वा, यो विनिविज्झित्वा द्वे तीणि गामक्खेत्तानि गच्छति, तादिसो जङ्घसकटसत्थेहि वळञ्जियमानोयेव निमित्तुपगो, अवळञ्जो न वट्टति. हेट्ठिमपरिच्छेदेन तंदिवसं जातो अट्ठङ्गुलुब्बेधो गोविसाणमत्तोपि वम्मिको निमित्तुपगो, ततो ओरं न वट्टति. उदकं यं असन्दमानं आवाटपोक्खरणितळाकजातस्सरलोणिसमुद्दादीसु ठितं, तं आदिं कत्वा अन्तमसो तङ्खणंयेव पथवियं खते आवाटे घटेहि आहरित्वा पूरितम्पि याव कम्मवाचापरियोसाना सण्ठहनकं निमित्तुपगं, इतरं सन्दमानकं, वुत्तपरिच्छेदकालं ¶ अतिट्ठन्तं, भाजनगतं वा न वट्टति. या अबद्धसीमालक्खणे नदी वुत्ता, सा निमित्तुपगा, अञ्ञा न वट्टतीति.

२५६४. तेसूति निद्धारणे भुम्मं. तीणीति निद्धारितब्बदस्सनं, इमिना एकं वा द्वे वा निमित्तानि न वट्टन्तीति दस्सेति. यथाह – ‘‘सा एवं सम्मन्नित्वा बज्झमाना एकेन, द्वीहि वा निमित्तेहि अबद्धा होती’’ति (महाव. अट्ठ. १३८). सतेनापीति एत्थ पि-सद्दो सम्भावनायं दट्ठब्बो, तेन वीसतिया, तिंसाय वा निमित्तेहि वत्तब्बमेव नत्थीति दीपेति.

२५६५. तियोजनं परं उक्कट्ठो परिच्छेदो एतिस्साति तियोजनपरा. ‘‘वीसती’’तिआदीनं सङ्ख्याने, सङ्ख्येय्ये च वत्तनतो इध सङ्ख्याने वत्तमानं वीसति-सद्दं गहेत्वा एकवीसति भिक्खूनन्ति भिन्नाधिकरणनिद्देसो कतोति दट्ठब्बं. ‘‘एकवीसति’’न्ति वत्तब्बे गाथाबन्धवसेन निग्गहीतलोपो, वीसतिवग्गकरणीयपरमत्ता सङ्घकम्मस्स कम्मारहेन सद्धिं भिक्खूनं एकवीसतिं गण्हन्तीति अत्थो, इदञ्च ¶ निसिन्नानं वसेन वुत्तं. हेट्ठिमन्ततो हि यत्थ एकवीसति भिक्खू निसीदितुं सक्कोन्ति, तत्तके पदेसे सीमं बन्धितुं वट्टतीति.

२५६६. या उक्कट्ठायपि या च हेट्ठिमायपि केसग्गमत्ततोपि अधिका वा ऊना वा, एता द्वेपि सीमायो ‘‘असीमा’’ति आदिच्चबन्धुना वुत्ताति योजना.

२५६७. समन्ततो सब्बमेव निमित्तं कित्तेत्वाति पुब्बदिसानुदिसादीसु परितो सब्बदिसासु यथालद्धं निमित्तोपगं सब्बनिमित्तं ‘‘विनयधरेन पुच्छितब्बं ‘पुरत्थिमाय दिसाय किं निमित्त’न्ति? ‘पब्बतो, भन्ते’ति. पुन विनयधरेन ‘एसो पब्बतो निमित्त’’न्तिआदिना (महाव. अट्ठ. १३८) अट्ठकथायं वुत्तनयेन निमित्तेन निमित्तं घटेत्वा कित्तेत्वा. ञत्ति दुतिया यस्साति विग्गहो, ‘‘सुणातु मे, भन्ते सङ्घो, यावता समन्ता निमित्ता कित्तिता’’तिआदिना (महाव. १३९) पदभाजने वुत्तेन ञत्तिदुतियेन कम्मेनाति अत्थो. अरहति पहोति विनयधरोति अधिप्पायो.

२५६८. बन्धित्वाति यथावुत्तलक्खणनयेन समानसंवाससीमं पठमं बन्धित्वा. अनन्तरन्ति किच्चन्तरेन ब्यवहितं अकत्वा, कालक्खेपं अकत्वाति वुत्तं होति, सीमं समूहनितुकामानं ¶ पच्चत्तिकानं ओकासं अदत्वाति अधिप्पायो. पच्छाति समानसंवाससम्मुतितो पच्छा. चीवराविप्पवासकं सम्मन्नित्वान या बद्धा, सा ‘‘अविप्पवासा’’ति वुच्चतीति योजना.

तत्थ चीवराविप्पवासकं सम्मन्नित्वान या बद्धाति ‘‘सुणातु मे, भन्ते सङ्घो, या सा सङ्घेन सीमा सम्मता समानसंवासा ¶ एकुपोसथा…पे… ठपेत्वा गामञ्च गामूपचारञ्च, खमति सङ्घस्स, तस्मा तुण्ही, एवमेतं धारयामी’’ति (महाव. १४४) वुत्तनयेन चीवरेन अविप्पवासं सम्मन्नित्वा या बद्धा. सा अविप्पवासाति वुच्चतीति तत्थ वसन्तानं भिक्खूनं चीवरेन विप्पवासनिमित्तापत्तिया अभावतो तथा वुच्चति, ‘‘अविप्पवाससीमा’’ति वुच्चतीति वुत्तं होति.

२५६९. ‘‘या काचि नदिलक्खणप्पत्ता नदी निमित्तानि कित्तेत्वा ‘एतं बद्धसीमं करोमा’ति कतापि असीमाव होती’’तिआदिकं (महाव. अट्ठ. १४७) अट्ठकथानयं दस्सेतुमाह ‘‘नदी…पे… न वोत्थरती’’ति, न पत्थरति सीमाभावेन ब्यापिनी न होतीति अत्थो. तेनेवाति येन न वोत्थरति, तेनेव कारणेन. अब्रवीति ‘‘सब्बा, भिक्खवे, नदी असीमा, सब्बो समुद्दो असीमो, सब्बो जातस्सरो असीमो’’ति (महाव. १४७) अवोच.

सीमाकथावण्णना.

२५७०. अट्ठमियापि उपोसथवोहारत्ता दिनवसेन उपोसथानं अतिरेकत्तेपि इध अधिप्पेतेयेव उपोसथे गहेत्वा आह ‘‘नवेवा’’ति.

२५७१-३. ते सरूपतो दस्सेतुमाह ‘‘चातुद्दसो…पे… कम्मेनुपोसथा’’ति. चतुद्दसन्नं पूरणो चातुद्दसो. पन्नरसन्नं पूरणो पन्नरसो. यदा पन कोसम्बक्खन्धके (महाव. ४५१ आदयो) आगतनयेन भिन्ने सङ्घे ओसारिते तस्मिं भिक्खुस्मिं सङ्घो तस्स वत्थुस्स वूपसमाय सङ्घसामग्गिं करोति, तदा ‘‘तावदेव उपोसथो कातब्बो, पातिमोक्खं उद्दिसितब्ब’’न्ति (महाव. ४७५) वचनतो ठपेत्वा चातुद्दसपन्नरसे ¶ अञ्ञोपि यो कोचि दिवसो सामग्गी उपोसथोति. एत्थ इति-सद्दो लुत्तनिद्दिट्ठो. चातुद्दसो, पन्नरसो, सामग्गी च उपोसथोति एते तयोपि उपोसथा दिवसेनेव निद्दिट्ठा दिवसेनेव वुत्ताति योजना.

सङ्घेउपोसथोति ¶ सङ्घेन कातब्बउपोसथो. गणेपुग्गलुपोसथोति एत्थापि एसेव नयो. साध्यसाधनलक्खणस्स सम्बन्धस्स लब्भमानत्ता ‘‘सङ्घे’’तिआदीसु सामिवचनप्पसङ्गे भुम्मनिद्देसो. उपोसथो साध्यो कम्मभावतो, सङ्घगणपुग्गला साधनं कारकभावतो.

सुत्तस्स उद्देसो सुत्तुद्देसो, सुत्तुद्देसोति अभिधानं नामं यस्स सो सुत्तुद्देसाभिधानो. कम्मेनाति किच्चवसेन.

२५७४. ‘‘अधिट्ठान’’न्ति वाच्चलिङ्गमपेक्खित्वा ‘‘निद्दिट्ठ’’न्ति नपुंसकनिद्देसो. वाच्चलिङ्गा हि तब्बादयोति पातिमोक्खो निद्दिट्ठो, पारिसुद्धि निद्दिट्ठाति पुमित्थिलिङ्गेन योजेतब्बा.

२५७५. वुत्ताति ‘‘पञ्चिमे, भिक्खवे, पातिमोक्खुद्देसा, निदानं उद्दिसित्वा अवसेसं सुतेन सावेतब्बं, अयं पठमो पातिमोक्खुद्देसो’’तिआदिना (महाव. १५०) देसिता, सयञ्च तेसञ्च उद्देसे सङ्खेपतो दस्सेतुमाह ‘‘निदान’’न्तिआदि. सावेतब्बन्ति एत्थ ‘‘सुतेना’’ति सेसो. सेसकन्ति अनुद्दिट्ठट्ठानं –

‘‘सुणातु मे, भन्ते सङ्घो…पे… आविकता हिस्स फासु होतीति इमं निदानं उद्दिसित्वा ‘उद्दिट्ठं खो ¶ आयस्मन्तो निदानं, तत्थायस्मन्ते पुच्छामि कच्चित्थ परिसुद्धा, दुतियम्पि पुच्छामि…पे… एवमेतं धारयामी’ति वत्वा ‘उद्दिट्ठं खो आयस्मन्तो निदानं. सुता खो पनायस्मन्तेहि चत्तारो पाराजिका धम्मा…पे… अविवदमानेहि सिक्खितब्ब’’न्ति (महाव. अट्ठ. १५०) –

अट्ठकथाय वुत्तनयेन अवसेसं सुतेन सावेतब्बं.

२५७६. सेसेसुपीति उद्दिट्ठापेक्खाय सेसेसु पाराजिकुद्देसादीसुपि. ‘‘अयमेव नयो ञेय्यो’’ति सामञ्ञेन वुत्तेपि ‘‘वित्थारेनेव पञ्चमो’’ति वचनतो वित्थारुद्देसे ‘‘सावेतब्बं तु सेसक’’न्ति अयं नयो न लब्भति. ‘‘सावेतब्बं तु सेसक’’न्ति वचनतो पाराजिकुद्देसादीसु यस्मिं विप्पकते अन्तरायो उप्पज्जति, तेन सद्धिं अवसेसं सुतेन सावेतब्बं. निदानुद्देसे पन ¶ अनुद्दिट्ठे सुतेन सावेतब्बं नाम नत्थि. भिक्खुनिपातिमोक्खे अनियतुद्देसस्स परिहीनत्ता ‘‘भिक्खुनीनञ्च चत्तारो’’ति वुत्तं. उद्देसा नविमे पनाति भिक्खूनं पञ्च, भिक्खुनीनं चत्तारोति उभतोपातिमोक्खे इमे नव उद्देसा वुत्ताति अत्थो.

२५७७. उपोसथेति सङ्घुपोसथे. अन्तरायन्ति राजन्तरायादिकं दसविधं अन्तरायं. यथाह – ‘‘राजन्तरायो चोरन्तरायो अग्यन्तरायो उदकन्तरायो मनुस्सन्तरायो अमनुस्सन्तरायो वाळन्तरायो सरीसपन्तरायो जीवितन्तरायो ब्रह्मचरियन्तरायो’’ति (महाव. १५०).

तत्थ सचे भिक्खूसु ‘‘उपोसथं करिस्सामा’’ति (महाव. अट्ठ. १५०) निसिन्नेसु राजा आगच्छति, अयं राजन्तरायो. चोरा आगच्छन्ति ¶ , अयं चोरन्तरायो. दवदाहो आगच्छति वा, आवासे वा अग्गि उट्ठहति, अयं अग्यन्तरायो. मेघो वा उट्ठेति, ओघो वा आगच्छति, अयं उदकन्तरायो. बहू मनुस्सा आगच्छन्ति, अयं मनुस्सन्तरायो. भिक्खुं यक्खो गण्हाति, अयं अमनुस्सन्तरायो. ब्यग्घादयो चण्डमिगा आगच्छन्ति, अयं वाळन्तरायो. भिक्खुं सप्पादयो डंसन्ति, अयं सरीसपन्तरायो. भिक्खु गिलानो वा होति, कालं वा करोति, वेरिनो वा तं मारेतुं गण्हन्ति, अयं जीवितन्तरायो. मनुस्सा एकं वा बहुं वा भिक्खू ब्रह्मचरिया चावेतुकामा गण्हन्ति, अयं ब्रह्मचरियन्तरायो.

‘‘चेवा’’ति इमिना अन्तरायेव अन्तरायसञ्ञिना वित्थारुद्देसे अकतेपि अनापत्तीति दीपेति. अनुद्देसोति वित्थारेन अनुद्देसो. निवारितोति ‘‘न, भिक्खवे, असति अन्तराये संखित्तेन पातिमोक्खं उद्दिसितब्ब’’न्तिआदिना (महाव. १५०) पटिसिद्धो. इमिना ‘‘अनुजानामि, भिक्खवे, सति अन्तराये संखित्तेन पातिमोक्खं उद्दिसितु’’न्ति (महाव. १५०) इदम्पि विभावितं होति.

२५७८. तस्साति पातिमोक्खस्स. इस्सरणस्स हेतुमाह ‘‘‘थेराधेय्य’न्ति पाठतो’’ति. थेराधेय्यन्ति थेराधीनं, थेरायत्तन्ति अत्थो. पाठतोति पाळिवचनतो. ‘‘यो तत्थ भिक्खु ब्यत्तो पटिबलो, तस्साधेय्यं पातिमोक्ख’’न्ति (महाव. १५५) वचनतो आह ‘‘अवत्तन्तेना’’तिआदि. अवत्तन्तेनाति अन्तमसो द्वेपि उद्देसे उद्दिसितुं असक्कोन्तेन. थेरेन यो ¶ अज्झिट्ठो, एवमज्झिट्ठस्स यस्स पन थेरस्स, नवस्स, मज्झिमस्स वा सो पातिमोक्खो ¶ वत्तति पगुणो होति, सो इस्सरोति सम्बन्धो.

अज्झिट्ठोति ‘‘त्वं, आवुसो, पातिमोक्खं उद्दिसा’’ति आणत्तो, इमिना अनाणत्तस्स उद्दिसितुं सामत्थिया सतिपि अनिस्सरभावो दीपितो होति. यथाह – ‘‘सचे थेरस्स पञ्च वा चत्तारो वा तयो वा पातिमोक्खुद्देसा नागच्छन्ति, द्वे पन अखण्डा सुविसदा वाचुग्गता होन्ति, थेरायत्तोव पातिमोक्खो. सचे पन एत्तकम्पि विसदं कातुं न सक्कोति, ब्यत्तस्स भिक्खुनो आयत्तो होती’’ति (महाव. अट्ठ. १५५).

२५७९. उद्दिसन्तेति पातिमोक्खुद्देसके पातिमोक्खं उद्दिसन्ते. समा वाति आवासिकेहि गणनेन समा वा. अप्पा वाति ऊना वा. आगच्छन्ति सचे पनाति सचे पन आगन्तुका भिक्खू आगच्छन्ति. सेसकन्ति अनुद्दिट्ठट्ठानं.

२५८०. उद्दिट्ठमत्तेति उद्दिट्ठक्खणेयेव कथारम्भतो पुब्बमेव. ‘‘वा’’ति इदं एत्थापि योजेतब्बं, इमिना अवुत्तं ‘‘अवुट्ठिताय वा’’ति इमं विकप्पं सम्पिण्डेति. अवुट्ठिताय परिसायाति च भिक्खुपरिसाय अञ्ञमञ्ञं सुखकथाय निसिन्नाययेवाति अत्थो. परिसायाति एत्थ ‘‘एकच्चाया’’ति च ‘‘सब्बाया’’ति च सेसो. भिक्खूनं एकच्चाय परिसाय वुट्ठिताय वा सब्बाय परिसाय वुट्ठिताय वाति योजना. तेसन्ति वुत्तप्पकारानं आवासिकानं. मूलेति सन्तिके. पारिसुद्धि कातब्बाति योजना. ‘‘इध पन, भिक्खवे…पे… आगच्छन्ति बहुतरा, तेहि, भिक्खवे, भिक्खूहि पुन पातिमोक्खं उद्दिसितब्ब’’न्ति वुत्तनयं दस्सेतुमाह ‘‘सचे बहू’’ति. एत्थ ‘‘पुन पातिमोक्खं उद्दिसितब्ब’’न्ति सेसो. सब्बविकप्पेसु पुब्बकिच्चं कत्वा ¶ पुन पातिमोक्खं उद्दिसितब्बन्ति अत्थो. अयं पनेत्थ सेसविनिच्छयो –

‘‘पन्नरसोवासिकानं, इतरानं सचेतरो;

समानेतरेनुवत्तन्तु, पुरिमानं सचेधिका;

पुरिमा अनुवत्तन्तु, तेसं सेसेप्ययं नयो.

‘‘पाटिपदोवासिकानं ¶ ,

इतरानं उपोसथो;

समथोकानं सामग्गिं,

मूलट्ठा देन्तु कामतो.

बहि गन्त्वान कातब्बो,

नो चे देन्ति उपोसथो;

देय्यानिच्छाय सामग्गी,

बहूसु बहि वा वजे.

‘‘पाटिपदेगन्तुकानं, एवमेव अयं नयो;

सावेय्य सुत्तं सञ्चिच्च, अस्सावेन्तस्स दुक्कटन्ति.

२५८१. विनिद्दिट्ठस्साति आणत्तस्स, इमिना इतरेसं अनापत्तीति दीपेति. इध ‘‘अगिलानस्सा’’ति सेसो. थेरेन आणापेन्तेन ‘‘किञ्चि कम्मं करोन्तो वा सदाकालमेव एको वा भारनित्थरणको वा सरभाणकधम्मकथिकादीसु अञ्ञतरो वा न उपोसथागारसम्मज्जनत्थं आणापेतब्बो, अवसेसा पन वारेन आणापेतब्बा’’ति (महाव. अट्ठ. १५९) अट्ठकथाय वुत्तविधिना आणापेतब्बो. सचे आणत्तो सम्मज्जनिं तावकालिकम्पि न लभति, साखाभङ्गं कप्पियं कारेत्वा सम्मज्जितब्बं. तम्पि अलभन्तस्स लद्धकप्पियं होति.

आसनपञ्ञापनाणत्तियम्पि ¶ वुत्तनयेनेव आणापेतब्बो. आणापेन्तेन च सचे उपोसथागारे आसनानि नत्थि, सङ्घिकावासतोपि आहरित्वा पञ्ञपेत्वा पुन आहरितब्बानि. आसनेसु असति कटसारकेपि तट्टिकायोपि पञ्ञपेतुं वट्टति, तट्टिकासुपि असति साखाभङ्गानि कप्पियं कारेत्वा पञ्ञपेतब्बानि, कप्पियकारकं अलभन्तस्स लद्धकप्पियं होति.

पदीपकरणेपि वुत्तनयेनेव आणापेतब्बो. आणापेन्तेन च ‘‘असुकस्मिं नाम ओकासे तेलं वा वट्टि वा कपल्लिका वा अत्थि, तं गहेत्वा करोही’’ति वत्तब्बो. सचे तेलादीनि नत्थि ¶ , भिक्खाचारेनपि परियेसितब्बानि. परियेसित्वा अलभन्तस्स लद्धकप्पियं होति. अपिच कपाले अग्गिपि जालेतब्बो.

२५८२. दीपन्ति एत्थ ‘‘जालेत्वा’’ति सेसो. अथ वा ‘‘कत्वा’’ति इमिना च योजेतब्बं. गणञत्तिं ठपेत्वाति ‘‘सुणन्तु मे, आयस्मन्ता, अज्जुपोसथो पन्नरसो, यदायस्मन्तानं पत्तकल्लं, मयं अञ्ञमञ्ञं पारिसुद्धिउपोसथं करेय्यामा’’ति एवं गणञत्तिं निक्खिपित्वा. कत्तब्बो तीहुपोसथोति तीहि भिक्खूहि उपोसथो कातब्बो. तीसु थेरेन एकंसं उत्तरासङ्गं कत्वा उक्कुटिकं निसीदित्वा अञ्जलिं पग्गहेत्वा द्वे एवं तिक्खत्तुमेव वत्तब्बो ‘‘परिसुद्धो अहं, आवुसो, ‘परिसुद्धो’ति मं धारेथा’’ति (महाव. १६८). दुतियेन, ततियेन च यथाक्कमं ‘‘परिसुद्धो अहं, भन्ते, ‘परिसुद्धो’ति मं धारेथा’’ति तिक्खत्तुमेव वत्तब्बं.

२५८३. पुब्बकिच्चादीनि कत्वा ञत्तिं अट्ठपेत्वा थेरेन नवो एवं तिक्खत्तुमेव वत्तब्बो ‘‘परिसुद्धो अहं, आवुसो ¶ , ‘परिसुद्धो’ति मं धारेही’’ति (महाव. १६८), नवेन थेरोपि ‘‘परिसुद्धो अहं, भन्ते, ‘परिसुद्धो’ति मं धारेथा’’ति (महाव. १६८) तिक्खत्तुं वत्तब्बो. इमस्मिं पन वारे ञत्तिया अट्ठपनञ्च ‘‘धारेही’’ति एकवचननिद्देसो चाति एत्तकोव विसेसोति तं अनादियित्वा पुग्गलेन कातब्बं उपोसथविधिं दस्सेतुमाह ‘‘पुब्बकिच्चं समापेत्वा, अधिट्ठेय्य पनेकको’’ति. अधिट्ठेय्याति ‘‘अज्ज मे उपोसथो, पन्नरसो’ति वा ‘चातुद्दसो’ति वा अधिट्ठामी’’ति अधिट्ठेय्य. अस्साति अवसाने वुत्तपुग्गलं सन्धाय एकवचननिद्देसो. यथावुत्तो सङ्घोपि तयोपि द्वेपि अत्तनो अत्तनो अनुञ्ञातं उपोसथं अन्तरायं विना सचे न करोन्ति, एवमेव आपत्तिमापज्जन्तीति वेदितब्बो.

२५८४-५. इदानि ‘‘चत्तारिमानि, भिक्खवे, उपोसथकम्मानि, अधम्मेन वग्गं उपोसथकम्म’’न्तिआदिना (महाव. १४९) नयेन वुत्तं कम्मचतुक्कं दस्सेतुमाह ‘‘अधम्मेन च वग्गेना’’तिआदि. अधम्मेन वग्गेन कम्मं, अधम्मतो समग्गेन कम्मं, धम्मेन वग्गेन कम्मं, धम्मतो समग्गेन कम्मन्ति एतानि चत्तारि उपोसथस्स कम्मानीति जिनो अब्रवीति योजना. चतूस्वपि पनेतेसूति एतेसु चतूसु कम्मेसु पन. चतुत्थन्ति ‘‘समग्गेन च धम्मतो’’ति वुत्तं चतुत्थं उपोसथकम्मं ‘‘धम्मकम्म’’न्ति अधिप्पेतं.

२५८६-७. तानि ¶ कम्मानि विभावेतुमाह ‘‘अधम्मेनिधा’’तिआदि. इध इमस्मिं सासने एत्थ एतेसु चतूसु उपोसथेसु. अधम्मेन वग्गो उपोसथो कतमोति कथेतुकामतापुच्छा. यत्थ यस्सं एकसीमायं भिक्खुनो चत्तारो वसन्तीति योजना.

तत्र ¶ एकस्स पारिसुद्धिं आनयित्वा ते तयो जना पारिसुद्धिं उपोसथं करोन्ति चे, एवं कतो उपोसथो अधम्मो वग्गुपोसथो नामाति योजना, एकसीमट्ठेहि चतूहि सङ्घुपोसथे कातब्बे गणुपोसथस्स कतत्ता अधम्मो च सङ्घमज्झं विना गणमज्झं पारिसुद्धिया अगमनतो तस्स हत्थपासं अनुपगमनेन वग्गो च होतीति अत्थो.

२५८८. अधम्मेन समग्गोति एत्थ ‘‘उपोसथो कतमो’’ति अनुवत्तेतब्बं. ‘‘भिक्खुनो एकतो’’ति पदच्छेदो. ‘‘होति अधम्मिको’’ति पदच्छेदो. चतूहि समग्गेहि सङ्घुपोसथे कातब्बे गणुपोसथकरणं अधम्मो, हत्थपासुपगमनतो समग्गो होति.

२५८९-९०. यो उपोसथो धम्मेन वग्गो होति, सो कतमोति योजना. यत्थ यस्सं एकसीमायं चत्तारो भिक्खुनो वसन्ति, तत्र एकस्स पारिसुद्धिं आनयित्वा ते तयो जना पातिमोक्खं उद्दिसन्ते चे, धम्मेन वग्गो उपोसथो होतीति योजना. एकसीमट्ठेहि चतूहि सङ्घुपोसथस्स कतत्ता धम्मो, एकस्स हत्थपासं अनुपगमनेन वग्गो च होतीति अत्थो.

२५९१. यो धम्मतो समग्गो, सो कतमोति योजना. इध इमस्मिं सासने चत्तारो भिक्खुनो एकतो पातिमोक्खं उद्दिसन्ति चे, अयं धम्मतो समग्गो उपोसथोति मतो अधिप्पेतोति योजना. चतूहि सङ्घुपोसथस्स कतत्ता धम्मो, एकस्सापि हत्थपासं अविजहनेन समग्गोति अधिप्पायो.

२५९२. वग्गे सङ्घे वग्गोति सञ्ञिनो, समग्गे च सङ्घे वग्गोति सञ्ञिनो उभयत्थ विमतिस्स वा उपोसथं करोन्तस्स दुक्कटं आपत्ति होतीति योजना.

२५९३. भेदाधिप्पायतोति ¶ ‘‘नस्सन्तेते, विनस्सन्तेते, को तेहि अत्थो’’ति एवं भेदपुरेक्खारताय ‘‘उपोसथं करोन्तस्सा’’ति आनेत्वा योजेतब्बं. तस्स भिक्खुनो थुल्लच्चयं होति ¶ अकुसलबलवताय च थुल्लच्चयं होतीति. यथाह – ‘‘भेदपुरेक्खारपन्नरसके अकुसलबलवताय थुल्लच्चयं वुत्त’’न्ति (महाव. अट्ठ. १७६). वग्गे वा समग्गे वा सङ्घे समग्गो इति सञ्ञिनो उपोसथं करोन्तस्स अनापत्तीति योजना. अवसेसो पनेत्थ वत्तब्बविनिच्छयो पवारणविनिच्छयावसाने ‘‘पारिसुद्धिप्पदानेना’’तिआदीहि (वि. वि. २६४२) एकतो वत्तुमिच्छन्तेन न वुत्तो.

२५९४-५. ‘‘उक्खित्तेना’’तिआदिकानि करणवचनन्तानि पदानि ‘‘सहा’’ति इमिना सद्धिं ‘‘उपोसथो न कातब्बो’’ति पदेन पच्चेकं योजेतब्बानि. उक्खित्तेनाति आपत्तिया अदस्सने उक्खित्तको, आपत्तिया अप्पटिकम्मे उक्खित्तको, पापिकाय दिट्ठिया अप्पटिनिस्सग्गे उक्खित्तकोति तिविधेन उक्खित्तेन. एतेसु हि तिविधे उक्खित्तके सति उपोसथं करोन्तो सङ्घो पाचित्तियं आपज्जति.

‘‘गहट्ठेना’’ति इमिना तित्थियोपि सङ्गहितो. सेसेहि सहधम्मिहीति भिक्खुनी, सिक्खमाना, सामणेरो, सामणेरीति चतूहि सहधम्मिकेहि. चुतनिक्खित्तसिक्खेहीति एत्थ चुतो च निक्खित्तसिक्खो चाति विग्गहो. चुतो नाम अन्तिमवत्थुं अज्झापन्नको. निक्खित्तसिक्खो नाम सिक्खापच्चक्खातको.

एकादसहीति पण्डको, थेय्यसंवासको, तित्थियपक्कन्तको, तिरच्छानगतो, मातुघातको, पितुघातको, अरहन्तघातको, भिक्खुनिदूसको, सङ्घभेदको ¶ , लोहितुप्पादको, उभतोब्यञ्जनकोति इमेहि एकादसहि अभब्बेहि.

सभागापत्तिकेन वा सह उपोसथो न कातब्बो, पारिवुत्थेन छन्देन उपोसथो न कातब्बो, करोतो दुक्कटं होतीति योजना. एवं उक्खित्तवज्जितेसु सब्बविकप्पेसु दुक्कटमेव वेदितब्बं. ‘‘यं द्वेपि जना विकालभोजनादिना सभागवत्थुना आपत्तिं आपज्जन्ति, एवरूपा वत्थुसभागा ‘सभागा’ति वुच्चती’’ति (महाव. अट्ठ. १६९) वचनतो ‘‘सभागापत्ती’’ति वत्थुसभागापत्तियेव गहेतब्बा.

उपोसथदिवसे सब्बोव सङ्घो सचे सभागापत्तिं आपन्नो होति,

‘‘इध ¶ पन, भिक्खवे, अञ्ञतरस्मिं आवासे तदहुपोसथे सब्बो सङ्घो सभागं आपत्तिं आपन्नो होति, तेहि, भिक्खवे, भिक्खूहि एको भिक्खु सामन्ता आवासा सज्जुकं पाहेतब्बो ‘गच्छावुसो, तं आपत्तिं पटिकरित्वा आगच्छ, मयं ते सन्तिके तं आपत्तिं पटिकरिस्सामा’ति. एवञ्चेतं लभेथ, इच्चेतं कुसलं. नो चे लभेथ, ब्यत्तेन भिक्खुना पटिबलेन सङ्घो ञापेतब्बो – ‘सुणातु मे, भन्ते सङ्घो, अयं सब्बो सङ्घो सभागं आपत्तिं आपन्नो, यदा अञ्ञं भिक्खुं सुद्धं अनापत्तिकं पस्सिस्सति, तदा तस्स सन्तिके तं आपत्तिं पटिकरिस्सती’’ति (महाव. १७१) च,

वेमतिको चे होति,

‘‘सुणातु मे, भन्ते सङ्घो, अयं सब्बो सङ्घो सभागाय आपत्तिया वेमतिको, यदा निब्बेमतिको ¶ भविस्सति, तदा तं आपत्तिं पटिकरिस्सती’’ति (महाव. १७१) च,

वुत्तनयेन उपोसथो कातब्बो.

एत्थ च सज्झुकन्ति तदहेवागमनत्थाय. गणुपोसथादीसुपि एसेव नयो. वुत्तञ्हि अट्ठकथागण्ठिपदे ‘‘यथा सङ्घो सभागं आपत्तिं आपज्जित्वा सुद्धं अलभित्वा ‘यदा सुद्धं पस्सिस्सति, तदा तस्स सन्तिके तं आपत्तिं पटिकरिस्सती’ति वत्वा उपोसथं कातुं लभति, एवं द्वीहिपि अञ्ञमञ्ञं आरोचेत्वा उपोसथं कातुं वट्टति. एकेनापि ‘परिसुद्धं लभित्वा पटिकरिस्सामी’ति आभोगं कत्वा कातुं वट्टति किरा’’ति. किराति चेत्थ अनुस्सवत्थे दट्ठब्बो, न पनारुचियं.

पारिवुत्थेन छन्देनाति छन्दं आहरित्वा कम्मं कातुं निसिन्नेनपि ‘‘असुभलक्खणतादिना केनचि कारणेन न करिस्सामी’’ति विस्सट्ठे छन्दे सचे पुन करिस्सति, पुन छन्दपारिसुद्धिं आहरित्वा कातब्बं. यथाह – ‘‘एतस्मिं पारिवासिये पुन छन्दपारिसुद्धिं अनानेत्वा कम्मं कातुं न वट्टती’’ति (महाव. अट्ठ. ११६७).

२५९६. अदेसेत्वा ¶ पनापत्तिन्ति आपन्नं आपत्तिं अदेसेत्वा. नाविकत्वान वेमतिन्ति ‘‘अहं, भन्ते, सम्बहुलासु आपत्तीसु वेमतिको, यदा निब्बेमतिको भविस्सामि, तदा ता आपत्तियो पटिकरिस्सामी’’ति विमतिं अनारोचेत्वा. ‘‘यदा निब्बेमतिकोति एत्थ सचे पनेस निब्बेमतिको न होति, वत्थुं कित्तेत्वाव देसेतुं वट्टती’’ति (महाव. अट्ठ. १६९) अन्धकट्ठकथायं वुत्तं. तत्रायं देसनाविधि – सचे मेघच्छन्ने सूरिये ‘‘कालो नु खो, विकालो’’ति ¶ वेमतिको भुञ्जति, तेन भिक्खुना ‘‘अहं, भन्ते, वेमतिको भुञ्जिं, सचे कालो अत्थि, सम्बहुला दुक्कटा आपत्तियो आपन्नोम्हि. नो चे अत्थि, सम्बहुला पाचित्तियापत्तियो आपन्नोम्ही’’ति एवं वत्थुं कित्तेत्वा ‘‘अहं, भन्ते, या तस्मिं वत्थुस्मिं सम्बहुला दुक्कटा वा पाचित्तिया वा आपत्तियो आपन्नो, ता तुम्हमूले पटिदेसेमी’’ति वत्तब्बं. एसेव नयो सब्बापत्तीसूति.

गण्ठिपदेसु पनेवं विनिच्छयो वुत्तो – ‘‘अहं, आवुसो, इत्थन्नामाय आपत्तिया वेमतिको, यदा निब्बेमतिको भविस्सामि, तदा तं आपत्तिं पटिकरिस्सामी’ति वत्वा उपोसथो कातब्बो, पातिमोक्खं सोतब्ब’’न्ति (महाव. १७०) वचनतो याव निब्बेमतिको न होति, ताव सभागापत्तिं पटिग्गहेतुं न लभति. अञ्ञेसञ्च कम्मानं परिसुद्धो नाम होति. ‘‘पुन निब्बेमतिको हुत्वा देसेतब्बमेवा’’ति (कङ्खा. अभि. टी. निदानवण्णना) नेव पाळियं, न अट्ठकथायं अत्थि, देसिते पन न दोसो. ‘‘इतो वुट्ठहित्वा तं आपत्तिं पटिकरिस्सामी’’ति (महाव. १७०) एत्थापि एसेव नयोति.

२५९७. उपोसथेति दिनकारककत्तब्बाकारवसेन पन्नरसी, सङ्घुपोसथो, सुत्तुद्देसोति इमेहि तीहि लक्खणेहि समन्नागते उपोसथे. सभिक्खुम्हा च आवासाति ‘‘यस्मिं उपोसथे किच्च’’न्तिआदिना वक्खमानप्पकारा सभिक्खुका आवासा. इध ‘‘अनावासा’’ति सेसो. आवासो वा अनावासो वाति एत्थ ‘‘अभिक्खुको वा नानासंवासकेहि सभिक्खुको वा’’ति च ¶ न गन्तब्बोति एत्थ ‘‘अञ्ञत्र सङ्घेन अञ्ञत्र अन्तराया’’ति च सेसो. ‘‘अनावासो’’ति उदोसितादयो वुत्ता. भिक्खुना उपोसथे सभिक्खुम्हा आवासा वा अनावासा वा अभिक्खुको वा नानासंवासकेहि सभिक्खुको वा आवासो वा अनावासो वा अञ्ञत्र सङ्घेन अञ्ञत्र अन्तराया कुदाचनं कदाचिपि न गन्तब्बोति योजना.

२५९८. यस्मिं ¶ आवासे पन उपोसथे किच्चं सचे वत्तति, सो आवासो ‘‘सभिक्खुको नामा’’ति पकासितोति योजना, इमिना सचे यत्थ उपोसथो न वत्तति, सो सन्तेसुपि भिक्खूसु अभिक्खुको नामाति दीपेति.

२५९९. उपोसथस्स पयोजनं, तप्पसङ्गेन पवारणाय च निद्धारेतुकामतायाह ‘‘उपोसथो किमत्थाया’’तिआदि.

२६००. पटिक्कोसेय्याति निवारेय्य. अदेन्तस्सपि दुक्कटन्ति एत्थ ‘‘कोपेतुं धम्मिकं कम्म’’न्ति आनेत्वा सम्बन्धितब्बं.

२६०१. सो चाति (कङ्खा. अट्ठ. निदानवण्णना) चतुवग्गादिप्पभेदेन पञ्चविधो सो सङ्घो च. हेट्ठिमपरिच्छेदेन कत्तब्बकम्मानं वसेन परिदीपितो, न छब्बग्गादीनं कातुं अयुत्ततादस्सनवसेन.

२६०२. चतुवग्गादिभेदनिबन्धनं कम्मं दस्सेतुमाह ‘‘पवारण’’न्तिआदि. पवारणञ्च तथा अब्भानञ्च उपसम्पदञ्च ठपेत्वा चतुवग्गेन अकत्तब्बं कम्मं न विज्जतीति योजना.

२६०३. मज्झदेसे ¶ उपसम्पदा मज्झदेसूपसम्पदा, तं. अब्भानं, मज्झदेसूपसम्पदञ्च विना पञ्चवग्गेन सब्बं कम्मं कातुं वट्टतीति योजना.

२६०४. किञ्चिपि कम्मं न न कत्तब्बन्ति योजना, सब्बम्पि कम्मं कत्तब्बमेवाति अत्थो. द्वे पटिसेधा पकतत्थं गमयन्तीति. वीसतिवग्गेन सङ्घेन सब्बेसम्पि कम्मानं कत्तब्बभावे किमत्थं अतिरेकवीसतिवग्गस्स गहणन्ति आह ‘‘ऊने दोसोति ञापेतुं, नाधिके अतिरेकता’’ति. यथावुत्ते चतुब्बिधे सङ्घे गणनतो ऊने दोसो होति, अधिके दोसो न होतीति ञापेतुं अतिरेकता दस्सिता, अतिरेकवीसतिवग्गसङ्घो दस्सितोति अधिप्पायो.

२६०५. चतुवग्गेन कत्तब्बे पकतत्ताव चत्तारो कम्मप्पत्ताति दीपिताति योजना. सेसा ¶ पकतत्ता छन्दारहाति सेसो. पकतत्ताति अनुक्खित्ता चेव अन्तिमवत्थुं अनज्झापन्ना च गहेतब्बा. सेसेसु चाति पञ्चवग्गादीसुपि.

२६०६. चतुवग्गादिकत्तब्बकम्मं असंवासपुग्गलं गणपूरं कत्वा करोन्तस्स दुक्कटं होति. न केवलं दुक्कटमेव, कतञ्च कम्मं कुप्पतीति योजना.

२६०७. परिवासादीति एत्थ आदि-सद्देन मूलायपटिकस्सनादीनं गहणं. तत्रट्ठन्ति परिवासादीसु ठितं. ‘‘तथा’’ति इमिना ‘‘कतं कुप्पति दुक्कट’’न्ति इदं अनुवत्तेति. सेसं तूति परिवासादिकम्मतो अञ्ञं पन उपोसथादिकम्मं ¶ . वट्टतीति ते पारिवासिकादयो गणपूरके कत्वा कातुं वट्टति.

उपोसथक्खन्धककथावण्णना.

वस्सूपनायिकक्खन्धककथावण्णना

२६०८. वस्सूपनायिका वुत्ताति सेसो. पच्छिमा चाति एत्थ इति-सद्दो निदस्सने. वस्सूपनायिकाति वस्सूपगमना. आलयो, वचीभेदो वा कातब्बो उपगच्छताति इमिना वस्सूपगमनप्पकारो दस्सितो. उपगच्छता आलयो कत्तब्बो, वचीभेदो वा कत्तब्बोति सम्बन्धो. उपगच्छन्तेन च सेनासने असति ‘‘इध वस्सं वसिस्सामी’’ति चित्तुप्पादमत्तं वा कातब्बं, सेनासने सति ‘‘इमस्मिं विहारे इमं तेमासं वस्सं उपेमी’’ति च ‘‘इध वस्सं उपेमी’’ति च वचीभेदो वा कातब्बोति अत्थो.

२६०९. जानं वस्सूपगमनं अनुपगच्छतो वापीति योजना. तेमासन्ति एत्थ ‘‘पुरिमं वा पच्छिमं वा’’ति सेसो. चरन्तस्सापीति एत्थ ‘‘चारिक’’न्ति सेसो. पुरिमं वा तेमासं पच्छिमं वा तेमासं अवसित्वाव चारिकं चरन्तस्सापि दुक्कटन्ति योजना. तेमासन्ति अच्चन्तसंयोगे उपयोगवचनं. यथाह – ‘‘न, भिक्खवे, वस्सं उपगन्त्वा पुरिमं वा तेमासं पच्छिमं वा तेमासं अवसित्वा चारिका पक्कमितब्बा, यो पक्कमेय्य, आपत्ति दुक्कटस्सा’’ति (महाव. १८५).

२६१०. रुक्खस्स ¶ सुसिरेति एत्थ ‘‘सुद्धे’’ति सेसो. यथाह – ‘‘रुक्खसुसिरेति एत्थ सुद्धे रुक्खसुसिरेयेव न वट्टति, महन्तस्स पन रुक्खसुसिरस्स अन्तो पदरच्छदनं कुटिकं ¶ कत्वा पविसनद्वारं योजेत्वा उपगन्तुं वट्टती’’ति. ‘‘रुक्खस्स सुसिरे’’ति इमिना रुक्खेकदेसो विटपोपि सङ्गहितो, सोपि सुद्धोव न वट्टति. यथाह – ‘‘रुक्खविटभियाति एत्थापि सुद्धे विटपमत्ते न वट्टति, महाविटपे पन अट्टकं बन्धित्वा तत्थ पदरच्छदनं कुटिकं कत्वा उपगन्तुं वट्टती’’ति (महाव. अट्ठ. २०३).

‘‘छत्तेति एत्थापि चतूसु थम्भेसु छत्तं ठपेत्वा आवरणं कत्वा द्वारं योजेत्वा उपगन्तुं वट्टति, छत्तकुटिका नामेसा होति. चाटियाति एत्थापि महन्तेन कपल्लेन छत्ते वुत्तनयेन कुटिं कत्वाव उपगन्तुं वट्टती’’ति अट्ठकथावचनतो एवमकतासु सुद्धछत्तचाटीसु निवारणं वेदितब्बं. छवकुटीति टङ्कितमञ्चादयो वुत्ता. यथाह – ‘‘छवकुटिका नाम टङ्कितमञ्चादिभेदा कुटि, तत्थ उपगन्तुं न वट्टती’’ति (महाव. अट्ठ. २०३).

सुसाने पन अञ्ञं कुटिकं कत्वा उपगन्तुं वट्टति. ‘‘छवसरीरं झापेत्वा छारिकाय, अट्ठिकानञ्च अत्थाय कुटिका करीयती’’ति अन्धकट्ठकथायं छवकुटि वुत्ता. ‘‘टङ्कितमञ्चोति कसिकुटिकापासाणघरन्ति लिखित’’न्ति (वजिर. टी. महावग्ग २०३) वजिरबुद्धित्थेरो. चतुन्नं पासाणानं उपरि पासाणं अत्थरित्वा कतो गेहोपि ‘‘टङ्कितमञ्चो’’ति वुच्चति. दीघे मञ्चपादे मज्झे विज्झित्वा अटनियो पवेसेत्वा मञ्चं करोन्तीति तस्स इदं उपरि, इदं हेट्ठाति नत्थि, परिवत्तेत्वा अत्थतोपि तादिसोव होति, तं सुसाने, देवट्ठाने च ठपेन्ति, अयम्पि टङ्कितमञ्चो नाम.

२६११. ‘‘सति पच्चयवेकल्ले, सरीराफासुताय वा’’ति अवसेसन्तरायानं वक्खमानत्ता ‘‘अन्तरायो’’ति इमिना राजन्तरायादि दसविधो गहेतब्बो.

२६१२-४. ‘‘अनुजानामि ¶ , भिक्खवे, सत्तन्नं सत्ताहकरणीयेन अप्पहितेपि गन्तुं, पगेव पहिते भिक्खुस्स भिक्खुनिया सिक्खमानाय सामणेरस्स सामणेरिया मातुया च पितुस्स चा’’ति (महाव. १९८) वुत्तनयं दस्सेतुमाह ‘‘मातापितून’’न्तिआदि.

मातापितूनं ¶ दस्सनत्थं, पञ्चन्नं सहधम्मिकानं दस्सनत्थं वा नेसं अत्थे सति वा नेसं अन्तरे गिलानं दट्ठुं वा तदुपट्ठाकानं भत्तादिं परियेसनत्थं वा नेसं भत्तादिं परियेसनत्थं वा तथा नेसं पञ्चन्नं सहधम्मिकानं अञ्ञतरं अनभिरतं उक्कण्ठितं अहं गन्त्वा वूपकासेस्सं वा वूपकासापेस्सामि वा धम्मकथमस्स करिस्सामीति वा तस्स पञ्चन्नं सहधम्मिकानं अञ्ञतरस्स उट्ठितं उप्पन्नं दिट्ठिं विवेचेस्सामि वा विवेचापेस्सामि वा धम्मकथमस्स करिस्सामीति वा तथा उप्पन्नं कुक्कुच्चं विनोदेस्सामीति वा विनोदापेस्सामीति वा धम्मकथमस्स करिस्सामीति वा एवं विनयञ्ञुना भिक्खुना सत्ताहकिच्चेन अपेसितेपि गन्तब्बं, पगेव पहितेति योजना.

भत्तादीति एत्थ आदि-सद्देन भेसज्जपरियेसनादिं सङ्गण्हाति. यथाह – ‘‘गिलानभत्तं वा परियेसिस्सामि, गिलानुपट्ठाकभत्तं वा परियेसिस्सामि, गिलानभेसज्जं वा परियेसिस्सामि, पुच्छिस्सामि वा उपट्ठहिस्सामि वा’’ति. वूपकासेस्सन्ति यत्थ अनभिरति उप्पन्ना, ततो अञ्ञत्थ गहेत्वा गमिस्सामीति अत्थो.

विनोदेस्सामहन्ति वाति एत्थ वा-सद्देन ‘‘इध पन, भिक्खवे, भिक्खु गरुधम्मं अज्झापन्नो होति परिवासारहो, सो चे भिक्खूनं सन्तिके दूतं पहिणेय्य ‘अहञ्हि गरुधम्मं अज्झापन्नो परिवासारहो, आगच्छन्तु भिक्खू, इच्छामि ¶ भिक्खूनं आगत’न्ति. गन्तब्बं, भिक्खवे, सत्ताहकरणीयेन अप्पहितेपि, पगेव पहिते ‘परिवासदानं उस्सुक्कं करिस्सामि वा अनुस्सावेस्सामि वा गणपूरको वा भविस्सामी’’तिआदिनयं (महाव. १९३) सङ्गण्हाति. एवं सत्ताहकिच्चेन गच्छन्तेन अन्तोउपचारसीमाय ठितेनेव ‘‘अन्तोसत्ताहे आगच्छिस्सामी’’ति आभोगं कत्वा गन्तब्बं. सचे आभोगं अकत्वा उपचारसीमं अतिक्कमति, छिन्नवस्सो होतीति वदन्ति.

२६१५. ‘‘अयं पनेत्थ पाळिमुत्तकरत्तिच्छेदविनिच्छयो’’ति अट्ठकथागतं रत्तिच्छेदविनिच्छयं दस्सेतुमाह ‘‘वस्सं उपगतेनेत्था’’तिआदि. एत्थाति इमस्मिं सत्ताहकिच्चाधिकारे. अयं पाळिमुत्तकविनिच्छयो दट्ठब्बोति अत्थो.

२६१६. ‘‘असुकं नाम दिवस’’न्तिआदिना निमन्तनाकारं वक्खति. पुब्बन्ति पठमं. वट्टतीति ¶ सत्ताहकिच्चेन गन्तुं वट्टति. यथाह – ‘‘सचे एकस्मिं महावासे पठमंयेव कतिका कता होति ‘असुकदिवसं नाम सन्निपतितब्ब’न्ति, निमन्तितोयेव नाम होति, गन्तुं वट्टती’’ति (महाव. अट्ठ. १९९). ‘‘उपासकेहि ‘इमस्मिं नाम दिवसे दानादीनि करोम, सब्बे एव सन्निपतन्तू’ति कतिकायपि कताय गन्तुं वट्टति, निमन्तितोयेव नाम होती’’ति केचि.

२६१७. भण्डकन्ति अत्तनो चीवरभण्डं. न वट्टतीति सत्ताहकिच्चेन गन्तुं न वट्टति. पहिणन्तीति चीवरधोवनादिकम्मेन पहिणन्ति. आचरियुपज्झायानं आणत्तियेन केनचि अनवज्जकिच्चेन सत्ताहकरणीयेन गन्तुं वट्टतीति इमिनाव दीपितं होति.

२६१८. उद्देसादीनमत्थायाति ¶ पाळिवाचनानि सन्धाय. आदि-सद्देन परिपुच्छादिं सङ्गण्हाति. गरूनन्ति अगिलानानम्पि आचरियुपज्झायानं. गन्तुं लभतीति सत्ताहकरणीयेन गन्तुं लभति. पुग्गलोति पकरणतो भिक्खुंयेव गण्हाति.

२६१९. आचरियोति निदस्सनमत्तं, उपज्झायेन निवारितेपि एसेव नयो. ‘‘सचे पन नं आचरियो ‘अज्ज मा गच्छा’ति वदति, वट्टती’’ति (महाव. अट्ठ. १९९) अट्ठकथानयं दस्सेतुमाह ‘‘रत्तिच्छेदे अनापत्ति, होतीति परिदीपिता’’ति. रत्तिच्छेदेति वस्सच्छेदनिमित्तं. ‘‘रत्तिच्छेदे’’ति सब्बत्थ वस्सच्छेदोति सन्निट्ठानं कत्वा वदन्ति, एवं सत्ताहकरणीयेन गतं नं अन्तोसत्ताहेयेव पुन आगच्छन्तं सचे आचरियो वा उपज्झायो वा ‘‘अज्ज मा गच्छा’’ति वदति, सत्ताहातिक्कमेपि अनापत्तीति अधिप्पायो, वस्सच्छेदो पन होतियेवाति दट्ठब्बं सत्ताहस्स बहिद्धा वीतिनामितत्ता.

२६२०. यस्स कस्सचि ञातिस्साति मातापितूहि अञ्ञस्स ञातिजनस्स. ‘‘गच्छतो दस्सनत्थाया’’ति इमिना सेसञातिकेहि ‘‘मयं गिलाना भदन्तानं आगमनं इच्छामा’’ति च ‘‘उपट्ठाककुलेहि दानं दस्साम, धम्मं सोस्साम, भिक्खूनं दस्सनं इच्छामा’’ति च एवं कत्तब्बं निद्दिसित्वा दूते वा पेसिते सत्ताहकरणीयेन गच्छतो रत्तिच्छेदो च दुक्कटञ्च न होतीति वुत्तं होति. यथाह ‘‘इध पन, भिक्खवे, भिक्खुस्स ञातको गिलानो होति…पे… गन्तब्बं, भिक्खवे, सत्ताहकरणीयेन पहिते, न त्वेव अप्पहिते’’ति (महाव. १९९) च ¶ ‘‘इध पन, भिक्खवे, उपासकेन सङ्घं उद्दिस्स विहारो कारापितो होति…पे… इच्छामि दानञ्च ¶ दातुं धम्मञ्च सोतुं भिक्खू च पस्सितुन्ति. गन्तब्बं, भिक्खवे, सत्ताहकरणीयेन पहिते, न त्वेव अप्पहिते’’ति (महाव. १८८) च.

२६२१. ‘‘अहं गामकं गन्त्वा अज्जेव आगमिस्सामी’’ति आगच्छं आगच्छन्तो सचे पापुणितुं न सक्कोतेव, वट्टतीति योजना. वट्टतीति एत्थ ‘‘अज्जेव आगमिस्सामी’’ति गन्त्वा आगच्छन्तस्स अन्तरामग्गे सचे अरुणुग्गमनं होति, वस्सच्छेदोपि न होति, रत्तिच्छेददुक्कटञ्च नत्थीति अधिप्पायो.

२६२२. वजेति (महाव. अट्ठ. २०३) गोपालकानं निवासनट्ठाने. सत्थेति जङ्घसत्थसकटसत्थानं सन्निविट्ठोकासे. तीसु ठानेसु भिक्खुनो, वस्सच्छेदे अनापत्तीति तेहि सद्धिं गच्छन्तस्सेव नत्थि आपत्ति, तेहि वियुञ्जित्वा गमने पन आपत्तियेव, पवारेतुञ्च न लभति.

वजादीसु वस्सं उपगच्छन्तेन वस्सूपनायिकदिवसे तेन भिक्खुना उपासका वत्तब्बा ‘‘कुटिका लद्धुं वट्टती’’ति. सचे करित्वा देन्ति, तत्थ पविसित्वा ‘‘इध वस्सं उपेमी’’ति तिक्खत्तुं वत्तब्बं. नो चे देन्ति, सालासङ्खेपेन ठितसकटस्स हेट्ठा उपगन्तब्बं. तम्पि अलभन्तेन आलयो कातब्बो. सत्थे पन कुटिकादीनं अभावे ‘‘इध वस्सं उपेमी’’ति वचीभेदं कत्वा उपगन्तुं न वट्टति, आलयकरणमत्तमेव वट्टति. आलयो नाम ‘‘इध वस्सं वसिस्सामी’’ति चित्तुप्पादमत्तं.

सचे मग्गप्पटिपन्नेयेव सत्थे पवारणदिवसो होति, तत्थेव पवारेतब्बं. अथ सत्थो अन्तोवस्सेयेव भिक्खुना पत्थितट्ठानं पत्वा अतिक्कमति. पत्थितट्ठाने ¶ वसित्वा तत्थ भिक्खूहि सद्धिं पवारेतब्बं. अथापि सत्थो अन्तोवस्सेयेव अन्तरा एकस्मिं गामे तिट्ठति वा विप्पकिरति वा, तस्मिंयेव गामे भिक्खूहि सद्धिं वसित्वा पवारेतब्बं, अप्पवारेत्वा ततो परं गन्तुं न वट्टति.

नावाय वस्सं उपगच्छन्तेनापि कुटियंयेव उपगन्तब्बं. परियेसित्वा अलभन्ते आलयो कातब्बो ¶ . सचे अन्तोतेमासं नावा समुद्देयेव होति, तत्थेव पवारेतब्बं. अथ नावा कूलं लभति, सयञ्च परतो गन्तुकामो होति, गन्तुं न वट्टति. नावाय लद्धगामेयेव वसित्वा भिक्खूहि सद्धिं पवारेतब्बं. सचेपि नावा अनुतीरमेव अञ्ञत्थ गच्छति, भिक्खु च पठमं लद्धगामेयेव वसितुकामो, नावा गच्छतु, भिक्खुना तत्थेव वसित्वा भिक्खूहि सद्धिं पवारेतब्बं.

इति वजे, सत्थे, नावायन्ति तीसु ठानेसु नत्थि वस्सच्छेदे आपत्ति, पवारेतुञ्च लभति.

२६२३. सति पच्चयवेकल्लेति पिण्डपातादीनं पच्चयानं ऊनत्ते सति. सरीराफासुताय वाति सरीरस्स अफासुताय आबाधे वा सति. वस्सं छेत्वापि पक्कमेति वस्सच्छेदं कत्वापि यथाफासुकट्ठानं गच्छेय्य. अपि-सद्देन वस्सं अछेत्वा वस्सच्छेदकारणे सति सत्ताहकरणीयेन गन्तुम्पि वट्टतीति दीपेति.

२६२४. येन केनन्तरायेनाति राजन्तरायादीसु येन केनचि अन्तरायेन. यो भिक्खु वस्सं नोपगतो, तेनापि छिन्नवस्सेन वापि दुतिया वस्सूपनायिका उपगन्तब्बाति योजना.

२६२५-६. सत्ताहन्ति ¶ अच्चन्तसंयोगे उपयोगवचनं. ‘‘वीतिनामेती’’ति इमिना सम्बन्धो. उपगन्त्वापि वा बहिद्धा एव सत्ताहं वीतिनामेति चे. यो गच्छति, यो च वीतिनामेति, तस्स भिक्खुस्स. पुरिमापि न विज्जतीति अनुपगतत्ता, छिन्नवस्सत्ता च पुरिमापि वस्सूपनायिका न विज्जति न लभति. इमेसं द्विन्नं यथाक्कमं उपचारातिक्कमे, सत्ताहातिक्कमे च आपत्ति वेदितब्बा.

पटिस्सवे च भिक्खुस्स, होति आपत्ति दुक्कटन्ति ‘‘इध वस्सं वसथा’’ति वुत्ते ‘‘साधू’’ति पटिस्सुणित्वा तस्स विसंवादे असच्चापने आपत्ति होति. कतमाति आह ‘‘दुक्कट’’न्ति. न केवलं एतस्सेव विसंवादे आपत्ति होति, अथ खो इतरेसम्पि पटिस्सवानं विसंवादे आपत्ति वेदितब्बा. यथाह – ‘‘पटिस्सवे च आपत्ति दुक्कटस्साति एत्थ न केवलं ‘इमं तेमासं इध वस्सं वसथा’ति एतस्सेव पटिस्सवस्स विसंवादे आपत्ति, ‘इमं ¶ तेमासं भिक्खं गण्हथ, उभोपि मयं इध वस्सं वसिस्साम, एकतोव उद्दिसापेस्सामा’ति एवमादिनापि तस्स तस्स पटिस्सवस्स विसंवादे दुक्कट’’न्ति (महाव. अट्ठ. २०७). तञ्च खो पटिस्सवकाले सुद्धचित्तस्स पच्छा विसंवादनपच्चया होति. पठमं असुद्धचित्तस्स पन पटिस्सवे पाचित्तियं, विसंवादेन दुक्कटन्ति पाचित्तियेन सद्धिं दुक्कटं युज्जति.

२६२७. ‘‘वस्सं उपगन्त्वा पन अरुणं अनुट्ठापेत्वा तदहेव सत्ताहकरणीयेन पक्कमन्तस्सापि अन्तोसत्ताहे निवत्तन्तस्स अनापत्ती’’ति (महाव. अट्ठ. २०७) अट्ठकथावचनतो, ‘‘को वादो वसित्वा बहि गच्छतो’’ति वक्खमानत्ता ¶ च ‘‘नुट्ठापेत्वा पनारुण’’न्ति पाठो गहेतब्बो. कत्थचि पोत्थकेसु ‘‘उट्ठापेत्वा पनारुण’’न्ति पाठो दिस्सति, सो न गहेतब्बो.

२६२८. वसित्वाति द्वीहतीहं वसित्वा. यथा वस्सं वसित्वा अरुणं अनुट्ठापेत्वाव सत्ताहकरणीयेन गच्छतो अनापत्ति, तथा गतट्ठानतो अन्तोसत्ताहे आगन्त्वा पुनपि अरुणं अनुट्ठापेत्वाव सत्ताहकरणीयेन गच्छतो अनापत्ति. ‘‘सत्ताहवारेन अरुणो उट्ठापेतब्बो’’ति (महाव. अट्ठ. २०१) अट्ठकथावचनं सत्तमारुणेन पटिबद्धदिवसं सत्तमेन अरुणेनेव सङ्गहेत्वा सत्तमअरुणब्भन्तरे अनागन्त्वा अट्ठमं अरुणं बहि उट्ठापेन्तस्स रत्तिच्छेददस्सनपरं, न सत्तमअरुणस्सेव तत्थ उट्ठापेतब्बभावदस्सनपरन्ति गहेतब्बं सिक्खाभाजनअट्ठकथाय, सीहळगण्ठिपदेसु च तथा विनिच्छितत्ता.

२६२९. ‘‘नोपेति असतिया’’ति पदच्छेदो, नोपेतीति ‘‘इमस्मिं विहारे इमं तेमासं वस्सं उपेमी’’ति वचीभेदेन न उपगच्छति.

२६३०. वुत्तमेवत्थं समत्थेतुमाह ‘‘न दोसो कोचि विज्जती’’ति.

२६३१. ‘‘इमस्मिं विहारे इमं तेमासं वस्सं उपेमी’’ति तिक्खत्तुं वचने निच्छारिते एव वस्सं उपगतो सियाति योजना. ‘‘निच्छारितेव तिक्खत्तु’’न्ति इदं उक्कंसवसेन वुत्तं, सकिं, द्विक्खत्तुं वा निच्छारितेपि वस्सूपगतो नाम होतीति. यथाह – ‘‘इमस्मिं विहारे इमं ¶ तेमासं वस्सं उपेमीति सकिं वा द्वत्तिक्खत्तुं वा वाचं निच्छारेत्वाव वस्सं उपगन्तब्ब’’न्ति (महाव. अट्ठ. १८४).

२६३२. नवमितो ¶ पट्ठाय गन्तुं वट्टति, आगच्छतु वा मा वा, अनापत्ती’’ति (महाव. अट्ठ. २०७) अट्ठकथानयं दस्सेतुमाह ‘‘आदिं तु नवमिं कत्वा’’तिआदि. नवमिं पभुति आदिं कत्वा, नवमितो पट्ठायाति वुत्तं होति. गन्तुं वट्टतीति सत्ताहकरणीयेनेव गन्तुं वट्टति, तस्मा पवारणदिवसेपि तदहेव आगन्तुं असक्कुणेय्यट्ठानं पवारणत्थाय गच्छन्तेन लब्भमानेन सत्ताहकरणीयेन गन्तुं वट्टति. ‘‘पवारेत्वा पन गन्तुं वट्टति पवारणाय तंदिवससन्निस्सितत्ता’’ति (वजिर. टी. महावग्ग २०७) हि वजिरबुद्धित्थेरो. सो पच्छा आगच्छतु वा मा वा, दोसो न विज्जतीति योजना.

वस्सूपनायिकक्खन्धककथावण्णना.

पवारणक्खन्धककथावण्णना

२६३३. ‘‘पवारणा’’ति इदं ‘‘चातुद्दसी’’तिआदीहि पच्चेकं योजेतब्बं. तस्मिं तस्मिं दिने कातब्बा पवारणा अभेदोपचारेन तथा वुत्ता. सामग्गी उपोसथक्खन्धककथावण्णनाय वुत्तसरूपाव. सामग्गिपवारणं करोन्तेहि च पठमं पवारणं ठपेत्वा पाटिपदतो पट्ठाय याव कत्तिकचातुमासिपुण्णमा एत्थन्तरे कातब्बा, ततो पच्छा वा पुरे वा न वट्टति. तेवाची द्वेकवाचीति ‘‘सुणातु मे, भन्ते…पे… तेवाचिकं पवारेय्य, द्वेवाचिकं पवारेय्य, एकवाचिकं पवारेय्या’’ति तं तं ञत्तिं ठपेत्वा कातब्बा पवारणा वुच्चति.

२६३४. तीणि कम्मानि मुञ्चित्वा, अन्तेनेव पवारयेति ‘‘चत्तारिमानि, भिक्खवे, पवारणकम्मानि, अधम्मेन वग्गं पवारणकम्मं…पे… धम्मेन समग्गं पवारणकम्म’’न्ति (महाव. २१२) वत्वा ‘‘तत्र, भिक्खवे ¶ , यदिदं अधम्मेन वग्गं पवारणकम्मं, न, भिक्खवे, एवरूपं पवारणकम्मं कातब्बं…पे… तत्र, भिक्खवे, यदिदं धम्मेन समग्गं पवारणकम्मं, एवरूपं, भिक्खवे, पवारणकम्मं कातब्ब’’न्तिआदिवचनतो (महाव. २१२) तीणि ¶ अकत्तब्बानि पवारणकम्मानि मुञ्चित्वा कातुं अनुञ्ञातेन चतुत्थेन पवारणकम्मेन पवारेय्याति अत्थो. तस्स विभागेकदेसं ‘‘पञ्च यस्मिं पनावासे’’तिआदिना वक्खति.

२६३५. पुब्बकिच्चं समापेत्वाति –

‘‘सम्मज्जनी पदीपो च, उदकं आसनेन च;

पवारणाय एतानि, ‘पुब्बकरण’न्ति वुच्चति.

‘‘छन्दपारिसुद्धिउतुक्खानं, भिक्खुगणना च ओवादो;

पवारणाय एतानि, ‘पुब्बकिच्च’न्ति वुच्चती’’ति. –

वुत्तं नवविधं पुब्बकिच्चं निट्ठापेत्वा.

पत्तकल्ले समानितेति –

‘‘पवारणा यावतिका च भिक्खू कम्मप्पत्ता,

सभागापत्तियो च न विज्जन्ति;

वज्जनीया च पुग्गला तस्मिं न होन्ति,

‘पत्तकल्ल’न्ति वुच्चती’’ति. –

वुत्ते चतुब्बिधे पत्तकल्ले समोधानिते परिसमापिते.

ञत्तिं ठपेत्वाति ‘‘सुणातु मे, भन्ते सङ्घो, अज्ज पवारणा, यदि सङ्घस्स पत्तकल्लं, सङ्घो पवारेय्या’’ति (महाव. २१०) एवं सब्बसङ्गाहिकवसेन च ‘‘तेवाचिकं पवारेय्या’’ति च दानादिकरणेन येभुय्येन रत्तिया खेपिताय च राजादिअन्तराये सति च तदनुरूपतो ‘‘द्वेवाचिकं, एकवाचिकं, समानवस्सिकं पवारेय्या’’ति च ञत्तिं ठपेत्वा ¶ , तासं विसेसो अट्ठकथायं दस्सितोयेव. यथाह –

‘‘एवञ्हि ¶ वुत्ते तेवाचिकञ्च द्वेवाचिकञ्च एकवाचिकञ्च पवारेतुं वट्टति, समानवस्सिकं न वट्टति. ‘तेवाचिकं पवारेय्या’ति वुत्ते पन तेवाचिकमेव वट्टति, अञ्ञं न वट्टति, ‘द्वेवाचिकं पवारेय्या’ति वुत्ते द्वेवाचिकञ्च तेवाचिकञ्च वट्टति, एकवाचिकञ्च समानवस्सिकञ्च न वट्टति. ‘एकवाचिकं पवारेय्या’ति वुत्ते पन एकवाचिकद्वेवाचिकतेवाचिकानि वट्टन्ति, समानवस्सिकमेव न वट्टति. ‘समानवस्सिक’न्ति वुत्ते सब्बं वट्टती’’ति (महाव. अट्ठ. २१०).

कातब्बाति थेरेन भिक्खुना एकंसं उत्तरासङ्गं करित्वा उक्कुटिकं निसीदित्वा अञ्जलिं पग्गहेत्वा एवमस्स वचनीयो ‘‘सङ्घं, आवुसो, पवारेमि दिट्ठेन वा…पे… ततियम्पि आवुसो, सङ्घं पवारेमि दिट्ठेन वा…पे… पस्सन्तो पटिकरिस्सामी’’ति (महाव. २१०) वुत्तनयेन कातब्बा. नवकेन भिक्खुना एकंसं उत्तरासङ्गं करित्वा…पे… ततियम्पि, भन्ते, सङ्घं पवारेमि दिट्ठेन वा…पे… पस्सन्तो पटिकरिस्सामीति (महाव. २१०) वुत्तनयेन कातब्बा.

२६३६. थेरेसु पवारेन्तेसु यो पन नवो, सो सयं याव पवारेति, ताव उक्कुटिकं निसीदेय्याति योजना.

२६३७. चत्तारो वा तयोपि वा एकावासे एकसीमायं वसन्ति चे, ञत्तिं वत्वा ‘‘सुणन्तु मे, आयस्मन्तो, अज्ज पवारणा, यदायस्मन्तानं पत्तकल्लं, मयं अञ्ञमञ्ञं पवारेय्यामा’’ति (महाव. २१६) गणञत्तिं ठपेत्वा पवारेय्युन्ति योजना.

पवारेय्युन्ति ¶ एत्थ थेरेन भिक्खुना एकंसं उत्तरासङ्गं कत्वा उक्कुटिकं निसीदित्वा अञ्जलिं पग्गहेत्वा ते तयो वा द्वे वा भिक्खू एवमस्सु वचनीया ‘‘अहं, आवुसो, आयस्मन्ते पवारेमि दिट्ठेन वा सुतेन वा परिसङ्काय वा, वदन्तु मं आयस्मन्तो अनुकम्पं उपादाय, पस्सन्तो पटिकरिस्सामि. दुतियम्पि…पे… ततियम्पि अहं, आवुसो, आयस्मन्ते पवारेमि दिट्ठेन वा सुतेन वा परिसङ्काय वा, वदन्तु मं आयस्मन्तो अनुकम्पं उपादाय, पस्सन्तो पटिकरिस्सामी’’ति (महाव. २१६) पवारेतब्बं. नवेनपि ‘‘अहं, भन्ते, आयस्मन्ते पवारेमि दिट्ठेन वा सुतेन वा परिसङ्काय वा, वदन्तु मं आयस्मन्तो अनुकम्पं उपादाय ¶ , पस्सन्तो पटिकरिस्सामि. दुतियम्पि…पे… ततियम्पि अहं, भन्ते, आयस्मन्ते पवारेमि दिट्ठेन वा सुतेन वा परिसङ्काय वा, वदन्तु मं आयस्मन्तो अनुकम्पं उपादाय, पस्सन्तो पटिकरिस्सामी’’ति पवारेतब्बं.

२६३८. अञ्ञमञ्ञं पवारेय्युं, विना ञत्तिं दुवे जना. तेसु थेरेन ‘‘अहं, आवुसो, आयस्मन्तं पवारेमि दिट्ठेन वा सुतेन वा परिसङ्काय वा, वदतु मं आयस्मा अनुकम्पं उपादाय, पस्सन्तो पटिकरिस्सामि. दुतियम्पि…पे… ततियम्पि अहं, आवुसो, आयस्मन्तं पवारेमि…पे… पटिकरिस्सामी’’ति (महाव. २१७) पवारेतब्बं. नवेनपि ‘‘अहं, भन्ते, आयस्मन्तं पवारेमि…पे… वदतु मं आयस्मा अनुकम्पं उपादाय, पस्सन्तो पटिकरिस्सामि. दुतियम्पि…पे… ततियम्पि अहं, भन्ते, आयस्मन्तं पवारेमि…पे… पटिकरिस्सामी’’ति पवारेतब्बं.

अधिट्ठेय्याति पुब्बकिच्चं समापेत्वा ‘‘अज्ज मे पवारणा चातुद्दसी’’ति वा ‘‘पन्नरसी’’ति वा वत्वा ‘‘अधिट्ठामी’’ति अधिट्ठेय्य ¶ . यथाह ‘‘अज्ज मे पवारणाति एत्थ सचे चातुद्दसिका होति, ‘अज्ज मे पवारणा चातुद्दसी’ति, सचे पन्नरसिका, ‘अज्ज मे पवारणा पन्नरसी’ति एवं अधिट्ठातब्ब’’न्ति (महाव. अट्ठ. २१८), इमिना सब्बसङ्गाहादिञत्तीसु च तस्मिं तस्मिं दिवसे सो सो वोहारो कातब्बोति दीपितमेव.

सेसा सङ्घपवारणाति पञ्चहि, अतिरेकेहि वा भिक्खूहि कत्तब्बा पवारणा सङ्घपवारणा.

२६३९. पवारितेति पठमपवारणाय पवारिते. अनागतोति केनचि अन्तरायेन पुरिमिकाय च पच्छिमिकाय च वस्सूपनायिकाय वस्सं अनुपगतो. अवुत्थोति पच्छिमिकाय उपगतो. वुत्तञ्हि खुद्दसिक्खावण्णनाय ‘‘अवुत्थोति पच्छिमिकाय उपगतो अपरिनिट्ठितत्ता ‘अवुत्थो’ति वुच्चती’’ति. पारिसुद्धिउपोसथं करेय्याति योजना. एत्थ ‘‘तेसं सन्तिके’’ति सेसो.

२६४०-१. यस्मिं ¶ पनावासे पञ्च वा चत्तारो वा तयो वा समणा वसन्ति, ते तत्थ एकेकस्स पवारणं हरित्वान सचे अञ्ञमञ्ञं पवारेन्ति, आपत्ति दुक्कटन्ति योजना.

सेसन्ति ‘‘अधम्मेन समग्ग’’न्तिआदिकं विनिच्छयं. इधाति इमस्मिं पवारणाधिकारे. बुधोति विनयधरो. उपोसथे वुत्तनयेनाति उपोसथविनिच्छये वुत्तक्कमेन. नयेति जानेय्य.

२६४२. सम्पादेतत्तनो सुचिन्ति अत्तनो उपोसथं सम्पादेति. सब्बं साधेतीति उपोसथादिसब्बं कम्मं निप्फादेति. नत्तनोति अत्तनो उपोसथं न निप्फादेति.

२६४३. तस्माति ¶ यस्मा अत्तनो सुचिं न साधेति, तस्मा. उभिन्नन्ति अत्तनो च सङ्घस्स च. किच्चसिद्धत्थमेविधाति उपोसथादिकम्मनिप्पज्जनत्थं इध इमस्मिं उपोसथकम्मादिपकरणे. पारिसुद्धिपीति एत्थ पि-सद्देन पवारणा सङ्गहिता. तेनेव वक्खति ‘‘छन्दं वा पारिसुद्धिं वा, गहेत्वा वा पवारण’’न्ति.

छन्दपारिसुद्धिपवारणं देन्तेन सचे सापत्तिको होति, आपत्तिं देसेत्वा एकंसं उत्तरासङ्गं कत्वा उक्कुटिकं निसीदित्वा अञ्जलिं पग्गहेत्वा छन्दादिहारको भिक्खु वत्तब्बो ‘‘छन्दं दम्मि, छन्दं मे हर, छन्दं मे आरोचेही’’ति (महाव. १६५), ‘‘पारिसुद्धिं दम्मि, पारिसुद्धिं मे हर, पारिसुद्धिं मे आरोचेही’’ति (महाव. १६४), ‘‘पवारणं दम्मि, पवारणं मे हर, पवारणं मे आरोचेहि, ममत्थाय पवारेही’’ति (महाव. २१३).

२६४४. ‘‘छन्दो एकेना’’ति पदच्छेदो. एकेन बहूनम्पि छन्दो हातब्बो, तथा पारिसुद्धि हातब्बा. पि-सद्देन पवारणा हातब्बाति योजना. परम्पराहटो छन्दोति बहूनं वा एकस्स वा छन्दादिहारकस्स हत्थतो अन्तरा अञ्ञेन गहिता छन्दपारिसुद्धिपवारणा. विसुद्धिया न गच्छति अनवज्जभावाय न पापुणाति बिळालसङ्खलिकछन्दादीनं सङ्घमज्झं अगमनेन वग्गभावकरणतो.

एत्थ च यथा बिळालसङ्खलिकाय पठमवलयं दुतियवलयं पापुणाति, न ततियं, एवमिमेपि छन्दादयो दायकेन यस्स दिन्ना, ततो अञ्ञत्थ न गच्छतीति बिळालसङ्खलिकासदिसत्ता ¶ ‘‘बिळालसङ्खलिका’’ति वुत्ता. बिळालसङ्खलिकाग्गहणञ्चेत्थ यासं कासञ्चि सङ्खलिकानं उपलक्खणमत्तन्ति दट्ठब्बं.

२६४५-६. छन्दं ¶ वा पारिसुद्धिं वा पवारणं वा गहेत्वा छन्दादिहारको सङ्घमप्पत्वा सचे सामणेरादिभावं पटिजानेय्य वा विब्भमेय्य वा मरेय्य वा, तं सब्बं छन्दादिभावं नाहटं होति, सङ्घं पत्वा एवं सिया सामणेरादिभावं पटिजानन्तो, विब्भन्तो, कालकतो वा भवेय्य, तं सब्बं हटं आनीतं होतीति योजना.

तत्थ सामणेरादिभावं वा पटिजानेय्याति ‘‘अहं सामणेरो’’तिआदिना भूतं सामणेरादिभावं कथेय्य, पच्छा सामणेरभूमियं पतिट्ठहेय्याति अत्थो. आदि-सद्देन अन्तिमवत्थुं अज्झापन्नो गहितो.

२६४७. सङ्घं पत्वाति अन्तमसो तंतंकम्मप्पत्तस्स चतुवग्गादिसङ्घस्स हत्थपासं पत्वाति अत्थो. पमत्तोति पमादं सतिसम्मोसं पत्तो. सुत्तोति निद्दूपगतो. खित्तचित्तकोति यक्खादीहि विक्खेपमापादितचित्तो. नारोचेतीति अत्तनो छन्दादीनं आहटभावं एकस्सापि भिक्खुनो न कथेति. सञ्चिच्चाति सञ्चेतेत्वा जानन्तोयेव अनादरियो नारोचेति, दुक्कटं होति.

२६४८. ये तेति ये ते भिक्खू थेरा वा नवा वा मज्झिमा वा. विपस्सनाति सहचरियेन समथोपि गय्हति. समथविपस्सना च इध तरुणायेव अधिप्पेता, तस्मा विपस्सनायुत्ताति एत्थ तरुणाहि समथविपस्सनाहि समन्नागताति अत्थो. रत्तिन्दिवन्ति अच्चन्तसंयोगे उपयोगवचनं. अतन्दिताति अनलसा.

‘‘रत्तिन्दिव’’न्ति एत्थ रत्ति-सद्देन रत्तियायेव गहणं, उदाहु एकदेसस्साति आह ‘‘पुब्बरत्तापररत्त’’न्ति. पुब्बा च सा रत्ति चाति पुब्बरत्ति, पठमयामो, अपरा च ¶ सा रत्ति चाति अपररत्ति, पच्छिमयामो, पुब्बरत्ति च अपररत्ति चाति समाहारद्वन्दे समासन्ते अ-कारपच्चयं कत्वा ‘‘पुब्बरत्तापररत्त’’न्ति वुत्तं. इधापि अच्चन्तसंयोगे उपयोगवचनं. मज्झिमयामे कायदरथवूपसमनत्थाय सुपनं अनुञ्ञातन्ति तं वज्जेत्वा पुरिमपच्छिमयामेसु निरन्तरभावनानुयोगो कातब्बोति दस्सनत्थमेव वुत्तं. विपस्सना परायना समथविपस्सनाव परं ¶ अयनं पतिट्ठा एतेसन्ति विपस्सनापरायना, समथविपस्सनाय युत्तपयुत्ता होन्तीति वुत्तं होति.

२६४९. लद्धो फासुविहारो येहि ते लद्धफासुविहारा, तेसं. फासुविहारोति च सुखविहारस्स मूलकारणत्ता तरुणा समथविपस्सना अधिप्पेता, पटिलद्धतरुणसमथविपस्सनानन्ति अत्थो. सिया न परिहानिति परिहानि नाम एवं कते न भवेय्य.

कत्तिकमासकेति चीवरमाससङ्खाते कत्तिकमासे पवारणाय सङ्गहो वुत्तोति योजना. गाथाबन्धवसेन ‘‘सङ्गाहो’’ति दीघो कतो, पवारणासङ्गहो वुत्तोति अत्थो. यथाह –

‘‘पवारणासङ्गहो च नामायं विस्सट्ठकम्मट्ठानानं थामगतसमथविपस्सनानं सोतापन्नादीनञ्च न दातब्बो. तरुणसमथविपस्सनालाभिनो पन सब्बे वा होन्तु, उपड्ढा वा, एकपुग्गलो वा, एकस्सपि वसेन दातब्बोयेव. दिन्ने पवारणासङ्गहे अन्तोवस्से परिहारोव होति, आगन्तुका तेसं सेनासनं गहेतुं न लभन्ति. तेहिपि छिन्नवस्सेहि न भवितब्बं, पवारेत्वा पन अन्तरापि चारिकं पक्कमितुं लभन्ती’’ति (महाव. अट्ठ. २४१).

पवारणासङ्गहस्स ¶ दानप्पकारो पन पाळितो गहेतब्बो.

पवारणक्खन्धककथावण्णना.

चम्मक्खन्धककथावण्णना

२६५०. एळका च अजा च मिगा चाति विग्गहो. पसूनं द्वन्दे एकत्तनपुंसकत्तस्स विभासितत्ता बहुवचननिद्देसो. एळकानञ्च अजानञ्च मिगानं रोहितेणिकुरुङ्गानञ्च. पसदा च मिगमाता च पसदमिगमाता, ‘‘पसदमिगमातुया’’ति वत्तब्बे गाथाबन्धवसेन ‘‘पसद’’न्ति निग्गहितागमो. पसदमिगमातुया च चम्मं भिक्खुनो वट्टतीति योजना. ‘‘मिगान’’न्ति इमिना गहितानमेवेत्थ विभागदस्सनं ‘‘रोहितेणी’’तिआदि. रोहितादयो मिगविभागविसेसा.

२६५१. एतेसं ¶ यथावुत्तसत्तानं चम्मं ठपेत्वा अञ्ञं चम्मं दुक्कटापत्तिया वत्थुभूतन्ति अत्थो. अञ्ञन्ति च –

‘‘मक्कटो काळसीहो च, सरभो कदलीमिगो;

ये च वाळमिगा होन्ति, तेसं चम्मं न वट्टती’’ति. (महाव. अट्ठ. २५९) –

अट्ठकथाय पटिक्खित्तं चम्ममाह. मक्कटो नाम साखमिगो. काळसीहो नाम महामुखवानरजातिको. वाळमिगा नाम सीहब्यग्घादयो. यथाह – ‘‘तत्थ वाळमिगाति सीहब्यग्घअच्छतरच्छा, न केवलञ्च एतेयेव, येसं पन चम्मं वट्टतीति वुत्तं, ते ठपेत्वा अवसेसा अन्तमसो गोमहिंसस्समिळारादयोपि सब्बे इमस्मिं अत्थे ‘वाळमिगा’त्वेव वेदितब्बा’’ति.

थविका ¶ च उपाहना च थविकोपाहनं. अमानुसं मनुस्सचम्मरहितं सब्बं चम्मं थविकोपाहने वट्टतीति योजना. एत्थ थविकाति उपाहनादिकोसकस्स गहणं. यथाह ‘‘मनुस्सचम्मं ठपेत्वा येन केनचि चम्मेन उपाहना वट्टति. उपाहनाकोसकसत्थककोसककुञ्जिकाकोसकेसुपि एसेव नयो’’ति (महाव. अट्ठ. २५९).

२६५२. ‘‘अनुजानामि, भिक्खवे, सब्बपच्चन्तिमेसु जनपदेसु गुणङ्गुणूपाहन’’न्ति (महाव. २५९) वचनतो ‘‘वट्टन्ति मज्झिमे देसे, न गुणङ्गुणूपाहना’’ति वुत्तं. मज्झिमे देसेति ‘‘पुरत्थिमाय दिसाय गजङ्गलं नाम निगमो’’तिआदिना (महाव. २५९) वुत्तसीमापरिच्छेदे मज्झिमदेसे. गुणङ्गुणूपाहनाति चतुपटलतो पट्ठाय बहुपटला उपाहना. यथाह – ‘‘गुणङ्गुणूपाहनाति चतुपटलतो पट्ठाय वुच्चती’’ति (महाव. अट्ठ. २४५). मज्झिमदेसे गुणङ्गुणूपाहना न वट्टन्तीति योजना. अन्तोआरामेति एत्थ पकरणतो ‘‘सब्बेस’’न्ति लब्भति, गिलानानमितरेसञ्च सब्बेसन्ति अत्थो. सब्बत्थापि चाति अन्तोआरामे, बहि चाति सब्बत्थापि. रोगिनोति गिलानस्स वट्टन्तीति योजना.

२६५३. पुटबद्धा खल्लकबद्धाचाति पच्चेकं योजेतब्बं. विसेसो पनेतासं अट्ठकथायमेव ¶ वुत्तो ‘‘पुटबद्धाति योनकउपाहना वुच्चति, या यावजङ्घतो सब्बपादं पटिच्छादेति. खल्लकबद्धाति पण्हिपिधानत्थं तले खल्लकं बन्धित्वा कता’’ति. पालिगुण्ठिमा च ‘‘पलिगुण्ठित्वा कता, या उपरि पादमत्तमेव पटिच्छादेति, न जङ्घ’’न्ति अट्ठकथायं दस्सिताव. तूलपुण्णाति तूलपिचुना पूरेत्वा कता.

सब्बाव ¶ नीला सब्बनीला, सा आदि यासं ता सब्बनीलादयो. आदि-सद्देन महानामरत्तपरियन्तानं गहणं. एतासं सरूपं अट्ठकथायमेव वुत्तं ‘‘नीलिका उमापुप्फवण्णा होति, पीतिका कणिकारपुप्फवण्णा, लोहितिका जयसुमनपुप्फवण्णा, मञ्जिट्ठिका मञ्जिट्ठवण्णा एव, कण्हा अद्दारिट्ठकवण्णा, महारङ्गरत्ता सतपदिपिट्ठिवण्णा, महानामरत्ता सम्भिन्नवण्णा होति पण्डुपलासवण्णा. कुरुन्दियं पन ‘पदुमपुप्फवण्णा’ति वुत्त’’न्ति (महाव. अट्ठ. २४६). सब्बनीलादयोपि चाति अपि-सद्देन नीलादिवद्धिकानं गहणं.

२६५४. चित्राति विचित्रा. मेण्डविसाणूपमवद्धिकाति मेण्डानं विसाणसदिसवद्धिका, कण्णिकट्ठाने मेण्डसिङ्गसण्ठाने वद्धे योजेत्वा कताति अत्थो. ‘‘मेण्डविसाणूपमवद्धिका’’ति इदं अजविसाणूपमवद्धिकानं उपलक्खणं. मोरस्स पिञ्छेन परिसिब्बिताति तलेसु वा वद्धेसु वा मोरपिञ्छेहि सुत्तकसदिसेहि परिसिब्बिता. उपाहना न च वट्टन्तीति योजना.

२६५५. मज्जाराति बिळारा. काळका रुक्खकण्टका. ऊलूका पक्खिबिळाला. सीहाति केसरसीहादयो सीहा. उद्दाति चतुप्पदजातिका. दीपी सद्दला. अजिनस्साति एवंनामिकस्स. परिक्खटाति उपाहनपरियन्ते चीवरे अनुवातं विय वुत्तप्पकारं चम्मं योजेत्वा कता.

२६५६. सचे ईदिसा उपाहना लभन्ति, तासं वळञ्जनप्पकारं दस्सेतुमाह ‘‘पुटादिं अपनेत्वा’’तिआदि. पुटादिं सब्बसो छिन्दित्वा वा अपनेत्वा वा उपाहना धारेतब्बाति योजना. एवमकत्वा लद्धनीहारेनेव धारेन्तस्स दुक्कटं. यथाह – ‘‘एतासु यं किञ्चि लभित्वा सचे ¶ तानि खल्लकादीनि अपनेत्वा सक्का होन्ति वळञ्जितुं, वळञ्जेतब्बा, तेसु पन सति वळञ्जन्तस्स दुक्कट’’न्ति (महाव. अट्ठ. २४६).

वण्णभेदं ¶ तथा कत्वाति एत्थ ‘‘एकदेसेना’’ति सेसो. ‘‘सब्बसो वा’’ति आहरित्वा सब्बसो वा एकदेसेन वा वण्णभेदं कत्वा सब्बनीलादयो उपाहना धारेतब्बाति योजना. तथा अकत्वा धारेन्तस्स दुक्कटं. यथाह ‘‘एतासु यं किञ्चि लभित्वा रजनं चोळकेन पुञ्छित्वा वण्णं भिन्दित्वा धारेतुं वट्टति. अप्पमत्तकेपि भिन्ने वट्टतियेवा’’ति. नीलवद्धिकादयोपि वण्णभेदं कत्वा धारेतब्बा.

२६५७. तत्थ ठाने पस्सावपादुका, वच्चपादुका, आचमनपादुकाति तिस्सो पादुकायो ठपेत्वा सब्बापि पादुका तालपत्तिकादिभेदा सब्बापि सङ्कमनीया पादुका धारेतुं न वट्टन्तीति योजना.

२६५८. अतिक्कन्तपमाणं उच्चासयनसञ्ञितं आसन्दिञ्चेव पल्लङ्कञ्च सेवमानस्स दुक्कटन्ति योजना. आसन्दी वुत्तलक्खणाव. पल्लङ्कोति पादेसु आहरिमानि वाळरूपानि ठपेत्वा कतो, एकस्मिंयेव दारुम्हि कट्ठकम्मवसेन छिन्दित्वा कतानि असंहारिमानि तत्रट्ठानेव वाळरूपानि यस्स पादेसु सन्ति, एवरूपो पल्लङ्को कप्पतीति ‘‘आहरिमेना’’ति इमिनाव दीपितं. ‘‘अकप्पियरूपकतो अकप्पियमञ्चो पल्लङ्को’’ति हि सारसमासे वुत्तं.

२६५९. गोनकन्ति दीघलोमकमहाकोजवं. चतुरङ्गुलाधिकानि किर तस्स लोमानि, काळवण्णञ्च होति. ‘‘चतुरङ्गुलतो ऊनकप्पमाणलोमो कोजवो वट्टती’’ति वदन्ति. कुत्तकन्ति सोळसन्नं नाटकित्थीनं ठत्वा नच्चनयोग्गं ¶ उण्णामयत्थरणं. चित्तन्ति भित्तिच्छिद्दादिकविचित्रं उण्णामयत्थरणं. पटिकन्ति उण्णामयं सेतत्थरणं. पटलिकन्ति घनपुप्फकं उण्णामयं लोहितत्थरणं, यो ‘‘आमलकपत्तो’’तिपि वुच्चति.

एकन्तलोमिन्ति उभतो उग्गतलोमं उण्णामयत्थरणं. विकतिन्ति सीहब्यग्घादिरूपविचित्रं उण्णामयत्थरणं. ‘‘एकन्तलोमीति एकतोदसं उण्णामयत्थरण’’न्ति दीघनिका. तूलिकन्ति रुक्खतूललतातूलपोटकितूलसङ्खातानं तिण्णं तूलानं अञ्ञतरपुण्णं पकतितूलिकं. उद्दलोमिकन्ति एकतो उग्गतलोमं उण्णामयत्थरणं. ‘‘उद्दलोमीति उभतोदसं उण्णामयत्थरणं. एकन्तलोमीति एकतोदसं उण्णामयत्थरण’’न्ति (दी. नि. अट्ठ. १.१५) दीघनिकायट्ठकथायं ¶ वुत्तं. सारसमासे पन ‘‘उद्दलोमीति एकतो उग्गतपुप्फं. एकन्तलोमीति उभतो उग्गतपुप्फ’’न्ति वुत्तं.

२६६०. कट्टिस्सन्ति रतनपरिसिब्बितं कोसेय्यकट्टिस्समयं पच्चत्थरणं. ‘‘कोसेय्यकट्टिस्समयन्ति कोसेय्यकसटमय’’न्ति (दी. नि. टी. १.१५) आचरियधम्मपालत्थेरेन वुत्तं, कन्तितकोसेय्यपुटमयन्ति अत्थो. कोसेय्यन्ति रतनपरिसिब्बितं कोसियसुत्तमयं पच्चत्थरणं. रतनपरिसिब्बनरहितं सुद्धकोसेय्यं पन वट्टति.

दीघनिकायट्ठकथायं पनेत्थ ‘‘ठपेत्वा तूलिकं सब्बानेव गोनकादीनि रतनपरिसिब्बितानि न वट्टन्ती’’ति (दी. नि. अट्ठ. १.१५) वुत्तं. तत्थ ‘‘ठपेत्वा तूलिक’’न्ति एतेन रतनपरिसिब्बनरहितापि तूलिका न वट्टतीति दीपेति. ‘‘रतनपरिसिब्बितानि न वट्टन्ती’’ति इमिना पन यानि रतनपरिसिब्बितानि, तानि भूमत्थरणवसेन यथानुरूपं मञ्चादीसु च उपनेतुं वट्टतीति दीपितन्ति ¶ वेदितब्बं. एत्थ च विनयपरियायं पत्वा गरुके ठातब्बत्ता इध वुत्तनयेनेवेत्थ विनिच्छयो वेदितब्बो. सुत्तन्तिकदेसनायं पन गहट्ठानम्पि वसेन वुत्तत्ता नेसं सङ्गण्हनत्थं ‘‘ठपेत्वा तूलिकं…पे… वट्टन्तीति वुत्त’’न्ति (दी. नि. अट्ठ. १.१५) अपरे.

हत्थिअस्सरथत्थरन्ति हत्थिपिट्ठे अत्थरितं अत्थरणं हत्थत्थरणं नाम. अस्सरथत्थरेपि एसेव नयो. कदलिमिगपवर-पच्चत्थरणकम्पि चाति कदलिमिगचम्मं नाम अत्थि, तेन कतं पवरपच्चत्थरणन्ति अत्थो. तं किर सेतवत्थस्स उपरि कदलिमिगचम्मं पत्थरित्वा सिब्बेत्वा करोन्ति. पि-सद्देन अजिनप्पवेणी गहिता. अजिनप्पवेणी नाम अजिनचम्मेहि मञ्चपमाणेन सिब्बेत्वा कता पवेणी. तानि किर चम्मानि सुखुमतरानि, तस्मा दुपट्टतिपट्टानि कत्वा सिब्बन्ति. तेन वुत्तं ‘‘अजिनप्पवेणी’’ति.

२६६१. रत्तवितानस्स हेट्ठाति कुसुम्भादिरत्तस्स लोहितवितानस्स हेट्ठा कप्पियपच्चत्थरणेहि अत्थतं सयनासनञ्च. कसावरत्तवितानस्स पन हेट्ठा कप्पियपच्चत्थरणेन अत्थतं वट्टति. तेनेव वक्खति ‘‘हेट्ठा अकप्पिये’’तिआदि.

द्विधा ¶ रत्तूपधानकन्ति सीसपस्से, पादपस्से चाति उभतोपस्से पञ्ञत्तरत्तबिब्बोहनवन्तञ्च सयनासनं. इदं सब्बं अकप्पियं परिभुञ्जतो दुक्कटं होति. ‘‘यं पन एकमेव उपधानं उभोसु पस्सेसु रत्तं वा होति पदुमवण्णं वा विचित्रं वा, सचे पमाणयुत्तं, वट्टती’’ति (महाव. अट्ठ. २५४) अट्ठकथाविनिच्छयो एतेनेव ब्यतिरेकतो वुत्तो होति. ‘‘येभुय्यरत्तानिपि द्वे बिब्बोहनानि न वट्टन्ती’’ति गण्ठिपदे वुत्तं. तेनेव येभुय्येन रत्तवितानम्पि न वट्टतीति विञ्ञायति.

एत्थ ¶ च किञ्चापि दीघनिकायट्ठकथायं ‘‘अलोहितकानि द्वेपि वट्टन्तियेव, ततो उत्तरि लभित्वा अञ्ञेसं दातब्बानि, दातुं असक्कोन्तो मञ्चे तिरियं अत्थरित्वा उपरि पच्चत्थरणं दत्वा निपज्जितुम्पि लभती’’ति (दी. नि. अट्ठ. १.१५) अविसेसेन वुत्तं. सेनासनक्खन्धकसंवण्णनायं पन ‘‘अगिलानस्स सीसूपधानञ्च पादूपधानञ्चाति द्वयमेव वट्टति, गिलानस्स बिब्बोहनानि सन्थरित्वा उपरि पच्चत्थरणं दत्वा निपज्जितुम्पि वट्टती’’ति (चूळव. अट्ठ. २९७) वुत्तत्ता गिलानोयेव मञ्चे तिरियं अत्थरित्वा निपज्जितुं लभतीति वेदितब्बं.

२६६२. उद्धं सेतवितानम्पि हेट्ठा अकप्पिये पच्चत्थरणे सति न वट्टतीति योजना. तस्मिन्ति अकप्पियपच्चत्थरणे.

२६६३. ‘‘ठपेत्वा’’ति इमिना आसन्दादित्तयस्स वट्टनाकारो नत्थीति दीपेति. सेसं सब्बन्ति गोनकादि द्विधारत्तूपधानकपरियन्तं सब्बं. गिहिसन्तकन्ति गिहीनं सन्तकं तेहियेव पञ्ञत्तं, इमिना पञ्चसु सहधम्मिकेसु अञ्ञतरेन वा तेसं आणत्तिया वा पञ्ञत्तं न वट्टतीति दीपेति. लभतेति निसीदितुं लभति.

२६६४. तं कत्थ लभतीति पदेसनियमं दस्सेतुमाह ‘‘धम्मासने’’तिआदि. धम्मासनेति एत्थ अट्ठकथायं ‘‘यदि धम्मासने सङ्घिकम्पि गोनकादिं भिक्खूहि अनाणत्ता आरामिकादयो सयमेव पञ्ञापेन्ति चेव नीहरन्ति च, एतं गिहिविकतनीहारं नाम. इमिना गिहिविकतनीहारेन वट्टती’’ति (चूळव. अट्ठ. ३२०; वि. सङ्ग. अट्ठ. पकिण्णकविनिच्छयकथा ५६ अत्थतो समानं) वुत्तं. भत्तग्गे वाति विहारे निसीदापेत्वा परिवेसनट्ठाने ¶ वा भोजनसालायं वा. अपिसद्देन गिहीनं गेहेपि तेहि पञ्ञत्ते गोनकादिम्हि निसीदितुं ¶ अनापत्तीति दीपेति. धम्मासनादिपदेसनियमनेन ततो अञ्ञत्थ गिहिपञ्ञत्तेपि तत्थ निसीदितुं न वट्टतीति ब्यतिरेकतो विञ्ञायति.

भूमत्थरणकेति एत्थ ‘‘कते’’ति सेसो. तत्थाति सङ्घिके वा गिहिसन्तके वा गोनकादिम्हि सहधम्मिकेहि अनाणत्तेहि गिहीहि एव भूमत्थरणे कते. सयितुन्ति उपरि अत्तनो पच्चत्थरणं दत्वा निपज्जितुं वट्टति. अपि-सद्देन निसीदितुम्पि वाति समुच्चिनोति. ‘‘भूमत्थरणके’’ति इमिना गिहीहि एव मञ्चादीसु सयनत्थं अत्थते उपरि अत्तनो पच्चत्थरणं दत्वा सयितुं वा निसीदितुं वा न वट्टतीति दीपेति.

चम्मक्खन्धककथावण्णना.

भेसज्जक्खन्धककथावण्णना

२६६५. गहपतिस्स भूमि, सम्मुतिभूमि, उस्सावनन्तिकाभूमि, गोनिसादिभूमीति कप्पियभूमियो चतस्सो होन्तीति वुत्ता भगवताति योजना.

२६६६. कथं कप्पियं कत्तब्बन्ति ‘‘अनुजानामि, भिक्खवे, चतस्सो कप्पियभूमियो उस्सावनन्तिकं गोनिसादिकं गहपतिं सम्मुति’’न्ति (महाव. २९५) एवं चतस्सो भूमियो उद्धरित्वा तासं सामञ्ञलक्खणं दस्सेतुमाह ‘‘सङ्घस्सा’’तिआदि. सङ्घस्स सन्तकं वासत्थाय कतं गेहं वा भिक्खुनो सन्तकं वासत्थाय कतं गेहं वाति योजना. कप्पियं कत्तब्बन्ति कप्पियट्ठानं कत्तब्बं. सहसेय्यप्पहोनकन्ति सब्बच्छन्नपरिच्छन्नादिलक्खणेन सहसेय्यारहं.

२६६७. इदानि ¶ चतस्सोपि भूमियो सरूपतो दस्सेतुमाह ‘‘ठपेत्वा’’तिआदि. भिक्खुं ठपेत्वा अञ्ञेहि कप्पियभूमिया अत्थाय दिन्नं वा तेसं सन्तकं वा यं गेहं, इदं एव गहपतिभूमि नामाति योजना.

२६६८. या पन कुटि सङ्घेन सम्मता ञत्तिदुतियाय कम्मवाचाय, सा सम्मुतिका नाम. तस्सा सम्मन्ननकाले कम्मवाचं अवत्वा अपलोकनं वा कातुं वट्टतेवाति योजना.

२६६९-७०. पठमइट्ठकाय ¶ वा पठमपासाणस्स वा पठमत्थम्भस्स वा आदि-ग्गहणेन पठमभित्तिपादस्स वा ठपने परेसु मनुस्सेसु उक्खिपित्वा ठपेन्तेसु समन्ततो परिवारेत्वा ‘‘कप्पियकुटिं करोम, कप्पियकुटिं करोमा’’ति अभिक्खणं वदन्तेहि आमसित्वा वा सयमेव उक्खिपित्वा वा इट्ठका ठपेय्य पासाणो वा थम्भो वा भित्तिपादो वा ठपेय्य ठपेतब्बो, अयं उस्सावनन्तिका कुटीति योजना.

२६७१. इट्ठकादिपतिट्ठानन्ति पठमिट्ठकादीनं भूमियं पतिट्ठानं. वदतन्ति ‘‘कप्पियकुटिं करोम, कप्पियकुटिं करोमा’’ति वदन्तानं. समकालं तु वट्टतीति एककालं वट्टति, इमिना ‘‘सचे हि अनिट्ठिते वचने थम्भो पतिट्ठाति, अप्पतिट्ठिते वा तस्मिं वचनं निट्ठाति, अकता होति कप्पियकुटी’’ति (महाव. अट्ठ. २९५) अट्ठकथाविनिच्छयो सूचितो.

२६७२. आरामो सकलो अपरिक्खित्तो वा येभुय्यतो अपरिक्खित्तो वाति दुविधोपि विञ्ञूहि विनयधरेहि ¶ ‘‘गोनिसादी’’ति वुच्चति. पवेसनिवारणाभावेन पविट्ठानं गुन्नं निसज्जायोगतो तथा वुच्चतीति योजना.

२६७३. पयोजनं दस्सेतुमाह ‘‘एत्थ पक्कञ्चा’’तिआदि. आमिसन्ति पुरिमकालिकद्वयं. ‘‘आमिस’’न्ति इमिना निरामिसं इतरकालिकद्वयं अकप्पियकुटियं वुत्थम्पि पक्कम्पि कप्पतीति दीपेति.

२६७४-५. इमा कप्पियकुटियो कदा जहितवत्थुका होन्तीति आह ‘‘उस्सावनन्तिका या सा’’तिआदि. या उस्सावनन्तिका येसु थम्भादीसु अधिट्ठिता, सा तेसु थम्भादीसु अपनीतेसु तदञ्ञेसुपि थम्भादीसु तिट्ठतीति योजना.

सब्बेसु थम्भादीसु अपनीतेसु सा जहितवत्थुका सियाति योजना. गोनिसादिकुटि परिक्खित्ता वतिआदीहि जहितवत्थुका सिया. परिक्खित्ताति च ‘‘आरामो पन उपड्ढपरिक्खित्तोपि बहुतरं परिक्खित्तोपि परिक्खित्तोयेव नामा’’ति (महाव. अट्ठ. २९५) कुरुन्दिमहापच्चरियादीसु वुत्तत्ता न केवलं सब्बपरिक्खित्ताव, उपड्ढपरिक्खित्तापि येभुय्यपरिक्खित्तापि गहेतब्बा.

सेसाति ¶ गहपतिसम्मुतिकुटियो. छदननासतो जहितवत्थुका सियुन्ति योजना. छदननासतोति एत्थ ‘‘गोपानसिमत्तं ठपेत्वा’’ति सेसो. सचे गोपानसीनं उपरि एकम्पि पक्खपासमण्डलं अत्थि, रक्खति. यत्र पनिमा चतस्सोपि कप्पियभूमियो नत्थि, तत्थ किं कातब्बं? अनुपसम्पन्नस्स दत्वा तस्स सन्तकं कत्वा परिभुञ्जितब्बं.

२६७६. भिक्खुं ¶ ठपेत्वा अञ्ञेसं हत्थतो पटिग्गहो च तेसं सन्निधि च तेसं अन्तोवुत्थञ्च भिक्खुस्स वट्टतीति योजना.

२६७७. भिक्खुस्स सन्तकं सङ्घिकम्पि वा अकप्पियभूमियं सहसेय्यप्पहोनके गेहे अन्तोवुत्थञ्च अन्तोपक्कञ्च भिक्खुस्स न वट्टति. भिक्खुनिया सन्तकं सङ्घिकम्पि वा अकप्पियभूमियं सहसेय्यप्पहोनके गेहे अन्तोवुत्थञ्च अन्तोपक्कञ्च भिक्खुनिया न वट्टतीति एवं उभिन्नं भिक्खुभिक्खुनीनं न वट्टतीति योजना.

२६७८. अकप्पकुटियाति अकप्पियकुटिया, ‘‘अकप्पियभूमियं सहसेय्यप्पहोनके गेहे’’ति अट्ठकथायं वुत्ताय अकप्पियभूमियाति अत्थो. आदि-सद्देन नवनीततेलमधुफाणितानं गहणं.

२६७९. तेहेव अन्तोवुत्थेहि सप्पिआदीहि सत्ताहकालिकेहि सह भिक्खुना पक्कं तं यावजीविकं निरामिसं सत्ताहं परिभुञ्जितुं वट्टतेवाति योजना.

२६८०. पक्कं सामंपक्कं तं यावजीविकं सचे आमिससंसट्ठं परिभुञ्जति, अन्तोवुत्थञ्च भुञ्जति, किञ्च भिय्यो सामंपक्कञ्च भुञ्जतीति योजना. यावजीविकस्स आमिससंसट्ठस्स आमिसगतिकत्ता ‘‘अन्तोवुत्थ’’न्ति वुत्तं.

२६८२. उदकं न होति कालिकं चतूसु कालिकेसु असङ्गहितत्ता.

२६८३. तिकालिका यावकालिका यामकालिका सत्ताहकालिकाति तयो कालिका पटिग्गहवसेनेव ¶ अत्तनो ¶ अत्तनो कालं अतिक्कमित्वा भुत्ता दोसकरा होन्ति, ततियं सत्ताहातिक्कमे निस्सग्गियपाचित्तियवत्थुत्ता अभुत्तम्पि दोसकरन्ति योजना.

‘‘भुत्ता दोसकरा’’ति इमिना पुरिमकालिकद्वयं पटिग्गहेत्वा कालातिक्कमनमत्तेन आपत्तिया कारणं न होति, भुत्तमेव होति. सत्ताहकालिकं कालातिक्कमेन अपरिभुत्तम्पि आपत्तिया कारणं होतीति दीपेति. तेसु सत्ताहकालिकेयेव विसेसं दस्सेतुमाह ‘‘अभुत्तं ततियम्पि चा’’ति. च-सद्दो तु-सद्दत्थे. यावजीविकं पन पटिग्गहेत्वा यावजीवं परिभुञ्जियमानं इतरकालिकसंसग्गं विना दोसकरं न होतीति न गहितं.

२६८४. अम्बादयो सद्दा रुक्खानं नामभूता तंतंफलेपि वत्तमाना इध उपचारवसेन तज्जे पानके वुत्ता, तेनेवाह ‘‘पानकं मत’’न्ति. चोचं अट्ठिककदलिपानं. मोचं इतरकदलिपानं. मधूति मुद्दिकफलानं रसं. मुद्दिकाति सीतोदके मद्दितानं मुद्दिकफलानं पानं. ‘‘सालूकपानन्ति रत्तुप्पलनीलुप्पलादीनं सालूके मद्दित्वा कतपान’’न्ति पाळियं, अट्ठकथाय (महाव. अट्ठ. ३००) च सालूक-सद्दस्स दीघवसेन संयोगदस्सनतो ‘‘सालु फारुसकञ्चा’’ति गाथाबन्धवसेन रस्सो कतो.

सालूकं कुमुदुप्पलानं फलरसं. खुद्दसिक्खावण्णनायं पन ‘‘सालूकपानं नाम रत्तुप्पलनीलुप्पलादीनं किञ्जक्खरेणूहि कतपान’’न्ति वुत्तं. ‘‘फारुसक’न्तिआदीसु एको रुक्खो’’ति गण्ठिपदे वुत्तं. तस्स फलरसो फारुसकं नाम. एतेसं अट्ठन्नं फलानं रसो उदकसम्भिन्नो वट्टति, सीतुदके मद्दितो पसन्नो निक्कसटोव वट्टति, उदकेन पन असम्भिन्नो रसो यावकालिको.

२६८५. फलन्ति ¶ अम्बादिफलं. सवत्थुकपटिग्गहोति पानवत्थुकानं फलानं पटिग्गहो. वसति एत्थ पानन्ति वत्थु, फलं, वत्थुना सह वट्टतीति सवत्थुकं, पानं, सवत्थुकस्स पटिग्गहो सवत्थुकपटिग्गहो. सवत्थुकस्स पटिग्गहं नाम वत्थुपटिग्गहणमेवाति कत्वा वुत्तं ‘‘पानवत्थुकानं फलानं पटिग्गहो’’ति.

२६८६. ‘‘सुकोट्टेत्वा’’ति वुच्चमानत्ता ‘‘अम्बपक्क’’न्ति आमकमेव अम्बफलं वुच्चति ¶ . उदकेति सीतोदके. परिस्सवं परिस्सावितं. कत्वाति मधुआदीहि अभिसङ्खरित्वा. यथाह – ‘‘तदहुपटिग्गहितेहि मधुसक्करकप्पूरादीहि योजेत्वा कातब्ब’’न्ति (महाव. अट्ठ. ३००). पातुं वट्टतीति एत्थ विनिच्छयो ‘‘एवं कतं पुरेभत्तमेव कप्पति, अनुपसम्पन्नेहि कतं लभित्वा पन पुरेभत्तं पटिग्गहितं पुरेभत्तं सामिसपरिभोगेनापि वट्टति, पच्छाभत्तं निरामिसपरिभोगेन याव अरुणुग्गमना वट्टतियेव. एस नयो सब्बपानेसू’’ति अट्ठकथायं वुत्तो.

२६८७. सेसपानकेसुपीति जम्बुपानकादीसुपि.

२६८८. उच्छुरसो अन्तोगधत्ता इध वुत्तो, न पन यामकालिकत्ता, सो पन सत्ताहकालिकोयेव.

२६८९. मधुकस्स रसन्ति मधुकपुप्फस्स रसं. एत्थ मधुकपुप्फरसो अग्गिपाको वा होतु आदिच्चपाको वा, पच्छाभत्तं न वट्टति. पुरेभत्तम्पि यं पानं गहेत्वा मज्जं करोन्ति, सो आदितो पट्ठाय न वट्टति. मधुकपुप्फं पन अल्लं वा सुक्खं वा भज्जितं वा तेन कतफाणितं वा यतो पट्ठाय मज्जं न करोन्ति, तं सब्बं पुरेभत्तं वट्टति.

पक्कडाकरसन्ति ¶ पक्कस्स यावकालिकस्स रसं. सब्बो पत्तरसो यामकालिको वुत्तोति योजना. अट्ठकथायं ‘‘यावकालिकपत्तानञ्हि पुरेभत्तंयेव रसो कप्पती’’ति (महाव. अट्ठ. ३००) इममेव सन्धाय वुत्तं.

२६९०. सानुलोमानं सत्तन्नं धञ्ञानं फलजं रसं ठपेत्वा सब्बो फलजो रसो विकाले यामसञ्ञिते अनुलोमतो परिभुञ्जितुं अनुञ्ञातोति योजना.

२६९१. यावकालिकपत्तानं सीतुदके मद्दित्वा कतो रसोपि अपक्को, आदिच्चपाकोपि विकाले पन वट्टतीति योजना.

२६९२-३. सत्तधञ्ञानुलोमानि सरूपतो दस्सेतुमाह ‘‘तालञ्चनाळिकेरञ्चा’’तिआदि. अपरण्णं ¶ मुग्गादि. ‘‘सत्तधञ्ञानुलोमिक’’न्ति इमिना एतेसं रसो यावकालिको यामकालसङ्खाते विकाले परिभुञ्जितुं न वट्टतीति दस्सेति.

२६९५. एवमादीनं खुद्दकानं फलानं रसो पन अट्ठपानानुलोमत्ता अनुलोमिके यामकालिकानुलोमिके निद्दिट्ठो कथितोति योजना.

२६९६. इध इमस्मिं लोके सानुलोमस्स धञ्ञस्स फलजं रसं ठपेत्वा अयामकालिको अञ्ञो फलरसो नत्थीति योजना, सब्बो यामकालिकोयेवाति दीपेति.

भेसज्जक्खन्धककथावण्णना.

कथिनक्खन्धककथावण्णना

२६९७. वुत्थवस्सानं ¶ पुरिमिकाय वस्सं उपगन्त्वा याव महापवारणा, ताव रत्तिच्छेदं अकत्वा वुत्थवस्सानं भिक्खूनं एकस्स वा द्विन्नं तिण्णं चतुन्नं पञ्चन्नं अतिरेकानं वा भिक्खूनं पञ्चन्नं आनिसंसानं वक्खमानानं अनामन्तचारादीनं पञ्चन्नं आनिसंसानं पटिलाभकारणा मुनिपुङ्गवो सब्बेसं अगारिकादिमुनीनं सकलगुणगणेहि उत्तमो भगवा कथिनत्थारं ‘‘अनुजानामि, भिक्खवे, वस्संवुत्थानं भिक्खूनं कथिनं अत्थरितु’’न्ति (महाव. ३०६) अब्र्वि कथेसीति योजना.

एत्थायं विनिच्छयो – ‘‘कथिनत्थारं के लभन्ति, के न लभन्तीति? गणनवसेन ताव पच्छिमकोटिया पञ्च जना लभन्ति, उद्धं सतसहस्सम्पि, पञ्चन्नं हेट्ठा न लभन्ती’’ति (महाव. अट्ठ. ३०६) इदं अट्ठकथाय अत्थारकस्स भिक्खुनो सङ्घस्स कथिनदुस्सदानकम्मं सन्धाय वुत्तं. ‘‘वुत्थवस्सवसेन पुरिमिकाय वस्सं उपगन्त्वा पठमपवारणाय पवारिता लभन्ति, छिन्नवस्सा वा पच्छिमिकाय उपगता वा न लभन्ति. अञ्ञस्मिं विहारे वुत्थवस्सापि न लभन्तीति महापच्चरियं वुत्त’’न्ति (महाव. अट्ठ. ३०६) इदं अट्ठकथाय आनिसंसलाभं सन्धाय वुत्तं, न कम्मं.

इदानि तदुभयं विभजित्वा दस्सेति –

‘‘पुरिमिकाय ¶ उपगतानं पन सब्बे गणपूरका होन्ति, आनिसंसं न लभन्ति, आनिसंसो इतरेसंयेव होति. सचे पुरिमिकाय उपगता चत्तारो वा होन्ति, तयो वा द्वे वा एको वा, इतरे गणपूरके कत्वा कथिनं अत्थरितब्बं. अथ चत्तारो भिक्खू उपगता, एको परिपुण्णवस्सो सामणेरो, सो चे पच्छिमिकाय उपसम्पज्जति, गणपूरको चेव होति, आनिसंसञ्च लभति ¶ . तयो भिक्खू द्वे सामणेरा, द्वे भिक्खू तयो सामणेरा, एको भिक्खु चत्तारो सामणेराति एत्थापि एसेव नयो. सचे पुरिमिकाय उपगता कथिनत्थारकुसला न होन्ति, अत्थारकुसला खन्धकभाणकत्थेरा परियेसित्वा आनेतब्बा, कम्मवाचं सावेत्वा कथिनं अत्थरापेत्वा दानञ्च भुञ्जित्वा गमिस्सन्ति, आनिसंसो पन इतरेसंयेव होती’’ति (महाव. अट्ठ. ३०६).

कथिनं केन दिन्नं वट्टतीति? येन केनचि देवेन वा मनुस्सेन वा पञ्चन्नं वा सहधम्मिकानं अञ्ञतरेन दिन्नं वट्टति. कथिनदायकस्स वत्तं अत्थि, सचे सो तं अजानन्तो पुच्छति ‘‘भन्ते, कथं कथिनं दातब्ब’’न्ति, तस्स एवं आचिक्खितब्बं ‘‘तिण्णं चीवरानं अञ्ञतरप्पहोनकं सूरियुग्गमनसमये वत्थं ‘कथिनचीवरं देमा’ति दातुं वट्टति, तस्स परिकम्मत्थं एत्तका नाम सूचियो, एत्तकं सुत्तं, एत्तकं रजनं, परिकम्मं करोन्तानं एत्तकानं भिक्खूनं यागुभत्तञ्च दातुं वट्टती’’ति.

कथिनत्थारकेनापि धम्मेन समेन उप्पन्नं कथिनं अत्थरन्तेन वत्तं जानितब्बं. तन्तवायगेहतो हि आभतसन्तानेनेव खलिमक्खितसाटकोपि न वट्टति, मलीनसाटकोपि न वट्टति, तस्मा कथिनत्थारसाटकं लभित्वा सुद्धं धोवित्वा सूचिआदीनि चीवरकम्मूपकरणानि सज्जेत्वा बहूहि भिक्खूहि सद्धिं तदहेव सिब्बित्वा निट्ठितसूचिकम्मं रजित्वा कप्पबिन्दुं दत्वा कथिनं अत्थरितब्बं. सचे तस्मिं अनत्थतेयेव अञ्ञो कथिनसाटकं अत्थरितब्बकं आहरति, अञ्ञानि च बहूनि कथिनानिसंसवत्थानि देति, यो ¶ आनिसंसं बहुं देति, तस्स सन्तकेनेव अत्थरितब्बं. इतरो यथा तथा ओवदित्वा सञ्ञापेतब्बो.

कथिनं पन केन अत्थरितब्बं? यस्स सङ्घो कथिनचीवरं देति. सङ्घेन पन कस्स दातब्बं? यो जिण्णचीवरो होति. सचे बहू जिण्णचीवरा होन्ति, वुड्ढस्स दातब्बं. वुड्ढेसुपि यो महापरिवारो तदहेव चीवरं कत्वा अत्थरितुं सक्कोति, तस्स दातब्बं. सचे वुड्ढो ¶ न सक्कोति, नवकतरो सक्कोति, तस्स दातब्बं. अपि च सङ्घेन महाथेरस्स सङ्गहं कातुं वट्टति, तस्मा ‘‘तुम्हे, भन्ते, गण्हथ, मयं कत्वा दस्सामा’’ति वत्तब्बं.

तीसु चीवरेसु यं जिण्णं होति, तदत्थाय दातब्बं. पकतिया दुपट्टचीवरस्स दुपट्टत्थायेव दातब्बं. सचेपिस्स एकपट्टचीवरं घनं होति, कथिनसाटको च पेलवो, सारुप्पत्थाय दुपट्टप्पहोनकमेव दातब्बं. ‘‘अहं अलभन्तो एकपट्टं पारुपामी’’ति वदन्तस्सापि दुपट्टं दातुं वट्टति. यो पन लोभपकतिको होति, तस्स न दातब्बं. तेनापि कथिनं अत्थरित्वा ‘‘पच्छा विसिब्बित्वा द्वे चीवरानि करिस्सामी’’ति न गहेतब्बं.

यस्स पन दिय्यति, तस्स –

‘‘सुणातु मे, भन्ते सङ्घो, इदं सङ्घस्स कथिनदुस्सं उप्पन्नं, यदि सङ्घस्स पत्तकल्लं, सङ्घो इमं कथिनदुस्सं इत्थन्नामस्स भिक्खुनो ददेय्य कथिनं अत्थरितुं, एसा ञत्ति.

‘‘सुणातु मे, भन्ते सङ्घो, इदं सङ्घस्स कथिनदुस्सं उप्पन्नं, सङ्घो इमं कथिनदुस्सं इत्थन्नामस्स भिक्खुनो देति कथिनं अत्थरितुं, यस्सायस्मतो खमति ¶ इमस्स कथिनदुस्सस्स इत्थन्नामस्स भिक्खुनो दानं कथिनं अत्थरितुं, सो तुण्हस्स, यस्स नक्खमति, सो भासेय्य.

‘‘दिन्नं इदं सङ्घेन कथिनदुस्सं इत्थन्नामस्स भिक्खुनो कथिनं अत्थरितुं, खमति सङ्घस्स, तस्मा तुण्ही, एवमेतं धारयामी’’ति (महाव. ३०७) –

एवं ञत्तिदुतियाय कम्मवाचाय दातब्बन्ति एवं दिन्नं.

२६९८-९. न उल्लिखितमत्तादि-चतुवीसतिवज्जितन्ति पाळियं आगतेहि ‘‘न उल्लिखितमत्तेन अत्थतं होति कथिन’’न्ति (महाव. ३०८) उल्लिखितमत्तादीहि चतुवीसतिया आकारेहि वज्जितं. चीवरन्ति ‘‘अहतेन अत्थतं होति कथिन’’न्ति (महाव. ३०९) पाळियं ¶ आगतानं सोळसन्नं आकारानं अञ्ञतरेन युत्तं कतपरियोसितं दिन्नं कप्पबिन्दुं तिण्णं चीवरानं अञ्ञतरचीवरं. ते पन चतुवीसति आकारा, सोळसाकारा च पाळितो (महाव. ३०८), अट्ठकथातो (महाव. अट्ठ. ३०८) च गहेतब्बा. गन्थगारवपरिहारत्थमिध न वुत्ता.

भिक्खुना वक्खमाने अट्ठधम्मे जानन्तेन अत्थरकेन आदाय गहेत्वा पुराणकं अत्तना परिभुञ्जियमानं अत्थरितब्बचीवरेन एकनामकं पुराणचीवरं उद्धरित्वा पच्चुद्धरित्वा नवं अत्थरितब्बं चीवरं अधिट्ठहित्वा पुराणपच्चुद्धटचीवरस्स नामेन अधिट्ठहित्वाव तं अन्तरवासकं चे, ‘‘इमिना अन्तरवासकेन कथिनं अत्थरामि’’इति वचसा वत्तब्बन्ति योजना. सचे उत्तरासङ्गो होति, ‘‘इमिना उत्तरासङ्गेन कथिनं अत्थरामि’’, सचे सङ्घाटि होति, ‘‘इमाय सङ्घाटिया कथिनं अत्थरामी’’ति वत्तब्बं.

२७००-१. इच्चेवं ¶ तिक्खत्तुं वुत्ते कथिनं अत्थतं होतीति योजना. तेन पन भिक्खुना नवकेन कथिनचीवरं आदाय सङ्घं उपसङ्कम्म ‘‘अत्थतं, भन्ते, सङ्घस्स कथिनं, धम्मिको कथिनत्थारो, अनुमोदथ’’इति वत्तब्बन्ति योजना.

२७०२. अनुमोदकेसु च थेरेहि ‘‘अत्थतं, आवुसो, सङ्घस्स कथिनं, धम्मिको कथिनत्थारो, अनुमोदामा’’ति वत्तब्बं, नवेन पन ‘‘अत्थतं, भन्ते, सङ्घस्स कथिनं, धम्मिको कथिनत्थारो, अनुमोदामी’’ति इति पुन ईरये कथेय्याति योजना. गाथाय पन अनुमोदनपाठस्स अत्थदस्सनमुखेन ‘‘सुअत्थतं तया भन्ते’’ति वुत्तं, न पाठक्कमदस्सनवसेनाति वेदितब्बं.

अत्थारकेसु च अनुमोदकेसु च नवेहि वुड्ढानं वचनक्कमो वुत्तो, वुड्ढेहि नवानं वचनक्कमो पन तदनुसारेन यथारहं योजेत्वा वत्तब्बोति गाथासु न वुत्तोति वेदितब्बो. अत्थारकेन थेरेन वा नवेन वा गणपुग्गलानं वचनक्कमो च गणपुग्गलेहि अत्थारकस्स वचनक्कमो च वुत्तनयेन यथारहं योजेतुं सक्काति न वुत्तो.

एवं अत्थते पन कथिने सचे कथिनचीवरेन सद्धिं आभतं आनिसंसं दायका ‘‘येन अम्हाकं ¶ कथिनं गहितं, तस्सेव च देमा’’ति देन्ति, भिक्खुसङ्घो अनिस्सरो. अथ अविचारेत्वाव दत्वा गच्छन्ति, भिक्खुसङ्घो इस्सरो. तस्मा सचे कथिनत्थारकस्स सेसचीवरानिपि दुब्बलानि होन्ति, सङ्घेन अपलोकेत्वा तेसम्पि अत्थाय वत्थानि दातब्बानि, कम्मवाचाय पन एकायेव वट्टति. अवसेसे ¶ कथिनानिसंसे बलववत्थानि वस्सावासिकठितिकाय दातब्बानि, ठितिकाय अभावे थेरासनतो पट्ठाय दातब्बानि, गरुभण्डं न भाजेतब्बं. सचे पन एकसीमाय बहू विहारा होन्ति, सब्बे भिक्खू सन्निपातेत्वा एकत्थ कथिनं अत्थरितब्बं, विसुं विसुं अत्थरितुं न वट्टति.

२७०३. ‘‘कथिनस्स च किं मूल’’न्तिआदीनि सयमेव विवरिस्सति.

२७०६. अट्ठधम्मुद्देसगाथाय पुब्बकिच्चं पुब्ब-वचनेनेव उत्तरपदलोपेन वुत्तं. तेनेव वक्खति ‘‘पुब्बकिच्चन्ति वुच्चती’’ति. ‘‘पच्चुद्धार’’इति वत्तब्बे ‘‘पच्चुद्धर’’इति गाथाबन्धवसेन रस्सो. तेनेव वक्खति ‘‘पच्चुद्धारो’’ति. अधिट्ठहनं अधिट्ठानं. पच्चुद्धारो च अधिट्ठानञ्च पच्चुद्धराधिट्ठाना. इतरीतरयोगेन द्वन्दसमासो. अत्थारोति एत्थ ‘‘कथिनत्थारो’’ति पकरणतो लब्भति.

‘‘मातिका’’ति इमिना ‘‘अट्ठ कथिनुब्भारमातिका’’ति पकरणतो विञ्ञायति. यथाह – ‘‘अट्ठिमा, भिक्खवे, मातिका कथिनस्स उब्भाराया’’ति (महाव. ३१०). मातिकाति मातरो जनेत्तियो, कथिनुब्भारं एता अट्ठ जनेन्तीति अत्थो. उद्धारोति कथिनस्स उद्धारो. आनिसंसाति एत्थ ‘‘कथिनस्सा’’ति पकरणतो लब्भति. कथिनस्स आनिसंसाति इमे अट्ठ धम्माति योजना. यथाह ‘‘अत्थतकथिनानं वो, भिक्खवे, पञ्च कप्पिस्सन्ती’’तिआदि (महाव. ३०६). ‘‘आनिसंसेना’’तिपि पाठो. आनिसंसेन सह इमे अट्ठ धम्माति योजना.

२७०७. ‘‘न उल्लिखितमत्तादि-चतुवीसतिवज्जित’’न्तिआदिना कथिनं अत्थरितुं कतपरियोसितं चीवरं चे लद्धं, तत्थ ¶ पटिपज्जनविधिं दस्सेत्वा सचे अकतसिब्बनादिकम्मं वत्थमेव लद्धं, तत्थ पटिपज्जनविधिं पुब्बकिच्चवसेन दस्सेतुमाह ‘‘धोवन’’न्तिआदि. तत्थ धोवनन्ति कथिनदुस्सस्स सेतभावकरणं. विचारोति ‘‘पञ्चकं वा सत्तकं वा नवकं वा एकादसकं ¶ वा होतू’’ति विचारणं. छेदनन्ति यथाविचारितस्स वत्थस्स छेदनं. बन्धनन्ति मोघसुत्तकारोपनं. सिब्बनन्ति सब्बसूचिकम्मं. रजनन्ति रजनकम्मं. कप्पन्ति कप्पबिन्दुदानं. ‘‘पुब्बकिच्च’’न्ति वुच्चति इदं सब्बं कथिनत्थारस्स पठममेव कत्तब्बत्ता.

२७०८. अन्तरवासकोति एत्थ इति-सद्दो लुत्तनिद्दिट्ठो. सङ्घाटि, उत्तरासङ्गो, अथो अन्तरवासकोति एसमेव तु पच्चुद्धारोपि अधिट्ठानम्पि अत्थारोपि वुत्तोति योजना.

२७०९. अट्ठमातिका (महाव. ३१०-३११; परि. ४१५; महाव. अट्ठ. ३१०-३११) दस्सेतुमाह ‘‘पक्कमनञ्चा’’तिआदि. पक्कमनं अन्तो एतस्साति पक्कमनन्तिकाति वत्तब्बे उत्तरपदलोपेन ‘‘पक्कमन’’न्ति वुत्तं. एस नयो सब्बत्थ. अट्ठिमाति एत्थ ‘‘मातिका’’ति पकरणतो लब्भति. इमा अट्ठ मातिकाति योजना.

२७१०. उद्देसानुक्कमेन निद्दिसितुमाह ‘‘कतचीवरमादाया’’तिआदि. ‘‘कतचीवरमादाया’’ति इमिना चीवरपलिबोधुपच्छेदो दस्सितो. ‘‘आवासे निरपेक्खको’’ति इमिना दुतियो आवासपलिबोधुपच्छेदो दस्सितो. एत्थ सब्बवाक्येसु ‘‘अत्थतकथिनो यो भिक्खु सचे पक्कमती’’ति सेसो. अतिक्कन्ताय सीमायाति विहारसीमाय अतिक्कन्ताय. होति पक्कमनन्तिकाति एत्थ ‘‘तस्स भिक्खुनो’’ति सेसो, तस्स भिक्खुनो पक्कमनन्तिका नाम मातिका होतीति अत्थो.

२७११-२. आनिसंसं ¶ नाम वुत्थवस्सेन लद्धं अकतसूचिकम्मवत्थं. तेनेव वक्खति ‘‘करोती’’तिआदि. ‘‘विहारे अनपेक्खको’’ति इमिना एत्थ पठमं आवासपलिबोधुपच्छेदो दस्सितो. सुखविहरणं पयोजनमस्साति सुखविहारिको, विहारोति. तत्थ तस्मिं विहारे विहरन्तोव तं चीवरं यदि करोति, तस्मिं चीवरे निट्ठिते निट्ठानन्ता निट्ठानन्तिकाति वुच्चतीति योजना. ‘‘निट्ठितेचीवरे’’ति इमिना चीवरपलिबोधुपच्छेदो दस्सितो.

२७१३. तमस्समन्ति तं वुत्थवस्सावासं. धुरनिक्खेपेति उभयधुरनिक्खेपवसेन चित्तप्पवत्तक्खणे. सन्निट्ठानं नाम धुरनिक्खेपो. एत्थ पलिबोधद्वयस्स एकक्खणेयेव उपच्छेदो अट्ठकथायं ¶ वुत्तो ‘‘सन्निट्ठानन्तिके द्वेपि पलिबोधा ‘नेविमं चीवरं कारेस्सं, न पच्चेस्स’न्ति चिन्तितमत्तेयेव एकतो छिज्जन्ती’’ति (महाव. अट्ठ. ३११).

२७१४. कथिनच्छादनन्ति कथिनानिसंसं चीवरवत्थुं. न पच्चेस्सन्ति न पच्चागमिस्सामि. करोन्तस्सेवाति एत्थ ‘‘चीवर’’न्ति पकरणतो लब्भति. ‘‘कथिनच्छादन’’न्ति इदं वा सम्बन्धनीयं. करोन्तस्साति अनादरे सामिवचनं. नट्ठन्ति चोरेहि हटत्ता वा उपचिकादीहि खादितत्ता वा नट्ठं. दड्ढं वाति अग्गिना दड्ढं वा. नासनन्तिकाति एवं चीवरस्स नासनन्ते लब्भमाना अयं मातिका नासनन्तिका नामाति अत्थो. एत्थ ‘‘न पच्चेस्स’’न्ति इमिना पठमं आवासपलिबोधुपच्छेदो दस्सितो. ‘‘करोन्तस्सेवा’’ति इमिना दुतियं चीवरपलिबोधुपच्छेदो दस्सितो.

२७१५. लद्धानिसंसोति लद्धकथिनानिसंसचीवरो. आनिसंसे चीवरे सापेक्खो अपेक्खवा बहिसीमगतो वस्संवुत्थसीमाय ¶ बहिसीमगतो तं चीवरं करोति, सो कतचीवरो अन्तरुब्भारं अन्तरा उब्भारं सुणाति चे, सवनन्तिका नाम होतीति योजना. ‘‘बहिसीमगतो’’तिआदिना दुतियपलिबोधुपच्छेदो दस्सितो. एत्थ ‘‘कतचीवरो’’ति वुत्तत्ता चीवरपलिबोधुपच्छेदो पठमं होति, इतरो पन ‘‘सह सवनेन आवासपलिबोधो छिज्जती’’ति (महाव. अट्ठ. ३११) अट्ठकथाय वुत्तत्ता पच्छा होति.

२७१६-७. चीवरासाय वस्संवुत्थो आवासतो पक्कन्तो ‘‘तुय्हं चीवरं दस्सामी’’ति केनचि वुत्तो बहिसीमगतो पन सवति, पुन ‘‘तव चीवरं दातुं न सक्कोमी’’ति वुत्तो आसाय छिन्नमत्ताय चीवरे पच्चासाय उपच्छिन्नमत्ताय आसावच्छेदिका नाम मातिकाति मता ञाताति योजना. आसावच्छादिके कथिनुब्भारे आवासपलिबोधो पठमं छिज्जति, चीवरासाय उपच्छिन्नाय चीवरपलिबोधो छिज्जति.

२७१८-२०. यो वस्संवुत्थविहारम्हा अञ्ञं विहारं गतो होति, सो आगच्छं आगच्छन्तो अन्तरामग्गे कथिनुद्धारं अतिक्कमेय्य, तस्स सो कथिनुद्धारो सीमातिक्कन्तिको मतोति योजना. तत्थ सीमातिक्कन्तिके कथिनुब्भारे चीवरपलिबोधो पठमं छिज्जति, तस्स बहिसीमे आवासपलिबोधो छिज्जति.

एत्थ ¶ च ‘‘सीमातिक्कन्तिको नाम चीवरकालसीमातिक्कन्तिको’’ति केनचि वुत्तं. ‘‘बहिसीमायं चीवरकालसमयस्स अतिक्कन्तत्ता सीमातिक्कन्तिको’’ति (सारत्थ. टी. महाव. ३११) सारत्थदीपनियं वुत्तं. ‘‘आगच्छं अन्तरामग्गे, तदुद्धारमतिक्कमे’’ति वुत्तत्ता पन सङ्घेन ¶ करियमानं अन्तरुब्भारं आगच्छन्तो विहारसीमं असम्पत्तेयेव कथिनुब्भारस्स जातत्ता तं न सम्भुणेय्य, तस्सेवं सीममतिक्कन्तस्सेव सतो पुन आगच्छतो अन्तरामग्गे जातो कथिनुब्भारो सीमातिक्कन्तिकोति अम्हाकं खन्ति.

कथिनानिसंसचीवरं आदाय सचे आवासे सापेक्खोव गतो होति, पुन आगन्त्वा कथिनुद्धारं कथिनस्स अन्तरुब्भारमेव सम्भुणाति चे यदि पापुणेय्य, तस्स सो कथिनुद्धारो होति, सो ‘‘सहुब्भारो’’ति वुच्चतीति योजना. सहुब्भारे द्वे पलिबोधा अपुब्बं अचरिमं छिज्जन्ति.

२७२१. ‘‘सीमातिक्कन्तिकेना’’ति वत्तब्बे उत्तरपदलोपेन ‘‘सीमतो’’ति वुत्तं. पक्कमनञ्च निट्ठानञ्च सन्निट्ठानञ्च सीमतो सीमातिक्कन्तिकेन सह इमे चत्तारो कथिनुब्भारा पुग्गलाधीना पुग्गलायत्ता सहुब्भारसङ्खातो अन्तरुब्भारो सङ्घाधीनोति योजना. ‘‘अन्तरुब्भरो’’ति गाथाबन्धवसेन रस्सत्तं.

२७२२. नासनन्ति नासनन्तिको. सवनन्ति सवनन्तिको. आसावच्छेदिकापि चाति तयोपि कथिनुब्भारा. न तु सङ्घा न भिक्खुतोति सङ्घतोपि न होन्ति, पुग्गलतोपि न होन्तीति अत्थो. चीवरस्स विनासो सङ्घस्स वा चीवरसामिकस्स वा पयोगेन न जातोति नासनको ताव कथिनुब्भारो उभतोपि न होतीति वुत्तो. सवनञ्च उभयेसं पयोगतो न जातन्ति तथा वुत्तं. तथा आसावच्छेदिकापि.

२७२३. आवासोयेव पलिबोधोति विग्गहो. पलिबोधो च चीवरेति एत्थ चीवरेति भेदवचनिच्छाय निमित्तत्थे ¶ भुम्मं, चीवरनिमित्तपलिबोधोति अत्थो, चीवरसङ्खातो पलिबोधोति वुत्तं होति. सच्चादिगुणयुत्तं मुसावादादिदोसविमुत्तं अत्थं वदति सीलेनाति युत्तमुत्तत्थवादी, तेन.

२७२४. अट्ठन्नं ¶ मातिकानन्ति बहिसीमगतानं वसेन वुत्ता पक्कमनन्तिकादयो सत्त मातिका, बहिसीमं गन्त्वा अन्तरुब्भारं सम्भुणन्तस्स वसेन वुत्तो सहुब्भारोति इमासं अट्ठन्नं मातिकानं वसेन च. अन्तरुब्भारतोपि वाति बहिसीमं अगन्त्वा तत्थेव वसित्वा कथिनुब्भारकम्मेन उब्भारकथिनानं वसेन लब्भनतो अन्तरुब्भारतो चाति महेसिना कथिनस्स दुवे उब्भारापि वुत्ताति योजना. बहिसीमं गन्त्वा आगतस्स वसेन सहुब्भारो, बहिसीमं आगतानं वसेन अन्तरुब्भारोति एकोयेव उब्भारो द्विधा वुत्तो, तस्मा अन्तरुब्भारं विसुं अग्गहेत्वा अट्ठेव मातिका पाळियं (महाव. ३१०) विभत्ताति वेदितब्बा.

२७२५. अनामन्तचारो उत्तरपदलोपवसेन ‘‘अनामन्ता’’ इति वुत्तो. याव कथिनं न उद्धरीयति, ताव अनामन्तेत्वा चरणं कप्पिस्सति, चारित्तसिक्खापदेन अनापत्ति भविस्सतीति अत्थो.

असमादानचारो ‘‘असमादान’’न्ति उत्तरपदलोपेन वुत्तो. असमादानचारोति तिचीवरं असमादाय चरणं, चीवरविप्पवासो कप्पिस्सतीति अत्थो.

‘‘गणतो’’ति इमिना उत्तरपदलोपेन गणभोजनं दस्सितं. गणभोजनम्पि कप्पिस्सति, तं सरूपतो पाचित्तियकण्डे वुत्तं.

‘‘यावदत्थिक’’न्ति ¶ इमिना यावदत्थचीवरं वुत्तं. यावदत्थचीवरन्ति यावतकेन चीवरेन अत्थो, तावतकं अनधिट्ठितं अविकप्पितं कप्पिस्सतीति अत्थो.

‘‘तत्थ यो चीवरुप्पादो’’ति इमिना ‘‘यो च तत्थ चीवरुप्पादो’’ति (महाव. ३०६) वुत्तो आनिसंसो दस्सितो. यो च तत्थ चीवरुप्पादोति तत्थ कथिनत्थतसीमायं मतकचीवरं वा होतु सङ्घस्स उद्दिस्स दिन्नं वा सङ्घिकेन तत्रुप्पादेन आभतं वा, येन केनचि आकारेन यं सङ्घिकं चीवरं उप्पज्जति, तं तेसं भविस्सतीति अत्थो. इमे पञ्च कथिनानिसंसा च वुत्ताति सम्बन्धो.

कथिनक्खन्धककथावण्णना.

चीवरक्खन्धककथावण्णना

२७२६-७. चीवरं ¶ उप्पज्जति एतासूति ‘‘उप्पादा’’ति जनिकाव वुच्चन्ति, चीवरवत्थपरिलाभक्खेत्तन्ति अत्थो. यथाह – ‘‘यथावुत्तानं चीवरानं पटिलाभाय खेत्तं दस्सेतुं अट्ठिमा भिक्खवे मातिकातिआदिमाहा’’ति (महाव. अट्ठ. ३७९). चीवरमातिकाति चीवरुप्पादहेतुभूतमातरो. तेनाह कथिनक्खन्धकवण्णनायं ‘‘मातिकाति मातरो, जनेत्तियोति अत्थो’’ति (महाव. अट्ठ. ३१०). मातिकाति चेत्थ चीवरदानमधिप्पेतं. यथाह ‘‘सीमाय दानं एका मातिका, कतिकाय दानं दुतिया’’तिआदि. सीमाय देति, कतिकाय देति, भिक्खापञ्ञत्तिया देति, सङ्घस्स देति, उभतोसङ्घे देति, वस्संवुत्थसङ्घस्स देति, आदिस्स देति, पुग्गलस्स देति. ‘‘इमा पन अट्ठ मातिका’’ति वुत्तमेव निगमनवसेन वुत्तं.

२७२८. तत्थाति ¶ तासु अट्ठमातिकासु. सीमाय देतीति ‘‘सीमाय दम्मी’’ति एवं सीमं परामसित्वा देन्तो सीमाय देति, एवं दिन्नं अन्तोसीमगतेहि भिक्खूहि भाजेतब्बन्ति वण्णितन्ति योजना. तत्थ अन्तोसीमगतेहीति दायको यं सीमं अपेक्खित्वा एवमाह, तस्सा सीमाय अन्तोगतेहि सब्बेहि. भाजेतब्बन्ति तं चीवरं भाजेतब्बं. वरवण्णिनाति ‘‘इतिपि सो भगवा अरह’’न्तिआदिना सकललोकब्यापिगुणातिसययुत्तेन ब्यामप्पभाय, छब्बण्णानं रंसीनञ्च वसेन उत्तमप्पभातिसययुत्तेन वरवण्णिना वण्णितं कथितं. अयमेत्थ पदवण्णना, अयं पन विनिच्छयो – सीमाय देतीति एत्थ ताव खण्डसीमा उपचारसीमा समानसंवाससीमा अविप्पवाससीमा लाभसीमा गामसीमा निगमसीमा नगरसीमा अब्भन्तरसीमा उदकुक्खेपसीमा जनपदसीमा रट्ठसीमा रज्जसीमा दीपसीमा चक्कवाळसीमा इति पन्नरस सीमा वेदितब्बा.

तत्थ खण्डसीमा सीमाकथायं वुत्ता. उपचारसीमा परिक्खित्तस्स विहारस्स परिक्खेपेन, अपरिक्खित्तस्स विहारस्स परिक्खेपारहट्ठानेन परिच्छिन्ना होति. अपिच भिक्खूनं धुवसन्निपातट्ठानतो वा परियन्ते ठितभोजनसालतो वा निबद्धवसनकआवासतो वा थाममज्झिमस्स पुरिसस्स द्विन्नं लेड्डुपातानं अन्तो उपचारसीमा वेदितब्बा. सा पन आवासेसु वड्ढन्तेसु वड्ढति, परिहायन्तेसु परिहायति. महापच्चरियं पन ‘‘भिक्खूसुपि वड्ढन्तेसु वड्ढती’’ति (महाव. अट्ठ. ३७९) वुत्तं. तस्मा सचे विहारे सन्निपतितभिक्खूहि सद्धिं ¶ एकाबद्धा हुत्वा योजनसतम्पि पूरेत्वा निसीदन्ति, योजनसतम्पि उपचारसीमाव होति, सब्बेसं लाभो पापुणाति. समानसंवासअविप्पवाससीमाद्वयम्पि वुत्तमेव.

लाभसीमा ¶ नाम नेव सम्मासम्बुद्धेन अनुञ्ञाता, न धम्मसङ्गाहकत्थेरेहि ठपिता, अपिच खो राजराजमहामत्ता विहारं कारेत्वा गावुतं वा अड्ढयोजनं वा योजनं वा समन्ततो परिच्छिन्दित्वा ‘‘अयं अम्हाकं विहारस्स लाभसीमा’’ति नामलिखितके थम्भे निखणित्वा ‘‘यं एत्थन्तरे उप्पज्जति, सब्बं तं अम्हाकं विहारस्स देमा’’ति सीमं ठपेन्ति, अयं लाभसीमा नाम. गामनिगमनगरअब्भन्तरउदकुक्खेपसीमापि वुत्ता एव.

जनपदसीमा नाम कासिकोसलरट्ठादीनं अन्तो बहू जनपदा होन्ति, एत्थ एकेको जनपदपरिच्छेदो जनपदसीमा. रट्ठसीमा नाम कासिकोसलादिरट्ठपरिच्छेदो. रज्जसीमा नाम महाचोळभोगो केरळभोगोति एवं एकेकस्स रञ्ञो आणापवत्तिट्ठानं. दीपसीमा नाम समुद्दन्तेन समुच्छिन्नमहादीपा च अन्तरदीपा च. चक्कवाळसीमा नाम चक्कवाळपब्बतेनेव परिच्छिन्ना.

एवमेतासु सीमासु खण्डसीमाय केनचि कम्मेन सन्निपतितं सङ्घं दिस्वा ‘‘एत्थेव सीमाय सङ्घस्स देमी’’ति वुत्ते यावतिका भिक्खू अन्तोखण्डसीमगता, तेहि भाजेतब्बं. तेसंयेव हि तं पापुणाति, अञ्ञेसं सीमन्तरिकाय वा उपचारसीमाय वा ठितानम्पि न पापुणाति. खण्डसीमाय ठिते पन रुक्खे वा पब्बते वा ठितस्स हेट्ठा वा पथविया वेमज्झं गतस्स पापुणातियेव.

‘‘इमिस्सा उपचारसीमाय सङ्घस्स दम्मी’’ति दिन्नं पन खण्डसीमासीमन्तरिकासु ठितानम्पि पापुणाति. ‘‘समानसंवाससीमाय दम्मी’’ति दिन्नं पन खण्डसीमासीमन्तरिकासु ठितानं न पापुणाति. अविप्पवाससीमालाभसीमासु दिन्नं तासु सीमासु अन्तोगतानंयेव पापुणाति. गामसीमादीसु दिन्नं ¶ तासं सीमानं अब्भन्तरे बद्धसीमाय ठितानम्पि पापुणाति. अब्भन्तरसीमाउदकुक्खेपसीमासु दिन्नं तत्थ अन्तोगतानंयेव पापुणाति. जनपदरट्ठरज्जदीपचक्कवाळसीमासुपि गामसीमादीसु वुत्तसदिसोयेव विनिच्छयो.

सचे ¶ पन जम्बुदीपे ठितो ‘‘तम्बपण्णिदीपे सङ्घस्स दम्मी’’ति वदति, तम्बपण्णिदीपतो एकोपि गन्त्वा सब्बेसं गण्हितुं लभति. सचेपि तत्रेव एको सभागभिक्खु सभागानं भागं गण्हाति, न वारेतब्बो. एवं ताव यो सीमं परामसित्वा देति, तस्स दाने विनिच्छयो वेदितब्बो.

यो पन ‘‘असुकसीमाया’’ति वत्तुं न जानाति, केवलं ‘‘सीमा’’ति वचनमत्तमेव जानन्तो विहारं आगन्त्वा ‘‘सीमाय दम्मी’’ति वा ‘‘सीमट्ठकसङ्घस्स दम्मी’’ति वा भणति, सो पुच्छितब्बो ‘‘सीमा नाम बहुविधा, कतरं सीमं सन्धाय भणसी’’ति, सचे वदति ‘‘अहं ‘असुकसीमा’ति न जानामि, सीमट्ठकसङ्घो भाजेत्वा गण्हतू’’ति, कतरसीमाय भाजेतब्बं? महासीवत्थेरो किराह ‘‘अविप्पवाससीमाया’’ति. ततो नं आहंसु ‘‘अविप्पवाससीमा नाम तियोजनापि होति, एवं सन्ते तियोजने ठिता लाभं गण्हिस्सन्ति, तियोजने ठत्वा आगन्तुकवत्तं पूरेत्वा आरामं पविसितब्बं भविस्सति, गमिको तियोजनं गन्त्वा सेनासनं आपुच्छिस्सति, निस्सयपटिपन्नस्स तियोजनातिक्कमे निस्सयो पटिप्पस्सम्भिस्सति, पारिवासिकेन तियोजनं अतिक्कमित्वा अरुणं उट्ठापेतब्बं भविस्सति, भिक्खुनिया तियोजने ठत्वा आरामप्पवेसनं आपुच्छितब्बं भविस्सति, सब्बम्पेतं उपचारसीमापरिच्छेदवसेनेव कत्तुं वट्टति. तस्मा उपचारसीमायमेव भाजेतब्ब’’न्ति.

२७२९. ये ¶ विहारा सङ्घेन कतिकाय एकलाभका समानलाभका एत्थ एतेसु विहारेसु दिन्नं ‘‘कतिकाय दम्मी’’ति दिन्नं सब्बेहि भिक्खूहि सह भाजेतब्बं चीवरं कतिकाय वुच्चतीति योजना.

अयमेत्थ विनिच्छयो – कतिका नाम समानलाभकतिका, तत्रेवं कतिका कातब्बा – एकस्मिं विहारे सन्निपतितेहि भिक्खूहि यं विहारं सङ्गण्हितुकामा समानलाभं कातुं इच्छन्ति, अस्स नामं गहेत्वा ‘‘असुको नाम विहारो पोराणको’’ति वा ‘‘बुद्धाधिवुत्थो’’ति वा ‘‘अप्पलाभो’’ति वा यं किञ्चि कारणं वत्वा ‘‘तं विहारं इमिना विहारेन सद्धिं एकलाभं कातुं सङ्घस्स रुच्चती’’ति तिक्खत्तुं सावेतब्बं. एत्तावता तस्मिं विहारे निसिन्नोपि इध निसिन्नोव होति. तस्मिं विहारेपि सङ्घेन एवमेव कातब्बं. एत्तावता इध ¶ निसिन्नोपि तस्मिं विहारे निसिन्नोव होति. एकस्मिं लाभे भाजियमाने इतरस्मिं ठितस्स भागं गहेतुं वट्टति. एवं एकेन विहारेन सद्धिं बहूपि आवासा एकलाभा कातब्बाति.

२७३०. चीवरदायकेन धुवकारा पाकवत्तादिनिच्चसक्कारा यत्थ सङ्घस्स क्रीयन्ति करीयन्ति तत्थ तस्मिं विहारे तेनेव दायकेन सङ्घस्स दिन्नं विहारं ‘‘भिक्खापञ्ञत्तिया दिन्न’’न्ति महेसिना वुत्तन्ति योजना.

तत्रायं विनिच्छयो – यस्मिं विहारे इमस्स चीवरदायकस्स सन्तकं सङ्घस्स पाकवत्तं वा वत्तति, यस्मिं वा विहारे भिक्खू अत्तनो भारं कत्वा सदा गेहे भोजेति, यत्थ वा तेन आवासो कारितो, सलाकभत्तादीनि वा निबद्धानि, येन पन सकलोपि विहारो ¶ पतिट्ठापितो, तत्थ वत्तब्बमेव नत्थि, इमे धुवकारा नाम. तस्मा सचे सो ‘‘यत्थ मय्हं धुवकारा करीयन्ति, एत्थ दम्मी’’ति वा ‘‘तत्थ देथा’’ति वा भणति, बहूसु चेपि ठानेसु धुवकारा होन्ति, सब्बत्थ दिन्नमेव होति.

सचे पन एकस्मिं विहारे भिक्खू बहुतरा होन्ति, तेहि वत्तब्बं ‘‘तुम्हाकं धुवकारे एकत्थ भिक्खू बहू, एकत्थ अप्पका’’ति, सचे ‘‘भिक्खुगणनाय गण्हथा’’ति भणति, तथा भाजेत्वा गण्हितुं वट्टति. एत्थ च वत्थभेसज्जादि अप्पकम्पि सुखेन भाजीयति, यदि पन मञ्चो वा पीठकं वा एकमेव होति, तं पुच्छित्वा यस्स वा विहारस्स एकविहारेपि वा यस्स सेनासनस्स सो विचारेति, तत्थ दातब्बं. सचे ‘‘असुकभिक्खु गण्हतू’’ति वदति, वट्टति.

अथ ‘‘मय्हं धुवकारे देथा’’ति वत्वा अविचारेत्वाव गच्छति, सङ्घस्सपि विचारेतुं वट्टति. एवं पन विचारेतब्बं – ‘‘सङ्घत्थेरस्स वसनट्ठाने देथा’’ति वत्तब्बं. सचे तत्थ सेनासनं परिपुण्णं होति. यत्थ नप्पहोति, तत्थ दातब्बं. सचे एको भिक्खु ‘‘मय्हं वसनट्ठाने सेनासनपरिभोगभण्डं नत्थी’’ति वदति, तत्थ दातब्बन्ति.

२७३१. सङ्घस्स पन यं दिन्नन्ति विहारं पविसित्वा ‘‘इमानि चीवरानि सङ्घस्स दम्मी’’ति यं चीवरं दिन्नं. ‘‘सम्मुखीभूतेना’’ति वत्तब्बे गाथाबन्धेन रस्सत्तं. सम्मुखिभूतेनाति च ¶ उपचारसीमाय ठितेन. भाजेतब्बन्ति घण्टिं पहरित्वा कालं घोसेत्वा भाजेतब्बं. इदमेत्थ मुखमत्तदस्सनं. विनिच्छयो अट्ठकथाय (महाव. अट्ठ. ३७९) वेदितब्बो. सेय्यथिदं – चीवरदायकेन ¶ विहारं पविसित्वा ‘‘इमानि चीवरानि सङ्घस्स दम्मी’’ति दिन्नेसु भाजियमानेसु सीमट्ठस्स असम्पत्तस्सपि भागं गण्हन्तो न वारेतब्बो. विहारो महा होति, थेरासनतो पट्ठाय वत्थेसु दिय्यमानेसु अलसजातिका महाथेरा पच्छा आगच्छन्ति, ‘‘भन्ते, वीसतिवस्सानं दिय्यति, तुम्हाकं ठितिका अतिक्कन्ता’’ति न वत्तब्बा, ठितिकं ठपेत्वा तेसं दत्वा पच्छा ठितिकाय दातब्बं.

‘‘असुकविहारे किर बहुं चीवरं उप्पन्न’’न्ति सुत्वा योजनन्तरिकविहारतोपि भिक्खू आगच्छन्ति, सम्पत्तसम्पत्तानं ठितट्ठानतो पट्ठाय दातब्बं. असम्पत्तानम्पि उपचारसीमं पविट्ठानं अन्तेवासिकादीसु गण्हन्तेसु दातब्बमेव. ‘‘बहि उपचारसीमाय ठितानं देथा’’ति वदन्ति, न दातब्बं. सचे पन उपचारसीमं ओक्कन्तेहि एकाबद्धा हुत्वा अत्तनो विहारद्वारे वा अन्तोविहारेयेव वा होन्ति, परिसवसेन वड्ढिता नाम सीमा होति, तस्मा दातब्बं. सङ्घनवकस्स दिन्नेपि पच्छा आगतानं दातब्बमेव. दुतियभागे पन थेरासनं आरुळ्हे आगतानं पठमभागो न पापुणाति, दुतियभागतो वस्सग्गेन दातब्बं.

एकस्मिं विहारे दस भिक्खू होन्ति, दस वत्थानि ‘‘सङ्घस्स देमा’’ति देन्ति, पाटेक्कं भाजेतब्बानि. सचे ‘‘सब्बानेव अम्हाकं पापुणन्ती’’ति गहेत्वा गच्छन्ति, दुप्पापितानि चेव दुग्गहितानि च, गतगतट्ठाने सङ्घिकानेव होन्ति. एकं पन उद्धरित्वा ‘‘इदं तुम्हाकं पापुणाती’’ति सङ्घत्थेरस्स दत्वा सेसानि ‘‘इमानि अम्हाकं पापुणन्ती’’ति गहेतुं वट्टति.

एकमेव वत्थं ‘‘सङ्घस्स देमा’’ति आहरन्ति, अभाजेत्वाव ‘‘अम्हाकं पापुणाती’’ति गण्हन्ति, दुप्पापितञ्चेव दुग्गहितञ्च, सत्थकेन, पन हलिद्दिआदिना वा लेखं कत्वा एकं ¶ कोट्ठासं ‘‘इमं ठानं तुम्हाकं पापुणाती’’ति सङ्घत्थेरस्स पापेत्वा सेसं ‘‘अम्हाकं पापुणाती’’ति गहेतुं वट्टति. यं पन वत्थस्सेव पुप्फं वा वलि वा, तेन परिच्छेदं कातुं न वट्टति. सचे एकं तन्तं उद्धरित्वा ‘‘इदं ठानं तुम्हाकं पापुणाती’’ति सङ्घत्थेरस्स दत्वा सेसं ‘‘अम्हाकं पापुणाती’’ति गण्हन्ति, वट्टति. खण्डं खण्डं छिन्दित्वा भाजियमानं वट्टतियेव.

एकभिक्खुके ¶ विहारे सङ्घस्स चीवरेसु उप्पन्नेसु सचे पुब्बे वुत्तनयेनेव सो भिक्खु ‘‘सब्बानि मय्हं पापुणन्ती’’ति गण्हाति, सुग्गहितानि, ठितिका पन न तिट्ठति. सचे एकेकं उद्धरित्वा ‘‘इदं मय्हं पापुणाती’’ति गण्हाति, ठितिका तिट्ठति. तत्थ ठितिकाय अट्ठिताय पुन अञ्ञस्मिं चीवरे उप्पन्ने सचे एको भिक्खु आगच्छति, मज्झे छिन्दित्वा द्वीहिपि गहेतब्बं. ठिताय ठितिकाय पुन अञ्ञस्मिं चीवरे उप्पन्ने सचे नवकतरो आगच्छति, ठितिका हेट्ठा ओरोहति. सचे वुड्ढतरो आगच्छति, ठितिका उद्धं आरोहति. अथ अञ्ञो नत्थि, पुन अत्तनो पापेत्वा गहेतब्बं.

‘‘सङ्घस्स देमा’’ति वा ‘‘भिक्खुसङ्घस्स देमा’’ति वा येन केनचि आकारेन सङ्घं आमसित्वा दिन्नं पन पंसुकूलिकानं न वट्टति ‘‘गहपतिचीवरं पटिक्खिपामि, पंसुकूलिकङ्गं समादियामी’’ति वुत्तत्ता, न पन अकप्पियत्ता. भिक्खुसङ्घेन अपलोकेत्वा दिन्नम्पि न गहेतब्बं. यं पन भिक्खु अत्तनो सन्तकं देति, तं भिक्खुदत्तियं नाम वट्टति. पंसुकूलं पन न होति. एवं सन्तेपि धुतङ्गं न भिज्जति. ‘‘भिक्खूनं देम, थेरानं देमा’’ति वुत्ते पन पंसुकूलिकानम्पि वट्टति. ‘‘इदं वत्थं सङ्घस्स देम, इमिना उपाहनत्थविकपत्तत्थविकआयोगअंसबद्धकादीनि ¶ करोथा’’ति दिन्नम्पि वट्टति.

पत्तत्थविकादीनं अत्थाय दिन्नानि बहूनिपि होन्ति, चीवरत्थायपि पहोन्ति, ततो चीवरं कत्वा पारुपितुं वट्टति. सचे पन सङ्घो भाजितातिरित्तानि वत्थानि छिन्दित्वा उपाहनत्थविकादीनं अत्थाय भाजेति, ततो गहेतुं न वट्टति. सामिकेहि विचारितमेव हि वट्टति, न इतरं.

‘‘पंसुकूलिकसङ्घस्स धम्मकरणअंसबद्धादीनं अत्थाय देमा’’ति वुत्तेपि गहेतुं वट्टति. परिक्खारो नाम पंसुकूलिकानम्पि इच्छितब्बो. यं तत्थ अतिरेकं होति, तं चीवरेपि उपनेतुं वट्टति. सुत्तं सङ्घस्स देन्ति, पंसुकूलिकेहिपि गहेतब्बं. अयं ताव विहारं पविसित्वा ‘‘इमानि चीवरानि सङ्घस्स दम्मी’’ति दिन्नेसु विनिच्छयो.

सचे पन बहि उपचारसीमाय अद्धानपटिपन्ने भिक्खू दिस्वा ‘‘सङ्घस्स दम्मी’’ति सङ्घत्थेरस्स वा सङ्घनवकस्स वा आरोचेति, सचेपि योजनं फरित्वा परिसा ठिता होति, एकाबद्धा ¶ चे, सब्बेसं पापुणाति. ये पन द्वादसहि हत्थेहि परिसं असम्पत्ता, तेसं न पापुणातीति.

२७३२. इदानि ‘‘उभतोसङ्घे देती’’ति मातिकं विवरन्तो आह ‘‘उभतोसङ्घमुद्दिस्सा’’तिआदि. उभतोसङ्घमुद्दिस्साति भिक्खुसङ्घं, भिक्खुनिसङ्घञ्च उद्दिसित्वा. देतीति ‘‘उभतोसङ्घस्स देमी’’ति देति. ‘‘बहु वा’’ति एत्थ ‘‘बहू वा’’ति वत्तब्बे गाथाबन्धवसेन रस्सत्तं. भिक्खुनीनं भिक्खू थोका वा होन्तु बहू वा, पुग्गलग्गेन अकत्वा उभतोसङ्घवसेन समभागोव कातुं वट्टतीति योजना.

तत्रायं ¶ विनिच्छयो – ‘‘उभतोसङ्घस्स दम्मी’’ति वुत्तेपि ‘‘द्वेधासङ्घस्स दम्मि, द्विन्नं सङ्घानं दम्मि, भिक्खुसङ्घस्स च भिक्खुनिसङ्घस्स च दम्मी’’ति वुत्तेपि उभतोसङ्घस्स दिन्नमेव होति, द्वे भागे समे कत्वा एको दातब्बो.

‘‘उभतोसङ्घस्स च तुय्हञ्च दम्मी’’ति वुत्ते सचे दस दस भिक्खू, भिक्खुनियो च होन्ति, एकवीसति पटिवीसे कत्वा एको पुग्गलस्स दातब्बो, दस भिक्खुसङ्घस्स, दस भिक्खुनिसङ्घस्स. येन पुग्गलिको लद्धो, सो सङ्घतोपि अत्तनो वस्सग्गेन गहेतुं लभति. कस्मा? उभतोसङ्घग्गहणेन गहितत्ता.

‘‘उभतोसङ्घस्स च चेतियस्स च दम्मी’’ति वुत्तेपि एसेव नयो. इध पन चेतियस्स सङ्घतो पापुणनकोट्ठासो नाम नत्थि, एकपुग्गलस्स पत्तकोट्ठाससमोव कोट्ठासो होति.

‘‘उभतोसङ्घस्स च तुय्हञ्च चेतियस्स चा’’ति वुत्ते पन द्वावीसति कोट्ठासे कत्वा दस भिक्खूनं, दस भिक्खुनीनं, एको पुग्गलस्स, एको चेतियस्स दातब्बो. तत्थ पुग्गलो सङ्घतोपि अत्तनो वस्सग्गेन पुन गहेतुं लभति. चेतियस्स एकोयेव.

‘‘भिक्खुसङ्घस्स च भिक्खुनीनञ्च दम्मी’’ति वुत्ते पन मज्झे भिन्दित्वा न दातब्बं, भिक्खू च भिक्खुनियो च गणेत्वा दातब्बं.

‘‘भिक्खुसङ्घस्स ¶ च भिक्खुनीनञ्च तुय्हञ्चा’’ति वुत्ते पन पुग्गलो विसुं ¶ न लभति, पापुणनट्ठानतो एकमेव लभति. कस्मा? भिक्खुसङ्घग्गहणेन गहितत्ता.

‘‘भिक्खुसङ्घस्स च भिक्खुनीनञ्च तुय्हञ्च चेतियस्स चा’’ति वुत्तेपि चेतियस्स एकपुग्गलपटिवीसो लब्भति, पुग्गलस्स विसुं न लब्भति. तस्मा एकं चेतियस्स दत्वा अवसेसं भिक्खू च भिक्खुनियो च गणेत्वा भाजेतब्बं.

‘‘भिक्खूनञ्च भिक्खुनीनञ्च दम्मी’’ति वुत्तेपि न मज्झे भिन्दित्वा दातब्बं, पुग्गलगणनाय एव विभजितब्बं.

‘‘भिक्खूनञ्च भिक्खुनीनञ्च तुय्हञ्च चेतियस्स चा’’ति एवं वुत्तेपि चेतियस्स एकपुग्गलपटिवीसो लब्भति, पुग्गलस्स विसुं नत्थि, भिक्खू च भिक्खुनियो च गणेत्वा एव भाजेतब्बं. यथा च भिक्खुसङ्घं आदिं कत्वा नयो नीतो, एवं भिक्खुनिसङ्घं आदिं कत्वापि नेतब्बो.

‘‘भिक्खुसङ्घस्स च तुय्हञ्चा’’ति वुत्ते पुग्गलस्स विसुं न लब्भति, वस्सग्गेनेव गहेतब्बं.

‘‘भिक्खुसङ्घस्स च चेतियस्स चा’’ति वुत्ते पन चेतियस्स विसुं पटिवीसो लब्भति.

‘‘भिक्खुसङ्घस्स च तुय्हञ्च चेतियस्स चा’’ति वुत्तेपि चेतियस्सेव लब्भति, न पुग्गलस्स.

‘‘भिक्खूनञ्च तुय्हञ्चा’’ति वुत्तेपि विसुं न लब्भति.

‘‘भिक्खूनञ्च चेतियस्स चा’’ति वुत्ते पन चेतियस्स लब्भति.

‘‘भिक्खूनञ्च ¶ तुय्हञ्च चेतियस्स चा’’ति वुत्तेपि चेतियस्सेव विसुं लब्भति, न पुग्गलस्स. भिक्खुनिसङ्घं आदिं कत्वापि एवमेव योजेतब्बं.

पुब्बे बुद्धप्पमुखस्स उभतोसङ्घस्स दानं देन्ति, भगवा मज्झे निसीदति, दक्खिणतो भिक्खू, वामतो भिक्खुनियो निसीदन्ति, भगवा उभिन्नं सङ्घत्थेरो, तदा भगवा अत्तनो लद्धपच्चये अत्तनापि परिभुञ्जति, भिक्खूनम्पि दापेति. एतरहि पन पण्डितमनुस्सा सधातुकं पटिमं वा चेतियं वा ठपेत्वा बुद्धप्पमुखस्स उभतोसङ्घस्स दानं देन्ति, पटिमाय वा ¶ चेतियस्स वा पुरतो आधारके पत्तं ठपेत्वा दक्खिणोदकं दत्वा ‘‘बुद्धानं देमा’’ति तत्थ यं पठमं खादनीयं भोजनीयं देन्ति, विहारं वा आहरित्वा ‘‘इदं चेतियस्स देमा’’ति पिण्डपातञ्च मालागन्धादीनि च देन्ति, तत्थ कथं पटिपज्जितब्बन्ति? मालागन्धादीनि ताव चेतिये आरोपेतब्बानि, वत्थेहि पटाका, तेलेन पदीपा कातब्बा. पिण्डपातमधुफाणितादीनि पन यो निबद्धं चेतियस्स जग्गको होति पब्बजितो वा गहट्ठो वा, तस्स दातब्बानि. निबद्धजग्गके असति आहटपत्तं ठपेत्वा वत्तं कत्वा परिभुञ्जितुं वट्टति. उपकट्ठे काले भुञ्जित्वा पच्छापि वत्तं कातुं वट्टतियेव.

मालागन्धादीसु च यं किञ्चि ‘‘इदं हरित्वा चेतियस्स पूजं करोथा’’ति वुत्ते दूरम्पि हरित्वा पूजेतब्बं. ‘‘भिक्खं सङ्घस्स हरा’’ति वुत्तेपि हरितब्बं. सचे पन ‘‘अहं पिण्डाय चरामि, आसनसालाय भिक्खू अत्थि, ते हरिस्सन्ती’’ति वुत्ते ‘‘भन्ते, तुय्हंयेव दम्मी’’ति वदति, भुञ्जितुं वट्टति. अथ पन ‘‘भिक्खुसङ्घस्स दस्सामी’’ति हरन्तस्स गच्छतो अन्तराव कालो उपकट्ठो होति, अत्तनो पापेत्वा भुञ्जितुं वट्टति.

२७३३. यं पन चीवरं ‘‘यस्मिं आवासे वस्संवुत्थस्स सङ्घस्स दम्मी’’ति देति, तस्मिंयेव आवासे वुत्थवस्सेन सङ्घेन वा गणेन वा पुग्गलेन वा तं चीवरं भाजेतब्बन्ति वण्णितं देसितन्ति योजना.

तत्रायं विनिच्छयो – विहारं पविसित्वा ‘‘इमानि चीवरानि वस्संवुत्थसङ्घस्स दम्मी’’ति देति, यावतिका भिक्खू तस्मिं आवासे वस्संवुत्था, यत्तका वस्सच्छेदं अकत्वा पुरिमवस्संवुत्था, तेहि भाजेतब्बं, अञ्ञेसं न पापुणाति. दिसापक्कन्तस्सापि ¶ सति गाहके ¶ याव कथिनस्स उब्भारा दातब्बं. अनत्थते पन कथिने अन्तोहेमन्ते एवञ्च वत्वा दिन्नं पच्छिमवस्संवुत्थानम्पि पापुणातीति लक्खणञ्ञू वदन्ति. अट्ठकथासु पनेतं अविचारितं.

सचे पन बहि उपचारसीमायं ठितो ‘‘वस्संवुत्थसङ्घस्स दम्मी’’ति वदति, सम्पत्तानं सब्बेसं पापुणाति. अथ ‘‘असुकविहारे वस्संवुत्थसङ्घस्सा’’ति वदति, तत्र वस्संवुत्थानमेव याव कथिनस्सुब्भारा पापुणाति. सचे पन गिम्हानं पठमदिवसतो पट्ठाय एवं वदति, तत्र सम्मुखीभूतानंयेव सब्बेसं पापुणाति. कस्मा? पिट्ठिसमये उप्पन्नत्ता. अन्तोवस्सेयेव ‘‘वस्सं वसन्तानं दम्मी’’ति वुत्ते छिन्नवस्सा न लभन्ति, वस्सं वसन्ताव लभन्ति. चीवरमासे पन ‘‘वस्सं वसन्तानं दम्मी’’ति वुत्ते पच्छिमिकाय वस्सूपगतानंयेव पापुणाति, पुरिमिकाय वस्सूपगतानञ्च छिन्नवस्सानञ्च न पापुणाति.

चीवरमासतो पट्ठाय याव हेमन्तस्स पच्छिमो दिवसो, ताव ‘‘वस्सावासिकं देमा’’ति वुत्ते कथिनं अत्थतं वा होतु अनत्थतं वा, अतीतवस्संवुत्थानमेव पापुणाति. गिम्हानं पठमदिवसतो पट्ठाय वुत्ते पन मातिका आरोपेतब्बा ‘‘अतीतवस्सावासस्स पञ्च मासा अभिक्कन्ता, अनागते चातुमासच्चयेन भविस्सति, कतरवस्सावासस्स देसी’’ति. सचे ‘‘अतीतवस्संवुत्थानं दम्मी’’ति वदति, तं अन्तोवस्सं वुत्थानमेव पापुणाति. दिसापक्कन्तानम्पि सभागा गण्हितुं लभन्ति.

सचे ‘‘अनागते वस्सावासिकं दम्मी’’ति वदति, तं ठपेत्वा वस्सूपनायिकदिवसे गहेतब्बं. अथ ‘‘अगुत्तो विहारो, चोरभयं अत्थि, न सक्का ठपेतुं, गण्हित्वा वा आहिण्डितु’’न्ति ¶ वुत्ते ‘‘सम्पत्तानं दम्मी’’ति वदति, भाजेत्वा गहेतब्बं. सचे वदति ‘‘इतो मे, भन्ते, ततिये वस्से वस्सावासिकं न दिन्नं, तं दम्मी’’ति, तस्मिं अन्तोवस्से वुत्थभिक्खूनं पापुणाति. सचे ते दिसापक्कन्ता, अञ्ञो विस्सासिको गण्हाति, दातब्बं. अथ एकोयेव अवसिट्ठो, सेसा कालकता, सब्बं एकस्सेव पापुणाति. सचे एकोपि नत्थि, सङ्घिकं होति, सम्मुखीभूतेहि भाजेतब्बन्ति.

२७३४. यागुया पन पीताय वा भत्ते वा भुत्ते सचे पन आदिस्स ‘‘येन मे यागु पीता, तस्स दम्मि, येन मे भत्तं भुत्तं, तस्स दम्मी’’ति परिच्छिन्दित्वा चीवरं देति, विनयधरेन ¶ तत्थ तत्थेव दानं दातब्बन्ति योजना. एस नयो खादनीयचीवरसेनासनभेसज्जादीसु.

तत्रायं विनिच्छयो – भिक्खू अज्जतनाय वा स्वातनाय वा यागुया निमन्तेत्वा तेसं घरं पविट्ठानं यागुं देति, यागुं दत्वा पीताय यागुया ‘‘इमानि चीवरानि येहि मय्हं यागु पीता, तेसं दम्मी’’ति देति, येहि निमन्तितेहि यागु पीता, तेसंयेव पापुणन्ति, येहि पन भिक्खाचारवत्तेन घरद्वारेन गच्छन्तेहि वा घरं पविट्ठेहि वा यागु लद्धा, येसं वा आसनसालतो पत्तं आहरित्वा मनुस्सेहि नीता, ये वा थेरेहि पेसिता, तेसं न पापुणन्ति.

सचे पन निमन्तितभिक्खूहि सद्धिं अञ्ञेपि बहू आगन्त्वा अन्तोगेहञ्च बहिगेहञ्च पूरेत्वा निसिन्ना, दायको च एवं वदति ‘‘निमन्तिता वा होन्तु अनिमन्तिता वा, येसं मया यागु दिन्ना, सब्बेसं इमानि वत्थानि होन्तू’’ति, सब्बेसं पापुणन्ति. येहि पन थेरानं हत्थतो यागु ¶ लद्धा, तेसं न पापुणन्ति. अथ सो ‘‘येहि मय्हं यागु पीता, सब्बेसं होन्तू’’ति वदति, सब्बेसं पापुणन्ति. भत्तखादनीयेसुपि एसेव नयो.

चीवरे वाति पुब्बेपि येन वस्सं वासेत्वा भिक्खूनं चीवरं दिन्नपुब्बं होति, सो चे भिक्खू भोजेत्वा वदति ‘‘येसं मया पुब्बे चीवरं दिन्नं, तेसंयेव इमं चीवरं वा सुत्तं वा सप्पिमधुफाणितादीनि वा होन्तू’’ति, सब्बं तेसंयेव पापुणाति.

सेनासने वाति ‘‘यो मया कारिते विहारे वा परिवेणे वा वसति, तस्सिदं होतू’’ति वुत्ते तस्सेव होति.

भेसज्जे वाति ‘‘मयं कालेन कालं थेरानं सप्पिआदीनि भेसज्जानि देम, येहि तानि लद्धानि, तेसंयेविदं होतू’’ति वुत्ते तेसंयेव होतीति.

२७३५. दीयतेति दानन्ति कम्मसाधनेन चीवरं वुच्चति. यं-सद्देन चीवरस्स परामट्ठत्ता तं-सद्देनापि तदेव परामसितब्बन्ति.

तत्रायं विनिच्छयो – ‘‘इमं ¶ चीवरं इत्थन्नामस्स दम्मी’’ति एवं परम्मुखा वा ‘‘इदं मे, भन्ते, तुम्हाकं दम्मी’’ति एवं सम्मुखा वा पादमूले ठपेत्वा वा देति, तं तस्सेव होति. सचे पन ‘‘इदं तुम्हाकञ्च तुम्हाकं अन्तेवासिकानञ्च दम्मी’’ति एवं वदति, थेरस्स च अन्तेवासिकानञ्च पापुणाति. उद्देसं गहेतुं आगतो गहेत्वा गच्छन्तो च अत्थि, तस्सापि पापुणाति. ‘‘तुम्हेहि सद्धिं निबद्धचारिकभिक्खूनं दम्मी’’ति वुत्ते उद्देसन्तेवासिकानं वत्तं कत्वा उद्देसपरिपुच्छादीनि गहेत्वा विचरन्तानं सब्बेसं पापुणातीति.

२७३७. वदतिच्चेवमेव ¶ चेति इच्चेवं यथावुत्तनयेन वदति चे. तन्ति तं परिक्खारं. तेसन्ति मातुआदीनं. सङ्घस्सेव सन्तकं होतीति योजना.

२७३८. ‘‘पञ्चन्नं…पे… होती’’ति इमिना पुरिमगाथाद्वयेन वित्थारितमेवत्थं संखिपित्वा दस्सेति. पञ्चन्नं सहधम्मिकानं. अच्चयेति कालकिरियाय. दानन्ति ‘‘मयि कालकते इमं परिक्खारं तुय्हं होतु, तव सन्तकं करोही’’तिआदिना परिच्चजनं. किञ्चिपीति अन्तमसो दन्तकट्ठम्पि. गिहीनं पन दानं तथा दायकानं गिहीनमेव अच्चये रूहतीति योजना.

२७३९. भिक्खु वा सामणेरो वा भिक्खुनिउपस्सये कालं करोति, अस्स भिक्खुस्स वा सामणेरस्स वा परिक्खारा भिक्खूनंयेव सन्तका भिक्खुसङ्घस्सेव सन्तकाति योजना. भिक्खुसङ्घस्सेव सन्तका कालकतस्स भिक्खुसङ्घपरियापन्नत्ता.

२७४०. सामणेरी वाति एत्थ वा-सद्देन ‘‘सिक्खमाना वा’’ति इदं सङ्गण्हाति. विहारस्मिं भिक्खूनं निवासनट्ठाने. तस्साति भिक्खुनिया वा सामणेरिया वा सिक्खमानाय वा परिक्खारा भिक्खुनीनं सन्तका होन्तीति योजना. सन्तकाति एत्थापि भिक्खूसु वुत्तनयेनेवत्थो गहेतब्बो.

२७४१. देहि नेत्वाति एत्थ ‘‘इमं चीवर’’न्ति पकरणतो लब्भति. ‘‘इमं चीवरं नेत्वा असुकस्स देही’’ति यं चीवरं दिन्नं, तं तस्स पुरिमस्सेव सन्तकं होति. ‘‘इदं चीवरं ¶ असुकस्स दम्मी’’ति यं चीवरं दिन्नं, तं यस्स पहिय्यति, तस्स पच्छिमस्सेव सन्तकं होतीति योजना.

२७४२. यथावुत्तवचनप्पकारानुरूपेन ¶ सामिके ञत्वा सामिकेसु विस्सासेन वा तेसु मतेसु मतकचीवरम्पि गण्हितुं वट्टतीति दस्सेतुं आह ‘‘एव’’न्तिआदि. ‘‘मतस्स वा अमतस्स वा’’ति पदच्छेदो. विस्सासं वापि गण्हेय्याति जीवन्तस्स सन्तकं विस्सासग्गाहं गण्हेय्य. गण्हे मतकचीवरन्ति मतस्स चीवरं मतकपरिक्खारनीहारेन पापेत्वा गण्हेय्य.

२७४३. रजते अनेनाति रजनन्ति मूलादिसब्बमाह. वन्तदोसेनाति सवासनसमुच्छिन्नरागादिदोसेन. तादिनाति रूपादीसु छळारम्मणेसु रागादीनं अनुप्पत्तिया अट्ठसु लोकधम्मेसु निब्बिकारताय एकसदिसेन.

२७४४-५. ‘‘मूले’’तिआदीसु निद्धारणे भुम्मं. मूलरजने हलिद्दिं ठपेत्वा सब्बं मूलरजनं वट्टति. खन्धेसु रजनेसु मञ्जेट्ठञ्च तुङ्गहारकञ्च ठपेत्वा सब्बं खन्धरजनं वट्टति. पत्तेसु रजनेसु अल्लिया पत्तं तथा नीलिया पत्तञ्च ठपेत्वा सब्बं पत्तरजनं वट्टति. पुप्फरजनेसु कुसुम्भञ्च किंसुकञ्च ठपेत्वा सब्बं पुप्फरजनं वट्टति. तचरजने लोद्दञ्च कण्डुलञ्च ठपेत्वा सब्बं तचरजनं वट्टति. फलरजनं सब्बम्पि वट्टतीति योजना.

मञ्जेट्ठन्ति एको सकण्टकरुक्खो, वल्लिविसेसो च, यस्स रजनं मञ्जेट्ठबीजवण्णं होति. मञ्जेट्ठरुक्खस्स खन्धो सेतवण्णोति सो इध न गहेतब्बो रजनाधिकारत्ता. तुङ्गहारको नाम एको सकण्टकरुक्खो, यस्स रजनं हरितालवण्णं होति. अल्लीति चुल्लतापिञ्छरुक्खो, यस्स पण्णरजनं हलिद्दिवण्णं होति. नीलीति गच्छविसेसो, यस्स पन रजनं नीलवण्णं होति. किंसुकं नाम वल्लिकिंसुकपुप्फं, यस्स रजनं लोहितवण्णं होति.

२७४६. किलिट्ठसाटकन्ति ¶ मलीनसाटकं. धोवितुन्ति एकवारं धोवितुं. अल्लिया धोतं किर सम्मदेव रजनं पटिग्गण्हाति.

२७४७. चीवरानं ¶ कथा सेसाति भेदकारणप्पकारकथादिका इध अवुत्तकथा. पठमे कथिने वुत्ताति सेसो. विभाविनाति खन्धकभाणकेन.

चीवरक्खन्धककथावण्णना.

इति विनयत्थसारसन्दीपनिया विनयविनिच्छयवण्णनाय

महावग्गविनिच्छयवण्णना निट्ठिता.

चूळवग्गो

पारिवासिकक्खन्धककथावण्णना

२७४८. एवं ¶ ¶ महावग्गविनिच्छयं सङ्खेपेन दस्सेत्वा चूळवग्गागतविनिच्छयं दस्सेतुमाह ‘‘तज्जनीय’’न्तिआदि. तज्जनीयन्ति कलहकारकानं भिक्खूनं ततो विरमनत्थाय निग्गहवसेन अनुञ्ञातं ञत्तिचतुत्थं तज्जनीयकम्मञ्च. नियस्सन्ति बालस्स अब्यत्तस्स आपत्तिबहुलस्स अनपदानस्स अननुलोमिकेहि गिहिसंसग्गेहि संसट्ठस्स विहरतो भिक्खुनो निग्गहवसेन निस्साय वसनत्थाय कातुं अनुञ्ञातं ञत्तिचतुत्थं नियस्सकम्मञ्च.

पब्बाजन्ति कुलदूसकस्स भिक्खुनो यत्थ तेन कुलदूसनं कतं, तत्थ न लभितब्बआवासत्थाय निग्गहवसेन अनुञ्ञातं ञत्तिचतुत्थं पब्बाजनीयकम्मञ्च. पटिसारणन्ति सद्धस्स उपासकस्स दायकस्स कारकस्स सङ्घुपट्ठाकस्स जातिआदीहि अक्कोसवत्थूहि अक्कोसकस्स भिक्खुनो तंखमापनत्थाय निग्गहवसेन अनुञ्ञातं ञत्तिचतुत्थं पटिसारणीयकम्मञ्च.

तिविधुक्खेपनन्ति आपत्तिया अदस्सने, आपत्तिया अप्पटिकम्मे, पापिकाय दिट्ठिया अप्पटिनिस्सग्गे च ततो ओरमितुं निग्गहवसेन अनुञ्ञातं ञत्तिचतुत्थं तिविधं उक्खेपनीयकम्मञ्चाति. दीपयेति पाळिया, अट्ठकथाय च वुत्तनयेन पकासेय्याति अत्थो.

तज्जनीयादिकम्मानं ओसारणनिस्सारणवसेन पच्चेकं दुविधत्तेपि तं भेदं अनामसित्वा केवलं ¶ जातिवसेन ‘‘सत्त कम्मानी’’ति वुत्तन्ति वेदितब्बं. यथा दस्सितो पनेतेसं ¶ विसेसो अत्थुप्पत्तिवसेनाति दट्ठब्बो. वित्थारो पनेसं कम्मक्खन्धकतो वेदितब्बो.

२७४९. खन्धके कम्मसङ्खाते खन्धके आगतानि तेचत्तालीस वत्तानि. तदनन्तरेति तस्स कम्मक्खन्धकस्स अनन्तरे. खन्धकेति पारिवासिकक्खन्धके. नव अधिकानि येसं ते नवाधिकानि तिंसेव वत्तानि, एकूनचत्तालीस वत्तानीति वुत्तं होति.

कम्मक्खन्धके ताव –

‘‘आपत्तिया अदस्सने उक्खेपनीयकम्मकतेन, भिक्खवे, भिक्खुना सम्मा वत्तितब्बं. तत्रायं सम्मावत्तना – न उपसम्पादेतब्बं, न निस्सयो दातब्बो, न सामणेरो उपट्ठापेतब्बो, न भिक्खुनोवादकसम्मुति सादितब्बा, सम्मतेनापि भिक्खुनियो न ओवदितब्बा, याय आपत्तिया सङ्घेन आपत्तिया अदस्सने उक्खेपनीयकम्मं कतं होति, सा आपत्ति न आपज्जितब्बा, अञ्ञा वा तादिसिका, ततो वा पापिट्ठतरा, कम्मं न गरहितब्बं, कम्मिका न गरहितब्बा, न पकतत्तस्स भिक्खुनो अभिवादनं पच्चुट्ठानं अञ्जलिकम्मं सामीचिकम्मं आसनाभिहारो सेय्याभिहारो पादोदकं पादपीठं पादकथलिकं पत्तचीवरपटिग्गहणं नहाने पिट्ठिपरिकम्मं सादितब्बं, न पकतत्तो भिक्खु सीलविपत्तिया अनुद्धंसेतब्बो, न आचारविपत्तिया अनुद्धंसेतब्बो, न दिट्ठिविपत्तिया अनुद्धंसेतब्बो, न आजीवविपत्तिया अनुद्धंसेतब्बो, न भिक्खु भिक्खूहि भेदेतब्बो, न गिहिद्धजो धारेतब्बो, न तित्थियद्धजो धारेतब्बो, न तित्थिया सेवितब्बा, भिक्खू सेवितब्बा, भिक्खुसिक्खाय ¶ सिक्खितब्बं, न पकतत्तेन भिक्खुना सद्धिं एकच्छन्ने आवासे वत्थब्बं, न एकच्छन्ने अनावासे वत्थब्बं, न एकच्छन्ने आवासे वा अनावासे वा वत्थब्बं, पकतत्तं भिक्खुं दिस्वा आसना वुट्ठातब्बं, न पकतत्तो भिक्खु आसादेतब्बो अन्तो वा बहि वा, न पकतत्तस्स भिक्खुनो उपोसथो ठपेतब्बो, न पवारणा ठपेतब्बा, न सवचनीयं कातब्बं, न अनुवादो पट्ठपेतब्बो, न ओकासो कारेतब्बो, न चोदेतब्बो, न सारेतब्बो, न भिक्खूहि सम्पयोजेतब्ब’’न्ति (चूळव. ५१) –

एवं ¶ चेतानि तेचत्तालीस वत्तानि सन्धाय वुत्तं ‘‘तेचत्तालीस वत्तानि, खन्धके कम्मसञ्ञिते’’ति.

पारिवासिकक्खन्धके (चूळव. ७६-८२) –

‘‘पारिवासिकेन, भिक्खवे, भिक्खुना सम्मा वत्तितब्बं. तत्रायं सम्मावत्तना – न उपसम्पादेतब्बं, न निस्सयो दातब्बो, न सामणेरो उपट्ठापेतब्बो, न भिक्खुनोवादकसम्मुति सादितब्बा, सम्मतेनपि भिक्खुनियो न ओवदितब्बा, याय आपत्तिया सङ्घेन परिवासो दिन्नो होति, सा आपत्ति न आपज्जितब्बा, अञ्ञा वा तादिसिका, ततो वा पापिट्ठतरा, कम्मं न गरहितब्बं, कम्मिका न गरहितब्बा, न पकतत्तस्स भिक्खुनो उपोसथो ठपेतब्बो, न पवारणा ठपेतब्बा, न सवचनीयं कातब्बं, न अनुवादो पट्ठपेतब्बो, न ओकासो कारेतब्बो, न चोदेतब्बो, न सारेतब्बो, न भिक्खूहि सम्पयोजेतब्बं.

‘‘न ¶ , भिक्खवे, पारिवासिकेन भिक्खुना पकतत्तस्स भिक्खुनो पुरतो गन्तब्बं, न पुरतो निसीदितब्बं, यो होति सङ्घस्स आसनपरियन्तो सेय्यापरियन्तो विहारपरियन्तो, सो तस्स पदातब्बो, तेन च सो सादितब्बो.

‘‘न, भिक्खवे, पारिवासिकेन भिक्खुना पकतत्तस्स भिक्खुनो पुरेसमणेन वा पच्छासमणेन वा कुलानि उपसङ्कमितब्बानि, न आरञ्ञिकङ्गं समादातब्बं, न पिण्डपातिकङ्गं समादातब्बं, न च तप्पच्चया पिण्डपातो नीहरापेतब्बो ‘मा मं जानिंसू’ति.

‘‘पारिवासिकेन, भिक्खवे, भिक्खुना आगन्तुकेन आरोचेतब्बं, आगन्तुकस्स आरोचेतब्बं, उपोसथे आरोचेतब्बं, पवारणाय आरोचेतब्बं, सचे गिलानो होति, दूतेनपि आरोचेतब्बं.

‘‘न ¶ , भिक्खवे, पारिवासिकेन भिक्खुना सभिक्खुका आवासा अभिक्खुको आवासो गन्तब्बो अञ्ञत्र पकतत्तेन अञ्ञत्र अन्तराया.

‘‘न, भिक्खवे, पारिवासिकेन भिक्खुना सभिक्खुका आवासा अभिक्खुको अनावासो गन्तब्बो अञ्ञत्र पकतत्तेन अञ्ञत्र अन्तराया. न, भिक्खवे, पारिवासिकेन भिक्खुना सभिक्खुका आवासा अभिक्खुको आवासो वा अनावासो वा गन्तब्बो अञ्ञत्र पकतत्तेन अञ्ञत्र अन्तराया.

‘‘न, भिक्खवे, पारिवासिकेन भिक्खुना सभिक्खुका अनावासा अभिक्खुको आवासो गन्तब्बो अञ्ञत्र पकतत्तेन अञ्ञत्र अन्तराया. न, भिक्खवे, पारिवासिकेन भिक्खुना सभिक्खुका अनावासा अभिक्खुको ¶ अनावासो गन्तब्बो अञ्ञत्र पकतत्तेन अञ्ञत्र अन्तराया. न, भिक्खवे, पारिवासिकेन भिक्खुना सभिक्खुका अनावासा अभिक्खुको आवासो वा अनावासो वा गन्तब्बो अञ्ञत्र पकतत्तेन अञ्ञत्र अन्तराया.

‘‘न, भिक्खवे, पारिवासिकेन भिक्खुना सभिक्खुका आवासा वा अनावासा वा अभिक्खुको आवासो गन्तब्बो अञ्ञत्र पकतत्तेन अञ्ञत्र अन्तराया. न, भिक्खवे, पारिवासिकेन भिक्खुना सभिक्खुका आवासा वा अनावासा वा अभिक्खुको अनावासो गन्तब्बो अञ्ञत्र पकतत्तेन अञ्ञत्र अन्तराया. न, भिक्खवे, पारिवासिकेन भिक्खुना सभिक्खुका आवासा वा अनावासा वा अभिक्खुको आवासो वा अनावासो वा गन्तब्बो अञ्ञत्र पकतत्तेन अञ्ञत्र अन्तराया.

‘‘न, भिक्खवे, पारिवासिकेन भिक्खुना सभिक्खुका आवासा सभिक्खुको आवासो गन्तब्बो यत्थस्सु भिक्खू नानासंवासका अञ्ञत्र पकतत्तेन अञ्ञत्र अन्तराया. न, भिक्खवे, पारिवासिकेन भिक्खुना सभिक्खुका आवासा सभिक्खुको अनावासो गन्तब्बो यत्थस्सु भिक्खू नानासंवासका अञ्ञत्र पकतत्तेन अञ्ञत्र अन्तराया. न, भिक्खवे, पारिवासिकेन भिक्खुना सभिक्खुका आवासा सभिक्खुको आवासो ¶ वा अनावासो वा गन्तब्बो यत्थस्सु भिक्खू नानासंवासका अञ्ञत्र पकतत्तेन अञ्ञत्र अन्तराया.

‘‘न, भिक्खवे, पारिवासिकेन भिक्खुना सभिक्खुका अनावासा सभिक्खुको आवासो गन्तब्बो यत्थस्सु ¶ भिक्खू नानासंवासका अञ्ञत्र पकतत्तेन अञ्ञत्र अन्तराया. न, भिक्खवे, पारिवासिकेन भिक्खुना सभिक्खुका अनावासा सभिक्खुको अनावासो गन्तब्बो यत्थस्सु भिक्खू नानासंवासका अञ्ञत्र पकतत्तेन अञ्ञत्र अन्तराया. न, भिक्खवे, पारिवासिकेन भिक्खुना सभिक्खुका अनावासा सभिक्खुको आवासो वा अनावासो वा गन्तब्बो यत्थस्सु भिक्खू नानासंवासका अञ्ञत्र पकतत्तेन अञ्ञत्र अन्तराया.

‘‘न, भिक्खवे, पारिवासिकेन भिक्खुना सभिक्खुका आवासा वा अनावासा वा सभिक्खुको आवासो गन्तब्बो यत्थस्सु भिक्खू नानासंवासका अञ्ञत्र पकतत्तेन अञ्ञत्र अन्तराया. न, भिक्खवे, पारिवासिकेन भिक्खुना सभिक्खुका आवासा वा अनावासा वा सभिक्खुको अनावासो गन्तब्बो यत्थस्सु भिक्खू नानासंवासका अञ्ञत्र पकतत्तेन अञ्ञत्र अन्तराया. न, भिक्खवे, पारिवासिकेन भिक्खुना सभिक्खुका आवासा वा अनावासा वा सभिक्खुको आवासो वा अनावासो वा गन्तब्बो यत्थस्सु भिक्खू नानासंवासका अञ्ञत्र पकतत्तेन अञ्ञत्र अन्तराया.

‘‘गन्तब्बो, भिक्खवे, पारिवासिकेन भिक्खुना सभिक्खुका आवासा सभिक्खुको आवासो यत्थस्सु भिक्खू समानसंवासका यं जञ्ञा ‘सक्कोमि अज्जेव गन्तु’न्ति.

‘‘गन्तब्बो, भिक्खवे, पारिवासिकेन भिक्खुना सभिक्खुका आवासा सभिक्खुको अनावासो यत्थस्सु ¶ भिक्खू समानसंवासका यं जञ्ञा ‘सक्कोमि अज्जेव गन्तु’न्ति.

‘‘गन्तब्बो, भिक्खवे, पारिवासिकेन भिक्खुना सभिक्खुका आवासा सभिक्खुको ¶ आवासो वा अनावासो वा यत्थस्सु भिक्खू समानसंवासका यं जञ्ञा ‘सक्कोमि अज्जेव गन्तु’न्ति.

‘‘गन्तब्बो, भिक्खवे, पारिवासिकेन भिक्खुना सभिक्खुका अनावासा सभिक्खुको आवासो यत्थस्सु भिक्खू समानसंवासका यं जञ्ञा ‘सक्कोमि अज्जेव गन्तु’न्ति.

‘‘गन्तब्बो, भिक्खवे, पारिवासिकेन भिक्खुना सभिक्खुका अनावासा सभिक्खुको अनावासो यत्थस्सु भिक्खू समानसंवासका यं जञ्ञा ‘सक्कोमि अज्जेव गन्तु’न्ति.

‘‘गन्तब्बो, भिक्खवे, पारिवासिकेन भिक्खुना सभिक्खुका अनावासा सभिक्खुको आवासो वा अनावासो वा यत्थस्सु भिक्खू समानसंवासका यं जञ्ञा ‘सक्कोमि अज्जेव गन्तु’न्ति.

‘‘गन्तब्बो, भिक्खवे, पारिवासिकेन भिक्खुना सभिक्खुका आवासा वा अनावासा वा सभिक्खुको आवासो यत्थस्सु भिक्खू समानसंवासका यं जञ्ञा ‘सक्कोमि अज्जेव गन्तु’न्ति.

‘‘गन्तब्बो, भिक्खवे, पारिवासिकेन भिक्खुना सभिक्खुका आवासा वा अनावासा वा सभिक्खुको अनावासो यत्थस्सु भिक्खू समानसंवासका यं जञ्ञा ‘सक्कोमि अज्जेव गन्तु’न्ति.

‘‘गन्तब्बो ¶ , भिक्खवे, पारिवासिकेन भिक्खुना सभिक्खुका आवासा वा अनावासा वा सभिक्खुको आवासो वा अनावासो वा यत्थस्सु भिक्खू समानसंवासका यं जञ्ञा ‘सक्कोमि अज्जेव गन्तु’न्ति.

‘‘न, भिक्खवे, पारिवासिकेन भिक्खुना पकतत्तेन भिक्खुना सद्धिं एकच्छन्ने आवासे ¶ वत्थब्बं, न एकच्छन्ने अनावासे वत्थब्बं, न एकच्छन्ने आवासे वा अनावासे वा वत्थब्बं, पकतत्तं भिक्खुं दिस्वा आसना वुट्ठातब्बं, पकतत्तो भिक्खु आसनेन निमन्तेतब्बो, न पकतत्तेन भिक्खुना सद्धिं एकासने निसीदितब्बं, न नीचे आसने निसिन्ने उच्चे आसने निसीदितब्बं, न छमायं निसिन्ने आसने निसीदितब्बं, न एकचङ्कमे चङ्कमितब्बं, न नीचे चङ्कमे चङ्कमन्ते उच्चे चङ्कमे चङ्कमितब्बं, न छमायं चङ्कमन्ते चङ्कमे चङ्कमितब्बं.

‘‘न, भिक्खवे, पारिवासिकेन भिक्खुना पारिवासिकेन वुड्ढतरेन भिक्खुना सद्धिं…पे… मूलायपटिकस्सनारहेन भिक्खुना सद्धिं…पे… मानत्तारहेन भिक्खुना सद्धिं…पे… मानत्तचारिकेन भिक्खुना सद्धिं…पे… अब्भानारहेन भिक्खुना सद्धिं एकच्छन्ने आवासे वत्थब्बं, न एकच्छन्ने अनावासे वत्थब्बं, न एकच्छन्ने आवासे वा अनावासे वा वत्थब्बं, न एकासने निसीदितब्बं, न नीचे आसने निसिन्ने उच्चे आसने निसीदितब्बं, न छमायं निसिन्ने आसने निसीदितब्बं, न एकचङ्कमे चङ्कमितब्बं, न नीचे चङ्कमे चङ्कमन्ते उच्चे चङ्कमे चङ्कमितब्बं, न छमायं चङ्कमन्ते चङ्कमे चङ्कमितब्बं.

‘‘पारिवासिकचतुत्थो ¶ चे, भिक्खवे, परिवासं ददेय्य, मूलाय पटिकस्सेय्य, मानत्तं ददेय्य, तंवीसो अब्भेय्य, अकम्मं न च करणीय’’न्ति (चूळव. ७६-८२) –

एवं पारिवासिकानं चतुनवुति वत्तानि.

सा च नेसं चतुनवुतिसङ्खा एवं वेदितब्बा – नउपसम्पादनादिनकम्मिकगरहपरियोसानानि नव वत्तानि, ततो पकतत्तस्स उपोसथट्ठपनादिभिक्खूहिसम्पयोजनपरियोसानानि अट्ठ, ततो नपुरतोगमनादी पञ्च, नपुरेगमनादी चत्तारि, आगन्तुकेन आरोचनादी चत्तारीति तिंस, सभिक्खुकावासादितो अभिक्खुकावासादिगमनपअसंयुत्तानि तीणि नवकानि चाति सत्तपञ्ञास, ततो नपकतत्तेन सद्धिं एकच्छन्नवासादिपटिसंयुत्तानि एकादस, ततो नपारिवासिकवुड्ढतरमूलायपटिकस्सनारहमानत्तारहमानत्तचारिकअब्भानारहेहि ¶ सद्धिं एकच्छन्नवासादिपटिसंयुत्तानि पच्चेकं एकादस कत्वा पञ्चपञ्ञासाय वत्तेसु पारिवासिकवुड्ढतरमूलायपटिकस्सनारहमानत्तारहानं तिण्णं समानत्ता तेसु एकं एकादसकं, मानत्तचारिकअब्भानारहानं द्विन्नं समानत्ता तेसु एकं एकादसकन्ति दुवे एकादसकानि, अन्ते पारिवासिकचतुत्थस्स सङ्घस्स परिवासादिदानचतुक्के गणपूरणत्थदोसतो निवत्तिवसेन चत्तारि चत्तारीति चतुनवुति वत्तानि. तानि अग्गहितग्गहणेन एकूनचत्तालीसवत्तानि नाम. आदितो नव, उपोसथट्ठपनादीनि अट्ठ, पकतत्तेन एकच्छन्नवासादी चत्तारि चाति एकवीसति वत्तानि कम्मक्खन्धके गहितत्ता इध गणनाय अग्गहेत्वा ततो सेसेसु तेसत्ततिया वत्तेसु पारिवासिकवुड्ढतरादीहि एकच्छन्ने वासादिपटिसंयुत्तानि द्वावीसति वत्तानि पकतत्तेहि समानत्ता तानि च ‘‘गन्तब्बो भिक्खवे’’तिआदिकं नवकं तथा ¶ गच्छन्तस्स अनापत्तिदस्सनपरं, न आवासतो गच्छन्तस्स आपत्तिदस्सनपरन्ति तञ्च अग्गहेत्वा अवसेसेसु द्वाचत्तालीसवत्तेसु पारिवासिकचतउत्थादिकम्मचतुक्कं गरुकापत्तिवुट्ठानाय गणपूरणत्थसामञ्ञेन एकं कत्वा तयो अपनेत्वा गणितानि एकूनचत्तालीसानि होन्तीति वुत्तं ‘‘नवाधिकानि तिंसेव, खन्धके तदनन्तरे’’ति.

२७५०. इमानि एकूनचत्तालीस वत्तानि पुरिमेहि तेचत्तालीसवत्तेहि सद्धिं द्वासीति होन्तीति आह ‘‘एवं सब्बानि…पे… गहितागहणेन तू’’ति.

एवं कम्मक्खन्धकपारिवासिकक्खन्धकेसु महेसिना वुत्तानि खन्धकवत्तानि गहितागहणेन द्वासीति एव होन्तीति योजना. एवमेत्थ द्वासीतिक्खन्धकवत्तानि दस्सितानि.

आगमट्ठकथावण्णनायं पन –

‘‘पारिवासिकानं भिक्खूनं वत्तं पञ्ञपेस्सामीति (चूळव. ७५) आरभित्वा ‘न उपसम्पादेतब्बं…पे… न छमायं चङ्कमन्ते चङ्कमे चङ्कमितब्ब’न्ति (चूळव. ७६-८१) वुत्तावसानानि छसट्ठि, ततो परं ‘न, भिक्खवे, पारिवासिकेन भिक्खुना पारिवासिकेन वुड्ढतरेन भिक्खुना सद्धिं, मूलायपटिकस्सनारहेन, मानत्तारहेन, मानत्तचारिकेन, अब्भानारहेन भिक्खुना सद्धिं एकच्छन्ने आवासे वत्थब्ब’न्तिआदीनं (चूळव. ८२) पकतत्ते चरितब्बेहि अनञ्ञत्ता विसुं ते अगणेत्वा पारिवासिकवुड्ढतरादीसु ¶ पुग्गलन्तरेसु चरितब्बत्ता तेसं वसेन सम्पिण्डेत्वा एकेकं कत्वा गणितानि पञ्चाति एकसत्तति वत्तानि, उक्खेपनीयकम्मकतवत्तेसु वत्तपञ्ञापनवसेन वुत्तं ‘न पकतत्तस्स भिक्खुनो अभिवादनं ¶ …पे… नहाने पिट्ठिपरिकम्मं सादितब्ब’न्ति (चूळव. ५१) इदं अभिवादनादीनं असादियनं एकं, ‘न पकतत्तो भिक्खु सीलविपत्तिया अनुद्धंसेतब्बो’तिआदीनि च दसाति एवमेतानि द्वासीति होन्ति. एतेस्वेव कानिचि तज्जनीयकम्मादिवत्तानि, कानिचि पारिवासिकादिवत्तानीति अग्गहितग्गहणेन द्वासीति एवा’’ति (म. नि. टी. २.२५; सारत्थ. टी. २.३९; वि. वि. टी. १.३९) –

वुत्तं. एतानि पन वत्तानि कदाचि तज्जनीयकम्मकतादिकाले, पारिवासिकादिकाले च चरितब्बानि खुद्दकवत्तानीति गहेतब्बानि आगन्तुकवत्तादीनं चुद्दसमहावत्तानं वक्खमानत्ता.

२७५१. इदानि पारिवासिकस्स भिक्खुनो रत्तिच्छेदं, वत्तभेदञ्च दस्सेतुमाह ‘‘परिवासञ्च वत्तञ्चा’’तिआदि. परिवासञ्च वत्तञ्च समादिन्नस्साति ‘‘परिवासं समादियामी’’ति परिवासञ्च ‘‘वत्तं समादियामी’’ति वत्तञ्च पकतत्तस्स भिक्खुनो सन्तिके उक्कुटिकं निसीदित्वा अञ्जलिं पग्गहेत्वा वचीभेदं कत्वा समादिन्नस्स. भिक्खुनोति पारिवासिकस्स भिक्खुनो.

२७५२. सहवासादयो ‘‘एकच्छन्ने’’तिआदिना सयमेव वक्खति. सहवासो, विनावासो, अनारोचनमेव चाति इमेहि तीहि पारिवासिकभिक्खुस्स रत्तिच्छेदो च दुक्कटञ्च होतीति योजना.

२७५३. उदकपातेन समन्ता निब्बकोसस्स उदकपातट्ठानेन. एकच्छन्नेति एकच्छन्ने परिच्छन्ने वा अपरिच्छन्ने वा आवासे. पकतत्तेन भिक्खुना सह उक्खित्तस्स निवासो ¶ निवारितोति योजना. ‘‘निवारितो’’ति इमिना दुक्कटं होतीति दीपेति.

२७५४. अन्तोयेवाति एकच्छन्नस्स आवासपरिच्छेदस्स अन्तोयेव. ‘‘न लब्भती’’ति इमिना रत्तिच्छेदो च दुक्कटञ्च होतीति दीपेति.

२७५५. महाअट्ठकथादिसूति ¶ आदि-सद्देन कुरुन्दट्ठकथादिं सङ्गण्हाति. उभिन्नन्ति उक्खित्तकपारिवासिकानं. इति अविसेसेन निद्दिट्ठन्ति योजना.

२७५६. इमिना सहवासेन रत्तिच्छेदञ्च दुक्कटञ्च दस्सेत्वा विनावासेन दस्सेतुमाह ‘‘अभिक्खुके पनावासे’’ति. आवासेति वसनत्थाय कतसेनासने. अनावासेति वासत्थाय अकते चेतियघरे वा बोधिघरे वा सम्मज्जनिअट्टके वा दारुअट्टके वा पानीयमाळे वा वच्चकुटियं वा द्वारकोट्ठके वा अञ्ञत्र वा यत्थ कत्थचि एवरूपे ठाने. विप्पवासं वसन्तस्साति पकतत्तेन विना वासं कप्पेन्तस्स. रत्तिच्छेदो च दुक्कटन्ति रत्तिच्छेदो चेव वत्तभेददुक्कटञ्च होति.

२७५७. एवं विप्पवासेन रत्तिच्छेददुक्कटानि दस्सेत्वा अनारोचनेन दस्सेतुमाह ‘‘पारिवासिकभिक्खुस्सा’’तिआदि. भिक्खुं दिस्वानाति आकासेनापि गच्छन्तं समानसंवासकं आगन्तुकं भिक्खुं दिस्वा. तङ्खणेति तस्मिं दिट्ठक्खणेयेव. ‘‘अनारोचेन्तस्स एव एतस्सा’’ति पदच्छेदो. एवकारेन रत्तिच्छेदो च दुक्कटञ्चाति उभयं एतस्स होतीति दीपेन्तेन अदिट्ठो चे, रत्तिच्छेदोव होतीति ञापेति. यथाह – ‘‘सोपिस्स रत्तिच्छेदं करोति, अञ्ञातत्ता पन वत्तभेददुक्कटं नत्थी’’ति (चूळव. अट्ठ. ७५). नानासंवासकेन ¶ सह विनयकम्मं कातुं न वट्टति, तस्स अनारोचनेपि रत्तिच्छेदो न होति.

२७५८-९. पारिवासिको भिक्खु यत्थ सङ्घनवकट्ठाने ठितो, तत्थेव तस्मिंयेव ठाने ठत्वा यथावुड्ढं पकतत्तेहिपि सद्धिं वुड्ढपटिपाटिया पञ्च किच्चानि कातुं वट्टतीति योजना.

तानि सरूपतो दस्सेतुमाह ‘‘उपोसथपवारण’’न्तिआदि. उपोसथपवारणं यथावुड्ढं कातुं लभतीति योजना. देन्तीति एत्थ ‘‘घण्टिं पहरित्वा’’ति सेसो. सङ्घदायकाति कम्मधारयसमासो. सङ्घस्स एकत्तेपि गरूसु बहुवचननिद्देसो. ‘‘देति चे सङ्घदायको’’तिपि पाठो. तत्थ घण्टिं पहरित्वा भाजेत्वा देन्तो सङ्घो वस्सिकसाटिकं देति चे, पारिवासिको यथावुड्ढं अत्तनो पत्तट्ठाने लभतीति योजना.

ओणोजनन्ति विस्सज्जनं, सङ्घतो अत्तनो पत्तानं द्विन्नं, तिण्णं वा उद्देसभत्तादीनं अत्तनो ¶ पुग्गलिकभत्तपच्चासाय पटिग्गहेत्वा ‘‘मय्हं अज्ज भत्तपच्चासा अत्थि, स्वे गण्हिस्सामी’’ति वत्वा सङ्घविस्सज्जनं लभतीति वुत्तं होति. भत्तन्ति आगतागतेहि वुड्ढपटिपाटिया गहेत्वा गन्तब्बं विहारे सङ्घस्स चतुस्सालभत्तं. तथा पारिवासिको यथावुड्ढं लभतीति योजना. इमे पञ्चाति वुत्तमेवत्थं निगमयति.

तत्रायं विनिच्छयो (चूळव. अट्ठ. ७५) – उपोसथपवारणे ताव पातिमोक्खे उद्दिस्समाने हत्थपासे निसीदितुं वट्टति. महापच्चरियं पन ‘‘पाळिया अनिसीदित्वा पाळिं विहाय हत्थपासं अमुञ्चन्तेन निसीदितब्ब’’न्ति वुत्तं. पारिसुद्धिउपोसथे करियमाने सङ्घनवकट्ठाने निसीदित्वा तत्थेव ¶ निसिन्नेन अत्तनो पाळिया पारिसुद्धिउपोसथो कातब्बोव. पवारणायपि सङ्घनवकट्ठाने निसीदित्वा तत्थेव निसिन्नेन अत्तनो पाळिया पवारेतब्बं. सङ्घेन घण्टिं पहरित्वा भाजियमानं वस्सिकसाटिकम्पि अत्तनो पत्तट्ठाने गहेतुं वट्टति.

ओणोजने सचे पारिवासिकस्स द्वे तीणि उद्देसभत्तादीनि पापुणन्ति, अञ्ञा चस्स पुग्गलिकभत्तपच्चासा होति, तानि पटिपाटिया गहेत्वा ‘‘भन्ते, हेट्ठा गाहेथ, अज्ज मय्हं भत्तपच्चासा अत्थि, स्वेव गण्हिस्सामी’’ति वत्वा विस्सज्जेतब्बानि, एवं तानि पुनदिवसेसु गण्हितुं लभति. ‘‘पुनदिवसे सब्बपठमं एतस्स दातब्ब’’न्ति कुरुन्दियं वुत्तं. यदि पन न गण्हाति न विस्सज्जेति, पुनदिवसे न लभति. इदं ओणोजनं नाम पारिवासिकस्सेव ओदिस्स अनुञ्ञातं. कस्मा? तस्स हि सङ्घनवकट्ठाने निसिन्नस्स भत्तग्गे यागुखज्जकादीनि पापुणन्ति वा न वा, तस्मा ‘‘सो भिक्खाहारेन मा किलमित्था’’ति इदमस्स सङ्गहकरणत्थाय ओदिस्स अनुञ्ञातं.

भत्ते चतुस्सालभत्तं यथावुड्ढं लभति, पाळिया पन गन्तुं वा ठातुं वा न लभति. तस्मा पाळितो ओसक्कित्वा हत्थपासे ठितेन हत्थं पसारेत्वा यथा सेनो निपतित्वा गण्हाति, एवं गण्हितब्बं. आरामिकसमणुद्देसेहि आहरापेतुं न लभति. सचे सयमेव आहरन्ति, वट्टति. रञ्ञो महापेळभत्तेपि एसेव नयो. चतुस्सालभत्ते पन सचे ओणोजनं कत्तुकामो होति, अत्तनो अत्थाय उक्खित्ते पिण्डे ‘‘अज्ज मे भत्तं अत्थि, स्वेव गण्हिस्सामी’’ति वत्तब्बं. ‘‘पुनदिवसे द्वे पिण्डे लभती’’ति (चूळव. अट्ठ. ७५) महापच्चरियं वुत्तं. उद्देसभत्तादीनिपि ¶ पाळितो ओसक्कित्वाव गहेतब्बानि. यत्थ पन निसीदापेत्वा परिविसन्ति ¶ , तत्थ सामणेरानं जेट्ठकेन भिक्खूनं सङ्घनवकेन हुत्वा निसीदितब्बन्ति.

पारिवासिकक्खन्धककथावण्णना.

समथक्खन्धककथावण्णना

२७६०. इदानि समथविनिच्छयं दस्सेतुं येसु अधिकरणेसु सन्तेसु समथेहि भवितब्बं, तानि ताव दस्सेन्तो आह ‘‘विवादाधारता’’तिआदि. विवादाधारताति विवादाधिकरणं. आपत्ताधारताति एत्थापि एसेव नयो. आधारताति अधिकरणपरियायो. आधारीयति अभिभुय्यति वूपसम्मति समथेहीति आधारो, विवादो च सो आधारो चाति विवादाधारो, सो एव विवादाधारता. एवमाधाराधिकरण-सद्दानं विवादादिसद्देहि सह कम्मधारयसमासो दट्ठब्बो. अधिकरीयति अभिभुय्यति वूपसम्मति समथेहीति अधिकरणन्ति विवादादिचतुब्बिधमेव पाळियं दस्सितं. अयमत्थो ‘‘एतेसं तु चतुन्नम्पि, समत्ता समथा मता’’ति वक्खमानेन विञ्ञायति.

२७६१. एतानि चत्तारि अधिकरणानि च ‘‘इध पन, भिक्खवे, भिक्खू विवदन्ति ‘धम्मो’ति वा ‘अधम्मो’ति वा’’ति (चूळव. २१५) अट्ठारस भेदकारकवत्थूनि च महेसिना वुत्तानि. तत्थ तेसु चतूसु अधिकरणेसु विवादो अधिकरणसङ्खातो एतानि अट्ठारस भेदकरवत्थूनि निस्सितो निस्साय पवत्तोति योजना.

२७६२. विपत्तियो चतस्सोवाति ‘‘इध पन, भिक्खवे, भिक्खू भिक्खुं अनुवदन्ति सीलविपत्तिया वा आचारविपत्तिया वा ¶ दिट्ठिविपत्तिया वा आजीवविपत्तिया वा’’ति (चूळव. २१५) वुत्ता चतस्सो विपत्तियो. दिट्ठादीनं अनुगन्त्वा सीलविपत्तिआदीहि वदनं चोदना अनुवादो. उपागतोति निस्सितो, अनुवादो चतस्सो विपत्तियो निस्साय पवत्तोति अत्थो. ‘‘तत्था’’ति पठममेव निद्धारणस्स वुत्तत्ता इध पुनवचने पयोजनं न दिस्सति, ‘‘सम्भवा’’ति वचनस्सापि न कोचि अत्थविसेसो दिस्सति. तस्मा ‘‘आपत्ताधारता तत्थ, सत्तआपत्तिसम्भवा’’ति पाठो न युज्जति, ‘‘आपत्ताधारता नाम, सत्त आपत्तियो मता’’ति पाठो ¶ युत्ततरो, आपत्ताधारता नाम आपत्ताधिकरणं नाम सत्त आपत्तियो मता सत्त आपत्तियोव अधिप्पेताति अत्थो.

२७६३. सङ्घकिच्चानि निस्सायाति अपलोकनकम्मादीनि चत्तारि सङ्घकम्मानि उपादाय किच्चाधिकरणाभिधानं सिया, किच्चाधिकरणं नाम चत्तारि सङ्घकम्मानीति अत्थो. एतेसं तु चतुन्नम्पीति एतेसं पन चतुन्नम्पि अधिकरणानं. समत्ताति वूपसमहेतुत्ता. समथा मताति सम्मुखाविनयादयो सत्त अधिकरणसमथाति अधिप्पेता. अधिकरणानि समेन्ति, सम्मन्ति वा एतेहीति ‘‘समथा’’ति वुच्चन्तीति ‘‘समत्ता समथा मता’’ति इमिना समथ-सद्दस्स अन्वत्थं दीपेति.

२७६४-५. ते सरूपतो दस्सेतुमाह ‘‘सम्मुखा’’तिआदि. ‘‘विनयो’’ति इदं सम्मुखादिपदेहि पच्चेकं योजेतब्बं ‘‘सम्मुखाविनयो सतिविनयो अमूळ्हविनयो’’ति. ‘‘पटिञ्ञाविनयो’’ति च पटिञ्ञातकरणं वुत्तं. सत्तमो विनयोति समथो अधिप्पेतो. तिणवत्थारकोति इमे सत्त समथा बुद्धेनादिच्चबन्धुना वुत्ताति योजना.

२७६६. चतूसु ¶ अधिकरणेसु यं अधिकरणं यत्तकेहि समथेहि सम्मति, ते सङ्गहेत्वा दस्सेन्तो आह ‘‘विवादो’’तिआदि.

२७६७-९. ‘‘विवादो’’तिआदिना उद्दिट्ठमत्थं निद्दिसन्तो आह ‘‘छट्ठेना’’तिआदि. एत्थ एतेसु चतूसु अधिकरणेसु, समथेसु च किं केन सम्मतीति चे? विवादो विवादाधिकरणं छट्ठेन येभुय्यसिकाय, पठमेन समथेन सम्मुखाविनयेन चाति द्वीहि समथेहि सम्मति. यस्सा किरियाय धम्मवादिनो बहुतरा, एसा येभुय्यसिका. ‘‘सङ्घसम्मुखता, धम्मसम्मुखता, विनयसम्मुखता, पुग्गलसम्मुखता’’ति (चूळव. २२९, २३४, २३६, २३७, २४२) वुत्तानं सङ्घादीनं चतुन्नं सन्निधानेन वा गणपुग्गलेहि समियमानं विवादाधिकरणं सङ्घसम्मुखतं विना इतरेहि तीहि वा सम्मतीति वुत्तं होति.

एत्थ च कारकसङ्घस्स सङ्घसामग्गिवसेन सम्मुखीभावो सङ्घसम्मुखता, समेतब्बस्स वत्थुनो ¶ भूतता धम्मसम्मुखता, यथा तं समेतब्बं, तथेवस्स समनं विनयसम्मुखता, यो च विवदति, येन च विवदति, तेसं उभिन्नं अत्थपच्चत्थिकानं सम्मुखीभावो पुग्गलसम्मुखता.

‘‘अनुवादो चतूहिपी’’ति उद्दिट्ठं निद्दिसन्तो आह ‘‘सम्मुखा’’तिआदि. अनुपुब्बेनाति अनुपटिपाटिया. सम्मुखाविनयादीहि तीहिपीति सम्मुखाविनयसतिविनयअमूळ्हविनयेहि तीहिपि. तथेवाति यथा तीहि, तथा पञ्चमेन तस्सपापियसिकासमथेनापि अनुवादो सम्मति, पगेव चतूहीति अत्थो.

यो पापुस्सन्नताय पापियो पुग्गलो, तस्स कत्तब्बतो ‘‘तस्सपापियसिका’’ति कम्मं वुच्चति. आयस्मतो दब्बस्स ¶ मल्लपुत्तस्स विय सतिवेपुल्लप्पत्तस्स खीणासवस्स कता अमूलिका सीलविपत्तिचोदना सम्मुखाविनयेन, ञत्तिचतुत्थाय कम्मवाचाय दिन्नेन सतिविनयेन च सम्मति. उम्मत्तकस्स भिक्खुनो कता आपत्तिचोदना सम्मुखाविनयेन च तथेव दिन्नेन अमूळ्हविनयेन च सम्मति. सङ्घमज्झे आपत्तिया चोदियमानस्स अवजानित्वा पटिजाननादिं करोन्तस्स पापभिक्खुनो बहुलापत्तिचोदना सम्मुखाविनयेन चेव तथेव पकतेन तस्सपापियसिकाकम्मेन च वूपसम्मतीति वुत्तं होति.

‘‘आपत्ति पन तीहेवा’’ति उद्देसस्स निद्देसमाह ‘‘सम्मुखेना’’तिआदि. सम्मुखेन सम्मुखाविनयेन, पटिञ्ञाय पटिञ्ञातकरणेन, तिणवत्थारकेन वा इमेहि तीहि एव समथेहि सा आपत्ति आपत्ताधिकरणं उपसमं यातीति योजना. एत्थ पटिञ्ञातकरणं नाम आपत्तिं पटिग्गण्हन्तेन ‘‘पस्ससी’’ति वुत्ते आपत्तिं देसेन्तेन ‘‘आम पस्सामी’’ति सम्पटिच्छनं. तिणवत्थारकं पन सयमेव वक्खति.

तीहेव समथेहीति एत्थ गरुकापत्ति सम्मुखाविनयेन, पटिञ्ञातकरणेन चाति द्वीहि, लहुकापत्तिं आपज्जित्वा सङ्घे वा गणे वा पुग्गले वा देसनाय सम्मुखाविनयेन चेव पटिञ्ञातकरणेन च, कोसम्बकानं विग्गहसदिसं महाविग्गहं करोन्तेहि आपन्ना अनेकविधा आपत्तियो सचे होन्ति, तासु वक्खमानसरूपं थुल्लवज्जादिं ठपेत्वा अवसेसा सब्बा आपत्तियो सम्मुखाविनयेन, तिणवत्थारकेन च सम्मन्तीति अत्थो.

किच्चं ¶ किच्चाधिकरणं एकेन सम्मुखाविनयेनेव सम्मतीति योजना.

२७७०. येभुय्यसिककम्मेति ¶ एत्थ निमित्तत्थे भुम्मं. सलाकं गाहयेति विनिच्छयकारके सङ्घे धम्मवादीनं बहुत्तं वा अप्पतरत्तं वा जानितुं वक्खमानेन नयेन सलाकं गाहापेय्य. बुधोति ‘‘न छन्दागतिं गच्छति…पे… गहितागहितञ्च जानाती’’ति वुत्तं पञ्चहि अङ्गेहि समन्नागतं पुग्गलं दस्सेति. ‘‘गूळ्हेना’’तिआदिना सलाकग्गाहप्पकारो दस्सितो. कण्णजप्पेनाति एत्थ कण्णे जप्पो यस्मिं सलाकग्गाहपयोगेति विग्गहो. एत्थ गूळ्हसलाकग्गाहो नाम धम्मवादिसलाका च अधम्मवादिसलाका च विसुं विसुं चीवरकण्णे पक्खिपित्वा पुग्गलानं सन्तिकं विसुं विसुं उपसङ्कमित्वा सलाका विसुं विसुं दस्सेत्वा ‘‘इतो तव रुच्चनकं गण्हाही’’ति रहो ठत्वा गाहापनं. विवटकं नाम धम्मवादीनं बहुभावं ञत्वा सब्बेसु जानन्तेसु पुग्गलानं सन्तिकं गाहापनं. कण्णजप्पनं नाम एवमेव कण्णमूले रहो ठत्वा गाहापनं.

२७७१. अलज्जुस्सदेति एत्थ ‘‘सङ्घे’’ति सेसो. लज्जिसु बालेसूति एत्थापि ‘‘उस्सदेसू’’ति वत्तब्बं.

२७७२. सकेन कम्मुनायेवाति अत्तनो यं किच्चं, तेनेवाति.

२७७३-५. ‘‘आपज्जती’’तिआदि ‘‘अलज्जी, लज्जी, बालो’’ति जाननस्स हेतुभूतकम्मदस्सनं. दुच्चिन्तितोति अभिज्झादितिविधमनोदुच्चरितवसेन दुट्ठु चिन्तेन्तो. दुब्भासीति मुसावादादिचतुब्बिधवचीदुच्चरितवसेन वचीद्वारे पञ्ञत्तानं सिक्खापदानं वीतिक्कमवसेन दुट्ठु भासनसीलो. दुक्कटकारिकोति पाणातिपातादितिविधकायदुच्चरितवसेन कायद्वारे ¶ पञ्ञत्तसिक्खापदानं वीतिक्कमवसेन कुच्छितकम्मस्स करणसीलो. इति लक्खणेनेवाति यथावुत्तं अलज्जीलज्जीबाललक्खणं निगमेति.

२७७६. ‘‘येभुय्यसिका’’तिआदिगाथाहि निद्दिट्ठमेव अत्थं निगमेतुमाह ‘‘तिधा’’तिआदि. तिधासलाकगाहेनाति तिविधस्स सलाकगाहस्स अञ्ञतरेन. बहुका धम्मवादिनो यदि सियुन्ति योजना. कातब्बन्ति एत्थ ‘‘विवादाधिकरणवूपसमन’’न्ति सेसो.

२७७७. यो ¶ पुग्गलो अलज्जी च होति सानुवादो च कम्मतो कायकम्मतो, वचीकम्मतो च असुचि च सम्बुद्धजिगुच्छनीयोति अत्थो. सो एवंविधो पापपुग्गलो तस्स पापियसिककम्मस्स योगो होतीति सम्बन्धो. सानुवादोति एत्थ अनुवादो नाम चोदना, सह अनुवादेन वत्ततीति सानुवादो, पापगरहितपुग्गलेहि कातब्बचोदनाय अनुरूपोति अत्थो.

२७७८-९. भण्डनेति कलहस्स पुब्बभागे. कलहेति कायवचीद्वारप्पवत्ते हत्थपरामसादिके कलहे च. विवादम्हि अनप्पकेति बहुविधे विवादे जाते. बहुअस्सामणे चिण्णेति समणानं अननुच्छविके नानप्पकारे कायिकवाचसिकवीतिक्कमे च कते. अनग्गेति अनन्ते. भस्सकेति कुच्छिते अमनापवचने चिण्णेति योजना, भासितेति अत्थो. गवेसन्तन्ति गवेसियमानं, आपत्ताधिकरणन्ति सेसो. वाळन्ति चण्डं. कक्खळन्ति आसज्जं. कातब्बन्ति वूपसमेतब्बं.

२७८०-२. यथा च वूपसम्मति, तथा तिणवत्थारके सुद्धो होतीति सम्बन्धो.

थुल्लवज्जन्ति ¶ पाराजिकञ्चेव सङ्घादिसेसञ्च. गिहीहि पटिसंयुतन्ति गिहीनं जातिआदीहि पाळिया आगतेहि दसहि अक्कोसवत्थूहि, अट्ठकथागतेहि च तदञ्ञेहि अक्कोसवत्थूहि खुंसनवम्भनपच्चया च धम्मिकपटिस्सवस्स असच्चापनपच्चया च आपन्नापत्तिं. एसा एव हि आपत्ति गिहिपटिसंयुत्ता नाम परिवारे ‘‘अत्थि गिहिपटिसंयुत्ता, अत्थि नगिहिपटिसंयुत्ता’’ति दुकं निक्खिपित्वा ‘‘गिहिपटिसंयुत्ताति सुधम्मत्थेरस्स आपत्ति, या च धम्मिकस्स पटिस्सवस्स असच्चापने आपत्ति. अवसेसा नगिहिपटिसंयुत्ता’’ति (परि. अट्ठ. ३२१) वचनतो.

सुधम्मत्थेरस्स आपत्तीति च तेन चित्तस्स गहपतिनो जातिं पटिच्च खुंसनवम्भनपच्चया आपन्ना ओमसवादसिक्खापदविभागगता दुक्कटापत्ति गहेतब्बा. इदञ्च उपलक्खणमत्तं, तस्मा इतरेहिपि अक्कोसवत्थूहि गिहिं खुंसेन्तानं वम्भेन्तानं इतरेसं भिक्खूनं सा आपत्ति गिहिपटिसंयुत्तावाति वेदितब्बं. तथा आपन्नं आपत्तिं देसापेन्तेन दस्सनूपचारं अविजहापेत्वा सवनूपचारं जहापेत्वा एकंसे उत्तरासङ्गं कारापेत्वा उक्कुटिकं निसीदापेत्वा अञ्जलिं पग्गण्हापेत्वा सा आपत्ति देसापेतब्बा.

दिट्ठाविकम्मिकन्ति ¶ दिट्ठाविकम्मे नियुत्तो दिट्ठाविकम्मिको, तं, अट्ठकथायं ‘‘ये पन ‘न मेतं खमती’ति अञ्ञमञ्ञं दिट्ठाविकम्मं करोन्ती’’ति (चूळव. अट्ठ. २१४) ये पुग्गला दस्सिता, तेसमञ्ञतरस्सेव गहणं.

योति भण्डनकारकेहि भिक्खूहि सद्धिं महन्तं विग्गहं कत्वा सम्बहुला आपत्तियो आपन्नो यो भिक्खु. तत्थाति तस्मिं तिणवत्थारकसमथकारके भिक्खुसमूहे. न होतीति छन्दं दत्वा तं भिक्खुपरिसं अनागतत्ता न संविज्जति. तञ्च ठपेत्वाति योजना.

तिणवत्थारके ¶ कते सति याव उपसम्पदमाळतो पभुति आपन्नाय सेसाय आपत्तिया निरापत्ति हुत्वा सुद्धो होति सङ्घोति योजना.

समथक्खन्धककथावण्णना.

खुद्दकवत्थुक्खन्धककथावण्णना

२७८३. कुट्टेति इट्ठकासिलादारुकुट्टानं अञ्ञतरस्मिं. अट्टानेति एत्थ अट्टानं �