📜
ನಮೋ ತಸ್ಸ ಭಗವತೋ ಅರಹತೋ ಸಮ್ಮಾಸಮ್ಬುದ್ಧಸ್ಸ
ಜಿನಾಲಙ್ಕಾರ
ಪಣಾಮದೀಪನೀಗಾಥಾ
ಯೋ ಲೋಕತ್ಥಾಯ ಬುದ್ಧೋ ಧನಸುತಭರಿಯಾಅಙ್ಗಜೀವೇ ಚಜಿತ್ವಾ ಪೂರೇತ್ವಾ ಆರಮಿಯೋ ತಿದಸಮನುಪಮೇ ಬೋಧಿಪಕ್ಖೀಯಧಮ್ಮೇ,
ಪತ್ವಾ ಬೋಧಿಂ ವಿಸುದ್ಧಂ ಸಕಲಗುಣದದಂ ಸೇಟ್ಠಭೂತೋ ತಿಲೋಕೇ,
ಕತ್ವಾ ದುಕ್ಖಸ್ಸ ಅನ್ತಂ ಕತಸುಭಜನತಂ ದುಕ್ಖತೋ ಮೋಚಯಿತ್ಥ.
ನತ್ವಾನಾಹಂ ಜಿನನ್ತಂ ಸಮುಪಚಿತಸುಭಂ ಸಬ್ಬಲೋಕೇಕಬನ್ಧುಂ,
ನಾಹು ಯೇನಪಿ ತುಲ್ಯೋ ಕುಸಲಮಹಿಮತೋ ಉತ್ತಮೋ ಭೂತಲೋಕೇ ತಸ್ಸೇವಾಯಂ ಉವಿಮ್ಹಂ ಸುವಿಪುಲಮಮಲಂ ಬೋಧಿಸಮ್ಭಾರಭೂತಂ,
ಹೇತುಂ ಹೇತ್ವಾನುರೂಪಂ ಸುಗತಗತಫಲಂ ಭಾಸತೋ ಮೇ ಸುಣಾಥ.
ಯೋಗಾವಚರಸಮ್ಪತ್ತಿದೀಪನೀಗಾಥಾ
ಜಾತೋ ಯೋ ನವಮೇ ಖಣೇ ಸುತಧರೋ ಸೀಲೇನ ಸುದ್ಧಿನ್ದ್ರಿಯೋ ಸಂಸಾರಂ ಅಯತೋ ಭವಕ್ಕಯಕರಂ ದಿಸ್ವಾ ಸಿವಂ ಖೇಮತೋ,
ತಂ ಸಮ್ಪಾಪಕಮಗ್ಗದೇಸಕಮುನಿಂ ಸಮ್ಪೂಜಯನ್ತೋ ತತೋ ಉದ್ಧಾನುಸ್ಸತಿಭಾವನಾದಿಕಮತೋ ಸಮ್ಪಾದಯೇ ತಂ ಸಿವಂ.
ವತ್ಥುವಿಸೋಧನೀಗಾಥಾ
ಬುದ್ಧೋತಿ ಕೋ ಬುದ್ಧಗುಣೋ ತಿ ಕೋ ಸೋ,
ಅಚಿನ್ತಯಾದಿತ್ತಮುಪಾಗತೋ ಯೋ;
ಅನಞ್ಞಸಾಧಾರಣಭೂತಮತ್ಥಂ,
ಅಕಾಸಿ ಕಿಂ ಸೋ ಕಿಮವೋಚ ಬುದ್ಧೋ.
ವಿಸುದ್ಧಖನ್ಧಸನ್ತಾನೋ ಬುದ್ಧೋತಿ ನಿಯಮೋ ಕತೋ,
ಖನ್ಧಸನ್ತಾನಸುದ್ಧೀ ತು ಗುಣೋತಿ ನಿಯಮೋ ಕತೋ.
ಅಕಾಸಿ ಕಿಚ್ಚಾನಿ ದಿನೇಸು ಪಞ್ಚ,
ಪಸಾದಯಞ್ಚಿದ್ಧಿಬಲೇನ ಸೇನ;
ಜನಾನಸೇಸಂ ಚರಿಯಾನುಕೂಲಂ,
ಞತ್ವಾನವೋಚಾನುಸಯಪ್ಪಹಾನಂ.
ಅನಞ್ಞಸಾಧಾರಣದೀಪನೀಗಾಥಾ
ಅಬ್ಭುಗ್ಗತಾ ಯಸ್ಸ ಗುಣಾ ಅನನ್ತಾ,
ತಿಬುದ್ಧಖೇತ್ತೇಕದಿವಾಕರೋತಿ;
ಜಾನಾತಿ ಸೋ ಲೋಕಮಿಮಂ ಪರಞ್ಚ,
ಸಚೇತನಞ್ಚೇವ ಅಚೇತನಞ್ಚ;
ಸಕಸ್ಸ ಸನ್ತಾನಗತಂ ಪರೇಸಂ,
ಬ್ಯತೀತಮಪ್ಪತ್ತಕಮತ್ರಭೂತಂ.
ಅನನ್ತಸತ್ತೇಸು ಚ ಲೋಕಧಾತುಸು,
ಏಕೋವ ಸಬ್ಬೇಪಿ ಸಮಾ ನ ತೇನ;
ದಿಸಾಸು ಪುಬ್ಬಾದಿಸು ಚಕ್ಕವಾಳಾ,
ಸಹಸ್ಸಸಙ್ಖಾಯಪಿ ಅಪ್ಪಮೇಯ್ಯಾ;
ಯೇ ತೇಸು ದೇವಾ ಮನುಜಾ ಚ ಬ್ರಹ್ಮಾ,
ಏಕತ್ಥ ಸಙ್ಗಮ್ಮ ಹಿ ಮನ್ತಯನ್ತಾ.
ಅನಾದಿಕಾಲಾಗತನಾಮರೂಪಿನಂ,
ಯಥಾಸಕಂ ಹೇತುಫಲತ್ತವುತ್ತಿನಂ;
ತಬ್ಭಾವಭಾವಿತ್ತಮಸಮ್ಭುಣನ್ತಾ,
ನಾನಾವಿಪಲ್ಲಾಸಮನುಪವಿಟ್ಠಾ.
ಕಮ್ಮಪ್ಪವತ್ತಿಞ್ಚ ಫಲಪ್ಪವತ್ತಿಂ,
ಏಕತ್ತನಾನತ್ತನಿರೀಹಧಮ್ಮತಂ;
ವಿಞ್ಞತ್ತಿಸನ್ತಾನಘನೇನ ಛನ್ನತೋ,
ಸಿವಞ್ಜಸಂ ನೋ ಭಣಿತುಂ ಸಮತ್ಥಾ.
ಏಕೋ ವ ಸೋ ಸನ್ತಿಕರೋ ಪಭಙ್ಕರೋ,
ಸಙ್ಖಾಯ ಞೇಯ್ಯಾನಿ ಅಸೇಸಿತಾನಿ;
ತೇಸಞ್ಹಿ ಮಜ್ಝೇ ಪರಮಾಸಮ್ಭೀವದಂ,
ಸಿವಞ್ಜಸಂ ದೀಪಯಿತುಂ ಸಮತ್ಥೋ.
ಸೋ ಗೋತಮೋ ಸಕ್ಯಸುತೋ ಮುನಿನ್ದೋ,
ಸಬ್ಬಸ್ಸ ಲೋಕಸ್ಸ ಪದೀಪಭೂತೋ;
ಅನನ್ತಸತ್ತೇ ಭವಬನ್ಧನಮ್ಹಾ,
ಮೋಚೇಸಿ ಕಾರುಞ್ಞಫಲಾನುಪೇಕ್ಖೀ.
ಅಭಿನೀಹಾರದೀಪನೀಗಾಥಾ
ವದೇಥ ತಸ್ಸೀಧ ಅನಪ್ಪಕಂ ಗುಣಂ,
ನ ತೇನ ತುಲ್ಯೋ ಪರಮೋ ಚ ವಿಜ್ಜತಿ;
ಕಿಂ ತಂ ಗುಣಂ ತಂ ಸದಿಸೇನ ದಿನ್ನಂ,
ಸಯಂಕತಂ ಕಿನ್ನು ಅಧಿಚ್ಚಲದ್ಧಂ.
ನಾಧಿಚ್ಚಲದ್ಧಂ ನ ಚ ಪುಬ್ಬಬುದ್ಧಾ,
ಬ್ರಹ್ಮಾದಿನಂ ಸಮ್ಮುತಿಯಾ ಬಹೂನಂ;
ಸಯಂಕತೇನೇವ ಅನೋಪಮೇನ,
ದಾನಾದಿನಾ ಲದ್ಧಮಿದಂ ವಿಪಾಕಂ.
ಇತೋ ಚತುನ್ನಂ ಅಸಙ್ಖಿಯಾನಂ,
ಸತಂಸಹಸ್ಸಾನಧಿಕಾನಮತ್ಥಕೇ;
ಕಪ್ಪೇ ಅತೀತಮ್ಹಿ ಸುಮೇಧತಾಪಸೋ,
ವೇಹಾಯಸಂ ಗಚ್ಛತಿ ಇದ್ಧಿಯಾ ತದಾ.
ದಿಪಙ್ಕರೋ ನಾಮ ಜಿನೋ ಸಸಙ್ಘೋ,
ರಮ್ಮಂ ಪುರಂ ಯಾತಿ ವಿರೋಚಮಾನೋ;
ಮನುಸ್ಸದೇವೇಹಿಭಿಪೂಜಿಯನ್ತೋ,
ಸಹಸ್ಸರಂಸಿ ವಿಯ ಭಾಣುಮಾ ನಭೇ.
ತಸ್ಸಞ್ಜಸಂ ಕಾತುಬಹುಸ್ಸಹಾನಂ,
ಬುದ್ಧೋತಿ ಸುತ್ವಾ ಸುಮನೋ ಪತೀತೋ;
ಮಮಜ್ಜ ದೇಹಂ ಪನಿಮಸ್ಸ ದತ್ವಾ,
ಬುದ್ಧೋ ಅಹಂ ಹೇಸ್ಸಮನಾಗತೇದಿಸೋ.
ತಸ್ಮಿಞ್ಜಸೇ ಕನ್ದರತಮ್ಹಿ ಪಙ್ಕೇ,
ಕತ್ವಾನ ಸೇತುಂ ಸಯಿ ಸೋ ಸದೇಹಂ;
ಬುದ್ಧೋ ಅಯಂ ಗಚ್ಛತು ಪಿಟ್ಠಿಯಾ ಮಮಂ,
ಬೋಧಿಸ್ಸಚೇ ಹೇಸ್ಸತಿ ಮೇ ಅನಾಗತೇ.
ಉಸ್ಸೀಸಕಂ ಯಾತಿ ಜಿನೋ ಹಿ ತಸ್ಸ,
ಅಜ್ಝಾಸಯೋ ಸಿಜ್ಝತಿಮಸ್ಸನಾಗತೇ;
ಞತ್ವಾನ ಬ್ಯಾಕಾಸಿ ಅಸೇಸತೋ ಹಿ,
ಬುದ್ಧೋ ಅಯಂ ಹೇಸ್ಸತಿನಾಗತೇಸು.
ಸುತ್ವಾನ ಪತ್ತೋ ವ ಮಹಾಭಿಸೇಕಂ,
ಲದ್ಧಂ ವ ಬೋಧಿಂ ಸಮನುಸ್ಸರನ್ತೋ;
ಪೂಜೇತ್ವಾ ಯಾತೇ ಮುನಿದೇವಮಾನುಸೇ,
ಉಟ್ಠಾಯ ಸೋ ಸಮ್ಮಸಿ ಪಾರಮೀ ದಸ.
ದಳ್ಹಂ ಗಹೇತ್ವಾ ಸಮತಿಂಸಪಾರಮೀ,
ಸಿಕ್ಖತ್ತಯಞ್ಚಸ್ಸ ಜಿನಸ್ಸ ಸನ್ತಿಕೇ;
ಕಾತುಂ ಸಮತ್ಥೋ ಪಿ ಭವಸ್ಸ ಪಾರಂ,
ಸತ್ತೇಸು ಕಾರುಞ್ಞಬಲಾ ಭವಂ ಗತೋ.
ಉಪ್ಪನ್ನುಪ್ಪನ್ನಕೇ ಸೋ ಜಿನವರಮತುಲೇ ಪೂಜಯಿತ್ವಾ ಅಸೇಸಂ ಬುದ್ಧೋ ಏಸೋ ಹಿ ಓಸೋ ಭವತಿ ನಿಯಮತೋ ಬ್ಯಾಕತೋ ತೇಹಿ ತೇಹಿ ತೇಸಂ ತೇಸಂ ಜಿನಾನಂ ಅಚನಮನುಪಮಂ ಪೂಜಯಿತ್ವಾ ಸಿರೇನ,
ತಂ ತಂ ದುಕ್ಖಂ ಸಹಿತ್ವಾ ಸಕಲಗುಣದದಂ ಪಾರಮೀ ಪೂರಯಿತ್ಥ.
ಬೋಧಿಸಮ್ಭಾರದೀಪನೀಗಾಥಾ
ಸೋ ದುಕ್ಖಖಿನ್ನಜನದಸ್ಸನದುಕ್ಖಖಿನ್ನೋ,
ಕಾರುಞ್ಞಮೇವ ಜನತಾಯ ಅಕಾಸಿ ನಿಚ್ಚಂ;
ತೇಸಂ ಹಿ ಮೋಚನಮುಪಾಯಮಿದನ್ತಿ ಞತ್ವಾ,
ತಾದೀಪರಾಧಮಪಿ ಅತ್ತನಿ ರೋಪಯೀ ಸೋ.
ದಾನಾದಿನೇಕವರಪಾರಮಿಸಾಗರೇಸು,
ಓಗಾಳ್ಹತಾಯಪಿ ಪದುಟ್ಠಜನೇನ ದಿನ್ನಂ;
ದುಕ್ಖಂ ತಥಾ ಅತಿಮಹನ್ತತರಮ್ಪಿ ಕಿಞ್ಚಿ,
ನಾಞ್ಞಾಸಿ ಸತ್ತಹಿತಮೇವೇಅ ಗವೇಸಯನ್ತೋ.
ಛೇತ್ವಾನ ಸೀಸಂ ಹಿ ಸಕಂ ದದನ್ತೋ,
ಮಂಸಂ ಪಚಿತ್ವಾನ ಸಕಂ ದದನ್ತೋ;
ಸೋ ಚತ್ತಗತ್ತೋ ಪಣಿಧಾನಕಾಲೇ,
ದುಟ್ಠಸ್ಸ ಕಿಂ ದುಸ್ಸತಿ ಛೇದನೇನ.
ಏವಂ ಅನನ್ತಮಪಿ ಜಾತಿಸತೇಸು ದುಕ್ಖಂ,
ಪತ್ವಾನ ಸತ್ತಹಿತಮೇವ ಗವೇಸಯನ್ತೋ;
ದೀಪಙ್ಕರೇ ಗಹಿತಸೀಲಸಮಾಧಿಪಞ್ಞಂ,
ಪಾಲೇಸಿ ಯಾವ ಸಕಬೋಧಿತಲೇ ಸುನಿಟ್ಠೋ.
ಯದಾಭಿನೀಹಾರಮಕಾ ಸುಮೇಧೋ,
ಯದಾ ಚ ಮದ್ದಿಂ ಅದದಾ ಸಿವಿನ್ದೋ;
ಏತ್ಥನ್ತರೇ ಜಾತಿಸು ಕಿಞ್ಚಿಪೇಕಂ,
ನಿರತ್ಥಕಂ ನೋ ಅಗಮಾಸಿ ತಸ್ಸ.
ಮಹಾಸಮುದ್ದೇ ಜಲಬಿನ್ದುತೋಪಿ,
ತದನ್ತ್ರೇ ಜಾತಿ ಅನಪ್ಪಕಾ ವ;
ನಿರನ್ತರಂ ಪೂರಿತಪಾರಮೀನಂ,
ಕಥಂ ಪಮಾಣಂ ಉಪಮಾ ಕುಹಿಂ ವಾ.
ಯೋ ಮಗ್ಗಪಸ್ಸೇ ಮಧುರಮ್ಬಬೀಜಂ,
ಛಾಯಾಫಲತ್ಥಾಯ ಮಹಾಜನಾನಂ;
ರೋಪೇಸಿ ತಸ್ಮಿಂ ಹಿ ಖಣೇವ ತೇನ,
ಛಾಯಾಫಲೇ ಪುಞ್ಞಮಲದ್ಧಮುದ್ಧಂ.
ತಥೇವ ಸಂಸಾರಪಥೇ ಜನಾನಂ,
ಹಿತಾಯ ಅತ್ತನಮಭಿರೋಪಿತಕ್ಖಣೇ;
ಸಿದ್ಧಂ ವ ಪುಞ್ಞೂಪರಿ ತಸ್ಸ ತಸ್ಮಿಂ,
ಧನಙ್ಗಜೀವಂ ಪಿ ಹರನ್ತಿ ಯೇ ಯೇ.
ಸೋ ಸಾಗರೇ ಜಲಧಿಕಂ ರುಹಿರಂ ಅದಾಸಿ,
ಭೂಮಾಪರಾಜಿಯ ಸಮಂಸಮದಾಸಿ ದಾನಂ;
ಮೇರುಪ್ಪಮಾಣಮಧಿಕಞ್ಚ ಸಮೋಳಿಸೀಸಂ,
ಖೇ ತಾರಕಾಧಿಕತರಂ ನಯನಂ ಅದಾಸಿ.
ಗಬ್ಭೋಕ್ಕನ್ತಿದೀಪನೀಗಾಥಾ
ಗಮ್ಭೀರಪಾನದಾನಾದಿಸಾಗರೇಸು ಹಿ ಥಾಮಸಾ;
ತರನ್ತೋ ಮದ್ದಿದಾನೇನ ನಿಟ್ಠಾಪೇತ್ವಾನ ಪಾರಮೀ.
ವಸನ್ತೋ ತುಸೀತೇ ಕಾಯೇ ಬೋಧಿಪರಿಪಾಕಮಾಗಮ್ಮ;
ಆಯಾಚನಾಯ ಚ ದೇವಾನಂ ಮಾತುಗಬ್ಭಮುಪಾಗಮಿ.
ಸತೋ ಚ ಸಮ್ಪಜಾನೋ ಚ ಮಾತುಕುಚ್ಛಿಮ್ಹಿ ಓಕ್ಕಮಿ;
ತಸ್ಸ ಓಕ್ಕನ್ತಿಯಂ ಸಬ್ಬಾ ದಸಸಹಸ್ಸೀ ಪಕಮ್ಪಿತ್ಥ.
ತತೋ ಪುಬ್ಬನಿಮಿತ್ತಾನಿ ದ್ವತ್ತಿಂಸಾನಿ ತದಾ ಸಿಯುಂ;
ತುಟ್ಠಹಟ್ಠಾ ವ ಸಾ ಮಾತಾ ಪುತ್ತಂ ಪಸ್ಸತಿ ಕುಚ್ಛಿಯಂ.
ವಿಜಾಯನಮಙ್ಗಲದೀಪನೀಗಾಥಾ
ಸಾ ಪುಣ್ಣಗಬ್ಭಾ ದಸಮಾಸತೋ ಪರಂ,
ಗನ್ತ್ವಾನ ಫುಲ್ಲಂ ವರಲುಮ್ಬಿನೀವನಂ;
ಠಿತಾ ಗಹೇತ್ವಾ ವರಸಾಲಸಾಖಂ,
ವಿಜಾಯಿ ತಂ ಪುತ್ತವರಂ ಸುಖೇನ.
ತದಾ ಸಹಸ್ಸೀದಸಲೋಕಧಾತುಸು,
ದೇವಾ ಚ ನಾಗಾ ಅಸುರಾ ಚ ಯಕ್ಖಾ;
ನಾನಾದಿಸಾ ಮಙ್ಗಲಚಕ್ಕವಾಳಂ,
ಸುಮಙ್ಗಲಂ ಮಙ್ಗಲಮಾಗಮಿಂಸು.
ಅನೇಕಸಾಖಞ್ಚ ಸಹಸ್ಸಮಣ್ಡಲಂ,
ಛತ್ತಂ ಮರೂ ಧಾರಯುಮನ್ತಲಿಕ್ಖೇ;
ಸುವಣ್ಣದಣ್ಡಾ ವಿಪತನ್ತಿ ಚಾಮರಾ,
ಖಜ್ಜಿಂಸು ಭೇರೀ ಚ ನದಿಂಸು ಸಙ್ಖಾ.
ಮಲೇನಕೇನಾಪಿ ಅನೂಪಲಿತ್ತೋ,
ಠಿತೋ ವ ಪಾದಾನಿ ಪಸಾರಯನ್ತೋ;
ಕಥೀ ವ ಧಮ್ಮಾಸನತೋತರನ್ತೋ,
ಜಾತೋ ಯಥಾದಿಚ್ಚವರೋ ನಭಮ್ಹಾ.
ಖೀಣಾಸವಾ ಬ್ರಹ್ಮಗಣೋಪಗನ್ತ್ವಾ,
ಸುವಣ್ಣಜಾಲೇನ ಪಟಿಗ್ಗಹೇಸುಂ;
ತತೋ ಚ ದೇವಾಜಿನಚಮ್ಮಕೇನ,
ತತೋ ದುಕೂಲೇನ ಚ ತಂ ಮನುಸ್ಸಾ.
ತೇಸಂ ಪಿ ಹತ್ಥಾ ವರಭೂಮಿಯಂ ಠಿತೋ,
ದಿಸಾ ವಿಲೋಕೇಸಿ ಸಬ್ಬಾ ಸಮನ್ತತೋ;
ವದಿಂಸು ದೇವಾ ಪಿ ಚ ಬ್ರಹ್ಮಕಾಯಿಕಾ,
ತಯಾ ಸಮೋ ಕತ್ಥಚಿ ನತ್ಥಿ ಉತ್ತರೋ.
ಗನ್ತ್ವಾನ ಉತ್ತರಂ ಸತ್ತ ಪದವಾರೇಹಿ ವಿಕ್ಕಮೋ,
ಸೀಹನಾದಂ ನದೀ ತೇಸಂ ದೇವತಾನಂ ಹಿ ಸಾವಯಂ.
ತತೋ ಪುತ್ತಂ ಗಹೇತ್ವಾನ ಗತಾ ಮಾತಾ ಸಕಙ್ಘರಂ,
ಮಾತಾ ಸತ್ತಮಿಯಂ ಗನ್ತ್ವಾ ದೇಅಪುತ್ತತ್ತಮಾಗಮಿ.
ತೇ ಬ್ರಹ್ಮಣಾ ಪಞ್ಚಮಿಯಂ ಸುಭುತ್ತಾ,
ನಾಮಂ ಗಹೇತುಂ ವರಲಕ್ಖಣಾನಿ;
ದಿಸ್ವಾನ ಏಕಙ್ಗುಲಿಮುಕ್ಖಿಪಿಂಸು,
ಬುದ್ಧೋ ಅಯಂ ಹೇಸ್ಸತಿ ವೀತರಾಗೋ.
ಜಿಣ್ಣಞ್ಚ ದಿಸ್ವಾ ಬ್ಯಾಧಿಕಂ ಮತಞ್ಚ,
ಅವ್ಹಾಯಿತಂ ಪಬ್ಬಜಿತಞ್ಚ ದಿಸ್ವಾ;
ಓಹಾಯ ಪಬ್ಬಜ್ಜಮುಪೇತಿ ಕಾಮೇ,
ಬುದ್ಧೋ ಅಯಂ ಹೇಸ್ಸತಿ ವೀತರಾಗೋ.
ಅಗಾರಿಯಸಮ್ಪತ್ತಿದೀಪನೀಗಾಥಾ
ಕಾಲಕ್ಕಮೇನ ಚನ್ದೋ ವ ವಡ್ಢನ್ತೋ ವಡ್ಢಿತೇ ಕುಲೇ,
ಪುಞ್ಞೋದಯೇನುದೇನ್ತೋ ಸೋ ಭಾಣುಮಾ ವಿಯ ಅಮ್ಬರೇ.
ಸಿದ್ಧಥಕೋ ಹಿ ಸಿದ್ಧತ್ಥೋ ಲದ್ಧಾ ದೇವಿಂ ಯಸೋಧರಂ,
ಚತ್ತಾಲೀಸಸಹಸ್ಸೇಹಿ ಪೂರಿತ್ಥೀಹಿ ಪುರಕ್ಖಿತೋ.
ರಮ್ಮಸುರಮ್ಮಸುಭೇಸು ಘರೇಸು,
ತಿಣ್ಣಮುತೂನಮನುಚ್ಛವಿಕೇಸು;
ದಿಬ್ಬಸುಖಂ ವಿಯ ಭುಞ್ಜಿ ಸುಖಂ ಸೋ,
ಅಚ್ಛರಿಯಬ್ಭುತರಾಜವಿಭೂತಿಂ.
ನೇಕ್ಖಮ್ಮಜ್ಝಾಸಯದೀಪನೀಯಮಕಗಾಥಾ
ನಮೋ ತಸ್ಸ ಯತೋ ಮಹಿಮತೋ ಯಸ್ಸ ತಮೋ ನ
ದಿಸ್ವಾ ನಿಮಿತ್ತಾನಿ ಮದಚ್ಛಿದಾನಿ,
ಥೀನಂ ವಿರೂಪಾನಿ ರತಚ್ಛಿದಾನಿ;
ಪಾಪಾನಿ ಕಮ್ಮಾನಿ ಸುಖಚ್ಛಿದಾನಿ,
ಲದ್ಧಾನಿ ಞಾಣಾನಿ ಭವಚ್ಛಿದಾನಿ.
ಪದಿತ್ತಗೇಹಾ ವಿಯ ಭೇರವಂ ರವಂ,
ರವಂ ಸಮ್ಮುಟ್ಠಾಯ ಗತೋ ಮಹೇಸಿ;
ಮಹೇಸಿಮೋಲೋಕಿಯಪುತ್ತಮತ್ತನೋ,
ತನೋಸಿ ನೋ ಪೇಮಮಹೋಘಮತ್ತನೋ.
ಉಮ್ಮಾರಉಮ್ಮಾರಗತುದ್ಧರಿತ್ವಾ,
ಪದಂ ಪದಂ ಯಾತನರಾಸಭಸ್ಸ;
ಅಲಂ ಅಲಂಕಾರತರೇನ ಗನ್ತುಂ,
ಮತೀ ಮತೀವೇತಿಮನಙ್ಗಭಙ್ಗೇ.
ಉಮ್ಮಾರಉಮ್ಮಾರಗತೋ ಮಹೇಸಿ,
ಅನಙ್ಗಭಙ್ಗಂ ಸಮಚಿನ್ತಯಿತ್ಥ;
ಕಿಂ ಮೇ ಜರಾಮಚ್ಚುಮುಖೇ ಠಿತಸ್ಸ,
ನ ಮೇ ವಸೇ ಕಾಮವಸೇ ಠಿತಸ್ಸ.
ಕಾಮೇನ ಕಾಮೇನ ನ ಸಾಧ್ಯಮೋಕ್ಖಂ,
ಮಾನೇನ ಮಾನೇನ ಮಮತ್ಥಿ ಕಿಞ್ಚಿ;
ಮಾರೋ ಸಸೇನೋ ಹಿ ಅವಾರಣೀಯೋ,
ಯನ್ತೇನ ಉಚ್ಛುಂ ವಿಯ ಮದ್ದತೀ ಮಂ.
ಆದಿತ್ತಮುಯಾತಪಯಾತಮೂನಂ,
ಅತಾಣಾಲೇಣಾಸರಣೇ ಜನೇ ತೇ;
ದಿಸ್ವಾನ ದಿಸ್ವಾನ ಸಿವಂ ಮಯಾ ತೇ,
ಕಾಮೇನ ಕಾಮೇನ ಕಥಂ ವಿನೇಯ್ಯ.
ವಿಜ್ಜಾವಿಜ್ಜಾಯ ಚುತಞ್ಚುಪೇತಂ,
ಅಸಾರಸಾರೂಪಗತಞ್ಜನಂ ಜನಂ;
ವಿಜ್ಜಾಯವಿಜ್ಜಾಯ ಯುತೋ ಚುತೋಹಂ,
ಪಹೋಮಿ ತಾರೇತುಮಸಙ್ಗಹೋ ಗತೋ.
ಮಗ್ಗನ್ತಿ ನೋ ದಿಟ್ಠಿಗತಾಪವಗ್ಗಂ,
ಅಗ್ಗಾ ತಿ ತೇವಾಹು ಜನಾ ಸಮಗ್ಗಾ;
ನಗ್ಗಂ ಅಹೋ ಮೋಹತಮಸ್ಸ ವಗ್ಗಂ,
ವಗ್ಗಂ ಹನಿಸ್ಸಾಮಿ ತಮಗ್ಗಮಗ್ಗಾ.
ಪಸೇಯ್ಹಕಾರೇನ ಅಸೇಯ್ಹದುಕ್ಖಂ,
ಜನಾ ಜನೇನ್ತೀಹ ಜನಾನಮೇವ;
ಪಸೇಯ್ಹಕಾರೇನಾ ಅಸೇಯ್ಹದುಕ್ಖಂ,
ಪಾಪಂ ನ ಜಾನನ್ತಿ ತತೋ ನಿದಾನಂ.
ತೇ ಓಘಯೋಗಾಸವಸಂಕಿಲೇಸಾ,
ತಮೇವ ನಾಸೇನ್ತಿ ತತೋ ಸಮುಟ್ಠಿತಾ;
ಏಕನ್ತಿಕಂ ಜಾತಿ ಜರಾ ಚ ಮಚ್ಚು,
ನಿರನ್ತರಂ ತಂ ಬ್ಯಸನಞ್ಚನೇಕಂ.
ಚೀರಂ ಕಿಲೇಸಾನಸಮುಜ್ಜಲನ್ತಂ,
ದಿಸ್ವಾನ ಸತ್ತಾನುಸಯಂ ಸಯಮ್ಭೂ;
ಸಾಧೇಮಿ ಬೋಧಿಂ ವಿನಯಾಮಿ ಸತ್ತೇ,
ಪಚ್ಛಾಪಿ ಪಸ್ಸಾಮಿ ಸುತಂ ಸುತನ್ತಂ.
ತಂ ದಿಬ್ಬಚಕ್ಕಂ ಖುರಚಕ್ಕಮಾಲಂ,
ರಜ್ಜಂ ಸಸಾರಜ್ಜಸಮಜ್ಜಮಜ್ಜಂ;
ತೇ ಬನ್ಧವಾ ಬನ್ಧನಮಾಗತಾ ಪರೇ,
ಸುತೋ ಪಸೂತೋಯಮನಙ್ಗದೂತೋ.
ಸಮುಜ್ಜಲನ್ತಂ ವಸತೀ ಸತೀಸಿರೀ,
ಸಿರೀಸಪಾಗಾರಮಿದಂ ಮಹಾವಿಸಂ;
ದದ್ದಲ್ಲಮಾನಾ ಯುವತೀ ವತೀಮಾ,
ಸಕಣ್ಟಕಾಯೇವ ಸಮಞ್ಜಸಞ್ಜಸೇ.
ಯಸ್ಸಾ ವಿರಾಜಿತಸಿರೀ ಸಿರಿಯಾಪಿ ನತ್ಥಿ,
ತಸ್ಸಾವಲೋಕಿಯ ನ ತಿತ್ತಿವಸಾನಮತ್ಥಿ;
ಗಚ್ಛಾಮಿ ಹನ್ದ ತವನಙ್ಗ ಸಿರಪ್ಪಭೇದಂ,
ಮತ್ತೇಭಕುಮ್ಭುಪರಿ ಸೀಹವಿಲಾಸಗಾಮಿಂ.
ಭೋ ಭೋ ಅನಙ್ಗಸುಚಿರ ಪಿ ಪನುಣ್ಣಬಾಣ,
ಬಾಣಾನಿ ಸಂಹರ ಪನುಣ್ಣಮಿತೋ ನಿರೋಧ;
ರೋಧೇನ ಚಾಪದಗತೋ ಮನಸೋ ನ ಸೋಚ,
ಸೋಚಂ ತವಪ್ಪನವಲೋಕಿಯ ಯಾಮಿ ಸನ್ತಿಂ.
ರತೀ ರತೀ ಕಾಮಗುಣೇ ವಿವೇಕೇ,
ಅಲಂ ಅಲನ್ತೇವ ವಿಚಿನ್ತಯನ್ತೋ;
ಮನಂ ಮನಙ್ಗಾಲಯಸಮ್ಪದಾಲಯಂ,
ತಹಿಂ ತಹಿಂ ದಿಟ್ಠಬಾಲಾ ವ ಪಕ್ಕಮಿ.
ಪಾದುದ್ಧಾರವಿಮ್ಹಯದೀಪನೀಗಾಥಾ
ಯಾವಞ್ಚಯಂ ರವಿ ಚರತ್ಯಚಲೇನ ರುದ್ಧೇ,
ಯಾವಞ್ಚ ಚಕ್ಕರತನಞ್ಚ ಪಯಾತಿ ಲೋಕೇ;
ತಾವಿಸ್ಸರೋ ನಭಚರೋ ಜಿತಚಾತುರನ್ತೋ,
ಹಿತ್ವಾ ಕಥಂ ನು ಪದಮುದ್ಧರಿ ಸೋ ನಿರಾಸೋ.
ದೀಪೇ ಮಹಾ ಚ ಚತುರಾಧಿಕದ್ವೇಸಹಸ್ಸೇ,
ತತ್ರಾಪಿ ಸೇಟ್ಠಭಜಿತಂ ವರಜಮ್ಬುದೀಪಂ;
ಭೂನಾಭಿಕಂ ಕಪಿಲವತ್ಥುಪುರಂ ಸುರಮ್ಮಂ,
ಹಿತ್ವಾ ಕಥಂ ನು ಪದಮುದ್ಧರಿ ಸೋ ನಿರಾಸೋ.
ಞಾತೀನಸೀತಿ ಕುಲತೋ ಹಿ ಸಹಸ್ಸ ಸಾಕ್ಯೇ,
ಹತ್ಥಿಸ್ಸಧಞ್ಞಧನಿನೋ ವಿಜಿತಾರಿಸಙ್ಘೇ;
ಗೋತ್ತೇನ ಗೋತಮಭವಂ ಪಿತರಞ್ಜನಗ್ಗಂ,
ಹಿತ್ವಾ ಕಥಂ ನು ಪದಮುದ್ಧರಿ ಸೋ ನಿರಾಸೋ.
ರಮ್ಮಂ ಸುರಮ್ಮವಸತಿಂ ರತನುಜ್ಜಲನ್ತಂ,
ಗಿಮ್ಹೇಪಿ ವಿಮ್ಹಯಕರಂ ಸುರಮನ್ದಿರಾಭಂ;
ಉಸ್ಸಾಪಿತದ್ಧಜಪಟಾಕಸಿತಾತಪತ್ತಂ,
ಹಿತ್ವಾ ಕಥಂ ನು ಪದಮುದ್ಧರಿ ಸೋ ನಿರಾಸೋ.
ಸಪೋಕ್ಖರಾ ಪೋಕ್ಖರಣೀ ಚತಸ್ಸೋ,
ಸುಪುಪ್ಫಿತಾ ಮನ್ದಿರತೋ ಸಮನ್ತಾ;
ಕೋಕಾ ನದನ್ತೂಪರಿ ಕೋಕನಾದೇ,
ಹಿತ್ವಾ ಕಥಂ ನು ಪದಮುದ್ಧರಿ ಸೋ ನಿರಾಸೋ.
ಸರೇ ಸರೋಜೇ ರುದಿತಾಳಿಪಾಳಿ,
ಸಮನ್ತತೋ ಪಸ್ಸತಿ ಪಞ್ಜರಞ್ಜಸಾ;
ದಿಸ್ವಾರವಿನ್ದಾನಿ ಮುಖಾರವಿನ್ದಂ
ನಾಥಸ್ಸ ಲಜ್ಜಾ ವಿಯ ಸಂಕುಜನ್ತಿ.
ಮಧುರಾ ಮಧುರಾಭಿರುತಾ,
ಚರಿತಾ ಪದುಮೇ ಪದುಮೇಳಿಗಣಾ;
ವಸತಿಂ ಅಧುನಾ ಮಧುನಾ,
ಅಕರುಂ ಜಹಿತಂ ಕಿಮಿದಂ ಪತಿನಾ.
ತಮ್ಹಾ ರಸಂ ಮಧುಕರಾ ಭವನಂ ಹರಿತ್ವಾ,
ನಿನ್ನಾದಿನೋ ಸಮಧುರಂ ಮಧುರಂ ಕರೋನ್ತಿ;
ನಾದೇನ ನಾದಮತಿರಿಚ್ಚುಪವೀಣಯನ್ತಿ,
ನಚ್ಚನ್ತಿ ತಾ ಸುರಪುರೇ ವಣಿತಾ ವ ತಾವ.
ಸಞ್ಚೋದಿತಾ ಪೀಣಪಯೋಧರಾಧರಾ,
ವಿರಾಜಿತಾನಙ್ಗಜಮೇಖಲಾಖಲಾ;
ಸುರಙ್ಗಣಾ ವಙ್ಗಜಫಸ್ಸದಾ ಸದಾ,
ರಮಾ ರಮಾಪೇನ್ತಿ ವರಙ್ಗದಾಗದಾ.
ಕರಾತಿರತ್ತಾ ರತಿರತ್ತರಾಮಾ,
ತಾಳೇನ್ತಿ ತಾಳಾವಚರೇ ಸಮನ್ತಾ;
ನಚ್ಚುಗ್ಗತಾನೇಕಸಹಸ್ಸಹತ್ಥಾ,
ಸಕ್ಕೋಪಿ ಕಿಂ ಸಕ್ಯಸಮೋತಿ ಚೋದಯುಂ.
ವಿಸಾಲನೇತ್ತಾ ಹಸುಲಾ ಸುಮಜ್ಝಾ,
ನಿಮ್ಬತ್ಥನೀ ವಿಮ್ಹಯಗೀತಸದ್ದಾ;
ಅಲಙ್ಕತಾ ಮಲ್ಲಧರಾ ಸುವತ್ಥಾ,
ನಚ್ಚನ್ತಿ ತಾಳಾವಚರೇಹಿ ಘುಟ್ಠಾ.
ಯಾಸಂ ಹಿ ಲೋಕೇ ಉಪಮಾ ನತ್ಥಿ,
ತಾಸಂ ಹಿ ಫಸ್ಸೇಸು ಕಥಾವಕಾಸಾ;
ತಂ ತಾದಿಸಂ ಕಾಮರತಿಂನುಭೋನ್ತೋ,
ಹಿತ್ವಾ ಕಥಂ ನು ಪದಮುದ್ಧರಿ ಸೋ ನಿರಾಸೋ.
ಪಾದೇಪಾದೇ ವಲಯವಿರವಾಮೇಖಲಾವೀಣಾನಾದಾ,
ಗೀತಂಗೀತಂ ಪತಿರತಿಕರಂ ಗಾಯತೀ ಗಾಯತೀ ಸಾ;
ಹತ್ಥೇಹತ್ಥೇ ವಲಯಚಲಿತಾ ಸಮ್ಭಮಂ ಸಮ್ಭಮನ್ತಿ,
ದಿಸ್ವಾದಿಸ್ವಾ ಇತಿ ರತಿಕರಂ ಯಾತಿ ಹಾಹಾ ಕಿಮೀಹಾ.
ಅಪುನರಾವತ್ತಿಗಮನದೀಪನೀಯಮಕಗಾಥಾ
ಅನನ್ತಕಾಲೋಪಚಿತೇನ ತೇನ,
ಪುಞ್ಞೇನ ನಿಬ್ಬತ್ತವಿಮಾನಯಾನೇ;
ತಸ್ಮಿಂ ದಿನೇ ಜಾತಸುತಂ ಪಜಾಪತಿಂ,
ಹಿತ್ವಾ ಗತೋ ಸೋ ಸುಗತೋ ಗತೋ ವ.
ತಂ ಜೀವಮಾನಂ ಪಿತರಞ್ಚ ಮಾತರಂ,
ತೇ ಞಾತಕೇ ತಾದಿಸಿಯೋ ಚ ಇತ್ಥಿಯೋ;
ತೇ ತಾದಿಸೇ ರಮ್ಮಕರೇ ನಿಕೇತೇ,
ಹಿತ್ವಾ ಗತೋ ಸೋ ಸುಗತೋ ಗತೋ ವ.
ಖೋಮಞ್ಚ ಪತ್ತುಣ್ಣದುಕೂಲಚೀನಂ,
ಸಕಾಸಿಕಂ ಸಾಧುಸುಗನ್ಧವಾಸಿತಂ;
ನಿವಾಸಿತೋ ಸೋಭತಿ ವಾಸವೋ ವ,
ಹಿತ್ವಾ ಗತೋ ಸೋ ಸುಗತೋ ಗತೋ ವ.
ವಿಧಿಪ್ಪಕಾಸಾ ನಿಧಿಯೋ ಚತಸ್ಸೋ,
ಸಮುಗ್ಗತಾ ಭೂತಧರಾ ವಸುನ್ಧರಾ;
ಸತ್ತಾವಸತ್ತಾವಸುಧಾ ಸುಧಾಸಾ,
ಹಿತ್ವಾ ಗತೋ ಸೋ ಸುಗತೋ ಗತೋ ವ.
ಸುವಣ್ಣಥಾಲೇ ಸತರಾಜಿಕೇ ಸುಭೇ,
ಸಾಧುಂ ಸುಗನ್ಧಂ ಸುಚಿಸಾಲಿಭೋಜನಂ;
ಭುತ್ವಾ ಸವಾಸೀಹಿ ವಿಲಾಸಿನೀಹಿ,
ಹಿತ್ವಾ ಗತ ಸೋ ಸುಗತೋ ಗತೋ ವ.
ಮನುಞ್ಞಗನ್ಧೇನ ಅಸುಞ್ಞಗನ್ಧೋ,
ಸುಗನ್ಧಗನ್ಧೇನ ವಿಲಿತ್ತಗತ್ತೋ;
ಸುಗನ್ಧವಾತೇನ ಸುವಿಜ್ಜಿತಙ್ಗೋ,
ಹಿತ್ವಾ ಗತೋ ಸೋ ಸುಗತೋ ಗತೋ ವ.
ಸುಲಕ್ಖಣೇ ಹೇವಭಿಲಕ್ಖಿತಙ್ಗೋ,
ಪಸಾಧಿತೋ ದೇವಪಸಾಧನೇನ;
ವಿರೋಚಮಾನೋ ಸಮರಾಜಿನೀಹಿ,
ಹಿತ್ವಾ ಗತೋ ಸೋ ಸುಗತೋ ಗತೋ ವ.
ನಾನಾಸನಾನಿ ಸಯನಾನಿ ನಿವೇಸನಾನಿ,
ಭಾಭಾನಿಭಾನಿ ರತನಾಕರಸನ್ನಿಭಾನಿ;
ತತ್ರುಸ್ಸಿತಾನಿ ರತನದ್ಧಜಭೂಸಿತಾನಿ,
ಹಿತ್ವಾ ವ ತಾನಿ ಹಿಮಬಿನ್ದುಸಮಾನಿ ತಾನಿ.
ನಾನಾವಿಧೇಹಿ ರತನೇಹಿ ಸಮುಜ್ಜಲೇಹಿ,
ನಾರೀಹಿ ನಿಚ್ಚಮುಪಗಾಯಿತಹಮ್ಮಿಯೇಹಿ;
ರಜ್ಜೇಹಿ ಚಕ್ಕರತನಾದಿವಿಭೂಸಿತೇಹಿ,
ಯಾತೋ ತತೋ ಹಿ ಮಹಿತೋ ಪುರಿಸಸ್ಸರೇಹಿ.
ದ್ವಿಪಾದಬ್ಯಾಸಯಮಕಗಾಥಾ
ಯಸೋಧರಂ ಪೀಣಪಯೋಧರಾಧರಂ,
ಅನಙ್ಗರಙ್ಗದ್ಧಜಭೂತಮಙ್ಗಂ;
ದೇವಚ್ಛರಾವುಜ್ಜಲಿತಂ ಪತಿಬ್ಬತಂ,
ಹಿತ್ವಾ ಗತೋ ಸೋ ಸುಗತೋ ವ ನೂನ.
ಸಭಾವನಿಚ್ಛನ್ದಮತಿಂ ಪಭಾವತಿಂ,
ಭತ್ತೋ ಕುಸೋ ಸಂಹರಿ ಭತ್ತಕಾಜಂ;
ತಾಯಾಭಿರೂಪಂ ಪಿ ಯಸೋಧರಂ ವರಂ,
ಹಿತ್ವಾ ಗತೋ ಸೋ ಸುಗತೋ ವ ನೂನ.
ಪುರೇ ಪುರೇ ಸಞ್ಚರಿ ಖಗ್ಗಹತ್ಥೋ,
ವರಂ ಪರಿತ್ಥೀನಂ ಅನಿತ್ಥಿಗನ್ಧೋ;
ಸಿರಿಞ್ಚ ರಿಞ್ಚಾಪಿ ನ ರಿಞ್ಚಿ ನಾರಿಂ,
ಹಿತ್ವಾನಿಮನ್ದಾನಿ ಗತೋ ತಥಾಗತೋ.
ಹರಿತ್ತಚೋ ರಾಗಬಲೇನ ದೇವಿಯಾ,
ಅವತ್ಥಲಿಙ್ಗೇನ ನ ಲಿಙ್ಗನುಸ್ಸರಿ;
ಅಸೇವಿ ಕಾಮಂ ತಮಿದಾನಿ ಕಾಮಂ,
ಹಿತ್ವಾ ಗತೋ ಸೋ ಸುಗತೋ ವ ನೂನ.
ಅಪಮೇಯ್ಯಕಪ್ಪೇಸು ವಿವೇಕಸೇವೀ,
ಹಿತ್ವಾ ಗತೋ ರಜ್ಜಸಿರಿಂ ವರಿತ್ಥಿಂ;
ಅಣುಂ ಕಲಿಂ ವಣ್ಣಯಿ ತಂ ಪುರಾಣಂ,
ವತ್ಥಮ್ಹಿ ಛಿದ್ದಂ ವಿಯ ತುನ್ನಕಾರೋ.
ತಥಾತಿ ಮನ್ತ್ವಾನ ಇದಾನಿನಙ್ಗೋ,
ಯಸೋಧರಂ ಪಗ್ಗಹಿತೋ ಧಜಂ ವ;
ಮತ್ತೋ ಜಿತೋಮ್ಹೀ ತಿ ಪಮತ್ತಬನ್ಧು,
ನ ಪಸ್ಸಿ ಞಾಣಾಸನಿಪಾತಮನ್ತರಂ.
ದಿಸ್ವಾನ ದುಕ್ಖಾನಲಸಮ್ಭವಂಭವಂ,
ಕತ್ವಾ ತದುಪ್ಪಾದಕನಙ್ಗಭಙ್ಗಂ;
ಯಸೋಧರಂ ಪೀಣಪಯೋಧರಾಧರಂ,
ಹಿತ್ವಾ ಗತೋ ಬುದ್ಧಬಲಪ್ಪದಂ ಪದಂ.
ಅನನ್ತಸತ್ತಾನಮನನ್ತಕಾಲೇ,
ಮನಙ್ಗಹೇತ್ವಾನ ಜಿತೋ ಅನಙ್ಗೋ;
ಪರಾಜಿತೋ ನೂನ ಹಿ ಏಕಕಸ್ಸ,
ತಥಾಗತೋ ಸೋ ನ ಪುನಾಗತೋ ವ.
ದಿಸ್ವಾನ ಞಾಣಾಸನಿಪಾತಮನ್ತರಂ,
ತಥಾಗತೋ ಸೋ ನ ಪುನಾಗತೋ ವ;
ತಥಾಗತೋ ಸೋ ನ ಪುನಾಗತೋ ವ,
ದಿಸ್ವಾನಞಾಣಾಸನಿಪಾತಮನ್ತರಂ.
ತಿಪಾದಬ್ಯಾಸಯಮಕಗಾಥಾ
ತಥಾಗತಚ್ಛೇರಮಹೋಸಿ ತಸ್ಸ,
ತಥಾ ಹಿಮಾರೋಪಿತದಾಹಸನ್ತಿಂ;
ತಥಾ ಹಿ ಮಾರೋ ಪಿ ತದಾಹ ಸನ್ತಿಂ,
ತಥಾ ಹಿ ಮಾರೋಪಿ ತದಾ ಹಸನ್ತಿಂ.
ಪಾದಬ್ಯಾಸಮಹಾಯಮಕಗಾಥಾ
ಸಕಾಮದಾತಾ ವಿನಯಾಮನತಗೂ,
ಸಕಾಮದಾತಾ ವಿನಯಾಮನನ್ತಗೂ;
ಸಕಾಮದಾತಾ ವಿನಯಾಮನನ್ತಗೂ,
ಸಕಾಮದಾತಾ ವಿನಯಾಮನನ್ತಗೂ.
ಅಬ್ಯಾಪೇತಾದ್ಯನ್ತಯಮಕಗಾಥಾ
ರವೇರವೇರೋರಭಿಮಾರಭೇರವೇ,
ರವೇರವೇರಿವ ಭೇರವೇ ರವೇ;
ರವೇ ರವೇ ಸೂದಿತಗಾರವೇ ರವೇ,
ರವೇರವೇದೇಸಿ ಜಿನೋರವೇ ರವೇ.
ಪಟಿಲೋಮಯಮಕಗಾಥಾ
ಲೋಕಾಯಾತತಯಾ ಕಾಲೋ ವಿಸೇಸಂ ನ ನ ಸಂಸೇವಿ,
ವಿಸೇಸಂ ನ ನ ಸಂಸೇವಿ ಲೋಕಾ ಯಾತತಯಾ ಕಾಲೋ.
ರಾಜರಾಜಯಸೋಪೇತವಿಸೇಸಂ ರಚಿತಂ ಮಯಾ,
ಯಾಮತಂ ಚಿರಸಂಸೇವಿತಪೇಸೋ ಯಜರಾಜರಾ.
ಏಕಠಾನಿಕಾದಿಯಮಕಗಾಥಾ
ಆಕಙ್ಖಕ್ಖಾಕಙ್ಖಙ್ಗ ಕಙ್ಖಾಗಙ್ಗಾಖಾಗಹಕ,
ಕಙ್ಖಾಗಾಹಕಕಙ್ಖಾಘ ಹಾ ಹಾ ಕಙ್ಖಾ ಕಹಂ ಕಹಂ.
ಅಪ್ಪಗಬ್ಭೋ ಅಪಗಬ್ಭೋ ಅಮೋಹೋ ಮಾ ಪಮೋಹಕೋ,
ಮಗ್ಗಮುಖಂ ಮೋಖಮಾಹ ಮಾಹಾ ಮೋಹಮೂಹಕ್ಖಮಂ.
ಪಾಪಾಪಾಪಭವಂ ಪಸ್ಸಂ ಪಾಪಾಪಭವುಗ್ಗತೋ,
ಪಾಪಾಪಾಪಭವಾಸಙ್ಗಾ ಪಾಪಾಪಾಪಭವಾಗತೋ.
ಕುಸಲಾಕುಸಲಂ ಪಸ್ಸಂ ಕುಸಲಾಕುಸಲಂ ಚಜಿ,
ಕುಸಲಾಕುಸಲಾಸಙ್ಗ ಕುಸಲಾಕುಸಲಾ ಚುತೋ.
ಅಕ್ಖರುತ್ತರಿಕಯಮಕಗಾಥಾ
ನೋನಾನಿನೋ ನನೂನಾನಿ ನನೇನಾನಿ ನನಾನಿನೋ,
ನುನ್ನಾನೇನಾನಿ ನೂನ ನ ನಾನನಂ ನಾನನೇನ ನೋ.
ಸಾರೇ ಸುರಾಸುರೇ ಸಾರೀ ರಸಸಾರಸರಿಸ್ಸರೋ,
ರಸಸಾರರಸೇ ಸಾರಿ ಸುರಾಸುರಸರಸ್ಸಿರೇ.
ದೇವಾನಂ ನನ್ದನೋ ದೇವೋ ದೇವದೇವ ನ ನನ್ದಿ ನೋ,
ವೇದದೀನೇನ ವೇದನ ವೇದಿ ವೇದನ ವೇದಿನೋ.
ದೇವಾಸನೇ ನಿಸಿನ್ನೋ ಸೋ ದೇವದೇವೋ ಸಸಾಸನೇ,
ನಿಸಿನ್ನಾನಂ ಸದೇವಾನಂ ದೇಸೇಸಿ ದಸ್ಸನಾಸನಂ.
ಪಹೇಳಿಗಾಥಾ
ದಸನಾವಗತೋ ಸಞ್ಞೋ ಅನ್ಧಸ್ಸ ತಮದೋ ರವಿ,
ಅಟ್ಠಮಾಪುಣ್ಣಸಙ್ಕಪ್ಪೋ ಪಾತ್ವನಞ್ಞಮನಞ್ಞಿವ.
ಬ್ಯಾಪೇತಾದಿಯಮಕಗಾಥಾ
ಏಕನ್ತಮೇವ ಸಪರತ್ಥಪರೋ ಮಹೇಸಿ,
ಏಕನ್ತಮೇವ ದಸಪಾರಮಿತಾಬಲೇನ;
ಏಕನ್ತಮೇವ ಹತಮಾರಬಲೇನ ತೇನ,
ಏಕನ್ತಮೇವ ಸುವಿಸುದ್ಧಮಲತ್ಥ ಬೋಧಿಂ.
ಮಹಾಪಧಾನದೀಪನೀಗಾಥಾ
ಓರೋಹಿತೋತೋಹಿತಪಾಪಧಮ್ಮೋ,
ಛನ್ನೇನ ಸ ಛನ್ನಹಯೇನ ಗನ್ತ್ವಾ;
ಅನೋಮತೀರಮ್ಹಿ ಅನೋಮಸತ್ತೋ,
ಅನೋಮಪಬ್ಬಜ್ಜಮುಪಾಗತೋ ಸೋ.
ನಿರಾಮಿಸಂ ಪೀತಿಸುಖಂ ಅನೂಪಮಂ,
ಅನೂಪಿಯೇ ಅಮ್ಬವನೇ ಅಲತ್ಥ;
ಸರೂಪಸೋಭಾಯ ವಿರೂಪಸೋಭಂ,
ಸರಾಜಿಕಂ ರಾಜಗಹಂ ಕರಿತ್ಥ.
ತತೋ ಅಳಾರ ಊದಕತಾಪಸಾನಂ,
ಝಾನೇನಸನ್ತುಟ್ಠಮನೋ ವಿಹಾಯ;
ಮಹಾಪಧಾನಾಯ ಉರುವೇಲಭೂಮಿಂ,
ಗತೋ ಸಿಖಪ್ಪತ್ತಮಕಾಸಿ ದುಕ್ಕರಂ.
ನ ಕಾಮತೋ ನೇವತಿದುಕ್ಕರಮ್ಹಿ,
ಸಬ್ಬಞ್ಞುತಾ ಸಿಜ್ಝತಿ ಮಜ್ಝಿಮಾಯ;
ಞತ್ವಾನ ತಂ ಪುಬ್ಬಗುಣೋಪಲದ್ಧಂ,
ಧಮ್ಮಂ ಸಮಾನೇತುಮಗಾ ಸುಬೋಧಿಂ.
ಮಾರಪರಾಜಯದೀಪನೀಗಾಥಾ
ತಿಬುದ್ಧಖೇತ್ತಮ್ಹಿ ತಿಸೇತಛತ್ತಂ,
ಲದ್ಧಾನ ಲೋಕಾಧಿಪತೀ ಭವೇಯ್ಯ;
ಗನ್ತ್ವಾನ ಬೋಧಿಮ್ಹಿಪರಾಜಿತಾಸನೇ,
ಯುದ್ಧಾಯ ಮಾರೇನಚಲೋ ನಿಸೀದಿ.
ದತ್ವಾನ ಮಂಸಂ ರಜ್ಜಂ ಪಿತಾ ಸುದ್ಧೋದನೋ ತದಾ,
ನಮಸ್ಸಮಾನೋ ಸಿರಸಾ ಸೇತಛತ್ತೇನ ಪೂಜಯಿ.
ಸಯಂ ನಾರಾಯನಬಲೋ ಅಭಿಞ್ಞಾಬಲಪಾರಗೂ,
ಜೇತುಂ ಸಬ್ಬಸ್ಸ ಲೋಕಸ್ಸ ಬೋಧಿಮಣ್ಡಂಉಪಾಗಮಿ.
ತದಾ ವಸವತ್ತೀರಾಜಾ ಛಕಾಮವಚರಿಸ್ಸರೋ,
ಸಸೇನಾವಾಹನೋ ಬೋಧಿಮಣ್ಡಂ ಯುದ್ಧಾಯುಪಾಗಮಿ.
ಏಥ ಗಣ್ಹಥ ಬನ್ಧಥ ಛಟ್ಟೇಥ ಚೇಟಕಂ ಇಮಂ,
ಮನುಸ್ಸಕಲಲೇ ಜಾತೋ ಕಿಮಿಹನ್ತಿ ನ ಮಞ್ಞತಿ.
ಜಲನ್ತಂ ನವವಿಧಂ ವಸ್ಸಂ ವಸ್ಸಾಪೇತಿ ಅನಪ್ಪಕಂ,
ಧೂಮನ್ಧಕಾರಂ ಕತ್ವಾನ ಪಾತೇಸಿ ಅಸಿನಂ ಬಹುಂ.
ಚಕ್ಕಾವುಧಂ ಖಿಪೇನ್ತೋ ಪಿ ನಾಸಕ್ಖಿ ಕಿಞ್ಚಿ ಕಾತವೇ,
ಗಹೇತಬ್ಬಂ ಹಿ ಗಹಣಂ ಅಪಸ್ಸನ್ತೋ ಇತಿಬ್ರವಿ.
ಸಿದ್ಧತ್ಥ ಕಸ್ಮಾ ಆಸಿ ನು ಆಸನೇ ಮಮ ಸನ್ತಕೇ,
ಉಟ್ಠೇಹಿ ಆಸನಾ ನೋ ಚೇ ಫಾಲೇಮಿ ಹದಯಂ ತವ.
ಸಪಾದಮೂಲೇ ಕೀಳನ್ತಂ ಪಸ್ಸನ್ತೋ ತರುಣಂ ಸುತಂ,
ಪಿತಾ ವುದಿಕ್ಖಿ ತಂ ಮಾರಂ ಮೇತ್ತಾಯನ್ತೋ ದಯಪರೋ.
ತದಾ ಸೋ ಅಸಮ್ಭಿವಾಚಂ ಸೀಹನಾದಂ ನದೀ ಮುನಿ,
ನ ಜಾನಾತಿ ಸಯಂ ಮಯ್ಹಂ ದಾಸಭಾವಪಿಯಂ ಖಳೋ.
ಯೇನ ಕೇನಚಿ ಕಮ್ಮೇನ ಜಾತೋ ದೇವಪುರೇ ವರೇ,
ಸಕಂ ಗತಿಂ ಅಜಾನನ್ತೋ ಲೋಕಜೇಟ್ಠೋತಿ ಮಞ್ಞತಿ.
ಅನನ್ತಲೋಕಖಾತುಮ್ಹಿ ಸತ್ತಾನಂ ಹಿ ಕತಂ ಸುಭಂ,
ಮಯ್ಹೇಕಪಾರಮಿಯಾ ಪಿ ಕಲಂ ನಗ್ಘತಿ ಸೋಳಸಿಂ.
ತಿರಚ್ಛಾನೋ ಸಸೋ ಹುತ್ವಾ ದಿಸ್ವಾ ಯಾಚಕಮಾಗತಂ,
ಪಚಿತ್ವಾನ ಸಕಂ ಮಂಸಂ ಪತಿಇಓಗ್ಗಿಮ್ಹಿ ದಾತವೇ.
ಏವಂ ಅನನ್ತಕಾಲೇಸು ಕತಂ ದುಕ್ಕರಕಾರಿಕಂ,
ಕೋ ಹಿ ನಾಮ ಕರೇಯ್ಯಞ್ಞೋ ಅನುಮ್ಮತ್ತೋ ಸಚೇತನೋ.
ಏವಂ ಅನನ್ತಪುಞ್ಞೇಹಿ ಸಿದ್ಧಂ ದೇಹಮಿಮಂ ಪನ,
ಯಥಾಭುತಂ ಅಜಾನನ್ತೋ ಮನುಸ್ಸೋಸೀ ತಿ ಮಞ್ಞತಿ.
ನಾಹಂ ಮನುಸ್ಸೋಮನುಸ್ಸೋ ನ ಬ್ರಹ್ಮಾ ನ ಚ ದೇವತಾ,
ಜರಾಮರಣಂ ಲೋಕಸ್ಸ ದಸ್ಸೇತುಂ ಪನಿಧಾಗತೋ.
ಅನುಪಲಿತ್ತೋ ಲೋಕೇನ ಜಾತೋನನ್ತಜಿನೋ ಅಹಂ,
ಬುದ್ಧೋ ಬೋಧಿತಲೇ ಹುತ್ವಾ ತಾರೇಮಿ ಜನತಂ ಬಹುಂ.
ಸಮನ್ತಾ ಧಜಿನಂ ದಿಸ್ವಾ ಯುದ್ಧಂ ಮಾರಂ ಸವಾಹನಂ,
ಯುದ್ಧಾಯ ಪಚ್ಚುಗಚ್ಛಾಮಿ ಮಾ ಮಂ ಠಾನಾ ಅಚಾವಯಿ.
ಯನ್ತೇ ತಂ ನಪ್ಪಸಹತಿ ಸೇನಂ ಲೋಕೋ ಸದೇವಕೋ,
ತನ್ತೇ ಪಞ್ಞಾಯ ಗಚ್ಛಾಮಿ ಆಮಂ ಪತ್ತಂ ವ ಅಸ್ಮನಾ.
ಇಚ್ಛನ್ತೋ ಸಾಸಪೇ ಗಬ್ಭೇ ಚಙ್ಕಮಾಮಿ ಇತೋ ಚಿತೋ,
ಇಚ್ಛನ್ತೋ ಲೋಕಧಾತುಮ್ಹಿ ಅತ್ತಭಾವೇನ ಛಾದಯಿ.
ಏತೇ ಸಬ್ಬೇ ಗಹೇತ್ವಾನ ಚುಣ್ಣೇತುಂ ಅಚ್ಛರಾಯಪಿ,
ಅತ್ಥಿ ಥಾಮಂ ಬಲಂ ಮಯ್ಹಂ ಪಾಣಘಾತೋ ನ ವಟ್ಟತಿ.
ಇಮಸ್ಸ ಗಣ್ಡುಪ್ಪಾದಸ್ಸ ಆಯುಧೇನ ಬಲೇನ ಕಿಂ,
ಮಯ್ಹಂ ಹಿ ತೇನ ಪಾಪೇನ ಸಲ್ಲಾಪೋ ಪಿ ನ ಯುಜ್ಜತಿ.
ಪಲ್ಲಙ್ಕಂ ಮಮ ಭಾವಾಯ ಕಿಮತ್ಥಞ್ಞೇನ ಸಕ್ಖಿನಾ,
ಕಮ್ಪಿತಾ ಮದ್ದಿಯಾ ದಾನಾ ಸಕ್ಖಿ ಹೋತಿ ಅಯಂ ಮಹೀ.
ಇತಿ ವತ್ವಾ ದಕ್ಖಿಣಂ ಬಾಹುಂ ಪಥವಿಯಾ ಪಣಮಯಿ,
ತದಾ ಕಮ್ಪಿತ್ಥ ಪಥವೀ ಮಹಾಘೋಸೋ ಅಜಾಯಥ.
ಪಥವೀಘೋಸೇನ ಆಕಾಸೇ ಗಜ್ಜನ್ತೋ ಅಸನಿ ಫಲಿ,
ತಸ್ಮಿಂ ಮಜ್ಝೇ ಗತೋ ಮಾರೋ ಸಪರಿಸೋ ಭಯತಜ್ಜಿತೋ.
ಮಹಾವಾತಸಮುದ್ಧತಭಸ್ಮಂ ವ ವಿಕಿರಿಯ್ಯಥ,
ಮಹಾಘೋಸೋ ಅಜಾಯಿತ್ಥ ಸಿದ್ಧತಸ್ಸ ಜಯೋ ಇತಿ.
ಅಭಿಸಮ್ಬೋಧಿದೀಪನೀಗಾಥಾ
ಪುರತೋ ಗಚ್ಛತಿ ಚನ್ದೋ ರಜತಚಕ್ಕಂ ವ ಅಮ್ಬರೇ,
ಸಹಸ್ಸರಂಸಿ ಸುರಿಯೋ ಪಚ್ಛಿಮೇನುಪಗಚ್ಛತಿ.
ಮಜ್ಝೇ ಬೋಧಿದುಮಚ್ಛತ್ತೇ ಪಲ್ಲಙ್ಕೇ ಅಪ್ಪರಾಜಿತೇ,
ಪಲ್ಲಙ್ಕೇನ ನಿಸೀದಿತ್ವಾ ಧಮ್ಮಂ ಸಮ್ಮಸತೇ ಮುನಿ.
ಸಕ್ಕೋ ತಸ್ಮಿಂ ಖಣೇ ಸಙ್ಖಂ ಧಮನ್ತೋ ಅಭಿಧಾವತಿ,
ಬ್ರಹ್ಮಾ ತಿಯೋಜನಂ ಛತ್ತಂ ಧಾರೇತಿ ಮುನಿಮುದ್ಧನಿ.
ಮಣಿತಾಲವಣ್ಟಂ ತುಸೀತೋ ಸುಯಾಮೋ ವಾಳಬೀಜನಿಂ,
ನಾನಾಮಙ್ಗಲಭಣ್ಡಾನಿ ಗಹಿತೋ ಸೇಸದೇವತಾ.
ಏವಂ ದಸಸಹಸ್ಸಮ್ಹಿ ಸಕ್ಕೋ ಬ್ರಹ್ಮಾ ಚ ದೇವತಾ,
ಸಙ್ಖಾದೀನೀ ಧಮನ್ತಾ ಚ ಚಕ್ಕವಾಳಮ್ಹಿ ಪೂರಯುಂ.
ಮಙ್ಗಲಾನಿ ಗಹೇತ್ವಾನ ತಿಟ್ಠನ್ತಿ ಕಾಚಿ ದೇವತಾ,
ಧಜಮಾಲ ಗಹೇತ್ವಾನ ತಥಾ ಪುಣ್ಣಘಟಾದಯೋ.
ತತ್ಥ ನಚ್ಚನ್ತಿ ಗಾಯನ್ತಿ ಸೇಳೇನ್ತಿ ವಾದಯನ್ತಿ ಚ,
ದೇವಾ ದಸಸಹಸ್ಸಮ್ಹಿ ತುಟ್ಠಹಟ್ಠಾ ಪಮೋದಿತಾ.
ಧಮ್ಮಾಮತರಸಸ್ಸಾದಂ ಲಭಿಸ್ಸಾಮಸ್ಸ ಸನ್ತಿಕೇ,
ನಯನಾಮತರಸಸ್ಸಾದಂ ಪಾಟಿಹಾರಿಯಞ್ಚ ಪಸ್ಸಿತುಂ.
ಜಾರಮರಣಕನ್ತಾರಾ ಸೋಕೋಪಾಯಾಸಸಲ್ಲತೋ,
ಮೋಚೇಸಿ ಕಾಮಪಾಸಮ್ಹಾ ದೇಸೇನ್ತೋ ಅಮತಂ ಪದಂ.
ಇತಿ ತುಟ್ಠೇಹಿ ದೇವೇಹಿ ಪೂಜಿಯನ್ತೋ ನರಾಸಭೋ,
ಕಿಞ್ಚಿ ಪೂಜಂ ಅಚಿನ್ತೇನ್ತೋ ಚಿನ್ತೇನ್ತೋ ಧಮ್ಮಮುತ್ತಮಂ.
ಸಬ್ಬತ್ಥಸಾಧಿತೋ ಸನ್ತೋ ಸಿದ್ಧತ್ಥೋ ಅಪ್ಪರಾಜಿತೋ,
ಚಕ್ಕವಾಳಸಿಲಾಸಾಣಿಪಾಕಾರೇಹಿ ಮನೋರಮೇ.
ತಾರಾಮಣಿಖಚಿತಾಕಾಸವಿತಾನೇ ಚನ್ದದೀಪಕೇ,
ಮಾನಾರತಮಪಜ್ಜೋತೇ ಮಾಲಾಗನ್ಧಾದಿಪೂಜಿತೇ.
ದಿಬ್ಬೇಹಿ ಛಣಭೇರೀಹಿ ಘುಟ್ಠೇ ಮಙ್ಗಲಗೀತಿಯಾ,
ಚಕ್ಕವಾಳೇ ಸುಪ್ಪಾಸಾದೇ ಬೋಧಿಮಣ್ಡಮಹಾತಲೇ.
ಬೋಧಿರುಕ್ಖಮಣಿಚ್ಛತ್ತೇ ಪಲ್ಲಙ್ಕೇ ಅಪ್ಪರಾಜಿತೇ,
ನಿಸ್ಸಿನ್ನೋ ಪಠಮೇ ಯಾಮೇ ಪುರಿಮಂ ಜಾತಿಮನುಸ್ಸರಿ.
ನಮರೂಪಾಮನುಪ್ಪತ್ತಿ ಸುದಿಟ್ಠಾ ಹೋತಿ ತೇನಿಧಾ,
ಸಕ್ಕಾತದಿಟ್ಠಿ ತೇನಸ್ಸ ಪಹೀನಾ ಹೋತಿ ಸಬ್ಬಸೋ.
ತತೋ ಹಿ ದುತಿಯೇ ಯಾಮೇ ಯಥಾಯಮ್ಮುಪಗೇ ಸರಿ,
ಸುದಿಟ್ಠಂ ಹೋತಿ ತೇನಸ್ಸ ಕಮ್ಮಕ್ಲೇಸೇಹಿ ಸಮ್ಭವಂ.
ಕಙ್ಖಾವಿತರಣೀ ನಾಮ ಞಾಣನ್ತಂ ಸಮುಪಾಗತಂ,
ತೇನಸೇಸ ಪಹೀಯಿತ್ಥ ಕಙ್ಖಾ ಸೋಳಸಧಾ ಠಿತಾ.
ತತೋ ಸೋ ತತಿಯೇ ಯಾಮೇ ದ್ವಾದಸಙ್ಗೇ ಅಸೇಸತೋ,
ಸೋ ಪಟಿಚ್ಚಸಮುಪ್ಪಾದೇ ಞಾಣಮೋತಾರಯೀ ಮುನಿ.
ಅವಿಜ್ಜವಾದ್ಯಾನುಲೋಮೇನ ಜರಾದಿಪಟಿಲೋಮತೋ,
ಸಮ್ಮಸನ್ತೋ ಯಥಾಭೂತಂ ಞಾಣದಸ್ಸನಮಾಗಮಿ.
ಕಪ್ಪಕೋಟಿಸತೇನಾಪಿ ಅಪ್ಪಮೇಯ್ಯೇಸು ಜಾತಿಸು,
ಲೋಭಂ ಅಸೇಸದಾನೇನ ವಿನಾಸೇನ್ತೋ ಪುನಪ್ಪುನಂ.
ಸೀಲೇನ ಖನ್ತಿಮೇತ್ತಾಯ ಕೋಖದೋಸಂ ನಿವಾರೇಸಿ,
ಪಞ್ಞಾಯ ಮೋಹಂ ಛೇತ್ವಾನ ಮಿಚ್ಛಾದಿಟ್ಠಿ ತಥೇವ ಚ.
ಗರೂಪಸೇವನಾದೀಹಿ ವಿಚಿಕಿಚ್ಛಂ ವಿನೋದಯಂ,
ಮಾನುದ್ಧಚ್ಚಂ ವಿನೋದೇನ್ತೋ ಕುಲೇ ಜೇಟ್ಠೋಪಚಾಯಿನಾ.
ನೇಕ್ಖಮ್ಮೇನ ವಿನಾಸೇನ್ತೋ ಕಾಮರಾಗಂ ಪುನಪ್ಪುನಂ,
ಸಚ್ಚೇನ ವಿಸಂವಾದಂ ಕೋಸಜ್ಜಂ ವೀರಿಯೇನ ಚ.
ಏವಂ ದಾನಾದಿನಾ ತಂ ತಂ ಕಿಲೇಸಙ್ಗಂ ವಿನೋದಯಂ,
ಸುವಡ್ಢಿತಾ ಮಹಾಪಞ್ಞಾ ಕಥಂ ಸನ್ತಿಂ ನ ರೂಹತಿ.
ಸುದುಕ್ಕರಂ ಕರಿತ್ವಾನ ದಾನಾದಿಪಚ್ಚಯಂ ಪುರೇ,
ನ ಕಿಞ್ಚಿ ಭವಸಮ್ಪತ್ತಿಂ ಪತ್ಥೇಸಿ ಬೋಧಿಮುತ್ತಮಂ.
ಪಣಿಧಾನಮ್ಹಾ ಪಟ್ಠಾಯ ಕತಂ ಪುಞ್ಞಞ್ಚ ಪತ್ಥನಂ,
ಏಕ್ಕತ್ಥ ದಾನಿ ಸಮ್ಪತ್ತಿಂ ದೇತಿ ಬೋಧಿಂ ಅಸಂಸಯಂ.
ತತೋ ಸೋ ಸಬ್ಬಸಙ್ಖಾರೇ ಅನಿಚ್ಚದುಕ್ಖನತ್ತತೋ,
ಸಮ್ಮಸನ್ತೋನುಲೋಮೇನ ನಿಬ್ಬಾನಂ ಸಮುಪಾಗಮಿ.
ಸವಾಸನೇ ಕಿಲೇಸೇ ಸೋ ಝಾಪೇನ್ತೋನುಮತ್ತಂ ಪಿ ಚ,
ಅರಹತ್ತಪ್ಪತ್ತಿಯಾ ಸುದ್ಧೋ ಬುದ್ಧೋ ಬೋಧಿತಲೇ ಅಹು.
ಪತ್ತೋ ವಿಮೇತ್ತಿಂ ವರಸೇತಛತ್ತಂ,
ಸೋ ಪೀತಿವೇಗೇನ ಉದಾನುದೀರಯಿ;
ಛೇತ್ವಾನ ಮಾರೇ ವಿಜಿತಾರಿಸಙ್ಘೋ,
ತಿಬುದ್ಧಖೇತ್ತೇಕದಿವಾಕರೋ ಅಹು.
ರಾಜಾಧಿರಾಜಾ ವರಮೇವಮಾಸಿ,
ತಿಛತ್ತಧಾರಿ ವರಧಮ್ಮರಾಜಾ;
ಮಹಾಸಹಸ್ಸಂ ಪಿ ಚ ಲೋಕಧಾತುಂ,
ಸರೇನ ವಿಞ್ಞಾಪಯಿತುಂ ಸಮತ್ಥೋ.
ಬುದ್ಧೋ ಲೋಕಾಲೋಕೇ ಲೋಕೇ,
ಜಾತೋ ಸತ್ತೋ ಕೋನುಮ್ಮತ್ತೋ;
ಸುದ್ಧಂ ಬುದ್ಧಂ ಓಘಾ ತಿಣ್ಣಂ,
ಸದ್ಧೋ ಪಞ್ಞೋ ಕೋ ನೋ ವನ್ದೇ.
ಭಜಿತಂ ಚಜಿತಂ ಪವನಂ ಭವನಂ,
ಜಹಿತಂ ಗಹಿತಂ ಸಮಲಂ ಅಮಲಂ;
ಸುಗತಂ ಅಗತಂ ಸುಗತಿಂ ಅಗತಿಂ,
ನಮಿತಂ ಅಮಿತಂ ನಮತಿಂ ಸುಮತಿಂ.
ಧಮ್ಮಚಕ್ಕಪವತ್ತನದೀಪನೀಗಾಥಾ
ಸಮ್ಮಾಸಮ್ಬೋಧಿಞಾನಂ ಹತಸಕಲಮಲಂ ಸುದ್ಧತೋ ಚಾತಿಸುದ್ಧಂ,
ಅದ್ಧಾ ಲದ್ಧಾ ಸುಲದ್ಧಂ ವತಮಿತಿ ಸತತಂ ಚಿನ್ತಯನ್ತೋ ಸುಬೋಧಿಂ;
ಸತ್ತಾಹಂ ಸತ್ತಮೇವಂ ವಿವಿಧಫಲಸುಖಂ ವಿತಿನಾಮೇಸಿ ಕಾಲಂ,
ಬ್ರಹ್ಮೇನಾಯಾಚಿತೋ ಸೋ ಇಸಿಪತನವನೇ ವತ್ತಯೀ ಧಮ್ಮಚಕ್ಕಂ.
ಪಾಟಿಹಾರಿಯದೀಪನೀಗಾಥಾ
ಬ್ರಹ್ಮಸ್ಸ ಸದ್ದಂ ಕರವೀಕಭಾಣಿಂ,
ಯಥಿಚ್ಛಿತಂ ಸಾವಯಿತುಂ ಸಮತ್ಥಂ;
ಸಚ್ಚಂ ಪಿಯಂ ಭೂತಹಿತಂ ವದನ್ತಂ,
ನ ಪೂಜಯೇ ಕೋ ಹಿ ನರೋ ಸಚೇತನೋ.
ಇದ್ಧಿ ಚ ಆದೇಸನಾನುಸಾಸನೀ,
ಪಾಟಿಹೀರೇ ಭಗವಾ ವಸೀ ಅಹು;
ಕತ್ವಾನ ಅಚ್ಛೇರಸುಪಾಟಿಹೀರಂ,
ದೇಸೇಸಿ ಧಮ್ಮಂ ಅನುಕಮ್ಪಿಮಂ ಪಜಂ.
ನವಗುಣದೀಪನೀಗಾಥಾ
ಏವಂ ಹಿ ಬುದ್ಧತ್ತಮುಪಾಗತೋ ಸೋ,
ದೇಸೇಸಿ ಧಮ್ಮಂ ಸನರಾಮರಾನಂ;
ನಾನಾನಯೇಹೀಭಿಸಮೇಸಿ ಸತ್ತೇ,
ತಸ್ಮಾ ಹಿ ಝಾತೋ ತಿಭವೇಸು ನಾಥೋ.
ಅದ್ಧಾ ಲದ್ಧಾ ಧಮ್ಮಾಲೋಕಂ,
ದಿಟ್ಠಾ ಪತ್ತಾ ಞಾತಾ ಸಚ್ಚಂ;
ತಿಞ್ಞಾರಾಗಾದೋಸಮೋಹಾ,
ಥೋಮೇಸುಂ ತೇ ದೇವಾ ಬ್ರಹ್ಮಾ.
ಮುನಿರಾಜವರೋ ನರರಾಜವರೋ,
ದಿವಿದೇವವರೋ ಸುಚಿಬ್ರಹ್ಮವರೋ;
ಸಕಪಾಪಹರೋ ಪರಪಾಪಹರೋ,
ಸಕವುಡ್ಢಿಕರೋ ಪರವುಡ್ಢಿಕರೋ.
ಸನರಾಮರುಬ್ರಹ್ಮಗಣೇಭಿ ರುತಾ,
ಅರಹಾದಿಗುಣಾ ವಿಪುಲಾ ವಿಮಲಾ;
ನವಧಾ ವಸುಧಾಗಗಣೇ,
ಸಕಲೇ ತಿದಿವೇ ತಿಭವೇ ವಿಸಟಾ.
ಯೇ ಪಿಸ್ಸ ತೇ ಭಗವತೋ ಚ ಅಚಿನ್ತಿಯಾದೀ,
ಸುದ್ಧಾತಿಸುದ್ಧತರಬುದ್ಧಗುಣಾ ಹಿ ಸಬ್ಬೇ;
ಸಙ್ಖೇಪತೋ ನವವಿಧೇಸು ಪದೇಸು ಖಿತ್ತಾ,
ವಕ್ಖಾಮಿ ದಾನಿ ಅರಹಾದಿಗುಣೇ ಅಹಂ ಪಿ.
ಯೋ ಚೀಧ ಜಾತೋ ಅರಹಂ ನಿರಾಸೋ,
ಸಮ್ಮಾಭಿಸಮ್ಬುದ್ಧಸಮನ್ತಚಕ್ಖು;
ಸಮ್ಪನ್ನವಿಜ್ಜಾಚರಣೋಘತಿಣ್ಣೋ,
ಸಮ್ಮಾಗತೋ ಸೋ ಸುಗತೋ ಗತೋ ವ.
ಅವೇದಿ ಸೋ ಲೋಕಮಿಮಂ ಪರಞ್ಚ,
ಅಮುತ್ತರೋ ಸಾರಥಿದಮ್ಮಸತ್ತೇ;
ಸದೇವಕಾನಂ ವರಸತ್ಥುಕಿಚ್ಚಂ,
ಅಕಾಸಿ ಬುದ್ಧೋ ಭಗವಾ ವಿಸುದ್ಧೋ.
ಗುಣದೀಪನೀಗಾಥಾ
ನ ತಸ್ಸ ಅದಿಟ್ಠನಮಿಧತ್ಥಿ ಕಿಞ್ಚಿ,
ಅತೋ ಅವಿಞ್ಞಾತಮಜಾನಿತಬ್ಬಂ;
ಸಬ್ಬಂ ಅಭಿಞ್ಞಾಸಿ ಯದತ್ಥಿ ಞೇಯ್ಯಂ,
ತಥಾಗತೋ ತೇನ ಸಮನ್ತಚಕ್ಖು.
ಇತಿ ಮಹಿತಮನನ್ತಾಕಿತ್ತಿಸಮ್ಭಾರಸಾರಂ,
ಸಕಲದಸಸಹಸ್ಸೀಲೋಕಧಾತುಮ್ಹಿ ನಿಚ್ಚಂ;
ಉಪಚಿತಸುಭಹೇತುಪಯುತಾನನ್ತಕಾಲಂ,
ತದಿಹ ಸುಗತಬೋಧಿಸಾಧುಕಂ ಚಿನ್ತನೀಯಂ;
ತಕ್ಕಬ್ಯಾಕರಣಞ್ಚ ಧಮ್ಮವಿನಯಂ ಸುತ್ವಾ ಪಿ ಯೋ ಪಞ್ಞವಾ,
ತೇನಾಯಂ ಸುಚಿಸಾರಭೂತವಚನಂ ವಿಞ್ಞಾಯತೇ ಕೇವಲಂ;
ಹೇತುಞ್ಚಾಪಿ ಫಲೇನ ತೇನ ಸಫಲಂ ಸಮ್ಪಸ್ಸಮಾನೋ ತತೋ ಬೋಧಿಂ ಸದ್ದಹತೇವ ತಸ್ಸ ಮಹತಾವಾಯಮತೋ ಸಮ್ಭವಂ.
ಯೋ ಸದ್ದಹನ್ತೋ ಪನ ತಸ್ಸ ಬೋಧಿಂ,
ವುತ್ತಾನುಸಾರೇನ ಗುಣೇರಹಾದೀ;
ಕಥೇತಿ ಚಿನ್ತೇನ್ತಿ ಚ ಸೋ ಮುಹುತ್ತಂ,
ಓಹಾಯ ಪಾಪಾನಿ ಉಪೇತಿ ಸನ್ತಿಂ.
ಸದ್ಧೇಯ್ಯಾ ತೇ ಚಿನ್ತೇಯ್ಯಾ ತೇ,
ವನ್ದೇಯ್ಯಾ ತೇ ಪೂಜೇಯ್ಯಾತೇ;
ಬುದ್ಧೋಲೋಕಾಲೋಕೇ ಲೋಕೇ,
ಜಾತೇ ನೇತಂ ಪತ್ಥೇನ್ತೇನ.
ಪೂಜಾನಿಧಾನದೀಪನೀಗಾಥಾ
ತಸಮಾ ಹಿ ಜಾತೋವರಕಮ್ಹಿ ತಸ್ಸ,
ಆಯತ್ತಕೇ ಮಙ್ಗಲಚಕ್ಕವಾಳೇ;
ಭೂತೇಹಿ ವತ್ಥೂಹಿ ಮನೋರಮೇಹಿ,
ಪೂಜೇಮಿ ತಂ ಪೂಜಿತ್ಪೂಜಿತಂ ಪುರೇ.
ಸೋಹಂ ಅಜ್ಜ ಪನೇತಸ್ಮಿಂ ಚಕ್ಕವಾಳಮ್ಹಿ ಪುಪ್ಫಿತೇ,
ಥಲಜೇ ಜಲಜೇ ವಾಪಿ ಸುಗನ್ಧೇ ಚ ಅಗನ್ಧಕೇ.
ಮನುಸ್ಸೇಸು ಅನೇಕತ್ಥ ತಳಾಕುಯ್ಯಾನವಾಪಿಸು,
ಪವನೇ ಹಿಮವನ್ತಸ್ಮಿಂ ತತ್ಥ ಸತ್ತ ಮಹಾಸರೇ.
ಪರಿತ್ತದೀಪೇ ದ್ವಿಸಹಸ್ಸೇ ಮಹಾದೀಪೇ ಸುಪುಪ್ಫಿತೇ,
ಸತ್ತಪರಿಭಣ್ಡಸೇಲೇಸು ಸಿನೇರುಪಬ್ಬತುತ್ತಮೇ.
ಕುಮುದುಪ್ಪಲಕಾದೀನಿ ನಾಗಾನಂ ಭವನೇಸುಪಿ,
ಪಾಟಲಾದೀನಿ ಪುಪ್ಫಾನಿ ಅಸುರಾನಂ ಹಿ ಆಲಯೇ.
ಕೋವಿಳಾರಾದಿಕಾನಿ ತು ದೇವತಾನಂ ಹಿ ಆಲಯೇ,
ಏವಮಾದೀ ಅನೇಕತ್ಥ ಪುಪ್ಫಿತೇ ಧರಣೀರುಹೇ.
ಚಮ್ಪಕಾ ಸಲಲಾ ನಿಮ್ಬಾ ನಾಗಪುನ್ನಾಗಕೇತಕಾ,
ವಸ್ಸಿಕಾ ಮಲ್ಲಿಕಾ ಸಾಲಾ ಕೋವಿಳಾರಾ ಚ ಪಾಟಲಿ.
ಇನ್ದೀವರಾ ಅಸೋಕಾ ಚ ಕಣಿಕಾರಾ ಚ ಮಕುಲಾ,
ಪದುಮಾ ಪುಣ್ಡರಿಕಾ ಚ ಸೋಗನ್ಧಿಕುಮುದುಪ್ಪಲಾ.
ಏತೇ ಚಞ್ಞೇ ಚ ರುಕ್ಖಾ ಚ ವಲ್ಲಿಯೋ ಚಾಪಿ ಪುಪ್ಫಿತಾ,
ಸುಗನ್ಧಾ ಸುಖಸಮ್ಫಸ್ಸಾ ನಾನಾವಣ್ಣನಿಭಾ ಸುಭಾ.
ವಿಚಿತ್ರಾ ನೀಲಾನೇಕಾನಿ ಪೀತಾ ಲೋಹಿತಕಾನಿ ಚ,
ಕಾಳಾ ಸೇತಾ ಚ ಮಞ್ಜಟ್ಠ ನೇಕವಣ್ಣಾ ಸುಪುಪ್ಫಿತಾ.
ಸೋಭತೇ ಪಬ್ಬತೇ ಹೇಟ್ಠಾ ಸರೇಹಿ ವನರಾಜಿಹಿ,
ಸನ್ದಮಾನಾಹಿ ಗಙ್ಗಾಹಿ ಹಿಮವಾ ರತನಾಕರೋ.
ಪತ್ತಕಿಞ್ಜಕ್ಖರೇಣೂಹಿ ಓಕಿಣ್ಣಂ ಹೋತಿ ತಂ ವನಂ,
ಭಮರಾ ಪುಪ್ಫಗನ್ಧೇಹಿ ಸಮನ್ತಾ ಅಭಿನಾದಿತಾ.
ಅಥೇತ್ತ ಸಕುಣಾ ಸನ್ತಿ ದಿಜಾ ಮಞ್ಜುಸ್ಸರಾ ಸುಭಾ,
ಕೂಜನ್ತಮುಪಕೂಜನ್ತಿ ಉತುಸಮ್ಪುಪ್ಫಿತೇ ದುಮೇ.
ನಿಚ್ಛರಾನಂ ನಿಪಾತೇನ ಪಬ್ಬತಾ ಅಭಿನಾದಿತಾ,
ಪಞ್ಚಙ್ಗಿಕಾನಿ ತೂರಿಯಾನಿ ದಿಬ್ಬಾನಿ ವಿಯ ಸುಯ್ಯರೇ.
ತತ್ಥ ನಚ್ಚನ್ತಿ ತಸ್ಮಿಂ ಜಲನ್ತಗ್ಗಿಸಿಖೂಪಮಾ,
ತಸ್ಮಿಂ ಹಿ ಕಿನ್ನರಾ ಕಿಚ್ಚಂ ಪದೀಪೇನ ಕರೀಯತಿ.
ಮುತ್ತಾಜಾಲಾವ ದಿಸ್ಸನ್ತಿ ನಿಚ್ಛರಾನಂ ಹಿ ಪಾತಕಾ,
ಪಜ್ಜಲನ್ತಾ ವ ತಿಟ್ಠನ್ತಿ ಮಣಿವೇಳುರಿಯಾದಯೋ.
ಕಾಳಾನುಸಾರಿ ತಗ್ಗರಂ ಕಪ್ಪೂರಂ ಹರಿಚನ್ದನಂ,
ಸಕುಣಾನಂ ಹಿ ಸದ್ದೇನ ಮಯೂರಾನಂ ಹಿ ಕೇಕಯಾ.
ಭಮರಾನಂ ಹಿ ನಿನ್ನಾದಾ ಕೋಞ್ಚನಾದೇನ ಹತ್ಥಿನಂ,
ವಿಜಮ್ಭಿತೇನ ವಾಳಾನಂ ಕಿನ್ನರಾನಂ ಹಿ ಗೀತಿಯಾ;
ಪಬ್ಬತಾನಂ ಹಿ ಓಭಾಸಾ ಮಣೀನಂ ಜೋತಿಯಾಪಿ ಚ,
ವಿಚಿತ್ರಬ್ಭವಿತಾನೇಹಿ ದುಮಾನಂ ಪುಪ್ಫಧೂಪಿಯಾ;
ಏವಂ ಸಬ್ಬಙ್ಗಸಮ್ಪನ್ನಂ ಕಿಂ ಸಿಯಾ ನನ್ದನಂ ವನಂ.
ಏವಂ ಸುಸಮ್ಫುಲ್ಲವನಂ ಹಿ ಯಂ ಯಂ,
ತಹಿಂ ತಹಿಂ ಪುಪ್ಫಿತಪುಪ್ಫಿತಂ ಸುಭಂ;
ಮಾಲಂ ಸುಸದ್ದಞ್ಚ ಮನುಞ್ಞಗನ್ಧಂ,
ಪೂಜೇಮಿ ತಂ ಪೂಜಿತಪೂಜಿತಂ ಪುರಾ.
ನಾಗಲೋಕೇ ಮನುಸ್ಸೇ ಚ ದೇವೇ ಬ್ರಹ್ಮೇ ಚ ಯಂ ಸಿಯಾ,
ಸಾಮುದ್ದಿಕಂ ಭೂಮಿಗತಂ ಆಕಾಸಟ್ಠಞ್ಚ ಯಂ ಧಮಂ.
ರಜತಂ ಜಾತರೂಪಞ್ಚ ಮುತ್ತಾ ವೇಳುರಿಯಾ ಮಣಿ,
ಮಸಾರಗಲ್ಲಂ ಫಲಿಕಂ ಲೋಹಿತಙ್ಗಂ ಪವಾಳಕಂ.
ಯೋ ಸೋ ಅನನ್ತಕಪ್ಪೇಸು ಪೂರೇತ್ವಾ ದಸಪಾರಮೀ,
ಬುದ್ಧೋ ಬೋಧೇಸಿ ಸತ್ತಾನಂ ತಸ್ಸ ಪೂಜೇಮಿ ತಂ ಧನಂ.
ಖೋಮಂ ಕೋಸೇಯ್ಯಂ ಕಪ್ಪಾಸಂ ಸಾಣಂ ಭಙ್ಗಞ್ಚ ಕಮ್ಬಲಂ,
ದುಕೂಲಾನಿ ಚ ದಿಬ್ಬಾನಿ ದುಸ್ಸಾನಿ ವಿವಿಧಾನಿ ತೇ.
ಅನನ್ತವತ್ಥದಾನೇನ ಹಿರೋತ್ತಪ್ಪಾದಿಸಂವರಂ,
ಯಸ್ಸ ಸಿದ್ಧಂ ಸಿಯಾ ತಸ್ಸ ದುಸ್ಸಾನಿ ಪುಜಯಾಮಹಂ.
ಪವನೇ ಜಾತರುಕ್ಖಾನಂ ನಾನಾಫಲರಸುತ್ತಮಂ,
ಅಮ್ಬಾ ಕಪಿಟ್ಠಾ ಪನ್ಸಾ ಚೋಚಮೋಚಾದಿನಪ್ಪಕಾ.
ತಸ್ಮಿಂ ಗನ್ಧರಸಂ ಓಜಂ ಬುದ್ಧಸೇಟ್ಠಸ್ಸ ಪೂಜಿತಂ,
ವನ್ದಾಮಿ ಸಿರಸಾ ನಿಚ್ಚಂ ವಿಪ್ಪಸನ್ನೇನ ಚೇತಸಾ.
ಪೂಜೇಮಿ ಪಠಮಂ ತಸ್ಸ ಪಣಿಧಾನಂ ಅಚಿನ್ತಿಯಂ,
ಚಕ್ಕವಾಳಮ್ಹಿ ಸಬ್ಬೇಹಿ ವಿಜ್ಜಮಾನೇಹಿ ವತ್ಥುಹಿ.
ದಸನ್ನಂ ಪಾರಮೀನನ್ತು ಪೂರಿತಟ್ಠಾನಮುತ್ತಮಂ,
ತತೋ ಸಾಲವನೇ ರಮ್ಮೇ ಜಾತಟ್ಠಾನಂ ಚರಿಮಕಂ.
ಛಬ್ಬಸಾನಿ ಪಧಾನಸ್ಮಿಂ ಕರಣಂ ದುಕ್ಕರಕಾರಿಕಂ,
ಅಪ್ಪರಾಜಿತಪಲ್ಲಙ್ಕಂ ಬುದ್ಧಂ ಬುದ್ಧಗುಣಂ ನಮೇ.
ಚುದ್ದಸ ಬುದ್ಧಞಾಣಾನಿ ಅಟ್ಠರ್ಸ ಆವೇಣಿಕಂ,
ಪೂಜೇಮಿ ದಸಬಲಞಾಣಂ ಚತುವೇಸಾರಜ್ಜಮುತ್ತಮಂ.
ಆಸಯಾನುಸಯಞಾಣಂ ಇನ್ದ್ರಿಯಾನಂ ಪರೋಪರಂ,
ಯಮಕಪಾಟಿಹೀರಞ್ಚ ಞಾಣಂ ಸಬ್ಬಞ್ಞುತಂ ಪಿ ಚ.
ಮಹಾಕರುಣಾಪತ್ತಿಞಾಣಂ ಅನಾವರಣ್ಮಿತಿ ಚ,
ಛ ಅಸಾಧಾರಣಾನೇತೇ ಞತ್ವಾನ ಪೂಜಯಾಮಹಂ.
ತತೋ ಚ ಸತ್ತಸತ್ತಾಹೇ ಧಮ್ಮಸಮ್ಮಸಿತಂ ನಮೇ,
ಬ್ರಹ್ಮುನಾ ಯಾಚಿತಟ್ಠಾನಂ ಧಮ್ಮಂ ದೇಸಯಿತುಂ ವರಂ.
ಇಸಿಪತನೇ ಮಿಗದಾಯೇ ಧಮ್ಮಚಕ್ಕಪವತ್ತನಂ,
ತತೋ ವೇಳುವನಾರಾಮೇ ವಸಿತಠಾನಞ್ಚ ಪೂಜಯೇ.
ತತೋ ಜೇತವನಂ ರಮ್ಮಂ ಚಿರವುತ್ಥಂ ಮಹೇಸಿನಾ,
ಅಸಾಧಾರಣಮಞ್ಞೇಸಂ ಯಮಕಪಾಟಿಹರಿಯಂ.
ಪಾರಿಚ್ಛತ್ತಕಮೂಲಮ್ಹಿ ಅಭಿಧಮ್ಮಞ್ಚ ದೇಸನಂ,
ಸಙ್ಕಸ್ಸನಗರದ್ವಾರೇ ದೇವೋರೋಹಣಕಂ ಪಿ ಚ.
ತತೋ ಚ ಹಿಮವನ್ತಸ್ಮಿಂ ಮಹಾಸಮಯದೇಸನಂ,
ವುತ್ತಾನೇತಾನಿ ಠಾನಾನಿ ನತ್ವಾನ ಪುಜಯಾಮಹಂ.
ಚತುರಾಸೀತಿಸಹಸ್ಸೇಹಿ ಧಮ್ಮಕ್ಖನ್ಧೇಹಿ ಸಙ್ಗಹಂ,
ಪಿಟಕತ್ತಯಂ ಯಥಾವುತ್ತವಿಧಿನಾ ಪೂಜಯಾಮಹಂ.
ಮಾರಸ್ಸ ಅತ್ತನೋ ಆಯುಸಙ್ಖಾರೋಸಜ್ಜನಂ ನಮೇ,
ಕುಸಿನಾರಾಯ ಮಲ್ಲಾನಂ ಯಮಕಸಾಲಮನ್ತರೇ.
ಪಣಿಧಾನಮ್ಹಿ ಪಟ್ಠಾಯ ಕತಂ ಕಿಚ್ಚಂ ಅಸೇಸತೋ,
ನಿಟ್ಠಪೇತ್ವಾನ ಸೋ ಸಬ್ಬಂ ಪರಿನಿಬ್ಬಾಯಿನಾಸವೋ.
ಏವಂ ನಿಬ್ಬಾಯಮಾನಸ್ಸ ಕತಕಿಚ್ಚಸ್ಸ ತಾದಿನೋ,
ಚಿರಗತಾ ಮಹಾಕರುಣಾ ನ ನಿಬ್ಬಾಯಿತ್ಥ ಕಿಞ್ಚಿಪಿ.
ಸ್ವಾಯಂ ಧಮ್ಮೋ ವಿನಯೋ ಚ ದೇಸಿತೋ ಸಾಧುಕಂ ಮಯಾ,
ಮಮಚ್ಚಯೇನ ಸೋ ಸತ್ಥಾ ಧಾತು ಚಾಪಿ ಸರೀರಜಾ.
ಅಪ್ಪರಾಜಿತಪಲ್ಲಙ್ಕಂ ಬೋಧಿರುಕ್ಖಞ್ಚ ಉತ್ತಮಂ,
ಮಮಚ್ಚಯೇನ ಸತ್ಥಾ ತಿ ಅನುಜಾನಿ ಮಹಾಮುನಿ.
ಮಮ ಠನೇ ಠಪೇತ್ವಾನ ಧಾತುಬೋಧಿಞ್ಚ ಪೂಜಿತಂ,
ಅನುಜಾನಾಮಿ ತುಮ್ಹಾಕಂ ಸಾಧನತ್ಥಂ ಸಿವಞ್ಜಸಂ.
ತಸ್ಮಾ ಹಿ ತಸ್ಸ ಸದ್ಧಮ್ಮಂ ಉಗ್ಗಣ್ಹಿತ್ವಾ ಯಥಾತಥಂ,
ಯೋ ದೇಸೇತಿ ಸಮ್ಬುದ್ಧೋ ತಿ ನತ್ವಾನ ಪೂಜಯಾಮಹಂ.
ತಸ್ಮಾ ಸಾಸಪಮತ್ತಂ ಪಿ ಜಿನಧಾತುಂ ಅಸೇಸಿಯ,
ವಿತ್ಥಿನ್ನಚಕ್ಕವಾಳಮ್ಹಿ ನತ್ವಾನ ಪೂಜಯಾಮಹಂ.
ಪರಮ್ಪರಾಭತಾನಂ ಹಿ ಇಮಮ್ಹಾ ಬೋದ್ಧಿರುಕ್ಖತೋ,
ಸಬ್ಬೇಸಂ ಬೋಧಿರುಕ್ಖಾನಂ ನತ್ವಾನ ಪೂಜಯಾಮಹಂ.
ಯಂ ಯಂ ಪರಿಭುಞ್ಜಿ ಭಗವಾ ಪತ್ತಚೀವರಮಾದಿಕಂ,
ಸಬ್ಬಂ ಪರಿಭೋಗಧಾತುಂ ನತ್ವಾನ ಪೂಜಯಾಮಹಂ.
ಯತ್ಥ ಕತ್ಥಚಿ ಸಯಿತೋ ಆಸಿನ್ನೋ ಚಙ್ಕಮೇಪಿ ವಾ,
ಪಾದಲಞ್ಛನ್ಕಂ ಕತ್ವಾ ಠಿತೋ ನತ್ವಾನ ಪೂಜಯೇ.
ನ ಸಞ್ಜಾನನ್ತಿ ಯೇ ಬುದ್ಧಂ ಏವರೂಪೋ ತಿ ಞಾತ್ವೇ,
ಕತಂ ತಂ ಪಟಿಮಂ ಸಬ್ಬಂ ನತ್ವಾನ ಪೂಜಯಾಮಹಂ.
ಏವಂ ಬುದ್ಧಞ್ಚ ಧಮ್ಮಞ್ಚ ಸಙ್ಘಞ್ಚ ಅನುತ್ತರಂ,
ಚಕ್ಕವಾಳಮ್ಹಿ ಸಬ್ಬೇಹಿ ವತ್ಥೂಹಿ ಪೂಜಯಾಮಹಂ.
ಪತ್ಥನಾದೀಪನೀಗಾಥಾ
ಅಸ್ಮಿಂ ಚ ಪುಬ್ಬೇಪಿ ಚ ಅತ್ತಭಾವೇ,
ಸಬ್ಬೇಹಿ ಪುಞ್ಞೇಹಿ ಮಯಾ ಕತೇಹಿ;
ಪೂಜಾವಿಧಾನೇಹಿ ಚ ಸಞ್ಞಮೇಹಿ,
ಭವೇ ಭವೇ ಪೇಮನಿಯೋ ಭವೇಯ್ಯಂ.
ಸದ್ಧಾ ಹಿರೋತ್ತಪ್ಪಬಹುಸ್ಸುತತ್ತಂ,
ಪರಕ್ಕಮೋ ಚೇವ ಸತಿಸ್ಸಮಾಧಿ;
ನಿಬ್ಬೇಧಭಾಗೀ ವಜಿರೂಪಮಾತಿ,
ಪಞ್ಞಾ ಚ ಮೇ ಸಿಜ್ಝತು ಯಾವ ಬೋಧಿಂ.
ರಾಗಞ್ಚ ದೋಸಞ್ಚ ಪಹಾಯ ಮೋಹಂ,
ದಿಟ್ಠಿಞ್ಚ ಮಾನಂ ವಿಚಿಕಿಚ್ಛಿತಞ್ಚ;
ಮಚ್ಛೇರೇಇಸ್ಸಾಮಲವಿಪ್ಪಹೀನೋ,
ಅನುದ್ಧತೋ ಅಚ್ಚಪಲೋ ಭವೇಯ್ಯಂ.
ಭವೇಯ್ಯಹಂ ಕೇನಚಿ ನಪ್ಪಸೇಯ್ಹೋ,
ಭೋಗೋ ಚ ದಿನ್ನೇಹಿ ಪಟೇಹಿ;
ಭೋಗೋ ಚ ಕಾಯೋ ಚ ಮಮೇಸ ಲದ್ಧೋ,
ಪರೂಪಕಾರಾಯ ಭವೇಯ್ಯಂ ನೂನ.
ಧಮ್ಮೇನಾ ಮಾಲಾಪಿತರೋ ಭರೇಯ್ಯಂ,
ವುಡ್ಢಪಚಾಯೀ ಚ ಬಹೂಪಕಾರೀ;
ಞಾತೀಸು ಮಿತ್ತೇಸು ಸಪತ್ತಕೇಸು,
ವುಡ್ಢಿಂ ಕರೇಯ್ಯಂ ಹಿತಮತ್ತನೋ ಚ.
ಮೇತ್ತೇಯ್ಯನಾಥಂ ಉಪಸಙ್ಕಮಿತ್ವಾ,
ತಸ್ಸತ್ತಭಾವಂ ಅಭಿಪೂಜಯಿತ್ವಾ;
ಲದ್ಧಾನ ವೇಯ್ಯಾಕರಣಂ ಅನೂನಂ,
ಬುದ್ಧೋ ಅಯಂ ಹೇಸ್ಸತಿನಾಗತೇಸು.
ಲೋಕೇನ ಕೇನಾಪಿ ಅನುಪಲಿತ್ತೋ,
ದಾನೇ ರತೋ ಸೀಲಗುಣೇ ಸುಸಾಣ್ಠಿತೋ;
ನೇಕ್ಖಮ್ಮಭಾಗಿ ವರಞಾಣಲಾಭೀ,
ಭವೇಯ್ಯಹಂ ಥಾಮಬಲುಪಪನ್ನೋ.
ಸೀಸಂ ಸಮಂಸಮಂ ಮಮ ಹತ್ಥಪಾದೇ,
ಸಂಛಿನದಮಾನೇಪಿ ಕರೇಯ್ಯಖನ್ತಿಂ;
ಸಚ್ಚೇ ಠಿತೋ ಕಾಲುಮಧಿಟ್ಠಿತೇ ವ,
ಮೇತ್ತಾಯುಪೇಕ್ಖಾಯ ಯುತೋ ಭವೇಯ್ಯಂ.
ಮಹಾಪರಿಚ್ಚಾಗಂ ಕತ್ವಾ ಪಞ್ಚ,
ಸಮ್ಬೋಧಿಮಗ್ಗಂ ಅವಿರಾಧಯನ್ತೋ;
ಛೇತ್ವಾ ಕಿಲೇಸೇ ಚಿತಪಞ್ಚಮಾರೋ,
ಬುದ್ಧೋ ಭವಿಸ್ಸಾಮಿ ಅನಾಗತೇಸು.