ಅಞ್ಞ > ವಂಸ-ಗನ್ಥ-ಸಙ್ಗಹೋ

ವಿನಯಪಿಟಕಂ, ಅಭಿಧಮ್ಮಪಿಟಕಂ ಸುತ್ತನ್ತಪಿಟಕನ್ತಿ. ತತ್ಥ ಕತಮಂ ವಿನಯ ಪಿಟಕಂ? ಪಾರಾಜಿಕಕಣ್ಡಂ, ಪಾಚಿತ್ತಿಯಕಣ್ಡಂ, ಮಹಾವಗ್ಗಕಣ್ಡಂ, ಚುಲ್ಲವಗ್ಗಕಣ್ಡಂ, ಪರಿವಾರಕಣ್ಡನ್ತಿ. ಇಮಾನಿ ಕಣ್ಡಾನಿ ವಿನಯಪಿಟಕಂ ನಾಮ.

ಕತಮಂ ಅಭಿಧಮ್ಮಪಿಟಕಂ? ಧಮ್ಮಸಙ್ಗಣೀ-ಪಕರಣಂ, ವಿಭಙ್ಗ-ಪಕರಣಂ, ಧಾತುಕಥಾ-ಪಕರಣಂ, ಪುಗ್ಗಲಪಞ್ಞತ್ತಿ-ಪಕರಣಂ, ಕಥಾವತ್ಥು-ಪಕರಣಂ, ಯಮಕ-ಪಕರಣಂ, ಪಟ್ಠಾನ-ಪಕರಣನ್ತಿ. ಇಮಾನಿ ಸತ್ತ ಪಕರಣಾನಿ ಅಭಿಧಮ್ಮಪಿಟಕಂ ನಾಮ. ಕತಮಂ ಸುತ್ತನ್ತಪಿಟಕಂ? ಸೀಲಕ್ಖನ್ಧವಗ್ಗಾದಿಕಂ, ಅವಸೇಸಂ ಬುದ್ಧವಚನಂ ಸುತ್ತನ್ತಪಿಟಕಂ ನಾಮ.

ಕಥಂ ನಿಕಾಯತೋ? ನಿಕಾಯಾ ಪಞ್ಚ ವಿಧಾ ಹೋನ್ತಿ. ದೀಘನಿಕಾಯೋ, ಮಜ್ಝಿಮನಿಕಾಯೋ, ಸಂಯುತ್ತನಿಕಾಯೋ, ಅಙ್ಗುತ್ತರನಿಕಾಯೋ, ಖುದ್ದಕನಿಕಾಯೋತಿ.

ತತ್ಥ ಕತಮೋ ದೀಘ-ನಿಕಾಯೋ? ಸೀಲಕ್ಖನ್ಧವಗ್ಗೋ, ಮಹಾವಗ್ಗೋ, ಪಾಥಿಕವಗ್ಗೋತಿ, ಇಮೇ ತಯೋ ವಗ್ಗಾ ದೀಘನಿಕಾಯೋ ನಾಮ. ಇಮೇಸು ತೀಸು ವಗ್ಗೇಸು, ಚತುತಿಂಸ ವಗ್ಗಾನಿ ಚ ಹೋನ್ತಿ. [ಚತುತಿಂಸೇವ ಸುತ್ತನ್ತಾ, ಸೀಲಕ್ಖನ್ಧವಗ್ಗಾದಿಕಾ, ಯಸ್ಸ ಭವನ್ತಿ ಸೋ ಯೇವ ದೀಘನಿಕಾಯ ನಾಮ ಹೋತಿ.]

ಕತಮೋ ಮಜ್ಝಿಮನಿಕಾಯೋ? ಮೂಲಪಣ್ಣಾಸೋ, ಮಜ್ಝಿಮಪಣ್ಣಾಸೋ, ಉಪರಿಪಣ್ಣಾಸೋತಿ, ಇಮೇ ತಯೋ ಪಣ್ಣಾಸಾ ಮಜ್ಝಿಮನಿಕಾಯೋ ನಾಮ. ಇಮೇಸು ತೀಸು ಪಣ್ಣಾಸೇಸು ದ್ವೇಪಞ್ಞಾಸಾಧಿಕ-ಸುತ್ತ-ಸತಾನಿ ಹೋನ್ತಿ [ದಿಯಡ್ಢಸತಸುತ್ತನ್ತಾ, ದ್ವಿ ಸುತ್ತಂ ಯಸ್ಸ ಸನ್ತಿಸೋ, ಮಜ್ಝಿಮನಿಕಾಯೋ ನಾಮೋ ಮೂಲಪಣ್ಣಾಸಮಾದಿ ಹೋತಿ.]

ಕತಮೋ ಸಂಯುತ್ತನಿಕಾಯೋ? ಸಗಾಥಾವಗ್ಗೋ, ನಿದಾನವಗ್ಗೋ, ಖನ್ಧಕವಗ್ಗೋ, ಸಳಾಯತನವಗ್ಗೋ, ಮಹಾವಗ್ಗೋತಿ, ಇಮೇ ಪಞ್ಚ ವಗ್ಗಾ ಸಂಯುತ್ತನಿಕಾಯೋ ನಾಮ. ಇಮೇಸು ಪಞ್ಚಸು ವಗ್ಗೇಸು ದ್ವಾಸಟ್ಠಿಸುತ್ತಸತ್ತಸತಾಧಿಕಸತ್ತ-ಸುತ್ತಸಹಸ್ಸಾನಿ ಹೋನ್ತಿ. [ದ್ವಾಸಟ್ಠಿ-ಸತ್ತ-ಸತಾನಿ, ಸತ್ತಸಹಸ್ಸಕಾನಿ ಚ.] ಸುತ್ತಾನಿ ಯಸ್ಸ ಹೋನ್ತಿ ಸೋ, ಸಗಾಥಾದಿಕವಗ್ಗಕೋ, ಸಂಯುತ್ತನಿಕಾಯೋ ನಾಮೋ ವೇದಿತಬ್ಬೋ ಚ ವಿಞ್ಞೂನಾತಿ.

ಕತಮೋ ಅಙ್ಗುತ್ತರನಿಕಾಯೋ? ಏಕ್ಕನಿಪಾತೋ, ದುಕ್ಕನಿಪಾತೋ, ತಿಕ್ಕನಿಪಾತೋ, ಚತುಕ್ಕನಿಪಾತೋ, ಪಞ್ಚಕನಿಪಾತೋ, ಛಕ್ಕನಿಪಾತೋ, ಸತ್ತಕನಿಪಾತೋ, ಅಟ್ಠಕನಿಪಾತೋ, ನವಕನಿಪಾತೋ, ದಸಕನಿಪಾತೋ, ಏಕಾದಸನಿಪಾತೋತಿ, ಇಮೇ ಏಕಾದಸ ನಿಪಾತಾ ಅಙ್ಗುತ್ತರನಿಕಾಯೋ ನಾಮ. ಇಮೇಸು ಏಕಾದಸ ನಿಪಾತೇಸು ಸತ್ತ-ಪಞ್ಞಾಸ-ಪಞ್ಚ-ಸತಾಧಿಕನವ-ಸುತ್ತ-ಸಹಸ್ಸಾನಿ ಹೋನ್ತಿ. [ನವಸುತ್ತಸಹಸ್ಸಾನಿ, ಪಞ್ಚಸತಮತ್ತಾನಿ ಚ, ಸತ್ತಪಞ್ಞಾಸಾಧಿಕಾನಿ, ಸುತ್ತಾನಿ ಯಸ್ಸ ಹೋನ್ತಿ ಸೋ, ಅಙ್ಗುತ್ತರನಿಕಾಯೋತಿ, ಏಕ್ಕನಿಪಾತಕಾದಿಕೋತಿ.]

ಕತಮೋ ಖುದ್ದಕನಿಕಾಯೋ? ಖುದ್ದಕಪಾಠೋ, ಧಮ್ಮಪದಂ, ಉದಾನಂ, ಇತಿವುತ್ತಕಂ, ಸುತ್ತನಿಪಾತೋ, ವಿಮಾನವತ್ಥು, ಪೇತವತ್ಥು, ಥೇರಕಥಾ, ಥೇರೀಕಥಾ, ಜಾತಕಂ, ಮಹಾನಿದ್ದೇಸೋ, ಪಟಿಸಮ್ಭಿದಾಮಗ್ಗೋ, ಅಪದಾನಂ, ಬುದ್ಧವಂಸೋ, ಚರಿಯಾಪಿಟಕಂ, ವಿನಯಪಿಟಕಂ, ಅಭಿಧಮ್ಮಪಿಟಕನ್ತಿ. ಇಮೇಸು ಸತ್ತರಸಸು ಗನ್ಥೇಸು ಅನೇಕಾನಿ ಸುತ್ತ-ಸಹಸ್ಸಾನಿ ಹೋನ್ತಿ. [ಅನೇಕಾನಿ ಸುತ್ತ-ಸಹಸ್ಸಾನಿ, ನಿದ್ದಿಟ್ಠಾನಿ ಮಹೇಸಿನಾ, ನಿಕಾಯೇ ಪಞ್ಚಮೇ ಇಮೇ, ಖುದ್ದಕೇ ಇತಿ ವಿಸುತೇತಿ.]

ಕಥಂ ಅಙ್ಗತೋ ಅಙ್ಗಹಿ ನವ ವಿಧಂ ಹೋತಿ? ಸುತ್ತಂ, ಗೇಯ್ಯಂ, ವೇಯ್ಯಾಕರಣಂ, ಗಾಥಾ, ಉದಾನಂ, ಇತಿವುತ್ತಕಂ, ಜಾತಕಂ, ಅಬ್ಭುತಧಮ್ಮಂ, ವೇದಲ್ಲನ್ತಿ, ನವಪ್ಪಭೇದಂ ಹೋತಿ. ತತ್ಥ ಉಭತೋ ವಿಭಙ್ಗನಿದ್ದೇಸಖನ್ಧಕಪರಿವಾರಾ, ಸುತ್ತನಿಪಾತೇ, ಮಙ್ಗಲಸುತ್ತ, ರತನಸುತ್ತ, ತುವಟ್ಟಕಸುತ್ತಾನಿ. ಅಞ್ಞಮ್ಪಿ ಸುತ್ತನಾಮಕಂ ತಥಾಗತವಚನಂ, ಸುತ್ತನ್ತಿ ವೇದಿತಬ್ಬಂ. ಸಬ್ಬಂ ಸಗಾಥಕಂ ಗೇಯ್ಯನ್ತಿ ವೇದಿತಬ್ಬಂ. ವಿಸೇಸನಸಂಯುತ್ತಕೇ ಸಕಲೋಪಿ ಸಗಾಥಕವಗ್ಗೋ, ಸಕಲಂ ಅಭಿಧಮ್ಮಪಿಟಕಂ ನಿಗಾಥಕಞ್ಚ ಸುತ್ತಯಞ್ಚ ಅಞ್ಞಮ್ಪಿ ಅಟ್ಠಹಿ ಅಙ್ಗೇಹಿ ಅಸಙ್ಗಹಿತಂ ಬುದ್ಧವಚನಂ ತಂ ವೇಯ್ಯಾಕರಣನ್ತಿ ವೇದಿತಬ್ಬಂ. ಧಮ್ಮಪದಂ, ಥೇರಕಥಾ, ಥೇರೀಕಥಾ, ಸುತ್ತನಿಪಾತೇ, ನೋ ಸುತ್ತನಾಮಿಕಾ ಸುದ್ಧಿಕಗಾಥಾ, ಗಾಥಾತಿ ವೇದಿತಬ್ಬಾ. ಸೋಮನಸ್ಸ ಞಾಣಮಯಿಕಗಾಥಾ ಪಟಿಕ-ಸಂಯುತ್ತಾ ದ್ವೇ ಅಸೀತಿಸುತ್ತನ್ತಾ ಉದಾನನ್ತಿ ವೇದಿತಬ್ಬಾ. ವುತ್ತಞ್ಹೇತಂ ಭಗವತಾತಿಆದಿನಯಪ್ಪವತ್ತಾ ದಸುತ್ತರಸತಸುತ್ತನ್ತಾ, ಇತಿವುತ್ತಕನ್ತಿ ವೇದಿತಬ್ಬಾ. ಅಪಣ್ಣಕಜಾತಕಾದೀನಿ ಪಞ್ಞಾಸಾದಿಕಾನಿ. ಪಞ್ಚಜಾತಕಸತಾನಿ, ಜಾತಕನ್ತಿ ವೇದಿತಬ್ಬಂ. ಚತ್ತಾರೋ ಮೇ ಭಿಕ್ಖವೇ ಅಚ್ಛರಿಯಾ ಅಭೂತಧಮ್ಮಾ, ಆನನ್ದೇತಿಆದಿನಯಪ್ಪವತ್ತಾ ಸಬ್ಬೇಪಿ ಅಚ್ಛರಿಯ ಅಭೂತಧಮ್ಮಪಟಿಸಂಯುತ್ತಾ ಸುತ್ತನ್ತಾ ಅಭೂತಧಮ್ಮನ್ತಿ ವೇದಿತಬ್ಬಾ. ಚುಲ್ಲವೇದಲ್ಲ, ಮಹಾವೇದಲ್ಲ, ಸಮ್ಮಾದಿಟ್ಠಿ, ಸಕ್ಕಪಞ್ಹ, ಸಙ್ಖಾರಭಾಜನಿಯ, ಮಹಾಪುಣ್ಣಮಸುತ್ತನ್ತಾದಯೋ ಸಬ್ಬೇಪಿ ವೇದಞ್ಚ ತುಟ್ಠಿಞ್ಚ ಲದ್ಧಾ [ಪುಚ್ಛ] ಲದ್ಧಾ ಪುಚ್ಛಿತಸುತ್ತನ್ತಾ, ವೇದಲ್ಲನ್ತಿ ವೇದಿತಬ್ಬಾ. ಕತಮಾನಿ ಚತುರಾಸೀತಿ ಧಮ್ಮಕ್ಖನ್ಧಸಹಸ್ಸಾನಿ ದುಜಾನಾನಿ, ಚತುರಾಸೀತಿ ಧಮ್ಮಕ್ಖನ್ಧಸಹಸ್ಸಾನಿ ಸಚೇ ವಿತ್ಥಾರೇನ ಕಥಿಸ್ಸಂ ಅತಿಪಪಞ್ಚೋ ಭವಿಸ್ಸತಿ. ತಸ್ಮಾ ನಯ ವಸೇನ ಕಥಿಸ್ಸಾಮಿ. ಏಕಂ ವತ್ಥು, ಏಕೋ ಧಮ್ಮಕ್ಖನ್ಧೋ, ಏಕಂ ನಿದಾನಂ ಏಕೋ ಧಮ್ಮಕ್ಖನ್ಧೋ, ಏಕಂ ಪಞ್ಹಾ ಪುಚ್ಛನ್ತಂ ಏಕೋ ಧಮ್ಮಕ್ಖನ್ಧೋ, ಏಕಂ ಪಞ್ಹಾ ವಿಸಜ್ಜನಂ ಏಕೋ ಧಮ್ಮಕ್ಖನ್ಧೋ, ಚತುರಾಸೀತಿ ಧಮ್ಮಕ್ಖನ್ಧಸಹಸ್ಸಾನಿ ಕೇನ ಭಾಸಿತಾನಿ, ಕತ್ಥ ಭಾಸಿತಾನಿ, ಕದಾ ಭಾಸಿತಾನಿ, ಕಮಾರಬ್ಭ ಭಾಸಿತಾನಿ, ಕಿಮತ್ಥಂ ಭಾಸಿತಾನಿ, ಕೇನ ಧಾರಿತಾನಿ, ಕೇನಾಭತಾನಿ, ಕಿಮತ್ಥಂ ಪರಿಯಾಪುಣಿತಬ್ಬಾನಿ. ತತ್ರಾಯಂ ವಿಸಜ್ಜನಾ, ಕೇನ ಭಾಸಿತಾನೀತಿ? ಬುದ್ಧಾನು ಬುದ್ಧೇಹಿ ಭಾಸಿತಾನಿ. ಕತ್ಥ ಭಾಸಿತಾನೀತಿ? ದೇವೇಸು ಚ ಮಾನುಸ್ಸೇಸು ಚ, ಭಾಸಿತಾನಿ. ಕದಾ ಭಾಸಿತಾನೀತಿ? ಭಗವತೋ ಧರಮಾನಕಾಲೇ ಚೇವ ಪಚ್ಛಿಮಕಾಲೇ ಚ ಭಾಸಿತಾನಿ. ಕತಮಾರಬ್ಭ ಭಾಸಿತಾನೀತಿ? ಪಞ್ಚವಗ್ಗಿಯಾದಿಕೇ ವೇನೇಯ್ಯ ಬನ್ಧವೇ ಆರಬ್ಭ ಭಾಸಿತಾನೀತಿ. ಕಿಮತ್ಥಂ ಭಾಸಿತಾನೀತಿ? ತಿವಜ್ಜಞ್ಚ ಅವಜ್ಜಞ್ಚ ಞತ್ವಾ ವಜ್ಜಂ ಪಹಾಯ ಅವಜ್ಜೇ ಪಟಿಪತ್ತಿತ್ವಾ ನಿಬ್ಬಾನಪರಿಯನ್ತೇ. ದಿಟ್ಠ-ಧಮ್ಮಿಕಸಮ್ಪರಾಯಿಕತ್ಥೇ ಸಮ್ಪಾಪುಣಿತುಂ.

ಕೇನ ಧಾರಿತಾನೀತಿ? ಅನುಬುದ್ಧೇಹಿ ಚೇವ ಸಿಸ್ಸಾನುಸಿಸ್ಸೇಹಿ ಚ ಧಾರಿತಾನಿ. ಕೇನಾ ಭತಾನೀತಿ? ಆಚರಿಯ ಪರಂಪರೇಹಿ ಆಭತಾನಿ. ಕಿಮತ್ಥಂ ಪರಿಯಾಪುಣಿತಬ್ಬಾನೀತಿ? ವಜ್ಜಞ್ಚ ಅವಜ್ಜಞ್ಚ ಞತ್ವಾ ವಜ್ಜಂ ಪಹಾಯ ಅವಜ್ಜೇ ಪಟಿಪತ್ತಿತ್ವಾ ನಿಬ್ಬಾನಪರಿಯನ್ತೇ ದಿಟ್ಠಧಮ್ಮಿಕಸಮ್ಪರಾಯಿಕತ್ಥೇ, ಸಂಪಾಪುಣಿತುಂ, ಯದೇವಂ ತಾಯ ನಿಬ್ಬಾನಪರಿಯನ್ತೇ ದಿಟ್ಠಧಮ್ಮಿಕಸಮ್ಪರಾಯಿಕತ್ಥೇ ಸಾಧಿಕಾನಿ ಹೋನ್ತಿ. ತೇವ ತತ್ಥ ಕೇಹಿ ಅಪ್ಪಮತ್ತೇನ ಪರಿಯಾಪುಣಿತಬ್ಬಾನಿ ಧಾರೇತಬ್ಬಾನಿ ಧಾರೇತಬ್ಬಾನಿ ವಾಚೇತಬ್ಬಾನಿ ಸಜ್ಝಾಯಂ ಕಾತಬ್ಬಾನೀತಿ [ಇತಿ ಚುಲ್ಲಗನ್ಥವಂಸೇ ಪಿಟಕತ್ತಯ ದೀಪಕೋ ನಾಮ ಪಠಮೋ ಪರಿಚ್ಛೇದೋ.]

ಆಚರಿಯೋ ಪನ ಅತ್ಥಿ. ಪೋರಾಣಾಚರಿಯಾ ಅತ್ಥಿ, ಅಟ್ಠಕಥಾಚರಿಯಾ ಅತ್ಥಿ, ಗನ್ಥಕಾರಕಾಚರಿಯಾ ಅತ್ಥಿ, ತಿವಿಧನಾಮಿಕಾಚರಿಯಾ. ಕತಮೇ ಪೋರಾಣಾಚರಿಯಾ? ಪಠಮಸಙ್ಗಾಯನಾಯಂ ಪಞ್ಚಸತಾ ಖೀಣಾಸವಾ ಪಞ್ಚನ್ನಂ ನಿಕಾಯಾನಂ ನಾಮಞ್ಚ ಅತ್ಥಞ್ಚ ಅಧಿಪ್ಪಾಯಞ್ಚ ಯದಞ್ಚ ಬ್ಯಞ್ಜನ ಸೋಧನಞ್ಚ ಅವಸೇಸಂ ಕಿಚ್ಚಂ ಕರಿಂಸು. ದುತಿಯಸಙ್ಗಾಯನಾಯಂ ಸತ್ತಸತಾ ಖೀಣಾಸವಾ ತೇಸಂಯೇವ ಸದ್ದತ್ಥಾದಿಕಂ ಕಿಚ್ಚಂ ಪುನ ಕರಿಂಸು. ತತಿಯಸಙ್ಗಾಯನಾಯಂ ಸಹಸ್ಸಮತ್ತಾ ಖೀಣಾಸವಾ ತೇಸಂಯೇವ ಸದ್ದತ್ಥಾದಿಕಂ ಕಿಚ್ಚಂ ಪುನ ಕರಿಂಸು. ಇಚ್ಚೇವಂ ದ್ವೇಸತಾಧಿಕಾ ದ್ವೇಸಹಸ್ಸ ಖೀಣಾಸವಾ ಮಹಾಕಚ್ಚಾಯನಂ ಠಪೇತ್ವಾ ಅವಸೇಸಾ ಪೋರಾಣಾಚರಿಯಾ ನಾಮ. ಯೇ ಪೋರಾಣಾಚರಿಯಾ ತೇಯೇವ ಅಟ್ಠಕಥಾಚರಿಯಾ ನಾಮ. ಕತಮೇ ಗನ್ಥಕಾರಕಾಚರಿಯಾ? ಮಹಾಅಟ್ಠಕಥಿಕಾಪೇಭದಅನೇಕಾಚರಿಯಾ ಗನ್ಥಕಾರಕಾಚರಿಯಾ ನಾಮ. ಕತಮೇ ತಿವಿಧ ನಾಮಾಚರಿಯಾ ಮಹಾಕಚ್ಚಾಯನೋ ತಿವಿಧನಾಮಂ. ಕತಮೇ ಗನ್ಥಾ ಮಹಾಕಚ್ಚಾಯನೇನ ಕತಾ? ಕಚ್ಚಾಯನಗನ್ಥೋ, ಮಹಾನಿರುತ್ತಿಗನ್ಥೋ, ಚುಲ್ಲನಿರುತ್ತಿಗನ್ಥೋ, ಯಮಕಗನ್ಥೋ, ನೇತ್ತಿಗನ್ಥೋ, ಪೇಟಕೋಪದೇಸಗನ್ಥೋತಿ, ಇಮೇ ಛ ಗನ್ಥಾ ಮಹಾಕಚ್ಚಾಯನೇನ ಕತಾ. ಕತಮೇ ಅನೇಕಾಚರಿಯೇನ ಕತಾ ಗನ್ಥಾ? ಮಹಾಪಚ್ಚರಿಕಾಚರಿಯೋ ಮಹಾಪಚ್ಚರಿಯಂ ನಾಮ ಗನ್ಥಂ ಅಕಾಸಿ. ಮಹಾಕುರುನ್ದಿಕಾಚರಿಯೋ ಕುರುನ್ದಿ ನಾಮ ಗನ್ಥಂ ಅಕಾಸಿ. ಅಞ್ಞತರೋ ಆಚರಿಯೋ ಮಹಾಪಚ್ಚರಿಯ ಗನ್ಥಸ್ಸ ಅಟ್ಠಕಥಂ ಅಕಾಸಿ. ಅಞ್ಞತರೋ ಆಚರಿಯೋ ಕುರುನ್ದಿ ಗನ್ಥಸ್ಸ ಅಟ್ಠಕಥಂ ಅಕಾಸಿ, ಮಹಾಬುದ್ಧಘೋಸಾ ನಾಮಚರಿಯೋ ವಿಸುದ್ಧಿಮಗ್ಗೋ ದೀಘನಿಕಾಯಸ್ಸ ಸುಮಙ್ಗಲವಿಲಾಸನಿ ನಾಮ ಅಟ್ಠಕಥಾ, ಮಜ್ಝಿಮನಿಕಾಯಸ್ಸ ಪಪಞ್ಚಸೂದನೀ ನಾಮ ಅಟ್ಠಕಥಾ, ಸಂಯುತ್ತನಿಕಾಯಸ್ಸ ಸಾರತ್ಥಪ್ಪಕಾಸಿನೀ ನಾಮ ಅಟ್ಠಕಥಾ, ಅಙ್ಗುತ್ತರನಿಕಾಯಸ್ಸ ಮನೋರಥಪೂರಣೀ ನಾಮ ಅಟ್ಠಕಥಾ, ಪಞ್ಚವಿನಯ ಗನ್ಥಾನಂ ಸಮನ್ತಪಾಸಾದಿಕಾ ನಾಮ ಅಟ್ಠಕಥಾ, ಸತ್ತನ್ನಂ ಅಭಿಧಮ್ಮಗನ್ಥಾನಂ ಪರಮತ್ಥಕಥಾ ನಾಮ ಅಟ್ಠಕಥಾ, ಪಾತಿಮೋಕ್ಖ ಸಂಖಾತಾಯ ಮಾತಿಕಾಯ ಕಙ್ಖಾವಿತರಣೀತಿ ವಿಸುದ್ಧಿ ನಾಮ ಅಟ್ಠಕಥಾ, ಧಮ್ಮಪದಸ್ಸ ಅಟ್ಠಕಥಾ, ಜಾತಕಸ್ಸ ಅಟ್ಠಕಥಾ, ಖುದ್ದಕಪಾಠಸ್ಸ ಅಟ್ಠಕಥಾ, ಸುತ್ತನಿಪಾತಸ್ಸ ಅಟ್ಠಕಥಾ, ಅಪದಾನಸ್ಸ ಅಟ್ಠಕಥಾತಿ, ಇಮೇ ತೇರಸ ಗನ್ಥೇ ಅಕಾಸಿ. ಬುದ್ಧದತ್ತೋನಾಮಾಚರಿಯೋ ವಿನಯ ವಿನಿಚ್ಛಯೋ, ಉತ್ತರವಿನಿಚ್ಛಯೋ, ಅಭಿಧಮ್ಮಾವತಾರೋ, ಬುದ್ಧವಂಸಸ್ಸ ಮಧುರತ್ಥವಿಲಾಸಿನೀ ನಾಮ ಅಟ್ಠಕಥಾತಿ, ಇಮೇ ಚತ್ತಾರೋ ಗನ್ಥೇ ಅಕಾಸಿ. ಆನನ್ದೋನಾಮಾಚರಿಯಾ ಸತ್ತಾಭಿಧಮ್ಮಗನ್ಥಟ್ಠಕಥಾಯ ಮೂಟೀಕಂ ನಾಮ ಟೀಕಂ ಅಕಾಸಿ. ಧಮ್ಮಪಾಲಾಚರಿಯೋ ನೇತ್ತಿಪ್ಪಕರಣಟ್ಠಕಥಾ, ಇತಿವುತ್ತಕಟ್ಠಕಥಾ, ಉದಾನಟ್ಠಕಥಾ, ಚರಿಯಾಪಿಟಕಟ್ಠಕಥಾ, ಥೇರಕಥಟ್ಠಕಥಾ, ಥೇರೀಕಥಟ್ಠಕಥಾ, ವಿಮಾನವತ್ಥುಸ್ಸ ವಿಮಲವಿಲಾಸಿನಿ ನಾಮ ಅಟ್ಠಕಥಾ, ಪೇತವತ್ಥುಸ್ಸ ವಿಮಲವಿಲಾಸಿನಿ ನಾಮ ಅಟ್ಠಕಥಾ, ವಿಸುದ್ಧಿಮಗ್ಗಸ್ಸ ಪರಮತ್ಥಮಞ್ಜೂಸಾ ನಾಮ ಟೀಕಾ, ದೀಘನಿಕಾಯಸ್ಸ ಅಟ್ಠಕಥಾದೀನಂ ಚತುನ್ನಂ ಅಟ್ಠಕಥಾನಂ ಲೀನತ್ಥಪ್ಪಕಾಸನಿ ನಾಮ ಟೀಕಾ, ಜಾತಕಟ್ಠಕಥಾಯ ಲೀನತ್ಥಪ್ಪಕಾಸನಿ ನಾಮ ಟೀಕಾ, ನೇತ್ತಿಪಕರಣಟ್ಠಕಥಾಯ ಟೀಕಾ, ಬುದ್ಧವಂಸಟ್ಠಕಥಾಯ ಪರಮತ್ಥದೀಪನೀ ನಾಮ ಟೀಕಾ, ಅಭಿಧಮ್ಮಟ್ಠಕಥಾಯಟೀಕಾ ಲೀನತ್ಥವಣ್ಣನಾ ನಾಮ ಅನುಟೀಕಾತಿ ಇಮೇ ಚುದ್ದಸ ಮತ್ತೇ ಗನ್ಥೇ ಅಕಾಸಿ.

ದ್ವೇ ಪುಬ್ಬಾಚರಿಯಾನಾಮಾ ಚರಿಯಾನಿರುತ್ತಿ ಮಞ್ಜೂಸಂ ನಾಮ ಚುಲ್ಲನಿರುತ್ತಿ ಟೀಕಞ್ಚ ಮಹಾನಿರುತ್ತಿ ಸಙ್ಖೇಪಞ್ಚ ಅಕಂಸು. ಮಹಾವಜಿರಬುದ್ಧಿನಾಮಾಚರಿಯೋ ವಿನಯಗಣ್ಠಿನಾಮ ಪಕರಣಂ ಅಕಾಸಿ. ದೀಪಙ್ಕರಸಙ್ಖಾತೋ ವಿಮಲಬುದ್ಧಿ ನಾಮಾಚರಿಯೋ ಮುಖಮತ್ತದೀಪನೀ ನಾಮಕಂ ನ್ಯಾಸಪ್ಪಕರಣಂ ಅಕಾಸಿ. ಚುಲ್ಲವಜಿರಬುದ್ಧಿ ನಾಮಾಚರಿಯೋ ಅತ್ಥಬ್ಯಾಖ್ಯಾನಂ ನಾಮ ಪಕರಣಂ ಅಕಾಸಿ.

ದೀಪಙ್ಕರೋ ನಾಮಾಚರಿಯೋ ರೂಪಸಿದ್ಧಿ ಪಕರಣಂ, ರೂಪಸಿದ್ಧಿ ಟೀಕಂ, ಸಮ್ಪಪಞ್ಚ ಸುತ್ತಞ್ಚೇತಿ ತಿವಿಧಂ ಪಕರಣಂ ಅಕಾಸಿ. ಆನನ್ದಾಚರಿಯಸ್ಸ ಜೇಟ್ಠಸಿಸ್ಸೋ ಧಮ್ಮಪಾಲೋ ನಾಮಾಚರಿಯೋ ಸಚ್ಚಸಙ್ಖೇಪಂ ನಾಮ ಪಕರಣಂ ಅಕಾಸಿ. ಕಸ್ಸಪೋ ನಾಮಾಚರಿಯೋ ಮೋಹವಿಚ್ಛೇದನೀ, ವಿಮತಿಚ್ಛೇದನೀ, ದಸಬುದ್ಧವಂಸೋ, ಅನಾಗತವಂಸೋತಿ, ಚತುವಿಧಂ ಪಕರಣಂ ಅಕಾಸಿ.

ಮಹಾನಾಮೋ ನಾಮಾಚರಿಯೋ, ಸದ್ಧಮ್ಮಪಕಾಸನೀ ನಾಮ ಪಟಿಸಮ್ಭಿದಾಮಗ್ಗಸ್ಸ ಅಟ್ಠಕಥಂ ಅಕಾಸಿ. ದೀಪವಂಸೋ, ಥೂಪವಂಸೋ, ಬೋಧಿವಂಸೋ, ಚೂಲವಂಸೋ, ಮಹಾವಂಸೋ, ಪಟಿಸಮ್ಭಿದಾಮಗ್ಗಟ್ಠಕಥಾ ಗಣ್ಠಿ ಚೇತಿ ಇಮೇ ಛ ಗನ್ಥಾ ಮಹಾನಾಮಾಚರಿ ವಿಸುಂ ವಿಸುಂ ಕತಾ.

ನವೋ ಮಹಾನಾಮೋ ನಾಮಾಚರಿಯೋ ನವಂ ಮಹಾವಂಸ ನಾಮ ಪಕರಣಂ ಅಕಾಸಿ. ಉಪಸೇನೋ ನಾಮಾಚರಿಯೋ ಸದ್ಧಮ್ಮಪಜ್ಜೋತಿಕಂ ನಾಮ ಮಹಾನಿದ್ದೇಸಸ್ಸ ಅಟ್ಠಕಥಂ ಅಕಾಸಿ. ಮೋಗ್ಗಲಾನೋ ನಾಮಾಚರಿಯೋ ಮೋಗ್ಗಲಾನಬ್ಯಾಕರಣಂ ನಾಮ ಪಕರಣಂ ಅಕಾಸಿ. ಸಙ್ಘರಕ್ಖಿತೋ ನಾಮಾಚರಿಯೋ, ಸುಬೋಧಾಲಙ್ಕಾರಂ ನಾಮ ಪಕರಣಂ ಅಕಾಸಿ. ವುತ್ತೋದಯಕಾರೋ ನಾಮಾಚರಿಯೋ ವುತ್ತೋದಯಂ ನಾಮ ಪಕರಣಂ ಅಕಾಸಿ. ಧಮ್ಮಸಿರಿ ನಾಮಾಚರಿಯೋ ಖುದ್ದಕಸಿಕ್ಖಂ ನಾಮ ಪಕರಣಂ ಅಕಾಸಿ. ಪುರಾಣಖುದ್ದಸಿಕ್ಖಾಯ ಟೀಕಾ, ಮೂಲಸಿಕ್ಖಾ ಚೇತಿ, ಇಮೇ ದ್ವೇ ಗನ್ಥಾ ದ್ವೇಹಾಚರಿಯೇಹಿ ವಿಸುಂ ವಿಸುಂ ಕತಾ.

ಅನುರುದ್ಧೋ ನಾಮಾಚರಿಯೋ ಪರಮತ್ಥವಿನಿಚ್ಛಯಂ, ನಾಮರೂಪಪರಿಚ್ಛೇದಂ, ಅಭಿಧಮ್ಮತ್ಥಸಙ್ಗಹಂ ಚೇತಿ ತಿವಿಧಂ ಪಕರಣಂ ಅಕಾಸಿ. ಖೇಮೋ ನಾಮಾಚರಿಯೋ ಖೇಮಂ ನಾಮ ಪಕರಣಂ ಅಕಾಸಿ. ಸಾರಿಪುತ್ತೋ ನಾಮಾಚರಿಯೋ ವಿನಯಟ್ಠಕಥಾಯ ಸಾರತ್ಥದೀಪನೀ ನಾಮ ಟೀಕಂ; ವಿನಯಸಙ್ಗಹಪಕರಣಂ, ವಿನಯಸಙ್ಗಹಸ್ಸಟೀಕಂ; ಅಙ್ಗುತ್ತರಟ್ಠಕಥಾಯ ಸಾರತ್ಥಮಞ್ಜೂಸಂ ನಾಮ ನವಂ ಟೀಕಂ; ಪಞ್ಚಿಕಾ ಟೀಕಞ್ಚೇತಿ, ಇಮೇ ಪಞ್ಚ ಗನ್ಥೇ ಅಕಾಸಿ. ಬುದ್ಧನಾಗೋ ನಾಮಾಚರಿಯೋ ವಿನಯತ್ಥಮಞ್ಜೂಸಂ ನಾಮ ಕಙ್ಖಾವಿತರಣೀಯಾ ಟೀಕಂ ಅಕಾಸಿ. ನವೋ ಮೋಗ್ಗಲಾನೋ ನಾಮಾಚರಿಯೋ ಅಭಿಧಾನಪ್ಪದೀಪಿಕಂ ನಾಮ ಪಕರಣಂ ಅಕಾಸಿ. ವಾಚಿಸ್ಸರೋ ನಾಮಾಚರಿಯೋ ಮಹಾಸಾಮಿ ನಾಮ ಸುಬೋಧಾಲಙ್ಕಾರಸ್ಸ ಟೀಕಾ, ವುತ್ತೋದಯ ವಿವರಣಂ, ಸುಮಙ್ಗಲಪ್ಪಸಾದನಿ ನಾಮ ಖುದ್ದಸಿಕ್ಖಾಯ ಟೀಕಾ; ಸಮ್ಬನ್ಧಚಿನ್ತಾ, ಸಮ್ಬನ್ಧಚಿನ್ತಾಯ ಟೀಕಾ; ಬಾಲಾವತಾರೋ, ಮೋಗ್ಗಲಾನಬ್ಯಾಕರಣಸ್ಸ ಪಞ್ಚಿಕಾಯ ಟೀಕಾ; ಯೋಗವಿನಿಚ್ಛಯೋ, ವಿನಯವಿನಿಚ್ಛಯಸ್ಸ ಟೀಕಾ, ಉತ್ತರವಿನಿಚ್ಛಯಸ್ಸ ಟೀಕಾ, ನಾಮರೂಪ-ಪರಿಚ್ಛೇದಸ್ಸ ವಿಭಾಗೋ, ಸದ್ದತ್ಥಸ್ಸ ಪದರೂಪವಿಭಾವನಂ; ಖೇಮಸ್ಸ ಪಕರಣಸ್ಸ ಟೀಕಾ, ಸೀಮಾಲಙ್ಕಾರೋ, ಮೂಲಸಿಕ್ಖಾಯ ಟೀಕಾ, ರೂಪವಿಭಾಗೋ, ಪಚ್ಚಯಸಙ್ಗಹೋ, ಸಚ್ಚಸಙ್ಖೇಪಸ್ಸ ಟೀಕಾ ಚೇತಿ, ಇಮೇ ಅಟ್ಠಾರಸ ಗನ್ಥೇ ಅಕಾಸಿ.

ಸುಮಙ್ಗಲೋ ನಾಮಾಚರಿಯೋ ಅಭಿಧಮ್ಮಾವತಾರಸ್ಸಟೀಕಂ, ಅಭಿಧಮ್ಮತ್ಥಸಙ್ಗಹಸ್ಸಟೀಕಞ್ಚ ದುವಿಧಂ ಪಕರಣಂ ಅಕಾಸಿ. ಬುದ್ಧಪಿಯೋ ನಾಮಾಚರಿಯೋ ಸಾರತ್ಥಸಙ್ಗಹಂ ನಾಮ ಪಕರಣಂ ಅಕಾಸಿ. ಧಮ್ಮಕಿತ್ತಿ ನಾಮಾಚರಿಯೋ ದನ್ತಧಾತು ಪಕರಣಂ ಅಕಾಸಿ. ಮೇಧಙ್ಕರೋ ನಾಮಾಚರಿಯೋ ಜಿನಚರಿತಂ ನಾಮ ಪಕರಣಂ ಅಕಾಸಿ. ಬುದ್ಧರಕ್ಖಿತೋ ನಾಮಾಚರಿಯೋ ಜಿನಲಙ್ಕಾರಂ, ಜಿನಲಙ್ಕಾರಸ್ಸ ಟೀಕಞ್ಚಾತಿ ದುವಿಧಂ ಪಕರಣಂ ಅಕಾಸಿ. ಉಪತಿಸ್ಸೋ ನಾಮಾಚರಿಯೋ ಅನಾಗತವಂಸಸ್ಸ ಅಟ್ಠಕಥಂ ಅಕಾಸಿ.

ಕಙ್ಖಾವಿತರಣೀಯಾ ಲೀನತ್ಥಪ್ಪಕಾಸಿನಿ, ನಿಸನ್ದೇಹೋ, ಧಮ್ಮಾನುಸಾರಣೀ, ಞೇಯ್ಯಾಸನ್ತತಿ, ಞೇಯ್ಯಾಸನ್ತತಿಯಾ ಟೀಕಾ, ಸುಮತಾದಾವತಾರೋ, ಲೋಕಪಞ್ಞತ್ತಿ ಪಕರಣಂ, ತಥಾಗತುಪ್ಪತ್ತಿ ಪಕರಣಂ, ನಲಾಟಧಾತು ವಣ್ಣನಾ, ಸೀಹಳವತ್ಥು, ಧಮ್ಮದೀಪಕೋ, ಪಟಿಪತ್ತಿಸಙ್ಗಹೋ, ವಿಸುದ್ಧಿಮಗ್ಗಣ್ಠಿ, ಅಭಿಧಮ್ಮಗಣ್ಠಿ, ನೇತ್ತಿಪಕರಣಗಣ್ಠಿ, ವಿಸುದ್ಧಿಮಗ್ಗಚುಲ್ಲನವಟೀಕಾ, ಸೋತಬ್ಬಮಾಲಿನೀ, ಪಸಾದಜನನೀ, ಓಕಾಸಲೋಕೋ, ಸುಬೋಧಾಲಙ್ಕಾರಸ್ಸ ನವ ಟೀಕಾ ಚೇತಿ, ಇಮೇ ವೀಸತಿ ಗನ್ಥಾ ವೀಸತಾಚರಿಯೇಹಿ ವಿಸುಂ ವಿಸುಂ ಕತಾ.

ಸದ್ಧಮ್ಮಸಿರಿ ನಾಮಾಚರಿಯೋ ಸದ್ದತ್ಥಭೇದಚಿನ್ತಾ ನಾಮ ಪಕರಣಂ ಅಕಾಸಿ. ದೇವೋ ನಾಮಾಚರಿಯೋ ಸುಮನ ಕೂಟವಣ್ಣನಂ ನಾಮ ಪಕರಣಂ ಅಕಾಸಿ. ಚುಲ್ಲಬುದ್ಧಘೋಸೋ ನಾಮಾಚರಿಯೋ ಸೋತತ್ಥಕಿನಿದಾನಂ ನಾಮ ಪಕರಣಂ ಅಕಾಸಿ. ರಟ್ಠಪಾಲೋ ನಾಮಾಚರಿಯೋ ಮಧುರಸಙ್ಗಾಹಣೀಕಿತ್ತಿ ನಾಮ ಪಕರಣಂ ಅಕಾಸಿ. ಸುಭೂತಚನ್ದೋ ನಾಮಾಚರಿಯೋ ಲಿಙ್ಗತ್ಥವಿವರಣ-ಪಕರಣಂ ಅಕಾಸಿ. ಅಗ್ಗವಂಸೋ ನಾಮಾಚರಿಯೋ ಸದ್ದನೀತಿ ಪಕರಣಂ ನಾಮ ಅಕಾಸಿ. ವಜಿರಬುದ್ಧಿ ನಾಮಾಚರಿಯೋ ಮಹಾಟೀಕಂ ನಾಮ ನ್ಯಾಸಪಕರಣಟೀಕಂ ಅಕಾಸಿ. ಗುಣಸಾಗರೋ ನಾಮಾಚರಿಯೋ ಮುಖಮತ್ತಸಾರಂ, ಮುಖಮತ್ತಸಾರಸ್ಸ ಟೀಕಞ್ಚ ದುವಿಧಂ ಪಕರಣಂ ಅಕಾಸಿ. ಅಭಯೋ ನಾಮಾಚರಿಯೋ ಸದ್ದತ್ಥಭೇದಚಿನ್ತಾಯ ಮಹಾಟೀಕಂ ಅಕಾಸಿ. ಞಾಣಸಾಗರೋ ನಾಮಾಚರಿಯೋ ಲಿಙ್ಗತ್ಥವಿವರಣಪ್ಪಕಾಸನಂ ನಾಮ ಪಕರಣಂ ಅಕಾಸಿ. ಅಞ್ಞತರೋ ಆಚರಿಯೋ ಗೂಳತ್ಥಟೀಕಂ, ಬಾಲಪ್ಪಬೋಧನಞ್ಚ ದುವಿಧಂ ಪಕರಣಂ ಅಕಾಸಿ. ಅಞ್ಞತರೋ ಆಚರಿಯೋ ಸದ್ದತ್ಥ-ಭೇದಚಿನ್ತಾಯ ಮಜ್ಝಿಮಟೀಕಂ ಅಕಾಸಿ. ಉತ್ತಮೋ ನಾಮಾಚರಿಯೋ ಬಾಲಾವತಾರಟೀಕಂ, ಲಿಙ್ಗತ್ಥವಿವರಣಟೀಕಞ್ಚ ದುವಿಧಂ ಪಕರಣಂ ಅಕಾಸಿ. ಅಞ್ಞತರೋ ಆಚರಿಯೋ ಸದ್ದತ್ಥಭೇದಚಿನ್ತಾಯ ನವ-ಟೀಕಂ ಅಕಾಸಿ. ಏಕೋ ಅಮಚ್ಚೋ ಅಭಿಧಾನಪ್ಪದೀಪಿಕಾಯಟೀಕಂ, ಗಣ್ಠಿಪಕರಣಸ್ಸ ದಣ್ಡೀಪ್ಪಕರಣಸ್ಸ ಮಾಗಧಭೂತಂ ಟೀಕಂ, ಕೋಲದ್ಧಜನಸ್ಸ ಸಕಟಭಾಸಾಯ ಕತಟೀಕಞ್ಚ ತಿವಿಧಂ ಪಕರಣಂ ಅಕಾಸಿ. ಧಮ್ಮಸೇನಾಪತಿ ನಾಮಾಚರಿಯೋ ಕಾರಿಕಂ, ಏತಿಮಾಸಪಿದೀಪನೀ, ಮನೋಹಾರಞ್ಚ ತಿವಿಧಂ ಪಕರಣಂ ಅಕಾಸಿ. ಅಞ್ಞತರೋ ಆಚರಿಯೋ ಕಾರಿಕಾಯ ಟೀಕಂ ಅಕಾಸಿ. ಅಞ್ಞತರೋ ಆಚರಿಯೋ ಏತಿಮಾಸಪಿದೀಪಿಕಾಯ ಟೀಕಂ ಅಕಾಸಿ.

ಅಞ್ಞತರೋ ಆಚರಿಯೋ ಸದ್ದಬಿನ್ದು ನಾಮ ಪಕರಣಂ ಅಕಾಸಿ. ಸದ್ಧಮ್ಮಗುರು ನಾಮಾಚರಿಯೋ ಸದ್ದವುತ್ತಿಪ್ಪಕಾಸಕಂ ನಾಮ ಪಕರಣಂ ಅಕಾಸಿ. ಸಾರಿಪುತ್ತೋ ನಾಮಾಚರಿಯೋ ಸದ್ದವುತ್ತಿಪ್ಪಕಾಸಕಸ್ಸ ಟೀಕಂ ಅಕಾಸಿ. ಅಞ್ಞತರೋ ಆಚರಿಯೋ ಕಚ್ಚಾಯನಸಾರಂ ನಾಮ ಪಕರಣಂ ಕಚ್ಚಾಯನಸಾರಸ್ಸ ಟೀಕಞ್ಚ ದುವಿಧಂ ಪಕರಣಂ ಅಕಾಸಿ. ನವೋ ಮೇಧಙ್ಕರೋ ನಾಮಾಚರಿಯೋ ಲೋಕದೀಪಕಸಾರಂ ನಾಮ ಪಕರಣಂ ಅಕಾಸಿ. ಅಗ್ಗಪಣ್ಡಿತೋ ನಾಮಾಚರಿಯೋ ಲೋಕುಪ್ಪತ್ತಿ ನಾಮ ಪಕರಣಂ ಅಕಾಸಿ. ಚೀವರೋ ನಾಮಾಚರಿಯೋ ಜಙ್ಘದಾಸಕಸ್ಸ ಟೀಕಂ ಅಕಾಸಿ. ಮಾತಿಕತ್ಥದೀಪನೀ, ಅಭಿಧಮ್ಮತ್ಥಸಙ್ಗಹವಣ್ಣನಾ, ಸೀಮಾಲಙ್ಕಾರಸ್ಸಟೀಕಾ, ವಿನಯಸಮುಟ್ಠಾನದೀಪನೀ ಟೀಕಾ, ಗಣ್ಠಿ ಸಾರೋ, ಪಟ್ಠಾನಗಣನಾ ನಯೋ, ಸುತ್ತನಿದ್ದೇಸೋ, ಪಾತಿಮೋಕ್ಖೋ, ಚೇತಿ, ಇಮೇ ಅಟ್ಠ ಗನ್ಥೇ ಸದ್ಧಮ್ಮಜೋತಿಪಾಲಾಚರಿಯೋ ಅಕಾಸಿ. ವಿಮಲಬುದ್ಧಿ ನಾಮಾಚರಿಯೋ ಅಭಿಧಮ್ಮ-ಪನ್ನರಸಟ್ಠಾನಂ ನಾಮ ಪಕರಣಂ ಅಕಾಸಿ. ನವೋ ವಿಮಲಬುದ್ಧಿ ನಾಮಾಚರಿಯೋ ಸದ್ದಸಾರತ್ಥಜಾಲಿನೀ, ಸದ್ದಸಾರತ್ಥಜಾಲಿನಿಯಾ ಟೀಕಾ, ವುತ್ತೋದಯ ಟೀಕಾ, ಪರಮತ್ಥಮಞ್ಜೂಸಾ ನಾಮ ಅಭಿಧಮ್ಮಸಙ್ಗಹಟೀಕಾಯ ಅನುಟೀಕಾ ದಸಗಣ್ಠಿವಣ್ಣನಾ, ಮಾಗಧಭೂತಾವಿದಗ್ಗಮುಖಮಣ್ಡನಟೀಕಾ ಚೇತಿ ಇಮೇ ಛ ಗನ್ಥೇ ಅಕಾಸಿ. ಅಞ್ಞತರೋ ಆಚರಿಯೋ ಪಞ್ಚಪಕರಣಟೀಕಾಯ ನವಾನುಟೀಕಂ ಅಕಾಸಿ. ಅರಿಯವಂಸೋ ನಾಮಾಚರಿಯೋ ಅಭಿಧಮ್ಮಸಙ್ಗಹ-ಟೀಕಾಯ [ಪರಮತ್ಥ] ಮಣಿಸಾರಮಞ್ಜೂಸಂ ನಾಮ ನವಾನುಟೀಕಂ ಅಕಾಸಿ. ಅಭಿಧಮ್ಮತ್ಥಸಙ್ಗಹಸ್ಸ ಟೀಕಾ, ಪೇಟಕೋಪದೇಸಸ್ಸ ಟೀಕಾ, ಚತುಭಾಣವಾರಸ್ಸ ಅಟ್ಠಕಥಾ, ಮಹಾಸಾರಪಕಾಸನೀ, ಮಹಾದೀಪನೀ, ಸಾರತ್ಥದೀಪನೀ ಗತಿ ಪಕರಣಂ, ಹತ್ಥಸಾರೋ, ಭುಮ್ಮಸಙ್ಗಹೋ, ಭುಮ್ಮನಿದ್ದೇಸೋ, ದಸವತ್ಥುಕಾಯವಿರತಿಟೀಕಾ, ಜೋತನಾ ನಿರುತ್ತಿ, ವಿಭತ್ತಿಕಥಾ, ಕಚ್ಚಾಯನವಿವರಣಾ, ಸದ್ಧಮ್ಮಮಾಲಿನೀ, ಪಞ್ಚಗತಿ ವಣ್ಣನಾ, ಬಾಲಚಿತ್ತಪಬೋಧನಂ, ಧಮ್ಮಚಕ್ಕಸುತ್ತಸ್ಸ ನವಟ್ಠಕಥಾ, ದನ್ತಧಾತು ಪಕರಣಸ್ಸ ಟೀಕಾ ಚೇತಿ, ಇಮೇ ವೀಸತಿ ಗನ್ಥಾ ನಾನಾಚರಿಯೇಹಿ ಕತಾ, ಅಞ್ಞಾನಿ ಪನ ಪಕರಣಾನಿ ಅತ್ಥಿ.

ಕತಮಾನಿ ಸದ್ಧಮ್ಮೋ ಪಾಯನೋ, ಬಾಲಪ್ಪಬೋಧನಪಕರಣಸ್ಸ ಟೀಕಾ ಚ, ಜಿನಾಲಙ್ಕಾರಪಕರಣಸ್ಸ ನವಟೀಕಾ ಚ, ಲಿಙ್ಗತ್ಥವಿವರಣಂ, ಲಿಙ್ಗವಿನಿಚ್ಛಯೋ; ಪಾತಿಮೋಕ್ಖವಿವರಣಂ, ಪರಮತ್ಥಕಥಾವಿವರಣಂ, ಸಮನ್ತಪಾಸಾದಿಕಾ ವಿವರಣಂ, ಚತುಭಾಣವಾರಟ್ಠಕಥಾ ವಿವರಣಂ, ಅಭಿಧಮ್ಮತ್ಥಸಙ್ಗಹವಿವರಣಂ, ಸಚ್ಚಸಙ್ಖೇಪವಿವರಣಂ, ಸದ್ದತ್ಥಭೇದಚಿನ್ತಾವಿವರಣಂ, ಸದ್ದವುತ್ತಿವಿವರಣಂ, ಕಚ್ಚಾಯನಸಾರವಿವರಣಂ, ಅಭಿಧಮ್ಮತ್ಥಸಙ್ಗಹಸ್ಸ ಟೀಕಾ ವಿವರಣಂ, ಮಹಾವೇಸ್ಸನ್ತರಾಜಾತಕಸ್ಸ ವಿವರಣಂ, ಸಕ್ಕಾಭಿಮತಂ, ಮಹಾವೇಸ್ಸನ್ತರಜಾತಕಸ್ಸ ನವಟ್ಠಕಥಾ, ಪಠಮ ಸಂಬೋಧಿ, ಲೋಕನೇತ್ತಿ ಚ, ಬುದ್ಧಘೋಸಾಚರಿಯನಿದಾನಂ ಮಿಲಿನ್ದಪಞ್ಹಾ ವಣ್ಣನಾ, ಚತುರಾ ರಕ್ಖಾ, ಚತುರಕ್ಖಾಯ ಅಟ್ಠಕಥಾ, ಸದ್ದವುತ್ತಿಪಕರಣಸ್ಸ ನವಟೀಕಾ, ಇಚ್ಚೇವಂ ಪಞ್ಚವೀಸತಿ ಪಮಾಣಾನಿ ಪಕರಣಾನಿ ಲಙ್ಕೋ ದೀಪಾದೀಸುಟ್ಠಾನೇಸು ಪಣ್ಡಿತೇಹಿ ಕತಾನಿ ಅಹೇಸುಂ, ಸಮ್ಬುದ್ಧೇಗಾಥಾ ಚ, ನರದೇವ ನಾಮ ಗಾಥಾ ಚ, ದಾತವೇ ಚೀರತ್ತಿ ಗಾಥಾ ಚ, ವೀಸತಿ ಓವಾದಗಾಥಾ ಚ, ದಾನಸತ್ತರಿ, ಸೀಲಸತ್ತರಿ, ಸಪ್ಪಾದಾನವಣ್ಣನಾ, ಅನನ್ತಬುದ್ಧವನ್ದನಗಾಥಾ ಚ, ಅಟ್ಠವೀಸತಿ ಬುದ್ಧವನ್ದನಗಾಥಾ ಚ, ಅತೀತಾನಾಗತಪಚ್ಚುಪ್ಪನ್ನವನ್ದನಗಾಥಾ ಚ, ಅಸೀತಿಮಹಾಸಾವಕವನ್ದನಗಾಥಾ ಚ, ನವಹಾರಗುಣವಣ್ಣನಾ ಚಾತಿ, ಇಮೇ ಬುದ್ಧಪಣಾಮ-ಗಾಥಾದಿಕಾ ಗಾಥಾ ಯೋ ಪಣ್ಡಿತೇಹಿ ಲಙ್ಕಾದೀಪಾದಿಸುಟ್ಠಾನೇಸು ಕತಾ ಅಹೇಸುಂ [ಇತಿ ಚುಲ್ಲಗನ್ಥವಂಸೇ ಗನ್ಥಕಾರಕಾಚರಿಯ ದೀಪಕೋ ನಾಮ ದುತಿಯೋ ಪರಿಚ್ಛೇದೋ]

೩. ಆಚರಿಯಾನಂ ಸಞ್ಜಾತಟ್ಠಾನಪರಿಚ್ಛೇದೋ

ಆಚರಿಯೇಸು ಚ ಅತ್ಥಿ ಜಮ್ಬುದೀಪಿಕಾಚರಿಯಾ ಅತ್ಥಿ, ಲಙ್ಕಾದೀಪಿಕಾಚರಿಯಾ. ಕತಮೇ ಜಮ್ಬುದೀಪಿಕಾಚರಿಯಾ? ಕತಮೇ ಲಙ್ಕಾದೀಪಿಕಾಚರಿಯಾ? ಮಹಾಕಚ್ಚಾಯನೋ ಜಮ್ಬುದೀಪಿಕಾಚರಿಯೋ ಸೋ ಹಿ ಅವನ್ತಿರಟ್ಠೇ ಉಜ್ಜೇನೀ ನಗರೇ ಚನ್ದಪಜ್ಜೋತಸ್ಸ ನಾಮ ರಞ್ಞೋ ಪುರೋಹಿತೋ ಹುತ್ವಾ ಕಾಮಾನಂ ಆದೀನವಂ ದಿಸ್ವಾ, ಘರಾವಾಸಂ ಪಹಾಯ ಸತ್ಥುಸಾಸನೇ ಪಬ್ಬಜ್ಜಿತ್ವಾ ಹೇಟ್ಠಾ ವುತ್ತಪ್ಪಕಾರೇ ಗನ್ಥೇ ಅಕಾಸಿ. ಮಹಾಅಟ್ಠಕಥಾಚರಿಯೋ ಜಮ್ಬುದೀಪಿಕೋ, ಮಹಾಪಚ್ಚರಿಕಾಚರಿಯೋ, ಮಹಾಕುರುನ್ದಿಕಾಚರಿಯೋ, ಅಞ್ಞತರೋ ಆಚರಿಯಾ ದ್ವೇತಿ ಇಮೇ ಚ ಭೂವಾಚರಿಯಾ. ಲಙ್ಕಾದೀಪಿಕಾಚರಿಯಾ ನಾಮ ತೇ ಕಿರ ಬುದ್ಧಘೋಸಾಚರಿಯಸ್ಸ ಪೂರೇ ಭೂತಾಚರಿಯೇ ಕಾಲೇ ಅಹೇಸುಂ. ಮಹಾಬುದ್ಧಘೋಸಾಚರಿಯೋ ಜಮ್ಬುದೀಪಿಕೋ. ಸೋ ಕಿರ ಮಗಧರಟ್ಠೇ ಘೋಸಕಗಾಮೇ ರಞ್ಞೋ ಪುರೋಹಿತಸ್ಸ ಕೇಸಿ ನಾಮ ಬ್ರಾಹ್ಮಣಸ್ಸ ಪುತ್ತೋ, ಸತ್ಥುಸಾಸನೇ ಪಬ್ಬಜ್ಜಿತ್ವಾ ಲಙ್ಕಾದೀಪಂ ಗತೋ ಹೇಟ್ಠಾ ವುತ್ತಪ್ಪಕಾರೇ ಗನ್ಥೇ ಅಕಾಸಿ.

ಬುದ್ಧದತ್ತಾಚರಿಯೋ, ಆನನ್ದಾಚರಿಯೋ, ಧಮ್ಮಪಾಲಾಚರಿಯೋ, ದ್ವೇ ಬುಬ್ಬಾಚರಿಯೋ, ಮಹಾವಜಿರ-ಬುದ್ಧಾಚರಿಯೋ, ಚುಲ್ಲವಜಿರ-ಬುದ್ಧಾಚರಿಯೋ, ವಿಮಲಬುದ್ಧಸಙ್ಖಾತೋ ದೀಪಙ್ಕರಾಚರಿಯೋ, ಚುಲ್ಲದೀಪಙ್ಕರಾಚರಿಯೋ, ಚುಲ್ಲಧಮ್ಮಪಾಲಾಚರಿಯೋ, ಕಸ್ಸಪಾಚರಿಯೋತಿ ಇಮೇ ಏಕಾದಸಚರಿಯಾ ಜಮ್ಬುದೀಪಿಕಾ ಹೇಟ್ಠಾ ವುತ್ತಪಕಾರೇ ಗನ್ಥೇ ಅಕಂಸು. ಮಹಾನಾಮಾಚರಿಯೋ, ಅಞ್ಞತರಾಚರಿಯಾ, ಚುಲ್ಲಮಹಾನಾಮಾಚರಿಯೋ, ಉಪಸೇನಾಚರಿಯೋ, ಮೋಗ್ಗಲಾನಾಚರಿಯೋ, ಸಙ್ಘರಕ್ಖಿತಾಚರಿಯೋ, ವುತ್ತೋದಯಕಾರಾಚರಿಯೋ, ಧಮ್ಮಸಿರಾಚರಿಯೋ, ಅಞ್ಞತರಾ ದ್ವಾಚರಿಯಾ, ಅನುರುದ್ಧಾಚರಿಯೋ, ಖೇಮಾಚರಿಯೋ, ಸಾರಿಪುತ್ತಾಚರಿಯೋ, ಬುದ್ಧನಾಗಾಚರಿಯೋ, ಚುಲ್ಲಮೋಗ್ಗಲಾನಾಚರಿಯೋ, ವಾಚಿಸ್ಸವಾಚರಿಯೋ, ಸುಮಙ್ಗಲಾಚರಿಯೋ, ಬುದ್ಧಪಿಯಾಚರಿಯೋ, ಧಮ್ಮಕಿತ್ತಿ ಆಚರಿಯೋ ಮೇಧಙ್ಕರಾಚರಿಯೋ, ಬುದ್ಧರಕ್ಖಿತಾಚರಿಯೋ, ಉಪತಿಸ್ಸಾ ಚರಿಯೋ, ಅಞ್ಞತರಾ ವೀಸತಾಚರಿಯಾ, ಸದ್ಧಮ್ಮಸಿರಾಚರಿಯೋ, ದೇವಾಚರಿಯೋ, ಚುಲ್ಲಬುದ್ಧಘೋಸಾಚರಿಯೋ, ಸಾರಿಪುತ್ತಾಚರಿಯೋ, ರಟ್ಠಪಾಲಾಚರಿಯೋತಿ ಇಮೇ ದ್ವೇ ಪಞ್ಞಾಸಾಚರಿಯಾ ಲಙ್ಕಾದೀಪಿಕಾಚರಿಯಾ ನಾಮ. ಸುಭೂತಚನ್ದಾಚರಿಯೋ, ಅಗ್ಗವಂಸಾಚರಿಯೋ, ನವೋ ವಜಿರಬುದ್ಧಾಚರಿಯೋ, ಗುಣಸಾಗರಾಚರಿಯೋ, ಅಭಯಾಚರಿಯೋ, ಞಾಣಸಾಗರಾಚರಿಯೋ, ಅಞ್ಞತರಾ ದ್ವಾಚರಿಯಾ, ಉತ್ತಮಾಚರಿಯೋ, ಅಞ್ಞತರೋ ಆಚರಿಯೋ, ಅಞ್ಞತರೋ ಮಹಾಮಚ್ಚೋ, ಧಮ್ಮಸೇನಾಪತಾಚರಿಯೋ, ಅಞ್ಞತರಾ ತಯೋ ಆಚರಿಯಾ, ಸದ್ಧಮ್ಮಗುರು ಆಚರಿಯೋ, ಸಾರಿಪುತ್ತಾಚರಿಯೋ, ಅಞ್ಞತರೋ ಏಕಾ ಆಚರಿಯೋ, ಮೇಧಙ್ಕರಾಚರಿಯೋ, ಅಗ್ಗಪಣ್ಡಿತಾಚರಿಯೋ, ಚೀವರಾಚರಿಯೋ, ಸದ್ಧಮ್ಮಜೋತಿಪಾಲಾಚರಿಯೋ, ವಿಮಲಬುದ್ಧಾಚರಿಯೋತಿ ಇಮೇ ತೇವೀಸತಿ ಆಚರಿಯಾ ಜಮ್ಬುದೀಪಿಕಾ ಹೇಟ್ಠಾ ವುತ್ತಪ್ಪಕಾರೇ ಗನ್ಥೇ ಪುಕ್ಕಾಮ ಸಙ್ಖಾತೇ ಅರಿಮದ್ದನ ನಗರೇ ಅಕಂಸು.

ನವೋವಿಮಲಬುದ್ಧಾಚರಿಯೋ ಜಮ್ಬುದೀಪಿಕೋ ಹೇಟ್ಠಾ ವುತ್ತಪ್ಪಕಾರೇ ಗನ್ಥೇ ಪಂಯನಗರೇ ಅಕಾಸಿ. ಅಞ್ಞತರಾಚರಿಯೋ ಅರಿಯವಂಸಾಚರಿಯೋತಿ ಇಮೇ ದ್ವಾಚರಿಯಾ ಜಮ್ಬುದೀಪಿಕಾ ಹೇಟ್ಠಾ ವುತ್ತಪ್ಪಕಾರೇ ಗನ್ಥೇ ಅತಿ [ನವಿ] ಪುರೇ ಅಕಂಸು, ಅಞ್ಞತರಾ ವೀಸತಾಚರಿಯಾ ಜಮ್ಬುದೀಪಿಕಾ ಹೇಟ್ಠಾ ವುತ್ತಪ್ಪಕಾರೇ ಗನ್ಥೇ ಕಿಞ್ಚಿ ಪುರಾದಿಘರೇ ಅಕಂಸು.

[ಇತಿ ಚುಲ್ಲಗನ್ಥವಂಸೇ ಆಚರಿಯಾನಂ ಸಞ್ಜಾತಟ್ಠಾನ ದೀಪಕೋ ನಾಮ ತತಿಯೋ ಪರಿಚ್ಛೇದೋ.]

ಗನ್ಥಾ ಪನ ಸಿಯಾ ಆಯಾಚನೇನ ಆಚರಿಯೇಹಿ ಕತಾ, ಸಿಯಾ ಅನಾಯಾಚನೇನ ಆಚರಿಯೇಹಿ ಕತಾ. ಕತಮೇ ಗನ್ಥಾ ಆಯಾಚನೇನ, ಕತಮೇ ಅನಾಯಾಚನೇನ ಕತಾ? ಮಹಾಕಚ್ಚಾಯನ ಗನ್ಥೋ, ಮಹಾಅಟ್ಠಕಥಾ ಗನ್ಥೋ, ಮಹಾಪಚ್ಚರಿಯ ಗನ್ಥೋ, ಮಹಾಕುರುನ್ದಿ ಗನ್ಥೋ, ಮಹಾಪಚ್ಚರಿಯಗನ್ಥಸ್ಸ ಅಟ್ಠಕಥಾ ಗನ್ಥೋ, ಮಹಾಕುರುನ್ದಿ ಗನ್ಥಸ್ಸ ಅಟ್ಠಕಥಾ ಗನ್ಥೋತಿ. ಇಮೇಹಿ ಛ ಗನ್ಥೇಹಿ ಅತ್ತನೋ ಮತಿಯಾ ಸಾಸನುಗ್ಗಹನತ್ಥಾಯ ಸದ್ಧಮ್ಮಠಿತಿಯಾ ಕತಾ.

ಬುದ್ಧಘೋಸಾಚರಿಯ ಗನ್ಥೇಸು ಪನ ವಿಸುದ್ಧಿಮಗ್ಗೋ, ಸಙ್ಘಪಾಲೇನ ನಾಮ ಸಙ್ಘಥೇರೇನ ಆಯಾಚಿತೇನ ಬುದ್ಧಘೋಸಾಚರಿಯೇನ ಕತೋ. ದೀಘನಿಕಾಯಸ್ಸ ಅಟ್ಠಕಥಾ ಗನ್ಥೋ ದಾಠಾ ನಾಮೇನ ಸಙ್ಘಥೇರೇನ ಆಯಾಚಿತೇನ ಬುದ್ಧಘೋಸಾಚರಿಯೇನ ಕತೋ. ಮಜ್ಝಿಮನಿಕಾಯಸ್ಸ ಅಟ್ಠಕಥಾ ಗನ್ಥೋ ಬುದ್ಧಮಿತ್ತನಾಮೇನ ಥೇರೇನ ಆಯಾಚಿತೇನ ಬುದ್ಧಘೋಸಾಚರಿಯೇನ ಕತೋ. ಸಂಯುತ್ತನಿಕಾಯಸ್ಸ ಅಟ್ಠಕಥಾ ಗನ್ಥೋ ಜೋತಿಪಾಲೇನ ನಾಮ ಥೇರೇನ ಆಯಾಚಿತೇನ ಬುದ್ಧಘೋಸಾಚರಿಯೇನ ಕತೋ. ಅಙ್ಗುತ್ತರನಿಕಾಯಸ್ಸ ಅಟ್ಠಕಥಾ ಗನ್ಥೋ ಭದ್ದನ್ತಾ ನಾಮ ಥೇರೇನ ಸಹಆಜೀವಕೇನ ಉಪಾಸಕೇನ ಚ ಆಯಾಚಿತೇನ ಬುದ್ಧಘೋಸಾಚರಿಯೇನ ಕತೋ. ಸಮನ್ತಪಾಸಾದಿಕಾ ನಾಮ ಅಟ್ಠಕಥಾ ಗನ್ಥೋ ಬುದ್ಧಸಿರಿ ನಾಮೇನ ಥೇರೇನ ಆಯಾಚಿತೇನ ಬುದ್ಧಘೋಸಾಚರಿಯೇನ ಕತೋ. ಸತ್ತನ್ನಂ ಅಭಿಧಮ್ಮ-ಗನ್ಥಾನಂ ಅಟ್ಠಕಥಾ ಗನ್ಥೋ ಚುಲ್ಲಬುದ್ಧಘೋಸೇನ ಭಿಕ್ಖುನಾ ಆಯಾಚಿತೇನ ಬುದ್ಧಘೋಸಾಚರಿಯೇನ ಕತೋ. ಧಮ್ಮಪದಸ್ಸಅಟ್ಠಕಥಾ ಗನ್ಥೋ ಕುಮಾರಕಸ್ಸಪನಾಮೇನ ಥೇರೇನ ಆಯಾಚಿತೇನ ಬುದ್ಧಘೋಸಾಚರಿಯೇನ ಕತೋ. ಜಾತಕಸ್ಸಅಟ್ಠಕಥಾ ಗನ್ಥೋ ಅತ್ಥದಸ್ಸೀ, ಬುದ್ಧಮಿತ್ತ, ಬುದ್ಧಪಿಯದೇವ ಸಙ್ಖಾತೇಹಿ ತೀಹಿ ಥೇರೇಹಿ ಆಯಾಚಿತೇನ ಬುದ್ಧಘೋಸಾಚರಿಯೇನ ಕತೋ. ಖುದ್ದಕಪಾಠಸ್ಸ ಅಟ್ಠಕಥಾ ಗನ್ಥೋ, ಸುತ್ತನಿಪಾತಸ್ಸ ಅಟ್ಠಕಥಾ ಗನ್ಥೋ ಅತ್ತನೋ ಮತಿಯಾ ಬುದ್ಧಘೋಸಾಚರಿಯೇನ ಕತೋ. ಅಪದಾನಸ್ಸ ಅಟ್ಠಕಥಾ ಗನ್ಥೋ ಪಞ್ಚನಿಕಾಯ ವಿಞ್ಞೂಹಿ ಪಞ್ಚಹಿ ಥೇರೇಹಿ ಆಯಾಚಿತೇನ ಬುದ್ಧಘೋಸಾಚರಿಯೇನ ಕತೋ.

ಬುದ್ಧಘೋಸಾಚರಿಯ-ಗನ್ಥದೀಪನಾ ನಿಟ್ಠಿತಾ.

ಬುದ್ಧತ್ತಾಚರಿಯ ಗನ್ಥೇಸು ಪನ ವಿನಯ-ವಿನಿಚ್ಛಯಗನ್ಥೋ ಅತ್ತನೋ ಸಿಸ್ಸೇನ ಬುದ್ಧಸೀಹೇನ ನಾಮ ಥೇರೇನ ಆಯಾಚಿತೇನ ಬುದ್ಧತ್ತಾಚರಿಯಾ ಕತೋ. ಉತ್ತರ-ವಿನಿಚ್ಛಯಗನ್ಥೋ ಸಙ್ಘಪಾಲೇನ ನಾಮೇನ ಥೇರೇನ ಆಯಾಚಿತೇನ ಬುದ್ಧದತ್ತಾಚರಿಯೇನ ಕತೋ. ಅಭಿಧಮ್ಮಾವತಾರೋ ನಾಮ ಗನ್ಥೋ ಅತ್ತನೋ ಸಿಸ್ಸೇನ ಸುಮತಿ ಥೇರೇನ ಆಯಾಚಿತೇನ ಬುದ್ಧದತ್ತಾಚರಿಯೇನ ಕತೋ. ಬುದ್ಧವಂಸಸ್ಸ ಅಟ್ಠಕಥಾ ಗನ್ಥೋ ತೇನೇವ ಬುದ್ಧಸೀಹನಾಮ ಥೇರೇನ ಆಯಾಚಿತೇನ ಬುದ್ಧದತ್ತಾಚರಿಯೇನ ಕತೋ.

ಬುದ್ಧದತ್ತಾಚರಿಯ-ಗನ್ಥದೀಪನಾ ನಿಟ್ಠಿತಾ.

ಅಭಿಧಮ್ಮಕಥಾಯ ಮೂಲಟೀಕಾ ನಾಮ ಟೀಕಾ ಗನ್ಥೋ ಬುದ್ಧಮಿತ್ತಾ ನಾಮ ಥೇರೇನ ಆಯಾಚಿತೇನ ಆನನ್ದಾಚರಿಯೇನ ಕತೋ.

ನೇತ್ತಿಪಕರಣಸ್ಸ ಅಟ್ಠಕಥಾ ಗನ್ಥೋ ಧಮ್ಮರಕ್ಖಿತ ನಾಮ ಥೇರೇನ ಆಯಾಚಿತೇನ ಧಮ್ಮಪಾಲಾಚರಿಯೇನ ಕತೋ. ಇತಿವುತ್ತಕಅಟ್ಠಕಥಾ ಗನ್ಥೋ, ಉದಾನಅಟ್ಠಕಥಾ ಗನ್ಥೋ, ಚರಿಯಾಪಿಟಕಅಟ್ಠಕಥಾ ಗನ್ಥೋ, ಥೇರಕಥಾಅಟ್ಠಕಥಾ ಗನ್ಥೋ, ಥೇರಿಕಥಾಅಟ್ಠಕಥಾ ಗನ್ಥೋ, ವಿಮಾನವತ್ಥುಅಟ್ಠಕಥಾ ಗನ್ಥೋ, ಪೇತವತ್ಥುಅಟ್ಠಕಥಾ ಗನ್ಥೋ, ಇಮೇ ಸತ್ತ ಗನ್ಥಾ ಅತ್ತನೋ ಮತಿಯಾ ಧಮ್ಮಪಾಲಾಚರಿಯೇನ ಕತೋ. ವಿಸುದ್ಧಿಮಗ್ಗಟೀಕಾ ಗನ್ಥೋ ದಾಠಾ ನಾಮೇನ ನಾಮ ಥೇರೇನ ಆಯಾಚಿತೇನ ಧಮ್ಮಪಾಲಾಚರಿಯೇನ ಕತೋ, ದೀಘನಿಕಾಯ-ಅಟ್ಠಕಥಾದೀನಂ ಚತುನ್ನಂ ಅಟ್ಠಕಥಾನಂ ಟೀಕಾ ಗನ್ಥೋ, ಅಭಿಧಮ್ಮಟ್ಠಕಥಾಯ ಅನುಟೀಕಾ ಗನ್ಥೋ, ನೇತ್ತಿಪಕರಣಟ್ಠಕಥಾಯ ಟೀಕಾ ಗನ್ಥೋ, ಬುದ್ಧವಂಸಟ್ಠಕಥಾಯ ಟೀಕಾ ಗನ್ಥೋ, ಜಾತಕಟ್ಠಕಥಾಯ ಟೀಕಾ ಗನ್ಥೋ ಚೇತಿ ಇಮೇ ಪಞ್ಚ ಗನ್ಥಾ ಅತ್ತನೋ ಮತಿಯಾ ಧಮ್ಮಪಾಲಾಚರಿಯೇನ ಕತೋ.

ಧಮ್ಮಪಾಲಾಚರಿಯ-ಗನ್ಥದೀಪನಾ ನಿಟ್ಠಿತಾ.

ನಿರುತ್ತಿಮಞ್ಜೂಸಾ ನಾಮ ಚುಲ್ಲನಿರುತ್ತಿಟೀಕಾ ಗನ್ಥೋ, ಮಹಾನಿರುತ್ತಿಸಙ್ಖೇಪೋ ನಾಮ ಗನ್ಥೋ ಚ ಅತ್ತನೋ ಮತಿಯಾ ಪುಬ್ಬಾಚರಿಯೇಹಿ ವಿಂಸು ಕತೋ.

ಪಞ್ಚ ವಿನಯಪಕರಣಾನಂ ವಿನಯಗಣ್ಠಿ ನಾಮ ಗನ್ಥೋ ಅತ್ತನೋ ಮತಿಯಾ ಮಹಾವಜಿರಬುದ್ಧಾಚರಿಯೇನ ಕತೋ. ನ್ಯಾಸಸಙ್ಖಾತೋ ಮುಖಮತ್ತದೀಪನೀ ನಾಮ ಗನ್ಥೋ ಅತ್ತನೋ ಮತಿಯಾ ವಿಮಲಬುದ್ಧಿ ಆಚರಿಯೇನ ಕತೋ. ಅತ್ಥಬ್ಯಕ್ಖ್ಯಾನೋ ನಾಮ ಗನ್ಥೋ ಅತ್ತನೋ ಮತಿಯಾ ಚುಲ್ಲವಜಿರಬುದ್ಧಾಚರಿಯೇನ ಕತೋ. ರೂಪಸಿದ್ಧಿ ತಸ್ಸ ಚ ಗನ್ಥಸ್ಸ ಟೀಕಾ ಗನ್ಥೋ ಸಬ್ಬ ಪಞ್ಚಸುತ್ತಞ್ಚ ಅತ್ತನೋ ಮತಿಯಾ ದೀಪಙ್ಕರಾಚರಿಯೇನ ಕತೋ. ಸಚ್ಚಸಙ್ಖೇಪೋ ನಾಮ ಗನ್ಥೋ ಅತ್ತನೋ ಮತಿಯಾ ಚುಲ್ಲಧಮ್ಮಪಾಲಾಚರಿಯೇನ ಕತೋ. ಮೋಹಚ್ಛೇದನೀ ಗನ್ಥೋ, ವಿಮತಿಚ್ಛೇದನೀ ಗನ್ಥೋ, ದಸ ಬುದ್ಧವಂಸೋ, ಅನಾಗತವಂಸೋ ಚ. ಅತ್ತನೋ ಮತಿಯಾ ಕಸ್ಸಪಾಚರಿಯೇನ ಕತೋ. ಪಟಿಸಮ್ಭಿದಾಮಗ್ಗಸ್ಸ ಅಟ್ಠಕಥಾ ಗನ್ಥೋ ಮಹಾನಾಮೇನ ಉಪಾಸಕೇನ ಆಯಾಚಿತೇನ ಮಹಾನಾಮಾಚರಿಯೇನ ಕತೋ. ದೀಪವಂಸೋ, ಥೂಪವಂಸೋ, ಬೋಧಿವಂಸೋ, ಚುಲ್ಲವಂಸೋ, ಪೋರಾಣವಂಸೋ, ಮಹಾವಂಸೋ ಚಾತಿ ಇಮೇ ಛ ಗನ್ಥಾ ಅತ್ತನೋ ಮತಿಯಾ ಮಹಾನಾಮಾಚರಿಯೇಹಿ ವಿಸುಂ ಕತಾ. ನವೋ ಮಹಾವಂಸಗನ್ಥೋ ಅತ್ತನೋ ಮತಿಯಾ ಚುಲ್ಲಮಹಾನಾಮಾಚರಿಯೇನ ಕತೋ. ಸದ್ಧಮ್ಮಪಜ್ಜೋತಿಕಾ ನಾಮ ಮಹಾನಿದ್ದೇಸಸ್ಸ ಅಟ್ಠಕಥಾ ಗನ್ಥೋ ದೇವೇನ ಥೇರೇನ ಆಯಾಚಿತೇನ ಉಪಸೇನಾಚರಿಯೇನ ಕತೋ. ಮೋಗ್ಗಲಾನಬ್ಯಾಕರಣಗನ್ಥೇ ಅತ್ತನೋ ಮತಿಯಾ ಮೋಗ್ಗಲಾನಾಚರಿಯೇನ ಕತೋ. ಸುಬೋಧಾಲಙ್ಕಾರ ನಾಮ ಗನ್ಥೋ ಅತ್ತನೋ ಮತಿಯಾ ಸಙ್ಘರಕ್ಖಿತಾಚರಿಯೇನ ಕತೋ. ವುತ್ತೋದಯ ಗನ್ಥೋ ಅತ್ತನೋ ಮತಿಯಾ ವುತ್ತೋದಯಕಾರಾಚರಿಯೇನ ಕತೋ. ಖುದ್ದಸಿಕ್ಖಾ ನಾಮ ಗನ್ಥೋ ಅತ್ತನೋ ಮತಿಯಾ ಧಮ್ಮಸಿರಾಚರಿಯೇನ ಕತೋ. ಪೋರಾಣಖುದ್ದಸಿಕ್ಖಾ ಟೀಕಾ ಚ ಮೂಲಸಿಕ್ಖಾ ಚಾತಿ, ಇಮೇ ದ್ವೇ ಗನ್ಥೇ ಅತ್ತನೋ ಮತಿಯಾ ಅಞ್ಞತರೇಹಿ ದ್ವಿಹಾಚರಿಯೇಹಿ ವಿಂಸು ಕತಾ.

ಪರಮತ್ಥವಿನಿಚ್ಛಯಂ ನಾಮ ಗನ್ಥೋ ಸಙ್ಘರಕ್ಖಿತೇನ ಥೇರೇನ ಆಯಾಚಿತೇನ ಅನುರುದ್ಧಾಚರಿಯೇನ ಕತೋ. ನಾಮರೂಪ-ಪರಿಚ್ಛೇದೋ ನಾಮ ಗನ್ಥೋ ಅತ್ತನೋ ಮತಿಯಾ ಅನುರುದ್ಧಾಚರಿಯೇನ ಕತೋ. ಅಭಿಧಮ್ಮತ್ಥಸಙ್ಗಹಂ ನಾಮ ಗನ್ಥೋ ನಮ್ಮ ನಾಮೇನ ಉಪಾಸಕೇನ ಆಯಾಚಿತೇನ ಅನುರುದ್ಧಾಚರಿಯೇನ ಕತೋ. ಖೇಮೋ ನಾಮ ಗನ್ಥೋ ಅತ್ತನೋ ಮತಿಯಾ ಖೇಮಾಚರಿಯೇನ ಕತೋ. ಸಾರತ್ಥದೀಪನೀ ನಾಮ ವಿನಯಟ್ಠಕಥಾಯ ಟೀಕಾ ಗನ್ಥೋ, ವಿನಯಸಙ್ಗಹಂ, ವಿನಯಸಙ್ಗಹಸ್ಸ ಟೀಕಾ ಗನ್ಥೋ, ಅಙ್ಗುತ್ತರಟ್ಠಕಥಾಯ ನವೋ ಟೀಕಾ ಗನ್ಥೋತಿ ಇಮೇ ಚತ್ತಾರೋ ಗನ್ಥಾ ಪರಕ್ಕಮಬಾಹು ನಾಮೇನ ಲಙ್ಕಾದೀಪಿಸ್ಸರೇನ ರಞ್ಞಾ ಆಯಾಚಿತೇನ ಸಾರಿಪುತ್ತಾಚರಿಯೇನ ಕತೋ. ಸಕಟಸದ್ದಸತ್ಥಸ್ಸ ಪಞ್ಚಿಕಾಯ ಟೀಕಾ ಗನ್ಥೋ ಅತ್ತನೋ ಮತಿಯಾ ಸಾರಿಪುತ್ತಾಚರಿಯೇನ ಕತೋ. ಕಙ್ಖಾವಿತರಣಿಯಾ ವಿನಯತ್ಥಮಞ್ಜೂಸಾ ನಾಮ ಟೀಕಾ ಗನ್ಥೋ ಸುಮೇಧಾ ನಾಮಥೇರೇನ ಆಯಾಚಿತೇನ ಬುದ್ಧನಾಗಾಚರಿಯೇನ ಕತೋ. ಅಭಿಧಾನಪ್ಪದೀಪಿಕೋ ನಾಮ ಗನ್ಥೋ ಅತ್ತನೋ ಮತಿಯಾ ಚೂಲಮೋಗ್ಗಲಾನಾಚರಿಯೇನ ಕತೋ. ಸುಬೋಧಾಲಙ್ಕಾರಸ್ಸ ಮಹಾಸಾಮಿ ನಾಮ ಟೀಕಾ, ವುತ್ತೋದಯ ವಿವರಣಞ್ಚಾತಿ ಇಮೇ ದ್ವೇ ಗನ್ಥಾ ಅತ್ತನೋ ಮತಿಯಾ ವಾಚಿಸ್ಸರೇನ ಕತಾ. ಖುದ್ದಸಿಕ್ಖಾಯ ಸುಮಙ್ಗಲಪ್ಪಸಾದನಿ ನಾಮ ನವೋ ಟೀಕಾ ಗನ್ಥೋ ಸುಮಙ್ಗಲೇನ ಆಯಾಚಿತೇನ ನವಾಚಿಸ್ಸರೇನ ಕತೋ. ಸಮ್ಬನ್ಧಚಿನ್ತಾಟೀಕಾ ಬಾಲಾವತಾರೋ, ಮೋಗ್ಗಲಾನಬ್ಯಾಕರಣಸ್ಸ ಟೀಕಾ ಚಾತಿ ಇಮೇ ತಯೋ ಗನ್ಥಾ, ಸುಮಙ್ಗಲ, ಬುದ್ಧಮಿತ್ತ, ಮಹಾಕಸ್ಸಪ ಸಙ್ಖಾತೇಹಿ ತೀಹಿ ಥೇರೇಹಿ ಚ, ಧಮ್ಮಕಿತ್ತಿ ನಾಮ ಉಪಾಸಕೇನ, ವಾನಿಜ್ಜಾ ಭಾತು ಉಪಾಸಕೇನ ಚ ಆಯಾಚಿತೇನ ವಾಚಿಸ್ಸರೇನ ಕತೋ. ನಾಮರೂಪಪರಿಚ್ಛೇದಸ್ಸ ವಿಭಾಗೋ, ಸದ್ದತ್ಥಸ್ಸ ಪದರೂಪ-ವಿಭಾವನಂ, ಖೇಮಪಕರಣಸ್ಸ ಟೀಕಾ, ಸೀಮಾಲಙ್ಕಾರೋ, ಮೂಲಸಿಕ್ಖಾಯ ಟೀಕಾ, ರೂಪವಿಭಾಗೋ, ಪಚ್ಚಯಸಙ್ಗಹೋ ಚಾತಿ ಇಮೇ ಸತ್ತ ಗನ್ಥಾ ಅತ್ತನೋ ಮತಿಯಾ ವಾಚಿಸ್ಸರೇನ ಕತಾ. ಸಚ್ಚಸಙ್ಖೇಪಸ್ಸ ಟೀಕಾ ಗನ್ಥೋ ಸಾರಿಪುತ್ತ-ನಾಮೇನ ಥೇರೇನ ಆಯಾಚಿತೇನ ವಾಚಿಸ್ಸರೇನ ಕತೋ. ಅಭಿಧಮ್ಮಾವತಾರಸ್ಸ ಟೀಕಾ, ಅಭಿಧಮ್ಮತ್ಥಸಙ್ಗಹಸ್ಸ ಟೀಕಾ ಚಾತಿ ಇಮೇ ದ್ವೇ ಗನ್ಥಾ ಅತ್ತನೋ ಮತಿಯಾ ಸುಮಙ್ಗಲಾಚರಿಯೇನ ಕತಾ. ಸಾರತ್ಥಸಙ್ಗಹಂ ನಾಮ ಗನ್ಥೋ ಅತ್ತನೋ ಮತಿಯಾ ಬುದ್ಧಪ್ಪಿಯೇನ ಕತೋ ದನ್ತಧಾತುವಣ್ಣನಾ ನಾಮ ಪಕರಣಂ

ಲಙ್ಕಾದೀಪಿಸ್ಸರಸ್ಸ ರಞ್ಞೋ ಸೇನಾಪತಿನಾ ಆಯಾಚಿತೇನ ಧಮ್ಮಕಿತ್ತಿನಾಮಾಚರಿಯೇನ ಕತಂ. ಜಿನಚರಿತಂ ನಾಮ ಪಕರಣಂ ಅತ್ತನೋ ಮತಿಯಾ ಮೇಧಙ್ಕರಾಚರಿಯೇನ ಕತಂ. ಜಿನಾಲಙ್ಕಾರೋ, ಜಿನಾಲಙ್ಕಾರಸ್ಸ ಟೀಕಾ ಅತ್ತನೋ ಮತಿಯಾ ಬುದ್ಧರಕ್ಖಿತಾಚರಿಯೇನ ಕತೋ. ಅಮತಧರಸ್ಸ ನಾಮ ಅನಾಗತವಂಸಸ್ಸ ಅತ್ತನೋ ಮತಿಯಾ ಅಟ್ಠಕಥಾ ಉಪತಿಸ್ಸಾಚರಿಯೇನ ಕತಾ. ಕಙ್ಖಾವಿತರಣೀಯಾ ಲೀನತ್ಥಪಕಾಸಿನೀ, ನಿಸನ್ದೇಹೋ, ಧಮ್ಮಾನುಸಾರಣೀ, ಞೇಯ್ಯಾ-ಸನ್ತತಿ, ಞೇಯ್ಯಾ-ಸನ್ತತಿಯಾ ಟೀಕಾ, ಸುಮತಾವತಾರೋ, ಲೋಕಪಞ್ಞತ್ತಿ ಪಕರಣಂ, ತಥಾಗತುಪ್ಪತ್ತಿ ಪಕರಣಂ, ನಲಾಟಧಾತುವಣ್ಣನಾ, ಸೀಹಳವತ್ಥು, ಧಮ್ಮದೀಪಕೋ ಪಟಿಪತ್ತಿ ಸಙ್ಗಹೋ, ವಿಸುದ್ಧಿಮಗ್ಗಸ್ಸ ಗಣ್ಠಿ, ಅಭಿಧಮ್ಮಗಣ್ಠಿ, ನೇತ್ತಿಪಕರಣಗಣ್ಠಿ, ವಿಸುದ್ಧಿಮಗ್ಗಚೂಲ-ನವಟೀಕಾ, ಸೋತಬ್ಬಮಾಲಿನೀ, ಪಸಾದಜನನೀ, ಓಕಸ್ಸಲೋಕೋ, ಸುಬೋಧಾಲಙ್ಕಾರಸ್ಸ ನವ ಟೀಕಾ ಚೇತಿ, ಇಮೇ ವೀಸತಿ ಗನ್ಥಾ ಅತ್ತನೋ ಮತಿಯಾ ವೀಸತಾಚರಿಯೇಹಿ ವಿಂಸು ವಿಂಸು ಕತಾ.

ಸದ್ದತ್ಥ ಭೇದಚಿನ್ತಾ ನಾಮ ಪಕರಣಂ ಅತ್ತನೋ ಮತಿಯಾ ಸದ್ಧಮ್ಮಸಿರಿನಾಮಾಚರಿಯೇನ ಕತಂ. ಸುಮನ-ಕೂಟವಣ್ಣನಂ ನಾಮ ಪಕರಣಂ, ರಾಹುಲಾ ನಾಮ ಥೇರೇನ ಆಯಾಚಿತೇನ ವಾಚಿಸ್ಸರೇನದೇವಥೇರೇನ ಕತಂ. ಸೋತತ್ಥ ಕಿಂ ಮಹಾನಿದಾನಂ ನಾಮ ಪಕರಣಂ ಅತ್ತನೋ ಮತಿಯಾ ಚುಲ್ಲಬುದ್ಧಘೋಸಾಚರಿಯೇನ ಕತಂ. ಮಧುರಸಙ್ಗಾಹನಿ ನಾಮ ಪಕರಣಂ ಅತ್ತನೋ ಮತಿಯಾ ರಟ್ಠಪಾಲಾಚರಿಯೇನ ಕತಂ. ಲಿಙ್ಗತ್ಥವಿವರಣಂ ನಾಮ ಪಕರಣಂ ಅತ್ತನೋ ಮತಿಯಾ ಸುಭೂತಚನ್ದಾಚರಿಯೇನ ಕತಂ. ಸದ್ದನೀತಿಪಕರಣಂ ಅತ್ತನೋ ಮತಿಯಾ ಅಗ್ಗವಂಸಾಚರಿಯೇನ ಕತಂ. ನ್ಯಾಸಪಕರಣಸ್ಸ ಮಹಾಟೀಕಾ ನಾಮ ಟೀಕಾ ಅತ್ತನೋ ಮತಿಯಾ ವಜಿರಬುದ್ಧಾಚರಿಯೇನ ಕತಾ. ಮುಖಮತ್ತಸಾರೋ ಅತ್ತನೋ ಮತಿಯಾ ಗುಣಸಾಗರಾಚರಿಯೇನ ಕತೋ. ಮುಖಮತ್ತಸಾರಸ್ಸ ಟೀಕಾ ಸುತಸಮ್ಪನ್ನ ನಾಮೇನ ಧಮ್ಮರಾಜಿನೋ ಗುರುನಾ ಸಙ್ಘಥೇರೇನ ಆಯಾಚಿತೇನ ಗುಣಸಾಗರಾಚರಿಯೇನ ಕತಾ. ಸದ್ದತ್ಥಭೇದಚಿನ್ತಾಯ ಮಹಾಟೀಕಾ ಅತ್ತನೋ ಮತಿಯಾ ಅಭಯಾಚರಿಯೇನ ಕತಾ. ಲಿಙ್ಗತ್ಥವಿವರಣಪ್ಪಕಾಸಕಂ ನಾಮ ಪಕರಣಂ ಅತ್ತನೋ ಮತಿಯಾ ಞಾಣಸಾಗರಾಚರಿಯೇನ ಕತಂ. ಗುಳ್ಹತ್ಥಸ್ಸ ಟೀಕಾ ಬಾಲಪ್ಪಬೋಧನಞ್ಚ ದುವಿಧಂ ಪಕರಣಂ ಅತ್ತನೋ ಮತಿಯಾ ಅಞ್ಞತರಾಚರಿಯೇನ ಕತಂ. ಸದ್ದತ್ಥಭೇದಚಿನ್ತಾಯ ಮಜ್ಝಿಮಟೀಕಾ ಅತ್ತನೋ ಮತಿಯಾ ಅಞ್ಞತರಾಚರಿಯೇನ ಕತಾ. ಬಾಲಾವತಾರಸ್ಸ ಟೀಕಾ, ಲಿಙ್ಗತ್ಥವಿವರಣಾ ಟೀಕಾ ಚ ಅತ್ತನೋ ಮತಿಯಾ ಉತ್ತಮಾಚರಿಯೇನ ಕತಾ. ಸದ್ದತ್ಥಭೇದಚಿನ್ತಾಯ ನವ ಟೀಕಾ ಅತ್ತನೋ ಮತಿಯಾ ಅಞ್ಞತರಾಚರಿಯೇನ ಕತಾ. ಅಭಿಧಾನಪ್ಪದೀಪಿಕಾಯ ಟೀಕಾ ದಣ್ಡೀಪಕರಣಸ್ಸ ಮಗಘ-ಭೂತಾ ಟೀಕಾ ಚಾತಿ ದುವಿಧಾ ಟೀಕಾಯೋ ಅತ್ತನೋ ಮತಿ, ಸೀಹಸೂರ ನಾಮ ರಞ್ಞೋ ಏಕೇನ ಅಮಚ್ಚೇನ ಕತಾ. ಕೋಲದ್ಧಜನಸ್ಸಟೀಕಾ ಪಾಸಾದಿಕೇನ ನಾಮ ಥೇರೇನ ಆಯಾಚಿತೇನ ತೇನೇವ ಮಹಾಮಚ್ಚೇನ ಕತಾ. ಕಾರಿಕಂ ನಾಮ ಪಕರಣಂ ಞಾಣಗಮ್ಭೀರನಾಮೇನ ಭಿಕ್ಖುನಾ ಆಯಾಚಿತೇನ ಧಮ್ಮಸೇನಾಪತಾಚರಿಯೇನ ಕತಂ. ಏತಿಮಾಸಮಿದೀಪನೀ [ವಾ ಏತಿಮಾಸಮಿದೀಪಿಕಾ] ನಾಮ ಪಕರಣಂ ಮನೋಹಾರಞ್ಚ ಅತ್ತನೋ ಮತಿಯಾ ತೇನೇವ ಧಮ್ಮಸೇನಾಪತಾಚರಿಯೇನ ಕತಂ. ಕಾರಿಕಾಯ ಟೀಕಾ ಅತ್ತನೋ ಮತಿಯಾ ಅಞ್ಞತರಾಚರಿಯೇನ ಕತಾ. ಏತಿಮಾಸಮಿದೀಪಿಕಾಯ ಟೀಕಾ ಅತ್ತನೋ ಮತಿಯಾ ಅಞ್ಞತರಾಚರಿಯೇನ ಕತಾ.

ಸದ್ದಬಿನ್ದುಪಕರಣಂ ಅತ್ತನೋ ಮತಿಯಾ ಧಮ್ಮರಾಜಸ್ಸ ಗುರುನಾ ಅಞ್ಞತರಾಚರಿಯೇನ ಕತಂ. ಸದ್ದವುತ್ತಿಪ್ಪಕಾಸಕಂ ನಾಮ ಪಕರಣಂ ಅಞ್ಞತರೇನ ಭಿಕ್ಖುನಾ ಆಯಾಚಿತೇನ ಸದ್ಧಮ್ಮಗುರು ನಾಮಾಚರಿಯೇನ ಕತಂ. ಸದ್ದವುತ್ತಿಪ್ಪಕಾಸಕಸ್ಸ ಟೀಕಾ ಅತ್ತನೋ ಮತಿಯಾ ಸಾರಿಪುತ್ತಾಚರಿಯೇನ ಕತಾ.

ಕಚ್ಚಾಯನ ಸಾರೋ ಚ ಕಚ್ಚಾಯನಸಾರಸ್ಸ ಟೀಕಾ ಚಾತಿ ದುವಿಧಂ ಪಕರಣಂ ಅತ್ತನೋ ಮತಿಯಾ ಅಞ್ಞತರಾಚರಿಯೇನ ಕತಂ. ಲೋಕದೀಪಕಸಾರಂ ನಾಮ ಪಕರಣಂ ಅತ್ತನೋ ಮತಿಯಾ ನವೇನಮೇಧಙ್ಕರಾಚರಿಯೇನ ಕತಂ. ಲೋಕುಪ್ಪತ್ತಿಪಕರಣಂ ಅತ್ತನೋ ಮತಿಯಾ ಅಗ್ಗಪಣ್ಡಿತಾಚರಿಯೇನ ಕತಂ. ಜಙ್ಘದಾಸಕಸ್ಸ ಟೀಕಾ ಭೂತಾ ಮಗಧಟೀಕಾ ಅತ್ತನೋ ಮತಿಯಾ ಚೀವರಾಚರಿಯೇನ ಕತಾ. ಮಾತಿಕತ್ಥದೀಪನೀ, ಅಭಿಧಮ್ಮತ್ಥಸಙ್ಗಹವಣ್ಣನಾ, ಸೀಮಾಲಙ್ಕಾರಸ್ಸಟೀಕಾ, ಗಣ್ಠಿಸಾರೋ, ಪಟ್ಠಾನಗಣನಾನಯೋ ಚಾತಿ ಇಮೇ ಪಞ್ಚ ಪಕರಣಾನಿ ಅತ್ತನೋ ಮತಿಯಾ ಸದ್ಧಮ್ಮಜೋತಿಪಾಲಾಚರಿಯೇನ ಕತಾನಿ. ಸಙ್ಖೇಪವಣ್ಣನಾ ಪರಕ್ಕಮಬಾಹು-ನಾಮೇನ ಜಮ್ಬುದೀಪಿಸ್ಸರೇನ ರಞ್ಞೋ ಆಯಾಚಿತೇ ತೇನೇವ ಸದ್ಧಮ್ಮಜೋತಿಪಾಲಾಚರಿಯೇನ ಕತಾ. ಕಚ್ಚಾಯನಸ್ಸ ಸುತ್ತನಿದ್ದೇಸೋ ಅತ್ತನೋ ಸಿಸ್ಸೇನ ಧಮ್ಮಚಾರಿನಾ ಥೇರೇನ ಆಯಾಚಿತೇನ ಸದ್ಧಮ್ಮಜೋತಿಪಾಲಾಚರಿಯೇನ ಕತೋ. ವಿನಯಸಮುಟ್ಠಾನದೀಪನೀ ನಾಮ ಪಕರಣಂ, ಅತ್ತನೋ ಗುರುನಾ ಸಙ್ಘಥೇರೇನ ಆಯಾಚಿತೇನ ಸದ್ಧಮ್ಮ-ಜೋತಿಪಾಲಾಚರಿಯೇನ ಕತಂ.

ಸತ್ತಪಕರಣಾನಿ ಪನ ತೇನ ಪುಕ್ಕಾಮನಗರೇ ಕತಾನಿ. ಸಙ್ಖೇಪವಣ್ಣನಾವ ಲಙ್ಕಾದೀಪೇ ಕತಾ. ಅಭಿಧಮ್ಮ-ಪನ್ನರಸಟ್ಠಾನವಣ್ಣಾನಂ ನಾಮ ಪಕರಣಂ ಅತ್ತನೋ ಮತಿಯಾ ನವೇನ-ವಿಮಲಬುದ್ಧಾಚರಿಯೇನ ಕತಾ. ಸದ್ದಸಾರತ್ಥಜಾಲಿನೀ ನಾಮ ಪಕರಣಂ ಅತ್ತನೋ ಮತಿಯಾ ನವೇನ-ವಿಮಲಬುದ್ಧಾಚರಿಯೇನ ಕತಂ. ಸದ್ದಸಾರತ್ಥ-ಜಾಲಿನಿಯಾ ಟೀಕಾ, ಪಂಯನಗರೇ ರಞ್ಞೋ ಗುರುನಾ ಸಙ್ಘರಾಜೇನ ಆಯಾಚಿತೇನ ತೇನೇವ ನವೇನ ವಿಮಲಬುದ್ಧಾಚರಿಯೇನ ಕತಾ. ವುತ್ತೋದಯಸ್ಸ ಟೀಕಾ, ಅಭಿಧಮ್ಮಸಙ್ಗಹಸ್ಸ ಟೀಕಾಯ ಪರಮತ್ಥಮಞ್ಜೂಸಾ ನಾಮ ಅನುಟೀಕಾ, ದಸಗಣ್ಠಿವಣ್ಣನಂ ನಾಮ ಪಕರಣಂ, ಮಗಧಭೂತವಿದಗ್ಗಮುಖಮಣ್ಡನಿಯಾಟೀಕಾ ಚಾತಿ ಇಮಾನಿ ಚತ್ತಾರಿ ಪಕರಣಾನಿ ಅತ್ತನೋ ಮತಿಯಾ ತೇನೇವ ನವೇನ ವಿಮಲಬುದ್ಧಾಚರಿಯೇನ ಕತಾನಿ.

ಪಞ್ಚಪಕರಣಟೀಕಾಯ ನವಾನುಟೀಕಾ ಅತ್ತನೋ ಮತಿಯಾ ಅಞ್ಞತರೋ ಚರಿಯೇನ ಕತಾ. ಅಭಿಧಮ್ಮಸಙ್ಗಹಸ್ಸ ನವಟೀಕಾ ಅತ್ತನೋ ಮತಿಯಾ ಅಞ್ಞತರಾಚರಿಯೇನ ಕತಾ. ಅಭಿಧಮ್ಮತ್ಥಸಙ್ಗಹಟೀಕಾಯ [ಮಣಿ] ಮಞ್ಜೂಸಾ [ಮಣಿಸಾರಮಞ್ಜೂಸಾ] ನಾಮ ನವಾನುಟೀಕಾ ಅತ್ತನೋ ಮತಿಯಾ ಅರಿಯವಂಸಾಚರಿಯೇನ ಕತಾ.

ಪೇಟಕೋಪದೇಸಸ್ಸ ಟೀಕಾ ಅತ್ತನೋ ಮತಿಯಾ ಉದುಮ್ಬರಿನಾಮಾಚರಿಯೇನ ಪುಕ್ಕಾಮನಗರೇ ಕತಾ. ಚತುಭಾಣವಾರಸ್ಸ ಅಟ್ಠಕಥಾ, ಮಹಾಸಾರಪಕಾಸಿನಿ, ಮಹಾದೀಪನೀ, ಸಾರತ್ಥದೀಪನೀ, ಗತಿಪಕರಣಂ, ಹತ್ಥಾಸಾರೋ, ಭುಮ್ಮಸಙ್ಗಹೋ, ಭುಮ್ಮನಿದ್ದೇಸೋ, ದಸವತ್ಥುಕಾಯವಿರತಿಟೀಕಾ, ಚೋದನಾನಿರುತ್ತಿ, ವಿಭತ್ತಿಕಥಾ, ಸದ್ಧಮ್ಮಮಾಲಿನಿ, ಪಞ್ಚಗತಿವಣ್ಣನಾ, ಬಾಲಚಿತ್ತ-ಪಬೋಧನಂ, ಧಮ್ಮಚಕ್ಕಸುತ್ತಸ್ಸ ನವಟ್ಠಕಥಾ, ದನ್ತಧಾತು-ಪಕರಣಸ್ಸ ಟೀಕಾ ಚ ಸದ್ಧಮ್ಮೋಪಾಯನೋ ಬಾಲಪ್ಪಬೋಧನಟೀಕಾ ಚ, ಜಿನಾಲಙ್ಕಾರಸ್ಸ ನವಟೀಕಾ ಚ, ಲಿಙ್ಗತ್ಥ-ವಿವರಣಂ, ಲಿಙ್ಗತ್ಥ-ವಿನಿಚ್ಛಯೋ, ಪಾತಿಮೋಕ್ಖವಿವರಣಂ, ಪರಮತ್ಥಕಥಾವಿವರಣಂ, ಸಮನ್ತಪಾಸಾದಿಕವಿವರಣಂ, ಚತುಭಾಣವಾರಟ್ಠಕಥಾ ವಿವರಣಂ, ಅಭಿಧಮ್ಮಸಙ್ಗಹವಿವರಣಂ, ಸಚ್ಚಸಙ್ಖೇಪವಿವರಣಂ, ಸದ್ದತ್ಥಭೇದಚಿನ್ತಾವಿವರಣಂ, ಸದ್ದವುತ್ತಿವಿವರಣಂ, ಕಚ್ಚಾಯನಸಾರವಿವರಣಂ, ಕಚ್ಚಾಯನವಿವರಣಂ, ಅಭಿಧಮ್ಮಸಙ್ಗಹಸ್ಸಟೀಕಾವಿವರಣಂ, ಮಹಾವೇಸ್ಸನ್ತರಜಾತಕಸ್ಸ ವಿವರಣಂ, ಸಕ್ಕಾಭಿಮತಂ, ಮಹಾವೇಸ್ಸನ್ತರಜಾತಕಸ್ಸ ನವಟ್ಠಕಥಾ, ಪಠಮ-ಸಮ್ಬೋಧಿ ಚ ಲೋಕನೇತ್ತಿ, ಬುದ್ಧಘೋಸಾಚರಿಯನಿದಾನಂ, ಮಿಲಿನ್ದ-ಪಞ್ಹೋ ವಣ್ಣನಾ, ಚತುರಾರಕ್ಖಾ, ಚತುರಾರಕ್ಖಾಯಅಟ್ಠಕಥಾ, ಸದ್ದವುತ್ತಿಪ್ಪಕರಣಸ್ಸ ನವಟೀಕಾ ಚಾತಿ ಇಮಾನಿ, ತಿಚತ್ತಾಲೀಸ ಪಕರಣಾನಿ ಅತ್ತನೋ ಮತಿಯಾ ಸಾಸನಸ್ಸ ಜಾತಿಯಾ ಸದ್ಧಮ್ಮಸ್ಸ ಠಿತಿಯಾ ಚ ಲಙ್ಕಾದೀಪಾದೀಸು ವಿಂಸು ವಿಂಸು ಕತಾನಿ.

ಸಮ್ಬುದ್ಧೇ ಗಾಥಾ ಚ…ಪೇ… ನವಹಾರಗುಣವಣ್ಣನಾ ಚಾತಿ ಇಮೇ ಬುದ್ಧಪಣಾಮಾದಿಕಾ ಗಾಥಾಯೋ. ಅತ್ತನೋ ಅತ್ತನೋ ಬುದ್ಧಗುಣಪಕಾಸನತ್ಥಾಯ ಅತ್ತನೋ ಚ ಪರೇ ಚ ಅನನ್ತಪಞ್ಞಾಪವತ್ತನತ್ಥಾಯ ಚ ಪಣ್ಡಿತೇಹಿ ಲಙ್ಕಾದೀಪಾದೀಸು ವಿಂಸು ವಿಂಸು ಕತಾ.

[ಇತಿ ಚುಲ್ಲ-ಗನ್ಥವಂಸೇ ಆಯಾಚಕಾಚರಿಯದೀಪಕೋ ನಾಮ ಚತುತ್ಥೋ ಪರಿಚ್ಛೇದೋ.]

ನಾಮಂ ಆರೋಪನಂ ಪೋತ್ಥಕಂ ಗನ್ಥಕಾರಸ್ಸ ಚ. ಲೇಖಂಲೇಖಾಪನಞ್ಚೇವ, ವದಾಮಿ ತದನನ್ತರನ್ತಿ. ತತ್ಥ ಚತುರಾಸೀತಿಯಾ ಧಮ್ಮಕ್ಖನ್ಧಸಹಸ್ಸಾನಿ ಪಿಟಕ, ನಿಕಾಯಙ್ಗ, ವಗ್ಗ, ನಿಪಾತಾದಿಕಂ ನಾಮಂ, ಕೇನಾರೋಪಿತಂ, ಕತ್ಥ ಆರೋಪಿತಂ, ಕದಾ ಆರೋಪಿತಂ, ಕಿಮತ್ಥಂ ಆರೋಪಿತನ್ತಿ? ತತ್ರಾಯಂ ಪಿವಿಸಜ್ಜನಾಕೇನ ಆರೋಪಿತನ್ತಿ ಪಞ್ಚಸತಖೀಣಾಸವೇಹಿ ಆರೋಪಿತಂ. ತೇಹಿ ಸಬ್ಬಬುದ್ಧವಚನಂ ಸಙ್ಗಾಯನ್ತಿ, ಇದಂ ಪಿಟಕಂ, ಅಯಂ ನಿಕಾಯೋ, ಇದಂ ಅಙ್ಗಂ, ಅಯಂ ವಗ್ಗೋ, ಅಯಂ ನಿಪಾತೋತಿ. ಏವಮಾದಿಕಂ ನಾಮಂ ಆರೋಪೇನ್ತಿ. ಕತ್ಥ ಆರೋಪಿತನ್ತಿ? ರಾಜಗಹೇ ವೇಭಾರಪಬ್ಬತಸ್ಸ ಪಾದೇ ಧಮ್ಮಮಣ್ಡಪ್ಪೇ ಆರೋಪಿತಂ. ಕದಾ ಆರೋಪಿತನ್ತಿ? ಭಗವತೋ ಪರಿನಿಬ್ಬುತೇ ಪಠಮಸಙ್ಗಾಯನಕಾಲೇ ಆರೋಪಿತಂ. ಕಿಮತ್ಥಂ ಆರೋಪಿತನ್ತಿ? ಧಮ್ಮಕ್ಖನ್ಧಾನಂ ವೋಹಾರಸುಖತ್ಥಾಯ ಸುಖಧಾರಣತ್ಥಾಯ ಚ ಆರೋಪಿತಂ. ಸಙ್ಗೀತಿಕಾಲೇ ಪಞ್ಚಸತಾ ಖೀಣಾಸವಾ ತೇಸಞ್ಚ ಧಮ್ಮಕ್ಖನ್ಧಾನಂ ನಾಮ ವಗ್ಗನಿಪಾತತೋ. ಇಮಸ್ಸ ಧಮ್ಮಕ್ಖನ್ಧಸ್ಸ ಅಯಂ ನಾಮೋ ಹೋತು, ಇಮಸ್ಸ ಚ ಪಕರಣಸ್ಸ ಅಯಂ ನಾಮೋತಿ, ಅಬ್ರವುಂ ಸಬ್ಬಂ ನಾಮಾದಿಕಂ ಕಿಚ್ಚಂ ಅಕಂಸು. ತೇ ಖೀಣಾಸವಾ, ಯದಿ ನಾಮಾದಿಕಂ ಕಿಚ್ಚಂ ಅಕತಂ ನ ಸುಪಾಕತಂ ತಸ್ಮಾ ವೋಹಾರಸುಖತ್ಥಾಯನಾಮಾದಿಕಂ ಕಿಚ್ಚಂ ಕತಂ ಅನಾಗತೇ ಪನತ್ಥಾಯ ನಾಮಾದಿಕಂ ಪವತ್ತಿತಂ ಅಸಞ್ಜಾತನಾಮೋ ನ ಸುಟ್ಠು ಪಾಕತೋ ಸಬ್ಬಸೋ ಭವೇತಿ. ಧಮ್ಮಕ್ಖನ್ಧಾನಂ ನಾಮ ದೀಪನಾ ನಿಟ್ಠಿತಾ.

ಚತುರಾಸೀತಿ ಧಮ್ಮಕ್ಖನ್ಧಸಹಸ್ಸಾನಿ ಕೇನ ಪೋತ್ಥಕೇ ಆರೋಪಿತಾನಿ, ಕದಾ ಆರೋಪಿತಾನಿ, ಕಿಮತ್ಥಂ ಆರೋಪಿತಾನೀತಿ. ತತ್ರಾಯಂ ವಿಸಜ್ಜನಾ ಕೇನಾರೋಪಿತಾನಿತಿ? ಖೀಣಾಸವಮಹಾನಾಗೇಹಿ ಆರೋಪಿತಾನಿ. ಕತ್ಥ ಆರೋಪಿತಾನೀತಿ? ಲಙ್ಕಾದೀಪೇ ಆರೋಪಿತಾನಿ. ಕದಾ ಆರೋಪಿತಾನೀತಿ? ಸದ್ಧಾತಿಸ್ಸಸ್ಸರಾಜಿನೋ ಪುತ್ತಸ್ಸ ವಟ್ಟಗಾಮನಿ ರಾಜಸ್ಸ ಕಾಲೇ ಆರೋಪಿತಾನಿ. ಕಿಮತ್ಥಂ ಆರೋಪಿತಾನೀತಿ? ಧಮ್ಮಕ್ಖನ್ಧಾನಂ ಅವಿಧಂಸನತ್ಥಾಯ ಸದ್ಧಮ್ಮಟ್ಠಿತಿಯಾ ಚ ಆರೋಪಿತಾನಿ.

ಧರಮಾನೋ ಹಿ ಭಗವಾ, ಅಮ್ಹಾಕಂ ಸುಗತೋಧೀರೋ;

ನಿಕಾಯೇ ಪಞ್ಚದೇಸೇತಿ, ಯಾವ ನಿಬ್ಬಾನಗಮನಾ.

ಸಬ್ಬೇಪಿ ತೇ ಭಿಕ್ಖು ಆದಿ, ಮನಸಾ ವಚಸಾಹಾರೋ;

ಸಬ್ಬೇ ಚ ವಾಚುಗ್ಗತಾ ಹೋನ್ತಿ, ಮಹಾಪಞ್ಞಾಸತಿವರಾ.

ನಿಬ್ಬೂತೇ ಲೋಕನಾಥಮ್ಹಿ, ತತೋ ವಸ್ಸಸತಂ ಭವೇ;

ಅರಿಯಾನರಿಯಾ ಚಾಪಿ ಚ, ಸಬ್ಬೇ ವಾಚುಗ್ಗತಾ ಧುವಂ.

ತತೋ ಪರಂ ಅಟ್ಠರಸಂ, ದ್ವಿಸತಂವಸ್ಸ ಗಣನಂ;

ಸಬ್ಬೇ ಪುಥುಜ್ಜನಾ ಚೇವ, ಅರಿಯಾ ಚ ಸಬ್ಬೇಪಿತೇ.

ಮನಸಾವಚಸಾಯೇವ, ವಾಚುಗ್ಗತಾವ ಸಬ್ಬದಾ;

ದುಟ್ಠಗಾಮಣಿರಞ್ಞೋ ಚ, ಕಾಲೇ ವಾಚುಗ್ಗತಾ ಧುವಂ.

ಅರಿಯಾನರಿಯಾಪಿ ಚ, ನಿಕಾಯೇ ಧಾರಣಾಸದಾ;

ತತೋ ಪರಮ್ಹಿ ರಾಜಾ ಚ, ತತೋ ಚುತೋ ಚ ತುಸಿತೇ.

ಉಪ್ಪಜ್ಜಿ ದೇವ ಲೋಕೇ ಸೋ, ದೇವೇಹಿ ಪರಿವಾರಿತೋ;

ಸದ್ಧಾ ತಿಸ್ಸೋತಿ ನಾಮೇನ, ತಸ್ಸ ಕನಿಟ್ಠಕೋ ಹಿತೋ.

ತತೋ ಲದ್ಧರಟ್ಠೋ ಹೋತಿ, ಬುದ್ಧಸಾಸನಪಾಲಕೋ.

ತದಾ ಕಾಲೇ ಭಿಕ್ಖೂ ಆಸುಂ, ಸಬ್ಬೇ ವಾಚುಗ್ಗತಾ ಸದಾ;

ನಿಕಾಯೇ ಪಞ್ಚವೇಧೇವ, ಯಾವ ರಞ್ಞೋ ಚ ಧಾರಣಾ;

ತತೋ ಚುತೋ ಸೋ ರಾಜಾ ಚ, ತುಸ್ಸೀತೇ ಉಪಪಜ್ಜತಿ;

ದೇವಲೋಕೇಟ್ಠಿತೋ ಸನ್ತೋ, ತದಾ ವಾಚುಗ್ಗತಾ ತತೋ.

ತಸ್ಸ ಪುತ್ತಾಪಿ ಅಹೇಸುಂ, ಅನೇಕಾ ವರಜ್ಜಂ ಗತಾ;

ಅನುಕ್ಕಮೇನ ಚುತತೇ, ದೇವಲೋಕಂ ಗತಾ ಧುವಂ;

ತದಾಪಿತೇ ಸಬ್ಬೇ ಭಿಕ್ಖೂ, ವಾಚುಗ್ಗತಾವ ಸಬ್ಬದಾ;

ನಿಕಾಯೇ ಪಞ್ಚವಿಧೇವ, ಧಾರಣಾವಸತಿಮತಾ.

ತತೋ ಪರಂ ಪೋತ್ಥಕೇಸು, ನಿಕಾಯಾ ಪಞ್ಚ ಪಿಟ್ಠಿತಾ;

ತದಾ ಅಟ್ಠಕಥಾ ಟೀಕಾ, ಸಬ್ಬೇ ಗನ್ಥಾ ಪೋತ್ಥಕೇ ಗತಾ;

ಸಬ್ಬೇ ಪೋತ್ಥೇಸು ಯೇ ಗನ್ಥಾ, ಪಾಳಿ ಅಟ್ಠಕಥಾ ಟೀಕಾ;

ಸಂಟ್ಠಿತಾಸಂ ಠಿತಾ ಹೋನ್ತಿ, ಸಬ್ಬೇಪಿ ನೋ ನ ಸನ್ತಿತೇ.

ತದಾ ತೇ ಪೋತ್ಥಕೇಯೇವ, ನಿಕಾಯಾ ಪಿಠಿತಾ ಖಿಲಾ;

ತದಾ ಅಟ್ಠಕಥಾದೀನಿ, ಭವನ್ತೀತಿ ವದನ್ತಿ ಚ.

ಲಙ್ಕಾದೀಪಸ್ಸ ರಞ್ಞೋವ, ಸದ್ಧಾ ತಿಸ್ಸಸ್ಸ ರಾಜಿನೋ.

ಪುತ್ತಕೋ ಲಙ್ಕಾದೀಪಸ್ಸ, ಇಸ್ಸರೋ ಧಮ್ಮಿಕೋ ವರೋ;

ತದಾ ಖೀಣಾಸವಾ ಸಬ್ಬೇ, ಓಲೋಕೇನ್ತಿ ಅನಗತೇ.

ಖೀಣಾಸವಾ ಪಸ್ಸನ್ತಿ ತೇ, ದುಪಞ್ಞೇವ ಪುಥುಜ್ಜನೇ;

ಸಬ್ಬೇಪಿ ತೇ ಭಿಕ್ಖೂ ಆಸುಂ, ಬಹುಂತರಾ ಪುಥುಜ್ಜನಾ;

ನ ಸಕ್ಖಿಸ್ಸನ್ತಿ ತೇ ಪಞ್ಚ, ನಿಕಾಯೇ ವಾಚುಗ್ಗತಂ ಇತಿ;

ಪೋತ್ಥಕೇಸು ಸಬ್ಬೇ ಪಞ್ಚ, ಆರೋಪೇನ್ತಿ ಖೀಣಾಸವಾ.

ಸದ್ಧಮ್ಮಟ್ಠಿತಿ ಚಿರತ್ತಾಯ, ಜನಾನಂ ಪುಞ್ಞತ್ಥಾಯ ಚ;

ತತೋ ಪಟ್ಠಾಯತೇ ಸಬ್ಬೇ, ನಿಕಾಯಾ ಹೋನ್ತಿ ಪೋತ್ಥಕೇ;

ಅಟ್ಠಕಥಾ ಟೀಕಾ ಸಬ್ಬೇ, ತೇ ಹೋನ್ತಿ ಪೋತ್ಥಕೇಟ್ಠಿತಾ.

ತತೋ ಪಟ್ಠಾಯತೇ ಸಬ್ಬೇ, ಭಿಕ್ಖು ಆದಿ ಮಹಾಗಣಾ;

ಪೋತ್ಥಕೇಸು ಠಿತೇಯೇವ, ಸಬ್ಬೇ ಪಸ್ಸನ್ತಿ ಸಬ್ಬದಾ.

[ಪೋತ್ಥಕೇ ಆರೋಪನ ದೀಪಕಾ ನಿಟ್ಠಿತಾ.]

ಯೋ ಕೋಚಿ ಪಣ್ಡಿತೋ ಧೀರೋ, ಅಟ್ಠಕಥಾದಿಕಂ ಗನ್ಥಂ ಕರೋತಿ ವಾ ಕಾರಾಪೇತಿ ವಾ, ತಸ್ಸ ಅನನ್ತಕೋ ಹೋತಿ ಪುಞ್ಞಸಂಚಯೋ, ಅನನ್ತಕೋ ಹೋತಿ ಪುಞ್ಞಾನಿಸಂಸೋ. ಚತುರಾಸೀತಿ ಚೇತಿಯಸಹಸ್ಸ ಕರಣಸದಿಸೋ, ಚತುರಾಸೀತಿ ಬುದ್ಧರೂಪಸಹಸ್ಸ ಕರಣಸದಿಸೋ, ಚತುರಾಸೀತಿ ಬೋಧಿರುಕ್ಖಸಹಸ್ಸರೋಪನಸದಿಸೋ, ಚತುರಾಸೀತಿ ವಿಹಾರಸಹಸ್ಸ ಕರಣಸದಿಸೋ, ಯೋ ಚ ಬುದ್ಧವಚನಮಞ್ಜೂಸಂ ಕರೋತಿ ವಾ ಕಾರಾಪೇತಿ ವಾ, ಯೋ ಚ ಬುದ್ಧವಚನಂ ಮಣ್ಡನಂ ಕರೋತಿ ವಾ ಕಾರಾಪೇತಿ ವಾ, ಯೋ ಚ ಬುದ್ಧವಚನಂ ಲೇಖಂ ಕರೋತಿ ವಾ ಕಾರಾಪೇತಿ ವಾ, ಯೋ ಚ ಪೋತ್ಥಕಂ ವಾ, ಯೋ ಚ ಪೋತ್ಥಕಮೂಲಂ ವಾ, ದೇತಿ ವಾ ದಾಪೇತಿ ವಾ, ಯೋ ಚ ತೇಲಂ ವಾ ಚುಣ್ಣಂ ವಾ, ಧಞ್ಞಂ ವಾ ಪೋತ್ಥಕಭಞ್ಜನತ್ಥಾಯ ಯಂ ಕಿಞ್ಚಿ ನಿತ್ಥಂ ವಾ ಪೋತ್ಥಕಛಿದ್ದೇ ಆವುನತ್ಥಾಯ, ಯಂ ಕಿಞ್ಚಿ ಸುತ್ತಂ ವಾ ಕಟ್ಠಫಲಕದ್ವಯಂ ವಾ ಪೋತ್ಥಕಂ ಪುಟನತ್ಥಾಯ ಯಂ ಕಿಞ್ಚಿ ವತ್ಥಂ ವಾ, ಪೋತ್ಥಕ-ಬನ್ಧನತ್ಥಾಯ, ಯಂ ಕಿಞ್ಚಿ ಯೋತ್ತಂ ವಾ ಪೋತ್ಥಕಲಾಪ ಪೂಟನತ್ಥಾಯ ಯಂ ಕಿಞ್ಚಿ ಥವಿಕಂ ದೇತಿ ವಾ ದಾಪೇತಿ ವಾ.

ಯೋ ಚ ಹರಿತಾಲೇನ ವಾ ಮನೋಸಿಲಾಯ ವಾ, ಸುವಣ್ಣೇನ ವಾ ರಜತೇನ ವಾ ಪೋತ್ಥಕಮಣ್ಡನಂ ವಾ ಕಟ್ಠಫಲಕಮಣ್ಡನಂ ವಾ ಕರೋತಿ ವಾ ಕಾರಾಪೇತಿ ವಾ, ತಸ್ಸ ಅನನ್ತಕೋ ಹೋತಿ ಪುಞ್ಞಸಂಚಯೋ, ಅನನ್ತಕೋ ಹೋತಿ ಪುಞ್ಞಾನಿಸಂಸೋ. ಚತುರಾಸೀತಿ ಚೇತಿಯಸಹಸ್ಸ ಕರಣಸದಿಸೋ, ಚತುರಾಸೀತಿ ವಿಹಾರಸಹಸ್ಸ ಕರಣಸದಿಸೋ.

ಭವೇ ನಿಬ್ಬತ್ತಮಾನೋ ಸೋ, ಸೀಲಗುಣಮುಪಾಗತಾ;

ಮಹಾ ತೇಜೋ ಸದಾ ಹೋತಿ, ಸೀಹನಾದೋ ವಿಸಾರದೋ.

ಆಯುವಣ್ಣಬಲುಪ್ಪೇತೋ, ಧಮ್ಮಕಾಮೋ ಭವೇ ಸದ್ದಾ;

ದೇವಮನುಸ್ಸಲೋಕೇಸು, ಮಹೇಸಕ್ಖೋ ಅನಾಮಯೋ.

ಭವೇ ನಿಬ್ಬತ್ತಮಾನೋ ಸೋ, ಪಞ್ಞವಾ ಸುಸಮಾಹಿತೋ;

ಅಧಿಪಚ್ಚ ಪರಿವಾರೋ, ಸಬ್ಬಸುಖಾಧಿ ಗಚ್ಛತಿ.

ಸದ್ದೋಹೀರಿಮಾ ವದಞ್ಞೂ, ಸಂವಿಗ್ಗ ಮಾನಸೋ ಭವೇ;

ಅಙ್ಗಪಚ್ಚಙ್ಗ ಸಮ್ಪನ್ನೋ, ಆರೋಹ ಪರಿಣಾಹವಾ.

ಸಬ್ಬೇ ಸತ್ತಾಪಿ ಯೋ ಲೋಕೇ, ಸಬ್ಬತ್ಥ ಪೂಜಿತಾಭವೇ;

ದೇವಮನುಸ್ಸ ಸಞ್ಚರೋ, ಮಿತ್ತಸಹಾಯ ಪಾಲಿತೋ.

ದೇವಮನುಸ್ಸ ಸಮ್ಪತ್ತಿಂ, ಅನುಭೋತಿ ಪುನಪ್ಪುನಂ;

ಅರಹತ್ತ ಫಲಂ ಪತ್ತೋ, ನಿಬ್ಬಾನಂ ಪಾಪುಣಿಸ್ಸತಿ.

ಪಟಿಸಮ್ಭಿದಾ ಚತಸ್ಸೋ, ಅಭಿಞ್ಞಾ ಛಬ್ಬಿಧೇ ವರೇ;

ವಿಮೋಕ್ಖೇ ಅಟ್ಠಕೇ ಸೇಟ್ಠೇ, ಗಮಿಸ್ಸತಿ ಅನಾಗತೇ.

ತಸ್ಮಾಹಿ ಪಣ್ಡಿತೋ ಪೋಸೋ, ಸಂಪಸ್ಸಂ ಹಿತ ಮತ್ತನೋ;

ಕಾರೇಯ್ಯ ಸಾಮ ಗನ್ಥೇ ಚ, ಅಞ್ಞೇ ಚಾಪಿ ಕಾರಾಪಯೇ.

ಪೋತ್ಥಕೇ ಚ ಠಿತೇ ಗನ್ಥೇ, ಪಾಳಿ ಅಟ್ಠಕಥಾದಿಕೇ;

ಧಮ್ಮಮಞ್ಜೂಸಾ ಗನ್ಥೇ ಚ, ಲೇಖಂ ಕರೇ ಕಾರಾಪಯೇ.

ಪೋತ್ಥಕಂ ಪೋತ್ಥಕಮೂಲಞ್ಚ, ತೇಸಂ ಚುಲ್ಲಥೂಸಮ್ಪಿ ಚ;

ಪಿಲೋತಿಕಾದಿಕಂ ಸುತ್ತಂ, ಕಟ್ಠಫಲದ್ವಯಮ್ಹಿ ಚ.

ಧಮ್ಮಬನ್ಧನತ್ಥಾಯ ಚ, ಯಂ ಕಿಞ್ಚಿ ಮಹಗ್ಘಂ ವತ್ಥಂ;

ಧಮ್ಮಬನ್ಧನಯೋತ್ತಞ್ಚ, ಯಂ ಕಿಞ್ಚಿ ಥವಿಕಮ್ಪಿ ಚ.

ದದೇಯ್ಯ ಧಮ್ಮಖೇತ್ತಮ್ಹಿ, ವಿಪ್ಪಸ್ಸನ್ನೇನ ಚೇತಸಾ;

ಅಞ್ಞೋ ಚಾಪಿ ದಜ್ಜಾಪೇಯ್ಯ, ಮಿತ್ತಸಹಾಯಬನ್ಧವೇತಿ.

ಗನ್ಥಾಕರಲೇಖಲೇಖಾಪನಾನಿಸಂಸ ದೀಪನಾ ನಿಟ್ಠಿತಾ.

[ಇತಿ ಚೂಲಗನ್ಥವಂಸೇ ಪಕಿಣ್ಣಕದೀಪಕೋ ನಾಮ ಪಞ್ಚಮೋ ಪರಿಚ್ಛೇದೋ.]

ಸೋಹಂ ಹಂಸಾರಟ್ಠ ಜಾತೋ, ನನ್ತಪಞ್ಞೋತಿ ವಿಸ್ಸುತೋ

ಸದ್ಧಾ ಸೀಲ ವೀರಪ್ಪೇತೋ, ಧಮ್ಮರಸಂ ಗವೇಸನೋ.

ಸೋಹಂ ತತೋ ಗನ್ತ್ವಾ ಚಿಮಂ, ಜಿನ ನವಂ ಯಂ ಪೂರಂ;

ಸಬ್ಬ ಧಮ್ಮಂ ವಿಚಿನನ್ತೋ, ವೀಸತಿ ವಸ್ಸಮಾಗತೋ.

ಸಬ್ಬ ಧಮ್ಮಂ ವಿಸ್ಸೇಜ್ಜೇನ್ತೋ, ಕಿಕಾರೇ ನೇವ ಭಿಕ್ಖುನೋ;

ಛ ವಸ್ಸಾನಂ ಗಣಂ ಭಿತ್ವಾ, ಕಾಮಾನಂ ಅಭಿಮದ್ದನಂ.

ಸನ್ತಿ ಸಭಾ ಚ ನಿಬ್ಬಾನಂ, ಗವೇಸಿಞ್ಚ ಪುನಪ್ಪುನಂ;

ವಸನ್ತೋಹಂ, ವನಾರಮ್ಮಂ, ಪಿಟಕತ್ತಯ ಸಙ್ಗಹಂ;

ಗನ್ಥವಂಸಂ ಇಮಂ ಖುದ್ದಂ, ಅರಿಯಸಙ್ಘದಾಸಕನ್ತಿ.

ಇತಿ ಪಾಮೋಜ್ಜತ್ಥಾಯ ಅರಞ್ಞವಾಸಿನಾ, ನನ್ದಪಞ್ಞಾಚರಿಯೇನ ಕತೋ ಚೂಳಗನ್ಥವಂಸೋ ನಿಟ್ಠಿತೋ.

ಧಮ್ಮವಟಂಸಕನಾಮೇನ ವಿಸುತೋ ಥೇರೋ, ಯಂ ಪಕರಣಂ ಲಿಕ್ಖಿತಂ ತಂ ಪರಿಪುಣ್ಣಂ ತೇನ ಪುಞ್ಞೇನ ತಂ ಪಿಟಕಂ ಪರಿಸಿಪ್ಪಂ ಪರಿನಿಟ್ಠಿತಂ.

ಮಮೇವ ಸಿಸ್ಸಸಮೂಹಾನಞ್ಚ ಪರಿಸಿಪ್ಪಂ ಪರಿನಿಟ್ಠಿತಂ. ತವೇ ಸಿಸ್ಸಾನೂ ಸಿಸ್ಸಾನಿ ಚ, ಪರಿಸಿಪ್ಪಂ ಪರಿನಿಟ್ಠಿತಂ.