ಅಞ್ಞ > ವಂಸ-ಗನ್ಥ-ಸಙ್ಗಹೋ

೧. ತತ್ಥ ಚ ನವಟ್ಠಾನಾಗತಸಾಸನವಂಸಕಥಾಮಗ್ಗೋ ಏವಂ ವೇದಿತಬ್ಬೋ. ಅಮ್ಹಾಕಞ್ಹಿ ಭಗವಾ ಸಮ್ಮಾಸಮ್ಬುದ್ಧೋ ವೇನೇಯ್ಯಾನಂ ಹಿತತ್ಥಾಯ ಹತ್ಥಗತಂ ಸುಖಂ ಅನಾದಿಯಿತ್ವಾ ದೀಪಙ್ಕರಸ್ಸ ಭಗವತೋ ಪಾದಮೂಲೇ ಬ್ಯಾಕರಣಂ ನಾಮ ಮಞ್ಜೂಸಕ ಪುಪ್ಫಂ ಪಿಲನ್ಧಿತ್ವಾ ಕಪ್ಪಸತಸಹಸ್ಸಾಧಿಕಾನಿ ಚತ್ತಾರಿ ಅಸಖ್ಯೇ ಯಾನಿ ಅನೇಕಾಸು ಜಾತೀಸು ಅತ್ತನೋ ಖೇದಂ ಅನಪೇಕ್ಖಿತ್ವಾ ಸಮತಿಂಸಪಾರಮಿಯೋ ¶ ಪೂರೇತ್ವಾ ವೇಸ್ಸನ್ತರತ್ತಭಾವತೋ ಚವಿತ್ವಾ ತುಸಿತಪುರೇ ದೇವಸುಖಂ ಅನುಭವಿ.

ತದಾ ದೇವೇಹಿ ಉಯ್ಯೋಜಿಯಮಾನೋ ಹುತ್ವಾ ಕಪಿಲವತ್ಥುಮ್ಹಿ ಹೋಸಮತರಞ್ಞಾ ಪಭುತಿ ಅಸಮ್ಭಿನ್ನಾತ್ತಿಯವಂಸಿಕಸ್ಸ ಸುದ್ಧೋ ಧನಸ್ಸನಾಮ ಮಹಾರಞ್ಞೋ ಅಗ್ಗಮಹೇಸಿಯಾ ಅಸಮ್ಭಿನ್ನಾತ್ತಿಯವಂ ಸಿಕಾಯ ಮಾಯಾಯ ಕುಚ್ಛೀಸ್ಮಿಂ ಆಸಾಳಿಮಾಸಸ್ಸ ಪುಣ್ಣಮಿಯಂ ಗುರುವಾರೇ ಪಟಿಸನ್ಧಿಂ ಗಹೇತ್ವಾ ಅಸಮಾಸಚ್ಚಯೇನ ವೇಸಾಖಮಾಸಸ್ಸ ಪುಣ್ಣಮಿಯಂ ಸುಕ್ಕವಾರೇ ವಿಜಾಯಿತ್ವಾ ಸೋಳಸವಸ್ಸಿಕಕಾಲೇ ರಜ್ಜಸಮ್ಪತ್ತಿಂ ಪತ್ವಾ ಏಕೂನತಿಂಸವಸ್ಸಾನಿ ಅತಿಕ್ಕಮಿತ್ವಾ ಮಙ್ಗಲಉಯ್ಯಾನಂ ನಿಕ್ಖಮನಕಾಲೇ ದೇವೇಹಿ ದಸ್ಸಿತಾನಿ ಚತ್ತಾರಿ ನಿಮಿತ್ತಾನಿ ಪಸ್ಸಿತ್ವಾ ಸಂವೇಗಂ ಆಪಜ್ಜಿತ್ವಾ ಮಹಾಭಿನಿಕ್ಖಮನಂ ನಿಕ್ಖಮಿತ್ವಾ ಅನೋಮಾಯನಾಮ ನದಿಯಾ ತೀರೇ ಭಮರ ವಣ್ಣಸನ್ನಿಭಾನಿ ಕೇಸಾನಿ ಛಿನ್ದಿತ್ವಾ ದೇವದತ್ತಿಯಕಾಸಾವಂ ಪಟಿಚ್ಛಾದೇತ್ವಾ ನೇ ರಞ್ಜರಾಯನಾಮ ನದಿಯಾ ತೀರೇ ವೇಸಾಖಮಾಸಸ್ಸ ಪುಣ್ಣಮಿಯಂ ಪಚ್ಚೂಸಕಾಲೇ ಸುಜಾತಾಯನಾಮ ಸೇಟ್ಠಿಧೀತಾಯ ದಿನ್ನಂ ಪಾಯಾಸಂ ಏಕೂನಪಣ್ಣಾಸವಾರೇನ ಪರಿಭುಞ್ಜಿತ್ವಾ ಪುರಿಮಿಕಾನಂ ಸಮ್ಮಾಸಮ್ಬುದ್ಧಾನಂ ಧಮ್ಮತಾಯ ಸುವಣ್ಣಪಾತಿಂ ನದಿಯಂ ಓತಾರೇತ್ವಾ ಮಹಾಬೋಧಿಮಣ್ಡಂ ಉಪಸಙ್ಕಮಿತ್ವಾ ಅಪರಾಜಿತಪಲ್ಲಙ್ಕೇ ನಿಸೀದಿತ್ವಾ ಅನಮತಗ್ಗಸಂ ಸಾರತೋ ಪಟ್ಠಾಯ ಅತ್ತಾನಂ ಛಾಯಾ ವಿಯ ಅನುಯನ್ತಾನಂ ಅನೇಕಸತಕಿಲೇಸವೇರೀನಂ ಸೀಸಂ ಚತೂಹಿ ಮಗ್ಗಸತ್ಥೇಹಿ ಛಿನ್ದಿತ್ವಾ ತಿಲೋಕಗ್ಗಮಹಾಧಮ್ಮರಾಜತ್ತಂ ಪತ್ವಾ ಪಞ್ಚತಾಲೀಸವಸ್ಸಾನಂ ತೇಸು ತೇಸು ಠಾನೇಸು ತೇಸಂ ತೇಸಂ ಸತ್ತಾನಂ ಮಹಾಕರುಣಾಸಮಾಪತ್ತಿಜಾಲಂ ಪತ್ಥಾರೇತ್ವಾ ದೇಸನಾಞಾಣಂ ವಿಜಮ್ಭೇತ್ವಾ ಧಮ್ಮಂ ದೇಸೇತ್ವಾ ಸಾಸನಂ ಪತಿಟ್ಠಾಪೇಸಿ. ಪತಿಟ್ಠಾಪೇತ್ವಾ ಚ ಪನ ಅಸೀತಿವಸ್ಸಾಯುಕಕಾಲೇ ವಿಜ್ಜೋತಯಿತ್ವಾ ನಿಬ್ಬಾಯನಪ್ಪ ದಾಪಜಾಲಂ ವಿಯ ಅನುಪಾದಿಸೇಸನಿಬ್ಬಾನಧಾತುಯಾ ಪರಿನಿಬ್ಬಾಯಿ. ಮಚ್ಚು ಧಮ್ಮಸ್ಸ ಚ ನಾಮ ತೀಸು ಲೋಕೇಸು ಅತಿಮಮಾಯಿತಬ್ಬೋ ಏಸ, ಅತಿಗರುಕಾತಬ್ಬೋ ಏಸ, ಅತಿಭಾಯಿತಬ್ಬೋ ಏಸಾತಿ ವಿಜಾನನಸಭಾವೋ ನತ್ಥಿ. ಭಗವನ್ತಂಯೇವ ತಾವ ತಿಲೋಕಗ್ಗಪುಗ್ಗಲಂ ಆದಾಯ ¶ ಗಚ್ಛತಿ, ಕಿಂಮಙ್ಗಂ ಪನ ಅಮ್ಹೇ ಯೇವಾ ತೇವಾ, ಅಹೋವತಅಚ್ಛರಿಯಾ ಸಙ್ಖಾರಧಮ್ಮೋತಿ. ಹೋನ್ತಿ ಚೇತ್ಥ–

ಸತ್ತಾಹಪರಿನಿಬ್ಬುತೇ ಚ ಭಗವತಿ ಆಯಸ್ಮಾ ಮಹಾಕಸ್ಸಪೋ ತಿಯಡ್ಢಸತಾಧಿಕೇಹಿ ಸಹಸ್ಸಮತ್ತೇಹಿ ಭಿಕ್ಖೂಹಿ ಸದ್ಧಿ ಪಾವಾತೋ ಕುಸೀನಾರಾಯಂ ಆಗಚ್ಛನ್ತೋ ಅನ್ತರಾಮಗ್ಗೇ ಭಗವಾ ಸಮ್ಮಾಸಮ್ಬುದ್ಧೋ ಪರಿನಿಬ್ಬುತೋತಿ ಸುತ್ವಾ ಅವೀತಸೋಕ ಭಿಕ್ಖೂ ರೋದನ್ತೇ ದಿಸ್ವಾ ವುದ್ಧಪಬ್ಬಜಿತೋ ಸುಭದ್ದಾನಾಮ ಭಿಕ್ಖು ಏವಂ ವದತಿ– ಮಾ ಆವುಸೋ ಪರಿದೇವಿತ್ಥ, ನತ್ಥೇತ್ಥ ಸೋಚಿತಬ್ಬೋನಾಮಕೋಚಿ, ಪುಬ್ಬೇ ಮಯಂ ಭವಾಮ ಸಮಣೇನ ಗೇ,ಭಮೇನ ಉಪದ್ದುತಾ– ಇದಂ ಕರೋಥ ಇದಂ ತುಮ್ಹಾಕಂ ಕಪ್ಪತಿ, ಮಾ ಇದಂ ಕರಿತ್ಥ ನ ಇದಂ ತುಮ್ಹಾಕಂ ಕಪ್ಪತೀತಿ, ಸೇಯ್ಯಥಾಪಿ ಇಣಸಾಧಿಕೇನ ದಾಸೋತಿ, ಇದಾನಿ ಪನ ಮಯಂ ಯಂ ಯಂ ಇಚ್ಛಾಮ, ತಂ ತಂ ಸಕ್ಕಾ ಕಾತುಂ, ಯಂ ಯಂ ಪನ ನ ಇಚ್ಛಾಮ,ತಂ ತಂ ಸಕ್ಕಾ ಅಕಾತುನ್ತಿ. ತಂ ಸುತ್ವಾ ಈದಿಸಂ ಪನ ವೇರೀಪುಗ್ಗಲಂ ಪಟಿಚ್ಚ ಸಮ್ಮಾಸಮ್ಬುದ್ಧಸ್ಸ ಭಗವತೋ ಸಾಸನಂ ಖಿಪ್ಪಂ ಅನ್ತರಧಾರೇಯ್ಯ, ಇದಾನಿ ಸುವಣ್ಣಕ್ಖನ್ಧಸದಿಸೋ ಸರೀರೋ ಸಂವಿಜ್ಜಮಾನೋ ¶ ಯೇವ ದುಕ್ಖೇನ ನಿಪ್ಫಾದಿತೇ ಸಾಸನೇ ಮಹಾಭಯಂ ಉಪ್ಪಜ್ಜಿ ಚ, ಈದಿಸೋ ಪುಗ್ಗಲೋ ಅಞ್ಞಂ ಈದಿಸಂ ಪುಗ್ಗಲಂ ಸಹಾಯಂ ಲಭಿತ್ವಾ ವುದ್ಧಿಮಾಪಜ್ಜನ್ತೋ ಹಾಪೇತುಂ ಸಕ್ಕುಣೇಯ್ಯ ಮಞ್ಞೇತಿ ಚಿತ್ತಕ್ಖೇದಂ ಪತ್ವಾ ಧಮ್ಮಸಂವೇಗಂ ಲಭಿತ್ವಾ ಇಮಂ ಭಿಕ್ಖುಂ ಇಧೇವ ಸೇತವತ್ಥಂ ನಿವಾಸಾಪೇತ್ವಾ ಸರೀರೇ ಭಸ್ಮೇನ ವಿಕಿರಿತ್ವಾ ಬಹಿದ್ಧಾ ಕರಿಸ್ಸಾಮೀತಿ ಚಿನ್ತೇಸಿ.

ತದಾ ಆಯಸ್ಮತೋ ಮಹಾಕಸ್ಸಪತ್ಥೇರಸ್ಸ ಏತದಹೋಸಿ,– ಇದಾನಿ ಸಮಣಸ್ಸ ಗೋತಮಸ್ಸ ಸರೀರಂ ಸಂವಿಜ್ಜಮಾನಂಯೇವ ಪರಿಸಾ ವಿವಾದಂ ಕರೋನ್ತೀತಿ ಮನುಸ್ಸಾ ಉಪವದಿಸ್ಸನ್ತಿತಿ. ತತೋ ಪಚ್ಛಾ ಇಮಂ ವಿತಕ್ಕಂ ವೂಪಸಮೇತ್ವಾ ಖಮಿತ್ವಾ ಸಮ್ಮಾಸಮ್ಬುದ್ಧೋ ಭಗವಾ ಪರಿನಿಬ್ಬಾಯಮಾನೋಪಿ ತೇನ ಪನ ದೇಸಿತೋ ಧಮ್ಮೋ ಸಂವಿಜ್ಜತಿ, ತೇನ ದೇಸಿತಸ್ಸ ಧಮ್ಮಸ್ಸ ಥಿರಂ ಪತಿಟ್ಠಾಪನತ್ಥಾಯ ಸಙ್ಗಾಯಿಯಮಾನಂ ಈದಿಸೇಹಿ ಪುಗ್ಗಲೇಹಿ ಸಾಸನಂ ನ ಅನ್ತರಧಾಯಿಸ್ಸತಿ, ಚಿರಂ ಠಸ್ಸತಿ ಯೇವಾತಿ ಮನಸಿಕರಿತ್ವಾ ಭಗವತೋ ದಿನ್ನಪಂಸು ಕೂಲಚೀವರಾದಿವಸೇನ ಧಮ್ಮಾನುಗ್ಗಹಂ ಅನುಸ್ಸರಿತ್ವಾ ಭಗವತೋ ಪರಿನಿಬ್ಬಾನತೋ ತತಿಯೇ ಮಾಸೇ ಆಸಾಳಿಮಾಸಸ್ಸ ಪುಣ್ಣಮಿತೋ ಪಞ್ಚಮೇ ದಿವಸೇ ರಾಜಗಹೇ ಸತ್ತಪಣ್ಣಿಗುಹಾಯಂ ಆಜಾತಸತ್ತುಂನಾಮ ರಾಜಾನಂ ನಿಸ್ಸಾಯ ಪಞ್ಚಹಿ ಅರಹನ್ತ ಸತೇಹಿ ಸದ್ಧಿಂ ಸತ್ತಮಾಸೇಹಿ ಪಠಮಂ ಸಙ್ಗಾಯನಂ ಅಕಾಸಿ.

ತದಾ ಅಟ್ಠಚತ್ತಾಲೀಸಾಧಿಕಸತಕಲಿಯುಗಂ ಅನವಸೇಸತೋ ಅಪನೇತ್ವಾ ಕಲಿಯುಗೇನ ಸಾಸನಂ ಸಮಂ ಕತ್ವಾ ಠಪೇಸಿ. ಯದಾ ಪನ ಅಜಾತಸತ್ತು ರಞ್ಞೋ ರಜ್ಜಂ ಪತ್ವಾ ಅಟ್ಠವಸ್ಸಾನಿ ಅಹೇಸುಂ, ತದಾ ಮರಮ್ಮರಟ್ಠೇ ತಙ್ಕೋಸಙ್ಗತ್ವಪುರೇ ಜಮ್ಬುದೀಪಧಜಸ್ಸನಾಮ ರಞ್ಞೋ ರಜ್ಜಂ ಪತ್ವಾ ಅತಿರೇಕಪಞ್ಚವಸ್ಸಾನಿ ಅಹೇಸುನ್ತಿ.

ಇಮಿಸ್ಸಞ್ಚ ಪಠಮಸಙ್ಗೀತಿಯಂ ಆಯಸ್ಮಾ ಮಹಾಕಸ್ಸಪೋ ಆಯಸ್ಮಾ ಉಪಾಲಿ ಆಯಸ್ಮಾ ಆನನ್ದೋ ಆಯಸ್ಮಾ ಅನುರುದ್ಧೋ ಚಾತಿ ಏವಮಾದಯೋ ಪಞ್ಚಸತಪ್ಪಮಾಣಾ ಮಹಾಥೇರಾ ಪಠಮಂ ಸಙ್ಗಾಯಿತ್ವಾ ಸಾಸನಂ ಅನುಗ್ಗಹೇಸುಂ. ಏವಂ ¶ ಸುಭದ್ದಸ್ಸ ದುಟ್ಠಪಬ್ಬಜಿತಸ್ಸ ದುಟ್ಠವಚನಂ ಸಾಸನಸ್ಸ ಅನುಗ್ಗಹೇ ಕಾರಣಂನಾಮ ಅಹೋಸಿ. ಸುಭದ್ದೋ ಚ ನಾಮ ದುಟ್ಠಪಬ್ಬಜಿತೋ ಆತುಮಾನಗರವಾಸೀ ಅಹೋಸಿ ಕಪ್ಪಕಕುಲಿಕೋ. ಸೋ ಯದಾ ಭಗವಾ ಆತುಮಾನಗರಂ ಗಚ್ಛತಿ, ತದಾ ಅತ್ತೇನೋ ಪುತ್ತೇ ದ್ವೇ ಸಾಮಣೇರೇ ಕಪ್ಪಕಕಮ್ಮಂ ಕಾರಾಪೇತ್ವಾ ಲದ್ಧೇಹಿ ತಣ್ಡುಲತೇಲಾದೀಹಿ ವತ್ಥೂಹಿ ಯಾಗುಂ ಪಚಿತ್ವಾ ಸಸಙ್ಘಸ್ಸ ಬುದ್ಧಸ್ಸ ಅದಾಸಿ. ಭಗವಾ ಪನ ತಾನಿ ಅಪ್ಪಟಿಗ್ಗಹೇತ್ವಾ ಕಾರಣಂ ಪುಚ್ಛಿತ್ವಾ ವಿಗರಹಿತ್ವಾ ಅಕಪ್ಪಿಯಸಮಾದಾನದುಕ್ಕಟಾಪತ್ತಿಂ ಕಪ್ಪಕಪುಬ್ಬಸ್ಸ ಭಿಕ್ಖುಸ್ಸ ಖುರಧಾರಣದುಕ್ಕಟಾಪತ್ತಿಞ್ಚ ಪಞ್ಞಾಪೇಸಿ. ತಂ ಕಾರಣಂ ಪಟಿಚ್ಚ ವೇರಂ ಬನ್ಧಿತ್ವಾ ಸಾಸನಂ ವಿದ್ಧಂಸಿತುಕಾಮತಾಯ ತತ್ತಕಅಯೋಗುಳಂ ಗಿಲಿತ್ವಾ ಉಗ್ಗೀರನ್ತೋ ವಿಯ ಈದಿಸದುಟ್ಠವಚನಂ ವದೀತಿ.

ಅಜಾತಸತ್ತುರಾಜಾ ಚ ತುಮ್ಹಾಕಂ ಧಮ್ಮಚಕ್ಕಂ ಹೋತು, ಮಮ ಆಣಾಚಕ್ಕಂ ಪವತ್ತಿಸ್ಸಾಮಿ, ವಿಸ್ಸಟ್ಠಾ ಹುತ್ವಾ ಸಙ್ಗಾಯನ್ತೂತಿ ಅನುಗ್ಗಹೇಸಿ. ತೇನೇಸ ಪಠಮಂ ಸಾಸನಾನುಗ್ಗಹೋ ರಾಜಾತಿ ವೇದಿತಬ್ಬೋ, ಮಹಾಕಸ್ಸಪಾದೀನಞ್ಚ ಅರಹನ್ತಾನಂ ಪಞ್ಚಸತಾನಂ ಸಿಸಾಪರಮ್ಪರಾ ಅನೇಕಾ ಹೋನ್ತಿ, ಗಣನಪಥಂ ವೀತಿವತ್ತಾ. ಯಮೇತ್ಥ ಇತೋ ಪರಂ ವತ್ತಬ್ಬಂ, ತಂ ಅಟ್ಠಕಥಾಯಂ ವುತ್ತನಯೇನ ವೇದಿತಬ್ಬಂ. ತೇ ಪನ ಮಹಾಥೇರಾ ಸಙ್ಗಾಯಿತ್ವಾ ಪರಿನಿಬ್ಬಾಯಿಂಸೂತಿ. ಹೋನ್ತಿ ಚೇತ್ಥ–

ತತೋ ಪರಂ ವಸ್ಸಸತಂ ತೇಸಂ ಸಿಸ್ಸಪರಮ್ಪರಾ ಸಾಸನಂ ಧಾರೇತ್ವಾ ಆಗಮಂಸು. ಅಥಾನುಕ್ಕಮೇನ ಗಚ್ಛನ್ತೇಸು ರತ್ತಿದಿವೇಸು ವಸ್ಸಸತಪರಿನಿಬ್ಬುತೇ ಭಗವತಿ ವೇಸಾಲಿಕಾ ವಜ್ಜಿಪುತ್ತಕಾ ಭಿಕ್ಖೂ ವೇಸಾಲಿಯಂ ಕಪ್ಪತಿ ಸಿಙ್ಗಿಲೋಣಕಪ್ಪಾ, ಕಪ್ಪತಿ ದ್ವಙ್ಗುಲಕಪ್ಪೋ, ಕಪ್ಪತಿ ಗಾಮನ್ತರಕಪ್ಪೋ, ಕಪ್ಪತಿ ಆವಾಸಕಪ್ಪೋ, ಕಪ್ಪತಿ ಅನುಮತಿಕಪ್ಪೋ, ಕಪ್ಪತಿ ಆಚಿಣ್ಣಕಪ್ಪೋ, ಕಪ್ಪತಿ ಆಮಥಿತಕಪ್ಪೋ, ಕಪ್ಪತಿ ಜಳೋಗಿಂ ಪಾತುಂ, ಕಪ್ಪತಿ ಅದಸಕಂ ನಿಸೀದನಂ, ಕಪ್ಪತಿ ಜಾತರೂಪರಜತನ್ತಿ ಇಮಾನಿ ದಸವತ್ಥೂನಿ ದೀಪೇಸುಂ.

ತೇಸಂ ಸುಸುನಾಗಪುತ್ತೋ ಕಾಳಾಸೋಕೋನಾಮ ರಾಜಾ ಪಕ್ಖೋ ಅಹೋಸಿ. ತೇನ ಖೋ ಪನ ಸಮಯೇನ ಆಯಸ್ಮಾ ಯಸೋ ಕಾಕಣ್ಡಕಪುತ್ತೋ ವಜ್ಜೀಸು ಚಾರಿಕಂ ಚರಮಾನೋ ವೇಸಾಲಿಕಾ ಕಿರ ವಜ್ಜಿಪುತ್ತಕಾ ಭಿಕ್ಖೂ ವೇಸಾಲಿಯಂ ದಸವತ್ಥೂನಿ ದಿಪೇನ್ತೀತಿ ಸುತ್ವಾ ನ ಖೋ ಪನೇತಂ ಪ್ಪತಿರೂಪಂ, ಯ್ವಾಹಂ ದಸಬಲಸ್ಸ ಸಾಸನವಿಪತ್ತಿಂ ಸುತ್ವಾ ಅಪ್ಪೋಸ್ಸುಕ್ಕೋ ಭವೇಯ್ಯಂ, ಸನ್ಧಾಹಂ ಅಧಮ್ಮವಾದಿನೋ ನಿಗ್ಗಹೇತ್ವಾ ಧಮ್ಮಂ ದೀಪೇಸ್ಸಾಮೀತಿ ಚಿನ್ತಯನ್ತೋ ಯೇನ ವೇಸಾಲೀ, ತದವಸರಿ. ತದಾ ಆಯಸ್ಮಾ ಮಹಾಯಸೋ ರೇವತಸಬ್ಬಕಾಮಿಆದೀಹಿ ಸತ್ತಸತೇಹಿ ಅರಹನ್ತೇಹಿ ಸದ್ಧಿಂ ಸಙ್ಗಾಯಿಸ್ಸಾಮೀತಿ ವೇಸಾಲಿಯಂ ವಾಲುಕಾರಾಮಂ ಆಗಚ್ಛಿ. ವಜ್ಜಿಪುತ್ತಕಾಚ ಭಿಕ್ಖೂ ಉಪಾರಮ್ಭಚಿತ್ತಾ ಕಾಳಾಸೋಕಂನಾಮ ರಾಜಾನಂ ಉಪಸಙ್ಕಮಿತ್ವಾ ಮಯಂ ಖೋ ಮಹಾರಾಜ ಇಮಸ್ಮಿಂ ಮಹಾವನಾರಾಮೇ ಗನ್ಧಕುಟಿಂ ರಕ್ಖಿತ್ವಾ ವಸ್ಸಾಮ, ಇದಾನಿ ಮಹಾರಾಜ ಅಧಮ್ಮವಾದಿನೋ ಅಞ್ಞೇ ಭಿಕ್ಖೂ ವಿಲುಮ್ಪಿತುಕಾಮಾ ವಿದ್ಧಂಸಿತುಕಾಮಾ ಆಗತಾತಿ ಆರೋಚೇಸುಂ. ಕಾಳಾಸೋಕೋ ¶ ಚ ಮಹಾರಾಜಾ ಆಗನ್ತುಕಾನಂ ಭಿಕ್ಖೂನಂ ಅಪ್ಪವಿಸನತ್ಥಾಯ ನಿವಾರೇಥಾತಿ ಅಮಚ್ಚೇ ಪೇಸೇಸಿ. ಅಮಚ್ಚಾಚ ನಿವಾರೇತುಂ ಗಚ್ಛನ್ತಾ ದೇವತಾನಂ ಆನುಭಾವೇನ ಭಿಕ್ಖೂ ನ ಪಸ್ಸನ್ತಿ. ತದಹೇವ ಚ ರತ್ತಿಭಾಗೇ ಕಾಳಾಸೋಕಮಹಾರಾಜಾ ಲೋಹಕುಮ್ಭೀನಿರಯೇ ಪತನಾಕಾರೇನ ಸುಪಿನಂ ಪಸ್ಸಿ. ತಸ್ಸ ರಞ್ಞೋ ಭಗಿನಿ ನನ್ದಾನಾಮ ಥೇರೀ ಆಕಾಸೇನ ಆಗಚ್ಛನ್ತಿ ಧಮ್ಮವಾದಿನೋ ಮಹಾಥೇರೇ ನಿಗ್ಗಣ್ಹಿತ್ವಾ ಅಧಮ್ಮವಾದೀನಂ ಭಿಕ್ಖೂನಂ ಪಗ್ಗಹಣೇ ದೋಸಬಹುಲತಂ ಪಕಾಸೇತ್ವಾ ಸಾಸನಸ್ಸ ಪಗ್ಗಹಣತ್ಥಾಯ ಓವಾದಂ ಅಕಾಸಿ.

ಕಾಳಾಸೋಕರಾಜಾ ಚ ಸಂವೇಗಪ್ಪತ್ತೋ ಹುತ್ವಾ ಆಯಸ್ಮನ್ತಾನಂ ಮಹಾಯಸತ್ಥೇರಾದೀನಂ ಖಮಾಪೇತ್ವಾ ಅಜಾತಸತ್ತುರಾಜಾ ವಿಯ ಸಙ್ಗಾಯನೇ ಪಗ್ಗಹಂ ಅಕಾಸಿ.

ಮಹಾಯಸತ್ಥೇರಾದಯೋ ಚ ಕಾಳಾಸೋಕಂ ರಾಜಾನಂ ನಿಸ್ಸಾಯ ವಾಲುಕಾರಾಮೇ ವಜ್ಜಿಪುತ್ತಕಾನಂ ಭಿಕ್ಖೂನಂ ಪಕಾಸಿತಾನಿ ಅಧಮ್ಮವತ್ಥೂನಿ ಭಿನ್ದಿತ್ವಾ ಅಟ್ಠತಿ ಮಾಸೇಹಿ ದುತಿಯಸಙ್ಗಾಯನಂ ಅಕಂಸು.

ತದಾ ಚ ಮಜ್ಝಿಮದೇಸೇ ಪಾತಲಿಪುತ್ತನಗರೇ ಸುಸುನಾಗರಞ್ಞೋ ಪುತ್ತಭೂತಸ್ಸ ಕಾಳಾಸೋಕರಞ್ಞೋ ಅತಿಸೇಕಂ ಪತ್ವಾ ದಸವಸ್ಸಾನಿ ಅಹೇಸುಂ. ಪರಮ್ಮರಟ್ಠೇ ಪನ ಸಿರಿಖೇತ್ತನಗರೇ ದ್ವತ್ತಗೋಙ್ಕಸ್ಸನಾಮ ರಞ್ಞೋ ಅಭಿಸಿತ್ತಕಾಲತೋ ಪುರೇ ಏಕವಸ್ಸಂ ಅಹೋಸಿ. ಜಿನಸಾಸನಂ ಪನ ವಸ್ಸಸತಂ ಅಹೋಸಿ.

ಇಮಿಸ್ಸಞ್ಚ ದುತಿಯಸಙ್ಗೀತಿಯಂ ಮಹಾಯಸ ರೇವತ ಸಬ್ಬಕಾಮಿಪ್ಪಮುಖಾ ಸತ್ತಸತಪ್ಪಮಾಣಾ ಮಹಾಥೇರಾ ದುತಿಯಂ ಸಙ್ಖಾಯಿತ್ವಾ ದುತಿಯಂ ಸಾಸನಂ ಪಗ್ಗಹೇಸುಂ.

ಆಯಸ್ಮಾ ಮಹಾಯಸತ್ಥೇರೋಚನಾಮ ಪಞ್ಚಹಿ ಏತದಗ್ಗಳಾನೇ ಹಿ ಭಗವತಾ ಥೋಮಿತಸ್ಸ ಆನನ್ದತ್ಥೇರಸ್ಸ ಸದ್ಧಿವಿಹಾರಿಕೋ ಅಹೋಸಿ. ವಜ್ಜಿಪುತ್ತಕಾನಂ ಭಿಕ್ಖೂನಂ ಅಧಮ್ಮವತ್ಥುದೀಪನಂ ದುತಿಯಸಙ್ಗೀತಿಯಂ ಕಾರಣಮೇವ. ಕಾಳಾಸೋಕರಾಜಾಚ ಪಗೇವ ಅಧಮ್ಮವಾದೀಭಿಕ್ಖೂನಂ ಸಹಾಯೋಪಿ ಸಮಾನೋ ಪುನ ಧಮ್ಮವಾದಿಭಿಕ್ಖೂನಂ ಸಹಾಯೋ ¶ ಹುತ್ವಾ ಅನುಗ್ಗಹಂ ಅಕಾಸಿ. ತಸ್ಮಾ ದುತಿಯಸಾಸನಪಗ್ಗಹೋ ರಾಜಾತಿ ವೇದಿತಬ್ಬೋ.

ದುತಿಯಸಙ್ಗೀತಿಯಂ ಪನ ಮಹಾಯಸತ್ಥೇರ ರೇವತ ಸಬ್ಬಕಾಮಿಪ್ಪಮುಖಾನಂ ಸತ್ತಸತಾನಂ ಮಹಾಥೇರಾನಂ ಸಿಸ್ಸಪರಮ್ಪರಾ ಅನೇಕಾ ಹೋನ್ತಿ, ಗಣನಪಥಂ ವೀತಿವತ್ತಾ. ಯಮೇತ್ಥ ಇತೋ ಪರಂ ವತ್ತಬ್ಬ, ತಂ ಅಟ್ಠಕಥಾಯಂ ವುತ್ತನಯೇನ ವೇದಿತಬ್ಬಂ. ತೇ ಪನ ಮಹಾಥೇರಾ ದುತಿಯಂ ಸಙ್ಗಾಯಿತ್ವಾ ಪರಿನಿಬ್ಬಾಯಿಂಸೂತಿ. ಹೋನ್ತಿ ಚೇತ್ಥ–

ತತೋ ಪರಂ ಅಟ್ಠತಿಂಸಾಧಿಕಾನಿ ದ್ವೇವಸ್ಸಸತಾನಿ ಸಮ್ಮಾಸಬ್ಬುದ್ಧಸ್ಸ ಭಗವತೋ ಸಾಸನಂ ನಿರಾಕುಲಂ ಅಹೋಸಿ ನಿರಬ್ಬುದಂ. ಅಟ್ಠತಿಂಸಾಧಿಕೇ ಪನ ದ್ವಿವಸ್ಸಸತೇ ಸಮ್ಪತ್ತೇ ಪಾಟಲಿಪುತ್ತ ನಗರೇ ¶ ಸಿರಿಧಮ್ಮಾಸೋಕಸ್ಸನಾಮ ರಞ್ಞೋ ಕಾಲೇ ನಿಗ್ರೋಧಸಾಮಣೇರಂ ಪಟಿಚ್ಚ ಬುದ್ಧಸಾಸನೇ ಪಸೀದಿತ್ವಾ ಭಿಕ್ಖುಸಙ್ಘಸ್ಸ ಲಾಭಸಕ್ಕಾರಂ ಬಾಹುಲ್ಲಂ ಅಹೋಸಿ. ತದಾ ಸಟ್ಠಿಸಹಸ್ಸಮತ್ತಾ ತಿತ್ಥಿಯಾ ಲಾಭಸಕ್ಕಾರಂ ಅಪೇಕ್ಖಿತ್ವಾ ಅಪಬ್ಬಜಿತಾಪಿ ಪಬ್ಬಜಿತಾವಿಯ ಹುತ್ವಾ ಉಪಾಸಥಪವಾರಣಾದಿಕಮ್ಮೇಸು ಪವಿಸನ್ತಿ, ಸೇಯ್ಯಥಾಪಿನಾಮ ಹಂಸಾನಂ ಮಜ್ಝೇ ಬಕಾ, ಯಥಾ ಚ ಗುನ್ನಂ ಮಜ್ಝೇ ಗವಜಾ, ಯಥಾ ಚ ಸಿನ್ಧವಾನಂ ಮಜ್ಝೇ ಗದ್ರಭಾತಿ.

ತದಾ ಭಿಕ್ಖುಸಙ್ಘೋ ಇದಾನಿ ಅಪರಿಸುದ್ಧಾ ಪರಿಸಾತಿ ಮನಸಿ ಕರಿತ್ವಾ ಉಪೋಸಥಂ ನ ಅಕಾಸಿ. ಸಾಸನೇ ಅಬ್ಬುದಂ ಹುತ್ವಾ ಸತ್ತವಸ್ಸಾನಿ ಉಪೋಸಥಪವಾರಣಾನಿ ಛಿಜ್ಜನ್ತಿ. ಸಿರಿಧಮ್ಮಾಸೋ ಕೋ ಚ ರಾಜಾ ತಂ ಸುತ್ವಾ ತಂ ಅಧಿಕರಣಂ ವೂಪಸಮೇಹಿ ಉಪೋಸಥಂ ಕಾರಾಪೇಹೀತಿ ಏಕಂ ಅಮಚ್ಚಂ ಪೇಸೇಸಿ. ಅಮಚ್ಚೋ ಚ ಭಿಕ್ಖೂ ಉಪೋಸಥಂ ಅಕತ್ತುಕಾಮೇ ಕಿಂ ಕರಿಸ್ಸಾಮೀತಿ ರಾಜಾನಂ ಪಟಿಪುಚ್ಛಿತುಂ ಅವಿಸಹತಾಯ ಸಯಂ ಮೂಳೋ ಹುತ್ವಾ ಅಞ್ಞೇನ ಮೂಳೇನ ಮನ್ಥೇತ್ವಾ ಸಚೇ ಭಿಕ್ಖುಸಙ್ಘೋ ಉಪೋಸಥಂ ನ ಕರೇಯ್ಯ, ಭಿಕ್ಖುಸಙ್ಘಂ ಘಾತೇತುಕಾಮೋ ಮಹಾರಾಜಾತಿ ಸಯಂ ಮೂಳೋ ಹುತ್ವಾ ಮೂಳಸ್ಸ ಸನ್ತಿಕಾ ಮೂಳವಚನಂ ಸುತ್ವಾ ವಿಹಾರಂ ಗನ್ತ್ವಾ ಉಪೋಸಥಂ ಅಕತ್ತುಕಾಮಂ ಭಿಕ್ಖುಸಙ್ಘಂ ಘಾತೇಸಿ.

ರಾಜಾ ಚ ತಂ ಸುತ್ವಾ ಅಯಂ ಬಾಲೋ ಮಯಾ ಅನಾಣತ್ತೋವ ಹುತ್ವಾ ಈದಿಸಂ ಲುದ್ದಕಮ್ಮಂ ಅಕಾಸಿ, ಅಹಂ ಪಾಪಕಮ್ಮತೋ ಮುಚ್ಚಿಸ್ಸಾಮಿವಾ ಮಾವಾತಿ ದ್ವಳಕಜಾತೋ ಹುತ್ವಾ ಮಹಾಮೋಗ್ಗಲಿಪುತ್ತ ತಿಸ್ಸತ್ಥೇರಂ ಗಙ್ಗಾಯ ಪತಿಸೋತತೋ ಆನೇತ್ವಾ ತಂ ಕಾರಣಂ ಥೇರಂ ಪುಚ್ಛಿ. ಥೇರೋ ಚ ದೀಪಕತಿತ್ತಿರಜಾತಕೇನ ಅಚೇತನತಾಯ ಪಾಪಕಮ್ಮತೋ ಮೋಚೇಸ್ಸಸಿತಿ ವಿಸ್ಸಜ್ಜೇಸಿ, ಸತ್ತಾಹಮ್ಪಿ ತಿತ್ಥಿಯಾನಂ ವಾದಂ ಸಿರಿಧಮ್ಮಾಸೋಕರಞ್ಞೋ ಸಿಕ್ಖಾಪೇಸಿ, ವಾದೇನ ವಾದಂ ತುಲಯಿತ್ವಾ ಸಟ್ಠಿಸಹಸ್ಸಮತ್ತೇ ತಿತ್ಥಿಯೇ ಸಾಸನಬಾಹಿರಂ ಅಕಾಸಿ. ತದಾ ಪನ ಉಪೋಸಥಂ ಅಕಾಸಿ. ಭಗವತಾ ವುತ್ತನಿಯಾಮೇನೇವ ಕಥಾವತ್ಥುಞ್ಚ ಭಿಕ್ಖುಸಙ್ಘಮಜ್ಝೇ ಬ್ಯಾಕಾಸಿ ¶ . ಅಸೋಕಾರಾಮೇ ಚ ಸಹಸ್ಸಮತ್ತಾ ಮಹಾಥೇರಾ ನವಹಿ ಮಾಸೇಹಿ ಸಙ್ಗಾಯಿಂಸುಂ.

ತದಾ ಮಜ್ಝಿಮದೇಸೇ ಪಾಟಲಿಪುತ್ತನಗರೇ ಸಿರಿಧಮ್ಮಾಸೋಕರಞ್ಞೋ ರಜ್ಜಂ ಪತ್ವಾ ಅಟ್ಠಾರಸವಸ್ಸಾನಿ ಅಹೇಸುಂ. ಮರಮ್ಮರಟ್ಠೇ ಪನ ಸಿರಿಖೇತ್ತನಗರೇ ರಮ್ಬೋಙ್ಕಸ್ಸನಾಮ ರಞ್ಞೋ ರಜ್ಜಂ ಪತ್ವಾ ದ್ವಾದಸ ವಸ್ಸಾನಿ ಅಹೇಸುನ್ತಿ.

ಇಮಿಸ್ಸಞ್ಚ ತತಿಯಸಙ್ಗೀತಿಯಂ ಮಹಾಮೋಗ್ಗಲಿಪುತ್ತತಿಸ್ಸತ್ಥೇರೋನಾಮ ದುತಿಯಸಙ್ಗಾಯಕೇಹಿ ಮಹಾಥೇರೇಹಿ ಬ್ರಹ್ಮಲೋ ಕಂ ಗನ್ತ್ವಾ ಸಾಸನಸ್ಸ ಪಗ್ಗಹಣತ್ಥಂ ತಿಸ್ಸನಾಮ ಮಹಾಬ್ರಹ್ಮಾನಂ ಆಯಾಚಿತ ನಿಯಾಮೇನ ತತೋ ಚವಿತ್ವಾ ಇಧ ಮೋಗ್ಗಲಿಯಾನಾಮ ಬ್ರಾಹ್ಮಣಿಯಾ ಕುಚ್ಛಿಮ್ಹಿ ನಿಬ್ಬತ್ತಸತ್ತೋ.

ಲಾಭಸಕ್ಕಾರಂ ಅಪೇಕ್ಖಿತ್ವಾ ಸಟ್ಠಿಸಹಸ್ಸಮತಾನಂ ತಿತ್ಥಿಯಾನಂ ಸಮಣಾಲಯಂ ಕತ್ವಾ ಉಪೋಸಥಪವಾರಣಾದೀಸು ಕಮ್ಮೇಸು ಪವೇಸನಂ ಪರಿಸಾಯ ಅಸುದ್ಧತ್ತಾ ಸತ್ತವಸ್ಸಾನಿ ಉಪೋಸಥಸ್ಸ ಅಕರಣಞ್ಚ ಸಾಸನಸ್ಸ ಪಗ್ಗಹಣೇ ಕಾರಣಮೇವ. ಮಹಾಮೋಗ್ಗಲಿಪುತ್ತತಿಸ್ಸ ಮಜ್ಝನ್ತಿಕ ಮಹಾರೇವಪ್ಪಮುಖಾ ಮಹಾಥೇರಾ ತತಿಯಂ ಸಙ್ಗಾಯಿತ್ವಾ ತತಿಯಂ ಸಾಸನಂ ಪಗ್ಗಹೇಸುಂ.

ಸಿರಿಧಮ್ಮಾಸೋಕರಾಜಾ ಚ ತಿತ್ಥಿಯಾನಂ ವಾದಂ ಸಲ್ಲಕ್ಖೇತ್ವಾ ತಿತ್ಥಿಯೇ ಬಹಿಸಾಸನಕರಣಾದೀಹಿ ಸಾಸನಸ್ಸ ಪಗ್ಗಹೋ ರಾಜಾತಿ ವೇದಿತಬ್ಬೋ. ಮಹಾಮೋಗ್ಗಲಿಪುತ್ತತಿಸ್ಸ ಮಜ್ಝಿನ್ತಿಕ ಮಹಾರೇವಪ್ಪಮುಖಾನಂ ಸಹಸ್ಸಮತ್ತಾನಂ ಮಹಾಥೇರಾನಂ ಸಿಸ್ಸಪರಮ್ಪರಾ ಅನೇಕಾ ಹೋನ್ತಿ, ಗಣನಪಥಂ ವೀತಿವತ್ತಾ. ಯಮೇತ್ಥ ಇತೋ ಪರಂ ವತ್ತಬ್ಬಂ, ತಂ ಅಟ್ಠಕಥಾಯಂ ವುತ್ತನಯೇನ ವೇದಿತಬ್ಬಂ. ತೇ ಪನ ಮಹಾಥೇರಾ ತತಿಯಂ ಸಙ್ಗಾಯಿತ್ವಾ ಪರಿನಿಬ್ಬಾಯಿಂಸೂತಿ. ಹೋನ್ತಿ ಚೇತ್ಥ–

ತತೋ ಪರಂ ಕತ್ಥ ಸಮ್ಮಾಸಮ್ಬುದ್ಧಸ್ಸ ಭಗವತೋ ಸಾಸನಂ ಸುಟ್ಠು ಪತಿಟ್ಠಹಿಸ್ಸತೀತಿ ವಿಮಂಸಿತ್ವಾ ಮಹಾಮೋಗ್ಗಲಿಪುತ್ತತಿಸ್ಸತ್ಥೇರೋ ಪಚ್ಚನ್ತದೇಸೇ ಜಿನಸಾಸನಸ್ಸ ಸುಪ್ಪತಿಟ್ಠಿಯಮಾನಭಾವಂ ಪಸ್ಸಿತ್ವಾ ನವಟ್ಠಾನಾನಿ ಜಿನಸಾಸನಸ್ಸ ಪತಿಟ್ಠಾಪನತ್ಥಾಯ ವಿಸುಂ ವಿಸುಂ ಮಹಾಥೇರೇ ಪೇಸೇಸಿ. ಸೇಯ್ಯಥಿದಂ. ಮಹಾಮಹಿನ್ದತ್ಥೇರಂ ಸೀಹಳದೀಪಂ ಪೇಸೇಸಿ-ತ್ವಂ ಏತಂ ದೀಪಂ ಗನ್ತ್ವಾ ತತ್ಥ ಸಾಸನಂ ಪತಿಟ್ಠಪೇಹೀತಿ, ಸೋಣತ್ಥೇರಂ ಉತ್ತರತ್ಥೇರಞ್ಚಸುವಣ್ಣಭೂಮಿಂ, ಮಹಾರಕ್ಖಿತತ್ಥೇರಂ ಯೋನಕಲೋಕಂ, ರಕ್ಖಿತತ್ಥೇರಂ ವನವಾಸೀರಟ್ಠಂ, ಯೋನಕಧಮ್ಮರಕ್ಖಿತತ್ಥೇರಂ ಅಪರನ್ತರಟ್ಠಂ, ಮಜ್ಝನ್ತಿ ಕತ್ಥೇರಂ ಕಸ್ಮೀರಗನ್ಧಾ ರರಟ್ಠಂ, ಮಹಾರೇವತ್ಥೇರಂ ಮಹಿಂಸಕಮಣ್ಡಲಂ, ಮಹಾಧಮ್ಮರಕ್ಖಿತತ್ಥೇರಂ ಮಹಾರಟ್ಠಂ, ಮಜ್ಝಿಮತ್ಥೇರಂ ಚೀನರಟ್ಠನ್ತಿ. ತತ್ಥ ಚ ಉಪಸಮ್ಪದಪಹೋನಕೇನ ಸಙ್ಘೇನ ಸದ್ಧಿಂ ಪೇಸೇಸಿ. ತೇ ಚ ಮಹಾಥೇರಾ ವಿಸುಂ ವಿಸುಂ ಗನ್ತ್ವಾ ಸಾಸನಂ ತತ್ಥ ತತ್ಥ ಪತಿಟ್ಠಾಪೇಸುಂ. ಪತಿಟ್ಠಾಪೇತ್ವಾ ಚ ತೇಸು ತೇಸು ಠಾನೇಸು ಭಿಕ್ಖೂನಂ ಕಾಸಾವಪಜ್ಜೋತೇನ ವಿಜ್ಜೋತಮಾನಾ ಅಬ್ಭಹಿಮಧೂರಜೋರಾಹುಸಙ್ಖಾತೇಹಿ ವಿಮತ್ತೋ ವಿಯ ನಿಸಾನಾಥೋ ಜಿನಸಾಸನಂ ಅನನ್ತರಾಯಂ ಹುತ್ವಾ ಪತಿಟ್ಠಾಸಿ.

ತೇಸು ಪನ ನವಸು ಠಾನೇಸು ಸುವಣ್ಣಭೂಮಿನಾಮ ಅಧುನಾ ಸುಧಮ್ಮನಗರಮೇವ. ಕಸ್ಮಾ ಪನೇತಂ ವಿಞ್ಞಾಯತೀತಿ ಚೇ. ಮಗ್ಗಾನುಮಾನತೋ ಠಾನಾನುಮಾನತೋ ¶ ವಾ. ಕಥಂ ಮಗ್ಗಾನುಮಾನತೋ. ಇತೋ ಕಿರ ಸುವಣ್ಣಭೂಮಿ ಸತ್ತಮತ್ತಾನಿ ಯೋಜನಸತಾನಿ ಹೋನ್ತಿ, ಏಕೇನ ವಾತೇ ನ ಗಚ್ಛನ್ತೀ ನಾವಾ ಸತ್ತಹಿ ಅಹೋರತ್ತೇಹಿ ಗಚ್ಛತಿ, ಅಥೇಕಸ್ಮಿಂ ಸಮಯೇ ಏವಂ ಗಚ್ಛನ್ತಿ ನಾವಾ ಸತ್ತಾಹಮ್ಪಿ ನದಿಯಾ ವಟ್ಟಮಚ್ಛ ಪಿಟ್ಠೇ ನೇವ ಗತಾತಿ ಅಟ್ಠಕಥಾಯಂ ವುತ್ತೇನ ಸೀಹಳದೀಪತೋ ಸುವಣ್ಣಭೂಮಿಂ ಗತಮಗ್ಗಪ್ಪಮಾಣೇನ ಸುಖಮ್ಮಪುರತೋ ಸೀಹಳದೀಪಂ ಗತಮಗ್ಗಪ್ಪಮಾಣಂ ಸಮೇತಿ. ಸುಧಮ್ಮೇ ಪುರತೋ ಕಿರ ಹಿ ಹಿಂಸಳದೀಪಂ ಸತ್ತಮತ್ತಾನಿ ಯೋಜನಸತಾನಿ ಹೋನ್ತಿ, ಉಜುಂ ವಾಯುಆಗಮನಕಾಲೇ ಗಚ್ಛನ್ತಿ ವಾಯುನಾವಾ ಸತ್ತಹಿ ಅಹೋರತ್ತೇಹಿ ಸಮ್ಪಾಪುಣಾತಿ. ಏವಂಮಗ್ಗಾನುಮಾನತೋ ವಿಞ್ಞಾಯತಿ.

ಕಥಂ ಠಾನಾನುಮಾನತೋ. ಸುವಣ್ಣಭೂಮಿ ಕಿರ ಮಹಾಸಮುದ್ದಸಮೀಪೇ ತಿಟ್ಠತಿ, ನಾನಾವೇರಜ್ಜಕಾನಮ್ಪಿ ವಾಣಿಜಾನಂ ಉಪಸಙ್ಕಮನಟ್ಠಾನಭೂತಂ ಮಹಾತಿತ್ಥಂ ಹೋತಿ. ತೇನೇವ ಮಹಾಜನಕಕುಮಾರಾದಯೋ ಚಮ್ಪಾನಗರಾದಿತೋ ಸಂವೋಹಾರತ್ಥಾಯ ನಾವಾಯ ಸುವಣ್ಣಭೂಮಿಂ ಆಗಮಂಸೂತಿ. ಸುಧಮ್ಮಪುರಮ್ಪಿ ಅಧುನಾ ಮಹಾಸಮುದ್ದಸಮೀಪೇಯೇವ ತಿಟ್ಠತಿ. ಏವಂ ಠಾನಾನುಮಾಸತೋ ವಿಞ್ಞಾಯತೀತಿ.

ಅಪರೇ ಪನ ಸುವಣ್ಣಭೂಮಿನಾಮ ಹರಿಭುಞ್ಜರಟ್ಠಂಯೇವ, ತತ್ಥ ಸು ವಣ್ಣಸ್ಸ ಬಾಹುಲ್ಲತ್ತಾತಿ ವದನ್ತಿ. ಅಞ್ಞೇ ಪನ ಸಿಯಾಮರಟ್ಠಂಯೇವಾತಿ ವದನ್ತಿ. ತಂ ಸಬ್ಬಂ ವಿಮಂಸಿತಬ್ಬಂ.

ಅಪರನ್ತಂ ನಾಮ ವಿಸುಂ ಏಕರಟ್ಠಮೇವಾತಿ ಅಪರೇ ವದನ್ತಿ. ಅಞ್ಞೇ ಪನ ಅಪರನ್ತಂನಾಮ ಸುನಾಪರನ್ತರಟ್ಠಮೇವಾತಿ ವದನ್ತಿ. ತಂ ಯುತ್ತಮೇವ. ಕಸ್ಮಾ ಅಪರನ್ತಂ ನಾಮ ಸುನಾಪರನ್ತರಟ್ಠಮೇವಾತಿ ವಿಞ್ಞಾಯತೀತಿ ಚೇ. ಅಟ್ಠಕಥಾಸು ದ್ವೀಹಿ ನಾಮೇಹಿ ವುತ್ತತ್ತಾ. ಉಪರಿಪಣ್ಣಾಸಅಟ್ಠಕಥಾಯಞ್ಹಿ ಸಳಾಯತನಸಂಯುತ್ತಟ್ಠಕಥಾಯಞ್ಚ ಅಟ್ಠಕಥಾಚರಿಯೇಹಿ ಸುನಾಪರನ್ತರಟ್ಠೇ ಕೋಣ್ಡಧಾನತ್ಥೇರೇನ ಸಲಾಕಾದಾನಾಧಿಕಾರೇ ಲದ್ಧೇತದಗ್ಗಟ್ಠಾನತಂ ದಸ್ಸನ್ತೇಹಿ ಅಪರನ್ತರಟ್ಠಂ ಸುನ ಸದ್ದೇನ ಯೋಜೇತ್ವಾ ವುತ್ತಂ. ಧಮ್ಮಪದಟ್ಠಕಥಾಯಂ ಪನ ಅಙ್ಗುತ್ತರಟ್ಠಕಥಾಯಞ್ಚ ತಮೇವ ರಟ್ಠಂ ವಿನಾ ಸುನಸದ್ದೇನ ವುತ್ತಂ. ಸುನಸದ್ದೋ ಚೇತ್ಥ ಪುತ್ತಪರಿಯಾಯೋ. ಮನ್ಧಾತುರಞ್ಞೋ ಜೇಟ್ಠಪುತ್ತೋ ಚತುದ್ದೀಪವಾಸಿ ನೋ ¶ ಪಕ್ಕೋಸಿತ್ವಾ ತೇಸಂ ವಿಸುಂ ವಿಸುಂ ನಿವಾಸಟ್ಠಾನಂ ನಿಯ್ಯಾದೇಸಿ. ತತ್ಥ ಉತ್ತರದೀಪವಾಸೀನಂ ಠಾನಂ ಕುರುರಟ್ಠಂನಾಮ, ಪುಬ್ಬದೀಪವಾಸೀನಂ ಪನ ವೇದೇಹರಟ್ಠಂನಾಮ, ಪಚ್ಛಿಮದೀಪವಾಸೀನಂ ಅಪರನ್ತಂ ನಾಮ. ಭತ್ತಪಚ್ಛಿಮದೀಪೇ ಜಾತತ್ತಾ ತೇ ಸುನಸದ್ದೇನ ವುತ್ತಾ. ತತ್ರ ಜಾತಾಪಿ ಹಿ ತೇಸಂ ಪುತ್ತಾತಿವಾ ಸುನಾತಿವಾ ವುತ್ತಾ, ಯಥಾ ವಜ್ಜಿಪುತ್ತಕಾ ಭಿಕ್ಖೂತಿ. ವತ್ತಿಚ್ಛಾವಸೇನ ವಾ ವಾಚಾಸಿಲಿಟ್ಠವಸೇನ ಚ ಇದಮೇವ ಸುನಸದ್ದೇನ ವಿಸೇಸೇತ್ವಾ ವೋಹರನ್ತೀತಿ ದಟ್ಠಬ್ಬಂ.

ಯೋನಕರಟ್ಠಂನಾಮ ಯವನಮನುಸ್ಸಾನಂ ನಿವಾಸಟ್ಠಾನಮೇವ, ಯಂಜಙ್ಗಮಙ್ಘಇತಿ ವುಚ್ಚತಿ.

ವನವಾಸೀರಟ್ಠಂನಾಮ ಸಿರಿಖೇತ್ತನಗರಟ್ಠಾನಮೋ. ಕೇಚಿ ಪನ ವನವಾಸೀರಟ್ಠಂನಾಮ ಏಕಂ ರಟ್ಠಮೇವ, ನ ಸಿರಿಖೇತ್ತನಗರಟ್ಠಾನನ್ತಿ ವದನ್ತಿ. ತಂ ನ ಸುನ್ದರಂ. ಸಿರಿಖೇತ್ತನಗರಟ್ಠಾನಮೇವ ಹಿ ವನವಾಸೀರಟ್ಠಂ ನಾಮ. ಕಸ್ಮಾ ಪನೇತಂ ವಿಞ್ಞಾಯತೀತಿಚೇ. ಇಮಸ್ಸ ಅಮ್ಹಾಕಂ ರಞ್ಞೋ ಭಾತಿಕರಞ್ಞೋ ಕಾಲೇ ಸಿರಿಖೇತ್ತನಗರೇ ಗುಮ್ಭೇಹಿ ಪಟಿಚ್ಛಾದಿತೇ ಏಕಸ್ಮಿಂ ಪಥವಿಪುಞ್ಜೇ ಅನ್ತೋ ನಿಮ್ಮುಜ್ಜಿತ್ವಾ ಠಿತಂ ಪೋರಾಣಿಕಂ ಏಕಂ ಲೋಹಮಯಬುದ್ಧಪಟಿಪಿಬ್ಬಂ ಪಟಿಲಭಿ, ತಸ್ಸ ಚ ಪಲ್ಲಙ್ಕೇ ಇದಂ ವನವಾಸೀರಟ್ಠವಾಸೀನಂ ಪೂಜನತ್ಥಾಯಾತಿಆದಿನಾ ಪೋರಾಣಲೇಖನಂ ದಿಸ್ಸತಿ, ತಸ್ಮಾ ಯೇವೇತಂ ವಿಞ್ಞಾಯತೀತಿ.

ಕಸ್ಮೀರಗನ್ಧಾರರಟ್ಠಂನಾಮ ಕಸ್ಮೀರರಟ್ಠಂ ಗನ್ಧಾರರಟ್ಠಞ್ಚ. ತಾನಿ ಪನ ರಟ್ಠಾನಿ ಏಕಾಬದ್ಧಾನಿ ಹುತ್ವಾ ತಿಟ್ಠನ್ತಿ. ತೇನೇವ ಮಜ್ಝನ್ತಿ ಕತ್ಥೇರಂ ಏಕಂ ದ್ವೀಸು ರಟ್ಠೇಸು ಪೇಸೇಸಿ. ಜನಪದತ್ತಾ ಪನ ನಪುಂಸಕೇಕತ್ತಂ ಭವತಿ. ತದಾ ಪನ ಏಕಸ್ಸ ರಞ್ಞೋ ಆಣಾಯ ಪತಿಟ್ಠಾನವಿಸಯತ್ತಾ ಏಕತ್ತವಚನೇನ ಅಟ್ಠಕಥಾಯಂ ವುತ್ತನ್ತಿಪಿ ವದನ್ತಿ.

ಮಹಿಂಸಕಮಣ್ಡಲಂನಾಮ ಅನ್ಧಕರಟ್ಠಂ, ಯಂ ಯಕ್ಖಪುರರಟ್ಠನ್ತಿ ವುಚ್ಚತಿ.

ಮಹಾರಟ್ಠಂನಾಮ ಮಹಾನಗರರಟ್ಠಂ. ಆಧುನಾ ಹಿ ಮಹಾರಟ್ಠಮೇವ ನ ಗರಸದ್ದೇನ ಯೋಜೇತ್ವಾ ಮಹಾನಗರರಟ್ಠನ್ತಿ ವೋಹರನ್ತೀತಿ. ಸಿಯಾಮರಟ್ಠನ್ತಿಪಿ ವದನ್ತಿ ಆಚರಿಯಾ.

ಚಿನರಟ್ಠಂನಾಮ ¶ ಹಿಮವನ್ತೇನ ಏಕಾಬದ್ಧಂ ಹುತ್ವಾ ಠಿತಂ ಚೀನರಟ್ಠಂ ಯೇ ವಾತಿ.

ಇದಂ ಸಾಸನಸ್ಸ ನವಸು ಠಾನೇಸು ವಿಸುಂ ವಿಸುಂ ಪತಿಟ್ಠಾನಂ.

ಇದಾನಿ ಆದಿತೋ ಪಟ್ಠಾಯ ಥೇರಪರಮ್ಪರಕಥಾ ವತ್ತಬ್ಬಾ. ಸಮ್ಮಾಸಮ್ಬುದ್ಧಸ್ಸ ಹಿ ಭಗವತೋ ಸದ್ಧಿವಿಹಾರಿಕೋ ಉಪಾಲಿತ್ಥೇ ರೋ,ತಸ್ಸ ಸಿಸ್ಸೋ ದಾಸಕತ್ಥೇರೋ, ತಸ್ಸ ಸಿಸ್ಸೋ ಸೋಣಕತ್ಥೇರೋ, ತಸ್ಸ ಸಿಸ್ಸೋ ಸಿಗ್ಗವತ್ಥೇರೋ ಚನ್ದವಜ್ಜಿತ್ಥೇ ರೋ ಚ, ತೇಸಂ ಸಿಸ್ಸೋ ಮೋಗ್ಗಲಿಪುತ್ತತಿಸ್ಸತ್ಥೇರೋತಿ ಇಮೇ ಪಞ್ಚಮಹಾಥೇರಾ ಸಾಸನವಂಸೇ ಆದಿಭೂತಾ ಆಚರಿಯಪರಮ್ಪರಾನಾಮ. ತೇಸಞ್ಹಿ ಸಿಸ್ಸಪರಮ್ಪರಭೂತಾ ಥೇರಪರಮ್ಪರಾ ಯಾವಜ್ಜತನಾ ನ ಉಪಚ್ಛಿನ್ಧನ್ತಿ. ಆಚರಿಯಪರಮ್ಪರಾಯ ಚ ಲಜ್ಜಿಭಿಕ್ಖೂ ಯೇವ ಪವೇಸೇತ್ವಾ ಕಥೇತಬ್ಬಾ ನೋ ಅಲಜ್ಜಿಭಿಕ್ಖೂ. ಅಲಜ್ಜೀಭಿಕ್ಖೂ ನಾಮ ಹಿ ಬಹುಸ್ಸುತಾಪಿ ಸಮಾನಾ ಲಾಭಗರುಲೋಕಗರುಆದಿಹಿ ಧಮ್ಮತನ್ತಿ ನಾಸೇತ್ವಾ ಸಾಸನವರೇ ಮಹಾಭಯಂ ಉಪ್ಪಾದೇನ್ತೀತಿ. ಸಾಸನರಕ್ಖನಕಮ್ಮಂನಾಮ ಹಿ ಲಜ್ಜೀನಂಯೇವ ವಿಸಯೋ ನೋ ಅಲಜ್ಜೀನಂ. ತೇನಾಹು ಪೋರಾಣಾ ಥೇರಾ, ಅನಾಗತೇ ಸಾಸನಂ ಕೋ ನಾಮ ರಕ್ಖಿಸ್ಸತೀತಿ ಅನುಪೇಕ್ಖಿತ್ವಾ ಅನಾಗತೇ ಸಾಸನಂ ಲಜ್ಜಿನೋ ರಕ್ಖಿಸ್ಸನ್ತಿ, ಲಜ್ಜಿನೋ ರಕ್ಖಿಸ್ಸನ್ತಿ, ಲಜ್ಜಿನೋ ರಕ್ಖಿಸ್ಸನ್ತೀತಿ ತಿಕ್ಖಾತ್ತುಂ ವಾಚಂ ನಿಚ್ಛಾರೇಸುಂ. ಏವಂ ಮಜ್ಝಿಮದೇಸೇಪಿ ಅಲಜ್ಜೀಪುಗ್ಗಲಾ ಬಹು ಸನ್ತೀತಿ ವೇದಿತಬ್ಬಾ.

ಪರಿನಿಬ್ಬಾನತೋ ಹಿ ಭಗವತೋ ವಸ್ಸಸತಾನಂ ಉಪರಿ ಪುಬ್ಬೇ ವುತ್ತನಯೇನೇವ ವಜ್ಜಿಪುತ್ತಕಾ ಭಿಕ್ಖೂ ಅಧಮ್ಮವತ್ಥೂನಿ ದೀಪೇತ್ವಾ ಪಠಮಸಙ್ಗೀತಿಕಾಲೇ ಬಹಿಕತೇಹಿ ಪಾಪಭಿಕ್ಖೂಹಿ ಸದ್ಧಿಂ ಮನ್ತೇತ್ವಾ ಸಹಾಯಂ ಗವೇಸೇತ್ವಾ ಮಹಾಸಙ್ಗೀತಿವೋಹಾರೇನ ಮಹಾಥೇರಾ ವಿಯ ಸಙ್ಗೀತಿಂ ಅಕಂಸು. ಕತ್ವಾ ಚ ವಿಸುಂ ಗಣಾ ಅಹೇಸುಂ. ಅಹೋವತ ಇದಂ ಹಾಸಿತಬ್ಬಕಮ್ಮಂ, ಸೇಯ್ಯಥಾಪಿ ನಾಮ ಜರಸಿಙ್ಗಾಲೋ ಚತುಪದಸಾಮಞ್ಞೇನ ಮಾನಂ ಜಪ್ಪೇತ್ವಾ ಅತ್ತಾನಂ ಸೀಹಂ ವಿಯ ಮಞ್ಞಿತ್ವಾ ಸೀಹೋ ವಿಯ ಸೀಹನಾದಂ ನದೀತಿ. ತೇ ಪಾವಚನಂ ಯಥಾ ಭೂತಂ ¶ ಅಜಾನಿತ್ವಾ ಸದ್ದಚ್ಛಾಯಾಮತ್ತೇನ ಯಥಾಭೂತಂ ಅತ್ಥಂ ನಾಮ ಸಿಂಸು. ಕಿಞ್ಚಿ ಪಾವಚನಮ್ಪೀ ಅಪನೇಸುಂ. ತಞ್ಚ ಸಕಗಣೇಯೇವ ಹೋತಿ, ನ ಧಮ್ಮವಾದೀಗಣೇ. ಧಮ್ಮವಿನಯಂ ವಿಕೋಪೇತ್ವಾ ಯಥಿಚ್ಛಿತ ವಸೇನೇವ ಚರಿಂಸು. ಅಯಂ ಪನ ಮಹಾಸಙ್ಗೀತಿನಾಮ ಏಕೋ ಅಧಮ್ಮವಾದೀಗಣೋ.

ತತೋ ಪಚ್ಛಾ ಕಾಲಂ ಅತಿಕ್ಕನ್ತೇ ತತೋಯೇವ ಅಞ್ಞಮಞ್ಞಂ ವಾದತೋ ಭಿಜ್ಜಿತ್ವಾ ಗೋಕುಲಿಕೋನಾಮ ಏಕೋ ಗಣೋ ಏಕಬ್ಯೋಹಾರೋನಾಮ ಏಕೋತಿ ದ್ವೇ ಗಣಾ ಭಿಜ್ಜಿಂಸು. ತತೋ ಪಚ್ಛಾ ಗೋಕುಲಿಕಗಣಗಣತೋಯೇವ ಅಞ್ಞಮಞ್ಞಂ ಭಿಜ್ಜಿತ್ವಾ ಬಹುಸ್ಸುತಿಕೋನಾಮ ಏಕೋ ಗಣೋ ಪಞ್ಞತ್ತಿವಾದೋನಾಮ ಏಕೋತಿ ದ್ವೇ ಗಣಾ ಭಿಜ್ಜಿಂಸು. ಪುನಪಿ ತೇಹಿಯೇವ ಗಣೇಹಿ ಚೇತಿಯವಾದೋನಾಮ ಏಕೋ ಗಣೋ ಭಿಜ್ಜಿ.

ತತೋ ಪಚ್ಛಾ ಚಿರಕಾಲಂ ಅತಿಕ್ಕನ್ತೇ ಧಮ್ಮವಾದೀಗಣೇಹಿ ವಿಸಭಾಗಗಣಂ ಪವಿಸಿತ್ವಾ ಮಹಿಂಸಾಸಕೋನಾಮ ಏಕೋಗಣೋ ವಜ್ಜಿಪುತ್ತಕೋನಾಮ ಏಕೋತಿ ದ್ವೇ ಗಣಾ ಭಿಜ್ಜಿಂಸು. ತತೋ ಪಚ್ಛಾಪಿ ವಜ್ಜಿಪುತ್ತಕಗಣತೋಯೇವ ಅಞ್ಞಮಞ್ಞಂ ಭಿಜ್ಜಿತ್ವಾ ಧಮ್ಮುತ್ತರಿಕೋನಾಮ ಏಕೋ ಗಣೋ, ಭದ್ದಯಾನಿಕೋನಾಮ ಏಕೋ, ಛನ್ನಾಗಾರಿಕೋನಾಮ ಏಕೋ, ಸಮುತಿಕೋನಾಮ ಏಕೋತಿ ಚತ್ತಾರೋ ಗಣಾ ಭಿಜ್ಜಿಂಸು.

ಪುನಪಿ ಮಹಿಂಸಾಸಕಗಣತೋ ಅಞ್ಞಮಞ್ಞಂ ಭಿಜ್ಜಿತ್ವಾ ಸಬ್ಬತ್ಥಿವಾದೋನಾಮ ಏಕೋ ಗಣೋ, ಧಮ್ಮಗುತ್ತಿಕೋನಾಮ ಏಕೋ, ಕಸ್ಸಪಿಯೋನಾಮ ಏಕೋ, ಸಙ್ಕನ್ತಿಕೋನಾಮ ಏಕೋ, ಸುತ್ತವಾದೋ ನಾಮ ಏಕೋತಿ ಪಞ್ಚ ಗಣಾ ಭಿಜ್ಜಿಂಸು.

ಏವಂ ಮಜ್ಝಿಮದೇಸೇ ದುತಿಯಸಙ್ಗೀತಿಂ ಸಙ್ಗಾಯನ್ತಾನಂ ಮಹಾಥೇರಾನಂ ಧಮ್ಮವಾದೀಥೇರವಾದಗಣತೋ ವಿಸುಂ ವಿಸುಂ ಭಿಜ್ಜಮಾನಾ ಅಧಮ್ಮವಾದೀಗಣಾ ಸತ್ತರಸ ಅಹೇಸುಂ. ತೇ ಚ ಅಧಮ್ಮವಾದೀಗಣಾ ಸಾಸನೇ ಥೇರಪರಮ್ಪರಾಯ ಅನನ್ತೋ ಗಧಾ. ತೇ ಹಿ ಸಾಸನೇ ಉಪಕಾರಾ ನ ಹೋನ್ತಿ, ಥೇರಪರಮ್ಪರಾಯ ಚ ಪವೇಸೇತ್ವಾ ಗಣ್ಹಿತುಂ ನ ಸಕ್ಕಾ, ಯಥಾ ಹಂಸಗಣೇ ಬಕೋ, ಯಥಾ ಚ ಗೋ ಗಣೇ ¶ ಗವಜೋ, ಯಥಾ ಚ ಸುವಣ್ಣಗಣೇ ಹಾರಕುಟೋತಿ.

ಮಹಾಕಸ್ಸಪತ್ಥೇರಾದಿತೋ ಪನ ಆಗತಾ ಥೇರಪರಮ್ಪರಾ ಉಪಾಲಿ ದಾಸಕೋ ಚೇವಾತಿಆದಿನಾ ಪರಿವಾರಖನ್ಧಕೇ ಸಮನ್ತಪಾಸಾದಿಕಟ್ಠಕಥಾಯಞ್ಚ ಆಗತನಯೇನೇವ ವೇದಿತಬ್ಬಾ.

ಉಪಾಲಿತ್ಥೇರಾದೀನಂ ಪರಿಸುದ್ಧಾಚಾರಾದೀನಿ ಅನುಮಾನೇತ್ವಾ ಯಾವ ಮೋಗ್ಗಲಿಪುತ್ತತಿಸ್ಸತ್ಥೇರಾ, ತಾವ ತೇಸಂ ಥೇರಾನಂ ಪರಿಸುದ್ಧಾ ಚಾರಾದೀನೀತಿ ಸಕ್ಕಾ ಞಾತುಂ, ಸೇಯ್ಯಥಾಪಿ ನದಿಯಾ ಉಪರಿಸೋತೇ ಮೇಘವಸ್ಸಾನಿ ಅನುಮಾನೇತ್ವಾ ಅಧೋಸೋತೇ ನದಿಯಾ ಉದಕಸ್ಸ ಬಾಹುಲ್ಲಭಾವೋ ವಿಞ್ಞಾತುಂ ಸಕ್ಕಾತಿ ಅಯಂ ಕಾರಣಾನುಮಾನನಯೋ ನಾಮ.

ಯಾವ ಪನ ಮೋಗ್ಗಲಿಪುತ್ತತಿಸ್ಸತ್ಥೇರಾ, ತಾವ ಥೇರಾನಂ ಪರಿಸುದ್ಧಾಚಾರಾದೀನಿ ಅನುಮಾನೇತ್ವಾ ಉಪಾಲಿತ್ಥೇರಸ್ಸ ಪರಿಸುದ್ಧಾಚಾರಾದೀನೀತಿ ಸಕ್ಕಾ ಞಾತುಂ, ಸೇಯ್ಯಥಾಪಿ ನಾಮ ಉಪರಿಧೂಮಂ ಪಸ್ಸಿತ್ವಾ ಅನುಮಾನೇತ್ವಾ ಅಗ್ಗಿ ಅತ್ಥೀತಿ ಸಕ್ಕಾ ಞಾತುನ್ತಿ ಅಯಂ ಫಲಾನುಮಾನನ ಯೋ ನಾಮ.

ಅದಿಭೂತಸ್ಸ ಪನ ಉಪಾಲಿತ್ಥೇರಸ್ಸ ಅವಸಾನಭೂತಸ್ಸ ಚ ಮೋಗ್ಗಲಿಪುತ್ತತಿಸ್ಸತ್ಥೇರಸ್ಸ ಪರಿಸುದ್ಧಾಚಾರಾದೀನಿ ಅನುಮಾನೇತ್ವಾ ಮಜ್ಝೇ ದಾಸಕಸೋಣಸಿಗ್ಗವಾದೀನಂ ಥೇರಾನಂ ಪರಿಸುದ್ಧಾಚಾರಾದೀನಿತಿ ಸಕ್ಕಾ ಞಾತುಂ, ಸೇಯ್ಯಥಾಪಿ ನಾಮ ಸಿಲಾಪಟ್ಟಸ್ಸ ಓರಭಾಗೇ ಪಾರಭಾಗೇ ಚ ಮಿಗಪದವಳಞ್ಜನಂ ದಿಸ್ವಾ ಅನುಮಾನೇತ್ವಾ ಮಜ್ಝೇ ಅಪಾಕಟಂ ಪದವಳಞ್ಚನಂ ಅತ್ಥೀತಿ ಸಕ್ಕಾ ಞಾತುನ್ತಿ ಅಯಂ ಮಿಗಪದವಳಞ್ಜನ ನಯೋ ನಾಮ.

ಏವಂ ತೀಹಿ ನಯೇಹಿ ಅಯಂ ಥೇರವಾದಗಣೋ ಧಮ್ಮವಾದೀಲಜ್ಜಿಪೇಸಲೋತಿ ವೇದಿತಬ್ಬೋ. ಏವಮುಪರಿಪಿ ನಯೋ ನೇತಬ್ಬೋ. ಥೇರಪರಮ್ಪರಾ ಚ ಯಾವ ಪೋತ್ಥಕಾರುಳಾ ಪರಿವಾರಖನ್ಧಕೇ ಸಮನ್ತ ಪಾಸಾದಿಕಾಯಞ್ಚ ತತೋ ಮಹಿನ್ದೋ ಇಟ್ಟಿಯೋತಿಆದಿನಾ ವುತ್ತ ನಯೇನ ವೇದಿತಬ್ಬಾತಿ.

ಇತಿ ಸಾಸನವಂಸೇ ನವಟ್ಠಾನಾಗತಸಾಸನವಂಸಕಥಾಮಗ್ಗೋ

೨. ಇದಾನಿ ¶ ಸೀಹಳದೀಪಸಾಸನಕಥಾಮಗ್ಗಂ ವತ್ತುಂ ಓಕಾಸೋ ಅನುಪ್ಪತ್ತೋ, ತಸ್ಮಾ ತಂ ವಕ್ಖಾಮಿ.

ಸೀಹಳದೀಪಞ್ಹಿ ಸಾಸನಸ್ಸ ಪತಿಟ್ಠಾನಭೂತತ್ತಾ ಚೇತಿಯಗಬ್ಭಸದಿಸಂ ಹೋತಿ. ಸಮ್ಮಾಸಮ್ಬುದ್ಧೋ ಕಿರ ಸೀಹಳದೀಪಂ ಧರಮಾನಕಾಲೇಪಿ ತಿಕ್ಖತ್ತುಂ ಅಗಮಾಸಿ. ಪಠಮಂ ಯಕ್ಖಾನಂ ದಮನತ್ಥಂ ಏಕಕೋವ ಗನ್ತ್ವಾ ಯಕ್ಖೇ ದಮೇತ್ವಾ ಮಯಿ ಪರಿನಿಬ್ಬುತೇ ಸೀಹಳದೀಪೇ ಸಾಸನಂ ಪತಿಟ್ಠಹಿಸ್ಸತೀತಿ ತಮ್ಬಪಣ್ಣಿದೀಪೇ ಆರಕ್ಖಂ ಕರೋನ್ತೋ ತಿಕ್ಖತ್ತುಂ ದೀಪಂ ಆವಿಞ್ಛಿ. ದುತಿಯಂ ಮಾತುಲಭಾಗಿನೇಯ್ಯಾನಂ ನಾಗರಾ ಜೂನಂ ದಮನತ್ಥಾಯ ಏಕಕೋವ ಗನ್ತ್ವಾ ತೇ ದಮೇತ್ವಾ ಅಗಮಾಸಿ. ತತಿಯಂ ಪಞ್ಚಭಿಕ್ಖುಸತಪರಿವಾರೋ ಗನ್ತ್ವಾ ಮಹಾಚೇತಿಯಟ್ಠಾನೇ ಚ ಥೂಪಾರಾಮಚೇತಿಯಟ್ಠಾನೇ ಚ ಮಹಾಬೋಧಿಪತಿಟ್ಠಿತಟ್ಠಾನೇ ಚ ಮಹಿಯಙ್ಗಣಚೇತಿಯಟ್ಠಾನೇ ಚ ಮುದಿಙ್ಗಣಚೇತಿಯಟ್ಠಾನೇ ಚ ದೀಘವಾಪಿ ಚೇತಿಯಟ್ಠಾನೇ ಚ ಕಲ್ಯಾಣಿಯಚೇತಿಯಟ್ಠಾನೇ ಚ ನಿರೋಧಸಮಾಪತ್ತಿಂ ಸಮಾಪಜ್ಜಿತ್ವಾ ನಿಸೀದಿ.

ತದಾ ಚ ಪನ ಸಾಸನಂ ಓಗಾಹೇತ್ವಾನ ತಾವ ತಿಟ್ಠತಿ. ಪಚ್ಛಾ ಪನ ಯಥಾವುತ್ತತ್ಥೇರಪರಮ್ಪರಾಯ ಸಮಭಿನಿವಿಟ್ಠೇನ ಮಹಾಮೋಗ್ಗಲಿಪುತ್ತತಿಸ್ಸತ್ಥೇರೇನ ಪೇಸಿತೋ ಮಹಿನ್ದತ್ಥೇರೋ ಜಿನಚಕ್ಕೇ ಪಞ್ಚತಿಂಸಾಧಿಕೇ ದ್ವಿಸತೇ ಸಮ್ಪತ್ತೇ ದುತಿಯಕತ್ತಿಕಮಾಸೇ ಇಟ್ಟಿಯೇನ ಉತ್ತಿಯೇನ ಸಮ್ಬುಲೇನ ಭದ್ದಸಾಲೇನ ಚಾತಿ ಏತೇಹಿ ಥೇರೇಹಿ ಸದ್ಧಿಂ ಸೀಹಳದೀಪಂ ಅಗಮಾಸಿ. ಸೋಣುತ್ತರತ್ಥೇರಾದಯೋ ಜಿನಚಕ್ಕೇ ಪಞ್ಚತಿಂಸಾಧಿಕೇ ದ್ವಿಸತೇ ಸಮ್ಪತ್ತೇ ದುತಿಯಕತ್ತಿಕಮಾಸೇಯೇವ ಸಾಸನಸ್ಸ ಪತಿಟ್ಠಾಪನತ್ಥಾಯ ಅತ್ತನೋ ಅತ್ತನೋ ಸಮ್ಪತ್ತಭಾರಭೂತಂ ತಂ ತಂ ಠಾನಂ ಅಗಮಂಸು.

ಮಹಾಮಹಿನ್ದತ್ಥೇರೋ ಪನ ಸತ್ತಮಾಸಾನಿ ಆಗಮೇತ್ವಾ ಜಿನಚಕ್ಕೇ ಛತ್ತಿಂಸಾಧಿಕೇ ದ್ವಿಸತೇ ಸಮ್ಪತ್ತೇ ಜೇಟ್ಠಮಾಸಸ್ಸ ಪುಣ್ಣಮಿಯಂ ಸೀಹಳದೀಪಂ ಸಾಸನಸ್ಸ ಪತಿಟ್ಠಾಪನತ್ಥಾಯ ಅಗಮಾಸಿ. ತೇನೇವ ತೇಸು ನವಸು ಠಾನೇಸು ಸೀಹಳದೀಪಂ ಛತ್ತಿಂಸಾಧಿಕೇ ದ್ವಿಸ ತೇ ¶ ಅಗಮಾಸಿ. ಅಞ್ಞಾನಿ ಪನ ಅಟ್ಠ ಠಾನಾನಿ ಪಞ್ಚತಿಂಸಾಧಿಕದ್ವಿಸತೇಯೇವ ಅಗಮಾಸೀತಿ ವಿಸುಂವ ವತ್ಥಪೇತಬ್ಬೋ.

ಕಸ್ಮಾ ಪನ ಮಹಾಮಹಿನ್ದತ್ಥೇರೋ ಸತ್ತಮಾಸಾನಿ ಆಗಮೇತ್ವಾ ಸಬ್ಬಪಚ್ಛಾ ಸೀಹಳದೀಪಂ ಗಚ್ಛತೀತಿ. ಸೀಹಳದೀಪೇ ಮುಟಭಿವೋ ನಾಮ ರಾಜಾ ಜರಾದುಬ್ಬಲೋ ಅಹೋತಿ, ಸಾಸನಂ ಪಗ್ಗಹೇತುಂ ಅಸಮತ್ಥೋ, ತಸ್ಸ ಪನ ಪುತ್ತೋ ದೇವಾನಂ ಪಿಯ ತಿಸ್ಸೋ ನಾಮ ರಾಜಕುಮಾರೋ ದಹರೋ ಸಾಸನಂ ಪಗ್ಗಹೇತುಂ ಸಮತ್ಥೋ ಭವಿಸ್ಸತಿ, ಸೋ ಚ ದೇವಾನಂ ವಿಯತಿಸ್ಸೋ ರಜ್ಜಂ ತಾವ ಲಭತು ವೇದಿಸ್ಸಕಗಿರಿನಗರೇ ಮಾತುಯಾ ಸದ್ಧಿಂ ಞಾತಕೇ ತಾವ ಪಸ್ಸಾಮೀತಿ ಅಪೇಕ್ಖಿತ್ವಾ ಸತ್ತಮಾಸಾನಿ ಆಗಮೇತ್ವಾ ಛತ್ತಿಂಸಾಧಿಕದ್ವಿಸತೇಯೇವ ಜಿನಚಕ್ಕೇ ಮಹಾಮಹಿನ್ದತ್ಥೇರೋ ಸೀಹಳದೀಪಂ ಗಚ್ಛತೀತಿ ವೇದಿತಬ್ಬಂ.

ಮಹಾಮಹಿನ್ದತ್ಥೇರೋ ಚ ಇಟ್ಟಿಯಾದೀಹಿ ಥೇರೇಹಿ ಚತೂಹಿ ಭಾಗಿನೇಯ್ಯೇನ ಸುಮನಸಾಮಣೇರೇನ ಭಣ್ಡುಕೇನ ನಾಮ ಉಪಾಸಕೇ ನ ಚಾತಿ ಏತೇಹಿ ಸದ್ಧಿಂ ಛತ್ತಿಂಸಾಧಿಕೇ ದ್ವಿಸತೇ ಜಿನಚಕ್ಕೇ ಜೇಟ್ಠಮಾಸಪುಣ್ಣಮಿಯಂ ಸುವಣ್ಣಹಂಸಾ ವಿಯ ಜೇಟ್ಠಮಾಸೇ ನಭಂ ಉಗ್ಗನ್ತ್ವಾ ಆಕಾಸಮಗ್ಗೇನ ಅನುರಾಧಪುರಸ್ಸ ಪುರತ್ಥಿಮದಿಸಾಭಾಗೇ ಮಿಸ್ಸ ಕಪಬ್ಬತಕೂಟೇ ಪತಿಟ್ಠಾಸಿ.

ಜೇಟ್ಠಮಾಸಸ್ಸ ಚ ಪುಣ್ಣಮಿಯಂ ಲಙ್ಕಾದೀಪೇ ಜೇಟ್ಠಮೂಲನಕ್ಖತ್ತಸಭಾ ಹುತ್ವಾ ಮನುಸ್ಸಾ ಛಣಂ ಅಕಂಸು. ತೇನೇವಾಹ ಸಾರತ್ಥದೀಪನಿಯಂ ನಾಮ ವಿನಯಡೀಕಾಯಂ, ಜೇಟ್ಠಮಾಸಸ್ಸ ಪುಣ್ಣಮಿಯಂ ಜೇಟ್ಠನಕ್ಖತ್ತಂ ಮೂಲನಕ್ಖತ್ತಂ ವಾ ಹೋತೀತಿ. ತತ್ಥ ಚ ಪುಣ್ಣಮಿನಕ್ಖತ್ತಂ ರಾಜಮತ್ತನ್ತೇ ಪುಣ್ಣಮಿನಕ್ಖತ್ತವಿಚಾರಣನಯೇನ ವುತ್ತನ್ತಿ ದಟ್ಠಬ್ಬಂ.

ದೇವಾನಂ ಪಿಯ ತಿಸ್ಸೋ ಚ ರಾಜಾ ನಕ್ಖತ್ತಂ ನಾಮ ಘೋಸಾಪೇತ್ವಾ ಛಣಂ ಕಾರೇಥಾತಿ ಅಮಚ್ಚೇ ಆಣಾಪೇತ್ವಾ ಚತ್ತಾಲೀ ಸಪುರಿಸಸಹಸ್ಸಪರಿವಾರೋ ನಗರಮ್ಹಾ ನಿಕ್ಖಮಿತ್ವಾ ಯೇನ ಮಿಸ್ಸ ಕಪಬ್ಬತೋ, ತೇನ ಪಾಯಾಸಿ ಮಿಗವಂ ಕೀಳಿತುಕಾಮೋ. ಅಥ ತಸ್ಮಿಂ ಪಬ್ಬತೇ ಅಧಿವತ್ಥಾ ಏಕಾ ದೇವತಾ ಮಿಗರೂಪೇನ ರಾಜಾನಂ ಫಲೋಭೇತ್ವಾ ಪಕ್ಕೋಸಿತ್ವಾ ಥೇರಸ್ಸ ಅಭಿಮುಖಂ ಅಕಾಸಿ.

ಥೇರೋ ¶ ರಾಜಾನಂ ಆಗಚ್ಛನ್ತಂ ದಿಸ್ವಾ ಮಮಂಯೇವ ರಾಜಾ ಪಸ್ಸತು ಮಾ ಇತರೇತಿ ಅಧಿಟ್ಠಹಿತ್ವಾ ತಿಸ್ಸ ತಿಸ್ಸ ಇತೋ ಏಹೀತಿ ಆಹ. ರಾಜಾ ತಂ ಸುತ್ವಾ ಚಿನ್ತೇಸಿ, ಇಮಸ್ಮಿಂ ದೀಪೇ ಜಾತೋ ಸಕಲೋಪಿ ಮನುಸ್ಸೋ ಮಂ ತಿಸ್ಸೋತಿ ನಾಮಂ ಗಹೇತ್ವಾ ಆಲಪಿತುಂ ಸಮತ್ಥೋ ನಾಮ ನತ್ಥಿ, ಅಯಂ ಪನ ಭಿನ್ನಭಿನ್ನಪಟಧರೋ ಭಣ್ಡುಕಾಸಾವ ವಸನೋ ಮಂ ನಾಮೇನ ಆಲಪತಿ, ಕೋ ನುಖೋ ಅಯಂ ಭವಿಸ್ಸತಿ, ಮನುಸ್ಸೋ ವಾ ಅಮನುಸ್ಸೋ ವಾತಿ. ಥೇರೋ ಆಹ,–

ಸಮಣಾ ಮಯಂ ಮಹಾರಾಜ, ಧಮ್ಮರಾಜಸ್ಸ ಸಾವಕಾ;

ತವೇವ ಅನುಕಮ್ಪಾಯ, ಜಮ್ಬುದೀಪಾ ಇಧಾಗತಾತಿ.

ತದಾ ಚ ದೇವಾನಂ ಪಿಯತಿಸ್ಸೋ ರಾಜಾ ಅಸೋಕರಞ್ಞಾ ಪೇಸಿತೇನ ಅಭಿಸೇಕೇನ ಏಕಮಾಸಾಭಿಸಿತ್ತೋ ಅಹೋಸಿ. ವಿಸಾಖಪುಣ್ಣಮಾಯಂ ಹಿಸ್ಸ ಅಭಿಸೇಕಮಕಂಸು. ಸೋ ಚ ಅಸೋಕರಞ್ಞಾ ಪೇಸಿತೇ ಧಮ್ಮಪಣ್ಣಾಕಾರೇ ರತನತ್ತಯಗುಣಪ್ಪಟಿಸಂಯುತ್ತಂ ಸಾಸನಪ್ಪವತ್ತಿಂ ಅಚಿರಸುತಂ ಅನುಸ್ಸರಮಾನೋ ತಂ ಥೇರಸ್ಸ ಸಮಣಾ ಮಯಂ ಮಹಾರಾಜ, ಧಮ್ಮರಾಜಸ್ಸ ಸಾವಕಾತಿ ವಚನಂ ಸುತ್ವಾ ಅಯ್ಯಾ ನುಖೋ ಆಗತಾತಿ ತಾವದೇವ ಆವುಧಂ ನಿಕ್ಖಿಪಿತ್ವಾ ಏಕಮನ್ತಂ ನಿಸೀದಿ ಸಮ್ಮೋದನೀಯಂ ಕಥಂ ಕಥಯಮಾನೋ. ಯಥಾಹ,–

ಆವುಧಂ ನಿಕ್ಖಿಪಿತ್ವಾನ, ಏಕಮನ್ತಂ ಉಪಾವಿಸಿ;

ನಿಸಜ್ಜ ರಾಜಾ ಸಮ್ಮೋದಿ, ಬಹುಂ ಅತ್ಥೂಪಸಞ್ಹಿತನ್ತಿ.

ಸಮ್ಮೋದನೀಯಂ ಕಥಞ್ಚ ಕುರುಮಾನೇಯೇವ ತಸ್ಮಿಂ ತಾನಿಪಿ ಚತ್ತಾಲೀಸಪುರಿಸಸಹಸ್ಸಾನಿ ಆಗನ್ತ್ವಾ ಸಮ್ಪರಿವಾರೇಸುಂ. ತದಾಥೇರೋ ಇತರೇಪಿ ಛ ಜನೇ ದಸ್ಸೇಸಿ. ರಾಜಾ ದಿಸ್ವಾ ಇಮೇ ಕದಾ ಆಗತಾತಿ ಆಹ. ಮಯಾ ಸದ್ಧಿಂಯೇವ ಮಹಾರಾಜಾತಿ. ಇದಾನಿ ಪನ ಜಮ್ಬುದೀಪೇ ಅಞ್ಞೇಪಿ ಏವರೂಪಾ ಸಮಣಾ ಸನ್ತೀತಿ. ಸನ್ತಿ ¶ ಮಹಾರಾಜ ಏತರಹಿಜಮ್ಬುದೀಪೋ ಕಾಲಾವಪಜ್ಜೋತೋ ಇಸಿವಾತಪಟಿವಾತೋ, ತಸ್ಮಿಂ–

ತೇವಿಜ್ಜಾ ಇದ್ಧಿಪತ್ತಾ ಚ, ಚೇತೋಪರಿಯಕೋವಿದಾ;

ಖೀಣಾಸವಾ ಅರಹನ್ತೋ, ಬಹೂ ಬುದ್ಧಸ್ಸ ಸಾವಕಾತಿ.

ಭನ್ತೇ ಕೇನ ಆಗತತ್ಥಾತಿ. ನೇವ ಮಹಾರಾಜ ಉದಕೇನ, ನ ಥಲೇನಾತಿ. ರಾಜಾ ಆಕಾಸೇನ ಆಗತಾತಿ ಅಞ್ಞಾಸಿ. ಥೇರೋ ಅತ್ಥಿ ನುಖೋ ರಞ್ಞೋ ಪಸ್ಸಾವೇಯ್ಯತ್ತಿಕನ್ತಿ ವೀಮಂಸನತ್ಥಾಯ ಆಸನ್ನಂ ಅಮ್ಬರುಕ್ಖಂ ಆರಬ್ಭ ಪಞ್ಹಂ ಪುಚ್ಛಿ, –

ಕಿನ್ನಾಮೋ ಮಹಾರಾಜ ಅಯಂ ರುಕ್ಖೋತಿ. ಅಮ್ಬರುಕ್ಖೋ ನಾಮ ಭನ್ತೇತಿ. ಇಮಂ ಪನ ಮಹಾರಾಜ ಅಮ್ಬಂ ಮುಞ್ಚಿತ್ವಾ ಅಞ್ಞೋ ಅಮ್ಬೋ ಅತ್ಥಿ ವಾ ನತ್ಥಿ ವಾತಿ. ಅತ್ಥಿ ಭನ್ತೇ ಅಞ್ಞೇಪಿ ಬಹೂ ಅಮ್ಬರುಕ್ಖಾತಿ. ಇಮಞ್ಚ ಅಮ್ಬಂ ತೇ ಚ ಅಮ್ಬೇ ಮುಞ್ಚಿತ್ವಾ ಅತ್ಥಿ ನುಖೋ ಮಹಾರಾಜ ಅಞ್ಞೇ ರುಕ್ಖಾತಿ. ಅತ್ಥಿ ಭನ್ತೇ, ತೇ ಪನ ನ ಅಮ್ಬರುಕ್ಖಾತಿ. ಅಞ್ಞೇ ಚ ಅಮ್ಬೇ ಅನಮ್ಬೇ ಚ ಮುಞ್ಚಿತ್ವಾ ಅತ್ಥಿ ಪನ ಅಞ್ಞೋ ರುಕ್ಖೋತಿ. ಅಯಮೇವ ಭನ್ತೇ ಅಮ್ಬ ರುಕ್ಖೋತಿ. ಸಾಧು ಮಹಾರಾಜ ಪಣ್ಡಿತೋಸೀತಿ.

ಅತ್ಥಿ ಪನ ಮಹಾರಾಜ ತೇ ಞಾತಕಾತಿ. ಅತ್ಥಿ ಭನ್ತೇ ಬಹೂಜನಾತಿ. ತೇ ಮುಞ್ಚಿತ್ವಾ ಕೇಚಿ ಅಞ್ಞಾತಕಾಪಿ ಅತ್ಥಿ ಮಹಾರಾಜಾತಿ. ಅಞ್ಞಾತಕಾ ಭನ್ತೇ ಞಾತಕೇಹಿ ಬಹುತರಾತಿ. ತವಞಾತಕೇ ಚ ಅಞ್ಞಾತಕೇ ಚ ಮುಞ್ಚಿತ್ವಾ ಅತ್ಥಞ್ಞೋ ಕೋಚಿ ಮಹಾರಾಜಾತಿ. ಅಹಮೇವ ಭನ್ತೇತಿ. ಸಾಧು ಮಹಾರಾಜ ಅತ್ತಾ ನಾಮ ಅತ್ತನೋ ನೇವ ಞಾತಕೋ ನ ಅಞ್ಞಾತಕೋತಿ.

ಅಥ ಥೇರೋ ಪಣ್ಡಿತೋ ರಾಜಾ ಸಕ್ಖಿಸ್ಸತಿ ಧಮ್ಮಂ ಅಞ್ಞಾತುನ್ತಿ ಚೂಳಹತ್ಥಿಪದೋಪಮಸುತ್ತಂ ಕಥೇಸಿ. ಕಥಾಪರಿಯೋಸಾನೇ ರಾಜಾ ತೀಸು ಸರಣೇಸು ಪತಿಟ್ಠಹಿ ಸದ್ಧಿಂ ಚತ್ತಾಲೀಸಾಯ ಪಾಣಸಹಸ್ಸೇಹೀತಿ. ತತೋ ಪರಂ ಯಂ ಯಂ ವತ್ತಬ್ಬಂ, ತಂ ತಂ ಸಮನ್ತಪಾಸಾದಿಕಾದೀಸು ವುತ್ತನಯೇನ ವೇದಿತಬ್ಬಂ.

ಇಚ್ಚೇವಂ ಸೀಹಳದೀಪೇ ಸಾಸನಾನುಗ್ಗಹಣ ಮಹಿನ್ದತ್ಥೇರತೋ ಆಗತಾ ¶ ಸಿಸ್ಸಪರಮ್ಪರಾ ಬಹೂ ಹೋನ್ತಿ, ಗಣನಪಥಂ ವೀತಿ ವತ್ತಾ. ಕಥಂ. ಮಹಾಮಹಿನ್ದತ್ಥೇರಸ್ಸ ಸಿಸ್ಸೋ ಅರಿಟ್ಠೋ ನಾಮ ಥೇರೋ, ತಸ್ಸ ಸಿಸ್ಸೋ ತಿಸ್ಸದತ್ತೋ, ತಸ್ಸ ಸಿಸ್ಸೋ ಕಾಳಸುಮನೋ, ತಸ್ಸ ಸಿಸ್ಸೋ ದೀಘೋ, ತಸ್ಸ ಸಿಸ್ಸೋ ದೀಘ ಸುಮನೋ, ತಸ್ಸ ಸಿಸ್ಸೋ ಕಾಳಸುಮನೋ, ತಸ್ಸ ಸಿಸ್ಸೋ ನಾಗೋ, ತಸ್ಸ ಸಿಸ್ಸೋ ಬುದ್ಧರಕ್ಖಿತೋ, ತಸ್ಸ ಸಿಸ್ಸೋ ತಿಸ್ಸೋ, ತಸ್ಸ ಸಿಸ್ಸೋ ರೇವೋ, ತಸ್ಸ ಸಿಸ್ಸೋ ಸುಮನೋ, ತಸ್ಸ ಸಿಸ್ಸೋ ಚೂಳನಾಗೋ, ತಸ್ಸ ಸಿಸ್ಸೋ ಧಮ್ಮಪಾಲಿ ಏತಾ, ತಸ್ಸ ಸಿಸ್ಸೋ ಖೇಮೋ, ತಸ್ಸ ಸಿಸ್ಸೋ ಉಪಲಿಸ್ಸೋ, ತಸ್ಸ ಸಿಸ್ಸೋ ಫುಸ್ಸದೇವೋ, ತಸ್ಸ ಸಿಸ್ಸೋ ಸುಮನೋ, ತಸ್ಸ ಸಿಸ್ಸೋ ಮಹಾಪದುಮೋ, ತಸ್ಸ ಸಿಸ್ಸೋ ಮಹಾಸೀವೋ, ತಸ್ಸ ಸಿಸ್ಸೋ ಉಪಾಲಿ, ತಸ್ಸ ಸಿಸ್ಸೋ ಮಹಾನಾಗೋ, ತಸ್ಸ ಸಿಸ್ಸೋ ಅಭಯೋ, ತಸ್ಸ ಸಿಸ್ಸೋ ತಿಸ್ಸೋ, ತಸ್ಸ ಸಿಸ್ಸೋ ಸುಮನೋ, ತಸ್ಸ ಸಿಸ್ಸೋ ಚೂಳಾಭಯೋ, ತಸ್ಸ ಸಿಸ್ಸೋ ತಿಸ್ಸೋ, ತಸ್ಸ ಸಿಸ್ಸೋ ಚೂಳದೇವೋ, ತಸ್ಸ ಸಿಸ್ಸೋ ಸೀವೋತಿ. ಅಯಂ ಯಾವ ಪೋತ್ಥಕಾರುಳಸಙ್ಖಾತಾ ಚತುತ್ಥಸಙ್ಗೀತಿಕಾ, ತಾವ ಥೇರಪರಮ್ಪರಾತಿ ದಟ್ಠಬ್ಬಾ.

ವುತ್ತಞ್ಹೇತಂ ಅಟ್ಠಕಥಾಯಂ,– ಯಾವಜ್ಜಭನಾ ತೇಸಂಯೇವ ಅನ್ತೇವಾಸಿಕಪರಮ್ಪರಭೂತಾಯ ಆಚರಿಯಪರಮ್ಪರಾಯ ಆಭತನ್ತಿತಿ ವೇದಿತಬ್ಬನ್ತಿ.

ಏವಂ ತೇಸಂ ಸಿಸ್ಸಪರಮ್ಪರಭೂತಾ ಆಚರಿಯಪರಮ್ಪರಾ ಯಾವಜ್ಜತನಾ ಸಾಸನೇ ಪಾಕಟಾ ಹುತ್ವಾ ಆಗಚ್ಛನ್ತೀತಿ ವೇದಿತಬ್ಬ.

ಸಾಸನೇ ವಿನಯಧರೇಹಿ ನಾಮ ತಿಲಕ್ಖಣಸಮ್ಪನ್ನೇಹಿ ಭವಿತಬ್ಬಂ. ತೀಣಿ ಹಿ ವಿನಯಧರಸ್ಸ ಲಕ್ಖಣಾನಿ ಇಚ್ಛಿ ತಬ್ಬಾನಿ. ಕತಮಾನಿ ತೀಣಿ. ಸುತ್ತಞ್ಚಸ್ಸ ಸ್ವಾಗತಂ ಹೋತಿ ಸುಪ್ಪವತ್ತಿ ಸುವಿನಿಚ್ಛಿತಂ ಸುತ್ತತೋ ಅನುಬ್ಯಞ್ಜನತೋತಿ ಇದಮೇಕಂ ಲಕ್ಖಣಂ, ವಿನಯೇ ಖೋ ಪನ ಠಿತೋ ಹೋತಿ ಅಸಂಹೀರೋತಿ ಇದಂ ದುತಿಯಂ, ಆಚರಿಯಪರಮ್ಪರಾ ಖೋ ಪನಸ್ಸ ಸುಗ್ಗಹಿತಾ ಹೋತಿ ಸುಮನಸಿಕತಾ ಸುಪಧಾರಿತಾತಿ ಇದಂ ತತಿಯಂ.

ತತ್ಥ ¶ ಆಚರಿಯಪರಮ್ಪರಾ ಖೋ ಪನಸ್ಸ ಸುಗ್ಗಹಿತಾ ಹೋತೀತಿ ಥೇರಪರಮ್ಪರಾ ವಂಸಪರಮ್ಪರಾ ಚಸ್ಸ ಸುಟ್ಠುಗಹಿತಾ ಹೋತಿ. ಸುಮನಸಿಕತಾತಿ ಸುಟ್ಠು ಮನಸಿಕತಾ, ಆವಜ್ಜಿತಮತ್ತೇ ಞಜ್ಜಲಿ ತಪ್ಪದೀಪೋ ವಿಯ ಹೋತಿ.

ಸುಪಧಾರಿತಾತಿ ಸುಟ್ಠು ಉಪಧಾರಿತಾ, ಪುಬ್ಬಾಪರಾನುಸನ್ಧಿತೋ ಅತ್ಥತೋ ಕಾರಣತೋ ಚ ಉಪ ಧಾರಿತಾ. ಅತ್ತನೋ ಮತಿಂ ಪಹಾಯ ಆಚರಿಯಸುದ್ಧಿಯಾ ವತ್ತಾ ಹೋತಿ, ಮಯ್ಹಂ ಆಚರಿಯೋ ಅಸುಕಾಚರಿಯಸ್ಸ ಸನ್ತಿಕೇ ಉಗ್ಗಣ್ಹಿ, ಸೋ ಅಸುಕಸ್ಸಾತಿ ಏವಂ ಸಬ್ಬಂ ಆಚರಿಯಪರಮ್ಪರಂ ಥೇರ ವಾದಙ್ಗಂ ಆಹರಿತ್ವಾ ಯಾವ ಉಪಾಲಿತ್ಥೇರೋ ಸಮ್ಮಾಸಮ್ಬುದ್ಧಸ್ಸ ಸನ್ತಿಕೇ ಉಗ್ಗಣ್ಹೀತಿ ಪಾಪೇತ್ವಾ ಠಪೇತಿ. ತತೋಪಿ ಆಹರಿತ್ವಾ ಉಪಾಲಿತ್ಥೇರೋ ಸಮ್ಮಾಸಮ್ಬುದ್ಧಸ್ಸ ಸನ್ತಿಕೇ ಉಗ್ಗಣ್ಹಿ, ದಾಸಕತ್ಥೇರೋ ಅತ್ತನೋ ಉಪಜ್ಝಾಯಸ್ಸ ಉಪಾಲಿತ್ಥೇರಸ್ಸ, ಸೋಣಕತ್ಥೇರೋ ಅತ್ತನೋ ಉಪಜ್ಝಾಯಸ್ಸ ದೋಸಕತ್ಥೇರಸ್ಸ, ಸಿಗ್ಗವತ್ಥೇರೋ ಅತ್ತನೋ ಉಪಜ್ಝಾಯಸ್ಸ ಸೋಣಕತ್ಥೇರಸ್ಸ, ಮೋಗ್ಗಲಿಪುತ್ತತಿಸ್ಸತ್ಥೇರೋ ಅತ್ತನೋ ಉಪಜ್ಝಾಯಸ್ಸ ಸಿಗ್ಗವತ್ಥೇರಸ್ಸ ಚಣ್ಡ ವಜ್ಜಿತ್ಥೇರಸ್ಸ ಚಾತಿ ಏವಂ ಸಬ್ಬಂ ಆಚರಿಯಪರಮ್ಪರಂ ಥೇರವಾದಙ್ಗಂ ಆಹರಿತ್ವಾ ಅತ್ತನೋ ಆಚರಿಯಂ ಪಾಪೇತ್ವಾ ಠಪೇತಿ. ಏವಂ ಉಗ್ಗಹಿತಾ ಹಿ ಆಚರಿಯಪರಮ್ಪರಾ ಸುಗ್ಗಹಿತಾ ಹೋತಿ.

ಏವಂ ಅಸಕ್ಕೋನ್ತೇನ ಪನ ದ್ವೇ ತಯೋ ಪರಿವಟ್ಟಾ ಉಗ್ಗಹೇತಬ್ಬಾ. ಸಬ್ಬಪಚ್ಛಿಮೇನ ಹಿ ನಯೇನ ಯಥಾ ಆಚರಿಯೋ ಚ ಆಚರಿಯಾಚರಿಯೋ ಚ ಪಾಳಿಞ್ಚ ಪರಿಪುಞ್ಛಞ್ಚ ವದನ್ತಿ, ತಥಾ ಞಾತುಂ ವತ್ತತೀತಿ.

ಯಥಾ ವುತ್ತತ್ಥೇರಪರಮ್ಪರಾ ಪನ ಭಗವತೋ ಧರಮಾನಕಾಲತೋ ಪಟ್ಠಾಯ ಯಾವ ಪೋತ್ಥಕಾರುಳಾ ಮುಖಪಾಠೇನೇವ ಪಿಟಕತ್ತಯಂ ಧಾರೇಸುಂ, ಪರಿಪುಣ್ಣಂ ಪನ ಕತ್ವಾ ಪೋತ್ಥಕೇ ಲಿಖಿತ್ವಾ ನ ಠಪೇನ್ತಿ. ಏವಂ ಮಹಾಥೇರಾ ದುಕ್ಕರಕಮ್ಮಂ ಕತ್ವಾ ಸಾಸನಂ ಪಗ್ಗಣ್ಹಿಂಸು. ತತ್ರಿದಂ ವತ್ಥು,–

ಸೀಹಳದೀಪೇ ಕಿರ ಚಣ್ಡಾಲತಿಸ್ಸಭಯೇನ ಸಙ್ಖುಬ್ಭಿತ್ವಾ ದೇವೋ ¶ ಚ ಅವಸ್ಸಿತ್ವಾ ದುಬ್ಭಿಕ್ಖಭಯಂ ಉಪ್ಪಜ್ಜಿ. ತದಾ ಅಕ್ಕೋ ದೇವಾನಮಿನ್ದೋ ಆಗನ್ತ್ವಾ ತುಮ್ಹೇ ಭನ್ತೇ ಪಿಟಕಂ ಧಾರೇತುಂ ನ ಸಕ್ಖಿಸ್ಸಥ, ನಾವಂ ಪನ ಆರೂಹಿತ್ವಾ ಜಮ್ಬುದೀಪಂ ಗಚ್ಛಥ, ಸಚೇ ನಾವಾ ಅಪ್ಪಹೋನಕಾ ಭವೇಯ್ಯ, ಕಟ್ಠೇನ ವಾ ವೇಳುನಾ ವಾ ತರಥ, ಅಭಯತ್ಥಾಯ ಪನ ಮಯಂ ರಕ್ಖಿಸ್ಸಾಮಾತಿ ಆಹ.

ತದಾ ಸಟ್ಠಿಮತ್ತಾ ಭಿಕ್ಖೂ ಸಮುದ್ದತೀರಂ ಗನ್ತ್ವಾ ಪುನ ಏತದಹೋಸಿ,– ಮಯಂ ಜಮ್ಬುದೀಪಂ ನ ಗಚ್ಛಿಸ್ಸಾಮ, ಇಧೇವ ವಸಿತ್ವಾ ತೇಪಿಟಕಂ ಧಾರಿಸ್ಸಾಮಾತಿ. ತತೋ ಪಚ್ಛಾ ನಾವಾ ತಿತ್ಥತೋ ನಿವತ್ತಿತ್ವಾ ಸೀಹಳದೀಪೇಕದೇಸಂ ಮಲಯಜನಪದಂ ಗನ್ತ್ವಾ ಮೂಲಫಲಾದೀಹಿಯೇವ ಯಾಪೇತ್ವಾ ಸಜ್ಝಾಯಂ ಅಕಂಸು. ಛಾತಕಭಯೇನ ಅತಿಪೀಳಿತಾ ಹುತ್ವಾ ಏವಮ್ಪಿ ಕಾತುಂ ಅಸಕ್ಕೋನ್ತೋ ವಾಳುಕತಲೇ ಉರಂ ಠಪೇತ್ವಾ ಸೀಸೇನ ಸೀಸಂ ಅಭಿಮುಖಂ ಕತ್ವಾ ವಾಚಂ ಅನಿಚ್ಛಾರೇತ್ವಾ ಮನಸಾಯೇವ ಅಕಂಸು. ಏವಂ ದ್ವಾದಸವಸ್ಸಾನಿ ಸದ್ಧಿಂ ಅಟ್ಠಕಥಾಯ ತೇಪಿಟಕಂ ರಕ್ಖಿತ್ವಾ ಸಾಸನಂ ಅನುಗ್ಗಹೇಸುಂ.

ದ್ವಾದಸವಸ್ಸೇಸು ಪನ ಅತಿಕ್ಕನ್ತೇಸು ತಂ ಭಯಂ ವೂಪಸಮಿತ್ವಾ ಪುಬ್ಬೇ ಜಮ್ಬುದೀಪಂ ಗಚ್ಛನ್ತಾ ಸತ್ತಭಿಕ್ಖುಸತಾ ಆಗನ್ತ್ವಾ ಸೀಹಳದೀಪೇಕದೇಸಂ ರಾಮಜನಪದೇ ಮಣ್ಡಲಾರಾಮವಿಹಾರಂ ಆಪಜ್ಜಿಂಸು. ತೇಪಿ ಸಟ್ಠಿಮತ್ತಾ ಭಿಕ್ಖೂ ತಮೇವ ವಿಹಾರಂ ಗನ್ತ್ವಾ ಅಞ್ಞಮಞ್ಞಂ ಸಮ್ಮನ್ತೇತ್ವಾ ಸಜ್ಝಾಯಿಂಸು. ತದಾ ಅಞ್ಞಮಞ್ಞಂ ಸಮೇನ್ತಿ, ನ ವಿರುಜ್ಝನ್ತಿ, ಗಙ್ಗಾದಕೇನ ವಿಯ ಯಮುನೋದಕಂ ಸಂಸನ್ದೇನ್ತಿ. ಏವಂ ಪಿಟಕತ್ತಯಂ ಮುಖಪಾಠೇನೇವ ಧಾರೇತ್ವಾ ಮಹಾಥೇರಾ ದುಕ್ಕರಕಮ್ಮಂ ಕರೋನ್ತೀತಿ ವೇದಿತಬ್ಬಾ.

ಯಮ್ಪಿ ಪರಿಯತ್ತಿಂ ಏಕಪದಮತ್ತಮ್ಪಿ ಅವಿರಜ್ಝಿತ್ವಾ ಧಾರೇನ್ತಿ, ತಂ ದುಕ್ಕರಕಮ್ಮಮೇವ.

ಸೀಹಳದೀಪೇ ಕಿರ ಪುನಬ್ಬಸುಕಸ್ಸ ನಾಮ ಕುಟುಮ್ಬಿಕಸ್ಸ ಪುತ್ತೋ ತಿಸ್ಸತ್ಥೇರೋ ಬುದ್ಧವಚನಂ ಉಗ್ಗಣ್ಹಿತ್ವಾ ಇಮಂ ಜಮ್ಬುದೀಪಂ ಆಗನ್ತ್ವಾ ಯೋನಕಧಮ್ಮರಕ್ಖಿತತ್ಥೇರಸ್ಸ ಸನ್ತಿಕೇ ಬುದ್ಧವಚನಂ ಉಗ್ಗಣ್ಹಿತ್ವಾ ಗಚ್ಛನ್ತೋ ನಾವಂ ಅಭಿರೂಹನತಿತ್ಥೇ ಏಕಸ್ಮಿಂ ಪದೇ ಉಪ್ಪನ್ನಕಙ್ಖೋ ಯೋಜನಸತಮಗ್ಗಂ ನಿವತ್ತಿತ್ವಾ ಆಚರಿಯಸ್ಸ ಸನ್ತಿಕಂ ಆಗಚ್ಛನ್ತೋ ¶ ಅನ್ತರಾಮಗ್ಗೇ ಏಕಸ್ಸ ಕುಟುಮ್ಬಿಕಸ್ಸ ಪಞ್ಹಂ ಕಥೇಸಿ. ಸೋ ಪಸೀದಿತ್ವಾ ಸತಸಹಸ್ಸಗ್ಘನಕಂ ಕಮ್ಪಲಂ ಅದಾಸಿ. ಸೋಪಿ ತಂ ಆಹರಿತ್ವಾ ಆಚರಿಯಸ್ಸ ಅದಾಸಿ. ಥೇರೋ ವಾ ಸಿಯಾ ಕೋಟ್ಟೇತ್ವಾ ನಿಸೀದನಟ್ಠಾನೇ ಪರಿಭಣ್ಡಂ ಕಾರೇಸಿ. ಕಿಮತ್ಥಾಯಾತಿ. ಪಚ್ಛಿಮಾಯ ಜನತಾಯ ಅನುಗ್ಗಹತ್ಥಾಯ. ಏವಂ ಕಿರಸ್ಸ ಅಹೋಸಿ,– ಅಮ್ಹಾಕಂ ಗತಮಗ್ಗಂ ಆವಜ್ಜಿತ್ವಾ ಅನಾಗತೇ ಸಬ್ರಹ್ಮಚಾರಿನೋ ಪಟಿಪತ್ತಿಂ ಪೂರೇತಬ್ಬಂ ಮಞ್ಞಿಸ್ಸನ್ತೀತಿ. ತಿಸ್ಸತ್ಥೇರೋಪಿ ಆಚರಿಯಸ್ಸ ಸನ್ತಿಕೇ ಕಙ್ಖಂ ಛಿನ್ದಿತ್ವಾ ಸೀಹಳದೀಪಮೇವ ಸಕಟ್ಠಾನಂ ಆಗಮಾಸೀತಿ. ಇಚ್ಚೇವಂ ಪರಿಯತ್ತಿಂ ಏಕಪದಮತ್ತಮ್ಪಿ ಅವಿರಜ್ಝಿತ್ವಾ ಧಾರಣಮ್ಪಿ ದುಕ್ಕರಕಮ್ಮಮೇವಾತಿ ದಟ್ಠಬ್ಬಂ.

ಯಮ್ಪಿ ಯೇಭುಯ್ಯೇನ ಪಗುಣಂ ನ ಕರೋನ್ತಿ, ತಸ್ಸ ಅನನ್ತರಧಾನತ್ಥಾಯ ಅಸಮ್ಮೋಸತ್ಥಾಯ ಉಗ್ಗಹಧಾರಣಾದಿವಸೇನ ರಕ್ಖನಮ್ಪಿ ಕರೋನ್ತಿ, ತಂ ದುಕ್ಕರಕಮ್ಮಮೇವ.

ಸೀಹಳದೀಪೇಯೇವ ಕಿರ ಮಹಾಭಯೇ ಏಕಸ್ಸೇವ ಭಿಕ್ಖುನೋ ಮಹಾನಿದ್ದೇಸೋ ಪಗುಣೋ ಅಹೋಸಿ. ಅಥ ಚತುನಿಕಾಯಿಕತಿಸ್ಸತ್ಥೇರಸ್ಸ ಉಪಜ್ಝಾಯೋ ಮಹಾತಿಪಿಟಕತ್ಥೇರೋ ನಾಮ ಮಹಾರಕ್ಖಿತತ್ಥೇರಂಆಹ,– ಆವುಸೋ ಮಹಾರಕ್ಖಿತ ಅಸುಕಸ್ಸ ಸನ್ತಿಕೇ ಮಹಾನಿದ್ದೇಸಂ ಗಣ್ಹಾಹೀತಿ. ಪಾಪೋಕಿರಾಯಂ ಭನ್ತೇ ನ ಗಣ್ಹಾಮೀತಿ. ಗಣ್ಹಾವುಸೋ ಅಹಂ ತೇ ಸನ್ತಿಕೇ ನಿಸೀದಿಸ್ಸಾಮೀತಿ. ಸಾಧು ಭನ್ತೇ ತುಮ್ಹೇಸು ನಿಸಿನ್ನೇಸು ಗಣ್ಹಿಸ್ಸಾಮೀತಿ ಪಟ್ಠಪತ್ವಾ ರತ್ತಿನ್ದಿವಂ ನಿರನ್ತರಂ ಪರಿಯಾಪುಣನ್ತೋ ಓಸಾನದಿವಸೇ ಹೇಟ್ಠಾಮಞ್ಚೇ ಇತ್ಥಿಂ ದಿಸ್ವಾ ಭನ್ತೇ ಸುತಂಯೇವ ಮೇ ಪುಬ್ಬೇ, ಸಚಾಹಂ ಏವಂ ಜಾನೇಯ್ಯಂ, ನ ಈದಿಸಸ್ಸ ಸನ್ತಿಕೇ ಧಮ್ಮಂ ಪರಿಯಾಪುಣೇಯ್ಯನ್ತಿ ಆಹ. ತಸ್ಸ ಪನ ಸನ್ತಿಕೇ ಬಹೂ ಮಹಾಥೇರಾ ಉಗ್ಗಣ್ಹಿತ್ವಾ ಮಹಾನಿದ್ದೇಸಂ ಪತಿಟ್ಠಾಪೇಸುಂ. ಏವಂ ಯಂ ಯೇಭುಯ್ಯೇನ ಪಗುಣಂ ನ ಕರೋನ್ತಿ, ತಸ್ಸ ಅನನ್ತರಧಾನತ್ಥಾಯ ಅಸಮ್ಮೋಸತ್ತಾಯ ಉಗ್ಗಹಧಾರಣಾದಿವಸೇನ ರಕ್ಖನಮ್ಪಿ ದುಕ್ಕರಕಮ್ಮಂ ಯೇವಾತಿ ದಟ್ಠಬ್ಬಂ.

ಇಚ್ಚೇವಂ ಭಗವತೋ ಧರಮಾನಕಾಲತೋ ಪಭುತಿ ಚಿರಕಾಲಂ ಯಥಾವುತ್ತಮಹಾಥೇರಪರಮ್ಪರಾ ಪರಿಯತ್ತಿಂ ಮುಖಪಾಠೇನೇವ ಧಾರೇಸುಂ ¶ . ಅಹೋವತ ಪೋರಾಣಿಕಾನಂ ಮಹಾಥೇರಾನಂ ಸತಿಪಞ್ಞಾಸಮಾಧಿವೇಪುಲ್ಲತಾಯ ಹಿ ತೇ ಮುಖಪಾಠೇನೇವ ಧಾರೇತು ಸಕ್ಕಾತಿ. ಮುಖಪಾಠೇನೇವ ಪೋರಾಣಕತ್ಥೇರಾನಂ ಪರಿಯತ್ತಿಧಾರಣಂ ಪಞ್ಚನವುತಾಧಿಕಾನಿ ಚತುಸತಾನಿ ಅಹೋಸಿ.

ಭಗವತೋ ಪರಿನಿಬ್ಬಾನತೋ ಮಹಾವಂಸಸಾರತ್ಥಸಙ್ಗಹೇಸು ಆಗತನಯೇನ ಜಿನಚಕ್ಕೇ ಪಣ್ಣಾಸ್ಸಾಧಿಕೇ ಚತುಸತೇ ಸಮ್ಪತ್ತೇ ತಮ್ಬಪಣ್ಣಿದೀಪೇ ರಾಜೂನಂ ಅಟ್ಠಾರಸಮಕೋ’ಸದ್ಧಾತಿಸ್ಸಸ್ಸ ನಾಮ ರಞ್ಞೋ ಪುತ್ತೋ ವಟ್ಟಗಾಮಣಿ ನಾಮ ರಾಜಾ ರಜ್ಜಂ ಪತ್ವಾ ಛವಸ್ಸಕಾಲೇ ಅನಾಗತೇ ಸತ್ತಾ ಹೀನಸತಿಪಞ್ಞಾಸಮಾಧಿಕಾ ಹುತ್ವಾ ನ ಸಕ್ಖಿಸ್ಸನ್ತಿ ಮುಖಪಾಠೇನ ಧಾರೇತುನ್ತಿ ಉಪಪರಿಕ್ಖಿತ್ವಾ ಪುಬ್ಬೇ ವುತ್ತೇಹಿ ಮಹಾಥೇರೇಹಿ ಅನುಪುಬ್ಬೇನ ಆಗತಾ ಪಞ್ಚಮತ್ತಾ ಮಹಾಥೇರಸತಾ ವಟ್ಟಗಾಮಣಿರಾಜಾನಂ ನಿಸ್ಸಾಯ ತಮ್ಬಪಣ್ಣಿದೀಪೇಕದೇಸೇ ಮಲಯಜನಪದೇ ಆಲೋಕಲೇಣೇ ಅಟ್ಠಕಥಾಯ ಸಹಪಿಟಕತ್ತಯಂ ಪೋತ್ಥಕೇ ಆರೋಪೇಸುಂ.

ತಞ್ಚ ಯಥಾವುತ್ತಸಙ್ಗೀತಿಯೋ ಉಪನಿಧಾಯ ಚತುತ್ಥಸಙ್ಗೀತಿಯೇವ ನಾಮಾತಿ ವೇದಿತಬ್ಬಾ. ವುತ್ತಞ್ಹೇತಂ ಸಾರತ್ಥದೀಪನಿಯಂ ನಾಮ ವಿನಯಟೀಕಾಯಂ,– ಚತುತ್ಥಸಙ್ಗೀತಿಸದಿಸಾ ಹಿ ಪೋತ್ಥಕಾರೋಹಸಙ್ಗೀತೀತಿ.

ಸೀಹಳದೀಪೇ ಪನ ವಟ್ಟಗಾಮಣಿರಾಜಾ ಮರಮ್ಮರಟ್ಠೇ ಸಿರಿಖೇತ್ತನಗರೇ ಏಕೋ ನಾಮ ಕುಕ್ಕುಟಸೀಸರಾಜಾ ಚ ಏಕಕಾಲೇನ ರಜ್ಜಂ ಕಾರೇಸಿ. ಅಮರಪುರಮಾಪಕಸ್ಸ ರಞ್ಞೋ ಕಾಲೇ ಸೀಹಳದೀಪಭಿಕ್ಖುಹಿ ಇಧ ಪೇಸಿತಸನ್ದೇಸಕಥಾಯಂ ಪನ ತೇತ್ತಿಂಸಾಧಿಕಚತುಸತೇ ಸಮ್ಪತ್ತೇ ಪೋತ್ಥಕಾರುಳಂ ಅಕಂಸೂತಿ ಆಗತಂ. ವುತ್ತಞ್ಹೇತಂ ತತ್ಥ,– ತೇತ್ತಿಂಸಾಧಿಕಚತುವಸ್ಸಸತಪರಿಮಾಣಕಾಲನ್ತಿ.

ಇದಂ ಸೀಹಳದೀಪೇ ಯಾವ ಪೋತ್ಥಕಾರುಳ್ಹಾ

ಅಥಾಪರಂ ¶ ಜಮ್ಬುದೀಪೇ ಸೀಹಳದೀಪೇ ಚ ಭಿಕ್ಖೂ ವಿಸುಂ ವಿಸುಂ ಗಣವಸೇನ ಭಿಜ್ಜಿಂಸು, ಯಥಾ ಅನೋತತ್ತದಹತೋ ನಿಕ್ಖಮನನದಿಯಾ ಗಙ್ಗಾಯಮುನಾದಿವಸೇನ ಭಿಜ್ಜನ್ತೀತಿ. ತತ್ಥ ಜಮ್ಬುದೀಪೇ ಗಣಾನಂ ಭಿಜ್ಜಮಾನತಂ ಉಪರಿಯೇವ ವಕ್ಖಾಮ.

ಸೀಹಳದೀಪೇ ಪನ ಗಣಾನಂ ಭಿಜ್ಜಮಾನತಾ ಏವಂ ದಟ್ಠಬ್ಬಾ. ಕಥಂ. ಸೀಹಳದೀಪೇ ಹಿ ಸಾಸನಸ್ಸ ಪತಿಟ್ಠಮಾನಕಾಲತೋ ಅಟ್ಠಾರಸಾಧಿ ಕದ್ವಿವಸ್ಸಸತೇ ಸಮ್ಪತ್ತೇ ವಟ್ಟಗಾಮಣಿರಞ್ಞಾ ಕಾರಾವಿತೇ ಅಭಯಗಿರಿವಿಹಾರೇ ಪರಿವಾರಖನ್ಧಕಂ ಪಾಠತೋ ಚ ಅತ್ಥತೋ ಚ ವಿಪಲ್ಲಾಸಂ ಕತ್ವಾ ಮಹಾವಿಹಾರವಾಸಿಗಣತೋ ಪುಥು ಹುತ್ವಾ ಏಕೋ ಗಣೋ ಭಿಜ್ಜಿ, ಸೋ ಅಭಯಗಿರಿವಾಸಿಗಣೋ ನಾಮ, ಧಮ್ಮರುಚಿಗಣೋತಿ ಚ ತಸ್ಸೇವ ನಾಮಂ.

ಅಭಯಗಿರಿವಾಸಿಗಣಸ್ಸ ಭಿಜ್ಜಮಾನತೋ ದ್ವೇಚತ್ತಾಲೀಸಾಧಿಕತಿವಸ್ಸಸತೇ ಸಮ್ಪತ್ತೇ ಮಹಾಸೇನೇನ ನಾಮ ರಞ್ಞಾ ಕಾರಾಪಿತೇ ಜೇತವನವಿಹಾರೇ ಭಿಕ್ಖೂ ಉಭತೋವಿಸಙ್ಗಪಾಠೇ ವಿಪರೀತವಸೇನ ಅಭಿಸಙ್ಖರಿತ್ವಾ ಅಭಯಗಿರಿವಾಸಿಗಣತೋ ವಿಸುಂ ಏಕೋ ಗಣೋ ಅಹೋಸಿ, ಸೋ ಜೇತವನವಾಸಿಗಣೋ ನಾಮ, ಸಾಗಲಿಯಗಣೋತಿ ಚ ತಸ್ಸೇವ ನಾಮಂ.

ಜೇತವನ ವಾಸಿಗಣಸ್ಸ ಭಿಜ್ಜಮಾನಕಾಲತೋ ಏಕಪಞ್ಞಾಸವಸ್ಸಾಧಿಕಾನಂ ತಿಣ್ಣಂ ವಸ್ಸಸತಾನಂ ಉಪರಿ ಕುರುನ್ದವಾಸಿನೋ ಚ ಕೋಲಮ್ಬವಾಸಿನೋ ಚ ಭಿಕ್ಖೂ ಭಾಗಿನೇಯ್ಯಂ ದಾಠಾಪತಿಂ ನಾಮ ರಾಜಾನಂ ನಿಸ್ಸಾಯ ಉಭತೋವಿಭಙ್ಗಪರಿವಾರಖನ್ಧಕಪಾಠೇ ವಿಪರೀತವಸೇನ ಅಭಿಸಙ್ಖರಿತ್ವಾ ವುತ್ತೇಹಿ ದ್ವೀಹಿ ಗಣೇಹಿ ವಿಸುಂ ಹುತ್ವಾ ಮಹಾವಿಹಾರ ವಾಸಿಗಣ್ಹತ್ತಮಂ ತುಲಯಿತ್ವಾ ಉಪಧಾರೇತ್ವಾ ಮಹಾವಿಹಾರನಾಮಂ ಗಹೇತ್ವಾ ಏಕೋ ಗಣೋ ಭಿಜ್ಜಿ. ಏವಂ ಸೀಹಳದೀಪೇ ಮಹಾಮಹಿನ್ದತ್ಥೇರಾದೀನಂ ವಂಸಭೂತೇನ ಮಹಾವಿಹಾರವಾಸಿ ಗಣೇನ ಸದ್ಧಿಂ ಚತ್ತಾರೋ ಗಣಾ ಭಿಜ್ಜಿಂಸು.

ತತ್ಥ ಮಹಾವಿಹಾರವಾಸಿ ಗಣೋಯೇವ ಏಕೋ ಧಮ್ಮವಾದೀ ಅಹೋಸಿ, ಸೇಸಾ ಪನ ಅಧಮ್ಮವಾದಿನೋ. ತೇ ಚ ತಯೋ ಅಧಮ್ಮವಾದಿನೋ ಗಣಾ ಭೂತತ್ಥಂ ಪಹಾಯ ಅಭೂತತ್ಥೇನ ಧಮ್ಮಂ ಅಗರುಂ ಕತ್ವಾ ಚರಿಂಸೂತಿ ¶ ವಚನತೋ ಸೀಹಳದೀಪೇ ಅಧಮ್ಮವಾದಿನೋ ತಯೋಪಿ ಅಲಜ್ಜಿನೋ ಗಣಾ ಪರಿಮಣ್ಡಲಸುಪ್ಪಟಿಚ್ಛನ್ನಾದಿಸಿಕ್ಖಾಪದಾನಿ ಅನಾದಿಯಿತ್ವಾ ವಿಚರಿಂಸು. ತತೋ ಪಟ್ಠಾಯ ಸಾಸನೇ ಏಕಚ್ಚಾನಂ ಭಿಕ್ಖೂನಂ ನಾನಪ್ಪಕಾರವಸೇನ ನಿವಾಸನಪಾರುಪನಾದೀನಿ ದಿಸ್ಸನ್ತಿತಿ ವೇದಿತಬ್ಬಂ.

ಅಧಮ್ಮವಾದಿಗಣಾನಂ ಭಿಜ್ಜಮಾನಕಾಲತೋ ಸತ್ತವೀಸಾಧಿಕಾನಂ ಪಞ್ಚಸತಾನಂ ವಸ್ಸಾನಞ್ಚ ಉಪರಿ ಸಿರಿಸಙ್ಘಬೋಧಿ ನಾಮ ರಾಜಾ ಮಹಾವಿಹಾರ ಗಣಸ್ಸ ಪಕ್ಖೋ ಹುತ್ವಾ ಅಧಮ್ಮವಾದಿನಾ ತಯೋ ಗಣೇ ನಿಗ್ಗಹಿತ್ವಾ ಜಿನಸಾಸನಂ ಪಗ್ಗಹೇಸಿ. ಸೋ ಚ ಸಿರಿಸಙ್ಘ ಬೋಧಿರಾಜಾ ಅಮ್ಹಾಕಂ ಮರಮ್ಮರಟ್ಠೇ ಅರಿಮನ್ದನನಗರೇ ಅನುರುದ್ಧೇನ ನಾಮ ರಞ್ಞಾ ಸಮಕಾಲವಸೇನ ರಜ್ಜಸಮ್ಪತ್ತಿಂ ಅನುಭವಿ.

ತತೋ ಪಚ್ಛಾ ಸೀಹಳದೀಪೇ ವೋಹಾರಕತಿಸ್ಸಸ್ಸ ನಾಮ ರಞ್ಞೋ ಕಾಲೇ ಕಪಿಲೇನ ನಾಮ ಅಮಚ್ಚೇನ ಸದ್ಧಿಂ ಮನ್ತೇತ್ವಾ ಮಹಾವಿಹಾರ ವಾಸಿನೋ ಭಿಕ್ಖೂ ನಿಸ್ಸಾಯ ಅಧಮ್ಮವಾದಿಗಣೇ ನಿಗ್ಗಣ್ಹಿತ್ವಾ ಜಿನಸಾಸನಂ ಪಗ್ಗಣ್ಹಾತಿ.

ತತೋ ಪಚ್ಛಾ ಚ ಗೋಟ್ಠಾಭಯಸ್ಸ ನಾಮ ರಞ್ಞೋ ಕಾಲೇ ಅಭಯಗಿರಿ ವಾಸಿನೋ ಭಿಕ್ಖೂ ಪರಸಮುದ್ದಂ ಪಬ್ಬಾಜೇತ್ವಾ ಮಹಾವಿಹಾರ ವಾಸಿನೋ ಭಿಕ್ಖೂ ನಿಸ್ಸಾಯ ಸಾಸನಂ ವಿಸೋಧಯಿ.

ತತೋ ಪಚ್ಛಾಪಿ ಗೋಟ್ಠಾಭಯರಞ್ಞೋ ಪುತ್ತಭೂತಸ್ಸ ಮಹಾಸೇನಸ್ಸ ನಾಮ ರಞ್ಞೋ ಕಾಲೇ ಅಭಯಗಿರಿವಾಸೀನಂ ಭಿಕ್ಖೂನಂ ಅಬ್ಭನ್ತರೇ ಸಙ್ಘಮಿತ್ತೋ ನಾಮ ಏಕೋ ಭಿಕ್ಖು ರಞ್ಞೋ ಪಧಾನಾಚರಿಯೋ ಹುತ್ವಾ ಮಹಾಮಹಿನ್ದತ್ಥೇರಾದೀನಂ ಅರಹನ್ತಾನಂ ನಿವಾಸಟ್ಠಾನಭೂತಂ ಮಹಾವಿಹಾರಾರಾಮಂ ವಿನಸ್ಸಿತುಂ ಮಹಾಸೇನರಞ್ಞಾ ಮನ್ತೇತ್ವಾ ಆರಭಿ. ತದಾ ನವವಸ್ಸಾನಿ ಮಹಾವಿಹಾರೇ ಭಿಕ್ಖು ಸಞ್ಞೋ ಅಹೋಸಿ. ಅಹೋವತ ಮಹಾಥೇರಾನಂ ಮಹಿದ್ಧಿಕಾನಂ ನಿವಾಸಟ್ಠಾನಂ ಅಲಜ್ಜಿನೋ ಭಿಕ್ಖೂ ವಿನಸ್ಸಾಪೇಸುಂ, ಸುವಣ್ಣಹಂಸ್ಸಾನಂ ನಿವಾಸಟ್ಠಾನಂ ಕಾಕಾ ವಿಯಾತಿ.

ಜೇತವನವಾಸೀನಞ್ಚ ಭಿಕ್ಖೂನಂ ಅಬ್ಭನ್ತರೇ ಏಕೋ ತಿಸ್ಸೋ ನಾಮ ಭಿಕ್ಖು ತೇನೇವ ರಞ್ಞಾ ಮನ್ತೇತ್ವಾ ಮಹಾವಿಹಾರೇ ಸೀಮಂ ಸಮೂಹನಿ ¶ . ಅಛೇಕತ್ತಾ ಪನ ತೇಸಂ ಸೀಮಸಮೂಹನಕಮ್ಮಂ ನ ಸಮ್ಪಜ್ಜೀತಿ. ಅಹೋವತ ದುಸ್ಸೀಲಾನಂ ಪಾಪಕಾನಂ ಕಮ್ಮಂ ಅಚ್ಛರಿಯಂ, ಸೇಯ್ಯಥಾಪಿ ನಾಮ ಸಾಖಮಿಗೋ ಅಗ್ಗಗ್ಘೋ ಕಾಸಿವತ್ಥಂ ಮಹಗ್ಘಂ ಭಿನ್ನತಿ, ಏವಮೇವ ಭಿನ್ದಿತಬ್ಬವತ್ಥುನಾ ಭೇದಕಪುಗ್ಗಲೋ ಅತಿವಿಯ ದೂರೋ ಅಹೋಸೀತಿ. ಭವನ್ತಿ ಚೇತ್ಥ, –

ಯಥಾ ಸಾಖಮಿಗೋ ಪಾಪೋ, ಅಪ್ಪಗ್ಘೋಯೇವ ಕಾಸಿಕಂ;

ಮಹಗ್ಘಂ ಕಚ್ಚ ಭಿನ್ನಂಭಿನ್ನಂ, ಮಹುಸ್ಸಾಹೇನ ಛಿನ್ದತಿ.

ಏವಂ ಅಧಮ್ಮವಾದೀ ಪಾಪೋ, ಧಮ್ಮವಾದಿಗಣಂ ಸುಭಂ;

ಮಹುಸ್ಸಾಹೇನ ಭಿನ್ದಯಿ, ಅಹೋ ಅಚ್ಛರಿಯೋ ಅಯಂ.

ಆರಕಾ ದೂರತೋ ಆಸುಂ, ಭಿನ್ದಿತಬ್ಬೇಹಿ ಭೇದಕಾ;

ಭೂಮಿತೋವ ಭವಗ್ಗನ್ತೋ, ಅಹೋ ಕಮ್ಮಂ ಅಜಾನತನ್ತಿ.

ಇಚ್ಚೇವಂ ಅಧಮ್ಮವಾದಿಗಣಾನಂ ಬಲವತಾಯ ಧಮ್ಮವಾದಿಗಣೋ ಪರಿಹಾಯತಿ. ಯಥಾ ಹಿ ಗಿಜ್ಝಸಕುಣಸ್ಸ ಪಕ್ಖವಾತೇನ ಸುವಣ್ಣಹಂಸಾ ಪಕತಿಯಾ ಠಾತುಂ ನ ಸಕ್ಕೋನ್ತಿ, ಏವಮೇವ ಅಧಮ್ಮವಾದೀನಂ ಬಲವತಾಯ ಧಮ್ಮವಾದೀ ಪರಿಹಾಯತಿ. ಬ್ಯಗ್ಘವನೇ ವಿಯ ಸುವಣ್ಣಮಿಗೋ ನಿಲ್ಲಯಿತ್ವಾ ಗೋಚರಂ ಗಣ್ಹಾತಿ, ಯಥಾರುಚಿವಸೇನ ಧಮ್ಮಂ ಚರಿತುಂ ಓಕಾಸಂ ನ ಲಭಿ.

ಸೀಹಳದೀಪೇ ಸಾಸನಸ್ಸ ಪತಿಟ್ಠಾನತೋ ದ್ವಿಸತ್ತತಾಧಿಕಾನಂ ಚತುಸತಾನಂ ವಸ್ಸಸಹಸ್ಸಾನಞ್ಚ ಉಪರಿ ಸಮ್ಮಾಸಮ್ಬುದ್ಧಸ್ಸ ಪರಿನಿಬ್ಬಾನತೋ ಅಟ್ಠಸತ್ತಸತಾಧಿಕಾನಂ ವಸ್ಸಸಹಸ್ಸಾನಂ ಉಪರಿ ಮಹಾರಾಜಾ ನಾಮ ಭೂಪಾಲೋ ರಜ್ಜಂ ಕಾರೇಸಿ. ಸೋ ಪನ ರಾಜಾ ಞದುಮ್ಬರಗಿರಿವಾಸಿಕಸ್ಸಪತ್ಥೇರಗ್ಗಮುಖಾ ಮಹಾವಿಹಾರವಾಸಿನೋ ಭಿಕ್ಖೂ ತಮೇವ ರಾಜಾನಂ ನಿಸ್ಸಾಯ ಸಾಸನೇ ಮಲಂ ವಿಸೋಧೇಸುಂ, ಯಥಾ ಹೇರಞ್ಞಿಕೋ ಹಿರಞ್ಞೇ ಮಲನ್ತಿ.

ಮಹಾವಿಹಾರವಾಸಿಗಣತೋ ಅಞ್ಞೇ ಅಧಮ್ಮವಾದಿನಾ ಉಪ್ಪಬ್ಬಾ ಜೇತ್ವಾ ¶ ವಿಸೋಧೇಸುಂ. ಸೋ ಚ ಮಹಾರಾಜಾ ಅಮ್ಹಾಕಂ ಮರಮ್ಮರಟ್ಠೇ ಅರಿಮದ್ದನನಗರೇ ನರಪತಿಚಞ್ಞಿಸೂನಾ ನಾಮ ರಞ್ಞಾ ಸಮಕಾಲ ವಸೇನ ರಜ್ಜಂ ಕಾರೇಸೀತಿ ವೇದಿತಬ್ಬೋ.

ತತೋ ಪಚ್ಛಾ ವಿ ವಿಜಯಬಾಹುರಾಜಾನಂ ಪರಕ್ಕಮಬಾಹುರಾಜಾನಞ್ಚ ನಿಸ್ಸಾಯ ಮಹಾವಿಹಾರ ವಾಸಿನೋ ಭಿಕ್ಖೂ ಸಾಸನಂ ಪರಿಸುದ್ಧಂ ಅಕಂಸು, ಅಧಮ್ಮವಾದಿನೋ ಸಬ್ಬೇಪಿ ಉಪ್ಪಬ್ಬಾಜೇತ್ವಾ ಮಹಾವಿಹಾರವಾಸಿಗಣೋಯೇವ ಏಕೋ ಪತಿಟ್ಠಹಿ, ಯಥಾ ಅಬ್ಭಾದಿಉಪಕ್ಕಿಲೇಸಮಲೇಹಿ ವಿಮುತ್ತೋ ನಿಸಾನಾಥೋತಿ.

ಸಿರಿಸಙ್ಘಬೋಧಿರಾಜಾ ವೋಹಾರಿಕತಿಸ್ಸರಾಜಾ ಗೋಟ್ಠಾಭಯರಾಜಾತಿ ಏತೇ ರಾಜಾನೋ ಸಾಸನಂ ವಿಸೋಧೇನ್ತೋಪಿ ಸಬ್ಬೇನ ಸಬ್ಬಂ ಅಧಮ್ಮವಾದಿಗಣಾನಂ ಅವಿನಸ್ಸನತೋ ಸಾಸನಂ ಪರಿಸುದ್ಧಂ ನ ತಾವ ಅಹೋಸಿ. ಸಿರಿಸಙ್ಘಬೋಧಿರಞ್ಞೋ ಮಹಾರಞ್ಞೋ ವಿಜಯಬಾಹುರಞ್ಞೋ ಪರಕ್ಕಮಬಾಹುರಞ್ಞೋತಿ ಏತೇಸಂಯೇವ ರಾಜೂನಂ ಕಾಲೇ ಸಬ್ಬೇನ ಸಬ್ಬಂ ಅಧಮ್ಮವಾದೀನಂ ವಿನಸ್ಸನತೋ ಸಾಸನಂ ಪರಿಸುದ್ಧಂ ಅಹೋಸಿ. ತದಾ ಪನ ಅಧಮ್ಮವಾದಿನಾ ಸೀಸಮ್ಪಿ ಉಟ್ಠಹಿತುಂ ನ ಸಕ್ಕಾ, ಯಥಾ ಅರುಣುಗ್ಗೇ ಕೋಸಿಯಾತಿ.

ಅಪರಭಾಗೇ ಪನ ಚಿರಂ ಕಾಲಂ ಅತಿಕ್ಕನ್ತೇ ಮಿಚ್ಛಾದಿಟ್ಠಿಕಾನಂ ವಿಜಾತಿಯಾನಂ ಭಯೇನ ಲಙ್ಕಾದೀಪೇ ಸಾಸನಂ ಓಸಕ್ಕಿತ್ವಾ ಗಣಪೂರಣಮತ್ತಸ್ಸಪಿ ಭಿಕ್ಖುಸಙ್ಘಸ್ಸ ಅವಿಜ್ಜಮಾನತಾಯ ಮಹಾವಿಜಯಬಾಹುರಞ್ಞೋ ಕಾಲೇ ರಾಮಞ್ಞದೇಸತೋ ಸಙ್ಘಂ ಆನೇತ್ವಾ ಸಾಸನಂ ಪತಿಟ್ಠಾಪೇಸಿ.

ತತೋ ಪಚ್ಛಾ ಚ ವಿಮಲಧಮ್ಮಸೂರಿಯಸ್ಸ ನಾಮ ರಞ್ಞೋ ಕಾಲೇ ರಕ್ಖಾಪುರರಟ್ಠತೋ ಸಙ್ಘಂ ಆನೇತ್ವಾ ಸಾಸನಂ ಪತಿಟ್ಠಾಪೇಸಿ. ತತೋ ಪಚ್ಛಾ ಚ ವಿಮಲಸ್ಸ ನಾಮ ರಞ್ಞೋ ಕಾಲೇ ತತೋಯೇವ ಸಙ್ಘಂ ಆನೇತ್ವಾ ಸಾಸನಂ ಪತಿಟ್ಠಾಪೇಸಿ. ತತೋ ಪಚ್ಛಾ ಚ ಕಿತ್ತಿಸ್ಸಿರಿರಾಜಸೀಹಸ್ಸ ನಾಮ ರಞ್ಞೋ ಕಾಲೇ ಸ್ಯಾಮರಟ್ಠತೋ ಸಙ್ಘಂ ಆನೇತ್ವಾ ತಥೇವ ಅಕಾಸೀತಿ.

ಅಯಂ ಸೀಹಳದೀಪೇ ಸಾಸನಸ್ಸ ಓಸಕ್ಕನಕಥಾ.

ತತೋ ¶ ಪಚ್ಛಾ ಜಿನಸಾಸನೇ ನವುತಾಧಿಕೇ ಅಟ್ಠವಸ್ಸಸತೇ ಸಮ್ಪತ್ತೇ ಬುದ್ಧದಾಸಸ್ಸ ನಾಮ ರಞ್ಞೋ ಕಾಲೇ ಏಕೋ ಧಮ್ಮ ಕಥಿಕತ್ಥೇರೋ ಠಪೇತ್ವಾ ವಿನಯಪಿಟಕಂ ಅಭಿಧಮ್ಮಪಿಟಕಞ್ಚ ಅವಸೇಸಂ ಸುತ್ತನ್ತಪಿಟಕಂ ಸೀಹಳಭಾಸಾಯ ಪರಿವತ್ತಿತ್ವಾ ಅಭಿಸಙ್ಖರಿತ್ವಾ ಠಪೇಸಿ. ತಞ್ಚ ಕಾರಣಂ ಚೂಳವಂಸೇ ವುತ್ತಂ.

ತಸ್ಸ ಕಿರ ಬುದ್ಧದಾಸಸ್ಸ ರಞ್ಞೋ ಪುತ್ತಾ ಅಸೀತಿಮತ್ತಾ ಅಸೀತಿಮಹಾಸಾವಕಾನಂ ನಾಮೇನೇವ ವೋಹಾರಿತಾ ಅಹೇಸುಂ. ತೇಸು ಪುತ್ತೇಸು ಸಾರಿಪುತ್ತತ್ಥೇರಸ್ಸ ನಾಮೇನ ವೋಹಾರಿತೋ ಏಕೋ ಉಪತಿಸ್ಸೋ ನಾಮ ರಾಜಕುಮಾರೋ ಪಿತರಿ ದೇವಙ್ಗತೇ ದ್ವೇಚತ್ತಾಲೀಸವಸ್ಸಾನಿ ರಜ್ಜಂ ಕರೇಸಿ.

ತತೋ ಪಚ್ಛಾ ಕನಿಟ್ಠೋ ಮಹಾನಾಮೋ ನಾಮ ರಾಜಕುಮಾರೋ ದ್ವಾವೀಸವಸ್ಸಾನಿ ರಜ್ಜಂ ಕಾರೇಸಿ. ತಸ್ಸ ರಞ್ಞೋ ಕಾಲೇ ಜಿನ ಚಕ್ಕೇ ತೇತ್ತಿಂಸಾಧಿಕನವಸತವಸ್ಸೇ ಸೀಹಳದೀಪೇ ಛಸಟ್ಠಿಮತ್ತಾನಂ ರಾಜೂನಂ ಪೂರಣಕಾಲೇ ಬುದ್ಧಘೋಸೋ ನಾಮ ಥೇರೋ ಸೀಹಳದೀಪಂ ಗನ್ತ್ವಾ ಸೀಹಳಭಾಸಾಯ ಲಿಖಿತೇ ಅಟ್ಠಕಥಾಗನ್ಥೇ ಮಾಗಧಭಾಸಾಯ ಪರಿವತ್ತಿತ್ವಾ ಲಿಖಿ.

ಸೋ ಪನ ಮಹಾನಾಮ ರಾಜಾ ಅಮ್ಹಾಕಂ ಮರಮ್ಮರಟ್ಠೇ ಸಿರಿಪಚ್ಚಯನಗರೇ ಸವಿಲಞ್ಞಿಕ್ರೋವಿ ನಾಮಕೇನ ರಞ್ಞಾ ಸಮಕಾಲೋ ಹುತ್ವಾ ರಜ್ಜಂ ಕಾರೇಸಿ. ಪರಿತ್ತನಿದ್ದಾನೇ ಪನ ಬ್ರೂಮವಿ?ಥೀ? ನಾಮಕೇನ ರಞ್ಞಾ ಸಮಕಾಲೋ ಹುತ್ವಾ ರಜ್ಜಂ ಕಾರೇಸೀತಿ ವುತ್ತಂ. ತಂ ನ ಯುಜ್ಜತಿಯೇವ.

ಸೀಹಳದೀಪೇ ಪನ ಕಿತ್ತಿಸ್ಸಿರಿಮೇಘೋ ನಾಮ ರಾಜಾ ಹುತ್ವಾ ನವಮೇ ವಸ್ಸೇ ತಸ್ಮಿಂಯೇವ ದೀಪೇ ರಾಜೂನಂ ದ್ವಾಸಟ್ಠಿಮತ್ತಾನಂ ಪೂರಣಕಾಲೇ ಜಿನಚಕ್ಕೇ ತಿಂಸಾಧಿಕೇ ಅಟ್ಠಸತವಸ್ಸೇ ಜಮ್ಬುದೀಪೇ ಕಲಿಙ್ಗಪುರತೋ ಕುಹಸಿವಸ್ಸ ನಾಮ ರಞ್ಞೋ ಜಾಮಾತಾ ದನ್ತಕುಮಾರೋ ಹೇಮಮಾಲಂ ನಾಮ ರಾಜಧೀತಂ ಗಹೇತ್ವಾ ದಾಠಾಧಾತುಂ ಥೇನೇತ್ವಾ ನವಾಯ ತರಿತ್ವಾ ಸೀಹಳದೀಪಂ ಅಗಮಾಸಿ. ಜಿನಚಕ್ಕೇ ತಿಂಸಾಧಿಕಅಟ್ಠವಸ್ಸಸತೇ ಜೇಟ್ಠತಿಸ್ಸರಾಜಾ ನವವಸ್ಸಾನಿ ರಜ್ಜಂ ಕಾರೇಸಿ.

ಬುದ್ಧದಾಸರಾಜಾ ¶ ಏಕೂನತಿಂಸತಿ ವಸ್ಸಾನಿ ಉಪಲಿಸ್ಸರಾಜಾ ಚದ್ವಿಚತ್ತಾಲೀಸವಸ್ಸಾನಿ ಮಹಾನಾಮರಾಜಾ ದ್ವಾವೀಸವಸ್ಸಾನೀತಿ ಸಬ್ಬಾನಿ ಸಮ್ಪಿಣ್ಡಿತ್ವಾ ಜಿನಸಾಸನಂ ದ್ವತ್ತಿಂಸಾಧಿಕನವವಸ್ಸಸತಪ್ಪಮಾಣಂ ಹೋತಿ.

ತಸ್ಮಿಞ್ಚ ಕಾಲೇ ಯದಾ ದ್ವೀಹಿ ವಸ್ಸೇಹಿ ಊನಂ ಅಹೋಸಿ, ತದಾ ಮಹಾನಾಮರಞ್ಞೋ ಕಾಲೇ ತಿಂಸಾಧಿಕನವವಸ್ಸಸತಮತ್ತೇ ಸಾಸನೇ ಬುದ್ಧಘೋಸೋ ನಾಮ ಥೇರೋ ಲಙ್ಕಾದೀಪಂ ಅಗಮಾಸಿ.

ಅಮರಪುರಮಾಪಕಸ್ಸ ರಞ್ಞೋ ಕಾಲೇ ಸೀಹಳದೀಪಿಕೇಹಿ ಭಿಕ್ಖೂಹಿ ಪೇಸಿತಸನ್ನೇಸಪಣ್ಣೇ ಪನ ಛಪಣ್ಣಾಸಾಧಿಕನವವಸ್ಸಸತಾತಿಕ್ಕನ್ತೇ ಸೂತಿ ವುತ್ತಂ.

ಏತ್ಥ ಠತ್ವಾ ಬುದ್ಧಘೋಸತ್ಥೇರಸ್ಸ ಅಟ್ಠುಪ್ಪತ್ತಿಂಸಙ್ಖೇಪಮತ್ತಂ ವಕ್ಖಾಮ. ಕಥಂ. ಸೀಹಳಭಾಸಕ್ಖರೇಹಿ ಪರಿವತ್ತಿತಂ ಪರಿಯತ್ತಿಸಾಸನಂ ಮಾಗಧಸಾಸಕ್ಖರೇನ ಕೋ ನಾಮ ಪುಗ್ಗಲೋ ಪರಿವತ್ತಿತುಂ ಸಕ್ಖಿಸ್ಸತೀತಿ ಮಹಾಥೇರಾ ನಿಮನ್ತಯಿತ್ವಾ ತಾವತಿಂಸಭವನಂ ಗನ್ತ್ವಾ ಘೋಸಂ ದೇವಪುತ್ತಂ ದಿಸ್ವಾ ಸದ್ಧಿಂ ಸಕ್ಕೇನ ದೇವಾನಮಿನ್ದೇನ ತಂ ಯಾಚಿತ್ವಾ ಬೋಧಿರುಕ್ಖಸಮೀಪೇ ಘೋಸಗಾಮೇ ಕೇಸಸ್ಸ ನಾಮ ಬ್ರಾಹ್ಮಣಸ್ಸ ಕೇಸಿಯಾ ನಾಮ ಬ್ರಾಹ್ಮಣಿಯಾ ಕುಚ್ಛಿಮ್ಹಿ ಪಟಿಸನ್ಧಿಂ ಗಣ್ಹಾಪೇಸುಂ. ಖಾದಥ ಭೋನ್ತೋ ಪಿವಥ ಭೋನ್ತೋತಿಆದಿನಾ ಬ್ರಾಹ್ಮಣಾನಂ ಅಞ್ಞಮಞ್ಞಂ ಘೋಸಕಾಲೇ ವಿಜಾಯನತ್ತಾ ಘೋಸೋತಿ ನಾಮಂ ಅಕಾಸಿ. ಸತ್ತವಸ್ಸಿಕಕಾಲೇ ಸೋ ತಿಣ್ಣಂ ವೇದಾನಂ ಪಾರಗೂ ಅಹೋಸಿ.

ಅಥ ಖೋ ಏಕೇನ ಅರಹನ್ತೇನ ಸದ್ಧಿಂ ವೇದಕಥಂ ಸಲ್ಲಪನ್ತೋ ತಂ ಕಥಂ ನಿಟ್ಠಾಪೇತ್ವಾ ಕುಸಲಾ ಧಮ್ಮಾ ಅಕುಸಲಾ ಧಮ್ಮಾ ಅಬ್ಯಾಕತಾ ಧಮ್ಮಾತಿಆದಿನಾ ಪರಮತ್ಥವೇದಂ ನಾಮ ಬುದ್ಧಮನ್ತಂ ಪುಚ್ಛಿ. ತದಾ ಸೋ ಸುತ್ವಾ ಉಗ್ಗಣ್ಹಿತುಕಾಮೋ ಹುತ್ವಾ ತಸ್ಸ ಅರಹನ್ತಸ್ಸ ಸನ್ತಿಕೇ ಪಬ್ಬಜಿತ್ವಾ ದೇವಸಿಕಂ ದೇವಸಿಕಂ ಪಿಟಕತ್ತಯಂ ಸಟ್ಠಿಮತ್ತೇಹಿ ಪದಸಹಸ್ಸೇಹಿ ಸಜ್ಝಾಯಂ ಅಕಾಸಿ, ವಾಚುಗ್ಗತಂ ಅಕಾಸಿ. ಏಕಮಾಸೇನೇವ ತಿಣ್ಣಂ ಪಿಟಕಾನಂ ಪಾರಗೂ ಅಹೋಸಿ.

ತತೋ ¶ ಪಚ್ಚಾ ರಹೋ ಏಕಕೋವ ನಿಸಿನ್ನಸ್ಸ ಏತದಹೋಸಿ,– ಬುದ್ಧಭಾಸಿತೇ ಪಿಟಕತ್ತಯೇ ಮಮ ವಾ ಪಞ್ಞಾ ಅಧಿಕಾ, ಉದಾಹು ಉಪಜ್ಝಾಯಸ್ಸ ವಾತಿ. ತಂ ಕಾರಣಂ ಞತ್ವಾ ಉಪಜ್ಝಾಚರಿಯೋ ನಿಗ್ಗಹಂ ಕತ್ವಾ ಓವದಿ. ಸೋ ಸಂವೇಗಪ್ಪತ್ತೋ ಹುತ್ವಾ ಖಮಾಪೇತುಂ ವನ್ದಿ. ಉಪಜ್ಝಾಚರಿಯೋ ತ್ವಂ ಆವುಸೋ ಸೀಹಳದೀಪಂ ಗನ್ತ್ವಾ ಪಿಟಕತ್ತಯಂ ಸೀಹಳಸ್ಸಾಸಕ್ಖರೇನ ಲಿಖಿತಂ ಮಾಗಧಭಾಸಕ್ಖರೇನ ಲಿಖಾಹಿ, ಏವಂ ಸತಿ ಅಹಂ ಖಮಿಸ್ಸಾಮೀತಿ ಆಹ.

ಬುದ್ಧಘೋಸೋ ಚ ಪಿತರಂ ಮಿಚ್ಛಾದಿಟ್ಠಿಭಾವತೋ ಮೋಚೇತ್ವಾ ಆಚರಿಯಸ್ಸ ವಚನಂ ಸಿರಸಾ ಪಟಿಗ್ಗಹೇತ್ವಾ ಪಿಟಕತ್ತಯಂ ಲಿಖಿತುಂ ಸೀಹಳದೀಪಂ ನಾವಾಯ ಅಗಮಾಸಿ. ತದಾ ಸಮುದ್ದಮಜ್ಝೇ ತೀಹಿ ದಿವಸೇಹಿ ತರನ್ತೇ ಬುದ್ಧದತ್ತತ್ಥೇರೋ ಚ ಸೀಹಳದೀಪತೋ ನಾವಾಯ ಆಗಚ್ಛನ್ತೋ ಅನ್ತರಾಮಗ್ಗೇ ದೇವಾನ ಆನುಭಾವೇನ ಅಞ್ಞಮಞ್ಞಂ ಪಸ್ಸಿತ್ವಾ ಕಾರಣಂ ಪುಚ್ಛಿತ್ವಾ ಜಾನಿ. ಜಾನಿತ್ವಾ ಚ ಬುದ್ಧದತ್ತತ್ಥೇರೋ ಏವಮಾಹ,- ಮಯಾ ಆವುಸೋ ಕತೋ ಜಿನಾಲಙ್ಕಾರೋ ಅಪ್ಪಸ್ಸಾರೋತಿ ಮಞ್ಞಿತ್ವಾ ಪಿಟಕತ್ತಯಂ ಪರಿವತ್ತಿತುಂ ಲಿಖಿತುಂ ಓಕಾಸಂ ನಾದಾಸುಂ, ತ್ವಂ ಪನ ಪಿಟಕತ್ತಯಂ ಸಂವಣ್ಣೇಹೀತಿ ವತ್ವಾ ಅತ್ತನೋ ಸಕ್ಕೇನ ದೇವಾನಮಿನ್ದೇನ ದಿನ್ನಂ ಹರಿತಕಿಫಲಂ ಅಯೋಮಯಲೇಖನ ದಣ್ಡಂ ನಿಸಿತಸಿಲಞ್ಚ ಬುದ್ಧಘೋಸತ್ಥೇರಸ್ಸ ಅದಾಸಿ. ಏವಂ ತೇಸಂ ದ್ವಿನ್ನಂ ಥೇರಾನಂ ಅಞ್ಞಮಞ್ಞಂ ಸಲ್ಲಪನ್ತಾನಂಯೇವ ನಾವಾ ಸಯಮೇವ ಅಪನೇತ್ವಾ ಗಚ್ಛಿಂಸು.

ಬುದ್ಧಘೋಸತ್ಥೇರೋ ಚ ಸೀಹಳದೀಪಂ ಪತ್ವಾ ಪಠಮಂ ಸಙ್ಘಪಾಲತ್ಥೇರಂ ಪಸ್ಸಿತ್ವಾ ಪಿಟಕತ್ತಯಂ ಮಾಗಧಭಾಸಕ್ಖರೇನ ಪರಿವತ್ತೇತುಂ ಆಗತೋಮ್ಹೀತಿ ಕಾರಣಂ ಆರೋಚೇತ್ವಾ ಸೀಹಳಭಿಕ್ಖೂ ಚ ಸೀಲೇ ಪತಿಟ್ಠಾಯಾತಿಆದಿಗಾಥಂ ನಿಯ್ಯಾದೇತ್ವಾ ಇಮಿಸ್ಸಾ ಗಾಥಾಯ ಅತ್ಥಂ ಪಿಟಕತ್ತಯಂ ಆಲೋಲೇತ್ವಾ ಸಂವಣ್ಣೇಹೀತಿ ಉಯ್ಯೋಜೇಸುಂ, ತಸ್ಮಿಂಯೇವ ದಿವಸೇ ಸಾಯನ್ಹಕಾಲತೋ ಪಟ್ಠಾಯ ಯಥಾವುತ್ತಗಾಥಂ ಪಮುಖಂ ಕತ್ವಾ ವಿಸುದ್ಧಿಮಗ್ಗಂ ಅಕಾಸಿ. ಕತ್ವಾ ತಂ ಕಮ್ಮಂ ನಿಪ್ಫಾದೇತ್ವಾ ತಸ್ಸ ಞಾಣಪ್ಪಭವಂ ವೀಮಂಸೇತುಕಾಮೋ ದೇವಾನಮಿನ್ದೋ ತಞ್ಚ ಗನ್ಥಂ ಅನ್ತರಧಾಪೇಸಿ. ಪುನಾಪಿ ಥೇರೋ ಅಕಾಸಿ ¶ . ತಥೇವ ದೇವಾನಮಿನ್ದೋ ಅನ್ತರಧಾಪೇಸಿ. ಪುನಾಪಿ ಥೇರೋ ಅಕಾಸಿ. ಏವಂ ತಿಕ್ಖತ್ತುಂ ಕಾರಾಪೇತ್ವಾ ಪುಬ್ಬಗನ್ಥೇಪಿ ದಸ್ಸೇಸಿ. ತಿಣ್ಣಮ್ಪಿ ಗನ್ಥಾನಂ ಅಞ್ಞಮಞ್ಞಂ ಏಕಪದಮತ್ತೇನಪಿ ವಿಸೇಸತಾ ನತ್ಥಿ ಸಙ್ಘಪಾಲತ್ಥೇರೋ ಚ ತಂ ಆರಾಧಯಿತ್ವಾ ಪಿಟಕತ್ತಯಂ ನಿಯ್ಯಾದೇಸಿ. ಏವಂ ವಿಸುದ್ಧಿಮಗ್ಗೇ ಸಙ್ಘಪಾಲತ್ಥೇರಸ್ಸ ಯಾಚನಂ ಆರಬ್ಭ ವಿಸುದ್ಧಿಮಗ್ಗೋ ಕತೋತಿ ಆಗತಂ. ಬುದ್ಧಘೋಸುಪ್ಪತ್ತಿಕಥಾಯಂ ಪನ ಸಙ್ಘರಾಜತ್ಥೇರಸ್ಸ ಆಯಾಚನಂ ಆರಬ್ಭಾತಿ ಆಗತಂ.

ಅಯಂ ಬುದ್ಧಘೋಸುಪ್ಪತ್ತಿಕಥಾಯಂ ಆಗತನಯೇನ ದಸ್ಸಿತಬುದ್ಧಘೋಸುಪ್ಪತ್ತಿಕಥಾಸಙ್ಖೇಪೋ.

ಚೂಳವಂಸೇ ಪನೇವಂ ಆಗತೋ. ಬುದ್ಧಘೋಸತ್ಥೇರೋ ನಾಮ ಮಹಾಬೋಧಿರುಕ್ಖಸಮೀಪೇ ಏಕಸ್ಮಿಂ ಬ್ರಾಹ್ಮಣಗಾಮೇ ವಿಜಾತೋ ತಿಣ್ಣಮ್ಪಿ ವೇದಾನಂ ಪಾರಗೂ ಅಹೋಸಿ ತೇಸು ತೇಸು ವಾದೇಸು ಚ ಅತಿಛೇಕೋ. ಸೋ ಅಞ್ಞೇಹಿ ಚ ಸದ್ಧಿಂ ಪುಚ್ಛಾಬ್ಯಾಕರಣಕಮ್ಮಂ ಕತ್ತುಕಾಮೋ ಜಮ್ಬುನೀಪತಲೇ ಆಹಿಣ್ಡನ್ತೋ ಏಕಂ ವಿಹಾರಂ ಪತ್ವಾ ತಸ್ಮಿಂ ವಾ ಆಗನ್ತುಕಭಾವೇನ ನಿಸೀದಿ. ತಸ್ಮಿಞ್ಚ ವಿಹಾರೇ ರೇವತೋ ನಾಮ ಥೇರೋ ವಸಿ. ತೇನ ಥೇರೇನ ಸದ್ಧಿಂ ಭಲ್ಲಪನ್ತೋ ಸೋ ಬ್ರಾಹ್ಮಣಮಾಣವೋ ತೀಸು ವೇದೇಸು ಅಲೋಲೇತ್ವಾ ಪಞ್ಹಂ ಪುಚ್ಛಿ. ಪುಚ್ಛಿತಂ ಪುಚ್ಛಿತಂ ಥೇರೋ ಬ್ಯಾಕಾಸಿ. ಥೇರಸ್ಸ ಪನ ಪುಚ್ಛಿತಂ ಪಞ್ಹಂ ಮಾಣವೋ ನ ಸಕ್ಕಾ ಬ್ಯಾಕಾತುಂ. ಅಥ ಮಾಣವೋ ಪುಚ್ಛಿ,–ಕೋ ನಾಮಾಯಂ ಭನ್ತೇ ಮನ್ತೋತಿ. ಬುದ್ಧಮನ್ತೋ ನಾಮಾಯನ್ತಿ ವುತ್ತೇ ಉಗ್ಗಣ್ಹಿತುಕಾಮೋ ಹುತ್ವಾ ಥೇರಸ್ಸ ಸನ್ತಿಕೇ ಪಬ್ಬಜಿತ್ವಾ ಪಿಟಕತ್ತಯಂ ಉಗ್ಗಣ್ಹಿ. ಅಚಿರನೇವ ತಿಣ್ಣಮ್ಪಿ ಪಿಟಕಾನಂ ಪಾರಗೂ ಅಹೋಸಿ. ಬುದ್ಧಸ್ಸೇವ ಘೋಸೋ ಯಸ್ಸ ಅತ್ಥೀತಿ ಬುದ್ಧಘೋಸೋತಿ ನಾಮೇನ ಪಾಕಟೋ ಅಹೋಸಿ.

ಬುದ್ಧಘೋಸೋ ಚ ಆಯಸ್ಮತೋ ರೇವತಸ್ಸ ಸನ್ತಿಕೇ ನಿಸೀದನ್ತೋ ಞಾಣೋದಯಂ ನಾಮ ಗನ್ಥಂ ಅಟ್ಠಸ್ಸಾಲಿನಿಞ್ಚ ನಾಮ ಗನ್ಥಂ ಅಕಾಸಿ. ತತೋ ಪಚ್ಛಾ ಪರಿತ್ತಟ್ಠಕಥಂ ಕತ್ತುಕಾಮೋ ಹುತ್ವಾ ಆರಭಿ. ತದಾ ಆಚರಿಯೋ ಏವಮಾಹ,– ಜಮ್ಬುದೀಪೇ ಪನ ಆವುಸೋ ಪಾಳಿಮತ್ತಂಯೇವ ಅತ್ಥಿ, ಅಟ್ಠಕಥಾ ಪನ ನತ್ಥಿ, ಆಚರಿಯವಾದೋ ಚ ¶ ಭಿನ್ನೋ ಹುತ್ವಾ ಅತ್ಥಿ, ತೇನೇವ ಮಹಾಮಹಿನ್ಧತ್ಥೇರೇನ ಆನಿತಾ ಅಟ್ಠಕಥಾ ತೀಸು ಚ ಸಙ್ಗೀತೀಸು ಆರುಳೋ ಪಾಳಿಯೋ ಸಾರಿಪುತ್ತತ್ಥೇರಾದೀಹಿ ದೇಸಿತೋ ಕಥಾಮಗ್ಗೋ ಸೀಹಳದೀಪೇ ಅತ್ಥಿ, ತ್ವಂ ಗನ್ತ್ವಾ ಮಾಗಧಭಾಸಕ್ಖರೇನ ಲಿಖೇಹೀತಿ ಉಯ್ಯೋಜಿಯಮಾನೋ ಬುದ್ಧಘೋಸತ್ಥೇರೋ ಸೀಹಳದೀಪಂ ಗನ್ತ್ವಾ ಅನುರಾಧಪುರೇ ಮಹಾವಿಹಾರಂ ಪವಿಸಿತ್ವಾ ಸಙ್ಘಪಾಲತ್ಥೇರಸ್ಸ ಸನ್ತಿಕೇ ಸದ್ಧಿಂ ಸೀಹಳಟ್ಠಕಥಾಯ ಥೇರವಾದೇ ಸುತ್ವಾ ಅಟ್ಠಕಥಂ ಕರಿಸ್ಸಮೀತಿ ಆರೋಚೇಸಿ. ಸೀಹಳಭಿಕ್ಖೂ ಚ ಪುಬ್ಬೇ ವುತ್ತನಯೇನೇವ ಸೀಲೇ ಪತಿಟ್ಠಾಯಾತಿಆದಿ ಗಾಥಾ ನಿಯ್ಯಾದೇಸುಂ. ಬುದ್ಧಘೋಸೋ ಚ ಸದ್ಧಿಂ ಅಟ್ಠಕಥಾಯ ಪಿಟಕತ್ತಯಂ ಸಙ್ಖಿಪಿತ್ವಾ ವಿಸುದ್ಧಿಮಗ್ಗಂ ಅಕಾಸಿ.

ಪುಬ್ಬೇ ವುತ್ತನಯೇನೇವ ಸಕ್ಕೋ ಅನ್ತರಧಾಪೇತ್ವಾ ತಿಕ್ಖತ್ತುಂ ಕಾರಾಪೇಸಿ. ಸಙ್ಘಪಾಲತ್ಥೇರೋಪಿ ಅರಾಧಯಿತ್ವಾ ಪಿಟಕತ್ತಯಂ ನಿಯ್ಯಾದೇಸೀತಿ.

ಕಿಞ್ಚಾಪಿ ನಾನಾ ಗನ್ಥೇಸು ನಾನಾಕಾರೇಹಿ ಬುದ್ಧಘೋಸುಪ್ಪತ್ತಿ ಆಗತಾ, ತಥಾಪಿ ಬುದ್ಧಘೋಸತ್ಥೇರಸ್ಸ ಸೀಹಳದೀಪಂ ಗನ್ತ್ವಾ ಪಿಟಕತ್ತಯಸ್ಸ ಲಿಖನಂ ಅಟ್ಠಕಥಾನಞ್ಚ ಕರಣಮೇವ ಪಮಾಣನ್ತಿ ಮನೋಕಿಲಿಟ್ಠಂ ನ ಉಪ್ಪಾದೇತಬ್ಬನ್ತಿ. ಬುದ್ಧಘೋಸತ್ಥೇರೋ ವಿಕಟತ್ತಯಂ ಲಿಖಿತ್ವಾ ಜಮ್ಬುದೀಪಂ ಪಚ್ಚಾಗಮಾಸಿ.

ಇಚ್ಚೇವಂ ಪಾಳಿಭಾಸಾಯ ಪರಿಯತ್ತಿಂ ಪರಿವತ್ತಿತ್ವಾ ಪಚ್ಛಾ ಆಚರಿಯಪರಮ್ಪರಸಿಸ್ಸಾನುಸಿಸ್ಸವಸೇನ ಸೀಹಳದೀಪೇ ಜಿನಚಕ್ಕಂ ಮಜ್ಝನ್ತಿ ಕಂಸುಮಾಸೀ ವಿಯ ಅತಿದಿಬ್ಬತಿ, ಅನೇಕಕೋಟಿಪ್ಪಮಾಣೇಹಿ ಸೋತಾಪನ್ನಸಕದಾಗಾಮಿಅನಾಗಾಮಿಅರಹನ್ತೇಹಿ ಲಙ್ಕಾದೀಪಂ ಅತಿಸೋಭತಿ, ಸಬ್ಬಪಾಲಿಫುಲ್ಲೇನ ತಿಯೋಜನಿಕಪಾರಿಚ್ಛತ್ತಕರುಕ್ಖೇನ ತಾವತಿಂಸಭವನಂ ವಿಯ ಸತಪತ್ತಪದುಮಾದೀಹಿ ಮಹಾಪೋಕ್ಖರಣೀ ವಿಯ ತೇಸು ತೇಸು ಠಾನೇಸು ಮಗ್ಗಮಹಾಮಗ್ಗಆಪಕಘರದ್ವಾರತಿತ್ಥವನಪಬ್ಬತಗುಹಮನ್ದಿರವಿಹಾರಸಾಲಾದೀಸು ಅಲದ್ಧಮಗ್ಗಫಲಟ್ಠಾನಂ ನಾಮ ಕಿಞ್ಚಿ ನತ್ಥಿ, ಥೋಕಂ ಆಗಮೇತ್ವಾ ಪಿಣ್ಡಾಯ ಪತಿಟ್ಠಮಾನಪದೇಸೇಪಿ ಮಗ್ಗಫಲಾನಿ ಲಭಿಂಸುಯೇವ.

ಮಗ್ಗಫಲಾನಿ ಸಚ್ಛಿಕರೋನ್ತಾನಂ ಪುಗ್ಗಲಾನಂ ಬಾಹುಲ್ಲತಾಯ ಅಯಂ ¶ ಪುಥುಜ್ಜನೋ ಅಯಂ ಪುಥುಜ್ಜನೋತಿ ಅಙ್ಗುಲಿಂ ಪಸಾರೇತ್ವಾ ದಸ್ಸೇತಬ್ಬೋ ಹೋತಿ. ಏಕಸ್ಮಿಂ ಕಾಲೇ ಸೀಹಳದೀಪೇ ಪುಥುಜ್ಜನ ಭಿಕ್ಖು ನಾಮ ನತ್ಥಿ. ತಥಾ ಹಿ ವುತ್ತಂ ವಿಭಙ್ಗಟ್ಠಕಥಾಯಂ, ಏಕವಾರಂ ಪುಥುಜ್ಜನಭಿಕ್ಖು ನಾಮ ನತ್ಥೀತಿ.

ಅಭಿಞ್ಞಾಲಾಭೀನಂ ಕಿರ ಮಹಿದ್ಧಿಕಾನಂ ಗಮನಾಗಮನವಸೇನ ಸೂರಿಯೋಸ್ಸಾಸಂ ಅಲಭಿತ್ವಾ ಧಞ್ಞಕೋಟ್ಟಕಾ ಮಾತುಗಾಮಾ ಧಞ್ಞಕೋಟ್ಟಿತುಂ ಓಕಾಸಂ ನ ಲಭಿಂಸು.

ದೇವಲೋಕತೋ ಸುಮನಸಾಮಣೇರೋ ದಕ್ಖಿಣಕ್ಖಕಂ ಸೀಹಳದೀಪಂ ಅನೇತ್ವಾ ತಸ್ಸ ಪಾಟಿಹಾರಿಯಂ ದಸ್ಸನವಸೇನ ಉದ್ಧಕಬಿನ್ಧೂಹಿ ತಿಯೋಜನಸತಂ ಸಕಲಮ್ಪಿ ಲಙ್ಕಾದೀಪಂ ಬ್ಯಾಪತ್ವಾ ಭಗವತಾ ಪರಿಭುತ್ತಚೇತಿಯಙ್ಗಣಂ ವಿಯ ಹುತ್ವಾ ನವಾಯ ಗಚ್ಛನ್ತಾ ಮಹಾಸಮುದ್ದೇ ಉದಕತೋ ನಾಳಿಕೇರಮತ್ತಮ್ಪಿ ದಿಸ್ವಾ ಸಕಲಙ್ಕಾದೀಪಂ ಪೂಜೇನ್ತಿ, ಮಹಾಮಹಿನ್ದತ್ಥೇರಸ್ಸ ಸನ್ತಿಕೇ ಅರಿಟ್ಠತ್ಥೇರೇನ ಸದ್ಧಿಂ ಪಞ್ಚಮತ್ತಾ ಭಿಕ್ಖುಸತಾ ಪಠಮಂ ತಾವ ವಿನಯಪಿಟಕಂ ಉಗ್ಗಣ್ಹಿಂಸೂತಿ ಇಮೇಹಿ ಕಾರಣೇಹಿ ಲಙ್ಕಾದೀಪಂ ಜಿನಚಕ್ಕಸ್ಸ ಪತಿಟ್ಠಾನಂ ಹುತ್ವಾ ವರದೀಪನ್ತಿ ನಾಮಂ ಪಟಿಲಭಿ.

ಸೀಹಳದೀಪೇಯೇವ ಪಿಟಕತ್ತಯಂ ಪೋತ್ಥಕಾರುಳವಸೇನ ಪತಿಟ್ಠಾಪೇತ್ವಾ ತತೋ ಪಚ್ಛಾ ಚೋರನಾಗಸ್ಸ ನಾಮ ರಞ್ಞೋ ಕಾಲೇ ಸಕಲಲಙ್ಕಾದೀಪಂ ದುಬ್ಭಿಕ್ಖಭಯೇನ ಪೀಳೇತ್ವಾ ಪಿಟಕತ್ತಯಂ ಧಾರೇನ್ತಾ ಭಿಕ್ಖೂ ಜಮ್ಬುದೀಪಂ ಆಗಮಂಸು. ಅನಾಗನ್ತ್ವಾ ತತ್ಥೇವ ಠಿತಾಪಿ ಭಿಕ್ಖೂ ಛಾತಕಭಯೇನ ಪೀಳೇತ್ವಾ ಉದರಪಟಲಂ ಬನ್ಧಿತ್ವಾ ಕುಚ್ಛಿಂ ವಾಲುಕರಾಸಿಮ್ಹಿ ಠಪೇತ್ವಾ ಪಿಟಕತ್ತಯಂ ಧಾರೇಸುಂ.

ಕುಟ ಕಣ್ಣತಿಸ್ಸಸ್ಸ ರಞ್ಞೋ ಕಾಲೇಯೇವ ದುಬ್ಭಿಕ್ಖಭಯಂ ವೂಪಸಮಿತ್ವಾ ಜಮ್ಬುದೀಪತೋ ಭಿಕ್ಖೂ ಪುನ ಗನ್ತ್ವಾ ಸೀಹಳದೀಪೇ ಠಿತೇಹಿ ಭಿಕ್ಖೂಹಿ ಸದ್ಧಿಂ ಮಹಾವಿಹಾರೇ ಪಿಟಕತ್ತಯಂ ಅವಿರೋಧಾಪೇತ್ವಾ ಸಮಸಮಂ ಕತ್ವಾ ಠಪೇಸುಂ. ಠಪೇತ್ವಾ ಚ ಪನ ಸೀಹಳದೀಪೇಯೇವ ಸುಟ್ಠು ಧಾರೇಸುಂ.

ತತ್ಥೇವ ಅಟ್ಠಕಥಾಯೋ ಬುದ್ಧಘೋಸತ್ಥೇರೋ ಮಾಗಧಭಾಸಾಯ ಪರಿವತ್ತೇತ್ವಾ ವಿರಚಿ. ಪಚ್ಛಾ ಚ ಯೇಭುಯ್ಯೇನ ತತ್ಥೇವ ಅಟ್ಠಕಥಾಟೀಕಾಅನುಮಧುಲಕ್ಖಣಗಣ್ಠಿಗನ್ಥನ್ತರಾನಿ ¶ ಅಕಂಸು. ಪುನ ಸಾಸನಂ ನಭೇ ರವಿನ್ದುವ ಪಾಕಟನ್ತಿ.

ತತ್ಥ ಬುದ್ಧವಂಸಟ್ಠಕಥಂ ಬುದ್ಧದತ್ತತ್ಥೇರೇ ಅಕಾಸಿ. ಇತಿವುತ್ತೋದಾನಚರಿಯಾಪಿಟಕಥೇರಾಥೇರೀವಿಮಾನವತ್ಥುಪೇತವತ್ಥುನೇತ್ತಿಅಟ್ಠಕಥಾಯೋ ಆಚರಿಯಧಮ್ಮಪಾಲತ್ಥೇರೋ ಅಕಾಸಿ. ಸೋ ಚ ಆಚರಿಯಧಮ್ಮಪಾಲತ್ಥೇರೋ ಸೀಹಳದೀಪಸ್ಸ ಸಮೀಪೇ ದಮಿಲರಟ್ಠೇ ಬದರತಿತ್ಥಮ್ಹಿ ನಿವಾಸಿತತ್ತಾ ಸೀಹಳದೀಪೇಯೇವ ಸಙ್ಗಹೇತ್ವಾ ವತ್ತಬ್ಬೋ.

ಪಟಿಸಮ್ಭಿದಾಮಗ್ಗಟ್ಠಕಥಂ ಮಹಾನಾಮೋ ನಾಮ ಥೇರೋ ಆಕಾಸಿ. ಮಹಾನಿದ್ದೇಸಟ್ಠಕಥಂ ಉಪಸೇನೋ ನಾಮ ಥೇರೋ ಅಕಾಸಿ. ಅಭಿಧಮ್ಮಟೀಕಂ ಪನ ಆನನ್ದತ್ಥೇರೋ ಅಕಾಸಿ. ಸಾ ಚ ಸಬ್ಬಾಸಂ ಟೀಕಾನಂ ಆದಿಭೂತತ್ತಾ ಮೂಲಟೀಕಾತಿ ಪಾಕಟಾ.

ವಿಸುದ್ಧಿಮಗ್ಗಸ್ಸ ಮಹಾಟೀಕಂ ದೀಘನಿಕಾಯಟ್ಠಕಥಾಯ ಟೀಕಂ ಮಜ್ಝಿಮನಿಕಾಯಟ್ಠಕಥಾಯ ಟೀಕಂ ಸಂಯುತ್ತನಿಕಾಯಟ್ಠಕಥಾಯ ಟೀಕಞ್ಹಾತಿ ಇಮಾಯೋ ಆಚರಿಯಧಮ್ಮಪಾಲತ್ಥೇರೋ ಅಕಾಸಿ.

ಸಾರತ್ಥದೀಪನಿಂ ನಾಮ ವಿನಯಟೀಕಂ ಅಙ್ಗುತ್ತರನಿಕಾಯಟೀಕಞ್ಚ ಪರಕ್ಕಮಬಾಹುರಞ್ಞಾ ಯಾಚಿತೋ ಸಾರಿಪುತ್ತತ್ಥೇರೋ ಅಕಾಸಿ. ವಿಮತಿವಿನೋದನಿಂ ನಾಮ ವಿನಯಟೀಕಂ ದಮಿಲರಟ್ಠವಾಸಿಕಸ್ಸಪತ್ಥೇರೋ ಅಕಾಸಿ.

ಅನುಟೀಕಂ ಪನ ಆಚರಿಯಧಮ್ಮಪಾಲತ್ಥೇರೋ. ಸಾ ಚ ಮೂಲಟೀಕಾಯ ಅನುತ್ತಾನತ್ಥಾನಿ ಉತ್ತಾನಾನಿ ಸಂವಣ್ಣಿತತ್ತಾ ಅನುಟೀಕಾ ತಿವುಚ್ಚತಿ.

ವಿಸುದ್ಧಿಮಗ್ಗಸ್ಸ ಚೂಳಟೀಕಂ ಮಖುದೀಪನಿಞ್ಚ ಅಞ್ಞೇತರಾ ಥೇರಾ ಅಕಂಸು. ಸಾ ಚ ಮೂಲಟೀಕಾಯ ಅತ್ಥಾವಸೇಸಾತಿ ಚ ಅನುತ್ತಾನತ್ಥಾತಿ ಚ ಕತ್ವಾ ಮೂಲಟೀಕಾಯ ಸದ್ಧಿಂ ಸಂಸನ್ದಿತ್ವಾ ಕತತ್ತಾ ಮಧುರ ಸತ್ತಾ ಚ ಮಧುದೀಪನಿನ್ತಿ ವುಚ್ಚತಿ. ಮೋಹವಿಚ್ಛೇದನಿಂ ಪನ ಲಕ್ಖಣಗನ್ಥಂ ಕಸ್ಸಪತ್ಥೇರೋ ಅಕಾಸಿ.

ಆಭಿಧಮ್ಮಾವತಾರಂ ಪನ ರುಪಾರೂಪವಿಭಾಗಂ ವಿನಯವಿನಿಚ್ಛಯಞ್ಚ ಬುದ್ಧ ದತ್ತತ್ಥೇರೋ. ವಿನಯಸಙ್ಗಹಂ ಸಾರಿಪುತ್ತತ್ಥೇರೋ. ಖುದ್ದಸಿಕ್ಖಂ ಧಮ್ಮಸಿರಿತ್ಥೇರೋ ¶ . ಪರಮತ್ಥವಿನಿಚ್ಛಯಂ ನಾಮರೂಪಪರಿಚ್ಛೇದಂ ಅಭಿಧಮ್ಮತ್ಥಸಙ್ಗಞ್ಚ ಅನುರುದ್ಧತ್ಥೇರೋ. ಸಚ್ಚಸಙ್ಖೇಪಂ ಧಮ್ಮಪಾಲತ್ಥೇರೋ. ಖೇಮಂ ಖೇಮತ್ಥೇರೋ. ತೇ ಚ ಸಙ್ಖೇಪತೋ ಸಂವಣ್ಣಿತತ್ತಾ ಸುಖೇನ ಚ ಲಕ್ಖಣಿಯತ್ತಾ ಲಕ್ಖಣಗನ್ಥಾತಿ ವುಚ್ಚನ್ತಿ.

ತೇಸಂ ಪನ ಸಂವಣ್ಣನಾಸು ಅಭಿಧಮ್ಮತ್ಥಸಙ್ಗಹಸ್ಸ ಪೋರಾಣಟೀಕಂ ನವವಿಮಲಬುದ್ಧಿತ್ಥೇರೋ ಅಕಾಸಿ. ಸಚ್ಚಂಸಙ್ಖೇಪನಾಮರೂಪಪರಿಚ್ಛೇದಖೇಮಾಅಭಿಧಮ್ಮಾವತಾರಾನಂ ಪೋರಾಣಟೀಕಂ ವಾಚಿಸ್ಸರಮಹಾಸಾಮಿತ್ಥೇರೋ. ಪರಮತ್ಥವಿನಿಚ್ಛಯಸ್ಸ ಪೋರಾಣಟೀಕಂ ಮಹಾಬೋಧಿತ್ಥೇರೋ.

ಅಭಿಧಮತ್ಥಸಙ್ಗಹಾಭಿಧಮ್ಮಾವತಾರಾಭಿನವ ಟೀಕಾಯೋ ಸುಮಙ್ಗಲಸಾಮಿತ್ಥೇರೋ. ಸಚ್ಚಸಙ್ಖೇಪಾಭಿನವಟೀಕಂ ಅರಞ್ಞವಾಸಿತ್ಥೇರೋ. ನಾಮರೂಪಪರಿಚ್ಛೇದಾಭಿನವಟೀಕಂ ಮಹಾಸಾಮಿತ್ಥೇರೋ. ಪರಮತ್ಥವಿನಿಚ್ಛಯಾಭಿನವಟೀಕಂ ಅಞ್ಞತರತ್ಥೇರೋ. ವಿನಯವಿನಿಚ್ಛಯಟೀಕಂ ರೇವತತ್ಥೇರೋ. ಖುದ್ದಸಿಕ್ಖಾಯ ಪುರಾಣಟೀಕಂ ಮಹಾಯಸತ್ಥೇರೋ. ತಾಯಯೇವ ಅಭಿನವಟೀಕಂ ಸಙ್ಘರಕ್ಖಿತತ್ಥೇರೋತಿ.

ವಜಿರಬುದ್ಧಿಂ ನಾಮ ವಿನಯಗಣ್ಠಿಪದತ್ಥಂ ವಜಿರಬುದ್ಧಿತ್ಥೇರೋ. ಚೂಳಗಣ್ಠಿಂ ಮಜ್ಝಿಮಗಣ್ಠಿಂ ಮಹಾಗಣ್ಠಿಞ್ಚ ಸೀಹಳದೀಪವಾಸಿನೋ ಥೇರಾ. ತೇ ಚ ಪದಕ್ಕಮೇನ ಅಸಂವಣ್ಣೇತ್ವಾ ಅನುತ್ತಾನತ್ಥಾಯೇವ ಸಂವಣ್ಣಿತತ್ತಾ ಗಣ್ಠಿಪದತ್ಥಾತಿ ವುಚ್ಚನ್ತಿ.

ಅಭಿಧಾನಪ್ಪದೀಪಿಕಂ ಪನ ಮಹಾಮೋಗ್ಗಲಾನತ್ಥೇರೋ. ಅತ್ಥಬ್ಯಕ್ಖಾನಂ ಚೂಳಬುದ್ಧತ್ಥೇರೋ. ವುತ್ತೋದಯಂ ಸಮ್ಬನ್ಧಚಿನ್ತನಂ ಸುಬೋಧಾಲಙ್ಕಾರಞ್ಚ ಸಙ್ಘರಕ್ಖಿತತ್ಥೇರೋ. ಬ್ಯಾಕರಣಂ ಮೋಗ್ಗಲಾನತ್ಥೇರೋ.

ಮಹಾವಂಸಂ ಚೂಳವಂಸಂ ದೀಪವಂಸಂ ಥೂಪವಂಸಂ ಬೋಧಿವಂಸಂ ಧಾತುವಂ ಸಞ್ಚ ಸೀಹಳದೀಪವಾಸಿನೋ ಥೇರಾ. ದಾಠಾಧಾತುವಂಸಂ ಪನ ಧಮ್ಮಕಿತ್ತಿತ್ಥೇರೋ ಅಕಾಸಿ. ಏತೇ ಚ ಪಾಳಿಮುತ್ತಕವಸೇನ ವುತ್ತತ್ತಾ ಗನ್ಥನ್ತರಾತಿ ವುಚ್ಚನ್ತಿ.

ಇಚ್ಚೇವಂ ಬುದ್ಧಘೋಸಾದಯೋ ಥೇರ ವರಾ ಯಥಾಬಲಂ ಯಥಾಸತ್ತಿಂ ಪರಿಯತ್ತಿಂ ಸಾಸನಂ ಉಪತ್ಥಮ್ಭೇತ್ವಾ ಬಹೂಹಿ ಮೂಲೇಹಿ ಬಹುಹಿಸಾಖಾಹಿ ಬಹೂಹಿ ಚ ವಿಟಪೇಹಿ ಉಪತ್ಥಮ್ಭಿಯಮಾನೋ ವೇಪುಲ್ಲಮಾ ಪಜ್ಜಮಾನೋ ¶ ಮಹಾನಿಗ್ರೋಧರುಕ್ಖೋ ವಿಯ ಥಿರಂ ಹುತ್ವಾ ಚಿರಕಾಲಂ ತಿಟ್ಠತೀತಿ ವೇದಿತಬ್ಬಂ.

ಇದಂ ಸೀಹಳದೀಪೇ ಪೋತ್ಥಕಾರುಳ್ಹತೋ ಪಚ್ಛಾ ಸಾಸನಸ್ಸ ಪತಿಟ್ಠಾನಂ.

ಏತೇಪಿ ಚ ಮಹಾಥೇರೋ, ಯಥಾಸತ್ತಿಂ ಯಥಾಬಲಂ;

ಅಟ್ಠಕಥಾದಯೋ ಕತ್ವಾ, ಮಚ್ಚುಮುಖಂ ಉಪಾಗಮುಂ.

ಸೇಯ್ಯಥಾಪಿ ಚ ಲೋಕಸ್ಮಿಂ, ಓಭಾಸಿತ್ವಾನ ಚನ್ದಿಮಾ;

ಆವಹಿತ್ವಾನ ಸತ್ತಾನಂ, ಹಿತಂ ಅತ್ಥಂವ ಗಚ್ಛತಿ.

ಏವಮೇವ ಮಹಾಥೇರಾ, ಞಾಣೋಭಾಸೇಹಿ ಭಾಸಿಯ;

ಆವಹಿತ್ವಾನ ಸತ್ತಾನಂ, ಹಿತಂ ಅತ್ಥಂವ ಗಚ್ಛತಿ.

ಇತಿ ಸಾಸನವಂಸೇ ಸೀಹಳದೀಪಿಕಸಾಸನವಂಸಕಥಾಮಗ್ಗೋ

೩. ಸುವಣ್ಣಭೂಮಿಸಾಸನವಂಸಕಥಾಮಗ್ಗೋ

೩. ಇದಾನಿ ಯಥಾಠಪಿತಮಾತಿಕಾವಸೇನ ಸುವಣ್ಣಭೂಮಿ ರಟ್ಠೇ ಸಾಸನವಂಸಕಥಾಮಗ್ಗಸ್ಸ ವತ್ಥುಂ ಓಕಾಸೋ ಅನುಪ್ಪತ್ಥೋ, ತಸ್ಮಾ ಸುವಣ್ಣಭೂಮಿರಟ್ಠಸಾಸನವಂಸಕಥಾಮಗ್ಗಂ ಆರಭಿಸ್ಸಾಮಿ.

ತತ್ಥ ಸುವಣ್ಣಭೂಮೀತಿ ತೀಸು ರಾಮಞ್ಞರಟ್ಠೇಸು ಏಕಸ್ಸ ನಾಮಂ. ತೀಣಿಹಿ ರಾಮಞ್ಞರಟ್ಠಾನಿ ಹೋನ್ತಿ ಹಂಸಾವತೀಮುತ್ತಿಮಸುವಣ್ಣಭೂಮಿವಸೇನ ಏಕದೇಸೇನ ಸಬ್ಬಮ್ಪಿ ರಾಮಞ್ಞರಟ್ಠಂ ಗಹೇತಬ್ಬಂ. ತತ್ಥ ಪನ ಉಕ್ಕಲಾಪಜನಪದೇ ತಪುಸ್ಸಭಲ್ಲಿಕೇ ಆದಿಂ ಕತ್ವಾ ಭಗವತೋ ಅಭಿಸಮ್ಬುಜ್ಝಿತ್ವಾ ಸತ್ತಸತ್ತಾಹೇಸು ಅತಿಕ್ಕನ್ತೇಸುಯೇವ ಆಸಾಳ್ಹಿಮಾಸಸ್ಸ ಜುಣ್ಹಪಕ್ಖಪಞ್ಚಮದಿವಸತೋ ಪಟ್ಠಾಯ ರಾಮಞ್ಞರಟ್ಠೇ ಸಾಸನಂ ಪತಿಟ್ಠತಿ.

ಇದಂ ರಾಮಞ್ಞರಟ್ಠೇ ಪಠಮಂ ಸಾಸನಸ್ಸ ಪತಿಟ್ಠಾನಂ.

ಭಗವತೋ ¶ ಅಭಿಸಮ್ಬುದ್ಧಕಾಲತೋ ಪುಬ್ಬೇಯೇವ ಅಪರಣ್ಣಕರಟ್ಠೇ ಸುಭಿನ್ನನಗರೇ ತಿಸ್ಸರಞ್ಞೋ ಕಾಲೇ ಏಕಸ್ಸ ಅಮಚ್ಚಸ್ಸ ತಿಸ್ಸೋ ಜಯೋ ಚಾತಿ ದ್ವೇಪುತ್ತಾ ಅಹೇಸುಂ. ತೇ ಗಿಹಿಭಾವೇ ಸಂವೇಗಂ ಲಭಿತ್ವಾ ಮಹಾಸಮುದ್ದಸ್ಸ ಸಮೀಪೇ ಗಜ್ಜಗಿರಿಮ್ಹಿ ನಾಮ ಪಬ್ಬತೇ ಇತ್ಥುಸಿಪಬ್ಬಂ ಪಬ್ಬಜಿತ್ವಾ ನಿಸೀದಿಸುಂ. ತದಾ ನಾಗಿಯಾ ವಿಜ್ಜಾಧರೋ ಸನ್ತವಂ ಕತ್ವಾ ದ್ವೇ ಅಣ್ಡಾನಿ ವಿಜಾಯಿತ್ವಾ ಸಾ ನಾಗೀ ಲಜ್ಜಾಯ ತಾನಿ ವಿಜಹಿತ್ವಾ ಗಚ್ಛಿ.

ತದಾ ಜೇಟ್ಠೋ ತಿಸ್ಸಕುಮಾರೋ ತಾನಿ ಲಭಿತ್ವಾ ಕನಿಟ್ಠೇನ ಸದ್ಧಿಂ ವಿಭಜಿತ್ವಾ ಏಕಂ ಏಕಸ್ಸ ಸನ್ತಿಕೇ ಠಪೇಸಿ. ಕಾಲೇ ಅತಿಕ್ಕನ್ತೇ ತೇಹಿ ಅಣ್ಡೇಹಿ ದ್ವೇ ಮನುಸ್ಸಾ ವಿಜಾಯಿಂಸು. ತೇ ದಸ ವಸ್ಸವಯೇ ಸಮ್ಪತ್ತೇ ಕನಿಟ್ಠಸ್ಸ ಅಣ್ಡತೋ ವಿಜಾಯನದಹರೋ ಕಾಲಂ ಕತ್ವಾ ಮಜ್ಝಿಮದೇಸೇ ಮಿಥಿಲನಗರೇ ಗವಂಪತಿ ನಾಮ ಕುಮಾರೋ ಉಪಜ್ಜಿ. ಸೋ ಸತ್ತವಸ್ಸಿಕಕಾಲೇ ಬುದ್ಧಸ್ಸ ಭಗವತೋ ಸನ್ತಿಕೇ ನಿಯ್ಯಾದೇತ್ವಾ ಪಬ್ಬಾಜೇತ್ವಾ ಅಚಿರೇನೇವ ಅರಹಾ ಅಹೋಸಿ.

ಜೇಟ್ಠಸ್ಸ ಪನ ಅಣ್ಡತೋ ವಿಜಾಯನದಹರೋ ದ್ವಾದಸವಸ್ಸಿಕಕಾಲೇ ಸಕ್ಕೋ ದೇವಾನಮಿನ್ದೋ ಆಗನ್ತ್ವಾ ರಾಮಞ್ಞರಟ್ಠೇ ಸುಧಮ್ಮಪುರಂ ನಾಮ ನಗರಂ ಮಾಪೇತ್ವಾ ಸೀಹರಾಜಾತಿ ನಾಮೇನ ತತ್ಥ ರಜ್ಜಂ ಕಾರಾಪೇಸಿ. ಸಿಲಾಲೋನೇ ಪನ ಸಿರಿಮಾಸೋಕೋತಿ ನಾಮೇನಾತಿ ವುತ್ತಂ. ಗವಂಪತಿತ್ಥೇರೋ ಚ ಅತ್ತನಾ ಮಾತರಂ ದಟ್ಠುಕಾಮೋ ಮಿಥಿಲನಗರತೋ ಆಗನ್ತುಂ ಆರಭಿ. ತದಾ ದಿಬ್ಬಚಕ್ಖುನಾ ಮಾತುಯಾ ಕಾಲಙ್ಕತಭಾವಂ ಞತ್ವಾ ಇದಾನಿ ಮೇ ಮಾತಾ ಕುಹಿಂ ಉಪ್ಪಜ್ಜತೀತಿ ಆವಜ್ಜನ್ತೋ ಬಾಹುಲ್ಲೇನ ನೇಸಾದಕೇವಟ್ಟಾನಂ ನಿವಾಸನಟ್ಠಾನಭೂತೇ ದೇಸೇ ಉಪ್ಪಜ್ಜತೀತಿ ಞತ್ವಾ ಸಚಾಹಂ ಗನ್ತ್ವಾ ನ ಓವಾದೇಯ್ಯಂ, ಮಾತಾ ಮೇ ಅಪಾಯಗಮನಿಯಂ ಅಪುಞ್ಞಂ ವಿಚಿನಿತ್ವಾ ಚತೂಸು ಅಪಾಯೇಸು ಉಪ್ಪಜ್ಜೇಯ್ಯಾತಿ ಚಿನ್ತೇತ್ವಾ ಭಗವನ್ತಂ ಯಾಚಿತ್ವಾ ರಾಮಞ್ಞರಟ್ಠಂ ವೇಹಾಸಮಗ್ಗೇನ ಆಗಚ್ಛಿ. ರಾಮಞ್ಞರಟ್ಠೇ ಸುಧಮ್ಮಪರಂ ಪತ್ವಾ ಅತ್ತನೋ ¶ ಭಾತುನಾ ಸೀಹರಾಜೇನ ಸದ್ಧಿಂ ರಟ್ಠವಾಸೀನಂ ಧಮ್ಮಂ ದೇಸೇತ್ವಾ ಪಞ್ಚಸು ಸೀಲೇಸು ಪತಿಟ್ಠಾಪೇಸಿ.

ಅಥ ಸೀಹರಾಜಾ ಆಹ, ಲೋಕೇಸು ಭನ್ತೇ ತ್ವಮಸಿ ಅಗ್ಗತರೋ ಪುಗ್ಗಲೋತಿ. ನ ಮಹಾರಾಜ ಅಹಂ ಅಗ್ಗತರೋ, ತೀಸು ಪನ ಭವೇಸು ಸಬ್ಬೇಸಂ ಸತ್ತಾನಂ ಮಕುಟಸಙ್ಕಾಸೋ ಗೋತಮೋ ನಾಮ ಮಯ್ಹಂ ಸತ್ಥಾ ಅತ್ಥಿ, ಇದಾನಿ ಮಜ್ಝಿಮದೇಸಂ ರಾಜಗಹಂ ಪಟಿವಸತೀತಿ. ಏವಂ ಪನ ಭನ್ತೇ ಸತಿ ತುಮ್ಹಾಕಂ ಆಚರಿಯಂ ಮಯಂ ದಟ್ಠುಂ ಅರಹಾಮ ವಾ ನೋ ವಾತಿ ಪುಚ್ಛಿ. ಗವಂಪತಿತ್ಥೇರೋಚ ಆಮ ಮಹಾರಾಜ ಅರಹಥ ಭಗವನ್ತಂ ದಟ್ಠುಂ, ಅಹಂ ಯಾಚಿತ್ವಾ ಆಗಚ್ಛಾಮೀತಿ ವತ್ವಾ ಭಗವನ್ತಂ ಯಾಚಿ. ಭಗವಾ ಚ ಅಭಿಸಮ್ಬುಜ್ಝಿತ್ವಾ ಅಟ್ಠಮೇ ವಸ್ಸೇ ಸದ್ಧಿಂ ಅನೇಕಸತಭಿಕ್ಖೂಹಿ ರಾಮಞ್ಞರಟ್ಠೇ ಸುಖಮ್ಮಪುರಂ ಆಕಾಸೇನ ಆಗಮಾಸಿ. ರಾಜವಂಸೇ ಪಞ್ಚಹಿ ಭಿಕ್ಖುಸತೇಹಿ ಆಗಮಾಸೀತಿ ವುತ್ತಂ. ಸಿಲಾಲೇಖನೇ ಪನ ವೀಸತಿಸಹಸ್ಸಮತ್ತೇಹಿ ಭಿಕ್ಖೂಹೀತಿ ವುತ್ತಂ. ಏತ್ಥ ಚ ಯಸ್ಮಾ ಭಗವಾ ಸಪರಿಸೋಯೇವ ಆಗಚ್ಛಿ, ನ ಏಕಕೋತಿ ಏತ್ತಕಮೇವ ಇಚ್ಛಿತಬ್ಬಂ, ತಸ್ಮಾ ನಾನಾ ವಾದತಂ ಪಟಿಚ್ಚ ಚಿತ್ತಸ್ಸಾಕುಲಿತಾ ನ ಉಪ್ಪಾದೇತಬ್ಬಾತಿ.

ಅಥ ಆಗನ್ತ್ವಾ ರತನಮಣ್ಡಪೇ ನಿಸೀದಿತ್ವಾ ಸರಾಜಿಕಾನಂ ರಟ್ಠವಾಸೀನಂ ಅಮತರಸಂ ಅದಾಸಿ. ತೀಸು ಸರಣೇಸು ಪಞ್ಚಸು ಚ ಸೀಲೇಸು ಪತಿಟ್ಠಾಪೇಸಿ. ಅಥ ಭಗವಾ ದಸ್ಸನತ್ಥಾಯ ಆಗತಾನಂ ಛನ್ನಂ ತಾಪಸಾನಂ ಛ ಕೇಸಧಾತುಯೋ ಪೂಜನತ್ಥಾಯ ಅದಾಸಿ. ತತೋ ಪಚ್ಛಾಸತ್ತತಿಂಸವಸ್ಸಾನಿ ಪೂರೇತ್ವಾ ಪರಿನಿಬ್ಬಾನಕಾಲೇಪಿ ಭಗವತೋ ಅಧಿಟ್ಠಾನಾನುರೂಪೇನ ಚಿತಕಟ್ಠಾನತೋ ತೇತ್ತಿಂಸ ದನ್ತೇ ಗಹೇತ್ವಾ ಗವಂಪತಿತ್ಥೇರೋ ಸುಧಮ್ಮಪುರಂ ಆನೇತ್ವಾ ಸೀಹರಞ್ಞೋ ದತ್ವಾ ತೇತ್ತಿಂಸಚೇತಿಯಾನಿ ಪತಿಟ್ಠಾಪೇಸಿ. ಏವಂ ಭಗವತೋ ಪರಿನಿಬ್ಬಾನತೋ ಅಟ್ಠಮೇಯೇವ ವಸ್ಸೇ ಗವಂಪತಿತ್ಥೇರೋ ರಾಮಞ್ಞ ರಟ್ಠೇ ಸುಧಮ್ಮಪುರೇ ಸಾಸನಂ ಪತಿಟ್ಠಾಪೇಸಿ.

ಇದಂ ರಾಮಞ್ಞರಟ್ಠೇ ದುತಿಯಂ ಸಾಸನಸ್ಸ ಪತಿಟ್ಠಾನಂ.

ಭಗವತೋ ¶ ಪರಿನಿಬ್ಬುತಪಞ್ಚತಿಂಸಾಧಿಕಾನಂ ದ್ವಿನ್ನಂ ಸತಾನಂ ಉಪರಿಸುವಣ್ಣಭೂಮಿಂ ನಾಮ ರಾಮಞ್ಞರಟ್ಠಂ ಆಗನ್ತ್ವಾ ಸೋಣತ್ಥೇರೋ ಉತ್ತರತ್ಥೇರೋಚಾತಿ ದ್ವೇ ಥೇರಾ ಪಞ್ಚವಗ್ಗಕಮ್ಮಾರಹೇಹಿ ಭಿಕ್ಖೂಹಿ ಸದ್ಧಿಂ ಸಾಸನಂ ಪತಿಟ್ಠಾಪೇಸುಂ. ತೇ ಚ ಥೇರಾ ಮಹಾಮೋಗ್ಗಲಿಪುತ್ತತಿಸ್ಸತ್ಥೇರಸ್ಸ ಸದ್ಧಿವಿಹಾರಿಕಾತಿ ಅಟ್ಠಕಥಾಯಂ ಆಗತಾ.

ತಪುಸ್ಸಭಲ್ಲಿಕೇ ಗವಂಪತಿತ್ಥೇರಞ್ಚ ಪಟಿಚ್ಚ ಸಾಸನಂ ತಾವ ಪತಿಟ್ಠಹಿ. ತಞ್ಚ ನ ಸಬ್ಬೇನ ಸಬ್ಬಂ ಓಗಾಹೇತ್ವಾ ಯೇ ಯೇ ಪನ ಸದ್ಧಾ ಪಸನ್ನಾ, ತೇ ತೇ ಅತ್ತನೋ ಇಚ್ಛಾವಸೇನೇವ ಸಾಸನಂ ಪಸೀದಿಂಸು. ಪಚ್ಛಾ ಪನ ಸೋಣುತ್ತರತ್ಥೇರಾ ಮಹುಸ್ಸಾಹೇನ ಆಚರಿಯ ಆಣತ್ತಿಯಾ ಸಾಸನಸ್ಸ ಪತಿಟ್ಠಾಪನತ್ಥಾಯ ಉಸ್ಸುಕ್ಕಂ ಆಪನ್ನಾ ಪತಿಟ್ಠಾಪೇಸುಂ. ತೇನ ಅಟ್ಠಕಥಾಯಂ ಏತಂ ರಟ್ಠಂ ಗನ್ತ್ವಾ ಏತ್ಥ ಸಾಸನಂ ಪತಿಟ್ಠಾಪೇಹೀತಿ ಕಾರಿತಪಚ್ಚಯವಸೇನ ಆಣತ್ತಿವಿಭತ್ತಿವಸೇನಚ ವುತ್ತಂ.

ತದಾ ಪನ ಸುವಣ್ಣಭೂಮಿರಟ್ಠೇ ಸುಧಮ್ಮಪುರೇ ಸಿರಿಮಾಸೋಕೋ ನಾಮ ರಾಜಾ ರಜ್ಜಂ ಕಾರೇಸಿ. ತಞ್ಚ ಸುಧಮ್ಮಪುರಂ ನಾಮ ಕೇಲಾಸಪಬ್ಬತಮುದ್ಧನಿ ದಕ್ಖಿಣಾಯ ಅನುದಿಸಾಯ ಪುಬ್ಬಡ್ಢಭಾಗೇನ ಪಬ್ಬತಮುದ್ಧನಿ ಅಪರಡ್ಢಭಾಗೇನ ಭೂಮಿತಲೇ ತಿಟ್ಠತಿ. ತಂಯೇವ ಗುಳಪಾಚಕಾನಂ ಮಸ್ಸಾನಂ ಗೇಹಸದಿಸಾನಿ ಗೇಹಾನಿ ಯೇಭುಯ್ಯೇನ, ತೇನೇವ ಗೋಳಮಿತ್ತಿಕ ನಾಮೇನಾಪಿ ವೋಹಾರಿಯತಿ. ತಸ್ಸ ಪನ ನಗರಸ್ಸ ಮಹಾಸಮುದ್ದಸಮೀಪೇ ಠಿತತ್ತಾ ದಕಯಕ್ಖಿನೀ ಸಬ್ಬದಾ ಆಗನ್ತ್ವಾ ರಾಜಗೇಹೇ ಜಾತೇ ಜಾತೇ ಕುಮಾರೇ ಖಾದಿ.

ಸೋಣುತ್ತರತ್ಥೇರಾನಂ ಸಮ್ಪತ್ತದಿವಸಯೇವ ರಾಜಗೇಹೇ ಏಕಂ ಪುತ್ತಂ ವಿಜಾಯಿ. ದಕಯಕ್ಖಿನೀಚ ಖಾದಿಸ್ಸಾಮೀತಿ ಸಹ ಪಞ್ಚಹಿ ಯಕ್ಖಿನಿಸತೇಹಿ ಆಗತಾ. ತಂ ದಿಸ್ವಾ ಮನುಸ್ಸಾ ಭಾಯಿತ್ವಾ ಮಹಾವಿರವಂ ರವನ್ತಿ. ತದಾ ಥೇರಾ ಭಯಾನಕಂ ಸೀಹಸೀಸವಸೇನ ಏಕಸೀಸಸರೀರದ್ವಯಸಮ್ಬನ್ಧಸಣ್ಠಾನಂ ಮನುಸೀಹರೂಪಂ ಮಾಪೇತ್ವಾ ದಸ್ಸೇತ್ವಾ ತಂ ಯಕ್ಖಿನಿಂ ಸಪರಿಸಂ ಪಲಾಪೇಸುಂ.

ಥೇರಾ ಚ ಪುನ ಯಕ್ಖಿನಿಯಾ ಅನಾಗಮನತ್ಥಾಯ ಪರಿತ್ತಂ ಅಕಂಸುತಸ್ಮಿಞ್ಚ ಸಮಾಗಮೇ ಆಗತಾನಂ ಮನುಸ್ಸಾನಂ ಬ್ರಹ್ಮಜಾಲಸುತ್ತಂ ಅದೇಸಯ್ಯುಂ ¶ . ಸಟ್ಠಿಮತ್ತಸಹಸ್ಸಾ ಸೋತಾಪನ್ನಾದಿಪರಾಯನಾ ಅಹೇಸುಂ. ಕುಲದಾರಕಾನಂ ಅಡ್ಢುಡ್ಢಾನಿ ಸಹಸ್ಸಾನಿ ಪಬ್ಬಜಿಂಸು. ಕುಲಧೀತಾನಂ ಪನ ದಿಘಡ್ಢಸಹಸ್ಸಂ. ರಾಜಕುಮಾರಾನಂ ಪಞ್ಚಸತಾಧಿಕಸಹಸ್ಸಮತ್ತಂ ಪಬ್ಬಜಿಂಸು. ಅವಸೇಸಾಪಿ ಮನುಸ್ಸಾ ಸರಣೇ ಪತಿಟ್ಠಹಿಂಸು. ಏವಂ ಸೋ ತತ್ಥ ಸಾಸನಂ ಪತಿಟ್ಠಾಪೇಸೀತಿ. ವುತ್ತಞ್ಚ ಅಟ್ಠಕಥಾಯಂ,–

ಸುವಣ್ಣಭೂಮಿಂ ಗನ್ತ್ವಾನ, ಸೋಣುತ್ತರಾ ಮಹಿದ್ಧಿಕಾ;

ಪಿಸಾಚೇ ನಿದ್ಧಮಿತ್ವಾನ, ಬ್ರಹ್ಮಜಾಲೇ ಮದೇಸಿಸುನ್ತಿ.

ತತೋ ಪಟ್ಠಾಯ ರಾಜಕುಮಾರಾನಂ ಸೋಣುತ್ತರನಾಮೇಹಿಯೇವ ನಾಮಂ ಅಕಂಸು. ಅವಸೇಸದ್ವಾರಕಾನಮ್ಪಿ ರಕ್ಖಸಭಯತೋ ವಿಮೋಚನತ್ಥಂ ತಾಲಪತ್ತಭುಜಪತ್ತೇಸು ಥೇರೇಹಿ ಮಾಪಿತಂ ಮನುಸೀಹರೂಪಂ ದಸ್ಸೇತ್ವಾ ಮತ್ಥಕೇ ಠಪೇಸುಂ. ಮನುಸ್ಸಾಚ ಸಿಲಾಮಯಂ ಮನುಸೀಹರೂಪಂ ಕತ್ವಾ ಸುಧಮ್ಮಪುರಸ್ಸ ಏಸನ್ನೇ ಪದೇಸೇ ಠಪೇಸುಂ. ತಂ ಯಾವಜ್ಜತನಾ ಅತ್ಥೀತಿ. ಇಚ್ಚೇವಂ ಭಗವತೋ ಪರಿನಿಬ್ಬಾನತೋ ಪಞ್ಚತಿಂಸಾಧಿಕೇ ದ್ವಿವಸ್ಸಸತೇ ಸಮ್ಪತ್ತೇ ಸೋಣುತ್ತರತ್ಥೇರಾ ಆಗನ್ತ್ವಾ ಸಾಸನಂ ಪತಿಟ್ಠಾಪೇತ್ವಾ ಸಾಸನಂ ಪತಿಟ್ಠಾಪೇತ್ವಾ ಅನುಗ್ಗಹಂ ಅಕಂಸೂತಿ.

ಇದಂ ರಾಮಞ್ಞರಟ್ಠೇ ತತಿಯಂ ಸಾಸನಸ್ಸ ಪತಿಟ್ಠಾನಂ.

ತತೋ ಪಚ್ಛಾ ಛಸತಾಧಿಕೇ ಸಹಸ್ಸೇ ಸಮ್ಪತ್ತೇ ಪುಬ್ಬೇ ವುತ್ತೇಹಿ ತೀಹಿ ಕಾರಣೇಹಿ ಸಾಸನಸ್ಸ ಉಪ್ಪತ್ತಿಟ್ಠಾನಭೂತಂ ರಾಮಞ್ಞರಟ್ಠಂ ದಾಮರಿಕಚೋರಭಯೇನ ಪಜ್ಜರರೋಗಭಯೇನ ಸಾಸನಪಚ್ಚತ್ಥಿಕಭಯೇನಚಾತಿ ತೀಹಿ ಭಯೇಹಿ ಆಕುಲಿತಂ ಅಹೋಸಿ. ತದಾ ಚ ತತ್ಥ ಸಾಸನಂ ದುಬ್ಬಲಂ ಅಹೋಸಿ, ಯಥಾ ಉದಕೇ ಮನ್ದೇ ತತ್ರಜಾತಂ ಉಪ್ಪಲಂ ಉಪ್ಪಲಂ ದುಬ್ಬಲನ್ತಿ. ತತ್ಥ ಭಿಕ್ಖೂಪಿ ಸಾಸನಂ ಯಥಾ ಕಾಮಂ ಪೂರೇತುಂ ನ ಸಕ್ಕಾ.

ಸೂರಿಯಕುಮಾರಸ್ಸ ನಾಮ ಮನೋಹರಿರಞ್ಞೋ ಪನ ಕಾಲೇ ಸಾಸನಂ ಅತಿವಿಯ ದುಬ್ಬಲಂ ಅಹೋಸಿ. ಜಿನಚಕ್ಕೇ ಏಕಛಸತಾಧಿಕೇ ವಸ್ಸಸಹಸ್ಸೇ ಸಮ್ಪತ್ತೇ ಕಲಿಯುಗೇಚ ಏಕೂನವೀಸತಾಧಿಕೇ ¶ ಚತುವಸ್ಸಸತೇ ಸಮ್ಪತ್ತೇ ಅರಿಮದ್ದನನಗರೇ ಅನುರುದ್ಧಾ ನಾಮ ರಾಜಾ ತತೋ ಸಹ ಪಿಟಕೇನ ಭಿಕ್ಖುಸಙ್ಘಂ ಆನೇಸಿ.

ತತೋ ಪಚ್ಛಾ ಜಿನಚಕ್ಕೇ ನವಾಧಿಕೇ ಸತ್ತಸತೇ ಸಹಸ್ಸೇ ಚ ಸಮ್ಪತ್ತೇ ಲಙ್ಕಾದೀಪೇ ಸಿರಿಸಙ್ಘಬೋಧಿಪರಕ್ಕಮಬಾಹುಮಹಾರಾಜಾ ಸಾಸನಂ ಸೋಧೇಸಿ.

ತತೋ ಛನ್ನಂ ವಸ್ಸಾನಂ ಉಪರಿ ಕಲಿಯುಗೇ ದ್ವತ್ತಿಂಸಾಧಿಕೇ ಪಞ್ಚಸತೇ ಸಮ್ಪತ್ತೇ ಉತ್ತರಾಜೀವೋ ನಾಮ ಥೇರೋ ಸಾಸನೇ ಪಾಕಟೋ ಅಹೋಸಿ.

ಸೋ ಪನ ರಾಮಞ್ಞರಟ್ಠವಾಸಿನೋ ಅರಿಯಾವಂಸತ್ಥೇರಸ್ಸ ಸದ್ಧಿವಿಹಾರಿಕೋ. ಅರಿಯಾವಂಸತ್ಥೇರೋ ಪನ ಕಪ್ಪುಙ್ಗನಗರವಾಸಿನೋ ಮಹಾಕಾಳತ್ಥೇರಸ್ಸ ಸದ್ಧಿವಿಹಾರಿಕೋ. ಮಹಾಕಾಳತ್ಥೇರೋ ಪನ ಸುಧಮ್ಮಪುರವಾಸಿನೋ ಪ್ರಾನದಸ್ಸಿತ್ಥೇರಸ್ಸ ಸದ್ಧಿವಿಹಾರಿಕೋ. ಅಯಂ ಪನ ಉತ್ತರಾಜೀವಛಪ್ಪದತ್ಥೇರಾನಂ ವಂಸದೀಪನತ್ಥಂ ವುತ್ತಾ.

ಸೋ ಪನ ಪ್ರಾನದಸ್ಸಿತ್ಥೇರೋ ಲೋಕಿಯಾಭಿಞ್ಞಾಯೋ ಲಭಿತ್ವಾ ನಿಚ್ಚಂ ಅಭಿಣ್ಹಂ ಪಾತೋವ ಮಗಧರಟ್ಠೇ ಉರುವೇಲನಿಗಮೇ ಮಹಾಬೋಧಿಂ ಗನ್ತ್ವಾ ಮಹಾಬೋಧಿಯಙ್ಗಣಂ ಸಮ್ಮಜ್ಜಿತ್ವಾ ಪುನ ಆಗನ್ತ್ವಾ ಸುಧಮ್ಮಪುರೇ ಪಿಣ್ಡಾಯ ಚರಿ. ಇದಂ ಥೇರಸ್ಸ ನಿಬದ್ಧವತ್ತುಂ. ಅಯಞ್ಚ ಅತ್ಥೋ ಸುಧಮ್ಮಪುರತೋ ಮಗಧರಟ್ಠಂ ಗನ್ತ್ವಾ ಉರುವೇಲನಿಗಮೇ ವಾಣಿಜಕಮ್ಮಂ ಕರೋನ್ತಾ ತದಾಕಾರಂ ಪಸ್ಸಿತ್ವಾ ಪಚ್ಚಾಗಮನಕಾಲೇ ಸುಧಮ್ಮಪುರ ವಾಸೀನಂ ಕಥೇಸುಂ, ತಸ್ಮಾ ವಿಞ್ಞಾಯತಿ.

ತಸ್ಮಿಞ್ಚ ಕಾಲೇ ಉತ್ತರಾಜೀವತ್ಥೇರೋ ಪರಿಪುಣ್ಣವೀಸತಿವಸ್ಸೇನ ಛಪ್ಪದೇನ ನಾಮ ಸಾಮಣೇರೇನ ಸದ್ಧಿಂ ಸೀಹಳದೀಪಂ ಗಚ್ಛಿ. ಸೀಹಳದೀಪವಾಸಿನೋ ಚ ಭಿಕ್ಖೂ ಮಯಂ ಮಹಾಮಹಿನ್ದತ್ಥೇರಸ್ಸ ವಂಸಿಕಾ ಭವಾಮ, ತುಮ್ಹೇಪಿ ಸೋಣುತ್ತರತ್ಥೇರಾನಂ ವಂಸಿಕಾ ಭವಥ, ತಸ್ಮಾ ಮಯಂ ಏಕವಂಸಿಕಾ ಭವಾಮ ಸಮಾನ ವಾದಿಕಾತಿ ವತ್ವಾ ಛಪ್ಪದಸಾಮಣೇರಸ್ಸ ಉಪಸಮ್ಪದಕಮ್ಮಂ ಅಕಂಸು. ತತೋ ಪಚ್ಛಾ ಚೇತಿಯ ವನ್ದನಾದೀನಿ ಕಮ್ಮಾನಿ ನಿಟ್ಠಾಪೇತ್ವಾ ಉತ್ತರಾಜೀವತ್ಥೇರೋ ಸದ್ಧಿಂ ಭಿಕ್ಖುಸಙ್ಖೇನ ಅರಿಮದ್ದನನಗರಂ ಪಚ್ಚಾಗಮಾಹಿ.

ಛಪ್ಪದಸ್ಸ ಪನ ಏತದಹೋಸಿ,- ಸಚಾಹಂ ಆಚರಿಯೇನ ಸಹ ಜಮ್ಬುದೀಪಂ ¶ ಗಚ್ಛೇಯ್ಯಂ, ಬಹೂಹಿ ಞಾತಿಬಲಿಬೋಧೇಹಿ ಪರಿಯತ್ತುಗ್ಗಹಣೇ ಅನ್ತರಾಯೋ ಭವೇಯ್ಯ, ತೇನ ಹಿ ಸೀಹಳದೀಪೇಯೇವ ವಸಿತ್ವಾ ಪರಿಯತ್ತಿಮುಗ್ಗಹೇತ್ವಾ ಪಚ್ಚಾಗಮಿಸ್ಸಾಮೀತಿ.

ತತೋ ಆಚರಿಯಸ್ಸ ಓಕಾಸಂ ಯಾಚಿತ್ವಾ ಸೀಹಳದೀಪೇಯೇವ ಪಟಿವಸಿ. ಸೀಹಳದೀಪೇ ವಸಿತ್ವಾ ಯಾವ ಲದ್ಧತ್ಥೇರಸಮ್ಮುತಿಕಾ ಪರಿಯತ್ತಿಂ ಪರಿಯಾಪುಣಿತ್ವಾ ಪುನ ಜಮ್ಬುದೀಪಂ ಪಚ್ಚಾಗನ್ತುಕಾಮೋ ಅಹೋಸಿ. ಅಥ ತಸ್ಸ ಏತದಹೋಸಿ,– ಅಹಂ ಏಕಕೋವ ಗಚ್ಛನ್ತೋ ಸಚೇ ಮಮ ಆಚರಿಯೋ ನತ್ಥಿ, ಸಚೇಪಿ ಜಮ್ಬುದೀಪವಾಸಿನಾ ಭಿಕ್ಖುಸಙ್ಘೇನ ಸದ್ಧಿಂ ವಿನಯಕಮ್ಮಂ ಕಾತುಂ ನ ಇಚ್ಛೇಯ್ಯಂ, ಏವಂ ಸತಿ ವಿಸುಂ ಕಮ್ಮಂ ಕಾತುಂ ನ ಸಕ್ಕೂಣೇಯ್ಯಂ, ತಸ್ಮಾ ಪಿಟಕಧರೇಹಿ ಚತೂಹಿ ಥೇರೇಹಿ ಸದ್ಧಿಂ ಗಚ್ಚೇಯ್ಯಂ, ಇಚ್ಚೇತಂ ಕುಸಲನ್ತಿ.

ಏವಂ ಪನ ಚಿನ್ತೇತ್ವಾ ತಾಮಲಿತ್ತಿಗಾಮವಾಸಿನಾ ಸಿವಲಿತ್ಥೇರೇನ ಕಮ್ಬೋಜರಞ್ಞೋ ಪುತ್ತಭೂತೇನ ತಾಮಲಿನ್ದತ್ಥೇರೇನ ಕಿಞ್ಚಿಪುರವಾಸಿನಾ ಆನನ್ದತ್ಥೇರೇನ ರಾಹುಲತ್ಥೇರೇನಚಾತಿ ಇಮೇಹಿ ಚತೂಹಿ ಥೇರೇಹಿ ಸದ್ಧಿಂ ನಾವಾಯ ಪಚ್ಚಾಗಚ್ಛಿ. ತೇ ಚ ಥೇರಾ ಪಿಟಕಧರಾ ಅಹೇಸುಂ ದಕ್ಖಾ ಥಾಮಸಮ್ಪನ್ನಾ ಚ. ತೇಸು ವಿಸೇಸತೋ ರಾಹುಲತ್ಥೇರೋ ಥಾಮಸಮ್ಪನ್ನೋ. ಕುಸಿಮನಗರಂ ಸಮ್ಪತ್ತಕಾಲೇ ಉಪಕಟ್ಠವಸ್ಸೂಪಗಮನಕಾಲೋ ಹುತ್ವಾ ಅರಿಮದ್ದನನಗರೇ ಆಚರಿಯಸ್ಸ ಸನ್ತಿಕಂ ಅಸಮ್ಪಾಪುಣಿತ್ವಾ ಕುಸಿಮನಗರಯೇವ ವಸ್ಸಂ ಉಪಗಮಿಂಸು. ತೇಸಂ ವಸ್ಸೂಪಗಮನವಿಹಾರವತ್ಥು ಆರಾಮಪಾಕಾರೋ ಚ ಕುಸಿಮನಗರಸ್ಸ ದಕ್ಖಿಣದಿಸಾಸಾಗೇ ಯಾವಜ್ಜತನಾ ಅತ್ಥಿ.

ವಸ್ಸಂವುಟ್ಠಕಾಲೇ ಪನ ಮಹಾಪವಾರಣಾಯ ಪವಾರೇತ್ವಾ ತೇ ಪಞ್ಚ ಥೇರಾ ಅರಿಮದ್ದನನಗರಂ ಅಗಮಂಸು. ಉತ್ತರಾಜೀವತ್ಥೇರೋಚ ಅರಿಮದ್ದನನಗರ ವಾಸೀಹಿ ಭಿಕ್ಖೂಹಿ ವಿಸುಂ ಹುತ್ವಾ ಸಙ್ಘಕಮ್ಮಾನಿ ಅಕಾಸಿ. ಕಿಞ್ಚಾಪಿ ಚೇತ್ಥ ಉತ್ತರಾಜೀವತ್ಥೇರಾದಯೋ ಸೀಹಳದೀಪತೋ ಪಚ್ಚಾಗನ್ತ್ವಾ ಅರಿಮದ್ದನನಗರೇ ವಸಿತ್ವಾ ಸಾಸನಂ ಅನುಗ್ಗಹೇಸುಂ, ರಾಮಞ್ಞರಟ್ಠೇ ಪನ ಜಾತತ್ತಾ ಪುಬ್ಬೇ ಚ ತತ್ಥ ನಿವಾಸತ್ತಾ ಇಧ ದಸ್ಸಿತಾತಿ ದಟ್ಠಬ್ಬಾ.

ತಸ್ಮಿಞ್ಚ ¶ ಕಾಲೇ ದಲನಗರೇ ಪದೀಪಜೇಯ್ಯಗಾಮೇ ಜಾತೋ ಸಾರಿಪುತ್ತೋ ನಾಮ ಮಹಲ್ಲಕಸ್ಸಮಣೇರೋ ಏಕೋ ಅರಿಮದ್ದನನಗರಂ ಗನ್ತ್ವಾ ಆನನ್ದತ್ಥೇರಸ್ಸ ಸನ್ತಿಕೇ ಉಪಸಮ್ಪಜ್ಜಿತ್ವಾ ಪರಿಯತ್ತಿ ಪರಿಯಪುಣಿ. ಸೋ ಬಹುಸ್ಸುತೋ ಅಹೋಸಿ ದಕ್ಖೋ ಥಾಮಸಮ್ಪನ್ನೋ ಚ. ತಮತ್ಥಂ ಸುತ್ವಾ ನರಪತಿಚಞ್ಞಿಸೂರಾಜಾ ಚಿನ್ತೇಸಿ,- ಸಚೇಸೋ ಅಙ್ಗಪಚ್ಚಙ್ಗಸಮ್ಪನ್ನೋ ಭವೇಯ್ಯ, ಆಚರಿಯಂ ಕತ್ವಾ ಠಪೇಸ್ಸಾಮಿ ಅನುಗ್ಗಹೇಸ್ಸಾಮೀತಿ. ರಾಜಾ ಏವಂ ಚಿನ್ತೇತ್ವಾ ರಾಜಪುರಿಸೇ ಪೇಸೇತ್ವಾ ವೀಮಂಸಾಪೇಸಿ. ರಾಜಪುರಿಸಾ ಚ ತಸ್ಸ ಛಿನ್ನಪಾದಙ್ಗುಟ್ಠಗ್ಗತಂ ಪಸ್ಸಿತ್ವಾ ತಮತ್ಥಂ ರಞ್ಞೋ ಆರೋಚೇಸುಂ. ರಾಜಾ ತಂ ಸುತ್ವಾ ಏವಂ ವಿಕಲಙ್ಗಪಚ್ಚಙ್ಗೋ ಭವೇಯ್ಯ, ಪಧಾನಾಚರಿಯಟ್ಠಾನೇ ಠಪೇತುಂ ನ ಯುತ್ತೋತಿ ಕತ್ವಾ ಪಧಾನಾಚರಿಯಭಾವಂ ನ ಅಕಾಸಿ. ಪೂಜಾಸಕ್ಕಾ ರಮತ್ತೇನೇವ ಅನುಗ್ಗಹಂ ಅಕಾಸಿ. ಏಕಸ್ಮಿಞ್ಚ ಕಾಲೇ ಧಮ್ಮವಿಲಾಸೋತಿ ಲಞ್ಛಂ ದತ್ವಾ ರಾಮಞ್ಞರಟ್ಠೇ ಸಾಸನಂ ಸೋಧೇತ್ವಾ ಪರಿಸುದ್ಧಂ ಕರೋಹೀತಿ ರಾಮಞ್ಞರಟ್ಠಂ ಪೇಸೇಸಿ.

ಸೋಚ ರಾಮಞ್ಞರಟ್ಠಂ ಗನ್ತ್ವಾ ದಲನಗರೇ ಬಹುನಂ ಭಿಕ್ಖೂನಂ ಧಮ್ಮ ವಿನಯಂ ವಾಚೇತ್ವಾ ಸಾಸನಂ ಪಗ್ಗಹೇಸಿ. ತತ್ಥ ಚ ರಾಮಞ್ಞಮನುಸ್ಸಾ ತಸ್ಸ ಧಮ್ಮವಿಲಾಸತ್ಥೇರಸ್ಸ ಸಿಸ್ಸಾನುಸಿಸ್ಸಾ ಸೀಹಳಭಿಕ್ಖು ಗಣಾತಿ ವೋಹಾರನ್ತಿ. ಇಚ್ಚೇವಂ ಸೀಹಳದೀಪಿಕಸ್ಸ ಆನನ್ದತ್ಥೇರಸ್ಸ ಸಿಸ್ಸಂ ಧಮ್ಮವಿಲಾಸಂ ಪಟಿಚ್ಚ ರಾಮಞ್ಞರಟ್ಠೇ ಸೀಹಳದೀಪತೋ ಸಾಸನಸ್ಸ ಆಗತಮಗ್ಗೋತಿ.

ಇದಂ ರಾಮಞ್ಞರಟ್ಠೇ ಚತುತ್ಥಂ ಸಾಸನಸ್ಸ ಪತಿಟ್ಠಾನಂ.

ತಸ್ಮಿಞ್ಚ ಕಾಲೇ ಮುತ್ತಿಮನಗರೇ ಅಗ್ಗಮಹೇಸಿಯಾ ಆಚರಿಯಾ ಬುದ್ಧವಂಸತ್ಥೇರಮಹಾನಾಗತ್ಥೇರಾ ಸೀಹಳದೀಪಂ ಗನ್ತ್ವಾ ಮಹಾಹಾರವಾಸಿಗಣವಂಸಭೂತಾನಂ ಭಿಕ್ಖೂನಂ ಸನ್ತಿಕೇ ಪುನ ಸಿಕ್ಖಂ ಗಣ್ಹಿತ್ವಾ ಮುತ್ತಿಮನಗರಂ ಪಚ್ಚಾಗನ್ತ್ವಾ ಮುತ್ತಿಮನಗರವಾಸೀತಿ ಭಿಕ್ಖೂಹಿ ವಿಸುಂ ಹುತ್ವಾ ಸಙ್ಘಕಮ್ಮಾನಿ ಕತ್ವಾ ಸಾಸನಂ ಪಗ್ಗಹೇಸುಂ. ತೇಚ ಥೇರೇ ¶ ಪಟಿಚ್ಚ ರಾಮಞ್ಞರಟ್ಠೇ ಪುನ ಸೀಹಳದೀಪತೋ ಸಾಸನಂ ಆಗತನ್ತಿ.

ಇದಂ ರಾಮಞ್ಞರಟ್ಠೇ ಪಞ್ಚಮಂ ಸಾಸನಸ್ಸ ಪತಿಟ್ಠಾನಂ.

ತತೋ ಪಚ್ಛಾಚ ಮುತ್ತಿಮನಗರೇ ಸೇತಿಭಿನ್ದಸ್ಸ ರಞ್ಞೋ ಮಾತುಯಾ ಆಚರಿಯೋ ಮೇಧಙ್ಕರೋ ನಾಮ ಥೇರೋ ಸೀಹಳದೀಪಂ ಗನ್ತ್ವಾ ಸೀಹಳದೀಪೇ ಅರಞ್ಞವಾಸೀನಂ ಮಹಾಥೇರಾನಂ ಸನ್ತಿಕೇ ಪುನ ಸಿಕ್ಖಂ ಗಹೇತ್ವಾ ಪರಿಯತ್ತಿಂ ಪರಿಯಾಪುಣಿತ್ವಾ ಸುವಣ್ಣರಜತಮಯೇ ತಿಪುಸೀಸಚ್ಛನ್ನೇ ಸೇತಿಭಿನ್ದಸ್ಸ ರಞ್ಞೋ ಮಾತುಯಾ ಕಾರಾವಿತೇ ವಿಹಾರೇ ನಿಸಿದಿತ್ವಾ ಸಾಸನಂ ಅನುಗ್ಗಹೇಸಿ. ಲೋಕದೀಪಕಸಾರಞ್ಚ ನಾಮ ಗನ್ಥಂ ಅಕಾಸಿ. ಅಥಾಪರಿಮ್ಪಿ ಮುತ್ತಿಮನಗರೇಯೇವ ಸುವಣ್ಣಸೋಭಣೋ ನಾಮ ಥೇರೋ ಸೀಹಳದೀಪಂ ಗನ್ತ್ವಾ ಮಹಾವಿಹಾರವಾಸಿಗಣವಂಸಭೂತಾನಂ ಥೇರಾನಂ ಸನ್ತಿಕೇ ಪುನ ಸಿಕ್ಖಂ ಗಹೇತ್ವಾ ಮುತ್ತಿಮನಗರಮೇವ ಪಚ್ಚಾಗಚ್ಛಿ.

ಸೋ ಪನ ಥೇರೋ ಅರಞ್ಞೇಯೇವ ವಸಿ. ಧುತಙ್ಗಧರೋ ಚ ಅಹೋಸಿ ಅಪ್ಪಿಚ್ಛೋ ಸನ್ತುಟ್ಠೋ ಲಜ್ಜೀ ಕುಕ್ಕುಚ್ಚಕೋ ಸಿಕ್ಖಾ ಕಾಮೋ ದಕ್ಖೋ ಥಾಮಸಮ್ಪನ್ನೋ ಚ. ಸೀಹಳದೀಪೇ ಕಲಮ್ಬುಮ್ಹಿ ನಾಮ ಜಾತಸ್ಸರೇ ಉದಕುಕ್ಖೇಪಸೀಮಾಯಂ ಅತಿರೇಕಪಞ್ಚವಗ್ಗೇನ ವನರತನಂ ನಾಮ ಸಙ್ಘರಾಜಂ ಉಪಜ್ಝಾಯಂ ಕತ್ವಾ ರಾಹುಲಭದ್ದಂ ನಾಮ ವಿಜಯಬಾಹುರಞ್ಞೋ ಆಚರಿಯಭೂತಂ ಥೇರಂ ಕಮ್ಮವಾಚಾಚರಿಯಂ ಕತ್ವಾ ಉಪಸಮ್ಪಜ್ಜಿ. ಸೋಚ ಥೇರೋ ಪುನಾಗನ್ತ್ವಾ ಮುತ್ತಿಮನಗರೇಯೇವ ವಸಿತ್ವಾ ಗಣಂ ವಡ್ಢೇತ್ವಾ ಸಾಸನಂ ಅನುಗ್ಗಹೇಸಿ. ಏತೇ ಚ ದ್ವೇ ಥೇರೇ ಪಟಿಚ್ಚ ರಾಮಞ್ಞರಟ್ಠೇ ಸೀಹಳದೀಪತೋ ಸಾಸನಂ ಆಗತಂ.

ಇದಂ ರಾಮಞ್ಞರಟ್ಠೇ ಛಟ್ಠಂ ಸಾಸನಸ್ಸ ಪತಿಟ್ಠಾನಂ.

ತತೋ ಪಚ್ಛಾ ಸಾಸನವಸೇನ ದ್ವಿವಸ್ಸಾಧಿಕೇ ದ್ವಿಸಹಸ್ಸೇ ಕಲಿಯುಗತೋ ಏಕಾಸೀತಿಕೇ ಸಮ್ಪತ್ತೇ ಹಂಸಾವತೀನಗರೇ ಸಿರಿಪರಮಮಹಾಧಮ್ಮರಾಜಾತಿ ¶ ಲದ್ಧನಾಮೋ ಧಮ್ಮಚೇತಿಯರಾಜಾ ಕುಸಿಮಮಣ್ಡಲೇ ಹಂಸಾವತೀಮಣ್ಡಲೇ ಮುತ್ತಿಮಮಣ್ಡಲೇ ಚ ರಟ್ಠವಾಸಿನೋ ಸಪಜಂವಿಯ ಧಮ್ಮೇನ ಸಮೇನ ರಕ್ಖಿತ್ವಾ ರಜ್ಜಂ ಕಾರೇಸಿ. ಸೋ ಚ ರಾಜಾ ತೀಸು ಪಿಟಕೇಸು ಚತೂಸು ಚ ವೇದೇಸು ಬ್ಯಾಕರಣಚ್ಛನ್ದಾಲಙ್ಕಾರಾದೀಸು ಚ ಛೇಕೋ ಸಿಕ್ಖಿತನಾನಾಸಿಪ್ಪೋ ನಾನಾಭಾಸಾಸು ಚ ಪಸುತೋ ಸದ್ಧಾಸೀಲಾದಿಗುಣೋಪೇತೋ ಕುಮುದಕುನ್ದಸರದಚನ್ದಿಕಾಸಮಾನಸಿತಪಜಪತಿಭೂತೋ ಚ ಸಾಸನೇ ಚ ಅತಿಪ್ಪಸನ್ನೋ ಅಹೋಸಿ.

ಏಕಸ್ಮಿಂ ಕಾಲೇ ಸೋ ಚಿನ್ತೇಸಿ, ಭಗವತೋ ಸಾಸನಂ ನಾಮ ಪಬ್ಬಜ್ಜಉಪಸಮ್ಪದತಾವೇನ ಸಮ್ಬನ್ಧಂ, ಉಪಸಮ್ಪದಭಾವೋ ಚ ಸೀಮಪರಿಸವತ್ಥು ಞತ್ತಿಕಮ್ಮವಾಚಾಸಮ್ಪತ್ತೀಹಿ ಸಮ್ಬನ್ಧೋತಿ. ಏವಞ್ಚ ಪನ ಚಿನ್ತೇತ್ವಾ ಸೀಮವಿನಿಚ್ಛಯಂ ತಸ್ಸಂ ವಣ್ಣನಂ ವಿನಯಸಙ್ಗಹಂ ತಸ್ಸಂವಣ್ಣನಂ ಸೀಮಾಲಙ್ಕಾರ ಸೀಮಸಙ್ಗಹಞ್ಚ ಸದ್ದತೋ ಅತ್ಥತೋ ಚ ಪುನಪ್ಪುನಂ ಉಪಪರಿಕ್ಖಿತ್ವಾ ಅಞ್ಞಮಞ್ಞಂ ಸಂಸನ್ದಿತ್ವಾ ಪುಬ್ಬಾಪರಂ ತುಲಯಿತ್ವಾ ಭಗವತೋ ಅಧಿಪ್ಪಾಯೋ ಈದಿಸೋ ಗನ್ಥಕಾರಾನಂ ಅಧಿಪ್ಪಾಯೋ ಈದಿಸೋತಿ ಪಸ್ಸಿತ್ವಾ ಅಮ್ಹಾಕಂ ರಾಮಞ್ಞರಟ್ಠೇ ಬದ್ಧನದೀಸಮುದ್ದಜಾತೇಸ್ಸರಾದಯೋ ಸೀಮಾಯೋ ಬಹುಕಾಪಿ ಸಮಾನಾ ಅಯಂ ಪರಿಸುದ್ಧಾತಿ ವವತ್ಥಪೇತುಂ ದುಕ್ಕರಂ, ಏವಂ ಸತಿ ಸೀಮಪರಿಸಾಪರಿಸುದ್ಧಾ ಭವಿತುಂ ದುಕ್ಕರಾತಿ ಪಟಿಭಾತಿ.

ತತೋ ಪಚ್ಛಾ ರಾಮಞ್ಞರಟ್ಠೇ ತಿಪಿಟಕಧರಬ್ಯತ್ತಪ್ಪಟಿಬಲತ್ಥೇರೇಹಿ ಮನ್ತೇತ್ವಾ ರಞ್ಞೋ ಪಟಿಭಾನಾನುರೂಪಂ ಸೀಮಪರಿಸಾ ಪರಿಸುದ್ಧಾ ಭವಿತುಂ ದುಕ್ಕರಾತಿ ಥೇರಾ ವಿನಿಚ್ಛನಿಂಸು.

ಅಥ ರಾಜಾ ಏವಮ್ಪಿ ಚಿನ್ತೇಸಿ,– ಅಹೋವತ ಸಮ್ಮಾಸಮ್ಬುದ್ಧಸ್ಸ ಸಾಸನಂ ಪಞ್ಚವಸ್ಸಸಹಸ್ಸಾನಿ ಪತಿಟ್ಠತಿಸ್ಸತೀತಿ ಗನ್ಥೇಸು ವುತ್ತೋಪಿ ಸಮಾನೋ ಅಭಿಸಮ್ಬುದ್ಧತೋ ಚತುಸಟ್ಠಾಧಿಕದ್ವಿಸಹಸ್ಸಮತ್ತೇನೇವ ಕಾಲೇನ ಸಾಸನೇ ಮಲಂ ಹುತ್ವಾ ಉಪಸಮ್ಪದಕಮ್ಮೇ ಕಙ್ಖಾಟ್ಠಾನಂ ತಾವ ಉಪ್ಪಜ್ಜಿ, ಕಥಂ ಪನ ಪಞ್ಚವಸ್ಸಸಹಸ್ಸಾನಿ ಸಾಸನಸ್ಸ ಪತಿಟ್ಠಾನಂ ಭವಿಸ್ಸತೀತಿ. ಏವಂ ಧಮ್ಮಸಂವೇಗಂ ಉಪ್ಪಾದೇತ್ವಾ ಪುನಾಪಿ ಏವಂ ಚಿನ್ತೇಸಿ,- ಏವಂ ಏತ್ತಕಂ ಸಾಸನೇ ಮಲಂ ದಿಸ್ಸಮಾನೋಪಿ ¶ ಸಮಾನೋ ಉಪಸಮ್ಪದಕಮ್ಮೇ ಕಙ್ಖಾಟ್ಠಾನಂ ದಿಸ್ಸಮಾನೋಪಿ ಸಮಾನೋ ಪರಿಸುದ್ಧತ್ಥಾಯ ಅನಾರಭಿತ್ವಾ ಮಾದಿಸೋ ಅಪ್ಪೋಸ್ಸುಕ್ಕೋ ಮಜ್ಝತ್ತೋ ನಿಸೀದಿತುಂ ಅಯುತ್ತೋ, ಏವಞ್ಹಿ ಸತಿ ಭಗವತಿ ಸದ್ಧೋ ಪಸನ್ನೋಮ್ಹೀತಿ ವತ್ತಬ್ಬತಂ ಅನಾಪಜ್ಜೇಯ್ಯಂ, ತಸ್ಮಾ ಸಾಸನಂ ನಿಮ್ಮಲಂ ಕಾತುಂ ಆರಭಿಸ್ಸಾಮೀತಿ.

ಕುತೋ ನುಖೋ ದಾನಿ ಸಾಸನಂ ಆಹರಿತ್ವಾ ಥಿರಂ ಪತಿಟ್ಠಾ ಪೇಯ್ಯನ್ತಿ ಆವಜ್ಜನ್ತೋ ಏವಂ ಚಿನ್ತೇಸಿ,- ಭಗವತೋ ಕಿರ ಪರಿನಿಬ್ಬಾನತೋ ಛತ್ತಿಂಸಾಧಿಕೇ ದ್ವಿಸತೇ ಸಮ್ಪತ್ತೇ ಮಹಾಮೋಗ್ಗಲಿ ಪುತ್ತತಿಸ್ಸತ್ಥೇರೋ ಮಹಾಮಹಿನ್ದತ್ಥೇರಂ ಪೇಸೇತ್ವಾ ಸೀಹಳದೀಪೇ ಸಾಸನಂ ಪತಿಟ್ಠಾಪೇಸಿ, ತದಾ ದೇವಾನಂ ಪಿಯತಿಸ್ಸರಾಜಾ ಮಹಾವಿಹಾರಂ ಕಾರಾಪೇತ್ವಾ ಅದಾಸಿ, ಸಾಸನವರಞ್ಚ ಏಕಾಸಿತಾಧಿಕಾನಿ ದ್ವಿವಸ್ಸಸತಾನಿ ವಿಮಲಂ ಹುತ್ವಾ ಪತಿಟ್ಠಹಿ, ಭಿಕ್ಖುಸಙ್ಘೋಪಿ ಮಹಾವಿಹಾರ ವಾಸಿಗಣವಸೇನ ಏಕತೋವ ಅಟ್ಠಾಸಿ, ತತೋ ಪಚ್ಛಾ ಅಭಯಗಿರಿವಾಸಿಜೇ ತವನವಾಸಿವಸೇನ ದ್ವೇಧಾ ಹುತ್ವಾ ಭಿಜ್ಜಿ, ಜಿನಚಕ್ಕೇ ಅಟ್ಠಸತ್ತಸತಾಧಿಕೇ ಸಹಸ್ಸೇ ಸಮ್ಪತ್ತೇ ಸಿರಿಸಙ್ಘಬೋಧಿಪರಕ್ಕಮಬಾಹುಮಹಾರಾಜಾ ಉದುಮ್ಬರಗಿರಿವಾಸಿ ಮಹಾಕಸ್ಸಪತ್ಥೇರಪ್ಪಮುಖಂ ಮಹಾವಿಹಾರ ವಾಸಿಗಣಂ ಅನುಗ್ಗಹೇತ್ವಾ ಯಥಾವುತ್ತೇ ದ್ವೇಗಣೇ ವಿಸೋಧೇಸಿ, ಸಾಸನಂ ನಿಮ್ಮಲಂ ಅಕಾಸಿ, ತತೋ ಪಚ್ಛಾ ವಿಜಯಬಾಹುಪರಕ್ಕಮಬಾಹುರಾಜೂನಂ ದ್ವಿನ್ನಂ ಕಾಲೇಪಿ ಸಾಸನಂ ನಿಮ್ಮಲಂ ಹುತ್ವಾಯೇವ ಅಟ್ಠಾಸಿ, ತೇನೇವ ಬ್ಯತ್ತಪ್ಪಟಿಬಲಭಿಕ್ಖೂ ಆಯಾಚಿತ್ವಾ ಸೀಹಳದೀಪಂ ಗನ್ತ್ವಾ ಪುನ ಸಿಕ್ಖಂ ಗಣ್ಹಾ ಪೇಸ್ಸಾಮಿ, ತೇಸಂ ಪನ ಪರಮ್ಪರವಸೇನ ಪವತ್ತಾನಂ ಭಿಕ್ಖೂನಂ ವಸೇನ ಅಮ್ಹಾಕಂ ರಾಮಞ್ಞರಟ್ಠೇ ಸಾಸನಂ ನಿಮ್ಮಲಂ ಹುತ್ವಾ ಪತಿಟ್ಠಹಿಸ್ಸತೀತಿ. ಏವಂ ಪನ ಚಿನ್ತೇತ್ವಾ ಮೋಗ್ಗಲಾನತ್ಥೇರಂ ಸೋಮತ್ಥೇರಞ್ಚ ಸೀಹಳದೀಪಂ ಗಮನತ್ಥಾಯ ಯಾಚಿ. ಥೇರಾಚ ಸಾಸನಪ್ಪಟಿಯತ್ತಕಮ್ಮಮಿದನ್ತಿ ಮನಸಿಕರಿತ್ವಾ ಪಟಿಞ್ಞಂ ಅಕಂಸು.

ರಾಜಾ ಚ ದಾಠಾಧಾತುಪೂಜನತ್ಥಾಯ ಭಿಕ್ಖುಸಙ್ಘಸ್ಸ ಪೂಜನತ್ಥಾಯ ಭೂವನೇಕಬಾಹುರಞ್ಞೋ ಪಣ್ಣಾಕಾರತ್ಥಾಯ ದೇಯ್ಯಧಮ್ಮಪಣ್ಣಾಕಾರವತ್ಥೂನಿ ಪಟಿಯಾದೇತ್ವಾ ಚಿತ್ರದೂತಂ ರಾಮದೂತನ್ತಿ ಇಮೇ ದ್ವೇ ಅಮಚ್ಚೇ ದ್ವೀಸು ನಾವಾಸು ನಾಯಕಟ್ಠಾನೇ ಠಪೇತ್ವಾ ಕಲಿಯುಗೇ ಸತ್ತತಿಂಸಾಧಿಕೇ ಅಟ್ಠವಸ್ಸಸತೇ ಸಮ್ಪತ್ತೇ ಮಾಘಮಾಸಸ್ಸ ಪುಣ್ಣಮಿತೋ ಏಕಾದಸಮಿಯಂ ಸೂರವಾರೇ ಚಿತ್ರದೂತಂ ಸದ್ಧಿಂ ಮೋಗ್ಗಲಾನತ್ಥೇರಪ್ಪಮುಖೇಹಿ ಭಿಕ್ಖೂಹಿ ಏಕಾಯ ನಾವಾಯ ಗಮಾಪೇಸಿ. ಫಗ್ಗುಣಮಾಸಸ್ಸ ಅಟ್ಠಮಿಯಂ ಸೀಹಳದೀಪೇ ಕಲಮ್ಬುತಿತ್ಥಂ ಪಾಯಾಸಿ.

ರಾಮದೂತಂ ಪನ ತಸ್ಮಿಂಯೇವ ವಸ್ಸೇ ಮಾಘಮಾಸಸ್ಸ ಪುಣ್ಣಮಿತೋ ದ್ವಾದಸಮಿಯಂ ಚನ್ದವಾರೇ ಸದ್ಧಿಂ ಸೋಮತ್ಥೇರಪ್ಪಮುಖೇಹಿ ಭಿಕ್ಖೂಹಿ ಏಕಾಯ ನಾವಾಯ ಗಮಾಪೇಸಿ. ಉಜುಕಂ ಪನ ವಾತಂ ಅಲಭಿತ್ವಾ ಚಿತ್ರಮಾಸಸ್ಸ ಜುಣ್ಹಪಕ್ಖನವಮಿಯಂ ಸೀಹಳದೀಪೇ ವಲ್ಲಿಗಾಮಂ ಪಾಯಾಸಿ.

ತತೋ ಪಚ್ಛಾ ತೇಪಿ ದ್ವೇ ಅಮಚ್ಚಾ ದ್ವೀಸು ನಾವಾಸು ಆಭತಾನಿ ದಾತಬ್ಬಪಣ್ಣಾಕಾರವತ್ಥೂನಿ ಸನ್ದೇಸಪಣ್ಣಾನಿ ಚ ಭೂವನೇಕಬಾಹುರಞ್ಞೋ ಭಿಕ್ಖೂಸಙ್ಘಸ್ಸ ಚ ಅದಾಸಿ. ರಞ್ಞಾ ಪೇಸಿತಭಿಕ್ಖೂನಞ್ಚ ಸನ್ದೇಸಪಣ್ಣೇ ಕಥಿತನಿಯಾಮೇನೇವ ಕಲ್ಯಾಣಿಯಂ ನಾಮ ನದಿಯಂ ಉದಕುಕ್ಖೇಪಸೀಮಾಯಂ ಸಾಮಣೇರಭೂಮಿಯಂ ಪತಿಟ್ಠಾಪೇತ್ವಾ ಪುನ ಉಪಸಮ್ಪದಕಮ್ಮಂ ಅಕಂಸು.

ಉಪಸಮ್ಪಜ್ಜಿತ್ವಾ ಚ ಭೂವನೇಕಬಾಹುರಾಜಾ ನಾನಾಪ್ಪಕಾರೇ ಭಿಕ್ಖೂನಂ ಸಾರುಪ್ಪೇ ಪರಿಕ್ಖಾರೇ ದತ್ವಾ ಇದಂ ಪನ ಆಮಿಸದಾನಂ ಯಾವ ಜೀವಿತಪರಿಯೋಸಾನಾಯೇವ ಪರಿಭುಞ್ಜಿತಬ್ಬಂ ಭವಿಸ್ಸತಿ, ನಾಮಲಞ್ಛಂ ಪನ ನ ಜೀರಿಸ್ಸತೀತಿ ಕತ್ವಾ ರಾಮದೂತಸ್ಸ ನಾವಾಯ ಪಖಾನಭೂತಸ್ಸ ಸೋಮತ್ಥೇರಸ್ಸ ಸಿರಿಸಙ್ಘಬೋಧಿಸಾಮೀತಿ ನಾಮಂ ಅದಾಸಿ. ಅವಸೇಸಾನಂ ಪನ ದಸನ್ನಂ ಥೇರಾನಂ ಕಿತ್ತಿಸಿರಿಮೇಘಸಾಮಿ ಪರಕ್ಕಮಬಾಹುಸಾಮಿ ಬುದ್ಧಘೋಸಸಾಮಿ ಸೀಹಳದೀಪವಿಸುದ್ಧಸಾಮಿ ಗುಣರತನಧರಸಾಮೀ ಜಿನಾಲಙ್ಕಾರಸಾಮಿ ರತನಮಾಲಿಸಾಮಿ ಸದ್ಧಮ್ಮತೇಜಸಾಮಿ ಧಮ್ಮರಾಮಸಾಮಿ ಭೂವನೇಕಬಾಹುಸಾಮೀತಿ ನಾಮಾನಿ ಅದಾಸಿ.

ಚಿತ್ರದೂತಸ್ಸ ¶ ನಾವಾಯ ಪಖಾನಭೂತಸ್ಸ ಮೋಗ್ಗಲಾನತ್ಥೇರಸ್ಸ ಧಮ್ಮಕಿತ್ತಿಲೋಕಗರುಸಾಮೀತಿ ನಾಮಂ ಅದಾಸಿ. ಅವಸೇಸಾನಂ ಪನ ಸಿರಿವನರತನಸಾಮಿ ಮಙ್ಗಲತ್ಥೇರಸ್ಸಾಮಿ ಕಲ್ಯಾಣತಿಸ್ಸಸ್ಸಾಮಿ ಚನ್ದಗಿರಿಸಾಮಿ ಸಿರಿದನ್ತಧಾತುಸಾಮಿ ವನವಾಸಿತಿಸ್ಸಸಾಮಿ ರತನಲಙ್ಕಾರಸಾಮಿ ಮಹಾದೇವಸಾಮಿ ಉದುಮ್ಬರಗಿರಿಸಾಮಿ ಚೂಳಾಭಯತಿಸ್ಸಸಾಮೀತಿ ನಾಮಾನಿ ಅದಾಸಿ. ಬಾವೀಸತಿಯಾ ಪನ ಪಚ್ಛಾ ಸಮಣಾನಂ ನಾಮಂ ನ ಅದಾಸಿ. ಅಭಿನವಸಿಕ್ಖಂ ಪನ ಸಬ್ಬೇಸಂಯೇವ ಅದಾಸಿ.

ತತೋ ಪಚ್ಛಾ ಚೇತಿಯಪೂಜನಾದೀನಿ ಕತ್ವಾ ತಂತಂಕಿಚ್ಚಂ ನಿಪ್ಫಾದೇತ್ವಾ ಪುನ ಆಗಮಂಸು. ಭೂವನೇಕಬಾಹುರಾಜಾ ಚಿತ್ರದೂತಂ ಏವಮಾಹ, ರಾಮಾಧಿಪತಿರಞ್ಞೋ ಪಣ್ಣಾಕಾರಂ ಪಟಿದಾತುಂ ಇಚ್ಛಾಮಿ, ಪಟಿದೂತಞ್ಚ ಪೇಸೇತುಂ ತಾವ ತ್ವಂ ಆಗಮೇಹೀತಿ. ಏವಂ ಪನ ವತ್ವಾ ಪಚ್ಛಾ ಆಗಮನಕಾಲೇ ಚಣ್ಡವಾತಭಯೇನ ಮಹಾಸಮುದ್ದಮಜ್ಝೇ ನಾವಾ ಅವಗಚ್ಛತಿ. ತೇನ ಸೀಹಳರಞ್ಞಾ ಪೇಸಿತನಾವಾಯ ಸಬ್ಬೇ ಸನ್ನಿಪತಿತ್ವಾ ಆರುಹಿತ್ವಾ ಆಗಚ್ಛನ್ತಾ ತೀಣಿ ದಿವಸಾನಿ ಅತಿಕ್ಕಮಿತ್ವಾ ಪುನ ಚಣ್ಡವಾತಭಯೇನ ಅಗಮ್ಭೀರಟ್ಠಾನೇ ಸಿಲಾಯ ಘಟ್ಟೇತ್ವಾ ಲಗ್ಗಿತ್ವಾ ಗನ್ತುಂ ಅಸಕ್ಕುಣಿತ್ವಾ ಏಕಂ ಉಳುಮ್ಪಂ ಬನ್ಧಿತ್ವಾ ಜಙ್ಘೇನೇವ ಅಗಮಂಸು. ಸೀಹಳರಞ್ಞೋ ಚ ದೂತೋ ಪಣ್ಣಾಕಾರಂ ದತ್ವಾ ಪಚ್ಚಾಗಮಾಸಿ. ಭಿಕ್ಖೂಸು ಚ ಭಿಕ್ಖೂ ಅನ್ತರಾಮಗ್ಗೇಯೇವ ಮಚ್ಚು ಆದಾಯ ಗಚ್ಛತಿ. ಅಹೋ ಅನಿಚ್ಚಾ ವತ ಸಙ್ಖಾರಾತಿ. ಹೋನ್ತಿ ಚೇತ್ಥ,–

ಇಮೇಸಂ ಪನ ಆರದ್ಧಂ, ನ ಕಿಚ್ಚಂ ಯಾವ ನಿಟ್ಠಿತಂ;

ನ ತಾವ ಆದಿಯಿಸ್ಸನ್ತಿ, ಮಚ್ಚು ನತ್ಥಿ ಆಪೇಕ್ಖನಾ.

ನಿಕ್ಕಾರುಣಿಕೋ ಹಿ ಏಸ, ಬಲಕ್ಕಾರೇನ ಆದಿಯ;

ರೋದಮಾನಂವ ಞಾತೀನಂ ಅನಿಚ್ಛನ್ತಂವ ಗಚ್ಛತೀತಿ.

ರಾಮಾಧಿಪತಿರಾಜಾಚ ತೇಸಂ ಭಿಕ್ಖೂನಂ ಪತ್ತಕಾಲೇ ಹಂಸಾವತೀನಗರಸ್ಸ ಪಚ್ಛಿಮಸ್ಮಿಂ ದಿಸಾಭಾಗೇ ನರಸೂರೇನ ನಾಮ ಅಮಚ್ಚೇನ ಪರಿಭುತ್ತೇ ಗಾಮಖೇತ್ತೇ ಪಾಳಿಅಟ್ಠಕಥಾಳೀಕಾದಯೋ ಪುನಪ್ಪುನಂ ಪಸ್ಸಿತ್ವಾ ಉಪಪರಿಕ್ಖಿತ್ವಾ ಸೀಮಸಮೂಹನಸೀಮಸಮ್ಮುತಿಕಮ್ಮಾನಿ ಕಾರಪೇಸಿ. ಸೀಹಳದೀಪೇ ಭಗವತಾ ನ್ಹಾಯಿತಪುಬ್ಬಾಯ ಕಲ್ಯಾಣಿಯಾ ನಾಮ ನದಿಯಂ ಉದಕುಕ್ಖೇಪಸೀಮಂ ಕತ್ವಾ ತತ್ಥ ಮಹಾವಿಹಾರವಾಸೀನಂ ಭಿಕ್ಖೂನಂ ಸನ್ತಿಕೇ ಉಪಲದ್ಧಉಪಸಮ್ಪದಭಾವೇಹಿ ಭಿಕ್ಖೂಹಿ ಕತತ್ತಾ ಕಲ್ಯಾಣೀಸೀಮಾತಿ ಸಮಞ್ಞಂ ಅಕಾಸಿ. ಇಚ್ಚೇವಂ ರಾಮಾಧಿಪತಿರಾಜಾ ಪತ್ತಲಙ್ಕೇ ಭಿಕ್ಖೂ ನಿಸ್ಸಾಯ ಸಾಸನಂ ಸುಟ್ಠು ಪತಿಟ್ಠಿತಂ ಅಕಾಸಿ. ಕಲಿಯುಗಸ್ಸ ಅಟ್ಠತಿಂಸಾಧಿಕಅಟ್ಠವಸ್ಸಸತಕಾಲತೋ ಯಾವ ಏಕಚತ್ತಾಲೀಸಾಧಿಕಅಟ್ಠವಸ್ಸಸತಾ ತೇಸಂ ಭಿಕ್ಖೂನಂ ವಂಸೇ ಅಸೀತಿಮತ್ತಾ ಗಣಪಾಮೋಕ್ಖತ್ಥೇರಾ ಅಹೇಸುಂ. ತೇಸಂ ಸಿಸ್ಸಜಾತಾನಿ ಪನ ಛಬ್ಬಿಸಾಧಿಕಾನಿ ದ್ವಿಸತಾನಿ ಚತುಸಹಸ್ಸಾನಿ ದಸಸಹಸ್ಸಾನಿ ಅಹೇಸುಂ. ಏವಂ ಭಗವತೋ ಸಾಸನಂ ರಾಮಞ್ಞರಟ್ಠೇ ವುಡ್ಢಿಂ ರಾಮಞ್ಞರಟ್ಠೇ ವುಡ್ಢಿಂ ವಿರೂಳಿಂ ವೇಪುಲ್ಲಮಾಪಜ್ಜಿತಿ.

ಇದಂ ರಾಮಞ್ಞರಟ್ಠೇ ಸತ್ತಮಂ ಸಾಸನಸ್ಸ ಪತಿಟ್ಠಾನಂ.

ಯದಾ ಪನ ಅರಿಮದ್ದನನಗರೇ ಅನುರುದ್ಧೋ ನಾಮ ರಾಜಾ ಸುಧಮ್ಮಪುರಂ ಸರಾಜಿಕಂ ಅಭಿಭವಿತ್ವಾ ವಿದ್ಧಂಸಿ, ತದಾ ರಾಮಞ್ಞರಟ್ಠಂ ರಾಜಸುಞ್ಞಂ ಹುತ್ವಾ ಪತಿಟ್ಠಹಿ. ರಾಮಞ್ಞರಟ್ಠೇ ಮುತ್ತಿಮನಗರೇ ಸೋಣುತ್ತರವಂಸೋ ಏಕೋ ಗಣೋ, ಸಿವಲಿವಂಸೋ ಏಕೋ, ತಾಮಲಿನ್ದವಂಸೋ ಏಕೋ, ಆನನ್ದವಂಸೋ ಏಕೋ, ಬುದ್ಧವಂಸೋ ಏಕೋ, ಮಹಾನಾಗವಂಸೋ ಏಕೋತಿ ಛಗ್ಗಣಾ ವಿಸುಂ ವಿಸುಂ ಹುತ್ವಾ ಅಟ್ಠಂಸು ನಾನಾಸಂವಾಸಕಾ ನಾನಾನಿಕಾಯಾ.

ಧಮ್ಮಚೇತಿಯರಞ್ಞಾ ಪನ ಕಾರಾಪಿತಸಾಸನಮ್ಪಿ ಅಭಿಜ್ಜಮಾನಂ ಹುತ್ವಾ ಅಟ್ಠಾಸಿ. ಸಮಾನಸಂವಾಸೋ ಏಕನಿಕಾಯೋಯೇವ ಅಹೋಸಿ. ಹಂಸಾವತೀಮುತ್ತಿಮಸುವಸೇನ ತೀಣಿಪಿ ರಾಮಞ್ಞರಟ್ಠಾನಿ ಸುನಾಪರನ್ತ ಸಙ್ಖಾತೇನ ಏಕಾಬದ್ಧಾನಿ ಹುತ್ವಾ ತಿಟ್ಠನ್ತಿ. ಪುಬ್ಬೇಚ ಮರಮ್ಮರಟ್ಠಿನ್ದರಾಜೂನಂ ಆಣಾಪವತ್ತನಟ್ಠಾನಾನಿ ಅಹೇಸುಂ ¶ . ತಸ್ಮಾ ಮರಮ್ಮರಟ್ಠತೋ ಏಕಚ್ಚೇ ಭಿಕ್ಖೂ ರಾಮಞ್ಞರಟ್ಠಂ ಗನ್ತ್ವಾ ಕಲ್ಯಾಣೀಸೀಮಾಯಂ ಪುನ ಸಿಕ್ಖಂ ಗಣ್ಹಿಂಸು. ಧಮ್ಮಚೇತಿಯರಞ್ಞಾಕಾರಾವಿತಸಾಸನಂ ಸಕಲಂ ಮರಮ್ಮರಟ್ಠಮ್ಪಿ ಬ್ಯಾಪೇತ್ವಾ ಓಗಾಹೇತ್ವಾ ತಿಟ್ಠತಿ.

ರಾಮಞ್ಞರಟ್ಠೇ ಸೋಣುತ್ತರತ್ಥೇರಾನಂ ಸಾಸನಂ ಪತಿಟ್ಠಾಪಿತಕಾಲತೋ ಪಟ್ಠಾಯ ಯಾವ ಸುಧಮ್ಮಪುರೇ ಮನೋಹರಿರಞ್ಞಾ ಅರಹನ್ತಾನಂ ಸಂವಿಜ್ಜಮಾನತಾ ವೇದಿತಬ್ಬಾ. ತತೋ ಪಚ್ಛಾ ಪನ ಉತ್ತರಾ ಜೀವಾರಿಯಾವಂಸಮಹಾಕಾಳಪ್ರಾನದಸ್ಸಿತ್ಥೇರಾನಂ ಕಾಲೇ ಲೋಕಿಯಜ್ಝಾನಾಭಿಞ್ಞಾಲಾಭಿಯೋಯೇವ ಸಂವಿಜ್ಜಂಸೂತಿ. ಅಧುನಾ ಪನ ತೀಸುಪಿ ರಾಮಞ್ಞರಟ್ಠೇಸು ಧಮ್ಮಚೇತಿಯರಞ್ಞಾ ಕಾರಾವಿತಸಾಸನಂಯೇವ ತಿಟ್ಠತಿ. ಏತ್ಥಚ ಹೇತುಫಲಸಮ್ಬನ್ಧವಸೇನ ಆದಿಅನ್ತವಸೇನೇ ಚ ಸಾಸನವಂಸಂ ಪಞ್ಞಾಯ ತುಲಯಿತ್ವಾ ಆದಿತೋವ ದಸ್ಸಿತೇಹಿ ತೀಹಿ ನಯೇಹಿ ಯಥಾಪವೇಣೀ ಘಟ್ಟಿಯತಿ, ತಥಾ ಗಣ್ಹೇಯ್ಯಾತಿ. ಅಯಞ್ಚ ಸಾಸನವಂಸೋ ಲಜ್ಜಿಪೇಸಲಸಿಕ್ಖಾಕಾಮಾನಂಯೇವ ವಸೇನ ವುತ್ತೋ, ನಾಲಜ್ಜೀನಂ ವಸೇನಾತಿ ದಟ್ಠಬ್ಬೋ.

ತಾಯ ಚ ಥೇರಪರಮ್ಪರಾಯ ಮುತ್ತಿಮನಗರವಾಸಿಮೇಧಙ್ಕರತ್ಥೇರೋ ಲೋಕದೀಪಕಸಾರಂ ನಾಮ ಗನ್ಥಂ ಅಕಾಸಿ. ಹಂಸಾವತೀನಗರವಾಸೀ ಪನ ಆನನ್ದತ್ಥೇರೋ ಮಧುಸಾರತ್ಥದೀಪನಿಂ ನಾಮ ಅಭಿಧಮ್ಮಟೀಕಾಯ ಸಂವಣ್ಣನಂ, ಹಂಸಾವತೀನಗರವಾಸೀಯೇವ ಧಮ್ಮಬುದ್ಧತ್ಥೇರೋ ಕವಿಸ್ಸಾರಂ ನಾಮ ಛನ್ದೋವಣ್ಣನಂ, ಹಂಸಾವತೀನಗರವಾಸೀಯೇವ ಸದ್ಧಮ್ಮಾಲಙ್ಕಾರತ್ಥೇರೋ ಪಟ್ಠಾನಸಾರದೀಪನಿಂ ನಾಮ ಪಕರಣಂ, ತಥೇವ ಅಞ್ಞತರೋ ಥೇರೋ ಅಫೇಗ್ಗುಸಾರಂ ನಾಮ ಗನ್ಥಂ ಅಕಾಸಿ. ಏವಂ ಅನೇಕಪ್ಪಕಾರಾನಂ ಗನ್ಥಕಾರಾನಂ ಮಹಾಥೇರಾನಂ ವಸನಟ್ಠಾನಂ ಹುತ್ವಾ ಸಾಸನಂ ಓಗಾಹೇತ್ವಾ ವಿರೂಳಟ್ಠಾನಂಅಹೋಸೀತಿ.

ಇತಿ ಸಾಸನವಂಸೇ ಸುವಣ್ಣಭೂಮಿಸಾಸನವಂಸಕಥಾಮಗ್ಗಾ ನಾಮ

೪. ಇದಾನಿ ಪನ ಯೋನಕರಟ್ಠೇ ಸಾಸನಸ್ಸುಪ್ಪತ್ತಿಂ ಕಥೇಸ್ಸಾಮಿ ¶ . ಭಗವಾ ಹಿ ವೇನೇಯ್ಯಹಿತಾವಹೋ ಯೋನಕರಟ್ಠೇ ಮಮಸಾಸನಂ ಚಿರಕಾಲಂ ಪಭಿಟ್ಠಹಿಸ್ಸತೀತಿ ಆಪೇಕ್ಖಿತ್ವಾ ಸದ್ಧಿಂ ಭಿಕ್ಖು ಸಙ್ಘೇನ ದೇಸಚಾರಿಕಂ ಆಹಿಣ್ಡನ್ತೋ ಲಭುಞ್ಜಂ ನಾಮ ನಗರಂ ಅಗಮಾಸಿ. ತದಾ ಏಕೋ ನೇಸಾದೋ ಹರಿಫಲಂ ದತ್ವಾ ತಂ ಪರಿಭುಞ್ಜಿತ್ವಾ ಹರಿಬೀಜೇ ಖಿಪಿತೇ ಪಥವಿಯಂ ಅಪತಿತ್ವಾ ಆಕಾಸೇಯೇವ ಪತಿಟ್ಠಾಸಿ. ತಂ ದಿಸ್ವಾ ಸಿತಂ ಪತ್ವಾಕಾಸಿ. ತಮತ್ಥಂ ದಿಸ್ವಾ ಆನನ್ದತ್ಥೇರೋ ಪುಚ್ಛಿ. ಅನಾಗತೇ ಖೋ ಆನನ್ದ ಇಮಸ್ಮಿಂ ಠಾನೇ ಮಮ ಧಾತುಚೇತಿಯಂ ಪತಿಟ್ಠಹಿಸ್ಸತಿ, ಸಾಸನಂ ವಿರೂಳಮಾಪಜ್ಜಿಸ್ಸತೀತಿ ಬ್ಯಾಕಾಸಿ. ಭಗವತಾ ಪನ ಹರಿಫಲಸ್ಸ ಭುಞ್ಜಿತಟ್ಠಾನತ್ತಾಹರಿಭುಞ್ಜೋತಿ ತಸ್ಸ ರಟ್ಠಸ್ಸ ನಾಮಂ ಅಹೋಸಿ. ದ್ವಿನ್ನಂ ತಾಪಸಾನಂ ಠಪಿತಂ ಜಲಸುತ್ತಿಕಂ ಪಟಿಚ್ಚ ಯೋನಕಾನಂ ಭಾಸಾಯ ಲಭುಞ್ಜೋತಿ ನಾಮಂ ಅಹೋಸಿ.

ತದಾ ತತ್ಥ ಮಪಿನ್ನಾಯ ನಾಮ ಏಕಿಸ್ಸಾ ಮಾತಿಕಾಯ ಸಮೀಪೇ ನಿಸಿನ್ನೋ ಏಕೋ ಲವಕುಲಿಕಜೇಟ್ಠಕೋ ಅತ್ತನೋ ಪುತ್ತಂ ಸತ್ತವಸ್ಸಿಕಂ ಭಗವತೋ ನಿಯ್ಯಾದೇತ್ವಾ ಪಬ್ಬಾಜೇಸಿ. ಕಮ್ಮಟ್ಠಾನಾನುಯೋಗವಸೇನ ಅಚಿರೇನೇವ ಅರಹತ್ತಂ ಪಾಪುಣಿ. ಸತ್ತವಸ್ಸಿ ಕಸ್ಸಚ ಸಾಮಣೇರಸ್ಸ ಅರಹತ್ತಂ ಸಚ್ಛಿಕತಟ್ಠಾನತಂ ಪಟಿಚ್ಚ ಯೋನಕಭಾಸಾಯ ಏತಂ ಠಾನಂ ಚಙ್ಗಮಙ್ಘ ಇತಿ ವುಚ್ಚತಿ. ಚಿರಕಾಲ ವಸೇನ ಜಙ್ಗಮಙ್ಘ ಇತಿ ವುಚ್ಚತಿ. ತತೋ ಪಟ್ಠಾಯಯೇವ ಯೋನಕರಟ್ಠೇ ಸಾಸನಂ ಪತಿಟ್ಠಾತೀತಿ.

ಇದಂ ಯೋನಕರಟ್ಠೇ ಪಠಮಂ ಸಾಸನಸ್ಸ ಪತಿಟ್ಠಾನಂ.

ಸಾಸನೇ ಪನ ಪಞ್ಚತಿಂಸಾಧಿಕೇ ದ್ವಿವಸ್ಸಸತೇ ಸಮ್ಪತ್ತೇ ಮಹಾರಕ್ಖಿತತ್ಥೇರೋ ಯೋನಕರಟ್ಠಂ ಗನ್ತ್ವಾ ಕಮ್ಬೋಜಖೇಮಾವರ ಹರಿಭುಞ್ಜಾಯುದ್ಧಯಾದೀಸು ಅನೇಕೇಸು ರಟ್ಠೇಸು ಸಾಸನಂ ಪತಿಟ್ಠಾಪೇತಿ. ತಾನಿ ಹಿ ಸಬ್ಬಾನಿ ರಟ್ಠಾನಿ ಸಙ್ಗಹೇತ್ವಾ ದಸ್ಸೇನ್ತೇಹಿ ಅಟ್ಠಕಥಾಚರಿಯೇಹಿ ಯೋನಕಲೋಕನ್ತಿ ಓಕಾಸಕಾಲೋಕವಾಚಕೇನ ಸಾಮಞ್ಞಸದ್ದೇನ ವುತ್ತಂ. ಪಕತಿ ಹೇಸಾ ಗನ್ಥಕಾರಾನಂ ಯೇನ ¶ ಕೇನಚಾಕಾರೇನ ಅತ್ಥನ್ತರಸ್ಸ ವಿಞ್ಞಾಪನಾತಿ.

ಮಹಾರಕ್ಖಿತತ್ಥೇರೋ ಚ ಸದ್ಧಿಂ ಪಞ್ಚಹಿ ಭಿಕ್ಖೂಹಿ ಪಾಟಲಿಪುತ್ತತೋ ಅನಿಲಪಥಮಗ್ಗೇನ ಯೋನಕಲೋಕಂ ಆಗನ್ತ್ವಾ ಕಾಳಕಾರಾಮಸುತ್ತೇನ ಯೋನಕೇ ಪಸಾದೇಸಿ. ಸತ್ತತಿಸಹಸ್ಸಾಧಿಕಪಾಣಸತಸಹಸ್ಸಂ ಮಗ್ಗಫಲಾಲಙ್ಕಾರಂ ಅದಾಸಿ. ಸನ್ತಿಕೇ ಚಸ್ಸ ದಸಸಹಸ್ಸಾನಿ ಪಬ್ಬಜಿಂಸು. ಏವಂ ಸೋ ತತ್ಥಸಾಸನಂ ಪತಿಟ್ಠಾಪೇಸಿ. ತಥಾ ಚ ವುತ್ತಂ ಅಟ್ಠಕಥಾಯಂ,–

ಯೋನಕರಟ್ಠಂ ತದಾ ಗನ್ತ್ವಾ, ಸೋ ಮಹಾರಕ್ಖಿತೋ ಇಸಿ;

ಕಾಳಕಾರಾಮಸುತ್ತೇನ, ತೇ ಪಸಾದೇಸಿ ಯೋನಕೇತಿ.

ತತೋ ಪಟ್ಠಾಯ ತೇಸಂ ಸಿಸ್ಸಪರಮ್ಪರಾ ಬಹೂ ಹೋನ್ತಿ, ಗಣನಪಥಂ ವೀತಿವತ್ತಾ.

ಇದಂ ಯೋನಕರಟ್ಠೇ ಮಹಾರಕ್ಖಿತತ್ಥೇರಾದಯೋ ಪಟಿಚ್ಚ

ಯೋನಕರಟ್ಠೇ ಲಕುನ್ನನಗರೇ ಜಿನಚಕ್ಕೇ ಪಞ್ಚವಸ್ಸಸತೇ ಮಣಿಮಯಂ ಬುದ್ಧಪ್ಪಟಿಮಂ ಮಾಪೇತ್ವಾ ವಿಸುಕಮ್ಮದೇವಪುತ್ತೋ ನಾಗಸೇನತ್ಥೇರಸ್ಸ ಅದಾಸಿ. ನಾಗೇಸೇನತ್ಥೇರೋ ಚ ತಸ್ಮಿಂ ಪಟಿಮಮ್ಹಿ ಧಾತು ಆಗನ್ತ್ವಾ ಪತಿಟ್ಠಾತೂತಿ ಅಧಿಟ್ಠಾಸಿ. ಅಧಿಟ್ಠಾನವಸೇನೇವ ಸತ್ತಧಾತುಯೋ ಆಗನ್ತ್ವಾ ತತ್ಥ ಪತಿಟ್ಠಹಿತ್ವಾ ಪಾಟಿಹಾರಿಯಂ ದಸ್ಸೇಸುನ್ತಿ ರಾಜವಂಸೇ ವುತ್ತಂ.

ತಞ್ಚ ವಚನಂ ಮಮ ಪರಿನಿಬ್ಬಾನತೋ ಪಞ್ಚವಸ್ಸಸತೇ ಅತಿಕ್ಕನ್ತೇ ಏತೇ ಉಪ್ಪಜ್ಜಿಸ್ಸನ್ತೀತಿ ಮಿಲಿನ್ದಪಞ್ಹಾಯಂ ವುತ್ತವಚನೇನ ಕಾಲಪರಿಮಾಣವಸೇನ ಚ ಸಮೇತಿ. ಯೋನಕರಟ್ಠೇ ಮಿಲಿನ್ದರಞ್ಞೋ ಕಾಲೇ ಜಿನಚಕ್ಕೇ ಪಞ್ಚವಸ್ಸಸತೇಯೇವ ನಾಗಸೇನತ್ಥೇರಂ ಪಟಿಸ್ಸ ಜಿನಚಕ್ಕಂ ವಿರೂಳಂ ಹುತ್ವಾ ಪತಿಟ್ಠಾಸಿ.

ಇದಂ ಯೋನಕರಟ್ಠೇ ನಾಗಸೇನತ್ಥೇರಂ ಪಟಿಚ್ಚ ತತಿಯಂ

ಕಲಿಯುಗೇ ¶ ಪಞ್ಚಸಟ್ಠಿವಸ್ಸೇಲಭುಞ್ಜನಗರತೋ ಸಙ್ಕಮಿತ್ವಾ ಕ್ಯುಙ್ಗರನಗರೇ ಮಾಪಿಕಸ್ಸ ಬಞ್ಞಾಚೋಮಙ್ಗರ ನಾಮಕಸ್ಸ ರಞ್ಞೋ ಕಾಲೇ ಮಜ್ಝಿಮದೇಸತೋ ಕಸ್ಸಪತ್ಥೇರೋ ಪಞ್ಚಹಿ ಥೇರೇಹಿ ಸದ್ಧಿಂ ಆಗಚ್ಛಿ.

ತದಾ ಸೋ ರಾಜಾ ವಿಹಾರಂ ಕತ್ವಾ ತೇಸಂ ಅದಾಸಿ. ಸೀಹಳದೀಪತೋ ಚ ಧಾತುಯೋ ಆನೇತ್ವಾ ಏಕೋ ಥೇರೋ ಆಗಚ್ಛಿ. ಧಾತುತೋ ಪಾಟಿಹಾರಿಯಂ ದಿಸ್ವಾ ಪಸೀದಿತ್ವಾ ಲಭುಞ್ಜಚೇತಿಯ ನಿಧಾನಂ ಅಕಾಸಿ. ತೇ ಚ ಥೇರೇ ಪಟಿಚ್ಚ ಯೋನಕರಟ್ಠೇ ಸಾಸನ ವಂಸೋ ಆಗತೋ.

ಇದಂ ಯೋನಕರಟ್ಠೇ ಚತುತ್ಥಂ ಸಾಸನಸ್ಸ ಪತಿಟ್ಠಾನಂ.

ಕಲಿಯುಗೇ ದ್ವಾಸಟ್ಠಾಧಿಕೇ ಸತ್ತಸತೇ ಸಮ್ಪತ್ಥೇ ಚಿನರಟ್ಠಿನ್ದೋ ರಾಜಾ ಅಭಿಭವಿತ್ವಾ ಸಕಲಮ್ಪಿ ಯೋನಕರಟ್ಠಂ ಸಙ್ಖುಬ್ಭಿತಂ ಹೋತಿ. ತದಾ ಮಹಾಧಮ್ಮಗಮ್ಭೀರತ್ಥೇರೋ ಮಹಾಮೇಧಙ್ಕರತ್ಥೇ ರೋಚಾತಿ ದ್ವೇ ಥೇರೋ ಯೋನಕರಟ್ಠತೋ ಸದ್ಧಿಂ ಬಹೂಹಿ ಭಿಕ್ಖೂಹಿ ಸೀಹಳದೀಪಂ ಅಗಮಂಸು. ತದಾ ಚ ಸೀಹಳದೀಪೇ ದುಬ್ಭಿಕ್ಖಭಯೇನ ಅಭಿಭೂತೋ ಹುತ್ವಾ ತತೋ ಸ್ಯಾಮರಟ್ಠೇ ಸೋಕ್ಕತಯನಗರಂ ಪುನ ಅಗಮಂಸು.

ತತೋ ಪಚ್ಛಾ ಲಕುನ್ನನಗರಂ ಗನ್ತ್ವಾ ಸಾಸನಂ ಪಗ್ಗಣ್ಹನ್ತಾನಂ ಲಜ್ಜಿಪೇಸಲಾನಂ ಭಿಕ್ಖೂನಂ ಸನ್ತಿಕೇ ಪುನ ಸಿಕ್ಖಂ ಗಣ್ಹಿಂಸು. ತೇ ಚ ಥೇರೋ ಸ್ಯಾಮರಟ್ಠೇ ಯೋನಕರಟ್ಠೇ ಚ ಸಬ್ಬತ್ಥ ಸಾಸನಂ ಪತಿಟ್ಠಾಪೇಸುನ್ತಿ.

ಇದಂ ಯೋನಕರಟ್ಠೇ ಪತ್ತಲಙ್ಕೇ ದ್ವೇ ಥೇರೇ ಪಟಿಚ್ಚ ಪಞ್ಚಮಂ

ಕಲಿಯುಗೇ ಪಞ್ಚವೀಸಾಧಿಕೇ ಅಟ್ಠವಸ್ಸಸತೇ ಸಮ್ಪತ್ತೇ ಸಿರಿಸದ್ಧಮ್ಮಲೋಕಪತಿಚಕ್ಕವತ್ತಿರಾಜಾ ಲಭುಞ್ಜಚೇತಿಯಂ ಪುನ ಮಹನ್ತಂ ಕತ್ವಾ ¶ ತಸ್ಸ ಚೇತಿಯಸ್ಸ ಸಮೀಪೇ ಚತ್ತಾರೋ ವಿಹಾರೇ ಕಾರಾಪೇತ್ವಾ ಮಹಾಮೇಧಙ್ಕರತ್ಥೇರಸ್ಸ ಸಾರಿಪುತ್ತತ್ಥೇರಸ್ಸ ಚ ಅದಾಸಿ. ತದಾಪಿ ತೇ ದ್ವೇ ಥೇರಾ ಸಾಸನಂ ಪರಿಸುದ್ಧಂ ಕತ್ವಾ ಪತಿಟ್ಠಾಪೇಸುನ್ತಿ.

ಇದಂ ಯೋನಕರಟ್ಠೇ ಮಹಾಮೇಧಙ್ಕರಸಾರಿಪುತ್ತತ್ಥೇರೇ

ಪಟಿಚ್ಚ ಛಟ್ಠಂ ಸಾಸನಸ್ಸ ಪತಿಟ್ಠಾನಂ.

ಕಲಿಯುಗೇ ತೇಚತ್ತಾಲೀಸಾಧಿಕೇ ನವವಸ್ಸಸತೇ ಸಮ್ಪತ್ತೇ ಹಂಸಾವತೀನಗರೇ ಅನೇಕಸೇತಿಭಿನ್ದೋ ನಾಮ ರಾಜಾ ಯೋನಕರಟ್ಠಂ ಅಭಿಭವಿತ್ವಾ ಅತ್ತನೋ ಹತ್ಥಗತಂ ಕತ್ವಾ ಬಲಿ ಭುಞ್ಜನತ್ಥಾಯ ಜೇಟ್ಠಪುತ್ತಸ್ಸ ಅನುರುದ್ಧಸ್ಸ ನಾಮ ರಾಜಕುಮಾರಸ್ಸ ದತ್ವಾ ಬಹೂಹಿ ಅಮಚ್ಚೇಹಿ ಸದ್ಧಿಂ ತತ್ಥ ಗನ್ತ್ವಾ ಅನುರಾಜತಾವೇನ ರಜ್ಜಂ ಕಾರಾಪೇಸಿ. ಸಾಸನಞ್ಚ ವಿಸೋಧಾಪೇತುಂ ಸದ್ಧಮ್ಮಚಕ್ಕಸಾಮಿತ್ಥೇರಂ ತೇನ ಸದ್ಧಿಂ ಪಹಿಣಿ.

ಅನೇಕಸೇತಿಭಿನ್ನೋ ಕಿರ ರಾಜಾ ಯೋನಕರಟ್ಠಂ ವಿಜಯಕಾಲೇ ಪಠಮಂ ಸಾಸನಸ್ಸ ಪತಿಟ್ಠಾನಭೂತಮಿದನ್ತಿ ಕತ್ವಾ ತಂರಟ್ಠವಾಸಿನೋ ಕರಮರಾನೀತಭಾವೇನ ನ ಅಗ್ಗಹೇಸೀತಿ.

ಯಥಾವುತ್ತತ್ಥೇರವಂಸೇಸು ಚ ಏಕೋ ಲಕುನ್ನನಗರೇ ಅರಞ್ಞವಾಸೀ ಥೇರೋ ತತ್ಥ ನಗರೇ ಅಜ್ಜ ಅಸುಕಸ್ಮಿಂ ಠಾನೇ ಏಕೋ ಮತೋತಿ ಗಿಹೀನಂ ಕಥೇತ್ವಾ ಯಥಾಕಥಿತಂ ಭೂತಂ ಹುತ್ವಾ ಅಯಂ ಅಭಿಞ್ಞಾಲಾಭೀತಿ ಪಾಕಟೋ ಅಹೋಸಿ.

ತಸ್ಮಿಂಯೇವ ಚ ನಗರೇ ಮಹಾಮಙ್ಗಲೋ ನಾಮ ಥೇರೋ ಅನೇಕಸೇತಿಭಿನ್ದಸ್ಸ ರಞ್ಞೋ ಯುಜ್ಝಿತುಂ ಆಗತಕಾಲೇ ಅನೇಕಸೇತಿಭಿನ್ದೋ ರಾಜಾ ಮಂ ಪಕ್ಕೋಸಿಸ್ಸತಿ, ಸಮಾನಜಾತಿಕಂ ದೂತಂ ಪೇಸ್ಸೇಸ್ಸತೀತಿ ಪಕ್ಕೋಸಿತಕಾಲತೋ ಪಠಮಮೇವವದಿ. ಯಥಾವುತ್ತನಿಯಾಮೇನೇವ ಪಕ್ಕೋಸನತೋ ಅಯಂ ಅಭಿಞ್ಞಾ ಲಾಭೀತಿ ಕಿತ್ತಿ ಘೋಸೋ ಅಹೋಸಿ.

ತತ್ಥ ನಗರೇ ಞಾಣವಿಲಾಸತ್ಥೇರೋ ಸಙ್ಖ್ಯಾಪಕಾಸಕಂ ನಾಮ ¶ ಪಕರಣಂ ಅಕಾಸಿ. ತಂಳೀಕಂ ಪನ ಪತ್ತಲಙ್ಕತ್ಥೇರಸ್ಸ ವಿಹಾರೇ ವಸನ್ತೋ ಸಿರಿಮಙ್ಗಲೋನಾಮ ಥೇರೋ ಅಕಾಸಿ.

ವಿಸುದ್ಧಿಮಗ್ಗದೀಪನಿಂ ಪನ ಸಂಞ್ಞ್ವತ್ತಅರಞ್ಞವಾಸೀ ಉತ್ತರಾರಾಮೋ ನಾಮ ಏಕೋ ಥೇರೋ. ಮಙ್ಗಲದೀಪನಿಂ ಸಿರಿಮಙ್ಗಲತ್ಥೇರೋ. ಉಪ್ಪಾತಸನ್ತಿಂ ಅಞ್ಞತರೋ ಥೇರೋ. ತಂ ಕಿರ ಉಪ್ಪಾತಸನ್ತಿಂ ಸಜ್ಝಾಯಿತ್ವಾ ಚೀನರಞ್ಞೋ ಸೇನಂ ಅಜಿನೀತಿ. ಇಚ್ಚೇವಂ ಯೋನಕರಟ್ಠೇ ಅಭಿಞ್ಞಾಲಾಭೀನಂ ಗನ್ಥಕಾರಾನಞ್ಚ ಥೇರಾನಂ ಆನುಭಾವೇನ ಜಿನಸಾಸನಂ ಪರಿಸುದ್ಧಂ ಹುತ್ವಾ ಪತಿಟ್ಠಾತಿ. ಏವಂ ಹೇತುಫಲಸಮ್ಬನ್ಧವಸೇನ ಆದಿ ಅನ್ತ ಸಮ್ಬನ್ಧವಸೇನ ಚ ಯಥಾವುತ್ತೇಹಿ ತೀಹಿ ನಯೇಹಿ ಥೇರಪರಮ್ಪರಾ ಘಟ್ಟೇತ್ವಾ ಗಹೇತಬ್ಬಾ.

ಇತಿ ಸಾಸನವಂಸೇ ಯೋನಕರಟ್ಠಸಾಸನವಂಸಕಥಾ

೫. ನವವಾಸೀರಟ್ಠಸಾಸನವಂಸಕಥಾಮಗ್ಗೋ

೫. ಇದಾನಿ ವನವಾಸೀರಟ್ಠೇ ಸಿರಿಖೇತ್ತನಗರಸಾಸನವಂಸಂ ವಕ್ಖಾಮಿ. ಜಿನಚಕ್ಕೇ ಹಿ ಏಕಾಧಿಕೇ ವಸ್ಸಸತೇ ಸಮ್ಪತ್ತೇ ಜಟಿಲೋ ಸಕ್ಕೋ ನಾಗೋ ಗರುಳೋ ಕುಮ್ಭಣ್ಡೋ ಚನ್ದೀ ಪರಮೀಸ್ವರೋಚಾತಿ ಇಮೇ ಸತ್ತ ಸಿರಿಖೇತ್ತಂ ನಾಮ ನಗರಂ ಮಾಪೇಸುಂ. ತತ್ಥ ದ್ವತ್ತಪೋಙ್ಕೋ ನಾಮ ರಾಜಾ ರಜ್ಜಂ ಕಾರೇಸಿ. ತಸ್ಸ ಕಿರ ತೀಣಿ ಅಕ್ಖೀನಿ ಸನ್ತೀತಿ. ತದಾ ಭಗವತೋ ಸಾವಕಾ ಅರಹನ್ತಾ ತಿಸಹಸ್ಸಮತ್ತಾ ತತ್ಥ ವಸಿಂಸು. ಸೋ ರಾಜಾ ತೇಸಂ ಅರಹನ್ತಾನಂ ದೇವಸಿಕಂ ಚತೂಹಿ ಪಚ್ಚಯೇಹಿ ಉಪತ್ಥಮ್ಭಿ. ಛ ಸರೀರಧಾತುಯೋ ಚ ಏಕೇಕಂ ಏಕೇಕಸ್ಮಿಂ ನಿದಹಿತ್ವಾ ಛ ಚೇತಿಇಯಾನಿ ಕಾರಾಪೇಸಿ. ದಕ್ಖಿಣಬಾಹುಂ ಪನ ನಿದಹಿತ್ವಾ ಏಕಮ್ಪಿ ಚೇತಿಯಂ ಕಾರಾಪೇಸಿ.

ಉಣ್ಹೀಸಧಾತುಂ ಪನ ಕಙ್ಗರನ್ನಗರತೋ ಆನೇತ್ವಾ ಏಕಮ್ಪಿ ಚೇತಿಯಂ ಕಾರಾಪೇಸಿ. ತಂ ಪನ ತಾವ ನ ನಿಟ್ಠಿತಂ. ಪಚ್ಛಾ ಅನುರುದ್ಧರಾಜಾ ಗಹೇತ್ವಾ ಅರಿಮದ್ದನನಗರಂ ಆನೇತ್ವಾ ಚಞ್ಞಿಙ್ಖು ನಾಮ ಚೇತಿಯೇ ನಿಧಾನಂ ¶ ಅಕಾಸಿ. ತಸ್ಮಾ ರಕ್ಖಿತತ್ಥೇರಸ್ಸ ಆಗಮನತೋ ಪುಬ್ಬೇಪಿ ಸಾಸನಂ ಪತಿಟ್ಠಾಸೀತಿ ದಟ್ಠಬ್ಬಂ. ತತೋ ಪಚ್ಛಾ ಸಾಸನಂ ದುಬ್ಬಲಂ ಹುತ್ವಾ ಅಟ್ಠಾಸಿ.

ಇದಂ ವನವಾಸೀರಟ್ಠೇ ಪಠಮಂ ಸಾಸನಸ್ಸ ಪತಿಟ್ಠಾನಂ.

ಮಹಾಮೋಗ್ಗಲಿಪುತ್ತತಿಸ್ಸತ್ಥೇರೇನ ಪನ ಪೇಸಿತೋ ರಕ್ಖಿತತ್ಥೇರೋ ವನವಾಸೀರಟ್ಠಂ ಗನ್ತ್ವಾ ಆಕಾಸೇ ಠತ್ವಾ ಅನಮತಗ್ಗಪರಿಯಾಯಕಥಾಯ ವನವಾಸಿಕೇ ಪಸಾದೇಸಿ. ಕಥಾಪರಿಯೋಸಾನೇ ಪನಸ್ಸ ಸಟ್ಠಿಸಹಸ್ಸಾನಂ ಧಮ್ಮಾಭಿಸಮಯೋ ಅಹೋಸಿ. ಸತ್ತತಿಸಹಸ್ಸಮತ್ತಾ ಪಬ್ಬಜಿಂಸು. ಪಞ್ಚವಿಹಾರಸತಾನಿ ಪತಿಟ್ಠಾಪೇಸುಂ. ಏವಂ ಸೋ ತತ್ಥ ಸಾಸನಂ ಪತಿಟ್ಠಾಪೇಸಿ. ತೇನೇವ ಅಟ್ಠ ಕಥಾಯಂ –

ಏವಂ ವನವಾಸೀರಟ್ಠೇ ಪುಬ್ಬೇಯೇವ ಸಾಸನಂ ಓಗಾಹೇತ್ವಾ ಪತಿಟ್ಠಹಿ. ನ ಪನ ತಾವ ಸಕಲಂ ಬ್ಯಾಪೇತ್ವಾ ಪತಿಟ್ಠಹಿ.

ಇದಂ ತಾವ ವನವಾಸೀರಟ್ಠೇ ಸಿರಿಖೇತ್ತನಗರೇ ದುತಿಯಂ

ಜಿನಚಕ್ಕೇ ಪನ ತೇತ್ತಿಂಸಾಧಿಕೇ ಚತುವಸ್ಸಸತೇ ಕುಕ್ಕುಟ ಸೀಸೋ ನಾಮ ಏಕೋ ರಾಜಾ ರಜ್ಜಂ ಕಾರೇಸಿ. ತಸ್ಸ ರಞ್ಞೋ ಕಾಲೇ ಭಗವತೋ ಸಾವಕಾ ಅರಹನ್ತಾ ಪಞ್ಚಸತಮತ್ತಾ ಅಹೇಸುಂ. ತೇಸಮ್ಪಿ ಸೋ ರಾಜಾ ದೇವಸಿಕಂ ಚತೂಹಿ ಪಚ್ಚಯೇಹಿ ಉಪತ್ಥಮ್ಭೇಸಿ. ಸೋತಾಪನ್ನಸಕದಾಗಾಮಿಅನಾಗಾಮಿನೋ ಪನ ಗಣನಪಥಂ ¶ ವೀತಿವತ್ತಾ ಅಹೇಸುಂ.

ಇದಂ ವನವಾಸೀರಟ್ಠೇ ಸಿರಿಖೇತ್ತನಗರೇ ಪರಮ್ಪರಾಭತವಸೇನ

ಇಚ್ಚೇವಂ ವನವಾಸೀರಟ್ಠೇ ಅನೇಕಸತೇಹಿ ಅರಹನ್ತತ್ಥೇರೇಹಿ ಸಾಸನಂ ಪುಣ್ಣಿನ್ದುಸಙ್ಕಾಸಂ ಹುತ್ವಾ ಅತಿವಿಯ ವಿಜ್ಜೋತೇಸಿ. ಸಾಸನಿಕ ಗನ್ಥಕಾರಾ ಪನ ಮಹಾಥೇರಾ ತತ್ಥ ನ ಸನ್ದಿಸ್ಸನ್ತಿ. ಅರಹನ್ತತ್ಥೇರಾ ಪನ ರಾಜೂನಂ ಆಯಾಚನಂ ಆರಬ್ಭ ಧಮ್ಮಸತ್ಥಂ ಏಕಂ ವಿರಚಯಿಂಸೂತಿ ಪೋರಾಣಾ ವದನ್ತೀತಿ. ಇಚ್ಚೇವಂ–

ಇತಿ ಸಾಸನವಂಸೇ ವನವಾಸೀರಟ್ಠಸಾಸನವಂಸಕಥಾಮಗ್ಗೋ

೬. ಅಪರನ್ತರಟ್ಠಸಾಸನವಂಸಕಥಾಮಗ್ಗೋ

೬. ಇದಾನಿ ಪನ ಮರಮ್ಮಮಣ್ಡಲೇ ಅಪರನ್ತರಟ್ಠೇ ಸಾಸನವಂಸಂ ವಕ್ಖಾಮಿ. ಅಮ್ಹಾಕಞ್ಹಿ ಮರಮ್ಮರಟ್ಠೇ ಸುಪ್ಪಾದಕತಿತ್ಥೇ ವಾಣಿಜಗಾಮೇ ವಸನ್ತೇ ಚೂಳಪುಣ್ಣ ಮಹಾಪುಣ್ಣೇದ್ವೇ ಭಾತಿಕೇ ಪಟಿಚ್ಚ ಭಗವತೋ ಧರಮಾನಸ್ಸೇವ ಅತಿರೇಕವೀಸತಿವಸ್ಸಕಾಲತೋ ಪಭುತಿ ಸಾಸನಂ ಪತಿಟ್ಠಾಸಿ. ನ ಪನ ತಾವ ಬ್ಯಾಪೇತ್ವಾ ಪತಿಟ್ಠಾಸಿ. ತೇನೇವ ಪುನ ಸಾಸನಸ್ಸ ಪತಿಟ್ಠಾಪನತ್ಥಾಯ ಮಹಾಮೋಗ್ಗಲಿಪುತ್ತತಿಸ್ಸತ್ಥೇರೋ ¶ ಯೋನಕಧಮ್ಮರಕ್ಖಿತತ್ಥೇರಂ ಪೇಸೇಸೀತಿ.

ಭಗವಾ ಪನ ಲೋಹಿತಚನ್ದನವಿಹಾರಂ ಪಟಿಗ್ಗಹೇತ್ವಾ ಸತ್ತಸತ್ತಾಹಾನಿ ನಿಸೀದಿತ್ವಾ ಸಮಾಗತಾನಂ ದೇವಮನುಸ್ಸಾನಂ ಧಮ್ಮರಸಂ ಅದಾಸಿ. ಸತ್ತಾಹೇಸು ಚ ಏಕಸ್ಮಿಂ ಅಹು ಚತುರಾಸೀತಿಪಾಣಸಹಸ್ಸಾನಂ ಧಮ್ಮಾಭಿಸಮಯೋ ಅಹೋಸಿ. ಪಞ್ಚಸತಮತ್ತೇಹಿ ಚ ಪಾಸಾದೇಹಿ ಆಗಚ್ಛನ್ತೋ ಅನ್ತರಾಮಗ್ಗೇ ಸಚ್ಚಬನ್ಧಪಬ್ಬತೇ ನಿಸಿನ್ನಸ್ಸ ಸಚ್ಚಬನ್ಧಸ್ಸ ನಾಮ ಇಸಿನೋ ಧಮ್ಮಂ ದೇಸೇತ್ವಾ ಛಹಿ ಅಭಿಞ್ಞಾಹಿ ಸದ್ಧಿಂ ಅರಹತ್ತಂ ಪಾಪೇಸಿ. ವಾಣಿಜಗಾಮೇ ಚ ಇಸಿದಿನ್ನಸೇಟ್ಠಿ ಆದೀನಮ್ಪಿ ಧಮ್ಮರಸಂ ಪಾಯೇಸಿ. ಇಚ್ಚೇವಂ ಸಚ್ಚಬನ್ಧಇಸಿದಿನ್ನಮಹಾಪುಣ್ಣಾದಯೋ ಪಟಿಚ್ಚ ಅಮ್ಹಾಕಂ ಮರಮ್ಮಮಣ್ಡಲೇ ಸಾಸನಂ ಪತಿಟ್ಠಾಸಿ.

ಇದಂ ಮರಮ್ಮಮಣ್ಡಲೇ ಅಪರನ್ತರಟ್ಠೇ ಪಠಮಂ ಸಾಸನಸ್ಸ

ಭಗವತೋ ಪರಿನಿಬ್ಬುತತೋ ಪಞ್ಚತಿಂಸಾಧಿಕೇ ದ್ವಿವಸ್ಸಸತೇ ಸಮ್ಪತ್ತೇ ತತಿಯಸಙ್ಗೀತಿಂ ಸಙ್ಗಾಯಿತ್ವಾ ಅವಸಾನೇ ಮಹಾಮೋಗ್ಗಲಿಪುತ್ತತಿಸ್ಸತ್ಥೇರೋ ಅತ್ತನೋ ಸದ್ಧಿವಿಹಾರಿಕಂ ಯೋನಕಧಮ್ಮರಕ್ಖಿತತ್ಥೇರಂ ಸದ್ಧಿಂ ಚತೂಹಿ ಭಿಕ್ಖೂಹಿ ಅಪರನ್ತರಟ್ಠಂ ಪೇಸೇಸಿ. ಅಪರನ್ತರಟ್ಠಞ್ಚ ನಾಮ ಅಮ್ಹಾಕಂ ಮರಮ್ಮಮಣ್ಡಲೇ ಸುನಾಪರನ್ತರಟ್ಠಮೇವ. ತಮತ್ಥಂ ಪನ ಹೇಟ್ಠಾ ಅವೋಚುಮ್ಹಾ.

ಯೋನಕಧಮ್ಮರಕ್ಖಿತತ್ಥೇರೋಪಿ ಅಪರನ್ತರಟ್ಠಂ ಆಗನ್ತ್ವಾ ಅಗ್ಗಿಕ್ಖನ್ಧೋಪಮಸುತ್ತೇನ ರಟ್ಠವಾಸೀನಂ ಪಸಾದೇಸಿ. ಸತ್ತತಿಮತ್ತಾನಂ ಪಾಣಸಹಸ್ಸಾನಂ ಧಮ್ಮರಸಂ ಪಾಯೇಸಿ. ರಟ್ಠವಾಸಿನೋ ಚ ಬಹವೋ ಸಾಸನೇ ಪಬ್ಬಜಿಂಸು. ರಾಜಕುಲತೋಪಿ ಸಹಸ್ಸಮತ್ತಾ ಪಬ್ಬಜಿಂಸು. ಇತ್ಥೀನಂ ಪನ ಅತಿರೇಕಸಟ್ಠಿಸಹಸ್ಸಮತ್ತಾ ಪಬ್ಬಜಿಂಸು. ತಞ್ಚ ನ ಅಗ್ಗಿಕ್ಖನ್ಧೋಪಮಸುತ್ತನ್ತಂ ಸುತ್ವಾ ಪಬ್ಬಜನ್ತೀನಂ ಇತ್ಥೀನಂ ವಸೇನ ವುತ್ತಂ, ಅಥ ಖೋ ಆದಿತೋ ಪಟ್ಠಾಯ ಯಾವಚಿರಕಾಲಾ ಸಾಸನಂ ಪಸೀದಿತ್ವಾ ಪಬ್ಬಜನ್ತೀನಂ ಇತ್ಥೀನಂ ವಸೇನ ವುತ್ತನ್ತಿ ದಟ್ಠಬ್ಬಂ. ಕಸ್ಮಾತಿ ಚೇ, ಇತ್ಥೀನಂ ಭಿಕ್ಖುನೀನಂ ಸನ್ತಿಕೇಯೇವ ಪಬ್ಬಜಿತುಂ ಯುತ್ತತ್ತಾ ಯೋನಕಧಮ್ಮರಕ್ಖಿತತ್ಥೇರೇನ ¶ ಚ ಸದ್ಧಿಂ ಭಿಕ್ಖುನೀನಂ ಅನಾಗತತ್ತಾ. ಏವಂ ಚಿರಕಾಲಂ ಅತಿಕ್ಕಮಿತ್ವಾ ಪಚ್ಛಾ ಭಿಕ್ಖುನಿಯೋ ಆಗನ್ತ್ವಾ ತಾಸಂ ಸನ್ತಿಕೇ ಪಬ್ಬಜಿತಾನಂ ವಸೇನ ವುತ್ತನ್ತಿ ದಟ್ಠಬ್ಬಂ. ಸೀಹಳದೀಪೇ ಅನುಳಾದೇವಿಯೋ ಪಬ್ಬಜಿತಕಾಲೇ ಮಹಾಮಹಿನ್ದತ್ಥೇರಸ್ಸ ಸಙ್ಘಮಿತ್ತಾಥೇರಿಯಾ ಪಕ್ಕೋಸನತಾ ಇಧ ಞಾಪಕಾತಿ. ಏವಂ ಯೋನಕಧಮ್ಮರಕ್ಖಿತತ್ಥೇರಂ ಪಟಿಚ್ಚ ಅಪರನ್ತರಟ್ಠೇ ಸತ್ತಾನಂ ಬಹುಪಕಾರೋ ಅಹೋಸಿ. ತೇನೇವಟ್ಠಕಥಾಯಂ–

ಅಪರನ್ತಂ ವಿಗಾಹಿತ್ವಾ, ಯೋನಕೋ ಧಮ್ಮರಕ್ಖಿತೋ;

ಅಗ್ಗಿಕ್ಖನ್ಧೂಪಮೇನೇತ್ಥ, ಪಸಾದೇಸಿ ಜನೇ ಬಹೂತಿ.

ತತ್ಥಾಯಂ ಅಧಿಪ್ಪಾಯ ವಿಸೇಸೋ ಗಹೇತಬ್ಬೋ. ಕಥಂ. ಅಗ್ಗಿಕ್ಖನ್ಧೋಪಮಸುತ್ತನ್ತಂ ನಾಮ ಭಿಕ್ಖೂನಂ ಪಟಿಪತ್ತಿವಸೇನ ವುತ್ತಂ, ತಂ ಭಿಕ್ಖೂನಂಯೇವ ದೇಸೇತುಂ ವಟ್ಟತಿ, ಥೇರೋಪಿ ತತ್ಥ ತಂ ದೇಸೇಸಿ, ತಸ್ಮಾ ಪುಣ್ಣಸಚ್ಚಬನ್ಧಾದಯೋ ಪಟಿಚ್ಚ ಭಗವತೋ ಧರಮಾನಸ್ಸ ವೀಸತಿವಸ್ಸಕಾಲೇಯೇವ ಸಾಸನಂ ಅಪರನ್ತರಟ್ಠೇ ಪತಿಟ್ಠಹಿತ್ವಾ ಕಸ್ಮಿಞ್ಚಿ ಕಸ್ಮಿಞ್ಚಿ ಠಾನೇ ಭಿಕ್ಖೂನಂ ಸಂವಿಜ್ಜಮಾನತ್ತಾ ತೇಸಂ ಭಿಕ್ಖೂನಂ ಸಙ್ಗಹೇತ್ವಾ ದೇಸೇತುಂ ಪಚ್ಛಾ ಆಗತಾನಞ್ಚ ಭಿಕ್ಖೂನಂ ಪರಿಸುದ್ಧಾಚಾರತಂ ವಿಞ್ಞಾಪೇತುಂ ಅಗ್ಗಿಕ್ಖನ್ಧೋಪಮಸುತ್ತಂ ಥೇರೋ ದೇಸೇಸೀತಿ. ಏವಞ್ಚ ಸತಿ ಅರಿಮದ್ದನನಗರೇ ಸಮಣಕುತ್ತಕಾನಂ ಸಂವಿಜ್ಜಮಾನಭಾವಂ ವಕ್ಖಮಾನೇನ ವಚನೇನ ಸಮೇತಿ.

ಇದಂ ಮರಮ್ಮಮಣ್ಡಲೇ ಅಪರನ್ತರಟ್ಠೇ ದುತಿಯಂ

ಯಸ್ಮಾ ಪನ ಬುದ್ಧೇ, ಭಗವಾ ಪುಣ್ಣತ್ಥೇರಸ್ಸ ಯಾಚನಮಾರಬ್ಭ ಅಪರನ್ತರಟ್ಠಂ ಆಗನ್ತ್ವಾ ವಾಣಿಜೇ ಹಿ ಕಾರಿತೇ ಚನ್ದನವಿಹಾರೇ ವಸಿತ್ವಾ ಏಕಸ್ಮಿಂ ಸಮಯೇ ಆನನ್ದೇನ ಪಚ್ಛಾಸಮಣೇನ ತಮ್ಬದೀಪರಟ್ಠಮ್ಪಿ ದೇಸಚಾರಿಕಂ ಆಹಿಣ್ಡಿ. ಆಹಿಣ್ಡಿತ್ವಾ ಅರಿಮದ್ದನನಗರಟ್ಠಾನಸಮೀಪಂ ಪತ್ವಾ ಪಬ್ಬತಮುದ್ಧನಿ ಠತ್ವಾ ಅನಾಗತೇ ಖೋ ಆನನ್ದ ಇಮಸ್ಮಿಂ ಪದೇಸೇ ಸಮ್ಮುತಿ ನಾಮ ರಾಜಾ ಅರಿಮದ್ದನಂ ನಾಮ ನಗರಂ ಮಾಪೇಸ್ಸತಿ ¶ , ತಸ್ಮಿಞ್ಚ ನಗರೇ ಮಮ ಸಾಸನಂ ವಿರೂಳಂ ಹುತ್ವಾ ಪತಿಟ್ಠಹಿಸ್ಸತೀತಿ ಬ್ಯಾಕಾಸಿ. ಅಯಮತ್ಥೋ ಪೋರಾಣವೇದಪಾತ್ಥಕೇಸು ವುತ್ತೋ.

ಯೋನಕಧಮ್ಮರಕ್ಖಿತತ್ಥೇರೋ ಚ ಅಪರನ್ತರಟ್ಠಂ ಆಗನ್ತ್ವಾ ತಮ್ಬದೀಪರಟ್ಠಮ್ಪಿ ಆಹಿಣ್ಡಿತ್ವಾ ತಮ್ಬದೀಪರಟ್ಠವಾಸೀನಮ್ಪಿ ಧಮ್ಮರಸಂ ಪಾಯೇಸಿಯೇವ. ಅಯಮತ್ಥೋ ಖತ್ತಿಯಕುಲತೋ ಏವ ಪುರಿಸಸಹಸ್ಸಾನಿ ಪಬ್ಬಜಿಂಸೂತಿ ಅಟ್ಠಕಥಾಯಂ ವುತ್ತತ್ತಾ ವಿಞ್ಞಾಯತಿ. ತದಾ ಹಿ ಅಪರನ್ತರಟ್ಠೇ ಖತ್ತಿಯೋ ನತ್ಥಿ, ತಮ್ಬದೀಪರಟ್ಠಿನ್ದೋಯೇವ ತಂ ಅನುಸಾಸೇತ್ವಾ ಅತಿ ವಸತಿ, ಖತ್ತಿಯೇ ಚ ಆಸನ್ತೇ ಕುತೋ ಖತ್ತಿಯಕುಲಾನಿ ಭವಿಸ್ಸನ್ತಿ, ತೇನೇವ ತಮ್ಬದೀಪರಟ್ಠತೋ ಪುರಿಸಸಹಸ್ಸಾನಿ ಪಬ್ಬಜಿಂಸೂತಿ ವಿಞ್ಞಾತಬ್ಬಂ. ತಸ್ಮಾ ತಮ್ಬದೀಪಿಕಸಾಸನವಂಸಮ್ಪಿ ಇಧ ವತ್ತುಂ ಯುಜ್ಜತಿ.

ತೇನಿದಾನಿ ತಮ್ಬದೀಪಿಕಾಸಾಸನವಂಸಂ ಪವಕ್ಖಾಮಿ. ಅಮ್ಹಾಕಞ್ಹಿ ಮರಮ್ಮಮಣ್ಡಲೇ ತಮ್ಬದೀಪರಟ್ಠೇ ಅರಿಮದ್ದನನಗರೇ ಸಮ್ಮುತಿರಾಜಾ ನಾಮ ಭೂಪಾಲೋ ರಜ್ಜಂ ಕರೇಸಿ. ತತೋ ಪಟ್ಠಾಯ ಯಾವ ಅನುರುದ್ಧರಞ್ಞಾ ಸಮಥಿ ನಾಮಕೇ ದೇಸೇ ನಿಸಿನ್ನಾನಂ ತಿಂಸಮತ್ತಾನಂ ಸಮಣಕುತ್ತಕಾನಂ ಸಟ್ಠಿಸಹಸ್ಸಮತ್ತಾನಂ ಸಿಸ್ಸಾನಂ ಓವಾದಂ ದತ್ವಾ ಚರಿಂಸು.

ತೇಸಂ ಪನ ಸಮಣಕುತ್ತಕಾನಂ ಅಯಂ ವಾದೋ,- ಸಚೇ ಯೋ ಪಾಣಾತಿಪಾತಂ ಕರೇಯ್ಯ, ಸೋ ಈದಿಸಂ ಪರಿತ್ತಂ ಭಣನ್ತೋ ತಮ್ಹಾ ಪಾಪಕಮ್ಮಾ ಪರಿಮುಚ್ಚೇಯ್ಯ, ಸಚೇ ಪನ ಯೋ ಮಾತಾಪಿತರಂ ಹನ್ತ್ವಾ ಅನನ್ತರಿಯಕಮ್ಮತೋ ಪರಿಮುಚ್ಚಿತುಕಾಮೋ ಭವೇಯ್ಯ, ಈದಿಸಂ ಪರಿತ್ತಂ ಭಣೇಯ್ಯ, ಸಚೇಪಿ ಪುತ್ತಧಿತಾನಂ ಆವಾಹವಿವಾಹಕಮ್ಮಂ ಕತ್ತುಕಾಮೋ ಭವೇಯ್ಯ, ಆಚರಿಯಾನಂ ಪಠಮಂ ನಿಯ್ಯಾದೇತ್ವಾ ಆವಾಹವಿವಾಹಕಮ್ಮಂ ಕಾತಬ್ಬಂ, ಯೋ ಇದಂ ಚಾರಿತ್ತಂ ಅತಿಕ್ಕಮೇಯ್ಯ, ಬಹು ಅಪುಞ್ಞಂ ಪಸವೇಯ್ಯಾತಿ ಏವಮಾದೀಹಿ ಮಿಚ್ಛಾವಾದೇಹಿ ಅತ್ತನೋ ಅತ್ತನೋ ಉಪಗತಾನಂ ಓವಾದಂ ಅದಂಸು. ತಮತ್ಥಂ ಸುತ್ವಾ ಅನುರುದ್ಧರಾಜಾ ಪರಿಚಿತಪುಞ್ಞೋ ತೇಸಂ ವಾದಂ ನ ರುಚಿ. ಅಯಂ ತೇಸಂ ಮಿಚ್ಛಾವಾದೋತಿ.

ತದಾ ¶ ಚ ಅರಿಮದ್ದನನಗರೇ ಅರಹನ್ತೋ ನಾಮ ಥೇರೋ ಆಗನ್ತ್ವಾ ಸಾಸನಂ ಪತಿಟ್ಠಾಪೇಸಿ. ಅಯಂ ಅರಹನ್ತತ್ಥೇರಸ್ಸ ಅಟ್ಠುಪ್ಪತ್ತಿ,– ರಾಜವಂಸಾಗತಪರಿತ್ತನಿದಾನಾಗತಸಾಸನಪ್ಪವೇಣಿಯಾಗತವಸೇನ ತಿವಿಧಾ ಹೋತಿ.

ತತ್ಥಾಯಂ ರಾಜವಂಸಾಗತಟ್ಠುಪ್ಪತ್ತಿ,– ತದಾ ಹಿ ಸುನಾಪರನ್ತತಮ್ಬದೀಪರಟ್ಠೇಸು ಸಬ್ಬೇನ ಸಬ್ಬಂ ಸಬ್ಬದಾ ಥಿರಂ ಸಾಸನಂ ನ ತಾವ ಪತಿಟ್ಠಾಸಿ. ತೇನೇವ ಭಗವತೋ ಬ್ಯಾಕತನಿಯಾಮೇನ ಸಾಸನಂ ಪತಿಟ್ಠಾಪೇಸ್ಸಾಮಾತಿ ಚಿನ್ತೇತ್ವಾ ಮಹಾಥೇರಾ ಸಕ್ಕಸ್ಸ ದೇವಾನಮಿನ್ದಸ್ಸ ಸನ್ತಿಕಂ ಗನ್ತ್ವಾ ಸಾಸನಂ ಅನುಗ್ಗಹಿತುಂ ಸಮತ್ಥಂ ಪುಗ್ಗಲಂ ದೇಹೀತಿ ಯಾಚಿಂಸು. ಸಕ್ಕೋಚ ದೇವಾನಮಿನ್ದೋ ತಾವತಿಂಸಭವನೇ ಏಕಂ ದೇವಪುತ್ತಂ ಯಾಚಿತ್ವಾ ಏಕಿಸ್ಸಾ ಬ್ರಾಹ್ಮಣಿಯಾ ಕುಚ್ಛಿಮ್ಹಿ ಪಟಿಸನ್ಧಿಂ ಗಣ್ಹಾಪೇಸಿ. ದಸಮಾಸಚ್ಚಯೇನ ವಿಜಾಯನಕಾಲೇ ಸೀಲಬುದ್ಧಿ ನಾಮ ಥೇರೋ ಅನುರಕ್ಖಿತ್ವಾ ವಯೇ ಸಮ್ಪತ್ತೇ ಪಬ್ಬಾಜೇಸಿ. ತೀಸು ಪಿಟಕೇಸು ಅತಿವಿಯ ಛೇಕೋ ಹುತ್ವಾ ಅರಹತ್ತಂ ಪಾಪುಣಿ. ಅರಹನ್ತೋತಿ ನಾಮೇನ ಪಾಕಟೋ ಅಹೋಸಿ.

ಸೋಚ ಥೇರೋ ಮರಮ್ಮಮಣ್ಡಲೇ ಜಿನಸಾಸನಂ ವಿಜ್ಜೋತಾಪೇತುಂ ಅರಿಮದ್ದನನಗರಂ ಆಗನ್ತ್ವಾ ನಗರತೋ ಅವಿದೂರೇ ಏಕಸ್ಮಿಂ ಅರಞ್ಞೇ ನಿಸೀದಿ. ತದಾ ಸಕ್ಕೋ ದೇವಾನಮಿನ್ದೋ ಏಕಂ ನೇಸಾದಂ ಪಲೋಭೇತ್ವಾ ತಸ್ಸ ಥೇರಂ ದಸ್ಸೇಸಿ. ಅಥ ನೇಸಾದಸ್ಸ ಏತದಹೋಸಿ,– ಅಯಂ ಪನ ಅಮನುಸ್ಸೋ ಯಕ್ಖೋ ಭವೇಯ್ಯ, ಸಚೇ ಪನ ಮನುಸ್ಸೋ ಭವೇಯ್ಯ, ಏವಂ ಸತಿ ಮಿಲಕ್ಖುಜಾತಿಕೋ ಭವೇಯ್ಯಾತಿ. ಏವಂ ಪನ ಚಿನ್ತೇತ್ವಾ ರಞ್ಞೋ ದಸ್ಸನತ್ಥಾಯ ನಗರಂ ಆನೇಸಿ. ಥೇರೋ ಚ ಅಟ್ಠಪರಿಕ್ಖಾರೇ ಗಹೇತ್ವಾ ಅನುಗಚ್ಛಿ. ನೇಸಾದಾ ಚ ಥೇರಂ ಆನೇತ್ವಾ ರಞ್ಞೋ ದಸ್ಸೇಸಿ.

ರಾಜಾ ದಿಸ್ವಾ ಸನ್ತಿನ್ದ್ರಿಯೋ ಅಯಂ, ನ ಮಿಲಕ್ಖುಜಾತಿಕೋ, ಇಮಸ್ಸ ಅಬ್ಭನ್ತರೇ ಸಾರಧಮ್ಮೋ ಅತ್ಥಿ ಮಞ್ಞೇತಿ ಲದ್ಧಸೂರಿಯೋಭಾಸಂವಿಯ ಪದುಮಂ ಫುಲ್ಲಚಿತ್ತಂ ಹುತ್ವಾ ವೀಮಂಸೇತುಕಾಮೋ ಥೇರಂ ಆಹ,– ಅತ್ತನೋ ಸಾರುಪ್ಪಂ ಆಸನಂ ಞತ್ವಾ ನಿಸೀದಾಹೀತಿ.

ಥೇರೋ ಚ ರಾಜಪಲ್ಲಙ್ಕಂ ಆರುಹಿತ್ವಾ ನಸೀದಿ. ರಾಜಾ ಚ ಅಯಂ ಅಗ್ಗಾಸನೇ ¶ ನಿಸೀದಿ, ಅವಸ್ಸಂ ಅಗ್ಗಪುಗ್ಗಲೋ ಭವೇಯ್ಯಾತಿ ಚಿನ್ತೇತ್ವಾ ತ್ವಂ ಕಸ್ಸ ಞಾತಿ, ಕಸ್ಸ ಭಿಸ್ಸೋ, ಕುತೋ ಆಗತೋಸೀತಿ ಪುಚ್ಛಿ. ಥೇರೋ ಚ ಏವಮಾಹ,– ಲೋಕಸ್ಮಿಂ ಯೋ ನವಗುಣಸಮ್ಪನ್ನೋ ಭಗವಾ ಸಮ್ಮಾಸಮ್ಬುದ್ಧೋ, ತಸ್ಸಾಹಂ ಞಾತಿ, ಸೋಭಗವಾಯೇವ ಮಮಾಚರಿಯೋ, ಭಿಕ್ಖುಸಙ್ಘಸ್ಸ ನಿಸಿನ್ನಟ್ಠಾನತೋ ಆಗತೋಮ್ಹೀತಿ.

ರಾಜಾ ಚ ಸೋಮನಸ್ಸಪ್ಪತ್ತೋ ಹುತ್ವಾ ಆಹ, ತವ ಆಚರಿಯೇನ ದೇಸಿತಂ ಧಮ್ಮಂ ಏಕದೇಸತೋ ದೇಸೇಹೀತಿ. ಅಥ ಯಥಾ ಸಿರಿಧಮ್ಮಾಸೋಕರಞ್ಞೋ ನಿಗ್ರೋಧಸಾಮಣೇರೇನ ಅಪ್ಪಮಾದಧಮ್ಮೋ ದೇಸಿತೋ, ಏವಂ ಅಪ್ಪಮಾದಧಮ್ಮಂಯೇವ ಥೇರೋ ದೇಸೇಸಿ.

ರಾಜಾ ಚ ಪುನ ಆಹ,– ಕುಹಿಂ ದಾನಿ ಸಮ್ಮಾಸಮ್ಬುದ್ಧೋ ನಿಸೀದತಿ, ತೇನ ಪನ ದೇಸಿತೋ ಧಮ್ಮೋ ಕತಿಪ್ಪಮಾಣೋ, ತಸ್ಸ ಸಾವಕಾ ಪನ ಕತಿಪ್ಪಮಾಣಾ, ತುಮ್ಹಾದಿಸಾ ಅಞ್ಞೇ ಅತ್ಥಿ ವಾ ಮಾ ವಾತಿ. ಇದಾನಿ ಅಮ್ಹಾಕಂ ಆಚರಿಯೋ ಸಮ್ಮಾಸಮ್ಬುದ್ಧೋ ಪರಿನಿಬ್ಬುತೋ, ಧಾತುಯೋಯೇವ ಇದಾನಿ ಅತ್ಥಿ, ತೇನ ಪನ ದೇಸಿತೋ ಧಮ್ಮೋ ಚತುರಾಸೀತಿಧಮ್ಮಕ್ಖನ್ಧಸಹಸ್ಸಪ್ಪಮಾಣೋ, ಸುಧಮ್ಮಪುರೇ ಪಿಟಕತ್ತಯಂ ಯುಗಳವಸೇನ ತಿಂಸವಿಧಾ ಅತ್ಥಿ, ಮಯಾ ಅಞ್ಞೋ ಪರಮತ್ಥ ಸಮ್ಮುತಿವಸೇನ ದುವಿಧೋಪಿ ಸಙ್ಘೋ ಅತ್ಥೀತಿ.

ತಂ ಸುತ್ವಾ ರಾಜಾ ಭಿಯ್ಯೋಸೋಮತ್ತಾಯ ಪಸನ್ನೋ ಹುತ್ವಾ ಪುನ ಆರೋಚೇಸಿ,– ಮಮ ಭನ್ತೇ ಇಮಸ್ಮಿಂ ಪಚ್ಚಕ್ಖೇ ನತ್ಥಿ ತಯಾ ಅಞ್ಞೋ ನಾಥೋ, ಅಜ್ಜಭಗ್ಗೇ ಪಾಣುಪೇತಂ ಮಂ ಉಪಾಸಕೋತಿ ಧಾರೇಹಿ, ತವ ಓವಾದಂ ಅಹಂ ಸಿರಸಾ ಪಟಿಗ್ಗಣ್ಹಿಸ್ಸಾಮೀತಿ.

ತತೋ ಪಚ್ಛಾ ಅರಞ್ಞಕಙ್ಗಾರಹೇ ಠಾನೇ ವಿಹಾರಂ ಕಾರಾಪೇತ್ವಾ ಅದಾಸಿ. ಸಮಣಕುತ್ತಕಾನಮ್ಪಿ ವಾದಂ ಭಿನ್ದಿ, ಯಥಾ ಪನ ಸುವಣ್ಣಪಾತಿಂ ಲಭಿತ್ವಾ ಸುವಣ್ಣಭಾಜನಂ ಲಭಿತ್ವಾ ಮತ್ತಿಕಾಭಾಜನನ್ತಿ. ಸಕಲೇಪಿ ಚ ರಟ್ಠೇ ಸಮಣಕುತ್ತಕಾನಂ ವಾದಂ ಜಹಾಪೇಸಿ. ತಸ್ಮಿಞ್ಚ ಕಾಲೇ ಸಮಣಕುತ್ತಕಾ ಹೀನಲಾಭಾ ಹುತ್ವಾ ಥೇರಸ್ಸ ಉಪನಾಹಂ ಬನ್ಧಿಂಸು. ತೇ ಪನ ಸಮಣಕುತ್ತಕಾ ಅರಞ್ಞೇ ನಿಸ್ಸಾಮಿಕಾವಿಯ ¶ ಕೋಲೇಯಕಾ ಸುನಖಾ ಅನಾಥಾ ಹುತ್ವಾ ಕಾಯಿಕಚೇತಸಿಕದುಕ್ಖಂ ಲಭಿಂಸು.

ರಾಜಾ ಚ ತಮತ್ಥಂ ಞತ್ವಾ ಯಥಾ ಸಮಣಕುತ್ತಕಾ ನಾಭಿಭವನ್ತಿ, ತಥಾ ಆರಕ್ಖಂ ಠಪೇಸಿ. ತೇ ಚ ಸಮಣಕುತ್ತಕೇ ಸೇತವತ್ಥಂ ನಿವಾಸಾಪೇತ್ವಾ ಆವುಧಗಾಹಯೋಧಭಾವೇನ ರಾಜಕಮ್ಮೇ ನಿಯೋಜಾಪೇಸಿ. ಥೇರೋ ಚ ಸಾಸನೇ ಪಸನ್ನೇ ಜನೇ ಪಬ್ಬಾಜೇತ್ವಾ ಉಪಸಮ್ಪಾದೇತ್ವಾ ಸಾಸನಂ ವಿಸೋಧಾಪೇಸಿ. ರಾಜಾ ಚ ಇಮಸ್ಮಿಂ ರಟ್ಠೇ ಪೋರಾಣಿಕಾ ರಾಜಾನೋ ಸಮಣಕುತ್ತಕಾನಂ ವಾದಂ ಗಹೇತ್ವಾ ರಜ್ಜಂ ಕಾರೇಸುಂ, ಸಚೇ ಹಿ ಪನ ತೇಸಂ ಅನತ್ಥಕರಜ್ಜಂ ಪುನ ಗಣ್ಹಾಪೇತುಂ ಸಕ್ಕುಣೇಯ್ಯಂ, ಏವಂ ಸತಿ ಅಹಂ ತೇಸಂ ಅನತ್ಥಕರಜ್ಜಂ ಅಪನೇತ್ವಾ ಸಾತ್ಥಕರಜ್ಜಂ ಗಣ್ಹಾಪೇತುಮಿಚ್ಛಾಮೀತಿ ಅನುಸೋಚೀತಿ.

ಅಯಂ ಪನ ಪರಿತ್ತನಿದಾನಾಗತಟ್ಠುಪ್ಪತ್ತಿ, –

ಸೀಹಳದೀಪೇ ಕಿರ ವಿಪ್ಪವಾಸೀನಗರೇ ನಿಸಿನ್ನೋ ಏಕೋ ಭಿಕ್ಖುಉಪದ್ವಾರಾವತೀನಗರಂ ಗನ್ತ್ವಾ ಪರಿಯತ್ತಿಂ ಉಗ್ಗಣ್ಹಿ. ತತೋ ಪಚ್ಛಾ ಸುಧಮ್ಮ ಪುರಂ ಗನ್ತ್ವಾ ಪರಿಯತ್ತಿಂ ಉಗ್ಗಣ್ಹಿ. ತಸ್ಮಿಞ್ಚ ಕಾಲೇ ಸಿರಿಖೇತ್ತನಗರೇ ಪಾಟಲಿರುಕ್ಖೇ ಏಕೋ ಗನ್ಥೋ ಅತ್ಥೀತಿ ಸುತ್ವಾ ಸುಧಮ್ಮಪುರತೋ ಸಿರಿಖೇತ್ತನಗರಂ ಅಗಮಾಸಿ. ಅನ್ತರಾಮಗ್ಗೇ ಲುದ್ಧಕೋ ಥೇರಂ ಪಸ್ಸಿತ್ವಾ ಅಯಂ ಯಕ್ಖೋತಿ ಮಞ್ಞಿತ್ವಾ ಗಹೇತ್ವಾ ಅನುರುದ್ಧರಞ್ಞೋ ದಸ್ಸೇಸಿ.

ತದಾ ರಾಜಾ ಥೇರಂ ಪುಚ್ಛಿ,– ಕೋ ಪನ ತ್ವನ್ತಿ. ಅಹಂ ಮಹಾರಾಜ ಗೋಭಮಸ್ಸ ಸಾವಕೋತಿ. ಪುನ ರಾಜಾ ಪುಚ್ಛಿ,–ತಿಣ್ಣಂ ಪನ ರತನಾನಂ ಕೀದಿಸೋತಿ. ಥೇರೋ ಆಹ,– ಮಹೋಸಧಪಣ್ಡಿತೋವಿಯ ಮಹಾರಾಜ ಬುದ್ಧೋ ದಟ್ಠಬ್ಬೋ, ಉಮಙ್ಗೋವಿಯ ಧಮ್ಮೋ, ವಿದೇಹಸೇನಾ ವಿಯ ಸಙ್ಘೋತಿ. ಏವಂ ಉಪಮಾಹಿ ಪಕಾಸಿತೋ ರಾಜಾ ಪುನ ಪುಚ್ಛಿ,–ಕಿಂ ನುಖೋ ಇಮೇ ಗೋತಮಸ್ಸ ಸಾವಕಾತಿ. ನ ಖೋ ಮಹಾರಾಜ ಇಮೇ ಗೋತಮಸ್ಸ ಸಾವಕಾ, ಇಮೇ ಪನ ಅಮ್ಹೇಹಿ ವಿಸಭಾಗಾ ಸಮಣಕುತ್ತಕಾಯೇ ವಾತಿ. ಏವಂ ವುತ್ತೇ ತತೋ ಪಟ್ಠಾಯ ತೇ ಸಮಣಕುತ್ತಕೇ ವಿಜಹಿ, ತಿಣಂ ವಿಯ ನಾತಿಮಞ್ಞಿ. ಪಾಟಲಿರುಕ್ಖಸು ಸಿರತೋಪಿ ¶ ಲದ್ಧಂ ತೇಸಂ ಗನ್ಥಂ ಲದ್ಧಟ್ಠಾನೇಯೇವ ಅಗ್ಗಿನಾ ಝಾಪೇಸಿ. ತಮ್ಪಿ ಠಾನಂ ಯಾವಜ್ಜತನಾ ಅಗ್ಗಿಝಾಪನಥಲನ್ತಿ ಪಾಕಟನ್ತಿ.

ಥೇರೋ ಚ ವಿಮಾನ ವತ್ಥುಂ ರಞ್ಞೋ ದೇಸೇಸಿ. ರಾಜಾ ಚ ಪಸೀದಿತ್ವಾ ಸಿರಿಖೇತ್ತನಗರತೋ ಅರಿಮದ್ದನನಗರಂ ಪಚ್ಚಾಗಮನಕಾಲೇ ಆನೇಸಿ.

ಇದಂ ಪನ ಪಾಟಲಿಸುಸಿರೇ ಲದ್ಧಗನ್ಥಸ್ಸ ಕಾರಣಂ,- ತೇಸಞ್ಹಿ ಸಮಣಕುತ್ತಕಾನಂ ಅಬ್ಭನ್ತರೇ ಏಕೋ ಉಪಾಯಚ್ಛೇಕೋ ಸಮಣಕುತ್ತಕೋ ಅತ್ತನೋ ವಾದಾನುರೂಪಂ ಗನ್ಥಂ ಕತ್ವಾ ಸಿರಿಖೇತ್ತನಗರೇ ದ್ವತ್ತಿಂಸರತನಕ್ಖನ್ಧಸ್ಸ ಪಾಟಲಿರುಕ್ಖಸ್ಸ ಸುಸಿರೇ ಪವೇಸೇತ್ವಾ ಪುನಪ್ಪುನಂ ಉದಕೇನ ತೇಮೇತ್ವಾ ಮತ್ತಿಕಾಯ ಲಿಮ್ಪೇತ್ವಾ ಪುನ ತಚಂ ಉಪ್ಪಾದೇತ್ವಾ ಉಟ್ಠಾಪೇಸಿ. ತದಾ ಮಯಂ ಸುಪಿನೇ ಪಾಟಲಿರುಕ್ಖೇ ಸಾರಗನ್ಥೋ ಅತ್ಥಬ್ಯಞ್ಜನಸಮ್ಪನ್ನೋ ಏಕೋ ಅತ್ಥೀತಿಇ ಪಸ್ಸಾಮಾತಿ ಕೋಲಾಹಲಂ ಉಪ್ಪಾದೇಸುಂ. ತಂ ಸುತ್ವಾ ರಾಜಾ ಸಿರಿಖೇತ್ತನಗರಂ ಗನ್ತ್ವಾ ತಂ ಪಾಟಲಿರುಕ್ಖಂ ಭಿನ್ದಿತ್ವಾ ಗವೇಸೇನ್ತೋ ತಂ ಗನ್ಥಂ ಲಭಿ. ಗನ್ಥೇ ಪನ ಸಕವಾದವಸೇನ ಸಮಣಕುತ್ತಕಸಾಮಞ್ಞತಾ ಈದಿಸಾಯೇವ, ಏತೇ ಗೋತಮಾಸಾವಕಾ ಹೋನ್ತಿಇ, ಏತೇಸಂಯೇವ ಆಚಾರೋ ಸಗ್ಗಮಗ್ಗಪಥಭೂತೋತಿ ಏವಮಾದೀಹಿ ಕಾರಣೇಹಿ ವುತ್ತಂ. ರಾಜಾ ಚ ಪಸೀದಿತ್ವಾ ಸಮಣಕುತ್ತಕಾನಂ ಬಹೂನಿ ದಾತಬ್ಬಾನಿ ಅದಾಸಿ. ತತೋ ಪಚ್ಛಾ ಥೇರಸ್ಸ ಧಮ್ಮಕಥಂ ಸುತ್ವಾ ತಂ ಅಗ್ಗಿನಾ ಝಾಪೇಸೀತಿ ಏವಂ ಸಮಣಕುತ್ತಕಾನಂ ವಚನಂ ಸುತ್ವಾ ಸಿರಿಖೇತ್ತನಗರಂ ಗನ್ತ್ವಾ ಅರಿಮದ್ದನನಗರಂ ಪಚ್ಚಾಗಚ್ಛನ್ತೋ ಥೇರಂ ಆನೇಸೀತಿ ದಟ್ಠಬ್ಬಂ. ಅರಿಮದ್ದನನಗರಂ ಸಮ್ಪತ್ತಕಾಲೇ ಜೇತವನಂ ನಾಮ ವಿಹಾರಂ ಕಾರಾಪೇತ್ವಾ ಅದಾಸಿ. ಥೇರೋ ಚ ತತ್ಥ ಸಾಸಾನಂ ವಿಸೋಧೇತ್ವಾ ನಿಸೀದಿ. ರಾಜಾ ದೇವಸಿಕಂ ಉದಕಂ ಆನೇತ್ವಾ ಅಗ್ಗಮಹೇಸೀ ಪನ ದೇವಸಿಕಂಯೇವ ಪಿಣ್ಡಪಾತಂ ಆನೇತ್ವಾ ಭೋಜೇಸಿ. ಉಪ್ಪನ್ನಕಙ್ಖಾ ಕಾಲೇಪಿ ತಂತಂಕಙ್ಖಾಟ್ಠಾನಂ ಪುಚ್ಛೀತಿ.

ಅಯಂ ಪನ ಸಾಸನಪ್ಪವೇಣಿಯಾಗತಟ್ಠುಪ್ಪತ್ತಿ,–

ಸುಧಮ್ಮಪುರೇ ಹಿ ಸಮಾಪತ್ತಿಲಾಭೀ ಅನೋಮದಸ್ಸೀ ನಾಮ ಥೇರೋ ¶ ಸೋಣುತ್ತರತ್ಥೇರಾನಂ ವಂಸಾನುರುಕ್ಖಣವಸೇನ ಸದ್ಧಿಂ ಪಞ್ಚಹಿ ಭಿಕ್ಖು ಸತೇಹಿ ನಿಸೀದಿ. ತಸ್ಸ ಪನ ಪಧಾನಸಿಸ್ಸೋ ಅಧಿಸೀಲೋನಾಮ, ತಸ್ಸ ಪಧಾನಸಿಸ್ಸೋ ಪ್ರಾನದಸ್ಸೀ ನಾಮ, ತಸ್ಸ ಪಧಾನಸಿಸ್ಸೋ ಕಾಳೋ ನಾಮ, ತಸ್ಸ ಪಧಾನಸಿಸ್ಸೋ ಅರಹನ್ತೋ ನಾಮ, ತಸ್ಸ ಪಧಾನಸಿಸ್ಸೋ ಅರಿಯವಂಸೋ ನಾಮಾತಿ.

ಇದಞ್ಚ ವಚನಂ-ಕೋ ಪನೇಸ ಉತ್ತರಾಜೀವಮಹಾಥೇರೋತಿ. ಅಯಞ್ಹಿ ಥೇರೋ ರಾಮಞ್ಞದೇಸಿಯಪುತ್ತೋ ಅರಿಯವಂಸತ್ಥೇರಸ್ಸ ಸಿಸ್ಸೋ. ಅರಿಯವಂಸತ್ಥೇರೋ ಪನ ಕಪ್ಪುಙ್ಗನಗರವಾಸೀ ಮಹಾಕಾಳತ್ಥೇರಸ್ಸ ಸಿಸ್ಸೋ. ಸೋ ಪನ ಸುಧಮ್ಮನಗರವಾಸಿನೋ ಪ್ರಾನದಸ್ಸೀ ಮಹಾಥೇರಸ್ಸ ಸಿಸ್ಸೋತಿ ಕಲ್ಯಾಣೀ ಸಿಲಾಲೇಖನೇ ವುತ್ತವಚನೇನ ನ ಸಮೇತಿ. ಏವಮ್ಪಿ ಸತಿ ಯಥಿಚ್ಛಿತ ಅಧಿಪ್ಪಾಯೋ ನ ನಸ್ಸತೀತಿ ದಟ್ಠಬ್ಬಂ.

ಏವಂ ನಾನಾಚರಿಯಾನಂ ವಾದೋ ನಾನಾಕಾರೇನ ದಿಸ್ಸಮಾನೋಪಿ ಅರಹನ್ತತ್ಥೇರಸ್ಸ ಅರಿಮದ್ದನನಗರೇ ಸಾಸನಂ ಅನುಗ್ಗಹೇತ್ವಾ ಪತಿಟ್ಠಾನತಾಯೇವೇತ್ಥ ಪಮಾಣನ್ತಿ ಕತ್ವಾ ನಾವಮಞ್ಞಿತಬ್ಬೋ. ಸಬ್ಬೇಸಞ್ಹಿ ಆಚರಿಯಾನಂ ವಾದೇಪಿ ಅರಹನ್ತತ್ಥೇರೋ ಅರಿಮದ್ದನನಗರಂ ಆಗನ್ತ್ವಾ ಸಾಸನಂ ಪತಿಟ್ಠಾಪೇಸೀತಿ ಅತ್ಥೋ ಇಚ್ಛಿತಬ್ಬೋಯೇವಾತಿ.

ಅರಹನ್ತತ್ಥೇರೋ ಪನ ಮೂಲನಾಮೇನ ಧಮ್ಮದಸ್ಸೀತಿ ಪಾಕಟೋ ಸುಧಮ್ಮಪುರವಾಸೀ ಸೀಲಬುದ್ಧಿತ್ಥೇರಸ್ಸ ಸಿಸ್ಸೋತಿ ದಟ್ಠಬ್ಬೋ. ಸೋ ಚ ಥೇರೋ ಪುಬ್ಬೇವ ಪಬ್ಬಜ್ಜಕಾಲತೋ ಚತೂಸು ವೇದೇಸು ಸಿಕ್ಖಿತಸಿಪ್ಪೋ. ಪಬ್ಬಜಿತ್ವಾ ಪನ ಸಾಳಕಥಂ ಪಿಟಕತ್ತಯಂ ಉಗ್ಗಣ್ಹಿತ್ವಾ ಪಾರಂ ಗನ್ತ್ವಾ ಸಬ್ಬತ್ಥ ಪಾಕಟೋ. ಸೋಕ್ಕತಯನಗರಂ ಅನೇತ್ವಾ ಮನುಸ್ಸಾ ಪೂಜೇನ್ತಿ. ತತ್ಥ ದಸವಸ್ಸಾನಿ ವಸಿತ್ವಾ ಪುನ ಸುಧಮ್ಮಪುರಂ ಆಗನ್ತ್ವಾ ಅರಞ್ಞವಾಸಂ ಸಮಾದಿಯಿ.

ತತೋ ಪಚ್ಛಾ ಜಿನಚಕ್ಕೇ ಏಕಸಟ್ಠಾಧಿಕೇ ಪಞ್ಚಸತೇ ಸಹಸ್ಸೇಚ ಸಮ್ಪತ್ತೇ ಕಲಿಯುಗೇ ಏಕೂನಾಸೀತಾಧಿಕೇ ತಿಸತೇ ಸಮ್ಪತ್ತೇ ಅನುರುದ್ಧರಾಜಾ ರಜ್ಜಂ ಪಾಪುಣಿ. ತದಾ ಅರಿಮದ್ದನನಗರೇ ಸಮಣಕುತ್ತಕಾ ¶ ಮಯಂ ಗೋತಮಸಾವಕಾತಿ ವತ್ವಾ ತಿಂಸತಿಂಸವಗ್ಗಾ ಹುತ್ವಾ ನಿಸೀದಿಂಸು. ವಗ್ಗವಸೇನ ಕಿರ ಸಹಸ್ಸಮತ್ತಾತಿ. ಅನುರುದ್ಧರಾಜಾ ಚ ತೇಸಂ ಸಮಣಕುತ್ತಕಾನಂ ಆಗಾರಿಯಾಬ್ರಹ್ಮಚರಿಯಾದೀನಿ ಸುತ್ವಾ ನ ಪಸೀದಿ. ಏವಮ್ಪಿ ಪವೇಣಿಯಾ ಆಗಭತ್ತಾ ನ ಪಜಹಿ. ಅರಹನ್ತಂ ಪನ ಥೇರಂ ಪಸ್ಸಿತ್ವಾ ತತೋ ಪಟ್ಠಾಯ ತೇಸಂ ಸಮಣಕುತ್ತಕಾನಂ ನಿಬದ್ಧವತ್ತಾನಿ ಭಿನ್ದಿತ್ವಾ ಸಾಸನೇ ಪಸೀದಿ.

ಇದಂ ಮರಮ್ಮಮಣ್ಡಲೇ ತಮ್ಬದೀಪರಟ್ಠೇ ಅರಿಮದ್ದನನಗರೇ ಅರಹನ್ತಂ.

ನಾಮ ಥೇರಂ ಪಟಿಚ್ಚ ತತಿಯಂ ಸಾಸನಸ್ಸ ಪತಿಟ್ಠಾನಂ.

ತಸ್ಮಿಞ್ಚ ಕಾಲೇ ಅರಹನ್ತತ್ಥೇರೋ ಅನುರುದ್ಧರಾಜಾನಂ ಆಹ,-ತೀಸು ಸಾಸನೇಸು ಪರಿಯತ್ತಿಸಾಸನೇ ತಿಟ್ಠನ್ತೇಯೇವ ಪಟಿಪತ್ತಿ ಸಾಸನಂ ತಿಟ್ಠತಿ, ಪಟಿಪತ್ತಿಸಾಸನೇ ತಿಟ್ಠನ್ತೇಯೇವ ಪಟಿವೇಧಸಾಸನಂ ತಿಟ್ಠತಿ, ಯಥಾ ಹಿ ಗುನ್ನಂ ಸತೇಪಿ ಸಹಸ್ಸೇಪಿ ವಿಜ್ಜಮಾನೇ ಪವೇಣಿಪ,ಲಿಕಾಯ ಧೇನುಯಾ ಅಸತಿ ಸೋ ವಂಸೋ ಸಾಪವೇಣೀ ನ ಘಳೀಯತಿಇ, ಏವಮೇವಂ ಧುತಙ್ಗಧರಾನಂ ಭಿಕ್ಖೂನಂ ಸತೇಪಿ ಸಹಸ್ಸೇಪಿ ವಿಜ್ಜಮಾನೇ ಪರಿಯತ್ತಿಯಾ ಅನ್ತರಹಿತಾಯ ಪಟಿವೇಧೋ ನಾಮ ನ ಹೋತಿ, ಯಥಾ ಪನ ನಿಮಿಕುಮ್ಭಿಯೋ ಜಾನನತ್ಥಾಯ ಪಾಸಾಣ ಪಿಟ್ಠೇ ಅಕ್ಖರೇಸು ಠಪಿತೇಸು ಯಾವ ಅಕ್ಖರಾನಿ ಧರನ್ತಿ, ತಾವ ನಿಧಿಕುಮ್ಭಿಯೋ ನಟ್ಠಾ ನಾಮ ನ ಹೋನ್ತಿ, ಏವಮೇವಂ ಪರಿಯತ್ತಿಯಾ ಧರಮಾನಾಯ ಸಾಸನಂ ಅನನ್ತರಹಿತಂ ನಾಮ ಹೋತಿ, ಯಥಾ ಚ ಮಹತೋ ತಳಾಕಸ್ಸ ಪಾಳಿಯಾ ಥಿರಾಯ ಉದಕಂ ನ ಠಸ್ಸತೀತಿ ನ ವತ್ತಬ್ಬಂ, ಉದಕೇ ಸತಿ ಪದುಮಾದೀನಿ ಪುಪ್ಫಾನಿ ನ ಪುಪ್ಫಿಸ್ಸನ್ತೀತಿ ನ ವತ್ತಬ್ಬಂ, ಏವಮೇವಂ ಮಹಾತಳಾಕಸ್ಸ ಥಿರಪಾಳಿಸದಿಸೇ ತೇಪಿಟಕೇ ಬುದ್ಧವಚನೇ ಸತಿ ಉದಕಸದಿಸಾ ಪಟಿಪತ್ತಿಪೂರಕಾ ಕುಲಪುತ್ತಾ ನತ್ಥೀತಿ ನ ವತ್ತಬ್ಬಂ, ತೇಸು ಸತಿ ಪದುಮಾದಿಪುಪ್ಫಸದಿಸೋ ಪಟಿವೇಧೋ ನತ್ಥೀತಿ ನ ವತ್ತಬ್ಬಂ, ಏವಂ ಏಕನ್ತತೋ ಪರಿಯತ್ತಿಮೇವ ಪಮಾಣಂ, ತಸ್ಮಾ ಅನ್ತಮಸೋ ದ್ವೀಸು ಪಾತಿಮೋಕ್ಖಸು ವತ್ತಮಾನೇಸುಪಿ ಸಾಸನಂ ಅನನ್ತರಹಿತಮೇವ, ಪರಿಯತ್ತಿಯಾ ಅನ್ತರಹಿತಾಯ ಸುಪ್ಪಟಿಪನ್ನಸ್ಸಾಪಿ ಧಮ್ಮಾಭಿಸಮಯೋ ನತ್ಥಿ, ಅನನ್ತರಹಿತಾಯ ಏವ ಧಮ್ಮಾಭಿಸಮಯೋ ಅತ್ಥಿ ¶ , ಇದಾನಿಪಿ ಅಮ್ಹಾಕಂ ಪರಿಯತ್ತಿಸಾಸನಂ ಪರಿಪುಣ್ಣಂ ನತ್ಥಿ, ಸರೀರಧಾತುಯೋ ಚ ನತ್ಥಿ, ತಸ್ಮಾ ಯತ್ಥ ಪರಿಯತ್ತಿಸಾಸನಂ ಸರೀರಧಾತುಯೋ ಚ ಅತ್ಥಿ, ತತ್ಥ ಪಣ್ಣಾಕಾರೇನ ಸದ್ಧಿಂ ದೂತಂ ಪೇಸೇತ್ವಾ ಆನೇತಬ್ಬಾ, ಏವಂ ಸತಿ ಅಮ್ಹಾಕಂ ರಟ್ಠೇ ಜಿನಸಾಸನಂ ಚಿರಕಾಲಂ ಪತಿಟ್ಠಹಿಸ್ಸತೀತಿ.

ಏವಂ ಪನ ಭನ್ತೇ ಸತಿ ಕತ್ಥ ಯಾಚಿಸ್ಸಾಮಾತಿ. ಸುವಣ್ಣಭೂಮಿರಟ್ಠೇ ಮಹಾರಾಜ ಸುಧಮ್ಮಪುರೇ ತೀಹಿ ವಾರೇಹಿ ಪಿಟಕತ್ತಯಂ ಲಿಖಿತ್ವಾ ಠಪೇಸಿ, ಸರೀರಧಾತುಯೋ ಚ ಬಹೂ ತತ್ಥ ಅತ್ಥೀತಿ. ರಾಜಾ ಏವಂ ಭನ್ತೇತಿ ಪಟಿಗ್ಗಣ್ಹಿತ್ವಾ ಬಹೂ ಪಣ್ಣಾಕಾರೇ ಪಟಿಯಾದೇತ್ವಾ ರಾಜಲೇಖನಂ ಲಿಖಿತ್ವಾ ಅಟ್ಠಙ್ಗಸಮನ್ನಾಗತಂ ಏಕಂ ಅಮಚ್ಚಂ ದೂತಂ ಕತ್ವಾ ಪೇಸೇಸಿ.

ಸುಧಮ್ಮಪುರಿನ್ದೋ ಮನೋಹರಿ ನಾಮ ರಾಜಾಪಿ ಮಚ್ಛೇರಚಿತ್ತೋ ಹುತ್ವಾ ತುಮ್ಹಾದಿಸಾನಂ ಮಿಚ್ಛಾದಿಟ್ಠೀನಂ ಠಾನೇ ಪಿಟಕತ್ತಯಂ ಸರೀರಧಾತುಯೋ ಚ ಪಹಿಣಿತುಂ ನ ಯುತ್ತಾ, ತಿಲೋಕಗ್ಗಸ್ಸ ಹಿ ಸಮ್ಮಾಸಮ್ಬುದ್ಧಸ್ಸ ಸಾಸನಂ ಸಮ್ಮಾದಿಟ್ಠೀನಂ ಠಾನೇಯೇವ ಪತಿಟ್ಠಹಿಸ್ಸತಿ, ಯಥಾ ನಾಮ ಕೇಸರಸೀಹರಾಜಸ್ಸ ವಸಾ ಸುವಣ್ಣಪಾತಿಯಂಯೇವ, ನ ಮತ್ತಿಕಾಭಾಜನೇತಿ.

ದೂತಾ ಪಚ್ಚಾಗನ್ತ್ವಾ ಅನುರುದ್ಧರಞ್ಞೋ ತಮತ್ಥಂ ಆರೋಚೇಸುಂ. ತಂ ಸುತ್ವಾ ಅನುರುದ್ಧರಾಜಾ ಕುಜ್ಝಿ, ತತ್ತಕಕಪಾಲೇ ಪಕ್ಖಿತ್ತತಿಲಂವಿಯ ತಟ ತಟಾಯಿ.

ಅಥ ರಾಜಾ ನದೀಮಗ್ಗೇನ ನಾವಾನಂ ಅಸೀತಿಸತಸಹಸ್ಸೇಹಿ ನಾವಿಕಾನಂ ಯೋಧಾನಂ ಅಟ್ಠಕೋಟೀಹಿ ಸೇನಂ ಬ್ಯೂಹಿತ್ವಾ ಥಲಮಗ್ಗೇನ ಸದ್ಧಿಂ ಚತೂಹಿ ಮಹಾಯೋಧನಾಯಕೇಹಿ ಹತ್ಥೀನಂ ಅಸೀತಿ ಸಹಸ್ಸೇಹಿ ಅಸ್ಸಾನಂ ನವುತಿಇಸತಸಹಸ್ಸೇಹಿ ಯೋಧಾನಂ ಅಸೀತಿಕೋಟಿಯಾ ಸೇನಂ ಬ್ಯೂಹಿತ್ವಾ ಸಯಮೇವ ಯುಜ್ಝಿತುಂ ಸುಧಮ್ಮಪರಂ ಗಚ್ಛಿ.

ತಂ ಸುತ್ವಾ ಮನೋಹರಿರಾಜಾ ಸೀತತಸಿತೋ ಹುತ್ವಾ ಅತ್ತನೋ ¶ ಬಹೂ ಯೋಧೇ ಸಂವಿದಹಿತ್ವಾ ಸುಧಮ್ಮಪುರಯೇವ ಪಟಿಸೇನಂ ಕತ್ವಾ ನಿಸೀದಿ.

ಅಥ ಅಥಬ್ಬಣವೇದೇ ಆಗತಪ್ಪಯೋಗವಸೇನ ಪುನಪ್ಪುನಂ ವಾಯಮನ್ತಾಪಿ ನಗರಮೂಲಂ ಉಪಸಙ್ಕಮಿತುಂ ನ ಸಕ್ಕಾ. ತದಾ ರಾಜಾ ವೇದಞ್ಞುನೋ ಪುಚ್ಛಿ,–ಕಸ್ಮಾ ಪನೇತ್ಥ ನಗರಮೂಲಂ ಉಪಸಙ್ಕಮಿತುಂ ನ ಸಕ್ಕೋಮಾತಿ. ವೇದಞ್ಞುನೋ ಆಹಂಸು,-ಅಥಬ್ಬಣವೇದವಿಧಾನಂ ಮಹಾರಾಜ ಅತ್ಥಿ ಮಞ್ಞೇತಿ. ಅಥ ರಾಜಾ ಪಥವಿಯಂ ನಿದಹಿತ್ವಾ ಮತಕಳೇವರಂ ಉದ್ಧರಿತ್ವಾ ಮಹಾಸಮುದ್ದೇ ಖಿಪೇಸಿ.

ಏಕಂ ಕಿರ ಮನುಸ್ಸಂ ಹಿನ್ದುಕುಲಂ ಜೇಙ್ಗುನಾಮಕಂ ಕೀಟಂ ಖಾದಾಪೇತ್ವಾ ತಂ ಮಾರೇತ್ವಾ ಹತ್ಥಪಾದಾದೀನಿ ಅಙ್ಗಪಚ್ಚಙ್ಗಾನಿ ಗಹೇತ್ವಾ ಛಿನ್ನಛಿನ್ನಾನಿ ಕತ್ವಾ ನಗರಸ್ಸ ಸಾಮನ್ತಾ ಪಥವಿಯಂ ನದಹಿತ್ವಾ ಠಪೇಸಿ. ತದಾ ಪನ ನಗರಂ ಉಪಸಙ್ಕಮಿತುಂ ಸಕ್ಕಾ. ನಗರಞ್ಚ ಪವಿಸಿತ್ವಾ ಅನುರುದ್ಧರಾಜಾ ಮನೋಹರಿರಾಜಾನಂ ಜೀವಗ್ಗಾಹಂ ಗಣ್ಹಿ. ಸುಧಮ್ಮಪುರೇ ಪೋರಾಣಿಕಾನಂ ರಾಜೂನಂ ಪವೇಣೀಆಗತವಸೇನ ರತನಮಯಮಞ್ಜೂಸಾಯಂ ಠಪೇತ್ವಾ ಪೂಜಿತಂ ಸಹಧಾತೂಹಿ ಪಿಟಕತ್ತಯಂ ಗಹೇತ್ವಾ ಮನೋಹರಿರಞ್ಞೋ ಸನ್ತಕಾನಂ ದ್ವತ್ತಿಂಸಹತ್ಥೀನಂ ಪಿಟ್ಠಿಯಂ ಆರೋಪೇತ್ವಾ ಆನೇಸಿ.

ಅರಿಮದ್ದನನಗರಂ ಪನ ಪತ್ವಾ ಧಾತುಯೋ ರತನಮಯಮಞ್ಜೂಸಾಯಂ ಠಪೇತ್ವಾ ಸಿರಿಸಯನಗಬ್ಭೇ ರತನಮಞ್ಚೇ ಸೀಸೋಪದೇಸಸ್ಸ ಸಮೀಪೇ ಠಪೇಸಿ. ಪಿಟಕತ್ತಯಮ್ಪಿ ರತನಮಯೇ ಪಾಸಾದೇ ಠಪೇತ್ವಾ ಭಿಕ್ಖುಸಙ್ಘಸ್ಸ ಉಗ್ಗಹಧಾರಣಾದಿಅತ್ಥಾಯ ನಿಯ್ಯಾದೇಸಿ. ತತೋ ಕಿರ ಆನೀತಂ ಪಿಟಕತ್ತಯಂ ಉಗ್ಗಣ್ಹನ್ತಾನಂ ಅರಿಯಾನಂ ಸಹಸ್ಸಮತ್ತಂ ಅಹೋಸೀತಿ.

ಸುಧಮ್ಮನಗರಂ ವಿಜಯಿತ್ವಾ ಪಿಟಕೇನ ಸದ್ಧಿಂ ಭಿಕ್ಖುಸಙ್ಘಂ ಆನೇತ್ವಾ ಸಾಸನಸ್ಸ ಪತಿಟ್ಠಾಪನಂ ಜಿನಚಕ್ಕೇ ಏಕಾಧಿಕೇ ಛಸತೇ ವಸ್ಸಸಹಸ್ಸೇ ಕಲಿಯುಗೇ ಚ ಸೋಳಸಾಧಿಕೇ ಚತುಸತೇ ಸಮ್ಪತ್ತೇತಿ ಸಿಲಾಲೇಖನೇಸು ವುತ್ತಂ.

ಅನುರುದ್ಧರಞ್ಞೋ ಕಾಲೇ ಪುಞ್ಞಾನುಭಾವೇನ ತಿಇಣ್ಣಂ ರತನಾನಂ ಪರಿಪುಣ್ಣತ್ತಾ ¶ ಪುಣ್ಣಗಾಮೋತಿ ಸಮಞ್ಞಾ ಅಹೋಸಿ. ಚಿರಕಾಲಂ ಅತಿಕ್ಕನ್ತೇ ಣ್ಣಕಾರಂ ಲೋಪವಸೇನ ಮಕಾರಸ್ಸ ಚ ನಿಗ್ಗಹಿತ ವಸೇನ ಪುಗಮೀತಿ ಮರಮ್ಮಭಾಸಾಯ ವೋಹಾರೀಯತೀತಿ ಅನಾಗತವಂಸರಾಜವಂಸೇಸು ವುತ್ತಂ.

ಅನುರುದ್ಧರಾಜಾಯೇವ ಚತ್ತಾರೋ ಮಹಾಯೋಧೇ ಸೀಹಳದೀಪಂ ಪೇಸೇತ್ವಾ ತತೋಪಿ ಪಿಟಕತ್ತಯಂ ಆನೇಸಿ. ಸೀಹಳದೀಪತೋ ಆನೀತಪಿಟಕತ್ತಯೇನ ಸುಧಮ್ಮಪುರತೋ ಆನೀತಪಿಟಕತ್ತಯಂ ಅಞ್ಞಮಞ್ಞಂ ಯೋಜೇತ್ವಾ ಸಂಸನ್ದೇತ್ವಾ ಅರಹನ್ತತ್ಥೇರೋ ವೀಮಂಸೇಸಿ. ತದಾ ಗಙ್ಗಾದಕೇನವಿಯ ಯಮುನೋದಕಂ ಅಞ್ಞಮಞ್ಞಂ ಅನೂನಂ ಅನಧಿಕಂ ಅಹೋಸಿ. ತೇಹಿ ಪಿಟಕೇಹಿ ಅಞ್ಞಾನಿಪಿ ವಡ್ಢೇತ್ವಾ ತಿಪಿಟಕಗಬ್ಭೇ ಠಪೇತ್ವಾ ಪೂಜೇಸಿ. ತೇಸು ತೇಸು ಠಾನೇಸುಪಿ ಪತಿಟ್ಠಾಪೇಸಿ.

ಮನೋಹರಿರಾಜಾನಮ್ಪಿ ಮ್ರಙ್ಕಪಾ ನಾಮ ದೇಸೇ ಉಪಟ್ಠಾಕೇಹಿ ಸಹ ಠಪೇಸಿ. ತಸ್ಸ ಚ ಕಿರ ರಞ್ಞೋ ಮುಖಂ ವಿರವಿತ್ವಾ ಕಥಂ ಸಲ್ಲಾಪೇನ್ತಸ್ಸ ಮುಖತೋ ಓಭಾಸೋ ಪಜ್ಜಲಿತ್ವಾ ನಿಕ್ಖಮಿ. ಸೋ ಕದಾಚಿ ಕದಾಚಿ ಅನುರುದ್ಧರಞ್ಞೋ ಸನ್ತಿಕಂ ಆಗನ್ತ್ವಾ ಗಾರವವಸೇನ ವನ್ದನಾದೀನಿ ಅಕಾಸಿ. ತದಾ ಅನುರುದ್ಧರಞ್ಞೋ ಲೋಮಹಂಸೋ ಉಪ್ಪಜ್ಜಿ ಉಬ್ಬಿಗ್ಗೋ ಚ. ತಸ್ಮಾ ತಸ್ಸ ರಞ್ಞೋ ನಿತ್ಥೇಜತ್ಥಾಯ ಬುದ್ಧರೂಪಸ್ಸ ಚೇತಿಯಸ್ಸ ಭತ್ತಂ ಪೂಜೇತ್ವಾ ತಂ ಗಹೇತ್ವಾ ಮನೋಹರಿರಞ್ಞೋ ಭಾಜೇಸಿ. ತದಾ ತಸ್ಸ ತದಾನುಭಾವೋ ಅನ್ತರಧಾಯಿ. ಮನೋಹರಿರಾಜಾ ಸಂವೇಗಂ ಆಪಜ್ಜಿತ್ವಾ ಸಂಸಾರೇ ಸಂಸರನ್ತೋ ಯಾವ ನಿಬ್ಬಾನಂ ನ ಪಾಪುಣಾಮಿ, ತಾವ ಪರವಸೇ ನಾನುವತ್ತೇಯ್ಯನ್ತಿ ಪತ್ಥನಂ ಅಕಾಸಿ. ಸುಧಮ್ಮಪುರತೋ ಆಭತಂ ಅತ್ತನೋ ಸನ್ತಕಂ ಮನೋಮಯ ಮಣಿಂ ಏಕಸ್ಸ ಸೇಟ್ಠಿನೋ ಸನ್ತಿಕೇ ವಿಕ್ಕಿಣಿತ್ವಾ ಲದ್ಧಮೂಲೇನ ಪಞ್ಚವಾಹರಜತೇನ ಅಭುಜಿತಪಲ್ಲಙ್ಕವಸೇನ ಏಕಂ ಮಹನ್ತಂ ಬುದ್ಧ ಬಿಮ್ಬಂ ಪರಿನಿಬ್ಬಾನಾಕಾರೇನ ಏಕನ್ತಿ ದ್ವೇ ಬುದ್ಧಪ್ಪಟಿಬಿಮ್ಬಾನಿ ಕಾರಾಪೇಸಿ. ಯಾವಜ್ಜತನಾ ತಾನಿ ಸನ್ತೀತಿ. ಇಚ್ಚೇವಂ ಅನುರುದ್ಧರಾಜಾ ಸುಧಮ್ಮಪುರತೋ ¶ ಸೀಹಳದೀಪತೋ ಚ ಸಾಸನಂ ಆನೇತ್ವಾ ಅರಿಮದ್ದನನಗರೇ ಪತಿಟ್ಠಾಪೇಸೀತಿ.

ಇದಂ ಅಮ್ಹಾಕಂ ಮರಮ್ಮಮಣ್ಡಲೇ ತಮ್ಬದೀಪರಟ್ಠೇ ಅರಿಮದ್ದನನಗರೇ

ಅನುರುದ್ಧರಾಜಾನಂ ಪಟಿಚ್ಚ ಚತುತ್ಥಂ ಸಾಸನಸ್ಸ ಪತಿಟ್ಠಾನಂ.

ಉತ್ತರಾಜೀವತ್ಥೇರೋಪಿ ಸೋಣುತ್ತರಾನಂ ವಂಸತೋ ಸಾಸನಂ ಗಹೇತ್ವಾ ಸುಧಮ್ಮಪುರತೋ ಅರಿಮದ್ದನನಗರಂ ಆಗನ್ತ್ವಾ ಸಾಸನಂ ಪತಿಟ್ಠಾಪೇಸಿ.

ಇದಂ ಅಮ್ಹಾಕಂ ಮರಮ್ಮಮಣ್ಡಲೇ ತಮ್ಬದೀಪರಟ್ಠೇ ಅರಿಮದ್ದನನಗರೇ ಉತ್ತರಾಜೀವತ್ಥೇರಂ ಪಟಿಚ್ಚ ಪಞ್ಚಮಂ ಸಾಸನಸ್ಸ ಪತಿಟ್ಠಾನಂ.

ಉತ್ತರಾಜೀವತ್ಥೇರಸ್ಸ ಸೀಹಳದೀಪಂ ಗತಕಾಲೇ ತೇನ ಸದ್ಧಿಂ ಗತಂ ಛಪ್ಪದಂ ನಾಮ ಸಾಮಣೇರಂ ಸೀಹಳದೀಪೇಯೇವ ಸೀಹಳದೀಪಿಕಾ ಪಬ್ಬಜಿಂಸು. ಪಬ್ಬಜಿತ್ವಾ ಚ ಛಪ್ಪದಸಾಮಣೇರೋ ಪರಿಯತ್ತಿಂ ಉಗ್ಗಣ್ಹಿತ್ವಾ ದಸವಸ್ಸಂ ತತ್ಥ ವಸಿತ್ವಾ ಅರಿಮದ್ದನನಗರಂ ಪಚ್ಚಾಗಚ್ಛಿ. ಸಿವಲಿತ್ಥೇರಞ್ಚ ತಾಮಲಿನ್ದತ್ಥೇರಞ್ಚ ಆನನ್ದತ್ಥೇರಞ್ಚ ರಾಹುಲತ್ಥೇ ರಞ್ಚ ಅನೇಸಿ. ತೇ ಪನ ಥೇರಾ ತಿಪಿಟಕಧರಾ ಹೋನ್ತಿ ಬ್ಯತ್ತಾ ದಕ್ಖಾ ಚ. ಅಯಞ್ಚತ್ಥೋ ವಿತ್ಥಾರೇನ ಹೇಟ್ಠಾ ವುತ್ತೋ.

ಅರಿಮದ್ದನನಗರಂ ಪತ್ವಾ ಅರಿಮದ್ದನ ವಾಸೀಹಿ ಭಿಕ್ಖೂಹಿ ಸದ್ಧಿಂ ವಿನಯಕಮ್ಮಾನಿ ಅಕತ್ವಾ ಪುಥು ಹುತ್ವಾ ನಿಸೀದಿಂಸು. ನರಪತಿರಾಜಾ ಚ ತೇಸು ಥೇರೇಸು ಅತಿವಿಯ ಪಸೀದಿ. ಏರಾವತೀನದಿಯಂ ಉಳುಮ್ಪಂ ಬನ್ಧಿತ್ವಾ ತತ್ಥೇವ ಉಪಸಮ್ಪದಕಮ್ಮಂ ಕಾರಾಪೇಸಿ. ಚಿರಕಾಲಂ ಅತಿಕ್ಕಮಿತ್ವಾ ಸೋ ಗಣೋ ವುಡ್ಢಿ ಹುತ್ವಾ ಉಪ್ಪಜ್ಜಿ.

ನರಪತಿರಾಜಾ ಚ ತೇ ಥೇರೇ ಸದ್ಧಿಂ ಸಙ್ಘೇನ ನಿಮನ್ತೇತ್ವಾ ಮಹಾದಾನಂ ಅದಾಸಿ. ತದಾ ಛಣೇ ಆಕಪ್ಪಸಮ್ಪನ್ನಂ ರೂಪಸೋಭಗ್ಗಪ್ಪಕ್ಕಂ ಏಕಂ ನಾಟಕಿತ್ತಿಂ ದಿಸ್ವಾ ರಾಹುಲತ್ಥೇರೋ ಪಟಿಬದ್ಧಚಿತ್ತೋ ಲೇಪೇ ಲಗ್ಗಿತವಾನರೋವಿಯ ಕದ್ದಮೇ ಲಗ್ಗಿತಮಾತಙ್ಗೋವಿಯ ಚ ಕಾಮ ಗುಣಲೇಪಕದ್ದಮೇಸು ಲಗ್ಗಿತೋ ಸಾಸನೇ ವಿರಮಿತ್ವಾ ಹೀ ನಾಯಾವತ್ತೀತುಂ ಆರಭಿ. ಮರಣನ್ತಿ ಕರೋಗೇನ ಅಭಿಭೂತೋ ವಿಯ ¶ ಅತೇಕಿಚ್ಛೋ ಹುತ್ವಾ ಸೇಸತ್ಥೇರೇಸು ಓವಾದಂ ದಿನ್ನೇಸು ಪಿನಾದಿಯಿ. ತದಾ ಸೇಸತ್ಥೇರಾ ತಂ ಏವಮಾಹಂಸು,-ಮಾ ತ್ವಂ ಏಕಂ ತಂ ಪಟಿಚ್ಚ ಸಬ್ಬೇಪಿ ಅಮ್ಹೇ ಲಜ್ಜಾಪೇತುಂ ನ ಅರಹಸಿ, ಮಾ ಇಧ ಹೀನಾಯಾ ವತ್ತೇಹಿ, ಮಲ್ಲಾರುದೀಪಂ ಗನ್ತ್ವಾ ಯಥಾರುಚಿಂ ಕರೋಹೀತಿ ಪೇಸೇಸುಂ. ರಾಹುಲತ್ಥೇರೋ ಚ ಕುಸಿಮತಿತ್ಥತೋ ನಾವಂ ಆರುಯ್ಹ ಮಲ್ಲಾರುದೀಪಂ ಅಗಮಾಸಿ. ಮಲ್ಲಾರುದೀಪಂ ಪತ್ತಕಾಲೇ ಮಲ್ಲಾರುರಾಜಾ ವಿನಯಂ ಜಾನಿತುಕಾಮೋ ಸಹ ಟೀಕಾಯ ಖುದ್ದಸಿಕ್ಖಾಪಕರಣಂ ತಸ್ಸ ಸನ್ತಿಕೇ ಉಗ್ಗಣ್ಹಿತ್ವಾ ಏಕಪತ್ತಮತ್ತಂ ಮಣಿಂ ಅದಾಸಿ. ಸೋಚ ತಂ ಲಭಿತ್ವಾ ಹೀನಾಯಾವತ್ತೀತಿ. ಹೋನ್ತಿ ಚೇತ್ಥ,-

ಅತಿದೂರೇವ ಹೋತಬ್ಬಂ, ಭಿಕ್ಖುನಾ ನಾಮ ಇತ್ಥಿಭಿ;

ಇತ್ಥಿಯೋ ನಾಮ ಭಿಕ್ಖೂನಂ, ಭವನ್ತಿ ಇಧ ವೇರಿನೋ.

ತಾವ ತಿಟ್ಠನ್ತು ದುಪ್ಪಞ್ಞಾ, ಮಯಂ ಪೋರಾಣಿಕಾಪಿ ಚ;

ಮಹಾಪಞ್ಞಾ ವಿನಾಸಂ, ಪತ್ತಾ ಹರಿತಚಾದಯೋ.

ತಸ್ಮಾ ಹಿ ಪಣ್ಡಿತೋ ಭಿಕ್ಖು, ಅನ್ತಮಸೋವ ಇತ್ಥಿಭಿ;

ವಿಸ್ಸಾಸಂ ನ ಕರೇ ಲೋಕೇ, ರಾಗೋ ಚ ದುಪ್ಪವಾರಿತೋತಿ.

ಸೇಸೇಸು ಚ ಥೇರೇಸು ಛಪ್ಪದೋ ನಾಮ ಥೇರೋ ಪಠಮಂ ಕಾಲಙ್ಕತೋ. ಸಿವಲಿತಾಮಲಿನ್ದಾನನ್ದತ್ಥೇರಾಯೇವ ತಯೋ ಪರಿಯತ್ತಿಉಗ್ಗಹಣಧಾರಣಾದಿವಸೇನ ಸಾಸನಂ ಉಪತ್ಥಮ್ಭೇತ್ವಾ ಅರಿಮದ್ದನನಗರೇ ನಿಸೀದಿಂಸು. ಏಕಸ್ಮಿಞ್ಚ ಕಾಲೇ ರಾಜಾ ತೇಸಂ ತಿಣ್ಣಂ ಥೇರಾನಂ ಏಕೇಕಂ ಹತ್ಥಿಂ ಅದಾಸಿ. ಸಿವಲಿತಾಮಲಿನ್ದತ್ಥೇರಾ ಪಟಿಗ್ಗಹೇತ್ವಾ ವನೇ ವಿಸ್ಸಜ್ಜಾಪೇಸುಂ. ಆನನ್ದತ್ಥೇರೋ ಪನ ಕಿಞ್ಚಿಪುರನಗರಂ ಪಹಿಣಿತ್ವಾ ಞಾತಕಾನಂ ದೇಹೀತಿ ಕುಸಿಮತಿತ್ಥಂ ಗನ್ತ್ವಾ ನಾವಂ ಆರೋಪೇಸಿ. ತಂ ಕಾರಣಂ ಞತ್ವಾ ಸಿವಲಿತಾಮಲಿನ್ದತ್ಥೇರಾತಂ ಏವಮಾಹಂಸು,– ಮಯಂ ಪನ ಆವುಸೋ ಹತ್ಥೀನಂ ಸುಖತ್ಥಾಯ ವನೇ ವಿಸ್ಸಜ್ಜೇಮ,ತ್ವಂ ಪನ ಅಧಮ್ಮಿಕಂ ಕರೋಸೀತಿ. ಕಿನ್ನಾಮ ಭನ್ತೇ ಞಾಭಕಾನಂ ಸಙ್ಗಹೋ ನ ವಟ್ಟತಿ, ನನು ಞಾತಕಾನಞ್ಚ ಸಙ್ಗಹೋತಿ ಭಗವತಾ ವುತ್ತನ್ತಿ.

ಥೇರಾ ¶ ಆಹಂಸು,-ಸಚೇ ತ್ವಂ ಅಮ್ಹಾಕಂ ವಚನಂ ನಕರೇಯ್ಯಾಸಿ,ಭವ ಇಚ್ಛಾನುರೂಪಂ ಕರೋಹಿ, ಮಯಂ ಪನ ತಯಾ ಸದ್ಧಿಂ ಸಂವಾಸಂ ನ ಕರಿಸ್ಸಾಮಾತಿ ವಿಸುಂ ನಿಸೀದಿಂಸು.

ತತೋ ಪಟ್ಠಾಯ ದ್ವೇ ಗಣಾ ಭಿಜ್ಜಿಂಸು. ತತೋ ಪಚ್ಛಾಕಾಲೇ ಅತಿಕ್ಕನ್ತೇ ತಾಮಲಿನ್ದತ್ಥೇರೋ ಬಹುಸ್ಸುತಾನಂ ಬ್ಯತ್ತಿಬಲಾನಂ ಸಿಸ್ಸಾನಂ ಅನುಗ್ಗಹತ್ಥಾಯ ಗಹಟ್ಠಾನಂ ಸನ್ತಿಕೇ ಅಯಂ ಬಹುಸ್ಸುತೋ ಅಯಂ ಮಹಾಪಞ್ಞೋತಿ ಏವಮಾದಿನಾ ವಚೀವಿಞ್ಞತ್ತಿಂ ಸಮುಟ್ಠಾಪೇತಿ, ಏವಂ ಕತೇ ಕುಲಪುತ್ತಾ ಸುಲಭಪಚ್ಚಯವಸೇನ ಸಾಸನಸ್ಸ ಹಿತಂ ಆವಹಿಭುಂಸಕ್ಖಿಸ್ಸನ್ತೀತಿ ಕತ್ವಾ. ತಂ ಕಾರಣಂ ಸುತ್ವಾ ಸಿವಲಿತ್ಥೇರೋ ಏವಮಾಹ,- ಕಸ್ಮಾ ತ್ವಂ ವಚೀವಿಞ್ಞತ್ತಿಂ ಸಮುಟ್ಠಾಪೇತ್ವಾ ಬುದ್ಧಪ್ಪಟಿಕುಚ್ಛಿತಂ ಕಮ್ಮಂ ಕರೋಸೀತಿ. ಭಗವತಾ ಅತ್ತನೋ ಅತ್ಥಾಯಯೇವ ವಚೀವಿಞ್ಞತ್ತಿಂ ಪಟಿಕ್ಖಿತ್ತಾ, ಅಹಂ ಪನ ಪರೇಸಂಯೇವ ಅತ್ಥಾಯ ವಚೀವಿಞ್ಞತ್ತಿಂಸಮುಟ್ಠಾಪೇಮಿ, ನಾತ್ತನೋ ಅತ್ಥಾಯ, ಸಾಸನಸ್ಸ ಹಿ ವೇಪುಲ್ಲತ್ಥಾಯ ಏವಂ ವಚೀವಿಞ್ಞತ್ತಿಂಸಮುಟ್ಠಾಪೇಮಿ. ಸಿವಲಿತ್ಥೇರೋಪಿ ನ ತ್ವಂ ಮಮ ವಚನಂ ಕರೋಸಿ, ಯಂ ಯಂ ತ್ವಂ ಇಚ್ಛಸಿ, ತಂ ತಂ ಕರೋಹಿ, ಅಹಂ ಪನ ತಯಾ ಸದ್ಧಿಂ ಸಂವಾಸಂ ನಕರಿಸ್ಸಾಮೀತಿ ವಿಸುಂ ಹುತ್ವಾ ಸದ್ಧಿಂ ಸಕಪಕ್ಖೇನ ನಿಸೀದಿ. ತತೋ ಪಟ್ಠಾಯ ತಯೋ ಗಣಾ ಭಿಜ್ಜಿಂಸು.

ಏವಂ ಅರಿಮದ್ದನನಗರೇ ಅರಹನ್ತತ್ಥೇರಸ್ಸ ಏಕೋ ವಂಸೋ, ಸಿವಲಿತ್ಥೇರಸ್ಸ ಏಕೋ, ತಾಮಲಿನ್ದತ್ಥೇರಸ್ಸ ಏಕೋ, ಆನನ್ದತ್ಥೇರಸ್ಸ ಏಕೋತಿ ಚತ್ತಾರೋ ಗಣಾ ಅಹೇಸುಂ.

ತೇಸು ಅರಹನ್ತತ್ಥೇರಗಣೋ ಸುಧಮ್ಮಪುರತೋ ಪಠಮಂ ಆಗತತ್ತಾ ಪುರಿಮಗಣೋತಿ ವೋಹಾರಿಯತಿ, ಅಞ್ಞೇ ಪನ ಪಚ್ಛಾ ಆಗತತ್ತಾ ಪಚ್ಛಾಗಣಾತಿ.

ಸಿವಲಿತ್ಥೇರೋ ಅರಿಮದ್ದನನಗರೇ ಯಾವೀಜೀವಂ ಸಾಸನಂ ಪಗ್ಗಣ್ಹಿತ್ವಾ ಕಲಿಯುಗೇ ನವುತಾಧಿಕೇ ಪಞ್ಚವಸ್ಸಸತೇ ಕಾಲೇ ಕಾಲಮಕಾಸಿ.

ಆನನ್ದತ್ಥೇರೋ ಪನ ಅರಿಮದ್ದನನಗರೇಯೇವ ಚತುಚತ್ತಾಲೀಸ ವಸ್ಸಾನಿ ¶ ಸಾಸನಂ ಪಗ್ಗಣ್ಹಿತ್ವಾ ಛನವುತಾಧಿಕೇ ಪಞ್ಚವಸ್ಸಸತೇ ಕಾಲೇ ಕಾಲಮಕಾಸಿ.

ತಾಮಲಿನ್ದತ್ಥೇರೋಪಿ ಯಾವಜೀವಂ ಸಾಸನಂ ಪಗ್ಗಣ್ಹಿತ್ವಾ ಅಟ್ಠನ ವುತಾಧಿಕೇ ಪಞ್ಚವಸ್ಸಸತೇ ಕಾಲೇ ಕಾಲಮಕಾಸೀತಿ. ಅಹೋ ಸಙ್ಖಾರಸಭಾವೋತಿ.

ಸೇಯ್ಯಥಾಜಗರಸ್ಸೇವ, ನಾಭಿಯಾ ಚಕ್ಕಮಣ್ಡಲೇ;

ಲಗ್ಗೋ ಸಸೋ ಸಮಿತ್ವಾಪಿ, ದಿಸಂ ಗಚ್ಛತಿ ತಂ ಮುಖಂ.

ತಥೇವ ಸಬ್ಬಸತ್ತಾಪಿ, ಮಚ್ಚುಚಕ್ಕೇಸು ಲಗ್ಗಿತಾ;

ಯಾವಜೀವಮ್ಪಿ ಧಾವಿತ್ವಾ, ಮಚ್ಚುಮುಖಂ ಉಪಾಗಮುನ್ತಿ.

ಇಚ್ಚೇವಂ ಅರಿಮದ್ದನಪುರೇ ಅರಹನ್ತೇಹಿ ಚ ಗನ್ಥಕಾರೇಹಿ ಚ ಪುಥುಜ್ಜನೇಹಿ ಜಿನಸಾಸನಂ ನಭೇ ಚನ್ದೋವಿಯ ವಿಜ್ಜೋತತಿ.

ತತ್ಥ ಹಿ ಯದಾ ಅನುರುದ್ಧರಾಜಾ ಸುಧಮ್ಮಪುರತೋ ಸಾಸನಂ ಆನೇಸಿ, ತದಾ ಅರಹನ್ತಾ ಛಸತಸಹಸ್ಸಮತ್ತಾ ಆಗತಾ, ಸೋತಾಪನ್ನಸಕದಾಗಾಮಿಅನಾಗಾಮಿನೋ ಪನ ಗಣನಪಥಂ ವೀತಿ ವತ್ತಾತಿ.

ಛತ್ತಗುಹಿನ್ದಸ್ಸ ನಾಮ ರಞ್ಞೋ ಕಾಲೇಪಿ ಹಿಮವನ್ತೇ ಗನ್ಧಮಾದನಪಬ್ಬತತೋ ಅಟ್ಠ ಅರಹನ್ತಾ ಪಿಣ್ಡಾಯ ರಾಜಗೇಹಂ ಆಗಮಂಸು. ರಾಜಾ ಚ ಪತ್ತಂ ಗಹೇತ್ವಾ ಪಿಣ್ಡಪಾತೇನ ಭೋಜೇತ್ವಾ ಇದಾನಿ ಕುತೋ ಆಗತತ್ಥಾಭಿ ಪುಚ್ಛಿ. ಹಿಮವನ್ತೇ ಮಹಾರಾಜ ಗನ್ಧ ಮಾದನಪಬ್ಬತತೋತಿ. ಅಥ ರಾಜಾ ಅತಿಪ್ಪಸನ್ನೋ ಹುತ್ವಾ ಇಧ ತೇಮಾಸಂ ವಸ್ಸಂ ಉಪಗಚ್ಛಥಾತಿ ಯಾಚಿತ್ವಾ ವಿಹಾರಂ ಕಾರಾಪೇತ್ವಾ ಅದಾಸಿ. ತೇಮಾಸಮ್ಪಿ ಅನ್ತೋಗೇಹೇ ನಿಮನ್ತೇತ್ವಾ ಪಿಣ್ಡಪಾತೇನ ಭೋಜೇಸಿ.

ಏಕಂ ಸಮಯಂ ಅರಹನ್ತಾನಂ ಗನ್ಧಮಾದನಪಬ್ಬತೇ ನನ್ದಮೂಲಗುಹಂ ವಿಯ ಏಕಂ ಗುಹಂ ಮಾಪೇತ್ವಾ ದಸ್ಸೇಹೀತಿ ಯಾಚಿ. ತೇ ಚ ಅರಹನ್ತಾ ನನ್ದಮೂಲಗುಹಂವಿಯ ಏಕಂ ಗುಹಂ ಇದ್ಧಿಯಾ ಮಾಪೇತ್ವಾ ದಸ್ಸೇಸುಂ ¶ . ರಾಜಾ ಚ ತಾಯ ಗುಹಾಯ ಸದಿಸಂ ಏಕಂ ಗುಹಂ ಕಾರಾಪೇಸಿ. ನನ್ದಮೂಲಗುಹಾಕಾರೇನ ಪನ ಕತತ್ತಾ ನನ್ದಾತಿ ನಾಮಮ್ಪಿ ಅಕಾಸಿ. ಇಚ್ಚೇವಂ ಛತ್ತಗುಹಿನ್ದಸ್ಸ ರಞ್ಞೋ ಕಾಲೇ ಗನ್ಧಮಾದನಪಬ್ಬತೇ ನನ್ದಮೂಲಗುಹತೋ ಆಗನ್ತ್ವಾ ಅರಹನ್ತಾ ಸಾಸನಂ ಪತಿಟ್ಠಾಪೇಸುಂ.

ಅರಹನ್ತಭಾವೋ ಚ ನಾಮೇಸ ಯಥಾಭೂತಂ ಜಾನಿತುಂ ದುಕ್ಕರೋ, ಅನುಪಸಮ್ಪನ್ನಾನಂ ಉತ್ತರಿಮನುಸ್ಸಧಮ್ಮದಸ್ಸನಸ್ಸ ಪಟಿಕ್ಖಿತ್ತತ್ತಾ, ಅರಹತ್ತಂ ವಾ ಪತ್ವಾಪಿ ವಾಸನಾಯ ಅಪ್ಪಜಹಿತತ್ತಾ. ಅರಹಾಪಿ ಹಿ ಸಮಾನೋ ಅಹಂ ಅರಹಾತಿ ಅನುಪಸಮ್ಪನ್ನಾನಂ ಕಥೇತುಂ ನ ವಟ್ಟತಿ, ಅರಹತ್ತಂ ಪತ್ವಾಪಿ ಏಕಚ್ಚೋ ವಾಸನಂ ಪಜಹಿತುಂ ನ ಸಕ್ಕಾ, ಪಿಲಿನ್ದವಚ್ಛತ್ಥೇರವತ್ಥುಚೇತ್ಥ ಞಾಪಕಂ. ಏವಂ ಲೋಕೇ ಅರಹನ್ತ ಭಾವೋ ಜಾನಿತುಂ ದುಕ್ಕರೋ. ತೇನೇವ ಮಹಾಕಸ್ಸಪತ್ಥೇರಸ್ಸ ಉಪಟ್ಠಾಕೋ ಏಕೋ ಭಿಕ್ಖು ಅತ್ತನೋ ಉಪಜ್ಝಾಯಸ್ಸ ಮಹಾಕಸ್ಸಪತ್ಥೇರಸ್ಸ ಸನ್ತಿಕೇ ವಸಿತ್ವಾಪಿ ತಸ್ಸ ಅರಹನ್ತ ಭಾವಂ ನ ಜಾನಿ.

ಮಹಾಕಸ್ಸಪತ್ಥೇರಞ್ಹಿ ಏಕೇನ ಸದ್ಧಿವಿಹಾರಿಕೇನ ಸದ್ಧಿಂ ಅರಞ್ಞವಿಹಾರತೋ ಗಾಮಂ ಪಿಣ್ಡಾಯ ಚರನ್ತಂ ಅನ್ತರಾಮಗ್ಗೇ ಪತ್ತಾ ದಿಪರಿಕ್ಖಾರೇ ಗಹೇತ್ವಾ ಪಚ್ಛಾ ಗಚ್ಛನ್ತೋಯೇವ ಏಕೋಸದ್ಧಿ ವಿಹಾರಿಕೋ ಏವಮಾಹ,–ಲೋಕಸ್ಮಿಂ ಭನ್ತೇ ಅರಹಾ ಅರಹಾತಿ ಪಾಕಟೋ, ಸುತಮತ್ತೋವಾಹಂ ಭವಾಮಿ, ನ ಕದಾಚಿ ದಿಟ್ಠಪುಬ್ಬೋತಿ. ತಂ ಸುತ್ವಾ ಥೇರೋ ಪಚ್ಛಾ ಪರಿವತ್ತತ್ವಾ ಓಲೋಕೇನ್ತೋ ಪರಿಕ್ಖಾರೇ ಆವುಸೋ ಗಹೇತ್ವಾ ಅರಹನ್ತಸ್ಸ ಪಚ್ಛಾಗಚ್ಛನ್ತೋಯೇವ ಅರಹನ್ತಭಾವಂ ನ ಜಾನಾತೀತಿ ಆಹಾತಿ.

ಅರಿಮದ್ದನನಗರೇಪಿ ಸೀಲಬುದ್ಧಿಪೋಲ್ಲೋಙ್ಕಸುಮೇಧತ್ಥೇರಾದಯೋಪಿ ಅರಹನ್ತಾಯೇವ ಅಹೇಸುಂ. ನರಪತಿರಾಜಾ ಹಿ ಖಣಿತ್ತಿ ಪಾದಪಬ್ಬತಂ ಗನ್ತ್ವಾ ಪಚ್ಚಾಗಮನಕಾಲೇ ಅನ್ತರಾಮಗ್ಗೇ ಏಕಿಸ್ಸಾ ಮಾತಿಕಾಯ ಮಣೋಭಾಸಂ ದಿಸ್ವಾ ಇಧ ಪುಞ್ಞಂ ಕಾರೇತುಕಾಮೋ ಸಕ್ಕೋ ದಸ್ಸೇತಿ ಮಞ್ಞೇತಿ ಮನಸಿಕರಿತ್ವಾ ಚೇತಿಯಂ ಕಾರಾಪೇಸ್ಸಾಮೀತಿ ¶ ತತ್ಥ ರಟ್ಠವಾಸೀತಿ ಸಮಂ ಭೂಮಿಭಾಗಂ ಕಾರಾಪೇಸಿ.

ಅಥ ಏಕೋ ಸೀಲಬುದ್ಧಿ ನಾಮ ಥೇರೋ ಏವಮಾಹ,– ಪುಞ್ಞಂ ಮಹಾರಾಜ ಕರಿಸ್ಸಮೀತಿ ಇದಂ ಭೂಮಿಪರಿಕಮ್ಮಂ ಕಾರಾಪೇಸಿ, ಏವಂ ಕಾರಾಪೇನ್ತಸ್ಸ ತೇ ಅಪುಞ್ಞಂಯೇವ ಭವತಿ, ನೋಪುಞ್ಞನ್ತಿ ವತ್ವಾ ಬಹೂ ಸತ್ತಾ ಮಾ ಕಿಲಮನ್ತೂತಿ ಮನಸಿಕತ್ವಾ ರಞ್ಞೋ ದಣ್ಡಕಮ್ಮೇನ ತಜ್ಜನತ್ಥಾಯ ರಞ್ಞಾ ದಿನ್ನಂ ಪಿಣ್ಡಪಾತಂ ನಭುಞ್ಜಿ. ರಾಜಾ ಚ ಸಚೇ ತ್ವಂ ಮಯಾ ದಿನ್ನಂ ಪಿಣ್ಡಪಾತಂ ಅಭುಞ್ಜಿತುಕಾಮೋ ಭವೇಯ್ಯಾಸಿ, ಮಮ ವಿಜಿತೇ ವಸನ್ತೋಯೇವ ತ್ವಂ ಮಮ ಪಿಣ್ಡಪಾತಾ ನ ಮುಚ್ಚೇಯ್ಯಾಸಿ, ರಟ್ಠವಾಸೀಹಿಪಿ ದಿನ್ನಪಿಣ್ಡಪಾತೋ ಮಯ್ಹಮೇವ ಸನ್ತಕೋ, ನನು ನಾಮ ಮಮ ಪಿಣ್ಡಪಾತಂಯೇವ ತ್ವಂ ಭುಞ್ಜಸೀತಿ ಆಹ.

ಸೀಲಬುದ್ಧಿತ್ಥೇರೋಪಿ ಸಚೇ ಅಹಂ ಏವಂ ಭವೇಯ್ಯಾಮಿ, ಸೀಹಳದೀಪಂ ಗನ್ತ್ವಾ ವಸಿಸ್ಸಾಮೀತಿ ಚಿನ್ತೇತ್ವಾ ಅರಞ್ಞೇ ವಸಿ.

ಅಥ ತಮತ್ಥಂ ಜಾನಿತ್ವಾ ನಗರದ್ವಾರೇ ಆರಕ್ಖೋ ಏಕೋ ಯಕ್ಖೋ ರಞ್ಞೋ ಆಗತಕಾಲೇ ಅಭಿಮುಖಂ ಠಿತೋವ ಭಯಾನಕರೂಪಂ ನಿಸೀದಿ. ಅಥ ನಾನಾವಿಜ್ಜಾಕಮ್ಮೇಹಿ ಅಪನೇನ್ತೋಪಿ ನ ಸಕ್ಕಾ ಅಪನೇತುಂ.

ಅಥ ರಾಜಾ ನಿಮಿತ್ತಪಾಠಕೇ ಪಕ್ಕೋಸಾಪೇತ್ವಾ ಪುಚ್ಛಿ,-ಕೇನ ಕಾರಣೇನ ಅಯಂ ಯಕ್ಖೋ ಇಧ ನಿಸಿನ್ನೋತಿ. ತ್ವಂ ಮಹಾರಾಜ ಸೀಲಬುದ್ಧಿತ್ಥೇರಂ ಅಗಾರವವಸೇನ ಪುಬ್ಬೇ ಕಥೇಸಿ, ಯಕ್ಖಾಪಿ ಥೇರೇ ಅತಿವಿಯ ಪಸನ್ನಾತಿ ಅಮ್ಹೇಹಿ ಸುತಪುಬ್ಬಾ, ತಂ ಪಟಿಚ್ಚ ಯಕ್ಖೋ ಭಯಾನಕರೂಪಂ ದಸ್ಸೇತ್ವಾ ನಿಸಿನ್ನೋ ಭವಿಸ್ಸತೀತಿ ಆಹ.

ರಾಜಾಪಿ ಅಮಚ್ಚೇ ಆಣಾಪೇಸಿ ಥೇರಂ ಪಕ್ಕಾಸಥಾತಿ. ಥೇರೋ ನಾಗಚ್ಛಿ. ಸೀಹಳದೀಪಂಯೇವ ಗಮಿಸ್ಸಾಮೀತಿ ಆರಭಿ. ತಮತ್ಥಂ ಸುತ್ವಾ ರಾಜಾ ಏಕಂ ಚತುರಙ್ಗಪಚ್ಚಯಂ ನಾಮ ಅಮಚ್ಚಂ ಪಕ್ಕೋಸಾಪೇತ್ವಾ ತ್ವಂ ಗನ್ತ್ವಾ ಥೇರಂ ಪಕ್ಕೋಸಾಹೀತಿ ಪೇಸೇಸಿ. ಚತುರಙ್ಗಪಚ್ಚಯೋ ಚ ಛೇಕತಾಯ ಏಕಂ ಸುವಣ್ಣಮಯಂ ಬುದ್ಧಪ್ಪಟಿಬಿಮ್ಬಂ ನಾವಾಯ ಠಪೇತ್ವಾ ಮಹಾಸಮುದ್ದತಿತ್ಥಂ ಅಗಮಾಸಿ. ಅಥ ಥೇರಂ ಸಮ್ಪಾಪುಣಿತ್ವಾ ¶ ಇದಾನಿ ಇಧ ಭಗವಾ ಸಮ್ಮಾಸಮ್ಬುದ್ಧೋ ಅಗಮಾಸಿ, ಸೀಲಬುದ್ಧಿತ್ಥೇರೋ ಭಗವತೋ ಸಮ್ಮಾಸಮ್ಬುದ್ಧಸ್ಸ ದಸ್ಸನತ್ಥಾಯ ಆಗಚ್ಛತೂತಿ ದೂತಂ ಪೇಸೇಸಿ. ಥೇರೋಪಿ ಭಗವತೋ ಸಮ್ಮಾಸಮ್ಬುದ್ಧಸ್ಸ ದಸ್ಸನತ್ಥಾಯ ಆಗಚ್ಛತೂತಿ ವಚನಂ ಪಟಿಕ್ಖಿಪಿತುಂ ಬುದ್ಧಗಾರವವಸೇನ ಅವಿಸಹತಾಯ ಆಗಚ್ಛೀತಿ.

ಪೋರಾಣಿಕಾನಂವ ಥೇರಾನಂ, ಬುದ್ಧೇ ಸಗಾರವಂ ಇಧ;

ಪಣ್ಡಿತೋ ಗಾರವಂ ಬುದ್ಧೇ, ಕರೇ ಪಸನ್ನಚೇತಸಾತಿ.

ನಾವಂ ಅಭಿರೂಹಿತ್ವಾ ಥೇರೋ ಭಗವತೋ ಸಮ್ಮಾಸಮ್ಬುದ್ಧಸ್ಸ ವನ್ದನಾಮಾನಪೂಜಾಸಕ್ಕಾರದೀನಿ ಅಕಾಸಿ. ಥೇರಸ್ಸ ಏವಂ ವನ್ದನಾಮಾನಪೂಜಾಸಕ್ಕಾರಾದೀನಿ ಕರೋನ್ತಸ್ಸೇವ ವೇಗೇನ ನಾವಂ ಆನೇತ್ವಾ ಗಚ್ಛಿ. ಅಥ ಚತುರಙ್ಗಪಚ್ಚಯೋ ಏವಮಾಹ,– ಇದಾನಿ ಭನ್ತೇ ತುಮ್ಹಾಕಂ ಆಚರಿಯಸ್ಸ ಸಮ್ಮಾಸಮ್ಬುದ್ಧಸ್ಸ ಸಾಸನಂ ಪಗ್ಗಣ್ಹಿತುಂ ಯುತ್ತೋತಿ. ರಾಜಾ ಚ ಅಮಚ್ಚೇಹಿ ಪರಿವಾರಿತೋ ಪಚ್ಚುಗ್ಗಚ್ಛಿ. ನಾವಾಯ ಥೇರಸ್ಸ ಹತ್ಥೇ ಗಹೇತ್ವಾ ರಾಜಗೇಹಂ ಆನೇಸಿ. ದ್ವಾರಂ ಪತ್ತಕಾಲೇ ಯಕ್ಖೋ ಪಥವಿಯಂ ನಿಸೀದಿತ್ವಾ ಥೇರಂ ವನ್ದಿ.

ರಾಜಾ ರಾಜಗೇಹಂ ಪತ್ವಾ ಥೇರಂ ನಾನಾಭೋಜನೇಹಿ ಭೋಜೇಸಿ. ಏವಞ್ಚ ಅವೋಚ,–ಅಜ್ಜತಗ್ಗೇ ಭನ್ತೇ ತ್ವಮಸಿ ಮಮಾಚರಿಯೋ, ಭಗವತೋವ ಓವಾದಂ ಸಿರಸಾ ಪಟಿಗ್ಗಹೇತ್ವಾ ಅನುವತ್ತಿಸ್ಸಾಮಾತಿ ಅತ್ತನೋ ಪಞ್ಚಪುತ್ತೇಪಿ ಥೇರಸ್ಸ ಅದಾಸಿ. ತೇ ಚ ಪಞ್ಚಕುಮಾರಾ ಥೇರೇನ ಸದ್ಧಿಂ ಅನುವತ್ತಿಂಸು. ಥೇರೋ ತೇ ಪಕ್ಕೋಸೇತ್ವಾ ವಿಹಾರಂ ಅಗಮಾಸಿ. ಅನ್ತರಾಮಗ್ಗೇ ಕಪ್ಪಿಯಪಥವಿಯಂ ಪಞ್ಚ ಪರಿಮಣ್ಡಲಾಕಾರಾನಿ ಲಿಖಿತ್ವಾ ತೇಸಂ ರಾಜಕುಮಾರಾನಂ ದಸ್ಸೇತ್ವಾ ನಿವತ್ತಾಪೇಸಿ. ರಾಜಕುಮಾರಾ ಪಟಿನಿವತ್ತಿತ್ವಾ ತಂ ಕಾರಣಂ ರಞ್ಞೋ ಆರೋಚೇಸುಂ. ರಾಜಾ ಚ ತುಮ್ಹಾಕಂ ಪುಞ್ಞಂ ಕಾರಾಪನತ್ಥಾಯ ದಸ್ಸೇತೀತಿ ವತ್ವಾ ತುಲಾವಸೇನ ತೇಹಿ ರಾಜಕುಮಾರೇಹಿ ಸುವಣ್ಣಂ ಸಮಂ ಕತ್ವಾ ತೇನ ಸುವಣ್ಣೇನ ಮೂಲಂ ಕತ್ವಾ ಭಗವತೋ ಧರಮಾನಕಾಲೇ ¶ ಪಸ್ಸೇನದಿಕೋಸಲರಞ್ಞಾ ಕಾರಾಪಿತಂ ಚನ್ದನಪ್ಪಟಿಬಿಮ್ಬಂವಿಯ ವಿಸುಂ ವಿಸುಂ ಪಟಿಬಿಮ್ಬಂ ಕಾರಾಪೇಸಿ.

ತೇಸಂ ನಿಧಾನಟ್ಠಾನಭೂತಾನಿ ಪಞ್ಚ ಚೇತಿಯಾನಿಪಿ ಸಕ್ಕೋ ಕಮ್ಮ ವಿಧಾಯಕೋ ಹುತ್ವಾ ಪತಿಟ್ಠಾಪೇಸಿ. ಏತ್ಥ ಚ ಪುಬ್ಬೇ ರಞ್ಞಾ ಪಸೀದಿತ್ವಾ ಥೇರಸ್ಸ ರಾಜಕುಮಾರಾ ದಿನ್ನಾ, ಮೂಲಂ ರತನತ್ತಯಸ್ಸ ದತ್ವಾ ಪುನ ರಾಜಕುಮಾರೇ ಭೂಜಿಸ್ಸೇ ಕಾರೇತುಕಾಮತಾಯ ಥೇರೋ ಏವಂ ಸಞ್ಞಂ ಅದಾಸೀತಿ ದಟ್ಠಬ್ಬಂ.

ಸೋ ಚ ಸೀಲಬುದ್ಧಿತ್ಥೇರೋ ಅರಹನ್ತಗಣವಂಸೋತಿ ದಟ್ಠಬ್ಬೋ.

ಅರಿಮದ್ದನನಗರೇಯೇವ ನರಪತಿ ರಞ್ಞೋ ಕಾಲೇ ಕಸ್ಸಪೋ ನಾಮ ಥೇರೋ ದೇಸಚಾರಿಕಂ ಚರಮಾನೋ ಪೋಲ್ಲೋಙ್ಕನಾಮಕಂ ದೇಸಂ, ತದವಸರಿ. ಅಥ ದ್ವೇ ಮಹಲ್ಲಕಪೋಲ್ಲೋಙ್ಕಾ ಮನುಸ್ಸಾ ಥೇರೇ ಅತಿಪ್ಪಸನ್ನತಾಯ ದ್ವೇ ಪುತ್ತೇ ಉಪಟ್ಠಾಕತ್ಥಾಯ ನಿಯ್ಯಾದೇಸುಂ.

ಪೋಲ್ಲೋಙ್ಕಮನುಸ್ಸಾನಂ ಅತಿಪ್ಪಸನ್ನತಂ ಪಟಿಚ್ಚ ಥೇರೋಪಿ ಪೋಲ್ಲೋಙ್ಕತ್ಥೇರೋತಿ ವೋಹಾರಿಯತಿ. ಯದಾ ಚ ಪನ ಸೋ ಥೇರೋ ಸೀಹಳದೀಪಂ ಗನ್ತುಕಾಮೋ ಅಹೋಸಿ, ತದಾ ಸಕ್ಕೋ ದೇವಾನಮಿನ್ದೋ ಬ್ಯಗ್ಘರೂಪಂ ಮಾಪೇತ್ವಾ ಪಿಟ್ಠಿಯಾ ಯಾವ ಮಹಾಸಮುದ್ದತೀರಂ ಆನೇಸಿ. ಮಹಾಸಮುದ್ದತೀರಂ ಪನ ಪತ್ವಾ ನಾವಂ ಅಭಿರೂಹಿತ್ವಾ ವಾಣಿಜೇಹಿ ಸದ್ಧಿಂ ತರಿ.

ಮಹಾಸಮುದ್ದಮಜ್ಝೇ ಪನ ಪತ್ವಾ ಸಾ ನಾವಾ ನ ಗಚ್ಛಿ, ನಿಚ್ಚಲಾವ ಅಟ್ಠಾಸಿ. ಅಥ ವಾಣಿಜಾ ಮನ್ತೇಸುಂ,-ಅಮ್ಹಾಕಂ ನಾವಾಯ ಅಲಕ್ಖೀ ಪಾಪಜನೋ ಅತ್ಥಿ ಮಞ್ಞೇತಿ. ಏವಂ ಪನ ಮನ್ತೇತ್ವಾ ಸಲಾಕಾದಾನಂ ಅಕಂಸು. ಯಾವ ತತಿಯಮ್ಪಿ ಥೇರಸ್ಸೇವ ಹತ್ಥೇ ಸಲಾಕಾ ಪುಬ್ಬೇ ಕತಕಮ್ಮವಿಪಾಕವಸೇನ ನಿಪತಿ. ಇದಂ ಪನ ಥೇರಸ್ಸ ಪುಬ್ಬೇ ಕತಕಮ್ಮಂ,-ಥೇರೋ ಹಿ ತತೋ ಅತ್ತಭಾವತೋ ಸತ್ತಮೇ ಭವೇ ಏಕಸ್ಮಿಂ ಗಾಮೇ ಕುಲದಾರಕೋ ಹುತ್ವಾ ಕೀಳನತ್ಥಾಯ ಏಕಂ ಸುನಖಂ ನದಿಯಂ ಓತಾರೇತ್ವಾ ಉದಕೇ ಕೀಳಮಾಪೇಸಿ. ಏವಂ ಕೀಳಮನ್ತಂ ಸುನಖಂ ಸಯಮೇವ ಉರೇನ ಉಗ್ಗಹೇತ್ವಾ ತೀರಂ ಆನೇಸೀತಿ ಏವಂ ¶ ಪುಬ್ಬೇ ಕತಕಮ್ಮವಿಪಾಕವಸೇನ ಥೇರಸ್ಸೇವ ಹತ್ಥೇ ಸಲಾಕಾ ನಿಪತಿ.

ತದಾ ವಾಣಿಜಾ ಉದಕಪಿಟ್ಠೇ ಖಿಪಿಂಸು. ಅಥ ಸಕ್ಕೋ ದೇವಾನಮಿನ್ದೋ ಕುಮ್ಭೀಲರೂಪಂ ಮಾಪೇತ್ವಾ ಪಿಟ್ಠಿಯಂ ಆರೋಪೇತ್ವಾ ಆನೇಸಿ. ಥೇರೋ ಯಕ್ಖದೀಪಂ ಪತ್ವಾ ಅನ್ಧಚಕ್ಖುಕಾನಂ ಯಕ್ಖಾನಂ ಮೇತ್ತಾನುಭಾವೇನ ಚಕ್ಖುಂ ಲಭಾಪೇಸಿ. ಯಕ್ಖಾ ಚ ಥೇರಸ್ಸ ಗುಣಂ ಞತ್ವಾ ದ್ವೇ ಯಕ್ಖಭಾತಿಕೇ ಅದಂಸು. ಥೇರೋ ಚ ಸೀಹಳದೀಪಂ ಗನ್ತ್ವಾ ಮಹಾಚೇತಿಯರೂಪಂ ಲೋಹಪಾಸಾದರೂಪಂ ಸರೀರಧಾತುಂ ಮಹಾಬೋಧಿಬಿಜಾನಿ ಚ ಆನೇತ್ವಾ ಪಚ್ಚಾಗಮಾಸೀತಿ.

ಸುಮೇಧತ್ಥೇರೋ ಚ ಹಲಙ್ಕಸ್ಸ ನಾಮ ನಗರಸ್ಸ ದಕ್ಖಿಣದಿಸಾಭಾಗೇ ಮ್ಹತ್ತಿಪಾಮೇ ಪುರತ್ಥಿಮಾಯ ಅನುದಿಸಾಯ ದಿನ್ನನಾಮಿಕೇ ವಿಹಾರೇ ವಸಿ. ಠಾನಸ್ಸ ಪನ ನಾಮವಸೇನ ಥೇರಸ್ಸೋಪಿ ದಿನ್ನವಿಹಾರೋ ತ್ವೇವ ನಾಮಂ ಅಹೋಸಿ. ಸೋಪಿ ಥೇರೋ ಪಂಸುಕೂಲಿಕೋ ಲಜ್ಜೀಪೇಸಲೋ ಸಿಕ್ಖಾಕಾಮೋ ಝಾನಲಾಭೀ ಅರಹಾಯೇವ. ಸೋ ಹಿ ದೇವಸಿಕಂ ದೇವಸಿಕಂ ಅಟ್ಠನವಯೋಜನಪ್ಪಮಾಣೇ ಪಾದಚೇತಿಯಂ ಗನ್ತ್ವಾ ವನ್ದಿ. ಚೇತಿಯಙ್ಗಣವತ್ತಞ್ಚ ಅಕಾಸಿ. ತತೋ ಆಗನ್ತ್ವಾ ಮ್ಹತ್ತಿಗಾಮೇ ಪಿಣ್ಡಾಯ ಚರಿ. ಇದಂ ಥೇರಸ್ಸ ನಿಬದ್ಧವತ್ತಂ.

ಅಪರಾನಿಪಿ ವತ್ಥೂನಿ ಬಹೂನಿ ಸನ್ತಿ, ಸಬ್ಬಾನಿ ಪನ ತಾನಿ ವಿತ್ಥಾರೇತ್ವಾ ವತ್ತಬ್ಬಾನಿಪಿ ಗನ್ಥಪಾರವಭಯೇನ ನ ವಕ್ಖಾಮ. ಸಬ್ಬಾನಿಪಿ ಹಿ ವುಚ್ಚಮಾನಾನಿ ಅಯಂ ಸಾಸನವಂಸಪ್ಪದೀಪಿಕಾ ಅತಿಪ್ಪಪಞ್ಚಾ ಭವಿಸ್ಸತಿ.

ಸಮ್ಮಾಸಮ್ಬುದ್ಧಸ್ಸ ಹಿ ಪರಿನಿಬ್ಬಾನತೋ ಯಾವಜ್ಜತನಾ ಥೇರಾನಂ ಪರಮ್ಪರವಸೇನ ಸಙ್ಘಟ್ಟೇತ್ವಾ ಆನಯನಮೇವೇತ್ಥ ಅಧಿಪ್ಪೇತಂ. ಯಥಾವುತ್ತಾನಿ ಪನ ವತ್ಥೂನಿ ಅಧುನಾ ಅಭಿಞ್ಞಾಲಾಭೀನಂ ಪುಗ್ಗಲಾನಂ ಅಖೇತ್ತಭಾವೇನ ಪಸಙ್ಗಞಾಣಪ್ಪಟಿಬಾಹಣತ್ಥಂ ಅರಿಮದ್ದನನಗರೇ ಚ ಬಹೂನಂ ಅಭಿಞ್ಞಾಲಾಭೀನಂ ಪುಗ್ಗಲಾನಂ ನಿವಾಸಟ್ಠಾನತಾ ದಸ್ಸನತ್ಥಂ ವುತ್ತಾನಿ. ವುತ್ತಞ್ಚೇತಂ ಭಿಕ್ಖುನೀಖನ್ಧಕಟ್ಠಕಥಾಯಂ,–

ಪಟಿಸಮ್ಭಿದಾಪತ್ತೇಹಿ ವಸ್ಸಸಹಸ್ಸಂ ಸುಕ್ಖವಿಪಸ್ಸಕೇಹಿ ವಸ್ಸಸಹಸ್ಸಂ ¶ ಅನಾಗಾಮೀಹಿ ವಸ್ಸಸಹಸ್ಸಂ ಸಕದಾಗಾಮೀಹಿ ವಸ್ಸಸಹಸ್ಸಂ ಸೋತಾಪನ್ನೇಹಿ ವಸ್ಸಸಹಸ್ಸನ್ತಿ ಏವಂ ಪಞ್ಚವಸ್ಸಸಹಸ್ಸಾನಿ ಪಟಿವೇಧಧಮ್ಮೋ ಠಸ್ಸತೀತಿ.

ದೀಘನಿಕಾಯಟ್ಠಕಥಾಯಂ ಪನ ಸಂಯುತ್ತನಿಕಾಯಟ್ಠಕಥಾಯಞ್ಚ ಪಟಿಸಮ್ಭಿದಾಪತ್ತೇಹಿ ವಸ್ಸಸಹಸ್ಸಂ ಛಳಾಭಿಞ್ಞೇಹಿ ವಸ್ಸಸಹಸ್ಸಂ ತೇವಿಜ್ಜೇಹಿ ವಸ್ಸಸಹಸ್ಸಂ ಸುಕ್ಖವಿಪಸ್ಸಕೇಹಿ ವಸ್ಸಸಹಸ್ಸಂ ಪಾತಿಮೋಕ್ಖೇನ ವಸ್ಸಸಹಸ್ಸನ್ತಿ ವುತ್ತಂ.

ಅಙ್ಗುತ್ತರನಿಕಾಯಟ್ಠಕಥಾಯಂ ಪನ ವಿಭಙ್ಗಕಥಾಯಞ್ಚ ಬುದ್ಧಾನಂ ಪರಿನಿಬ್ಬಾನತೋ ವಸ್ಸಸಹಸ್ಸಮೇವ ಪಟಿಸಮ್ಭಿದಾ ನಿಬ್ಬತ್ತೇತುಂ ಸಕ್ಕೋನ್ತಿ, ತತೋ ಪರಂ ಛ ಅಭಿಞ್ಞಾ, ತತೋಪಿ ಅಸಕ್ಕೋನ್ತಾ ತಿಸ್ಸೋ ವಿಜ್ಜಾ ನಿಬ್ಬತ್ತಿಂಸು. ಗಚ್ಛನ್ತೇ ಕಾಲೇ ತಾಪಿ ನಿಬ್ಬತ್ತೇತುಂ ಅಸಕ್ಕೋನ್ತಾ ಸುಕ್ಖವಿಪಸ್ಸಕಾ ಹೋನ್ತಿ. ಏತೇನೇವ ನಯೇನ ಅನಾಗಾಮಿನೋ ಸಕದಾಗಾಮಿನೋ ಸೋತಾಪನ್ನಾತಿ ವುತ್ತಂ.

ಏವಂ ನಾನಾನಯೇಹಿ ಅಟ್ಠಕಥಾಯಪಿ ಆಗತತ್ತಾ ಅಧುನಾ ಲೋಕೇ ಅರಿಯಪುಗ್ಗಲಾ ಭವಿತುಂ ನ ಸಕ್ಕಾತಿ ನ ವತ್ತಬ್ಬಂ. ಅರಿಯಾನಮೇವ ಖೇತ್ತಸ್ಸ ಅಧುನಾಪಿ ಸಮ್ಭವತೋ, ಸಚೇ ಆರದ್ಧವಿಪಸ್ಸಕೋ ಭವೇಯ್ಯ ಸೋ ಅರಹಾ ಭವಿತುಂ ಸಕ್ಕಾಯೇವಾತಿ ನಿಟ್ಠಮೇತ್ಥಾವಗನ್ತಬ್ಬಂ. ಅಟ್ಠಕಥಾಸು ಪನ ನಾನಾಭಾಣಕತ್ಥೇರಾನಂ ನಾನಾವಾದವಸೇನ ವುತ್ತನ್ತಿ ದಟ್ಠಬ್ಬಂ. ಏತ್ತಕೇನೇವ ಪನ ನಾನಾಕಾರೇನ ವಾದೋ ಭಿನ್ನೋಪಿ ಸಾಸನಂ ಭಿಜ್ಜತಿಯೇವ. ಸಾಸನಸ್ಸ ಅಭಿನ್ನಂಯೇವ ಹಿ ಏತ್ಥ ಪಮಾಣನ್ತಿ.

ಏವಂ ಮರಮ್ಮಮಣ್ಡಲೇ ಅರಿಮದ್ದನನಗರೇ ಅನೇಕೇಹಿ ಅರಹನ್ತಸತೇಹಿ ಸಾಸನಂ ವಿಜ್ಜೋತತಿ. ಭಗವತೋ ಪನ ಪರಿನಿಬ್ಬಾನತೋ ತಿಂಸಾಧಿಕಾನಂ ನವವಸ್ಸಸತಾನಂ ಉಪರಿ ಪರಮ್ಮರಟ್ಠೇ ಸೇಞಿಲಞ್ಞಿಕ್ರೋಧಿನಾಮೇನ ರಞ್ಞಾ ಸಮಕಾಲವಸೇನ ಸೀಹಳದೀಪೇ ರಜ್ಜಂ ಪತ್ತಸ್ಸ ಮಹಾನಾಮರಞ್ಞೋ ಕಾಲೇ ಬುದ್ಧಘೋಸಬುದ್ಧದತ್ತತ್ಥೇರೇಹಿ ಪಭುತಿ ತೇತೇಮಹಾಥೇರಾ ತೇತೇಗನ್ಥೇ ಅಕಂಸು.

ತತೋ ಪಚ್ಛಾ ಸತಿಸಮಾಧಿಪಞ್ಞಾಮನ್ದವಸೇನ ಸುಖಾವಬೋಧನತ್ಥಂ ¶ ಟೀಕಾಯೋ ಅಕಂಸು. ಅರಿಮದ್ದನನಗರೇ ಜಿನಚಕ್ಕೇಸತ್ತನವುತಾಧಿಕೇ ಛಸತೇ ಸಹಸ್ಸೇ ಚ ಸಮ್ಪತ್ತೇ ತಿಣ್ಣಂ ಪಿಟಕಾನಂ ಮೂಲಭೂತೇಸು ಸದ್ದನಯೇಸು ಸೋತಾರಾನಂ ಛೇಕತ್ಥಾಯ ಮಹಾಸಮುದ್ದೇವಿಯ ಆನನ್ದೋ ನಾಮ ಮಹಾಮಚ್ಛೋ ತೀಸು ಪಿಟಕೇಸು ಸಾಟ್ಠಕಥೇಸು ವಿಲೋಲೇತ್ವಾ ಅಗ್ಗವಂಸೋ ನಾಮ ಥೇರೋ ಸದ್ದನೀತಿಪ್ಪಕರಣಂ ಅಕಾಸಿ. ಅರಿಮದ್ದನನಗರೇ ಹಿ ಉತ್ತರಾಜೀವತ್ಥೇರಾದೀನಂ ಸೀಹಳದೀಪಂ ಗಮನತೋ ಪುಬ್ಬೇಯೇವ ತಯೋ ಮಹಾಥೇರಾ ಪರಿಯತ್ತಿವಿಸಾರದಾ, ಮಹಾಅಗ್ಗಪಣ್ಡಿತೋ, ತಸ್ಸ ಸದ್ಧಿವಿಹಾರಿಕೋ ದುತಿಯಅಗ್ಗಪಣ್ಡಿತೋ, ತಸ್ಸ ಭಾಗಿನೇಯ್ಯೋ ತತಿಯಅಗ್ಗಪಣ್ಡಿತೋತಿ. ತತಿಯಅಗ್ಗಪಣ್ಡಿತೋ ಪನ ಅಗ್ಗವಂಸೋತಿಪಿ ವೋಹಾರಿಯತಿ.

ತಸ್ಮಿಞ್ಚ ಕಾಲೇ ಅರಿಮದ್ದನನಗರವಾಸಿನೋ ಸದ್ದಕೋವಿದಾ ಬಹವೋ ಸನ್ತೀತಿ ಯಾವ ಲಙ್ಕಾದೀಪಾ ಕಿತ್ತಿಘೋಸೋ ಪತ್ಥರಿ. ತಸ್ಮಾ ಸೀಹಳದೀಪಿಕಾ ಸದ್ದಕೋವಿದಾ ವೀಮಂಸೇತುಕಾಮಾ ಹುತ್ವಾ ಅರಿಮದ್ದನನಗರಂ ಆಗಮಂಸು. ತದಾ ಅರಿಮದ್ದನನಗರವಾಸಿನೋ ಭಿಕ್ಖೂ ಸದ್ದನೀತಿಪ್ಪಕರಣಂ ದಸ್ಸೇಸು.

ಸೀಹಳದೀಪಿಕಾ ಚ ತಂ ದಿಸ್ವಾ ಉಪಧಾರೇನ್ತಾ ಸದ್ದವಿಸಯೇ ಅಯಂ ಗನ್ಥೋವಿಯ ಸೀಹಳದೀಪೇ ಗನ್ಥೋ ಇತ್ಥಿ, ಇಮಸ್ಮಿಂ ಪಕರಣೇ ಆಗತವಿನಿಚ್ಛಯಮ್ಪಿ ಸಕಲಂ ನ ಜಾನಿಮ್ಹಾತಿ ನಾನಾಪ್ಪಕಾರೇಹಿ ಥೋಮೇಸುನ್ತಿ ಯಾವಜ್ಜಭನಾ ಕಥಾಮಗ್ಗೋ ನ ಉಪಚ್ಛಿನ್ನೋತಿ.

ಅರಿಮದ್ದನನಗರೇ ಸೀಹಳದೀಪಂ ಗನ್ತ್ವಾ ಪಚ್ಚಾಗತೋ ಛಪ್ಪದೋ ನಾಮ ಸದ್ಧಮ್ಮಜೋತಿಪಾಲತ್ಥೇರೋ ಸದ್ದನಯೇ ಛೇಕತಾಯ ಸುತ್ತನಿದ್ದೇಸಂ ಅಕಾಸಿ. ಪರಮತ್ಥಧಮ್ಮೇ ಚ ಛೇಕತಾಯ ಸಙ್ಖೇಪವಣ್ಣನಂ ನಾಮಚಾರದೀಪಕಞ್ಚ. ವಿನಯೇ ಛೇಕತಾಯ ವಿನಯಗೂಳತ್ಥದೀಪನಿಂ ಸೀಮಾಲಙ್ಕಾರಞ್ಚ ಅಕಾಸಿ. ಅತ್ತನಾ ಕಥಾನಂ ಗನ್ಥಾನಂ ನಿಗಮೇ ಸದ್ಧಮ್ಮ ಜೋತಿಪಾಲೋತಿ ಮೂಲನಾಮೇನ ವುತ್ತಂ. ಕುಸಿಮನಗರೇ ಪನ ಛಪ್ಪದ ಗಾಮೇ ಜಾತತ್ತಾ ಠಾನಸ್ಸ ನಾಮೇನ ಛಪ್ಪದೋತಿ ಪಾಕಟೋ.

ಕುಖನನಗರೇ ಪನ ಛಪ್ಪದೋತಿ ವೋಹಾರಿತೋಪಿ ಏಕೋ ಥೇರೋ ಅತ್ಥಿ. ಸೋ ಅಲಜ್ಜೀ ದುಸ್ಸೀಲೋ. ಏಕಚ್ಚೇ ಪನ ನಾಮಸಾಮಞ್ಞಲೇಸಮತ್ತೇನ ಪತ್ತಲಙ್ಕಂ ಸೀಲವನ್ತಂ ಪೇಸಲಂ ಸಿಕ್ಖಾಕಾಮಂ ಛಪ್ಪದತ್ಥೇರಂ ಅಲಜ್ಜಿದುಸ್ಸೀಲಭಾವೇನ ಉಪವದನ್ತಿ, ಯಥಾ ನಾಮ ಸಾಮಞ್ಞಲೇಸಮತ್ತೇನ ಮಲ್ಲಪುತ್ತಂ ಆಯಸ್ಮನ್ತಂ ದಬ್ಬಂ ಅಸಮಾಚಾರೇನಾತಿ.

ಅರಿಮದ್ದನನಗರಯೇವ ಅಲೋಙ್ಗಚಞ್ಞಿಸೂನಾಮಕಸ್ಸ ರಞ್ಞೋ ಕಾಲೇ ಮಹಾವಿಮಲಬುದ್ಧಿತ್ಥೇರೋ ಚೂಳವಿಮಲಬುದ್ಧಿತ್ಥೇರೋತಿ ದ್ವೇ ಥೇರಾ ಪರಿಯತ್ತಿವಿಸಾರದಾ ಅಹೇಸುಂ. ತೇಸು ಮಹಾವಿಮಲಬುದ್ಧಿತ್ಥೇರೋ ಕಚ್ಚಾಯನಸ್ಸ ಸಂವಣ್ಣನಂ ನ್ಯಾಸಗನ್ಥಮಕಾಸಿ.

ಕೇಚಿ ಪನ ಸೀಹಳದೀಪವಾಸೀ ವಿಮಲಬುದ್ಧಿತ್ಥೇರೋ ತಮಕಾಸೀತಿ ವದನ್ತಿ. ಚೂಳವಿಮಲಬುದ್ಧಿತ್ಥೇರೋ ಪನ ವುತ್ತೋದಯಸ್ಸ ಪೋರಾಣಟೀಕಮಕಾಸಿ. ಛನ್ದೋಸಾರತ್ಥವಿಕಾಸಿನಿಂ ಸದ್ಧಮ್ಮಞಾಣತ್ಥೇರೋ ಅಕಾಸಿ. ವಚನತ್ಥಜೋತಿಂ ಪನ ವೇಪುಲ್ಲತ್ಥೇರೋ ಅಕಾಸಿ. ನ್ಯಾಸಗನ್ಥಸ್ಸಪೋರಾಣಟೀಕಂ ನರಪತಿರಞ್ಞೋ ಕಾಲೇ ಏಕೋ ಅಮಚ್ಚೋ ಅಕಾಸಿ.

ಸೋ ಹಿ ರಞ್ಞೋ ಏಕಂ ಓರೋಧಂ ಪಟಿಚ್ಚ ಜಾತಂ ಏಕಂ ಧೀತರಂ ದಿಸ್ವಾ ವಾನರೋವಿಯ ಲೇಪೇ ಲಗ್ಗಿತೋ ತಿಸ್ಸಂ ಪಟಿಬನ್ಧಚಿತ್ತೋ ಹುತ್ವಾ ಲಗ್ಗಿ. ತಮತ್ಥಂ ಜಾನಿತ್ವಾ ರಾಜಾ ಏವಮಾಹ,– ಸಚೇ ಏತಂ ಇಚ್ಛೇಯ್ಯಾಸಿ, ಏಕಂ ಗನ್ಥಂ ಪರಿಪುಣ್ಣವಿನಿಚ್ಛಯಂ ಗೂಳತ್ಥಂ ಕರೋಹಿ, ಸಚೇ ತ್ವಂ ತಾದಿಸಂ ಗನ್ಥಂ ಕಾತುಂ ಸಕ್ಕುಣೇಯ್ಯಾಸಿ, ಏತಂ ಲಭಿಸ್ಸಸೀತಿ. ಅಥ ಸೋ ನ್ಯಾಸಸ್ಸ ಸಂವಣ್ಣನಂ ಪೋರಾಣಟೀಕಂ ಅಕಾಸಿ.

ತತೋ ಪಚ್ಛಾ ಹೀನಾಯಾವತ್ತಿತ್ವಾ ಧೀತರಂ ದತ್ವಾ ರಜ್ಜುಗ್ಗಾಹಾಮಚ್ಚಟ್ಠಾನೇ ಠಪೇಸಿ, ಯಂ ಮರಮ್ಮವೋಹಾರೇನ ಸಂಪ್ಯಙ್ಗಇತಿ ವುಚ್ಚತಿ. ತೇನ ಪನ ಕತತ್ತಾ ಸೋಪಿ ಗನ್ಥೋ ತಂ ನಾಮೇನ ವುಚ್ಚತಿ. ಕಾರಿಕಂ ತಸ್ಸಾ ಚ ಸಂವಣ್ಣನಂ ಛತ್ತಗುಹಿನ್ದಸ್ಸ ನಾಮ ರಞ್ಞೋ ಕಾಲೇಧಮ್ಮಸೇನಾಪತಿತ್ಥೇರೋ ಅಕಾಸಿ. ತೇನ ಕಿರ ಕಾರಪಿತೇ ನನ್ದಗುಹಾಯ ಸಮೀಪೇ ನನ್ದವಿಹಾರೇ ನಿಸೀದಿತ್ವಾ ಅಕಾಸಿ.

ತಸ್ಮಿಞ್ಚಕಾಲೇ ¶ ಗನ್ಥಮಾದನಪಬ್ಬತೇ ನನ್ದಮೂಲಗುಹತೋ ಅರಹನ್ತಾ ಆಗನ್ತ್ವಾ ತಸ್ಮಿಂ ವಿಹಾರೇ ವಸ್ಸಂ ಉಪಗಚ್ಛಿಂಸು. ತೇಸಂ ಸಮ್ಮುಖೇ ಕತತ್ತಾ ತೇ ಚ ಗನ್ಥಾ ಪಣ್ಡಿತೇಹಿ ಸಾರತೋ ಪಚ್ಚೇತಬ್ಬಾತಿ ಆಚರಿಯಾ ವದನ್ತಿ.

ವಾಚ್ಚವಾಚಕಂ ಪನ ಧಮ್ಮದಸ್ಸೀ ನಾಮ ಸಾಮಣೇರೋ ಅಕಾಸಿ.

ಸದ್ದತ್ಥಭೇದಚಿನ್ತಂ ಪನ ಅರಿಮದ್ದನನಗರಸಮೀಪೇ ಠಿತಸ್ಸ ಖಣಿತ್ತಿಪಾದಪಬ್ಬತಸ್ಸ ಸಮೀಪೇ ಏಕಸ್ಮಿಂ ಗಾಮೇ ವಸನ್ತೋ ಸದ್ಧಮ್ಮಸಿರಿ ನಾಮ ಥೇರೋ ಅಕಾಸಿ. ಸೋಯೇವ ಥೇರೋ ಬ್ರಹಜಂ ನಾಮ ವೇದಸತ್ಥಮ್ಪಿ ಮರಮ್ಮಭಾಸಾಯ ಪರಿವತ್ತೇಸಿ.

ಏಕಕ್ಖರಕೋಸಂ ಪನ ಸದ್ಧಮ್ಮಕಿತ್ತಿತ್ಥೇರೋ ಅಕಾಸಿ. ಸೋ ಹಿ ಕಲಿಯುಗೇ ಸತ್ತಾಸೀತಾಧಿಕೇ ಅಟ್ಠಸತೇ ಸಮ್ಪತ್ತೇ ಮಿಚ್ಛಾ ದಿಟ್ಠಿಕಾನಂ ಜಲುಮಸಞ್ಞಿತಾನಂ ಕುಲಾನಂ ಭಯೇನ ಸಕಲೇಪಿ ತಮ್ಬದೀಪರಟ್ಠೇ ಸಾಸನೋಭಾಸೋ ಮಿಲಾಯತಿ. ಬಹೂನಿಪಿ ಪೋತ್ಥಕಾನಿ ಅಗ್ಗಿಭಯೇನ ನಸ್ಸೇಸುಂ.

ತದಾ ತಂ ಪವತ್ತಿಂ ಪಸ್ಸಿತ್ವಾ ಸಚೇ ಪರಿಯತ್ತಿಧಮ್ಮೋವಿನಸ್ಸೇಯ್ಯ, ಪಟಿಪತ್ತಿಧಮ್ಮೋಪಿ ನಸ್ಸಿಸ್ಸತಿ, ಪಟಿಪತ್ತಿಧಮ್ಮೇ ನಸ್ಸನ್ತೇ ಕುತೋ ಪಟಿವೇಧಧಮ್ಮೋ ಭವಿಸ್ಸತೀತಿ ಸಂವೇಗಂ ಅಪಜ್ಜಿತ್ವಾ ಇಮಂ ಗನ್ಥಂ ಅಕಾಸೀತಿ ತಟ್ಟಿಕಾಯಂ ವುತ್ತಂ.

ಮುಖಮತ್ತಸಾರಂ ಸಾಗರತ್ಥೇರೋ ಅಕಾಸಿ.

ಕಲಿಯುಗೇ ಏಕಾಸೀತಾಧಿಕೇ ಪಞ್ಚಸತೇ ಸಮ್ಪತ್ತೇ ಏಕಂ ದಹರಪುತ್ತಂ ಕಾಲಙ್ಕತಂ ಪಟಿಚ್ಚ ಸಂವೇಗಂ ಆಪಜ್ಜಿತ್ವಾ ಪಚ್ಚೇಕಬುದ್ಧತ್ತಂ ಪತ್ಥಯನ್ತಸ್ಸ ಜೇಯ್ಯಸಿಙ್ಖನಾಮಕಸ್ಸ ರಞ್ಞೋ ಪುತ್ತೋ ಕ್ಯಚ್ವಾನಾಮಕೋ ರಾಜಾ ರಜ್ಜಂ ಕಾರೇಸಿ. ಧಮ್ಮರಾಜಾತಿಪಿ ನಾಮಲಞ್ಛಂ ಪಟಿಗ್ಗಣ್ಹಿ. ತೀಸು ಪನ ಪಿಟಕೇಸು ಯಥಾಭೂತಂ ವಿಜಾನಕತಾಯ ಮರಮ್ಮವೋಹಾರೇನ ಕ್ಯಚ್ವಾತಿ ವೋಹಾರಿಯತಿ.

ಸೋ ಚ ಕಿರ ರಾಜಾ ಪಾಳಿಅಟ್ಠಕಥಾಟೀಕಾಗನ್ಥನ್ತರೇಸು ಅತಿಛೇಕತಾಯ ಪಿಟಕತ್ತಯೇ ಸಾಕಚ್ಛಮತ್ತಮ್ಪಿ ಕಾತುಂ ಸಮತ್ಥೋ ¶ ನಾಮ ನತ್ಥೀತಿ ಉಗ್ಗಹಿತತಿಪಿಟಕೋ ಹುತ್ವಾ ಭಿಕ್ಖುಸಙ್ಘಮ್ಪಿ ದಿವಸೇ ಸತ್ತಹಿ ವಾರೇಹಿ ಗನ್ಥಂ ವಾಚೇತಿ.

ಖಣಿತ್ತಿಪಾದಪಬ್ಬತಸ್ಸ ಸಮೀಪೇಪಿ ಏಕಂ ತಳಾಕಂ ಕಾರಾಪೇತ್ವಾ ತತ್ಥ ರಾಜಾಗಾರಂ ಕಾರಾಪೇತ್ವಾ ತತ್ಥ ನಿಸೀದಿತ್ವಾ ಗನ್ಥಂ ವಾಚೇತಿ. ಸಬ್ಬಾನಿ ಪನ ರಾಜೂನಂ ಕಿಚ್ಚಾನಿ ಪುತ್ತಸ್ಸೇವ ಉಪರಾಜಸ್ಸ ನಿಯ್ಯಾದೇಸಿ. ಗನ್ಥಂ ಉಗ್ಗಣ್ಹನ್ತಾನಂ ಓರೋಧಾನಮತ್ಥಾಯ ಸಙ್ಖೇಪತೋ ಸದ್ದಬಿನ್ದುಂ ನಾಮ ಪಕರಣಂ ಪರಮತ್ಥಬಿನ್ದುಞ್ಚ ನಾಮ ಪಕರಣಂ ಅಕಾಸಿ. ತಸ್ಸ ಹಿ ಚಿತ್ತಂ ಪರಿಯತ್ತಿಯಂಯೇವ ರಮತಿ. ಅಞ್ಞಂ ಪನ ರಾಜಕಿಚ್ಚಂ ಸುಣಿತುಮ್ಪಿ ನ ಇಚ್ಛಿ. ಅನುರುದ್ಧರಾಜಾ ಅನಾಗತೇ ಅಹಂ ರಾಜಾ ಭವೇಯ್ಯಾಮಿ, ತದಾಯೇವ ಇಮಾನಿ ತಾಳಿಬೀಜಾನಿ ಉಟ್ಠಹನ್ತೂತಿ ಅಧಿಟ್ಠಹಿತ್ವಾ ರೋಪೇಸಿ. ತಾನಿ ತಸ್ಸ ರಞ್ಞೋ ಕಾಲೇ ಉಟ್ಠಹಿಂಸು. ತೇನೇವ ಅನುರುದ್ಧರಾಜಾಯೇವಾಯನ್ತಿ ರಟ್ಠವಾಸಿನೋ ಸಞ್ಜಾನಿಂಸು. ಸಮ್ಮುತಿರಾಜಾ ಹಿ ಅನುರುದ್ಧರಾಜಾ ಕ್ಯಚ್ವಾರಾಜಾತಿ ಇಮೇ ತಯೋ ಏಕಸನ್ತಾನಾತಿ ವದನ್ತಿ.

ಸೋ ರಾಜಾ ಏಕಮ್ಪಿ ಚೇತಿಯಂ ಅಕಾಸಿ, ನ ತಂ ನಿಟ್ಠಂ ಅಗಮಾಸಿ, ಪರಿಯತ್ತಿಯಂಯೇವ ಪರಿಚಾರಕತ್ತಾತಿ ರಾಜವಂಸೇ ಆಗತಂ. ಲೋಕಸಮ್ಮುತಿವಸೇನ ಕಕ್ಖಳದಿನೇ ಇಟ್ಠಕಾನಿ ಕಾರಾಪೇತ್ವಾ ತಸ್ಮಿಂಯೇವ ದಿನೇ ಭೂಮಿಸಮಂ ಕತ್ವಾ ತಸ್ಮಿಂಯೇವ ದಿನೇ ಅಞ್ಞಮ್ಪಿ ಸಬ್ಬಂ ಕಾರಾಪೇಸಿ. ತೇನ ಮರಮ್ಮವೋಹಾರೇನ ಪ್ರಸ್ಸದಾ ಚೇತಿಯನ್ತಿ ಯಾವಜ್ಜಭನಾ ಪಾಕಟಂ.

ತಸ್ಸ ರಞ್ಞೋ ಏಕಾ ಧಿಭಾ ವಿಭತ್ಯತ್ಥಂ ನಾಮ ಗನ್ಥಂ ಅಕಾಸೀತಿ.

ಪುಬ್ಬೇ ಕಿರ ಅರಿಮದ್ದನನಗರೇ ಉಗ್ಗಹಧಾರಣಾದಿವಸೇನ ಸಾಸನಂ ಅತಿವಿಯ ವಿರೂಳಮಾಪಜ್ಜಿ. ಅರಿಮದ್ದನನಗರೇಯೇವ ಹಿ ಏಕೋ ವುಡ್ಢಪಬ್ಬಜಿತೋ ಭಿಕ್ಖು ಗನ್ಥಂ ಲಿಖಿತುಂ ಸಿಲಾಲೇಖನದಣ್ಡೇನ ಇಚ್ಛನ್ತೋ ರಾಜಗೇಹಂ ಪಾವಿಸಿ. ರಾಜಾ ಕೇನ ಆಗತೋಸೀತಿ ಪುಚ್ಛಿ. ಗನ್ಥಂ ಲಿಖಿತುಂ ಸಿಲಾಲೇಖನದಣ್ಡೇನ ಇಚ್ಛನ್ತೋ ಆಗತೋ ಮ್ಹೀತಿ. ಏವಂ ಮಹಲ್ಲಕೋ ತ್ವಂ ಗನ್ಥಂ ಮಹುಸ್ಸಾಹೇನ ಪರಿಯಾಪುಣನ್ತೋಪಿ ¶ ಗನ್ಥೇಸು ಛೇಕಸ್ಸ ಓಕಾಸಂ ನ ಪಸ್ಸಾಮಿ, ಸಚೇ ಹಿಮುಸಲೋ ಅಙ್ಕುರಂ ಉಟ್ಠಾಪೇತ್ವಾ ರೂಹೇಯ್ಯ, ಏವಂ ಸತಿ ತ್ವಂ ಗನ್ಥೇಸು ಛೇಕತಂ ಆಪಜ್ಜೇಯ್ಯಾಸೀತಿ ಆಹ.

ತತೋ ಪಚ್ಛಾ ವಿಹಾರಂ ಗನ್ತ್ವಾ ದೇವಸಿಕಂ ದೇವಸಿಕಂ ಏಕದನ್ತಕಟ್ಠಪ್ಪಮಾಣತ್ತಂ ಲೇಖನಂ ಉಗ್ಗಹೇತ್ವಾ ಕಚ್ಚಾಯನಅಭಿಧಮ್ಮೇತ್ಥಸಙ್ಗಹಪ್ಪಕರಣಂ ಆದಿಂ ಕತ್ವಾ ಆಚರಿಯಸ್ಸ ಸನ್ತಿಕೇ ಉಗ್ಗಣ್ಹಿ. ಸೋ ಅಚಿರೇನೇವ ಗನ್ಥೇಸು ಛೇಕತಂ ಪತ್ವಾ ಮುಸಲೇ ಜಮ್ಬುರುಕ್ಖಙ್ಕುರಂ ಬನ್ಧಿತ್ವಾ ಉಸ್ಸಾಪೇತ್ವಾ ರಾಜಗೇಹಂ ಪಾವಿಸಿ.

ಅಥ ತಂ ರಾಜಾ ಪುಚ್ಛಿ,-ಕೇನಆಗತೋಸೀತಿ. ಅಯಂ ಮಹಾರಜ ಮುಸಲೋ ಅಙ್ಕುರಂ ಉಟ್ಠಾಪೇತ್ವಾ ರೂಹತೀತಿ ಆಚಿಕ್ಖಿತುಂ ಆಗತೋಮ್ಹೀತಿ ವುತ್ತೇ ರಾಜಾ ಏತಸ್ಸ ಗನ್ಥೇಸು ಛೇಕತಂ ಪತ್ತೋಮ್ಹೀತಿ ವುತ್ತಂ ಹೋತೀತಿ ಜಾನಾಸಿ. ತಂ ಸಚ್ಚಂ ವಾ ಅಲಿಕಂ ವಾತಿ ವೀಮಂಸನತ್ಥಾಯ ಮಹಾಥೇರಾನಂ ಸನ್ತಿಕಂ ಪಹಿಣಿ. ಮಹಾಥೇರಾಪಿ ಗೂಳಟ್ಠಾನಂ ಪುಚ್ಛಿಂಸು. ಸೋಪಿ ಪುಚ್ಛಿತಂ ಪುಚ್ಛಿತಂ ಬ್ಯಾಕಾಸಿ.

ಅಥ ಸೋ ಭಿಕ್ಖು ಮಹಾಥೇರೇ ಏವಮಾಹ,-ತುಮ್ಹೇ ಭನ್ತೇ ಮಂ ಬಹೂ ಪುಚ್ಛಥ, ಅಹಮ್ಪಿ ತುಮ್ಹೇ ಪುಚ್ಛಿತುಂ ಇಚ್ಛಾಮಿ, ಓಕಾಸಂ ದೇಥಾತಿ ಯಾಚಿತ್ವಾ ಅಞ್ಞಸಮಾನಚೇತಸಿಕನ್ತಿ ಏತ್ಥ ಅಞ್ಞಸದ್ದಸ್ಸ ಅವಧ್ಯಾಪೇಕ್ಖತ್ತಾ ಅವಧಿಪದಂ ಉದ್ಧರಿತ್ವಾ ದಸ್ಸೇಥಾತಿ ಪುಚ್ಛಿ. ಮಹಾಥೇರಾಪಿ ಪುಬ್ಬೇ ಅಮನಸಿಕತತ್ತಾ ಸೀಘಂ ವಿಸ್ಸಜ್ಜಿತುಂ ನ ಸಕ್ಖಿಂಸು. ರಾಜಾ ತಮತ್ಥಂ ಸುತ್ವಾ ತುಟ್ಠಚಿತ್ತೋ ಹುತ್ವಾ ದಿಸಾ ಪಾಮೋಕ್ಖನಮೇನ ಆಚರಿಯಟ್ಠಾನೇ ಠಪೇಸಿ. ಸೋ ಪನ ಭಿಕ್ಖು ಅಗನ್ಥಕಾರಕೋಪಿ ಗನ್ಥಕಾರಕೋವಿಯ ಪಚ್ಛಿಮಾನಂ ಜನತಾನಂ ದಿನ್ನೋಪದೇಸವಸೇನ ಉಪಕಾರಂ ಕತ್ವಾ ಸಾಸನೇ ಉಪ್ಪಜ್ಜೀತಿ. ಹೋನ್ತಿ ಚೇತ್ಥ,–

ಅಹಂ ಮಹಲ್ಲಕೋ ಹೋಮಿ, ದುಪ್ಪಞ್ಞೋ ಪರಿಯತ್ತಿಕಂ;

ಉಗ್ಗಹಂ ಮಹುಸ್ಸಾಹೇನ, ನ ಸಕ್ಖಿಸ್ಸಾಮಿ ಜಾನಿತುಂ.

ಪುಬ್ಬೇ ಕಿರ ಅರಿಮದ್ದನನಗರೇ ಮಾತುಗಾಮಾಪಿ ಗನ್ಥಂ ಉಗ್ಗಣ್ಹಿಂಸು. ಯೇಭುಯ್ಯೇನ ಉಗ್ಗಹಧಾರಣಾದಿವಸೇನ ಪರಿಯತ್ತಿಸಾಸನಂ ಪಗ್ಗಹೇಸುಂ. ಮಾತುಗಾಮಾ ಹಿ ಅಞ್ಞಮಞ್ಞಂ ಪಸ್ಸನ್ತಾ ತುಮ್ಹೇ ಕಿತ್ತಕಂ ಗನ್ಥಂ ಉಗ್ಗಣ್ಹಥ, ಕಿತ್ತಕಂ ಗನ್ಥಂ ವಾಚುಗ್ಗತಂ ಕರೋಥಾತಿ ಪುಚ್ಛಿ ಸುನ್ತಿ.

ಏಕೋ ಕಿರ ಮಾತುಗಾಮೋ ಏಕಂ ಮಾತುಗಾ,ಮಂ ಪುಚ್ಛಿ,-ತ್ವಂ ಇದಾನಿ ಕಿತ್ತಕಂ ಗನ್ಥಂ ವಾಚುಗ್ಗತಂ ಕರೋಸೀತಿ. ಅಹಂ ಪನ ಇದಾನಿ ದಹರಪುತ್ತೇಹಿ ಬಲಿಬೋಧತ್ತಾ ಬ್ಯಾಕುಲಂ ಪತ್ವಾ ಬಹುಂ ಗನ್ಥಂ ವಾಚುಗ್ಗತಂ ಕಾತುಂ ನಸಕ್ಕಾ,ಸಮನ್ತಮಹಾಪಟ್ಠಾನೇ ಪನ ಕುಸಲತ್ತಿಕಮತ್ತಂವ ವಾಚುಗ್ಗತಂ ಕರೋಮೀತಿ ಆಹಾತಿ.

ಇದಮ್ಪಿ ಅರಿಮದ್ದನನಗರವಾಸೀನಂ ಮಾತುಗಾಮಾನಮ್ಪಿ ಪರಿಯತ್ತುಗ್ಗಹಣೇ ಏಕಂ ವತ್ಥು,–

ಏಕಂ ಕಿರ ಭಿಕ್ಖುಂ ಪಿಣ್ಡಾಯ ಚರನ್ತಂ ಏಕಾ ದ್ವಾದಸವಸ್ಸಿಕಾ ದಹರಿತ್ಥೀ ಪುಚ್ಛಿ,-ಕಿನ್ನಾಮೋಸಿ ತ್ವಂ ಭನ್ತೇತಿ. ಖೇಮಾನಾಮಾಹನ್ತಿ. ಕಥಞ್ಹಿ ಭನ್ತೇ ಪುಮಾವ ಸಮಾನೋ ಇತ್ಥಿಲಿಙ್ಗೇನ ನಾಮಂ ಅಕಾಸೀತಿ ಆಹ. ಅಥ ಅನ್ತೋಗೇಹೇ ನಿಸಿನ್ನಾ ಮಾತಾ ಸುತ್ವಾ ಧೀತರಂ ಆಹ,-ತ್ವಂ ರಾಜಾದಿಗಣಸ್ಸ ಲಕ್ಖಣಂ ನ ಜಾನಾಸೀತಿ. ಆಮ ಜಾನಾಮಿ, ಅಯಂ ಪನ ಖೇಮಸದ್ದೋ ನ ರಾಜಾದಿಗಣಪಕ್ಖಂ ಭಜತೀತಿ. ಅಥ ¶ ಮಾತಾ ಏವಮಾಹ,-ಅಯಂ ಪನ ಖೇಮಸದ್ದೋ ಏಕದೇಸೇನೇವ ರಾಜಾದಿಗಣಪಕ್ಖಂ ಭಜತೀತಿ.

ಅಯಂ ಪನೇತ್ಥ ಧೀತು ಅಧಿಪ್ಪಾಯೋ,-ನ ರಾಜಾದಿಸದ್ದೋ ಕದಾಚಿ ರಾಜೋತಿ ಪಚ್ಚತ್ತವಚನವಸೇನ ಓಕಾರನ್ತೋ ದಿಸ್ಸತಿ ವಿನಾ ದೇವರಾಜೋತಿಆದಿಸಮಾಸವಿಸಯಂ, ಖೇಮಸದ್ದೋ ಪನ ಕತ್ಥಚಿ ಖೇಮೋತಿ ಚ ಖೇಮನ್ತಿ ಚ ಲಿಙ್ಗನ್ತರವಸೇನ ರೂಪನ್ತರಂ ದಿಸ್ಸತಿ, ತೇನೇವ ಖೇಮಸದ್ದೋ ನ ರಾಜಾದಿಗಣೋತಿ ವೇದಿತಬ್ಬೋತಿ.

ಅಯಂ ಪನ ಮಾತು ಅಧಿಪ್ಪಾಯೋ,-ಖೇಮಸದ್ದೋ ಅಭಿಧೇಯ್ಯಲಿಙ್ಗತ್ತಾ ತಿಲಿಙ್ಗಕೋ,ಯದಾ ಪನ ಸಞ್ಞಾಸದ್ದಾಧಿಕಾರೇ ಪಚ್ಚತ್ತವಚನವಸೇನ ಖೇಮಾತಿ ಆಕಾರನ್ತೋ ದಿಸ್ಸತಿ, ತದಾ ಏಕದೇಸೇನ ಖೇಮಸದ್ದೋ ರಾಜಾದಿಗಣಪಕ್ಖಂ ಭಜತೀತಿ.

ಅರಿಮದ್ದನನಗರೇ ಕಿರ ಏಕಸ್ಸ ಕುಟುಮ್ಬಿಕಸ್ಸ ಏಕೋ ಪುತ್ತೋ ದ್ವೇ ಧೀತರೋ ಅಹೇಸುಂ. ಏಕಸ್ಮಿಞ್ಚ ಕಾಲೇ ಘಮ್ಮಾಭಿಭೂತತ್ತಾ ಗೇಹಸ್ಸ ಉಪರಿತಲೇ ನಹಾಯಿತ್ವಾ ನಿಸೀದಿ. ಅಥ ಏಕಾ ದಾಸೀ ಗೇಹಸ್ಸ ಹೇಟ್ಠಾ ಠತ್ವಾ ಕಿಞ್ಚಿ ಕಮ್ಮಂ ಕರೋನ್ತೀ ತಸ್ಸ ಕುಟುಮ್ಬಿಕಸ್ಸ ಗುಯ್ಹಟ್ಠಾನಂ ಓಲೋಕೇಸಿ. ತಮತ್ಥಂ ಜಾನಿತ್ವಾ ಕುಟುಮ್ಬಿಕೋ ಸಾಖಂ ಓಲೋಕೇಸೀತಿ ಏಕಂ ವಾಕ್ಯಂ ಬನ್ಧಿತ್ವಾ ಪುತ್ತಸ್ಸ ದಸ್ಸೇಸಿ,ಇಮಸ್ಸ ಅತ್ಥಯೋಜನಂ ಕರೋಹೀತಿ. ಅಥ ಪುತ್ತೋ ಅತ್ಥಯೋಜನಂ ಅಕಾಸಿ,-ಸಾಖಂ ರುಕ್ಖಸಾಖಂ ಓಲೇಕೇಸಿ ಉದಿಕ್ಖತೀತಿ. ಅಥ ಪಚ್ಛಾ ಏಕಾಯ ಧೀತುಯಾ ದಸ್ಸೇಸಿ, ಇಮಸ್ಸ ಅತ್ಥಯೋಜನಂ ಕರೋಹೀತಿ. ಸಾಪಿ ಅತ್ಥಯೋಜನಂ ಅಕಾಸಿ,- ಸಾ ಸುನಖೋ ಖಂ ಆಕಾಸಂ ಓಲೋಕೇಸಿ ಉದಿಕ್ಖತೀತಿ. ಅಥ ಪಚ್ಛಾ ಏಕಾಯ ಧೀತುಯಾ ದಸ್ಸೇಸಿ, ಇಮಸ್ಸ ಅತ್ಥ ಯೋಜನಂ ಕರೋಹೀತಿ. ಸಾಪಿ ಅತ್ಥಯೋಜನಂ ಅಕಾಸಿ,-ಸಾ ಇತ್ಥೀ ಖಂ ಅಙ್ಗಜಾತಂ ಓಲೋಕೇಸಿ ಮುಖಂ ಉದ್ಧಂ ಕತ್ವಾ ಓಲೋಕೇಸೀತಿ.

ಏಕೋ ಕಿರ ಸಾಮಣೇರೋ ರತನಪೂರವಾಸೀ ಅರಿಮದ್ದನನಗರೇ ಮಾತುಗಾಮಾಪಿ ¶ ಸದ್ದನಯೇಸು ಅತಿಕೋವಿದಾತಿ ಸುತ್ವಾ ಅಹಂ ತತ್ಥ ಗನ್ತ್ವಾ ಜಾನಿಸ್ಸಾಮೀತಿ ಅರಿಮದ್ದನನಗರಂ ಗತೋ. ಅಥ ಅನ್ತರಾಮಗ್ಗೇ ಅರಿಮದ್ದನನಗರಸ್ಸ ಸಮೀಪೇ ಏಕಂ ದಹರಿತ್ಥಿಂ ಕಪ್ಪಾಸವತ್ಥುಂ ರಕ್ಖಿತ್ವಾ ನಿಸಿನ್ನಂ ಪಸ್ಸಿ. ಅಥ ಸಾಮಣೇರೋ ತಸ್ಸಾ ಸನ್ತಿಕಂ ಮಗ್ಗಪುಚ್ಛನತ್ಥಾಯ ಗಚ್ಛಿ. ಅಥ ದಹರಿತ್ಥೀ ಸಾಮಣೇರಂ ಪುಚ್ಛಿ,-ಕುತೋ ಆಗತೋಸೀತಿ.

ಸಾಮಣೇರೋ ಆಹ,-ರತನಪೂರತೋ ಅಹಂ ಆಗಚ್ಛತೀತಿ. ಕುಹಿಂ ಗತೋಸೀತಿ ವುತ್ತೇ ಅರಿಮದ್ದನನಗರಂ ಗಚ್ಛತೀತಿ ಆಹ. ಅಥ ದಹರಿತ್ಥೀ ಏವಮಾಹ,-ತ್ವಂ ಭನ್ತೇ ಸದ್ದಯೋಗವಿನಿಚ್ಛಯಂ ಅನುಪಧಾರೇತ್ವಾ ಕಥೇಸಿ, ಅಮ್ಹಯೋಗಟ್ಠಾನೇ ಹಿ ತ್ವಂ ನಾಮ ಯೋಗಸದ್ದೇನ ಯೋಜೇತ್ವಾ ಕಥೇಸಿ, ನನು ಪಣ್ಡಿತಾನಂ ವಚನೇನ ನಾಮ ಪರಿಪುಣ್ಣತ್ಥೇನ ಅವಿರುದ್ಧಸದ್ದನಯೇನ ಪುಣ್ಣಿನ್ದುಸಙ್ಕಾಸೇನ ಭವಿತಬ್ಬನ್ತಿ. ಅಥ ಸಾಮಣೇರೋ ಖೇತ್ತವತ್ಥೂನಿ ರಕ್ಖನ್ತೀ ದುಗ್ಗತಾ ದಹರಿತ್ಥೀಪಿ ತಾವ ಸದ್ದನಯಕೋವಿದಾ ಹೋತಿ, ಕಿಮಙ್ಗಂ ಪನ ಭೋಗಸಮ್ಪನ್ನಾ ಮಹಲ್ಲಕಿತ್ಥಿಯೋತಿ ಲಜ್ಜಿತ್ವಾ ತತೋಯೇವ ಪಟಿನಿವತ್ತಿತ್ವಾ ಪಚ್ಚಾಗಮಾಸೀತಿ.

ಇದಂ ಮರಮ್ಮಮಣ್ಡಲೇ ತಮ್ಬದೀಪರಟ್ಠೇ ಅರಿಮದ್ದನನಗರೇ ಥೇರಪರಮ್ಪರವಸೇನ ಸಾಸನಸ್ಸ ಪತಿಟ್ಠಾನಂ.

ಇದಾನಿ ಮರಮ್ಮಮಣ್ಡಲೇಯೇವ ಜೇಯ್ಯವಡ್ಢನರಟ್ಠೇ ಕೇತುಮತೀನಗರೇ ಸಾಸನವಂಸಂ ವಕ್ಖಾಮಿ.

ಕಲಿಯುಗೇ ಹಿ ದ್ವಿಸತ್ತತಾಧಿಕೇ ಅಟ್ಠವಸ್ಸಸತೇ ಸಮ್ಪತ್ತೇ ಜೇಯ್ಯವಡ್ಢನರಟ್ಠೇ ಕೇತುಮತೀನಗರೇ ಮಹಾಸಿರಿಜೇಯ್ಯಸೂರೋ ನಾಮ ರಾಜಾ ರಜ್ಜಂ ಕಾರೇಸಿ. ಏಕಂ ಅತಿಛೇಕಂ ದೇವನಾಗ ನಾಮಕಂ ಏಕಂ ಹತ್ಥಿಂ ನಿಸ್ಸಾಯ ವಿಜಿತಂ ವಿತ್ಥಾರಮಕಾಸಿ. ತಸ್ಸ ಪನ ರಞ್ಞೋ ಕಾಲೇ ಕಲಿಯುಗೇ ದ್ವಿನವುತಾಧಿಕೇ ಅಟ್ಠವಸ್ಸಸತೇ ಸಮ್ಪತ್ತೇ ಮಹಾಪರಕ್ಕಮೋ ನಾಮ ಥೇರೋ ಸೀಹಳದೀಪತೋ ನಾವಾಯ ಆಗನ್ತ್ವಾ ಕೇತುಮತೀನಗರಂ ಸಮ್ಪತ್ತೋ. ರಾಜಾ ಚ ದ್ವಾರಾ ವತೀನಗರಸ್ಸ ¶ ದಕ್ಖಿಣದಿಸಾಭಾಗೇ ಮಹಾವಿಹಾರಂ ಕಾರಾಪೇತ್ವಾ ತಸ್ಸ ಅದಾಸಿ ನಿಚ್ಚಭತ್ತಮ್ಪಿ. ತಸ್ಮಿಞ್ಚ ವಿಹಾರೇ ಸೀಮಂ ಸಮ್ಮನ್ನಿತ್ವಾ ತಿಸ್ಸಂ ಸೀಮಾಯಂ ತುಲಾವಸೇನ ಅತ್ತನಾ ಸಮಂ ಕತ್ವಾ ಲೋಹಮಯಬುದ್ಧಪ್ಪಟಿಬಿಮ್ಬಂ ಕಾರಾಪೇಸಿ. ತಞ್ಚ ಬುದ್ಧಪ್ಪಟಿಬಿಮ್ಬಿಂ ಸಮ್ಪತ್ತಲಙ್ಕಾದೀಪನ್ತಿ ನಾಮೇನ ಪಾಕಟಂ ಅಹೋಸಿ.

ತಸ್ಸ ರಞ್ಞೋ ಕಾಲೇ ಸುರಾಮೇರಯಸಿಕ್ಖಾಪದಂ ಪಟಿಚ್ಚ ವಿಪಾದೋ ಅಹೋಸಿ. ಕಥಂ. ಬೀಜತೋ ಪಟ್ಠಾಯಾತಿ ಸಮ್ಭಾರೇ ಪಟಿಯಾ ದೇತ್ವಾ ಚಾಟಿಯಂ ಪಕ್ಖಿತ್ತಕಾಲತೋ ಪಟ್ಠಾಯ ತಾಲನಾಲಿಕೇರಾದೀನಂ ಪುಪ್ಫರಸೋ ಪುಪ್ಫತೋ ಗಲಿತಾಭಿನವಕಾಲತೋ ಪಟ್ಠಾಯ ಚ ನ ಪಾತಬ್ಬೋತಿ ಕಙ್ಖಾವಿತರಣೀಟೀಕಾದೀಸು ವುತ್ತವಚನೇ ಅಧಿಪ್ಪಾಯಂ ವಿಪಲ್ಲಾಸತೋ ಗಹೇತ್ವಾ ತಾಲನಾಲಿಕೇರಾದೀನಂ ರಸೋ ಗಲಿತಾಭಿನವತೋ ಪಟ್ಠಾಯ ಪಿವಿತುಂ ನ ವಟ್ಟತೀತಿ ಏಕಚ್ಚೇ ವದನ್ತಿ. ಏಕಚ್ಚೇ ಪನ ಏವಂ ವದನ್ತಿ,–ತಾಲನಾಲಿಕೇರಾದೀನಂ ರಸೋ ಗಲಿತಾಭಿನವಕಾಲೇ ಪಿವಿತುಂ ವಟ್ಟತೀತಿ.

ತತ್ಥ ಪುಬ್ಬಪಕ್ಖೇ ಆಚರಿಯಾನಂ ಅಯಮಧಿಪ್ಪಾಯೋ,–

ಬೀಜತೋ ಪಟ್ಠಾಯಾತಿ ಏತ್ಥ ಸಮ್ಭಾರೇ ಪಟಿಯಾದೇತ್ವಾ ಚಾಟಿಯಂ ಪಕ್ಖಿತ್ತಕಾಲತೋ ಪಟ್ಠಾಯ ನ ಪಾತಬ್ಬೋ. ತಾಲನಾಲಿಕೇರಾದೀನಂ ಪುಪ್ಫರಸೋ ಚ ಗಲಿತಾಭಿನವಕಾಲತೋಯೇವ ನ ಪಾತಬ್ಬೋತಿ.

ಅಯಂ ಪನ ಅಪರಪಕ್ಖೇ ಆಚರಿಯಾನಮಧಿಪ್ಪಾಯೋ,–

ಬೀಜತೋ ಪಟ್ಠಾಯಾತಿ ಏತ್ಥ ಸಮ್ಭಾರೇ ಪಟಿಯಾದೇತ್ವಾ ಚಾಟಿಯಂ ಪಕ್ಖಿತ್ತಕಾಲತೋ ಪಟ್ಠಾಯ ನ ಪಾತಬ್ಬೋ. ತಾಲನಾಲಿಕೇರಾದೀನಂ ಸಮ್ಭಾರೇಹಿ ಪಟಿಯಾದಿತೋ ಪುಪ್ಫರಸೋ ಪುಪ್ಫತೋ ಗಲಿತಾಭಿನವಕಾಲತೋ ನ ಪಾತಬ್ಬೋತಿ.

ಏವಂ ತಾಲನಾಲಿಕೇರಾದೀನಂ ರಸೋ ಗಲಿತಾಭಿನವಕಾಲತೋ ಪಟ್ಠಾಯ ಪಾತುಂ ವಟ್ಟತಿ ನ ವಟ್ಟತೀತಿ ವಿವಾದಂ ಕರೋನ್ತಾನಂ ಮಜ್ಝೇ ನಿಸೀದಿತ್ವಾ ಸಮ್ಪತ್ತಲಙ್ಕೋ ಮಹಾಪರಕ್ಕಮತ್ಥೇರೋ ತಾದಿಸೋ ಪಿವಿತುಂ ವಟ್ಟತೀತಿ ವಿನಿಚ್ಛಿನ್ದಿ, ಸುರಾವಿನಿಚ್ಛಯಞ್ಚ ನಾಮ ಗನ್ಥಂ ಅಕಾಸಿ ¶ . ಏವಂ ಕೇತುಮತೀನಗರಂ ಮಾಪೇನ್ತಂ ಮಹಾಸಿರಿಜೇಯ್ಯಸೂರಂ ನಾಮ ರಾಜಾನಂ ನಿಸ್ಸಾಯ ಕೇತುಮತಿಯಂ ಸಾಸನಂ ಪತಿಟ್ಠಹಿ.

ಇದಂ ಮರಮ್ಮಮಣ್ಡಲೇಯೇವ ಕೇತುಮತೀನಗರೇ

ಇದಾನಿ ಮರಮ್ಮಮಣ್ಡಲೇ ತಮ್ಬದೀಪರಟ್ಠೇಯೇವ ಖನ್ಧಪುರಸಾಸನವಂಸಂ ವಕ್ಖಾಮಿ.

ಕಲಿಯುಗೇ ಹಿ ಚತುಸಟ್ಠಾಧಿಕೇ ಛವಸ್ಸಸತೇ ತಯೋ ಭಾತಿಕಾ ಕಿತ್ತಿತರನಾಮಕಂ ರಾಜಾನಂ ರಜ್ಜತೋ ಚಾವೇತ್ವಾ ಖನ್ಧಪುರನಗರೇ ರಜ್ಜಂ ಕಾರೇಸುಂ. ತದಾ ಕಿತ್ತಿತರನಾಮಕಸ್ಸ ರಞ್ಞೋ ಏಕೋ ಪುತ್ತೋ ಚೀನರಟ್ಠಿನ್ದರಾಜಾನಂ ಯಾಚಿತ್ವಾ ಬಹೂಹಿ ಸೇನಙ್ಗೇಹಿ ಖನ್ಧಪುರನಗರಂ ಸಮ್ಪರಿವಾರೇತ್ವಾ ಅಟ್ಠಾಸಿ. ಅಥ ತೀಸು ಪಿಟಕೇಸು ಛೇಕಂ ಏಕಂ ಮಹಾಥೇರಂ ಪಕ್ಕೋಸೇತ್ವಾ ಮನ್ತೇಸುಂ. ಥೇರೋ ಏವಮಾಹ,– ಜನಪದಾಯತ್ತಮಿದಂ ಕಮ್ಮಂ ಸಮಣಾನಂ ನ ಕಪ್ಪತಿ ವಿಚಾರೇತುಂ, ಅಹಮ್ಪಿ ಸಮಣೋ, ನಾಟಕೇಹಿ ಪನ ಸದ್ಧಿಂ ಮನ್ತೇಥಾತಿ. ಅಥ ನಾಟಕೇ ಪಕ್ಕೋಸೇತ್ವಾ ಮನ್ತೇಸುಂ. ನಾಟಕಾಪಿ ಸಚೇ ಕಾರಣಂ ನತ್ಥಿ, ಏವಂ ಸತಿ ಫಲಂ ನ ಭವೇಯ್ಯ, ಸಚೇ ಪೂತಿ ನತ್ಥಿ, ಮಕ್ಖಿಕಾ ನ ಸನ್ನಿಪತೇಯ್ಯುನ್ತಿ ಗೀತಂ ಗಾಯಿತ್ವಾ ಉದಕೇ ಕೀಳನ್ತಿ.

ಅಥ ತೇಚ ತಯೋ ಭಾತಿಕಾ ತಂ ಸುತ್ವಾ ಕಿತ್ತಿತರನಾಮಕಂ ರಾಜಾನಂ ಬನ್ಧನಾಗಾರತೋ ಗಹೇತ್ವಾ ಮಾರೇತ್ವಾ ಇದಾನಿ ಯಂ ರಜ್ಜೇ ಠಪಯಿಸ್ಸಾಮಾತಿ ಚಿನ್ತೇತ್ವಾ ತುಮ್ಹೇ ಗಚ್ಛಥ, ಅಯಂ ತಸ್ಸ ಸೀಸೋ, ಇದಾನಿ ಏಸ ಪರಲೋಕಂ ಗತೋತಿ ಸೀಸಂ ದಸ್ಸೇಸುಂ. ಅಥ ಚೀನರಟ್ಠಸೇನಾಯೋಪಿ ಇದಾನಿ ರಾಜವಂಸಿಕೋ ನತ್ಥಿ, ತೇ ನಹಿ ಯುಜ್ಝಿತುಂ ನ ಇಚ್ಛಾಮ, ಯಂ ರಜ್ಜೇ ಠಪಯಿಸ್ಸಾಮಾತಿ ಕತ್ವಾ ಮಯಂ ಆಗತಾ, ಇದಾನಿ ಸೋ ನತ್ಥೀತಿ ವತ್ವಾ ನಿವತ್ತೇತ್ವಾ ಅಗಮಂಸು.

ಸೋ ಚ ಥೇರೋ ನಾಟಕೇಹಿ ಸದ್ಧಿಂ ಮನ್ತೇಥಾತಿ ಏತ್ತಕಮೇವ ವುತ್ತತ್ತಾ ಭಿಕ್ಖುಭಾವತೋ ನ ಮೋಚೇತೀತಿ ದಟ್ಠಬ್ಬಂ. ವುತ್ತಞ್ಚೇತಂ,–

ಪರಿಯಾಯೋಚ ಆಣತ್ತಿ, ತತಿಯೇ ದುತಿಯೇ ಪನ;

ಆಣತ್ತಿಯೇವ ಸೇಸೇಸು, ದ್ವಯಮೇತಂ ನ ಲಬ್ಭತೀತಿ.

ತಸ್ಮಿಂ ಪನ ಖನ್ಧಪುರೇ ಅರಿಮದ್ದನನಗರೇ ಅರಹನ್ತಗಣವಂಸಿಕಾ ಛಪ್ಪದಗಣವಂಸಿಕಾ ಆನನ್ದ ಗಣವಂಸಿಕಾ ಚ ಥೇರಾ ಬಹವೋ ವಸನ್ತಿ. ತೇಹಿ ಪನ ಕತಗನ್ಥೋ ನಾಮ ಕೋಚಿ ನತ್ಥೀತಿ.

ಇದಂ ಖನ್ಧಪುರೇ ಸಾಸನಸ್ಸ ಪತಿಟ್ಠಾನಂ.

ಇದಾನಿ ಮರಮ್ಮಮಣ್ಡಲೇ ತಮ್ಬದೀಪರೇಟ್ಠೇಯೇವ ವಿಜಯಪುರೇ ಸಾಸನವಂಸಂ ವಕ್ಖಾಮಿ.

ಕಲಿಯುಗೇ ಹಿ ಚತುಸತ್ತತಾಧಿಕೇ ಛವಸ್ಸಸತೇ ಸೀಹಸೂರೋ ನಾಮ ರಾಜಾ ವಿಜಯಪುರಂ ಮಾಪೇಸಿ. ತತೋ ಪಚ್ಛಾ ದ್ವೀಸು ಸಂವಚ್ಛರೇಸು ಅತಿಕ್ಕನ್ತೇಸು ಚಮುಂನದಿಯಂ ಮತಸೇತಿಭಂ ಏಕಂ ಲಭಿತ್ವಾ ಏಕಸೇತಿಭಿನ್ನೋತಿ ತಸ್ಸ ನಾಮಂ ಪಾಕಟಂ ಅಹೋಸಿ. ತಸ್ಸ ರಞ್ಞೋ ಕಾಲೇ ವಿಜಯಪುರೇ ಸೀಲವನ್ತಾ ಲಜ್ಜೀಪೇಸಲಾ ಭಿಕ್ಖೂ ಬಹವೋ ನತ್ಥಿ. ಅರಿಮದ್ದನನಗರತೋ ಅನುರುದ್ಧರಾಜಕಾಲೇ ರಾಜಭಯೇನ ನಿಲೀಯಿತ್ವಾ ಅವಸೇಸಾ ಸಮಣಕುತ್ತಕಾಯೇವ ಬಹವೋ ಅತ್ಥಿ. ಪಚ್ಛಾ ಚೂಳಅರಹನ್ತತ್ಥೇರದಿಬ್ಬಚಕ್ಖುತ್ಥೇರಾನಂ ಆಗತಕಾಲೇಯೇವ ಲಜ್ಜೀಪೇಸಲಾ ಭಿಕ್ಖೂ ಬಲವನ್ತಾ ಹುತ್ವಾ ಗಣಂ ವಡ್ಢಾಪೇಸುಂ. ರಾಜಾ ಚ ದಿಬ್ಬಚಕ್ಖುತ್ಥೇರಂ ಅನ್ತೇಪುರಂ ಪವೇಸೇತ್ವಾ ದೇವಸಿಕಂ ಪಿಣ್ಡಪಾತೇನ ಭೋಜೇಸಿ. ಅನುರುದ್ಧರಞ್ಞಾ ತಮ್ಬುಲಮಞ್ಜೂಸಾಯಂ ಠಪೇತ್ವಾ ಪೂಜಿತಾ ಸತ್ತ ಧಾತುಯೋ ಲಭಿತ್ವಾ ತಾಸಂ ಪಞ್ಚಧಾತುಯೋ ಚಞ್ಞಿಙ್ಖುಚೇತಿಯೇ ನಿಧಾನಂ ಅಕಾಸಿ. ಅವಸೇಸಾ ಪನ ದ್ವೇ ಧಾತುಯೋ ಪುಞ್ಞಸ್ಸ ನಾಮ ಅಮಚ್ಚಸ್ಸ ಪೂಜನತ್ಥಾಯ ನಿಯ್ಯಾದೇಸಿ. ಸೋಚ ಅಮಚ್ಚೋ ಜೇಯ್ಯಪುರೇ ಪುಞ್ಞಚೇತಿಯೇ ನಿಧಾನಂ ಅಕಾಸಿ.

ತದಾ ಚ ಕಿರ ಸಮಣಕುತ್ತಕಾ ಗಹಟ್ಠಾವಿಯ ರಾಜರಾಜಮಹಾಮತ್ತಾನಂ ¶ ಸನ್ತಿಕೇ ಉಪಟ್ಠಾನಂ ಅಕಂಸು. ಕಲಿಯುಗೇ ಚತುಅಸೀತಾಧಿಕೇ ಛವಸ್ಸಸತೇ ಸಮ್ಪತ್ತೇ ಸೀಸಸೂರರಞ್ಞೋ ಜೇಟ್ಠ ಪುತ್ತೋ ಉಜನೋ ನಾಮ ರಾಜಾ ರಜ್ಜಂ ಕಾರೇಸಿ. ಸೋ ಪನ ಅವಪಙ್ಕ್ಯಾ ನಾಮಕೇ ದೇಸೇ ಚಮ್ಪಕಕಟ್ಠಮಯೇ ಸತ್ತವಿಹಾರೇ ಕಾರಾಪೇಸಿ. ದ್ವಿ ವಸ್ಸಾಧಿಕೇ ಸತ್ತವಸ್ಸಸತೇ ಕಾಲೇ ತೇ ವಿಹಾರಾ ನಿಟ್ಠಂ ಅಗಮಂಸು.

ತೇಸು ವಿಹಾರೇಸು ಚಮ್ಪಕಂ ನಾಮ ಪಧಾನವಿಹಾರಂ ಅಮಚ್ಚಪುತ್ತಸ್ಸ ಸುಧಮ್ಮಮಹಾಸಾಮಿತ್ಥೇರಸ್ಸ ಅದಾಸಿ. ಸೋ ಪನ ಥೇರೋ ಅರಿಮದ್ದನನಗರೇ ಅರಹನ್ತತ್ಥೇರಸ್ಸ ವಂಸಿಕೋತಿ ದಟ್ಠಬ್ಬೋ.

ವೇಳೂವನಂ ನಾಮ ಪರಿವಾರವಿಹಾರಂ ಪನ ಆಭಿಧಮ್ಮಿಕಸ್ಸ ಞಾಣಧಜಸ್ಸ ನಾಮ ಥೇರಸ್ಸ ಅದಾಸಿ. ಸೋಪಿ ಅರಹನ್ತತ್ಥೇರಸ್ಸ ವಂಸಿಕೋ.

ಜೇತವನಂ ನಾಮ ಪರಿವಾರವಿಹಾರಂ ಪನ ಸಕಲವಿನಯಪಿಟಕಂ ವಾಚುಗ್ಗತಂ ಕರೋನ್ತಸ್ಸ ಗುಣಾರಾಮತ್ಥೇರಸ್ಸ ಅದಾಸಿ. ಸೋ ಪನ ಥೇರೋ ಅರಿಮದ್ದನನಗರೇಯೇವ ಆನನ್ದತ್ಥೇರಸ್ಸ ವಂಸಿಕೋ.

ಕುಲವಿಹಾರಂ ನಾಮ ಪರಿವಾರವಿಹಾರಂ ಆದಿಚ್ಚರಂಸಿನೋ ನಾಮ ಥೇರಸ್ಸ ಅದಾಸಿ. ಸೋಪಿ ಆನನ್ದತ್ಥೇರಸ್ಸ ವಂಸಿಕೋಯೇವ.

ಸುವಣ್ಣವಿಹಾರಂ ನಾಮ ಪರಿವಾರವಿಹಾರಂ ಸುಧಮ್ಮಾಲಙ್ಕಾರಸ್ಸ ನಾಮ ಥೇರಸ್ಸ ಅದಾಸಿ. ಸೋಪಿ ಆನನ್ದತ್ಥೇರವಂಸಿಕೋಯೇವ.

ನೀಚಗೇಹಂ ನಾಮ ಪರಿವಾರವಿಹಾರಂ ವರಪತ್ತಸ್ಸ ನಾಮ ಥೇರಸ್ಸ ಅದಾಸಿ. ಸೋ ಪನ ಸುಧಮ್ಮಮಹಾಸಾಮಿತ್ಥೇರಸ್ಸ ಅನ್ತೇವಾಸಿಕೋ.

ದಕ್ಖಿಣಕೋಟಿಂ ನಾಮ ಪರಿವಾರವಿಹಾರಂ ಸಿರಿಪುಞ್ಞವಾಸಿನೋ ನಾಮ ಥೇರಸ್ಸ ಅದಾಸಿ. ಸೋಪಿ ಸುಧಮ್ಮಮಹಾಸಾಮಿತ್ಥೇರಸ್ಸ ಅನ್ತೇವಾಸಿಕೋತಿ.

ತೇಸಂ ವಿಹಾರಾನಂ ಏಸನ್ನಟ್ಠಾನೇ ರಾಜಾ ಸಯಮೇವ ಹತ್ಥೇನ ಗಹೇತ್ವಾ ಮಹಾಬೋಧಿರುಕ್ಖಂ ರೋಪೇಸಿ. ತೇಸಂ ವಿಹಾರಾನಂ ಪಟಿ ಜಗ್ಗನತ್ಥಾಯ ಬಹೂನಿಪಿ ಖೇತ್ತವತ್ಥೂನಿ ಅದಾಸಿ ಆರಾಮಗೋಪಕ ಕುಲಾನಿ ಚ.

ತೇಸಂ ¶ ಪನ ಥೇರಾನಂ ಸುಧಮ್ಮಪುರಾರಿಮದ್ದನಪುರಭಿಕ್ಖುವಂಸಿಕತ್ತಾಲಜ್ಜಿಪೇಸಲತಾ ವಿಞ್ಞಾತಬ್ಬಾ. ತೇನೇವ ವಿಜಯಪುರೇ ಸಾಸನಂ ಅತಿವಿಯ ಪರಿಸುದ್ಧಂ ಅಹೋಸೀತಿ ದಟ್ಠಬ್ಬಂ.

ತೇಸಮ್ಪಿ ಸಿಸ್ಸಪರಮ್ಪರಾ ಅನೇಕಸಹಸ್ಸಪ್ಪಮಾಣಾ ಅಹೇಸುಂ. ಏವಂ ಲಜ್ಜೀಪೇಸಲಾನಂಯೋ ಭಿಕ್ಖೂನಂ ಸನ್ತಿಕಾ ಕೇಚಿ ಸದ್ಧಿವಿಹಾರಿಕಾ ಕೀಟಾಗಿರಿಮ್ಹಿ ಅಸ್ಸಜಿಪುನಬ್ಬಸುಕಾವಿಯ ಅಲಜ್ಜೀ ದುಸ್ಸೀಲಾ ಉಪ್ಪಜ್ಜಿಂಸು, ಸೇಯ್ಯಥಾಪಿ ನಾಮ ಮಧುರಮ್ಬರುಕ್ಖತೋ ಅಮ್ಬಿಲಫಲನ್ತಿ. ತೇ ಪನ ಬಹುಅನಾಚಾರಂ ಚರಿಂಸುಯೇವ. ಇದಂ ಪನ ತೇಸಂ ಮೂಲಉಪ್ಪತ್ತಿ ದಸ್ಸನಂ.

ರಾಜಾ ಹಿ ತದಾ ತೇಸಂ ವಿಹಾರಾನಂ ಪಟಿಜಗ್ಗನತ್ಥಾಯ ಬಹೂನಿ ಖೇತ್ತವತ್ಥೂನಿ ಅದಾಸಿ. ತೇಸು ಖೇತ್ತವತ್ಥೂಸು ಬಲಿವಿಚಾರಣತ್ಥಾಯ ಸುಧಮ್ಮಮಹಾಸಾಮಿತ್ಥೇರೋ ಏಕಚ್ಚೇ ಭಿಕ್ಖೂ ಆರಕ್ಖಣಟ್ಠಾನೇ ಠಪೇಸಿ. ಆರಕ್ಖಣಭಿಕ್ಖೂ ಪನ ಧಮ್ಮಾನುಲೋಮವಸೇನ ಕಸ್ಸಕಾನಂ ಓವಾದಾಪೇಸಿ, ಖೇತ್ತವತ್ಥುಸಾಮಿಭಾಗಮ್ಪಿ ಪಟಿಗ್ಗಣ್ಹಾಪೇಸಿ. ತಸ್ಮಿಞ್ಚ ಕಾಲೇ ಖೇತ್ತವತ್ಥೂನಿ ಪಟಿಚ್ಚ ಭಿಕ್ಖೂ ವಿವಾದಂ ಅಕಂಸು. ಅಥ ತಂ ವಿವಾದಂ ಸುತ್ವಾ ಸಾಸನಧರತ್ಥೇರೋ ಚ ದ್ವೇ ಪರಕ್ಕಮತ್ಥೇರಾ ಚ ತತೋ ನಿಕ್ಖಮಿಂಸು. ನಿಕ್ಖಮಿತ್ವಾ ಸಾಸನಧರತ್ಥೇರೋ ಖಣಿತ್ತಿ ಪಾದಪಬ್ಬತೇ ನಿಸೀದಿ. ದ್ವೇ ಪರಕ್ಕಮತ್ಥೇರಾ ಚ ಚಙ್ಗಕಿಙ್ಗಪಬ್ಬತಕನ್ದರೇ ನಿಸೀದಿಂಸು. ತೇಸಞ್ಹಿ ನಿವಾಸಟ್ಠಾನತ್ತಾ ಯಾವಜ್ಜತನಾ ತಂ ಠಾನಂ ಪರಕ್ಕಮಟ್ಠಾನನ್ತಿ ಪಾಕಟಂ ಅಹೋಸಿ. ತೇ ಪನ ಥೇರಾ ಏಕಚಾರಾತಿ ವೋಹಾರಿಂಸು. ಅವಸೇಸಾ ಪನ ಭಿಕ್ಖೂ ಗಾಮವಾಸೀಬಹುಚಾರಾತಿ ವೋಹಾರಿಂಸು. ತತೋ ಪಟ್ಠಾಯ ಅರಞ್ಞವಾಸೀಗಾಮವಾಸೀವಸೇನ ವಿಸುಂ ಗಣಾ ಹೋನ್ತಿ. ವಿಹಾರಸ್ಸ ನಿನ್ನಾನಂ ಖೇತ್ತವತ್ಥೂನಂ ಬಲಿಪ್ಪಟಿಗ್ಗಾಹಕಭಿಕ್ಖೂನಮ್ಪಿ ಸಙ್ಘಜಾತಿಸಮಞ್ಞಾ ಅಹೋಸಿ.

ಕಲಿಯುಗೇ ಚತುವಸ್ಸಾಧಿಕೇ ಸತ್ತಸತೇ ಉಜನಸ್ಸ ರಞ್ಞೋ ಧರಮಾನಸ್ಸೇವ ಕನಿಟ್ಠಭಾತಿಕೋ ಕ್ಯೇಚ್ವಾ ನಾಮ ರಾಜಾ ಕುಮಾರೋ ರಜ್ಜಂ ಗಣ್ಹಿ.

ಅಯಂ ಪನ ತಸ್ಸ ಅಟ್ಠುಪ್ಪತ್ತಿ,– ಉಜನೋ ನಾಮ ರಾಜಾ ತ್ವಂ ಸಮುದ್ದಮಜ್ಝಂ ¶ ನಾಮ ಗಾಮಂ ಗನ್ತ್ವಾ ತತ್ಥ ನಿಸೀದಿತ್ವಾ ತತ್ರುಪ್ಪಾದಬಲಿಂ ಭುಞ್ಜಾಹೀತಿ ನಿಯ್ಯಾದೇಸಿ. ಸೋ ಪನ ರಾಜಕುಮಾರೋ ಲುದ್ದಕಮ್ಮೇಸುಯೇವ ಅಭಿರಮ್ಮಣಸೀಲೋ. ಏಕಸ್ಮಿಂ ಸಮಯೇ ಪಿಗವಂ ಗನ್ತ್ವಾ ಪಚ್ಚಾಗತಕಾಲೇ ರತ್ತಿಯಂ ಸುಪಿನಂ ಪಸ್ಸಿ,– ಸಕ್ಕೋ ದೇವಾನಮಿನ್ದೋ ಆಗನ್ತ್ವಾ ಉಪೋಸಥಸೀಲಂ ಸಮಾದಿಯಾಹಿ, ಏವಂ ಸತಿ ಅಚಿರೇನೇವ ಸೇತಿಭೇ ಲಭಿಸ್ಸಸತೀತಿ ವತ್ವಾ ತಾವತಿಂಸಭವನಂ ಪುನ ಗತೋತಿ.

ಸೋಚ ರಾಜಕುಮಾರೋ ತತೋ ಪಟ್ಠಾಯ ಉಪೋಸಥಸೀಲಂ ಸಮಾದಿಯಿ. ಪಚ್ಛಾ ಕಾಲೇಪಿ ಅತ್ತನೋ ಹತ್ಥೇ ಗುಥೇನ ಕಿಲಿನ್ನಂ ಭವತೀತಿ ಪುನ ಸುಪಿನಂ ಪಸ್ಸಿ. ಸೋ ಅಚಿರೇನೇವ ಪಞ್ಚ ಸೇತಿಭೇ ಲಭಿ. ಅಥ ಏಕೋ ಅಮಚ್ಚೋ ಗನ್ತ್ವಾ ರಞ್ಞೋ ತಮತ್ಥಂ ಆರೋಚೇಸಿ. ರಾಜಾ ತುಟ್ಠಚಿತ್ತೋ ಹುತ್ವಾ ಮಮ ಕಿರ ಭೋನ್ತೋ ಕನಿಟ್ಠಭಾತಿಕೋ ಪಞ್ಚ ಸೇತಿಭೇ ಲಭೀತಿ ರಾಜಪುರಿಸಾನಂ ಮಜ್ಝೇ ಸಂವಣ್ಣೇಸಿ. ಅಮಚ್ಚೋ ಪುನ ರಾಜಕುಮಾರಸ್ಸ ಸನ್ತಿಕಂ ಗನ್ತ್ವಾ ತಮತ್ಥಂ ಆರೋಚೇಸಿ. ರಾಜಕುಮಾರೋಪಿ ಮಮ ಭಾತಿಕೋ ರಾಜಾ ಅಕಥಿತಪುಬ್ಬಂ ವಾಚಾಪೇಯ್ಯಂ ವದತೀತಿ ಆರಾಧಯಿತ್ವಾ ಪುನ ಗನ್ತ್ವಾ ತಮತ್ಥಂ ರಞ್ಞೋ ಆರೋಚಾಪೇಸಿ. ರಾಜಾಪಿ ತಥೇವ ವದತೀತಿ. ತಂ ಸುತ್ವಾ ರಾಜಕುಮಾರೋ ಭಿಯ್ಯೋಸೋ ಪಸೀದಿ.

ಕಸ್ಮಾ ಪನ ಉಜನೋ ರಾಜಾ ಕಿತ್ತಿತರಂ ನಾಮ ರಾಜಕುಮಾರಂ ಕನಿಟ್ಠವೋಹಾರೇನ ನ ವದತೀತಿ. ಏಕಸೇತಿಭಿನ್ದೋ ಹಿ ರಾಜಾ ಅಪರಸ್ಸ ರಞ್ಞೋ ದೇವಿಂ ಗಬ್ಭಿನಿಂ ಆನೇತ್ವಾ ಅಗ್ಗಮಹೇಸಿಟ್ಠಾನೇ ಠಪೇಸಿ, ಠಪೇತ್ವಾ ಅಚಿರೇನೇವ ಉಜನಂ ವಿಜಾಯಿ, ತೇನೇವ ನ ಉಜನೋ ಏಕಸೇತಿಭಿನ್ದಸ್ಸ ಪುತ್ತೋ, ಕಿತ್ತಿತರೋ ನಾಮ ರಾಜಕುಮಾರೋಯೇವ ಏಕಸೇತಿಭಿನ್ದಸ್ಸ ಪುತ್ತೋ, ತಸ್ಮಾ ತಂ ಕಾರಣಂ ಪಟಿಚ್ಚ ಸೋ ತಂ ಕನಿಟ್ಠವೋಹಾರೇನ ನ ವದತೀತಿ.

ಕನಿಟ್ಠೋ ಪಞ್ಚಸೇತಿಭೇ ಲಭತೀತಿ ಸುತ್ವಾ ರಾಜಾ ಭಾಯಿತ್ವಾ ಕನಿಟ್ಠಸ್ಸ ರಜ್ಜಂ ಉಪನಿಯ್ಯಾದೇಸಿ. ರಾಜಾ ರಾಜಗೇಹಸ್ಸ ಪಚ್ಛಿಮದ್ವಾರೇನ ನಿಕ್ಖಮಿ. ಕನಿಟ್ಠೋ ಪುರಿಮದ್ವಾರೇನ ಪಾವಿಸಿ. ಪಞ್ಚನ್ನಂ ಪನ ಸೇತಿಭಾನಂ ಲದ್ಧತ್ತಾ ಪಞ್ಚಸೇತಿಭಿನ್ದೋತಿ ಪಾಕಟೋ. ಮೂಲನಾಮಂ ಪನಸ್ಸ ¶ ಸೀಹಸೂರೋತಿ ದಟ್ಠಬ್ಬಂ. ತಸ್ಸ ರಞ್ಞೋ ಕಾಲೇ ಬಹೂ ಅಲಜ್ಜಿನೋ ಗಾಮಸಾಮನ್ತ ವಿಹಾರೇ ವಸಿತ್ವಾ ಅನೇಕವಿಧಂ ಆನಾಚಾರಂ ಚರಿಂಸು. ಸುಧಮ್ಮಪುರಅರಿಮದ್ದನಪುರತೋ ಪರಮ್ಪರವಸೇನ ಆಗತಾ ಭಿಕ್ಖೂಪಿ ಬಹೂ ಲಜ್ಜಿನೋ ಸಿಕ್ಖಾಕಾಮಾ ಸನ್ತಿ.

ಅಥ ತಸ್ಸ ರಞ್ಞೋ ಭತ್ತಂ ಪರಿಭುಞ್ಜನಕಾಲೇ ಏಕೋ ಸಮಣಕುತ್ತಕೋ ಅಟ್ಠ ಪರಿಕ್ಖಾರೇ ಗಹೇತ್ವಾ ಆಗನ್ತ್ವಾ ರಞ್ಞೋ ಸಮ್ಮುಖೇ ಅಟ್ಠಾಸಿ. ಕಿಮತ್ಥಾಯ ಆಗತೋಸೀತಿ ಪುಚ್ಛಿತೇ ಪಿಣ್ಡಪಾತತ್ಥಾಯ ಆಗತೋಮ್ಹೀತಿ ಆಹ. ಅಥ ರಾಜಾ ಸಯಂ ಭುಞ್ಜಿಸ್ಸಾಮೀತಿ ಆರಭಿತ್ವಾಪಿ ಅತಿಪ್ಪಸನ್ನತಾಯ ಪನ ಸುವಣ್ಣಪಾತಿಯಾ ಪಟಿಯಾದಿತಂ ಸಕಲಮ್ಪಿ ಭತ್ತಂ ಅದಾಸಿ. ಅಥ ರಾಜಾ ಏವಂ ಚಿನ್ತೇಸಿ,– ಅಯಂ ಭಿಕ್ಖು ಪಿಣ್ಡಪಾತತ್ಥಾಯ ಉಪಮಜ್ಝನ್ತಿ ಕಯೇವ ಆಗನ್ತ್ವಾ ಅಟ್ಠಾಸಿ, ನ ಸೋ ಪುಥುಜ್ಜನಭಿಕ್ಖು, ಅಥ ಖೋ ಅಭಿಞ್ಞಾಲಾಭೀ ಅರಹಾ ಭವೇಯ್ಯ, ಮಮ ಪುಞ್ಞತ್ಥಾಯ ಆಗತೋ ಭವೇಯ್ಯ ಮಂ ಅನುಕಮ್ಪಂ ಉಪಾದಾಯಾತಿ.

ಏವಂ ಪನ ಚಿನ್ತೇತ್ವಾ ಏಕಂ ರಾಜಪುರಿಸಂ ಆಣಾಪೇಸಿ ತಸ್ಸ ಪಚ್ಛಾ ಅನುಗನ್ತ್ವಾ ಓಲೋಕೇತುಂ. ಸೋ ಪನ ಸಮಣಕುತ್ತಕೋ ಸಯಂ ಅಲಜ್ಜಿಭೂತತ್ತಾವ ಅತ್ತನೋ ಭರಿಯಾ ಪಚ್ಚುಗ್ಗನ್ತ್ವಾ ಪತ್ತಂ ಗಣ್ಹಿ. ತಂ ದಿಸ್ವಾ ರಾಜಪುರಿಸೋ ರಞ್ಞೋ ಸನ್ತಿಕಂ ಗನ್ತ್ವಾ ಪಠಮಮೇವ ಏವಂ ಚಿನ್ತೇಸಿ,– ಸಚೇ ಯಥಾಭೂತಂ ಆರೋಚೇಯ್ಯಂ, ರಞ್ಞೋ ಪಸಾದೋ ವಿನಸ್ಸೇಯ್ಯ, ಏವಂ ಪನ ಅನಾರೋಚೇತ್ವಾ ಯಥಾ ರಞ್ಞೋ ಪಸ್ಸಾದೋ ಭಿಯ್ಯೋಸೋಮತ್ತಾಯ ಭವೇಯ್ಯ, ಮಯ್ಹಮ್ಪಿ ಲಾಭೋ ಉಪ್ಪಜ್ಜೇಯ್ಯ, ಸಮಣಕುತ್ತಕೋಪಿ ರಾಜಪರಾಧತೋ ವಿಮುಚ್ಚೇಯ್ಯ, ಏವಂ ಆರೋಚೇಸ್ಸಾಮೀತಿ. ಏವಂ ಪನ ಚಿನ್ತೇತ್ವಾ ಅಹಂ ಮಹಾರಾಜ ತಂ ಅನುಗನ್ತ್ವಾ ಓಲೋಕೇಸಿ, ಅಥ ಮಮ ಏವಂ ಓಲೋಕೇನ್ತಸ್ಸವ ಅನ್ತರಧಾಯೀತಿ ಆರೋಚೇಸಿ. ರಾಜಾ ಭಿಯ್ಯೋಸೋಮತ್ತಾಯ ಪಸೀದಿತ್ವಾ ಹತ್ಥಂ ಪಸಾರೇತ್ವಾ ಯಥಾಹಂ ಮಞ್ಞಮಿ, ತಥಾ ಅವಿರಜ್ಝನಮೇವತನ್ತಿ ತಿಕ್ಖತ್ತುಂ ವಾಚಂ ನಿಚ್ಛಾರೇಸಿ, ರಾಜಪುರಿಸಸ್ಸ ಚ ದಾತಬ್ಬಂ ಅದಾಸಿ.

ತಸ್ಮಿಂಯೇವ ದಿವಸೇ ಏಕೋ ಅಮಚ್ಚೋ ರಞ್ಞೋ ಪಣ್ಣಾಕಾರತ್ಥಾಯ ¶ ವೇಲಾಹಕಂ ನಾಮ ಏಕಂ ತುರಙ್ಗಮಂ ಅದಾಸಿ. ಅಥ ರಾಜಾ ಮಮ ಪುಞ್ಞಾನುಭಾವೇನ ಏಸ ಲದ್ಧೋತಿ ಸಮ್ಪಹಂಸಿ. ತಂ ಪನ ತುರಙ್ಗಮಂ ಆರೋಹಿತ್ವಾ ಏಕಂ ಹತ್ಥಾರೋಹಂ ಪಾಜಾಪೇಸಿ. ಅಥ ಮಹಾಜನಸ್ಸ ಓಲೋಕೇನ್ತಸ್ಸ ಹತ್ಥಾರೋಹಸ್ಸ ಸೀಸೇವೇಟ್ಠನದುಸ್ಸಂಯೇವ ಪಸ್ಸಿತ್ವಾ ಆಕಾಸೇ ಪಕ್ಖನ್ಧೋ ಬಕೋವಿಯ ಪಞ್ಞಾಯತಿ. ಸೋ ಪನ ತುರಙ್ಗಮೋ ಪಾತೋವ ವಿಜಯಪುರತೋ ಗಚ್ಛನ್ತೋ ಪಬ್ಬತಬ್ಭನ್ತರನಗರಂ ಸಾಯನ್ಹಸಮಯೇ ಪಾಪುಣಿ. ಅಬ್ಭ ವಿಜಬ್ಭನಅಸ್ಸೋತಿಪಿ ನಾಮಂ ಅಕಾಸಿ.

ಇಚ್ಚೇವಂ ಸಮಣಕುತ್ತಕಾ ದಾರಮ್ಪಿ ಪೋಸೇಸುಂ, ಪಗೇವ ಇತರಂ ಅನಾಚಾರಂ. ತೇನೇವ ತೇ ಸಮಣಕುತ್ತಕಾ ರಞ್ಞೋ ಮಲ್ಲರಙ್ಗಮ್ಪಿ ಪವಿಸಿತ್ವಾ ಮಲ್ಲಂ ಯುಜ್ಝೇಸುಂ. ತೇಸು ಪನ ಸಮಣಕುತ್ತಕೇಸು ಓವಿಚಙ್ಗಾಖುಂಸಙ್ಘಜೋ ನಾಮ ಸಮಣಕುತ್ತಕೋ ಮಲ್ಲಕಮ್ಮೇ ಅತಿವಿಯ ಛೇಕೋ ಅಧಿಕೋ. ಸೋ ಕಿರ ಸಂವಚ್ಛರೇ ಸಂವಚ್ಛರೇ ರಞ್ಞೋ ಮಲ್ಲರಙ್ಗೇ ಜಯಿತ್ವಾ ಪನ್ನರಸ ವಾ ವೀಸತಿ ವಾ ಅಸ್ಸೇ ಪಟಿಲಭೀತಿ.

ರತನಪೂರನಗರೇ ಮಲ್ಲಕಮ್ಮೇ ಅತಿಛೇಕೋ ಅಧಿಕೋ ಏಕೋ ಕಮ್ಬೋಜಕುಲೋ ಅತ್ಥಿ. ಸೋ ರತನಪೂರನಗರೇ ಜೇಯ್ಯಪುರನಗರ ಚ ಅತ್ತನಾ ಸಮಥಾಮಂ ಮಲ್ಲಪುರಿಸಂ ಅಸಭಿತ್ವಾ ವಿಜಯ ಪುರಂ ಆಗನ್ತ್ವಾ ಚಮ್ಪಕವಿಹಾರಸ್ಸ ದ್ವಾರಸಮೀಪೇ ಮಲ್ಲಸಭಾಮಣ್ಡಪೇ ಪವಿಸಿತ್ವಾ ಮಲ್ಲಕಮ್ಮಂ ಕಾತುಂ ಇಚ್ಛಾಮೀತಿ ರಞ್ಞೋ ಆರೋಚೇಸಿ. ಅಥ ರಾಜಾ ತಂ ಸಙ್ಘಜಂ ಆಮನ್ತೇತ್ವಾ ಏವಮಾಹ,- ಇದಾನಿ ಭೋ ತ್ವಂ ಇಮಿನಾ ಸದ್ಧಿಂ ಮಲ್ಲಯುದ್ಧಂ ಕಾತುಂ ಸಕ್ಖಿಸ್ಸಸೀತಿ. ಆಮಮಹಾರಾಜ ಪುಬ್ಬೇ ಅಹಂ ದಹರೇ ಹುತ್ವಾ ಕೀಳನತ್ಥಾಯಯೇವ ಮಲ್ಲಕಮ್ಮಂ ಅಕಾಸಿಂ, ಇದಾನಿ ಪನ ಏಕೂನಸತ್ತತಿವಸ್ಸೋ ಅಹಂ ಇತೋ ಪಚ್ಛಾ ಮಲ್ಲಯುದ್ಧಂ ಕಾತುಂ ಸಕ್ಖಿಸ್ಸಾಮಿ ವಾ ಮಾ ವಾತಿ ನ ಜಾನಾಮಿ, ಇದಾನಿ ಪರಪಕ್ಖಂ ಮಲ್ಲಪುರಿಸಂ ಮಲ್ಲಕಮ್ಮೇನ ಮಾರೇಸ್ಸಾಮೀತಿ ವದತಿ.

ಅಥ ರಾಜೂನಂ ಮಲ್ಲಕಮ್ಮಂ ನಾಮ ಕೀಳನತ್ಥಾಯಯೇವ ಭವತಿ, ಮಾ ಮಾರೇತುಂ ಉಸ್ಸಾಹಂ ಕರೋಹೀತಿ ವತ್ವಾ ಅಞ್ಞಮಞ್ಞಂ ಮಲ್ಲಯುದ್ಧಂ ಕಾರಾಪೇಸಿ ¶ . ಸಪರಿಸಸ್ಸ ರಞ್ಞೋ ಓಲೋಕೇನ್ತಸ್ಸೇವ ತೇ ಮಲ್ಲಾಕಾರೇನ ನಚ್ಚಿತ್ವಾ ಅಞ್ಞಮಞ್ಞಂ ಸಮೀಪಂ ಉಪಗಚ್ಛಿಂಸು. ಅಥ ಸಙ್ಘಜೋ ಮಲ್ಲೋ ಕಮ್ಬೋಜಮಲ್ಲಸ್ಸ ಪಾದೇನ ಪಹರಣಾಕಾರಂ ದಸ್ಸೇತ್ವಾ ದಕ್ಖಿಣಹತ್ಥಮುಟ್ಠಿನಾ ಕಪಾಲೇ ಪಹಾರಂ ಅದಾಸಿ. ಅಥ ಕಮ್ಬೋಜಮಲ್ಲಸ್ಸ ಮುಖಂ ಪಚ್ಛತೋ ಅಹೋಸಿ. ತದಾ ಸಪರಿಸೋ ರಾಜಾ ಈದಿಸಾ ಪನ ವಿಮುಖತೋ ಮರಣಮೇವ ಸೇಯ್ಯೋ ಇದಾನಿ ಪನ ಇಮಂ ಪಸ್ಸಿತುಂ ನ ವಿಸಹಾಮೀತಿ ವದತಿ. ಪುನ ಸಙ್ಘಜೋ ವಾಮಹತ್ಥ ಮುಟ್ಠಿನಾ ಪಹಾರಂ ಅದಾಸಿ. ಅಥ ಕಮ್ಬೋಜಮಲ್ಲಸ್ಸ ಮುಖಂ ಪರಿವಟ್ಟೇತ್ವಾ ಯಥಾ ಪುಬ್ಬೇ, ತಥಾ ಪತಿಟ್ಠಾಸಿ.

ತಸ್ಮಿಞ್ಚ ಕಾಲೇ ಸಪರಿಸೋ ಖತ್ತಿಯೋ ತಂ ಅಚ್ಛರಿಯಂ ದಿಸ್ವಾ ದ್ವೇ ಅಸ್ಸೇ ತಿಂಸಮತ್ತಾನಿ ವತ್ತಾನಿ ಸತಕಹಾಪಣಞ್ಚ ಅದಾಸೀತಿ. ಇದಞ್ಚ ವಚನಂ ಪೋರಾಣಪೋತ್ಥಕೇಸು ಆಗತತ್ತಾ ಸಾಧುಜನಾನಞ್ಚ ಸಂವೇಜನಿಯಟ್ಠಾನತ್ತಾ ವುತ್ತಂ. ಠಪೇತ್ವಾ ಹಿ ಸಂವೇಗಲಾಭಂ ನತ್ಥಿ ಅಞ್ಞಂ ಕಿಞ್ಚಿ ಪಯೋಜನನ್ತಿ.

ಕಲಿಯುಗೇ ತೇರಸಾಧಿಕೇ ಸತ್ತವಸ್ಸಸತೇ ವಿಜಯಪುರೇಯೇವ ತಸ್ಸ ಪುತ್ತೋ ಕಿತ್ತಿತರನಾಮಕೋ ರಾಜಾ ರಜ್ಜಂ ಕಾರೇಸಿ. ವಿತರಾ ಸದಿಸನಾಮವಸೇನೇವ ಸೀಹಸೂರೋತಿ ನಾಮಂ ಪಟಿಗ್ಗಣ್ಹಿ. ಪಿತು ರಞ್ಞೋ ಕಾಲೇ ಲದ್ಧೇಸು ಪಞ್ಚಸು ಸೇತಿಹೇಸು ಚತುನ್ನಂಯೇವ ಅವಸೇಸತ್ತಾ ಚತುಸೇತಿಭಿನ್ದೋತಿ ನಾಮಂ ಪಾಕಟಂ. ತೇನೇ ವಾಹ ಅಭಿಧಾನಪ್ಪದೀಪಿಕಾಟೀಕಾಯಂ ಚತುಸೇತಿಭಿನ್ದೋತಿ. ತಸ್ಸ ರಞ್ಞೋ ಕಾಲೇ ಚತುರಙ್ಗಬಲೋ ನಾಮ ಮಹಾಅಮಚ್ಚೋ ಗನ್ಥಕೋವಿದೋ ಅಭಿಧಾನಪ್ಪದೀಪಿಕಾಸಂ ವಣ್ಣನಂ ಅಕಾಸಿ. ಸೋ ಪನ ಸಕಲಬ್ಯಾಕರಣವನಾಸಙ್ಗಞಾಣಾಚಾರೀ ಅಹೋಸಿ.

ಏಕಸ್ಮಿಞ್ಚ ಸಮಯೇ ರಾಜಾ ಏಕಂ ಮಹನ್ತಂ ವಿಹಾರಂ ಕಾರಾಪೇತ್ವಾ ಅಸುಕರಞ್ಞಾ ಅಯಂ ವಿಹಾರೋ ಕಾರಾಪಿತೋ, ಇಮಸ್ಮಿಂ ವಿಹಾರೇ ಸೀಲವನ್ತಾಯೇವ ನಿಸೀದನ್ತೂತಿ ಕೋಲಾಹಲಂ ಉಪ್ಪಾದೇಸಿ. ಅಥ ಸಾಚಞ್ಞಿನಾಮಗಾಮವಾಸೀ ಏಕೋ ಥೇರೋ ಆಗನ್ತ್ವಾ ನಿಸೀದಿ.

ಅಯಂ ¶ ಪನ ತಸ್ಸ ಥೇರಸ್ಸ ಅಟ್ಠುಪ್ಪತ್ತಿ,–

ಸಾಚಞ್ಞಿಗಾಮೇ ಕಿರ ಏಕೋ ಗಹಪತಿ ಅತ್ತನೋ ಪುತ್ತಂ ಸಿಪ್ಪುಗ್ಗಹಣತ್ಥಾಯ ವಿಹಾರೇ ಏಕಸ್ಸ ಭಿಕ್ಖುಸ್ಸ ಸನ್ತಿಕೇ ನಿಯ್ಯಾದೇಸಿ. ಪುತ್ತಸ್ಸ ಪನ ವಿಹಾರಂ ಅಗನ್ತುಕಾಮಸ್ಸ ತಜ್ಜನತ್ಥಾಯ ಸಕಣ್ಟಕಗಚ್ಛಸ್ಸ ಉಪರಿ ಖಿಪತಿ. ಸೋ ಚ ದಹರೋ ನಿಕ್ಖಮಿತ್ವಾ ಗೇಹಂ ಅನಾಗತ್ವಾ ವಿಹಾರೇಯೇವ ನಿಸೀದಿ. ಮಾತಾಪಿತೂನಂ ಸನ್ತಿಕಂ ಅನಾಗನ್ತ್ವಾ ಥೋಕಂ ಥೋಕಂ ದೂರಂ ಗನ್ತ್ವಾ ಸಾಮಣೇರ ಭೂಮಿತೋ ಉಪಸಮ್ಪದಭೂಮಿಂ ಪತ್ವಾ ಅರಿಮದ್ದನನಗರಂ ಗಚ್ಛಿ. ಅತಿಪಞ್ಞವನ್ತತಾಯ ಪನ ಪತ್ತಪ್ಪತ್ತಟ್ಠಾನೇ ಮಹಾಥೇರೋ ಸಙ್ಗಣ್ಹಿಂಸು. ತೇನೇವೇಸ ಸಕಲಮರಮ್ಮರಟ್ಠೇ ಪಾಕಟೋ ಅಹೋಸಿ. ಅಥ ಮಾತಾಪಿತರೋ ಪುತ್ತಸ್ಸ ಆಗಮನಂ ಅಪೇಕ್ಖಿತ್ವಾಯೇವ ನಿಸೀದಿಂಸು. ತಮತ್ಥಂ ಪನ ಸುತ್ವಾ ಏಸ ಅಮ್ಹಾಕಂ ಪುತ್ತೋ ಭವಿಸ್ಸತಿ ವಾ ನೋ ವಾತಿ ವೀಮಂಸಿತುಕಾಮೋ ಪಿತಾ ಅನುಗಚ್ಛಿ. ಅರಿಮದ್ದನನಗರೇ ತಂ ಸಮ್ಪಾಪುಣಿತ್ವಾ ಉಪಟ್ಠಪೇತ್ವಾ ನಿಸೀದಿ. ಸೋಪಿ ಭಿಕ್ಖು ಯಥಾಉಪಟ್ಠಾನೇನೇವ ಸನ್ತಪ್ಪೇತ್ವಾ ಗನ್ಥಂ ಉಗ್ಗಣ್ಹಿ. ಅಪರಸ್ಮಿಂ ಪನ ಕಾಲೇಸೋ ಭಿಕ್ಖು ಅಜ್ಜ ಸೂಪೋ ಅಪ್ಪಲೋಣೋತಿಆದಿನಾ ಪುನಪ್ಪುನಂ ಭಣತಿ.

ಅಥ ಪಿತಾ ಏವಮಾಹ,- ನ ಪುಬ್ಬೇ ಪಿಯಪುತ್ತಕ ತಯಾ ಈದಿಸಂ ವಚನಂ ಕಥಿತಂ, ಇದಾನಿ ಪನ ತ್ವಂ ಅಭಿಣ್ಹಂ ಈದಿಸಂ ವಚನಂ ಛಣಸಿ, ಕಾರಣಮೇತ್ಥ ಕಿನ್ತಿ ಪುಚ್ಛಿ. ಪುಬ್ಬೇ ಗನ್ಥೇಸು ಛೇಕತ್ತಂ ಅಪ್ಪತ್ವಾ ಗನ್ಥೇಸು ಛೇಕತ್ಥಂ ಬ್ಯಾಪನ್ನಚಿತ್ತತಾಯ ನ ವುತ್ತಂ, ಇದಾನಿ ಪನ ಮಯಾ ಇಚ್ಛಿತೋ ಅತ್ಥೋ ಮತ್ಥಕಂ ಪತ್ತೋ, ತಸ್ಮಾ ಕಾಯಬಲಪರಿಗ್ಗಹಣತ್ಥಾಯ ಮಯಾ ಈದಿಸಂ ವಚನಂ ವುತ್ತನ್ತಿ ವದತಿ. ತಂ ವಚನಂ ಸುತ್ವಾ ಪಿತಾ ಮಾತುಯಾ ಸನ್ತಿಕಂ ಗಮನತ್ಥಾಯ ಓಕಾಸಂ ಯಾಚಿತ್ವಾ ಪಿತರಾ ಸದ್ಧಿಂ ಸಕಟ್ಠಾನಂ ಆಗಚ್ಛನ್ತೋ ವಿಜಯಪುರಂ ಚೇತಿಯವನ್ದನತ್ಥಾಯ ಪಾವಿಸಿ.

ತದಾ ರಞ್ಞಾ ವುತ್ತವಚನಂ ಸುತ್ವಾ ತಸ್ಮಿಂ ವಿಹಾರೇ ಅರುಹಿತ್ವಾ ನಿಸೀದಿ ¶ . ಆರಕ್ಖಪುರಿಸಾ ಚ ತಂ ಭಿಕ್ಖುಂ ವಿಹಾರೇ ನಿಸಿನ್ನಂ ದಿಸ್ವಾ ತಮತ್ಥಂ ರಞ್ಞೋ ಆರೋಚೇಸುಂ. ರಾಜಾ ಚ ಚತುರಙ್ಗಬಲಂ ಅಮಚ್ಚಂ ಆಣೇಪೇಸಿ,-ಗನ್ತ್ವಾ ತಸ್ಸ ಭಿಕ್ಖುಸ್ಸ ಞಾಣಥಾಮಂ ಉಪಧಾರೇಹೀತಿ. ಚತುರಙ್ಗಬಲೋ ಚ ಗನ್ತ್ವಾ ತಂ ಭಿಕ್ಖುಂ ಗೂಳಗೂಳಟ್ಠಾನಂ ಪುಚ್ಛಿ. ಸೋಪಿ ಪುಚ್ಛಿತಂ ಪುಚ್ಛಿತಂ ವಿಸ್ಸಜ್ಜೇಸಿ. ಚತುರಙ್ಗಬಲೋ ಚ ತಮತ್ಥಂ ರಞ್ಞೋ ಆರೋಚೇಸಿ. ರಾಜಾ ತುಟ್ಠಚಿತ್ತೋ ಹುತ್ವಾ ತಂ ವಿಹಾರಂ ತಸ್ಸ ಭಿಕ್ಖುಸ್ಸ ಅದಾಸಿ. ತಸ್ಸ ಪನ ಭಿಕ್ಖುಸ್ಸ ದಹರಕಾಲೇ ಸಕಣ್ಟಕಗಚ್ಛೇ ಪಿತುನೋ ಖಿಪನಂ ಪಟಿಚ್ಚ ಕಣ್ಡಕಖಿಪತ್ಥೇರೋತಿ ಸಮಞ್ಞಾ ಅಹೋಸಿ, ಮೂಲನಾಮಂ ಪನಸ್ಸ ನಾಗಿತೋತಿ. ಸೋತಸ್ಮಿಂ ವಿಹಾರೇ ನಿಸೀದಿತ್ವಾ ಸದ್ದಸಾರತ್ಥಜಲಿನಿಂ ನಾಮ ಗನ್ಥಂ ಅಕಾಸಿ. ತಸ್ಸ ಕಿರ ಥೇರಸ್ಸ ಕಾಲೇ ತಸ್ಮಿಂ ನಗರೇ ಆರದ್ಧ ವಿಪಸ್ಸನಾಧುರಾ ಮಹಲ್ಲಕಾ ಭಿಕ್ಖೂ ಸಹಸ್ಸಮತ್ತಾ ಅಹೇಸುಂ. ಆರದ್ಧಗನ್ಥಧುರಾ ಪನ ದಹರಭಿಕ್ಖೂ ಗಣನಪಥಂ ವೀತಿವತ್ತಾ.

ತಸ್ಸ ಪನ ಪಿತರಮ್ಪಿ ಸೇಟ್ಠಿಟ್ಠಾನೇ ಠಪೇಸಿ. ತೇನೇವ ತಂ ಗಾಮಂ ಸೇಟ್ಠಿಗಾಮೋತಿ ನಾಮೇನ ವೋಹರಿಂಸು.

ಕಚ್ಚಾಯನವಣ್ಣನಂ ಪನ ವಿಜಯಪುರೇಯೇವ ಅಭಯಗಿರಿಪಬ್ಬತೇ ನಿಸಿನ್ನೋ ಮಹಾವಿಜಿತಾಪೀ ನಾಮ ಥೇರೋ ಅಕಾಸಿ. ವಾಚಕೋ ಪದೇಸಮ್ಪಿ ಸೋಯೇವ ಅಕಾಸಿ. ಸದ್ದವುತ್ತಿಂ ಪನ ಸದ್ಧಮ್ಮಗುರುತ್ಥೇರೋ ಅಕಾಸಿ.

ಇಚ್ಚೇವಂ ವಿಜಯಪುರೇ ಅನೇಕೇಹಿ ಗನ್ಥಕಾರೇಹಿ ಸಾಸನಂ ವಿಪುಲಂ ಅಹೋಸಿ.

ಕಲಿಯುಗೇ ಪನ ಪಞ್ಚಾಸೀತಾಧಿಕೇ ಛವಸ್ಸಸತೇ ಸಮ್ಪತ್ತೇ ಅಸಙ್ಖಯಾಚೋಯೋನ್ನಾಮಕೋ ರಾಜಾ ಜೇಯ್ಯಪುರನಗರಂ ಮಾಪೇತ್ವಾ ತತ್ಥ ರಜ್ಜಂ ಕಾರೇಸಿ. ತತ್ಥ ಪನ ರಾಜೂನಂ ಕಾಲೇ ಥೇರೇಹಿ ಕತಗನ್ಥೋ ನಾಮ ನತ್ಥಿ.

ಕಲಿಯುಗೇ ಛಬ್ಬಿಸಾಧಿಕೇ ಸತ್ತವಸ್ಸಸತೇ ವೇಸಾಖಮಾಸೇ ಜೇಯ್ಯಪುರನಗರಂ ವಿನಸ್ಸಿ. ತಸ್ಮಿಂಯೇವ ಸಂವಚ್ಛರೇ ಜೇಟ್ಠಮಾಸೇ ವಿಜಯಪುರಂ ವಿನಸ್ಸಿ. ತಸ್ಮಿಂಯೇವ ಸಂವಚ್ಛರೇ ಫಗ್ಗುನಮಾಸೇ ಸತ್ವಿವರಾಜಾ ¶ ರತನಪೂರಂ ನಾಮ ನಗರಂ ಮಾಪೇತ್ವಾ ರಜ್ಜಂ ಕಾರೇಸೀತಿ.

ಇದಂ ವಿಜಯಪುರಜೇಯ್ಯಪುರೇಸು ಸಾಸನಸ್ಸ ಪತಿಟ್ಠಾನಂ.

ಇದಾನಿ ಮರಮ್ಮಮಣ್ಡಲೇ ತಮ್ಬನೀಪರಟ್ಠೇಯೇವ ರತನಪೂರನಗರೇ ಸಾಸನವಂಸಂ ವಕ್ಖಾಮಿ.

ಕಲಿಯುಗೇ ಹಿ ಅಟ್ಠಾಸೀತಾಧಿಕೇ ಸತ್ತವಸ್ಸಸತೇ ನರಪತಿರಞ್ಞೋ ಧಿತಾಯ ಸದ್ಧಿಂ ಅಲೋಙ್ಗಚಞ್ಞಿಸೂರಞ್ಞೋ ಪುತ್ತೋ ಆನನ್ದಸೂರಿಯೋ ನಾಮ ಸನ್ಥವಂ ಕತ್ವಾ ಏಕಂ (ಸಿದ್ಧಿಕಂ ನಾಮ ಪುತ್ತಂ ವಿಜಾಯಿ. ಸೋ ವಯೇ ಸಮ್ಪತ್ತೇ ರಜ್ಜಸಮ್ಪತ್ತಿಂ ಲಭಿ. ತತೋ ಪಭುತಿ ಯಾವ ಮ್ರೇನಚೋದಿಘಾ ರಞ್ಞಾ ಅರಿಮದ್ದನನಗರೇ ರಜ್ಜಂ ಅಕಂಸು). ತತೋ ಪಚ್ಛಾ ಸಿರಿಸುಧಮ್ಮರಾಜಾಧಿಪತೀತಿ ಲದ್ಧನಾಮೋ ಸತ್ವಿವರಾಜಾ ರತನಪೂರನಗರೇ ರಜ್ಜಂ ಕಾರೇಸಿ. ತಸ್ಸ ರಞ್ಞೋ ಕಾಲೇ ಕಲಿಯುಗೇ ಏಕನವುತಾಧಿಕೇ ಸತ್ತವಸ್ಸಸತೇ ಸಮ್ಪತ್ತೇ ಲಙ್ಕಾದೀಪತೋ ಸಿರಿಸದ್ಧಮ್ಮಾಲಙ್ಕಾರತ್ಥೇರೋ ಸೀಹಳಮಹಾಸಾಮಿತ್ಥೇರೋಚಾತಿ ಇಮೇ ದ್ವೇ ಥೇರಾ ಪಞ್ಚ ಸರೀರಧಾತುಯೋ ಆನೇತ್ವಾ ನಾವಾಯ ಕುಸಿಮತಿತ್ಥಂ ಪಾಪುಣಿತ್ವಾ ರಾಮಞ್ಞರಟ್ಠೇ ಬಞ್ಞಾರನಿ ನಾಮೇನ ರಞ್ಞಾ ನಿವಾರಿತಾ ಅನಿಸೀದಿಸ್ವಾ ತತೋ ಸೋಯೇವ ರಾಜಾ ಥೇರೇ ಯಾವ ಸಿರಿಖೇತ್ತನಗರಾ ಪಹಿಣಿ. ತಮತ್ಥಂ ಞತ್ವಾ ರತನಪೂರಿನ್ದೋ ರಾಜಾ ಚತ್ತಾಲೀಸಾಯ ನಾವಾಹಿ ಯಾವ ಸಿರಿಖೇತ್ತನಗರಂ ಪಚ್ಚುಗ್ಗನ್ತ್ವಾ ಆನೇಸಿ. ಆನೇತ್ವಾ ಚ ಮಹಾನವಗಾಮಂ ಪತ್ತಕಾಲೇ ಸಹ ಓರೋಧೇಹಿ ಅಮಚ್ಚೇಹಿ ಚ ಸಯಮೇವ ರಾಜಾ ಪಚ್ಚುಗ್ಗಚ್ಛಿ. ರತನಪೂರಂ ಪ್ಪನ ಪತ್ತಕಾಲೇ ಮಹಾಪಥವೀ ಚಲಿ, ಪಟಿನಾದಞ್ಚ ನದಿ. ತದಾ ರಾಜಾ ಸಮ್ಮಾಸಮ್ಬುದ್ಧಸ್ಸ ತಿಲೋಕಗ್ಗಸ್ಸ ಸಾಸನಂ ಪಗ್ಗಣ್ಹಿಸ್ಸಾಮೀತಿ ಚಿನ್ತೇತ್ವಾ ಸರೀರಧಾತುಂ ಆನೇತ್ವಾ ಇಧ ಪತ್ತಕಾಲೇ ಅಯಂ ಮಹಾಪಥವೀ ಚಲತಿ, ಪಟಿನಾದಞ್ಚ ನದತಿ, ಇದಂ ¶ ಅಮ್ಹಾಕಂ ರಟ್ಠೇ ಜಿನಸಾಸನಸ್ಸ ಚಿರಕಾಲಂ ಪತಿಟ್ಠಾನಭಾವೇ ಪುಬ್ಬನಿಮಿತ್ತನ್ತಿ ಸಯಮೇವ ನಿಮಿತ್ತಪಾಠಂ ಅಕಾಸಿ.

ತಾವ ತಿಟ್ಠತು ಜೀವಮಾನಸ್ಸ ಸಮ್ಮಾಸಮ್ಬುದ್ಧಸ್ಸ ಆನುಭಾವೋ, ಅಹೋವತ ಸರೀರಧಾತುಯಾಯೇವ ಅನುಭಾವೋತಿ ಬಹುರಟ್ಠ ವಾಸಿನೋ ಪಸಿದಿಂಸು. ಹೋನ್ತಿ ಚೇತ್ಥ, –

ಸರೀರಧಾತುಯಾ ತಾವ, ಮಹನ್ತೋಚ್ಛರಿಯೋ ಹೋತಿ;

ಕಾ ಕಥಾ ಪನ ಬುದ್ಧಸ್ಸ, ಜೀವಮಾನಸ್ಸ ಸೇಟ್ಠಸ್ಸ.

ಏವಂ ಅನುಸ್ಸರಿತ್ವಾನ, ಉಪ್ಪಾದೇಯ್ಯ ಪಸಾದಕಂ;

ಬುದ್ಧಗುಣೇಸು ಬಾಹುಲ್ಲಂ, ಗಾರವಞ್ಚಂ ಕರೇ ಜನೋತಿ.

ಕಲಿಯುಗೇ ದ್ವೇನವುತಾಧಿಕೇ ಸತ್ತವಸ್ಸಸತೇ ತಾ ಪಞ್ಚ ಧಾತುಯೋ ನಿದಹಿತ್ವಾ ಜೇಯ್ಯಪುರನಗರತೋ ಪಚ್ಛಿಮದಿಸಾಭಾಗೇ ಸಮಭೂಮಿಭಾಗೇ ಚೇತಿಯಂ ಪತಿಟ್ಠಾಪೇಸಿ. ತಞ್ಚ ಚೇತಿಯಂ ರತನಚೇತಿಯನ್ತಿ ಪಞ್ಞಾಪೇಸಿ, ಹತ್ಥಿರೂಪಬಾಹುಲ್ಲತಾಯ ಪನ ಅನೇಕಿಭಿನ್ದೋತಿ ಪಾಕಟಂ ಹೋತಿ. ತೀಹಿ ಸಿರಿಗಬ್ಭೇಹಿ ಸತ್ತಹಿ ದ್ವಾರೇಹೀ ಚ ಅಲಙ್ಕತಂ ನಾಮ ಮಹಾವಿಹಾರಂ ಕಾರಾಪೇತ್ವಾ ದ್ವಿನ್ನಂ ಸೀಹಳದೀಪಿಕತ್ಥೇರಾನಂ ಅದಾಸಿ. ತತೋ ಪಚ್ಛಾ ತೇಸು ಮಹನ್ತತ್ಥೇರೋ ಸಕವಿಹಾರಸಮೀಪೇ ಪಬ್ಬತಮುದ್ಧನಿ ಅತ್ತನೋ ಸಿಸ್ಸೇಪಿ ಅಪ್ಪವೇಸೇತ್ವಾ ಲಜ್ಜೀಪೇಸಲಬಹುಸ್ಸುತಸಿಕ್ಖಾಕಾಮೇಹಿ ಸಬ್ಬೇಹಿ ತೀಹಿ ಥೇರೇಹಿ ಸದ್ಧಿಂ ಸೀಮಂ ಸಮ್ಮನ್ನತಿ. ಇಚ್ಚೇವಂ ಸೀಮಸಮ್ಮುತಿಪರಿಯತ್ತಿವಾಚನಾದಿಕಮ್ಮೇಹಿ ಮರಮ್ಮರಟ್ಠೇ ಸಾಸನಂ ವಿರೂಳಂ ಕತ್ವಾ ಪತಿಟ್ಠಾಪೇಸಿ.

ಇದಂ ಮರಮ್ಮಮಣ್ಡಲೇ ರತನಪೂರನಗರೇ ಸೀಹಳದೀಪಿಕೇ

ದ್ವೇ ಥೇರೇ ಪಟಿಚ್ಚ ಪಠಮಂ ಸಾಸನಸ್ಸ ಪತಿಟ್ಠಾನಂ.

ಕಲಿಯುಗೇ ಛಬ್ಬೀಸಾಧಿಕೇ ಸತ್ತವಸ್ಸಸತೇ ಸಮ್ಪತ್ತೇ ಫಗ್ಗುನಮಾಸೇ ಸತ್ವವರಾಜಾ ರತನಪೂರನಗರಂ ಮಾಪೇಸಿ. ತಸ್ಸ ರಞ್ಞೋ ¶ ಕಾಲೇ ಜೇಯ್ಯಪುರನಗರೇ ಏಕಾ ಪೂಪಿಕಾ ಇತ್ಥೀ ಅಲಜ್ಜಿನೋ ಏಕಸ್ಸ ಭಿಕ್ಖುಸ್ಸ ಸನ್ತಿಕೇ ಧನಂ ಉಪನಿದಹಿ. ಅಪರಭಾಗೇಸಾ ತಂ ಧನಂ ಯಾಚಿ. ಅಥ ಸೋ ಭಿಕ್ಖು ತವ ಧನಂ ಅಹಂ ನ ಪಟಿಗ್ಗಣ್ಹಾಮೀತಿ ಮುಸಾ ಭಣತಿ. ಏವಂ ವಿವಾದಂ ಕತ್ವಾ ತಂ ಕಾರಣಂ ರಞ್ಞೋ ಆರೋಚೇಸಿ. ರಾಜಾ ಪಕ್ಕೋಸಾಪೇತ್ವಾ ಸಯಮೇವ ತಂ ಭಿಕ್ಖುಂ ಪುಚ್ಛಿ,-ತ್ವಂ ಭನ್ತೇ ತಸ್ಸಾ ಇತ್ಥಿಯಾ ಧನಂ ಪಟಿಗ್ಗಣ್ಹಾಸಿ ವಾ ಮಾ ವಾತಿ. ಅಹಂ ಮಹಾರಾಜ ಸಮಣೋ ಅಲಿಕಂ ಭಣಿತುಂ ನ ವಟ್ಟತಿ, ನ ಪಟಿಗ್ಗಣ್ಹಾಮೀತಿ ವದತಿ. ತಂ ಕಾರಣಂ ರಾಜಾ ಚ ಪುನಪ್ಪುನಂ ಪುಚ್ಛಿತ್ವಾ ವೀಮಂಸನ್ತೋ ಭಿಕ್ಖುಸ್ಸ ಕೇರಾಟಿಕಭಾವಂ ಜಾನಿತ್ವಾ ತಂ ಸಮಣೋ ಸಮಾನೋ ಭಗವತೋ ಪಞ್ಞತ್ತಂ ಸಿಕ್ಖಾಪದಂ ಅಕ್ಕಮಿತ್ವಾ ಮುಸಾ ಭಣತೀತಿ ಕುಜ್ಝಿತ್ವಾ ಸಯಮೇವ ಅಪರಾಧಾನುರೂಪಂ ಸೀಯಂ ಛಿನ್ದಿತ್ವಾ ರಾಜಗೇಹತೋ ಹೇಟ್ಠಾ ಖಿಪಿ.

ತಞ್ಚ ಕಾರಣಂ ಸಕಲಮರಮ್ಮರಟ್ಠೇ ಪಾಕಟಂ. ಅಲಜ್ಜೀಭಿಕ್ಖೂಪಿ ಅಞ್ಞೇ ಪಾಪಕಮ್ಮಂ ಕಾತುಂ ನ ವಿಸಹಿಂಸು. ರಞ್ಞಾ ಭಾಯಿತ್ವಾಯೇವ ಸಿಕ್ಖಾಪದಂ ನ ಅಕ್ಕಮೇಸುಂ.

ಕಲಿಯುಗೇ ತಿಂಸಾಧಿಕೇ ಸತ್ತವಸ್ಸಸತೇ ಸಮ್ಪತ್ತೇ ಮಙ್ಗಕ್ರಿಚ್ವಾಚೋಙ್ಕ ನಾಮ ರಾಜಾ ರಜ್ಜಂ ಕಾರೇಸಿ. ಸೋ ಪನ ರಾಜಾ ರಟ್ಠವಾಸೀನಂ ಸುಖತ್ಥಾಯ ನಿಮಿತ್ತಂ ಗಹೇತ್ವಾ ತಾಲವಣ್ಟಂ ಗಹೇತ್ವಾ ರಾಜಗೇಹಂ ಪಟಿಗ್ಗಣ್ಹಿ. ಸೋ ಚ ರಾಜಾ ಸಕ್ಕರಾಜೇ ಪಞ್ಚಚತ್ತಾಲೀಸಾಧಿಕೇ ಸತ್ತವಸ್ಸಸತೇ ಸಮ್ಪತ್ತೇ ಚಞ್ಞಿಙ್ಖುಂ ನಾಮ ಚೇತಿಯಂ ಪತಿಟ್ಠಾಪೇಸಿ. ಯಙ್ಗರನಾಮಕಸ್ಸ ಸಿಲಾಪಬ್ಬತಸ್ಸ ಸಮೀಪೇ ಪೋರಾಣಿಕಂ ಏಕಂ ಚೇತಿಯಂ ನದೀಉದಕಂ ಭಿನ್ದಿ. ತದಾ ಸಕರಣ್ಡಕಾ ಪಞ್ಚ ಧಾತುಯೋ ಉದಕೇ ನಿಮ್ಮುಜ್ಜನ್ತಿಯೋ ಏರಾಪಥೋ ನಾಮ ನಾಗೋ ಗಹೇತ್ವಾ ಪಚ್ಛಾ ಚಞ್ಞಿಙ್ಖುಂ ನಾಮ ಚೇತಿಯಂ ಪತಿಟ್ಠಾಪೇಸ್ಸಾಮೀತಿ ರಞ್ಞಾ ಆರದ್ಧಕಾಲೇಯೇವ ದಾಠಾನಾಗಸ್ಸ ನಾಮ ಥೇರಸ್ಸ ಸಹ ಕರಣ್ಡಕೇನ ಪಞ್ಚ ಧಾತುಯೋ ನಿಯ್ಯಾದೇಸಿ. ಸೋ ಚ ಥೇರೋ ರಞ್ಞೋ ಅದಾಸಿ. ರಾಜಾ ದ್ವೇ ಧಾತುಯೋ ಮುಟ್ಠೋಚೇತಿಯೇ ನಿಧಾನಂ ಅಕಾಸಿ. ತಿಸ್ಸೋ ಪನ ಚಞ್ಞಿಙ್ಖುಂ ಚೇತಿಯೇತಿ ಪೋರಾಣಪೋತ್ಥಕೇಸು ವುತ್ತಂ.

ಸೋ ¶ ರಾಜಾ ಕುಮಾರಕಾಲೇ ಸಿಕ್ಖಾಪಕಸ್ಸ ಆಚರಿಯಸ್ಸ ಸೇತಚ್ಛತ್ತಂ ದತ್ವಾ ಸಙ್ಘನಾಯಕಟ್ಠಾನಂ ನಿಯ್ಯಾದೇಸಿ. ಖೇಮಾಚಾರೋ ನಾಮ ಏಕೋ ಥೇರೋ ರತ್ತಿಭಾಗೇ ಮಜ್ಝನ್ತಿಕಕಾಲೇ ಚೇತಿಯಙ್ಗಣೇ ಓಲಮ್ಬೇತ್ವಾ ಠಪಿತಂ ಭೇರಿಂ ಅನೇಕವಾರಂ ಪಹರಿ. ಅಥ ರಾಜಾ ರಾಜಗೇಹತೋಯೇವ ಸುತ್ವಾ ಯಥಾಠಪಿತನ್ತಿಯಾಮವಸೇನ ವಿಹಾರೇ ಕೋಚಿ ಭಿಕ್ಖು ಕಾಲಂ ಕತೋ ಭವೇಯ್ಯಾತಿ ಮಞ್ಞಿತ್ವಾ ವಿಹಾರಂ ಗನ್ತ್ವಾ ಪುಚ್ಛಾಹೀತಿ ದೂತಂ ಪೇಸೇಸಿ. ದೂತೋ ವಿಹಾರಂ ಗನ್ತ್ವಾ ಕಾರಣಂ ಪುಚ್ಛಿ. ಭಿಕ್ಖೂ ಚ ಏವಮಾಹಂಸು,- ನ ಅಮ್ಹೇಸು ಕಾಲಙ್ಕತಭಿಕ್ಖು ನಾಮ ಅತ್ಥಿ, ಅಥ ಖೋ ಸಕ್ಕೋ ದೇವಾನಮಿನ್ದೋ ಇದಾನಿ ಕಾಲಙ್ಕತೋತಿ ಬಹೂನಂ ಮನುಸ್ಸಾನಂ ಞಾಪನತ್ಥಾಯ ಭೇರಿಂ ಪಹರಿಮ್ಹಾತಿ. ಪುನ ರಾಜಾ ಭಿಕ್ಖೂ ಪಕ್ಕೋಸಾಪೇತ್ವಾ ಪುಚ್ಛಿ,-ಕಸ್ಮಾ ಪನ ಭನ್ತೇ ತುಮ್ಹೇ ಸಕ್ಕಸ್ಸ ದೇವಾನಮಿನ್ದಸ್ಸ ಕಾಲಙ್ಕತಭಾವಂ ಜಾನಾಥಾತಿ. ಅಥ ಭಿಕ್ಖೂ ಏವಮಾಹಂಸು,-ಭಗಲತೋ ಪರಿನಿಬ್ಬಾನಕಾಲೇ ಸಾಸನಂ ರಕ್ಖಿಸ್ಸಾಮೀತಿ ಸಕ್ಕೋ ದೇವಾನಮಿನ್ದೋ ಪಟಿಞ್ಞಂ ಕತ್ವಾಪಿ ಇದಾನಿ ಸಾಸನೇ ವಸನ್ತಾನಂ ಅಮ್ಹಾಕಂ ಅನುಪಾಲನಕಮ್ಮಂ ನಾಮ ಕಿಞ್ಚಿ ನ ಅಕಾಸಿ, ಸಚೇ ಪನ ಸಕ್ಕೋ ದೇವಾನಮಿನ್ದೋ ಜೀವಮಾನೋ ಭವೇಯ್ಯ, ಸಮ್ಮಾಸಮ್ಬುದ್ಧಸ್ಸ ಸನ್ತಿಕೇ ಪಟಿಞ್ಞಂ ದಳಂ ಕತ್ವಾ ಇದಾನಿ ಅಪ್ಪೋಸ್ಸುಕ್ಕೋ ನ ಭವೇಯ್ಯ. ಇದಾನಿ ಪನ ಸಕ್ಕಸ್ಸ ದೇವಾನಮಿನ್ದಸ್ಸ ಆರಕ್ಖಣಕಮ್ಮಂ ನಾಮ ಕಿಞ್ಚಿ ನ ದಿಸ್ಸತಿ, ತಸ್ಮಾ ಇದಾನಿ ಸಕ್ಕೋ ದೇವಾನಮಿನ್ದೋ ಕಾಲಙ್ಕತೋತಿ ಜಾನಿಮ್ಹಾತಿ.

ರಾಜಾ ತಂ ಸುತ್ವಾ ಖೇಮಾಚಾರತ್ಥೇರಸ್ಸ ಪಸೀದಿತ್ವಾ ವಿಹಾರಂ ಕಾರಾಪೇತ್ವಾ ಅದಾಸಿ. ಸೋ ಚ ಥೇರೋ ಸುಧಮ್ಮಪುರವಾಸೀನಂ ಸೀಹಳವಂಸಿಕಾನಂ ಮಹಾಥೇರಾನಂ ವಂಸೇ ಭವತಿ ಲಜ್ಜೀ ಪೇಸಲೋ ಹೋತೀತಿ.

ರತನಪೂರನಗರೇಯೇವ ಅಧಿಕರಞ್ಞೋ ಕಾಲೇ ರತನಪೂರನಗರಸ್ಸ ದಕ್ಖಿಣದಿಸಾಭಾಗೇ ಮಹಾಸೇತುಂ ಕಾರಾಪೇಸಿ. ತಸ್ಸ ¶ ಪನ ಆಚರಿಯೋ ಸಙ್ಘರಾಜಾ ಲಜ್ಜೀಪಕ್ಖಂ ನ ಭಜತಿ. ತೇನೇವ ಥೇರಪರಮ್ಪರಾಯ ಏಸ ನ ಸಙ್ಗಹಿತಬ್ಬೋ.

ತಸ್ಸ ರಞ್ಞೋ ಕಾಲೇ ಛಸಟ್ಠಾಧಿಕೇ ಸತ್ತವಸ್ಸಸತೇ ಕಲಿಯುಗೇ ರಾಜಾಧಿರಾಜಾ ನಾಮ ರಾಮಞ್ಞರಟ್ಠಿನ್ದೋ ಭೂಪಾಲೋತಿ ಸಹಸ್ಸಪ್ಪಮಾಣಾಸು ನಾವಾಸು ಸಟ್ಠಿಸತಸಹಸ್ಸೇಹಿ ಯೋಧೇಹಿ ಸದ್ಧಿಂ ನದೀಮಗ್ಗೇನ ಯುಜ್ಝನತ್ಥಾಯ ರತನಪೂರಾಭಿಮುಖಂ ಆಗತೋ.

ಅಥ ಅಧಿಕರಾಜಾ ಬಹವೋ ಅಮಚ್ಚೇಚ ಭಿಕ್ಖೂ ಚ ಸನ್ನಿಪಾತಾಪೇತ್ವಾ ಮನ್ತೇಸಿ,-ಇದಾನಿ ರಾಮಞ್ಞರಟ್ಠಿನೋ ರಾಜಾ ಯುಜ್ಝನತ್ಥಾಯ ಇಧ ಆಗಚ್ಛತಿ, ಯುದ್ಧಂ ಅಕತ್ವಾ ಕೇನುಪಾಯೇನ ತಂ ಪಟಿನಿವತ್ತಾಪೇತುಂ ಸಕ್ಖಿಸ್ಸಾಮಾತಿ. ಅಥ ಸಬ್ಬೇ ಕಿಞ್ಚಿ ಅಕಥೇತ್ವಾ ತುಣ್ಹೀಭಾವೇನೇವ ನಿಸೀದಿಂಸು.

ಅಥ ಜಾತವಸ್ಸೇನ ಏಕತ್ತಿಂಸವಸ್ಸಿಕೋ ಉಪಸಮ್ಪದಾವಸೇನ ಪನ ಏಕಾದಸವಸ್ಸಿಕೋ ಏಕೋ ಭಿಕ್ಖು ಏವಮಾಹ,-ಏಕೋ ಪನ ರಾಮಞ್ಞರಟ್ಠಿನ್ದೋ ರಾಜಾಧಿರಾಜಾ ತಾವ ತಿಟ್ಠತು, ಸಚೇ ಸಕಲೇಪಿ ಜಮ್ಬುದೀಪೇ ಸಬ್ಬೇ ರಾಜಾನೋ ಆಗಚ್ಛೇಯ್ಯುಂ, ಏವಮ್ಪಿ ಕಥಾಸಲ್ಲಾಪೇನೇವ ಯುದ್ಧಂ ಅಕತ್ವಾ ಪಟಿನಿವತ್ತಾಪೇಸುಂ ಸಕ್ಕೋಮೀತಿ.

ಅಥ ಅಧಿಕರಾಜಾ ತುಟ್ಠಚಿತ್ತೋ ಹುತ್ವಾ ಆಹ,- ಯಥಾ ಭನ್ತೇ ತ್ವಂ ಸಕ್ಕೋಸಿ ರಾಜಾಧಿರಾಜಂ ಯಥಾಸಲ್ಲಾಪೇನ ಪಟಿನಿ ವತ್ಥಾಪೇತುಂ, ತಥಾ ಕರೋಹೀತಿ.

ಅಥ ಸೋ ಭಿಕ್ಖು ಮೇತ್ತಾಸನ್ದೇಸಪಣ್ಣಂ ಪೇಸೇತ್ವಾ ಓಕಾಸಂ ಯಾಚಿ ತಸ್ಸ ರಾಜಾಧಿರಾಜಸ್ಸ ಸನ್ತಿಕಂ ಪವಿಸಿತುಕಾಮೋ. ರಾಜಾಧಿರಾಜಾ ಚ ತಸ್ಸ ಭಿಕ್ಖುಸ್ಸ ಮೇತ್ತಾಸನ್ದೇಸಪಣ್ಣಂ ಪಸ್ಸಿತ್ವಾ ತಂ ಭಿಕ್ಖುಂ ಸೀಙ್ಘಂ ಆನೇಥಾತಿ ದೂತಂ ಪೇಸೇಸಿ. ದೂತೋ ಆನೇತ್ವಾ ರಞ್ಞೋ ದಸ್ಸೇಸಿ. ಅಥ ಸೋ ಭಿಕ್ಖು ರಾಜಾಧಿರಾಜಂ ಧಮ್ಮದೇಸನಾಯ ಓವಾದಂ ದತ್ವಾ ಸಕಟ್ಠಾನಂ ಪಟಿನಿವತ್ತಾಪೇಸಿ. ಅಯಞ್ಚ ¶ ಭಿಕ್ಖು ಅರಿಮದ್ದನನಗರೇ ಚತೂಸು ಗಣೇಸು ಅರಹನ್ತಗಣವಂಸೋ ಸಿಕ್ಖಾಕಾಮೋ ಲಜ್ಜೀ ಪೇಸಲೋ. ಅರಿಮದ್ದನನಗರೇ ಚಾಗಹೇ ನಾಮ ದೇಸೇ ಪನ ಜಾತತ್ತಾ ಚಾಗ್ರುಹಿ ಭಿಕ್ಖೂತಿ ವೋಹಾರಿಯತಿ.

ಕಲಿಯುಗೇ ಅಟ್ಠಾಸೀತಾಧಿಕೇ ಸತ್ತವಸ್ಸಸತೇ ಸಮ್ಪತ್ತೇ ಮಿಞ್ಞ್ಹಙ್ಗ ಧಮ್ಮರಾಜಾ ರತನಪೂರೇಯೇವ ರಜ್ಜಂ ಸಮ್ಪತ್ತೋ. ತಸ್ಸ ರಞ್ಞೋ ಕಾಲೇ ಸೀಹಳದೀಪತೋ ದ್ವೇ ಮಹಾಥೇರಾ ರತನಪೂರಂ ಆಗನ್ತ್ವಾ ಸಾಸನಂ ಅನುಗ್ಗಹೇತ್ವಾ ನಿಸೀದಿಂಸು.

ತದಾ ಕಲಿಯುಗೇ ಅಟ್ಠಸತೇ ಸಮ್ಪುಣ್ಣೇ ಪೋರಾಣಕಂ ಕಲಿಯುಗಂ ಅಪನೇತ್ವಾ ಅಭಿನವಂ ಠಪೇತುಂ ಓಕಾಸೋ ಅನುಪ್ಪತ್ತೋ. ಅಥ ಚಾಗ್ರಿಹಿ ಥೇರೋ ಚ ರಾಜವಿಹಾರವಾಸಿತ್ಥೇರೋ ಚ ಏವಮಾಹಂಸು,- ಅಪನೀತಬ್ಬಕಾಲೇ ಮಹಾರಾಜ ಸಮ್ಪತ್ತೇ ಅನಪನೇತುಂ ನ ವಟ್ಟತೀತಿ.

ಅಥ ರಾಜಾ ಪುನ ಏವಮಾಹ,-ಅಪನೀತಬ್ಬೇ ಸಮ್ಪತ್ತೇ ಅನಪನೇತ್ವಾ ಅಜ್ಝುಪೇಕ್ಖಿತ್ವಾ ವಸನ್ತಸ್ಸ ಕೋ ದೋಸೋತಿ. ಸಚೇ ಅಪನೀತಬ್ಬೇ ಸಮ್ಪತ್ತೇ ಅನಪನೇತ್ವಾ ಅಜ್ಝುಪೇಕ್ಖಿತ್ವಾ ನಿಸೀದೇಯ್ಯ, ರಟ್ಠವಾಸೀನಂ ದುಕ್ಖಂ ಭವಿಸ್ಸತೀತಿ ವೇದಸತ್ಥೇಸು ಆಗತಂ, ಸಕ್ಕರಾಜಂ ಅಪನೇನ್ತೋಪಿ ರಾಜಾ ತಸ್ಮಿಂಯೇವ ವಸ್ಸೇ ದಿವಙ್ಗತೋ ಭವೇಯ್ಯಾತಿ ಆಹಂಸು.

ಅಥ ರಾಜಾ ಸತ್ತಾನಂ ಸುಖಂ ಲಭೀಯಮಾನತಂ ಜಾನನ್ತೋಯೇವ ಮಾದಿಸೋ ಅತ್ತನೋ ಭಯಂ ಅಪೇಕ್ಖಿತ್ವಾ ಅಪನೀತಬ್ಬಂ ಅನಪನೇತ್ವಾ ನಿಸೀದಿತುಂ ನ ವಟ್ಟತಿ, ಕಮ್ಮಂ ಖೀಯಿತ್ವಾಪಿ ಮಮ ಅಗುಣಂ ಲೋಕೇ ಪತ್ಥರಿತ್ವಾ ಪತಿಟ್ಠಹಿಸ್ಸತೀತಿ ಮನಸಿಕರಿತ್ವಾ ಸಕ್ಕರಾಜೇ ಅಟ್ಠವಸ್ಸಸತೇ ಸಮ್ಪುಣ್ಣೇ ಬಸ್ಯುಛಿದ್ರಮುನಿಸಖ್ಯಂ ಅಪನೇತ್ವಾ ಚಮ್ಮಾವಸೇಸಂ ಠಪೇಸಿ. ಅಥ ಮಹಾಮಣ್ಡಪಂ ಕಾರಾಪೇತ್ವಾ ಮಹಾಛಣಂ ಕತ್ವಾ ಮಹಾದಾನಮ್ಪಿ ಅದಾಸಿ.

ಚಾಗ್ರಿಹಿಥೇರೋ ರಾಜವಿಹಾರ ವಾಸಿತ್ಥೇರೋಚಾತಿ ಅರಿಮದ್ದನ ನಗರೇ ¶ ಅರಹನ್ತಗಣಾಂಸಿಕೋ ಲಜ್ಜೀ ಪೇಸಲೋ ಸಿಕ್ಖಾಕಾಮೋ.

ಈದಿಸಂ ಪನ ವಚನಂ ಸಾಸನಪ್ಪಟಿಯತ್ತತ್ತಾ ಚ ರಟ್ಠವಾಸಿಕಾಯತ್ತತ್ತಾ ಚ ಧಮ್ಮಾನುಲೋಮವಸೇನ ವುತ್ತಂ.

ಕಲಿಯುಗೇ ಚತುವಸ್ಸಾಧಿಕೇ ಅಟ್ಠಸತೇ ಮಹಾನರಪತಿ ರಾಜಾ ರತನಪೂರನಗರೇ ರಜ್ಜಂ ಕಾರೇಸಿ. ಸೋ ಚ ರಾಜಾ ಥೂಪಾರಾಮಚೇತಿಯಂ ಕಾರಾಪೇಸಿ. ತಸ್ಸ ಪನ ಆಚರಿಯೋ ಮಹಾಸಾಮಿತ್ಥೇರೋ ನಾಮ. ಸೋ ಪನ ಥೇರೋ ಸೀಹಳದೀಪಂ ಗನ್ತ್ವಾ ಸೀಹಳಿನ್ದಸ್ಸ ರಞ್ಞೋ ಆಚರಿಯಸ್ಸ ಸಾರಿಪುತ್ತತ್ಥೇರಸ್ಸ ಸನ್ತಿಕೇ ಸಿಕ್ಖಂ ಗಹೇತ್ವಾ ಪಚ್ಚಾಗತತ್ಥೇರವಂಸಿಕೋತಿ ದಟ್ಠಬ್ಬೋ. ತಸ್ಸ ರಞ್ಞೋ ಕಾಲೇ ರತನಪೂರನಗರೇ ಮಹಾಅರಿಯವಂಸೋ ನಾಮ ಏಕೋ ಥೇರೋ ಅತ್ಥಿ. ಸೋ ಪನ ಪರಿಯತ್ತಿವಿಸಾರದೋ ಅರಿಮದ್ದನನಗರೇ ಛಪ್ಪದಗಣತೋ ಆಗತವಂಸಿಕೋ.

ಏಕಸ್ಮಿಂ ಸಮಯೇ ಜೇಯ್ಯಪುರನಗರಂ ಗನ್ತ್ವಾ ರೇಙ್ಗ ಇತಿ ಪಾಕಟಸ್ಸ ಮಹಾಥೇರಸ್ಸ ಸನ್ತಿಕೇ ಸದ್ದನಯಂ ಉಗ್ಗಣ್ಹಿತ್ವಾ ನಿಸೀದಿ. ಸೋ ಪನ ಕಿರ ಮಹಾಥೇರೋ ಅಞ್ಞೇಹಿ ಸದ್ಧಿಂ ಯಂವಾ ತಂವಾ ಕಥಂ ಅಸಲ್ಲಪಿತುಕಾಮತಾಯ ಮುಖೇ ಉದಕಂ ಠಪೇತ್ವಾ ಯೇಭುಯ್ಯೇನ ನಿಸೀದತಿ. ತೇನೇವೇಸ ಮರಮ್ಮವೋಹಾರೇನ ರೇಙ್ಗು ಇತಿ ಪಾಕಟೋ ಅಹೋಸಿ.

ಸೋ ಕಿರ ಅರಿಯವಂಸತ್ಥೇರೋ ರೇಙ್ಗುಂ ಥೇರಸ್ಸ ಸನ್ತಿಕಂ ಗನ್ಥಂ ವಾಚಾಪೇತು ಓಕಾಸಂ ಯಾಚಿಸ್ಸಾಮೀತಿ ಉಪಗಚ್ಛನ್ತೋಪಿ ಕಥಾಸಲ್ಲಾಪಂ ಅಕತ್ವಾ ದ್ವೇ ಅಹಾನಿ ವತ್ತಂ ಪರಿಪೂರೇತ್ವಾಯೇವ ಪಚ್ಚಾಗಚ್ಛಿ. ತತಿಯದಿವಸೇ ಪನ ಚಮ್ಮಖಣ್ಡಂ ಆಕೋಟುನತ್ತಾ ಸದ್ದಂ ಸುತ್ವಾ ಮುಖತೋ ಉದಕಂ ಉಗ್ಗಿರಿತ್ವಾ ಕಾರಣಂ ಪುಚ್ಛಿ. ಗನ್ಥಂ ಉಗ್ಗಹಣತ್ಥಾಯ ಆಗತಭಾವಂ ಆರೋಚೇಸಿ.

ಅಥ ಥೇರೋ ಏವಮಾಹ,-ಅಹಂ ಆವುಸೋ ದಿವಸೇ ದಿವವಸೇ ತಿಕ್ಖತ್ತುಂ ಗನ್ಥಂ ವಾಚೇಮಿ, ಮಜ್ಝನ್ತಿ ಕಾತಿಕ್ಕಮಕಾಲೇಪಿ ಪಞ್ಞಚೇತಿಯಂ ಗನ್ತ್ವಾ ಚೇತಿಯಙ್ಗಣೇ ಸಮ್ಮಜ್ಜನಕಿಚ್ಚಂ ಕರೋಮಿ, ಓಕಾಸಂ ¶ ನ ಲಭಾಮಿ, ಏವಮ್ಪಿ ತ್ವಂ ಬಹೂಗನ್ಥೇ ಉಗ್ಗಹೇತ್ವಾಪಿ ಆಚರಿಯೇಹಿ ದಿನ್ನೋಪದೇಸಂ ಅಲಭಿತ್ವಾ ಪುನ ಮಮ ಸನ್ತಿಕಂ ಆಗಚ್ಛಸಿ, ತಸ್ಮಾಯಙ್ಗಣೇ ಸಮ್ಮಜ್ಜನವತ್ತಂ ತಾವಕಾಲಿಕಂ ವಿಕೋಪೇತ್ವಾ ಗನ್ಥುಗ್ಗಹಣತ್ಥಾಯ ಓಕಾಸಂ ದಸ್ಸಾಮೀತಿ ವತ್ವಾ ಅಭಿಧಮ್ಮತ್ಥವಿಸಾವಿನಿಂ ನಾಮ ಲಕ್ಖಣಟೀಕಂ ಉಗ್ಗಣ್ಹಾಪೇಸಿ. ನಾನಾನಯೇಹಿ ಉಪದೇಸಂ ದತ್ವಾ ವಾಚೇಸಿ. ವಾಚೇತ್ವಾ ಚ ತತಿಯದಿವಸೇ ಆಚರಿಯಸ್ಸ ಸನ್ತಿಕಂ ನಾಗಚ್ಛಿ. ಮಹಾಥೇರೋಪಿ ಕಾರಣಂ ಅಕಲ್ಲತಾಯ ಅನಾಗತೋ ಭವೇಯ್ಯಾತಿ ಮಞ್ಞಿತ್ವಾ ಪುಚ್ಛನತ್ಥಾಯ ಭಿಕ್ಖೂ ಪೇಸೇಸಿ.

ಅರಿಯವಂಸತ್ಥೇರೋಚ ಆಚರಿಯಸ್ಸ ಸನ್ತಿಕಂ ಗಮಿಸ್ಸಾಮೀತಿ ಆಗತೋ, ಅನ್ತರಾಮಗ್ಗೇಯೇವ ದೂತಭಿಕ್ಖೂ ಪಸ್ಸಿತ್ವಾ ತೇಹಿ ಸದ್ಧಿಂ ಮಹಾಥೇರಸ್ಸ ಸನ್ತಿಕಂ ಆಗಮಂಸು. ಆಚರಿಯಸ್ಸ ಸನ್ತಿಕಂ ಪತ್ವಾ ಆಚರಿಯಾ ಅರಿಯವಂಸತ್ಥೇರಂ ಪುಚ್ಛಿ,-ಕಸ್ಮಾ ಪನ ತ್ವಂ ನ ಉಗ್ಗಹಣತ್ಥಾಯ ಆಗತೋಸೀತಿ. ಅಹಂ ಭನ್ತೇ ತುಮ್ಹೇಹಿ ದಿನ್ನೋಪದೇಸಂ ನಿಸ್ಸಾಯ ಇದಾನಿ ಸಬ್ಬಂ ನಯಂ ಜಾನಾಮೀತಿ. ಅಥ ಆಚರಿಯೋ ಆಹ, ಯಂ ಪನ ಗನ್ಥಂ ನಿಸ್ಸಾಯ ತ್ವಂ ಛೇಕತಂ ಪತ್ತೋಸಿ, ತಸ್ಸ ಸಂವಣ್ಣನಂ ಕತ್ವಾ ಉಪಕಾರಂ ಕರೋಹೀತಿ. ಅಥ ಅರಿಯವಂಸತ್ಥೇರೋ ಆಚರಿಯಸ್ಸ ವಚನಂ ಸಿರಸಾ ಪಟಿಗ್ಗಹೇತ್ವಾ ಅಭಿಧಮ್ಮತ್ಥವಿಭಾವಿನಿಯಾ ಮಣಿಸಾರಮಞ್ಜೂಸಂ ನಾಮ ಅನುಸಂವಣ್ಣನಂ ಅಕಾಸಿ. ನಿಟ್ಠಿತನಿಟ್ಠಿತಪಾಳಂ ಉಪೋಸಥದಿವಸೇ ಉಪೋಸಥದಿವಸೇ ಪುಞ್ಞಚೇತಿಯಸ್ಸ ಚೇತಿಯಙ್ಗಣೇ ಭಿಕ್ಖುಸಙ್ಘಂ ಸನ್ನಿಪಾತಾಪೇತ್ವಾ ಭಿಕ್ಖುಸಙ್ಘಸ್ಸ ಮಜ್ಝೇ ವಾಚಾಪೇತ್ವಾ ಸುಣಾಪೇಸಿ,- ಸಚೇ ಕೋಚಿ ದೋಸೋ ಅತ್ಥಿ, ತಂ ವದಥಾತಿ.

ಅಥ ಅರಿಮದ್ದನನಗರತೋ ಚೇತಿಯವನ್ದನತ್ಥಾಯ ಏಕೋ ಭಿಕ್ಖು ಆಗನ್ತ್ವಾ ಪರಿಸಕೋಟಿಯಂ ಸುಣಿತ್ವಾ ನಿಸೀದಿ. ಅಥ ಸೋ ಭಿಕ್ಖು ದ್ವೇ ವಾರಂ ಏಏಇತಿ ಸದ್ದಂ ಅಕಾಸಿ. ತಂ ಠಾನಂ ಸಲ್ಲಕ್ಖೇತ್ವಾ ಠಪೇಸಿ. ನಿವಾಸನಟ್ಠಾನಞ್ಚ ಪುಚ್ಛಿ. ಅರಿಯವಂಸತ್ಥೇರೋಪಿ ಸಕವಿಹಾರಂ ಪತ್ವಾ ತಸ್ಮಿಂ ಠಾನೇ ಉಪಧಾರೋನ್ತೋ ಏಕಸ್ಮಿಂ ಠಾನೇ ಏಕಸ್ಸ ಅತ್ಥಸ್ಸ ದ್ವಿಕ್ಖತ್ತುಂ ವುತ್ತತ್ತಾ ಪುನರುತ್ತಿದೋಸೋ ದಿಸ್ಸತಿ, ಏಕಸ್ಮಿಂ ¶ ಠಾನೇ ಇಮಂ ಗನ್ಥನ್ತಿ ಪುಲ್ಲಿಙ್ಗರೂಪೇನ ವತ್ತಬ್ಬಟ್ಠಾನೇ ಇದಂ ಗನ್ಥನ್ತಿ ನಪುಂಸಕಲಿಙ್ಗೇನ ವುತ್ತತ್ತಾ ಲಿಙ್ಗವಿರೋಧಿದೋಸೋ ದಿಸ್ಸತಿ.

ಅಥ ತಂ ಪುಗ್ಗಲಂ ಪಕ್ಕೋಸಾಪೇತ್ವಾ ಏವಮಾಹ,-ಅಹಂ ಆವುಸೋ ಇಮಂ ಗನ್ಥಂ ಮಹುಸ್ಸಾಹೇನ ಕರೋಮಿ, ತಞ್ಚ ವಿವೇಕಕಾಲೇ ರತ್ತಿಭಾಗೇಯೇವ ಪೋತ್ಥಕಂ ಪತ್ಥರಿತ್ವಾ ಲಿಖಾಮಿ, ಏವಂ ಮಹುಸ್ಸಾಹೇನ ಕರೋನ್ತಮ್ಪಿ ತ್ವಂ ಅರುಚ್ಚನಾಕಾರೇನ ಸದ್ದಂ ಕರೋಸಿ, ಕೀದಿಸಂ ಪನ ದೋಸಂ ಸುತ್ವಾ ಏವಂ ಕರೋಸೀತಿ ಪುಚ್ಛಿ. ಅಥ ಸೋ ಭಿಕ್ಖು ಏವಮಾಹ,- ತಯೋ ಭನ್ತೇ ಮಹುಸ್ಸಾಹೇನ ಕತೇ ಗನ್ಥೇ ದೋಸವಸೇನ ಬಹುವತ್ತಬ್ಬಟ್ಠಾನಂ ನತ್ಥಿ, ಸದ್ದತೋಚೇವ ಅತ್ಥತೋ ಚ ಪರಿಪುಣ್ಣೋಯೇವೇಸ ಗನ್ಥೋ, ಅಥ ಖೋ ಪನ ಏಕಸ್ಮಿಂ ಠಾನೇ ಏಕಸ್ಸ ಅತ್ಥಸ್ಸ ದ್ವಿಕ್ಖತ್ತುಂ ವುತ್ತತ್ತಾ ಪುರನುತ್ತಿದೋಸೋ ದಿಸ್ಸತಿ, ಏಕಸ್ಮಿಂ ಪನ ಇಮಂ ಗನ್ಥನ್ತಿ ಪುಲ್ಲಿಙ್ಗೇನ ವತ್ತಬ್ಬಟ್ಠಾನೇ ಇದಂ ಗನ್ಥನ್ತಿ ನಪುಂಸಕಲಿಙ್ಗೇನ ವುತ್ತತ್ತಾ ಲಿಙ್ಗವಿರೋಧಿದೋಸೋ ದಿಸ್ಸತಿ, ಏವಂ ಏತ್ತಕಂಯೇವ ದೋಸಂ ದಿಸ್ವಾ ಈದಿಸಂ ಅರುಚ್ಚನಾಕಾರಂ ದಸ್ಸೇಮೀತಿ.

ಅಥ ಅರಿಯವಂಸತ್ಥೇರೋ ತುಟ್ಠಚಿತ್ತೋ ಹುತ್ವಾ ಅತ್ತನೋ ಸರೀರಪಾರುಪಿತಂ ದುಪಟ್ಟಚೀವರಂ ಇಮಿನಾಹಂ ತವ ಞಾಣಂ ಪೂಜೇಮೀತಿ ವತ್ವಾ ಅದಾಸಿ. ಪಚ್ಛಾಕಾಲೇ ಅಧಿಕರಾಜಾ ತಮತ್ಥಂ ಸುತ್ವಾ ನಾಮ ಲಞ್ಛಂ ಅದಾಸಿ.

ಸೋ ಚ ಅರಿಯವಂಸತ್ಥೇರೋ ಮಣಿದೀಪಂ ನಾಮ ಗನ್ಥಂ ಗನ್ಥಾ ಭರಣಞ್ಚೇವ ಜಾತಕವಿಸೋಧನಞ್ಚ ಪಾಳಿಭಾಸಾಯ ಅಕಾಸಿ. ಅನುಟೀಕಾಯ ಪನ ಅತ್ಥಯೋಜನಂ ಮರಮ್ಮಭಾಸಾಯ ಅಕಾಸಿ.

ಏಕಂ ಸಮಯಂ ಅಧಿಕರಾಜಾ ವಿಹಾರಂ ಗನ್ತ್ವಾ ಧಮ್ಮಂ ಸುಣಿ. ಥೇರೋ ಧಮ್ಮಂ ದೇಸೇತ್ವಾ ನಿಟ್ಠಿತಕಾಲೇ ಯಾನಬಲಿಂ ಸುಖತ್ಥಾಯ ಯಾಚಿ. ರಾಜಾ ಅದತ್ವಾ ನಾವಂ ಅಭಿರೂಹಿತ್ವಾ ಪಚ್ಚಾಗಚ್ಛಿ. ಅನ್ತರಾಮಗ್ಗೇ ನಾವಾಯ ಫಿಯಂ ಏಕೋ ಸಂಸುಮಾರೋ ಮುಖೇನ ಗಣ್ಹಿತ್ವಾ ನಿಚ್ಚಲಂ ಕತ್ವಾ ಠಪೇಸಿ. ಥೇರೇನ ಯಾಚಿತಂ ಯಾನಬಲಿಂ ದದಾಮೀತಿ ಮಹಾಸದ್ದಂ ಕತ್ವಾ ರಾಜಪುರಿಸೇ ತಿಕ್ಖತ್ತುಂ ನಿಚ್ಛಾರೇಸಿ. ಅಥ ಸಂಸುಮಾರೋ ನಾವಂ ಮುಞ್ಚಿತ್ವಾ ಗಚ್ಛಿ. ಏಕಸ್ಮಿಞ್ಚ ಕಾಲೇ ರಾಜಾ ವಿಹಾರಂ ನಿಕ್ಖಮಿ. ಅಥ ¶ ಏಕೋ ಹತ್ಥಿನೀ ವಿಹಾರಸಮೀಪೇ ಬನ್ಧಿತ್ವಾ ಠಪೇಸಿ. ಸಾ ಬೋಧಿರುಕ್ಖಸಾಖಂ ಛಿನ್ದಿತ್ವಾ ಖಾದಿ. ಸಾ ತತ್ಥೇವ ಭೂಮಿಯಂ ಪತಿ. ಅಥ ಥೇರೋ ಸಚ್ಚಕಿರಿಯಂ ಕತ್ವಾ ಮೇತ್ತಾಭಾವನಂ ಭಾವೇತ್ವಾ ಮೇತ್ತೋದಕೇನ ಭಿಞ್ಚಿ. ತಂ ಖಣಞ್ಞೇವ ಸಾ ಉಟ್ಠಹಿ. ರಾಜಾ ಚ ತಂ ಅಚ್ಛರಿಯಂ ದಿಸ್ವಾ ತಸ್ಸಾ ಅಗ್ಘನಕಮೂಲಂ ದತ್ವಾ ವಿಹಾರತೋ ನದೀ ತಿತ್ಥಂ ಗಮನಮಗ್ಗೇ ಸಿಲಾಪಟ್ಟಂ ಚಿನಿತ್ವಾ ಸೇತುಂ ಅಕಾಸೀತಿ.

ಸದ್ಧಮ್ಮಕಿತ್ತಿತ್ಥೇರೋ ಪನ ಅರಿಯವಂಸತ್ಥೇರಸ್ಸ ಸದ್ಧಿವಿಹಾರಿಕೋ ಜೇತವನವಿಹಾರವಾಸೀ. ತೇ ಪನ ಥೇರಾ ಛಪ್ಪದಗಣವಂಸಿಕಾತಿ ದಟ್ಠಬ್ಬಾ.

ಕಲಿಯುಗೇ ದ್ವೇಚತ್ತಾಲೀಸಾಧಿಕೇ ಅಟ್ಠವಸ್ಸಸತೇ ಸಮ್ಪತ್ತೇ ರತನಪೂರನಗರೇಯೇವ ಸಿರಿಸುಧಮ್ಮರಾಜಾಧಿಪತಿ ನಾಮ ದುತಿಯಾಧಿಕರಾಜಾ ರಜ್ಜಂ ಕಾರೇಸಿ. ತಸ್ಮಿಞ್ಚ ಕಾಲೇ ಪಬ್ಬತಬ್ಭನ್ತರನಗರತೋ ಮಹಾಸೀಲವಂಸೋ ನಾಮ ಥೇರೋ ಪಞ್ಚಚತ್ತಾಲೀಸಾಧಿಕೇ ಅಟ್ಠವಸ್ಸಸತೇ ಸಮ್ಪತ್ತೇ ಸುಮೇಧಕಥಂ ಕಬ್ಯಾಲಙ್ಕಾರವಸೇನ ಬನ್ಧಿತ್ವಾ ಬುದ್ಧಾಲಙ್ಕಾರಞ್ಚ ನಾಮ ಕಬ್ಯಾಲಙ್ಕಾರಂ ಪಬ್ಬತಬ್ಭನ್ತರಪ್ಪಟಿಸಂಯುತ್ತಞ್ಚೇವ ಕಬ್ಯಾಲಙ್ಕಾರಂ ಬನ್ಧಿತ್ವಾ ತೇ ಗಹೇತ್ವಾ ರತನಪೂರನಗರಂ ಆಗಚ್ಛಿ.

ಅಥ ರಾಜಾ ಥೂಪಾರಾಮಚೇತಿಯಸ್ಸ ಏಸನ್ನಟ್ಠಾನೇ ರತನವಿಮಾನವಿಹಾರೇ ನಿಸೀದಾಪೇಸಿ. ಸೋ ಚ ಥೇರೋ ತತ್ಥ ಸೋತಾರಾನಂ ಪರಿಯತ್ತಿಂ ವಾಚೇತ್ವಾ ನಿಸೀದಿ. ಸೋ ಚ ಥೇರೋ ತತ್ಥ ನಿಸಿನ್ನಾನಂ ಥೇರಾನಂ ಅಟ್ಠಮಕೋ ಹೋತಿ. ಸೋ ಚ ಮಹಾಸೀಲವಂಸತ್ಥೇರೋ ಕಲಿಯುಗಸ್ಸ ಪನ್ನರಸಾಧಿಕೇ ಅಟ್ಠವಸ್ಸಸತೇ ಜಾತೋ. ತಿಂಸವಸ್ಸಕಾಲೇ ರತನಪೂರನಗರಂ ಆಗತೋತಿ ಪೋರಾಣಪೋತ್ಥಕೇಸು ವುತ್ತಂ. ಸೋ ಪನ ಥೇರೋ ನೇತ್ತಿಪಾಳಿಯಾ ಅತ್ಥ ಯೋಜನಂ ಮರಮ್ಮಭಾಸಾಯ ಅಕಾಸಿ ಪಾರಾಯನವತ್ಥುಞ್ಚ.

ರತನಪೂರನಗರೇಯೇವ ರಟ್ಠಸಾರೋ ನಾಮ ಏಕೋ ಥೇರೋ ಅತ್ಥಿ, ಮಹಾಸೀಲವಂಸತ್ಥೇರೇನ ಸಮಞ್ಞಾಣಥಾಮೋ. ಸೋ ಪನ ರತನಪೂರನಗರೇಯೇವ ¶ ಕಲಿಯುಗಸ್ಸ ತಿಂಸಾಧಿಕೇ ಅಟ್ಠವಸ್ಸಸತೇ ಕಾಲೇ ಜಾತೋ. ಭೂರಿದತ್ತಜಾತಕಂ ಹತ್ಥಿಪಾಲಜಾತಕಂ ಸಂವರಜಾತಕಞ್ಚ ಕಬ್ಯಾಲಙ್ಕಾರವಸೇನ ಬನ್ಧಿ ಅಞ್ಞಞ್ಚ ಅನೇಕವಿಧಂ ಕಬ್ಯಾಲಙ್ಕಾರಂ. ತೇ ಪನ ದ್ವೇ ಥೇರಾ ಕಬ್ಯಾಲಙ್ಕಾರಕಾ ರಕಾತಿ ಥೇರಪರಮ್ಪರಾಯ ಪವೇಸೇತ್ವಾ ನ ಗಣೇನ್ತಿ ಪೋರಾಣಾ.

ಏತ್ಥ ಚ ಕಿಞ್ಚಾಪಿ ಸಮಣಾನಂ ಉಪೋಸಥಿಕಾನಞ್ಚ ಕಬ್ಯಾಲಙ್ಕಾರಂ ಬನ್ಧಿತುಂ ವಾಚೇತುಂ ವಾ ಕಪ್ಪಾಕಪ್ಪವಿಚಾರಣಂ ವತ್ತುಂ ಓಕಾಸೋ ಲದ್ಧೋ, ಸಾಸನವಂಸಂ ಪನ ವತ್ತುಂ ಓಕಾಸಸ್ಸ ಅತಿವಿತ್ಥಾರೋವಸೇಸತ್ತಾ ತಂ ಅವತ್ವಾ ಅಜ್ಝುಪೇಕ್ಖಿಸ್ಸಾಮ. ಉಪೋಸಥವಿನಿಚ್ಛಯೇ ಪನ ನಚ್ಚಗೀತಾದಿಸಿಕ್ಖಾಪದಸ್ಸ ವಿಸಯೇ ವಿತ್ಥಾರೇನ ಮಯಂ ಅವೋಚುಮ್ಹಾ.

ಕಲಿಯುಗಸ್ಸ ಗತೇ ತೇಸಟ್ಠಾಧಿಕೇ ಅಟ್ಠವಸ್ಸಸತೇ ರತನಪೂರನಗರೇಯೇವ ಸಿರಿತ್ರಿಭವನಾದಿತ್ಯನರಪತಿಪವರಮಹಾಧಮ್ಮ ರಾಜಾಧಿಪತಿರಾಜಾ ರಜ್ಜಂ ಕಾರೇಸಿ. ತಸ್ಸ ರಞ್ಞೋ ಕಾಲೇತಿಸಾಸನಧಜೋ ನಾಮ ಭಿಕ್ಖು ಸದ್ಧಮ್ಮಕಿತ್ತಿತ್ಥೇರಸ್ಸ ಸನ್ತಿಕೇ ಗನ್ಥಂ ಉಗ್ಗಣ್ಹಿ. ಅಥ ಅರಿಮದ್ದನನಗರತೋ ಏಕೋ ಮಹಾಥೇರೋಸೋತುನಂ ವಾಚಿತ್ವಾ ರತನಪೂರನಗರೇ ನಿಸೀದಿಸ್ಸಾಮೀತಿ ಆಗತೋ. ಅಥ ಸದ್ಧಮ್ಮಕಿತ್ತಿತ್ಥೇರಸ್ಸ ಗನ್ಥಂ ವಾಚೇನ್ತಸ್ಸೇವ ವಿಹಾರಸ್ಸ ಹೇಟ್ಠಾ ನಿಸೀದಿತ್ವಾ ಸೋ ಮಹಾಥೇರೋ ಸದ್ದಂ ಸುಣಿತ್ವಾ ಏವಂ ಚಿನ್ತೇಸಿ,-ಏತಸ್ಸ ಸನ್ತಿಕೇ ಅಹಂ ನವಕಟ್ಠಾನೇ ಠತ್ವಾ ಥೋಕಂ ಗನ್ಥಂ ಉಗ್ಗಣ್ಹಿಸ್ಸಾಮೀತಿ. ಅಥ ಸೋ ಮಹಾಥೇರೋ ಸದ್ಧಮ್ಮಕಿತ್ತಿತ್ಥೇರಸ್ಸ ಸನ್ತಿಕಂ ಪವಿಸಿತ್ವಾ ಗನ್ಥಂ ವಾಚಾಪೇತುಂ ಓಕಾಸಂ ಯಾಚಿ. ಅಥ ಸದ್ಧಮ್ಮಕಿತ್ತಿತ್ಥೇರೋ ವಸ್ಸಪಮಾಣಂ ಪುಚ್ಛಿತ್ವಾ ತ್ವಂ ಭನ್ತೇ ಮಯಾ ವುಡ್ಢತರೋಸೀತಿ ಆಹ. ಅಹಂ ತಯಾ ವುಡ್ಢತರೋಪಿ ಸಮಾನೋ ನವಕಟ್ಠಾನೇ ಠತ್ವಾ ಗನ್ಥಂ ಉಗ್ಗಣ್ಹಿಸ್ಸಾಮೀತಿ ಆಹ. ಅಥ ಸದ್ಧಮ್ಮಕಿತ್ತಿತ್ಥೇರೋ ತಸ್ಸ ಗನ್ಥಂ ವಾಚೇಸಿ. ಅತಿಪಸೀದಿತ್ವಾ ಪನ ತಂ ಮಹಾಥೇರಂ ಮಹಾಸಾಧುಜ್ಜನೋತಿ ನಾಮೇನ ವೋಹಾರತಿ.

ಅಥ ¶ ಪಚ್ಛಾ ಮರಮ್ಮರಟ್ಠಂ ಕಲಿಯುಗಸ್ಸ ಪಞ್ಚಾಸೀತಾಧಿಕಅಟ್ಠಸತಕಾಲತೋ ಪಟ್ಠಾಯ ಯಾವ ಅಟ್ಠಾಸೀತಾಧಿಕಅಟ್ಠಸತವಸ್ಸಕಾಲಂ ನಾನಾಭಯೇಹಿ ಸಙ್ಖುಬ್ಭಿತಂ ಅಹೋಸಿ. ತದಾ ಕಮ್ಬೋಜರಟ್ಠತೋ ಸಿಹನಿಸ್ವಾ ನಾಮ ಭಿನ್ನಕುತೋ ಆಗನ್ತ್ವಾ ರತನ ಪೂರನಗರೇ ರಜ್ಜಂ ಗಣ್ಹಿ. ಅಥ ಸೋ ಏವಂ ಚಿನ್ತೇಸಿ,- ಭಿಕ್ಖೂ ಅದಾರಾ ಅಪುತ್ತಿಕಾ ಹುತ್ವಾ ಪುನ ಸಿಸ್ಸೇ ಪೋಸೇತ್ವಾ ಪರಿವಾರಂ ಗವೇಸನ್ತಿ, ಸಚೇ ಭಿಕ್ಖೂ ಪರಿವಾರಂ ವಿಚಿನಿತ್ವಾ ರಾಜಭಾವಂ ಗಣ್ಹೇಯ್ಯುಂ, ಏವಂ ಸತಿ ರಜ್ಜಂ ಗಹೇತುಂ ಸಕ್ಖಿಸ್ಸನ್ತಿ, ಇದಾನೇವ ಭಿಕ್ಖೂ ಗಹೇತ್ವಾ ಮಾರೇತುಂ ವಟ್ಟತೀತಿ. ಏವಂ ಪನ ಚಿನ್ತೇತ್ವಾ ತೋವಿಸೀಲೂ ನಾಮಕೇ ಖೇತ್ತವನೇ ಬಹೂ ಮಣ್ಡಪೇ ಕಾರಾಪೇತ್ವಾ ಗೋಮಹಿಸಕುಕ್ಕುಟಸೂಕರಾದಯೋ ಮಾರಾಪೇತ್ವಾ ಭಿಕ್ಖೂ ಭೋಜೇಸ್ಸಾಮೀತಿ ವತ್ವಾ ಜೇಯ್ಯಪುರವಿಜಯಪುರರತನಪೂರನಗರೇಸು ಸಬ್ಬೇ ಮಹಾಥೇರೇ ಬಹೂಹಿ ಅನ್ತೇವಾಸಿಕೇಹಿ ಸದ್ಧಿಂ ಪಕ್ಕೋಸಾಪೇತ್ವಾ ತೇಸು ಮಣ್ಡಪೇಸು ನಿಸೀದಾಪೇತ್ವಾ ಹತ್ಥಿಅಸ್ಸಾದಿಸೇನಙ್ಗೇಹಿ ಪರಿವಾರೇತ್ವಾ ಮಾರೇಸಿ. ತದಾ ಕಿರ ತಿಸಹಸ್ಸಪ್ಪಮಾಣಾ ಭಿಕ್ಖೂ ಮರಿಂಸೂತಿ. ಭಿಕ್ಖೂ ಚ ಮಾರೇತ್ವಾ ಬಹೂಪಿ ಪೋತ್ಥಕೇ ಅಗ್ಗಿನಾ ಝಾಪೇಸಿ, ಚೇತಿಯಾನಿಪಿ ಭೇದಾಪೇಸಿ. ಅಹೋವತ ಪಾಪಜನಸ್ಸ ಪಾಪಕಮ್ಮನ್ತಿ. ಹೋನ್ತಿ ಚೇತ್ಥ,-

ಸಾಸನಂ ನಾಮ ರಾಜಾನಂ, ನಿಸ್ಸಾಯ ತಿಟ್ಠತೇ ಇಧ;

ಮಿಚ್ಛಾದಿಟ್ಠಿಕರಾಜಾನೋ, ಸಾಸನಂ ದೂಸೇನ್ತಿ ಸತ್ಥುನೋ.

ಸಮ್ಮಾದಿಟ್ಠೀ ಚ ರಾಜಾನೋ, ಪಗ್ಗಣ್ಹನ್ತೇವ ಸಾಸನಂ;

ಏವಞ್ಚ ಸತಿ ಆಕಾಸೇ, ಉಲೂರಾಜಾವ ದಿಬ್ಬತೀತಿ.

ಅಥ ಕಲಿಯುಗೇ ಏಕವಸ್ಸಾಧಿಕೇ ನವವಸ್ಸಸತೇ ಸಮ್ಪತ್ತೇ ಆಕಾಸೇ ಬಹೂಹಿ ತಾರಕಾಹಿ ಧೂಮಾ ನಿಕ್ಖಮಿಂಸು. ಚಞ್ಞಿಙ್ಖುಚೇತಿಯೇಪಿ ಬುದ್ಧಪ್ಪಟಿಬಿಮ್ಬಸ್ಸ ಅಕ್ಖಿಕೂಪತೋ ಉದಕಧಾರಾನೇತ್ತಜಲಾನಿವಿಯ ನಿಕ್ಖಮಿಂಸೂತಿ ರಾಜವಂಸೇ ವುತ್ತಂ.

ಅಥ ¶ ಸದ್ಧಮ್ಮಕಿತ್ತಿತ್ಥೇರೋ ಸದ್ಧಿಂ ಮಹಾಸಾಧುಜ್ಜನತಿಸಾಯ ನಧಜತ್ಥೇರೇಹಿ ಕೇತುಮತೀನಗರಂ ಅಗಮಾಸಿ. ರಟ್ಠಸಾರತ್ಥೇರೋಪಿ ಸಿರಿಖೇತ್ತನಗರಂ ಸಯಮೇವ ಅಗಮಾಸೀತಿ ಪೋರಾಣಪೋತ್ಥಕೇಸು ವುತ್ತಂ. ತಂ ಪನ ರಾಜವಂಸೇ ಸಿರಿಖೇತ್ತನಗರಿನ್ದೋ ಸತ್ವ ವರಾಜಾ ತಂ ಆನೇಸೀತಿ ವುತ್ತವಚನೇನ ನ ಸಮೇತಿ.

ಸದ್ಧಮ್ಮಕಿತ್ತಿತ್ಥೇರೋಪಿ ಕೇತುಮತೀನಗರೇ ಕಾಲಙ್ಕತೋ. ತತೋ ಪಚ್ಛಾ ಥೋಕಂ ಕಾಲಂ ಅತಿಕ್ಕಮಿತ್ವಾ ಮಹಾಸಾಧುಜ್ಜನತ್ಥೇರೋ ತತ್ಥೇವ ಕಾಲಮಕಾಸಿ.

ತಿಸಾಸನಧಜತ್ಥೇರೋ ಪನ ಕಲಿಯುಗೇ ದ್ವಾದಸಾಧಿಕೇ ನವವಸ್ಸಸತೇ ಸಮ್ಪತ್ತೇ ಹಂಸಾವತೀನಗರೇ ಅನೇಕಸೇತಿಭಿನ್ದಸ್ಸ ರಞ್ಞೋ ಕಾಲೇ ಕೇತುಮತೀನಗರತೋ ಹಂಸಾವತೀನಗರಂ ಅಗಮಾಸಿ.

ತತೋ ಪಚ್ಛಾ ತಿಚತ್ತಾಲೀಸವಸ್ಸಿಕೋ ಹುತ್ವಾ ಕಲಿಯುಗೇ ತೇರಸಾಧಿಕೇ ನವವಸ್ಸಸತೇ ಮಿಙ್ಘ ಬ್ರಹ್ಮನರಪತಿರಞ್ಞೋಕಾಲೇ ಪುನ ಜೇಯ್ಯಪುರನಗರಂ ಸಮ್ಪತ್ತೋ ಹುತ್ವಾ ಜೇತವನವಿಹಾರಸಮೀಪೇ ಏಕಿಸ್ಸಂ ಗುಹಾಯಂ ದಿಸೀದಿ. ಮಹಾಅರಿಯವಂಸಗಣಿಕಸ್ಸ ಜೇತವನತ್ಥೇರಸ್ಸ ಸನ್ತಿಕೇ ಉಪಸಙ್ಕಮಿ.

ತಸ್ಮಿಞ್ಚ ಕಾಲೇ ಜೇತವನತ್ಥೇರೋ ಗಿಲಾನೋ ಹುತ್ವಾ ಮಯಿ ಕಾಲಙ್ಕತೇ ಮಮ ಠಾನಂ ಅಧುನಾ ಹಂಸಾವತೀನಗರತೋ ಆಗತೋ ತಿಸಾಸನಧಜೋ ನಾಮ ಥೇರೋ ಪರಿಗ್ಗಣ್ಹಿತುಂ ಸಮತ್ಥೋ ಭವಿಸ್ಸತಿ, ತಸ್ಸ ನಿಯ್ಯಾದೇಸ್ಸಾಮೀತಿ ಚಿನ್ತೇಸಿ. ತಸ್ಮಿಂ ಖಣೇ ತಿಸಾಸನಧಜತ್ಥೇರೋ ಪುರಿಮಯಾಮೇ ಸುಪಿನಂ ಮಸ್ಸಿ,– ಮತಕಳೇವರಂ ಸಮೀಪಂ ಆಗಚ್ಛತೀತಿ, ಮಜ್ಝಿಮಯಾಮೇ ಪನ ತಂ ಮತಕಳೇವರಂ ಗುಹಾಯಂ ಪವಿಸತೀತಿ, ಪಚ್ಛಿಮಯಾಮೇ ಮತಕಳೇವರಸ್ಸ ಮಂಸಂ ಸತ್ಥೇನ ಛಿನ್ದತೀತಿ. ಅಥ ಸುಪಿನಂ ಪಸ್ಸಿತಭಾವಂ ಅತ್ತನೋ ಸಮೀಪೇ ಸಯನ್ತಸ್ಸ ಏಕಸ್ಸ ಸಾಮಣೇರಸ್ಸ ಆರೋಚೇಸಿ. ಆರೋಚೇತ್ವಾ ಚ ಪರಿತ್ತಂ ಭಣೇತ್ವಾ ನಿಸೀದನ್ತಸ್ಸೇವ ಜೇತವನತ್ಥೇರೋ ತಂ ಪಕ್ಕೋಸಿತ್ವಾ ಜೇತವನವಿಹಾರಂ ತಸ್ಸ ನಿಯ್ಯಾದೇಸಿ. ತಿಸಾಸನಧಜತ್ಥೇರೋ ಚ ಜೇತವನವಿಹಾರೇ ನಿಸೀದಿತ್ವಾ ¶ ಗನ್ಥಂ ವಾಚೇತ್ವಾ ನಿಸೀದಿ. ಮಿಙ್ಘ ಬ್ರಹ್ಮನರಪತಿರಾಜಾ ಚ ತಸ್ಸ ಅನುಗ್ಗಹಿತಂ ಅಕಾಸಿ.

ಪಚ್ಛಾ ಕಲಿಯುಗೇ ಸೋಳಸಾಧಿಕೇ ನವವಸ್ಸಸತೇ ಸಮ್ಪತ್ತೇ ಹಂಸಾವತೀನಗರಿನ್ದೋ ಅನೇಕಸೇತಿಭಿನ್ದೋ ನಾಮ ರಾಜಾ ರತನಪೂರನಗರಂ ವಿಜಯಿತ್ವಾ ಏಕಂ ವಿಹಾರಂ ಕಾರಾಪೇತ್ವಾ ತಸ್ಸ ಅದಾಸಿ.

ಸೋ ಚ ತಿಸಾಸನಧಜತ್ಥೇರೋ ಅರಿಮದ್ದನನಗರೇ ಅರಹನ್ತ ಗಣವಂಸಿಕೋತಿ ದಟ್ಠಬ್ಬೋ.

ತಸ್ಸ ಪನ ಸಿಸ್ಸಾ ಅನೇಕಸತಪ್ಪಮಾಣಾ ಲಜ್ಜಿನೋ ಅಹೇಸುಂ. ತೇಸು ಪನ ಸಿಸ್ಸೇಸು ವರಬಾಹುತ್ಥೇರೋ ಭೂಮಿನಿಖಾನೇನ ಗರವಾಸಿತ್ಥೇರೋ ಮಹಾರಟ್ಠಗಾಮವಾಸಿನೋ ತಯೋ ಮಹಾಥೇರಾತಿ ಇಮೇ ಪಞ್ಚ ಥೇರಾ ವಿಸೇಸತೋ ಪರಿಯತ್ತಿಕೋವಿದಾತಿ.

ತಿಸಾಸನಧಜತ್ಥೇರೋ ಚ ಮಹಲ್ಲಕಕಾಲೇ ಅನಾಪಾನ ಸತಿಕಮ್ಮಟ್ಠಾನಂ ಗಹೇತ್ವಾ ಅರಞ್ಞಂ ಪವಿಸಿತ್ವಾ ವಿವೇಕಟ್ಠಾನಂ ಗಣ್ಹಿ. ತದಾ ಜೇತವನಗಣಾದಯೋ ಅರಹನ್ತ ಗಣವಂಸಾಯೇವ. ಅಪರಭಾಗೇಯೇವ ತೇಸಂ ಸಿಸ್ಸಾನುಸಿಸ್ಸಪರಮ್ಪರಾಸು ಕೇಚಿ ಭಿಕ್ಖೂ ಸಿರಚ್ಛಾದನಂ ನಾನಾವಣ್ಣಪ್ಪಟಿಮಣ್ಡಿತಞ್ಚ ತಾಲವಣ್ಟಂ ಗಹೇತ್ವಾ ಆಚಾರವಿಕಾರಂ ಆಪಜ್ಜಿಂಸು.

ಕಲಿಯುಗೇ ಏಕವಸ್ಸಾಧಿಕೇ ಸಹಸ್ಸೇ ಸಮ್ಪತ್ತೇ ಉಕ್ಕಂಸಿಕೋ ನಾಮ ರಾಜಾ ವಿಹಾರಂ ಕಾರಾಪೇತ್ವಾ ತಿಸಾಸನಧಜತ್ಥೇರಸ್ಸ ಸಿಸ್ಸಭೂತಸ್ಸ ವರಬಾಹುತ್ಥೇರಸ್ಸ ಸಿಸ್ಸಭೂತಸ್ಸ ಮಹಾರತನಾಕರಸ್ಸ ನಾಮ ಥೇರಸ್ಸ ಅದಾಸಿ.

ಸೋ ಚ ಮಹಾರತನಾಕರತ್ಥೇರೋ ಉಕ್ಕಂಸಿಕರಞ್ಞೋ ಸಿರಿಸುಧಮ್ಮರಾಜಾಮಹಾಧಿಪತೀತಿ ನಾಮಲಞ್ಛಂ ಛನ್ದಾಲಙ್ಕಾರಸದ್ದನೇತ್ತಿ ನಯೇಹಿ ಅಲಙ್ಕರಿತ್ವಾ ದಸ್ಸಿತಂ ರಜಿನ್ದರಾಜನಾಮಾಭಿಧೇಯ್ಯಾದೀಪನಿಂ ನಾಮ ಗನ್ಥಂ ಅಕಾಸಿ.

ತಞ್ಚ ಗನ್ಥಂ ಪರಿವಿಸೋಧನತ್ಥಾಯ ತಿರೋಪಬ್ಬತಾಭಿಧೇಯ್ಯಸ್ಸ ಮಹಾಥೇರಸ್ಸ ನಿಯ್ಯಾದೇಸಿ. ತಿಸಾಸನಧಜತ್ಥೇರಸ್ಸ ಸಿಸ್ಸಭೂತೇಸು ¶ ಮಹಾರಟ್ಠಗಾಮವಾಸೀಸು ತೀಸು ಭಾತಿಕತ್ಥೇರೇಸು ಜೇಟ್ಠೋ ತಿಂಸಗುಹಾಸುವಸನ್ತೋ ಪರಿಯತ್ತಿಂ ವಾಚೇತ್ವಾ ನಿಸೀದಿ. ಸತ್ವವರಾಜಾ ಚ ತಸ್ಮಿಂ ಥೇರೇ ಅತಿವಿಯ ಪಸನ್ನೋ ಅಹೋಸಿ. ಞ್ಞೋಙ್ಕರಮಿ ನಾಮಕಸ್ಸ ರಞ್ಞೋ ಕಾಲೇಪಿ ಚೂಳಪಿತಾ ಏಕಂ ವಿಹಾರಂ ಕಾರಾಪೇತ್ವಾ ತಸ್ಸೇವ ಅದಾಸಿ. ಉಕ್ಕಂಸಿಕರಞ್ಞೋ ಕಾಲೇಪಿ ಮಙ್ಗವಂನಾಮಕೇ ಪಬ್ಬತೇ ವಿಹಾರಂ ಕಾರಾಪೇತ್ವಾ ತಸ್ಸೇವ ಅದಾಸಿ.

ತೇಸು ಮಹಾರಟ್ಠಗಾಮವಾಸಿತ್ಥೇರೇಸು ಮಜ್ಝಿಮತ್ಥೇರೋಪಿ ತಿಸಾಸನಧಜತ್ಥೇರಸ್ಸ ಜೇಟ್ಠಭಾತಿಕತ್ಥೇರಸ್ಸ ಚ ನಿವಾಸಟ್ಠಾನಭೂತೇ ಜೇತವನವಿಹಾರೇಯೇವ ಗನ್ಥಂ ವಾಚೇತ್ವಾ ನಿಸೀದಿ. ಕನಿಟ್ಠತ್ಥೇರೋಪಿ ತೇಸಂ ನಿವಾಸಟ್ಠಾನಭೂತೇಸುಯೇವ ವಿಹಾರೇಸು ಗನ್ಥಂ ವಾಚೇತ್ವಾ ನಿಸೀದಿ. ಏತ್ಥ ಚ ತಿಸಾಸನಧಜತ್ಥೇರೋ ನಾಮ ಲಜ್ಜಿಅಲಜ್ಜಿವಸೇನ ದುಬ್ಬಿಧೋ. ಯಥಾವುತ್ತತ್ಥೇರೋ ಪನ ಲಜ್ಜೀಯೇ ವಾತಿ ದಟ್ಠಬ್ಬೋ. ಅಲಜ್ಜೀ ಪನ ಇಮಸ್ಮಿಂ ಥೇರಪರಮ್ಪರಾದಸ್ಸನೇ ನ ಇಚ್ಛಿ ತಬ್ಬೋ. ಅಲಜ್ಜೀಭೂತಸ್ಸ ಪನ ತಿಸಾಸನಧಜತ್ಥೇರಸ್ಸ ವತ್ಥುಂ ಇಧ ಅವತ್ವಾ ಅಜ್ಝುಪೇಕ್ಖಿಸ್ಸಾಮ, ಪಯೋಜನಾಭಾವಾ ಗನ್ಥಸ್ಸ ಚ ಪಪಞ್ಚೂಪಗಮನತ್ತಾತಿ.

ಯೋಗಿರಙ್ಗ ನಾಮಕಸ್ಸ ರಞ್ಞೋ ಕಾಲೇ ಜೇಯ್ಯಪುರೇ ಸುವಣ್ಣಗುಹವಾಸೀ ಮಹಾಥೇರೋ ದಕ್ಖಿಣಾರಾಮವಿಹಾರವಾಸೀ ಮಹಾಥೇರೋ ಚತುಭೂಮಿಕವಿಹಾರವಾಸೀ ಮಹಾಥೇರೋ ತೋಙ್ಗಭೀಲೂ ವಿಹಾರವಾಸೀ ಮಹಾಥೇರೋ ಚ ತಿಸಾಸನಧಜಮಹಾಥೇರಸ್ಸ ಸದ್ಧಿವಿಹಾರಿಕಾಯೇವ. ತೇಸಂ ಪನ ವತ್ಥುಮ್ಪಿ ಗನ್ಥವಿತ್ಥಾರಭಯೇನ ನ ವದಾಮ. ಲಜ್ಜಿಗಣವಂಸಿಕಾ ಏತೇತಿ ವಿಜಾನನಮೇವ ಹೇತ್ಥ ಪಮಾಣನ್ತಿ.

ಕಲಿಯುಗೇ ಏಕಸಟ್ಠಾಧಿಕೇ ನವವಸ್ಸಸತೇ ಸಮ್ಪತ್ತೇ ಫಗ್ಗುನಮಾಸಸ್ಸ ಜುಣ್ಹಪಕ್ಖದುತಿಯದಿವಸೇ ಸುಕ್ಕವಾರೇ ರತನಪೂರನಗರಂ ದುತಿಯಂ ಮಾಪೇತ್ವಾ ಞ್ಞೋಗೀರಙ್ಗ ನಾಮ ರಾಜಾ ರಜ್ಜಂ ಕಾರೇಸಿ. ಸೀಹಸೂರಧಮ್ಮರಾಜಾತಿಪಿ ನಾಮಲಞ್ಛಂ ಪಟಿಗ್ಗಣ್ಹಿ. ತೋಚಭೀಲೂ ವಿಹಾರವಾಸೀಮಹಾಥೇರಂ ¶ ಉದ್ದಿಸ್ಸ ಚತುಭೂಮಿಕವಿಹಾರಂ ಕಾರಾಪೇಸಿ. ಚತ್ತಾರಿ ಮಹಾಮುನಿಚೇತಿಯಾನಿಪಿ ಕಾರಾಪೇಸಿ. ವಿಹಾರ ಚೇತಿಯೇಸು ಅನಿಟ್ಠಿತೇಸುಯೇವ ಸಿನ್ನೀನಗರಂ ನಿಕ್ಖಮಿತ್ವಾ ತತ್ಥ ವೇರಂ ವೂಪಸಮಾಪೇತ್ವಾ ಪಚ್ಚಾಗತಕಾಲೇ ಸಙ್ಖಾರಸಭಾವಂ ಅನತಿಕ್ಕಮನತೋ ದಿವಙ್ಗತೋ ಅಹೋಸಿ. ಅಹೋವತ ಸಙ್ಖಾರಧಮ್ಮಾತಿ. ಹೋನ್ತಿ ಚೇತ್ಥ,–

ಸೇಯ್ಯಥಾ ವಾಣಿಜಾನಂವ, ಘರಗೋಳಿಕರೂಪಕಂ;

ತಂತಂದಿಸಂ ಭಮಿತ್ವಾವ, ಸೀಸಂ ಠಪೇತಿ ಉತ್ತರಂ;

ಏವಂ ಲೋಕಮ್ಹಿ ಸತ್ತಾ ಚ, ಸನ್ಧಿಚುತೀನಮನ್ತರೇ;

ಯಥಾ ತಥಾ ಭಮಿತ್ವಾವ, ಅನ್ತೇ ಠಪೇನ್ತಿ ಸನ್ತನುನ್ತಿ;

ಕಲಿಯುಗೇ ಸತ್ತಸಟ್ಠಾಧಿಕೇ ನವವಸ್ಸಸತೇ ಫಗ್ಗುನಮಾಸಸ್ಸ ಕಾಳಪಕ್ಖತೇರಸಮಿಯಂ ತಸ್ಸ ಜೇಟ್ಠಪುತ್ತೋ ಪಿತು ಸನ್ತಕಂ ರಜ್ಜಂ ಗಣ್ಹಿ. ಮಹಾಧಮ್ಮರಾಜಾತಿ ನಾಮಲಞ್ಛಮ್ಪಿ ಪಟಿಗ್ಗಣ್ಹಿ. ಪಿತು ಕಾಲೇ ಅನಿಟ್ಠಿತಾನಿ ಚೇತಿಯಾನಿ ಪುನ ಕಾರಾಪೇಸಿ. ಚತುಭೂಮಿಕವಿಹಾರಞ್ಚ ನಿಟ್ಠಂ ಗಮಾಪೇತ್ವಾ ತೋವಿಭೀಲೂ ಮಹಾಥೇರಸ್ಸ ಪರಲೋಕಂ ಗನ್ತ್ವಾ ಅವಿಜ್ಜಮಾನತಾಯ ಚತುಭೂಮಿಕವಿಹಾರವಾಸೀ ಮಹಾಥೇರಸ್ಸ ದಸ್ಸಾಮೀತಿ ಅನ್ತೇಪುರಂ ಪಕ್ಕೋಸಾಪೇಸಿ. ಥೇರೋ ದ್ವೇ ವಾರಾನಿ ಪಕ್ಕೋಸಿಯಮಾನೋಪಿ ನಾಗಚ್ಛಿ. ತತಿಯ ವಾರೇ ಪನ ಬಹೂ ಸದ್ಧಿವಿಹಾರಿಕಾ ಅನ್ತೇಪುರಂ ಗನ್ತ್ವಾ ಪವಿಸಥ, ನ ಹಿ ಸಕ್ಕಾ ರಞ್ಞಾ ಪಕ್ಕೋಸಿತೇ ಪಟಿಕ್ಖಿಪಿತುನ್ತಿ ಆಹಂಸು.

ಅಥ ಥೇರೋ ಏವಮಾಹ,- ಅಹಂ ಆವುಸೋ ರಟ್ಠಪೀಳನಪಿಣ್ಡಪಾತಂ ಭುಞ್ಜಿತುಂ ನ ಇಚ್ಛಾಮಿ, ಏವಮ್ಪಿ ಸಚೇ ತುಮ್ಹೇ ಇಚ್ಛಥ ರಞ್ಞೋ ಸನ್ತಿಕಂ ಗನ್ತುಂ, ಏವಂ ಸತಿ ಇದಾನಿ ರಞ್ಞೋ ಸನ್ತಿಕಂ ಅಹಂ ಗಮಿಸ್ಸಾಮೀತಿ ಅನ್ತೇಪುರಂ ಪಾವಿಸಿ. ಪವಿಸಿತ್ವಾ ರಞ್ಞಾ ಸದ್ಧಿಂ ಸಲ್ಲಾಪಂ ಕತ್ವಾ ಅಯಂ ವಿಹಾರೋ ಅರಞ್ಞವಾಸೀನಂ ಭಿಕ್ಖೂನಂ ಅಸಪ್ಪಾಯೋತಿ ಪಟಿಕ್ಖಿಪಿ. ಏವಂ ಪನ ಭನ್ತೇ ಸತಿ ತಸ್ಮಿಂ ವಿಹಾರೇ ನಿಸೀದಿಯಮಾನಂ ಥೇರಂ ಉಪದಿಸ್ಸಥಾತಿ ¶ . ಖಣಿತ್ತಿಪಾದವಿಹಾರವಾಸೀ ಮಹಾರಾಜ ಥೇರೋ ಪರಿಯತ್ತಿವಿಸ್ಸಾರದೋ ಸಿಕ್ಖಾಕಾಮೋ, ತಸ್ಸ ದಾತುಂ ವಟ್ಟತೀತಿ. ಅಥ ರಾಜಾ ತಸ್ಸ ವಿಹಾರಂ ಅದಾಸಿ. ಮಹಾಸಙ್ಘನಾಥೋತಿ ನಾಮಲಞ್ಛಮ್ಪಿ ಅದಾಸಿ. ಸೋ ತತ್ಥ ಪರಿಯತ್ತಿಂ ವಾಚೇತ್ವಾ ನಿಸೀದಿ.

ತಸ್ಸ ಪನ ವಿಹಾರಸ್ಸ ಪರಿವಾರಭೂತೇಸು ಚತ್ತಾಲೀಸಾಯ ವಿಹಾರೇಸು ಉತ್ತರಾಯ ಅನುದಿಸಾಯ ಏಕಸ್ಮಿಂ ವಿಹಾರೇ ವಸನ್ತೋ ವರಾಭಿಸಙ್ಘನಾಥೋ ನಾಮ ಥೇರೋ ಮಣಿಕುಣ್ಡಲವತ್ಥುಂ ಮರಮ್ಮಭಾಸಾಯ ಅಕಾಸಿ. ಪಚ್ಛಿಮಾಯ ಅನುದಿಸಾಯ ಏಕಸ್ಮಿಂ ವಿಹಾರೇ ವಸನ್ತೋ ಏಕೋ ಥೇರೋ ಸತ್ತರಾಜಧಮ್ಮವತ್ಥುಂ ಅಕಾಸಿ.

ತಸ್ಮಿಞ್ಚ ಕಾಲೇ ಭಾಮಅಙ್ಕ್ಯೋ ಆಚಾರಅಙ್ಕ್ಯೋತಿ ದ್ವಿನ್ನಂ ಭಿಕ್ಖೂನಞ್ಚ ಲೋಕಧಮ್ಮೇಸು ಛೇಕತಾಯ ದ್ವೇ ವಿಹಾರೇ ಕತ್ವಾ ಅದಾಸಿ. ತೇ ಪನ ದ್ವೇ ಥೇರಾ ವೇದಸತ್ಥಕೋವಿದಾ, ಪರಿಯತ್ತಿಪಟಿಪತ್ತೀಸು ಪನ ಮನ್ದಾ, ರಾಮಞ್ಞರಟ್ಠತೋ ಆಗತಾ. ತೇ ಪನ ಥೇರಪರಮ್ಪರಾಯ ನ ಗಣನ್ತಿ ಪೋರಾಣಾ.

ಕಲಿಯುಗೇ ತಿಸತ್ತತಾಧಿಕೇ ನವವಸ್ಸಸತೇ ಸಮ್ಪತ್ತೇ ಮಹಾಮುನಿಚೇತಿಯಸ್ಸ ಪುರತ್ಥಿಮದಿಸಾಭಾಗೇ ಚತ್ತಾರೋ ವಿಹಾರೇ ಕಾರಾಪೇತ್ವಾ ಚತುನ್ನಂ ಥೇರಾನಂ ಅದಾಸಿ. ತೇ ಚ ಥೇರಾ ತತ್ಥ ನಿಸೀದಿತ್ವಾ ಸಾಸನಂ ಪಗ್ಗಣ್ಹಿಂಸು.

ತಸ್ಮಿಂಯೇವ ಕಾಲೇ ಬದರವನವಾಸೀ ನಾಮ ಏಕೋಪಿ ಥೇರೋ ಅತ್ಥಿ. ಸೋಪಿ ಪರಿಯತ್ತಿವಿಸಾರದೋ ಛಪ್ಪದವಂಸಿಕೋ. ಸೋ ಚ ಥೇರೋ ಯಾವಜೀವಂ ಯಥಾಬಲಂ ಸಾಸನಂ ಪಗ್ಗಣ್ಹಿತ್ವಾ ದುತಿಯಭವೇ ಚಲಙ್ಗನಗರೇ ಏಕಿಸ್ಸಾ ಇತ್ಥಿಯಾ ಕುಚ್ಛಿಮ್ಹಿ ಪಟಿಸನ್ಧಿಂ ಗಣ್ಹಿ. ದಸಮಾಸಚ್ಚಯೇನ ಕಲಿಯುಗೇ ಚತ್ತಾಲೀಸಾಧಿಕೇ ನವವಸ್ಸಸತೇ ಸಮ್ಪತ್ತೇ ಬುಧವಾರೇ ವಿಜಾಯಿತ್ವಾ ತೇರಸವಸ್ಸಿಕಕಾಲೇ ಸಾಸನೇ ಪಬ್ಬಜಿತ್ವಾ ಪರಿಯತ್ತಿಂ ಉಗ್ಗಣ್ಹಿ. ಸಿರಿಖೇತ್ತನಗರಿನ್ದೋ ರಾಜಾ ಸಿರಿಖೇತ್ತನಗರಂ ಆನೇತ್ವಾ ಸಿರಿಖೇತ್ತನಗರೇ ಸಾಮಣೇರೋತಿ ನಾಮೇನ ಪಾಕಟೋ ಹುತ್ವಾ ಕಲಿಯುಗೇ ಚತುಪಣ್ಣಾಸಾಧಿಕೇ ¶ ನವವಸ್ಸಸತೇ ಸಮ್ಪತ್ತೇ ಪನ್ನರಸವಸ್ಸಿಕಕಾಲೇ ವೇಸ್ಸನ್ತರಜಾಭಕಂ ಕಬ್ಯಾಲಙ್ಕಾರವಸೇನ ಬನ್ಧಿ. ಪರಿಪುಣ್ಣವೀಸತಿವಸ್ಸಕಾಲೇ ಸಿರಿಖೇತ್ತನಗರೇಯೇವ ಸಿರಿಖೇತ್ತನಗರಿನ್ದೋ ವೇರವಿಜಯೋ ನಾಮ ರಾಜಾ ಅನುಗ್ಗಹೇತ್ವಾ ಉಪಸಮ್ಪದಭೂಮಿಯಂ ಪತಿಟ್ಠಾತಿ. ಪಚ್ಛಿಮಪಕ್ಖಾಧಿಕೋ ನಾಮ ರಾಜಾ ಸಿರಿಖೇತ್ತನಗರಂ ಅತ್ತನೋ ಹತ್ಥಗತಂ ಅಕಾಸಿ. ತಸ್ಮಿಞ್ಚ ಕಾಲೇ ತಂ ಥೇರಂ ಆನೇತ್ವಾ ರತನಪೂರನಗರೇ ವಸಾಪೇಸಿ. ಸೂರಕಿತ್ತಿ ನಾಮ ರಞ್ಞೋ ಕನಿಟ್ಠಭಾತಿಕೋ ಏರಾವತೀನದೀತೀರೇ ಚತುಭೂಮಿಕವಿಹಾರಂ ಕಾರಾಪೇತ್ವಾ ತಸ್ಸ ಥೇರಸ್ಸ ಅದಾಸಿ. ರಾಜಾ ಚ ತಿಪಿಟಕಾಲಙ್ಕಾರೋತಿ ನಾಮಲಞ್ಛಂ ಅದಾಸಿ.

ಕಲಿಯುಗೇ ವಸ್ಸಸಹಸ್ಸೇ ಸಮ್ಪತ್ತೇ ಫಗ್ಗುನಮಾಸಸ್ಸ ಪುಣ್ಣಮಿಯಂ ಸಟ್ಠಿವಸ್ಸಿಕೋ ಹುತ್ವಾ ತಿರಿಯಪಬ್ಬತಂ ಗನ್ತ್ವಾ ಅರಞ್ಞವಾಸಂ ವಸಿ. ದ್ವೇ ವಸ್ಸಾಧಿಕೇ ವಸ್ಸಸಹಸ್ಸೇ ರಾಜಾ ತಸ್ಮಿಂ ವಿಹಾರಂ ಕಾರಾಪೇತ್ವಾ ತಸ್ಸೇವ ಥೇರಸ್ಸ ಅದಾಸಿ. ಸೋ ಪನ ತಿಪಿಟಕಾಲಙ್ಕಾರತ್ಥೇರೋ ಸಿರಿಖೇತ್ತನಗರೇ ನವಙ್ಗಕನ್ದರೇ ಪತ್ತಲಙ್ಕಸ್ಸ ಅತುಲವಂಸತ್ಥೇರಸ್ಸ ವಂಸಿಕೋ. ಸಿರಿಖೇತ್ತನಗರೇ ನವಙ್ಗಕನ್ದರೇ ಸುವಣ್ಣವಿಹಾರೇ ವಸನ್ತಸ್ಸ ಥೇರಸ್ಸ ಕಿತ್ತಿಘೋಸೋ ಸಬ್ಬತ್ಥ ಪತ್ಥರಿ. ಜೇಯ್ಯಪುರೇ ಏರಾವತೀನದೀತೀರೇ ಚತುಭೂಮಿಕವಿಹಾರೇ ವಸನಕಾಲೇ ಅಟ್ಠಸಾಲಿನಿಯಾ ಆದಿತೋ ವೀಸತಿ ಗಾಥಾನಂ ಸಂವಣ್ಣನಂ ಅಕಾಸಿ. ಸೂರಕಿತ್ತಿನಾಮಕಸ್ಸ ಕನಿಟ್ಠಭಾತಿಕಸ್ಸ ಯಾಚನಮಾರಬ್ಭ ಯಸವಡ್ಢನವತ್ಥುಞ್ಚ ಅಕಾಸಿ. ತಿರಿಯಪಬ್ಬತೇ ವಸನಕಾಲೇ ವಿನಯಾಲಙ್ಕಾರಟೀಕಂ ಅಕಾಸಿ. ಪಚ್ಛಿಮಪಕ್ಖಾಧಿಕರಞ್ಞೋ ಕಾಲೇ ಮಹಾಸಙ್ಘನಾಥತ್ಥೇರಂ ಸಙ್ಘರಾಜಭಾವೇ ಠಪೇಸಿ. ಸೋ ಚ ಸಙ್ಘರಾಜಾ ಅತಿವಿಯ ಪರಿಯತ್ತಿ ವಿಸಾರದೋ. ತಸ್ಮಿಞ್ಚ ಕಾಲೇ ರತನಪೂರನಗರೇಪಿ ಅರಿಯಾಲಙ್ಕಾರತ್ಥರೋ ನಾಮ ಏಕೋ ಅತ್ಥಿ. ಸೋ ಪನ ತಿಪಿಟಕಾಲಙ್ಕಾರತ್ಥೇರೇನ ಸಮಞ್ಞಾಣಥಾಮೋ. ವಯಸಾಪಿ ಸಮಾನವಸ್ಸಿಕಾ.

ತೇಸು ತಿಪಿಟಕಾಲಙ್ಕಾರತ್ಥೇರೋ ಗನ್ಥನ್ತರಬಹುಸ್ಸುತಟ್ಠಾನೇ ¶ ಅಧಿಕೋ, ಅರಿಯಾಲಙ್ಕಾರತ್ಥೇರೋ ಪನ ಧಾತುಪಚ್ಚಯವಿಭಾಗಟ್ಠಾನೇ ಅಧಿಕೋತಿ ದಟ್ಠಬ್ಬೋ. ಪಚ್ಛಾ ಪನ ಉಕ್ಕಂಸಿಕರಞ್ಞೋಕಾಲೇ ತೇಪಿ ದ್ವೇ ಥೇರಾ ರಞ್ಞೋ ಆಚರಿಯಾ ಹುತ್ವಾ ಸಾಸನಂ ಪಗ್ಗಣ್ಹಿಂಸು. ತೇಸು ಅರಿಯಾಲಙ್ಕಾರತ್ಥೇರೋ ಅಪರಭಾಗೇ ಕಾಲಙ್ಕರಿತ್ವಾ ತಸ್ಸ ಥೇರಸ್ಸ ಸದ್ಧಿವಿಹಾರಿಕಸ್ಸ ದುತಿಯಾರಿಯಾಲಙ್ಕಾರತ್ಥೇರಸ್ಸ ರಾಜಮಣಿಚೂಳಚೇತಿಯಸ್ಸ ಸಮೀಪೇ ದಕ್ಖಿಣವನಾರಾಮಂ ನಾಮ ವಿಹಾರಂ ಕಾರಾಪೇತ್ವಾ ಅದಾಸಿ.

ಉಕ್ಕಂಸಿಕೋ ನಾಮ ರಾಜಾ ಪನ ಸಾಸನೇ ಬಹುಪ್ಪಕಾರೋ. ಸೋ ಚ ಕಲಿಯುಗೇ ಛನವುತಾಧಿಕೇ ನವವಸ್ಸಸತೇ ರಜ್ಜಂ ಪತ್ತೋ. ರಜ್ಜಂ ಪನ ಪತ್ವಾ ಸಿರಿಧಮ್ಮಾಸೋಕರಾಜಾವಿಯ ಚತ್ತಾರಿ ವಸ್ಸಾನಿ ಅತಿಕ್ಕಮಿತ್ವಾ ಮುದ್ಧಾಭಿಸೇಕಂ ಪಟಿಗ್ಗಹೇತ್ವಾ ಸಿರಿಸುಧಮ್ಮ ರಾಜಾಮಹಾಧಿಪತೀತಿ ನಾಮಲಞ್ಛಮ್ಪಿ ಪಟಿಗ್ಗಣ್ಹಿ. ಏಕಸ್ಮಿಂ ಪನ ಸಮಯೇ ಹಂಸಾವತೀನಗರಂ ಗನ್ತ್ವಾ ತತ್ಥ ನಿಸೀದಿ. ಅಥ ರಾಮಞ್ಞರಟ್ಠವಾಸಿನೋ ಏವಮಾಹಂಸು,- ಮರಮ್ಮಿಕಭಿಕ್ಖೂ ನಾಮ ಪರಿಯತ್ತಿಕೋವಿದಾ ವೇದಸತ್ಥಞ್ಞುನೋ ನತ್ಥೀತಿ. ತಂ ಸುತ್ವಾ ರಾಜಾ ಚತುಭೂಮಿಕವಿಹಾರವಾಸಿತ್ಥೇರಸ್ಸ ಸನ್ತಿಕಂ ಸಾಸನಂ ಪೇಸೇಸಿ,-ತಿಂಸವಸ್ಸಿಕಾ ಚತ್ತಾಲೀಸವಸ್ಸಿಕಾ ವಾ ಪರಿಯತ್ತಿಕೋವಿದಾ ವೇದಸತ್ಥಞ್ಞುನೋ ಭಿಕ್ಖೂ ರಾಮಞ್ಞರಟ್ಠಂ ಮಮ ಸನ್ತಿಕಂ ಪೇಸೇಥಾತಿ. ಅಥ ಚತುಭೂಮಿ ಕವಿಹಾರವಾಸಿತ್ಥೇರೋ ತಿಪಿಟಕಾಲಙ್ಕಾರಂ ತಿಲೋಕಾಲಙ್ಕಾರಂ ತಿಸಾಸನಾಲಙ್ಕಾರಞ್ಚ ಸದ್ಧಿಂ ತಿಂಸಮತ್ಥೇಹಿ ಭಿಕ್ಖೂಹಿ ಪೇಸೇಸಿ. ಹಂಸಾವತೀನಗರಂ ಪನ ಪತ್ವಾ ಮೋಧೋಚೇತಿಯಸ್ಸ ಪುರತ್ಥಿಮಭಾಗೇ ವಿಹಾರೇ ಕಾರಾಪೇತ್ವಾ ತೇಸಂ ಅದಾಸಿ.

ಉಪೋಸಥದಿವಸೇಸು ಸುಧಮ್ಮಸಾಲಾಯಂ ರಾಮಞ್ಞರಟ್ಠವಾಸಿನೋ ಪರಿಯತ್ತಿಕೋವಿದೇ ವೇದಸತ್ಥಞ್ಞುನೋ ಸನ್ನಿಪಾತಾಪೇತ್ವಾ ತೇಹಿ ತೀಹಿ ಥೇರೇಹಿ ಸದ್ಧಿಂ ಕಥಾಸಲ್ಲಾಪಂ ಕಾರಾಪೇಸಿ. ಅಥ ರಾಮಞ್ಞರಟ್ಠವಾಸಿನೋ ಭಿಕ್ಖೂ ಏವಮಾಹಂಸು,– ಪುಬ್ಬೇ ಪನ ಮಯಂ ಮರಮ್ಮರಟ್ಠೇ ಪರಿಯತ್ತಿಕೋವಿದಾ ವೇದಸತ್ತಞ್ಞುನೋ ನತ್ಥೀತಿ ಮಞ್ಞಾಮ, ಇದಾನಿ ಮರಮ್ಮರಟ್ಠವಾಸಿನೋ ಅತಿವಿಯ ಪರಿಯತ್ತಿ ಕೋವಿದಾ ¶ ವೇದಸತ್ಥಞ್ಞುನೋತಿ. ಅಪರಭಾಗೇ ಕಲಿಯುಗೇ ಛನವುತಾಧಿಕೇ ನವವಸ್ಸಸತೇ ಸಮ್ಪತ್ತೇ ರಾಜಾ ರತನಪೂರನಗರಂ ಪಚ್ಚಾಗಚ್ಛಿ.

ತೇಪಿ ಥೇರಾ ಪಚ್ಚಾಗನ್ತುಕಾಮಾ ರಾಮಞ್ಞರಟ್ಠೇ ಪಧಾನಭೂತಸ್ಸ ತಿಲೋಕಗರೂತಿ ನಾಮಧೇಯ್ಯಸ್ಸ ಮಹಾಥೇರಸ್ಸ ಸನ್ತಿಕಂ ವನ್ದನತ್ಥಾಯ ಅಗಮಂಸು.

ತದಾ ತಿಲೋಕಗರುತ್ಥೇರೋಪಿ ತೇಹಿ ಸದ್ಧಿಂ ಸಲ್ಲಾಪಂ ಕತ್ವಾ ಏವಮಾಹ,-ತುಮ್ಹೇಸು ಪನ ತಿಪಿಟಕಾಲಙ್ಕಾರತ್ಥೇರೋ ಪಠಮಂ ಆವಾಸವಿಹಾರಂ ಲಭಿಸ್ಸತೀತಿ. ಕಸ್ಮಾ ಪನ ಭನ್ತೇ ಏವಮ ವೋಚಾತಿ ವುತ್ತೇ ಅಯಂ ಪನ ಪಿಣ್ಡಾಯ ಚರನ್ತೋಪಿ ಅನ್ತರಾಮಗ್ಗೇ ವೇಳುವೇತ್ತಾದೀನಿ ಲಭಿತ್ವಾ ಗಹೇತ್ವಾ ವಿಹಾರೇ ಪಟಿಸಙ್ಖರಣಂ ಅಕಾಸಿ, ತಸ್ಮಾಹಂ ಏವಂ ವದಾಮಿ, ಲೋಕೇ ವಿಹಾರೇ ಪಟಿಸಙ್ಖರಣಸೀಲಾ ಭಿಕ್ಖೂ ಸೀಘಮೇವ ಆವಾಸವಿಹಾರಂ ಲಭನ್ತೀತಿ ಹಿ ಪೋರಾಣತ್ಥೇರಾ ಆಹಂಸೂತಿ ಆಹ.

ತೇಪಿ ರತನಪೂರನಗರಂ ಪಚ್ಚಾಗಚ್ಛಿಂಸು. ತಿಲೋಕಗರುತ್ಥೇರಸ್ಸ ವಚನಾನುರೂಪಮೇವ ತಿಪಿಟಕಾಲಙ್ಕಾರತ್ಥೇರೋ ಸಬ್ಬಪಠಮಂ ಆವಾಸವಿಹಾರಂ ಲಭೀತಿ.

ಕಲಿಯುಗೇ ಪನ ನವವಸ್ಸಾಧಿಕೇ ವಸ್ಸಸಹಸ್ಸೇ ಸಮ್ಪತ್ತೇ ರಞ್ಞೋ ಕನಿಟ್ಠೋ ಕಾಲಮಕಾಸಿ. ಅಥಂ ರಞ್ಞೋ ಪುತ್ತೋ ಉಚ್ಚನಗರಭೋಜಕೋ ಬಾಲಜನೇಹಿ ಸನ್ಥವಂ ಕತ್ವಾ ತೇಸಂ ವಚನಂ ಆದಿಯಿತ್ವಾ ಪಚ್ಚೂಸಕಾಲೇ ಪಿತರಂ ಘಾತೇತುಕಾಮೋ ಅನ್ತೇಪುರಂ ಸಹಸಾ ಪಾವಿಸಿ.

ರಾಜಾವ ಅನಗ್ಘಂ ಮುದ್ದಿಕಂ ಗಹೇತ್ವಾ ನನ್ದಜೇಯ್ಯೇನ ನಾಮ ಅಮಚ್ಚೇನ ರಾಜಯೋಧೇನ ನಾಮ ಅಮಚ್ಚೇನಚ ಸದ್ಧಿಂ ಅಞ್ಞತರವೇಸೇನ ನಗರತೋ ನಿಕ್ಖಮಿತ್ವಾ ರಜತವಾಲುಕನದಿಂ ಸಮ್ಪತ್ತೋ.

ತಸ್ಮಿಞ್ಚ ಕಾಲೇ ಏಕೋ ಸಾಮಣೇರೋ ಮಾತಾಪಿತೂನಂ ಗೇಹೇ ಪಿಣ್ಡಪಾತಂ ಆನೇಸ್ಸಾಮೀತಿ ಖುದ್ದಕನಾವಾಯ ನದಿಯಂ ಆಗಚ್ಛಿ. ಅಥ ¶ ತಂ ಸಾಮಣೇರಂ ದಿಸ್ವಾ ರಾಜಾ ಏವಮಾಹ,- ಅಮ್ಹೇ ಭನ್ತೇ ಪರತೀರಂ ನಾವಾಯ ಆನೇಹೀತಿ. ಸಾಮಣೇರೋ ಚ ಆಹ,-ಸಚೇ ಉಪಾಸಕ ತುಮ್ಹೇ ಪರತೀರಂ ಆನೇಯ್ಯಂ, ಭತ್ತಕಾಲಂ ಅತಿಕ್ಕಮೇಯ್ಯನ್ತಿ. ಅಥ ರಾಜಾ ಅಮ್ಹೇಯೇವ ಸೀಘಂ ಆನೇಹಿ, ಇಮಂ ಮುದ್ದಿಕಂ ದಸ್ಸಾಮೀತಿ ಅಸ್ಸಾಸೇತ್ವಾ ಆನೇತುಂ ಓಕಾಸಂ ಯಾಚಿ. ಅಥ ಸಾಮಣೇರೋ ಕಾರುಞ್ಞಪ್ಪತ್ತಂ ವಚನಂ ಸುತ್ವಾ ಪರತೀರಂ ಆನೇಸಿ.

ಅಥ ಚತುಭೂಮಿಕವಿಹಾರಂ ಪತ್ವಾ ತಸ್ಮಿಂ ವಿಹಾರೇ ಥೇರಸ್ಸ ಸಬ್ಬಮ್ಪಿ ಕಾರಣಂ ಆರೋಚೇತ್ವಾ ಏವಮಾಹ,-ಸಚೇ ಭನ್ತೇ ಅಮ್ಹೇ ಗಣ್ಹಿತುಂ ಆಗಚ್ಛಯ್ಯ, ತೇ ನಿವಾರೇಥಾತಿ. ಥೇರೋಚ ಮಯಂ ಮಹಾರಾಜ ಸಮಣಾ ನ ಸಕ್ಕಾ ಏವಂ ನಿವಾರೇತುಂ, ಏವಮ್ಪಿ ಏಕೋ ಉಪಾಯೋ ಅತ್ಥಿ,-ನಿಸಿನ್ನವಿಹಾರವಾಸಿತ್ಥೇರೋ ಪನ ಗಿಹಿಕಮ್ಮೇಸು ಅತಿವಿಯ ಛೇಕೋ, ತಂ ಪಕ್ಕೋಸೇತ್ವಾ ಕಾರಣಂ ಚಿನ್ತೇತುಂ ಯುತ್ತನ್ತಿ. ಅಥ ತಂ ಪಕ್ಕೋಸೇತ್ವಾ ತಮತ್ಥಂ ಆರೋಚೇತ್ವಾ ರಾಜಾ ಇದಮವೋ ಚ,- ಸಚೇ ಭನ್ತೇ ಅಮ್ಹೇ ಗಣ್ಹಿತುಂ ಆಗಚ್ಛೇಯ್ಯುಂ, ಅಥ ಕೇನಚಿದೇವ ಉಪಾಯೇನ ತೇ ನಿವಾರೇಥಾತಿ. ಅಥ ಸೋ ಥೇರೋ ಏವಮಾಹ,-ತೇನ ಹಿ ಮಹಾರಾಜ ಮಾ ಕಿಞ್ಚಿ ಸೋಚಿ ಮಾಭಾಯಿ ವಿಹಾರಮಜ್ಝೇ ಸಿರಿಗಬ್ಭಂ ಪವಿಸಿತ್ವಾ ನಿಸೀದಥಾತಿ ವತ್ವಾ ಪಿಣ್ಡಾಯ ಅಚರನ್ತೇ ಭಿಕ್ಖುಸಾಮಣೇರೇ ಸನ್ನಿಪಾತಾಪೇತ್ವಾ ವಿಸುಂ ವಿಸುಂ ದಣ್ಡಹತ್ಥಾ ಹುತ್ವಾ ಏಕಸ್ಸಪಿ ಪುರಿಸಸ್ಸ ವಿಹಾರಂ ಪವಿಸಿತುಂ ಓಕಾಸಂ ಮಾ ದೇಥಾತಿ ವತ್ವಾ ಸೇನಂವಿಯ ಬ್ಯೂಹೇಸಿ. ಸಾಮನ್ತವಿಹಾರೇಸುಪಿ ವಸನ್ತೇ ಭಿಕ್ಖುಸಾಮಣೇರೇ ಪಕ್ಕೋಸಿ. ತದಾ ಕಿರ ಆಗನ್ತ್ವಾ ಸನ್ನಿಪಾತಾನಂ ಭಿಕ್ಖುಸಾಮಣೇರಾನಂ ಅತಿರೇಕಸಹಸ್ಸಮತ್ತಂ ಅಹೋಸಿ. ಥೇರೋ ತೇ ವಿಹಾರೇ ದ್ವಾರಕೋಟ್ಠಕೇಸು ಆಗತಮಗ್ಗೇ ಚ ವಿಸುಂ ವಿಸುಂ ದಣ್ಡಹತ್ಥಾ ಹುತ್ವಾ ಆರಕ್ಖಣತ್ಥಾಯ ಠಪೇಸಿ, ಯಥಾ ವಡ್ಢಕೀ ಸೂಕರೋ ಬ್ಯಗ್ಘಸ್ಸ ನಿವಾರಣತ್ಥಾಯ ವಿಸುಂ ವಿಸುಂ ಸೂಕರೇ ಸಂವಿಧಾಯ ಠಪೇಸೀತಿ. ಅಥ ಪುತ್ತಸ್ಸ ಯೋಧಾಪಿ ರಾಜಾನಂ ಗಹೇತುಂ ನ ಸಕ್ಕಾ, ಭಿಕ್ಖು ಸಾಮಣೇರಾನಂ ¶ ಗಾರವವಸೇನ ಬಲಕ್ಕಾರೇನ ಮಾರೇತ್ವಾ ಪವಿಸಿತುಂ ನ ವಿಸಹನ್ತಿ, ಭಿಕ್ಖು ಸಾಮಣೇರಾನಂ ಬಾಹುಲ್ಲತಾಯ ಚ.

ತಸ್ಮಿಂಯೇವ ಸಂವಚ್ಛರೇ ಅಸ್ಸಯುಜಮಾಸಸ್ಸ ಕಾಳಪಕ್ಖಪಞ್ಚಮಿತೋ ಯಾವ ಕತ್ತಿಕಮಾಸಸ್ಸ ಕಾಳಪಕ್ಖಪಞ್ಚಮೀ ವಿಹಾರೇಯೇವ ರಾಜಾ ನಿಲೀಯಿತ್ವಾ ನಿಸೀದಿ. ಅಥ ಅನ್ತೇಪುರವಾಸಿಕಾ ಅಮಚ್ಚಾ ಪುತ್ತಂ ಅಪನೇತ್ವಾ ರಾಜಾನಂ ಆನೇತ್ವಾ ರಜ್ಜೇ ಠಪೇಸುಂ. ರಾಜಾ ಚ ಪುನ ರಜ್ಜಂ ಪತ್ವಾ ವಿಹಾರೇ ನಿಸಿನ್ನಕಾಲೇ ಮಾ ಭಾಯಿ ಮಹಾರಾಜ ತ್ವಂ ಜಿನೇಸ್ಸತೀತಿ ರಞ್ಞೋ ಆರೋಚೇನ್ತಸ್ಸ ವೇದಸತ್ಥಞ್ಞುನೋ ಏಕಸ್ಸ ಭಿಕ್ಖುಸ್ಸ ಚಞ್ಞಿಙ್ಖುಚೇತಿಯಸ್ಸ ಏಸನ್ನಟ್ಠಾನೇ ಏಕಂ ವಿಹಾರಂ ಕಾರಾಪೇತ್ವಾ ಅದಾಸಿ. ಧಮ್ಮನನ್ದರಾಜಗುರೂತಿ ನಾಮಲಞ್ಛಮ್ಪಿ ಅದಾಸಿ. ತಸ್ಸ ಪನ ವಿಜಾತಟ್ಠಾನಭೂತಂ ಗಾಮಂ ನಿಸ್ಸಾಯ ಮರಮ್ಮವೋಹಾರೇನ ‘ಯೇ ನೇ ನಾ ಸೇ ಯಾಂ ವ’ ಇತಿ ಸಮಞ್ಞಾ ಅಹೋಸಿ.

ರಾಜಾ ಚ ಪುನ ರಜ್ಜಂ ಪತ್ವಾ ತಸ್ಮಿಂಯೇವ ಸಂವಚ್ಛರೇ ಕತ್ತಿಕಮಾಸಸ್ಸ ಕಾಳಪಕ್ಖಚುದ್ದಸಮಿಯಂ ಸಬ್ಬೇಪಿ ಮಹಾಥೇರೇ ನಿಮನ್ತೇತ್ವಾ ರಾಜಗೇಹಂ ಪವೇಸೇತ್ವಾ ಪಿಣ್ಡಪಾತೇನ ಭೋಜೇಸಿ. ಅಥ ರಾಜಾ ಏವಮಾಹ,-ಚತುಭೂಮಿಕವಿಹಾರವಾಸಿತ್ಥೇರೋ ಸಮ್ಪರಾಯಿಕತ್ಥಾವಹೋ ಆಚರಿಯೋ, ನಿಸಿನ್ನವಿಹಾರವಾಸಿತ್ಥೇರೋ ಪನ ದಿಟ್ಠಧಮ್ಮಿಕತ್ಥಾವಹೋತಿ ಏವಂ ರಾಜಾವಂಸೇ ವುತ್ತಂ. ಪೋರಾಣಪೋತ್ಥಕೇಸು ಪನ ಚತುಭೂಮಿಕವಿಹಾರ ವಾಸಿತ್ಥೇರೋ ಏಕನ್ತಸಮಣೋ ಆಚರಿಯೋ, ನಿಸಿನ್ನವಿಹಾರವಾಸಿತ್ಥೇರೋ ಪನ ಯೋಧಾರಹೋ ಯೋಧಕಮ್ಮೇ ಛೇಕೋತಿ ರಾಜಾ ಅಹಾತಿ ವುತ್ತಂ. ರಾಜಾ ಕಿರ ಸಮ್ಪರಾಯಿಕತ್ಥಂ ಅನುಪೇಕ್ಖಿತ್ವಾ ದಿನ್ನಕಾಲೇ ನಿಸಿನ್ನವಿಹಾರತ್ಥೇರಸ್ಸ ನ ಅದಾಸಿ, ಕದಾಚಿ ಕದಾಚಿ ಪನ ದಿಟ್ಠಧಮ್ಮಿಕತ್ಥಂ ಅನುಪ್ಪೇಕ್ಖಿತ್ವಾ ತಸ್ಸ ವಿಸುಂ ಅದಾಸೀತಿ. ಏತ್ಥ ಚ ಯಸ್ಮಾ ನಿಸಿನ್ನವಿಹಾರ ವಾಸಿತ್ಥೇರೋ ರಞ್ಞೋ ಭೀಯೇಹಿ ನಿವಾರಣತ್ಥಾಯ ಆರಕ್ಖಂ ಅಕಾಸಿ, ನ ಪರೇಸಂ ವಿಹೇಠನತ್ಥಾಯ, ಆಣತ್ತಿಕಪ್ಪಯೋಗಾ ಚ ನ ದಿಸ್ಸತಿ, ತಸ್ಮಾ ನತ್ಥಿ ಆಪತ್ತಿದೋಸೋ. ಸದ್ಧಾತಿಸ್ಸರಞ್ಞೋ ಭಯೇಹಿ ¶ ನಿವಾರಣತ್ಥಂ ಅರಹನ್ತೇಹಿ ಥೇರೇಹಿ ಕತಪ್ಪಯೋಗೋವಿಯ ದಟ್ಠಬ್ಬೋ.

ಚತುಭೂಮಿಕವಿಹಾರ ವಾಸಿತ್ಥೇರೋ ಪನ ಖಣಿತ್ತಿಪಾದಗಾಮೇ ಜಾತೋ, ಅರಿಮದ್ದನಪುರೇ ಅರಹನ್ತತ್ಥೇರಗಣಪ್ಪಭವೋ, ಯತ್ಥ ಕತ್ಥಚಿ ಗನ್ತ್ವಾ ಅಞ್ಞೇಸಂ ಭಿಕ್ಖೂನಂ ಆಚಾರಂ ಯಥಾಭೂತಂ ಜಾನಿತ್ವಾ ತೇಹಿ ಚತುಪಚ್ಚಯಸಮ್ಭೋಗೋ ನ ಕಭಪುಬ್ಬೋ, ಅನ್ತಮಸೋ ಉದಕಮ್ಪಿ ನ ಪಿವಿತಪುಬ್ಬೋ, ತಂತಂಟ್ಠಾನಮ್ಪಿ ಚಮ್ಮಖಣ್ಡಂ ಗಹೇತ್ವಾಯೇವ ಗಮನಸೀಲೋ. ಉಕ್ಕಂಸಿಕರಾಜಾ ಪನ ಸಿರಿಖೇತ್ತನಗರೇ ದ್ವತ್ತಪೋಙ್ಕರಞ್ಞಾ ಕಾರಾವಿತಚೇತಿಯಸಣ್ಠಾನಂ ಗಹೇತ್ವಾ ರಾಜಮಣಿಚೂಳಂ ನಾಮ ಚೇತಿಯಂ ಅಕಾಸಿ. ತಂ ಪನ ಚೇತಿಯಂ ಪರಿಮಣ್ಡಲತೋ ತಿಹತ್ಥಸತಪ್ಪಮಾಣಂ, ಉಬ್ಬೇಧತೋಪಿ ಏತ್ತಕಮೇವ. ತಸ್ಸ ಪನ ಚೇತಿಯಸ್ಸ ಚತೂಸು ಪಸ್ಸೇಸು ಚತ್ತಾರೋ ವಿಹಾರೇಪಿ ಕಾರಾಪೇಸಿ, ಪುರತ್ಥಿಮಪಸ್ಸೇ ಪುಬ್ಬವನಾರಾಮೋ ನಾಮ ವಿಹಾರೋ, ದಕ್ಖಿಣಪಸ್ಸೇ ಪನ ದಕ್ಖಿಣವನಾರಾಮೋ ನಾಮ, ಪಚ್ಛಿಮಪಸ್ಸೇ ಪಚ್ಛಿಮವನಾರಾಮೋ ನಾಮ, ಉತ್ತರಪಸ್ಸೇ ಉತ್ತರವನಾರಾಮೋ ನಾಮ. ತೇಸು ಚತೂಸು ವಿಹಾರೇಸು ಉತ್ತರವನಾರಾಮೋ ನಾಮ ವಿಹಾರೋ ಅಸನಿಪಾಭಗ್ಗಿನಾ ಡಯ್ಹಿತ್ವಾ ವಿನಸ್ಸಿ. ಅವಸೇಸೇ ಪನ ತಯೋ ವಿಹಾರೇ ಪರಿಯತ್ತಿಕೋವಿದಾನಂ ತಿಣ್ಣಂ ಮಹಾಥೇರಾನಂ ಅದಾಸಿ. ನಾಮ ಲಞ್ಛಮ್ಪಿ ತೇಸಂ ಅದಾಸಿ. ಪಚ್ಛಿಮಸ್ಸ ರಞ್ಞೋ ಕಾಲೇಯೇವ ಉತ್ತರಪಸ್ಸೇ ವಿಹಾರಂ ಕಾರಾಪೇಸಿ.

ತಸ್ಮಿಂ ಪನ ಚೇತಿಯೇ ಛತ್ತಂ ಅನಾರೋಪೇತ್ವಾಯೇವ ಸೋ ರಾಜಾ ದಿವಙ್ಗತೋ. ತೇಸು ಪನ ಚತೂಸು ವಿಹಾರೇಸು ನಿಸಿನ್ನಾನಂ ಥೇರಾನಂ ದಕ್ಖಿಣವನಾರಾಮವಿಹಾರವಾಸೀಮಹಾಥೇರೋ ಕಚ್ಚಾಯನಗನ್ಥಸ್ಸ ಅತ್ಥಂ ಛಬ್ಬಿಧೇಹಿ ಸಂವಣ್ಣನಾನಯೇಹಿ ಅಲಙ್ಕರಿತ್ವಾ ಮರಮ್ಮಭಾಸಾಯ ಸಂವಣ್ಣೇಸಿ. ಪಚ್ಛಿಮವನಾರಾಮವಿಹಾರ ವಾಸಿತ್ಥೇರೋ ಪನ ನ್ಯಾಸಸ್ಸ ಸಂವಣ್ಣನಂ ಛಹಿ ನಯೇಹಿ ಅಲಙ್ಕರಿತ್ವಾ ಅಕಾಸಿ.

ಕಲಿಯುಗೇ ಪನ ದಸವಸ್ಸಾಧಿಕೇ ಸಹಸ್ಸೇ ಸಮ್ಪತ್ತೇ ತಸ್ಸ ¶ ರಞ್ಞೋ ಪುತ್ತೋ ಸಿರಿನನ್ದಸುಧಮ್ಮರಾಜಾಪವರಾಧೀಪತಿ ರಜ್ಜಂ ಕಾರೇಸಿ. ಪಿತುನೋ ರಾಜಗೇಹಂ ಭಿನ್ದಿತ್ವಾ ವಿಹಾರಂ ಕಾರಾಪೇತ್ವಾ ತಿಲೋಕಾಲಙ್ಕಾರಸ್ಸ ನಾಮ ಮಹಾಥೇರಸ್ಸ ಅದಾಸಿ. ತಿಲೋಕಾಲಙ್ಕಾರತ್ಥೇರೋ ಚ ನಾಮ ತಿಪಿಟಕಾಲಙ್ಕಾರತ್ಥೇರೇನ ಸಮಞ್ಞಾಣಥಾಮಸ್ಸ ಅರಿಯಾಲಙ್ಕಾರತ್ಥೇರಸ್ಸ ಸಿಸ್ಸೋತಿ ದಟ್ಠಬ್ಬೋ. ಅಯಞ್ಚತ್ಥೋ ಹೇಟ್ಠಾ ದಸ್ಸಿತೋ. ಜೇಯ್ಯಪುರೇ ಚತುಭೂಮಿಕಅತುಲವಿಹಾರಂ ಕಾರಾಪೇತ್ವಾ ದಾಟ್ಠಾನಾಗರಾಜಗುರುತ್ಥೇರಸ್ಸ ಅದಾಸಿ. ಸೋ ಚ ಥೇರೋ ನಿರುತ್ತಿಸಾರಮಞ್ಜೂಸಂ ನಾಮ ನ್ಯಾಸಸಂವಣ್ಣನಂ ಅಕಾಸೀ.

ಕಲಿಯುಗೇ ದ್ವಾದಸಾಧಿಕೇ ವಸ್ಸಸಹಸ್ಸೇ ಸಮ್ಪತ್ತೇ ಫಗ್ಗುನಮಾಸೇ ಸೋತಾಪನ್ನಾ ನಾಮ ಆರಕ್ಖದೇವತಾ ಅಞ್ಞತ್ಥ ಗಮಿಸ್ಸಾಮಾತಿ ಆಹಂಸೂತಿ ನಗರಾ ಸುಪಿನಂ ಪಸ್ಸನ್ತಾ ಹುತ್ವಾ ಬಹೂಸನ್ನಿಪತಿತ್ವಾ ದೇವಪೂಜಂ ಅಕಂಸು. ದೇವತಾನಂ ಪನ ಸಙ್ಕಮನಂ ನಾಮ ನತ್ಥಿ, ಪುಬ್ಬನಿಮಿತ್ತಮೇವತನ್ತಿ ದಟ್ಠಬ್ಬಂ.

ತಸ್ಮಿಞ್ಚ ಕಾಲೇ ಚಿನರಞ್ಞೋ ಯೋಧಾ ಆಗನ್ತ್ವಾ ಮರಮ್ಮರಟ್ಠಂ ದೂಸೇಸುಂ. ಸಾಸನಂ ಅಬ್ಭಪ್ಪಟಿಚ್ಛನ್ನೋ ವಿಯ ಚನ್ದೋ ದುಬ್ಬಲಂ ಅಹೋಸಿ.

ಕಲಿಯುಗೇ ತೇವೀಸಾಧಿಕೇ ವಸ್ಸಸಹಸ್ಸೇ ಸಮ್ಪತ್ತೇ ತಸ್ಸ ರಞ್ಞೋ ಕನಿಟ್ಠೋ ಮಹಾಪವರಧಮ್ಮರಾಜಾಲೋಕಾಧಿಪತಿ ನಾಮ ರಾಜಾ ರಜ್ಜಂ ಕಾರೇಸಿ. ತಸ್ಮಿಞ್ಚ ಕಾಲೇ ಲೋಕಸಙ್ಕೇತವಸೇನ ಪುಞ್ಞಂ ಮನ್ದಂ ಭವಿಸ್ಸತೀತಿ ವೇದಸತ್ಥಞ್ಞೂಹಿ ಆರೋಚಿತತ್ತಾ ಲೋಕಸಙ್ಕೇತವಸೇನೇವ ಅಭಿನವಪುಞ್ಞುಪ್ಪಾದನತ್ಥಂ ಖನ್ಧವಾರಗೇಹಂ ಕಾರಾಪೇತ್ವಾ ತಾವಕಾಲಿಕವಸೇನ ಸಙ್ಕಮಿತ್ವಾ ನಿಸೀದಿ. ತತೋ ಅಪರಭಾಗೇ ಉತ್ತರಗೇಹಂ ಭಿನ್ದಿತ್ವಾ ತಸ್ಮಿಂಯೇವ ಠಾನೇ ವಿಹಾರಂ ಕಾರಾಪೇತ್ವಾ ಏಕಸ್ಸ ಮಹಾಥೇರಸ್ಸ ಅದಾಸಿ.

ದಕ್ಖಿಣಗೇಹಂ ಪನ ನಗರಸ್ಸ ಪುರತ್ಥಿಮದಿಸಾಭಾಗೇ ವಿಹಾರಂ ಕಾರಾಪೇತ್ವಾ ಅಗ್ಗಣಮ್ಮಾಲಙ್ಕಾರತ್ಥೇರಸ್ಸ ಅದಾಸಿ. ಸೋ ಚ ಥೇರೋ ಕಚ್ಚಾಯನಗನ್ಥಸ್ಸಚೇವ ಅಭಿಧಮ್ಮತ್ಥಸಙ್ಗಹಸ್ಸ ಚ ಮಾತಿಕಾಧಾತುಕಥಾಯಮಕಪಟ್ಠಾನಾನಞ್ಚ ¶ ಅತ್ಥಂ ಮರಮ್ಮಭಾಸಾಯ ಯೋಜೇಸಿ.

ಉಪರಾಜಾ ಚ ಮಹಾಸೇತುನೋ ಪಮುಖೇ ಠಾನೇ ಸೋವಣ್ಣಮಯವಿಹಾರಂ ಕಾರಾಪೇತ್ವಾ ಉತ್ತರಗೇಹವಿಹಾರ ವಾಸಿತ್ಥೇರಸ್ಸ ಅನ್ತೇವಾಸಿಕಸ್ಸ ಜಿನಾರಾಮತ್ಥೇರಸ್ಸ ಅದಾಸಿ. ತಸ್ಮಿಂಯೇವ ಠಾನೇ ನಾನಾರತನವಿಚಿತ್ರಂ ವಿಹಾರಂ ಕಾರಾಪೇತ್ವಾ ತಸ್ಸೇವ ಥೇರಸ್ಸ ಅನ್ತೇವಾಸಿಕಸ್ಸ ಗುಣಗನ್ಧತ್ಥೇರಸ್ಸ ಅದಾಸಿ.

ಸೋ ಪನ ಥೇರೋ ‘ಛಿನ ವ್ಡಿನ’ ಗಾಮೇ ವಿಜಾತೋ. ವಯೇ ಪನ ಸಮ್ಪತ್ತೇ ರತನಪೂರನಗರಂ ಗನ್ತ್ವಾ ಪರಿಯತ್ತಿಂ ಉಗ್ಗಣ್ಹಿತ್ವಾ ತತೋ ಪುನ ನಿವತ್ತಿತ್ವಾ ಬದುನನಗರೇ ಬದರಗಾಮೇ ನಿಸೀದಿತ್ವಾ ಪಚ್ಛಾ ‘ಛಿನ ವ್ಡಿನ’ ಗಾಮೇ ಚತೂಹಿ ಪಚ್ಚಯೇಹಿ ಕಿಲಮಥೋ ಹುತ್ವಾ ವಸತಿ. ತಸ್ಮಿಞ್ಚ ಕಾಲೇ ಗಾಮೇ ಮೋಕ್ಖಸ್ಸ ನಾಮ ಪುರಿಸಸ್ಸ ಸನ್ತಿಕೇ ಏಕಂ ಅನಗ್ಘಂ ಮಣಿಂ ರಾಜಾ ಲಭಿತ್ವಾ ಅತಿವ ಮಮಾಯಿ. ‘ಛಿನ ವ್ಡಿನ’ ಮೋಕ್ಖಮಣೀತಿ ಪಾಕಟೋ ಅಹೋಸಿ.

ಅಥ ಉತ್ತರಗೇಹವಿಹಾರವಾಸಿತ್ಥೇರೋ ಆಹ,- ‘ಛಿನ ವ್ಡಿನ’ ಗಾಮಕೇ ನ ಮಣಿಯೇವ ಅನಗ್ಘಂ, ಅಥ ಖೋ ಏಕೋಪಿ ಥೇರೋ ಗುಣಗನ್ಧೋ ನಾಮ ಪರಿಯತ್ತಿಕೋವಿದೋ ಅನಗ್ಘೋಯೇವಾತಿ.

ಅಥ ತಂ ಸುತ್ವಾ ರಾಜಾ ತಂ ಪಕ್ಕೋಸೇತ್ವಾ ಚತೂಹಿ ಪಚ್ಚಯೇಹಿ ಉಪತ್ಥಮ್ಭೇತ್ವಾ ಪೂಜಂ ಅಕಾಸಿ.

ಸಹಸ್ಸೋರೋಧಗಾಮೇ ಗುಣಸಾರೋ ನಾಮ ಥೇರೋ ಪಲಿಣಗಾಮೇ ಸುಜಾತೋ ನಾಮ ಥೇರೋ ಚ ಗುಣಗನ್ಧತ್ಥೇರಸ್ಸ ಸಿಸ್ಸಾಯೇವ ಅಹೇಸುಂ.

ಏಕಸ್ಮಿಞ್ಚ ಕಾಲೇ ತಿರಿಯಪಬ್ಬತವಿಹಾರವಾಸೀಮಹಾಥೇರೋ ಭಿಕ್ಖುಸಙ್ಘಮಜ್ಝೇ ಅಗ್ಗಧಮ್ಮಾಲಙ್ಕಾರತ್ಥೇರಂ ಕೀಳನವಸೇನ ಏವಮಾಹ,- ಅಮ್ಹೇಸು ಆವುಸೋ ಅನ್ತರಧಾರಯಮಾನೇಸು ತ್ವಂ ಲೋಕೇ ಏಕೋ ಗನ್ಥಕೋವಿದತ್ಥೇರೋ ಭವಿಸ್ಸಸಿ ಮಞ್ಞೇತಿ. ಅಥ ಅಗ್ಗಧಮ್ಮಾಲಙ್ಕಾರೋ ಚ ಏವಮಾಹ,-ತುಮ್ಹೇಸು ಭನ್ತೇ ಅನ್ತರಧಾರಯಮಾನೇಸು ಮಯಂ ಗನ್ಥಕೋವಿದಾನ ಭವೇಯ್ಯಾಮಕೋ ನಾಮ ¶ ಪುಗ್ಗಲೋ ಲೋಕೇ ಗನ್ಥಕೋವಿದೋ ಭವಿಸ್ಸತೀತಿ. ಪೋರಾಣಪೋತ್ಥಕೇಸು ಪನ ಅರಿಯಾಲಙ್ಕಾರತ್ಥೇರೋ ನನು ಪನಿದಾನಿ ಮಯಂ ಗನ್ಥಕೋವಿದಾ ನ ತಾವ ಭವಾಮಾತಿ ಏವಮಾಹಾತಿ ವುತ್ತಂ. ಸೋ ಅಗ್ಗಧಮ್ಮಾಲಙ್ಕಾರತ್ಥೇರೋಯೇವ ರಞ್ಞಾ ಯಾಚಿತೋ ರಾಜವಂಸ. ಸಙ್ಖೇಪಮ್ಪಿ ಅಕಾಸಿ. ಸೋ ಪ್ಪನ ಥೇರೋ ಅಮಚ್ಚಪುತ್ತೋ.

ಏಕಸ್ಮಿಞ್ಚ ಕಾಲೇ ಹೀನಾಯಾವತ್ತಕೋ ಏಕೋ ಮಹಾಅಮಚ್ಚೋ ರಞ್ಞೋ ಸನ್ತಿಕಾ ಅತ್ತನಾ ಉಪಲದ್ಧಪರಿಭೋಗಂ ಸಬ್ಬಂ ಗಹೇತ್ವಾ ವಿಹಾರಂ ಆಗನ್ತ್ವಾ ಅಗ್ಗಧಮ್ಮಾಲಙ್ಕಾರತ್ಥೇರೇನ ಸದ್ಧಿಂ ಸಲ್ಲಾಪಂ ಅಕಾಸಿ. ಸಲ್ಲಾಪಂ ಪನ ಕತ್ವಾ ಸಬ್ಬಂ ಪರಿಭೋಗಂ ಥೇರಸ್ಸ ದಸ್ಸೇತ್ವಾ ಸಚೇ ಭನ್ತೇ ತ್ವಂ ಗಿಹಿ ಭವೇಯ್ಯಾಸಿ, ಏತ್ತಕಂ ಪರಿಭೋಗಂ ಲಭಿಸ್ಸತೀತಿ ಆಹ. ಥೇರೋಪಿ ಏವಮಾಹ,-ತುಮ್ಹಾಕಂ ಪನ ಏತ್ತಕೋ ಪರಿಭೋಗೋ ಅಮ್ಹಾಕಂ ಸಮಣಾನಂ ವಚ್ಚಕುಟಿಂ ಅಸುಭಭಾವನಂ ಭಾವೇತ್ವಾ ಪವಿಸನ್ತಾನಂ ಪುಞ್ಞಂ ಕಲಂ ನಾಗ್ಘತಿ ಸೋಳಸಿನ್ತಿ. ಕಿಞ್ಚಾಪಿ ಇದಞ್ಚ ಪನ ವಚನಂ ಸಾಸನವಂಸೇ ಅಪ್ಪಧಾನಂ ಹೋತಿ, ಪುಬ್ಬಾಚರಿಯಸೀಹೇಹಿ ಪನ ವುತ್ತ ವಚನಂ ಯಾವ ಅಪಾಣಕೋಟಿಕಾ ಸರಿತಬ್ಬಮೇವಾತಿ ಮನಸಿಕರೋನ್ತೇನ ವುತ್ತನ್ತಿ.

ಕಲಿಯುಗೇ ಪನ ಚತುತ್ತಿಂಸಾಧಿಕೇ ವಸ್ಸಸಹಸ್ಸೇ ಸಮ್ಪತ್ತೇ ತಸ್ಸ ಪುತ್ತೋ ನರಾವರೋ ನಾಮ ರಾಜಾ ರಜ್ಜಂ ಕಾರೇಸಿ. ಮಹಾಸೀಹಸೂರಧಮ್ಮರಾಜಾತಿ ನಾಮಲಞ್ಛಂ ಪಟಿಗ್ಗಣ್ಹಿ. ತಸ್ಸ ರಞ್ಞೋ ಕಾಲೇ ‘ಸೀ ಖೋಂ’ ಚೇತಿಯಸ್ಸ ಸಮೀಪೇ ಜೇತವನವಿಹಾರೇ ಗನ್ಥಂ ಉಗ್ಗಣ್ಹನ್ತೋ ಏಕೋ ದಹರಭಿಕ್ಖು ಗನ್ಥಛೇಕೋಪಿ ಸಮಾನೋ ಬಾಲಕಾಲೇ ಬಾಲಚಿತ್ತೇನ ಆಕುಲಿತೋ ಹುತ್ವಾ ವಚ್ಚಕೂಪೇ ವಾತಾತಪೇಹಿ ಬಹಿಸುಕ್ಖಭಾವೇನ ಪಟಿಚ್ಛಾದಿತೇ ದಣ್ಡೇನ ಆಲುಲಿತ್ವಾ ದುಗ್ಗನ್ಧೋವಿಯ ಚಿತ್ತಸನ್ತಾನೇ ಪರಿಯತ್ತಿವಾತಾತಪೇಹಿ ಬಹಿಸುಕ್ಖಭಾವೇನ ಪಟಿಚ್ಛಾದಿತೇ ಕೇನಚಿದೇವ ರೂಪಾರಮ್ಮಣಾದಿನಾ ಆಲುಲಿತ್ವಾ ಕಿಲೇಸಸತ್ತಿಸಙ್ಖಾತೋ ದುಗ್ಗನ್ಧೋ ವಾಯಿತ್ವಾ ಹೀನಾಯಾವತ್ತಿಸ್ಸಾಮೀತಿ ಚಿನ್ತೇತ್ವಾ ಗಿಹಿವತ್ಥಾನಿ ಗಹೇತ್ವಾ ಸದ್ಧಿಂ ಸಹಾಯಭಿಕ್ಖುಹಿ ನದೀತಿತ್ಥಂ ಅಗಮಾಸಿ. ಅನ್ತರಾಮಗ್ಗೇ ¶ ತಾವ ಭಿಕ್ಖುಭಾವೇನೇವ ಚೇತಿಯಂ ವನ್ದಿಸ್ಸಾಮೀತಿ ಗಿಹಿವತ್ಥಾನಿ ಸಹಾಯಕಾನಂ ಹತ್ಥೇ ಠಪೇತ್ವಾ ಚೇತಿಯಪ್ಪಮುಖೇ ಲೇಣಂ ಪವಿಸಿತ್ವಾ ವನ್ದಿತ್ವಾ ನಿಸೀದಿ. ಅಥ ಏಕಾ ದಹರಿತ್ಥೀ ಚೇತಿಯಙ್ಗಣಂ ಆಗನ್ತ್ವಾ ಬಹಿ ಲೇಣಂ ನಿಸೀದಿಸ್ವಾ ಉದಕಂ ಸಿಞ್ಚಿತ್ವಾ ಪತ್ಥನಂ ಅಕಾಸಿ,-ಇಮಿನಾ ಪುಞ್ಞಕಮ್ಮೇನ ಸಬ್ಬೇಹಿ ಅಪಾಯಾದಿನುಕ್ಖೇಹಿ ಮೋಚೇಯ್ಯಾಮಿ, ಭವೇ ಭವೇ ಚ ಹೀನಾಯಾವತ್ತಕಸ್ಸ ಪುರಿಸಸ್ಸ ಪಾದಚಾರಿಕಾ ನ ಭವೇಯ್ಯಾಮೀತಿ.

ಅಥ ತಂ ಸುತ್ವಾ ದಹರಭಿಕ್ಖು ಏವಂ ಚಿನ್ತೇಸಿ,-ಇದಾನಿ ಅಹಂಹೀನಾಯಾವತ್ತಿಸ್ಸಾಮೀತಿ ಚಿನ್ತೇತ್ವಾ ಆಗತೋ, ಅಯಮ್ಪಿ ದಹರಿತ್ಥೀ ಹೀನಾಯಾವತ್ತಕಸ್ಸ ಪುರಿಸಸ್ಸ ಪಾದಚಾರಿಕಾ ನ ಭವೇಯ್ಯಾ ಮೀತಿ ಪತ್ಥನಂ ಅಕಾಸಿ, ಇದಾನಿ ತಂ ದಹರಿತ್ಥಿಂ ಕಾರಣಂ ಪುಚ್ಛಿಸ್ಸಾಮೀತಿ. ಏವಂ ಪನ ಚಿನ್ತೇತ್ವಾ ಬಹಿ ಲೇಣಂ ನಿಕ್ಖಮಿತ್ವಾ ತಂ ದಹರಿತ್ಥಿಂಕಾರಣಂ ಪುಚ್ಛಿ,-ಕಸ್ಮಾ ಪನ ತ್ವಂ ಹೀನಾಯಾವತ್ತಕಸ್ಸ ಪುರಿಸಸ್ಸ ಪಾದಚಾರಿಕಾ ನ ಭವೇಯ್ಯಾಮೀತಿ ಪತ್ಥನಂ ಕರೋಸೀತಿ. ಹೀನಾಯಾವತ್ತಕಸ್ಸ ಭನ್ತೇ ಪುರಿಸಸ್ಸ ಪಾದಚಾರಿಕಾ ನ ಭವೇಯ್ಯಾಮೀತಿ ವುತ್ತವಚನಂ ಬಾಲಪುರಿಸಸ್ಸ ಪಾದಚಾರಿಕಾ ನ ಭವೇಯ್ಯಾಮೀತಿ ವುತ್ತವಚನೇನ ನಾನಾ ನ ಹೋತಿ, ಸದಿಸತ್ಥಕಮೇವಾತಿ ನನು ಹೀನಾಯಾ ವತ್ತಕೋ ಬಾಲೋಯೇವ ನಾಮ, ಸಚೇ ಪನ ಭನ್ತೇ ಹೀನಾಯಾವತ್ತಕೋ ಬಾಲೋ ನಾಮ ನ ಭವೇಯ್ಯ, ಕೋ ನಾಮ ಲೋಕೇ ಬಾಲೋ ಭವೇಯ್ಯ, ಭಿಕ್ಖು ನಾಮ ಹಿ ಪರೇಹಿ ದಿನ್ನಂ ಚೀವರಪಿಣ್ಡಪಾತಸೇನಾಸನಂ ಪರಿಭುಞ್ಜಿತ್ವಾ ಸುಖಂ ವಸತಿ, ಸಚೇ ಗನ್ಥಂ ಉಗ್ಗಣ್ಹಿತು ಕಾಮೋ ಭವೇಯ್ಯ, ಯಥಾಕಾಮಂಯೇವ ಗನ್ಥಂ ಉಗ್ಗಣ್ಹಿತುಂ ಓಕಾಸಂ ಲಭತಿ, ಏವಂ ಪನ ಅಹುತ್ವಾ ಅಲಸಿಕೋಯೇವ ಭುಞ್ಜಿತ್ವಾ ಸಯಿತ್ವಾ ನಿಸೀದಿತುಂ ಇಚ್ಛೇಯ್ಯ, ಏವಮ್ಪಿ ಯಥಾಕಾಮಂ ಭುಞ್ಜಿತುಂ ಸಯಿತುಂ ಓಕಾಸಂ ಲಭತಿ, ಏವಮ್ಪಿ ಸಮಾನೋ ಪರಸ್ಸ ದಾಸೋ ಭವಿಸ್ಸಾಮಿ, ದಾರಸ್ಸ ಕಿಂಕರೋ ಭವಿಸ್ಸಾಮೀತಿ ಅಕಥೇನ್ತೋಪಿ ಕಥೇನ್ತೋವಿಯ ಹುತ್ವಾ ಹೀನಾಯಾವತ್ತೇಯ್ಯ, ಸೋ ಲೋಕೇ ಅಞ್ಞೇಹಿ ಬಾಲೇಹಿ ಅಧಿಕೋ ಬಾಲೋತಿ ಅಹಂ ಮಞ್ಞಾಮಿ, ಸಚೇ ಪನ ಬಾಲತರಸ್ಸ ಭರಿಯಾ ಭವೇಯ್ಯ, ಅಹಂ ಬಾಲತರೀ ಭವೇಯ್ಯನ್ತಿ ¶ ವುತ್ತೇ ಸೋ ದಹರಭಿಕ್ಖು ಸಂವೇಗಂ ಆಪಜ್ಜಿತ್ವಾ ಬಹಿನಗರದ್ವಾರಂ ನಿಕ್ಖಮಿತ್ವಾ ವಾನರಗಣೇನ ವಿನಾ ಝಾಯನ್ತೋವಿಯ ವಾನರೋ ಝಾಯಿತ್ವಾ ನಿಸೀದಿ.

ಅಥ ಸಹಾಯಕಾ ಆಗನ್ತ್ವಾ ಗಿಹಿವತ್ಥಾನಿ ಗಣ್ಹಾಹೀತಿ ಪಕ್ಕೋಸಿಂಸು. ತಸ್ಮಿಂ ಕಾಲೇ ಸೋ ದಹರಭಿಕ್ಖು ಆಗಚ್ಛಥ ಭವನ್ತೋತಿ ವತ್ವಾ ಸಬ್ಬಂ ಕಾರಣಂ ತೇಸಂ ಆಚಿಕ್ಖಿತ್ವಾ ಇದಾನಿ ಪನ ಭವನ್ತೋ ಹೀನಾಯಾವತ್ತೇಹೀತಿ ಸಚೇ ಯೋ ಕೋಚಿ ಆಗನ್ತ್ವಾ ಮಮ ಸೀಸಂ ಮುಗ್ಗರೇನ ಪಹಾರೇಯ್ಯ, ಏವಂ ಸನ್ತೇಪಿ ಹೀನಾಯಾವತ್ತಿತುಂ ನ ಇಚ್ಛಾಮಿ, ಇತೋ ಪಟ್ಠಾಯ ಯಾವ ಜೀವಿತಪರಿಯನ್ತಾ ಹೀನಾಯಾವತ್ತಿತುಂ ಮನಸಾಪಿ ನ ಚಿನ್ತಯಿಸ್ಸಾಮೀತಿ ವತ್ವಾ ಏರಾವತೀನಂದಿಂ ತರಿತ್ವಾ ಜೇಯ್ಯಪುರಂ ಅಗಮಾಸಿ. ತದಾ ಕಿರ ದಹರಿತ್ಥೀ ದೇವಲಾಭವಯ್ಯ, ನ ಮನುಸ್ಸಿತ್ಥೀತಿ ವದನ್ತಿ ಪಣ್ಡಿತಾತಿ.

ಜೇಯ್ಯಪುರಂ ಪನ ಪತ್ವಾ ಪರಿಯತ್ತಿಕೋವಿದಾನಂ ಮಹಾಥೇರಾನಂ ಸನ್ತಿಕೇ ನಯಂ ಗಹೇತ್ವಾ ಪುಞ್ಞಚೇತಿಯಸ್ಸ ದಕ್ಖಿಣದಿಸಾಭಾಗೇ ಏಕಸ್ಮಿಂ ವಿಹಾರೇ ನಿಸೀದಿ. ಪರಿಯತ್ತಿಂ ವಾಚೇತ್ವಾ ಅಥ ಕಮೇನ ತಂತಂದಿಸಾಹಿ ಭಿಕ್ಖುಸಾಮಣೇರಾ ಆಗನ್ತ್ವಾ ತಸ್ಸ ಸನ್ತಿಕೇ ಪರಿಯತ್ತಿಂ ಉಗ್ಗಣ್ಹಿಂಸು. ಆವಾಸಂ ಪನ ಅಲಭಿತ್ವಾ ಕೇಚಿ ಭಿಕ್ಖುಸಾಮಣೇರಾ ಛತ್ತಾನಿಪಿ ಛಾದಿತ್ವಾ ನಿಸೀದಿಂಸು.

ಏಕಸ್ಮಿಂ ಕಾಲೇ ರಾಜಾ ನಿಕ್ಖಮಿತ್ವಾ ಪುಞ್ಞಚೇತಿಯಂ ವನ್ದಿಸ್ಸಾಮೀತಿ ಚೇತಿಯಙ್ಗಣಂ ಪಾವಿಸಿ. ಅಥ ಛತ್ತಾನಿ ಛಾದೇತ್ವಾ ನಿಸಿನ್ನೇ ಭಿಕ್ಖೂ ದಿಸ್ವಾ ಗುಹಾಯ ಸದ್ಧಿಂ ವಿಹಾರಂ ಕಾರಾಪೇತ್ವಾ ತಸ್ಸ ಭಿಕ್ಖುಸ್ಸ ಅದಾಸಿ. ತಿಲೋಕಗರೂತಿಪಿ ನಾಮಲಞ್ಛಂ ಅದಾಸಿ. ಸುಖವೋಹಾರತ್ಥಂ ಪನ ಕಕಾರಲೋಪಂ ಕತ್ವಾ ತಿಲೋಗರೂತಿ ವೋಹರಿಂಸು.

ತಸ್ಸ ಪನ ಸದ್ಧಿವಿಹಾರಿಕೋ ಸತ್ತವಸ್ಸಿಕೋ ತೇಜೋದೀಪೋ ನಾಮ ಭಿಕ್ಖು ಪರಿತ್ತಟೀಕಂ ಅಕಾಸಿ. ಅಪರಭಾಗೇ ಪನ ತಿಲೋಕಾಲಙ್ಕಾರೋತಿ ನಾಮಲಞ್ಛಂ ಅದಾಸಿ. ಏವಂ ತೇಜೇದೀಪೋ ನಾಮ ಭಿಕ್ಖು ನರಾವರರಞ್ಞೋ ಕಾಲೇ ಪರಿತ್ತಟೀಕಂ ಅಕಾಸೀತಿ ದಟ್ಠಬ್ಬಂ. ಕೇಚಿ ಪನ ಪಚ್ಛಿಮಪಕ್ಖಾಧಿಕರಞ್ಞೋ ಕಾಲೇತಿ ವದನ್ತಿ.

ಏಕಸ್ಮಿಂ ¶ ಪನ ಕಾಲೇ ತಿರಿಯಪಬ್ಬತವಿಹಾರವಾಸೀಮಹಾಥೇರೋ ಪಾದಚೇತಿಯಂ ವನ್ದನತ್ಥಾಯ ಗನ್ತ್ವಾ ಪಚ್ಚಾಗತಕಾಲೇ ಕುಖನನಗರೇ ಸುವಣ್ಣಗುಹಾಯಂ ಜಮ್ಬುಧಜತ್ಥೇರಸ್ಸ ಸನ್ತಿಕಂ ಪವಿಸಿತ್ವಾ ತೇನ ಸದ್ಧಿಂ ಸಲ್ಲಾಪಂ ಅಕಾಸಿ. ತೇ ಚ ಮಹಾಥೇರಾ ಅಞ್ಞಮಞ್ಞಂ ಪಸ್ಸಿತ್ವಾ ಸಲ್ಲಪಿತ್ವಾ ಅತಿವಿಯ ಪಮೋದಿಂಸು. ಲೋಕಸ್ಮಿಞ್ಹಿ ಬಾಲೋ ಬಾಲೇನ ಪಣ್ಡಿತೋ ಪಣ್ಡಿತೇನ ಸದ್ಧಿಂ ಅತಿವಿಯ ಪಮೋದತೀತಿ. ತೇ ಚ ದ್ವೇ ಥೇರಾ ಸಮಾನವಸ್ಸಿಕಾ. ತಿರಿಯಪಬ್ಬತವಿಹಾರ ವಾಸೀಮಹಾಥೇರೋ ತೇನ ಸದ್ಧಿಂ ಸಲ್ಲಾಪಂ ಕತ್ವಾ ಪಚ್ಚಾಗಚ್ಛಿ. ಜಮ್ಬುಧಜತ್ಥೇರೋ ಚ ಮಗ್ಗಂ ಅಚಿಕ್ಖಿತುಂ ಅನುಗಚ್ಛಿ. ಅಥ ತಿರಿಯಪಬ್ಬತವಿಹಾರವಾಸೀಮಹಾಥೇರೋ ಜಮ್ಬುಧಜತ್ಥೇರಂ ಆಹ,- ಅಹಂ ಭನ್ತೇ ರಾಜವಲ್ಲಭೋ ಹೋಮಿ ರಾಜಗುರು,ತ್ವಂಯೇವ ಮಮ ಪುರತೋ ಗಚ್ಛಾಹೀತಿ. ಅಥ ಜಮ್ಬುಧಜತ್ಥೇರೋಪಿ ತಿರಿಯಪಬ್ಬತವಿಹಾರವಾಸಿತ್ಥೇರಂ ಆಹ,-ತ್ವಂ ಭನ್ತೇ ರಾಜವಲ್ಲಭೋ ಭವಸಿರಾಜಗುರು, ಲೋಕೇ ರಾಜಗುರು ನಾಮ ಪಧಾನಭಾವೇ ಠಿತೋ, ತಸ್ಮಾ ತ್ವಂಯೇವ ಮಮ ಪುರತೋ ಗಚ್ಛಾಹೀತಿ. ಏತ್ಥ ಚ ದ್ವೇಪಿ ಮಹಾಥೇರಾ ಅಞ್ಞಮಞ್ಞಂ ಗಾರವವಸೇನ ಲೋಕವತ್ತಂ ಅಪೇಕ್ಖಿತ್ವಾ ಏವಮಾಹಂಸೂತಿ ದಟ್ಠಬ್ಬಂ. ತಿರಿಯಪಬ್ಬತವಿಹಾರವಾಸೀಮಹಾಥೇರೋಪಿ ರತನಪೂರನಗರಂ ಪತ್ವಾ ರಾಜವಂಸಪಬ್ಬತಂ ಗನ್ತ್ವಾ ಅರಞ್ಞವಾಸಂ ವಸಿ.

ಅಥ ಉಕ್ಕಂಸಿಕರಾಜಾ ಕನಿಟ್ಠೇನ ಸೂರಕಿತ್ತಿನಾಮೇನ ಸದ್ಧಿಂ ಮನ್ತೇಸಿ,-ಸಚೇ ತ್ವಂ ವನೇ ಥೇರಂ ಪಠಮಂ ಪಸ್ಸಸಿ, ತ್ವಂಯೇವ ವಿಹಾರಂ ಕಾರಾಪೇತ್ವಾ ಥೇರಸ್ಸ ದದಾಹಿ, ಸಚೇ ಪನಾಹಂ ಪಠಮಂ ಪಸ್ಸೇಯ್ಯ, ಅಹಂ ವಿಹಾರಂ ಕಾರಾಪೇತ್ವಾ ದದಾಮೀತಿ.

ಅಥ ಕನಿಟ್ಠಾ ಪಠಮಂ ಪಸ್ಸಿತ್ವಾ ತಿರಿಯಪಬ್ಬತಕನ್ದರೇ ಜೇತವನಂ ನಾಮ ವಿಹಾರಂ ಕಾರಾಪೇತ್ವಾ ಅದಾಸಿ. ಇದಞ್ಚ ವಚನಂ ಸಾಧುಜ್ಜನಾನಂ ಗುಣಂ ಏವಕಾರಂ ಪೀತಿಸೋಮನಸ್ಸಂ ಉಪ್ಪಜ್ಜಿ, ತೇನ ಪುಞ್ಞಕಮ್ಮೇನ ತೇನ ಪೀತಿಸೋಮನಸ್ಸೇನ ಸತ್ತಕ್ಖತ್ತುಂ ದೇವರಜ್ಜಸಮ್ಪತ್ತಿಂ ಸತ್ತಕ್ಖತ್ತುಂ ಮನುಸ್ಸರಜ್ಜಸಮ್ಪತ್ತಿಂ ಪಟಿಲಭೀತಿ ವುತ್ತತ್ತಾ ಸಾಧುಜ್ಜನಾನಂ ಗುಣಂ ಅನುಸ್ಸರಿತ್ವಾ ಪುಞ್ಞವಿಸೇಸಲಾಭತ್ಥಾಯ ವುತ್ತಂ.

ತಿರಿಯಪಬ್ಬತವಿಹಾರವಾಸೀಮಹಾಥೇರೋ ಚ ಜಮ್ಬುಧಜತ್ಥೇರಸ್ಸ ¶ ಗುಣಂ ಉಕ್ಕಂಸಿಕರಞ್ಞೋ ಆರೋಚೇಸಿ. ರಾಜಾ ಚ ಅತಿವಿಯ ಪಸೀದಿತ್ವಾ ಜಮ್ಬುಧಜೋತಿ ಮೂಲನಾಮೇ ದೀಪಸದ್ದೇನ ಯೋಜೇತ್ವಾ ಜಮ್ಬುದೀಪಧಜೋತಿ ನಾಮಲಞ್ಛಂ ಅದಾಸಿ.

ಜಮ್ಬುಧಜತ್ಥೇರೋ ಚ ನಾಮ ಧಮ್ಮನನ್ದತ್ಥೇರಸ್ಸ ಸದ್ಧಿವಿಹಾರಿಕಾ. ಧಮ್ಮನನ್ದತ್ಥೇರೋ ಚ ಜೋತಿಪುಞ್ಞತ್ಥೇರಸ್ಸ ಸದ್ಧಿವಿಹಾರಿಕೋ. ತೇ ಚ ಥೇರಾ ಅರಹನ್ತಗಣವಂಸಿಕಾ.

ಜಮ್ಬುಧಜತ್ಥೇರೋ ಪನ ವಿನಯಪಾಳಿಯಾ ಅಟ್ಠಕಥಾಯ ಚ ಅತ್ಥ ಯೋಜನಂ ಮರಮ್ಮಭಾಸಾಯ ಅಕಾಸಿ. ಮಣಿರತನೋ ನಾಮ ಪನ ಥೇರೋ ಅಟ್ಠಸಾಲಿನೀಸಮ್ಮೋಹವಿನೋದನೀಕಙ್ಖಾವಿತರಣೀಅಟ್ಠಕಥಾನಂ ಅಭಿಧಮ್ಮತ್ಥವಿಭಾವನೀಸಙ್ಖಪವಣ್ಣನಾಳೀಕಾನಞ್ಚ ಅತ್ಥಂ ಮರಮ್ಮ ಭಾಸಾಯ ಯೋಜೇಸಿ.

ಮೂಲಾವಾಸಗಾಮೇ ಚ ಪುಬ್ಬಾರಾಮವಿಹಾರವಾಸಿತ್ಥೇರೋ ಗೂಳತ್ಥ ದೀಪನಿಂ ನಾಮ ಗನ್ಥಂ ವಿಸುದ್ಧಿಮಗ್ಗಗಣ್ಠಿಪದತ್ಥಞ್ಚ ಮೂಲಭಾಸಾಯ ಅಕಾಸಿ, ನೇತ್ತಿಪಾಳಿಯಾ ಚ ಅತ್ಥಂ ಮರಮ್ಮಭಾಸಾಯ ಯೋಜೇಸಿ. ಸೋ ಪನ ಥೇರೋ ಪುಬ್ಬೇ ಗಾಮವಾಸೀ ಹುತ್ವಾ ಸೀಸವೇಠನತಾಲಪತ್ತಾನಿ ಗಹೇತ್ವಾ ಆಚರಿಯಪ್ಪವೇಣೀವಸೇನ ವಿನಯವಿಲೋಮಾಚಾರಂ ಚರಿ. ಪಚ್ಛಾ ಪನ ತಂ ಆಚಾರಂ ವಿಸ್ಸಜ್ಜಿತ್ವಾ ಅರಞ್ಞವಾಸಂ ವಸಿ. ಸೋಪಿ ಥೇರೋ ಗಮ್ಭೀರಞಾಣಿಕೋ ಸದ್ದತ್ಥನಯೇಸು ಅತಿವಿಯ ಛೇಕೋ.

ಕಲಿಯುಗೇ ಪನ ಪಞ್ಚತಿಂಸಾಧಿಕೇ ವಸ್ಸಸಹಸ್ಸೇ ಸಮ್ಪತ್ತೇ ಕನಿಟ್ಠೋ ಸಿರಿಪವರಮಹಾಧಮ್ಮರಾಜಾ ನಾಮ ಭೂಪಾಲೋ ರಜ್ಜಂ ಕಾರೇಸಿ. ದಬ್ಬಿಮುಖಜಾತಸ್ಸರೇ ಪನ ಗೇಹಂ ಕಾರಾಪೇತ್ವಾ ನಿಸೀದನತೋ ದಬ್ಬಿಮುಖಜಾತಸ್ಸರೋತಿ ನಾಮಂ ಪಾಕಟಂ ಅಹೋಸಿ. ತಸ್ಮಿಂ ಪನ ಜಾತಸ್ಸರೇ ಜೇಯ್ಯಭೂಮಿಕಿತ್ತಿಂ ನಾಮ ವಿಹಾರಂ ಕಾರಾಪೇತ್ವಾ ಸಿರಿಸದ್ಧಮ್ಮಪಾಲತ್ಥೇರಸ್ಸ ಅದಾಸಿ. ಬಹೂನಮ್ಪಿ ಗಾಮವಾಸೀ ಅರಞ್ಞವಾಸೀ ಭಿಕ್ಖೂನಂ ಅನುಗ್ಗಹಂ ಅಕಾಸಿ. ರತನಪೂರನಗರಸ್ಮಿಞ್ಹಿ ದಸಸು ‘ಞ್ಯ್ौಂ ಯಾಂ’ ರಾಜಾಂಸೇಸು ಪ್ಪಚ್ಛಿಮಾ ಪಞ್ಚ ರಾಜಾನೋ ಅವಿಚಿನಿತ್ವಾಯೇವ ಅಲಜ್ಜೀಲಜ್ಜೀಮಿಸ್ಸಕವಸೇನ ಸಾಸನಂ ಪಗ್ಗಣ್ಹಿಂಸು. ತದಾ ¶ ಜಿನಸಾಸನಂ ಅಬ್ಭನ್ತರೇ ಚನ್ದೋವಿಯ ಅತಿಪರಿಸುದ್ಧಂ ನ ಅಹೋಸಿ. ಏವಮ್ಪಿ ಲಜ್ಜಿನೋ ಅತ್ತನೋ ಅತ್ತನೋ ವಂಸಾನುರಕ್ಖಣವಸೇನ ಧಮ್ಮಂ ಪೂರೇತುಂ ಅನಿವಾರಿತತ್ತಾ ಲಜ್ಜೀಗಣವಂಸೋ ನ ಛಿಜ್ಜತಿ. ತಥಾ ಅಲಜ್ಜಿನೋಪಿ ಅತ್ತನೋ ಅತ್ತನೋ ಆಚರಿಯಪ್ಪವೇಣೀವಸೇನ ವಿಚರಿಂಸು, ತೇನ ಅಲಜ್ಜೀಗಣವಂಸೋಪಿ ನ ಛಿಜ್ಜತೀತಿ ದಟ್ಠಬ್ಬಂ. ತಸ್ಸ ರಞ್ಞೋ ಕಾಲೇ ದೇವಚಕ್ಕೋಭಾಸೋ ನಾಮ ಏಕೋ ಥೇರೋ ಅತ್ಥಿ, ವೇದಸತ್ಥಞ್ಞೂ ಪಿಟಕೇಸು ಪನ ಮನ್ದೋತಿ.

ಕಲಿಯುಗೇ ಪನ ಅಟ್ಠತಿಂಸಾಧಿಕೇ ವಸ್ಸಸಹಸ್ಸೇ ಸಮ್ಪತ್ತೇ ವೇಸಾಖಮಾಸಸ್ಸ ಕಾಳಪಕ್ಖಅಟ್ಠಮಿತೋ ಪಟ್ಠಾಯ ಲೋಕಸಙ್ಕೇತವಸೇನ ಉಪ್ಪಜ್ಜಮಾನಂ ಭಯಂ ನಿವಾರೇತುಂ ನವಗುಹಾಯಂ ತೇನ ದೇವಚಕ್ಕೋಭಾಸತ್ಥೇರೇನ ಕಥಿತನಿಯಾಮೇನ ಪಠಮಂ ಮರಮ್ಮಿಕಭಿಕ್ಖೂ ಪಟ್ಠಾನಪ್ಪಕರಣಂ ವಾಚಾಪೇಸಿ. ತತೋ ಪಚ್ಛಾ ಜೇಟ್ಠಮಾಸಸ್ಸ ಜುಣ್ಹಪಕ್ಖಪಾಟಿಪದದಿವಸತೋ ರಾಮಞ್ಞರಟ್ಠವಾಸಿಕೇ ಭಿಕ್ಖೂ ಪಟ್ಠಾನಪ್ಪಕರಣಂ ವಾಚಾಪೇಸಿ. ಮಹಾಛಣಞ್ಚ ಕಾರಾಪೇಸಿ. ರಟ್ಠವಾಸಿನೋಪಿ ಬಹುಪೂಜಾಸಕ್ಕಾರಂ ಕಾರಾಪೇಸಿ. ತಸ್ಸ ಕಿರ ರಞ್ಞೋ ಕಾಲೇ ಪೋತ್ಥಕಂ ಅಟ್ಠಿಭಲ್ಲಿಕರುಕ್ಖನಿಯ್ಯಾಸೇಹಿ ಪರಿಮಟ್ಠಂ ಕತ್ವಾ ಮನೋಸಿಲಾಯ ಲಿಖಿತ್ವಾ ಸುವಣ್ಣೇನ ಲಿಮ್ಪೇತ್ವಾ ಪಿಟಕಂ ಪತಿಟ್ಠಾಪೇಸಿ. ತತೋ ಪಟ್ಠಾಯ ಯಾವಜ್ಜತನಾ ಇದಂ ಪೋತ್ಥಕಕಮ್ಮಂ ಮರಮ್ಮರಟ್ಠೇ ಅಕಂಸೂತಿ.

ಕಲಿಯುಗೇ ಸಟ್ಠಾಧಿಕೇ ವಸ್ಸಸಹಸ್ಸೇ ಸಮ್ಪತ್ತೇ (ಅಸ್ಸಯುಜಮಾಸಸ್ಸ ಕಾಳಪಕ್ಖಛಟ್ಠಮಿಯಂ ಅಙ್ಗಾರವಾರೇ) ತಸ್ಸ ಪುತ್ತೋ ರಜ್ಜಂ ಕಾರೇಸಿ. ಸಿರಿಹಾಸೀಹಸೂರಸುಧಮ್ಮರಾಜಾತಿ ನಾಮಲಞ್ಛಮ್ಪಿ ಪಟಿಗ್ಗಣ್ಹಿ. ಪಿತು ರಞ್ಞೋ ಗೇಹಟ್ಠಾನೇ ಚೇತಿಯಂ ಕಾರಾಪೇಸಿ. ತಸ್ಸ ಪನ ಮಾರಜೇಯ್ಯರತನನ್ತಿ ಸಮಞ್ಞಾ ಅಹೋಸಿ. ತಸ್ಸ ಪನ ರಞ್ಞೋ ಕಾಲೇ ಸಲ್ಲಾವತಿಯಾ ನಾಮ ನದಿಯಾ ಪಚ್ಛಿಮಭಾಗೇ ತುನ್ನನಾಮಕೇ ಗಾಮೇ ಗುಣಾಭಿಲಙ್ಕಾರೋ ನಾಮ ಥೇರೋ ಸಾಮಣೇರಾನಂ ಗಾಮಗ್ಗವೇಸನಕಾಲೇ ಏಕಂಸಂ ಉತ್ತರಾಸಙ್ಗಂ ಕಾರಾಪೇತ್ವಾ ¶ ಸೀಸವೇಠನತಾಲಪತ್ತಾನಿ ಪನ ನ ಗಣ್ಹಾಪೇತ್ವಾ ತಾಲವಣ್ಟಮೇವ ಗಣ್ಹಾಪೇಸಿ. ಏಕೋ ಗಣೋ ಹುತ್ವಾ ಸಪರಿವಾರೇನ ಸದ್ಧಿಂ ತುನ್ನಗಾಮೇ ನಿಸೀದಿ. ತುನ್ನಗಣೋತಿ ತಸ್ಸ ಸಮಞ್ಞಾ ಅಹೋಸಿ. ಸೋ ಪನ ಥೇರೋ ಪಾಳಿಅಟ್ಠಕಥಾಟೀಕಾಗನ್ಥನ್ತರೇಸು ಅಧಿಪ್ಪಾಯಂ ಯಥಾಭೂತಂ ನ ಜಾನಾತಿ, ಅಭಿಧಮ್ಮಪಿಟಕಂಯೇವ ಸಿಸ್ಸಾನಂ ವಾಚೇತ್ವಾ ನಿಸೀದಿ.

ತಸ್ಮಿಞ್ಚ ಕಾಲೇ ಕೇತುಮತೀನಗರೇ ನಿಸಿನ್ನಾ ಬದ್ಧನ್ನಾ ಬುದ್ಧಙ್ಕುರತ್ಥೇರ ಚಿತ್ತತ್ಥೇರಾ, ದೀಪಯಙ್ಗನಗರೇ ಉಳುಗಾಮೇ ನಿಸಿನ್ನೋ ಸುನನ್ದತ್ಥೇರೋ, ತಲುಪ್ಪನಗರೇ ಜೇಯ್ಯಬಹುಅನ್ಧಗಾಮೇ ಕಲ್ಯಾಣತ್ಥೇರೋತಿ ಇಮೇ ಚತ್ತಾರೋ ಥೇರಾ ಸಾಮಣೇರಾನಂ ಗಾಮಪ್ಪವೇಸನಕಾಲೇ ಏಕಂಸಂ ಉತ್ತರಾಸಙ್ಗಂ ಅಕಾರಾಪೇತ್ವಾ ಸೀಸವೇಠನತಾಲಪತ್ತಾನಿ ಅಗ್ಗಣ್ಹಾಪೇತ್ವಾ ಚೀವರಂ ಪಾರುಪಾಪೇತ್ವಾ ತಾಲವಣ್ಟಂ ಗಣ್ಹಾಪೇತ್ವಾ ಸಕಲಕಗಣಂ ಓವಾದಂ ಕತ್ವಾ ನಿಸೀದಿಂಸು. ತೇ ಪನ ಥೇರಾ ಪಾಳಿಅಟ್ಠಕಥಾಟೀಕಾಗನ್ಥನ್ತರೇಸು ಅಧಿಪ್ಪಾಯಂ ಯಥಾಭೂಭಂ ಜಾನಿಂಸು, ತೀಸುಪಿ ಪಿಟಕೇಸು ಕೋವಿದಾ ಅಹೇಸುಂ. ಇಚ್ಚೇವಂ ಸಿರಿಮಹಾಸೀಹಸೂರಸುಧಮ್ಮರಞ್ಞೋ ಕಾಲೇ ಪಾರುಪನಭಿಕ್ಖೂಹಿ ನಾನಾ ಹುತ್ವಾ ವಿರೂಪಂ ಆಪಜ್ಜಿತ್ವಾ ಏಕಂಸಿಕಗಣೋ ನಾಮ ವಿಸುಂ ಭಿಜ್ಜಿ, ಯಥಾ ಪನ ಅಯಮಲಂ ಅಯತೋ ಉಟ್ಠಹಿತ್ವಾ ವಿಸದಿಸಂ ಹುತ್ವಾ ವಿರುದ್ಧಂ ಹೋತೀತಿ. ಏವಂ ಭಿಜ್ಜಮಾನಾಪಿ ಗಣಾ ರಾಜಾ ಪಮಾದೋ ಅನುಸ್ಸುಕ್ಕೋ ಹುತ್ವಾ ಅತ್ತನೋ ಅತ್ತನೋ ರುಚಿವಸೇನೇವ ಚರಿತ್ವಾ ನಿಸೀದಿಂಸು.

ತೇಸು ಚ ದ್ವೀಸು ಗಣೇಸು ಪಾರುಪನಗಣೇ ಥೇರಾ ಪಾಳಿಅಟ್ಠಕಥಾಟೀಕಾಗನ್ಥನ್ತರೇಸು ನೀತತ್ಥವಸೇನ ವುತ್ತಂ ವಚನಂ ನಿಸ್ಸಾಯ ನಿಕ್ಕಙ್ಖಾ ನಿದ್ದೋಸಾವ ಹುತ್ವಾ ನಿಸೀದಿಂಸು. ಏಕಂಸಿಕಗಣೇ ಪನ ಥೇರಾ ಅತ್ತನೋ ಅತ್ತನೋ ವಾದೋ ನ ಪಾಳಿಯಂ ನ ಚ ಅಟ್ಠಕಥಾಸು ನೇವ ಟೀಕಾಸು ನಾಪಿ ಗನ್ಥನ್ತೇರೇಸು ದಿಸ್ಸತಿ, ಇಮಮತ್ಥಂ ಅಜಾನನ್ತಾ ಇದಮೇವ ಸಚ್ಚಂ ಮೋಘಮಞ್ಞನ್ತಿ ವತ್ವಾ ಕೇಚಿ ಪನ ಸಕಸಕಸಿಸ್ಸಾನಂ ಓವಾದಂ ಅದಂಸು. ಏವರೂಪಾಪಿ ಸಿಸ್ಸಾ ಓವಾದಂ ಪಟಿಗ್ಗಣ್ಹಿಂಸು.

ಕೇಚಿ ಪನ ಪಾಳಿಯಾದೀಸು ಸಕವಾದಸ್ಸ ಅನಾಗತಭಾವಂ ಞತ್ವಾಯೇವ ¶ ಅಪರಿಸುದ್ಧಚಿತ್ತಾ ಹುತ್ವಾ ಸಮ್ಮಾಸಮ್ಬುದ್ಧಸ್ಸ ಭಗವತೋ ಮುಖಂ ಅನೋಲೋಕೇತ್ವಾ ಸಮ್ಮಾಸಮ್ಬುದ್ಧಸ್ಸೇವ ಭಗವತೋ ಗುಣಂ ಅನುಸ್ಸರಿತ್ವಾ ಸಕವಾದೇ ಆಕಾಸೇ ಪಸಾರಿತ ಹತ್ಥೋವಿಯ ಅಪ್ಪತಿಟ್ಠಾನೋತಿ ಜಾನಿತ್ವಾಯೇವ ಅಮ್ಹಾಕಂ ವಾದೋ ಸಮ್ಪತ್ತಲಙ್ಕಸ್ಸ ಸದ್ಧಮ್ಮಚಾರಿತ್ಥೇರಸ್ಸ ವಂಸಪ್ಪಭವೋತಿ ಅನಿಸ್ಸಾಯಭೂಭಮ್ಪಿ ನಿಸ್ಸಯಂ ಅಕಂಸು. ಅಭೂತೇನ ಮಹಾಥೇರಂ ಸೀಲವನ್ತಂ ಅಬ್ಭಾಚಿಕ್ಖಿಂಸು. ಫ್ಯಸೀನಾಮಕೇ ಗಾಮೇ ದಿಟ್ಠಧಮ್ಮಿಕಸಮ್ಪರಾಯಿ ಕತ್ಥಂ ಅನಪೇಕ್ಖನ್ತಸ್ಸ ಹೀನಾಯಾವತ್ತಕಸ್ಸ ದುಸ್ಸೀಲಸ್ಸ ಉಪಾಸಕಸ್ಸ ಲಞ್ಜಂ ದತ್ವಾ ಅಮ್ಹಾಕಂ ವಾದಾನುರೂಪಂ ಏಕಂ ಗನ್ಥಂ ಕರೋಹೀತಿ ಉಯ್ಯೋಜೇತ್ವಾ ಅನಾಗತೇ ಅನುಭವಿಯಮಾನದುಕ್ಖತೋ ಅಭಾಯಿತ್ವಾ ನಿಸ್ಸಯಂ ಗವೇಸಿಂಸೂತಿ.

ತಸ್ಮಿಂಞ್ಚ ಕಾಲೇ ನಿಗ್ರೋಧಪಾಳಿಸುವಣ್ಣವಿಹಾರವಾಸಿತ್ಥೇರೋ ಗಾಮವಾಸೀಭಿಕ್ಖು ಗಣಂ ಸಮಿತಿಂ ಕತ್ವಾ ತಸ್ಸ ನಾಯಕೋ ಹುತ್ವಾ ಸೀಸವೇಠನಂ ಅಧಾರೇನ್ತಾ ಅಮಙ್ಗಲಭಿಕ್ಖೂ ಸಾಸನೇ ಮಾತಿಟ್ಠನ್ತೂತಿ ಅರಞ್ಞವಾಸೀನಂ ಭಿಕ್ಖೂನಂ ಗನ್ಥಂ ವಿಕೋಪೇತ್ವಾ ತತೋ ತತೋ ಪಬ್ಬಜೇಸುಂ. ಅಥ ಹತ್ಥಿಸಾಲಗಾಮಸ್ಸ ಪುರತ್ಥಿಮಾಯ ಅನುದಿಸಾಯ ಸೇಟ್ಠಿತಳಾಕಸ್ಸ ದಕ್ಖಿಣಾಯ ಅನುದಿಸಾಯ ವಿಹಾರೇ ನಿಸಿನ್ನೇ ಅತಿರೇಕಪಣ್ಣಾಸಭಿಕ್ಖೂಪಿ ಪಬ್ಬಾಜೇಸ್ಸಾಮಾಸಿ ಚಿನ್ತೇತ್ವಾ ಗಾಮವಾಸೀಭಿಕ್ಖೂ ಸನ್ನಹಿತ್ವಾ ಅಗಮಾಸಿ. ಅಥ ರಾಜಾ ತಮತ್ಥಂ ಸುತ್ವಾ ಗಾಮವಾಸೀಗಣೋಪಿ ಏಕೋ, ಅರಞ್ಞವಾಸೀಗಣೋಪಿ ಏಕೋ, ಗಾಮವಾಸೀಭಿಕ್ಖೂ ಅರಞ್ಞವಾಸೀಭಿಕ್ಖೂ ವಿಹೇಠೇಸುಂ ನ ಸಕ್ಕಾ, ಸಕಸಕವಾದವಸೇನ ಸಕಸಕಟ್ಠಾನೇ ನಿಸೀದಿ ತಬ್ಬನ್ತಿ ರಾಜಲೇಖನಂ ಪೇಸೇಸಿ. ಅಥ ಅರಞ್ಞವಾಸೀಭಿಕ್ಖೂ ಸುಖಂ ವಸಿತುಂ ಓಕಾಸಂ ಲಭಿಂಸು.

ಕಲಿಯುಗೇ ಛಸತ್ತತಾಧಿಕೇ ವಸ್ಸಸಹಸ್ಸೇ ಸಮ್ಪತ್ತೇ ತಸ್ಸ ರಞ್ಞೋ ಪುತ್ತೋ ಮಹಾಸೀಹಸೂರಧಮ್ಮರಾಜಾಧಿರಾಜಾ ನಾಮ ರಜ್ಜಂ ಕಾರೇಸಿ. ಸೋಯೇವ ಸೂರಜ್ಜರಾಜಾತಿ ಚ ಸೇತಿಭಿನ್ದೋತಿ ಚ ವೋಹಾರಿಯತಿ.

ತಸ್ಸ ¶ ರಞ್ಞೋ ಕಾಲೇ ಸುವಣ್ಣಯಾನೋಲೋಕನಗಾಮವಾಸೀಉಕ್ಕಂಸಮಾಲಂ ನಾಮ ಥೇರಂ ಅನ್ತೋಯುಧನಾಯಕೋ ಏಕೋ ಅಮಚ್ಚೋ ಆನೇತ್ವಾ ರತನಪೂರನಗರಂ ಪತ್ವಾ ಸುವಣ್ಣಕುಕ್ಕುಟಾಚಲೇ ವಿಹಾರಂ ಕಾರಾಪೇತ್ವಾ ಠಪೇಸಿ.

ಸೋ ಪಾಳಿಅಟ್ಠಕಥಾಟೀಕಾಗನ್ಥನ್ತರೇಸು ಅತಿವಿಯ ಛೇಕೋ. ವಣ್ಣಬೋಧನಂ ನಾಮ ಲಿಖನನಯಞ್ಚ ಅಕಾಸಿ. ತಸ್ಸ ಗಾಮಸ್ಸ ರಾಜೂಹಿ ದಿನ್ನವಸೇನ ಚೇತಿಯಜಗ್ಗನಕಮ್ಮೇ ಯುತ್ತಕುಲತ್ತಾ ಪನ ರಞ್ಞೋ ಆಚರಿಯಟ್ಠಾನೇ ಅಟ್ಠಪೇತ್ವಾ ಅನ್ತೋಯುಧನಾಯ ಕಸ್ಸೇವ ಪೂಜನತ್ಥಾಯ ನಿಯ್ಯಾದೇಸಿ. ತಸ್ಸಾಪಿ ರಞ್ಞೋ ಕಾಲೇ ಸಾಮಣೇರೇಹಿ ಗಾಮಪ್ಪವಸನಕಾಲೇ ಪಾರುಪೇತ್ವಾ ಪವಿಸಿತಬ್ಬನ್ತಿ ಏಕಚ್ಚೇ ವದಿಂಸು. ಏಕಚ್ಚೇ ಪನ ಏಕಂಸಂ ಉತ್ತರಾಸಙ್ಗಂ ಕತ್ವಾ ಪವಿಸಿತಬ್ಬನ್ತಿ ವದಿಂಸು. ಏವಂ ಅಞ್ಞಮಞ್ಞಂ ಕಲಹಂ ಅಕಂಸು.

ತತ್ಥ ಉಕ್ಕಂಸಮಾಲಾನಾಮಕೋ ಥೇರೋ ಪಾರುಪನಗಣೇ ಪಧಾನೋ ಹುತ್ವಾ ನಾನಾಗನ್ಥೇಸು ಪಾರುಪನವತ್ತಮೇವ ಆಗತನ್ತಿ ಪಕಾಸಿಂಸು. ಏಕಂಸಿಕಗಣೇ ಪನ ತಿರಿಯಪಬ್ಬತವಿಹಾರವಾಸೀಮಹಾಥೇರಾ ಆಚರಿಯಪ್ಪವೇಣೀದಸ್ಸನವಸೇನ ಪಾರುಪನವಾದಂ ಪಟಿಕ್ಖಿಪಿಂಸು.

ಅಥ ರಾಜಾ ಚ ಫಲಿಕಖಚಿತವಿಹಾರವಾಸಿತ್ಥೇರಂ ಮೇಘುಚ್ಚನವಿಹಾರವಾಸಿತ್ಥೇರಂ ಸುಹತ್ಥತ್ಥೇರಂ ಬುದ್ಧಙ್ಕುರತ್ಥೇರಞ್ಚಾತಿ ಇಮೇ ಚತ್ತಾರೋ ಥೇರೇ ವಿನಯವಿನಿಚ್ಛಕಟ್ಠಾನೇ ಠಪೇತ್ವಾ ದ್ವೇ ಪಕ್ಖಾ ಅತ್ತನೋ ಅತ್ತನೋ ವಾದಂ ದಸ್ಸೇನ್ತೂತಿ ಆಹ.

ತೇ ಚ ಚತ್ತಾರೋ ಥೇರಾ ಪಾಳಿಅಟ್ಠಕಥಾಟೀಕಾಗನ್ಥನ್ತರೇಸು ಅಕೋವಿದಾ. ತೇಸಞ್ಹಿ ಠಪೇತ್ವಾ ರಾಜವಲ್ಲಭಮತ್ತಂ ಅಞ್ಞೋ ಕೋಚಿ ಗುಣವಿಸೇಸೋ ನತ್ಥಿ ರಾಜಗುರುಭಾವತ್ಥಾಯ, ಯಥಾ ಬ್ಯಗ್ಘಾ ರುಕ್ಖಗಚ್ಛಲತಾದಿಪ್ಪಟಿಚ್ಛನ್ನೇ ದುಗ್ಗಟ್ಠಾನೇ ನಿಸಿನ್ನೇ ಮಿಗೇ ಖುದ್ದಕತ್ತಾ ದುಬ್ಬಲೇಪಿ ಗಣ್ಹೇತುಂ ನ ಸಕ್ಕೋನ್ತಿ, ಏವಮೇವ ತೇ ಏಕಂಸಿಕತ್ಥೇರೇ ¶ ರಾಜಾನಂ ನಿಸ್ಸಾಯ ಠಿತೇ ಗನ್ಥೇಸು ಅನಾಗತತ್ತಾ ದುಬ್ಬಲೇಪಿ ವಾದವಸೇನ ಅಭಿಭವಿತುಂ ನ ಸಕ್ಖಿಂಸು. ತೇನೇವ ಪರಸೇನಾಯ ಬಲವತಂ ಜಾನಿತ್ವಾ ನಿಪಚ್ಚಕಾರಂ ದಸ್ಸೇತ್ವಾ ವೇರಂ ಸಮೇತ್ವಾ ನಿಸಿನ್ನೋ ಪಣ್ಡಿತಯೋಧೋವಿಯ ವಾದಂ ನಿಟ್ಠಂ ಅಪ್ಪಾಪೇತ್ವಾಯೇವ ಪಾರುಪನಗಣಾ ನಿಸೀದಿಂಸೂತಿ.

ಕಲಿಯುಗೇ ಪನ ಪಞ್ಚನವುತಾಧಿಕೇ ವಸ್ಸಸಹಸ್ಸೇ ಸಮ್ಪತ್ತೇ ತಸ್ಸ ಪುತ್ತೋ ಮಹಾರಾಜಾಧಿಪತಿ ನಾಮ ರಜ್ಜಂ ಕಾರೇಸಿ. ಪಚ್ಛಾ ಪನ ಕಾಲೇ ತೇರಸಾಧಿಕೇ ಸತೇ ವಸ್ಸಸಹಸ್ಸೇ ಚ ಸಮ್ಪತ್ತೇ ರಾಮಞ್ಞರಟ್ಠಿನೋ ರಾಜಾ ತಂ ಅಭಿಭವಿತ್ವಾವ ಅನೀತತ್ತಾ ಪತ್ತಹಂಸಾವತೀತಿ ಪಾಕಟಂ ಅಹೋಸಿ.

ತಸ್ಸ ರಞ್ಞೋ ಕಾಲೇ ಕುಖನನಗರೇ ಜಾಲಯುತ್ತ ಗಾಮತೋ ಞಾಣವರಂ ನಾಮ ಥೇರಂ ಆನೇತ್ವಾ ಆಚರಿಯಟ್ಠಾನೇ ಠಪೇಸಿ. ಸೋ ಪನ ಥೇರೋ ಪಾಳಿಅಟ್ಠಕಥಾಟೀಕಾಗನ್ಥನ್ತರೇಸು ಅತಿವಿಯ ಛೇಕೋ. ಸುಧಮ್ಮಸಭಾಯಂ ಪರಿಯತ್ತಿವಾಚಕಾನಂ ಸೋತಾರಾನಂ ಅತ್ಥಾಯ ಅಭಿಧಮ್ಮತ್ಥಸಙ್ಗಹಪ್ಪಕರಣಸ್ಸ ಗಣ್ಠಿಪದತ್ಥಂ ಪಠಮಂ ಅಕಾಸಿ. ತತೋ ಪಚ್ಛಾ ಅಟ್ಠಸಾಲಿನಿಯಂ ಗಣ್ಠಿಪದತ್ಥಂ ಸುರಾವಿನಿಚ್ಛಯಞ್ಚ ಅಕಾಸಿ. ತತೋ ಪಚ್ಛಾ ತೇನ ರಞ್ಞಾ ಯಾಚಿತೋ ಅಭಿಧಾನಪ್ಪಟೀಪಿಕಾಯ ಅತ್ಥಂ ಮರಮ್ಮಭಾಸಾಯ ಯೋಜೇಸಿ. ರಞ್ಞೋ ನಾಮಲಞ್ಛಂ ಛನ್ದೋಲಙ್ಕಾರಸದ್ದನೇತ್ತಿವಿದಗ್ಗದಣ್ಡೀಬ್ಯಞ್ಜೀನನಯೇಹಿ ಅಲಙ್ಕರಿತ್ವಾ ರಾಜಾಧಿರಾಜನಾಮತ್ಥಪ್ಪಕಾಸಿನಿಂ ನಾಮ ಗನ್ಥಮ್ಪಿ ಅಕಾಸಿ.

ರಾಜಾ ಹತ್ಥಿಸಾಲನಾಮಕೇ ದೇಸೇ ಕಾರಾಪಿತಗೇಹಂ ಭಿನ್ದಿತ್ವಾ ಸತಪ್ಪಮಾಣೇ ವಿಹಾರೇ ಕಾರಾಪೇತ್ವಾ ಸಬ್ಬೇಸಮ್ಪಿ ವಿಹಾರಾನಂ ಕಿತ್ತಿಜೇಯ್ಯವಾಸಟ್ಠಾಪನನ್ತಿ ನಾಮಾನಿ ಪಞ್ಞಾಪೇತ್ವಾ ತಸ್ಸೇವ ಥೇರಸ್ಸ ಅದಾಸಿ. ವಿಹಾರನಾಮೇನೇವ ಚ ಥೇರಸ್ಸಾಪಿ ತಂಸಮಞ್ಞಾ ಅಹೋಸಿ.

ತಸ್ಮಿಞ್ಚ ಕಾಲೇ ಅಕ್ಯಕರಞ್ಞೋ ಪಿತುರಞ್ಞೋ ಚ ಕಾಲೇ ತೇಸಂ ¶ ದ್ವಿನ್ನಂ ಗಣಾನಂ ವಿವಾದವಸೇನ ಅವಿಪ್ಪಕತವಚನಂ ಪುನ ವಿವಾದಸ್ಸ ವೂಪಸಮನತ್ಥಾಯ ಅತ್ತನೋ ಅತ್ತನೋ ವಾದಂ ಕಥಾಪೇಸಿ. ಪಾರುಪನಗಣೇ ಸೋ ಥೇರೋ ಪಧಾನೋ ಹುತ್ವಾ ಏಕಂಸಿಕಗಣೇ ಪನ ಪಾಸಂಸತ್ಥೇರೋ ಪಧಾನೋ ಹುತ್ವಾ ಯಥಾಯುದ್ಧಂ ಅಕಾಸಿ. ಅಥ ರಾಜಾ ಅತಿವಿಯ ರಾಜವಲ್ಲಭಂ ಜೇಯ್ಯಭೂಮಿಸುವಣ್ಣವಿಹಾರವಾಸಿತ್ಥೇರಂ ತೇಸಂ ವಾದಸ್ಸ ವಿನಿಚ್ಛಿನ್ದನತ್ಥಾಯ ವಿನಯಚರೇಟ್ಠಾನೇ ಠಪೇಸಿ.

ಕಿಞ್ಚಾಪಿ ಸೋ ಪನ ಥೇರೋ ಪಾಳಿಅಟ್ಠಕಥಾಟೀಕಾಗನ್ಥನ್ತರೇಸು ಥೋಕಂಯೇವ ಜಾನಕತ್ತಾ ಪರಿಯತ್ತಿಕೋವಿದೇಸು ಅಬ್ಬೋಹಾರಿಕೋಯೇವ ಅಹೋಸಿ, ರಾಜವಲ್ಲಭತ್ತಾ ಪನ ರಾಜಾ ಯಥಾಭೂತಂ ಅಜಾನಿತ್ವಾ ವಿನಯಧರಟ್ಠಾನೇ ಠಪೇಸಿ. ಯಥಾ ಪನ ಅಯಂ ಪುರತ್ಥಿಮದಿಸಾ, ಅಯಂ ಪನ ಪಚ್ಛಿಮದಿಸಾಭಿ ಏವಮಾದಿನಾ ದಿಸಾವವತ್ಥಾನಮತ್ತಂಯೇವ ಕಾತುಂ ಸಮತ್ಥಂ ನಙ್ಗಲಕೋಟಿಯಾ ಸಂವಡ್ಢನ್ತಂ ಪರಿಸುಂ ರಾಜಾಗಾರೇ ಧಮ್ಮವಿನಿಚ್ಛಕಾಮಪಚ್ಚಟ್ಠಾನೇ ಠಪೇತಿ, ಏವಮೇವ ರಾಜಾ ಅಯಂ ಈದಿಸೋ ಅಯಂ ಈದಿಸೋತಿ ಅಜಾನಿತ್ವಾ ವಿನಯಧರಟ್ಠಾನೇ ಠಪಿತತ್ತಾ ಸೋ ಜೇಯ್ಯಭೂಮಿಸುವಣ್ಣವಿಹಾರವಾಸಿತ್ಥೇರೋ ತೇಸಂ ದ್ವಿನ್ನಂ ಪಕ್ಖಾನಂ ದ್ವೀಸು ವಾದೇಸು ಅಯಂ ಭೂತೋ ಅಯಂ ಅಭೂತೋತಿ ವತ್ತುಂ ನ ಸಕ್ಕಾ, ಅದ್ವಾರಘರೇ ಪವಿಟ್ಠಕಾಲೇವಿಯ ತದಾ ಅಹೋಸಿ. ಸೇಯ್ಯಥಾಪಿ ನಾಮ ಮಹಿಸೋ ಅತ್ತನೋ ಸಮೀಪೇ ಠತ್ವಾ ದೇವಗೀತಂ ಗಾಯಿತ್ವಾ ದೇವವೀಣಂ ವಾದೇನ್ತಸ್ಸ ದೇವಗನ್ಧಬ್ಬಸ್ಸ ವೇಳುಸಲಾಕಂ ಪಹರನ್ತಸ್ಸ ಚ ಗಾಮದಾರಕಸ್ಸ ಸದ್ದೇಸು ಕಿಞ್ಚಿ ವಿಸೇಸಂ ನ ಜಾನಾತಿ, ಏವಮಿದಂ ಸಮ್ಪದಂ ದಟ್ಠಬ್ಬಂ. ಅಥ ರಾಜಾ ಮಮ ವಿಜಿತೇ ಯೇಯೇಭಿಕ್ಖೂ ಯಂಯಂಇಚ್ಛನ್ತಿ, ತೇತೇಭಿಕ್ಖೂ ತಂತಂಚರಿತ್ವಾ ಯಥಾಕಮ್ಮಂ ನಿಸೀದನ್ತೂತಿ ರಾಜಲೇಖನಂ ಠಪೇಸಿ. ತೇಸಂ ವಿವಾದೋ ತದಾ ನ ವೂಪಸಮಿ.

ಅಪರಭಾಗೇ ತೇರಸಾಧಿಕೇ ಸತೇ ಸಹಸ್ಸೇ ಚ ಸಮ್ಪತ್ತೇ ರತನಪೂರನಗರಂ ವಿನಸ್ಸಿ.

ತತೋ ಪಚ್ಛಾ ದುತಿಯೇ ಸಂವಚ್ಛರೇ ರತನಸಿಖನಗರಮಾಪಕೋ ರಾಜಾ ರಾಮಞ್ಞರಟ್ಠಿನ್ದಸ್ಸ ರಞ್ಞೋ ಸೇನಂ ಯವಖೇತ್ತತೋ ಚಾತಕಸಕುಣಂವಿಯ ¶ ಅತ್ತನೋ ಪುಞ್ಞನುಭಾವೇನ ಮರಮ್ಮರಟ್ಠತೋ ನೀಹರಿತ್ವಾ ಸಕಲಮ್ಪಿ ರಾಮಞ್ಞರಟ್ಠಂ ಅತ್ತನೋ ಹತ್ಥಗತಂ ಕತ್ವಾ ರಜ್ಜಂ ಕಾರೇಸಿ.

ತಸ್ಮಿಞ್ಚ ಕಾಲೇ ಸಕಲಮರಮ್ಮರಟ್ಠವಾಸೀನಂ ಚಿತ್ತಂ ಪಸಾದೇಸಿ, ಯಥಾ ನಾಮ ಸೂರಿಯಾತಪೇನ ಮಿಲಾಯನ್ತಾನಂ ಕುಮುದಾನಂ ಅನೋತತ್ತೋದಕೇನ ಸಿಞ್ಚಿತ್ವಾ ಹರಿತತ್ತಂ ಪಾಪೇತಿ, ಏವಮೇವ ರಾಮಞ್ಞರಟ್ಠಿನ್ದಸ್ಸ ಸೇನಾಬಲಾತಪೇಹಿ ದುಕ್ಖಪ್ಪತ್ತಾನಂ ಮರಮ್ಮರಟ್ಠವಾಸೀನಂ ಗಹಟ್ಠಾನಞ್ಚೇವ ಭಿಕ್ಖೂನಞ್ಚ ಅತ್ತನೋ ಪುಞ್ಞಾನೋತತ್ತೋದಕೇನ ಛಿಞ್ಚಿತ್ವಾ ಕಾಯಿಕಚೇತಸಿಕವಸೇನ ದುವಿಧಮ್ಪಿ ಸುಖಂ ಉಪ್ಪಾದೇಸಿ.

ಸಕಲಮರಮ್ಮರಟ್ಠವಾಸಿನೋ ಚ ಅಯಂ ಅಮ್ಹಾಕಂ ರಾಜಾ ಬೋಧಿಸತ್ತೋತಿ ವೋಹಾರಿಂಸು. ಅಥ ಏಕಸ್ಮಿಂ ಮಾಸೇ ಚತೂಸು ಉಪೋಸಥದಿವಸೇಸು ಭಿಕ್ಖುಸಙ್ಘಂ ನಿಮನ್ತೇತ್ವಾ ಅನ್ತೇಪುರೇ ಪವೇಸೇತ್ವಾ ಪಿಣ್ಡಪಾತೇನ ಭೋಜೇಸಿ. ರಾಜೋರೋಧಾಮಚ್ಚೇಹಿ ಸದ್ಧಿಂ ಉಪೋಸಥಂ ಉಪವಸಿ. ಸಬ್ಬೇಸಮ್ಪಿ ರಾಜೋರೋಧಾಮಚ್ಚಾನಂ ಗುಣತ್ತಯಪಾಠಂ ಸಹ ಅತ್ಥಯೋಜನಾನಯೇನ ವಾಚಗ್ಗತಂ ಕಾರಾಪೇಸಿ.

ಅಥ ಬೇಲುವಗಾಮವಾಸೀಯಸತ್ಥೇರಂ ಅನೇತ್ವಾ ಅತ್ತನೋ ಆಚರಿಯಟ್ಠಾನೇ ಠಪೇಸಿ. ಮಹಾಅತುಲಯಸಧಮ್ಮರಾಜಗುರೂತಿ ನಾಮಲಞ್ಛಮ್ಪಿ ಅದಾಸಿ. ತತೋ ಪಟ್ಠಾಯ ಪನ ಅತುಲತ್ಥೇರೋತಿ ನಾಮೇನ ಪಾಕಟೋ ಅಹೋಸಿ. ತಸ್ಮಿಞ್ಚ ಕಾಲೇ ಪಾರುಪನಗಣಪಕ್ಖಾಪಲಿಣಗಾಮವಾಸೀಸುಜಾತತ್ಥೇರಾದಯೋ ಸಾಮಣೇರಾನಂ ಗಾಮಪ್ಪವೇಸನಕಾಲೇ ಚೀವರಂ ಪಾರುಪಿತ್ವಾ ಪವಿಸಿತಬ್ಬನ್ತಿ ಅಕ್ಖರಂ ಲಿಖಿತ್ವಾ ರಞ್ಞೋ ಸನ್ತಿಕಂ ಸನ್ದೇಸಪಣ್ಣಂ ಪವೇಸೇತಿ.

ಅಥ ಏಕಂಸಿಕಗಣಪಕ್ಖಾಪಿ ಅತುಲತ್ಥೇರಾದಯೋ ಪುಬ್ಬೇಸಂ ರಾಜೂನಂ ಕಾಲೇ ಅಧಿಕರಣಂ ವೂಪಸಮಿ, ಇದಾನಿ ವೂಪಸಮಿತಕಮ್ಮಂ ಪುನ ನ ಉಪ್ಪಾದೇತಬ್ಬನ್ತಿ ಲೇಖನಂ ಲಿಖಿತ್ವಾ ರಞ್ಞೋ ಸನ್ತಿಕಂ ಪೇಸೇಸಿ.

ಅಥ ರಾಜಾ ದ್ವಿನ್ನಂ ಪಕ್ಖಾನಂ ಸಕಸಕವಾದಂ ಕಥೇತುಕಾಮೋಪಿ ¶ ಇದಾನಿ ರಾಜಪ್ಪಟಿಸಂಯುತ್ತಂ ಕಮ್ಮಂ ಬಹು ಅತ್ಥಿ, ತಿಟ್ಠಸು ತಾವ ಸಾಸನಪ್ಪಟಿಸಂಯುತ್ತಂ ಕಮ್ಮಂ, ರಾಜಪ್ಪಟಿಸಂಯುತ್ತಮೇವ ಕಮ್ಮಂ ಪಠಮಂ ಆರಭಿಸ್ಸಾಮಿ, ಪಚ್ಛಾ ಸಾಸನಪ್ಪಟಿಸಂಯುತ್ತಂ ಕಮ್ಮಂ ಕರಿಸ್ಸಾಮೀತಿ ರಾಜಲೇಖನಂ ಠಪೇಸಿ. ಅಪರಭಾಗೇ ಪನ ರಾಜಾ ಏವಂ ಆಣಂ ಠಪೇಸಿ,-ಇದಾನಿ ಮಮ ವಿಜಿತೇ ಸಬ್ಬೇಪಿ ಭಿಕ್ಖೂ ಮಮ ಆಚರಿಯಸ್ಸ ಮತಿಂ ಅನುವತ್ತಿತ್ವಾ ಚರನ್ತೂತಿ.

ಅಥ ಪಾರುಪನಗಣಭಿಕ್ಖೂಪಿ ಏಕಂಸಿಕಗಣಂ ಅನುವತ್ತೇಸುಂ ರಞ್ಞೋ ಆಣಾವಸೇನ. ಸಹಸ್ಸೋರೋಧಗಾಮೇ ಪನ ದ್ವೇ ಮಹಾಥೇರಾ ಅತ್ತನೋ ಪರಿಸಂ ಪಾರುಪನವಸೇನೇವ ಗಾಮಪ್ಪವೇಸನವತ್ತಂ ಪರಿಪೂರಿತಬ್ಬನ್ತಿ ಓವದಿತ್ವಾ ನಿಸೀದಿಂಸು.

ತದಾ ರಞ್ಞೋ ಆಚರಿಯೋ ಯಸತ್ಥೇರೋ ತಮತ್ಥಂ ಸುತ್ವಾತೇ ಪಕ್ಕೋಸಾಪೇಸಿ. ತೇ ಚ ಆಗನ್ತ್ವಾ ನಗರಂ ಸಮ್ಪತ್ತಕಾಲೇ ಏಕೋ ಉಪಾಸಕೋ ಪಸನ್ನೋ ಹುತ್ವಾ ತೇಸಂ ಥೇರಾನಂ ಪಿಣ್ಡಪಾತೇನ ಉಪಟ್ಠಹಿ. ಅಥ ಅತುಲತ್ಥೇರೋ ತೇ ಮಹಾಥೇರೇ ದೂರಟ್ಠಾನತೋ ವಾಲುಕಂ ಆನೇತ್ವಾ ತಸ್ಸ ಉಪಾಸಕಸ್ಸ ಗೇಹಸಮೀಪೇ ಓಕಿರಾಪೇಸಿ. ಇದಂ ವಿನಯಧಮ್ಮಸ್ಸ ಅನನುಲೋಮವಸೇನ ಚರನ್ತಾನಂ ದಣ್ಡಕಮ್ಮನ್ತಿ ಕೋಲಾಹಲಮ್ಪಿ ಉಪ್ಪಾದೇಸಿ. ಅಥ ತೇಸಂ ವಾಲುಕಂ ಆಹರನ್ತಾನಂಯೇವ ಅಞ್ಞಮಞ್ಞಂ ಸಲ್ಲಪೇಸುಂ,-ಇದಾನಿ ಭನ್ತೇ ವಿನಯಧಮ್ಮಾನುಲೋಮವಸೇನ ಆಚರನ್ತಾನಂ ಅಮ್ಹಾಕಂ ಈದಿಸಂ ಕಮ್ಮಂ ಅಸಾರುಪ್ಪಂ, ಅಹೋ ಅಚ್ಛರಿಯಧಮ್ಮೋ ಲೋಕೋತಿ ಏಕೋ ಥೇರೋ ಆಹ. ಅಥ ಪನ ಏಕೋ ಥೇರೋ ಏವಮಾಹ,-ಇದಾನಿ ಆವುಸೋ ಲೋಕಪಾಲಾ ದೇವಾ ಈದಿಸಂ ಅಧಮ್ಮಕಮ್ಮಂ ದಿಸ್ವಾಯೇವ ಅಜ್ಝುಪೇಕ್ಖಿತ್ವಾ ಅಪ್ಪೋಸ್ಸುಕಾ ನಿಸೀದಿತುಂ ನ ಸಕ್ಕಾ, ಇದಾನಿ ಲೋಕಪಾಲಾ ದೇವಾ ಪಮಜ್ಜಿತ್ವಾ ನಿಸೀದನ್ತಿ ಮಞ್ಞೇತಿ.

ತಸ್ಮಿಂಯೇವ ಖಣೇ ವೇಗೇನ ಮೇಘೋ ಉಟ್ಠಹಿತ್ವಾ ಅತುಲತ್ಥೇರಸ್ಸ ವಿಹಾರೇ ರಾಜಗೇಹೇ ಚ ಏಕಕ್ಖಣೇ ಅಸನಿಯೋ ನಿಪತಿಂಸು. ಏವಂ ಸಮಾನೋಪಿ ಸೋ ಥೇರೋ ಅತಿಮಾನಥದ್ಧತಾಯ ಸತಿಂ ನ ಲಭಿ.

ಪುನ ¶ ರಾಜಾ ಇದಾನಿ ಮಮ ವಿಜಿತೇ ಸಬ್ಬೇಪಿ ಭಿಕ್ಖೂ ಮಮ ಆಚರಿಯಸ್ಸ ಮತಿಂ ಅನುವತ್ತನ್ತಿ ವಾ ಮಾ ವಾತಿ ಅಮಚ್ಚೇ ಪುಚ್ಛಿ. ಅಮಚ್ಚಾಪಿ ಏವಂ ರಞ್ಞೋ ಆರೋಚೇಸುಂ,-ಇದಾನಿ ಮಹಾರಾಜ ಕುಖನನಗರೇ ನೀಪಗಾಮೇ ನಿಸಿನ್ನೋ ಏಕೋ ಮಹಾಥೇರೋ ಮುನಿನ್ದಘೋಸೋ ನಾಮ ಅತ್ಥಿ, ಸೋ ಪಾರುಪನವಸೇನ ಅತ್ತನೋ ಪರಿಸಂ ಓವಾದೇತ್ವಾ ಬಹುಗುಣಂ ಉಪ್ಪಾದೇತ್ವಾ ನಿಸೀದತೀತಿ.

ಅಥ ರಾಜಾ ಏವಮಾಹ,-ತಂ ಪಕ್ಕೋಸೇತ್ವಾ ಸುಧಮ್ಮಸಸಾಯಂ ಮಹಾಥೇರೇ ಸನ್ನಿಪಾಭಾಪೇತ್ವಾ ತಸ್ಸ ಥೇರಸ್ಸ ವಿನಯ ಪಣ್ಣತ್ತಿಂ ಯಥಾಭೂತಂ ಅಜಾನನ್ತಸ್ಸ ಯಥಾಭೂತಂ ಸಭಾವಂ ದಸ್ಸೇತ್ವಾ ಓವಾದೇನ್ತೂತಿ.

ಅಥ ಅಮಚ್ಚಾ ತಥಾ ಅಕಂಸು. ಮಹಾಥೇರಾ ಚ ಸುಧಮ್ಮಸಸ್ಸಯಂ ಸನ್ನಿಪತಿತ್ವಾ ತಂ ಪಕ್ಕೋಸೇತ್ವಾ ಓವದಿಂಸು. ತೇಸು ಪನ ಮಹಾಥೇರೇಸು ಏಕೋ ಥೇರೋ ಭೂಪಾಲಸ್ಸ ಸಙ್ಘರಞ್ಞೋ ಚ ಮುಖಂ ಓಲೋಕೇತ್ವಾ ಭಗವತೋ ಪನ ಸಮ್ಮಾಸಮ್ಬುದ್ಧಸ್ಸ ಮುಖಂ ಅನೋಲೋಕೇತ್ವಾ ಮುನಿನ್ದಘೋಸತ್ಥೇರಂ ಏವಮಾಹ,- ಇದಾನಿ ಆವುಸೋ ಇಮಸ್ಮಿಂ ಮರಮ್ಮರಟ್ಠೇ ಸಬ್ಬೇಪಿ ಭಿಕ್ಖೂ ಭೂಪಾಲಸ್ಸ ಸಙ್ಘಸ್ಸ ರಞ್ಞೋ ಚ ಆಣಂ ಅನುವತ್ತಿತ್ವಾ ಏಕಂಸಿಕಾಯೇವ ಅಹೇಸುಂ, ತ್ವಂಯೇವ ಏಕೋ ಸದ್ಧಿಂ ಪರಿಸಾಯ ಪಾರುಪನವತ್ಥಂ ಚರಿತ್ವಾ ನಿಸೀದಸಿ, ಕಸ್ಮಾ ಪನ ತ್ವಂ ಮಾನಥದ್ಧೋ ಹುತ್ವಾ ಈದಿಸಂ ಅನಾಚಾರಂ ಅವಿಜಹಿತ್ವಾ ತಿಟ್ಠಸೀತಿ.

ಅಥ ಮುನಿನ್ದಘೋಸತ್ಥೇರೋ ತಸ್ಸ ಥೇರಸ್ಸ ಮುಖಂ ಉಜುಕಂ ಓಲೋಕೇತ್ವಾ ಏವಮಾಹ,- ತ್ವಂ ಲಜ್ಜೀಪೇಸಲೋ ಸಿಕ್ಖಾಕಾಮೋತಿ ಪುಬ್ಬೇ ಮಯಾ ಸುತಪುಬ್ಬೋ, ಈದಿಸೋ ಪನ ಪುಗ್ಗಲೋ ಈದಿಸಂ ವಚನಂ ವತ್ತುನಂ ಯುತ್ತೋ,ಈದಿಸಸ್ಸ ಹಿ ಪುಗ್ಗಲಸ್ಸ ಈದಿಸಂ ವಚನಂ ಅಸ್ಸಾರುಪ್ಪಂ, ಸಚೇ ತ್ವಂ ಅಯಂ ಅಪ್ಪಪುಞ್ಞೋ ನಿತ್ತೇಜೋ ಅನಾಥೋತಿ ಮಂ ಮಞ್ಞಿತ್ವಾ ಅಗಾರವವಸೇನ ವತ್ತುಂ ಇಚ್ಛೇಯ್ಯಾಸಿ, ಏವಂ ಸನ್ತೇಪಿ ಮಮಾಚರಿಯಸ್ಸ ಮುಖಂ ಓಲೋಕೇತ್ವಾ ಮಮಾಚರಿಯಸ್ಸ ಗುಣಂ ಜಾನಿತ್ವಾ ತಸ್ಸ ಸಿಸ್ಸೋಯನ್ತಿ ಅನುಸ್ಸರಿತ್ವಾ ಈದಿಸಂ ವಚನಂ ಅಧಮ್ಮಿಕಂ ವತ್ತುಂ ನ ಸಕ್ಕಾತಿ.

ಅಥ ¶ ಸೋ ಥೇರೋ ತಂ ಪುಚ್ಛಿ,-ಕೋ ಪನ ತವಾಚರಿಯೋತಿ. ಅಥ ಸುಖಮ್ಮಸಭಾಯಂ ಠಪಿತಂ ಬುದ್ಧರೂಪಂ ವದ್ದಿತ್ವಾ ಅಯಂ ಮಮಾಚರಿಯೋತಿ ಆಹ. ಮಮಾಸರಿಯೋತಿ ವತ್ವಾ ಪನ ಭಿಕ್ಖುಸಙ್ಘಮಜ್ಝೇ ಉಟ್ಠಹಿತ್ವಾ ಏಕಂಸಂ ಉತ್ತರಾಸಙ್ಗಂ ಕತ್ವಾ ಉಕ್ಕುಟಿಕಂ ನಿಸೀದಿತ್ವಾ ಅಞ್ಜಲಿಂ ಪಗ್ಗಹೇತ್ವಾ ಅಹಂ ಭನ್ತೇ ಯಾವ ಜೀವಿತಪರಿಯೋಸಾನಾ ಮಮ ಜೀವಿತಂಯೇವ ಪರಿಚ್ಚಜಿಸ್ಸಾಮಿ, ಭಗವತೋ ಪನತಿ ಲೋಕಗ್ಗಸ್ಸ ಸಿಕ್ಖಾಪದಂ ನ ವಿಜಹಿಸ್ಸಾಮೀತಿ ಆರೋಚೇಸಿ.

ಅಥ ರಾಜಾ ತಮತ್ಥಂ ಸುತ್ವಾ ಮಾನಥದ್ಧೋ ಏಸೋ ಮಮ ವಿಜಿತೇ ನಿಸೀದಾಪೇತುಂ ವಟ್ಟತಿ, ರಟ್ಠನ್ತರಂ ಪಬ್ಬಾಜೇತಬ್ಬೋತಿ ರಾಜಾಣಾಯ ರಟ್ಠನ್ತರಂ ಪೇಸೇಸಿ.

ರಾಜಪುರಿಸಾ ಚ ತಂ ಪಕ್ಕೋಸೇತ್ವಾ ರಟ್ಠನ್ತರಂ ಆನೇಸಿ. ಬಹಙ್ಗಂ ನಾಮ ದೇಸಂ ಪತ್ವಾ ಬಹಙ್ಗನಾಯಕೋ ಪುರಿಸೋ ರಾಜಪುರಿಸಾನಂ ಲಞ್ಜಂ ದತ್ವಾ ಏವಮಾಹ,- ಅಯಂ ಪನ ಭೋನ್ತೋ ಮರಮ್ಮರಟ್ಠಸ್ಸ ಪರಿಯನ್ತಪ್ಪದೇಸೋ, ಇಧೇವ ಠಪೇತ್ವಾ ತುಮ್ಹೇ ನಿವತ್ತಥಾತಿ.

ರಾಜ ಪುರಿಸಾಪಿ ಲಞ್ಜಂ ಗಹೇತ್ವಾ ತತ್ಥೇವ ಠಪೇತ್ವಾ ನಿವತ್ತಿಂಸು. ಥೇರೋಪಿ ಚತೂಹಿ ದಿಸಾಹಿ ಆಗತಾನಂ ಭಿಕ್ಖುಸಾಮಣೇರಾನಂ ಪಾರುಪನವಸೇನ ಓವಾದಂ ದತ್ವಾ ಪರಿಯತ್ತಿಂ ವಾಚೇತ್ವಾ ತತ್ಥ ನಿಸೀದಿ. ಅಭಿಧಮ್ಮತ್ಥಸಙ್ಗಹಗನ್ಥಸ್ಸ ಅತ್ಥಯೋಜನಮ್ಪಿ ಮರಮ್ಮಭಾಸಾಯ ಅಕಾಸಿ.

ಅಪರಭಾಗೇ ರಾಜಾ ತಮತ್ಥಂ ಸುತ್ವಾ ಇದಾನಿ ಸೋ ಥೇರೋ ಮಮ ವಿಜಿತಪರಿಯನ್ತೇಯೇವ ನಿಸೀದಿತ್ವಾ ಅಮ್ಹೇಹಿ ಅನಿಚ್ಛಿತಂ ನಿವಾರಿತಂ ಕಮ್ಮಂ ಕತ್ವಾ ನಿಸೀದಿ, ತಂ ಪಕ್ಕೋಸಥಾತಿ ಆಹ.

ರಾಜದೂತಾ ಚ ತತ್ಥ ಗನ್ತ್ವಾ ಪಕ್ಕೋಸಿಂಸು. ಥೇರೋ ಚ ಇದಾನಿ ಮಂ ರಾಜಾ ಮಾರೇತುಕಾಮೋತಿ ಮಞ್ಞಿತ್ವಾ ಸಿಕ್ಖಂ ಪಚ್ಚಕ್ಖಿತ್ವಾ ಗಿಹಿವತ್ಥಂ ನಿವಾಸೇತ್ವಾ ತೇಹಿ ಸದ್ಧಿಂ ಆಗಚ್ಛಿ. ನಗರಂ ಪನ ಆಗನ್ತ್ವಾ ಪತ್ತಕಾಲೇ ರಞ್ಞೋ ಸನ್ತಿಕಂ ಆನೇಸಿ.

ಅಥ ರಾಜಾ ಏವಮಾಹ,-ತ್ವಂ ಭಿಕ್ಖು ಹುತ್ವಾ ಗಣಂ ವಡ್ಢಾಪೇತ್ವಾ ನಿಸೀದಸೀತಿ ಮಯಾ ಸುತಂ, ಕಸ್ಮಾ ಪನಿದಾನಿ ಗಿಹಿ ಭವಸೀತಿ. ಸಚೇ ¶ ತ್ವಂ ಮಹಾರಾಜ ಮಂ ಮಾರೇತುಕಾಮೋ ಪಕ್ಕೋಸೇಯ್ಯಾಸಿ, ಏವಂ ಸತಿ ಯದಿ ಸಿಕ್ಖಂ ಅಪ್ಪಚ್ಚಕ್ಖಾಯ ಠಿತಂ ಮಂ ಮಾರೇಯ್ಯಾಸಿ, ತವ ಭಾರಿಯಂ ಕಮ್ಮಂ ಭವಿಸ್ಸತೀತಿ ಮನಸಿಕರಿತ್ವಾ ತವ ಕಮ್ಮಸ್ಸ ಅಭಾರಿಯತ್ಥಾಯ ಸಿಕ್ಖಂ ಪಚ್ಚಕ್ಖಿತ್ವಾ ಆಗತೋಮ್ಹಿ, ಸಚೇ ಮಂ ಮಾರೇತುಕಾಮೋಸಿ, ಮಾರೇಹೀಹಿ. ರಾಜಾ ಚ ತಂ ಬನ್ಧನಾಗಾರೇ ಠಪೇತ್ವಾ ಸ್ಯಾಮರಟ್ಠಂ ಯುಜ್ಝನತ್ಥಾಯಗಚ್ಛಿ. ಯಜ್ಝನತ್ಥಾಯ ಪನ ಗನ್ತ್ವಾ ಪಚ್ಚಾಗತಕಾಲೇ ಅನ್ತರಾಮಗ್ಗೇವ ದಿವಙ್ಗತೋ ಅಹೋಸೀತಿ.

ಕಲಿಯುಗೇ ಪನ ದ್ವಾವೀಸಾಧಿಕೇ ವಸ್ಸಸತೇ ಸಹಸ್ಸೇ ಚ ಸಮ್ಪತ್ತೇ ತಸ್ಸ ಜೇಟ್ಠಪುತ್ತೋ ಸಿರಿಪವರಮಹಾಧಮ್ಮರಾಜಾ ನಾಮ ರಜ್ಜಂ ಕಾರೇಸಿ. ರತನಸಿಖನಗರತೋ ಸಙ್ಕಮೇತ್ವಾ ಜೇಯ್ಯಪುರಂ ದುತಿಯಂ ಮಾಪಿತತ್ತಾ ಜೇಯ್ಯಪುರಮಾಪೇಕೋ ರಾಜಾತಿಪಿ ತಸ್ಸ ಸಮಞ್ಞಾ ಅಹೋಸಿ. ತಸ್ಮಿಞ್ಚ ಕಾಲೇ ಮಹಾಪಬ್ಬತಬ್ಭನ್ತರನಗರವಾಸಿಂ ಞಾಣತ್ಥೇರಂ ಆನೇತ್ವಾ ಆಚರಿಯಟ್ಠಾನೇ ಠಪೇಸಿ. ಸೋಕಿರ ಥೇರೋ ಗಮ್ಭೀರಪಞ್ಞೋ ಏಕಸ್ಮಿಂ ದಿವಸೇ ನವ ವಾ ದಸ ವಾ ಭಾಣವಾರೇ ವಾಚುಗ್ಗತಂ ಕಾತುಂ ಸಮತ್ಥೋ ಅಹೋಸಿ. ಅಭಿನವೋಪಸಮ್ಪನ್ನಕಾಲೇಯೇವ ಪದವಿಭಾಗಗನ್ಥಂ ನ್ಯಾಸಸಂ ವಣ್ಣನಂ ಯಮಕಸಂವಣ್ಣನಂ ಮಹಾಪಟ್ಠಾನಸಂವಣ್ಣನಞ್ಚ ಮರಮ್ಮಭಾಸಾಯ ಅಕಾಸಿ. ರಾಜಾ ಮಹಾಭೂಮಿರಮ್ಮಣಿಯವಿಹಾರಂ ನಾಮ ಕಾರಾಪೇತ್ವಾ ತಸ್ಸೇವ ಅದಾಸಿ. ಞಾಣಾಲಙ್ಕಾರಮಹಾಧಮ್ಮರಾಜಗುರೂ ತಿಪಿ ನಾಮಲಞ್ಛಂ ಅದಾಸಿ.

ತಸ್ಮಿಞ್ಚ ಕಾಲೇ ಪಾರುಪನಗಣೇ ಥೇರಾ ಏವಂ ಚಿನ್ತೇಸುಂ,- ಇದಾನಿ ಪನ ಅಮ್ಹಾಕಂ ಪಕ್ಖಿಕೋ ಥೇರೋ ರಞ್ಞೋ ಆಚರಿಯೋ ಅಹೋಸಿ, ಇದಾನಿ ಮಯಂ ಪತಿಟ್ಠಾನಂ ಲಭಾಮಾತಿ. ಏವಂ ಪನ ಚಿನ್ತೇತ್ವಾ ಸಾಮಣೇರಾನಂ ಗಾಮಪ್ಪವೇಸನಕಾಲೇ ಚೀವರಂ ಪಾರುಪೇತ್ವಾ ಪವಿಸಿತಬ್ಬನ್ತಿ ಸನ್ದೇಸಪಣ್ಣಂ ರಞ್ಞೋ ಸನ್ತಿಕಂ ಪವೇಸೇಸಿ. ಅಥ ಅತುಲತ್ಥೇರೋ ಪುಬ್ಬೇ ವುತ್ತನಯೇನ ವೂಪಸಮಿತಂ ಕಮ್ಮಮಿದನ್ತಿ ಸನ್ದೇಸಪಣ್ಣಂ ರಞ್ಞೋ ಸನ್ತಿಕಂ ಪವೇಸೇಸಿ. ತೇನೇವ ಅಞ್ಞಮಞ್ಞಂ ಪಟಿವಚನವಸೇನ ದಸ್ಸೇತುಂ ಓಕಾಸಂ ನ ಲಭಿಂಸೂತಿ.

ತತೋ ಪಚ್ಛಾ ಕಲಿಯುಗೇ ಪಞ್ಚವೀಸವಸ್ಸಾಧಿಕೇ ಸತೇ ಸಹಸ್ಸೇ ¶ ಚ ಸಮ್ಪತ್ತೇ ತಸ್ಸ ರಞ್ಞೋ ಸಿರಿಪವರಸುಧಮ್ಮಮಹಾರಾಜಿನ್ದಾಧಿಪತಿ ನಾಮ ರಜ್ಜಂ ಕಾರೇಸಿ. ರತನಪೂರಂ ಪನ ತತಿಯಂ ಮಾಪಕತ್ತಾ ರತನಪೂರಮಾಪಕೋತಿ ಏಕಸ್ಸ ಪನ ಛದ್ದನ್ತನಾಗರಾಜಸ್ಸ ಸಾಮಿಭೂತತ್ತಾ ಸೇತಿಭಿನ್ದೋತಿ ಚ ಸಮಞ್ಞಾ ಅಹೋಸಿ. ಚರಚ್ಚ ಗಾಮವಾಸೀಚನ್ದಾವರಂ ನಾಮ ಥೇರಂ ಆನೇತ್ವಾ ಅತ್ತನೋ ಆಚರಿಯಟ್ಠಾನೇ ಠಪೇಸಿ. ಸೂಮಿಕಿತ್ತಿಅತುಲಂ ನಾಮ ವಿಹಾರಂ ಕಾರಾಪೇತ್ವಾ ತಸ್ಸ ಅದಾಸಿ. ಜಮ್ಬುದೀಪಅನನ್ತಧಜಮಹಾಧಮ್ಮರಾಜಗುರೂತಿಪಿ ನಾಮಲಞ್ಛಂ ಅದಾಸಿ. ತಸ್ಸ ರಞ್ಞೋ ಕಾಲೇ ಏಕಚ್ಚೇ ಮನುಸ್ಸಾ ದಿಟ್ಠಿವಿಪಲ್ಲಾಸಾ ಅಹೇಸುಂ, ತೇಪಿ ಪಕ್ಕೋಸಾಪೇತ್ವಾ ಸಮ್ಮಾದಿಟ್ಠಿಂ ಗಣ್ಹಾಪೇಸಿ. ತಸ್ಸ ಪನ ರಞ್ಞೋ ಕಾಲೇ ಏಕಂಸಿಕಗಣಂ ಅಭಿಭವಿತುಂ ಓಕಾಸಂ ನ ಲಭಿಂಸೂತಿ.

ತತೋ ಪಚ್ಛಾ ಕಲಿಯುಗೇ ಅಟ್ಠತಿಂಸಾಧಿಕೇ ವಸ್ಸಸತೇ ಸಹಸ್ಸೇ ಚ ಸಮ್ಪತ್ತೇ ತಸ್ಸ ರಞ್ಞೋ ಪುತ್ತೋ ಮಹಾಧಮ್ಮೇ ರಾಜಾಧಿರಾಜಾ ನಾಮ ರಜ್ಜಂ ಕಾರೇಸಿ. ನಗರಸ್ಸ ದಕ್ಖಿಣದಿಸಾಭಾಗೇ ಪಞ್ಚಭೂಮಿಕವಿಹಾರಂ ಕಾರಾಪೇತ್ವಾ ಜೇಯ್ಯಭೂಮಿವಾಸಾತುಲನಾಮೇನ ಪಞ್ಞಾಪೇತ್ವಾ ಮಾರಾವಟ್ಟನಸ್ಸ ನಾಮ ಥೇರಸ್ಸ ಅದಾಸಿ. ಗುಣಮುನಿನ್ದಾಭಿಸಾಸನಧಜಮಹಾಧಮ್ಮರಾಜಾಧಿರಾಜಗುರೂತಿಪಿ ನಾಮಲಞ್ಛಂ ಅದಾಸಿ.

ತಸ್ಮಿಞ್ಚ ಕಾಲೇ ನನ್ದಮಾಲೋ ನಾಮ ಥೇರೋ ಚಲಙ್ಗನಗರಸ್ಸ ಪುರತ್ಥಿಮದಿಸಾಭಾಗೇ ವಿಹಾರೇ ನಿಸೀದಿತ್ವಾ ಬಹೂನಂ ಭಿಕ್ಖುಸಾಮಣೇರಾನಂ ಗನ್ಥಂ ವಾಚೇಸಿ. ಸಾಮಣೇರಾನಂ ಗಾಮಪ್ಪವೇಸನಕಾಲೇ ಪಾರುಪನವತ್ತಮೇವ ಪರಿಪೂರೇತ್ವಾ ಪವಿಸಿತಬ್ಬಂ, ಏಕಂಸಿಕವತ್ತಂ ಪನ ನೇವ ಪಾಳಿಯಂ ನ ಅಟ್ಠಕಥಾಯಂ ನ ಚ ಟೀಕಾಸು ನಾಪಿ ಗನ್ಥನ್ತರೇಸು ದಿಸ್ಸತಿ, ನ ಧಮ್ಮಾನುಲೋಮನ್ತಿ ಓವಾದಂ ಅಭಿಣ್ಹಂ ಅದಾಸಿ. ಪಾಳಿಅಟ್ಠಕಥಾದೀಸು ಆಗತವಿನಿಚ್ಛಯಂ ದಸ್ಸೇತ್ವಾ ಏಕಮ್ಪಿಗನ್ಥಂ ಅಕಾಸಿ.

ಅಥ ಏಕಂಸಿಕಗಣಿಕಾ ಭಿಕ್ಖೂ ತಂ ಗನ್ಥಂ ರಞ್ಞೋ ಸನ್ತಿಕಂ ಪವೇಸಿಂಸು ದೋಸಾವಿಕರಣತ್ಥಾಯ. ತಸ್ಮಿಞ್ಚ ಕಾಲೇ ರಾಜಾ ಏವರೂಪಂ ಸುಪಿನಂ ಪಸ್ಸಿ, -ಸಕ್ಕೋ ಹಿ ದೇವರಾಜಾ ಸೇತವತ್ಥಂ ನಿವಾಸೇತ್ವಾ ¶ ಸೇತಾಲಙ್ಕಾರೇಹಿ ಅಲಙ್ಕರಿತ್ವಾ ಸೇತಕುಸುಮಾನಿ ಪಿಲನ್ದಿತ್ವಾ ರಞ್ಞೋ ಸನ್ತಿಕಂ ಆಗನ್ತ್ವಾ ಏವಮಾಹ,- ಅಪರನ್ತರಟ್ಠೇಹಿ ಮಹಾರಾಜ ನಮ್ಪದಾನದೀತೀರೇ ಪಾದಚೇತಿಯೇ ಬಹೂನಿ ತಿಣಾನಿ ಉಟ್ಠಹಿತ್ವಾ ಅಞ್ಞಮಞ್ಞಂ ಮೂಲೇನ ಮೂಲಂ ಖನ್ಧೇನ ಖನ್ಧಂ ಪತ್ತೇನ ಪತ್ತಂ ಸಮ್ಪನ್ಧಿತ್ವಾ ಪಟಿಚ್ಛಾದೇತ್ವಾ ಠಿತಾನಿ, ತಾನಿ ಪನ ಪುಬ್ಬರಾಜೂಹಿ ಯಥಾಭೂತಂ ಅಜಾನನ್ತೇಹಿ ಅವಿಸೋಧಿತಾನಿ, ಇದಾನಿ ಪನ ತಯಾ ಯಥಾಭೂತಂ ಜಾನನ್ತೇನ ಪರಿಸುದ್ಧಂ ಕತ್ತುಕಾಮೇನ ವಿಸೋಧಿತಬ್ಬಾನಿ, ತತ್ಥಚ ಏಕೋ ಭಿಕ್ಖು ಆಗನ್ತ್ವಾ ಉಪದೇಸನಯಂ ದಸ್ಸತೀತಿ.

ಏವಂ ಪನ ಸುಪಿನಂ ಪಸ್ಸಿತ್ವಾ ನನ್ದಮಾಲಂ ನಾಮ ಥೇರಂ ಪಕ್ಕೋಸಾಪೇತ್ವಾ ರತನಪೂರನಗರಸ್ಸ ಏಸನ್ನಟ್ಠಾನೇ ಉದಕಕೀಳನತ್ಥಾಯ ಕಾರಾಪಿತೇ ರಾಜಗೇಹೇ ವಸಾಪೇಸಿ.

ಅಥ ಥೇರೋ ಸಾಮಣೇರಾನಂ ಗಾಮಪ್ಪವೇಸನಕಾಲೇ ಪಾರುಪನವಸೇನ ಪವಿಸಿತಬ್ಬನ್ತಿ ಪಾಳಿಅಟ್ಠಕಥಾಟೀಕಾಗನ್ಥನ್ತರೇಹಿ ರಾಜಾನಂ ಜಾನಾಪೇಸಿ, ಯಥಾ ಮಹಾಮೋಗ್ಗಲಿಪುತ್ತತಿಸ್ಸತ್ಥೇರೋ ಸಿರಿಧಮ್ಮಾಸೋಕರಾಜಾನಂ ಸಮ್ಮಾವಾದನ್ತಿ. ಅಥ ರಾಜಾ ಪರಿಚಿತ ಪಾರಮೀಪುಞ್ಞಸಮ್ಭಾರೋ ಮಹಾಞಾಣೋ ಜಾನಾಸಿ,-ಪಾರುಪನವಾದೋಯೇವ ಪಾಳಿಅಟ್ಠಕಥಾಟೀಕಾಗನ್ಥನ್ತರೇಸು ಆಗತೋ, ಏಕಂಸಿಕವಾದೋ ಪನ ತೇಸು ಕತ್ಥಚಿಪಿ ನ ಆಗತೋತಿ. ಏವಂ ಪನ ಜಾನಿತ್ವಾ ರಞ್ಞೋ ಗೇಹೇ ದ್ವೇ ಪಕ್ಖೇ ಥೇರೇ ಸನ್ನಿಪಾತಾಪೇತ್ವಾ ಅತ್ತನೋ ಅತ್ತನೋ ವಾದಂ ಕಥಾಪೇಸಿ.

ಅಥ ಏಕಂಸಿಕತ್ಥೇರೋ ಏವಮಾಹಂಸು,-ತುಮ್ಹಾಕಂ ಪಾರುಪನವಾದೋ ಕತ್ಥ ಆಗತೋತಿ. ತದಾ ಪಾರುಪನತ್ಥೇರಾ ಪರಿಮಣ್ಡಲಂ ಪಾರುಪಿಸ್ಸಾಮೀತಿಆದಿನಾ ನಯೇನ ಪಾಳಿಅಟ್ಠಕಥಾಟೀಕಾಗನ್ಥನ್ತರೇಸು ಪಾರುಪನವಾದೋ ಆಗತೋತಿ ಆಹಂಸು. ತತೋ ಪಚ್ಛಾ ಪಾರುಪನತ್ಥೇರಾ ಏವಮಾಹಂಸು,-ತುಮ್ಹಾಕಂ ಪನ ಏಕಂಸಿಕವಾದೋ ಕತ್ಥ ಆಗತೋತಿ. ತದಾ ತೇ ಏಕಂಸಿಕತ್ಥೇರಾ ಅದ್ವಾರಘರಂ ಪವಿಟ್ಠಕಾಲೋವಿಯ ರತ್ತಿಭಾಗೇ ಮಹಾವನಮಗ್ಗೇ ಗಮನಕಾಲೋವಿಯ ಚ ಹುತ್ವಾ ಕಿಞ್ಚಿ ವತ್ತುಂ ನ ಸಕ್ಕಾ. ಮುಖಂ ನಾಮ ಕಥನತ್ಥಾಯ ಭುಞ್ಜನತ್ಥಾಯ ಹೋತೀತಿ ¶ ವುತ್ತತ್ತಾ ಯಂ ವಾ ತಂ ವಾ ವದನ್ತಾಪಿ ರಾಜಾನಂ ಆರಾಧೇತುಂ ನ ಸಕ್ಖಿಂಸು.

ರಾಜಾ ಚ ಥೇರಂ ನಿಸ್ಸಾಯ ವಿನಯೇ ಕೋಸಲ್ಲತಾಯ ಪಾಳಿಯಂ ಈದಿಸೋಯೇವ ಆಗತೋ, ಅಟ್ಠಕಥಾದೀಸು ಈದಿಸೋಯೇವಾತಿ ವತ್ವಾ ತುಮ್ಹಾಕಂ ಏಕಂಸಿಕವಾದೋ ಪಾಳಿಅಟ್ಠಕಥಾಟೀಕಾಗನ್ಥನ್ತರೇಸು ನ ದಿಸ್ಸತಿ, ಏವಮ್ಪಿ ಸಮಾನಾ ಕಸ್ಮಾ ಈದಿಸಂ ವತ್ತಂ ಅಕಂಸೂತಿ ಪುಚ್ಛಿ. ಅಥ ತೇ ಏಕಂಸಿಕತ್ಥೇರಾ ಚತುಹತ್ಥಗಬ್ಭೇ ಸಹೋಡ್ಡೇನ ಗಹಿತಚೋರಾವಿಯ ಮನುಸ್ಸೇಹಿ ಗತಿತಕಾಕಾವಿಯ ಚ ಕಿಞ್ಚಿ ವತ್ತುಂ ಅಸಕ್ಕುಣೇಯ್ಯತಾಯ ಸಬ್ಬದಿಸಾಸು ಓಲೋಕೇತ್ವಾಯೇವ ಅಮ್ಹಾಕಂ ಚಾರಿತ್ತಂ ಪಾಳಿಆದೀಸು ನ ದಿಟ್ಠಪುಬ್ಬಂ, ಅಥ ಖೋ ಪನ ಆಚರಿಯಪ್ಪವೇಣೀವಸೇನೇವ ಚರಿಮ್ಹಾತಿ ವತ್ವಾ ಪರಾಜಯಂ ಪತ್ವಾ ಪಾರುಪನಪಕ್ಖೇಯೇವ ಪವಿಸಿಂಸೂತಿ. ರಾಜಾ ಚ ಇತೋ ಪಟ್ಠಾಯ ಭಿಕ್ಖೂ ಪಾರುಪನವತ್ತಮೇವ ಕಾರಾಪೇತುಂ ಸಾಮಣೇರಾನಂ ಓವದನ್ತೂತಿ ರಾಜಾಣಂ ಠಪೇಸಿ. ತತೋ ಪಟ್ಠಾಯ ಏಕಂಸಿಕಪಕ್ಖಾಥೇರಾ ಅರುಣುಗ್ಗಮನಕಾಲೇ ಕೋಸಿಯಾವಿಯ ಸೀಸಂ ಉಟ್ಠಹಿತುಮ್ಪಿ ನ ಸಕ್ಕಾತಿ.

ಸೋಕಸರಭೂಮಹಾಚೇತಿಯಸ್ಸ ಪುರತ್ಥಿಮದಿಸಾಭಾಗೇ ದ್ವೀಹಿ ಪಾಸಾದೇಹಿ ಅಲಙ್ಕತಂ ಚತುಭೂಮಿಕಂ ಭೂಮಿಕಿತ್ತಿವಿರಾಮಂ ನಾಮ ವಿಹಾರಂ ಕಾರಾಪೇತ್ವಾ ನನ್ದಮಾಲತ್ಥೇರಸ್ಸ ಅದಾಸಿ, ನರಿನ್ದಾಭಿಧಜಮಹಾಧಮ್ಮರಾಜಾಧಿರಾಜಗುರೂತಿ ನಾಮಲಞ್ಛಮ್ಪಿ ಅದಾಸಿ. ಸೋ ಪನ ಥೇರೋ ಛಪ್ಪದವಂಸಿಕೋತಿ ದಟ್ಠಬ್ಬೋ. ಅಭಿನವೋಪಸಮ್ಪನ್ನಕಾಲೇಯೇವ ವಿನಯವಿನಿಚ್ಛಯಸ್ಸ ಸುತ್ತಸಙ್ಗಹಸ್ಸ ಮಹಾವಗ್ಗಟ್ಠಕಥಾಯ ಚ ಅತ್ಥಯೋಜನಂ ಮರಮ್ಮಭಾಸಾಯ ಅಕಾಸಿ, ಸಾಸನಸುದ್ಧಿದೀಪಿಕಂ ನಾಮ ಗನ್ಥಮ್ಪಿ ಅಕಾಸೀತಿ.

ತತೋ ಪಚ್ಛಾ ಕಲಿಯುಗೇ ತೇಚತ್ತಾಲೀಸಾಧಿಕೇ ವಸ್ಸಸತೇ ಸಹಸ್ಸೇ ಚ ಸಮ್ಪತ್ತೇ ಫಗ್ಗುನಮಾಸಸ್ಸ ಕಾಳಪಕ್ಖಪನ್ನ ರಸಮಿಯಂ ರತನಸಿಖಮಾಪಕಸ್ಸ ರಞ್ಞೋ ಮಜ್ಝಿಮಪುತ್ತೋ ರಜ್ಜಂ ಕಾರೇಸಿ ¶ .

ತದಾ ರಾಜಾ ಏವಂ ಚಿನ್ತೇಸಿ,-ಏಕಂಸಿಕಪಾರುಪನವಸೇನ ಉಪ್ಪನ್ನೋ ವಿವಾದೋ ಪುಬ್ಬೇಸಂ ರಾಜೂನಂ ಕಾಲೇ ವೂಪಸಮಿತುಂ ನ ಸಕ್ಕಾ, ಸಿರಿಪವರಸುಧಮ್ಮಮಹಾರಾಜಿನ್ದಾಧಿಪತಿನೋ ಕಾಲೇಪಿ ರಾಜಗೇಹೇ ಸನ್ನಿಪಾತಾಪೇತ್ವಾ ರಞ್ಞೋ ಸಮ್ಮುಖೇ ಕಥಾಪಿತತ್ತಾ ವಿಸ್ಸಟ್ಠೇನ ಕಥೇತುಂ ಓಕಾಸಸ್ಸ ಅಲದ್ಧತ್ತಾ ಯಥಾಕಾಮಂ ವತ್ತುಂ ಅವಿಸಹತ್ತಾ ಪರಾಜಯೋ ಅಹೋಸೀತಿ ಲೇಸಂ ಓಡ್ಡತುಂ ಓಕಾಸೋ ಭವೇಯ್ಯಮಯ್ಹಂ ಪನ ಕಾಲೇ ಈದಿಸಂ ಅಕತ್ವಾ ತೇಸಂ ತೇಸಂ ಥೇರಾನಂ ವಿಹಾರೇ ದೂತಂ ಪೇಸೇತ್ವಾ ಸಕಸಕವಾದಂ ಕಥಾ ಪೇಸ್ಸಾಮಿ, ಏವಞ್ಹಿ ಸತಿ ತೇತೇಥೇರಾ ವಿಸ್ಸಟ್ಠಾ ಹುತ್ವಾ ಕಥೇಸ್ಸನ್ತೀತಿ.

ಏವಂ ಪನ ಚಿನ್ತೇತ್ವಾ ಅನ್ತೋಯುಧನಾಯಕಂ ಅಮಚ್ಚಂ ಪಧಾನಂ ಕತ್ವಾ ತೇಸಂ ತೇಸಂ ಥೇರಾನಂ ಸನ್ತಿಕಂ ಗನ್ತ್ವಾ ಆರೋಚಾಪೇಸಿ,-ಸಕಸಕವಾದಂ ವಿಸ್ಸಟ್ಠಾ ಹುತ್ವಾ ವದಥಾತಿ. ಅಥ ಏಕಂಸಿಕಗಣಿಕಾ ಥೇರಾ ಅಮ್ಹೇಹಿ ವುತ್ತವಚನಂ ಪಾಳಿಆದೀಸು ನ ದಿಸ್ಸತಿ, ಅಥ ಖೋ ಪನ ಆಚರಿಯಪ್ಪವೇಣೀವಸೇನೇವ ಮಯಂ ಚರಿಮ್ಹಾತಿ ಅನುಜಾನಿಂಸು.

ಮಹಾರಾಜಾ ಚ ಏವಂ ಥೇರಾನಂ ಅನುಜಾನನೇ ಸತಿ ಕಿಞ್ಚಿ ಕತ್ತಬ್ಬಂ ನತ್ಥಿ, ಇದಾನಿ ಪರಿಮಣ್ಡಲಸುಪ್ಪಟಿಚ್ಛನ್ನಸಿಕ್ಖಾಪದಾನಿ ಅವಿಕೋಪೇತ್ವಾ ಸಾಮಣೇರಾ ಗಾಮಂ ಪವಿಸನ್ತೂತಿ ರಾಜಲೇಖನಂ ತತ್ಥ ತತ್ಥ ಪೇಸೇಸಿ.

ಅಪರಭಾಗೇ ಪನ ಸಹಸ್ಸೋರೋಧಗಾಮತೋ ಉಪಸಮ್ಪದಾ ವಸ್ಸೇನ ಸತ್ತವಸ್ಸಿಕಂ ಞಾಣಂ ನಾಮ ಭಿಕ್ಖುಂ ಆನೇತ್ವಾ ಅನ್ತೋಯುಧವಿಹಾರಂ ನಾಮ ಕಾರಾಪೇತ್ವಾ ತಸ್ಸ ಅದಾಸಿ, ಞಾಣಾಭಿಸಾಸನಧಜಮಹಾಧಮ್ಮರಾಜಗುರೂತಿ ನಾಮಲಞ್ಛಮ್ಪಿ ಅದಾಸಿ. ಅಥ ರಞ್ಞಾ ಯಾಚಿತೋ ರಾಜಾಭಿಸೇಕಗನ್ಥಂ ಪರಿಸೋಧೇತ್ವಾ ಮರಮ್ಮಭಾಸಾಯ ಅತ್ಥಂ ಯೋಜೇಸಿ.

ಅಪರಭಾಗೇ ಭಗವಾ ಧರಮಾನೋಯೇವ ಆಗನ್ತ್ವಾ ಚತುನ್ನಂ ಯಕ್ಖಾನಂ ದಮೇತ್ವಾ ತೇಹಿ ದಿನ್ನಂ ಮಂಸೋದನಂ ಪಟಿಗ್ಗಹೇತ್ವಾ ಪಬ್ಬತಸಾಮನ್ತದೇಸಂ ¶ ಗನ್ತ್ವಾ ಪರಿಭುಞ್ಜಿತ್ವಾ ತಂ ಠಾನಂ ಓಲೋಕೇತ್ವಾ ಸಿತಂ ಪಾತ್ವಾಕಾಸಿ. ಅಥ ಆನನ್ದತ್ಥೇರೋ ಕಾರಣಂ ಪುಚ್ಛಿ. ಅನಾಗತೇ ಖೋ ಆನನ್ದ ಇಮಸ್ಮಿಂ ದೇಸೇ ಮಹಾನಗರಂ ಭವಿಸ್ಸತಿ, ಚತ್ತಾರೋ ಚ ಇಮೇ ಯಕ್ಖಾ ತಸ್ಮಿಂ ನಗರೇ ರಾಜಾನೋ ಭವಿಸ್ಸನ್ತೀತಿ ಬ್ಯಾಕಾಸಿ.

ಯಥಾಬ್ಯಾಕತನಿಯಾಮೇನೇವ ಕಲಿಯುಗೇ ಚತುಚತ್ತಾಲೀಸಾಧಿಕೇ ವಸ್ಸಸತೇ ಸಹಸ್ಸೇ ಚ ಸಮ್ಪತ್ತೇ ಮಾಘಮಾಸಸ್ಸ ಕಾಳಪಕ್ಖದ್ವಾದಸಮಿಯಂ ಅಙ್ಗಾರವಾರೇ ಉತ್ತರಫಗ್ಗುನೀನಕ್ಖತ್ತೇನ ಯೋಗೇ ಅಮರಪುರಂ ನಾಮ ಮಹಾರಾಜಟ್ಠಾನೀನಗರಂ ಮಾಪೇಸಿ.

ಸಿರಿಪರವಿಜಯಾನನ್ತಯಸತ್ರಿಭವನಾದಿತ್ಯಾಧಿಪತಿಪಣ್ಡಿತಮಹಾಧಮ್ಮರಾಜಾಧಿರಾಜಾತಿ ನಾಮಲಞ್ಛಮ್ಪಿ ಪಟಿಗ್ಗಣ್ಹಿ.

ಅಗ್ಗಮಹೇಸಿಯಾ ಕಾರಾಪಿತಂ ಜೇಯ್ಯಭೂಮಿವಿಹಾರಕಿತ್ತಿನಾಮಕಂ ವಿಹಾರಂ ಗುಣಾಭಿಲಙ್ಕಾರಸದ್ಧಮ್ಮಮಹಾಧಮ್ಮರಾಜಾಧಿರಾಜಗುರುತ್ಥೇರಸ್ಸ ಅದಾಸಿ, ಯೋ ‘ಮೇ ಓ ಸಯಾಡೋ’ ಇತಿ ವುಚ್ಚತಿ.

ಕನ್ನೀನಗರಭೋಜಕಾಯ ರಾಜಕಞ್ಞಾಯ ಕಾರಾಪಿತಂ ವಿಹಾರರಮಣೀಯವಿರಾಮಂ ನಾಮ ವಿಹಾರಂ ಗುಣಮುನಿನ್ದಾಧಿಪತಿ ಮಹಾಧಮ್ಮರಾಜಾಧಿರಾಜಗುರುತ್ಥೇರಸ್ಸ ಅದಾಸಿ, ಯೋ ‘ಮಾಂ ಲೇ ಸಯಾಡೋ’ ಇತಿ ವುಚ್ಚತಿ.

ಉಪರಞ್ಞೋ ದೇವಿಯಾ ಕಾರಾಪಿತಂ ಮಙ್ಗಲಾವಿರಾಮಂ ನಾಮ ವಿಹಾರಂ ತಿಪಿಟಕಸದ್ಧಮ್ಮಸಾಮಿಮಹಾಧಮ್ಮರಾಜಾಧಿರಾಜಗುರುತ್ಥೇರಸ್ಸ ಅದಾಸಿ, ಯೋ ‘ಸೋಂ ಠಾ ಸಯಾಡೋ’ ಇತಿ ವುಚ್ಚತಿ.

ಮಜ್ಝಿಮಗೇಹವಾಸಿದೇವಿಯಾ ಕಾರಾಪಿತಂ ಮಙ್ಗಲಾವಾಸಾತುಲಂ ನಾಮ ವಿಹಾರಂ ಞಾಣಜಮ್ಬುದೀಪಅನನ್ತಧಜಮಹಾಧಮ್ಮರಾಜಾಧಿರಾಜಗುರುತ್ಥೇರಸ್ಸ ಅದಾಸಿ, ಯೋ ‘ಮೇಂ ಜ್ವಾ ಸಯಾಡೋ’ ಇತಿ ವುಚ್ಚತಿ.

ಇಮೇ ಪ್ಪನ ಚತ್ತಾರೋ ಮಹಾಥೇರೇ ಸಙ್ಘರಾಜಟ್ಠಾನೇ ಠಪೇಸಿ.

ಉತ್ತರಗೇಹವಾಸಿದೇವಿಯಾ ಕಾರಾಪಿತಂ ಮಙ್ಗಲಭೂಮಿಕಿತ್ತಿಂ ನಾಮ ¶ ವಿಹಾರಂ ಕವಿನ್ದಾಭಿಸದ್ಧಮ್ಮಧರಧಜಮಹಾಧಮ್ಮರಾಜಗುರುತ್ಥೇರಸ್ಸ ಅದಾಸಿ, ಯೋ ‘ಞ್ಯೋಂ ಕಾಂ ಸಯಾಡೋ’ ಇತಿ ವುಚ್ಚತಿ.

ಸಿರಿಖೇತ್ತನಗರಭೋಜಕೇನ ರಾಜಕುಮಾರೇನ ಕಾರಾಪಿತಂ ಅತುಲಭೂಮಿವಾಸಂ ನಾಮ ವಿಹಾರಂ ಕವಿನ್ದಾಭಿಸದ್ಧಮ್ಮಪವರಮಹಾಧಮ್ಮ ರಾಜಗುರುತ್ಥೇರಸ್ಸ ಅದಾಸಿ, ಯೋ ‘ಸ್ವೇ ಟೋಂ ಸಯಾಡೋ’ ಇತಿ ವುಚ್ಚತಿ.

ಅನ್ತೋಅಮಚ್ಚೇನ ಏಕೇನ ಕಾರಾಪಿತಂ ವಿಹಾರಂ ಞಾಣಾಲಙ್ಕಾರಸದ್ಧಮ್ಮಧಜಮಹಾಧಮ್ಮರಾಜಗುರುತ್ಥೇರಸ್ಸ ಅದಾಸಿ, ಯೋ ‘ಸೇಂ ಟೇ ಸಯಾಡೋ’ ಇತಿ ವುಚ್ಚತಿ.

ವಾಮಬಲನಾಯಕೇನಾಮಚ್ಚೇನ ಕಾರಾಪಿತಂ ವಿಹಾರಂ ಪರಮಸಿರಿವಂಸಧಜಮಹಾಧಮ್ಮರಾಜಗುರುತ್ಥೇರಸ್ಸ ಅದಾಸಿ, ಯೋ ‘ಮೇ ಠೀ ಸಯಾಡೋ’ ಇತಿ ವುಚ್ಚತಿ.

ಧಮ್ಮವಿನಿಚ್ಛಕೇನ ಏಕೇನಾಮಚ್ಚೇನ ಕಾರಾಪಿತಂ ವಿಹಾರಂ ಕವಿನ್ದ ಸಾರಧಜಮಹಾಧಮ್ಮರಾಜಾಧಿರಾಜಗುರುತ್ಥೇರಸ್ಸ ಅದಾಸಿ, ಯೋ ‘ಲೋಕಾ ಮ್ಹಾಂ ಕೇಂ ಸಯಾಡೋ’ ಇತಿ ವುಚ್ಚತಿ.

ಇಚ್ಚೇವಂ ಪರಿಯತ್ತಿಕೋವಿದಾನಂ ಅನೇಕಾನಂ ಮಹಾಥೇರಾನಂ ಸದ್ಧಿಂ ನಾಮಲಞ್ಛೇನ ವಿಹಾರಂ ದತ್ವಾ ಅನುಗ್ಗಹಂ ಅಕಾಸಿ. ಯಸ್ಮಾ ಪನ ಸಬ್ಬೇಸಂ ಥೇರಾನಂ ನಾಮಂ ಉದ್ಧರಿತ್ವಾ ವಿಸುಂ ವಿಸುಂ ಕಥಿತೇ ಅಯಂ ಸಾಸನವಂಸಪ್ಪದೀಪಿಕಕಥಾ ಅತಿಪ್ಪಪಞ್ಚಾ ಭವಿಸ್ಸತಿ, ತಸ್ಮಾ ಇಧ ಅಜ್ಝುಪೇಕ್ಖಿತ್ವಾ ವತ್ತಬ್ಬಮೇವ ವಕ್ಖಾಮಾತಿ.

ಪಚ್ಛಾಭಾಗೇ ಚತ್ತಾರೋ ಮಹಾಥೇರಾ ರಾಜಾದುಬ್ಬಲತಾಯ ಯಥಾಕಾಮಂ ಸಾಸನಂ ವಿಸೋಧೇತುಂ ಸಕ್ಖಿಸ್ಸನ್ತೀತಿ ಮಞ್ಞಿತ್ವಾ ಪುನ ಅಟ್ಠ ಥೇರೇ ಏತೇಹಿ ಚತೂಹಿ ಮಹಾಥೇರೇಹಿ ಸದ್ಧಿಂ ಸಾಸನಂ ವಿಸೋಧಾಪೇತುಂ ಸಙ್ಘನಾಯಕಟ್ಠಾನೇ ಠಪೇಸಿ. ಸೇಯ್ಯಥಿದಂ, ಕವಿನ್ದಾಭಿಸದ್ಧಮ್ಮಪವರಮಹಾಧಮ್ಮರಾಜಗುರುತ್ಥೇರೋ, ತಿಪಿಟಕಾಲಙ್ಕಾರಧಜಮಹಾಧಮ್ಮರಾಜಗುರುತ್ಥೇರೋ, ಚಕ್ಕಿನ್ದಾಭಿಧಜಮಹಾಧಮ್ಮರಾಜಗುರುತ್ಥೇರಾ, ಪರಮಸಿರಿವಂಸಧಜಮಹಾಧಮ್ಮರಾಜಗುರುತ್ಥೇರೋ, ಜನಿನ್ದಾಭಿಪವರಮಹಾಧಮ್ಮರಾಜಗುರುತ್ಥೇರೋ, ಮಹಾಞಾಣಾಭಿಧಜಮಹಾಧಮ್ಮರಾಜಗುರುತ್ಥೇರೋ ¶ , ಞಾಣಾಲಙ್ಕಾರಸದ್ಧಮ್ಮಧಜಮಹಾಧಮ್ಮರಾಜಗುರುಥೇರೋ, ಞಾಣಾಭಿಸಾಸನಧಜಮಹಾಧಮ್ಮರಾಜಗುರುತ್ಥೇರೋತಿ.

ಅಥ ಅರಹಾಪಿ ಸಮಾನೋ ನಿಸ್ಸಯಮುಚ್ಚಕಙ್ಗವಿಕಲೋ ವಿನಾನಿಸ್ಸಯಾಚರಿಯೇನ ವಸಿತುಂ ನ ವಟ್ಟತೀತಿ ಜಾನಿತ್ವಾ ನಿಸ್ಸಯಾ ಚರಿಯಪ್ಪಹೋನಕಾನಂ ಥೇರಾನಂ ನಿಸ್ಸಯಙ್ಗಾನಿ ನಿಸ್ಸಯಮುಚ್ಚಕಾರಹಾನಂ ನಿಸ್ಸಯಮುಚ್ಚಕಙ್ಗಾನಿ ಪರಿಪೂರಾಪೇತ್ವಾ ನಿಸ್ಸಿತಕಾನಂ ನಿಸ್ಸಯಂ ಗಣ್ಹಿತ್ವಾವ ನಿಸೀದಾಪೇಸಿ.

ತತೋ ಪಚ್ಛಾ ಕಲಿಯುಗೇ ಪಞ್ಞಾಸಾಧಿಕೇ ವಸ್ಸಸತೇ ಸಹಸ್ಸೇವ ಸಮ್ಪತ್ತೇ ಞಾಣಾಭಿಸಾಸನಧಜಮಹಾಧಮ್ಮರಾಜಗುರುತ್ಥೇರಂಯೇವ ಏಕಂ ಸಙ್ಘರಾಜಟ್ಠಾನೇ ಠಪೇಸಿ. ತತೋ ಪಟ್ಠಾಯ ಸೋಯೇವ ಏಕೋ ಸಙ್ಘನಾಯಕೋ ಹುತ್ವಾ ಸಾಸನಂ ವಿಸೋಧಯಿ.

ತತೋ ಪಚ್ಛಾ ಏಕಪಣ್ಣಾಸಾಧಿಕೇ ವಸ್ಸಸತೇ ಸಹಸ್ಸೇ ಚ ಸಮ್ಪತ್ತೇ ಫಗ್ಗುನಮಾಸೇ ಮಹಾಮುನಿಚೇತಿಯಸ್ಸ ದಕ್ಖಿಣದಿಸಾಭಾಗೇ ದ್ವೀಹಿ ಇಟ್ಠಕಮಯೇಹಿ ಪಾಕಾರೇಹಿ ಪರಿಕ್ಖಿತ್ತಂ ಪಞ್ಚಭೂಮಿಕಂ ಅಸೋಕಾರಾಮೇ ರತನಭೂಮಿಕಿತ್ತಿಂ ನಾಮ ವಿಹಾರಂ ಅತಿಮಹನ್ತಂ ಕಾರಾಪೇತ್ವಾ ಞಾಣಾಭಿಸಾಸನಧಜಮಹಾಧಮ್ಮರಾಜಗುರುತ್ಥೇರಸ್ಸ ಅದಾಸಿ. ಞಾಣಾಭಿವಂಸಧಮ್ಮಸೇನಾಪತಿಮಹಾಧಮ್ಮರಾಜಾಧಿರಾಜಗುರೂತಿ ನಾಮಲಞ್ಛಮ್ಪಿ ಪುನ ಅದಾಸಿ. ತತೋ ಅಞ್ಞಾನಿ ಜೇಯ್ಯಭೂಮಿವಿಹಾರಕಿತ್ತಿಮಙ್ಗಲವಿರಾಮಾದಯೋ ಅನೇಕೇಪಿ ವಿಹಾರೇ ತಸ್ಸೇವ ಅದಾಸಿ.

ಸೋ ಪನ ತೇಸು ವಿಹಾರೇಸು ವಾರೇನ ನಿಸೀದಿತ್ವಾ ಪರಿಯತ್ತಿಂ ವಾಚೇಸಿ. ಉಭತೋವಿಭಙ್ಗಾನಿಪಿ ವಾಚುಗ್ಗತಂ ಅಕಾಸಿ. ನಿಚ್ಚಂಯೇವ ಏಕಾಸನಿಕಧುಜಙ್ಗಂ ಸಮಾದಿಯಿ.

ಸೋ ಪನ ಥೇರೋ ಉಪಸಮ್ಪದಾವಸ್ಸೇನ ಪಞ್ಚವಸ್ಸಿಕೋ ಹುತ್ವಾ ಪುಬ್ಬೇವ ಸಙ್ಘರಾಜಭಾವತೋ ಪೇಟಕಾಲಙ್ಕಾರ ನಾಮ ನೇತ್ತಿಸಂವಣ್ಣನಂ ಅಭಿನವಟೀಕಂ ಅಕಾಸಿ. ಅಟ್ಠವಸ್ಸಿಇಕಕಾಲೇ ಸಙ್ಘರಾಜಾ ಅಹೋಸಿ. ಸಙ್ಘರಾಜಾ ಹುತ್ವಾ ಸಾಧುಜ್ಜನವಿಲಾಸಿನಿಂ ನಾಮ ¶ ದೀಘನಿಕಾಯಟೀಕಂ ಅಕಾಸಿ. ಅರಿಯವಂಸಾಲಙ್ಕಾರಂ ನಾಮ ಗನ್ಥಞ್ಚ ಅಕಾಸಿ. ಮಹಾಧಮ್ಮರಞ್ಞಾ ಯಾಚಿತೋ ಜಾತಕಟ್ಠಕಥಾಯ ಅತ್ಥಯೋಜನಂ ಚತುಸಾಮಣೇರವತ್ಥುಂ ರಾಜೋವಾದವತ್ಥುಂ ತಿಗುಮ್ಭಥೋಮನಂ ಛದ್ದನ್ತನಾಗರಾಜುಪ್ಪತ್ತಿಕಥಂ ರಾಜಾಧಿರಾಜ ವಿಲಾಸಿನಿಂ ನಾಮ ಗನ್ಥಞ್ಚಾತಿ ಏವಮಾದಯೋಪಿ ಅಕಾಸಿ.

ಕಲಿಯುಗೇ ಪನ ದ್ವಾಸಟ್ಠಾಧಿಕೇ ವಸ್ಸಸತೇ ಸಹಸ್ಸೇ ಚ ಸಮ್ಪತ್ತೇ ಸೀಹಳದೀಪತೋ ಅಮ್ಪಗಹಪತಿಸ್ಸೋ, ಮಹಾದಮ್ಪೋ, ಕೋಚ್ಛ ಗೋಧೋ, ಬ್ರಾಹ್ಮಣವತ್ತೋ, ಭೋಗಹವತ್ತೋ, ವಾತುರಗಮ್ಮೋತಿ ಇಮೇ ಛ ಸಾಮಣೇರಾ ದಸ ಧಾತುಯೋ ಧಮ್ಮಪಣ್ಣಾ ಕಾರತ್ಥಾಯ ಆನೇತ್ವಾ ಅಮರಪುರಂ ನಾಮ ಮಹಾರಾಜಟ್ಠಾನೀನಗರಂ ಆಗತಾ ಸದ್ಧಿಂ ಏಕೇನ ಉಪಾಸಕೇನ.

ಅಥ ಞಾಣಾಭಿವಂಸಧಮ್ಮಸೇನಾಪತಿಮಹಾಧಮ್ಮರಾಜಾಧಿರಾಜಗುರುನಾ ಸಙ್ಘರಞ್ಞಾ ಉಪಜ್ಝಾಯೇನ ಕವಿನ್ದಾಭಿಸದ್ಧಮ್ಮಧರಧಜಮಹಾಧಮ್ಮರಾಜಗುರುತ್ಥೇರೇನ ಜನಿನ್ದಾಭಿಧಜಮಹಾಧಮ್ಮರಾಜಗುರುತ್ಥೇರೇನ ಮುನಿನ್ದಘೋಸಮಹಾಧಮ್ಮರಾಜಗುರುತ್ಥೇರೇನಾತಿ ಏವಮಾದೀಹಿ ರಾಜಗುರುತ್ಥೇ ರೇಹಿ ಕಮ್ಮವಾಚರಿಯೇಹಿ ಹತ್ಥಿರಜ್ಜುಸುವಣ್ಣಗುಹಸೀಮಾಯಂ ಉಪಸಮ್ಪದಕಮ್ಮಂ ಕಾರಾಪೇಸಿ, ಉಪಾಸಕಞ್ಚ ಸಾಮಣೇರಭೂಮಿಯಂ ಪತಿಟ್ಠಾಪೇಸಿ, ತತೋ ಪಚ್ಛಾ ಚ ಅನೇಕವಾರಂ ಆಗತಾನಂ ಭಿಕ್ಖೂನಂ ಪುನ ಸಿಕ್ಖಂ ಗಣ್ಹಾಪೇಸಿ, ಸಾಮಣೇರಾನಞ್ಚ ಉಪಸಮ್ಪದಕಮ್ಮಂ ಕಾರಾಪೇಸಿ, ಉಪಾಸಕಾನಞ್ಚ ಪಬ್ಬಜ್ಜಕಮ್ಮನ್ತಿ.

ಅಪರಭಾಗೇ ಪನ ಕಲಿಯುಗೇ ಛಚತ್ತಾಲೀಸಾಧಿಕೇ ವಸ್ಸಸತೇ ಸಹಸ್ಸೇ ಚ ಸಮ್ಪತ್ತೇ ಪಿತುರಞ್ಞೋ ಆಚರಿಯಪುಬ್ಬೋ ಅತುಲೋ ನಾಮ ಥೇರೋ ಚೀವರಪಟಲಂ ಉಪರಿಸಙ್ಘಾಟಿಂ ಕತ್ವಾ ಉರಬನ್ಧನವತ್ಥಂ ಬನ್ಧಿತಬ್ಬನ್ತಿ ಚೂಳಗಣ್ಠಿಪದೇ ವುತ್ತತ್ತಾ ಸಾಮಣೇರಾನಂ ಗಾಮಪ್ಪವಸೇನಕಾಲೇ ಏಕಂಸಂ ಉತ್ತರಾಸಙ್ಗಂ ಕತ್ವಾ ಉರಬನ್ಧನವತ್ಥಂ ಬನ್ಧಿತ್ವಾಯೇವ ಪವಿಸಿತಬ್ಬನ್ತಿ ದಳಂ ಕತ್ವಾ ರಞ್ಞೋ ಸನ್ತಿಕಂ ಲೇಖನಂ ಪವೇಸೇಸಿ.

ಅಥ ರಾಜಾ ತಂ ಸುತ್ವಾ ಮಹಾಥೇರೇ ಸುಧಮ್ಮಸಭಾಯಂ ಸನ್ನಿಪಾತಾಪೇತ್ವಾ ¶ ಅತುಲತ್ಥೇರೇನ ಸದ್ಧಿಂ ಸಾಕಚ್ಛಂ ಕಾರಾಪೇಸಿ. ಅಥ ಅತುಲತ್ಥೇರೋ ಚೀವರಪಟಲಂ ಉಪರಿಸಙ್ಘಾಟಿಂ ಕತ್ವಾ ಉರಬನ್ಧನವತ್ಥಂ ಬನ್ಧಿತಬ್ಬನ್ತಿ ಚೂಳಗಣ್ಠಿಪದೇ ಆಗತಪಾಠಂ ದಸ್ಸೇತ್ವಾ ಸಾಮಣೇರಾನಂ ಗಾಮಪ್ಪವೇಸನಕಾಲೇ ಏಕಂಸಂ ಉತ್ತರಾಸಙ್ಗಂ ಕತ್ವಾ ಉರಬನ್ಧನವತ್ಥಂ ಬನ್ಧಿತ್ವಾ ಪವಿಸಿತಬ್ಬನ್ತಿ ಆಹ.

ಅಥ ಮಹಾಥೇರಾ ತಂ ಪುಚ್ಛಿಂಸು,-ಈದಿಸೋ ಅಧಿಪ್ಪಾಯೋ ಅಞ್ಞತ್ಥ ದಿಸ್ಸತಿ ವಾ ಮಾ ವಾತಿ. ಅಥ ಅತುಲತ್ಥೇರೋ ಏವಮಾಹ,-ಅಞ್ಞತ್ಥ ಪನ ಈದಿಸೋ ಅಧಿಪ್ಪಾಯೋ ನ ದಿಸ್ಸತೀತಿ. ಏವಂ ಹೋತು, ಅಯಂ ಗನ್ಥೋ ಕೇನ ಕತೋತಿ. ಸೀಹಳದೀಪೇ ಅನುರಾಧಪುರಸ್ಸ ದಕ್ಖಿಣದಿಸಾಭಾಗೇ ಪೋಕ್ಕನ್ತಿ ಗಾಮೇ ಅರಹನ್ತೇನ ಮೋಗ್ಗಲಾನತ್ಥೇರೇನಾತಿ. ಅಯಮತ್ಥೋ ಕಥಂ ಜಾನಿತಬ್ಬೋತಿ. ಪಿಟಕತ್ತಯಲಕ್ಖಣಗನ್ಥೇ ಆಗತತ್ತಾತಿ. ಅಯಞ್ಚ ಪಿಟಕತ್ತಯ ಲಕ್ಖಣಗನ್ಥೋ ಕುತೋ ಲದ್ಧೋತಿ. ಬುದ್ಧಘೋಸತ್ಥೇರೇನ ಕಿರ ಸೀಹಳದೀಪತೋ ಆನೀತತ್ತಾ ತತೋ, ಅಯಞ್ಹಿ ಗನ್ಥೋ ಸೀಹಳದೀಪತೋ ಅತ್ತನಾ ಆನೀತೇಸು ಗನ್ಥೇಸು ಅಸುಕೋ ಗನ್ಥೋ ಅಸುಕೇನ ಥೇರೇನ ಕತೋತಿ ವಿಞ್ಞಾಪನತ್ಥಾಯ ಬುದ್ಧಘೋಸತ್ಥೇರೇನ ಕತೋ, ಇದಾನಾಯಂ ಗನ್ಥೋ ಅಮ್ಹಾಕಂ ಹತ್ಥೇ ಸಂವಿಜ್ಜತೀತಿ. ಸಚೇ ಇದಾನಾಯಂ ಗನ್ಥೋ ತುಮ್ಹಾಕಂ ಹತ್ಥೇ ಸಂವಿಜ್ಜತಿ, ಅಮ್ಹಾಕಂ ದಸ್ಸೇಹೀತಿ. ಪಸ್ಸಥಾವುಸೋ ಅಯಮಮ್ಹಾಕಂ ಹತ್ಥೇ ಗನ್ಥೋತಿ ದಸ್ಸೇಸಿ. ಅಥ ಮಹಾಥೇರೇಹಿ ಸಙ್ಘರಾಜಪ್ಪಮುಖೇಹಿ ತಸ್ಮಿಂ ಗನ್ಥೇ ಪಸ್ಸಿತೇ ವಿನಯಗಣ್ಠಿಪದಂ ಸೀಹಳದೀಪೇ ಪರಕ್ಕಮಬಾಹುರಞ್ಞೋ ಕಾಲೇ ಮೋಗ್ಗಲಾನತ್ಥೇರೋ ಅಕಾಸೀತಿ ಆಗತಂ, ನ ಚೂಳಗಣ್ಠಿಪದಂ ಸೀಹಳದೀಪೇ ಅನುರಾಧಪುರಸ್ಸದಕ್ಖಿಣದಿಸಾಭಾಗೇ ಪೋಕ್ಕನ್ತಿಗಾಮೇ ಅರಹಾ ಮೋಗ್ಗಲಾನತ್ಥೇರೋ ಅಕಾಸೀತಿ.

ಅಥ ಥೇರಾ ಏವಮಾಹಂಸು,-ಕಸ್ಮಾ ಪನ ಪಿಟಕತ್ತಯಲಕ್ಖಣಗನ್ಥೇ ಅನಾಗತಮ್ಪಿ ಆಗತಂವಿಯ ಕತ್ವಾ ಮುಸಾ ವದಥ, ನ ನು ತುಮ್ಹಾಕಮ್ಪಿ ಏಕಂಸಿಕಭಿಕ್ಖೂನಂ ಮುಸಾವಾದಸಿಕ್ಖಾಪದಂ ಅತ್ಥೀತಿ. ಅಥ ಅತುಲತ್ಥೇರೋ ಉತ್ತರಿಂ ವತ್ತುಂ ಅಸಕ್ಕುಣೇಯ್ಯತ್ತಾ ಲುದ್ದಕಸ್ಸ ¶ ವಾಕುರೇ ಬನ್ಧಮಿಗೋವಿಯ ಫನ್ದಮಾನೋ ಹುತ್ವಾ ಅಟ್ಠಾಸಿ, ಸಹೋಡ್ಡೇನ ಗಹಿತೋವಿಯ ಚೋರೋ ಸಹಮುಸಾವಾದಕಮ್ಮೇನ ಸೋ ಥೇರೋ ಗಹಿತೋ ಅಹೋಸೀತಿ.

ಇದಂ ಇಮಸ್ಸ ಅತ್ಥಸ್ಸ ಆವಿಭಾವತ್ಥಾಯ ವತ್ಥು, –

ಇಮಸ್ಮಿಂ ಕಿರ ರಟ್ಠೇ ಏಕೋ ಜನಪದವಾಸೀಪುರಿಸೋ ಕೇನಚಿದೇವ ಕರಣೀಯೇನ ಅಮರಪುರಂ ನಾಮ ಮಹಾರಾಜಟ್ಠಾನೀನಗರಂ ಆಗಚ್ಛಿ. ಆಗನ್ತ್ವಾ ಚ ಪಚ್ಚಾಗತಕಾಲೇ ಅನ್ತರಾಮಗ್ಗೇ ಪಾಥೇಯ್ಯಂ ಖಯಂ ಅಹೋಸಿ. ಅಥಸ್ಸ ಏತದಹೋಸಿ,- ಇದಾನಿ ಮಮ ಪಾಥೇಯ್ಯಂ ಖಯಂ ಅಹೋಸಿ, ಇಮಸ್ಮಿಂ ಕಿರ ರಟ್ಠೇ ಸಹಸ್ಸೋರೋಧಗಾಮೇ ಲದ್ಧವರೋ ನಾಮ ಮಹಾಸೇಟ್ಠಿ ಸಬ್ಬತ್ಥ ಭೂತಲೇ ಅತಿವಿಯ ಪಾಕಟೋ. ತಸ್ಸಾಹಂ ಞಾತೀತಿ ವಞ್ಚೇತ್ವಾ ಕಥೇಸ್ಸಾಮಿ, ಏವಂ ಸತಿ ತೇನ ಮಹಾಸೇಟ್ಠಿನಾ ಮಿತ್ತಸನ್ಥವಂ ಕಾತುಂ ತೇತೇಗಾಮಿಕಾ ಮನುಸ್ಸಾ ಮಮ ಬಹು ಲಾಭಂ ದಸ್ಸನ್ತಿ, ತದಾ ಪಾಥೇಯ್ಯೇನ ಅಕಿಚ್ಛೋ ಭವಿಸ್ಸಾಮೀತಿ. ಏವಂ ಪನ ಚಿನ್ತೇತ್ವಾ ಅನ್ತರಾಮಗ್ಗೇ ಸಮ್ಪತ್ತಸಮ್ಪತ್ತಗಾಮೇಸು ಮಹಾಭೋಗಾನಂ ಗೇಹಂ ವಿಚಿನೇತ್ವಾ ಮಹಾಭೋಗಾನಂ ಸನ್ತಿಕಂ ಪವಿಸಿತ್ವಾ ಕಥಾಸಲ್ಲಾಪಂ ಅಕಾಸಿ.

ಅಥ ತೇತೇಗಾಮಿಕಾ ತ್ವಂ ಕುತೋ ಆಗತೋ, ಕುಹಿಂ ಗಮಿಸ್ಸಸಿ, ಕಸ್ಸ ಞಾತಿ,ಕೋ ವಾ ತ್ವನ್ತಿ ಪುಚ್ಛಿಂಸು. ಅಮರಪೂರಮಹಾರಾಜಟ್ಠಾನೀನಗರತೋ ಆಗತೋ, ಸಹಸ್ಸೋರೋಧಗಾಮಂ ಗಮಿಸ್ಸಾಮಿ, ಸಹಸ್ಸೋರೋಧಗಾಮೇ ಲದ್ಧವರಸ್ಸ ನಾಮ ಮಹಾಸೇಟ್ಠಿನೋ ಜಾಮಾತಾ ಧನವಡ್ಢಕೋ ನಾಮಾಹನ್ತಿ ಆಹ.

ಅಥ ತೇತೇಗಾಮಿಕಾ ಲದ್ಧವರೇನ ಮಹಾಸೇಟ್ಠಿನಾ ಮಿತ್ತಸನ್ಥವಂ ಕಾತುಂ ನಾನಾಭೋಜನೇಹಿ ಭೋಜೇಸುಂ. ಅಞ್ಞೇಹಿಪಿ ಬಹೂಹಿ ಪಣ್ಣಾಕಾರೇಹಿ ಸಙ್ಗಹಂ ಅಕಂಸು. ಇಮಿನಾವ ನಯೇನ ಸಮ್ಪತ್ತ ಸಮ್ಪತ್ತಗಾಮೇಸು ವಞ್ಚೇತ್ವಾ ಅತ್ತನೋ ಗುಣಂ ಕಥೇತ್ವಾ ಅದ್ಧಾನ ಮಗ್ಗಂ ತರಿ. ಪಚ್ಛಾ ಪನ ಸಹಸ್ಸೋರೋಧಗಾಮಂ ಸಮ್ಪತ್ತೋ. ಸೋ ಸಹಸ್ಸೋರೋಧಗಾಮಂ ನ ಸಮ್ಪತ್ತಪುಬ್ಬೋ. ಲದ್ಧವರೋ ಮಹಾಸೇಟ್ಠಿ ತೇನ ನ ದಿಟ್ಠಪುಬ್ಬೋ. ಸಹಸ್ಸೋರೋಧಗಾಮಂ ಸಮ್ಪತ್ತೇಯೇವ ಅಯಂ ಕಿಂ ನಾಮ ಗಾಮೋತಿ ಅಪುಚ್ಛಿತ್ವಾಯೇವ ತಸ್ಮಿಂ ಗಾಮೇ ಮಹಾಭೋಗತರಸ್ಸ ¶ ಮಹಾಗೇಹಂ ವಿಚಿನನ್ತೋ ತಸ್ಸೇವ ಲದ್ಧವರಸ್ಸ ಸೇಟ್ಠಿನೋ ಮಹನ್ತಂ ಗೇಹಂ ಪಸ್ಸಿತ್ವಾ ಲದ್ಧವರಸ್ಸ ಸೇಟ್ಠಿನೋ ಸನ್ತಿಕಂ ಪವಿಸಿತ್ವಾ ತೇನ ಸದ್ಧಿಂ ಕಥಾಸಲ್ಲಾಪಂ ಅಕಾಸಿ.

ಅಥ ಮಹಾಸೇಟ್ಠಿ ತಂ ಪುಚ್ಛಿ,-ತ್ವಂ ಕುತೋ ಆಗತೋ, ಕುಹಿಂ ಗಮಿಸ್ಸಸಿ, ಕಸ್ಸ ಞಾತಿ,ಕೋ ತ್ವನ್ತಿ. ಅಮರಪುರಮಹಾರಾಜಟ್ಠಾನೀನಗರತೋ ಸಾಮಿ ಆಗತೋ, ಸಹಸ್ಸೋರೋಧಗಾಮಂ ಗಮಿಸ್ಸಾಮಿ, ಸಹಸ್ಸೋರೋಧಗಾಮೇ ಲದ್ಧವರಸ್ಸ ನಾಮ ಮಹಾಸೇಟ್ಠಿನೋ ಜಾಮಾತಾ, ಧನವಡ್ಢಕೋ ನಾಮಾಹನ್ತಿ ಆಹ.

ಅಥ ಮಹಾಸೇಟ್ಠಿ ತಸ್ಸ ಮುಖಂ ಉಜುಂ ಓಲೋಕೇತ್ವಾ ಅಯಂ ಮಾಣವ ಸಹಸ್ಸೋರೋಧಗಾಮೋಯೇವ, ಅಹಮ್ಪಿ ಲದ್ಧವರೋ ನಾಮ ಮಹಾಸೇಟ್ಠಿ, ಮಮ ಧೀತರೋ ಸನ್ತಿ, ತಾಪಿ ಸಸ್ಸಾಮಿಕಾಯೇವ ಹೋನ್ತಿ, ಇದಾನಿ ತಾ ಸಕಸಕಸ್ಸಾಮಿಕಾನಂಯೇವ ಸನ್ತಿಕೇ ವಸನ್ತಿ, ನ ತ್ವಂ ಕದಾಚಿ ಮಯಾ ದಿಟ್ಠಪುಬ್ಬೋ, ಕೇನ ಕಾರಣೇನ ಕುತೋ ಆಗನ್ತ್ವಾ ಮಮ ಜಾಮಾತಾ ಭವಸೀತಿ ಪುಚ್ಛಿ.

ಅಥ ಸೋ ಮ್ಮನುಸ್ಸೇಹಿ ಅನುಬನ್ಧಿಯಮಾನೋವಿಯ ಮಿಗೋ ಸಕಲಮ್ಪಿ ಕಾಯಂ ಫನ್ದಾಪೇತ್ವಾ ಕಿಞ್ಚಿ ವತ್ತಬ್ಬಂ ವಚನಂ ಅಜಾನಿತ್ವಾ ಅಲದ್ಧಪ್ಪತಿಟ್ಠಾನತಾಯ ಏವಂ ಸತಿ ಕುತೋ ಆಗತೋ, ಕುಹಿಂ ಗಮಿಸ್ಸಾಮಿ, ಕಸ್ಸ ಞಾತಿ, ಕೋ ವಾ ಅಹನ್ತಿ ಇದಾನಿ ನ ಜಾನಾಮಿ, ಸಬ್ಬದಿಸಾ ಸಮ್ಮುಯ್ಹಾಮಿ, ಖಮಾಹಿ ಮಮ ಅಪರಾಧಂ, ಇತೋ ಪಟ್ಠಾಯ ಯಾವ ಜೀವಿತಪರಿಯೋಸಾನಾ ನ ವಞ್ಚೇಸ್ಸಾಮಿ, ವಞ್ಚೇತುಂ ನ ವಿಸಹಾಮಿ, ಇದಾನಿ ಅತಿವಿಯ ಭಾಯಾಮಿ, ಮಾ ಕಿಞ್ಚಿ ದಣ್ಡಕಮ್ಮಂ ಕರೋಹೀತಿ ವತ್ವಾ ವೇಗೇನ ಉಟ್ಠಹಿತ್ವಾ ಪಲಾಯೀತಿ.

ಇಚ್ಚೇವಂ ಅತುಲತ್ಥೇರೋ ದುಮ್ಮುಖೋ ಹುತ್ವಾ ಯಂವಾತಂವಾ ಮುಖಾರೂಳಂ ವಿಲಪಿತ್ವಾ ಸಙ್ಘಮಜ್ಝೇ ನಿಸೀದಿ.

ತತೋ ಪಚ್ಛಾ ಖಲಿತ್ವಾ ಕದ್ದಮೇ ಪತಿತಂ ಪುರಿಸಂ ಪುನ ಉಪರಿ ಅಕ್ಕಮನ್ತಾವಿಯ ಪುನ ಮಹಾಥೇರಾ ಏವಂ ಪುಚ್ಛಿಂಸು,-ಇದಂ ಭನ್ತೇ ತವ ಚೂಳಗಣ್ಠಿಪದಂ ನಾಮ ತೀಸು ವಿನಯಮಹಾಟೀಕಾಸು ಸಾಧಕವಸೇನ ದಸ್ಸಿತಂ ¶ ಚೂಳಗಣ್ಠಿಪದಂ ಉದಾಹು ಅಪರನ್ತಿ. ತೀಸು ವಿನಯಮಹಾಟೀಕಾಸು ಸಾಧಕವಸೇನ ದಸ್ಸಿತಂ ಚೂಳಗಣ್ಠಿಪದಂಯೇವ ಇದನ್ತಿ. ಏವಂಸತಿ ಕಸ್ಮಾ ತವ ಚೂಳಗಣ್ಠಿಪದೇಯೇವ ವುತ್ತಞ್ಹಿ ವಜಿರಬುದ್ಧಿಟೀಕಾಯಂ, ವುತ್ತಞ್ಹಿ ಸಾರತ್ಥದೀಪನೀಟೀಕಾಯಂ, ತಥಾ ಹಿ ವುತ್ತಂ ವಿಮತಿ ವಿನೋದನೀಟೀಕಾಯನ್ತಿ ತಾಸಂ ವಿನಯಮಹಾಟೀಕಾನಂ ಪಚ್ಛಾ ಹುತ್ವಾ ತಿಸ್ಸೋ ವಿನಯಮಹಾಟೀಕಾಯೋ ಸಾಧಕವಸೇನ ದಸ್ಸಿತಾತಿ. ಏವಂ ಪನ ಪುಚ್ಛನ್ತೋ ಸೋ ಮಯಾ ಪುಬ್ಬೇ ವುತ್ತಂ ತೀಸು ವಿನಯಮಹಾಟೀಕಾಸು ಸಾಧಕವಸೇನ ದಸ್ಸಿತಂ ಚೂಳಗಣ್ಠಿಪದಂಯೇವ ಇದನ್ತಿ ವಚನಂ ಸಚ್ಚಮೇವಾತಿ ಮುಖಾಸುಞ್ಞತ್ಥಾಯ ಪುನಪ್ಪುನಂ ವದಿ.

ಇದಞ್ಚ ಇಮಸ್ಸ ಅತ್ಥಸ್ಸ ಆವಿಭಾವತ್ಥಾಯ ವತ್ಥು, –

ಏಕೋ ಕಿರ ಪುರಿಸೋ ಏಕೇನ ಸಹಾಯೇನ ಸದ್ಧಿಂ ಪುತ್ತದಾರಪೋಸನತ್ಥಾಯ ರಞ್ಞೋ ಭತಿಂ ಗಹೇತ್ವಾ ಯುದ್ಧಕಮ್ಮಂ ಕಾತುಂ ಸಙ್ಗಾಮಂ ಗಚ್ಛತಿ. ಅಥ ಪರಸೇನಾಯ ಯುಜ್ಝಿತ್ವಾ ಪರಸೇನಾ ಅಭಿಭವಿತ್ವಾ ಸಬ್ಬೇ ಮನುಸ್ಸಾ ಅತ್ತನೋ ಅತ್ತನೋ ಅಭಿಮುಖಟ್ಠಾನಂ ಪಲಾಯಿಂಸು. ಅಥ ಸೋಪಿ ಪುರಿಸೋ ತೇನ ಸಹಾಯೇನ ಸದ್ಧಿಂ ಅತ್ತನೋ ಅಭಿಮುಖಟ್ಠಾನಂ ಪಲಾಯಿ. ತೋಕಂ ಪಲಾಯಿತ್ವಾ ಅನ್ತರಾಮಗ್ಗೇ ಪರಸೇನಾಹಿ ಪಹರಿತದಣ್ಡೇನ ಮುಚ್ಛಿತೋ ಹುತ್ವಾ ಸೋ ಪುರಿಸೋ ತೇನ ಸದ್ಧಿಂ ಗನ್ತುಂ ನ ಸಕ್ಕಾ, ಅನ್ತಮಸೋ ನಿಸೀದಿತುಮ್ಪಿ ನ ಸಕ್ಕಾ.

ಅಥ ಸಹಾಯಸ್ಸ ಏತದಹೋಸಿ,-ಇದಾನಿ ಅಯಂ ಅತಿವಿಯ ಬಾಳಗಿಲಾನೋ ಹೋತಿ ಮರಣಾಸನ್ನೋ, ಸಚಾಹಂ ತಸ್ಸ ಉಪಟ್ಠಹಿತ್ವಾ ಇಧೇವ ನಿಸೀದೇಯ್ಯಂ, ವೇರಿನೋ ಆಗನ್ತ್ವಾ ಮಂ ಗಣ್ಹಿಸ್ಸನ್ತೀತಿ. ಏವಂ ಪನ ಚಿನ್ತೇತ್ವಾ ಗಿಲಾನಸ್ಸ ಸನ್ತಕಾನಿ ಕಹಾಪಣವತ್ಥಾದೀನಿ ಗಹೇತ್ವಾ ತಂ ತತ್ಥೇವ ಠಪೇತ್ವಾ ಗಚ್ಛತಿ. ಸಕಟ್ಠಾನಸಮೀಪಂ ಪನ ಪತ್ತಸ್ಸ ತಸ್ಸ ಏತದಹೋಸಿ,- ಸಚೇ ತಂ ಅನ್ತರಾಮಗ್ಗೇ ಠಪೇತ್ವಾ ಆಗಚ್ಛಾಮೀತಿ ವದೇಯ್ಯಂ, ತಸ್ಸ ಞಾತಕಾ ಮಮ ಉಪರಿ ದೋಸಂ ರೋಪೇಸ್ಸನ್ತಿ, ಇದಾನಿ ಸೋ ಮರಿತ್ವಾ ಅಹಂ ಏಕಕೋವ ಆಗಚ್ಛಾಮೀತಿ ವದಿಸ್ಸಾಮೀತಿ. ಸಕಟ್ಠಾನಂ ಪನ ಪತ್ವಾ ತಸ್ಸ ಭರಿಯಾ ತಸ್ಸ ಸನ್ತಿಕಂ ಆಗನ್ತ್ವಾ ಮಯ್ಹಂ ಪನ ಸಾಮಿಕೋ ¶ ಕುಹಿಂ ಗತೋ, ಕತ್ಥ ಠಪೇತ್ವಾ ತ್ವಂ ಏಕಕೋವ ಆಗಚ್ಛಸೀತಿ ಪುಚ್ಛಿ. ತವ ಅಯ್ಯೇ ಸಾಮಿಕೋ ಪರೇಸಂ ಆವುಧೇನ ಪಹರಿತ್ವಾ ಕಾಲಙ್ಕತೋ, ಇಮಾನಿ ತವ ಸಾಮಿಕಸ್ಸ ಸನ್ತಕಾನೀತಿ ವತ್ವಾ ಕಹಾಪಣವತ್ಥಾದೀನಿ ದತ್ವಾ ಮಾ ಸೋಚಿ ಮಾ ಪರಿದೇವಿ, ಇದಾನಿ ಮತಕಭತ್ತಂ ದತ್ವಾ ಪುಞ್ಞಭಾಗಂಯೇವ ಭಾಜೇಹೀತಿ ಸಮಸ್ಸಾಸೇಸಿ. ಅಥ ಸಾ ತಾನಿ ಗಹೇತ್ವಾ ರೋದಿತ್ವಾ ಮತಕಭತ್ತಂ ದತ್ವಾ ಪುಞ್ಞಭಾಗಂ ಭಾಜೇಸಿ.

ಅಪರಭಾಗೇ ಪನ ಥೋಕಂ ಕಾಲಂ ಅತಿಕ್ಕನ್ತೇ ಗಿಲಾನಾ ವುಟ್ಠಿತೋ ಸಕಗೇಹಂ ಆಗಚ್ಛತಿ. ಭರಿಯಾಪಿ ತಂ ನ ಸದ್ದಹಿ. ಅಹಂ ನ ಕಾಲಙ್ಕತೋ, ಗಿಲಾನಂಯೇವ ಮಂ ಠಪೇತ್ವಾ ಸೋ ಮಮ ಸನ್ತಕಾನಿ ಗಹೇತ್ವಾ ಗತೋ, ಸಚೇ ಮಂ ತ್ವಂ ನ ಸದ್ದಹಸಿ, ಅಹಂ ಅನ್ತೋಗಬ್ಭೇ ನಿಲೀಯಿತ್ವಾ ನಿಸೀದಿಸ್ಸಾಮಿ, ತಂ ಪಕ್ಕೋಸೇತ್ವಾ ಪುಚ್ಛಾಹೀತಿ ಆಹ.

ಅಥ ಸಾ ತಂ ಪಕ್ಕೋಸೇತ್ವಾ ಬಹಿ ಗಬ್ಭೇ ನಿಸೀದಿತ್ವಾ ಪುಚ್ಛಿ,-ಮಮ ಸಾಮಿ ಸಾಮಿಕೋ ಕಾಲಙ್ಕತೋತಿ ತಂ ಸಚ್ಚಂ ವಾ ಅಲಿಕಂ ವಾತಿ. ಸಚ್ಚಮೇವೇತಂ, ಯಂ ತವ ಸಾಮಿಕೋ ಕಾಲಙ್ಕತೋತಿ.

ಅಥ ಸೋ ಪುರಿಸೋ ಬಹಿ ಗಬ್ಭಂ ನಿಕ್ಖಮಿತ್ವಾ ಅಙ್ಗುಲಿಂ ಪಸಾರೇತ್ವಾ ನ ಇದಾನಿ ಭೋಸಮ್ಮ ಅಹಂ ಕಿಞ್ಚಿ ಮತ್ತೋಪಿ ಮರಾಮಿ, ಕಸ್ಮಾ ಪನ ಅಮರನ್ತಂಯೇವ ಮಂ ಮತೋ ಏಸೋತಿ ವದೇಸೀತಿ. ಅಥ ಕಿಞ್ಚಿ ವತ್ತಬ್ಬಸ್ಸ ಕಾರಣಸ್ಸ ಅದಿಸ್ಸನತೋ ಮುಖಾಸುಞ್ಞತ್ಥಾಯ ಅಙ್ಗುಲಿಂ ಪಸಾರೇತ್ವಾ ಉಜುಂ ಓಲೋಕೇತ್ವಾ ಇದಾನಿ ತ್ವಂ ಇಧ ಆಗನ್ತುಂ ಸಮತ್ಥೋಪಿ ಮತೋಯೇವ, ಮತೋತಿ ಮಯಾ ವುತ್ತ ವಚನಂ ಸಚ್ಚಂಯೇವ, ನಾಹಂ ಕಿಞ್ಚಿ ಅಲಿಕಂ ವದಾಮೀತಿ ಆಹ. ಏವಂ ಸೋ ಪುನಪ್ಪುನಂ ವದನ್ತೋಪಿ ಜೀವಮಾನಕಸ್ಸ ಸಂವಿಜ್ಜಮಾನತ್ತಾ ಪಚ್ಚಕ್ಖೇಯೇವ ಚ ತಸ್ಸ ಠಿತತ್ತಾ ಕೋಚಿಪಿ ತಸ್ಸ ವಚನಂ ನ ಸದ್ದಹಿ, ಪರಾಜಯಂಯೇವ ಸೋ ಪತ್ತೋತಿ.

ಇಚ್ಚೇವಂ ¶ ಅತುಲತ್ಥೇರೋ ಮುಖಾಸುಞ್ಞತ್ಥಾಯ ವದನ್ತೋಪಿ ಕೋಚಿ ನ ಸದ್ದಹಿ, ಪರಾಜಯಂಯೇವ ಸೋ ಪತ್ತೋತಿ.

ಅಯಂ ಅತುಲತ್ಥೇರಸ್ಸ ದುತಿಯೋ ಪರಾಜಯೋ.

ಪುನಪಿ ಸೇಯ್ಯಥಾಪಿ ಲುದ್ದಕೋ ಕುಞ್ಜರಂ ದಿಸ್ವಾ ಏಕೇನ ವಾರೇನ ಉಸುನಾ ವಿಜ್ಝಿತ್ವಾ ಪತನ್ತಮ್ಪಿ ಕುಞ್ಜರಂ ಪುನ ಅನುಟ್ಠಾಹನತ್ಥಾಯ ಕತಿಪಯವಾರೇಹಿ ಉಸೂಹಿ ವಿಜ್ಝತಿ, ಏವಮೇವ ಏಕವಾರೇನೇವ ಪರಾಜಯಂ ಪತ್ತಂ ಪನ ವಾದಸ್ಸ ಅನುಕ್ಖಿಪನತ್ಥಾಯ ಕತಿಪಯವಾರೇಹಿ ಪರಾಜಯಂ ಪಾಪೇತುಂ ಪಾರುಪನವಾದಿನೋ ಮಹಾಥೇರಾ ಏವಮಾಹಂಸು,- ತವ ಚೂಳಗಣ್ಠಿಪದೇಯೇವ ಸಾಮಣೇರಾನಂ ಪರಿಮಣ್ಡಲಸುಪ್ಪಟಿಚ್ಛನ್ನಾದೀನಿ ವತ್ತಾನಿ ಅಭಿನ್ದಿತ್ವಾಯೇವ ಪವಿಸಿತಬ್ಬೋತಿ ಪುಬ್ಬೇ ವತ್ವಾ ಚೀವರಪಟಲಉಪರಿಸಙ್ಘಾಟಿಂ ಕತ್ವಾ ಉರಬನ್ಧನವತ್ಥಂ ಬನ್ಧಿತಬ್ಬನ್ತಿ ಪನ ವುತ್ತಂ, ಕಸ್ಮಾ ಪನ ಪುಬ್ಬೇನ ಅಪರಂ ಅಸಂಸನ್ದಿತ್ವಾ ವುತ್ತಂ, ತುಮ್ಹಾಕಂ ವಾದೇ ಪಟಿಸರಣಭೂತಾನಂ ಪಾಳಿಅಟ್ಠಕಥಾಟೀಕಾಗನ್ಥನ್ತರಾನಂ ನತ್ಥಿತಾಯ ಅಮ್ಹಾಕಂ ಪಟಿಸರಣಭೂತಂ ಚೂಳಗಣ್ಠಿಪದನ್ತಿ ವದಥ, ತುಮ್ಹಾಕಂ ಪಟಿಸರಣಭೂತಾ ಚೂಳಗಣ್ಠಿಪದತೋಯೇವ ಭಯಂ ಉಪ್ಪಜ್ಜತೀತಿ ವತ್ವಾ ಸಹ ನಿಲೀಯನಟ್ಠಾನೇನ ಗಹಿತಂ ಚೋರಂ ವಿಯ ಸಹ ನಿಸ್ಸಯೇನ ಅಧಮ್ಮವಾದಿನೋ ಗಣ್ಹಿಂಸು.

ಇದಂ ಇಮಸ್ಸ ಅತ್ಥಸ್ಸ ಅವಿಭಾವತ್ಥಾಯ ವತ್ಥು, –

ಅತೀತೇ ಕಿರ ಬಾರಾಣಸಿತೋ ಅವಿದೂರೇ ನದೀತೀರೇ ಗಾಮಕೇ ಪಾಟಲಿ ನಾಮ ನಟಮಚ್ಚೋ ವಸತಿ. ಸೋ ಏಕಸ್ಮಿಂ ಉಸ್ಸವ ದಿವಸೇ ಭರಿಯಮಾದಾಯ ಬಾರಾಣಸಿಂ ಪವಿಸಿತ್ವಾ ನಚ್ಚಿತ್ವಾ ವೀಣಂ ವಾದಿತ್ವಾ ಗಾಯಿತ್ವಾ ಧನಂ ಲಭಿತ್ವಾ ಉಸ್ಸವಪರಿಯೋಸಾನೇ ಬಹು ಸುರಾಭತ್ತಂ ಗಾಹಾಪೇತ್ವಾ ಅತ್ತನೋ ಗಾಮಂ ಗಚ್ಛನ್ತೋ ನದೀತೀರಂ ಪತ್ವಾ ನವೋದಕಂ ಆಗಚ್ಛನ್ತಂ ದಿಸ್ವಾ ಭತ್ತಂ ಭುಞ್ಜನ್ತೋ ಸುರಂ ವಿವನ್ತೋ ನಿಸೀದಿತ್ವಾ ಮತ್ತೋ ಹುತ್ವಾ ಅತ್ತನೋ ಬಲಂ ಅಜಾನನ್ತೋ ಮಹಾವೀಣಂ ಗೀವಾಯ ಬನ್ಧಿತ್ವಾ ನದಿಂ ಓತರಿತ್ವಾ ಗಮಿಸ್ಸಾಮೀತಿ ಭರಿಯಂ ಹತ್ಥೇ ಗಹೇತ್ವಾ ನದಿಂ ಓತರಿ. ವೀಣಾಛಿದ್ದೇಹಿ ಉದಕಂ ¶ ಪಾವಿಸಿ. ಅಥ ನಂ ಸಾ ಪೀಣಾ ಉದಕೇ ಓಸೀದಾಪೇಸಿ. ಭರಿಯಾ ಪನಸ್ಸ ಓಸೀದನಭಾವಂ ಞತ್ವಾ ತಂ ವಿಸ್ಸಜ್ಜಿತ್ವಾ ಉತ್ತರಿತ್ವಾ ನದೀತೀರೇ ಅಟ್ಠಾಸಿ. ನಟಪಾಟಲಿ ಸಕಿಂ ಉಮ್ಮುಜ್ಜತಿ, ಸಕಿಂ ನಿಮ್ಮುಜ್ಜತಿ, ಉದಕಂ ಪವಿಸಿತ್ವಾ ಉದ್ಧುಮಾತಉದರೋ ಅಹೋಸಿ. ಅಥಸ್ಸ ಭರಿಯಾ ಚಿನ್ತೇಸಿ,-ಮಯ್ಹಂ ಸಾಮಿಕೋ ಇದಾನಿ ಮರಿಸ್ಸತಿ, ಏಕಂ ಗೀತಂ ಯಾಚಿತ್ವಾ ಪರಿಸಮಜ್ಝೇ ತಂ ಗಾಯನ್ತೀ ಜೀವಿತಂ ಕಪ್ಪೇಸ್ಸಾಮೀತಿ ಚಿನ್ತೇತ್ವಾ ಸಾಮಿ ತ್ವಂ ಉದಕೇ ನಿಮ್ಮುಜ್ಜಸಿ, ಏಕಂ ಮೇ ಗೀತಂ ದೇಹಿ, ತೇನ ಜೀವಿತಂ ಕಪ್ಪೇಸ್ಸಾಮೀತಿ ವತ್ವಾ–

ಬಹುಸ್ಸುತಂ ಚಿತ್ತಕಥಂ, ಗಙ್ಗಾ ವಹತಿ ಪಾಟಲಿಂ;

ವುಯ್ಹಮಾನಕಂ ಭದ್ದನ್ತೇ, ಏಕಂ ಮೇ ದೇಹಿ ಗಾಥಕನ್ತಿ.

ಅಥ ನಂ ನಟಪಾಟಲಿ ಭದ್ದೇ ಕಥಂ ತವ ಗೀತಂ ದಸ್ಸಾಮಿ, ಇದಾನಿ ಮಹಾಜನಸ್ಸ ಪತಿಸರಣಭೂತಂ ಉದಕಂ ಮಂ ಮಾರೇತೀತಿ ವತ್ವಾ–

ಯೇನ ಸಿಞ್ಚನ್ತಿ ದುಕ್ಖಿತಂ, ಯೇನ ಸಿಞ್ಚನ್ತಿ ಆತುರಂ;

ತಸ್ಸ ಮಜ್ಝೇ ಮರಿಸ್ಸಾಮಿ, ಜಾತಂ ಸರಣತೋ ಭಯನ್ತಿ.

ಅಥ ಅತುಲತ್ಥೇರೋ ಅತ್ತನೋ ಪತಿಸರಣಭೂತಾ ಚೂಳಗಣ್ಠಿಪದತೋ ಭಯಂ ಉಪ್ಪಜ್ಜಿತ್ವಾ ಕಿಞ್ಚಿ ವತ್ತಬ್ಬಂ ಅಜಾನಿತ್ವಾ ಅಧೋಮುಖೋ ಹುತ್ವಾ ಪರಾಜಾಯಂ ಪತ್ತೋತಿ.

ಅಯಂ ಅತುಲತ್ಥೇರಸ್ಸ ತತಿಯೋ ಪರಾಜಯೋ.

ಅಥ ರಾಜಾ ತೇಸಂ ದ್ವಿನ್ನಂ ಪಕ್ಖಾನಂ ವಚನಂ ಸುತ್ವಾ ಚೂಳಗಣ್ಠಿಪದಸ್ಸ ಪುಬ್ಬಾಪರವಿರೋಧಿದೋಸಹಿ ಆಕುಲತ್ತಾ ಸುತ್ತಸುತ್ತಾನುಲೋಮಾದೀಸು ಅಪ್ಪವಿಟ್ಠತ್ತಾ ಆಗಮಸುದ್ಧಿಯಾ ಚ ಅಭಾವತೋ ಪರೋವಸ್ಸಸತಂ ಚಿರಂ ಠಿತಸ್ಸ ಗೇಹಸ್ಸವಿಯ ಅತಿದುಬ್ಬಲವಸೇನ ಅಥಿರತಂ ಜಾನಿತ್ವಾ ಇದಾನಿ ಸಾಸನಂ ಪರಿಸುದ್ಧಂ ಭವಿಸ್ಸತೀತಿ ಸೋಮನಸ್ಸಪ್ಪತ್ತೋ ಹುತ್ವಾ ಮಮ ವಿಜಿತೇ ಸಬ್ಬೇಪಿ ಭಿಕ್ಖೂ ಪಾರುಪನವಸೇನ ಸಮಾನವಾದಿಕಾ ಹೋನ್ತೂತಿ ಆಣಂ ಠಪೇಸಿ. ತತೋ ¶ ಪಟ್ಠಾಯ ಯಾವಜ್ಜತನಾ ಸಕಲೇಪಿ ಮರಮ್ಮರಟ್ಠೇ ಪಾರುಪನವಸೇನ ಸಮಾನವಾದಿಕಾ ಭವನ್ತೀತಿ.

ಅಯಮೇತ್ಥ ಸಙ್ಖೇಪೋ,-ತೇಸಞ್ಹಿ ದ್ವಿನ್ನಂ ಪಕ್ಖಾನಂ ಸನ್ನಿಪತಿತ್ವಾ ವಚನಪ್ಪಟಿವಚನ ವಸೇನ ವಿವಾದಕಥಾ ವಿತ್ಥಾರೇನ ವುಚ್ಚಮಾನಾ ಛಪಞ್ಚಸಾಣವಾರಮತ್ತಮ್ಪಿ ಪತ್ವಾ ನಿಟ್ಠಂ ನ ಪಾಪುಣೇಯ್ಯ. ಯಸ್ಮಾ ಪನ ಸಬ್ಬಂ ಅನವಸೇಸೇತ್ವಾ ವುಚ್ಚಮಾನಂ ಅಯಂ ಸಾಸನವಂಸಪ್ಪಟೀಪಿಕಾ ಅತಿಪ್ಪಪಞ್ಚಾ ಭವಿಸ್ಸತಿ, ತಸ್ಮಾ ಏತ್ಥ ಇಚ್ಛಿತಮತ್ತಮೇವ ದಸ್ಸಯಿತ್ವಾ ಅಜ್ಝುಪೇಕ್ಖಾಮಾತಿ.

ಞಾಣಾಭಿವಂಸಧಮ್ಮಸೇನಾಪತಿಮಹಾಧಮ್ಮರಾಜಾಧಿರಾಜ ಗುರು ಪನ ಸಙ್ಘರಾಜಾ ಮಹಾಥೇರೋ ಸೀಹಳದೀಪೇ ಅಮರಪುರನಿಕಾಯಿಕಾನಂ ಭಿಕ್ಖೂನಂ ಆದಿಭೂತೋ ಆಚರಿಯೋ ಬಹೂಪಕಾರೋ. ಅಮರಪುರನಿಕಾಯೋತಿ ತತ್ಥೇರಪ್ಪಭವೋತಿ.

ಕಲಿಯುಗೇ ಪನ ಏಕಾಸೀತಾಧಿಕೇ ವಸ್ಸಸತೇ ಸಹಸ್ಸೇ ಚ ಸಮ್ಪತ್ತೇ ತಸ್ಸ ರಞ್ಞೋ ನತ್ತಾ ಸಿರಿತ್ರಿಭವನಾದಿತ್ಯಪವರಪಣ್ಡಿತಮಹಾಧಮ್ಮರಾಜಾಧಿರಾಜಾ ನಾಮ ರಜ್ಜಂ ಕಾರೇಸಿ. ಸೋ ಪನ ಅಮರಪುರತೋ ಸಙ್ಕಮಿತ್ವಾ ರತನಪೂರಂ ಚತುತ್ಥಂ ಮಾಪೇಸಿ. ತಸ್ಸ ರಞ್ಞೋ ಕಾಲೇ ಗುಣಮುನಿನ್ದಾಧಿಪತಿಮಹಾಧಮ್ಮರಾಜಾಧಿರಾಜಗುರುತ್ಥೇರಸ್ಸ ಸೀಸ್ಸಂ ಸಜೀವಗಾಮವಾಸಿಂ ಸೀಲಾಚಾರಂ ನಾಮ ಥೇರಂ ಅರಞ್ಞವಾಸೀನಂ ಭಿಕ್ಖೂನಂ ಪಾಮೋಕ್ಖಟ್ಠಾನೇ ಠಪೇಸಿ. ರಾಜಾಗಾರನಾಮಕೇ ದೇಸೇ ವಿಹಾರಂ ಕಾರಾಪೇತ್ವಾ ತಸ್ಸೇವ ಅದಾಸಿ.

ಕಲಿಯುಗೇ ಏಕಾಸೀತಾಧಿಕೇ ವಸ್ಸಸತೇ ಸಹಸ್ಸೇ ಚ ಸಮ್ಪತ್ತೇ ಚಲಙ್ಗಪುರತೋ ಪಞ್ಞಾಸೀಹಂ ನಾಮ ಥೇರಂ ಆನೇತ್ವಾ ಅಸೋಕಾರಾಮೇ ರತನಭೂಮಿಕಿತ್ತಿವಿಹಾರೇ ಪತಿಟ್ಠಾಪೇಸಿ, ಮುನಿನ್ದಾಭಿಸಿರಿಸದ್ಧಮ್ಮಧಜಮಹಾಧಮ್ಮರಾಜಾಧಿರಾಜಗುರೂತಿ ನಾಮಲಞ್ಛಮ್ಪಿ ಅದಾಸಿ.

ಕಲಿಯುಗೇ ಚತೂಸೀಸಾಧಿಕೇ ವಸ್ಸಸತೇ ಸಹಸ್ಸೇ ಚ ಸಮ್ಪತ್ತೇ ಮುನಿನ್ದಾಭಿವಂಸಧಮ್ಮಸೇನಾಪತಿಮಹಾಧಮ್ಮರಾಜಾಧಿರಾಜಗುರೂತಿ ನಾಮಲಞ್ಛಂ ದತ್ವಾ ಮಹಾಜೇಯ್ಯಭೂಮಿವಿಹಾರರಮ್ಮಣೀಯಂ ನಾಮ ವಿಹಾರಂ ¶ ದತ್ವಾ ತಂಯೇವ ಮಹಾಥೇರಂ ಸಙ್ಘರಾಜಟ್ಠಾನೇ ಠಪೇಸಿ.

ಏಕಸ್ಮಿಞ್ಚ ಸಮಯೇ ಮಹಾಥೇರೇ ರಾಜಾ ಪುಚ್ಛಿ,-ಚತಸ್ಸೋ ದಾಠಾ ನಾಮ ಚತ್ತಾಲೀಸಾಯ ದನ್ತೇಸು ಅನ್ತೋಗಧಾ ವಾ, ಉದಾಹು ಚತ್ತಾಲೀಸಾಯ ದನ್ತೇಹಿ ವಿಸುಂ ಭೂತಾತಿ ಪುಚ್ಛಿ.

ಅಥ ಏಕಚ್ಚೇ ಥೇರಾ ಏವಮಾಹಂಸು,-ಚತಸ್ಸೋ ದಾಠಾ ನಾಮ ಚತ್ತಾಲೀಸಾಯ ದನ್ತೇಸು ಅನ್ತೋಗಧಾತಿ. ಏಕಚ್ಚೇ ಪನ ಚತಸ್ಸೋ ದಾಠಾ ನಾಮ ಚತ್ತಾಲೀಸಾಯ ದನ್ತೇಹಿ ವಿಸುಂ ಭೂತಾತಿ ಆಹಂಸು. ಅಥ ರಾಜಾ ಗನ್ಥಂ ಆಹರಥಾತಿ ಆಹ. ಅಥ ಅನ್ತೋಗಧವಾದಿಕಾ ಥೇರಾ ಗನ್ಥಂ ಆಹರಿಂಸು,- ಅಞ್ಞೇಸಂ ಪರಿಪುಣ್ಣದನ್ತಾನಮ್ಪಿ ದ್ವತ್ತಿಂಸದನ್ತಾ ಹೋನ್ತಿ, ಇಮಸ್ಸ ಪನ ಚತ್ತಾಲೀಸಂ ಭವಿಸ್ಸನ್ತೀತಿ ಚ.

ದನ್ತಾತಿ ಪರಿಪುಣ್ಣದನ್ತಸ್ಸ ದ್ವತ್ತಿಂಸದನ್ತಟ್ಠಿಕಾನಿ. ತೇಪಿ ವಣ್ಣತೋ ಸೇತಾ, ಸಣ್ಠಾನತೋ ಅನೇಕಸಣ್ಠಾನಾ. ತೇಸಞ್ಹಿ ಹೇಟ್ಠಿಮಾಯ ತಾವ ದನ್ತಪಾಳಿಯಾ ಮಜ್ಝೇ ಚತ್ತಾರೋ ದನ್ತಾ ಮತ್ತಿಕಾಪಿಣ್ಡೇ ಪಟಿಪಾಟಿಯಾ ಠಪಿತಆಲಾಬುಬೀಜಸಣ್ಠಾನಾ, ತೇಸಂ ಉಭೋಸು ಪಸ್ಸೇಸು ಏಕೇಕೋ ಏಕಮೂಲಕೋ ಏಕಕೋಟಿಕೋ ಮಲ್ಲಿಕಮಕುಳಸಣ್ಠಾನೋ, ತತೋ ಏಕೇಕೋ ದ್ವಿಮೂಲಕೋ ದ್ವಿಕೋಟಿಕೋ ಯಾನಕಉಪತ್ಥಮ್ಫಿನಿಸಣ್ಠಾನೋ, ತತೋ ದ್ವೇ ದ್ವೇ ತಿಮೂಲಕಾ ತಿಕೋಟಿಕಾ, ತತೋ ದ್ವೇ ದ್ವೇ ಚತುಮೂಲಕಾ ಚತುಕೋಟಿಕಾತಿ. ಉಪರಿಮಾಯ ದನ್ತಪಾಳಿಯಾಪಿ ಏಸೇವ ನಯೋತಿ ಚ.

ತಸ್ಸ ಕಿರ ಉತ್ತರೋಟ್ಠಅಪ್ಪಕತಾಯ ತಿರಿಯಂ ಫಾಲೇತ್ವಾ ಅಪನೀತದ್ಧಂವಿಯ ಖಾಯತಿ, ಚತ್ತಾರೋ ದನ್ತೇ ದ್ವೇ ಚ ದಾಠಾ ನ ಛಾದೇತಿ, ತೇನ ನಂ ಓಟ್ಠದ್ಧೋತಿ ವೋಹರನ್ತೀತಿ ಚ.

ತತ್ಥ ತಸ್ಸಾತಿ ಲಿಚ್ಛವಿನೋ ನಾಮ ರಾಜಕುಮಾರಸ್ಸ, ಉತ್ತರೋಟ್ಠಅಪ್ಪಕತಾಯಾತಿ ಉಪರಿ ಓಟ್ಠಸ್ಸ ಅಪ್ಪಕತಾಯ. ಅಪನೀತದ್ಧಂ ವಿಯಾತಿ ಉಪರಿ ಓಟ್ಠಸ್ಸ ಉಪಡ್ಢಭಾಗಂ ಅಪನೀತಂ ವಿಯ ಖಾಯತೀತಿ ಅತ್ಥೋ. ನ ಛಾದೇತೀತಿ ಉಪರಿ ಓಟ್ಠಸ್ಸ ಉಪಡ್ಢಭಾಗೇ ಪನ ನ ಪಟಿಚ್ಛಾದೇತಿ. ತೇನಾಹಿ ಯೇನ ಚತ್ತಾರೋ ದನ್ತೇ ದ್ವೇ ಚ ದಾಠಾ ನ ಛಾದೇತಿ, ತೇನ ನಂ ಲಿಚ್ಛವೀರಾಜಕುಮಾರಂ ಓಟ್ಠದ್ಧೋತಿ ವೋಹರನ್ತೀತಿ ¶ . ಏವಂ ಅನ್ತೋಗಧವಾದೇಹಿ ಥೇರೇಹಿ ಗನ್ಥಂ ಆಹರಿತ್ವಾ ದಸ್ಸಿತೇ ಸಬ್ಬೇಪಿ ತಸ್ಮಿಂ ವಾದೇ ಪತಿಟ್ಠಹಿಂಸೂತಿ.

ಏಕಸ್ಮಿಞ್ಚ ಕಾಲೇ ರಾಜಾ ಮನ್ತಿನಿಂ ಅಮಚ್ಚಂ ಪುಚ್ಛಿ,-ಪುಬ್ಬರಾಜೂಹಿ ವಿಹಾರಸ್ಸ ಚೇತಿಯಸ್ಸ ವಾ ದಿನ್ನಾನಿ ಖೇತ್ತವತ್ಥುಆದೀನಿ ಪಚ್ಛಿಮರಾಜೂನಂ ಕಾಲೇ ಯಥಾದಿನ್ನಂ ತಾನಿ ಪತಿಟ್ಠಹನ್ತಿ ವಾ ಮಾ ವಾತಿ.

ಅಥ ಮನ್ತಿನಿಆಮಚ್ಚೋ ಏವಂ ಕಥೇಸಿ,- ಸಙ್ಘಿಕಾಯ ಭೂಮಿಯಾ ಪುಗ್ಗಲಿಕಾನಿ ಬೀಜಾನಿ ರೋಪಯನ್ತಿ, ಭಾಗಂ ದತ್ವಾ ಪರಿಭುಞ್ಜಿತಬ್ಬಾನೀತಿ ದಸಕೋಟ್ಠಾಸೇ ಕತ್ವಾ ಏಕೋ ಕೋಟ್ಠಾಸೋ ಭೂಮಿಸ್ಸಾಮಿಕಾನಂ ದಾತಬ್ಬೋತಿ ಚ ವಿನಯಪಾಳಿಅಟ್ಠಕಥಾಸು ವುತ್ತತ್ತಾ ಪುಬ್ಬೇ ಏಕೇನ ರಞ್ಞಾ ದಿನ್ನಾನಿ ಖೇತ್ತವತ್ಥುಆದೀನಿ ಪಚ್ಛಾ ಏಕಸ್ಸ ರಞ್ಞೋ ಕಾಲೇ ಯಥಾದಿನ್ನಂ ಠಿತಾನಿ. ಏತ್ಥ ಹಿ ಸಙ್ಘಿಕಾಯ ಭೂಮಿಯಾತಿ ವುತ್ತತ್ತಾ ಲಾಭಸೀಮಾಯಂವಿಯ ಬಲಿಂಯೇವ ಅದತ್ವಾ ಸಹ ಭೂಮಿಯಾ ದಿನ್ನತ್ತಾ ಪವೇಣೀವಸೇನ ಸಙ್ಘಿಕಾ ಭೂಮಿ ಅತ್ಥೀತಿ ವಿಞ್ಞಾಯತಿ. ಏತ್ಥಚ ಪಟಿಗ್ಗಾಹಕೇಸು ಮತೇಸು ತದಞ್ಞೋ ಚತುದ್ದಿಸಸಙ್ಘೋ ಅನಾಗತಸಙ್ಘೋ ಚ ಇಸ್ಸರೋ, ತಸ್ಸ ಸನ್ತಕೋ, ತೇನ ವಿಚಾರೇತಬ್ಬೋತಿ.

ಚೇತಿಯ ಪದೀಪತ್ಥಾಯ ಪಟಿಸಙ್ಖಾರಣತ್ಥಾಯ ವಾ ದಿಇನ್ನಆರಾಮೋಪಿ ಜಗ್ಗಿತಬ್ಬೋ, ವೇತ್ತನಂ ಅತ್ವಾಪಿ ಜಗ್ಗಾಪೇತಬ್ಬೋತಿ ಚೇತಿಯೇ ಛತ್ತಂ ವಾ ವೇದಿಕಂ ವಾ ಜಿಣ್ಣಂ ವಾ ಪಟಿಸಙ್ಖರೋನ್ತೇನ ಸುಧಾಕಮ್ಮಾದೀನಿ ವಾ ಕರೋನ್ತೇನ ಚೇತಿಯಸ್ಸ ಉಪನಿಕ್ಖೇಪತೋ ಕಾರೇತಬ್ಬನ್ತಿ ಚ ಅಟ್ಠಕಥಾಯಂ ವುತ್ತತ್ತಾ ಪುಬ್ಬರಾಜೂಹಿ ಚೇತಿಯಸ್ಸ ದಿನ್ನಾನಿ ಖೇತ್ತವತ್ಥುಆದೀನಿ ಪಚ್ಛಿಮರಾಜೂನಂ ಕಾಲೇಪಿ ಚೇತಿಯಸನ್ತಕಸಾವೇನೇವ ಠಿತಾನೀತಿ ವೇದಿತಬ್ಬಾನಿ.

ಅಥಾಪರಮ್ಪಿ ಪುಚ್ಛಿ,- ಕದಾ ಕಸ್ಸ ರಞ್ಞೋ ಕಾಲೇ ಆದಿಂ ಕತ್ವಾ ಖೇತ್ತವತ್ಥುಆದೀನಿ ವಿಹಾರಸ್ಸ ಚೇತ್ಯಸ್ಸ ವಾ ದಿನ್ನಾನೀತಿ.

ಅಥ ಮನ್ತಿನಮಚ್ಚೋ ಏವಮಾಹ,-ಪುರಿಮಕಪ್ಪೇಸು ಪುರಿಮಾನಂ ರಾಜೂನಂ ಕಾಲೇಪಿ ವಿಹಾರಸ್ಸ ಚೇತಿಯಸ್ಸ ವಾ ದಿನ್ನಾನೀತಿ ವೇದಿತಬ್ಬಾನಿ, ತೇನೇವ ಸುಜಾತಸ್ಸ ನಾಮ ಭಗವತೋ ಅಮ್ಹಾಕಂ ಬೋಧಿಸತ್ತೋ ¶ ಚಕ್ಕವತ್ತಿರಾಜಾ ಸದ್ಧಿಂ ಸತ್ತಹಿ ರತನೇಹಿ ದ್ವಿಸಹಸ್ಸೇ ಖುದ್ದಕದೀಪೇ ಚತ್ತಾರೋ ಮಹಾದೀಪೇ ಚ ಅದಾಸಿ, ರಟ್ಠವಾಸಿನೋ ಚ ಆರಾಮಗೋಪಕಕಿಚ್ಚಂ ಕಾರಾಪೇಸೀತಿ ಗನ್ಥೇಸು ಆಗತಂ, ತಸ್ಮಾ ಚಿರಕಾಲತೋಯೇವ ಪಟ್ಠಾಯ ಪುಬ್ಬರಾಜೂಹಿ ಖೇತ್ತವತ್ಥುಆದಿನಿ ದಿನ್ನಾನೀತಿ ವೇದಿತಬ್ಬಾನಿ.

ರಾಜವಂಸೇಸುಪಿ ಭಗವತೋ ಪರಿನಿಬ್ಬಾನತೋ ವಸ್ಸಸತಾನಂ ಉಪರಿ ಸಿರಿಖೇತ್ತನಗರೇ ಏಕಾಯ ಆಪೂಪಿಕಾಯ ಪಞ್ಚಕರೀಸ ಮತ್ತಂ ಖೇತ್ತಂ ಏಕಸ್ಸ ಥೇರಸ್ಸ ದಿನ್ನಂ, ತಂ ದ್ವತ್ತಪೋಙ್ಕೋ ನಾಮ ರಾಜಾ ವಿಲುಮ್ಪಿತ್ವಾ ಗಣ್ಹಿ. ಅಥ ಪಹಾರಘಣ್ಟಭೇರಿಯೋ ಪಹರಿತಾಪಿ ಸದ್ದಂ ನ ಅಕಂಸು. ರಞ್ಞೋ ಕುನ್ತಚಕ್ಕಮ್ಪಿ ಯಥಾ ಪುಬ್ಬೇ, ತಥಾ ಪೇಸಿತಟ್ಠಾನಂ ನ ಗಚ್ಛಿ. ಅಥ ತಂ ಕಾರಣಂ ಞತ್ವಾ ಆಪೂಪಿಕಾಯ ಯಥಾದಿನ್ನಮೇವ ಥೇರಸ್ಸ ನಿಯ್ಯಾದೇಸೀತಿ.

ಕಲಿಯುಗೇ ಪನ ನವನವುತಾಧಿಕೇ ವಸ್ಸಸತೇ ಸಹಸ್ಸೇ ಚ ಸಮ್ಪತ್ತೇ ತಸ್ಸ ಕನಿಟ್ಠೋ ಸಿರಿಪವರಾದಿತ್ಯಲೋಕಾಪೇತಿ ವಿಜಯಮಹಾಧಮ್ಮರಾಜಾಧಿರಾನಾ ರಜ್ಜಂ ಕಾರೇಸಿ, ಸೋ ಪನ ರಾಜಾ ರತನಪೂರತೋ ಸಙ್ಕಮಿತ್ವಾ ಅಮರಪುರಂ ದುತಿಯಂ ಮಾಪೇಸಿ. ತಸ್ಸ ರಞ್ಞೋ ರಜ್ಜಂ ಪತ್ತಸಂವಚ್ಛರೇಯೇವ ಜೇಟ್ಠಮಾಸಸ್ಸ ಜುಣ್ಹಪಕ್ಖಪಞ್ಚಮಿಯಂ ರತನಪೂರನಗರೇ ಮಾರವಿಜಯರತನಸುಧಮ್ಮಾಯ ನಾಮ ಪಿಟಕಸಾಲಾಯ ಸೂರಿಯವಂಸಸ್ಸ ನಾಮ ಥೇರಸ್ಸ ಪರಿಸಮಜ್ಝೇ ರಾಜಲೇಖನಂ ವಾಚಾಪೇತ್ವಾ ಸಙ್ಘರಜ್ಜಂ ನಿಯ್ಯಾದೇಸಿ. ಸೂರಿಯವಂಸಾಭಿಸಿರಿಪವರಾಲಙ್ಕಾರಧಮ್ಮಸೇನಾಪತಿಮಹಾಧಮ್ಮರಾಜಾಧಿರಾಜಗುರೂತಿ ನಾ ಮಲಞ್ಛಮ್ಪಿ ಅದಾಸಿ.

ಸೋ ಪನ ಥೇರೋ ಕಲಿಯುಗೇ ಪಞ್ಚವೀಸಾಧಿಕೇ ವಸ್ಸಸತೇ ಸಹಸ್ಸೇ ಚ ಸಮ್ಪತ್ತೇ ಮಿಗಸಿರಮಾಸಸ್ಸ ಜುಣ್ಹಪಕ್ಖಸತ್ತಮಿಯಂ ಸುತ್ತವಾರೇ ವಾಲುಕವಾಪಿಗಾಮೇ ಪಟಿಸನ್ಧಿಯಾ ವಿಜಾತೋತಿಸತ್ತತಿವಯಂ ಸಮ್ಪತ್ತೇ ಸಙ್ಘರಜ್ಜಂ ಪತ್ತೋ ಸನ್ತಿನ್ದ್ರಿಯೋ ಖನ್ತೀ ಧಮ್ಮೋ ಸಿಕ್ಖಾಕಾಮೋ ಪರಿಯತ್ತಿವಿಹಾರದೋ ತಿಪಿಟಕಾಲಙ್ಕಾರಮಹಾಧಮ್ಮರಾಜಗುರುತ್ಥೇರಸ್ಸ ಸಿಸ್ಸೋ. ಸೋ ಪನ ಕಲಿಯುಗೇ ಪನ್ನರಸಾಧಿಕೇ ¶ ದ್ವಿವಸ್ಸಸತೇ ಸಹಸ್ಸೇಚ ಸಮ್ಪತ್ತೇ ತಸ್ಸ ರಞ್ಞೋ ಕಾಲೇಯೇವ ಮಚ್ಚುವಸಂ ಪತ್ತೋ.

ಅಥ ರಾಜಾ ಅನೇಕಸಹಸ್ಸೇಹಿ ಪಾಸಾದೇಹಿ ಅಭೂತಪುಬ್ಬೇಹಿ ಅಚ್ಛರಿಯಕಮ್ಮೇಹಿ ಸರೀರಝಾಪನಕಿಚ್ಚಂ ಅಕಾಸಿ. ಅಥ ಕಲಿಯುಗೇ ಸೇಳಸಾಧಿಕೇ ವಸ್ಸಸತೇ ಸಹಸ್ಸೇಚ ಸಮ್ಪತ್ತೇ ತಸ್ಸ ಮಹಾಥೇರಸ್ಸ ಸಿಸ್ಸಂ ಞೇಯ್ಯಧಮ್ಮಂ ನಾಮ ಥೇರಂ ಪುನ ಸಙ್ಘರಾಜಟ್ಠಾನೇ ಠಪೇಸಿ. ಪಠಮಂ ಞೇಯ್ಯಧಮ್ಮಾಲಙ್ಕಾರಧಮ್ಮ ಸೇನಾಪತಿಮಹಾಧಮ್ಮರಾಜಾಧಿರಾಜಗುರೂತಿ ನಾಮಲಞ್ಛಂ ಅದಾಸಿ. ತತೋ ಪಚ್ಛಾ ದುತಿಯಂ ಞೇಯ್ಯಧಮ್ಮಾಭಿವಂಸಸಿರಿಪವರಾಲಙ್ಕಾರಧಮ್ಮಸೇನಾಪತಿಮಹಾಧಮ್ಮರಾಜಾಧಿರಾಜ- ಗುರೂತಿ ನಾಮಲಞ್ಛಂ ಅದಾಸಿ.

ಸೋ ಪನ ಥೇರೋ ಕಲಿಯುಗೇ ಏಕಸಟ್ಠಾಧಿಕೇ ವಸ್ಸಸತೇ ಸಹಸ್ಸೇಚ ದೇವಸೂರಗಾಮೇ ಪಟಿಸನ್ಧಿಯಾ ವಿಜಾತೋ ಹುತ್ವಾ ಅಸೀತಾಧಿಕೇ ವಸ್ಸಸತೇ ಸಹಸ್ಸೇಚ ಪಠಮಆಸಾಳಿಮಾಸಸ್ಸ ಜುಣ್ಹಪಕ್ಖಚುದ್ದಸಮಿಯಂ ಉಪಸಮ್ಪದಭೂಮಿಂ ಪತ್ತೋ.

ತಸ್ಸ ರಞ್ಞೋ ಕಾಲೇ ಕಲಿಯುಗೇ ನವನವುತಾಧಿಕೇ ವಸ್ಸಸತೇ ಸಹಸ್ಸೇಚ ಸಮ್ಪತ್ತೇ ಸೀಹಳದೀಪತೋ ಪಞ್ಞಾತಿಸ್ಸೋ ನಾಮ ಥೇರೋ ಸದ್ಧಿಂ ಸುನನ್ದೇನ ನಾಮ ಭಿಕ್ಖುನಾ ಇನ್ದಸಾರೇನ ನಾಮ ಸಾಮಣೇರೇನ ಏಕೇನ ಉಪಾಸಕೇನ ಏಕೇನ ದಾರಕೇನಚ ಅಮರಪುರಂ ನಾಮ ನಗರಂ ಸಮ್ಪತ್ತೋ. ಅಥ ಸಙ್ಘರಾಜಾ ತೇಸಂ ಪಚ್ಚಯಾನುಗ್ಗಹೇನ ಧಮ್ಮಾನುಗ್ಗಹೇಚ ಅನುಗ್ಗಹೇಸಿ. ತೇಸು ಅಪರಭಾಗೇ ಕಲಿಯುಗೇ ದ್ವಿವಸ್ಸಾಧಿಕೇ ದ್ವಿಸತೇ ವಸ್ಸಸಹಸ್ಸೇಚ ಸಮ್ಪತ್ತೇ ಪಞ್ಞಾತಿಸ್ಸತ್ಥೇರೋ ಜರರೋಗೇನ ಅಭಿಭೂತತ್ತಾ ಸಙ್ಖಾರಧಮ್ಮಾನಂ ಸಭಾವಂ ಅನತಿವತ್ತತ್ತಾ ಕಾಲಮಕಾಸಿ. ತಸ್ಸ ಪುನ ಸಿಕ್ಖಂ ಗಣ್ಹಿಸ್ಸಾಮೀತಿ ಪರಿವಿತಕ್ಕೋ ಮತ್ಥಕಂ ಅಪ್ಪತ್ತೋ ಹುತ್ವಾ ವಿನಸ್ಸಯಿ. ತೇನಾಹಭಗವಾ, –

ಅಚಿನ್ತಿತಮ್ಪಿ ¶ ಭವತಿ, ಚಿನ್ತಿ ತಮ್ಪಿ ವಿನಸ್ಸತಿ;

ನ ಹಿ ಚಿನ್ತಾಮಯಾ ಭೋಗಾ, ಇತ್ಥಿಯಾ ಪುರಿಸಸ್ಸ ವಾತಿ.

ಇಮಸ್ಮಿಂ ಪನ ಲೋಕೇ ಪಣ್ಡಿತೋ ಪುಞ್ಞಂ ಕತ್ತುಕಾಮೋ ಅಭಿತ್ಥರೇವ ಕರೇಯ್ಯ. ಕೋ ನಾಮ ಜಞ್ಞಾ ಅಜ್ಜೇ ವಾ ಸುವೇ ವಾ ಪರಸುವೇ ವಾ ಮರಣಂ ಭವಿಸ್ಸಭೀತಿ. ತೇನಾಹ ಭಗವಾ, –

ಅಭಿತ್ಥರೇಥ ಕಲ್ಯಾಣೇ, ಪಾಪಾ ಚಿತ್ತಂ ನಿವಾರಯೇ;

ದನ್ದಞ್ಹಿ ಕರತೋ ಪುಞ್ಞಂ, ಪಾಪಸ್ಮಿಂ ರಮತೀ ಮನೋತಿ.

ಅಥ ಮಹಾರಾಜಾ ತಸ್ಸ ಸರೀರಝಾಪನಕಿಚ್ಚಂ ಬಹೂಹಿ ಸಾಧುಕೀಳನಸಭಾಯೇಹಿ ಅಕಾಸಿ. ತತೋ ಪಚ್ಛಾ ಸುನನ್ದಸ್ಸ ನಾಮ ಭಿಕ್ಖುಸ್ಸ ಪುನ ಸಿಕ್ಖಂ ಅದಾಸಿ. ಸಾಮಣೇರಂ ಪನ ಉಪಸಮ್ಪದಭೂಮಿಯಂ ಪತಿಟ್ಠಾಪೇಸಿ. ದಾರಕಞ್ಚ ಸಾಮಣೇರಭೂಮಿಯನ್ತಿ.

ತೇ ಪನ ಮಹಾರಾಜಾ ಕಲಿಯುಗೇ ತಿವಸ್ಸಾಧಿಕೇ ದ್ವಿಸತೇ ಸಹಸ್ಸೇಚ ಸಮ್ಪತ್ತೇ ಮಾಘಮಾಸೇ ಬಹೂಹಿ ಪಚ್ಚಯೇಹಿ ಉಪತ್ಥಮ್ಭೇತ್ವಾ ತಾನಿತಾನಿ ಸಬ್ಬಾನಿ ಕಮ್ಮಾನಿ ತೀರೇತ್ವಾ ಕುಸಿಮನಗರಜೇಟ್ಠಸ್ಸ ಏಕಸ್ಸ ಅಮಚ್ಚಸ್ಸ ಭಾರಂ ಕತ್ವಾ ತಸ್ಸೇವ ಸಬ್ಬಾನಿ ಕಿಚ್ಚಾನಿ ನಿಯ್ಯಾದೇತ್ವಾ ಸೀಹಳದೀಪಂ ಪಹಿಣೀತಿ.

ಸಙ್ಘರಾಜಾಮಹಾಥೇರೋ ಪನ ಸಾಸನಸ್ಸ ಚಿರಟ್ಠಿತತ್ಥಾಯ ಸೋತಾರಾನಂ ಸುಖಪ್ಪಟಿಬೋಧನತ್ಥಾಯ ನಾನಾಗನ್ಥೇಹಿ ಪಾಠಂ ವಿಸೋಧೇತ್ವಾ ಸದ್ಧಮ್ಮಪ್ಪಜ್ಜೋತಿಕಾಯ ನಾಮ ಮಹಾನಿದ್ದೇಸಟ್ಠಕಥಾಯ ಅತ್ಥಯೋಜನಂ ಮರಮ್ಮಭಾಸಾಯ ಅಕಾಸಿ. ಬಹೂನಂ ಸಿಸ್ಸಾನಂ ಪರಿಯತ್ತಿವಾಚನವಸೇನ ಜಿನಸಾಸನಸ್ಸ ಅನುಗ್ಗಹಂ ಅಕಾಸೀತಿ.

ಅಪರಭಾಗೇ ಕಲಿಯುಗೇ ಅಟ್ಠವಸ್ಸಾಧಿಕೇ ದ್ವಿಸಕೇ ಸಹಸ್ಸೇಚ ಸಮ್ಪತ್ತೇ ಮಿಗಸಿರಮಾಸಸ್ಸ ಜುಣ್ಹಪಕ್ಖಅಟ್ಠಮಿಯಂ ತಸ್ಸ ಪುತ್ತೋ ಸೀರಿಪವರಾದಿತ್ಯವಿಜಯಾನನ್ತಯಸಮಹಾಧಮ್ಮರಾಜಾಧಿರಾಜಾ ನಾಮ ರಜ್ಜಂ ಕಾರೇಸಿ. ತದಾ ಸೂರಿಯವಂಸಾಭಿಸಿರಿಪವರಾಲಙ್ಕಾರಧಮ್ಮಸೇನಾಪತಿಮಹಾಧಮ್ಮರಾಜಾಧಿರಾಜಗುರು- ಮಹಾಥೇರಸ್ಸ ಸಿಸ್ಸಂ ಪಞ್ಞಾಜೋತಾಭಿಧಜಮಹಾಧಮ್ಮರಾಜಾಧಿರಾಜಗುರುತ್ಥೇರಂ ¶ ಸಙ್ಘರಾಜಟ್ಠಾನೇ ಠಪೇಸಿ.

ಸೋಪಿ ಸೀಲವಾ ಪರಿಯತ್ತಿಕೋವಿದೋ ಸಿಕ್ಖಾಕಾಮೋ ಲಜ್ಜೀಪೇಸಲೋ. ಅಙ್ಗುತ್ತರನಿಕಾಯಪಾಳಿಯಾ ತದಟ್ಠಕಥಾಯಚ ಅತ್ಥ ಯೋಜನಂ ಮರಮ್ಮಭಾಸಾಯ ಅಕಾಸಿ.

ತಸ್ಸ ರಞ್ಞೋ ಕಾಲೇ ಞೇಯ್ಯಧಮ್ಮಾಭಿವಂಸಸಿರಿಪವರಾಲಙ್ಕಾರಧಮ್ಮಸೇನಾಪತಿಮಹಾಧಮ್ಮರಾಜಾಧಿರಾಜ- ಗುರುತ್ಥೇರೋ ಸದ್ಧಮ್ಮವಿಲಾಸಿನಿಯಾ ನಾಮ ಪಟಿಸಮ್ಭಿದಾಮಗ್ಗಟ್ಠಕಥಾಯ ಅತ್ಥಯೋಜನಂ ಮರಮ್ಮಭಾಸಾಯ ಅಕಾಸಿ.

ಮಣಿಜೋತಸದ್ಧಮ್ಮಾಲಙ್ಕಾರಮಹಾಧಮ್ಮರಾಜಾಧಿರಾಜಗುರುತ್ಥೇರೋಸಂಯುತ್ತ- ನಿಕಾಯಪಾಳಿಯಾ ತದಟ್ಠಕಥಾಯಚ ಅತ್ಥಯೋಜನಂ ಮರಮ್ಮಭಾಸಾಯ ಅಕಾಸಿ.

ಮೇಧಾಭಿವಂಸಸದ್ಧಮ್ಮಧಜಮಹಾಧಮ್ಮರಾಜಾಧಿರಾಜಗುರುತ್ಥೇರೋ ದೀಘನಿಕಾಯಪಾಳಿಯಾ ತದಟ್ಠಕಥಾಯಚ ಅತ್ಥಯೋಜನಂ ಮರಮ್ಮಭಾಸಾಯ ಅಕಾಸಿ.

ಞೇಯ್ಯಧಮ್ಮಾಭಿವಂಸಸಿರಿಪವರಾಲಙ್ಕಾರಧಮ್ಮಸೇನಾಪತಿಮಹಾ ಧಮ್ಮರಾಜಾಧಿರಾಜಗುರುತ್ಥೇರಸ್ಸ ಸಿಸ್ಸೋ ಉಪಸಮ್ಪದಾವಸೇನ ಪಞ್ಚವಸ್ಸಿಕೋ ಪಞ್ಞಾಸಾಮಿ ನಾಮಾಹಂ ಸದ್ದತ್ಥಭೇದಚಿನ್ತಾನಾಮಕಸ್ಸಗನ್ಥಸ್ಸ ಗಣ್ಠಿಪದತ್ಥವಣ್ಣನಂ ಮರಮ್ಮಭಾಸಾಯ ಅಕಾಸಿಂ. ದಸವಸ್ಸಿಕಕಾಲೇ ಪನ ಅಭಿಧಾನಪ್ಪದೀಪಿಕಾಸಂವಣ್ಣನಾಯ ಅತ್ಥಯೋಜನಂ ಮರಮ್ಮಭಾಸಾಯ ಅಕಾಸಿಂ. ತಸ್ಸಾಚ ಪಾಠಂ ಬಹೂಹಿ ಗನ್ಥೇಹಿ ಸಂಸದ್ದಿತ್ವಾ ವಿಸೋಧೇಸಿನ್ತಿ.

ಅಪರಭಾಗೇ ಸಕ್ಕರಾಜೇ ಚುದ್ದಸಾಧಿಕೇ ದ್ವಿಸತೇ ಸಹಸ್ಸೇಚ ಸಮ್ಪತ್ತೇ ಅಯಂ ಅಮ್ಹಾಕಂ ಧಮ್ಮಿಕೋ ರಾಜಾ ಅನೇಕಸತಜಾತೀಸು ಉಪಚಿತಪುಞ್ಞಾನುಭಾವೇನ ಜಿನಸಾಸನಸ್ಸ ಪಗ್ಗಣ್ಹನತ್ಥಾಯ ಸಮ್ಮಾದೇವಲೋಕಪಾಲೇಹಿ ಉಯ್ಯೋಜಿಯನೋವಿಯರಜ್ಜಸಮ್ಪತ್ತಿಂ ಪಟಿಲಭಿ. ದಸಬಲಸ್ಸಸಾಸನಂ ಪಗ್ಗಣ್ಹಿತುಕಾಮಸ್ಸ ಧಮ್ಮರಾಜಸ್ಸ ಮನೋರಥೋ ಮತ್ಥಕಂ ಪತ್ತೋ ಅಹೋಸಿ. ಮರಿಯಾದಂ ಭಿನ್ದಿತ್ವಾ ದಿನ್ನಕತಮಗ್ಗಂವಿಯ ಉದಕಂ ಲದ್ಧೋಕಾಸತಾಯ ಸದ್ಧಾ ಮಹೋಘೋ ¶ ಅವತ್ಥರಿತ್ವಾ ತಿಟ್ಠತಿ. ಚತ್ತಾರಿಚ ವಸ್ಸಾನಿ ಅತಿಕ್ಕಮಿತ್ವಾ ಬೇಸಾಖಮಾಸೇ ಪಞ್ಚಕಕುಧಭಣ್ಡಾದೀಹಿ ಅನೇಕೇಹಿ ರಾಜಭೋಗ್ಗಭಣ್ಡೇಹಿ ಪರಿವಾರೇತ್ವಾ ಉದುಮ್ಬರಭದ್ದಪಿಟ್ಠೇ ಸದ್ಧಿಂ ಮಹೇಸಿಯಾ ಅಭಿಸೇಕಂ ಪತ್ತೋ. ತೇನಾವೋಚುಮ್ಹಾ ನಾಗರಾಜುಪ್ಪತ್ತಿಕಥಾಯಂ,-

ಮಹಾಪುಞ್ಞೋವ ರಾಜಾಯಂ, ಕಟ್ಠಟಘೇವ ಆಗತೇ;

ಸಕ್ಕರಾಜೇ ಹಿ ಸಮ್ಪತ್ತಿಂ, ಪತ್ವಾ ದಾನೇ ರತೋ ವತೇ.

ತದಾ ಚತ್ತಾರಿ ವಸ್ಸಾನಿ, ಅತಿಕ್ಕಮಿತ್ವಾ ವಿಸಾಧಿಕೇ;

ಸದ್ಧಿಂ ಮಹೇಸಿಯಾ ಸೇಕಂ, ಪತ್ತೋ ಹುತ್ವಾ ಮಹಾತಲೇ.

ಜಿನಚಕ್ಕಞ್ಚ ಜೋತೇಸಿ, ಮಹಾಸೋಕಾದಯೋ ಯಥಾ;

ಅಲಜ್ಜಿನೋಚ ನಿಗ್ಗಯ್ಹ, ಪಗ್ಗಹೇತ್ವಾನ ಲಜ್ಜಿನೋ.

ರಟ್ಠೇಚ ದಾನಸೀಲೇಸು, ಭಾವನಾಯಾಭಿಯುಞ್ಚಯೇ;

ತದಾ ಯಸ್ಮಾ ಅಲಜ್ಜಿನೋ ನಿಗ್ಗಹಿತಬ್ಬಪುಗ್ಗಲೇ ಅವೀಚಿನರಕೇ ನಿಕ್ಖಿಪನ್ತೋವಿಯ ನಿಗ್ಗಹಕಮ್ಮಂ ಅಕಾಸಿ, ತಸ್ಮಾ ತೇ ಅಲದ್ಧೋಕಾಸಾ ನಿಲೀಯನ್ತಿ, ಯಥಾ ಅರುಣುಗ್ಗಮನಕಾಲೇ ಕೋಸಿಯಾತಿ. ತೇನಾವೋಚುಮ್ಹಾ ನಾಗರಾಜುಪ್ಪತ್ತಿಕಥಾಯಂ,-

ತದಾ ಪನ ಜಿನಚಕ್ಕಂ, ನಭೇ ಚನ್ದೋವ ಪಾಕಟಂ;

ಅಲಜ್ಜಿನೋ ನಿಲೀಯನ್ತಿ, ಅರುಣುಗ್ಗೇವ ಕೋಸಿಯಾತಿ.

ಯಸ್ಮಾಚ ಲಜ್ಜಿನೋ ಪಗ್ಗಹಿತಬ್ಬಪುಗ್ಗಲೇ ಭವಗ್ಗೇಉಕ್ಖಿಪನ್ತೋವಿಯ ಪಗ್ಗಹಕಮ್ಮಂ ಕರೋತಿ, ತಸ್ಮಾ ತೇ ಲದ್ಧೋಕಾಸಾ ಉಟ್ಠಿತಸೀಸಾ ನಿರಾಸಙ್ಕಾ ಹುತ್ವಾ ತಿಟ್ಠನ್ತಿ, ಯಥಾ ಚನ್ದಿಮಸೂರಿಯಾಲೋಕಾನಂ ಪಟಿಲದ್ಧಕಾಲೇ ಆದಿಕಪ್ಪಿಕಾತಿ. ತೇನಾವೋಚುಮ್ಹಾ, –

ತದಾಪಿಚ ¶ ಜಿನಚಕ್ಕಂ, ಖೇ ಭಾಣುಮಾವ ಪಾಕಟಂ;

ಲಜ್ಜಿನೋಪಿ ಉಟ್ಠಹನ್ತಿ, ಓಭಾಲದ್ಧೇವ ಕಪ್ಪಿಕಾತಿ.

ತೇಪಿಟಕಮ್ಪಿ ನವಙ್ಗಂ ಬುದ್ಧವಚನಂ ಚಿರಟ್ಠಿತಿಕಂ ಕತ್ತುಕಾಮೋ ಪರಿಯತ್ತಿವಿಸ್ಸರದೇಹಿ ಮಹಾಥೇರೇಹಿ ವಿಸೋಧಾಪೇತ್ವಾ ಲೇಖಕಾನಂ ಭತಿಂ ದತ್ವಾ ಕಣ್ಠಜಮುದ್ಧಜಾದಿವಿಧಾನಂ ಸಿಥಿಲಧನಿತಾದಿವಿಧಾನಞ್ಚ ಪುನಪ್ಪುನಂ ವಿಚಾರೇತ್ವಾ ಅನ್ತಮಸೋ ಪರಿಚ್ಛೇದಲೇಖಮತ್ತಮ್ಪಿ ಅವಿರಾಧೇತ್ವಾ ಅನ್ತೇಪುರಂ ಪವಿಸೇತ್ವಾ ಸುವಣ್ಣಮಯೇಸು ಲೋಹಮಯೇಸುಚ ಪೋತ್ಥಕೇಸು ಲಿಖಾಪೇಸಿ. ಞಾಣಥಾಮಸಮ್ಪನ್ನೇಚ ಭಿಕ್ಖೂ ವಿಚಿನೇತ್ವಾ ಯಥಾಬಲಂ ವಿನಯಪಿಟಕಂ ವಿಸುಂ ವಿಸುಂ ಧಾರೇತಿ ವಾಚುಗ್ಗತಂ ಕಾರಾಪೇತಿ. ಅಗ್ಗಮಹೇಸಿಂ ಆದಿಂ ಕತ್ವಾ ಸಕಲ ಓರೋಧಾದಯೋ ಬಹೂ ರಾಜಸೇವಕಾ ಅಮಚ್ಚಾದಯೋ ನಾಗರಿಕೇಚ ಯಥಾಬಲಂ ಸುತ್ತನ್ತಪಿಟಕಂ ಅಭಿಧಮ್ಮಪಿಟಕಞ್ಚ ವಿಸುಂ ವಿಸುಂ ಏಕೇಕಸುತ್ತಮಾತಿಕಾಪದಭಾಜನೀಚಿತ್ತವಾರಾದಿವಸೇನ ವಿಭಾಜೇತ್ವಾ ಧಾರೇತಿ ವಾಚುಗ್ಗತಂ ಕಾರಾಪೇತಿ. ಸಯಞ್ಚ ಅನತ್ತಲಕ್ಖಣಾದಿಕಂ ಅನೇಕವಿಧಂ ಸುತ್ತಂ ದೇವಸಿಕಂ ಸಜ್ಝಾಯಂ ಕರೋತಿ. ಜಿನಸಾಸನಸ್ಸ ಚಿರಟ್ಠಿತತ್ಥಾಯಸಕಲವಿಜಿತೇಚ ಅರಞ್ಞವಾಸೀನಂ ಭಿಕ್ಖೂನಂ ಅಸ್ಸಮಸ್ಸ ಸಮನ್ತತೋ ಪಞ್ಚಧನುಸತಪ್ಪಮಾಣೇ ಠಾನೇಥಲದಕಚರಾನಂ ಸಬ್ಬೇಸಂ ಸತ್ತಾನಂ ಅಭಯಂ ಅದಾಸಿ. ಪರಿಯತ್ತಿ ವಿಸಾರದಾನಞ್ಚ ಥೇರಾನುಥೇರಾನಂ ಮಾತಾಪಿತಾದಯೋ ಞಾತಕೇ ಸಬ್ಬರಾಜಕಿಚ್ಚತೋ ಬಲಿಕಮ್ಮತೋಚ ಮೋಚಾಪೇತ್ವಾ ಯಥಾಸುಖಂ ವಸಾಪೇತಿ. ಏಕಾಹೇನೇವಾಪಿ ಸಹಸ್ಸಮತ್ತೇ ಕುಲಪುತ್ತೇ ಪಬ್ಬಜೂಪಸಮ್ಪದಭೂಮೀಸು ಪತಿಟ್ಠಾಪೇತ್ವಾ ಸಾಸನಂ ಪಗ್ಗಣ್ಹಿ. ಅಞ್ಞಾನಿಪಿ ಬಹೂನಿ ಪುಞ್ಞಕಮ್ಮಾನಿ ಕರೋತಿ. ಕತ್ವಾಚ ವಿವಟ್ಟಮೇವ ಪತ್ಥೇತಿ, ನೋ ವಟ್ಟಂ. ಅಞ್ಞೇಚ ಓರೋಧಾದಯೋ ತುಮ್ಹೇ ಯಾನಿ ಕಾನಿಚಿ ಪುಞ್ಞಕಮ್ಮಾನಿ ಕತ್ವಾ ವಿವಟ್ಟಮೇವ ಪತ್ಥೇತ, ಮಾ ವಟ್ಟನ್ತಿ ಅಭಿಣ್ಹಂ ಓವದತಿ. ಅನಿಚ್ಚಲಕ್ಖಣಾದಿಸಂಯುತ್ತಾಯ ಧಮ್ಮಕಥಾಯ ನಿಚ್ಚಂ ಓವದತಿ. ಸಯಮ್ಪಿ ಸಮಥವಿಪಸ್ಸನಾಸು ನಿಚ್ಚಾರದ್ಧಂ ಅಕಾಸಿ. ರಾಜೂನಂ ಪನ ರಟ್ಠಸಾಮಿಕಾನಂ ಧಮ್ಮತಾಯ ಕಿಚ್ಚಬಾಹುಲ್ಲತಾಯ ಕದಾಚಿ ಕದಾಚಿ ಓಕಾಸಂ ನ ಲಭತಿ ಕಮ್ಮಟ್ಠಾನಮನುಯುಞ್ಜಿತುಂ, ಏವಮ್ಪಿ ಸಮಾನೋ ಸರೀರಮಲಪರಿಜಗ್ಗನಕಾಲೇಪಿ ಕಮ್ಮಟ್ಠಾನಮನುಯುಞ್ಜತಿಯೇವ, ನ ಮೋಘವಸೇನ ಕಾಲಂ ಖೇಪೇತಿ. ಲೋಕೇ ಹಿ ಅಮಙ್ಗಲಸಮ್ಮತಾನಿಪಿ ಮನುಸ್ಸಸೀಸಕಪಾಲಟ್ಠಿಆದೀನಿ ಸುಸಾಸನತೋ ಆನೇತ್ವಾ ದನ್ತಕಟ್ಠಾದೀನಿ ವಾ ತಂಸದಿಸಾನಿ ಕಾರಾಪೇತ್ವಾ ಅತ್ತನೋ ಸಮೀಪೇ ಠಪೇತ್ವಾ ಅಟ್ಠಿಕಾದಿಭಾವನಾಮಯಪುಞ್ಞಂ ವಿಚಿನಾತಿ.

ತದಾ ಪನ ಅಮ್ಹಾಕಂ ಆಚರಿಯವರಂ ಪರಿಯತ್ತಿವಿಸಾರದಂ ತಿಕ್ಖ ಜವನಗಚ್ಛಿರಾದಿಞಾಣೋಪೇತಂ ವಿಚಿತ್ರಧಮ್ಮದೇಸನಾಕಥಂ ಸಕಲ ಮರಮ್ಮಿಕಭಿಕ್ಖೂನಂ ಓನಮಿತಟ್ಠಾನಭೂತಂ ವುದ್ಧಾಪಚಾಯಿಂ ರೂಪಸೋಭಗ್ಗಪತ್ತಂ ಯುತ್ತವಾದಿಕಂ ಞೇಯ್ಯಧಮ್ಮಾಭಿಮುನಿವರಞಾಣಕಿತ್ತಿಸಿರಿಧಜಧಮ್ಮಸೇನಾಪತಿ- ಮಹಾಧಮ್ಮರಾಜಾಧಿರಾಜಗುರೂತಿ ತತಿಯಂ ಲದ್ಧಲಞ್ಛಂ ತಂ ಭಿಕ್ಖುಸಙ್ಘಾನಂ ಸಕಲರಟ್ಠವಾಸೀನಂ ಪಾಮೋಕ್ಖಭಾವೇ ಪತಿಟ್ಠಾಪೇಸಿ ಅಸೋಕಮಹಾರಾಜಾವಿಯ ಮಹಾಮೋಗ್ಗಲಿಪುತ್ತತಿಸ್ಸತ್ಥೇರಂ. ತೇನಾವೋಚುಮ್ಹಾ ನಾಗರಾಜುಪ್ಪತ್ತಿಕಥಾಯಂ,–

ತದಾಚ ಭಿಕ್ಖುಸಙ್ಘಾನಂ, ಥೇರಂ ಪಾಮೋಕ್ಖಭಾವಕೇ;

ಞೇಯ್ಯಾದಿಲದ್ಧಲಞ್ಛಂ ತಂ, ಪತಿಟ್ಠಾಪೇಸಿ ಸಾಧುಕನ್ತಿ.

ತದಾಚ ಅಮ್ಹಾಕಂ ಧಮ್ಮಿಕಮಹಾರಾಜಾ ಸಕ್ಕರಾಜೇ ಏಕೂನವೀಸತಾಧಿಕೇ ಸಹಸ್ಸೇ ದ್ವಿಸತೇಚ ಸಮ್ಪತ್ತೇ ಮನ್ತಲಾಖ್ಯಾತಾಚಲಸ್ಸ ಸಮೀಪೇ ಸುಭೂಮಿಲಕ್ಖಣೋಪೇತಂ ಏಕನಿಪಾತತಿತ್ಥಮಿವ ಬಹುಜನನಯನವಿಹಙ್ಗಾನಂ ಸಬ್ಬನಗರಾಲಙ್ಕಾರೇಹಿ ಪರಿಕ್ಖಿತ್ತಂ ಮನುಸ್ಸಾನಂ ಚಕ್ಖುಲೋಲತಾಜನಕಂ ನಾನಾರತನೇಹಿ ಸಮ್ಪುಣ್ಣಂ ನಾನಾ ವೇರಜ್ಜವಾಣಿಜಾನಂ ಪುಟಭೇದನಟ್ಠಾನಭೂತಂ ರತನಪುಣ್ಣನಾಮಕಂ ಮಹಾರಾಜಟ್ಠಾನಿಕಂ ಮಾಪೇಸಿ, ಮನ್ಧಾತುವಿಯ ರಾಜಗಹಂ, ಸುದಸ್ಸನೋ ವಿಯಚ ಕುಸಾವತೀನಗರನ್ತಿ. ತೇನಾವೋಚುಮ್ಹಾ ನಾಗರಾಜುಪ್ಪತ್ತಿಕಥಾಯಂ,–

ತದಾ ಕಟ್ಠಟಝೇ ಸಮ್ಪತ್ತೇ, ಮನ್ತಲಾಖ್ಯಾಚಲಸ್ಸಚ;

ಏರಾವತೀತಿ ನಾಮಾಯ, ಮಾಪೇಸಿ ಸಮೀಪೇ ನಗರಂ.

ಸುಭೂಮಿಲಕ್ಖಣೋಪೇತಂ ¶ , ರತನಪುಣ್ಣನಾಮಕಂ;

ರಾಜಗಹಂವ ಮನ್ಧಾತು, ಅಕಿರಮ್ಮಣಿಯಂ ಸುಭನ್ತಿ.

ಸೇಯ್ಯಥಾಪಿ ನಾಮ ಲೋಕೇ ಆಲೋಕತ್ಥಿಕಾನಂ ಸತ್ತಾನಂ ಪೀತಿಸೋಮನಸ್ಸಂ ಉಪ್ಪಾದೇನ್ತೋ ಉಪಕರೋನ್ತೋ ಉದಯಪಬ್ಬತತೋ ಸಹಸ್ಸರಂಸೀ ದಿವಾಕರೋ ಉಟ್ಠಹತಿ, ಏವಮೇವಂ ಮರಮ್ಮರಟ್ಠಿಕಾನಂ ಲಜ್ಜೀಪೇಸಲಾನಂ ಸಿಕ್ಖಾಕಾಮಾನಂ ಭಿಕ್ಖೂನಂ ಗಿಹೀನಞ್ಚ ಪೀತಿಸೋಮನಸ್ಸಂ ಉಪ್ಪಾದೇನ್ತೋ ಉಪಕಾರೋನ್ತೋ ಅಯಂ ಧಮ್ಮಿಕೋರಾಜಾ ಇಮಸ್ಮಿಂ ಮರಮ್ಮರಟ್ಠೇ ಉಪ್ಪಜ್ಜತಿ.

ಇಮಞ್ಚ ಧಮ್ಮಿಕರಾಜಾನಂ ನಿಸ್ಸಾಯ ಮರಮ್ಮರಟ್ಠೇ ಸಮ್ಮಾಸಮ್ಬುದ್ಧಸ್ಸ ಸಾಸನಂ ಅತಿವಿಯ ಜೋತೇತಿ. ವುಡ್ಢಿಂ ವಿರೂಳಿಂ ವೇಪುಲ್ಲಂ ಆಪಜ್ಜತಿ.

ಸಾಸನಞ್ಚ ನಾಮೇತಂ ರಾಜಾನಂ ನಿಸ್ಸಾಯ ತಿಟ್ಠತೀತಿ. ಅಯಂ ಧಮ್ಮಿಕರಾಜಾಯೇವ ನ ಸಾಸನಸ್ಸೂಪಕಾರೋ ಧಮ್ಮಚಾರೀ ಧಮ್ಮಮಾನೀ, ಅಪಿಚ ಖೋ ಧಮ್ಮಿಕರಾಜಾನಂ ನಿಸ್ಸಿತಾಪಿ ಸಬ್ಬರಟ್ಠವಾಸಿಕಾ ಸಾಸನಸ್ಸೂಪಕಾರಾಯೇವ ಧಮ್ಮಚಾರಿನೋ ಧಮ್ಮಮಾನಿನೋ ರಾಜಾನುಗತಾ ಹುತ್ವಾ. ತೇನೇವಾಹ ಮಹಾಬೋಧಿಜಾತಕಾದೀಸು, –

ಗವಞ್ಚೇ ತರಮಾನಾನಂ, ಉಜುಂ ಗಚ್ಛತಿ ಪುಙ್ಗವೋ;

ಸಬ್ಬಾ ಗಾವೀ ಉಜುಂ ಯನ್ತಿ, ನೇತ್ತೇ ಉಜುಂ ಗತೇ ಸತಿ.

ಏವಮೇವ ಮನುಸ್ಸೇಸು, ಯೋ ಹೋತಿ ಸೇಟ್ಠಸಮ್ಮತೋ;

ಸೋ ಚೇಪಿ ಧಮ್ಮಂ ಚರತಿ, ಪಗೇವ ಇತರಾ ಪಜಾ;

ಸಬ್ಬರಟ್ಠಂ ಸುಖಂ ಸೇತಿ, ರಾಜಾ ಚೇ ಹೋತಿ ಧಮ್ಮಿಕೋತಿ.

ವಿಸೇಸತೋ ಪನ ದುತಿಯಂ ಅಮರಪುರಂ ಮಾಪೇನ್ತಸ್ಸ ಮಹಾಧಮ್ಮರಞ್ಞೋ ಅಗ್ಗಮಹೇಸಿಯಾ ಅಜ್ಜವಮದ್ದವಸೋಹಜ್ಜಾದಿಗುಣಯುತ್ತಾಯ ಧಿತಾ ಅಮ್ಹಾಕಂ ರಞ್ಞೋ ಅಗ್ಗಮಹೇಸೀ ಸಮ್ಮಾಚಾರಿನೀ ಪತಿಬ್ಬತಾ. ಸಬ್ಬನಾರೀನಂ ಅಗ್ಗಭಾವಂ ಪತ್ತಾಪಿ ಸಮಾನಾ ಕಾಮಗುಣಸಙ್ಖಾತೇನ ಸುರಾಮದೇನ ಅಪ್ಪಮಜ್ಜಿತ್ವಾ ಪುಞ್ಞಕಮ್ಮೇಸು ಅಪ್ಪಮಾದವಸೇನ ನಿಚ್ಚಾರದ್ಧವೀರಿಯಾ ಹೋತಿ. ನಿಚ್ಚಂ ಪರಿಯತ್ತಿಯಾ ಉಗ್ಗಹಣಂ ಅಕಾಸಿ. ವೇದಪಾರಗೂಚ ¶ ಅಹೋಸಿ. ಸಮ್ಮಾಸಮ್ಬುದ್ಧಸಾಸನೇ ಅತಿವಿಯ ಪಸನ್ನಾ ಅಞ್ಞಾಪಿ ಓರೋಧಾದಯೋ ಮಹಾಧಮ್ಮರಞ್ಞೋ ಓವಾದೇ ಠತ್ವಾ ಧಮ್ಮಂ ಚರಿಂಸು. ಸಾಸನಂ ಪಸೀದಿಂಸುಯೇವ. ಉಪರಾಜಾಪಿ ಮಹಾಧಮ್ಮರಾಜಸ್ಸ ಏಕಮಾತಾಪೀತಿಕೋ ಮಹಾಧಮ್ಮರಾಜಿಚ್ಛಾಯ ಅವಿರೋಧೇತ್ವಾಯೇವ ಸಕಲರಟ್ಠವಾಸೀನಂ ಗಿಹೀನಂ ಭಿಕ್ಖೂನಞ್ಚ ಅತ್ಥಹಿತಮಾವಹತಿ, ಸೇಯ್ಯಥಾಪಿ ಚಕ್ಕವತ್ತಿರಞ್ಞೋ ಸನ್ತಿಕೇ ಜೇಟ್ಠಪುತ್ತೋ ಥಾಮಜವಸಮ್ಪನ್ನೋ ಅತಿಸೂರೋ ಉಟ್ಠಾನವೀರಿಯೋ. ಅಞ್ಞೇಪಿ ಅಮಚ್ಚಾ ಅನೇಕಸಹಸ್ಸಪ್ಪಮಾಣಾ ಮಹಾಧಮ್ಮರಞ್ಞಾ ಲದ್ಧೇಸು ಲದ್ಧೇಸು ಠಾನನ್ತರೇಸು ಠಿತಾ ಮಹಾಧಮ್ಮರಞ್ಞೋ ತಂ ತಂ ಕಿಚ್ಚಮಾವಹನ್ತಿ ಪುಞ್ಞಕಮ್ಮೇಸು ಅಭಿರಮನ್ತಿ. ಸಕಲರಟ್ಠವಾಸಿನೋಚ ಮನುಸ್ಸಾ ದಾನಸೀಲಭಾವನಾಸುಯೇವ ಚಿತ್ತಂ ಠಪೇನ್ತಿ. ಭಿಕ್ಖೂಚ ಸಙ್ಘರಾಜಪ್ಪಮುಖಾದಯೋ ಥೇರನವಮಜ್ಝಿಮಾ ಗನ್ಥಧುರವಿಪಸ್ಸನಾಧುರೇಸು ಅಭಿಯುಞ್ಜನ್ತಿ.

ಏವಮೇಕಸ್ಸ ಸಾಧುಜ್ಜನಸ್ಸ ಗುಣಂ ಮಹನ್ತೇನ ಉಸ್ಸಾಹೇನ ಕಥೇನ್ತೋಪಿ ದುಕ್ಕರಂತಾವ ನಿಟ್ಠಂ ಪಾಪೇತುಂ, ಭಗವತೋ ಪನ ತಿಲೋಕಗ್ಗಸ್ಸ ಅನೇಕಸಹಸ್ಸಪಾರಮಿತಾನುಭಾವೇನ ಪವತ್ತಂ ಗುಣಂ ಕೋ ನಾಮ ಪುಗ್ಗಲೋ ಸಕ್ಖಿಸ್ಸತಿ ನಿಟ್ಠಂ ಪಾಪೇತ್ವಾ ಕಥೇತುನ್ತಿ. ಏವಂ ಮಹಾಧಮ್ಮರಾಜಸ್ಸಚ ಅಗ್ಗಮಹೇಸಿಯಾಚೇವ ಉಪರಾಜಾದೀನಞ್ಚ ಗುಣೇ ವಿಸ್ಸಟ್ಠೇನ ವಿತ್ಥಾರತೋ ಕಥಿಯಮಾನೇ ಇಮಿಸ್ಸಾ ಸಾಸನವಂಸಪ್ಪದೀಪಿಕಾಯ ಅನೇಕಸತಭಾಣವಾರಮತ್ತಮ್ಪಿ ಪತ್ವಾ ಪರಿಯನ್ತೋ ನ ಪಞ್ಞಾಯೇಯ್ಯ, ಯಸ್ಮಾಚ ಅತಿಪ್ಪಪಞ್ಚಾ ಭವೇಯ್ಯ, ತಸ್ಮಾ ಸಙ್ಖೇಪೇನೇವಾಯಂ ಕಥಿತಾ ಸಾಧುಜ್ಜನಾನಂ ಮಹಾಪುಞ್ಞಮಯಾಯ ಪೀತಿಯಾ ಅನುಮೋದನತ್ಥಾಯ. ಇದಞ್ಹಿ ಸುಣನ್ತೇಹಿ ಸಾಧುಜ್ಜನೇಹಿ ಅನುಮೋದಿತಬ್ಬಂ,- ಅಸುಕಸ್ಮಿಂ ಕಿರ ಕಾಲೇ ಅಸುಕಸ್ಮಿಂ ರಟ್ಠೇ ಅಸುಕೋ ನಾಮ ರಾಜಾ ಸಾಸನಂ ಪಗ್ಗಣ್ಹಿತ್ವಾ ವುಡ್ಢಿಂ ವಿರೂಳಿಂ ವೇಪುಲ್ಲಮಾಪಜ್ಜಿ, ಸೇಯ್ಯಥಾಪಿ ನಾಮ ರುಕ್ಖೋ ಭೂಮೋದಕಾನಂ ನಿಸ್ಸಾಯ ವುಡ್ಢಿಂ ವಿರೂಳಿಂ ವೇಪುಲ್ಲಮಾಪಜ್ಜೀತಿ.

ಇಮಸ್ಸ ರಞ್ಞೋ ಕಾಲೇ ಞೇಯ್ಯಧಮ್ಮಾಭಿಮುನಿವರಞ್ಞಾಣಕಿತ್ತಿ ಸಿರಿಧಜಧಮ್ಮಸೇನಾಪತಿಮಹಾಧಮ್ಮರಾಜಾಧಿರಾಜಗುರು ನಾಮ ಸಙ್ಘರಾಜಾ ¶ ಮಹಾಥೇರೋ ರಞ್ಞಾ ಅಭಿಯಾಚಿತೋ ಸುರಾಜಮಗ್ಗದೀಪನಿಂ ನಾಮ ಗನ್ಥಂ ಅಕಾಸಿ. ಮಜ್ಝಿಮನಿಕಾಯಟ್ಠಕಥಾಯ ಅತ್ಥಂ ಸಿಸ್ಸಾನಂ ವಾಚೇತ್ವಾ ಯಥಾವಾಚಿತನಿಯಾಮೇನ ಅತ್ಥಯೋಜನಾನಯಂ ಪೋತ್ಥಕೇ ಆರೋಪಾಪೇಸಿ.

ಮೇಧಾಭಿವಂಸಸದ್ಧಮ್ಮಧಜಮಹಾಧಮ್ಮರಾಜಾಧಿರಾಜಗುರು ನಾಮ ಮಹಾಥೇರೋ ಜಾತಕಪಾಳಿಯಾ ಅತ್ಥಯೋಜನಾನಯಂ ಮರಮ್ಮಭಾಸಾಯ ಅಕಾಸಿ.

ಸಙ್ಘರಾಜಸ್ಸ ಸಿಸ್ಸೋ ಪಞ್ಞಾಸಾಮಿಸಿರಿಕವಿಧಜಮಹಾಧಮ್ಮರಾಜಾಧಿರಾಜಗುರೂತಿ ರಞ್ಞಾ ಲದ್ಧನಾಮಲಞ್ಛೋ ಸೋಯೇವಾಹಂ ಧಮ್ಮ ರಞ್ಞಾ ಅಗ್ಗಮಹೇಸಿಯಾಚ ಅಭಿಯಾಚಿತೋ ಸೀಲಕಥಂ ನಾಮ ಗನ್ಥಂ ಉಪಾಯಕಥಂ ನಾಮ ಗನ್ಥಞ್ಚ ಅಕಾಸಿಂ. ರಞ್ಞೋ ಆಚರಿಯಭೂತೇನ ದಿಸಾಪಾಮೋಕ್ಖೇನ ನಾಮ ಉಪಾಸಕೇನ ಅಭಿಯಾಚಿತೋ ಸೋಯೇವಾತಂ ಅಕ್ಖರವಿಸೋಧನಿಂ ನಾಮ ಗನ್ಥಂ ಆಪತ್ತಿವಿನಿಚ್ಛಯಂ ನಾಮ ಗನ್ಥಞ್ಚ. ತಥಾ ಸಙ್ಘರಞ್ಞಾ ಚೋದಿತೋ ಸೋಯೇ ವಾಹಂ ನಾಗರಾಜುಪ್ಪತಿಕಥಂ ವೋಹಾರತ್ಥಭೇದಞ್ಚ ವಿವಾದವಿನಿಚ್ಛಯಞ್ಚ ಅಕಾಸಿಂ. ತಥಾ ಪಞ್ಚಜಮ್ಬುಗಾಮಭೋಜಕೇನ ಲೇಖಕಾಮಚ್ಚೇನ ದ್ವೀಹಿಚ ಆರೋಚನಲೇಖಕಾಮಚ್ಚೇಹಿ ಅಭಿಯಾಚಿತೋ ಸೋ ಯೇವಾಹಂ ರಾಜಸೇವಕದೀಪನಿಂ ನಾಮ ಗನ್ಥಂ ಅಕಾಸಿಂ. ತಥಾ ದೀಘನಾವಾನಗರಭೋಜಕೇನ ಮಹಾಅಮಚ್ಚೇನ ಅಭಿಯಾಚಿತೋ ಸೋಯೇವಾಹಂ ನಿರಯಕಥಾದೀಪಕಂ ನಾಮ ಗನ್ಥಂ ಅಕಾಸಿಂ. ತಥಾ ಸಿಲಾಲೇಡ್ಡುಕನಾಮಕೇನ ಉಪಾಸಕೇನ ಅಭಿಯಾಚಿತೋ ಸೋಯೇವಾಹಂ ಉಪೋಸಥವಿನಿಚ್ಛಯಂ ನಾಮ ಗನ್ಥಂ ಅಕಾಸಿಂ. ತಥಾ ಬಹೂಹಿ ಸೋತುಜನೇಹಿ ಅಭಿಯಾಚಿತೋ ಸೋಯೇವಾಹಂ ಸದ್ದನೀತಿಯಾ ಸಂವಣ್ಣನಂ ಪಾಳಿಭಾಸಾಯ ಅಕಾಸಿನ್ತಿ.

ಏಕಸ್ಮಿಞ್ಚ ಸಮಯೇ ಕಲಿಯುಗೇ ವೀಸಾಧಿಕೇ ದ್ವಿಸತೇ ಸಹಸ್ಸೇಚ ಸಮ್ಪತ್ತೇ ರಞ್ಞೋ ಏತದಹೋಸಿ,- ಇದಾನಿ ಬುದ್ಧಸ್ಸ ಭಗವತೋ ಸಾಸನೇ ಕೇಸಞ್ಚಿ ಭಿಕ್ಖೂನಂ ಸಾಮಣೇರಾನಞ್ಚ ಕುಲದೂಸನಾದಿಅಸಾರುಪ್ಪಕಮ್ಮೇಹಿ ಉಪ್ಪಾದಿತಾ ಚತ್ತಾರೋ ಪಚ್ಚಯಾ ಬಹೂ ದಿಸ್ಸನ್ತಿ ¶ , ಕೇಚಿಪಿ ಅಲಜ್ಜೀ ಪುಗ್ಗಲಾ ಜಾತರೂಪಾದಿನಿಸ್ಸಗ್ಗಿಯವತ್ಥುಮ್ಪಿಸಾದಿಯನ್ತಿ, ಕೇಚಿಪಿ ವಿನಾ ಪಚ್ಚಯಂ ವಿಕಾಲೇ ತಮ್ಬುಲಂ ಖಾದನ್ತಿ, ಸನ್ನಿಧಿಞ್ಚ ಕತ್ವಾ ಧೂಮಾನಿಚ ಪಿವನ್ತಿ, ಅಗಿಲಾನಾ ಹುತ್ವಾ ಸಉಪಾಹನಾ ಗಾಮಂ ಪವಿಸನ್ತಿ, ಛತ್ತಂ ಧಾರೇನ್ತಿ, ಅಞ್ಞೇಪಿ ಅವಿನಯಾನುಲೋಮಾಚಾರೇ ಚರನ್ತಿ, ಇದಾನಿ ಭಿಕ್ಖೂನಂ ಸಾಮಣೇರಾನಞ್ಚ ಬುದ್ಧಸ್ಸ ಸಮ್ಮುಖೇ ಬುದ್ಧಂ ಸಕ್ಖಿಂ ಕತ್ವಾ ಇಮೇ ಅನಾಚಾರೇ ನ ಚರಿಸ್ಸಾಮಾತಿ ಪಟಿಞ್ಞಂ ಕಾರಾಪೇತ್ವಾ ಭಗವತೋ ಸಿಕ್ಖಾಪದಾನಿ ರಕ್ಖಾಪೇತುಂ ವಟ್ಟತಿ, ಏವಞ್ಚ ಸತಿ ಭಿಕ್ಖೂ ಸಾಮಣೇರಾಚ ಮಯಂ ಬುದ್ಧಸ್ಸ ಸಮ್ಮುಖೇ ಏವಂ ಪಟಿಞ್ಞಂ ಕರೋಮ, ಪಟಿಞ್ಞಞ್ಚ ಕತ್ವಾ ವಿಕಾರಂ ಆಪಜ್ಜನ್ತಾನಂ ಅಮ್ಹಾಕಂ ಇಮಸ್ಮಿಂಯೇವ ಅತ್ತಭಾವೇ ಇಮಸ್ಮಿಂಯೇವ ಪಚ್ಚಕ್ಖೇ ಕಿಞ್ಚಿ ಭಯಂ ಉಪ್ಪಜ್ಜೇಯ್ಯಾತಿ ಪಚ್ಚಕ್ಖಭಯಂ ಅಪೇಕ್ಖಿತ್ವಾ ತೇ ಸಿಕ್ಖಾಪದಂ ರಕ್ಖಿಸ್ಸನ್ತೀತಿ. ಏವಂ ಪನ ಚಿನ್ತೇತ್ವಾ ಭಿಕ್ಖೂನಂ ಸಾಮಣೇರಾನಞ್ಚ ಏವಂ ಪಟಿಞ್ಞಂ ಕಾರಾಪೇತುಂ ಯುಜ್ಜತಿ ವಾ ಮಾ ವಾತಿ ಮಯಂ ನ ಜಾನಾಮ, ಇದಾನಿ ಸಙ್ಘರಾಜಾದಯೋ ಮಹಾಥೇರೇ ಸನ್ನಿಪಾತಾಪೇತ್ವಾ ಪುಚ್ಛಿಸ್ಸಾಮೀತಿ ಪುನ ಚಿನ್ತೇಸಿ.

ಅಥ ಸಬ್ಬೇಪಿ ಮಹಾಥೇರೇ ಸಙ್ಘರಾಜಸ್ಸ ವಿಹಾರೇ ಸನ್ನಿಪಾತಾಪೇತ್ವಾ ಇಮಂ ಕಾರಣಂ ಪುಚ್ಛಥಾತಿ ಅಮಚ್ಚೇ ಆಣಾಪೇಸಿ. ಅಥ ಅಮಚ್ಚಾ ಮಹಾಥೇರೇ ಸನ್ನಿಪಾತಾಪೇತ್ವಾ ಪುಚ್ಛಿಂಸು,-ಇದಾನಿ ಭನ್ತೇ ಸಾಸನೇ ಭಿಕ್ಖೂನಂ ಸಾಮಣೇರಾನಞ್ಚ ಅವಿನಯಾನುಲೋಮಾಚಾರಾನಿ ದಿಸ್ವಾ ಬುದ್ಧಸ್ಸ ಸಮ್ಮುಖೇ ಬುದ್ಧಂ ಸಕ್ಖಿಂ ಕತ್ವಾ ರಾಜಾ ಯಥಾ ಇಮೇ ಅನಾಚಾರೇ ನ ಚರಿಸ್ಸಾಮಾತಿ ಪಟಿಞ್ಞಂ ಕಾರಾಪೇತ್ವಾ ಭಗವತೋ ಸಿಕ್ಖಾಪದಾನಿ ರಕ್ಖಾಪೇತುಂ ಇಚ್ಛತಿ, ತಥಾ ಕಾರಾಪೇತುಂ ಯುಜ್ಜತಿ ವಾ ಮಾ ವಾತಿ.

ಅಥ ಸಙ್ಘರಾಜಪ್ಪಮುಖಾದಯೋ ಮಹಾಥೇರಾ ಏವಮಾಹಂಸು,- ಯಸ್ಮಾ ಸಾಸನಸ್ಸ ಪರಿಸುದ್ಧಭಾವಂ ಇಚ್ಛನ್ತೋ ಏವಂ ಕರೋತಿ, ತಸ್ಮಾ ತಥಾ ಕಾರಾಪೇತುಂ ಯುಜ್ಜತೀತಿ.

ಪಣ್ಡಿತಾಭಿಧಜಮುನಿನ್ದಘೋಸಮಹಾಧಮ್ಮರಾಜಗುರುತ್ಥೇರಾದಯೋ ಪನ ಕತಿಪಯತ್ಥೇರಾ ಏವಮಾಹಂಸು, – ಇದಾನಿ ಭಿಕ್ಖೂ ನಾಮ ಸದ್ಧಾಬಲಾದೀನಂ ¶ ಥೋಕತಾಯ ಭಗವತೋ ಆಣಾಸಙ್ಖಾತಂ ಸಚಿತ್ತಕಾಚಿತ್ತಕಾಪತ್ತಿಇಂ ಆಪಜ್ಜಿತ್ವಾ ಭಗವತಾಯೇವ ಅನುಞ್ಞಾತೇಹಿ ದೇಸನಾವುಟ್ಠಾನಕಮ್ಮೇಹಿ ಪಟಿಕರಿತ್ವಾ ಸೀಲಂ ಪರಿಸುದ್ಧಂ ಕತ್ವಾ ಲಜ್ಜೀಪೇಸಲಭಾವಂ ಕರೋನ್ತಿ, ನ ಕದಾಚಿ ಆಪತ್ತಿಂ ಅನಾಪಜ್ಜಿತ್ವಾ, ತಸ್ಮಾ ಭಗವತಾ ಪಟಿಕ್ಖಿತ್ತಂ ಕಮ್ಮಂ ಸಞ್ಚಿಚ್ಚನ ವೀತಿಕ್ಕಮಿಸ್ಸಾಮಾತಿ ಬುದ್ಧಸ್ಸ ಸಮ್ಮುಖೇ ಪಟಿಞ್ಞಾಕರಣಂ ಅತಿಭಾರಿಯಂ ಹೋತಿ, ಸಚೇಪಿ ಪುಬ್ಬೇ ಪಟಿಞ್ಞಂ ಕತ್ವಾ ಪಚ್ಛಾ ವಿಸಂವಾದೇಯ್ಯ, ಏವಂ ಸತಿ ಪಟಿಸ್ಸವವಿಸಂವಾದೇ ಸುದ್ಧಚಿತ್ತಸ್ಸ ದುಕ್ಕಟಂ ಪಟಿಸ್ಸವಕ್ಖಣೇಏವ ಪಾಚಿತ್ತಿ ಇತರಸ್ಸಚಾತಿ ವಚನತೋ ತಂ ತಂ ಆಪತ್ತಿಂ ಪಟಿಸ್ಸವವಿಸಂವಾದನದುಕ್ಕಪೇತ್ತಿಯಾ ಸಹೇವ ಆಪಜ್ಜೇಯ್ಯ, ಅಥ ಪಟಿಞ್ಞಾಕರಣತೋಯೇವ ಆಪತ್ತಿಬಹುಲತಾ ಭವೇಯ್ಯ, ಯಥಾ ಪನ ರೋಗಂ ವೂಪಸಮಿತುಂ ಅಸಪ್ಪಾಯಭೇಸಜ್ಜಂ ಪಟಿಸೇವತಿ, ಅಥಸ್ಸ ರೋಗೋ ಅವೂಪಸಮಿತ್ವಾ ಅತಿಕ್ಕಮೇಯ್ಯ, ಏವಂ ಆಪತ್ತಿಂ ಅನಾಪಜ್ಜಿತುಕಾಮೋ ಬುದ್ಧಸ್ಸ ಸಮ್ಮುಖೇ ಪಟಿಞ್ಞಂ ಕರೋತಿ, ಅಥಸ್ಸ ಆಪತ್ತಿಬಹುಲಾಯೇವ ಭವೇಯ್ಯಾತಿ, ಕಿಞ್ಚ ಭಿಯ್ಯೋ ಅಭಯದಸ್ಸಾವಿನೋ ಭಿಕ್ಖೂ ಅನೇಕಸತಬುದ್ಧಸ್ಸ ಸಮ್ಮುಖೇ ಅನೇಕಸತವಾರಾನಿಪಿ ಪಟಿಞ್ಞಂ ಕತ್ವಾ ಸಿಕ್ಖಾಪದಂ ವೀತಿಕ್ಕಮಿತುಂ ವಿಸಹಿಸ್ಸನ್ತಿಯೇವಾತಿ.

ಅಥ ಸಙ್ಘರಾಜಾ ಮಹಾಥೇರೋ ಅತ್ತನೋ ಸಿಸ್ಸಂ ಪಞ್ಞಾಸಾಮಿಸಿರಿಕವಿಧಜಮಹಾಧಮ್ಮರಾಜಾಧಿರಾಜಗುರುಂ ನಾಮ ಮಂ ಉಯ್ಯೋಜೇಸಿ, ತಸ್ಸ ಥೇರಸ್ಸ ವಚನೇ ಪಟಿವಚನಂ ದಾತುಂ.

ಅಥಾಹಂ ಏವಂ ವದಾಮಿ,- ದ್ವೇ ಪುಗ್ಗಲಾ ಅಭಬ್ಬಾ ಸಞ್ಚಿಚ್ಚ ಆಪತ್ತಿಂ ಆಪಜ್ಜಿತುಂ ಭಿಕ್ಖೂಚ ಭಿಕ್ಖುನಿಯೋಚ ಅರಿಯಾ ಪುಗ್ಗಲಾ, ದ್ವೇ ಪುಗ್ಗಲಾ ಸಬ್ಬಾ ಸಞ್ಚಿಚ್ಚ ಆಪತ್ತಿಂ ಆಪಜ್ಜಿತುಂ ಭಿಕ್ಖೂಚ ಭಿಕ್ಖುನಿಯೋಚ ಪುಥುಜ್ಜನಾತಿ ಪರಿವಾರಪಾಳಿಯಂ ವುತ್ತತ್ತಾ ಅರಿಯಪುಗ್ಗಲಾನಂವಿಯ ಪುಥುಜ್ಜನಾನಂ ವಿಸ್ಸಟ್ಠೇನ ಪಟಿಞ್ಞಂ ಕಾತುಂ ನ ವಟ್ಟತೀತಿ ಮನಸಿಕರಿತ್ವಾ ಪುಥುಜ್ಜನಭಿಕ್ಖೂನಂ ಪಟಿಞ್ಞಾಕರಣಂ ಅತಿಭಾರಿಯನ್ತಿ ವೇದೇಯ್ಯಚೇ, ಸಬ್ಬೇಹಿಪಿ ಅರಿಯಪುಥುಜ್ಜನೇಹಿ ಭಿಕ್ಖೂಹಿ ಉಪಸಮ್ಪದಾಮಾಳಕೇ ಆದಿತೋವ ¶ ಚತ್ತಾರಿ ಅಕರಣೀಯಾನಿ ಆಚಿಕ್ಖಿತಬ್ಬಾನೀತಿ ವುತ್ತೇಸು ಚತೂಸು ಅಕರಣೀಯೇಸು ಅನ್ತಮಸೋ ತಿಣಸಲಾಕಂ ಉಪಾದಾಯ ಯೋ ಭಿಕ್ಖು ಪಾದಂ ವಾ ಪಾದಾರಹಂ ವಾ ಅತಿರೇಕಪಾದಂ ವಾ ಅದಿನ್ನಂ ಥೇಯ್ಯಸಙ್ಖಾತಂ ಆದಿಯತಿ, ಅಸ್ಸಮಣೋ ಹೋತಿ ಅಸಕ್ಯಪುತ್ತಿಯೋತಿ, ಅನ್ತಮಸೋ ಕುನ್ತಕಿಪಿಲ್ಲಿಕಂ ಉಪಾದಾಯ ಯೋ ಭಿಕ್ಖು ಸಞ್ಚಿಚ್ಚ ಮನುಸ್ಸವಿಗ್ಗಹಂ ಜೀವಿತಂ ವೋರೋಪೇಸಿ, ಅನ್ತಮಸೋ ಗಬ್ಭಪಾತನಂ ಉಪಾದಾಯ ಅಸ್ಸಮಣೋ ಹೋತಿ ಅಸಕ್ಯಪುತ್ತಿಯೋತಿ, ಅನ್ತಮಸೋ ಸುಞ್ಞಾಗಾರೇ ಅಭಿರಮಾಮೀತಿ ಯೋ ಭಿಕ್ಖುಪಾಪಿಚ್ಛೋ ಇಚ್ಛಾಪಕತೋ ಅಸನ್ತಂ ಅಭೂತಂ ಉತ್ತರಿಮನುಸ್ಸಧಮ್ಮಂ ಉಲ್ಲಪತಿ, ಅಸ್ಸಮಣೋ ಹೋತಿ ಅಸಕ್ಯಪುತ್ತಿಯೋತಿಚ ಉಪಜ್ಝಾಚರಿಯೇನ ಓವದಿಯಮಾನೇಹಿ ಅಭಿನವೋಪಸಮ್ಪನ್ನೇಹಿ ಆಮ ಭನ್ತೇತಿ ಪಟಿಞ್ಞಾಕಥಾಯೇವ. ಸಾಮಣೇರೇಹಿಪಿ ಪಬ್ಬಜ್ಜಕ್ಖಣೇಯೇವ ಉಪಜ್ಝಾಯಸ್ಸ ಸನ್ತಿಕೇ ಪಾಣಾತಿಪಾತಾವೇರಮಣಿಸಿಕ್ಖಾಪದಂ ಸಮಾದಿಯಾಮೀತಿಆದಿನಾ ಪಠಮಂ ಪಟಿಞ್ಞಾ ಕತಾಯೇವ. ತಥಾ ಭಿಕ್ಖೂಹಿ ತಂತಂಆಪತ್ತಿಂ ಆಪಜ್ಜಿತ್ವಾ ದೇಸನಾಯ ಪಟಿಕರಣಕಾಲೇ ಸಾಧು ಸುಟ್ಠು ಭನ್ತೇ ಸಂವರಿಸ್ಸಾಮೀತಿ ಅಭಿಣ್ಹಂ ಪಟಿಞ್ಞಾ ಕತಾಯೇವ. ಸಾಮಣೇರೇಹಿಪಿ ಉಪಜ್ಝಾಚರಿಯಸ್ಸ ಸನ್ತಿಕೇ ಸಿಕ್ಖಾಗ್ಗಹಣಕಾಲೇಪಿ ಪಾಣಾತಿಪಾತಾವೇರ ಮಣಿಸಿಕ್ಖಾಪದಂ ಸಮಾದಿಯಾಮೀತಿಆದಿನಾ ಅಭಿಣ್ಹಂ ಪಟಿಞ್ಞಾ ಕತಾಯೇವ. ತಾಹಿ ಪನ ಪಟಿಞ್ಞಾಹಿ ಅಭಾಯಿತ್ವಾ ಇತೋಯೇವ ಭಾಯಾಮೀತಿ ವುತ್ತವಚನಂ ಅಚ್ಛರಿಯಂವಿಯ ಹುತ್ವಾ ಖಾಯತಿ. ಇಮಾಯ ಹಿ ಪಟಿಞ್ಞಾಯ ತಾಸಂ ಪಟಿಞ್ಞಾನಂ ವಿಸೇಸತಾ ನ ದಿಸ್ಸತೀತಿ.

ಅಯಂ ಪನೇತ್ಥ ಸನ್ನಿಟ್ಠಾನತ್ಥೋ,- ಪಟಿಸ್ಸವದುಕ್ಕಟಾಪತ್ತಿ ನಾಮ ಸಾವತ್ಥಿಯಂ ಪಸ್ಸೇನದಿಕೋಸಲರಞ್ಞಾ ಇಮಸ್ಮಿಂ ವಿಹಾರೇ ವಸ್ಸಂ ಉಪಗಚ್ಛಾಹೀತಿ ಆಯಾಚಿತೇ ಸಾಧೂತಿ ಪಟಿಜಾನಿತ್ವಾ ಲಾಭಬಹುಲತಂ ಪಟಿಚ್ಚ ಅನ್ತರಾಮಗ್ಗೇ ಅಞ್ಞಸ್ಮಿಂ ವಿಹಾರೇ ವಸ್ಸಂ ಉಪಗನ್ತ್ವಾ ಪಟಿಸ್ಸವವಿಸಂವಾದನಪಚ್ಚಯಾ ಉಪನನ್ದಂ ನಾಮ ಭಿಕ್ಖುಂ ಆರಬ್ಭ ಪಞ್ಞತ್ತಾ. ಸಮನ್ತಪಾಸಾದಿಕಞ್ಚ ನಾಮ ವಿನಯಟ್ಠಕಥಾಯ ವಸ್ಸೂಪನಾಯಿಕಕ್ಖನ್ಧಕವಣ್ಣನಾಯಂ ¶ ಪಟಿಸ್ಸವೇಚ ಆಪತ್ತಿ ದುಕ್ಕಟಸ್ಸಾತಿ ಏತ್ಥ ನ ಕೇವಲಂ ಇಮಂ ತೇಮಾಸಂ ಇಧ ವಸ್ಸಂ ವಸಥಾತಿ ಏತಸ್ಸೇವ ಪಟಿಸ್ಸವೇ ಆಪತ್ತಿ, ಇಮಂ ತೇಮಾಸಂ ಭಿಕ್ಖಂ ಗಣ್ಹಥ, ಉಭೋಪಿ ಮಯಂ ವಸ್ಸಂ ವಸಿಸ್ಸಾಮ, ಏಕತೋ ಉದ್ದಿಸ್ಸಾಪೇಸ್ಸಾಮಾತಿ ಏವಮಾದಿನಾಪಿ ತಸ್ಸ ತಸ್ಸ ಪಟಿಸ್ಸವೇ ದುಕ್ಕಟಂ, ತಞ್ಚ ಖೋ ಪಠಮಂ ಸುದ್ಧಚಿತ್ತಸ್ಸ ಪಚ್ಛಾ ವಿಸಂವಾದನಪಚ್ಚಯಾ, ಪಠಮಮ್ಪಿ ಅಸುದ್ಧ ಚಿತ್ತಸ್ಸ ಪನ ಪಟಿಸ್ಸವೇ ಪಾಚಿತ್ತಿಯನ್ತಿ ವುತ್ತಂ.

ಇಚ್ಚೇವಂ ಭಿಕ್ಖೂನಂ ಅಞ್ಞಮಞ್ಞಂ ದಾಯಕೇಹಿಚ ಸದ್ಧಿಂ ಪಟಿಜಾನಿತ್ವಾ ವಿಸಂವಾದನಪಚ್ಚಯಾ ಅಞ್ಞೇಸಂ ಅತ್ಥಹಿತಭೇದೇಯೇವ ದುಕ್ಕಟಾಪತ್ತಿ ವುತ್ತಾ, ನ ಅತ್ತನೋ ಇಚ್ಛಾವಸೇನ ಸಯಮೇವ ಅಹಂ ಭುಞ್ಜಿಸ್ಸಾಮಿ ಸಯಿಸ್ಸಾಮೀತಿ ಏವಮಾದಿನಾ ವತ್ವಾ ಯಥಾವುತ್ತಾನುರೂಪಂ ಅಕತ್ವಾ ವಿಸಂವಾದನೇತಿ. ಸಚೇ ಪನ ಭಿಕ್ಖುಸಾಮಣೇರಾನಂ ಪಠಮಮೇವ ಆಮ ಭನ್ತೇತಿಆದಿನಾ ಪಟಿಞ್ಞಂ ಕತ್ವಾ ಪಚ್ಛಾ ಕೇನಚಿದೇವ ಕರಣೀಯೇನ ತಂತಂಆಪತ್ತಿಂ ಆಪಜ್ಜನ್ತೋ ಸಹ ಪಟಿಸ್ಸವವಿಸಂವಾದೇನ ದುಕ್ಕಟಾಪತ್ತಿಯಾ ಆಪಜ್ಜೇಯ್ಯ, ಏವಂ ಸತಿ ತತ್ಥ ತತ್ಥ ಸಿಕ್ಖಾಪದೇಸು ದ್ವೇ ದ್ವೇ ಆಪತ್ತಿಯೋ ಪಞ್ಞಾಪೇಯ್ಯ, ನ ಚ ಏವಮ್ಪಿ ಪಞ್ಞತ್ತಾ, ತೇನೇವ ಪಟಿಸ್ಸವದುಕ್ಕಟಾಪತ್ತಿ ನಾಮ ಪರೇಸಂ ಸನ್ತಿಕೇ ಪರೇಸಂ ಮತಿಂ ಗಹೇತ್ವಾ ಪಟಿಜಾನಿತ್ವಾ ವಿಸಂವಾದನಟ್ಠಾನೇಯೇವ ಪಞ್ಞತ್ತಾತಿ ದಟ್ಠಬ್ಬಾ.

ಇದಾನಿ ರಾಜಾ ಸಾಸನಸ್ಸ ಸುದ್ಧಿಂ ಇಚ್ಛನ್ತೋ ಇಮಿನಾ ಉಪಾಯೇನ ಭಿಕ್ಖುಸಾಮಣೇರಾನಂ ಸೀಲಂ ಸಂವರಾಪೇನ್ತೋ ಪಚ್ಚಕ್ಖಸಮ್ಪರಾಯಿಕಭಯಂ ಅನುಪೇಕ್ಖಿತ್ವಾ ಸಂವರಂ ಆಪಜ್ಜೇಯ್ಯುನ್ತಿ ಚಿನ್ತೇತ್ವಾ ಬುದ್ಧಸ್ಸ ಸಮ್ಮುಖೇ ಪಟಿಞ್ಞಂ ಕಾರಾಪಿತತ್ತಾ ನ ಕೋಚಿ ದೋಸೋ ದಿಸ್ಸತಿ. ಭಿಕ್ಖುಸಾಮಣೇರಾನಮ್ಪಿ ಭಿಯ್ಯೋಸೋಮತ್ತಾಯಸೀಲಂ ಸಂವರಿತ್ವಾ ಸೀಲಪರಿಸುದ್ಧಿ ಭವೇಯ್ಯಾತಿ. ಅಥ ರಾಜಾ ಸಬ್ಬೇಸಂ ಭಿಕ್ಖುಸಾಮಣೇರಾನಂ ಬುದ್ಧಸ್ಸ ಸಮ್ಮುಖೇ ಪಟಿಞ್ಞಂ ಕಾರಾಪೇತ್ವಾ ಸೀಲಂ ರಕ್ಖಾಪೇಸೀತಿ.

ಇಚ್ಚೇವಂ ಇಮಸ್ಸ ರಞ್ಞೋ ಕಾಲೇ ಪುಬ್ಬೇ ಅಲಜ್ಜಿನೋಪಿ ಸಮಾನಾ ಭಯಂ ಅನುಪೇಕ್ಖಿತ್ವಾ ಯೇಭುಯ್ಯೇನ ಲಜ್ಜಿನೋವ ಭವನ್ತೀತಿ.

ಬುದ್ಧಸ್ಸ ¶ ಭಗವತೋ ಪರಿನಿಬ್ಬಾನತೋ ತಿಸತಾಧಿಕಾನಂ ದ್ವಿವಸ್ಸಸಹಸ್ಸಾನಂ ಉಪರಿ ನವುತಿಮೇ ಸಂವಚ್ಛರೇ ಬಹಿನದೀತೀರೇ ಗಾಮಸೀಮತೋ ಪಟ್ಠಾಯ ಯಾವ ಅನ್ತೋಉದಕುಕ್ಖೇಪಾ, ತಾವ ಕಮ್ಮಂ ಕರೋನ್ತಾನಂ ಭಿಕ್ಖೂನಂ ಸುಖೇನ ಗಮನತ್ಥಾಯ ಗಹಟ್ಠಾ ಗಾಮಸೀಮಾಯ ಉದಕುಕ್ಖೇಪಸೀಮಂ ಸಮ್ಬನ್ಧಿತ್ವಾ ಸೇತುಂ ಅಕಂಸು.

ಅಥ ತತ್ಥ ಞಾಣಾಲಙ್ಕಾರಸುಮನಮಹಾಧಮ್ಮರಾಜಗುರುಗಣಾ ಚರಿಯನಾಮಕೋ ಥೇರೋ ಉಪಸಮ್ಪದಾದಿವಿನಯಕಮ್ಮಾನಿ ಕತಿಪಯ ವಸ್ಸೇಸು ಅಕಾಸಿ.

ಧೀರಾನನ್ದತ್ಥೇರೋ ಪನ ತತ್ಥ ಸಙ್ಕರದೋಸೋ ಹೋತೀತಿ ಕಮ್ಮಂ ಕಾತುಂ ನ ಇಚ್ಛತಿ. ತಥಾ ಪಟ್ಠಾಯ ಯೇ ಯೇ ಞಾಣಾಲಙ್ಕಾರಸುಮನಮಹಾಧಮ್ಮರಾಜಗುರುಗಣಾಚರಿಯಸ್ಸ ಮತಿಂ ರುಚ್ಚನ್ತಿ, ತೇ ತೇ ತಸ್ಸ ಪಕ್ಖಿಕಾ ಭವನ್ತಿ. ಯೇ ಯೇ ಪನ ಧೀರಾನನ್ದತ್ಥೇರಸ್ಸಮತಿಂ ರುಚ್ಚನ್ತಿ, ತೇತೇ ತಸ್ಸ ಪಕ್ಖಿಕಾ ಭವನ್ತಿ. ಏವಂಲಙ್ಕಾದೀಪೇ ಅಮರಪುರನಿಕಾಯಿಕಾ ಭಿಕ್ಖೂ. ದ್ವೇಧಾ ಭಿನ್ದಿತ್ವಾ ತಿಟ್ಠನ್ತಿ.

ಅಥ ಧೀರಾನನ್ದಪಕ್ಖೇ ಭಿಕ್ಖು ತಪ್ಪಕ್ಖಿಕಸ್ಸ ಸೀಲಕ್ಖನ್ಧತ್ಥೇರಸ್ಸ ಸಿಸ್ಸೇ ಧಮ್ಮಕ್ಖನ್ಧವನರತನಭಿಕ್ಖೂ ಅಮ್ಹಾಕಂ ಜಮ್ಬುದೀಪೇ ರತನಪುಣ್ಣನಗರಂ ಪೇಸೇಸುಂ ಸಙ್ಘರಾಜಮಹಾಥೇರಸ್ಸ ಸನ್ತಿಕೇ ಓವಾದಸ್ಸ ಪಟಿಗ್ಗಾಹಣತ್ಥಾಯ. ತೇ ಚ ಕಲಿಯುಗೇ ಅಟ್ಠಾರಸಾಧಿಕೇ ದ್ವಿವಸ್ಸಸತೇ ಸಹಸ್ಸೇಚ ಸಮ್ಪತ್ತೇ ಕತ್ತಿಕಮಾಸಸ್ಸ ಜುಣ್ಹಪಕ್ಖಅಟ್ಠಮಿಯಂ ಸೀಹಳದೀಪತೋ ನಿಕ್ಖಮಿತ್ವಾ ಆಗಚ್ಛನ್ತಾ ಏಕೂನವೀಸಾಧಿಕೇ ದ್ವಿವಸ್ಸಸತೇ ಸಹಸ್ಸೇಚ ಸಮ್ಪತ್ತೇ ಫಗ್ಗುನಮಾಸಸ್ಸ ಜುಣ್ಹಪಕ್ಖಸತ್ತಮಿಯಂ ರತನಪುಣ್ಣನಗರಂ ಸಮ್ಪತ್ತಾ.

ಅಥ ಧಮ್ಮರಾಜಾ ಸಙ್ಘರಾಜಸ್ಸ ಆರಾಮೇ ಚತುಭೂಮಿಕಂ ವಿಹಾರಂ ಕಾರಾಪೇತ್ವಾ ತತ್ಥ ತೇ ವಸಾಪೇಸಿ. ಚತೂಹಿ ಪಚ್ಚಯೇಹಿಚ ಸಙ್ಗಹಂ ಅಕಾಸಿ. ಸಙ್ಘರಾಜಾಚ ತೇಸಂ ದ್ವಿನ್ನಂ ಪಕ್ಖಿಕಾನಂ ವಚನಂ ಸುತ್ವಾ ಬಹೂಹಿ ಗನ್ಥೇಹಿ ಸಂಸನ್ದಿತ್ವಾ ವಿವಾದಂ ವಿನಿಚ್ಛಿನ್ದಿ. ತಾದಿಸೇ ಠಾನೇ ಸಙ್ಕರದೋಸಸ್ಸ ಅತ್ಥಿಭಾವಂ ಪಕಾಸೇತ್ವಾ ಸನ್ದೇಸಪಣ್ಣಮ್ಪಿ ತೇಸಂ ಅದಾಸಿ.

ಮಹಾಧಮ್ಮರಾಜಾಚ ¶ ತೇಸಂ ಪುನ ಸಿಕ್ಖಂ ಸಙ್ಘರಾಜಸ್ಸ ಸನ್ತಿಕೇ ಗಣ್ಹಾಪೇತ್ವಾ ಪಿಟಕತ್ತಯಪೋತ್ಥಕಾದೀನಿ ದಾತಬ್ಬವತ್ಥೂನಿ ದತ್ವಾ ತಸ್ಮಿಂಯೇವ ಸಂವಚ್ಛರೇ ಪಠಮಆಸಾಳಿಮಾಸಸ್ಸ ಕಾಳಪಕ್ಖದಸಮಿಯಂ ನಾವಾಯ ತೇ ಪೇಸೇಸಿ.

ತತೋ ಪಚ್ಛಾಚ ಞಾಣಾಲಙ್ಕಾರಸುಮನಮಹಾಧಮ್ಮರಾಜಗುರುಗಣಾಚರಿಯಪಕ್ಖೇ ಭಿಕ್ಖೂಪಿ ತಪ್ಪಕ್ಖಿಕಸ್ಸ ಪಞ್ಞಾಮೋಲಿತ್ಥೇರಸ್ಸ ಸಿಸ್ಸೇ ವಿಮಲಜೋತಿಧಮ್ಮನನ್ದಭಿಕ್ಖೂ ಪೇಸೇಸುಂ ಸದ್ಧಿಂ ಅರಿಯಾಲಙ್ಕಾರೇನ ನಾಮ ಸಾಮಣೇರೇನ ಚತೂಹಿಚ ಉಪಾಸಕೇಹಿ. ತೇಚ ಕಲಿಯುಗೇ ವೀಸಾಧಿಕೇ ದ್ವಿಸತೇ ಸಹಸ್ಸೇಚ ಸಮ್ಪತ್ತೇ ಕತ್ತಿಕಮಾಸಸ್ಸ ಜುಣ್ಹಪಕ್ಖಪಞ್ಚಮಿಯಂ ಸಮ್ಪತ್ತಾ.

ತದಾಪಿ ಸಙ್ಘರಾಜಸ್ಸ ಆರಾಮೇಯೇವ ಏಕಂ ವಿಹಾರಂ ಕಾರಾಪೇತ್ವಾ ತೇ ವಸಾಪೇಸಿ. ಚತೂಹಿ ಪಚ್ಚಯೇಹಿಚ ಸಙ್ಗಹಂ ಅಕಾಸಿ. ಸಙ್ಘರಾಜಾಪಿ ಪುನ ವಿನಿಚ್ಛಯಂ ಅದಾಸಿ ಯಥಾವುತ್ತನಯೇನ. ಧಮ್ಮರಾಜಾ ತೇಸಮ್ಪಿ ಭಿಕ್ಖೂನಂ ಸಙ್ಘರಾಜಸ್ಸ ಸನ್ತಿಕೇ ಪುನ ಸಿಕ್ಖಂ ಗಣ್ಹಾಪೇತ್ವಾ ಸಾಮಣೇರಞ್ಚ ಉಪಸಮ್ಪಾದೇತ್ವಾ ಚತೂಹಿ ಪಚ್ಚಯೇಹಿ ಸಙ್ಗಹಂ ಕತ್ವಾ ಪಹಿಣಿ.

ತತೋ ಪಚ್ಛಾಚ ಕಲಿಯುಗೇ ಬಾವೀಸಾಧಿಕೇ ದ್ವಿವಸ್ಸಸತೇ ಸಹಸ್ಸೇಚ ಸಮ್ಪತ್ತೇ ಮಾಘಮಾಸಸ್ಸ ಕಾಳಪಕ್ಖಏಕಾದಸಮಿಯಂ ಸೀಹಳದೀಪತೋಯೇವ ದ್ವೇ ಭಿಕ್ಖೂ ತಯೋ ಸಾಮಣೇರಾ ಚತ್ತಾರೋ ಉಪಾಸಕಾ ಸರಜತಸುವಣ್ಣಕರಣ್ಡಕಂ ಸರಜತಸುವಣ್ಣಚೇತಿಯದಾತುಂ ಹತ್ಥಿದನ್ತಮಯಂ ಬುದ್ಧರೂಪಂ ಮಹಾಬೋಧಿಪತ್ತಾನಿ ಮಹಾಬೋಧಿತಚಂ ಮಹಾಬೋಧಿಪತಿಟ್ಠಾನಸೂಮಿಂ ಸೀಹಳದಕ್ಖಿಣಸಾಖಾಬೋಧಿಪತ್ತಾನಿ ದುತಿಯಸತ್ತಾಹಅನಿಮಿಸಟ್ಠಾನಭೂಮಿಞ್ಚ ಧಮ್ಮಪಣ್ಣಾಕಾರತ್ಥಾಯ ಗಹೇತ್ವಾ ರತನಪುಣ್ಣಂ ನಾಮ ಮಹಾರಾಜಟ್ಠಾನೀನಗರಂ ಸಮ್ಪತ್ತಾ. ತೇಸಮ್ಪಿ ಧಮ್ಮರಾಜಾ ಚತೂಹಿ ಪಚ್ಚಯೇಹಿ ಸಙ್ಗಹಂ ಕತ್ವಾ ಸಙ್ಘರಞ್ಞೋ ಆರಾಮೇ ವಸಾಪೇಸಿ. ಭಿಕ್ಖುನಞ್ಚ ಪುನ ಸಿಕ್ಖಂ ಗಣ್ಹಾಪೇಸಿ. ಸಾಮಣೇರಾನಞ್ಚ ಉಪಸಮ್ಪದಕಮ್ಮಂ ಗಹಟ್ಠಾನಞ್ಚ ಪಬ್ಬಜ್ಜಕಮ್ಮಂ ಗಣ್ಹಾಪೇಸಿ.

ಇಚ್ಚೇವಂ ಮರಮ್ಮರಟ್ಠೇ ಭಗವತೋ ಪರಿನಿಬ್ಬಾನತೋ ಪಟ್ಠಾಯ ಯಾವಜ್ಜತನಾ ¶ ಸಾಸನಸ್ಸ ಥೇರಪರಮ್ಪರವಸೇನ ಪತಿಟ್ಠಾನತಾ ವೇದಿತಬ್ಬಾ.

ಇಚ್ಚೇವಂ ಮರಮ್ಮಮಣ್ಡಲೇ ಅರಿಮದ್ದನಪುರೇ ಅರಹನ್ತತ್ಥೇರಗಣೋ ಉತ್ತರಾಜೀವತ್ಥೇರಛಪ್ಪದತ್ಥೇರಗಣೋ ಸಿವಲಿತ್ಥೇರಗಣೋ ಆನನ್ದತ್ಥೇರಗಣೋ ತಾಮಲಿನ್ದತ್ಥೇರಗಣೋತಿ ಪಞ್ಚ ಗಣಾ ಅಹೇಸುಂ.

ಇದಾನಿ ಅರಿಮದ್ದನನಗರೇ ಪಞ್ಚಗಣತೋ ಪಟ್ಠಾಯ ವಿಜಯಪುರಜೇಯ್ಯಪುರರತನಪೂರೇಸು ಥೇರಪರಮ್ಪರವಸೇನ ಸಾಸನಸ್ಸ ಅನುಕ್ಕಮೇನ ಆಗತಭಾವಂ ದಸ್ಸಯಿಸ್ಸಾಮಿ. ಸಿರಿಖೇತ್ತನಗರೇ ಹಿ ‘ಸೋ ಯಾಂ ನೋಂ’ ನಾಮ ರಾಜಾ ಪರಕ್ಕಮವಂಸಿಕಸ್ಸ ಸಾರದಸ್ಸಿತ್ಥೇರಸ್ಸ ಅನ್ತೇವಾಸಿಕಂ ಸದ್ಧಮ್ಮಟ್ಠಿತಿತ್ಥೇರಂ ಅತ್ತನೋ ಆಚರಿಯಂ ಕತ್ವಾ ಪೂಜೇಸಿ.

ಕಲಿಯುಗಸ್ಸ ಚತುವಸ್ಸಾಧಿಕಅಟ್ಠಸತಕಾಲೇ ಸಿರಿಖೇತ್ತನಗರತೋ ಆಗನ್ತ್ವಾ ಸೋ ರತನಪೂರೇ ರಜ್ಜಂ ಕಾರೇಸಿ. ಅಥ ಅತ್ತನೋ ಪುತ್ತಂ ಅನೇಕಿಭಂ ನಾಮ ರಾಜಕುಮಾರಂ ಮಹಾರಾಜ ನಾಮೇನ ಸಿರಿಖೇತ್ತನಗರಂ ಭುಞ್ಜಾಪೇಸಿ. ದಕ್ಖಿಣದಿಸಾಭಾಗೇ ‘ಕೂ ವ್ಠೇ ಟ-ಯೋ ಮೋ’ ನಗರಂ, ಪಚ್ಛಿಮದಿಸಾಭಾಗೇ ‘ಫೋ ಖೋಂ’ ನಾಮ ಠಾನಂ, ಉತ್ತರದಿಸಾಭಾಗೇ ‘ಮ ಲೋಂ’ ನಗರಂ, ಪುರತ್ಥಿಮದಿಸಾಭಾಗೇ ‘ಕೋಂ ಖೋಂ’ ನಾಮ ಠಾನಂ, ಏತ್ಥನ್ತರೇ ನಿಸಿನ್ನಾನಂ ಗಿಹೀನಂ ಮಮ ಪುತ್ತಸ್ಸ ಆಣಾ ಪವತ್ತತು, ಭಿಕ್ಖೂನಂ ಮಮಾಚರಿಯಸ್ಸ ಸದ್ಧಮ್ಮಟ್ಠಿತಿತ್ಥೇರಸ್ಸ ಆಣಾ ಪವತ್ತತೂತಿ ನಿಯ್ಯಾದೇಸಿ.

ತಸ್ಸಚ ಸದ್ಧಮ್ಮಟ್ಠಿತಿತ್ಥೇರಸ್ಸ ಅರಿಯವಂಸತ್ಥೇರೋ ಮಹಾಸಾಮಿತ್ಥೇರೋತಿ ದ್ವೇ ಸಿಸ್ಸಾ ಅಹೇಸುಂ. ತೇಸು ಮಹಾಸಾಮಿತ್ಥೇರೋ ಪುಬ್ಬೇ ವುತ್ತನಯೇನ ಸಾಸನವಂಸಂ ಆನೇಸ್ಸಾಮೀತಿ ಸೀಹಳದೀಪಂ ಗನ್ತ್ವಾ ಸೀಹಳದೀಪತೋ ಸದ್ಧಿಂ ಪಞ್ಚಹಿ ಭಿಕ್ಖೂಹಿ ಸದ್ಧಮ್ಮಚಾರಿಂ ನಾಮ ಥೇರಂ ಆನೇತ್ವಾ ಅಭಿನವಸಿಕ್ಖಂ ಗಣ್ಹಿತ್ವಾ ಸಿರಿಖೇತ್ತನಗರೇ ಸೀಹಳದೀಪವಂಸಿಕಂ ಸಾಸನಂ ವಡ್ಢಾಪೇತ್ವಾ ನಿಸೀದಿ. ತಸ್ಸ ಮಹಾಸಾರಿತ್ಥೇರಸ್ಸ ಸಿಸ್ಸೋ ಅತುಲವಂಸೋ ನಾಮ ಥೇರೋ ಚತೂಸು ದಿಸಾಸು ಅಹಿಣ್ಡಿತ್ವಾ ಪರಿಯತ್ತಿಂ ಉಗ್ಗಣ್ಹಿತ್ವಾ ಸಿರಿಖೇತ್ತನಗರೇಯೇವ ¶ ತಮ್ಬುಲಭುಞ್ಜಮಾತಿಕಾಸಮೀಪೇ ಸಾಸನಂ ಪಗ್ಗಣ್ಹಿತ್ವಾ ನಿಸೀದಿ. ತಸ್ಸ ಅತುಲವಂಸತ್ಥೇರಸ್ಸ ಸಿಸ್ಸೋ ರತನರಂಸೀ ನಾಮ ಥೇರೋಚ ಪರಿಯತ್ತಿವೇಸಾರಜ್ಜಂ ಪತ್ವಾ ಸಿರಿಖೇತ್ತನಗರೇಯೇವ ಸಾಸನಂ ಪಗ್ಗಣ್ಹಿತ್ವಾ ನಿಸೀದಿ. ತಸ್ಸಚ ರತನರಂ ಸಿತ್ಥೇರಸ್ಸ ಸಿಸ್ಸೋ ಸತ್ವವಧಮ್ಮರಾಜಸ್ಸ ಆಚರಿಯೋ ಅಭಿಸಙ್ಕೇತೋ ನಾಮ ಥೇರೋ ಪರಿಯತ್ತಿವೇಸಾರಜ್ಜಂ ಪತ್ವಾ ಸಿರಿಖೇತ್ತನಗರಯೇವ ಸಾಸನಂ ಪಗ್ಗಣ್ಹಿತ್ವಾ ನಿಸೀದಿ. ತಸ್ಸ ಪನ ಸಿಸ್ಸೋ ಮುನಿನ್ದಘೋಸೋ ನಾಮ ಥೇರೋ ಅತ್ಥಿ. ಕಲಿಯುಗೇ ಸತ್ತತಾಧಿಕೇ ನವಸತೇ ಸಮ್ಪತ್ತೇ ಪಚ್ಛಿಮಪಕ್ಖಾಧಿಕರಾಜಾ ಸಿರಿಖೇತ್ತನಗರಂ ಅಭಿಭವಿತ್ವಾ ನನ್ದಯೋಧೇನ ನಾಮ ಅಮಚ್ಚೇನ ಸದ್ಧಿಂ ತಂ ಮುನಿನ್ದಘೋಸತ್ಥೇರಂ ಆನೇತ್ವಾ ರತನಪೂರೇ ಪತಿಟ್ಠಾಪೇಸಿ.

ಸೋ ಕಿರ ಪಚ್ಛಿಮಪಕ್ಖಾಧಿಕರಾಜಾ ಏವಂ ಕಥೇಸಿ,- ಅಹಂ ಸಿರಿಖೇತ್ತನಗರಂ ಲಭಿತ್ವಾ ಏಕಂಯೇವ ಭಿಕ್ಖುಂ ಏಕಂಯೇವ ಗಿಹಿಂ ಲಭಾಮೀತಿ.

ಸೋ ಪನ ಥೇರೋ ಸಾಮಣೇರನಾಮೇನ ಮುನಿನ್ದಘೋಸೋ ನಾಮ. ಉಪಸಮ್ಪನ್ನಕಾಲೇ ಪನ ಮಾತುಲಭೂತಸ್ಸ ಥೇರಸ್ಸ ನಾಮೇನ ಉಪಾಲಿ ನಾಮ. ದಿನ್ನನಾಮೇನ ಪನ ತಿಪಿಟಕಾಲಙ್ಕಾರೋ ನಾಮ. ತಿರಿಯಪಬ್ಬತವಿಹಾರೇ ಪನ ವಾಸತ್ತಾ ಠಾನನಾಮೇನ ತಿರಿಯಪಬ್ಬತತ್ಥೇರೋ ನಾಮ.

ಸೋ ಕಿರ ಏರಾವತೀನದೀತೀರೇ ಚತುಭೂಮಿಕವಿಹಾರೇ ಪಠಮಂ ನಿಸೀದಿತ್ವಾ ಪಚ್ಛಾ ಕಲಿಯುಗಸ್ಸ ವಸ್ಸಸಹಸ್ಸೇ ಕಾಲೇಸಟ್ಠಿವಸ್ಸಾಯುಕೋ ಹುತ್ವಾ ತಿರಿಯಪಬ್ಬತವಿಹಾರೇ ನಿಸೀದಿ. ಸಾಮಣೇರಕಾಲೇ ಸೋ ಜಲುಮಸ್ಯಾಮಭಯೇನ ರತನಪೂರತೋ ನಿಕ್ಖಮಿತ್ವಾ ಕೇತುಮತೀನಗರಂ ಪತ್ವಾ ತತ್ಥ ತಿಸಾಸನಧಜತ್ಥೇರಸ್ಸ ಸಿಸ್ಸಭೂತಸ್ಸ ಧಮ್ಮರಾಜಗುರುತ್ಥೇರಸ್ಸ ಸನ್ತಿಕೇ ಗನ್ಥಂ ಉಗ್ಗಣ್ಹಿಂ. ಪಾಳಿಅಟ್ಠಕಥಾಟೀಕಾಸು ಅತಿಛೇಕತಾಯ ದಹರಕಾಲೇಯೇವಚ ವೇಸ್ಸನ್ತರಜಾತಕಂ ಕಬ್ಯಾಲಙ್ಕಾರೇನ ಬನ್ಧಿತ್ವಾ ಕಥನತೋ ಅತಿವಿಯ ಪಾಕಟೋ ಅಹೋಸಿ. ತಸ್ಸ ಪನ ¶ ಥೇರಸ್ಸ ಸಿಸ್ಸೋ ಉಚ್ಚನಗರವಾಸೀ ಮಹಾತಿಸ್ಸತ್ಥೇರೋತಿ ಸಙ್ಗಿರಜನಪದೇ ಅರಞ್ಞವಾಸಂ ವಸಿತ್ವಾ ಪರಿಯತ್ತಿಂ ವಾಚೇತ್ವಾ ಸಾಸನಂ ಪಗ್ಗಣ್ಹಿ. ತಸ್ಸ ಪನ ಸಿಸ್ಸೋ ರೇಮಿನಗಾಮೇ ಗಾಮವಾಸೀ ಚನ್ದತ್ಥೇರೋ ನಾಮ. ತಸ್ಸ ಸಿಸ್ಸೋ ತಂಗಾಮವಾಸೀ ಗುಣಸಿರಿತ್ಥೇರೋ ನಾಮ. ತಸ್ಸ ಸಿಸ್ಸೋ ತಂಗಾಮವಾಸೀ ಕಲ್ಯಾಣಧಜತ್ಥರೋ ನಾಮ. ಸೋ ಪನ ಥೇರೋ ಪದುಮನಗರೇ ಸಹಸ್ಸೋರೋಧಬೋಧೋದಧಿಗಾಮೇಸು ಪರಿಯತ್ತಿಂ ವಾಚೇತ್ವಾ ನಿಸೀದಿ. ತಸ್ಸ ಸಿಸ್ಸೋ ಬೋಧೋದಧಿಗಾಮವಾಸಿನೋ ಇನ್ದೋಭಾಸಕಲ್ಯಾಣಚಕ್ಕವಿಮಲಾಚಾರತ್ಥೇರಾ ಸಹಸ್ಸೋರೋಧಗಾಮವಾಸಿನೋ ಗುಣಸಾರಚನ್ದಸಾರತ್ಥೇರಾ ವಂತುಮಗಾಮವಾಸೀ ವರಏಸಿತ್ಥೇರೋ ಕನ್ನಿನಗರೇ ಜರರಾಜಗಾಮ ವಾಸೀ ಗುಣಸಿರಿತ್ಥೇರೋಚಾತಿ ಇಮೇ ಥೇರಾ ಕಲ್ಯಾಣಧಜತ್ಥೇರಸ್ಸ ಸನ್ತಿಕೇ ಪುನ ಸಿಕ್ಖಂ ಗಹೇತ್ವಾ ಪರಿಯತ್ತಿಂ ಉಗ್ಗಣ್ಹಿತ್ವಾ ಕೋವಿದಾ ಅಹೇಸುಂ.

ತಸ್ಸೇವ ಕಲ್ಯಾಣಧಜತ್ಥೇರಸ್ಸ ಸಿಸ್ಸೋ ಸಙ್ಗಿರಜನಪದೇ ಸಮಿವನಗಾಮೇ ನಿಸಿನ್ನೋ ಧಮ್ಮಧರೋ ನಾಮ ಥೇರೋ ಮಹಲ್ಲಕಕಾಲೇ ಪದುಮನಗರೇ ಕುಸುಮಮೂಲಗಾಮೇ ನಿಸೀದಿತ್ವಾ ಗನ್ಥಂ ವಾಚೇತ್ವಾ ಸಾಸನಂ ಪಗ್ಗಣ್ಹಿ.

ತೇಸು ಗುಣಸಿರಿತ್ಥೇರೋ ಅಮರಪುರಮಾಪಕಸ್ಸ ರಞ್ಞೋ ಕಾಲೇ ಗುಣಾಭಿಲಙ್ಕಾರಸದ್ಧಮ್ಮಮಹಾರಾಜಾಧಿರಾಜಗುರೂತಿ ನಾಮಲಞ್ಛಂ ಗಣ್ಹಿತ್ವಾ ಜೇಯ್ಯಭೂಮಿವಾಸಕಿತ್ತಿವಿಹಾರೇ ಪಟಿವಸಿ.

ತಸ್ಸ ಪನ ಥೇರಸ್ಸ ಸಿಸ್ಸೋ ಞಾಣಾಭಿವಂಸಧಮ್ಮಸೇನಾಪತಿಮಹಾಧಮ್ಮರಾಜಾಗುರು ನಾಮ ಮಹಾಥೇರೋ. ತಸ್ಸೇವ ರಞ್ಞೋ ಕಾಲೇ ಸಙ್ಘರಾಜಾ ಅಹೋಸಿ. ಸೋ ಪನ ಥೇರೋ ಸೀಹಳದೀಪೇ ಅಮರಪುರನಿಕಾಯಿಕಾನಂ ಪಭವೋ. ಗುಣಾಭಿಲಙ್ಕಾರಸದ್ಧಮ್ಮಮಹಾಧಮ್ಮರಾಜಾಧಿರಾಜಗುರುತ್ಥೇರಸ್ಸೇವ ಸಿಸ್ಸೋ ತಿಪಿಟಕಾಲಙ್ಕಾರಮಹಾಧಮ್ಮರಾಜಗುರು ನಾಮ ಥೇರೋ. ತಸ್ಸ ಸಿಸ್ಸೋ ಸೂರಿಯವಂಸಾಭಿಸಿರಿಪವರಾಲಙ್ಕಾರಧಮ್ಮಸೇನಾಪತಿ ಮಹಾಧಮ್ಮರಾಜಾಧಿರಾಜಗುರು ನಾಮ ಥೇರೋ ಅಮರಪುರದುತಿಯಮಾಪಕಸ್ಸ ರಞ್ಞೋ ಕಾಲೇ ¶ ಸಙ್ಘರಾಜಾ ಅಹೋಸಿ. ತಸ್ಸ ಪನ ಸಿಸ್ಸೋ ಞೇಯ್ಯ ಧಮ್ಮಾಭಿವಂಸಮುನಿವರಞಾಣಕಿತ್ತಿಸಿರಿಪವರಾಲಙ್ಕಾರಧಮ್ಮಸೇನಾಪತಿ- ಮಹಾಧಮ್ಮರಾಜಾಧಿರಾಜಗುರು ಮಹಾಥೇರೋ ದುತಿಯಂ ಅಮರಪುರಮಾಪಕಸ್ಸ ರತನಪುಣ್ಣಮಾಪಕಸ್ಸಚ ರಞ್ಞೋ ಕಾಲೇಸು ಸಙ್ಘ ರಾಜಾ ಅಹೋಸಿ. ಸೋ ಪನ ಞಾಣಾಭಿವಂಸಧಮ್ಮಸೇನಾಪತಿಮಹಾಧಮ್ಮರಾಜಾಧಿರಾಜಗುರುತ್ಥೇರಸ್ಸ ಸಙ್ಘರಞ್ಞೋ ಸಿಸ್ಸೋಪಿ ವರಏಸಿತ್ಥೇರಸ್ಸ ಸಿಸ್ಸೋಚ ಅಹೋಸಿ.

ಅಯಂ ಸೀಹಳದೀಪತೋ ಸಬ್ಬಪಚ್ಛಿಮಾಗತೇಹಿ ಸದ್ಧಮ್ಮಚಾರೀಮಹಾಸಾಮಿತ್ಥೇರೇಹಿ ಯಾವ ಅಮ್ಹಾಕಂ ಆಚರಿಯಾ ಥೇರಪರಮ್ಪರಾ ದಸ್ಸನಕಥಾ.

ಅಯಮ್ಪಿ ಅಪರಾ ಥೇರಪರಮ್ಪರಾ ವೇದಿತಬ್ಬಾ. ಛಪ್ಪದತ್ಥೇರವಂಸಿಕೋ ಸದ್ಧಮ್ಮಕಿತ್ತಿ ನಾಮ ಥೇರೋ ಜೇಯ್ಯಪುರಂ ಆಗನ್ತ್ವಾ ಚತುದೀಪಭೂಮಿಟ್ಠಾನೇ ನಿಸೀದಿತ್ವಾ ಮಹಾಅರಿಯವಂಸತ್ಥೇರಸ್ಸ ಸನ್ತಿಕೇ ಪರಿಯತ್ತಿಂ ಉಗ್ಗಣ್ಹಿತ್ವಾ ತತೋ ಪಚ್ಛಾ ಜೇತವನವಿಹಾರಂ ಸಙ್ಕಮಿತ್ವಾ ತತ್ಥ ನಿಸೀದಿತ್ವಾ ಪರಿಯತ್ತಿಂ ವಾಚೇತ್ವಾ ಸಾಸನಂ ಪಗ್ಗಣ್ಹಿ.

ತಸ್ಸ ಸದ್ಧಮ್ಮಕಿತ್ತಿತ್ಥೇರಸ್ಸ ಸಿಸ್ಸೋ ತಿಸಾಸನಧಜೋ ನಾಮ. ತಸ್ಸ ಸಿಸ್ಸೋ ಧಮ್ಮರಾಜಗುರು ನಾಮ. ತಸ್ಸ ಸಿಸ್ಸೋ ಮುನಿನ್ದಘೋಸೋ ನಾಮ. ತಸ್ಸ ಸಿಸ್ಸೋ ಮಹಾತಿಸ್ಸೋ ನಾಮ. ತಸ್ಸ ಸಿಸ್ಸೋ ಚನ್ದಪಞ್ಞೋ ನಾಮ. ತಸ್ಸ ಸಿಸ್ಸೋ ಗುಣಸಿರಿ ನಾಮ. ತಸ್ಸ ಸಿಸ್ಸೋ ಞಾಣಧಜೋ ನಾಮ. ತಸ್ಸ ಸಿಸ್ಸೋ ಧಮ್ಮಧರೋ ನಾಮ. ತಸ್ಸ ಸಿಸ್ಸೋ ಇನ್ದೋಭಾಸೋ ನಾಮ. ತತೋ ಪಟ್ಠಾಯ ಕಲ್ಯಾಣಚಕ್ಕ ವಿಮಲಾಚಾರ ಗುಣಸಾರ ಚನ್ದಸಾರ ವರಏಸೀ ಗುಣಸಿರಿ ಞಾಣಾಭಿವಂಸ ಞೇಯ್ಯಧಮ್ಮಾಭಿವಂಸತ್ಥೇರಾನಂ ವಸೇನ ಸಾಸನವಂಸೋ ವೇದಿತಬ್ಬೋತಿ.

ಅಯಂ ಪತ್ತಲಙ್ಕಸ್ಸ ಛಪ್ಪದತ್ಥೇರಸ್ಸ ಸಿಸ್ಸಭೂತಾ ಸದ್ಧಮ್ಮಕಿತ್ತಿತ್ಥೇರತೋ ಪಟ್ಠಾಯ ಥೇರಪರಮ್ಪರದಸ್ಸನಕಥಾ.

ಇದಂ ರತನಪುಣ್ಣನಗರೇ ಸಾಸನಸ್ಸ ಪತಿಟ್ಠಾನಂ.

ಏವಂ ಅಪರನ್ತರಟ್ಠಸಙ್ಖಾತೇನ ಏಕದೇಸೇನ ಸಕಲಮ್ಪಿ ಮರಮ್ಮರಟ್ಠಂ ¶ ಗಹೇತ್ವಾ ಸಾಸನವಂಸೋ ದಸ್ಸೇತಬ್ಬೋ. ಭಗವಾಪಿ ಹಿ ಅಪರನ್ತರಟ್ಠೇ ಚನ್ದನವಿಹಾರೇ ವಸಿತ್ವಾ ತಮ್ಬದೀಪರಟ್ಠೇ ತಂತಂದೇಸಮ್ಪಿ ಇದ್ಧಿಯಾ ಚರಿತ್ವಾ ಸತ್ತಾನಂ ಧಮ್ಮಂ ದೇಸೇಸಿಯೇವಾತಿ.

ಇತಿ ಸಾಸನವಂಸೇ ಅಪರನ್ತರಟ್ಠಸಾಸನವಂಸಕಥಾಮಗ್ಗೋ

೭. ಕಸ್ಮಿರಗನ್ಧಾರರಟ್ಠಸಾಸನವಂಸಕಥಾಮಗ್ಗೋ

೭. ಇದಾನಿ ಯಥಾವುತ್ತಮಾತಿಕಾವಸೇನ ಕಸ್ಮೀರವನ್ಧಾರರಟ್ಠಸಾಸನವಂಸಕಥಾಮಗ್ಗಂ ವತ್ತುಂ ಓಕಾಸೋ ಅನುಪ್ಪತ್ತೋ, ತಸ್ಮಾ ತಂ ವಕ್ಖಾಮಿ.

ತತಿಯಸಙ್ಗೀತಾವಸಾನೇ ಹಿ ಮಹಾಮೋಗ್ಗಲಿಪುತ್ತತಿಸ್ಸತ್ಥೇರೋ ಮಜ್ಝನ್ತಿ ಕತ್ಥೇರಂ ಕಸ್ಮೀರಗನ್ಧಾರರಟ್ಠಂ ಪೇಸೇಸಿ,-ತ್ವಂ ಏತಂ ರಟ್ಠಂ ಗನ್ತ್ವಾ ಏತ್ಥ ಸಾಸನಂ ಪಭಿಟ್ಠಾಪೇಹೀತಿ. ಏತ್ಥ ಚ ಕಸ್ಮೀರಗನ್ಧಾರರಟ್ಠಂ ನಾಮ ಚೀನರಟ್ಠಸಮೀಪೇ ತಿಟ್ಠತಿ. ತೇನೇವ ಹಿ ಅಧುನಾ ಕಸ್ಮೀರಗನ್ಧಾರರಟ್ಠವಾಸಿನೋ ಚಿನರಟ್ಠವಾಸಿನೋಚ ಮನುಸ್ಸಾ ಅರವಾಳಸ್ಸ ನಾಮ ನಾಗರಾಜಸ್ಸ ಉಪ್ಪಜ್ಜನಕಾಲತೋ ಪಟ್ಠಾಯ ಯಾವಜ್ಜತನಾ ನಾಗರೂಪಂ ಕತ್ವಾ ಮಾನೇನ್ತಿ ಪೂಜೇನ್ತಿ ಸಕ್ಕರೋನ್ತಿ, ವತ್ಥಭಾಜನಾದೀಸುಪಿ ನಾಗರೂಪಮೇವ ತೇ ಯೇಭುಯ್ಯೇನ ಕರೋನ್ತೀತಿ.

ಸೋಚ ಮಜ್ಝನ್ತಿಕತ್ಥೇರೋಪಿ ಚತೂಹಿ ಭಿಕ್ಖೂಹಿ ಸದ್ಧಿಂ ಅತ್ಥ ಪಞ್ಚಮೋ ಹುತ್ವಾ ಪಾಟಲಿಪುತ್ತತೋ ವೇಹಾಸಂ ಅಬ್ಭುಗ್ಗನ್ತ್ವಾ ಹಿಮವತಿ ಅರವಾಳದಹಸ್ಸ ಉಪರಿ ಓತರಿ. ತೇನ ಖೋ ಪನ ಸಮಯೇನ ಕಸ್ಮೀರಗನ್ಧಾರರಟ್ಠೇ ಸಸ್ಸಪಾಕಸಮಯೇ ಅರವಾಳೋ ನಾಮ ನಾಗರಾಜಾ ಅರವಾಳದಹೇ ನಿಸೀದಿತ್ವಾ ಕರಕವಸ್ಸಂ ನಾಮ ವಸ್ಸಾಪೇತ್ವಾ ಸಸ್ಸಂ ಹರಾಪೇತ್ವಾ ಮಹಾಸಮುದ್ದಂ ಪಾಪೇಸಿ. ತೇರೋಚ ಅರವಾಳದಹಸ್ಸ ಉಪರಿ ಓತರಿತ್ವಾ ಅರವಾಳದಹಪಿಟ್ಠಿಕಂ ಚಙ್ಕಮತಿಪಿ ತಿಟ್ಠತಿಪಿ ನಿಸೀದತಿಪಿ ಸೇಯ್ಯಮ್ಪಿ ಕಪ್ಪೇತಿ. ನಾಗಮಾಣವಕಾ ತಂ ದಿಸ್ವಾ ಅರವಾಳಸ್ಸ ನಾಗರಾಜಸ್ಸ ಆರೋಚೇಸುಂ, - ಮಹಾರಾಜ ಏಕೋ ಛಿನ್ನಭಿನ್ನಪಟಧರೋ ಭಣ್ಡುಕಾಸಾವವಸನೋ ಅಮ್ಹಾಕಂ ಉದಕಂ ದೂಸೇತೀತಿ. ತದಾ ಪನ ಥೇರೋ ಅತ್ತಾನಂಯೇವ ¶ ನಾಗಾನಂ ದಸ್ಸೇತಿ. ನಗರಾಜಾ ತಾವದೇವ ಕೋಧಾಭಿಭೂತೋ ನಿಕ್ಖಮಿತ್ವಾ ಥೇರಂ ದಿಸ್ವಾ ಮಕ್ಖಂ ಅಸ್ಸಹಮಾನೋ ಅನ್ತಲಿಕ್ಖೇ ಅನೇಕಾನಿ ಭಿಂಸನಕಾನಿ ನಿಮ್ಮಿನಿ. ತತೋ ತತೋ ಭುಸಾವಾತಾ ವಾಯನ್ತಿ, ರುಕ್ಖಾ ಛಿಜ್ಜನ್ತಿ, ಪಬ್ಬತಕೂಟಾ ಪತನ್ತಿ ಮೇಘಾಗಜ್ಜನ್ತಿ, ವಿಜ್ಜುಂಲತಾ ನಿಚ್ಛರನ್ತಿ, ಅಸನಿಯೋ ಫಲನ್ತಿ, ಭಿನ್ನಂ ವಿಯ ಗಗನಂ ಉದಕಂ ಪಗ್ಘರತಿ, ಭಯಾನಕರೂಪಾ ನಾಗಕುಮಾರಾ ಸನ್ನಿಪತನ್ತಿ, ಸಯಮ್ಪಿ ಧೂಮಾಯತಿ ಪಜ್ಜಲತಿ, ಪಹರಣವುಟ್ಠಿಯೋ ವಿಸ್ಸಜ್ಜೇತಿ, ಕೋ ಅಯಂಮುಣ್ಡಕೋ ಛಿನ್ನಭಿನ್ನಪಟಧರೋತಿಆದೀಹಿ ಫರುಸವಚನೇಹಿ ಥೇರಂ ಸನ್ತಜ್ಜೇತಿ, ಏಥ ಗಣ್ಹಥ ಹನಥ ನಿದ್ಧಮಥ ಇಮಂ ಸಮಣನ್ತಿ ನಾಗಬಲಂ ಆಣಾಪೇಸಿ.

ಥೇರೋ ಸಬ್ಬಂ ತಂ ಭಿಂಸನಕಂ ಅತ್ತನೋ ಇದ್ಧಿಬಲೇನ ಪಟಿಬಾಹಿತ್ವಾ ನಾಗರಾಜಾನಂ ಆಹ,–

ಸದೇವಕೋಪಿ ಚೇ ಲೋಕೋ, ಆಗನ್ತ್ವಾ ತಾಸಯೇಯ್ಯ ಮಂ;

ನ ಮೇ ಪಟಿಬಲೋ ಅಸ್ಸ, ಜನೇತುಂ ಭಯಭೇರವಂ.

ಸಚೇಪಿ ತ್ವಂ ಮಹಿಂ ಸಬ್ಬ, ಸಸಮುದ್ದಂ ಸಪಬ್ಬತಂ;

ಉಕ್ಖಿಪಿತ್ವಾ ಮಹಾನಾಗ, ಖಿಪೇಯ್ಯಾಸಿ ಮಮೂಪರಿ.

ನೇವ ಮೇ ಸಕ್ಕುಣೇಯ್ಯಾಸಿ, ಜನೇತುಂ ಭಯಭೇರವಂ;

ಅಞ್ಞದತ್ಥು ತವೇವಸ್ಸ, ವಿಘಾತೋ ಉರಗಾಧಿಪಾತಿ.

ಏವಂ ವುತ್ತೇ ನಾಗರಾಜಾ ವಿಹತಾನುಭಾವೋ ನಿಪ್ಫಲವಾಯಾಮೋ ದುಕ್ಖೀ ದುಮ್ಮನೋ ಅಹೋಸಿ.

ತಂ ಥೇರೋ ತಙ್ಖಣಾನುರೂಪಾಯ ಧಮ್ಮಿಯಾ ಕಥಾಯ ಸನ್ದಸ್ಸೇತ್ವಾ ಸಮಾದಪೇತ್ವಾ ಸಮುತ್ತೇಜೇತ್ವಾ ಸಮ್ಪಹಂಸೇತ್ವಾ ತೀಸು ಸರಣೇಸು ಪಞ್ಚಸುಚ ಸೀಲೇಸು ಪತಿಟ್ಠಾಪೇಸಿ ಸದ್ಧಿಂ ಚತುರಾಸೀತಿಯಾ ನಾಗಸಹಸ್ಸೇಹಿ. ಅಞ್ಞೇಪಿ ಬಹೂ ಹಿಮವನ್ತವಾಸಿನೋ ಯಕ್ಖಾಚ ಗನ್ಧಬ್ಬಾಚ ಕುಮ್ಭಣ್ಡಾಚ ಥೇರಸ್ಸ ಧಮ್ಮಕಥಂ ಸುತ್ವಾ ಸರಣೇಸುಚ ಸೀಲೇಸುಚ ಪತಿಟ್ಠಹಿಂಸು. ಪಞ್ಚಕೋಪಿ ಯಕ್ಖೋ ಸದ್ಧಿಂ ಭರಿಯಾಯ ಯಕ್ಖಿನಿಯಾ ಪಞ್ಚಹಿಚ ಪುತ್ತಸತೇಹಿ ಪಠಮೇ ¶ ಫಲೇ ಪತಿಟ್ಠಿತೋ. ಅಥಾಯಸ್ಮಾ ಮಜ್ಝನ್ತಿ ಕತ್ಥೇರೋ ಸಬ್ಬೇನಾಗಯಕ್ಖರಕ್ಖಸೇ ಆಮನ್ತೇತ್ವಾ ಏವಮಾಹ,-

ಮಾದಾನಿ ಕೋಧಂ ಜನಯಿತ್ಥ, ಇತೋ ಉದ್ಧಂ ಯಥಾ ಪುರೇ;

ಸಸ್ಸಘಾತಞ್ಚ ಮಾ ಕತ್ಥ, ಸುಖಕಾಮಾ ಹಿ ಪಾಣಿನೋ;

ಕರೋಥ ಮೇತ್ತಂ ಸತ್ತೇಸು, ವಸನ್ತು ಮನುಜಾ ಸುಖನ್ತಿ.

ತೇ ಸಬ್ಬೇಪಿ ಸಾಧು ಭನ್ತೇತಿ ಥೇರಸ್ಸ ವಚನಂ ಪಟಿಸ್ಸುಣಿತ್ವಾ ಯಥಾನುಸಿಟ್ಠಂ ಪಟಿಪಜ್ಜಿಂಸು. ತಂ ದಿವಸಮೇವ ನಾಗರಾಜಸ್ಸ ಪೂಜಾಸಮಯೋ ಹೋತಿ. ಅಥ ನಾಗರಾಜಾ ಅತ್ತನೋ ರತನಮಯಂ ಪಲ್ಲಙ್ಕಂ ಆಹರಾಪೇತ್ವಾ ಥೇರಸ್ಸ ಪಞ್ಞಪೇಸಿ. ನಿಸೀದಿ ಥೇರೋ ಪಲ್ಲಙ್ಕೇ. ನಾಗರಾಜಾಪಿ ಥೇರಂ ಬೀಜಯಮಾನೋ ಸಮೀಪೇ ಅಟ್ಠಾಸಿ. ತಸ್ಮಿಂ ಖಣೇ ಕಸ್ಮೀರಗನ್ಧಾರರಟ್ಠವಾಸಿನೋ ಆಗನ್ತ್ವಾ ಥೇರಂ ದಿಸ್ವಾ ಅಮ್ಹಾಕಂ ನಾಗರಾಜತೋಪಿ ಥೇರೋ ಮಹಿದ್ಧಿಕತರೋತಿ ಥೇರಮೇವ ವನ್ದಿತ್ವಾ ನಿಸಿನ್ನಾ. ಥೇರೋ ತೇಸಂ ಆಸಿವಿಸೋಪಮಸುತ್ತಂ ಕಥೇಸಿ. ಸುತ್ತಪರಿಯೋಸಾನೇ ಅಸೀತಿಯಾಪಾಣಸಹಸ್ಸಾನಂ ಧಮ್ಮಾಭಿಸಮಯೋ ಅಹೋಸಿ. ಕುಲಸತಸಹಸ್ಸಞ್ಚ ಪಬ್ಬಜಿ. ತತೋ ಪಭುತಿ ಚ ಕಸ್ಮೀರಗನ್ಧಾರೋ ಯಾವಜ್ಜೇತನಾ ಕಾಸಾವಪಜ್ಜೋತಾ ಇಸಿವಾತಪಟಿವಾತಾಏವ.

ಗನ್ತ್ವಾ ಕಸ್ಮೀರಗನ್ಧಾರಂ, ಇಸಿ ಮಜ್ಝನ್ತಿಕೋ ತದಾ;

ದುಟ್ಠಂ ನಾಗಂ ಪಸಾದೇತ್ವಾ, ಮೋಚೇಸಿ ಬನ್ಧನಾ ಬಹೂತಿ.

ಅಧುನಾ ಪನ ಕಸ್ಮೀರಗನ್ಧಾರರಟ್ಠೇ ಸಾಸನಸ್ಸ ಅತ್ಥಙ್ಗತಸ್ಸವಿಯ ಸೂರಿಯಸ್ಸ ಓಭಾಸೋ ನ ಪಞ್ಞಾಯತಿ, ತಸ್ಮಾ ತತ್ಥ ಸಾಸನಸ್ಸ ಪತಿಟ್ಠಾನೇ ವಿತ್ಥಾರೇನ ವತ್ತಬ್ಬಕಿಚ್ಚಂ ನತ್ಥೀತಿ.

ಇತಿ ಸಾಸನವಂಸೇ ಕಸ್ಮೀರಗನ್ಧಾರರಟ್ಠಸಾಸನವಂಸಕಥಾಮಗ್ಗೋ

೮. ಮಹಿಂಸಕರಟ್ಠಸ್ಸಾಸನವಂಸಕಥಾಮಗ್ಗೋ

೮. ಇದಾನಿ ¶ ಯಥಾವುತ್ತಮಾತಿಕಾವಸೇನ ಮಹಿಂಸಕರಟ್ಠಸಾಸನವಂಸಕಥಾಮಗ್ಗಂ ವತ್ತುಂ ಓಕಾಸೋ ಅನುಪ್ಪತ್ತೋ, ತಸ್ಮಾ ತಂ ವಕ್ಖಾಮಿ.

ತತಿಯಸಙ್ಗೀತಾವಸಾನೇ ಹಿ ಮಹಾಮೋಗ್ಗಲಿಪುತ್ತತಿಸ್ಸತ್ಥೇರೋ ಮಹಾರೇವತ್ಥೇರಂ ಮಹಿಂಸಕಮಣ್ಡಲಂ ಪೇಸೇಸಿ,- ತ್ವಂ ಏತಂ ರಟ್ಠಂ ಗನ್ತ್ವಾ ಏತ್ಥ ಸಾಸನಂ ಪತಿಟ್ಠಾಪೇಹೀತಿ.

ಸೋಚ ಅತ್ತಪಞ್ಚಮೋ ಹುತ್ವಾ ಮಹಿಂಸಕಮಣ್ಡಲಂ ಅಗಮಾಸಿ ಪಚ್ಚನ್ತಿಮೇಸು ಜನಪದೇಸು ಪಞ್ಚವಗ್ಗೋ ಗಣೋ ಅಲಂ ಉಪಸಮ್ಪದಕಮ್ಮಾಯಾತಿ ಮಞ್ಞಮಾನೋ. ಥೇರೋ ಮಹಿಂಸಕಮಣ್ಡಲಂ ಗನ್ತ್ವಾ ದೇವದೂತಸುತ್ತಂ ಕಥೇಸಿ. ಸುತ್ತಪರಿಯೋಸಾನೇ ಚತ್ತಾಲೀಸಪಾಣಸಹಸ್ಸಾನಿ ಧಮ್ಮಚಕ್ಖುಂ ಪ್ಪಟಿಲಭಿಂಸು. ಚತ್ತಾಲೀಸಂಯೇವ ಪಾಣಸಹಸ್ಸಾನಿ ಪಬ್ಬಜಿಂಸು.

ಗನ್ತ್ವಾನ ರಟ್ಠಂ ಮಹಿಂಸಂ, ಮಹಾರೇವೋ ಮಹಿದ್ಧಿಕೋ;

ಚೋದೇತ್ವಾ ದೇವದೂತೇಹಿ, ಮೋಚೇಸಿ ಬನ್ಧನಾ ಬಹೂತಿ.

ಅಧುನಾ ಪನ ತತ್ಥ ಸಾಸನಸ್ಸ ಅಬ್ಭೇಹಿವಿಯ ಪಟಿಚ್ಛನ್ನಸ್ಸ ಸೂರಿಯಸ್ಸ ಓಕಾಸೋ ದುಬ್ಬಲೋ ಹುತ್ವಾ ಪಞ್ಞಾಯತಿ.

ಇತಿ ಸಾಸನವಂಸೇ ಮಹಿಂಸಕರಟ್ಠಸಾಸನವಂಸಕಥಾಮಗ್ಗೋ

೯. ಇತೋ ಪರಂ ಮಹಾರಟ್ಠಸಾಸನವಂಸಕಥಾಮಗ್ಗಂ ಕಥಯಿಸ್ಸಾಮಿ ಯಥಾವುತ್ತಮಾತಿಕಾವಸೇನ.

ತತಿಯಸಙ್ಗೀತಾವಸಾನೇ ಹಿ ಮಹಾಮೋಗ್ಗಲಿಪುತ್ತತಿಸ್ಸತ್ಥೇರೋ ಮಹಾಧಮ್ಮರಕ್ಖಿತ್ಥೇರಂ ಮಹಾರಟ್ಠಂ ಪೇಸೇಸಿ,-ತ್ವಂ ಏತಂ ರಟ್ಠಂ ಗನ್ತ್ವಾ ಏತ್ಥ ಸಾಸನಂ ಪತಿಟ್ಠಾಪೇಸೀತಿ.

ಮಹಾಧಮ್ಮರಕ್ಖಿತತ್ಥೇರೋಚ ಅತ್ತಪಞ್ಚಮೋ ಹುತ್ವಾ ಮಹಾರಟ್ಠಂ ಗನ್ತ್ವಾ ಮಹಾನಾರದಕಸ್ಸಪಜಾತಕಕಥಾಯ ಮಹಾರಟ್ಠಕೇ ಪಸಾದೇತ್ವಾ ¶ ಚತುರಾಸೀತಿಪಾಣಸಹಸ್ಸಾನಿ ಮಗ್ಗಫಲೇಸು ಪತಿಟ್ಠಾಪೇಸಿ. ತೇರಸಸಹಸ್ಸಾನಿ ಪಬ್ಬಜಿಂಸು. ಏವಂ ಸೋ ತತ್ಥ ಸಾಸನಂ ಪತಿಟ್ಠಾಪೇಸಿ.

ಮಹಾರಟ್ಠಂ ಇಸಿ ಗನ್ತ್ವಾ, ಸೋ ಮಹಾ ಧಮ್ಮರಕ್ಖಿತೋ;

ಜಾತಕಂ ಕಥಯಿತ್ವಾನ, ಪಸಾದೇಸಿ ಮಹಾಜನನ್ತಿ.

ತತ್ಥ ಕಿರ ಮನುಸ್ಸಾ ಪುಬ್ಬೇ ಅಗ್ಗಿಹುತಾದಿಮಿಚ್ಛಾಕಮ್ಮಂ ಯೇಭುಯ್ಯೇನ ಅಕಂಸು. ತೇನೇವ ಥೇರೋ ಮಹಾನಾರದಕಸ್ಸಪಜಾತಕಕಥಂ ದೇಸೇಸಿ. ತತೋ ಪಟ್ಠಾಯ ತತ್ಥ ಮನುಸ್ಸಾ ಜಾತಕ ಕಥಂ ಯೇಭುಯ್ಯೇನ ಸೋತುಂ ಅತಿವಿಯ ಇಚ್ಛನ್ತಿ. ಭಿಕ್ಖೂಚ ಯೇಭುಯ್ಯೇನ ಗಹಟ್ಠಾನಂ ಜಾತಕಕಥಂಯೇವ ದೇಸೇನ್ತಿ. ವಿಸೇಸತೋ ಪನ ವಸ್ಸನ್ತರಜಾತಕಕಥಂ ತೇ ಮನುಸ್ಸಾ ಬಹೂಹಿ ದಾತಬ್ಬವತ್ಥೂಹಿ ಪೂಜೇತ್ವಾ ಸುಣನ್ತಿ.

ತಞ್ಚ ಮಹಾರಟ್ಠಂ ನಾಮ ಸ್ಯಾಮರಟ್ಠಸಮೀಪೇ ಠಿತಂ, ತೇನೇವ ಸ್ಯಾಮರಟ್ಠವಾಸಿನೋಪಿ ಭಿಕ್ಖೂ ಗಹಟ್ಠಾಚ ಯೇಭುಯ್ಯೇನ ಸೋತುಂ ಇಚ್ಛನ್ತೀತಿ. ಮಹಾಧಮ್ಮರಕ್ಖಿತತ್ಥೇರೋಪಿ ಮಹಾರಟ್ಠವಾಸೀಹಿ ಸದ್ಧಿಂ ಸಕಲಸ್ಯಾಮರಟ್ಠವಾಸೀನಂ ಧಮ್ಮಂ ದೇಸೇಸಿ, ಅಮತರಸಂ ಪಾಯೇಸಿ, ಯಥಾ ಯೋನಕಧಮ್ಮರಕ್ಖಿತತ್ಥೇರೋ ಅಪರನ್ತರಟ್ಠಂ ಗನ್ತ್ವಾ ಸಕಲಮರಮ್ಮರಟ್ಠವಾಸೀನನ್ತಿ.

ಯಂ ಪನ ಯೋನಕರಟ್ಠಸಾಸನವಂಸಕಥಾಯಂ ವುತ್ತಂ, ತಮ್ಪಿ ಸಬ್ಬಂ ಏತ್ಥಾಪಿ ದಟ್ಠಬ್ಬಂಯೇವ, ತೇಹಿ ತಸ್ಸ ಏಕಸದಿಸತ್ತೇನ ಠಿತತ್ತಾತಿ. ತಥಾ ಹಿ ನಾಗಸೇನತ್ಥೇರೋಪಿ ಯೋನಕರಟ್ಠೇ ವಸಿತ್ವಾ ಸ್ಯಾಮರಟ್ಠಾದೀಸುಪಿ ಸಾಸನಂ ಪತಿಟ್ಠಾಪೇಸಿ. ಯೋನಕರಟ್ಠವಾಸಿನೋ ಮಹಾಧಮ್ಮಗಮ್ಭೀರತ್ಥೇರಮಹಾಮೇಧಙ್ಕರತ್ಥೇರಾಚ ಸದ್ಧಿಂ ಬಹೂಹಿ ಭಿಕ್ಖೂಹಿ ಸೀಹಳದೀಪಂ ಗನ್ತ್ವಾ ತತೋ ಪುನಾಗನ್ತ್ವಾ ಸ್ಯಾಮರಟ್ಠೇ ಸೋಕ್ಕತಯನಗರಂ ಪತ್ವಾ ತತ್ಥ ನಿಸೀದಿತ್ವಾ ಸಾಸನಂ ಪಗ್ಗಣ್ಹಿತ್ವಾ ಪಚ್ಛಾ ಲಕುನ್ನನಗರೇ ನಿಸೀದಿತ್ವಾ ಸಾಸನಂ ಪಗ್ಗಣ್ಹಿ. ಏವಂ ಯೋನಕರಟ್ಠೇ ಸಾಸನಂ ಠಿತಂ ಸ್ಯಾಮಾದೀಸುಪಿ ಠಿತಂಯೇವಾತಿ ದಟ್ಠಬ್ಬಂ.

ಬುದ್ಧಸ್ಸ ಭಗವತೋ ಪರಿನಿಬ್ಬಾನತೋ ದ್ವಿಸತಾಧಿಕಾನಂ ದ್ವಿನ್ನಂ ವಸ್ಸಸಹಸ್ಸಾನಂ ¶ ಉಪರಿ ನವುತಿಮೇ ವಸ್ಸ ಸೀಹಳದೀಪೇ ರಜ್ಜಂ ಪತ್ತಸ್ಸ ಕಿತ್ತಿಸ್ಸಿರಿರಾಜಸೀಹಮಹಾರಾಜಸ್ಸ ಅಭಿಸೇಕತೋ ತತಿಯೇ ವಸ್ಸೇ ತೇನೇವ ಕಿತ್ತಿಸ್ಸಿರಿರಾಜಸೀಹಮಹಾರಞ್ಞಾ ಪಹಿತಪಣ್ಣಾಕಾರಸಾಸನಂ ಆಗಮ್ಮ ಸರಾಮಾಧಿಪತಿಧಮ್ಮಿಕಮಹಾರಾಜಾಧಿರಾಜೇನಾಣತ್ತೇಹಿ ಲಙ್ಕಾದೀಪಂ ಆಗತೇಹಿ ಉಪಾಲಿತ್ಥೇ ರಾದೀಹಿ ಪತಿಟ್ಠಾಪಿತೋ ವಂಸೋ ಉಪಾಲಿವಂಸೋತಿ ಪಾಕಟೋ. ಸೋಚ ದುವಿಧೋ ಪುಬ್ಬಾರಾಮವಿಹಾರವಾಸೀಅಭಯಗಿರಿವಿಹಾರವಾಸೀವಸೇನಾತಿ. ಏವಂ ಮಹಾನಗರಯೋನಕಲ್ಯಾಮರಟ್ಠೇಸು ಸಾಸನಂ ಥಿರಂ ಹುತ್ವಾ ತಿಟ್ಠತೀತಿ ವೇದಿತಬ್ಬನ್ತಿ.

ಇತಿ ಸಾಸನವಂಸೇ ಮಹಾರಟ್ಠಸಾಸನವಂಸಕಥಾಮಗ್ಗೋ ನಾಮ

೧೦. ತತೋ ಪರಂ ಪವಕ್ಖಾಮಿ ಚೀನರಟ್ಠಸಾಸನವಂಸಕಥಾಮಗ್ಗಂ ಯಥಾಟ್ಠವಿತಮಾತಿಕಾವಸೇನ.

ತತಿಯಸಙ್ಗೀತಾವಸಾನೇ ಹಿ ಮಹಾಮೋಗ್ಗಲಿಪುತ್ತತಿಸ್ಸತ್ಥೇರೋ ಮಜ್ಝಿಮತ್ಥೇರಂ ಚಿನರಟ್ಠಂ ಪೇಸೇಸಿ,-ತ್ವಂ ಏತಂ ರಟ್ಠಂ ಗನ್ತ್ವಾ ಏತ್ಥ ಸಾಸನಂ ಪತಿಟ್ಠಾಪೇಹೀತಿ.

ಮಜ್ಝಿಮತ್ಥೇರೋಚ ಕಸ್ಸಪಗೋತ್ತರೇನ ಅಳಕರೇವತ್ಥೇರೇನ ದುನ್ದಭಿಯತ್ಥೇರೇನ ಮಹಾರೇವತ್ಥೇರೇನಚ ಸದ್ಧಿಂ ಹಿಮವನ್ತಪ್ಪದೇಸೇ ಪಞ್ಚಚೀನರಟ್ಠಂ ಗನ್ತ್ವಾ ಧಮ್ಮಚಕ್ಕಪ್ಪವತ್ತನಸುತ್ತನ್ತಕಥಾಯತಂ ದೇಸಂ ಪಸಾದೇತ್ವಾ ಅಸೀತಿಪಾಣಕೋಟಿಯೋ ಮಗ್ಗಫಲರತನಾನಿ ಪಟಿಲಾಭೇಸಿ. ಪಞ್ಚಪಿಚ ತೇ ಥೇರಾ ಪಞ್ಚರಟ್ಠಾನಿ ಪಸಾದೇಸುಂ. ಏಕಮೇಕಸ್ಸ ಸನ್ತಿಕೇ ಸಹಸ್ಸಮತ್ತಾ ಪಬ್ಬಜಿಂಸು. ಏವಂ ತೇ ತತ್ಥ ಸಾಸನಂ ಪತಿಟ್ಠಾಪೇಸುಂ.

ಗನ್ತ್ವಾ ಮಜ್ಝಿಮತ್ಥೇರೋ, ಹಿಮವನ್ತಂ ಪಸಾದಯಿ;

ಯಕ್ಖಸೇನಂ ಪಕಾಸೇನ್ತೋ, ಧಮ್ಮಚಕ್ಕಪ್ಪವತ್ತನನ್ತಿ.

ತತ್ಥ ಕಿರ ಮನುಸ್ಸಾ ಯೇಭುಯ್ಯೇನ ಚನ್ದೀಪರಮೀಸ್ವಾರಾನಂ ಯಕ್ಖಾನಂ ಪೂಜಂ ¶ ಕರೋನ್ತಿ. ತೇನೇವ ತೇ ಪಞ್ಚ ಥೇರಾ ತೇಸಂ ಯಕ್ಖಸೇನಂ ಪಕಾಸಯಿತ್ವಾ ಧಮ್ಮಂ ದೇಸೇಸುಂ. ಕಸ್ಮೀರಗನ್ಧಾರರಟ್ಠಂ ಪನ ಕದಾಚಿ ಕದಾಚಿ ಚೀನರಟ್ಠಿನ್ದಸ್ಸ ವಿಜಿತಂ ಹೋತಿ, ಕದಾಚಿ ಕದಾಚಿ ಪನ ವಿಸುಂ ಹೋತಿ. ತದಾ ಪನ ವಿಸುಂಯೇವ ಅಹೋಸೀತಿ ದಟ್ಠಬ್ಬಂ.

ಚೀರನಟ್ಠೇ ಪನ ಭಗವತೋ ಸಾಸನಂ ದುಬ್ಬಲಂಯೇವ ಹುತ್ವಾ ಅಟ್ಠಾಸಿ, ನ ಥಿರಂ ಹುತ್ವಾ. ತೇನೇವ ಇದಾನಿ ತತ್ಥ ಕತ್ಥಚಿಯೇವ ಸಾಸನಂ ಛಾಯಾಮತ್ತಂವ ಪಞ್ಞಾಯತಿ, ವಾತವೇಗೇನ ವಿಕಿಣ್ಣಅಬ್ಭಂವಿಯ ತಿಟ್ಠತೀತಿ.

ಇತಿ ಸಾಸನವಂಸೇ ಚೀನರಟ್ಠಸಾಸನವಂಸಕಥಾಮಗ್ಗೋ ನಾಮ

ಏವಂ ಸಬ್ಬೇನ ಸಬ್ಬಂ ಸಾಸನವಂಸಕಥಾಮಗ್ಗೋ ನಿಟ್ಠಿತೋ.

ಲಙ್ಕಾಗತೇನ ಸನ್ತೇನ, ಚಿತ್ರಞಾಣೇನ ಭಿಕ್ಖುನಾ;

ಸರಣಙ್ಕರನಾಮೇನ, ಸದ್ಧಮ್ಮಟ್ಠಿತಿಕಾಮಿನಾ.

ದೂರತೋಯೇವ ದೀಪಮ್ಹಾ, ಸುಮಙ್ಗಲೇನ ಜೋತಿನಾ;

ವಿಸುದ್ಧಸೀಲಿನಾಚೇವ, ದೀಪನ್ತರಟ್ಠಭಿಕ್ಖುನಾ.

ಅಞ್ಞೇಹಿಚಾಭಿಯಾಚಿತೋ, ಪಞ್ಞಾಸಾಮೀತಿ ನಾಮಕೋ;

ಅಕಾಸಿಂ ಸುಟ್ಠುಕಂ ಗನ್ಥಂ, ಸಾಸನವಂಸಪ್ಪದೀಪಿಕಂ.

ದ್ವಿಸತೇಚ ಸಹಸ್ಸೇಚ, ತೇವೀಸಾಧಿಕೇ ಗತೇ;

ಪುಣ್ಣಾಯಂ ಮಿಗಸೀರಸ್ಸ, ನಿಟ್ಠಂ ಗತಾವ ಸಬ್ಬಸೋ.

ಕೋಚಿ ಏತ್ಥೇವ ದೋಸೋ ಚೇ, ಪಞ್ಞಾಯತಿ ಸುಚಿತ್ತಕಾ;

ತಂ ಖಮನ್ತು ಚ ಸುದ್ಧಿಯಾ, ಗಣ್ಹನ್ತು ಯುತ್ತಿಕಂ ಹವೇತಿ.