📜
ನಮೋ ತಸ್ಸ ಭಗವತೋ ಅರಹತೋ ಸಮ್ಮಾಸಮ್ಬುದ್ಧಸ್ಸ
ಮಹಾವಂಸಪಾಳಿ
ಪಥಮಪರಿಚ್ಛೇದ
ಮಹಿಯಙ್ಗಣಾಗಮನಂ
ನಮಸ್ಸಿತ್ವಾನ ¶ ಸಮ್ಬುದ್ಧಂ, ಸುಸುದ್ಧಂ ಸುದ್ಧವಂಸಜಂ;
ಮಹಾವಂಸಂ ಪವಕ್ಖಾಮಿ, ನಾನಾನೂನಾಧಿಕಾರಿಕಂ.
ಪೋರಾಣೇಹಿ ಕತೋ’ಪೇಸೋ, ಅತಿವಿತ್ಥಾರಿತೋ ಕ್ವಚಿ;
ಅತೀವ ಕ್ವಚಿ ಸಂಖಿತ್ತೋ, ಅನೇಕಪುನರುತ್ತಕೋ.
ವಜ್ಜಿತಂ ತೇಹಿ ದೋಸೇಹಿ, ಸುಖಗ್ಗಹಣಧಾರಣಂ;
ಪಸಾದಸಂವೇಗಕರಂ, ಸುತಿತೋ ಚ ಉಪಾಗತಂ.
ಪಸಾದಜನಕೇ ಠಾನೇ, ತಥಾ ಸಂವೇಗಕಾರಕೇ;
ಜನಯನ್ತೋ ಪಸಾದಞ್ಚ, ಸಂವೇಗಞ್ಚ ಸುಣಾಥ ತಂ.
ದೀಪಙ್ಕರಞ್ಹಿ ಸಮ್ಬುದ್ಧಂ, ಪಸ್ಸಿತ್ವಾ ನೋ ಜಿನೋ ಪುರಾ;
ಲೋಕಂ ದುಕ್ಖಾ ಪಮೋಚೇತುಂ, ಬೋಧಾಯ ಪಣಿಧಿಂ ಅಕಾ.
ತತೋ ತಞ್ಚೇವ ಸಮ್ಬುದ್ಧಂ, ಕೋಣ್ಡಞ್ಞಂ ಮಙ್ಗಲಂ ಮುನಿಂ;
ಸುಮನಂ ರೇವತಂ ಬುದ್ಧಂ, ಸೋಭಿತಞ್ಚ ಮಹಾಮುನಿಂ.
ಅನೋಮದಸ್ಸಿಂ ಸಮ್ಬುದ್ಧಂ, ಪದುಮಂ ನಾರದಂ ಜಿನಂ;
ಪದುಮುತ್ತರಸಮ್ಬುದ್ಧಂ, ಸುಮೇಧಞ್ಚ ತಥಾಗತಂ.
ಸುಜಾತಂ ಪಿಯದಸ್ಸಿಞ್ಚ, ಅತ್ಥದಸ್ಸಿಞ್ಚ ನಾಯಕಂ;
ಧಮ್ಮದಸ್ಸಿಞ್ಚ ಸಿದ್ಧತ್ಥಂ, ತಿಸ್ಸಂ ಫುಸ್ಸಜಿನಂ ತಥಾ.
ವಿಪಸ್ಸಿಂ ಸಿಖೀಸಮ್ಬುದ್ಧಂ, ಸಮ್ಬುದ್ಧಂ ವೇಸ್ಸಭುಂ ವಿಭುಂ;
ಕಕುಸನ್ಧಞ್ಚ ಸಮ್ಬುದ್ಧಂ, ಕೋಣಾಗಮನಮೇವ ಚ.
ಕಸ್ಸಪಂ ಸುಗತಞ್ಚ’ಮೇ, ಸಮ್ಬುದ್ಧೇ ಚತುವೀಸತಿ;
ಆರಾಧೇತ್ವಾ ಮಹಾವೀರೋ, ತೇಹಿ ಬೋಧಾಯ ಬ್ಯಾಕತೋ.
ಪುರೇತ್ವಾ ¶ ಪಾರಮೀ ಸಬ್ಬಾ, ಪತ್ವಾ ಸಮ್ಬೋಧಿಮುತ್ತಮಂ;
ಉತ್ತಮೋ ಗೋತಮೋ ಬುದ್ಧೋ, ಸತ್ತೇ ದುಕ್ಖಾ ಪಮೋಚಯಿ.
ಮಗಧೇಸು ರುವೇಲಾಯಂ, ಬೋಧಿಮೂಲೇ ಮಹಾಮುನಿ;
ವಿಸಾಖಪುಣ್ಣಮಾಯಂ ಸೋ, ಪತ್ತೋ ಸಮ್ಬೋಧಿಮುತ್ತಮಂ.
ಸತ್ತಾಹಾನಿ ತಹಿಂ ಸತ್ತ, ಸೋ ವಿಮುತ್ತಿಸುಖಂ ಪರಂ;
ವಿನ್ದನ್ತಂ ಮಧುರತ್ತಞ್ಚ, ದಸ್ಸಯನ್ತೋ ವಸೀ ವಸಿ.
ತತೋ ಬಾರಾಣಸಿಂ ಗನ್ತ್ವಾ, ಧಮ್ಮಚಕ್ಕಂ ಪಗತ್ತಯಿ;
ತತ್ಥ ವಸ್ಸ ವಸನ್ತೋ’ವ, ಸಟ್ಠಿಂ ಅರಹತಂ ಅಕಾ.
ತೇ ಧಮ್ಮದೇಸನತ್ಥಾಯ, ವಿಸ್ಸಜ್ಜೇತ್ವಾನ ಭಿಕ್ಖವೋ;
ವಿನೇತ್ವಾ ಚ ತತೋ ತಿಂಸ-ಸಹಾ ಯೇ ಭದ್ದವಗ್ಗಿಯೇ.
ಸಹಸ್ಸಜಟಿಲೇ ನಾಥೋ, ವಿನೇತುಂ ಕಸ್ಸಪಾದಿಕೇ;
ಹೇಮನ್ತೇ ಉರುವೇಲಾಯಂ, ವಸಿತೇ ಪರಿಪಾಚಯಂ.
ಉರುವೇಲಕಸ್ಸಪಸ್ಸ, ಮಹಾಯಞ್ಞೇ ಉಪಟ್ಠಿತೇ;
ತಸ್ಸ’ತ್ತನೋ ನಾಗಮನೇ, ಇಚ್ಛಾಚಾರಂ ವಿಜಾನಿಯ.
ಉತ್ತರಕುರುತೋ ಭಿಕ್ಖಂ, ಆಹರಿತ್ವಾ ರಿಮದ್ದನೋ;
ಅನೋತತ್ತದಹೇ ಭುತ್ವಾ, ಸಾಯನ್ಹಸಮಯೇ ಸಯಂ.
ಬೋಧಿತೋ ನವಮೇ ಮಾಸೇ, ಫುಸ್ಸಪುಣ್ಣಮಿಯಂ ಜಿನೋ;
ಲಙ್ಕಾದೀಪಂ ವಿಸೋಧೇತುಂ, ಲಙ್ಕಾದೀಪಮುಪಾಗಮಿ.
ಸಾಸನುಜ್ಜೋತನಂ ಠಾನಂ, ಲಂಕಾ ಞಾತಾ ಜಿನೇನ ಹಿ;
ಯಕ್ಖಪುಣ್ಣಾಯ ಲಙ್ಕಾಯ, ಯಕ್ಖಾ ನಿಬ್ಬಾ ಸಿಯಾತಿ ಚ.
ಞಾತೋವ ಲಙ್ಕಾಮಜ್ಝಮ್ಹಿ, ಗಙ್ಗಾಭೀರೇ ಮನೋರಮೇ;
ತಿಯೋಜನಾಯ ತೇ ರಮ್ಮೇ, ಏಕಯೋಜನವಿತ್ಥತೇ.
ಮಹಾನಾಗವನುಯ್ಯಾನೇ, ಯಕ್ಖಸಙ್ಗಾಮಭೂಮಿಯಾ;
ಲಙ್ಕಾದೀಪಟ್ಠಯಕ್ಖಾನಂ, ಮಹಾಯಕ್ಖಸಮಾಗಮೋ.
ಉಪಾಗತೋ ತಂ ಸುಗತೋ, ಮಹಾಯಕ್ಖಸಮಾಗಮಂ;
ಸಮಾಗಮಸ್ಸ ಮಜ್ಝಮ್ಹಿ, ತತ್ಥ ತೇಸಂ ಸಿರೋಪರಿ.
ಮಹಿಯಙ್ಗಣಥೂಪಸ್ಸ, ಠಾನೇ ವೇಹಾಯಸಂ ಜಿನೋ;
ವುಟ್ಠಿವಾತನ್ಧಕಾರೇಸಿ, ತೇಸಂ ಸಂವೇಜನಂ ಅಕಾ.
ತೇ ಭಯಟ್ಠಾ’ಭಯಂ ಯಕ್ಖಾ, ಅಯಾಚುಂ ಅಭಯಂ ಜಿನಂ;
ಜಿನೋ ಅಭಯದೋ ಆಹ, ಯಕ್ಖೇ ತೇ’ತಿ ಭಯದ್ದೀತೇ.
ಯಕ್ಖಾ ¶ ಭಯಂ ವೋ ದುಕ್ಖಞ್ಚ, ಹರಿಸ್ಸಾಮಿ ಇದಂ ಅಹಂ;
ತುಮ್ಹೇ ನಿಸಜ್ಜಠಾನಂ ಮೇ, ಸಮಗ್ಗಾ ದೇಥ ನೋ ಇಧ.
ಆಹು ತೇ ಸುಗತಂ ಯಕ್ಖಾ, ದೇಮ ಮಾರಿಸ ತೇ ಇಧ;
ಸಬ್ಬೇಪಿ ಸಕಲಂ ದೀಪಂ, ದೇಹಿ ನೋ ಅಭಯಂ ತುವಂ.
ಭಯಂ ಸೀತಂ ತಮಂ ತೇಸಂ, ಹನ್ತ್ವಾ ತಂ ದಿನ್ನಭೂಮಿಯಂ;
ಚಮ್ಮಕ್ಖನ್ಧಂ ಅತ್ಥರಿತ್ವಾ, ತತ್ಥಾ’ ಸೀನೋ ಜಿನೋ ತತೋ.
ಚಮ್ಮಕ್ಖಣ್ಡಂ ಪಸಾರೇಸಿ, ಆದಿತ್ತಂ ತಂ ಸಮನ್ತತೋ;
ಘಮ್ಮಾಭಿಭೂತಾ ತೇ ಭೀತಾ, ಠಿತಾ ಅನ್ತೇ ಸಮನ್ತತೋ.
ಗಿರಿದೀಪಂ ತತೋ ನಾಥೋ, ರಮ್ಮಂ ತೇಸಂ ಇಧಾ’ನಯಿ;
ತೇಸು ತತ್ಥ ಪವಿಟ್ಠೇಸು, ಯಥಾಠಾನೇ ಠಪೇಸಿ ಚ.
ನಾಥೋ ತಂ ಸಂಖಿಪಿ ಧಮ್ಮಂ, ತದಾ ದೇವಾ ಸಮಾಗಮುಂ;
ತಸ್ಮಿಂ ಸಮಾಗಮೇ ತೇಸಂ, ಸತ್ಥಾ ಧಮ್ಮ ಮದೇಸಯಿ.
ನೇಕೇಸಂ ಪಾಣಕೋಟೀನಂ, ಧಮ್ಮಾಭಿಸಮಯೋ ಅಹು;
ಸರಣೇಸು ಚ ಸೀಲೇಸು, ಠಿತಾ ಆಸುಂ ಅಸಂಖಿಯಾ.
ಸೋತಾಪತ್ತಿಫಲಂ ಪತ್ವಾ, ಸೇಲೇ ಸುಮನಕೂಟಕೇ;
ಮಹಾಸುಮನದೇವಿನ್ದೋ, ಪೂಜಿಯಂ ಯಾಚಿ ಪೂಜಿಯಂ.
ಸಿರಂ ಪರಾಮಸಿತ್ವಾನ, ನೀಲಾಮಲಸಿರೋರುಹೋ;
ಪಾಣಿಮತ್ತೇಅದಾ ಕೇಸೇ, ತಸ್ಸ ಪಾಣ ಹಿತೋ ಜಿನೋ.
ಸೋ ತಂ ಸುವಣ್ಣಚಙ್ಕೋಟ-ವರೇನಾದಾಯ ಸತ್ಥುನೋ;
ನಿಸಿನ್ನಟ್ಠಾನರಚಿತೇ, ನಾನಾರತನಸಞ್ಚಯೇ.
ಸಬ್ಬತೋ ಸತ್ತರತನೇ, ತೇ ಠಪೇತ್ವಾ ಸಿರೋರುಹೇ;
ಸೋ ಇನ್ದನೀಲಥೂಪೇನ, ಪಿದಹೇಸಿ ನಮಸ್ಸಿ ಚ.
ಪರಿನಿಬ್ಬುತಮ್ಹಿ ಸಮ್ಬುದ್ಧೇ, ಚಿತಕತೋ ಚ ಇದ್ಧಿಯಾ;
ಆದಾಯ ಜಿನಗೀವಟ್ಠಿಂ, ಥೇರೋ ಸರಭೂನಾಮಕೋ.
ಥೇರಸ್ಸ ಸಾರಿಪುತ್ತಸ್ಸ, ಸಿಸ್ಸೋ ಆನೀಯ ಚೇತಿಯೇ;
ತಸ್ಮಿಂಯೇವ ಠಪೇತ್ವಾನ, ಭಿಕ್ಖೂಹಿ ಪರಿವಾರಿತೋ.
ಛಾದಾಪೇತ್ವಾ ಮೇದವಣ್ಣ-ಪಾಸಾಣೇಹಿ ಮಹಿದ್ಧಿಕೋ;
ಥೂಪಂ ದ್ವಾದಸಹತ್ಥುಚ್ಚಂ, ಕಾರಾಪೇತ್ವಾನ ಪಕ್ಕಮಿ.
ದೇವಾನಂಪಿಯತಿಸ್ಸಸ್ಸ, ರಞ್ಞೋ ಭಾತುಕುಧಾರಕೋ;
ಉದ್ಧಚೂಳಾಭಯೋ ನಾಮ, ದಿಸ್ವಾ ಚೇತಿಯ ಮಬ್ಭುತಂ.
ತಂ ¶ ಛಾದಯಿತ್ವಾ ಕಾರೇಸಿ, ತಿಂಸಹತ್ಥುಚ್ಚ ಚೇತಿಯಂ;
ಮದ್ದನ್ತೋ ದಮಿಳೇ ರಾಜಾ, ತತ್ರಟ್ಠೋ ದುಕ್ಖಗಾಮಣಿ.
ಅಸೀತಿಹತ್ಥಂ ಕಾರೇಸಿ, ತಸ್ಸ ಕಞ್ಜುಕಚೇತಿಯಂ;
ಮಹಿಯಙ್ಗಣಥೂಪೋಯ-ಮೇಸೋ ಏವಂ ಪತಿಟ್ಠಿತೋ.
ಏವಂ ದೀಪಮಿಮಂಕತ್ವಾ, ಮನುಸ್ಸಾರಹಮಿಸ್ಸರೋ;
ಉರುವೇಲಮಗಾ ಧೀರೋ, ಉರುವೀರ ಪರಕ್ಕಮೋತಿ.
ಮಹಿಯಙ್ಗಣಾಗಮನಂ ನಿಟ್ಠಿತಂ.
ನಾಗದೀಪಾಗಮನ
ಮಹಾಕಾರುಣಿಕೋ ಸತ್ಥಾ, ಸಬ್ಬಲೋಕಹಿತೇ ರತೋ;
ಬೋಧಿತೋ ಪಞ್ಚಮೇ ವಸ್ಸೇ, ವಸಂ ಜೇತವನೇ ಜಿನೋ.
ಮಹೋದರಸ್ಸ ನಾಗಸ್ಸ, ತಥಾ ಚೂಳೋದರಸ್ಸ ಚ;
ಮಾತುಲಭಾಗಿನೇಯ್ಯಾನಂ, ಮಣಿಪಲ್ಲಙ್ಕಹೇತುಕಂ.
ದಿಸ್ವಾ ಸಪಾರಿಸಜ್ಜಾನಂ, ಸಙ್ಗಾಮಂ ಪಚ್ಚುಪಟ್ಠಿತಂ;
ಸಮ್ಬುದ್ಧೋ ಚಿತ್ತಮಾಸಸ್ಸ, ಕಾಳಪಕ್ಖೇ ಉಪೋಸಥೇ.
ಪಾತೋಯೇವ ಸಮಾದಾಯ, ಪವರಂ ಪತ್ತಚೀವರಂ;
ಅನುಕಮ್ಪಾಯ ನಾಗಾನಂ, ನಾಗದೀಪಮುಪಾಗಮಿ.
ಮಹಾದರೋ’ಪಿಸೋ ನಾಗೋ, ತದಾ ರಾಜಾ ಅಹಿದ್ಧಿಕೋ;
ಸಮುದ್ದೇ ನಾಗಭವನೇ, ದಸದ್ಧಸತಯೋಜನೇ.
ಕಣಿಟ್ಠಿಕಾ ತಸ್ಸ ಕಣ್ಹಾ, ವಡ್ಢಮಾನಮ್ಹಿ ಪಬ್ಬತೇ;
ನಾಗರಾಜಸ್ಸ ದಿನ್ನಾ’ಸಿ, ತಸ್ಸ ಚೂಳೋದರೋ ಸುತೋ.
ತಸ್ಸ ಮಾತಾ ಮಹಾಮಾತು, ಮಣಿಪಲ್ಲಙ್ಕಮುತ್ತಮಂ;
ದತ್ವಾ ಕಾಲಕತಾ ನಾಗೀ, ಮಾತುಲೇನ ತಥಾ ಹಿ ಸೋ.
ಅಹೋಸಿ ಭಾಗಿನೇಯ್ಯಸ್ಸ, ಸಙ್ಗಾಮೋ ಪಚ್ಚುಪಟ್ಠಿತೋ;
ಪಬ್ಬತೇಯ್ಯಾ’ಪಿ ನಾಗಾ ತೇ, ಅಹೇಸುಞ್ಹಿ ಮಹಿದ್ಧಿಕಾ.
ಸಮಿದ್ಧಿಸುಮನೋ ನಾಮ, ದೇವೋ ಜೇತವನೇ ಠಿತಂ;
ರಾಜಾಯತನಮಾದಾಯ, ಅತ್ತನೋ ಭವನಂ ಸುಭಂ.
ಬುದ್ಧಾನುಮತಿಯಾಯೇವ, ಛತ್ತಾಕಾರಂ ಜಿನೋಪರಿ;
ಧಾರಯನ್ತೋ ಉಪಾಗಞ್ಛಿ, ಠಾನಂ ತಂ ಪುಬ್ಬವುಟ್ಠಕಂ.
ದೇವೋ ¶ ಹಿ ಸೋ ನಾಗದೀಪೇ, ಮನುಸ್ಸೋ’ನನ್ತರೇ ಭವೇ;
ಅಹೋಸಿ ರಾಜಾಯತನ-ಠಿತಠಾನೇ ಸ ಅದ್ದಸ.
ಪಚ್ಚೇಕಬುದ್ಧ ಭುಞ್ಜನ್ತೇ, ದಿಸ್ವಾ ಚಿತ್ತಂ ಪಸಾದಿಯ;
ಪತ್ತಸೋಧನಸಾಖಾಯೋ, ತೇಸಂ ಪಾದಾಸಿ ತೇನ ಸೋ.
ನಿಬ್ಬತ್ತಿತಸ್ಮಿಂ ರುಕ್ಖಸ್ಮಿಂ, ಜೇತುಯ್ಯಾನೇ ಮನೋರಮೇ;
ದ್ವಾರಕೋಟ್ಠಕಪಸ್ಸಮ್ಹಿ, ಪಚ್ಛಾ ಬಹಿ ಅಹೋಸಿ ಸೋ.
ದೇವಾತಿದೇವೋ ದೇವಸ್ಸ, ತಸ್ಸ ವುದ್ಧಿಞ್ಚ ಪಸ್ಸಿಯ;
ಇದಂ ಠಾನ ಹಿತತ್ಥಞ್ಚ, ತಂ ಸರುಕ್ಖಂ ಇಧಾನಯಿ.
ಸಙ್ಗಾಮಮಜ್ಝೇ ಆಕಾಸೇ, ನಿಸಿನ್ನೋ ತತ್ಥ ನಾಯಕೋ;
ತಮಂ ತಮೋನುದೋ ತೇಸಂ, ನಾಗಾನಂ ಹಿಂಸನಂ ಅಕಾ.
ಅಸ್ಸಾಸೇನ್ತೋ ಭಯಟ್ಟೇ ತೇ, ಆಲೋಕಂ ಪವಿದ್ಧಂಸಯಿ;
ತೇ ದಿಸ್ವಾ ಸುಗತಂ ತುಟ್ಠಾ, ಪಾದೇ ವನ್ದಿಂಸು ಸತ್ಥುನೋ.
ತೇಸಂ ಧಮ್ಮಮದೇಸೇಸಿ, ಸಾಮಗ್ಗಿಕರಣಂ ಜಿನೋ;
ಉಭೋ’ಪಿ ತೇ ಪತೀತಾ ತಂ, ಪಲ್ಲಙ್ಕಂ ಮುನಿನೋ ಅದುಂ.
ಸತ್ಥಾ ಭೂಮಿಗತೋ ತತ್ಥ, ಪಸೀದಿಸ್ವಾನ ಆಸನೇ;
ತೇಹಿ ದಿಬ್ಬನ್ನಪಾನೇಹಿ, ನಾಗರಾಜೇಹಿ ತಪ್ಪಿತೋ.
ತೇ ಜಲಟ್ಠೇ ತಲಟ್ಠೇ ಚ, ಭುಜಗೇ’ಸೀತಿಕೋಟಿಯೋ;
ಸರಣೇಸು ಚ ಸೀಲೇಸು, ಪತಿಟ್ಠಾಪೇಸಿ ನಾಯಕೋ.
ಮಹೋದರಸ್ಸ ನಾಗಸ್ಸ, ಮಾತುಲೋ ಮಣಿಅಕ್ಖಿಕೋ;
ಕಲ್ಯಾಣಿಯಂ ನಾಗರಾಜಾ, ಯುದ್ಧಂ ಕಾತುಂ ತಹಿಂ ಗತೋ.
ಬುದ್ಧಗಾಮಮ್ಹಿ ಪಠಮೇ, ಸುತ್ವಾ ಸದ್ಧಮ್ಮದೇಸನಂ;
ಠಿತೋ ಸರಣಸೀಲೇಸು, ತತ್ಥಾ’ಯಾಚಿ ತಥಾಗತಂ.
ಮಹತೀ ಅನುಕಮ್ಪಾನೋ, ಕತಾ ನಾಥ ತಯಾ ಅಯಂ;
ತವಾನಾಗಮನೇ ಸಬ್ಬೇ, ಮಯಂ ಭಸ್ಮೀ ಭವಾಮಹೇ.
ಅನುಕಮ್ಪಾ ಮಹೀ ಪಿತೇ, ವಿಸುಂ ಹೋತು ಮಹೋದಯ;
ಪುನರಾಗಮನೇನೇತ್ಥ, ವಾಸಭೂಮಿಂ ಮಮಾ ಮಮ.
ಅಧಿವಾಸಯಿತ್ವಾ ಭಗವಾ, ತುಣ್ಹಿಭಾವೇ ನಿಧಾಗಮಂ;
ಪತಿಟ್ಠಾಪೇಸಿ ತತ್ಥೇವ, ರಾಜಾಯತನಚೇತಿಯಂ.
ತಞ್ಚಪಿ ¶ ರಾಜಾಯತನಂ, ಪಲ್ಲಞ್ಚಙ್ಕ ಮಹಾರಹಂ;
ಅಪ್ಪೇಸಿ ನಾಗರಾಜೂನಂ, ಲೋಕನಾಥೋ ನಮಸ್ಸಿತುಂ.
ಪರಿಭೋಗಚೇತಿಯಂ ಮಯ್ಹಂ, ನಾಗರಾಜಾ ನಮಸ್ಸಥ;
ತಂ ಭವಿಸ್ಸತಿ ವೋತಾತಾ, ಹಿತಾಯ ಚ ಸುಖಾಯ ಚ.
ಇಚ್ಚೇವಮಾದಿಂ ಸುಗತೋ, ನಾಗಾನಂ ಅನುಸಾಸನಂ;
ಕತ್ವಾ ಜೇತವನಂ ಏವ, ಗತೋ ಲೋಕಾನುಕಮ್ಪಕೋತಿ.
ನಾಗದೀಪಾಗಮನಂ
ಕಲ್ಯಾಣಾಗಮನಂ
ತತೋ ಸೋ ತತಿಯೇ ವಸ್ಸೇ,
ನಾಗಿನ್ದೋ ಮಣಿಅಕ್ಖಿಕೋ;
ಉಪಸಙ್ಕಮ್ಮ ಸಮ್ಬುದ್ಧಂ,
ಸತಸಙ್ಘಂ ನಿಮನ್ತಯಿ.
ಬೋಧಿತೋ ಅಟ್ಠಮೇ ವಸ್ಸೇ, ವಸಂ ಜೇತವನೇ ಜಿನೋ;
ನಾಥೋ ಪಞ್ಚಹಿ ಭಿಕ್ಖೂನಂ, ಸತೇಹಿ ಪರಿವಾರಿತೋ.
ದುತಿಯೇ ದಿವಸೇ ಭತ್ತ-ಕಾಲೇ ಆರೋಚಿತೇ ಜಿನೋ;
ರಮ್ಮೇ ವೇಸಾಖಮಾಸಮ್ಹಿ, ಪುಣ್ಣಮಾಯಂ ಮುನಿಸ್ಸರೋ.
ತತ್ಥೇವ ಪಾರುಪಿತ್ವಾನ, ಸಙ್ಘಾಟಿಂ ಪತ್ತಮಾದಿಯ;
ಆಗಾ ಕಲ್ಯಾಣಿದೇಸಂ ತಂ, ಮಣಿಅಕ್ಖಿನಿವೇಸನಂ.
ಕಲ್ಯಾಣಿ ಚೇತಿಯಠಾನೇ, ಕತೇ ರತನಮಣ್ಡಪೇ;
ಮಹಾರಹಮ್ಹಿ ಪಲ್ಲಙ್ಕೇ, ಸಹಸಙ್ಘೇನು’ಪಾವಿಸಿ.
ದಿಬ್ಬೇಹಿ ಖಜ್ಜಭೋಜ್ಜೇಹಿ, ಸಗಣೋ ಸಗಣಂ ಜಿನಂ;
ನಾಗರಾಜಾ ಧಮ್ಮರಾಜಂ, ಸನ್ತಪ್ಪೇಸಿ ಸುಮಾನಸೋ.
ತತ್ಥ ಧಮ್ಮಂ ದೇಸಯಿತ್ವಾ, ಸತ್ಥಾ ಲೋನುಕಮ್ಪಕೋ;
ಉಗ್ಗನ್ತ್ವಾ ಸುಮನೇ ಕೂಟೇ, ಪದಂ ದಸ್ಸೇಸಿ ನಾಯಕೋ.
ತಸ್ಮಿಂ ಪಬ್ಬತಪಾದಮ್ಹಿ, ಸಹಸಙ್ಘೋ ಯಥಾಸುಖಂ;
ದಿವಾ ವಿಹಾರಂ ಕತ್ವಾನ, ದೀಘವಾಪಿ ಮುಪಾಗಮಿ.
ತತ್ಥ ¶ ಚೇತಿಯಠಾನಮ್ಹಿ, ಸಸಙ್ಘೋವ ನಿಸೀದಿಯ;
ಸಮಾಧಿಂ ಅಪ್ಪಯೀ ನಾಥೋ, ಠಾನಾಗಾರವಪತ್ತಿಯಾ.
ತತೋ ವುಟ್ಠಾಯ ಠಾನಮ್ಹಾ, ಠಾನಾಠಾನೇಸು ಕೋವಿದೋ;
ಮಹಾಮೇಘವನಾರಾಮ-ಠಾನಮಾಗ ಮಹಾಮುನಿ.
ಮಹಾಬೋಧಿಠಿತಠಾನೇ, ನಿಸೀದಿತ್ವಾ ಸಸಾವಕೋ;
ಸಮಾಧಿಂ ಅಪ್ಪಯೀ ನಾಥೋ, ಮಹಾಥೂಪಠಿತೇ ತಥಾ.
ಥೂಪಾರಾಮಮ್ಹಿ ಥೂಪಸ್ಸ, ಠಿತಠಾನೇ ತಥೇವ ಚ;
ಸಮಾಧಿತೋ’ಥ ವುಟ್ಠಾಯ, ಸಿಲಾಚೇತಿಯಠಾನಗೋ.
ಸಹಾಗತೇ ದೇವಗಣೋ, ಗಣೀ ಸಮನುಸಾಸಿಯ;
ತತೋ ಜೇತವನಂ ಬುದ್ಧೋ, ಬುದ್ಧಸಬ್ಬತ್ಥಕೋ ಅಗಾ.
ಏವಂ ಲಙ್ಕಾಯ ನಾಥೋ, ಹಿತಮಮಿತಮತೀ ಆಯತಿಂ ಪೇಕ್ಖಮಾನೋ;
ತಸ್ಮಿಂ ಕಾಲಮ್ಹಿ ಲಂಕಾಸುರಭುಜಗಗಣಾದೀನಮತ್ಥಞ್ಚ ಪಸ್ಸಂ;
ಆಗಾ ತಿಕ್ಖತ್ತುಮೇತಂ ಅತಿವಿಪುಲದಯೋ ಲೋಕದೀಪೋ ಸುದೀಪಂ;
ದೀಪೋ ತೇನಾಯಮಾಸಿ ಸುಜನಬಹುಮನೋ ಧಮ್ಮದೀಪಾವ ಭಾಸೀತಿ.
ಕಲ್ಯಾಣಾಗಮನಂ
ಸುಜನಪ್ಪಸಾದಸಂವೇಗತ್ಥಾಯ ಕತೇ ಮಹಾವಂಸೇ
ತಥಾಗತಾಭಿಗಮನಂ ನಾಮ
ಪಠಮೋ ಪರಿಚ್ಛೇದೋ.
ದುತಿಯಪರಿಚ್ಛೇದ
ಮಹಾಸಮ್ಮತವಂಸ
ಮಹಾಸಮ್ಮತ ¶ ರಾಜಸ್ಸ, ವಂಸಜೋ ಹಿ ಮಹಾಮುನಿ;
ಕಪ್ಪಸ್ಸಾದಿಮ್ಹಿ ರಾಜಾ’ಸಿ, ಮಹಾಸಮ್ಮತನಾಮಕೋ.
ರೋಜೋ ಚ ವರರೋಜೋ ಚ, ತಥಾ ಕಲ್ಯಾಣಕಾ ದುವೇ;
ಉಪೋಸಥೋ ಚ ಮನ್ಧಾತಾ, ಚರಕೋ’ಪಚರಾ ದುವೇ.
ಚೇತೀಯೋ ಮುಚಲೋ ಚೇವ, ಮಹಾಮೂಚಲನಾಮಕೋ;
ಮುಚಲಿನ್ದೋ ಸಾಗರೋ ಚೇವ, ಸಾಗರೋ ದೇವ ವನಾಮಕೋ.
ಭರತೋ ಭಗೀರಥೋ ಚೇವ, ರುಚಿ ಚ ಸುರುಚಿ ಪಿಚ;
ಪತಾಪೋ ಮಹಾಪತಾಪೋ, ಪನಾದಾ ಚ ತಥಾ ದುವೇ.
ಸುದಸ್ಸನೋ ಚ ನೇರು ಚ, ತಥಾ ಏವ ದುವೇ ದುವೇ;
ಪಚ್ಛಿಮಾ ಚಾ’ತಿ ರಾಜಾನೋ, ತಸ್ಸ ಪುತ್ತಪಪುತ್ತಕಾ.
ಅಸಂಖಿಯಾಯುಕಾ ಏತೇ, ಅಟ್ಠವೀಸತಿ ಭೂಮಿಪಾ;
ಕುಸಾವತಿಂ ರಾಜಗಹಂ, ಮಿಥಿಲಞ್ಚಾಪಿ ಆವಸುಂ.
ತತೋ ಸತಞ್ಚ ರಾಜನೋ, ಛಪ್ಪಞ್ಞಾಸ ಚ ಸಟ್ಠಿ ಚ;
ಚತುರಾಸೀತಿ ಸಹಸ್ಸಾನಿ, ಛತ್ತಿಂಸಾ ಚ ತತೋ ಪರೇ.
ದ್ವತ್ತಿಂಸ ಅಟ್ಠವೀಸಾ ಚ, ದ್ವಾವೀಸತಿ ತತೋ ಪರೇ;
ಅಟ್ಠಾರಸ ಸತ್ತರಸ, ಪಞ್ಚದಸ ಚತುದ್ದಸ.
ನವ ಸತ್ತ ದ್ವಾದಸ ಚ, ಪಞ್ಚವೀಸ ತತೋಪರೇ;
ಪಞ್ಚವೀಸಂ ದ್ವಾದಸ ಚ, ದ್ವಾದಸಞ್ಚ ನವಾ ಪಿಚ.
ಚತುರಾಸೀತಿಸಹಸ್ಸಾನಿ, ಮಖಾದೇವಾದಿಕಾಪಿ ಚ;
ಚತುರಾಸೀತಿಸಹಸ್ಸಾನಿ, ಕಳಾರಾಜನಕಾದಯೋ.
ಸೋಳಸ ಯಾವ ಓಕ್ಕಾತಂ, ಪಪುತ್ತಾ ರಾಸಿತೋ ಇಮೇ;
ವಿಸುಂ ವಿಸುಂ ಪುರೇ ರಜ್ಜಂ, ಕಮತೋ ಅನುಸಾಸಿಸುಂ.
ಓಕ್ಕಾಮುಖೋ ಜೇಟ್ಠಪುತ್ತೋ, ಓಕ್ಕಾಕಸಾ’ಸಿ ಭೂಪತಿ;
ನಿಪುರೋ ಚನ್ದೀಮಾ ಚನ್ದಂ-ಮುಖೋ ಚ ಸಿವಿ ಸಞ್ಜಯೋ.
ವೇಸ್ಸನ್ತರ ¶ ಮಹಾರಾಜಾ, ಜಾಲೀ ಚ ಸೀಹವಾಹನೋ;
ಸೀಹಸ್ಸರೋ ಚ ಇಚ್ಚೇತೇ, ತಸ್ಸ ಪುತ್ತ ಪ ಪುತ್ತಕಾ.
ದ್ವೇಅಸೀತಿ ಸಹಸ್ಸಾನಿ, ಸೀಹಸ್ಸರಸ್ಸ ರಾಜಿನೋ;
ಪುತ್ತ ಪ ಪುತ್ತ ರಾಜಾನೋ, ಜಯಸೇನೋ ತದನ್ತಿಮೋ.
ಏತೇ ಕಪಿಲವತ್ಥುಸ್ಮಿಂ, ಸಕ್ಯರಾಜಾತಿ ವಿಸ್ಸುತಾ;
ಸೀಹಹನು ಮಹಾರಾಜಾ, ಜಯಸೇನಸ್ಸ ಅತ್ರಜೋ.
ಜಯಸೇನಸ್ಸ ಧೀತಾ ಚ, ನಾಮೇನಾ’ಸಿ ಯಸೋಧರಾ;
ದೇವದಯೇ ದೇವದಹ-ಸಕ್ಕೋ ನಾಮಾ’ಸಿ ಭೂಪತಿ.
ಅಞ್ಜನೋ ಚಾ’ಥ ಕಚ್ಚಾನಾ, ಆಸುಂ ತಸ್ಸ ಸುತಾ ದುವೇ;
ಮಹೇಸೀಚಾ’ಸಿ ಕಚ್ಚಾನಾ, ರಞ್ಞೋ ಸೀಹಹನುಸ್ಸ ಸಾ.
ಆಸೀ ಅಞ್ಜನಸಕ್ಕಸ್ಸ, ಮಹೇಸೀ ಸಾ ಯಸೋಧರಾ;
ಅಞ್ಜನಸ್ಸ ದುವೇ ಧೀತಾ, ಮಾಯಾ ಚಾಥ ಪಜಾಪತಿ.
ಪುತ್ತಾ ದುವೇ ದಣ್ಡಪಾಣೀ, ಸುಪ್ಪಬುದ್ಧೋ ಚ ಸಾಕಿಯೋ;
ಪಞ್ಚ ಪುತ್ತಾ ದುವೇ ಧೀತಾ, ಆಸುಂ ಸೀಹಹನುಸ್ಸರೇ.
ಸುದ್ಧೋದನೋ ಧೋತೋದನೋ, ಸಕ್ಕಸುಕ್ಕಮಿತೋದನೋ;
ಅಮಿತಾ ಪಮಿತಾಚಾ’ತಿ, ಇಮೇ ಪಞ್ಚ ಇಮಾ ದುವೇ.
ಸುಪ್ಪಬುದ್ಧಸ್ಸ ಸಕ್ಕಸ್ಸ, ಮಹೇಸೀ ಅಮಿತಾ ಅಹು;
ತಸ್ಸಾ’ಸುಂ ಭದ್ದಕಚ್ಚಾನಾ, ದೇವದತ್ತೋ ದುವೇ ಸುತಾ.
ಮಾಯಾ ಮಹಾಪಜಾಪತಿ ಚೇವ, ಸುದ್ಧೋದನ ಮಹೇಸೀಯೋ;
ಸುದ್ಧೋದನ ಮಹಾರಞ್ಞೋ, ಪುತ್ತೋ ಮಾಯಾಯ ಸೋ ಜಿನೋ.
ಮಹಾ ಸಮ್ಮತವಂಸಮ್ಹಿ, ಅಸಮ್ಭಿನ್ನೇ ಮಹಾಮುನಿ;
ಏವಂ ಪವತ್ತೇ ಸಞ್ಜಾತೋ, ಸಬ್ಬ ಖತ್ಥಿಯ ಮುದ್ಧನಿ.
ಸಿದ್ಧತ್ಥಸ್ಸ ಕುಮಾರಸ್ಸ, ಬೋಧಿಸತ್ತಸ್ಸ ಸಾ ಅಹು;
ಮಹೇಸೀ ಭದ್ದಕಚ್ಚಾನಾ, ಪುತ್ತೋ ತಸ್ಸಾ’ಸಿ ರಾಹುಲೋ.
ಬಿಮ್ಬಿಸಾರೋ ಚ ಸಿದ್ಧತ್ಥ-ಕುಮಾರೋ ಚ ಸಹಾಯಕಾ;
ಉಭಿನ್ನಂ ಪಿತರೋ ಚಾಪಿ, ಸಹಾಯಾಏವ ತೇ ಅಹುಂ.
ಬೋಧಿಸತ್ತೋ ಬಿಮ್ಬಿಸಾರಾ, ಪಞ್ಚವಸ್ಸಾಧಿಕೋ ಅಹು;
ಏಕೂನತಿಂಸೋ ವಯಸಾ, ಬೋಧಿಸತ್ತೋ’ಭಿನಿಕ್ಖಮಿ.
ಪದಹಿತ್ವಾನ ¶ ಛಬ್ಬಸ್ಸಂ, ಬೋಧಿಂ ಪತ್ವಾ ಕಮೇನ ಚ;
ಪಞ್ಚತಿಂಸೋ ಥ ವಯಸಾ, ಬಿಮ್ಬಿಸಾರಮುಪಾಗಮಿ.
ಬಿಮ್ಬಿಸಾರೋ ಪನ್ನರಸ-ವಸ್ಸೋ’ಥ ಪೀತರಂ ಸಯಂ;
ಅಭಿಸಿತ್ತೋ ಮಹಾಪಞ್ಞೋ, ಪತ್ತೋ ರಜ್ಜಸ್ಸ ತಸ್ಸ ತು.
ಪತ್ತೇ ಸೋಳಸಮೇ ವಸ್ಸೇ, ಸತ್ಥಾ ಧಮ್ಮಮದೇಸಯಿ;
ದ್ವಾಪಞ್ಞಾಸೇವ ವಸ್ಸಾನಿ, ರಜ್ಜಂ ಕಾರೇಸಿ ಸೋ ಪನ.
ರಜ್ಜೇ ಸಮಾ ಪನ್ನರಸ, ಪುಬ್ಬೇ ಜಿನಸಮಾಗಮಾ;
ಸತ್ತತಿಂಸ ಸಮಾ ತಸ್ಸ, ಧರಮಾನೇ ತಥಾಗತೇ.
ಬಿಮ್ಬಿಸಾರಸುತೋ’ಜಾತ-ಸತ್ತುತಂ ಘಾತೀಯಾ’ಮತಿ;
ರಜ್ಜಂ ದ್ವತ್ತಿಂಸವಸ್ಸಾನಿ, ಮಹಾಮಿತ್ತದ್ದುಕಾರಯೀ.
ಅಜಾತಸತ್ತುನೋ ವಸ್ಸೇ, ಅಟ್ಠಮೇ ಮುನಿ ನಿಬ್ಬುತೋ;
ಪಚ್ಛಾ ಸೋ ಕಾರಯೀ ರಜ್ಜಂ, ವಸ್ಸಾನಿ ಚತುವೀಸತಿ.
ತಥಾಗತೋ ಸಕಲಲೋಕಗ್ಗತಂ ಗತೋ;
ಅನಿಚ್ಚತಾವ ಸಮವಸೋ ಉಪಾಗತೋ;
ಇತಿ’ಧ ಯೋ ಭಯಜನನಿಂ ಅನಿಚ್ಚತಂ,
ಅವೇಕ್ಖತೇ ಸ ಭವತಿ ದುಕ್ಖಪಾರಗೂತಿ.
ಸುಜನಪ್ಪಸಾದಸಂವೇಗತ್ಥಾಯ ಕತೇ ಮಹಾವಂಸೇ
ಮಹಾಸಮ್ಮತವಂಸೋ ನಾಮ
ದುತಿಯೋ ಪರಿಚ್ಛೇದೋ.
ತತಿಯ ಪರಿಚ್ಛೇದ
ಪಠಮಧಮ್ಮಸಂಗೀತಿ
ಪಞ್ಚನೇತ್ತೋ ¶ ಜಿನೋ ಪಞ್ಚ-ಚತ್ತಾಲೀಸಸಮಾ’ಸಮೋ;
ಠತ್ವಾ ಸಬ್ಬಾನಿ ಕಿಚ್ಚಾನಿ, ಕತ್ವಾ ಲೋಕಸ್ಸ ಸಬ್ಬಥಾ.
ಕುಸಿನಾರಾಯಯಮಕ-ಸಾಲಾನಮನ್ತರೇ ವರೇ;
ವೇಸಾಖಪುಣ್ಣಮಾಯಂ ಸೋ, ದೀಪೋ ಲೋಕಸ್ಸ ನಿಬ್ಬುತೋ.
ಸಙ್ಖ್ಯಾಪಥಮತಿಕ್ಕನ್ತಾ, ಭಿಕ್ಖೂ ತತ್ಥ ಸಮಾಗತಾ;
ಖತ್ತಿಯಾ ಬ್ರಾಹ್ಮಣಾ ವಸ್ಸಾ, ಸುದ್ಧಾ ದೇವಾ ತಥೇವ ಚ.
ಸತ್ತಸತಸಹಸ್ಸಾನಿ, ತೇಸು ಪಾಮೋಕ್ಖಭಿಕ್ಖವೋ;
ಥೇರೋ ಮಹಾಕಸ್ಸಪೋವ, ಸಙ್ಘತ್ಥೇರೋ ತದಾ ಅಹು.
ಸತ್ಥುಸರೀರಸಾರೀರ-ಧಾತುಕಿಚ್ಚಾನಿ ಕಾರಿಯ;
ಇಚ್ಛನ್ತೋ ಸೋ ಮಹಾಥೇರೋ, ಸತ್ಥು ಧಮ್ಮಚಿರಟ್ಠಿತಿಂ.
ಲೋಕನಾಥೇ ದಸಬಲೇ, ಸತ್ತಾಹಪರಿನಿಬ್ಬುತೇ;
ದುಬ್ಭಾಸಿತಂ ಸುಭದ್ದಸ್ಸ, ಬುದ್ಧಸ್ಸ ವಚನಂ ಸರಂ.
ಸರಂ ಚೀವರದಾನಞ್ಚ, ಸಮತ್ತೇ ಠಪನಂ ತಥಾ;
ಸದ್ಧಮ್ಮಠಪನತ್ಥಾಯ, ಮುನಿನಾ’ನುಗ್ಗಹಂ ಕತಂ.
ಕಾತುಂ ಸದ್ಧಮ್ಮಸಂಗೀತಿಂ, ಸಮ್ಬುದ್ಧಾನಮತೇ ಯತಿ;
ನವಙ್ಗಸಾಸನಧರೇ, ಸಬ್ಬಙ್ಗಸಮುಪಾಗತೇ.
ಭಿಕ್ಖೂ ಪಞ್ಚಸತೇಯೇವ, ಮಹಾಖೀಣಾಸವೇ ವರೇ;
ಸಮ್ಮನ್ನಿ ಏಕೇನೂನೇ ತು, ಆನನ್ದತ್ಥೇರಕಾರಣಾ.
ಪುನ ಆನನ್ದತ್ಥೇರಾ’ಪಿ, ಭಿಕ್ಖೂಹಿ ಅಭಿಯಾಚಿತೋ;
ಸಮ್ಮನ್ನಿ ಕಾತುಂ ಸಂಗೀತಿಂ, ಸಾ ನ ಸಕ್ಕಾ ಹಿ ತಂ ವಿನಾ.
ಸಾಧುಕೀಳನಸತ್ತಾಹಂ, ಸತ್ತಾಹಂ ಧಾತುಭಾಜನಂ;
ಇಚ್ಚದ್ಧಮಾಸಂ ಖೇಪೇತ್ವಾ, ಸಬ್ಬಲೋಕಾನುಕಮ್ಪಕಾ.
ವಸ್ಸಂ ವಸಂ ರಾಜಗಹೇ, ಕಸ್ಸಾಮ ಧಮ್ಮಸಙ್ಗಹಂ;
ನಾಞ್ಞೇಹಿ ತತ್ತ ವತ್ಥಬ್ಬ-ಮಿತಿ ಕತ್ವಾನ ನಿಚ್ಛಯಂ.
ಸೋಕಾತುರಂ ¶ ತತ್ಥ ತತ್ಥ, ಅಸ್ಸಾಸೇನ್ತೋ ಮಹಾಜನಂ;
ಜಮ್ಬುದೀಪಮ್ಹಿ ತೇ ಥೇರಾ, ವಿಚರಿತ್ವಾನ ಚಾರಿಕಂ.
ಆಸಳ್ಹಿಸುಕ್ಕಪಕ್ಖಮ್ಹಿ, ಸುಕ್ಕಪಕ್ಖಠಿತತ್ಥಿಕಾ;
ಉಪಾಗಮುಂ ರಾಜಗಹಂ, ಸಮ್ಪನ್ನಚತುಪಚ್ಚಯಂ.
ತತ್ಥೇವ ವಸ್ಸೂಪಗತಾ, ತೇ ಮಹಾಕಸ್ಸಪಾದಯೋ;
ಥೇರಾ ಥಿರಗುಣೂಪೇತಾ, ಸಮ್ಬುದ್ಧಮತಕೋವಿದಾ.
ವಸ್ಸಾನಂ ಪಠಮಂ ಮಾಸಂ, ಸಬ್ಬಸೇನಾಸನೇಸು’ಪಿ;
ಕಾರೇಸುಂ ಪಟಿಸಙ್ಖಾರಂ, ವತ್ವಾನಾ’ಜಾತಸತ್ತುನೋ.
ವಿಹಾರಪಟಿಸಙ್ಖಾರೇ, ನಿಟ್ಠಿತೇ ಅಹು ಭೂಪತಿ;
ಇದಾನಿ ಧಮ್ಮಸಂಗೀತಿಂ, ಕರಿಸ್ಸಾಮಿ ಮಯಂ ಇತಿ.
ಕತ್ತಬ್ಬಂ ಕಿನ್ತಿಪುಟ್ಠಸ್ಸ, ನಿಸಜ್ಜಠಾನಮಾದಿಸುಂ;
ರಾಜಾ ಕತ್ಥಾತಿ ಪುಚ್ಛಿತ್ವಾ, ವುತ್ತಠಾನಮ್ಹಿ ತೇಹಿ ಸೋ.
ಸೀಘಂ ವೇಭಾರಸೇಲಸ್ಸ, ಪಸ್ಸೇ ಕಾರೇಸಿ ಮಣ್ಡಪಂ;
ಸತ್ತಪಣ್ಣಿಗುಹಾದ್ವಾರೇ, ರಮ್ಮಂ ದೇವಸಭೋಪಮಂ.
ಸಬ್ಬಥಾ ಮಣ್ಡಯಿತ್ವಾ ತಂ, ಅತ್ಥರಾಪೇಸಿ ತತ್ಥ ಸೋ;
ಭಿಕ್ಖೂನಂ ಗಣನಾಯೇವ, ಅನಗ್ಘತ್ಥರಣಾನಿ ಚ.
ನಿಸ್ಸಾಯ ದಕ್ಖಿಣಂ ಭಾಗಂ, ಉತ್ತರಾಮುಖಮುತ್ತಮಂ;
ಥೇರಾಸನಂ ಸುಪಞ್ಞತ್ತಂ, ಆಸಿ ತತ್ಥ ಮಹಾರಹಂ.
ತಸ್ಮಿಂ ಮಣ್ಡಪಮಜ್ಝಸ್ಮಿಂ, ಪುರತ್ಥಮುಖಮುತ್ತಮಂ;
ಧಮ್ಮಾಸನಂ ಸುಪಞ್ಞತ್ತಂ, ಅಹೋಸಿ ಸುಗತಾರಹಂ.
ರಾಜಾ’ರೋಚಯಿ ಥೇರಾನಂ, ಕಮ್ಮಂ ನೋ ನಿಟ್ಠಿತಂ ಇತಿ;
ತೇ ಥೇರಾ ಥೇರಮಾನನ್ದ-ಮಾನನ್ದಕರಮಬ್ರವುಂ.
ಸ್ವೇ ಸನ್ನಿಪಾತೋ ಆನನ್ದ, ಸೇಖೇನ ಗಮನಂ ತಹಿಂ;
ನ ಯುತ್ತನ್ತೇ ಸದತ್ಥೇ ತ್ವಂ, ಅಪ್ಪಮತ್ತೋ ತತೋ ಭವ.
ಇಚ್ಚೇವಂ ಚೋದಿತೋ ಥೇರೋ, ಕತ್ವಾನ ವೀರಿಯಂ ಸಮಂ;
ಇರಿಯಾಪಥತೋ ಮುತ್ತಂ, ಅರಹತ್ತಮಪಾಪುಣಿ.
ವಸ್ಸಾನಂ ದುತಿಯೇ ಮಾಸೇ, ದುತಿಯೇ ದಿವಸೇ ಪನ;
ರುಚಿರೇ ಮಣ್ಡಪೇ ತಸ್ಮಿಂ, ಥೇರಾ ಸನ್ನಿಪತಿಂಸು ತೇ.
ಠಪೇತ್ವಾ’ನನ್ದತ್ಥೇರಸ್ಸ, ಅನುಚ್ಛವಿಕಮಾಸನಂ;
ಆಸನೇಸು ನಿಸೀದಿಂಸು, ಅರಹನ್ತೋ ಯಥಾರಹಂ.
ಥೇರೋ’ರಹತ್ತಪತ್ತಿಂ ¶ ಸೋ, ಞಾಪೇತುಂ ತೇಹಿ ನಾಗಮಾ;
ಕುಹಿಂ ಆನನ್ದತ್ಥೇರೋ’ತಿ, ವುಚ್ಚಮಾನೇ ತು ಕೇಹಿಚಿ.
ನಿಮ್ಮುಜ್ಜಿತ್ವಾ ಪಥವಿಯಾ, ಗನ್ತ್ವಾ ಜೋತಿಪಥೇನ ವಾ;
ನಿಸೀದಿ ಥೇರೋ ಆನನ್ದೋ, ಅತ್ತನೋ ಠಪಿತಾಸನೇ.
ಉಪಾಲಿಥೇರೋ ವಿನಯೇ, ಸೇಸಧಮ್ಮೇ ಅಸೇಸಕೇ;
ಆನನ್ದತ್ಥೇರಮಕರುಂ, ಸಬ್ಬೇ ಥೇರಾ ಧುರನ್ಧರೇ.
ಮಹಾಥೇರೋ ಸಕತ್ತಾನಂ, ವಿನಯಂ ಪುಚ್ಛಿತುಂ ಸಯಂ;
ಸಮ್ಮನ್ನು’ಪಾಲಿಥೇರೋ ಚ, ವಿಸ್ಸಜ್ಜೇತುಂ ತಮೇವ ತು.
ಥೇರಾಸನೇ ನಿಸೀದಿತ್ವಾ, ವಿನಯಂ ತಮಪುಚ್ಛಿ ಸೋ;
ಧಮ್ಮಾಸನೇ ನಿಸೀದಿತ್ವಾ, ವಿಸ್ಸಜ್ಜೇಸಿ ತಮೇವ ಸೋ.
ವಿನಯಞ್ಞೂನಮಗ್ಗೇನ, ವಿಸ್ಸಜ್ಜಿತಕಮೇನ ತೇ;
ಸಬ್ಬೇ ಸಜ್ಝಾಯಮಕರುಂ, ವಿನಯಂ ನಯಕೋವಿದಾ.
ಅಗ್ಗಂ ಬಹುಸ್ಸುತಾದೀನಂ, ಕೋಸಾರಕ್ಖಂ ಮಹೇಸಿನೋ;
ಸಮ್ಮನ್ನಿತ್ವಾನ ಅತ್ತಾನಂ, ಥೇರೋ ಧಮ್ಮಮಪುಚ್ಛಿ ಸೋ.
ತಥಾ ಸಮ್ಮನ್ನಿಯ’ತ್ತಾನಂ, ಧಮ್ಮಾಸನಾಗತೋ ಸಯಂ;
ವಿಸ್ಸಜ್ಜೇಸಿ ತಮಾನನ್ದ-ತ್ಥೇರೋ ಧಮ್ಮಮಸೇಸತೋ.
ವೇದೇಹಮುನಿನಾ ತೇನ, ವಿಸ್ಸಜ್ಜಿತಕಮೇನ ತೇ;
ಸಬ್ಬೇ ಸಜ್ಝಾಯಮಕರುಂ, ಧಮ್ಮಂ ಧಮ್ಮತ್ಥಕೋವಿದಾ.
ಏವಂ ಸತ್ತಹಿ ಮಾಸೇಹಿ, ಧಮ್ಮಸಂಗೀತಿ ನಿಟ್ಠಿತಾ;
ಸಬ್ಬಲೋಕಹಿತತ್ಥಾಯ, ಸಬ್ಬಲೋಕಹಿ ತೇಹಿ ಸಾ.
ಮಹಾಕಸ್ಸಪಥೇರೇನ, ಇದಂ ಸುಗತಸಾಸನಂ;
ಪಞ್ಚವಸ್ಸಸಹಸ್ಸಾನಿ, ಸಮತ್ಥಂ ವತ್ತನೇ ಕತಂ.
ಅತೀವ ಜಾತಪಾಮೋಜ್ಜಾ, ಸನ್ಧಾರಕಜಲನ್ತಿಕಾ;
ಸಂಗೀತಿಪರಿಯೋಸಾನೇ, ಛದ್ಧಾಕಮ್ಪಿ ಮಹಾಮಹೀ.
ಅಚ್ಛರಿಯಾನಿ ಚಾ’ಹೇಸುಂ, ಲೋಕೇನೇಕಾನಿನೇಕಧಾ;
ಥೇರೇಹೇವ ಕತತ್ತಾ ಚ, ಥೇರಿಯಾಯಂ ಪರಮ್ಪರಾ.
ಪಠಮಂ ಸಙ್ಗಹಂ ಕತ್ವಾ, ಸಬ್ಬಲೋಕಹಿತಂ ಬಹುಂ;
ತೇ ಯಾವತಾಯುಕಂ ಠತ್ವಾ, ಥೇರಾ ಸಬ್ಬೇಪಿ ನಿಬ್ಬುತಾ.
ಥೇರಾ’ಪಿ ¶ ತೇ ಮತಿಪದೀಪಹತನ್ಧಕಾರಾ,
ಲೋಕನ್ಧಕಾರಹನನಮ್ಹಿ ಮಹಾಪದೀಪಾ;
ನಿಬ್ಬಾಪಿತಾ ಮರಣಘೋರಮಹಾನಿಲೇನ,
ತೇನಾಪಿ ಜೀವಿತಮದಂ ಮತಿಮಾ ಜಹೇಯ್ಯಾತಿ.
ಸುಜನಪ್ಪಸಾದಂಸಂವೇಗತ್ಥಾಯ ಕತೇ ಮಹಾವಂಸೇ
ಪಠಮಧಮ್ಮಸಂಗೀತಿನಾಮ
ತತಿಯೋ ಪರಿಚ್ಛೇದೋ.
ಚತುತ್ಥ ಪರಿಚ್ಛೇದ
ದುತಿಯ ಸಂಗೀತಿ
ಅಜಾತಸತ್ತು ಪುತ್ತೋ ತಂ, ಘಾತೇತ್ವಾ’ದಾಯಿ ಭದ್ದಕೋ;
ರಜ್ಜಂ ಸೋಳಸವಸ್ಸಾನಿ, ಕಾರೇಸಿ ಮಿತ್ತದೂಭಿಕೋ.
ಉದಯಭದ್ದ ಪುತ್ತೋ ತಂ, ಘಾತೇತ್ವಾ ಅನುರುದ್ಧಕೋ;
ಅನುರುದ್ಧಸ್ಸ ಪುತ್ತೋ ತಂ, ಘಾತೇತ್ವಾ ಮುಣ್ಡನಾಮಕೋ.
ಮಿತ್ತದ್ದುನೋ ದುಮ್ಮತಿನೋ, ತೇ’ಪಿ ರಜ್ಜಮಕಾರಯುಂ;
ತೇಸಂ ಉಭಿನ್ನಂ ರಜ್ಜೇಸು, ಅಟ್ಠವಸ್ಸಾನ’ತಿಕ್ಕಮುಂ.
ಮುಣ್ಡಸ್ಸ ಪುತ್ತೋ ಪಿತರಂ, ಘಾತೇತ್ವಾ ನಾಗದಾಸಕೋ;
ಚತುವೀಸತಿವಸ್ಸಾನಿ, ರಜ್ಜಂ ಕಾರೇಸಿ ಪಾಪಕೋ.
ಪಿತುಘಾತಕವಂಸೋ’ಯ, ಮೀತಿಕುದ್ಧಾ’ಥ ನಾಗರಾ;
ನಾಗದಾಸಕ ರಾಜಾನಂ, ಅಪನೇತ್ವಾ ಸಮಾಗತಾ.
ಸುಸುನಾಗೋತಿ ಪಞ್ಞಾತಂ, ಅಮಚ್ಚಂ ಸಾಧುಸಮ್ಮತಂ;
ರಜ್ಜೇ ಸಮಭಿಸಿಞ್ಜಿಂಸು, ಸಬ್ಬೇಸಂ ಹಿತಮಾನಸಾ.
ಸೋ ¶ ಅಟ್ಠಾರಸವಸ್ಸಾನಿ, ರಾಜಾ ರಜ್ಜಮಕಾರಯಿ;
ಕಾಳಾಸೋ ಕೋ ತಸ್ಸ ಪುತ್ತೋ, ಅಟ್ಠವೀಸತಿ ಕಾರಯಿ.
ಅತೀತೇ ದಸಮೇ ವಸ್ಸೇ, ಕಾಳಾಸೋಕಸ್ಸ ರಾಜಿನೋ;
ಸಮ್ಬುದ್ಧಪರಿನಿಬ್ಬಾನಾ, ಏವಂ ವಸ್ಸಸತಂ ಅಹು.
ತದಾ ವೇಸಾಲಿಯಾ ಭಿಕ್ಖೂ, ಅನೇಕಾ ವಜ್ಜಿಪುತ್ತಕಾ;
ಸಿಙ್ಗೀಲೋಣಂ ದ್ವಙ್ಗುಲಞ್ಚ, ತಥಾ ಗಾಮನ್ತರಮ್ಮಿ ಚ.
ಆವಾಸಾ’ನುಮತಾ’ಚಿಣ್ಣಂ, ಅಮಥಿತಂ ಜಲೋಗಿ ಚ;
ನಿಸೀದನಂ ಅದಸಕಂ, ಜಾತರೂಪಾದಿಕಂ ಇತಿ.
ದಸವತ್ಥೂನಿ ದೀಪೇಸುಂ, ಕಪ್ಪನ್ತೀತಿ ಅಲಜ್ಜೀನೋ;
ತಂ ಸುತ್ವಾನ ಯಸತ್ಥೇರೋ, ಏವಂ ವಜ್ಜೀಸು ಚಾರಿಕಂ.
ಛಳಭಿಞ್ಞೋ ಬಲಪ್ಪತ್ತೋ, ಯಸೋ ಕಾಕಣ್ಡಕತ್ರಜೋ;
ತಂ ಸಮೇತುಂ ಸಉಸ್ಸಾಹೋ, ತತ್ಥಾಗಮಿ’ಮಹಾವನಂ.
ಠಪೇತ್ವಾ’ಪೋಸಥಗ್ಗೇ ತೇ, ಕಂಸಪಾತಿಂ ಸಹೋಧಕಂ;
ಕಹಾಪಣಾದಿಂ ಸಙ್ಘಸ್ಸ, ದೇಥ’ನಾ’ಹು ಉಪಾಸಕೇ.
ನ ಕಪ್ಪತೇ ತಂ ಮಾ ದೇಥ, ಇತಿ ಥೇರೋ ಸವಾರಯಿ;
ಪಟಿಸಾರಣೀಯಂ ಕಮ್ಮಂ, ಯಸತ್ಥೇರಸ್ಸ ತೇ ಕರುಂ.
ಯಾಚಿತ್ವಾ ಅನುದೂತಂ ಸೋ, ಸಹ ತೇನ ಪುರಂ ಗತೋ;
ಅತ್ತನೋ ಧಮ್ಮವಾದಿತ್ತಂ, ಸಞ್ಞಾಪೇತ್ವಾ’ಗ ಸಾಗರೇ.
ಅನುದೂತವಚೋ ಸುತ್ವಾ, ತಮುಕ್ಖಿಪಿತುಮಾಗತಾ;
ಪರಿಕ್ಖಿಪಿಯ ಅಟ್ಠಂಸು, ಸರಂ ಥೇರಸ್ಸ ಭಿಕ್ಖವೋ.
ಥೇರೋ ಉಗ್ಗಮ್ಮ ನಭಸಾ, ಗನ್ತ್ವಾ ಕೋಸಮ್ಬಿಯಂ ತತೋ;
ಪಾವೇಯ್ಯಕಾ ವನ್ತಿಕಾನಂ, ಭಿಕ್ಖೂನಂ ಸನ್ತಿಕಂ ಲಹುಂ.
ವೇಸೇಸಿ ದೂತೇತು ಸಯಂ, ಗನ್ತ್ವಾ’ಹೋ ಗಙ್ಗಪಬ್ಬತಂ;
ಆಹ ಸಮ್ಭೂತತ್ಥೇರಸ್ಸ, ತಂ ಸಬ್ಬಂ ಸಾಣವಾಸಿನೋ.
ಪಾವೇಯ್ಯಕಾ ಸಟ್ಠಿಥೇರಾ, ಅಸಿತಾ’ವನ್ತಿಕಾಪಿ ಚ;
ಮಹಾಖೀಣಾಸವಾ ಸಬ್ಬೇ, ಅಹೋಗಙ್ಗಮ್ಹಿ ಓತರುಂ.
ಭಿಕ್ಖವೋ ಸನ್ನಿಪತಿತಾ, ಸಬ್ಬೇ ತತ್ಥ ತತೋ ತತೋ;
ಆಸುಂ ನವುತಿಸಹಸ್ಸಾನಿ, ಮನ್ತೇತ್ವಾ ಅಖಿಲಾ’ಪಿ ತೇ.
ಸೋರೇಯ್ಯ ¶ ರೇವತತ್ಥೇರಂ, ಬಹುಸ್ಸುತ ಮನಾಸವಂ;
ತಂ ಕಾಲಪಮುಖಂ ಞತ್ವಾ, ಪಸ್ಸಿತುಂ ನಿಕ್ಖಮಿಂಸು ತಂ.
ಥೇರೋ ತಮ್ಮನ್ತನಂ ಸುತ್ವಾ, ವೇಸಾಲಿಂ ಗನ್ತುಮೇವ ಸೋ;
ಇಚ್ಛನ್ತೋ ಫಾಸುಗಮನಂ, ತತೋ ನಿಕ್ಖಮಿ ತಙ್ಖಣಂ.
ಪಾತೋ ಪಾತೋವ ನಿಕ್ಖನ್ತ-ಟ್ಠಾನಂ ತೇನ ಮಹತ್ತನಾ;
ಸಾಯಂ ಸಾಯಮುಪೇನ್ತಾನಂ, ಸಹಜೋತಿಯಮದ್ದಸುಂ.
ತತ್ಥ ಸಮ್ಭೂತತ್ಥೇರೇನ, ಯಸತ್ಥೇರೋ ನಿಯೋಜಿತೋ;
ಸದ್ಧಮ್ಮಸವನನ್ತೇ ತಂ, ರೇವತಥೇರ ಮುತ್ತಮಂ.
ಉಪೇಚ್ಚ ದಸವತ್ಥೂನಿ, ಪುಚ್ಛಿ ಥೇರೋ ಪಟಿಕ್ಖಿಪಿ;
ಸುತ್ವಾ’ಧಿಕರಣಂ ತಞ್ಚ, ನಿಸೇಧೇಮಾತಿ ಅಬ್ರವಿ.
ಪಾಪಾಪಿ ಪಕ್ಖಂ ಪೇಕ್ಖನ್ತಾ, ರೇವತತ್ಥೇರ ಮುತ್ತಮಂ;
ಸಾಮಣಕಂ ಪರಿಕ್ಖಾರಂ, ಪಟಿಯಾದಿಯ ತೇ ಬಹುಂ.
ಸೀಘಂ ನಾವಾಯ ಗನ್ತ್ವಾನ, ಸಹಜಾತಿಸಮೀಪಗಾ;
ಕರೋನ್ತಿ ಭತ್ತವಿಸ್ಸಗ್ಗಂ, ಭತ್ತಕಾಲೇ ಉಪಟ್ಠಿತೇ.
ಸಹಜಾತಿಂ ಆವಸನ್ತೋ, ಸಾಳಥೇರೋ ವಿಚಿನ್ತಿಯಾ;
ಪಾವೇಯ್ಯಕಾ ಧಮ್ಮವಾದೀ, ಇತಿ ಪಸ್ಸಿ ಅನಾಸವೋ.
ಉಪೇಚ್ಚ ತಂ ಮಹಾಬ್ರಹ್ಮಾ, ಧಮ್ಮೇ ನಿಟ್ಠಾತಿ ಅಬ್ರವಿ;
ನಿಚ್ಚಂ ಧಮ್ಮೇ ಠಿತತ್ತಂ ಸೋ, ಅತ್ತನೋ ತಸ್ಸ ಅಬ್ರವಿ.
ತೇ ಪರಿಕ್ಖಾರಮಾದಾಯ, ರೇವತತ್ಥೇರಮದ್ದಸುಂ;
ಥೇರೋ ನ ಗಣ್ಹಿ ತಪ್ಪಕ್ಖ-ಗಾಹೀ ಸಿಸ್ಸಂ ಪಣಾಮಯೀ.
ವೇಸಾಲಿಂ ತೇ ತತೋ ಗನ್ತ್ವಾ, ತತೋ ಪುಪ್ಫಪುರಂ ಗತಾ;
ವದಿಂಸು ಕಾಳಾಸೋಕಸ್ಸ, ನರಿನ್ದಸ್ಸ ಅಲಜ್ಜೀನೋ.
ಸತ್ಥುಸ್ಸ ನೋ ಗನ್ಧಕುಟಿಂ, ಗೋಪಯನ್ತೋ ಮಯಂ ತಹಿಂ;
ಮಹಾವನವಿಹಾರಸ್ಮಿಂ, ವಸಾಮ ವಜ್ಜೀಭೂಮಿಯಂ.
ಗಣ್ಹಿಸ್ಸಾಮ ವಿಹಾರ’ನ್ತಿ, ಗಾಮವಾಸಿಕಸಿಕ್ಖವೋ;
ಆಗಚ್ಛನ್ತಿ ಮಹಾರಾಜ, ಮಟಿಸೇಧಯ ತೇ ಇತಿ.
ರಾಜಾನಂ ದುಗ್ಗಹಿತಂ ತೇ, ಕತ್ವಾ ವೇಸಾಲಿಮಾಗಮುಂ;
ರೇವತತ್ಥೇರ ಮೂಲಮ್ಹಿ, ಸಹಜಾತಿಯಮೇತ್ಥ ತು.
ಭಿಕ್ಖೂ ¶ ಸತಸಹಸ್ಸಾನಿ, ಏಕಾದಸ ಸಮಾಗತಾ;
ನವುತಿಞ್ಚ ಸಹಸ್ಸಾನಿ, ಅಹು ತಂ ವತ್ಥು ಸನ್ತಿಯಾ.
ಮೂಲಟ್ಠೇಹಿ ವಿನಾ ವತ್ಥು-ಸಮನಂ ನೇವ ರೋಚಯಿ;
ಥೇರೋ ಸಬ್ಬೇಪಿ ಭಿಕ್ಖೂ ತೇ, ವೇಸಾಲಿಮಾಗಮುಂ ತತೋ.
ದುಗ್ಗಹಿತೋವ ಸೋ ರಾಜಾ, ತತ್ಥಾಮಚ್ಚೇ ಅಪೇಸಯಿ;
ಮೂಳಾ ದೇವಾನುಭಾವೇನ, ಅಞ್ಞತ್ಥ ಅಗಮಿಂಸು ತೇ.
ಪೇಸೇತ್ವಾ ತೇ ಮಹೀಪಾಲೋ, ತಂ ರತ್ತಿಂ ಸುಪಿನೇನಸೋ;
ಅಪಸ್ಸಿ ಸಕಮತ್ತಾನಂ, ಪಕ್ಖಿತ್ತಂ ಲೋಹಕುಮ್ಭಿಯಂ.
ಅತಿಭೀತೋ ಅಹು ರಾಜಾ, ತಮಸ್ಸಾ ಸೇತು ಮಾಗಮಾ;
ಭಗಿನೀ ನನ್ದಥೇರೀ ತು, ಆಕಾಸೇನ ಅನಾಸವಾ.
ಭಾರಿಯಂ ತೇ ಕತಂ ಕಮ್ಮಂ, ಧಮ್ಮಿಕೇ’ಯ್ಯೇ ಖಮಾಪಯ;
ಪಕ್ಖೋ ತೇಸಂ ಭವಿತ್ವಾ ತ್ವಂ, ಕುರು ಸಾಸನಪಗ್ಗಹಂ.
ಏವಂ ಕತೇ ಸೋತ್ಥಿ ತುಯ್ಹಂ, ಹೇಸ್ಸತೀತಿ ಅಪಕ್ಕಮಿ;
ಪಸಾತೇಯೇವ ವೇಸಾಲಿಂ, ಗನ್ತುಂ ನಿಕ್ಖಮಿ ಭೂಪತಿ.
ಗನ್ತ್ವಾ ಮಹಾವನಂ ಭಿಕ್ಖೂ-ಸಙ್ಘಂ ಸೋ ಸನ್ನಿಪಾತಿಯ;
ಸುತ್ವಾ ಉಭಿನ್ನಂ ವಾದಞ್ಚ, ಧಮ್ಮಪಕ್ಖಞ್ಚ ರೋಚಿಯ.
ಖಮಾಪೇತ್ವಾ ಧಮ್ಮಿಕೇ ತೇ, ಭಿಕ್ಖೂ ಸಬ್ಬೇ ಮಹೀಪತಿ;
ಅತ್ತನೋ ಧಮ್ಮಪಕ್ಖತ್ತಂ, ವತ್ವಾ ತುಮ್ಹೇ ಯಥಾರುಚಿ.
ಸಮ್ಪಗ್ಗಹಂ ಸಾಸನಸ್ಸ, ಕರೋಥಾತಿ ಚ ಭಾಸಿಯ;
ದತ್ವಾ ಚ ತೇಸಂ ಆರಕ್ಖಂ, ಅಗಮಾಸಿ ಸಕಂ ಪುರಂ.
ನಿಚ್ಛೇತುಂ ತಾನಿ ವತ್ಥೂನಿ, ಸಙ್ಘೋ ಸನ್ನಿಪತೀ ತದಾ;
ಅನಗ್ಗಾನಿ ತತ್ಥ ಭಸ್ಸಾನಿ, ಸಙ್ಘಮಜ್ಝೇ ಅಜಾಯಿಸುಂ.
ತತೋ ಸೋ ರೇವತತ್ಥೇರೋ, ಸಾವೇತ್ವಾ ಸಙ್ಘಮಜ್ಝಗೋ;
ಉಬ್ಭಾಹಿಕಾಯ ತಂ ವತ್ಥುಂ, ಸಮೇತುಂ ನಿಚ್ಛಯಂ ಅಕಾ.
ಪಾಚಿನಕೇಚ ಚತುರೋ, ಚತುರೋ ಪಾವೇಯ್ಯಕೇಪಿ ಚ;
ಉಬ್ಭಾಹಿಕಾಯ ಸಮ್ಮನ್ನಿ, ಭಿಕ್ಖೂ ತಂ ವತ್ಥು ಸನ್ತಿಯಾ.
ಸಬ್ಬಕಾಮೀ ಚ ಸಾಳ್ಹೋ ಚ, ಖುಜ್ಜಸೋಭಿತನಾಮಕೋ;
ವಾಸಭಗಾಮಿಕೋ ಚಾತಿ, ಥೇರೋ ಪಾಚಿನಕಾ ಇಮೇ.
ರೇವತೋ ¶ ಸಾಣಸಮ್ಭೂತೋ,
ಯಸೋ ಕಾಕೋಣ್ಡಕತ್ರಜೋ;
ಸುಮನೋ ಚಾತಿ ಚತ್ತಾರೋ,
ಥೇರಾ ಪಾವೇಯ್ಯಕಾ ಇಮೇ.
ಸಮೇತುಂ ತಾನಿ ವತ್ಥೂನಿ, ಅಪ್ಪಸದ್ದಂ ಅನಾಕುಲಂ;
ಅಗಮುಂ ವಾಲುಕಾರಾಮಂ, ಅಟ್ಠತ್ಥೇರಾ ಅನಾಸವಾ.
ದಹರೇನಾ’ಜಿ ತೇ ನೇತ್ಥ, ಪಞ್ಞತ್ತೇ ಆಸನೇ ಸುಭೇ;
ನಿಸೀದಿಂಸು ಮಹಾಥೇರಾ, ಮಹಾಮುನಿ ಮತಞ್ಞುನೋ.
ತೇಸು ವತ್ಥೂಸು ಏಕೇಕಂ, ಕಮತೋ ರೇವತೋ ಮಹಾ;
ಥೇರೋ ಥೇರಂ ಸಬ್ಬಕಾಮಿಂ, ಪುಚ್ಛಿ ಪುಚ್ಛಾಸು ಕೋವಿದೋ.
ಸಬ್ಬಕಾಮೀ ಮಹಾಥೇರೋ, ತೇನ ಪುಟ್ಠೋ’ಥ ಬ್ಯಾಕರಿ;
ಸಬ್ಬಾನಿ ತಾನಿ ವತ್ಥೂನಿ, ನ ಕಪ್ಪನ್ತೀತಿ ಸುತ್ತತೋ.
ನಿಹನಿತ್ವಾ’ಧಿಕರಣಂ, ತಂ ತೇ ತತ್ಥ ಯಥಾಕ್ಕಮಂ;
ತಥೇವ ಸಙ್ಘಮಜ್ಝೇಪಿ, ಪುಚ್ಛಾವಿಸ್ಸಜ್ಜನಂ ಕರುಂ.
ನಿಗ್ಗಹಂ ಪಾಪಭಿಕ್ಖೂನಂ, ದಸವತ್ಥುಕದೀಪನಂ;
ತೇಸಂ ದಸಸಹಸ್ಸಾನಂ, ಮಹಾಥೇರೋ ಅಕಂಸು ತೇ.
ಸಬ್ಬಕಾಮೀ ಪುಥವಿಯಾ, ಸಙ್ಘತ್ಥೇರೋ ತದಾ ಅಹು;
ಸೋ ವೀಸಂ ವಸ್ಸಸತಿಕೋ, ತದಾ’ಸಿ ಉಪಸಮ್ಪದಾ.
ಸಬ್ಬಕಾಮೀ ಚ ಸಾಳ್ಹೋ ಚ,
ರೇವತೋ ಖುಜ್ಜಸೋಭಿತೋ;
ಯಸೋ ಕಾಕೋಣ್ಡಕಸುತೋ,
ಸಮ್ಭೂತೋ ಸಾಣವಾಸಿಕೋ.
ಥೇರಾ ಆನನ್ದತ್ಥೇರಸ್ಸ, ಏತೇ ಸದ್ಧಿವಿಹಾರಿನೋ;
ವಾಸಭಗಾಮಿಕೋ ಚೇವ, ಸುಮನೋ ಚ ದುವೇ ಪನ.
ಥೇರಾ’ನುರುದ್ಧತ್ಥೇರಸ್ಸ, ಏತೇ ಸದ್ಧಿವಿಹಾರಿನೋ;
ಅಟ್ಠ ಥೇರಾ’ಪಿ ಧಞ್ಞಾ ತೇ, ದಿಟ್ಠಪುಬ್ಬಾ ತಥಾಗತಂ.
ಭಿಕ್ಖೂ ಸತಸಹಸ್ಸಾನಿ, ದ್ವಾದಸಾಸುಂ ಸಮಾಗತಾ;
ಸಬ್ಬೇಸಂ ರೇವತತ್ಥೇರೋ, ಭಿಕ್ಖೂನಂಪಮುಖೋತದಾ.
ತತೋ ¶ ಸೋ ರೇವತತ್ಥೇರೋ, ಸದ್ಧಮ್ಮಟ್ಠಿತಿಯಾ ಚಿರಂ;
ಕಾರೇತುಂ ಧಮ್ಮಸಂಗೀತಿಂ, ಸಬ್ಬಭಿಕ್ಖುಸಮೂಹತೋ.
ಪಭಿನ್ನತ್ಥಾದಿಞಾಣಾನಂ, ಪಿಟಕತ್ತಯಧಾರಿನಂ;
ಸತಾನಿ ಸತ್ತಭಿಕ್ಖೂನಂ, ಅರಹನ್ತಾನಮುಚ್ಚಿನಿ.
ತೇ ಸಬ್ಬೇ ವಾಲುಕಾರಾಮೇ, ಕಾಳಾಸೋಕೇನ ರಕ್ಖಿತಾ;
ರೇವತತ್ಥೇರಪಾಮೋಕ್ಖಾ, ಅಕರುಂ ಧಮ್ಮಸಙ್ಗಹಂ.
ಪುಬ್ಬೇ ಕತಂ ತಥಾ ಏವ, ಧಮ್ಮಂ ಪಚ್ಛಾ ಚ ಭಾಸಿತಂ;
ಆದಾಯ ನಿಟ್ಠಪೇಸುಂ ತಂ, ಏತಂ ಮಾಸೇಹಿ ಅಟ್ಠಹಿ.
ಏವಂ ದುತಿಯಸಂಗೀತಿಂ, ಕತ್ವಾ ತೇಪಿ ಮಹಾಯಸಾ;
ಥೇರಾ ದೋಸಕ್ಖಯಂ ಪತ್ತಾ, ಪತ್ತಾಕಾಲೇನ ನಿಬ್ಬುತಿಂ.
ಇತಿ ಪರಮಮತೀನಂ ಪತ್ತಿಪತ್ತಬ್ಬಕಾನಂ,
ತಿಭವಹಿತಕರಾನಂ ಲೋಕನಾಥೇರಸಾನಂ;
ಸುಮರಿಯಮರಣಂ ತಂ ಸಙ್ಖತಾ ಸಾರಕತ್ತಂ,
ಪರಿಗಣಿಯಮಸೇಸಂ ಅಪ್ಪಮತ್ತೋ ಭವೇಯ್ಯಾತಿ.
ಸುಜನಪ್ಪಸಾದಸಂವೇಗತ್ಥಾಯ ಕತೇ
ಮಹಾವಂಸೇ ದುತಿಯಸಂಗೀತಿ ನಾಮ
ಚತುತ್ಥೋ ಪರಿಚ್ಛೇದೋ.
ಪಞ್ಚಮ ಪರಿಚ್ಛೇದ
ತತಿಯಧಮ್ಮಸಂಗೀತಿ
ಯಾ ಮಹಾಕಸ್ಸಪಾದೀಹಿ ¶ , ಮಹಾಥೇರೇಹಿ ಆದಿತೋ;
ಕತಾ ಸದ್ಧಮ್ಮ ಸಂಗೀತಿ, ಥೇರಿಯಾ’ತಿ ಪವುಚ್ಚತಿ.
ಏಕೋ’ವ ಥೇರವಾದೋ ಸೋ, ಆದಿವಸ್ಸಸತೇ ಅಹು;
ಅಞ್ಞಾಚರಿಯವಾದಾತು, ತತೋ ಓರಂ ಅಜಾಯಿಸುಂ.
ತೇಹಿ ಸಂಗೀತಿಕಾರೇಹಿ, ಥೇರೇಹಿ ದುತಿಯೇಹಿ ತೇ;
ನಿಗ್ಗಹಿತಾ ಪಾಪಭಿಕ್ಖೂ, ಸಬ್ಬೇ ದಸಸಹಸ್ಸಕಾ.
ಅಕಂಸಾ’ಚರಿಯವಾದಂ ತೇ, ಮಹಾಸಂಗೀತಿನಾಮಕಾ;
ತತೋ ಗೋಕುಲಿಕಾ ಜಾತಾ, ಏಕಬ್ಬೋಹಾರಿಕಾಪಿ ಚ.
ಗೋಕುಲಿಕೇಹಿ ಪಣ್ಣತ್ತಿ-ವಾದಾ ಬಾಹುಲಿಕಾಪಿ ಚ;
ಚೇತಿಯವಾದಾ ತೇಸ್ವೇವ, ಸಮತಾಸಙ್ಘಿಕಾ ಛ ತೇ.
ಪುನಾಪಿ ಥೇರವಾದೇಹಿ, ಮಹಿಂಸಾಸಕಭಿಕ್ಖವೋ;
ವಜ್ಜೀಪುತ್ತಕಭಿಕ್ಖೂ ಚ, ದುವೇ ಜಾತಾ ಇಮೇ ಖಲು.
ಜಾತಾ’ಥ ಧಮ್ಮುತ್ತರಿಯಾ, ಭದ್ರಯಾನಿಕಭಿಕ್ಖವೋ;
ಛನ್ನಾಗಾರಾ ಸಮ್ಮಿತಿಯಾ, ವಜ್ಜೀಪುತ್ತಿಯಭಿಕ್ಖೂತಿ.
ಮಹಿಂಸಾಸಕಭಿಕ್ಖೂಹಿ, ಭಿಕ್ಖೂ ಸಬ್ಬತ್ಥ ವಾದಿನೋ;
ಧಮ್ಮಗುತ್ತಿಯಭಿಕ್ಖೂ ಚ, ಜಾತಾ ಖಲು ಇಮೇ ದುವೇ.
ಜಾತಾ ಸಬ್ಬತ್ಥಿವಾದೀಹಿ, ಕಸ್ಸಪಿಯಾ ತತೋ ಪನ;
ಜಾತಾ ಸಙ್ಕನ್ತಿಕಾ ಭಿಕ್ಖೂ, ಸುತ್ತವಾದಾ ತತೋ ಪನ.
ಥೇರವಾದೇನ ಸಹ ತೇ, ಹೋನ್ತಿ ದ್ವಾದಸಿ’ಮೇಪಿ ಚ;
ಪುಬ್ಬೇ ವುತ್ತಛವಾದಾ ಚ, ಇತಿ ಅಟ್ಠಾರಸಾ ಖಿಲಾ.
ಸತ್ತರಸಾಪಿ ದುತಿಯೇ, ಜಾತಾ ವಸಸ್ಸತೇ ಇತಿ;
ಅಞ್ಞಾಚರಿಯವಾದಾ ತು, ತತೋ ಓರಮಜಾಯಿಸುಂ.
ಹೇಮತಾ ¶ ರಾಜಗಿರಿಯಾ, ತಥಾ ಸಿದ್ಧತ್ಥಿಕಾಪಿ ಚ;
ಪುಬ್ಬಸೇಲಿಯಭಿಕ್ಖೂ ಚ, ತಥಾ ಅಪರಸೇಲಿಯಾ.
ವಾಜಿರಿಯಾ ಛ ಏತೇಹಿ, ಜಮ್ಬುದೀಪಮ್ಹಿ ಭಿನ್ನಕಾ;
ಧಮ್ಮರುಚಿ ಚ ಸಾಗಲಿಯಾ, ಲಂಕಾದೀಪಮ್ಹಿ ಭಿನ್ನಕಾ.
ಆಚರಿಯಕುಲವಾದಕಥಾ ನಿಟ್ಠಿತಾ.
ಧಮ್ಮಾಸೋಕಾಭಿಸೇಕ
ಕಾಳಾಸೋಕಸ್ಸ ಪುತ್ತಾ ತು, ಅಹೇಸುಂ ದಸಭಾತಿಕಾ;
ಬಾವೀಸತಿಂ ತೇ ವಸ್ಸಾನಿ, ರಜ್ಜಂ ಸಮನುಸಾಸಿಸುಂ.
ನವ ನನ್ದಾ ತತೋ ಆಸುಂ, ಕಮೇನೇವ ನರಾಧಿಪಾ;
ತೇ’ಪಿ ಬಾವೀಸವಸ್ಸಾನಿ, ರಜ್ಜಂ ಸಮನುಸಾಸಿಸುಂ.
ಮೋರಿಯಾನಂ ಖತ್ತಿಯಾನಂ, ವಂಸೇ ಜಾತಂ ಸಿರಿಧರಂ;
ಚನ್ದಗುತ್ತೋತಿ ಪಞ್ಞಾತಂ, ಚಾಣಕ್ಕೋ ಬ್ರಾಹ್ಮಣೋ ತತೋ.
ನವಮಂ ಧನನನ್ದಂ ತಂ, ಘಾತೇತ್ವಾ ಚಣ್ಡಕೋಧಸಾ;
ಸಕಲೇ ಜಮ್ಬುದೀಪಸ್ಮಿಂ, ರಜ್ಜೇ ಸಮಭಿಸಿಞ್ಚೀ ಸೋ.
ಸೋ ಚತುವೀಸವಸ್ಸಾನಿಂ, ರಾಜಾ ರಜ್ಜಮಕಾರಯಿ;
ತಸ್ಸ ಪುತ್ತೋ ಬಿನ್ದುಸಾರೋ, ಅಟ್ಠವೀಸತಿ ಕಾರಯಿ.
ಬಿನ್ದುಸಾರಸುತಾ ಆಸುಂ, ಸತಂ ಏಕೋ ಚ ವಿಸ್ಸುತಾ;
ಅಸೋಕೋ ಆಸಿ ತೇಸಂ ತು, ಪುಞ್ಞತೇಜೋಬಲಿದ್ಧಿಕೋ.
ವೇಮಾತಿಕೇ ಭಾತರೋ ಸೋ, ಹನ್ತ್ವಾ ಏಕೂನಕಂ ಸತಂ;
ಸಕಲೇ ಜಮ್ಬುದೀಪಸ್ಮಿಂ, ಏಕರಜ್ಜಮಪಾಪುಣಿ.
ಜಿನನಿಬ್ಬಾನತೋ ಪಚ್ಛಾ, ಪುರೇ ತಸ್ಸಾಭಿಸೇಕತೋ;
ಸಾಟ್ಠಾರಸಂ ವಸ್ಸಸತ-ದ್ವಯಮೇವಂ ವಿಜಾನಿಯ.
ಪತ್ವಾ ಚತೂಹಿ ವಸ್ಸೇಹಿ, ಏಕರಜ್ಜಂ ಮಹಾಯಸೋ;
ಪುರೇ ಪಾಟಲಿಪುತ್ತಸ್ಮಿಂ, ಅತ್ತಾನಮಭಿಸೇಚಯಿ.
ತಸ್ಸಾ’ಭಿಸೇಕೇನ ¶ ಸಮಂ, ಆಕಾಸೇ ಭೂಮಿಯಂ ತಥಾ;
ಯೋಜನೇ ಯೋಜನೇ ಆಣಾ, ನಿಚ್ಚಂ ಪವತ್ತಿತಾ ಅಹು.
ಅನೋತತ್ತೋ ದಕಾಕಾಜೇ, ಅಟ್ಠನೇಸುಂ ದಿನೇ ದಿನೇ;
ದೇವಾ ದೇವೋ ಅಕಾ ತೇಹಿ, ಸಂವಿಭಾಗಂ ಜನಸ್ಸಚ.
ನಾಗಲತಾದನ್ತಕಟ್ಠಂ, ಆನೇಸುಂ ಹಿಮವನ್ತತೋ;
ಅನೇಕೇಸಂ ಸಹಸ್ಸಾನಂ, ದೇವಾ ಏವ ಪಹೋನಕಂ.
ಅಗದಾ’ಮಲಕಞ್ಚೇವ, ತಥಾಗದ ಹರಿತಕಂ;
ತತೋ’ವ ಅಮಪಕ್ಕಞ್ಚ, ವಣ್ಣಗನ್ಧರಸುತ್ತಮಂ.
ಪಞ್ಚವಣ್ಣಾನಿ ವತ್ಥಾನಿ, ತತ್ಥಪುಞ್ಜನಪಟ್ಟಕಂ;
ಪೀತಞ್ಚ ದಿಬ್ಬಪಾನಞ್ಚ, ಛದ್ದನ್ತದಹತೋ ಮರು.
ಮರನ್ತಾ ನಗರೇ ತಸ್ಮಿಂ, ಮಿಗಸೂಕರಪಕ್ಖಿನೋ;
ಆಗನ್ತ್ವಾನ ಮಹಾನಸಂ, ಸಯಮೇವ ಮರನ್ತಿ ಚ.
ಗಾವೋ ತತ್ಥ ಚರಾಪೇತ್ವಾ, ವಜಮಾನೇನ್ತಿ ದೀಪಿನೋ;
ಖೇತ್ತ ವತ್ಥುತಳಾಕಾದಿಂ, ಪಾಲೇನ್ತಿ ಮಿಗಸೂಕರಾ.
ಸುಮನಂ ಪುಪ್ಫಪಟಕಂ, ಅಭುತ್ತಂ ದಿಬ್ಬಮುಪ್ಪಲಂ;
ವಿಲೇಪನಂ ಅಞ್ಜನಞ್ಚ, ನಾಗಾನಾಗಾವಿಮಾನತೋ.
ಸಾಲಿವಾಹಸಹಸ್ಸಾನಿ, ನವುತಿಂ ತು ಸುವಾ ಪನ;
ಛದ್ದನ್ತದಹತೋಯೇವ, ಆಹರಿಂಸು ದಿನೇ ದಿನೇ.
ತೇ ಸಾಲಿನಿತ್ಥುಸಕಣೇ, ಅಖಣ್ಡೇತ್ವಾನ ತಣ್ಡುಲೇ;
ಅಕಂಸು ಮೂಸಿಕಾ ತೇಹಿ, ಭತ್ತಂ ರಾಜಕುಲೇ ಅಹು.
ಅಕಂಸು ಸಸ್ಸತಂ ತಸ್ಸ, ಮಧೂನಿ ಮಧುಮಕ್ಖಿಕಾ;
ತಥಾ ಕಮ್ಮಾರಸಾಲಾಸು, ಅಚ್ಛಾಕೂಟಾನಿ ಪಾತಯುಂ.
ಕರವಿಕಾ ಸಕುಣಿಕಾ, ಮನುಞ್ಞಮಧುರಸ್ಸರಾ;
ಅಕಂಸು ತಸ್ಸಾ’ಗನ್ತ್ವಾನ, ರಞ್ಞೋ ಮಧುರವಸ್ಸಿತಂ.
ರಾಜಾ’ಭಿಸಿತ್ತೋ ಸೋ’ಸೋಕೋ,
ಕುಮಾರಂ ತಿಸ್ಸಸವ್ಹಯಂ;
ಕಣಿಟ್ಠಂ ಸಂಸೋದರಿಯಂ, ಉಪರಜ್ಜೇ’ಭಿಸೇಚಯಿ.
ಧಮ್ಮಾಸೋಕಾಭಿಸೇಕೋ ನಿಟ್ಠಿತೋ
ನಿಗ್ರೋಧಸಾಮಣೇರ ದಸ್ಸನ
ಪಿತಾ ¶ ಸಟ್ಠಿಸಹಸ್ಸಾನಿ, ಬ್ರಾಹ್ಮಣೇ ಬ್ರಹ್ಮಪಕ್ಖಿಕೇ;
ಭೋಜೇಸಿ ಸೋಪಿ ತೇಯೇವ, ತೀಣಿ ವಸ್ಸಾನಿ ಭೋಜಯಿ.
ದಿಸ್ವಾ’ನುಪಸಮಂ ತೇಸಂ, ಅಸೋಕೋ ಪರಿವೇಸನೇ;
ವಿಚೇಯ್ಯ ದಾನಂ ದಸ್ಸನ್ತಿ, ಅಮಚ್ಚೇ ಸನ್ನಿಯೋಜಿಯ.
ಆಣಾಪಯಿತ್ವಾ ಮತಿಮಾ, ನಾನಾಪಾಸಣ್ಡಿಕೇ ವಿಸುಂ;
ವೀಮಂಸಿತ್ವಾ ನಿಸಜ್ಜಾಯ, ಭೋಜಾಪೇತ್ವಾ ವಿಸಜ್ಜಯಿ.
ಕಾಲೇ ವಾತಾಯನಗತೋ, ಸನ್ತಂ ರಚ್ಛಾಗತಂ ಯತಿಂ;
ನಿಗ್ರೋಧಸಾಮಣೇರಂ ಸೋ, ದಿಸ್ವಾ ಚಿತ್ತಂ ಪಸಾದಯಿ.
ಬಿನ್ದುಸಾರಸ್ಸ ಪುತ್ತಾನಂ, ಸಬ್ಬೇಸಂ ಜೇಟ್ಠಭಾತುನೋ;
ಸುಮನಸ್ಸ ಕುಮಾರಸ್ಸ, ಪುತ್ತೋ ಸೋ ಹಿ ಕುಮಾರಕೋ.
ಅಸೋಕೋ ಪಿತರಾ ದಿನ್ನಂ, ರಜ್ಜಮುಜ್ಜೇನಿಯಞ್ಹಿ ಸೋ;
ಹಿತ್ವಾ’ಗತೋ ಪುಪ್ಫಪುರಂ, ಬಿನ್ದುಸಾರೇ ಗಿಲಾನಕೇ.
ಕತ್ವಾ ಪುರಂ ಸಕಾಯತ್ತಂ, ಮತೇ ಪಿತರಿ ಭಾತರಂ;
ಘಾತೇತ್ವಾ ಜೇಟ್ಠಕಂ ರಜ್ಜಂ, ಅಗ್ಗಹೇಸಿ ಪುರೇ ವರೇ.
ಸುಮನಸ್ಸ ಕುಮಾರಸ್ಸ, ದೇವೀ ತನ್ನಾಮಿಕಾ ತತೋ;
ಗಬ್ಭಿನೀ ನಿಕ್ಖಮಿತ್ವಾನ, ಪಾಚಿನದ್ವಾರತೋ ಬಹಿ.
ಚಣ್ಡಾಲಗಾಮ ಮಗಮಾ, ತತ್ಥ ನಿಗ್ರೋಧದೇವತಾ;
ತಮಾಲಪಿಯನಾಮೇನ, ಮಾ ಪತ್ವಾ ಘರಕಂ ಅದಾ.
ತದಹೇ’ವ ವರಂ ಪುತ್ತಂ, ವಿಜಾಯಿತ್ವಾ ಸುತಸ್ಸ ಸಾ;
ನಿಗ್ರೋಧೋತಿ ಅಕಾ ನಾಮಂ, ದೇವತಾ ನುಗ್ಗಹಾನುಗಾ.
ದಿಸ್ವಾ ತಂ ಜೇಟ್ಠಚಣ್ಡಾಲೋ, ಅತ್ತನೋ ಸಾಮಿನಿಂ ವಿಯ;
ಮಞ್ಞನ್ತೋ ತಂ ಉಪಟ್ಠಾಸಿ, ಸತ್ತವಸ್ಸಾನಿ ಸಾಧುಕಂ.
ತಂ ಮಹಾವರುಣೋ ಥೇರೋ, ತದಾ ದಿಸ್ವಾ ಕುಮಾರಕಂ;
ಉಪನಿಸ್ಸಯ ಸಮ್ಪನ್ನಂ, ಅರಹಾ ಪುಚ್ಛಿ ಮಾತರಂ.
ಪಬ್ಬಾಜೇಸಿ ಖುರಗ್ಗೇ ಸೋ, ಅರಹತ್ತಮಪಾಪುಣಿ;
ದಸ್ಸನಾಯೋ’ಪ ಗಚ್ಛನ್ತೋ, ಸೋ ತತೋ ಮಾತುದೇವಿಯಾ.
ದಕ್ಖಿಣೇನ ಚ ದ್ವಾರೇನ, ಪವಿಸಿತ್ವಾ ಪುರುತ್ತಮಂ;
ತಂ ಗಾಮಗಾಮಿಮಗ್ಗೇನ, ಯಾತಿ ರಾಜಙ್ಗಣೇ ತದಾ.
ಸನ್ತಾಯ ¶ ಇರಿಯಾ ಯಸ್ಮಿಂ, ಪಸೀದಿ ಸಮಹೀಪತಿ;
ಪುಬ್ಬೇ’ವ ಸನ್ನಿವಾಸೇನ, ಪೇಮಂ ತಸ್ಮಿಂ ಅಜಾಯಥ.
ಪುಬ್ಬೇ ಕಿರ ತಯೋ ಆಸುಂ, ಭಾತರೋ ಮಧು ವಾಣಿಜಾ;
ಏಕೋ ಮಧುಂ ವಿಕ್ಕಿಣಾತಿ, ಆಹರನ್ತಿ ಮಧುಂ ದುವೇ.
ಏಕೋ ಪಚ್ಚೇಕಸಮ್ಬುದ್ಧೋ, ವಣರೋಗಾತುರೋ ಅಹು;
ಅಞ್ಞೋ ಪಚ್ಚೇಕಸಮ್ಬುದ್ಧೋ, ತದತ್ಥಂ ಮಧುವತ್ಥಿಕೋ.
ಪಿಣ್ಡಚಾರಿಕವತ್ತೇನ, ನಗರಂ ಪಾವಿಸೀ ತದಾ;
ತಿತ್ಥಂ ಜಲತ್ಥಂ ಗಚ್ಛನ್ತಿ, ಏಕಾ ಚೇಟೀ ತಮದ್ದಸ.
ಪುಚ್ಛಿತ್ವಾ ಮಧುಕಾಮತ್ತಂ, ಞತ್ವಾ ಹತ್ಥೇನ ಆದಿಸಿ;
ಏಸೋ ಮಧ್ವಾಪಣೋ ಭನ್ತೇ, ತತ್ಥ ಗಚ್ಛಾ’ತಿ ಅಬ್ರವಿ.
ತತ್ಥ ಪತ್ತಸ್ಸ ಬುದ್ಧಸ್ಸ, ವಾಣಿಜೋ ಸೋ ಪಸಾದವಾ;
ವಿಸ್ಸನ್ದಯನ್ತೋ ಮುಖತೋ, ಪತ್ತಪುರಂ ಮಧುಂ ಅದಾ.
ಪುಣ್ಣಞ್ಚ ಉಪ್ಪತನ್ತಞ್ಚ, ಪತಿತಞ್ಚ ಮಹೀತಲೇ;
ದಿಸ್ವಾ ಮಧುಂ ಪಸನ್ನೋ ಸೋ, ಏವಂ ಪಣಿದಹೀ ತದಾ.
ಜಮ್ಬುದೀಪೇ ಏಕರಜ್ಜಂ, ದಾನೇನಾ’ನೇನ ಹೋತು ಮೇ;
ಆಕಾಸೇ ಯೋಜನೇ ಆಣಾ, ಭೂಮಿಯಂ ಯೋಜನೇತಿ ಚ.
ಭಾತರೇ ಆಗತೇ ಆಹ, ಏದಿಸಸ್ಸ ಮಧುಂ ಅದಂ;
ಅನುಮೋದಥ ತುಮ್ಹೇ ತಂ, ತುಮ್ಹಾಕಞ್ಚ ಯತೋ ಮಧು.
ಜೇಟ್ಠೋ ಆಹ ಅತುಟ್ಠೋ ಸೋ,
ಚಣ್ಡಾಲೋ ನೂನ ಸೋಸಿಯಂ;
ನಿವಾಸೇನ್ತೀತಿ ಚಣ್ಡಾಲಾ,
ಕಾಸಾಯಾನಿ ಸದಾ ಇತಿ.
ಮಜ್ಝೋ ಪಚ್ಚೇಕಬುದ್ಧಂ ತಂ, ಖಿಪಪಾರಣ್ಣವೇ ಇತಿ;
ಪತ್ತಿದಾನವಚೋ ತಸ್ಸ, ಸುತ್ವಾ ತೇ ಚಾನುಮೋದಿಸುಂ.
ಆಪಣಾ ದೇಸಿಕಂ ಯಾತು, ದೇವಿತ್ತಂ ತಸ್ಸ ಪತ್ಥಯಿ;
ಆದಿಸ್ಸಮಾನಸನ್ಧಿ ಚ, ರೂಪಂ ಅತಿಮನೋರಮಂ.
ಅಸೋಕೋ ಮಧುದೋ’ಸನ್ಧಿ-ಮಿತ್ತಾದೇವೀ ತು ಚೇಟಿಕಾ;
ಚಣ್ಡಾಲವಾದೀ ನಿಗ್ರೋಧೋ, ತಿಸ್ಸೋ ಸೋ ಪಾರವಾದಿಕೋ.
ಚಣ್ಡಾಲವಾದೀ ಚಣ್ಡಾಲ-ಗಾಮೇ ಆಸಿ ಯತೋ ತು ಸೋ;
ಪತ್ಥೇಸಿ ಮೋಕ್ಖಂ ಮೋಕ್ಖಞ್ಚ, ಸತ್ತ ವಸ್ಸೋವ ಪಾಪುಣಿ.
ನಿವಿಟ್ಠಪೇಮೋ ¶ ತಸ್ಮಿಂ ಸೋ, ರಾಜಾ’ತಿ ತುರಿತೋ ತತೋ;
ಪಕ್ಕೋಸಾಪೇಸಿ ತಂ ಸೋ ತು, ಸನ್ತವುತ್ತೀ ಉಪಾಗಮಿ.
ನಿಸಿದ ತಾತಾ’ನುರೂಪೇ, ಆಸನೇ ತಾ’ಹ ಭೂಪತಿ;
ಅದಿಸ್ವಾ ಭಿಕ್ಖುಮಞ್ಞಂ ಸೋ, ಸೀಹಾಸನಮುಪಾಗಮಿ.
ತಸ್ಮಿಂ ಪಲ್ಲಙ್ಕಮಾಯಾತೇ, ರಾಜಾಇತಿ ವಿಚಿನ್ತಯಿ;
ಅಜ್ಜಾ’ಯಂ ಸಾಮಣೇರೋ ಮೇ, ಘರೇ ಹೇಸ್ಸತಿ ಸಾಮಿಕೋ.
ಆಲಮ್ಬಿತ್ವಾ ಕರಂ ರಞ್ಞೋ, ಸೋ ಪಲ್ಲಙ್ಕೇ ಸಮಾರುಹಿ;
ನಿಸೀದಿ ರಾಜಪಲ್ಲಙ್ಕೇ, ಸೇತಚ್ಛತ್ತಸ್ಸ ಹೇಟ್ಠತೋ.
ದಿಸ್ವಾ ತಥಾ ನಿಸಿನ್ನಂ ತಂ, ಅಸೋಕೋ ಸೋ ಮಹೀಪತಿ;
ಸಮ್ಭಾವೇತ್ವಾನ ಗುಣತೋ, ತುಟ್ಠೋ’ತೀವ ತದಾ ಅಹು.
ಅತ್ತನೋ ಪಟಿಯತ್ತೇನ, ಖಜ್ಜಭೋಜ್ಜೇನ ತಪ್ಪಿಯ;
ಸಮ್ಬುದ್ಧದೇಸಿತಂ ಧಮ್ಮಂ, ಸಾಮಣೇರಮಪುಚ್ಛಿತಂ.
ತಸ್ಸ’ಪ್ಪಮಾದವಗ್ಗಂ ಸೋ, ಸಾಮಣೇರೋ ಅಭಾಸಥ;
ತಂ ಸುತ್ವಾ ಭೂಮಿಪಾಲೋ ಸೋ, ಪಸನ್ನೋ ಜಿನಸಾಸನೇ.
ಅಟ್ಠ ತೇ ನಿಚ್ಚಭತ್ತಾನಿ, ದಮ್ಮಿ ತಾತಾ’ತಿ ಆಹ ತಂ;
ಉಪಜ್ಝಾಯಸ್ಸ ಮೇ ರಾಜ, ತಾನಿ ದಮ್ಮೀತಿ ಆಹ ಸೋ.
ಪುನ ಅಟ್ಠಸು ದಿನ್ನೇಸು, ತಾನ’ದಾ ಚರಿಯಸ್ಸ ಸೋ;
ಪುನ ಅಟ್ಠಸು ದಿನ್ನೇಸು, ಭಿಕ್ಖುಸಙ್ಘಸ್ಸ ತಾನ’ದಾ.
ಪುನ ಅಟ್ಠಸು ದಿನ್ನೇಸು, ಅಧಿವಾಸೇಸಿ ಬುದ್ಧಿಮಾ;
ದ್ವತ್ತಿಂಸಭಿಕ್ಖೂ ಆದಾಯ, ದುತಿಯದಿವಸೇ ಗತೋ.
ಸಹತ್ಥಾ ತಪ್ಪಿತೋ ರಞ್ಞಾ, ಧಮ್ಮಂ ದೇಸಿಯ ಭೂಪತಿಂ;
ಸರಣೇಸು ಚ ಸೀಲೇಸು, ಠಪೇಸಿ ಸಮಹಾಜನಂ.
ನಿಗ್ರೋಧಸಾಮಣೇರದಸ್ಸನಂ
ಸಾಸನಪ್ಪವೇಸ
ತತೋ ರಾಜಾ ಪಸನ್ನೋ ಸೋ, ದಿಗುಣೇನ ದಿನೇ ದಿನೇ;
ಭಿಕ್ಖೂ ಸಟ್ಠಿಸಹಸ್ಸಾನಿ, ಅನುಪುಬ್ಬೇನು’ಪಠಹಿ.
ತತ್ಥಿಯಾನಂ ಸಹಸ್ಸಾನಿ, ನಿಕಡ್ಢಿತ್ವಾನ ಸಟ್ಠಿಸೋ;
ಸಟ್ಠಿಭಿಕ್ಖುಸಹಸ್ಸಾನಿ, ಘರೇ ನಿಚ್ಚಮಭೋಜಯಿ.
ಸಟ್ಠಿಭಿಕ್ಖುಸಹಸ್ಸಾನಿ ¶ , ಭೋಜೇತುಂ ತುರಿತೋ ಹಿ ಸೋ;
ಪಟಿಯಾದಾಪಯಿತ್ವಾನ, ಖಜ್ಜಭೋಜ್ಜಂ ಮಹಾರಹಂ.
ಭೂಸಾಪೇತ್ವಾನ ನಗರಂ, ಗನ್ತ್ವಾ ಸಙ್ಘಂ ನಿಮನ್ತಿಯ;
ಘರಂ ನೇತ್ವಾನ ಭೋಜೇತ್ವಾ, ದತ್ವಾ ಸಾಮಣಕಂ ಬಹುಂ.
ಸತ್ಥಾರಾ ದೇಸಿತೋ ಧಮ್ಮೋ, ಕಿತ್ತಕೋತಿ ಅಪುಚ್ಛಥ;
ಬ್ಯಾಕಾಸಿ ಮೋಗ್ಗಲಿಪುತ್ತೋ, ತಿಸ್ಸತ್ಥೇರೋ ತದಸ್ಸತಂ.
ಸುತ್ವಾನ ಚತುರಾಸೀತಿ, ಧಮ್ಮಕ್ಖನ್ಧಾ’ತಿ ಸೋ’ಬ್ರವಿ;
ಪೂಜೇಮಿ ತೇ’ಹಂ ಪಚ್ಚೇಕಂ, ವಿಹಾರೇನಾ’ತಿ ಭೂಪತಿ.
ದತ್ವಾ ತದಾ ಛನ್ನವುತಿ-ಧನಕೋಟಿಂ ಮಹೀಪತಿ;
ಪುರೇಸು ಚತುರಾಸೀತಿ-ಸಹಸ್ಸೇಸು ಮಹೀತಲೇ.
ತತ್ಥ ತತ್ಥೇ’ವ ರಾಜೂಹಿ, ವಿಹಾರೇ ಆರಭಾಪಯಿ;
ಸಯಂ ಅಸೋಕಾರಾಮಂ ತು, ಕಾರಾಪೇತುಂ ಸಮಾರಭಿ.
ರತನತ್ತಯನಿಗ್ರೋಧ-ಗಿಲಾನಾನನ್ತಿ ಸಾಸನೇ;
ಪಚ್ಚೇಕಂ ಸತಸಹಸ್ಸಂ, ಸೋ ದಾಪೇಸಿ ದಿನೇ ದಿನೇ.
ಧನೇನ ಬುದ್ಧದಿನ್ನೇನ, ಥೂಪಪೂಜಾ ಅನೇಕಧಾ;
ಅನೇಕೇಸು ವಿಹಾರೇಸು, ಅನೇಕೇ ಅಕರುಂ ಸದಾ.
ಧನೇನ ಧಮ್ಮದಿನ್ನೇನ, ಪಚ್ಚಯೇ ಚತುರೋ ವರೇ;
ಧಮ್ಮಧರಾನಂ ಭಿಕ್ಖೂನಂ, ಉಪನೇತುಂ ಸದಾ ನರಾ.
ಅನೋತತ್ತೋದಕಾಜೇಸು, ಸಙ್ಘಸ್ಸ ಚತುರೋ ಅದಾ;
ತೇ ಪಿಟಕಾನಂ ಥೇರಾನಂ, ಸಟ್ಠಿಯೇ’ಕಂ ದಿನೇ ದಿನೇ.
ಏಕಂ ಅಸನ್ಧಿಮಿತ್ತಾಯ, ದೇವಿಯಾ ತು ಅದಾಪಯಿ;
ಸಯಂ ಪನ ದುವೇಯೇವ, ಪರಿಭುಞ್ಜಿ ಮಹೀಪತಿ.
ಸಟ್ಠಿಭಿಕ್ಖುಸಹಸ್ಸಾನಂ, ದನ್ತಕಟ್ಠಂ ದಿನೇ ದಿನೇ;
ಸೋಳಸಿತ್ಥಿಸಹಸ್ಸಾನಂ, ಅದಾ ನಾಗಲತಾವ್ಹಯಂ.
ಅಥೇಕದಿವಸಂ ರಾಜಾ, ಚತುಸಮ್ಬುದ್ಧದಸ್ಸಿನಂ;
ಕಪ್ಪಾಯುಕಂ ಮಹಾಕಾಳಂ, ನಾಗರಾಜಂ ಮಹಿದ್ಧಿಕಂ.
ಸುಣಿತ್ವಾ ತಮಾನೇತುಂ, ಸೋಣ್ಡಸಙ್ಖಲಿಬನ್ಧನಂ;
ಪೇಸಯಿತ್ವಾ ತಮಾನೇತ್ವಾ, ಸೇತಚ್ಛತ್ತಸ್ಸ ಹೇಟ್ಠತೋ.
ಪಲ್ಲಙ್ಕಮ್ಹಿ ನಿಸೀದೇತ್ವಾ, ನಾನಾಪುಪ್ಫೇಹಿ ಪೂಜಿಯ;
ಸೋಳಸಿತ್ಥಿಸಹಸ್ಸೇಹಿ, ಪರಿವಾರಿಯ ಅಬ್ರವಿ.
ಸದ್ಧಮ್ಮಚಕ್ಕವತ್ತಿಸ್ಸ ¶ , ಸಮ್ಬುದ್ಧಸ್ಸ ಮಹೇಸಿನೋ;
ರೂಪಂ ಅನನ್ತಞಾಣಸ್ಸ, ದಸ್ಸೇಹಿ ಮಮ ಭೋ ಇತಿ.
ದ್ವತ್ತಿಂಸಲಕ್ಖಣೂಪೇತಂ, ಅಸೀತಿಬ್ಯಞ್ಜನುಜ್ಜಲಂ;
ಬ್ಯಾಮಪ್ಪಭಾಪರಿಕ್ಖಿತ್ತಂ, ಕೇತುಮಾಲಾಹಿ ಸೋಭಿತಂ.
ನಿಮ್ಮಾಸಿ ನಾಗರಾಜಾ ಸೋ, ಬುದ್ಧರೂಪಂ ಮನೋಹರಂ;
ತಂ ದಿಸ್ವಾ’ತಿ ಪಸಾದಸ್ಸ, ವಿಮ್ಹಯಸ್ಸ ಚ ಪೂರಿತೋ.
ಏತೇನ ನಿಮ್ಮಿತಂ ರೂಪಂ, ಈದಿಸಂ ಕೀದಿಸಂ ನುಖೋ;
ತಥಾಗತಸ್ಸ ರೂಪನ್ತಿ, ಆಸಿ ಪಿತುನ್ನತುನ್ನತೋ.
ಅಕ್ಖಿಪೂಜನ್ತಿ ಸಞ್ಞಾತಂ, ತಂ ಸತ್ತಾಹಂ ನಿರನ್ತರಂ;
ಮಹಾಮಹಂ ಮಹಾರಾಜ, ಕಾರಾಪೇಸಿ ಮಹಿದ್ಧಿಕೋ.
ಏವಂ ಮಹಾನುಭಾವೋ ಚ, ಸದ್ಧೋ ಚಾಪಿ ಮಹೀಪತಿ;
ಥೇರೋ ಚ ಮೋಗ್ಗಲಿಪುತ್ತೋ, ದಿಟ್ಠಾ ಪುಬ್ಬೇ ವಸೀಹಿ ತೇ.
ಸಾಸನಪ್ಪವೇಸೋ ನಿಟ್ಠಿತೋ.
ಮೋಗ್ಗಲಿಪುತ್ತತಿಸ್ಸಥೇರಾದಯೋ
ದುತಿಯೇ ಸಙ್ಗಹೇ ಥೇರಾ, ಪೇಕ್ಖನ್ತಾ’ನಾಗತೇಹಿ ತೇ;
ಸಾಸನೋಪದ್ದವಂ ತಸ್ಸ, ರಞ್ಞೋ ಕಾಲಮ್ಹಿ ಅದ್ದಸುಂ.
ಪೇಕ್ಖಾನ್ತಾ ಸಕಲೇ ಲೋಕೇ, ತದುಪದ್ದವಘಾತಕಂ;
ತಿಸ್ಸಬ್ರಹ್ಮಾನಮದ್ದಕ್ಖುಂ, ಅಚಿರಟ್ಠಾಯಿ ಜೀವಿತಂ.
ತೇಸಂ ಸಮುಪಸಙ್ಕಮ್ಮ, ಆಯಾಚಿಂಸು ಮಹಾಪತಿಂ;
ಮನುಸ್ಸೇಸು’ಪಪಜ್ಜಿತ್ವಾ, ತದುಪದ್ದವಘಾತನಂ.
ಅದಾ ಪಟಿಞ್ಞಂ ತೇಸಂ ಸೋ, ಸಾಸನುಜ್ಜೋತನತ್ಥಿಕೋ;
ಸಿಗ್ಗವಂ ಚಣ್ಡವಜ್ಜಿಞ್ಚ ಅವೋಚುಂ ದಹರೇ ಯತಿ.
ಅಟ್ಠಾರಸಾದಿಕಾ ವಸ್ಸ-ಸತಾ ಉಪರಿ ಹೇಸ್ಸತಿ;
ಉಪದ್ದವೋ ಸಾಸನಸ್ಸ, ನ ಸಮ್ಭೋಸ್ಸಾಮ ತಂ ಮಯಂ.
ಇಮಂ ತುಮ್ಹಾ’ಧಿಕರಣಂ, ನೋಪಗಞ್ಛಿತ್ಥ ಭಿಕ್ಖವೋ;
ದಣ್ಡಕಮ್ಮಾರಹಾ ತಸ್ಮಾ, ದಣ್ಡಕಮ್ಮಪದಞ್ಹಿ ವೋ.
ಸಾಸನುಜ್ಜೋತನತ್ಥಾಯ, ತಿಸ್ಸಬ್ರಹ್ಮಾ ಮಹಾಪತಿ;
ಮೋಗ್ಗಲಿಬ್ರಾಹ್ಮಣಘರೇ, ಪಟಿಸನ್ಧಿಂ ಗಹೇಸ್ಸತಿ.
ಕಾಲೇ ¶ ತುಮ್ಹೇಸು ಏಕೋ ತಂ, ಪಬ್ಬಾಜೇತು ಕುಮಾರಕಂ;
ಏಕೋ ತಂ ಬುದ್ಧವಚನಂ, ಉಗ್ಗಣ್ಹಾಪೇತು ಸಾಧುಕಂ.
ಅಹು ಉಪಾಲಿಥೇರಸ್ಸ,
ಥೇರೋ ಸದ್ಧಿವಿಹಾರಿಕೋ;
ದಾಸಕೋ ಸೋಣಕೋ ತಸ್ಸ,
ದ್ವೇ ಥೇರಾ ಸೋಣಕಸ್ಸಿಮೇ.
ಅಹು ವೇಸಾಲಿಯಂ ಪುಬ್ಬೇ-ದಾಸಕೋ ನಾಮ ಸೋತ್ಥಿಯೋ;
ತಿಸಿಸ್ಸಸತಜೇಟ್ಠೋ ಸೋ, ವಸಂ ಆಚರಿಯನ್ತಿಕೇ.
ದ್ವಾದಸವಸ್ಸಿಕೋಯೇವ, ವೇದಪಾರಗತೋ ಚರಂ;
ಸಸಿಸ್ಸೋ ವಾಲಿಕಾರಾಮೇ, ವಸನ್ತಂ ಕತಸಙ್ಗಹಂ.
ಉಪಾಲಿಥೇರಂ ಪಸ್ಸಿತ್ವಾ, ನಿಸೀದಿತ್ವಾ ತದನ್ತಿಕೇ;
ವೇದೇಸು ಗಣ್ಠಿಠಾನಾನಿ, ಪುಚ್ಛಿ ಸೋ ತಾನಿ ಬ್ಯಾಕರಿ.
ಸಬ್ಬಧಮ್ಮಾನುಪತಿತೋ, ಏಕಧಮ್ಮೋ ಹಿ ಮಾಣವ;
ಸಬ್ಬೇ ಧಮ್ಮಾ ಓಸರನ್ತಿ, ಏಕಧಮ್ಮೋ ಹಿ ಕೋ ನು ಸೋ.
ಇಚ್ಚಾಹ ನಾಮಂ ಸನ್ಧಾಯ, ಥೇರೋ ಮಾಣವಕೋ ತು ಸೋ;
ನಾ’ಞ್ಞಾಸಿ ಪುಚ್ಛಿತೋ ಮನ್ತೋ, ಬುದ್ಧಮನ್ತೋತಿ ಭಾಸಿತೋ.
ದೇಹೀತಿ ಆಹ ಸೋ ಆಹ, ದೇಮ ನೋ ವೇಸಧಾರಿನೋ;
ಗುರುಂ ಆಪುಚ್ಛಿ ಮನ್ತತ್ಥಂ, ಮಾತರಂ ಪಿತರಂ ತಥಾ.
ಮಾಣವಾನಂ ಸತೇಹೇ’ಸ, ತೀಹಿ ಥೇರಸ್ಸ ಸನ್ತಿಕೇ;
ಪಬ್ಬಜಿತ್ವಾನ ಕಾಲೇನ, ಉಪಸಮ್ಪಜ್ಜಿ ಮಾಣವೋ.
ಖೀಣಾಸವಸಹಸ್ಸಂ ಸೋ, ದಾಸಕತ್ಥೇರಜೇಟ್ಠಕಂ;
ಉಪಾಲಿಥೇರೋ ವಾಚೇಸಿ, ಸಕಲಂ ಪಿಟಕತ್ತಯಂ.
ಗಣನಾ ವೀತಿವತ್ತಾ ತೇ, ಸೇಸಾ’ರಿಯ ಪುಥುಜ್ಜನಾ;
ಪಿಟಕಾನುಗ್ಗಹಿತಾನಿ, ಯೇಹಿ ಥೇರಸ್ಸ ಸನ್ತಿಕೇ.
ಕಾಸೀಸು ಕೋಸಲೋ ನಾಮ, ಸತ್ಥವಾಹಸುತೋ ಅಹು;
ಗಿರಿಬ್ಬಜಂ ವಣಿಜ್ಜಾಯ, ಗತೋ ಮಾತಾಪಿತೂಹಿ ಸೋ.
ಅಗಾ ವೇಳುವನಂ ಪಞ್ಚ-ದಸವಸೋ ಕುಮಾರಕೋ;
ಮಾಣವಂ ಪಞ್ಚಪಞ್ಞಾಸ, ಪರಿವಾರಿಯ ತಂ ಗತಾ.
ಸಗಣಂ ದಾಸಕಂ ಥೇರಂ, ತತ್ಥ ದಿಸ್ವಾ ಪಸೀದಿಯ;
ಪಬ್ಬಜ್ಜಂ ಯಾಚಿ ಸೋ ಆಹ, ತವಾ’ಪುಚ್ಛ ಗುರುಂ ಇತಿ.
ಭತ್ತತ್ತಯಮಭುಞ್ಜಿತ್ವಾ ¶ , ಸೋಣಕೋ ಸೋ ಕುಮಾರಕೋ;
ಮಾತಾಪಿತೂಹಿ ಕಾರೇತ್ವಾ, ಪಬ್ಬಜ್ಜಾನುಞ್ಞಮಾಗತೋ.
ಸದ್ಧಿಂ ತೇಹಿ ಕುಮಾರೇಹಿ, ದಾಸಕತ್ಥೇರಸನ್ತಿಕೇ;
ಪಬ್ಬಜ್ಜಂ ಉಪಸಮ್ಪಜ್ಜ, ಉಗ್ಗಣ್ಹಿ ಪಿಟಕತ್ತಯಂ.
ಖೀಣಾಸವಸಹಸ್ಸಸ್ಸ, ಥೇರಸಿಸ್ಸ ಗಣಸ್ಸ ಸೋ;
ಅಹೋಸಿ ಪಿಟಕಞ್ಞುಸ್ಸ, ಜೇಟ್ಠಕೋ ಸೋಣಕೋ ಯತಿ.
ಅಹೋಸಿ ಸಿಗ್ಗವೋ ನಾಮ, ಪುರೇ ಪಾಟಲಿನಾಮಕೋ;
ಪಞ್ಞವಾ’ಮಚ್ಚತನಯೋ, ಅಟ್ಠಾರಸಸಮೋ ತು ಸೋ.
ಪಾಸಾದೇಸು ವಸಂ ತೀಸು, ಛಳಡ್ಢಉತುಸಾಧುಸು;
ಅಮಚ್ಚಪುತ್ತಂ ಆದಾಯ, ಚಣ್ಡವಜ್ಜಿಂ ಸಹಾಯಕಂ.
ಪುರಿಸಾನಂ ದಸದ್ಧೇಹಿ, ಸತೇಹಿ ಪರಿವಾರಿತೋ;
ಗನ್ತ್ವಾನ ಕುಕ್ಕುಟಾರಾಮಂ, ಸೋಣಕತ್ಥೇರಮದ್ದಸ.
ಸಮಾಪತ್ತಿಸಮಾಪನ್ನಂ, ನಿಸಿನ್ನಂ ಸಂವುತಿನ್ದ್ರಿಯಂ;
ವನ್ದಿ ತೇನಾಲಪನ್ತಂ ತಂ, ಞತ್ವಾ ಸಙ್ಘಮಪುಚ್ಛಿತಂ.
ಸಮಾಪತ್ತಿಸಮಾಪನ್ನಾ, ನಾಲಪನ್ತೀ’ತಿ ಆಹು ತೇ;
ಕಥನ್ನು ವುಟ್ಠಹನ್ತೀತಿ, ವುತ್ತಾ ಆಹಂಸು ಭಿಕ್ಖವೋ.
ಪಕ್ಕೋಸನಾಯ ಸತ್ಥುಸ್ಸ, ಸಙ್ಘಪಕ್ಕೋಸನಾಯ ಚ;
ಯಥಾ ಕಾಲಪರಿಚ್ಛೇದಾ, ಆಯುಕ್ಖಯವಸೇನ ಚ.
ವುಟ್ಠಹನ್ತೀತಿ ವತ್ವಾನ, ತೇಸಂ ದಿಸ್ವೋ’ಪನಿಸ್ಸಯಂ;
ಪಾಹೇಸುಂ ಸಙ್ಘವಚನಂ, ವುಟ್ಠಾಯ ಸ ತಹಿಂ ಅಗಾ.
ಕುಮಾರೋ ಪುಚ್ಛಿ ಕಿಂ ಭನ್ತೇ, ನಾಲಪಿತ್ಥಾತಿ ಆಹ ಸೋ;
ಭುಞ್ಜಿಮ್ಹ ಭುಞ್ಜಿತಬ್ಬನ್ತಿ, ಆಹ ಭೋಜೇಥ ನೋ ಅಪಿ.
ಆಹ ಅಮ್ಹಾದಿಸೇ ಜಾಹೇ, ಸಕ್ಕಾ ಭೋಜಯಿತುಂ ಇತಿ;
ಮಾತಾಪಿತು ಅನುಞ್ಞಾಯ, ಸೋ ಕುಮಾರೋಥ ಸಿಗ್ಗವೋ.
ಚಣ್ಡವಜ್ಜೀ ಚ ತೇಪಞ್ಚ-ಸತಾನಿ ಪುರಿಸಾಪಿ ಚ;
ಪಬ್ಬಜ್ಜಿತ್ವೋ’ಪಸಮ್ಪಜ್ಜುಂ, ಸೋಣತ್ಥೇರಸ್ಸ ಸನ್ತಿಕೇ.
ಉಪಜ್ಝಾಯನ್ತಿಕೇಯೇವ, ತೇ ದುವೇ ಪಿಟಕತ್ತಯಂ;
ಉಗ್ಗಹೇಸುಞ್ಚ ಕಾಲೇನ, ಛಳಭಿಞ್ಞಂ ಲಭಿಂಸು ಚ.
ಞತ್ವಾ ¶ ತಿಸ್ಸ ಪಟಿಸನ್ಧಿಂ, ತತೋ ಪಭುತಿ ಸಿಗ್ಗವೋ;
ಥೇರೋ ಸೋ ಸತ್ತವಸ್ಸಾನಿ, ತಂ ಘರಂ ಉಪಸಙ್ಕಮಿ.
ಗಚ್ಛಾತಿ ವಾಚಾಮತ್ತಮ್ಪಿ, ಸತ್ತವಸ್ಸಾನಿ ನಾಲಭಿ;
ಅಲತ್ಥ ಅಟ್ಠಮೇ ವಸ್ಸೇ, ಗಚ್ಛಾತಿ ವಚನಂ ತಹಿಂ.
ತಂ ನಿಕ್ಖಮನ್ತಂ ಪವಿಸನ್ತೋ, ದಿಸ್ವಾ ಮೋಗ್ಗಲಿಬ್ರಾಹ್ಮಣೋ;
ಕಿಞ್ಚಿ ಲದ್ಧಂ ಘರೇ ನೋತಿ, ಪುಚ್ಛಿ ಆಮಾತಿ ಸೋ’ಬ್ರವಿ.
ಘರಂ ಗನ್ತ್ವಾನ ಪುಚ್ಛಿತ್ವಾ, ದುತಿಯೇ ದಿವಸೇ ತತೋ;
ಮುಸಾವಾದೇನ ನಿಗ್ಗಣ್ಹಿ, ಥೇರಂ ಘರಮುಪಾಗತಂ.
ಥೇರಸ್ಸ ವಚನಂ ಸುತ್ವಾ, ಸೋ ಪಸನ್ನಮನೋ ದ್ವಿಜೋ;
ಅತ್ತನೋ ಪಕತೇನ’ಸ್ಸ, ನಿಚ್ಚಂ ಭಿಕ್ಖಂ ಪವತ್ತಯಿ.
ಕಮೇನ’ಸ್ಸ ಪಸೀದಿಂಸು, ಸಬ್ಬೇ’ಪಿ ಘರಮಾನುಸಾ;
ಭೋಜಾಪೇಸಿ ದಿಜೋ ನಿಚ್ಚಂ, ನಿಸೀದಾಪಿಯ ತಂ ಘರೇ.
ಏವಂ ಕಮೇನ ಗಚ್ಛನ್ತೋ, ಕಾಲೇ ಸೋಳಸವಸ್ಸಿಕೋ;
ಅಹು ತಿಸ್ಸಕುಮಾರೋ ಸೋ, ತಿವೇದೋದಧಿಪಾರಗೋ.
ಥೇರೋ ಕಥಾಸಮುಟ್ಠಾನಂ, ಹೇಸ್ಸತೇ’ವ ಘರೇ ಇತಿ;
ಆಸನಾನಿ ನ ದಸ್ಸೇಸಿ, ಠಪೇತ್ವಾ ಮಾಣವಾಸನಂ.
ಬ್ರಹ್ಮಲೋಕಗತತ್ತಾವ, ಸುಚಿಕಾಮೋ ಅಹೋಸಿ ಸೋ;
ತಸ್ಮಾ ಸೋ ತಸ್ಸ ಪಲ್ಲಙ್ಕೋ, ವಾಸಯಿತ್ವಾ ಲಗೀಯತಿ.
ಅಞ್ಞಾಸನಂ ಅಪಸ್ಸನ್ತೋ, ಠಿತೇ ಥೇರೇ ಸಸಮ್ಭಮೋ;
ತಸ್ಸ ತಂ ಆಸನಂ ತಸ್ಸ, ಪಞ್ಞಪೇಸಿ ಘರೇ ಜನೋ.
ದಿಸ್ವಾ ತತ್ಥ ನಿಸಿನ್ನಂ ತಂ, ಆಗಮ್ಮಾ’ಚರಿಯನ್ತಿಕಾ;
ಕುಜ್ಝಿತ್ವಾ ಮಾಣವೋ ವಾಚಂ, ಅಮನಾಪಂ ಉದೀರಯಿ.
ಥೇರೋ ಮಾಣವ ಕಿಂ ಮನ್ತಂ, ಜಾನಾಸೀತಿ ತಮಬ್ರವಿ;
ತಮೇವ ಪುಚ್ಛಂ ಥೇರಸ್ಸ, ಪಚ್ಛಾ ರೋಚೇಸಿ ಮಾಣವೋ.
ಜಾನಾಮೀತಿ ಪಟಿಞ್ಞಾಯ, ಥೇರೇ ಥೇರಂ ಅಪುಚ್ಛಿಸೋ;
ಗಣ್ಠಿಠಾನಾನಿ ವೇದೇಸು, ತಸ್ಸ ಥೇರೋ’ಥ ಬ್ಯಾಕರಿ.
ಗಹಟ್ಠೋಯೇವ ¶ ಥೇರೋ ಸೋ,
ವೇದಪಾರಗತೋ ಅಹು;
ನ ಬ್ಯಾಕರೇಯ್ಯ ಕಿಂ ತಸ್ಸ,
ಪಭಿನ್ನಪಟಿಸಮ್ಭಿದೋ.
ಯಸ್ಸ ಚಿತ್ತಂ ಉಪ್ಪಜ್ಜತಿ ನ ನಿರುಜ್ಝತಿ,
ತಸ್ಸ ಚಿತ್ತಂ ನಿರುಜ್ಝಿಸ್ಸತಿ; ನ ಉಪ್ಪಜ್ಜಿಸ್ಸತಿ,
ಯಸ್ಸ ವಾ ಪನ ಚಿತ್ತಂ ನಿರುಜ್ಝಿಸತಿ ನ ಉಪ್ಪಜ್ಜಿಸ್ಸತಿ;
ತಸ್ಸ ಚಿತ್ತಂ ಉಪ್ಪಜ್ಜತಿ, ನ ನಿರುಜ್ಝತೀತಿ.
ತಂ ಚಿತ್ತಯಮಕೇ ಪಞ್ಹಂ, ಪುಚ್ಛಿ ಥೇರೋ ವಿಸಾರದೋ;
ಅನ್ಧಕಾರೋ ವಿಯ ಅಹು, ತಸ್ಸ ಸೋ ತಮವೋಚ ಸೋ.
ಭಿಕ್ಖುಕೋ ನಾಮ ಮನ್ತೋತಿ, ಬುದ್ಧ ಮನ್ತೋತಿ ಸೋ ಬ್ರವಿ;
ದೇಹೀತಿ ವುತ್ತೇ ನೋವೇಸ-ಧಾರಿನೋ ದಮ್ಮಿ ತಂ ಇತಿ.
ಮಾತಾಪಿತೂಹಿ’ನುಞ್ಞಾತೋ, ಮನ್ತತ್ಥಾಯ ಸ ಪಬ್ಬಜ್ಜಿ;
ಕಮ್ಮಟ್ಠಾನಮದಾ ಥೇರೋ, ಪಬ್ಬಾಜೇತ್ವಾ ಯಥಾರಹಂ.
ಭಾವನಂ ಅನುಯುಞ್ಜನ್ತೋ, ಅಚಿರೇನ ಮಹಾಮತೀ;
ಸೋತಾಫತ್ತಿಫಲಂ ಪತ್ತೋ, ಥೇರೋ ಞತ್ವಾನ ತಂ ತಥಾ.
ಪೇಸೇಸಿ ಚಣ್ಡವಜ್ಜಿಸ್ಸ, ಥೇರಸ್ಸನ್ತಿಕಮುಗ್ಗಹಂ;
ಕಾತುಂ ಸುತ್ತಾಭಿಧಮ್ಮಾನಂ, ಸೋತತ್ಥಾ’ಕಾತದುಗ್ಗಹಂ.
ತತೋ ಸೋ ತಿಸ್ಸದಹರೋ, ಆರಭಿತ್ವಾ ವಿಪಸ್ಸನಂ;
ಛಳಭಿಞ್ಞೋ ಅಹು ಕಾಲೇ, ಥೇರಭಾವಞ್ಚ ಪಾಪುಣಿ.
ಅತೀವ ಪಾಕಟೋ ಆಸಿ, ಚನ್ದೋ’ವ ಸೂರಿಯೋ’ವಸೋ;
ಲೋಕೋ ತಸ್ಸ ವಚೋ’ಮಞ್ಞೀ, ಸಮ್ಬುದ್ಧಸ್ಸ ವಚೋಪಿಯ.
ಮೋಗ್ಗಲಿಪುತ್ತತಿಸ್ಸಥೇರೋದಯೋ ನಿಟ್ಠೀತೋ.
ಏಕಾಹಂ ¶ ಉಪರಾಜಾ ಸೋ, ಅದಕ್ಖಿ ಮಿಗವಂ ಗತೋ;
ಕೀಳಮಾನೇ ಮಿಗೇ’ರಞ್ಞೇ, ದಿಸ್ವಾ ಏತಂ ವಿಚಿನ್ತಯಿ.
ಮಿಗಾಪಿ ಏವಂ ಕಿಳನ್ತಿ, ಅರಞ್ಞೇ ತಿಣಗೋಚರಾ;
ನ ಕಿಳಿಸ್ಸನ್ತಿ ಕಿಂ ಭಿಕ್ಖೂ, ಸುಖಾಹಾರವಿಹಾರಿನೋ.
ಅತ್ತನೋ ಚಿನ್ತಿತಂ ರಞ್ಞೋ, ಆರೋಚೇಸಿ ಘರಂ ಗತೋ;
ಸಞ್ಞಾಪೇತುಂ ತು ಸತ್ತಾಹಂ, ರಜ್ಜಂ ತಸ್ಸ ಅದಾಸಿ ಸೋ.
ಅನುಭೋಹಿ ಇಮೇ ರಜ್ಜಂ, ಸತ್ತಾಹಂ ತ್ವಂ ಕುಮಾರಕ;
ತತೋ ತಂ ಘಾತಯಿಸ್ಸಾಮಿ, ಇಚ್ಚ’ವೋಚ ಮಹೀಪತಿ.
ಆಹಾ’ತಿ ತಮ್ಹಿ ಸತ್ತಾಹೇ,
ತ್ವಂ ಕೇನಾ’ಸಿ ಕಿಸೋ ಇತಿ;
ಮರಣಸ್ಸ ಭಯೇನಾತಿ,
ವುತ್ತೇ ರಾಜಾ’ಹ ತಂ ಪುನ.
ಸತ್ತಾಹಾ’ಹಂ ಮರಿಸ್ಸಂತಿ, ತ್ವಂ ನ ಕೀಳಿ ಇಮೇ ಕಥಂ;
ಕೀಳಿಸ್ಸನ್ತಿ ಯತಿ ತಾತ, ಸದಾ ಮರಣಸಞ್ಞಿನೋ.
ಇಚ್ಚೇವಂ ಭಾಕರಾ ವುತ್ತೋ, ಸಾಸನಸ್ಮಿಂ ಪಸೀದಿ ಸೋ;
ಕಾಲೇನ ಮಿಗವಂ ಗನ್ತ್ವಾ, ಥೇರಮದಕ್ಖಿ ಸಞ್ಞತಂ.
ನಿಸಿನ್ನಂ ರುಕ್ಖಮೂಲಸ್ಮಿಂ, ಸೋ ಮಹಾಧಮ್ಮರಕ್ಖಿತಂ;
ಸಾಲಸಾಖಾಯ ನಾಗೇನ, ಬೀಜಯನ್ತ ಮನಾಸವಂ.
ಅಯಂ ಥೇರೋ ವಿಯಾ’ಹಮ್ಪಿ, ಪಬ್ಬಜ್ಜ ಜಿನ ಸಾಸನೇ;
ವಿಹರಿಸ್ಸಂ ಕದಾ ರಞ್ಞೇ, ಇತಿ ಚಿನ್ತಯಿ ಪಞ್ಞವಾ.
ಥೇರೋ ತಸ್ಸ ಪಸಾದತ್ಥಂ,
ಉಪತಿತ್ವಾ ವಿಹಾಯಸಾ;
ಗನ್ತ್ವಾ ಅಸೋಕಾರಾಮಸ್ಸ,
ಪೋಕ್ಖರಞ್ಞೋ ಜಲೇ ಠಿತೋ.
ಆಕಾಸೇ ಠಪಯಿತ್ವಾನ, ಚೀವರಾನಿ ವರಾನಿ ಸೋ;
ಓಗಾಹಿತ್ವಾ ಪೋಕ್ಖರಣೀ, ಗತ್ತಾನಿ ಪರಿಸಿಞ್ಚಥ.
ತಂ ¶ ಇದ್ಧಿಂ ಉಪರಾಜಾ ಸೋ, ದಿಸ್ವಾ’ತೀವ ಪಸೀದಿಯ;
ಅಜ್ಜೇವ ಪಬ್ಬಜಿಸ್ಸಂತಿ, ಬುದ್ಧಿಂಚಾ’ಕಾಸಿ ಬುದ್ಧಿಮಾ.
ಉಪಸಙ್ಕಮ್ಮ ರಾಜಾನಂ, ಪಬ್ಬಜ್ಜಂ ಯಾಚಿ ಸಾದರೋ;
ನಿವಾರೇತುಮಸಕ್ಕೋನ್ತೋ, ತಮಾದಾಯ ಮಹೀಪತಿ.
ಮಹತಾ ಪರಿವಾರೇನ, ವಿಹಾರಮಗಮಾ ಸಯಂ;
ಪಬ್ಬಜಿ ಸೋ ಮಹಾಧಮ್ಮ-ರಕ್ಖಿತತ್ಥೇರಸನ್ತಿಕೇ.
ಸದ್ಧಿಂ ತೇನ ಚತುಸತ-ಸಹಸ್ಸಾನಿ ನರಾಪಿ ಚ;
ಅನುಪಬ್ಬಜಿತಾನನ್ತು, ಗಣನಾ ಚ ನ ವಜ್ಜತಿ.
ಭಾಗಿನೇಯ್ಯೋ ನರಿನ್ದಸ್ಸ, ಅಗ್ಗಿ ಬ್ರಹ್ಮಾತಿ ವಿಸ್ಸುತೋ;
ಅಹೋಸಿ ರಞ್ಞೋ ಧೀತಾಯ, ಸಙ್ಘಮಿತ್ತಾಯ ಸಾಮಿಕೋ.
ತಸ್ಸಾ ತಸ್ಸ ಸುತೋ ಚಾಪಿ,
ಸುಮನೋ ನಾಮ ನಾಮಸೋ;
ಯಾಚಿತ್ವಾ ಸೋ’ಪಿ ರಾಜಾನಂ,
ಉಪರಾಜೇನ ಪಬ್ಬಜಿ.
ಉಪರಾಜಸ್ಸ ಪಬ್ಬಜ್ಜಾ, ತಸ್ಸಾ’ಸೋಕಸ್ಸ ರಾಜಿನೋ;
ಚತುತ್ಥೇ ಆಸಿವಸ್ಸೇಸಾ, ಮಹಾಜನಹಿತೋದಯಾ.
ತತ್ಥೇವ ಉಪಸಮ್ಪನ್ನೋ, ಸಮ್ಪನ್ನಉಪನಿಸ್ಸಯೋ;
ಘಟೇನ್ತೋ ಉಪರಾಜಾ ಸೋ, ಛಳ’ಭಿಞ್ಞೋ’ರಹಾ ಅಹು.
ವಿಹಾರೇ ತೇಸಮಾರದ್ಧೇ, ಸಬ್ಬೇ ಸಬ್ಬಪುರೇಸುಪಿ;
ಸಾಧುಕಂ ತೀಹಿ ವಸ್ಸೇಹಿ, ನಿಟ್ಠಾಪೇಸುಂ ಮನೋರಮೇ.
ಥೇರಸ್ಸ ಇನ್ದಗುತ್ತಸ್ಸ, ಕಮ್ಮಾದಿಟ್ಠಾಯಕಸ್ಸ ತು;
ಇದ್ಧಿಯಾ ಚಾ’ಸು ನಿಟ್ಠಾಸಿ, ಅಸೋಕಾರಾಮಸವ್ಹಯೋ.
ಜನೇನ ಪರಿಭುತ್ತೇಸು, ಠಾನೇಸು ಚ ತಹಿಂ ತಹಿಂ;
ಚೇತಿಯಾನಿ ಅಕಾರೇಸಿ, ರಮಣೀಯಾನಿ ಭೂಪತಿ.
ಪುರೇಹಿ ಚತುರಾಸೀತಿ-ಸಹಸ್ಸೇಹಿ ಸಮನ್ತತೋ;
ಲೇಖೇ ಏಕಾಹಮಾನೇಸುಂ, ವಿಹಾರಾ ನಿಟ್ಠಿತಾ ಇತಿ.
ಲೇಖೇ ಸುತ್ವಾ ಮಹಾರಾಜಾ, ಮಹಾತೇಜಿದ್ಧಿ ವಿಕ್ಕಮೋ;
ಕಾತುಕಾಮೋ ಸಕಿಂಯೇವ, ಸಬ್ಬಾರಾಮ ಮಹಾಮಹಂ.
ಪುರೇ ಭೇರಿಂ ಚರಾಪೇಸಿ, ಸತ್ತಮೇ ದಿವಸೇ ಇತೋ;
ಸಬ್ಬಾರಾಮಮಹೋ ಹೋತು, ಸಬ್ಬದೇಸೇಸು ಏಕದಾ.
ಯೋಜನೇ ¶ ಯೋಜನೇ ದೇನ್ತು, ಮಹಾದಾನಂ ಮಹೀತಲೇ;
ಕರೋನ್ತು ಗಾಮಾರಾಮಾನಂ, ಮಗ್ಗಾನಞ್ಚ ವಿಭೂಸನಂ.
ವಿಹಾರೇಸು ಚ ಸಬ್ಬೇಸು, ಭಿಕ್ಖುಸಙ್ಘಸ್ಸ ಸಬ್ಬಥಾ;
ಮಹಾದಾನಾನಿ ವತ್ತೇನ್ತು, ಯಥಾಕಾಲಂ ಯಥಾಬಲಂ.
ದೀಪಮಾಲಾ ಪುಮ್ಫಮಾಲಾ-ಲಙ್ಕಾರೇಹಿ ತಹಿಂ ತಹಿಂ;
ತೂರಿಯೇಹಿ ಚ ಸಬ್ಬೇಹಿ, ಉಪಹಾರಂ ಅನೇಕಧಾ.
ಉಪೋಸಥಙ್ಗಾನಾ’ದಾಯ, ಸಬ್ಬೇ ಧಮ್ಮಂ ಸುಣನ್ತು ಚ;
ಪೂಜಾವಿಸೇಸೇನ’ನೇಕೇ ಚ, ಕರೋನ್ತು ತದಹೇಪಿ ಚ.
ಸಬ್ಬೇ ಸಬ್ಬತ್ಥ ಸಬ್ಬಥಾ, ಯಥಾಣತ್ತಾಧಿಕಾಪಿ ಚ;
ಪೂಜಾ ಸಮ್ಪಟಿಯಾದೇಸುಂ, ದೇವಲೋಕಮನೋರಮಾ.
ತಸ್ಮಿಂ ದಿನೇ ಮಹಾರಾಜಾ, ಸಬ್ಬಾಲಙ್ಕಾರ ಭೂಸಿತೋ;
ಸಹೋರೋಧೋ ಸಹಾಮಚ್ಚೋ, ಬಲೋಘ ಪರಿವಾರಿತೋ.
ಅಗಮಾಸಿ ಸಕಾರಾಮಂ, ಭಿನ್ದನ್ತೋ ವಿಯ ಮೇದಿನಿಂ;
ಸಙ್ಘಮಜ್ಝಮ್ಹಿ ಅಟ್ಠಾಸಿ, ವನ್ದಿತ್ವಾ ಸಙ್ಘಮುತ್ತಮಂ.
ತಸ್ಮಿಂ ಸಮಾಗಮೇ ಆಸುಂ, ಅಸೀತಿ ಭಿಕ್ಖುಕೋಟಿ ಯೋ;
ಅಹೇಸುಂ ಸತಸಹಸ್ಸಂ, ತೇಸು ಖೀಣಾಸವಾ ಯತಿ.
ನವುತಿ ಭಿಕ್ಖುಸಹಸ್ಸಾನಿ, ಅಹೂ ಭಿಕ್ಖುನಿಯೋ ತಹಿಂ;
ಖಿಣಾಸವಾ ಭಿಕ್ಖುನಿಯೋ, ಸಹಸ್ಸಂ ಆಸು ತಾಸು ತು.
ಲೋಕವಿವರಣಂ ನಾಮ, ಪಾಟಿಹೀರಂ ಅಕಂಸು ತೇ;
ಖೀಣಾಸವಾ ಪಸಾದತ್ಥಂ, ಧಮ್ಮಾಸೋಕಸ್ಸ ರಾಜಿನೋ.
ಚಣ್ಡಾಸೋಕೋತಿ ಞಾಯಿತ್ಥ, ಪುಬ್ಬೇ ಪಾಪೇನ ಕಮ್ಮುನಾ;
ಧಮ್ಮಾಸೋಕೋತಿ ಞಾಯಿತ್ಥ, ಪಚ್ಛಾ ಪುಞ್ಞೇನ ಕಮ್ಮುನಾ.
ಸಮುದ್ದಪರಿಯನ್ತಂ ಸೋ, ಜಮ್ಬುದೀಪಂ ಸಮನ್ತತೋ;
ಪಸ್ಸಿ ಸಬ್ಬೇ ವಿಹಾರೇ ಚ, ನಾನಾಪೂಜಾ ವಿಭೂಸಿತೇ.
ಅತೀವ ತುಟ್ಠೋ ತೇ ದಿಸ್ವಾ, ಸಙ್ಘಂ ಪುಚ್ಛಿ ನಿಸೀದಿಯ;
ಕಸ್ಸ ಭನ್ತೇ ಪರಿಚ್ಚಾಗೋ, ಮಹಾಸುಗತ ಸಾಸನೇ.
ಥೇರೋ ಸೋ ಮೋಗ್ಗಲಿಪುತ್ತೋ, ರಞ್ಞೋ ಪಞ್ಹಂ ವಿಯಾಕರಿ;
ಧರಮಾನೇ’ಪಿ ಸುಗತೇ, ನತ್ಥಿ ಚಾಗೀ ತಯಾಸಮೋ.
ತಂ ಸುತ್ವಾ ವಚನಂ ಭಿಯ್ಯೋ, ತುಟ್ಠೋ ರಾಜಾ ಅಪುಚ್ಛಿ ತಂ;
ಬುದ್ಧಸಾಸನ ದಾಯಾದೋ, ಹೋತಿ ಖೋ ಮಾದಿಸೋ ಇತಿ.
ಥೇರೋ ¶ ತು ರಾಜಪುತ್ತಸ್ಸ, ಮಹಿನ್ದಸ್ಸೂ’ಪನಿಸ್ಸಯಂ;
ತಥೇವ ರಾಜಧೀತಾಯ, ಸಙ್ಘಮಿತ್ತಾಯ ಪೇಕ್ಖಿಯ.
ಸಾಸನಸ್ಸಾ’ಭಿ ವುದ್ಧಿಞ್ಚ, ತಂ ಹೇತುಕಮ ವೇಕ್ಖಿಯ;
ಪಚ್ಚಾಭಾಸಥ ರಾಜಾನಂ, ಸೋ ಸಾಸನಧುರನ್ಧರೋ.
ತಾದಿಸೋ’ಪಿ ಮಹಾಚಾಗೀ, ದಾಯಾದೋ ಸಾಸನಸ್ಸ ನ;
ಪಚ್ಚಯದಾಯಕೋ’ಚ್ಚೇವ, ವುಚ್ಚತೇ ಮನುಜಾಧೀಪ.
ಯೋ ತು ಪುತ್ತಂ ಧೀತರಂ ವಾ,
ಪಬ್ಬಜ್ಜಾಪೇತಿ ಸಾಸನೇ;
ಸೋ ಸಾಸನಸ್ಸ ದಾಯಾದೋ,
ಹೋತಿ ನೋ ದಾಯಕೋ ಅಪಿ.
ಅಥ ಸಾಸನ ದಾಯಾದ-ಭಾವಮಿಚ್ಛಂ ಮಹೀಪತಿ;
ಮಹಿನ್ದಂ ಸಙ್ಘಮಿತ್ತಞ್ಚ, ಠಿತೇ ತತ್ರ ಅಪುಚ್ಛಥ.
ಪಬ್ಬಜಿಸ್ಸಥ ಕಿಂ ತಾತಾ, ಪಬ್ಬಜ್ಜಾ ಮಹತೀ ಮತಾ;
ಪಿತುನೋ ವಚನಂ ಸುತ್ವಾ, ಪಿತರಂ ತೇ ಅಭಾಸಿಸುಂ.
ಅಜ್ಜೇವ ಪಬ್ಬಜಿಸ್ಸಾಮ, ಸಚೇ ತ್ವಂ ದೇವ ಇಚ್ಛಸಿ;
ಅಮ್ಹಞ್ಚ ಲಾಭೋ ತುಮ್ಹಞ್ಚ, ಪಬ್ಬಜ್ಜಾಯ ಭವಿಸ್ಸತಿ.
ಉಪರಾಜಸ್ಸ ಪಬ್ಬಜ್ಜ-ಕಾಲಭೋ ಪಭುತೀಹಿ ಸೋ;
ಸಾ ಚಾಪಿ ಅಗ್ಗಿಬ್ರಹ್ಮಸ್ಸ, ಪಬ್ಬಜ್ಜಾ ಕತನಿಚ್ಛಯಾ.
ಉಪರಜ್ಜಂ ಮಹೀನ್ದಸ್ಸ, ದಾತುಕಾಮೋ’ಪಿ ಭೂಪತಿ;
ತತೋ’ಪಿ ಅಧಿಕಾಸಾ’ತಿ, ಪಬ್ಬಜ್ಜಂಯೇವ ರೋಚಯಿ.
ಪಿಯಂ ಪುತ್ತಂ ಮಹಿನ್ದಞ್ಚ, ಬುದ್ಧಿರೂಪಬಲೋದಿತಂ;
ಪಬ್ಬಜ್ಜಾ ಪೇಸಿ ಸಮಹಂ, ಸಙ್ಘ ಮಿತ್ತಞ್ಚ ಧೀತರಂ.
ತದಾ ವೀಸತಿವಸ್ಸೋ ಸೋ, ಮಹಿನ್ದೋ ರಾಜನನ್ದನೋ;
ಸಙ್ಘಮಿತ್ತಾ ರಾಜಧೀತಾ, ಅಟ್ಠಾರಸಸಮಾ ತದಾ.
ತದಹೇವ ಅಹು ತಸ್ಸ, ಪಬ್ಬಜ್ಜಾ ಉಪಸಮ್ಪದಾ;
ಪಬ್ಬಜ್ಜಾ ಸಿಕ್ಖಾದಾನಞ್ಚ, ತಸ್ಸಾ ಚ ತದಹು ಅಹು.
ಉಪಜ್ಝಾಯೋ ಕುಮಾರಸ್ಸ, ಅಹು ಮೋಗ್ಗಲಿಸವ್ಹಯೋ;
ಪಬ್ಬಾಜೇಸಿ ಮಹಾದೇವ-ತ್ಥೇರೋ ಮಜ್ಝನ್ತಿಕೋ ಪನ.
ಕಮ್ಮವಾಚಂ ಅಕಾ ತಸ್ಮಿಂ, ಸೋ’ಪಸಮ್ಪದಮಣ್ಡಲೇ;
ಅರಹತ್ತಂ ಮಹಿನ್ದೋ ಸೋ, ಪತ್ತೋ ಸಪಟಿಸಮ್ಭಿದಂ.
ಸಙ್ಘಮಿತ್ತಾ’ಹು’ಪಜ್ಝಾಯಾ ¶ , ಧಮ್ಮಪಾಲಾತಿ ವಿಸ್ಸುತಾ;
ಆಚರಿಯಾ ಆಯುಪಾಲಿ, ಕಾಲೇ ಸಾ’ಸಿ ಅನಾಸವಾ.
ಉಭೋ ಸಾಸನಪಜ್ಜೋತಾ, ಲಂಕಾದೀಪೋಪಕಾರಿನೋ;
ಛಟ್ಠೇ ವಸ್ಸೇ ಪಬ್ಬಜಿಂಸು, ಧಮ್ಮಾಸೋಕಸ್ಸ ರಾಜಿನೋ.
ಮಹಾಮಹಿನ್ದೋ ವಸ್ಸೇಹಿ, ತೀಹಿ ದೀಪಪ್ಪಸಾದಕೋ;
ಪಿಟಕತ್ತಯಂ ಮುಗ್ಗಣ್ಹಿ, ಉಪಜ್ಝಾಯಸ್ಸ ಸನ್ತಿಕೇ.
ಸಾ ಭಿಕ್ಖುನೀ ಚನ್ದಲೇಖಾ, ಮಹಿನ್ದೋ ಭಿಕ್ಖೂ ಸೂರಿಯೋ;
ಸಮ್ಬುದ್ಧ ಸಾಸನಾಕಾಸಂ, ತೇ ಸದಾ ಸೋಭಯುಂ ತದಾ.
ವನೇ ಪಾಟಲಿಪುತ್ತಮ್ಹಾ, ವನೇ ವನಚರೋ ಚರಂ;
ಕುನ್ತಕಿನ್ನರಿಯಾ ಸದ್ಧಿಂ, ಸಂವಾಸಂ ಕಪ್ಪಯೀ ಕಿರ.
ತೇನ ಸಂವಾಸಮನ್ವಾಯ,
ಸಾ ಪುತ್ತೇ ಜನಯೀ ದುವೇ;
ತಿಸ್ಸೋ ಜೇಟ್ಠೋ ಕಣಿಟ್ಠೋ ತು,
ಸುಮಿತ್ತೋ ನಾಮ ನಾಮತೋ.
ಮಹಾವರುಣತ್ಥೇರಸ್ಸ, ಕಾಲೇ ಪಬ್ಬಜ್ಜ ಸನ್ತಿಕೇ;
ಅರಹತ್ತಂ ಪಾಪುಣಿಂಸು, ಛಳಭಿಞ್ಞಂ ಗುಣಂ ಉಭೋ.
ಪಾದೇ ಕೀಟವಿಸೇನಾ’ಸಿ, ಫುಟ್ಠೋ ಜೇಟ್ಠೋ ಸವೇದನೋ;
ಆಹ ಪುಟ್ಠೋ ಕಣಿಟ್ಠೇನ, ಭೇಸಜ್ಜಂ ಪಸತಂ ಘಟಂ.
ರಞ್ಞೋ ನಿವೇದನಂ ಥೇರೋ, ಗಿಲಾನವತ್ತತೋ’ಪಿ ಸೋ;
ಸಪ್ಪಿಸತ್ಥಞ್ಚ ಚರಣಂ, ಪಚ್ಛಾಭತ್ತಂ ಪಟಿಕ್ಖಿಪಿ.
ಪಿಣ್ಡಾಯ ಚೇ ಚರಂ ಸಪ್ಪಿಂ, ಲಭಸೇ ತ್ವಂ ತಮಾಹರ;
ಇಚ್ಛಾಹ ತಿಸ್ಸಥೇರೋ ಸೋ, ಸುಮಿತ್ತಂ ಥೇರಮುತ್ತಮಂ.
ಪಿಣ್ಡಾಯ ಚರತಾ ತೇನ, ನ ಲದ್ಧಂ ಪಸತಂ ಘತಂ;
ಸಪ್ಪಿಕುಮ್ಭಸತೇನಾಪಿ, ಬ್ಯಾಧಿಜಾತೋ ಅಸಾಧಿಯೋ.
ತೇನೇವ ಬ್ಯಾಧಿನಾ ಥೇರೋ, ಪತ್ತೋ ಆಯುಕ್ಖಯನ್ತಿಕಂ;
ಓವದಿತ್ವಾಪ್ಪಮಾದೇನ, ನಿಬ್ಬಾತುಂ ಮಾನಸಂ ಅಕಾ.
ಆಕಾಸಮ್ಹಿ ನಿಸೀದಿತ್ವಾ, ತೇಜೋಧಾತುವಸೇನ ಸೋ;
ಯಥಾರುಚಿ ಅಧಿಟ್ಠಾಯ, ಸರೀರಂ ಪರಿನಿಬ್ಬುತೋ.
ಜಾಲಾಸರೀರಾ ನಿಕ್ಖಮ್ಮ, ನಿಮ್ಮಂಸಛಾರಿಕಂ ಡಹಿ;
ಥೇರಸ್ಸ ಸಕಲಂ ಕಾಯಂ, ಅಟ್ಠಿಕಾನಿತುನೋ ಡಹಿ.
ಸುತ್ವಾ ¶ ನಿಬ್ಬೂತಿಮೇತಸ್ಸ, ತಿಸ್ಸಥೇರಸ್ಸ ಭೂಪತಿ;
ಅಗಮಾಸಿ ಸಕಾರಾಮಂ, ಜನೋಘ ಪರಿವಾರಿತೋ.
ಹತ್ತಿಕ್ಖನ್ಧಗತೋ ರಾಜಾ, ತಾನಟ್ಠಿನ’ವರೋಪಿಯ;
ಕಾರೇತ್ವಾ ಧಾತುಸಕ್ಕಾರಂ, ಸಙ್ಘಂ ಬ್ಯಾಧಿಮಪುಚ್ಛಿತಂ.
ತಂ ಸುತ್ವಾ ಜಾತಸಂವೇಗೋ, ಪುರದ್ವಾರೇಸು ಕಾರಿಯ;
ಸುಧಾಚಿತಾ ಪೋಕ್ಖರಣೀ, ಭೇಸಜ್ಜಾನಞ್ಚ ಪೂರಿಯ.
ಪಾಪೇಸಿ ಭಿಕ್ಖುಸಙ್ಘಸ್ಸ, ಭೇಸಜ್ಜಾನಿ ದಿನೇ ದಿನೇ;
ಮಾ ಹೋತು ಭಿಕ್ಖುಸಙ್ಘಸ್ಸ, ಭೇಸಜ್ಜಂ ದುಲ್ಲಭಂ ಇತಿ.
ಸುಮಿತ್ತಥೇರೋ ನಿಬ್ಬಾಯಿ, ಚಙ್ಕಮನ್ತೋ’ವ ಚಙ್ಕಮೇ;
ಪಸೀದಿ ಸಾಸನೇ’ತೀವ, ತೇನಾಪಿ ಚ ಮಹಾಜನೋ.
ಕುನ್ತಿಪುತ್ತಾ ದುವೇ ಥೇರಾ,
ತೇ ಲೋಕಹಿತಕಾರಿನೋ;
ನಿಬ್ಬಾಯಿಂಸು ಅಸೋಕಸ್ಸ,
ರಞ್ಞೋ ವಸ್ಸಮ್ಹಿ ಅಟ್ಠಮೇ.
ತತೋ ಪಭುತಿ ಸಙ್ಘಸ್ಸ, ಲಾಭೋ’ತೀವ ಮಹಾ ಅಹು;
ಪಚ್ಛಾ ಪಸನ್ನಾ ಚ ಜನಾ, ಯಸ್ಮಾ ಲಾಭಂ ಪವತ್ತಯುಂ.
ಪಹೀನಲಾಭಸಕ್ಕಾರಾ, ತಿತ್ಥಿಯಾ ಲಾಭಕಾರಣಾ;
ಸಯಂ ಕಾಸಾಯಮಾದಾಯ, ವಸಿಂಸು ಸಹ ಭಿಕ್ಖೂಹಿ.
ಯಥಾಸಕಞ್ಚ ತೇ ವಾದಂ, ಬುದ್ಧವಾದೋ’ತಿ ದೀಪಯುಂ;
ಯಥಾಸಕಞ್ಚ ಕಿರಿಯಾ, ಅಕರಿಂಸು ಯಥಾರುಚಿ.
ತತೋ ಮೋಗ್ಗಲಿಪುತ್ತೋ ಸೋ,
ಥೇರೋ ಥಿರ ಗುಣೋದಯೋ;
ಸಾಸನಬ್ಬುದಮುಪ್ಪನ್ನಂ,
ದಿಸ್ವಾ ತಮತಿಕಕ್ಖಲಂ.
ತಸ್ಸೋ’ಪಸಮನೇ ಕಾಲಂ, ದೀಘದಸ್ಸೀ ಅವೇಕ್ಖಿಯ;
ದತ್ವಾ ಮಹಿನ್ದಥೇರಸ್ಸ, ಮಹಾಭಿಕ್ಖುಗಣಂ ಸಕಂ.
ಉದ್ಧಂ ಗಙ್ಗಾಯ ಏಕೋ’ವ, ಅಹೋಗಙ್ಗಮ್ಹಿ ಪಬ್ಬತೇ;
ವಿಹಾಸಿ ಸತ್ತವಸ್ಸಾನಿ, ವಿವೇಕ ಮನುಬ್ರೂಹಯಂ.
ತಿತ್ಥಿಯಾನಂ ಬಹುಚತ್ತಾ ಚ, ದುಬ್ಬಚ್ಚತ್ತಾ ಚ ಭಿಕ್ಖವೋ;
ತೇಸಂ ಕಾತುಂ ನ ಸಕ್ಖಿಂಸು, ಧಮ್ಮೇನ ಪಟಿಸೇಧನಂ.
ತೇನೇವ ¶ ಜಮ್ಬುದೀಪಮ್ಹಿ, ಸಬ್ಬಾರಾಮೇಸು ಭಿಕ್ಖವೋ;
ಸತ್ತವಸ್ಸಾನಿ ನಾಕಂಸು, ಉಪೋಸಥ ಪವಾರಣಂ.
ತಂ ಸುತ್ವಾ ಮಹಾರಾಜಾ, ಧಮ್ಮಾಸೋಕೋ ಮಹಾಯಸೋ;
ಏಕಂ ಅಮಚ್ಚಂ ಪೇಸೇಸಿ, ಅಸೋಕಾರಾಮ ಮುತ್ತಮಂ.
ಗನ್ತ್ವಾ’ಧಿಕರಣಂ ಏತಂ, ವುಪಸಮ್ಮ ಉಪೋಸಥಂ;
ಕಾರೇಹಿ ಭಿಕ್ಖುಸಙ್ಘೇನ, ಪಮಾ’ರಾಮೇ ತುವಂ ಇತಿ.
ಗನ್ತ್ವಾನ ಸನ್ನಿಪಾತೇತ್ವಾ, ಭಿಕ್ಖುಸಙ್ಘಂ ಸದುಮ್ಮತಿ;
ಉಪೋಸಥಂ ಕರೋಥಾತಿ, ಸಾವೇಸಿ ರಾಜಸಾಸನಂ.
ಉಪೋಸಥಂ ತಿತ್ತಿಯೇಹಿ, ನ ಕರೋಮ ಮಯಂ ಇತಿ;
ಅವೋ ಚ ಭಿಕ್ಖುಸಙ್ಘೋ ತಂ, ಅಮಚ್ಚಂ ಮೂಳ್ಹಮಾನಸಂ.
ಸೋ’ಮಚ್ಚೋ ಕತಿಪಯಾನಂ, ಥೇರಾನಂ ಪಟಿಪಾಟಿಯಾ;
ಅಚ್ಛಿನ್ದಿ ಅಸಿನಾ ಸೀಸಂ, ಕಾರೇಮೀತಿ ಉಪೋಸಥಂ.
ರಾಜಭಾತಾ ತಿಸ್ಸತ್ಥೇರೋ, ತಂ ದಿಸ್ವಾ ಕಿರಿಯಂ ಲಹುಂ;
ಗನ್ತ್ವಾನ ತಸ್ಸ ಆಸನ್ನೇ, ಸಾಸನಮ್ಹಿ ನಿಸಿದಿ ಸೋ.
ಥೇರಂ ದಿಸ್ವಾ ಅಮಚ್ಚೋ ಸೋ, ಗನ್ತ್ವಾ ರಞ್ಞೋ ನಿವೇದಯಿ;
ಸಬ್ಬಂ ಪವತ್ತಿಂ ತಂ ಸುತ್ವಾ, ಜಾತದಾಹೋ ಮಹೀಪತಿ.
ಸೀಘಂ ಗನ್ತ್ವಾ ಭಿಕ್ಖುಸಙ್ಘಂ, ಪುಚ್ಛಿ ಉಬ್ಬಿಗ್ಗಮಾನಸೋ;
ಏವಂ ಕತೇನ ಕಮ್ಮೇನ, ಕಸ್ಸ ಪಾಪಂ ಸಿಯಾ ಇತಿ.
ತೇಸಂ ಅಪಣ್ಡಿತಾ ಕೇಚಿ, ಪಾಪಂ ತುಯ್ಹನ್ತಿ ಕೇಚಿ ತು;
ಉಭಿನ್ನಂಚಾ’ತಿ ಆಹಂಸು, ನತ್ಥಿ ತುಯ್ಹನ್ತಿ ಪಣ್ಡಿತಾ.
ತಂ ಸುತ್ವಾ’ಹ ಮಹಾರಾಜಾ, ಸಮತ್ಥೋ ಅತ್ಥಿ ಭಿಕ್ಖುನ;
ವಿಮತಿಂ ಮೇ ವಿನೋದೇತ್ವಾ, ಕಾತುಂ ಸಾಸನಪಗ್ಗಹಂ.
ಅತ್ಥಿ ಮೋಗ್ಗಲಿಪುತ್ತೋ ಸೋ,
ತಿಸ್ಸತ್ಥೇರೋ ರಥೇಸಭ;
ಇಚ್ಛಾಹ ಸಙ್ಘೋ ರಾಜಾನಂ,
ರಾಜ ತತ್ಥಾ’ಸಿ ಸಾದರೋ.
ವಿಸುಂ ಭಿಕ್ಖುಸಹಸ್ಸೇನ, ಚತುರೋ ಪರಿವಾರಿತೇ;
ಥೇರೋ ನರಸಹಸ್ಸೇನ, ಅಮಚ್ಚೇ ಚತುರೋ ತಥಾ.
ತದಹೇಯೇವ ಪೇಸೇಸಿ, ಅತ್ತನೋ ವಚನೇನ ಸೋ;
ಥೇರಂ ಆನೇತು ಮೇ ತೇಹಿ, ತಥಾ ವುತ್ತೇ ಸನಾಗಮಿ.
ತಂ ¶ ಸುತ್ವಾ ಪುನ ಅಟ್ಠ’ತ್ಥ, ಥೇರೇ’ಮಚ್ಚೇ ಚ ಪೇಸಯಿ;
ವಿಸುಂ ಸಹಸ್ಸಪುರಿಸೇ, ಪುಬ್ಬೇ ವಿಯ ಸನಾಗಮಿ.
ರಾಜಾ ಪುಚ್ಛಿ ಕಥಂ ಥೇರೋ, ಆಗಚ್ಛೇಯ್ಯ ನು ಖೋ ಇತಿ;
ಭಿಕ್ಖೂ ಆಹಂಸು ಥೇರಸ್ಸ, ತಸ್ಸ’ಗಮನಕಾರಣಂ.
ಹೋತಿ ಭನ್ತೇ ಉಪತ್ಥಮ್ಭೋ, ಕಾತುಂ ಸಾಸನಪಗ್ಗಹಂ;
ಇತಿ ವುತ್ತೇ ಮಹಾರಾಜ, ಥೇರೋ ಏಸ್ಸತಿ ಸೋ ಇತಿ.
ಪುನಾಪಿ ಥೇರೋ’ಮಚ್ಚೇ ಚ, ರಾಜಾ ಸೋಳಸ ಸೋಳಸ;
ವಿಸುಂ ಸಹಸ್ಸ ಪುರಿಸೇ, ತಥಾ ವತ್ವಾನ ಪೇಸಯಿ.
ಥೇರೋ ಮಹಲ್ಲತ್ತೇ’ಪಿ, ನಾರೋಹಿಸ್ಸತಿ ಯಾನಕಂ;
ಥೇರಂ ಗಙ್ಗಾಯ ನಾವಾಯ, ಆನೇಥಾ’ತಿ ಚ ಅಬ್ರವಿ.
ಗನ್ತ್ವಾ ತೇ ತಂ ತಥಾ’ವೋಚುಂ,
ಸೋ ತಂ ಸುತ್ವಾ’ವ ಉಟ್ಠಹಿ;
ನಾವಾಯ ಥೇರಂ ಆನೇಸುಂ,
ರಾಜಾ ಪಚ್ಚುಗ್ಗಮೀ ತಹಿಂ.
ಜಾಣುಮತ್ತಂ ಜಲಂ ರಾಜೋ’ಗಹೇತ್ವಾ ದಕ್ಖಿಣಂ ಕರಂ;
ನಾವಾಯ ಓತರನ್ತಸ್ಸ, ಥೇರಸ್ಸಾ’ದಾಸಿ ಗಾರವೋ.
ದಕ್ಖಿಣಂ ದಕ್ಖಿಣೇಯ್ಯೋ ಸೋ, ಕರಂ ರಞ್ಞೋ’ನುಕಮ್ಪಕೋ;
ಆಲಮ್ಬಿತ್ವಾ’ನುಕಮ್ಪಾಯ, ಥೇರೋ ನಾವಾಯ ಓತರಿ.
ರಾಜಾ ಥೇರಂ ನಯಿತ್ವಾನ, ಉಯ್ಯಾನಂ ರತಿವಡ್ಢನಂ;
ಥೇರಸ್ಸ ಪಾದೇ ಧೋವಿತ್ವಾ, ಮಕ್ಖೇತ್ವಾ ಚ ನಿಸೀದಿಯ.
ಸಮತ್ಥಭಾವಂ ಥೇರಸ್ಸ, ವೀಮಂಸನ್ತೋ ಮಹೀಪತಿ;
ದಟ್ಠುಕಾಮೋ ಅಹಂ ಭನ್ತೇ, ಪಾಟಿಹೀರನ್ತಿ ಅಬ್ರವಿ.
ಕನ್ತಿ ವುತ್ತೇ ಮಹೀಕಮ್ಪಂ, ಆಹ ತಂ ಪುನ ರಾಹಸೋ;
ಸಕಲಾಯೇ’ಕ ದೇಸಾಯ, ಕತರಂ ದಟ್ಠುಮಿಚ್ಛಸಿ.
ಕೋ ದುಕ್ಕರೋತಿ ಪುಚ್ಛಿತ್ವಾ, ಏಕ ದೇಸಾಯ ಕಮ್ಪನಂ;
ದುಕ್ಕರನ್ತಿ ಸುಣಿತ್ವಾನ, ತಂ ದುಟ್ಠುಕಾಮತಂ ಬ್ರವೀ.
ರಥಂ ಅಸ್ಸಂ ಮನುಸ್ಸಞ್ಚ, ಪಾತಿಞ್ಚೋದಕ ಪೂರಿತಂ;
ಥೇರೋ ಯೋಜನ ಸೀಮಾಯ, ಅನ್ತರಮ್ಹಿ ಚತುದ್ದಿಸೇ.
ಠಪಾಪೇತ್ವಾ ¶ ತದಡ್ಢೇಹಿ, ಸಹ ತಂ ಯೋಜನಂ ಮಹಿಂ;
ಚಾಲೇಸಿ ಇದ್ಧಿಯಾ ತತ್ರ, ನಿಸಿನ್ನಸ್ಸ ಚ ದಸ್ಸಯಿ.
ತೇನಾ’ಮಚ್ಚೇನ ಭಿಕ್ಖೂನಂ, ಮರಣೇನ’ತ್ತನೋಪಿ ಚ;
ಪಾಪಸ್ಸ’ತ್ಥಿತ್ತ ನತ್ಥಿತ್ತಂ, ಥೇರಂ ಪುಚ್ಛಿ ಮಹೀಪತಿ.
ಪಟಿಚ್ಚ ಕಮ್ಮಂ ನತ್ಥೀತಿ, ಕಿಲಿಟ್ಠಂ ಚೇತನಂ ವಿನಾ;
ಥೇರೋ ಬೋಧೇಸಿ ರಾಜಾನಂ, ವತ್ವಾ ತಿತ್ತಿರಜಾತಕಂ.
ವಸನ್ತೋ ತತ್ಥ ಸತ್ತಾಹಂ, ರಾಜುಯ್ಯಾನೇ ಮನೋರಮೇ;
ಸಿಕ್ಖಾಪೇಸಿ ಮಹೀಪಾಲಂ, ಸಮ್ಬುದ್ಧಸಮಯಂ ಸುಭಂ.
ತಸ್ಮಿಂಯೇವ ಚ ಸತ್ತಾ ಹೇ, ದುವೇ ಯಕ್ಖೇ ಮಹೀಪತಿ;
ಪೇಸೇತ್ವಾ ಮಹಿಯಂ ಭಿಕ್ಖೂ, ಅಸೇಸೇ ಸನ್ನಿಪಾತಯಿ.
ಸತ್ತಮೇ ದಿವಸೇ ಗನ್ತ್ವಾ, ಸಕಾರಾಮಂ ಮನೋರಮಂ;
ಕಾರೇಸಿ ಭಿಕ್ಖುಸಙ್ಘಸ್ಸ, ಸನ್ನಿಪಾತಮಸೇಸತೋ.
ಥೇರೇನ ಸಹ ಏಕನ್ತೇ, ನಿಸಿನ್ನೋ ಸಾಣಿಅನ್ತರೇ;
ಏಕೇಕಲದ್ಧಿಕೇ ಭಿಕ್ಖು, ಪಕ್ಕೋಸಿತ್ವಾನ ಸನ್ತಿಕಂ.
ಕಿಂವಾದೀ ಸುಗತೋ ಭನ್ತೇ, ಇತಿ ಪುಚ್ಛಿ ಮಹೀಪತಿ;
ತೇ ಸಸ್ಸತಾದಿಕಂ ದಿಟ್ಠಿಂ, ಬ್ಯಾಕರಿಂಸು ಯಥಾಸಕಂ.
ತೇ ಮಿಚ್ಛಾದಿಟ್ಠಿಕೇ ಸಬ್ಬೇ, ರಾಜಾ ಉಪ್ಪಬ್ಬಾಜಾಪಯೀ;
ಸಬ್ಬೇ ಸಟ್ಠಿಸಹಸ್ಸಾನಿ, ಆಸುಂ ಉಪ್ಪಬ್ಬಜಾಪಿತಾ.
ಅಪುಚ್ಛಿ ಧಮ್ಮಿಕೇ ಭಿಕ್ಖೂ, ಕಿಂವಾದೀ ಸುಗತೋ ಇತಿ;
ವಿಭಜ್ಜವಾದೀ ತಾಹಂಸು, ತಂ ಥೇರಂ ಪುಚ್ಛಿ ಭೂಪತಿ.
ವಿಭಜ್ಜವಾದೀ ಸಮ್ಬುದ್ಧೋ,
ಹೋತಿ ಭನ್ತೇ’ತಿ ಆಹ ಸೋ;
ಥೇರೋ’ ಆಮಾ’ತಿ ತಂ ಸುತ್ವಾ,
ರಾಜಾ ತುಟ್ಠಮನೋ ತದಾ.
ಸಙ್ಘೋ ಪಿಸೋಧಿತೋ ಯಸ್ಮಾ,
ತಸ್ಮಾ ಸಙ್ಘೋ ಉಪೋಸಥಂ;
ಕರೋತು ಭನ್ತೇ ಇಚ್ಚೇವಂ,
ವತ್ವಾ ಥೇರಸ್ಸ ಭೂಪತಿ.
ಸಙ್ಘಸ್ಸ ರಕ್ಖಂ ದತ್ವಾನ, ನಗರಂ ಪಾವಿಸೀ ಸುಭಂ;
ಸಙ್ಘೋ ಸಮಗ್ಗೋ ಹುತ್ವಾನ, ತದಾ’ಕಾಸಿ ಉಪೋಸಥಂ.
ಥೇರೋ ¶ ಅನೇಕ ಸಙ್ಖಮ್ಹಾ, ಭಿಕ್ಖುಸಙ್ಘಾ ವಿಸಾರದೇ;
ಛಳಭಿಞ್ಞೇ ತೇಪಿಟಕೇ, ಪಭಿನ್ನಪಟಿಸಮ್ಭಿದೇ.
ಭಿಕ್ಖುಸಹಸ್ಸಂ ಉಚ್ಚಿನಿ, ಕಾತುಂ ಸದ್ಧಮ್ಮಂ ಸಙ್ಗಹಂ;
ತೇಹಿ ಅಸೋಕಾರಾಮಮ್ಹಿ, ಅಕಾ ಸದ್ಧಮ್ಮ ಸಙ್ಗಹಂ.
ಮಹಾಕಸ್ಸಪತ್ಥೇರೋ ಚ, ಯಸತ್ಥೇರೋ ಚ ಕಾರಯುಂ;
ಯಥಾ ತೇ ಧಮ್ಮ ಸಂಗೀತಿಂ, ತಿಸ್ಸತ್ಥೇರೋಪಿ ತಂ ತಥಾ.
ತಥಾವತ್ಥುಪ್ಪಕರಣಂ, ಪರವಾದಪ್ಪಮದ್ದನಂ;
ಅಭಾಸಿ ತಿಸ್ಸತ್ಥೇರೋ ಚ, ತಸ್ಮಿಂ ಸಂಗೀತಿ ಮಣ್ಡಲೇ.
ಏವಂ ಭಿಕ್ಖುಸಹಸ್ಸೇನ, ರಕ್ಖಾಯ’ಸೋಕ ರಾಜಿನೋ;
ಅಯಂ ನವಹಿ ಮಾಸೇಹಿ, ಧಮ್ಮ ಸಂಗೀತಿ ನಿಟ್ಠಿತಾ.
ರಞ್ಞೋ ಸತ್ತರಸೇ ವಸ್ಸೇ, ದ್ವಾಸತ್ತತಿಸಮೋ ಇಸಿ;
ಮಹಾಪವಾರಣಾಯ’ಸೋ, ಸಂಗೀತಿ ತಂ ಸಮಾಪಯಿ.
ಸಾಧುಕಾರಂ ದದನ್ತೀವ, ಸಾಸನಟ್ಠಿತಿ ಕಾರಣಂ;
ಸಂಗೀತಿ ಪರಿಯೋಸಾನೇ, ಅಕಮ್ಮಿತ್ಥ ಮಹಾಮಹೀ.
ಹಿತ್ವಾ ಸೇಟ್ಠಂ ಬ್ರಹ್ಮವಿಮಾನಮ್ಪಿ ಮನುಞ್ಞಂ;
ಜೇಗುಚ್ಛಂ ಸೋ ಸಾಸನಹೇತುನರಲೋಕಂ;
ಆಗಮ್ಮಾ’ಕಾ ಸಾಸನಕಿಚ್ಚಂ ಕತಕಿಚ್ಚೋ;
ಕೋನಾಮ’ಞ್ಞೋ ಸಾಸನಕಿಚ್ಚಮ್ಹಿ ಪಮಜ್ಜೇತಿ.
ಸುಜನಪ್ಪಸಾದಸಂವೇಗತ್ಥಾಯ ಕತೇ ಮಹಾವಂಸೇ
ತತಿಯಧಮ್ಮಸಂಗೀತಿ ನಾಮ
ಪಞ್ಚಮೋ ಪರಿಚ್ಛೇದೋ.
ಛಟ್ಠಪರಿಚ್ಛೇದ
ವಿಜಯಾಗಮನಂ
ವಙ್ಗೇಸು ¶ ವಙ್ಗನಗರೇ, ವಙ್ಗರಾಜಾ ಅಹು ಪುರೇ;
ಕಾಲಿಙ್ಗರಞ್ಞೋ ಧೀತಾ’ಸಿ, ಮಹೇಸೀ ತಸ್ಸ ರಾಜಿನೋ.
ಸೋ ರಾಜಾ ದೇವಿಯಾ ತಸ್ಸಾ, ಏಕಂ ಅಲಭಿ ಧೀತರಂ;
ನೇಮಿತ್ತಾಬ್ಯಾಕರುಂ ತಸ್ಸಾ, ಸಂವಾಸಂ ಮಗರಾಜಿನಾ.
ಅತೀವ ರೂಪಿನಿಂ ಆಸಿ, ಅತೀವ ಕಾಮಗಿದ್ಧಿನೀ;
ದೇವೇನ ದೇವಿಯಾ’ಚಾಪಿ, ಲಜ್ಜಾಯಾ’ಸಿ ಜಗುಚ್ಛಿತಾ.
ಏಕಾಕಿನೀ ಸಾ ನಿಕ್ಖಮ್ಮ, ಸೇರೀಚಾರಸುಖತ್ಥಿನೀ;
ಸತ್ಥೇನ ಸಹ ಅಞ್ಞಾತಾ, ಅಗಾ ಮಗಧಗಾಮಿನಾ.
ಲಾಳರಟ್ಠೇ ಅಟವಿಯಾ, ಸೀಹೋ ಸತ್ಥಮಭಿದ್ಧವಿ;
ಅಞ್ಞತ್ಥ ಸೇಸಾ ಧಾವಿಂಸು, ಸೀಹಗತದಿಸನ್ತುಸಾ.
ಗಣ್ಹಿತ್ವಾ ಗೋಚರಂ ಸೀಹೋ, ಗಚ್ಛಂ ದಿಸ್ವಾ ತಮಾ’ರತೋ;
ರತ್ತೋ ಉಪಾಗಲಾಲೇನ್ತೋ, ಲಙ್ಗುಲಂ ಪತ್ತಕಣ್ಣಕೋ.
ಸಾ ತಂ ದಿಸ್ವಾ ಸರಿತ್ವಾನ, ನೇಮಿತ್ತವಚನಂ ಸುತಂ;
ಅಭೀತಾ ತಸ್ಸ ಅಙ್ಗಾನಿ, ರಞ್ಜಯನ್ತಿ ಪರಾಮಸಿ.
ತಸ್ಸಾ ಫಸ್ಸೇನಾ’ತಿ ರತ್ತೋ, ಪಿಟ್ಠಿಂ ಆರೋಪಿಯಾ’ಸುತಂ;
ಸೀಹೋ ಸಕಂ ಗುಹಂ ನೇತ್ವಾ, ತಾಯ ಸಂವಾಸಮಾಚರಿ.
ತೇನ ಸಂವಾಸಮನ್ವಾಯ, ಕಾಲೇನ ಯಮಕೇ ದುವೇ;
ಪುತ್ತಞ್ಚ ಧೀತರಞ್ಚಾತಿ, ರಾಜಧೀತಾ ಜನೇಸಿ ಸಾ.
ಪುತ್ತಸ್ಸ ಹತ್ಥಪಾದಾ’ಸುಂ, ಸೀಹಾಕಾರಾ ತತೋ ಅಕಾ;
ನಾಮೇನ ಸೀಹಬಾಹುಂ ತಂ, ಧೀತರಂ ಸೀಹಸೀವಲಿಂ.
ಪುತ್ತೋ ಸೋಳಸವಸ್ಸೋ ಸೋ, ಮಾತರಂ ಪುಚ್ಛಿ ಸಂಸಯಂ;
ತುವಂ ಪಿತಾ ಚ ನೋ ಅಮ್ಮ, ಕಸ್ಮಾ ವಿಸದಿಸಾ ಇತಿ.
ಸಾ ಸಬ್ಬಮಬ್ರವೀ ತಸ್ಸ, ಕಿಂನಯಾಮಾ’ತಿ ಸೋ’ಬ್ರವಿ;
ಗುಹಂ ಥಕೇತಿತಾತೋ ತೇ, ಪಾಸಾಣೇನಾತಿ ಸಾ’ಬ್ರವಿ.
ಮಹಾಗುಹಾಯ ¶ ಥಕನಂ, ಖನ್ಧೇನಾ’ದಾಯ ಸೋ ಅಕಾ;
ಏಕಾಹೇನೇ’ವ ಪಞ್ಞಾಸ-ಯೋಜನಾನಿ ಗತಾಗತಂ.
ಗೋಚರಾಯ ಗಹೇ ಸೀಹೇ, ದಕ್ಖಿಣಸ್ಮಿಞ್ಹಿ ಮಾತರಂ;
ವಾಮೇ ಕಣಿಟ್ಠಿಂ ಕತ್ವಾನ, ತಯೋ ಸೀಘಂ ಅಪಕ್ಕಮೀ.
ನಿವಾಸೇತ್ವಾನ ಸಾಖಂ ತೇ, ಪಚ್ಚನ್ತಂ ಗಾಮಮಾಗಮುಂ;
ತತ್ಥಾಸಿ ರಾಜಿಧೀತಾಯ, ಮಾತುಲಸ್ಸ ಸುತೋ ತದಾ.
ಸೇನಾಪತಿ ವಙ್ಗರಞ್ಞೋ, ಠಿತೋ ಪಚ್ಚನ್ತ ಗಾಮಕೋ;
ನಿಸಿನ್ನೋವಟಮೂಲಲೇಸೋ, ಕಮ್ಮನ್ತಂ ಸಂವಿಧಾಯಕಂ.
ದಿಸ್ವಾ ತೇ ಪುಚ್ಛಿತೇ’ವೋಚುಂ, ಅಟವೀ ವಾಸಿನೋ ಮಯಂ;
ಇತಿ ಸೋ ದಾಪಯೀ ತೇಸಂ, ವತ್ಥಾನಿ ಧಜಿನೀ ಪತಿ.
ತಾನಾ’ಹೇಸುಂ ಉಳಾರಾನಿ, ಭತ್ತಂ ಪಣ್ಣೇಸು ದಾಪಯಿ;
ಸೋವಣ್ಣಭಾಜನನಾ’ಸುಂ, ತೇಸಂ ಪುಞ್ಞೇನ ತಾನಿ ಚ.
ತೇನ ಸೋ ವಿಮ್ಹಿತೋ ಪುಚ್ಛಿ, ಕೇ ತುಮ್ಹೇತಿ ಚಮೂಪತಿ;
ತಸ್ಸ ಸಾ ಜಾತಿಗೋತ್ತಾನಿ, ರಾಜಧೀತಾ ನಿವೇದಯಿ.
ಪಿತುಚ್ಛಾ ಧೀತರಂ ತಂ ಸೋ, ಆದಾಯ ಧಜಿನೀ ಪತಿ;
ಗನ್ತ್ವಾನ ವಙ್ಗನಗರಂ, ಸಂವಾಸಂ ತಾಯ ಕಪ್ಪಯಿ.
ಸೀಹೋ ಸೀಘಂ ಗುಹಂ ಗನ್ತ್ವಾ, ತೇ ಅದಿಸ್ವಾ ತಯೋ ಜನೇ;
ಅಟ್ಟಿತೋ ಪುತ್ತಸೋಕೇನ, ನ ಚ ಖಾದಿ ನ ಚಾ’ಪಿವಿ.
ದಾರಕೇ ತೇ ಗವೇಸನ್ತೋ, ಅಗಾ ಪಚ್ಚನ್ತಗಾಮಕೇ;
ಉಬ್ಬಾಸೀಯತಿ ಸೋ ಸೋ’ವ, ಯಂಯಂ ಗಾಮಮುಪೇತಿ ಸೋ.
ಪಚ್ಚನ್ತವಾಸಿನೋ ಗನ್ತ್ವಾ, ರಞ್ಞೋ ತಂ ಪಟಿವೇದಯುಂ;
ಸೀಹೋ ಪಿಳೇತಿ ತೇ ರಟ್ಠಂ, ತಂ ದೇವ ಪಟಿಸೇಧಯ.
ಅಲಕಂ ನಿಸೇಧಕಂ ತಸ್ಸ, ಹತ್ಥಿಕ್ಖನ್ಧಗತಂ ಪುರೇ;
ಆದೇತು ಸೀಹದಾಯೀತಿ, ಸಹಸ್ಸಂ ಸೋ ಪಚಾರಯಿ.
ತಥೇವ ದ್ವೇಸಹಸ್ಸಾನಿ, ತೀಣಿಚಾ’ಪಿ ನರಿಸ್ಸರೋ;
ದ್ವೀಸು ವಾರೇಸು ವಾರೇಸಿ, ಮಾತಾ ಸೀಹಭುಜಂ ಹಿತಂ.
ಅಗ್ಗಹಿ ತತಿಯೇ ವಾರೇ, ಸೀಹಬಾಹು ಅಪುಚ್ಛಿಯ;
ಮಾತರಂ ತಿಸಹಸ್ಸಂ ತಂ, ಘಾತೇತುಂ ಪಿತರಂ ಸಕಂ.
ರಞ್ಞೋ ಕುಮಾರಂ ದಸ್ಸೇಸುಂ, ತಂ ರಾಜಾ ಇಧ ಮಬ್ರವಿ;
ಗಹಿತೋ ಯದಿ ಸೀಹೋ ತೇ, ದಮ್ಮಿ ರಟ್ಠಂ ತದೇವ ತೇ.
ಸೋ ¶ ತಂ ಗನ್ತ್ವಾ ಗುಹಾದ್ವಾರಂ, ಸೀಹಂ ದಿಸ್ವಾವ ಆರಕಾ;
ಏನ್ತಂ ಪುತ್ತಸಿನೇಹೇನ, ವಿಜ್ಝಿತುಂ ತಂ ಸರಂ ಖಿಪಿ.
ಸರೋ ನಳಾತಮಾಹಚ್ಚ, ಮೇತ್ತಚಿತ್ತೇನ ಥಸ್ಸ ತು;
ಕುಮಾರಪಾದಮೂಲೇ’ವ, ನಿವತ್ತೋ ಪತಿ ಭೂಮಿಯಂ.
ತಥಾ’ಸಿ ಯಾವ ತತಿಯಂ, ತತೋ ಕುಜ್ಝಿಮಿಗಾಮಿಪೋ;
ತತೋ ಖಿತ್ತೋ ಸರೋತಸ್ಸ, ಕಾಯಂ ನಿಬ್ಬಿಜ್ಜ ನಿಕ್ಖಮಿ.
ಸಕೇಸರಂ ಸೀಹಸೀಸಂ, ಆದಾಯ ಸಪುರಂ ಅಗಾ;
ಮತಸ್ಸ ವಙ್ಗರಾಜಸ್ಸ, ಸತ್ತಾಹಾನಿ ತದಾ ಅಹು.
ರಞ್ಞೋ ಅಪುತ್ತಕತ್ತಾ ಚ, ಪತೀತಾ ಚಸ್ಸ ಕಮ್ಮುನಾ;
ಸುತ್ವಾ ಚ ರಞ್ಞೋ ನತ್ತುತ್ತಂ, ಸಞ್ಜಾನಿತ್ವಾ ಚ ಮಾತರಂ.
ಅಮಚ್ಚಾ ಸನ್ನಿಪತಿತಾ, ಅಖಿಲಾ ಏಕಮಾನಸಾ;
ಸೀಹಬಾಹು ಕುಮಾರಸ್ಸ, ರಾಜಾ ಹೋಹೀತಿ ಅಬ್ರವುಂ.
ಸೋ ರಜ್ಜಂ ಸಮ್ಪಟಿಚ್ಛಿತ್ವಾ, ದತ್ವಾ ಮಾತು ಪತಿಸ್ಸ ತಂ;
ಸೀಹಸೀವಲಿಮಾದಾಯ, ಜಾತಭೂಮಿಂ ಗತೋ ಸಯಂ.
ನಗರಂ ತತ್ಥ ಮಾಪೇಸಿ, ಅಹು ಸೀಹಪುರನ್ತಿ ತಂ;
ಅರಞ್ಞೇ ಯೋಜನಸತೇ, ಗಾಮೇ ಚಾಪಿ ನಿವೇಸಯಿ.
ಲಾಳರಟ್ಠೇ ಪುರೇ ತಸ್ಮಿಂ, ಸೀಹಬಾಹುನರಾಧಿಪೋ;
ರಜ್ಜಂ ಕಾರೇಸಿ ಕತ್ವಾನ, ಮಹೇಸಿಂ ಸೀಹಸೀವಲಿಂ.
ಮಹೇಸೀ ಸೋಳಸಕ್ಖತ್ತುಂ, ಯಮಕೇ ಚ ದುವೇ ದುವೇ;
ಪುತ್ತೇ ಜನಯಿ ಕಾಲೇಸಾ, ವಿಜಯೋ ನಾಮ ಜೇಟ್ಠಕೋ.
ಸುಮಿತ್ತೋ ನಾಮ ದುತಿಯೋ, ಸಬ್ಬೇ ದ್ವತ್ತಿಂಸ ಪುತ್ತಕಾ;
ಕಾಲೇನ ವಿಜಯಂ ರಾಜಾ, ಉಪರಜ್ಜೇ’ಭಿ ಸೇಚಯಿ.
ವಿಜಯೋ ವಿಸಮಾಚಾರೋ, ಆಸಿ ತಮ್ಪರಿಸಾಪಿ ಚ;
ಸಾಹಸಾನಿ ಅನೇಕಾನಿ, ದುಸ್ಸಹಾನಿ ಕರಿಂಸುತೇ.
ಕುದ್ಧೋ ಮಹಾಜನೋ ರಞ್ಞೋ, ತಮತ್ಥಂ ಪಟಿವೇದಯಿ;
ರಾಜಾ ತೇ ಸಞ್ಞಪೇತ್ವಾನ, ಪುತ್ತಂ ಓವದಿ ಸಾಧುಕಂ.
ಸಬ್ಬಂ ತಥೇವ ದುತಿಯಂ, ಅಹೋಸಿ ತತಿಯಂ ಪನ;
ಕುದ್ಧೋ ಮಹಾಜನೋ ಆಹ, ಪುತ್ತಂ ಘಾತೇಹಿ ತೇ ಇತಿ.
ರಾಜಾ’ಥವಿಜಯಂ ತಞ್ಚ, ಪರಿವಾರಞ್ಚ ತಸ್ಸ ತಂ;
ಸತ್ತಸತಾನಿ ಪುರಿಸೇ, ಕಾರೇತ್ವಾ ಅದ್ಧಮುಣ್ಣಕೇ.
ನಾವಾಯ ¶ ಪಕ್ಖಿಪಾಪೇತ್ವಾ, ವಿಸ್ಸಜ್ಜಾಪೇಸಿ ಸಾಗರೇ;
ತಥಾ ತೇಸಂ ಭರಿಯಾಯೋ, ತಥೇವ ಚ ಕುಮಾರಕೇ.
ವಿಸುಂ ವಿಸುಂ ತೇ ವಿಸ್ಸಟ್ಠಾ, ಪುರಿಸಿತ್ಥಿಕುಮಾರಕಾ;
ವಿಸುಂ ವಿಸುಂ ದೀಪಕಸ್ಮಿಂ, ಓಕ್ಕಮಿಂಸು ವಸಿಂಸು ಚ.
ನಗ್ಗದೀಪೋತಿ ಞಾಯಿತ್ಥ, ಕುಮಾರೋಕ್ಕನ್ತದೀಪಕೋ;
ಭರಿಯೋಕ್ಕನ್ತದೀಪೋ ತು, ಮಹಿನ್ದದೀಪಕೋ ಇತಿ.
ಸುಪ್ಪಾರಕೇ ಪಟ್ಟನಮ್ಹಿ, ವಿಜಯೋ ಪನ ಓಕ್ಕಮಿ;
ಪರಿಸಾ ಸಾಹಸೇನೇ’ತ್ಥ, ಭೀತೋ ನಾವಂ ಪುನಾ’ರುಹಿ.
ಲಂಕಾಯಂ ವಿಜಯಸನಾಮಕೋ ಕುಮಾರೋ;
ಓತಿಣ್ಣೋ ಥಿರಮತಿ ತಮ್ಬಪಣ್ಣಿದೀಪೇ;
ಸಾಲಾನಂ ಯಮಕಗುಣಾನಮನ್ತರಸ್ಮಿಂ;
ನಿಬ್ಬಾತುಂ ಸಯಿತದಿನೇ ತಥಾಗತಸ್ಸ.
ಸುಜನಪಸಾದಸಂವೇ ಗತ್ಥಾಯಕತೇ ಮಹಾವಂಸೇ
ವಿಜಯಾಗಮನಂನಾಮ
ಛಟ್ಠಾಪರಿಚ್ಛೇದೋ.
ಸತ್ತಮ ಪರಿಚ್ಛೇದ
ವಿಜಯಾಭಿಸೇಕೋ
ಸಬ್ಬಲೋಕಹೀತಂ ¶ ಕತ್ವಾ, ಪತ್ವಾ ಸನ್ತಿಕರಂ ಪದಂ;
ಪರಿನಿಬ್ಬಾನಮಞ್ಚಮ್ಹಿ, ನಿಪನ್ನೋ ಲೋಕನಾಯಕೋ.
ದೇವತಾಸನ್ನಿಪಾತಮ್ಹಿ, ಮಹನ್ತಮ್ಹಿ ಮಹಾಮುನಿ;
ಸಕ್ಕ ತತ್ರಸಮೀಪಟ್ಠಂ, ಅವೋಚ ವದತಂ ವರೋ.
ವಿಜಯೋ ಲಾಳಾವಿಸಯಾ, ಸೀಹಬಾಹುನರಿನ್ದಜೋ;
ಏಸಲಙ್ಕಾಧನುಪತ್ತೋ, ಸತ್ತಭಚ್ಚಸತಾನುಗೋ.
ಪತಿಟ್ಠಹಿಸ್ಸತಿ ದೇವಿನ್ದಂ, ಲಂಕಾಯಂ ಮಮ ಸಾಸನಂ;
ತಸ್ಮಾ ಸಪರಿವಾರಂ ತಂ, ರಕ್ಖಲಂಕಞ್ಚ ಸಾಧುಕಂ.
ತಥಾಗತಸ್ಸ ದೇವಿನ್ದೋ, ವಚೋ ಸುತ್ವಾವ ಸಾದರೋ;
ದೇವಸ್ಸುಪ್ಪಲವಣ್ಣಸ್ಸ, ಲಂಕಾರಕ್ಖಂ ಸಮಪ್ಪಯಿ.
ಸಕ್ಕೇನ ವುತ್ತಮತ್ತೋಸೋ, ಲಙ್ಕಾಮಾಗಮ್ಮಸಜ್ಜುಕಂ;
ಪರಿಬ್ಬಾಜಕ ವೇಸೇನ, ರುಕ್ಖಮೂಲ ಮೂಪವಿಸಿಂ.
ವಿಜಯಸಮ್ಮುಖಾ ಸಬ್ಬೇ,
ತಂ ಉಪಚ್ಚ ಅಪುಚ್ಛಿಸುಂ;
ಅಯಂ ಭೋ ಕೋನು ದೀಪೋತೀ,
ಲಂಕಾದೀಪೋತಿ ಸೋ ಬ್ರವಿ.
ನ ಸನ್ತಿ ಮನುಜಾ ಹೇತ್ಥ, ನ ಚ ಹೇಸ್ಸತಿ ವೋ ಭಯಂ;
ಇತಿ ವತ್ವಾ ಕುಣ್ಡೀಕಾಯ, ತೇ ಜಲೇನ ನಿಸಿಞ್ಚಿಯ.
ಸುತ್ತಞ್ಚ ತೇಸಂ ಹತ್ಥೇಸು, ಲಗೇತ್ವಾನಭಸಾ’ಗಮಾ;
ದಸ್ಸೇಸಿ ಸೋಣಿರೂಪೇನ, ಪರಿವಾರಿಕಯಕ್ಖಿನೀ.
ಏಕೋ ತಂ ವಾರಿಯನ್ತೋಪಿ, ರಾಜಪುತ್ತೇನ ಅನ್ವಗಾ;
ಗಾಮಮ್ಹಿ ವಿಜ್ಜಮಾನಮ್ಹಿ, ಭವನ್ತಿ ಸುನಖಾ ಇತಿ.
ತಸ್ಸಾ ಚ ಸಾಮೀನೀ ತತ್ಥ, ಕುವೇಣೀನಾಮ ಯಕ್ಖಿನೀ;
ನಿಸೀದಿ ರುಕ್ಖಮೂಲಮ್ಹಿ, ಕನ್ತನ್ತಿ ತಾಪಸೀ ವಿಯ.
ದಿಸ್ವಾನ ¶ ಸೋ ಪೋಕ್ಖರಣೀ, ನಿಸಿನ್ನಂ ತಞ್ಚ ತಾಪಸಿಂ;
ತತ್ಥ ನ್ಹಾತ್ವಾ ಪಿವಿತ್ವಾ ಚ, ಆದಾಯ ಚ ಮುಲಾಲಿಯೋ.
ವಾರಿಞ್ಚ ಪೋಕ್ಖರೇಹೇವ, ವುಟ್ಠಾಸಿ ಸಾತಮಬ್ರವಿ;
ಭಕ್ಖೋ’ಸಿ ಮಮ ತಿಟ್ಠಾತಿ, ಅಟ್ಠಾ ಬದ್ಧೋ ವಸೋ ನರೋ.
ಪರಿತ್ತಸುತ್ತ ತೇಜೇನ, ಭಕ್ಖಿತುಂ ಸಾ ನ ಸಕ್ಕುಣೀ;
ಯಾಚಿಯನ್ತೋಪಿ ತಂ ಸುತ್ತಂ, ನಾ’ದಾಯಕ್ಖಿನಿಯಾ ನರೋ.
ತಂ ಗಹೇತ್ವಾ ಸುರುಙ್ಗಾಯಂ, ರುದನ್ತಂ ಯಕ್ಖಿನೀ ಖಿಪಿ;
ಏವಂ ಏಕೇಕಸೋ ತತ್ಥ, ಖಿಪೀ ಸತ್ತಸತಾನಿಪಿ.
ಅನಾಯನ್ತೇಸು ಸಬ್ಬೇಸು, ವಿಜಯೋ ಭಯಸಂಕಿತೋ;
ನನ್ತಪಞ್ಚಾಯುಧೋ ಗನ್ತ್ವಾ, ದಿಸ್ವಾ ಪೋಕ್ಖರಣಿಂ ಸುಭಂ.
ಅಪಸ್ಸ ಮುತ್ತಿಣ್ಣಪದಂ, ಪಸ್ಸಂ ತಞ್ಚೇವ ತಾಪಸಿಂ;
‘‘ಇಮಾಯ ಖಲು ಭಚ್ಚಾ ಮೇ, ಗಹಿತಾನು’’ತಿ ಚಿನ್ತಿಯ.
ಕಿಂ ನ ಪಸ್ಸಸಿ ಭಚ್ಚೇ ಮೇ,
ಹೋತಿ ತ್ವಂ ಇತಿ ಆಹತಂ;
‘‘ಕಿಂ ರಾಜಪುತ್ತ ಭಚ್ಚೇಹಿ,
ಪಿವ ನಹಾಯಾ’’ತಿ ಆಹಸಾ.
ಯಕ್ಖಿನೀ ತಾವ ಜಾನಾತಿ, ಮಮ ಜಾತಿನ್ತಿ ನಿಚ್ಛಿತೋ;
ಸಙ್ಘಂ ಸನಾಮಂ ಸಾವೇತ್ವಾ, ಧನುಂ ಸನ್ಧಾಯು’ ಪಾಗತೋ.
ಯಕ್ಖಿಂ ಆದಾಯ ಗೀವಾಯ, ನಾರಾ ಚ ವಲಯೇನ ಸೋ;
ವಾಮಹತ್ಥೇನ ಕೇಸೇಸು, ಗಹೇತ್ವಾ ದಕ್ಖಿಣೇ ನ ತು.
ಉಕ್ಖಿಪಿತ್ವಾ ಅಸಿಂಆಹ, ‘‘ಭಚ್ಚೇ ಮೇ ದೇಹಿ ದಾಸಿತಂ;
ಮಾರೇಮೀ’’ತಿ ಭಯಟ್ಟಾಸಾ, ಜೀವಿತಂ ಯಾಚಿ ಯಕ್ಖಿನೀ.
ಜೀವಿತಂ ದೇಹಿ ಮೇ ಸಾಮಿ, ರಜ್ಜಂ ದಜ್ಜಾಮಿ ತೇ ಅಹಂ;
ಕರಿಸ್ಸಮಿ’ತ್ತಿ ಕಿಚ್ಚಞ್ಚ, ಕಿಚ್ಚಂ ಅಞ್ಞಂ ಯಥಿಚ್ಛಿತಂ.
ಅದುಬ್ಭಾತ್ಥಾಯ ಸಪಥಂ, ಸೋ ತಂ ಯಕ್ಖಿಂ ಅಕಾರಯಿ;
‘‘ಆನೇಹಿ ಭಚ್ಚೇ ಸೀಘ’’ನ್ತಿ, ವುತ್ತಮತ್ತಾವ ಸಾ’ನಯಿ.
‘‘ಇಮೇ ಜಾತಾ’’ತಿ ವುತ್ತಾಸಾ,
ತಣ್ಡುಲಾದಿಂ ವಿನಿದ್ದಿಸಿ;
ಭಕ್ಖಿತಾನಂ ವಾಣಿಜಾನಂ,
ನಾವಟ್ಠಂ ವಿವಿಖಂ ಬಹುಂ.
ಭಚ್ಚಾ ¶ ತೇ ಸಾಧಯಿತ್ವಾನ, ಭತ್ತಾನಿ ಬ್ಯಞ್ಜನಾನಿಚ;
ರಾಜಾ ಪುತ್ತಂ ಭೋಜಯಿತ್ವಾ, ಸಬ್ಬೇಚಾಪಿ ಅಭುಞ್ಜಿಸುಂ.
ದಾಪಿತಂ ವಿಜಯೇನ’ಗ್ಗಂ, ಯಕ್ಖೀ ಭುಞ್ಜಿಯ ಪೀಣಿತಾ;
ಸೋಳಸವಸ್ಸಿಕಂ ರೂಪಂ, ಮಾಪಯಿತ್ವಾ ಮನೋಹರಂ.
ರಾಜಪುತ್ತ ಮುಪಗಞ್ಛಿ, ಸಬ್ಬಾಭರಣಭೂಸಿತಾ;
ಮಾಪೇಸಿ ರುಕ್ಖಮೂಲಸ್ಮಿಂ, ಸಯನಞ್ಚ ಮಹಾರಹಂ.
ಸಾಣಿಯಾ ಸುಪರಿಕ್ಖಿತ್ತಂ, ವಿತಾನಸಮಲಙ್ಕತಂ;
ತಂ ದಿಸ್ವಾ ರಾಜತನಯೋ, ಪೇಕ್ಖಂ ಅತ್ಥಮನಾಗತಂ.
ಕತ್ವಾನ ತಾಯನಾವಾಯಂ, ನಿಪಜ್ಜ ಸಯನೇ ಸುಖಂ;
ಸಾಣೀ ಪರಿಕ್ಖಿಪಿತ್ವಾನ, ಸಬ್ಬೇ ಭಚ್ಚಾ ನಿಪಜ್ಜಿಸುಂ.
ರತ್ತಿಂ ತೂರಿಯಸದ್ದಞ್ಚ, ಸುತ್ವಾ ಗೀತರವಞ್ಚ ಸೋ;
ಅಪುಚ್ಛಿ ಸಹಸೇಮಾನಂ, ಕಿಂ ಸದ್ದೋ ಇತಿ ಯಕ್ಖಿನಿಂ.
ರಜ್ಜಞ್ಚ ಸಾಮಿನೋ ದೇಯ್ಯಂ, ಸಬ್ಬೇ ಯಕ್ಖೇ ಚ ಘಾತಿಯ;
ಮನುಸ್ಸಾ ವಾಸಕರಣಾ, ಯಕ್ಖಾ ಮಂ ಘಾತಯನ್ತಿಹಿ.
ಇತಿ ಚಿನ್ತಿಯ ಯಕ್ಖೀ ಸಾ, ಅಬ್ರವಿ ರಾಜನನ್ದನಂ;
ಸೀರೀಸವತ್ಥುನಾ ಮೇತಂ, ಸಾಮಿ ಯಕ್ಖಪುರಂ ಇಧ.
ತತ್ಥ ಜೇಟ್ಠಸ್ಸ ಯಕ್ಖಸ್ಸ, ಲಂಕಾನಗರವಾಸಿನೀ;
ಕುಮಾರಿಕಾ ಇಧಾ’ನೀತಾ, ತಸ್ಸಾ ಮಾತಾ ಚ ಆಗತಾ.
ಆವಾಹ ಮಙ್ಗಲೇ ತತ್ಥ, ಇಧಾಪಿ ಉಸ್ಸವೇ ಮಹಾ;
ವತ್ತತೇ ತತ್ಥ ಸದ್ದೋಯಂ, ಮಹಾಹೇಸ ಸಮಾಗಮೋ.
ಅಜ್ಜೇವ ಯಕ್ಖೇ ಘಾತೇಹಿ,
ನ ಹಿ ಸಕ್ಖಾ ಇತೋ ಪರಂ;
ಸೋ ಆಹಾ’ದಿಸ್ಸ ಮಾನೇತೇ,
ಘಾತೇಸ್ಸಾಮಿ ಕಥಂ ಅಹಂ.
ಯತ್ಥ ಸದ್ದಂ ಕರಿಸ್ಸಾಮ, ತೇನ ಸದ್ದೇನ ಘಾತಯ;
ಆಯುಧಂ ಮೇ’ನುಭಾವೇನ, ತೇಸಂ ಕಾಯೇ ಪತಿಸ್ಸತಿ.
ತಸ್ಸಾ ಸುತ್ವಾ ತಥಾ ಕತ್ವಾ, ಸಬ್ಬೇ ಯಕ್ಖೇ ಅಘಾತಯಿ;
ಸಯಮ್ಪಿ ಲದ್ಧವಿಜಯೋ, ಯಕ್ಖರಾಜ ಪಸಾಧನಂ.
ಪಸಾಧನೇಹಿ ಸೇಸೇಹಿ, ತಂತಂ ಭಚ್ಚಂ ಪಸಾಧಯಿ;
ಕತಿಪಹಂ ವಸಿತ್ವೇ’ತ್ಥ, ತಮ್ಬಪಣ್ಣಿಮುಪಾಗಮಿ.
ಮಾಪಯಿತ್ವಾ ¶ ತಮ್ಪಪಣ್ಣಿ-ನಗರಂ ವಿಜಯೋ ತಹಿಂ;
ವಸೀ ಯಕ್ಖಿನಿಯಾ ಸದ್ಧಿಂ, ಅಮಚ್ಚ ಪರಿವಾರಿತೋ.
ನಾವಾಯ ಭೂಮಿಮೋತಿಣ್ಣಾ, ವಿಜಯಪಮುಖಾ ತದಾ;
ಕಿಲನ್ತಾ ಪಾಣಿನಾಭೂಮಿಂ, ಆಲಮ್ಬಿಯ ನಿಸೀದಿಸುಂ.
ತಮ್ಬಭೂಮಿರಜೋಫುಟ್ಠೋ, ತಮ್ಬೋಪಾಣಿ ಯತೋ ಅಹುಂ;
ಸೋ ದೇಸೋಚೇವ ದೀಪೋ ಚ, ತೇನ ತನ್ನಾಮಕೋ ಅಹು.
ಸೀಹಬಾಹು ನರಿನ್ದೋ ಸೋ, ಸೀಹಮಾದಿನ್ನವಾ ಇತಿ;
ಸೀಹಳೋ ತೇನ ಸಮ್ಬನ್ಧಾ, ಏತೇ ಸಬ್ಬೇಪಿ ಸೀಹಳಾ.
ತತ್ಥ ತತ್ಥ ಚ ಗಾಮೇ ತೇ, ತಸ್ಸಾ’ಮಚ್ಚಾ ನಿವೇಸಯುಂ;
ಅನುರಾಧಗಾಮಂ ತನ್ನಾಮೋ, ಕದಮ್ಬ ನದೀಯನ್ತಿಕೇ.
ಗಮ್ಭೀರನದೀಯಾ ತೀರೇ, ಉಪತಿಸ್ಸೋ ಪುರೋಹಿತೋ;
ಉಪತಿಸ್ಸಗಾಮಂ ಮಾಪೇಸಿ, ಅನುರಾಧಸ್ಸ ಉತ್ತರೇ.
ಅಞ್ಞೇ ತಯೋ ಅಮಚ್ಚಾ ತೇ, ಮಾಪಯಿಂಸು ವಿಸುಂ ವಿಸುಂ;
ಉಜ್ಜೇನಿಂ ಉರುವೇಲಞ್ಚ, ವಿಜಿತಂ ನಗರಂ ತಥಾ.
ನಿವಾಸೇತ್ವಾ ಜನಪದಂ, ಸಬ್ಬೇ’ಮಚ್ಚಾ ಸಮಚ್ಚತಂ;
ಅವೋಚುಂ ರಾಜತನಯಾ, ಸಾಮಿ ರಜ್ಜೇಭಿಸೇಚಯ.
ಇತಿ ವುತ್ತೋ ರಾಜಪುತ್ತೋ, ನ ಇಚ್ಛಿ ಅಭಿಸೇಚನಂ;
ವಿನಾ ಖತ್ತಿಯಕಞ್ಞಾಯ, ಅಭಿಸೇಕಂ ಮಹೇಸಿಯಾ.
ಅಥಾಮಚ್ಚಾ ಸಾಮಿನೋ ಹೇ, ಅಭಿಸೇಕ ಕತಾ ದರಾ;
ದುಕ್ಕರೇಸುಪಿ ಕಿಚ್ಚೇಸು, ತದತ್ಥಭಿರುತಾ ತಿಗಾ.
ಪಣ್ಣಾಕಾರೇ ಮಹಾಸಾರೇ, ಮಣಿಮುತ್ತಾದಿಕೇ ಬಹೂ;
ಗಾಹಾಪಯಿತ್ವಾ ಪಾಹೇಸುಂ, ದಕ್ಖಿಣಂ ಮಧುರಂ ಪುರಂ.
ಪಣ್ಡುರಾಜಸ್ಸ ಧೀತತ್ಥಂ, ಸಾಮಿನೋ ಸಾಮಿಭತ್ತಿನೋ;
ಅಞ್ಞೇಸಂ ಚಾಪಿ ಧೀತತ್ಥಂ, ಅಮಚ್ಚಾನಂ ಜನಸ್ಸ ಚ.
ಸೀಘಂ ನಾವಾಯ ಗನ್ತ್ವಾನ, ದೂತಾ ತೇ ಮಧುರಂ ಪುರಂ;
ಪಣ್ಣಾಕಾರೇ ಚ ಲೇಖಞ್ಚ, ತಸ್ಸ ರಞ್ಞೋ ಅದಸ್ಸಯುಂ.
ತತೋ ರಾಜಾಅಮಚ್ಚೇಹಿ, ಮನ್ತಯಿತ್ವಾ ಸಧೀತರಂ;
ಪಾಹೇತುಕಾಮೋ’ಮಚ್ಚಾನಂ, ಅಞ್ಞೇಸಂ ಚಾಪಿ ಧೀತರೋ.
ಲದ್ಧಾ ಊನಸತಂ ಕಞ್ಞಾ, ಅಥಭೇರಿಂ ಚರಾಪಯಿ;
ಲಂಕಾಯ ಧೀತುಗಮನಂ, ಇಚ್ಛಮಾನಾ ನರಾ ಇಧ.
ನಿವಾಸಯಿತ್ವಾ ¶ ದಿಗುಣಂ, ಘರದ್ವಾರೇಸು ಧೀತರೋ;
ಠಪೇನ್ತು ತೇನ ಲಿಙ್ಗೇನ, ಆದೀಯಿಸ್ಸಾಮಿತಾ ಇತಿ.
ಏವಂ ಲದ್ಧಾ ಬಹೂಕಞ್ಞಾ, ತಪ್ಪಯಿತ್ವಾನ ತಂ ಕುಲಂ;
ಸಮ್ಪನ್ನಸಬ್ಬಾಲಙ್ಕಾರಂ, ಧೀತರಂ ಸಮ್ಪಟಿಚ್ಛದಂ.
ಸಬ್ಬಾ ತಾ ಲದ್ಧಸಕ್ಕಾರಾ, ಕಞ್ಞಾಯೋ ಚ ಯಥಾರಹಂ;
ರಾಜಾರಹೇ ಚ ಹತ್ಥಸ್ಸ-ರಥಪೇಸ್ಸಿಯ ಕಾರಕೇ.
ಅಟ್ಠಾರಸನ್ನಂ ಸೇಣೀನಂ, ಸಹಸ್ಸಞ್ಚ ಕುಲಾನಿ ಸೋ;
ಲೇಖಂ ದತ್ವಾನ ಪೇಸೇಸಿ, ವಿಜಯಸ್ಸ ಜಿತಾ’ರಿನೋ.
ಸಬ್ಬೋಸೋ’ತರೀ ನಾವಾಹಿ, ಮಹಾತಿತ್ಥೇ ಮಹಾಜನೋ;
ತೇನೇವ ಪಟ್ಟನಂ ತಞ್ಹಿ, ಮಹಾತಿತ್ಥಂತಿ ವುಚ್ಚತಿ.
ವಿಜಯಸ್ಸ ಸುತೋಧೀತಾ, ತಸ್ಸಾ ಯಕ್ಖಿನಿಯಾ ಅಹು;
ರಾಜಕಞ್ಞಾಗಮಂ ಸುತ್ವಾ, ವಿಜಯೋ ಆಹ ಯಕ್ಖಿನಿಂ.
‘‘ಗಚ್ಛ ದಾನಿ ತುವಂ ಭೋತಿ, ಠಪೇತ್ವಾ ಪುತ್ತಕೇ ದುವೇ;
ಮನುಸ್ಸಾ ಅಮನುಸ್ಸೇಹಿ, ಭಾಯಿನ್ತೀಹಿ ಸದಾ’’ ಇತಿ.
ಸುತ್ವಾ ತಂ ಯಕ್ಖಭಯತೋ, ಭೀತಂ ತಂ ಆಹ ಯಕ್ಖಿನಿಂ;
ಮಾ ಚಿನ್ತಯಿ ಸಾಹಸ್ಸೇನ, ದಾಪಯಿಸ್ಸಾಮಿ ತೇ ಬಲಿಂ.
ಪುನಪ್ಪುನಂ ತಂ ಯಾಚಿತ್ವಾ, ಉಭೋ ಆದಾಯ ಪುತ್ತಕೇ;
ಭೀತಾಪಿ ಸಾ ಅಗತಿಯಾ, ಲಂಕಾಪುರಮುಪಾಗಮಿ.
ಪುತ್ತೇ ಬಿಹಿ ನಿಸೀದೇತ್ವಾ, ಸಯಂ ಪಾವಿಸಿ ತಂ ಪುರಂ;
ಸಞ್ಜಾನಿತ್ವಾನ ತಂ ಯಕ್ಖಿಂ, ಭೀತಾ ಚೋರೀತಿ ಸಞ್ಞಿತೋ.
ಸಂಖುಭಿಂಸು ಪುರೇ ಯಕ್ಖಾ, ಏಕೋ ಸಾಹಸಿಕೋ ಪನ;
ಏಕಪಾಣಿಪ್ಪಹಾರೇನ, ವಿಲಯಂ ನಯಿ ಯಕ್ಖಿನಿಂ.
ತಸ್ಸಾತು ಮಾತುಲೋ ಯಕ್ಖೋ, ನಿಕ್ಖಮ್ಮ ನಗರಾ ಬಹಿ;
ದಿಸ್ವಾ ತೇ ದಾರಕೇ ಪುಚ್ಛಿ, ತುಮ್ಹೇ ಕಸ್ಸ ಸುತಾ ಇತಿ.
ಕುವೇಣಿಯಾ’ತಿ ಸುತ್ವಾ’ಹ, ಮಾತಾ ವೋ ಮಾರಿತಾ ಇಧ;
ತುಮ್ಹೇಪಿ ದಿಸ್ವಾ ಮಾರೇಯ್ಯುಂ, ಪಲಾಯಥ ಲಹುಂ ಇತಿ.
ಆಗುಂ ಸುಮನಕೂಟಂ ತೇ, ಪಲಾಯಿತ್ವಾ ತತೋ ಲಹುಂ;
ವಾಸಂ ಕಪ್ಪೇಸಿ ಜೇಟ್ಠೋ ಸೋ, ವುದ್ಧೋ ತಾಯ ಕಣಿಟ್ಠಿಯಾ.
ಪುತ್ತಧೀತಾಹಿ ¶ ವಡ್ಢಿತ್ವಾ, ರಾಜಾನುಞ್ಞಾಯ ತೇ ವಸುಂ;
ತತ್ಥೇವ ಮಲಯೇ ಏಸೋ, ಪುಲಿನ್ದಾನಞ್ಹಿ ಸಮ್ಭವೋ.
ಪಣ್ಡುರಾಜಸ್ಸ ದೂತಾ ತೇ, ಪಣ್ಣಾಕಾರಂ ಸಮಪ್ಪಯುಂ;
ವಿಜಯಸ್ಸ ಕುಮಾರಸ್ಸ, ರಾಜಾಧಿಕಾರಿಕಾ ಚ ತಾ.
ಕತ್ವಾ ಸಕ್ಕಾರಸಮ್ಮಾನಂ, ದೂತಾನಂ ವಿಜಯೋ ಪನ;
ಅದಾ ಯಾಥಾರಹಂ ಕಞ್ಞಾ, ಅಮಚ್ಚಾನಂ ಜನಸ್ಸ ಚ.
ಯಥಾ ವಿಧಿ ಚ ವಿಜಯಂ, ಸಬ್ಬೇ ಮಚ್ಚಾಸಮಾಗತಾ;
ರಜ್ಜೇಸಮಭಿಸಿಞ್ಚಿಂಸು, ಕರಿಂಸುಚ ಮಹಾಛಣಂ.
ತತೋ ಸೋ ವಿಜಯೋ ರಾಜಾ, ಪಣ್ಡುರಾಜಸ್ಸ ಧೀತರಂ;
ಮಹತಾ ಪರಿಹಾರೇನ, ಮಹೇಸಿತ್ತೇ’ಭಿಸೇಚಯಿ.
ಧನಾನ’ದಾ ಅಮಚ್ಚಾನಂ, ಅದಾಸಿ ಸಸುರಸ್ಸತು;
ಅನುವಸ್ಸಂ ಸಙ್ಖಮುತ್ತಂ, ಸತಸಹಸ್ಸ ದ್ವಯಾರಹಂ.
ಹಿತ್ವಾ ಪುಬ್ಬಾಚರಿತಂ ವಿಸಮಂ ಸಮೇನ;
ಧಮ್ಮೇನ ಲಂಕಮಖಿಲಂ ಅನುಸಾಸಮಾನೋ;
ಸೋ ತಮಪಣ್ಣಿನಗರೇ ವಿಜಯೋ ನರಿನ್ದೋ;
ರಜ್ಜಂ ಅಕಾರಯಿ ಸಮಾ ಖಲು ಅಟ್ಠತಿಂಸಾ’ತಿ.
ಸುಜನಪಸಾದಸಂವೇ ಗತ್ಥಾಯ ಕತೇ ಮಹಾವಂಸೇ
ವಿಜಯಾಭಿಸೇಕೋ ನಾಮ
ಸತ್ತಮೋ ಪರಿಚ್ಛೇದೋ.
ಅಟ್ಠಮ ಪರಿಚ್ಛೇದ
ಪಣ್ಡುವಾಸುದೇವಾಭಿಸೇಕೋ
ವಿಜಯೋ ¶ ಸೋ ಮಹಾರಾಜಾ, ವಸ್ಸೇ ಅನ್ತಿಮಕೇ ಠಿತೋ;
ಇತಿ ಚಿನ್ತಯಿ ‘‘ವುದ್ಧೋ’ಹಂ, ನ ಚ ವಿಜ್ಜತಿ ಮೇ ಸುತೋ.
ಕಿಚ್ಛೇನ ವಾಸಿತಂ ರಟ್ಠಂ, ನಸ್ಸೇಯ್ಯ ಮಮ ಅಚ್ಚಯೇ;
ಆಣಾಪೇಯ್ಯಂ ರಜ್ಜಹೇತು-ಸುಮಿತ್ತಂ ಭಾತರಂ ಮಮ.
ಅಥಾ’ಮಚ್ಚೇಹಿ ಮನ್ತೇತ್ವಾ, ಲೇಖಂ ತತ್ಥ ವಿಸಜ್ಜಯಿ;
ಲೇಖಂ ದತ್ವಾನ ವಿಜಯೋ, ನ ಚಿರೇನ ದಿವಙ್ಗತೋ.
ತಸ್ಮಿಂ ಮತೇ ಅಮಚ್ಚಾ ತೇ, ಪೇಕ್ಖನ್ತಾ ಖತ್ತಿಯಾಗಮಂ;
ಉಪತಿಸ್ಸಗಾಮೇ ಠತ್ವಾನ, ರಟ್ಠಂ ಸಮುನುಸಾಸಿಸುಂ.
ಮತೇ ವಿಜಯರಾಜಮ್ಹಿ, ಖತ್ತಿಯಾಗಮನಾ ಪುರಾ;
ಏಕಂ ವಸ್ಸಂ ಅಯಂ ಲಂಕಾ-ದೀಪೋ ಆಸಿ ಅರಾಜಕೋ.
ತಸ್ಮಿಂ ಸೀಹಪುರೇ ತಸ್ಸ, ಸೀಹಬಾಹುಸ್ಸ ರಾಜಿನೋ;
ಅಚ್ಚಯೇನ ಸುಮಿತ್ತೋ ಸೋ, ರಾಜಾ ತಸ್ಸ ಸುತೋ ಅಹು.
ತಸ್ಸ ಪುತ್ತಾ ತಯೋ ಆಸುಂ, ಮದ್ದರಾಜಸ್ಸ ಧೀತುಯಾ;
ದೂತಾ ಸೀಹಪುರಂ ಗನ್ತ್ವಾ, ರಞ್ಞೋ ಲೇಖಂ ಅದಂಸು ತೇ.
ಲೇಖಂ ಸುತ್ವಾನ ಸೋ ರಾಜಾ, ಪುತ್ತೇ ಆಮನ್ತಯೀ ತಯೋ;
ಅಹಂ ಮಹಲ್ಲಕೋ ತಾತಾ, ಏಕೋ ತುಮ್ಹೇಸು ಗಚ್ಛತು.
ಲಂಕಂ ನೇಕಗುಣಂ ಕನ್ತಂ, ಮಮ ಭಾತುಸ್ಸ ಸನ್ತಕಂ;
ತಸ್ಸ’ಚ್ಚ ಯೇನ ತತ್ಥೇವ, ರಜ್ಜಂ ಕಾರೇತು ಸೋಭನಂ.
ಕಣಿಟ್ಠಕೋ ಪಣ್ಡುವಾಸು-ದೇವೋ ರಾಜಕುಮಾರಕೋ;
‘‘ಗಮಿಸ್ಸಾಮೀತಿ ಚಿನ್ತೇತ್ವಾ, ಞತ್ವಾ ಸೋತ್ಥಿ ಗತಮ್ಪಿ ಚ.
ಪಿತರಾ ಸಮನುಞ್ಞಾತೋ, ದ್ವತ್ತಿಂಸಾಮಚ್ಚ ದಾರಕೇ;
ಆದಾಯ ಆರುಹೀ ನಾವಂ, ಪರಿಬ್ಬಾಜಕಲಿಙ್ಗವಾ.
ಮಹಾಕನ್ದರನಜ್ಜಾ ತೇ, ಮುಖದ್ವಾರಮ್ಹಿ ಓತರಂ;
ತೇ ಪರಿಬ್ಬಾಜಕೇ ದಿಸ್ವಾ, ಜನೋ ಸಕ್ಕರಿ ಸಾಧುಕಂ.
ಪುಚ್ಛಿತ್ವಾ ¶ ನಗರಂ ಏತ್ಥ, ಉಪಯನ್ತಂ ಕಮೇನ ತೇ;
ಉಪತಿಸ್ಸ ಗಾಮಂ ಸಮ್ಪತ್ತಾ, ದೇವತಾ ಪರಿಪಾಲಿತಾ.
ಅಮಚ್ಚಾ’ನುಮತೋ’ಮಚ್ಚೋ, ಪುಚ್ಛಿ ನೇಮಿತ್ತಕಾ ತಹಿಂ;
ಖತ್ತಿಯಾ’ಗಮನಂ ತಸ್ಸ, ಸೋ ಬ್ಯಾಕಾಸಿ ಪರಂಪಿ ಚ.
ಸತ್ತಮೇ ದೀವಸೇಯೇವ, ಆಗಮಿಸ್ಸತಿ ಖತ್ತಿಯೋ;
ಬುದ್ಧಸಾಸನ ಮೇತಸ್ಸ, ವಂಸಜೋ’ವ ಠಪೇಸ್ಸತಿ.
ಸತ್ತಮೇ ದಿವಸೇಯೇವ, ತೇ ಪರಿಬ್ಬಾಜಕೇ ತಹಿಂ;
ಪತ್ತೇ ದಿಸ್ವಾನ ಪುಚ್ಛಿತ್ವಾ, ಅಮಚ್ಚಾ ತೇ ವಿಜಾನಿಯ.
ತಂ ಪಣ್ಣುವಾಸುದೇವಂ ತೇ, ಲಂಕಾರಜ್ಜೇನ ಅಪ್ಪಯುಂ;
ಮಹೇಸಿಯಾ ಅಭಾವಾಸೋ, ನ ತಾವ ಅಭಿಸೇಚಯಿ.
ಅಮಿತೋದನಸಕ್ಕಸ್ಸ, ಪಣ್ಡುಸಕ್ಕೋ ಸುತೋ ಅಹು;
ಞತ್ವಾ ವಿನಾಸಂ ಸಕ್ಯಾನಂ, ಸೋ ಆದಾಯ ಸಕಂ ಜನಂ.
ಗನ್ತ್ವಾ ಅಞ್ಞಾಪದೇಸೇನ, ಗಙ್ಗಾಪಾರಂ ತಹಿಂ ಪುರಂ;
ಮಾಪೇತ್ವಾ ತತ್ಥ ಕಾರೇಸಿ, ರಜ್ಜಂ ತಸ್ಸ ಸುತೇ ಲಭಿ.
ಧೀತಾ ಕಣಿಟ್ಠಿತಾ ಆಸಿ, ಭದ್ದಕಚ್ಚಾನ ನಾಮಿಕಾ;
ಸಬ್ಬಲಕ್ಖಣಸಮ್ಪನ್ನಾ, ಸುರೂಪಾ ಅಭಿಪತ್ಥಿತಾ.
ತದತ್ಥಂ ಸತ್ತರಾಜಾನೋ, ಪಣ್ಣಾಕಾರೇ ಮಹಾರಹೇ;
ಪೇಸೇಸುಂ ರಾಜಿನೋ ತಸ್ಸ, ಭೀತೋ ರಾಜೂಹಿ ಸೋ ಪನ.
ಞತ್ವಾನ ಸೋತ್ಥಿಗಮನಂ, ಅಭಿಸೇಕಫಲಮ್ಪಿ ಚ;
ಸಹದ್ವತ್ತಿಂಸ ಇತ್ಥೀಹಿ, ನಾವಂ ಆರೋಪಿಯಾ’ಸುತಂ.
ಗಙ್ಗಾಯ ಖಿಪಿ ಗಣ್ಹಾತು, ಪಹು ಮೇ ಧೀತರಂ ಇತಿ;
ಗಹೇತುಂ ತೇ ನ ಸಕ್ಖಿಂಸು, ನಾವಾಸಾಪನ ಸೀಘಗಾ.
ದುತಿಯೇ ದಿವಸೇಯೇವ, ಗೋಣಾಗಾಮಕ ಪಟ್ಟನಂ;
ಪತ್ತಾಪಬ್ಬಜಿತಾ ಕಾರಾ, ಸಬ್ಬಾ ತಾ ತತ್ಥ ಓತರುಂ.
ಪುಚ್ಛಿತ್ವಾ ನಗರಂ ಏತ್ಥ, ತಾ ಕಮೇನೋಪಯನ್ತಿಯೋ;
ಉಪತಿಸ್ಸಗಾಮಂ ಸಮ್ಪತ್ತಾ, ದೇವತಾ ಪರಿಪಾಲಿತಾ.
ನೇಮಿತ್ತಕಸ್ಸ ವಚನಂ, ಸುತ್ವಾ ತತ್ಥಾ’ಗತಾ ತು ತಾ;
ದಿಸ್ವಾ ಅಮಚ್ಚೋ ಪುಚ್ಛಿತ್ವಾ, ಞತ್ವಾ ರಞ್ಞೋ ಸಮಪ್ಪಯಿ.
ತಂ ಪಣ್ಡುವಾಸುದೇವಂ ತೇ, ಅಮಚ್ಚಾ ಸುದ್ಧಬುದ್ಧಿನೋ;
ರಜ್ಜೇ ಸಮಭಿಸಿಞ್ಚಿಂಸು, ಪುಣ್ಣಸಬ್ಬಮನೋರಥಂ.
ಸುಭದ್ದಕಚ್ಚಾನ ¶ ಮನೋಮರೂಪಿನಿಂ;
ಮಹೇಸೀಭಾವೇ ಅಭಿಸಿಞ್ಚಿಯ’ತ್ತನೋ;
ಸಹಗತಾ ತಾಯ ಪದಾಸಿ ಅತ್ತನಾ;
ಸಹಾಗತಾನಂ ವಸಿ ಭೂಮಿಪೋ ಸುಖನ್ತೀ.
ಸುಜನಪ್ಪಸಾದ ಸಂವೇಗತ್ಥಾಯ ಕತೇ ಮಹಾವಂಸೇ
ಪಣ್ಡುವಾಸುದೇವಾಭಿಸೇಕೋ ನಾಮ
ಅಟ್ಠಮೋ ಪರಿಚ್ಛೇದೋ.
ನವಮ ಪರಿಚ್ಛೇದ
ಅಭಯಾಭಿಸೇಕೋ
ಮಹೇಸೀ ಜನಯೀ ಪುತ್ತೇ, ದಸ ಏಕಞ್ಚ ಧೀತರಂ;
ಸಬ್ಬಜೇಟ್ಠೋ’ಭಯೋ ನಾಮ, ಚಿತ್ತಾನಾಮ ಕನಿಟ್ಠಿಕಾ.
ಪಸ್ಸಿತ್ವಾ ತಂ ವಿಯಾಕಂಸು, ಬ್ರಾಹ್ಮಣಾ ಮನ್ತಪಾರಗಾ;
‘‘ರಜ್ಜಹೇತು ಸುತೋ ಅಸ್ಸಾ, ಘಾತಯಿಸ್ಸತಿ ಮಾತುಲೇ’’.
ಘಾತೇಸ್ಸಾಮಿ ಕನಿಟ್ಠಿನ್ತಿ, ನಿಚ್ಛಿತೇ ಭಾತರಾ’ಭಯೋ;
ವಾರೇಸಿ ಕಾಲೇ ವಾಸೇಸುಂ, ಗೇಹಂ ತಂ ಏಕಥುಣಿಕೇ.
ರಞ್ಞೋ ಚ ಸಿರಿಗಬ್ಭೇನ, ತಸ್ಸ ದ್ವಾರಮಕಾರಯುಂ;
ಅನ್ತೋ ಠಪೇಸುಂ ಏಕಞ್ಚ, ದಾಸಿಂ ನರಸತಂ ಬಹಿ.
ರೂಪೇನು’ಮ್ಮಾದಯೀ ನರೇ, ದಿಟ್ಠಮತ್ತಾವ ಸಾಯತೋ;
ತತೋ ಉಮ್ಮಾದಚಿತ್ತಾ’ತಿ, ನಾಮಂ ಸೋಪಪದಂ ಲಭಿ.
ಸುತ್ವಾನ ಲಂಕಾಗಮನಂ, ಭದ್ದಕಚ್ಚಾನದೇವಿಯಾ;
ಮಾತರಾ ಚೋದಿತಾ ಪುತ್ತಾ, ಠಪೇತ್ವೇ’ಕಞ್ಚ ಆಗಮುಂ.
ದಿಸ್ವಾನ ತೇ ಪಣ್ಡುವಾಸು-ದೇವಂ ಲಙ್ಕಿನ್ದಮಾಗತಾ;
ದಿಸ್ವಾನ ತಂ ಕನಿಟ್ಠಿಞ್ಚ, ರೋದಿತ್ವಾ ಸಹ ತಾಯ ಚ.
ರಞ್ಞಾ ಸುಕತಸಕ್ಕಾರಾ, ರಞ್ಞೋ’ನುಞ್ಞಾಯ ಚಾರಿಕಂ;
ಚರಿಂಸು ಲಂಕಾದೀಪಮ್ಹಿ, ನಿವಸುಞ್ಚ ಯಥಾರುಚಿಂ.
ರಾಮೇನ ¶ ವುಸಿತಠಾನಂ, ರಾಮಗೋಣನ್ತಿ ವುಚ್ಚತಿ;
ಉರುವೇಲಾ’ನುರಾಧಾನಂ, ನಿವಾಸಾ ಚ ತಥಾ ತಥಾ.
ತಥಾ ವಿಜಿತದೀಘಾಯು-ರೋಹಣಾನಂ ನಿವಾಸಕಾ;
ವಿಜಿತಗಾಮೋ ದೀಘಾಯು-ರೋಹಣನ್ತಿ ಚ ವುಚ್ಚತಿ.
ಕಾರೇಸಿ ಅನುರಾಧೋ ಸೋ, ವಾಪಿಂ ದಕ್ಖಿಣತೋ ತತೋ;
ಕಾರಾಪೇತ್ವಾ ರಾಜಗೇಹಂ, ತತ್ಥ ವಾಸಮಕಪ್ಪಯೀ.
ಮಹಾರಾಜಾ ಪಣ್ಡುವಾಸು-ದೇವೋ ಜಟ್ಠಸುತಂ ಸಕಂ;
ಅಭಯಂ ಉಪರಜ್ಜಮ್ಹಿ, ಕಾಲೇ ಸಮಭಿಸೇಚಯಿ.
ದೀಘಾಯುಸ್ಸ ಕುಮಾರಸ್ಸ, ತನಯೋ ದೀಘಗಾಮಣಿ;
ಸುತ್ವಾ ಉಮ್ಮಾದಚಿತ್ತಂ ತಂ, ತಸ್ಸಂ ಜಾತಕುತೂಹಲೋ.
ಗಹೇತ್ವಾ’ಪತಿಸ್ಸ ಗಾಮಂ, ತಂ ಅಪಸ್ಸಿ ಮನುಜಾಧಿಪಂ;
ಅದಾ ಸಹೋಪರಾಜೇನ, ರಾಜುಪಟ್ಠಾನಮಸ್ಸಸೋ.
ಗವಕ್ಖಾಭಿಮುಖಟ್ಠಾನೇ, ತಂ ಉಪೇಚ್ಚ ಠಿತಂ ತುಸಾ;
ದಿಸ್ವಾನ ಗಾಮಿಣಿಂ ಚಿತ್ತಾ, ರತ್ತಚಿತ್ತಾ’ಹ ದಾಸಿಕಂ.
‘‘ಕೋ ಏಸೋ’’ತಿ ತತೋ ಸುತ್ವಾ,
ಮಾತುಲಸ್ಸ ಸುತೋಇತಿ;
ದಾಸಿಂ ತತ್ಥ ನಿಯೋಜೇಸಿ,
ಸದ್ಧಿಂಕತ್ವಾನ ಸೋ ತತೋ.
ಗವಕ್ಖಮ್ಹಿ ಡಸಾಪೇತ್ವಾ, ರತ್ತಿಂ ಕಕ್ಕಟಯನ್ತಕಂ;
ಆರುಯ್ಹ ಛಿನ್ದಯಿತ್ವಾನ, ಕವಾಟಂ ತೇನ ಪಾವಿಸಿ.
ತಾಯ ಸದ್ಧಿಂ ವಸಿತ್ವಾನ, ಪಚ್ಚೂಸೇಯೇವ ನಿಕ್ಖಮಿ;
ಏವಂ ನಿಚ್ಚಂ ವಸೀ ತತ್ಥ, ಛಿದ್ದಾಭಾವಾ ಅಪಾಕಟೋ.
ಸಾ ತೇನ ಅಗ್ಗಹೀ ಗಬ್ಭಂ, ಗಬ್ಭೇ ಪರಿಣತೇ ತತೋ;
ಮಾತು ಆರೋಚಯೀ ದಾಸೀ, ಮಾತಾ ಪುಚ್ಛಿಯ ಧೀತರಂ.
ರಞ್ಞೋ ಆರೋಚಯೀ ರಾಜಾ, ಅಮನ್ತೇತ್ವಾ ಸುತೇ’ಬ್ರಹ್ಮಾ;
ಪೋಸಿಯೋಸೋ’ಪಿ ಅಮ್ಹೇಹಿ, ದೇವ ತಸ್ಸೇವ ತಂ ಇತಿ.
ಪುತ್ತೋ ಚೇ ಮಾರಯಿಸ್ಸಾಮ, ತ’ನ್ತಿ ತಸ್ಸ ಅದಂಸು ತಂ;
ಸಾ ಸೂತಿಕಾಲಸಮ್ಪತ್ತೇ, ಸೂತಿ ಗೇಹಞ್ಚ ಪಾವಿಸಿಂ.
ಸಙ್ಕಿತ್ವಾ ¶ ಗೋಪಕಂ ಚಿತ್ತಂ, ಕಾಲವೇಲಞ್ಚ ದಾಸಕಂ;
ತಸ್ಮಿಂ ಕಮ್ಮೇ ನಿಸ್ಸಾಯಾ’ತಿ, ಗಾಮಣಿ ಪರಿಚಾರಕೇ.
ತೇ ಪಟಿಞ್ಞಂ ಅದೇನ್ತೇ ತೇ, ರಾಜಪುತ್ತಾ ಅಘಾತಯುಂ;
ಯಕ್ಖಾ ಹುತ್ವಾನ ರಕ್ಖಿಂಸು, ಉಭೋ ಗಬ್ಭೇ ಕುಮಾರಕಂ.
ಅಞ್ಞಂ ಉಪವಿಜಞ್ಞಂ ಸಾ, ಸಲ್ಲಕ್ಖಾ ಪೇಸಿ ದಾಸಿಯಾ;
ಚಿತ್ತಾ ಸಾ ಜನಯೀ ಪುತ್ತಂ, ಸಾ ಇತ್ಥಿ ಪನ ಧೀತರಂ.
ಚಿತ್ತಂ ಸಹಸ್ಸಂ ದಾಪೇತ್ವಾ, ತಸ್ಸಾ ಪುತ್ತಂ ಸಕಮ್ಪಿ ಚ;
ಆಣಾಪೇತ್ವಾ ಧೀತರಂ ತಂ, ನಿಪಜ್ಜಾಪೇಸಿ ಸನ್ತಿಕೇ.
ಧೀತಾ ಲದ್ಧಾ’ತಿ ಸುತ್ವಾನ, ತುಟ್ಠಾ ರಾಜಸುತಾ ಅಹುಂ;
ಮಾತಾ ಚ ಮಾತುಮಾತಾ ಚ, ಉಭೋ ಪನ ಕುಮಾರಕಂ.
ಮಾತಾಮಹಸ್ಸ ನಾಮಞ್ಚ, ಜೇಟ್ಠಸ್ಸ ಮಾತುಲಸ್ಸ ಚ;
ಏಕಂ ಕತ್ವಾ ತಮಕರುಂ, ಪಣ್ಡುಕಾಭಯನಾಮಕಂ.
ಲಂಕಾ ಪಾಲೋ ಪಣ್ಡುವಾಸು-ದೇವೋ ರಜ್ಜಮಕಾರಯಿ;
ತಿಂಸ ವಸ್ಸಮ್ಹಿ ಜಾತಮ್ಹಿ, ಮತೋ ಸೋ ಪಣ್ಡುಕಾಭಯೇ.
ತಸ್ಮಿಂ ಮತಸ್ಮಿಂ ಮನುಜಾಧಿಪಸ್ಮಿಂ,
ಸಬ್ಬೇ ಸಮಾಗಮ್ಮ ನರಿನ್ದಪುತ್ತಾ;
ತಸ್ಸಾಭಯಸ್ಸಾಭಯದಸ್ಸ ಭಾತು,
ರಾಜಾಭಿಸೇಕಂ ಅಕರುಂ ಉಳಾರಾತಿ.
ಸುಜನಪ್ಪಸಾದ ಸಂವೇಗತ್ಥಾಯ ಕತೇ ಮಹಾವಂಸೇ
ಅಭಯಾಭಿಸೇಕೋ ನಾಮ
ನವಮೋ ಪರಿಚ್ಛೇದೋ.
ದಸಮ ಪರಿಚ್ಛೇದ
ಪಣ್ಡುಕಾಭಯಾಭಿಸೇಕೋ
ಉಮ್ಮಾದಚಿತ್ತಾಯಾಣತ್ತಾ ¶ , ದಾಸೀ ಆದಾಯ ದಾರಕಂ;
ಸಮುಗ್ಗೇ ಪಕ್ಖಿಪಿತ್ವಾನ, ದ್ವಾರಮಣ್ಡಲ ಕೇ ಅಗಾ.
ರಾಜಪುತ್ತಾ ಚ ಮಿಗವಂ, ಗತಾ ತುಮ್ಬರಕನ್ದರೇ;
ದಿಸ್ವಾ ದಾಸಿಂ ಕುಹಿಂ ಯಾಸಿ, ಕಿಂ ಮೇ ಕನ್ತಿ ಚ ಪುಚ್ಛಿಸುಂ.
ದ್ವಾರಮಣ್ಡಲಕಂ ಯಾಮಿ, ಧೀತುಮೇಗುಳಪೂವಕಂ;
ಇಚ್ಚಾಹ ಓರೋಪೇಹೀತಿ, ರಾಜಪುತ್ತಂ ಕಮಬ್ರವುಂ.
ಚಿತ್ತೋ ಚ ಕಾಲವೇಲೋ ಚ, ತಸ್ಸಾ’ರಕ್ಖಾಯ ನಿಗ್ಗತಾ;
ಮಹನ್ತಂ ಸೂಕರವೇಸಂ, ತಂ ಖಣಂಯೇವ ದಸ್ಸಯುಂ.
ತೇ ತಂ ಸಮನುಬನ್ಧಿಂಸು, ಸಾಸಮಾದಾಯ ತತ್ರ’ಗಾ;
ದಾರಕಞ್ಚ ಸಹಸ್ಸಞ್ಚ, ಆಯುತ್ತಸ್ಸ ಅದಾರಹೋ.
ತಸ್ಮಿಂಯೇವ ದಿನೇ ತಸ್ಸ, ಭರಿಯಾ ಜನಯೀ ಸುತಂ;
ಯಮಕೇ ಜನಯೀ ಪುತ್ತೇ, ಭರಿಯಂ ಮೇ’ತಿ ಪೋಸಿತಂ.
ಸೋ ಸತ್ತವಸ್ಸಿಕೋ ಚಾ’ಸಿ, ತಂ ವಿಜಾನಿಯ ಮಾತುಲಾ;
ಗನ್ತುಂ ಸರಸಿ ಕೀಳನ್ತೇ, ದಾರಕೇ ಚ ಪಯೋಜಯುಂ.
ಜಲಟ್ಠಂ ರುಕ್ಖಸುಸಿರಂ, ಜಲಚ್ಛಾದಿತಛಿದ್ದಕಂ;
ನಿಮುಜ್ಜಮಾನೋ ಛಿದ್ದೇನ, ಪವಿಸಿತ್ವಾ ಚಿರಟ್ಠಿತೋ.
ತತೋ ತಥೇವ ನಿಕ್ಖಮ್ಮ, ಕುಮಾರೇ ಸೇಸದಾರಕೇ;
ಉಪಚ್ಚ ಪುಚ್ಛಿಯನ್ತೋಪಿ, ವಞ್ಚೇತ’ಞ್ಞವಚೋಹಿ ಸೋ.
ಮನುಸ್ಸೇಹಾ’ಗತೇಹೇಸೋ, ನಿವಾಸೇತ್ವಾನ ವತ್ಥಕಂ;
ಕುಮಾರೋ ವಾರಿಮೋ ಗಯ್ಹ, ಸುಸಿರಮ್ಹಿ ಠಿತೋ ಅಹು.
ವತ್ಥಕಾನಿ ಗಣೇತ್ವಾನ, ಮಾರೇತ್ವಾ ಸೇಸದಾರಕೇ;
ಗನ್ತ್ವಾ ಆರೋಚಯುಂ ಸಬ್ಬೇ, ದಾರಕಾ ಮಾರಿತಾ ಇತಿ.
ಗತೇಸು ¶ ತೇಸು ಸೋ ಗನ್ತ್ವಾ, ಆಯುತ್ತಕಘರಂ ಸಕಂ;
ವಸಂ ಅಸ್ಸಾಸಿತೋ ತೇನ, ಅಹೂ ದ್ವಾದಸವಸ್ಸಿಕೋ.
ಪುನ ಸುತ್ವಾನ ಜೀವನ್ತಂ, ಕುಮಾರಂ ತಸ್ಸ ಮಾತುಲಂ;
ತತ್ಥ ಗೋಪಾಲಕೇ ಸಬ್ಬೇ, ಮಾರೇತುಂ ಸನ್ನಿಯೋಜಯುಂ.
ತಸ್ಮಿಂ ಅಹನಿ ಗೋಪಾಲಾ, ಲದ್ಧಾ ಏಕಂ ಚತುಪ್ಪದಂ;
ಅಗ್ಗಿಂ ಆಹರಿತುಂ ಗಾಮಂ, ಪೇಸೇತುಂ ತಂ ಕುಮಾರಕಂ.
ಸೋ ಗನ್ತ್ವಾ ಘರಮಾಯುತ್ತ-ಪುತ್ತಕಂಯೇವ ಪೇಸಯಿ;
ಪಾದಾ ರುಜನ್ತಿ ಮೇ ತೇಹಿ, ಅಗ್ಗಿಂ ಗೋಪಾಲಸನ್ತಿಕಂ.
ತತ್ಥ ಅಙ್ಗಾರ ಮಂಸಞ್ಚ,
ಖಾದಿಸ್ಸಸಿ ತುವಂ ಇತಿ;
ನೇ ಸಿ ಸೋ ತಂ ವಚೋ ಸುತ್ವಾ,
ಅಗ್ಗಿಂ ಗೋಪಾಲಸನ್ತಿಕಂ.
ತಸ್ಮಿಂ ಖಣೇ ಪೇಸಿತಾ ತೇ, ಪರಿಕ್ಖಿಪಿಯ ಮಾರಯುಂ;
ಸಬ್ಬೇ ಗೋಪೇ ಮಾರಯಿತ್ವಾ, ಮಾತುಲಾನಂ ನಿವೇದಯುಂ.
ತಥೋ ಸೋಳಸವಸ್ಸಂ ತಂ, ವಿಜಾನಿಂಸು ಚ ಮಾತುಲಾ;
ಮಾತಾ ಸಹಸ್ಸಞ್ಚಾ’ದಾಸಿ, ತಸ್ಸಾ ರಕ್ಖಞ್ಚ ಆದಿಸಿ.
ಆಯುತ್ತೋ ಮಾತುಸನ್ದೇಸಂ, ಸಬ್ಬಂ ತಸ್ಸ ನಿವೇದಿಯ;
ದತ್ವಾ ದಾಸಂ ಸಹಸ್ಸಞ್ಚ, ಪೇಸೇಸಿ ಪಣ್ಡುಲನ್ತಿಕಂ.
ಪಣ್ಡುಲಬ್ರಾಹ್ಮಣೋ ನಾಮ, ಭೋಗವಾ ವೇದಪಾರಗೋ;
ದಕ್ಖಿಣಸ್ಮಿಂ ದಿಸಾಭಾಗೇ, ವಸೀ ಪಣ್ಡುಲಗಾಮಕೇ.
ಕುಮಾರೋ ತತ್ಥ ಗನ್ತ್ವಾನ, ಪಸ್ಸಿ ಪಣ್ಡುಲಬ್ರಾಹ್ಮಣಂ;
‘‘ತ್ವಂ ಪಣ್ಡುಕಾಭಯೋ ತಾತ’’, ಇತಿ ಪುಚ್ಛಿಯ ಬ್ಯಾಕತೇ.
ತಸ್ಸ ಕತ್ವಾನ ಸಕ್ಕಾರಂ, ಆಹ ರಾಜಾ ಭವಿಸ್ಸಸಿ;
ಸಮಸತ್ತತಿವಸ್ಸಾನಿ, ರಜ್ಜಂ ತ್ವಂ ಕಾರಯಿಸ್ಸಸಿ.
ಸಿಪ್ಪಂ ಉಗ್ಗಣ್ಹ ತಾತಾತಿ, ಸಿಪ್ಪುಗ್ಗಹಮಕಾರಯೀ;
ಚನ್ದೇನ ತಸ್ಸ ಪುತ್ತೇನ, ಖಿಪ್ಪಂ ಸಿಪ್ಪಂ ಸಮಾಪಿತಂ.
ಅದಾ ಸತಸಹಸ್ಸಂ ಸೋ, ಯೋಧಸಙ್ಗಹಕಾರಣಾ;
ಯೋಧೇಸು ಸಙ್ಗಹಿತೇಸು, ತೇನ ಪಞ್ಚಸತೇಸು ಸೋ.
ಸಿಯುಂ ಯಾಯ ಗಯಿತಾನಿ, ಪಣ್ಣಾನಿ ಕನಕಾನಿ ತಂ;
ಮಹೇಸಿಂ ಕುರುಚನ್ದಞ್ಚ, ಮಮ ಪುತ್ತಂ ಪುರೋಹಿತಂ.
ಇಭಿ ¶ ವತ್ವಾ ಧನಂ ದತ್ವಾ, ಸಯೋಧಂ ನಿಹರಿ ತತೋ;
ಸೋ ನಾಮಂ ಸಾವಯಿತ್ವಾನ, ತತೋ ನಿಕ್ಖಮ್ಮ ಪುಞ್ಞವಾ.
ಲದ್ಧಬಲೋ ನಗರಕೇ, ಕಾಸಪಬ್ಬತ ಸನ್ತಿಕೇ;
ಸತ್ತಸತಾನಿ ಪುರಿಸೇ, ಸಬ್ಬೇಸಂ ಭೋಜನಾನಿ ಚ.
ತತೋ ನರಸಹಸ್ಸೇನ, ದ್ವಿಸತೇನ ಕುಮಾರಕೋ;
ಗಿರಿಕಣ್ಡ ಪಬ್ಬತಂ ನಾಮ, ಅಗಮಾ ಪರಿವಾರಿತೋ.
ಗಿರಿಕಣ್ಡಸಿವೋ ನಾಮ, ಪಣ್ಡುಕಾಭಯ ಮಾತುಲೋ;
ತಂ ಪಣ್ಡುವಾಸುದೇವೇನ, ದಿನ್ನಂ ಭುಞ್ಜತಿ ದೇಸಕಂ.
ಸೋ ಕರಿಸಸತಂ ಪಕ್ಕಂ, ತದಾ ಲಾವೇತಿ ಖತ್ತಿಯೋ;
ತಸ್ಸ ಧೀತಾ ರೂಪವತೀ, ಪಾಲೀ ನಾಮಾ’ಸಿ ಖತ್ತಿಯಾ.
ಸಾ ಮಹಾಪರಿವಾರೇನ, ಯಾನಮಾರುಯ್ಹ ಸೋಭನಂ;
ಪಿತುಭತ್ತಂ ಗಾಹಯಿತ್ವಾ, ಲಾವಕಾನಞ್ಚ ಗಚ್ಛತಿ.
ಕುಮಾರಸ್ಸ ಮನುಸ್ಸಾನಂ, ದಿಸ್ವಾ ತತ್ಥ ಕುಮಾರಿಕಂ;
ಆರೋಚೇಸುಂ ಕುಮಾರಸ್ಸ, ಕುಮಾರೋ ಸಹಸಾ’ಗತೋ.
ದ್ವೇಧಾ ತಂ ಪರಿಸಂ ಕತ್ವಾ, ಸತಂ ಯಾನಮಪೇಸಯಿ;
ತದನ್ತಿಕಂ ಸಪರಿಸಾ, ಕತ್ಥ ಯಾಸೀತಿ ಪುಚ್ಛಿತಂ.
ತಾಯ ವುತ್ತೇತು ಸಬ್ಬಸ್ಮಿಂ, ತಸ್ಸಂಸಾರತ್ತ ಮಾನಸೋ;
ಅತ್ತನೋ ಸಂವಿಭಾಗತ್ಥಂ, ಭನ್ತೇನಾ’ಯಾಚಿ ಖತ್ತಿಯೋ.
ಸಾಸಮೋರುಯ್ಹ ಯಾನಮ್ಹಾ, ಅದಾ ಸೋವಣ್ಣಪಾತಿಯಾ;
ಭತ್ತಂ ನಿಗ್ರೋಧ ಮೂಲಸ್ಮಿಂ, ರಾಜಪುತ್ತಸ್ಸ ಖತ್ತಿಯಾ.
ಗಣ್ಹಿ ನಿಗ್ರೋಧಪಣ್ಣಾನಿ, ಭೋಜೇತುಂ ಸೇಸಕೇ ಜನೇ;
ಸೋವಣ್ಣಭಾಜನಾನಾ’ಸುಂ, ತಾನಿ ಪಣ್ಣಾನಿ ತಂ ಖಣೇ.
ತಾನಿ ದಿಸ್ವಾ ರಾಜಪುತ್ತೋ, ಸರಿತ್ವಾ ದಿಜಭಾಸಿತಂ;
ಮಹೇಸಿಭಾವ ಯೋಗ್ಗಾಮೇ, ಕಞ್ಞಾಲದ್ಧಾತಿ ತುಸ್ಸಿಸೋ.
ಸಬ್ಬೇ ಭೋಜಾಪಯೀ ತೇಸಾ, ತಂ ನ ಖೀಯಿತ್ಥ ಭೋಜನಂ;
ಏಕಸ್ಸ ಪಟಿವಿಸೋ’ವ, ಗಹಿತೋ ತತ್ಥ ದಿಸ್ಸಥ.
ಏವಂ ಪುಞ್ಞಗುಣೂಪೇತಾ, ಸುಕುಮಾರೀ ಕುಮಾರಿಕಾ;
ಸುವಣ್ಣಪಾಲಿ ನಾಮೇನ, ತತೋಪ್ಪಭುತ ಆಸಿ ಸಾ.
ತಂ ¶ ಕುಮಾರ ಗಹೇತ್ವಾನ, ಯಾನಮಾರುಯ್ಹ ಖತ್ತಿಯೋ;
ಮಹಬ್ಬಲ ಪರಿಬ್ಯೂಳ್ಹೋ, ಅನುಸಂಣೀ ಅಪಕ್ಕಮಿ.
ತಂ ಸುತ್ವಾನ ಪಿತಾ ತಸ್ಸಾ, ನರೇ ಸಬ್ಬೇ ಅಪೇಸಯಿ;
ತೇ ಗನ್ತ್ವಾ ಕಲಹಂ ಕತ್ವಾ, ತಜ್ಜಿತಾ ತೇಹಿ ಆಗಮುಂ.
ಕಲಹನಗರಂ ನಾಮ, ಗಾಮೋ ತತ್ಥ ಕತೇ ಅಹು;
ತಂ ಸುತ್ವಾ ಭಾತರೋ ತಸ್ಸಾ, ಪಞ್ಚಯುದ್ಧಾಯು’ಪಾಗಮುಂ.
ಸಬ್ಬೇ ತೇ ಪಣ್ಡುಲಸುತೋ, ಚನ್ದೋಯೇವ ಅಘಾತಯಿ;
ಲೋಹಿತ ವಾಹಖಣ್ಡೋತಿ, ತೇಸಂ ಯುದ್ಧಮಹೀ ಅಹು.
ಮಹತಾ ಬಲ ಕಾಧಯನ,
ತತೋ ಸೋ ಪಣ್ಡುಕಾಭಯೋ;
ಗಙ್ಗಾಯ ಪಾರಿಮೇ ತಿರೇ,
ದೋಳಪಬ್ಬತಕಂ ಅಗಾ.
ತತ್ಥ ಚತ್ತಾರಿ ವಸ್ಸಾನಿ, ವಸಿ ತಂ ತತ್ಥ ಮಾತುಲಾ;
ಸುತ್ವಾ ಠಪೇತ್ವಾ ರಾಜಾನಂ, ತಂ ಯುದ್ಧತ್ಥಮುಪಾಗಮುಂ.
ಖನ್ಧಾವಾರಂ ನಿವೇಸೇತ್ವಾ, ಧೂಮರಕ್ಖಾಗ ಸನ್ತಿಕೇ;
ಭಾಗಿನೇಯ್ಯೇನ ಯುಜ್ಝಿಂಸು, ಭಾಗಿನೇಯ್ಯೋ ತು ಮಾತುಲೇ.
ಅನುಬನ್ಧೀ ಓರಗಙ್ಗಂ, ಮಲಾಪೇತ್ವಾ ನಿವತ್ತಿಯ;
ತೇಸಞ್ಚ ಖನ್ಧಾವಾರಮ್ಹಿ, ದುವೇ ವಸ್ಸಾನಿ ಸೋ ವಸೀ.
ಗನ್ತ್ವೋ’ಪತಿಸ್ಸಗಾಮಂ ತೇ, ತಮತ್ಥಂ ರಾಜಿನೋ’ಬ್ರವುಂ;
ರಾಜಾಲೇಖಂ ಕುಮಾರಸ್ಸ, ಸರಹಸ್ಸಂ ಸಪಾಹಿಣಿ.
‘‘ಪುಞ್ಜಸ್ಸು ಪಾರಗಙ್ಗಂ ತ್ವಂ, ಮಾ’ಗಾ ಓರಂತತೋ’’ಇತಿ;
ತಂ ಸುತ್ವಾ ತಸ್ಸ ಕುಜ್ಜಿಂಸು, ಭಾತರೋ ನವ ರಾಜಿನೋ.
ಉಪತ್ಥಮ್ಭೋ ತ್ವಮೇವಾ’ಸಿ, ಚಿರಂ ತಸ್ಸ ಇದಾನಿ ತು;
ರಟ್ಠಂ ದದಾಸಿ ತಸ್ಮಾ ತ್ವಂ, ಮಾರೇಸ್ಸಾಮಾ’ತಿ ಅಬ್ರವುಂ.
ಸೋ ತೇಸಂ ರಜ್ಜಮಪ್ಪೇಸಿ, ತೇ ತಿಸ್ಸಂ ನಾಮ ಭಾತರಂ;
ಸಬ್ಬೇವ ಸಹಿತಾ’ಕಂಸು, ರಜ್ಜಸ್ಸ ಪರಿನಾಯಕಂ.
ಏಸೋ ವೀಸತಿವಸ್ಸಾನಿ, ಅಭಯೋ’ಭಯ ದಾಯಕೋ;
ತತ್ಥೋ’ಪತಿಸ್ಸಗಾಮಮ್ಹಿ, ರಾಜಾ ರಜ್ಜಮಕಾರಯಿ.
ವಸನ್ತಿ ¶ ಧೂಮರಕ್ಖಾಗೇ, ಸರೇ ತುಮ್ಬರಿಯಙ್ಗಣೇ;
ಚರತೇ ವಳವಾ ರುಪಾ, ಯಕ್ಖೀ ಚೇತಿಯನಾಮಿಕಾ.
ಏಕೋ ದಿಸ್ವಾನ ಸೇನಙ್ಗಂ, ಉತ್ತಪಾದಂ ಮನೋರಮಂ;
ಆರೋಚೇಸಿ ಕುಮಾರಸ್ಸ, ವಳವೇ’ತ್ತೀ’ದಿಸೀ ಇತಿ.
ಕುಮಾರೋ ರಸ್ಮಿಮಾದಾಯ, ಗಹೇತುಂ ತಂ ಉಪಾಗಮಿ;
ಪಚ್ಛತೋ ಅಗತಂ ದಿಸ್ವಾ, ಭೀತಾ ತೇಜೇನ ತಸ್ಸಸಾ.
ಧಾವಿ’ನನ್ತರಧಾಯಿತ್ವಾ, ಧಾವನ್ತಿ ಮನುಬನ್ಧಿಸೋ;
ಧಾವಮಾನಾ ಸರಂ ಹಂ ಸಾ, ಸತ್ತಕ್ಖತ್ತುಂ ಪರಿಕ್ಖಿಪಿ.
ಓತರಿತ್ವಾ ಮಹಾಗಙ್ಗಂ, ಉತ್ತರಿತ್ವಾ ತತೋ ಪನ;
ಧುಮರಕ್ಖಂ ಪಬ್ಬತಂ ತಂ, ಸತ್ತಕ್ಖತ್ತುಂ ಪರಿಕ್ಖಿಪಿ.
ತಂ ಸರಂ ಪುನ ತಿಕ್ಖತ್ತುಂ, ಪರಿಕ್ಖಿಪಿ ತತೋ ಪುನ;
ಗಙ್ಗಂ ಕಚ್ಛಕತಿತ್ಥೇನ, ಸಮೋತರಿ ತಹಿಂ ತು ಸೋ.
ಗಹೇಸಿತಂ ವಾಲಧಿಸ್ಮಿಂ, ತಾಲಪತ್ತಞ್ಚ ತೋಯಗಂ;
ತಸ್ಸ ಪುಞ್ಞಾನುಭಾವೇನ, ಸೋ ಅಹೋಸಿ ಮಹಾ ಅಸಿ.
ಉಚ್ಚಾರೇಸಿ ಅಸಿಂ ದಜ್ಜಂ, ‘‘ಮಾರೋಮೀ’’ತಿ ತಮಾಹ ಸಾ;
ರಜ್ಜಂ ಗಹೇತ್ವಾ ತೇ ದಜ್ಜಂ, ಸಾಮಿ ಮಾಮಂ ಅಮಾರಯಿ.
ಗೀವಾಯ ತಂ ಗಹೇತ್ವಾ ಸೋ, ವಿಜ್ಝಿತ್ವಾ ಅಸಿಕೋಟಿಯಾ;
ನಾಸಾಯ ರಜ್ಜುಯಾ ಬನ್ಧಿ, ಸಾ ಅಹೋಸಿ ವಸಾನುಗಾ.
ಗನ್ತ್ವಾ ತಂ ಧುಮರಕ್ಖಂ ಸೋ, ತಮಾರುಯ್ಹ ಮಹಬ್ಬಲೋ;
ತತ್ಥ ಚತ್ತಾರಿ ವಸ್ಸಾನಿ, ಧೂಮರಕ್ಖನ ಗೇ ವಸಿ.
ತತೋ ನಿಕ್ಖಮ್ಮ ಸಬಲೋ, ಆಗಮ್ಮಾ’ರಿಟ್ಠಪಬ್ಬತಂ;
ಸುದ್ಧಿಕಾಲಮಪೇಕ್ಖನ್ತೋ, ತತ್ಥ ಸತ್ತಸಮಾವಸಿ.
ದ್ವೇ ಮಾತುಲೇ ಠಪೇತ್ವಾನ, ತಸ್ಸ ಸೇಸಟ್ಠಮಾತುಲಾ;
ಯುದ್ಧಸಜ್ಜಾ ಅರಿಟ್ಠಂ ತಂ, ಉಪಸಙ್ಕಮ್ಮ ಪಬ್ಬತಂ.
ಖನ್ಧಾವಾರಂ ನಗರಕೇ, ನಿವೇಸೇತ್ವಾ ಚಮೂಪತಿಂ;
ದತ್ವಾ ಪರಿಕ್ಖಿಪಾಪೇಸುಂ, ಸಮನ್ತಾ’ರಿಟ್ಠಪಬ್ಬತಂ.
ಯಕ್ಖಿನಿಯಾ ಮನ್ತಯಿತ್ವಾ, ತಸ್ಸಾ ವಚನಯುತ್ತಿಯಾ;
ದತ್ವಾ ರಾಜಪರಿಕ್ಖಾರಂ, ಪಣ್ಣಾಕಾರಾ ಯುವಾನಿ ಚ.
‘‘ಗಣ್ಹಾಥ ¶ ಸಬ್ಬಾನೇ’ತಾನಿ, ಖಮಾಪೇಸ್ಸಾಮಿ ವೋ ಅಹಂ’’;
ಇತಿ ವತ್ವಾನ ಪೇಸೇಸಿ, ಕುಮಾರೋ ಪುರತೋ ಬಲಂ.
ಗಣ್ಹಿಸ್ಸಾಮಿ ಪವಿಟ್ಠನ್ತಿ, ವಿಸ್ಸಟ್ಠೇಸು ತು ತೇಸು ಸೋ;
ಆರುಯ್ಹ ಯಕ್ಖವಳವಂ, ಮಹಾಬಲಪುರಕ್ಖತೋ.
ಯುದ್ಧಾಯ ಪಾವಿಸಿ ಯಕ್ಖೀ, ಮಹಾರಾವ ಮರಾಪಿಸಾ;
ಅನ್ತೋ ಬಹಿಬಲಞ್ಚಸ್ಸ, ಉಕ್ಕುಟ್ಠಿಂ ಮಹತಿಂ ಅಕಾ.
ಕುಮಾರಪುರಿಸಾ ಸಬ್ಬೇ, ಪರಸೇನಾ ನರೇ ಬಹೂ;
ಘಾತೇತ್ವಾ ಮಾತುಲೇ ಚ’ತ್ಥ, ಸೀಸರಾಸಿಂ ಅಕಂಸು ತೇ.
ಸೇನಾಪತಿ ಪಾಲಯಿತ್ವಾ, ಗುಮ್ಬಟ್ಠಾನಂ ಸಪಾವಿಸಿ;
ಸೇನಾಪತಿ ಗುಮ್ಬಕೋ’ತಿ, ತೇನ ಏಸ ಪವುಚ್ಚತಿ.
ಉಪರಿಟ್ಠಮಾತುಲಸಿರಂ, ಸೀಸರಾಸಿಂ ಸಪಸ್ಸಿಯ;
ಲಾಬುರಾಸೀ’ವ ಇಚ್ಛಾಹ, ತೇನಾ’ಸಿ ಲಾಬುಗಾಮಕೋ.
ಏವಂ ವಿಜಿತಸಙ್ಗಾಮೋ, ತತೋ ಸೋ ಪಣ್ಡುಕಾಭಯೋ;
ಅಯ್ಯಕಸ್ಸಾ’ನುರಾಧಸ್ಸ, ವಸನಠಾನಮಾಗಮಿ.
ಅತ್ತನೋ ರಾಜಗೇಹಂ ಸೋ, ತಸ್ಸ ದತ್ವಾನ ಅಯ್ಯಕೋ;
ಅಞ್ಞತ್ಥವಾಸಂ ಕಪ್ಪೇಸಿ, ಸೋ ತು ತಸ್ಮಿಂ ಘರೇ ವಸಿ.
ಪುಚ್ಛಾಪೇತ್ವಾನ ನೇಮಿತ್ತಂ, ವತ್ಥುವಿಜ್ಜಾ’ವಿದುಂ ತಥಾ;
ನಗರಂ ಪವರಂ ತಸ್ಮಿಂ, ಗಾಮೇಯೇವ ಅಮಾಪಯಿ.
ನಿವಾಸತ್ತಾ’ನುರಾಧಾನಂ, ಅನುರಾಧಪುರಂ ಅಹು;
ನಕ್ಖತ್ತೇನಾ’ನುರಾಧೇನ, ಪತಿಟ್ಠಾಪಿತ ತಾಯ ಚ.
ಆಣಾಪೇತ್ವಾ ಮಾತುಲಾನಂ, ಛತ್ತಂ ಜಾತಸ್ಸರೇ ಇಧ;
ಧೋವಾಪೇತ್ವಾ ಧಾರಯಿತ್ವಾ, ತಂ ಸರೇಯೇವ ವಾರಿನಾ.
ಅತ್ತನೋ ಅಭಿಸೇಕಂ ಸೋ, ಕಾರೇಸಿ ಪಣ್ಡುಕಾಭಯೋ;
ಸುವಣ್ಣಪಾಲಿಂ ದೇವಿಂ ತಂ, ಮಹೇಸಿತ್ತೇ ಭಿಸೇಚಯಿ.
ಅದಾ ಚನ್ದಕುಮಾರಸ್ಸ, ಪೋರೋಹಿಚ್ಚಂ ಯಥಾವಿಧಿ;
ಠಾನನ್ತರಾನಿ ಸೇಸಾನಂ, ಭಚ್ಚಾನಞ್ಚ ಯಥಾರಹಂ.
ಮಾತುಯಾ ಉಪಕಾರತ್ತಾ, ಅತ್ತನೋ ಚ ಮಹೀಪತಿಂ;
ಅಘಾತಯಿತ್ವಾ ಜೇಟ್ಠಂ ತಂ, ಮಾತುಲಂ ಅಭಯಂ ಪನ.
ರತ್ತಿರಜ್ಜಂ ಅದಾ ತಸ್ಸ, ಅಹು ನಗರಗುತ್ತಿಕೋ;
ತದುಪಾದಾಯ ನಗರೇ, ಅಹೂ ನಗರಗುತ್ತಿಕೋ.
ಸಸ್ಸುರಂ ¶ ತಂ ಅಘಾತೇತ್ವಾ, ಗಿರಿಕಣ್ಡಸಿವಮ್ಪಿ ಚ;
ಗಿರಿಕಣ್ಣದೇಸಂ ತಸ್ಸೇ’ವ, ಮಾತುಲಸ್ಸ ಅದಾಸಿ ಸೋ.
ಸರಂ ತಞ್ಚ ಖಣಾಪೇತ್ವಾ, ಕಾರಾಪೇಸಿ ಬಹೂ ದಕಂ;
ಜಯೇ ಜಲಸ್ಸ ಗಾಹೇನ, ಜಯವಾಪೀತಿ ಅಹುತಂ.
ಕಾಲವೇಲಂ ನಿವಾಸೇಸಿ, ಯಕ್ಖಂಪುರ ಪುರತ್ಥಿಮೇ;
ಯಕ್ಖಂ ತು ಚಿತ್ತರಾಜಂ ತಂ, ಹೇಟ್ಠೋ ಅಭಯವಾಪಿಯಾ.
ಪುಬ್ಬೋಪಕಾರಿಂ ದಾಸಿಂ ತಂ, ನಿಬ್ಬತ್ತಂ ಯಕ್ಖಯೋನಿಯಾ;
ಪುರಸ್ಸ ದಕ್ಖಿಣದ್ವಾರೇ, ಸೋ ಕತಞ್ಞೂ ನಿವಾಸಯಿ.
ಅನ್ತೋ ನರಿನ್ದವತ್ಥುಸ್ಸ, ವಳವಾಮುಖಯಕ್ಖಿನಿಂ;
ನಿವಾಸೇಸಿ ಬಲಿಂ ತೇಸಂ, ಅಞ್ಞೇಸಞ್ಚಾನುವಸ್ಸಕಂ.
ದಾಪೇಸಿ ಛಣಕಾಲೇ ತು, ಚಿತ್ತರಾಜೇನ ಸೋ ಸಹ;
ಸಮಾಸನೇ ನಿಸೀದಿತ್ವಾ, ದಿಬ್ಬಮಾನುಸನಾಟಕಂ.
ಕಾರೇನ್ತೋ’ಭಿರಮಿ ರಾಜಾ, ರತಿಖಿಡ್ಡಾ ಸಮಪ್ಪಿತೋ;
ದ್ವಾರಗಾಮೇ ಚ ಚತುರೋ, ಭಯವಾಪಿಞ್ಚ ಕಾರಯಿ.
ಮಹಾಸುಸಾನಘಾತನಂ, ಪಚ್ಛಿಮರಾಜಿನಿಂ ತಥಾ;
ವೇಸ್ಸವಣಸ್ಸ ನಿಗ್ರೋಧಂ, ಬ್ಯಾಧಿದೇವಸ್ಸ ತಾಲಕಂ.
ಯೋನಸಭಾಗ ವತ್ಥುಞ್ಚ, ಮಹೇಜ್ಜಘರಮೇವ ಚ;
ಏತಾನಿ ಪಚ್ಛಿಮದ್ವಾರ-ದಿಸಾಭಾಗೇ ನಿವೇಸಯಿ.
ಪಞ್ಚಸತಾನಿ ಚಣ್ಡಾಲ-ಪುರಿಸೇ ಪುರಸೋಧಕೇ;
ದುವೇಸತಾನಿ ಚಣ್ಡಾಲ-ಪುರಿಸೇ ವಚ್ಚಸೋಧಕೇ.
ದಿಯಡ್ಢಸತಚಣ್ಡಾಲೇ, ಮತನೀಹಾರಕೇ’ಪಿ ಚ;
ಸುಸಾನ ಗೋಪಚಣ್ಡಾಲೇ, ತತ್ತಕೇಯೇವ ಆದಿಸಿ.
ತೇಸಂ ಗಾಮಂ ನಿವೇಸೇಸಿ, ಸುಸಾನಾ ಪಚ್ಛಿಮುತ್ತರೇ;
ಯಥಾ ವಿಹಿತಕಮ್ಮಾನಿ, ತಾನಿ ನಿಚ್ಚಂ ಅಕಂಸುತೇ.
ತಸ್ಸ ಚಣ್ಡಾಲಗಾಮಸ್ಸ, ಪುಬ್ಬುತ್ತರದಿಸಾಯ ತು;
ನೀಚಸುಸಾನಕಂ ನಾಮ, ಚಣ್ಡಾಲಾನಮಕಾರಯಿ.
ತಸ್ಸುತ್ತರೇ ಸುಸಾನಸ್ಸ, ಪಾಸಾಣಪಬ್ಬತನ್ತರೇ;
ಆವಾಸಪಾಲಿಝಾಧಾನಂ, ತದಾ ಆಸಿ ನಿವೇಸಿತಾ.
ತದುತ್ತರೇ ¶ ದಿಸಾಭಾಗೇ, ಯಾವ ಗಾಮಣಿ ವಾಪಿಯಾ;
ತಾಪಸಾನಂ ಅನೇಕೇಸಂ, ಅಸ್ಸಮೋ ಆಸಿ ಕಾರಿತೋ.
ತಸ್ಸೇವ ಚ ಸುಸಾನಸ್ಸ, ಪುರತ್ಥಿಮದಿಸಾಯ ತು;
ಜೋತಿಯಸ್ಸ ನಿಗಣ್ಠಸ್ಸ, ಘರಂ ಕಾರೇಸಿ ಭೂಪತಿ.
ತಸ್ಮಿಂಯೇವ ದೇಸಸ್ಮಿಂ, ನಿಗಣ್ಠೋ ಗಿರಿನಾಮಕೋ;
ನಾನಾಪಾಸಣ್ಡಕಾ ಚೇವ, ವಸಿಂಸು ಸಮಣಾ ಬಹೂ.
ತತ್ಥೇವ ಚ ದೇವಕುಲಂ, ಅಕಾರೇಸಿ ಮಹೀಪತಿ;
ಕುಭಣ್ಡಸ್ಸ ನಿಗಣ್ಠಸ್ಸ, ತಂನಾಮಕಮಹೋಸಿತಂ.
ತತೋ ತು ಪಚ್ಛಿಮೇ ಭಾಗೇ, ಝಾಧಪಾಲಿಪುರತ್ಥಿಮೇ;
ಮಿಚ್ಛಾದಿಟ್ಠಿಕುಲಾನಂ ತು, ವಸೀ ಪಞ್ಚಸತಂ ತಹಿಂ.
ಪರಂ ಜೋತಿಯಗೇಹಮ್ಹಾ, ಓರಂ ಗಾಮಣಿ ವಾಪಿಯಾ;
ಸೋ ಪರಿಬ್ಬಾಜಕಾರಾಮಂ, ಕಾರಾಪೇಸಿ ತಥೇವ ಚ.
ಆಜೀವಕಾನಂ ಗೇಹಞ್ಚ, ಬ್ರಾಹ್ಮಣವಟ್ಟಮೇವ ಚ;
ಸಿವಿಕಾ ಸೋತ್ಥಿಸಾಲಾ ಚ, ಅಕಾರೇಸಿ ತಹಿಂ ತಹಿಂ.
ದಸವಸ್ಸಾಭಿಸೇಕೋ ಸೋ, ಗಾಮಸೀಮಾ ನಿವೇಸಯಿ;
ಲಂಕಾದೀಪಮ್ಹಿ ಸಕಲೇ, ಲಂಕಿನ್ದೋ ಪಣ್ಡುಕಾಭಯೋ.
ಸೋ ಕಾಲವೇಲಚಿತ್ತೇಹಿ, ದಿಸ್ಸಮಾನೇಹಿ ಭೂಪತಿ;
ಸಹಾ’ನು ಭೋಸಿ ಸಮ್ಪತಿಂ, ಯಕ್ಖಭೂತಸಹಾಯ ವಾ.
ಪಣ್ಡುಕಾಭಯರಞ್ಞೋ ಚ, ಅಭಯಸ್ಸ ಚ ಅನ್ತರೇ;
ರಾಜಸುಞ್ಞಾನಿ ವಸ್ಸಾನಿ, ಅಹೇಸುಂ ದಸಸತ್ತ ಚ.
ಸೋ ಪಣ್ಡುಕಾಭಯಮಹೀಪತಿ ಸತ್ತತಿಂಸ–
ವಸ್ಸೋ’ಧಿಗಮ್ಮ ಧಿತಿಮಾ ಧರಣೀ ಪತಿತ್ತಂ;
ರಮ್ಮೇ ಅನುನಮನುರಾಧಪುರೇ ಸಮಿದ್ಧೇ;
ವಸ್ಸಾನಿ ಅಕಾರಯಿ ರಜ್ಜಮೇತ್ಥಾತಿ.
ಸುಜನಪ್ಪಸಾದಸಂವೇಗತ್ಥಾಯ ಕತೇ ಮಹಾವಂಸೇ
ಪಣ್ಡುಕಾಭಯಾಭಿಸೇಕೋನಾಮ
ದಸಮೋ ಪರಿಚ್ಛೇದೋ.
ಏಕಾದಸಮ ಪರಿಚ್ಛೇದ
ದೇವಾನಂಪಿಯತಿಸ್ಸಾಭಿಸೇಕೋ
ತಸ್ಸಚ್ಚಯೇ ¶ ತಸ್ಸ ಸುತೋ, ಮುಟಸಿವೋ’ತಿ ವಿಸ್ಸುತೋ;
ಸುವಣ್ಣಪಾಲಿಯಾ ಪುತ್ತೋ, ಪತ್ತೋ ರಜ್ಜಮನಾಕುಲಂ.
ಮಹಾಮೇಘವನುಯ್ಯಾನಂ, ನಾಮನುಗಗುಣೋದಿತಂ;
ಫಲಪುಪ್ಫತರುಪೇತಂ, ಸೋ ರಾಜಾ ಕಾರಯಿ ಸುಭಂ.
ಉಯ್ಯಾನಠಾನಗ್ಗಹಣೇ, ಮಹಾಮೇಘೋ ಅಕಾಲಜೋ;
ಪಾವಸ್ಸಿತೇನ ಉಯ್ಯಾನಂ, ಮಹಾಮೇಘವನಂ ಅಹು.
ಸಟ್ಠಿವಸ್ಸಾನಿ ಮುಟಸಿವೋ, ರಾಜಾ ರಾಜ್ಜಮಕಾರಯಿ;
ಅನುರಾಧೇ ಪುರವರೇ, ಲಂಕಾ ಭುವದನೇ ಸುಭೇ.
ತಸ್ಸ ಪುತ್ತಾ ದಸಾ’ಹೇಸುಂ, ಅಞ್ಞಮಞ್ಞಹಿತೇಸಿನೋ;
ದುವೇ ಧೀತಾ ಚಾ’ನುಕುಲಾ, ಕುಲಾನುಚ್ಛವಿಕಾ ಅಹೂ.
ದೇವಾನಂ ಪಿಯತಿಸ್ಸೋತಿ, ವಿಸ್ಸುತೋ ದುತಿಯೋ ಸುತೋ;
ತೇಸು ಭಾತೂಸು ಸಬ್ಬೇಸು, ಪುಞ್ಞಾಪಞ್ಞಾಧಿಕೋ ಅಹು.
ದೇವಾನಂ ಪಿಯತಿಸ್ಸೋ ಸೋ, ರಾಜಾ’ಸಿ ಪಿತುಅಚ್ಚಯೇ;
ತಸ್ಸಾ’ಭಿಸೇಕೇನ ಸಮಂ, ಬಹೂನ’ಚ್ಛರಿಯಾನ’ಹುಂ.
ಲಂಕಾದೀಪಮ್ಹಿ ಸಕಲೇ, ನಿಧಯೋ ರತನಾನಿ ಚ;
ಅನ್ತೋಠಿತಾನಿ ಉಗ್ಗನ್ತ್ವಾ, ಪಥವೀತಲಮಾರುಹುಂ.
ಲಂಕಾದೀಪಸಮೀಪಮ್ಹಿ, ಭಿನ್ನನಾವಾಗತಾನಿ ಚ;
ತತ್ರಜಾತಾನಿ ಚ ಥಲಂ, ರತನಾನಿ ಸಮಾರುಹುಂ.
ಛಾತಪಬ್ಬತಪಾದಮ್ಹಿ, ತಿಸ್ಸೋ ಚ ವೇಳುಯಟ್ಠಿಯೋ;
ಜಾತಾರಥಪತೋದೇನ, ಸಮಾನಾ ಪರಿಮಾಣತೋ.
ತಾಸು ಏಕಾಲತಾಯಟ್ಠಿ, ರಜತಾ’ಭಾ ತಹಿಂ ಲತಾ;
ಸುವಣ್ಣಾವಣ್ಣಾರುಚಿರಾ, ದಿಸ್ಸನ್ತೇತಾ ಮನೋರಮಾ.
ಏಕಾ ಕುಸುಮಾ ಯಟ್ಠೀತು, ಕುಸುಮಾನಿ ತಹಿಂ ಪನ;
ನಾನಾನಿ ನಾನಾವಣ್ಣಾನಿ, ದಿಸ್ಸನ್ತೇ’ತಿ ಫುಟಾನಿ ಚ.
ಏಕಾಸಕುಣಯಟ್ಠಿತು ¶ , ತಹಿಂ ಪಕ್ಖಿಮಿಗಾ ಬಹೂ;
ನಾನಾ ಚ ನಾನಾವಣ್ಣಾ ಚ, ಸಜೀವಾ ವಿಯ ದಿಸ್ಸರೇ.
ಭಯಗಜರಥಾಮಲಕಾ, ವಲಯಙ್ಗುಲಿವೇಠಕಾ;
ಕಕುಧಫಲಾಪಾಕತಿಕಾ, ಇಚ್ಚೇತಾ ಅಟ್ಠಜಾತಿಯೋ.
ಮುತ್ತಾಸಮುದಾ ಉಗ್ಗನ್ತ್ವಾ, ತೀರೇ ವಟ್ಟಿ ವಿಯ ಠಿತಾ;
ದೇವಾನಂ ಪಿಯತಿಸ್ಸಸ್ಸ, ಸಬ್ಬಂ ಪುಞ್ಞವಿಜಮ್ಭಿತಂ.
ಇನ್ದನೀಲಂ ವೇಳುರಿಯಂ, ಲೋಹಿತಙ್ಕಮಣಿಧಿ’ಮೇ;
ರಜತಾನಿ ಪನೇ’ತಾನಿ, ಮುತ್ತಾ ತಾ ತಾವಯಟ್ಠಿಯೋ.
ಸತ್ತಹಬ್ಭನ್ತರೇಯೇವ, ರಞ್ಞೋ ಸನ್ತಿಕಮಾಹರುಂ;
ತಾನಿ ದಿಸ್ವಾ ಪತೀತೋ ಸೋ, ರಾಜಾ ಇತಿ ವಿಚಿನ್ತಯಿ.
ರತನಾನಿ ಅನಗ್ಘಾನಿ, ಧಮ್ಮಾಸೋಕೋ ಇಮಾನಿಮೇ;
ಸಹಾಯೋ’ರಹತೇನಾ’ಞ್ಞೋ, ತಸ್ಸ ದಸ್ಸಂ ಇಮಾನ’ತೋ.
ದೇವಾನಂ ಪಿಯತಿಸ್ಸೋ ಚ, ಧಮ್ಮಾಸೋಕೋ ಚ ತೇ ಇಮೇ;
ದ್ವೇ ಅದಿಟ್ಠಸಹಾಯಾಹಿ, ಚಿರಪ್ಪಭುತಿ ಭೂಪತಿ.
ಭಾಗಿನೇಯ್ಯಂ ಮಹಾರಿಟ್ಠಂ, ಅಮಚ್ಚಂ ಪಮುಖಂ ತತೋ;
ದಿಜಂ ಅಮಚ್ಚಂ ಗಣತಂ, ರಾಜಾ ತೇ ಚತುರೋ ಜನೇ.
ದೂತೋ ಕತ್ವಾನ ಪಾಹೇಸಿ, ಬಲೋಘಪರಿವಾರಿತೇ;
ಗಾಹಾ ಪೇತ್ವಾ ಅನಗ್ಘಾನಿ, ರತನಾನಿ ಇಮಾನಿ ಸೋ.
ಮಣಿಜಾತೀ ಚ ತಿಸ್ಸೋ ತಾ, ತಿಸ್ಸೋ ಚ ರಥಯಟ್ಠಿಯೋ;
ಸಙ್ಖಞ್ಚ ದಕ್ಖಿಣಾವತ್ತಂ, ಮುತ್ತಾ ಜಾತೀ ಚ ಅಟ್ಠ ತಾ.
ಆರುಯ್ಹ ಜಮ್ಬುಕೋಲಮ್ಹಿ, ನಾವಂ ಸತ್ತದಿನೇನ ತೇ;
ಸುಖೇನ ತಿತ್ಥಂ ಲದ್ಧಾನ, ಸತ್ತಾಹೇನ ತತೋ ಪುನ.
ಪಾಟಲಿಪುತ್ತಂ ಗನ್ತ್ವಾನ, ಧಮ್ಮಾಸೋಕಸ್ಸ ರಾಜಿನೋ;
ಅದಂಸು ಪಣ್ಣಾಕಾರೇತೇ, ದಿಸ್ವಾ ತಾನಿ ಪಸೀದಿ ಸೋ.
ರತನಾನಿ’ದಿಸಾನೇತ್ಥ, ನತ್ಥಿ ಮೇ ಇತಿ ಚಿನ್ತಿಯ;
ಅದಾ ಸೇನಾಪತಿಟ್ಠಾನಂ, ತುಟ್ಠೋ’ರಿಟ್ಠಸ್ಸ ಭೂಪತಿ.
ಪೋರೋಹಿಚ್ಚಬ್ರಾಹ್ಮಣಸ್ಸ, ದಣ್ಡನಾಯತಂ ಪನ;
ಅದಾಸಿ ತಸ್ಸಾ’ಮಚ್ಚಸ್ಸ, ಸೇಟ್ಠಿತ್ತಂ ಗಣಕಸ್ಸ ತು.
ತೇಸಂ ಅನಪ್ಪಕೇ ಭೋಗೇ, ದತ್ವಾ ವಾಸಘರಾನಿ ಚ;
ಮಹಾಮಚ್ಚೇಹಿ ಮನ್ತೇನ್ತೋ, ಪಸ್ಸಿತ್ವಾ ಪಟಿಪಾಭತಂ.
ವಾಲಬೀಜನೀ ¶ ಮುಣ್ಹಿಸಂ, ಖಗ್ಗಂ ಛತ್ತಞ್ಚ ಪಾದುಕಂ;
ಮೋಳಿಂ ವತಂ ಸಪಾಮಙ್ಗಂ, ಭಿಙ್ಕಾರಂ ಹರಿಚನ್ದನಂ.
ಅಧೋವಿಮಂ ವತ್ಥಕೋಟಿಂ, ಮಹಗ್ಘಂ ಹತ್ಥಪುಞ್ಛನಿಂ;
ನಾಗಾ’ಹಟಂ ಅಞ್ಜನಞ್ಚ, ಅರುಣಾಭಞ್ಚ ಮತ್ತಿಕಂ.
ಅನೋತತ್ತೋದಕಞ್ಚೇವ, ಗಙ್ಗಾಸಲಿಲಮೇವ ಚ;
ಸಙ್ಖಞ್ಚ ನನ್ದಿಯಾವಟ್ಟಂ, ವಡ್ಢಮಾನಂ ಕುಮಾರಿಕಂ.
ಹೇಮಭೋಜನಕಣ್ಡಞ್ಚ, ಸಿವಿಕಞ್ಚ ಮಹಾರಹಂ;
ಹರೀಟಕಂ ಆಮಲಕಂ, ಮಹಗ್ಘಂ ಅಮತೋಸಧಂ.
ಸುಕಾಹಟಾನಂ ಸಾಲೀನಂ, ಸಟ್ಠಿವಾಹಸತಾನಿ ಚ;
ಅಭಿಸೇಕೋ ಪಕರಣಂ, ಪರಿವಾರವಿಸೇಸಿತಂ.
ದತ್ವಾ ಕಾಲೇ ಭಹಾಯಸ್ಸ, ಪಣ್ಣಾಕಾರೇ ನರಿಸ್ಸರೋ;
ದೂತೇ ಪಾಹೇಸಿಸದ್ಧಮ್ಮ-ಪಣ್ಣಾಕಾರಮಿಮಮ್ಪಿಚ.
ಅಹಂ ಬುದ್ಧಞ್ಚ ಧಮ್ಮಞ್ಚ, ಸಙ್ಘಞ್ಚ ಸರಣಂ ಗತೋ;
ಉಪಾಸಕತ್ತಂ ದೇಸೇಸಿಂ, ಸಕ್ಯಪುತ್ತಸ್ಸ ಸಾಸನೇ.
ತ್ವಮ್ಪಿಮಾನಿ ರತನಾನಿ, ಉತ್ತಮಾನಿ ನರುತ್ತಮ;
ಚಿತ್ತಂ ಪಸಾದಯಿತ್ವಾನ, ಸದ್ಧಾಯ ಸರಣಂ ವಜ.
‘‘ಕರೋಥ ಮೇ ಸಹಾಯಸ್ಸ, ಅಭಿಸೇಕಂ ಪುನೋ’’ ಇತಿ;
ವತ್ವಾ ಸಹಯಾ’ಮಚ್ಚೇತೇ, ಸಕ್ಕರಿತ್ವಾ ಚ ಪೇಸಯಿ.
ಪಞ್ಚಮಾಸೇ ವಸಿತ್ವಾನ, ತೇ ಮಚ್ಚಾ’ತಿವಸಕ್ಕತಾ;
ವೇಸಾಖಸುಕ್ಖಪಕ್ಖಾದಿ-ದಿನೇ ದೂತಾ ವಿನಿಗ್ಗತಾ.
ತಾಮಲಿತ್ತಿಯಮಾರುಯ್ಹ, ನಾವಂ ತೇಜಮ್ಬುಕೋಲಕೇ;
ಓರುಯ್ಹ ಕೂಪಂ ಪಸ್ಸಿಂಸು, ಪತ್ವಾ ದ್ವಾದಸಿಯಂ ಇಧ.
ಅದಂಸು ಪಣ್ಣಾಕಾರೇ ತೇ, ದೂತಾ ಲಂಕಾದೀಪಸ್ಸತೇ;
ತೇಸಂ ಮಹನ್ತಂ ಸಕ್ಕಾರಂ, ಲಂಕಾಪತಿ ಅಕಾರಯಿ.
ತೇ ಮಗ್ಗಸಿರಮಾಸಸ್ಸ, ಆದಿಚನ್ದೋದಯೇಜಿನೇ;
ಅಭಿಸಿತ್ತಞ್ಚ ಲಂಕಿನ್ದಂ, ಅಮಚ್ಚಾ ಸಾಮಿಭತ್ತಿನೋ.
ಧಮ್ಮಾಸೋಕಸ್ಸ ವಚನಂ, ವತ್ವಾ ಸಾಮಿ ಹಿತೇರತಾ;
ಪುನೋಪಿ ಅಭಿಸಿಞ್ಚಿಂಸು, ಲಂಕಾಹಿತಸುಖೇರತಂ.
ವೇಸಾಖೇ ¶ ನರಪತಿ ಪುಣ್ಣಮಾಯಮೇವಂ;
ದೇವಾನಂ ಪಿಯವಚನೋ ಪಗೂಳನಾಮೋ;
ಲಂಕಾಯಂ ಪವೀತತಪೀತಿ ಉಸ್ಸವಾಯಂ;
ಅತ್ತಾನಂ ಜನಸುಖದೋ’ಭಿಸೇಚಯೀ ಸೋತಿ.
ಸುಜನಪ್ಪಸಾದಸಂವೇಗತ್ಥಾಯ ಕತೇ ಮಹಾವಂಸೇ
ದೇವಾನಂಪಿಯತಿಸ್ಸಾಭಿಸೇಕೋನಾಮ
ಏಕಾದಸಮೋ ಪರಿಚ್ಛೇದೋ.
ದ್ವಾದಸಮ ಪರಿಚ್ಛೇದ
ನಾನಾದೇಸಪಸಾದೋ
ಥೇರೋ ಮೋಗ್ಗಲಿಪುತ್ತೋ ಸೋ, ಜಿನಸಾಸನ ಜೋತಕೋ;
ನಿಟ್ಠಾಪೇತ್ವಾನ ಸಂಗೀತಿಂ, ಪೇಕ್ಖಮಾನೋ ಅನಾಗತಂ.
ಸಾಸನಸ್ಸ ಪತಿಟ್ಠಾನಂ, ಪಚ್ಚನ್ತೇಸು ಅವೇಕ್ಖಿಯ;
ಪೇಸೇಸಿ ಕತ್ತಿಕೇ ಮಾಸೇ, ತೇತೇ ಥೇರೇ ತಹಿಂ ತಹಿಂ.
ಥೇರಂ ಕಸ್ಮೀರಗನ್ಧಾರಂ, ಮಜ್ಝನ್ತಿಕಮಪೇಸಯಿ;
ಅಪೇಸಯೀ ಮಹಾದೇವ-ತ್ಥೇರಂ ಮಹಿಸಮಣ್ಡಲಂ.
ವನವಾಸಿಂ ಅಪೇಸಯಿ, ಥೇರಂ ರಕ್ಖಿತನಾಮಕಂ;
ತಥಾ’ಪರನ್ತಕಂ ಯೋನ-ಧಮ್ಮರಕ್ಖಿತನಾಮಕಂ.
ಮಹಾರಟ್ಠಂ ಮಹಾಧಮ್ಮ-ರಕ್ಖಿತತ್ಥೇರ ನಾಮಕಂ;
ಮಹಾರಕ್ಖಿತ ಥೇರಂ ತಂ, ಯೋನ ಲೋಕಮಪೇಸಯಿ.
ಪೇಸೇಸಿ ಮಜ್ಝಿಮಂ ಥೇರಂ, ಹಿಮವನ್ತಪದೇಸಕಂ;
ಸುವಣ್ಣಭೂಮಿಂ ಥೇರೇ ದ್ವೇ, ಸೋಣಮುತ್ತರ ಮೇವ ಚ.
ಮಹಾಮಹಿನ್ದತ್ಥೇರಂ ತಂ, ಥೇರ ಇಟ್ಟಿಯಮುತ್ತಿಯಂ;
ಸಮ್ಬಲಂ ಭದ್ದಸಾಲಞ್ಚ, ಸಕೇ ಸದ್ಧಿವಿಹಾರಿಕೇ.
ಲಂಕಾದೀಪೇ ¶ ಮನುಞ್ಞಮ್ಹಿ, ಮನುಞ್ಞಂ ಜಿನಸಾಸನಂ;
ಪತಿಟ್ಠಾಪೇಥ ತುಮ್ಹೇ’ತಿ, ಪಞ್ಚ ಥೇರೇ ಅಪೇಸಯಿ.
ತದಾ ಕಸ್ಮೀರಗನ್ಧಾರೇ, ಪಕ್ಕಂ ಸಸ್ಸಂ ಮಹಿದ್ಧಿಕೋ;
ಅರವಾಲೋ ನಾಗರಾಜಾ, ವಸ್ಸಂ ಕರಕಸಞ್ಞಿತಂ.
ವಸ್ಸಾ ಪೇತ್ವಾ ಸಮುದ್ದಸ್ಮಿಂ, ಸಬ್ಬಂ ಖಿಪತಿದಾರುಣೋ;
ತತ್ರ ಮಜ್ಝನ್ತಿಕತ್ಥೇರೋ, ಖಿಪ್ಪಂ ಗನ್ತ್ವಾ ವಿಹಾಯಸಾ.
ಅರವಾಲದಹೇವಾರಿ-ಪಿಟ್ಠೇ ಚಙ್ಕಮನಾದಿಕೇ;
ಅಕಾಸಿ ದಿಸ್ವಾ ತಂನಾಗಾ, ರುಟ್ಠಾರಞ್ಞೋ ನಿವೇದಯುಂ.
ನಾಗರಾಜಾ’ಥರುಟ್ಠೋ ಸೋ, ವಿವಿಧಾ ಭಿಸಿಕಾ’ಕರಿ;
ವಾತಾ ಮಹನ್ತಾ ವಾಯನ್ತಿ, ಮೇಘೋ ಗಜ್ಜತಿ ವಸ್ಸತಿ.
ಫಲನ್ತ್ಯ’ಸನಿಯೋ ವಿಜ್ಜು, ನಿಚ್ಛರನ್ತಿ ತತೋ ತತೋ;
ಮಹಿರುಹಾ ಪಬ್ಬತಾನಂ, ಕೂಟಾನಿ ಪಪತನ್ತಿ ಚ.
ವಿರೂಪರೂಪಾ ನಾಗಾ ಚ, ಭಿಂಸಾಪೇನ್ತಿ ಸಮನ್ತತೋ;
ಸಯಂ ಧುಪಾಯತಿ ಜಲತಿ, ಅಕ್ಕೋಸನ್ತೋ ಅನೇಕಧಾ.
ಸಬ್ಬಂ ತಂ ಇದ್ಧಿಯಾ ಥೇರೋ, ಪಟಿಬಾಹಿಯ ಭಿಂಸನಂ;
ಅವೋಚ ನಾಗರಾಜಂ ತಂ, ದಸ್ಸೇನ್ತೋ ಬಲಮುತ್ತಮಂ.
ಸದೇವ ಕೋಪಿ ಚೇ ಲೋಕೋ, ಆಗನ್ತ್ವಾ ತಾಸಯೇಯ್ಯ ಮಂ;
ನ ಮೇ ಪಟಿಬಲೋ ಅಸ್ಸ, ಜನೇತುಂ ಭಯಭೇರವಂ.
ಸಚೇ’ಪಿ ತ್ವಂ ಮಹಿಂ ಸಬ್ಬಂ, ಸಸಮುದ್ದಂ ಸಪಬ್ಬತಂ;
ಉಕ್ಖಿಪಿತ್ವಾ ಮಹಾನಾಗ, ಖಿಪೇಯ್ಯಾಸಿ ಮಮೋ’ಪರಿ.
ನೇವ ಮೇ ಸಕ್ಕುಣೇಯ್ಯಾಸಿ, ಜನೇತುಂ ಭಯಭೇರವಂ;
ಅಞ್ಞದತ್ಥು ತವೇ‘ವ’ಸ್ಸ, ವಿಘಾತೋ ಉರಗಾಧಿಪ.
ತಂಸುತ್ವಾ ನಿಮ್ಮದಸ್ಸ’ಸ್ಸ, ಥೇರೋ ಧಮ್ಮಮದೇಸಯಿ;
ತತೋ ಸರಣಸೀಲೇಸು, ನಾಗರಾಜಾ ಪತಿಟ್ಠಹಿ.
ತಥೇವ ಚತುರಾಸೀತಿ-ಸಹಸ್ಸಾನಿ ಭುಜಙ್ಗಮಾ;
ಹಿಮವನ್ತೇವ ಗನ್ಧಬ್ಬಾ, ಯಕ್ಖಾ ಕುಮ್ಭಣ್ಡಕಾ ಬಹೂ.
ಪಣ್ಡಕೋ ನಾಮ ಯಕ್ಖೋ ತು, ಸದ್ಧಿಂಹಾರಿತ ಯಕ್ಖಿಯಾ;
ಪಞ್ಚಸತೇಹಿ ಪುತ್ತೇಹಿ, ಫಲಂ ಪಾಪುಣಿ ಆದಿಕಂ.
‘‘ಮಾ’’ದಾನಿ ¶ ಕೋಧಂ ಜನಿಯಿತ್ಥ, ಇತೋ ಉದ್ಧಂ ಯಥಾಪುರೇ;
ಸಸಘಾತಞ್ಚ ಮಾ’ಕತ್ಥ, ಸುಖಕಾಮಾಹಿ ಪಾಣಿನೋ.
ಕರೋಥ ಮೇತ್ತಂ ಸತ್ತೇಸು, ವಸನ್ತು ಮನುಜಾ ಸುಖಂ;
ಇತಿ ತೇನಾ’ನುಸಿಟ್ಠಾ ತೇ, ತಥೇವ ಪಟಿಪಜ್ಜಿಸುಂ.
ತತೋ ರತನಪಲ್ಲಙ್ಕೇ, ಥೇರಂ ಸೋ ಉರಗಾಧಿಪೋ;
ನಿಸೀದಾಪಿಯ ಅಟ್ಠಾಸಿ, ಬೀಜಮಾನೋ ತದನ್ತಿಕೇ.
ತದಾ ಕಸ್ಮೀರಗನ್ಧಾರ-ವಾಸಿನೋ ಮನುಜಾ’ಗತಾ;
ನಾಗರಾಜಸ್ಸ ಪೂಜತ್ಥಂ, ಮನ್ತ್ವಾ ಥೇರಂ ಮಹಿದ್ಧಿಕಂ.
ಥೇರಮೇವಾ’ಭಿ ವಾದೇತ್ವಾ, ಏಕಮನ್ತಂ ನಿಸೀದಿಸುಂ;
ತೇಸಂ ಧಮ್ಮಮದೇಸೇಸಿ, ಥೇರೋ ಆಸಿವಿಸೋಪಮಂ.
ಅಸೀತಿಯಾ ಸಹಸ್ಸಾನಂ, ಧಮ್ಮಾಭಿಸಮಯೋ ಅಹು;
ಸತಸಹಸ್ಸ ಪುರಿಸಾ, ಪಬ್ಬಜುಂ ಥೇರಸನ್ತಿಕೇ.
ತತೋಪ್ಪಭುಪತಿ ಕಸ್ಮಿರ-ಗನ್ಧಾರಂ ತೇ ಇದಾನಿಪಿ;
ಆಸುಂ ಕಾಸಾವ ಪಜ್ಜೋತಾ, ವತ್ಥುತ್ತಯಪರಾಯನಾ.
ಗನ್ತ್ವಾ ಮಹಾದೇವತ್ಥೇರೋ, ದೇಸಂ ಮಹಿಸಮಣ್ಡಲಂ;
ಸುತ್ತನ್ತಂ ದೇವದೂತಂ ಸೋ, ಕಥೇಸಿ ಜನಮಜ್ಝಗೋ.
ಚತ್ತಾಲೀಸ ಸಹಸ್ಸಾನಿ, ಧಮ್ಮಚಕ್ಖುಂ ವಿಸೋಧಯುಂ;
ಚತ್ತಾಲೀಸ ಸಹಸ್ಸಾನಿ, ಪಬ್ಬಜಿಂಸು ತದನ್ತಿಕೇ.
ಗನ್ತ್ವಾ’ಥ ರಕ್ಖಿತತ್ಥೇರೋ, ವನವಾಸಿಂ ನಭೇ ಠಿತೋ;
ಸಂಯುತ್ತಮನಮತಗ್ಗಂ, ಕಥೇಸಿ ಜನಮಜ್ಝಗೋ.
ಸಟ್ಠಿ ನರಸಹಸ್ಸಾನಂ, ಧಮ್ಮಾಭಿಸಮಯೋ ಅಹು;
ಸತ್ತತಿಂಸ ಸಹಸ್ಸಾನಿ, ಪಬ್ಬಜಿಂಸು ತದನ್ತಿಕೇ.
ವಿಹಾರಾನಂ ಪಞ್ಚಸತಂ, ತಸ್ಮಿಂದೇಸೇ ಪತಿಟ್ಠಹಿ;
ಪತಿಟ್ಠಾಪೇಸಿ ತತ್ಥೇವಂ, ಥೇರೋ ಸೋ ಜಿನಸಾಸನಂ.
ಗನ್ತ್ವಾ’ಪರನ್ತಕಂ ಥೇರೋ, ಯೋನಕೋ ಧಮ್ಮರಕ್ಖಿತೋ;
ಅಗ್ಗಿಕ್ಖನ್ಧೋಪಮಂ ಸುತ್ತಂ, ಕಥೇತ್ವಾ ಜನಮಜ್ಝಗೋ.
ಸತ್ತತಿಂಸ ಸಹಸ್ಸಾನಿ, ಪಾಣೇ ತತ್ಥ ಸಮಾಗತೇ;
ಧಮ್ಮಾಮತಮಪಾಯೇಸಿ, ಧಮ್ಮಾ ಧಮ್ಮೇಸು ಕೋವಿದೋ.
ಪುರಿಸಾನಞ್ಚ ಸಹಸ್ಸಞ್ಚ, ಇತ್ಥಿಯೋ ಚ ತತೋ’ಧಿಕಾ;
ಖತ್ತಿಯಾನಂ ಕುಲಾಯೇವ, ನಿಕ್ಖಮಿತ್ವಾನ ಪಬ್ಬಜುಂ.
ಮಹಾರಟ್ಠಮಿಸೀ ¶ ಗನ್ತ್ವಾ, ಸೋ ಮಹಾಧಮ್ಮರಕ್ಖಿತೋ;
ಮಹಾನಾರದಕಸ್ಸಪವ್ಹಂ, ಜಾತಕಂ ಕಥಯೀ ತಹಿಂ.
ಮಗ್ಗಫಲಂ ಪಾಪುಣಿಂಸು, ಚತುರಾಸೀತಿ ಸಹಸ್ಸಕಾ;
ತೇರಸನ್ತು ಸಹಸ್ಸಾನಿ, ಪಬ್ಬಜಿಂಸು ತದನ್ತಿಕೇ.
ಗನ್ತ್ವಾನ ಯೋನವಿಸಯಂ, ಸೋ ಮಹಾಧಮ್ಮರಕ್ಖಿತೋ ಇಸಿ;
ಕಾಳಕಾರಾಮ ಸುತ್ತನ್ತಂ, ಕಥೇಸಿ ಜನಮಜ್ಝಗೋ.
ಪಾಣಸತ ಸಹಸ್ಸಾನಿ, ಸಹಸ್ಸಾನಿ ಚ ಸತ್ತತಿ;
ಮಗ್ಗಫಲಂ ಪಾಪುಣಿಂಸು, ದಸ ಸಹಸ್ಸಾನಿ ಪಬ್ಬಜುಂ.
ಗನ್ತ್ವಾ ಚತೂಹಿ ಥೇರೇಹಿ, ದೇಸೇಸಿ ಮಜ್ಝಿಮೋ ಇಸಿ;
ಹಿಮವನ್ತಪದೇಸಸ್ಮಿಂ, ಧಮ್ಮಚಕ್ಕಪವತ್ತನಂ.
ಮಗ್ಗಫಲಪಾಪುಣಿಂಸು, ಅಸೀತಿಪಾಣ ಕೋಟಿಯೋ;
ವಿಸುಂ ತೇ ಪಞ್ಚರಟ್ಠಾನಿ, ಪಞ್ಚಥೇರಾ ಪಸಾದಯುಂ.
ಪುರಿಸಸತಸಹಸ್ಸಾನಿ, ಏಕೇಕಸ್ಸೇವ ಸನ್ತಿಕೇ;
ಪಬ್ಬಜಿಂಸು ಪಸಾದೇನ, ಸಮ್ಮಾಸಮ್ಬುದ್ಧ ಸಾಸನೇ.
ಸದ್ಧಿಂ ಉತ್ತರಥೇರೇನ, ಸೋಣತ್ಥೇರೋ ಮಹಿದ್ಧಿಕೋ;
ಸುವಣ್ಣಭೂಮಿಂ ಅಗಮಾ, ತಸ್ಮಿಂ ತು ಸಮಯೇ ಪನ.
ಜಾತೇ ಜಾತೇ ರಾಜಗೇಹೇ, ದಾರಕೇ ರುದ್ದರಕ್ಖಸೀ;
ಸಮುದ್ದತೋ ನಿಕ್ಖಮಿತ್ವಾ, ಭಕ್ಖಿತ್ವಾ ಪನ ಗಚ್ಛತಿ.
ತಸ್ಮಿಂ ಖಣೇ ರಾಜಗೇಹೇ,
ಜಾತೋ ಹೋತಿ ಕುಮಾರಕೋ;
ಥೇರೇ ಮನುಸ್ಸಾ ಪಸ್ಸಿತ್ವಾ,
ರಕ್ಖಸಾನಂ ಸಹಾಯಕಾ.
ಇತಿ ಚಿನ್ತಿಯ ಮಾರೇತುಂ, ಸಾ ಯುವಾ ಉಪಸಙ್ಕಮುಂ;
‘‘ಕಿಮೇತನ್ತಿ’’ಚ ಪುಚ್ಛಿತ್ವಾ, ಥೇರಂ ತೇ ಏವ ಮಾಹುತೇ.
ಸಮಣಾ ಮಯಂ ಹಿಮವನ್ತಾ, ನ ರಕ್ಖಸಿ ಸಹಾಯಕಾ;
ರಕ್ಖಸೀ ಸಾ ಸಪರಿಸಾ, ನಿಕ್ಖನ್ತಾ ಹೋತಿ ಸಾಗರಾ.
ತಂ ದಿಸ್ವಾನ ಮಹಾರಾವಂ, ವಿರವಿಂಸು ಮಹಾಜನಾ;
ದಿಗುಣೇ ರಕ್ಖಸೇ ಥೇರೋ, ಮಾಪಯಿತ್ವಾ ಭಯಾನಕೇ.
ತಂ ¶ ರಕ್ಖಸಿಂ ಸಪರಿಸಂ, ಪರಿಕ್ಖಿಪಿ ಸಮನ್ತತೋ;
ಇದಂ ಇಮೇಹಿ ಉದ್ಧನ್ತಿ, ಮನ್ತ್ವಾ ಭೀತಾ ಪಲಾಯಿಸಾ.
ತಸ್ಸ ದೇಸಸ್ಸ ಆರಕ್ಖಂ, ಠಪೇತ್ವಾನ ಸಮನ್ತತೋ;
ತಸ್ಮಿಂ ಸಮಾಗಮೇ ಥೇರೋ, ಬ್ರಹ್ಮಜಾಲಮದೇಸಯಿ.
ಸರಣೇಸು ಚ ಸೀಲೇಸು, ಅಟ್ಠಂಸು ಬಹವೋ ಜನಾ;
ಸಟ್ಠಿಯಾ ತು ಸಹಸ್ಸಾನಂ, ಧಮ್ಮಾಭಿಸಮಯೋ ಅಹು.
ಅಡ್ಢುಡ್ಢಾನಿ ಸಹಸ್ಸಾನಿ, ಪಬ್ಬಜುಂ ಕುಲದಾರಕಾ;
ಪಬ್ಬಜಿಂಸು ದಿಯಡ್ಢನ್ತು, ಸಹಸ್ಸಂ ಕುಲಧೀತರೋ.
ತತೋಪ್ಪಭುತಿ ಸಞ್ಜಾತೇ, ರಾಜಗೇಹೇ ಕುಮಾರಕೇ;
ನಾಮಂ ಕರಿಂಸು ರಾಜಾನೋ, ಸೋಣುತ್ತರ ಸನಾಮಕೇ.
ಮಹಾಜನಸ್ಸಾಪಿ ಜಿನಸ್ಸ ಕಡ್ಢನಂ;
ವಿಹಾಯ ಪತ್ತಂ ಅಮತಂ ಸುಖಮ್ಪಿತೇ;
ಕರಿಂಸು ಲೋಕಸ್ಸ ಹಿತಂ ತಹಿಂ ತಹಿಂ;
ಭವೇಯ್ಯ ಯೋ ಲೋಕಹಿತೇ ಪಮಾದವಾತಿ.
ಸುಜನಪ್ಪಸಾದ ಸಂವೇಗತ್ಥಾಯ ಕತೇ ಮಹಾವಂಸೇ
ನಾನಾದೇಸಪಸಾದೋ ನಾಮ ದ್ವಾದಸಮೋ ಪರಿಚ್ಛೇದೋ.
ತೇರಸಮ ಪರಿಚ್ಛೇದ
ಮಹಿನ್ದಾಗಮನೋ
ಮಹಾಮಹಿನ್ದತ್ಥೇರೋ ಸೋ, ತದಾ ದ್ವಾದಸವಸ್ಸಿಕೋ;
ಉಪಜ್ಝಾಯೇನ ಆಣತ್ತೋ, ಸಙ್ಘೇನ ಚ ಮಹಾಮತೀ.
ಲಂಕಾದೀಪಂ ಪಸಾದೇತುಂ,
ಕಾಲಂ ಪೇಕ್ಖಂ ವಿಚಿನ್ತಯೀ;
‘‘ವುಡ್ಢೋ ಮುಟಸಿವೋ ರಾಜಾ,
ರಾಜಾ ಹೋತು ಸುತೋ’’ ಇತಿ.
ತದನ್ತರೇ ¶ ಞಾತಿಗಣಂ, ದಟ್ಠುಂ ಕತ್ವಾನ ಮಾನಸಂ;
ಉಪಜ್ಝಾಯಞ್ಚ ಸಙ್ಘಞ್ಚ, ವನ್ದಿತ್ವಾ ಪುಚ್ಛ ಭೂಪತಿಂ.
ಆದಾಯ ಚತುರೋ ಥೇರೇ, ಸಙ್ಘಮಿತ್ತಾಯ ಅತ್ರಜಂ;
ಸುಮನಂ ಸಾಮಣೇರಞ್ಚ, ಛಳಾಭಿಞ್ಞಂ ಮಹಿದ್ಧಿಕಂ.
ಞಾತೀನಂ ಸಙ್ಗಹಂ ಕಾತುಂ, ಅಗಮಾ ದಕ್ಖಿಣಾಗಿರಿಂ;
ತತೋ ತತ್ಥ ಚರನ್ತಸ್ಸ, ಛಮ್ಮಾಸಾ ಸಮತಿಕ್ಕಮುಂ.
ಕಮೇನ ವೇದಿಸಗಿರಿಂ, ನಗರಂ ಮಾತುದೇವಿಯಾ;
ಸಮ್ಪತ್ವಾ ಮತರಂ ಪಸ್ಸಿ, ದೇವೀ ದಿಸ್ವಾ ಪಿಯಂ ಸುತಂ.
ಭೋಜಯಿತ್ವಾ ಸಪರಿಸಂ, ಅತ್ತನಾಯೇವ ಕಾರಿತಂ;
ವಿಹಾರಂ ಚೇತಿಯಗಿರಿಂ, ಥೇರಂ ಆರೋಪಯೀ ಸುಭಂ.
ಅವನ್ತಿರಟ್ಠಂ ಭುಞ್ಜನ್ತೋ, ಪಿತರಾ ದಿನ್ನಮತ್ತನೋ;
ಸೋ ಅಸೋಕ ಕುಮಾರೋ ಹಿ, ಉಜ್ಜೇನೀಗಮನಾ ಪುರಾ.
ವೇದಿಸೇ ನಗರೇ ವಾಸಂ, ಉಪಗನ್ತ್ವಾ ತಹಿಂ ಸುಭಂ;
ದೇವಿನ್ನಾಮ ಲಭಿತ್ವಾನ, ಕುಮಾರಿಂ ಸೇಟ್ಠಿಧೀತರಂ.
ಸಂವಾಸಂ ತಾಯ ಕಪ್ಪೇಸಿ, ಗಬ್ಭಂ ಗಣ್ಹಿಯ ತೇನ ಸಾ;
ಉಜ್ಜೇನಿಯಂ ಕುಮಾರಂ ತಂ, ಮಹಿನ್ದಂ ಜನಯೀ ಸುಭಂ.
ವಸ್ಸದ್ವಯಮತಿಕ್ಕಮ್ಮ, ಸಙ್ಘಮಿತ್ತಞ್ಚ ಧೀತರಂ;
ತಸ್ಮಿಂ ಕಾಲೇ ವಸತಿ ಸಾ, ವೇದಿಸೇ ನಗರೇ ತಹಿಂ.
ಥೇರೋ ತತ್ಥ ನಿಸೀದಿತ್ವಾ, ಕಾಲಞ್ಞೂ ಇತಿ ಚಿನ್ತಯಿ;
ಪಿತರಾ ಮೇ ಸಮಾಣತ್ತಂ, ಅಭಿಸೇಕ ಮಹುಸ್ಸವಂ.
ದೇವಾನಂಪಿಯತಿಸ್ಸೋ ಸೋ, ಮಹಾರಾಜಾ’ನುಭೋತು ಚ;
ವತ್ಥುತ್ತಯಗುಣೇ ಚಾಪಿ, ಸುತ್ವಾ ಜಾನಾತು ದೂಹತೋ.
ಆರೋಹತು ಮಿಸ್ಸನಗಂ, ಜೇಟ್ಠಮಾಸಸ್ಸು’ಪೋಸಥೇ;
ತದಹೇವ ಗಮಿಸ್ಸಾಮ, ಲಂಕಾದೀಪವರಂ ಮಯಂ.
ಮಹಿನ್ದೋ ಉಪಸಙ್ಕಮ್ಮ, ಮಹಿನ್ದತ್ಥೇರ ಮುತ್ತಮಂ;
ಯಾಹಿ ಲಂಕಂ ಪಸಾದೇತುಂ, ಸಮ್ಬುದ್ಧೇನಾ’ಸಿ ಬ್ಯಾಕತೋ.
ಮಯಮ್ಪಿ ತತ್ಥುಪತ್ಥಮ್ಭಾ, ಭವಿಸ್ಸಾಮಾ’ತಿ ಅಬ್ರವಿ;
ದೇವಿಯಾ ಭಗಿನೀ ಧೀತು-ಪುತ್ತೋ ಭಣ್ಡುಕ ನಾಮಕೋ.
ಥೇರೇನ ದೇವಿಯಾ ಧಮ್ಮಂ, ಸುತ್ವಾ ದೇಸಿತಮೇವ ತು;
ಅನಾಗಾಮಿಫಲಂ ಪತ್ವಾ, ವಸಿ ಥೇರಸ್ಸ ಸನ್ತಿಕೇ.
ತತ್ಥ ¶ ಮಾಸಂ ವಸಿತ್ವಾನ, ಜೇಟ್ಠಮಾಸಸ್ಸು’ ಪೋಸಥೇ;
ಥೇರೋ ಚತೂಹಿ ಥೇರೇಹಿ, ಸುಮನೇನಾ’ಥ ಭಣ್ಡುನಾ.
ಸದ್ಧಿಂ ತೇನ ಗಹಟ್ಠೇನ, ನ ರತೋ ಞಾತಿಹೇತುನಾ;
ತಸ್ಮಾ ವಿಹಾರಾ ಆಕಾಸಂ, ಉಗ್ಗನ್ತ್ವಾ ಸೋ ಮಹಿದ್ಧಿಕೋ.
ಖಣೇನೇವ ಇಧಾಗಮ್ಮ, ರಮ್ಮೇ ಮಿಸ್ಸಕ ಪಬ್ಬತೇ;
ಅಟ್ಠಾಸಿ ವಿಲುಕೂಟಮ್ಹಿ, ರುಚಿರಮ್ಬತ್ಥಲೇ ವರೇ.
ಲಂಕಾಪಸಾದ ಗುಣೇನ ವಿಯಾಕತೋ ಸೋ;
ಲಂಕಾಹಿತಾಯ ಮುನಿನಾ ಸಯಿತೇನ ಅನ್ತೇ;
ಲಂಕಾಯ ಸತ್ಥುಸದಿಸೋ ಹಿತಹೇತು ತಸ್ಸಾ;
ಲಂಕಾಮರೂಹಿ ಮಹಿತೋ’ಭಿನಿಸೀದಿ ತತ್ತಾತಿ.
ಸುಜನಪ್ಪಸಾದಸಂವೇಗತ್ಥಾಯ ಕತೇ ಮಹಾವಂಸೇ
ಮಹಿನ್ದಾಗಮನೋ ನಾಮ
ತೇರಸಮೋ ಪರಿಚ್ಛೇದೋ.
ಚುದ್ದಸಮ ಪರಿಚ್ಛೇದ
ನಗರಪ್ಪವೇಸನೋ
ದೇವಾನಂಪಿಯತಿಸ್ಸೋ ಸೋ, ರಾಜಾ ಸಲಿಲಕೀಳಿತಂ;
ದತ್ವಾ ನಗರವಾಸೀನಂ, ಮಿಗವಂ ಕೀಳಿತುಂ ಅಗಾ.
ಚತ್ತಾಲೀಸಸಹಸ್ಸೇಹಿ, ನರೇಹಿ ಪರಿವಾರಿತೋ;
ಧಾವನ್ತೋ ಪದಸಾಯೇವ, ಅಗಮಾ ಮಿಸ್ಸಕಂ ನಗಂ.
ಥೇರೇ ದಸ್ಸೇತುಮಿಚ್ಛನ್ತೋ, ದೇವೋ ತಸ್ಮಿಂ ಮಹೀಧರೇ;
ಗುಮ್ಭಂಭಕ್ಖಯಮಾನೋ’ವ, ಅಟ್ಠಾ ಗೋಕಣ್ಣರೂಪವಾ.
ರಾಜಾ ದಿಸ್ವಾ ‘‘ಪಮತ್ತಂ ತಂ, ನ ಯುತ್ತಂ ವಿಜ್ಝಿತುಂ’’ ಇತಿ;
ಜಿಯಾ ಸದ್ದಮಕಾಧಾಪಿ, ಗೋಕಣ್ಣೋ ಪಬ್ಬತನ್ತರಂ.
ರಾಜಾ’ನುಧಾವಿ ¶ ಸೋಧಿಂ, ಥೇರಾನಂ ಸನ್ತಿಕಂ ಗತೋ;
ಥೇರೇ ದಿಟ್ಠೇ ನರಿನ್ದೇನ, ಸಯಮನ್ತರಧಾಯಿಸೋ.
ಥೇರೋ ‘‘ಬಹೂಸು ದಿಟ್ಠೇಸು, ಅತಿಭಾಯಿಸ್ಸತೀ’’ ತಿಸೋ;
ಅತ್ತಾನಮೇವ ದಸ್ಸೇಸಿ, ಪಸ್ಸಿತ್ವಾ ತಂ ಮಹೀಪತಿಂ.
ಭೀತೋ ಅಟ್ಠಾಸಿ ತಂ ಥೇರೋ, ‘‘ಏಹಿ ತಿಸ್ಸಾತಿ ಅಬ್ರವಿ;
ತಿಸ್ಸಾ’ತಿ ವಚನೇನೇವ, ರಾಜಾ ಯಕ್ಖೋ’’ತಿ ಚಿನ್ತಯೀ.
ಸಮಣಾ ಮಯಂ ಮಹಾರಾಜ, ಧಮ್ಮರಾಜಸ್ಸ ಸಾವಕಾ;
ತಮೇವ ಅನುಕಮ್ಪಾಯ, ಜಮ್ಬುದೀಪಾ ಇಧಾಗತಾ.
ಇಚ್ಚಾಹ ಥೇರೋ ತಂ ಸುತ್ವಾ, ರಾಜಾ ವೀತಭಯೋ ಅಹು;
ಸರಿತ್ವಾ ಸಖೀಸನ್ದೇಸಂ, ‘‘ಸಮಾಣಾ’’ ಇತಿ ನಿಚ್ಛಿತೋ.
ಧನುಂ ಸರಞ್ಚ ನಿಕ್ಖಿಪ್ಪ, ಉಪಸಙ್ಕಮ್ಮ ತಂ ಇಸಿಂ;
ಸಮ್ಮೋದಮಾನೋ ಥೇರೇನ, ಸೋ ನಿಸೀದಿ ತದನ್ತಿಕೇ.
ತದಾ ತಸ್ಸ ಮನುಸ್ಸಾ ತೇ, ಆಗಮ್ಮ ಪರಿವಾರಯುಂ;
ತದಾ ಸೇಸೇ ಛ ದಸ್ಸೇಸಿ, ಮಹಾಥೇರೋ ಸಹಾಗತೇ.
ತೇ ದಿಸ್ವಾ ಅಬ್ರವೀ ರಾಜಾ, ‘‘ಕದಾ’’ ಮೇ ಆಗತಾ ಇತಿ;
‘‘ಮಯಾ ಸದ್ಧಿಂ’’ತಿ ಥೇರೇನ, ವುತ್ತೇ ಪುಚ್ಛಿ ಇದಂ ಪುನ.
‘‘ಸನ್ತಿ ಈದಿಸಕಾ ಅಞ್ಞೇ, ಜಮ್ಬುದೀಪೇ ಯತೀ’’ ಇತಿ;
ಆಹ ‘‘ಕಾಸಾವಪಜ್ಜೋ ತೋ, ಜಮ್ಬುದೀಪೋ ತಹಿಂ ಪನ.
ತೇವಿಜ್ಜಾ ಇದ್ಧಿಪ್ಪತ್ತಾ ಚ, ಚೇತೋಪರಿಯಕೋವಿದಾ;
‘‘ದಿಬ್ಬಸೋತಾ’ರಹನ್ತೋ ಚ, ಬಹೂ ಬುದ್ಧಸ್ಸ ಸಾವಕಾ’’.
ಪುಚ್ಛಿ ‘‘ಕೇನಾಗತತ್ಥಾ’’ತಿ, ನ ಥಲೇನ ನ ವಾರಿನಾ;
ಆಗತಮ್ಹಾ’’ತಿ ವುತ್ತೇ ಸೋ, ವಿಜಾನಿ ನಭಸಾಗಮಂ.
ವೀಮಂಸಂಸೋ ಮಹಾಪಞ್ಞೋ, ಕಣ್ಹಂ ಪಞ್ಹಮಪುಚ್ಛಿತಂ;
ಪುಟ್ಠೋ ಪುಟ್ಠೋ ವಿಯಾಕಾಸಿ, ತಂತಂ ಪಞ್ಹಂ ಮಹೀಪತಿ.
ರುಕ್ಖೋಯಂ ರಾಜಕಿನ್ನಾಮೋ, ಅಞ್ಞೋ ನಾಮ ಅಯಂ ತರು;
ಇಮಂ ಮುಞ್ಚಿಯ ಅತ್ಥ’ಮ್ಬೋ, ಸನ್ತಿ ಅಮ್ಬತರೂ ಬಹುಂ.
ಇಮಞ್ಚ ಅಮ್ಬಂ ತೇಚ’ಮ್ಬೇ, ಮುಞ್ಚಿಯತ್ಥಿ ಮಹೀರುಹಾ;
ಸನ್ತಿ ಭನ್ತೇ ಬಹು ರುಕ್ಖಾ, ಅನಮ್ಬಾಪನ ತೇ ತರು.
ಅಞ್ಞೇ ¶ ಅಮ್ಬೇ ಅನಮ್ಬೇ ಚ, ಮುಞ್ಚಿಯ’ತ್ಥಿ ಮಹೀರುಹಾ;
ಅಯಂ ಭನ್ತೇ ಅಮ್ಬರುಕ್ಖೋ, ಪಣ್ಡಿತೋ’ಸಿ ನರಿಸ್ಸರ.
ಸನ್ತಿ ತೇ ಞಾತಕಾ ರಾಜ, ಸನ್ತಿ ಭನ್ತೇ ಬಹುಜ್ಜನಾ;
ಸನ್ತಿ ಅಞ್ಞಾತಕಾ ರಾಜ, ಸನ್ತಿ ತೇ ಞಾತಿತೋ ಬಹೂ.
ಞಾತಕೇ ತೇ ಚ ಅಞ್ಞೇ ಚ, ಮುಞ್ಚಿಯ’ಞ್ಞೋಪಿ ಅತ್ಥಿ ನು;
‘‘ಭನ್ತೇ’’ ಹಮೇವ ಸಾಧು ತ್ವಂ, ಪಣ್ಡಿತೋ’ಸಿ ನರಿಸ್ಸರ.
ಪಣ್ಡಿತೋ’ತಿ ವಿದಿತ್ವಾನ, ಚೂಳಹತ್ಥಿಪದೋಪಮಂ;
ಸುತ್ತನ್ತಂ ದೇಸಯೀ ಥೇರೋ, ಮಹೀಪಸ್ಸ ಮಹಾಮತೀ.
ದೇಸನಾಪರಿಯೋಸಾನೇ, ಸದ್ಧಿಂ ತೇಹಿ ನರೇಹಿ ಸೋ;
ಚತ್ತಾಲೀಸಸಹಸ್ಸೇಹಿ, ಸರಣೇಸು ಪತಿಟ್ಠಹಿ.
ಭತ್ತಾ’ಭೀಹಾರಂ ಸಾಯನ್ಹೇ, ರಞ್ಞೋ ಅಭಿಹರುಂ ತದಾ;
‘‘ನ ಭುಞ್ಜಿಸ್ಸ’’ನ್ತಿ ದಾನಿ ಮೇ, ಇತಿ ಜನಮ್ಮಿ ಭೂಪತಿ.
ಪುಚ್ಛಿತುಂಯೇವ ಯುತ್ತನ್ತಿ, ಭತ್ತೇನಾ’ಪುಚ್ಛಿತೇ ಇಸಿ;
ನ ಭುಞ್ಜಾಮ ಇದಾನೀ’ತಿ, ವುತ್ತೇ ಕಾಲಞ್ಚ ಪುಚ್ಛಿಸೋ.
ಕಾಲಂ ವುತ್ತೇ’ಬ್ರವಿ ಏವಂ, ‘‘ಗಚ್ಛಾಮ ನಗರಂ’’ಇತಿ;
ತುವಂ ಗಚ್ಛ ಮಹಾರಾಜ, ವಸಿಸ್ಸಾಮ ಮಯಂ ಇಧ.
ಏವಂ ಸತಿ ಕುಮಾರೋ’ಯಂ, ಅಮ್ಹೇಹಿ ಸಹ ಗಚ್ಛತು;
ಅಯಞ್ಹಿ ಆಗತಫಲೋ, ರಾಜ ವಿಞ್ಞಾತಸಾಸನೋ.
ಅಪೇಕ್ಖಮಾನೋ ಪಬ್ಬಜ್ಜಂ, ವಸತ’ಮ್ಹಾಕಮನ್ತಿಕೇ;
ಇದಾನಿ ಪಬ್ಬಜೇಸ್ಸಾಮ, ಇಮಂ ತ್ವಂ ಗಚ್ಛ ಭೂಮಿಪ.
ಪಾತೋ ರಥಂ ಪೇಸಯಿಸ್ಸಂ, ತುಮ್ಹೇ ತತ್ಥ ಠಿತಾ ಪುರಂ;
ಯಾಥಾ’ತಿ ಥೇರೇ ವನ್ದಿತ್ವಾ, ಭಣ್ಡುಂನೇತ್ವ’ಕ ಮನ್ತಕಂ.
ಪುಚ್ಛಿ ಥೇರಾಧಿಕಾರಂಸೋ, ರಞ್ಞೋ ಸಬ್ಬಮಭಾಸಿ ಸೋ;
ಥೇರಂ ಞತ್ವಾ’ತಿ ತುಟ್ಠೋಸೋ, ‘‘ಲಾಭಾ ಮೇ’’ಇತಿ ಚಿನ್ತಯಿ.
ಭಣ್ಡುಸ್ಸ ಗೀಹಿಭಾವೇನ, ಗತಾಸಙ್ಕೋ ನರಿಸ್ಸರೋ;
ಅಞ್ಞಾಸಿ ನರಭಾವಂ ಸೋ, ‘‘ಪಬ್ಬಾಜೇಮ ಇಮಂ’’ ಇತಿ.
ಥೇರೋ ತಂ ಗಾಮಸೀಮಾಯಂ, ತಸ್ಮಿಂಯೇವ ಖಣೇ ಅಕಾ;
ಭಣ್ಡುಕಸ್ಸ ಕುಮಾರಸ್ಸ, ಪಬ್ಬಜ್ಜಮುಪಸಮ್ಪದಂ.
ತಸ್ಮಿಂಯೇವ ¶ ಖಣೇ ಸೋ ಚ, ಅರಹತ್ತಮಪಾಪುಣಿ;
ಸುಮನಂ ಸಾಮಣೇರಂ ತಂ, ಥೇರೋ ಆಮನ್ತಯೀ ತತೋ.
ಧಮ್ಮಸವನಕಾಲಂ ತ್ವಂ, ಘೋಸೇಹೀ’’ತಿ ಅಪುಚ್ಛಿಸೋ;
ಸಾವೇನ್ತೋ ಕಿತ್ತಕಂ ಠಾನಂ, ಭನ್ತೇ ಘೋಸೇಮ’ಹಂ ಇತಿ.
‘‘ಸಕಲಂ ತಮ್ಬಪಣ್ಣೀ’’ತಿ, ವುತ್ತೇ ಥೇರೇನ ಇದ್ಧಿಯಾ;
ಸಾವೇನ್ತೋ ಸಕಲಂ ಲಂಕಂ, ಧಮ್ಮಕಾಲಮಘೋಸಯೀ.
ರಾಜಾ ನಾಗಚತುತ್ತೇಸೋ, ಸೋಣ್ಣಿಪಸ್ಸೇ ನಿಸೀದಿಯ;
ಭುಞ್ಜನ್ತೋ ತಂ ರವಂ ಸುತ್ವಾ, ಥೇರನ್ತಿಕ ಮಪೇಸಯಿ.
‘‘ಉಪದ್ದವೋ ನು ಅತ್ಥೀ’’ತಿ, ಆಹ ನತ್ಥಿ ಉದ್ದವೋ;
ಸೋತುಂ ಸಮ್ಬುದ್ಧವಚನಂ, ಕಾಲೋ ಘೋಸಾಪಿತೋ ಇತಿ.
ಸಾಮಣೇರ ರವಂ ಸುತ್ವಾ, ಭುಮ್ಮಾದೇವಾ ಅಘೋಸಯುಂ;
ಅನುಕ್ಕಮೇನ ಸೋ ಸದ್ದೋ, ಬ್ರಹ್ಮಲೋಕಂ ಸಮಾರುಹಿ.
ತೇನ ಘೋಸೇನ ದೇವಾನಂ, ಸನ್ನಿಪಾತೋ ಮಹಾ ಅಹು;
ಸಮಚಿತ್ತಸುತ್ತಂ ದೇಸೇಸಿ, ಥೇರೋ ತಸ್ಮಿಂ ಸಮಾಗಮೇ.
ಅಸಂಖಿಯಾನಂ ದೇವಾನಂ, ಧಮ್ಮಾಭಿಸಮಯೋ ಅಹು;
ಬಹೂ ನಾಗಾ ಸುಪಣ್ಣಾ ಚ, ಸರಣೇಸು ಪತಿಟ್ಠಯುಂ.
ಯಥೇದಂ ಸಾರಿಪುತ್ತಸ್ಸ, ಸುತ್ತಂ ಥೇರಸ್ಸ ಭಾಸತೋ;
ತಥಾ ಮಹಿನ್ದತ್ಥೇರಸ್ಸ, ಅಹು ದೇವಸಮಾಗಮೋ.
ರಾಜಾ ಪಭಾ ತೇ ಪಾಹೇಸಿ, ರಥಂ ಸಾರಥಿ ಸೋ ಗತೋ;
‘‘ಆರೋಹಥ ರಥಂ ಯಾಮ, ನಗರಂ’’ ಇತಿ ತೇ’ಬ್ರವಿ.
ನಾ’ರೋಹಾಮ ರಥಂ ಗಚ್ಛ, ಗಚ್ಛಾಮ ತವ ಪಚ್ಛತೋ;
ಇತಿ ವತ್ವಾನ ಪೇಸೇತ್ವಾ, ಸಾರಥಿಂ ಸುಮನೋರಥಂ.
ವೇಹಾಸಮಬ್ಭುಗನ್ತ್ವಾ, ತೇ ನಗರಸ್ಸ ಪುರತ್ಥತೋ;
ಪಠಮತ್ಥೂಪಟ್ಠಾನಮ್ಹಿ, ಓತರಿಂಸು ಮಹಿದ್ಧಿಕಾ.
ಥೇರೇಹಿ ಪಠಮೋತಿಣ್ಣ-ಠಾನಮ್ಹಿ ಕತಚೇತಿಯಂ;
ಅಜ್ಜಾಪಿ ವುಚ್ಚತೇ ತೇನ, ಏವಂ ಪಠಮಚೇತಿಯಂ.
ರಞ್ಞಾ ಥೇರಗುಣಂ ಸುತ್ವಾ, ಸಬ್ಬಾ ಅನ್ತೇಪುರಿತ್ಥಿಯೋ;
ಥೇರದಸ್ಸನಮಿಚ್ಛಿಂಸು, ಯಸ್ಮಾ ತಸ್ಮಾಮಹೀಪತಿ.
ಅನ್ತೋ’ವ ¶ ರಾಜವತ್ಥುಸ್ಸ, ರಮ್ಮಂ ಕಾರೇಸಿ ಮಣ್ಡಪಂ;
ಸೇತೇಹಿ ವತ್ಥಪುಪ್ಫೇಹಿ, ಛಾದಿತಂ ಸಮಲಙ್ಕತಂ.
ಉಚ್ಚಸೇಯ್ಯಾವಿರಮಣಂ, ಸುತತ್ತಾ ಥೇರಸನ್ತಿಕೇ;
ಕಙ್ಖೀ ‘‘ಉಚ್ಚಾಸನೇ ಥೇರೋ, ನಿಸೀದಿದೇಯ್ಯನುನೋತಿ ಚ.
ತದನ್ತರೇ ಸಾರಥಿ ಸೋ, ಥೇರೇ ದಿಸ್ವಾ ತಹಿಂ ಠಿತೇ;
ಚೀವರಂ ಪಾರುಪನ್ತೇ ತೇ, ಅತಿವಿಮ್ಹಿತ ಮಾನಸೋ.
ಗನ್ತ್ವಾ ರಞ್ಞೋ ನಿವೇದೇಸಿ, ಸುತ್ವಾ ಸಬ್ಬಂ ಮಹೀಮತಿ;
‘‘ನಿಸಜ್ಜಂ ನ ಕರಿಸ್ಸನ್ತಿ, ಪೀಠಕೇಸೂ’’ತಿ ನಿಚ್ಛಿತೋ.
‘‘ಸುಸಾಧು ಭುಮ್ಮತ್ಥರಣಂ, ಪಞ್ಞಾಪೇಥಾ’’ತಿ ಭಾಸಿಯ;
ಗನ್ತ್ವಾ ಪಟಿಪಥಂ ಥೇರೇ, ಸಕ್ಕಚ್ಚಂ ಅಭಿವಾದಿಯ.
ಮಹಾಮಹಿನ್ದತ್ಥೇರಸ್ಸ, ಹತ್ಥತೋ ಪತ್ತಮಾದಿಯ;
ಸಕ್ಕಾರಪೂಜಾವಿಧಿನಾ, ಪುರಂ ಥೇರಂ ಪವೇಸಯಿ.
ದಿಸ್ವಾ ಆಸನಪಞ್ಞತ್ತಿಂ, ನೇಮಿತ್ತಾ ಬ್ಯಾಕರುಂ ಇತಿ;
‘‘ಗಹಿತಾ ಪಥವೀ’ಮೇಹಿ, ದೀಪೇ ಹೇಸ್ಸನ್ತಿ ಇಸ್ಸರಾ.
ನರಿನ್ದೋ ಪೂಜಯನ್ತೋ ತೇ, ಥೇರೇ ಅನ್ತೇಪುರಂ ನಯಿ;
ತತ್ಥ ತೇ ದುಸ್ಸಪೀಠೇಸುಂ, ನಿಸೀದಿಂಸು ಯಥಾರಹಂ.
ತೇ ಯಾಗುಖಜ್ಜಭೋಜ್ಜೇಹಿ, ಸಯಂ ರಾಜಾ ಅತಪ್ಪಯಿ;
ನಿಟ್ಠಿತೇ ಭತ್ತಕಿಚ್ಚಮ್ಹಿ, ಸಯಂ ಉಪನಿಸೀದಿಯ.
ಕನಿಟ್ಠಸ್ಸೋಪರಾಜಸ್ಸ, ಮಹಾನಾಗಸ್ಸ ಜಾಯಿಕಂ;
ವಸನ್ತಿಂ ರಾಜಗೇಹೇ’ವ, ಪಕ್ಕೋಸಾ ಪೇಸಿಚಾ’ನುಲಂ.
ಆಗಮ್ಮ ಅನುಲಾದೇವೀ, ಪಞ್ಚ ಇತ್ಥಿಸತೇಹಿ ಸಾ;
ಥೇರೇವನ್ದಿಯ ಪೂಜೇತ್ವಾ, ಏಕಮನ್ತಮುಪಾವಿಸಿ.
ಪೇತವತ್ಥುಂ ವಿಮಾನಞ್ಚ, ಸಚ್ಚಸಂಯುತ್ತಮೇವ ಚ;
ದೇಸೇಸಿ ಥೇರೋ ತಾ ಇತ್ಥೀ, ಪಠಮಂ ಫಲಮಜ್ಝಗುಂ.
ಹಿಯ್ಯೋ ದಿಟ್ಠಮನುಸ್ಸೇಹಿ, ಸುತ್ವಾ ಥೇರಗುಣೇ ಬಹೂ;
ಥೇರದಸ್ಸನಮಿಚ್ಛನ್ತಾ, ಸಮಾಗನ್ತ್ವಾನ ನಾಗರಾ.
ರಾಜದ್ವಾರೇ ಮಹಾಸದ್ದಂ, ಅಕರುಂ ತಂ ಮಹೀಪತಿ;
ಸುತ್ವಾ ಪುಚ್ಛಿಯ ಜಾನಿತ್ವಾ, ಆಹ ತೇಸಂ ಹಿತತ್ಥಿಕೋ.
ಸಬ್ಬೇಸಂ ¶ ಇಧ ಸಮ್ಬಾಧೋ, ಸಾಲಾಮಙ್ಗಲಹತ್ಥಿನೋ;
ಸೋಧೇಥ ತತ್ಥ ದಕ್ಖನ್ತಿ, ಥೇರೇ’ಮೇ ನಾಗರಾ’ಇತಿ.
ಸೋಧೇತ್ವಾ ಹತ್ಥಿಸಾಲಂ ತಂ, ವಿತಾನಾದೀಹಿ ಸಜ್ಜುಕಂ;
ಅಲಙ್ಕರಿತ್ವಾ ಸಯನೇ, ಪಞ್ಞಪೇಸುಂ ಯಥಾರಹಂ.
ಸಥೇರೋ ತತ್ಥ ಗನ್ತ್ವಾನ, ಮಹಾಥೇರೋ ನಿಸೀದಿಯ;
ಸೋ ದೇವದೂತಸುತ್ತನ್ತಂ, ಕಥೇಸೀ ಕಥಿಕೋ ಮಹಾ.
ತಂ ಸುತ್ವಾನ ಪಸೀದಿಂಸು, ನಗರಾ ತೇ ಸಮಾಗತಾ;
ತೇಸು ಪಾಣಸಹಸ್ಸಂತು, ಪಠಮಂ ಫಲಮಜ್ಝಗಾ.
ಲಂಕಾದೀಪೇ ಸೋ ಸತ್ಥುಕಪ್ಪೋ ಅಕಪ್ಪೋ;
ಲಂಕಾಧಿಟ್ಠಾನೇ ದ್ವೀಸು ಠಾನೇಸು ಥೇರೋ;
ಧಮ್ಮಂ ಭಾಸಿತ್ವಾ ದೀಪಭಾಸಾಯ ಏವಂ;
ಸದ್ಧಮ್ಮೋ ತಾರಂ ಕಾರಯೀ ದೀಪದೀಪೋತಿ.
ಸುಜನಪ್ಪಸಾದಸಂವೇಗತ್ಥಾಯ ಕತೇ ಮಹಾವಂಸೇ
ನಗರಪ್ಪವೇಸನೋ ನಾಮ
ಚುದ್ದಸಮೋ ಪರಿಚ್ಛೇದೋ.
ಪಞ್ಚದಸಮ ಪರಿಚ್ಛೇದ
ಮಹಾವಿಹಾರ ಪಟಿಗ್ಗಹಕೋ
ಹತ್ಥಿಸಾಲಾಪಿ ಸಮ್ಬಾಧಾ, ಇತಿ ತತ್ಥ ಸಮಾಗತಾ;
ತೇ ನನ್ದನವನೇ ರಮ್ಮೇ, ದಕ್ಖಿಣದ್ವಾರತೋ ಬಹಿ.
ರಾಜುಯ್ಯಾನೇ ಘನಚ್ಛಾಯೇ, ಸೀತಲೇ ನೀಲಸದ್ದಲೇ;
ಪಞ್ಞಾಪೇಸುಂ ಆಸನಾನಿ, ಥೇರಾನಂ ಸಾದರಾ ನರಾ.
ನಿಕ್ಖಮ್ಮ ದಕ್ಖಿಣದ್ವಾರಾ, ಥೇರೋ ತತ್ಥ ನಿಸೀದಿ ಚ;
ಮಹಾಕುಲೀನಾ ಚಾ’ಗಮ್ಮ, ಇತ್ಥಿಯೋ ಬಹುಕಾ ತಹಿಂ.
ಥೇರಂ ¶ ಉಪನಿಸೀದಿಂಸು, ಉಯ್ಯಾನಂ ಪೂರಯನ್ತಿಯೋ;
ಬಾಲಪಣ್ಡಿತಸುತ್ತನ್ತಂ, ತಾಸಂ ಥೇರೋ ಅದೇಸಯಿ.
ಸಹಸ್ಸಂ ಇತ್ಥಿಯೋ ತಾಸು, ಪಠಮಂ ಫಲಮಜ್ಝಗುಂ;
ಏವಂ ತತ್ಥೇವ ಉಯ್ಯಾನೇ, ಸಾಯಣ್ಹಸಮಯೋ ಅಹು.
ತತೋ ಥೇರಾ ನಿಕ್ಖಮಿಂಸು, ‘‘ಯಾಮ ತಂ ಪಬ್ಬತಂ’’ ಇತಿ;
ರಞ್ಞೋ ಪಟಿನಿವೇದೇಸುಂ, ಸೀಘಂ ರಾಜಾ ಉಪಾಗಮಿ.
ಉಪಾಗಮ್ಮಾ’ಬ್ರವೀ ಥೇರಂ, ‘‘ಸಾಯಂ ದೂರೋ ಚ ಪಬ್ಬತೋ;
ಇಧೇವ ನನ್ದನುಯ್ಯಾನೇ, ನಿವಾಸೋ ಫಾಸುಕೋ ಇತಿ.
ಪುರಸ್ಸ ಅಚ್ಚಾಸನ್ನತ್ತಾ, ‘‘ಅಸಾರುಪ್ಪ’’ನ್ತಿ ಭಾಸಿತೇ;
‘‘ಮಹಾಮೇಘವನುಯ್ಯಾನಂ, ನಾತಿದೂರಾತಿ ಸನ್ತಿಕೇ.
ರಮ್ಮಂ ಛಾಯೂದಕೂಪೇತಂ, ನಿವಾಸೋ ತತ್ಥ ರೋಚತು;
ನಿವತ್ತಿತಬ್ಬಂ ಭನ್ತೇ’’ನ್ತಿ, ಥೇರೋ ತತ್ಥ ನಿವತ್ತಯಿ.
ತಸ್ಮಿಂ ನಿವತ್ತಠಾನಮ್ಹಿ, ಕದಮ್ಬನದಿಯನ್ತಿಕೇ;
ನಿವತ್ತಚೇತಿಯಂ ನಾಮ, ಕತಂ ವುಚ್ಚತಿ ಚೇತಿಯಂ.
ತಂ ನನ್ದನಾ ದಕ್ಖಿಣೇನ, ನಯಂ ಥೇರಂ ರಥೇಸಭೋ;
ಮಹಾಮೇಘವನುಯ್ಯಾನಂ, ಪಾಚಿನದ್ವಾರಕಂ ನಯಿ.
ತತ್ಥ ರಾಜಘರೇ ರಮ್ಮೇ, ಮಞ್ಚಪೀಠಾನಿ ಸಾಧುಕಂ;
ಸಾಧೂತಿ ಸನ್ಥರಾಪೇತ್ವಾ, ‘‘ವಸತೇ’ತ್ತ ಸುಖಂ’’ ಇತಿ.
ರಾಜಾ ಥೇರೇ’ಭಿವಾದೇತ್ವಾ, ಅಮಚ್ಚಪರಿವಾರಿತೋ;
ಪುರಂ ಪಾವಿಸಿ ಥೇರಾ ತು, ತಂ ರತ್ತಿಂ ತತ್ಥ ತೇ ವಸುಂ.
ಪಭಾತೇಯೇವ ಪುಪ್ಫಾನಿ, ಗಾಹೇತ್ವಾ ಧರಣೀಪತಿ;
ಥೇರೇ ಉಪಚ್ಚ ವನ್ದಿತ್ವಾ, ಪೂಜೇತ್ವಾ ಕುಸುಮೇಹಿ ಚ.
ಪುಚ್ಛಿ ಕಚ್ಚಿ ಸುಖಂ ವುಟ್ಠಂ, ಉಯ್ಯಾನಂ ಫಾಸುಕಂ ಇತಿ;
ಸುಖಂ ವುತ್ಥಂ ಮಹಾರಾಜ, ಉಯ್ಯಾನಂ ಯತಿ ಫಾಸುಕಂ.
ಆರಾಮೋ ಕಪ್ಪತೇ ಭನ್ತೇ, ಸಙ್ಘಸ್ಸಾ’’ತಿ ಅಪುಚ್ಛಿ ಸೋ;
‘‘ಕಪ್ಪತೇ’’ಇತಿ ವತ್ವಾನ, ಕಪ್ಪಾಕಪ್ಪೇಸು ಕೋವಿದೋ.
ಥೇರೋ ವೇಳುವನಾರಾಮ, ಪಟಿಗ್ಗಹಣಮಬ್ರವಿ;
ತಂ ಸುತ್ವಾ ಅಭಿಹಟ್ಠೋ ಸೋ, ತುಟ್ಠಹಟ್ಠೋ ಮಹಾಜನೋ.
ಥೇರಾನಂ ¶ ವನ್ದನತ್ಥಾಯ, ದೇವೀ ತು ಅನುಲಾಗತಾ;
ಸದ್ಧಿಂ ಪಞ್ಚಸತಿತ್ಥೀಹಿ, ದುತಿಯಂ ಫಲಮಜ್ಝಗಾ.
ಸಾ ಪಞ್ಚಸತಾ ದೇವೀ, ಅನುಲಾ’ಹ ಮಹೀಪತಿ;
‘‘ಪಬ್ಬಜಿಸ್ಸಾಮ ದೇವಾ’’ತಿ, ರಾಜಾ ಥೇರಮವೋಚ ಸೋ.
ಪಬ್ಬಾಜೇಥ ಇಮಾಯೋ’’ತಿ, ಥೇರೋ ಆಹ ಮಹೀಪತಿಂ;
‘‘ನ ಕಪ್ಪತಿ ಮಹಾರಾಜ, ಪಬ್ಬಾಜೇತುಂ ಥಿಯೋ ಹಿನೋ.
ಅತ್ಥಿ ಪಾಟಲಿಪುತ್ತಸ್ಮಿಂ, ಭಿಕ್ಖುನೀ ಮೇ ಕನಿಟ್ಠಿಕಾ;
ಸಙ್ಘಮಿತ್ತಾತಿ ನಾಮೇನ, ವಿಸ್ಸುತಾ ಸಾ ಬಹುಸ್ಸುತಾ.
ನರಿನ್ದಸಮಣಿನ್ದಸ್ಸ, ಮಹಾಬೋಧಿದುಮಿನ್ದತೋ;
ದಕ್ಖಿಣಂ ಸಾಖಮಾದಾಯ, ತಥಾ ಭಿಕ್ಖುನಿಯೋ ವರಾ.
ಆಗಚ್ಛತೂ’ತಿ ಪೇಸೇಹಿ, ರಞ್ಞೋ ನೋ ಪಿತು ಸನ್ತಿಕಂ;
ಪಬ್ಬಾಜೇಸ್ಸತಿ ಸಾ ಥೇರೀ, ಆಗತಾ ಇತ್ಥಿಯೋ ಇಮಾ.
‘‘ಸಾಧು’’ತಿ ವತ್ವಾ ಗಣ್ಹಿತ್ವಾ, ರಾಜಾ ಭಿಙ್ಕಾರಮುತ್ತಮಂ;
‘‘ಮಹಾಮೇಘವನುಯ್ಯಾನಂ, ದಮ್ಮಿ ಸಙ್ಘಸ್ಸಿ’ಮಂ ಇತಿ.
ಮಹಿನ್ದಥೇರಸ್ಸ ಕರೇ, ದಕ್ಖಿಣೋದಕಮಾ’ಕಿರೀ;
ಮಹಿಯಾ ಪತಿತೇ ತೋಯೇ, ಅಕಮ್ಪಿತ್ಥ ಮಹಾ ಮಹೀ.
‘‘ತಸ್ಮಾ ಕಮ್ಪತಿ ಭೂಮೀ’’ತಿ, ಭೂಮಿಪಾಲೋ ಅಪುಚ್ಛಿ ತಂ;
ಪತಿಟ್ಠಿತತ್ತಾ ದೀಪಮ್ಹಿ, ಸಾಸನಸ್ಸಾ’ತಿ ಸೋ ಬ್ರವಿ.
ಥೇರಸ್ಸ ಉಪನಾಮೇಸಿ, ಜಾತಿಪುಪ್ಫಾನಿ ಜಾತಿಮಾ;
ಥೇರೋ ರಾಜಘರಂ ಗನ್ತ್ವಾ, ತಸ್ಸ ದಕ್ಖಿಣತೋ ಠಿತೋ.
ರುಕ್ಖಮ್ಹಿ ಪಿಚುಲೇ ಅಟ್ಠ, ಪುಪ್ಫಮುಟ್ಠೀ ಸಮೋಕಿರೀ;
ತತ್ಥಾಪಿ ಪುಥವೀ ಕಮ್ಪಿ, ಪುಟ್ಠೋ ತಸ್ಸಾ’ಹ ಕಾರಣಂ.
ಅಹೋಸಿ ತಿಣ್ಣಂ ಬುದ್ಧಾನಂ, ಕಾಲೇ’ಪಿ ಇಧ ಮಾಲಕೋ;
ನರಿನ್ದಸಙ್ಘಕಮ್ಮತ್ಥಂ, ಭವಿಸ್ಸತಿ ಇದಾನಿಪಿ.
ರಾಜಗೇಹಾ ಉತ್ತರತೋ, ಚಾರುಪೋಕ್ಖರಣಿಂ ಅಗಾ;
ತತ್ತಕಾ ನೇವ ಪುಪ್ಫಾನಿ, ಥೇರೋ ತತ್ಥಾಪಿ ಓಕಿರಿ.
ತತ್ಥಾ’ಪಿ ಪುಥುವೀ ಕಮ್ಪಿ, ಪುಟ್ಠೋ ತಸ್ಸಾ’ಹ ಕಾರಣಂ;
‘‘ಜನ್ತಘರ ಪೋಕ್ಖರಣೀ, ಅಯಂ ಹೇಸ್ಸತಿ ಭೂಮಿಪ’’.
ತಸ್ಸೇವ ¶ ರಾಜಗೇಹಸ್ಸ, ಗನ್ತ್ವಾನ ದ್ವಾರಕೋಟ್ಠಕಂ;
ತತ್ತಕೇಹೇ’ವ ಪುಪ್ಫೇಹಿ, ತಂ ಠಾನಂ ಪೂಜಯೀ ಇಸಿ.
ತತ್ಥಾಪಿ ಪುಥುವೀಕಮ್ಪಿ, ಹಟ್ಠಲೋಮೋ ಅತೀವಸೋ;
ರಾಜಾ ತಂ ಕಾರಣಂ ಪುಚ್ಛಿ, ಥೇರೋ ತಸ್ಸಾ’ಹ ಕಾರಣಂ.
ಇಮಮ್ಹಿ ಕಪ್ಪೇ ಬುದ್ಧಾನಂ, ತಿಣ್ಣನ್ನಂ ಬೋಧಿರುಕ್ಖತೋ;
ಆನೇತ್ವಾ ದಕ್ಖಿಣಾಸಾಖಾ, ರೋಪಿತಾ ಇಧ ಭೂಮಿಪ.
ತಥಾಗತಸ್ಸ ಅಮ್ಹಾಕಂ, ಬೋಧಿಸಾಖಾಪಿ ದಕ್ಖಿಣಾ;
ಇಮಸ್ಮಿಂಯೇವ ಠಾನಮ್ಹಿ, ಪತಿಟ್ಠಿಸ್ಸತಿ ಭೂಮಿಪ.
ತತೋ’ಗಮಾ ಮಹಾಥೇರೋ, ಮಹಾಮುಚಲಮಾಲಕಂ;
ತತ್ತಕಾನೇವ ಪುಪ್ಫಾನಿ, ತಸ್ಮಿಂ ಠಾನೇ ಸಮೋಕಿರಿ.
ತಥಾಪಿ ಪುಥವೀ ಕಮ್ಪಿ, ಪುಟ್ಠೋ ತಸ್ಸಾ’ಹ ಕಾರಣಂ;
ಸಙ್ಘಸ್ಸು ಪೋಸಥಾ ಗಾರಂ, ಇಧ ಹೇಸ್ಸತಿ ಭೂಮಿಪ.
ಪಞ್ಹಮ್ಬಮಾಲಕಟ್ಠಾನಂ, ತತೋ’ಗಮಾ ಮಹೀಪತಿ;
ಸುಪಕ್ಕಂ ಅಮ್ಬಪಕ್ಕಞ್ಚ, ವಣ್ಣಗನ್ಧರಸುತ್ತಮಂ.
ಮಹನ್ತಂ ಉಪನಾಮೇಸಿ, ರಞ್ಞೋ ಉಯ್ಯಾನಪಾಲಕೋ;
ತಂ ಥೇರಸ್ಸುಪನಾಮೇಸಿ, ರಾಜಾ ಅತಿಮನೋರಮಂ.
ಥೇರೋ ನಿಸೀದನಾಕಾರಂ, ದಸ್ಸೇಸಿ ಜನತಾ ಹಿತೋ;
ಅತ್ಥರಾಪೇಸಿ ತತ್ಥೇವ, ರಾಜಾ ಅತ್ಥರಣಂ ವರಂ.
ಅದಾ ತತ್ಥ ನಿಸಿನ್ನಸ್ಸ, ಥೇರಸ್ಸಮ್ಬಂ ಮಹೀಪತಿ;
ಥೇರೋ ತಂ ಪರಿಭುಞ್ಜಿತ್ವಾ, ರೋಪನತ್ಥಾಯ ರಾಜಿನೋ.
ಅಮ್ಬಟ್ಠಿಕಂ ಅದಾ ರಾಜಾ, ತಂ ಸಯಂ ತತ್ಥ ರೋಪಯಿ;
ಹತ್ಥೇ ತಸ್ಸೋಪರಿಥೇರೋ, ಧೋವಿ ತಸ್ಸ ವಿರುಳ್ಹಿಯಾ.
ತಂ ಖಣಂಯೇವ ಬೀಜಮ್ಹಾ, ತಮ್ಹಾ ನಿಕ್ಖಮ್ಮ ಅಙ್ಕುರೋ;
ಕಮೇನಾ’ತಿ ಮಹಾರುಕ್ಖೋ, ಪತ್ತಪಕ್ಕಧರೋ ಅಹು.
ತಂ ಪಾಟಿಹಾರಿಯಂ ದಿಸ್ವಾ, ಪರಿಸಾ ಸಾ ಸರಾಜಿಕಾ;
ನಮಸ್ಸಮಾನಾ ಅಟ್ಠಾಸಿ, ಥೇರೇ ಹತ್ಥತನುರುಹಾ.
ಥೇರೋ ¶ ತದಾ ಪುಪ್ಫಮುಟ್ಠಿ, ಅಟ್ಠ ತತ್ಥ ಸಮೋಕಿರಿ;
ತಥಾಪಿ ಪುಥವೀಕಮ್ಪಿ, ಪುಟ್ಠೋ ತಸ್ಸಾ’ಹ ಕಾರಣಂ.
ಸಙ್ಘಸ್ಸಪ್ಪನ್ನಲಾಭಾನಂ, ಅನೇಕೇಸಂ ನರಾಧಿಪ;
ಸಙ್ಗಮ್ಮಭಾಜನಠಾನಂ, ಇದಂ ಠಾನಂ ಭವಿಸ್ಸತಿ.
ತತೋ ಗನ್ತ್ವಾ ಚತುಸ್ಸಾಲ-ಠಾನಂ ತತ್ಥ ಸಮೋಕಿರಿ;
ತತ್ತಕಾನೇವ ಪುಪ್ಫಾನಿ, ಕಮ್ಪಿ ತತ್ಥಾಪಿ ಮೇದಿನೀ.
ತಂ ಕಮ್ಪಕಾರಣಂ ಪುಚ್ಛಿ, ರಾಜಾ ಥೇರೋ ವಿಯಾಕರಿ;
ತಿಣ್ಣನ್ನಂ ಪುಬ್ಬಬುದ್ಧಾನಂ, ರಾಜುಯ್ಯಾನ ಪಟಿಗ್ಗಹೇ.
ದಾನ ವತ್ಥುನಾ’ಹಟಾನಿ, ದೀಪವಾಸೀಹಿ ಸಬ್ಬತೋ;
ಇಧ ಠಪೇತ್ವಾ ಭೋಜೇಸುಂ, ಸಸಙ್ಘೇ ಸುಗತೇ ತಯೋ.
ಇದಾನಿ ಪನ ಏತ್ಥೇವ, ಚತುಸ್ಸಾಲಾ ಭವಿಸ್ಸತಿ;
ಸಙ್ಘಸ್ಸ ಇಧ ಭತ್ತಗ್ಗಂ, ಭವಿಸ್ಸತಿ ನರಾಧಿಪ.
ಮಹಥೂಪಠಿತಠಾನಂ, ಠಾನಾಠಾನವಿದೂತತೋ;
ಅಗಮಾಸಿ ಮಹಾಥೇರೋ, ಮಹಿನ್ದೋ ದೀಪದೀಪನೋ.
ತದಾ ಅನ್ತೋಪರಿಕ್ಖೇಪೇ, ರಾಜುಯ್ಯಾನಸ್ಸ ಖುದ್ದಿಕಾ;
ಕಕುಧವ್ಹಾ ಅಹು ವಾಪೀ, ತಸ್ಸೋ’ಪರಿ ಜಲನ್ತಿಕೇ.
ಥೂಪಾರಹಂ ಥಲಠಾನಂ, ಅಹು ಥೇರೇ ತಹಿಂ ಗತೇ;
ರಞ್ಞೋ ಚಮ್ಪಕಪುಪ್ಫಾನಂ, ಪುಟಕಾನ’ಟ್ಠ ಆಹರುಂ.
ತಾನಿ ಚಮ್ಪಕಪುಪ್ಫಾನಿ, ರಾಜಾ ಥೇರಸ್ಸು’ಪಾನಯಿ;
ಥೇರೋ ಚಮ್ಪಕಪುಪ್ಫೇಹಿ, ತೇಹಿ ಪೂಜೇಸಿ ತಂ ಫಲಂ.
ತತ್ಥಾಪಿ ಪುಥವೀ ಕಮ್ಪಿ, ರಾಜಾ ತಂ ಕಮ್ಪಕಾರಣಂ;
ಪುಚ್ಛಿ ಥೇರೋ’ನು ಪುಬ್ಬೇನ, ಆಹತಂ ಕಮ್ಪಕಾರಣಂ.
ಇದಂ ಠಾನಂ ಮಹಾರಾಜ, ಚತುಬುದ್ಧ ನಿಸೇವಿತಂ;
ಥೂಪಾರಹಂ ಹಿತತ್ಥಾಯ, ಸುಖತ್ಥಾಯ ಚ ಪಾಣಿನಂ.
ಇಮಮ್ಹಿ ಕಪ್ಪೇ ಪಠಮಂ, ಕಕುಸನ್ಧೋ ಜಿನೋ ಅಹು;
ಸಬ್ಬ ಧಮ್ಮವಿದೂ ಸತ್ಥಾ, ಸಬ್ಬಲೋಕಾನುಕಮ್ಪಕೋ.
ಮಹಾತಿತ್ಥವ್ಹಯಂ ಆಸಿ, ಮಹಾಮೇಘವನಂ ಇದಂ;
ನಗರಂ ಅಭಯಂ ನಾಮ, ಪುರತ್ಥಿಮದಿಸಾಯ’ಹು.
ಕದಮ್ಬ ನದಿಯಾ ಪಾರೇ, ತತ್ಥ ರಾಜಾ’ಭಯೋ ಅಹು;
ಓಜದೀಪೋತಿ ನಾಮೇನ, ಅಯಂ ದೀಪೋ ತದಾಅಹು.
ರಕ್ಖಸೇಹಿ ¶ ಜನಸ್ಸೇ’ತ್ಥ, ರೋಗೋ ಪಜ್ಜರಕೋ ಅಹು;
ಕಕುಸನ್ಧೋ ದಸಬಲೋ, ದಿಸ್ವಾನ ತದುಪದ್ದವಂ.
ತಂ ಗನ್ತ್ವಾ ಸತ್ತವಿನಯಂ, ಪವತ್ತಿಂ ಸಾಸನಸ್ಸ ಚ;
ಕಾತುಂ ಇಮಸ್ಮಿಂ ದೀಪಸ್ಮಿಂ, ಕರುಣಾ ಬಲಚೋದಿತೋ.
ಚತ್ತಾಲೀಸಸಹಸ್ಸೇಹಿ, ತಾದೀಹಿ ಪರಿವಾರಿತೋ;
ನಭಸಾ’ಗಮ್ಮ ಅಟ್ಠಾಸಿ, ದೇವಕೂಟಮ್ಹಿ ಪಬ್ಬತೇ.
ಸಮ್ಬುದ್ಧಸ್ಸಾ’ನುಭಾವೇನ, ರೋಗೋ ಪಜ್ಜರಕೋ ಇಧ;
ಉಪಸನ್ತೋ ಮಹಾರಾಜ, ದೀಪಮ್ಹಿ ಸಕಲೇ ತದಾ.
ಕತ್ಥ ಠಿತೋ ಅಧಿಟ್ಠಾಸಿ, ನರಿಸ್ಸರ ಮುನಿಸ್ಸರೋ;
ಸಬ್ಬೇ ಮಂ ಅಜ್ಜ ಪಸ್ಸನ್ತು, ಓಜದೀಪಮ್ಹಿ ಮಾನುಸಾ.
ಆಗನ್ತುಕಾಮಾ ಸಬ್ಬೇವ, ಮನುಸ್ಸಾ ಮಮ ಸನ್ತಿಕಂ;
ಆಗಚ್ಛನ್ತು ಅಕಿಚ್ಛೇನ, ಖಿಪ್ಪಞ್ಚಾಪಿ ಮಹಾಮುನಿ.
ಓಭಾಸಯನ್ತಂ ಮುನಿನ್ದಂ ತಂ, ಓಭಾಸನ್ತಞ್ಚ ಪಬ್ಬತಂ;
ರಾಜಾ ಚ ನಾಗರಾ ಚೇವ, ದಿಸ್ವಾ ಖಿಪ್ಪಂ ಉಪಾಗಮುಂ.
ದೇವತಾ ಬಲಿದಾನತ್ಥಂ, ಮನುಸ್ಸಾ ಚ ತಹಿಂ ಗತಾ;
ದೇವತಾ ಇತಿ ಮಞ್ಞಿಂಸು, ಸಸಙ್ಘಂ ಲೋಕನಾಯಕಂ.
ರಾಜಾ ಸೋ ಮುನಿರಾಜಂ ತಂ, ಅತಿಹಟ್ಠೋ’ಭಿ ವಾದಿಯ;
ನಿಮನ್ತಯಿತ್ವಾ ಭತ್ತೇನ, ಆನೇತ್ವಾ ಪುರಸನ್ತಿ ಕಂ.
ಸಸಙ್ಘಸ್ಸ ಮುನಿನ್ದಸ್ಸ, ನಿಸಜ್ಜಾರಹಮುತ್ತಮಂ;
ರಮಣೀಯಮಿದಂ ಠಾನ-ಮಸಮ್ಬಾಧನ್ತಿ ಚಿನ್ತಿಯ.
ಕಾರಿತೇ ಮಣ್ಡಪೇ ರಮ್ಮೇ, ಪಲ್ಲಙ್ಕೇಸು ವರೇ ಸುತಂ;
ನಿಸೀದಾಪೇಸಿ ಸಮ್ಬುದ್ಧಂ, ಸಸಙ್ಘಂ ಇಧ ಭೂಪತಿ.
ನಿಸಿನ್ನಮ್ಪಿ ಚ ಪಸ್ಸನ್ತಾ, ಸಸಙ್ಘಂ ಲೋಕನಾಯಕಂ;
ದೀಪೇ ಮನುಸ್ಸಾ ಆನೇಸುಂ, ಪಣ್ಣಾಕಾರೇ ಸಮನ್ತತೋ.
ಅತ್ತನೋ ಖಜ್ಜಭೋಜ್ಜೇಹಿ, ತೇಹಿ ತೇಹಾ’ಭತೇಹಿ ಚ;
ಸನ್ತಪ್ಪೇಸಿ ಸಸಙ್ಘಂ ತಂ, ರಾಜಾ ಸೋ ಲೋಕನಾಯಕಂ.
ಇಧೇವ ಪಚ್ಛಾಭತ್ತಂ ತಂ, ನಿಸಿನ್ನಸ್ಸ ಜಿನಸ್ಸ ಸೋ;
ಮಹಾ ತಿತ್ಥಕಮುಯ್ಯಾನಂ, ರಾಜಾ’ದಾ ದಕ್ಖಿಣಂ ವರಂ.
ಅಕಾಲಪುಪ್ಫಾ ¶ ಲಙ್ಕಾರೇ, ಮಹಾತಿತ್ಥವನೇ ತದಾ;
ಪಟಿಗ್ಗಹಿತೇ ಬುದ್ಧೇನ, ಅಕಮ್ಪಿತ್ಥ ಮಹಾಮಹೀ.
ಏತ್ಥೇವ ಸೋ ನಿಸೀದಿತ್ವಾ, ಧಮ್ಮಂ ದೇಸೇಸಿ ನಾಯಕೋ;
ಚತ್ತಾಲೀಸ ಸಹಸ್ಸಾನಿ, ಪತ್ತಾ ಮಗ್ಗಫಲಂ ನರಾ.
ದಿವಾವಿಹಾರಂ ಕತ್ವಾನ, ಮಹಾತಿತ್ಥವನೇ ಜಿನೋ;
ಸಾಯಣ್ಹಸಮಯೇ ಗನ್ತ್ವಾ, ಬೋಧಿಠಾನಾರಹಂ ಮಹಿ.
ನಿಸಿನ್ನೋ ತತ್ಥ ಅಪ್ಪೇತ್ವಾ, ಸಮಾಧಿಂ ವುಟ್ಠಿತೋ ತತೋ;
ಇತಿ ಚಿನ್ತಯಿ ಸಮ್ಬುದ್ಧೋ, ಹಿತತ್ಥಂ ದೀಪವಾಸಿನಂ.
ಆದಾಯ ದಕ್ಖಿಣಂ ಸಾಖಂ, ಬೋಧಿತೋ ಮೇ ಸಿರೀಸತೋ;
ಆಗಚ್ಛತು ರೂಪನನ್ದಾ, ಭಿಕ್ಖುನೀ ಸಹಭಿಕ್ಖುನೀ.
ತಸ್ಸ ತಂ ಚಿತ್ತಮಞ್ಞಾಯ, ಸಾ ಥೇರೀ ತದನನ್ತರಂ;
ಗಹೇತ್ವಾ ತತ್ಥ ರಾಜಾನಂ, ಉಪಸಙ್ಕಮ್ಮ ತಂ ತರುಂ.
ಲೇಖಂ ದಕ್ಖಿಣಸಾಖಾಯ, ದಾಪೇತ್ವಾನ ಮಹಿದ್ಧಿಕಾ;
ಮನೋಸಿಲಾಯ ಛಿನ್ನಂ ತಂ, ಠಿತಂ ಹೇಮಕಟಾಹಕೇ.
ಇದ್ಧಿಯಾ ಬೋಧಿಮಾದಾಯ, ಸಪಞ್ಚಸತ ಭಿಕ್ಖುನೀ;
ಇಧಾ’ನೇತ್ವಾ ಮಹಾರಾಜ, ದೇವತಾ ಪರಿವಾರಿತಾ.
ಸಸುವಣ್ಣ ಕಟಾಹಂ ತಂ, ಸಮ್ಬುದ್ಧೇನ ಪಸಾರಿತೇ;
ಠಪೇಸಿ ದಕ್ಖಿಣೇ ಹತ್ಥೇ, ತಂ ಗಹೇತ್ವಾ ತಥಾಗತೋ.
ಪತಿಟ್ಠಾಪೇತುಂ ಪಾದಾಸಿ, ಬೋಧಿಂ ರಞ್ಞೋ’ಭಯಸ್ಸ ತಂ;
ಮಹಾತಿತ್ಥಮ್ಹಿ ಉಯ್ಯಾನೇ, ಪತಿಟ್ಠಾಪೇಸಿ ಭೂಪತಿ.
ತತೋ ಗನ್ತ್ವಾನ ಸಮ್ಬುದ್ಧೋ,
ಇತೋ ಉತ್ತರತೋ ಪನ;
ಸಿರೀಸಮಾಲಕೇ ರಮ್ಮೇ,
ನಿಸೀದಿತ್ವಾ ತಥಾಗತೋ.
ಜನಸ್ಸ ಧಮ್ಮಂ ದೇಸೇಸಿ, ಧಮ್ಮಾಭಿಸಮಯೋ ತಹಿಂ;
ವೀಸತಿಯಾ ಸಹಸ್ಸಾನಂ, ಪಾಣಾನಂ ಆಸಿ ಭೂಮಿಪ.
ತತೋಪಿ ಉತ್ತರಂ ಗನ್ತ್ವಾ, ಥೂಪರಾಮಮಹಿಂ ಜಿನೋ;
ನಿಸಿನ್ನೋ ತತ್ಥ ಅಪ್ಪೇತ್ವಾ, ಸಮಾಧಿಂ ವುಟ್ಠಿತೋ ತತೋ.
ಧಮ್ಮಂ ¶ ದೇಸೇಸಿ ಸಮ್ಬುದ್ಧೋ, ಪರಿಸಾಯ ತಹಿಂಪನ;
ದಸಪಾಣ ಸಹಸ್ಸಾನಿ, ಪತ್ತಮಗ್ಗಫಲಾನ’ಹುಂ.
ಅತ್ತನೋ ಧಮ್ಮಕರಣಂ, ಮನುಸ್ಸಾನಂ ನಮಸ್ಸಿತುಂ;
ದತ್ವಾ ಸಪರಿವಾರಂ ತಂ, ಠಪೇತ್ವಾ ಇಧ ಭಿಕ್ಖುನಿಂ.
ಸಹ ಭಿಕ್ಖುಸಹಸ್ಸೇನ, ಮಹಾದೇವಞ್ಚ ಸಾವಕಂ;
ಠಪೇತ್ವಾ ಇಧ ಸಮ್ಬುದ್ಧೋ, ತತೋ ಪಾಚಿನತೋ ಪನ.
ಠಿತೋ ರತನಮಾಲಮ್ಹಿ, ಜನಂ ಸಮನುಸಾಸಿಯ;
ಸಸಙ್ಘೋ ನಭಮುಗ್ಗನ್ತ್ವಾ, ಜಮ್ಬುದೀಪಂ ಜಿನೋ ಅಗಾ.
ಇಮಮ್ಹಿ ಕಪ್ಪೇ ದುತಿಯಂ, ಕೋಣಾಗಮನ ನಾಯಕೋ;
ಅಹು ಸಬ್ಬವಿದೂ ಸತ್ಥಾ, ಸಬ್ಬಲೋಕಾನುಕಮ್ಪಕೋ.
ಮಹಾನಾಮವ್ಹಯಂ ಆಸಿ, ಮಹಾಮೇಘವನಂ ಇದಂ;
ವಡ್ಢಮಾನಪುರಂ ನಾಮ, ದಕ್ಖಿಣಾಯ ದಿಸಾಯ’ಹು.
ಸಮಿದ್ಧೋ ನಾಮ ನಾಮೇನ, ತತ್ಥ ರಾಜಾ ತದಾ ಅಹು;
ನಾಮೇನ ವರದೀಪೋ’ತಿ, ಅಯಂ ದೀಪೋ ತದಾ ಅಹು.
ದುಬ್ಬುಟ್ಠುಪದ್ದವೋ ಏತ್ಥ, ವರದೀಪೇ ತದಾ ಅಹು;
ಜಿನೋ ಸಕೋಣಾಗಮನೋ, ದಿಸ್ವಾನ ತದುಪದ್ದವಂ.
ತಂ ಹುತ್ವಾ ಸತ್ತವಿನಯಂ, ಪವತ್ತಿಂ ಸಾಸನಸ್ಸ ಚ;
ಕಾತುಂ ಇಮಸ್ಮಿಂ ದೀಪಸ್ಮೀಂ, ಕರುಣಾ ಬಲಚೋದಿತೋ.
ತಿಂಸ ಭಿಕ್ಖುಸಹಸ್ಸೇಹಿ, ತಾದೀಹಿ ಪರಿವಾರಿತೋ;
ನಭಸಾ’ಗಮ್ಮ ಅಟ್ಠಾಸಿ, ನಭೇ ಸುಮನಕೂಟಕೇ.
ಸಮ್ಬುದ್ಧಸ್ಸಾ’ನುಭಾವೇನ, ದುಬ್ಬುಟ್ಠಿ ಸಾ ಖಯಂ ಗತಾ;
ಸಾಸನಾನ್ತರಧಾನತ್ತಾ, ಸುವುಟ್ಠಿ ಚ ತದಾಅಹು.
ತತ್ತ ಠಿತೋ ಅಧಿಟ್ಠಾಸಿ, ನರಿಸ್ಸರಮುನಿಸ್ಸರೋ;
ಸಬ್ಬೇವ ಅಜ್ಜ ಪಸ್ಸನ್ತು, ವರದೀಪಮ್ಹಿ ಮಾನುಸಾ.
ಆಗನ್ತುಕಾಮಾ ಸಬ್ಬೇವ, ಮನುಸ್ಸಾ ಮಮ ಸನ್ತಿಕಂ;
ಆಗಚ್ಛನ್ತು ಅಕಿಚ್ಛೇನ, ಖಿಪ್ಪಞ್ಚಾ’ತಿ ಮಹಾಮುನಿ.
ಮಹಾಸತ್ತಂ ಮುನಿನ್ದಂ ತಂ, ಓಭಾಸನ್ತಞ್ಚ ಪಬ್ಬತಂ;
ರಾಜಾ ಚ ನಾಗರಾ ಚೇವ, ದಿಸ್ವಾ ಖಿಪ್ಪಮುಪಾಗಮುಂ.
ದೇವತಾಬಲಿದಾನತ್ಥಂ ¶ , ಮನುಸ್ಸಾ ಚ ತಹಿಂ ಗತಾ;
ದೇವತಾ ಇತಿ ಮಞ್ಞಿಂಸು, ಸಸಙ್ಘಂ ಲೋಕನಾಯಕಂ.
ರಾಜಾ ಸೋ ಮುನಿರಾಜಂ ತಂ, ಅತಿಹಟ್ಠೋ’ಭಿವಾದಿಯ;
ನಿಮನ್ತಯಿತ್ವಾ ಭತ್ತೇನ, ಆನೇತ್ವಾ ಪುರಸನ್ತಿಕಂ.
ಸಸಙ್ಘಸ್ಸ ಮುನಿನ್ದಸ್ಸ, ನಿಸಜ್ಜಾರಹ ಮುತ್ತಮಂ;
ರಮಣೀಯಮಿದಂ ಠಾನಂ, ಅಸಮ್ಬಾಧನ್ತಿ ಚಿನ್ತಿಯ.
ಕಾರಿತೇ ಮಣ್ಡಪೇ ರಮ್ಮೇ, ಪಲ್ಲಙ್ಕೇಸು ವರೇಸು ತಂ;
ನಿಸೀದಾಪಯಿ ಸಮ್ಬುದ್ಧಂ, ಸಸಙ್ಘಂ ಇಧ ಭೂಪತಿ.
ನಿಸಿನ್ನಮ್ಪಿ’ಧ ಪಸ್ಸನ್ತಾ, ಸಸಙ್ಘಂ ಲೋಕನಾಯಕಂ;
ದೀಪೇ ಮನುಸ್ಸಾ ಆನೇಸುಂ, ಪಣ್ಣಾಕಾರೇ ಸಮನ್ತತೋ.
ಅತ್ತನೋ ಖಜ್ಜಭೋಜ್ಜೇಹಿ,
ತೇಹಿ ತೇಹಾ’ಭ ತೇಹಿ ಚ;
ಸನ್ತಪ್ಪೇಸಿ ಸಸಙ್ಘಂ ತಂ,
ರಾಜಾ ಸೋ ಲೋಕ ನಾಯಕಂ.
ಇಧೇವ ಪಚ್ಛಾಭತ್ತಂ ತಂ, ನಿಸಿನ್ನಸ್ಸ ಜಿನಸ್ಸ ಸೋ;
ಮಹಾನಾಮಕಮುಯ್ಯಾನಂ, ರಾಜಾ’ದಾ ದಕ್ಖಿಣಂ ವರಂ.
ಅಕಾಲಪುಪ್ಫಾಲಙ್ಕಾರೇ, ಮಹಾನಾಮವನೇ ತದಾ;
ಪಟಿಗ್ಗಹಿತೇ ಬುದ್ಧೇನ, ಅಕಮ್ಪಿತ್ಥ ಮಹಾಮಹೀ.
ಏತ್ಥೇವ ಸೋ ನಿಸೀದಿತ್ವಾ, ಧಮ್ಮಂ ದೇಸೇಸಿ ನಾಯಕೋ;
ತದಾ ತಿಂಸ ಸಹಸ್ಸಾನಿ, ಪತ್ತಾ ಮಗ್ಗಫಲಂ ನರಾ.
ದಿವಾವಿಹಾರಂ ಕತ್ವಾನ, ಮಹಾನಾಮವನೇ ಜಿನೋ;
ಸಾಯಣ್ಹಸಮಯೇ ಗನ್ತ್ವಾ, ಪುಬ್ಬಧೋಧಿಠಿತಂ ಮಹಿಂ.
ನಿಸಿನ್ನೋ ತತ್ಥ ಅಪ್ಪೇತ್ವಾ, ಸಮಾಧಿಂ ವುಟ್ಠಿತೋ ತತೋ;
ಇತಿ ಚಿನ್ತೇಸಿ ಸಮ್ಬುದ್ಧೋ, ಹಿತತ್ಥಂ ದೀಪವಾಸಿನಂ.
ಆದಾಯ ದಕ್ಖಿಣಂ ಸಾಖಂ, ಮಮೋದುಮ್ಬರಬೋಧಿತೋ;
ಆಯಾತು ಕನಕದತ್ತಾ, ಭಿಕ್ಖುನೀ ಸಹಭಿಕ್ಖುನೀ.
ತಸ್ಸ ತಂ ಚಿತ್ತಮಞ್ಞಾಯ, ಸಾ ಥೇರೀ ತದನನ್ತರಂ;
ಗಹೇತ್ವಾ ತತ್ಥ ರಾಜಾನಂ, ಉಪಸಙ್ಕಮ್ಮ ತಂ ತರುಂ.
ಲೇಖಂ ¶ ದಕ್ಖಿಣಸಾಖಾಯ, ದಾಪೇತ್ವಾನ ಮಹಿದ್ಧಿಕಾ;
ಮನೋಸಿಲಾಯ ಛಿನ್ನಂ ತಂ, ಠಿತಂ ಹೇಮಕಟಾಹಕೇ.
ಇದ್ಧಿಯಾ ಬೋಧಿಮಾದಾಯ, ಸಪಞ್ಚಸಹಭಿಕ್ಖುನೀ;
ಇಧಾಗನ್ತ್ವಾ ಮಹಾರಾಜ, ದೇವತಾಪರಿವಾರಿತಾ.
ಸಸುವಣ್ಣಕಟಾಹಂ ತಂ, ಸಮ್ಬುದ್ಧೇನ ಪಸಾರಿತೇ;
ಠಪೇಸಿ ದಕ್ಖಿಣೇ ಹತ್ಥೇ, ತಂ ಗಹೇತ್ವಾ ತಥಾಗತೋ.
ಪತಿಟ್ಠಾಪೇತುಂ ರಞ್ಞೋ’ದಾ, ಸಮಿದ್ಧಸ್ಸ ಸತಂ ತಹಿಂ;
ಮಹಾನಾಮಮ್ಹಿ ಉಯ್ಯಾನೇ, ಪತಿಟ್ಠಾಪೇಸಿ ಭೂಪತಿ.
ತತೋ ಗನ್ತ್ವಾನ ಸಮ್ಬುದ್ಧೋ, ಸಿರೀಸಮಾಲಕುತ್ತರೇ;
ಜನಸ್ಸ ಧಮ್ಮಂ ದೇಸೇಸಿ, ನಿಸಿನ್ನೋ ನಾಗಮಾಲಕೇ.
ತಂ ಧಮ್ಮದೇಸನಂ ಸುತ್ವಾ, ಧಮ್ಮಾಭಿಸಮಯೋ ತಹಿಂ;
ವೀಸತಿಯಾ ಸಹಸ್ಸಾನಂ, ಪಾಣಾನಂ ಆಸಿ ಭೂಮಿಪ.
ಪುಬ್ಬಬುದ್ಧನಿಸಿನ್ನಂ ತಂ, ಠಾನಂ ಗನ್ತ್ವಾ ಪುರುತ್ತರಂ;
ನಿಸಿನ್ನೋ ತತ್ಥ ಅಪ್ಪೇತ್ವಾ, ಸಮಾಧಿಂ ವುಟ್ಠಿತೋ ತತೋ.
ಧಮ್ಮಂ ದೇಸೇಸಿ ಸಮ್ಬುದ್ಧೋ, ಪರಿಸಾಯ ತಹಿಂ ಪನ;
ದಸಪಾಣಸಹಸ್ಸಾನಿ, ಪತ್ತಾ ಮಗ್ಗಫಲಂ ಅಹುಂ.
ಕಾಯಬನ್ಧನಧಾತುಂ ಸೋ, ಮನುಸ್ಸೇಹಿ ನಮಸ್ಸಿತುಂ;
ದತ್ವಾ ಸಪರಿವಾರಂ ತಂ, ಠಪೇತ್ವಾ ಇಧ ಭಿಕ್ಖುನಿಂ.
ಸಹ ಭಿಕ್ಖುಸಹಸ್ಸೇನ, ಮಹಾಸುಮ್ಮಞ್ಚ ಸಾವಕಂ;
ಠಪೇತ್ವಾ ಇಧ ಸಮ್ಬುದ್ಧೋ, ಓರಂ ರತನಮಾಲತೋ.
ಠಪೇತ್ವಾ ಸುದಸ್ಸನೇ ಮಾಲೇ, ಜನಂ ಸಮನುಸಾಸಿಯ;
ಸಸಙ್ಘೋ ನಭಮುಗ್ಗಮ್ಮ, ಜಮ್ಬುದೀಪಂ ಜಿನೋ ಅಗಾ.
ಇಮಮ್ಹಿ ಕಪ್ಪೇ ತತಿಯಂ, ಕಸ್ಸಪೋ ಗೋತ್ತತೋ ಜಿನೋ;
ಅಹು ಸಬ್ಬವಿದೂ ಸತ್ಥಾ, ಸಬ್ಬಲೋಕಾನುಕಮ್ಪಕೋ.
ಮಹಾಮೇಘವನಂ ಆಸಿ, ಮಹಾಸಾಗರನಾಮಕಂ;
ವಿಸಾಲಂ ನಾಮ ನಗರಂ, ಪಚ್ಛಿಮಾಯ ದಿಸಾಯ’ಹು.
ಜಯನ್ತೋ ನಾಮ ನಾಮೇನ, ತತ್ಥ ರಾಜಾ ತದಾ ಅಹು;
ನಾಮೇನ ಮಣ್ಡದೀಪೋತಿ, ಅಯಂ ದೀಪೋ ತದಾ ಅಹು.
ತದಾ ¶ ಜಯನ್ತರಞ್ಞೋ ಚ, ರಞ್ಞೋ ಕನಿಟ್ಠಭಾತು ಚ;
ಯುದ್ಧಂ ಉಪಟ್ಠಿತಂ ಆಸಿ, ಭಿಂಸನಂ ಸತ್ತಹಿಂಸನಂ.
ಕಸ್ಸಪೋ ಸೋ ದಸಬಲೋ, ತೇನ ಯುದ್ಧೇನ ಪಾಣಿನಂ;
ಮಹನ್ತಂ ಬ್ಯಸನಂ ದಿಸ್ವಾ, ಮಹಾಕಾರುಣಿಕೋ ಮುನಿ.
ತಂ ಹನ್ತ್ವಾ ಸತ್ತವಿನಯಂ, ಪವತ್ತಿಂ ಸಾಸನಸ್ಸ ಚ;
ಕಾತುಂ ಇಮಸ್ಮಿಂ ದೀಪಸ್ಮಿಂ, ಕರುಣಾಬಲಚೋದಿತೋ.
ವೀಸತಿಯಾ ಸಹಸ್ಸೇಹಿ, ತಾದೀಹಿ ಪರಿವಾರಿತೋ;
ನಭಸಾ’ಗಮ್ಮ ಅಟ್ಠಾಸಿ, ಸುಭಕೂಟಮ್ಹಿ ಪಬ್ಬತೇ.
ತತ್ರಠಿತೋ ಅಧಿಟ್ಠಾಸಿ, ನರಿಸ್ಸರ ಮುನಿಸ್ಸರೋ;
‘‘ಸಬ್ಬೇ ಮಂ ಅಜ್ಜ ಪಸ್ಸನ್ತು, ಮಣ್ಡದೀಪಮ್ಹಿ ಮಾನುಸಾ.
ಆಗನ್ತುಕಾಮಾ ಸಬ್ಬೇವ, ಮಾನುಸಾ ಮಮ ಸನ್ತಿಕಂ;
ಆಗಚ್ಛನ್ತು ಅಕಿಚ್ಛೇನ, ಖಿಪ್ಪಞ್ಚಾ’ತಿ ಮಹಾಮುನಿ.
ಓಭಾಸನ್ತಂ ಮುನಿನ್ದಂ ತಂ, ಓಭಾಸನ್ತಞ್ಚ ಪಬ್ಬಕಂ;
ರಾಜಾ ಚ ನಾಗರಾ ಚೇವ, ದಿಸ್ವಾ ಖಿಪ್ಪಂ ಉಪಾಗಮುಂ.
ಅತ್ತನೋ ಅತ್ತನೋ ಪತ್ತ-ವಿಜಯಾಯ ಜನಾ ಬಹೂ;
ದೇವತಾ ಬಲಿದಾನತ್ಥಂ, ತಂ ಪಬ್ಬತಮುಪಾಗತಾ.
ದೇವತಾ ಇತಿ ಮಞ್ಞಿಂಸು, ಸಸಙ್ಘಂ ಲೋಕನಾಯಕಂ;
ರಾಜಾ ಚ ಸೋ ಕುಮಾರೋ ಚ, ಯುದ್ಧಮುಜ್ಝಿಂಸು ವಿಮ್ಹಿತಾ.
ರಾಜಾ ಸೋ ಮುನಿರಾಜಂ ತಂ, ಅತಿಹಟ್ಠೋ’ಭಿವಾದಿಯ;
ನಿಮನ್ತಯಿತ್ವಾ ಭತ್ತೇನ, ಆನೇತ್ವಾ ಪುರಸನ್ತಿಕಂ.
ಸಸಙ್ಘಸ್ಸ ಮುನಿನ್ದಸ್ಸ, ನಿಸಜ್ಜಾರಹಮುತ್ತಮಂ;
ರಮಣೀಯಮಿದಂ ಠಾನ-ಮಸಮ್ಬಾಧನ್ತಿ ಚಿನ್ತಿಯ.
ಕಾರಿತೇ ಮಣ್ಡಪೇ ರಮ್ಮೇ, ಪಲ್ಲಙ್ಕೇಸು ವರೇಸು ತಂ;
ನಿಸೀದಾಪೇಸಿ ಸಮ್ಬುದ್ಧಂ, ಸಸಙ್ಘಂ ಇಧ ಭೂಪತಿ.
ನಿಸಿನ್ನಮ್ಪಿಧ ಪಸ್ಸನ್ತಾ, ಸಸಙ್ಘಂ ಲೋಕನಾಯಕಂ;
ದೀಪೇ ಮನುಸ್ಸಾ ಆನೇಸುಂ, ಪಣ್ಣಾಕಾರೇ ಸಮನ್ತತೋ.
ಅತ್ತನೋ ಖಜ್ಜಭೋಜ್ಜೇಹಿ, ತೇಹಿ ತೇಹಾ’ಭತೇಹಿ ಚ;
ಸಸನ್ತಪ್ಪೇಸಿ ಸಸಙ್ಘಂ ತಂ, ರಾಜಾ ಸೋ ಲೋಕನಾಯಕಂ.
ಇಧೇ’ವ ಪಚ್ಛಾಭತ್ತಂ ತಂ, ನಿಸಿನ್ನಸ್ಸ ಜಿನಸ್ಸ ಸೋ;
ಮಹಾಸಾಗರಮುಯ್ಯಾನಂ, ರಾಜಾ’ದಾ ದಕ್ಖಿಣಂ ವರಂ.
ಅಕಾಲಪುಪ್ಫಲಙ್ಕಾರೇ ¶ , ಮಹಾಸಾಗರಕಾನನೇ;
ಪಟಿಗ್ಗಹಿತೇ ಬುದ್ಧೇನ, ಅಕಮ್ಪಿತ್ಥ ಮಹಾಮಹೀ.
ಏತ್ಥೇವ ಸೋ ನಿಸೀದಿತ್ವಾ, ಧಮ್ಮಂ ದೇಸೇಸಿ ನಾಯಕೋ;
ತದಾ ವೀಸಂ ಸಹಸ್ಸಾನಿ, ಸೋತಾಪತ್ತಿಫಲಂ ನರಾ.
ದಿವಾ ವಿಹಾರಂ ಕತ್ವಾನ, ಮಹಾಸಾಗರಕಾನನೇ;
ಸಾಯನ್ಹೇ ಸುಗತೋ ಗನ್ತ್ವಾ, ಪುಬ್ಬಬೋಧಿಟ್ಠಿತಂ ಮಹಿಂ.
ನಿಸಿನ್ನೋ ತತ್ಥ ಅಪ್ಪೇತ್ವಾ, ಸಮಾಧಿಂ ವುಟ್ಠಿತೋ ತತೋ;
ಇತಿ ಚಿನ್ತೇಸಿ ಸಮ್ಬುದ್ಧೋ, ಹಿತತ್ಥಂ ದೀಪವಾಸಿನಂ.
ಆದಾಯ ದಕ್ಖಿಣಂ ಸಾಖಂ, ಮಮ ನಿಗ್ರೋಧಬೋಧಿತೋ;
ಸುಧಮ್ಮಾ ಭಿಕ್ಖುನೀ ಏತು, ಇದಾನಿ ಸಹಭಿಕ್ಖುನೀ.
ತಸ್ಸ ತಂ ಚಿತ್ತಮಞ್ಞಾಯ, ಸಾ ಥೇರೀ ತದನನ್ತರಂ;
ಗಹೇತ್ವಾ ತತ್ಥ ರಾಜಾನಂ, ಉಪಸಙ್ಕಮ್ಮ ತಂ ತರುಂ.
ಲೇಖಂ ದಕ್ಖಿಣಸಾಖಾಯ, ದಾಪೇತ್ವಾನ ಮಹಿದ್ಧಿಕಾ;
ಮನೋಸಿಲಾಯ ಛಿನ್ನಂ ತಂ, ಠಿತಂ ಹೇಮಕಟಾಯಕೇ.
ಇದ್ಧಿಯಾ ಬೋಧಿಮಾದಾಯ, ಸಪಞ್ಚಸತಭಿಕ್ಖುನೀ;
ಇಧಾನೇತ್ವಾ ಮಹಾರಾಜ, ದೇವತಾಪರಿವಾರಿತಾ.
ಸಸುವಣ್ಣಕಟಾಹಂ ತಂ, ಸಮ್ಬುದ್ಧೇನ ಪಸಾರಿತೇ;
ಠಪೇಸಿ ದಕ್ಖಿಣೇ ಹತ್ಥೇ, ತಂ ಗಹೇತ್ವಾ ತಥಾಗತೋ.
ಪತಿಟ್ಠಾಪೇತುಂ ರಞ್ಞೋ’ದಾ, ಜಯನ್ತಸ್ಸ ಸತಂ ತಹಿಂ;
ಮಹಾಸಾಗರಮುಯ್ಯಾನೇ, ಪತಿಟ್ಠಾಪೇಸಿ ಭೂಪತಿ.
ತತೋ ಗನ್ತ್ವಾನ ಸಮ್ಬುದ್ಧೋ, ನಾಗಮಾಳಕಉತ್ತರೇ;
ಧನಸ್ಸ ಧಮ್ಮಂ ದೇಸೇಸಿ, ನಿಸಿನ್ನೋ’ಸೋಕಮಾಳಕೇ.
ತಂ ಧಮ್ಮದೇಸನಂ ಸುತ್ವಾ, ಧಮ್ಮಾಭಿಸಮಯೋ ತಹಿಂ;
ಅಹು ಪಾಣಸಹಸ್ಸಾನಂ, ಚತುನ್ನಂ ಮನುಜಾಧಿಪ.
ಪುಬ್ಬಬುದ್ಧನಿಸಿತಂ ತಂ, ಠಾನಂ ಗನ್ತ್ವಾ ಪುನುತ್ತರಂ;
ನಿಸಿನ್ನೋ ತತ್ಥ ಅಪ್ಪೇತ್ವಾ, ಸಮಾಧಿಂ ವುಟ್ಠಿತೋ ತತೋ.
ಧಮ್ಮಂ ದೇಸೇಸಿ ಸಮ್ಬುದ್ಧೋ, ಪರಿಸಾಯ ತಹಿಂ ಪನ;
ದಸಪಾಣಸಹಸ್ಸಾನಿ, ಪತ್ತಮಗ್ಗಫಲಾನ’ಹುಂ.
ಜಲಸಾಟಿಕಧಾತುಂ ¶ ಸೋ, ಮನಸ್ಸೇಹಿ ನಮಸ್ಸಿತುಂ;
ದತ್ವಾ ಸಪರಿವಾರಂ ತಂ; ಠಪೇತ್ವಾ ಇಧ ಭಿಕ್ಖುನೀ.
ಸಹ ಭಿಕ್ಖುಸಹಸ್ಸೇನ, ಸಬ್ಬನನ್ದಿಞ್ಚ ಸಾವಕಂ;
ಠಪೇತ್ವಾ ನದೀತೋ ಓರಂ, ಸೋ ಸುದಸ್ಸನಮಾಳತೋ.
ಸೋಮನಸ್ಸೇ ಮಾಳಕಸ್ಮಿಂ, ಜನಂ ಸಮನುಸಾಸಿಯ;
ಸಙ್ಘೇನ ನಭಮುಗ್ಗನ್ತ್ವಾ, ಜಮ್ಬುದೀಪಂ ಜಿನೋ ಅಗಾ.
ಅಹು ಇಮಸ್ಮಿಂ ಕಪ್ಪಸ್ಮಿಂ, ಚತುತ್ಥಂ ಗೋತಮೋ ಜಿನೋ;
ಸಬ್ಬಧಮ್ಮವಿದೂ ಸತ್ಥಾ, ಸಬ್ಬಲೋಕಾನುಕಮ್ಪಕೋ.
ಪಠಮಂ ಸೋ ಇಧಾಗನ್ತ್ವಾ, ಯಕ್ಖನಿದ್ಧಮನಂ ಅಕಾ;
ದುತಿಯಂ ಪುನರಾಗಮ್ಮ, ನಾಗಾನಂ ದಮನಂ ಅಕಾ.
ಕಲ್ಯಾಣಿಯಂ ಮಣಿಅಕ್ಖಿ ನಾಗೇನಾ’ಭಿನಿಮನ್ತಿತೋ;
ತತಿಯಂ ಪುನರಾಗಮ್ಮ, ಸಸಙ್ಘೋ ತತ್ಥ ಭುಞ್ಜಿಯ.
ಪುಬ್ಬಬೋಧಿಠಿತಠಾನಂ, ಥೂಪಠಾನಮಿದಮ್ಪಿ ಚ;
ಪರಿಭೋಗಧಾತುಠಾನಞ್ಚ, ನಿಸಜ್ಜಾಯೋ’ಪಭುಞ್ಜಿಯ.
ಪುಬ್ಬಬುದ್ಧಠಿತಟ್ಠಾನಾ, ಓರಂ ಗನ್ತ್ವಾ ಮಹಾಮುನಿ;
ಲಂಕಾದೀಪೇ ಲೋಕದೀಪೋ, ಮನುಸ್ಸಾಭಾವತೋ ತದಾ.
ದೀಪಟ್ಠಂ ದೇವಸಙ್ಘಞ್ಚ, ನಾಗೇ ಸಮನುಸಾಸಿಯ;
ಸಸಙ್ಘೋ ನಭಮುಗ್ಗನ್ತ್ವಾ, ಜಮ್ಬುದೀಪಂ ಜಿನೋ ಅಗಾ.
ಏವಂ ಠಾನಮಿದಂ ರಾಜ, ಚತುಬುದ್ಧನಿಸೇವಿತಂ;
ತಸ್ಮಿಂ ಠಾನೇ ಮಹಾರಾಜ, ಥೂಪೋ ಹೇಸ್ಸತಿ’ನಾಗತೇ.
ಬುದ್ಧಸಾರೀರಧಾತೂನಂ, ದೋಣಧಾತುನಿಧಾನವಾ;
ವೀಸಂಹತ್ಥಸತಂ ಉಚ್ಚೋ, ಹೇಮಮಾಲೀ’ತಿ ವಿಸ್ಸುತೋ.
ಅಹಮೇವ ಕಾರೇಸ್ಸಾಮಿ, ಇಚ್ಛಾಹ ಪುಥವಿಸ್ಸರೋ;
ಇಧ ಅಞ್ಞಾನಿ ಕಿಚ್ಚಾನಿ, ಬಹೂನಿ ತವ ಭೂಮಿಪ.
ತಾನಿ ಕಾರೇಹಿ ನತ್ತಾತೇ, ಕಾರೇಸ್ಸತಿ ಇಮಂ ಪನ;
ಮಹಾನಾಗಸ್ಸ ತೇ ಭಾತು, ಉಪರಾಜಸ್ಸ ಅತ್ರಜೋ.
ಸೋ ಯಟ್ಠಾಲಯತಿಸ್ಸೋತಿ, ರಾಜಾ ಹೇಸ್ಸತ’ನಾಗತೇ;
ರಾಜಾ ಗೋಟ್ಠಾಭಯೋ ನಾಮ, ತಸ್ಸ ಪುತ್ತೋ ಭವಿಸ್ಸತಿ.
ತಸ್ಸ ¶ ಪುತ್ತೋ ಕಾಕವಣ್ಣ-ತಿಸ್ಸೋ ನಾಮ ಭವಿಸ್ಸತಿ;
ತಸ್ಸ ರಞ್ಞೋ ಸುತೋ ರಾಜ, ಮಹಾರಾಜಾ ಭವಿಸ್ಸತಿ.
ದುಟ್ಠಗಾಮಣಿಸದ್ದೇನ, ಪಾಕಟೋ’ಭಯನಾಮಕೋ;
ಕಾರೇಸ್ಸತೀ’ಧ ಥೂಪಂ ಸೋ, ಮಹಾ ತೇಜಿದ್ಧಿವಿಕ್ಕಮೋ.
ಇಚ್ಚಾಹ ಥೇರೋ ಥೇರಸ್ಸ, ವಚನೇ ನೇ’ತ್ಥ ಭೂಪತಿ;
ಉಸ್ಸಾಪೇಸಿ ಸಿಲಾಥಮ್ಭಂ, ತಂ ಪವತ್ತಿಂ ಲಿಖಾಪಿಯ.
ರಮ್ಮಂ ಮಹಾಮೇಘವನಂ, ತಿಸ್ಸಾರಾಮಂ ಮಹಾಮಹೀ;
ಮಹಾಮಹಿನ್ದಥೇರೋ ಸೋ, ಪಟಿಗ್ಗಯ್ಹ ಮಹಿದ್ಧಿಕೋ.
ಅಕಮ್ಪೋ ಕಮ್ಪಯಿತ್ವಾನ, ಮಹಿಂ ಠಾನೇಸು ಅಟ್ಠಸು;
ಪಿಣ್ಡಾಯ ಪವಿಸಿತ್ವಾನ, ನಗರಂ ಸಾಗರೂಪಮಂ.
ರಞ್ಞೋ ಘರೇ ಭತ್ತಕಿಚ್ಚಂ, ಕತ್ವಾ ನಿಕ್ಖಮ್ಮ ಮನ್ದಿರಂ;
ನಿಸಜ್ಜ ನನ್ದನವನೇ, ಅಗ್ಗಿಕ್ಖನ್ಧೋಪಮಂ ತಹಿಂ.
ಸುತ್ತಂ ಜನಸ್ಸ ದೇಸೇತ್ವಾ, ಸಹಸ್ಸಂ ಮಾನುಸೇ ತಹಿಂ;
ಪಾಪಯಿತ್ವಾ ಮಗ್ಗಫಲಂ, ಮಹಾಮೇಘವನೇ ವಸಿ.
ತತಿಯೇ ದಿವಸೇ ಥೇರೋ, ರಾಜಗೇಹಮ್ಹಿ ಭುಞ್ಜಿಯ;
ನಿಸಜ್ಜ ನನ್ದನವನೇ, ದೇಸಿಯಾ’ಸಿವಿಸೋಪಮಂ.
ಪಾಪಯಿತ್ವಾ’ಭಿಸಮಯಂ, ಸಹಸ್ಸಪುರಿಸೇ ತತೋ;
ತಿಸ್ಸಾರಾಮಂ ಅಗಾ ಥೇರೋ, ರಾಜಾ ಚ ಸುತದೇಸನೋ.
ಥೇರಂ ಉಪನಿಸೀದಿತ್ವಾ, ಸೋ ಪುಚ್ಛಿ ಜಿನಸಾಸನಂ;
ಪತಿಟ್ಠಿತನ್ನು ಭನ್ತೇ’ತಿ, ನ ತಾವ ಮನುಜಾ’ಧಿಪ.
ಉಪೋಸಥಾದಿಕಮ್ಮತ್ಥಂ, ಜಿನಾ’ಣಾಯ ಜನಾಧಿಪ;
ಸೀಮಾಯ ಇಧ ಬದ್ಧಾಯ, ಪತಿಟ್ಠಿಸ್ಸತಿ ಸಾಸನಂ.
ಇಚ್ಚ’ಬ್ರವಿ ಮಹಾಥೇರೋ, ತಂ ರಾಜಾ ಇದಮಬ್ರವಿ;
ಸಮ್ಬುದ್ಧಾ’ಣಾಯ ಅನ್ತೋಹಂ, ವಸ್ಸಿಸ್ಸಾಮಿ ಜುತಿನ್ಧರ.
ತಸ್ಮಾ ಕತ್ವಾ ಪುರಂ ಅನ್ತೋ-ಸೀಮಂ ಬನ್ಧಥ ಸಜ್ಜುಕಂ;
ಇಚ್ಚಾ’ಬ್ರವಿ ಮಹಾರಾಜಾ, ಥೇರೋ ತಂ ಇಧಮಬ್ರವಿ.
ಏವಂ ಸತಿ ತುವಂಯೇವ, ಪಜಾನ ಪುಥವಿಸ್ಸರ;
ಸೀಮಾಯ ಗಮನಟ್ಠಾನಂ, ಬನ್ಧಿಸ್ಸಾಮ ಮಯಂ ಹಿತಂ.
‘‘ಸಾಧೂ’’ತಿ ¶ ವತ್ವಾ ಭೂಮಿನ್ದೋ, ದೇವಿನ್ದೋ ವಿಯ ನನ್ದನಾ;
ಮಹಾಮೇಘವನಾರಮ್ಮಾ, ಪಾವಿಸಿ ಮನ್ದಿರಂ ಸಕಂ.
ಚತುತ್ಥೇ ದಿವಸೇ ಥೇರೋ, ರಞ್ಞೋ ಗೇಹಮ್ಹಿ ಭುಞ್ಜಿಯ;
ನಿಸಜ್ಜ ನನ್ದನವನೇ, ದೇಸೇಸ’ನಮನಗ್ಗಿಯಂ.
ಪಾಯೇತ್ವಾ’ಮತಪಾನಂ ಸೋ, ಸಹಸ್ಸಪುರಿಸೇ ತಹಿಂ;
ಮಹಾಮೇಘವನಾರಾಮಂ, ಮಹಾಥೇರೋ ಉಪಾಗಮಿ.
ಪಾತೋ ಭೇರಿಂ ಚರಾಪೇತ್ವಾ, ಮಣ್ಡಯಿತ್ವಾ ಪುರಂ ವರಂ;
ವಿಹಾರಗಾಮಿಮಗ್ಗಞ್ಚ, ವಿಹಾರಞ್ಚ ಸಮನ್ತತೋ.
ರಥೇಸಭೋ ರಥಟ್ಠೋ ಸೋ, ಸಬ್ಬಾಲಙ್ಕಾರಭೂಸಿತೋ;
ಸಹಾಮಚ್ಚೋ ಸಹೋರೋಧೋ, ಸಯೋಗ್ಗಬಲವಾಹನೋ.
ಮಹತಾ ಪರಿವಾರೇನ, ಸಕಾರಾಮಮುಪಾಗಮಿ;
ತತ್ಥ ಥೇರೇ ಉಪಗನ್ತ್ವಾ, ವನ್ದಿತ್ವಾ ವನ್ದನಾರಹೇ.
ಸಹ ಥೇರೇಹಿ ಗನ್ತ್ವಾನ, ನದಿಯೋ’ಪರಿತಿತ್ಥಕಂ;
ತತೋ ಕಸನ್ತೋ ಅಗಮಿ, ಹೇಮನಙ್ಗಲಮಾದಿಯ.
ಮಹಾಪದುಮೋ ಕುಞ್ಜರೋ ಚ, ಉಭೋ ನಾಗಾ ಸುಮಙ್ಗಲಾ;
ಸುವಣ್ಣನಙ್ಗಲೇ ಯುತ್ತಾ, ಪಠಮೇ ಕುನ್ತಮಾಳಕೇ.
ಚತುರಙ್ಗಮಹಾ ಸೇನೋ, ಸಹ ಥೇರೇಹಿ ಖತ್ತಿಯೋ;
ಗಹೇತ್ವಾ ನಙ್ಗಲಂ ಸೀತಂ, ದಸ್ಸಯಿತ್ವಾ ಅರಿನ್ದಮೋ.
ಸಮಲಙ್ಕತಂ ಪುಣ್ಣಘಟಂ, ನಾನಾರಾಗಂ ಧಜಂ ಸುಭಂ;
ಪಾತಿಂ ಚನ್ದನಚುಣ್ಣಞ್ಚ, ಸೋಣ್ಣರಜತ ದಣ್ಡಕಂ.
ಆದಾಸಂ ಪುಪ್ಫಭರಿತಂ, ಸಮುಗ್ಗಂ ಕುಸುಮಗ್ಘಿಯಂ;
ತೋರಣಕದಲೀಛತ್ತಾದಿಂ, ಗಹಿತಿತ್ಥಿ ಪರಿವಾರಿತೋ.
ನಾನಾತುರಿಯ ಸಙ್ಘುಟ್ಠೋ, ಬಲೋಘ ಪರಿವಾರಿತೋ;
ಥುತಿಮಙ್ಗಲಗೀತೇಹಿ, ಪೂರಯನ್ತೋ ಚತುದ್ದಿಸಂ.
ಸಾಧುಕಾರ ನಿನಾದೇತಿ, ಚೇಲುಕ್ಖೇಪಸತೇಹಿ ಚ;
ಮಹತಾ ಛಣಪುಜಾಯ, ಕಸನ್ತೋ ಭೂಮಿಪೋ ಅಗಾ.
ವಿಹಾರಞ್ಚ ಪುರಞ್ಚೇವ, ಕುರುಮಾನೋ ಪದಕ್ಖಿಣಂ;
ಸೀಮಾಯ ಗಮನಠಾನಂ, ನದಿಂ ಪತ್ವಾ ಸಮಾಪಯಿ.
ಕೇನಕೇನ ನಿಮಿತ್ತೇನ, ಸೀಮಾ ಏತ್ಥ ಗತಾತಿ ಚೇ;
ಏವಂ ಸೀಮಾಗತಠಾನಂ, ಇಚ್ಛಮಾನಾ ನಿಬೋಧಥ.
ನಜ್ಜಾಪಾಸಾಣತಿತ್ಥಮ್ಹಿ ¶ , ಪಾಸಾಣೇ ಕುಡ್ಡವಾಟಕಂ;
ತತೋ ಕುಮ್ಬಲವಾಟಂ ತಂ, ಮಹಾನಿಪಂ ತತೋ ಅಗಾ.
ತತೋ ಕುಕುಧಪಾಳಿಙ್ಗೋ, ಮಹಾಅಙ್ಗಣಗೋ ತತೋ;
ತತೋ ಖುಜ್ಜಮಧುಲಞ್ಚ, ಮರುತ್ತಪೋಕ್ಖರಣಿಂತತೋ.
ವಿಜಯಾರಾಮ ಉಯ್ಯಾನೇ, ಉತ್ತರದ್ವಾರಕೋಟ್ಠ ಗೋ;
ಗಜಕುಮ್ಭಕ ಪಾಸಾಣಂ, ಥುಸವಟ್ಠಿಕ ಮಜ್ಝಗೋ.
ಅಭಯೇ ಬಲಾಕಪಾಸಾಣಂ, ಮಹಾಸುಸಾನ ಮಜ್ಝಗೋ;
ದೀಘಪಾಸಾಣಕಂ ಗನ್ತ್ವಾ, ಕಮ್ಮಾರದೇವ ಗಾಮತೋ.
ನಿಗ್ರೋಧ ಮಙ್ಗಣಂ ಗನ್ತ್ವಾ, ಹಿಯಗಲ್ಲಸಮೀಪಕೇ;
ದಿಯಾವಸಬ್ರಾಹ್ಮಣಸ್ಸ, ದೇವೋಕಂ ಪುಬ್ಬದಕ್ಖಿಣಂ.
ತತೋ ತೇಲುಮಪಾಲಿಙ್ಗೋ,
ತತೋ ತಾಲಚತುಕ್ಕಗೋ;
ಅಸ್ಸಮಣ್ಡಲವಾಮೇನ,
ದ್ವೇ ಕದಮ್ಬಾ ಅಜಾಯಿಸುಂ.
ತತೋ ಮರುಮ್ಬತಿತ್ತಙ್ಗೋ, ತತೋ ಉದ್ಧಂ ನಿದಿಂ ಅಗಾ;
ಪಠಮ ಚೇತಿಯ ಪಾಚಿನೇ, ದ್ವೇ ಕದಮ್ಬಾ ಅಜಾಯಿಸುಂ.
ಸೇನಿನ್ದಗುತ್ತರಜ್ಜಮ್ಹಿ, ದಮಿಳಾ ದಕಸುದ್ಧಿಕಾ;
ನದಿಂ ದೂರನ್ತಿ ಬನ್ಧಿತ್ವಾ, ನಗರಾಸನ್ನಮಕಂಸು ತಂ.
ಜೀವ ಮಾನಕದಮ್ಬಞ್ಚ, ಅನ್ತೋಸೀಮಗತಂ ಅಹು;
ಮತಕ ದಮ್ಬತೀರೇನ, ಸೀಮಾಉದ್ದಕದಮ್ಬಗಾ.
ಸೀಹಸಿನಾ ನತಿತ್ಥೇನ, ಉಗ್ಗನ್ತ್ವಾ ತೀರತೋ ವಜಂ;
ಪಾಸಾಣತಿತ್ಥಂ ಗನ್ತ್ವಾನ, ನಿಮಿತ್ತಂ ಘಟ್ಟಯಿ ಇಸಿ.
ನಿಮಿತ್ತೇತು ಪನೇ’ತಸ್ಮಿಂ, ಘಟ್ಟಿತೇ ದೇವಮಾನುಸಾ;
ಸಾಧುಕಾರಂ ಪವತ್ತೇಸುಂ, ಸಾಸನಂ ಸುಪ್ಪತಿಟ್ಠಿತಂ.
ರಞ್ಞೋ ದಿನ್ನಾಯ ಸೀತಾಯ, ನಿಮಿತ್ತೇ ಪರಿಕಿತ್ತಯಿ;
ದ್ವತ್ತಿಂಸಮಾಳಕತ್ಥಞ್ಚ, ಥೂಪಾರಾಮತ್ಥಮೇವ ಚ.
ನಿಮಿತ್ತೇ ಕಿತ್ತಯಿತ್ವಾನ, ಮಹಾಥೇರೋ ಮಹಾಮತಿ;
ಸೀಮನ್ತರನಿಮಿತ್ತೇ ಚ, ಕಿತ್ತಯಿತ್ವಾ ಯಥಾವಿಧಿಂ.
ಅಬನ್ಧೀ ¶ ಸಬ್ಬಾ ಸೀಮಾಯೋ, ತಸ್ಮಿಂಯೇವ ದಿನೇವಸೀ;
ಮಹಾಮಹೀ ಅಕಮ್ಪಿತ್ಥ, ಸೀಮಾಬನ್ಧೇ ಸಮಾಪಿತೇ.
ಪಞ್ಚಮೇ ದಿವಸೇ ಥೇರೋ, ರಞ್ಞೋ ಗೇಹಮ್ಹಿ ಭುಞ್ಜಿಯ;
ನಿಸಜ್ಜ ನನ್ದನವನೇ, ಸುತ್ತನ್ತಂ ಖಜ್ಜನೀಯಕಂ.
ಮಹಾಜನಸ್ಸ ದೇಸೇತ್ವಾ, ಸಹಸ್ಸಂ ಮಾನುಸೇ ತಹಿಂ;
ಪಾಯೇತ್ವಾ ಅಮತಂ ಪಾನಂ, ಮಹಾಮೇಘವನೇ ವಸೀ.
ಛಟ್ಠೇಪಿ ದಿವಸೇ ಥೇರೋ, ರಞ್ಞೋಗೇಹಮ್ಹಿ ಭುಞ್ಜಿಯ;
ನಿಸಜ್ಜ ನನ್ದನವನೇ, ಸುತ್ತ ಗೋಮಯ ಪಿಣ್ಡಿಕಂ.
ದೇಸಯಿತ್ವಾ ದೇಸನಞ್ಞೂ, ಮಹಸ್ಸಂಯೇವ ಮಾನುಸೇ;
ಪಾಪಯಿತ್ವಾ’ಭಿಸಮಯಂ, ಮಹಾ ಮೇಘವನೇ ವಸೀ.
ಸತ್ತಮೇಪಿ ದಿನೇ ಥೇರೋ, ರಾಜಗೇಹಮ್ಹಿ ಭುಞ್ಜಿಯ;
ನಿಸಜ್ಜ ನನ್ದನವನೇ, ಧಮ್ಮಚಕ್ಕಪ್ಪವತ್ತನಂ.
ಸುತ್ತನ್ತಂ ದೇಸಯಿತ್ವಾನ, ಸಹಸ್ಸಂಯೇವ ಮಾನುಸೇ;
ಪಾಪಯಿತ್ವಾ’ಭಿಸಮಯಂ, ಮಹಾ ಮೇಘವನೇ ವಸಿ.
ಏವಞ್ಹಿ ಅಟ್ಠ ನವಮ-ಸಹಸ್ಸಾನಿ ಜುತಿನ್ಧರೋ;
ಕಾರಯಿತ್ವಾ’ಭಿಸಮಯಂ, ದಿವಸೇಹೇವ ಸತ್ತತಿ.
ತಂ ಮಹಾನನ್ದನವನಂ, ವುಚ್ಚತೇ ತೇನ ತಾದಿನಾ;
ಸಾಸನಜೋತಿತಟ್ಠಾನ-ಮೀತಿ ಜೋತಿವನಂ ಇತಿ.
ತಿಸ್ಸರಾಮಮ್ಹಿ ಕಾರೇಸಿ,
ರಾಜಾ ಥೇರಸ್ಸ ಆದಿತೋ;
ಪಾಸಾದಂ ಸೀಘಮುಕ್ಕಾಯ,
ಸುಕ್ಖಾ ಪೇತ್ವಾನ ಮತ್ತಿಕಾ.
ಪಾಸಾದೋ ಕಾಳಕಾಭಾಸೋ,
ಆಸಿ ಸೋ ತೇನ ತಂ ತಹಿಂ;
ಕಾಳಪಾಸಾದ ಪರಿವೇಣ-ಮೀತಿ ಸಙ್ಖಮುಪಾಗತಂ.
ತತೋ ಮಹಾಬೋಧಿಘರಂ, ಲೋಹಪಾಸಾದ ಮೇವ ಚ;
ಸಲಾಕಗ್ಗಞ್ಚ ಕಾರೇಸಿ, ಭತ್ತಸಾಲಞ್ಚ ಸಾಧುಕಂ.
ಬಹೂನಿ ¶ ಪರಿವೇಣಾನಿ, ಸಾಧು ಪೋಕ್ಖರಣೀಪಿ ಚ;
ರತ್ತಿಠಾನ ದಿವಾಠಾನ-ಪಭುತೀನಿ ಚ ಕಾರಯಿ.
ತಸ್ಸ ನಹಾನಪಾಪಸ್ಸ, ನ್ಹಾನಪೋಕ್ಖರಣೀತಟೇ;
ಸುನಹಾತಪರಿವೇಣನ್ತಿ, ಪರಿವೇಣಂ ಪವುಚ್ಚತಿ.
ತಸ್ಸ ಚಙ್ಕಮಿತಠಾನೇ, ದೀಪ ದೀಪಸ್ಸ ಸಾಧುನೋ;
ವುಚ್ಚತೇ ಪರಿವೇಣಂ ತಂ, ದೀಘಚಙ್ಕಮನಂ ಇತಿ.
ಅಗ್ಗಫಲಸಮಾಪತ್ತಿಂ, ಸಮಾಪಜ್ಜ ಯಹಿಂ ತುಸೋ;
ಫಲಗ್ಗ ಪರಿವೇಣನ್ತಿ, ಏತಂ ತೇನ ಪವುಚ್ಚತಿ.
ಅಪಸ್ಸಿಯ ಅಪಸ್ಸೇನಂ, ಥೇರೋ ತತ್ಥ ನಿಸೀದಿಸೋ;
ಥೇರಾ ಪಸ್ಸಯ ಪರಿವೇಣಂ, ಏತಂ ತೇನ ಪವುಚ್ಚತಿ.
ಬಹೂ ಮರುಗಣಾ ಯತ್ಥ, ಉಪಾಸಿಂಸು ಉಪಚ್ಚತಂ;
ತೇನೇವ ತಂ ಮರುಗಣ-ಪರಿವೇಣನ್ತಿ ವುಚ್ಚತಿ.
ಸೇನಾಪತಿತಸ್ಸ ರಞ್ಞೋ, ಥೇರಸ್ಸ ದೀಘಸನ್ದಕೋ;
ಕಾರೇಸಿ ಚೂಳಪಾಸಾದಂ, ಮಹಾಥಮ್ಭೇಹಿ ಅಟ್ಠಹಿ.
ದೀಘಸನ್ದ ಸೇನಾಪತಿ-ಪರಿವೇಣನ್ತಿ ತಂ ತಹಿಂ;
ವುಚ್ಚತೇ ಪರಿವೇಣಂ ತಂ, ಪಮುಖಂ ಪಮುಖಾಕರಂ.
ದೇವಾನಂಪಿಯವಚನೋ’ಪಗುಳನಾಮೋ,
ಲಂಕಾಯಂ ಪಠಮಮಿಮಂ ಮಹಾವಿಹಾರಂ;
ರಾಜಾ ಸೋ ಸುಮತಿಮಹಾಮಹಿನ್ದಥೇರಂ,
ಆಗಮ್ಮಾ ಮಲಮತಿಮೇತ್ಥಕಾರಯಿತ್ಥಾತಿ.
ಸುಜನಪ್ಪಸಾದ ಸಂವೇಗತ್ಥಾಯ ಕತೇ ಮಹಾವಂಸೇ
ಮಹಾವಿಹಾರಪಟಿಗ್ಗಹಕೋ ನಾಮ
ಪನ್ನರಸಮೋ ಪರಿಚ್ಛೇದೋ.
ಸೋಳಸಮ ಪರಿಚ್ಛೇದ
ಚೇತಿಯಪಬ್ಬತವಿಹಾರ ಪಟಿಗ್ಗಹಕೋ
ಪುರೇ ¶ ಚರಿತ್ವಾ ಪಿಣ್ಡಾಯ, ಕರಿತ್ವಾ ಜನಸಙ್ಗಹಂ;
ರಾಜಗೇಹಮ್ಹಿ ಭುಞ್ಜನ್ತೋ, ಕಾರೇನ್ತೋ ರಾಜಸಙ್ಗಹಂ.
ಛಬ್ಬಸದಿವಸೇ ಥೇರೋ, ಮಹಾಮೇಘವನೇ ವಸೀ;
ಆಸಳ್ಹಸುಕ್ಕಪಕ್ಖಸ್ಸ, ತೇರಸೇ ದಿವಸೇ ಪನ.
ರಾಜಗೇಹಮ್ಹಿ ಭುಞ್ಜಿತ್ವಾ, ಮಹಾರಞ್ಞೋ ಮಹಾಮತಿ;
ಮಹಾ’ಪ್ಪಮಾದಸುತ್ತನ್ತಂ, ದೇಸಯಿತ್ವಾ ತತೋ ಚ ಸೋ.
ವಿಹಾರಕರಣಂ ಇಚ್ಛಂ, ತತ್ಥ ಚೇತಿಯಪಬ್ಬತೇ;
ನಿಕ್ಖಮ್ಮ ಪುರಿಮದ್ವಾರಾ, ಅಗಾ ಚೇತಿಯಪಬ್ಬತಂ.
ಥೇರಂ ತತ್ಥ ಗತಂ ಸುತ್ವಾ, ರಥಂ ಆರುಯ್ಹ ಭೂಪತಿ;
ದೇವಿಯೋ ದ್ವೇ ಚ ಆದಾಯ, ಥೇರಸ್ಸಾನುಪದಂ ಅಕಾ.
ಥೇರಾ ನಾಗಚತುಕ್ಕಮ್ಹಿ, ನಹಾತ್ವಾ ರಹದೇ ತಹಿಂ;
ಪಬ್ಬತಾರೋಹಣತ್ಥಾಯ, ಅಟ್ಠಂಸು ಪಟಿಪಾಟಿಯಾ.
ರಾಜಾ ರಥಾ ತದೋ’ರುಯ್ಹ, ಸಬ್ಬೇ ಥೇರೇ’ಭಿವಾದಯಿ;
ಉಣ್ಹೇ ಕಿಲನ್ತೇ ಕಿಂರಾಜ, ಆಗತೋಸೀ’ತಿ ಅಹುತೇ.
ತುಮ್ಹಾಕಂ ಗಮನಾಸಙ್ಕೀ, ಆಗತೋಮ್ಹೀ’ತಿ ಭಾಸಿತೇ;
ಇಧೇವ ವಸ್ಸಂ ವಸಿತುಂ, ಆಗತಮ್ಹಾ’ತಿ ಭಾಸಿಯ.
ತಸ್ಸೂಪನಾಯಿಕಂ ಥೇರೋ, ಖನ್ಧಕಂ ಖನ್ಧಕೋವಿದೋ;
ಕಥೇಸಿ ರಞ್ಞೋ ತಂ ಸುತ್ವಾ, ಭಾಗಿನೇಯ್ಯೋ ಚ ರಾಜಿನೋ.
ಮಹಾರಿಟ್ಠೋ ಮಹಾಮಚ್ಚೋ, ಪಞ್ಚಪಞ್ಞಾಸಭಾತುಹಿ;
ಸದ್ಧಿಂ ಜೇಟ್ಠಕನಿಟ್ಠೇಹಿ, ರಾಜಾನಮಭಿತೋ ಠಿತೋ.
ಯಾಚಿತ್ವಾ ತದಹು ಚೇವ, ಪಬ್ಬಜುಂ ಥೇರಸನ್ತಿಕೇ;
ಪತ್ತಾರಹತ್ತಂ ಸಬ್ಬೇಪಿ, ತೇ ಖುರಗ್ಗೇ ಮಹಾಮತೀ.
ಕನ್ತಕಚೇತಿಯಠಾನೇ, ಪರಿತೋ ತದಹೇವ ಸೋ;
ಕಮ್ಮಾನಿ ಆರಭಾಪೇತ್ವಾ, ಲೇಣಾನಿ ಅಟ್ಠಸಟ್ಠಿಯೋ.
ಅಗಮಾಸಿ ¶ ಪುರಂ ರಾಜಾ, ಥೇರಾ ತತ್ಥೇವ ತೇ ವಸುಂ;
ಕಾಲೇ ಪಿಣ್ಡಾಯ ನಗರಂ, ಪವಿಸನ್ತಾ’ನುಕಮ್ಪಕಾ.
ನಿಟ್ಠಿತೇ ಲೇಣಕಮ್ಮಮ್ಹಿ, ಆಸಳ್ಹಿಪುಣ್ಣಮಾಸಿಯಂ;
ಗನ್ತ್ವಾ ಅದಾಸಿ ಥೇರಾನಂ, ರಾಜಾ ವಿಹಾರದಕ್ಖಿಣಂ.
ದ್ವತ್ತಿಂಸಮಾಳಕಾನಞ್ಚ, ವಿಹಾರಸ್ಸ ಚ ತಸ್ಸ ಖೋ;
ಸೀಮಂ ಸೀಮಾತಿಗೋ ಥೇರೋ, ಬನ್ಧಿತ್ವಾ ತದಹೇವ ಸೋ.
ತೇಸಂ ಪಬ್ಬಜ್ಜಾಪೇಕ್ಖಾನಂ, ಅಕಾಸಿ ಉಪಸಮ್ಪದಂ;
ಸಬ್ಬೇಸಂ ಸಬ್ಬಪಠಮಂ, ಬದ್ಧೇ ತುಮ್ಬರುಮಾಳಕೇ.
ಏತೇ ದ್ವಾಸಟ್ಠಿ ಅರಹನ್ತೋ, ಸಬ್ಬೇ ಚೇತಿಯಪಬ್ಬತೇ;
ತತ್ಥ ವಸ್ಸಂ ಉಪಗನ್ತ್ವಾ, ಅಕಂಸು ರಾಜಸಙ್ಗಹಂ.
ದೇವಮನುಸ್ಸಗಣಗಣಿತಂ ತಂ,
ತಞ್ಚ ಗಣಂ ಗುಣವಿತ್ಥತಕಿತ್ತಿಂ;
ಯಾನಮುಪಚ್ಚ ಚ ಮಾನಯಮಾನಾ,
ಪುಞ್ಞಚಯಂ ವಿಪುಲಂ ಅಕರಿಂಸೂತಿ.
ಸುಜನಪಸಾದಸಂವೇಗತ್ಥಾಯ ಕತೇ ಮಹಾವಂಸೇ
ಚೇತಿಯಪಬ್ಬತವಿಹಾರಪಟಿಗ್ಗಹಕೋ ನಾಮ
ಸೋಳಸಮೋ ಪರಿಚ್ಛೇದೋ.
ಸತ್ತರಸಮ ಪರಿಚ್ಛೇದ
ಧಾತುಆಗಮನೋ
ವುತ್ಥವಸ್ಸೋ ಪವಾರೇತ್ವಾ, ಕತ್ತಿಕಪುಣ್ಣಮಾಸಿಯಂ;
ಅವೋಚೇ’ದಂ ಮಹಾರಾಜಂ, ಮಹಾಥೇರೋ ಮಹಾಮತಿ.
ಚಿರದಿಟ್ಠೋ ಹಿ ಸಮ್ಬುದ್ಧೋ, ಸತ್ಥಾ ನೋ ಮನುಜಾಧಿಪ;
ಅನಾಥವಾಸಂ ಅವಸಿಮ್ಹ, ನತ್ಥಿ ನೋ ಪೂಜಿಯಂ ಇಧ.
‘‘ಭಾಸಿತ್ಥ ನನು ಭನ್ತೇಮೇ, ಸಮ್ಬುದ್ಧೋ ನಿಬ್ಬುತೋ’’ ಇತಿ;
ಆಹ ಧಾತೂಸು ದಿಟ್ಠೇಸು, ದಿಟ್ಠೋ ಹೋತಿ ಜಿನೋ’’ ಇತಿ.
ವಿದಿತೋ ¶ ವೋ ಅಧಿಪ್ಪಾಯೋ, ಥೂಪಸ್ಸ ಕಾರಣೇ ಮಯಾ;
ಕಾರೇಸ್ಸಾಮಿ ಅಹಂ ಥೂಪಂ, ತುಮ್ಹೇ ಜಾನಾಥ ಧಾತುಯೋ.
ಮನ್ತೇಹಿ ಸುಮನೇನಾತಿ, ಥೇರೋ ರಾಜಾನಮಬ್ರವಿ;
ರಾಜಾ’ಹ ಸಾಮಣೇರಂ ತಂ, ಕುತೋ ಲಚ್ಛಾಮ ಧಾತುಯೋ.
ವಿಭೂಸಯಿತ್ವಾ ನಗರಂ, ಮಗ್ಗಞ್ಚ ಮನುಜಾಧಿಪ;
ಉಪೋಸಥೀ ಸಪರಿಸೋ, ಹತ್ಥಿಂ ಆರುಯ್ಹ ಮಙ್ಗಲಂ.
ಸೇತಚ್ಛತ್ತಂ ಧಾರಯನ್ತೋ, ತಾಲಾವಚರಸಂಹಿತೋ;
ಮಹಾನಾಗವನುಯ್ಯಾನಂ, ಸಾಯನ್ಹಸಮಯೇ ವಜ.
ಧಾತುಭೇದಞ್ಞುನೋ ರಾಜ, ಧಾತುಯೋ ತತ್ಥ ಲಚ್ಛಸಿ;
ಇಚ್ಛಾಹ ಸಾಮಣೇರೋ ಸೋ, ಸುಮನೋ ತಂ ಸುಮಾನಸಂ.
ಥೇರೋ’ಥ ರಾಜಕುಲತೋ, ಗನ್ತ್ವಾ ಚೇತಿಯಪಬ್ಬತಂ;
ಆಮನ್ತಿಯ ಸಾಮಣೇರಂ, ಸುಮನಂ ಸುಮನೋ ಗತಿಂ.
ಏಹಿ ತ್ವಂ ಭದ್ರ ಸುಮನ, ಗನ್ತ್ವಾ ಪುಪ್ಫಪುರಂ ವರಂ;
ಅಯ್ಯಕಂ ತೇ ಮಹಾರಾಜಂ, ಏವಂ ನೋ ವಚನಂ ವದ.
ಸಹಾಯೋ ತೇ ಮಹಾರಾಜ, ಮಹಾರಾಜಾ ಮರುಪ್ಪಿಯೋ;
ಪಸನ್ನೋ ಬುದ್ಧಸಮಯೇ, ಥೂಪಂ ಕಾರೇತುಮಿಚ್ಛತಿ.
ಮುನಿನೋ ಧಾತುಯೋ ದೇಹಿ, ಪತ್ತಂ ಭುತ್ತಞ್ಚ ಸತ್ಥುನಾ;
ಸರೀರಧಾತುಯೋ ಸನ್ತಿ, ಬಹವೋ ಹಿ ತವನ್ತಿಕೇ.
ಪತ್ತಪೂರಾ ಗಹೇತ್ವಾ ತಾ, ಗನ್ತ್ವಾ ದೇವಪುರಂ ವರಂ;
ಸಕ್ಕಂ ದೇವಾನಮಿನ್ದಂ ತಂ, ಏವಂ ನೋ ವಚನಂ ವದ.
ತಿಲೋಕದಕ್ಖಿಣೇಯ್ಯಸ್ಸ, ದಾಠಾಧಾತು ಚ ದಕ್ಖಿಣಾ;
ತವನ್ತಿಕಮ್ಹಿ ದೇವಿನ್ದ, ದಕ್ಖಿಣಕ್ಖಕಧಾತು ಚ.
ದಾಠಂ ತ್ವಮೇವ ಪೂಜೇಹಿ, ಅಕ್ಖಕಂ ದೇಹಿ ಸತ್ಥುನೋ;
ಲಂಕಾದೀಪಸ್ಸ ಕಿಚ್ಚೇಸು, ಮಾಪಮಜ್ಜ ಸುರಾಧಿಪ.
‘‘ಏವಂ ಭನ್ತೇ’’ತಿ ವತ್ವಾ ಸೋ, ಸಾಮಣೇರೋ ಮಹಿದ್ಧಿಕೋ;
ತಙ್ಖಣಂಯೇವ ಅಗಮಾ, ಧಮ್ಮಾಸೋಕಸ್ಸ ಸನ್ತಿಕಂ.
ಸಾಲಮೂಲಮ್ಹಿ ಠಪಿತಂ, ಮಹಾಬೋಧಿಂ ತಹಿಂ ಸುತಂ;
ಕತ್ತಿಕಚ್ಛಣಪೂಜಾಹಿ, ಪೂಜಿಯಂ ತಞ್ಚ ಅದ್ದಸ.
ಥೇರಸ್ಸ ¶ ವಚನಂ ವತ್ವಾ, ರಾಜತೋ ಲದ್ಧಧಾತುಯೋ;
ಪತ್ತಪೂರಂ ಗಹೇತ್ವಾನ, ಹಿಮವನ್ತಮುಪಾಗಮಿ.
ಹಿಮವನ್ತೇ ಠಪೇತ್ವಾನ, ಸಧಾತುಂ ಪತ್ತಮುತ್ತಮಂ;
ದೇವಿನ್ದಸನ್ತಿಕಂ ಗನ್ತ್ವಾ, ಥೇರಸ್ಸ ವಚನಂ ಭಣಿ.
ಚೂಳಾಮಣಿ ಚೇತಿಯಮ್ಹಾ, ಗಹೇತ್ವಾ ದಕ್ಖಿಣಕ್ಖಕಂ;
ಸಾಮಣೇರಸ್ಸ ಪಾದಾಸಿ, ಸಕ್ಕೋ ದೇವಾನಮಿಸ್ಸರೋ.
ತಂ ಧಾತುಂ ಧಾತುಪತ್ತಞ್ಚ, ಆದಾಯ ಸುಮನೋ ತತೋ;
ಆಗಮ್ಮ ಚೇತಿಯಗಿರಿಂ, ಥೇರಸ್ಸ’ದಾಸಿ ತಂ ಯತಿ.
ಮಹಾನಾಗವನುಯ್ಯಾನಂ, ವುತ್ತೇನಾ ವಿಧಿನಾ’ಗಮಾ;
ಸಾಯನ್ಹಾಸಮಯೇ ರಾಜಾ, ರಾಜಸೇನಾ ಪುರಕ್ಖತೋ.
ಠಪೇಸಿ ಧಾತುಯೋ ಸಬ್ಬಾ, ಥೇರೋ ತತ್ಥೇವ ಪಬ್ಬತೇ;
ಮಿಸ್ಸಕಂ ಪಬ್ಬತಂ ತಸ್ಮಾ, ಆಹು ಚೇತಿಯ ಪಬ್ಬತಂ.
ಠಪೇತ್ವಾ ಧಾತುಪತ್ತಂ ತಂ, ಥೇರೋ ಚೇತಿಯಪಬ್ಬತೇ;
ಗಹೇತ್ವಾ ಅಕ್ಖಕಂ ಧಾತುಂ, ಸಙ್ಕೇತಂ ಸಗಣೋ’ಗಮಾ.
ಸಚಾಯಂ ಮುನಿನೋ ಧಾತು, ಛತ್ತಂ ನಮತು ಮೇ ಸಯಂ;
ಜಣ್ಣುಕೇಹಿ ಕರೀಧಾತು, ಧಾತುಚಙ್ಕೋಟಕೋ ಅಯಂ.
ಸಿರಸ್ಮಿಂ ಮೇ ಪತಿಟ್ಠಾತು, ಆಗಮ್ಮ ಸಹ ಧಾತುಕೋ;
ಇತಿ ರಾಜಾ ವಿಚಿನ್ತೇಸಿ, ಚಿನ್ತಿತಂ ತಂ ತಥಾ ಅಹು.
ಅಮತೇನಾ’ಭಿಸಿತ್ತೋವ, ಅಹು ಹಟ್ಠೋ’ತಿ ಭೂಪತಿ;
ಸೀಸತೋ ತಂ ಗಹೇತ್ವಾನ, ಹತ್ಥಿಕ್ಖನ್ಧೇ ಠಪೇಸಿತಂ.
ಹಟ್ಠೋ ಹತ್ತೀ ಕುಞ್ಚನಾದಂ, ಅಕಾ ಕಮ್ಪಿತ್ಥ ಮೇದಿನೀ;
ತತೋ ನಾಗೋ ನಿವತ್ತಿತ್ವಾ, ಸಥೇರ ಬಲವಾಹನೋ.
ಪುರತ್ಥಿಮೇನ ದ್ವಾರೇನ, ಪವಿಸಿತ್ವಾ ಪುರಂ ಸುಭಂ;
ದಕ್ಖಿಣೇನ ಚ ದ್ವಾರೇನ, ನಿಕ್ಖಮಿತ್ವಾ ತತೋ ಪುನ.
ಥೂಪಾರಾಮೇ ಚೇತಿಯಸ್ಸ, ಠಾನತೋ ಪಚ್ಛತೋ ಕತಂ;
ಪಮೋಜವತ್ಥುಂ ಗನ್ತ್ವಾನ, ಬೋಧಿಠಾನೇ ನಿವತ್ತಿಯ.
ಪುರತ್ಥಾವದನೋ ಅಠಾ, ಥೂಪಠಾನಂ ತದಾ ಹಿತಂ;
ಕದಮ್ಬಪುಪ್ಫಆದಾರಿ-ವಲ್ಲೀಹಿ ಚಿತಕಂ ಅಹು.
ಮನುಸ್ಸದೇವೋ ¶ ದೇವೇಹಿ, ತಂ ಠಾನಂ ರಕ್ಖಿತಂ ಸುಚಿಂ;
ಸೋಧಾಪೇತ್ವಾ ಭೂಸಯಿತ್ವಾ, ತಙ್ಖಣಂಯೇವ ಸಾಧುಕಂ.
ಧಾತುಂ ಓರೋಪನತ್ಥಾಯ, ಆರಭೀ ಹತ್ಥಿಕ್ಖನ್ಧತೋ;
ನಾಗೋ ನ ಇಚ್ಛಿತಂ ರಾಜಾ, ಥೇರಂ ಪುಚ್ಛಿತ್ಥ ತಂ ಮನಂ.
ಅತ್ತನೋ ಖನ್ಧಸಮಕೇ, ಠಾನೇ ಠಪನಮಿಚ್ಛತಿ;
ಧಾತುಓರೋಪನಂ ತೇನ, ನ ಇಟ್ಠಮೀ’ತಿ ಸೋ ಬ್ರವಿ.
ಆಣಾಪೇತ್ವಾ ಖಣಂಯೇವ,
ಸುಕ್ಖಾತೋ’ಭಯವಾಪಿತೋ;
ಸುಕ್ಖಕದ್ದಮ ಖಣ್ಡೇಹಿ,
ಚಿತಾ ಪೇತ್ವಾನ ತಂ ಸಮಂ.
ಅಲಙ್ಕರಿತ್ವಾನ ಬಹುಧಾ, ರಾಜಾ ತಂ ಠಾನಮುತ್ತಮಂ;
ಓರೋಪೇತ್ವಾ ಹತ್ಥಿಕ್ಖನ್ಧಾ, ಧಾತುಂ ತತ್ಥ ಠಪೇಸಿತಂ.
ಧಾತಾರಕ್ಖಂ ಸಂವಿಧಾಯ, ಠಪೇತ್ವಾ ತತ್ಥ ಹತ್ಥಿನಂ;
ಧಾತುಥೂಪಸ್ಸ ಕರಣೇ, ರಾಜಾ ತುರಿತಮಾನಸೋ.
ಬಹೂ ಮನುಸ್ಸೇ ಯೋಜೇತ್ವಾ, ಇತ್ಥಿಕಾಕರಣೇ ಲಹುಂ;
ಧಾತುಕಿಚ್ಚಂ ವಿಚಿನ್ತೇನ್ತೋ, ಸಾಮಚ್ಚೋ ಪಾವಿಸೀ ಪುರಂ.
ಮಹಾಮಹಿನ್ದತ್ಥೇರೋ ತು, ಮಹಾ ಮೇಘವನಂ ಸುಭಂ;
ಸಗಣೋ ಅಭಿಗನ್ತ್ವಾನ, ತತ್ಥ ವಾಸಮಕಪ್ಪಯಿ.
ರತ್ತಿಂ ನಾಗೋ’ನುಪರಿಯಾತಿ, ತಂ ಠಾನಂ ಸೋ ಸಧಾತು ಕಂ;
ಬೋಧಿಠಾನಮ್ಹಿ ಸಾಲಾಯ, ದಿವಾಠಾತಿ ಸಧಾತುಕೋ.
ವತ್ಥುಸ್ಸ ತಸ್ಸೋ’ಪರಿತೋ, ಥೂಪಂ ಥೇರಮತಾನು ಗೋ;
ಜಙ್ಘಾಮತ್ತಂ ಚಿತಾಪೇತ್ವಾ, ಕತಿಪಾಹೇನ ಭೂಪತಿ.
ತತ್ಥ ಧಾತುಪತಿಟ್ಠಾನಂ, ಘೋಸಾಪೇತ್ವಾ ಉಪಾಗಮಿ;
ತತೋ ತತೋ ಸಮನ್ತೋ ಚ, ಸಮಾಗಮಿ ಮಹಾಜನೋ.
ತಸ್ಮಿಂ ಸಮಾಗಮೇ ಧಾತು, ಹತ್ಥಿಕ್ಖನ್ಧಾ ನಗಾಗ್ಗತಾ;
ಸತ್ತತಾಲಪ್ಪಮಾಣಮ್ಹಿ, ದಿಸ್ಸನ್ತಿ ನಭಸಿಟ್ಠಿತಾ.
ವಿಮ್ಹಾಪಯನ್ತಿ ಜನತಂ, ಯಮಕಂ ಪಾಟಿಹಾರಿಯಂ;
ಕಣ್ಣಮ್ಬಮೂಲೇ ಬುದ್ಧೋ’ವ, ಅಕರಿ ಲೋಮಹಂಸನಂ.
ತತೋ ¶ ನಿಕ್ಖನ್ತಜಾಲಾಹಿ, ಜಲಧಾರಾಹಿ ಚಾ’ಸಕಿಂ;
ಅಯಂ ಓಭಾಸಿತಾ’ಸಿತ್ತಾ, ಸಬ್ಬಾಲಂಕಾಮಹೀ ಮಹು.
ಪರಿನಿಬ್ಬಾನಮಞ್ಚಮ್ಹಿ, ನಿಪನ್ನೇನ ಜಿನೇನ ಹಿ;
ಕತಂ ಮಹಾಅಧಿಟ್ಠಾನ-ಪಞ್ಚಕಂ ಪಞ್ಚಚಕ್ಖುನಾ.
ಗಯ್ಹಮಾನಾ ಮಹಾಬೋಧಿ ಸಾಖಾಸೋಕೇನ ದಕ್ಖಿಣಾ;
ಛಿಜ್ಜಿತ್ವಾನ ಸಯಂಯೇವ, ಪತಿಟ್ಠಾತು ಕಟಾಹಕೇ.
ಪತಿಟ್ಠಹಿತ್ವಾ ಸಾ ಸಾಖಾ, ಛಬ್ಬಣ್ಣರಸ್ಮಿಯೋ ಸುಭಾ;
ರಞ್ಜಯನ್ತೀ ದಿಸಾ ಸಬ್ಬಾ, ಫಲಪತ್ತೇಹಿ ಮುಚ್ಚತು.
ಸಸುವಣ್ಣಕಟಾಹಾ ಸಾ, ಉಗ್ಗನ್ತ್ವಾನ ಮನೋರಮಾ;
ಅದಿಸ್ಸಮಾನಾ ಸತ್ತಾಹಂ, ಹಿಮಗಬ್ಭಮ್ಹಿ ತಿಟ್ಠತು.
ಥೂಪಾರಾಮೇ ಪತಿಟ್ಠನ್ತಂ, ಮಮ ದಕ್ಖಿಣಅಕ್ಖಕಂ;
ಕರೋತು ನಭಮುಗ್ಗನ್ತ್ವಾ, ಯಮಯಂ ಪಾಟಿಹಾರಿಯಂ.
ಲಙ್ಕಾ ಲಙ್ಕಾರಭೂತಮ್ಹಿ, ಹೇಮಮಾಲಿಕಚೇತಿಯೇ;
ಪತಿಟ್ಠಹನ್ತಿಯೋ ಧಾತು, ದೋಣಮತ್ತಾ ಪಮಾಣತೋ.
ಬುದ್ಧವೇಸಧರಾ ಹುತ್ವಾ, ಉಗ್ಗನ್ತ್ವಾ ನಭಸಿಟ್ಠಿತಾ;
ಪತಿಟ್ಠಂ ತು ಕರಿತ್ವಾನ, ಯಮಕಂ ಪಾಟಿಹಾರಿಯಂ.
ಅಧಿಟ್ಠಾನಾನಿ ಪಞ್ಚೇ’ವ, ಅಧಿಟ್ಠಾಸಿ ತಥಾಗತೋ;
ಅಕಾಸಿ ತಸ್ಮಾ ಸಾ ಧಾತು, ತದಾ ತಂ ಪಾಟಿಹಾರಿಯಂ.
ಆಕಾಸಾ ಓತರಿತ್ವಾ ಸಾ, ಅಟ್ಠಾಭೂಪಸ್ಸ ಮುದ್ಧನಿ;
ಅತೀವಹಟ್ಠೋ ತಂ ರಾಜಾ, ಪತಿಟ್ಠಾಪೇಸಿ ಚೇತಿಯೇ.
ಪತಿಟ್ಠಿತಾಯ ತಸ್ಸಾ ಚ, ಧಾತುಯಾ ಚೇತಿಯೇ ತದಾ;
ಅಹು ಮಹಾಭೂಮಿಚಾಲೋ, ಅಬ್ಭುತೋ ಲೋಮಹಂಸನೋ.
ಏವಂ ಅಚಿನ್ತಿಯಾ ಬುದ್ಧಾ, ಬುದ್ಧಧಮ್ಮಾ ಅಚಿನ್ತಿಯಾ;
ಅಚಿನ್ತಿಯೇ ಪಸನ್ನಾನಂ, ವಿಪಾಕೋ ಹೋತಿ ಅಚಿನ್ತಿಯೋ.
ತಂ ಪಾಟಿಹಾರಿಯಂ ದಿಸ್ವಾ, ಪಸೀದಿಂಸು ಜನೇ ಜನಾ;
ಮತ್ತಾಭಯೋ ರಾಜಪುತ್ತೋ, ಕನಿಟ್ಠೋ ರಾಜಿನೋ ಪನ.
ಮುನಿಸ್ಸರೇ ಪಸೀದಿತ್ವಾ, ಯಾಚಿತ್ವಾನ ನರಿಸ್ಸರಂ;
ಪುರಿಸಾನಂ ಸಹಸ್ಸೇನ, ಸಹ ಪಬ್ಬಜಿಸಾಸನೇ.
ಚೇತಾರಿಗಾಮತೋ ¶ ಚಾಪಿ, ದ್ವಾರಮಣ್ಡಲತೋಪಿ ಚ;
ವಿಹೀರಬೀಜತೋ ಚಾಪಿ, ತಥಾ ಗಲ್ಲಕಪಿಟ್ಠಿತೋ.
ತಥೋ’ಪತಿಸ್ಸಗಾಮಾ ಚ, ಪಞ್ಚ ಪಞ್ಚ ಸತಾನಿ ಚ;
ಪಬ್ಬಜುಂ ದಾರಕಾ ಹಟ್ಠಾ, ಜಾತಸದ್ಧಾ ತಥಾಗತೇ.
ಏವಂ ಪುರಾ ಬಾಹಿರಾ ಚ, ಸಬ್ಬೇ ಪಬ್ಬಜಿತಾ ತದಾ;
ತಿಂಸ ಭಿಕ್ಖುಸಹಸ್ಸಾನಿ, ಅಹೇಸುಂ ಜಿನಸಾಸನೇ.
ಥೂಪಾರಾಮೇ ಥೂಪವರಂ, ನಿಟ್ಠಾಪೇತ್ವಾ ಮಹೀಪತಿ;
ರತನಾದೀಹಿ’ನೇಕೇಹಿ, ಸದಾ ಪೂಜಮಕಾರಯಿ.
ರಾಜೋರೋಧಾ ಖತ್ತಿಯಾ ಚ, ಅಮಚ್ಚಾ ನಾಗರಾ ತಥಾ;
ಸಬ್ಬೇ ಜನಪದಾ ಚೇವ, ಪುಜಾ’ಕಂಸು ವಿಸುಂ ವಿಸುಂ.
ಥೂಪಪುಬ್ಬಙ್ಗಮಂ ರಾಜಾ, ವಿಹಾರಂ ತತ್ಥ ಕಾರಯಿ;
ಥೂಪಾರಾಮೋತಿ ತೇನೇ’ಸ, ವಿಹಾರೋ ವಿಸ್ಸುತೋ ಅಹು.
ಸಕಧಾತುಸರೀರಕೇನ ಚೇ’ವಂ,
ಪರಿನಿಬ್ಬಾನಗತೋಪಿ ಲೋಕನಾಥೋ;
ಜನಕಾಯಹಿತಂ ಸುಖಞ್ಚ ಸಮ್ಮಾ,
ಬಹುಧಾ’ಕಾಸಿ ಠಿತೇ ಜಿನೇ ಕಥಾವಕಾತಿ.
ಸುಜನಪ್ಪಸಾದಸಂವೇಗತ್ಥಾಯ ಕತೇ ಮಹಾವಂಸೇ
ಧಾತುಅಗಮನೋ ನಾಮ
ಸತ್ತರಸಮೋ ಪರಿಚ್ಛೇದೋ.
ಅಟ್ಠಾರಸಮ ಪರಿಚ್ಛೇದ
ಮಹಾಬೋಧಿಗ್ಗಹಣೋ
ಮಹಾಬೋಧಿಞ್ಚ ಥೇರಿಞ್ಚ, ಆಣಾಪೇತುಂ ಮಹೀಪತಿ;
ಥೇರೇನ ವುತ್ತವಚನಂ, ಸರಮಾನೋ ಸಕೇ ಘರೇ.
ಅನ್ತೋವಸ್ಸೇ’ಕ ದಿವಸಂ, ನಿಸಿನ್ನೋ ಥೇರಸನ್ತಿಕೇ;
ಸಹಾ’ಮಚ್ಚೇಹಿ ಮನ್ತೇತ್ವಾ, ಭಾಗಿನೇಯ್ಯಂ ಸಯಂ ಸಕಂ.
ಅರಿಟ್ಠನಾಮಕಾ’ಮಚ್ಚಂ ¶ , ತಸ್ಮಿಂ ಕಮ್ಮೇ ನಿಯೋಜಿತುಂ;
ಮನ್ತ್ವಾ ಆಮನ್ತಯಿತ್ವಾನ, ಇದಂ ವಚನಮಬ್ರವಿ.
ತಾ ಸಕ್ಖಿಸ್ಸಸಿ…, ಧಮ್ಮಾಸೋಕಸ್ಸ ಸನ್ತಿಕಾ;
ಮಹಾಬೋಧಿಂ ಸಙ್ಘಮಿತ್ತಂ, ಥೇರಿಂ ಆನಯಿತುಂ ಇಧ.
ಸಕ್ಖಿಸ್ಸಾಮಿ ಅಹಂ ದೇವ, ಆನೇತುಂ ತಂ ದುವೇ ತತೋ;
ಇಧಾ’ಗತೋ ಪಬ್ಬಜಿತುಂ, ಸಚೇ ಲಚ್ಛಾಮಿ ಮಾನದ.
ಏವಂ ಹೋತೂತಿ ವತ್ವಾನ, ರಾಜಾ ತಂ ತತ್ಥ ಪೇಸಯಿ;
ಸೋ ಥೇರಸ್ಸ ಚ ರಞ್ಞೋ ಚ, ಸಾಸನಂ ಗಯ್ಹ ವನ್ದಿಯ.
ಅಸ್ಸಯುಜಸುಕ್ಕಪಕ್ಖೇ, ನಿಕ್ಖನ್ತೋ ದುತಿಯೇ’ಹನಿ;
ಸಾನುಯುತ್ತೋ ಜಮ್ಬುಕೋಲೇ, ನಾವಮಾರುಯ್ಹ ಪಟ್ಟನೇ.
ಮಹೋದಮಿಂ ಕರಿತ್ವಾನ, ಥೇರಾಧಿಟ್ಠಾನಯೋಗತೋ;
ನಿಕ್ಖನ್ತದಿವಸೇಯೇವ, ರಮ್ಮಂ ಪುಪ್ಫಪುರಂ ಅಗಾ.
ತದಾ ತು ಅನುಲಾದೇವೀ, ಪಞ್ಚಕಞ್ಞಾಸತೇಹಿ ಚ;
ಅನ್ತೇಪುರಿಕಇತ್ಥೀನಂ, ಸದ್ಧಿಂ ಪಞ್ಚಸತೇಹಿ ಚ.
ದಸಸೀಲಂ ಸಮಾದಾಯ, ಕಾಸಾಯ ವಸನಾ ಸುಚಿ;
ಪಬ್ಬಜ್ಜಾಪೇಕ್ಖಿ ನಿಸೇಖಾ, ಪೇಕ್ಖನ್ತಿ ಥೇರಿಯಾ’ಗಮಂ.
ನಗರಸ್ಸೇ’ಕದೇಸಮ್ಹಿ, ರಮ್ಮೇ ಭಿಕ್ಖುನುಪಸ್ಸಯೇ;
ಕಾರಾಪಿತೇ ನರಿನ್ದೇನ, ವಾಸಂ ಕಪ್ಪೇಸಿ ಸುಬ್ಬತಾ.
ಉಪಾಸಿಕಾಹಿ ತಾಹೇ’ಸ, ವುತ್ತೋ ಭಿಕ್ಖುನುಪಸ್ಸಯೋ;
ಉಪಾಸಿಕಾ ವಿಹಾರೋತಿ, ತೇನ ಲಂಕಾಯ ವಿಸ್ಸುತೋ.
ಭಾಗಿನೇಯ್ಯೋ ಮಹಾ’ರಿಟ್ಠೋ, ಧಮ್ಮಾಸೋಕಸ್ಸ ರಾಜಿನೋ;
ಅಪ್ಪೇತ್ವಾ ರಾಜಸನ್ದೇಸಂ, ಥೇರಸನ್ದೇಸ’ಮಬ್ರವಿ.
ಭಾತುಜಯಾ ಸಹಾಯಸ್ಸ, ರಞ್ಞೋ ತೇ ರಾಜಕುಞ್ಜರ;
ಆಕಙ್ಖಮಾನಾ ಪಬ್ಬಜ್ಜಂ, ನಿಚ್ಚಂ ವಸತಿ ಸಞ್ಞತಾ.
ಸಙ್ಘಮಿತ್ತಂ ಭಿಕ್ಖುನಿಂ ತಂ, ಪಬ್ಬಾಜೇತುಂ ವಿಸಜ್ಜಯ;
ತಾಯ ಸದ್ಧಿಂ ಮಹಾಬೋಧಿ-ದಕ್ಖಿಣಸಾಖಮೇವ ಚ.
ಥೇರಿಯಾ ಚ ತಮೇವತ್ಥಂ, ಅಬ್ರವಿ ಥೇರಭಾಸಿತಂ;
ಗನ್ತ್ವಾ ಪಿತುಸಮೀಪಂ ಸಾ, ಥೇರೀ ಥೇರಮತಂ ಬ್ರವೀ.
ಆಹ ¶ ರಾಜಾ ತುವಂ ಅಮ್ಮ, ಅಪಸ್ಸನ್ತೋ ಕಥಂ ಅಹಂ;
ಸೋಕಂ ವಿನೋದಯಿಸ್ಸಾಮಿ, ಪುತ್ತನತ್ತವಿಯೋಗಜಂ.
ಆಹ ಸಾ ಮೇ ಮಹಾರಾಜ, ಭಾತುನೋ ವಚನಂ ಗರು;
ಪಬ್ಬಾಜನೀಯಾ ಚ ಬಹೂ, ಗನ್ತಬ್ಬಂ ತತ್ಥ ತೇನ ಮೇ.
‘‘ಸತ್ಥಘಾತಮನಾರಹಾ, ಮಹಾಬೋಧಿಮಹೀರುಹಾ;
ಕಥನ್ನು ಸಾಖಂ ಗಣಿಸ್ಸಂ’’, ಇತಿ ರಾಜಾ ವಿಚಿನ್ತಯೀ.
ಅಮಚ್ಚಸ್ಸ ಮಹಾದೇವ-ನಾಮಕಸ್ಸ ಮತೇನ ಸೋ;
ಭಿಕ್ಖುಸಙ್ಘಂ ನಿಮನ್ತೇತ್ವಾ, ಭೋಜೇತ್ವಾ ಪುಚ್ಛಿ ಭೂಪತಿಂ.
ಭನ್ತೇ ಲಂಕಂ ಮಹಾಬೋಧಿ, ಪೇಸೇತಬ್ಬಾ ನು ಖೋ ಇತಿ;
ಥೇರೋ ಮೋಗ್ಗಲಿಪುತ್ತೋ ಸೋ, ಪೇಸೇತಬ್ಬಾತಿ ಭಾಸಿಯ.
ಕತಂ ಮಹಾಅಧಿಟ್ಠಾನ-ಪಞ್ಚಕಂ ಪಞ್ಚಚಕ್ಖುನಾ;
ಆಭಾಸಿ ರಞ್ಞೋ ತಂ ಸುತ್ವಾ, ತುಸ್ಸಿತ್ವಾ ಧರಣೀಪತಿ.
ಸತ್ತಯೋಜನಿಕಂ ಮಗ್ಗಂ, ಸೋ ಮಹಾಬೋಧಿಗಾಮಿನಂ;
ಸೋಧಾಪೇತ್ವಾನ ಸಕ್ಕಚ್ಚಂ, ಭೂಸಾಪೇತಿ ಅನೇಕಧಾ.
ಸುವಣ್ಣಂ ನೀಹರಾಪೇಸಿ, ಕಟಾಹಕರಣಾಯ ಚ;
ವಿಸ್ಸಕಮ್ಮೋ ಚ ಆಗನ್ತ್ವಾ, ಸತುಲಾಧಾರರೂಪವಾ.
‘‘ಕಟಾಹಂ ಕಿಂ ಪಮಾಣಂ ನು, ಕರೋಮೀ’ತಿ ಅಪುಚ್ಛಿತಂ;
‘‘ಞತ್ವಾ ಪಮಾಣಂ ತ್ವಂಯೇವ, ಕರೋಹಿ’’ ಇತಿ ಭಾಸಿಯ.
ಸುವಣ್ಣಾ ಗಹೇತ್ವಾನ, ಹತ್ಥೇನ ಪರಿಮಜ್ಜಿಯ;
ಕಟಾಹಂ ತಙ್ಖಣಂಯೇವ, ನಿಮ್ಮಿನಿತ್ವಾನ ಪಕ್ಕಮಿ.
ನವಹತ್ಥಪರಿಕ್ಖೇಪಂ, ಪಞ್ಚಹತ್ಥಂ ಗಭೀರತೋ;
ತಿಹತ್ಥವಿಕ್ಖಮ್ಭಯುತಂ, ಅಟ್ಠಙ್ಗುಲಘನಂ ಸುಭಂ.
ಯುವಸ್ಸ ಹತ್ಥಿನೋ ಸೋಣ್ಡ-ಪಮಾಣಮುಖವಟ್ಟಿಕಂ;
ಗಾಹಾ ಪೇತ್ವಾನ ತಂ ರಾಜಾ, ಬಾಲಸುರಸಮಪ್ಪಕಂ.
ಸತ್ತಯೋಜನದೀಘಾಯ, ವಿತ್ಥತಾಯತಿ ಯೋಜನಂ;
ಸೇನಾಯ ಚತುರಙ್ಗಿನ್ಯಾ, ಮಹಾಭಿಕ್ಖುಗಣೇನ ಚ.
ಉಪಗಮ್ಮ ಮಹಾಬೋಧಿಂ, ನಾನಾಲಙ್ಕಾರಭೂಸಿತಂ;
ನಾನಾರತನಚಿತ್ತಂ ತಂ, ವಿವಿಧದ್ಧಜಮಾಲಿನಿಂ.
ನಾನಾಕುಸುಮಸಂಕಿಣ್ಣಂ ¶ , ನಾನಾತುರಿಯಘೋಸಿತಂ;
ಸೇನಾಯ ಪರಿವಾರೇತ್ವಾ, ಪರಿಕ್ಖಿಪಿಯ ಸಾಣಿಯಾ.
ಮಹಾಥೇರಸಹಸ್ಸೇನ, ಪಮುಖೇನ ಮಹಾಗಣೇ;
ರಞ್ಞಂ ಪತ್ತಾಭಿಸೇಕಾನಂ, ಸಹಸ್ಸೇನಾ’ಧಿಕೇನ ಚ.
ಅತ್ತಾನಂ ಪರಿವಾರೇತ್ವಾ, ಮಹಾಬೋಧಿಞ್ಚ ಸಾಧುಕಂ;
ಓಲೋಕೇಸಿ ಮಹಾಬೋಧಿಂ, ಪಗ್ಗಹೇತ್ವಾನ ಅಞ್ಜಲಿಂ.
ತಸ್ಸಾ ದಕ್ಖಿಣಸಾಖಾಯ, ಚತುಹತ್ಥಪಮಾಣಕಂ;
ಠಾನಂ ಖನ್ಧಞ್ಚ ವಜ್ಜೇತ್ವಾ, ಸಾಖಾ ಅನ್ತರಧಾಯಿಸುಂ.
ತಂ ಪಾಟಿಹಾರಿಯಂ ದಿಸ್ವಾ, ಪತೀತೋ ಪುಥವೀಪತಿ;
‘‘ಪೂಜೇಮ’ಹಂ ಮಹಾಬೋಧಿಂ, ರಜ್ಜೇನಾ’ಹಿ ಉದೀರಿಯ.
ಅಭಿಸಿಞ್ಚಿ ಮಹಾಬೋಧೀಂ, ಮಹಾರಜ್ಜೇ ಮಹೀಪತಿ;
ಪುಪ್ಫಾದೀಹಿ ಮಹಾಬೋಧಿಂ, ಪೂಜೇತ್ವಾನ ಪದಕ್ಖಿಣಂ.
ಕತ್ವಾ ಅಟ್ಠಸು ಠಾನೇಸು, ವನ್ದಿತ್ವಾನ ಕತಞ್ಜಲೀ;
ಸುವಣ್ಣಖಚಿತೇ ಪೀಠೇ, ನಾನಾರತನಮಣ್ಡಿತೇ.
ಸ್ವಾರೋಹೇ ಯಾವ ಸಾಉಚ್ಚೇ, ತಂ ಸುವಣ್ಣಕಟಾಹಕಂ;
ಠಪಾಪೇತ್ವಾನ ಆರುಯ್ಹ, ಗಹೇತುಂ ಸಾಖಮುತ್ತಮಂ.
ಆದಿಯಿತ್ವಾನ ಸೋವಣ್ಣ ತುಲಿಕಾಯ ಮನೋಸಿಲಂ;
ಲೇಖಂ ದತ್ವಾನ ಸಾಖಾಯ, ಸಚ್ಚಕ್ರಿಯಮಕಾ ಇತಿ.
‘‘ಲಂಕಾದೀಪಂ ಯದಿ ಇತೋ, ಗನ್ತಬ್ಬಂ ಉರುಬೋಧಿಯಾ;
ನಿಬ್ಬೇಮತಿಕೋ ಬುದ್ಧಸ್ಸ, ಸಾಸನಮ್ಹಿ ಸಚೇ ಅಹಂ.
ಸಯಂಯೇವ ಮಹಾಬೋಧಿ-ಸಾಖಾಯಂ ದಕ್ಖಿಣಾ ಸುಭಾ;
ಛಿಜ್ಜಿತ್ವಾನ ಪತಿಟ್ಠಾತು, ಇಧ ಹೇಮಕಟಾಹಕೇ.
ಲೇಖಠಾನೇ ಮಹಾಬೋಧಿ, ಛಿಜ್ಜಿತ್ವಾ ಸಯಮೇವ ಸಾ;
ಗನ್ಧಕದ್ದಮಪೂರಸ್ಸ, ಕಟಾಹಸ್ಸೋ’ಪರಿಟ್ಠಿತಾ.
ಮೂಲಲೇಖಾಯ ಉಪರಿ, ತಿಯಙ್ಗುಲತಿಯಙ್ಗುಲೇ;
ದದಂ ಮನೋಸಿಲಾ ಲೇಖಾ, ಪರಿಕ್ಖಿಪಿ ನರಿಸ್ಸರೋ.
ಆದಿಯಾ ಥೂಲಮೂಲಾನಿ, ಖುದ್ದಕಾನಿ’ತರಾಹಿ ತು;
ನಿಕ್ಖಮಿತ್ವಾ ದಸ ದಸ, ಜಾಲೀಭೂತಾ ನಿಓತರುಂ.
ತಂ ¶ ಪಾಟಿಹಾರಿಯಂ ದಿಸ್ವಾ, ರಾಜಾ’ತೀವ ಪಮೋದಿತೋ;
ತತ್ಥೇವಾ’ಕಾಸಿ ಉಕ್ಕುಟ್ಠಿಂ, ಸಮನ್ತಾ ಪರಿಸಾಪಿ ಚ.
ಭಿಕ್ಖುಸಙ್ಘೋ ಸಾಧುಕಾರಂ, ತುಟ್ಠಚಿತ್ತೋ ಪಮೋದಯಿ;
ಚೇಲುಕ್ಖೇಪಸಹಸ್ಸಾನಿ, ಪವತ್ತಿಂಸು ಸಮನ್ತತೋ.
ಏವಂ ಸತೇನ ಮೂಲಾನಂ, ತತ್ಥ ಸಾ ಗನ್ಧಕದ್ದಮೇ;
ಪತಿಟ್ಠಾಸಿ ಮಹಾಬೋಧಿ, ಪಸಾದೇನ್ತೀ ಮಹಾಜನಂ.
ತಸ್ಸಾ ಖನ್ಧೋ ದಸಹತ್ಥೋ, ಪಞ್ಚಸಾಖಾ ಮನೋರಮಾ;
ಚತುಹತ್ಥಾ ಚತುಹತ್ಥಾ, ದಸಡ್ಢಫಲಮಣ್ಡಿತಾ.
ಸಹಸ್ಸನ್ತು ಪಸಾಖಾನಂ, ಸಾಖಾನಂ ತಾಸಮಾಸಿ ಚ;
ಏವಂ ಆಸಿ ಮಹಾಬೋಧಿ, ಮನೋಹರಸಿರಿಧರಾ.
ಕಟಾಹಮ್ಹಿ ಮಹಾಬೋಧಿ-ಪತಿಟ್ಠಿತಕ್ಖಣೇ ಮಹೀ;
ಅಕಮ್ಪಿ ಪಾಟಿಹೀರಾನಿ, ಅಹೇಸುಂ ವಿವಿಧಾನಿ ಚ.
ಸಯಂ ನಾದೇಹಿ ತೂರಿಯಾನಂ, ದೇವೇಸು ಮಾನುಸೇಸು ಚ;
ಸಾಧುಕಾರನಿನಾದೇತಿ, ದೇವಬ್ರಹ್ಮಗಣಸ್ಸ ಚ.
ಮೇಘಾನಂ ಮಿಗಪಕ್ಖಿನಂ, ಯಕ್ಖಾದೀನಂ ರವೇಹಿ ಚ;
ರವೇಹಿಚಮಹೀಕಮ್ಪೇ, ಏಕಕೋಲಾಹಲಂ ಅಹು.
ಬೋಧಿಯಾ ಫಲಪತ್ತೇಹಿ, ಛಬ್ಬಣ್ಣರಸ್ಮಿಯೋ ಸುಭಾ;
ನಿಕ್ಖಮಿತ್ವಾ ಚಕ್ಕವಾಳಂ, ಸಕಲಾ ಸೋಭಯಿಂಸು ಚ.
ಸಕಟಾಹಾ ಮಹಾಬೋಧಿ, ಉಗ್ಗನ್ತ್ವಾನ ತತೋ ನಭಂ;
ಅಟ್ಠಾಸಿ ಹಿಮಗಬ್ಭಮ್ಹಿ, ಸತ್ತಾಹಾನಿ ಅದಸ್ಸನಾ.
ರಾಜಾ ಓರುಯ್ಹ ಪೀಠಮ್ಹಾ, ತಂ ಸತ್ತಾಹಂ ತಹಿಂ ವಸಂ;
ನಿಚ್ಚಂ ಮಹಾಬೋಧಿಪೂಜಂ, ಅಕಾಸಿ ಚ ಅನೇಕಧಾ.
ಅತೀತೇ ತಮ್ಹಿ ಸತ್ತಾಹೇ, ಸಬ್ಬೇ ಹಿಮವಲಾವಕಾ;
ಪವಿಸಿಂಸು ಮಹಾಬೋಧಿಂ, ಸಬ್ಬಾಕಾ ರಂಸಿಯೋಪಿ ಚ.
ಸುದ್ಧೇನಕದಿಸಿಸ್ಸಿತ್ಥ, ಸಾಕಟಾಹೇ ಪತ್ತಿಟ್ಠಿತಾ;
ಮಹಾಜನಸ್ಸ ಸಬ್ಬಸ್ಸ, ಮಹಾಬೋಧಿ ಮನೋರಮಾ.
ಪವತ್ತಮ್ಹಿ ಮಹಾಬೋಧಿ, ವಿವಿಧೇ ಪಾಟಿಹಾರಿಯೇ;
ವಿಮ್ಹಾಪಯನ್ತಿ ಜನತಂ, ಪಥವೀತಲಮೋರುಹಿ.
ಪಾಟಿಹಿರೇಹಿ’ನೇಕೇಹಿ ¶ , ತೇಹಿ ಸೋ ಪೀಣಿತೋ ಪುನ;
ಮಹಾರಾಜಾ ಮಹಾಬೋಧಿಂ, ಮಹಾರಜ್ಜೇನ ಪೂಜಯಿ.
ಮಹಾಬೋಧಿಂ ಮಹಾರಜ್ಜೇ-ನಾಭಿಸಿಞ್ಚಿಯ ಪೂಜಯಂ;
ನಾನಾಪೂಜಾಹಿ ಸತ್ತಾಹಂ, ಪುನ ತತ್ಥೇವ ಸೋ ವಸಿ.
ಅಸ್ಸಯುಜಸುಕ್ಕಪಕ್ಖೇ, ಪನ್ನರಸಉಪೋಸಥೇ;
ಅಗ್ಗಹೇಸಿ ಮಹಾಬೋಧಿಂ, ದ್ವಿಸತ್ತಾಹಮಚ್ಚಯೇ ತತೋ.
ಅಸ್ಸಯುಜಕಾಳಪಕ್ಖೇ, ಚತುದ್ದಸಉಪೋಸಥೇ;
ರಥೇ ಸುಭೇ ಠಪೇತ್ವಾನ, ಮಹಾಬೋಧಿಂ ರಥೇಸಭೋ.
ಪೂಜೇನ್ತೋ ತಂ ದಿನಂಯೇವ, ಉಪನೇತ್ವಾ ಸಕಂ ಪುರಂ;
ಅಲಙ್ಕರಿತ್ವಾ ಬಹುಧಾ, ಕಾರೇತ್ವಾ ಮಣ್ಡಪಂ ಸುಭಂ.
ಕತ್ತಿಕಸುಕ್ಕಪಕ್ಖಸ್ಸ, ದಿನೇ ಪಾಟಿಪದೇ ತಹಿಂ;
ಮಹಾಬೋಧಿಂ ಮಹಾಸಾಲ-ಮೂಲೇ ಪಾಚಿನತೇ ಸುಭೇ.
ಠಪಾಪೇತ್ವಾನ ಕಾರೇಸಿ, ಪೂಜಾ’ನೇಕಾ ದಿನೇ ದಿನೇ;
ಗಾಹತೋ ಸತ್ತರಸಮೇ, ವಿವಸೇ ತು ನವಙ್ಕಿರಾ.
ಸಕಿಂ ಯೇವಅಜಾಯಿಂಸು, ತಸ್ಸಾ’ನೇಕನರಾಧಿಪೋ;
ತುಟ್ಠಚಿತ್ತೋ ಮಹಾಬೋಧಿಂ, ಪುನ ರಜ್ಜೇನ ಪೂಜಯಿ.
ಮಹಾರಜ್ಜೇ’ಭಿ ಸಿಞ್ಚಿತ್ವಾ, ಮಹಾಬೋಧಿಂ ಮಹಿಸ್ಸರೋ;
ಕಾರೇಸಿ ಚ ಮಹಾಬೋಧಿ-ಪೂಜಾ ನಾನಪ್ಪಕಾರಕಂ.
ಇತಿ ಕುಸುಮಪುರೇ ಸರೇಸರಂಸಾ,
ಬಹುವಿಧಚಾರುಧಜಾಕುಲಾವಿಸಾಲಾ;
ಸುರುಚಿರಪವರೋರು ಬೋಧಿಪೂಜಾ,
ಮರುನರಚಿತ್ತವಿಕಾಸಿನೀ ಅಹೋಸೀತಿ.
ಸುಜನಪ್ಪಸಾದಸಂವೇಗತ್ಥಾಯ ಕತೇ ಮಹಾವಂಸೇ
ಮಹಾಬೋಧಿಗ್ಗಹಣೋ ನಾಮ
ಅಟ್ಠಾರಸಮೋ ಪರಿಚ್ಛೇದೋ.
ಏಕೂನವೀಸತಿಮ ಪರಿಚ್ಛೇದ
ಬೋಧಿ ಆಗಮನೋ
ಮಹಾಬೋಧಿರಕ್ಖಣತ್ಥಂ ¶ , ಅಟ್ಠಾರಸ ರಥೇ ಸಭೋ;
ದೇವಕುಲಾನಿ ದತ್ವಾನ, ಅಟ್ಠಾಮಚ್ಚಾ ಕುಲಾನಿ ಚ.
ಅಟ್ಠ ಬ್ರಾಹ್ಮಣಕುಲಾನಿ, ಅಟ್ಠ ವಸ್ಸಕುಲಾನಿ ಚ;
ಗೋಪಕಾನಂ ತರಚ್ಛಾನಂ, ಕುಲಿಙ್ಗಾನಂ ಕುಲಾನಿ ಚ.
ತಥೇವ ಪೇಸಕಾರಾನಂ, ಕುಮ್ಭಕಾರಾನಮೇವ ಚ;
ಸಬ್ಬೇ ಸಞ್ಚಾಪಿ ಸೇನೀನಂ, ನಾಗಯಕ್ಖಾನಮೇವ ಚ.
ಹೇಮಸಜ್ಜುಘಟೇಚೇವ, ದತ್ವಾ ಅಟ್ಠಟ್ಠ ಮಾನದೋ;
ಆರೋಪೇತ್ವಾ ಮಹಾಬೋಧಿಂ, ನಾವಂ ಗಙ್ಗಾಯ ಭೂಸಿತಂ.
ಸಙ್ಘಮಿತ್ತ ಮಹಾಥೇರೀ, ಸಹೇ ಕದಸ ಭಿಕ್ಖುನಿಂ;
ತಥೇವಾ’ರೋಪಯಿತ್ವಾನ, ಅರಿಟ್ಠಪಮುಖೇಪಿ ಚ.
ನಗರಾ ನಿಕ್ಖಮಿತ್ವಾನ, ವಿಞ್ಜಾಟವಿಮತಿಚ್ಚಸೋ;
ತಾಮಲಿತ್ಥಿಂ ಅನುಪ್ಪತ್ತೋ, ಸತ್ತಾಹೇನೇ’ವ ಭೂಪತಿ.
ಅಚ್ಚುಳಾ ರಾಹಿ ಪೂಜಾಯಿ, ದೇವಾನಾಗಾನರಾಪಿ ಚ;
ಮಹಾಬೋಧಿಂ ಪೂಜಯನ್ತಾ, ಸತ್ತಾಹೇನ’ವುಪಾಗಮುಂ.
ಮಹಾಸಮುದ್ದತೀರಮ್ಹಿ, ಮಹಾಬೋಧಿಂ ಮಹೀಪತಿ;
ಠಪಾಪೇತ್ವಾನ ಪೂಜೇಸಿ, ಮಹಾರಜ್ಜೇನ ಸೋ ಪುನ.
ಮಹಾಬೋಧಿಂ ಮಹಾರಜ್ಜೇ, ಅಭಿಸಿಞ್ಚೀಯಕಾಮದೋ;
ಅಗ್ಗಸಿರ ಸುಕ್ಕಪಕ್ಖೇ, ದಿನೇ ಪಾಟಿಪದೇ ತತೋ.
ಉಚ್ಚಾರೇತುಂ ಮಹಾಬೋಧಿಂ, ತೇಹಿಯೇವ’ಟ್ಠ ಅಟ್ಠಹಿ;
ಸಾಲಮೂಲಮ್ಹಿ ದಿನ್ನೇಹಿ, ಧಾತುಗ್ಗತಕುಲೇಹಿ ಸೋ.
ಉಕ್ಖಿಪಿತ್ವಾ ಮಹಾಬೋಧಿಂ, ಗಲಮತ್ತಂ ಜಲಂ ತಹಿಂ;
ಓಗಾಹೇತ್ವಾ ಸನಾವಾಯ, ಪತಿಟ್ಠಾಪಯಿ ಸಾಧುಕಂ.
ನಾವಂ ¶ ಆರೋಪಯಿತ್ವಾ ತಂ, ಮಹಾಥೇರಿಂ ಸಥೇರಿಕಂ;
ಮಹಾರಿಟ್ಠಂ ಮಹಾಮಚ್ಚಂ, ಇದಂ ವಚನಮಬ್ರವಿ.
‘‘ಅಹಂ ರಜ್ಜೇನ ತಿಕ್ಖತ್ತುಂ, ಮಹಾಬೋಧಿಮಪೂಜಯಿಂ;
ಏವ ಮೇವಾ’ಭಿ ಪೂಜೇತು, ರಾಜಾ ರಜ್ಜೇನ ಮೇ ಸಖಾ’’.
ಇದಂ ವತ್ವಾ ಮಹಾರಾಜಾ, ತೀರೇ ಪಞ್ಜಲಿಕೋ ಠಿತೋ;
ಗಚ್ಛಮಾನಂ ಮಹಾಬೋಧಿಂ, ಪಸ್ಸಂ ಅಸ್ಸೂನಿವತ್ತಯಿ.
ಮಹಾಬೋಧಿ ವಿಯೋಗೇನ,
ಧಮ್ಮಾ ಸೋಕೋ ಸಸೋಕವಾ;
ಕನ್ನಿತ್ವಾ ಪರಿದೇವಿತ್ವಾ,
ಅಗಮಾಸಿ ಸಕಂ ಪುರಂ.
ಮಹಾಬೋಧಿ ಸಮಾರುಳ್ಹಾ, ನಾವಾಪಕ್ಖನ್ಧೀ ತೋಯಧಿಂ;
ಸಮನ್ತಾ ಯೋಜನೇ ವಿಚೀ, ಸನ್ನಿಸೀದಿ ಮಹಣ್ಣವೇ.
ಪುಪ್ಫಿಂಸು ಪಞ್ಚವಣ್ಣಾನಿ, ಪದುಮಾನಿ ಸಮನ್ತತೋ;
ಅನ್ತಲಿಕ್ಖೇ ಪವಜ್ಜಿಂಸು, ಅನೇಕ ತೂರಿಯಾನಿ ಚ.
ದೇವತಾಹಿ ಅನೇಕಾಹಿ, ಪೂಜಾ’ನೇಕಾ ಪವತ್ತಿತಾ;
ಗಹೇತುಞ್ಚ ಮಹಾಬೋಧಿ, ನಾಗಾ’ಕಾಸುಂ ವಿಕುಬ್ಬನಂ.
ಸಙ್ಘಮಿತ್ತಾ ಮಹಾಥೇರಿ, ಅಭಿಞ್ಞಾಬಲಪಾರಗಾ;
ಸುಪಣ್ಣರೂಪಾ ಹುತ್ವಾನ, ತೇ ತಾಸೇಸಿ ಮಹೋರಗೇ.
ತೇ ತಾಸಿತಾ ಮಹಾಥೇರಿಂ, ಯಾಚಿತ್ವಾನ ಮಹೋರಗಾ;
ನಯಿತ್ವಾನ ಮಹಾಬೇಮಧಿಂ, ಭುಜಙ್ಗಭವನಂ ತತೋ.
ಸತ್ತಾಹಂ ನಾಗರಜ್ಜೇನ, ಪೂಜಾಹಿ ವಿವಿಧಾಹಿ ಚ;
ಪೂಜಯಿತ್ವಾನ ಆನೇತ್ವಾ, ನಾವಾಯಂ ಠಪಯಿಂಸು ತೇ.
ತದಹೇವ ಮಹಾಬೋಧಿ, ಜಮ್ಬುಕೋಲಮಿಧಗಮಾ;
ದೇವಾನಂಪಿಯತಿಸ್ಸೋ ತು, ರಾಜಾ ಲೋಕಹಿತೇ ರತೋ.
ಸುಮನಾ ಸಾಮಣೇರಮ್ಹಾ, ಪುಬ್ಬೇ ಸುತತದಾಗಮೋ;
ಮಗ್ಗಸಿರಾದಿದಿನಘೋ, ಪಭುತಿ ವಚಸಾದರೋ.
ಉತ್ತರದ್ವಾರತೋ ¶ ಯಾವ, ಜಮ್ಬುಕೋಲಂ ಮಹಾಪಥಂ;
ವಿಭೂಸಯಿತ್ವಾ ಸಕಲಂ, ಮಹಾಬೋಧಿಗತಾಸಯೋ.
ಸಮುದ್ದಾಸನಸಾಲಾಯ, ಠಾನೇ ಠತ್ವಾ ಮಹಣ್ಣವೇ;
ಆಗಚ್ಛನ್ತಂ ಮಹಾಬೋಧಿಂ, ಮಹಾಥೇರಿದ್ಧಿಯಾ’ದ್ದಸ.
ತಸ್ಮಿಂಠಾನೇ ಕತಾ ಸಾಲಾ, ಪಕಾ ಸೇತುಂ ತಮಬ್ಭುತಂ;
ಸಮುದ್ದಾಸನಸಾಲಾತಿ, ನಾಮೇನಾ‘ಸಿ’ಧ ಪಾಕಟಾ.
ಮಹಾಥೇರಾನುಭಾವೇನ, ಸದ್ಧಿಂ ಥೇರೇಹಿ ತೇಹಿ ಚ;
ತದಹೇವ’ಗಮಾ ರಾಜಾ, ಜಮ್ಬುಕೋಲಂ ಸ ಸೇನಕೋ.
ಮಹಾಬೋಧಾ ಗಮೇಪೀತಿ-ವೇಗೇನು’ನ್ನೋ ಉದಾನಯಂ;
ಗಲಪ್ಪಮಾಣಂ ಸಲಿಲಂ, ವಿಗಾಹೇತ್ವಾ ಸುವಿಗ್ಗಹೋ.
ಮಹಾಬೋಧಿಂ ಸೋಳಸಹಿ, ಕುಲೇಹಿ ಸಹ ಮುದ್ಧನಾ;
ಆದಾಯೋ’ರೋಪಯಿತ್ವಾನ, ವೇಲಾಯಂ ಮಣ್ಡಪೇ ಸುಭೇ.
ಠಪಯಿತ್ವಾನ ಲಂಕಿನ್ದೋ, ಲಂಕಾರಜ್ಜೇನ ಪೂಜಯಿ;
ಸೋಳಸನ್ನಂ ಸಮಪ್ಪೇತ್ವಾ, ಕುಲಾನಂ ರಜ್ಜಮತ್ತನೋ.
ಸಯಂ ದೋವಾರಿಕಠಾನೇ, ಠತ್ವಾನ ದಿವಸೇ ತಯೋ;
ತತ್ಥೇವ ಪೂಜಂ ಕಾರೇಸಿ, ವಿವಿಧಂ ಮನುಜಾಧಿಪೋ.
ಮಹಾಬೋಧಿಂ ದಸಮಿಯಂ, ಆರೋಪೇತ್ವಾ ರಥೇಸುಭೇ;
ಆನಯನ್ತೋ ಮನುಸ್ಸಿನ್ದೋ, ದುಮಿನ್ದಂ ತಂ ಠಪಾಪಯಿ.
ಪಾಚಿನಸ್ಸ ವಿಹಾರಸ್ಸ, ಠಾನೇ ಠಾನವಿಚಕ್ಖಣೋ;
ಪಾತರಾಸಂ ಪವತ್ತೇಸಿ, ಸಸಙ್ಘಸ್ಸ ಜನಸ್ಸ ಸೋ.
ಮಹಾಮಹಿನ್ದಥೇರೇ’ತ್ಥ, ಕತಂ ದಸಬಲೇನ ತಂ;
ಕಥೇಸಿ ನಾಗದಮನಂ, ರಞ್ಞೋ ತಸ್ಸ ಅಸೇಸತೋ.
ಥೇರಸ್ಸ ಸುತ್ವಾ ಕಾರೇತ್ವಾ, ಸಞ್ಞಾಣಾನಿ ತಹಿಂ ತಹಿಂ;
ಪರಿಭುತ್ತೇಸು ಠಾನೇಸು, ನಿಸಜ್ಜಾದೀಹಿ ಸತ್ಥುನಾ.
ತಿವಕ್ಕಸ್ಸ ಬ್ರಾಹ್ಮಣಸ್ಸ, ಗಾಮದ್ವಾರೇ ಚ ಭೂಪತಿ;
ಠಪಾಪೇತ್ವಾ ಮಹಾಬೋಧಿಂ, ಠಾನೇಸು ತೇಸು ತೇಸು ಚ.
ಸುದ್ಧವಾಲುಕ ಸನ್ಥಾರೇ, ನಾನಾಪುಪ್ಫಸಮಾಕುಲೇ;
ಪಗ್ಗಹಿತಧಜೇ ಮಗ್ಗೇ, ಪುಪ್ಫಗ್ಘಿಕವಿಭೂಸಿತೇ.
ಮಹಾಬೋಧಿಂ ¶ ಪೂಜಯನ್ತೋ, ರತ್ತಿನ್ದಿವ ಮತನ್ದಿತೋ;
ಆನಯಿತ್ವಾ ಚುದ್ದಸಿಯಂ, ಅನುರಾಧ ಪುರನ್ತಿಕಂ.
ವಡ್ಢಮಾನಕಚ್ಛಾಯಾಯ, ಪುರಂ ಸಾಧು ವಿಭೂಸಿತಂ;
ಉತ್ತರೇನ ಚ ದ್ವಾರೇನ, ಪೂಜಯನ್ತೋ ಪವೇಸಿಯ.
ದಕ್ಖಿಣೇನ ಚ ದ್ವಾರೇನ, ನಿಕ್ಖಮಿತ್ವಾ ಪವೇಸಿಯ;
ಮಹಾ ಮೇಘವನಾರಾಮಂ, ಚತುಬುದ್ಧನಿಸೇವಿತಂ.
ಸುಮನಸ್ಸೇವ ವಚಸಾ, ಪದೇಸಂ ಸಾಧುಸಙ್ಖತಂ;
ಪುಬ್ಬಬೋಧಿಠಿತಟ್ಠಾನಂ, ಉಪನೇತ್ವಾ ಮನೋರಮಂ.
ಕುಲೇಹಿ ಸೋ ಸೋಳಸಹಿ, ರಾಜಾ ಲಙ್ಕಾರಧಾರಿಹಿ;
ಓರೋಪೇತ್ವಾ ಮಹಾಬೋಧಿಂ, ಪತಿಟ್ಠಾ ಪೇತು ಮೋಸ್ಸಜ್ಜಿ.
ಹತ್ಥತೋ ಮುತ್ತಮತ್ತಸಾ, ಅಸೀತಿರತನಂ ನಭಂ;
ಉಗ್ಗನ್ತ್ವಾನ ಠಿತಾ ಮುಞ್ಚಿ, ಛಬ್ಬಣ್ಣಾ ರಸ್ಮಿಯೋ ಸುಭಾ.
ದೀಪೇ ಪತ್ಥರಿಯಾ’ಹಚ್ಚ, ಬ್ರಹ್ಮಲೋಕಂ ಠಿತಾ ಅಹು;
ಸೂರಿಯತ್ಥಙ್ಗಮನಾಯಾವ, ರಸ್ಮಿಯೋ ತಾ ಮನೋರಮಾ.
ಪುರಿಸಾ ದಸಸಹಸ್ಸಾನಿ, ಪಸನ್ನಾ ಪಾಟಿಹಾರಿಯೇ;
ವಿಪಸ್ಸಿತ್ವಾನಾ’ರಹತ್ಥಂ, ಪತ್ವಾನ ಇಧ ಪಬ್ಬಜುಂ.
ಓರೋಹಿತ್ವಾ ಮಹಾಬೋಧಿ, ಸೂರಿಯತ್ಥಙ್ಗಮೇ ತತೋ;
ರೋಹಿಣಿಯಾ ಪತಿಟ್ಠಾಸಿ, ಮಹಿಯಂ ಕಮ್ಪಿ ಮೇದಿನೀ.
ಮೂಲಾನಿ ತಾನಿ ಉಗ್ಗನ್ತ್ವಾ, ಕಟಾಹಮುಖವಟ್ಟಿತೋ;
ವಿನನ್ಧನ್ತಾ ಕಟಾಹಂ ತಂ, ಓತರಿಂಸು ಮಹೀತಲಂ.
ಪತಿಟ್ಠಿತಂ ಮಹಾಬೋಧಿಂ, ಜನಾ ಸಬ್ಬೇ ಸಮಗತಾ;
ಗನ್ಧಮಾಲಾದಿ ಪೂಜಾಹಿ, ಪೂಜಯಿಂಸು ಸಮನ್ತತೋ.
ಮಹಾಮೇಘೋ ಪವಸ್ಸಿತ್ಥ, ಹಿಮಗಬ್ಭಾ ಸಮನ್ತತೋ;
ಮಹಾಬೋಧಿಂ ಛಾದಯಿಂಸು, ಸೀತಲಾನಿ ಘನಾನಿ ಚ.
ಸತ್ತಾಹಾನಿ ಮಹಾಬೋಧಿಂ, ತಹಿಂಯೇವ ಅದಸ್ಸನಾ;
ಹಿಮಗಬ್ಭೇ ಸನ್ನಿಸೀದಿ, ಪಸಾದಜನನೀ ಜನೇ.
ಸತ್ತಾಹಾ ತಿಕ್ಕಮೇ ಮೇಘಾ, ಸಬ್ಬೇ ಅಪಗಮಿಂಸು ತೇ;
ಮಹಾಬೋಧಿ ಚ ದಿಸ್ಸಿತ್ಥ, ಛಬ್ಬಣ್ಣಾ ರಂಸಿಯೋಪಿ ಚ.
ಮಹಾಮಹಿನ್ದತ್ಥೇರೋಚ, ಸಙ್ಘಮಿತ್ತಾ ಚ ಭಿಕ್ಖುನೀ;
ತತ್ಥಾ’ಗಞ್ಛುಂಸಪರಿಸಾ, ರಾಜಾ ಸಪರಿಸೋಪಿ ಚ.
ಖತ್ತಿಯಾ ¶ ಕಾಜರಗ್ಗಾಮೇ, ಚನ್ದನಗ್ಗಾಮ ಖತ್ತಿಯಾ;
ತಿವಕ್ಕ ಬ್ರಾಹ್ಮಣೋ ಚೇವ, ದೀಪವಾಸೀ ಜನಾಪಿ ಚ.
ದೇವಾನುಭಾವೇನಾ’ಗಞ್ಛುಂ, ಮಹಾಬೋಧಿ ಮಹುಸ್ಸುಕ್ಕಾ;
ಮಹಾಸಮಾಗಮೇ ತಸ್ಮಿಂ, ಪಾಟಿಹಾರಿಯವಿಮ್ಹಿತೇ.
ಪಕ್ಕಂ ಪಾಚಿನಸಾಖಾಯ, ಪೇಕ್ಖತಂ ಪಕ್ಕ’ಮಕ್ಖತಂ;
ಥೇರೋ ಪತನ್ತಮಾದಾಯ, ರೋಪೇತುಂ ರಾಜಿನೋ ಅದಾ.
ಪಂಸೂನಂ ಗನ್ಧಮಿಸ್ಸಾನಂ, ಪುಣ್ಣೇ ಸೋಣ್ಣ ಕಟಾಹಕೇ;
ಮಹಾಸನಸ್ಸ ಠಾನೇ ತಂ, ಠಪಿತಂ ರೋಪ’ಯಿಸ್ಸರೋ.
ಪೇಕ್ಖತಂಯೇವ ಸಬ್ಬೇಸಂ, ಉಗ್ಗನ್ತ್ವಾ ಅಟ್ಠ ಅಙ್ಕುರಾ;
ಜಾಯಿಂಸು ಬೋಧಿತರುಣಾ, ಅಟ್ಠಂಸು ಚತುಹತ್ಥಕಾ.
ರಾಜಾ ತೇ ಬೋಧಿತರುಣೇ, ದಿಸ್ವಾ ವಿಮ್ಹಿತಮಾನಸೋ;
ಸೇತಚ್ಛತ್ತೇನ ಪೂಜೇಸಿ, ಅಭಿಸೇಕಮದಾಸಿ ಚ.
ಪತಿಟ್ಠಾಪೇಸಿ ಅಟ್ಠನ್ನಂ, ಜಮ್ಬುಕೋಲಮ್ಹಿ ಪಟ್ಟನೇ;
ಮಹಾಬೋಧಿ ಠಿತ ಠಾನೇ, ನಾವಾಯೋ ರೋಹನೇ ತದಾ.
ತಿವಕ್ಕಬ್ರಾಹ್ಮಣಗಾಮೇ, ಥೂಪಾರಾಮೇ ತಥೇವ ಚ;
ಇಸ್ಸರಸಮಣಾರಾಮೇ, ಪಠಮೇ ಚೇತಿಯಙ್ಗಣೇ.
ಚೇತಿಯ ಪಬ್ಬತಾ ರಾಮೇ, ತಥಾ ಕಾಜರಗಾಮಕೇ;
ಚನ್ದನಗಾಮಕೇ ಚಾತಿ, ಏಕೇಕಂ ಬೋಧಿಲಟ್ಠಿಕಂ.
ಸೇಸಾ ಚತುಪಕ್ಕಜಾತಾ, ದ್ವತ್ತಿಂಸ ಬೋಧಿಲಟ್ಠಿಯೋ;
ಸಮನ್ತಾ ಯೋಜನಠಾನೇ, ವಿಹಾರೇಸು ತಹಿಂ ತಹಿಂ.
ದೀಪಾವಾಸೀ ಜನಸ್ಸೇವ, ಹಿತತ್ಥಾಯ ಪತಿಟ್ಠಿತೇ;
ಮಹಾಬೋಧಿ ದುಮಿನ್ದಮ್ಹಿ, ಸಮ್ಮಾಸಮ್ಬುದ್ಧ ತೇಜಸಾ.
ಅನುಲಾಸಾಸ ಪರಿಸಾ, ಸಙ್ಘಮಿತ್ತಾಯ ಥೇರಿಯಾ;
ಸನ್ತಿಕೇ ಪಬ್ಬಜಿತ್ವಾನ, ಅರಹತ್ತಮಪಾಪುಣಿ.
ಅರಿಟ್ಠೋ ಸೋ ಪಞ್ಚಸತ-ಪರಿವಾರೋ ಚ ಖತ್ತಿಯೋ;
ಥೇರನ್ತಿಕೇ ಪಬ್ಬಜಿತ್ವಾ, ಅರಹತ್ತಮಪಾಪುಣಿ.
ಯಾನಿ ಸೇಟ್ಠಿಕುಲಾನ’ಟ್ಠ-ಮಹಾಬೋಧಿಮಿಧಾಹರುಂ;
ಬೋಧಾಹರಕುಲಾನೀತಿ, ತಾನಿ ತೇನ ಪವುಚ್ಚರೇ.
ಉಪಾಸಿಕಾ ವಿಹಾರೋತಿ, ಞಾತೇ ಭಿಕ್ಖುನುಪಸ್ಸಯೇ;
ಸಸಙ್ಘಾ ಸಙ್ಘಮಿತ್ತಾ ಸಾ, ಮಹಾಥೇರೀ ತಹಿಂ ವಸಿ.
ಅಗಾರತ್ತಯಪಾಮೋಕ್ಖೇ ¶ , ಅಗಾರೇ ತತ್ಥ ಕಾರಯಿ;
ದ್ವಾದಸ ತೇಸು ಏಕಸ್ಮಿಂ, ಮಹಾಗಾರೇ ಠಪಾಪಯಿ.
ಮಹಾಬೋಧಿಸಮೇತಾಯ, ನಾವಾಯ ಕೂಪಯಟ್ಠಿಕಂ;
ಏಕಸ್ಮಿಂ ಪಿಯ ಮೇಕಸ್ಮಿಂ, ಅರಿತ್ತಂ ತೇಹಿ ತೇವಿದುಂ.
ಜಾತೇ ಅಞ್ಞನಿಕಾಯೇಪಿ, ಅಗಾರಾ ದ್ವಾದಸಾಪಿ ತೇ;
ಹತ್ಥಾಳಕ ಭಿಕ್ಖುನೀಹಿ, ವಳಞ್ಜಯಿಂಸು ಸಬ್ಬದಾ.
ರಞ್ಞೋ ಮಙ್ಗಲಹತ್ಥಿ ಸೋ, ವಿಚರನ್ತೋ ಯಥಾಸುಖಂ;
ಪುರಸ್ಸ ಏಕಪಸ್ಸಮ್ಹಿ, ಕನ್ದರನ್ತಮ್ಹಿ ಸೀತಲೇ.
ಕದಮ್ಬಪುಪ್ಫಗುಮ್ಬನ್ತೇ, ಅಟ್ಠಾಸಿ ಗೋಚರಂ ಚರಂ;
ಹತ್ಥಿಂ ತತ್ಥರತಂ ಞತ್ವಾ, ಅಕಂಸು ತತ್ಥ ಆಳ್ಹಕಂ.
ಅಥೇಕ ದಿವಸಂ ಹತ್ಥೀ, ನಗಣ್ಹಿ ಕಬಳಾನಿ ಸೋ;
ದೀಪಪ್ಪಸಾದಕಂ ಥೇರಂ, ರಾಜಾ ಸೋ ಪುಚ್ಛಿತಂ ಮತಂ.
ಕದಮ್ಬಪುಪ್ಫಗುಮ್ಬಸ್ಮಿಂ, ಥೂಪಸ್ಸ ಕರಣಂ ಕರೀ;
ಇಚ್ಛತೀತಿ ಮಹಾಥೇರೋ, ಮಹಾರಾಜಸ್ಸ ಅಬ್ರವಿ.
ಸಧಾತುಕಂ ತತ್ಥ ಥೂಪಂ, ಥೂಪಸ್ಸ ಘರಮೇವ ಚ;
ಖಿಪ್ಪಂ ರಾಜಾ ಅಕಾರೇಸಿ, ನಿಚ್ಚಂ ಜನಹಿತೇರತೋ.
ಸಙ್ಘಮಿತ್ತಾ ಮಹಾಥೇರೀ, ಸುಞ್ಞಾಗಾರಾಭಿಲಾಸಿನೀ;
ಆಕಿಣ್ಣತ್ತಾ ವಿಹಾರಸ್ಸ, ವುಸ್ಸಮಾನಸ್ಸ ತಸ್ಸ ಸಾ.
ವುದ್ಧತ್ಥಿನೀ ಸಾಸನಸ್ಸ, ಭಿಕ್ಖುನೀನಂ ಹಿತಾಯ ಚ;
ಭಿಕ್ಖುನುಪಸ್ಸಯಂ ಅಞ್ಞಂ, ಇಚ್ಛಮಾನಾ ವಿಚಕ್ಖಣಾ.
ಗನ್ತ್ವಾ ಚೇತಿಯಗೇಹಂ ತಂ, ಪವಿವೇಕಸುಖಂ ಭುಸಂ;
ದಿವಾವಿಹಾರಂ ಕಪ್ಪೇಸಿ, ವಿಹಾರಕುಸಲಾ’ಮಲಾ.
ಥೇರಿಯಾ ವನ್ದನತ್ಥಾಯ, ರಾಜಾ ಭಿಕ್ಖುನುಪಸ್ಸಯಂ;
ಗನ್ತ್ವಾ ತತ್ಥ ಗತಂ ಸುತ್ವಾ, ಗನ್ತ್ವಾನ ತತ್ಥ ವನ್ದಿಯ.
ಸಮ್ಮೋದಿತ್ವಾ ತಾಯ ಸದ್ಧಿಂ, ತತ್ಥಾಗಮನಕಾರಣಂ;
ತಸ್ಸಾ ಞತ್ವಾ ಅಧಿಪ್ಪಾಯಂ, ಅಧಿಪ್ಪಾಯ ವಿದೂ ವಿದೂ.
ಸಮನ್ತಾ ಥೂಪಗೇಹಸ್ಸ, ರಮ್ಮಂ ಭಿಕ್ಖುನುಪಸ್ಸಯಂ;
ದೇವಾನಂಪಿಯತಿಸ್ಸೋ ಸೋ, ಮಹಾರಾಜಾ ಅಕಾರಯಿ.
ಹತ್ಥಾಳ್ಹಕಸಮೀಪಮ್ಹಿ ¶ , ಕತೋ ಭಿಕ್ಖುನುಪಸ್ಸಯೋ;
ಹತ್ಥಾಳ್ಹಕವಿಹಾರೋತಿ, ವಿಸ್ಸುತೋ ಆಸಿ ತೇನ ಸೋ.
ಸುಮಿತ್ತಾ ಸಙ್ಘಮಿತ್ತಾ ಸಾ, ಮಹಾಥೇರೀ ಮಹಾಮತೀ;
ತಸ್ಮಿಞ್ಹಿ ವಾಸಂ ಕಪ್ಪೇಸಿ, ರಮ್ಮೇ ಭಿಕ್ಖುನುಪಸ್ಸಯೇ.
ಏವಂ ಲಂಕಾ ಲೋಕಹಿತಂ ಸಾಸನವುದ್ಧಿಂ;
ಸಂಸೋಧೇನ್ತೋ ಏಸ ಮಹಾಬೋಧಿ ದುಮಿನ್ದೋ;
ಲಂಕಾದೀಪೇ ರಮ್ಮೇ ಮಹಾಮೇಘವನಸ್ಮಿಂ,
ಅಟ್ಠಾ ಸೀಘಂ ಕಾಲಮನೇಕಬ್ಭೂತಯುತ್ತೋತಿ.
ಸುಜನಪ್ಪಸಾದಸಂವೇಗತ್ಥಾಯ ಕತೇ ಮಹಾವಂಸೇ
ಬೋಧಿಆಗಮನೋ ನಾಮ
ಏಕೂನವೀಸತಿಮೋ ಪರಿಚ್ಛೇದೋ.
ವೀಸತಿಮ ಪರಿಚ್ಛೇದ
ಥೇರಪರಿನಿಬ್ಬಾನಂ
ಅಟ್ಠಾರಸಮ್ಹಿ ವಸ್ಸಮ್ಹಿ, ಧಮ್ಮಾಸೋಕಸ್ಸ ರಾಜಿನೋ;
ಮಹಾಮೇಘವನಾರಾಮೇ, ಮಹಾಬೋಧಿ ಪತಿಟ್ಠತಿ.
ತತೋ ದ್ವಾದಸಮೇ ವಸ್ಸೇ, ಮಹೇಸೀ ತಸ್ಸ ರಾಜಿನೋ;
ಪಿಯಾ ಅಸನ್ಧೀಮಿತ್ತಾ ಸಾ, ಮತಾ ಸಮ್ಬುದ್ಧಮಾಮಕಾ.
ತತೋ ಚತುತ್ಥೇ ವಸ್ಸಮ್ಹಿ, ಧಮ್ಮಾಸೋಕೋ ಮಹೀಪತಿ;
ತಿಸ್ಸರಕ್ಖ ಮಹೇಸಿತ್ತೇ, ಠಪೇಸಿ ವಿಸಮಾಸಯಂ.
ತತೋ ತು ತತಿಯೇ ವಸ್ಸೇ, ಸಾಬಾಲಾ ರೂಪಮಾನಿನೀ;
‘‘ಮಯಾಪಿ ಚ ಅಯಂ ರಾಜಾ, ಮಹಾಬೋಧಿಂ ಮ ಮಾಯತಿ’’.
ಇತಿ ಕೋಧವಸಂ ಗನ್ತ್ವಾ, ಅತ್ತನೋ’ನತ್ಥ ಕಾರಿಕಾ;
ಮಣ್ಡುಕಣ್ಟಕಯೋಗೇನ, ಮಹಾಬೋಧಿ ಮಘಾ ತಯಿ.
ತತೋ ¶ ಚ ತುತ್ಥೇವಸ್ಸಮ್ಹಿ, ಧಮ್ಮಾ ಸೋಕೋ ಮಹಾಯಸೋ;
ಅನಿಚ್ಚ ತಾವ ಸಂಪತ್ತೋ, ಸತ್ತತಿಂಸಸಮಾ ಇಮೇ.
ದೇವಾನಂ ಪಿಯತಿಸ್ಸೋ ತು, ರಾಜಾ ಧಮ್ಮಗುಣೇ ರತೋ;
ಮಹಾವಿಹಾರೇ ನವಕಮ್ಮಂ, ತಥಾ ಚೇತಿಯಪಬ್ಬತೇ.
ಥೂಪಾರಾಮೇ ನವಕಮ್ಮಂ, ನಿಟ್ಠಾಪೇತ್ವಾ ಯಥಾರಹಂ;
ದೀಪಪ್ಪಸಾದಕಂ ಥೇರಂ, ಪುಚ್ಛಿ ಪುಚ್ಛಿತಕೋವಿದಂ.
ಕಾರಾಪೇಸ್ಸಮಹಂ ಭನ್ತೇ, ವಿಹಾರೇಸು ಬಹೂ ಇಧ;
ಪತಿಟ್ಠಾಪೇತುಂ ಥೂಪೇಸು, ಕಥಂ ಲಚ್ಛಾಮ ಧಾತುಯೋ.
ಸಮ್ಬುದ್ಧಪತ್ತಂ ಪೂರೇತ್ವಾ, ಸುಮನೇನಾ’ಹಟಾ ಇಧ;
ಚೇತಿಯಪಬ್ಬತೇ ರಾಜ, ಠಪಿತಾ ಅತ್ಥಿ ಧಾತುಯೋ.
ಹತ್ಥಿಕ್ಖನ್ಧೇ ಠಪೇತ್ವಾ ತಾ, ಧಾತುಯೋ ಇಧ ಆಹರ;
ಇತಿ ವುತ್ತೋ ಸಥೇರೇನ, ತಥಾ ಆಹರಿ ಧಾತುಯೋ.
ವಿಹಾರೇ ಕಾರಯಿತ್ವಾನ, ಠಾನೇ ಯೋಜನಯೋಜನೇ;
ಧಾತುಯೋ ತತ್ಥ ಥೂಪೇಸು, ನಿಧಾಪೇಸಿ ಯಥಾರಹಂ.
ಸಮ್ಬುದ್ಧಭುತ್ತಪತ್ತಂ ತು, ರಾಜವತ್ಥುಘರೇ ಸುಭೇ;
ಠಪಯಿತ್ವಾನ ಪೂಜೇಸಿ, ನಾನಾಪೂಜಾಹಿ ಸಬ್ಬದಾ.
ಪಞ್ಚಸತೇಹಿ’ಸ್ಸರೇತಿ, ಮಹಾಥೇರಸ್ಸ ಸನ್ತಿಕೇ;
ಪಬ್ಬಜ್ಜವಸಿತಠಾನೇ, ಇಸ್ಸರಸಮಣಕೋ ಅಹು.
ಪಞ್ಚಸತೇಹಿ ವಸ್ಸೇಹಿ, ಮಹಾಥೇರಸ್ಸ ಸನ್ತಿಕೇ;
ಪಬ್ಬಜ್ಜವಸಿತಠಾನೇ, ತಥಾ ವಸ್ಸಗಿರಿ ಅಹು.
ಯಾ ಯಾ ಮಹಾಮಹಿನ್ದೇನ, ಥೇರೇನ ವಸಿತಾ ಗುಹಾ;
ಸಪಬ್ಬತವಿಹಾರೇಸು, ಸಾ ಮಹಿನ್ದಗುಹಾ ಅಹು.
ಮಹಾವಿಹಾರಂ ಪಠಮಂ, ದುತಿಯಂ ಚೇತಿಯವ್ಹಯಂ;
ಥೂಪಾರಾಮಂ ತು ತತಿಯಂ, ಥೂಪಪುಬ್ಬಙ್ಗಮಂ ಸುಭಂ.
ಚತುತ್ಥಂ ತು ಮಹಾಬೋಧಿ-ಪತಿಟ್ಠಾಪನಮೇವ ಚ;
ಥೂಪಠಾನೀಯಭೂತಸ್ಸ, ಪಞ್ಚಮಂ ಪನ ಸಾಧುಕಂ.
ಮಹಾಚೇತಿಯಠಾನಮ್ಹಿ, ಸಿಲಾಥೂಪಸ್ಸ ಚಾರುನೋ;
ಸಮ್ಬುದ್ಧಗೀವಾಧಾತುಸ್ಸ, ಪತಿಟ್ಠಾಪನಮೇವ ಚ.
ಇಸ್ಸರಸಮಣಂ ¶ ಛಟ್ಠಂ, ತಿಸ್ಸವಾಪಿನ್ತುಸತ್ತಮಂ;
ಅಟ್ಠಮಂ ಪಠಮಂ ಥೂಪಂ, ನವಮಂ ವಸ್ಸಗಿರಿವ್ಹಯಂ.
ಉಪಾಸಿಕಾವ್ಹಯಂ ರಮ್ಮಂ, ತಥಾ ಹತ್ಥಾಳ್ಹಕವ್ಹಯಂ;
ಭಿಕ್ಖುನುಪಸ್ಸಕೇ ದ್ವೇ’ಮೇ, ಭಿಕ್ಖುನೀ ಫಾಸುಕಾರಣಾ.
ಹತ್ಥಾಳ್ಹಕೇ ಓಸರಿತ್ವಾ, ಭಿಕ್ಖುನೀನಂ ಉಪಸ್ಸಯೇ;
ಗನ್ತ್ವಾನ ಭಿಕ್ಖುಸಙ್ಘೇನ, ಭತ್ತಗ್ಗಹಣಕಾರಣಾ.
ಹತ್ತಸಾಲಂ ಸೂಪಹಾರಂ, ಮಹಾಪಾಳಿಕನಾಮಕಂ;
ಸಬ್ಬುಪಕರಣೂಪೇತಂ, ಸಮ್ಪತ್ತಪರಿಚಾರಿಕಂ.
ತಥಾ ಭಿಕ್ಖುಸಹಸ್ಸಸ್ಸ, ಸಪರಿಕ್ಖಾರಮುತ್ತಮಂ;
ಪವಾರಣಾಯ ದಾನಞ್ಚ, ಅನುವಸ್ಸಕಮೇವ ಚ.
ನಾಗದೀಪೇ ಜಮ್ಬುಕೋಲ-ವಿಹಾರಂ ತ ಮ್ಹಿಪಟ್ಟನೇ;
ತಿಸ್ಸಮಹಾವಿಹಾರಞ್ಚ, ಪಾಚೀನಾರಾಮ ಮೇವ ಚ.
ಇತಿ ಏತಾನಿ ಕಮ್ಮಾನಿ, ಲಂಕಾಜನಹಿತತ್ಥಿಕೋ;
ದೇವಾನಂಪಿಯತಿಸ್ಸೋ ಸೋ, ಲಂಕಿನ್ದೋ ಪುಞ್ಞಪಞ್ಞವಾ.
ಪಠಮೇಯೇವ ವಸ್ಸಮ್ಹಿ, ಕಾರಾಪೇಸಿ ಗುಣಪ್ಪಿಯೋ;
ಯಾವ ಜೀವನ್ತುನೇಕಾನಿ, ಪುಞ್ಞಕಮ್ಮಾನಿ ಆಚಿನಿ.
ಅಯಂ ದೀಪೋ ಅಹು ಠಿತೋ, ವಿಜಿತೇ ತಸ್ಸ ರಾಜಿನೋ;
ವಸ್ಸಾನಿ ಚತ್ತಾಲೀಸಂ ಸೋ, ರಾಜಾ ರಜ್ಜಮಕಾರಯಿ.
ತಸ್ಸ’ಚ್ಚ ಯೇ ತಂ ಕನಿಟ್ಠೋ, ಉತ್ತಿಯೋ ಇತಿ ವಿಸ್ಸುತೋ;
ರಾಜಪುತ್ತೋ ಅಪುತ್ತಂ ತಂ, ರಜ್ಜಂ ಕಾರೇಸಿ ಸಾಧುಕಂ.
ಮಹಾಮಹಿನ್ದತ್ಥೇರೋ ತು, ಜಿನಸಾಸನಮುತ್ತಮಂ;
ಪರಿಯತ್ತಿಂ ಪಟಿಪತ್ತಿಂ, ಪಟಿವೇಧಞ್ಚ ಸಾಧುಕಂ.
ಲಂಕಾದೀಪಮ್ಹಿ ದೀಪೇತ್ವಾ, ಲಂಕಾದೀಪೋ ಮಹಾಗಣಿ;
ಲಂಕಾಯಸೋ ಸತ್ಥು ಕಪ್ಪೋ, ಕತ್ವಾ ಲಂಕಾಹಿತಂ ಬಹುಂ.
ತಸ್ಸ ಉತ್ತಿಯರಾಜಸ್ಸ, ಜಯವಸ್ಸಮ್ಹಿ ಅಟ್ಠಮೇ;
ಅನ್ತೋವಸ್ಸಂ ಸಟ್ಠಿವಸ್ಸೋ, ಚೇತಿಯಪಬ್ಬತೇ ವಸಂ.
ಅಸ್ಸಯುಜಸ್ಸ ಮಾಸಸ್ಸ, ಸುಕ್ಕಪಕ್ಖಠಮೇ ದಿನೇ;
ಪರಿನಿಬ್ಬಾಯಿತೇ ನೇತಂ, ದಿನಂ ತನ್ನಾಮಕಂ ಅಹು.
[ನಿಬ್ಬುತಸ್ಸ ¶ ಮಹಿನ್ದಸ್ಸ, ಅಟ್ಠಮಿಯಂ ದಿನೇ ಪನ,
ತೇನ ತಂ ದಿವಸಂ ನಾಮ, ಅಟ್ಠಮಿಯಾತಿ ಸಮ್ಮತಂ.]
ತಂ ಸುತ್ವಾ ಉತ್ತಿಯೋ ರಾಜಾ, ಸೋಕಸಲ್ಲಸಮಪ್ಪಿತೋ;
ಗನ್ತ್ವಾನ ಥೇರಂ ವನ್ದಿತ್ವಾ ಕನ್ದಿತ್ವಾ ಬಹುಧಾ ಬಹುಂ.
ಆಸಿತ್ತಗನ್ಧತೇಲಾಯ, ಬಹುಂ ಸೋವಣ್ಣದೋಣಿಯಾ;
ಥೇರದೇಭಂ ಖಿಪಾಪೇತ್ವಾ, ತಂ ದೋಣಿಂ ಸಾಧುಫುಸ್ಸಿತಂ.
ಸೋವಣ್ಣಕೂಟಾಗಾರಮ್ಹಿ, ಠಪಾಪೇತ್ವಾ ಅಲಙ್ಕತೇ;
ಕೂಟಾಗಾರಂ ಗಾಹಯಿತ್ವಾ, ಕಾರೇನ್ತೋ ಸಾಧುಕೀಳಿತಂ.
ಮಹತಾ ಚ ಜನೋಘೇನ, ಆಗತೇನತತೋ ತತೋ;
ಮಹತಾ ಚ ಬಲೋಘೇನ, ಕಾರೇನ್ತೋ ಪೂಜನಾವಿಧಿಂ.
ಅಲಙ್ಕತೇನ ಮಗ್ಗೇನ, ಬಹುಧಾ’ಲಙ್ಕತಂ ಪುರಂ;
ಆನಯಿತ್ವಾನ ನಗರೇ, ಚಾರೇತ್ವಾ ರಾಜವೀಥಿಯೋ.
ಮಹಾವಿಹಾರಂ ಆನೇತ್ವಾ, ಏತ್ಥ ಪಞ್ಹಮ್ಬಮಾಳಕೇ;
ಕುಟಾಗಾರಂ ಠಪಾಪೇತ್ವಾ, ಸತ್ತಾಹಂ ಸೋ ಮಹೀಪತಿ.
ತೋರಣದ್ಧಜಪುಪ್ಫೇಹಿ, ಗನ್ಧಪುಣ್ಣಘಟೇಹಿ ಚ;
ವಿಹಾರಞ್ಚ ಸಮನ್ತಾ ಚ, ಮಣ್ಡಿಹಂ ಯೋಜನತ್ತಯಂ.
ಅಹು ರಾಜಾನುಭಾವೇನ, ದೀಪನ್ತು ಸಕಲಂ ಪನ;
ಆನುಭಾವೇನ ದೇವಾನಂ, ತಥೇವಾ’ಲಙ್ಕತಂ ಅಹು.
ನಾನಾಪೂಜಂ ಕಾರಯಿತ್ವಾ, ಸತ್ತಾಹಂ ಸೋ ಮಹೀಪತಿ;
ಪುರತ್ಥಿಮದಿಸಾಭಾಗೇ, ಥೇರಾನಂ ಬದ್ಧಮಾಳಕೇ.
ಕಾರೇತ್ವಾ ಗನ್ಧಚಿತಕಂ, ಮಹಾಥೂಪಂ ಪದಕ್ಖಿಣಂ;
ಕರೋನ್ತೋ ತತ್ಥ ನೇತ್ವಾ ತಂ, ಕೂಟಾಗಾರಂ ಮನೋರಮಂ.
ಚಿತಕಮ್ಹಿ ಠಪಾಪೇತ್ವಾ, ಸಕ್ಕಾರಂ ಅನ್ತಿಮಂ ಅಕಾ;
ಚೇತಿಯಞ್ಚೇತ್ಥ ಕಾರೇಸಿ, ಗಾಹಾ ಪೇತ್ವಾನ ಧಾತುಯೋ.
ಉಪಡ್ಢಧಾತುಂ ¶ ಗಾಹೇತ್ವಾ, ಚೇತಿಯೇ ಪಬ್ಬತೇಪಿ ಚ;
ಸಬ್ಬೇಸು ಚ ವಿಹಾರೇಸು, ಥೂಪೇ ಕಾರೇಸಿ ಖತ್ತಿಯೋ.
ಇಸಿನೋ ದೇಹನಿಕ್ಖೇಪ-ಕತಠಾನಞ್ಹಿ ತಸ್ಸ ತಂ;
ವುಚ್ಚತೇ ಬಹುಮಾನೇನ, ಇಸಿಭೂಮಙ್ಗನಂ ಇತಿ.
ತತೋ ಪಭುತ್ಯ’ರಿಯಾನಂ, ಸಮನ್ತಾ ಯೋಜನತ್ತಯೇ;
ಸರೀರಂ ಆಹರಿತ್ವಾನ, ತಮ್ಹಿ ದೇಸಮ್ಹಿ ಡಯ್ಹತಿ.
ಸಙ್ಘಮಿತ್ತಾ ಮಹಾಥೇರೀ, ಮಹಾ’ಭಿಞ್ಞಾ ಮಹಾಮತೀ;
ಕತ್ವಾ ಸಾಸನಕಿಚ್ಚಾನಿ, ತಥಾ ಲೋಕಹಿತಂ ಬಹುಂ.
ಏಕೂನಸಟ್ಠಿವಸ್ಸಾ ಸಾ, ಉತ್ತಿಯಸ್ಸೇ’ವ ರಾಜಿನೋ;
ವಸ್ಸಮ್ಹಿ ನವಮೇ ಖೇಮೇ, ಹತ್ಥಾಳ್ಹಕಉಪಸ್ಸಯೇ.
ವಸನ್ತೀ ಪರಿನಿಬ್ಬಾಯೀ, ರಾಜಾ ತಸ್ಸಾಪಿ ಕಾರಯಿ;
ಥೇರಸ್ಸ ವಿಯ ಸತ್ತಾಹಂ, ಪೂಜಾಸಕ್ಕಾರ ಮುತ್ತಮಂ.
ಸಬ್ಬಾ ಅಲಙ್ಕತಾ ಲಂಕಾ, ಥೇರಸ್ಸ ವಿಯ ಆಸಿ ಚ;
ಕೂಟಾಗಾರಗತಂ ಥೇರಿ-ದೇಹಂ ಸತ್ತದಿನಚ್ಚಯೇ.
ನಿಕ್ಖಾಮೇತ್ವಾನ ನಗರಂ, ಥೂಪರಾಮ ಪುರತ್ಥತೋ;
ಚಿತ್ತಸಾಲಾ ಸಮೀಪಮ್ಹಿ, ಮಹಾಬೋಧಿಪ ದಸ್ಸಯೇ.
ಥೇರಿಯಾ ವುಟ್ಠಠಾನಮ್ಹಿ, ಅಗ್ಗಿಕಿಚ್ಚ ಮಕಾರಯಿ;
ಥೂಪಞ್ಚ ತತ್ಥ ಕಾರೇಸಿ, ಉತ್ತಿಯೋ ಸೋ ಮಹೀಪತಿ.
ಪಞ್ಚಾಪಿ ತೇ ಮಹಾಥೇರಾ, ಥೇರಾರಿಟ್ಠಾದಯೋಪಿ ಚ;
ತಥಾ’ನೇಕ ಸಹಸ್ಸಾನಿ, ಭಿಕ್ಖು ಖೀಣಾಸವಾಪಿ ಚ.
ಸಙ್ಘಮಿತ್ತಾ ಪಭುತಿಯೋ, ತಾ ಚ ದ್ವಾದಸಥೇರಿಯೋ;
ಖೀಣಾಸವಾ ಭಿಕ್ಖುನಿಯೋ, ಸಹಸ್ಸಾನಿ ಬಹೂನಿ ಚ.
ಬಹುಸ್ಸುತಾ ಮಹಾಪಞ್ಞಾ, ವಿನಯಾದಿಜಾನಾಗಮಂ;
ಜೋತಯಿತ್ವಾನ ಕಾಲೇನ, ಪಯಾತಾ’ನಿಚ್ಚತಾವಸಂ.
ದಸವಸ್ಸಾನಿ ಸೋ ರಾಜಾ, ರಜ್ಜಂ ಕಾರೇಸಿ ಉತ್ತಿಯೋ;
ಏವಂ ಅನಿಚ್ಚತಾ ಏಸಾ, ಸಬ್ಬಲೋಕವಿನಾಸಿನೀ.
ತಂ ¶ ಏತಂ ಅತಿಸಾಹಸಂ ಅತಿಬಲಂ ನ ವಾರಿಯಂ ನರೋ;
ಜಾನನ್ತೋಪಿ ಅನಿಚ್ಚತಂ ಭವಗತೇ ನಿಬ್ಬಿನ್ದತೇನೇವ ಚ;
ನಿಬ್ಬಿನ್ದೋ ವಿರತಿಂ ರತಿಂ ನ ಕುರುತೇ ಪಾಪೇಹಿ ಪುಞ್ಞೇಹಿ ಚ;
ತಸ್ಸೇ’ಸಾಅತಿಮೋಹಜಾಲಬಲತಾಜಾನಮ್ಪಿ ಸಮ್ಮುಯ್ಹತೀತಿ.
ಸುಜನಪ್ಪಸಾದಸಂವೇಗತ್ಥಾಯ ಕತೇ ಮಹಾವಂಸೇ
ಥೇರಪರಿನಿಬ್ಬಾನಂ ನಾಮ
ವೀಸತಿಮೋ ಪರಿಚ್ಛೇದೋ.
ಏಕವೀಸತಿಮ ಪರಿಚ್ಛೇದ
ವಞ್ಚ ರಾಜಕೋ
ಉತ್ತಿಯಸ್ಸ ¶ ಕನಿಟ್ಠೋ ತು, ಮಹಾಸಿವೋ ತದಚ್ಚಯೇ;
ದಸ ವಸ್ಸಾನಿ ಕಾರೇಸಿ, ರಜ್ಜಂ ಸುಜನ ಸೇವಕೋ.
ಭದ್ದಸಾಲಮ್ಹಿ ಸೋ ಥೇರೇ, ಪಸೀದಿತ್ವಾ ಮನೋರಮಂ;
ಕಾರೇಸಿ ಪುರಿಮಾಯನ್ತು, ವಿಹಾರಂ ನಗರಙ್ಗಣಂ.
ಮಹಾಸಿವಕನಿಟ್ಠೋ ತು, ಸುರತಿಸ್ಸೋ ತದಚ್ಚಯೇ;
ದಸವಸ್ಸಾನಿ ಕಾರೇಸಿ, ರಜ್ಜಂ ಪುಞ್ಞೇಸು ಸಾದರೋ.
ದಕ್ಖಿಣಾಯ ದಿಸಾಯಂ ಸೋ, ವಿಹಾರಂ ನಗರಂ ಗಣಂ;
ಪುರಿಮಾಯ ಹತ್ಥಿಕ್ಖನ್ಧಞ್ಚ, ಗೋಕಣ್ಣಗಿರಿಮೇವ ಚ.
ವಙ್ಗುತ್ತರೇ ಪಬ್ಬತಮ್ಹಿ, ಪಾಚಿನ ಪಬ್ಬತವ್ಹಯಂ;
ರಹೇಣಕಸಮೀಪಮ್ಹಿ, ತಥಾ ಕೋಳಮ್ಬಕಾಳಕಂ.
ಅರಿಟ್ಠಪಾದೇ ಮಂ ಗುಲಕಂ, ಪುರಿಮಾಯ’ಚ್ಛ ಗಲ್ಲಕಂ;
ಗಿರಿನೇಲಪನಾಯಕಣ್ಡಂ, ನಗರಸ್ಸುತ್ಥರಾಯ ತು.
ಪಞ್ಚಸತಾ ¶ ನೇವ ಮಾದಿ-ವಿಹಾರೇ ಪುಥವೀ ಪತಿ;
ಗಙ್ಗಾಯ ಓರಪಾರಞ್ಹಿ, ಲಂಕಾದೀಪೇ ತಹಿಂ ತಹಿಂ.
ಪುರೇ ರಜ್ಜಾ ಚ ರಜ್ಜೇ ಚ, ಸಟ್ಠೀವಸ್ಸಾನಿ ಸಾಧುಕಂ;
ಕಾರೇಸಿ ರಮ್ಮೇ ಧಮ್ಮೇನ, ರತನತ್ತಯ ಗಾರವೋ.
ಸುವಣ್ಣಪಿಣ್ಡತಿಸ್ಸೋತಿ, ನಾಮಂ ರಜ್ಜಾ ತಸ್ಸಾ ಅಹು;
ಸುರತಿಸ್ಸೋತಿ ನಾಮನ್ತು, ತಸ್ಸಾ’ಪುರಜ್ಜಪತ್ತಿಯಾ.
ಅಸ್ಸನಾವಿಕಪುತ್ತಾ ದ್ವೇ, ದಮಿಳಾ ಸೇನಗುತ್ತಿಕಾ;
ಸುರತಿಸ್ಸಮಹೀಪಾಲಂ, ತಂ ಗಹೇತ್ವಾ ಮಹಬ್ಬಲಾ.
ದುವೇ ವೀಸತಿವಸ್ಸಾನಿ, ರಜ್ಜಂ ಧಮ್ಮೇನ ಕಾರಯುಂ;
ತೇ ಗಹೇತ್ವಾ ಅಸೇಲೋ ತು, ಮುಟಸಿವಸ್ಸ ಅತ್ರಜೋ.
ಸೋದರಿಯಾನಂ ಭಾತೂನಂ, ನವಮೋ ಭತುಕೋ ತತೋ;
ಅನುರಾಧಪುರೇ ರಜ್ಜಂ, ದಸವಸ್ಸಾನಿ ಕಾರಯಿ.
ಚೋಳರಟ್ಠಾ ಇಧ ಗಮ್ಮ, ರಜ್ಜತ್ಥಂ ಉಜುಜಾತಿಕೋ;
ಏಳಾರೋ ನಾಮ ದಮಿಳೋ, ಗಹೇತ್ವಾ’ಸೇಲಭೂಪತಿಂ.
ವಸ್ಸಾನಿ ಚತ್ತಾರೀಸಞ್ಚ, ಚತ್ತಾರಿ ಚ ಅಕಾರಯಿ;
ರಜ್ಜಂ ವೋಹಾರಸಮಯೇ, ಮಜ್ಝತ್ತೋ ಮಿತ್ತಸತ್ತುಸು.
ಸಯನಸ್ಸ ಸಿರೋಪಸ್ಸೇ, ಘಣ್ಟಂ ಸುದೀಘಯೋತ್ತಕಂ;
ಲಮ್ಬಾಪೇಸಿ ವೀರಾವೇತುಂ, ಇಚ್ಛನ್ತೇಹಿ ವಿನಿಚ್ಛಯಂ.
ಏಕೋ ಪುತ್ತೋ ಚ ಧೀತಾ ಚ, ಅಹೇಸುಂ ತಸ್ಸ ರಾಜಿನೋ;
ರಥೇನ ತಿಸ್ಸವಾಪಿಂ ಸೋ, ಗಚ್ಛನ್ತೋ ಭೂಮಿಪಾಲಜೋ.
ತರುಣಂ ವಚ್ಛಕಂ ಮಗ್ಗೇ, ನಿಪನ್ನಂ ಸಹಧೇನುಕಂ;
ಗೀವಂ ಅಕ್ಕಮ್ಮಚಕ್ಕೇನ, ಅಸಞ್ಚಿಚ್ಚ ಅಘಾತಯಿ.
ಗನ್ತ್ವಾನ ಧೇನುಘಣ್ಟಂ ತಂ, ಘಟ್ಟೇಸಿ ಘಟ್ಟಿತಾಸಯಾ;
ರಾಜಾ ತೇನೇವ ಚಕ್ಕೇನ, ಸೀಸಂ ಪುತ್ತಸ್ಸ ಛೇದಯಿ.
ದಿಜಪೋತಂ ತಾಲರುಕ್ಖೇ, ಏಕೋ ಸಪ್ಪೋ ಅಭಕ್ಖಯಿ;
ತಮ್ಪೋತಮಾತಾ ಸಕುಣೀ, ಗನ್ತ್ವಾ ಘಣ್ಟಮಘಟ್ಟಯಿ.
ಆಣಾಪೇತ್ವಾನ ತಂ ರಾಜಾ, ಕುಚ್ಛಿಂ ತಸ್ಸ ವಿದಾಳಿಯ;
ಪೋತಂ ತಂ ನೀಹರಾಪೇತ್ವಾ, ತಾಲೇ ಸಪ್ಪಮಸಪ್ಪಯಿ.
ರತನಗ್ಗಸ್ಸ ¶ ರತನ-ತ್ತಯಸ್ಸ ಗುಣಸಾರತಂ;
ಅಜಾನನ್ತೋಪಿ ಸೋ ರಾಜಾ, ಚಾರಿತ್ತಮನುಪಾಲಯಂ.
ಚೇತಿಯದಬ್ಬತಂ ಗನ್ತ್ವಾ, ಭಿಕ್ಖುಸಙ್ಘಂ ಪವಾರಿಯ;
ಆಗಚ್ಛನ್ತೋ ರಥಗತೋ, ರಥಸ್ಸ ಯುಗಕೋಟಿಯಾ.
ಅಕಾಸಿ ಜಿನಥೂಪಸ್ಸ,
ಏಕದೇಸಸ್ಸ ಭಞ್ಜನಂ;
ಅಮಚ್ಚಾ ‘‘ದೇವ ಥೂಪೋನೋ,
ತಯಾ ಭಿನ್ನೋ’ತಿ ಆಹು ತಂ.
ಅಸಞ್ಚಿಚ್ಚ ಕತೇ‘ಪೇ’ಸ, ರಾಜಾ ಓರುಯ್ಹ ಸನ್ದನಾ;
‘‘ಚಕ್ಕೇನ ಮಮ ಸೀಸಮ್ಪಿ, ಛಿನ್ದಥಾ’ತಿ ಪಥೇಸಯಿ.
‘‘ಪರಹಿಂಸಂ ಮಹಾರಾಜ, ಸತ್ಥಾ ನೋ ನೇವ ಇಚ್ಛತಿ;
ಥೂಪಂ ಪಾಕತಿಕಂ ಕತ್ವಾ, ಖಮಾಪೇಹೀ’’ತಿ ಆಹು ತಂ.
ತೇ ಠಪೇತುಂ ಪಞ್ಚದಸ, ಪಾಸಾಣೇ ಪತಿತೇ ತಹಿಂ;
ಕಹಾಪಣ ಸಹಸ್ಸಾನಿ, ಅದಾ ಪಞ್ಚದಸೇ ವಸೋ.
ಅಕಾ ಮಹಲ್ಲಿಕಾ ವೀಹಿಂ, ಸೋ ಸೇತುಂ ಆತಪೇ ಖಿಪಿ;
ದೇವೋ ಅಕಾಲೇ ವಸ್ಸಿತ್ವಾ, ತಸ್ಸಾ ವಿಹಿಂ ಅತೇಮಯಿ.
ವೀಹಿಂ ಗಹೇತ್ವಾ ಗನ್ತ್ವಾ ಸಾ, ಘಣ್ಟಂ ತಂ ಸಮಘಟ್ಟಯಿ;
ಅಕಾಲವಸ್ಸಂ ಸುತ್ವಾ ತಂ, ವಿಸ್ಸಜ್ಜೇತ್ವಾ ತಮತ್ತಿಕಂ.
ರಾಜಾ ಧಮ್ಮಮ್ಹಿ ವತ್ತನ್ತೋ, ‘‘ಕಾಲೇ ವಸ್ಸಂ ಲಭೇ’’ಇತಿ;
ತಸ್ಸಾ ವಿನಿಚ್ಛಯತ್ಥಾಯ, ಉಪವಾಸಂ ನಿಪಜ್ಜಿ ಸೋ.
ಬಲಿಗ್ಗಾಹೀ ದೇವಪುತ್ತೋ, ರಞ್ಞೋ ತೇಜೇನ ಓತ್ಥಟೋ;
ಗನ್ತ್ವಾ ಚಾತುಮಹಾರಾಜ-ಸನ್ತಿಕಂ ತಂ ನಿವೇದಯಿ.
ತೇ ತಮಾದಾಯ ಗನ್ತ್ವಾನ, ಸಕ್ಕಸ್ಸ ಪಟಿವೇದಯುಂ;
ಸಕ್ಕೋ ಪಜ್ಜುನ್ನಮಾಹುಯ, ಕಾಲೇ ವಸ್ಸಂ ಉಪಾದಿಯಿ.
ಬಲಿಗ್ಗಾಹೀ ದೇವಪುತ್ತೋ, ರಾಜಿನೋ ತಂ ನಿವೇದಯಿ;
ತತೋಪ್ಪಭುತಿ ತಂ ರಜ್ಜೇ, ದಿವಾ ದೇವೋ ನ ವಸ್ಸಥ.
ರತ್ತಿಂ ದೇವೋ’ನು ಸತ್ತಾಹಂ, ವಸ್ಸಿಯಾಮಮ್ಹಿ ಮಜ್ಝಿಮೇ;
ಪುಣ್ಣಾನ’ಹೇಸುಂ ಸಬ್ಬತ್ಥ, ಖುದ್ದಕಾ ವಾಟಕಾನಿಪಿ.
ಅಗತಿಗಮನದೋಸೋ ¶ ಮುತ್ತಮತ್ತೇನ ಏಸೋ,
ಅನುಪಹತ ಕುದಿಟ್ಠಿಪೀದಿಸಿಂ ಪಾಪುಣೀ’ದ್ಧಿಂ;
ಅಗತಿಗಮನದೋಸಂ ಸುದ್ಧದಿಟ್ಠಿಸಮಾನೋ,
ಕಥಮಿಧಹಿ ಮನುಸ್ಸೋ ಬುದ್ಧಿಮಾ ನೋ ಜಹೇಯ್ಯಾತಿ.
ಸುಜನಪ್ಪಸಾದಸಂವೇಗತ್ಥಾಯ ಕತೇ ಮಹಾವಂಸೇ
ಪಞ್ಚರಾಜಕೋ ನಾಮ
ಏಕವೀಸತಿಮೋ ಪರಿಚ್ಛೇದೋ.
ಬಾವೀಸತಿಮ ಪರಿಚ್ಛೇದ
ಗಾಮಣಿಕುಮಾರ ಸುತಿ
ಏಳಾರಂ ಘಾತಯಿತ್ವಾನ, ರಾಜಾ’ಹು ದುಟ್ಠಗಾಮಣಿ;
ತದತ್ಥ ದೀಪನತ್ಥಾಯ, ಅನುಪುಬ್ಬಕಥಾ ಅಯಂ.
ದೇವಾನಂ ಪಿಯತಿಸ್ಸಸ್ಸ, ರಞ್ಞೋ ದುತಿಯಭಾತಿಕೋ;
ಉಪರಾಜಾ ಮಹಾನಾಗೋ, ನಾಮಾನು ಭಾತುನೋ ಪಿಯೋ.
ರಞ್ಞೋ ದೇವೀ ಸಪುತ್ತಸ್ಸ, ಬಾಲಾ ರಜ್ಜಾಭಿಕಾಮಿನಿ;
ಉಪರಾಜವಧತ್ಥಾಯ, ಜಾತಚಿತ್ತಾ ನಿರನ್ತರಂ.
ವಾಪಿಂ ತರಚ್ಛನಾಮಂ ಸಾ, ಕಾರಾಪೇನ್ತಸ್ಸ ಪಾಹಿಣಿ;
ಅಮ್ಬಂ ವಿಸೇನ ಯೋಜೇತ್ವಾ, ಠಪೇತ್ವಾ ಅಮ್ಬಮತ್ಥಕೇ.
ತಸ್ಸಾ ಪುತ್ತೋ ಸಹಗತೋ, ಉಪರಾಜೇನ ಬಾಲಕೋ;
ಭಾಜನೇ ವಿವಟೇಯೇವ, ತಂ ಅಮ್ಬಂ ಖಾದಿಯಾ’ಮರಿ.
ಉಪರಾಜಾ ತತೋಯೇವ, ಸದಾರ ಬಲ ವಾಹನೋ;
ರಕ್ಖಿಹುಂ ಸಕಮತ್ತಾನಂ, ರೋಹಣಾ’ಭಿಮುಖೋ ಅಗಾ.
ಯಟ್ಠಾಲಯ ವಿಹಾರಸ್ಮಿಂ, ಮಹೇಸೀ ತಸ್ಸ ಗಬ್ಭಿನೀ;
ಪುತ್ತಂ ಜನೇಸಿ ಸೋ ತಸ್ಸ, ಭಾತು ನಾಮ ಮಕಾರಯಿ.
ತತೋ ¶ ಗನ್ತ್ವಾ ರೋಹಣಂ ಸೋ,
ಇಸ್ಸರೋ ರೋಹಣೇ’ಖಿಲೋ;
ಮಹಾ ಭಾಗೋ ಮಹಾ ಗಾಮೇ,
ರಜ್ಜಂ ಕಾರೇಸಿ ಖತ್ತಿಯೋ.
ಕಾರೇಸಿ ಸೋ ನಾಗಮಹಾ-ವಿಹಾರಂ ಸಕನಾಮಕಂ;
ಉದ್ಧಕನ್ದರಕಾದೀ ಚ, ಪಿಹಾರೇ ಕಾರಯೀ ಬಹೂ.
ಯಟ್ಠಾಲಯ ಕತಿಸ್ಸೋ ಸೋ, ತಸ್ಸ ಪುತ್ತೋ ತದಚ್ಚಯೇ;
ಹತ್ಥೇವ ರಜ್ಜಂ ಕಾರೇಸಿ, ತಸ್ಸ ಪುತ್ತೋ’ಭಯೋ ತಥಾ.
ಗೋಟ್ಠಾಭಯಸುತೋ ಕಾಕ-ವಣ್ಣತಿಸ್ಸೋತಿ ವಿಸ್ಸುಹೋ;
ತದಚ್ಚಯೇ ತತ್ಥ ರಜ್ಜಂ, ಸೋ ಅಕಾರೇಸಿ ಖತ್ತಿಯೋ.
ವಿಹಾರದೇವಿ ನಾಮಾ’ಸಿ, ಮಹೇಸೀ ತಸ್ಸ ರಾಜಿನೋ;
ಸದ್ಧಸ್ಸ ಸದ್ಧಾಸಮ್ಪನ್ನಾ, ಧೀತಾ ಕಲ್ಯಾಣಿ ರಾಜಿನೋ.
ಕಲ್ಯಾಣಿಯಂ ನರಿನ್ದೋ ಹಿ, ತಿಸ್ಸೋ ನಾಮಾಸಿ ಖತ್ತಿಯೋ;
ದೇವಿಸಞ್ಞೋಗಜನಿತ-ಕೋ ಪೋತಸ್ಸ ಕನಿಟ್ಠಕೋ.
ಭೀತೋ ತತೋ ಪಲಾಯಿತ್ವಾ, ಅಯ್ಯಉತ್ತಿಯ ನಾಮಕೋ;
ಅಞ್ಞತ್ಥ ವಸಿ ಸೋ ದೇಸೋ, ತೇನ ತಂ ನಾಮಕೋ ಅಹು.
ದತ್ವಾ ರಹಸ್ಸಲೇಖಂ ಸೋ, ಭಿಕ್ಖುವೇಸಧರಂ ನರಂ;
ಪಾಹೇಸಿ ದೇವಿಯಾ ಗನ್ತ್ವಾ, ರಾಜದ್ವಾರೇ ಠಿತೋ ತುಸೋ.
ರಾಜ ಗೇಹೇ ಅರಹತಾ, ಭುಞ್ಜಮಾನೇನ ಸಬ್ಬದಾ;
ಅಞ್ಞಾಯಮಾನೋ ಥೇರೇನ, ರಞ್ಞೋ ಘರಮುಪಾಗಮಿ.
ಥೇರೇನ ಸದ್ಧಿಂ ಭುಞ್ಜಿತ್ವಾ, ರಞ್ಞೋ ಸಹ ವಿನಿಗ್ಗಮೇ;
ಪಾತೇಸಿ ಭೂಮಿಯಂ ಲೇಖಂ, ಪೇಕ್ಖಮಾನಾಯ ದೇವಿಯಾ.
ಸದ್ದೇನ ತೇನ ರಾಜಾನಂ, ನಿವತ್ತಿತ್ವಾ ವಿಲೋಕಯಂ;
ಞತ್ವಾನ ಲೇಖಸನ್ದೇಸಂ, ಕುದ್ಧೋ ಥೇರಸ್ಸ ದುಮ್ಮತಿ.
ಥೇರಂ ತಂ ಪುರಿಸಂ ತಞ್ಚ, ಮಾರಾಪೇತ್ವಾನ ಕೋಧಸಾ;
ಸಮುದ್ದಸ್ಮಿಂ ಖಿಪಾಪೇಸಿ, ಕುಜ್ಝಿತ್ವಾ ತೇನ ದೇವತಾ.
ಸಮುದ್ದೇನೋ’ತ್ಥರಾ ಪೇಸುಂ, ತಂ ದೇಸಂ ಸೋತುಭೂಪತಿ;
ಅತ್ತನೋ ಧೀತರಂ ಯುದ್ಧಂ, ದೇವಿಂ ನಾಮ ಸುರುಪಿನಿಂ.
ಲಿಖಿತ್ವಾ ರಾಜಧೀತಾತಿ, ಸೋವಣ್ಣಕ್ಖಲಿಯಾ ಲಹುಂ;
ನಿಸೀದಾಪಿಯ ತತ್ಥೇವ, ಸಮುದ್ದಸ್ಮಿಂ ವಿಸ್ಸಜ್ಜಯಿ.
ಓಕ್ಕನ್ತಂ ¶ ತಂ ತತೋ ಲಂಕೇ-ಕಾಕವಣ್ಣೋ ಮಹೀಪತಿ;
ಅಭಿಸೇಚಯಿ ತೇನಾ’ಸಿ, ವಿಹಾರೋಪಪದವ್ಹಯಾ.
ತಿಸ್ಸ ಮಹಾವಿಹಾರಞ್ಚ, ತಥಾ ಚಿತ್ತಲಪಬ್ಬತಂ;
ಗಮಿತ್ಥವಾಲಿಂ ಕುಟಾಲಿಂ, ವಿಹಾರೇ ಏವಮಾದಿಕೇ.
ಕಾರೇತ್ವಾ ಸುಪಸನ್ನೇನ, ಮನಸಾರತನತ್ತಯೇ;
ಉಪಟ್ಠಹಿ ತದಾ ಸಙ್ಘಂ, ಪಚ್ಚಯೇಹಿ ಚತೂಹಿ ಸೋ.
ಕೋಟಿಪಬ್ಬತ ನಾಮಮ್ಹಿ, ವಿಹಾರೇ ಸೀಲವತ್ತಿಮಾ;
ತದಾ ಅಹು ಸಾಮಣೇರೋ, ನಾನಾಪುಞ್ಞಕರೋ ಸದಾ.
ಸುಖೇನಾರೋಹಣತ್ಥಾಯ, ಅಕಾಸ ಚೇತಿಯಙ್ಗಣೇ;
ಠಪೇಸಿ ತೀಣಿ ಪಾಸಾಣೇ, ಪಾಸಾಣ ಫಲಕಾನಿ ಸೋ.
ಅದಾ ಪಾನೀಯ ದಾನಞ್ಚ, ವತ್ತಂ ಸಙ್ಘಸ್ಸ ಚಾ’ಕರಿ;
ಸದಾ ಕಿಲನ್ತಕಾಯಸ್ಸ, ತಸ್ಸಾ’ಬೋಧೋ ಮಹಾ ಅಹು.
ಸಿವಿಕಾಯ ಕಮಾನೇತ್ವಾ, ಭಿಕ್ಖವೋ ಕತವೇದಿನೋ;
ಸಿಲಾಪಸ್ಸಯ ಪರಿವೇಣೇ, ತಿಸ್ಸಾರಾಮೇ ಉಪಟ್ಠಹುಂ.
ಸದಾ ವಿಹಾರದೇವೀಸಾ, ರಾಜಗೇಹೇ ಸುಸಙ್ಖತೇ;
ಪುರೇಭತ್ತಂ ಮಹಾದಾನಂ, ದತ್ವಾ ಸಙ್ಘಸ್ಸ ಸಞ್ಞತಾ.
ಪಚ್ಛಾಭತ್ತಂ ಗನ್ಧಮಾಲಂ, ಭೇಸಜ್ಜವಸನಾನಿ ಚ;
ಗಾಹಯಿತ್ವಾ ಗತಾ’ರಾಮಂ, ಸಕ್ಕರೋತಿ ಯಥಾರಹಂ.
ತದಾ ತಥೇವ ಕತ್ವಾ ಸಾ, ಸಙ್ಘತ್ಥೇರಸ್ಸ ಸನ್ತಿಕೇ;
ನಿಸೀದಿ ಧಮ್ಮಂ ದೇಸೇನ್ತೋ, ಥೇರೋ ತಂ ಇಧ ಮಬ್ರವಿ.
‘‘ಮಹಾಸಮ್ಪತ್ತಿ ತುಮ್ಹೇಹಿ, ಲದ್ಧಾ’ಯಂ ಪುಞ್ಞಕಮ್ಮುನಾ;
ಅಪ್ಪಮಾದೋ’ವ ಕಾತಬ್ಬೋ, ಪುಞ್ಞಕಮ್ಮೇ ಇದಾನಿಪಿ’’.
ಏವಂ ವುತ್ತೇ ತು ಸಾ ಆಹ, ‘‘ಕಿಂ ಸಮ್ಪತ್ತಿ ಅಯಂ ಇಧ;
ಯೇಸಂ ನೋ ದಾರಕಾ ನತ್ಥಿ, ವಞ್ಝಾಸಮ್ಪತ್ತಿ ತೇನ ನೋ’’.
ಛಳಭಿಞ್ಞೋ ಮಹಾಥೇರೋ, ಪುತ್ತಲಾಭಮವೇಕ್ಖಿಯ;
‘‘ಗಿಲಾನಂ ಸಾಮಣೇರಂ ತಂ, ಪಸ್ಸದೇವೀ’’ತಿ ಅಬ್ರವಿ.
ಸಾ ಗನ್ತ್ವಾ’ಸನ್ನ ಮರಣಂ, ಸಾಮಣೇರಮವೋಚ ತಂ;
‘‘ಪತ್ಥೇಹಿ ಮಮ ಪುತ್ತತ್ತಂ, ಸಮ್ಪತ್ತೀ ಮಹತೀ ಹಿ ನೋ’’.
ನ ¶ ಇಚ್ಛತೀತಿ ಞತ್ವಾನ, ತದತ್ಥಂ ಮಹತಿಂ ಸುಭಂ;
ಪುಪ್ಫಪೂಜಂ ಕಾರಯಿತ್ವಾ, ಪುನ ಯಾಚಿ ಸುಮೇಧಸಾ.
ಏವಮ್ಪ’ನಿಚ್ಛಮಾನಸ್ಸ, ಅತ್ಥಾಯು’ಪಾಯಕೋವಿದಾ;
ನಾನಾ ಭೇಸಜ್ಜ ವತ್ಥಾನಿ, ಸಙ್ಘೇ ದತ್ವಾ’ಥ ಯಾಚಿತಂ.
ಪತ್ಥೇಸಿ ಸೋ ರಾಜಕುಲಂ, ಸಾ ತಂ ಠಾನಂ ಅನೇಕಧಾ;
ಅಲಙ್ಕರಿತ್ವಾ ವನ್ದಿತ್ವಾ, ಯಾನಮಾರುಯ್ಹ ಪಕ್ಕಮಿ.
ತತೋ ಚುತೋ ಸಾಮಣೇರೋ, ಗಚ್ಛಮಾನಾಯ ದೇವಿಯಾ;
ತಸ್ಸಾ ಕುಚ್ಛಿಮ್ಹಿ ನಿಬ್ಬತ್ತಿ, ತಂ ಜಾನಿಯ ನಿವತ್ತಿಸಾ.
ರಞ್ಞೋ ತಂ ಸಾಸನಂ ದತ್ವಾ, ರಞ್ಞಾ ಸಹ ಪುನಾ’ಗಮಾ;
ಸರೀರಕಿಚ್ಚಂ ಕಾರೇತ್ವಾ, ಸಾಮಣೇರಸ್ಸು’ಭೋಪಿತೇ.
ತಸ್ಮಿಂಯೇವ ಪರಿವೇಣೇ, ವಸನ್ತಾ ಸನ್ತಮಾನಸಾ;
ಮಹಾದಾನಂ ಪವತ್ತೇಸುಂ, ಭಿಕ್ಖುಸಙ್ಘಸ್ಸ ಸಬ್ಬದಾ.
ತಸ್ಸೇ’ವಂ ದೋಹಳೋ ಆಹಿ, ಮಹಾ ಪುಞ್ಞಾಯ ಮಾತುಯಾ;
‘‘ಉಸಭಮತ್ತಂ ಮಧುಗಣ್ಡಂ, ಕತ್ವಾ ಉಸ್ಸೀಸಕೇ ಸಯಂ.
ವಾಮೇತರೇನ ಪಸ್ಸೇನ, ನಿಪನ್ನಾಸಯನೇ ಸುಭೇ;
ದ್ವಾದಸನ್ನಂ ಸಹಸ್ಸಾನಂ, ಭಿಕ್ಖೂನಂ ದಿನ್ನಸೇಸಕಂ.
ಮಧುಂ ಭುಞ್ಜಿತುಕಾಮಾ’ಸಿ, ಅಥ ಏಳಾರ ರಾಜಿನೋ;
ಯೋಧಾನ ಮಗ್ಗಯೋಧಸ್ಸ, ಸೀಸಚ್ಛಿನ್ನಾಸಿದೇವನಂ.
ತಸ್ಸೇವ ಸೀಸೇ ಠತ್ವಾನ, ಪಾತುಞ್ಚೇವ ಅಕಾಮಯಿ;
ಅನುರಾಧ ಪುರಸ್ಸೇವ, ಉಪ್ಪಲಕ್ಖೇತ್ತತೋ ಪನ.
ಆನೀತುಪ್ಪಲಮಾಲಞ್ಚ, ಅಮಿಲಾ ತಂ ಪಿಲನ್ಧಿತುಂ;
ತಂ ದೇವೀ ರಾಜಿನೋ ಆಹ, ನೇಮಿತ್ತೇ ಪುಚ್ಛಿ ಭೂಪತಿ.
ತಂ ಸುತ್ವಾ ಆಹು ನೇಮಿತ್ತಾ, ‘‘ದೇವಿಪುತ್ತೋ ನಿಘಾತಿಯ;
ದಮಿಳೇ ಕತ್ವೇ’ಕರಜ್ಜಂ, ಸಾಸನಂ ಜೋತಯಿಸ್ಸತಿ’’.
ಏದಿಸಂ ಮಧುಗಣ್ಡಂ ಸೋ, ದಸ್ಸೇತಿ ತಸ್ಸ ಈದಿಸಿಂ;
ಸಮ್ಪತ್ತಿಂ ದೇತಿ ರಾಜಾ’’ತಿ, ಘೋಸಾಪೇಸಿ ಮಹೀಪತಿ.
ಗೋಟ್ಠಸಮುದ್ದವೇಲನ್ತೇ, ಮಧುಪುಣ್ಣಂ ನಿಕುಜ್ಜಿತಂ;
ನಾವಂ ಞತ್ವಾನ ಆಚಿಕ್ಖಿ, ರಞ್ಞೋ ಜನಪದೇ ನರೋ.
ರಾಜಾ ¶ ದೇವಿಂ ತಹಿಂ ನೇತ್ವಾ, ಮಣ್ಡಪಮ್ಹಿ ಸುಸಙ್ಖತೇ;
ಯಥಿಚ್ಛಿಥಂ ತಾಯ ಮಧುಂ, ಪರಿಭೋಗಮಕಾರಯಿ.
ಇತರೇ ದೋಹಳೇ ತಸ್ಸಾ, ಸಮ್ಪಾದೇತುಂ ಮಹೀಪತಿ;
ವೇಳುಸುಮನ ನಾಮಂ ತಂ, ಯೋಧಂ ತತ್ಥ ನಿಯೋಜಯಿ.
ಸೋ’ನುರಾಧಪುರಂ ಗನ್ತ್ವಾ, ರಞ್ಞೋ ಮಙ್ಗಲವಾಜಿನೋ;
ಗೋಪಕೇನ ಅಕಾ ಮೇತ್ತಿಂ, ತಸ್ಸ ಕಿಚ್ಚಞ್ಚ ಸಬ್ಬದಾ.
ತಸ್ಸ ವಿಸ್ಸತ್ಥ ತಂ ಞತ್ವಾ, ಪಾತೋವ ಉಪ್ಪಲಾನ’ಸಿಂ;
ಕದಮ್ಬನದಿಯಾ ತೀರೇ, ಠಪೇತ್ವಾನ ಅಸಙ್ಕಿತೋ.
ಅಸ್ಸಂ ನೇತ್ವಾ ತಮಾರುಯ್ಹ, ಗಣ್ಹಿತ್ವಾನ ಉಪ್ಪಲಾನ’ಸಿಂ;
ನಿವೇದಯಿತ್ವಾನ ಅತ್ತಾನಂ, ಅಸ್ಸವೇಗೇನ ಪಕ್ಕಮಿ.
ಸುತ್ವಾ ರಾಜಾ ಗಹೇತುಂ ತಂ, ಮಹಾ ಯೋಧಾನಪೇಸಯಿ;
ದುತಿಯಂ ಸಮ್ಮಥಂ ಅಸ್ಸಂ, ಆರುಯ್ಹ ಸೋನುಧಾಪಿತಂ.
ಸೋ ಗುಮ್ಬನಿಸ್ಸಿತೋ ಅಸ್ಸ-ಪಿಟ್ಠೇಯೇವ ನಿಸೀದಿಯ;
ಏನ್ತಸ್ಸ ಪಿಟ್ಠಿತೋ ತಸ್ಸ, ಉಬ್ಬಯ್ಹಾ’ಸಿಂ ಪಸಾರಯಿ.
ಅಸ್ಸವೇಗೇನಯನ್ತಸ್ಸ, ಸೀಸಂ ಛಿಜ್ಜ ಉಭೋಹಯೇ;
ಸೀಸಞ್ಚಾ’ದಾಯ ಸಾಯಂ ಸೋ, ಮಹಾಗಾಮಮುಪಾಗಮಿ.
ದೋಹಳೇ ತೇ ಚ ಸಾ ದೇವೀ, ಪರಿಭುಞ್ಜಿ ಯಥಾರುಚಿ;
ರಾಜಾ ಯೋಧಸ್ಸ ಸಕ್ಕಾರಂ, ಕಾರಾಪೇಸಿ ಯಥಾರಹಂ.
ಸಾ ದೇವೀ ಸಮಯೇ ಧಞ್ಞಂ, ಜನಯೀ ಪುತ್ತಮುತ್ತಮಂ;
ಮಹಾರಾಜಕುಲೇ ತಸ್ಮಿಂ, ಆನನ್ದೋ ಚ ಮಹಾ ಅಹು.
ತಸ್ಸ ಪುಞ್ಞಾನುಭಾವೇನ, ತದಹೇವ ಉಪಾಗಮುಂ;
ನಾನಾರತನಸಮ್ಪುಣ್ಣಾ, ಸತ್ತನಾವಾ ತತೋ ತತೋ.
ತಸ್ಸೇವ ಪುಞ್ಞತೇಜೇನ, ಛದ್ದನ್ತಕುಲತೋ ಕರೀ;
ಹತ್ಥಿಚ್ಛಾಪಂ ಆಹರಿತ್ವಾ, ಠಪೇತ್ವಾ ಇಧ ಪಕ್ಕಮಿ.
ತಂ ತಿತ್ಥಸರತೀರಮ್ಹಿ, ದಿಸ್ವಾ ಗುಮ್ಬನ್ತರೇ ಠಿತಂ;
ಕಣ್ಡುಲವ್ಹೋ ಬಾಲಿಸಿಕೋ, ರಞ್ಞೋ ಆಚಿಕ್ಖಿ ತಾವದೇ.
ಪೇಸೇತ್ವಾ’ಚರಿಯೇ ರಾಜಾ, ತಮಾಣಾಪಿಯ ಪೋಸಯಿ;
ಕಣ್ಡುಲೋ ಇತಿ ಞಾಯಿತ್ಥ, ದಿಟ್ಠತ್ತಾ ಕಣ್ಡುಲೇನ ಸೋ.
‘‘ಸುವಣ್ಣಭಾಜನಾದೀನಂ ¶ , ಪುಣ್ಣಾ ನಾವಾ ಇಧಾಗತಾ’’;
ಇತಿ ರಞ್ಞೋ ನಿವೇದಸುಂ, ರಾಜಾ ತಾನಾ’ಹರಾಪಯಿ.
ಪುತ್ತಸ್ಸ ನಾಮಕರಣೇ, ಮಙ್ಗಲಮ್ಹಿ ಮಹೀಪತಿ;
ದ್ವಾದಸ ಸಹಸ್ಸಸಙ್ಖಂ, ಭಿಕ್ಖುಸಙ್ಘಂ ನಿಮನ್ತಿಯ.
ಏವಂ ಚಿನ್ತೇಸಿ ‘‘ಯದಿಮೇ, ಪುತ್ತೋ ಲಂಕಾತಲೇ’ಖಿಲೇ;
ರಜ್ಜಂ ಗಹೇತ್ವಾ ಸಮ್ಬುದ್ಧ-ಸಾಸನಂ ಜೋತಯಿಸ್ಸತಿ.
ಅಟ್ಠುತ್ತರಸಹಸ್ಸಞ್ಚ, ಭಿಕ್ಖವೋ ಪವಿಸನ್ತು ಚ;
ಸಬ್ಬೇ ತೇ ಉದ್ಧಪತ್ತಞ್ಚ, ಚೀವರಂ ಪಾರಪನ್ತು ಚ.
ಪಠಮಂ ದಕ್ಖಿಣಂ ಪಾದಂ, ಉಮ್ಮಾರನ್ತೋ ಠಪೇನ್ತು ಚ;
ಏಕಚ್ಛತ್ತಯುತಂ ಧಮ್ಮ-ಕರಣಂ ನೀಹರನ್ತು ಚ.
ಗೋತಮೋ ನಾಮ ಥೇರೋ ಚ, ಪತಿಗ್ಗಣ್ಹಾತು ಪುತ್ತಕಂ;
ಸೋ ಚ ಸರಣಸಿಕ್ಖಾ ಯೋ, ದೇತು’’ ಸಬ್ಬಂ ತಥಾ ಅಹು.
ಸಬ್ಬಂ ನಿಮಿತ್ತಂ ದಿಸ್ವಾನ, ತುಟ್ಠಚಿತ್ತೋ ಮಹೀಪತಿ;
ದತ್ವಾ ಸಙ್ಘಸ್ಸ ಪಾಯಾಸಂ, ನಾಮಂ ಪುತ್ತಸ್ಸ ಕಾರಯಿ.
ಮಹಾಗಾಮೇ ನಾಯಕತ್ತಂ, ಪಿತುನಾಮಞ್ಚ ಏಕತೋ;
ಉಭೋ ಕತ್ವಾನ ಏಕಜ್ಝಂ, ಗಾಮಣಿಅಭಯೋ ಇತಿ.
ಮಹಾಗಾಮಂ ಪವಿಸಿತ್ವಾ, ನವಮೇ ದಿವಸೇ ತತೋ;
ಸಙ್ಗಮಂ ದೇವಿಯಾ ಕಾಸಿ, ತೇನ ಗಬ್ಭಮಗಣ್ಹಿ ಸಾ.
ಕಾಲೇ ಜಾತಂ ಸುತಂ ರಾಜಾ, ತಿಸ್ಸನಾಮಂ ಅಕಾರಯಿ;
ಮಹತಾ ಪರಿಹಾರೇನ, ಉಭತೋ ವಡ್ಢಿಂಸು ದಾರಕಾ.
ಸಿತ್ಥಪ್ಪವೇಸಮಙ್ಗಲ-ಕಾಲೇ ದ್ವಿನ್ನಮ್ಪಿ ಸಾದರೋ;
ಭಿಕ್ಖುಸತಾನಂ ಪಞ್ಚನಂ, ದಾಪಯಿತ್ವಾನ ಪಾಯಸಂ.
ತೇಹಿ ಉಪಡ್ಢೇ ಭುತ್ತಮ್ಹಿ, ಗಹೇತ್ವಾ ಥೋಕಥೋಕಕಂ;
ಸೋವಣ್ಣಸರಕೇನೇ’ಸಂ, ದೇವಿಯಾ ಸಹ ಭೂಪತಿ.
‘‘ಸಮ್ಬುದ್ಧಸಾಸನಂ ತುಮ್ಹೇ, ಯದಿ ಛಡ್ಡೇಥ ಪುತ್ತಕಾ;
ಮಾ ಜೀರತು ಕುಚ್ಛಿಗತಂ, ಇದಂ ವೋ’’ತಿ ಅಪಾಪಯಿ.
ವಿಞ್ಞಾಯ ಭಾಸಿತತ್ಥಂ ತೇ, ಉಭೋ ರಾಜಕುಮಾರಕಾ;
ಪಾಯಾಸಂ ತಂ ಅಭುಞ್ಜಿಂಸು, ತುಟ್ಠಚಿತ್ತಾ’ಮತಂ ವಿಯ.
ದಸ ದ್ವಾದಸವಸ್ಸೇಸು, ತೇಸು ವೀಮಂಸನತ್ಥಿಕೋ;
ತಥೇವ ಭಿಕ್ಖೂ ಭೋಜೇತ್ವಾ, ತೇಸಂ ಉಚ್ಛಿಟ್ಠಮೋದನಂ.
ಗಾಹಯಿತ್ವಾ ¶ ತಟ್ಟಕೇನ, ಠಪಾಪೇತ್ವಾ ತದನ್ತಿಕೇ;
ತಿಭಾಗಂ ಕಾರಯಿತ್ವಾನ, ಇಧ ಮಾಹ ಮಹೀಪತಿ.
‘‘ಕುಲದೇವತಾನಂ ನೋ ತಾತಾ, ಭಿಕ್ಖೂನಂ ವಿಮುಖಾ ಮಯಂ;
ನ ಹೇಸ್ಸಾಮಾ’’ತಿ ಚಿನ್ತೇತ್ವಾ, ಭಾಗಂ ಭುಞ್ಜಥಿ’ಮನ್ತಿ ಚ.
‘‘ದ್ವೇ ಭಾತರೋ ಮಯಂ ನಿಚ್ಚಂ, ಅಞ್ಞಮಞ್ಞಮದೂಭಕಾ;
ಭವಿಸ್ಸಾಮಾ’’ತಿ ಚಿನ್ತೇತ್ವಾ, ಭಾಗಂ ಭುಞ್ಜಿಥಿ’ಮನ್ತಿ ಚ.
ಅಮತಂ ವಿಯ ಭುಞ್ಜಿಂಸು, ತೇ ದ್ವೇ ಭಾಗೇ ಉಭೋಪಿ ಚ;
‘‘ನ ಯುಜ್ಝಿಸ್ಸಾಮ ದಮಿಳೇಹಿ’’, ಇತಿ ಭುಞ್ಜಥಿ’ಮಂ ಇತಿ.
ಏವಂ ವುತ್ತೇತು ತಿಸ್ಸೋ ಸೋ, ಪಾಣಿನಾ ಖಿಪಿ ಭೋಜನಂ;
ಗಾಮಣಿಭತ್ತಪಿಣ್ಡಂ ತು, ಖಿಪಿತ್ವಾ ಸಯನಂ ಗತೋ.
ಸಂಕುಚಿತ್ವಾ ಹತ್ಥಪಾದಂ, ನಿಪಜ್ಜಿ ಸಯೇನ ಸಯಂ;
ದೇವೀ ಗನ್ತ್ವಾ ತೋಸಯನ್ತೀ, ಗಾಮಣಿಂ ಏತದಬ್ರವಿ.
ಪಸಾರಿತಙ್ಗೋ ಸಯನೇ, ಕಿಂ ನಸೇಸಿ ಸುಖಂ ಸುತ;
‘‘ಗಙ್ಗಾಪಾರಮ್ಹಿ ದಮೀಳಾ, ಇತೋ ಗೋಟ್ಠಮಹೋದಧಿ.
ಕಥಂ ಪಸಾರಿತಙ್ಗೋ’ಹಂ, ನಿಪಜ್ಜಾಮೀ’ತಿ ಸೋ ಬ್ರವಿ;
ಸುತ್ವಾನ ತಸ್ಸಾಧಿಪ್ಪಾಯಂ, ತುಣ್ಹೀ ಆಸಿ ಮಹೀಪತಿ.
ಸೋ ಕಮೇನಾ’ಭಿವಡ್ಢನ್ತೋ, ಅಹು ಸೋಳಸವಸ್ಸಿಕೋ;
ಪುಞ್ಞವಾ ಯಸವಾ ಧೀಮಾ, ತೇಜೋ ಬಲಪರಕ್ಕಮೋ.
ಚಲಾಚಲಾಯಂ ಗತಿಯಞ್ಹಿ ಪಾಣಿನೋ,
ಉಪೇನ್ತಿ ಪುಞ್ಞೇನ ಯಥಾರುಚಿಂ ಗತಿಂ;
ಇತೀತಿ ಮನ್ತೇತ್ವಾ ಸತತಂ ಮಹಾದರೋ,
ಭವೇಯ್ಯ ಪುಞ್ಞಪಚಯಮ್ಹಿ ಬುದ್ಧಿಮಾತಿ.
ಸುಜನಪ್ಪಸಾದಸಂವೇಗತ್ಥಾಯ ಕತೇ ಮಹಾವಂಸೇ
ಗಾಮಣಿಕುಮಾರಸೂತಿ ನಾಮ
ಬಾವೀಸತಿಮೋ ಪರಿಚ್ಛೇದೋ.
ತೇವೀಸತಿಮ ಪರಿಚ್ಛೇದ
ಯೋಧಲಾಭೋ
ಬಲಲಕ್ಖಣರೂಪೇತಿ ¶ ,
ತೇಜೋಜವಗುಣೇಹಿ ಚ;
ಅಗ್ಗೋ ಹುತ್ವಾ ಮಹಾಕಾಯೋ,
ಸೋ ಚ ಕಣ್ಡೂಲವಾರಣೋ.
ನನ್ದೀಮಿತ್ತೋ ಸುರನಿಮಿಲೋ, ಮಹಾಸೋಣೋ ಗೋಟ್ಠಯಿಮ್ಬರೋ;
ಥೇರಪುತ್ತಾಭಯೋ ಭರಣೋ, ವೇಳುಸುಮನೋ ತಥೇವ ಚ.
ಖಞ್ಜದೇವೋ ಫುಸ್ಸದೇವೋ, ಲಭಿಯ್ಯ ವಸಭೋಪಿ ಚ;
ಏತೇ ದಸ ಮಹಾಯೋಧಾ, ತಸ್ಸಾ’ಹೇಸುಂ ಮಹಬ್ಬಲಾ.
ಅಹು ಏಳಾರರಾಜಸ್ಸ, ಮಿತ್ತೋ ನಾಮ ಚಮೂಪತಿ;
ತಸ್ಸ ಕಮ್ಮನ್ತಗಾಮಮ್ಹಿ, ಪಾಚೀನಖಣ್ಡರಾಜಿಯಾ.
ಚಿತ್ತಪಬ್ಬತಸಾಮನ್ತಾ, ಅಹು ಭಗಿನಿಯಾ ಸುತೋ;
ಕೋಸೋಹಿತವತ್ಥಗುಯ್ಹೋ, ಮಾತುಲಸ್ಸೇವ ನಾಮತೋ.
ದೂರಮ್ಪಿ ಪರಿಸಪ್ಪನ್ತಂ, ದಹರಂ ತಂ ಕುಮಾರಕಂ;
ಆಬಜ್ಝ ನನ್ದಿಯಾ ಕಟ್ಯಂ, ನಿಸದಮ್ಹಿ ಅಬನ್ಧಿಸು.
ನಿಸದಂ ಕಡ್ಢತೋ ತಸ್ಸ, ಭೂಮಿಯಂ ಪರಿಸಪ್ಪತೋ;
ಉಮ್ಮಾರಾತಿಕ್ಕಮೇ ನನ್ದಿ, ಸಾ ಛಜ್ಜತಿ ಯತೋ ತತೋ.
ನನ್ದಿಮಿತ್ತೋತಿ ಞಾಯಿತ್ಥ, ದಸನಾಗಬಲೋ ಅಹು;
ವುದ್ಧೋ ನಗರಮಾಗಮ್ಮ, ಸೋ ಉಪಟ್ಠಾಸಿ ಮಾತುಲಂ.
ಥೂಪಾದೀಸು ಅಸಕ್ಕಾರಂ, ಕರೋನ್ತೋ ದಮಿಳೇ ತದಾ;
ಊರುಂ ಅಕ್ಕಮ್ಮಪಾದೇನ, ಹತ್ಥೇನ ಇತರಂ ತುಸೋ.
ಗಹೇತ್ವಾ ಸಮ್ಪದಾಲೇತ್ವಾ, ಬಹಿಕ್ಖಪತಿಂ ಥಾಮವಾ;
ದೇವಾ ಅನ್ತರಧಾಪೇನ್ತಿ, ತೇನ ಖಿತ್ತಂ ಕಳೇವರಂ.
ದಮಿಳಾನಂ ಖಯಂ ದಿಸ್ವಾ, ರಞ್ಞೋ ಆರೋಚಯಿಂ ಸುತಂ;
‘‘ಸಹೋಟ್ಟಂ ಗಣ್ಹಥೇತಂ’’ತಿ, ವುತ್ತಂ ಕಾತುಂ ನ ಸಕ್ಖಿಸುಂ.
ಚಿನ್ತೇಸಿ ¶ ನನ್ದಿಮಿತ್ತೋ ಸೋ, ‘‘ಏವಮ್ಪಿ ಕರತೋ ಮಮ;
ಜನಕ್ಖಯೋ ಕೇವಲಞ್ಹಿ, ನತ್ಥಿ ಸಾಸನಜೋತನಂ.
ರೋಹಣೇ ಖತ್ತಿಯಾ ಸನ್ತಿ, ಪಸನ್ನಂ ರತನತ್ತಯೇ;
ತತ್ಥ ಕತ್ವಾ ರಾಜಸೇವಂ, ಗಣ್ಹಿತ್ವಾ ದಮಿಳೇ’ಖಿಲೇ.
ರಜ್ಜಂ ದತ್ವಾ ಖತ್ತಿಯಾನಂ, ಜೋತೇಸ್ಸಂ ಬುದ್ಧಸಾಸನಂ’’;
ಇತಿ ಗನ್ತ್ವಾ ಗಾಮಣಿಸ್ಸ, ತಂ ಕುಮಾರಸ್ಸ ಸಾವಯಿ.
ಮಾತುಯಾ ಮನ್ತಯಿತ್ವಾ ಸೋ, ಸಕ್ಕಾರಂ ತಸ್ಸ ಕಾರಯಿ;
ಸಕ್ಕತೋ ನನ್ದಿಮಿತ್ತೋ ಸೋ, ಯೋಧೋ ವಸಿ ತದನ್ತಿಕೇ.
ಕಾಕವಣ್ಣೋ ತಿಸ್ಸರಾಜಾ, ವಾರೇತುಂ ದಮಿಳಿಸದಾ;
ಮಹಾಗಙ್ಗಾಯ ತಿತ್ಥೇಸು, ರಕ್ಖಂ ಸಬ್ಬೇಸು ಕಾರಯಿ.
ಅಹು ದೀಘಾಭಯೋ ನಾಮ, ರಞ್ಞೋ’ಞ್ಞ ಭರಿಯಾ ಸುತೋ;
ಕಚ್ಛಕತಿತ್ಥೇ ಗಙ್ಗಾಯ, ತೇನ ರಕ್ಖಮಕಾರಯಿ.
ಸೋ ರಕ್ಖಾಕರಣತ್ಥಾಯ, ಸಮನ್ತಾ ಯೋಜನದ್ವಯೇ;
ಮಹಾಕುಲಮ್ಹಾ ಏಕೇಕಂ, ಪುತ್ತಂ ಆಣಾಪಯಿ ತಹಿಂ.
ಕೋಟ್ಠಿವಾಲೇ ಜನಪದೇ, ಗಾಮೇ ಖಣ್ಡಕವಿಟ್ಠಿಕೇ;
ಸತ್ತಪುತ್ತೋ ಕುಲಪತಿ, ಸಙ್ಘೋ ನಾಮಾ’ಸಿ ಇಸ್ಸರೋ.
ತಸ್ಸಾಪಿ ಧೂತಂ ಪಾಹೇಸಿ, ರಾಜಪುತ್ತೋ ಸುತತ್ಥಿಕೋ;
ಸತ್ತಮೋ ನಿಮಿಲೋ ನಾಮ, ದಸಹತ್ಥಿಬಲೋ ಸುತೋ.
ತಸ್ಸ ಅಕಮ್ಮಸೀಲತ್ತಾ, ಖೀಯನ್ತಾ ಛಪಿ ಭಾತರೋ;
ರೋಚಯುಂ ತಸ್ಸ ಗಮನಂ, ನ ತು ಮಾತಾ ಪಿತಾ ಪನ.
ಕುಜ್ಝಿತ್ವಾ ಸೇಸಭಾತೂನಂ, ಪಾತೋಯೇವ ತಿಯೋಜನಂ;
ಗನ್ತ್ವಾ ಸುರಗ್ಗಮೇಯೇವ, ರಾಜಪುತ್ತಂ ಅಪಸ್ಸಿಸೋ.
ಸೋ ತಂ ವಿಮಂಸನತ್ಥಾಯ, ದೂರೇ ಕಿಚ್ಚೇ ನಿಯೋಜಯಿ;
ಚೇತಿಯ ಪಬ್ಬತಾ ಸನ್ನೇ, ದ್ವಾರ ಮಣ್ಡಲಗಾಮಕೇ.
ಬ್ರಾಹ್ಮಣೋ ಕುಣ್ಡಲೋ ನಾಮ, ವಿಜ್ಜ ತೇ ಮೇ ಸಹಾಯಕೋ;
ಸಮುದ್ದಪಾರೇ ಭಣ್ಡಾನಿ, ತಸ್ಸ ವಿಜ್ಜನ್ತಿ ಸನ್ತಿಕೇ.
ಗನ್ತ್ವಾ ತಂ ತೇನ ದಿನ್ನಾನಿ, ಭಣ್ಡಕಾನಿ ಇಧಾ’ಹರ;
ಇತಿ ವತ್ವಾನ ಭೋಜೇತ್ವಾ, ಲೇಖಂ ದತ್ವಾ ವಿಸ್ಸಜ್ಜಯಿ.
ತತೋ ನವ ಯೋಜನಞ್ಹಿ, ಅನುರಾಧಪುರಂ ಇದಂ;
ಪುಬ್ಬಣ್ಹೇಯೇವ ಗನ್ತ್ವಾನ, ಸೋ ತಂ ಬ್ರಾಹ್ಮಣ ಮದ್ದಸ.
‘‘ನ್ಹತ್ವಾ ¶ ವಾಪಿಯಂ ತಾತ, ಏಹೀ’’ತಿ ಆಹ ಬ್ರಾಹ್ಮಣೋ;
ಇಧಾ’ನಾಗತ ಪುಬ್ಬತ್ತಾ, ನ್ಹತ್ವಾನ ತಿಸ್ಸವಾಪಿಯಂ.
ಮಹಾಬೋಧಿಞ್ಚ ಪೂಜೇತ್ವಾ, ಥೂಪಾರಾಮೇ ಚ ಚೇತಿಯಂ;
ನಗರಂ ಪವಿಸಿತ್ವಾನ, ಪಸ್ಸಿತ್ವಾ ಸಕಲಂ ಪುರಂ.
ಆಪಣಾ ಗನ್ಧಮಾದಾಯ, ಉತ್ತರ ದ್ವಾರತೋ ತತೋ;
ನಿಕ್ಖಮ್ಮುಪ್ಪಲ ಖೇತ್ತಮ್ಹಾ, ಗಹೇತ್ವಾ ಉಪ್ಪಲಾನಿ ಚ.
ಉಪಾಗಮಿ ಬ್ರಾಹ್ಮಣಂ ತಂ, ಪುಟ್ಠೋ ತೇನಾ’ಹ ಸೋ ಗತಿಂ;
ಸುತ್ವಾ ಸೋ ಬ್ರಾಹ್ಮಣೋ ತಸ್ಸ, ಪುಬ್ಬಾಗಮಮಿಧಾಗಮಂ.
ವಿಮ್ಹಿತೋ ಚಿನ್ತಯೀ ಏವಂ, ‘‘ಪುರಿಸಾ ಜಾನೀಯೋ ಅಯಂ;
ಸಚೇ ಜಾನೇಯ್ಯ ಏಳಾರೋ, ಇಮಂ ಹತ್ಥೇ ಕರಿಸ್ಸತಿ.
ತಸ್ಮಾ’ಯಂ ದಮಿಳಾ’ಸನ್ನೇ, ವಾಸೇತುಂ ನೇವ ಅರಹತಿ;
ರಾಜಪುತ್ತಸ್ಸ ಪಿತುನೋ, ಸನ್ತಿಕೇ ವಾಸಮರಹತಿ’’.
ಏವ ಮೇವಂ ಲಿಖಿತ್ವಾನ, ಲೇಖಂ ತಸ್ಸ ಸಮಪ್ಪಯಿ;
ಪುಣ್ಣವಡ್ಢನ ವತ್ಥಾನಿ, ಪಣ್ಣಾಕಾರೇ ಬಹೂಪಿ ಚ.
ದತ್ವಾ ತಂ ಭೋಜಯಿತ್ವಾ ಚ, ಪೇಸೇಸೀ ಸಖಿಸನ್ತಿಕಂ;
ಸೋ ವಡ್ಢಮಾನಚ್ಛಾಯಾಯಂ, ಗತ್ವಾ ರಾಜಸುತನ್ತಿ ಕಂ.
ಲೇಖಞ್ಚ ಪಣ್ಣಾಕಾರೇ ಚ, ರಾಜಪುತ್ತಸ್ಸ ಅಪ್ಪಯಿ;
ತುಟ್ಠೋ ಆಹ ‘‘ಸಹಸ್ಸೇನ, ಪಸಾದೇಥ ಇಮ’’ನ್ತಿ ಸೋ.
ಇಸ್ಸಂ ಕರಿಂಸು ತಸ್ಸ’ಞ್ಞೇ, ರಾಜಪುತ್ತಸ್ಸ ಸೇವಕಾ;
ಸೋ ತಂ ದಸಸಹಸ್ಸೇನ, ಪಸಾದಾಪೇಸಿ ದಾರಕಂ.
ತಸ್ಸ ಕೇಸಂ ಲಿಖಾಪೇತ್ವಾ, ಗಙ್ಗಾಯೇವ ನಹಾಪಿಯ;
ಪುಣ್ಣವಡ್ಢನ ವತ್ಥಯುಗಂ, ಗನ್ಧಮಾಲಞ್ಚ ಸುನ್ದರಂ;
ಅಚ್ಛಾದೇತ್ವಾ ವಿಲಿಮ್ಪೇತ್ವಾ, ಮಣ್ಡಯಿತ್ವಾ ಸುರೂಪಕಂ.
ಸೀಸಂ ದುಕೂಲಪಟ್ಟೇನ, ವೇಠಯಿತ್ವಾ ಉಪಾನಯುಂ;
ಅತ್ತನೋ ಪರಿಹಾರೇನ, ಭತ್ತಂ ತಸ್ಸ ಅದಾಪಯಿ.
ಅತ್ತನೋ ದಸಸಹಸ್ಸ-ಅಗ್ಘನಸಯನಂ ಸುಭಂ;
ಸಯನತ್ಥಂ ಅದಾಪೇಸಿ, ತಸ್ಸ ಯೋಧಸ್ಸ ಖತ್ತಿಯೋ.
ಸೋ ¶ ಸಬ್ಬಂ ಏಕತೋ ಕತ್ವಾ, ನೇತ್ವಾ ಮಾತಾಪಿತನ್ತಿಕಂ;
ಮಾತುಯಾ ದಸಸಹಸ್ಸಂ, ಸಯನಂ ಪಿತುನೋ ಅದಾ.
ತಂಯೇವ ರತ್ತಿಂ ಆಗನ್ತ್ವಾ, ರಕ್ಖಠಾನೇ ಅದ್ದಸ್ಸಯಿ;
ಪಭಾತೇ ರಾಜಪುತ್ತೋ ತಂ, ಸುತ್ವಾ ತುಟ್ಠಮನೋ ಅಹು.
ದತ್ವಾ ಪರಿಚ್ಛದಂ ತಸ್ಸ, ಪರಿವಾರಜನಂ ತಥಾ;
ದತ್ವಾ ದಸಸಹಸ್ಸಾನೀ, ಪೇಸೇಸಿ ಪಿತುಸನ್ತಿಕಂ.
ಯೋಧೋ ದಸಸಹಸ್ಸಾನಿ, ನೇತ್ವಾ ಮಾತಾಪಿತನ್ತಿಕಂ;
ತೇಸಂ ದತ್ವಾ ಕಾಕವಣ್ಣ-ತಿಸ್ಸೋ ರಾಜಾ ಮುಪಾಗಮಿ.
ಸೋ ಗಾಮಣಿಕುಮಾರಸ್ಸ, ತಮಪ್ಪೇಸಿ ಮಹೀಪತಿ;
ಸಕ್ಕತೋ ಸುರನಿಮಿಲೋ, ಯೋಧೋ ವಸಿ ತದನ್ತಿಕೇ.
ಕುಟುಮ್ಬರಿಕಣ್ಣಿಕಾಯಂ,
ಹುನ್ದರೀವಾಪಿ ಗಾಮಕೇ;
ತಿಸಸ್ಸ ಅಟ್ಠಮೋ ಪುತ್ತೋ,
ಅಹೋಸಿ ಸೋಣ ನಾಮಕೋ.
ಸತ್ತವಸ್ಸಿಕಕಾಲೇಪಿ, ತಾಲಗಚ್ಛೇ ಅಲುಞ್ಚಿ ಸೋ;
ದಸ ವಸ್ಸಿಕಕಾಲಮ್ಹಿ, ತಾಲೇ ಲುಞ್ಚಿಮಹಬ್ಬಲೋ.
ಕಾಲೇ ನ ಸೋ ಮಹಾಸೋಣೋ,
ದಸ ಹತ್ಥಿ ಬಲೋ ಅಹು;
ರಾಜಾ ತಂ ತಾದಿಸಂ ಸುತ್ವಾ,
ಗಹೇತ್ವಾ ಪಿತುಸನ್ತಿಕಾ.
ಗಾಮಣಿಸ್ಸ ಕುಮಾರಸ್ಸ, ಅದಾಸಿ ಪೋಸನತ್ಥಿಕೋ;
ತೇನ ಸೋ ಲದ್ಧಸಕ್ಕಾರೋ, ಯೋಧೋ ವಸಿ ತದನ್ತಿಕೇ.
ಗಿರಿನಾಮೇ ಜನಪದೇ, ಗಾಮೇ ನಿಚ್ಛೇಲವಿಟ್ಠಿಕೇ;
ದಸಹತ್ಥಿಬಲೋ ಆಸಿ, ಮಹಾನಾಗಸ್ಸ ಅತ್ರಜೋ.
ಲಕುಣ್ಟಕಸರೀರತ್ತಾ, ಅಹು ಗೋಟ್ಠಕ ನಾಮಕೋ;
ಕರೋನ್ತಿ ಕೇಳಿಪರಿಹಾಸಂ, ತಸ್ಸ ಜೇಟ್ಠಾ ಛ ಭಾತರೋ.
ತೇ ಗನ್ತ್ವಾ ಮಾಸಖೇತ್ತತ್ಥಂ, ಕೋಟ್ಟಯಿತ್ವಾ ಮಹಾವನಂ;
ತಸ್ಸ ಭಾಗಂ ಠಪೇತ್ವಾನ, ಗನ್ತ್ವಾ ತಸ್ಸ ನಿವೇದಯುಂ.
ಸೋ ¶ ಗನ್ತ್ವಾ ತಂ ಖಣಂಯೇವ, ರುಕ್ಖೇ ಇಮ್ಬರಸಞ್ಞಿತೇ;
ಲುಞ್ಚಿತ್ವಾನ ಸಮಂ ಕತ್ವಾ, ಭೂಮಿಂ ಗನ್ತ್ವಾ ನಿವೇದಯಿ.
ಗನ್ತ್ವಾನ ಭಾತರೋ ತಸ್ಸ, ದಿಸ್ವಾ ಕಮ್ಮನ್ತ ಮಬ್ಭುತಂ;
ತಸ್ಸ ಕಮ್ಮಂ ಕಿತ್ತಯನ್ತಾ, ಆಗಚ್ಛಿಂಸು ತದನ್ತಿಕಂ.
ತದುಪಾದಾಯ ಸೋ ಆಸಿ, ಗೋಟ್ಠಯಿಮ್ಬರನಾಮಕೋ;
ತಥೇವ ರಾಜಾ ಪಾಹೇಸಿ, ತಮ್ಬಿ ಗಾಮಣಿಸನ್ತಿಕಂ.
ಕೋಟಿಪಬ್ಬತಸಾಮನ್ತಾ, ಕಿತ್ತಿಗಾಮಮ್ಹಿ ಇಸ್ಸರೋ;
ರೋಹಣೋ ನಾಮ ಗಹಪತಿ, ಜಾತಂ ಪುತ್ತಕಮತ್ತನೋ.
ಸಮಾನ ನಾಮಂ ಕಾರೇಸಿ, ಗೋಟ್ಠಕಾಹಯರಾಜಿನೋ;
ದಾರಕೋ ಸೋ ಬಲೀ ಆಸಿ, ದಸದ್ವಾದಸವಸ್ಸಿಕೋ.
ಅಸಕ್ಕುಣೇಯ್ಯಪಾಸಾಣೇ, ಉದ್ಧತ್ತುಂ ಚತುಪಞ್ಚಹಿ;
ಕೀಳಮಾನೋ ಖಿಪಿ ತದಾ, ಸೋ ಕೀಳಾಗುಳಕೇ ವಿಯ.
ತಸ್ಸ ಸೋಳಸವಸ್ಸಸ್ಸ, ಪಿತಾ ಗದಮಕಾರಯಿ;
ಅಟ್ಠತಿಂಸಙ್ಗುಲವಟ್ಟಂ, ಸೋಳಸಹತ್ಥದೀಘಕಂ.
ಕಾಲಾನಂ ನಾಳಿಕೇರಾನಂ,
ಖನ್ಧೇ ಆಹಚ್ಚ ತಾಯ ಸೋ;
ತೇ ಪಾತಯಿತ್ವಾ ತೇನೇವ,
ಯೋ ಧೋ ಸೋ ಪಾಕಟೋ ಅಹು.
ತಥೇವ ರಾಜಾ ಪಾಹೇಸಿ, ತಮ್ಪಿ ಗಾಮಣಿಸನ್ತಿಕೇ;
ಉಪಟ್ಠಾಕೋ ಮಹಾಸುಮ್ಮ-ಥೇರಸ್ಸಾ’ಸಿ ಪಿತಾ ಪನ.
ಸೋ ಮಹಾಸುಮ್ಮಥೇರಸ್ಸ, ಧಮ್ಮಂ ಸುತ್ವಾ ಕುಟುಮ್ಬಿಕೋ;
ಸೋತಾಪತ್ತಿಫಲಂ ಪತ್ತೋ, ವಿಹಾರೇ ಕೋಳಪಬ್ಬತೇ.
ಸೋತು ಸಞ್ಜಾತಸಂವೇಗೋ, ಆರೋಚೇತ್ವಾನ ರಾಜಿನೋ;
ದತ್ವಾ ಕುಟುಮ್ಬಂ ಪುತ್ತಸ್ಸ, ಪಬ್ಬಜಿ ಥೇರಸನ್ತಿಕೇ.
ಭಾವನಂ ಅನುಯುಞ್ಜಿತ್ವಾ, ಅರಹತ್ತಮಪಾಪುಣಿ;
ಪುತ್ತೋ ತೇನ’ಸ್ಸ ಪಞ್ಞಾಯಿ, ಥೇರಪುತ್ತಾಭಯೋ ಇತಿ.
ಕಪ್ಪಕನ್ದರಗಾಮಮ್ಹಿ, ಕುಮಾರಸ್ಸ ಸುತೋ ಅಹು;
ಭರಣೋ ನಾಮ ಸೋ ಕಾಲೇ, ದಸದ್ವಾದಸವಸ್ಸಿಕೇ.
ದಾರಕೇಹಿ ¶ ವನಂ ಗನ್ತ್ವಾ’-ನುಬನ್ಧಿತ್ವಾ ಸಸೇ ಬಹೂ;
ಪಾದೇನ ಪಹರಿತ್ವಾನ, ದ್ವಿಖಣ್ಡಂ ಭೂಮಿಯಂ ಖಿಪಿ.
ಗಾಮಿಕೇಹಿ ವನಂ ಗನ್ತ್ವಾ, ಸೋಳಸವಸ್ಸಿಕೋ ಪನ;
ತಥೇವ ಪಾತೇಸಿ ಲಹುಂ, ಮಿಗ ಗೋಕಣ್ಣಸೂಕರೇ.
ಭರಣೋ ಸೋ ಮಹಾಯೋಧೋ,
ತೇನೇವ ಪಾಕಟೋ ಅಹು;
ತಥೇವ ರಾಜಾ ವಾಸೇಸಿ,
ತಮ್ಪಿ ಗಾಮಣಿಸನ್ತಿಕೇ.
ಗಿರಿಗಾಮೇ ಜನಪದೇ, ಕುಟುಮ್ಬಿಯಙ್ಗಣಗಾಮಕೇ;
ಕುಟುಮ್ಪಿವಸಭೋ ನಾಮ, ಅಹೋಸಿ ತತ್ಥ ಸಮ್ಮತೋ.
ವೇಳೋ ಜನಪದೋ ತಸ್ಸ, ಸುಮನೋ ಗಿರಿಭೋಜಕೋ;
ಸಹಾಯಸ್ಸ ಸುತೇ ಜಾತೇ, ಪಣ್ಣಾಕಾರಪುರಸ್ಸರಾ.
ಗನ್ತ್ವಾ ಉಭೋ ಸಕಂ ನಾಮಂ, ದಾರಕಸ್ಸ ಅಕಾರಯುಂ;
ತಂ ವುದ್ಧಂ ಅತ್ತನೋ ಗೇಹೇ, ವಾಸೇಸಿ ಸಿರಿಭೋಜಕೋ.
ತಸ್ಸೇ’ಕೋ ಸಿನ್ಧವೋ ಪೋಸಂ, ಕಞ್ಚಿನಾ ರೋಹಿತುಂ ಅದಾ;
ದಿಸ್ವಾ ತು ವೇಳುಸುಮನಂ, ಅಯಂ ಅರೋಹಕೋ ಮಮ.
ಅನುರೂಪೋ’ತಿ ಚಿನ್ತೇತ್ವಾ,
ಪಹಟ್ಠೋ ಹೇಸಿತಂ ಅಕಾ;
ತಂ ಞತ್ವಾ ಭೋಜಕೋ ‘‘ಅಸ್ಸಂ,
ಆರೋಹಾ’’ತಿ ತಮಾಹಸೋ.
ಸೋ ಅಸ್ಸಂ ಆರುಹಿತ್ವಾ ತಂ, ಸೀಘಂ ಧಾವಯಿ ಮಣ್ಡಲೇ;
ಮಣ್ಡಲೇ ಸಕಲೇ ಅಸ್ಸೋ, ಏಕಾಬದ್ಧೋ ಅದಿಸ್ಸಿ ಸೋ.
ನಿಸೀದಿ ಧಾವತೋ ಚ’ಸ್ಸ, ವಸ್ಸಹಾರೋ’ವ ಪಿಟ್ಠಿಯಂ;
ಮೋಚೇತಿಪಿ ಉತ್ತರಿಯಂ, ಬನ್ಧತಿಪಿ ಅನಾದರೋ.
ತಂ ದಿಸ್ವಾ ಪರಿಸಾ ಸಬ್ಬಾ, ಉಕ್ಕುಟ್ಠಿಂ ಸಮ್ಪವತ್ತಯಿ;
ದತ್ವಾ ದಸಸಹಸ್ಸಾನಿ, ತಸ್ಸ ಸೋ ಗಿರಿಭೋಜಕೋ.
ರಾಜಾನುಚ್ಛವಿಕೋ’ಯಂತಿ, ಹಟ್ಠೋ ರಞ್ಞೋ ಅದಾಸಿ ತಂ;
ರಾಜಾ ತಂ ವೇಳುಸುಮನಂ, ಅತ್ತನೋಯೇವ ಸನ್ತಿಕೇ.
ಕಾರೇತ್ವಾ ¶ ತಸ್ಸ ಸಕ್ಕಾರಂ, ವಾಸೇಸಿ ಬಹುಮಾನಯಂ;
ನಕುಲನಗರಕಣ್ಣಿಕಾಯಂ, ಗಾಮೇ ಮಹಿನ್ದ ದೋಣಿಕೇ.
ಅಭಯಸ್ಸ’ನ್ತಿಮೇ ಪುತ್ತೋ, ದೇವೋನಾಮಾ’ಸಿ ಥಾಮವಾ;
ಈಸಕಂ ಪನ ಖಞ್ಜತ್ತಾ, ಖಞ್ಜದೇವೋತಿ ತಂ ವಿದುಂ.
ಮಿಗಮಂ ಗಾಮವಾಸೀಹಿ, ಸಹ ಗನ್ತ್ವಾನ ಸೋ ತದಾ;
ಮಹಿಸೇ ಅನುಬನ್ಧಿತ್ವಾ, ಮಹನ್ತೇ ಉಟ್ಠಿತುಟ್ಠಿತೇ.
ಹತ್ಥೇನ ಪಾದೇ ಗಣ್ಹಿತ್ವಾ, ಭಮೇತ್ವಾ ಸೀಸಮತ್ಥಕೇ;
ಅಸುಮ್ಹ ಭೂಮಿಂ ಚುಣ್ಣೇತಿ, ತೇಸಂ ಅಟ್ಠೀನಿ ಮಾಣವೋ.
ತಂ ಪವತ್ತಿಂ ಸುಣಿತ್ವಾವ, ಖಞ್ಜದೇವಂ ಮಹೀಪತಿ;
ವಾಸೇಸಿ ಆಹರಾಪೇತ್ವಾ, ಗಾಮಣಿಸ್ಸೇ’ವ ಸನ್ತಿಕೇ.
ಚಿತ್ತಲಪಬ್ಬತಾ’ಸನ್ನೇ, ಗಾಮೇ ಕಪಿಟ್ಠನಾಮಕೇ;
ಉಪ್ಪಲಸ್ಸ ಸುತೋ ಆಸಿ, ಫುಸ್ಸದೇವೋತಿ ನಾಮಕೋ.
ಗನ್ತ್ವಾ ಸಹ ಕುಮಾರೇಹಿ, ವಿಹಾರಂ ಸೋ ಕುಮಾರಕೋ;
ಬೋಧಿಯಾ ಪೂಜಿತಂ ಸಙ್ಖಂ, ಆದಾಯ ಧಮಿಥಾಮಸಾ.
ಅಸನೀಪಾತಸದ್ದೋವ, ಸದ್ದೋ ತಸ್ಸ ಮಹಾ ಅಹು;
ಉಮ್ಮತ್ತಾ ವಿಯ ಆಸುಂ ತೇ, ಭೀತಾ ಸಬ್ಬೇಪಿ ದಾರಕಾ.
ತೇನ ಸೋ ಆಸಿ ಉಮ್ಮಾದ-ಫುಸ್ಸ ದೇವೋತಿ ಪಾಕಟೋ;
ಧನುಸಿಪ್ಪಂ ಅಕಾರೇಸಿ, ತಸ್ಸ ವಂಸಾಗತಂ ಪಿತಾ.
ಸದ್ದವೇಧಿ ವಿಜ್ಜುವೇಧೀ, ವಾಲವೇಧೀ ಚ ಸೋ ಅಹು;
ವಾಲುಕಾಪುಣ್ಣಸಕಟಂ, ಬದ್ಧಧಮ್ಮಸತಂ ತಥಾ.
ಅಸನೋ ದುಮ್ಬರಮಯಂ, ಅಟ್ಠಸೋಳಸಅಙ್ಗುಲಂ;
ತಥಾ ಅಯೋ ಲೋಹಮಯಂ, ಪಟ್ಟಂದಿ ಚತುರಙ್ಗಲಿ.
ನಿಬ್ಬೇಧಯತಿಕಣ್ಣೇನ, ಕಣ್ಡೋ ತೇನ ವಿಸಜ್ಜಿತೋ;
ಥಲೇ ಅಟ್ಠುಸಭಂ ಯಾತಿ, ಜಲೇ ತು ಉಸಭಂ ಪನ.
ತಂ ಸುಣಿತ್ವಾ ಮಹಾರಾಜಾ, ಪವತ್ತಿಂ ಪಿತುಸನ್ತಿಕಾ;
ತಮ್ಪಿ ಆಣಾಪಯಿತ್ವಾನ, ಗಾಮಣಿಮ್ಹಿ ಅವಾಸಯಿ.
ತುಲಾಧಾರನಗಾಸನ್ನೇ, ವಿಹಾರವಾಪಿ ಗಾಮಕೇ;
ಮತ್ತಕುಟುಮ್ಬಿಸ್ಸ ಸುತೋ, ಅಹು ವಸಭನಾಮಕೋ.
ತಂ ¶ ಸುಜಾತಸರೀರತ್ತಾ, ಲಭಿಯ ವಸಭಂ ವಿದುಂ;
ಸೋ ವೀಸತಿವಸ್ಸುದ್ದೇಸಮ್ಹಿ, ಮಹಾಕಾಯಬಲೋ ಅಹು.
ಆದಾಯ ಸೋ ಕತಿಪಯೋ, ಪುರಿಸೇಯೇವ ಆರಭಿ;
ಖೇತ್ತತ್ಥಿಕೋ ಮಹಾವಾಪಿಂ, ಕರೋನ್ತೋ ತಂ ಮಹಬ್ಬಲೋ.
ದಸಹಿ ದ್ವಾದಸಹಿ ವಾ, ವಹಿತಬ್ಬೇ ಧುರೇಹಿಪಿ;
ವಹನ್ತೋ ಪಂಸುಪಿಣ್ಡೇ ಸೋ, ಲಹುಂ ವಾಪಿಂ ಸಮಾಪಯಿ.
ತೇನ ಸೋ ಪಾಕಟೋ ಆಸಿ, ತಮ್ಪಿ ಆದಾಯ ಭೂಮಿಪೋ;
ದತ್ವಾ ತಂ ತಸ್ಸ ಸಕ್ಕಾರಂ, ಗಾಮಣಿಸ್ಸ ಅದಾಸಿ ತಂ.
ವಸಭೋದಕವಾರೋತಿ, ಕಂ ಖೇತ್ತಂ ಪಾಕಟಂ ಅಹು;
ಏವಂ ಲಭಿಯಾವಸಭೋ, ವಸಿ ಗಾಮಣಿಸನ್ತಿಕೇ.
ಮಹಾಯೋಧಾನಮೇತೇಸಂ, ದಸನ್ನಮ್ಪಿ ಮಹಿಪತಿ;
ಪುತ್ತಸ್ಸ ಸಕ್ಕಾರಸಮಂ, ಸಕ್ಕಾರಂ ಕಾರಯಿ ತದಾ.
ಆಮನ್ತೇತ್ವಾ ಮಹಾಯೋಧೇ, ದಸಾಪಿ ಚ ದಿಸಮ್ಪತಿ;
‘‘ಯೋಧೇ ದಸದಸೇ’ಕೇಕೋ, ಏಸಥಾ’ತಿ ಉದಾಹರಿ.
ತೇ ತಥೇವಾ’ನಯುಂ ಯೋಧೇ, ತೇಸಮ್ಪಾಹ ಮಹೀಪತಿ;
ತಸ್ಸ ಯೋಧಸಹಸ್ಸಾಪಿ, ತಥೇವ ಪರಿಯೇಸಿತುಂ.
ತಥಾ ತೇಪಾ’ನಯುಂ ಯೋಧೇ, ತೇಸಮ್ಪಾಹಂ ಮಹೀಪತಿ;
ಪುನಯೋಧಸಹಸ್ಸಸ್ಸ, ತಥೇವ ಪರಿಯೇಸಿತುಂ.
ತಥಾ ತೇಪಾ’ನಯುಂ ಯೋಧೇ, ಸಬ್ಬೇ ಸಮ್ಪಿಣ್ಡಿತಾ ತು ತೇ;
ಏಕಾದಸಸಹಸ್ಸಾನಿ, ಯೋಧಾಸತಂ ತಥಾ ದಸ.
ಸಬ್ಬೇ ತೇ ಲದ್ಧಸಕ್ಕಾರಾ, ಭೂಮಿಪಾಲೇನ ಸಬ್ಬದಾ;
ಗಾಮಣಿಂ ರಾಜಪುತ್ತಂ ತಂ, ವಸಿಂಸು ಪರಿವಾರಿಯ.
ಇತಿ ಸುಚರಿತಜಾತಬ್ಭುತಂ,
ಸುಣಿಯ ನರೋ ಮತಿಮಾ ಸುಖತ್ತಿಕೋ;
ಅಕುಸಲಪಥತೋ ಪರಮ್ಮುಖೋ,
ಕುಸಲಪಥೇ’ಭಿರಮೇಯ್ಯ ಸಬ್ಬದಾತಿ.
ಸುಜನಪ್ಪಸಾದಸಂವೇಗತ್ಥಾಯ ಕತೇ ಮಹಾವಂಸೇ
ಯೋಧಲಾಭೋ ನಾಮ
ತೇವೀಸತಿಮೋ ಪರಿಚ್ಛೇದೋ.
ಚತುವೀಸತಿಮ ಪರಿಚ್ಛೇದ
ದ್ವೇಭಾತಿಕಯುದ್ಧಂ
ಹತ್ಥಸ್ಸ ¶ ಥರುಕಮ್ಮಸ್ಸ, ಕುಸಲೋ ಕತುಪಾಸನೋ;
ಸೋ ಗಾಮಣಿರಾಜಸುತೋ, ಮಹಾಗಾಮೇ ವಸೀ ತದಾ.
ರಾಜಾ ರಾಜಸುತಂ ತಿಸ್ಸಂ, ದೀಘವಾಪಿಮ್ಹಿ ವಾಸಯಿ;
ಆರಕ್ಖಿತುಂ ಜನಪದಂ, ಸಮ್ಪನ್ನ ಬಲವಾಹನಂ.
ಕುಮಾರೋ ಗಾಮಣಿಕಾಲೇ, ಸಮ್ಪಸ್ಸನ್ತೋ ಬಲಂ ಸಕಂ;
‘‘ಯುಜ್ಝಿಸ್ಸಂ ದಮಿಳೇಹೀ’’ತಿ, ಪಿತುರಞ್ಞೋ ಕಥಾಪಯೀ.
ರಾಜಾ ತಂ ಅನುರಕ್ಖನ್ತೋ, ‘‘ಓರಗಙ್ಗಂ ಅಲಂ’’ ಇತಿ;
ವಾರೇಸಿ ಯಾವತತಿಯಂ, ಸೋ ತಥೇವ ಕಥಾಪಯೀ.
ಪಿತಾ ಮೇ ಪುರಿಸೋ ಹೋನ್ತೋ, ನೇ’ವಂ ವಕ್ಖತಿ ತೇನಿ’ದಂ;
ಪಿಲನ್ಧತೂತಿ ಪೇಸೇಸಿ, ಇತ್ಥಾಲಙ್ಕಾರಮಸ್ಸ ಸೋ.
ರಾಜಾ’ಹ ತಸ್ಸ ಕುಜ್ಝಿತ್ವಾ, ‘‘ಕರೋಥ ಹೇಮಸಙ್ಖಲಿಂ;
ತಾಯ ತಂ ಬನ್ಧಯಿಸ್ಸಾಮಿ, ನಾ’ಞ್ಞಥಾ ರಕ್ಖಿಯೋ ಹಿ ಸೋ.
ಪಲಾಯಿತ್ವಾನ ಮಲಯಂ, ಕುಜ್ಝಿತ್ವಾ ಪಿತುನೋ ಅಗಾ;
ದುಟ್ಠತ್ತಾಯೇವ ಪಿತರಿ, ಆಹು ತಂ ದುಟ್ಠಗಾಮಣಿ.
ರಾಜಾ’ಥ ಆರಭೀ ಕಾತುಂ, ಮಹಾಮಙ್ಗಲಚೇತಿಯಂ;
ನಿಟ್ಠಿತೇ ಚೇತಿಯೇ ಸಙ್ಘಂ, ಸನ್ನಿಪಾತಯಿ ಭೂಪತಿ.
ದ್ವಾದಸಾ’ಸುಂ ಸಹಸ್ಸಾನಿ, ಭಿಕ್ಖೂ ಚಿತ್ತಲಪಬ್ಬತಾ;
ತತೋ ತತೋ ದ್ವಾದಸೇವ, ಸಹಸ್ಸಾನಿ ಸಮಾಗಮುಂ.
ಕತ್ವಾನ ಚೇತಿಯಮಹಂ, ರಾಜಾ ಸಙ್ಘಸ್ಸ ಸಮ್ಮುಖಾ;
ಸಬ್ಬೇ ಯೋಧೇ ಸಮಾನೇತ್ವಾ, ಕಾರೇಸಿ ಸಪಥಂ ತದಾ.
‘‘ಪುತ್ತಾನಂ ಕಲಹಟ್ಠಾನಂ, ನ ಗಚ್ಛಿಸ್ಸಾಮ ನೋ’’ಇತಿ;
ಅಕಂಸು ಸಪಥಂ ಸಬ್ಬೇ, ತಂ ಯುದ್ಧಂ ತೇನ ನಾಗಮುಂ.
ಚತುಸಟ್ಠಿ ವಿಹಾರೇ ಸೋ, ಕಾರಾಪೇತ್ವಾ ಮಹೀಪತಿ;
ತತ್ತಕಾನೇವ ವಸ್ಸಾನಿ, ಠತ್ವಾ ಮರಿತಹಿಂ ತದಾ.
ರಞ್ಞೋ ¶ ಸರೀರಂ ಗಾಹೇತ್ವಾ, ಛನ್ನಯಾನೇನ ರಾಜಿನಿ;
ನೇತ್ವಾ ತಿಸ್ಸ ಮಹಾರಾಮಂ, ತಂ ಸಙ್ಘಸ್ಸ ನಿವೇದಯಿ.
ಸುತ್ವಾ ತಿಸ್ಸಕುಮಾರೋ ತಂ, ಆಗನ್ತ್ವಾ ದೀಘವಾಪಿತೋ;
ಸರೀರಕಿಚ್ಚಂ ಕಾರೇತ್ವಾ, ಸಕ್ಕಚ್ಚಂ ಪಿತುನೋ ಸಯಂ.
ಮಾತರಂ ಕಣ್ಡುಲಂ ಹತ್ಥಿಂ, ಆದಿಯಿತ್ವಾ ಮಹಬ್ಬಲೋ;
ಭಾತುಭಯಾ ದೀಘವಾಪಿಂ, ಅಗಮಾಸಿ ಲಹುಂ ತತೋ.
ತಂ ಪವತ್ತಿಂ ನಿವೇದೇತುಂ, ದುಟ್ಠಗಾಮಣಿ ಸನ್ತಿಕಂ;
ಲೇಖಂ ದತ್ವಾ ವಿಸಜ್ಜೇಸುಂ, ಸಚ್ಚೇಮಚ್ಚಾ ಸಮಾಗತಾ.
ಸೋ ಗುತ್ತಹಾಲಮಾಗನ್ತ್ವಾ, ತತ್ಥ ಚಾರೇ ವಿಸಜ್ಜಿಯ;
ಮಹಾಗಾಮಮುಪಗನ್ತ್ವಾ, ಸಯಂ ರಜ್ಜೇ’ಭಿಸೇಚಯಿ.
ಮಾತತ್ಥಂ ಕಣ್ಡೂಲತ್ಥಞ್ಚ, ಭಾತುಲೇಖಂ ವಿಸಜ್ಜಯಿ;
ಅಲದ್ಧಾ ಯಾವತತಿಯಂ, ಯುದ್ಧಾಯ ಸಮುಪಾಗಮಿ.
ಅಹು ದ್ವಿನ್ನಂ ಮಹಾಯುದ್ಧಂ, ಚೂಳಙ್ಗಣಿಯಪಿಟ್ಠಿಯಂ;
ತತ್ಥ ನೇಕಸಹಸ್ಸಾನಿ, ಪತಿಂಸು ರಾಜಿನೋ ನರಾ.
ರಾಜಾ ಚ ತಿಸ್ಸಾಮಚ್ಚೋ ಚ, ವಳವಾದೀಘುತುನಿಕಾ;
ತಯೋಯೇವ ಪಲಾಯಿಂಸು, ಕುಮಾರೋ ಅನುಬನ್ಧಿತೇ.
ಉಭಿನ್ನಮನ್ತರೇ ಭಿಕ್ಖೂ, ಮನ್ತಯಿಂಸು ಮಹೀಧರಂ;
ತಂ ದಿಸ್ವಾ ‘‘ಭಿಕ್ಖುಸಙ್ಘಸ್ಸ, ಕಮ್ಮಂ’’ ಇತಿ ನಿವತ್ತಿ ಸೋ.
ಕಪ್ಪಕನ್ದರನಜ್ಜಾಸೋ, ಜವಮಾಲಿತಿತ್ಥಮಾಗತೋ;
ರಾಜಾ’ಹ ತಿಸ್ಸಮಚ್ಚಂ ತಂ, ‘‘ಛಾತಜ್ಝತ್ತಾ ಮಯಂ’’ಇತಿ.
ಸುವಣ್ಣಸರಕೇ ಖಿತ್ತ-ಭತ್ತಂ ನೀಹರಿತಸ್ಸ ಸೋ;
ಸಙ್ಘೇ ದತ್ವಾ ಭುಞ್ಜನತೋ, ಕಾರೇತ್ವಾ ಚತುಭಾಗಕಂ.
‘‘ಘೋಸೇಹಿ ಕಾಲ’’ಮಿಚ್ಚಾ’ಹ,
ತಿಸ್ಸೋ ಕಾಲಮಘೋಸಯಿ;
ಸುಣಿತ್ವಾ ದಿಬ್ಬಸೋತೇನ,
ರಞ್ಞೋ ಸಕ್ಖಾಯ ದಾಯಕೋ.
ಥೇರೋ ಪಿಯಙ್ಗು ದೀಪಟ್ಠೋ, ಥೇರಂ ತತ್ಥ ನಿಯೋಜಯಿ;
ತಿಸ್ಸಂ ಕುಟುಮ್ಬಿಕಸುತಂ, ಸೋ ತತ್ಥ ನಭಸಾ’ಗಮಾ.
ತಸ್ಸ ತಿಸ್ಸೋ ಕರಾಪತ್ತ-ಆದಾಯಾ’ದಾಸಿ ರಾಜಿನೋ;
ಸಙ್ಘಸ್ಸ ಭಾಗಂ ಸಮ್ಭಾಗಂ, ರಾಜಾ ಪತ್ತೇ ಖಿಪಾಪಯಿ.
ಸಮ್ಭಾಗಂ ¶ ಖಿಪಿ ತಿಸ್ಸೋ ಚ, ಸಮ್ಭಾಗಂ ವಳವಾಪಿ ಚ;
ನ ಇಚ್ಛಿತಸ್ಸಾಭಾಗಞ್ಚ, ತಿಸ್ಸೋ ಪತ್ತಮ್ಹಿ ಪಕ್ಖಿಪಿ.
ಭತ್ತಸ್ಸ ಪುಣ್ಣಪತ್ತಂ ತಂ, ಅದಾಥೇರಸ್ಸ ಭೂಪತಿ;
ಅದಾ ಗೋತಮಥೇರಸ್ಸ, ಸೋ ಗನ್ತ್ವಾ ನಭಸಾ ಲಹುಂ.
ಭಿಕ್ಖೂನಂ ಭುಞ್ಜಮಾನಾನಂ, ದತ್ವಾ ಆಲೋಪಭಾಗಸೋ;
ಪಞ್ಚಸತಾನಂ ಸೋ ಥೇರೋ, ಲದ್ಧೇಹಿ ತು ತದನ್ತಿಕಾ.
ಭಾಗೇಹಿ ಪತ್ತಂ ಪೂರೇತ್ವಾ, ಆಕಾಸೇ ಖಿಪಿ ರಾಜಿನೋ;
ದಿಸ್ವಾ’ ಗತಂ ಗಹೇತ್ವಾ ತಂ, ತಿಸ್ಸೋ ಭೋಜಿಸಿ ಭೂಪತಿಂ.
ಭುಞ್ಜಿತ್ವಾನ ಸಯಞ್ಜಾಪಿ, ವಳವಞ್ಚ ಅಭೋಜಯಿ;
ಸತ್ತಾಹಂ ಚುಮ್ಬಟಂ ಕತ್ವಾ, ರಾಜಾ ಪತ್ತಂ ವಿಸಜ್ಜಯಿ.
ಗನ್ತ್ವಾನ ಸೋ ಮಹಾಗಾಮಂ, ಸಮಾದಾಯ ಬಲಂ ಪುನ;
ಸಟ್ಠಿಸಹಸ್ಸಂ ಯುದ್ಧಾಯ, ಗನ್ತ್ವಾ ಯುಜ್ಝಿ ಸಭಾತರಾ.
ರಾಜಾ ವಳವಮಾರುಯ್ಹ, ತಿಸ್ಸೋ ಕಣ್ಡೂಲ ಹತ್ಥಿನಂ;
ದ್ವೇ ಭಾತರೋ ಸಮಾಗಞ್ಛುಂ, ಯುಜ್ಝಮಾನಾ ರಣೇ ತದಾ.
ರಾಜಾ ಕರಿಂ ಕರಿತ್ವ’ನ್ತೋ, ವಳವಾಮಣ್ಡಲಂ ಅಕಾ;
ತಥಾಪಿ ಛಿದ್ದಂ ನೋ ದಿಸ್ವಾ, ಲಙ್ಘಾ ಪೇತುಂ ಮತಿಂಅಕಾ.
ವಳವಂ ಲಙ್ಘಯಿತ್ವಾನ, ಹತ್ಥಿನಂ ಭಾತಿಕೋ’ಪರಿ;
ತೋಮರಂ ಖಿಪಿ ಚಮ್ಮಂವ, ಯಥಾ ಛಿಜ್ಜತಿ ಪಿಟ್ಠಿಯಂ.
ಅನೇಕಾನಿ ಸಹಸ್ಸಾನಿ, ಕುಮಾರಸ್ಸ ನರಾತಹಿಂ;
ಪತಿಂಸು ಯುದ್ಧೇ ಯುಜ್ಝನ್ತಾ, ಭಿಜ್ಜ ಚೇವ ಮಹಬ್ಬಲಂ.
‘‘ಆರೋಹಕಸ್ಸ ವೇಕಲ್ಲಾ, ಇತ್ಥೀ ಮಂ ಲಙ್ಘಯೀ’’ಇತಿ;
ಕುದ್ಧೋಕರೀ ತಂ ಚಾಲೇನ್ತೋ, ರುಕ್ಖಮೇಕ ಮುಪಾಗಮಿ.
ಕುಮಾರೋ ಆರುಹೀ ರುಕ್ಖಂ, ಹತ್ಥೀ ಸಾಮಿಮುಪಾಗಮಿ;
ತಮಾರುಯ್ಹ ಪಲಾಯನ್ತಂ, ಕುಮಾರೋ ಮನುಬನ್ಧಿ ಸೋ.
ಪವಿಸಿತ್ವಾ ವಿಹಾರಂ ಸೋ, ಮಹಾಥೇರ ಘರಂಗತೋ;
ನಿಪಜ್ಜಹೇಟ್ಠಾ ಮಞ್ಚಸ್ಸ, ಕುಮಾರೋ ಭಾತುನೋಭಯಾ.
ಪಸಾರಯಿ ಮಹಾಥೇರೋ, ಚೀವರಂ ತತ್ಥ ಮಞ್ಚಕೇ;
ರಾಜಾ ಅನುಪದಂ ಗನ್ತ್ವಾ, ‘‘ಕುಹಿಂ ತಿಸ್ಸೋ’’ತಿ ಪುಚ್ಛಥ.
‘‘ಮಞ್ಚೇ ¶ ತತ್ಥ ಮಹಾರಾಜ’’, ಇತಿ ಥೇರೋ ಅವೋಚ ತಂ;
ಹೇಟ್ಠಾ ಮಞ್ಚೇತಿ ಜಾನಿತ್ವಾ, ತತೋ ನಿಕ್ಖಮ್ಮ ಭೂಪತಿ.
ಸಮನ್ತತೋ ವಿಹಾರಸ್ಸ, ರಕ್ಖಂ ಕಾರಯಿ ತಂ ಪನ;
ಪಞ್ಚಕಮ್ಹಿ ನಿಪಜ್ಜೇತ್ವಾ, ದತ್ವಾ ಉಪರಿ ಚೀವರಂ.
ಮಞ್ಚಪಾದೇಸು ಗಣ್ಹಿತ್ವಾ, ಚತ್ತಾರೋ ದಹರಾ ಯತೀ;
ಮತಭಿಕ್ಖುನಿಯಾಮೇನ, ಕುಮಾರಂ ಬಹಿ ನೀಹರುಂ.
ನೀಯಮಾನನ್ತು ತಂ ಞತ್ವಾ, ಇಧ ಮಾಹ ಮಹೀಪತಿ;
‘‘ತಿಸ್ಸ ತ್ವಂ ಕುಲದೇವತಾನಂ, ಸೀಸೇ ಹುತ್ವಾನ ನಿಯ್ಯಾಸಿ.
ಬಲಕ್ಕಾರೇನ ಗಹಣಂ, ಕುಲದೇವೇಹಿ ನತ್ಥಿ ಮೇ;
ಗುಣಂ ತ್ವಂ ಕುಲದೇವಾನಂ, ಸರೇಯ್ಯಾಸಿ ಕದಾಚಿಪಿ’’.
ತತೋಯೇವ ಮಹಾಗಾಮಂ, ಅಗಮಾಸಿ ಮಹೀಪತಿ;
ಆಣಾಪೇಸಿ ಚ ತತ್ಥೇವ, ಮಾತರಂ ಮಾತುಗಾರವೋ.
[ವಸ್ಸಾನಿ ಅಟ್ಠಸಟ್ಠಿಂಸೋ, ಅಟ್ಠಾ ಧಮ್ಮಟ್ಠಮಾನಸೋ;
ಅಟ್ಠಸಟ್ಠಿವಿಹಾರೇ ಚ, ಕಾರಾಪೇಸಿ ಮಹೀಪತಿ.]
ನಿಕ್ಖಾಮಿತೋ ಸೋ ಭಿಕ್ಖೂಹಿ, ತಿಸ್ಸೋರಾಜ ಸುತೋ ಪನ;
ದೀಘವಾಪಿಂ ತತೋಯೇವ, ಅಗಮ’ಞ್ಞತರೋ ವಿಯ.
ಕುಮಾರೋ ಗೋಧಗತ್ತಸ್ಸ, ತಿಸ್ಸಥೇರಸ್ಸ ಆಹ ಸೋ;
‘‘ಸಾಪರಾಧೋ ಅಹಂ ಭನ್ತೇ, ಖಮಾಪೇಸ್ಸಾಮಿ ಭಾತರಂ.
ವೇಯ್ಯಾವಚ್ಚಕರಾ ಕಾರಂ, ತಿಸ್ಸಂ ಪಞ್ಚಸತಾನಿ ಚ;
ಭಿಕ್ಖುನಮಾದಿಯಿತ್ವಾ ಸೋ, ಥೇರೋ ರಾಜ ಮುಪಾಗಮಿ.
ರಾಜಪುತ್ತಂ ಠಪೇತ್ವಾನ, ಥೇರೋ ಸೋಪಾನ ಮತ್ಥಕೇ;
ಸಸಙ್ಘೋ ಪಾವಿಸಿ ಸದ್ಧೋ, ನಿಸೀದಾವಿಯ ಭೂಮಿಪೋ.
ಉಪಾನಯೀ ಯಾಗುಆದಿಂ, ಥೇರೋ ಪತ್ತಂ ವಿಧೇಸಿಸೋ;
‘‘ಕಿನ್ತಿ ವುತ್ತೋ’ಬ್ರವಿ ತಿಸ್ಸಂ, ಆದಾಯ ಅಗತಾ’’ಇತಿ.
‘‘ಕುಹಿಂ ಚೋರೋ’’ತಿ ವುತ್ತೋ ಚ, ಠಿತಠಾನಂ ನಿವೇದಯಿ;
ವಿಹಾರದೇವೀ ಗನ್ತ್ವಾನ, ಛಾದಿಯಠಾಸಿ ಪುತ್ತಕ.
ರಾಜಾ’ಹ ¶ ಥೇರಂ ‘‘ಞಾತೋ ವೋ,
ದಾಸಭಾವೋ ಇದಾನಿ ನೋ;
ಸಾಮಣೇರಂ ಪೇಸಯೇಥ,
ತುಮ್ಹೇ ಮೇ ಸತ್ತವಸ್ಸಿಕಂ.
ಜನಕ್ಖಯಂ ವಿನಾಯೇವ, ಕಲಹೋ ನ ಭವೇಯ್ಯ ನೋ;
ರಾಜಾ ಸಙ್ಘಸ್ಸ ದೋಸೇಸೋ, ಭಂಘೇ ದಣ್ಡಂ ಕರಿಸ್ಸತಿ.
ಹೇಸ್ಸತಾ’ಗತಕಿಚ್ಚಾ ವೋ,
ಯಾಗಾದಿಂ ಗಣ್ಹಾಥಾತಿ ಸೋ;
ದತ್ವಾ ತಂ ಭಿಕ್ಖುಸಙ್ಘಸ್ಸ,
ಪಕ್ಕೋಸಿತ್ವಾನ ಭಾತರಂ.
ತತ್ಥೇವ ಸಙ್ಘಮಜ್ಝಮ್ಹಿ, ನಿಸಿನ್ನೋ ಭಾತರಾ ಸಹ;
ಭುಞ್ಜಿತ್ವಾ ಏಕತೋಯೇವ, ಭಿಕ್ಖು ಸಙ್ಘಂ ವಿಸಜ್ಜಯಿ.
ಸಸ್ಸಕಮ್ಮಾನಿ ಕಾರೇತುಂ, ತಿಸ್ಸಂ ತತ್ಥೇವ ಪಾಹಿಣಿ;
ಸಯಮ್ಪಿ ಭೇರಿಂ ಚಾರೇತ್ವಾ, ಸಸ್ಸಕಮ್ಮಾನಿ ಕಾರಯಿ.
ಇತಿ ವೇರಮನೇಕವಿಕಪ್ಪಚಿತಂ,
ಸಮಯನ್ತಿ ಬಹುಂ ಅಪಿ ಸಪ್ಪುರಿಸಂ;
ಇತಿ ಚಿನ್ತಿಯ ಕೋಹಿ ನರೋ ಮತಿಮಾ,
ನ ಭವೇಯ್ಯ ಪರೇಸು ಸುಸನ್ತ ಮನೋತಿ.
ಸುಜನಪ್ಪಸಾದಸಂವೇಗತ್ಥಾಯ ಕತೇ ಮಹಾವಂಸೇ
ದ್ವೇಭಾತಿಕಯುದ್ಧಂ ನಾಮ
ಚತುವೀಸತಿಮೋ ಪರಿಚ್ಛೇದೋ.
ಪಞ್ಚವೀಸತಿಮ ಪರಿಚ್ಛೇದ
ದುಟ್ಠಗಾಮಣಿ ವಿಜಯೋ
ದುಟ್ಠಗಾಮಣಿರಾಜಾ’ಥ ¶ , ಕತ್ವಾನ ಜನಸಙ್ಗಹಂ;
ಕುನ್ತೇ ಧಾತುಂ ನಿಧಾಪೇತ್ವಾ, ಸಯೋಗ್ಗಬಲವಾಹನೋ.
ಗನ್ತ್ವಾ ತಿಸ್ಸಮಹಾರಾಮಂ, ವನ್ದಿತ್ವಾ ಸಙ್ಘಮಬ್ರವಿ;
‘‘ಪಾರಗಙ್ಗಂ ಗಮಿಸ್ಸಾಮಿ, ಜೋತೇತುಂ ಸಾಸನಂ ಅಹಂ.
ಸಕ್ಕಾತುಂ ಭಿಕ್ಖವೋ ದೇಥ, ಅಮ್ಹೇಹಿ ಸಹಗಾಮಿನೋ;
ಮಙ್ಗಲಞ್ಚೇವ ರಕ್ಖಾ ಚ, ಭಿಕ್ಖೂನಂ ದಸ್ಸನಂ ಹಿನೋ.
ಅದಾಸಿ ದಣ್ಡಕಮ್ಮತ್ಥಂ, ಸಙ್ಘೋ ಪಞ್ಚಸತಂ ಯತೀ;
ಭಿಕ್ಖುಸಙ್ಘತಮಾದಾಯ, ತತೋ ನಿಕ್ಖಮ್ಮ ಭೂಪತಿ.
ಸೋಧಾಪೇತ್ವಾನ ಮಲಯೇ, ಇಧಾಗಮನಮಞ್ಜಸಂ;
ಕಣ್ಡುಲಂ ಹತ್ಥಿಮಾರುಯ್ಹ, ಯೋಧೇಹಿ ಪರಿವಾರಿತೋ.
ಮಹತಾ ಬಲಕಾಯೇನ, ಯುದ್ಧಾಯ ಅಭಿನಿಕ್ಖಮಿ;
ಮಹಾಗಾಮೇನ ಸಮ್ಬದ್ಧಾ, ಸೇನಾಗಾ’ಗುತ್ತಹಾಲಕಂ.
ಮಹಿಯಙ್ಗಣಮಾಗಮ್ಮ, ಛತ್ತಂ ದಮಿಳಮಗ್ಗಹೀ;
ಘಾತೇತ್ವಾ ದಮಿಳೇ ತತ್ಥ, ಆಗನ್ತ್ವಾ ಅಮ್ಬತಿತ್ಥಕಂ.
ಗಙ್ಗಾ ಪರಿಖಾಸಮ್ಪನ್ನಂ, ತಿತ್ಥಮ್ಬದಮಿಳಂ ಪನ;
ಯುಜ್ಝಂ ಚತೂಹಿ ಮಾ ಸೇಹಿ, ಕತಹತ್ಥಂ ಮಹಬ್ಬಲಂ.
ಮಾತರಂ ದಸ್ಸಯಿತ್ವಾನ, ತೇನ ಲೇಸೇನ ಅಗ್ಗಹಿ;
ತತೋಓರುಯ್ಹ ದಮಿಳೇ, ಸತ್ತರಾಜೇ ಮಹಬ್ಬಲೇ.
ಏಕಾಹೇನೇವ ಗಣ್ಹಿತ್ವಾ, ಖೇಮಂ ಕತ್ವಾ ಮಹಬ್ಬಲೋ;
ಬಲಸ್ಸಾ’ದಾ ಧನಂ ತೇನ, ಖೇಮಾರಾಮೋತಿ ವುಚ್ಚತಿ.
ಮಹಾಕೋಟ್ಠನ್ತರೇ ಸೋಬ್ಭೇ, ದೋಣೋ ಗವರಮಗ್ಗಹೀ;
ಹಾಲಕೋಲೇ ಇಸ್ಸರಿಯಂ, ನಾಳಿಸೋಬ್ಭಮ್ಹಿ ನಾಳಿಕಂ.
ದೀಘಾಭಯಗಲ್ಲಕಮ್ಹಿ, ಗಣ್ಹಿ ದೀಘಾಭಯಮ್ಪಿ ಚ;
ಕಚ್ಛಿಪಿಟ್ಠೇ ಕಪಿಸೀಸಂ, ಚತುಮಾಸೇನ ಅಗ್ಗಹಿ.
ಕೋಟನಗರೇ ¶ ಕೋಟಞ್ಚ, ತತೋ ಹಾಲವಹಾಣಕಂ;
ವಹಿಟ್ಠೇ ವಹಿಟ್ಠದಮಿಳಂ, ಗಾಮಣಿಮ್ಹಿ ಚ ಗಾಮಣಿಂ.
ಕುಮ್ಭಗಾಮಮ್ಹಿ ಕುಮ್ಭಞ್ಚ, ನನ್ದಿಗಾಮಮ್ಹಿ ನನ್ದಿಕಂ;
ಗಣ್ಹಿ ಖಾಣುಂ ಖಾಣುಗಾಮೇ, ದ್ವೇ ತು ತಮ್ಬುಣ್ಣಮೇ ಪನ.
ಮಾತುಲಂ ಭಾಗಿನೇಯ್ಯಞ್ಚ, ತಮ್ಬಉಣ್ಣಮನಾಮಕೇ;
ಜಮ್ಬುಚಗ್ಗಹೀ ಸೋಸೋ ಚ, ಗಾಮೋ’ಹು ತಂ ತದವ್ಹಯೋ.
‘‘ಅಜಾನಿತ್ವಾ ಸಕಂಸೇನಂ, ಘಾತೇನ್ತಿ ಸಜನಾ’’ ಇತಿ;
ಸುತ್ವಾನ ಸಚ್ಚಕಿರಿಯಂ, ಅಕರೀ ತತ್ಥ ಭೂಪತಿ.
ರಜ್ಜಸುಖಾಯ ವಾಯಾಮೋ, ನಾಯಂ ಮಮ ಕದಾಚಿಪಿ;
ಸಮ್ಬುದ್ಧ ಸಾಸನಸ್ಸೇವ, ಠಪನಾಯ ಅಯಂ ಮಮ.
ತೇನ ಸಚ್ಚೇನ ಮೇಸೇನಾ-ಕಾಯೋಪಗತಭಣ್ಡಿಕಂ;
ಜಾಲವಣ್ಣಂವ ಹೋತೂತಿ, ತಂ ತಥೇವತದಾ ಅಹು.
ಗಙ್ಗಾತೀರಮ್ಹಿ ದಮಿಳಾ, ಸಬ್ಬೇ ಘಾತಿತಸೇಸಕಾ;
ವಿಜಿತಂ ನಗರಂ ನಾಮ, ಸರಣತ್ಥಾಯ ಪಾವಿಸುಂ.
ಫಾಸುಕೇ ಅಙ್ಗಣಠಾನೇ, ಖನ್ಧಾವಾರಂ ನಿವೇಸಯಿ;
ತಂ ಖನ್ಧಾವಾರ… ಠೀತಿ, ನಾಮೇನಾ’ಹೋಸಿ ಪಾಕಟಂ.
ವಿಜಿತನಗರಗಾಹತ್ಥಂ, ವೀಮಂಸನ್ತೋ ನರಾಧಿಪೋ;
ದಿಸ್ವಾ’ಯನ್ತಂ ನನ್ದಿಮಿತ್ತಂ, ವಿಸಜ್ಜಾಪೇಸಿ ಕಣ್ಡುಲಂ.
ಗಣ್ಹಿತುಂ ಆಗತಂ ಹತ್ಥಿಂ, ನನ್ದೀಮಿತ್ತೋ ಕರೇಹಿತಂ;
ಉಭೋ ದನ್ತೇ ಪೀಳಯಿತ್ವಾ, ಉಕ್ಕುಟಿಕಂ ನಿಸೀದಯಿ.
ಹತ್ಥಿನಾ ನನ್ದಿಮಿತ್ತೋ ತು, ಯಸ್ಮಾ ಯತ್ಥ ಅಯುಜ್ಝಿ ಸೋ;
ತಸ್ಮಾ ತತ್ಥ ತತೋ ಗಾಮೋ, ಹತ್ಥಿಪೋರೋತಿ ವುಚ್ಚತಿ.
ವೀಮಂಸಿತ್ವಾ ಉಭೋ ರಾಜಾ, ವಿಜಿತಂ ನಗರಂ ಅಗಾ;
ಯೋಧಾನಂ ದಕ್ಖಿಣದ್ವಾರೇ, ಸಙ್ಗಾಮೋ ಆಸಿ ಭಿಂಸನೋ.
ಪುರತ್ಥಿಮಮ್ಹಿ ದ್ವಾರಮ್ಹಿ, ಸೋ ವೇಳುಸುಮನೋ ಪನ;
ಅನೇಕ ಸಙ್ಖೇ ದಮಿಳೇ, ಅಸ್ಸಾರುಳ್ಹೇ ಅಘಾತಯಿ.
ದ್ವಾರಂ ಥಕೇಸುಂ ದಮಿಳಾ, ರಾಜಾ ಯೋಧೇ ವಿಸಜ್ಜಯಿ;
ಕಣ್ಣುಲೋ ನನ್ದಿಮಿತ್ತೋ ಚ, ಸುರನಿಮಿಲೋ ಚ ದಕ್ಖಿಣೇ.
ಮಹಾಸೋಣೋ ¶ ಚ ಗೋಟ್ಠೋ ಚ,
ಥೇರ ಪುತ್ತೋ ಚ ತೇ ತಯೋ;
ದ್ವಾರೇಸು ತೀಸು ಕಮ್ಮಾನಿ,
ಇತರೇಸು ತದಾ ಕರುಂ.
ನಗರಂ ತಂ ತಿಪರಿಖಂ, ಉಚ್ಚಪಾಕಾರ ಗೋಪಿತಂ;
ಅಯೋಕಮ್ಮಕತದ್ವಾರಂ, ಅರೀಹಿ ದುಪ್ಪಧಂಸಿಯಂ.
ಜಾಣೂಹಿ ಠತ್ವಾ ದಾಠಾಹಿ, ಭಿನ್ದಿತ್ವಾನ ಸಿಲಾಯುಧಾ;
ಇಟ್ಠಕಾ ಚೇವ ಹತ್ಥಿ ಸೋ, ಅಯೋದ್ವಾರಮುಪಾಗಮಿ.
ಗೋಪುರಟ್ಠಾ ತು ದಮಿಳಾ, ಖಿಪಿಂಸು ವಿವಿಧಾ’ಯುಧೇ;
ಪಕ್ಕಂ ಅಯೋಗುಳಞ್ಚೇವ, ಕಥಿಕಞ್ಚ ಸಿಲೇಸಿಕಂ.
ಪಿಟ್ಠಿಂ ಖಿತ್ತೇ ಸಿಲೇಸಮ್ಹಿ, ಧೂಪಾಯನ್ತೇ’ಥ ಕಣ್ಡುಲೋ;
ವೇದನಟ್ಟೋ’ದಕಠಾನಂ, ಗನ್ತ್ವಾನ ತತ್ಥ ಓಗಹೀ.
ನ ಇದಂ ಸುರಾಪಾಣಂ ತೇ, ಅಯೋದ್ವಾರ ವಿಘಾಟನಂ;
ಗಚ್ಛ ದ್ವಾರಂ ವಿಘಾಟೇಹಿ, ಇಚ್ಚಾಹಗೋಟ್ಠಯಿಮ್ಬರೋ.
ಸೋ ಮಾನಂ ಜನಯಿತ್ವಾನ, ಕೋಞ್ಚಂ ಕತ್ವಾ ಗಜುತ್ತಮೋ;
ಉದಕಾ ಉಟ್ಠಹಿತ್ವಾನ, ಥಲೇ ಅಟ್ಠಾಸಿ ದಪ್ಪವಾ.
ಹತ್ಥಿವಜ್ಜೇ ವಿಯೋಜೇತ್ವಾ, ಸಿಲೇಸಂ ಓಸಧಂ ಅಕಾ;
ರಾಜಾ ಆರುಯ್ಹ ಹತ್ಥಿಂ ತಂ, ಕುಮ್ಭೇ ಫುಸಿಯಪಾಣಿನಾ.
‘‘ಲಂಕಾದೀಪಮ್ಹಿ ಸಕಲೇ, ರಜ್ಜಂ ತೇ ತಾತ ಕಣ್ಡುಲ;
ದಮ್ಮೀ’’ತಿ ತಂ ತೋಸಯಿತ್ವಾ, ಭೋಜೇತ್ವಾ ವರಭೋಜನಂ.
ವೇಠಯಿತ್ವಾ ಸಾಟಕೇನ, ಕಾರಯಿತ್ವಾ ಸುವಮ್ಮಿತಂ;
ಸತ್ತಗುಣಂ ಮಾಹಿಸಚಮ್ಮಂ, ಬನ್ಧೇತ್ವಾ ಚಮ್ಮಪಿಟ್ಠಿಯಂ.
ತಸ್ಸೋ’ ಪರಿತೇಲಚಮ್ಮಂ, ದಾಪೇತ್ವಾ ತಂ ವಿಸಜ್ಜಯಿ;
ಅಸನೀವಿಯ ಗಜ್ಜನ್ತೋ, ಸೋ ಗಹೇತ್ವಾ’ಪದ್ದವೇ ಸಹ.
ಪದರಂ ವಿಜ್ಝಿ ದಾಠಾಹಿ, ಉಮ್ಮಾರಂ ಪದಸಾ’ಹನಿ;
ಸದ್ಧಾರಬಾಹಂ ತಂ ದ್ವಾರಂ, ಭೂಮಿಯಂ ಸರವಂ ಪತಿ.
ಗೋಪುರೇ ದಬ್ಬಸಮ್ಭಾರಂ, ಪತನ್ತಂ ಹತ್ತಿಪಿಟ್ಠಿಯಂ;
ಬಾಹಾಹಿ ಪರಿಹರಿತ್ವಾನ, ನನ್ದೀಮಿತ್ತೋ ಪವಟ್ಟಯಿ.
ದಿಸ್ವಾನ ¶ ತಸ್ಸ ಕಿರಿಯಂ, ಕಣ್ಡುಲೋ ತುಟ್ಠಮಾನಸೋ;
ದಾಠಾಪೀಠನವೇರಂ ತಂ, ಛಡ್ಢೇಸಿ ಪಠಮಂ ಕತಂ.
ಅತ್ಥನೋ ಪಿಟ್ಠಿತೋಯೇವ, ಪವೇಸತ್ಥಾಯ ಕಣ್ಡುಲೋ;
ನಿವತ್ತಿತ್ವಾನ ಓಲೋಕಿ, ಯೋಧಂ ತತ್ಥ ಗಜುತ್ತಮೋ.
‘‘ಹತ್ಥಿನಾಕತಮಗ್ಗೇನ, ನಪ್ಪವೇಕ್ಖಾಮಹಂ’’ಇತಿ;
ನನ್ದೀಮಿತ್ತೋ ವಿಚಿನ್ತೇತ್ವಾ, ಪಾಕಾರಂ ಹನಿ ಬಾಹುನಾ.
ಸೋ ಅಟ್ಠಾರಸಹತ್ಥುಚ್ಚೋ, ಪತಿಅಟ್ಠುಸಭೋ ಕಿರ;
ಓಲೋಕಿ ಸುರನಿಮಲಂ, ಅನಿಚ್ಛಂ ಸೋಪಿ ತಂ ಪಥಂ.
ಲಙ್ಘಯಿತ್ವಾನ ಪಾಕಾರಂ,
ನಗರಬ್ಭನ್ತರೇ ಪತಿ;
ಭಿನ್ದಿತ್ವಾ ದ್ವಾರಮೇಕೇಕಂ,
ಗೋಟ್ಠೋ ಸೋಣೋವ ಪಾವಿಸಿ.
ಹತ್ತೀ ಗಹೇತ್ವಾ ರಥಚಕ್ಕಂ, ಮಿತ್ತೋ ಸಕಟಪಞ್ಜರಂ;
ನಾಳಿಕೇರತರುಂ ಗೋಟ್ಠೋ, ನಿಮ್ಮಲೋ ಖಗ್ಗಮುತ್ತಮಂ.
ತಾಲರುಕ್ಖಂ ಮಹಾಸೋಣೋ, ಥೇರಪುತ್ತೋ ಮಹಾಗದಂ;
ವಿಸುಂ ವಿಸುಂ ವೀಥಿಗತಾ, ದಮಿಳೇ ತತ್ಥ ಚುಣ್ಣಯುಂ.
ವಿಜಿತಂ ನಗರಂ ಭೇತ್ವಾ, ಚತುಮಾಸೇನ ಖತ್ತಿಯೋ;
ತಥೋ ಗಿರಿಲಕಂ ಗನ್ತ್ವಾ, ಗಿರಿಯಂ ದಮಿಳಂ ಹನಿ.
ಗನ್ತ್ವಾ ಮಹೇಲನಗರಂ, ತಿಮಹಾಪರಿಖಂ ತತೋ;
ಕದಮ್ಬ ಪುಪ್ಫವಲ್ಲೀಹಿ, ಸಮನ್ತಾ ಪರಿವಾರಿತಂ.
ಏಕದ್ವಾರಂ ದುಪ್ಪವೇಸಂ, ಚತುಮಾಸೇ ವಸಂ ತಹಿಂ;
ಗಣ್ಹಿ ಮಹೇಲರಾಜಾನಂ, ಮನ್ತಯುದ್ಧೇನ ಭೂಮಿಪೋ.
ತತೋ’ನುರಾಧನಗರಂ, ಆಗಚ್ಛನ್ತೋ ಮಹೀಪತಿ;
ಖನ್ಧಾವಾರಂ ನಿವೇಸೇಸಿ, ಪರಿತೋಕಾಸಪಬ್ಬತಂ.
ಮಾಸಮ್ಹಿ ಜೇಟ್ಠಮೂಲಮ್ಹಿ, ತಳಾಕಂ ತತ್ಥ ಕಾರಿಯ;
ಜಲಂ ಕೀಳಿ ತಹಿಂ ಗಾಮೋ, ಪೋಸೋನನಗರವ್ಹಯೋ.
ತಂ ¶ ಯುದ್ಧಾಯಾಗತಂ ಸುತ್ವಾ, ರಾಜಾನಂ ದುಟ್ಠಗಾಮಣಿಂ;
ಅಮಚ್ಚೇ ಸನ್ನಿಪಾತೇತ್ವಾ, ಏಳಾರೋ ಆಹ ಭೂಮಿಪೋ.
‘‘ಸೋ ರಾಜಾ ಚ ಸಯಂಯೋಧೋ,
ಯೋಧಾ ಚಸ್ಸ ಮಹೂಕಿರ;
ಅಮಚ್ಚೋ ಕಿನ್ನು ಕಾತಬ್ಬಂ,
ಕಿನ್ತಿ ಮಞ್ಞನ್ತಿ ನೋ ಇಮೇ.
ದೀಘಜತ್ತುಪ್ಪಭುತಯೋ, ಯೋಧಾ ಏಳಾರರಾಜಿನೋ;
‘‘ಸುವೇ ಯುದ್ಧಂ ಕರಿಸ್ಸಾಮಿ’’, ಇತಿ ತೇ ನಿಚ್ಛಯಂ ಕರುಂ.
ದುಟ್ಠಗಾಮಣಿರಾಜಾಪಿ, ಮನ್ತೇತ್ವಾ ಮಾತುಯಾ ಸಹ;
ತಸ್ಸಾ ಮತೇನ ಕಾರೇಸಿ, ದ್ವತ್ತಿಂಸ ಬಲಕೋಟ್ಠಕೇ.
ರಾಜಚ್ಛತ್ತಧರೇ ತತ್ಥ, ಠಪೇಸಿ ರಾಜರೂಪಕೇ;
ಅಬ್ಭನ್ತರೇ ಕೋಟ್ಠಕೇ ತು, ಸಯಂ ಅಟ್ಠಾಸಿ ಭೂಪತಿ.
ಏಳಾರರಾಜಾ ಸನ್ನದ್ಧೋ, ಮಹಾಪಬ್ಬತ ಹತ್ಥಿನಂ;
ಆರುಯ್ಹ ಅಗಮಾ ತತ್ಥ, ಸಯೋಗ್ಗ ಬಲವಾಹನೋ.
ಸಙ್ಗಾಮೇ ವತ್ತಮಾನಮ್ಹಿ, ದೀಘಜತ್ತು ಮಹಬ್ಬಲೋ;
ಆದಾಯ ಖಗ್ಗಫಲಕಂ, ಯುಜ್ಝಮಾನೋ ಭಯಾನಕೋ.
ಹತ್ಥೇ ಅಟ್ಠರಸು’ಗ್ಗನ್ತ್ವಾ, ನಭಂ ತಂ ರಾಜರೂಪಕಂ;
ಛಿನ್ದಿತ್ವಾ ಅಸಿನಾ ಭಿನ್ದಿ, ಪಠಮಂ ಬಲಕೋಟ್ಠಕಂ.
ಏವಂ ಸೇಸೇಪಿ ಭಿನ್ದಿತ್ವಾ, ಮಲಕೋಟ್ಠೇ ಮಹಬ್ಬಲೋ;
ಠಿತಂ ಗಾಮಣಿರಾಜೇನ, ಬಲಕೋಟ್ಠಮುಪಾಗಮಿ.
ಯೋಧೋ ಸೋ ಸುರನಿಮಲೋ, ಗಚ್ಛನ್ತಂ ರಾಜಿನೋ’ಪರಿ;
ಸಾವೇತ್ವಾ ಅತ್ತನೋ ನಾಮಂ, ತಮಕ್ಕೋಸಿ ಮಹಬ್ಬಲೋ.
ಇತರೋ ‘‘ತಂ ವಧಿಸ್ಸ’’ನ್ತಿ, ಕುದ್ಧೋ ಆಕಾಸಮುಗ್ಗಮಿ;
ಇತರೋ ಓತರನ್ತಸ್ಸ, ಫಲಕಂ ಉಪನಾಮಯಿ.
‘‘ಛಿನ್ದಾ ಮೇತಂ ಸಫಲಕಂ’’, ಇತಿ ಚಿನ್ತಿಯ ಸೋ ಪನ;
ಫಲಕಂ ಹನಿ ಖಗ್ಗೇನ, ತಂ ಮುಞ್ಚಿಯಿ’ ತರೋಸಯಿ.
ಕಪ್ಪೇನ್ತೋ ಮುತ್ತಫಲಕಂ, ದೀಘಜತ್ತು ತಹಿಂ ಪತಿ;
ಉಟ್ಠಾಯ ಸೂರನಿಮಿಲೋ, ಪತಿತಂ ಸತ್ತಿಯಾ’ಹನಿ.
ಸಙ್ಖಂ ¶ ಧಮಿ ಫುಸ್ಸದೇವೋ, ಸೇನಾ ಭಿಜ್ಜಿತ್ಥ ದಾಮಿಳಿ;
ಏಳರೋಪಿ ನಿವತ್ತಿತ್ಥ, ಘಾತೇಸುಂ ದಮಿಳೇ ಬಹೂ.
ತತ್ಥ ವಾಪಿ ಜಲಂ ಆಸಿ, ಹತಾನಂ ಲೋಹಿತಾ ವಿಲಂ;
ತಸ್ಮಾ ಕುಲತ್ಥವಾ ಪೀತಿ, ನಾಮತೋ ವಿಸ್ಸುತಂ ಅಹು.
ಚರಾಪೇತ್ವಾ ತಹಿಂ ಭೇರಿಂ, ದುಟ್ಠಗಾಮಣಿ ಭೂಪತಿ;
‘‘ನ ಹನಿಸ್ಸತು ಏಳಾರಂ, ಮಂಮುಞ್ಚಿಯ ಪರೋ’’ಇತಿ.
ಸನ್ನದ್ಧೋ ಸಯಮಾರುಯ್ಹ, ಸನ್ನದ್ಧಂ ಕಣ್ಡುಲಂ ಕರಿಂ;
ಏಳಾರಂ ಅನುಬನ್ಧನ್ತೋ, ದಕ್ಖಿಣದ್ವಾರಮಾಗಮಿ.
ಪುರದಕ್ಖಿಣದ್ವಾರಮ್ಹಿ, ಉಭೋ ಯುಜ್ಝಿಂಸು ಭೂಮಿಪಾ;
ತೋಮರಂ ಖಿಪಿ ಏಳಾರೋ, ಗಾಮಣಿ ತಮವಞ್ಚಯಿ.
ವಿಜ್ಝಾಪೇಸಿ ಚ ದನ್ತೇಹಿ, ತಂ ಹತ್ಥಿಂ ಸಕಹತ್ಥಿನಾ;
ತೋಮರಂ ಖಿಪಿ ಏಳಾರಂ, ಸಹತ್ಥಿ ತತ್ಥ ಸೋ ಪತಿ.
ತತೋ ವಿಜಿತಸಙ್ಗಾಮೋ, ಸಯೋಗ್ಗಬಲವಾಹನೋ;
ಲಂಕಂ ಏಕಾತಪತ್ತಂ ಸೋ, ಕತ್ವಾನ ಪಾವಿಸಿ ಪುರಂ.
ಪುರಮ್ಹಿ ಭೇರಿಂ ಚಾರೇತ್ವಾ, ಸಮನ್ತಾ ಯೋಜನೇ ಜನೇ;
ಸನ್ನಿಪಾತಿಯ ಕಾರೇಸಿ, ಪೂಜಂ ಏಳಾರರಾಜಿನೋ.
ತಂ ದೇಹಪತಿತಠಾನೇ, ಕೂಟಾಗಾರೇನ ಝಾಪಯಿ;
ಚೇತಿಯಂ ತತ್ಥ ಕಾರೇಸಿ, ಪರಿಹಾರಮದಾಸಿ ಚ.
ಅಜ್ಜಾಪಿ ಲಂಕಾಪತಿನೋ, ತಂ ಪದೇಸಸಮೀಪಗಾ;
ತೇನೇವ ಪರಿಹಾರೇನ, ನ ವಾದಾಪೇನ್ತಿ ತೂರಿಯಂ.
ಏವಂ ದ್ವತ್ತಿಂಸ ದಮಿಳ, ರಾಜಾನೋ ದುಟ್ಠಗಾಮಣಿ;
ಗಣ್ಹಿತ್ವಾ ಏಕಚ್ಛತ್ತೇನ, ಲಂಕಾರಜ್ಜಮಕಾಸಿ ಸೋ.
ವಿಜಿತೇ ನಗರೇ ಭಿನ್ನೇ, ಯೋಧೋ ಸೋ ದೀಘಜತ್ತುಕೋ;
ಏಳಾರಸ್ಸ ನಿವೇದೇತ್ವಾ, ಭಾಗಿನೇಯ್ಯಸ್ಸ ಯೋಧತಂ.
ತಸ್ಸ ಹಲ್ಲುಕ ನಾಮಸ್ಸ, ಭಾಗಿನೇಯ್ಯಸ್ಸ ಅತ್ತನೋ;
ಪೇಸಯೀ ಚಾಗಮತ್ಥಾಯ, ತಸ್ಸ ಸುತ್ವಾನ ಹಲ್ಲುಕೋ.
ಏಳಾರದಡ್ಢದಿವಸಾ, ಸತ್ತಮೇ ದಿವಸೇ ಇಧ;
ಪುರಿಸಾನಂ ಸಹಸ್ಸೇಹಿ, ಸಟ್ಠಿಯಾ ಸಹ ಓತರಿ.
ಓತಿಣ್ಣೋ ಸೋ ಸುಣಿತ್ವಾಪಿ, ಪತನಂ ತಸ್ಸ ರಾಜಿನೋ;
‘‘ಯುಜ್ಝಿಸ್ಸಾಮೀ’’ತಿ ಲಜ್ಜಾಯ, ಮಹಾತಿತ್ಥಂ ಇಧಾಗಮಾ.
ಖನ್ಧಾವಾರಂ ¶ ನಿವೇಸೇಸಿ, ಗಾಮೇ ಕೋಳಮ್ಬಹಾಲಕೇ;
ರಾಜಾ ತಸ್ಸಾ’ಗಮಂ ಸುತ್ವಾ, ಯುದ್ಧಾಯ ಅಭಿನಿಕ್ಖಮಿ.
ಯುದ್ಧಸನ್ನಹ ಸನ್ನದ್ಧೋ, ಹತ್ಥಿಮಾರುಯ್ಹ ಕಣ್ಡುಲಂ;
ಹತ್ಥಸ್ಸ ರಥಯೋ ಧೇಹಿ, ಪನ್ತೀಹಿ ಚ ಅನುನಕೋ.
ಉಮ್ಮಾದಫುಸ್ಸೋ ದೇವೋ ಸೋ, ದೀಪೇ ಅಗ್ಗಧನುಗ್ಗಹೋ;
ದಸಡ್ಢಾಯುಧಸನದ್ಧೋ, ಸೇಸಯೋಧಾ ಚ ಅನ್ವಗುಂ.
ಪವತ್ತೇ ತುಮೂಲೇ ಯುದ್ಧೇ, ಸನ್ನದ್ಧೋ ಭಲ್ಲುಕೋ ತಹಿಂ;
ರಾಜಾಭಿಮುಖ ಮಾಯಾಸಿ, ನಾಗರಾಜಾ ತು ಕಣ್ಡುಲೋ.
ತಂ ವೇಗಮನ್ದಿಭಾವತ್ಥಂ, ಪಚ್ಚೋಸಕ್ಕಿ ಸನಿಂ ಸನಿಂ;
ಸೇನಾಪಿ ಸದ್ಧಿಂ ತೇನೇವ, ಪಚ್ಚೋಸಕ್ಕಿ ಸನಿಂ ಸನಿಂ.
ರಾಜಾಹ ‘‘ಪುಬ್ಬೇ ಯುದ್ಧೇಸು, ಅಟ್ಠವೀಸತಿಯಾ ಅಯಂ;
ನ ಪಚ್ಚೋಸಕ್ಕಿ ಕಿಂ ಏತಂ, ಫುಸ್ಸದೇವಾ’’ತಿ ಆಹ ಸೋ.
ಜಯೋ ನೋ ಪರಮೋ ದೇವ, ಜಯಭೂಮಿ ಮಯಂ ಗಜೋ;
ಪಚ್ಚೋಸಕ್ಕತಿ ಪೇಕ್ಖನ್ತೋ, ಜಯಠಾನಮ್ಹಿ ಠಸ್ಸತಿ.
ನಾಗೋ’ಥ ಪಚ್ಚೋಸಕ್ಕಿತ್ವಾ, ಫುಸ್ಸದೇವಸ್ಸ ಪಸ್ಸತೋ;
ಮಹಾವಿಹಾರಸೀಮನ್ತೇ, ಅಟ್ಠಾಸಿ ಸುಪ್ಪತಿಟ್ಠಿತೋ.
ತತ್ರಟ್ಠಿತೋ ನಾಗರಾಜಾ, ಭಲ್ಲುಕೋ ದಮಿಳೋ ತಹಿಂ;
ರಾಜಾಭಿಮುಖಮಾಗನ್ತ್ವಾ, ಉಪ್ಪಣ್ಡೇಸಿ ಮಹೀಪತಿ.
ಮುಖಂ ಪಿಧಾಯ ಖಗ್ಗೇನ, ರಾಜಾ ಅಕ್ಕೋಸಿ ತಂ ಪನ;
‘‘ರಞ್ಞೋ ಮುಖಮ್ಹಿ ಪಾತೇಮಿ’’, ಇತಿ ಕಣ್ಡಞ್ಚ ಸೋ ಖಿಪಿ.
ಆಹಚ್ಚ ಸೋ ಖಗ್ಗತಲಂ, ಕಣ್ಡೋ ಪಪತಿ ಭೂಮಿಯಂ;
‘‘ಮುಖೇ ವಿದ್ಧೋ’’ತಿ ಸಞ್ಞಾಯ, ಉಕ್ಕಟ್ಠಿಂ ಭಲ್ಲುಕೋ ಅಕಾ.
ರಞ್ಞೋ ಪಚ್ಛಾ ನಿಸಿನ್ನೋ ಭೋ, ಫುಸ್ಸದೇವೋ ಮಹಬ್ಬಲೋ;
ಕಣ್ಡ ಖಿಪಿಮುಖೇ ತಸ್ಸ, ಘಟ್ಟೇನ್ತೋ ರಾಜಕುಣ್ಡಲಂ.
ರಾಜಾನಂ ಪಾದತೋ ಕತ್ವಾ, ಪತಮಾನಸ್ಸ ತಸ್ಸ ತು;
ಖಿಪಿತ್ವಾ ಅಪರಂ ಕಣ್ಡಂ, ವಿಜ್ಝಿತ್ವಾ ತಸ್ಸ ಜಣ್ಡುಕಂ.
ರಾಜಾನಂ ಸೀಸತೋ ಕತ್ವಾ, ಪಾತೇಸೀ ಲಹುಹತ್ಥಕೋ;
ಭಲ್ಲುಕೇ ಪತಿತೇ ತಸ್ಮಿಂ, ಜಯನಾದೋ ಪವತ್ತಥ.
ಫುಸ್ಸದೇವೋ ¶ ತಹಿಂಯೇವ, ಞಾಪೇತುಂ ದೋಸ ಮತ್ತನೋ;
ಕಣ್ಡವಲ್ಲಿಂ ಸಕಂ ಛೇತ್ವಾ, ಪಸತಂ ಲೋಹಿತಂ ಸಯಂ.
ರಧಞ್ಞಾ ದಸ್ಸೇಸಿ ತಂ ದಿಸ್ವಾ, ರಾಜಾ ತಂ ಪುಚ್ಛಿ‘‘ಕಿಂ’’ಇತಿ;
ರಾಜ ದಣ್ಡೋ ಕತೋ ಮೇತಿ, ಸೋ ಅವೋಚ ಮಹೀಪತಿ.
ಕೋಧೋ ದೋಸೋತಿ ವುತ್ತೋವ,
ಆಹ ಕುಣ್ಡಲ ಘಟ್ಟನಂ;
ಅದೋಸಂ ದೋಸಮಞ್ಞಾಯ,
ಕಿಮೇತಂ ಕರಿ ಭಾತಿಕ.
ಇತಿ ವತ್ವಾ ಮಹಾರಾಜಾ, ಕತಞ್ಞು ಇಧ ಮಾಹ ಚ;
‘‘ಕಣ್ಡಾನುಚ್ಛವಿಕೋ ತುಯ್ಹಂ, ಸಕ್ಕಾರೋ ಹೇಸ್ಸತೇ ಮಹಾ.
ಘಾತೇತ್ವಾ ದಮಿಳೇ ಸಬ್ಬೇ, ರಾಜಾ ಲದ್ಧಜಯೋ ಕತೋ;
ಪಾಸಾದ ತಲಮಾರುಯ್ಹ, ಸೀಹಾಸನಗತೋ ತಹಿಂ.
ನಾಟಕಾಮಚ್ಚ ಮಜ್ಝಮ್ಹಿ, ಫುಸ್ಸದೇವಸ್ಸ ತಂ ಸರಂ;
ಆಣಾಪೇತ್ವಾ ಠಪಾಪೇತ್ವಾ, ಪುಂಖೇನ ಉಜುಕಂ ತಲೇ.
ಕಹಾಪಣೇಹಿ ಕಣ್ಡಂ ತಂ, ಆಸಿತ್ತೇ’ಯು ಪರೂಪರಿ;
ಛಾದಾಪೇತ್ವಾ ದಾಪೇಸಿ, ಫುಸ್ಸದೇವಸ್ಸ ತಂ ಖಣೇ.
ನರಿನ್ದಪಾಸಾದತಲೇ, ನರಿನ್ದೋಥ ಅಲಙ್ಕತೇ;
ಸುಗನ್ಧದೀಪುಜ್ಜಲಿತೇ, ನಾನಾಗನ್ಧಸಮಾಯುತೇ.
ನಾಟಕ ಜನಯೋಗೇನ, ಅಚ್ಛರಾಹಿ ಚ ಭೂಸಿತೇ;
ಅನಗ್ಘತ್ಥರಣತ್ಥಿಣ್ಣೇ, ಮುದುಕೇ ಸಯನೇ ಸುಭೇ.
ಸಯಿತೋ ಸಿರಿಸಮ್ಪತ್ತಿಂ, ಮಹತಿಂ ಅಪಿಪೇಕ್ಖಿಯ;
ಕತಂ ಅಕ್ಖೋಭಿಣಿಘಾತಂ, ಸರನ್ತೋ ನ ಸುಖಂ ಲಭಿ.
ಯಿಯಙ್ಗುದೀಪೇ ಅರಹನ್ತೋ, ಞತ್ವಾ ತಂ ತಸ್ಸತಕ್ಕಿತಂ;
ಅಟ್ಠಾ’ರಹನ್ತೇ ಪಾಹೇಸುಂ, ತಮಸ್ಸಾಸೇತುಮಿಸ್ಸರಂ.
ಆಗಮ್ಮ ತೇ ಮಜ್ಝಾಯಾಮೇ, ರಾಜ ದ್ವಾರಮ್ಹಿ ಓತರುಂ;
ನಿವೇದಿ ತಬ್ಭಾಗಮನಾ, ಪಾಸಾದ ತಲೇಮಾರುಹುಂ.
ವನ್ದಿತ್ವಾ ¶ ತೇ ಮಹಾರಾಜ, ನಿಸೀದಾಪಿಯ ಆಸನೇ;
ಕತ್ವಾ ವಿವಿಧಸಕ್ಕಾರಂ, ಪುಚ್ಛಿ ಆಗತಕಾರಣಂ.
ಪಿಯಙ್ಗುದೀಪೇ ಸಙ್ಘೇನ, ಪೇಸಿತಂ ಮನುಜಾಧಿಪ;
ತಮಸ್ಸಾ ಸಯಿತುಂ ಅಮ್ಹೇ, ಇತಿ ರಾಜಾ ಪುನಾ’ಹತೇ.
‘‘ಕಥಂ ನು ಭನ್ತೇ ಅಸ್ಸಾಸೋ, ಮಮ ಹೇಸ್ಸತಿ ಯೇನ ಮೇ;
ಅಕ್ಖೋಭಿಣಿಮಹಾಸೇನ, ಘಾತೋ ಕಾರಾಪಿತೋ’’ಇತಿ.
‘‘ಸಗ್ಗಮಗ್ಗನ್ತರಾಯೋ ಚ, ನತ್ಥಿ ತೇ ತೇನ ಕಮ್ಮುನಾ;
ದೀಯಡ್ಢಮನುಜಾ ಚೇ’ತ್ಥ, ಘಾತಿತಾ ಮನುಜಾಧಿಪ.
ಸರಣೇಸು ಠಿತೋ ಏಕೋ, ಪಞ್ಚಸೀಲೇಪಿ ಚಾ’ಪರೋ;
ಮಿಚ್ಛಾದಿಟ್ಠಿ ಚ ದುಸ್ಸೀಲೋ, ಸೇಸಾ ಪಸುಸಮಾಮತಾ.
ಜೋತಯಿಸ್ಸಸಿ ಚೇವ ತ್ವಂ, ಬಹುಧಾ ಬುದ್ಧಸಾಸನಂ;
ಮನೋವಿಲೇಖಂ ತಸ್ಮಾ ತ್ವಂ, ವಿನೋದಯ ನರಿಸ್ಸರ.
ಇತಿ ವುತ್ತೋ ಮಹಾರಾಜಾ, ತೇಹಿ ಅಸ್ಸಾಸಮಾಗತೋ;
ವನ್ದಿತ್ವಾ ತೇ ವಿಸಜ್ಜೇತ್ವಾ, ಸಯಿತೋ ಪುನ ಚಿನ್ತಯಿ.
ವಿನಾ ಸಙ್ಘೇನ ಆಹಾರಂ, ಮಾಭುಞ್ಜೇಥ ಕದಾಚಿಪಿ’’;
ಇತಿ ಮಾತಾಪಿತಾ’ಹಾರೇ, ಸಪಿಂಸು ದಹರೇ’ ವನೋ.
ಅದತ್ವಾ ಭಿಕ್ಖುಸಙ್ಘಸ್ಸ, ಭುತ್ತಂ ಅತ್ಥಿ ನುಖೋ ಇತಿ;
ಅದ್ದಸ ಪಾತರಾಸಮ್ಹಿ, ಏಕಂ ಮರಿಚವಟ್ಟಿಕಂ.
ಸಙ್ಘಸ್ಸ ಅಟ್ಠಪೇತ್ವಾವ ಪರಿಭುತ್ತಂ ಸತಿಂ ವಿನಾ;
ತದತ್ಥಂ ದಣ್ಡಕಮ್ಮಂ ಮೇ, ಕತ್ತಬ್ಬನ್ತಿ ಚ ಚಿನ್ತಯಿ.
ಏತೇ ತೇನೇಕಕೋಟಿ ಇಧ ಮನುಜಗಣೇ ಘಾತಿತೇ ಚಿನ್ತಯಿತ್ವಾ,
ಕಾಮಾನಂ ಹೇತು ಏತಂ ಮನಸಿ ಚ ಕಯಿರಾ ಸಾಧು ಆದೀನವಂ ತಂ;
ಸಬ್ಬೇಸಂ ಘಾತನಿಂ ತಂ ಮನಸಿ ಚ ಕಯಿರಾ’ ನಿಚ್ಚತಂ ಸಾಧು ಸಾಧು,
ಏವಂ ದುಕ್ಖಾ ಪಮೋಕ್ಖಂ ಸುಭಗತಿ ಮಹವಾ ಪಾಪುಣೇಯ್ಯಾ’ಚೀರೇನಾತಿ.
ಸುಜನಪ್ಪಸಾದಸಂವೇಗತ್ಥಾಯ ಕತೇ ಮಹಾವಂಸೇ
ದುಟ್ಠಗಾಮಣಿವಿಜಯೋ ನಾಮ
ಪಞ್ಚವೀಸತಿಮೋ ಪರಿಚ್ಛೇದೋ.
ಛಬ್ಬೀಸತಿಮ ಪರಿಚ್ಛೇದ
ಮರಿಚವಟ್ಟಿಕವಿಹಾರಮಹೋ
ಏಕಚ್ಛತ್ತಂ ¶ ಕರಿತ್ವಾನ, ಲಂಕಾರಜ್ಜಂ ಮಹಾಯಸೋ;
ನಾನನ್ತರಂ ಸಂವಿದಹಿ, ಯೋಧಾನಂ ಸೋ ಯಥಾರಹಂ.
ಥೇರಪುತ್ತಾಭಯೋ ಯೋಧೋ, ದಿಯ್ಯಮಾನಂ ನ ಇಚ್ಛಿತಂ;
ಪುಚ್ಛಿತೋವ ಕಿಮತ್ಥನ್ತಿ, ಯುದ್ಧಮತ್ಥೀತಿ ಅಬ್ರವಿ.
ಏಕರಜ್ಜೇ ಕತೇ ಯುದ್ಧಂ, ಕಿನಾಮತ್ತೀತಿ ಪುಚ್ಛಿತೋ;
ಯುದ್ಧಂ ಕಿಲೇಸ ಚೋರೇಹಿ, ಕರಿಸ್ಸಾಮಿ ಸುದುಜ್ಜಯಂ.
ಇಚ್ಚೇವ ಮಾಹ ತಂ ರಾಜಾ, ಪುನಪ್ಪುನಂ ನಿಸೇಧಯಿ;
ಪುನಪ್ಪುನಂ ಸೋಯಾಚಿತ್ವಾ, ರಞ್ಞೋನುಞ್ಞಾಯ ಪಬ್ಬಜಿ.
ಪಬ್ಬಜಿತ್ವಾ ಚ ಕಾಲೇನ, ಅರಹತ್ತಮಪಾಪುಣಿ;
ಪಞ್ಚಖೀಣಾಸವಸತ-ಪರಿವಾಏರಾ ಅಹೋಸಿ ಚ.
ಛತ್ತಮಙ್ಗಲ ಸತ್ತಾಹೇ, ಗತೇ ಗತಭಯೋ’ ಭಯೋ;
ರಾಜಾ ಕತಾ ಭಿಸೇಕೋವ, ಮಹತಾ ವಿಭವೇನ ಸೋ.
ತಿಸ್ಸವಾಪಿ’ಮಗಾ ಕೀಳ-ವಿಧಿನಾ ಸಮಲಙ್ಕ ತಂ;
ಕೀಳಿತುಂ ಅಭಿಸಿತ್ತಾನಂ, ಚಾರಿತ್ತಞ್ಚಾ ನುರಕ್ಖಿತುಂ.
ರಞ್ಞೋ ಪರಿಚ್ಛದಂ ಸಬ್ಬಂ, ಉಪಾಯನಸತಾನಿ ಚ;
ಮರಿಚವಟ್ಟಿವಿಹಾರಸ್ಸ, ಠಾನಮ್ಹಿ ಠಪಯಿಂಸು ಚ.
ತತ್ಥೇವ ಥೂಪಠಾನಮ್ಹಿ, ಸಧಾತುಂ ಕುನ್ತಮುತ್ತಮಂ;
ಠಪೇಸುಂ ಕುನ್ತಧರಕಾ, ಉಜುಕಂ ರಾಜಮಾನುಸಾ.
ಸಹೋರೋಧೋ ಮಹಾರಾಜಾ, ಕೀಳಿತ್ವಾ ಸಲಿಲೇ ದಿವಾ;
ಸಾಯಮಾಹಂ ಗಮಿಸ್ಸಾಮ, ಕುನ್ತಂ ವಡ್ಢೇಥ ಭೋ’’ಇತಿ.
ಚಾಲೇತುಂ ತಂ ನ ಸಕ್ಖಿಂಸು, ಕುನ್ತಂ ರಾಜಾಧಿಕಾರಿಕಾ;
ಗನ್ಧಾಮಾಲಾಹಿ ಪೂಜೇಸುಂ, ರಾಜಸೇನಾಸಮಾಗತಾ.
ರಾಜಾ ¶ ಮಹನ್ತಂ ಅಚ್ಛೇರಂ, ದಿಸ್ವಾ ತಂ ಹಟ್ಠಮಾನಸೋ;
ವಿಧಾಯ ತತ್ಥ ಆರಕ್ಖಂ, ಪವಿಸಿತ್ವಾ ಪುರಂ ತತೋ.
ಕುನ್ತಂ ಪರಿಕ್ಖಿಪಾಪೇತ್ವಾ, ಚೇತಿಯಂ ತತ್ಥ ಕಾರಯಿ;
ಥೂಪಂ ಪರಿಕ್ಖಿಪಾಪೇತ್ವಾ, ವಿಹಾರಞ್ಚ ಅಕಾರಯಿ.
ತೀಹಿ ವಸ್ಸೇಹಿ ನಿಠಾಸಿ, ವಿಹಾರೋ ಸೋ ನರಿಸ್ಸರೋ;
ಸಙ್ಘಂ ಸಸನ್ನಿಪಾತೇಸಿ, ವಿಹರಮಹಾಕಾರಣಾ.
ಭಿಕ್ಖುನಂ ಸತಸಹಸ್ಸಾನಿ, ತದಾ ಭಿಕ್ಖುನಿಯೋ ಪನ;
ನವುತಿ ಚ ಸಹಸ್ಸಾನಿ, ಅಭವಿಂಸು ಸಮಾಗತಾ.
ತಸ್ಮಿಂ ಸಮಾಗಮೇ ಸಙ್ಘಂ, ಇದಮಾಕ ಮಹೀಪತಿ;
‘‘ಸಙ್ಘಂ ಭನ್ತೇ ವಿಸರಿತ್ವಾ, ಭುಞ್ಜಿಂ ಮರಿಚವಟ್ಟಿಕಂ.
ಹಸ್ಸೇ’ತಂ ದಣ್ಡಕಮ್ಮಂ ಮೇ, ಭವತೂತಿ ಅಕಾರಯಿ;
ಸಚೇತಿಯಂ ಮರಿಚವಟ್ಟಿ-ವಿಹಾರಂ ಸುಮನೋಹರಂ.
ಪತಿಗ್ಗಣ್ಹಾತು ತಂ ಸಙ್ಘೋ, ಇತಿ ಸೋ ದಕ್ಖಿಣೋದಕಂ;
ಪಾತಿತ್ವಾ ಭಿಕ್ಖುಸಙ್ಘಸ್ಸ, ವಿಹಾರಂ ಸುಮನೋ ಅದಾ.
ವಿಹಾರೇ ತಂ ಸಮನ್ತಾಪಿ, ಮಹನ್ತಂ ಮಣ್ಡಪಂ ಸುಭಂ;
ಕಾರೇತ್ವಾ ತತ್ಥ ಸಙ್ಘಸ್ಸ, ಮಹಾದಾನಂ ಪವತ್ತಯಿ.
ಪಾದೇ ಪತಿಟ್ಠಾಪೇತ್ವಾಪಿ,
ಜಲೇ ಅಭಯವಾಪಿಯಾ;
ಕತೋ ಸೋ ಮಣ್ಡಪೋ ಆಸಿ,
ಸೇಸೋ ಕಾಸೇ ಕಥಾವಕಾ.
ಸತ್ತಾಹಂ ಅನ್ನಪಾನಾದಿಂ, ದತ್ವಾನ ಮನುಜಾಧಿಪೋ;
ಅದಾ ಸಾಮಣಕಂ ಸಬ್ಬಂ, ಪರಿಕ್ಖಾರಂ ಮಹಾರಹಂ.
ಅಹು ಸತಸಹಸ್ಸಗ್ಘೋ, ಪರಿಕ್ಖಾರೋ ಸ ಆದಿಕೋ;
ಅನ್ತೇ ಸಹಸ್ಸಗ್ಘನಕೋ, ಸಬ್ಬ ಸಙ್ಘೋ ಚ ತಂಲಭಿ.
ಯುದ್ಧೇ ದಾನೇ ಚ ಸೂರೇನ, ಸೂರಿನಾ ರತನತ್ತಯೇ;
ಪಸನ್ನಾಮಲಚಿತ್ತೇನ, ಸಾಸನುಜೋತ ನತ್ಥಿನಾ.
ರಞ್ಞಾ ¶ ಕತಞ್ಞುನಾ ತೇನ, ಥೂಪಕಾರಾಪನಾದಿತೋ;
ವಿಹಾರ ಮಹನನ್ತಾನಿ, ಪೂಜೇತುಂ ರತನತ್ತಯಂ.
ಪರಿಚ್ಚತ್ತಧನಾನೇ’ತ್ಥ, ಅನಗ್ಘಾನಿ ವಿಮುಞ್ಚಿಯ;
ಸೇಸಾನಿ ಹೋನ್ತಿ ಏಕಾಯ, ಊನವೀಸತಿಕೋಟಿಯೋ.
ತೋಗಾ ದಸದ್ಧವಿಧ ದೋಸವಿದೂಸಿತಾಪಿ,
ಪಞ್ಞಾವಿಸೇಸ ಸಹಿತೇಹಿ ಜನೇಹಿ ಪತ್ತಾ;
ಹೋನ್ತೇವ ಪಞ್ಚಗುಣಯೋಗ ಗಹಿತಸಾರಂ,
ಇಚ್ಚಸ್ಸ ಸಾರಗಹಣೇ ಮತಿಮಾಯತೇಯ್ಯಾತಿ.
ಸುಜನಪ್ಪಸಾದಸಂವೇಗತ್ಥಾಯ ಕತೇ ಮಹಾವಂಸೇ
ಮರಿಚವಟ್ಟಿಕವಿಹಾರಮಹೋನಾಮ
ಛಬ್ಬೀಸತಿಮೋ ಪರಿಚ್ಛೇದೋ.
ಸತ್ತವೀಸತಿಮ ಪರಿಚ್ಛೇದ
ಲೋಹಪಾಸಾದಮಹೋ
ತತೋ ರಾಜಾ ವಿಚಿನ್ತೇಸಿ, ವಿಸ್ಸುತಂ ಸುಸ್ಸುತಂ ಸುತಂ;
ಮಹಾಪಞ್ಞೋ ಸದಾ ಪುಞ್ಞೋ, ಪಞ್ಞಾಯ ಕತನಿಚ್ಛಯೋ.
‘‘ದೀಪಪ್ಪಸಾದಕೋ ಥೇರೋ, ರಾಜಿನೋ ಅಯ್ಯಕಸ್ಸ ಮೇ;
ಏವಂ ಕಿರಾಹನತ್ತಾ ತೇ, ದುಟ್ಠಗಾಮಣಿಭೂಪತಿ.
ಮಹಾಪುಞ್ಞೋ ಮಹಾಥೂಪಂ, ಸೋಣ್ಣಮಾಲಿಂ ಮನೋರಮಂ;
ವೀಸಂಹತ್ಥಸತಂ ಉಚ್ಚಂ, ಕಾರೇಸ್ಸತಿ ಅನಾಗತೇ.
ಪುನೋ ಉಪೋಸಥಾಗಾರಂ, ನಾನಾರತನಮಣ್ಡಿತಂ;
ನವಭೂಮಂ ಕರಿತ್ವಾನ, ಲೋಹಪಾಸಾದ ಮೇವ ಚ.
ಇತಿ ಚಿನ್ತಿಯ ಭೂಮಿನ್ದೋ, ಲಿಖಿತ್ವೇವಂ ಠಪಾಪಿತಂ;
ಪೇಕ್ಖಾಪೇನ್ತೋ ರಾಜಗೇಹೇ, ಠಿತಂ ಏವ ಕರಣ್ಡಕೇ.
ಸೋವಣ್ಣಪಟ್ಟಂ ಲದ್ಧಾನ, ಲೇಖಂ ತತ್ಥ ಅವಾಚಯಿ;
‘‘ಚತ್ತಾಲೀಸಸತಂ ವಸ್ಸಂ, ಅತಿಕ್ಕಮ್ಮ ಅನಾಗತೇ.
ಕಾಕವಣ್ಣಸುತೋ ¶ ದುಟ್ಠ-ಗಾಮಣಿಮನುಜಾಧಿಪೋ;
ಇದಞ್ಚಿದಞ್ಚ ಏವಞ್ಚ, ಕಾರೇಸ್ಸತೀ’’ತಿ ವಾಚಿತಂ.
ಸುತ್ವಾ ಹಟ್ಠೋ ಉದಾನೇತ್ವಾ, ಅಪ್ಪೋಟ್ಠೇಸಿ ಮಹೀಪತಿ;
ತತೋ ಪಾತೋ’ವ ಗನ್ತ್ವಾನ, ಮಹಾಮೇಘವನಂ ಸುಭಂ.
ಸನ್ನಿಪಾತಂ ಕಾರಯಿತ್ವಾ, ಭಿಕ್ಖುಸಙ್ಘಸ್ಸ ಅಬ್ರವಿ;
‘‘ವಿಮಾನತುಲ್ಯಂ ಪಾಸಾದಂ, ಕಾರಯಿಸ್ಸಾಮಿ ವೋ ಅಹಂ.
ದಿಬ್ಬಂ ವಿಮಾನಂ ಪೇಸೇತ್ವಾ, ತದಾ ಲೇಖಂ ಅದಾಥ ಮೇ’’;
ಭಿಕ್ಖುಸಙ್ಘೋ ವಿಸಜ್ಜೇಸಿ, ಅಟ್ಠ ಖೀಣಾಸವೇ ತಹಿಂ.
ಕಸ್ಸಪಮುನಿನೋ ಕಾಲೇ, ಅಸೋಕೋ ನಾಮ ಬ್ರಾಹ್ಮಣೋ;
ಅಟ್ಠ ಸಲಾಕಭತ್ತಾನಿ, ಸಙ್ಘಸ್ಸ ಪರಿಣಾಮಿಯ.
ಭರಣಿಂ ನಾಮ ದಾಸಿಂ ಸೋ, ‘‘ನಿಚ್ಚಂ ದೇಹೀ’’ತಿ ಅಬ್ರವಿ;
ದತ್ವಾ ಸಾ ತಾನಿ ಸಕ್ಕಚ್ಚಂ, ಯಾವಜೀವಂ ತತೋ ಚುತಾ.
ಆಕಾಸಟ್ಠವಿಮಾನಮ್ಹಿ, ನಿಬ್ಬತ್ತಿರುಚಿರೇ ಸುಭೇ;
ಅಚ್ಛರಾನಂ ಸಹಸ್ಸೇನ, ಸದಾ’ಸಿ ಪರಿವಾರಿತಾ.
ತಸ್ಸಾ ರತನಪಾಸಾದೋ, ದ್ವಾದಸಯೋಜನುಗ್ಗತೋ;
ಯೋಜನಾನಂ ಪರಿಕ್ಖೇಪೋ, ಚತ್ತಾಲೀಸಞ್ಚ ಅಟ್ಠ ಚ.
ಕೂಟಾಗಾರಸಹಸ್ಸೇನ, ಮಣ್ಡಿತೋ ನವಭೂಮಿಕೋ;
ಸಹಸ್ಸಗಬ್ಭಸಮ್ಪನ್ನೋ, ರಾಜಮಾನೋ ಚತುಮ್ಮುಖೋ.
ಸಹಸ್ಸಸಙ್ಖಸಂವುತ್ತಿ, ಸೀಹಪಞ್ಜರ ನೇತ್ತವಾ;
ಸಕಿಙ್ಕಣಿಕಜಾಲಾಯ, ಸಜ್ಜಿತೋ ವೇದಿಕಾಯ ಚ.
ಅಮ್ಬಲಟ್ಠಿಕಪಾಸಾದೋ, ತಸ್ಸ ಮಜ್ಝೇ ಠಿತೋ ಅಹು;
ಸನ್ತಮತೋ ದಿಸ್ಸಮಾನೋ, ಪಗ್ಗಹಿತಧಜಾಕುಲೋ.
ತಾವತಿಂಸಞ್ಚ ಗಚ್ಛನ್ತಾ, ದಿಸ್ವಾ ಥೇರಂ ತಮೇವ ತೇ;
ಹಿಙ್ಗುಲೇನ ತದಾ ಲೇಖಂ, ಲೇಖಯಿತ್ವಾ ಪಟೇ ತತೋ.
ನಿವತ್ತಿತ್ವಾನ ಆಗನ್ತ್ವಾ, ಪಟಂ ಸಙ್ಘಸ್ಸ ದಸ್ಸಯುಂ;
ಸಙ್ಘೋ ಪಟಂ ಗಹೇತ್ವಾ ತಂ, ಪಾಹೇಸಿ ರಾಜಸನ್ತಿಕಂ.
ತಂ ¶ ದಿಸ್ವಾ ಸುಮನೋ ರಾಜಾ, ಆಗಮ್ಮಾರಾಮ ಮುತ್ತಮಂ;
ಆಲೇಖತುಲ್ಯಂ ಕಾರೇಸಿ, ಲೋಹಪಾಸಾದ ಮುತ್ತಮಂ.
ಕಮ್ಮಾರಮ್ಭನಕಾಲೇವ, ಚತುದ್ವಾರಮ್ಹಿ ಭೋಗವಾ;
ಅಟ್ಠಸತಸಹಸ್ಸಾನಿ, ಹಿರಞ್ಞಾನಿ ಠಪಾಪಯಿ.
ಪುಟಸಹಸ್ಸ ವತ್ಥಾನಿ, ದ್ವಾರೇ ದ್ವಾರೇ ಠಪಾಪಯಿ;
ಗುಳ ತೇಲಸಕ್ಖರಮಧು-ಪುರಾ ಚಾನೇಕ ಚಾಟಿಯೋ.
‘‘ಅಮೂಲಕಕಮ್ಮ ಮೇತ್ಥ, ನ ಕಾತಬ್ಬ’’ನ್ತಿ ಭಾಸಿಯ;
ಅಗ್ಘಾಪೇತ್ವಾ ಕತಂ ಕಮ್ಮಂ, ತೇಸಂ ಮೂಲಮದಾಪಯಿ.
ಹತ್ಥಸತಂ ಹತ್ಥಸತಂ, ಆಸಿ ಏಕೇಕ ಪಸ್ಸತೋ;
ಉಚ್ಚತೋ ತತ್ತಕೋಯೇವ, ಪಾಸಾದೋ ಹಿ ಚತುಮ್ಮುಖೋ.
ತಸ್ಮಿಂ ಪಾಸಾದ ಸೇಟ್ಠಸ್ಮಿಂ, ಅಹೇಸುಂ ನವಭೂಮಿಯೋ;
ಏಕೇಕಿಸ್ಸಾ ಭೂಮಿಯಾ ಚ, ಕೂಟಾಗಾರಸತಾನಿ ಚ.
ಕೂಟಾಗಾರಾನಿ ಸಬ್ಬಾನಿ, ಸಜ್ಝುನಾ ಖಚಿತಾ ನ’ಯುಂ;
ಪವಾಲವೇದಿಕಾ ತೇಸಂ, ನಾನಾರತನ ಭೂಸಿತಾ.
ನಾನಾರತನ ಚಿತ್ತಾನಿ, ತಾಸಂ ಪದುಮಕಾನಿ ಚ;
ಸಜ್ಝಕಿಂಕಿಣಿಕಾಪನ್ತಿ-ಪರಿಕ್ಖಿತ್ತಾವ ತಾ ಅಹು.
ಸಹಸ್ಸಂ ತತ್ಥ ಪಾಸಾದೋ, ಗಬ್ಭಾ ಆಸುಂ ಸುಸಙ್ಖತಾ;
ನಾನಾರತನ ಖಚಿತಾ, ಸೀಹಪಞ್ಜರನೇತ್ತವಾ.
ನಾರಿವಾಹನಯಾನನ್ತು, ಸುತ್ವಾ ವೇಸ್ಸವಣಸ್ಸ ಸೋ;
ತದಾ ಕಾರಮಕಾರೇಸಿ, ಮಜ್ಝೇ ರತನಮಣ್ಡಪಂ.
ಸೀಹಬ್ಯಗ್ಘಾದಿರೂಪೇಹಿ, ದೇವತಾ ರೂಪಕೇಹಿ ಚ;
ಅಹು ರತನಮಯೋಹೇ’ಸ, ಥಮ್ಭೇಹಿ ಚ ವಿಭೂಸಿತೋ.
ಮುತ್ತಾಜಾಲಪರಿಕ್ಖೇಪೋ, ಮಣ್ಡಪನ್ತೇ ಸಮನ್ತತೋ;
ಪವಾಲವೇದಿಕಾ ಚೇತ್ಥ, ಪುಬ್ಬೇ ವುತ್ತವಿಧಾ ಅಹು.
ಸತ್ತರತನ ಚಿತ್ತಸ್ಸ, ವೇಮಜ್ಝೇ ಮಣ್ಡಪಸ್ಸ ತು;
ರುಚಿರೋ ದನ್ತಪಲ್ಲಙ್ಕೋ, ರಮ್ಮೋ ಫಲಿಕಸನ್ಥರೋ.
ದನ್ತಮಯಾಪಸ್ಸಯೇ’ತ್ಥ, ಸುವಣ್ಣಮಯ ಸೂರಿಯೋ;
ಸಜ್ಝುಮಯೇ ಚನ್ದಿಮಾ ಚ, ತಾರಾ ಚ ಮುತ್ತಕಾ ಮಯಾ.
ನಾನಾರತನ ¶ ಪದುಮಾನಿ, ತತ್ಥ ತತ್ಥ ಯಥಾರಹಂ;
ಜಾತಕಾನಿ ಚ ತತ್ಥೇವ, ಆಸುಂ ಸೋಣ್ಣಲತನ್ತರೇ.
ಮಹಗ್ಘಪಚ್ಚತ್ಥರಣೇ, ಪಲ್ಲಙ್ಕೇ’ತಿ ಮನೋರಮೇ;
ಮನೋಹರಾ’ಸಿಟ್ಠಪಿತಾ, ರುಚಿರಂ ದನ್ತಬೀಜನೀ.
ಪವಾಲಪಾದುಕಾ ತತ್ಥ, ಫಲಿಕಮ್ಹಿ ಪತಿಟ್ಠಿತಾ;
ಸೇತಚ್ಛತ್ತಂ ಸಜ್ಝುದಣ್ಡಂ, ಪಲ್ಲಙ್ಕೋ’ಪರಿಸೋಭಥ.
ಸತ್ತರತನ ಮಯಾನೇತ್ಥ, ಅಟ್ಠಮಙ್ಗಲಿಕಾನಿ ಚ;
ಚತುಪ್ಪದಾನಂ ಪನ್ತೀ ಚ, ಮಣಿಮುತ್ತನ್ತರಾ ಅಹುಂ.
ರಜತಾನಞ್ಚ ಘಣ್ಟಾನಂ, ಪನ್ತೀ ಭತ್ತನ್ತಲಮ್ಬಿತಾ;
ಪಾಸಾದಛತ್ತಪಲ್ಲಙ್ಕ-ಮಣ್ಡಪಾ’ಸುಂ ಅನಗ್ಘಿಕಾ.
ಮಹಗ್ಘ ಪಞ್ಞಪಾಪೇಸಿ, ಮಞ್ಚಪೀಠಂ ಯಥಾರಹಂ;
ತಥೇವ ಭೂಮತ್ಥರಣಂ, ಕಮ್ಬಲಞ್ಚ ಮಹಾರಹಂ.
ಆಚಾಮ ಕುಮ್ಭಿಸೋವಣ್ಣಾ, ಉಲುಙ್ಕೋ ಚ ಅಹು ತಹಿಂ;
ಪಾಸಾದ ಪರಿಭೋಗೇಸು, ಸೇಸೇಸು ಚ ಕಥಾ’ ವಕಾ.
ಚಾರುಪಾಕಾರ ಪರಿವಾರೋ,
ಸೋ ಚತುದ್ವಾರಕೋಟ್ಠಕೋ;
ಪಾಸಾದೋ’ಲಙ್ಕತೋ ಸೋಭಿ,
ತಾವತಿಂಸ ಸಭಾ ವಿಯ.
ತಮ್ಬ ಲೋಹಿಟ್ಠಕಾಹೇ’ಸೋ,
ಪಾಸಾದೋ ಛಾದಿತೋ ಅಹು;
ಲೋಹ ಪಾಸಾದ ವೋಹಾರೋ,
ತೇನ ತಸ್ಸ ಅಜಾಯಥ.
ನಟ್ಠಿತೇ ಲೋಹಪಾಸಾದೇ, ಸೋ ಸಙ್ಘಂ ಸನ್ನಿಪಾತಯಿ;
ರಾಜಾ ಸಙ್ಘೋ ಸನ್ನಿಪತಿ, ಮರಿಚವಟ್ಟಿಮಹೇ ವಿಯ.
ಪುಥುಜ್ಜನಾ’ವ ಅಟ್ಠಂಸು, ಭಿಕ್ಖೂ ಪಠಮಭೂಮಿಯಂ;
ತೇಪಿಟಕಾ ದುತಿಯಾಯ, ಸೋತಾಪನ್ನಾದಯೋ ಪನ.
ಏಕೇ ¶ ಕೇಯೇವ ಅಟ್ಠಂಸು, ತತಿಯಾದೀಸು ಭೂಮಿಸು;
ಅರಹನ್ತೋ ಚ ಅಟ್ಠಂಸು, ಉದ್ಧಂ ಚತೂಸು ಭೂಮಿಸು.
ಸಙ್ಘಸ್ಸ ದತ್ವಾ ಪಾಸಾದಂ, ದಕ್ಖಿಣಮ್ಬುಪುರಸ್ಸರಂ;
ರಾಜಾ’ದತ್ಥ ಮಹಾದಾನಂ, ಸತ್ತಾಹಂ ಪುಬ್ಬಕಂ ಪಿಯ.
ಪಾಸಾದ ಮಹಚತ್ತಾನಿ, ಮಹಾಚಾಗೇನ ರಾಜಿನಾ;
ಅನಗ್ಘಾನಿ ಠಪೇತ್ವಾನ, ಅಹೇಸುಂ ತಿಂಸಕೋಟಿಯೋ.
ನಿಸ್ಸಾರೇ ಧನನಿಚಯೇ ವಿಸೇಸಸಾರಂ,
ಯೇ ದಾನಂ ಪರಿಗಣಯನ್ತಿ ಸಾಧುಪಞ್ಞಾ;
ತೇ ದಾನಂ ವಿಪುಲಮಪೇತ ಚಿತ್ತಸಙ್ಗಾ,
ಸತ್ತಾನಂ ಹಿತಪರಮಾ ದದನ್ತಿ ಏವಂತಿ.
ಸುಜನಪ್ಪಸಾದಸಂವೇಗತ್ಥಾಯ ಕತೇ ಮಹಾವಂಸೇ
ಲೋಕಹಪಾಸಾದಮಹೋ ನಾಮ
ಸತ್ತವೀಸತಿಮೋ ಪರಿಚ್ಛೇದೋ.
ಅಟ್ಠವೀಸತಿಮ ಪರಿಚ್ಛೇದ
ಮಹಾ ಥೂಪಸಾಧನ ಲಾಭೋ
ತತೋ ಸತಸಹಸ್ಸಂ ಸೋ, ವಿಸ್ಸಜ್ಜೇತ್ವಾ ಮಹೀಪತಿ;
ಕಾರಾಪೇಸಿ ಮಹಾಬೋಧಿ-ಪೂಜಂ ಸುಳಾರಮುತ್ತಮಂ.
ತತೋ ಪುರಂ ಪವಿಸಿನ್ತೋ, ಥೂಪಠಾನೇ ನಿವೇಸಿತಂ;
ಪಸ್ಸಿತ್ವಾನ ಸೀಲಾಯೂಪಂ, ಸರಿತ್ವಾ ಪುಬ್ಬಕಂ ಸುತಿಂ.
‘‘ಕಾರೇಸ್ಸಾಮಿ ಮಹಾಥೂಪಂ’’, ಇತಿ ಹಟ್ಠೋ ಮಹಾತಲಂ;
ಆರುಯ್ಹ ರತ್ತಿಂ ಭುಞ್ಜಿತ್ವಾ, ಸಯಿತೋ ಇತಿ ಚಿನ್ತಯಿ.
‘‘ದಮಿಳೇ ¶ ಮದ್ದಮಾನೇನ, ಲೋಕೋ’ಯಂ ಪೀಳಿತೋ ಮಯಾ;
ನ ಸಕ್ಕಾ ಬಲಿಮುದ್ಧತ್ತುಂ, ತಂ ವಜ್ಜಿಯ ಬಲಿಂ ಅಹಂ.
ಕಾರಯನ್ತೋ ಮಹಾಥೂಪಂ, ಕತಂ ಧಮ್ಮೇನ ಇಟ್ಠಿಕಾ;
ಉಪ್ಪಾದೇಸ್ಸಾಮಿ ‘‘ಇಚ್ಚೇವಂ, ಚಿನ್ತಯನ್ತಸ್ಸ ಚಿನ್ತಿತಂ.
ಛತ್ತಮ್ಹಿ ದೇವತಾಜಾನೀ, ತತೋ ಕೋಲಾಹಲಂ ಅಹು;
ದೇವೇಸು ಞತ್ವಾ ತಂ ಸಕ್ಕೋ, ವಿಸ್ಸಕಮ್ಮಾನ ಮಬ್ರವಿ.
‘‘ಇಟ್ಠಕತ್ತಂ ಚೇತಿಯಸ್ಸ, ರಾಜಾ ಚಿನ್ತೇಸಿ ಗಾಮಣಿ;
ಗನ್ತ್ವಾ ಪುರಾ ಯೋಜನಮ್ಹಿ, ಗಮ್ಭೀರ ನದೀ ಯನ್ತಿಕೇ.
ಮಾಪೇಹಿ ಇಟ್ಠಿಕಾ ತತ್ತಂ’, ಇತಿ ಸಕ್ಕೇ ನ ಭಾಸಿತೋ;
ವಿಸ್ಸಕಮ್ಮೋ ಇಧಾಗಮ್ಮ, ಮಾಪೇಸಿ ತತ್ಥ ಇಟ್ಠಿಕಾ.
ಪಭಾತೇ ಲುದ್ದಕೋ ತತ್ಥ, ಸುನಖೇಹಿ ವನಂ ಅಗಾ;
ವೋಧಾರೂಪೇನ ದಸ್ಸೇಸಿ, ಲುದ್ದಕಂ ಭುಮ್ಮದೇವತಾ.
ಲುದ್ದಕೋ ತಂ’ನುಬನ್ಧನ್ತೋ, ಗನ್ತ್ವಾ ದಿಸ್ವಾನ ಇಟ್ಠಕಾ;
ಅನ್ತರಹಿತಾಯ ಗೋಧಾಯ, ಇತಿ ಚಿಧನ್ತಸಿ ಸೋ ತಹಿಂ.
‘‘ಕಾರೇತು ಕಾಮೋ ಕಿರ ನೋ, ಮಹಾಥೂಪಂ ಮಹೀಪತಿ;
ಉಪಾಯನಮಿದಂ ತಸ್ಸಂ’, ಇತಿ ಗನ್ತ್ವಾ ನಿವೇದಯಿ.
ತಸ್ಸ ತಂ ವಚನಂ ಸುತ್ವಾ, ಪಿಯಂ ಜನಹಿ ತಪ್ಪಿಯೋ;
ರಾಜಾ ಕಾರೇಸಿ ಸಕ್ಕಾರಂ, ಮಹನ್ತಂ ತುಟ್ಠಮಾನಸೋ.
ಪುರಾಪುಬ್ಬುತ್ತರೇ ದೇಸೇ, ಯೋಜನತ್ತಯ ಮತ್ಥಕೇ;
ಆಚಾರ ವಿಟ್ಠಿಗಾಮಮ್ಹಿ, ಸೋಳಸಕರೀಸೇ ಕಲೇ.
ಸೋವಣ್ಣ ಬೀಜಾನು’ಟ್ಠಿಂಸು, ವಿವಿಧಾನಿ ಪಮಾಣತೋ;
ವಿದತ್ಥುಕ್ಕಟ್ಠ ಮಾಣಾನಿ, ಅಙ್ಗುಲಿಮಾಣಾ ನಿಹೇಠತೋ.
ಸುವಣ್ಣ ಪುಣ್ಣಂ ತಂ ಭೂಮಿಂ, ದಿಸ್ವಾ ಸಙ್ಗಾಮವಾಸಿಕಾ;
ಸುವಣ್ಣ ಪಾಹಿಂ ಆದಾಯ, ಗನ್ತ್ವಾ ರಞ್ಞೋ ನಿವೇದಯುಂ.
ಪುರಾಪಾಚಿನ ಪಸ್ಸಮ್ಹಿ, ಸತ್ತ ಯೋಜನ ಮತ್ಥಕೇ;
ಗಙ್ಗಾಪಾರೇ ತಮ್ಬಪಿಟ್ಠೇ, ತಮ್ಬಲೋಹಂ ಸಮುಟ್ಠಹಿ.
ತಙ್ಗಾಮಿಕಾ ತಮ್ಬಲೋಹ-ಬೀಜಮಾದಾಯ ಪಾತಿಯಾ;
ರಾಜಾನ ಮುಪಸಙ್ಕಮ್ಮ, ತಮತ್ಥಞ್ಚ ನಿವೇದಯುಂ.
ಪುಬ್ಬದಕ್ಖಿಣದೇಸಮ್ಹಿ, ಪುರತೋ ಚತುಯೋಜನೇ;
ಸುಮನ ವಾಪಿ ಗಾಮಮ್ಹಿ, ಉಟ್ಠಹಿಂಸು ಮಣೀಬಹೂ.
ಉಪಲ ¶ ಕುರುವಿನ್ದೇಹಿ, ಮಿಸ್ಸಕಾನೇವ ಗಾಮಿಕಾ;
ಆದಾಯ ಪಾತಿಯಾಏವ, ಗನ್ತ್ವಾ ರಞ್ಞೋ ನಿವೇದಯುಂ.
ಪುರತೋ ದಕ್ಖಿಣೇ ಪಸ್ಸೇ, ಅಟ್ಠಯೋಜನಮತ್ಥಕೇ;
ಅಮ್ಬಟ್ಠ ಕೋಲಲೇಣಮ್ಹಿ, ರಜತಂ ಉಪಪಜ್ಜಥ.
ನಗರೇ ವಾಣಿಜೋ ಏಕೋ, ಆದಾಯ ಸಕಟೇ ಬಹೂ;
ಮಲಯಾ ಸಿಙ್ಗೀವೇರಾದಿಂ, ಆನೇತುಂ ಮಲಯಂ ಗತೋ.
ಲೇಣಸ್ಸ ಅವಿದೂರಮ್ಹಿ, ಸಕಟಾನಿಟ್ಠ ಪಾಪಿಯ;
ಪತೋದಾದಾರುನಿಚ್ಛನ್ತೋ, ಆರುಳ್ಹೋ ತಂ ಮಹೀಧರಂ.
ಚಾಟಿಪ್ಪಮಾಣ ತಂ ತತ್ಥ, ಪಕ್ಕಭಾರೇನ ನಾಮಿ ತಂ;
ದಿಸ್ವಾ ಪನ ಸಲಟ್ಠಿಞ್ಚ, ಪಾಸಾಣಟ್ಠಞ್ಚ ತಂ ಫಲಂ.
ವಣ್ಟೇ ತಂ ವಾಸಿಯಾ ಛೇತ್ವಾ, ದಸ್ಸಾಮ’ಗ್ಗನ್ತಿ ಚಿನ್ತಿಯ;
ಕಾಲಂ ಘೋಸೇಸಿ ಸದ್ಧಾಯ, ಚತ್ತಾರೋ’ನಾಸವಾಗಮುಂ.
ಹಟ್ಠೋ ಸೋ ತೇ’ಭಿವಾದೇತ್ವಾ, ನಿಸೀದಾಪಿಯ ಸಾದರೋ;
ವಾಸಿಯಾ ವಣ್ಟಸಾಮನ್ತಾ, ತಚಂ ಛೇತ್ವಾ ಅಪಸ್ಸಯಂ.
ಮುಞ್ಜಿತ್ವಾ’ವಾಟ ಪುಣ್ಣಂ ತಂ, ಯೂಸಂ ಪತ್ತೇಹೀ ಆದಿಯ;
ಚತ್ತಾರೋ ಯೂಸ ಪೂರೇತೇ, ಪತ್ತೇ ತೇಸಮದಾಸಿಸೋ.
ತೇ ತಂ ಗಹೇತ್ವಾ ಪಕ್ಕಾಮುಂ,
ಕಾಲಂ ಘೋಸೇಸಿ ಸೋ ಪುನ;
ಅಞ್ಞೇ ಖಿಣಾಸವಾ ಥೇರಾ,
ಚತ್ತಾರೋ ತತ್ಥ ಆಗಮುಂ.
ತೇಸಂ ಪತ್ತೇ ಗಹೇತ್ವಾ ಸೋ, ಪತ್ತಾಮಿಞ್ಜಹಿ ಪೂರಿಯ;
ಅದಾಸಿ ತೇಸಂ ಪಕ್ಕಾಮುಂ, ತಯೋ ಏಕೋ ನಪಕ್ಕಮಿ.
ರಜತಂ ತಸ್ಸ ದಸ್ಸೇತುಂ, ಓರೋಹಿತ್ವಾ ತತೋ ಹಿ ಸೋ;
ನಿಸಜ್ಜ ಲೇಣಾಸನ್ನಮ್ಹಿ, ತಾಮಿಞ್ಜಾ ಪರಿಭುಞ್ಜಥ.
ಸೇಸಾಮಿಞ್ಜಾ ವಾಣಿಜೋ’ಪಿ, ಭುಞ್ಜಿತ್ವಾ ಯಾವದತ್ಥಕಂ;
ಭಣ್ಡಿಕಾಯ ಗಹೇತ್ವಾನ, ಸೇಸಥೇರಪದಾನುಗೋ.
ಅಞ್ಜಸಾ ¶ ಇಮಿನಾ ತ್ವಮ್ಪಿ, ಗಚ್ಛ ದಾನೀ ಉಪಾಸಕ;
ಗನ್ತ್ವಾನ ಥೇರಂ ಪಸ್ಸಿತ್ವಾ, ವೇಯ್ಯಾವಚ್ಚ ಮಹಾಸಿ ಚ.
ಥೇರೋ ಚ ಲೇಣದ್ವಾರೇನ, ತಸ್ಸ ಮಗ್ಗ ಅಮಾಪಯಿ;
ಥೇರಂ ವನ್ದಿಯ ಸೋ ತೇನ, ಗಚ್ಛನ್ತೋ ಲೇಣಮದ್ದಸ.
ಲೇಣ ದ್ವಾರಮ್ಹಿ ಠತ್ವಾನ, ಪಸ್ಸಿತ್ವಾ ರಜತಮ್ಪಿ ಸೋ;
ವಾಸಿಯಾ ಆಹನಿತ್ವಾನ, ರಜತತಿ ವಿಜಾನಿಯ.
ಗಹೇತ್ವೇಕಂ ಸಜ್ಝುಪಿಣ್ಡಂ, ಗನ್ತ್ವಾನ ಸಕಟನ್ತಿಕಂ;
ಸಕಟಾನಿ ಠಪಾಪೇತ್ವಾ, ಸಜ್ಝುಪಿಣ್ಡಂ ತಮಾದಿಯ.
ಲಹುಂ ಅನುರಾಧ ಪುರಂ, ಆಗಮ್ಮ ವರವಾಣಿಜೋ;
ದಸ್ಸೇತ್ವಾ ರಜತಂ ರಞ್ಞೋ, ತಮತ್ಥಮ್ಪಿ ನಿವೇದಯಿ.
ಪುರತೋ ಪಚ್ಛಿಮೇ ಪಸ್ಸೇ, ಪಞ್ಚಯೋಜನ ಮತ್ಥಕೇ;
ಉರುವೇಲಪಟ್ಟನೇ ಮುತ್ತಾ, ಮಹಾಮಲಕ ಮತ್ತಿಯೋ.
ಪವಾಲನ್ತರಿಕಾ ಸದ್ಧಿಂ, ಸಮುದ್ದಾಥಲಮೋಕ್ಕಮುಂ;
ಕೇವಟ್ಟಾ ತಾ ಸಮೇಕ್ಖಿತ್ವಾ, ರಾಸಿಂ ಕತ್ವಾನ ಏಕತೋ.
ಪಾತಿಯಾ ಆನಯಿತ್ವಾನ, ಮುತ್ತಾ ಸಹ ಪವಾಲಕಾ;
ರಾಜಾನ ಮುಪಸಙ್ಕಮ್ಮ, ತಮತ್ಥಮ್ಪಿ ನಿವೇದಯುಂ.
ಪುರತೋ ಉತ್ತರೇ ಪಸ್ಸೇ, ಸತ್ತ ಯೋಜನ ಮತ್ಥಕೇ;
ಪೇಳಿವಾಪಿಕ ಗಾಮಸ್ಸ, ವಾಪಿಪಕ್ಖನ್ತಕನ್ದರೇ.
ಜಾಯಿಂಸು ವಾಲುಕಾಪಿಟ್ಠೇ, ಚತ್ತಾರೋ ಉತ್ತಮಾ ಮಣೀ;
ನೀಸದ ಪೋತಪ್ಪಮಾಣಾ, ಉಮ್ಮಾಪುಪ್ಫನಿಭಾಸುಭಾ.
ತೇ ದಿಸ್ವಾ ಸುನಖೋ ಲುದ್ದೋ, ಅಗನ್ತ್ವಾ ರಾಜಸನ್ತಿಕಂ;
‘‘ಏವರೂಪಾ ಮಣೀದಿಟ್ಠೋ, ಮಯಾ’’ಇತಿ ನಿವೇದಯಿ.
ಇಟ್ಠಕಾದೀನಿ ಏತಾನಿ ಮಹಾಪುಞ್ಞೋ ಮಹಾಮತಿ;
ಮಹಾಥೂಪತ್ಥಮುಪ್ಪನ್ನಾ-ನ’ಸ್ಸೋಸಿ ತದಹೇವ ಸೋ.
ಯಥಾನುರೂಪಂ ಸಕ್ಕಾರಂ, ತೇಸಂ ಕತ್ವಾ ಸುಮಾನತೋ;
ಏತೇ ವಾ ರಕ್ಖಕೇ ಕತ್ವಾ, ಸಬ್ಬಾನಿ ಆಹರಾಪಯಿ.
ಖೇದಮ್ಪಿ ¶ ಕಾಯಜಮಸಯ್ಹಮಚಿನ್ತಯಿತ್ವಾ,
ಪುಞ್ಞಂ ಪಸನ್ನಮನಸೋ ಪಚಿತ ಹಿ ಏವಂ;
ಸಾಧೇತಿ ಸಾಧನ ಸತಾನಿ ಸುಖಾ ಕರಾನಿ,
ತಸ್ಮಾ ಪಸನ್ನಮನಸೋ’ವ ಕರೇಯ್ಯ ಪುಞ್ಞನ್ತಿ.
ಸುಜನಪ್ಪಸಾದಸಂವೇಗತ್ಥಾಯ ಕತೇ ಮಹಾವಂಸೇ
ಮಹಾಥೂಪಸಾಧನಲಾಭೋ ನಾಮ
ಅಟ್ಠವೀಸತಿಮೋ ಪರಿಚ್ಛೇದೋ.
ಏಕೂನತಿಂಸತಿಮ ಪರಿಚ್ಛೇದ
ಥೂಪಾರಮ್ಭೋ
ಏವಂ ಸಮತ್ತೇ ಸಮ್ಭಾರೇ, ವೇಸಾಖಪುಣ್ಣಮಾಸೀಯಂ;
ಪತ್ತೇ ವಿಸಾಖನಕ್ಖತ್ತೇ, ಮಹಾಥೂಪತ್ಥಮಾರಭಿ.
ಹಾರೇತ್ವಾನ ತಹಿಂ ಥೂಪಂ, ಥೂಪಠಾನಮಖಾಣಯಿ;
ಸತ್ಥಹತ್ಥೋ ಮಹೀಪಾಲೋ, ಥಿರೀ ಕಾತುಂ ಮನೇಕಧಾ.
ಯೋಧೇಹಿ ಆಹರಾಪೇತ್ವಾ, ಗುಳಪಾಸಾಣಕೇ ತಹಿಂ;
ಕೂಟೇಹಿ ಆಹನಾಪೇತ್ವಾ, ಪಾಸಾಣೇ ಚುಣ್ಣಿತೇ ಅಥ.
ಚಮ್ಮವನದ್ಧ ಪಾದೇಹಿ, ಮಹಾಹತ್ಥೀಹಿ ಮದ್ದಯಿ;
ಭೂಮಿಯಾ ಥಿರೀಭಾವತ್ಥಂ, ಅತ್ಥಾನತ್ಥವಿಚಕ್ಖಣೋ.
ಆಕಾಸ ಗಙ್ಗಾಪತಿತ-ಟ್ಠಾನೇ ಸತತತಿನ್ತಕೇ;
ಮತ್ತಿಕಾ ಸುಖುಮಾ ತತ್ಥ, ಸಮನ್ತಾ ತಿಂ ಸಯೋಜನೇ.
ನವನೀತ ಮತ್ತಿಕಾ’ತೇಸಾ, ಸುಖುಮತ್ತಾ ಪಪುಚ್ಚತಿ;
ಖೀಣಾಸವಾ ಸಾಮಣೇರಾ, ಮತ್ತಿಕಾ ಆಹರುಂ ತತೋ.
ಮತ್ತಿಕಾ ಅತ್ಥರಾಪೇಸಿ, ತತ್ಥ ಪಾಸಾಣಕೋಟ್ಟಿಮೇ;
ಇಟ್ಠಕಾ ಅತ್ಥರಾಪೇಸಿ, ಮತ್ತಿಕೋ ಪರಿಇಸ್ಸರೋ.
ತಸ್ಸೋ ¶ ಪರಿಖರಸುಧಂ, ಕುರುವಿನ್ದಂ ತತೋಪರಿ;
ತಸ್ಸೋ ಪರಿಅಯೋಜಾಲಂ, ಮರುಮ್ಬನ್ತು ತತೋಪರಂ.
ಆಹಟಂ ಸಾಮಣೇರೇಹಿ, ಹಿಮವನ್ತಾ ಸುಗನ್ಧಕಂ;
ಸನ್ಥರಾಪೇಸಿ ಭೂಮಿನ್ದೋ, ಫಳಿಕನ್ತು ತತೋಪರಿ.
ಸೀಲಾಯೋ ಸನ್ಥರಾಪೇಸಿಚ್ಛ ಫಳಿಕಸನ್ಥರೋ ಪರಿ;
ಸಬ್ಬತ್ಥ ಮತ್ತಿಕಾಕಿಚ್ಚೇ, ನವನೀತವ್ಹಯಾ ಅಹು.
ನಿಯ್ಯಾಸೇನ ಕಪಿಟ್ಠಸ್ಸ, ಸನ್ನಿತೇನ ರಸೋದಕೇ;
ಅಟ್ಠಙ್ಗುಲಂ ಬಹಲಏತಾ, ಲೋಹಪಟ್ಟಂ ಸೀಲೋಪರಿ.
ಮನೋಸಿಲಾಯತಿಲತೇ-ಲಸನ್ನಿತಾಯ ತತೋ ಪರಿ;
ಸತ್ತಙ್ಗುಲಂ ಸಜ್ಜುಪಟ್ಟಂ, ಸನ್ಥರೇಸಿ ರಥೇಸಭೋ.
ಮಹಾಥೂಪ ಪತಿಟ್ಠಾನ-ಠಾನೇ ಏವಂ ಮಹೀಪತಿ;
ಕಾರೇತ್ವಾ ಪರಿಕಮ್ಮಾನಿ, ವಿಪ್ಪಸನ್ನೇನ ಚೇತಸಾ.
ಆಸಳ್ಹೀ ಸುಕ್ಕಪಕ್ಖಸ್ಸ, ದಿವಸಮ್ಹಿ ಚತುದ್ದಸೇ;
ಕಾರೇತ್ವಾ ಭಿಕ್ಖುಸಙ್ಘಸ್ಸ, ಸನ್ನಿಪಾತಮಿದಂ ವದಿ.
ಮಹಾಚೇತಿಯ ಮತ್ಥಾಯ, ಭದನ್ತಾಮಙ್ಗಲಿಟ್ಠಕಂ;
ಪತಿಟ್ಠಾಪೇಸ್ಸಂ ಸ್ವೇ ಏತ್ಥ, ಸಬ್ಬೋ ಸಙ್ಘೋ ಸಮೇತುನೋ.
ಬುದ್ಧ ಪೂಜಾ ಪಯೋಗೇನ, ಮಹಾಜನಹೀತತ್ಥಿಕೋ;
‘‘ಮಹಾಜನೋ’ ಪೋಸಥಿಕೋ, ಗನ್ಧಮಾಲಾದಿಗಣ್ಹಿಯ.
ಮಹಾಥೂಪ ಪತಿಟ್ಠಾನ-ಠಾನಂ ಯಾತು ಸುವೇ’’ಇತಿ;
ಚೇತಿಯ ಠಾನ ಭೂಸಾಯ, ಅಮಚ್ಚೇ ಚ ನಿಯೋಜಯಿ.
ಆಣಾಪಿತಾ ನರಿನ್ದೇನ, ಮುನಿನೋ ಪಿಯಗಾರವಾ;
ಅನೇಕೇಹಿ ಪಕಾರೇಹಿ, ತೇ ತಂ ಠಾನಮಲಙ್ಕರುಂ.
ನಗರಂ ಸಕಲಞ್ಚೇವ, ಮಗ್ಗಞ್ಚೇವ ಇಧಾಗತಂ;
ಅನೇಕೇಹಿ ಪಕಾರೇಹಿ, ಅಲಙ್ಕಾರಯಿ ಭೂಪತಿ.
ಪಭಾತೇ ಚ ಚತುದ್ವಾರೇ, ನಗರಸ್ಸ ಠಪಾಪಯಿ;
ನಹಾಪಿತೇ ನಹಾಪಕೇ ಚ, ಅಪ್ಪಕೇ ಚ ಬಹೂತಥಾ.
ವತ್ಥಾನಿ ¶ ಗನ್ಧಮಾಲಾ ಚ, ಅನ್ನಾನಿ ಮಧುರಾನಿ ಚ;
ಮಹಾಜನತ್ಥಂ ಭೂಮಿನ್ದೋ, ಮಹಾಜನಹಿತೇ ರತೋ.
ಪಟಿಯತ್ತಾನಿ ಏತಾನಿ, ಸಾದಿಯಿತ್ವಾ ಯಥಾರುಚಿ;
ಪೋರಾಜಾನಪದಾಚೇವ ಥೂಪಠಾನಮುಪಾಗಮುಂ.
ಸುಮಣ್ಡಿತೇಹಿ ನೇಕೇಹಿ, ಠಾನನ್ತರ ವಿಧಾನತೋ;
ಆರಕ್ಖಿತೋ ಅಮಚ್ಚೇಹಿ, ಯಥಾಠಾನಂ ಮಹೀಪತಿ.
ಸುಮಣ್ಡಿತಾಹಿ ನೇಕಾಹಿ, ದೇವಕಞ್ಞೂಪಮಾಹಿ ಚ;
ನಾಟಕೀಹಿ ಪರಿಬ್ಬುಳ್ಹೋ, ಸುಮಣ್ಡಿತ ಪಸ್ಸಾಧಿತೋ.
ಚತ್ತಾಲೀಸ ಸಹಸ್ಸೇಹಿ, ನರೇಹಿ ಪರಿವಾರಿತೋ;
ನಾನಾ ತೂರಿಯ ಸಙ್ಘುಟ್ಠೋ, ದೇವರಾಜ ವಿಲಾಸವಾ.
ಮಹಾಥೂಪ ಪತಿಟ್ಠಾನಂ, ಠಾನಾಠಾನ ವಿಚಕ್ಖಣೋ;
ಅಪರಣ್ಹೇ ಉಪಾಗಞ್ಛಿ, ನನ್ದಯನ್ತೋ ಮಹಾಜನಂ.
ಅಟ್ಠುತ್ತರಸಹಸ್ಸಂ ಸೋ, ಸಾಟಕಾನಿಟ್ಠಪಾಪಿಯ;
ಪುಟಬದ್ಧಾನಿ ಮಜ್ಝಮ್ಹಿ, ಚತುಪಸ್ಸೇ ತತೋ ಪನ.
ವತ್ಥಾನಿ ರಾಸೀಂಕಾರೇಸಿ, ಅನೇಕಾನಿ ಮಹೀಪತಿ;
ಮಧುಸಪ್ಪಿ ಗುಳಾದೀಹಿ ಚ, ಮಙ್ಗಲತ್ಥಂ ಠಪಾಪಯಿ.
ನಾನಾದೇಸೇಹಿಪಾ’ಗಞ್ಛುಂ, ಬಹವೋ ಭಿಕ್ಖವೋ ಇಧ;
ಇಧ ದೀಪಟ್ಠಸಙ್ಘಸ್ಸ, ಕಾ ಕಥಾವ ಇಧಾಗಮೇ.
ಥೇರೋ’ ಸೀತಿ ಸಹಸ್ಸಾನಿ, ಭಿಕ್ಖೂ ಆದಾಯ ಆಗಮಾ;
ರಾಜಗಹಸ್ಸ ಸಾಮನ್ತಾ, ಇನ್ದಗುತ್ತೋ ಮಹಾಗಣೀ.
ಸಹಸ್ಸಾನಿ’ಸಿಪತನಾ, ಭಿಕ್ಖೂನಂ ದ್ವಾದಸಾ’ದಿಯ;
ಧಮ್ಮಸೇನೋ ಮಹಾಥೇರೋ, ಚೇತಿಯಠಾನಮಾಗಮಾ.
ಸಟ್ಠಿಭಿಕ್ಖುಸಹಸ್ಸಾನಿ, ಆದಾಯ ಇಧಮಾಗಮಾ;
ಪೀಯದಸ್ಸೀ ಮಹಾಥೇರೋ, ಜೇತಾರಾಮ ವಿಹಾರತೋ.
ವೇಸಾಲೀ ಮಹಾವನತೋ, ಥೇರೋರು ಬುದ್ಧರಕ್ಖಿತೋ;
ಅಟ್ಠಾರಸ ಸಹಸ್ಸಾನಿ, ಭಿಕ್ಖೂ ಆದಾಯ ಆಗಮಾ.
ಕೋಸಮ್ಬೀ ಘೋಸಿತಾರಾಮಾ, ಥೇರೋರು ಧಮ್ಮರಕ್ಖಿತೋ;
ತಿಂಸಭಿಕ್ಖುಸಹಸ್ಸಾನಿ, ಆದಾಯ ಇಧ ಆಗಮಾ.
ಆದಾಯುಜ್ಜೇನೀಯಂ ¶ ಥೇರೋ, ದಕ್ಖಿಣ ಗಿರಿತೋ ಯತಿ;
ಚತ್ತಾರೀಸ ಸಹಸ್ಸಾನಿ, ಅಗೋರು ಸಙ್ಘರಕ್ಖಿತೋ.
ಭಿಕ್ಖೂನಂ ಸತಸಹಸ್ಸಂ, ಸಟ್ಠಸಹಸ್ಸಾನಿ ಚಾ’ದಿಯ;
ಪುಪ್ಫಪುರೇ’ಸೋಕರಾಮಾ, ಥೇರೋ ಮಿತ್ತಿಣ್ಣ ನಾಮಕೋ.
ದುವೇ ಸತಸಹಸ್ಸಾನಿ, ಸಹಸ್ಸಾನಿ ಅಸೀತಿ ಚ;
ಭಿಕ್ಖೂ ಗಹೇತ್ವಾನು’ತ್ತಿಣ್ಣೋ, ಥೇರೋ ಕಸ್ಮಿರಮಣ್ಡಲಾ.
ಚತ್ತಾರೀಸತ ಸಹಸ್ಸಾನಿ, ಸಹಸ್ಸಾನಿ ಚ ಸಟ್ಠಿ ಚ;
ಭಿಕ್ಖೂ ಪಲ್ಲವಭೋಗಮ್ಹಾ, ಮಹಾದೇವೋ ಮಹಾಮತೀ.
ಯೋನನಗರಾ’ಲಸನ್ದಾಸೋ, ಯೋನ ಮಹಾಧಮ್ಮರಕ್ಖಿತೋ;
ಥೇರೋ ತಿಂಸ ಸಹಸ್ಸಾನಿ, ಭಿಕ್ಖೂ ಆದಾಯ ಆಗಮಾ.
ವಞ್ಝಾಟವಿವತ್ತನಿಯಾ, ಸೇನಾಸನಾ ತು ಉತ್ತರೋ;
ಥೇರೋ ಸಟ್ಠಿಸಹಸ್ಸಾನಿ, ಭಿಕ್ಖೂ ಆದಾಯ ಆಗಮಾ.
ಚಿತ್ತಗುತ್ತೋ ಮಹಾಥೇರೋ, ಬೋಧಿಮಣ್ಡವಿಹಾರತೋ;
ತಿಂಸ ಭಿಕ್ಖುಸಹಸ್ಸಾನಿ, ಆದಿಯಿತ್ವಾ ಇಧಾಗಮಾ.
ಚನ್ದಗುತ್ತೋ ಮಹಾಥೇರೋ, ವನವಾಸಪದೇಸತೋ;
ಆಗಾಸೀತಿ ಸಹಸ್ಸಾನಿ, ಆದಿಯಿತ್ವಾ ಯತೀ ಇಧ.
ಸೂರಿಯಗುತ್ತೋಮಹಾಥೇರೋ, ಕೇಲಾಸಮ್ಹಾ ವಿಹಾರತೋ;
ಛನ್ನವುತಿ ಸಹಸ್ಸಾನಿ, ಭಿಕ್ಖೂಆದಾಯ ಆಗಮಾ.
ಭಿಕ್ಖೂನಂ ದೀಪವಾಸಿನಂ, ಆಗತಾನಞ್ಚ ಸಬ್ಬಸೋ;
ಗಣನಾಯ ಪರಿಚ್ಛೇದೋ, ಪೋರಾಣೇಹಿ ನ ಭಾಸಿತೋ.
ಸಮಾಗತಾನಂ ಸಬ್ಬೇಸಂ, ಭಿಕ್ಖುನಂ ತಂ ಸಮಾಗಮೇ;
ವುತ್ತಾ ಖೀಣಾಸವಾಯೇವ, ತೇ ಛನ್ನವುತಿಕೋಟಿಯೋ.
ತೇ ಮಹಾಚೇತಿಯಠಾನಂ, ಪರಿವಾರೇತ್ವಾ ಯಥಾರಹಂ;
ಮಜ್ಝೇ ಠಪೇತ್ವಾ ಓಕಾಸಂ, ರಞ್ಞೋ ಅಟ್ಠಂಸು ಭಿಕ್ಖವೋ.
ಪವಿಸಿತ್ವಾ ತಹಿಂ ರಾಜಾ, ಭಿಕ್ಖುಸಙ್ಘಂ ತಥಾ ಠಿತಂ;
ದಿಸ್ವಾ ಪಸನ್ನಚಿತ್ತೇನ, ವನ್ದಿತ್ವಾ ಹಟ್ಠಮಾನಸೋ.
ಗನ್ಧಮಾಲಾಹಿ ಪೂಜೇತ್ವಾ, ಕತ್ವಾನ ತಿಪದಕ್ಖಿಣಂ;
ಮಜ್ಝೇ ಪುಣ್ಣಘಟಠಾನಂ, ಪವಿಸಿತ್ವಾ ಸಮಙ್ಗಲಂ.
ಸುವಣ್ಣಖೀಲೇ ¶ ಪಟಿಮುಕ್ಕಂ, ಪರಿಬ್ಭಮನದಣ್ಡಕಂ;
ರಾಜತೇನ ಕತಂ ಸುದ್ಧಂ, ಸುದ್ಧಪೀತಿ ಬಲೋದಯೋ.
ಗಾಹಯಿತ್ವಾ ಅಮಚ್ಚೇನ, ಮಣ್ಡಿತೇನ ಸುಜಾತಿನಾ;
ಅಭಿಮಙ್ಗಲಭೂತೇನ, ಭೂತಭೂತಿಪರಾಯಣೋ.
ಮಹನ್ತಂ ಚೇತಿಯಾವಟ್ಟಂ, ಕಾರೇತುಂ ಕತನಿಚ್ಛಯೋ;
ಭಮಾಪಯಿತು ಮಾರದ್ಧೋ, ಪರಿಕಮ್ಮಿತ ಭೂಮಿಯಂ.
ಸಿದ್ಧತ್ಥೋ ನಾಮ ನಾಮೇನ, ಮಹಾಥೇರೋ ಮಹಿದ್ಧಿಕೋ;
ತಥಾಕರೋನ್ತಂ ರಾಜಾನಂ, ದೀಘದಸ್ಸೀ ನಿವಾರಯಿ.
‘‘ಏವಂ ಮಹನ್ತಂ ಥೂಪಞ್ಚ, ಅಯಂ ರಾಜಾ’ರಭಿಸ್ಸತಿ;
ಥೂಪೇ ಅನಿಟ್ಠಿತೇಯೇವ, ಮರಣಂ ಅಸ್ಸ ಹೇಸ್ಸತಿ.
ಭವಿಸ್ಸತಿ ಮಹನ್ತೋ ಚ, ಥೂಪೋದುಪ್ಪಟಿಸಙ್ಖರೋ;
ಇತಿ ಸೋ ನಾಗತಂ ಪಸ್ಸಂ, ಮಹನ್ತತ್ತಂ ನಿವಾರಯಿ.
ಸಙ್ಘಸ್ಸ ಚ ಅನುಞ್ಞಾಯ, ಥೇರೋ ಸಮ್ಭಾವನಾಯಚ;
ಮಹನ್ತಂ ಕತ್ತುಕಾಮೋ’ಪಿ, ಗಣ್ಹಿತ್ವಾ ಥೇರಭಾಸಿತಂ.
ಥೇರಸ್ಸ ಉಪದೇಸೇನ, ತಸ್ಸ ರಾಜಾ ಅಕಾರಯಿ;
ಮಜ್ಝಿಮಂ ಚೇತಿಯಾವಟ್ಟಂ, ಪತಿಟ್ಠಾಪೇತುಮಿಟ್ಠಿಕಾ.
ಸೋವಣ್ಣರಜತೇ ಚೇವ, ಘಟೇ ಮಜ್ಝೇಟ್ಠಪಾಪಯಿ;
ಅಟ್ಠಟ್ಠ ಅಟ್ಠಿತುಸ್ಸಾಹೋ, ಪರಿವಾರಿಯ ತೇ ಪನ.
ಅಟ್ಠುತ್ತರಸಹಸ್ಸಞ್ಚ, ಠಪಾಪೇಸಿ ನವೇ ಘಟೇ;
ಅಟ್ಠುತ್ತರೇ ಅಟ್ಠುತ್ತರೇ, ವತ್ಥಾನಂ ತು ಸತೇ ಪನ.
ಇಟ್ಠಿಕಾಪವರಾ ಅಟ್ಠ, ಠಪಾಪೇಸಿ ವಿಸುಂ ವಿಸುಂ;
ಸಮ್ಮತೇನ ಅಮಚ್ಚೇನ, ಭೂಸಿತೇನ ಅನೇಕಧಾ.
ತತೋ ಏಕಂ ಗಾಹಯಿತ್ವಾ, ನಾನಾಮಙ್ಗಲಸಙ್ಖತೇ;
ಪುರಿತ್ಥಿಮದಿಸಾಭಾಗೇ, ಪಠಮಂ ಮಙ್ಗಲಿತ್ಥಿಕಂ.
ಪತಿಟ್ಠಾಪೇಸಿ ಸಕ್ಕಚ್ಚಂ, ಮನುಞ್ಞೇ ಗನ್ಧಕದ್ದಮೇ;
ಜಾತಿಸುಮನ ಪುಪ್ಫೇಸು, ಪೂಜಿತೇಸು ತಹಿಂ ಪನ.
ಅಹೋಸಿ ಪುಥವೀಕಮ್ಪೋ, ಸೇಸಾ ಸತ್ತಾಪಿ ಸತ್ತಹಿ;
ಪತ್ತಿಟ್ಠಾಪೇಸ’ ಮಚ್ಚೇಹಿ, ಮಙ್ಗಲಾನಿ ಚ ಕಾರಯಿ.
ಏವಂ ¶ ಅಸಾಳ್ಹಮಾಸಸ್ಸ, ಸುಕ್ಕಪಕ್ಖೇ’ಭಿಸಮ್ಮತೇ;
ಉಪೋಸಥೇ ಪನ್ನರಸೇ, ಪತಿಟ್ಠಾಪೇಸಿ ಇಟ್ಠಿಕಾ.
ಚತುದ್ದಿಸಂ ಠಿತೇ ತತ್ಥ, ಮಹಾಥೇರೇ ಅನಾಸವೇ;
ವನ್ದಿತ್ವಾ ಪೂಜಯಿತ್ವಾ ಚ, ಸುಪ್ಪತಿತೋ ಕಮೇನ ಸೋ.
ಪುಬ್ಬುತ್ತರಂ ದಿಸಂ ಗನ್ತ್ವಾ, ಪಿಯದಸ್ಸಿಂ ಅನಾಸವಂ;
ವನ್ದಿತ್ವಾನ ಮಹಾಥೇರಂ, ಅಟ್ಠಾಸಿ ತಸ್ಸ ಸನ್ತಿಕೇ.
ಮಙ್ಗಲಂ ತತ್ಥ ವಡ್ಢೇನ್ತೋ, ತಸ್ಸ ಧಮ್ಮಮಭಾಸಿಸೋ;
ಥೇರಸ್ಸ ದೇಸನಾ ತಸ್ಸ, ಜನಸ್ಸಾ’ಹೋಸಿ ಸಾತ್ಥಿಕಾ.
ಚತ್ತಾಲೀಸಸಹಸ್ಸಾನಂ, ಧಮ್ಮಾಭಿಸಮಯೋ ಅಹು;
ಚತ್ತಾಲೀಸಸಹಸ್ಸಾನಂ, ಸೋತಾಪತ್ತಿಫಲಂ ಅಹು.
ಸಹಸ್ಸಂ ಸಕದಾಗಾಮಿ, ಅನಾಗಾಮಿ ಚ ತತ್ತಕಾ;
ಸಹಸ್ಸಂಯೇವ ಅರಹನ್ತೋ, ತತ್ಥ’ಹೇಸುಂ ಗಿಹೀಜನಾ.
ಅಟ್ಠಾರಸಸಹಸ್ಸಾನಿ, ಭಿಕ್ಖೂಭಿಕ್ಖುನಿಯೋ ಪನ;
ಚುದ್ದಸೇವ ಸಹಸ್ಸಾನಿ, ಅರಹತ್ತೇ ಪತಿಟ್ಠಯುಂ.
ಏವಮ್ಪಪಸನ್ನಮತಿಮಾ ರತನತ್ತಯಮ್ಹಿ,
ಚಾಗಾಮಿಮುತ್ತಮನಸಾಜನತಾಹಿ ತೇನ;
ಲೋಕತ್ಥಸಿದ್ಧಿ ಪರಮಾ ಭವತೀತಿ ಞತ್ವಾ,
ಸದ್ಧಾದಿನೇಕಗುಣಯೋಗ ರತಿಂ ಕರೇಯ್ಯಾತಿ.
ಸುಜನಪ್ಪಸಾದಸಂ ವೇಗತ್ಥಾಯ ಕತೇ ಮಹಾವಂಸೇ
ಥೂಪಾರಮ್ಭೋ ನಾಮ
ಏಕೂನತಿಂಸತಿಮೋ ಪರಿಚ್ಛೇದೋ.
ತಿಂಸತಿಮ ಪರಿಚ್ಛೇದ
ಧಾತುಗಬ್ಭರಚನೋ
ವನ್ದಿತ್ವಾನ ¶ ಮಹಾರಾಜಾ, ಸಬ್ಬಂ ಸಙ್ಘಂ ನಿಮನ್ತಯಿ;
‘‘ಯಾವಚೇತಿಯನಿಟ್ಠಾನಾ, ಭಿಕ್ಖಂ ಗಣ್ಹಥ ಮೇ’’ಇತಿ.
ಸಙ್ಘೋ ತಂ ನಾಧಿವಾಸೇಸಿ, ಅನುಪುಬ್ಬೇನ ಸೋ ಪನ;
ಯಾವನ್ತೋ ಯಾವ ಸತ್ತಾಹಂ, ಸತ್ತಾಹಮಧಿವಾಸನಂ.
ಅಲತ್ಥೋ’ಪಡ್ಢಭಿಕ್ಖೂಹಿ, ತೇ ಲದ್ಧಾ ಸುಮನೋ’ವ ಸೋ;
ಅಟ್ಠಾರಸಸು ಠಾನೇಸು, ಥೂಪಠಾನಸಮನ್ತತೋ.
ಮಣ್ಡಪೇ ಕಾರಯಿತ್ವಾನ, ಮಹಾದಾನಂ ಪವತ್ತಯಿ;
ಸತ್ಥಾಹಂ ತತ್ಥ ಸಙ್ಘಸ್ಸ, ತತೋ ಸಙ್ಘಂ ವಿಸ್ಸಜ್ಜಯಿ.
ತತೋ ಭೇರಿಂ ಚರಾಪೇತ್ವಾ, ಇಟ್ಠಕಾ ವಡ್ಢಕೀ ಲಹುಂ;
ಸನ್ನಿಪಾತೇಸಿ ತೇ ಆಸುಂ, ಪಞ್ಚಮತ್ತಸತಾನಿ ಹಿ.
ಕಥಂ ಕರಿಸ್ಸಸಿ ನೇ’ಕೋ, ಪುಚ್ಛಿತೋ ಆಹ ಭೂಪತಿ;
‘‘ಪೇಸ್ಸಿಯಾನಂ ಸತಂ ಲದ್ಧಾ, ಪಂಸೂನಂ ಸಕಟಂ ಅಹಂ.
ಖೇಪಯಿಸ್ಸಾಮಿ ಏಕ್ಕಾ’ಹಂ, ತಂ ರಾಜಾ ಪಟಿಬಾಹಯಿ;
ತತೋ ಉಪಡ್ಢುಪಡ್ಢಞ್ಚ, ಪಂಸೂ ದ್ವೇ ಅಮ್ಮಣಾನಿ ಚ.
ಆಹಂಸು ರಾಜಾ ಪಟಿಬಾಹಿ, ಚತುರೋ ತೇಪಿ ವಡ್ಢಕೀ;
ಅಥೇಕೋ ಪಣ್ಡಿತೋ ಬ್ಯತ್ತೋ, ವಡ್ಢಕೀ ಆಹ ಭೂಪತಿಂ.
‘‘ಉದುಕ್ಖಲೇ ಕೋಟ್ಟಯಿತ್ವಾ, ಅಹಂ ಸುಪ್ಪೇಹಿ ವಟ್ಟಿತಂ;
ಪಿಂಸಾಪಯಿತ್ವಾ ನಿಸದೇ, ಏತಂ ಪಂಸೂನಮಮ್ಮಣಂ.
ಇತಿ ವುತ್ತೋ ಅನುಞ್ಞಾಸಿ, ತಿಣಾದಿನೇತ್ಥನೋ ಸಿಯುಂ;
ಚೇತಿಯಮ್ಹೀತಿ ಭೂಮಿನ್ದೋ, ಇನ್ದತುಲ್ಯಪರಕ್ಕಮೋ.
‘‘ಕಂ ಸಣ್ಠಾನಂ ಚೇತಿಯಂ ತಂ, ಕರಿಸ್ಸಸಿ ತುವಂ ಇತಿ;
ಪುಚ್ಛಿತಂ ತಂಖಣಂಯೇವ, ವಿಸ್ಸಕಮ್ಮೋ ತಮಾವಿಸಿ.
ಸೋವಣ್ಣಪಾತಿಂ ತೋ ಯಸ್ಸ, ಪುರಾಪೇತ್ವಾವ ವಡ್ಢಕೀ;
ಪಾಣಿನಾ ವಾರಿಮಾದಾಯ, ವಾರಿಪಿಟ್ಠಿಯಮಾಹನೀ.
ಫಲಿಕ ¶ ಲೋಲಸದಿಸಂ, ಮಹಾಫುಬ್ಬುಳಮುಟ್ಠಹಿ;
ಆಹೀ’ದಿಸಂ ಕರಿಸ್ಸತಿ, ತುಸ್ಸಿತ್ವಾನ’ಸ್ಸ ಭೂಪತಿ.
ಸಹಸ್ಸಗ್ಘಂ ವತ್ಥಯುಗಂ, ತಥಾ’ಲಙ್ಕಾರ ಪಾದುಕಾ;
ಕಹಾಪನಾನಿ ದ್ವಾದಸ-ಸಹಸ್ಸಾನಿ ಚ ದಾಪಪಿ.
‘‘ಇಟ್ಠಕಾ ಆಹಾರಾಪೇಸ್ಸಂ, ಅಪೀಳೇನ್ತೋ ಕಥಂ ನರೇ’’;
ಇತಿ ರಾಜಾ ವಿಚಿನ್ತೇಸಿ, ರತ್ತಿಂಞತ್ವಾನ ತಂ ಮರೂ.
ಚೇತಿಯಸ್ಸ ಚತುದ್ಧಾರೇ, ಆಹರಿತ್ವಾನ ಇಟ್ಠಕಾ;
ರತ್ತಿಂ ರತ್ತಿಂ ಠಪಯಿಂಸು, ಏಕೇಕಾಹಪಹೋನಕಾ.
ತಂ ಸುತ್ವಾ ಸುಮನೋರಾಜಾ, ಚೇತಿಯೇ ಕಮ್ಮಮಾರಭಿ;
ಅಮೂಲಮೇತ್ಥ ಕಮ್ಮಞ್ಚ, ನ ಕಾತಬ್ಬನ್ತಿ ಞಾಪಯಿ.
ಏಕೇಕಸ್ಮಿಂ ದುವಾರಸ್ಮಿಂ, ಠಪಾಪೇಸಿ ಕಹಾಪಣೇ;
ಸೋಳಸಸತಸಹಸ್ಸಾನಿ, ವತ್ಥಾನಿಸು ಬಹೂನಿ ಚ.
ವಿವಿಧಞ್ಚ ಅಲಙ್ಕಾರಂ, ಖಜ್ಜಂಭೋಜ್ಜಂ ಸಪಾನಕಂ;
ಗನ್ಧಮಾಲಾಗುಳಾದಿಚ, ಮುಖವಾಸಕಪಞ್ಚಕಂ.
‘‘ಯಥಾರುಚಿತಂ ಗಣ್ಹನ್ತು, ಕಮ್ಮಂ ಕತ್ವಾ ಯಥಾರುಚಿಂ;
ತೇ ತಥೇವ ಅಪೇಕ್ಖಿತ್ವಾ, ಅದಂಸು ರಾಜಕಮ್ಮಿಕಾ.
ಥೂಪಕಮ್ಮಸಹಾಯತ್ತಂ, ಏಕೋ ಭಿಕ್ಖುನಿಕಾಮಯಂ;
ಮತ್ತಿಕಾಪಿಣ್ಡಮಾದಾಯ, ಅತ್ತನಾ ಅಭಿಸಙ್ಖತಂ.
ಗನ್ತ್ವಾನ ಚೇತಿಯಟ್ಠಾನಂ, ವಡ್ಢೇತ್ವಾ ರಾಜಕಮ್ಮಿಕೇ;
ಅದಾಸಿ ತಂ ವಡ್ಢಕಿಸ್ಸ, ಗಣ್ಹನ್ತೋಯೇವ ಜಾನಿಸೋ.
ತಸ್ಸಾ ಕಾರಂ ವಿದಿತ್ವಾನ, ತತ್ಥಾಹೋಸಿ ಕುತೂಹಲಂ;
ಕಮೇನ ರಾಜಾ ಸುತ್ವಾನ, ಆಗತೋ ಪುಚ್ಛಿ ವಡ್ಢಕೀ.
ದೇವ ಏಕೇನ ಹತ್ಥೇನ, ಪುಪ್ಫಾನಾ’ದಾಯ ಭಿಕ್ಖವೋ;
ಏಕೇನ ಮತ್ತಿಕಾಪಿಣ್ಡಂ, ದೇನ್ತಿ ಮಯ್ಹಂ ಅಹಂ ಪನ.
ಅಯಂ ಆಗನ್ತುಕೋ ಭಿಕ್ಖು, ಅಯಂ ನೇವಾಸಿಕೋ ಇತಿ;
ಜಾನಾಮಿನೇವಾ’ತಿ ವಚೋ, ಸುತ್ವಾ ರಾಜಾಸಮಪ್ಪಯಿ.
ಏಕೋಬಲತ್ಥಂ ದಸ್ಸೇತುಂ, ಮತ್ತಿಕಾ ದಾಯಕಂ ಯತಿಂ;
ಸೋ ಬಲತಸ್ಸ ದಸ್ಸೇಸಿ, ಸೋ ತಂ ರಞ್ಞೋ ನಿವೇದಯಿ.
ಜಾತಿಮಕುಲಕುಮ್ಭೇಸೋ ¶ , ಮಹಾಬೋಧಙ್ಗಣೇ ತಯೋ;
ಠಪಾಪೇತ್ವಾ ಬಲತ್ಥೇನ, ರಾಜಾ ದಾಪೇಸಿ ಭಿಕ್ಖುನೋ.
ಅಜಾನಿತ್ವಾ ಪೂಜಯಿತ್ವಾ, ಠಿತಸ್ಸೇ’ತಸ್ಸ ಭಿಕ್ಖುನೋ;
ಬಲತ್ಥೋ ತಂ ನಿವೇದೇಸಿ, ತದಾ ತಂ ಜಾನಿ ಸೋ ಯತಿ.
ಕೇಲಿವಾತೇ ಜನಪದೇ, ಪಿಯಙ್ಗಲ್ಲನಿವಾಸಿಕೋ;
ಥೇರೋ ಚೇತಿಯಕಮ್ಮಸ್ಮಿಂ, ಸಹಾಯತ್ತಂ ನಿಕಾಮಯಂ.
ತಸ್ಸಿತ್ಥಿಕಾವಡ್ಢಕಿಸ್ಸ, ಞಾತಕೋ ಇಧ ಆಗತೋ;
ತಸ್ಸಿಟ್ಠಿಕಾ ಸಮತ್ತೇನ, ಞಾತೋ ಕತ್ವಾನ ಇಟ್ಠಕಂ.
ಕಮ್ಮಿಯೇವಡ್ಢಯಿತ್ವಾನ, ವಡ್ಢಕಿಸ್ಸ ಅದಾಸಿತಂ;
ಸೋ ತಂ ತತ್ಥ ನಿಯೋಜೇಸಿ, ಕೋಲಾಹಲಮಹೋಸಿ ಚ.
ರಾಜಾ ಸುತ್ವಾವ’ ತಂ ಆಹ, ‘‘ಞಾತುಂ ಸಕ್ಕಾ ತಮಿಟ್ಠಿಕಂ’’;
ಜಾನನ್ತೋಪಿ ನ ಸಕ್ಕಾತಿ, ರಾಜಾನಂ ಆಹ ವಡ್ಢಕೀ.
‘‘ಜಾನಾಸಿ ತಂ ತ್ವಂ ಥೇರಂತಿ’’,
ವುತ್ತೋ ಆಮಾ’’ತಿ ಭಾಸಿತೋ;
ತಂ ಞಾಪನತ್ಥಂ ಅಪ್ಪೇಸಿ,
ಬಲತ್ಥಂ ತಸ್ಸ ತೂಪತಿ.
ಬಲತ್ಥೋ ತೇನ ತಂ ಞತ್ವಾ, ರಾಜಾನುಞ್ಞಾಯುಪಾಗತೋ;
ಕಟ್ಠಹಾಲಪರಿವೇಣೇ, ಥೇರಂ ಪಸ್ಸಿಯ ಮನ್ತಿಯ.
ಥೇರಸ್ಸ ಮಗಮನಾಹಞ್ಚ, ಗತಿಠಾನಞ್ಚ ಜಾನಿಯ;
‘‘ತುಮ್ಹೇಹಿ ಸಹ ಗಚ್ಛಾಮಿ, ಸಕಂ ಗಾಮಂ’’ನ್ತಿ ಭಾಸಿಯ.
ರಞ್ಞೋ ಸಬ್ಬಂ ನಿವೇದೇಸಿ, ರಾಜಾ ತಸ್ಸ ಅದಾಪಯಿ;
ವತ್ಥಯುಗಂ ಸಹಸ್ಸಗ್ಘಂ, ಮಹಗ್ಘಂ ರತ್ತಕಮ್ಬಲಂ.
ಸಾಮಣಕೇ ಪರಿಕ್ಖಾರೇ, ಬಹುಕೇ ಸಕ್ಖರಮ್ಪಿ ಚ;
ಸುಗನ್ಧ ತೇಲನಾಳಿಞ್ಚ, ದಾಪೇತ್ವಾ ಅನುಸಾಸಿತಂ.
ಥೇರೇನ ಸಹ ಗನ್ತ್ವಾ ಸೋ, ದಿಸ್ಸನ್ತೇ ಪಿಯಗಲ್ಲಕೇ;
ಥೇರಂ ಸೀತಾಯ ಛಾಯಾಯ, ಸೋದಕಾಯ ನಿಸೀದಿಯ.
ಸಕ್ಖರಪಾಣಕಂ ದತ್ವಾ, ಪಾದೇ ತೇಲೇನ ಮಕ್ಖಿಯ;
ಉಪಾಹನಾನಿ ಯೋಜೇತ್ವಾ, ಪರಿಕ್ಖಾರೇ ಉಪಾನಯಿ.
ಕುಲೂಪಗಸ್ಸ ¶ ಥೇರಸ್ಸ, ಗಹಿತಾ ಮೇ ಇಮೇ ಮಯಾ;
ವತ್ಥಯುಗಂತು ಪುತ್ತಸ್ಸ, ಸಬ್ಬೇ ತಾನಿ ದದಾಮಿ ವೋ.
ಇತಿ ವತ್ವಾನ ದತ್ವಾ ತೇ, ಗಹೇತ್ವಾ ಗಚ್ಛತೋ ಪನ;
ವನ್ದಿತ್ವಾ ರಾಜವಚಸಾ, ರಞ್ಞೋ ಸನ್ದೇಸಮಾಹ ಸೋ.
ಮಹಾಥೂಪೇ ಕಯಿರಮಾನೇ, ಸತಿಯಾಕಮ್ಮಕಾರಕಾ;
ಅನೇಕಸಙ್ಖಾಹಿ ಜನಾ, ಪಸನ್ನಾ ಸುಗತಿಂ ಗತಾ.
ಚಿತ್ತಪ್ಪಸಾದಮತ್ತೇನ, ಸುಗತೇ ಗತಿಉತ್ತಮಾ;
ಲಬ್ಭತೀತಿ ವಿದಿತ್ವಾನ, ಥೂಪಪೂಜಂ ಕರೇ ಬುಧೋ.
ಏತ್ಥೇವ ಭತಿಯಾ ಕಮ್ಮಂ, ಕರಿತ್ವಾ ಇತ್ಥಿಯೋ ದುವೇ;
ತಾವತಿಂಸಮ್ಹಿ ನಿಬ್ಬತ್ತಾ, ಮಹಾಥೂಪಮ್ಹಿ ನಿಟ್ಠಿತೇ.
ಆವಜ್ಜಿತ್ವಾ ಪುಬ್ಬಕಮ್ಮಂ, ದಿಟ್ಠಕಮ್ಮಫಲಾ ಉಭೋ;
ಗನ್ಧಮಾಲಾ’ದಿಯಿತ್ವಾನ, ಥೂಪಂ ಪೂಜೇತುಮಾಗತಾ.
ಗನ್ಧಮಾಲಾಹಿ ಪೂಜೇತ್ವಾ, ಚೇತಿಯಂ ಅಭಿವನ್ದಿಸುಂ;
ತಸ್ಮಿಂ ಖಣೇ ಭಾತಿವಙ್ಕ-ವಾಸೀ ಥೇರೋ ಮಹಾಸಿವೋ.
ರತ್ತಿಭಾಗೇ ಮಹಾಥೂಪಂ, ವನ್ದಿಸ್ಸಾಮೀತಿ ಆಗತೋ;
ತಾದಿಸ್ವಾನ ಮಹಾಸತ್ತ-ಪಣ್ಣಿರುಕ್ಖಮ ಪಸ್ಸಿತೋ.
ಅದಸ್ಸಯಿತ್ವಾ ಅತ್ತಾನಂ, ಪಸ್ಸಂ ಸಮ್ಪತ್ತಿಮಬ್ಭುತಂ;
ಠತ್ವಾ ತಾಸಂ ವನ್ದನಾಯ, ಪರಿಯೋಸಾನೇ ಅಪುಚ್ಛಿತಂ.
‘‘ಭಾಸತೇ ಸಕಲೋ ದೀಪೋ,
ದೇಹೋಭಾಸೇನ ವೋ ಇಧ;
ಕಿನ್ನುಕಮ್ಮಂ ಕರಿತ್ವಾನ,
ದೇವಲೋಕಂ ಇತೋ ಗತಾ.
ಮಹಾಥೂಪೇ ಕತಂ ಕಮ್ಮಂ, ತಸ್ಸ ಆಹಂಸು ದೇವತಾ;
ಏವಂ ತಥಾಗತೇ ಹೇವ, ಪಸಾದೋ ಹಿ ಮಹಪ್ಫಲೋ.
ಪುಪ್ಫಧಾನತ್ತಯಂ ಥೂಪೇ, ಇಟ್ಠಿಕಾಹಿ ಚಿತಂ ಚಿತಂ;
ಸಮಂ ಪಥವಿಯಾ ಕತ್ವಾ, ಇದ್ಧಿಮನ್ತೋ’ವ ಸೀದಯುಂ.
ನವ ವಾರೇ ಚಿತಂ ಸಬ್ಬಂ, ಏವಂ ಓಸೀದಯಿಂಸು ತೇ;
ಅಥ ರಾಜಾ ಭಿಕ್ಖುಸಙ್ಘ-ಸನ್ನಿಪಾತ ಮಕಾರಯಿ.
ತತ್ಥಾಸೀತಿಸಹಸ್ಸಾನಿ ¶ , ಸನ್ನಿಪಾತಮ್ಹಿ ಭಿಕ್ಖವೋ;
ರಾಜಾ ಸಙ್ಘಮುಪಾಗಮ್ಮ, ಪೂಜೇತ್ವಾ ಅಭಿವನ್ದಿಯ.
ಇಟ್ಠಕೋಸಿದನೇಹೇತುಂ, ಪುಚ್ಛಿ ಸಙ್ಘೋ ವಿಯಾಕರಿ;
‘‘ನೋ ಸೀದನತ್ಥಂ ಥೂಪಸ್ಸ, ಇದ್ಧಿಮನ್ತೇಹಿ ಭಿಕ್ಖೂಹಿ.
ಕತಂ ಏತಂ ಮಹಾರಾಜ, ನ ಇದಾನಿ ಕರಿಸ್ಸತೇ;
ಅಞ್ಞಥತ್ತಮಕತ್ವಾ ತಂ, ಮಹಾಥೂಪಂ ಸಮಾಪಯ.
ತಂ ಸುತ್ವಾ ಸುಮನೋ ರಾಜಾ, ಥೂಪಕಮ್ಮಮಕಾರಯಿ;
ಪುಪ್ಫಾಧಾನೇಸು ದಸಸು, ಇಟ್ಠಿಕಾ ದಸಕೋಟಿಯೋ.
ಭಿಕ್ಖುಸಙ್ಘೋ ಸಾಮಣೇರೇ, ಉತ್ತರಂ ಸುಮನಮ್ಪಿ ಚ;
‘‘ಚೇಭಿಯ ಧಾತುಗಬ್ಭತ್ಥಂ, ಪಾಸಾಣೇ ಮೇಘವಣ್ಣಕೇ.
ಆಹರಥಾ’’ತಿ ಯೋಜೇಸಿ, ತೇ ಗನ್ತ್ವಾ ಉತ್ತರಂ ಕುರುಂ;
ಅಸೀತಿ ರತನಾಯಾಮ, ವಿತ್ಥಾರೇ ರವಿಭಾಸುರೇ.
ಅಟ್ಠಙ್ಗುಲಾನಿ ಬಹಲೇ, ಗಣ್ಠಿಪುಪ್ಫನಿಭೇ ಸುಭೇ;
ಛಮೇಘವಣ್ಣಪಾಸಾಣೇ, ಆಹರಿಂಸು ಖಣೇತತೋ.
ಪುಪ್ಫಧಾನಸ್ಸ ಉಪರಿ, ಮಜ್ಝೇ ಏಕಂ ನಿಪಾತಿಯ;
ಚತುಪಸ್ಸಮ್ಹಿ ಚತುರೋ, ಮಞ್ಜೂಸಂ ವಿಯ ಯೋಜಿಯ.
ಏಕಂ ಪಿಧಾನಕತ್ಥಾಯ, ದಿಸಾಭಾಗೇ ಪುರತ್ಥಿಮೇ;
ಅದಸ್ಸನಂ ಕರಿತ್ವಾ ತೇ, ಠಪಯಿಂಸು ಮಹಿದ್ಧಿಕಾ.
ಮಜ್ಝಮ್ಹಿ ಧಾತುಗಬ್ಭಸ್ಸ, ತಸ್ಸ ರಾಜಾ ಅಕಾರಯಿ;
ರತನಮಯಂ ಬೋಧಿರುಕ್ಖಂ, ಸಬ್ಬಾಕಾರಮನೋರಮಂ.
ಅಟ್ಠಾರಸ ರತನಿಕೋ, ಖನ್ಧೋ ಸಾಖಾಸ್ಸ ಪಞ್ಚ ಚ;
ಪವಾಲಮಯಮೂಲೋ ಸೋ, ಇನ್ದನೀಲೇ ಪತಿಟ್ಠಿತೋ.
ಸುಸುದ್ಧರಜತಕ್ಖನ್ಧೋ, ಮಣಿಪತ್ತೇಹಿ ಸೋಭಿತೋ;
ಹೇಮಮಯಪಣ್ಡುಪತ್ತ, ಫಲೋ ಪವಾಳಅಙ್ಕುರೋ.
ಅಥ ಮಙ್ಗಲಿಕಾ ತಸ್ಸ, ಖನ್ಧೇ ಪುಪ್ಫಲತಾಪಿ ಚ;
ಚತುಪ್ಪದಾನಂ ಪನ್ತೀಧ, ಹಂಸಪನ್ತಿ ಚ ಸೋಭನಾ.
ಉದ್ಧಂ ಚಾರುವಿತಾನನ್ತೇ, ಮುತ್ತಾ ಕಿಂ ಕಿಣಿಜಾಲಕಾ;
ಸುವಣ್ಣ ಘಣ್ಟಾಪನ್ತೀಧ, ದಾಮಾನಿ ಚ ತಹಿಂ ತಹಿಂ.
ವಿತಾನ ¶ ಚತುಕೋಣಮ್ಹಿ, ಮುತ್ತಾದಾಮಕಲಾಪಕೋ;
ನವಸತ ಸಹಸ್ಸಗ್ಘೋ, ಏಕೇ ಕೋ ಅಸಿಲಮ್ಬಿತೋ.
ರವಿಚನ್ದತಾರ ರೂಪಾನಿ, ನಾನಾಪದುಮಕಾನಿ ಚ;
ರತನೇಹಿ ಕತಾನೇವ, ಧಿತಾನೇ ಅಪ್ಪಿತಾನ’ಯುಂ.
ಅಟ್ಠುತ್ತರಸಹಸ್ಸಾನಿ, ವತ್ತಾನಿ ವಿವಿಧಾನಿ ಚ;
ಮಹಗ್ಘನಾನಾರಙ್ಗಾನಿ, ವಿತಾನೇ ಲಮ್ಬಿತಾನ’ಯುಂ.
ಬೋಧಿಂ ಪರಿಕ್ಖಿಪಿತ್ವಾನ, ನಾನಾರತನವೇದಿಕಾ;
ಮಹಾಮಲಕ ಮುತ್ತಾಹಿ, ಸನ್ಥಾರೇತು ತದನ್ತರೇ.
ನಾನಾರತನ ಪುಪ್ಫಾನಂ, ಚತುಗನ್ಧೂದಕಸ್ಸ ಚ;
ಪುಣ್ಣಾ ಪುಣ್ಣಘಟಪನ್ತಿ, ಬೋಧಿಮೂಲೇ ಕತಾನ’ಯುಂ.
ಬೋಧಿ ಪಾಚಿನ ಪಞ್ಞತ್ತೇ, ಪಲ್ಲಙ್ಕೇಕೋಟಿಅಗ್ಘಕೇ;
ಸೋವಣ್ಣ ಬುದ್ಧಪಟಿಮಂ, ನಿಸೀದಾಪೇಸಿ ಭಾಸುರಂ.
ಸರೀರಾವಯವಾತಸ್ಸಾ, ಪಟಿಮಾಯ ಯಥಾರಹಂ;
ನಾನಾವಣ್ಣೇಹಿ ರತನೇಹಿ, ಕತಾ ಸುರುಚಿರಾ ಅಹುಂ.
ಮಹಾಬ್ರಹ್ಮಾ ಠಿತೋ ತತ್ಥ, ರಾಜತಚ್ಛತ್ತ ಧಾರಕೋ;
ವಿಜಯುತ್ತರಸಙ್ಖೇನ, ಸಕ್ಕೋ ಚ ಅಭಿಸೇಕದೋ.
ವಿಣಾಹತ್ಥೋ ಪಞ್ಚಸಿಖೋ, ಕಾಳನಾಗೋ ಸನಾಟಿಕೋ;
ಸಹಸ್ಸಹತ್ಥೋ ಮಾರೋ ಚ, ಸಹತ್ತೀಸಹ ಕಿಂಕರೋ.
ಪಾಚಿನಪಲ್ಲಙ್ಕನಿಭಾ, ತೀಸು ಸೇಸದಿಸಾಸು ಚ;
ಕೋಟಿಕೋಟಿಧನಗ್ಘಾ ಚ, ಪಲ್ಲಙ್ಕಾ ಅತ್ಥತಾ ಅಹುಂ.
ಬೋಧಿಂ ಉಸ್ಸಿಸಕೇ ಕತ್ವಾ, ನಾನಾರತನಮಣ್ಡಿತಂ;
ಕೋಟಿ ಧನಗ್ಘಕಂಯೇವ, ಪಞ್ಞತ್ತಂ ಸಯನಂ ಅಹು.
ಸತ್ತಸತ್ತಾಹ ಠಾನೇಸು, ತತ್ಥ ತತ್ಥ ಯಥಾರಹಂ;
ಅಧಿಕಾರೇ ಅಕಾರೇಸಿ, ಬ್ರಹ್ಮಯಾಚನಮೇವ ಚ.
ಧಮ್ಮಚಕ್ಕಪ್ಪವತ್ತಞ್ಚ, ಯಸಪಬ್ಬಜನಮ್ಪಿ ಚ;
ಭದ್ದವಗ್ಗಿಯ ಪಬ್ಬಜ್ಜಂ, ಜಟಿಲಾನಂ ದಮನಮ್ಪಿ ಚ.
ಬಿಮ್ಬಿಸಾರಾಗಮಞ್ಚಾಪಿ ¶ , ರಾಜಗೇಹಪ್ಪವೇಸನಂ;
ವೇಳುವನಸ್ಸಗಹನಂ, ಅಸೀತಿಸಾವಕೇ ತಥಾ.
ಕಪಿಲ ವತ್ಥುಗಮನಂ, ತಥಾ ರತನ ಚಙ್ಕಮಂ;
ರಾಹುಲಾನನ್ದಪಬ್ಬಜ್ಜಂ, ಗಹಣಂ ಜೇತವನಸ್ಸ ಚ.
ಅಮ್ಬಮೂಲೇ ಪಾಟಿಹೀರಂ, ತಾವತಿಂಸಮ್ಹಿ ದೇಸನಂ;
ದೇವೋರೋಹಣಪಾಟಿಹೀರಂ, ಥೇರಪಞ್ಹಸಮಾಗಮಂ.
ಮಹಾಸಮಯ ಸುತ್ತನ್ತಂ, ರಾಹುಲೋವಾದಮೇವಚ;
ಮಹಾಮಙ್ಗಲಸುತ್ತಞ್ಚ, ಧನಪಾಲಸಮಾಗಮಂ.
ಆಳವಕಙ್ಗುಲಿಮಾಲ, ಅಪಲಾಲದಮನಮ್ಪಿ ಚ;
ಪಾರಾಯನಕಸಮಿತಿಂ, ಆಯುವೋಸ್ಸಜ್ಜನಂ ತಥಾ.
ಸೂಕರಮದ್ದವಗ್ಗಾಹಂ, ಸಿಙ್ಗೀವಣ್ಣಯುಗಸ್ಸ ಚ;
ಪಸನ್ನೋದಕಪಾನಞ್ಚ, ಪರಿನಿಬ್ಬಾನ ಮೇವ ಚ.
ದೇವಮನುಸ್ಸ ಪರಿದೇವಂ, ಥೇರೇನ ಪಾದವನ್ದನಂ;
ದಹನಂ ಅಗ್ಗಿನಿಬ್ಬಾನಂ, ತತ್ಥ ಸಕ್ಕಾರ ಮೇವ ಚ.
ಧಾತುವಿತಙ್ಗ ದೋಣೇನ, ಪಸಾದಜನಕಾನಿ ಚ;
ಯೇಭುಯ್ಯೇನ ಅಕಾರೇಸಿ, ಜಾತಕಾನಿ ಸುಜಾತಿಮಾ.
ವೇಸ್ಸನ್ತರ ಜಾತಕನ್ತು, ವಿತ್ಥಾರೇನ ಅಕಾರಯಿ;
ಕುಸಿನಾಪುರತೋ ಯಾವ, ಬೋಧಿಮನ್ತಿ ತಥೇವ ಚ.
ಚತುದ್ದಿಸಂ ತೇ ಚತ್ತಾರೋ, ಮಹಾರಾಜಾ ಠಿತಾ ಅಹುಂ;
ತೇತ್ತಿಂಸದೇವ ಪುತ್ತಾ ಚ, ಬಾತ್ತಿಂಸ ಚ ಕುಮಾರಿಯೋ.
ಯಕ್ಖಸೇನಾಪತಿಅಟ್ಠ, ವೀಸತಿ ಚ ತತೋ ಪರಿ;
ಅಞ್ಜಲೀಪಗ್ಗಹಾದೇವಾ, ಪುಪ್ಫಪುಣ್ಣಘಟಾ ತತೋ.
ನಚ್ಚಕಾ ದೇವತಾಚೇವ, ತೂರಿಯವಾದಕ ದೇವತಾ;
ಆದಾಸಗಾಹಕಾ ದೇವಾ, ಪುಪ್ಫಸಾಖಾ ಧರಾ ತಥಾ.
ಪದುಮಾದಿಗಾಹಕಾ ದೇವಾ, ಅಞ್ಞೇ ದೇವಾ ಚ ನೇಕಧಾ;
ರತನಗ್ಘಿಯ ಪನ್ತಿ ಚ, ಧಮ್ಮಚಕ್ಕಾನ ಮೇವ ಚ.
ಖಗ್ಗಧರಾದೇವಪನ್ತಿ, ದೇವಾಪಾತಿಧರಾ ತಥಾ;
ತೇಸಂ ಸೀಸೇ ಪಞ್ಚಹತ್ಥಾ, ಗನ್ಧತೇಲಸ್ಸ ಪೂರಿತಾ.
ದುಕೂಲವಟ್ಟಿಕಾ ¶ ಪನ್ತಿ, ಸದಾಪಞ್ಜಲಿತಾ ಅಹು;
ಫಲಿಕಗ್ಘಿಯೇ ಚತುಕ್ಕಣ್ಣೇ, ಏಕೇಕೋ ಚ ಮಹಾಮಣಿ.
ಸುವಣ್ಣಮಣಿ ಮುತ್ತಾನಂ, ರಾಸಿಯೋ ವಜಿರಸ್ಸ ಚ;
ಚತುಕ್ಕಣ್ಣೇಸು ಚತ್ತಾರೋ, ಕಥಾ’ಹೇಸುಂ ಪಭಸ್ಸರಾ.
ಮೇದವಣ್ಣಕಪಾಸಾಣ, ಭಿತ್ತಿಯಂಯೇವ ಉಜ್ಜಲಾ;
ವಿಜ್ಜಾತಾ ಅಪ್ಪಿತಾ ಆಸುಂ, ಧಾತುಗಬ್ಭೇವಿಭೂಸಿತಾ.
ರೂಪಕಾನೇತ್ತಸಬ್ಬಾನಿ, ಧಾತುಗಬ್ಭೇ ಮನೋರಮೇ;
ಘನಕೋಟ್ಟಿ ಮಹೇಮಸ್ಸ, ಕಾರಾಪೇಸಿ ಮಹೀಪತಿ.
ಕಮ್ಮಾಧಿಟ್ಠಾಯಕೋ ಏತ್ಥ, ಸಬ್ಬಂ ಸಂವಿದಹಿ ಇಮಂ;
ಇನ್ದಗುತ್ತೋ ಮಹಾಥೇರೋ, ಛಳಭಿಞ್ಞೋ ಮಹಾಮತೀ.
ಸಬ್ಬಂ ರಾಜಿದ್ಧಿಯಾ ಏತಂ, ದೇವತಾನಞ್ಚ ಇದ್ಧಿಯಾ;
ಇದ್ಧಿಯಾ ಅರಿಯಾನಞ್ಚ, ಅಸಮ್ಬಾಧಂ ಪತಿಟ್ಠಿತಂ.
ನಿಟ್ಠನ್ತಂ ಸುಗತಞ್ಚ ಪೂಜಿಯತಮಂ ಲೋಕುತ್ತಮಂ ನಿತ್ತಮಂ;
ಧಾತು ತಸ್ಸ ವಿಚುಣ್ಣಿತಂ ಜನಹಿತಂ ಆಸಿಂಸತಾ ಪೂಜಿಯ;
ಪುಞ್ಞಂ ತಂ ಸಮಮಿಚ್ಚ’ಚೇಚ್ಚ ಮತಿಮಾ ಸದ್ಧಾಗುಣಲಙ್ಕತೋ;
ತಿಟ್ಠನ್ತಂ ಸುಗತಂ ವಿಯ’ಸ್ಸ ಮುನಿನೋ ಧಾತು ಚ ಸಮ್ಬೂಜಯೇ.
ಸುಜನಪ್ಪಸಾದಸಂವೇಗತ್ಥಾಯ ಕತೇ ಮಹಾವಂಸೇ
ಧಾತುಗಬ್ಭರಚನೋ ನಾಮ
ತಿಂಸತಿಮೋ ಪರಿಚ್ಛೇದೋ.
ಏಕತಿಂಸತಿಮ ಪರಿಚ್ಛೇದ
ಧಾತುನಿಧಾನಂ
ಧಾತುಗಬ್ಭಮ್ಹಿ ¶ ಕಮ್ಮಾನಿ, ನಿಟ್ಠಾಪೇತ್ವಾ ಅರಿನ್ದಮೋ;
ಸನ್ನಿಪಾತಂ ಕಾರಯಿತ್ವಾ, ಸಙ್ಘಸ್ಸ ಇಧಮಬ್ರವಿ.
ಧಾತುಗಬ್ಭಮ್ಹಿ ಕಮ್ಮಾನಿ, ಮಯಾ ನಿಟ್ಠಾಪಿ ತಾನಿ ಹಿ;
ಸುವೇ ಧಾತುಂ ನಿಧೇಸ್ಸಾಮಿ, ಭನ್ತೇ ಜಾನಾಥ ಧಾತುಯೋ’’.
ಇದಂ ವತ್ವಾ ಮಹಾರಾಜಾ, ನಗರಂ ಪಾವಿಸೀ ತತೋ;
ಧಾತು ಆಹರಕಂ ಭಿಕ್ಖುಂ, ಭಿಕ್ಖುಸಙ್ಘೋ ವಿಚಿನ್ತಿಯ.
ಸೋಣುತ್ತರಂ ನಾಮಯತಿಂ, ಪೂಜಾಪರಿವೇಣವಾಸಿ ಕಂ;
ಧಾತಾಹರಣ ಕಮ್ಮಮ್ಹಿ, ಛಳಭಿಞ್ಞಂ ನಿಯೋಜಯಿ.
ಚಾರಿಕಂ ಚರಮಾನಮ್ಹಿ, ನಾಥೇ ಲೋಕಹಿತಾಯಹಿ;
ನನ್ದುತ್ತರೋ’ತಿ ನಾಮೇನ, ಗಙ್ಗಾತೀರಮ್ಹಿ ಮಾಣವೋ.
ನಿಮನ್ತೇತ್ವಾ’ಭಿಸಮ್ಬುದ್ಧಂ, ಸಹ ಸಙ್ಘಂ ಅಭೋಜಯಿ;
ಸತ್ಥಾಪಯೋಗಪಟ್ಠಾನೇ, ಸಸಙ್ಘೋನಾವಮಾರುಹಿ.
ತತ್ಥ ಭದ್ದಜಿಥೇರೋ ತು, ಛಳಭಿಞ್ಞೋ ಮಹಿದ್ಧಿಕೋ;
ಜಲಪಕ್ಖಲಿತಟ್ಠಾನಂ, ದಿಸ್ವಾ ಭಿಕ್ಖೂ ಇದಂ ವದೀ.
‘‘ಮಹಾ ಪನಾದಭೂತೇನ, ಮಯಾ ವುತ್ತೋ ಸುವಣ್ಣಯೋ;
ಪಾಸಾದೋ ಪತಿತೋ ಏತ್ಥ, ಪಞ್ಚವೀಸತಿಯೋಜಕೋ.
ತಂ ಪಾಪುಣಿತ್ವಾ ಗಙ್ಗಾಯ, ಜಲಂ ಪಕ್ಖಿಲಿ ತಂ ಇಧ;
ಭಿಕ್ಖೂ ಅಸದ್ದಹನ್ತಾ ತಂ, ಸತ್ಥುನೋ ತಂ ನಿವೇದಯುಂ.
ಸತ್ಥಾ’ಹ ‘‘ಕಙ್ಖಂ ಭಿಕ್ಖುನಂ, ವಿನೋದೇಹೀ’’ತಿಸೋತತೋ;
ಞಾಪೇತುಂ ಬ್ರಹ್ಮಲೋಕೇ’ಪಿ, ವಸವತ್ತಿಸಮತ್ಥ ತಂ.
ಇದ್ಧಿಯಾ ನಭಮುಗ್ಗನ್ತ್ವಾ, ಸತ್ತತಾಲಸಮೇ ಠಿತೋ;
ದೂಸ್ಸಥೂಪಂ ಬ್ರಹ್ಮಲೋಕೇ, ಠಪೇತ್ವಾ ವಡ್ಢಿತೇ ಕರೇ.
ಇಧಾ’ನೇತ್ವಾ ¶ ದಸ್ಸಯಿತ್ವಾ, ಜನಸ್ಸ ಪುನ ತಂ ತಹಿಂ;
ಠಪಯಿತ್ವಾ ಯಥಾಠಾನೇ, ಇದ್ಧಿಯಾ ಗಙ್ಗಾಮಾಗತೋ.
ಪಾದಙ್ಗುಟ್ಠೇನ ಪಾಸಾದಂ, ಗಹೇತ್ವಾ ಥುಪಿಕಾಯಸೋ;
ಉಸ್ಸಾಪೇತ್ವಾನ ದಸ್ಸೇತ್ವಾ, ಜನಸ್ಸ ಖಿಪಿ ತಂ ತಹಿಂ.
ನನ್ದುತ್ತರೋ ಮಾಣವಕೋ, ದಿಸ್ವಾ ತಂ ಪಾಟಿಹಾರಿಯಂ;
ಪರಾಯತ್ತಮಹಂ ಧಾತುಂ, ಪಹುಆನಯಿತುಂ ಸಿಯಂ.
ಇತಿ ಪತ್ಥಯಿ ತೇನೇತಂ, ಸಙ್ಘೋ ಸೋಣುತ್ತರಂ ಯತಿಂ;
ತಸ್ಮಿಂ ಕಮ್ಮೇ ನಿಯೋಜೇಸಿ, ಸೋಳಸವಸ್ಸಿಕಂ ಅಪಿ.
‘‘ಆಹರಾಮಿ ಕುತೋ ಧಾತುಂ’’, ಇತಿ ಸಙ್ಘಮಪುಚ್ಛಿಸೋ;
ಕಥೇಸಿ ಸಙ್ಘೋ ಥೇರಸ್ಸ, ತಸ್ಸ ತಾ ಧಾತುಯೋ ಇತಿ.
‘‘ಪರಿನಿಬ್ಬಾನ ಮಞ್ಚಮ್ಹಿ, ನಿಪನ್ನೋ ಲೋಕ ನಾಯಕೋ;
ಧಾತೂಹಿಪಿಲೋಕಹಿ ತಂ, ಕಾತುಂ ದೇವಿನ್ದ ಮಬ್ರುವಿ.
ದೇವಿನ್ದ’ಟ್ಠಸು ದೋಣೇಸು, ಮಮ ಸಾರಿರಧಾಥುಸು;
ಏಕಂ ದೋಣಂ ರಾಮಗಾಮೇ, ಕೋಳಿಯೇಹಿ ಚ ಸಕ್ಕತಂ.
ನಾಗಲೋಕಂ ತತೋ ನಿತಂ, ತತೋ ನಾಗೇಹಿ ಸಕ್ಕತಂ;
ಲಂಕಾದಿಪೇ ಮಹಾಥೂಪೇ, ನಿಧಾನಾಯ ಭವಿಸ್ಸತಿ.
ಮಹಾಕಸ್ಸಪತ್ಥೇರೋಪಿ, ದೀಘದಸ್ಸೀ ಮಹಾಯತಿ;
ಧಮ್ಮಾಸೋಕ ನರಿನ್ದೇನ, ಧಾತುವಿತ್ಥಾರಕಾರಕೋ.
ರಾಜಗಹಸ್ಸ ಸಾಮನ್ತೇ, ರಞ್ಞಾ ಅಜಾತಸತ್ತುನಾ;
ಕಾರಾಪೇನ್ತೋ ಮಹಾಧಾತುಂ, ನಿಧಾನಂ ಸಾಧು ಸಙ್ಖತಂ.
ಸತ್ತ ದೋಣಾನಿ ಧಾತೂನಂ, ಆಹರಿತ್ವಾನ ಕಾರಯಿ;
ರಾಮಗಾಮಮ್ಹಿ ದೋಣನ್ತು, ಸತ್ತುಚಿತ್ತಞ್ಞುನ’ಗ್ಗಹಿ.
ಮಹಾಧಾತುನಿಧಾನಂ ತಂ, ಧಮ್ಮಾಸೋಕೋಪಿ ಭೂಪತಿ;
ಪಸ್ಸಿತ್ವಾ ಅಟ್ಠಮಂ ದೋಣಂ, ಆಣಾಪೇತುಂಮಕಿಂ ಅಕಾ.
ಮಹಾಥೂಪೇ ನಿಧಾನತ್ಥಂ, ವಿಹಿತಂ ತಂ ಜಿನೇನಿ’ತಿ;
ಧಮ್ಮಾಸೋಕಂ ನಿವಾರೇಸುಂ, ತತ್ಥ ಖಿಣಾಸವಾಯತಿ.
ರಾಮಗಾಮಮ್ಹಿ ಥೂಪೋತು, ಗಙ್ಗಾತೀರೇ ಕತೋ ತತೋ;
ಭಿಜ್ಜಿಗಙ್ಗಾಯ ಓಘೇನ, ಸೋತು ಧಾತು ಕರಣ್ಡಕೋ.
ಸಮುದ್ದಂ ¶ ಪವಿಸಿತ್ವಾನ, ದ್ವಿಧಾ ಭಿನ್ನೇ ಜಲೇ ತಹಿಂ;
ನಾನಾರತನಪಿಟ್ಠಮ್ಹಿ, ಅಟ್ಠಾರಸ್ಮಿಂ ಸಮಾಕುಲೋ.
ನಾಗಾ ದಿಸ್ವಾ ಕರಣ್ಡಂ ತಂ, ಕಾಳನಾಗಸ್ಸ ರಾಜಿನೋ;
ಮಞ್ಜೇರಿಕನಾಗಭವನಂ, ಉಪಗಮ್ಮ ನಿವೇದಯುಂ.
ದಸಕೋಟಿಸಹಸ್ಸೇಹಿ, ಗನ್ತ್ವಾ ನಾಗೇಹಿ ಸೋ ತಹಿಂ;
ಧಾತೂ ತಾ ಅಭಿಪೂಜೇನ್ತೋ, ನೇತ್ವಾನ ಭವನಂ ಸಕಂ.
ಸಬ್ಬರತನಮಯಂ ಥೂಪಂ, ತಸ್ಸೋಪರಿಘರಂ ತಥಾ;
ಮಾಪೇತ್ವಾ ಸಹ ನಾಗೇಹಿ, ಸದಾ ಪೂಜೇಸಿ ಸಾದರೋ.
ಆರಕ್ಖಾಮಹತೀ ತತ್ಥ, ಗನ್ತ್ವಾ ಧಾತುಇಧಾನಯ;
ಸುವೇ ಧಾತುನಿಧಾನಞ್ಹಿ, ಭೂಮಿಪಾಲೋ ಕರಿಸ್ಸತಿ’’.
ಇಚ್ಚೇವಂ ಸಙ್ಘವಚನಂ, ಸುತ್ವಾ ಸಾಧೂತಿ ಸೋ ಪನ;
ಪತ್ತಬ್ಬಕಾಲಂ ಪೇಕ್ಖನ್ತೋ, ಪರಿವೇಣ ಮಗಾಸಕಂ.
ಭವಿಸ್ಸತಿ ಸುವೇ ಧಾತು, ನಿಧಾನನ್ತಿ ಮಹೀಪತಿ;
ಚಾರೇಸಿ ನಗರೇ ಭೇರಿಂ, ಸಬ್ಬ ಕಿಚ್ಚಂ ವಿಧಾಯ ತಂ.
ನಗರಂ ಸಕಲಞ್ಚೇವ, ಇಧಾಗಾಮಿಞ್ಚ ಅಞ್ಜಸಂ;
ಅಲಙ್ಕಾರಯಿ ಸಕ್ಕಚ್ಚಂ, ನಗರೇ ಚ ವಿಭೂಸಯಿ.
ಸಕ್ಕೋ ದೇವಾನಮಿನ್ದೋ ಚ, ಲಂಕಾದೀಪಮಸೇಸಕಂ;
ಆಮನ್ತೇತ್ವಾ ವಿಸ್ಸಕಮ್ಮಂ, ಅಲಙ್ಕಾರಯಿನೇಕಧಾ.
ನಗರಸ್ಸ ಚತುದ್ವಾರೇ, ವತ್ತಭತ್ತಂಹಿ ನೇಕಧಾ;
ಮಹಾಜನೋಪಭೋಗತ್ಥಂ, ಠಪಾಪೇಸಿ ನರಾಧಿಪೋ.
ಉಪೋಸಥೇ ಪನ್ನರಸೇ, ಅಪರನ್ಹೇ ಸುಮಾನಸೋ;
ಪಣ್ಡಿತೋ ರಾಜಕಿಚ್ಚೇಸು, ಸಬ್ಬಾಲಙ್ಕಾರ ಮಣ್ಡಿತೋ.
ಸಬ್ಬಾಹಿ ನಾಟಕತ್ಥೀಹಿ, ಯೋಧೇಹಿ ಸಾಯುಧೇಹಿ ಚ;
ಮಹತಾ ಚ ಬಲೋಘೇನ, ಹತ್ಥಿವಾ ಜಿರಥೇಹಿ ಚ.
ನಾನಾವಿಧವಿಭೂಸೇಹಿ, ಸಬ್ಬತೋ ಪರಿವಾರಿತೋ;
ಆರುಯ್ಹ ಸುರಥಂ ಅಟ್ಠಾ, ಸುಸೇತ ಚ ಸುಸಿನ್ಧವಂ.
ಭೂಸಿತಂ ಕಣ್ಡೂಲಂ ಹತ್ಥಿಂ, ಕಾರೇತ್ವಾ ಪುರತೋಸುಭಂ;
ಸುವಣ್ಣಚಙ್ಗೋಟಧರೋ, ಸೋತಚ್ಛತ್ತಸ್ಸ ಹೇಟ್ಠಾತೋ.
ಅಟ್ಠುತ್ತರ ¶ ಸಹಸ್ಸಾನಿ, ನಾಗರನಾರಿಯೋ ಸುಭಾ;
ಸುಪುಣ್ಣಘಟಭೂಸಾಯೋ, ತಂ ರಟ್ಠಂ ಪರಿವಾರಯುಂ.
ನಾನಾಪುಪ್ಫಸಮುಗ್ಗಾನಿ, ತಥೇವ ದಣ್ಡದೀಪಿಕಾ;
ತತ್ತಕಾ ತತ್ತಕಾ ಏವ, ಧಾರಯಿತ್ವಾನ ಇತ್ಥಿಯೋ.
ಅಟ್ಠುತ್ತರ ಸಹಸ್ಸಾನಿ, ದಾರಕಾ ಸಮಲಙ್ಕತಾ;
ಗಹೇತ್ವಾ ಪರಿವಾರೇಸುಂ, ನಾನಾವಣ್ಣಧಜೇ ಸುಭೇ.
ನಾನಾತೂರಿಯಘೋಸೇಹಿ, ಅನೇಕೇಹಿ ತಹಿಂ ತಹಿಂ;
ಹತ್ಥಸರಥಸದ್ದೇಹಿ, ಭಿಜ್ಜನ್ತೇ ವಿಯ ಭೂತಲೇ.
ಯನ್ತೋ ಮಹಾಮೇಘವನಂ, ಸಿರಿಯಾ ಸೋ ಮಹಾಯಸೋ;
ಯನ್ತೇ’ವ ನನ್ದನವನಂ, ದೇವರಾಜಾ ಅಸೋಭಥ.
ರಞ್ಞೋ ನಿಗ್ಗಮನಾರಮ್ಭೇ, ಮಹಾತೂರಿಯ ರವಂಪುರೇ;
ಪರಿವೇಣೇ ನಿಸಿನ್ನೋ’ವ, ಸುತ್ವಾ ಸೋಣುತ್ತರೋ ಯತಿ.
ನಿಮುಜ್ಜಿತ್ವಾ ಪುಥುವಿಯಾ, ಗನ್ತ್ವಾನ ನಾಗಮನ್ದಿರಂ;
ನಾಗರಾಜಸ್ಸ ಪುರತೋ, ತತ್ಥ ಪಾತೂರಹುಲಹುಂ.
ವುಟ್ಠಾಯ ಅಭಿವಾದೇತ್ವಾ, ಪಲ್ಲಙ್ಕೇ ತಂ ನಿವೇಸೀಲ;
ಸಕ್ಕರಿತ್ವಾನ ನಾಗಿನ್ದೋ, ಪುಚ್ಛಿ ಆಗತ ದೇಸಕಂ.
ತಸ್ಮಿಂ ವುತ್ತೇ ಅಥೋಪುಚ್ಛಿ, ಥೇರಾಗಮನಕಾರಣಂ;
ಪತ್ವಾ’ಧಿಕಾರಂ ಸಬ್ಬಂ ಸೋ, ಸಙ್ಘ ಸನ್ದೇಸ ಮಬ್ರುವಿ.
ಮಹಾಥೂಪೇ ನಿಧಾನತ್ಥಂ, ಬುದ್ಧೇನ ವಿಹಿತಾ ಇಧ;
ತವ ಹತ್ಥಗತಾ ಧಾತು, ದೇಹಿತಾ ಕಿರ ಮೇ ತುವಂ.
ತಂ ಸುತ್ವಾ ನಾಗರಾಜಾಸೋ, ಅತೀವ ದೋಮನಸ್ಸಿ ತೋ;
‘‘ಪಹೂ ಅಯಞ್ಹಿ ಸಮಣೋ, ಬಲಕ್ಕಾರೇನ ಗಣ್ಹಿತುಂ.
ತಸ್ಮಾ ಅಞ್ಞತ್ಥ ನೇತಬ್ಬಾ, ಧಾತುಯೋ’’ಇತಿ ಚಿನ್ತಿಯ;
ತತ್ಥ ಠಿತಂ ಭಾಗಿನೇಯ್ಯಂ, ಆಕಾರೇನ ನಿವೇದಯಿ.
ನಾಮೇನ ವಾಸುಲದತ್ತೋ, ಜಾನಿತ್ವಾ ತಸ್ಸ ಇಙ್ಗಿತಂ;
ಗನ್ತ್ವಾ ತಂ ಚೇತಿಯಘರಂ, ಗಿಲಿತ್ವಾನ ಕರಣ್ಡಕಂ.
ಸಿನೇರುಪಾದಂ ¶ ಗನ್ತ್ವಾನ, ಕುಣ್ಡಲಾವಟ್ಟಕೋಸಯಿ;
ತಿಯೋಜನಸತಂ ದೀಘೋ, ಭೋಗೋಯೋಜನವಟ್ಟವಾ.
ಅನೇಕಾನಿ ಸಹಸ್ಸಾನಿ, ಮಾಪೇತ್ವಾನ ಫಣಾನಿ ಚ;
ಧೂಪಾಯತಿ ಪಜ್ಜಲತಿ, ಸಯಿತ್ವಾ ಸೋ ಮಹಿದ್ಧಿಕೋ.
ಅನೇಕಾನಿ ಸಹಸ್ಸಾನಿ, ಅತ್ತನಾ ಸದಿಸೇ ಅಹಿ;
ಮಾಪಯಿತ್ವಾ ಸಯಾಪೇಸಿ, ಸಮನ್ತಾ ಪರಿವಾರಿತೇ.
ಬಹೂ ದೇವಾ ಚ ನಾಗಾ ಚ, ಓಸರಿಂಸು ತಹಿಂ ತದಾ;
‘‘ಯುದ್ಧಂ ಉಭಿನ್ನಂ ನಾಗಾನಂ, ಪಸಿಸ್ಸಾಮ ಮಯಂ’’ಇತಿ.
ಮಾತುಲೋ ಭಾಗಿನೇಯ್ಯೇನ, ಹಟಾತಾ ಧಾತುಯೋ ಇತಿ;
ಞತ್ವಾ’ನಹ ಥೇರಂ ತಂ, ಧಾತುನತ್ಥಿ ಮೇ ಸನ್ತಿಕೇ ಇತಿ.
ಆದಿತೋಪ್ಪಭುತಿಥೇರೋ, ತಾಸಂ ಧಾತೂನಮಾಗಮಂ;
ವತ್ವಾನ ನಾಗರಾಜಂ ತಂ, ‘‘ದೇಹಿ ಧಾತೂ’’ತಿ ಅಬ್ರುವಿ.
ಅಞ್ಞಥಾ ಸಞ್ಞಾಪೇತುಂ ತಂ, ಥೇರಂ ಸೋ ಉರಗಾಧಿಪೋ;
ಆದಾಯ ಚೇತಿಯ ಘರಂ, ಗನ್ತ್ವಾ ತಂ ತಸ್ಸ ವಣ್ಣಯಿ.
ಅನೇಕಧಾ ಅನೇಕೇಹಿ, ರತನೇಹಿ ಸುಸಙ್ಖತಂ;
ಚೇತಿಯಂ ಚೇತಿಯಘರಂ, ಪಸ್ಸ ಭಿಕ್ಖು ಸುನಿಮ್ಮಿತಂ.
ಲಂಕಾದೀಪಮ್ಹಿ ಸಕಲೇ, ಸಬ್ಬಾನಿ ರತನಾನಿಪಿ;
ಸೋಪಾನನ್ತೇ ಪಾಟಿಕಮ್ಪಿ, ನಾಗ್ಘನ್ತ’ಞ್ಞೇಸು ಕಾ ಕಥಾ.
ಮಹಾಸಕ್ಕಾರಠಾನಮ್ಹಾ, ಅಪ್ಪಸಕ್ಕಾರಠಾನ ಕಂ;
ಧಾತೂನಂ ನಯನಂ ನಾಮ, ನಯುತ್ತಂ ಭಿಕ್ಖುವೋ ಇದಂ.
‘‘ಸಚ್ಚಾಭಿಸಮಯೋ ನಾಮ, ತುಮ್ಹಾಕಂ ಹೀನ ವಿಜ್ಜತಿ;
ಸಚ್ಚಾಭಿಸಮಯಠಾನಂ, ನೇತುಂ ಯುತ್ತಞ್ಹಿ ಧಾತುಯೋ’’.
‘‘ಸಂಸಾರ ದುಕ್ಖ ಮೋಕ್ಖಾಯ, ಉಪ್ಪಜ್ಜನ್ತಿ ತಥಾಗತಾ;
ಬುದ್ಧಸ್ಸಾಯಮಧಿಪ್ಪಾಯೋ, ತೇನನೇಸ್ಸಾಮ ಧಾತುಯೋ.
ಧಾತುನಿಧಾನಂ ಅಜ್ಜೇ’ವ, ಸೋ ಹಿ ರಾಜಾ ಕರಿಸ್ಸತಿ;
ತಸ್ಮಾ ಪಪಞ್ಚಮಕರಿತ್ವಾ, ಲಹುಂ ಮೇ ದೇಹಿ ಧಾತುಯೋ’’.
ನಾಗೋಆಹಸಚೇ ಭನ್ತೇ, ತುವಂ ಪಸ್ಸಸಿ ಧಾತುಯೋ;
ಗಹೇತ್ವಾ ಯಾಹಿ ತಂ ಥೇರೋ, ತಿಕ್ಖತ್ತುಂ ತಂ ಭಣಾಪಿಯ.
ಸುಖುಮಂ ¶ ಕರಂ ಮಾಪಯಿತ್ವಾ, ಥೇರೋ ತತ್ರಠಿತೋ’ವಸೋ;
ಭಾಗಿನೇಯ್ಯಸ್ಸ ವದನೇ, ಹತ್ಥಂ ಪಕ್ಖಿಪ್ಪ ತಾವದೇ.
ಧಾತುಕರಣ್ಡಂ ಆದಾಯ, ‘‘ತಿಟ್ಠ ನಾಗಾ’’ತಿ ಭಾಸಿಯ;
ನಿಮುಜ್ಜಿತ್ವಾ ಪಥವಿಯಂ, ಪರಿವೇಣಮ್ಹಿ ಉಟ್ಠಹಿ.
ನಾಗರಾಜಾ ಗತೋ ಭಿಕ್ಖು, ಅಮ್ಹೇಹಿ ವಞ್ಚಿತೋ’’ಇತಿ;
ಧಾತು ಆನಯನತ್ಥಾಯ, ಭಾಗಿನೇಯ್ಯಸ್ಸ ಪಾಹಿಣಿ.
ಭಾಗಿನೇಯ್ಯೋ’ಥ ಕುಚ್ಛಿಮ್ಹಿ, ಅಪಸ್ಸಿತ್ವಾ ಕರಣ್ಡಕಂ;
ಪರಿದೇವಮಾನೋ ಆಗನ್ತ್ವಾ, ಮಾತುಲಸ್ಸ ನಿವೇದಯಿ.
ತದಾ ಸೋ ನಾಗರಾಜಾಪಿ, ‘‘ವಞ್ಚಿತಮ್ಹ ಮಯಂ’’ಇತಿ;
ಪರಿದೇವಿ ನಾಗಾ ಸಬ್ಬೇಪಿ, ಪರಿದೇವಿಂಸು ಪೀಳಿತಾ.
ಭಿಕ್ಖು ನಾಗಸ್ಸ ವಿಜಯೇ, ತುಟ್ಠಾ ದೇವಾ ಸಮಾಗತಾ;
ಧಾತುಯೋ ಪೂಜಯನ್ತಾತಾ, ತೇನೇವ ಸಹ ಆಗಮುಂ.
ಪರಿದೇವಮಾನಾ ಆಗನ್ತ್ವಾ, ನಾಗಾ ಸಙ್ಘಸ್ಸ ಸನ್ತಿಕೇ;
ಬಹುಧಾ ಪರಿದೇವಿಂಸು, ಧಾತಾಹರಣ ದುಕ್ಖಿತಾ.
ತೇಸಂ ಸಙ್ಘೋ’ನುಕಮ್ಪಾಯ, ಥೋಕಂ ಧಾತುಮದಾಪಯಿ;
ತೇ ತೇನ ತುಟ್ಠಾ ಗನ್ತ್ವಾನ, ಪೂಜಾ ಭಣ್ಡಾನಿ ಆಹರುಂ.
ಸಕ್ಕೋ ರತನಪಲ್ಲಙ್ಕಂ, ಸೋಣ್ಣಚಙ್ಕೋಟಮೇವ ಚ;
ಆದಾಯ ಸಹ ದೇವೇಹಿ, ತಂ ಠಾನಂ ಸಮುಪಾಗತೋ.
ಥೇರಸ್ಸ ಉಗ್ಗತಠಾನೇ, ಕಾರಿತೇ ವಿಸ್ಸಕಮ್ಮುನಾ;
ಪತಿಟ್ಠಪೇತ್ವಾ ಪಲ್ಲಙ್ಕಂ, ಸುಭೇ ರತನಮಣ್ಡಪೇ.
ಮಾತುಕರಣ್ಡಮಾದಾಯ, ತಸ್ಸ ಥೇರಸ್ಸ ಹತ್ಥತೋ;
ಚಙ್ಕೋಟಕೇ ಠಪೇತ್ವಾನ, ಪಲ್ಲಙ್ಕೇ ಪವರೇಠಪಿ.
ಬ್ರಹ್ಮಾ ಛತ್ತಮಧಾರೇಸಿ, ಸನ್ತುಸ್ಸಿತೋ ವಾಳಬೀಜನಿಂ;
ಮಣಿತಾಲವಣ್ಟಂ ಸುಯಾಮೋ, ಸಕ್ಕೋ ಸಙ್ಖಂ ತುಸೋದಕಂ.
ಚತ್ತಾರೋ ತು ಮಹಾರಾಜಾ, ಅಟ್ಠಂಸು ಖಗ್ಗಪಾಣಿನೋ;
ಸಮುಗ್ಗಹತ್ಥಾ ತೇತ್ತಿಂಸ, ದೇವಪುತ್ತಾ ಮಹಿದ್ಧಿಕಾ.
ಪಾರಿಚ್ಛತ್ತಕ ಪುಪ್ಫೇಹಿ, ಪೂಜಯನ್ತಾ ತಹಿಂಠಿತಾ;
ಕುಮಾರಿಯೋತು ದ್ವತ್ತಿಂಸ, ದಣ್ಡದೀಪಧರಾ ಠಿತಾ.
ಪಲಾಪೇತ್ವಾ ¶ ದುಟ್ಠಯಕ್ಖೇ, ಯಕ್ಖಸೇನಾಪತಿ ಪನ;
ಅಟ್ಠವೀಸತಿ ಅಟ್ಠಂಸು, ಆರಕ್ಖಂ ಕುರುಮಾನಕಾ.
ವೀಣಂ ವಾದಯಮಾನೋ’ವ, ಅಟ್ಠಾ ಪಞ್ಚಸಿಖೋ ತಹಿಂ;
ರಙ್ಗಭೂಮಿಂ ಮಾಪಯಿತ್ವಾ, ತಿಮ್ಪರುತುರಿಯ ಘೋಸವಾ.
ಅನೇಕದೇವಪುತ್ತಾ ಚ, ಸಾಧುಗೀತಪ್ಪಯೋಜಕಾ;
ಮಹಾಕಾಳೋ ನಾಗರಾಜಾ, ಥುಯಮಾನೋ ಅನೇಕಧಾ.
ದಿಬ್ಬತೂರಿಯಾನಿ ವಜ್ಜನ್ತಿ, ದಿಬ್ಬಸಂಗೀತಿ ವತ್ತತಿ;
ದಿಬ್ಬಗನ್ಧಾದಿವಸ್ಸಾನಿ, ವಸ್ಸಪೇನ್ತಿ ಚ ದೇವತಾ.
ಸೋ ಇನ್ದಗುತ್ತಥೇರೋತು, ಮಾರಸ್ಸ ಪಟಿಬಾಹನಂ;
ಚಕ್ಕವಾಳಸಮಂ ಕತ್ವಾ, ಲೋಹಚ್ಛತ್ತಮಮಾಪಯಿ.
ಮಾತೂನಂ ಪುರತೋ ಚೇವ, ತತ್ಥ ತತ್ಥ ಚ ಪಞ್ಚಸು;
ಠಾನೇಸು ಗಣಸಜ್ಝಾಯಂ, ಕರಿಂಸ್ವ ಖಿಲಭಿಕ್ಖವೋ.
ತತ್ಥಾ’ಗಮಾ ಮಹಾರಾಜಾ, ಪಹಟ್ಠೋ ದುಟ್ಠಗಾಮಣಿ;
ಸೀಸೇನಾ’ದಾಯ ಆನೀತೇ, ಚಙ್ಕೋಟಮ್ಹಿ ಸುವಣ್ಣಯೇ.
ಠಪೇತ್ವಾ ಧಾತು ಚಙ್ಕೋಟಂ, ಪತಿಟ್ಠಾಪಿಯ ಆಸನೇ;
ಧಾತುಂ ಪೂಜೀಯ ವನ್ದಿತ್ವಾ, ಠಿತೋ ಪಞ್ಚಲೀಕೋ ತಹಿಂ.
ದಿಬ್ಬಚ್ಛತ್ತಾದಿಕಾನೇತ್ಥ, ದಿಬ್ಬಗನ್ಧಾದಿಕಾನಿ ಚ;
ಪಸ್ಸಿತ್ವಾ ದಿಬ್ಬತೂರಿಯಾದಿ-ಸದ್ದೇ ಸುತ್ವಾ ಚ ಖತ್ತಿಯೋ.
ಅಪಸ್ಸಿತ್ವಾ ಬ್ರಹ್ಮದೇವೋ, ತುಟ್ಠೋ ಅಚ್ಛರಿಯಬ್ಭುತೋ;
ಧಾತುಛತ್ತೇನ ಪೂಜೇಸಿ, ಲಂಕಾರಜ್ಜೇ’ಭಿಸಿಞ್ಚಿ ಚ.
‘‘ದಿಬ್ಬಚ್ಛತ್ತಂ ಮಾನುಸಞ್ಚ, ವಿಮುತ್ತಿಚ್ಛತ್ತಮೇವ ಚ;
ಇತಿ ತಿಚ್ಛಿತ್ತಧಾರಿಸ್ಸ, ಲೋಕನಾಥಸ್ಸ ಸತ್ಥುನೋ.
ತಿಕ್ಖತ್ತುಮೇವ ಮೇ ರಜ್ಜಂ, ದಮ್ಮೀ’ತಿ ಹಟ್ಠಮಾನಸೋ;
ತಿಕ್ಖತ್ತುಮೇವ ಧಾತೂನಂ, ಲಂಕಾರಜ್ಜಮದಾಸಿಸೋ.
ಪೂಜಯನ್ತೋ ಧಾತುಯೋತಾ, ದೇವೇಹಿ ಮಾನುಸೇಹಿ ಚ;
ಸಹ ಚಙ್ಕೋಟಕೇಹೇವ, ಸೀಸೇನಾದಾಯ ಖತ್ತಿಯೋ.
ಭಿಕ್ಖುಸಙ್ಘ ಪರಿಬ್ಯುಳ್ಹೋ, ಕತ್ವಾ ಥೂಪಂ ಪದಕ್ಖಿಣಂ;
ಪಾಚಿನತೋ ಆಹರಿತ್ವಾ, ಧಾತುಗಬ್ಭಮ್ಹಿ ಓತರಿ.
ಅರಹನ್ತೋ ಛನ್ನವುತಿ-ಕೋಟಿಯೋ ಥೂಪಮುತ್ತಮಂ;
ಸಮನ್ತಾ ಪರಿವಾರೇತ್ವಾ, ಅಟ್ಠಂಸು ಕತಪಞ್ಜಲೀ.
ಓತರಿತ್ವಾ ¶ ಧಾತುಗಬ್ಭಂ, ಮಹಗ್ಘೇ ಸಯನೇಸುಭೇ;
ಠಪೇಸ್ಸಾಮಿತಿ ಚಿನ್ತೇನ್ತೇ, ಪೀತಿಪುಣ್ಣನರಿಸ್ಸರೇ.
ಸಧಾತು ಧಾತುಚಙ್ಕೋಟೋ, ಉಗ್ಗನ್ತ್ವಾ ತಸ್ಸ ಸೀಸತೋ;
ಸತ್ತತಾಲಪ್ಪಮಾಣಮ್ಹಿ, ಆಕಾಸಮ್ಹಿ ಠಿತೋ ತತೋ.
ಸಯಂ ಕರಣ್ಡೋ ವಿವರಿ, ಉಗ್ಗನ್ತ್ವಾ ಧಾತುಯೋ ತತೋ;
ಬುದ್ಧವೇಸಂ ಗಹೇತ್ವಾನ, ಲಕ್ಖಣೇಬ್ಯಞ್ಜನುಜ್ಜಲಂ.
ಗಣ್ಡಮ್ಬಮೂಲೇ ಬುದ್ಧೋ’ವ, ಯಮಕಂ ಪಾಟಿಹಾರಿಯಂ;
ಅಕಂಸು ಧರಮಾನೇನ, ಸುಗತೇನ ಅಧಿಟ್ಠಿತಂ.
ತಂ ಪಾಟಿಹಾರಿಯಂ ದಿಸ್ವಾ, ಪಸನ್ನೇಕಗ್ಗಮಾನಸಾ;
ದೇವಾಮನುಸ್ಸಾ ಅರಹತ್ತಂ, ಪತ್ತಾ ದ್ವಾದಸ ಕೋಟಿಯೋ.
ಸೇಸಾ ಫಲತ್ತಯಂ ಪತ್ತಾ, ಅತೀತಾ ಗಣನಾಪಥಂ;
ಹಿತ್ವಾ’ಥ ಬುದ್ಧವೇಸಂ ತಾ, ಕರಣ್ಡಮ್ಹಿ ಪತಿಟ್ಠಯುಂ.
ತತೋ ಓರುಯ್ಹ ಚಙ್ಕೋಟೋ, ರಞ್ಞೋ ಸೀಸೇ ಪತಿಟ್ಠಹಿ;
ಸಹಿನ್ದಗುತ್ತಥೇರೇನ, ನಾಟಕೀಹಿ ಚ ಸೋ ಪನ.
ಧಾತುಗಬ್ಭಂಪರಿಹರಂ, ಪತ್ವಾನ ಸಯನಂ ಸುಭಂ;
ಚಙ್ಕೋಟಂ ರತನಪಲ್ಲಙ್ಕೇ, ಠಪಯಿತ್ವಾ ಜುತಿನ್ಧರೋ.
ಧೋವಿತ್ವಾನ ಪುನೋಹತ್ಥೇ, ಗನ್ಧವಾಸಿತ ವಾರಿನಾ;
ಚತುಜ್ಜಾತಿಯಗನ್ಧೇನ, ಉಬ್ಬತೇತ್ವಾ ಸಗಾರವೋ.
ಕರಣ್ಡಂ ವಿವರಿತ್ವಾನ, ತಾಗಹೇತ್ವಾನ ಧಾತುಯೋ;
ಇತಿ ಚಿನ್ತಯಿ ಭೂಮಿನ್ದೋ, ಮಹಾಜನಹಿತತ್ಥಿಕೋ.
ಅನಾಕುಲಂ ಕೇಹಿಚಿಪಿ, ಯದಿ ಹೇಸ್ಸನ್ತಿ ಧಾತುಯೋ;
ಜನಸ್ಸ ಸರಣಂ ಹುತ್ವಾ, ಯದಿ ಠಸ್ಸನ್ತಿ ಧಾತುಯೋ.
ಸತ್ಥುನಿಪನ್ನಾಕಾರೇನ, ಪರಿನಿಬ್ಬಾನಮಞ್ಚಕೇ;
ನಿಪಜ್ಜನ್ತು ಸುಪಞ್ಞತ್ತೇ, ಸಯನಮ್ಹಿ ಮಹಾರಹೇ.
ಇತಿ ಚಿನ್ತಿಯ ಸೋ ಧಾತೂ, ಠಪೇಸಿ ಸಯನುತ್ತಮೇ;
ತದಾ ಕಾರಾ ಧಾತುಯೋ ಚ, ಸಹಿಂಸು ಸಯನುತ್ತಮೇ.
ಆಸಳ್ಹೀಸುಕ್ಕಪಕ್ಖಸ್ಸ, ಪನ್ನರಸಉಪೋಸಥೇ;
ಉತ್ತರಾಸಳ್ಹನಕ್ಖತ್ತೇ, ಏವಂ ಧಾತುಪತಿಟ್ಠಿತಾ.
ಸಹ ¶ ಧಾತುಪತಿಟ್ಠಾನಾ, ಅಕ್ಖಮ್ಪಿತ್ಥ ಮಹಾಮಹೀ;
ಪಾಟಿಹೀರಾನಿನೇಕಾನಿ, ಪವತ್ತಿಂಸು ಅನೇಕಧಾ.
ರಾಜಾ ಪಸನ್ನೋಧಾತುತಾ, ಸೇತಚ್ಛತ್ತೇನ ಪೂಜಯಿ;
ಲಂಕಾಯ ರಜ್ಜಂ ಸಕಲಂ, ಸತ್ತಾಹಾನಿ ಅದಾಸಿ ಚ.
ಕಾಯೇ ಚ ಸಬ್ಬಾಲಙ್ಕಾರಂ, ಧಾತುಗಬ್ಭಮ್ಹಿ ಪೂಜಯಿ;
ತಥಾನಾಟಕಿಯೋ’ಮಚ್ಛಾ, ಪರಿಸಾ ದೇವತಾಪಿ ಚ.
ವತ್ಥಗುಳಘತಾದೀನಿ, ದತ್ವಾ ಸಙ್ಘಸ್ಸ ಭೂಪತಿ;
ಭಿಕ್ಖೂಹಿ ಗಣಸಜ್ಝಾಯಂ, ಕಾರೇತ್ವಾ’ಖಿಲರತ್ತಿಯಂ.
ಪುನಾಹನಿ ಪುರೇಭೇರಿಂ, ಚಾರೇಸಿ ‘‘ಸಕಲಾ ಜನಾ;
ವಿನ್ದನ್ತು ಧಾತುಸತ್ತಾಹಂ, ಇಮಂ’’ತಿ ಜನತಾಹಿತೋ.
ಇನ್ದಗುತ್ತೋ ಮಹಾಥೇರೋ, ಅದಿಟ್ಠಾಸಿ ಮಹಿದ್ಧಿಕೋ;
‘‘ಧಾತು ವನ್ದಿತುಕಾಮಾಯೇ, ಲಂಕಾದೀಪಮ್ಹಿ ಮಾನುಸಾ.
ತಙ್ಖಣಂಯೇವ ಆಗನ್ತ್ವಾ, ವನ್ದಿತ್ವಾ ಧಾತುಯೋ ಇಧ;
ಯಥಾ ಸಕಂ ಘರಂ ಯನ್ತು’’, ತಂ ಯಥಾಧಿಟ್ಠಿತಂ ಅಹು.
ಸೋ ಮಹಾಭಿಕ್ಖುಸಙ್ಘಸ್ಸ, ಮಹಾರಾಜಾ ಮಹಾಯಸೋ;
ಮಹಾದಾನಂ ಪವತ್ತೇತ್ವಾ, ತಂ ಸತ್ತಾಹಂ ನಿರನ್ತರಂ.
ಆಚಿಕ್ಖಿಧಾತುಗಬ್ಭಮ್ಹಿ, ಕಿಚ್ಚಂ ನಿಠಾಪಿತಂ ಮಯಾ;
ಧಾತುಗಬ್ಭಪಿಧಾನಂತು, ಸಙ್ಘೋ ಜಾನಿತುಮರಹತಿ.
ಸಙ್ಘೋ ತೇ ದ್ವೇ ಸಾಮಣೇರೇ, ತಸ್ಮಿಂ ಕಮ್ಮೇ ನಿಯೋಜಯಿ;
ಪಿದಹಿಂಸು ಧಾತುಗಬ್ಭಂ, ಪಾಸಾಣೇನಾ’ಹಟೇನ ತೇ.
‘‘ಮಾಲೇತ್ಥ ಮಾ ಮಿಲಾಯನ್ತು, ಗನ್ಧಾಸುಸ್ಸನ್ತುಮಾ ಇಮೇ;
ಮಾ ನಿಬ್ಬಾಯನ್ತು ದೀಪಾವ, ಮಾ ಕಿಞ್ಚಾಪಿ ವಿವಜ್ಜತು.
ಮೇದವಣ್ಣ ಛ ಪಾಸಾಣಾ, ಸನ್ಧಿಯನ್ತುನಿರನ್ತರಾ’’;
ಇತಿ ಘೀಣಾಸವಾ ಏತ್ಥ, ಸಬ್ಬಮೇತಂ ಅಧಿಟ್ಠಯುಂ.
ಆಣಾಪೇಸಿ ಮಹಾರಾಜಾ, ‘‘ಯಥಾಸತ್ತಿಂ ಮಹಾಜನೋ;
ಧಾತುನಿಧಾನಕಾನೇ’ತ್ಥ, ಕರೋತೂ’’ತಿ ಹಿತತ್ಥಿಕೋ.
ಮಹಾಧಾತುನಿಧಾನಸ್ಸ, ಪಿಟ್ಠಿಮ್ಹಿ ಚ ಮಹಾಜನೋ;
ಅಕಾ ಸಹಸ್ಸ ಧಾತುನಂ, ನಿಧಾನಾನಿ ಯಥಾಬಲಂ.
ಪಿದಹಾಪಿಯತಂ ಸಬ್ಬಂ, ರಾಜಾಥೂಪಂ ಸಮಾಪಯಿ;
ಚತುರಸ್ಸ ಚ ಯಞ್ಚೇತ್ಥ, ಚೇತಿಯಮ್ಹಿ ಸಮಾಪಯಿ.
ಪುಞ್ಞಾನಿ ¶ ಏವಮಮಲಾನಿ ಸಯಞ್ಚಸನ್ತೋ,
ಕುಬ್ಬನ್ತಿ ಸಬ್ಬವಿಭವುತ್ತಮಪತ್ತಿ ಹೇತು;
ಕಾರೇನ್ತಿ ಚಾಪಿಹಿ’ಖಿಲಾ ಪರಿಸುದ್ಧಚಿತ್ತಾ,
ನಾನಾವಿಸೇಸಜಾನತಾ ಪರಿವಾರಹೇತೂ’’ತಿ.
ಸುಜನಪ್ಪಸಾದ ಸಂವೇಗತ್ಥಾಯ ಕತೇ ಮಹಾವಂಸೇ
ಧಾತುನಿಧಾನಂ ನಾಮ
ಏಕತಿಂಸತಿಮೋ ಪರಿಚ್ಛೇದೋ.
ದ್ವತ್ತಿಂಸತಿಮ ಪರಿಚ್ಛೇದ
ತುಸಿತಪುರಗಮನಂ
ಅನಿಟ್ಠಿತೇ ಛತ್ತಕಮ್ಮೇ, ಸುಧಾಕಮ್ಮೇ ಚ ಚೇತಿಯೇ;
ಮಾರಣನ್ತಿಕರೋಗೇನ, ರಾಜಾ ಆಸಿ ಗಿಲಾನಕೋ.
ತಿಸ್ಸಂ ಪಕ್ಕೋಸಯಿತ್ವಾ ಸೋ, ಕನಿಟ್ಠಂ ದೀಘವಾಪಿತೋ;
‘‘ಥೂಪೇ ಅನಿಟ್ಠಿತಂ ಕಮ್ಮಂ, ನಿಟ್ಠಾಪೇಹೀತಿ ಅಬ್ರವಿ.
ಭಾತುನೋ ದುಬ್ಬಲತ್ತಾಸೋ, ತುನ್ನವಾಯೇಹಿ ಕಾರಿಯ;
ಕಞ್ಚುಕಂ ಸುದ್ಧವತ್ಥೇಹಿ, ತೇನ ಛಾದಿಯ ಚೇತಿಯಂ.
ಚಿತ್ತಕಾರೇಹಿ ಕಾರೇಸಿ, ವೇದಿಕಂ ತತ್ಥ ಸಾಧುಕಂ;
ಪನ್ತಿಪುಣ್ಣಘಟಾನಞ್ಚ, ಪಞ್ಚಙ್ಗುಲಕಪನ್ತಿಕಂ.
ಛತ್ತಾಕಾರೇಹಿ ಕಾರೇಸಿ, ಛತ್ತಂ ವೇಳುಮಯಂ ತಥಾ;
ಖರಪತ್ತಮಯೇ ಚನ್ದ-ಸೂರಿಯೇ ಮುದ್ಧವೇದಿಯಂ.
ಲಾಖಾಕುಙ್ಕುಮಕೇಹೇ’ತಂ, ಚಿತ್ತಯಿತ್ವಾ ಸುಚಿತ್ತಿತಂ;
ರಞ್ಞೋ ನಿವೇದಯಿ’’ಥೂಪೇ, ಕತ್ತಬ್ಬಂ ನಿಟ್ಠಿತಂ’’ಇತಿ.
ಸಿವಿಕಾಯ ನಿಪಜ್ಜಿತ್ವಾ, ಇಧಾಗನ್ತ್ವಾ ಮಹೀಪತಿ;
ಪದಕ್ಖಿಣಂ ಕರಿತ್ವಾನ, ಸಿವಿಕಾಯೇ’ವ ಚೇತಿಯಂ.
ವನ್ದಿತ್ವಾ ¶ ದಕ್ಖಿಣದ್ವಾರೇ, ಸಯನೇ ಭೂಮಿಸನ್ಥತೇ;
ಸಯಿತ್ವಾ ದಕ್ಖಿಣಪಸ್ಸೇನ, ಸೋ ಮಹಾಥೂಪ ಮುತ್ತಮಂ.
ಸಯಿತ್ವಾ ವಾಮಪಸ್ಸೇಸ, ಲೋಹಪಾಸಾದ ಮುತ್ತಮಂ;
ಪಸ್ಸನ್ತೋ ಸುಮನೋ ಆಸಿ, ಭಿಕ್ಖುಸಙ್ಘಪುರೇಕ್ಖತೋ.
ಗಿಲಾನಪುಚ್ಛನತ್ಥಾಯ, ಆಗತಾಹಿ ತತೋ ತತೋ;
ಛನ್ನವುತಿಕೋಟಿಯೋ ಭಿಕ್ಖೂ, ತಸ್ಮಿಂ ಆಸುಂ ಸಮಾಗಮೇ.
ಗಣಸಜ್ಝಾಯಮಕರುಂ, ವಗ್ಗಬನ್ಧೇನ ಭಿಕ್ಖವೋ;
ಥೇರಪುತ್ತಾಭಯಂ ಥೇರಂ, ತತ್ಥಾ’ದಿಸ್ವಾ ಮಹೀಪತಿ.
ಅಟ್ಠವೀಸ ಮಹಾಯುದ್ಧಂ, ಯುಜ್ಝನ್ತೋ ಅಪರಾಜಯಂ;
ಯೋ ಸೋ ನ ಪಚ್ಚುದಾವತ್ತೋ, ಮಹಾಯೋಧೋ ವಸೀ ಮಮ.
ಮಚ್ಚುಯುದ್ಧಮ್ಹಿ ಸಮ್ಪತ್ತೇ, ದಿಸ್ವಾ ಮಞ್ಞೇ ಪರಾಜಯಂ;
ಇದಾನಿ ಸೋ ಮಂ ನೋ ಪೇತಿ, ಥೇರೋ ಥೇರಪುತ್ತಭಯೋ.
ಇತಿ ಚಿನ್ತಯಿ ಸೋಥೇರೋ, ಜಾನಿತ್ವಾ ತಸ್ಸ ಚಿನ್ತಿತಂ;
ಕರಿನ್ದನದಿಯಾ ಸಿಸೇ, ವಸಂ ಪಞ್ಜಲಿಪಬ್ಬತೇ.
ಪಞ್ಚಖೀಣಾಸವಸತ-ಪರಿವಾರೇನ ಇದ್ಧಿಯಾ;
ನಭಸಾಗಮ್ಮ ರಾಜಾನಂ, ಅಟ್ಠಾಸಿ ಪರಿವಾರಿಯ.
ರಾಜಾ ದಿಸ್ವಾ ಪಸನ್ನೋ ತಂ, ಪುರತೋ ಚ ನಿಸೀದಿಯ;
ತುಮ್ಹೇ ದಸಮಹಾಯೋಧೇ, ಗಣ್ಹಿತ್ವಾನ ಪುರೇ ಅಹಂ.
ಯುಜ್ಝಿಂ ಇದಾನಿ ಏಕೋ’ವ, ಮಚ್ಚುನಾ ಯುದ್ಧಮಾರಭಿಂ;
ಮಚ್ಚುಸತ್ತುಂ ಪರಾಜೇತುಂ, ನ ಸಕ್ಕೋಮೀ’’ತಿ ಆಹ ಚ.
ಆಹ ಥೇರೋ ‘‘ಮಹಾರಾಜ-ಮಾ ಭಾಯಿ ಮನುಜಾಧಿಪ;
ಕಿಲೇಸಸತ್ತುಂ ಅಜಿತ್ವಾ, ಅಜೇಯ್ಯೋ ಮಚ್ಚುಸತ್ತುಕೋ.
ಸಬ್ಬಮ್ಪಿ ಸಙ್ಖಾರಗತಂ, ಅವಸ್ಸಂಯೇವ ಭಿಜ್ಜತಿ;
‘‘ಅನಿಚ್ಚಾ ಸಬ್ಬಸಙ್ಖಾರಾ’’, ಇತಿ ವುತ್ತಂಹಿ ಸತ್ಥುನಾ.
ಲಜ್ಜಾ ಸಾರಜ್ಜರಹಿತಾ, ಬುದ್ಧೇಪೇ’ತಿ ಅನಿಚ್ಚತಾ;
ತಸ್ಮಾ ಅನಿಚ್ಚಾ ಸಙ್ಖಾರಾ, ದುಕ್ಖಾ’ನತ್ತಾತಿ ಚಿನ್ತಯ.
ದುತಿಯೇ ಅತ್ತಾಭಾವೇಪಿ, ಧಮ್ಮಚ್ಛನ್ದೋ ಮಹಾಹಿತೇ;
ಉಪಟ್ಠಿತೇ ದೇವಲೋಕೇ, ಹಿತ್ವಾ ದಿಬ್ಬಂ ಸುಖಂ ತುವಂ.
ಇಧಾಗಮ್ಮ ಬಹುಂ ಪುಞ್ಞಂ, ಅಕಾಸಿ ಚ ಅನೇಕಧಾ;
ಕರಣಮ್ಪೇಕರಜ್ಜಸ್ಸ, ಸಾಸನುಜ್ಜೋತನಾಯತೇ.
ಮಹಾಪುಞ್ಞಕತಂ ¶ ಪುಞ್ಞಂ, ಯಾವಜ್ಜದಿವಸಾ ತಯಾ;
ಸಬ್ಬಂನುಸ್ಸರಮೇವಂ ತೇ, ಸುಖಂ ಸಜ್ಜು ಭವಿಸ್ಸತಿ.
ಥೇರಸ್ಸವಚನಂ ಸುತ್ವಾ, ರಾಜಾ ಅತ್ತಮನೋ ಅಹು;
‘‘ಅವಸ್ಸಯೋ ಮಚ್ಚುಯುದ್ಧೇಪಿ, ತ್ವಂ ಮೇ ಸೀ’’ತಿ ಅಭಾಸಿತಂ.
ತದಾ ಚ ಆಹರಾಪೇತ್ವಾ, ಪಹಟ್ಠೋ ಪುಞ್ಞ ಪೋತ್ಥಕಂ;
ವಾಚೇತುಂ ಲೇಖಕಂ ಆಹ, ಸೋ ತಂ ವಾಚೇಸಿ ಪೋತ್ಥಕಂ.
ಏಕೂನಸತವಿಹಾರಾ, ಮಹಾರಾಜೇನ ಕಾರಿತಾ;
ಏಕೂನವೀಸಕೋಟೀಹಿ, ವಿಹಾರೋ ಮರಿಚ ವಟ್ಟಿ ಚ.
ಉತ್ತಮೋ ಲೋಹಪಾಸಾದೋ,
ತಿಂಸಕೋಟೀಹಿ ಕಾರಿತೋ;
ಮಹಾಥೂಪೇ ಅನಗ್ಘಾನಿ,
ಕಾರಿತಾ ಚತುವೀಸತಿ.
ಮಹಾಥೂಪಮ್ಹಿ ಸೇಸಾನಿ, ಕಾರಿತಾನಿ ಸುಬುದ್ಧಿನಾ;
ಕೋಟಿಸಹಸ್ಸಂ ಅಗ್ಘನ್ತಿ, ಮಹಾರಾಜಾ’’ತಿ ವಾಚಯಿ.
‘‘ಕೋಟ್ಠನಾಮಮ್ಹಿ ಮಲಯೇ, ಅಕ್ಖಕ್ಖಾಯಿಕ ಛಾತಕೇ;
ಕುಣ್ಡಲಾನಿ ಮಹಗ್ಘಾನಿ, ದುವೇ ದತ್ವಾನ ಗಣ್ಹಿಯ.
ಖೀಣಾಸವಾನಂ ಪಞ್ಚನ್ನಂ, ಮಹಾಥೇರಾನ ಮುತ್ತಮೋ;
ದಿನ್ನೋ ಪಸನ್ನಚಿತ್ತೇನ, ಕಙ್ಗುಅಮ್ಬಿಲಪಿಣ್ಡಕೋ.
ಚೂಳಙ್ಗನಿಯ ಯುದ್ಧಮ್ಹಿ, ಪರಾಜಿತ್ವಾ ಪಲಾಯತಾ;
ಕಾಲಂ ಘೋಸಾಪಯಿತ್ವಾನ, ಆಗತಸ್ಸ ವಿಹಾಯಸಾ.
ಖೀಣಾಸವಸ್ಸ ಯತಿನೋ, ಅತ್ತಾನಮನಪೇಕ್ಖಿಯ;
ದಿನ್ನಂ ಸರಕಭತ್ತ’ನ್ತಿ, ವುತ್ತೇ ಆಹ ಮಹೀಪತಿ.
ವಿಹಾರಮಹಸತ್ತಾಹೇ, ಪಾಸಾದಸ್ಸ ಮಹೇತಥಾ;
ಥೂಪಾರಮ್ಭೇ ತು ಸತ್ತಾಹೇ, ತಥಾ ಧಾತುನಿಧಾನಕೇ.
ಚಾತುದ್ದಿಸಸ್ಸ ಉಭತೋ, ಸಙ್ಘಸ್ಸ ಉಭತೋ ಮಯಾ;
ಮಹಾರಹಂ ಮಹಾದಾನಂ, ಅವಿಸೇಸಂ ಪವತ್ತಿತಂ.
ಮಹಾವೇಸಾಖಪೂಜಾ ಚ, ಚತುವೀಸತಿ ಕಾರಯಿ;
ದೀಪೇ ಸಙ್ಘಸ್ಸ ತಿಕ್ಖತ್ತುಂ, ತಿಚೀವರಮದಾಪಯಿ.
ಸತ್ತಸತ್ತ ¶ ದಿನಾನೇವ, ದೀಪೇ ರಜ್ಜಮಹಂ ಇಮಂ;
ಪಞ್ಚಕ್ಖತ್ತುಂ ಸಾಸನಮ್ಹಿ, ಅದಾಸಿಂ ಹಟ್ಠಮಾನಸೋ.
ಸತತಂ ದ್ವಾದಸಠಾನೇ, ಸಪ್ಪಿನಾ ಸುದ್ಧವಟ್ಟಿಯಾ;
ದೀಪಸಹಸ್ಸಂ ಜಾಲೇಸಿಂ, ಪೂಜೇನ್ತೋ ಸುಗತಂ ಅಹಂ.
ನಿಚ್ಚಂ ಅಟ್ಠಾರಸಠಾನೇ, ವಜ್ಜೇಹಿ ವಿಹಿತಂ ಅಹಂ;
ಗಿಲಾನ ಭತ್ತಭೇಸಜ್ಜಂ, ಗಿಲಾನಾನಮದಾಪಯಿಂ.
ಚತುತ್ತಾಲೀಸಠಾನಮ್ಹಿ, ಸಙ್ಖತಂ ಮಧುಪಾಯಸಂ;
ತತ್ತಕೇಸ್ವೇವ ಠಾನೇಸು, ತೇಲುಲ್ಲೋಪಕಮೇವ ಚ.
ಘತೇ ಪಕ್ಕೇ ಮಹಾಜಾಲ, ಪೂವೇ ಠಾನಮ್ಹಿ ತತ್ತಕೇ;
ತಥೇವ ಸಹ ಭತ್ತೇಹಿ, ನಿಚ್ಚ ಏಮವ ಅದಾಪಯಿಂ.
ಉಪೋಸಥೇಸು ದಿವಸೇಸು, ಮಾಸೇ ಮಾಸೇ ಚ ಅಟ್ಠಸು;
ಲಂಕಾದೀಪೇ ವಿಹಾರೇಸು, ದೀಪ ತೇಲಮದಾಪಯಿಂ.
ಧಮ್ಮದಾನಂ ಮಹನ್ತನ್ತಿ, ಸುತ್ವಾ ಅಮಿಸದಾನತೋ;
ಲೋಹ ಪಾಸಾದತೋ ಹೇಟ್ಠಾ, ಸಙ್ಘಮಜ್ಝಮ್ಹಿ ಆಸನೇ.
‘‘ಓಸಾರೇಸ್ಸಾಮಿ ಸಙ್ಘಸ್ಸ, ಮಙ್ಗಲಸುತ್ತ’’ಮಿಚ್ಚಹಂ;
ನಿಸಿನ್ನೋ ಓಸಾರಯಿತುಂ, ನಾಸಕ್ಖಿಂ ಸಙ್ಘಗಾರವಾ.
ತತೋಪ್ಪಭುತಿ ಲಂಕಾಯ, ವಿಹಾರೇಸು ತಹಿಂ ತಹಿಂ;
ಧಮ್ಮಕಥಂ ಕಥಾಪೇಸಿಂ, ಸಕ್ಕರಿತ್ವಾನ ದೇಸಕೇ.
ಧಮ್ಮಕಥಿಕ ಸ್ಸೇಕಸ್ಸ, ಸಪ್ಪಿಫಾಣಿತಸಕ್ಖರಂ;
ನಾಳಿಂ ನಾಳಿಮದಾಪೇಸಿಂ, ದಾಪೇಸಿಂ ಚತುರಙ್ಗುಲಂ.
ಮುಟ್ಠಿಕಂ ಯಟ್ಠಿಮಧುಕಂ, ದಾಪೇಸಿಂ ಸಾಟಕದ್ವಯಂ;
ಸಬ್ಬಂಪಿಸ್ಸರಿಯೇ ದಾನಂ, ನಮೇ ಹಾಸೇಸಿ ಮಾನಸಂ.
ಜೀವಿತಂ ಅನಪೇಕ್ಖಿತ್ವಾ, ದುಗ್ಗತೇನ ಸತಾ ಮಯಾ;
ದಿನ್ನ ದಾನ ದ್ವಯಂಯೇವ, ತಂ ಮೇ ಹಾಸೇಸಿ ಮಾನಸಂ.
ತಂ ಸುತ್ವಾ ಅಭಯೋ ಥೇರೋ, ತಂ ದಾನದ್ವಯಮೇವ ಸೋ;
ರಞ್ಞೋ ಚಿತ್ತಪ್ಪಸಾದತ್ಥಂ, ಸಂ ವಣ್ಣೇಸಿ ಅನೇಕಧಾ.
ತೇಸು ಪಞ್ಚಸು ಥೇರೇಸು, ಕಙ್ಗುಅಮ್ಬಿಲಗಾಹಕೋ;
ಮಲಿಯ ದೇವ ಮಹಾಥೇರೋ, ಸುಮನಕೂಟಮ್ಹಿ ಪಬ್ಬತೇ.
ನವನ್ನಂ ¶ ಭಿಕ್ಖುಸತಾನಂ, ದತ್ವಾ ತಂ ಪರಿಭುಞ್ಜಿ ಸೋ;
ಪಥವೀಚಾಲಕೋ ಧಮ್ಮ, ಸುತ್ತಥೇರೋ ತು ತಂ ಪನ.
ಕಲ್ಯಾಣಿಕವಿಹಾರಮ್ಹಿ, ಭಿಕ್ಖೂನಂ ಸಂವಿಭಾಜಿಯ;
ದಸದ್ಧಸ ತಸಙ್ಖಾನಂ, ಪರಿಭೋಗ ಮಕಾಸಯಂ.
ತಲಙ್ಗರ ವಾಸಿಕೋ ಧಮ್ಮ, ದಿನ್ನತ್ಥೇರೋ ಪಿಯಙ್ಗುಕೇ;
ದೀಪೇ ದಸಸಹಸ್ಸಾನಂ, ದತ್ವಾನ ಪರಿಭುಞ್ಜಿತಂ.
ಮಙ್ಗಣವಾಸಿಕೋ ಖುದ್ದ, ತಿಸ್ಸತ್ಥೇರೋ ಮಹಿದ್ಧಿಕೋ;
ಕೇಲಾಸೇ ಸಟ್ಠಿಸಹಸ್ಸಾನಂ, ದತ್ವಾನ ಪರಿಭುಞ್ಜಿ ತಂ.
ಮಹಾಬ್ಯಗ್ಘೋ ಚ ಥೇರೋ ತಂ, ಉಕ್ಕನಗರವಿಹಾರಕೇ;
ದತ್ವಾ ಸತಾನಂ ಸತ್ತಾನಂ, ಪರಿಭೋಗಮಕಾಸಯಂ.
ಸರಕಭತ್ತಗಾಹೀ ತು, ಥೇರೋ ಪಿಯಙ್ಗುದೀಪಕೇ;
ದ್ವಾದಸ ಭಿಕ್ಖುಸಹಸ್ಸಾನಂ, ದತ್ವಾನ ಪರಿಭುಞ್ಜಿತಂ.
ಇತಿ ವತ್ವಾ’ಭಯತ್ಥೇರೋ, ರಞ್ಞೋ ಹಾಸೇಸಿ ಮಾನಸಂ;
ರಾಜಾ ಚಿತ್ತಂ ಪಸಾದೇತ್ವಾ, ತಂ ಥೇರಂ ಇಧ ಮಬ್ರುವಿ.
‘‘ಚತುವೀಸತಿವಸ್ಸಾನಿ, ಸಙ್ಘಸ್ಸ ಉಪಕಾರಕೋ;
ಅಹ ಮೇವಂ ಹೋತು ಕಾಯೋ’ಪಿ, ಸಙ್ಘಸ್ಸ ಉಪಕಾರಕೋ.
ಮಹಾಥೂಪ ದಸ್ಸನಠಾನೇ, ಸಙ್ಘಸ್ಸ ಕಮ್ಮಮಾಳಕೇ;
ಸರೀರಂ ಸಙ್ಘದಾಸಸ್ಸ, ತುಮ್ಹೇ ಝಾಪೇಥ ಮೇ’’ಇತಿ.
ಕನಿಟ್ಠಂ ಆಹ ‘‘ಭೋ ತಿಸ್ಸ, ಮಹಾಥೂಪೇ ಅನಿಟ್ಠಿತಂ;
ನಿಟ್ಠಾಪೇಹಿ ತುವಂ ಸಬ್ಬಂ, ಕಮ್ಮಂ ಸಕ್ಕಚ್ಚ ಸಾಧುಕಂ.
ಸಾಯಂ ಪಾತೋ ಚ ಪುಪ್ಫಾನಿ, ಮಹಾಥೂಪಮ್ಹಿ ಪೂಜಯ;
ತಿಕ್ಖತ್ತುಂ ಉಪಹಾರಞ್ಚ, ಮಹಾಥೂಪಸ್ಸ ಕಾರಯ.
ಪಟಿಯಾದಿತಞ್ಚ ಯಂ ವತ್ತಂ, ಮಯಾ ಸುಗತ ಸಾಸನೇ;
ಸಬ್ಬಂ ಅಪರಿಹಾಪೇತ್ವಾ, ತಾತ ವತ್ತಯ ತಂ ತುವಂ.
ಸಙ್ಘಸ್ಸ ತಾತ ಕಿಚ್ಚೇಸು, ಮಾ ಪಮಜ್ಜಿತ್ಥ ಸಬ್ಬದಾ’’;
ಇತಂ ತಂ ಅನುಸಾಸಿತ್ವಾ, ತುಣ್ಹೀ ಆಸಿ ಮಹೀಪತಿ.
ತಙ್ಖಣಂ ¶ ಗಣಸಜ್ಝಾಯಂ, ಭಿಕ್ಖುಸಙ್ಘೋ ಅಕಾಸಿ ಚ;
ದೇವತಾ ಛ ರಥೇ ಚೇವ, ಛಹಿ ದೇವೇಹಿ ಆನಯುಂ.
ಯಾಚುಂ ವಿಸುಂ ವಿಸುಂ ದೇವಾ, ರಾಜಾನಂ ತೇ ರಥೇ ಠಿತಾ;
‘‘ಅಮ್ಹಾಕಂ ದೇವಲೋಕಂ ತ್ವಂ, ಏಹಿ ರಾಜಮನೋರಮಂ’’.
ರಾಜಾ ತೇಸಂ ವಚೋ ಸುತ್ವಾ, ‘‘ಯಾವ ಧಮ್ಮಂ ಸುಣೋಮಹಂ;
ಅಧಿವಾಸೇಥ ತಾವಾ’’ತಿ, ಹತ್ಥಾಕಾರೇನ ವಾರಯಿ.
ವಾರೇತಿ ಗಣಸಜ್ಝಾಯ, ಮೀಭಿ ಮನ್ತ್ವಾನ ಭಿಕ್ಖವೋ;
ಸಜ್ಝಾಯಂ ಠಪಯುಂ ರಾಜಾ, ಪುಚ್ಛಿತಂ ಠಾನಕಾರಣಂ.
‘‘ಆಗಮೇಥಾ’’ತಿ ಸಞ್ಞಾಯ, ದಿನ್ನತ್ತಾ’ತಿ ವದಿಂಸು ತೇ;
ರಾಜಾ ‘‘ನೇತಂ ತಥಾ ಭನ್ತೇ’’, ಇತಿ ವತ್ವಾನ ತಂ ವದಿ.
ತಂ ಸುತ್ವಾನ ಜನಾ ಕೇಚಿ, ‘‘ಭೀತೋ ಮಚ್ಚುಭಯಾ ಅಯಂ;
ಲಾಲಪ್ಪತೀ’’ತಿ ಮಞ್ಞಿಂಸು, ತೇಸಂ ಕಙ್ಖಾವಿನೋದನಂ.
ಕಾರೇತುಂ ಅಭಯತ್ಥೇರೋ, ರಾಜಾನಂ ಏವಮಾಹ ಸೋ;
‘‘ಜಾನಾಪೇತುಂ ಕಥಂ ಸಕ್ಕಾ, ಆನೀತಾ ತೇ ರಥಾ’’ಇತಿ.
ಪುಪ್ಫದಾನಂ ಖಿಪಾಪೇಸಿ, ರಾಜ ನಭಸಿ ಪಣ್ಡಿತೋ;
ತಾನಿ ಲಗ್ಗಾನಿ ಲಮ್ಬಿಂಸು, ರಥೀಸಾಸು ವಿಸುಂ ವಿಸುಂ.
ಆಕಾಸೇ ಲಮ್ಬಮಾನಾನಿ, ತಾನಿ ದಿಸ್ವಾ ಮಹಾಜನೋ;
ಕಙ್ಖಂ ಪಟಿವಿನೋದೇಸಿ, ರಾಜಾ ಥೇರಮಭಾಸಿತಂ.
‘‘ಕತಮೋ ದೇವಲೋಕೋ ಹಿ,
ರಮ್ಮೋ ಭನ್ತೇ’’ತಿ ಸೋ ಬ್ರುವಿ;
‘‘ತುಸಿನಾನಂ ಪುರಂ ರಾಜ,
ರಮ್ಮಂ’’ಇತಿ ಸತಂ ಮತಂ.
ಬುದ್ಧಭಾವಾಯ ಸಮಯಂ, ಓಲೋಕೇನ್ತೋ ಮಹಾದಯೋ;
ಮೇತ್ತೇಯ್ಯೋ ಬೋಧಿಸತ್ತೋ ಹಿ, ವಸತೇ ತುಸಿತೇ ಪುರೇ.
ಥೇರಸ್ಸ ವಚನಂ ಸುತ್ವಾ, ಮಹಾರಾಜಾ ಮಹಾಮತೀ;
ಓಲೋಕೇನ್ತೋ ಮಹಾಥೂಪಂ, ನಿಪನ್ನೋವ ನಿಮೀಲಯಿ.
ಚವಿತ್ವಾ ತಂಖಣಂಯೇವ, ತುಸಿತಾ ಅಹಟೇ ರಥೇ;
ನಿಬ್ಬತ್ತಿತ್ವಾ ಠಿತೋಯೇವ, ದಿಬ್ಬದೇಹೋ ಅದಿಸ್ಸಥ.
ಕತಸ್ಸ ¶ ಪುಞ್ಞಕಮ್ಮಸ್ಸ, ಫಲಂ ದಸ್ಸೇತುಮತ್ತನೋ;
ಮಹಾಜನಸ್ಸ ದಸ್ಸೇನ್ತೋ, ಅತ್ತಾನಂ ಸಮಲಙ್ಕತಂ.
ರಥಟ್ಠೋಯೇವ ತಿಕ್ಖತ್ತುಂ, ಮಹಾಥೂಪಂ ಪದಕ್ಖಿಣಂ;
ಕತ್ವಾನ ಥೂಪಂ ಸಙ್ಘಞ್ಚ, ವನ್ದಿತ್ವಾ ತುಸಿತಂ ಅಗಾ.
ನಾಟಕಿಯೋ ಇಧಾಗನ್ತ್ವಾ, ಮಕುಟಂ ಯತ್ಥ ಮೋಚಯುಂ;
‘‘ಮಕುಟಮುತ್ತಸಾಲಾ’’ತಿ, ಏತ್ಥ ಸಾಲಾ ಕತಾ ಅಹು.
ಚಿತಕೇ ಠಪಿತೇ ರಞ್ಞೇ, ಸರೀರಮ್ಹಿ ಮಹಾಜನೋ;
ಯತ್ಥಾರವಿ ‘‘ರಾವವಟ್ಟಿ-ಸಾಲಾ’’ನಾಮ ತಹಿಂ ಅಹು.
ರಞ್ಞೋ ಸರೀರಂ ಝಾಪೇಸುಂ, ಯಸ್ಮಿಂ ನಿಸ್ಸೀಮಮಾಳಕೇ;
ಸೋ ಏವ ಮಾಳಕೋ ಏತ್ಥ, ವುಚ್ಚತೇ ‘‘ರಾಜ ಮಾಳಕೋ’’.
ದುಟ್ಠಗಾಮಣಿರಾಜಾ ಸೋ, ರಾಜಾ ನಾಮಾರಹೋ ಮಹಾ;
ಮೇತ್ತೇಯ್ಯಸ್ಸ ಭಗವತೋ, ಹೇಸ್ಸತಿ ಅಗ್ಗಸಾವಕೋ.
ರಞ್ಞೋ ಪಿತಾ ಪಿತಾ ತಸ್ಸ,
ಮಾತಾ ಮಾತಾ ಭವಿಸ್ಸತಿ;
ಸದ್ಧಾತಿಸ್ಸೋ ಕನಿಟ್ಠೋ ತು,
ದುತಿಯೋ ಹೇಸ್ಸತಿ ಸಾವಕೋ.
ಸಾಲಿರಾಜಕುಮಾರೋ ಯೋ,
ತಸ್ಸ ರಞ್ಞೋ ಸುತೋ ತುಸೋ;
ಮೇತ್ತೇಯ್ಯಸ್ಸ ಭಗವತೋ,
ಪುತ್ತೋಯೇವ ಭವಿಸ್ಸತಿ.
ಏವಂ ಯೋ ಕುಸಲಪರೋ ಕರೋತಿ ಪುಞ್ಞಂ,
ಛಾದೇನ್ತೋ ಅನಿಯತಪಾಪಕಂ ಬಹುಮ್ಪಿ;
ಸೋ ಸಗ್ಗಂ ಸಕಲೇ ರಮಿ ವೋ ಪಯಾತಿ ತಸ್ಮಾ,
ಸಪ್ಪಞ್ಞೋ ಸ ತತರತೋ ಭವೇಯ್ಯ ಪುಞ್ಞೇತಿ.
ಸುಜನಪ್ಪಸಾದಸಂವೇಗತ್ಥಾಯ ಕತೇ ಮಹಾವಂಸೇ
ತುಸಿತಪುರಗಮನಂ ನಾಮ
ದ್ವತ್ತಿಂಸತಿಮೋ ಪರಿಚ್ಛೇದೋ
ತೇತ್ತಿಂಸತಿಮ ಪರಿಚ್ಛೇದ
ದಸರಾಜಕೋ
ದುಟ್ಠಗಾಮಣಿರಞ್ಞೋ ¶ ತು, ರಜ್ಜೇಠಿತಾ ಜನಾ ಅಹೂ;
ಸಾಲಿರಾಜಕುಮಾರೋತಿ, ಹಸ್ಸಾಸಿ ವಿಸ್ಸುತೋ ಸುತೋ.
ಅತೀವ ಧಞ್ಞೋ ಸೋ ಆಸಿ, ಪುಞ್ಞಕಮ್ಮರತೋ ಸದಾ;
ಅತೀವ ಚಾರುರುಪಾಯ, ಸತ್ತೋ ಚಣ್ಡಾಲಿಯಾ ಅಹು.
ಅಸೋಕಮಾಲಾದೇವಿಂತಂ, ಸಮ್ಬನ್ಧಂ ಪುಬ್ಬಜಾತಿಯಾ;
ರೂಪೇನಾ’ತಿ ಪಿಯಾಯನ್ತೋ, ಸೋ ರಜ್ಜಂ ನೇವಕಾಮಯಿ.
ದುಟ್ಠಗಾಮಣಿಭಾತಾ’ಸೋ, ಸದ್ಧಾತಿಸ್ಸೋ ತದಚ್ಛಯೇ;
ರಜ್ಜಂ ಕಾರೇಸ್ಸಾ’ಭಿಸಿತ್ತೋ, ಅಟ್ಠಾರಸ್ಸ ಸಮಾ’ಸಮೋ.
ಛಕ್ಕಕಮ್ಮಂ ಸುಧಾಕಮ್ಮಂ, ಹತ್ಥಿಪಾಕಾರಮೇವ ಚ;
ಮಹಾಥೂಪಸ್ಸ ಕಾರೇಸಿ, ಸೋ ಸದ್ಧಾಕತನಾಮಕೋ.
ದೀಪೇನ ಲೋಹಪಾಸಾದೋ, ಉಡ್ಡಿಯ್ಹಿತ್ಥ ಸುಸಙ್ಖತೋ;
ಕಾರೇಸಿ ಲೋಹಪಾಸಾದಂ, ಪುನ ಸೋ ಸತ್ತಭೂಮಕಂ.
ನವುತಿಸತಸಹಸ್ಸಗ್ಘೋ, ಪಾಸಾದೋ ಆಸಿ ಸೋ ತದಾ;
ದಕ್ಖಿಣಗೀರಿವಿಹಾರಂ, ಕಲ್ಲಕಲೇಣ ಮೇವ ಚ.
ಕುಳುಮ್ಬಾಲವಿಹಾರಞ್ಚ, ತಥಾಪೇತ್ತಙ್ಗ ವಾಲಿಕಂ;
ವೇಲಙ್ಗವಟ್ಟಿಕಞ್ಚೇವ, ದುಬ್ಬಲವಾಪಿತಿಸ್ಸತಂ.
ದುರತಿಸ್ಸಕವಾಪಿಞ್ಚ, ತಥಾಮಾತುವಿಹಾರಕಂ;
ಕಾರೇಸಿ ಆದೀಘವಾಪಿಂ, ವಿಹಾರಂಯೋಜನ ಯೋಜನೇ.
ದೀಘವಾಪಿವಿಹಾರಞ್ಚ, ಕಾರೇಸಿ ಸಹಚೇತಿಯಂ;
ನಾನಾರತನಕಚ್ಛನ್ನಂ, ತತ್ಥ ಕಾರೇಸಿ ಚೇತಿಯೇ.
ಸನ್ಧಿಯಂ ಸನ್ಧಿಯಂ ತತ್ಥ, ರಥಚಕ್ಕಪ್ಪಮಾಣಕಂ;
ಸೋವಣ್ಣಮಾಲಂ ಕಾರೇತ್ವಾ, ಲಗ್ಗಾಪೇಸಿ ಮನೋರಮಂ.
ಚತುರಾಸೀತಿಸಹಸ್ಸಾನಂ ¶ , ಧಮ್ಮಕ್ಖನ್ಧಾನಮಿಸ್ಸರೋ;
ಚತುರಾಸೀತಿಸಹಸ್ಸಾನಿ, ಪೂಜಾಚಾಪಿ ಅಕಾರಯಿ.
ಏವಂ ಪುಞ್ಞಾನಿ ಕತ್ವಾ ಸೋ, ಅನೇಕಾನಿ ಮಹೀಪತಿ;
ಕಾಯಸ್ಸಭೇದಾ ದೇವೇಸು, ತುಸಿತೇಸು’ಪಪಜ್ಜಥ.
ಸದ್ಧಾತಿಸ್ಸಪಕಾರಾಜೇ, ವಸನ್ತೇ ದೀಘವಾಪಿಯಂ;
ಲಜ್ಜೀತಿಸ್ಸೋ ಜೇಟ್ಠಸುತೋ, ಗಿರಿಕುಮ್ಭಿಮನಾಮಕಂ.
ವಿಹಾರಂ ಕಾರಯಿ ರಮ್ಮಂ, ತಂಕನಿಟ್ಠಸುತೋ ಪನ;
ಥುಲ್ಲತ್ಥನೋ ಅಕಾರೇಸಿ, ವಿಹಾರಂ ಕನ್ದರವ್ಹಯಂ.
ಪಿತರಾ ಥುಲ್ಲತ್ಥನಕೋ, ಭಾತುಸನ್ತಿಕಮಾಯತಾ;
ಸಹೇವಾ’ಹ ವಿಹಾರಸ್ಸ, ಸಙ್ಘಭೋಗತ್ಥಮತ್ತನೋ.
ಸದ್ಧಾತಿಸ್ಸೇಉಪರತೇ, ಸಬ್ಬೇ’ಮಚ್ಚಾ ಸಮಾಗತಾ;
ಥೂಪಾರಾಮೇ ಭಿಕ್ಖುಸಙ್ಘಂ, ಸಕಲಂ ಸನ್ನಿಪಾತಿಯ.
ಸಙ್ಘಾನುಞ್ಞಾಯರಟ್ಠಸ್ಸ, ರಕ್ಖಣತ್ಥಂ ಕುಮಾರಕಂ;
ಅಭಿಸಿಞ್ಚುಂ ಥುಲ್ಲತ್ಥನಂ, ತಂ ಸುತ್ವಾ ಲಜ್ಜೀತಿಸ್ಸತೋ.
ಇಧಾಗನ್ತ್ವಾ ಗಹೇತ್ವಾ ತಂ, ಸಯಂ ರಜ್ಜಮಕಾರಯಿ;
ಮಾಸಞ್ಚೇವ ದಸಾಹಞ್ಚ, ರಾಜಾ ಥುಲ್ಲತ್ಥನೋ ಪನ.
ತಿಸ್ಸೋಸಮಂ ಲಜ್ಜೀತಿಸ್ಸೋ, ಸಙ್ಘೋ ಹುತ್ವಾ ಅನಾದರೋ;
‘‘ನ ಜಾನಿಂಸು ಯಥಾವುಡ್ಢಂ’’ ಮೀತಿ ತಂ ಪರಿಭಾಸಯಿ.
ಪಚ್ಛಾ ಸಙ್ಘಂ ಖಮಾಪೇತ್ವಾ, ದಣ್ಡಕಮ್ಮತ್ಥಮಿಸ್ಸರೋ;
ತೀಣಿ ಸತಸಹಸ್ಸಾನಿ, ದತ್ವಾನ ಉರುಚೇತಿಯೇ.
ಸಿಲಾಮಯಾನಿ ಕಾರೇಸಿ, ಪುಪ್ಫಯಾನಾನಿ ತೀಣಿಸೋ;
ಅಥೋ ಸತಸಹಸ್ಸೇನ, ಚಿತಾಪೇಸಿ ಚ ಅನ್ತರಾ.
ಮಹಾಥೂಪಥೂಪಾರಾಮಾನಂ, ಭೂಮಿಂಭೂಮಿಸ್ಸರೋ ಸಮಂ;
ಥೂಪಾರಾಮೇ ಚ ಥೂಪಸ್ಸ, ಸಿಲಾಕಞ್ಚುಕ ಮುತ್ತಮಂ.
ಥೂಪಾರಾಮಸ್ಸ ಪುರತೋ, ಸಿಲಾಥೂಪಕಮೇವ ಚ;
ಲಜ್ಜೀಕಾಸನಸಾಲಞ್ಚ, ಭಿಕ್ಖುಸಙ್ಘಸ್ಸ ಕಾರಯಿ.
ಕಞ್ಚುಕಂ ¶ ಕಣ್ಟಕೇ ಥೂಪೇ, ಕಾರಾಪೇಸಿ ಸಿಲಾಮಯಂ;
ದತ್ವಾನ ಸತಸಹಸ್ಸಂ, ವಿಹಾರೇ ಚೇತಿಯವ್ಹಯೇ.
ಗಿರಿಕುಮ್ಭಿಲನಾಮಸ್ಸ, ವಿಹಾರಸ್ಸ ಮಹಮ್ಹಿ ಸೋ;
ಸಟ್ಠಿಭಿಕ್ಖುಸಹಸ್ಸಾನಂ, ತಿಚೀವರಮದಾಪಯಿ.
ಅರಿಟ್ಠವಿಹಾರಂ ಕಾರೇಸಿ, ತಥಾಕನ್ದರಹಿನಕಂ;
ಗಾಮಿಕಾನಞ್ಚ ಭಿಕ್ಖೂನಂ, ಭೇಸಜ್ಜಾನಿ ಅದಾಪಯಿ.
ಕಿಮಿಚ್ಛಕಂ ತಣ್ಡುಲಞ್ಚ, ಭಿಕ್ಖುನೀನಮದಾಪಯಿ;
ಸಮಾನವ’ಠಮಾಸಞ್ಚ, ರಜ್ಜಂ ಸೋ ಕಾರಯೀ ಇಧ.
ಮತೇ ಲಜ್ಜಿಕತಿಸ್ಸಮ್ಹಿ, ಕನಿಟ್ಠೋ ತಸ್ಸ ಕಾರಯಿ;
ರಜ್ಜಂ ಛಳೇವ ವಸ್ಸಾನಿ, ಖಲ್ಲಾಟನಾಗನಾಮಕೋ.
ಲೋಹಪಾಸಾದಪರಿವಾರೇ, ಪಾಸಾದೇ’ತಿ ಮನೋರಮೇ;
ಲೋಹಪಾಸಾದಸೋಭತ್ಥಂ, ಏಸೋ ದ್ವತ್ತಿಂಸಕಾರಯಿ.
ಮಹಾಥೂಪಸ್ಸ ಪರಿತೋ, ಚಾರುನೋ ಹೇಮಮಾಲಿನೋ;
ವಾಲಿಕಙ್ಗಣಮರಿಯಾದಂ, ಪಾಕಾರಞ್ಚ ಅಕಾರಯಿ.
ಸೋವಕುರುನ್ದಪಾಸಕಂ, ವಿಹಾರಞ್ಚ ಅಕಾರಯಿ;
ಪುಞ್ಞಕಮ್ಮಾನಿಚಞ್ಞಾನಿ, ಕಾರಾಪೇಸಿ ಮಹೀಪತಿ.
ತಂ ಮಹಾರತ್ತತೋನಾಮ, ಸೇನಾಪತಿ ಮಹೀಪತಿಂ;
ಖಲ್ಲಾಟನಾಗರಾಜಾನಂ, ನಗರೇಯೇವ ಅಗ್ಗಹಿ.
ತಸ್ಸ ರಞ್ಞೋ ಕನಿಟ್ಠೋತು, ವಟ್ಟಗಾಮಣಿನಾಮಕೋ;
ತಂ ದುಟ್ಠಸೇನಾಪತಿಕಂ, ಹನ್ತ್ವಾ ರಜ್ಜಮಕಾರಯಿ.
ಖಲ್ಲಾಟನಾಗರಞ್ಞೋಸೋ, ಪುತ್ತಕಂ ಸಕಭಾತುನೋ;
ಮಹಾಚೂಲಿಕನಾಮಾನಂ, ಪುತ್ತಠಾನೇ ಠಪೇಸಿ ಚ.
ತಮ್ಮಾತರಂ ನುಳಾದೇವಿಂ, ಮಹೇಸಿಞ್ಚ ಅಕಾಸಿಸೋ;
ಪೀತಿಠಾನೇ ಠಿತತಾ’ಸ್ಸ, ಪೀತಿರಾಜಾತಿ ಅಬ್ರವುಂ.
ಏವಂ ರಜ್ಜೇ’ಭಿಸಿತ್ತಸ್ಸ, ತಸ್ಸ ಮಾಸಮ್ಹಿ ಪಞ್ಚಮೇ;
ರೋಹಣೇ ನಕುಲನಗರೇ, ಏಕೋ ಬ್ರಾಹ್ಮಣಚೇಟತೋ.
ತಿಯೋ ¶ ನಾಮ ಬ್ರಾಹ್ಮಣಸ್ಸ, ವಚೋ ಸುತ್ವಾ ಅಪಣ್ಡಿತೋ;
ಚೋರೋ ಅಸು ಮಹಾತಸ್ಸ, ಪರಿವಾರೋ ಅಹೋಸಿ ಚ.
ಸಗಣಾಸತ್ತದಮಿಳಾ, ಮಹಾತಿತ್ಥಮ್ಹಿ ಓತರುಂ;
ತದಾ ಬ್ರಾಹ್ಮಣತಿಯೋ ಚ, ತೇ ಸತ್ತದಮಿಳಾಪಿಚ.
ಛಕ್ಕತ್ಥಾಯ ವಿಸಜ್ಜೇಸುಂ, ಲೇಖಂ ಭೂಪತಿಸನ್ತಿಕಂ;
ರಾಜಾ ಬ್ರಾಹ್ಮಣತಿಯಸ್ಸ, ಲೇಖಂ ಪೇಸೇಸಿ ನೀತಿಮಾ.
‘‘ರಜ್ಜಂ ತವ ಇದಾನೇವ, ಗಣ್ಹ ತ್ವಂ ದಮಿಳೇ’’ ಇತಿ;
ಸಾಧೂತಿ ಸೋ ದಮಿಳೇಹಿ, ಯುಜ್ಝಿ ಗಣ್ಹಿಂಸು ತೇ ತು ತಂ.
ತತೋ ತೇ ದಮಿಳಾ ಯುದ್ಧಂ, ರಞ್ಞಾ ಸಹ ಪವತ್ತಯುಂ;
ಕೋಳಮ್ಬಾಲಕಸಾಮನ್ತಾ, ಯುದ್ಧೇ ರಾಜಾ ಪರಾಜಿತೋ.
ತಿತ್ಥಾರಾಮದುವಾರೇನ, ರಥಾರುಳ್ಹೋ ಪಲಾಯತಿ;
ಪಣ್ಡುಕಾಭಯರಾಜೇನ, ತಿತ್ಥಾರಾಮೋಹಿ ಕಾರಿತೋ;
ವಾಸಿತೋ ಚ ತದಾ ಆಸಿ, ಏಕವೀಸತಿ ರಾಜುಸೂ.
ತಂ ದಿಸ್ವಾ ಪಲಾಯನ್ತಂ, ನಿಗಣ್ಠೋಗಿರಿನಾಮಕೋ;
‘‘ಪಲಾಯತಿ ಮಹಾಕಾಳ-ಸೀಹಳೋ’’ತಿ ಭುಸಂ ರವಿ.
ತಂ ಸುತ್ವಾನ ಮಹಾರಾಜಾ, ‘‘ಸಿದ್ಧೇ ಮಮ ಮನೋರಥೇ;
ವಿಹಾರಂ ಏತ್ಥ ಕಾರೇಸ್ಸಂ’’, ಇಚ್ಚೇವಂ ಚಿನ್ತಯೀ ತದಾ.
ಸಗಬ್ಭಂ ಅನುಲಾದೇವಿಂ, ಅಗ್ಗಹೀ ರಕ್ಖಿಯಾ ಇತಿ;
ಮಹಾಚೂಳ ಮಹಾನಾಗ-ಕುಮಾರೇಚಾಪೀ ರಕ್ಖಿಯೇ.
ರಥಸ್ಸ ಲಹುಭಾವತ್ಥಂ, ಡತ್ವಾ ಚೂಳಾಮಣಿಂಸುಭಂ;
ಓತಾರೇಸಿ ಸೋಮದೇವಿಂ, ತಸ್ಸ’ನುಞ್ಞಾಯ ಭೂಪತಿ.
ಯುದ್ಧಾಯಗಮನೇಯೇವ, ಪುತ್ತಕೇ ದ್ವೇ ಚ ದೇವಿಯೋ;
ಗಾಹಯಿತ್ವಾನ ನಿಕ್ಖನ್ತೋ, ಸಙ್ಕಿತೋ ಸೋ ಪರಾಜಯೇ.
ಅಸಕ್ಕುಣಿತ್ವಾ ಗಾಹೇತುಂ, ಪತ್ತಂ ಭುತ್ತಂ ಜಿನೇನ ತಂ;
ಪಲಾಯಿತ್ವಾ ವೇಸ್ಸಗೀರಿ-ವನೇ ಅಭಿನಿಯಿಯಿಸೋ.
ಕುತ್ಥಿಕ್ಕುಲಮಹಾತಿಸ್ಸ-ಥೇರೋ ದಿಸ್ವಾ ತಹಂ ತು ತಂ;
ಭತ್ತಂ ಪಾದಾ ಅನಾಮಟ್ಠಂ, ಪಿಣ್ಡದಾನಂ ವಿವಜ್ಜಿಯ.
ಅಥ ¶ ಕೇತಕಿಪತ್ತಮ್ಹಿ, ಲಿಖಿತ್ವಾ ಹಟ್ಠಮಾನಸೋ;
ಸಙ್ಘಭೋಗಂ ವಿಹಾರಸ್ಸ, ತಸ್ಸ ಪಾದಾಮಹೀಪತಿ.
ತತೋ ಗನ್ತ್ವಾ ಸಿಲಾಸೋಬ್ಭ-ಕಣ್ಡಕಮ್ಹಿ ವಸೀ ತತೋ;
ಗನ್ತ್ವಾನ ಮಾತುವೇಲಙ್ಗೇ, ಸಾಲಗಲಸಮೀಪಗೋ.
ತತ್ಥದ್ದಸ ದಿಟ್ಠಪುಬ್ಬಂ, ಥೇರಂ ಥೇರೋ ಮಹೀಪತಿಂ;
ಉಪಟ್ಠಾಕಸ್ಸ ಅಪ್ಪೇಸಿ, ತನಸಿವಸ್ಸ ಸಾಧುಕಂ.
ತಸ್ಸ ಸೋ ತನಸಿವಸ್ಸ, ರಟ್ಠಿಕಸ್ಸ’ನ್ತಿಕೇ ತಹಿಂ;
ರಾಜಾ ಚುದ್ದಸವಸ್ಸಾನಿ, ವಸೀ ತೇನ ಉಪಟ್ಠಿತೋ.
ಸತ್ತಸು ದಮೀಳೇಸ್ವೇ’ಕೋ, ಸೋಮಾದೇವಿಂ ಮದಾವಹಂ;
ರಾಗರತ್ತೋ ಗಹೇತ್ವಾನ, ಪರತೀರಮಗಾಲಹುಂ.
ಏಕೋಪತ್ತಂ ದಸಬಲಸ್ಸ, ಅನುರಾಧಪುರೇ ಠಿತಂ;
ಆದಾಯ ತೇನ ಸನ್ತುಟ್ಠೋ, ಪರತೀರಮಗಾಲಹುಂ.
ಪುಳಹತ್ಥೋ ತು ದಮಿಳೋ, ತೀಣಿವಸ್ಸಾನಿ ಕಾರಯಿ;
ರಜ್ಜಂ ಸೇನಾಪತಿಂ ಕತ್ವಾ, ದಮಿಳಂ ಬಾಹಿಯವ್ಹಯಂ.
ಪುಳಹತ್ಥಂ ಗಹೇತ್ವಾ ತಂ, ದೂರೇ ವಸ್ಸಾನಿ ಬಾಹೀಯೋ;
ರಜ್ಜಂ ಕಾರೇಸಿ ತಸ್ಸಾ’ಸಿ, ಪಣಯಮಾರೋ ಚಮೂಪತಿ.
ಬಾಹೀಯಂ ತಂ ಗಹೇತ್ವಾನ, ರಾಜಾ’ಸಿ ಪಣಯಮಾರಕೋ;
ಸತ್ತವಸ್ಸಾನಿ ತಸ್ಸಾ’ಸಿ, ಪಿಳಯಮಾರೋ ಚಮೂಪತಿ.
ಪಣಯಮಾರಂ ಗಹೇತ್ವಾ ಸೋ, ರಾಜಾಸಿ ಪೀಳಯಮಾರಕೋ;
ಸತ್ತಮಾಸಾನಿ ತಸ್ಸಾಸಿ, ದಾಠಿಯೋ ತು ಚಮೂಪತಿ.
ಪೀಳಯಮಾರಂ ಗಹೇತ್ವಾ ಸೋ, ದಾಠಿಯೋ ದಮಿಳೋ ಪನ;
ರಜ್ಜಂ’ನುರಾಧನಗರೇ, ದುವೇ ವಸ್ಸಾನಿ ಕಾರಯಿ.
ಏವಂ ದಮಿಳರಾಜೂನಂ, ತೇಸಂ ಪಞ್ಚನ್ನಮೇವಹಿ;
ಹೋನ್ತಿ ಚುದ್ದಸವಸ್ಸಾನೀ, ಸತ್ತಮಾಸಾ ಚ ಉತ್ತರಿಂ.
ಗತಾಯ ತು ನಿವಾಸತ್ಥಂ, ಮಲಯೇ’ನುಲದೇವಿಯಾ;
ಭರಿಯಾಕನಸಿವಸ್ಸ, ಪಾದಾಪಹರಿ ಪಚ್ಛಿಯಂ.
ಕುಜ್ಝಿತ್ವಾ ರೋದಮಾನಾಸಾ, ರಾಜಾನಂ ಉಪಸಕಿಮಿ;
ತಂ ಸುತ್ವಾ ತನಸಿವೋಸೋ, ಮನುಮಾದಾಯ ನಿಕ್ಖಮಿ.
ದೇವಿಯಾ ¶ ವಚನಂ ಸುತ್ವಾ, ತಸ್ಸ ಆಗಮನಾ ಪುರಾ;
ದ್ವಿಪುತ್ತಂ ದೇವಿಮಾದಾಯ, ತತೋ ರಾಜಾ’ಪಿ ನಿಕ್ಖಮಿ.
ಧನುಂ ಸನ್ಧಾಯ ಆಯನ್ತಂ, ಸೀವಂ ವಿಜ್ಝಿ ಮಹಾಸೀವೋ;
ರಾಜಾ ನಾಮಂ ಭಾವಯಿತ್ವಾ, ಅಕಾಸಿ ಜಿನಸಙ್ಗಹಂ.
ಅಲತ್ಥ ಅಟ್ಠಾಮಚ್ಚೇಚ, ಮಹನ್ತೇ ಯೋಧಸಮ್ಮತೇ;
ಪರಿವಾರೋ ಮಹಾಆಸೀ, ಪರಿಹಾರೋ ಚ ರಾಜಿನೋ.
ಕುಮ್ಭೀಲಕಮಹಾತಿಸ್ಸ-ಥೇರ ದಿಸ್ವಾ ಮಹಾಯಸೋ;
ಅಚ್ಛಗಲ್ಲವಿಹಾರಮ್ಹಿ, ಬುದ್ಧಪೂಜಮಕಾರಯಿ.
ವತ್ಥುಂ ಸೋಧೇತುಮಾರುಳ್ಹೋ, ಅಕಾಸಚೇತಿಯಙ್ಗಣಂ;
ಕವಿಸೀಸೇ ಅಮಚ್ಚಮ್ಹಿ, ಓರೋಹನ್ತೋಮಹೀಪತಿ.
ಆರೋಹನ್ತೋ ಸದೇವಿಕೋ, ದಿಸ್ವಾ ಮಗ್ಗೇ ನಿಸಿನ್ನಕಂ;
‘‘ನ ನಿಪನ್ನೋ’’ತಿ ಕುಜ್ಝಿತ್ವಾ, ಕವಿಸೀಸಂ ಅಘಾತಯಿ.
ಸೇಸಾ ಸತ್ತಅಮಚ್ಚಾವಿ, ನಿಬ್ಬಿನ್ನಾ ತೇನ ರಾಜಿನಾ;
ತಸ್ಸ’ನ್ತಿಕಾ ಪಲಾಯಿತ್ವಾ, ಪಕ್ಕಮನ್ತಾ ಯಥಾರುಚಿ.
ಮಗ್ಗೇ ವಿಲುತ್ತಾ ಚೋರೇಹಿ, ವಿಹಾರಂ ಹಮ್ಬುಗಲ್ಲಕಂ;
ಪವಿಸಿತ್ವಾನ ಅದ್ದಕ್ಖುಂ, ತಿಸ್ಸತ್ಥೇರಂ ಬಹುಸ್ಸುತಂ.
ಚತುನೇಕಾಯಿಕೋ ಥೇರೋ, ಯಥಾಲದ್ಧಾನಿ ದಾಪಯಿ;
ವತ್ಥಫಾಣಿತತೇಲಾನಿ, ತಣ್ಡುಲಾ ಪಾಹುಣಾ ತಥಾ.
ಅಸ್ಸತ್ಥಕಾಲೇ ಥೇರೋ ಸೋ,
‘‘ಕುಹಿಂಯಾತಾ’’ತಿ ಪುಚ್ಛಿತೇ;
ಅತ್ತಾನಂ ಆವೀಕತ್ವಾ ತೇ,
ತಂ ಪವತ್ತಿಂ ನಿವೇದಯುಂ.
‘‘ಕಾರೇತುಂ ಕೇಹಿ ಸಕ್ಕಾ ನು, ಜಿನಸಾಸನಪಗ್ಗಹಂ;
ದಮಿಳೇಹಿ ವಾ’ಥ ರಞ್ಞಾ, ಇತಿ ಪುಟ್ಠಾ ತು ತೇ ಪನ.
‘‘ರಞ್ಞೋ ಸಕ್ಕಾ’’ತಿ ಆಹಂಸು, ಸಞ್ಞಾಪೇತ್ವಾನ ತೇ ಇತಿ;
ಉಭೋ ತಿಸ್ಸ ಮಹಾತಿಸ್ಸ-ಥೇರಾ ಆದಾಯ ತೇ ತತೋ.
ರಾಜಿನೋ ಸನ್ತಿಕಂ ನೇತ್ವಾ, ಅಞ್ಞಮಞ್ಞಂ ಖಮಾಪಯುಂ;
ರಾಜಾ ಚ ತೇ ಅಮಚ್ಚಾ ಚ, ಥೇರೋ ಏವ ಮಯಾಚಯುಂ.
ಸಿದ್ಧೇ ¶ ಕಮ್ಮೇ ಪೇಸಿತೇನೋ, ಗನ್ತಬ್ಬಂ ಸನ್ತಿಕಂ ಇತಿ;
ಥೇರಾ ದತ್ವಾ ಪಟಿಞ್ಞಂ ತೇ, ಯಥಾಠಾನಮಗಞ್ಛಿಸುಂ.
ಅನುರಾಧಪುರಂ ರಾಜಾ, ಆಗನ್ತ್ವಾನ ಮಹಾಯಸೋ;
ದಾಠಿಕಂ ದಮಿಳಂ ಹನ್ತ್ವಾ, ಸಯಂ ರಜ್ಜಮಕಾರಯಿ.
ತತೋ ನಿಗಣ್ಠಾರಾಮಂ ತಂ, ವಿದ್ಧಂಸೇತ್ವಾ ಮಹೀಪತಿ;
ವಿಹಾರಂ ಕಾರಯಿ ತತ್ಥ, ದ್ವಾದಸ ಪರಿವೇಣಕಂ.
ಮಹಾವಿಹಾರಪಟ್ಠಾನಾ, ದ್ವೀಸು ವಸ್ಸಸ ತೇಸು ಚ;
ಸತ್ತರಸಸು ವಸ್ಸೇಸು, ದಸಮಾಸಾ’ಮಿಕೇಸು ಚ.
ತಥಾ ದಿನೇಸು ದಸಸು, ಅತಿಕ್ಕನ್ತೇಸು ಸಾದರೋ;
ಅಭಯಗಿರಿ ವಿಹಾರಂಸೋ, ಪತಿಟ್ಠಾಪೇಸಿ ಭೂಪತಿ.
ಅಕ್ಕೋಸಿಯಿತ್ವಾ ತೇ ಥೇರೇ, ತೇಸು ಪುಬ್ಬುಪಕಾರಿನೋ;
ತಂ ಮಹಾತಿಸ್ಸ ಥೇರಸ್ಸ, ವಿಹಾರಂ ಮಾನದೋ ಅದಾ.
ಗಿರಿಸ್ಸ ಯಸ್ಮಾ ಗಾರಾಮೇ, ರಾಜಾ ಕಾರೇಸಿ ಸೋಭಯೋ;
ತಸ್ಮಾ’ಭಯ ಗಿರಿತ್ವೇವ, ವಿಹಾರೋ ನಾಮಕೋ ಅಹು.
ಆಣಾಪೇತ್ವಾ ಸೋಮಾದೇವಿಂ,
ಯಥಾ ಠಾನೇ ಠಪೇಸಿಸೋ;
ತಸ್ಸಾತನ್ನಾಮಕಂ ಕತ್ವಾ,
ಸೋಮಾರಾಮ ಮಕಾರಯಿ.
ರಥಾ ಓರೋಪಿತಾ ಸಾ ಹಿ, ತಸ್ಮಿಂಠಾನೇ ವರಙ್ಗನಾ;
ಕದ್ದಮ್ಬಪುಪ್ಫ ಗುಮ್ಬಮ್ಹಿ, ನಿಲಿನಾ ತತ್ಥ ಅದ್ದಸ.
ಮುತ್ತಯನ್ತಂ ಸಾಮಣೇರಂ, ಮಗ್ಗಂ ಹತ್ಥೇನ ಛಾದಿಯ;
ರಾಜಾ ತಸ್ಸ ವಚೋ ಸುತ್ವಾ, ವಿಹಾರಂ ತತ್ಥ ಕಾರಯಿ.
ಮಹಾಥೂಪಸ್ಸುತ್ತರತೋ,
ಚೇತಿಯಂ ಉಚ್ಚವತ್ಥುಕಂ;
ಸಿಲಾ ಸೋಭಕಣ್ಡಕಂ ನಾಮ,
ರಾಜಾ ಸೋಯೇವ ಕಾರಯಿ.
ತೇಸು ಸತ್ತಸು ಯೋಧೇಸು, ಉತ್ತಿಯೋ ನಾಮ ಕಾರಯಿ;
ನಗರಮ್ಹಾ ದಕ್ಖಿಣತೋ, ವಿಹಾರಂ ದಕ್ಖಿಣವ್ಹಯಂ.
ತತ್ತೇವ ¶ ಮೂಲವೋಕಾಸ, ವೀಹಾರಂ ಮೂಲನಾಮಕೋ;
ಅಮಚ್ಚೋ ಕಾರಯೀ ತೇನ, ಸೋಪಿ ತಂನಾಮಕೋ ಅಹು.
ಕಾರೇಸಿ ಸಾಲಿಯಾರಾಮಂ, ಅಮಚ್ಚೋ ಸಾಲಿಯವ್ಹಯೋ;
ಕಾರೇಸಿ ಪಬ್ಬತಾರಾಮಂ, ಅಮಚ್ಚೋ ಪಬ್ಬತವ್ಹಯೋ.
ಉತ್ತರತಿಸ್ಸರಾಮನ್ತು, ತಿಸ್ಸಾಮಚ್ಚೋ ಅಕಾರಯಿ;
ವಿಹಾರೇ ನಿಟ್ಠಿತೇ ರಮ್ಮೇ, ತಿಸ್ಸಥೇರ ಮುಪಚ್ಚತೇ.
‘‘ತುಮ್ಹಾಕಂ ಪಟಿಸನ್ಥಾರ, ವಸೇನ’ಮ್ಹೇಹಿ ಕಾರಿತೇ;
ವಿಹಾರೇ ದೇಮ ತುಮ್ಹಾಕಂ, ಇತಿ ವತ್ವಾ ಅದಂಸು ಚ.
ಥೇರೋ ಸಬ್ಬತ್ಥವಾಸೇಸಿ, ತೇ ತೇ ಭಿಕ್ಖೂ ಯಥಾ ರಹಂ;
ಅಮಚ್ಚಾ’ದಂಸು ಸಙ್ಘಸ್ಸ, ವಿವಿಧೇ ಸಮಣಾರಹೇ.
ರಾಜಾ ಸಕವಿಹಾರಮ್ಹಿ, ವಸನ್ತೇ ಸಮುಪಟ್ಠಹಿ;
ಪಚ್ಚಯೇಹಿ ಅನುನೇಹಿ, ತೇನ ತೇ ಬಹವೋ ಅಹುಂ.
ಥೇರಂ ಕುಲೇಹೀ ಸಂಸಟ್ಠಂ, ಮಹಾತಿಸ್ಸೋತಿ ವಿಸ್ಸುತಂ;
ಕುಲಸಂಸಟ್ಠ ದೋಸೇನ, ಸಙ್ಘೋ ತಂ ನೀಹರಿ ಇತೋ.
ತಸ್ಸ ಸಿಸ್ಸೋ ಬಹಲಮಸ್ಸು-
ತಿಸ್ಸತ್ಥೇರೋತಿ ಪಿಸ್ಸುತೋ;
ಕುದ್ಧೋ’ಭಯಗಿರಿಂ ಗನ್ತ್ವಾ,
ವಸಿ ಪಕ್ಖಂ ವಹಂ ತಹಿಂ.
ತತೋಪ್ಪಭುತಿ ತೇ ಭಿಕ್ಖೂ, ಮಹಾವಿಹಾರನಾಗಮುಂ;
ಏವಂ ತೇ’ಭಯಗಿರಿಕಾ, ನಿಗ್ಗತಾ ಥೇರವಾದತೋ.
ಪಭಿನ್ನಾ’ಭಯಗಿರಿಕೇಹಿ, ದಕ್ಖಿಣವಿಹಾರಿಕಾಯತಿ;
ಏವಂ ತೇ ಥೇರವಾದೀಹಿ, ಪಭಿನ್ನಾ ಭಿಕ್ಖವೋ ದ್ವಿಧಾ.
ಮಹಾ ಅಭಯಭಿಕ್ಖೂ ತೇ, ವಡ್ಢೇತುಂ ದೀಪವಾಸಿನೋ;
ವಟ್ಟಗಾಮಣಿಭೂಮಿನ್ದೋ, ಪತ್ತಿಂ ನಾಮ ಅದಾಸಿ ಸೋ.
ವಿಹಾರಪರಿವೇಣಾನಿ, ಘಟಾಬದ್ಧೇ ಅಕಾರಯಿ;
‘‘ಪಟಿಸಙ್ಖರಣಂ ಏವಂ, ಹೇಸ್ಸತೀತಿ ವಿಚಿನ್ತಿಯ.
ಪಿಟಕತ್ತಯಪಾಳಿಞ್ಚ, ತಸ್ಸ ಅಟ್ಠಕಥಮ್ಪಿ ಚ;
ಮುಖಪಾಠೇನ ಆನೇಸುಂ, ಪುಬ್ಬೇ ಭಿಕ್ಖೂ ಮಹಾಮತಿ.
ಹಾನಿಂ ¶ ದಿಸ್ವಾನ ಸತ್ತಾನಂ, ತದಾ ಭಿಕ್ಖೂ ಸಮಾಗತಾ;
ಚಿರಟ್ಠಿತತ್ಥಂ ಧಮ್ಮಸ್ಸ, ಪೋತ್ಥಕೇಸು ಲಿಖಾಪಯುಂ.
ವಟ್ಟಗಾಮಣಿ ಅಭಯೋ, ರಾಜಾ ರಜ್ಜಮಕಾರಯಿ;
ಇತಿ ದ್ವಾದಸವಸ್ಸಾನಿ, ಪಞ್ಚಮಾಸೇಸು ಆದಿತೋ.
ಇತೀ ಪರಹಿತ ಮತ್ತನೋ ಹಿತಞ್ಚ,
ಪಟಿಲಭಿಯಿಸ್ಸರಿಯಂ ಕರೋತಿ ಪಞ್ಞೋ;
ವಿಪುಲಮಪಿ ಕುಬುದ್ಧಿಲದ್ಧಭೋವಂ,
ಉಭಯಹಿತಂ ನ ಕರೋತಿ ಭೋಗಲುದ್ಧೋ’ತಿ.
ಸುಜನಪ್ಪಸಾದಸಂವೇಗತ್ಥಾಯ ಕತೇ ಮಹಾವಂಸೇ
ದಸರಾಜಕೋ ನಾಮ
ತೇತ್ತಿಂಸತಿಮೋ ಪರಿಚ್ಛೇದೋ.
ಚತುತ್ತಿಂಸತಿಮ ಪರಿಚ್ಛೇದ
ಏಕಾದಸರಾಜದೀಪನೋ
ತದಚ್ಚಯೇ ಮಹಾಚೂಲೀ-ಮಹಾತಿಸ್ಸೋ ಅಕಾರಯಿ;
ರಜ್ಜಂ ಚುದ್ದಸವಸ್ಸಾನಿ, ಧಮ್ಮೇನ ಚ ಸಮೇನ ಚ.
ಸಹತ್ಥೇನ ಕತಂ ದಾನಂ, ಸೋ ಸುತ್ವಾನ ಮಹಪ್ಫಲಂ;
ಪಠಮೇಯೇವ ವಸ್ಸಮ್ಹಿ, ಗನ್ತ್ವಾ ಅಞ್ಞಾತವೇಸವಾ.
ಕತ್ವಾನ ಸಾಲಿಲವನಂ, ಲದ್ಧಾಯ ಭತಿಯಾ ತತೋ;
ಪಿಣ್ಡಪಾತಂ ಮಹಾಸುಮ್ಮ-ಥೇರಸ್ಸಾ’ದಾ ಮಹೀಪತಿ.
ಸೋಣ್ಣಗಿರಿಮ್ಹಿ ಪುನ ಸೋ, ತೀಣಿವಸ್ಸಾನಿ ಖತ್ತಿಯೋ;
ಗುಳಯನ್ತಮ್ಹಿ ಕತ್ವಾನ, ಭತಿಂಲದ್ಧಾ ಗುಳೇ ತತೋ.
ತೇ ಗುಳೇ ಆಹರಾಪೇತ್ವಾ, ಪುರಂ ಆಗಮ್ಮ ಭೂಪತಿ;
ಭಿಕ್ಖುಸಙ್ಘಸ್ಸ ಪಾದಾಸಿ, ಮಹಾದಾನಂ ಮಹೀಪತಿ.
ತಿಂಸಭಿಕ್ಖುಸಹಸ್ಸಸ್ಸ, ಅದಾ ಅಚ್ಛಾದನಾನಿ ಚ;
ದ್ವಾದಸನ್ನಂ ಸಹಸ್ಸಾನಂ, ಭಿಕ್ಖೂನೀನಂ ತಥೇವ ಚ.
ಕಾರಯಿತ್ವಾ ¶ ಮಹೀಪಾಲೋ, ವಿಹಾರಂ ಸುಪ್ಪತಿಟ್ಠಿತಂ;
ಸಟ್ಠಿಭಿಕ್ಖು ಸಹಸ್ಸಸ್ಸ, ತಿಚೀವರಮದಾಪಯಿ.
ತಿಂಸ ಸಹಸ್ಸ ಸಙ್ಖಾನಂ, ಭಿಕ್ಖುನೀನಞ್ಚ ದಾಪಯಿ;
ಮಣ್ಡವಾಪಿ ವಿಹಾರಂ ಸೋ, ತಥಾ ಅಭಯಗಲ್ಲಕಂ.
ವಙ್ಗುಪಟ್ಟಙ್ಗಗಲ್ಲಞ್ಚ, ದೀಘಬಾಹುಕಗಲ್ಲಕಂ;
ವಾಲಗಾಮ ವಿಹಾರಞ್ಚ, ರಾಜಾ ಸೋಯೇವ ಕಾರಯಿ.
ಏವಂ ಸದ್ಧಾಯ ಸೋ ರಾಜಾ, ಕತ್ವಾ ಪುಞ್ಞಾನಿನೇಕಧಾ;
ಚತುದ್ದಸನ್ನಂ ವಸ್ಸಾನಂ, ಅಚ್ಚಯೇನ ದಿವಂ ಅಗಾ.
ವಟ್ಟಗಾಮಣಿನೋ ಪುತ್ತೋ, ಚೋರನಾಗೋತಿ ವಿಸ್ಸುತೋ;
ಮಹಾಚೂಳಿಸ್ಸರಜ್ಜಮ್ಹಿ, ಚೋರೋ ಹುತ್ವಾ ಚರಿತದಾ.
ಮಹಾಚೂಳೇ ಉಪರತೇ, ರಜ್ಜಂ ಕಾರಯಿ ಆಗತೋ;
ಅತ್ತನೋ ಚೋರಕಾಲೇ ಸೋ, ನಿವಾಸಂ ಯೇಸುನಾಲಭಿ.
ಅಟ್ಠರಸವಿಹಾರೇ ತೇ, ವಿದ್ಧಂಸಾಪೇಸಿ ದುಮ್ಮತಿ;
ರಜ್ಜಂ ದ್ವಾದಸವಸ್ಸಾನಿ, ಚೋರನಾಗೋ ಅಕಾರಯಿ.
ಲೋಕನ್ತರಿಕ ನಿರಯಂ, ಪಾಪೋಸೋಉಪಪಜ್ಜಥ;
ತದಚ್ಚಯೇ ಮಹಾಚೂಳ್ಹಿ-ರಞ್ಞೋ ಪುತ್ತೋ ಅಕಾರಯಿ.
ರಜ್ಜಂ ತೀಣೇವ ವಸ್ಸಾನಿ, ರಾಜಾತಿಸ್ಸೋ’ತಿ ವಿಸ್ಸುತೋ;
ಚೋರನಾಗಸ್ಸ ದೇವೀತು, ವೀಸಮಂ ವೀಸಮಾನುಲಾ.
ವೀಸಂ ದತ್ವಾನ ಮಾರೇಸಿ, ಬಲತ್ಥೇರತ್ತಮಾನಸಾ;
ತಸ್ಮಿಂಯೇವಬಲತ್ಥೇಸಾ, ಅನುಲಾರತ್ತಮಾನಸಾ.
ತಿಸ್ಸಂ ವೀಸೇನಘಾತೇತ್ವಾ, ತಸ್ಸ ರಜ್ಜಮದಾಸಿಸಾ;
ಸೀವೋ ನಾಮ ಬಲತ್ಥೋಸೋ, ಜೇಟ್ಠದೋವಾರಿಕೋ ತಹಿಂ.
ಕತ್ವಾ ಮಹೇಸಿಂ ಅನುಲಂ, ವಸ್ಸಂ ಮಾಸದ್ವಯಾ’ಚಿಕಂ;
ರಜ್ಜಂ ಕಾರೇಸಿ ನಗರೇ, ವಟುಕೇ ದಮಿಳೇ’ನುಲಾ.
ರತ್ತಾ ವೀಸೇನ ತಂ ಹನ್ತ್ವಾ, ವಟುಕೇ ರಜ್ಜಮಪ್ಪಯಿ;
ವಟುಕೋ ದಮಿಳೋ ಸೋ ಹಿ, ಪುರೇ ನಗರವಡ್ಢಕೀ.
ಮಹೇಸಿಂ ಅನುಲಂ ಕತ್ವಾ, ವಸ್ಸಂ ಮಾಸದ್ವಯಾಧಿಕಂ;
ರಜ್ಜಂ ಕಾರೇಸಿ ನಗರೇ, ಅನುಲಾ ತತ್ಥ ಆಗತಂ.
ಪಸ್ಸಿತ್ವಾ ದಾರುಭತಿಕಂ, ತಸ್ಮಿಂ ಸಾರತ್ತಮಾನಸಾ;
ಹನ್ತ್ವಾ ವಿಸೇನ ವಟುಕಂ, ತಸ್ಸ ರಜ್ಜಂ ಸಮಪ್ಪಯಿ.
ದಾರುಭತಿಕತಿಸ್ಸೋ ¶ ಸೋ, ಮಹೇಸಿಂ ಕರಿಯಾನುಲಂ;
ಏಕಮಾಸಾಧಿಕಂ ವಸ್ಸಂ, ಪುರೇ ರಜ್ಜಮಕಾರಯಿ.
ಕಾರೇಸಿ ಸೋ ಪೋಕ್ಖರಣಿಂ, ಮಹಾಮೇಘವನೇ ಲಹುಂ;
ನಿಲೀಯೇ ನಾಮ ದಮಿಳೇ, ಸಾ ಪುರೋಹಿತಬ್ರಾಹ್ಮಣೇ.
ರಾಗೇನ ರತ್ತಾ ಅನುಲಾ, ತೇನ ಸಂವಾಸಕಾಮಿನೀ;
ದಾರುಭತಿಕತಿಸ್ಸಂತಂ, ವೀಸಂ ದತ್ವಾನ ಘಾತಿಯ.
ನಿಲೀಯಸ್ಸ ಅದಾ ರಜ್ಜಂ, ಸೋಪಿ ನಿಲೀಯಬ್ರಾಹ್ಮಣೋ;
ತಂ ಮಹೇಸಿಂ ಕರಿತ್ವಾನ, ನಿಚ್ಚಂ ತಾಯ ಉಪಟ್ಠಿತೋ.
ರಜ್ಜಂ ಕಾರೇಸಿ ಛಮ್ಮಾಸಂ, ಅನುರಾಧಪುರೇ ಇಧ;
ದ್ವತ್ತಿಂಸಾಯ ಬಲತ್ಥೇಹಿ, ವತ್ಥುಕಾಮಾ ಯಥಾರುಚಿಂ.
ವೀಸೇನ ತಂ ಘಾತಯಿತ್ವಾ, ನಿಲೀಯಂ ಖತ್ತಿಯಾನುಲಾ;
ರಜ್ಜಂ ಸಾ ಅನುಲಾದೇವೀ, ಚತುಮಾಸಮಕಾರಯಿ.
ಮಹಾಚೂಳಿಕರಾಜಸ್ಸ, ಪುತ್ತೋ ದುತಿಯಕೋ ಪನ;
ಕೂಟಕಣ್ಣತಿಸ್ಸೋ ನಾಮ, ಭೀತೋ ಸೋ’ನುಲದೇವಿಯಾ.
ಪಲಾಯಿತ್ವಾ ಪಬ್ಬಜಿತ್ವಾ, ಕಾಲೇ ಪತ್ತಬಲೋ ಇಧ;
ಆಗನ್ತ್ವಾ ಘಾತಯಿತ್ವಾ, ತಂ ಅನುಲಂ ದುಟ್ಠಮಾನಸಂ.
ರಜ್ಜಂ ಕಾರೇಸಿ ದ್ವಾವೀಸಂ, ವಸ್ಸಾನಿ ಮನುಜಾಧಿಪೋ;
ಮಹಾಉಪೋಸಥಾಗಾರಂ, ಅಕಾ ಚೇತಿಯಪಬ್ಬತೇ.
ಘರಸ್ಸ ತಸ್ಸ ಪುರತೋ, ಸಿಲಾಥೂಪಮಕಾರಯಿ;
ಬೋಧಿಂ ರೋಪೇಸಿ ತತ್ಥೇವ, ಸೋವ ಚೇತಿಯೇಪಬ್ಬತೇ.
ಪೇಲಗಾಮವಿಹಾರಞ್ಚ, ಅನ್ತರಗಙ್ಗಾಯ ಕಾರಯಿ;
ತತ್ಥೇವ ವಣ್ಣಕಂ ನಾಮ, ಮಹಾಮಾತಿಕಮೇವ ಚ.
ಅಮ್ಬದುಗ್ಗಮಹಾವಾಪಿಂ, ಭಯೋಲುಪ್ಪಲಮೇವ ಚ;
ಸತ್ತಹತ್ಥುಚ್ಚಪಾಕಾರಂ, ಪುರಸ್ಸ ಪರಿಖಂ ತಥಾ.
ಮಹಾವತ್ಥುಮ್ಹಿ ಅನುಲಂ, ಝಾಪಯಿತ್ವಾ ಅಸಞ್ಞತಂ;
ಅಪನೀಯ ತತೋ ಥೋಕಂ, ಮಹಾವತ್ಥುಮಕಾರಯಿ.
ಪದುಮಸ್ಸರವನುಯ್ಯಾನಂ, ನಗರೇಯೇವ ಕಾರಯಿ;
ಮತಾ’ಸ್ಸ ದನ್ತೇ ಧೋವಿತ್ವಾ, ಪಬ್ಬಜಿ ಜಿನಸಾಸನೇ.
ಕುಲಸನ್ತಕೇ ¶ ಘರಟ್ಠಾನೇ, ಮಾತುಭಿಕ್ಖುನುಪಸ್ಸಯಂ;
ಕಾರೇಸಿ ದನ್ತಗೇಹನ್ತಿ, ವಿಸ್ಸತೋ ಆಸಿ ತೇನ ಸೋ.
ತದಚ್ಚಯೇ ತಸ್ಸ ಪುತ್ತೋ, ನಾಮಕೋ ಭಾತಿಕಾಭಯೋ;
ಅಟ್ಠವೀಸತಿವಸ್ಸಾನಿ, ರಜ್ಜಂ ಕಾರೇಸಿ ಖತ್ತಿಯೋ.
ಮಹಾದಾಟ್ಠಿಕರಾಜಸ್ಸ, ಭಾತಿಕತ್ತಾಮಹೀಪತಿ;
ದೀಪೇ ‘‘ಭಾತಿಕರಾಜಾ’’ತಿ, ಪಾಕಟೋ ಆಸಿ ಧಮ್ಮಿಕೋ.
ಕಾರೇಸಿ ಲೋಹಪಾಸಾದೇ, ಪಟಿಸಙ್ಖಾರಮೇತ್ಥಸೋ;
ಮಹಾಥೂಪೇ ವೇದಿಕಾ ದ್ವೇ, ಥೂಪವ್ಹೇ’ಪೋಸಥವ್ಹಯಂ.
ಅತ್ತನೋ ಬಲಿಮುಜ್ಝಿತ್ವಾ, ನಗರಸ್ಸ ಸಮನ್ತತೋ;
ರೋಪಾಪೇತ್ವಾ ಯೋಜನಮ್ಹಿ, ಸುಮನಾನ’ಜ್ಜುಕಾನಿ ಚ.
ಪಾದವೇಚಿಕತೋ ಯಾವ, ಧುರಚ್ಛತ್ತಾನರಾಧಿಪೋ;
ಚತುರಙ್ಗಲಬಹಲೇನ, ಗನ್ಧೇನ ಉರುಚೇತಿಯಂ.
ಲಿಮ್ಪಾಪೇತ್ವಾನ ಪುಪ್ಫಾನಿ, ವಣ್ಟೇಹಿ ತತ್ಥ ಸಾಧುಕಂ;
ನಿವೇಸಿತ್ವಾನ ಕೋರೇಸಿ, ಥೂಪಂ ಮಾಲಾಗುಲೋಪಮಂ.
ಪುನದ್ವಙ್ಗುಲಬಹಲಾಯ, ಮನೋಸಿಲಾಯ ಚೇತಿಯಂ;
ಲಿಮ್ಪಾಪೇತ್ವಾನ ಕಾರೇಸಿ, ತಥೇವ ಕುಸುಮಾಚಿತಂ.
ಪುನ ಸೋಪಾನತೋ ಯಾವ, ಧುರಚ್ಛತ್ತಾವ ಚೇತಿಯಂ;
ಪುಪ್ಫೇಹಿ ಓಕಿರಾಪೇತ್ವಾ, ಛಾದೇಸಿ ಪುಪ್ಫರಾಸಿನೋ.
ಉಟ್ಠಾಪೇತ್ವಾನ ಯನ್ತೇಹಿ, ಜಲಂ ಅಭಯವಾಪಿತೋ;
ಜಲೇಹಿ ಥೂಪಂ ಸೇವನ್ತೋ, ಬಲಪೂಜಮಕಾರಯಿ.
ಸಕಟಸತೇನ ಮುತ್ತಾನಂ, ಸದ್ಧಿಂ ತೇಲೇನ ಸಾಧುಕಂ;
ಮದ್ದಾಪೇತ್ವಾ ಸುಧಾಪಿಣ್ಡಂ, ಸುಧಾಕಮ್ಮಮಕಾರಯಿ.
ಪವಾಲಜಾಲಂ ಕಾರೇತ್ವಾ, ತಂ ಖಿಪಾಪಿಯ ಚೇತಿಯೇ;
ಸೋವಣ್ಣಾನಿ ಪದುಮಾನಿ, ಚಕ್ಕಮತ್ತಾನಿ ಸನ್ಧಿಸು.
ಲಗ್ಗಾಪೇತ್ವಾ ತತೋ ಮುತ್ತಾ-ಕಲಾಪೇ ಯಾವ ಹೇಟ್ಠಿಮಾ;
ಪದುಮಾ’ಲಮ್ಬಯಿತ್ವಾನ, ಮಹಾಥೂಪಮಪೂಜಯಿ.
ಗಣಸಜ್ಝಾಯಸದ್ದಂ ¶ ಸೋ, ಧಾತುಗಬ್ಭಮ್ಹಿತಾದಿನಿ;
ಸುತ್ವಾ ‘‘ಅದಿಸ್ವಾ ತಂನಾ’ಹಂ, ವುಟ್ಠಹಿಸ್ಸನ್ತಿ ನಿಚ್ಛಿತೋ.
ಪಾಚಿನಾದಿಕಮೂಲಮ್ಹಿ, ಅನಾಹಾರೋ ನಿಪಜ್ಜಥ;
ಥೇರಾ ದ್ವಾರಂ ಮಾಪಯಿತ್ವಾ, ಧಾತುಗಬ್ಭಂ ನಯಿಂಸು ತಂ.
ಧಾತುಗಬ್ಭವಿಭೂತಿಂಸೋ, ಸಬ್ಬಂ ದಿಸ್ವಾ ಮಹೀಪತಿ;
ನಿಕ್ಖನ್ತೋ ತಾದಿಸೇಹೇವ, ಪೋತ್ಥರೂಪೇಹಿ ಪೂಜಯಿ.
ಮಧುಗನ್ಧೇಹಿ ಗನ್ಧೇಹಿ, ಘಟೇಹಿ ಸರಸೇಹಿ ಚ;
ಅಞ್ಜನಹರಿತಾಲೇಹಿ, ತಥಾಮನೋಸಿಲಾಹಿ ಚ.
ಮನೋಸಿಲಾಸು ವಸ್ಸೇನ, ಭಸ್ಸಿತ್ವಾ ಚೇತಿಯಙ್ಗಣೇ;
ಠಿತಾಸು ಗೋಪ್ಫಮತ್ತಾಸು, ರಚಿತೇ ಪು’ಪ್ಪಲೇಹಿ ಚ.
ಥೂಪಙ್ಗಣಮ್ಹಿ ಸಕಲೇ, ಪುರಿತೇ ಗನ್ಧಕದ್ದಮೇ;
ಚಿತ್ತಕಿಲಞ್ಜಛಿದ್ದೇಸು, ರಚಿತೇ ಪು’ಪ್ಪಲೇಹಿ ಚ.
ವಾರಯಿತ್ವಾ ವಾರಿಮಗ್ಗಂ, ತಥೇವ ಪುರಿತೇ ಘಟೇ;
ದೀಪವಟ್ಟಿಹಿ ನೇಕಾನಿ, ಕತವಟ್ಟಿಸಿಖಾಹಿ ಚ.
ಮಧುಕತೇಲಮ್ಹಿ ತಥಾ, ತಿಲತೇಲೇ ತಥೇವ ಚ;
ತಥೇವ ಪಟ್ಟವಟ್ಟೀನಂ, ಸು ಬಹೂಹಿ ಸಿಖಾಹಿ ಚ.
ಯಥಾವುತ್ತೇಹಿ ಏತೇಹಿ, ಮಹಾಥೂಪಸ್ಸ ಖತ್ತಿಯೋ;
ಸತ್ತಕ್ಖತ್ತುಂ ಸತ್ತಕ್ಖತ್ತುಂ, ಪೂಜಾ’ಕಾಸಿ ವಿಸುಂ ವಿಸುಂ.
ಅನುವಸ್ಸಞ್ಚ ನಿಯತಂ, ಸುಧಾಮಙ್ಗಲಮುತ್ತಮಂ;
ಬೋಧಿಸಿನಾನಪೂಜಾ ಚ, ತಥೇವ ಉರುಬೋಧಿಯಾ.
ಮಹಾವೇಸಾಖ ಪೂಜಾ ಚ, ಉಳಾರಾ ಅಟ್ಠವೀಸತಿ;
ಚತುರಾಸೀತಿ ಸಹಸ್ಸಾನಿ, ಪೂಜಾ ಚ ಅನುಳಾರಿಕಾ.
ವಿವಿಧಂ ನಟನಚ್ಚಞ್ಚ, ನಾನಾತೂರಿಯವಾದಿತಂ;
ಮಹಾಥೂಪೇ ಮಹಾಪೂಜಂ, ಸದ್ಧಾನುನ್ನೋ ಅಕಾರಯಿ.
ದಿವಸಸ್ಸ ಚ ತಿಕ್ಖತ್ತುಂ, ಬುದ್ಧುಪ್ಪಟ್ಠಾನಮಾಗಮಾ;
ದ್ವಿಕ್ಖತ್ತುಂ, ಪುಪ್ಫಭೇರಿಞ್ಚ, ನಿಯತಂ ಸೋ ಅಕಾರಯಿ.
ನಿಯತಞ್ಚನದಾನಞ್ಚ, ಪವಾರಣಾದಾನಮೇವ ಚ;
ತೇಲಫಾಣಿತವತ್ಥಾದಿ-ಪರಿಕ್ಖಾರಂ ಸಮಣಾರಹಂ.
ಬಹುಂ ¶ ಪಾದಾಸಿ ಸಙ್ಘಸ್ಸ, ಚೇತಿಯಖೇತ್ತಮೇವ ಚ;
ಚೇತಿಯೇ ಪರಿಕಮ್ಮತ್ಥಂ, ಅದಾಸಿ ತತ್ಥ ಖತ್ತಿಯೋ.
ಸದಾ ಭಿಕ್ಖುಸಹಸ್ಸಸ್ಸ, ವಿಹಾರೇ ಚೇತಿಯಪಬ್ಬತೇ;
ಸಲಾಕವತ್ತಭತ್ತಞ್ಚ, ಸೋ ದಾಪೇಸಿ ಚ ಭೂಪತಿ.
ಚಿನ್ತಾಮಣಿಮುಚೇಲವ್ಹೇ, ಉಪಟ್ಠಾನತ್ತಯೇ ಚ ಸೋ;
ತಥಾ ಪದುಮಘರೇ ಛತ್ತ-ಪಾಸಾದೇ ಚ ಮನೋರಮೇ.
ಭೋಜೇನ್ತೋ ಪಞ್ಚಠಾನಮ್ಹಿ, ಭಿಕ್ಖೂಗನ್ಥಧುರೇ ಯುತೇ;
ಪಚ್ಚಯೇಹಿ ಉಪಟ್ಠಾಸಿ, ಸದಾ ಧಮ್ಮೇ ಸಗಾರವೋ.
ಪೋರಾಣರಾಜನಿಯಾತಂ, ಯಂಕಿಞ್ಚಿ ಸಾಸನಸ್ಸಿತಂ;
ಅಕಾಸಿ ಪುಞ್ಞಕಮ್ಮಂಸೋ, ಸಬ್ಬಂ ಭಾತಿಕಭೂಪತಿ.
ತಸ್ಸ ಭಾಭಕರಾಜಸ್ಸ, ಅಚ್ಚಯೇ ತಂ ಕನಿಟ್ಠಕೋ;
ಮಹಾದಾಠಿಮಹಾನಾಗ-ನಾಮೋ ರಜ್ಜಮಕಾರಯಿ.
ದ್ವಾದಸಂಯೇವ ವಸ್ಸಾನಿ, ನಾನಾಪುಞ್ಞಪರಾಯನೋ;
ಮಹಾಥೂಪಮ್ಹಿ ಕಿಞ್ಜಕ್ಖ- ಪಾಸಾಣೇ ಅತ್ಥರಾಪಯಿ.
ವಾಲಿಕಾಮರಿಯಾದಞ್ಚ, ಕಾರೇಸಿ ವಿತ್ಥತಙ್ಗಣಂ;
ದೀಪೇ ಸಬ್ಬವಿಹಾರೇಸು, ಧಮ್ಮಾಸನಮದಾಪಯಿ.
ಅಮ್ಬತ್ಥಲ ಮಹಾಥೂಪಂ, ಕಾರಾಪೇಸಿ ಮಹೀಪತಿ;
ಚ ಯೇಅನಿಟ್ಠಮಾನಮ್ಹಿ, ಸರಿತ್ವಾ ಮುನಿನೋ ಗುಣಂ.
ಚಜಿತ್ವಾನ ಸಕಂ ಪಾಣಂ, ನಿಪಜ್ಜಿತ್ವಾ ಸಯಂ ತಹಿಂ;
ಠಪಯಿತ್ವಾ ಚಯಂ ತಸ್ಸ, ನಿಟ್ಠಾಪೇತ್ವಾನ ಚೇತಿಯಂ.
ಚತುದ್ವಾರೇ ಠಪಾಪೇಸಿ, ಚತುರೋ ರತನಗ್ಘಿಕೇ;
ಸುಸಿಪ್ಪಿಕೇಹಿ ಸುವಿಭತ್ತೇ, ನಾನಾರತನಜೋತಿತೇ.
ಚೇತಿಯೇ ಪಟಿಮೋಚೇತ್ವಾ, ನಾನಾರತನಕಞ್ಚುಕಂ;
ಕಞ್ಚನ ಬುಬ್ಬುಲಞ್ಚೇತ್ಥ, ಮುತ್ತೋಲಮ್ಬಞ್ಚ ದಾಪಯಿ.
ಚೇತಿಯ ಪಬ್ಬತಾವಟ್ಟೇ, ಅಲಙ್ಕರಿಯ ಯೋಜನಂ;
ಯೋಜಾಪೇತ್ವಾ ಚತುದ್ವಾರಂ, ಸಮನ್ತಾ ಚಾರುವೀಥಿಕಂ.
ವೀಥಿಯಾ ಉಭತೋ ಪಸ್ಸೇ, ಆಪಣಾನಿ ಪಸಾರಿಯ;
ಧಜಗ್ಘಿಕ ತೋ ರಣಾನಿ, ಮಣ್ಡಯಿತ್ವಾ ತಹಿಂ ತಹಿಂ.
ದೀಪಮಾಲಾ ¶ ಸಮುಜ್ಜೋತಂ, ಕಾರಯಿತ್ವಾ ಸಮನ್ತತೋ;
ನಟನಚ್ಚಾನಿ ಗೀತಾನಿ, ವಾದಿತಾನಿ ಚ ಕಾರಯಿ.
ಮಗ್ಗೇ ಕದಮ್ಬನದಿತೋ, ಯಾವಚೇತಿಯ ಪಬ್ಬತಾ;
ಗನ್ತುಂ ಧೋತೇಹಿ ಪಾದೇಹಿ, ಕಾರಯಿ’ತ್ಥರಣತ್ಥತಂ.
ಸನಚ್ಚಗೀತವಾದೇಹಿ, ಸಮಜ್ಜಮಕರುಂ ತಹಿಂ;
ನಗರಸ್ಸ ಚತುದ್ವಾರೇ, ಮಹಾ ದಾನಞ್ಚ ದಾಪಯಿ.
ಅಕಾಸಿ ಸಕಲೇ ದೀಪೇ, ದೀಪಮಾಲಾನಿರನ್ತರಂ;
ಸಲಿಲೇಪಿ ಸಮುದ್ದಸ್ಸ, ಸಮನ್ತಾ ಯೋಜನನ್ತರೇ.
ಚೇತಿಯಸ್ಸ ಮಹೇತೇನ, ಪೂಜಾ ಸಾ ಕಾರಿತಾ ಸುಭಾ;
ಗಿರಿಭಣ್ಡಾ ಮಹಾಪೂಜಾ, ಉಳಾರಾ ವುಚ್ಚತೇ ಇಧ.
ಸಮಾಗತಾನಂ ಭಿಕ್ಖೂನಂ, ತಸ್ಮಿಂ ಪೂಜಾ ಸಮಾಗಮೇ;
ದಾನಂ ಅಟ್ಠಸು ಠಾನೇಸು, ಠಪಾಪೇತ್ವಾ ಮಹೀಪತಿ.
ತಾಳಯಿತ್ವಾನ ತತ್ರಟ್ಠಾ, ಅಟ್ಠಸೋವಣ್ಣಭೇರಿಯೋ;
ಚತುವೀಸಸಹಸ್ಸಾನಂ, ಮಹಾದಾನಂ ಪವತ್ತಯಿ.
ಛಚೀವರಾನಿ ಪಾದಾಸಿ, ಬನ್ಧಮೋಕ್ಖಞ್ಚ ಕಾರಯಿ;
ಚತುದ್ವಾರೇನ್ವಾಪಿತೇಹಿ, ಸದಾ ಕಮ್ಮಮಕಾರಯಿ.
ಪುಬ್ಬರಾಜೂಹಿ ಠಪಿತಂ, ಭಾತರಂ ಠಪಿತಂ ತಥಾ;
ಪುಞ್ಞಕಮ್ಮಂ ಅಹಾಪೇತ್ವಾ, ಸಬ್ಬಂ ಕಾರಯಿಭೂಪತಿ.
ಅತ್ತಾನಂ ದೇವಿಂಪುತ್ತೇ ದ್ವೇ, ಹತ್ಥಿಂ ಅಸ್ಸಞ್ಚ ಮಙ್ಗಲಂ;
ವಾರಿಯನ್ತೋ’ಪಿ ಸಙ್ಘೇನ, ಸಙ್ಘಸ್ಸಾ’ದಾಸಿ ಭೂಪತಿ.
ಛಸತ ಸಹಸ್ಸಗ್ಘಕಂ, ಭಿಕ್ಖುಸಙ್ಘಸ್ಸ ಸೋ ಅದಾ;
ಸತಸಹಸ್ಸಗ್ಘನಕಂ, ಭಿಕ್ಖೂನೀನಂ ಗಣಸ್ಸ ತು.
ದತ್ವಾನ ಕಪ್ಪಿಯಂ ಭಣ್ಡಂ, ವಿವಿಧಂ ವಿಧಿಕೋವಿದೋ;
ಅತ್ತಾನಞ್ಚ’ವ ಸೇಸೇ ಚ, ಸಙ್ಘತೋ ಅಭಿನೀಹರಿ.
ಕಾಲಾಯನ ಕಣ್ಣಿಕಮ್ಹಿ, ಮಣಿನಾಗ ಪಬ್ಬತವ್ಹಯಂ;
ವಿಹಾರಞ್ಚ ಕಳವ್ಹಯಂ, ಕಾರೇಸಿ ಮನುಜಾಧಿಪೋ.
ಕುಬು ¶ ಬನ್ಧನದೀತೀರೇ, ಸಮುದ್ದವಿಹಾರಮೇವ ಚ;
ಹುವಾವಕಣ್ಣಿಕೇ ಚೂಳ, ನಗಪಬ್ಬತಸವ್ಹಯಂ.
ಪಾಸಾಣದೀಪಕವ್ಹಮ್ಹಿ, ವಿಹಾರೇ ಕಾರಿತೇ ಸಯಂ;
ಪಾನಿಯಂ ಉಪನಿತಸ್ಸ, ಸಾಮಣೇರಸ್ಸ ಖತ್ತಿಯೋ.
ಉಪಚಾರೇ ಪಸೀದಿತ್ವಾ, ಸಮನ್ತಾ ಅಟ್ಠಯೋಜನಂ;
ಸಙ್ಘಭೋಗಮದಾತಸ್ಸ, ವಿಹಾರಸ್ಸ ಮಹೀಪತಿ.
ಮಣ್ಡವಾಪಿ ವಿಹಾರೇ ಚ, ಸಾಮಣೇರಸ್ಸ ಖತ್ತಿಯೋ;
ತುಟ್ಠೋ ವಿಹಾರಂ ದಾಪೇಸಿ, ಸಙ್ಘೇ ಭೋಗಂ ತಥೇವ ಸೋ.
ಇತಿ ವಿಭವಮನಪ್ಪಂ ಸಾಧುಪಞ್ಞಾ ಲಭಿತ್ವಾ,
ವಿಗತಮದಪಮಾದಾಚತ್ತ ಕಾಮಪಸಙ್ಗಾ;
ಅಕರಿಯಜನಖೇದಂ ಪುಞ್ಞಕಮ್ಮಾಭಿರಾಮಾ,
ವಿಪುಲವಿವಿಧಪುಞ್ಞಂ ಸುಪ್ಪನ್ನಾಕರೋನ್ತೀತಿ.
ಸುಜನಪ್ಪಸಾದಸಂವೇಗತ್ಥಾಯ ಕತೇ ಮಹಾವಂಸೇ
ಏಕಾದಸರಾಜದೀಪನೋ ನಾಮ
ಚತುತ್ತಿಂಸತಿಮೋ ಪರಿಚ್ಛೇದೋ.
ಪಞ್ಚತಿಂಸತಿಮಪರಿಚ್ಛೇದ
ದ್ವಾದಸರಾಜಕೋ
ಆಮಣ್ಡಗಾಮಣ್ಯಭಯೋ, ಮಹಾದಾಠಿಕಅಚ್ಚಯೇ;
ನವವಸ್ಸನಟ್ಠಮಾಸೇ, ರಜ್ಜಂ ಕಾರೇಸಿ ತಂ ಸುತೋ.
ಛತ್ತಾತಿ ಛತ್ತಂ ಕಾರೇಸಿ, ಮಹಾಥೂಪೇ ಮನೋರಮೇ;
ತಥೇವ ಪಾದವೇದಿಞ್ಚ, ಮುದ್ಧವೇದಿಞ್ಚ ಕಾರಯಿ.
ತಥೇವ ಲೋಹಪಾಸಾದ, ಥೂಪವ್ಹೇ ಪೋಸಥವ್ಹಯೇ;
ಕಾರೇಸಿ ಕುಚ್ಛಿಆಜಿರಂ, ಕುಚ್ಛಿಆಳಿನ್ದಮೇವ ಚ.
ಉಭಯತ್ಥಾಪಿ ¶ ಕಾರೇಸಿ, ಚಾರುಂ ರತನಪಣ್ಡಪಂ;
ರಜತಲೇಣ ವಿಹಾರಞ್ಚ, ಕಾರಾಪೇಸಿ ನರಾಧಿಪೇ.
ಮಹಾಗಾಮೇಣ್ಡವಾಪಿಂಸೋ, ಪಸ್ಸೇ ಕಾರಿಯ ದಕ್ಖಿಣೇ;
ದಕ್ಖಿಣಸ್ಸ ವಿಹಾರಸ್ಸ, ಅದಾಸಿ ಪುಞ್ಞದಕ್ಖಿಣೋ.
ಮಾಘಾತಂ ಸಕಲೇ ದೀಪೇ, ಕಾರೇಸಿ ಮನುಜಾಧಿಪೋ;
ವಲ್ಲಿಫಲಾನಿ ಸಬ್ಬಾನಿ, ರೋಪಾಪೇತ್ವಾ ತಹಿಂ ತಹಿಂ.
ಮಂ ಸಕುಭಣ್ಡಕಂ ನಾಮ, ಆಮಣ್ಡಿಯ ಮಹೀಪತಿ;
ಪತ್ತಂ ಪೂರಾಪಯಿತ್ವಾನ, ಕಾರೇತ್ವಾ ವತ್ಥಚುಮ್ಬಟಂ.
ದಾಪೇಸಿ ಸಬ್ಬಸಙ್ಘಸ್ಸ, ವಿಪ್ಪಸನ್ನೇನ ಚೇತಸಾ;
ಪತ್ತೇ ಪೂರಾಪಯಿತ್ವಾ ಸೋ, ಆಮಣ್ಡ ಗಾಮಣಿವಿದೂ.
ತಙ್ಕನಿಟ್ಠೋಕಣಿರಾಜಾ-ತಿಸ್ಸೋ ಘಾತಿಯ ತಾತರಂ;
ತೀಣಿ ವಸ್ಸಾನಿ ನಗರೇ, ರಜ್ಜಂ ಕಾರೇಸಿ ಖತ್ತಿಯೋ.
ಉಪೋಸಥಘರಟ್ಟಂ ಏಸಾ, ನಿಚ್ಛಿನಿ ಚೇಕಿಯವ್ಹಯೇ;
ರಾಜಾಪರಾಧಕಮ್ಮಮ್ಹಿ, ಪುತ್ತೇ ಸಟ್ಠಿತು ಭಿಕ್ಖವೋ.
ಸಹೋಡ್ಡೇ ಗಾಹಯಿತ್ವಾನ, ರಾಜಾ ಚೇತಿಯ ಪಬ್ಬತೇ;
ಖಿಪಾಪೇಸಿ ಕಣಿರವ್ಹೇ, ಪಬ್ಭಾರಮ್ಹಿ ಅಸೀಲಕೇ.
ಕಣಿರಾಜಾ ಅಚ್ಚಯೇನ, ಆಮಣ್ಡಗಾಮಣಿ ಸುತೋ;
ಚೂಳಾಭಯೋ ವಸ್ಸಮೇಕಂ, ರಜ್ಜಂ ಕಾರೇಸಿ ಖತ್ತಿಯೋ.
ಸೋ ಗೋಣಕನದೀತೀರೇ, ಪುರಪಸ್ಸಮ್ಹಿ ದಕ್ಖಿಣೇ;
ಕಾರಾಪೇಸಿ ಮಹೀಪಾಲೋ, ವಿಹಾರೇ ಚೂಳಗಲ್ಲಕಂ.
ಚೂಳಾಭಯಸ್ಸ’ಚ್ಚ ಯೇನ, ಸೀವಲಿ ತಂ ಕನಿಟ್ಠಿಕಾ;
ಆಮಣ್ಡಧೀತಾ ಚತುರೋ, ಮಾಸೇ ರಜ್ಜಮಕಾರಯಿ.
ಆಮಣ್ಡ ಭಾಗಿನೇಯ್ಯಾ ತು, ಸೀವಲಿಂ ಅಪನೀಯತಂ;
ಇಳನಾಗೋತಿ ನಾಮೇನ, ಛತ್ತಂ ಉಸ್ಸಾಪಯಿ ಪುರೇ.
ತಿಸ್ಸವಾಪಿಂ ಗತೇ ತಸ್ಮಿಂ, ಆದಿವಸ್ಸೇ ನರಾಧಿಪೇ;
ತಂ ಹಿತ್ವಾ ಪುರಮಾಗಞ್ಛುಂ, ಬಹವೋಲಮ್ಬಕಣ್ಣಕಾ.
ತಹಿಂ ಅದಿಸ್ವಾ ತೇ ರಾಜಾ, ಕುದ್ಧೋ ತೇಹಿ ಅಕಾರಯಿ;
ಮದ್ದಯಂ ವಾಪಿಯಾ ಪಸ್ಸೇ, ಮಹಾಥೂಪಞ್ಜಸಂಸಯಂ.
ತೇಸಂ ¶ ವಿಚಾರಕೇ ಕತ್ವಾ, ಚಣ್ಡಾಲೇ ಚ ಠಪಾಪಯಿ;
ತೇನ ಕುದ್ಧಾಲಮ್ಬಕಣ್ಣಾ, ಸಬ್ಬೇ ಹುತ್ವಾನ ಏಕತೋ.
ರಾಜಾನಂ ತಂ ಗಹೇತ್ವಾನ, ರುನ್ಧಿತ್ವಾನ ಸಕೇ ಘರೇ;
ಸಯಂ ರಜ್ಜಂ ವಿಚಾರೇಸುಂ, ರಞ್ಞೋ ದೇವೀ ತದಾ ಸಕಂ.
ಪುತ್ತಂ ಚನ್ದಮುಖಸಿವಂ, ಮಣ್ಡಯಿತ್ವಾ ಕುಮಾರಕಂ;
ದತ್ವಾನ ಹತ್ಥೇ ಧಾತೀನಂ, ಮಙ್ಗಲಹತ್ಥಿ ಸನ್ತಿಕೇ.
ಪೇಸೇಸಿ ವತ್ವಾ ಸನ್ದೇಸಂ, ನೇತ್ವಾ ತಂ ಧಾತಿಯೋ ತಹಿಂ;
ವದಿಂಸು ದೇವಿಸನ್ದೇಸಂ, ಸಬ್ಬಂ ಮಙ್ಗಲ ಹತ್ಥಿನೋ.
‘‘ಅಯಂ ತೇ ಸಾಧಿನೋ ಪುತ್ತೋ,
ಸಾಮಿಕೋ ಚಾರಕೇ ಠಿತೋ;
ಅರಿಹಿ ಘಾತತೋ ಸೇಸೋ,
ತಯಾ ಘಾತೋ ಇಮಸ್ಸ ತು.
ತ್ವಮೇನಂ ಕಿರ ಘಾತೇಹಿ, ಇದಂ ದೇವಿವಚೋ’’ಇತಿ;
ವತ್ವಾ ತು ಸಯಾಪೇಸುಂ, ಪಾದಮೂಲಮ್ಹಿ ಹತ್ಥಿನೋ.
ದುಕ್ಖಿತೋ ಸೋ ರುದಿತ್ವಾನ, ನಾಗೋ ಭೇತ್ವಾನ ಆಳಕಂ;
ಪವಿಸಿತ್ವಾ ಮಹಾವತ್ಥುಂ, ದ್ವಾರಂ ಪಾತಿಯ ಥಾಮಸಾ.
ರಞ್ಞೋ ನಿಸಿನ್ನಙ್ಗಣಮ್ಹಿ, ಉಗ್ಘಾಟೇತ್ವಾ ಕವಾಟಕಂ;
ನಿಸೀದಾಪಿಯ ತಂ ಖನ್ಧೇ, ಮಹಾತಿತ್ಥಮುಪಾಗಮಿ.
ನಾವಂ ಆರೋ ಪಯಿತ್ವಾನ, ರಾಜಾನಂ ತತ್ಥ ಕುಞ್ಜರೋ;
ಪಚ್ಛಿಮೋ ದಧಿತೀರೇನ, ಸಯಂ ಮಲಯ ಮಾರುಹೀ.
ಪರತೀರೇ ವಸಿತ್ವಾ ಸೋ, ತೀಣಿವಸ್ಸಾನಿ ಖತ್ತಿಯೋ;
ಬಲಕಾಯಂ ಗಹೇತ್ವಾನ, ಆಗಾ ನಾವಾತಿ ರೋಹಣಂ.
ತಿತ್ಥೇ ಸಕ್ಖರಸೋಬ್ಭಮ್ಹಿ, ಓತರಿತ್ವಾನ ಭೂಪತಿ;
ಅಕಾಸಿ ರೋಹಣೇ ತತ್ಥ, ಮಹನ್ತಂ ಬಲಸಙ್ಗಹಂ.
ರಞ್ಞೋ ಮಙ್ಗಲಹತ್ಥಿಸೋ, ದಕ್ಖಿಣಂ ಮಲಯಂ ತತೋ;
ರೋಹಣಂಯೇ’ವುಪಾಗಞ್ಛಿ, ತಸ್ಸ ಕಮ್ಮಾನಿ ಕಾತವೇ.
ಮಹಾಪದುಮನಾಮಸ್ಸ, ತತ್ಥ ಜಾತಕಭಾಣಿನೋ;
ತುಲಾಧಾರವ್ಹವಾಸಿಸ್ಸ, ಮಹಾಥೇರಸ್ಸ ಸನ್ತಿಕೇ.
ಕಪಿಜಾತಕಂ ¶ ಸುತ್ವಾನ, ಬೋಧಿಸತ್ತೇ ಪಸಾದವಾ;
ನಾಗಮಹಾವಿಹಾರಂ ಸೋ, ಜಿಯಾಮುತ್ತಧನುಸ್ಸತಂ.
ಕತ್ವಾ ಕಾರೇಸಿ ಥೂಪಞ್ಚ, ವಡ್ಢಾಪೇಸಿ ಯಥಾಠಿತಂ;
ತಿಸ್ಸವಾಪಿಞ್ಚ ಕಾರೇಸಿ, ತಥಾ ದುರವ್ಹವಾಪಿಕಂ.
ಸೋ ಗಹೇತ್ವಾ ಬಲಂ ರಾಜಾ, ಯುದ್ಧಾಯ ಅಭಿನಿಕ್ಖಮಿ;
ತಂ ಸುತ್ವಾ ಲಮ್ಬಕಣ್ಣಾ ಚ, ಯುದ್ಧಾಯ ಅಭಿಸಂಯುತಾ.
ಪಪಲ್ಲಕ್ಖನ್ಧದ್ವಾರಮ್ಹಿ, ಖೇತ್ತೇ ಹಿಙ್ಕರವಾಪಿಕೇ;
ಯುದ್ಧಂ ಉಭಿನ್ನಂ ವತ್ತಿತ್ಥ, ಅಞ್ಞಮಞ್ಞವಿಹೇಸನಂ.
ನಾವಾಕಿಲನ್ತದೇಹತ್ತಾ, ಪೋಸಾ ಸೀದನ್ತಿ ರಾಜಿನೋ;
ರಾಜಾ ನಾಮಂ ಸಾವಯಿತ್ವಾ, ಸಯಂ ಪಾವಿಸಿ ತೇನ ಸೋ.
ತೇನ ಭೀತಾಲಮ್ಬಕಣ್ಣಾ, ಸಯಿಂಸು ಉದರೇನ ಸೋ;
ತೇಸಂ ಸೀಸಾನಿ ಛಿನ್ದಿತ್ವಾ, ರತನಾಭಿಸಮಂಕರಿ.
ತಿಕ್ಖತ್ತುಮೇವನ್ತುಕತೇ, ಕರುಣಾಯ ಮಹೀಪತಿ;
‘‘ಅಮಾರೇತ್ವಾ’ವ ಗಣ್ಹಾಥ, ಜೀವಗ್ಗಾಹ’ನ್ತಿ ಅಬ್ರುವಿ.
ತತೋ ವಿಜಿತಸಙ್ಗಾಮೋ, ಪುರಂ ಆಗಮ್ಮ ಭೂಪತಿ;
ಛತ್ತಂ ಉಸ್ಸಾಪಯಿತ್ವಾನ ತಿಸ್ಸವಾಪಿ ಛಣಂ ಅಗಾ.
ಜಲಕೀಳಾಯ ಉಗ್ಗನ್ತ್ವಾ, ಸುಮಣ್ಡಿತಪಸಾಧಿತೋ;
ಅತ್ತನೋ ಸಿರಿಸಮ್ಪತ್ತಿಂ, ದಿಸ್ವಾ ತಸ್ಸನ್ತರಾಯಿಕೇ.
ಲಮ್ಬಕಣ್ಣೇ ಸರಿತ್ವಾನ, ಕುದ್ಧೋ ಸೋ ಯೋಜಯೀರಥೇ;
ಯುಗಪರಮ್ಪರಾ ತೇಸಂ, ಪುರತೋ ಪಾವಿಸೀ ಪುರಂ.
ಮಹಾವತ್ಥುಸ್ಸ ಉಮ್ಮಾರೇ, ಠತ್ವಾ ರಾಜಾಣಪೇಸಿ ಸೋ;
‘‘ಇಮೇಸಂ ಸೀಸಮುಮ್ಮಾರೇ, ಅಸ್ಮಿಂ ಛಿನ್ದಥ ಭೋ’’ಇತಿ.
ಗೋಣಾ ಏತೇರಥೇ ಯುತ್ತಾ, ತವ ಹೋನ್ತಿ ರಥೇಸಭ;
ಸಿಙ್ಗಂಖುರಞ್ಚ ಏತೇಸಂ, ಛೇದಾಪಯತ ಭೋ’’ಇತಿ.
ಮಾತುಯಾ ಅಥ ಸಞ್ಞತ್ತೋ, ಸೀಸಚ್ಛೇದಂ ನಿವಾರಿಯ;
ನಾಸಞ್ಚ ಪಾದಙ್ಗುಟ್ಠಞ್ಚ, ತೇಸಂ ರಾಜಾ ಅಛೇದಯಿ.
ಹತ್ಥಿವುತ್ಥಂ ಜನಪದಂ, ಅದಾ ಹತ್ಥಿಸ್ಸ ಖತ್ತಿಯೋ;
ಹತ್ಥಿಭೋಗೋ ಜನಪದೋ, ಇತಿ ತೇನಾಸಿ ನಾಮತೋ.
ಏವಂ ಅನುರಾಧಪುರೇ, ಇಳಾನಾಗೋ ಮಹೀಪತಿ;
ಛಬ್ಬಸ್ಸಾನಿ ಅನುನಾನಿ, ರಜ್ಜಂ ಕಾರೇಸಿ ಖತ್ತಿಯೋ.
ಇಳನಾಗಚ್ಚಯೇ ¶ ತಸ್ಸ, ಪುತ್ತೋ ಚನ್ದಮುಖೋಸಿವೋ;
ಅಟ್ಠವಸ್ಸಂ ಸತ್ತಮಾಸಂ, ರಾಜಾ ರಜ್ಜಮಕಾರಯಿ.
ಮಣಿಕಾರಗಾಮೇ ವಾಪಿ, ಕಾರಾಪೇತ್ವಾ ಮಹೀಪತಿ;
ಇಸ್ಸರಸಮಣವ್ಹಸ್ಸ, ವಿಹಾರಸ್ಸ ಅದಾಸಿ ಸೋ.
ತಸ್ಸ ರಞ್ಞೋ ಮಹೇಸೀ ಚ, ಸಙ್ಗಾಮೇ ಪತ್ತಿಮತ್ತನೋ;
ತಸ್ಸೇವಾ’ದಾ ವಿಹಾರಸ್ಸ, ದಮಿಳದೇವೀತಿ ವಿಸ್ಸುತಾ.
ತಂ ತಿಸ್ಸವಾಪೀ ಕೀಳಾಯ, ಹನ್ತ್ವಾ ಚನ್ದಮುಖಂ ಸಿವಂ;
ಯಸಳಾಲಕತಿಸ್ಸೋ’ತಿ, ವಿಸ್ಸುತೋ ತಙ್ಕನಿಟ್ಠಕೋ.
ಅನುರಾಧಪುರೇ ರಮ್ಮೇ, ಲಙ್ಕಾಭುವದನೇ ಸುಭೇ;
ಸತ್ತವಸ್ಸಾನಟ್ಠಮಾಸೇ, ರಾಜಾ ರಜ್ಜಮಕಾರಯಿ.
ದೋವಿರಿಕಸ್ಸ ದತ್ತಸ್ಸ, ಪುತ್ಥೋ ದೋವಾರಿಕೋ ಸಯಂ;
ರಞ್ಞೋ ಸದಿಸರೂಪೇನ, ಅಹೋಸಿ ಸುಭನಾಮವಾ.
ಸುಭಂ ಬಲತ್ಥಂ ತಂ ರಾಜಾ, ರಾಜಭೂಸಾಯ ಭೂಸಿಯ;
ನಿಸಿದಾಪಿಯ ಪಲ್ಲಙ್ಕೇ, ಹಾಸತ್ಥಂ ಯಸಳಾಲಕೋ.
ಸೀಸಚೋಳಂ ಬಲತ್ಥಸ್ಸ, ಸಸೀಸೇ ಪಟಿಮುಞ್ಚಿಯ;
ಯಟ್ಠಿಂ ಗಹೇತ್ವಾ ಹತ್ಥೇನ, ದ್ವಾರಮೂಲೇ ಠಿತೋ ಸಯಂ.
ವನ್ದನ್ತೇಸು ಅಮಚ್ಚೇಸು, ನಿಸಿನ್ನಂ ಆಸನಮ್ಹಿ ತಂ;
ರಾಜಾ ಹಸತಿ ಏವಂ ಸೋ, ಕುರುತೇ ಅನ್ತರನ್ತರಾ.
‘‘ಬಲತ್ಥೋ ಏಕದಿವಸಂ, ರಾಜಾನಂ ಹಸಮಾನಕಂ;
ಅಯಂ ಬಲತ್ಥೋ ಕಸ್ಮಾ ಮೇ, ಸಮ್ಮುಖಾಹಸತೀ’’ತಿ ಸೋ.
ಮಾರಾಪಯಿತ್ವಾ ರಾಜಾನಂ, ಬಲತ್ಥೋ ಸೋ ಸುಭೋ ಇಧ;
ರಜ್ಜಂ ಕಾರೇಸಿ ಛಬ್ಬಸ್ಸಂ, ಸುಭರಾಜಾತಿ ವಿಸ್ಸುತೋ.
ದ್ವಿಸು ಮಹಾವಿಹಾರೇಸು, ಸುಭರಾಜಾ ಮನೋರಮಂ;
ಪರಿವೇಣಪನ್ತಿಂ ಸುಭ-ನಾಮಕಂಯೇವ ಕಾರಯಿ.
ಉರುವೇಲಸಮೀಪಮ್ಹಿ, ತಥಾ ವೇಲ್ಲಿವಿಹಾರಕಂ;
ಪುರತ್ಥಿಮೇ ಏಕದ್ವಾರಂ, ಗಙ್ಗನ್ತೇ ನನ್ದಿಗಾಮಕಂ.
ಲಮ್ಬಕಣ್ಣಸುತೋ ¶ ಏಕೋ, ಉತ್ತರಪಸ್ಸವಾಸಿಕೋ;
ಸೇನಾಪತಿಮುಪಟ್ಠಾಸಿ, ವಸಭೋ ನಾಮ ಮಾತುಲಂ.
ಹೇಸ್ಸತಿ ವಸಭೋ ನಾಮ, ರಾಜಾ’ತಿ ಸುತಿಯಾಸದಾ;
ಘಾತೇತಿ ರಾಜಾದೀಪಮ್ಹಿ, ಸಬ್ಬೇ ವಸಭನಾಮಕೇ.
‘‘ರಞ್ಞೋ ದಸ್ಸಾಮ ವಸತಂ, ಇಮ’’ನ್ತಿ ಭರಿಯಾಯ ಸೋ;
ಸೇನಾಪತಿಮನ್ತಯಿತ್ವಾ, ಪಾತೋ ರಾಜಕುಲಂ ಅಗಾ.
ಗಚ್ಛತೋ ತೇನ ಸಹಸಾ, ತಮ್ಬುಲಂ ಚುಣ್ಣವಜ್ಜಿತಂ;
ಹತ್ಥಮ್ಹಿ ವಸಭಸ್ಸಾ’ದಾ, ತಂ ಸಾಧು ಪರಿರಕ್ಖಿತುಂ.
ರಾಜಗೇಹಸ್ಸ ದ್ವಾರಮ್ಹಿ, ತಮ್ಬುಲಂ ಚುಣ್ಣವಜ್ಜಿತಂ;
ಸೇನಾಪತಿ ಉದಿಕ್ಖಿತ್ವಾ, ತಂ ಚುಣ್ಣತ್ಥಂ ವಿಸಜ್ಜಯಿ.
ಸೇನಾಪತಿಸ್ಸ ಭರಿಯಾ, ಚುಣ್ಣತ್ಥಂ ವಸಭಂ ಗತಂ;
ವತ್ವಾ ರಹಸ್ಸಂ ದತ್ವಾ ಚ, ಸಹಸ್ಸಂ ತಂ ಪಲಾಪಯಿ.
ಮಹಾವಿಹಾರಠಾನಂ ಸೋ, ಗನ್ತ್ವಾನ ವಸಭೋ ಪನ;
ತತ್ಥ ಥೇರೇಹಿ ಖಿರನ್ನ-ವತ್ಥೇಹಿ ಕತಸಙ್ಗಹೋ.
ತತೋ ಪರಂ ಕುಟ್ಠಿನೋ ಚ, ರಾಜಭಾವಾಯ ನಿಚ್ಛಿತಂ;
ಸುತ್ವಾನ ವಚನಂಹಟ್ಠೋ, ‘‘ಚೋರೋ ಹೇಸ್ಸ’’ನ್ತಿ ನಿಚ್ಛಿತೋ.
ಲದ್ಧಸಮತ್ಥಪುರಿಸೇ, ಗಾಮಘಾತಂ ತತೋ ಪರಂ;
ಕರೋನ್ತೋ ರೋಹಣಂ ಗನ್ತ್ವಾ, ಕಪಲ್ಲಪುವೋಪದೇಸತೋ.
ಕಮೇನ ರಟ್ಠಂ ಕಣ್ಹನ್ಥೋ, ಸಮ್ಪತ್ತಬಲವಾಹನೋ;
ಸೋ ರಾಜಾ ದ್ವೀಹಿ ವಸ್ಸೇಹಿ, ಆಗಮ್ಮ ಪುರಸನ್ತಿಕಂ.
ಸುಭರಾಜಂ ರಣೇ ಹನ್ತ್ವಾ, ವಸಭೋ ಸೋ ಮಹಬ್ಬಲೋ;
ಉಸ್ಸಾಪಯಿ ಪುರೇಭತ್ತಂ, ಮಾತುಲೋ’ಪಿ ರಣೇ ಪತಿ.
ತಂ ಮಾತುಲಸ್ಸ ಸರಿರಂ, ಪುಬ್ಬಭೂತೋಪಕಾರಿಕಂ;
ಅಕಾಸಿ ವಸಭೋ ರಾಜಾ, ಮಹೇಸಿಂ ಮೇತ್ತನಾಮಿಕಂ.
ಸೋಹೋರಪಾಠಕಂ ಪುಚ್ಛಿ, ಆಯುಪ್ಪಮಾಣಮತ್ತನೋ;
‘‘ಆಹ ದ್ವಾದಸವಸ್ಸಾನಿ’’, ರಹೋಯೇವಸ್ಸ ಸೋಪಿ ಚ.
ರಹಸ್ಸಂ ರಕ್ಖಣತ್ಥಾಯ, ಸಹಸ್ಸಂ ತಸ್ಸಾ ದಾಪಿಯ;
ಸಙ್ಘಂ ಸೋ ಸನ್ನಿಪಾತೇತ್ವಾ, ವನ್ದಿತ್ವಾ ಪುಚ್ಛಿ ಭೂಪತಿ.
‘‘ಸಿಯಾನು ¶ ಭನ್ತೇ ಆಯುಸ್ಸ, ವಡ್ಢನಕಾರಣಂ’’ಇತಿ;
‘‘ಅತ್ಥೀ’’ತಿ ಸಙ್ಘೋ ಆಚಿಕ್ಖಿ, ಅನ್ತರಾಯವಿಮೋಚನಂ.
ಪರಿಸ್ಸಾವನದಾನಞ್ಚ, ಆವಾಸದಾನ ಮೇವ ಚ;
ಗಿಲಾನವತ್ತದಾನಞ್ಚ, ದಾತಬ್ಬಂ ಮನುಜಾಧಿಪ.
‘‘ಕಾತಬ್ಬಂ ಜಿಣ್ಣಕಾವಾಸ-ಪಟಿಸಙ್ಖರಣಂ ತಥಾ;
ಪಞ್ಚಸೀಲಸಮಾದಾನಂ, ಕತ್ವಾ ತಂ ಸಾಧುರಕ್ಖಿಯಂ.
ಉಪೋಸಥೂಪವಾಸೋ ಚ, ಕತ್ತಬ್ಬೋ’ ಪೋಸಥೇ’’ಇತಿ;
ರಾಜಾ ಸಾಧೂತಿ ಗನ್ತ್ವಾನ, ತಥಾ ಸಬ್ಬಂ ಮಕಾಸಿ ಸೋ.
ತಿಣ್ಣಂ ತಿಣ್ಣಞ್ಚ ವಸ್ಸಾನಂ, ಅಚ್ಚಯೇನ ಮಹೀಪತಿ;
ದೀಪಮ್ಹಿ ಸಬ್ಬಸಙ್ಘಸ್ಸ, ತಿಚೀವರಮದಾಪಯಿ.
ಅನಾಗತಾನಂ ಥೇರಾನಂ, ಪೇಸಯಿತ್ವಾನ ದಾಪಯಿ;
ದ್ವತ್ತಿಂಸಾಯಹಿ ಠಾನೇಸು, ದಾಪೇಸಿ ಮಧುಪಾಯಸಂ.
ಚತುಸಟ್ಠಿಯಾ ಚ ಠಾನೇಸು, ಮಹಾದಾನಂತು ಮಿಸ್ಸಕಂ;
ಸಹಸ್ಸವಟ್ಟಿ ಚತುಸು, ಠಾನೇಸು ಚ ಜಲಾಪಯಿ.
ಚೇತಿಯಪಬ್ಬತೇ ಚೇವ, ಥೂಪಾರಾಮೇ ಚ ಚೇತಿಯೇ;
ಮಹಾಥೂಪೇ ಮಹಾಬೋಧಿ-ಘರೇ ಇತಿ ಇಮೇಸು ಹಿ.
ಚಿತ್ತಲಕೂಟೇ ಕಾರೇಸಿ, ದಸಥೂಪೇ ಮನೋರಮೇ;
ದೀಪೇ’ಖಿಲಮ್ಹಿ ಆವಾಸೇ, ಜಿಣ್ಣೇ ಚ ಪಟಿಸಙ್ಖರಿ.
ವಲ್ಲಿಯೇರವಿಹಾರೇ ಚ, ಥೇರಸ್ಸ ಸೋ ಪಸೀದಿಯ;
ಮಹಾವಲ್ಲಿಗೋತ್ತಂ ನಾಮ, ವಿಹಾರಞ್ಚ ಅಕಾರಯಿ.
ಕಾರೇಸಿ ಅನುರಾರಾಮಂ, ಮಹಾಗಾಮಸ್ಸ ಸನ್ತಿಕೇ;
ಹೇಳಿಗಾಮಟ್ಠಕರಿಸ, ಸಹಸ್ಸಂ ತಸ್ಸ ದಾಪಯಿ.
ಮುಚೇಲವಿಹಾರಂ ಕಾರೇತ್ವಾ, ಸೋ ತಿಸ್ಸವಡ್ಢಮಾನಕೇ;
ಆಳಿಸಾರೋದಕಭಾಗಂ, ವಿಹಾರಸ್ಸ ಅದಾಪಯಿ.
ಕಲಮ್ಬತಿತ್ಥೇ ಥೂಪಮ್ಹಿ, ಕಾರೇಸಿಟ್ಠಿಕಕಞ್ಚುಕಂ;
ಕಾರೇಸುಪೋಸಥಾ ಗಾರಂ, ವಟ್ಟಿತೇಲತ್ಥ ಮಸ್ಸತು.
ಸಹಸ್ಸಕರೀಸವಾಪಿಂಸೋ ¶ , ಕಾರಾಪೇತ್ವಾ ಅದಾಸಿ ಚ;
ಕಾರೇಸುಪೋಸಥಾಗಾರಂ, ವಿಹಾರೇ ಕುಮ್ಭಿಗಲ್ಲಕೇ.
ಸೋಯೇ’ವು ಪೋಸಥಾಗಾರಂ, ಇಸ್ಸರಸಮಣಕೇ ಇಧ;
ಥೂಪಾರಾಮೇಥೂಪಘರಂ, ಕಾರಾಪೇಸಿ ಮಹೀಪತಿ.
ಮಹಾವಿಹಾರೇ ಪರಿವೇಣ, ಪನ್ತಿಂ ಪಚ್ಛಿಮಪೇಕ್ಖಿನಿಂ;
ಕಾರೇಸಿ ಚ ಚತುಸಾಲಞ್ಚ, ಜಿಣ್ಣಕಂ ಪಟಿಸಙ್ಖರಿ.
ಚತುಬುದ್ಧಪಟಿಮಾರಮ್ಮಂ, ಪಟಿಮಾನಂಘರಂತಥಾ;
ಮಹಾಬೋಧಿಙ್ಗಣೇ ರಮ್ಮೇ, ರಾಜಾ ಸೋಯೇವ ಕಾರಯಿ.
ತಸ್ಸ ರಞ್ಞೋ ಮಹೇಸೀ ಸಾ, ವುತ್ತನಾಮಾ ಮನೋರಮಂ;
ಥೂಪಂ ಥೂಪಘರಞ್ಚೇವ, ರಮ್ಮಂ ತಥೇವ ಕಾರಯಿ.
ಥೂಪಾರಾಮೇ ಥೂಪಘರಂ, ನಿಟ್ಠಾಪೇತ್ವಾ ಮಹೀಪತಿ;
ತಸ್ಸ ನಿಟ್ಠಾಪಿತಮಹೇ, ಮಹಾದಾನಮದಾಸಿ ಚ.
ಯುತ್ತಾನಂ ಬುದ್ಧವಚನೇ, ಭಿಕ್ಖೂನಂ ಪಚ್ಚಯಮ್ಪಿ ಚ;
ಭಿಕ್ಖೂನಂ ಧಮ್ಮಕಥಿಕಾನಂ, ಸಪ್ಪಿಫಾಣಿತಮೇವ ಚ.
ನಗರಸ್ಸ ಚತುದ್ವಾರೇ, ಕಪಣವಟ್ಟಞ್ಚ ದಾಪಯಿ;
ಗಿಲಾನಾನಞ್ಚ ಭಿಕ್ಖೂನಂ, ಗಿಲಾನವಟ್ಟಮೇವ ಚ.
ಮಯೇತ್ತಿಂ ರಾಜುಪ್ಪಲವಾಪಿಂ, ವಹಕೋಲಮ್ಬಗಾಮಕಂ;
ಮಹಾನಿಕ ವಿತ್ತವಾಪಿಂ, ಮಹಾರಾಮೋತ್ತಿ ಮೇವ ಚ.
ಕೇಹಾಲಂ ಕಾಳಿವಾಪಿಞ್ಚ, ಚಮ್ಬುಟ್ಠಿಂ ವಾತಮಙ್ಗನಂ;
ಅಭಿವಡ್ಢಮಾನಕಞ್ಚ, ಇಚ್ಚೇಕಾದಸ ವಾಪಿಯೋ.
ದ್ವಾದಸ ಮಾತಿಕಾ ಚೇವ, ಸುಭಿಕ್ಖತ್ಥಮಕಾರಯಿ;
ಗುತ್ತತ್ಥ ಪುರಪಾಕಾರಂ, ಚೇವ ಮುಚ್ಚಮಕಾರಯಿ.
ಗೋಪುರಞ್ಚ ಚತುದ್ವಾರೇ, ಮಹಾವತ್ಥುಞ್ಚ ಕಾರಯಿ;
ಸರಂ ಕಾರೇಸಿ ಉಯ್ಯಾನೇ, ಹಂಸೇತತ್ಥವಿಸಜ್ಜಯಿ.
ಪುರೇ ಬಹೂ ಪೋಕ್ಖರಣೀ, ಕಾರಾಪೇತ್ವಾ ತಹಿಂ ತಹಿಂ;
ಉಮ್ಮಗ್ಗೇನ ಜಲಂ ತತ್ಥ, ಪವೇಸೇಸಿ ಮಹೀಪತಿ.
ಏವಂ ¶ ನಾನಾವಿಧಂ ಪುಞ್ಞಂ, ಕತ್ವಾ ವಸಭಭೂಪತಿ;
ಹತನ್ತರಾಯೋ ಸೋ ಹುತ್ವಾ, ಪುಞ್ಞಕಮ್ಮೇ ಸದಾದರೋ.
ಚತುತ್ತಾಸೀಸವಸ್ಸಾನಿ, ಪುರೇ ರಜ್ಜಮಕಾರಯಿ;
ಚತುತ್ತಾಲೀಸವೇಸಾಖ, ಪೂಜಾ ಯೋ ಚ ಅಕಾರಯಿ.
ಸುಭರಾಜಾ ಧರನ್ತೋ ಸೋ, ಅತ್ತನೋ ಏಕಧೀತರಂ;
ವಸಭೇನ ಭಯಾಸಂಕೀ, ಅಪ್ಪೇಸಿ’ಠಿಕ ವಡ್ಢಕಿಂ.
ಅತ್ತನೋ ಕಮ್ಬಲಞ್ಚೇವ, ರಾಜಾ ಭಣ್ಡಾನಿ ಚ’ಪ್ಪಯಿ;
ವಸಭೇನ ಹತೇ ತಸ್ಮಿಂ, ತಮಾದಾಸಿಟ್ಠವಡ್ಢಕೀ.
ಧೀತಿಠಾನೇ ಠಪೇತ್ವಾನ, ವಡ್ಢೇತಿ ಅತ್ತನೋ ಘರೇ;
ಸಕಮ್ಮಂ ಕರತೋ ತಸ್ಸ, ಭತ್ತಂ ಆಹರಿ ದಾರಿಕಾ.
ಸಾ ನಿರೋಧಸಮಾಪನ್ನಂ, ತದಮ್ಬಪುಪ್ಫ ಗುಮ್ಬಕೇ;
ಸತ್ತಮೇ ದಿವಸೇ ದಿಸ್ವಾ, ಭತ್ತಂ ಮೇಧಾವೀನೀ ಅದಾ.
ಪುನ ಭತ್ತಂ ರನ್ಧಯಿತ್ವಾ, ಪಿತುನೋ ಭತ್ತಮಾಹರಿ;
ಪಪಞ್ಚಕಾರಣಂ ಪುಟ್ಠಾ, ತಮತ್ಥಂ ಪಿತುನೋ ವದಿ.
ತುಟ್ಠೋ ಪುನಪ್ಪುನಞ್ಚೇ’ಸೋ, ಭತ್ತಂ ಥೇರಸ್ಸ ದಾಪಯಿ;
ವಿಸ್ಸತ್ಥೋ’ನಾಗತಂ ದಿಸ್ವಾ, ಥೇರೋ ಆಹ ಕುಮಾರಿಕಂ.
‘‘ತವಇಸ್ಸರಿಯೇಜಾತೇ, ಇಮಂ ಠಾನಂ ಕುಮಾರಿಕೇ;
ಸರೇಯ್ಯಾಸೀ’ತಿ ಥೇರೋ ತು, ತದಾ ಚ ಪರಿನಿಬ್ಬುತೋ.
ಸಕೇ ಸೋ ವಸಭೋ ರಾಜಾ, ವಯಪ್ಪತ್ತಮ್ಹಿ ಪುತ್ತಕೇ;
ವಙ್ಕನಾಸಿಕತಿಸ್ಸಮ್ಹಿ, ಕಞ್ಞಂತಸ್ಸಾನುರೂಪಿಕಂ.
ಗವೇಸಾಪೇಸಿ ಪುರಿಸಾ, ತಂ ದಿಸ್ವಾನ ಕುಮಾರಿಕಂ;
ಇಟ್ಠಕವಡ್ಢಕೀಗಾಮೇ, ಇತ್ಥಿಲಕ್ಖಣ ಕೋವಿದಾ.
ರಞ್ಞೋ ನಿವೇದಯುಂ ರಾಜಾ, ತಮಾಣಾಪೇತುಮಾರಭಿ;
ತಸ್ಸಾಹ ರಾಜಧೀತತ್ತಂ, ಇಟ್ಠಕವಡ್ಢಕೀ ತದಾ.
ಸುಭರಞ್ಞೋ ತು ಧೀತತ್ತಂ, ಕಮ್ಬಲಾದೀಹಿ ಞಾಪಯಿ;
ರಾಜಾ ತುಟ್ಠೋ ಸುತಸ್ಸಾ’ದಾ, ತಂ ಸಾಧು ಕತಮಙ್ಗಲಂ.
ವಸಭಸ್ಸಚ್ಚಯೇ ಪುತ್ತೋ, ವಙ್ಕನಾಸಿಕ ತಿಸ್ಸಕೋ;
ಅನುರಾಧಪುರೇ ರಜ್ಜಂ, ತೀಣಿ ವಸ್ಸಾನಿ ಕಾರಯಿ.
ಸೋ ¶ ಗೋಣನದಿಯಾ ತೀರೇ, ಮಹಾಮಙ್ಗಲನಾಮಕಂ;
ವಿಹಾರಂ ಕಾರಯಿ ರಾಜಾ, ವಙ್ಕನಾಸಿಕತಿಸ್ಸಕೋ.
ಮಹಾಮತ್ತಾ ತು ದೇವೀ ಸಾ, ಸರನ್ತೀ ಥೇರಭಾಸಿತಂ;
ವಿಹಾರಕಾರಣತ್ಥಾಯ, ಅಕಾಸಿ ಧನಸಞ್ಚಯಂ.
ವಙ್ಕನಾಸಿಕತಿಸ್ಸಸ್ಸ, ಅಚ್ಚಯೇ ಕಾರಯೀ ಸುತೋ;
ರಜ್ಜಂ ಬಾವೀಸವಸ್ಸಾನಿ, ಗಜ್ಜಬಾಹುಕಗಾಮಣಿ.
ಸುತ್ವಾ ಸೋ ಮಾತುವಚನಂ, ಮಾತುದತ್ಥಾಯ ಕಾರಯಿ;
ಕದಮ್ಬಪುಪ್ಫಠಾನಮ್ಹಿ, ರಾಜಮಾತುವಿಹಾರಕಂ.
ಮಾತಾ ಸತಸಹಸ್ಸಂ ಸಾ, ಭೂಮಿಅತ್ಥೋಯ ಪಣ್ಡಿತಾ;
ಅದಾ ಮಹಾವಿಹಾರಸ್ಸ, ವಿಹಾರಞ್ಚ ಅಕಾರ ಯಿ.
ಸಯಮೇವ ಅಕಾರೇಸಿ, ತತ್ಥ ಥೂಪಂ ಸಿಲಾಮಯಂ;
ಸಙ್ಘಭೋಗಞ್ಚ ಪಾದಾಸಿ, ಕಿಣಿತ್ವಾನ ತತೋ ತತೋ.
ಅಭಯುತ್ತರ ಮಹಾಥೂಪಂ, ವಡ್ಢಾಪೇತ್ವಾ ಚಿತಾಪಯಿ;
ಚತುದ್ವಾರೇ ಚ ತತ್ಥೇವ, ಆದಿಮುಖಮಕಾರಯಿ.
ಗಾಮಣಿತಿಸ್ಸವಾಪಿಂ ಸೋ, ಕಾರಾಪೇತ್ವಾ ಮಹೀಪತಿ;
ಅಭಯಗಿರಿ ವಿಹಾರಸ್ಸ, ಪಾಕವಟ್ಟಾಯ’ದಾಸಿ ಚ.
ಮರಿಚವಟ್ಟಿಕಥೂಪಮ್ಹಿ, ಕಞ್ಚುಕಞ್ಚ ಅಕಾರಯಿ;
ಕಿಣಿತ್ವಾ ಸತಸಹಸ್ಸೇನ, ಸಙ್ಘಭೋಗಮದಾಸಿ ಚ.
ಕಾರೇಸಿ ಪಚ್ಛಿಮೇ ವಸ್ಸೇ, ವಿಹಾರಂ ರಾಮಕವ್ಹಯಂ;
ಮಹೇಜಸನಸಾಲಞ್ಚ, ನಗರಮ್ಹಿ ಅಕಾರಯಿ.
ಗಜಬಾಹುಸ್ಸಚ್ಚಯೇನ, ಸಸುರೋ ತಸ್ಸ ರಾಜಿನೋ;
ರಜ್ಜಂ ಮಹಲ್ಲಕೋ ನಾಗೋ, ಛಬ್ಬಸ್ಸಾನಿ ಅಕಾರಯಿ.
ಪುರತ್ಥಿಮೇ ಪೇಜಲಕಂ, ದಕ್ಖಿಣೇ ಕೋಟಿ ಪಬ್ಬತಂ;
ಪಚ್ಛಿಮೇ ದಕಪಾಸಾಣೇ, ನಾಗದೀಪೇ ಸಾಲಿಪಬ್ಬತಂ.
ಬೀಜಗಾಮೇ ತನವೇಳಿಂ, ರೋಹಣೇ ಜನಪದೇ ಪನ;
ತೋಬ್ಬಲನಾಗಪಬ್ಬತಞ್ಚ, ಅನ್ತೋಟ್ಠೇ ಗಿರಿಹಾಲಿಕಂ.
ಏತೇ ¶ ಸತ್ತ ವಿಹಾರೇ ಸೋ, ಮಹಲ್ಲನಾಗಭೂಪತಿ;
ಪರಿತ್ತೇನಪಿ ಕಾಲೇನ, ಕಾರಾಪೇಸಿ ಮಹಾಮತೀ.
ಏವಂ ಅಸಾರೇಹಿ ಧನೇಹಿ ಸಾರಂ,
ಪುಞ್ಞಾನಿ ಕತ್ವಾನ ಬಹೂನಿ ಪಞ್ಞಾ;
ಆದೇನ್ತಿ ಬಾಲಾ ಪನ ಕಾಮ ಹೇತು,
ಬಹೂನಿ ಪಾಪಾನಿ ಕರೋನ್ತಾ ಮೋಹಾ’ತಿ.
ಸುಜನಪ್ಪಸಾದಸಂವೇಗತ್ಥಾಯ ಕತೇ ಮಹಾವಂಸೇ
ದ್ವಾದಸ ರಾಜಕೋ ನಾಮ
ಪಞ್ಚತಿಂಸತಿಮೋ ಪರಿಚ್ಛೇದೋ.
ಛತ್ತಿಂಸತಿಮ ಪರಿಚ್ಛೇದ
ತಯೋದಸ ರಾಜಕೋ
ಮಹಲ್ಲನಾಗಚ್ಚಯೇನ ¶ , ಪುತ್ತೋ ಭಾತಿಕತಿಸ್ಸಕೋ;
ಚತುವೀಸತಿವಸ್ಸಾನಿ, ಲಂಕಾರಜ್ಜಮಕಾರಯಿ.
ಮಹಾವಿಹಾರೇ ಪಾಕಾರಂ, ಕಾರಾಪೇಸಿ ಸಮನ್ತತೋ;
ಗವರತಿಸ್ಸವಿಹಾರಂ, ಸೋ ಕಾರಯಿತ್ವಾ ಮಹೀಪತಿ.
ಮಹಾಗಾಮಣಿಕಂ ವಾಪಿಂ, ವಿಹಾರಸ್ಸ’ಸ್ಸ’ದಾಸಿ ಚ;
ವಿಹಾರಞ್ಚ ಅಕಾರೇಸಿ, ಭಾತಿಯತಿಸ್ಸ ನಾಮಕಂ.
ಕಾರೇಸುಪೋಸಥಾಗಾರಂ, ಥೂಪಾರಾಮೇ ಮನೋರಮೇ;
ರನ್ಧಕಣ್ಡಕವಾಪಿಞ್ಚ, ಕಾರಾಪೇಸಿ ಮಹೀಪತಿ.
ಸತ್ತೇಸು ಮುದುಚಿತ್ತೋಸೋ, ಸಙ್ಘಮ್ಹಿ ತಿಬ್ಬಗಾರವೋ;
ಉಭತೋಸಙ್ಘೇ ಮಹೀಪಾಲೋ, ಮಹಾದಾನಂ ಪವತ್ತಯಿ.
ಭಾತಿಕತಿಸ್ಸಚ್ಚಯೇನ, ತಸ್ಸ ಕನಿಟ್ಠತಿಸ್ಸಕೋ;
ಅಟ್ಠವೀಸಸಮಾರಜ್ಜಂ, ಲಂಕಾದೀಪೇ ಅಕಾರಯಿ.
ಭೂತಾರಾಮ ¶ ಮಹಾನಾಗ, ಥೇರಸ್ಮಿಂ ಸೋ ಪಸೀದಿಯ;
ಕಾರೇಸಿ ರತನಪಾಸಾದಂ, ಅಭಯಗಿರಿಮ್ಹಿ ಸಾಧುಕಂ.
ಅಭಯಗಿರಿಮ್ಹಿ ಪಾಕಾರಂ, ಮಹಾಪರಿವೇಣಮೇವ ಚ;
ಕಾರೇಸಿ ಮಣಿಸೋಮವ್ಹೇ, ಮಹಾಪರಿವೇಣಮೇವ ಚ.
ತತ್ಥೇವ ಚೇತಿಯಘರಂ, ಅಮ್ಬತ್ಥಲೇ ತಥೇವ ಚ;
ಕಾರೇಸಿ ಪಟಿಸಙ್ಖಾರಂ, ನಾಗದೀಪೇ ಘರೇ ಪನ.
ಮಹಾವಿಹಾರಸೀಮಂಸೋ, ಮದ್ದಿತ್ವಾ ತತ್ಥ ಕಾರಯಿ;
ಕುಕ್ಕುಟಗಿರಿ ಪರಿವೇಣ, ಪನ್ತಿಂ ಸಕ್ಕಚ್ಚ ಭೂಪತಿ.
ಮಹಾವಿಹಾರೇ ಕಾರೇಸಿ, ದ್ವಾದಸ ಮನುಜಾಧಿಪೋ;
ಮಹಾಚತುರಸ್ಸಪಾಸಾದೇ, ದಸ್ಸನೇಯ್ಯೇಮನೋರಮೇ.
ದಕ್ಖಿಣವಿಹಾರ ಥೂಪಮ್ಹಿ, ಕಞ್ಚುಕಞ್ಚ ಅಕಾರಯಿ;
ಭತ್ತಸಾಲಂ ಮಹಾಮೇಘ, ವನಾಸಿಮಞ್ಚ ಮದ್ದಿಯ.
ಮಹಾವಿಹಾರಪಾಕಾರಂ, ಪಸ್ಸತೋ ಅಪನೀಯಸೋ;
ಮಗ್ಗಂ ದಕ್ಖಿಣವಿಹಾರ, ಗಾಮಿಞ್ಚಾಪಿ ಅಕಾರಯಿ.
ಭೂತಾರಾಮ ವಿಹಾರಞ್ಚ, ರಾಮಗೋಣಕಮೇವ ಚ;
ತಥೇವ ನನ್ದತಿಸ್ಸಸ್ಸ, ಆರಾಮಞ್ಚ ಅಕಾರಯಿ.
ಪಾಚಿನತೋ ಅನುಳಾತಿಸ್ಸ, ಪಬ್ಬತಂ ಗಙ್ಗರಾಜಿಯಂ;
ನಿಯೇಲತಿಸ್ಸಾರಾಮಞ್ಚ, ಪಿಳ ಪಿಟ್ಠಿ ವಿಹಾರಕಂ.
ರಾಜಮಹಾವಿಹಾರಞ್ಚ, ಕಾರೇಸಿ ಮನುಜಾಧಿಪೋ;
ಸೋಯೇವ ತೀಸು ಠಾನೇಸು, ಕಾರೇಸು’ಪೋಸಥಾಲಯಂ.
ಕಲ್ಯಾಣೀಕ ವಿಹಾರೇ ಚ, ಮಣ್ಡಲಗಿರಿಕೇ ತಥಾ;
ದುಬ್ಬಲವಾಪಿತಿಸ್ಸವ್ಹೇ, ವಿಹಾರೇಸು ಇಮೇಸು ಹಿ.
ಕನಿಟ್ಠತಿಸ್ಸಚ್ಚಯೇನ, ತಸ್ಸ ಪುತ್ತೋ ಅಕಾರಯಿ;
ರಜ್ಜಂ ದ್ವೇಯೇವ ವಸ್ಸಾನಿ, ಚೂಳನಾಗೋತಿ ವಿಸ್ಸುತೋ.
ಚೂಳನಾಗಕನಿಟ್ಠೋತು, ರಾಜಾಘಾತಿಯ ಭಾತಿಕಂ;
ಏಕವಸ್ಸಂ ಕುಡ್ಡನಾಗೋ, ರಜ್ಜಂ ಲಂಕಾಯ ಕಾರಯಿ.
ಮಹಾಪೇಳಞ್ಚ ವಡ್ಢೇಸಿ, ಏಕನಾಳಿಕಛಾತಕೇ;
ಭಿಕ್ಖುಸತಾನಂ ಪಞ್ಚನ್ನಂ, ಅಬ್ಭೋಚ್ಛಿನ್ನಂ ಮಹೀಪತಿ.
ಕುಡ್ಡನಾಗಸ್ಸ ¶ ರಞ್ಞೋ ತು, ದೇವೀಯಾ ಭಾತುಕೋ ತದಾ;
ಸೇನಾಪತಿ ಸಿರಿನಾಗೋ, ಚೋರೋ ಹುತ್ವಾನ ರಾಜಿನೋ.
ಬಲವಾಹನ ಸಮ್ಪನ್ನೋ, ಆಗಮ್ಮ ನಗರನ್ತಿಕಂ;
ರಾಜಬಲೇನ ಯುಜ್ಝನ್ತೋ, ಕುಡ್ಡನಾಗಂ ಮಹೀಪತಿಂ.
ಪಲಾಪೇತ್ವಾ ಲದ್ಧಜಯೋ, ಅನುರಾಧ ಪುರೇ ವರೇ;
ಲಂಕಾರಜ್ಜಮಕಾರೇಸಿ, ವಸ್ಸಾನೇಕೂನವೀಸತಿ.
ಮಹಾಥೂಪವರೇ ಛತ್ತಂ, ಕಾರಾಪೇತ್ವಾನ ಭೂಪತಿ;
ಸುವಣ್ಣಕಮ್ಮಂ ಕಾರೇಸಿ, ದಸ್ಸನೇಯ್ಯಂ ಮನೋರಮಂ.
ಕಾರೇಸಿ ಲೋಹಪಾಸಾದಂ, ಸಂಖಿತ್ತಂ ಪಞ್ಚಭೂಮಕಂ;
ಮಹಾಬೋಧಿ ಚತುದ್ವಾರೇ, ಸೋಪಾನಂ ಪುನಕಾರಯಿ.
ಕಾರೇತ್ವಾ ಛತ್ತಪಾಸಾದಂ, ಮಹೇ ಪೂಜಮಕಾರಯಿ;
ಕುಲಮ್ಬಣಞ್ಚ ದೀಪಸ್ಮಿಂ, ವಿಸ್ಸಜ್ಜೇಸಿ ದಯಾಪರೋ.
ಸಿರಿನಾಗಚ್ಚಯೇ ತಸ್ಸ, ಪುತ್ತೋ ತಿಸ್ಸೋ ಅಕಾರಯಿ;
ರಜ್ಜಂ ದ್ವಾವೀಸವಸ್ಸಾನಿ, ಧಮ್ಮವೋಹಾರ ಕೋವಿದೋ.
ಠಪೇಸಿ ಸೋ ಹಿ ವೋಹಾರಂ, ಹಿಂಸಾ ಮುತ್ತಂ ಯತೋಇಧ;
ವೋಹಾರಕ ತಿಸ್ಸರಾಜಾ, ಇತಿ ನಾಮಂ ತತೋ ಅಹು.
ಕಮ್ಬುಗಾಮಕವಾಸಿಸ್ಸ, ದೇವತ್ಥೇರಸ್ಸ ಸನ್ತಿಕೇ;
ಧಮ್ಮಂ ಸುತ್ವಾ ಪಟಿಕಮ್ಮಂ, ಪಞ್ಚಾವಾಸೇ ಅಕಾರಯಿ.
ಮಹಾತಿಸ್ಸಸ್ಸ ಥೇರಸ್ಸ, ಅನುರಾ ರಾಮವಾಸಿನೋ;
ಪಸನ್ನೋ ಮುಚೇಲಪಟ್ಟನೇ, ದಾನ ವಟ್ಟಮಕಾರಯಿ.
ತಿಸ್ಸರಾಜ ಮಣ್ಡಪಞ್ಚ, ಮಹಾವಿಹಾರದ್ವಯೇಪಿ ಸೋ;
ಮಹಾಬೋಧಿಘರೇ ಪಾಚಿ, ಲೋಹರೂಪದ್ಧಯಮ್ಪಿ ಚ.
ಸತ್ತಪಣ್ಣಿಕಪಾಸಾದಂ, ಕಾರೇತ್ವಾ ಸುಖವಾಸಕಂ;
ಮಾಸೇ ಮಾಸೇ ಸಹಸ್ಸಂ ಸೋ, ಮಹಾವಿಹಾರಸ್ಸ ದಾಪಯಿ.
ಅಭಯಗಿರಿವಿಹಾರೇ, ದಕ್ಖಿಣಮೂಲಸವ್ಹಯೇ;
ಮರಿಚವಟ್ಟಿ ವಿಹಾರಮ್ಹಿ, ಕುಲಾಲಿತಿಸ್ಸಸವ್ಹಯೇ.
ಮಹಿಯಙ್ಗಣ ವಿಹಾರಮ್ಹಿ, ಮಹಾಗಾಮಕಸವ್ಹಯೇ;
ಮಹಾನಾಗತಿಸ್ಸವ್ಹಮ್ಹಿ, ತಥಾ ಕಲ್ಯಾಣೀಕವ್ಹಯೇ.
ಇತಿ ¶ ಅಟ್ಠಸು ಥೂಪೇಸು, ಛತ್ತಕಮ್ಮಮಕಾರಯಿ;
ಮೂಕನಾಗಸೇನಾಪತಿ, ವಿಹಾರೇ ದಕ್ಖಿಣೇ ತಥಾ.
ಮರಿಚ ವಟ್ಟಿ ವಿಹಾರಮ್ಹಿ, ಪುತ್ತಭಾಗವ್ಹಯೇ ತಥಾ;
ಇಸ್ಸರಸಮಣವ್ಹಮ್ಹಿ, ತಿಸ್ಸವ್ಹೇ ನಾಗದೀಪಕೇ.
ಇತಿ ಛಸು ವಿಹಾರೇಸು, ಪಾಕಾರಞ್ಚ ಅಕಾರಯಿ;
ಕಾರೇಸು’ ಪೋಸಥಾಗಾರಂ, ಅನುರಾರಾಮಸವ್ಹಯೇ.
ಅರಿಯವಂಸಕಥಾಠಾನೇ, ಲಂಕಾದೀಪೇಖಿಲೇಪಿ ಚ;
ದಾನ ವಟ್ಟಂ ಠಪಾಪೇಸಿ, ಸದ್ಧಮ್ಮೇ ಗಾರವೇನ ಸೋ.
ತಿಣೀ ಸತಸಹಸ್ಸಾನಿ, ದತ್ವಾನ ಮನುಜಾಧಿಪೋ;
ಇಣತೋ ಸಯಿಕೇ ಭಿಕ್ಖೂ, ಮೋಚೇಸಿ ಸಾಸನಪ್ಪಿಯೋ.
ಮಹಾ ವೇಸಾಖ ಪೂಜಂ ಸೋ, ಕಾರೇತ್ವಾ ದೀಪವಾಸಿನಂ;
ಸಬ್ಬೇ ಸಂಯೇವ ಭಿಕ್ಖೂನಂ, ತಿಚೀವರಮದಾಪಯಿ.
ವೇತುಲ್ಲವಾದಂ ಮದ್ದಿತ್ವಾ, ಕಾರೇತ್ವಾ ಪಾಪನಿಗ್ಗಹಂ;
ಕಪಿಲೇನ ಅಮಚ್ಚೇನ, ಸಾಸನಂ ಜೋತಯೀಚ ಸೋ.
ವಿಸ್ಸುತೋ’ಭಯನಾಗೋ’ತಿ, ಕನಿಟ್ಠೋ ತಸ್ಸರಾಜಿನೋ;
ದೇವಿಯಾ ತಸ್ಸ ಸಂಸಟ್ಠೋ, ಞಾತೋ ಭೀತೋ ಸಭಾತರಾ.
ಪಲಾಯಿತ್ವಾ ಹಲ್ಲತಿತ್ಥಂ, ಗನ್ತ್ವಾನ ಸಹಸೇವಕೋ;
ಕುದ್ಧೋ ವಿಯ ಮಾತುಲಸ್ಸ, ಹತ್ಥಪಾದಞ್ಚ ಛೇದಯಿ.
ರಾಜಿನೋ ರಟ್ಠತೇದತ್ಥಂ, ಠಪೇತ್ವಾನ ಇಧೇವ ತಂ;
ಸುನಖೋಪಮಂ ದಸ್ಸಯಿತ್ವಾ, ಗಹೇತ್ವಾ’ತಿ ಸಿನಿದ್ಧಕೇ.
ತತ್ಥೇವ ನಾವಂ ಆರುಯ್ಹ, ಪರತೀರಮಗಾಸಯಂ;
ಸುಭವೋ ಮಾತುಲೋ ತು, ಉಪಗಮ್ಮ ಮಹೀಪತಿ.
ಸುಹದೋ ವಿಯ ಹುತ್ವಾನ, ತಸ್ಮಿಂ ರಟ್ಠಮಭಿನ್ದಿಸೋ;
ಅಭಯೋ ತಂ ಜಾನನತ್ಥಂ, ದೂತಂ ಇಧ ವಿಸಜ್ಜಯಿ.
ತಂ ದಿಸ್ವಾ ಪೂಗರುಕ್ಖಂ ಸೋ, ಸಮನ್ತಾ ಕುನ್ತನಾಳಿಯಾ;
ಪರಿಬ್ಭಮನ್ತೋ ಮದ್ದಿತ್ವಾ, ಕತ್ವಾ ದುಬ್ಬಲಮೂಲಕಂ.
ಬಾಹುನಾಯೇವ ಪಾತೇತ್ವಾ, ತಜ್ಜೇತ್ವಾ ತಂ ಪಲಾಪಯಿ;
ದೂತೋ ಗನ್ತ್ವಾ ಅಭಯಸ್ಸ, ತಂ ಪವತ್ತಿಂ ಪವೇದಯಿ.
ಞತ್ವಾ’ಭಯೋ ¶ ತಂ ದಮಿಳೇ, ಆದಾಯ ಬಸುಕೇ ತತೋ;
ನಗರನ್ತಿಕಮಾಗಞ್ಛಿ, ಭಾತರಾ ಸಹ ಯುಜ್ಝಿತುಂ.
ತಂ ಞತ್ವಾನ ಪಲಾಯಿತ್ವಾ, ಅಸ್ಸಮಾರುಯ್ಹದೇವಿಯಾ;
ಮಲಯಂ ಆಗಮಾ ರಾಜಾ, ತಂಕನಿಟ್ಠೋ’ನು ಬನ್ಧಿಯ.
ರಾಜಾನಂ ಮಲಯೇ ಹನ್ತ್ವಾ, ದೇವೀಮಾದಾಯ ಆಗತೋ;
ಕಾರೇಸಿ ನಗರೇ ರಜ್ಜಂ, ಅಟ್ಠವಸ್ಸಾನಿ ಭೂಪತಿ.
ಪಾಸಾಣವೇದಿಂ ಕಾರೇಸಿ, ಮಹಾಬೋಧಿಸಮನ್ತತೋ;
ಲೋಹಪಾಸಾದಙ್ಗಣಮ್ಹಿ, ರಾಜಾ ಮಣ್ಡಪಮೇವ ಚ.
ದ್ವಿಹಿ ಸತಸಹಸ್ಸೇಹಿ, ನೇಕವತ್ಥಾನಿ ಭಾಗಿಯ;
ದೀಪಮ್ಹಿ ಭಿಕ್ಖುಸಙ್ಘಸ್ಸ, ವತ್ಥದಾನಮದಾಸಿ ಸೋ.
ಅಭಯಸ್ಸ’ಚ್ಚಯೇ ಭಾತು, ತಸ್ಸಸ್ಸ ತಸ್ಸ ಅತ್ರಜೋ;
ದ್ವೇವಸ್ಸಾನಿ ಸಿರಿನಾಗೋ, ಲಂಕಾರಜ್ಜ ಮಕಾರಯಿ.
ಪಟಿಸಙ್ಖರಿಯ ಪಾಕಾರಂ, ಮಹಾಬೋಧಿಸಮನ್ತತೋ;
ಮಹಾಬೋಧಿಘರಸ್ಸೇವ, ಸೋಯೇವ ವಾಲಿಕಾತಲೇ.
ಮೂಚೇಲರುಕ್ಖಪರತೋ, ಹಂಸವಟ್ಟಂ ಮನೋರಮಂ;
ಮಹನ್ತಂ ಮಣ್ಡಪಞ್ಚೇವ, ಕಾರಾಪೇಸಿ ಮಹೀಪತಿ.
ವಿಜಯಕುಮಾರಕೋ ನಾಮ, ಸಿರಿನಾಗಸ್ಸ ಅತ್ರಜೋ;
ಪಿತುನೋ ಅಚ್ಚಯೇ ರಜ್ಜಂ, ಏಕವಸ್ಸಮಕಾರಯಿ.
ಲಮ್ಬಕಣ್ಣಾ ತಯೋ ಆಸುಂ, ಸಹಾತಾ ಮಹಿಯಙ್ಗಣೇ;
ಸಙ್ಘತಿಸ್ಸೋ ಸಙ್ಘಬೋಧಿ, ತತಿಯೋ ಗೋಟ್ಠಕಾಭಯೋ.
ತೇ ತಿಸ್ಸವಾಪಿಮರಿಯಾದ-ಗತೋ ಅನ್ಧೋ ವಿಚಕ್ಖಣೋ;
ರಾಜುಪಟ್ಠಾನಮಾಯನ್ತೇ, ಪದಸದ್ದೇನ ಅಬ್ರವಿ.
‘‘ಪಥವೀಸಾಮಿನೋ ಏತೇ, ತಯೋ ವಹತಿಭೂ’ಇತಿ;
ತಂ ಸುತ್ವಾ ಅಭಯೋ ಪಚ್ಛಾ, ಯನ್ತೋ ಪುಚ್ಛಿ ಪುನಾಹಸೋ.
ತಸ್ಸ ವಂಸೋ ಠಸ್ಸತೀತಿ,
ಪುನ ಪುಚ್ಛಿತಮೇವ ಸೋ;
‘‘ಪಚ್ಛಿಮಸ್ಸಾ’’ತಿ ಸೋ ಆಹ,
ತಂ ಸುತ್ವಾ ದ್ವೀಹಿಸೋಅಗಾ.
ತೇ ¶ ಪುರಂ ಪವಿಸಿತ್ವಾನ, ತಯೋ ರಞ್ಞೋ’ತಿ ವಲ್ಲಭೋ;
ರಾಜಕಿಚ್ಚಾನಿ ಸಾಧೇನ್ತಾ, ವಸನ್ತಾ ರಾಜಸನ್ತಿಕೇ.
ಹನ್ತ್ವಾ ವಿಜಯರಾಜಾನಂ, ರಾಜಗೇಹಮ್ಹಿ ಏಕತೋ;
ಸೇನಾಪತಿಂಸಙ್ಘತಿಸ್ಸಂ, ದುವೇರಜ್ಜೇ’ಭಿಸೇಚಯುಂ.
ಏವಂ ಸೋ ಅಭಿಸಿತ್ತೋವ, ಅನುರಾಧಪುರುತ್ತಮೇ;
ರಜ್ಜಂ ಚತ್ತಾರಿ ವಸ್ಸಾನಿ, ಸಙ್ಘತಿಸ್ಸೋ ಅಕಾರಯಿ.
ಮಹಾಥೂಪಮ್ಹಿ ಛತ್ತಞ್ಚ, ಹೇಮಕಮ್ಮಞ್ಚ ಕಾರಯಿ;
ವಿಸುಂ ಸತಸಹಸ್ಸಗ್ಘೇ, ಚತುರೋ ಚ ಮಹಾಮಣಿ.
ಮಜ್ಝೇ ಚತುನ್ನಂ ಸೂರಿಯಾನಂ, ಠಪಾಪೇಸಿ ಮಹೀಪತಿ;
ಥೂಪಸ್ಸ ಮುದ್ಧನಿ ತಥಾ-ನಗ್ಘವಜಿರಚುಮ್ಬಟಂ.
ಸೋ ಛತ್ತಮಹಪೂಜಾಯ, ಸಙ್ಘಸ್ಸ ಮನುಜಾಧಿಪೋ;
ಚತ್ತಾಲೀಸಸಹಸ್ಸಸ್ಸ, ಛ ಚೀವರಮದಾಪಯಿ.
ತಂ ಮಹಾದೇವಥೇರೇನ, ದಾಮಗಲ್ಲಕ ವಾಸಿನೋ;
ದೇಸಿತಂ ಖನ್ಧಕೇ ಸುತ್ತಂ, ಯಾಗಾನಿಸಂಸ ದೀಪನಂ.
ಸುತ್ವಾ ಪಸನ್ನೋ ಸಙ್ಘಸ್ಸ, ಯಾಗುದಾನಮದಾಪಯಿ;
ನಗರಸ್ಸ ಚತುದ್ವಾರೇ, ಸಕ್ಕಚ್ಚಞ್ಚೇವ ಸಾಧು ಚ.
ಸೋ ಅನ್ತರನ್ತರೇ ರಾಜಾ, ಜಮ್ಬುಪಕ್ಕಾನಿ ಖಾದಿತುಂ;
ಸಹೋರೋಧೋ ಸಹಾಮಚ್ಚೋ, ಅಗಾಪಾಚಿನ ದೀಪಕಂ.
ಉಪದ್ದುತಂ’ಸ್ಸ ಗಮನೇ, ಮನುಸ್ಸಾ ಪಾಚಿ ವಾಸಿನೋ;
ವಿಸಂ ಫಲೇಸು ಯೋ ಜೇಸುಂ, ರಾಜಭೋಜ್ಜಾಯ ಜಮ್ಬುಯಾ.
ಖಾದಿತ್ವಾ ಜಮ್ಬುಪಕ್ಕಾನಿ, ತಾನಿ ತತ್ಥೇವ ಸೋ ಮತೋ;
ಸೇನಾಪತಿ ಸಙ್ಘಧಬಾಧೀಂ-ಭಯೋ ರಜ್ಜೇ’ಭಿಸೇಚಯಿ.
ರಾಜಾಸಿರಿ ಸಙ್ಘ ಬೋಧಿ, ವಿಸ್ಸುತೋ ಪಞ್ಚಸೀಲವಾ;
ಅನುರಾಧಪುರೇ ರಜ್ಜಂ, ದುವೇ ವಸ್ಸಾನಿ ಕಾರಯಿ.
ಮಹಾವಿಹಾರೇ ಕಾರೇಸಿ, ಸಲಾಕಗ್ಗಂ ಮನೋರಮಂ;
ತದಾದೀಪೇ ಮನುಸ್ಸೇಸೋ, ಞತ್ವಾ ದುಬ್ಬುಟ್ಠುಪದ್ದುತೇ.
ಕರುಣಾಯ ಕಮ್ಪಿತಮನೋ, ಮಹಾಥೂಪಙ್ಗಣೇ ಸಯಂ;
ನಿಪಜ್ಜಿ ಭೂಮಿಯಂ ರಾಜಾ, ಕತ್ವಾನ ಇತಿ ನಿಚ್ಛಯಂ.
‘‘ಪವಸ್ಸಿತ್ವಾನ ¶ ದೇವೇನ, ಜಲೇನುಪಲಾವಿತೇ ಮಯಿ;
ನಹೇವ ವುಟ್ಠಹಿಸ್ಸಾಮಿ, ಮರಮಾನೋಪಹಂ ಇಧ’’.
ಏವಂ ನಿಪನ್ನೇ ಭೂಮಿನ್ದೇ, ದೇವೋ ಪಾವಸ್ಸಿ ತಾವದೇ;
ಲಂಕಾದೀಪಮ್ಹಿ ಸಕಲೇ, ಪಿಣಯನ್ತೋ ಮಹಾಮಹಿಂ.
ತಥಾಪಿ ನುಟ್ಠಹತಿಸೋ, ಅಪಿಲಾಪನತೋ ಜಲೇ;
ಆವರಿಂಸು ತತೋ’ಮಚ್ಚಾ, ಜಲನಿಗ್ಗಮನಾಳಿಯೋ.
ತತೋ ಜಲಮ್ಹಿ ಪಿಲವಂ, ರಾಜಾ ವುಟ್ಠಾಸಿ ಧಮ್ಮಿಕೋ;
ಕರುಣಾಯನುದಿ ಏವಂ, ದೀಪೇ ದುಬ್ಬುಟ್ಠಿಕಾಭಯಂ.
ಚೋರಾತಹಿಂ ತಹಿಂ ಜಾತಾ, ಇತಿ ಸುತ್ವಾನ ಭೂಪತಿ;
ಚೋರೇ ಆಣಾಪಯಿತ್ವಾನ, ರಹಸ್ಸೇನ ಪಲಾಪೀಯ.
ಆಣಾಪೇತ್ವಾ ರಹಸ್ಸೇನ, ಮತಾನಂ ಸೋ ಕಲೇವರಂ;
ಅಗ್ಗೀಹಿ ಉತ್ತಾಸೇತ್ವಾನ, ಹನಿತಂ ಚೋರುಪದ್ದವಂ.
ಏಕೋ ಯಕ್ಖೋ ಇಧಾಗಮ್ಮ, ರತ್ತಕ್ಖೋ ಇತಿ ವಿಸ್ಸುತೋ;
ಕರೋತಿ ರತ್ತಾನ’ಕ್ಖೀತಿ, ಮನುಸ್ಸಾನಂ ತಹಿಂ ತಹಿಂ.
ಅಞ್ಞಮಞ್ಞಮಪೇಕ್ಖಿತ್ವಾ, ಭಾಯಿತ್ವಾ ರತ್ತನೇತ್ತತಂ;
ನರಾಮರನ್ತಿ ತೇ ಯಕ್ಖೋ, ಸೋಭಕ್ಖೇಸಿ ಅಸಙ್ಕಿತೋ.
ರಾಜಾ ಉಪದ್ದವಂ ತೇಸಂ, ಸುತ್ವಾ ಸನ್ತತ್ತಮಾನಸೋ;
ಏಕೋ’ಪವಾಸ ಗಬ್ಭಮ್ಹಿ, ಹುತ್ವಾ ಅಟ್ಠಙ್ಗುಪೋಸಥಿ.
‘‘ಅಪಸ್ಸಿತ್ವಾನ ತಂ ಯಕ್ಖಂ, ನ ಚುಟ್ಠಾಮೀ’’ತಿ ಸೋ ಸಯಿ;
ತಸ್ಸ ಸೋ ಧಮ್ಮತೇಜೇನ, ಅಗಾ ಯಕ್ಖೋ ತದನ್ತಿಕಂ.
ತೇನ ‘‘ಕೋಸೀ’’ತಿ ಪುಟ್ಠೋ ಚ, ಸೋ ‘‘ಅಹ’’ನ್ತಿ ಪವೇದಯಿ;
‘‘ಕಸ್ಮಾ ಪಜಂ ಮೇ ಭಕ್ಖೇಸಿ, ಮಾ ಖಾದ’’ಇತಿ ಸೋಬ್ರವಿ.
‘‘ಏಕಸ್ಮಿಂ ಮೇ ಜನಪದೇ, ನರೇ ದೇಹೀ’’ತಿ ಸೋಬ್ರವಿ;
‘‘ನ ಸಕ್ಕಾ ಇತಿ ವುತ್ತೇ ಸೋ, ಕಮೇನೇಕಂತಿ ಅಬ್ರವಿ.
‘‘ಅಞ್ಞಂ ನ ಸಕ್ಕಾ ದಾತುಂ ಮೇ, ಮಂ ಖಾದ’’ ಇತಿ ಸೋಬ್ರವಿ;
‘‘ನ ಸಕ್ಕಾ’’ಇತಿ ತಂ ಯಾಚಿ, ಗಾಮೇ ಗಾಮೇ ಬಲಿಞ್ಚ ಸೋ.
ಸಾಧೂತಿ ವತ್ವಾ ಭೂಮಿನ್ದೋ, ದಿಪಮ್ಪಿ ಸಕಲೇಪಿ ಚ;
ಗಾಮವರೇ ನಿವೇಸೇತ್ವಾ, ಬಲಿಂತಸ್ಸ ಅದಾಪಯಿ.
ಮಹಾಸತ್ತೇನ ¶ ತೇನೇವ, ಸಬ್ಬಭೂತಾನುಕಮ್ಪಿನಾ;
ಮಹಾರೋಗಭಯಂ ಜಾತಂ, ದೀಪದೀಪೇನ ನಾಸಿತಂ.
ಸೋ ಭಣ್ಡಾಗಾರಿಕೋ ರಞ್ಞೋ,
ಅಮಚ್ಚೋ ಗೋಟ್ಠತಾಭಯೋ;
ಚೇರೋ ಹುತ್ವಾ ಉತ್ತರತೋ,
ನಗರಂ ಸಮುಪಾಗಮಿ.
ಪರಿಸ್ಸಾವನಮಾದಾಯ, ರಾಜಾ ದಕ್ಖಿಣದ್ವಾರತೋ;
ಪರಹಿಂಸಮರೋಚೇನ್ತೋ, ಏಕಕೋವ ಪಲಾಯಿ ಸೋ.
ಪುಟಭತ್ತಂ ಗಹೇತ್ವಾನ, ಗಚ್ಛನ್ತೋ ಪುರಿತೋ ಪಥಿ;
ಭತ್ತಭೋಗಾಯರಾಜಾನಂ, ನಿಬನ್ಧಿತ್ಥ ಪುನಪ್ಪುನಂ.
ಜಲಂ ಪರಿಸ್ಸಾವಯಿತ್ವಾ, ಭುಞ್ಜಿತ್ವಾನ ದಯಾಲುಕೋ;
ತಸ್ಸೇವಂ’ನುಗ್ಗಹಂ ಕಾತುಂ, ಇದಂ ವಚನಮಬ್ರುವಿ.
‘‘ಸಙ್ಘಬೋಧಿ ಅಹಂ ರಾಜಾ, ಗಹೇತ್ವಾ ಮಮಭೋ ಸೀರಂ;
ಗೋಟ್ಠಾಭಯಸ್ಸ ದಸ್ಸೇಹಿ, ಬಹುಂ ದಸ್ಸತಿ ತೇ ಧನಂ.
ನ ಇಚ್ಛಿತೋ ತಥಾಕಾತುಂ, ತಸ್ಸತ್ಥಾಯ ಮಹೀಪತಿ;
ನಿಸಿನ್ನೋಯೇವ ಅಮರಿ, ಸೋ ಸೀಸಂ ತಸ್ಸ ಆದಿಯ.
ಗೋಟ್ಠಾಭಯಸ್ಸ ದಸ್ಸೇಸಿ, ಸೋತು ವಿಮ್ಹಿತಮಾನಸೋ;
ದತ್ವಾ ತಸ್ಸ ಧನಂ ರಞ್ಞೋ, ಸಕ್ಕಾರಂ ಸಾಧುಕಾರಯಿ.
ಏವಂ ಗೋಟ್ಠಾಭಯೋ ಏಸೋ, ಮೇಘವಣ್ಣಾಭಯೋ’ತಿ ಚ;
ವಿಸ್ಸುತೋ ತೇರಸ ಸಮಾ, ಲಂಕಾರಜ್ಜಮಕಾರಯಿ.
ಮಹಾವತ್ಥುಂ ಕಾರಯಿತ್ವಾ, ವತ್ಥುದ್ವಾರಮ್ಹಿ ಮಣ್ಡಪಂ;
ಕಾರಯಿತ್ವಾ ಮಣ್ಡಯಿತ್ವಾ, ಸೋ ಭಿಕ್ಖು ತತ್ಥ ಸಙ್ಘತೋ.
ಅಟ್ಠುತ್ತರಸಹಸ್ಸಾನಿ, ನಿಸೀದೇತ್ವಾ ದಿನೇ ದಿನೇ;
ಯಾಗುಖಜ್ಜಕ ಭೋಜ್ಜೇಹಿ, ಸಾದೂಹಿ ವಿವಿಧೇಹಿ ಚ.
ಸಚೀವರೇಹಿ ಕಪ್ಪೇತ್ವಾ, ಮಹಾದಾನಂ ಪವತ್ತಯಿ;
ಏಕವೀಸದಿನಾ ನೇವಂ, ನಿಬದ್ಧಞ್ಚಸ್ಸ ಕಾರಯಿ.
ಮಹಾವಿಹಾರೇ ಕಾರೇಸಿ, ಸಿಲಾಮಣ್ಡಪ ಮುತ್ತಮಂ;
ಲೋಹಪಾಸಾದಥಮ್ಭೇ ಚ, ಪರಿವತ್ತಿಯ ಠಾಪಯಿ.
ಮಹಾಬೋಧಿ ¶ ಸಿಲಾವೇದಿಂ, ಉತ್ತರದ್ವಾರತೋರಣಂ;
ಪತಿಟ್ಠಾಪೇಸಿ ಥಮ್ಭೇ ಚ, ಚಕುಕಣ್ಣೇ ಸಚಕ್ಕಕೇ.
ತಿಸ್ಸೋ ಸೀಲಾಪಟಿಮಾಯೋ, ತೀಸು ದ್ವಾರೇಸು ಕಾರಯಿ;
ಠಪಾಪೇಸಿ ಚ ಪಲ್ಲಙ್ಕಂ, ದಕ್ಖಿಣಮ್ಹಿ ಸಿಲಾಮಯಂ.
ಪಧಾನಭೂಮಿಂ ಕಾರೇಸಿ, ಮಹಾವಿಹಾರಪಚ್ಛತೋ;
ದೀಪಮ್ಹಿ ಜಿಣ್ಣಕಾವಾಸಂ, ಸಬ್ಬಞ್ಚ ಪಟಿಸಙ್ಖರಿ.
ಥೂಪಾರಾಮೇ ಥೂಪಘರಂ, ಥೇರಮ್ಬತ್ಥಲಕೇ ತಥಾ;
ಆರಾಮೇ ಮಣಿಸೋಮವ್ಹೇ, ಪಟಿಸಙ್ಖಾರಯಿ ಚ ಸೋ.
ಥೂಪಾರಾಮೇ ಮಣಿಸೋಮಾ-ರಾಮೇ ಮರಿಚವಟ್ಟಕೇ;
ದಕ್ಖಿಣವ್ಹ ವಿಹಾರೇ ಚ, ಉಪೋಸಥಘರಾನಿ ಚ.
ಮೇಘವಣ್ಣಾಭಯವ್ಹಞ್ಚ, ನವವಿಹಾರಮಕಾರಯಿ;
ವಿಹಾರಮಹಪೂಜಾಯಂ, ಪಿಣ್ಡೇತ್ವಾ ದೀಪವಾಸೀನಂ.
ತಿಂಸಭಿಕ್ಖುಸಹಸ್ಸಾನಂ, ಛಚೀವರಮದಾಸಿ ಚ;
ಮಹಾವೇಸಾಖಪೂಜಞ್ಚ, ತದಾ ಏವಂ ಅಕಾರಯಿ.
ಅನುವಸ್ಸಞ್ಚ ಸಙ್ಘಸ್ಸ, ಛಚೀವರಮದಾಮಯಿ;
ಪಾಪಕಾನಂ ನಿಗ್ಗಹೇನ, ಸೋಧೇನ್ತೋ ಸಾಸನಂ ತು ಸೋ.
ವೇತುಲ್ಲವಾದಿನೋ ಭಿಕ್ಖೂ, ಅಭಯಗಿರಿನಿವಾಸಿನೋ;
ಗಾಹಯಿತ್ವಾಸಟ್ಠಿಮತ್ತೇ, ಜಿನಸಾಸನಕಣ್ಟಕೇ.
ಕತ್ವಾನ ನಿಗ್ಗಹಂ ತೇಸಂ, ಪರತಿರೇ ಖಿಪಾಪಯಿ;
ತತ್ಥ ಖಿತ್ತಸ್ಸ ಥೇರಸ್ಸ, ನಿಸ್ಸಿತೋ ಭಿಕ್ಖುಚೋಳಿಕೋ.
ಸಙ್ಘಮಿತ್ತೋ’ತಿನಾಮೇನ, ಭೂತಿವಿಜ್ಜಾದಿಕೋವಿದೋ;
ಮಹಾವಿಹಾರೇ ಭಿಕ್ಖುನಂ, ಕುಜ್ಝಿತ್ವಾನ ಇಧಗಮಾ.
ಥೂಪಾರಾಮೇ ಸನ್ನಿಪಾತಂ, ಪವಿಸಿತ್ವಾ ಅಸಞ್ಞತೋ;
ಸಙ್ಘಪಾಲಸ್ಸ ಪರಿವೇಣ, ವಾಸಿತ್ಥೇರಸ್ಸ ತತ್ಥ ಸೋ.
ಗೋಟ್ಠಾಸಯಸ್ಸ ಥೇರಸ್ಸ, ಮಾತುಲಸ್ಸ’ಸ್ಸ ರಾಜಿನೋ;
ರಞ್ಞೋ ನಾಮೇನಾ‘‘ಲಪನ್ತೋ, ವಚನಂ ಪಟಿಬಾಹಿಯ.
ರಞ್ಞೋ ಕುಲೂಪಗೋ ಆಸಿ, ರಾಜಾ ತಸ್ಮಿಂ ಪಸೀದಿಯ;
ಜೇಟ್ಠಪುತ್ತಂ ಜೇಟ್ಠತಿಸ್ಸಂ, ಮಹಾಸೇನಂ ಕನಿಟ್ಠಕಂ.
ಅಪ್ಪೇಸಿ ¶ ತಸ್ಸ ಭಿಕ್ಖುಸ್ಸ, ಸೋ ಸಙ್ಗಣ್ಹಿ ದುತಿಯಕಂ;
ಉಪನನ್ಧಿ ತಸ್ಮಿಂ ಭಿಕ್ಖುಸ್ಮಿಂ, ಜೇಟ್ಠತಿಸ್ಸೋ ಕುಮಾರಕೋ.
ಪಿತುನೋ ಅಚ್ಚಯೇ ಜೇಟ್ಠ, ಸಿಸ್ಸೋ ರಾಜಾಅಹೋಸಿಸೋ;
ಪಿತು ಸಾರೀರ ಸಕ್ಕಾರೇ, ನಿಗ್ಗನ್ತುಂ ನಿಚ್ಛಮಾನಕೇ.
ದುಟ್ಠಾಮಚ್ಚೇ ನಿಗ್ಗಹೇತುಂ, ಸಯಂ ನಿಕ್ಖಮ್ಮ ಭೂಪತಿ;
ಕನಿಟ್ಠಂ ಪುರತೋ ಕತ್ವಾ, ಪಿತುಕಾಯಂ ಅನನ್ತರಂ.
ತತೋ ಅಮಚ್ಚೇ ಕತ್ವಾನ, ಸಯಂ ಹುತ್ವಾನ ಪಚ್ಛತೋ;
ಕನಿಟ್ಠೇ ಪಿತುಕಾಯೇ ಚ, ನಿಕ್ಖನ್ತೇ ತದನನ್ತರಂ.
ದ್ವಾರಂ ಸಂವರಯಿತ್ವಾನ, ದುಟ್ಠಮಚ್ಚೇ ನಿಘಾತಿಯ;
ಸೂಲೇ ಅಪ್ಪೇಸಿ ಪಿತುನೋ, ಚಿತಕಾಯಸಮನ್ತತೋ.
ತೇನ’ಸ್ಸ ಕಮ್ಮುನಾ ನಾಮಂ, ಕಕ್ಖಲೋಪಪದಂಅಹು;
ಸಙ್ಘಮಿತ್ತೋತು ಸೋ ಭಿಕ್ಖು, ಭೀತೋ ತಸ್ಮಿಂ ನರಾಧಿಪಾ.
ತಸ್ಸಾಭಿಸೇಕಸಮಕಾಲಂ, ಮಹಾಸೇನೇನ ಮನ್ತಿಯ;
ತಸ್ಸಾಭಿಸೇಕಂ ಪೇಕ್ಖನ್ತೋ, ಪರತೀರಂ ಗತೋ ಇತೋ.
ಪಿತರಾ ಸೋ ವಿಪ್ಪಕತಂ, ಲೋಹಪಾಸಾದ ಮುತ್ತಮಂ;
ಕೋಟಿಧನಂ ಅಗ್ಘನಕಂ, ಕಾರೇಸಿ ಸತ್ತಭೂಮಕಂ.
ಸಟ್ಠಿಸತಸಹಸ್ಸಗ್ಘಂ, ಪೂಜಯಿತ್ವಾ ಮಣಿಂತಹಿಂ;
ಕಾರೇಸಿ ಜೇಟ್ಠತಿಸ್ಸೋತಂ, ಮಣಿಪಾಸಾದನಾಮಕಂ.
ಮಣಿ ದುವೇ ಮಹಗ್ಘೇ ಚ, ಮಹಾಥೂಪೇ ಅಪೂಜಯಿ;
ಮಹಾಬೋಧಿಘರೇ ತೀಣಿ, ತೋರಣಾನಿ ಚ ಕಾರಯಿ.
ಕಾರಯಿತ್ವಾ ವಿಹಾರಂ ಸೋ, ಪಾಚಿನತಿಸ್ಸ ಪಬ್ಬತಂ;
ಪಞ್ಚವಾಸೇಸು ಸಙ್ಘಸ್ಸ, ಅದಾಸಿ ಪುಥುವೀ ಪತಿ.
ದೇವಾನಂಪಿಯತಿಸ್ಸೇನ, ಸೋ ಪತಿಟ್ಠಾಪಿತಂ ಪುರಾ;
ಥೂಪಾರಾಮೇ ಉರುಸಿಲಾ, ಪಟಿಮಂ ಚಾರುದಸ್ಸನಂ.
ನೇತ್ವಾನ ಥೂಪಾರಾಮವ್ಹಂ, ಜೇಟ್ಠತಿಸ್ಸೋ ಮಹೀಪಹಿ;
ಪತಿಟ್ಠಾಪೇಸಿ ಆರಾಮೇ, ಪಾಚಿನತಿಸ್ಸ ಪಬ್ಬತೇ.
ಕಾಳಮತ್ತಿಕವಾಪಿಂಸೋ, ಅದಾಚೇತಿಯ ಪಬ್ಬತೇ;
ವಿಹಾರ ಪಾಸಾದ ಮಹಂ, ಮಹಾವೇಸಾಖಮೇವ ಚ.
ಕತ್ವಾ ¶ ತಿಂಸ ಸಹಸ್ಸಸ್ಸ, ಸಙ್ಘಸ್ಸ’ದಾ ಛಚೀವರಂ;
ಆಳಮ್ಬಗಾಮವಾಪಿಂಸೋ, ಜೇಟ್ಠತಿಸ್ಸೋ ಅಕಾರಯಿ.
ಏವಂ ಸೋ ವಿವಿಧಂ ಪುಞ್ಞಂ, ಪಾಸಾದಕರಣಾದಿಕಂ;
ಕಾರೇನ್ತೋ ದಸವಸ್ಸಾನಿ, ರಾಜಾ ರಜ್ಜಮಕಾರಯಿ.
ಇತಿ ಬಹುವಿಧ ಪುಞ್ಞ ಹೇತು ಭೂತಾ,
ನರಪತಿತಾ ಬಹುಪಾಪಹೇತು ಚಾತಿ;
ಮಧುರಮಿವ ವಿಸೇನಮಿಸ್ಸಮನ್ನಂ,
ಸುಜನಮನೋ ಭಜತೇ ನ ತಂ ಕದಾಪಿ.
ಸುಜನಪ್ಪಸಾದ ಸಂವೇಗತ್ಥಾಯ ಕತೇ ಮಹಾವಂಸೇ
ತಯೋದಸರಾಜಕೋನಾಮ
ಛತ್ತಿಂಸತಿಮೋ ಪರಿಚ್ಛೇದೋ.
ಸತ್ತತಿಂಸತಿಮ ಪರಿಚ್ಛೇದ
ಪಞ್ಚರಾಜಕೋ
ಜೇಟ್ಠತಿಸ್ಸಚ್ಚಯೇ ತಸ್ಸ, ಮಹಾಸೇನೋ ಕನಿಟ್ಠಕೋ;
ಸತ್ತವೀಸತಿವಸ್ಸಾನಿ, ರಾಜಾ ರಜ್ಜಮಕಾರಯಿ.
ತಸ್ಸ ರಜ್ಜಾಭಿಸೇಕಂ ತಂ,
ಕಾರೇತುಂ ಪರತೀರತೋ;
ಸೋ ಸಙ್ಘಮಿತ್ತತ್ಥೇರೋ ತು,
ಕಾಲಂ ಞತ್ವಾ ಇಧಾಗತೋ.
ತಸ್ಸಾಭಿಸೇಕಂ ಕಾರೇತ್ವಾ, ಅಞ್ಞಂ ಕಿಚ್ಚಞ್ಚನೇಕಧಾ;
ಮಹಾವಿಹಾರ ವಿದ್ಧಂಸಂ, ಕಾತುಕಾಮೋ ಅಸಞ್ಞತೋ.
ಅವಿನಯವಾದಿನೋ ಏತೇ, ಮಹಾವಿಹಾರವಾಸಿನೋ;
ವಿನಯವಾದೀ ಮಯಂ ರಾಜ, ಇತಿ ಗಾಹಿಯ ಭೂಪಭಿಂ.
ಮಹಾವಿಹಾರವಾಸಿಸ್ಸ ¶ , ಆಹಾರಂ ದೇತಿ ಭಿಕ್ಖುನೋ;
ಯೋ ಸೋ ಸತಂ ದಣ್ಡಿಯೋ’ತಿ, ರಞ್ಞಾ ದಣ್ಡಂ ಠಪಾಪಯಿ.
ಉಪದ್ದುತಾ ತೇಹಿ ಭಿಕ್ಖೂ, ಮಹಾವಿಹಾರವಾಸಿನೋ;
ಮಹಾವಿಹಾರಂ ಛಡ್ಡೇತ್ವಾ, ಮಲಯಂ ರೋಹಣಂ ಅಗುಂ.
ತೇನ ಮಹಾವಿಹಾರೋ’ಯಂ, ನವವಸ್ಸಾನಿ ಛಡ್ಡಿತೋ;
ಮಹಾವಿಹಾರವಾಸೀಹಿ, ಭಿಕ್ಖೂಹಿ ಆಸಿ ಸುಞ್ಞಕೋ.
‘‘ಹೋತಿ ಅಸ್ಸಾಮಿಕಂ ವತ್ಥು, ಪುತುವಿಸಾಮಿನೋ’’ಇತಿ;
ರಾಜಾನಂ ಸಞ್ಞಾಪೇತ್ವಾ ಸೋ, ಥೇರೋ ದುಮ್ಮತಿ ದುಮ್ಮತಿಂ.
ಮಹಾವಿಹಾರಂ ನಾಸೇತುಂ, ಲದ್ಧಾನುಮತಿ ರಾಜತೋ;
ತಥಾ ಕಾತುಂ ಮನುಸ್ಸೇ ಸೋ, ಯೋಜೇಸಿ ದುಟ್ಠಮಾನಸೋ.
ಸಙ್ಘಮಿತ್ತಸ್ಸ ಥೇರಸ್ಸ, ಸೇವಕೋ ರಾಜವಲ್ಲಭೋ;
ಸೋಣಾಮಚ್ಚೋ ದಾರಣೋ ಚ, ಭಿಕ್ಖವೋ ಚ ಅಲಜ್ಜಿನೋ.
ಭಿನ್ದಿತ್ವಾ ಲೋಹಪಾಸಾದಂ, ಸತ್ತಭೂಮಕ ಮುತ್ತಮಂ;
ಘರೇ ನಾನಪ್ಪಕಾರೇ ಚ, ಇತೋ’ಭಯಗಿರಿಂ ನಯುಂ.
ಮಹಾವಿಹಾರಾ ನೀತೇಹಿ, ಪಾಸಾದೇಹಿ ಬಹೂಹಿ ಚ;
ಅಭಯಗಿರಿವಿಹಾರೋಯಂ, ಬಹುಪಾಸಾದಕೋ ಅಹು.
ಸಙ್ಘಮಿತ್ತಂ ಪಾಪಮಿತ್ತಂ, ಥೇರಂ ಸೋಣಞ್ಚ ಸೇವಕಂ;
ಆಗಮ್ಮ ಸುಬಹುಂ ಪಾಪಂ, ಅಕಾಸಿ ಸೋ ಮಹೀಪತಿ.
ಮಹಾಸಿಲಾಪಟಿಮಂ ಸೋ, ಪಾಚಿನತಿಸ್ಸಪಬ್ಬತಾ;
ಆನೇತ್ವಾ’ಭಯಗಿರಿಮ್ಹಿ, ಪತಿಟ್ಠಾಪೇಸಿ ಭೂಪತಿ.
ಪಟಿಮಾಘರಂ ಬೋಧಿಘರಂ, ಧಾತುಸಾಲಂ ಮನೋರಮಂ;
ಚತುಸಾಲಞ್ಚ ಕಾರೇಸೀ, ಸಙ್ಖರೀ ಕುಕ್ಕುಟವ್ಹಯಂ.
ಸಙ್ಘಮಿತ್ತೇನ ಥೇರೇನ, ತೇನ ದಾರುಣಕಮ್ಮುನಾ;
ವಿಹಾರೋ ಸೋ’ಭಯಗಿರಿ, ದಸ್ಸನೇಯ್ಯೋ ಅಹು ತದಾ.
ಮೇಘವಣ್ಣಾಭಯೋ ನಾಮ, ರಞ್ಞೋ ಸಬ್ಬತ್ಥ ಸಾಖಕೋ;
ಸಖಾ ಅಮಚ್ಚೋ ಕುಜ್ಝಿತ್ವಾ, ಮಹಾವಿಹಾರನಾಸನೇ.
ಚೋರೋ ಹುತ್ವಾನ ಮಲಯಂ, ಗನ್ತ್ವಾ ಲದ್ಧಮಹಬ್ಬಲೋ;
ಖನ್ಧಾವಾರಂ ನಿವೇಸೇಸಿ, ದುರತಿಸ್ಸಕವಾಪಿಯಂ.
ತತ್ರಾ’ಗತಂ ¶ ತಂ ಸುತ್ವಾ, ಸಹಾಯಂ ಸೋ ಮಹೀಪತಿ;
ಯುದ್ಧಾಹ ಪಚ್ಚುಗ್ಗನ್ತ್ವಾನ, ಖನ್ಧಾವಾರಂ ನಿವೇಸಯಿ.
ಸಾಧುಂ ಪಾನಞ್ಚ ಮಂಸಞ್ಚ, ಲಭಿತ್ವಾ ಮಲಯಾಗತಂ;
‘‘ನ ಸೇವಿಸ್ಸಂ ಸಹಾಯೇನ, ವಿನಾ ರಞ್ಞಾ’’ತಿ ಚಿನ್ತಿಯ.
ಆದಾಯ ತಂ ಸಯಂಯೇವ, ರತ್ತಿಂ ನಿಕ್ಖಮ್ಮ ಏಕಕೋ;
ರಞ್ಞೋ ಸನ್ತಿಕಮಾಗಮ್ಮ, ತಮತ್ಥಂ ಪಟಿವೇದಯಿ.
ತೇನಾ’ಭತಂ ತೇನ ಸಹ, ವಿಸ್ಸತ್ಥೋ ಪರಿಭುಞ್ಜಿಯ;
‘‘ಕಸ್ಮಾ ಚೋರೋ ಅಹು ಮೇ ತ್ವಂ, ‘‘ಇತಿ ರಾಜಾ ಅಪುಚ್ಛಿತಂ.
‘‘ತಯಾ ಮಹಾವಿಹಾರಸ್ಸ, ನಾಸಿತತ್ತಾ’’ತಿ ಅಬ್ರುವಿ;
‘‘ವಿಹಾರಂ ವಾಸಯಿಸ್ಸಾಮಿ, ಖೇಮಮೇತಂ ಮಮಚ್ಚಯಂ.
ಇಚ್ಛೇವ ಮಬ್ರವೀ ರಾಜಾ, ರಾಜಾನಂ ಸೋ ಖಮಾಪಯಿ;
ತೇನ ಸಞ್ಞಾಪಿತೋ ರಾಜಾ, ನಗರಂಯೇವ ಆಗಮಿ.
ರಾಜಾನಂ ಸಞ್ಞಪೇತ್ವಾ ಸೋ, ಮೇಘವಣ್ಣಾಭಯೋ ಪನ;
ರಞ್ಞಾ ಸಹ ನ ಆಗಞ್ಛಿ, ದಬ್ಬಸಮ್ಭಾರಕಾರಣಾ.
ವಲಭಾ ಭರಿಯಾ ರಞ್ಞೋ, ಏಕಂ ಲೇಖಕಧೀತಿಕಾ;
ಮಹಾವಿಹಾರನಾಸಮ್ಹಿ, ದುಕ್ಖಿತಂ ತಂ ವಿನಾಸಕಂ.
ಥೇರಂ ಮಾರಾಪಯಿ ಕುದ್ಧಾ, ಸಂಗಹೇತ್ವಾನ ವಡ್ಢಕಿಂ;
ಥೂಪಾರಾಮಂ ವಿನಾಸೇತುಂ, ಆಗತಂ ದುಟ್ಠಮಾನಸಂ.
ಮಾರಾಪೇತ್ವಾ ಸಙ್ಘಮಿತ್ತ-ತ್ಥೇರಂ ದಾರುಣಕಾರಕಂ;
ಸೋಣಾಮಚ್ಚದಾರಣಞ್ಚ, ಘಾತಯಿಂಸು ಅಸಞ್ಞಕಾ.
ಆನೇತ್ವಾ ದಬ್ಬಸಮ್ಭಾರಂ, ಮೇಘವಣ್ಣಾಭಯೋ ತು ಸೋ;
ಮಹಾವಿಹಾರೇನೇಕಾನಿ, ಪರಿವೇಣಾನಿ ಕಾರಯಿ.
ಅಭಯೇನಭಯೋ ತಸ್ಮಿಂ, ವೂಪಸನ್ತೇ ತು ಭಿಕ್ಖವೋ;
ಮಹಾವಿಹಾರಂ ವಾಸೇಸುಂ, ಆಗನ್ತ್ವಾನ ತತೋ ತತೋ.
ರಾಜಾ ಮಹಾಬೋಧಿಘರೇ, ಪಚ್ಛಿಮಾಯ ದಿಸಾಯ ತು;
ಕಾರೇತ್ವಾ ಲೋಹರೂಪಾನಿ, ಠಪಾಪೇಸಿ ದುವೇ ತು ಸೋ.
ದಕ್ಖಿಣಾರಾಮವಾಸಿಮ್ಹಿ, ಕುಹಕೇ ಜಿಮ್ಹಮಾನಸೇ;
ಪಸೀದಿತ್ವಾ ಪಾಪಮಿತ್ತೇ, ತಿಸ್ಸತ್ಥೇರೇ ಅಸಞ್ಞತೇ.
ಮಹಾವಿಹಾರಸೀಮನ್ತೇ ¶ , ಉಯ್ಯಾನೇ ಜೋತಿನಾಮಕೇ;
ಜೇತವನವಿಹಾರಂ ಸೋ, ವಾರಯನ್ತೋಪಿ ಕಾರಯಿ.
ತತೋ ಸೀಮಂ ಸಮುಗ್ಘಾತುಂ, ಭಿಕ್ಖುಸಙ್ಘಮಯಾಚಿಸೋ;
ಅದಾತುಕಾಮಾ ತಂ ಭಿಕ್ಖೂ, ವಿಹಾರಮ್ಹಾ ಅಪಕ್ಕಮುಂ.
ಇಧ ಸೀಮಾಸಮುಗ್ಘಾತಂ, ಪರೇಹಿ ಕರಿಯಮಾನಕಂ;
ಕೋಪೇತುಂ ಭಿಕ್ಖವೋ ಕೇಚಿ, ನಿಲೀಯಿಂಸು ತಹಿಂ ತಹಿಂ.
ಮಹಾವಿಹಾರೋ ನವಮಾಸೇ, ಏವಂ ಭಿಕ್ಖೂಹಿ ವಜ್ಜಿತೋ;
‘‘ಸಮುಗ್ಘಾತಂ ಕರಿಮ್ಹಾ’’ತಿ-ಪರೇ ಭಿಕ್ಖೂ ಅಮಞ್ಞಿಸುಂ.
ತತೋ ಸೀಮಾಸಮುಗ್ಘಾತೇ, ಬ್ಯಾಪಾರೇ ಪರಿನಿಟ್ಠಿತೇ;
ಮಹಾವಿಹಾರಂ ವಾಸೇಸುಂ, ಇಧಾಗನ್ತ್ವಾನ ಭಿಕ್ಖವೋ.
ತಸ್ಸ ವಿಹಾರಗಾಹಿಸ್ಸ, ತಿಸ್ಸತ್ಥೇರಸ್ಸ ಚೋದನಾ;
ಅನ್ತಿಮವತ್ಥುನಾ ಆಸಿ, ಭೂತತ್ಥಂ ಸಙ್ಘಮಜ್ಝಗಾ.
ವಿನಿಚ್ಛಿಯ ಮಹಾಮಚ್ಚೋ, ತಥಾ ಧಮ್ಮಿಕಸಮ್ಮತೋ;
ಉಪ್ಪಬ್ಬಾಜೇಸಿ ಧಮ್ಮೇನ, ತಂ ಅನಿಚ್ಛಾಯ ರಾಜಿನೋ.
ಸೋಯೇವ ರಾಜಾ ಕಾರೇಸಿ, ವಿಹಾರಂ ಮಣಿಹೀರಕಂ;
ತಯೋ ವಿಹಾರೇ ಕಾರೇಸಿ, ದೇವಾಲಯಂ ವಿನಾಸಿಯ.
ಗೋಕಣ್ಣಂ ಏರಕಾಪಿಲ್ಲಂ, ಕಲನ್ದಬ್ರಾಹ್ಮಣಗಾಮಕೇ;
ಮಿಗಗಾಮವಿಹಾರಞ್ಚ, ಗಙ್ಗಸೇನಕಪಬ್ಬತಂ.
ಪಚ್ಛಿಮಾಯ ದಿಸಾಯಾಥ, ಧಾತುಸೇನಞ್ಚ ಪಬ್ಬತಂ;
ರಾಜಾ ಮಹಾವಿಹಾರಞ್ಚ, ಕೋಕವಾತಮ್ಹಿ ಕಾರಯಿ.
ರೂಪಾರಮ್ಮವಿಹಾರಞ್ಚ, ಚೂಳವಿಟ್ಟಞ್ಚ ಕಾರಯಿ;
ಉತ್ತರಾಭಯಸವ್ಹೇ ಚ, ದುವೇ ಭಿಕ್ಖೂನುಪಸ್ಸಯೇ.
ಕಾಲವೇಳಕಯಕ್ಖಸ್ಸ, ಠಾನೇ ಥೂಪಞ್ಚ ಕಾರಯಿ;
ದೀಪಮ್ಹಿ ಜಿಣ್ಣಕಾವಾಸೇ, ಬಹೂ ಚ ಪಟಿಸಙ್ಖರಿ.
ಸಙ್ಘತ್ಥೇರಸಹಸ್ಸಸ್ಸ, ಸಹಸ್ಸಗ್ಘಮದಾಸಿ ಸೋ;
ಥೇರದಾನಞ್ಚ ಸಬ್ಬೇಸಂ, ಅನುವಸ್ಸಞ್ಚ ಚೀವರಂ.
ಅನ್ನಪಾನಾದಿದಾನಸ್ಸ, ಪರಿಚ್ಛೇದೋ ನ ವಿಜ್ಜತಿ;
ಸುಭಿಕ್ಖತ್ಥಾಯ ಕಾರೇಸಿ, ಸೋ’ವ ಸೋಳಸ ವಾಪಿಯೋ.
ಮಣಿಹೀರಮಹಾವಾಪಿಂ ¶ , ಜಲ್ಲುರಂ ಖಾಣುನಾಮಕಂ;
ಮಹಾಮಣಿಂ ಕೋಕವಾತಂ, ಮೋರಕಪರಕವಾಪಿಕಂ.
ಕುಬ್ಬಾಹಕಂ ವಾಹಕಞ್ಚ, ರತ್ತಮಾಲಕಣ್ಡಕಮ್ಪಿ ಚ;
ತಿಸ್ಸವಡ್ಢಮಾನಕಞ್ಚ, ವೇಳಙ್ಗವಿಟ್ಠಿಕಮ್ಪಿ ಚ.
ಮಹಾಗಲ್ಲಚೀರವಾಪಿಂ, ಮಹಾದಾರಗಲ್ಲಕಮ್ಪಿ ಚ;
ಕಾಳಪಾಸಾಣವಾಪಿಞ್ಚ, ಇಮಾ ಸೋಳಸ ವಾಪಿಯೋ.
ಗಙ್ಗಾಯ ಪಬ್ಬವವ್ಹಂಸೋ, ಮಹಾಮಾತಿಞ್ಚ ಕಾರಯಿ;
ಏವಂ ಪುಞ್ಞಮಪುಞ್ಞಞ್ಚ, ಸುಬಹುಂ ಸೋ ಉಪಾಚಿನೀತಿ.
ಅಸಾಧುಸಙ್ಗಮೇನೇವಂ, ಯಾವಜೀವಂ ಸುಭಾಸುಭಂ;
ಕತ್ವಾ ಗತೋ ಯಥಾಕಮ್ಮಂ, ಸೋ ಮಹಾಸೇನಭೂಪತಿ.
ತಸ್ಮಾ ಅಸಾಧುಸಂಸಗ್ಗಂ, ಆರಕಾ ಪರಿವಜ್ಜಿಯ;
ಅಹಿಂ ವಾ’ಸಿ ವಿಸಂ ಖಿಪ್ಪಂ, ಕರೇಯ್ಯ’ತ್ಥಹಿತಂ ಬುಧೋ.
ಅಹು ರಾಜಾ ಸಿರಿಮೇಘ-ವಣ್ಣೋ ತಸ್ಸ ಸುತೋ ತತೋ;
ವನ್ಧಾತಾ ವಿಯ ಲೋಕಸ್ಸ, ಸಬ್ಬಸಮ್ಪತ್ತಿದಾಯಕೋ.
ಮಹಾಸೇನೇನ ಪಾಪಾನಂ, ವಸಗೇನ ವಿನಾಸಿತೇ;
ಮಹಾವಿಹಾರೇ ಸಬ್ಬೇಪಿ, ಸನ್ನಿಪಾತಿಯ ಭಿಕ್ಖವೋ.
ಉಪಸಙ್ಕಮ್ಮ ವನ್ದಿತ್ವಾ, ನಿಸಿನ್ನೋ ಪುಚ್ಛಿ ಸಾದರೋ;
‘‘ಪಿತರಾ ಸಙ್ಘಮಿತ್ತಸ್ಸ, ಸಹಾಯೇನ ವಿನಾಸಿತಂ.
ಕಿಂ ಕಿಮೇವಾ’’ತಿ ಆಹಂಸು, ಭಿಕ್ಖವೋ ತಂ ನರಿಸ್ಸರಂ;
‘‘ಸೀಮಾಯುಗ್ಘಾಟನಂ ಕಾತುಂ, ವಾಯಮಿತ್ವಾಪಿ ತೇ ಪಿತಾ.
ನಾಸಕ್ಖಿ ಅನ್ತೋಸೀಮಾಯಂ, ಭಿಕ್ಖೂನಂ ವಿಜ್ಜಮಾನತೋ;
ಭೂಮಿಗಬ್ಭನಿಲೀನಾಹಿ, ಸತ್ತಾಸುಂ ಏತ್ಥ ಭಿಕ್ಖವೋ.
ಅಮಚ್ಚೋ ಸೋಣಾಮಚ್ಚೋ ಚ, ಸಙ್ಘಮಿತ್ತೋ ಚ ಪಾಪಿಯೋ;
ರಾಜಾನಂ ಸಞ್ಞಾಪೇತ್ವಾನ, ಅಪುಞ್ಞಂ ತೇನ ಕಾರಯುಂ.
ಭಿನ್ದಿತ್ವಾ ಲೋಹಪಾಸಾದಂ, ಸತ್ತಭೂಮಕಮುತ್ತಮಂ;
ಘರೇ ನಾನಪ್ಪಕಾರೇ ಚ, ಇತೋ’ಭಯಗಿರಿಂ ನಯುಂ.
ಮಾಸಕೇ ಚತುಬುದ್ಧೇಹಿ, ನಿವುತ್ಥೇ ಚೇತಿಯಙ್ಗಣೇ;
ವಪಾಪೇಸುಞ್ಚ ದುಪ್ಪಞ್ಞಾ, ಪಸ್ಸ ಬಾಲಸಮಾಗಮಂ’’.
ತಂ ¶ ಸುತ್ವಾ ಪಿತುಕಮ್ಮಂ ಸೋ, ನಿಬ್ಬಿನ್ನೋ ಬಾಲಸಙ್ಗಮೇ;
ಪಿತರಾ ನಾಸಿತಂ ತತ್ಥ, ಸಬ್ಬಂ ಪಾಕತಿಕಂ ಅಕಾ.
ಲೋಹಪಾಸಾದಮಗದೋ’ವ, ಕಾಸಿ ಪಾಸಾದಮುತ್ತಮಂ;
ರಞ್ಞೋ ಮಹಾಪನಾದಸ್ಸ, ದಸ್ಸೇನ್ತೋ ವಿಯ ಭೂತಲೇ.
ಪರಿವೇಣಾನಿ ಸಬ್ಬಾನಿ, ನಾಸಿತಾನಿ ನಿವೇಸಯಿ;
ಭೋಗೇ ಆರಾಮಿಕಾನಞ್ಚ, ಯಥಾಠಾನೇ ಠಪೇಸಿ ಸೋ.
ಪಿತರಾ ಪಚ್ಚಯಾನಞ್ಚ, ಪಚ್ಛಿನ್ನತ್ತಾ ವಿಬುದ್ಧಿನಾ;
ಛಿದ್ದಾವಾಸಂ ಘನಾವಾಸಂ, ವಿಹಾರಂ’ಕಾಸಿ ಬುದ್ಧಿಮಾ.
ಕಾರಿತೇ ಪಿತರಾ ಜೋತಿ ವನೇಚೇ’ಸೋ ವಿಹಾರಕೇ;
ಕಮ್ಮಂ ವಿಪ್ಪಕತಂ ಸಬ್ಬಂ, ನಿಟ್ಠಾಪೇಸಿ ನರಿಸ್ಸರೋ.
ಥೇರಸ್ಸಾ’ಥ ಮಹಿನ್ದಸ್ಸ, ಸಮಣಿನ್ದಸ್ಸ ಸುನುನೋ;
ಸುತ್ವಾನ ಮನುಜಿನ್ದೋ ಸೋ, ಪವತ್ತಿಂ ಸಬ್ಬಮಾದಿತೋ.
ಪಸೀದಿತ್ವಾ ಗುಣೇ ತಸ್ಸ, ರಾಜಾ ದಿಪ್ಪಪಸಾದಕೇ;
‘‘ಇಸ್ಸರೋ ವತ ದೀಪಸ್ಸ, ಥೇರೋ’’ ಇತಿ ವಿಚಿನ್ತಿಯ.
ಪಟಿಬಿಮ್ಬಂ ಸುವಣ್ಣಸ್ಸ, ಕತ್ವಾ ತಮ್ಮಾಣ ನಿಸ್ಸಿತಂ;
ಪುಬ್ಬಕತ್ತಿಕಮಾಸಸ್ಸ, ಪಬ್ಬಪಕ್ಖೇ ತು ಸತ್ತಮೇ.
ದಿನೇ ನೇತ್ವಾ ಚೇತಿಯಮ್ಬ-ಥಲೇ ಥೇರಮ್ಬಸಞ್ಞಿತೇ;
ತತ್ರಟ್ಠಮೇ ನಿವಾಸೇತ್ವಾ, ತತೋ ತು ನವಮೇ ಪನ.
ಮಹಾಸೇನಂ ಗಹೇತ್ವಾ ಸೋ, ದೇವಸೇನಾ ಸಮೂಪಮಂ;
ಓರೋಧೇ ನಗರೇ ಚೇವ, ಗೇಹರಕ್ಖಣಕೇ ವಿನಾ.
ಲಂಕಾದೀಪೇ ಚ ಸಕಲೇ, ಸಬ್ಬೇ ಆದಾಯ ಭಿಕ್ಖವೋ;
ವಿಸ್ಸಜ್ಜೇತ್ವಾ ಮನುಸ್ಸೇ ಚ, ನಗರೇ ಚಾರಕಟ್ಠಿತೇ.
ಪಟ್ಠಪೇತ್ವಾ ಮಹಾದಾನಂ, ಅಯಞ್ಚಾಖಿಲಪಾಣಿನಂ;
ಪೂಜಂ ಸಬ್ಬೋಪಹಾರೇಹಿ, ಕರೋನ್ತೋ ಚ ಅನೂಪಮಂ.
ಪಚ್ಚುಗ್ಗಮನಮೇತಸ್ಸ, ದೀಪಸತ್ಥುಸ್ಸ ಸತ್ಥುನೋ;
ವರಪುತ್ತಸ್ಸ ಸೋ ಕತ್ವಾ, ದೇವರಾಜಾ’ವ ಸತ್ಥುನೋ.
ಚೇತಿಯಮ್ಬಥಲಾ ಯಾವ, ನಗರಂ ಸಾಧುಸಜ್ಜಯಿ;
ಮಗ್ಗಂ ವೇಸಾಲಿತೋ ಯಾವ, ಸಾವತ್ಥಿನಗರಂ ಯಥಾ.
ವಿಸ್ಸಜ್ಜೇತ್ವಾ ¶ ತಹಿಂ ಭೋಗಂ, ಸಬ್ಬಂ ಥೇರಸ್ಸ ಸೋ ಪಿತಾ;
ರಾಜಾ ಮೋಗ್ಗಲಿಪುತ್ತಸ್ಸ, ಥೇರಸ್ಸಾ’ಗಮನೇ ವಿಯ.
ದತ್ವಾ ತತ್ಥ ಮಹಾದಾನಂ, ಕಪಣದ್ಧಿವನಿಬ್ಬಕೇ;
ಭಿಕ್ಖವೋಪಿ ಚ ತೋಸೇತ್ವಾ, ಪಚ್ಚಯೇಹಿ ಚತೂಹಿ’ಪಿ.
ಥೇರಸ್ಸಾ’ಗಮನೇ ಏವಂ, ಪಸ್ಸತೂತಿ ಮಹಾಜನೇ;
ಗಹೇತ್ವಾ ತಂಮಹನ್ತೇನ, ಸಕ್ಕಾರೇನ ಮಹಾಯಸೋ.
ತಮ್ಹಾ ಓರುಯ್ಹ ಸೋ ಮಹಾ, ಸಯಂ ಹುತ್ವಾ ಪುರೇಚರೋ;
ಭಿಕ್ಖವೋ ಚಾಪಿ ಕತ್ವಾನ, ಪರಿವಾರೇ ಸಮನ್ತತೋ.
ಥೇರಸ್ಸ ಬಿಮ್ಬಂ ಸೋವಣ್ಣಂ, ಖಿರಸಾಗರಮಜ್ಝಗೋ;
ಸಞ್ಝಾ ಘನಪರಿಕ್ಖಿತ್ತೋ, ಹೇಮಮೇರು’ವ ಸೋಭಥ.
ವೇಸಾಲಿನಗರಂ ಸುತ್ತಂ, ದೇಸೇತುಂ ಲೋಕನಾಯಕೋ;
ಅಗಮಾ ಏವಮೇವಾತಿ, ದಸ್ಸೇಸಿ ಚ ಮಹಾಜನಂ.
ಏವಂ ಕರೋನ್ತೋ ಸಕ್ಕಾರ-ಸಮ್ಮಾನಂ ಸೋ ನರಾಸಭೋ;
ನಗರಸ್ಸ’ಸ್ಸ ಪಾಚಿನ-ದ್ವಾರಪಸ್ಸೇ ಸಯಂಕತಂ.
ಉಪಸಙ್ಕಮ್ಮ ಸಾಯಣ್ಹೇ, ವಿಹಾರಂ ಸೋತ್ಥಿಯಾ ಕರಂ;
ತೀಹಂ ತತ್ಥಾಪಿ ವಾಸೇಸಿ, ಬಿಮ್ಬಂ ತಂ ಜಿನಸುನುನೋ.
ನಗರಂ ಸಾಧುಸಜ್ಜೇತ್ವಾ, ತತೋ ದ್ವಾದಸಮೇ ದಿನೇ;
ಸತ್ಥುಸ್ಸಾ’ದಿಪ್ಪವೇಸಮ್ಹಿ, ಪುರಂ ರಾಜಗಹಂ ಯಥಾ.
ಪಟಿಮಂ ನೀಹರಿತ್ವಾ ತಂ, ವಿಹಾರಂ ಸೋತ್ಥಿಯಾ ಕರಂ;
ನಗರೇ ಸಾಗರಾಕಾರೇ, ವತ್ತಮಾನೇ ಮಹಾಮಹೇ.
ಮಹಾವಿಹಾರಂ ನೇತ್ವಾನ, ತೇಮಾಸಂ ಬೋಧಿಯಙ್ಗಣೇ;
ನಿವಾಸೇತ್ವಾ ಪವೇಸೇತ್ವಾ, ತೇನೇವ ವಿಧಿನಾ ಪುರಂ.
ರಾಜಗೇಹಸಮೀಪಮ್ಹಿ, ಪುಬ್ಬದಕ್ಖಿಣಕೋಣಕೇ;
ಪಟಿಬಿಮ್ಬಸ್ಸ ಕಾರೇಸಿ, ತಸ್ಸ ಸಾಧುನಿವೇಸನಂ.
ಕಾರೇತ್ವಾ ಇದ್ಧಿಯಾದೀನಂ, ಪಟಿಮಾಯೋ ವಿಸಾರದೋ;
ಥೇರೇನ ಸಹ ತತ್ಥೇ’ವ, ನಿವೇಸೇಸಿ ಮಹಾಪತಿ.
ಆರಕ್ಖಂ ಪಟ್ಠಪೇತ್ವಾ, ಪೂಜಾಯ ಚ ಪರಿಬ್ಬಯಂ;
ಅನುಸಂವಚ್ಛರಂ ಕಾತುಂ, ಏವಮೇವ ನಿಯೋಜಯಿ.
ತಸ್ಸಾಣಮನುರಕ್ಖನ್ತಾ ¶ , ರಾಜಾ ತಬ್ಬಂಸಿಕಾ ಇಧ;
ಯಾವ’ಜ್ಜಪರಿರಕ್ಖನ್ತಿ, ತಂ ವಿಧಿಂ ನ ವಿನಾಸಿಯ.
ಪವಾರಣಾದಿನೇ ನೇತ್ವಾ, ವಿಹಾರಂ ನಗರಾ ತತೋ;
ಕಾತುಂ ತೇರಸಿಯಂ ಪೂಜಂ, ಅನುವಸ್ಸಂ ನಿಯೋಜಯಿ.
ವಿಹಾರೇ ಅಭಯೇ ತಿಸ್ಸ-ವಸಭೇ ಬೋಧಿಪಾದಪೇ;
ಸಿಲಾವೇದಿಞ್ಚ ಕಾರೇಸಿ, ಪಾಕಾರಞ್ಚ ಮನೋಹರಂ.
ನವಮೇ ತಸ್ಸ ವಸ್ಸಮ್ಹಿ, ದಾಠಾಧಾತುಂ ಮಹೇಸಿನೋ;
ಬ್ರಾಹ್ಮಣೀಕಾಚಿ ಆದಿಯ, ಕಾಲಿಙ್ಗಮ್ಹಾ ಇಧಾನಯಿ.
ದಾಠಾಧಾತುಸ್ಸ ವಂಸಮ್ಹಿ, ವುತ್ತೇನ ವಿಧಸನಂ;
ಗಹೇತ್ವಾ ಬಹುಮಾನೇನ, ಕತ್ವಾ ಸಮ್ಮಾ ನ ಮುತ್ತಮಂ.
ಪಕ್ಖಿಪಿತ್ವಾ ಕರಣ್ಡಮ್ಹಿ, ವಿಸುದ್ಧಫಲಿಕುಮ್ಭವ್ಹೇ;
ದೇವಾನಂಪಿಯತಿಸ್ಸೇನ, ರಾಜವತ್ಥುಮ್ಹಿ ಕಾರಿತೇ.
ಧಮ್ಮಚಕ್ಕವ್ಹಯೇ ಗೇಹೇ, ವಡ್ಢಯಿತ್ಥ ಮಹೀಪತಿ;
ತತೋ ಪಟ್ಠಾಯ ತಂ ಗೇಹಂ, ದಾಠಾಧಾತುಘರಂ ಅಹು.
ರಾಜಾ ಸತಸಹಸ್ಸಾನಂ, ನವಕಂ ಪುಣ್ಣಮಾನಸೋ;
ವಿಸ್ಸಜ್ಜೇತ್ವಾ ತತೋ’ಕಾಸಿ, ದಾಠಾಧಾತು ಮಹಾಮಹಂ.
ಅನುಸಂವಚ್ಛರಂ ನೇತ್ವಾ, ವಿಹಾರಮಭಯುತ್ತರಂ;
ತಸ್ಸ ಪೂಜಾವಿಧಿಂ ಕಾತು, ಮೇವ ರೂಪಂ ನಿಯೋಜಯಿ.
ಅಟ್ಠಾರಸ ವಿಹಾರೇ ಚ, ಕಾರಾಪೇಸಿ ಮಹೀಪತಿ;
ಅನುಕಮ್ಪಾಯ ಪಾಣೀನಂ, ವಾಪಿಯೋ ಚ ಥಿರೋದಿಕಾ.
ಬೋಧಿ ಪೂಜಾದಿ ಪುಞ್ಞಾನಿ, ಅಪ್ಪಮೇಯ್ಯಾನಿ ಕಾರಿಯ;
ಅಟ್ಠವೀಸತಿಮೇ ವಸ್ಸೇ, ಗಭೋ ಸೋ ತಸ್ಸ ಯಾ ಗತಿ.
ಕುಮಾರೋ ಜೇಟ್ಠತಿಸೋ’ಥ, ಭಾತಾ ತಸ್ಸ ಕನಿಟ್ಠಕೋ;
ಛತ್ತಂ ಲಙ್ಘೇಸಿ ಸಂಕಾಯಂ, ದನ್ತಸಿಪ್ಪಮ್ಹಿ ಕೋವಿದೋ.
ಕತ್ವಾ ಕಮ್ಮಾನಿ ಚತ್ರಾನಿ, ದುಕ್ಕರಾನಿ ಮಹೀಪತಿ;
ಸಿಪ್ಪಾಯತನ ಮೇತಂ ಸೋ, ತಿಕ್ಖಾಪೇಸಿ ಬಹೂಜನೇ.
ಅಣತ್ತೋ ಪಿತುನಾ’ಕಾಸಿ, ಇದ್ಧಿಹಿ ವಿಯ ನಿಮ್ಮಿತಂ;
ಬೋಧಿಸತ್ತ ಸರೂಪಞ್ಚ, ರೂಪಂ ಸಾಧು ಮನೋಹರಂ.
ಅಪಸಯಞ್ಚ ¶ ಪಲ್ಲಙ್ಕಂ, ಛತ್ತಂ ರತನಮಣ್ಡಪಂ;
ಚಿತ್ರದನ್ತಮಯಂ ಕಿಞ್ಚಿ, ತಸ್ಸ ಕಮ್ಮಂ ತಹಿಂ ತಹಿಂ.
ಕತ್ವಾ ಸೋ ನವವಸ್ಸಾನಿ, ಲಂಕಾದೀಪಾನುಸಾಸನಂ;
ಅನೇಕಾನಿ ಚ ಪುಞ್ಞಾನಿ, ಯಥಾಕಮ್ಮಮುಪಾಗಮಿ.
ಬುದ್ಧದಾಸೋ ತತೋ ತಸ್ಸ, ಪುತ್ತೋ ಆಸಿ ಮಹೀಪತಿ;
ಗುಣಾನಂ ಆಕರೋ ಸಬ್ಬ-ರತನಾನಂ’ವ ಸಾಗರೋ.
ಸುಖಂ ಸಬ್ಬಪಯೋಗೇಹಿ, ಕರೋನ್ತೋ ದೀಪವಾಸಿನಂ;
ರಕ್ಖಮಾಲಕಮನ್ದಂ’ವ, ಪುರಂ ವಸ್ಸವಣೋ ಧನೀ.
ಪಞ್ಞಾ ಪುಞ್ಞಗುಣೂಪೇತೋ, ವಿಸುದ್ಧಕರುಣಾಲಯೋ;
ತಥಾ ದಸಹಿ ರಾಜೂನಂ, ಧಮ್ಮೇಹಿ ಸಮುಗಾಗತೋ.
ಚತಸ್ಸೋ ಅಗತಿ ಹಿತ್ವಾ, ಕಾರಯನ್ತೋ ವಿನಿಚ್ಛಯಂ;
ಜನಂ ಸಙ್ಗಹವತ್ಥೂಹಿ, ಸಙ್ಗಹೇಸಿ ಚತೂಹಿಪಿ.
ಚರಿಯಂ ಬೋಧಿಸತ್ತಾನಂ, ದಸ್ಸೇನ್ತೋ ಸಕ್ಖಿಪಾಣಿನಂ;
ಪಿತಾ’ವ ಪುತ್ತೇ ಸೋ ಸತ್ತೇ, ಅನುಕಮ್ಪಿತ್ಥ ಭೂಪತಿ.
ದಳಿದ್ದೇ ಧನದಾನೇನಾ-ಕಾಸಿ ಪುಣ್ಣಮನೋರಥೇ;
ಸುಖಿತೇ ಸಬ್ಬಭೋಗಾನಂ, ಜೀವಿತಸ್ಸ ಚ ಗುತ್ತಿಯಾ.
ಸಾಧವೋ ಸಙ್ಗಹೇನಾ’ಥ, ನಿಗ್ಗಹೇನ ಅಸಾಧವೋ;
ಗಿಲಾನೇ ವೇಜ್ಜಕಮ್ಮೇನ, ಸಙ್ಗಹೇಸಿ ಮಹಾಪತಿ.
ಅಥೇಕ ದಿವಸಂ ರಾಜಾ, ಹತ್ಥಿಕ್ಖನ್ಧವರಂ ಗತೋ;
ತಿಸ್ಸವಾಪಿಂ ನಹಾನತ್ತಂ, ಗಚ್ಛಮಾನೋ ಮಹಾಪಥೇ.
ಅದ್ದಸೇ’ಕಂ ಮಹಾನಾಗಂ, ಕುಚ್ಛಿರೋಗ ಸಮಪ್ಪಿತಂ;
ಪುತ್ತಭಾಗ ವಿಹಾರಸ್ಸ, ಪಸ್ಸೇ ವಮ್ಮಿಕಮತ್ಥಕೇ.
ಉತ್ತಾನ ಮುದರೇ ರೋಗಂ, ದಸ್ಸೇತುಂ ಗಣ್ಡಸಞ್ಞಿತಂ;
ನಿಪನ್ನಂಸೋ’ಥ ಚಿನ್ತೇಸಿ, ತತೋ ರೋಗೀತಿ ನಿಚ್ಛಯಂ.
ಅಥೋ’ರುಯ್ಹ ಮಹಾನಾಗಂ, ಮಹಾನಾಗ ಸಮೀಪಗೋ;
ಏವಮಾಹ ಮಹಾನಾಗೋ, ಮಹಾನಾಗಮನಾಗವಾ.
‘‘ಕಾರಣಂ ತೇ ಮಹಾನಾಗ, ಞಾತಮಾಗಮನೇ ಮಯಾ;
ಕುಮ್ಹೇ ಖಲು ಮಹಾತೇಜಾ, ಖಿಪ್ಪಂ ಕುಪ್ಪಿತಸೀಲಿನೋ.
ತಸ್ಮಾ ಫುಸಿತ್ವಾ ತಂ ಕಮ್ಮಂ, ಕಾತುಂ ಸಕ್ಕಾ ನ ತೇ ಮಯಾ;
ಅಫುಸಿತ್ವಾಪಿ ನೋ ಸಕ್ಕಾ, ಕಿನ್ನುಕಾತಬ್ಬಮೇತ್ಥೀ’ತಿ.
ಏವಂ ¶ ಪುತ್ತೇ ಫಣಿನ್ದೋ ಸೋ, ಕೇವಲಂ ಫಣಮತ್ತನೋ;
ಬಿಲಸ್ಸ’ನ್ತೋ ಪವೇಸೇತ್ವಾ, ನಿಪ್ಪಜ್ಜಿತ್ಥ ಸಮಾಹಿತೋ.
ಅಥೇ’ನ ಮುಪಸಙ್ಕಮ್ಮ, ಉಚ್ಛಙ್ಗಗತಮತ್ತನೋ
ಸತ್ಥಂ ಗಹೇತ್ವಾ ಫಾಲೇತ್ವಾ, ಉದರಂ ತಸ್ಸ ಭೋಗಿನೋ.
ನೀಹರಿತ್ವಾ ತತೋ ದೋಸಂ, ಕತ್ವಾ ಭೇಸಜ್ಜ ಮುತ್ತಮಂ;
ಸಪ್ಪಂ ತಂ ತಙ್ಖಣೇನೇವ, ಅಕಾಸಿ ಸುಖಿತಂ ತದಾ.
ಅತ್ತಾನ ಮೇವಂ ಥೋಮೇಸಿ, ‘‘ಮಹಾಕಾರುಞ್ಞತಂ ಮಮ;
ತಿರಚ್ಛಾನಾಪಿ ಜಾನಿಂಸು, ಸಾಧು ರಜ್ಜನ್ತಿ ಮೇ ಕತಂ.
ದಿಸ್ವಾ ಸುಖಿತಮತ್ತಾನಂ, ಪನ್ನಗೋಸೋ ಮಹೀಪತಿಂ;
ಪೂಜೇತುಂ ತಸ್ಸ ಪಾದಾಸಿ, ಮಹಗ್ಘಂ ಮಣಿಮತ್ತನೋ.
ಸಿಲಾಮಯಾಯ ಸಮ್ಬುದ್ಧ-ಪಟಿಮಾಯ ಅಕಾರಯಿ;
ಮಿಣಿಂ ತಂ ನಯನಂ ರಾಜಾ, ವಿಹಾರೇ ಅಭಯುತ್ತರೇ.
ಏಕೋಪಿ ಭಿಕ್ಖು ಭಿಕ್ಖನ್ತೋ, ಗಾಮಮ್ಹಿ ಥುಸವಿತ್ಥಿಕೇ;
ಸುಕ್ಖಂ ಭಿಕ್ಖಂ ಲಭಿತ್ವಾನ, ಖೀರಭಿಕ್ಖಾಯ ಸಞ್ಚರಂ.
ಖೀರಂ ಸಪ್ಪಾಣಕಂ ಲದ್ಧಾ, ಪರಿಭುಞ್ಜಿತ್ಥ ಕುಚ್ಛಿಯಂ;
ಪಾಣಕಾ ಬಲವೋ ಹುತ್ವಾ, ಉದರಂ ತಸ್ಸ ಖಾದಿಸುಂ.
ತತೋ ಸೋ ಉಪಸಙ್ಕಮ್ಮ, ತಂ ನಿವೇದೇಸಿ ರಾಜಿನೋ;
ರಾಹ ‘‘ಜಾತೋ ಸುಲೋ’ಯಂ, ಕದಾ ಹಾರೇಸಿ ಕೀದಿಸಂ.
ಸೋ ಆಹ’’ ಥುಸವಿತ್ಥಿಮ್ಹಿ, ಗಾಮೇ ಖೀರೇನ ಭೋಜನೇ;
ಭುತ್ತೇ’ತಿ ರಾಜಾ ಅಞ್ಞಾಸಿ, ಖೀರಂ ಸಪ್ಪಾಣಕಂ’’ಇತಿ.
ತದೇವ ಅಸ್ಸೋ ಏಕೋಪಿ, ಸಿರಾವೇಧ ತಿಕಿಚ್ಛಿಯೋ;
ರಾಜಾ ತಸ್ಸ ಸಿರಾವೇಧಂ, ಕತ್ವಾ ಆದಾಯ ಲೋಹಿತಂ.
ಪಾಯೇತ್ವಾ ಸಮಣಂ ಆಹ, ಮುಹುತ್ತಂ ವೀತಿನಾಮಯ;
‘‘ಅಸ್ಸಲೋಹಿತಮಣ’’ನ್ತಿ, ತಂ ಸುತ್ವಾ ಸಮಣೋವಮಿ.
ಪಾಣಕಾ ಲೋಹಿತೇನೇವ, ನಿಕ್ಖಮಿಂಭು ಸುಖೀ ಅಹು;
ಭಿಕ್ಖುಂ ರಾಜಾ ನಿವೇದೇಸಿ, ಕುಚ್ಛಿಮೇವಂ ಪನತ್ತನೋ.
‘‘ಏಕಸತ್ಥಪಹಾರೇನ ¶ , ಪಾಣಕಾ ಸಮಣೋ ಹಯೋ;
ಕತಾ ಅರೋಗಾ ಸಮ್ಮಮೇ, ವೇಜ್ಜಕಮ್ಮ ಮಹೋ’’ಇತಿ.
ಪಿವನ್ತೋ ತೋಯಮೇಕೋ ಹಿ,
ದೇಡ್ಡುಭಣ್ಡಂ ಮಜಾನಿಯ;
ಅಜ್ಝೋಹರಿತದಾ ಆಸಿ,
ತತೋ ಜಾತೋ’ತಿ ದೇಡ್ಡುಭೋ.
ಅನ್ತೋ ತು ದಿತ್ಥತುಣ್ಡೇನ, ತೇನ ದುಕ್ಖೇನ ಪೀಳಿತೋ;
ರಾಜಾನಂ ಮಗಮಾ ರಾಜಾ, ನಿದಾನಂ ತಸ್ಸ ಪುಚ್ಛಿಯ.
ಅನ್ತೋ ತು ದಿತ್ಥತುಣ್ಡೇನ, ತೇನ ದುಕ್ಖೇನ ಪೀಳಿತೋ;
ರಾಜಾನಂ ಮಗಮಾ ರಾಜಾ, ನಿದಾನಂ ತಸ್ಸ ಪುಚ್ಛಿಯ.
ಅಏನ್ತಾ ಸಪ್ಪೋ’ತಿ ವಿಞ್ಞಾಯ, ಸತ್ತಾಹಮುಪವಾಸಿಯ;
ಸುನ್ಹಾತಸು ವಿಲಿತ್ತಞ್ಚ, ಸಯನೇ ಸಾಧು ಸನ್ಥತೇ.
ಸಯಾಪೇಸಿ ತತೋ ಸೋ’ತಿ, ನಿದ್ದಾಯ ಮುಖಮತ್ತನೋ;
ವಿವರಿತ್ವಾ ತದಾ ಸುತ್ತೋ, ತತೋ ತಸ್ಸ ಮುಖನ್ತಿಕೇ.
ಮಂಸಪೇಸಿಂ ಠಪಾಪೇಸಿ, ಸರಜ್ಜುಂ ತಸ್ಸ ನಿಗ್ಗತೋ;
ಗನ್ಧೇನ ತಂ ಡಂಸಿತ್ವಾನ, ಅನ್ತೋ ವಿಸಿತುಮಾರಭಿ.
ರಜ್ಜುಯಾ’ಥ ಗಹೇತ್ವಾನ, ಸಮಾಕಡ್ಢಿಕ ಪಾಣಿಯಂ;
ಉದಕೇ ಪಾತಯಿತ್ವಾನ, ಇದಂ ವಚನಮಬ್ರವಿ.
‘‘ವೇಜ್ಜೋ ಅಹೋಸಿ ಸಮ್ಮಾಸ-ಮ್ಬುದ್ಧಸ್ಸ ಕಿರ ಜೀವಕೋ;
ಕಮ್ಮಂ ವಿಜ್ಜತಿ ಲೋಕಸ್ಸ, ಕತಂ ಕಿಂತೇನ ದುಕ್ಕರಂ.
ಈದಿಸಂ ಕಸಿರಾಸೋ’ಪಿ, ಕಮ್ಮಂ ನತ್ಥೇ’ತ್ಥ ಸಂಸಯೋ;
ಸಬ್ಬಾದರೇನ ಕುಬ್ಬನ್ತೋ, ಅಹೋ ಪುಞ್ಞೋ ದಯೋ ಮಮ.
ತಥಾ ಹೇಲ್ಲೋಲಿಗಾಮಮ್ಹಿ, ಚಣ್ಡಾಲಿ ಮುಳ್ಹಗಬ್ಭಿನಿಂ;
ಜಾತಂ ಸತ್ತಸು ವಾರೇಸು, ಸಗಬ್ಭಂ ಸುಖಿತಂ ಅಕಾ.
ವಾತಬೋಧೇನ ಏಕೋ’ಪಿ, ಭಿಕ್ಖು ಉಟ್ಠಾಪಿತೋ ಅಹು;
ಗೋಪಾನಸೀ ಗತೇತಮ್ಹಿ, ದುಕ್ಖಾಮೋಚೇಸಿ ಬುದ್ಧಿಮಾ.
ಪಿವನ್ತಸ್ಸಾಪಿ ಮಣ್ಡೂಕ, ಜೀಬಯುತ್ತಂ ಜಲಂ ಲಹುಂ;
ನಾಸಿಕಾ ಬಿಲತೋ ಗನ್ತ್ವಾ, ಬೀಜಮಾರುಯ್ಹ ಮತ್ಥಕಂ.
ಭಿಜ್ಜಿತ್ವಾ ಆಸಿ ಮಣ್ಡೂಕೋ, ಸೋ ವುದ್ಧೋ ತತ್ಥ ಗಚ್ಛತಿ;
ಮೇಘಸ್ಸಾ’ಗಮನೇ ತೇನ, ಸೋ’ನಿಬ್ಬಜ್ಜತಿ ಮಾಣವೋ.
ಫಾಲೇತ್ವಾ ¶ ಮತ್ಥಕಂ ರಾಜಾ, ಮಣ್ಡೂಕಮಪನೀಯ ಸೋ;
ಕಪಾಲಾನಿ ಘಟೇತ್ವಾನ-ಕಾಸಿ ಪಾಕತಿಕಂ ಖಣೇ.
ಹಿತತ್ಥಂ ದೀಪಾವಾಸಿನಂ, ಗಾಮೇ ಗಾಮೇ ಮಹೀಪತಿ;
ಕಾರೇತ್ವಾ ವೇಜ್ಜಸಾಲಾಯೋ, ವಜ್ಜೇ ತತ್ಥ ನಿಯೋಜಯಿ.
ಸಬ್ಬೇಸಂ ವಜ್ಜಸತ್ಥಾನಂ, ಕತ್ವಾ ಸಾರತ್ಥಸಙ್ಗಹಂ;
ಠಪೇಸಿ ವೇಜ್ಜೇ ದೀಪಸ್ಸ, ತಿಕಿಚ್ಛತ್ಥಮನಾಗತೇ;
ಯೋಜೇಸಿ ವೇಜ್ಜ ಮೇಕೇಕಂ, ರಾಜಾ ಗಾಮ ದ್ವಿಪಞ್ಚಕೇ.
ಅದಾ ವಿಸದ್ಧ ಖೇತ್ತಾನಂ, ವೇಜ್ಜಾನಮುಪಜೀವನಂ;
ವೇಜ್ಜೇಹತ್ಥೀನಮಸ್ಸಾನಂ, ಬಲಸ್ಸ ಚ ನಿಯೋಜಯಿ.
ಪಿಟ್ಠಸಪ್ಪಿನಮನ್ವಾನಂ, ಸಾಲಾಯೋ ಚ ತಹಿಂ ತಹಿಂ;
ಕಾರೇಸಿ ಸಹ ಭೋಗೇನ, ಸಾಲಾಯೋ ಚ ಮಹಾಪಥೇ.
ನಿಚ್ಚಮಸ್ಸೋಸಿ ಸದ್ಧಮ್ಮಂ, ಸಕ್ಕತ್ವಾ ಧಮ್ಮಭಾಣಕೇ;
ಧಮ್ಮಭಾಣಕವಟ್ಟಞ್ಚ, ಪಟ್ಠಪೇಸಿ ತಹಿಂ ತಹಿಂ.
ಸಾಟಕನ್ತರತೋ ಕತ್ವಾ, ಸತ್ಥ ವಟ್ಟಿಂ ಮಹಾದಯೋ;
ದಿಟ್ಠೇ ದಿಟ್ಠೇ ಪಮೋಚೇಸಿ, ದುಕ್ಖಮ್ಹಾ ದುಕ್ಖಿತೇ ಜನೇ.
ಅಥೇಕ ದಿವಸಂ ರಾಜಾ, ರಾಜಾಭರಣ ಮಣ್ಡಿತೋ;
ಸದ್ಧಿಂ ಗಚ್ಛತಿ ಸೇನಾಯ, ದೇವೇಹಿ ವಿಯ ವಾಸವೋ.
ತಂ ದಿಸ್ವಾ ಸಿರಿಸೋಭಗ್ಗ-ಮಗ್ಗಂ ಪತ್ತಂ ಮಹೀ ಪತಿಂ;
ರಾಜಿದ್ಧಿಹಿ ವಿರಾಜನ್ತಂ, ಬದ್ಧವೇರೋ ಭವನ್ತರೇ.
ಕುಟ್ಠಿ ಏಕೋ ಪಕುಪ್ಪಿತ್ವಾ, ಹಟ್ಠೇನಾಹನಿಯಾ’ವತಿಂ;
ಪೋಥೇನ್ತೋ ತಞ್ಚ ಪೋಥೇನ್ತೋ, ಭೂಮಿಂ ಕತ್ತರಯಟ್ಠಿಯಾ.
ಅಕ್ಕೋಸೇಸಿ ಅನೇಕೇಹಿ, ಅಕ್ಕೋಸವಚನೇಹಿ ಚ;
ವಿಪ್ಪಕಾರಂಮಿಮಂ ದಿಸ್ವಾ, ದೂರತೋ’ವ ಮಹೀಪತಿ.
‘‘ನಾಹಂ ಸರಾಮಿ ಸತ್ತಸ್ಸ, ಕಸ್ಸಾ’ಪಿ ಕತಮಪ್ಪಿಯಂ;
ಪುಬ್ಬವೇರೀ ಅಯಂ ಜಾತು, ನಿಬ್ಬಾಪೇಸ್ಸಾಮಿತಂ’’ ಇತಿ.
ಅಣಾಪೇಸಿ ಸಮೀಪಟ್ಠಂ, ಪುರಿಸಂ ‘‘ಗಚ್ಛ ಕುಟ್ಠಿನೋ;
ಅಮುಕಸ್ಸಾ’ಭಿಜಾನಾಹಿ, ಚಿತ್ತಾಚಾರ’’ನ್ತಿ ಸೋ ತತೋ.
ಸಹಾಯೋ ¶ ವಿಯ ಕುಟ್ಠಿಸ್ಸ, ಸಮೀಪಮ್ಹಿ ನಿಸೀದಿಯ;
‘‘ರುಟ್ಠೋ ಕಿಮತ್ಥಂ ಭೋ ತ್ವ’’ನ್ತಿ, ಪುಚ್ಛಿ ಸಬ್ಬಮವೋಚ ಸೋ.
‘‘ದಾಸೋ ಮೇ ಬುದ್ಧದಾಸೋ’ಯಂ, ರಾಜಾಹು ಪುಞ್ಞಕಮ್ಮುನಾ;
ಅವಮಞ್ಞಾಯ ಮಂ ಮಯ್ಹಂ, ಪರತೋ ತೋ ಯಾತಿ ಹತ್ಥಿನಾ.
ಜಾನಾಪೇಸ್ಸಾಮಿ ಅತ್ತಾನಂ, ಕತಿಪಾಹೇನ ಸೋಯದಿ;
ಹತ್ಥಂ ಮೇ ಏತಿ ಕಾರೇತ್ವಾ, ಸಬ್ಬಂ ದಾಸಾನ ನಿಗ್ಗಹಂ.
ನೋ ಚೇ ಹತ್ಥಂ ಮಮಾ’ಯಾತಿ, ಮಾರೇತ್ವಾ ಗಲಲೋಹಿತಂ;
ಪಿವಿಸ್ಸಾಮಿ ನ ಸನ್ದೇಹೋ, ನ ಚಿರೇನೇವ ಪಸ್ಸಸಿ’’.
ಸೋ ಗನ್ತ್ವಾ ನರಪಾಲಸ್ಸ, ಪವತ್ತಿಂ ತಂ ನಿವೇದಯಿ;
‘‘ಪುಬ್ಬವೇರಿ ಮಮಾಯನ್ತಿ, ನಿಚ್ಛಿನಿತ್ವಾ ಮಹಾಮತಿ.
ವಿನೋ ದೇತುಮುಪಾಯೇನ, ಪುತ್ತಂವೇರನ್ತಿ ವೇರಿನೋ;
‘‘ಸಾಧು ಸಙ್ಗಣುತಂ ತ್ವ’’ನ್ತಿ, ಪುರಿಸಂ ತಂ ನಿಯೇಜಯಿ.
ಸೋ ಕುಟ್ಠಿಮುಪಸಙ್ಕಮ್ಮ, ಸಹಾಯೋ ಪಿಯ ಆಹತಂ;
‘‘ರಾಜಾನಂ ತಂ ವಿನಾಸೇತುಂ, ಚೇತೇತ್ವಾ ಕಾಲಮೇತ್ತಕಂ.
ಅಲಭನ್ತೋ ಸಹಾಯಂ ಮೇ, ನಾಸಕ್ಖಿ ತಸ್ಸ ಘಾತನೇ;
ಲದ್ಧಾತುಮ್ಹೇ ನಯಿಸ್ಸಾಮಿ, ಮತ್ಥಕಂ ಮೇ ಮನೋರಥಂ.
ಏಥ ಗೇಹೇ ವಸಿತ್ವಾ ಮೇ, ಹೋಥ ಮೇ ಅನುವತ್ತಕಾ;
ಅಹಮೇವ’ಸ್ಸ ನಾಸೇಮಿ, ಕತಿಪಾಹೇನ ಜೀವಿತಂ.
ಇತಿ ವತ್ವಾನ ತಂ ಕುಟ್ಠಂ, ನೇತ್ವಾ ಸೋ ಘರಮತ್ತನೋ;
ಸುನ್ಹಾತ ಸುವಿಲಿತ್ತಞ್ಚ, ನಿವತ್ಥಸುಖುಮಮ್ಬರಂ.
ಸುಭುತ್ತಮಧುರಾಹಾರಂ, ಯೋಬ್ಬನಿತ್ಥಿಕಥಾದರಂ;
ಸಯಾಪೇಸಿ ಮನುಞ್ಞಮ್ಹಿ, ಸಯನೇ ಸಾಧು ಸನ್ಥತೇ.
ಏತೇ ನೇವ ನಿಯಾಮೇನ, ಕತಿಪಾಹಂ ನೀವಾಸಿಯ;
ಞತ್ವಾ ತಂ ಜಾತವಿಸ್ಸಾಸಂ, ಸುಖಿತಂ ಪಿಣಿತಿನ್ದ್ರಿಯಂ.
‘‘ರಞ್ಞೋ ದಿನ್ನ’’ನ್ತಿ ವತ್ವಾನ, ಖಜ್ಜಭೋಜ್ಜಾದಿಕಂ ಅದಾ;
ದ್ವತ್ತಿಕ್ಖತ್ತುಂ ನಿಸೇಧೇತ್ವಾ, ತೇನ’ಜ್ಝಿಟ್ಠೋ ನಮಗ್ಗಹಿ.
ಭೂಪಾಲೇನ ಕಮೇನಾ’ಸಿ, ವಿಸ್ಸತ್ಥೋ’ತಿವ ಭೂಮಿಪೋ;
ಮತೋತಿ ಸುತ್ವಾ ತಸ್ಸಾ-ಸಿ ಹದಯಂ ಫಲಿತಂ ದ್ವಿಧಾ.
ಏವಂ ¶ ರೋಗೇ ತಿಕಿಚ್ಛೇಸಿ, ರಾಜಾ ಸಾರೀರಮಾನಸೇ;
ಠಪೇಸಿ ವೇಜ್ಜೇ ದೀಪಸ್ಸ, ತಿಕಚ್ಛತ್ಥ ಮನಾಗತೇ.
ಪಞ್ಚವೀಸತಿಹತ್ಥೇನ, ಪಾಸಾದೇ ನೋಪಸೋಭಿತಂ;
ಮಹಾವಿಹಾರೇಮೋರವ್ಹ-ಪರಿವೇಣಮಕಾರಯಿ.
ಸಮಣಂ ಗೋಳಪಾನುಞ್ಚ, ಅದಾ ಗಾಮದ್ವಯಂ ತಹಿಂ;
ಧಮ್ಮಘಾಸಕ ಭಿಕ್ಖೂನಂ, ಭೋಗೇ ಕಪ್ಪಿಯಕಾರಕೇ.
ವಿಹಾರೇ ಪರಿವೇಣೇ ಚ, ಸಮ್ಪನ್ನ ಚತುಪಚ್ಚಯೇ;
ವಾಪಿಯೋ ದಾನಸಾಲಾಯೋ, ಪಟಿಮಾಯೋಚ ಕಾರಯಿ.
ತಸ್ಸೇವ ರಞ್ಞೋ ರಜ್ಜಮ್ಹಿ, ಮಹಾಧಮ್ಮಕಥೀಯತಿ;
ಸುತ್ತಾನಿ ಪರಿವತ್ತೇಸಿ, ಸೀಹಳಾಯನಿರುತ್ತಿಯಾ.
ಅಭೀತಿ ಪುತ್ತಾ ತಸ್ಸಾ’ಸುಂ, ಸೂರಾವಿರಙ್ಗರೂಪಿನೋ;
ಅಸೀತಿಯಾ ಸಾವಕಾನಂ, ನಾಮಕಾಯಿಪದಸ್ಸನಾ.
ಸಾರಿಪುತ್ತಾದಿನಾಮೇಹಿ, ಪುತ್ತೇಹಿ ಪರಿವಾರಿತೋ;
ಬುದ್ಧದಾಸೋ ಸಸಮ್ಬುದ್ಧ-ರಾಜಾವಿಯ ವಿರೋಚಥ.
ಏವಂ ಕತ್ವಾ ಹಿತಂದೀಪ-ವೀಸೀನಂ ತಿದಿವಂ ಗತೋ;
ವಸ್ಸೇ ಏಕೂನತಿಂಸಮ್ಹಿ, ಬುದ್ಧದಾಸೋ ನರಾಧಿಪೋ.
ತತೋ ಜೇಟ್ಠಸುತೋ ತಸ್ಸ, ಉಪತಿಸ್ಸೋ’ಸಿ ಭೂಪತಿ;
ಸಬ್ಬರಾಜಗುಣೋಪೇಸೋ, ನಿಚ್ಚಸೀಲೋ ಮಹಾದಯೋ.
ದಸಾಪುಞ್ಞಕ್ರಿಯಾಹಿತ್ವಾ, ದಸಪುಞ್ಞಕ್ರಿಯಾ’ದೀಯಿ;
ರಾಜಧಮ್ಮೇಚ ಪೂರೇಸಿ, ರಾಜಪಾರಮಿತಾ ದಸ.
ಗಣ್ಹಿ ಸಙ್ಗಹವತ್ಥೂಹಿ, ಚಥೂಹಿ ಚ ಚತುದ್ದಿಸಂ;
ಮಹಾಪಾಳಿಮ್ಹಿ ದಾಪೇಸಿ, ರಾಜಾರಾಜಾನುಭೋಜನಂ.
ಉತ್ತರಮ್ಹಿ ದಿಸಾಭಾಗೇ, ಚೇತಿಯಮ್ಹಾ ತು ಮಙ್ಗಲಾ;
ಥೂಪಞ್ಚ ಪಟಿಮಾಗೇಹಂ, ಪಟಿಮಞ್ಚಾ’ಪಿ ಕಾರಯಿ.
ಕರೋನ್ತೋ ತಞ್ಚ ಸೋ ರಾಜಾ, ಮಾಖಿಜ್ಜನ್ತು ಜನಾ ಇತಿ;
ಕಾರಾಪೇಸಿ ಕುಮಾರೇಹಿ, ದಾಪೇತ್ವಾ ಗುಳಕಣ್ಡುಲಂ.
ರಾಜುಪ್ಪಲವ್ಹಯಂ ¶ ಗಿಜ್ಝ-ಕೂಟಂ ಪೋಕ್ಖರಪಾಸಯಂ;
ವಾಲಾಹಸ್ಸಞ್ಚ ಅಮ್ಬುಟ್ಠಿಂ, ಗೋಣ್ಡಿಗೋಮಮ್ಹಿ ವಾಪಿಕಂ.
ವಿಹಾರಂ ಖಣ್ಡರಾಜಿಞ್ಚ, ವಾಪಿಯೋ ಚ ಥಿರೋದಿಕಾ;
ಅಪ್ಪಮಾಣಾನಿ ಪುಞ್ಞಾನಿ, ಕಾರಾಪೇಸಿ ತಹಿಂ ತಹಿಂ.
ವಸ್ಸಾಮಾನೇಪಿ ಸೋ ವಸ್ಸೇ, ಸಯನೇ ಸನ್ನಿಸಿನ್ನಕೋ;
ಕೇವಲಂ ಪರಿಣಾಮೇಸಿ, ರತ್ತಿಂ ‘‘ಖೇದೋ ಜನಸ್ಸೀ’’ತಿ.
ಞತ್ವಾ ಅಮಚ್ಚೋ ತಂ ನೇತ್ವಾ, ಉಯ್ಯಾನಂ ಜಾದಯೀಘರಂ;
ಏವಂ ಪಟಿಚ್ಚ ಅತ್ತಾನಂ, ದುಕ್ಖಂ ನಾಕಾಸಿ ಪಾಣಿನಂ.
ಕಾಲೇ ತಸ್ಸಾ’ಸೀ ದುಕ್ಖಿತ್ತ-ರೋಗದುಕ್ಖೇಹಿ ಪೀಳಿತೋ;
ದೀಪೋ ದೀಪೋ ಪಮೋಪಾಪ-ತಮಸೋ ಸೋ ಸುಮಾನಸೋ.
ಭಿಕ್ಖೂ ಪುಚ್ಛಿತ್ಥ’’ಕಿಂಭನ್ತೇ, ದುಬ್ಭಿಕ್ಖಾದಿಭಯದ್ದಿತೇ;
ಲೋಕೇ ಲೋಕಹಿತಂ ನತ್ಥಿ, ಕತಂ ಕಿಞ್ಚಿ ಮಹೇಸೀನಾ.
ಗಹ್ಘಾರೋಹಣಸುತ್ತಸ್ಸ, ಉಪ್ಪತ್ತಿಂತಸ್ಸ ನಿದ್ದಿಸುಂ;
ಸುತ್ವಾ ತಂ ಸಬ್ಬಸೋವಣ್ಣಂ, ಬಿಮ್ಬಂ ಸಮ್ಬುದ್ಧಧಾತುನೋ.
ಕತ್ವಾ ಸತ್ಥುಸಿಲಾಪತ್ತಂ, ಸೋದಕಂ ಪಾಣಿಸಮ್ಪುಟೇ;
ಠಪೇತ್ವಾ ತಸ್ಸ ತೇ ರೂಪ-ಮಾರೋಪೇತ್ವಾ ಮಹಾರಥಂ.
ಸಯಂ ಸೀಲಂ ಸಮಾದಾಯ, ಸಮಾದೇತ್ವಾ ಮಹಾಜನಂ;
ಮಹಾದಾನಂ ಪವತ್ತೇತ್ವಾ, ಅಭಯಂ ತಮ್ಬಪಾಣಿನಂ.
ಅಲಙ್ಕತ್ವಾ ಚ ನಗರಂ, ದೇವಲೋಕಮನೋಹರಂ;
ದೀಪವಾಸೀಹಿ ಸಬ್ಬೇಹಿ, ಭಿಕ್ಖೂಹಿ ಪರಿವಾರಿತೋ.
ಓತರಿತ್ಥ ಮಹಾವೀಥಿಂ, ಭಿಕ್ಖೂ ತತ್ಥ ಸಮಾಗತಾ;
ಭಣನ್ತಾ ರತನಂ ಸುತ್ತಂ, ಸಿಞ್ಚಮಾನಾ ಜಲಂ ತಥಾ.
ರಾಜಗೇಹನ್ತಿಕೇ ವೀತಿ-ಮಗ್ಗೇ ಪಾಕಾರಸನ್ತಿಕೇ;
ವಿಚರಿಂಸು ತಿಯಾಮನ್ತೇ, ಕುರುಮಾನಾ ಪದಕ್ಖಿಣಂ.
ಭಿಜ್ಜಮಾನೇ’ರುಣೇ ವಸ್ಸಿ, ಮಹಾಮೇಘೋ ಮಹೀತಲೇ;
ರೋಗಾತುರಾಚ ಸಬ್ಬೇಪಿ, ಸುಖಿತಾಕಂಸು ಉಸ್ಸವಂ.
‘‘ಯದಾ ದುಬ್ಭಿಕ್ಖರೋಗಾದಿ-ಭಯಂ ದೀಪಮ್ಹಿ ಹೇಸ್ಸತಿ;
ಏವಮೇವ ಕರೋನ್ತೂ’’ತಿ, ನಿಯೋಜೇಸಿ ನರಾಧಿಪೋ.
ಆರುಳ್ಹೋ ¶ ಚೇತಿಯಂ ಕುನ್ತ-ಕಿಪಿಲ್ಲಾದಿಮವೇಕ್ಖಿಯ;
ಪುಚ್ಛಿತ್ವಾ ಮೋರಪಿಞ್ಚೇನ, ‘‘ಸಣಿಕಂ ಯನ್ತುವನಂತಿ ಚ.
ಸಙ್ಖಂ ಸೋದಕಮಾದಾಯ, ಚರತಾ’ಸನಧೋವನೇ;
ದಕ್ಖಿಣಪರಿತೋಣಮ್ಹಿ, ಕಾರೇತ್ವಾ ರಾಜಗೇಹತೋ.
ಉಪೋಸಥಘರಂ ಬುದ್ಧ-ಪಟಿಮಾಗೇಹ ಮೇವ ಚ;
ಪಾಕಾರೇನ ಪರಿಕ್ಖಿತ್ತಂ, ಉಯ್ಯಾನಞ್ಚ ಮನೋರಮಂ.
ಚಾತುದ್ದಸಿಂಪಞ್ಚದಸಿಂ, ಯಾ ಚ ಪಕ್ಖಸ್ಸ ಅಟ್ಠಮೀ;
ಪಾಟಿಹಾರಿಯಪಕ್ಖಞ್ಚ, ಅಟ್ಠಙ್ಗಸಮುಪಾಗತಂ.
ಉಪೋಸಥಂಸಮಾದಾಯ, ಸಾಪದಾನಂ ತಹಂ ವಸೀ;
ಯಾವಜೀವಞ್ಚ ಸೋ ಭುಞ್ಜಿ, ಮಹಾಪಾಳಿಮ್ಹಿ ಭೋಜನಂ.
ಚರನ್ತೋಚಕಲನ್ದಾನ ಮುಯ್ಯಾನೇ ಭತ್ತಮತ್ತನೋ;
ಕತ್ವಾ ನಿವಾಪಂ ದಾಪೇಸಿ, ತದಜ್ಜಾಪಿ ಚ ವತ್ತತಿ.
ಚೋರಂ ವಜ್ಜಮುಪನೀತಂ, ದಿಸ್ವಾ ಸಂವಿಗ್ಗಮಾನಸೋ;
ಛವಂ ಸುಸಾನಂ ಆನೇತ್ವಾ, ಖಿಪಿತ್ವಾ ಲೋಹಕುಮ್ಭಿಯಂ.
ದತ್ವಾ ಧಮಂ ಪಲಾಪೇತ್ವಾ, ಚೋರಂ ರತ್ತಿಯಮುಗ್ಗತೇ;
ಸೂರಿಯೇ ಕುಜ್ಝಿತೋ ಚೋರಂ-ವಿಯಝಾಪಯಿ ತಂ ಛವಂ.
ಅಕಾ ದೀಪಮ್ಹಿ ಸಬ್ಬೇಸಂ, ಚೇತಿಯಾನಂ ಮಹಾಮಹಂ;
ಥೂಪಾರಾಮೇ ಚ ಥೂಪಸ್ಸ, ಹೇಮಚುಮ್ಬಟಕಞ್ಚುಕಂ.
ದ್ವಾಚತ್ತಾಲೀಸವಸ್ಸಾನಿ, ಕತ್ವಾ ವಞ್ಚುಂಖಣಮ್ಪಿಸೋ;
ಕತ್ವಾ ಪುಞ್ಞಮುಪಾಗಞ್ಛಿ, ದೇವರಾಜಸಹಬ್ಯತಂ.
ರಞ್ಞೋ ತಸ್ಸ ಕನಿಟ್ಠೇನ, ಮಹಾನಾಮೇನ ವಲ್ಲಭಾ;
ದೇವೀ ಸತ್ಥಂ ನಿಪಾತೇತ್ವಾ, ತಮಠಾನಮ್ಹಿ ಮಾರಯಿ.
ಪಬ್ಬಜಿತ್ಕಾ ಕನಿಟ್ಠೋ ಸೋ, ಜೀವಮಾನಮ್ಹಿ ಭಾತರಿ;
ಹತೇ ರಾಜಿನಿ ಭೀತಾಯ, ಆವತ್ತಿತ್ವಾ’ಸಿ ಭೂಪತಿ.
ಮಹೇಸಿಂಅತ್ತನೋ’ಕಾಸಿ, ಮಹೇಸಿಂ ಭಾತುಘಾತಿನಿಂ;
ಗಿಲಾನಸಾಲಾ ಕಾರೇಸಿ, ಮಹಾಪಾಳಿಞ್ಚ ವಡ್ಢಯಿ.
ಲೋಹದ್ವಾರ ¶ ರಲಗ್ಗಾಮ-ಕೋಟಿಪಸ್ಸವನವ್ಹಯೇ;
ತಯೋ ವಿಹಾರೇ ಕತ್ವಾ’ದಾ, ಭಿಕ್ಖೂನಮಭಯುತ್ತರೇ.
ವಿಹಾರಂ ಕಾರಯಿತ್ವಾನ, ಧುಮರಕ್ಖಮ್ಹಿ ಪಬ್ಬತೇ;
ಮಹೇಸಿಯಾ ನಯೇನಾ’ದಾ, ಭಿಕ್ಖೂನಂ ಥೇರವಾದೀನಂ.
ನವಕಮ್ಮಞ್ಚ ಜಿಣ್ಣೇಸು, ವಿಹಾರೇಸು ಸಕಾರಯಿ;
ದಾನಸೀಲರತೋ ವತ್ಥು-ಪೂಜಕೋ ಚ ಅಹು ಸದಾ.
ಬೋಧಿಮಣ್ಡಸಮೀಪಮ್ಹಿ, ಜಾತೋ ಬ್ರೋಹ್ಮಣಮಾಣವೋ;
ವಿಜ್ಜಾಸಿಪ್ಪಕಲಾವೇದೀ, ತೀಸು ವೇದೇಸು ಪಾರಗೋ.
ಸಮ್ಮಾವಿಞ್ಞಾತಸಮಯೋ, ಸಬ್ಬವಾದವಿಸಾರದೋ;
ವಾದತ್ಥಿ ಜಮ್ಬುದೀಪಮ್ಹಿ, ಆಹಿಣ್ಡನ್ತೋ ಪವಾದಿಕೋ.
ವಿಹಾರಮೇಕಂ ಆಗಮ್ಮ, ರತ್ತಿಂ ಪಾತಞ್ಜಲಂ ಮತಂ;
ಪರಿವತ್ತೇಸಿ ಸಮ್ಪುಣ್ಣ-ಪದಂ ಸುಪರಿಮಣ್ಡಲಂ.
ತತ್ಥೇಕೋ ರೇವತೋನಾಮ, ಮಹಾಥೇರೋ ವಿಜಾನಿಯ;
‘‘ಮಹಾಪಞ್ಞೋ ಅಯಂ ಸತ್ಥೋ, ದಮೇತುಂ ವಟ್ಟತೀ’’ತಿ ಸೋ.
‘‘ಕೋ ನು ಗದ್ರಭರಾವೇನ, ವಿರವನ್ತೋ’’ತಿ ಅಬ್ರವಿ;
‘‘ಗದ್ರಭಾನಂ ರವೇ ಅತ್ಥಂ, ಕಿಂ ಜಾನಾಸೀ’’ತಿ ಆಹತಂ.
‘‘ಅಹಂ ಜಾನೇ’’ತಿ ವುತ್ತೋಸೋ, ಓತಾರೇಸಿ ಸಕಂ ಮತಂ;
ವುತ್ತಂ ವುತ್ತಂ ವಿಯಾಕಾಸಿ, ವಿರೋಧಮ್ಪಿ ಚ ದಸ್ಸಯಿ.
‘‘ತೇನಹಿ ತ್ವಂ ಸಕವಾದ-ಮೋತಾರೇಹೀ’’ತಿ ಚೋದಿತೋ;
ಪಾಳಿಮಾಹಾ’ಭಿಧಮ್ಮಸ್ಸ, ಅತ್ಥಮಸ್ಸ ನ ಸೋ’ಮಿಗಾ.
ಆಹ ಕಸ್ಸೇ’ಸಮನ್ತೋ’ತಿ, ಬುದ್ಧಮನ್ತೋ’ತಿ ಸೋಬ್ರವಿ;
‘‘ದೇಹಿ ಮೇ ತ’’ನ್ತಿ ವುತ್ತೇಹಿ, ‘‘ಗಣ್ಹು ಪಬ್ಬಜ್ಜತಂ’’ಇತಿ.
ಮನ್ತತ್ಥೀ ಪಬ್ಬಜಿತ್ವಾಸೋ, ಉಗ್ಗಣ್ಹಿ ಪಿಟಕತ್ತಯಂ;
‘‘ಏಕಾಯನೋ ಅಯಂ ಮಗ್ಗೋ’’, ಇತಿ ಪಚ್ಛಾ ತಮಗ್ಗಹಿ.
ಬುದ್ಧಸ್ಸ ವಿಯ ಗಮ್ಭೀರ-ಘೋಸತ್ತಾತಂ ವಿಯಾಕರುಂ;
‘‘ಬುದ್ಧಘೋಸೋ’’ತಿ ಘೋಸೋಹಿ, ಬುದ್ಧೋ ವಿಯ ಮಹೀತಲೇ.
ತತ್ಥ ಞಾಣೋದಯಂ ನಾಮ, ಕತ್ವಾ ಮಕರಣಂ ತದಾ;
ಧಮ್ಮಸಙ್ಗಣೀಯಾ’ಕಾಸಿ, ಕಚ್ಛಂ ಸೋ ಅಟ್ಠಸಾಲಿನಿಂ.
ಪತಿತ್ತಟ್ಠಕಥಞ್ಚೇವ ¶ , ಕಾರಾಮಾರಭಿಬುದ್ಧಿಮಾ;
ತಂ ದಿಸ್ವಾ ರೇವತೋ ಥೇರೋ, ಇದಂ ವಚನಮಬ್ರುವಿ.
ಪಾಳಿಮತ್ತಇಧಾನಿತಂ, ನತ್ಥಿ ಅಟ್ಠಕಥಾ ಇಧ;
ತಥಾಚರಿಯವಾದಾ ಚ, ಭಿನ್ನರೂಪಾ ನ ವಿಜ್ಜರೇ.
ಸೀಹಳಾಟ್ಠಕಥಾ ಸುದ್ಧಾ, ಮಹಿನ್ದೇನ ಮತೀಮತಾ;
ಸಂಗೀತಿತ್ತಯಮಾರುಳಂ, ಸಮ್ಮಾಸಮ್ಬುದ್ಧದೇಸಿತಂ.
ಸಾರಿಪುತ್ತಾದಿಗೀತಞ್ಚ, ಕಥಾಮಗ್ಗಂ ಸಮೇಕ್ಖಿಯ;
ಏಕಾ ಸೀಹಳಭಾಸಾಯ, ಸೀಹಳೇಸು ಪವತ್ತತಿ.
ತಂ ತತ್ಥ ಗನ್ತ್ವಾ ಸುತ್ವಾ ತಂ, ಮಾಗಧಾನಂ ನಿರುತ್ತಿಯಾ;
ಪರಿವತ್ತೇಸಿ ಸಾ ಹೋತಿ, ಸಬ್ಬಲೋಕಹಿತಾ ವಹಾ.
ಏವಂ ವುತ್ತೋ ಪಸನ್ನೋ ಸೋ, ನಿಕ್ಖಮಿತ್ವಾ ತತೋಇಮಂ;
ದೀಪಮಾಗಾ ಇಮಸ್ಸೇವ, ರಞ್ಞೋಕಾಲೇ ಮಹಾಮತಿ.
ಮಹಾವಿಹಾರಂ ಸಮ್ಪತ್ತೋ, ವಿಹಾರಂ ಸಬ್ಬಸಾಧೂನಂ;
ಮಹಾಪಧಾನಘರಂ ಗನ್ತ್ವಾ, ಸಙ್ಘಪಾಲಸ್ಸ ಸನ್ತಿಕಾ.
ಸೀಹಳಟ್ಠಕಥಾ ಸುದ್ಧಾ, ಥೇರವಾದಞ್ಚ ಸಬ್ಬಸೋ;
‘‘ಧಮ್ಮಸಾಮಿಸ್ಸ ಏಸೋವ, ಅಧಿಪ್ಪಾಯೋ’’ತಿ ನಿಚ್ಛಿಯ.
ತತ್ಥ ಸಙ್ಘಂ ಸಮಾನೇತ್ವಾ, ‘‘ಕಾತುಮಟ್ಠಕಥಾಮಮ;
ಪೋತ್ಥಕೇ ದೇಥ ಸಬ್ಬೇ’’ತಿ, ಆಹ ವೀಮಂಸಿತುಂ ಸತಂ.
ಸಙ್ಘೋ ಗಾಥಾದ್ವಯಂ ತಸ್ಸಾ-ದಾಸಿ ‘‘ಸಾಮತ್ತಿಯಂ ತವ;
ಏತ್ಥ ದಸ್ಸೇಹಿ ತಂ ದಿಸ್ವಾ, ಸಬ್ಬೇ ದೇಮಾ’’ತಿ ಪೋತ್ಥಕೇ.
ಪಿಟಕತ್ತಯಮೇತ್ಥೇವ, ಸದ್ಧಿಮಟ್ಠಕಥಾಯ ಸೋ;
ವಿಸುದ್ಧಿಮಗ್ಗ ನಾಮಾಕಾ, ಸಙ್ಗಹೇತ್ವಾ ಸಮಾಸತೋ.
ತತೋ ಸಙ್ಘಂ ಸಮುಹೇತ್ವಾ, ಸಮ್ಬುದ್ಧಮತಕೋವಿದಂ;
ಮಹಾಬೋಧಿಸಮೀಪಮ್ಹಿ, ಸೋ ತಂ ವಾಚೇತುಮಾರಭಿ.
ದೇವತಾ ತಸ್ಸ ನೇಪುಞ್ಞಂ, ಪಕಾಸೇತುಂ ಮಹಾಜನೇ;
ಛಾದೇಸುಂ ಪೋತ್ಥಕಂಸೋ’ಯಿ, ದ್ವತ್ತಿಕ್ಖತ್ತುಮ್ಪಿ ತಂ ಅಕಾ.
ವಾಚೇತುಂ ತತಿಯೇ ವಾರೇ, ಪೋತ್ಥಕೇ ಸಮುದಾಹಟೇ;
ಪೋತ್ಥಕದ್ವಯಮಞ್ಞಮ್ಪಿ, ಸಣ್ಠಾಪೇಸುಂ ತಹಿಂ ಮರೂ.
ವಾಚಯಿಂಸು ¶ ತದಾಭಿಕ್ಖೂ, ಪೋತ್ಥಕತ್ತಯ ಮೇಕತೋ;
ಗನ್ಥತೋ ಅತ್ಥತೋ ಚಾಪಿ, ಪುಬ್ಬಾಪರವಸೇನ ವಾ.
ಥೇರವಾದೇಹಿ ಪಾಳಿಹಿ, ಪದೇಹಿ ಬ್ಯಞ್ಜನೇಹಿ ಚ;
ಅಞ್ಞತ್ಥತ್ತಮಹೂನೇವ, ಪೋತ್ಥತ್ಥಕೇಸುಪಿ ತೀಸುಪಿ.
ಅಥ ಉಗ್ಘೋಸಯಿ ಸಙ್ಘೋ, ತುಟ್ಠಹಟ್ಠೋ ತಿಸೇಸತೋ;
‘‘ನಿಸ್ಸಂಸಯಾ’ಯಂ ಮೇತ್ತೇಯ್ಯೋ’’, ಇತಿ ವತ್ವಾ ಪುನಪ್ಪುನಂ.
ಸದ್ಧಿಮಟ್ಠಕಥಾಯಾ’ದಾ, ಪೋತ್ಥಕೇ ಪಿಟಕತ್ತಯೇ;
ಗನ್ಥಕಾರೇ ವಸನ್ತೋ ಸೋ, ವಿಹಾರೇ ದುರಸಙ್ಕರೇ.
ಪರಿವತ್ತೇಸಿ ಸಬ್ಬಾಪಿ, ಸೀಹಳಟ್ಠಕಥಾ ತದಾ;
ಸಬ್ಬೇಸಂ ಮೂಲಭಾಸಾಯ, ಮಾಗಧಾಯ ನಿರುತ್ತಿಯಾ.
‘‘ಸತ್ತಾನಂ ಸಬ್ಬಭಾಸಾನಂ, ಸಾ ಅಹೋಸಿ ಹಿತಾವಹಾ;
ಥೇರಿಯಾ ಚರಿಯಾಸಬ್ಬೇ, ಪಾಳಿಂವಿಯ ತಮಗ್ಗಯ್ಹಂ.
ಅಥ ಕತ್ತಬ್ಬಕಿಚ್ಚೇಸು, ಗಹೇತು ಪರಿನಿಟ್ಠಿತಿಂ;
ವನ್ದಿತುಂ ಸೋ ಮಹಾಬೋಧಿಂ, ಜಮ್ಬುದೀಪಮುಪಾಗಮಿ.
ಸುತ್ವಾ ದ್ವಾವೀಸವಸ್ಸಾನಿ, ಮಹಾನಾಮೋ ಮಹಾಮಹಿಂ;
ಕತ್ವಾ ಪುಞ್ಞಾನಿ ಚಿತ್ರಾನಿ, ಯಥಾ ಕಮ್ಮಮುಗಾಗಮಿ.
ಸಬ್ಬೇ’ಪೇ ತೇ ಧರಣೀಪತಯೋ ಮಚ್ಚುಮಚ್ಚೇತುಮನ್ತೇ,
ನೋ ಸಕ್ಖಿಂ ಸೂಪಚಿತಸುಖಬಲಾಸಾಧು ಸಮ್ಪನ್ನಭೋಗೋ;
ಏವಂ ಸಬ್ಬೇ ನಿಧನವಸಗಾ ಹೋನ್ತಿ ಸತ್ತಾ’ತಿ ನಿಚ್ಚಂ,
ರಾಗಂ ಸಮ್ಮಾ ವಿನಯತುಧನೇ ಜೀವಿತೇ ಚಾಪಿ ಧೀಮಾ.
ಸುಜನಪ್ಪಸಾದಸಂವೇಗತ್ಥಾಯ ಕತೇ ಮಹಾವಂಸೇ
ಪಞ್ಚರಾಜಕೋ ನಾಮ
ಸತ್ತತಿಂಸತಿಮೋ ಪರಿಚ್ಛೇದೋ.
ಅಟ್ಠತಿಂಸತಿಮ ಪರಿಚ್ಛೇದ
ದಸರಾಜಕೋ
ಮಹಾನಾಮ ¶ ಸುತೋ ಆಸಿ, ದಮಿಳೀ ಕುಚ್ಛಿಸಮ್ಭವೋ;
ಸೋತ್ಥಿಸೇನೋ, ತಥಾಸಙ್ಘೋ-ಧೀತಾ ಚಾ’ಸಿ ಮಹೇಸಿಯಾ.
ಸೋತ್ಥಿಸೇನೋ ತದಾ ರಜ್ಜಂ, ಪತ್ವಾ ಸಙ್ಘಯನಾಸಿತೋ;
ತಸ್ಮಿಂಯೇವ ದಿನೇ ಭೇರಿಂ, ಚರಾಪೇತ್ವಾ ತದಾ ತು ಸಾ.
ಅತ್ತನೋ ಸಾಮಿಕಸ್ಸದಾ, ಛತ್ತಗ್ಗಾಹಕಜನ್ತುನೋ;
ಛತ್ತಗ್ಗಾಹಕವಾಪಿಂ ಸೋ, ಕತ್ವಾ ಸಂವಚ್ಛರೇ ಮತೋ.
ಅಥ ಮಚ್ಚೋ ಮಹಾಪಞ್ಞೋ, ಸಹಾಯೋ ತಸ್ಸ ತಂ ಮತಂ;
ಅನ್ತೋವತ್ಥುಮ್ಹಿ ಝಾಪೇತ್ವಾ, ವೀಹಿಚೋರಂ ಮಹಾಬಲಂ.
ರಜ್ಜಯೋಗ್ಗೋತಿ ಚಿನ್ತೇತ್ವಾ, ಕತ್ವಾ ತಂ ಭೂಪತಿಂ ರಹೋ;
ಅನ್ತೋಯೇವ ನಿವಾಸೇತ್ವಾ, ರಾಜಾ ರೋಗಾತುರೋ ಇತಿ.
ಯಸಂ ರಜ್ಜಂ ವಿಚಾರೇಸಿ, ಛಣೇ ಪತ್ತೇ ಮಹಾಜನಾ;
ರಾಜಾ ಚೇ ಅತ್ಥಿ ಅಮ್ಹೇಹಿ, ಸದ್ಧಿಂ ಮೇತೂತಿ ಘೋಸಯುಂ.
ತಂ ಸುತ್ವಾ ನರಪಾಲೋ ಸೋ, ಸಬ್ಬಲಙ್ಕಾರಮಣ್ಡಿತೋ;
ಸಮಾನಂತೇ ಮಹಾನಾಗೇ, ನೇಸಯೋಗ್ಗಾ ಮಮಾ’ತಿಸೋ.
ದಾಟ್ಠಾಧಾತುಘರಠಾನೇ, ಸುವಾ ನಾಗಂ ಸಮಾದಿಸಿ;
ರಞ್ಞೋ ಆಣಾತಿ ವುತ್ತೇ ಸೋ, ಅಗಾ ಆರುಯ್ಹ ತಂ ಪುರಂ.
ಕತ್ವಾ ಪದಕ್ಖಿಣಂ ಗನ್ತ್ವಾ, ಪಾಚಿನದ್ವಾರತೋ ಬಹಿ;
ಪಠಮೇ ಚೇತಿಯಠಾನೇ, ಧಾತುನಾಗಂ ಸಮಪ್ಪಯಿ.
ಮಹಾಚೇತಿತ್ತಯೇ ಹತ್ಥಿ-ಪಾಕಾರೇ’ಕಾಸಿ ತೋರಣಂ;
ಮಿತ್ತಸೇನೋ ಬಹುಂ ಪುಞ್ಞಂ, ಕತ್ವಾ ವಸ್ಸೇನ ಸೋ ಚುತೋ.
ಮಿತ್ತಸೇನಂ ರಣೇ ಹನ್ತ್ವಾ, ದಮಿಳೋ ಪಣ್ಡುನಾಮಕೋ;
ಆಗತೋ ಪರತೀರಮ್ಹಾ, ಲಙ್ಕಾರಜ್ಜಮಕಾರಯಿ.
ಜನಾ ಕುಲೀನಾ ಸಬ್ಬೇಪಿ, ರೋಹಣಂ ಸಮುಪಾಗತಾ;
ಓರಗಙ್ಗಾಯ ಇಸ್ಸೇರಂ, ದಮಿಳಾ ಏವ ಕಪ್ಪಯುಂ.
ಯೇ ¶ ಸುಭಸ್ಸ ಬಲಟ್ಠಸ್ಸ, ಭೀತಾಮೋರಿಯವಂಸಜಾ;
ಬಲಾಯಿತ್ವಾ ನರಾವಾಸಂ, ಕಪ್ಪಯಿಂಸು ತಹಿಂ ತಹಿಂ.
ತೇಸಮಞ್ಞತಮೋ ನನ್ದಿ-ವಾಪಿ ಗಾಮೇ ಕುಟಿಮ್ಬಕೋ;
ಧಾತುಸೇನವ್ಹಯೋ ಆಸಿ, ದಾಠಾನಾಮೋ ಚ ತಂ ಸುತೋ.
ಗಾಮೇ ಅಮ್ಬಿಲಯಾಗುಮ್ಹಿ, ವಸಂ ಪುತ್ತೇ ದುವೇ ಲಭಿ;
ಧಾತುಸೇನಂ ಸಿಲಾತಿಸ್ಸ-ಬೋಧಿಂಚ ಸಮ್ಪಜಾತಿಕೇ.
ಮಾತುಸೋ ದರಿಯೋ ತೇಸಂ, ಸದ್ಧೋ ಪಬ್ಬಜ್ಜ ವತ್ತತಿ;
ದೀಘಸನ್ದಕತಾವಾಸೇ, ಧಾತುಸೇನಾಪಿ ಮಾಣವೋ.
ಸನ್ತಿಕೇ ತಸ್ಸ ಪಬ್ಬಜ್ಜ-ರುಕ್ಖಮೂಲಮ್ಹಿ ಏಕದಾ;
ಸಜ್ಝಾಯತಿ ಪವಿಸ್ಸಿತ್ಥ, ಮೇಘೋ ನಾಗೋತುಪಸ್ಸಿಯ.
ಪರಿಕ್ಖಿಪಿತ್ವಾ ಭೋಗೇಹಿ, ಛಾದಯಿತ್ವಾ ಫಣೇನ ಚ;
ಪೋತ್ಥಕಞ್ಚ ಕುಮಾರಞ್ಚ, ರಕ್ಖಿತಂ ಪಸ್ಸಿ ಮಾತುಲೋ.
ಸೀಸೇ ಆಕಿರಿ ಸಙ್ಕಾರಂ, ತಸ್ಸ ರುಟ್ಠೋ ಪರೋಯತಿ;
ತಸ್ಮಿಂ ಚಿತ್ತಂ ನ ದೂಸೇಸಿ, ತಮ್ಪಿ ದಿಸ್ವಾನ ಮಾತುಲೋ.
ಉತ್ತಮೋ ವತ’ಯಂ ಸತ್ತೋ, ರಾಜಾ ಹೇಸ್ಸತಿ ನಿಚ್ಛಯಂ;
ರಕ್ಖಿತಬ್ಬೋ’ತಿ ಆದಾಯ, ತಂ ವಿಹಾರಮುಪಾಗತೋ.
ಗೋಣಿಸಾದಿ ವಿಹಾರೇ’ಯಂ, ಕತ್ತಬ್ಬೋ ನೀತಿಮಾ ಇತಿ;
ಸಿಕ್ಖಾಪೇಸಿ ಕುಮಾರಂ ತಂ, ಪಣ್ಡುಕೋ ತಂ ವಿಜಾನಿಯ.
ಗಣ್ಹಥೇತನ್ತಿಪೇಸೇಸಿ, ಸೇವಕೇ ತಸ್ಸಾರತ್ತಿಯಂ;
ದಿಸ್ವಾನ ಸುಪಿನಂ ಥೇರೋ, ನೀಹರಿತ್ಥ ಕುಮಾರಕಂ.
ತಸ್ಮಿಂ ನಿಕ್ಖನ್ತಮತ್ತಮ್ಹಿ, ಸೇವಕಂ ಪರಿವಾರಿಯ;
ಪರಿವೇಣೇ ನ ಪಸ್ಸಿಂಸು, ತತೋ ನಿಕ್ಖಮ್ಮ ತೇ ಉಭೋ.
ದಕ್ಖಿಣಸ್ಮಿಂ ದಿಸಾಭಾಗೇ, ಗೋಣ ನಾಮಂ ಮಹಾನದಿಂ;
ಪತ್ವಾ ಸಮ್ಪುಣ್ಣಮಟ್ಠಂಸು, ಗನ್ತುಕಾಮಾಪಿ ವೇಗಸಾ.
ಯಥಾ ನದಿಯಂ ವಾರೇತಿ, ಅಮ್ಹೇ ತಂ ತ್ವಮ್ಪಿ ವಾರಯ;
ವಾಪಿಂಗಹೇತ್ವಾ ಏತ್ಥೇ’ತಿ, ವತ್ವಾ ಥೇರೋ ತದಾ ನದಿಂ.
ಓತರಿತ್ಥಕುಮಾರೇನ, ಸದ್ಧಿಂ ದಿಸ್ವಾನ ತೇ ಉಭೋ;
ನಾಗರಾಜಾ ತದಾ ಏಕೋ, ಪಿಟ್ಠಿಂ ಪಾದಾಸಿ ತೇನ ಸೋ.
ಉತ್ತರಿತ್ವಾ ಕುಮಾರಂ ತಂ, ನೇತ್ವಾ ಪಚ್ಚನ್ತಮಾವಸಂ;
ಲದ್ಧಾ ಖೀರೋದನಂ ಸುತ್ವಾ, ಸೇಸಂ ಪತ್ತೇನ ತಸ್ಸ’ದಾ.
ಚಿತ್ತಕಾರೇನ ¶ ಥೇರಮ್ಹಿ, ಭತ್ತಂ ಪಕ್ಖಿಪ್ಪ ಭೂಮಿಯಂ;
ಭುಞ್ಜಿ ಥೇರೋಪಿ ತಂ ಜಾನಿ, ಭುಞ್ಜ ತೇ ಯಂ ಮಹಿಂ ಇತಿ.
ಪಣ್ಡುರಾಜಾಪಿ ಕತ್ವಾನ, ರಜ್ಜಂ ವಸ್ಸಮ್ಹಿ ಪಞ್ಚಮೇ;
ಚುತೋ ಪುತ್ತೋ ಪಿಪಾರಿನ್ದೋ, ತತಿಯೋ ತಸ್ಸ ಭಾತುಕೋ.
ಕಣಿಟ್ಠೋ ಖುದ್ದಪಾರಿನ್ದೋ, ಕುಬ್ಬಂ ರಜ್ಜಂ ಮಹಾಮಹಿಂ;
ಧಾತುಸೇನಾನುಗೇ ಸಬ್ಬೇ, ವಿಹೇಠೇಸಿ ಮಹಾಜನೇ.
ಸಙ್ಗಹೇತ್ವಾ ಜನೇ ಸಾಧು-ಸೇನೋ ಯುಜ್ಜಿತ್ಥ ರಾಜಿನಾ;
ಸೋ ಸೋಳಸಹಿ ವಸ್ಸೇಹಿ, ಪುಞ್ಞಪಾಪಕರೋಮತೋ.
ನಿರಿತರೋ ತತೋ ಆಸಿ, ರಾಜಾಮಾಸದ್ವಯೇನ ತಂ;
ಧಾತುಸೇನೋ ವಿನಾಸೇಸಿ, ತೇನ ಕತ್ವಾ ಮಹಾಹವಂ.
ಹತೇ ತಸ್ಮಿಂ ಮಹೀಪಾಲೇ, ದಾಠಿಯೋ ದಮಿಳೋ ತತೋ;
ರಾಜಾ ವಸ್ಸತ್ಥ ಯೇ ಹುತ್ವಾ, ಧಾತುಸೇನಹತೋತತೋ.
ಪಿಟ್ಠಿಯೋ ದಮಿಳೋ ಸತ್ತ-ಮಾಸೇನ ನಿಧನಂ ಗತೋ;
ಧಾತುಸೇನೇನ ಯುಜ್ಝಿತ್ವಾ, ವಂಸೋ ಪಚ್ಛಿಜ್ಜಿ ದಾಮಿಳೋ.
ಅಥಾ’ಸಿ ರಾಜಾಲಙ್ಕಾಯಂ, ಧಾತುಸೇನೋ ಇರಾಧಿಪೋ;
ಭಾತರಾ ಸಹ ದೀಪಮ್ಹಿ, ದಮಿಳೇ ದೀಪಘಾತಕೇ.
ಉಪಾಯೇಹಿ ಅನೇಕೇಯಿ, ಏಕವೀಸಪ್ಪಮಾಣಕೇ;
ಖನ್ಧವಾರೇ ನಿವೇಸೇತ್ವಾ, ಕತ್ವಾ ಯುದ್ಧಮಸೇಸತೋ.
ಸೋಧೇತ್ವಾ ಮೇದಿನಿಂ ಸಾಧು, ಕತ್ವಾ ಚ ಸುಖಿತಂಜನಂ;
ಸಾಸನಞ್ಚ ಯಥಾಠಾನೇ, ಠಪೇಸಿ ಪರನಾಸಿತಂ.
ದಮಿಳೇ ಯೇ’ನುವತ್ತಿಂಸು, ಕುಲೀನಾ ಕುಲಗಾಮವಾ;
ತೇ ಮಂ ವಾ ಸಾಸನಂ ವಾ ನೋ, ರಕ್ಖಿಂಸೂ’ತಿ ಪಕುಪ್ಪಿಯ.
ತೇಸಂ ಗಾಮೇ ಗಹೇತ್ವಾನ, ಗಾಮೇ ಸ್ವಾಕಾಸಿರಕ್ಖಕೇ;
ರೋಹಣಾ’ಗಮ್ಮ ತೇ ಸಬ್ಬೇ, ಕುಲೀನಾ ತಮುಪಟ್ಠಹುಂ.
ತೇಸಂ ಸಕ್ಕಾರಸಮ್ಮಾನಂ, ಯಥಾಯೋಗಮಕಾಸಿ ಸೋ;
ಅಮಚ್ಚೇ ಅತ್ತನೋ ದುಕ್ಖ-ಸಹಾಯೇಚಾ’ಭಿ ತೋಸಯಿ.
ಬನ್ಧಾಪೇತ್ವಾ ಮಹಾಗಙ್ಗಂ, ಕೇದಾರೇ’ಕಾ ಥಿರೋದಕೇ;
ಮಹಾಪಾಳಮ್ಹಿ ಭಿಕ್ಖೂನಂ, ಸಾಲಿಭತ್ತಞ್ಚ ದಾಪಯಿ.
ಪಙ್ಗುರೋಗಾ ತುರಟ್ಟಾನಂ, ಸಾಲಾಯೋಕಾಸಿ ಬುದ್ಧಿಮಾ;
ಕಾಳವಾಪಿಂಚ ಗಣ್ಹಿತ್ವಾ, ಬನ್ಧಿ ಗೋಣಂ ಮಹಾನದಿಂ.
ಮಹಾವಿಹಾರಂ ¶ ಕತ್ವಾನ, ಪನ್ತಿಯುತ್ತಮನಾಕುಲಂ;
ತಥಾ ಬೋಧಿಘರಞ್ಚೇವ, ದಸ್ಸನೇಯ್ಯ ಮಕಾರಯಿ.
ಭಿಕ್ಖವೋ ಪರಿತೋಸೇತ್ವಾ, ಪಚ್ಚಯೇಹಿ ಚತೂಹಿಪಿ;
ಧಮ್ಮಾಸೋಕೋ’ವ ಸೋಕಾಸಿ, ಸಙ್ಗಹಂ ಪಿಟಕತ್ತಯೇ.
ಅಟ್ಠಾರಸವಿಹಾರೇ ಚ, ಥೇರಿಯಾನ ಮಕಾರಯಿ;
ಸಮ್ಪನ್ನಭೋಗೇ ದೀಪಮ್ಹಿ, ಅಟ್ಠಾರಸ ಚ ವಾಪಿಯೋ.
ಕಾಳವಾಪೀ ವಿಹಾರೋ ಚ, ಕೋಟಿಪಸ್ಸಾವನಾಮಕೋ;
ದಕ್ಖಿಣ ಗಿರಿನಾಮೋ ಚ, ವಿಹಾರೋ ವಡ್ಢಮಾನಕೋ.
ಪಣ್ಣವಲ್ಲಕಭೂತೋ ಚ, ಭಲ್ಲಾತಕಸನಾಮಕೋ;
ಪಾಸಾಣಸಿನ್ನೇ ದೇಸಮ್ಹಿ, ಧಾತುಸೇನೋ ಚ ಪಬ್ಬತೋ.
ಮಂ ಗನೋ ಥೂಪವಿಟ್ಠಿ ಚ, ಧಾತುಸೇನೋಪಿ ಉತ್ತರೇ;
ಪಾಚಿನ ಕಮ್ಬವಿಟ್ಠಿ ಚ, ತಥಾ ಅನ್ತರಮೇ ಗಿರಿ.
ಅನ್ತಾಳಿ ಧಾತುಸೇನೋ ಚ, ಕಸ್ಸಪಿಟ್ಠಿಕ ಪುಬ್ಬಕೋ;
ರೋಹಣೇದಾಯಗಾಮೋ ಚ, ಸಾಲವಾಣೋ ವಿಭೀಸನೋ.
ವಿಹಾರೋ ಭಲ್ಲಿವಾಣೋ ಚ, ಅಟ್ಠಾರಸನರುತ್ತಮೋ;
ಪಾದೂಲಕಂ ಹಮ್ಬಲಟ್ಠಿ, ಮಹಾದತ್ಥಾದಿವಾಪಿ ಯೋ.
ಖುದ್ದಕೇ ಚ ವಿಹಾರೇಸೋ, ಅಟ್ಠಾರಸನರುತ್ತಮೋ;
ವಾಪೀಯೋ ಚ ತಥಾಕತ್ವಾ, ತೇಸಮೇವ ತು ದಾಪಯಿ.
ಪಞ್ಚವೀಸತಿ ಹತ್ಥಞ್ಚ, ಮಯೂರಪರಿವೇಣಕಂ;
ಹರಿತ್ವಾ’ಕಾಸಿಪಾಸಾದ-ಮೇಕವೀಸತಿ ಹತ್ಥಕಂ.
ಕುಮಾರಸೇನಸ್ಸ’ಪೇತ್ವಾ, ಪುಬ್ಬಭೋಗಂ ವಿಸೋಧಯಿ;
ಕಾಳವಾಪಿಮ್ಮಿಭಾಗದ್ಧಂ, ಖೇತ್ತಾನಞ್ಚ ಸತದ್ವಯಂ.
ಲೋಹ ಪಾಸದಕೇ ಜಿಣ್ಣೇ, ನವಕಮ್ಮಮಕಾರಯಿ;
ಮಹಾಥೂಪೇಸು ಛತ್ತಾನಿ, ತೀಸು ಜಿಣ್ಣಾನಿ ಕಾರಯಿ.
ದೇವಾನಂಪಿಯತಿಸ್ಸೇನ, ಕತಂ ಬೋಧಿಮಹಂ ವಿಯ;
ಸಿನ್ಹಾನಪೂಜಂ ಬೋಧಿಸ್ಸ, ವರಬೋಧಿಸ್ಸ ಕಾರಯಿ.
ಧಾವನಾ ಲೋಭನಾವಾಯೋ, ತತ್ಥ ಪೂಜೇಸಿ ಸೋಳಸ;
ಅಲಙ್ಕಾರಂ ಮುನಿನ್ದಸ್ಸ, ಅಭಿಸೇಕಞ್ಚ ಕಾರಯಿ.
ಮಹಾಬೋಧಿ ಪತಿಟ್ಠಾನಾ, ಓರಂ ಲಙ್ಕಾಯ ಭೂಮಿಪಾ;
ಯಾವ ದ್ವಾದಸಮಂ ವಸ್ಸಂ, ಬೋಧಿಪೂಜಮಕಾರಯುಂ.
ಮಹಾಮಹಿನ್ದತ್ಥೇರಸ್ಸ ¶ , ಕಾರೇತ್ವಾ ಪಟಿಬಿಮ್ಬಕಂ;
ಥೇರಸ್ಸಾ’ಲಾಹನಂ ನೇತ್ವಾ, ಕಾತುಂ ಪೂಜಂ ಮಹಾರಹಂ.
ದತ್ವಾ ಸಹಸ್ಸಂ ದೀಪೇತುಂ, ದೀಪವಂಸಂ ಸಮಾದಿಸಿ;
ಠಿತಾನಂ ತತ್ಥ ಭಿಕ್ಖೂನಂ, ದಾತುಞ್ಚಾಣಾಪಯಿಗುಳಂ.
ಭಿಕ್ಖುಸ್ಸ ಅತ್ತನೋ ಸೀಸೇ, ಸಙ್ಕಾರೋಕಿರಣಂ ಸರಂ;
ಲಾಭಂ ನಾದಾಸಿ ವುತ್ಥಸ್ಸ, ಪರಿವೇಣಸ್ಸ ಅತ್ತನೋ.
ಫಾತಿಕಮ್ಮಂ ಬಹುಂ’ಕಾಸಿ, ವಿಹಾರೇ ಅಭಯುತ್ತರೇ;
ಸಿಲಾಸತ್ಥುಸ್ಸ ಕಾರೇಸಿ, ಮನ್ದಿರಞ್ಚ ಸಮಣ್ಡಪಂ.
ಬುದ್ಧ ದಾಸಕತೇನೇತ್ತೇ, ನಟ್ಠೇ’ನಗ್ಘಮಣಿ ದ್ವಯಂ;
ಅಕಾಸಿ ನೇತ್ತಂ ಸತ್ಥುಸ್ಸ, ರಂಸಿ ಚೂಳಾಮಣಿಂತಥಾ.
ಮಣಿಹಿ ಘನನೀಲೇಹಿ, ಕೇಸಾ ವತ್ತಂ ಸುಮುತ್ತಮಂ;
ಹೇಮಪಟ್ಟಂ ತಥೇವುಣ್ಣ-ಲೋಮಂ ಸೋವಣ್ಣ ಚೀವರಂ.
ಪಾದಜಾಲಂ ಸುವಣ್ಣಸ್ಸ, ಪದುಮಂ ದೀಪಮುತ್ತಮಂ;
ನಾನಾರಾಗಮ್ಬರಂ ತತ್ಥ, ಪೂಜಯಿತ್ಥ ಅಸಂಖಿಯಂ.
ಅಕಾಸಿ ಪಟಿಮಾ ಗೇಹೇ, ಬಹುಮಙ್ಗಲಚೇತಿಯೇ;
ಬೋಧಿಸತ್ತೇ ತಥಾ’ಕಾಸಿ, ಕಾಳಸೇಲಸ್ಸ ಸತ್ಥುನೋ.
ಉಪಸುಮ್ಭವ್ಹಯಸ್ಸಾಪಿ, ಲೋಕನಾಥಸ್ಸ ಕಾರಯಿ;
ರಂಸೀಚೂಳಾಮಣಿಞ್ಚೇವ, ಅಭಿಸೇಕವ್ಹಯಸ್ಸ ಚ.
ಬುದ್ಧಬಿಮ್ಬಸ್ಸ ಕಾರೇಸಿ, ಪುಬ್ಬೇ ವುತ್ತಂ ಪಿಳನ್ಧನಂ;
ವಾಮಪಸ್ಸಮ್ಹಿ ಬೋಧಿಸ್ಸ, ಬೋಧಿಸತ್ತಘರಂ ತಥಾ.
ಮೇತ್ತೇಯ್ಯಸ್ಸ ಚ ಕಾರೇಸಿ, ಸಬ್ಬಂ ರಾಜಪಿಳನ್ಧನಂ;
ಸಮನ್ತಾ ಯೋಜನೇ ತಸ್ಸ, ತದಾ ರಕ್ಖಞ್ಚ ಯೋಜಯಿ.
ಕಾರಾಪೇಸಿ ವಿಹಾರೇಸು, ಧಾತುರಾಜವ್ಹಪನ್ತಿಯೋ;
ತಥಾ ಸತಸಹಸ್ಸೇನ, ಮಹಾಬೋಧಿಘರಂ ವರಂ.
ಥೂಪಾರಮಮ್ಹಿ ಥೂಪಸ್ಸ, ಪೂಜಂ ಜಿಣ್ಣವಿಸೋಧನಂ;
ದಾಠಾ ಧಾತುಘರೇಚಾಪಿ, ಜಿಣ್ಣಸ್ಸ ಪಟಿಸಙ್ಖರಂ.
ದಾಠಾಧಾತುಕರುಣ್ಡಞ್ಚ, ರಂಸಿಞ್ಚ ಘನಕೋಟ್ಟಿಮಂ;
ಮಹಗ್ಘಮನಿಸಂಕಿಣ್ಣಂ, ಸುವಣ್ಣ ಪದುಮಾನಿ ಚ.
ದಾಠಾಧಾತುಮ್ಹಿ ಪೂಜೇಸಿ, ಪೂಜಾಚಾಕಾ ಅಸಙ್ಖಿಯಾ;
ಚೀವರಾದೀನಿ ದಾಪೇಸಿ, ಭಿಕ್ಖೂನಂ ದೀಪವಾಸಿನಂ.
ಕಾರಾಪೇತ್ವಾ ¶ ವಿಹಾರೇಸು, ನವಕಮ್ಮಂ ತಹಿಂ ತಹಿಂ;
ಪಾಕಾರೇ ಚ ಘರೇತ್ವಾ’ಕಾ, ಸುಧಾಕಮ್ಮಂ ಮನೋಹರಂ.
ಮಹಾಚೇತಿತ್ತಯೇ ಕತ್ವಾ, ಸುಧಾಕಮ್ಮಂ ಮಹಾರಹಂ;
ಸುವಣ್ಣಛತ್ತಂ ಕಾರೇಸಿ, ತಥಾ ವಜಿರಚುಮ್ಬಟಂ.
ಮಹಾವಿಹಾರೇ ಪಾಪೇನ, ಮಹಾಸೇನೇನ ನಾಸಿತೇ;
ವಸಿಸುಂ ಧಮ್ಮರುಚಿಕಾ, ಭಿಕ್ಖೂ ಚೇತಿಯಪಬ್ಬತೇ.
ಕತ್ವಾ ಅಮ್ಬತ್ಥಲಂ ಥೇರ-ವಾದಾನಂ ದಾತು ಕಾಮಕೋ;
ಯಾಚಿತೋ ತೇಹಿ ತೇಸಂ’ವ, ಅದಾಸಿ ಧರಣೀ ಪತಿ.
ದಾತು ಪಠಾನನಾವಞ್ಚ, ಕಾರೇತ್ವಾ ಕಂಸಲೋಹಜಂ;
ದಾನವಟ್ಟಂ ಪವತ್ತೇಸಿ, ಅಮ್ಬಣೇಭಿ ದ್ವಿಪಞ್ಚಹಿ.
ಅನ್ತೋ ಬಹಿ ಚ ಕಾರೇತ್ವಾ, ನಗರಸ್ಸ ಜಿನಾಲಯೇ;
ಪಟಿಮಾಯೋ ಚ ಪೂಜೇಸಿ, ಧಮ್ಮಾಸೋಕಸಮೋ’ಸಮೋ.
ತಸ್ಸ ಪುಞ್ಞಾನಿ ಸಬ್ಬಾನಿ, ವತ್ಥು ಪಟಿಪದಂ ನರೋ;
ಕೋ ಹಿ ನಾಮ ಸಮತ್ಥೋತಿ, ಮುಖಮತ್ತಂ ನಿದಸ್ಸಿತಂ.
ತಸ್ಸ ಪುತ್ತದುವೇ ಆಸುಂ, ಕಸ್ಸಪೋ ಭಿನ್ನಮಾತಿಕೋ;
ಸಮಾನಮಾತಿಕೋ ಚೇವ, ಮೋಗ್ಗಲ್ಲಾನೋ ಮಹಬ್ಬಲೋ.
ತಥಾ ಪಾಣಸಮಾ ಏಕಾ, ದುಹಿತಾ ಚ ಮನೋರಮಾ;
ಭಾಗಿನೇಯ್ಯಸ್ಸ ಪಾದಾಸಿ, ಸೇನಾಪಚ್ಚಞ್ಚ ತಞ್ಚ ಸೋ.
ವಿನಾ ದೋಸೇನ ತಾಳೇಸಿ, ಕಸಾಯೂರುಸು ಸೋ’ಪಿತಂ;
ರಾಜಾ ದಿಸ್ವಾನ ದುಹಿತು-ವತ್ಥಂ ಲೋಹಿತಮಕ್ಖಿತಂ.
ಞತ್ವಾ ತಂ ಮಾತರಂ ತಸ್ಸ, ನಗ್ಗಂ ಝಪೇಸಿ ಕುಜ್ಝಿಯ;
ತತೋಪ್ಪಭುತಿಸೋ ಬದ್ಧ-ವೇರೋ ಸಙ್ಗಮ್ಮ ಕಸ್ಸಪಂ.
ರಜ್ಜೇ ನೇತಂ ಪಲೋಭೇತ್ವಾ, ಭಿನ್ದಿತ್ವಾ ಪಿತುಅನ್ತರೇ;
ಸಙ್ಗಹೇತ್ವಾ ಜನಂ ಜವ-ಗಾಹಂ ಗಾಹಾಪಯೀ ಪತಿಂ.
ಉಸ್ಸಾಪೇಸಿ ತತೋ ಛತ್ತಂ, ಕಸ್ಸಪೋ ಪಿತುಪಕ್ಖಿಯೇ;
ವಿನಾಸೇತ್ವಾ ಜನೇ ಲದ್ಧ-ಸಬ್ಬಪಾಪಸಹಾಯಕೋ.
ಮೋಗ್ಗಲ್ಲಾನೋ ತತೋ ತೇನ,
ಕಾತುಕಾಮೋ ಮಹಾಹವಂ;
ಅಲದ್ಧ ಬಲತಾಯ’ಗಾ,
ಜಮ್ಬುದೀಪ ಬಲತ್ಥಿಕೋ.
ಮಹಾರಜ್ಜ ¶ ವಿನಾಸೇನ, ವಿಯೋಗೇನ ಚ ಸೂನುನೋ;
ಬದ್ಧನಾಗಾರವಾಸೇನ, ದುಕ್ಖಿತಮ್ಪಿ ದುರಾಧಿಪಂ.
ದುಕ್ಖಾಪೇತುಮಪಞ್ಞೋಸೋ, ಆಹ ಕಸ್ಸಪರಾಜಕಂ;
ನಿಧಿ ರಾಜಕುಲೇರಾಜ-ಗುತ್ತ ತೇ ಪಿತರಾ ಇತಿ.
ನೇ’ತಿ ಗುತ್ತೇ ನ ಜಾನಾಸಿ, ಚಿತ್ತಮೇತಸ್ಸ ಭೂಮಿಪ;
ಮೋಗ್ಗಲ್ಲಾನಸ್ಸ ಕಾಪೇತಿ, ನಿಧಿಂಸೋತಿ ತದಬ್ರೂವಿ.
ಸುತ್ವಾ ತಂ ಕುಪಿತೋ ದೂತೇ, ಪಾಹೇಸೀ ಪಿತುಸನ್ತಿಕಂ;
ಆಚಿಕ್ಖತು ನಿಧಿಠಾನ-ಮಿತಿ ವತ್ವಾ ನರಾಧಮೋ.
ಮಾರೇತು ಅಮ್ಹೇ ಪಾಪಸ್ಸ, ತಸ್ಸುಪಾಯೋ’ತಿ ಚಿನ್ತಿಯ;
ತುಣ್ಹೀ ಅಹೋಸಿ ತೇ ಗನ್ತ್ವಾ, ರಾಜಕಸ್ಸ ನಿವೇದಯುಂ.
ತತೋ’ತೀವ ಪಕುಪ್ಪಿತ್ವಾ, ಪೇಸಯಿತ್ಥ ಪುನಪ್ಪುನಂ;
ಸಾಧು ದಿಸ್ವಾ ಸಹಾಯಮ್ಮೇ, ನ್ಹತ್ವಾನ ಕಾಳವಾಪಿಯಂ.
ಪರಿಸ್ಸಾಮೀತಿ ಚಿನ್ತೇತ್ವಾ, ಆಹ ದೂತೇ ಸಚೇ ಮಮಂ;
ಕಾಳವಾಪಿಂಸಮಾಪೇತಿ, ಸಕ್ಕಾ ಞಾತುನ್ತಿ ತೇ ಗತಾ.
ರಞ್ಞೋ ಆಹಂಸು ರಾಜಾಪಿ, ತುಟ್ಠಹಟ್ಠೋ ಧನತ್ಥಿಕೋ;
ಪೇಸೇಸಿ ದೂತೇ ದತ್ವಾನ, ರಥಂ ಜಿಣ್ಣೇನ ವಾಜಿನಾ.
ಏವಂ ಗಚ್ಛತಿ ಭೂಪಾಲೇ, ಪಾಜೇನ್ತೋ ರಥಿಕೋ ರಥಂ;
ಖಾದನ್ತೋ ಲಾಜಮಸ್ಸಾಪಿ, ಕಿಞ್ಚಿ ಮತ್ತಂ ಅದಾಸಿ ಸೋ.
ತಂ ಖಾದಿತ್ವಾ ಪಸೀದಿತ್ವಾ, ತಸ್ಮಿಂ ಪಾಣಮದಾ ತದಾ;
ಮೋಗ್ಗಲ್ಲಾನಸ್ಸ ತಂ ಕಾತುಂ, ಸಙ್ಗಹಂ ದ್ವಾರನಾಯಕಂ.
ಏವಂ ಸಮ್ಪತ್ತಿಯೋ ನಾಮ, ಚಲಾ ವಿಜ್ಜುಲ್ಲತೋಪಮಾ;
ತಸ್ಮಾ ತಾಸು ಪಮಜ್ಜೇಯ್ಯ, ಕೋ ಹಿ ನಾಮ ಸಚೇತನೋ.
ರಾಜಾ ಏತೀತಿಸುತ್ವಾನ, ಥೇರೋ ಸೋ ತಸ್ಸ ಸೋಹ ದೋ;
ಲದ್ಧಾ ಮಾಸೋದನಂ ಮಂಸಂ, ಸಾಣುಣಞ್ಚ ವರಂ ಸರಂ.
ರಾಜಾ ರೋಚೇತಿ ಏತನ್ತಿ, ಗೋಪಯಿತ್ವಾ ಉಪಾವಿಸಿ;
ಗನ್ತ್ವಾ ರಾಜಾಪಿ ವನ್ದಿತ್ವಾ, ಏಕಮನ್ತಮುಪಾವಿಸೀ.
ಏವಂ ನಿಸಿನ್ನಾ ಸಮ್ಪತ್ತ-ರಜ್ಜಾ ವಿಯ ಉಭೋಪಿ ತೇ;
ಅಞ್ಞಮಞ್ಞಾ’ಭಿಲಾಪೇನ, ನಿಬ್ಬಾಪೇಸುಂ ಮಹಾದರಂ.
ಭೋಜಯಿತ್ವಾನ ತಂ ಥೇರೋ, ಓವದಿತ್ವಾ ಅನೇಕಧಾ;
ಅಪ್ಪಮಾದೇ ನಿಯೋಜೇಸಿ, ದಸ್ಸೇತ್ವಾ ಲೋಕಧಮ್ಮತಂ.
ತತೋ ¶ ವಾಪೀ ಮುಪಗಮ್ಮ, ಓಗ್ಗಯ್ಹಿತ್ವಾ ಯಥಾ ಸುಖಂ;
ನ್ಹಯಿತ್ವಾ ಪಿವಿತ್ವಾ ಚ, ಆಹೇವಂ ರಾಜಸೇವಕೇ.
ಏತ್ತಕಂ ಮೇ ಧನಂ ಭೋ’ತಿ, ಸುತ್ವಾ ತಂ ರಾಜಸೇವಕಾ;
ಆಪರಿತ್ವಾ ಪುರಂರಞ್ಞೋ, ನಿವೇದೇಸುಂ ನಿರಿಸ್ಸರೋ.
ಧನಂ ರಕ್ಖತಿ ಪುತ್ತಸ್ಸ, ದೀಪೇ ಭಿನ್ದತಿ ಮಾನುಸೇ;
ಜೀವನ್ತೋ’ಯಂತೀ ಕುಜ್ಝಿತ್ವಾ, ಆಣಾಪೇಸಿ ಚಮೂಪತಿಂ.
ಮಾರೇಹಿ ಪಿತರಂ ಮೇತಿ, ದಿಟ್ಠಾ ಪಿಟ್ಠೀತಿ ವೇರಿನೋ;
ಹಟ್ಠತುಟ್ಠೋ ತಿರುಟ್ಠೋಸೋ, ಸಬ್ಬಾಲಙ್ಕರಮಣ್ಡಿತೋ.
ರಾಜಾನಮುಪಸಙ್ಕಮ್ಮ, ಪುರತೋ ಚ’ಸ್ಸ ಚಙ್ಕಮಿ;
ರಾಜಾದಿಸ್ವಾ ಚ ಚಿನ್ತೇಸಿ, ಪಾಪಿಯೋ’ಯಂ ಮತಂ ಮಮ.
ಕಾಯಂ ವಿಯ ದುಕ್ಖಾಪೇತ್ವಾ, ನರಕಂ ಹೇತು ಮಿಚ್ಛತಿ;
ರೋಸುಪ್ಪಾದೇನ ತಸ್ಸೇವ, ಕಿಂಪುರೇಮಿ ಮನೋರಥಂ.
ಇತಿ ಮೇತ್ತಾಯಮಾನೋ ತಂ, ಆಹ ಸೇನಾಪತಿಂ ಪತಿ;
ಮೋಗ್ಗಲ್ಲಾನೇ ತ್ವಯಿಚೇವ, ಏಕಚಿತ್ತೋ ಅಹಂ ಇತಿ.
ಹಸಂಚಾಲೇಸಿ ಸೀಸಂಸೋ, ದಿಸ್ವಾ ತಂ ಜಾನಿಭೂಪತಿ;
‘‘ನೂನ ಮಾರೇತಿ ಅಜ್ಜಾ’’ತಿ, ತದಾ ಸಾಹಸಿಕೋಪಿ ಸೋ.
ನಗ್ಗಂ ಕತ್ವಾನ ರಾಜಾನಂ, ಸಸಙ್ಖಲಿಕ ಬನ್ಧನಂ;
ಪುರತ್ಥಾಭಿಮುಖಂ ಕತ್ವಾ, ಅನ್ತೋಬನ್ಧಿಯ ಭಿತ್ತಿಯಂ.
ಮತ್ತಿಕಾಯ ವಿಲಿಮ್ಪೇಸಿ, ಏವಂ ದಿಸ್ವಾಪಿ ಪಣ್ಡಿತೋ;
ಕೋ ಹಿ ರಜ್ಜೇಯ್ಯ ಭೋಗೇಸು, ಜೀವಿತೇಪಿ ಯಸೇಪಿ ವಾ.
ಧಾತುಸೇನೋ ನರಿನ್ದೋ ಸೋ, ಏವಂ ಪುತ್ತಹತೋ ಗತೋ;
ಅಟ್ಠಾರಸಹಿ ವಸ್ಸೇಹಿ, ದೇವರಾಜಸ್ಸ ಸನ್ತಿಕಂ.
ಕಾಳವಾಪೀ ಮಯಂ ರಾಜಾ, ಕಾರಾಪೇನ್ತೋ ಸಮಾಹಿತಂ;
ಪಸ್ಸಿತ್ವಾ ಭಿಕ್ಖುಮೇತನ್ತು, ವುಟ್ಠಾಪೇತುಂ ಸಮಾಧಿತೋ.
ಅಸಕ್ಕೋನ್ತೋ ಖಿಪಾಪೇಸಿ, ಪಂಸುಂ ಭಿಕ್ಖುಸ್ಸ ಮತ್ಥಕೇ;
ಸನ್ಧಿಟ್ಠಿಕೋ ವಿಪಾಕೋಯಂ, ತಸ್ಸ ಕಮ್ಮಸ್ಸ ದೀಪಿತೋ.
ದಸಾಪಿತೇ ¶ ರಾಜವರಾ ಸಭೋಗಾ,
ಉಪಾಗಮುಂ ಮಚ್ಚುಮುಖಂ ಸಭೋವಾ;
ಅನಿಚ್ಚತಂ ಭೋಗವತೋ ಧನೇ ಚ,
ದಿಸ್ವಾ ಸಪಞ್ಞೋ ವಿಭವಂ ಇಚ್ಛೇ.
ಸುಜನಪ್ಪಸಾದಸಂವೇಗತ್ಥಾಯ ಕತೇ ಮಹಾವಂಸೇ
ದಸರಾಜಕೋ ನಾಮ
ಅಟ್ಠತಿಂಸತಿಏಮಾ ಪರಿಚ್ಛೇದೋ.
ಏಕೂನಚತ್ತಾಲೀಸತಿಮ ಪರಿಚ್ಛೇದ
ರಾಜದ್ವಯದೀಪನೋ
ತತೋ ಕಸ್ಸಪನಾಮೋ ಸೋ, ಪಾಪಕೋ ನರಪಾಲಕೋ;
ಅಸ್ಸ ಗೋ ಪಞ್ಚಸೂದಞ್ಚ, ಪೇಸಯಿತ್ವಾನ ಭಾತಿಕಂ.
ಮಾರಾಪೇತುಂ ಅಸಕ್ಕೋನ್ತೋ, ಭೀತೋ ಸೀಹಗಿರಿಂ ಗತೋ;
ದುರಾರೋಹಂ ಮನುಸ್ಸೇಹಿ, ಸೋಧಾಪೇತ್ವಾ ಸಮನ್ತತೋ.
ಪಾಕಾರೇನ ಪರಿಕ್ಖಿಪ್ಪ, ಸೀಹಾಕಾರೇನ ಕಾರಯಿ;
ತತ್ಥ ನಿಸ್ಸೇಣಿ ಗೇಹಾನಿ, ತೇನ ತಂ ನಾಮಕೋ ಅಹೂ.
ಸಂಹರಿತ್ವಾ ಧನಂ ತತ್ಥ, ನಿದಹಿತ್ವಾ ಸುಗೋಪಿತಂ;
ಅತ್ತನೋ ನಿಹಿತಾನಂ ಸೋ, ರಕ್ಖಂ ದತ್ವಾ ತಹಿಂ ತಹಿಂ.
ಕತ್ವಾ ರಾಜಘರಂ ತತ್ಥ, ದಸ್ಸನೇಯ್ಯಂ ಮನೋರಮಂ;
ದುತಿಯಾಲಕಮನ್ದಂವ, ಕುವೇರೋವ ತಹಿಂ ವಸಿ.
ಮಿಗಾರೋ ನಾಮ ಕಾರೇಸಿ, ಸೇನಾಪತಿ ಸನಾಮಕಂ;
ಪರಿವೇಣಂ ತಥಾಗೇಹ-ಮಭಿಸೇಕಜಿನಿಸ್ಸ ಚ.
ತಸ್ಸಾಭಿಸೇಕಂ ಯಾಚಿತ್ವಾ, ಸಿಲಾಸಮ್ಬುದ್ಧತೋ’ಧಿರಂ;
ಅಲದ್ಧಾಸಾಮಿ ನೋ ರಜ್ಜೇ, ಜಾನಿಸ್ಸಾಮೀತಿ ಸಣ್ಠಹಿ.
ಹುತ್ವಾ ವಿಪ್ಪಟಿಸಾರೀ ಸೋ, ಅತ್ತನಾ ಕತಕಮ್ಮನಾ;
ಮುಚ್ಚಿಸ್ಸಾಮಿ ಕತಂ ನು’ತಿ, ಪುಞ್ಞಂ ಕಾಸಿ ಅನಪ್ಪಕಂ.
ಮಹಾ ¶ ವತ್ಥುನಿ ಕಾರೇಸಿ, ದ್ವಾರೇಸು ನಗರಸ್ಸ ಸೋ;
ಅಮ್ಬುಯ್ಯಾನೇ ಚ ಕಾರೇಸಿ, ದೀಪೇ ಯೋಜನ ಯೋಜನೇ.
ಇಸ್ಸರಸಮಣಾರಾಮಂ, ಕಾರೇತ್ವಾ ಪುಬ್ಬವತ್ಥುತೋ;
ಅಧಿಕಂ ಭೋಗಗಾಮೇ ಚ, ಅಧಿಕಂ ತಸ್ಸ ದಾಪಯಿ.
ಬೋಧಿ ಉಪ್ಪಲವಣ್ಣಾ ಚ, ತಸ್ಸಾಸುಂ ಧೀತರೋ ದುವೇ;
ವಿಹಾರಸ್ಸ’ಸ್ಸ ಕಾರೇಸಿ, ನಾಮಂ ತಾಸಞ್ಚ ಅತ್ತನೋ.
ದೇನ್ತೇ ತಸ್ಮಿಂ ನ ಇಚ್ಛಿಂಸು, ಸಮಣಾ ಥೇರವಾದಿನೋ;
‘‘ಪಿತುಘಾತಿಸ್ಸ ಕಮ್ಮ’’ನ್ತಿ, ಲೋಕಗಾರಯ್ಹ ಭೀರುನೋ.
ದಾತುಕಾಮೋಸ ತೇಸಂ’ವ, ಸಮ್ಬುದ್ಧ ಪಟಿಮಾಯ’ದಾ;
ಭಿಕ್ಖವೇ ಅಧಿವಾಸೇಸುಂ, ಭೋಗೋ ನೋ ಸತ್ಥುನೋ ಇತಿ.
ಕಥಾ ನಿಯ್ಯನ್ತಿ ಉಯ್ಯಾನೇ, ಸಮೀಪೇ ಪಬ್ಬತಸ್ಸ ಸೋ;
ಕಾರಾಪೇಸಿ ವಿಹಾರಂ ಸೋ, ತೇಸಂ ನಾಮೋ ತತೋ ಅಹು.
ಅದಾ ಧಮ್ಮರುಚಿನಂ ತಂ, ಸಮ್ಪತ್ತ ಚತುಪಚ್ಚಯಂ;
ವಿಹಾರಞ್ಚೇವ ಉಯ್ಯಾನಂ, ದಿಸಾಭಾಗಮ್ಹಿ ಉತ್ತರೇ.
ಭತ್ತಂ ಸನೀರಪಕ್ಕಂ ಸೋ, ಭುಞ್ಜಿತ್ವಾ ದಿನ್ನಮಿತ್ಥಿಯಾ;
ಸಪ್ಪಿಯುತ್ತಂ ಮನುಞ್ಞೇಹಿ, ಸೂಪೇಹಿ ಅಭಿಸಙ್ಖತಂ.
ಮನುಞ್ಞಮಿದಮಯ್ಯಾನಂ, ದಸ್ಸಮೇವನ್ತಿ ತಾದಿಸಂ;
ಭತ್ತಂ ಪಾದಾಸಿ ಭಿಕ್ಖೂನಂ, ಸಬ್ಬೇಸಞ್ಚ ಸಚೀವರಂ.
ಉಪೋಸಥಮಧಿಟ್ಠಾಸಿ, ಅಪ್ಪಮಞ್ಞಞ್ಚ ಭಾವಯಿ,
ಸಮಾದಿಯಿ ಧುತಙ್ಗೇ ಚ, ಲಿಖಾಪೇಸಿ ಚ ಪೋತ್ಥಕೇ.
ಪಟಿಮಾದಾನ ಸಾಲಾದಿಂ, ಕಾರಾಪೇಸಿ ಅನಪ್ಪಕಂ;
ಭಿತೋ ಸೋ ಪರಲೋಕಮ್ಹಾ, ಮೋಗ್ಗಲ್ಲಾನಾ ಚ ವತ್ತತಿ.
ತತೋ ಅಟ್ಠಾರಸೇ ವಸ್ಸೇ, ಮೋಗ್ಗಲ್ಲಾನೋ ಮಹಾಭಟೋ;
ಆದೇಸೇನ ನಿಗಣ್ಠಾನಂ, ದ್ವಾದಸಗ್ಗಸಹಾಯ ವಾ.
ಜಮ್ಬುದೀಪಾ ಇಧಾಗಮ್ಮ, ದೇಸೇ ಅಮ್ಬಟ್ಠಕೋಲಕೇ;
ಕುಳಾರೀ ನಾಮೇ ಬನ್ಧಿತ್ಥ, ವಿಹಾರೇ ಬಲಸಞ್ಚಯಂ.
ರಾಜಾ ಸುತ್ವಾ ಗಹೇತ್ವಾ ತಂ, ಭಞ್ಜಿಸ್ಸಾಮಿತಿ ನಿಕ್ಖಮಿ;
ನೇಮಿತ್ತೇಹಿ ನ ಸಕ್ಕಾತಿ, ವದನ್ತೇಪಿ ಮಹಾಬಲೋ.
ಮೋಗ್ಗಲ್ಲಾನೋಪಿ ಸನ್ನದ್ಧ ಬಲೋ ಸೂರಸಹಾಯ ವಾ;
ಗಚ್ಛನ್ತೋ ಸುರಸಙ್ಗಾಮಂ, ದೇವೋ ವಿಯ ಸುಜಮ್ಪತಿ.
ಅಞ್ಞಮಞ್ಞಂ ¶ ಉಪಾಗಮ್ಮ, ಭಿನ್ನವೇಲಾವ ಸಾಗರಾ;
ಆರಭಿಂಸು ಮಹಾಯುದ್ಧಂ, ಬಲಕಾಯಾ ಉಭೋಪಿ ತೇ.
ಕಸ್ಸಪೋ ಪುರತೋ ದಿಸ್ವಾ, ಮಹನ್ತಂ ಕದ್ದಮಾಸಯಂ;
ಗನ್ತುಮಞ್ಞೇನ ಮಗ್ಗೇನ, ಪರಿವತ್ತೇಸಿ ದನ್ತಿನಂ.
ದಿಸ್ವಾ ತಂ ಸಾಮಿಕೋನೋ’ಯಂ, ಪಲಾಯತಿ ಭಣೇ ಇತಿ;
ಬಲಕಾಯೋ ಪಭಿಜ್ಜಿತ್ಥ, ‘‘ದಿಟ್ಠಂ ಪಿಠ’’ನ್ತಿ ಘೋಸಯುಂ.
ಮೋಗ್ಗಲಾನ ಬಲಾರಾಜಾ, ಛೇತ್ವಾ ನಿಕರಣೇನ ಸೋ;
ಸೀಸಂ ಉಕ್ಖಿಪಿಯಾ’ಕಾಸಂ, ಛುರಿಕಂ ಕೋಸಿಯಂ ಖಿಪಿ.
ಕತ್ವಾ’ಳಾಹನ ಕಿಚ್ಚಂ ಸೋ, ತಸ್ಸ ಕಮ್ಮೇ ಪಸೀದಿಯ;
ಸಬ್ಬಂಸೋ ಧನಮಾದಾಯ, ಆಗಞ್ಛಿ ನಗರಂ ವರಂ.
ಭಿಕ್ಖೂ ಸುತ್ವಾ ಪವತ್ತಿಂ ತಂ, ಸುನಿವತ್ಥಾ ಸುಪಾರುತಾ;
ಸಮ್ಮಜ್ಜಿತ್ವಾ ವಿಹಾರಞ್ಚ, ಅಟ್ಠಂಸು ಪಟಿಪಾಟಿಯಾ.
ಮಹಾಮೇಘವನಂ ಪತ್ವಾ, ದೇವರಾಜಾವ ನನ್ದನಂ;
ಮಹಾಸೇನ ನಿವತ್ತೇತ್ವಾ, ಹತ್ಥಿಪಾಕಾರತೋ ಬಹಿ.
ಉಪಸಙ್ಕಮ್ಮ ವನ್ದಿತ್ವಾ, ಸಙ್ಘೇ ತಸ್ಮಿಂ ಪಸೀದಿಯ;
ಛತ್ತತ್ತೇನ ಸಙ್ಘಂ ಪೂಜೇಸಿ, ಸಙ್ಘೋ ತಸ್ಸೇವ ತಂ ಅದಾ.
ತಂ ಠಾನಂ ಛತ್ತವಡ್ಢೀತಿ, ವೋಹರಿಂಸು ತಹಿಂ ಕತಂ;
ಪರಿವೇಣಮ್ಪಿ ತಂ ನಾಮಂ, ಅಹೋಸಿ ಪುರಮಾಗತೋ.
ವಿಹಾರೇ ದ್ವೇಪಿ ಗನ್ತ್ವಾನ, ಸಙ್ಘಂ ತತ್ಥಾ’ಭಿವನ್ದಿಯ;
ಪಾಪುಣಿತ್ವಾ ಮಹಾರಜ್ಜಂ, ಲೋಕಂ ಧಮ್ಮೇನ ಪಾಲಯಿ.
ಕುದ್ಧೋ ನೀಹರಿ ದಾಠಂಸೋ, ಘಾತಕಂ ಪಿತುನೋ ಮಮ;
ಅನುವತ್ತಿತ್ವಾ ಮಚ್ಚಾತಿ, ತೇನ ರಕ್ಖಸ ನಾಮ ವಾ.
ಅತಿರೇಕಸಹಸ್ಸಂ ಸೋ, ಅಮಚ್ಚಾನಂ ವಿನಾಸಯಿ;
ಕಣ್ಣನಾಸಾದಿ ಛೇದೇಸಿ, ಪಬ್ಬಾಜೇಸಿ ತಥಾ ಬಹೂ.
ತತೋ ಸುತ್ವಾನ ಸದ್ಧಮ್ಮ-ಮುಪಸನ್ನೋ ಸುಮಾನಸೋ;
ಮಹಾದಾನಂ ಪವತ್ತೇಸಿ, ಮೇಘೋ ವಿಯ ಮಹೀತಲೇ.
ಫುಸ್ಸಪುಣ್ಣಮೀಯಂ ದಾನ-ಮನುವಸ್ಸಂ ಪವತ್ತಯಿ;
ತತೋ ಪಟ್ಠಾಯ ತಂ ದಾನಂ, ದೀಪೇ ಅಜ್ಜಾಪಿ ವತ್ತತಿ.
ಸೋಪಿ ಸಾರಥಿಕೋ ಲಾಜ-ದಾಯಕೋ ಪಿತುರಾಜಿನೋ;
ಆನೇತ್ವಾ ಪಿತುಸನ್ದೇ ಸಂ, ಮೋಗ್ಗಲ್ಲಾನಸ್ಸ ದಸ್ಸಯಿ.
ತಂ ¶ ದಿಸ್ವಾ ಪರಿದೇವಿತ್ವಾ, ಪಿತುನೋ ಪೇಮ ಮತ್ತನೀ;
ವಣ್ಣೇತ್ವಾ ತಸ್ಸ ಪಾದಾಸಿ, ದ್ವಾರನಾಯಕತಂ ವಿಭೂ.
ಸೇನಾಪತಿ ಮಿಗಾರೋಹಿ, ನಿವೇದೇತ್ವಾ ಯಥಾ ವಿಧಿಂ;
ಅಭಿಸೇಕ ಜಿನಸ್ಸಾ’ಕಾ, ಅಭಿಸೇಕಂ ಯಥಾರುಚಿಂ.
ಸೀಹಾ’ಚಲೇ ದಳ್ಹನಾಮಂ, ದಾಠಾ ಕೋಣ್ಡಞ್ಞಕಮ್ಪಿ ಚ;
ವಿಹಾರಂ ಧಮ್ಮರುಚಿನಂ, ಸಾಗಲಿನಞ್ಚ ದಾಪಯಿ.
ಪಬ್ಬತನ್ತು ವಿಹಾರಂಸೋ, ಕತ್ವಾ ಥೇರಸ್ಸ ದಾಪಯಿ;
ಮಹಾನಾಮಸನಾಮಸ್ಸ, ದೀಘಸಣ್ಡ ವಿಹಾರಕೇ.
ರಾಜಿನಿನಾಮಕಞ್ಚೇವ, ಕತ್ವಾ ಭಿಕ್ಖುನುಪಸ್ಸಯಂ;
ಅದಾ ಸಾಗಲಿಕಾನಂ ಸೋ, ಭಿಕ್ಖುನೀನಂ ಮಹಾಮತಿ.
ಲಮ್ಬಕಣ್ಣಕಗೋತ್ತೋಪಿ, ದಾಠಾ ಪಭುತಿ ನಾಮಕೋ;
ಕಸ್ಸಪಸ್ಸ ಉಪಠಾನೇ, ಕೋಚಿ ನಿಬ್ಬಿನ್ನ ಮಾನಸೋ.
ಗನ್ತಾ ಮೇ ರೇಲಿಯಂ ವಗ್ಗಂ,
ವಾಸಂ ತತ್ಥೇವ ಕಪ್ಪಯಿ;
ಅಹೋಸಿ ಪುತ್ತೋ ತಸ್ಸೇಕೋ,
ಸಿಲಾಕಾ ಲೋತಿ ಪಿಸ್ಸುತೋ.
ಸೋಪಿ ಕಸ್ಸಪತೋ ಭೀತೋ, ಞಾತಕೇನ ಸಹ’ತ್ತನೋ;
ಮೋಗ್ಗಲ್ಲಾನೇನ ಗನ್ತ್ವಾನ, ಜಮ್ಬುದೀಪತಲಂ ಇತೋ.
ಬೋಧಿಪಣ್ಡವಿಹಾರಮ್ಪಿ, ಪಬ್ಬಜ್ಜಂ ಸಮುಪಾಗತೋ;
ಕರೋನ್ತೋ ಸಙ್ಘಕಿಚ್ಚಾನಿ, ಸಾದರೋ ಸೋ ಸುಪೇಸಲೋ.
ಅಮ್ಮಂ ಸಙ್ಘಸ್ಸ ಪಾದಾಸಿ, ಸಙ್ಘೋ ತಸ್ಮಿಂ ಪಸೀದಿಯ;
ಆಹ’ಮ್ಬ ಸಾಮಣೇರೋ’ತಿ, ತೇನ ತಂ ನಾಮಕೋ ಅಹು.
ಸೋ ಕೇಸಧಾತುವಂಸಮ್ಹಿ, ವುತ್ತೇನ ವಿಧಿನಾ ತತೋ;
ಕೇಸಧಾತುಂ ಲಭಿತ್ವಾನ, ತಸ್ಸ ರಜ್ಜೇ ಇಧಾ’ನಯಿ.
ತಸ್ಸ ಕತ್ವಾನ ಸಕ್ಕಾರಂ, ಗಹೇತ್ವಾ ಕೇಸ ಧಾತುಯೋ;
ಮಹಗ್ಘೇ ನಿದಹಿತ್ವಾನ, ಕರಣ್ಡೇ ಫಲಿಕುಮ್ಭವ್ಹೇ.
ದೀಪಙ್ಕರಸ್ಸ ನಾಥಸ್ಸ, ಪಟಿಮಾಯ ಘರೇ ವರೇ;
ವಡ್ಢೇತ್ವಾ ಪರಿಹಾರೇನ, ಮಹಾಪೂಜಂ ಪವತ್ತಯಿ.
ಮಾತುಲಂ ಭರಿಯಞ್ಚ’ಸ್ಸ, ಕತ್ವಾ ಸೋವಣ್ಣಯಂ ತಹಿಂ;
ಠಪೇಸಿ ಪಟಿಮಾಯೋ ಚ, ಅಸ್ಸ ಬಿಮ್ಬಞ್ಚ ಚಾರುಕಂ.
ಕೇಸಧಾತುಕರಣ್ಡಞ್ಚ ¶ , ಛತ್ತಂ ರತನಮಣ್ಡಪಂ;
ಸಾವಕಗ್ಗಯುಂಗಂ ವಾಳ-ಬೀಜನಿಞ್ಚ ಸಕಾರಯಿ.
ಪರಿಹಾರಞ್ಚ ತಸ್ಸ’ದಾ, ರಾಜಾ ಅಧಿಕಮತ್ತನೋ;
ಸಿಲಾಕಾಳ ಮಸಿಗ್ಗಾಹಂ, ಕತ್ವಾ ರಕ್ಖಾಯ ಯೋಜಯಿ.
ಅಸಿಗ್ಗಾಹಸಿಲಾಕಾಳೋ, ಇತಿ ತೇನಾ’ಸಿ ವಿಸ್ಸುತೋ;
ಭಗಿನಿಞ್ಚ’ಸ್ಸ ಪಾದಾಸಿ, ಸದ್ಧಿಂ ಭೋಗೇನ ಭೂಮಿಪೋ.
ವುತ್ತೋ’ಯಮತಿ ಸಙ್ಖೇಪೋ, ವಿತ್ಥಾರೋ ಪನ ಸಬ್ಬಸೋ;
ಕೇಸಧಾತುಕವಂಸಮ್ಹಾ, ಗಹೇತಬ್ಬೋ ವಿಭಾವಿನಾ.
ಬನ್ಧಿತ್ವಾ ಸಾಗರಾ ರಕ್ಖಂ, ದೀಪಞ್ಚ ಕಾಸಿನಿಬ್ಭಯಂ;
ಧಮ್ಮಕಮ್ಮನ ಸೋಧೇಸಿ, ಸಧಮ್ಮಂ ಜಿನಸಾಸನಂ.
ಸೇನಾಪತಿಸ ನಾಮಂ’ಕಾ, ಪಧಾನಘರ ಮುತ್ತರೋ;
ಕತ್ವಾ’ಟ್ಠಾರಸಮೇ ವಸ್ಸೇ, ಸೋ ಪುಞ್ಞಾನಿ ಖಯಂ ಗತೋ.
ಕಸ್ಸಪತೋ ಜಿತೋ ಅತಿಬಲಿ ಪುಞ್ಞಕ್ಖಯೇ ಸಙ್ಖತೇ;
ಜೇತುಂ ನೋ ವಿಸಹಿತ್ಥ ಮಚ್ಚುಮುಪಗಂ ಸೋ ಯೇವದಾಸೋವಿಯ;
ತಸ್ಮಾ ಮಚ್ಚುಬಲಂ ನಿಹಚ್ಚ ಸುಖಿನೋ ಹೇಸ್ಸನ್ತಿ ಮೇಧಾವಿನೋ;
ನಿಬ್ಬಾನಂ ಪರಮಚ್ಚುತಂ ಸಿವಪದಂ ಪತ್ತಬ್ಬಮತ್ತಞ್ಞುನಾ.
ಸುಜನಪ್ಪಸಾದ ಸಂವೇಗತ್ಥಾಯ ಕತೇ ಮಹಾವಂಸೇ
ರಾಜದ್ವಯದೀಪನೋ ನಾಮ
ಏಕೂನಚತ್ತಾಲೀಸತಿಮೋ ಪರಿಚ್ಛೇದೋ.
ಚತ್ತಾಲೀಸತಿಮ ಪರಿಚ್ಛೇದ
ಅಟ್ಠರಾಜಕೋ
ತಸ್ಸಚ್ಚಯೇ ಕುಮಾರಾದಿ-ಧಾತುಸೇನೋತಿ ವಿಸ್ಸುತೋ;
ಅಹು ತಸ್ಸ ಸುತೋ ರಾಜಾ, ದೇವರೂಪೋ ಮಹಾಬಲೋ.
ಕಾರಿತೇ ಪಿತರಾ’ಕಾಸಿ, ವಿಹಾರೇ ನವಕಮ್ಮಕಂ;
ಕಾರೇತ್ವಾ ಧಮ್ಮಸಙ್ಗೀತಿಂ ಪರಿಸೋಧೇತಿ ಸಾಸನಂ.
ಸನ್ತಪ್ಪೇಸಿ ¶ ಮಹಾಸಙ್ಘಂ, ಪಚ್ಚಯೇಹಿ ಚತೂಹಿಪಿ;
ಕತ್ವಾ ಪುಞ್ಞಾನಿ’ನೇಕಾನಿ, ನವಮೇ ಹಾಯನೇ’ತಿಗಾ.
ತಿತ್ತಿಸೇನೋ ಸುತೋ ತಸ್ಸ, ರಾಜಾ ಹುತ್ವಾ ಅನೇಕಧಾ;
ಕತ್ವಾ ಪುಞ್ಞಾನಿ ರಜ್ಜಂ ತಂ, ಮಾಸಮ್ಪಿ ನವಮೇ ಜಹಿ.
ಸಿವೋ ತಂ ಮಾತುಲೋ ಹನ್ತ್ವಾ, ಹುತ್ವಾ ರಾಜಾ ಅನಪ್ಪಕಂ;
ಪುಞ್ಞಂ ಕತ್ವೋ’ಪತಿಸ್ಸೇನ, ಪಞ್ಚವೀಸ ದಿನೇ ಹತೋ.
ಉಪತಿಸ್ಸೋ ತತೋ ಆಸಿ, ರಾಜಾ ಹನ್ತ್ವಾನ ಸೀವಕಂ;
ಮೋಗ್ಗಲ್ಲಾನಸ್ಸ ಭಗಿನೀ, ಸಾಮಿಕೋ ಧಜಿನೀಪತಿ.
ರಾಜಾ ಠಾನನ್ತರಾದೀಹಿ, ಕತ್ವಾನ ಜನಸಙ್ಗಹಂ;
ಸೀಲಾಕಾಳಸ್ಸ ಪಾದಾಸಿ, ಸಹ ಭೋ ಕನಧೀವರಂ.
ಏಕೋ ಪುತ್ತೋ ಅಹು ರಞ್ಞೋ, ಉಪತಿಸ್ಸಸ್ಸ ಕಸ್ಸಪೋ;
ಸಸೋಳಸ ಸಹಾಯೇಹಿ, ಸೂರೋ ಸೂಪೇಹಿ ಸಞ್ಞುತೋ.
ಏಕ ವುತ್ತಿಸಹಾಯೇಹಿ, ದಾನಮಾನ ಮಹಾಧನೋ;
ಧಮ್ಮಟ್ಠೋ ವೀರಿಯಾಜೀವಿ, ಸಾಧು ಜೇಟ್ಠಪಚಾಯಕೋ.
ಸಿಲಾ ಕಾಳೋತತೋ ರಜ್ಜ-ಲೋಭವಞ್ಚಿತ ಮಾನಸೋ;
ದಕ್ಖಿಣಂ ಮಲಯಂ ಗನ್ತ್ವಾ, ಸಙ್ಗಣ್ಹಿತ್ವಾ ಮಹಾ ಬಲಂ.
ವಿಲುಮ್ಪಮಾನೋ ಪಚ್ಚನ್ತಿ, ಸಮ್ಪತ್ತೋ ನಗರನ್ತಿಕಂ;
ತಂ ಸುತ್ವಾ ಕಸ್ಸಪೋ ಜೇಟ್ಠೋ, ವರಮಾರುಯ್ಹ ಕುಞ್ಜರಂ.
ಅಸ್ಸಾ ಸೇತ್ವಾನ ಪಿತರಂ, ಸಮಾದಾಯ ಸಹಾಯಕೇ;
ನಿಕ್ಖಮ್ಮ ನಗರಾ ಗಚ್ಛಿ, ಸಿಲಾಕಾಲಸ್ಸ ದಸ್ಸನಂ.
ಏವಂ ಸತ್ತ’ಟ್ಠ ವಾರೇಸು, ಪಲಾತೋ ಲೀನವುತ್ತಿಕೋ;
ಹತ್ಥೇ ಕತ್ವಾ ಉಪಾಯೇನ, ದೇಸೇ ಪಾಚಿನ ಪಚ್ಛಿಮೇ.
ಯುಜ್ಝಿತುಂ ಪುನ ಪಾಚಿನ-ತಿಸ್ಸ ಪಬ್ಬತಮಾಗಮಿ;
ಕಸ್ಸಪೋಪಿ ಸಹಾಯೇಹಿ, ಸದ್ಧಿಮಾರುಯ್ಹ ದನ್ತಿನಂ.
ತತ್ಥ ಗನ್ತ್ವಾ ಪಲಾಪೇತ್ವಾ, ಚೋರಂ ಪಬ್ಬತಮತ್ಥಕಂ;
ಆರೋಪೇಸಿ ಮಹಾನಾಗಂ, ತೇನಾ’ಸಿ ಗಿರಿಕಸ್ಸಪೋ.
ಮಾನತ್ಥದ್ಧೋ ಸಿಲಾಕಾಳೋ, ಭಿಯ್ಯೋ ರಟ್ಠಂ ಪಭಿನ್ದಿಯ;
ಸಬ್ಬಂ ಹತ್ಥಗತಂ ಕತ್ವಾ, ಅಜೇಯ್ಯ ಬಲವಾಹನೋ.
ಆಗಮ್ಮ ನಗರಂ ರುನ್ಧಿ, ಸತ್ಥಾಹಂ ರಾಜಸೇವಕಾ;
ಯುಜ್ಝಿತ್ವಾ ವಿರಲಾ ಆಸುಂ, ತತೋ ಚಿನ್ತೇಸಿ ಕಸ್ಸಪೋ.
ಏತೇ ¶ ನಗರರೋಧೇನ, ಸಬ್ಬೇ ಭಿಜ್ಜನ್ತಿ ಪಾಣಿನೋ;
ಪರಿಹೀನಂ ಬಲಂ ರಾಜಾ, ಅನ್ಧಕೋ ಚ ಮಹಲ್ಲಕೋ.
ಮೇರುಕನ್ದರಕೇ ಕತ್ವಾ, ಮಾತರಂ ಪಿತರಞ್ಚ ಮೇ;
ಅಙ್ಗಹೇತ್ವಾ ಬಲಂ ಪಚ್ಛಾ, ಚೋರೋ ನಿಗ್ಗಣ್ಹಿ ಯೋ ಇತಿ.
ರತ್ತಿಯಂ ಸೋ ಸಹಾಯೇ ಚ, ರಾಜಸಾಧನಮೇವಚ;
ಆದಾಯ ಪಿತರೋ ಚೇವ, ಮಲಯಂ ಗನ್ತುಮಾರಭಿ.
ತದಾ ಮಗ್ಗಮಜಾನನ್ತಾ, ಸಮ್ಮೂಳಾ ಮಗ್ಗದೇಸಕಾ;
ನಗರಸ್ಸ ಸಮೀಪೇವ, ಸಮ್ಭಮಿಂಸು ಇತೋ ತತೋ.
ಸಿಲಾಕಾಳೋ ಪವತ್ತಿಂ ತಂ, ಸುತ್ವಾ ಸಙ್ಗಮ್ಮ ವೇಗಸಾ;
ಪರಿವಾರೇಸಿ ಸಙ್ಗಾಮೋ, ತತ್ಥ ಭಿಂಸನಕೋ ಅಹು.
ದೇವಾಸುರರಣಾಕಾರೇ, ವತ್ತಮಾನೇ ಮಹಾಹವೇ;
ಪತಿತೇಸು ಸಹಾಯೇಸು, ಸೀದಮಾನೇ ಮಹಾಗಜೇ.
ಹತ್ಥಾರೋಹಸ್ಸ ದತ್ವಾ, ಛಿನ್ದಿತ್ವಾ ಸೀಸಮತ್ತನೋ;
ಪುಞ್ಛಿತ್ವಾ ಲೋಹಿತಂ ಕತ್ವಾ, ಕೋಸಿಯಂ ಅಸಿ ಪುತ್ತಿಕಂ.
ಹತ್ಥಿಕುಮ್ಭೇ ಉಭೋ ಹತ್ಥೇ, ಠಪೇತ್ವಾನ ಅವತ್ಥರಿ;
ಉಪತಿಸ್ಸೋಪಿ ತಂ ಸುತ್ವಾ, ಸೋಕಸಲ್ಲಾಹತೋ ಮರಿ.
ಏವಂ ದಿಯಡ್ಢವಸ್ಸೇನ, ಉಪತಿಸ್ಸೇ ದಿವಂಗತೇ;
ರಾಜಾ’ಹೋಸಿ ಸಿಲಾಕಾಳೋ, ಪುಬ್ಬನಾಮೇನ ಏಕತೋ.
ತಂ ಅಮ್ಬಸಾಮಣೇರಾದಿ-ಸಿಲಾಕಾಳೋತಿ ವೋಹರುಂ;
ತಿತ್ಥಂ ತೇರಸವಸ್ಸಾನಿ, ದಿಪಂ ಧಮ್ಮೇನ ಪಾಲಯಿ.
ಮಹಾಪಾಳಿಮ್ಹಿ ದಾಪೇಸಿ, ಪಚ್ಚಗ್ಘಂ ರಾಜಭೋಜನಂ;
ವೇಜ್ಜಸಾಲಾಸು ಭೋಗೇ ಚ, ವಡ್ಢೇಸಿ ಜನತಾಹಿತೋ.
ಅನ್ವಹಂ ಪೂಜಯಿ ಬೋಧಿಂ, ಪಟಿಮಾಯೋ ಚ ಕಾರಯಿ;
ಸಬ್ಬೇಸಂ ದೀಪವಾಸೀನಂ, ಭಿಕ್ಖೂನಂ’ದಾ ತಿಚೀವರಂ.
ಮಾಘಾತಂ ಕಾರಯಿದೀಪೇ, ಸಬ್ಬೇಸಂಯೇವ ಪಾಣಿನಂ;
ಆನಿತಂ ಅತ್ತನಾ ಕೇಸ-ಧಾತುಂ ಸಮ್ಮಾ ಅಪೂಜಯಿ.
ರಹೇರದಕವಾರಞ್ಚ, ಅದಾಸಿ ಅಭಯುತ್ತರೇ;
ಪುರತ್ಥಿಮಾ ಥೇರೀಯಾನಂ, ವಿಹಾರಕುನ್ಥನಾಮ ಸೋ.
ಆನೇತ್ವಾ ಆಸನಂ ತತ್ಥ, ಠಪೇಸಿ ದುಮರಾಜಕೇ;
ಯಾವಜೀವಂ ಪವತ್ತೇಸಿ, ಪುಞ್ಞಕಮ್ಮಮಸಙ್ಖಿಯಂ.
ಮೋಗ್ಗಲ್ಲಾನೋ ¶ ತಥಾ ದಾಠಾ, ಪಭುತಿ ಚೋ’ಪತಿಸ್ಸಕೋ;
ಪುತ್ತೋ ತಸ್ಸಾ’ಸುಮಗ್ಗಸ್ಸ, ದೇಸಂ ದತ್ವಾ ಪುರತ್ಥಿಮಂ.
ದತ್ವಾ ಠಾನನ್ತರಞ್ಚಾದಿ-ಪಾದಸಞ್ಞಂ ವಿಸಜ್ಜಯಿ;
ಗನ್ತ್ವಾ ತತ್ಥ ವಸಾಹೀತಿ, ಸೋಪಿ ಗನ್ತ್ವಾ ತಹಿಂ ವಸಿ.
ಠಾನಂ ಮಲಯರಾಜಗ್ಗಂ, ದೇಸಂ ದತ್ವಾನ ದಕ್ಖಿಣಂ;
ರಕ್ಖಣತ್ಥಂ ಸಮುದ್ದಸ್ಸ, ಮಜ್ಝಿಮಂ ತು ನಿಯೋಜಯಿ.
ಉಪತಿಸ್ಸಂ ತು ವಾಸೇಸಿ, ಸನ್ತಿಕೇಯೇವ ಅತ್ತನೋ;
ವಿಸೇಸೇನ ಮಮಾಯನ್ತೋ, ಯೂನಂ ಕಲ್ಯಾನದಸ್ಸನಂ.
ತಸ್ಸ ದ್ವಾದಸಮೇ ವಸ್ಸೇ, ಇತೋ ಕಾಸಿ ಪುರಂ ಗತೋ;
ಧಮ್ಮಾತು ಮಿಧಾ’ನೇಸಿ, ತತೋ ವಾಣಿಜ ಮಾಣವೋ.
ರಾಜಾ ದಿಸ್ವಾ’ಸಮತ್ಥೋ ಸೋ, ಧಮ್ಮಾಧಮ್ಮವಿಚಾರಣೇ;
ಹೇಮಸಞ್ಞಾಯ ದೀಪಮ್ಹಿ, ಪತನ್ತೋ ಸಲಭೋ ವಿಯ.
ಬುದ್ಧಧಮ್ಮೋತಿ ಸಞ್ಞಾಯ, ತಂ ಗಹೇತ್ವಾನ ಸಾಧುಕಂ;
ಕತ್ವಾ ಸಕ್ಕಾರಸಮ್ಮಾನಂ, ಗೇಹೇ ರಾಜಘರನ್ತಿಕೇ.
ಠಪೇತ್ವಾ ಅನುವಸ್ಸಂ ತು, ನೇತ್ವಾ ಜೇತವನಂ ಮಹಂ;
ಕಾತುಂ ಕಾರೇಸಿ ಚಾರಿತ್ತಂ, ಹಿತಂ ಮನ್ತ್ವಾನ ಪಾಣಿನಂ.
ಏವಂ ಕತ್ವಾ ಸಿಲಾಕಾಳೋ, ಪುಞ್ಞಕಮ್ಮಮನಪ್ಪಕಂ;
ಪತ್ತೇ ತೇರಸಮೇ ವಸ್ಸೇ, ಯಥಾಕಮ್ಮಮುಪಾಗಮಿ.
ದಾಠಪ್ಪಭುತಿಕೋ ರಜ್ಜಂ, ಗಹೇತ್ವಾ ಭಾತರಂಸಕಂ;
ಅಕ್ಕಮೋತಿ ನಿವಾರೇನ್ತಂ, ಮಾರಾಪೇಸಿ ವಿಬುದ್ಧಿಕೋ.
ಮೋಗ್ಗಲ್ಲಾನೋ’ಥ ತಂ ಸುತ್ವಾ, ಅಪ್ಪತ್ತಂ ರಜ್ಜಮಗ್ಗಹಿ;
ಅಕಾರಣೇ ಮೇ ಮಾರೇಸಿ, ಕಣಿಟ್ಠಂ ಧಮ್ಮವಾದೀನಂ.
ಕಾರಾಪೇಸ್ಸಾಮಹಮ್ಪಜ್ಜ, ರಜ್ಜನ್ತಿ ಪರಿಕುಪ್ಪಿಯ;
ಸಮಾದಾಯ ಮಹಾಸೇನಂ, ಅಗಾರಾಹೇರ ಪಬ್ಬತಂ.
ರಾಜಾಪಿ ಸುತ್ವಾ ಸನ್ನದ್ಧ-ಬಲಕಾಯೋ ಕರಿನ್ದಕೇ;
ಪಬ್ಬತೇ ಸಿವಿರಂ ಬನ್ಧಿ, ಮೋಗ್ಗಲ್ಲಾನೋ ನಿಸಮ್ಮತಂ.
ಸಾಪರಾಧಾನ ತೇ ಮೇ ವಾ, ಮನುಸ್ಸಾ ದೀಪವಾಸಿನೋ;
ಏಕಸ್ಮಿಞ್ಚ ಮತೇ ರಜ್ಜ-ಮುಭಿನ್ನಂಯೇವ ನೋಸಿಯಾ.
ತಸ್ಮಾ ಅಞ್ಞೇನ ಯುಜ್ಝನ್ತು, ಉಭೋಯೇವ ಮಯಂ ಇಧ;
ಹತ್ಥಿಯುದ್ಧಂ ಕರೋಮಾತಿ, ರಞ್ಞೋ ಪೇಸೇಸಿ ಸಾಸನಂ.
ಸೋಪಿ ¶ ಸಾಧೂತಿ ವತ್ವಾನ, ಬದ್ಧಪಞ್ಚಾಯುಧೋ ಗಜಂ;
ಆರುಯ್ಹ ಮುನಿನೋ ಮಾರೋ ವಿಯ ಓತ್ಥರಿ ತಾವದೇ.
ಮೋಗ್ಗಲ್ಲಾನೋಪಿ ಸನ್ನದ್ಧೋ, ಆರುಯ್ಹ ಕರೀನಂ ವರಂ;
ತತ್ಥಾ’ಗೋ ಅಞ್ಞಮಞ್ಞಂ ತೇ, ಪಾಪುಣಿಂಸು ಮಹಾಗಜಾ.
ಸದ್ದೋ ಸೂಯಿತ್ಥ ಸಙ್ಘಟ್ಟೇ, ಅಸನಿರಾವ ಸನ್ನಿಭೋ;
ದನ್ತಘಾತೇನ ಉಟ್ಠಾಸಿ, ಜಾಲಾ ವಿಜ್ಜುಲ್ಲತಾ ವಿಯ.
ಸಞ್ಝಾಘನಸಭಾಗಾ’ಸುಂ, ಗಜಾ ಲೋಹಿತಮಕ್ಖಿತಾ;
ಮೋಗ್ಗಲ್ಲಾನಗಜಾವಿದ್ಧೋ, ರಞ್ಞೋಓಸಕ್ಕಿ ಕುಞ್ಜರೋ.
ರಾಜಾ ಆರಭಿ ತಂ ದಿಸ್ವಾ, ಛಿನ್ದಿತುಂ ಸೀಸಮತ್ತನೋ;
ಮೋಗ್ಗಲ್ಲಾನೋ’ಥ ವನ್ದನ್ತೋ, ಯಾಚಿ’ಮೇ’ವಂ ಕಿರೀಇತಿ.
ಯಾಚಮಾನೇಪಿ ಸೋಮಾನಂ, ಮಾನೇನ್ತೋ ಛಿನ್ದಿಕನ್ಧರಂ;
ಛಡ್ಡೇಸಿ ಛಹಿ ಸೋ ರಜ್ಜಂ, ಮಾಸೇಹಿ ದಿವಸೇಹಿ ಚ.
ಮೋಗ್ಗಲ್ಲಾನೋ ತತೋ ರಾಜಾ, ಆಸಿ ದೀಪೇ ಮಹಾಬಲೋ;
ಮಾತುಲಞ್ಚ ಪಟಿಚ್ಚೇಮಂ, ಚೂಲನಾಮೇನ ವೋಹರುಂ.
ಆಸಾಧಾರಣಕಾವೇಯ್ಯೋ, ವತ್ಥುತ್ತಯ ಪರಾಯಣೋ;
ದಾನಸಂಯಮ ಸೋಚೇಯ್ಯೋ, ಸೋರಚ್ಚಾದಿಗುಣಾಲಯೋ.
ದಾನೇನ ಪಿಯವಾಚಾಯ, ಅತ್ಥಸ್ಸ ಚರಿಯಾಯ ಚ;
ಸಮಾನತ್ತಸ್ಸಭಾವೇನ, ಸಙ್ಗಹೇಸಿ ಮಹಾಜನಂ.
ಪಿಣ್ಡಪಾತವಿಹಾರೇಹಿ, ಭೇಸಜ್ಜಚ್ಛಾದನೇಹಿ ಚ;
ಭಿಕ್ಖುಸಙ್ಘಞ್ಹಿ ಸಙ್ಗಣ್ಹಿ, ಧಮ್ಮಿಕಾಯ ಚ ಗುತ್ತಿಯಾ.
ಅತಿರೇಕಾಯ ಪೂಜಾಯ, ಪೂಜೇತ್ವಾ ಧಮ್ಮಭಾಣಕೇ;
ಪಿಟಕೇ ತೀಣಿ ವಾಚೇಸಿ, ಸದ್ಧಿಮಟ್ಠಕಥಾಯ ಸೋ.
ಕುಮಾರೇ ಉಪಲಾಲೇತ್ವಾ, ನಿವಾಪೇನ ಯಥಾರುಚಿಂ;
ಸಜ್ಝಾಪೇಸಿ ಸದಾ ಧಮ್ಮಂ, ಧಮ್ಮದೀಪೋ ಮಹಾಮತಿ.
ಧಮ್ಮದೀಪಞ್ಚ ಸೋ ಕತ್ವಾ, ಕುಞ್ಜರಸೇಖರೇನಿ ಸಾ;
ಧಮ್ಮಾವಾಸಾನೇ ವಾಚೇಸಿ, ಪುರಮ್ಹಿ ಪುರಿಸುತ್ತಮೋ.
ಬನ್ಧಾಪೇಸಿ ಕದಮ್ಬಞ್ಚ, ನದಿಂಪಬ್ಬತಮಜ್ಝತೋ;
ಪತ್ತಪಸಾಣವಾಪಿಞ್ಚ, ಧನವಾಪಿಂ ಗರಿತರಂ.
ಗಣ್ಹಾಪೇಸಿ ಸದೀಘಾಯು-ಹೇತು ಕಮ್ಮನ್ತಿ ಸಾದರೋ;
ಲಿಖಾಪೇಸಿ ಚ ಸದ್ಧಮ್ಮಂ, ವತ್ಥುಪೂಜಞ್ಚ ಕಾರಯಿ.
ಲೋಕಂ ¶ ಸೋ ಅನುಕಮ್ಪಿತ್ವಾ, ಮಾತಾಪುತ್ತಂವ ಓರಸಂ;
ದತ್ವಾ ಭುತ್ವಾ ಯಥಾಕಾಮಂ, ವಸ್ಸೇ ವೀಸತಿಮೇ ಮರಿ.
ಮಹೇಸೀ ತಸ್ಸ ಘಾತೇತ್ವಾ, ವಿಸಯೋಗೇನ ಞಾತಕೇ;
ಪುತ್ತಂ ರಜ್ಜೇ’ಭಿಸಿಞ್ಚಿತ್ವಾ, ಸಯಂ ರಜ್ಜಂ ವಿಚಾರಯಿ.
ತಥಾಭಿಸಿತ್ತೋ ಸೋ ಕಿತ್ತಿ-ಸಿರಿಮೇಘೋ ನರಾಧಿಪೋ;
ತಿಪುಪತ್ತೇಹಿ ಛಾದೇಸಿ, ದುಮಿನ್ದಧರಮಾದಿತೋ.
ಕಪಣದ್ಧಿವಣಿಬ್ಬಾನಂ, ಮಹಾದಾನಂ ಪವತ್ತಯಿ;
ಮಗ್ಗಪಾಲೋ ತಥಾಕಾರೋ, ಅಹು ಸಬ್ಬೋಪಭೋಗಿಯೋ.
ಮಹೇಸೀ ಸಾ ಸದಾ ಆಸಿ, ಪಧಾನಾ ಸಬ್ಬಕಮ್ಮಸು;
ರಜ್ಜಂ ತಸ್ಸಾ’ಸಿ ತೇನೇವ, ಹೇಟ್ಠುಪರಿಯವತ್ತಿಕಂ.
ರಾಜಾಪಾದಾ ಮಹಾಮಚ್ಚಾ’-ಹೇಸುಂ ಲಞ್ಚಪರಾಯನಾ;
ದುಬ್ಬಲೇ ಚ ವಿಹೇಠೇಸುಂ, ಬಲೀ ಜಾನಪದಾ ನರಾ.
ಸಿಲಾಕಾಳಸ್ಸ ಕಾಲಮ್ಹಿ, ಗಾಮೇ ಸಙ್ಗಿಲ್ಲನಾಮಕೇ;
ಭಯವಸೀವ್ಹಯೋ ಪೋಸೋ, ಅಹು ಮೋರಿಯವಂಸಜೋ.
ಅಹೋಸಿ ಪುತ್ತೋ ಸೀವಸ್ಸ, ಅಗ್ಗಬೋಧಿ ಸನಾಮಕೋ;
ಭಾಗಿನೇಯ್ಯೋಪಿ ತಸ್ಸಾಸಿ, ಮಹಾನಾಗೋತಿ ವಿಸ್ಸುತೋ.
ಭಾಗಿನೇಯೋ ಮಹಾನಾಗೋ, ಅಗ್ಗಬೋಧಿ ಚ ಸುನ್ದರೋ;
ಉಳಾರಜ್ಝಾಸಯತ್ತಾ ಸೋ, ಮಹಾನಾಗೋ ಮಹಬ್ಬಲೋ.
ಹಿತ್ವಾ ಕಸ್ಸಕಕಮ್ಮಾನಿ, ಚೋರಕಮ್ಮಮಕಾ ವನೇ;
ಗೋಧಂ ಲದ್ಧಾನ ಪೇಸೇಸಿ, ಮಾತುಲಾನಿಯ ಸನ್ತಿಕಂ.
ಗೋಧಂ ದಿಸ್ವಾ’ವಸಾ ಞತ್ವಾ, ಧಞ್ಞಪಚ್ಛಿಮಪೇಸಯಿ;
ಕಮ್ಮಾರಸ್ಸಾ’ಪಿ ಪೇಸೇಸಿ, ಸಸಂ ಸೋಪಿ ತಥೇವಕಾ.
ಬೀಜಂ ಭಗಿನೀ ಮಾಯಾಚಿ, ಬೀಜಗಾಹಞ್ಚ ತಸ್ಸ ಸಾ;
ದಾಸಞ್ಚ ಞತ್ವಾ ಪೇಸೇಸಿ, ಅನ್ನಪಾನಾದಿನಾ ರಹೋ.
ತದಾ ದುಬ್ಭಿಕ್ಖಕಾಲಮ್ಹಿ, ಏಕೋ ಮನ್ತಧರೋ ನರೋ;
ಭಿಕ್ಖಾಲಾಭಾಯ ಸದ್ಧೇಹಿ, ಭಿಕ್ಖುವೇಸೇನ ಭಿಕ್ಖತಿ.
ತಂ ಗಾಮಂ ಪವಿಸಿತ್ವಾ ಸೋ, ಅಲದ್ಧಾ ಕಿಞ್ಚಿ ಭೋಜನಂ;
ಅಭಿಭೂತೋ ಜಿಘಚ್ಛಾಯ, ಕಮ್ಪಮಾನೋ ನಿಗಚ್ಛತಿ.
ತಂ ದಿಸ್ವಾ ಕರುಣಾಯನ್ತೋ, ಮಹಾನಾಗೋ ಮಹಾದಯೋ;
ಪತ್ತಮಾದಾಯ ಗಾಮನ್ತ-ಮಾಹಿಣ್ಡಿತ್ವಾಪಿ ಸಬ್ಬಸೋ.
ಯಾಗುಮತ್ತಮ್ಪಿ ¶ ನಾಲತ್ಥ, ತತೋ ಉತ್ತರಸಾಟಕಂ;
ದತ್ವಾ ಆಹರಿ ಆಹಾರಂ, ಸೋ ತಂ ಭುತ್ವಾ ಪಸೀದಿಯ.
ರಜ್ಜಾರಹಮಿಮಂ ದೀಪೇ, ಕರಿಸ್ಸಾಮೀತಿ ಚಿನ್ತಿಯ;
ತಮಾದಾಯ ಖಣೇನಾ’ಗಾ, ಗೋಕಣ್ಣಕಮಹಣ್ಣವಂ.
ಅಥ ತತ್ಥ ನಿಸೀದಿತ್ವಾ, ಸಞ್ಜಪನ್ತೋ ಯಥಾವಿಧಿಂಮ;
ಮನ್ತೋನಾ’ನೇಸಿ ನಾಗಿನ್ದಂ, ಫುಸ್ಸಪುಣ್ಣಮರತ್ತಿಯಂ.
ಮಹಾನಾಗಂ ಫುಸಾಹೀತಿ, ಮಹಾನಾಗಂ ನಿಯೋಜಯಿ;
ಸೋ ಭೀತೋ ಪುರಿಮೇ ಯಾಮೇ, ಆಗತಂ ತಂ ನ ಸಮ್ಭುಸೀ.
ತಥಾ ಮಜ್ಝಿಮಯಾಮೇಪಿ, ಪಚ್ಛಿಮೇ ಪನ ನಙ್ಗಲೇ;
ಗಹೇತ್ವಾ ಖಿಪಿ ತೀಹೇವ, ಅಙ್ಗುಲೀಹಿ ಸತಂ ಛುಪಿ.
ಸೋ ತಂ ಬ್ಯಾಕಾಸಿ ತಂ ದಿತ್ವಾ, ಸಬಲಂ ಮೇ ಪರಿಸ್ಸಮಂ;
ತೀಹಿ ರಾಜೂಹಿ ಯುಜ್ಝಿತ್ವಾ, ಚತುತ್ಥಂ ತ್ವಂ ನಿಘಾತಿಯ.
ವುಡ್ಢೋ ತೀಣೇವ ವಸ್ಸಾನಿ, ರಾಜಾ ಹುತ್ವಾ ನ ಜೀವಸಿ;
ತಥಾ ಹೇಸ್ಸನ್ತಿ ರಾಜಾನೋ, ತಯೋ ತೇ ವಂಸಜಾ ನರಾ.
ಗನ್ತ್ವಾ ಸೇವಸ್ಸು ರಾಜಾನಂ, ಪಚ್ಛಾ ಪಸ್ಸಸಿ ಮೇಖಲಂ;
ಇತಿ ವತ್ವಾನ ಪೇಸೇಸಿ, ಸೋಪಿ ಗನ್ತ್ವಾ ನರಿಸ್ಸರಂ.
ಪಸ್ಸಿತ್ವಾ ತಮುಪಟ್ಠಾಸಿ, ರಾಜಾ ರೋಹಣಕಮ್ಮಿಕಂ;
ತಂ ಅಕಾಸಿ ತದುಟ್ಠಾನಂ, ಭಣ್ಡಮಾಹರಿ ಸೋ ಬಹುಂ.
ರಾಜಾ ತಸ್ಮಿಂ ಪಸೀದಿತ್ವಾ, ಅನ್ಧಸೇನಾಪತಿವ್ಹಯಂ;
ದತ್ವಾ ಠಾನನ್ತರಂ ತಸ್ಸ, ಗನ್ತುಂ ತತ್ಥೇವ ಯೋಜಯಿ.
ಭಯಸೀವಸ್ಸ ಪುತ್ತಞ್ಚ, ಭಾಗಿನೇಯ್ಯಞ್ಚ ಅತ್ತನೋ;
ಆದಾಯ ಗನ್ತ್ವಾ ತಂ ದೇಸಂ, ಪರಿವತ್ತೇಸಿ ಸಬ್ಬಸೋ.
ಪಚ್ಚೇಕಭೋಗಂ ಕತ್ವಾನ, ರೋಹಣಂ ತತ್ಥ ಸೋ ವಸಂ;
ದಾಠಪ್ಪಭೂತಿನಾ ಕಾತುಂ, ಯುದ್ಧಂಗನ್ತ್ವಾ ಮಹಬ್ಬಲೋ.
ಮೋಗ್ಗಲ್ಲಾನಭಯಾ ಗನ್ತ್ವಾ, ರೋಹಣಞ್ಚ ತಹಿಂ ವಸೀ;
ಸುತ್ವಾ ಕಿತ್ತಿಸಿರೀಮೇಘವಣ್ಣ-ರಞ್ಞೋ ರಜ್ಜೇ ಸಮಞ್ಜಸಂ.
ರಜ್ಜಂ ಗಹೇತುಂ ಕಾಲೋತಿ, ಸೀಘಂ ಆಗಮ್ಮ ರೋಹಣಾ;
ಏಕೂನವಿಸೇ ದಿವಸೇ, ಮಾರಯಿತ್ವಾ ಮಹೀಪತಿಂ.
ಸಯಂ ಹುತ್ವಾ ಮಹೀಪಾಲೋ, ದೇಸಂ ಕತ್ವಾ ಯಥಾ ಪುರೇ;
ಭಾಗಿನೇಯ್ಯಸ್ಸ ಪಾಹೇಸಿ, ಪಣ್ಣಮಾಗಚ್ಛತೂತಿ ಸೋ.
ಆಗಚ್ಛನ್ತೋ ¶ ನಿಮಿತ್ತೇನ, ನಿವತ್ತಿತ್ವಾ ಮರಿತ್ಥ ಸೋ;
ತತೋ ಮಾತುಲಪುತ್ತಂ’ಕಾ, ಉಪರಜ್ಜಂ ಕತಞ್ಞುಕೋ.
ಆಲವಾಲಂ ದುಮಿನ್ದಸ್ಸ, ಕತ್ವಾ ಹೇಮಮಯಂ ಘರಂ;
ಛಾದಾಪೇಸಿ ಮುನಿನ್ದಸ್ಸ, ಪಟಿಮಾಯೋ ಚ ಸನ್ದಹಿ.
ಮಹಾಚೇತಿತ್ತಯೇ ಕಾಸಿ, ಸುಧಾಕಮ್ಮಞ್ಚ ಚುಮ್ಬಟಂ;
ಹತ್ಥಿವೇದಿಞ್ಚ ಕಾರೇತ್ವಾ, ಚಿತ್ತಕಮ್ಮಮಕಾರಯಿ.
ಪೇಸಕಾರಕಗಾಮಂ ಸೋ, ಜಮ್ಬೇಲವ್ಹಯಮುತ್ತರೇ;
ಮಹಾವಿಹಾರೇಚಾಬನ್ಧಿ, ಗಾಮಂ ತಿನ್ತಿಣಿಕವ್ಹಯಂ.
ಉದ್ಧಗಾಮಮ್ಹಿ ವಸಭ-ಗಾಮಂ ಜೇತವನಸ್ಸ’ದಾ;
ವತ್ಥದಾನಂ ನಿಕಾಯೇಸು, ತೀಸು ಚೇವ ಪವತ್ತಯಿ.
ಖೇತ್ತಾನಂ ಹಿಸತಂ ದತ್ವಾ, ವಿಹಾರೇ ಜೇತನಾಮಕೇ;
ಯಾಗುಂ ತತ್ಥ ಪವತ್ತೇಸಿ, ಭಿಕ್ಖೂನಂ ಸಬ್ಬಕಾಲಿಕಂ.
ಸಹಸ್ಸ ದೂರತಿಸ್ಸವ್ಹಾ, ಖೇತ್ತಂ ದತ್ವಾ ತಪಸ್ಸಿನಂ;
ಮಹಾವಿಹಾರವಾಸೀನಂ, ಯಾಗುಂ ನಿಚ್ಚಂ ಪವತ್ತಯಿ.
ಚಿರಮಾತಿಕವಾರಞ್ಚ, ತತ್ಥೇವ’ದಾ ಗುಣೇ ರತೋ;
ಮಯೂರಪರಿವೇಣೇ ಚ, ನವಕಮ್ಮಮಕಾರಯಿ.
ಕಾಸಿಖಣ್ಡೇ ಮಹಾದೇವ-ರತ್ತಕುರವನಾಮಕೇ;
ವಿಹಾರೇ ಅನುರಾರಾಮಂ, ಜಿಣ್ಣಞ್ಚ ಪಟಿಸಙ್ಖರೀ.
ಕಮಂ ಸೋವಗ್ಗಿಕಂ ಕತ್ವಾ, ಏವಮಾದಿಂ ನರಿಸ್ಸರೋ;
ಅಗಮಾ ತೀಹಿ ವಸ್ಸೇಹಿ, ದೇವರಾಜಸಹಬ್ಯತಂ.
ಅಟ್ಠೇತೇ ಕುಟ್ಠಚಿತ್ತಾ’ಪರಿಮಿತವಿಭವಾ ರಾಜರಾಜೇನರೂಪಾ;
ರಾಜಾನೋ ರಾಜಮಾನಾ ನರಕರಿತುರಗಾಸೂರಸೇನಾರಥೇಹಿ;
ಅನ್ತೇ ಹಿತ್ವಾ’ಖಿಲಂ ತಂ ವಿಗತಪರಿಜನಾ’ಳಾಹನಂ ಸಙ್ಖತಾಸುಂ;
ಸಪ್ಪಞ್ಞೋ ತಂ ಸರನ್ತೋ ಭವತು ಭವಸುಖಂ ವನ್ತುಕಾಮೋ ಹಿತೇಸೀ.
ಸುಜನಪ್ಪಸಾದಸಂವೇಗತ್ಥಾಯ ಕತೇ ಮಹಾವಂಸೇ
ಅಟ್ಠರಾಜಕೋ ನಾಮ
ಚತ್ತಾಲೀಸತಿಮೋ ಪರಿಚ್ಛೇದೋ.
ಏಕಚತ್ತಾಲೀಸತಿಮ ಪರಿಚ್ಛೇದ
ದ್ವಿರಾಜಕೋ
ಮಹಾನಾಗನರಿನ್ದಸ್ಸ ¶ , ಭಾಗಿನೇಯ್ಯೋ ಸುಭಾಗಿಯೋ;
ಸೋ ಅಗ್ಗಬೋಧಿರಾಜಾಸಿ, ಅಗ್ಗಬೋಧಿಗತಾಸಯೋ.
ತೇಜೇನ ಬಾಹುಂ ಸೋಮ್ಮೇನ, ಚನ್ದಂ ಸಮ್ಪುಣ್ಣಮಣ್ಡಲಂ;
ಸುಮೇರುಮಚಲನ್ತೇನ, ಗಮ್ಭಿರೇನ ಮಹೋದಧಿಂ.
ವಸುನ್ಧರಾ ಪಕಮ್ಪೇನ, ಮಾರುತಂ ಸಮ್ಪವುತ್ತಿಯಾ;
ಬುದ್ಧಿಯಾಮರಮನ್ತಾರಂ, ಸುದ್ಧಿಯಾ ಸರದಮ್ಬರಂ.
ಕಾಮಭೋಗೇನ ದೇವಿನ್ದ, ಮತ್ಥೇನ ಚ ನರಿಸ್ಸರಂ;
ಧಮ್ಮೇನ ಸುದ್ಧವಾಸೇಟ್ಠಂ, ವಿಕ್ಕಮೇನ ಮಿಗಾಧಿಪಂ.
ರಾಜಧಮ್ಮೇಹಿ ರಜ್ಜೇಹಿ, ಚಕ್ಕವತ್ತಿನರಿಸ್ಸರಂ;
ವೇಸ್ಸನ್ತರಞ್ಚ ದಾನೇನ, ಅನುಗನ್ತ್ವಾ ಜನೇ ಸುತೋ.
ಮಾತುಲಂ ಉಪರಾಜವ್ಹೇ, ಭಾತರಂ ಯುವರಾಜಕೇ;
ಭಾಗಿನೇಯ್ಯಞ್ಚ ಮಲಯ-ರಾಜಠಾನೇ ಠಪೇಸಿ ಸೋ.
ಠಾನನ್ತರೇ ಯಥಾಯೋಗಂ-ಸೇಟ್ಠಾಮಚ್ಚೇ ಠಪೇಸಿ ಚ;
ಜನಂ ಸಙ್ಗಹವತ್ಥೂಹೀ, ರಾಜಧಮ್ಮೇಹಿ ಚಗ್ಗಹಿ.
ದೇಸಂ ಸಯೋಗ್ಗಂ ಪಾದಾಸಿ, ಯುವರಾಜಸ್ಸ ದಕ್ಖಿಣಂ;
ವಸಂ ತತ್ಥ ಸಿರೀವಡ್ಢ-ಮಾನವಾಪಿಂ ಸಗಾಹಯಿ.
ಕತ್ವಾ ಗಿರಿವಿಹಾರಞ್ಚ, ಸಙ್ಘಿಕಂ ತಸ್ಸ ದಾಪಯಿ;
ಖೇತ್ತಾನಂ ದ್ವಿಸತಂ ಸಙ್ಘ-ಭೋಗತ್ಥಾಯ ಮಹಾಮತಿ.
ಅದಾ ಮಲಯರಾಜಸ್ಸ, ದಾಠಾನಾಮಂ ಸಧೀತರಂ;
ಪರಿವೇಣಂ ಸೀರಿಸಙ್ಘ-ಬೋಧಿನಾಮಞ್ಚ ಕಾರಯಿ.
ಮಹಾಸಿವಸ್ಸ ಕಾರೇಸಿ, ಪರಿವೇಣಂ ಸನಾಮಕಂ;
ಪರಿವಾರೋ’ಪಿ ತಸ್ಸಾಸಿ, ಏವಂ ಪುಞ್ಞಪರಾಯನೋ.
ಕತ್ವಾ ಸಾಧುಪಚಾರೇನ, ಪೋರಾಣಂ ಸಙ್ಗಹಂ ವಿಧಿಂ;
ಅನ್ತರಾಯಂ ವಿಸೋಧೇತುಂ, ಜಿಣ್ಣಞ್ಚ ಪಟಿಸಙ್ಖರಿ.
ಕವಯೋ ¶ ತಸ್ಸ ರಜ್ಜಮ್ಹಿ, ಸೀಹಳಾಯ ನಿರುತ್ತಿಯಾ;
ಕಾವೇಯ್ಯೇ ಬಹುಕೇ’ಕಾಸುಂ, ವಿಚಿತ್ರನಯಾಸಾಲಿನೋ.
ವಿಹಾರೇ ದಕ್ಖಿಣೇ ಕಾಸಿ, ಪಾಸಾದಂ ಸುಮನೋಹರಂ;
ಅಕಾ ನವಹಿ ವಸ್ಸೇಹಿ, ದಿಪೇ ಕಣ್ಟಕಸೋಧನಂ.
ಕುರುನ್ದನಾಮಂ ಕಾರೇತ್ವಾ, ವಿಹಾರಂ ಸಬ್ಬಸಙ್ಘಿಕಂ;
ವಾಪಿಂ ತನ್ನಾಮಕಂ ನಾಳಿ-ಕೇರಾರಾಮಂ ತಿಯೋಜನಂ.
ಮಹಾಸಿವವ್ಹಯೇ ಚೇವ, ಸಸ್ಸಂ ಕಾರಯಿತುಂ ಅದಾ;
ಲಾಭಸಕ್ಕಾರಸಮ್ಮಾನ-ಮಾರಾಮಿಕಸತಂ ತದಾ.
ವಿಹಾರಂ ತಂ ಸಮೀಪಮ್ಹಿ, ಕತ್ವಾ ಅಮ್ಬಿಲಪಸ್ಸವಂ;
ಗಾಮಂ ತನ್ನಾಮಕಂ ಚಾದಾ, ಥೇರಿಯಾನಂ ತಪಸ್ಸೀನಂ.
ಉತ್ತರವಲ್ಲಿವಿಹಾರಸ್ಸ, ರತನಂ ದೀಘವಣ್ಣಿತಂ;
ದತ್ವಾ ಗಾಮಂ ಪತಿಟ್ಠೇಸಿ, ಸತ್ಥುಬಿಮ್ಬಂ ಸಿಲಾಮಯಂ.
ಕೇಳಿವಾತೇ ಚ ಕಾರೇಸಿ, ಸುಮನಂ ನಾಮ ಪಬ್ಬತಂ;
ಮಹಾತೇಲವಟಂಬೋಧಿ-ಘರೇ ಪಾಸಾಣವೇದಿಕಂ.
ಕಾರೇತ್ವಾ ಲೋಹಪಾಸಾದಂ, ಪಾಸಾದಮಹನೇ ಅದಾ;
ಛತ್ತಿಂಸಾನಂ ಸಹಸ್ಸಾನಂ, ಭಿಕ್ಖೂನಂ ಸೋ ತಿಚೀವರಂ.
ಗಾಮಂ ದತ್ವಾ ನಿಯೋಜೇಸಿ, ಆರಕ್ಖಂ ಧೀತು ನಾಮಕಂ;
ಹತ್ಥಿಕುಚ್ಛಿವಿಹಾರೇಪಿ, ಪಾಸಾದಂ ಕಾಸಿ ಬುದ್ಧಿಮಾ.
ದಾಠಾ ಸಿವಸ್ಸ ಠತ್ವಾನ, ಓವಾದೇ ಸಾಧು ಭಿಕ್ಖುನೋ;
ಸಮಾಚರನ್ತೋ ಧಮ್ಮೇನ, ಸಕ್ಕಚ್ಚಂ ತಮುಪಟ್ಠಹಿ.
ಮೂಗಸೇನಾಪತಿಂ ಚಾಕಾ, ವಿಹಾರಂ ಸೋ ವಿಸಾಲಕಂ;
ಗಾಮಂ ಲಜ್ಜಿಕಮೇತಸ್ಸ, ದಾಸ ಭೋಗಾಯ’ದಾಸಿ ಚ.
ಮಹಾನಾಗಸ್ಸ ಪುಞ್ಞತ್ಥಂ, ರಞ್ಞೋ ತಂನಾಮಕಂ ಅಕಾ;
ಮಹಾಥೇರಸ್ಸ ತಞ್ಚಾ’ದಾ, ರಾಜಾ ತೇಪಿಟಕಸ್ಸ ಸೋ.
ಅತ್ತನೋ ಸದಿಸಾನಞ್ಚ, ಯೋಗೀನಂ ವಿಗತಾಲಯೋ;
ಭಿಕ್ಖೂನಂ ಚತುಸಟ್ಠೀನಂ, ವಿಹಾರಂ ತಂ ತದಾ ಅದಾ.
ಕತ್ವಾ ತಸ್ಸೇವ ಮಹಾ-ಪರಿವೇಣನಿವಾಸಿನೋ;
ಭಿನ್ನೋರುದೀಪಂ ದತ್ವಾನ, ವಟ್ಟಕಾಕಾರಪಿಟ್ಠಿತೋ.
ದಕ್ಖಿಣಗೀರಿದಳ್ಹವ್ಹೇ, ಮಹಾನಾಗೇ ಚ ಪಬ್ಬತೇ;
ಕಾಳವಾಪಾದಿಕೇ ಚಾ’ಕಾ, ವಿಹಾರೇ ಪೋಸಥಾಲಯೇ.
ವಿಹಾರೇ ¶ ಅಭಯೇ’ಕಾಸಿ, ಮಹಾಪೋಕ್ಖರಣಿಂ ತಥಾ;
ಚೇತಿಯಪಬ್ಬತೇ ಚಾಕಾ, ನಾಗಸೋಣ್ಡಿಂ ಥಿರೋದಿಕಂ.
ಮಹಿನ್ದತಟವಾವಿಞ್ಚ, ಕಾರಾಪೇತ್ವಾನ ಸಾಧುಕಂ;
ಏತಿಸ್ಸಾ ಮರಿಯಾದಾಯ, ಥೇರಂ ನೇತುಂ ನಿಯೋಜಯಿ.
ಮಹಾಮಹಿನ್ದ ಥೇರಮ್ಹಿ, ತಂಠಾನಸಮುಪಾಗತೋ;
ತರಚ್ಛಾ ಏವ ನೇತುನ್ತಿ, ಕತಿಕಞ್ಚೇವ ಕಾರಯಿ.
ಛತ್ತಂ ಸೋಣ್ಣಞ್ಚ ಕಾರೇಸಿ, ನಿಕಾಯೇಸುಪಿ ತೀಸು ಸೋ;
ಸತ್ತಾಟ್ಠನವ ವಾರೇಸು, ಮಹಗ್ಘರತನೇಹಿ ಚ.
ಮಹಾತೂಪೇ ಚತುಬ್ಬೀಸ-ಭಾರಂ ಛತ್ತಂ ಸುವಣ್ಣಯಂ;
ತತ್ಥ ತತ್ಥ ಚ ಪೂಜೇಸಿ, ಮಹಗ್ಘಂ ರತನುತ್ತಮಂ.
ದಾಠಾಧಾತುಘರಂ ಕತ್ವಾ, ವಿಚಿತ್ರರತನುಜ್ಜಲಂ;
ಕಾಸಿ ಹೇಮಕರಣ್ಡಞ್ಚ, ಲೋಹನಾವಞ್ಚ ಪಾಳಿಯಂ.
ಮಣಿಮೇಖಲನಾಮಞ್ಚ, ಬನ್ಧಾಪೇಸಿ ಸಬನ್ಧನಂ;
ಮಹಾಮಾತಿಞ್ಚ ಗಣ್ಹೇಸಿ, ಮಣಿಹೀರಕವಾಪಿಯಂ.
ತದಾ ಏಕೋ ಮಹಾಥೇರೋ, ಜೋತಿಪಾಲಕನಾಮಕೋ;
ಪರಾಜೇಸಿ ವಿವಾದೇನ, ದೀಪೇ ವೇತುಲ್ಲವಾದಿನೋ.
ದಾಠಾಪಭುತಿನಾಮೋ’ಥ, ಆದಿಪಾದೋ’ತಿಲಜ್ಜಿತೋ;
ಹತ್ಥಮುಕ್ಖಿಪ್ಪಿ ತಂ ಹನ್ತುಂ, ಗಣ್ಡೋ ಸಞ್ಜಾಯಿ ತಂಖಣೇ.
ರಾಜಾ ತಸ್ಮಿಂ ಪಸೀದಿತ್ವಾ, ವಿಹಾರೇಯೇವ ವಾಸಯಿ;
ಮಾನೇನ ತಂ ಅನಾಗಮ್ಮ, ದಾಠಾಪಭೂಮತೋ ಕಿರ.
ದತ್ವಾ ಮಹಾದಿಪಾದತ್ತಂ, ಭಾಗಿನೇಯ್ಯಗ್ಗಬೋಧಿನೋ;
ರಕ್ಖಿತುಂ ತಂ ನಿಯೋಜೇಸಿ, ಥೇರಂ ಸೋಪಿ ತಮಾಚರಿ.
ನೀಲಗೇಹಪರಿಚ್ಛೇದಂ, ಕತ್ವಾ ತಸ್ಸೇವ ಸೋ ಅದಾ;
ಕತ್ವೇವಂ ಬಹುಧಾ ಪುಞ್ಞಂ, ಚತುತ್ತಿಂಸೇ ಸಮೇ ಮತೋ.
ಅಗ್ಗಬೋಧಿ ತತೋ ಆಸಿ, ರಾಜಾ ಪುಬ್ಬಸ್ಸ ರಾಜಿನೋ;
ಮಹಲ್ಲಕತ್ತಾನಂ ಖುದ್ದ-ನಾಮೇನ ಪರಿದೀಪಯುಂ.
ಸೋ ದೀಪಂ ಪರಿಪಾಲೇಸಿ, ಪುಬ್ಬಚಾರಿತ್ತಕೋವಿದೋ;
ಅಕಾಸಿ ಚ ಮಹೇಸಿಂ ಸೋ, ಮಾತುಲಧೀತುಮತ್ತನೋ.
ಸಙ್ಘಭದ್ದಂ ಅಸಿಗ್ಗಾಹಂ, ಕಾಸಿ ಬನ್ಧುಂ ಮಹೇಸಿಯಾ;
ಯಥಾರಹಮದಾ ಚೇವ, ಠಾನನ್ತರಮನಾಲಯೋ.
ಕತ್ವಾ ¶ ವೇಳುವನಂ ರಾಜಾ, ಸಾಗಲೀನಂ ನಿಯೋಜಯೀ;
ಜಮ್ಬುರನ್ತರಗಲ್ಲಞ್ಚ, ಕಾಸಿ ಮಾತಿಕಪಿಟ್ಠಿಕಂ.
ರಞ್ಞೋ ತಸ್ಸೇ’ವ ರಜ್ಜಮ್ಹಿ, ಕಾಲಿಙ್ಗೇಸು ಮಹೀಪತಿ;
ಸತ್ತಾನಂ ಮರಣಂ ಯುದ್ಧೇ, ದಿಸ್ವಾ ಸಂವಿಗ್ಗಮಾನಸೋ.
ಇಮಂ ದೀಪಮುಪಾಗಮ್ಮ, ಪಬ್ಬಜ್ಜಾ ಕತನಿಚ್ಛಯೋ;
ಜೋತಿಪಾಲಮ್ಹಿ ಪಬ್ಬಜಿ, ರಾಜಾ ಸಕ್ಕಾಸಿ ತಂ ಚಿರಂ.
ಪಧಾನಠಾನಂ ತಸ್ಸ’ಕಾ, ವಿಹಾರೇ ಮತ್ತಪಬ್ಬತೇ;
ತಸ್ಸಾಮಚ್ಚೋ ಮಹೇಸೀ ಚ, ತಥೇವಾ’ಗಮ್ಮ ಪಬ್ಬಜುಂ.
ರಞ್ಞೋ ಮಹೇಸೀ ಸುತ್ವಾನ, ತಸ್ಸ ಪಬ್ಬಜ್ಜಮುತ್ತಮಂ;
ಸಕ್ಕಚ್ಚಂ ತಮುಪಟ್ಠಾಸಿ, ರತನವ್ಹಞ್ಚ ಕಾರಯಿ.
ಅದಾ ರಾಜಾ ಅಮಚ್ಚಸ್ಸ, ಪಾಚೀನಕಣ್ಡರಾಜಿಯಂ;
ವೇತ್ತವಾಸವಿಹಾರಞ್ಚ, ಸೋ’ದಾ ಸಙ್ಘಸ್ಸ ತಂ ಯತಿ.
ರಾಜತ್ಥೇರೇಮತೇ ರಾಜಾ, ಸೋಚಿತ್ವಾ ಪರಿದೇವಿಯ;
ಪಧಾನಠಾನಂ ಕಾರೇಸಿ, ಚೂಳಗಲ್ಲವಿಹಾರಕೇ.
ಪಲಂನಗರಗಞ್ಚೇವ, ತಸ್ಸ ಠಾನಞ್ಹಿ ಕಾರಯಿ;
ಏವಂ ತದತ್ಥಂ ಪುಞ್ಞಾನಿ, ಬಹೂನಿ’ಪಿ ಮಹೀಪತಿ.
ಜೋತಿಪಾಲಿತ ಥೇರಮ್ಹಿ, ತೂಪಾರಾಮಮ್ಹಿ ಚೇತಿಯಂ;
ವನ್ದಮಾನೇ ಪಭಿಜ್ಜಿತ್ವಾ, ಭಾಗೋ ತಂ ಪುರತೋ ಪತಿ.
ಪಕ್ಕೋಸಿತ್ವಾನ ರಾಜಾನಂ, ಥೇರೋ ದಸ್ಸೇಸಿ ದುಕ್ಖಿತೋ;
ರಾಜಾ ದಿಸ್ವಾವ ಸಂವಿಗ್ಗೋ, ಕಮ್ಮಂ ಪಟ್ಠಪಿ ತಂಖಣೇ.
ದಕ್ಖಿಣಕ್ಖಕಧಾತುಂ ಸೋ, ಲೋಹಪಾಸಾದಕುಚ್ಛಿಯಂ;
ಸಾರಕ್ಖಂ ಠಪಯಿತ್ವಾನ, ರತ್ತಿನ್ದಿವಮಪೂಜಯಿ.
ನವಕಮ್ಮೇ ಚಿರಾಯನ್ತೇ, ಥೂಪಾರಾಮಮ್ಹಿ ದೇವತಾ;
ಸುಪಿನಂ ತಸ್ಸ ದಸ್ಸೇಸುಂ, ರತ್ತಿಮಾರಾಮಿಕಾ ವಿಯ.
ಸಚೇ ರಾಜಾ ಪಪಞ್ಚೇತಿ, ಕಾತುಂ ಧಾತುಘರಂ ಮಯಂ;
ಧಾತುಂ ಗಹೇತ್ವಾ ಗಚ್ಛಾಮ, ಯತ್ಥತತ್ಥಾ’ತಿ ತಂಖಣೇ.
ರಾಜಾ ಪಬುದ್ಧೋ ಸಂವಿಗ್ಗೋ, ನ ಚಿರೇನೇವ ಕಾರಯಿ;
ಕಮ್ಮಂ ಧಾತುಘರೇಸಬ್ಬಂ, ಚಿತ್ತಕಮ್ಮಾದಿಸಞ್ಞುತ್ತಂ.
ಚತಸ್ಸೋ ಪಟಿಮಾಯೋ ಚ, ಪಲ್ಲಙ್ಕೇ ಚ ಸಿಲಾಮಯೇ;
ಹೇಮಚ್ಛತ್ತಂ ಸಿಲಾದನ್ತ-ಕಮ್ಮಂ ಗೇಹಮ್ಹಿ ಸಬ್ಬಸೋ.
ಮಹಾಮಚ್ಚಾದಯೋ’ಕಂಸು ¶ , ಕರಣ್ಡಾನಂ ಸತಂ ನವ;
ದೇವಾನಂಪಿಯತಿಸ್ಸಸ್ಸ, ಕಮ್ಮಞ್ಚ ನಿಖಿಲಂ ನವಂ.
ಸಬ್ಬುಸ್ಸಾಹೇನ ಕಾರೇತ್ವಾ, ಮಹಾಪೂಜಂ ಯಥಾರಹಂ;
ಆನೇತ್ವಾ ಲೋಹಪಾಸಾದಾ, ಧಾತುಂ ಸಬ್ಬಾದರೇನ ಸೋ.
ಜೋತಿಪಾಲಂ ಮಹಾಥೇರಂ, ಸಸಙ್ಘಂ ಪರಿವಾರಿಯ;
ಪರಿಹಾರೇನ ವಡ್ಢೇಸಿ, ಧಾತುಂ ಧಾತುಕರಣ್ಡಕೇ.
ಧಾತುಗೇಹಸ್ಸ ಪಾದಾಸಿ, ಲಙ್ಕಾದೀಪಂ ಸಹತ್ತನಾ;
ಲಾಭಗ್ಗಾಮ-ಮದಾ ತಸ್ಸಾ, ರಕ್ಖಕಾನಂ ಮಹೇಸಿಯಾ.
ನಾಗದೀಪಮ್ಹಿ ಗೇಹಞ್ಚ, ರಾಜಾಯತನಧಾತುಯಾ;
ಉಣ್ಣಲೋಮಘರಞ್ಚೇವ, ಛತ್ತಮಾಮಲಚೇತಿಯೇ.
ತತ್ಥ ಗಾಮಂ ವಿಹಾರಸ್ಸ, ಯಾಗುದಾನಾಯ’ದಾಸಿ ಚ;
ವಿಹಾರಸ್ಸ’ಭಯಸ್ಸಾ’ದಾ, ಗಾಮಮಙ್ಗಣಸಾಲಕಂ.
ನಾಮಂ ಕತ್ವಾನ ಸೋ’ಕಾಸಿ, ಅತ್ತನೋ ಚ ಮಹೇಸಿಯಾ;
ದಾಠಗ್ಗಬೋಧಿಮಾವಾಸಂ, ವಿಹಾರೇ ಅತಯುತ್ತರೇ.
ದೇವೀ ಕಪಾಲನಾಗಂ ಸಾ, ವಿಹಾರಂ ಸಾಧುಕಾರಿಯ;
ತಸ್ಸೇ’ವಾದಾ ವಿಹಾರಸ್ಸ, ಸಮ್ಪನ್ನಚತುಪಚ್ಚಯಂ.
ಗೇಹಂ ಜೇತವನೇ ಕಾಸಿ, ರಾಜಾ ರಾಜತಚುಮ್ಬಟಂ;
ಉದಪಾನಂ ಮಣಾಪೇಸಿ, ಸೋವ ಬೋಧಿಘರನ್ತಿಕೇ.
ಗಙ್ಗಾತಟಂ ವಲಾಹಸ್ಸಂ, ವಾಪಿಂ ಗಿರಿತಟಞ್ಚಕಾ;
ಮಹಾಪಾಳಿಂಪಿ ವಡ್ಢೇಸಿ, ಭತನಾವಞ್ಚ ಕಾರಯಿ.
ಭಿಕ್ಖೂನೀನಂ ಮಹೇಸೀ ಚ, ಭತ್ತವಂಸಂ ಸಮಾದಿಸಿ;
ಏವಂ ಪುಞ್ಞಾನಿ ಕತ್ವಾ ಸೋ, ದಿವಂ’ಗಾ ದಸಮೇ ಸಮೇ.
ಏವಂ ಪುಞ್ಞರತಾ ನರಾಧಿಪತಯೋ ಸಮ್ಪನ್ನಭೋಗಾ ಗಮುಂ;
ಮಚ್ಚುಸ್ಸೇವ ವಸಂ ತತೋಹಿ ಮತಿಮಾ ಸಮ್ಮಾ ಭವಸ್ಸೀದಿಸಂ;
ಪಸ್ಸನ್ತೋ ನಿಯಮಂ ವಿಹಾಯ ವಿಧಿನಾ ಸಬ್ಬಂ ಭವೇ ಸಙ್ಗತಿಂ;
ನಿಬ್ಬಾನಾಭಿಮುಖೋ ಚರೇಯ್ಯ ಧಿತಿಮಾ ಪಬ್ಬಜ್ಜಮಜ್ಝೂಪಗೋ.
ಸುಜನಪ್ಪಸಾದಸಂವೇಗತ್ಥಾಯ ಕತೇ ಮಹಾವಂಸೇ
ದ್ವಿರಾಜಕೋ ನಾಮ
ಏಕಚತ್ತಾಲೀಸತಿಮೋ ಪರಿಚ್ಛೇದೋ.
ದ್ವಿಚತ್ತಾಲೀಸತಿಮ ಪರಿಚ್ಛೇದ
ಛ ರಾಜಕೋ
ಸಙ್ಘತಿಸ್ಸೋ ¶ ತತೋ ಆಸಿ, ಅಸಿಗ್ಗಾಹೋ ಮಹೀಪತಿ;
ಸಾಸನಸ್ಸ ಚ ರಟ್ಠಸ್ಸ, ವುದ್ಧಿಕಾಮೋ ನಯೇ ರತೋ.
ಠಾನನ್ತರಂ ಯಥಾರಹಂ, ದತ್ವಾ ಸಙ್ಗಣ್ಹಿಸೋ ಜನಂ;
ತದಾ ಖುದ್ದಕರಾಜಸ್ಸ, ಮೋಗ್ಗಲ್ಲಾನೋ ಚಮೂಪತಿ.
ವಸನ್ತೋ ರೋಹಣೇ ಸುತ್ವಾ, ಸಙ್ಘತಿಸ್ಸಸ್ಸ ರಾಜತಂ;
ಖನ್ಧವಾರಂ ಸಯುದ್ಧತ್ಥಂ, ಮಹಾಗಲ್ಲೇ ನಿವೇಸಯಿ.
ಸಙ್ಘತಿಸ್ಸೋ ಚ ಸುತ್ವಾ ತಂ, ಬಲಕಾಯಮಪೇಸಯಿ;
ಯುಜ್ಝಿತುಂ ತೇನ ತಜ್ಜೇಸಿ, ಮೋಗ್ಗಲ್ಲಾನೋ ಮಹಬ್ಬಲೋ.
ತತೋ ಹತ್ಥಸ್ಸಮಾದಾಯ, ಗನ್ತ್ವಾ ರತ್ತಿವಿಹಾರಕಂ;
ಬಲಂ ಸೋ ಸನ್ನಿಪಾತೇನ್ತೋ, ವಾಸಂ ತತ್ಥೇವ ಕಪ್ಪಯಿ.
ರಾಜಾ ಸುತ್ವಾ ಪುನಾ’ಗನ್ತ್ವಾ, ಕದಲ್ಲಾದೀನಿವಾತಕೇ;
ಯುಜ್ಝಿತ್ವಾ ತಂ ಪಲಾಪೇತ್ವಾ, ಪೇಸೇತ್ವಾ ಬಲಮತ್ತನೋ.
ಸಯಂ ಪುರಮುಪಾಗಞ್ಛಿ, ಸೋಪಿ ನಟ್ಠಂ ಸವಾಹಿನಿಂ;
ಪುನ ಪಾಕತಿಕಂ ಕತ್ವಾ, ಕರೇಹೇರಮುಪಾಗಮಿ.
ರಞ್ಞೋ ಸೇನಾಪತಿ ಪುತ್ತಂ, ಪೇಸೇತ್ವಾ ಚೋರಸನ್ತಿಕಂ;
ಯೇನ ಕೇನಚಿ ಲೇಸೇನ, ಸಯಂ ದುಕ್ಖಿವ ದುಮ್ಮನೋ.
ಆತುರೋ ವಿಯ ಬಾಳ್ಹಂ ಸೋ, ಹೋಸಿ ಮಞ್ಚಪರಾಯನೋ;
ರಾಜಾ ಸುತ್ವಾ ಪವತ್ತಿತಂ, ಉಪಸಙ್ಕಮ್ಮ ತಙ್ಖಣೇ.
ಮಾ ತ್ವಂ ಸೋಚಿ ಕುಮಾರಸ್ಸ, ಸಮ್ಮಾನೇತ್ವಾನುಸಾಸಿಯ;
ಹನ್ದ ತ್ವಂ ನಗರಂ ರಕ್ಖ, ನತೇ ಸಕ್ಕಾ ಮಯಾ ಸಹ.
ಯುದ್ಧಮಣ್ಡಲಮಾಗನ್ತುಂ, ಗಿಲಾನತ್ತಾತಿ ಯೋಜಯಿ;
ಉಬ್ಬಾಸಿತೇ ಜನೇ ಸಬ್ಬೇ, ವಿಚ್ಛಿನ್ನೇ ರಾಜಭೋಜನೇ.
ಮಹಾಪಾಳಿಮ್ಹಿ ಸಮ್ಪಕ್ಕಂ, ರಞ್ಞೋ ಭೋಜನಮಾಹರುಂ;
ರಾಜಾ ದ್ವಿಸ್ವಾ’ತಿ ನಿಬಿನ್ನೋ, ಯಾವ ಮನ್ದೋ ನ ಹೇಸ್ಸತಿ.
ಏಕ್ಕೋ ¶ ಪೀತಿ ವಿಚಿನ್ತೇತ್ವಾ, ಯುದ್ಧಾಯ ಸಮಾಸಾ’ಗಮಾ;
ಸದ್ಧಿಂ ಪುತ್ತೇನ ಆರುಯ್ಹ, ಹತ್ಥಿಂಸನ್ನದ್ಧವಾಹನೋ.
ಥೋಕೇನೇವ ಬಲೇನಾಗಾ, ಪಾಚಿನತಿಸ್ಸಪಬ್ಬತಂ;
ಏವಂ ಉಭಯತೋ ಚೂಳ-ಸಙ್ಗಾಮೇ ಪಚ್ಚುಪಟ್ಠಿತೇ.
ಸೇನಾಪತಿಸಮಿತ್ತದ್ದು, ಯುದ್ಧಮಾರಭಿ ಪಚ್ಛತೋ;
ಪುತ್ತೋ ದಿಸ್ವಾ ನರಿನ್ದಸ್ಸ, ಘಾತೇಸ್ಸಾಮಿ ಇಮಂ ಇತಿ.
ಆಹ ರಾಜಾ ನಿವಾರೇಸಿ, ಮಾ ತೇ ರುಚ್ಚಿ ಬಲಂ ಇದಂ;
ನೇವ ಸಕ್ಕಾ’ಧಿವಾಸೇತುಂ, ಅತಿಮನ್ದಂ ಹನಿಸ್ಸತಿ.
ದುವಿನ್ನಂ ಬಲಕಾಯಾನಂ, ರಾಜಾಮಜ್ಝಗತೋ ಅಹು;
ತತೋ ಸೇನಾ ದ್ವಿಧಾ’ಹೋಸಿ, ಚೋರಸೇನಾಪತೀಪತಿ.
ರಞ್ಞೋ ನಾಗೋ ಮಧುಕವ್ಹ ರುಕ್ಖಚ್ಛಾಯಂ ಸಮಾವಿಸಿ;
ತದಾ ಛತ್ತಂ ಪತಿತಸ್ಸ, ಸಾಖಮಾಹಚ್ಚ ಭೂಮಿಯಂ.
ಚೋರಸ್ಸ ಸೇನಾ ತಂ ದಿತ್ವಾ, ಹರಿತ್ವಾ ಸಾಮಿನೋ ಅದಾ;
ಸೋ ತಂ ಉಸ್ಸಾಪಯಿಛತ್ತಂ, ಠತ್ವಾಪಬ್ಬತಮುದ್ಧನಿ.
ತದಾ ರಾಜಬಲಂ ರಾಜಾ, ನುನಮೇಸೋತಿ ಚಿನ್ತಿಯ;
ಗನ್ತ್ವಾ ತಂ ಪರಿವಾರೇಸಿ, ರಾಜಾ ಆಸಿ ತದೇಕಕೋ.
ಹತ್ಥಿಕ್ಖನ್ಧಾ ತದೋರುಯ್ಹ-ಪುತ್ತಂ’ಮಚ್ಚಞ್ಚ ಸೋಹದಂ;
ಉಪಾವಿಸಿ ಸಮೀಪಮ್ಹಿ, ಮೇರುಮಜ್ಜರಕಾನನಂ.
ಮೋಗ್ಗಲ್ಲಾನೋ ತತೋ ಲದ್ಧ-ಜಯೋ ವಾಹನಮಾದಿಯ;
ಸೇನಾಪತಿಂಚ ಮಿತ್ತದ್ದುಂ, ತಸ್ಸ ಪುತ್ತಞ್ಚ ಪಾಪಿನಂ.
ಉಪಾಗಮ್ಮ ಪುರಂ ರಾಜಾ, ಆಸೀ ಲಙ್ಕಾ ತಲಾಧಿಪೋ;
ತತೋ ಚಿನ್ತೇಸಿ ಜೀವನ್ತೇ, ಸತ್ತುಮ್ಹಿ ನ ಸುಖಂ ಇತಿ.
ಸೋ ಸುತ್ವಾ ಪುಬ್ಬರಾಜಸ್ಸ, ಪುತ್ತೋ ಏತ್ಥಾತಿ ಕುಜ್ಝಿಯ;
ಆಣಾಪೇಸಿ ಚ ತಸ್ಸಾ’ಸು, ಹತ್ಥಪಾದಾನಿ ಛಿನ್ದಿತುಂ.
ಉಪಕ್ಕಮಿ ತದಾ ರಞ್ಞಾ, ಆಣತ್ತೋ ಪುರಿಸೋ ಖಣೇ;
ಛಿನ್ದಿತುಂ ಹತ್ಥಪಾದಂ ಸೋ, ಕುಮಾರೋ ರೋದಿ ದುಮ್ಮನೋ.
ಪೂವಖಾದಕಹತ್ಥಂ ಮೇ, ಛಿನ್ದೇಯ್ಯಂ ಚೇ ತದಾ ಅಹಂ;
ಖಾದಿಸಂ ತೇನ ಪೂವೇತಿ, ಹಂ ಸುತ್ವಾ ರಾಜಕಮ್ಮಿಕೋ.
ರೋದಿತ್ವಾ ಪರಿದೇವಿತ್ವಾ, ರಾಜಾಣಾಯ ದುಖದ್ದಿತೋ;
ವಾಮಂ ಹತ್ಥಞ್ಚ ಪಾದಞ್ಚ, ತಸ್ಸ ಛಿನ್ದಿ ನರಾಧಮೋ.
ಜೇಟ್ಠತಿಸ್ಸೋ ¶ ಪಲಾಯಿತ್ವಾ, ರಞ್ಞೋ ಪುತ್ತೋ’ಪರೋ ಅಗಾ;
ಅಞ್ಞತೋ ಮಲಯಂ ದೇಸಂ, ಮೇರುಕನ್ದರನಾಮಕಂ.
ರಾಜಾ’ಥ ಸಸುತಾ’ಮಚ್ಚೋ, ಗನ್ತ್ವಾ ವೇಳುವನಂ ರಹೋ;
ಚೋದಿತೋ ತತ್ಥ ಭಿಕ್ಖೂಹಿ, ಕಾಸಾವಾನಿ ಸಮಾದಿಯಿ.
ಭಿಕ್ಖುವೇಸಂ ಗಹೇತ್ವಾನ, ರೋಹಣಂ ಗನ್ತುಮಾನಸೋ;
ಮಣಿಹೀರಂ ಸಮಾಗಞ್ಛಿ, ತತ್ರಠಾ ರಾಜಸೇವಕಾ.
ಸಞ್ಜಾನಿತ್ವಾ ತಯೋಪೇತೇ, ತೇಸಂ ಪಾದೇವರುಜ್ಝಿಯ;
ಸಾಸನಂ ತಸ್ಸ ಪೇಸೇಸುಂ, ರಾಜಾ ಸುತ್ವಾ ವಿಸೇಸತೋ.
ತುಟ್ಠೋ ಆಣಾಪಯಿ ಗನ್ತ್ವಾ, ಸೀಘಮಾದಾಯ ತೇಜನೇ;
ತತೋ ಸೀಹಗಿರಿಂನೇತ್ವಾ, ತಿಸ್ಸಙ್ಕಂ ನಿರುಪದ್ದವಂ.
ಸೀಸಂ ಗಣ್ಹಥ ತತ್ಥೇವ, ರಞ್ಞೋ ಚ ತನಯಸ್ಸ ಚ;
ಅಮಚ್ಚಂ ಪನ ಜೀವನ್ತ-ಮಾನೇಯ್ಯಾಥ ಮಮ’ನ್ತಿಕಂ.
ಮನುಸ್ಸಾ ಏವಮಾಣತ್ತಾ, ತೇ ಗಹೇತ್ವಾ ತಯೋಜನೇ;
ನೇತ್ವಾ ಸೀಹಗಿರಿಂಕಾತುಂ, ಯಥಾವುತ್ತಮುಪಕ್ಕಮುಂ.
ತತೋ ರಾಜಸುತೋ ಆಹ, ಪುರಿಸೇ ಕಮ್ಮಕಾರಕೇ;
ಸೀಸಂ ಮೇ ಪಠಮಂ ಛೇತ್ವಾ, ದೇಥ ಮಯ್ಹಂ ಸುಖಂ ಇತಿ.
ರಾಜಪೋಸಾ ತಥಾ’ಕಾಸುಂ, ಪಚ್ಛಾಛಿನ್ದಿಂಸು ರಾಜಿನೋ;
ಸೀಸಂ ಪಸ್ಸಥ ಬಾಲಾನಂ, ಕಮ್ಮಂ ಕಮ್ಮವಿದೂಜನಾ.
ಏವಂ ಅನಿಚ್ಚಾ ಭೋಗಾಹಿ, ಅಧುವಾ ಅಸಯಂವಸೀ;
ತತ್ಥ ಲಗ್ಗಾ ಕಥಂ ನಿಚ್ಚಂ, ಸುಖಂ ಭೋ ನ ಗವೇಸಥ.
ರಞ್ಞೋ ಸಾಸನಮಾಹಂಸು, ಅಮಚ್ಚಸ್ಸ ಹಿತೇಸಿನೋ;
ತಂ ಸುತ್ವಾನ ಹಸಿತ್ವಾನ, ಇದಂ ವಚನಮಬ್ರವಿ.
ಛಿನ್ನಸೀಸೋ ಮಯಾ ದಿಟ್ಠೋ, ಮಯಿ ಜೀವತಿ ಸಾಮಿಕೋ;
ಠಪೇತ್ವಾ ಹಮ್ಪಿ ಸೇವಾಮಿ, ಅಹೋ ಅಞ್ಞಞ್ಹಿ ಸಾಮಿಕಂ.
ಇಧ ತಂ ಮಾರಯಿತ್ವಾನ, ಛಾಯಂ ತಸ್ಸ ಹರಿಸ್ಸಥ;
ಅಹೋ ಅಞ್ಞಾಣಕಾ ತುಮ್ಹೇ, ಮಞ್ಞೇ ಉಮ್ಮತ್ತಕಾ ಇತಿ.
ಇತಿ ವತ್ವಾನ ಸೋ ಪಾದೇ, ಗಹೇತ್ವಾ ಸಾಮಿನೋ ಸಯಿ;
ತಸ್ಸ ತೇ ಹರಣೋಪಾಯಂ, ಅಪಸ್ಸನ್ತಾ ಯಥಾ ತಥಾ.
ತಸ್ಸಾಪಿ ಸೀಸಂ ಛೇತ್ವಾನ, ಮಚ್ಚಾ ಆದಾಯ ತೀಣಿ’ಪಿ;
ರಞ್ಞೋ ದಸ್ಸೇತುಮಾಹಚ್ಚ, ರಾಜಾ ತುಸಿತ್ಥ ನಿಬ್ಭಯೋ.
ದುಟ್ಠಸೇನಾ ¶ ಪತಿಸ್ಸಾ’ದಾ, ತತೋ ಮಲಯರಾಜತಂ;
ಅಸಿಗ್ಗಾಹಕಠಾನಮ್ಹಿ, ತಸ್ಸ ಪುತ್ತಂ ಠಪೇಸಿ ಚ.
ಥೂಪತ್ತಯಮ್ಪಿ ಛಾದೇಸಿ, ವತ್ಥೇಹಿ ಅಹತೇಹಿ ಸೋ;
ತಥಾ ಲಙ್ಕಾತಲೇ ಸಬ್ಬೇ, ಥೂಪೇಕಾಸಿ ಮಹುಸ್ಸವಂ.
ಕೇಸಧಾತುಞ್ಚ ನಾಥಸ್ಸ, ದಾಠಾಧಾತುಂ ತಥೇವ ಚ;
ಮಹಾಬೋಧಿಂ ಸಸಕ್ಕಚ್ಚಂ, ಮಹಾಪೂಜಾಯ ಸಕ್ಕರಿ.
ಸಬ್ಬಂ ವೇಸಾಖಪೂಜಾದಿಂ, ಚಾರಿತ್ತಂನುಗತಂ ಅಕಾ;
ಧಮ್ಮಕಮ್ಮೇನ ಸೋಧೇಸಿ, ಸಬ್ಬಂ ಸುಗತಸಾಸನಂ.
ಪಿಟಕಾನಞ್ಚ ಸಜ್ಝಾಯಂ, ಮಹಾಪೂಜಾಯ ಕಾರಯಿ;
ಲಾಭಂ ದತ್ವಾ ತಿರೇಕೇನ, ಪೂಜಯಿತ್ಥ ಬಹುಸ್ಸುತೇ.
ಭಿಕ್ಖೂನಂ ದೀಪವಾಸೀನಂ, ಸಬ್ಬೇಸಂ ಚೀವರಂ ಅಗಾ;
ಆವಾಸೇಸು ಚ ಸಬ್ಬೇಸು, ಕಥಿನಂ ಅತ್ಥರಾಪಯಿ.
ಪಟಿಮಾಯೋ ಚ ಕಾರೇಸಿ, ಜಿಣ್ಣಞ್ಚ ಪಟಿಸಙ್ಖರಿ;
ಲೋಣಕ್ಖೇತ್ತಞ್ಚ ಪಾದಾಸಿ, ಸಙ್ಘಸ್ಸ ತಿಸತಾಧಿಕಂ.
ಕಾರಪಿಟ್ಠಿಮ್ಹಿ ಕಾರೇಸಿ, ಮೋಗ್ಗಲ್ಲಾನ ವಿಹಾರಕಂ;
ವಿಹಾರಾ ಪಿಟ್ಠಿಗಾಮಞ್ಚ, ಸಗಾಮಂ ವಟಗಾಮಕಂ.
ತಥಾ ಚೇತಿಯಗೇಹಞ್ಚ’-ಕಾಸಿ ರಕ್ಖವಿಹಾರಕೇ;
ವಿಹಾರಂ ನಂ ಬಹುನ್ನಂ ಸೋ, ಭೋಗಗಾಮೇ ಬಹೂ ಅದಾ.
ಏವಂ ಪುಞ್ಞಾನೀ ಸೋ’ಕಾಸಿ, ಅಪ್ಪಮೇಯ್ಯಾನಿ ಭೂಮಿಪೋ;
ಸಮ್ಪತ್ತೀನಮನಿಚತ್ತಂ, ಸರನ್ತೋ ಪುಬ್ಬರಾಜಿನೋ.
ತದಾ ಕೇನಚಿ ದೋಸೇನ, ಕುದ್ಧೋಮಲಯರಾಜಿನೋ;
ಸರಿತ್ವಾ ಪುಬ್ಬರಾಜಸ್ಸ, ಕತಂ ತೇನ ವಿರೂಪಕಂ.
ಉಪಾಯೇನ ಗಹೇತ್ವಾನ, ಹತ್ಥಪಾದಞ್ಚ ಛೇದಯಿ;
ತಂ ಸುತ್ವಾ ಸೋ ಅಸಿಗ್ಗಾಹೋ, ಸಪುತ್ತೋ ರೋಹಣಂಗತೋ.
ವಸನ್ತೋ ತತ್ಥ ಸೋ ಕತ್ವಾ, ಹತ್ಥೇ ಜನಪದಂ ಲಹುಂ;
ಜೇಟ್ಠಸಿಸ್ಸಮುಪಗಞ್ಛಿ, ನಿಲೀನಂ ಮಲಯೇ ಠಿತಂ.
ಸದ್ಧಿಂ ತೇನಸಘಾತೇನ್ತೋ, ರಟ್ಠಂ ಜನಪದಂ ಖಣೇ;
ದೋಳಪಬ್ಬತಮಾಗಮ್ಮ, ಖನ್ಧಾವಾರಂ ನಿವೇಸಯಿ.
ರಾಜಾ ಸುತ್ವಾನ ತಂ ಸಬ್ಬಂ, ಸನ್ನದ್ಧಬಲವಾಹನೋ;
ಖನ್ಧಾವಾರಂ ನಿವೇಸೇಸಿ, ಗನ್ತ್ವಾ ತಸ್ಸೇವ ಸನ್ತಿಕಂ.
ತದಾ ¶ ಪಜ್ಜರರೋಗೇನ, ಮನುಸ್ಸಾರಾಜಿನೋ ಬಹೂ;
ಉಪದ್ದುತಾ ಮತಾ ಆಸುಂ, ತಂ ಸುತ್ವಾ ಸೋ ಅಸಿಗ್ಗಹೋ.
ಯುದ್ಧಮಾರಭಿವೇಗೇನ, ರಞ್ಞೋ ಸೇನಾತಿದುಬ್ಬಲಾ;
ಪಭಿಜ್ಜಿತ್ವಾ ಪಲಾಯಿತ್ಥ, ರಾಜಾಪಚ್ಛಾ ಪಲಾಯಿ ಸೋ.
ದಿಸ್ವಾ ಏಕಾಕಿನಂ ಯನ್ತಂ, ಸೀಹಪಬ್ಬತಸನ್ತಿಕೇ;
ಅಸಿಗ್ಗಾಹೋ ಮಹಾರಾಜಂ, ಮಾರಯಿತ್ಥ ಸಪರಿಸಂ.
ಓಹೀನಂ ಪಚ್ಛತೋ ಜೇಟ್ಠ-ತಿಸ್ಸಮ್ಪಿ ಪನ ಮಾರಿತುಂ;
ಸಾಸನಂ ತಸ್ಸ ಪೇಸೇಸಿ, ಏಹಿ ರಾಜಾ ಭವಾಹೀತಿ.
ಸೋ ತಞ್ಞತ್ವಾ ಪಲಾಯಿತ್ವಾ, ನಿವತ್ತೋ ಮಲಯಂ ಅಗಾ;
ಕಥಞ್ಹಿ ಲದ್ಧಂ ಕಿಚ್ಛೇನ, ರಜ್ಜಂಸೋ ದೇತಿ ಮೇ ಇತಿ.
ಏವಂ ಖೋ ದಲ್ಲನಾಮಂ ಸೋ, ಮೋಗ್ಗಲ್ಲಾನಂ ನರಿಸ್ಸರಂ;
ಮಾರೇತ್ವಾ ಛಹಿ ವಸ್ಸೇಹಿ, ಸಮ್ಪತ್ತಬಲವಾಹನೋ.
ಅಥಾ’ಗನ್ತ್ವಾ ಅಸಿಗ್ಗಾಹೋ, ಅನುರಾಧಪುರಂ ವರಂ;
ರಾಜಾ ಹುತ್ವಾ ಪವತ್ತೇಸಿ, ಆಣಾಚಕ್ಕಂ ಮಹೀತಲೇ.
ಸ ಸಿಲಾಮೇಘವಣ್ಣವ್ಹೋ, ಸಙ್ಘಂ ಬೋಧಿಞ್ಚ ವನ್ದಿಯ;
ಥೂಪತ್ತಯಞ್ಚ ಸಕ್ಕಾಸಿ, ಮಹಾಪಾಳಿಞ್ಚ ವಡ್ಢಯಿ.
ಪಾಯಾಸಂ’ದಾಸಿ ಸಙ್ಘಸ್ಸ, ಸಪ್ಪಿಫಾಣಿತಸಙ್ಖತಂ;
ಛಾತಕೇ ಅತಿಕಿಚ್ಛಮ್ಹಿ, ಪರಿಸ್ಸಾವನಮೇವ ಚ.
ಸಬ್ಬದಾನೇನ ಸಙ್ಗಣ್ಹೀ, ಕಪಣದ್ಧಿವಣಿಬ್ಬಕೇ;
ಪೂವಮೂಲಧನಂಚಾ’ದಾ, ಕುಮಾರಾನಂ ಮಹಾದಯೋ.
ವಿಹಾರೇ ಅಭಯೇ ಬುದ್ಧಂ, ಪೂಜಯಿತ್ಥ ಸೀಲಾಮಯಂ;
ಜಿಣ್ಣಞ್ಚ ಗೇಹಂ ತಸ್ಸಾ’ಕಾ, ನಾನಾರತನಚಿತ್ತಿಕಂ.
ಕೋಲವಾಪಿಞ್ಚ ದತ್ವಾನ, ಆರಕ್ಖತ್ಥಂ ಜಿನಸ್ಸ ಸೋ;
ಪೂಜಂ ಸಬ್ಬೋಪಹಾರೇಹಿ, ಸಬ್ಬಕಾಲಂ ಪವತ್ತಯಿ.
ಏವಂ ತಸ್ಮಿಂ ಮಹೀಪಾಲೇ, ವಸನ್ತೇ ಪುಞ್ಞಭಾಜನೇ;
ನಾಯಕೋ ಸಿರಿನಾಗವ್ಹೋ, ಜೇಟ್ಠತಿಸ್ಸಸ್ಸ ಮಾತುಲೋ.
ಗನ್ತ್ವಾನ ಪರತೀರಂ ಸೋ, ಆದಾಯ ದಮಿಳೇ ಬಹೂ;
ಆಗನ್ತ್ವಾ ಉತ್ತರಂ ದೇಸಂ, ಗಣ್ಹಿತುಂ ತಮುಪಕ್ಕಮಿ.
ರಾಜಾಪಿ ಸುತ್ವಾ ತಂ ಗನ್ತ್ವಾ, ಯುಜ್ಝಿತ್ವಾ ರಾಜಮಿತ್ತಕೇ;
ಗಾಮೇ ಹನ್ತ್ವಾನ ತಂ ತೇನ, ದಮಿಳೇ ಸದ್ಧಿಮಾಗತೇ.
ಹತಸೇಸೇ ¶ ಗಹೇತ್ವಾನ, ಕತ್ವಾ ಪರಿಭವಂ ಬಹುಂ;
ಅದಾಸಿ ದಾಸೇ ಕತ್ವಾನ, ವಿಹಾರೇಸು ತಹಿಂ ತಹಿಂ.
ಏವಂಸಮ್ಪತ್ತವಿಜಯೇ, ಪುರಮಾಗಮ್ಮಭೂಮಿಪೇ;
ಸಬ್ಬಂ ರಟ್ಠಂ ವಿಸೋಧೇತ್ವಾ, ವಸನ್ತೇ ಅಕುತೋ ಭಯೇ.
ಭಿಕ್ಖುಬೋಧೀ ಸನಾಮೋ’ಥ, ವಿಹಾರೇ ಅಭಯುತ್ತರೇ;
ದುಸ್ಸೀಲೇ ಬಹುಲೇ ದಿಸ್ವಾ, ಪಬ್ಬಜ್ಜಾಯ ನವೋಪಿ ಸೋ.
ರಾಜಾನಮುಪಸಙ್ಕಮ್ಮ, ಧಮ್ಮಕಮ್ಮಮಯಾಚಥ;
ರಾಜಾ ತೇ ನೇವ ಕಾರೇಸಿ, ಧಮ್ಮಕಮ್ಮಂ ವಿಹಾರಕೇ.
ದುಸ್ಸೀಲಾ ನಿಹಟಾ ತೇನ, ಸಬ್ಬೇ ಮನ್ತಿಯ ಏಕತೋ;
ರಹೋ ತಂ ಮಾರಯಿತ್ವಾನ, ತಂ ಕಮ್ಮಂ ಪಟಿಬಾಹಯ್ಯುಂ.
ರಾಜಾ ಸುತ್ವಾ ತದಾ ಕುದ್ಧೋ, ಸಬ್ಬೇಗಣ್ಹಿಯ ಏಕತೋ;
ಅಕಾ ಪೋಕ್ಖರಣೀ ಪಾಲೇ, ಛಿನ್ನಹತ್ಥೇ ಸಬನ್ಧನೇ.
ಅಞ್ಞೇ ತತ್ಥ ಸತಂ ಭಿಕ್ಖೂ, ಜಮ್ಬುದೀಪೇ ಖಿಪಾಪಯಿ;
ಸರನ್ತೋ ತಸ್ಸ ಉಸ್ಸಾಹಂ, ಪರಿಸೋಧೇಸಿ ಸಾಸನಂ.
ಭಿಕ್ಖೂ ಥೇರಿಯವಾದೇ ಸೋ, ಕಾತುಂ ತೇಹಿ ಉಪೋಸಥಂ;
ಆರಾಧೇತ್ವಾ ಪಟಿಕ್ಖಿತ್ತೋ, ಪಕುಪ್ಪಿತ್ವಾ ಅನಾದರೋ.
ಅಕ್ಕೋಸಿತ್ವಾ ಚ ಭಾಸಿತ್ವಾ, ವಾಚಾಹಿ ಫರುಸಾಹಿ ಸೋ;
ಭಿಕ್ಖೂ ತೇ ಅಕ್ಖಮಾಪೇತ್ವಾ, ದಕ್ಖಿಣಂ ದೇಸಮಜ್ಝಗಾ.
ತಸ್ಸ ಸೋ ಮಹತಾ ಫುಟ್ಠೋ, ರೋಗೇನ ಮರಿಸಜ್ಜುಕಂ;
ಏವಂ ನವಹಿ ವಸ್ಸೇಹಿ, ಪರಿಚ್ಚಜಿ ಮಹೀತಲಂ.
ತಸ್ಸ ಪುತ್ತೋ ತತೋ ಅಗ್ಗ-ಬೋಧಿ ನಾಮೋ ಕುಮಾರಕೋ;
ಆಸಿ ರಾಜಾಸಿರಿಸಙ್ಘ-ಬೋಧಿನಾಮೇನ ವಿಸುತೋ.
ಕಣಿಟ್ಠಂ ಭಾತರಂ ಮಾಣಂ, ಓಪರಜ್ಜೇ’ಭಿಸಞ್ಚಿಯ;
ತಸ್ಸಾ’ದಾ ದಕ್ಖಿಣಂ ದೇಸಂ, ಸಯೋಗ್ಗಬಲವಾಹನಂ.
ರಾಜಾ ಸೋ ಪುಬ್ಬರಾಜೂನಂ, ಪವತ್ತಂ ನ ವಿನಾಸಿಯ;
ರಟ್ಠಂ ಧಮ್ಮೇನ ಪಾಲೇಸಿ, ಸಙ್ಘಞ್ಚ ಬಹುಮಾನಯಿ.
ಜೇಟ್ಠತಿಸ್ಸೋ’ಥ ತಂ ಸಬ್ಬಂ, ಸುಣಿತ್ವಾ ಮಲಯೇ ಠಿತೋ;
ಅರಿಟ್ಠಂ ಗಿರಿಮಾಗಮ್ಮ, ಸಙ್ಗಹೇಸಿ ಮಹಾಜನಂ.
ಕತ್ವಾ ಹತ್ಥಗತೇ ಪುಬ್ಬ-ದಕ್ಖಿಣೇ ಸುಸಮಾನಸೇ;
ಕಮೇನ ಪುರಮಾಗನ್ತು-ಮಾರಭಿತ್ಥ ಮಹಾಬಲೋ.
ದಾಠಾಸಿವ ¶ ಮಮಚ್ಚಞ್ಚ, ಗಹೇತುಂ ಪಚ್ಛಿಮಂ ದಿಸಂ;
ಪೇಸಯಿತ್ವಾ ಸಯಂ ಗಾಮೇ, ವಸಿತ್ಥ ಸಿರಿಪಿಟ್ಠಿಕೇ.
ರಾಜಾ ನಿಸಮ್ಮ ತಂಸಬ್ಬಂ, ಉಪರಾಜಂ ವಿಸಜ್ಜಯಿ;
ಸಬಲಂ ಪಚ್ಛಿಮಂ ದೇಸಂ, ಸೋ ಗನ್ತ್ವಾ ತಂ ಪಲಾಪಯಿ.
ಪೋತಕಂವ ಕುಲಾವಮ್ಹಿ, ಸಕ್ಕಾ ಹನ್ತುನ್ತಿ ದಾರಕಂ;
ಮಾಯೇತ್ತಂ ಆಗತಂ ರಾಜಾ, ಕುಮಾರಾ’ಮಚ್ಚ ಮಗ್ಗಹೀ.
ಜೇಟ್ಠತಿಸ್ಸಂಪಿ ಏತಂವ, ಗಣ್ಹಿಸ್ಸಾಮೀತಿ ಚಿನ್ತಿಯ;
ಥೋಕೇನೇವ ಬಲೇನಾಗಾ, ನಿರಾಸಙ್ಕೋತಿವಿಕ್ಕಮೋ.
ಜೇಟ್ಠಸಿಸ್ಸೋಪಿ ತಂ ಸುತ್ವಾ, ಸನ್ನದ್ಧಬಲವಾಹನೋ;
ಸಾಗರೋ ಭಿನ್ನವೇಲೋವ, ರಾಜಸೇನಂ ಸಮೋತ್ಥರಿ.
ರಾಜಸೇನಾ ಪಭಿಜ್ಜಿತ್ಥ, ರಾಜಾ ಆರುಯ್ಹ ಕುಞ್ಜರಂ;
ಏಕೋ ಅಞ್ಞಾತವೇಸೇನ, ಪಲಾಯಿತ್ವಾ ಖಣೇನ ಸೋ.
ಛಟ್ಠೇ ಮಾಸಮ್ಹಿ ರಜ್ಜಮ್ಹಾ, ನಾವಮಾರುಯ್ಹ ಸಜ್ಜುಕಂ;
ಜಮ್ಬುದೀಪಮಗಾಹಿತ್ವಾ, ಧನಂ ದೇಸಞ್ಚ ಞಾತಕೇ.
ಜೇಟ್ಠತಿಸ್ಸೋ ತತೋ ಹುತ್ವಾ, ಪುರೇ ರಾಜಾಯಥಾ ಪುರೇ;
ಸಬ್ಬಂ ಕಿಚ್ಚಂ ಪವತ್ತೇಸಿ, ಪರಿಪಾಲೇಸಿ ಸಾಸನಂ.
ಮಹಾದಾರಗಿರಿಂ ಸೋ’ದಾ, ವಿಹಾರೇ ಅಭಯುತ್ತರೇ;
ಮಹಾವಿಹಾರಸ್ಸಾ’ದಾಸಿ, ಮಹಾಮೇತ್ತವ್ಹಬೋಧಿಕಂ.
ಗೋಣ್ಡಿಗಾಮಞ್ಚ ಪಾದಾಸಿ, ರಾಜಾ ಜೇತವನಸ್ಸ ಸೋ;
ಮಾತುಲಙ್ಗಣಕಞ್ಚೇವ, ಗಾಮಞ್ಚೋ ದುಮ್ಬರಙ್ಗಣಂ.
ಮಹಾನಾಗಸ್ಸ ಪಾದಾಸಿ, ಪಧಾನಘರಕಸ್ಸ ಸೋ;
ಕಸ್ಸಪಸ್ಸ ಗಿರಿಸ್ಸಾಪಿ, ಆಹಾರಂ ಅಮ್ಬಿಲಾಪಿಕಂ.
ಗಾಮಂ ಕಕ್ಖಲವಿತ್ಥಿಞ್ಚ, ಅದಾವೇಳುವನಸ್ಸ ಸೋ;
ಗಙ್ಗಾಮಾತಿ ವಿಹಾರಸ್ಸ, ಕೇಹೇತಂ ಗಾಮಕಂ ಅದಾ.
ಅನ್ತರಾಗಙ್ಗಸವ್ಹಸ್ಸ, ಚುಲ್ಲಮಾತಿಕಗಾಮಕಂ;
ಮಯೇತ್ತಿಕಸ್ಸಪಾವಾಸೇ, ಸಹನ್ನ ನಗರಂ ಅದಾ.
ಕಾಳವಾಪಿ ವಿಹಾರಸ್ಸ, ಉದವ್ಹಂ ಗಾಮಮಾದಿಸಿ;
ಏತೇ ಚಞ್ಞೇಚ ಸೋ ಭೋಗ-ಗಾಮೇಹಿ ಪರಿಪೂರಯಿ.
ಜಿಣ್ಣಂ ಸತಸಹಸ್ಸೇಹಿ, ತೀಹಿ ಸೋ ಪಟಿಸಙ್ಖರಿ;
ಭಿಕ್ಖೂನಂ ದೀಪವಾಸೀನಂ, ತಿಚೀವರಮದಾಸಿ ಚ.
ಜಮ್ಬುದೀಪಗತಸ್ಸಾ’ಸುಂ ¶ , ರಞ್ಞೋ ಸೋದರಿಯಾ ನರಾ;
ತತ್ಥ ತತ್ಥ ನಿಲೀನಾ ತೇ, ದೇಸಂ ಹನ್ತುಮುಪಕ್ಕಮುಂ.
ಸುತ್ವಾ ತಂ ಜೇಟ್ಠತಿಸ್ಸೋ’ಥ, ಕಾಳವಾಪಿಂಉಪಚ್ಚ ಸೋ;
ಯುಜ್ಝನ್ತೋ ತೇಹಿ ತತ್ಥೇವ, ವಾಸಂ’ಕಾಸಿ ಸವಾಹನೋ.
ಪರತೀರಂ ಗತೋ ರಾಜಾ, ಗಹೇತ್ವಾ ದಮಿಳಂ ಬಲಂ;
ಕಾಳವಾಪಿಮುಪಾಗಮ್ಮ, ಕಾತುಂ ಯುದ್ಧಮುಪಕ್ಕಮಿ.
ಜೇಟ್ಠತಿಸ್ಸೋಪಿ ಸನ್ನದ್ಧ ಬಲಕಾಯೋ ಧನಾಯುಧೋ;
ಜಮ್ಬುದೀಪಂ ಗಮಾಪೇತ್ವಾ, ಅಮಚ್ಚಂ ದಾಠಸಿವಕಂ.
ವಮ್ಮಿತಂ ಗಜಮಾರುಯ್ಹ, ಯುಜ್ಝನ್ತೋ ಅತ್ತನೋ ಬಲಂ;
ಓಹೀಯಮಾನಂ ದಿಸ್ವಾನ, ಆರುಳ್ಹಂ ಅತ್ತನಾ ಸಹ.
ಮಹಾಮಚ್ಚವಚೋ ವೇದಂ, ಸನ್ದೇಸಂ ಮೇ ಮಹೇಸಿಯಾ;
ಆರೋಚೇಹಿ ಯಥಾಕಾಮಂ, ಪಚ್ಛಾ ತವ ಕರಿಸ್ಸತಿ.
ಪಬ್ಬಜಿತ್ವಾ ಮಹಾದೇವೀ, ಸಜ್ಝಾಯಿತ್ವಾ ಚ ಆಗಮಂ;
ಅಭಿಧಮ್ಮಂ ಕಥೇತ್ವಾನ, ಪತ್ತಿಂ ದೇಹೀತಿ ರಾಜಿನೋ.
ಇಚ್ಚೇತಂ ಸಾಸನಂ ದತ್ವಾ, ದಮಿಳೇ ಆಗತಾಗತೇ;
ಯಾವ ಯುದ್ಧಂ ನಿಹನ್ತ್ವಾನ, ಆಯುಮ್ಹಿ ಖಯಮಾಗತೇ.
ವೇಳುಪ್ಪದಮಿಳಂ ನಾಮ, ದಿಸ್ವಾ ಯುಜ್ಝಿತುಮಾಗತಂ;
ತಮ್ಬುಲತ್ಥವಿಯಂ ಹತ್ಥೇ, ರಕ್ಖನ್ತೋ ಛುರಿಕಂ ತದಾ.
ತತೋ ನಿಕ್ಕರಣಿಂ ಸಮ್ಮಾ, ಗಹೇತ್ವಾ ಸೀಸಮತ್ತನೋ;
ಛೇತ್ವಾ ಹತ್ಥಿಮ್ಹಿ ಅಪ್ಪೇತ್ವಾ, ಛುರಿಕಂ ಕೋಸಿಯಂ ಖಿಪಿ.
ಉಗ್ಘೋಸಯಿ ಮಹಾಸೇನಾ, ಮಹಾಮಚ್ಚೋಪಿ ಸೋ ತದಾ;
ಗನ್ತ್ವಾ’ಭಿಯೋಗಂ ವತ್ವಾನ, ಸೀಸಚ್ಛೇದಮ್ಹಿ ರಾಜಿನೋ.
ಸನ್ದೇಸಂ ದೇವಿಯಾ ವತ್ವಾ, ತಾಯ ಪಬ್ಬಜ್ಜಸಾಸನೇ;
ಸಮಾಪಿತೋ ಭಿಧಮ್ಮಮ್ಹಿ, ಸದ್ಧಿಮಟ್ಠಕಥಾಯ ಹಿ.
ಧಮ್ಮಾಸನಾ ಸಮೋರುಯ್ಹ, ನಿಸೀದಿಯ ಮಹೀತಲೇ;
ಏಹಿ ರಞ್ಞೋ ಮಹಾಕಾರಂ, ದಸ್ಸೇಹೀ’ತಿ ನಿಯೋಜಿತೋ.
ನಿಸಜ್ಜ ಪುರತೋ ತಸ್ಸಾ, ಛಿನ್ದಿತ್ವಾ ಸೀಸಮತ್ತನೋ;
ಖಿಪಿತ್ವಾ ಛುರಿಕಂ ಆಹ, ಏವಂ ದೇವೋ ಮತೋ ಇತಿ.
ಸಾ ತಂ ದಿಸ್ವಾ-ತಿಸೋಕೇನ, ಫಾಲೇತ್ವಾ ಹದಯಂ ಮತಾ;
ಏವಂ ಪಞ್ಚಹಿ ಮಾಸೇಹಿ, ರಾಜಾ ಸೋ ತಿದಿವಂ ಗತೋ.
ಏವಂ ¶ ವಿಜಿತಸಙ್ಗಾಮೋ, ಸತ್ತವೋ ಅಭಿಮದ್ದಿಯ;
ರಜ್ಜಂ ಪಾಕತಿಕಂ ಕತ್ವಾ, ವಿಹರನ್ತೋ ಪುರೇ ವರೇ.
ಉಪರಾಜಸ್ಸ ನಾಮೇನ, ಕಾರಿತಸ್ಸ ಪನ’ತ್ತನಾ;
ಮಹಲ್ಲರಾಜಾ ಸವ್ಹಸ್ಸ, ಪಧಾನಘರಕಸ್ಸ ಸೋ.
ಅದ್ಧಾ ಗಾಮದ್ವಯಂ ರಾಜಾ, ಹಙ್ಕಾರಂ ಸಾಮುಗಾಮಕಂ;
ಕೇಹೇಲ್ಲರಾಜಭಾಗಞ್ಚ, ಸಬ್ಬೇಪಿ ಪರಿಚಾರಕೇ.
ತಥಾ ಜೇತವನಸ್ಸ’ದಾ, ಮಹಾಮಣಿಕಗಾಮಕಂ;
ಮಯೇತ್ತಿಕಸ್ಸಪಾವಾಸಂ, ಸಾಲಗಾಮೇನ ಪೂಜಯಿ.
ಅಮ್ಬಿಲ್ಲಪದರಂ ಚಾ’ದಾ, ಚೇತಿಯಸ್ಸ ಗಿರಿಸ್ಸ ಸೋ;
ಪುಲತ್ಥಿನಗರೇ ಕಾಸಿ, ಮಹಾಪಾನಾದಿ ದೀಪಕಂ.
ಅಮಚ್ಚಾ ತಸ್ಸ ಮಾರೇಸುಂ, ಮಾಣವ್ಹಂ ಯುವರಾಜಕಂ;
ಅನ್ತೋಪುರೇ’ಪರಜ್ಝಿತ್ವಾ, ದತ್ವಾಪಿ ಸಮಮೇತ್ತಿಕಂ.
ತತೋ ಕಸ್ಸಪನಾಮಂ ಸೋ, ಕಣಿಟ್ಠಂ ಸಕಭಾತರಂ;
ಪಾಲೇನ್ತೋ ಸನ್ತತಿಂ ರಾಜಾ, ಓಪರಜ್ಜೇ’ಭಿಸೇಚಯಿ.
ಮಾಣಸ್ಸ ಮರಣಂ ಸುತ್ವಾ, ಗಹೇತ್ವಾ ದಮಿಳೇ ಲಹುಂ;
ದಾಠಾಸಿವೋ ಸಮಾಗಞ್ಛಿ, ಗಾಮಂ ತಿನ್ತಿಣೀ ನಾಮಕಂ.
ತಸ್ಸಾಗಮನಮಞ್ಞಾಮ, ನಿಕ್ಖಮಿತ್ವಾ ಸವಾಹನೋ;
ಯುಜ್ಝನ್ತೋ ದ್ವಾರಸೇ ವಸ್ಸೇ, ಜಮ್ಬುದೀಪಂ ಪಲಾತವಾ.
ಪಹಾಯ ಸಬ್ಬಂ ಗಚ್ಛನ್ತೋ, ಸಞ್ಞಾಣತ್ಥಾಯ ಅತ್ತನೋ;
ಏಕಾವಲಿಂ ಗಹೇತ್ವಾವ, ಏಕಾಕೀ ಸೋ ಹಿ ನಿಕ್ಖಮಿ.
ಏಕಾವಲಿಂ ವಿನಾಚೇವ, ರಾಜಾ ಹುತ್ವಾ ಯಥಾವಿಧಿಂ;
ಅಹು ದಾಠೋಪತಿಸ್ಸೋತಿ, ವಿಸುತೋ ಧರಣೀ ತಲೇ.
ಇತರೋ ಲದ್ಧಓಕಾಸೋ, ರಜ್ಜಮಗ್ಗಹಿ ಯುಜ್ಝಿಯ;
ಅಞ್ಞಮಞ್ಞಂ ಪಲಾಪೇಸುಂ, ಏವಂ ತೇ ಅನ್ತರನ್ತರಾ.
ಏವಂ ಉಭಿನ್ನಂ ರಾಜೂನಂ, ಸಙ್ಗಾಮೇನಾ’ಭಿಪೀಳಿತೋ;
ಲೋಕೋ ಉಪದ್ದುತೋ-ಸಬ್ಬೋ ವಿಹೀನಧನಧಞ್ಞವಾ.
ದಾಠೋಪತಿಸ್ಸೋ ನಾಸೇಸಿ, ಸಬ್ಬಂ ಪುಬ್ಬಕರಾಜೂನಂ;
ಗಣ್ಹೀ ತೀಸು ನಿಕಾಯೇಸು, ಸಾರಂ ಧಾತುಘರೇಸು ಚ.
ಸುವಣ್ಣಪಟಿಮಾಯೋ ಸೋ, ಸುವಣ್ಣಂ ಗಣ್ಹಿ ಭಿನ್ದಿಯ;
ಸೋಣ್ಣಮಾಲಾದಿಕಂ ಸಬ್ಬಂ, ಪೂಜಾಭಣ್ಡಂ ನಿರಾಕರಿ.
ಥೂಪಾರಾಮೇ ¶ ತಥಾಗಣ್ಹಿ, ಸೋವಣ್ಣಂ ಥುಪಿಕಂ ಘರೇ;
ಮಹಗ್ಘರತನಾಕಿಣ್ಣಂ, ಛತ್ತಂ ಭಿನ್ದಿತ್ಥ ಚೇತಿಯೇ.
ಮಹಾಪಾಳಿಮ್ಹಿ ನಾವಾಯೋ, ದಮಿಳಾನಂ ಸದಾಪಯಿ;
ರಾಜಗೇಹಾ ನಿಝಾಪೇಸುಂ, ಸದ್ಧಿಂ ಧಾತುಘರೇನ ತೇ.
ಪಚ್ಛಾ ವಿಪ್ಪಟಿಸಾರೀ ಸೋ, ದೇಸೇತುಂ, ಪಾಪಮತ್ತನೋ;
ಕಾರೇಸಿ ಸಹ ಭೋಗೇನ, ಸಾಕವತ್ಥುವಿಹಾರಕಂ.
ಭಾಗಿನೇಯ್ಯೋಪಿ ರತನ-ದಾಠೋ ಇತಿ ಜನೇ ಸುತೋ;
ಮಹಾದೀಪಾದೋ ಹುತ್ವಾನ, ಸಭೋಗೋ ತಮುಪಟ್ಠಹಿ.
ಅಗ್ಗಬೋಧಿಮ್ಹಿ ಸಮ್ಪತ್ತೇ, ರಜ್ಜಂ ಯುದ್ಧಬಲೇನ ಚ;
ಕಸ್ಸಪೋ ಯುವರಾಜಾ ಸೋ, ಸೇನಂ ರಕ್ಖಿತುಮತ್ತನೋ.
ದುಪ್ಪಞ್ಞೋ ಸಹಸಾ ಭೇತ್ವಾ, ಥೂಪಾರಾಮಮ್ಹಿ ಚೇತಿಯಂ;
ದೇವಾನಂಪಿಯತಿಸ್ಸೇನ, ಖುದ್ದರಾಜೇನ ಚೇವ ಹಿ.
ಪುಬ್ಬಕೇಹಿಚ ರಾಜೂಹಿ, ಪೂಜಿತಂಧನಸಾರಕಂ;
ಅಗ್ಗಹೇಸಿ ದುನ್ನಿತೀಹಿ, ಪಾಪಕೇಹಿ ಪುರಕ್ಖತೋ.
ದಕ್ಖಿಣಸ್ಸ ವಿಹಾರಸ್ಸ, ಚೇತಿಯಂ ಪರಿಭಿನ್ದಿಯ;
ಅಗ್ಗಹೇಸಿ ಧನಂ ಸಾರಂ, ಏವಮಞ್ಞೇಪಿ ಭಿನ್ದಯಿ.
ಏವಂ ಕರೋನ್ತಂ ತಂ ರಾಜಾ, ದುನ್ನಿತಿಕಪುರಕ್ಖತಂ;
ನಾಸಕ್ಖಿ ಕಿರ ವಾರೇತುಂ, ಅಹೋ ಪಾಪಾ ನಿವಾರಿಯಾ.
ತಂ ವಾರೇತು ಮಸಕ್ಕೋನ್ತೋ, ಥೂಪಾರಾಮಮ್ಹಿ ಚೇತಿಯಂ;
ಭಿನ್ನಂ ತೇನ ಸಕಾರೇಸಿ, ಸಹಸ್ಸೇನ ಸಮಙ್ಗಲಂ.
ತದಾ ದಾಠೋಪತಿಸ್ಸೇನ, ಅಗ್ಗಬೋಧಿ ನರಿಸ್ಸರೋ;
ಜಿತೋ ರೋಹಣಮೇವಾ’ಗಾ, ಸಜ್ಜೇತುಂ ಬಲವಾಹನಂ.
ತತ್ರ ಠಿತೋ ಸೋಳಸಮೇ, ವಸ್ಸೇ ಬ್ಯಾಧಿಹತೋ ಮತೋ;
ತದಾ ತಸ್ಸ ಕಣಿಟ್ಠೋ ಸೋ, ಯುವರಾಜಾಪಿ ಕಸ್ಸಪೋ.
ದಾಠೋಪತಿಸ್ಸ ರಾಜಾನಂ, ಜಮ್ಬುದೀಪಂ ಪಲಾಪಿಯ;
ಏಕರಜ್ಜಮಕಾದೇಸಂ, ಮಕುಟನ್ತು ನ ಧಾರಯಿ.
ಸಾಧೂನಂ ಸಙ್ಗಮೇನೇ’ಸ, ಹುತ್ವಾ ವಿಪ್ಪಟಿಸಾರಕೋ;
ನಾಸಂ ಪಾಪಸ್ಸ ಕಮ್ಮಸ್ಸ, ಕರಿಸ್ಸಾಮೀತಿ ಚಿನ್ತಿಯ.
ಪುಪ್ಫಾರಾಮೇ ಫಲಾರಾಮೇ, ವಾಪಿಯೋ’ಪಿ ಚ ಕಾರಯಿ;
ಮಹಾಚೇತಿತ್ತಯಞ್ಚಾಪಿ, ಮಹಾಪೂಜಾಹಿ ಸಕ್ಕರಿ.
ಥೂಪಾರಾಮಞ್ಚ ¶ ಪೂಜೇತ್ವಾ, ಏಕಂಗಾಮಞ್ಚ ತಸ್ಸದಾ;
ಸಬ್ಬಾಗಮಿಯಭಿಕ್ಖೂಹಿ, ಧಮ್ಮಂದೇಸಾಪಯಿತ್ಥ ಚ.
ಕತ್ವಾ ಮರಿಚವಟ್ಟಿಮ್ಹಿ, ಪಾಸಾದಂ ಸುತ್ಥಿರಂ ತಹಿಂ;
ವಾಸಯಿತ್ಥ ಮಹಾಥೇರಂ, ನಾಗಸಾಲ ನಿವಾಸಿತಂ.
ತತ್ರಟ್ಠಂ ತಮುಪಟ್ಠಾಯ, ಪಚ್ಚಯೇತಿ ಚತೂಹಿ’ಪಿ;
ಅಭಿಧಮ್ಮಂ ಕಥಾಪೇಸಿ, ಸದ್ಧಿಮಟ್ಠಕಥಾಯ ಸೋ.
ನಾಗಸಾಲಕಮಾವಾಸಂ, ಕತ್ವಾ ತಸ್ಸೇವ’ದಾಸಿ ಸೋ;
ಮಹಾನಿಟ್ಠಿಲಗಾಮಞ್ಚ, ಪಚ್ಚಯತ್ಥಾಯ ತಸ್ಸ’ದಾ.
ಅಥ ದಾಥೋಪತಿಸ್ಸೋ ಸೋ, ಜಮ್ಬುದೀಪಾ ಇಧಾಗತೋ;
ಮಹನ್ತಂ ಬಲಮಾದಾಯ, ಕರೋನ್ತೋ ತೇನ ಆಹವಂ.
ಕಸ್ಸಪೇನ ಸುಸನ್ನದ್ಧ-ವಾಹನೇನ ತತೋ ಮರಿ;
ದ್ವಾದಸಾಸುಂ ಕಿರೇತಸ್ಸ, ರಾಜಭೂತಸ್ಸ ಹಾಯನಾ.
ತಸ್ಸ ದಾಠೋಪತಿಸ್ಸಸ್ಸ, ಭಾಗಿನೇಯ್ಯೋ ಸನಾಮಕೋ;
ಜಮ್ಬುದೀಪಂ ಪಲಾಯಿತ್ಥ, ಭೀತೋ ತಮ್ಹಾ ಮಹಾರಣೇ.
ಏವಂ ಅನಿಚ್ಚಾ ವತ ಸಬ್ಬಭೋಗಾ,
ಸುದುಲ್ಲಭಾ ಚೇವ ಖಣೇವ ಸೋಭಾ;
ತಸ್ಮಾಹಿ ಏತೇಸು ರತಿಂ ವಿಹಾಯ,
ಭವೇಯ್ಯ ಧಮ್ಮಾಭಿಮುಖೋ ಹಿತೇಸೀ.
ಸುಜನಪ್ಪಸಾದಸಂವೇಗತ್ಥಾಯ ಕತೇ ಮಹಾವಂಸೇ
ಛ ರಾಜಕೋ ನಾಮ
ದ್ವಿಚತ್ತಾಲೀಸತಿಮೋ ಪರಿಚ್ಛೇದೋ.
ತೇಚತ್ತಾಲೀಸತಿಮ ಪರಿಚ್ಛೇದ
ಚತುರಾಜಕೋ
ತತೋ ¶ ವಿಜಿತಸಙ್ಗಾಮೋ, ಕಸ್ಸಪೋ ಪುರಿತಾಸಯೋ;
ಮಹಾಪಾಳಿಮ್ಹಿ ಸಙ್ಘಸ್ಸ, ಸಮಿದ್ಧಂ ಭೋಜನಂ ಅಕಾ.
ನಾಗಸಾಲಾ ನಿವಾಸಿಂ ಸೋ, ಮಹಾಧಮ್ಮಕಥಿಂ ಯತಿಂ;
ಮಹಾಪೂಜಾಯ ಪೂಜೇತ್ವಾ, ಸದ್ಧಮ್ಮಂ ತೇನ ವಾಚಯಿ.
ವಸನ್ತಂ ಭಾತುಆವಾಸೇ, ಸಮುದ್ದಿಸ್ಸ ಲಿಖಾಪಯಿ;
ಕಟನ್ಧಕಾರವಾಸಿಂ ಸೋ, ಪಾಳಿ ಸಬ್ಬಂ ಸಸಙ್ಗಹಂ.
ಜಿಣ್ಣಂ ಸಙ್ಖರಿಕಮ್ಮಞ್ಚ, ನವಂ ಕಾರೇಸಿ ಚೇತಿಯೇ;
ಸಙ್ಘಭೋಗಮನೇಕಞ್ಚ, ತತ್ಥ ತತ್ಥ ಪವತ್ತಯಿ.
ನಾನಾಮಣಿಸಮುಜ್ಜೋತಂ, ಕಾಸಿ ಚೂಳಮಣಿತ್ತಯಂ;
ಸತಂ ಪಣ್ಡುಪಲಾಸಾನಂ, ವತ್ಥದಾನೇನ ತಪ್ಪಯಿ.
ತಸ್ಸಾಸುಂ ಬಹವೋ ಪುತ್ತಾ, ಜೇಟ್ಠೋ ತೇಸಞ್ಚ ಮಾಣಕೋ;
ಸಬ್ಬೇ ತೇ ನ ವಯಪ್ಪತ್ತಾ, ಬಾಲಾವಿಗತಬುದ್ಧಿನೋ.
ತತೋ ಸೋ ಬ್ಯಾಧಿನಾ ಫುಟ್ಠೋ, ಅತೇಕಿಚ್ಛೇನ ಕೇನಚಿ;
ಪುತ್ತಾ ಮೇ ಬಾಲಕಾ ಸಬ್ಬೇ, ನೇ’ತೇ ರಜ್ಜಕ್ಖಮಾ ಇತಿ.
ವಸನ್ತಂ ರೋಹಣೇ ದೇಸೇ, ಭಾಗಿನೇಯ್ಯಂ ಮಹಾಮತಿಂ;
ಆಹುಯ ಸಬ್ಬಂ ಪಾದಾಸಿ, ರಜ್ಜಂ ಪುತ್ತೇಹಿ ಅತ್ತನೋ.
ಗನ್ಧಮಾಲಾದಿಪೂಜಾಹಿ, ಪೂಜಯಿತ್ವಾನ ಚೇತಿಯೇ;
ಭಿಕ್ಖುಸಙ್ಘಂ ಖಮಾಧಪಸಿ, ದತ್ವಾನ ಚತುಪಚ್ಚಯಂ.
ಏವಂ ಧಮ್ಮಂ ಚರಿತ್ವಾನ, ಮಿತ್ತಾಮಚ್ಚಜನೇಸು ಚ;
ಗತೋ ನವಹಿ ವಸ್ಸೇಹಿ, ಯಥಾಕಮ್ಮಂ ನರಾಧಿಪೋ.
ಕತ್ವಾ ಕತ್ತಬ್ಬಕಿಚ್ಚಂ ಸೋ, ಮಾತುಲಸ್ಸ ಸಗಾರವೋ;
ಸಙ್ಗಹನ್ತೋ ಜನಂ ಮಾಣೋ, ದಮಿಳೇ ನೀಹರಾಪಯಿ.
ಏಕತೋ ದಮಿಳಾ ಹುತ್ವಾ, ನಿಬ್ಬಾಸೇಮ ಇಮಂ ಇತಿ;
ತಸ್ಮಿಂ ಠಿತೇ ಬಹಿದ್ಧಾವ, ಅಗ್ಗಹೇಸುಂ ಪುರಂ ಸಯಂ.
ಹತ್ತ ¶ ದಾಠಸ್ಸ ಪೇಸೇಸಿ, ಜಮ್ಬುದೀಪಗತಸ್ಸ ತೇ;
ಆಗನ್ತುಂತವ ಕಾಲೋತಿ, ಸಾಸನಂ ರಜ್ಜಗಾಹಣೇ.
ಮಾಣೋ’ಪಿ ಸಙ್ಘಂ ಪೇಸೇಸಿ, ಸಾಸನಂ ಪಿತುರೋಹಣಂ;
ಪಿತಾ ಸುತ್ವಾನ ತಂ ಆಗಾ, ನ ಚೀರೇನೇವ ರೋಹಣಾ.
ಉಭೇ ತೇ ಮನ್ತಯಿತ್ವಾನ, ಅಕಂಸು ಸನ್ಧಿಲೇಸಕಂ;
ಉಮಿಳೇಹಿ ತತೋ ಜಾತಾ, ಸಬ್ಬೇ ತೇ ಸಮವುತ್ತಿನೋ.
ತತೋ ಸೋ ಪಿತರಂ ರಜ್ಜೇ, ಅಭಿಸಿಞ್ಚಿತ್ಥ ಮಾಣಕೋ;
ಸೋ’ಭಿಸಿತ್ತೋ ನಿಕಾಯಾನಂ, ಸಹಸ್ಸಾನಂ ತಯಂ ಅದಾ.
ಸಙ್ಘಂ ರಟ್ಠಞ್ಚ ಸಙ್ಗಯ್ಹ, ಸಬ್ಬಂ ರಾಜಕುಲಟ್ಠಿತಂ;
ಭಣ್ಡಂ ಪೇಸೇಸಿ ಸತ್ತೂಹಿ, ರಕ್ಖಣತ್ಥಾಯ ರೋಹಣಂ.
ಹತ್ಥದಾಠೋಪಿ ಸುತ್ವಾನ, ದಮಿಳಾನಂ ತು ಸಾಸನಂ;
ಖಣೇನಾ’ಗಾ ಇಮಂ ದೀಪಂ, ಗಹೇತ್ವಾ ದಮಿಳ್ಹಂ ಬಲಂ.
ತದಾ ತೇ ದಮಿಳಾ ಸಬ್ಬೇ, ಪರಿಭೂತಾ ಇಧ ಠಿತಾ;
ಆಯನ್ತಮೇವ ತಂ ಗನ್ತ್ವಾ, ಪರಿವಾರೇಸು ಮಞ್ಜಸೇ.
ಮಾಣೋಪಿ ಸುತ್ವಾ ತಂ ಸಬ್ಬಂ, ನಾಯಂ ಕಾಲೋತಿ ಯುಜ್ಝಿತುಂ;
ಪೇಸೇತ್ವಾ ಪಿತುರಾಜಾನಂ, ಸದ್ಧಿಂ ಸಾರೇನ ರೋಹಣಂ.
ಪುಬ್ಬದೇಸಂ ಸಯಂ ಗನ್ತ್ವಾ, ಸಙ್ಗಣ್ಹನ್ತೋ ಜನಂ ವಸೀ;
ಲದ್ಧಾ ದಮಿಳಪಕ್ಖಂ ಸೋ, ಗಹೇತ್ವಾ ರಾಜಕಂ ಪುರಂ.
ದಾಠೋಪತಿಸ್ಸೋ ರಾಜಾತಿ, ನಾಮಂ ಸಾವೇತಿ ಅತ್ತನೋ;
ಮಾತುಲಂ ವಿಯ ತಂ ಲೋಕೋ, ತೇನ ನಾಮೇನ ವೋಹರಿ.
ಪಿತುಚ್ಛಪುತ್ತಮಾನೇತ್ವಾ, ಅಗ್ಗಬೋಧಿ ಸನಾಮಕಂ;
ಠಪೇತ್ವಾ ಯುವರಾಜತ್ತೇ, ದೇಸಞ್ಚಾ’ದಾಸಿ ದಕ್ಖಿಣಂ.
ಠಾನನ್ತರಞ್ಚ ಪಾದಾಸಿ, ನಿಸ್ಸಿತಾನಂ ಯಥಾರಹಂ;
ಸಾಸನಸ್ಸ ಚ ಲೋಕಸ್ಸ, ಸಬ್ಬಂ ಕತ್ತಬ್ಬಮಾಚರಿ.
ಮಹಾಪಾಳಿಮ್ಹಿ ದಾಪೇಸಿ, ಸವತ್ಥಂ ದಧಿಭತ್ತಕಂ;
ಖೀರಂ ಪಾಯಾಸಕಞ್ಚೇವ, ಧಮ್ಮಂ ಸುಣಿ ಉಪೋಸಥಿ.
ಕಾರೇತ್ವಾ ಸಬ್ಬಪೂಜಾಯೋ, ದೇಸಾ ಪೇತ್ವಾನ ದೇಸನಂ;
ಏವಮಾದೀಹಿ ಪುಞ್ಞೇಹಿ, ಅತ್ತಾನಂ’ಕಾಸಿ ಭದ್ದಕಂ.
ಕಸ್ಸಪಸ್ಸ ವಿಹಾರಸ್ಸ, ದತ್ವಾಸೇನವ್ಹಗಾಮಕಂ;
ಮಹಾಗಲ್ಲಞ್ಚ ಪಾದಾಸಿ, ಪಧಾನಘರಕಸ್ಸ ಸೋ.
ಪರಿವೇಣಸ್ಸ ¶ ಮೋರಸ್ಸ, ಅಕಾಸಿ ಸಕಗಾಮಕಂ;
ಥೂಪಾರಾಮಸ್ಸ ಪುಣ್ಣೋಳಿಂ, ದತ್ವಾ ಸಕ್ಕಾಸಿ ಚೇತಿಯಂ.
ಕಪ್ಪೂರಪರಿವೇಣಂ ಸೋ, ಕಾರೇಸಿ ಅಭಯುತ್ತರೇ;
ವಿಹಾರಂ ತಿಪುಥುಲ್ಲವ್ಹಂ, ಕತ್ವಾ ತಸ್ಸೇವ ದಾಪಯಿ.
ತಸ್ಮಿಂ ಕರೋನ್ತೇ ವಾರೇಸುಂ, ಸೀಮಾಯನ್ತೋ’ತಿ ಭಿಕ್ಖವೋ;
ಥೇರಿಯಾ ತೇ ಕಿಬಾಹೇತ್ವಾ, ಬಲಂ ತಥೇವ ಕಾರಯಿ.
ಅಥ ತೇ ತೇ ಥೇರಿಯಾ ಭಿಕ್ಖೂ, ದುಮ್ಮಞ್ಞೂ ತತ್ಥ ರಾಜಿನಿ;
ಅಸ್ಸದ್ಧಂ ತಂ ವಿದಿತ್ವಾನ, ಪತ್ತನಿಕ್ಕುಜ್ಜನಂ ಕರುಂ.
ವುತ್ತಞ್ಹಿ ಮುನಿನಾ ತೇನ, ಅಸ್ಸದ್ಧೋ ಯೋ ಉಪಾಸಕೋ;
ಅಲಾಭಾಯ ಚ ಭಿಕ್ಖೂನಂ, ಚೇತೇತ’ಕ್ಕೋಸತಿ ಚ ತೇ.
ಪತ್ತನಿಕುಜ್ಜನಂ ತಸ್ಸ, ಕತ್ತಬ್ಬನ್ತಿ ತತೋ ಹಿ ತೇ;
ತಸ್ಸ ತಂ ಕಮ್ಮಮಕರುಂ, ಲೋಕೋ ಮಞ್ಞಿತ್ಥ ಅಞ್ಞಥಾ.
ಆದಾಯು ಕುಜ್ಜಿತಂ ಪತ್ತಂ, ಚರನ್ತೋ ಭಿಕ್ಖುಭಿಕ್ಖಕಂ;
ನಿಕುಜ್ಜೇಯ್ಯ ಘರದ್ವಾರೇ, ತಸ್ಸಾ’ತಿ ಕಥಿಕಂ ಕರುಂ.
ತಸ್ಮಿಂ ಸೋ ಸಮಯೇ ಫುಟ್ಠೋ, ಬ್ಯಾಧಿನಾ ಮಹತಾಮರಿ;
ವಸ್ಸಮ್ಹಿ ನವಮೇ ರಾಜಾ, ಸಮ್ಪತ್ತೋ ಜೀವಿತಕ್ಖಯಂ.
ದಪ್ಪುಲೋಪಿ ತತೋ ರಾಜಾ, ಗತೋ ರೋಹಣಕಂ ಸಕಂ;
ವಾಸಂ ಕಪ್ಪೇಸಿ ತತ್ಥೇವ, ಕರೋನ್ತೋ ಪುಞ್ಞಸಞ್ಚಯಂ.
ಇತೋ ಪಟ್ಠಾಯ ವಕ್ಖಾಮ, ತಸ್ಸ ವಂಸಮನಾಕುಲಂ;
ವುಚ್ಚಮಾನಮ್ಹಿ ಏತ್ಥೇವ, ತಸ್ಮಿಂ ಹೋತಿ ಅಸಙ್ಕರೋ.
ಜಾತೋ ಓಕ್ಕಾಕವಂಸಮ್ಹಿ, ಮಹಾತಿಸ್ಸೋತಿ ವಿಸ್ಸುತೋ;
ಆಸಿ ಏಕೋ ಮಹಾಪುಞ್ಞೋ, ಸಮಾಕಿಣ್ಣಗುಣಾಕರೋ.
ತಸ್ಸೇ’ಕಾ ಭರಿಯಾ ಆಸಿ, ಸಙ್ಘಪಿವಾತಿ ವೀಸ್ಸುತಾ;
ಧಞ್ಞಪುಞ್ಞಗುಣೂಪೇತಾ, ಧೀತಾ ರೋಹಣಸಾಮಿನೋ.
ತಸ್ಸಾಪುತ್ತಾ ತಯೋ ಆಸುಂ, ಪಠಮೋ ಅಗ್ಗಬೇಧಿಕೋ;
ದುತಿಯೋ ದಪ್ಪುಲೋ ನಾಮ, ತತಿಯೋ ಮಣಿಅಕ್ಖಿಕೋ.
ಏಕಾವ ಧೀತಾ ತಸ್ಸಾಸಿ, ರಾಜನಮಗಮಾ ಚ ಸಾ;
ಜೇಟ್ಠೋ ರೋಹಣನಾಮಸ್ಸ, ದೇಸಸ್ಸಾ’ಸಿ ಸಯಂ ವಸೀ.
ಮಹಾಪಾಳಿಂ ಸ ಕಾರೇಸಿ, ಮಹಾಗಾಮೇ ಮಹಾಧನೋ;
ದಾಠಗ್ಗಬೋಧಿನಾಮಞ್ಚ, ಪರಿವೇಣಂ ತಹಿ ವಂಸೋ.
ಕಾಣಗಾಮಮ್ಹಿ ¶ ಕಾಣಾನಂ, ಗಿಲಾನಾನಞ್ಚ ಸಾಲಕೇ;
ವಿಹಾರೇ ಪಟಿಮಾವ್ಹೇ ಚ, ಮಹನ್ತಂ ಪಟಿಮಾಘರಂ.
ಪತಿಟ್ಠಪೇಸಿ ಕತ್ವಾನ, ಬುದ್ಧತತ್ಥ ಸಿಲಾಮಯಂ;
ಮಹನ್ತನಾಮಂ ಸಪ್ಪಞ್ಞೋ, ಇದ್ಧೀಹಿ ವಿಯ ನಿಮ್ಮಿತಂ.
ಸಾಲವಾಣಞ್ಚ ಕಾರೇಸಿ, ವಿಹಾರಂ ಅತ್ತನಾಮಕಂ,
ಪರಿವೇಣವಿಹಾರಞ್ಚ, ತಥಾ ಕಾಜರಗಾಮಕಂ.
ನವಕಮ್ಮಾನಿ ಕಾರೇತ್ವಾ, ಧಮ್ಮಸಾಲವಿಹಾರಕೇ;
ಸಯಂ ವಚ್ಚಕುಟೀ ಏಸ, ತತ್ಥ ಸೋಧೇಸಿ ಬುದ್ಧಿಮಾ.
ಉಚ್ಚಿಟ್ಠಂ ಭಿಕ್ಖುಸಙ್ಘಸ್ಸ, ಭೋಜನಂ ಪರಿಭುಞ್ಜಿಯ;
ಮಣ್ಡಗಾಮಞ್ಚ ಸಙ್ಘಸ್ಸ, ಗಾಮಂ’ದಾಸಿ ಮಸಾದವಾ.
ಪುಞ್ಞಾನೇ’ತಾನಿಚಞ್ಞಾನಿ, ಕತ್ವಾ ತಸ್ಮಿಂ ದಿವಙ್ಗತೇ;
ಆಸೀ ತಸ್ಸಾ’ನುಜೋ ತತ್ಥ, ಸಾಮಿ ದಪ್ಪುಲನಾಮಕೋ.
ಇಸ್ಸೇರಂ ತತ್ಥ ವತ್ತೇಸಿ, ಸಮ್ಪಮದ್ದಿಯ ಸತ್ತ ವೋ;
ಮಹಾದಾನಂ ಪವತ್ತೇಸಿ, ನಿಸ್ಸಙ್ಕಂ ರೋಹಣಂ ಅಗಾ.
ತಸ್ಸ ತುಟ್ಠೋ ಜನೋ ಆಹ, ಮಹಾಸಾಮೀತಿ ಏಸನೋ;
ತತೋ ಪಟ್ಠಾಯ ತಂ ಲೋಕೋ-ಮಹಾಸಾಮೀತಿ ವೋಹರಿ.
ಸುತ್ವಾನ ತಂ ಸಿಲಾದಾಠೋ, ನರಿನ್ದೋ ಸಕಧೀತರಂ;
ತಸ್ಸ ಪಾದಾಸಿ ಸನ್ತುಟ್ಠೋ, ಗುಣೇಹಿ ಬಹುಕೇಹಿ ಚ.
ಯುಜರಾಜತ್ತಮಸ್ಸಾದಾ, ರಜ್ಜಯೋಗ್ಗೋತಿ ಮಾನಿತುಂ;
ಮಾಣವಮ್ಮಾದಯೋ ತಸ್ಸ, ಪುತ್ತಾ ಆಸುಂ ಮಹಾಸಯಾ.
ಪಾಸಾಣದಿಪವಾಸಿಸ್ಸ, ಮಹಾಥೇರಸ್ಸ ಸನ್ತಿಕೇ;
ಧಮ್ಮಂ ಸುತ್ವಾ ಪಸೀದಿತ್ವಾ, ತಸ್ಮಿಂ ತಂ ಬಹುಮಾನಿತುಂ.
ವಿಹಾರಂ ರೋಹಣೇ ಕತ್ವಾ, ತಸ್ಸ ಪಾದಾಸಿ ಸೋಪಿ ತಂ;
ಚಾತುದ್ದಿಸಿಯಸಙ್ಘಸ್ಸ, ಪರಿಭೋಗಾಯ ವಿಸ್ಸಜ್ಜಿ.
ಅಮ್ಬಮಾಲಾ ವಿಹಾರಾದಿ, ವಿಹಾರೇ ಕಾರಯಿ ಬಹೂ;
ಖದಿರಾಲಿವಿಹಾರಞ್ಚ, ಕತ್ವಾ ದೇವ ಮಪೂಜಯಿ.
ಪಾಸಾದಮನುರಾರಾಮಂ, ಮುತ್ತೋಲಮ್ಬಂ ಸುಜಿಣ್ಣಕಂ;
ಸೀರಿವಡ್ಢಞ್ಚ ಪಾಸಾದಂ, ತಥಾ ತಕ್ಕಮ್ಬಿಲಂ ಪರಂ.
ಸೋಧೇತ್ವಾ ಭಿಕ್ಖವೋ ತತ್ಥ, ದ್ವತ್ತಿಂಸ ಪರಿವಾಸಯಿ;
ಸಬ್ಬಪಚ್ಚಯದಾನೇನ, ಸನ್ತಪ್ಪೇತ್ವಾ ಮಹೀಮತಿ.
ಅದಾ ¶ ಕೇವಟ್ಟಗಮ್ಭೀರಂ, ಗಾಮಂ ನಾಗವಿಹಾರಕೇ;
ತಥಾ ರಾಜವಿಹಾರಸ್ಸ, ಗೋನ್ನಗಾಮಂ ಸಮಾದಿಯಿ.
ಅದಾ ತೀಸವಿಹಾರಸ್ಸ, ತಥಾಕನ್ತಿಕಪಬ್ಬಕಂ;
ಚಿತ್ತಲಪಬ್ಬತಸ್ಸಾ’ದಾ, ಗಾಮಂ ಸೋ ಗೋನ್ನವಿಟ್ಠಿಕಂ.
ದತ್ವಾ ರಿಯಾಕರಸ್ಸೇಸ, ಗಾಮಂ ಸೋಮಾಲವತ್ಥುಕಂ;
ಅಕಾಸಿ ಪಟಿಮಾಗೇಹಂ, ತಥೇವ ಸುಮನೋಹರಂ.
ತತ್ರಟ್ಠಸ್ಸ ಜಿನಸ್ಸಾ’ಕಾ, ಉಣ್ಣಲೋಮಂ ಮಹಗ್ಘಿಯಂ;
ಹೇಮಪಟ್ಟಞ್ಚ ಕಾರೇಸಿ, ಸಬ್ಬಂ ಪೂಜಾವಿಧಿಂ ಸ’ಕಾ.
ಚೇತಿಯೇ ಪರಿಜಿಣ್ಣೇ ಸೋ, ಸುಧಾಕಮ್ಮೇನ ರಞ್ಜಯಿ;
ತಿಪಞ್ಚಹತ್ಥಂ ಕಾರೇಸಿ, ಮೇತ್ತೇಯ್ಯಂ ಸುಗತಂ ಪರಂ.
ಏವಮಾದಿನಿ ಪುಞ್ಞಾನಿ, ಅಪ್ಪಮೇಯ್ಯಾನಿ ಸೋ ವಿಭೂ;
ಅಕಾಸಿ ಚ ಸಯಂ ಸಾಧು, ಪರಿವಾರೇಹೀ ಕಾರಯಿ.
ಪರಿವಾರಾ ಚ ತಸ್ಸಾಸುಂ, ಬಹೂಪುಞ್ಞಕರಾ ನರಾ;
ವಿಹಾರಾ ನೇಕಕಾ ಆಸುಂ, ಕತಾ ತೇಹಿ ಸಪ್ಪಚ್ಚಯಾ.
ಕದಾಚಿ ಮಗ್ಗಂ ಗಚ್ಛಂ ಸೋ, ಅರಞ್ಞಮ್ಹಿ ಅಗಾಮಕೇ;
ಸೇನಂ ಸಂವಿದಹಿತ್ವಾನ, ವಾಸಂ ಕಪ್ಪೇಸಿ ರತ್ತಿಯಂ.
ಸುನಹಾತವಿಲ್ಲಿತ್ತೋ ಸೋ, ಸುಭುತ್ತೋಸಯನೇ ಸುಖೇ;
ನಿಪನ್ನೇಸು ಘರೇ ರಮ್ಮೇ, ನಿದ್ದಾಯಿತುಮುಪಕ್ಕಮಿ.
ಅಲಭನ್ತೋ ತದಾ ನಿದ್ದಂ, ಕಿನ್ನು ಖೋ ಇತಿ ಕಾರಣಂ;
ಪವತ್ತಿಂ ಉಪಧಾರೇನ್ತೋ, ದಿವಸೇ ಸಬ್ಬಮತ್ತನೋ.
ಅದಿಸ್ವಾ ಕಾರಣಂ ಅನ್ತೋ, ಅವಸ್ಸಂ ಬಹಿ ಹೇಸ್ಸತಿ;
ಇತಿ ಚಿನ್ತಿಯ ಯೋಜೇಸಿ, ಮನುಸ್ಸೇತಂ ಗವೇಸಿತುಂ.
ಏವಮಾಹ ಚ ನಿಸ್ಸಙ್ಕಂ, ಅಯ್ಯಕಾ ಮಮ ರತ್ತಿಯಂ;
ತೇಮೇನ್ತಾ ರುಕ್ಖಮೂಲಸ್ಮಿಂ, ಠಿತಾ ಆನೇಥ ತೇ ಇತಿ.
ತೇಪಿ ಗನ್ತ್ವಾ ಗವೇಸನ್ತಾ, ದೀಪಹತ್ಥಾ ಮಹಾಜನಾ;
ಮಹಾಗಾಮಾ’ಗತೇ ಭಿಕ್ಖೂ, ರುಕ್ಖಮೂಲಗತೇ ತದಾ.
ತೇ ಗನ್ತ್ವಾ ಸಾಸನಂ ರಞ್ಞೋ, ಆರೋಚೇಸುಂ ಪಧಾವಿಸೋ;
ದಿಸ್ವಾ ಚ ಭಿಕ್ಖು ಸನ್ತುಟ್ಠೋ, ನೇತ್ವಾ ವಾಸಘರಂ ಸಕಂ.
ನಿಚ್ಚದಾನಾಯ ಭಿಕ್ಖೂನಂ, ಠಪಿತೇ ರತ್ತಚೀವರೇ;
ತೇಸಂ ದತ್ವಾನ ತಿನ್ತಾನಿ, ಚೀವರಾನಿ ಸಮಾದಿಯ.
ಸುಕ್ಖಾಪಿಯ ¶ ಚ ಕತ್ವಾನ, ಪಾದಧೋವನಕಾದಿಕಂ;
ನಿಸೀದಾಪಿಯ ತೇ ಸಬ್ಬೇ, ಸಯನೇ ಸಾಧು ಸನ್ಥತೇ.
ಭೇಸಜ್ಜಂ ಪಟಿಯಾದೇತ್ವಾ, ಸಯಮೇವೋ’ಪನಾಮಿಯ;
ಪಚ್ಚೂಸೇಪಿ ಚ ಕತ್ವಾನ, ಕತ್ತಬ್ಬಂ ಭೋಜನಾದಿಕಂ.
ದತ್ವಾ ಕಪ್ಪಿಯ ಕಾರೇ’ಥ, ವಿಸ್ಸಜ್ಜೇಸಿ ಯಥಾರುಚಿಂ;
ಏವಂ ಪುಞ್ಞರತಸ್ಸೇವ, ತಸ್ಸಾ’ಸಿ ದಿವಸಂ ಗತಂ.
ಏವಂ ಪುಞ್ಞಪರೇತಸ್ಮಿಂ, ವಸಮಾನೇ ನರುತ್ತಮೇ;
ರಟ್ಠಂ ಜನಪದಂ ಸಬ್ಬಂ, ಯೋಜೇತ್ವಾ ಪುಞ್ಞಕಮ್ಮೇಸು.
ಮಾಣೋ ಪಾಚಿನದೇಸಮ್ಹಿ, ವಸನ್ತೋ ಬಲಸಙ್ಗಹಂ;
ಕತ್ವಾನ ಪಿತುನೋ ಸೇನಂ, ಧನಂ ಚೇವಾ ಹರಾಪಿಯ.
ಕಾತುಂ ಸಙ್ಗಾಮಮಾಗಞ್ಛಿ, ತಿಪುಚುಲ್ಲಸಗಾಮಕಂ;
ದಾಠೋಪತಿಸ್ಸೋ ತಂ ಸುತ್ವಾ, ತಮ್ಬಲಂಗಾ ಮಹಾಬಲೋ.
ತತ್ಥಾ’ಕಂಸು ಮಹಾಯುದ್ಧಂ, ಅಞ್ಞಮಞ್ಞಂ ಸಮಾಗತಾ;
ಯೋಧಾ ದಾಠೋ ಪತಿಸ್ಸಸ್ಸ, ಮಾಣಂ ಸಙ್ಗಂವ ಮಾರಯುಂ.
ತಂ ಸುತ್ವಾ ದಪ್ಪುಲೋ ಸೋಪಿ, ಸೋಕಸಲ್ಲಹತೋ ಮರಿ;
ಸತ್ತಾಹ ಮನುರಾಧಮ್ಹಿ, ವಸಂ ರಜ್ಜಮಕಾರಯಿ.
ರೋಹಣೇ ತೀಣಿ ವಸ್ಸಾನಿ, ಏಸ ರಜ್ಜಮಕಾರಯಿ;
ತಸ್ಮಾ ತಸ್ಸ ಕಥಾ ಆಸಿ, ರೋಹಣಮ್ಹಿ ಇಧಾಪಿ ಚ.
ಏವಂ ಪರೇಮಾರಿಯ ಆಹವಮ್ಹಿ,
ಕಿಚ್ಛೇನ ಲದ್ಧಾವ ನರೇನ ಭೋಗಾ;
ಆಸುಂ ಖಣೇ ವಿಜ್ಜುಲತೋಪ ಭೋಗಾ,
ಕೋ ಬುದ್ಧಿಮಾ ತೇಸು ರತಿಂ ಕರೇಯ್ಯ.
ಸುಜನಪ್ಪಸಾದಸಂವೇಗತ್ಥಾಯ ಕತೇ ಮಹಾವಂಸೇ
ಚತುರಾಜಕೋ ನಾಮ
ತೇಚತ್ತಾಲೀಸತಿಮೋ ಪರಿಚ್ಛೇದೋ.
ಚತುಚತ್ತಾಲೀಸತಿಮ ಪರಿಚ್ಛೇದ
ತಿರಾಜಕೋ
ಅಚ್ಚಯೇ ¶ ಹತ್ಥದಾಠಸ್ಸ, ಅಗ್ಗಬೋಧಿಕುಮಾರಕೋ;
ಕಣಿಟ್ಠೋ ರಾಜಿನೋ ಆಸಿ, ಸಿರಿಸಙ್ಘಾದಿ ಬೋಧಿಕೋ.
ಧಮ್ಮರಾಜಾ ಅಯಂ ಆಸಿ, ಸಮ್ಮಾ ದಸ್ಸನಸಞ್ಞುತೋ;
ತಸ್ಮಾ ಸೋ ಪುಞ್ಞಕಮ್ಮಾನಿ, ಅಪ್ಪಮೇಯ್ಯಾನಿ ವತ್ತಯಿ.
ನಿಕಾಯತ್ತಯವಾಸೀನಂ, ಭತ್ತಗ್ಗಮವಲೋಕಯಿ;
ಮಹಾಪಾಳಿಞ್ಚ ವಡ್ಢೇಸಿ, ಮಾಘಾತಞ್ಚೇವ ಕಾರಯಿ.
ಠಾನನ್ತರಞ್ಚ ದಾಪೇಸಿ, ಯಥಾರಹ ಮನಾಲಯೋ;
ಸಿಪಗೋತ್ತಾದಿಯೋಗ್ಗೇಹಿ, ಸಂಗತೇಹಿ ಚ ಸಂಗಹಿ.
ಯತ್ಥ ಕತ್ಥಚಿ ದಿಸ್ವಾಪಿ, ಭಿಕ್ಖವೋ ಸೋ ಮಹಾಮತಿ;
ಸಕ್ಕತ್ವಾ ಸೋಭಣಾಪೇಸಿ, ಪರಿತ್ತಂ ಸಾಸನೋಗಧಂ.
ಥೇರಂ ಸೋ ಉಪಸಙ್ಕಮ್ಮ, ನಾಗಸಾಲನಿವಾಸಿನಂ;
ದಾಠಾಸಿವಂ ಮಹಾಪಞ್ಞಂ, ಸೀಲವನ್ತಂ ಬಹುಸ್ಸುತಂ.
ಸಕ್ಕಚ್ಚ ನಂ ತತೋ ಸುತ್ವಾ, ಸಮ್ಮಾಸಮ್ಬುದ್ಧಸಾಸನಂ;
ಧಮ್ಮೇ’ತೀವಪಸೀದಿತ್ವಾ, ಸಬ್ಬಸನ್ತಿಕರೋ ಇತಿ.
ಸುತ್ವಾ ಥೇರಿಯವಾದಾನಂ, ಪುಬ್ಬಞಾತೀನಮತ್ತನೋ;
ಪಾಪಾನಂ ದುಟ್ಠಚಿತ್ತಾನಂ, ಅಪಕಾರೇ ಕತೇ ಬಹೂ.
ವಿಹಾರೇ ಪರಿವೇಣೇ ಚ, ಜಿಣ್ಣೇಪಾಕತಿಕೇ ಅಕಾ;
ಭೋಗಗಾಮೇ ಚ ದಾಪೇಸಿ, ತತ್ಥ ತತ್ಥ ಬಹೂದಯೇ.
ವಿಚ್ಛಿನ್ನಪಚ್ಚಯೇ ಚಾಕಾ, ತದಾತ್ಯಂ ಕುರಿತೇ ವಿಯ;
ದಾಸಕೇಪಿ ಚ ಸಙ್ಘಸ್ಸ, ಯಥಾಠಾನೇ ಠಪಾಪಯಿ.
ಪಧಾನಘರ ಮೇತಸ್ಸ, ಥೇರಸ್ಸ’ಕಾಸನಾಮಕಂ;
ಪಟಿಗ್ಗಹೇತ್ವಾ ತಂ ಸೋ’ಪಿ, ಸಙ್ಘಸ್ಸಾ’ದಾ ಮಹಾಮತೀ.
ಭೋಗಗಾಮೇ ಚ ತಸ್ಸಾ’ದಾ, ಭರತ್ತಾಲಂ ಕಿಹಿಮ್ಬಿಲಂ;
ಕತಕಞ್ಚ ತುಲಾಧಾರಂ, ಅನ್ಧಕಾರಕಮೇವ ಚ.
ಅನ್ಧಕಾರಂ ¶ ಅನ್ತುರೇಳಿಂ, ಬಾಲವಂ ದ್ವಾರನಾಯಕಂ;
ಮಹಾನಿಕಡ್ಢಿಕಞ್ಚೇವ, ಪೇಳಹಾಳಂ ತಥಾಪರಂ.
ಏತೇ ಅಞ್ಞೇ ಚ ಸೋ ದತ್ವಾ, ಭೋಗಗಾಮೇ ನರಿಸ್ಸರೋ;
ದಾಸಿ ಆರಾಮಿಕೇ ಚೇವ, ಅತ್ತನೋ ಕಿರ ಞಾತಕೇ.
ತಥಾ ದ್ವಿನ್ನಂ ನಿಕಾಯಾನಂ, ವಿಹಾರೇ ಮನ್ದಪಚ್ಚಯೇ;
ದಿಸ್ವಾಪಿ ಚ ಸುತ್ವಾ ವಾ, ಭೋಗಗಾಮೇ ಬಹೂ ಅದಾ.
ಬಹುನಾ ಕಿನ್ತುವುತ್ತೇನ, ನಿಕಾಯೇಸು’ಪಿ ತೀಸು’ಪಿ;
ಅದಾ ಗಾಮಸಹಸ್ಸಂ ಸೋ, ಬಹುಪ್ಪಾದಂ ನಿರಾಕುಲಂ.
ಅನುಸ್ಸರನ್ತೋ ಸೋ ತಿಣ್ಣಂ, ರತನಾನಂ ಗುಣೇ ವರೇ;
ಏಕಾವಲಿಂ ಗಹೇತ್ವಾನ, ಅಕ್ಖಮಾಲ ಮಕಾ ಕಿರ.
ಏವಂ ಸಬ್ಬಪ್ಪಯೋಗೇಹಿ, ಸೋ’ಹು ಧಮ್ಮಪರಾಯನೋ;
ಸಬ್ಬೇ ತಮನುಸಿಕ್ಖನ್ತಾ, ಹೇಸು ಧಮ್ಮಕರಾ ನರಾ.
ದಮಿಳೋ ಪೋತ್ಥಕುಟ್ಠವೋ, ತಸ್ಸ ಕಮ್ಮಕರೋ ತದಾ;
ಮಾಟಮ್ಬಿಯವ್ಹಂ ಕಾರೇಸಿ, ಪಧಾನಘರಮಬ್ಭುತಂ.
ಬೂಕಕಲ್ಲೇ ಅಮ್ಬವಾಪಿಂ, ತನ್ತವಾಯಿಕಚಾಟಿಕಂ;
ಗಾಮಂ ನಿಟ್ಠಿಲವೇಟ್ಠಿಞ್ಚ, ತಸ್ಸಾ’ದಾ ಸೋ ಸದಾ ಸಕಂ.
ಕಪ್ಪೂರಪರಿವೇಣೇ ಚ, ಕುರುನ್ದಪಿಲ್ಲಕೇ ತಥಾ;
ಮಹಾರಾಜಘರೇ ಚೇವ, ಪಾಸಾದೇ ಸೋ’ವ ಕಾರಯಿ.
ಅಞ್ಞತ್ಥಾ’ದಾ ತಯೋ ಗಾಮೇ, ವಿಹಾರೇಸು ಮಹಾಧನೋ;
ಪೋತ್ಥಸಾತವ್ಹಯೋ ಪಞ್ಞೋ, ವಿಹಾರೇ ಜೇತನಾಮಕೇ.
ಸೇನಾಪತಿರಾಜನಾಮಂ, ಪರಿವೇಣಂ ಸಮಾಪಯಿ;
ಮಹಾಕನ್ದೋ ಚ ದಮಿಳೋ, ಪರಿವೇಣಂ ಸನಾಮಕಂ.
ಚುಲ್ಲಪನ್ಥಂ ತಥಾ ಏಕೋ, ಸೇಹಾಲಉಪರಾಜಕಂ;
ಉಪರಾಜಾ ಸಕಾರೇಸಿ, ಸಙ್ಘತಿಸ್ಸೋ’ಪಿ ರಾಜಿನೋ.
ಅಞ್ಞೇಸು ಬಹವೋ ಆಸುಂ, ವಿಹಾರೇ ಏವಮಾದಿಕೇ;
ಭಸ್ಸ ರಞ್ಞೋ’ ನುವತ್ತನ್ತಾ, ಏವಂ ಧಮ್ಮೀಹಿ ಪಾಣಿನೋ.
ಪಾಪಂ ವಾಪಿ ಹಿ ಪುಞ್ಞಂ ವಾ,
ಪಧಾನೋಯಂ ಕರೋತಿ ಯೋ;
ಲೋ ಕೋ ತಂ ತಂ ಕರೋತೇವ,
ತಂ ವಿಜನೇಯ್ಯ ಪಣ್ಡಿತೋ.
ಜೇಟ್ಠನಾಮಾ ¶ ಮಹಾಪುಞ್ಞಾ, ಮಹೇಸೀ ತಸ್ಸ ರಾಜಿನೋ;
ಜೇಟ್ಠಾರಾಮಞ್ಚ ಕಾರೇಸಿ, ಭಿಕ್ಖೂನೀನಮುಪಸ್ಸಯಂ.
ತಸ್ಸಾ’ದಾಸಿ ಚ ದ್ವೇ ಗಾಮೇ, ಪಕ್ಕಪಾಸಾಣಭೂಮಿಯಂ;
ತಮ್ಬುದ್ಧಂ ಭೇಲಗಾಮಞ್ಚ, ಆರಾಮಿಕಸತಂ ತಥಾ.
ಅಕಾ ಮಲಯರಾಜಾಪಿ, ಧಾತುಗೇಹಂ ಮಹಾರಹಂ;
ಮಣ್ಡಲಗಿರಿವಿಹಾರಮ್ಹಿ, ಚೇತಿಯಸ್ಸ ಮಹಾಧನೋ.
ಲೋಹಪಾಸಾದಕೇ ಸೋ’ವ, ಛಾದೇಸಿ ಮಜ್ಝಕೂಟಕಂ;
ಬೋಧಿತಿಸ್ಸವಿಹಾರಞ್ಚ, ಬೋಧಿತಸ್ಸೋ ಮಹಾಯಸೋ.
ದೀಪೇ ಮಣ್ಡಲಿಕಾ ಸಬ್ಬೇ, ತತ್ಥ ತತ್ಥ ಯಥಾಬಲಂ;
ವಿಹಾರೇ ಪರಿವೇಣೇ ಚ, ಕಾರಯಿಂಸು ಅನಪ್ಪಕೇ.
ತಸ್ಸ ಕಾಲೋ ನರಿನ್ದಸ್ಸ, ಪುಞ್ಞಕಮ್ಮಮಯೋ ಇಧ;
ಅತಿವಿತ್ಥಾರಭೀತೇನ, ಸಬ್ಬಸೋ ನ ವಿಚಾರಿತಂ.
ಪುಬ್ಬಕೋಪಿ ಕಥಾಮಗ್ಗೋ, ಆಕುಲೋ ವಿಯ ಭಾತಿಮೇ;
ಯಥಾಪಧಾನಂ ಕಥಿತಂ, ಹೇತೂನಂ ಉಪಲಕ್ಖಣಂ.
ಅಥಾಪರೇನ ಕಾಲೇನ, ಪುಲತ್ಥಿನಗರಂ ಗತೋ;
ವಾಸಂ ತತ್ಥೇವ ಕಪ್ಪೇಸಿ, ಕರೋನ್ತೋ ಪುಞ್ಞಸಞ್ಚಯಂ.
ಅತೇಕಿಚ್ಛಿಯರೋಗೇನ, ಸಮ್ಫುಟ್ಠೋ ಕಾಲಮತ್ತನೋ;
ಮರಣಸ್ಸ ವಿದಿತ್ವಾನ, ತಮಾಹುಯಮಹಾಜನಂ.
ಓವದಿತ್ವಾನ ಧಮ್ಮೇನ, ಮರಣಂ ಸೋ ಉಪಾಗಮಿ;
ಮಹಾಜನೋ ಮತೇ ತಸ್ಮಿಂ, ಬಾಳ್ಹಸೋಕೋ ಪರೋದಿಯ.
ಕತ್ವಾ ಆಳಹಣೇ ತಸ್ಸ, ಕಿಚ್ಚಂ ಸಬ್ಬಮಸೇಸತೋ;
ತಸ್ಸಾಳಾಹಣಭಸ್ಮಮ್ಪಿ, ಕತ್ವಾ ಭೇಸಜ್ಜಮತ್ತನೋ.
ರಾಜಾ ಭಣ್ಡಞ್ಚ ತಂ ಸಬ್ಬಂ, ಸಬ್ಬಞ್ಚ ಬಲವಾಹನಂ;
ಸಮ್ಮಾ ಆದಾಯ ಗೋಪೇತ್ವಾ, ನಗರಂ ಸಮುಪಾಗಮಿ.
ಏವಂ ಸೋಳಸಮೇ ವಸ್ಸೇ, ರಾಜಾ ಆಸಿ ದಿವಙ್ಗತೋ;
ಪೋತ್ಥಕುಟ್ಠೋಪಿ ದಮಿಳೋ, ರಜ್ಜಂ ತಸ್ಸ ವಿಚಾರಯಿ.
ಉಪರಾಜಂ ಗಹೇತ್ವಾನ, ದಾಠಾಸಿವಂ ಖಿಪಾಪಯಿ;
ಚಾರಕೋ ವಿಹಿತುಂ ಸಮ್ಮಾ, ರಕ್ಖಾವರಣ ಮಾದಿಸಿ.
ವಿನಾ ರಞ್ಞಾ ನ ಸಕ್ಕಾತಿ, ಮೇದಿನಿಂ ಪರಿಭುಞ್ಜಿತುಂ;
ಆನೇತ್ವಾ ದತ್ತನಾಮಕಂ, ಧನಪಿಟ್ಠಪ್ಪಧಾನಕಂ.
ಉಪ್ಪನ್ನಂ ¶ ರಾಜವಂಸಮ್ಹಿ, ರಜ್ಜೇ ತಂ ಅಭಿಸಿಞ್ಚಿಯ;
ತಸ್ಸ ನಾಮಂ ಠಪೇತ್ವಾನ, ಸಯಂ ಸಬ್ಬಂ ವಿಚಾರಯಿ.
ದನ್ತೋ ಸೋ ಧನಪಿಟ್ಠಿಮ್ಹಿ, ವಿಹಾರಂ ಸಕನಾಮಕಂ;
ಕಾರಯಿತ್ವಾನ ಪುಞ್ಞಾನಿ, ಅಞ್ಞಾನಿಪಿ ಸಮಾಚಿನಿ.
ಸಮಕನ್ತು ಸೋ ಠತ್ವಾ’ವ, ವಸ್ಸದ್ವಯ ಮಹುಮತೋ;
ಪೋತ್ಥಕುಟ್ಠೋ ಮತೇತಸ್ಮಿಂ, ಪುನ ಅಞ್ಞಮ್ಪಿ ಮಾಣವಂ.
ಹತ್ಥದಾಠಂ ಸಮಾಹೂಯ, ಉಣ್ಹಾ ನಗರಸಮ್ಭವಂ;
ತಮ್ಪಿ ರಜ್ಜೇ ಭಿಸಿಞ್ಚಿತ್ವಾ, ಯಥಾ ಪುಬ್ಬಂ ಸಯಂವಸೀ.
ಕಾಳದೀಘಾವಿಕಂ ಕತ್ವಾ, ಪಧಾನಘರಕಂ ತಥಾ;
ಪುಞ್ಞಮಞ್ಞಂ ಛಮಾಸೇಹಿ, ಸೋ’ಪಿ ಮಚ್ಚುವಸಂ ಗತೋ.
ಏವಂ ವಿದಿತ್ವಾ ಬಹುಪದ್ದವಾನಿ;
ಧನಾನಿ ಧಞ್ಞಾನಿ ಚ ವಾಹನಾನಿ;
ವಿಹಾಯ ರಜ್ಜೇಸು ರತಿಂಸಪ್ಪಞ್ಞಾ;
ಮನುಞ್ಞಪುಞ್ಞಾಭಿರತಾ ಭವೇಯ್ಯುಂ.
ಸುಜನಪ್ಪಸಾದಸಂವೇಗತ್ಥಾಯ ಕತೇ ಮಹಾವಂಸೇ
ತಿರಾಜಕೋ ನಾಮ
ಚತುಚತ್ತಾಲೀಸತಿಮೋ ಪರಿಚ್ಛೇದೋ.
ಪಞ್ಚಚತ್ತಾಲೀಸತಿಮ ಪರಿಚ್ಛೇದ
ರಞ್ಞೋ ತಸ್ಸಚ್ಚಯೇ ರಾಜಾ, ಮಾಣವಮ್ಮೋ ಅಹೋಸಿ ಸೋ;
ಕಿಂ ಗೋತ್ತೋ ಕಸ್ಸ ಪುತ್ತೋ ಚ, ಕಥಂ ರಜ್ಜಮಪಾಪುಣಿ.
ಮಹಾಸಮ್ಮತವಂಸಮ್ಹಿ, ಜಾತೋ ಜಾತಿಗುಣಾವಹೋ;
ಪುತ್ತೋ ಕಸ್ಸಪನಾಮಸ್ಸ, ಥೂಪಾರಾಮಸ್ಸ ಭೇದಿನೋ.
ಧೀತಾ ಮಲಯರಾಜಸ್ಸ, ಸಙ್ಘನಾಮಸ್ಸ ರಾಜಿನೋ;
ತಂ ಲಭಿತ್ವಾ ವಸಂ ದೇಸೇ, ಉತ್ತರೇ ಲೀನವುತ್ತಿಕೋ.
ಹತ್ಥದಾಠನರಿನ್ದೇನ, ತಸ್ಮಿಂ ಅತ್ಥೇವ ಧಾರಿತೇ;
ಜಮ್ಬುದೀಪಮುಪಾಗಮ್ಮ, ನರಸೀಹಂ ಮಹೀಪತಿ.
ಗನ್ತ್ವಾ ವತ್ವಾ ¶ ಸಕಂ ನಾಮಂ, ಸೇವಿತುಂ ತಮುಪಕ್ಕಮಿ;
ಆರಾಧೇಸಿ ಚ ಸಬ್ಬೇಹಿ, ಪಯೋಗೇಹಿ ನರಾಧೀಪಂ.
ವಿದಿತ್ವಾ ತಸ್ಸ ಸೋಹಜ್ಜಂ, ನೇತ್ವಾ ಭರಿಯಮತ್ತನೋ;
ವಾಸಂ ತತ್ಥೇವ ಕಪ್ಪೇಸಿ, ಸೇವಮಾನೋ ದಿವಾನಿಸಂ.
ಸೋಪಿ ಆರಾಧಿತೋ ತೇನ, ಕಣ್ಡುವೇಟ್ಠಿ ನರುತ್ತಮೋ;
ಸಬ್ಬಂ ನೇನ್ತೋವ ತಂ ರಜ್ಜಂ, ಮಹಾಭೋಗಮದಾಪಯಿ.
ತೇನ ಸಂವಾಸಮನ್ವಾಯ, ಭರಿಯಾ ಸಙ್ಘನಾಮಿಕಾ;
ಚತಸ್ಸೋ ಧೀತರೋ ಪುತ್ತೇ, ಚತ್ತಾರೋಪಿ ವಿಜಾಯಥ.
ಅಥೇಕದಿವಸಂ ರಾಜಾ, ಹತ್ಥಿಕ್ಖನ್ಧವರಂ ಗತೋ;
ಸಞ್ಚರನ್ತೋ ಯಥಾಕಾಮಂ, ಮಾಣವಮ್ಮೇನ ಏಕತೋ.
ನಾಳಿಕೇರಂ ಪಿವಿತ್ವಾನ, ತತ್ರಟ್ಠೋವ ಪಿಪಾಸಿತೋ;
ಮಾಣವಮ್ಮಸ್ಸ ಪಾದಾಸಿ, ಮಞ್ಞನ್ತೋ ಅಞ್ಞಮೇವ ತಂ.
ಸೋ ತಂ ಗಹೇತ್ವಾ ಚಿನ್ತೇಸಿ, ಸಖಂ ಪೇಸ ನರಾಧಿಪೋ;
ಉಚ್ಛಿಟ್ಠಂ ನಾಮ ಕಿಂ ಹೋತಿ, ಸತ್ತಾನಂ ಪರಮತ್ಥತೋ.
ತಸ್ಮಾ ಯುತ್ತಂ ಮಯಾಪಾತು-ಮೀತಿ ಚಿನ್ತಿಯ ತಂ ಪಿವಿ;
ಏವಂ ಹೋನ್ತಿ ಮಹುಸ್ಸಾಹಾ, ದೇತುಕಾಮಾಹಿ ಬುದ್ಧಿನೋ.
ರಾಜಾಪಿ ದಿಸ್ವಾ ತಂ ಭೀತೋ, ತಸ್ಸಪೀ ತಾವ ಸೇಸಕಂ;
ಸಯಂ ಪಿವಿ ತಥಾಹೋತಿ, ಕಮ್ಮಂ ಪುಞ್ಞವತಂ ಸದಾ.
ಠಪೇಸಿ ಸಕವೇಸೇವ, ತತೋ ಪಟ್ಠಾಯ ಅತ್ತನೋ;
ಭೋಜನೇ ಸಯನೇ ಚೇವ, ಪರಿಹಾರೇ ಚ ವಾಹನೇ.
ಏವಂ ತೇಸು ವಸನ್ತೇಸು, ಯುದ್ಧತ್ಥಾಯಮುಪಕ್ಕಮಿ;
ವಲ್ಲಭೋ ನರಸೀಹೇನ, ನರಸೀಹೋ ವಿಚಿನ್ತಯಿ.
ಅಯಂ ಖೋ ಮಮ ಸೇವಾಯ, ರಜ್ಜಂ ವಂಸ ಗತಂ ಸಕಂ;
ಲಭಿಸ್ಸಾಮೀತಿ ಸೇವೇತಿ, ರತ್ತಿಂ ದಿವ ಮತನ್ದಿತೋ.
ಸಚೇ ಸೋಪಿ ಮಯಾ ಗನ್ತ್ವಾ, ಯುಜ್ಝನ್ತೋ ಮರಣಂ ಗತೋ;
ತಕ್ಕಿತಂ ತಸ್ಸ ಮಯ್ಹಞ್ಚ, ಸಬ್ಬಂ ತಮಫಲಂ ಭವೇ.
ಏವಂ ಚಿನ್ತಿಯತಂ ರಾಜಾ, ನಿವತ್ತೇತ್ವಾ ಸಕೇ ಪುರೇ;
ಸಯಂ ವಲ್ಲಭರಾಜೇನ, ಕಾತುಂ ಸಙ್ಗಾಮಮಾರಸಿ.
ಮಾಣವಮ್ಮೋಪಿ ಚಿನ್ತೇಸಿ, ಸಚೇ’ಯಂ ಮಯಿ ಜೀವಿತಿ;
ರಾಜಾ ಮೀಯತಿ ಯುದ್ಧಮ್ಹಿ, ಕಿಂ ಫಲಂ ಮಮ ಜೀವಿತೇ.
ವಿಸ್ಸಾಸೋ ¶ ದುಕ್ಕತೋ ತೇನ, ಭವಿಸ್ಸತಿ ತಥಾಸತಿ;
ಸಙ್ಗಹೇಸಿ ಕಿಮತ್ಥಂ ಮಂ, ಸಮಾನತ್ತೇನ ಅತ್ತನೋ.
ತಸ್ಮಾ ಯುತ್ತಂ ಮಯಾ ಗನ್ತುಂ, ಸಹಸಙ್ಗಾಮ ಮಣ್ಡಲಂ;
ಸುಖಞ್ಹಿ ಸದ್ಧಿಂ ತೇನೇತ್ಥ, ಜೀವಿತಂ ಮರಣಂಪಿ ವಾ.
ಏವಂ ಚಿನ್ತಿಯ ಸನ್ನದ್ಧ-ಬಲೋ ಹತ್ಥಿವರಂ ಗತೋ;
ಗನ್ತ್ವಾ ದಸ್ಸೇಸಿ ಅತ್ತಾನಂ, ಸೋ ತಂ ಸಙ್ಗಾಮ ಮಣ್ಡಲೇ.
ನರಸೀಹೋವ ತಂ ದಿಸ್ವಾ, ಹಟ್ಠತುಟ್ಠೋ ಸಮುಗ್ಗಿರಿ;
ಸಹೋ ಸನ್ಥವಮೇತಸ್ಮಿಂ, ಕತ್ತಬ್ಬಂ ಮೇ ಕತಂ ಇತಿ.
ತತೋ ಮಾನಸ್ಸ ಸೇನಾ ಚ, ಸೇನಾ ಚೇವಸ್ಸರಾಜಿನೋ;
ಸೇನಂ ವಲ್ಲಭರಾಜಸ್ಸ, ವಿದ್ಧಂಸೇಸಿ ಸಮಾಗತಾ.
ಮಾಣವಮ್ಮೋಪಿ ದಸ್ಸೇಸಿ, ತಹಿಂ ಸುರತ್ತಮತ್ತನೋ;
ಪರಕ್ಕಮನ್ತೋ ದೇವಾನಂ, ರಣೇ ನಾರಾಯಣೋ ವಿಯ.
ನರಸೀತೋಪಿ ಸನ್ತುಟ್ಠೋ, ಮಾಣವಮ್ಮಸ್ಸ ವಿಕ್ಕಮೇ;
ಆಲಿಙ್ಗತ್ವಾ ಸಿನೇಹೇನ, ತ್ವಂ ಖೋ ಮೇ ಜಯದೋ ಇತಿ.
ಅತ್ತನೋ ಪುರಮಾಗಮ್ಮ, ಕತ್ವಾ ವಿಜಯಮಙ್ಗಲಂ;
ಮಾಣವಮ್ಮಸ್ಸ ಸೇನಾಯ, ಕತ್ತಬ್ಬಂ ಸಬ್ಬಮಾಚರಿ.
ಅಥೇವಂ ಚಿನ್ತಯಿ ರಾಜಾ, ಕತ್ತಬ್ಬಂ ಮೇ ಸಹಾಯಕೋ;
ಅತ್ತನಾ’ಕಾಸಿ ಸಬ್ಬಞ್ಚ, ಅನಣೋ ಸೋ ಮಮಜ್ಜತೋ.
ಇಣಂ ಮಮಾಪಿ ಸೋಧೇಮಿ, ಕತ್ವಾ ಕತ್ತಬ್ಬಮತ್ತನಾ;
ಕತ್ತಞ್ಞೂ ಕತವೇದೀಹಿ, ಪುರಿಸಾ’ತೀವದುಲ್ಲಭಾ.
ಅಮಚ್ಚೇ ಸನ್ನಿಪಾತೇತ್ವಾ, ಇದಂ ವಚನಮಬ್ರವಿ;
ಸಹಾಯಸ್ಸ ಮಮೇತಸ್ಸ, ಕಮ್ಮೇ ತುಮ್ಹೇಪಿ ಸಕ್ಖಿನೋ.
ಮಯಾಪಿ ತಸ್ಸ ಕತ್ತಬ್ಬಂ, ಕಮ್ಮಂ ಸಾಧು ಸುಖಾವಹಂ;
ಉಪಕಾರೋ ಹಿ ಸಾಧೂನಂ, ಧಮ್ಮೋ ಪುಬ್ಬೋಪಕಾರಿನೋ.
ಏವಂ ವುತ್ತೇ ಅಮಚ್ಚಾ ತೇ, ಪಚ್ಚಾಹಂಸು ಮಹೀಪತಿ;
ಯಂ ಯಮಿಚ್ಛತಿ ದೇವೋಹಿ, ತಂ ತಂ ರುಚ್ಚತಿ ನೋ ಇತಿ.
ಅಥ ಸೋ ಮಾಣವಮ್ಮಸ್ಸ, ಸೇನಂ ದತ್ವಾ ಸವಾಹನಂ;
ಸಬ್ಬೋಪಕರಣಞ್ಚೇವ, ಸಬ್ಬಕಮ್ಮಕರೇಪಿ ಚ.
ಗಚ್ಛಾತಿ ವತ್ವಾ ತಂ ಯನ್ತಂ, ಸಹಸೇನಾಯಪೇಕ್ಖಿಯ;
ಪರಿದೇವಿತ್ಥ ಭೂಮಿನ್ದೋ, ವಿಪ್ಪವುತ್ಥಂ’ವ ಪುತ್ತಕಂ.
ಮಾಣವಮ್ಮೋಪಿ ¶ ಆರುಯ್ಹ, ನಾವಾಯೋ ಜಲಧೀತಟೇ;
ನ ಚಿರೇನೇವ ಆಗಮ್ಮ, ಸಮತ್ತಿಕ್ಕಮ್ಮ ವೇಗಸಾ.
ಸಹ ಸೇನಾಯ ಮದ್ದನ್ಥೋ, ಲಙ್ಕಾದೀಪಮುಪವಿಸೀ;
ತಂ ಸುತ್ವಾನ ಪಲಾಯಿತ್ಥ, ರಾಜಾ ದಾಠೋಪತಿಸ್ಸಕೋ.
ಮಾಣವಮ್ಮೋ ಪುರಂ ಗನ್ತ್ವಾ, ಅಹುತ್ವಾವ ನರಾಧಿಪೋ;
ಪಲಾತಮನುಬನ್ಧಿತ್ಥ, ಪದಾನುಪದಮುಗತೋ.
ತದಾ ಸಾ ದಮಿಳಿ ಸೇನಾ, ಅಸ್ಸೋಸಿ ಕಿರ ಸಾಮಿಕೋ;
ಮಹಾರೋಗಾ’ಭಿಭೂತೋತಿ, ಸುತ್ವಾ ತಂ ಸಾ ಅಪಕ್ಕಮಿ.
ಸುತ್ವಾ ದಾಠೋಪತಿಸ್ಸೋ ತಂ, ಸಮಾದಾಯ ಮಹಾಬಲಂ;
ಮಾಣವಮ್ಮಂ ಉಪಾಗಮ್ಮ, ಕಾತುಮಾರಭಿ ಸಂಯುಧಂ.
ಮಾಣವಮ್ಮೋ ಚ ಚಿನ್ತೇಸಿ, ಸಬ್ಬಾ ಸೇನಾ ಗತಾ ಮಮ;
ಮತೇ ಮಯಿ ಸಮಿಜ್ಝೇಯ್ಯ, ವೇರಿನೋ ಮೇ ಮನೋರಥಂ.
ಜಮ್ಬುದೀಪಂವ ತಸ್ಮಾ’ಹಂ, ಗನ್ತ್ವಾ’ದಾಸ ಬಲಂ ತತೋ;
ಪುನ ರಜ್ಜಂ ಗಹೇಸ್ಸಂತಿ, ತಸ್ಮಾ ಏವಮಕಾಸಿ ಸೋ.
ಗನ್ತ್ವಾ ಪುನ’ಪಿ ದಿಸ್ವಾನ, ಸಹಾಯಂ ನರಸೀಹಕಂ;
ಆರಾಧಹನ್ತೋ ನಿಪುಣಂ, ಸಕ್ಕಚ್ಚಂ ತಮುಪಟ್ಠಹಿ.
ಯಾವ ರಾಜಚತುಕ್ಕಂಸೋ, ಮಾಣಾಮ್ಮೋ ತಹಿಂ ವಸಿ;
ನರಸೀಹೋ’ಥ ಚಿನ್ತೇಸಿ, ಮಾನತ್ಥದ್ಧೋ ಯಸೋಧನೋ.
ರಜ್ಜತ್ಥಂ ಮೇ ಸಹಾ ಯೋ ಮಂ, ಸೇವನ್ತೋಯೇವ ಅದ್ಧಗೋ;
ವುದ್ಧೋ ಹೇಸ್ಸತಿ ತಂ ಪಸ್ಸಂ, ಕಥಂ ರಜ್ಜಂ ಕರೋಮಹಂ.
ಇಮಸ್ಮಿಂ ಪನ ವಾರಸ್ಮಿಂ, ಪೇಸಯಿತ್ವಾ ಬಲಂ ಮಮ;
ರಜ್ಜಂ ತಂ ನ ಗಹೇಸ್ಸಾಮಿ, ಕೋ ಅತ್ಥೋ ಜೀವಿತೇನ ಮೇ.
ಏವಂ ಚಿನ್ತಿಯ ಸೋ ಸೇನಂ, ಸನ್ನಿಪಾತಿಯ ಅತ್ತನೋ;
ಸನ್ನಾಹೇತ್ವಾ ಯಥಾ ಯೋಗಂ, ದಾಪೇತ್ವಾನ ಯಥಾರುಚಿಂ.
ಸಯಮೇವ ತಮಾದಾಯ, ಸಮುದ್ದತಟಮಾಗತೋ;
ನಾವಾಯೋ ಚಿತ್ತರೂಪಾಯೋ, ಕಾರಯಿತ್ವಾ ಥಿರಾ ಬಹೂ.
ಅಮಚ್ಚೇ ಆಹ ‘‘ಏತೇನ, ಸದ್ಧಿಂ ಗಚ್ಛಥ ಭೋ’’ಇತಿ;
ನಾವಂ ಆರೋಹಿತುಂ ಸಬ್ಬೇ, ನ ಇಚ್ಛಿಂಸು ತದಾ ಜನಾ.
ತದಾ ಸೀಹೋ ವಿಚಿನ್ತೇತ್ವಾ, ಸಯಂ ಹುತ್ವಾ ತಿರೋಹಿತೋ;
ಅತ್ತನೋ ಪರಿಹಾರಂ ಸೋ, ರಾಜಲಕ್ಖಣಸಮ್ಮತಂ.
ಸಬ್ಬಂ ¶ ತಸ್ಸೇವ ದತ್ವಾನ, ಅಲಙ್ಕಾರಮ್ಪಿ ಅತ್ತನೋ;
ಆರೋಪೇತ್ವಾನ ತಂ ನಾವಂ, ಗಚ್ಛ ಠತ್ವಾನ ಸಾಗರೇ.
ಇಮಂ ಭೇರಿಂಚ ವಾದೇಹಿ, ಕೋಟ್ಠನಾಮನ್ತಿ ಯೋಜಯೀ;
ಸೋ’ಪಿ ಸಬ್ಬಂ ತಥಾಕಾಸಿ, ರಾಜಾನೋ ಅಗಮಾ ಇತಿ.
ಆರುಹಿಂಸು ಜನಾ ನಾವಂ, ಏಕಂ ಕತ್ವಾ ನರಾಧಿಪಂ;
ಸೋ ತಂ ಸೇನಙ್ಗಮಾದಾಯ, ಮಾಣೋ ಗನ್ತುಂ ಸಮಾರಭಿ.
ಕೇವಲೋ’ಪಿ ಸಮುದ್ದೋ ಸೋ, ಅಹೋಭಿ ನಗರೂಪಮೋ;
ಅಥ ಸೋ ಪಟ್ಟನಂ ಪತ್ವಾ, ಓತರಿತ್ವಾ ಸವಾಹನೋ.
ವಿಸ್ಸಾಮೇತ್ವಾ ಬಲಂ ತತ್ಥ, ವಸಂ ಕತಿಪಯೇ ದಿನೇ;
ಉತ್ತರಂ ದೇಸಮಾದಾಯ, ಕತ್ವಾ ಹತ್ಥಗತಂ ಜನಂ.
ಅಕ್ಖೋಬ್ಭಿಯ ಮಹಾಸೇನೋ, ನಗರಂ ಗನ್ತುಮಾರಭಿ;
ಪೋತ್ಥಕುಟ್ಠೋಪಿ ತಂ ಸುತ್ವಾ, ಪಚ್ಚುಗ್ಗಞ್ಛಿ ಮಹಾಬಲೋ.
ಸಂಗಚ್ಛಿಂಸು ಉಭೋ ಸೇನಾ, ಭಿನ್ನವೇಲಾ’ವ ಸಾಗರಾ;
ಮಾಣವಮ್ಮೋ ತತೋ ಹತ್ಥಿ-ಮಾರುಯ್ಹ ಗಹಿತಾಯುಧೋ.
ಪೋತ್ಥಕುಟ್ಠಞ್ಚ ರಾಜಾನಂ, ದ್ವೇಧಾ ಕತ್ವಾ ಪಲಾಪಯಿ;
ಹತ್ಥದಾಠಂ ಪಲಾಯನ್ತಂ, ದಿಸ್ವಾ ಜನಪದಾ ನರಾ.
ಸೀಸಮಸ್ಸ ಗಹೇತ್ವಾನ, ಮಾಣವಮ್ಮಸ್ಸ ದಸ್ಸಯುಂ;
ಪೋತ್ಥಕುಟ್ಠೋಪಲಾಯಿತ್ವಾ, ಮೇರುಕನ್ದರಮಾಗಮಿ.
ತತೋ ತಂ ಸಾಮಿಕೋ ದಿಸ್ವಾ, ಸಹಾಯೋ ಮೇ ಅಯಂಚಿರಂ;
ತಸ್ಮಾ ನ ಸಕ್ಕಾ ಚಡ್ಡೇತುಂ, ಆಪದೇ ಸರಣಾಗತಂ.
ಸಾಮಿನೋ ಚ ಸಹಾಯಸ್ಸ, ನಿದ್ದೋಸೋಹಂ ಕಥಂ ಭವೇ;
ಇತಿ ಚಿನ್ತಿಯ ಪೂವಂ ಸೋ, ಸವಿಸಂ ಖಾದಿಯಾ’ಮರಿ.
ಕುಟ್ಠಕೋಪಿ ಚ ತೇನೇವ, ಖಾದಿತ್ವಾ ಪೂವಕಂ ಮತೋ;
ಮಾಣವಮ್ಮಸ್ಸ ತಸ್ಸೇವಂ, ದೀಪೋ ಆಸಿ ಅಕಣ್ಟಕೋ.
ಮಾಣವಮ್ಮೋ ತತೋ ದೀಪೇ, ಛತ್ತಂ ಉಸ್ಸಾಪಯಿ ತದಾ;
ವಾರೇನ್ತೋ ವಿಯ ತೇನೇವ, ದುಕ್ಖಂ ದೀಪೇ ಜನಸ್ಸ ಸೋ.
ಪುಞ್ಞಕಮ್ಮಾನಿ ಸೋ’ಕಾಸಿ, ಅನಗ್ಘಾನಿ ಬಹೂನಿ ಚ;
ಸಮತ್ಥೋ ಕೋಹಿ ತಂ ಸಬ್ಬಂ, ವತ್ತುಂ ಪಟಿಪದಂ ನರೋ.
ಕಪ್ಪಗಾಮವ್ಹಯಞ್ಚೇವ, ತಥಾ ಸೇಪಣ್ಣಿನಾಮಕಂ;
ಪಧಾನರಕ್ಖೇ ಚ ಸಿರಿಂ, ಸಿರೀಸಙ್ಘಾದಿ ಬೋಧಿಕೇ.
ಪಾಸಾದಂ ¶ ಸೋವ ಕಾರೇಸಿ, ಪಸಾದಾವಹಮುತ್ತಮೋ;
ಛಾದೇಸಿ ಲೋಹಪಾಸಾದಂ, ಥೂಪಾರಾಮಘರಂ ತಥಾ.
ಥೂಪಾರಾಮೇ ಚ ಪಾಸಾದಂ ಕತ್ವಾ’ದಾ ಪಂಸುಕೂಲಿನಂ;
ಜಿಣ್ಣಕಂ ಪಟಿಸಙ್ಖಾಸಿ ಛತ್ತಂ ಚೇತಿಯಮುದ್ಧನಿ;
ಬಹವೋ ಜಿಣ್ಣಕಾವಾಸೇ ತತ್ಥೇವ ಪಟಿಸಙ್ಖರಿ.
[ಏತ್ಥ ಮಾಣವಮ್ಮಸ್ಸ ರಜ್ಜಕಥಾಯ ಊನತಾ ದಿಸ್ಸತಿ. ಇತೋ ಪಟ್ಠಾಯ ಅಗ್ಗಬೋಧಿಸ್ಸ ರಜ್ಜಪಟಿಬದ್ಧಾ ಕಥಾ ವಿರ ಖಾಯತಿ.]
ಛಚತ್ತಾಲೀಸತಿಮ ಪರಿಚ್ಛೇದ
…ವಾಸಂ-ಕತ್ವಾ ಸುಲಭಪಚ್ಚಯಂ;
ದಾಸಿ ಧಮ್ಮರುಚಿನಂ ಸೋ, ರಾಜಿನೀ ದೀಪಕಮ್ಪಿ ಚ.
ಕಾರೇತ್ವಾನ ಪರಿಚ್ಛೇದಂ, ಮಹಾನೇತ್ತಾದಿ ಪಾದಿಕಂ;
ತೇಸಮೇವ ಅದಾ ಕೋಳು-ವಾತೇ ಸೋ ದೇವತಿಸ್ಸಕಂ.
ವಹತ್ಥಲೇ ಚ ಸೋ ಕತ್ವಾ, ಕದಮ್ಬಗೋನನಾಮಕಂ;
ದೇವಪಾಳಿಮ್ಹಿ ಕತ್ವಾನ, ಗೀರಿವ್ಹನಗರಂ ತಥಾ.
ಕತ್ವಾ ಅನ್ತರಸೋಬ್ಭಮ್ಹಿ, ದೇವನಾಮಂ ವಿಹಾರಕಂ;
ರಾಜಮಾತಿಕಮಾರಾಮಂ, ಕತ್ವಾ’ದಾ ಪಂಸುಕೂಲಿನಂ.
ಗೋಕಣ್ಣಕವಿಹಾರೇ’ಕಾ, ಪಧಾನಘರಮೇವ ಚ;
ಜಿಣ್ಣಗೇಹಞ್ಚ ಕಾರೇಸಿ, ವಡ್ಢಮಾನಕಬೋಧಿಯಾ.
ಸಙ್ಘಮಿತ್ತವ್ಹಯೇ ಚೇವ, ಅಞ್ಞತ್ಥ ಚ ಮಹಾಯಸೋ;
ತತ್ಥ ತತ್ಥ ವಿಹಾರೇಸು, ನವಕಮ್ಮಮಕಾರಯಿ.
ಛಬ್ಬೀಸತಿ ಸಹಸ್ಸಾನಿ, ಸುವಣ್ಣಾನಂ ಸಮಪ್ಪಿಯ;
ಜಿಣ್ಣಾನಿ ಪಟಿಸಙ್ಖಾಸಿ, ರಾಜಾ ಚೇತಿಯಪಬ್ಬತೇ.
ತಾಲವತ್ಥುವಿಹಾರಞ್ಚ, ಕಾರೇತ್ವಾ ಪಣ್ಣಭತ್ತಕಂ;
ವಿಹಾರಸ್ಸ ಮಹಾಸೇನ-ನರಿನ್ದವ್ಹಸ್ಸ ದಾಪಯಿ.
ಗೋಣ್ಡಿಗಾಮಿಕವಾಪಿಞ್ಚ, ಛಿನ್ನಂ ಬನ್ಧಿ ಯಥಾ ಪುರಾ;
ದಾನಭಣ್ಡಞ್ಚ ಸೋ ಸಬ್ಬಂ, ಸಬ್ಬೇಸಂ ದಾಸಿ ಪಾಣಿನಂ.
ಉಪೋಸಥಂ ¶ ಉಪವಸತಿ, ಸದ್ಧಿಂ ದೀಪಜನೇಹಿ ಸೋ;
ಧಮ್ಮಞ್ಚ ತೇಸಂ ದೇಸೇತಿ, ದಾತುಂ ಲೋಕುತ್ತರಂ ಸುಖಂ.
ಕಮ್ಮಂ ಸೋವಗ್ಗಿಯಂ ತಸ್ಸ, ರಜ್ಜೇ ಸಬ್ಬೋ ಸಮಾಚರಿ;
ಯಂ ಕರೋತಿ ಮಹೀಪಾಲೋ, ತಂ ತಸ್ಸ ಕುರುತೇ ಜನೋ.
ತಸ್ಮಾ ರಾಜಾ ಮಹಾಪಞ್ಞೋ, ಧಮ್ಮಮೇವ ಸಮಾಚರೇ;
ಸೋ ನಿವುತ್ಥನಿವುತ್ಥಮ್ಹಿ, ಠಾನೇ ಹೋತಿ ಮಹಾಯಸೋ.
ಸಮ್ಪತ್ತಪರಿವಾರೋ ಚ, ಅನ್ತೇ ಗಚ್ಛತಿ ನಿಬ್ಬುತಿಂ;
ಅತ್ತತ್ಥಞ್ಚ ಪರತ್ಥಞ್ಚ, ತಸ್ಮಾ ಪಸ್ಸೇಯ್ಯ ಬುದ್ಧಿಮಾ.
ಅತ್ತನಾ ಯದಿ ಏಕೇನ, ವಿನಿತೇನ ಮಹಾಜನಾ;
ವಿನಯಂ ಯನ್ತಿ ಸಬ್ಬೇಪಿ, ಕೋತಂ ನಾಸೇಯ್ಯ ಪಣ್ಡಿತೋ.
ಪಯೋಗೋ ಯೋ ಹಿ ಸತ್ತಾನಂ, ಲೋಹದ್ವಯ ಹಿತಾವಹೋ;
ಸೋ ತೇನ ಅಕತೋ ನತ್ಥಿ, ರತ್ತನ್ದಿವಮತನ್ದಿನಾ.
ಅತ್ತನೋ ಸೋ ನಿವತ್ಥಾನಿ, ವತ್ಥಾನಿ ಸುಖುಮಾನಿ ಚ;
ಪಂಸೂಕೂಲಿಕಭಿಕ್ಖೂನಂ, ಚೀವರತ್ಥಾಯ ದಾಪಯಿ.
ಅಟ್ಠಾನವಿನಿಯೋಗೋಪಿ, ಸಙ್ಗಹೋ ವಾ ವಿರೂಪಕೋ;
ಸಾವಜ್ಜೋ ಪರಿಭೋಗೋ ವಾ, ತಸ್ಸ ನಾಹೋಸಿ ಸಬ್ಬಸೋ.
ಯೇ ಯೇ ಸತ್ತಾ ಯದಾ ಹಾರಾ, ತೇಸಂ ತಂ ತಂ ಸದಾಪಯಿ;
ಯೇ ಯೇನ ಸುಖೀ ಹೋನ್ತಿ, ತೇ ತೇ ತೇನ ಸುಖಾಪಯೀ.
ಏವಂ ಪುಞ್ಞಾನಿ ಕತ್ವಾನ, ಛಬ್ಬಸ್ಸಾನಿ ನರಾಧಿಪೋ;
ಅಗಮಾ ದೇವರಾಜಸ್ಸ, ಸನ್ತಿಕಂ ಸನ್ತಿಯಾವಹೋ.
ಅಥ ತಸ್ಸ ನುಜೋ ರಾಜಾ, ಕಸ್ಸಪೋ ಹೋತಿ ಖತ್ತಿಯೋ;
ಸಮತ್ಥೋ ರಜ್ಜಭಾರಸ್ಸ, ವಹಿತುಂ ಪುಬ್ಬವುತ್ತಿನೋ.
ಪಿತಾ ವಿಯ ನಿಯಂ ಪುತ್ತಂ, ಸೋ ಸಙ್ಗಣ್ಹಿ ಮಹಾಜನಂ;
ದಾನೇನ ಪೇಯ್ಯವಜ್ಜೇನ, ಅತ್ಥಸ್ಸ ಚರಿಯಾಯ ಚ.
ಠಾನನ್ತರಞ್ಚ ದಾಪೇಸಿ, ತಸ್ಸ ತಸ್ಸ ಯಥಾರಹಂ;
ಸಯಂ ಭುಞ್ಜಿತ್ಥ ಭೋಗೇಪಿ, ಸಬ್ಬದುಕ್ಖವಿವಜ್ಜಿತೋ.
ಗೀಹಿನಞ್ಚೇವ ಭಿಕ್ಖೂನಂ, ಬ್ರಹ್ಮಣಾನಞ್ಚ ಖತ್ತಿಯೋ;
ವತ್ತಾಪಯಿ ಸಕಾವಾರೇ, ಮಾಘಾತಞ್ಚೇವ ಕಾರಯಿ.
ಮಚ್ಛತಿತ್ಥೇ ದುವೇ ಚೇವ, ಆವಾಸಂ ಹೇಳಿಗಾಮಕಂ;
ವಣಿಜ್ಜಗಾಮಮಾರಾಮಂ, ಕಸ್ಸಪಾದೀಗಿರಿಂ ತಥಾ.
ತಥಾ ¶ ಅಮ್ಬತನವ್ಹಞ್ಚ, ಪಧಾನಘರ ಮುತ್ತಮಂ; ಭೋಗಗಾಮಞ್ಚ…
[ಏತ್ಥಕಸ್ಸಪಸ್ಸ ರಜ್ಜಪಟಿಬದ್ಧಾಯ ಕಥಾಯ ಊನತಾ ದಿಸ್ಸತಿ.]
ತೇಸಂ ಸಬ್ಬಕನಿಟ್ಠೋಪಿ, ಮಹಿನ್ದೋ ನಾಮ ಖತ್ತಿಯೋ;
ಸಮ್ಪತ್ತರಜ್ಜೋ ನಾಹೋಸಿ, ರಾಜಾ ರಜ್ಜ ಧುರನ್ಧರೋ.
ತಸ್ಸಪಿ ಕಿರ ನಿಲವ್ಹೋ, ಸಹಾಯೋ ಚೀರಸತ್ಥುತೋ;
ಮತೋ ಪುಬ್ಬೇವ ತಸ್ಮಾ, ಸೋ ಸರನ್ತೋ ತಂ ನ ಇಚ್ಛಿತಂ.
ಅಹೋರಜ್ಜಮ್ಪಿ ದೀಪಮ್ಹಿ, ನ ಮಞ್ಞಿತ್ಥ ಸುಖಾವಹಂ;
ಅಭಾವೇನ ಸಹಾಯಸ್ಸ, ಸಹಾಯಾ’ತೀವ ದುಲ್ಲಭಾ.
ತೇನೇವ ವುತ್ತಂ ಮುನಿನಾ, ಧಮ್ಮಾ ಯೇಕೇಚಿ ಲೋಕಿಯಾ;
ತಥಾ ಲೋಕುತ್ತರಾ ಚೇವ, ಧಮ್ಮಾ ನಿಬ್ಬಾನಗಾಮಿನೋ.
ಕಲ್ಯಾಣಮಿತ್ತಂ ಆಗಮ್ಮ, ಸಬ್ಬೇ ತೇ ಹೋನ್ತಿ ಪಾಣಿನಂ;
ತಸ್ಮಾ ಕಲ್ಯಾಣಮಿತ್ತೇಸು, ಕತ್ತಬ್ಬೋ’ತಿ ಸದಾ ದರೋ.
ಆದಿಪಾದೋವ ಸೋ ತಸ್ಮಾ, ಹುತ್ವಾ ರಜ್ಜಂ ವಿಚಾರಯಿ;
ಪಾಲೇತುಂಯೇವ ದೀಪಮ್ಹಿ, ಜಿವನ್ತೋ ವಿಯ ಪಾಣಿನೋ.
ಕಸ್ಸಪಸ್ಸ ಸಭಾತುಸ್ಸ, ಪುತ್ತಂ ಸೋ ಅಗ್ಗಬೋಧಿಕಂ;
ಠಪೇತ್ವಾ ಓಪರಜ್ಜಮ್ಹಿ, ದತ್ವಾ ಭೋಗಮನಪ್ಪಕಂ.
ದೇಸಂ ದತ್ವಾನ ಪಾಚಿನಂ, ವಸಿತುಂ ತತ್ಥ ಪೇಸಿಯ;
ದೇಸಂ ದಕ್ಖಿಣಮಾದಾಸಿ, ರಾಜ ಪುತ್ತಸ್ಸ ಅತ್ತನೋ.
ಮಹಾಪಾಳಿಮ್ಹಿ ದಾನಞ್ಚ, ದಾಪೇಸಿ ದಸವಾಹಣಂ;
ಸಬ್ಬೇ ಭೋಗೇ ಸಮೇ’ಕಾಸಿ, ಯಾಚನಾನಂ ಸಹ’ತ್ತನಾ.
ಅದತ್ವಾ ಯಾಚಕಾನಂ ಸೋ, ನು ಕಿಞ್ಚಿ ಪರಿಭುಞ್ಜತಿ;
ಭುತ್ತಂ ವಾ ಸತಿಯಾ ದೇತಿ, ದ್ವಿ ಗುಣಂ ಅತ್ತಭುತ್ತತೋ.
ಸಕನಾಮಂ ಸಕಾರೇಸಿ, ಭಿಕ್ಖುನೀ ನ ಮುಪಸ್ಸಯಂ;
ಪಾದಾನಗರಗಲ್ಲಞ್ಚ, ಆರಾಮ ಮರಿಯಾದಕಂ.
ಮಹಿನ್ದತಟಮಾರಾಮಂ, ಸಮ್ಪತ್ತ ಚತುಪಚ್ಚಯಂ;
ಅಞ್ಞಮ್ಪಿ ಬಹುಧಾ ಕಾಸಿ, ಪುಞ್ಞಂ ಪುಞ್ಞಗುಣೇರತೋ.
ತಿಣೀ ವಸ್ಸಾನಿ ಕಾರೇತ್ವಾ, ರಜ್ಜಮೇವ ಮಹಾಮತಿ;
ಗವೇಸನ್ತೋ ಸಹಾಯಂ’ವ, ದೇವಲೋಕಮುಪಾಗಮಿ.
ವಸನ್ತೋ ¶ ದಕ್ಖಿಣೇ ದೇಸೇ, ಅಗ್ಗಬೋಧಿ ಕುಮಾರಕೋ;
ಕೇನಾಪಿ ಕರಣೀಯೇನ, ನಗರಂ ಆಗತೋ ಅಹು.
ತಸ್ಮಿಂ ತತ್ಥ ವಸನ್ತಮ್ಹಿ, ಆದಿಪಾದೋ ಮಹಿನ್ದಕೋ;
ಮತೋ ಆಸಿ ತತೋ ತಸ್ಸ, ರಜ್ಜಂ ಹತ್ಥಗತಂ ಅಹು.
ಸೋ ತಂ ಹತ್ಥಗತಂ ಕತ್ವಾ, ಸಣ್ಠಪೇತ್ವಾನ ಸಾಸನಂ;
ಪಾಚಿನ ದೇಸಪತಿನೋ, ಅಗ್ಗಬೋಧಿಸ್ಸ ಪೇಸಯಿ.
ಸ ಆಗನ್ತ್ವಾ ಅಹು ರಾಜಾ, ಸಿಲಾಮೇಘೋತಿ ಸಞ್ಞಿತೋ;
ಓಪರಜ್ಜೇ ಕುಮಾರಞ್ಚ, ಅಭಿಸಿಞ್ಚಿತ್ಥ ಭೂಪತಿ.
ಸೋ ರಾಜಾ ನಂ ನಿಯೋಜೇತ್ವಾ, ಚಿನ್ತಾ ಭಾರಂ ವಿಮುಞ್ಚಿಯ;
ಭೋಗೇ ಭುಞ್ಜಥ ತುಮ್ಹೇತಿ, ಸಯಂ ರಜ್ಜಂ ವಿಚಾರಯಿ.
ಯಥಾಯೋಗಂ ಜನಸ್ಸೇಸ-ಕಾಸಿ ನಿಗ್ಗಹಸಂಗಹೇ;
ದೇಸೇ ಉಬ್ಬಿನಯಂ ಸಬ್ಬಂ, ಮಗ್ಗಂ ಪಾಪೇಸಿ ಚಕ್ಖುಮಾ.
ಏವಂ ತೇಸು ವಸನ್ತೇಸು, ಓತಾರಂ ಪಾಪಕಮ್ಮಿನೋ;
ನ ಲಭನ್ತಾ ವಿಚಿನ್ತೇಸುಂ, ಭಿನ್ದಿತಬ್ಬಾ ಇಮೇ ಇತಿ.
ರಾಜಾನಮುಪಸಙ್ಕಮ್ಮ, ಅವೋಚುಂ ಪಿಸುನಂ ರಹೋ;
ತುವಂ ರಾಜಾಸಿ ನಾಮೇನ, ರಾಜಾ ಅಞ್ಞೋ ಸಭಾವಹೋ.
ಉಪರಾಜಾ ಅಯಂ ರಜ್ಜಂ, ಗಣ್ಹಿಸ್ಸತಿ ಮಹಾಜನಂ;
ಸಙ್ಗಯ್ಹ ನ ಚಿರೇನೇವ, ಹೋತಿ ರಾಜಾ ನ ಸಂಸಯೋ.
ತಂ ಸುತ್ವಾನ ಮಹೀಪಾಲೋ, ಪರಿಭಿಜ್ಜಿ ಕುಮಾರಕೇ;
ಕುಮಾರೋಪಿ ವಿಧಿತ್ವಾ ತಂ, ಚೋರೋ ಹುತ್ವಾನ ರಾಜಿನ್ದೋ.
ಪಲಾಯಿತ್ವಾ ಸಕಂ ದೇಸಂ, ಸಙ್ಗಣ್ಹಿತ್ವಾ ತಹಿಂ ಜನೇ;
ಮಹನ್ತಂ ಬಲಮಾದಾಯ, ಕಾತುಂ ಸಙ್ಗಾಮ ಮಾರಭಿ.
ಕದಲ್ಯಾದಿನಿವಾತಮ್ಹಿ, ಸಙ್ಗಾಮೋ ಭಿಂಸನೋ ಅಹು;
ಗತೋ ತತ್ಥ ಪರಾಜಿತ್ವಾ, ಕುಮಾರೋ ಮಲಯಂ ವಸೋ.
ತತೋ ರಾಜಾ ಕತಞ್ಞೂ ಸೋ, ಉಪಕಾರಂ ಸಭಾತುನೋ;
ಚಿನ್ತೇತ್ವಾ ರಜ್ಜದಾನಾದಿಂ, ಪರಿದೇವಿತ್ಥ ಪಾಕಟಂ.
ಕುಮಾರೋಪಿ ಚ ತಂ ಸುತ್ವಾ, ಅಹೋಸಿ ಮುದುಚಿತ್ತಕೋ;
ಏವಂ ತೇ ಅಞ್ಞಮಞ್ಞಸ್ಸ, ಸಿನಿದ್ಧನ್ತಂ ಪಕಾಸಯುಂ.
ರಾಜಾ ಗನ್ತ್ವಾ ಸಯಂಯೇವ, ಮಲಯಂ ಏಕಕೋ ವಂಸೋ;
ಕುಮಾರಂ ತಂ ಸಮಾದಾಯ, ಆಗಮಿತ್ಥ ಸಕಂ ಪುರಂ.
ಹೋತಿ ¶ ನಿಸ್ಸಂಸಯಂ [ಏವಂಪಿ ಚಿತ್ತೋ] ಅತೀವ ಸೋ;
ವಿವಾಹಂ ತೇನ ಕಾರೇಸಿ, ಧೀತರಂ ಸಙ್ಘನಾಮಿಕಂ.
ತಾಯ ಸದ್ಧಿಂ ವಸನ್ತೋ ಸೋ, ವಿಸ್ಸತ್ಥೋ ತೇನ ರಾಜಿನಾ;
ಪಹಾರಂ ತಾಯ ಪಾದಾಸಿ, ದುಟ್ಠೋ ದೋಸಮ್ಹಿ ಕಿಸ್ಮಿಂಚಿ.
ಪಿತರಂ ಸಾ ಉಪಾಗಮ್ಮ, ಕರುಣಂ ರೋದಿತಮ್ಪತಿ;
ಅಕಾರಣೇ ಮಂ ಮಾರೇತಿ, ದಿನ್ನೋ ವೋ ಸಾಮಿಕೋ ಇತಿ.
ಸೋಪಿ ತಂ ಸುತಮತ್ತೇವ, ದುಕ್ಕತಂ ವತ ಮೇ ಇತಿ;
ಪಬ್ಬಾಜೇಸಿ ಲಹುಂ ಗನ್ತ್ವಾ, ಭಿಕ್ಖೂನೀ ನ ಮುಪಸ್ಸಯಂ.
ಅಗ್ಗಬೋಧಿಸನಾಮೋಥ, ತಸ್ಸಾ ಮಾತುಲ ಪುತ್ತಕೋ;
ಸುಚಿರೇನೇವ ಕಾಲೇನ, ತಸ್ಸಂ ಸಾ ರತ್ತಮಾನಸೋ.
ಕಾಲೋ’ಯನ್ತಿ ವಿದಿತ್ವಾನ, ತಮಾದಾಯ ಪಲಾಯಿತುಂ;
ಅಞ್ಞತೋ ತಂ ಗಹೇತ್ವಾನ, ಗತೋ ಏಕೋವ ರೋಹಣಂ.
ಅಗ್ಗಬೋಧಿಂ ನರಿನ್ದೋ ಸೋ, ಅಗ್ಗಬೋಧಿ ನಮಾದಿಯ;
ಅಗ್ಗಬೋಧಿಂ ನಿಹನ್ತುಂ ತಂ, ರೋಹಣಂ ತಮುಪಾವೀಸಿ.
ಅಗ್ಗಬೋಧಿ ನಿಸೇಧೇತ್ವಾ, ಅಗ್ಗಬೋಧಿಂ ಸಭಾತರಂ;
ಅಪರೇ ಪಬ್ಬತೇ ಹನ್ತು-ಮಗ್ಗಬೋಧಿಂ ಸಯಂ ಗತೋ.
ಕಸಿಣಂ ರೋಹಣಂ ಹತ್ಥ-ಗತಂ ಕತ್ವಾ ಮಹಾ ಬಲೋ;
ಯುಜ್ಝಿತ್ವಾ ತೇನ ತಂ ಗಣ್ಹಿ, ಭರಿಯಂ ಸಙ್ಘಮತ್ತನೋ.
ತತೋ ಪಟ್ಠಾಯ ಸುಖಿತಾ, ಸಮಗ್ಗಾ ತೇ ತಯೋ ಜನಾ;
ವಿಸ್ಸಟ್ಠಾ ಅಞ್ಞಮಞ್ಞೇಸು, ವಿಹರಿಂಸು ಯಥಾರುಚಿಂ.
ವಾಪಾರನಿಂ ಅಕಾರಾಮಂ, ತಥಾ ಮಾಣಗ್ಗಬೋಧಿಕಂ;
ಸಭತ್ತುದ್ದೇಸಭೋಗಞ್ಚ, ವಿಹಾರೇ ಅತಿಯುತ್ತರೇ.
ಹತ್ಥಿ ಕುಚ್ಛಿವಿಹಾರೇ ಚ, ವಿಹಾರೇ ಪುನ ಪಿಟ್ಠಿಕೇ;
ಮಹಾದೀಪರಿವೇಣೇ ಚ, ಪಾಸಾದೇ ವಾಹದೀಪಕೇ.
ಥೂಪಾರಾಮಮ್ಹಿ ಗೇಹಸ್ಸ, ದ್ವಾರೇ ಚ ಪರಿಜಿಣ್ಣಕೇ;
ಕಾಸಿ ಪಾಕತಿಕಂ ತತ್ಥ, ಥಮ್ಭೇ ಚ ಪರಿವತ್ತಯಿ.
ಏವಂ ಕತ್ವಾನ ಪುಞ್ಞಾನಿ, ಪುಞ್ಞಾನಿ ಚ ಯಥಾಬಲಂ;
ಚತ್ತಾಲೀಸತಿಮೇ ವಸ್ಸೇ, ಯಥಾಕಮ್ಮ ಮುಪಾಗಮಿ.
ಅಥೋಪರಾಜಾ ರಾಜಾ’ಸಿ, ಅಗ್ಗಬೋಧಿ ಸಿರೀಧರೋ;
ತನಯೋ ಸೋ ಮಹಿನ್ದಸ್ಸ, ಆದಿಪಾದಸ್ಸ ಧೀಮತೋ.
ಸಾಸನಮ್ಪಿ ¶ ಚ ಲೋಕಞ್ಚ, ಸಙ್ಗಣಿತ್ಥ ಯಥಾರಹಂ;
ಓಪರಜ್ಜೇ’ಭಿಸಿಞ್ಚತ್ಥ, ಮಹಿನ್ದಂ ಪುತ್ತಮತ್ತನೋ.
ಮಹಾಬೋಧಿಸ್ಸ ಕಾರೇಸಿ, ಘರಂ ಜಿಣ್ಣಂ ನವಂ ಥಿರಂ;
ಆರಾಮೇ ದ್ವೇ ಚ ಕಾರೇಸಿ, ಕಳನ್ದಂ ಮಲ್ಲವಾತಕಂ.
ಧಮ್ಮಕಮ್ಮೇಹಿ ಸಕ್ಕಚ್ಚಂ, ಸೋಧೇಸಿ ಜಿನಸಾಸನಂ;
ವಿನಿಚ್ಛನನ್ತೋ ಧಮ್ಮೇನ, ಛಿನ್ದಿ ಕೂಟಟ್ಟಕಾರಕೇ.
ಭೇಸಜ್ಜಞ್ಚ ಗಿಲಾನಾನಂ, ಮಙ್ಗಲಂ ಚಾವಮಙ್ಗಲಂ;
ಲಙ್ಕಾದೀಪಮ್ಹಿ ಸಕಲೇ, ಸಯಮೇವ ವಿಚಾರಯೀ.
ಸಲಾಕಭತ್ತಂ ದಾಪೇಸಿ, ನಿಕಾಯತ್ತಯ ವಾಸಿನಂ;
ಭೋಜನಂ ಪಂಸುಕೂಲೀನಂ, ಅತ್ತಯೋಗ್ಗಂ ಮಹಾರಹಂ.
ಏವಮಾದೀನಿ ಕತ್ವಾನ, ಪುಞ್ಞಾನಿ ಸಸಯಂ ವಸೀ;
ಚುತೋ’ಸಿ ಛಹಿ ವಸ್ಸೇಹಿ, ಪುಲತ್ಥಿನಗರೇ ವಸಂ.
ತತೋ ಪುಬ್ಬೇವ ತಸ್ಸಾಸಿ, ಪುತ್ತೋ ಸೋ ಯುವರಾಜಕೋ;
ಮತೋ ಕಿರ ತತೋ ರಜ್ಜಂ, ಅಪುತ್ತಂ ತಂ ತದಾ ಅಹು.
ಪುತ್ತೋ ಮಹಿನ್ದೋ ನಾಮಾ’ಸಿ, ಸಿಲಾ ಮೇಘಸ್ಸ ರಾಜಿನೋ;
ರಜ್ಜಯೋಗ್ಗೋ ಮಹಾಪುಞ್ಞೋ, ಲೋಕಸಙ್ಗಣ್ಹ ನಕ್ಖಮೋ.
ತಸ್ಸ ಜಾತದಿನೇಯೇವ, ರಾಜಾ ನಕ್ಖತ್ತಪಾಠಕೇ;
ಪುಚ್ಛಿತ್ವಾ ರಜ್ಜಯೋಗ್ಗೋತಿ, ಸುತ್ವಾ ತೇಹಿ ವಿಯಾಕತಂ.
ದತ್ವಾ ತೇಸಂ ಧನಂ ಸಾಧು, ಪವತ್ತಿಂ ತಂ ನಿಗೂಹಯಿ;
ಅಥ ನಂ ಸೋ ವಯಪ್ಪತ್ತಂ, ಕತ್ವಾ ಸೇನಾಪತಿಂಸಕಂ.
ರಜ್ಜಂ ವಸ್ಸೇವ ಕತ್ವಾನ, ಸಬ್ಬಂ ಹತ್ಥೇ ಸಯಂವಸೀ;
ಸೋ ಧಮ್ಮೇನ ವಿಚಾರೇಸಿ, ರಾಜ ಕಿಚ್ಚಂ ಮಹಾಮತಿ.
ಮತೇಪಿ ತಸ್ಮಿಂ ತಸ್ಮಾ ಸೋ, ಅಗ್ಗಬೋಧಾಭಿಧಾನಿನೋ;
ಸೇನಾಪಚ್ಚಂ ನ ಗಣ್ಹಿತ್ಥ, ನಯಞ್ಞೂ ತಸ್ಸ ಹತ್ಥಕೋ.
ತದಾ ಕೇನಚಿ ಗನ್ತ್ವಾ ಸೋ, ಕರಣೀಯೇನ ರಾಜಿನೋ;
ಸಮುದ್ದತೀರೇ ವಸತಿ, ಮಹಾತಿತ್ಥಮ್ಹಿ ಪಟ್ಟನೇ.
ಸುತ್ವಾ ಸೋ ಚೂಳಪಿತುನೋ, ಮರಣಂ ವೇಗಸಾ’ಗಮಾ;
ಚೋರಾ ರಜ್ಜಂ ಗಹೇತ್ವಾನ, ನಾಸೇಯ್ಯುಂ ನಗರಂ ಇತಿ.
ತತೋ ಉತ್ತರದೇಸಮ್ಹಿ, ಮಣ್ಡಲೀಕಾ ಸರಟ್ಠಿಯಾ;
ಅಚ್ಛಿನ್ದಿತ್ವಾನ ತಂ ದೇಸಂ, ಛಿನ್ನರಾಜಕರಂ ಕರುಂ.
ಸೋ ¶ ತಂ ಸುತ್ವಾ ಮಹಾಸೇನೋ, ಗನ್ತ್ವಾ ಉತ್ತರದೇಸಕಂ;
ಸಬ್ಬೇ ನಿಮ್ಮಥಯಿತ್ವಾನ, ಮಣ್ಡಲೀ ಕೇಸರಟ್ಠಿಯೇ.
ಗನ್ತ್ವಾ ರಞ್ಞೋ ಮತಠಾನಂ, ದಿಸ್ವಾ ದೇವಿಂ ಪರೋದಿಯ;
ಅಸ್ಸಾಸೇತ್ವಾ ಯಥಾಕಾಲಂ, ಇದಂ ವಚನಮಬ್ರವಿ.
ಮಾಚಿನ್ತೇಸಿ ಮಹಾದೇವೀ, ಮತೋ ಮೇ ಸಾಮಿಕೋ ಇತಿ;
ರಕ್ಖಿಸ್ಸಾಮಿ ಅಹಂ ದೀಪಂ, ತುಮ್ಹೇ ರಜ್ಜಂ ಕರಿಸ್ಸಥ.
ತುಣ್ಹಿಭೂತಾ’ಧಿವಾಸೇತ್ವಾ, ಪಿಯಸಾ ಪಾಪಬುದ್ಧಿಕಾ;
ರಹೋ ಯೋಜಯೀ ತಂ ಹನ್ತುಂ, ವತ್ಥುಕಾಮಾ ಯಥಾರುಚಿಂ.
ಸೇನಾಪತಿ ತಂ ಞತ್ವಾನ, ತಸ್ಸಾ’ರಕ್ಖಂ ವಿಧಾಯ ಸೋ;
ತಂ ಪಕ್ಖಿಯೇಹಿ ಯುಜ್ಝಿತ್ವಾ, ಪಲಾಪೇಸಿ ಮಹಾಜನಂ.
ತತೋ ದೇವಿಂ ಸಬನ್ಧೇತ್ವಾ, ಪಕ್ಖಿಪಿತ್ವಾನ ಯಾನಕೇ;
ಆದಾಯ ತಂ ಪುರಂ ಗನ್ತ್ವಾ, ರಜ್ಜಂ ಗಣ್ಹಿ ಸಸಾಧನಂ.
ಅತ್ಥಿ ದಪ್ಪುಳ ನಾಮೋ’ಪಿ,
ಸಿಲಾ ಮೇಘಸ್ಸ ರಾಜಿನೋ;
ಭಾಗಿನೇಯ್ಯೋ ಮಹಾಸೇನೋ,
ಆದಿಪಾದೋ ಮಹಾ ಧನೋ.
ಸೋ ಸೇನಂ ಸನ್ನಿಪಾತೇತ್ವಾ, ವಸನ್ತೋ ಕಾಳವಾಪಿಯಂ;
ಕಾತುಂ ಸಙ್ಗಾಮ ಮಾಗಞ್ಛಿ, ಸಙ್ಗಗಾಮಪ್ಪದೇಸಕಂ.
ಸೇನಾಪತಿ ಪವತ್ತಿಂ ತಂ, ಸುತ್ವಾ ಸಮ್ಪನ್ನವಾಹನೋ;
ದೇವಿಞ್ಚ ತಂ ಸಮಾದಾಯ, ಅಗಮಾ ತತ್ಥ ಸಜ್ಜುಕಂ.
ತೇಸಂ ತತ್ಥಸಿ ಸಙ್ಗಾಮೋ, ಉಭಿನ್ನಂ ಲೋಮಹಂಸನೋ;
ಆದಿಪಾದೋ ತದಾಸೇನಂ, ಓಹೀಯನ್ತಂ ಸಮೇಕ್ಖಿಯ.
ಪಲಾಯಿತ್ವಾ ಆರುಹಿತ್ಥ, ಅಚ್ಛಸೇಲಂ ಸವಾಹನೋ;
ಪಲಾಪೇತ್ವಾನ ತಂ ತತ್ಥ, ಸೇನಾಪತಿ ಸುಖಂ ವಸಿ.
ಸುಞ್ಞಂತಿ ನಗರಂ ಸುತ್ವಾ, ಮಣ್ಡಲೀಕಾಪಿ ಉತ್ತರೇ;
ದೇಸೇ ಸಬ್ಬೇ ಸಮಾಗಮ್ಮ, ಅಗ್ಗಹೇಸುಂ ಪುರಂ ತದಾ.
ಸೋ ಹಿ ತೇ ಪಟಿಬಾಹೇಸಿ, ಸೂರೋ ಧೀರಪರಕ್ಕಮೋ;
ಅಥಾಗಮ್ಮ ಪುರಂ ರಜ್ಜಂ, ವಿಚಾರೇಸಿ ಯಥಾನಯಂ.
ಭಿಕ್ಖುಸಙ್ಘಸ್ಸ ಲೋಕಸ್ಸ, ಮಚ್ಛಾನಂ ಮಿಗಪಕ್ಖಿನಂ;
ಞಾತೀನಂ ಬಲಕಾಯಸ್ಸ, ಕತ್ತಬ್ಬಂ ಸಬ್ಬಮಾಚರಿ.
ಪಚ್ಛಾ ¶ ಅನು ಬಲಪ್ಪತ್ತೋ, ದಪ್ಪುಲೋ ಮಲಯಂ ಗತೋ;
ಭಾಗಿನೇಯ್ಯೋ ದುವೇ ಚೇವ, ಪಕ್ಕೋಸಿತ್ವಾನ ರೋಹಣಾ.
ರಟ್ಠೇ ಜನಪದೇ ಸಬ್ಬೇ, ಆದಾಯ ಬಹುವಾಹನೋ;
ರತ್ತಿಯಂ ಪುರಮಾಗಮ್ಮ, ಸಮುದ್ದೋ ವಿಯ ಓತ್ಥರಿ.
ಬಲಕಾಯೋ ಪುರಂ ರುನ್ಧಿ, ಉಗ್ಘೋಸೇನ್ತೋ ಸಮನ್ತತೋ;
ಹೇಸಿತೇನ ತುರಙ್ಗಾನಂ, ಕೋಞ್ಚನಾದೇ ನದನ್ತಿನಂ.
ತಾಳಾವಚರ ಸದ್ದಾನಂ, ಕಾಹಳಾನಂ ರವೇನ ಚ;
ಗಜ್ಜಿತೇನ ಭಟಾನಞ್ಚ, ಆಕಾಸಂ ನ ತದಾ ಫಲಿ.
ತದಾ ಸೇನಾಪತಿ ದಿಸ್ವಾ, ಮಹಾಸೇನಂ ಪಮೋದಿಯ;
ಆರೋಚೇಸಿ ಅವತ್ತಿಂ ತಂ, ಬಲಕಾಯಸ್ಸ ಅತ್ತನೋ.
ರಾಜಪುತ್ತಾ ತಯೋ ಏತೇ, ಮಹನ್ತಂ ಬಲಮಾದಿಯ;
ನಗರಂ ನೋ’ಪರುನ್ಧಿಂಸು, ಕಿನ್ತು ಕತ್ತಬ್ಬ ಮೇತ್ಥ ವೋ.
ಏವಂ ವುತ್ತಾ ತಮಾಹಂಸು, ಸೂರಾ ತಸ್ಸ ರಣತ್ಥಿನೋ;
ದೇವಾಸೇವಾ ದಿನೇಯೇವ, ಸೇವಕಾನಂ ನ ಜೀವಿತಂ.
ಏವಂ ಭೂತೇ ಸಚೇ ಕಾಲೇ, ಓಹೀನಾ ಜೀವಿಭತ್ಥಿನೋ;
ಪೋಸೇಸಿ ಸಾಮಿ ಕಿಂ ಕಾಲ-ಮೇತ್ತಕಂ ನೋ ಯಥಾ ಸುಖಂ.
ವುತ್ತೇ ಏವಂ ಸಉಸ್ಸಾಹೋ, ಬಲಂ ಸಜ್ಜಿಯ ರತ್ತಿಯಂ;
ಉಗ್ಗತೇ ಅರುಣೇ ಹತ್ಥಿ-ಮಾರುಯ್ಹ ಕತಕಮ್ಮಕಂ.
ದ್ವಾರೇನೇ’ಕೇನ ನಿಕ್ಖಮ್ಮ, ಪತನ್ತೋ ಅಸನೀ ವಿಯ;
ಸದ್ಧಿಂ ಯೋ ಧಸಹಸ್ಸೇಹಿ, ಸಙ್ಗಾಮಂ ಕಾಸಿ ದುಸ್ಸಹಂ.
ಬಲಂ ತಂ ಆದಿಪಾದಸ್ಸ, ನಿಪ್ಫೋಟೇತ್ವಾ ತತೋ ತತೋ;
ಸನ್ನಿಪಾತಿಯ ಏಕಜ್ಝಂ, ನಿಯತ್ತಿಂ ಸಮ್ಪವೇದಯಿ.
ಹತಾವಸೇಸೇ ಆದಾಯ, ಆದಿಪಾದೋಪಿ ದಪ್ಪುಳೋ;
ಪುಬ್ಬಣ್ಹೇವ ಪರಾಜಿತ್ವಾ, ಪಲಾಯಿತ್ವಾ’ಗ ರೋಹಣಂ.
ರಾಜಪುತ್ತೇ ದುವೇ ಚೇವ, ರೋಹಣಮ್ಹಾ ತದಾ ಗತೇ;
ಜೀವಗ್ಗಾಹಂ ಸಗಾಹೇತ್ವಾ, ತೇ ಆದಾಯ ಪುರಂ ಗತೋ.
ಏವಂ ಪತ್ತಜಯೋ ಸೂರೋ, ದೀಪೇ ಜಾತೇ ನಿರಾಕುಲೇ;
ಪಾಚಿನದೇಸಂ ಸಾಧೇತುಂ, ಪೇಸಯಿತ್ಥ ಸವಾಹನೇ.
ತೇಪಿ ಗನ್ತ್ವಾನ ದೇಸಂ ತಂ, ಉತ್ತರಂ ದೇಸಮೇವ ಚ;
ಸಾಧಯಿತ್ವಾ’ಚಿರೇನೇವ, ಸಙ್ಗಹೇಸುಂ ಮಹಾಬಲಂ.
ರಾಜಾಪಿ ¶ ತಂ ಮಹಾದೇವಿಂ, ಭರಿಯಂ ಕಾಸಿ ಅತ್ತನೋ;
ಪರಿಚ್ಚತ್ತುಞ್ಚ ಮಾರೇತುಂ, ನ ಸಕ್ಕಾಯನ್ತಿ ಚಿನ್ತಿಯ.
ತೇಸಂ ಸಂವಾಸಮನ್ವಾಯ, ಗಬ್ಭೋ ಆಸಿ ಪತಿಟ್ಠಿತೋ;
ಪುತ್ತಂ ವಿಜಾಯಿ ಸಾಧಞ್ಞ-ಪುಞ್ಞಲಕ್ಖಣಸಞ್ಞುತ್ತಂ.
ರಞ್ಞೋ ಸಾ’ತಿಪಿಯಾ ಆಸಿ, ತತೋ ಪಟ್ಠಾಯ ಸೋಪಿ ಖೋ;
ಪುತ್ತಸ್ಸ ತಸ್ಸ ಪಾದಾಸಿ, ಓಪರಜ್ಜಂ ಸಭೋಗಿಯಂ.
ಠಿತಾ ಪಾಚಿನದೇಸಮ್ಹಿ, ಆದಿಪಾದಾ ನಿಸಮ್ಮತಂ;
ವಿನಾ ಸೋ’ಯನ್ತಿ ಅಮ್ಹಾಕಂ, ಉಭೋ ಹುತ್ವಾನ ಏಕತೋ.
ದ್ವೀಸು ಪಸ್ಸೇಸು ಸೇನಞ್ಚ, ಸಮಾದಾಯ ಮಹಾಧನಂ;
ಸನ್ಧಿಂಭಾತರಮಾಹೂಯ, ಕತ್ವಾರೋಹಣ ದೇಸತೋ.
ಗಙ್ಗಾತೀರಮ್ಹಿ ವಾಸಂ ತೇ, ಕಪ್ಪಯಿಂಸು ಮಹಬ್ಬಲಾ;
ರಾಜಾ ಸಬ್ಬಂ ನಿಸಮ್ಮೇ’ತಂ, ಮಣ್ಡಲೀಕೇ ತಹಿಂ ತಹಿಂ.
ಆರಾಧೇತ್ವಾ ಗಹೇತ್ವಾನ, ದುಟ್ಠೇ ಮಾರಿಯ ಕೇಚನ;
ರಕ್ಖಂ ದತ್ವಾನ ನಗರೇ, ಕತ್ತಬ್ಬಂ ಸಾಧುಯೋಜಿಯ.
ಮಹಾಸೇನಙ್ಗಮಾದಾಯ, ಮಹೇಸಿಞ್ಚ ತಮಾದಿಯ;
ಖನ್ಧಾವಾರಂ ನಿವೇಸೇತಿ, ಮಹುಮ್ಮಾರಮ್ಹಿ ಗಾಮಕೇ.
ತಸ್ಸಾಗಮನಮಞ್ಞಾಯ, ಆದಿಪಾದಾಪಿ ತೇ ತಯೋ;
ಕೋವಿಳಾರವ್ಹಯೇ ಗಾಮೇ, ಮಹಾಯುದ್ಧಂ ಪವತ್ತಯುಂ.
ಅಥ ರಾಜಾ ಮಹಾಸೇನೋ, ಸಮುಗ್ಘಾತೇಸಿ ತಂ ಬಲಂ;
ದಪ್ಪುಳೋ ಸೋ ಪಲಾಯಿತ್ಥ, ಆದಿ ಪಾದಾ ದುವೇ ಹತಾ.
ತತ್ಥಾಪಿ ಲದ್ಧವಿಜಯೋ, ಪುರಮಾಗಮ್ಮಭೂಮಿಪೋ;
ರಾಜಕಿಚ್ಚಂ ವಿಚಾರೇಸಿ, ಮಹಾದಾನಂ ಪವತ್ತಯಿ.
ಮಹಾಬೋಧಿ ದುಮಿನ್ದಸ್ಸ, ಮಹಾಚೇತಿತ್ತಯಸ್ಸ ಚ;
ಧಾತೂನಮ್ಪಿ ಚ ಸಕ್ಕಚ್ಚಂ, ಮಹಾಪೂಜಾಮಕಾರಯೀ.
ರೋಹಣಂ ಸಮುಪಾಗಮ್ಮ, ದಪ್ಪುಳೋ ಸೋ ತಮಾಗತೋ;
ಬಲಂ ಸಮ್ಪಟಿಪಾದೇಸಿ, ಯುಜ್ಝಿತುಂ ಪುನ ರಾಜಿನಾ.
ರಾಜಾ ಸೋ ಪುತ್ತನತ್ತಾನಂ, ದೇಸಂ ಕಾತುಂ ನಿರಾಕುಲಂ;
ಥೂಪಾರಾಮಮ್ಹಿ ಸಬ್ಬೇಪಿ, ಸನ್ನಿಪಾತಿಯ ಭಿಕ್ಖವೋ.
ಅಞ್ಞೇಪಿ ಚ ಮಹಾಪಞ್ಞೇ, ಯುತ್ತಾ ಯುತ್ತಿವಿಸಾರದೇ;
ರಾಜಧಮ್ಮೇಸು ಸಬ್ಬೇಸು, ನಿಪುಣೋ ನಯಕೋವಿದೋ.
ಆರೋಚೇತ್ವಾ ¶ ಪವತ್ತಿಂ ತಂ, ತೇಹಿ ಸಮ್ಮಾ ಪಕಾಸಿತೋ;
ಚತುರಙ್ಗಮಹಾಸೇನೋ, ಸಬ್ಬೂಪಕರಣಾನುಗೋ.
ದೀಪೇ ಸಬ್ಬತ್ಥ ಯೋಜೇತ್ವಾ, ಕತ್ತಬ್ಬಂ ನಗರೇಪಿ ಚ;
ನಿಕ್ಖನ್ತೋ ನ ಚಿರೇನೇವ, ಅಗಮಾ ಮಾರಪಬ್ಬತಂ.
ಸಮ್ಮದ್ದಿತ್ವಾನ ತಂ ದೇಸಂ, ಖಿಪ್ಪಂ ಪಬ್ಬತಮಾರುಹೀ;
ತಂ ದಿಸ್ವಾ ರೋಹಣೇ ಸಬ್ಬೇ, ಭೀತಾ ತಂ ವಸಮಾಗಮುಂ.
ತತೋ ಸನ್ಧಿಂ ಕರಿತ್ವಾನ, ದಪ್ಪುಳೇನ ಸದಪ್ಪಕೋ;
ಹತ್ಥೀ ಅಸ್ಸೇ ಚ ಮಣಯೋ, ಗಹೇತ್ವಾ ತಸ್ಸ ಹತ್ಥತೋ.
ಗಾಳ್ಹಗಙ್ಗಞ್ಚ ಕತ್ವಾನ, ಸೀಮಂ ರೋಹಣಭೋಗಿನಂ;
ಓರಗಙ್ಗಂ ಸಮಾದಾಯ, ರಾಜಭೋಗಮಕಾರಯಿ.
ದೀಪಮೇವಂ ಮಹಾತೇಜೋ, ಕತ್ವಾ ವಿಗತಕಣ್ಟಕಂ;
ಏಕಾತಪತ್ತೋ ಆಗಮ್ಮ, ಪುರಂ ವಸಿ ಯಥಾಸುಖಂ.
ಪರಿವೇಣಂ ಸಕಾರೇಸಿ, ರಾಜಾ ದಾಮವಿಹಾರಕಂ;
ತಥಾ ಸನ್ನಿರತಿತ್ಥಞ್ಚ, ಪುಲತ್ಥಿನಗರೇ ವಿಭೂ.
ಮಹಾಲೇಖಞ್ಚ ಕಾರೇಸಿ, ಪರಿವೇಣಮಭಯಾ ಚಲೇ;
ತಥಾ ರತನಪಾಸಾದಂ, ತಥೇವ ಸುಮನೋಹರಂ.
ಅನೇಕಭೂಮಂ ಕಾರೇತ್ವಾ, ವೇಜಯನ್ತಮಿವಾಪರಂ;
ತಥಾ ಸತಸಹಸ್ಸೇಹಿ, ತೀಹಿ ಚೇವ ಮಹಾಧನೋ.
ಜಮ್ಬೋನದತುವಣ್ಣಸ್ಸ, ಸಹಸ್ಸೇಹಿ ಚ ಸಟ್ಠಿಹಿ;
ಬಿಮ್ಬಂ ಸತ್ಥುಸ್ಸ ಕಾರೇತ್ವಾ, ನಗ್ಘಂ ಚೂಳಾಮಣಿಯುತಂ.
ಪೂಜಂ ಸಬ್ಬೋಪಹಾರೇನ, ಕಾರೇತ್ವಾನ ಮಹಾರಹಂ;
ಪಾಸಾದಮಹನೇ ಸಬ್ಬಂ, ರಜ್ಜಂ ಓಸ್ಸಜ್ಜಿ ಅತ್ತನೋ.
ಬೋಧಿಸತ್ತಞ್ಚ ಕಾರೇತ್ವಾ, ರಾಜಾನಂ ಸುಮನೋಹರಂ;
ಸಣ್ಠಪಿತ್ಥಸಿಲಾ ಮೇಘೇ, ಚಾರುಂ ಭಿಕ್ಖೂನುಪಸ್ಸಯೇ.
ಥೂಪಾರಾಮಮ್ಹಿ ಥುಪಸ್ಸ, ಕಾಸಿ ಸೋವಣ್ಣಕಞ್ಚುಕಂ;
ಪಟ್ಟಂ ಕತ್ವಾ ವಿಚಿತತ್ಥಂ, ರಜತಂ ಅನ್ತರನ್ತರಾ.
ತಸ್ಮಿಂಯೇವ ಚ ಪಾಸಾದಂ, ಪರಿಜಿಣ್ಣಂ ಸಕಾರಯಿ;
ಅಭಿಧಮ್ಮಂ ಕಥಾಪೇಸಿ, ಕಾರಾಪೇತ್ವಾ ಮಹಾಮಹಂ.
ಮಹಾಥೇರೇನ ಸತಿಮಾ, ಹೇಮಸಾಲಿನಿವಾಸಿನಾ;
ತತ್ಥ ಪೋಕ್ಖರಣಿಞ್ಚಸ್ಸ, ಪರಿಭೋಗಾಯ ಕಾರಯಿ.
ಜಿಣ್ಣೇ ¶ ದೇವಕೂಲೇ ಕತ್ವಾ, ಬಹುಕೇ ತತ್ಥ ತತ್ಥ ಸೋ;
ದೇವಾನಂ ಪಟಿಮಾಯೋ ಚ, ಕಾರಯಿತ್ಥ ಮಹಾರಹಾ.
ಬ್ರಾಹ್ಮಣಾನಞ್ಚ ದತ್ವಾನ, ಪಚ್ಚಗ್ಘಂ ರಾಜಭೋಜನಂ;
ಪಾಯೇಸಿ ಖೀರಂ ಸೋವಣ್ಣ-ತಟ್ಟಕೇಹಿ ಸಸಕ್ಖರಂ.
ಉಸಭೇ ಪಙ್ಗುಲಾನಞ್ಚ, ಜೀವಿಕಞ್ಚ ಸದಾಪಯೀ;
ದಮಿಳಾನನ್ತು ಪಾದಾಸಿ, ಅಸ್ಸೇ ಗೋಣೇ ಅಗಣ್ಹತಂ.
ಅನಾಥಾ ಯೇ ಸಲಜ್ಜಾ ಚ, ತೇ ಚ ಸಙ್ಗಣ್ಹಿ ಸೋ ರಹೋ;
ಅಸಂಗಹಿತೋ ದೀಪಮ್ಹಿ, ನತ್ಥಿ ತೇನ ಯಥಾರಹಂ.
ದಾತಬ್ಬೋತಿ ಕಥಂ ಗುನ್ನ-ಮಹಾರೋ ಸೋ ವಿಚಿನ್ತಿಯ;
ಸಸ್ಸೇ ಖೀರಗತೇ’ದಾಸಿ, ತೇಸಂ ಖೇತ್ತಸಹಸ್ಸಕೇ.
ಕಾಳವಾಪಿಮ್ಹಿ ಸೋ ವಾರಿ-ಸಮ್ಪಾತಂ ಕಾರಯಿ ಥಿರಂ;
ಪುಞ್ಞಮೇವಂ ವಿಧಂ ತಸ್ಸ, ಅಪ್ಪಮೇಯ್ಯಂ ಬಹುಂ ಕಿರ.
ತಸ್ಸ ಪುತ್ತೋ ತದಾ ಆಸಿ, ಯುವರಾಜಾ ದಿವಙ್ಗತೋ;
ಜಾತೋ ಸೇನಾಪತಿ ಕಾಲೇ, ಅಪರೋ ಅತ್ಥಿ ದಾರಕೋ.
ತಂ ರಾಜಾ ರಾಜಪುತ್ತೇಹಿ, ಭೀತೋ ರಾಜಾರಹೋ ಇತಿ;
ಮಾರೇತುಂ ತಂ ನ ಸಕ್ಕೋನ್ತಿ, ವಡ್ಢಪೇಸಿ ಯಥಾ ತಥಾ.
ಅರೀಹಿ ನಗರೇ ರುದ್ಧೇ, ಪಿತರಂ ಸೋ ಕಿರೇಕದಾ;
ಉಪಸಙ್ಕಮ್ಮ ಯಾಚಿತ್ಥ, ಸಙ್ಗಮಾವಚರಂ ಗಜಂ.
ಸೋ ದಾಪೇಸಿ ಮಹಾನಾಗಂ, ಘೋರಂ ಮಾರಕರೂಪಮಂ;
ಕತಹತ್ಥಂ ಬಲಞ್ಚೇವ, ಸಬ್ಬಾಯುಧ ವಿಸಾರದಂ.
ಕಾಲೋಯಮೀತಿ ಮನ್ತ್ವಾ ಸೋ, ಬನ್ಧಿತ್ವಾ ಛುರಿಕಂ ತದಾ;
ಕುಞ್ಜರಂ ವರಮಾರುಯ್ಹ, ನಿಕ್ಖಮ್ಮ ನಗರಾ ಬಹಿ.
ವಿದ್ಧಂಸೇತ್ವಾ ಬಲಂ ಸಬ್ಬಂ, ದುಜ್ಜಯಂ ಜಯಮಗ್ಗಹೀ;
ರಾಜಾ ದಿಸ್ವಾ ಪಸನ್ನೋ ತಂ, ಸೇನಾಪಚ್ಚಞ್ಚ ತಸ್ಸ’ದಾ.
ಏಸೋವ ಕಿರ ಗನ್ತ್ವಾನ, ಸಬಲೋ ದೇಸಮುತ್ತರಂ;
ಪಲಾಪೇಸಿ ಸಸೇನಂ ತಂ, ಆದಿಪಾದಞ್ಚ ದಪ್ಪುಲಂ.
ಬದ್ಧವೇರೋ ತತೋ’ಹೋಸಿ, ದಪ್ಪುಳೋ ತಮ್ಹಿ ಸಾಧುಕಂ;
ಮಹಾಉಮ್ಮಾರಯುದ್ಧಮ್ಹಿ, ದಿಸ್ವಾ ತಮತೀಕೋಧವಾ.
ಸೀಘಂ ಪೇಸೇಸಿ ತಂ ಹನ್ತುಂ, ಹತ್ಥಿಮಾರುಳ್ಹಮತ್ತನಾ;
ಓವಿಜ್ಝಿಯ ಪಲಾಪೇಸಿ, ತಮೇಸ ಸಕದನ್ತೀನಾ.
ದಿಸ್ವಾ ¶ ತಮತಿಸನ್ತುಟ್ಠೋ, ಅಞ್ಞೇಸಞ್ಚ ಅಭಾವತೋ;
ರಜ್ಜಯೋಗೇ ಅದಾ ತಸ್ಸ, ಉಪರಾಜತ್ತಮತ್ತನೋ.
ಏವಂ ವೀಸತಿ ವಸ್ಸಾನಿ, ದೀಪಮೇತಂ ಸುಭುಞ್ಜಿಯ;
ವಿಪಾಕಂ ಪುಞ್ಞಕಮ್ಮಸ್ಸ, ಭುಞ್ಜಿತುಞ್ಚ ದಿವಙ್ಗತೋ.
ಏವಂ ಅನೇಕೇಹಿ ನಯೇಹಿ ಥದ್ಧಾ;
ಜನಸ್ಸ ದುಕ್ಖೇಹಿ ವಿರೂಪಕೇಹಿ;
ಭೋಗಾ ವಿನಸ್ಸನ್ತಿ ಖಣೇ ನ ಸಬ್ಬೇ;
ಅಹೋ ತಹಿಂಯೇವ ರಮನ್ತಿ ಬಾಲಾ.
ಸುಜನಪ್ಪಸಾದಸಂವೇಗತ್ಥಾಯ ಕತೇ ಮಹಾವಂಸೇ
ಛ ರಾಜಕೋ ನಾಮ
ಛಚತ್ತಾಲೀಸತಿಮೋ ಪರಿಚ್ಛೇದೋ.
ಸತ್ತಚತ್ತಾಲೀಸತಿಮ ಪರಿಚ್ಛೇದ
ಪಞ್ಚರಾಜಕೋ
ಅಚ್ಚಯೇ ¶ ಪಿತುನೋ ರಾಜಾ, ಉಪರಾಜಾ ಅಹೋಸಿ ಸೋ;
ಸಮತ್ಥೋ ಸಕ್ಕುಮಿತ್ತಾನಂ, ಕಾತುಂ ನಿಗ್ಗಹ ಸಂಗಹೇ.
ಸೇನಾ ನಾಮಸಿ ಸಪ್ಪಞ್ಞಾ, ಮಹೇಸೀ ತಸ್ಸ ರಾಜಿನೋ;
ಖುದ್ದಪುತ್ತಾ ಪೀಯಾ’ತೀವ, ರಞ್ಞೋ ಕಲ್ಯಾಣದಸ್ಸನಾ.
ಅದಾಸಿ ಯುವರಾಜತ್ತಂ, ಜೇಟ್ಠಪುತ್ತಸ್ಸ ಅತ್ತನೋ;
ಆದಿಪಾದೇ’ಪರೇಕಾಸಿ, ರಾಜಿನೀಪಿ ಚ ಧೀತರೋ.
ದತ್ವಾ ಠಾನನ್ತರಂ ರಾಜಾ, ತೇಸಂ ತೇಸಂ ಯಥಾರಹಂ;
ಜನಂ ಸಙ್ಗಹವತ್ಥೂಹಿ, ಸಙ್ಗಹೇಸಿ ಚತೂಹಿಪಿ.
ಅಥ ಕೇನಾಪಿ ಸೋ ಗನ್ತ್ವಾ, ಹೇತುನಾ ಮಣಿಹೀರಕಂ;
ವಸನ್ತೋ ಕಿರ ಅಸ್ಸೋಸಿ, ಪಚ್ಚನ್ತೋ ಕುಪಿತೋ ಇತಿ.
ತತೋ ಸೇನಾಪತಿಞ್ಚೇವ, ಜೇಟ್ಠಪುತ್ತಞ್ಚ ಅತ್ತನೋ;
ಗನ್ತ್ವಾ ಸಾಧೇಥ ತಂ ದೇಸ-ಮೀತಿ ಪೇಸೇಸಿ ಸಜ್ಜುಕಂ.
ತೇಸು ತತ್ಥೋಪಯಾತೇಸು, ಪಿಸುನಾ ಭೇದಚಿನ್ತಕಾ;
ವತ್ವಾ ಯಂಕಿಞ್ಚಿ ಭಿನ್ದಿಂಸು, ತೇ ಉಭೋಪಿ ನರಾಧಿಪೇ.
ತತೋ ¶ ದ್ವೇ ವೇರಿನೋ ಹುತ್ವಾ, ದೇಸಂ ಗಣ್ಹಿತುಮಾರಭುಂ;
ರಾಜಾ ಸುತ್ವಾ ಖಣೇನೇವ, ದುರತಿಸ್ಸ ಮುಪಾಗಮಿ.
ತೇ ಉಭೋ ತತ್ಥ ಘಾತೇತ್ವಾ, ತೇಸಂ ಸಬ್ಬಂ ಸಮಾದಿಯ;
ಹನ್ತ್ವಾ ತಂ ಪಕ್ಖಿಯೇ ಸಬ್ಬೇ, ಪುಳತ್ಥಿನಗರಂ ಗಮಿ.
ತದಾ ರೋಹಣದೇಸಮ್ಹಿ, ಭೋಗಾಧಿಪತಿನೋ ಸುತೋ;
ದಾಠಾಸಿವಾದಿಪಾದಸ್ಸ, ಮಹಿನ್ದೋ ನಾಮ ಖತ್ತಿಯೋ.
ಪಿತುನೋ ಸೋ’ಪರಿಜ್ಝಿತ್ವಾ, ರಞ್ಞೋ ಸನ್ತಿಕಮಾಗಮಾ;
ದಿಸ್ವಾ ರಾಜಾಪಿ ಸನ್ತುಟ್ಠೋ, ತಂ ಸಙ್ಗಣ್ಹಿ ಯಥಾರಹಂ.
ತೇನ ಮೇತ್ತಿಂ ಥಿರಂ ಕಾತುಂ, ಧೀತರಂ ದೇವ ನಾಮಿಕಂ;
ತಸ್ಸ ದತ್ವಾನ ಪಾಹೇಸಿ, ಬಲಂ ರೋಹಣಮೇವಸೋ.
ಸೋ ಗನ್ತ್ವಾ ರಾಜಸೇನಾಯ, ಮದ್ದಾಪೇತ್ವಾನ ರೋಹಣಂ;
ಜಮ್ಬುದೀಪಂ ಪಲಾಪೇತ್ವಾ, ಪಿತರಂ ರೋಹಣಂ ಲಭಿ.
ಮಹಾವಿಹಾರೇ ಕಾರೇಸಿ, ಸಲಾಕಗ್ಗಂ ಥಿರಂ ಸುಭಂ;
ಖೋಲಕ್ಖಿಯಮುನಿನ್ದಸ್ಸ, ಪರಿಹಾರಾಯ ದಾಪಯಿ.
ಮಹಾನಾಮವ್ಹಯಂ ಗಾಮಂ, ಪೂಜಯಿತ್ವಾ ಯಥಾಬಲಂ;
ವಡ್ಢಮಾನದುಮಿನ್ದಸ್ಸ, ಜಿಣ್ಣಂ ಗೇಹಞ್ಚ ಕಾರಿಯ.
ರುಕ್ಖಣತ್ಥಾಯ ತಸ್ಸಾ;ದಾ, ಕೋಟ್ಠಾಗಾಮಂ ಬಹುದಯಂ;
ನೀಲಾರಾಮಸ್ಸ ಪಾದಾಸಿ, ಕಾಳುಸ್ಸಂ ನಾಮ ಗಾಮಕಂ.
ಲೋಹರೂಪಸ್ಸ ಪಾದಾಸಿ, ಆರಾಮಸ್ಸ ಚ ಗಾಮಕಂ;
ಜಿಣ್ಣಞ್ಚ ಪಟಿಸಙ್ಖಾಸಿ, ಪಟಿಮಾಯೋ ಚ ಕಾರಯಿ.
ಪಾಸಾದೇ ಚೇತಿಯೋ ಚೇವ, ವಿಹಾರೇ ಚ ಅನಪ್ಪಕೇ;
ಪುಳತ್ಥಿನಗರೇ’ಕಾಸಿ, ವೇಜ್ಜಸಾಲಂ ಮಹಾದಯೋ.
ತಥಾ ಪಣ್ಡಾ ವಿಯಞ್ಚೇವ, ಭೋಗಗಾಮಸಮಾಯುತಂ;
ಪಿಟ್ಠಸಪ್ಪಿನಮನ್ಧಾನಂ, ಸಾಲಾಯೋ ಚ ತಹಿಂ ತಹಿಂ.
ಪೋತ್ಥಕೇಸು ಲಿಖಾಪೇತ್ವಾ, ಅಟ್ಟೇ ಸಮ್ಮಾ ವಿನಿಚ್ಛಿತೇ;
ರಾಜಗೇಹೇ ಠಪಾಪೇಸಿ, ಉಕ್ಕೋಟನಭಯೇನ ಸೋ.
ನಾಗವಡ್ಢನನಾಮಸ್ಸ, ಭೋಗಗಾಮೇ ಬಹೂ ಅದಾ;
ಲೇಖೇ’ಪುಬ್ಬೇ ನ ವಾರೇತ್ವಾ, ಪಾಲೇತ್ವಾ ಪುಬ್ಬಸಾಸನಂ.
ಪಿತರಾ ¶ ಚ ಮಹಾದಾನಂ, ಪುಞ್ಞಮಞ್ಞಮ್ಪಿ ವಾ ಕತಂ;
ಸಬ್ಬಂ ತಮವಿನಾಸೇತ್ವಾ, ನಿಚ್ಚಂ ಸೋ ರಕ್ಖಿ ಸಾದರೋ.
ಮಹೇಸೀ ಚ ಮಹಾರಞ್ಞೋ, ಪುಞ್ಞಾನಿ ಬಹುಕಾರಯಿ;
ಕಣ್ಟಕಂ ಚೇತಿಯಂ ಕಾಸಿ, ದೇವೀ ಚೇತಿಯಪಬ್ಬತೇ.
ಕಾರೇತ್ವಾ ಜಯಸೇನಞ್ಚ, ಪಬ್ಬತಂ ಗಾಮಿಕಸ್ಸದಾ;
ಭಿಕ್ಖುಸಙ್ಘಸ್ಸ ಸಾ ಗಾಮಂ, ಮಹುಮ್ಮಾರಞ್ಚ ತಸ್ಸ ದಾ.
ಸಿಲಾಮೇಘವ್ಹಯಂ ಕತ್ವಾ, ಭಿಕ್ಖುನೀನಮುಪಸ್ಸಯಂ;
ಸಿಲಾಮೇಘವ್ಹಯೇ ದಾಸಿ, ಭಿಕ್ಖುನೀನಞ್ಚ ಪಚ್ಚಯೇ.
ಗಾಮಾಯೇ’ಸುಂ ಪುರಾಕೀತಾ, ವಿಹಾರೋ ತತ್ಥ ಸಾಧನಂ;
ದತ್ವಾ ತೇ ಮೇ ಚಯಿತ್ವಾನ, ವಿಹಾರಸ್ಸೇವ ದಾಪಯಿ.
ಛಾದಯಿತ್ವಾ ಮಹಾರುಕ್ಖೇ, ಸಬ್ಬೇ ಚೇತಿಯಪಬ್ಬತೇ;
ನಾನಾರಾಗೇ ಧಜೇ ಚೇವ, ಪಟಾಕಾಯೋ ಚ ಪೂಜಯಿ.
ಪುಬ್ಬಾರಾಮಕಭಾಗಮ್ಪಿ, ಪಾಸಾದಂ ಪಟಿಸಙ್ಖರಿ;
ಉಸ್ಸಾನವಿಟ್ಠಿಂ ದುಬ್ಭೋಗಂ, ಸುಭೋಗಂ ತಸ್ಸ ಕಾರಯಿ.
ವಿಹಾರಂ ಗಿರಿಭಣ್ಡಞ್ಚ, ನಟ್ಠಂ ಪಾಕತಿಕಂ ಕರಿ;
ಭೋಗಗಾಮೇ ಚ ದಾಪೇಸಿ, ಭಿಕ್ಖೂನಂ ತನ್ನಿವಾಸಿನಂ.
ಅಮ್ಬುಯ್ಯಾನಮ್ಹಿ ಆವಾಸಂ, ಕತ್ವಾ ದಪ್ಪುಳಪಬ್ಬತಂ;
ಭಿಕ್ಖೂನಂ ತಿಸತಸ್ಸಾ’ದಾ, ಸಮ್ಪನ್ನಚತುಪಚ್ಚಯಂ.
ಕಾರೇತ್ವಾ ನೀಲಗಲ್ಲಞ್ಚ, ಆರಾಮಂ ಸೋ ಮನೋರಮಂ;
ದಕವಾರಂ ಬಹುಪ್ಪಾದಂ, ತಸ್ಸ ದಾಪೇಸಿ ಕಾರಿಯ.
ಅರಿಕಾರಿ ವಿಹಾರೇ ಚ, ಪಟಿಸಙ್ಖಾಸಿ ಜಿಣ್ಣಕಂ;
ಸಲಾಕಗ್ಗಞ್ಚ ಪಾಸಾದಂ, ಅಪುಬ್ಬಂಯೇವ ಕಾರಯಿ.
ವಾಹದೀಪೇ ಸಕಾರೇಸಿ, ಸೇನಗ್ಗಬೋಧಿಪಬ್ಬತಂ;
ಧಮ್ಮಂ ತೀಸು ನಿಕಾಯೇಸು, ವಾಚಯಿತ್ಥ ಬಹುಸ್ಸುತೇ.
ಗಣ್ಹಾಪೇಸಿ ಚ ಭಿಕ್ಖೂನಂ, ಅಯೋಪತ್ತೇಸು ಗಣ್ಠಿಕೇ;
ಪುಞ್ಞನ್ತಿ ವುತ್ತಂ ಸಬ್ಬಂ ಸೋ, ನ ಕಿಞ್ಚಿ ಪರಿವಜ್ಜಯಿ.
ಕುಲೀನಾನಮನಾಥಾನಂ, ಇತ್ಥೀನಂ’ದಾ ಪಿಳನ್ಧನಂ;
ಭೋಜನಂ ಭೋಜನತ್ಥೀನಂ, ಬಹು ಸೋ ದಾಸಿ ರತ್ತಿಯಂ.
ಗುನ್ನಂ ಸಸ್ಸಾನಿ ಪಾದಾಸಿ, ಕಾಕಾದೀನಞ್ಚ ಭತ್ತಕಂ;
ತಣ್ಡುಲಞ್ಚ ಕುಮಾರಾನಂ, ಮಧುಫಾಣಿತಸಂಯುತ್ತಂ.
ಏವಂ ¶ ಪುಞ್ಞಾನಿ ಕತ್ವಾನ, ನರಿನ್ದೋ ಸೋ ಸಪಾರಿಸೋ;
ಭುತ್ವಾ ಪಞ್ಚಸು ವಸ್ಸೇಸು, ಮೇದಿನಿಂ ಸಮ್ಪರಿಚ್ಚಜಿ.
ತತೋ ತಸ್ಸ ಸುತೋ ಆಸಿ, ಸೀಹಳಾನಂ ರಥೇಸತೋ;
ಸಬ್ಬರೂಪಗುಣೋಪೇತೋ, ಮಹಿನ್ದೋ ನಾಮ ಖತ್ತಿಯೋ.
ಸೋ ಧಮ್ಮಿಕಸೀಲಾಮೇಘೋ, ಇಚ್ಚಾಸಿ ಧರಣೀತಲೇ;
ಧಮ್ಮದೀಪೋ ಧಮ್ಮಧಜೋ, ಸುದ್ಧಧಮ್ಮಪರಾಯನೋ.
ಪುಬ್ಬಕೇಹಿ ನರಿನ್ದೇಹಿ, ಕತಂ ಧಮ್ಮಪಥಾನುಗಂ;
ಸಬ್ಬಂ ಕಾಸಿ ಅಹಾಪೇತ್ವಾ, ಅಧಮ್ಮಂ ತು ವಿವಜ್ಜಯಿ.
ರಾಜಾರತನಪಾಸಾದೇ, ಕಾತುಂ ಸೋ ನವಕಮ್ಮಕಂ;
ಸಬ್ಬಕಾಲೇಸು ದಾಪೇಸಿ, ಗೇಟ್ಠುಮ್ಬದಕವಾರಕಂ.
ಜಿಣ್ಣಞ್ಚ ಪಟಿಸಙ್ಖಾಸಿ, ಪುಞ್ಞಕಮ್ಮಮಕಾಸಿ ಚ;
ರಜ್ಜಂ ಕತ್ವಾನ ಚತೂಸು, ವಸ್ಸೇಸು ನಿಧನಂ ಗತೋ.
ಅಗ್ಗಬೋಧಿ ತತೋ ರಾಜಾ, ಛತ್ತಂ ಉಸ್ಸಾಪಯಿ ಪುರೇ;
ಕಾರೇನ್ತೋ ಸಬ್ಬಸತ್ತಾನಂ, ಹಿತಂ ಸುಖಮಸೇಸತೋ.
ಧಾತುಪೂಜಂ ಸಕಾರೇಸಿ, ಸತ್ಥುಸಬ್ಬಗುಣಾರಹಂ;
ಪಿತಾಮಹಕತಸ್ಸಾ’ಪಿ, ಸಮ್ಬುದ್ಧಸ್ಸ ಮಹಾಮಹಂ.
ಉದಯಗ್ಗಾದಿಬೋಧಿಞ್ಚ, ಪರಿವೇಣಂ ಸಕಾರಯಿ;
ನಾಮಂ ಗಹೇತ್ವಾ ಪಿತುನೋ, ಅತ್ತನೋ ಚ ನರಾಧಿಪೋ.
ಸಭೋಗಂ ಪರಿವೇಣಞ್ಚ, ಕತ್ವಾ ತಂ ಭೂತನಾಮಕಂ;
ಸಕಾಚರಿಯಕಸ್ಸಾ’ದಾ, ಭಿಕ್ಖೂನಂ ತಿಸತಸ್ಸ ಚ.
ರಾಜಸಾಲಾಯ ದಾಪೇಸಿ, ಚೂಳವಾಪಿಯಗಾಮಕಂ;
ಗಾಮದ್ವಯಞ್ಚ ದಾಪೇಸಿ, ಕಾಳೂಲಮಲ್ಲವಾತಕೇ.
ಪವೇಸಂ ವಿನಿವಾರೇಸಿ, ಉಪೋಸಥದಿನೇಸು ಸೋ;
ಮಚ್ಛಮಂಸಸುರಾದೀನಂ, ಅನ್ತೋನಗರಮತ್ತನೋ.
ಭಿಕ್ಖೂ ವಾ ಚೇತಿಯೇ ವಾ ಸೋ, ವನ್ದಿತ್ವಾ ನಿಕ್ಖಮಂ ತತೋ;
ವಾಲುಕಾ ಹಾ ವಿನಸ್ಸನ್ತು, ಇತಿ ಪಾದೇಸು ವೋಧಯೀ.
ಯಂ ಯಂ ಸೋವಗ್ಗಿಯಂ ಕಮ್ಮಂ, ಕಮ್ಮಂ ನಿಸ್ಸರಣವಹಂ;
ವತ್ಥುತ್ತಯೇ ಪಸನ್ನೋ ಸೋ, ಕಮ್ಮಂ ತಂ ಸಬ್ಬಮಾಚರಿ.
ಮಾತುಪಟ್ಠಾನನಿರತೋ, ರತ್ತಿನ್ದಿವಮಹೋಸಿಸೋ;
ಗನ್ತ್ವಾ ತಸ್ಸಾ ಉಪಟ್ಠಾನಂ, ಪಾತೋವ ಕಿರ ಭೂಪತಿ.
ಸೀಸಂ ¶ ತೇಲೇನ ಮಕ್ಖೇತ್ವಾ, ಉಬ್ಬಟ್ಟೇತ್ವಾನ ಜಲ್ಲಿಕಂ;
ನಖೇ ವಿಸುದ್ಧೇ ಕತ್ವಾನ, ನಹಾಪೇತ್ವಾನ ಸಾದರಂ.
ಅಚ್ಛಾದೇತ್ವಾ ನವಂ ವತ್ಥಂ, ಸುಖಸಮ್ಫಸ್ಸಮತ್ತನೋ;
ವತ್ಥಂ ಛಡ್ಡಿತಮಾದಾಯ, ಪೇಲ್ಲೇತ್ವಾ ಸಯಮೇವ ತಂ.
ತಸ್ಸ ತೋಯೇನ ಸಿಞ್ಚಿತ್ವಾ, ಸೀಸಂ ಸಮಕುಟಂ ಸಕಂ;
ಗನ್ಧಮಾಲಾಹಿ ತಂ ಸಮ್ಮಾ, ಚೇತಿಯಂ ವಿಹ ಪೂಜಿಯ.
ನಮಸ್ಸಿತ್ವಾನ ತಿಕ್ಖತ್ತುಂ, ಕತ್ವಾ ತಂ ಸೋ ಪದಕ್ಖಿಣಂ;
ದಾಪೇತ್ವಾ ಪರಿಸಾಯ’ಸ್ಸಾ, ವತ್ಥಾದೀನಿ ಯಥಾರುಚಿಂ.
ಸಹತ್ಥೇನೇವ ಭೋಜೇತ್ವಾ, ಭೋಜನಂ ತಂ ಮಹಾರಹಂ;
ಭುತ್ಥಾವಸೇಸಂ ಭುಞ್ಜಿತ್ವಾ, ಸಮಾಕಿರಿಯಮತ್ಥಕೇ.
ಭೋಜೇತ್ವಾ ಪರಿಸಂ ತಸ್ಸಾ, ರಾಜಭೋಜನಮುತ್ತಮಂ;
ಸಜ್ಜೇತ್ವಾ ವಾಸಗೇಹಞ್ಚ, ಸುಗನ್ಧಪರಿವಾಸಿತಂ.
ಸಹತ್ಥಾ ಪಞ್ಞಪೇತ್ವಾನ, ಸಯನಂ ತತ್ಥ ಸಾಧುಕಂ;
ಪಾದೇ ಧೋವಿಯ ಮಕ್ಖೇತ್ವಾ, ಗನ್ಧತೇಲೇನ ಸಣ್ಹಕಂ.
ಸಮ್ಬಾಹೇನ್ತೋ ನಿಸೀದಿತ್ವಾ, ಕತ್ವಾ ನಿದ್ದಮುಪೇತಕಂ;
ಕತ್ವಾ ಪದಕ್ಖಿಣಂ ಮಞ್ಚಂ, ತಿಕ್ಖತ್ತುಂ ಸಾಧುವನ್ದಿಯ.
ಆರಕ್ಖಕೇ ನಿಯೋಜೇತ್ವಾ, ದಾಸೇಕಮ್ಮಕರೇಪಿ ಚ;
ತಸ್ಸಾ ಪಿಟ್ಠಿಮಕತ್ವಾನ, ಅಪಕ್ಕಮೇವ ಪಿಟ್ಠಿತೋ.
ಠತ್ವಾ ಅದಸ್ಸನೇ ಠಾನೇ, ತಿಕ್ಖತ್ತುಂ ಪುನ ವನ್ದಿಯ;
ಸನ್ತುಟ್ಠೋ ತೇನ ಕಮ್ಮೇನ, ಸರನ್ತೋ ತಂ ಪುನಪ್ಪುನಂ.
ಗೇಹಂ ಯಾತಿ ಸಜೀವನ್ತಂ, ಏವಮೇವ ಉಪಟ್ಠಹಿ;
ಏಕದಾ ದಾಸವಾದೇನ, ವನ್ದಿತ್ವಾ ದಾಸಮತ್ತನೋ.
ತೇನತ್ತನೋ ಕಥಾಪೇಸಿ, ಖಮಾಪೇತುಂ ಸಯಂ ವಚೋ;
ಅತ್ತಾನಂ ಭಿಕ್ಖುಸಙ್ಘಸ್ಸ, ದಾಪಯಿತ್ವಾನ ಮಾತರಾ.
ಧನಮತ್ಥಗ್ಘನಂ ಞತ್ವಾ, ಭುಜಿಸ್ಸೋ ಆಸಿ ಬುದ್ಧಿಮಾ;
ಏವಂ ಪುಞ್ಞಪರೋ ಹುತ್ವಾ, ಕತ್ವಾ ದೀಪಸ್ಸ ಸಙ್ಗಹಂ.
ಏಕಾದಸಹಿ ವಸ್ಸೇಹಿ, ದೇವಲೋಕಮುಪಾಗಮಿ;
ತಸ್ಸಾನುಜೋ ದಪ್ಪುಳೋ’ಥ, ರಾಜಾ ಹೋಸಿ ತದಚ್ಚಯೇ.
ಸಬ್ಬಂ ಪುಬ್ಬಕರಾಜೂನಂ, ಚರಿಯಂ ಸೋ ಸಮಾಚರಿ;
ತದಾ ಮಹಿನ್ದನಾಮಸ್ಸ, ಪುತ್ತಾರೋಹಣಸಾಮಿನೋ.
ಪಿತರಾ ¶ ನಿಹಟಾ’ಗಞ್ಛುಂ, ರಾಜಾನಂ ಮಾತುಲಂ ಸಕಂ;
ಸೋ ತೇ ದಿಸ್ವಾ ಪವತ್ತಿಂ ತಂ, ಸುತ್ವಾ ದತ್ವಾ ಮಹಾಬಲಂ.
ಪಾಹೇಸಿ ಪಿತರಾ ಯುದ್ಧಂ, ಕಾತುಂ ಬನ್ಧು ಹಿತೇ ರತೇ;
ಮಹಿನ್ದೋಪಿ ತಥಾಭಾವಂ, ವಿದಿತ್ವಾ ರೋಹಣಾಧಿಪೋ.
ಯುದ್ಧಂ ಪಟಿಪದೇಯೇವ, ತೇಸಂ’ಕಾಸಿ ಮಹಾಬಲೋ;
ತೇ ಉಭೋಪಿ ಪಲಾಯಿಂಸು, ದತ್ವಾ ಸೇನಾಯ ನಾಯಕಂ.
ಪುನಾಗನ್ತ್ವಾ ಮಹೀಪಾಲಂ, ಸೇವಮಾನಾ ಇಧಾ’ವಸುಂ;
ಪಿತಾಪಿ ತೇನ ಸನ್ತುಟ್ಠೋ, ಅಞ್ಞೇನ ಸಕಬನ್ಧುನಾ.
ಯುಜ್ಝನ್ತೋ ಮರಣಂ ಗಞ್ಛಿ, ಞಾತಿಸೋಪಿ ಮತೋ ಕಿರ;
ತದಾ’ದಾ ಭಾಗಿನೇಯ್ಯಸ್ಸ, ರಾಜಾ ಕಿತ್ತಗ್ಗಬೋಧಿನೋ.
ಸಬ್ಬರೂಪಗುಣೋಪೇತಂ, ಧಿತರಂ ದೇವ ನಾಮಿಕಂ;
ಸೋ ದಪ್ಪುಳಂ ಠಪೇತ್ವಾನ, ಸೇವತ್ಥಂ ತಸ್ಸ ರಾಜಿನೋ.
ಸಯಂ ಸೇನಙ್ಗಮಾದಾಯ, ರೋಹಣಂ ಸಮುಪಾಗಮಿ;
ರೋಹಣಾಧಿಪತಿ ಹುತ್ವಾ, ಸಬ್ಬಾಕಾರಸಮಪ್ಪಿತೋ.
ಪುತ್ತಧೀತಾಹಿ ವಡ್ಢೇನ್ತೋ, ವಾಸಂ ತತ್ಥೇವ ಕಪ್ಪಯಿ;
ರಾಜಾಕಾಸಿ ದುಮಿನ್ದಸ್ಸ, ಘರಂ ಜಿಣ್ಣಂ ನವಂ ಥಿರಂ.
ಸೋವಣ್ಣಖಚಿತಂ ಕಮ್ಮಂ, ಮಙ್ಗಲೇನ ಚ ತಸ್ಸ ಸೋ;
ಅತ್ತನೋ ರಾಜಭಾವಸ್ಸ, ಸತ್ಥುಪಾರಮಿತಾಯ ಚ.
ಸಮ್ಮಾನುಚ್ಛವಿಕಂ ಕತ್ವಾ, ಮಹಾಪೂಜಂ ಪವತ್ತಯಿ;
ಜಿಣ್ಣಂ ಕಾರೇಸಿ ಪಾಸಾದಂ, ಹತ್ಥಿಕುಚ್ಛಿವಿಹಾರಕೇ.
ವಾಹದೀಪಸ್ಸ ಆರಾಮಂ, ಲಾವರಾವಞ್ಚ ಪಬ್ಬತಂ;
ವಿಹಾರೇ ಜೇತನಾಮೇ ಚ, ಕತ್ವಾ ಸೋವಣ್ಣಯಂ ಮುನಿಂ.
ವಡ್ಢೇತ್ವಾ ಬೋಧಿಗೇಹಮ್ಹಿ, ಪೂಜಂಕಾಸಿ ಅಚಿನ್ತಿಯಂ;
ಅನುಸಂವಚ್ಛರಂ ದೀಪೇ, ವತ್ಥದಾನಂ ಪವತ್ತಯಿ.
ಮಹಾಪಾಳಿಞ್ಚ ವಡ್ಢೇಸಿ, ಭತ್ತಗ್ಗಮವಲೋಕಯೀ;
ತುಲಾಭಾರಞ್ಚ ದಾಪೇಸಿ, ಜಿಣ್ಣಞ್ಚ ಪಟಿಸಙ್ಖರಿ.
ಚಾರಿತ್ತಂ ಪುಬ್ಬರಾಜೂನಂ, ಪಾಲೇಸಿ ಮನವಜ್ಜಿಯಂ;
ತಸ್ಸಾ’ಸಿ ವಜಿರೋ ನಾಮ, ಸೇನಾಪತಿ ಮಹಾಪತಿ.
ಕಚ್ಛವಾಲಂ ಸಕಾರೇಸಿ, ಆರಾಮಂ ಪಂಸುಕೂಲಿನಂ;
ಥೂಪಾರಾಮಮ್ಹಿ ಥೂಪಸ್ಸ, ಘರಂ ಛಾದೇಸಿ ಸಾಧುಕಂ.
ಇಟ್ಠಕಾಹಿ ¶ ಸುವಣ್ಣಾಹಿ, ಹೇಮದ್ವಾರೇ ಚ ಕಾರಯಿ;
ಏವಂ ಸೋಳಸವಸ್ಸಾನಿ, ಕತ್ವಾ ರಜ್ಜಂ ನರಾಧಿಪೋ.
ಅಗಮಾ ಸಬ್ಬಸತ್ತಾನಂ, ಗನ್ತಬ್ಬಂ ದೇಸಮೇವ ಸೋ;
ತಸ್ಮಿಂ ರಾಜಿನಿ ಸಮ್ಪತ್ತೇ, ದೇವಲೋಕಂ ತದಾ ಅಹು.
ಅಗ್ಗಬೋಧಿಸನಾಮೋ’ಥ, ಆಣಾಭೇರಿಂ ಚರಾಪಯಿ;
ಪಿತಾ ತಸ್ಸ ಸಭಾತುಸ್ಸ, ಪುತ್ತಂ ಮಹಿನ್ದನಾಮಕಂ.
ರಜ್ಜತ್ಥಂ ಸಕಪುತ್ತಾನಂ, ಆದಿಪಾದಂ ನ ಕಾರಯೀ;
ಆದರಂ ಸೋ ಸಬನ್ಧೂನಂ, ಕನಿಟ್ಠಾನಮ್ಪಿ ಕಾತವೇ.
ಅಸಹನ್ತೋ ಪಲಾಯಿತ್ಥ, ಪರತೀರಂ ಸಮಾಕುಲೋ;
ತೇ ಸಮಾಗಮನಂ ಸುತ್ವಾ, ಪೇಸಯಿತ್ವಾ ಮಹಾಬಲಂ.
ಕಾರೇತ್ವಾ ಯುದ್ಧಮೇತೇಹಿ, ಸೀಸಂ ತೇಸಂ ಸಗಣ್ಹಯಿ;
ನಿಕಾಯೇಸು ವಿಚಾರೇತ್ವಾ, ಕತ್ತಬ್ಬಂ ಸಬ್ಬಮೇವ ಸೋ.
ದೀಪೇ’ಪಿ ಸಕಲೇ ಕಾಸಿ, ಪಾಪಾಚಾರನಿವಾರಣಂ;
ಭಿಕ್ಖೂ ಚೂಳವಿಹಾರೇಸು, ಯಾಗುಂ ಗಣ್ಹನ್ತಿ ಸಬ್ಬದಾ.
ಮಹಾವಿಹಾರೇ ತಂ ಸುತ್ವಾ, ರಾಜಾ ನಿಬ್ಬಿನ್ನಮಾನಸೋ;
ಕಣ್ಠಪಿಟ್ಠಿಮಹಾಗಾಮಂ ತಥಾ ಯಾಬಾಲಗಾಮಕಂ.
ತೇಲಗಾಮಂ ಬಹುದಞ್ಚ, ದಕವಾರಂ ಪದಾಪಿಯ;
ಯಾಗುಂ ಗಹೇತುಂ ಯೋಜೇಸಿ, ವಿಹಾರೇಸು’ಪಿ ಭಿಕ್ಖವೋ.
ತತೋ ಪಟ್ಠಾಯ ತಂ ಯಾಗುಂ, ಸಬ್ಬೇ ಗಣ್ಹಿಂಸು ಸಾದರಾ;
ದೀಪೇ ಭೇರಿಂಚ ರಾಪೇತ್ವಾ, ಸನ್ನಿಪಾತಿಯ ಯಾಚಕೇ.
ಸುವಣ್ಣಂ ಸೋಪದಾಪೇಸಿ, ಯಥಿಚ್ಛಂ ದಿವಸತ್ತಯಂ;
ಏವಮಾದಿಂ ಸ ಕತ್ವಾನ, ಪುಞ್ಞವಂ ವಸ್ಸೇಹಿ ತೀಹಿ ಚ.
ವತ್ಥುತ್ತಯಪಸಾದಸ್ಸ, ಫಲಂ ಪಸ್ಸಿತುಮತ್ತನೋ;
ರಾಜಾ ದಿಬ್ಬೇನ ಯಾನೇನ, ಗಚ್ಛನ್ತೋ ವಿಯ ಸೋ ಮರಿ.
ಏವಂ ಅನಿಚ್ಚಾ ವತ ಸಬ್ಬದೇಹಿನೋ;
ಸಬ್ಬಞ್ಞೂನೋಪೇವ ಮುಪೇತಿ ಮಚ್ಚುಂ;
ಪಹಾಯ ತಸ್ಮಾ ಭವರಾಗಜಾತಂ;
ಬುಧೋ ಸುಬುದ್ಧಿವಿಭವೇ ಭವೇಯ್ಯ.
ಸುಜನಪ್ಪಸಾದಸಂವೇಗತ್ಥಾಯ ಕತೇ ಮಹಾವಂಸೇ
ಪಞ್ಚರಾಜಕೋ ನಾಮ
ಸತ್ತಚತ್ತಾಲೀಸತಿಮೋ ಪರಿಚ್ಛೇದೋ.
ಅಟ್ಠಚತ್ತಾಲೀಸತಿಮ ಪರಿಚ್ಛೇದ
ಏಕರಾಜಕೋ
ತತೋ ¶ ತಸ್ಸಾ’ನುಜೋ ಸೇನೋ, ಛತ್ತಂ ಉಸ್ಸಾಪಯೀ ಪುರೇ;
ಪಿಯಂ’ವ ಪುತ್ತಂ ಪಸ್ಸನ್ತೋ, ಸತ್ತೇ ಸಬ್ಬೇ ಮಹಾಧನೋ.
ಚರಿಯಂ ಪುಬ್ಬರಾಜೂನಂ, ಸಮಾಚರಿ ಯಥಾಭತಂ;
ಅಪುಬ್ಬಮ್ಪಿ ಚ ವತ್ತೇಸಿ, ಚರಿಯಂ ಧಮ್ಮಸಂಹಿತಂ.
ಭಿಕ್ಖೂನಂ ಭಿಕ್ಖೂನೀನಞ್ಚ, ಞಾತೀನಂ ದೀಪವಾಸಿನಂ;
ಮಚ್ಛಾನಂ ಮಿಗಪಕ್ಖೀನಂ, ಕತ್ತಬ್ಬಂ ಸ ಸಮಾಚರಿ.
ಮಹಿನ್ದಂ ಪರತೀರಂ ಸೋ, ಗತಂ ಯೋಜಿಯಮಾರಯಿ;
ಏವಂ ಸೋ ಸುವಿಸೋಧೇಸಿ, ರಜ್ಜಪಚ್ಚತ್ಥಿಕೇ’ಖಿಲೇ.
ಮಹಾದಾನಂ ಪವತ್ತೇಸಿ, ಯಾಚಕಾನಂ ಧನೇಸಿನಂ;
ಭಿಕ್ಖೂನಂ ಬ್ರಾಹ್ಮಣಾನಞ್ಚ, ಮನುಞ್ಞಂ ರಾಜಭೋಜನಂ.
ಅಹೇಸುಂ ಅನುಜಾತಸ್ಸ, ಮಹಿನ್ದೋ ಕಸ್ಸಪೋ ತಥಾ;
ಉದಯೋತಿ ತಯೋ ತೇಸು, ಮಹಿನ್ದೋ ಯುವರಾಜಕೋ.
ಹುತ್ವಾ ತಸ್ಸಾನುವತ್ತನ್ತೋ, ಸಕ್ಕಚ್ಚಂ ತಮುಪಟ್ಠಹಿ;
ಸಙ್ಘಾನಾಮಾಸಿ ರಾಜಸ್ಸ, ಭರಿಯಾ ತಸ್ಸ ರಾಜಿನೀ.
ಕೀಳನತ್ಥಂ ಸಮುದ್ದಸ್ಸ, ಗತೇ ರಾಜಿನಿ ಪಟ್ಟನಂ;
ಉದಯೋ ಆದಿಪಾದೋಸೋ, ಓಹೀನೋ ನಗರೇ ತದಾ.
ನಾಲನಾಮಂ ಗಹೇತ್ವಾನ, ಧೀತರಂ ಮಾಣಿಲಾನಿಯಾ;
ರಕ್ಖಿತಂ ರಾಜರಕ್ಖಾಯ, ಪುಳತ್ಥಿನಗರಂ ಅಗಾ.
ರಾಜಾ ತಸ್ಮಿಂ ಅಕುಜ್ಝಿತ್ವಾ, ಸನ್ಧಿಂ ಕತ್ವಾ ಅಕುಪ್ಪಿಯಂ;
ಮಹಾದೀಪಾದಂ ಪೇಸೇತ್ವಾ, ತೋಸತ್ವಾ ತಂ ಇಧಾನಯಿ.
ಏವಂ ಸಮಗ್ಗಾ ತೇ ಆಸುಂ, ತತೋ ಪಟ್ಠಾಯ ಖತ್ತಿಯಾ;
ರಕ್ಖನ್ತಾ ಸಾಸನಂ ಲೋಕಂ, ವಸಿಂಸು ಸುಸಮಾಹಿತಾ.
ತತೋ ಕೇನಚಿ ಕಾಲೇನ, ಪಣ್ಡುರಾಜಾ ಮಹಾಬಲೋ;
ಜಮ್ಬುದೀಪಾ ಇಧಾ’ಗಮ್ಮ, ದೀಪ ಗಣ್ಹಿತುಮಾರಭಿ.
ರಾಜಾ ¶ ಸುತ್ವಾ ಮಹಾಸೇನಂ, ಪೇಸುಯಿತ್ಥ ತದನ್ತಿಕಂ;
ಅಮಚ್ಚಾನಂ ವಿವಾದೇನ, ಥದ್ಧೋತಾರೋ ನಾರಾಧಿಪೋ.
ಪಣ್ಡುರಾಜಾ ವಿನಾಸೇನ್ತೋ, ಸಬ್ಬಂ ತಂ ದೇಸಮುತ್ತರಂ;
ಖನ್ಧಾವಾರಂ ನಿವೇಸೇಸಿ, ಮಹಾತಾಲಿತಗಾಮಕೇ.
ವಸನ್ತಾ ದಮಿಳಾ ಏತ್ಥ, ಬಹವೋ ಯೇ ತಹಿಂ ತಹಿಂ;
ಸಬ್ಬೇ ತಂ ಪಕ್ಖಿಯಾಹೇಸುಂ, ತತೋ ಸೋ ಬಲವಾ ಅಹು.
ತತ್ಥ ಗನ್ತಾ ಮಹಾಸೇನಾ, ರಞ್ಞೋ ಯುಜ್ಝಿತುಮಾರಭಿ;
ಹತ್ಥಿಕ್ಖನ್ಧಗತೋ ಪಣ್ಡು-ರಾಜಾಪಿ ಸಮುಪಾವಿಸಿ.
ಅಹು ದಮಿಳಸೇನಾಸಾ, ಪಸ್ಸನ್ತಿ ಸಾಮಿನೋ ಮುಖಂ;
ಸಮ್ಪತ್ತಬಲಹುಸ್ಸಾಹಾ, ತದತ್ಥೇ ಚತ್ತಜೀವಿತಾ.
ದೀಪಸೇನಾ ತು ಸಾಮಿನ-ಮಭಾವೇನ ನಿರುಸ್ಸುಕ್ಕಾ;
ಯುಜ್ಝನ್ತಿ ಪರಿಭಿನ್ದಿತ್ವಾ, ಪಲಾಯಿತ್ಥ ತತೋ ತತೋ.
ಓತರಿತ್ಥಮಹಾಸೇನಾ, ಪಣ್ಡುರಾಜಾಸ್ಸ ತಙ್ಖಣೇ;
ಮಾರಸೇನಾವ ಗಚ್ಛನ್ತಿ, ವಿಚುಣ್ಣೇನ್ತಿ ಮಹಾಜನಂ.
ರಾಜಾ ಸೇನಾಯ ಭಿನ್ನತ್ತಂ, ಸುಕ್ಕಾ ಸಬ್ಬಂ ಸಮಾದಿಯ;
ಹತ್ಥಸಾರಂ ಪುರಂ ಹಿತ್ವಾ, ಮಲಯಾಭಿಮುಖೋ ಗತೋ.
ತತೋ ಹತ್ಥಿಂ ಸಮಾರುಯ್ಹ, ಯುವರಾಜಾ ಮಹಿನ್ದಕೋ;
ಯುಜ್ಝನ್ತೋ ಸಕಸೇನಾಯ, ಪಲಾತತ್ತಂ ಸಮೇಕ್ಖಿಯ.
ಏಕೇನಮೇ ನ ಸಕ್ಕಾ ವೇ, ಸಬ್ಬೇ ಏತೇಹಿ ಮಾರಿತುಂ;
ಏತೇಸಂ ನ ಚ ನೀಚಾನಂ, ಹತ್ಥೇಸು ಮರಣಂ ಸುಖಂ.
ತಸ್ಮಾ ವರಂ ಮೇ ಮರಣಂ, ಮಯಾ ಏವೇತಿ ಚಿನ್ತಿಯ;
ಹತ್ಥಿಕ್ಖನ್ಧಗತೋಯೇವ, ಛಿನ್ದಿ ಸೋ ಸೀಸಮತ್ತನೋ.
ತಂ ದಿಸ್ವಾ ಬಹವೋ ಸೀಸೇ, ತತ್ಥ ಛಿನ್ದಿಂಸು ಸೇವಕಾ;
ತಂ ದಿಸ್ವಾ ದಮಿಳೀ ಸೇನಾ, ಹಟ್ಠತುಟ್ಠಾ ಪಮೋದಿಸಾ.
ಏತಂ ಸಬ್ಬಂ ಸಮೇಕ್ಖಿತ್ವಾ, ಆದಾಪಾದೋ ಸಕಸ್ಸಪೋ;
ತುರಙ್ಗವರಮಾರುಯ್ಹ, ಸುಸನ್ನದ್ಧೋ ಮಹಾಯುಧೋ.
ವಿಹಾರಮುಪಸಙ್ಕಮ್ಮ, ಅಭಯಂ ಏಕಕೋವ ಸೋ;
ತಾದಿಸಮ್ಪಿ ಮಹಾಸೇನಂ, ಓಗಾಹೇತ್ವಾ ವಿದಾರಯಿ.
ಸುಪಣ್ಣೋ ವಿಯ ಗಣ್ಹನ್ತೋ, ಭೂಜಗೇನ ಸಲಿಲಾಲ ಯೇ;
ಸೋ ತಂ ಸಬ್ಬಂ ನಿವತ್ತೇಸಿ, ಅತ್ತಾನಞ್ಚ ಸುಗೋಪಯಿ.
ಅಸ್ಸೋ ¶ ಏಕೋವ ದಿಸ್ಸಿತ್ಥ, ತುರಙ್ಗಾವಲಿಸನ್ನಿಭೋ;
ಅತ್ತನೋ ಸೋ ಜನಂ ಕಞ್ಚಿ, ಅಪಸ್ಸನ್ತೋ’ನುಗಾಮಿನಂ.
ಕಿಂ ಮೇ ಏಕೇನ ವೇರಿನಂ, ಪೂರಿತೇನ ಮನೋರಥಂ;
ಕಾಲನ್ತರೇಹಂ ಜೀವನ್ತೋ, ಪೂರೇಸ್ಸಂ ಮೇ ಮನೋರಥಂ.
ತಸ್ಮಾ ಗನ್ತುಂವ ಯುತ್ತನ್ತಿ, ನಿಮ್ಫೋಟೇತ್ವಾ ಮಹಾಬಲಂ;
ನಿಬ್ಭಯೋವ ಮಹಾಯೋಧೋ, ಕೋಣ್ಡಿವಾತಮುಪಾಗಮಿ.
ಪಣ್ಡುರಾಜಾ ಮಹಾಸೇನಾ, ಅಗ್ಗಹೇಸಿ ತತೋ ಪುರಂ;
ಸೀಸಂ ತಂ ಯುವರಾಜಸ್ಸ, ಪಣ್ಡುರಾಜಸ್ಸ ದಸ್ಸಯುಂ.
ಸೋ ತಂ ದಿಸ್ವಾ ಚ ಝಾಪೇತ್ವಾ, ರಾಜೂನಂ ಪಣ್ಡುದೇಸಿನಂ;
ಸಬ್ಬಮಾಳಾಹನೇ ಕಿಚ್ಚಂ, ತಸ್ಸ ಕಾತುಂ ನಿಯೋಜಯಿ.
ಸಬ್ಬಂ ಸಾರಂ ಹರಾಪೇಸಿ, ಭಣ್ಡಾಗಾರಮ್ಹಿ ರಾಜಿನೋ;
ಅಗ್ಗಣ್ಹಿತ್ಥ ಗಹೇತಬ್ಬಂ, ವಿಹಾರೇ ನಗರೇಪಿ ಚ.
ಪಾಸಾದೇ ರತನೇ ಸಬ್ಬೇ, ಸೋವಣ್ಣಂಸತ್ಥುಬಿಮ್ಬಕಂ;
ಸಿಲಾಮಯ ಮುನಿನ್ದಸ್ಸ, ಚಕ್ಖುಭೂಕ ಮಣಿದ್ವಯಂ.
ತಥಾ ಸೋವಣ್ಣಪಟ್ಟೇ ಚ, ಥೂಪಾರಾಮಮ್ಹಿ ಚೇತಿಯೇ;
ಸುವಣ್ಣ ಪಟಿಮಾಯೋ ಚ, ವಿಹಾರೇಸು ತಹಿಂ ತಹಿಂ.
ಸಬ್ಬಂ ಗಹೇತ್ವಾ ನಿಸ್ಸಾರಂ, ಲಙ್ಕಾದೀಪ ಮಕಾಸಿ ಸೋ;
ಛಡ್ಡಯಿತ್ಥ ಪುರಂ ರಮ್ಮ, ಯಕ್ಖಭಕ್ಖಿತ ರೂಪಕಂ.
ರಾಜಾ’ಪಿ ರಕ್ಖಂ ದತ್ವಾನ, ಮಹಾಮಗ್ಗೇ ತಹಿಂ ತಹಿಂ;
ಗಙ್ಗಾದ್ವಯ ಮುಖೇ ವಾಸಂ, ಕಪ್ಪೇಸಿ ಪರಿಸಙ್ಕಿತೋ.
ಪಣ್ಡುರಾಜಾ ತತೋ ಸದ್ಧಿಂ, ಕಾತುಂ ಸೀಹಳಸಾಮಿನಾ;
ಅಮಚ್ಚೇ ತತ್ಥ ಪೇಸೇಸಿ, ದಿಸ್ವಾ ತೇ ಸೀಹಲಾಧಿಪೋ.
ಸುಣಿತ್ವಾ ಸಾಸನಂ ತೇಸಂ, ಸಬ್ಬಂ ತಂ ಸಮ್ಪಟಿಚ್ಛಿಯ;
ದೂತಾನಂ ಕಾರಯಿತ್ವಾನ, ಯಥಾಕಾಮೇನ ಸಙ್ಗಹಂ.
ಹತ್ಥಿದ್ವಯಂ ಸದತ್ವಾನ, ಸಬ್ಬಮಾಭರಣಮ್ಪಿ ಚ;
ತಸ್ಸ ಪೇಸೇಸಿ ದೂತೇಸೋ, ಅತ್ತನೋಪಿ ಹಿತಾವಹೇ.
ಪಣ್ಡುರಾಜಾ ಸಿತಂ ಸಬ್ಬಂ, ದಿಸ್ವಾ ಸನ್ತುಟ್ಠಮಾನಸೋ;
ನಿಯ್ಯಾತೇತ್ವಾನ ದೂತಾನಂ, ತದಹೇವ ಮಹಾಪುರಂ.
ನಿಕ್ಖಮಿತ್ವಾ ಪುರಾ ಗನ್ತ್ವಾ, ನ ಚಿರೇನೇವ ಪಟ್ಟನಂ;
ತತ್ಥ ಆರುಯ್ಹ ನಾವಂ ಸೋ, ಸಕ ದೇಸ ಮುಪಾಗಮಿ.
ತತೋ ¶ ಆಗಮ್ಮ ನಗರಂ, ಸೀಲಾಮೇಘೋ ಮಹೀಪತಿ;
ಯಥಾಠಾನೇ ಠಪೇತ್ವಾನ, ದೀಪಂ ವಸಿ ಸಮಾಹಿತೋ.
ಭಾತರಂ ದುತಿಯಂ ಕತ್ವಾ, ಉದಯಂ ನಾಮ ಖತ್ತಿಯಂ;
ಮಹಾದೀಪಾದಂ ತಸ್ಸಾ’ದಾ, ಸೋಗತ್ಥಂ ದಕ್ಖಿಣಂ ದಿಸಂ.
ಸೋಪಿ ಖೋ ನ ಚಿರೇನೇವ, ಕತ್ವಾ ಪುಞ್ಞಂ ಯಥಾರಹಂ;
ರೋಗೇನೇಕೇನ ಸಮ್ಫುಟ್ಠೋ, ಪವಿಟ್ಠೋ ಮಚ್ಚುನೋ ಮುಖಂ.
ಕಸ್ಸಪೋ ಆದಿಪಾದೋಪಿ, ಪುಲತ್ಥಿನಗರೇ ವಸಂ;
ಯೋಜೇತ್ವಾ ಪಣ್ಡುರಾಜೇನ, ಅಹೋಸಿ ಕಿರ ಮಾರಿತೋ.
ತದಾ ಕಸ್ಸಪನಾಮಸ್ಸ, ಪುತ್ತಾ ಆಸುಂ ಮಹಾರಹಾ;
ಆದಿಪಾದಸ್ಸ ಚತ್ತಾರೋ, ಧಞ್ಞಲಕ್ಖಣ ಸಞ್ಞುತಾ.
ಯೋ ಸೇನಂ ಸಬ್ಬಪಠಮೋ, ಸೇನೋ ನಾಮ ಕುಮಾರಕೋ;
ಸೂರೋ ವೀರೋ ಮಹುಸ್ಸಾಹೋ, ರಾಜಭಾರಕ್ಖಮೋ ಸಮೋ.
ರಾಜಾ ಮಹಾದೀಪಾದತ್ತಂ, ತಸ್ಸ ದತ್ವಾ ಯಥಾವಿಧಿಂ;
ಭೋಗತ್ಥಂ ದಕ್ಖಿಣಂ ದೇಸಂ, ಸವಾಹನ ಮುಪಾದಿಸಿ.
ರೋಹಣಾಧಿಪತಿಸ್ಸಾ’ಸುಂ, ಪುತ್ತಾ ಕಿತ್ತಗ್ಗಬೋಧಿತೋ;
ಚತ್ತಾರೋ ಧೀತರೋ ತಿಸ್ಸೋ, ದಸ್ಸನೇಯ್ಯಾ ಮನೋರಮಾ.
ತದಾ ಜೇಟ್ಠಸುತಂ ತಸ್ಸ, ಮಹಿನ್ದಂ ನಾಮ ಖತ್ತಿಯಂ;
ಪಿತುಚ್ಛಾ ಮಾರಯಿತ್ವಾನ, ದೇಸಂ ಗಣ್ಹಿ ಸಸಾಧನಂ.
ಭಾತರೋ ತೇ ತಯೋ ತಸ್ಮಿಂ,
ಸಂರುಟ್ಠಾ ಭಾತು ಘಾತನೇ;
ಆದಾಯ ಭಗೀನೀ ತಿಸ್ಸೋ,
ರಞ್ಞೋ ಸನ್ತಿಕಮಾಗಮುಂ.
ರಾಜಾಪಿ ದಿಸ್ವಾ ತೇತೀವ, ಮಮಾಯನ್ತೋ ದಯಾಲುಕೋ;
ಸಬ್ಬೇ ದೇವಕುಮಾರೇವ, ಸುಖಂ ವಡ್ಢೇಸಿ ಪೇಮವಾ.
ತತೋ ಕಸ್ಸಪನಾಮಂ ಸೋ, ತೇಸಂ ಜೇಟ್ಠಂ ನರಿಸ್ಸರೋ;
ದೇಸಂ ತಂ ಗಣ್ಹ ಯಾಹೀತಿ, ದತ್ವಾ ಬಲಮಪೇಸಯಿ.
ಸೋ’ಪಿ ಗನ್ತ್ವಾನ ತಂ ಹನ್ತ್ವಾ, ರೋಹಣಂ ಕಸಿಣಮ್ಪಿ ತಂ;
ಕತ್ವಾ ಹತ್ಥಗತಂ ತತ್ಥ, ವಸಿತ್ಥ ನಿರುಪದ್ದವೋ.
ಅಥ ಸೋ ಭಾತರೋ ದ್ವೇ’ಪಿ, ಸೇನಞ್ಚ ಉದಯಂ ತಥಾ;
ಪಕ್ಕೋಸಿತ್ವಾನ, ಭಾಜೇತ್ವಾ, ದೇಸಂ ತೇಹಿ ಸಹಾವಸಿ.
ರಾಜಾ ¶ ತಾ ಸಾಧು ವಡ್ಢೇತ್ವಾ, ವಯಪತ್ತಾಸು ತೀಸು ಸೋ;
ರಾಜಕಞ್ಞಾಸು ಧಞ್ಞಾಸು, ದೇವಚ್ಛರಸೂ ರೂಪಿಸು.
ಠಪೇತ್ವಾ ರಾಜಿನಿ ಠಾನೇ, ಉಪರಾಜಸ್ಸ ದಾಪಯಿ;
ಸಙ್ಘನಾಮಂ ಮಹಾಭೋಗಂ, ದತ್ವಾ ರಜ್ಜಸರಿಕ್ಖಕಂ.
ಕಣಿಟ್ಠೋ ಉಪರಾಜಸ್ಸ, ಮಹಿನ್ದೋ ನಾಮ ಭಾತುಕೋ;
ಅತ್ಥಿ ಸಬ್ಬಗುಣೋಪೇತೋ, ಸಬ್ಬಸತ್ಥವಿಸಾರದೋ.
ತಸ್ಸಾ’ದಾಸಿ ದುವೇ ರಾಜಾ, ರಾಜಕಞ್ಞಾ ಮನೋಹರಾ;
ತಿಸ್ಸವ್ಹಕಿತ್ತ ನಾಮಞ್ಚ, ದತ್ವಾ ಭೋಗಂ ಯಥಾರುಚಿಂ.
ಏವಂ ಕರೋನ್ತೋ ಞಾತೀನಂ, ಸಂಗಹಂ ಸೋ ಯಥಾರಹಂ;
ಆರಾಧೇನ್ತೋ ಚ ದಾನಾದಿ-ಸಙ್ಗಹೇಹಿ ಮಹಾಜನಂ.
ರಾಜಾ ದಸಯಿ ರಾಜೂನಂ, ಧಮ್ಮೇಹಿ ಸಮುಪಾಗತೋ;
ಸಮಾಚರನ್ತೋ ಪುಞ್ಞಾನಿ, ಪರಿಭುಞ್ಜಿತ್ಥ ಮೇದಿನಿಂ.
ಪಂಸುಕೂಲಿಕ ಭಿಕ್ಖೂನಂ, ಕತ್ವಾ’ರಿಟ್ಠಮ್ಹಿ ಪಬ್ಬತೇ;
ಮಹಾಭೋಗಂ ಅದಾರಾಮಂ, ನಿಮ್ಮಿತಂ ವಿಯ ಇದ್ಧಿಯಾ.
ಪರಿಹಾರಞ್ಚ ತಸ್ಸದಾ, ರಾಜಾರಹಮಸೇಸತೋ;
ಆರಾಮಿಕೇ ಚ ಬಹವೋ, ದಾಸೇ ಕಮ್ಮಕರೇಪಿ ಚ.
ಪಾಸಾದಂ ಸೋವ ಕಾರೇಸಿ, ವಿಹಾರೇ ಜೇತನಾಮಕೇ;
ಅನೇಕಭೂಮಿಂ ಭೂಮಿನ್ದೋ, ಬುದ್ಧಭೂಮಿಗತಾಸಯೋ.
ವಡ್ಢೇತ್ವಾ ತತ್ಥ ಕಾರೇತ್ವಾ, ಸಬ್ಬ ಸೋವಣ್ಣಯಂ ಜಿನಂ;
ಸಣ್ಠಪೇತ್ವಾ ಮಹಾಭೋಗಂ, ವಸಾಪೇಸಿ ಚ ಭಿಕ್ಖವೋ.
ಮಹಾದಿ ಪರಿವೇಣಮ್ಹಿ, ಕಾರೇಸಿ ಸುಮನೋಹರಂ;
ಪಾಸಾದ ಮಗ್ಗಿಸನ್ದಂಡ್ಢಂ, ತಸ್ಮಿಂಯೇವ ವಿಹಾರಕೇ.
ಕತ್ವಾ ವೀರಙ್ಕುರಾರಾಮಂ, ವಿಹಾರೇ ಅಭಯುತ್ತರೇ;
ಮಹಾಸಙ್ಘಿಕ ಭಿಕ್ಖೂನಂ, ಥೇರಿಯಾನಞ್ಚ ದಾಪಯಿ.
ಪುಬ್ಬಾರಾಮಞ್ಚ ಕಾರೇಸಿ, ಸಮ್ಪನ್ನ ಚತುಪಚ್ಚಯಂ;
ಸದ್ಧಿಂ ಸೋ ಸಙ್ಘನಾಮಾಯ, ದೇವಿಯಾಪಿ ಚ ಅತ್ತನೋ.
ಮಹಾವಿಹಾರೇತಾಯೇವ, ಸದ್ಧಿಂ ಕಾರೇಸಿ ಭೂಮಿಪೋ;
ಆವಾಸಂ ಸಙ್ಘಸೇನವ್ಹಂ, ಮಹಾಭೋಗಂ ಮಹಾಮತಿ.
ಕಾರೇತ್ವಾ ಸಬ್ಬಸೋವಣ್ಣಂ, ಕೇಸಧಾತು ಕರಣ್ಡಕಂ;
ಮಹಾಪೂಜಂ ಪವತ್ತೇಸಿ, ರಜ್ಜಂ ವಿಸ್ಸಜ್ಜಿ ಉತ್ತಮೋ.
ಚೇತಿಯಸ್ಸ ¶ ಗೀರಿಸ್ಸಾದಾ, ಕಾಣವಾಪಿಂ ಬಹುದಯಂ;
ಭಿಕ್ಖೂನಂ ದಿಪವಾಸೀನಂ, ದಾಪೇಸಿ ಚ ತಿಚೀವರಂ.
ಪುಲತ್ಥಿ ನಗರೇ ಕಾಸಿ, ವಾಪಿಯೋ ಥುಸವಾಪಿಯಾ;
ಸೇನಗ್ಗಬೋಧಿಮಾವಾಸಂ, ಗಾಮಾರಾಮಿಕ ಸಞ್ಞುತಂ.
ತಸ್ಮಿಂಯೇವ ಚ ಕಾರೇಸಿ, ಮಹಾಪಾಳಿಂ ಸುಭೋಜನಂ;
ಮಹಾಪಾಳಿಞ್ಚ ಸಬ್ಬೇಸಂ, ಮಹಾನೇತ್ತಮ್ಪಿ ಪಬ್ಬತೇ.
ವೇಜ್ಜಸಾಲಮ್ಪಿ ಕಾರೇಸಿ, ನಗರಸ್ಸ ಚ ಪಚ್ಛಿಮೇ;
ಅನಾಥಾನಂ ಪವತ್ತೇಸಿ, ಯಾಗುದಾನಂ ಸಖಜ್ಜಕಂ.
ಪಂಸುಕೂಲಿಕ ಭಿಕ್ಖೂನಂ, ಪಚ್ಚೇಕಞ್ಚ ಮಹಾನಸಂ;
ಕತ್ವಾ ದಾಪೇಸಿ ಸಕ್ಕಚ್ಚಂ, ನಿಚ್ಚಂ ಭೋಜನಮುತ್ತಮೋ.
ಹುತ್ವಾ ಮಹಾದಿಪಾದೋ’ಯಂ, ಕಪ್ಪೂರ ಪರಿವೇಣಕೇ;
ಉತ್ತರಾಳ್ಹೇ ಚ ಕಾರೇಸಿ, ಪರಿಚ್ಛೇದೇ ಸನಾಮಕೇ.
ತುಲಾಭಾರಞ್ಚ ಪಾದಾಸೀ, ತಿಕ್ಖತ್ತುಂ ಸೋ ಮಹಾಧನೇ;
ಪುಞ್ಞಮಞ್ಞಮ್ಪಿ ಸೋ’ಕಾಸಿ, ರಾಜಾ ನಾನಪ್ಪಕಾರಕಂ.
ಸಙ್ಘನಾಮಾಪಿ ಸಾ ದೇವೀ, ಉತ್ತರಮ್ಹಿ ವಿಹಾರಕೇ;
ಕತ್ವಾ ಮಹಿನ್ದಸೇನವ್ಹಾ-ವಾಸಂ ವಾಸೇಸಿ ಭಿಕ್ಖವೋ.
ಆರದ್ಧೋ ದಪ್ಪುಲವ್ಹಸ್ಸ, ಕಾಲೇ ರಾಜಸ್ಸ ಧೀಮಭೋ;
ಮಹಾದೇವೇನ ಸೋ ಆಸಿ, ರಮ್ಮೋ ದಪ್ಪುಲ ಪಬ್ಬತೋ.
ದಾರುಕಸ್ಸಪನಾಮೇನ, ತಥಾ ಕಸ್ಸಪರಾಜಿಕಂ;
ಉಭೋಪಿ ತೇ ವಿಪ್ಪಕತೇ, ರಾಜಾ ಸೋ ವಸಮಾಪಯಿ.
ಭದ್ದೋ ಸೇನಾಪತಿ ತಸ್ಸ, ಭದ್ದಸೇನಾಪತಿ’ವ್ಹಯಂ;
ಪರಿವೇಣಮ್ಪಿ ಕಾರೇಸಿ, ದಾಸಭೋಗಸಮಾಯುತಂ.
ಉತ್ತರೋ ಚ ಅಮಚ್ಚೋ’ಕಾ, ವಿಹಾರೇ ಅಭಯುತ್ತರೇ;
ವಾಸಮುತ್ತರಸೇನವ್ಹಂ, ರಮ್ಮ ಮುತ್ತರಪಚ್ಚಯಂ.
ವಜಿರೋ ನಾಮ ತತ್ಥೇವಾ-ವಾಸಂ ವಜಿರಸೇನಕಂ;
ಕಾಸಿ ರಕ್ಖಸನಾಮೋಚಾ-ವಾಸಂ ರಕ್ಖಸನಾಮಕಂ.
ತತೋ ವೀಸತಿ ವಸ್ಸೇಸು, ಪುಲತ್ಥಿ ನಗರೇ ವಸಂ;
ಪಣ್ಡುರಾಜಕತಂ ಕಾರಂ, ಸರನ್ತೋ ಸರದಸ್ಸನೋ.
ದದನ್ತೋ ವಿಯ ಸೇನಸ್ಸ, ಸೂರಸ್ಸಾವಸರಞ್ಚಸೋ;
ಪಹಾಯ ದೀಪಂ ದೀಪೋ’ವ, ಮಹಾವಾತ ಹತೋ ಗತೋ.
ಭೋಗೋ ¶ ಅನಿಚ್ಚಾ ಸಹ ಜೀವಿತೇನ;
ಪಗೇವ ತೇ ಬನ್ಧುಜನಾ ಸಹಾಯಾ;
ನರಾಧೀಪಂ ಪಸ್ಸಥ ಏಕಮೇವ;
ಸಮಾಗತಂ ಮಚ್ಚುಮುಖಂ ಸುಘೋರಂ.
ಸುಜನಪ್ಪಸಾದಸಂವೇಗತ್ಥಾಯ ಕತೇ ಮಹಾವಂಸೇ
ಏಕ ರಾಜಕೋ ನಾಮ
ಅಟ್ಠಚತ್ತಾಲೀಸತಿಮೋ ಪರಿಚ್ಛೇದೋ.
ಏಕೂನಪಞ್ಞಾಸತಿಮ ಪರಿಚ್ಛೇದ
ರಾಜದ್ವಯದೀಪನೋ
ಏವಂ ತಸ್ಮಿಂ ಮತೇ ತಸ್ಸ, ಕಾತಬ್ಬಂ ಸಾಧುಕಾರಿಯ;
ಮಹಾದೀಪಾದೋ ಸೇನವ್ಹೋ, ಆದಾಯ ಬಲವಾಹನಂ.
ಆಗಮ್ಮ ನಗರಂ ರಾಜಾ, ಅಹೋಸಿ ಧರಣೀ ತಲೇ;
ಆದಿಕಪ್ಪಮ್ಹಿ ರಾಜೂನಂ, ದಸ್ಸನ್ತೋ ಚರಿಯಂ ಪಿಯ.
ಸದ್ಧೋ ಮಹಾಧನೋ ಸೂರೋ, ಮುತ್ತಚಾಗೀ ನಿರಾಲಯೋ;
ಯಾಚಯೋಗೋ ಮಹಾಭೋಗೋ, ಸಮ್ಪನ್ನಬಲವಾಹನೋ.
ಕಿತ್ತಿಯಾ’ಮಲಭೂತಾಯ, ತಥಾ ತೇಜೋ ಗುಣೇನ ಚ;
ಸನ್ನಿಪಾತಂವ ಸೋ ಚನ್ದ-ಸೂರಿಯಾನಂ ನಿದಸ್ಸಯಿ.
ಅಸಙ್ಕಿಣ್ಣ ಗುಣಾಕಿಣ್ಣೋ, ಸುವಿಚಿಣ್ಣ ಗುಣಾಗುಣೋ;
ನಿತ್ಥಿಣ್ಣಪಾಪೋ ನಿಬ್ಬಿಣ್ಣ-ಸಂಸಾರೋ ಸಾರದಸ್ಸನೋ.
ಭರಿಯಾ ತಸ್ಸ ಯಾ ಆಸಿ, ಸಙ್ಘಾತಂ ಸೋ ಭಿಸೇಚಯಿ;
ಮಹೇಸೀಭಾವೇ ದತ್ವಾನ, ಪರಿಹಾರಂ ಯಥಾಭತಂ.
ಮಹಿನ್ದಂ ನಾಮ ಸಪ್ಪಞ್ಞಂ, ಕಣಿಟ್ಠಂ ಭಾತರಂ ಸಕಂ;
ದತ್ವಾ ದಕ್ಖಿಣಭಾಗಂ ಸೋ, ಓಪರಜ್ಜೇ’ಭಿಸೇಚಯಿ.
ಅನ್ತೇಪುರೇ’ಪರಜ್ಝಿತ್ವಾ, ಸೋ ರಞ್ಞಾ ಅವಧಾರಿತೇ;
ಸಪುತ್ತದಾರೋ ವುಟ್ಠಾಯ, ಅಞ್ಞಾತೋ ಮಲಯಂ ಅಗಾ.
ಉಪ್ಪಜ್ಜಿತ್ಥ ¶ ತದಾ ಪುತ್ತೋ, ರಞ್ಞೋ ಸಙ್ಘಾಯ ದೇವಿಯಾ;
ದಸ್ಸೇನ್ತೋ’ವ ಪನಾದಸ್ಸ, ಕುಮಾರ ರೂಪಮತ್ತನೋ.
ರಾಜಾ ತಂ ಜಾತಮತ್ತಂ’ವ, ದಿಸ್ವಾ ಸನ್ಥುಟ್ಠಮಾನುಸೋ;
ಸಿದ್ಧತ್ಥಂ ಲುಮ್ಬಿನೀಜಾತಂ, ರಾಜಾ ಸುದ್ಧೋದನೋ ವಿಯ.
ಧಞ್ಞಪುಞ್ಞಗುಣೂಪೇತೋ, ಠಪೇತ್ವಾ ದೀಪಮೇಕಕಂ;
ಜಮ್ಬುದೀಪೇ’ಪಿ ಕಸಿಣೇ, ರಜ್ಜಯೋಗ್ಗೋತಿ ಮೇ ಸುತೋ.
ನಾಮದಾನ ದಿನೇಯೇವ, ಪರಿಹಾರೇನ ಸಬ್ಬಸೋ;
ಓಪರಜ್ಜೇ ಭಿಸಿಞ್ಚಿತ್ವಾ, ದಕ್ಖಿಣಂ ದೇಸಮಸ್ಸ’ದಾ.
ಯುವರಾಜಾಪಿ ಮಲಯೇ, ವಸನ್ತೋ’ವ ಮಹೀಪತಿಂ;
ಆರಾಧೇತ್ವಾ ಉಪಾಯೇನ, ಅನುಞ್ಞತೋ ಸಭಾತರಾ.
ನಿಕಾಯತ್ತಯ ವಾ ಸೀಹಿ, ಸದ್ಧಿಂ ಭಿಕ್ಖೂಹಿ ಆಗತೋ;
ದಿಸ್ವಾ ರಾಜಾನಮೇತ್ಥೇವ, ಸನ್ಧೀಂ’ಕಾಸಿ ಅಕುಪ್ಪಿಯಂ.
ಯಾ ತಸ್ಸ ಯುವರಾಜಸ್ಸ, ಭರಿಯಾ ತಿಸ್ಸಾ ನಾಮಿಕಾ;
ರಾಜಿನೀ ಸಾ ವಿಜಾಯಿತ್ಥ, ಧೀತರಂ ಸಙ್ಘನಾಮಿಕಂ.
ಕಿತ್ತಿನಾಮಾ’ಪರಾಯಾ ಚ, ಭರಿಯಾ ಸಾಪಿ ಖೋ ಪನ;
ವಿಜಾಯಿ ಪುತ್ತೇ ಚತ್ತಾರೋ, ತಥಾ ಏಕಞ್ಚ ಧೀತರಂ.
ತದಾ ರಾಜಾಪಿ ಚಿನ್ತೇತ್ವಾ, ಏವಂ ಸತಿ ಕಣಿಟ್ಠಕೋ;
ನಿಸ್ಸಙ್ಕೋ ಮಯಿ ಹೋತೀತಿ, ಸಮ್ಮಾ ಮನ್ತೀಹಿ ಮನ್ತಿಯ.
ಧೀತರಂ ಯುವರಾಜಸ್ಸ, ಸುರೂಪಿಂ ರೂಪನಾಮಿಕಂ;
ಕಸ್ಸಪಸ್ಸ’ತ್ತ ಪುತ್ತಸ್ಸ, ವಿವಾಹಂ ಕಾರಯಿ ಬುಧೋ.
ದಕ್ಖಿಣಂ ದೇಸಮಸ್ಸೇವ, ಕಣಿಟ್ಠಸ್ಸ ಸದಾಪಯಿ;
ರಾಜಪುತ್ತಸ್ಸ ಪಾದಾಪಿ, ಪಚ್ಚೇಕಂ ಭೋಗಮತ್ತನೋ.
ರಜ್ಜಮ್ಹಿ ಸಬ್ಬಂ ತಸ್ಸೇವ, ಪರಿಭೋಗಾಯ ದಾಪಯಿ;
ಕೇವಲನ್ತು ವಿಚಾರೇಸಿ, ದೀಪಂ ದೀಪ ಹಿತಾವಹೋ.
ತೇಸಂ ಸಂವಾಸಮನ್ವಾಯ, ಉಭಿನ್ನಂ ಪುಞ್ಞಕಮ್ಮಿನಂ;
ಧಞ್ಞಪುಞ್ಞಗುಣೂಪೇತಾ, ವಿಜಾತಾ ಪುತ್ತಧೀತರೋ.
ಕತ್ವಾ ಸಬ್ಬೋಪಹಾರೇನ, ದಾಠಾಧಾತು ಮಹಾಮಹಂ;
ಆರುಯ್ಹ ವರಪಾಸಾದಂ, ರತನವ್ಹಂ ಮಹೀಪತಿ.
ತದಾ ಸೋವಣ್ಣಯಸ್ಸಾಪಿ, ಸಮ್ಬುದ್ಧಸ್ಸ ಪುರಾ ಠಿತಂ;
ಸುಞ್ಞಂ ಪಿಟ್ಠಂ ಸಯಂ ದಿಸ್ವಾ, ಕಸ್ಮಾ ಏವನ್ತಿ ಸಂವದಿ.
ತತೋ ¶ ಅಮಚ್ಚಾ ಆಹಂಸು, ನಾಜಾನಾಸಿ ಮಹೀಪತಿ;
ಮಹಾಪಿತುನರಿನ್ದಸ್ಸ, ಕಾಲೇ ತವ ನರಿಸ್ಸರಂ.
ಪಣ್ಡುರಾಜಾ ಇಧಾಗಮ್ಮ, ದೀಪಮೇತಂ ವಿನಾಸಿಯ;
ಸಬ್ಬಂ ಸಾರಗತಂ ದೀಪೇ, ಸಮಾದಾಯ ಗತೋ ಇತಿ.
ತಂ ಸುತ್ವಾ ಲಜ್ಜಿತೋ ರಾಜಾ, ಸಯಂ ವಿಯ ಪರಾಜಿತೋ;
ತದಹೇವ ನಿಯೋಜೇಸಿ, ಅಮಚ್ಚೇ ಬಲಸಙ್ಗಹೇ.
ತದಾ’ವ ಕಿರ ಆಗಞ್ಛಿ, ಪಣ್ಡುರಾಜಕುಮಾರಕೋ;
ಪರಿಭೂತೋ ಸರಾಜೇನ, ರಜ್ಜತ್ಥಂ ಕತ ನಿಚ್ಛಯೋ.
ರಾಜಾ ದಿಸ್ವಾ’ತಿ ಸನ್ತುಟ್ಠೋ, ಕತ್ತಬ್ಬಂ ತಸ್ಸ ಕಾರಿಯ;
ಮಹಾತಿತ್ಥ ಮುಪಾಗಮ್ಮ, ಪಟ್ಟನಂ ಸೇಮತ್ರಸೋ.
ಮಹನ್ತಂ ಬಲಕಾಯಞ್ಚ, ತಸ್ಸೋಪಕರಣಾನಿ ಚ;
ಅನುನಂ ಪಟಿಯಾದೇತ್ವಾ, ದೇವಸೇನಂವ ಸಜ್ಜಿತಂ.
ಪಣ್ಡುರಾಜಕುಮಾರೇನ, ಸದ್ಧಿಂ ಸೇನಾಪತಿ ಸಕಂ;
ಗನ್ತ್ವಾ ತಂ ಪಣ್ಡುರಾಜಾನಂ, ಹನ್ತ್ವಾನಿಕಮಿತೋ ಪುರಾ.
ರತನಂ ಸಬ್ಬಮಾದಾಯ, ದತ್ವಾ ರಜ್ಜಂ ಇಮಸ್ಸ ಚ;
ನ ಚಿರೇನೇವ ಏಹೀತೀ, ಉಯ್ಯೋಜೇಸಿ ಮಹಾಯಸೋ.
ಸೋಪಿ ಏವಂ ಕರೋಮೀತಿ, ಪಟಿಸ್ಸುತ್ವಾ ಮಹೀಪತಿಂ;
ವಿನ್ದಿತ್ವಾ ಬಲಮಾದಾಯ, ನಾಮಮಾರುಯ್ಹ ತಂ ಖಣೇ.
ಪರತೀರಂ ತತೋ ಗನ್ತ್ವಾ, ಸಂವುಳಹ ಬಲವಾಹನೋ;
ವಿನಾಸಯನ್ತೋ ಪಚ್ಚನ್ತಂ, ವಾರೇಸಿ ಮಧುರಂ ಪುರಂ.
ದ್ವಾರಾನಿ ಪಿದಹಿತ್ವಾನ, ಪಚ್ಛಿನ್ದಿತ್ಥ ಗತಾಗತಂ;
ತತೋ ಅಗ್ಗಿಂ ಖಿಪಾಪೇಸಿ, ಗೋಪುರಟ್ಟಾಲ ಕೋಟ್ಠಕೇ.
ಏವಂ ಸೀಹಳಸೇನಾಯ, ಪವಿಟ್ಠಾಯ ಸಕಂ ಪುರಂ;
ಸಬ್ಬಂ ವಿಲುಮ್ಪಮಾನಾಯ, ಸೇನಙ್ಗಂ ಘಾತಯನ್ತಿಯಾ.
ಪಣ್ಡುರಾಜಾ ನಿಸಮ್ಮೇತಂ, ಸಮಾದಾಯ ಸಕಂ ಬಲಂ;
ವೇಗಸಾ ತಂ ಸಮಾಗಮ್ಮ, ಯುದ್ಧಂ ಕಾತುಂ ಸಮಾರಭಿ.
ಅಸಮ್ಪುಣ್ಣ ಬಲತ್ತಾ ಸೋ, ವಿದ್ಧೋ ಸಲ್ಲೇನ ಭೂಪತಿ;
ಹತ್ಥಿಕ್ಖನ್ಧಗತೋಯೇವ, ವಿಹಾಯ ಪುರಮತ್ತನೋ.
ಪಲಾಯಿತ್ವಾ ಗತಠಾನೇ, ಜೀವಿತಂ ನಿಜಮೇಸ್ಸಜಿ;
ಭರಿಯಾವ’ಸ್ಸ ತೇನಾಸಿ, ಸಮ್ಪತ್ತಾ ಜೀವಿತಕ್ಖಯಂ.
ತತೋ ¶ ಸೀಹಳಸೇನಾಸಾ, ಪವಿಟ್ಠಾ ನಿಬ್ಭಯಾ ಪುರಂ;
ತತ್ಥ ಸಬ್ಬಂ ವಿಲುಮ್ಪಿತ್ಥ, ದೇವಾ’ಸಿರಪುರಂ ಯಥಾ.
ಸೇನಾಪತಿ ತತೋ ರಾಜ-ಗೇಹೇ ಭತ್ತಂ ಸಮೇಕ್ಖಿಯ;
ದೀಪಾನಿತಮಿಮಮ್ಹಾ ಚ, ತತ್ರಟ್ಠಞ್ಚ ಮಹಾರಹಂ.
ಸಾರಂ ಸಬ್ಬಂಸಮಾದಾಯ, ದೇಸೇ ಚ ನಗರೇ ಠಿತಂ;
ಕತ್ವಾ ಇಸ್ಸರಿಯಂ ತತ್ಥ, ವಸೇವತ್ತಿಯ ಅತ್ತನೋ.
ಪಣ್ಡುರಾಜ ಕುಮಾರಂ ತು, ತತ್ಥ ರಜ್ಜೇ’ಭಿ ಸಿಞ್ಚಿಯ;
ಕಾರೇತ್ವಾ ಪರಿಹಾರಞ್ಚ, ದೇಸಂ ತಸ್ಸ ಸಮಪ್ಪಿಯ.
ಯಥಾರುಚಿಂ ಗಹೇತ್ವಾನ, ಹತ್ಥಿಅಸ್ಸೇ ನರೇ’ಪಿ ಚ;
ತತ್ಥ ತತ್ಥ ಯಥಾ ಕಾಮಂ, ವಸನ್ತೋ ಅಕುತೋ ಭಯೋ.
ಸಮುದ್ದ ತಟಮಾಗಮ್ಮ, ಠತ್ವಾ ತತ್ಥ ಯಥಾಸುಖಂ;
ಕೀಳನ್ತೋ ವಿಯ ನಾವಂ ಸೋ, ಸಮಾರುಯ್ಹ ವಿಸಾರದೋ.
ಮಹಾತಿತ್ಥ ಮುಪಾಗಮ್ಮ, ವನ್ದಿತ್ವಾ ಧರಣೀ ಪತಿಂ;
ತಂ ಸಾಸನಂ ನಿವೇದೇತ್ವಾ, ಸಾರಂ ದಸ್ಸೇಸಿ ಆಹಟಂ.
ರಾಜಾ ಸಾಧೂತಿ ವತ್ವಾನ, ಕಾರೇತ್ವಾ ತಸ್ಸ ಸಙ್ಗಹಂ;
ಸದ್ಧಿಂ ಸೇನಾಯ ಆಗನ್ತ್ವಾ, ಪಕಟ್ಠಾಯ ಸಕಂ ಪುರಂ.
ಜಯಪಾನಂ ಪಿವಿತ್ವಾನ, ಕತ್ವಾ ವಿಜಯಮಙ್ಗಲಂ;
ಮಹಾಧಾಗಂ ಪವತ್ತೇತ್ವಾ, ಯಾಚಕಾನಂ ಯಥಾ ರುಚಿಂ.
ಸಬ್ಬಂ ಪಾಕತಿಕಂ ಕಾಸಿ, ಸಾರಂ ದೀಪೇ ನಿರಾಲಯೋ;
ಸೋವಣ್ಣ ಪಟಿಮಾಯೋ ಚ, ಯಥಾಠಾನೇ ಠಪಾಪಯಿ.
ಸುಞ್ಞಂ ರತನಪಾಸಾದೇ, ಪಿಟ್ಠಂ ಪೂರೇಸಿ ಸತ್ಥುನೋ;
ಕಾಸಿ ರಕ್ಖಪಿಧಾನೇನ, ನಿಬ್ಭಯಂ ಧರಣೀತಲಂ.
ತತೋ ಪಟ್ಠಾಯ ದೀಪಂಸೋ, ಅರೀನಂ ದುಪ್ಪಧಂಸಿಯಂ;
ಕತ್ವಾ ವಡ್ಢೇಸಿ ಭೋಗೇಹಿ, ಉತ್ತರಾದಿಕುರುಂ ಪಿಯ.
ಖಿನ್ನಾ ಪುಬ್ಬಸ್ಸ ರಾಜಸ್ಸ, ಕಾಲೇ ದೀಪಮ್ಹಿ ಪಾಣಿನೋ;
ನಿಬ್ಬುತಾ ತಂ ಸಮಾಗಮ್ಮ, ಘಮ್ಮಾ ವಿಯ ವಲಾಹಕಾ.
ತಸ್ಸ ವೀಸತಿಮೇ ವಸ್ಸೇ, ವಿಹಾರೇ ಅಭಯುತ್ತರೇ;
ನಿಕ್ಖಮಿತ್ವಾ ಗತಾ ಹೇಸುಂ, ಪಂಸುಕೂಲಿಕ ಭಿಕ್ಖವೋ.
ಯುವರಾಜಾ ಮಹಿನ್ದೋ ಸೋ, ಧುಮರಾಜಸ್ಸ ಸತ್ಥುನೋ;
ಕಾರಾಪಯಿ ಘರಂ ರಮ್ಮಂ, ದಸ್ಸನೇಯ್ಯಂ ಮನೋರಮಂ.
ಬೋಧಿಗೇಹಂ ¶ ಕರೋನ್ತೋ ತಂ, ದಿಸ್ವಾ ವಡ್ಢಕೀನೋ ತದಾ;
ವಂಸೇನ ಸಾಖಂ ಆಹಚ್ಚ, ಭಿಜ್ಜನ್ತಂ ವರಬೋಧಿಯಾ.
ಕಿನ್ತು ಕಾತಬ್ಬಮೇತ್ಥಾತಿ, ಯುವರಾಜಂ ನಿವೇದಯುಂ;
ಸೋ ತಂ ತಂ ಮುಪಸಂಕಮ್ಮ, ಮಹಾಪೂಜಾಯ ಪೂಜಿಯ.
ಸಚೇ ಸತ್ಥಾ, ಹಿತತ್ಥಾಯ, ಸಮ್ಭೂತೋ ಸಬ್ಬಪಾಣಿನಂ;
ಲದ್ಧುಂ ಪುಞ್ಞಸ್ಸ’ನಗ್ಘಸ್ಸ, ಘರಸ್ಸ ಕರಣೇತಿ’ಧ.
ಸಾಖಾ ಗಚ್ಛಂ ತು ಉದ್ಧಂವ, ಕಾತುಂ ಸಕ್ಕಾ ಯಥಾಘರಂ;
ಏವಮಾರಾಧಯಿತ್ವಾನ, ವನ್ದಿತ್ವಾ ಸಙ್ಘರಂ ಗತೋ.
ತದಾ ಸಾಖಾ ದುಮಿನ್ದಸ್ಸ, ರತ್ತಿಯಂ ಉದ್ಧಮುಗ್ಗಮಿ;
ತತೋ ಕಮ್ಮಕರಾ ಸಬ್ಬಂ, ಆರೋಚೇಸುಂ ಸಸಾಮಿನೋ.
ಯುವರಾಜಾ’ತಿ ಸನ್ತುಟ್ಠೋ, ಭಾತುರಞ್ಞೋ ನಿವೇದಿಯ;
ಮಹಾಪೂಜಾಯ ಪೂಜೇಸಿ, ವಿಸ್ಸಜ್ಜಿಯ ಬಹುಧನಂ.
ತಥಾ ಮಹಿನ್ದಸೇನವ್ಹಂ, ಪರಿವೇಣಞ್ಚ ಕಾರಿಯ;
ಸಙ್ಘಸ್ಸಾ’ದಾ ಸಭೋಗಂ ಸೋ, ಪುಞ್ಞಾ ಪುಞ್ಞಾನಿಚಾಚೀನಿ.
ಅದಾ ಸಪರಿಸಂ ಭತ್ತಂ, ವತ್ಥಂ ಛತ್ತಮುಪಾಹನಂ;
ತಥಾ ಗಮಿಯಭತ್ತಞ್ಚ, ನಹಾನಞ್ಚ ಸಭತ್ತಕಂ.
ಏವಂ ಖುದ್ದಾನು ಖುದ್ದಾನಿ, ಕತ್ವಾ ಪುಞ್ಞಾನಿ ಸೋ ವಿಭೂ;
ರಞ್ಞೋ ತೇತ್ತಿಂಸವಸ್ಸಮ್ಹಿ, ಯಥಾಕಮ್ಮಮುಪಾಗಮಿ.
ಅಥ ರಾಜಾ ಮತೇತಸ್ಮಿಂ, ಕಣಿಟ್ಠಮುದಯಂ ಸಕಂ;
ತಸ್ಸ ಠಾನೇ ಠಪೇತ್ವಾನ, ಸಬ್ಬಂ ತಸ್ಸೇವ ತಸ್ಸದಾ.
ತುಲಾಭಾರಸ್ಸ ದಾನೇನ, ದೀನಾನಾಥೇ ಸತಪ್ಪಯಿ;
ಧಮ್ಮಕಮ್ಮೇನ ಸೋಧೇಸಿ, ನಿಕಾಯತ್ತಯಮೇಕತೋ.
ಸೋಣ್ಣಥಾಲೀಸಹಸ್ಸಂ ಸೋ, ಮುತ್ತಾಹಿ ಪರಿಪೂರಿಯ;
ಠಪೇತ್ವಾ ಮಣಿಮೇಕೇಕಂ, ತಸ್ಸೋಪರಿ ಮಹಾರಹಂ.
ಬ್ರಾಹ್ಮಣಾನಂ ಸಹಸ್ಸಸ್ಸ, ಸುದ್ಧೇ ರತನಭಾಜನೇ;
ಭೋಜೇತ್ವಾ ಖೀರಪಾಯಾಸಂ, ದಾಪೇತ್ವಾ ಹೇಮಸುತ್ತಕಂ.
ತಥಾ ನವೇಹಿ ವತ್ಥೇಹಿ, ಅಚ್ಛಾದೇತ್ವಾ ಯಥಾರುಚಿಂ;
ಸನ್ತಪ್ಪೇಸಿ ಮಹನ್ತೇನ, ಪರಿಹಾರೇನ ಪುಞ್ಞವಾ.
ಭಿಕ್ಖೂನಂ ದೀಪವಾಸೀನಂ, ಅದಾಸಿ ಚ ತಿಚೀವರಂ;
ಅದಾ ಸಬ್ಬಾಸಮಿತ್ಥೀನಂ, ವತ್ಥಞ್ಚ ಸುಮನೋಹರಂ.
ಕಾರೇತ್ವಾ ¶ ಲೋಹಪಾಸಾದಂ, ವೇಜಯನ್ತಸರಿಕ್ಖಕಂ;
ವಡ್ಢೇಸಿ ಪಟಿಮಂ ತತ್ಥ, ಸುವಣ್ಣಘಟಕೋಟ್ಟಿಮಂ.
ಸುತ್ವಾ ಉಪೋಸಥಾಗಾರ-ಭಾವಂ ಸಬ್ಬ ಮಹೇಸೀನಂ;
ತುಚ್ಛೋ ಯಂ ನೇವ ಹೋತೂತಿ, ವಾಸಂ ಸಙ್ಘಸ್ಸ ತಂ ಅಕಾ.
ಭೋಗಗಾಮೇ ಚ ತಸ್ಸದಾ, ರಕ್ಖಕೇ ಚ ನಿಯೋಜಯಿ;
ಭಿಕ್ಖೂ ದ್ವತ್ತಿಂಸಮತ್ತಾಹಿ, ವಸನ್ತೂತಿ ನಿಯಾಮಯಿ.
ಗಙ್ಗಾಯ ಮರಿಯಾದಂ ಸೋ, ಕಾರೇಸಿ ಮಣಿಮೇಖಲಂ;
ತೋಯನಿದ್ಧಮನಞ್ಚಾಕಾ, ಮಣಿಹೀರಕವಾಪಿಯಾ.
ಕಟ್ಠುನ್ತನಗರೇ ಚೇವ, ಕಾಣವಾಪಿಂಚ ಬನ್ಧಯಿ;
ವೇಜ್ಜಸಾಲಞ್ಚ ಕಾರೇಸಿ, ಚೇತಿಯಮ್ಹಿ ಗಿರಿಮ್ಹಿ ಸೋ.
ಬುದ್ಧಗಾಮವಿಹಾರಞ್ಚ, ವಿಹಾರಂ ಮಹಿಯಙ್ಗಣಂ;
ಕೂಟತಿಸ್ಸ ವಿಹಾರಞ್ಚ, ಭೋಗಗಾಮೇ ನ ವಡ್ಢಯಿ.
ಮಣ್ಡಲಸ್ಸ ಗಿರಿಸ್ಸಾ’ದಾ, ವಿಹಾರಸ್ಸ ಸಗಾಮಕೇ;
ಉತ್ತರಾಳ್ಹೇ ಚ ಕಾರೇಸಿ, ಪಾಸಾದಂ ಪರಿವೇಣಕೇ.
ಮಹಾಸೇನಸ್ಸ ಬುದ್ಧಸ್ಸ, ಗಾಮಂ ದತ್ವಾನ ರಕ್ಖಕೇ;
ದಾಸಿ ಸೋಬ್ಭವಿಹಾರೇ ಚ, ಕಾರೇಸಿ ಪಟಿಮಾಘರಂ.
ಬೋಧಿಸತ್ತೇ ಚ ವಡ್ಢೇಸಿ, ಪಾಸಾದೇ ಮಣಿಮೇಖಲೇ;
ಸೀಲಾಮಯಮುನಿನ್ದಸ್ಸ, ಜಿಣ್ಣಗೇಹಮ್ಪಿ ಕಾರಯಿ.
ರಾಜ ತಂ ಬೋಧಿಸತ್ತಞ್ಚ, ಸಘರಂ ತತ್ಥ ಸನ್ನಹಿ;
ಆಲವಾಲಂ ದುಮಿನ್ದಸ್ಸ, ಗನ್ಧಿತ್ವಾ ಕಾ ಮಹಾಮಹಂ.
ಲಿಖಿತ್ವಾ ಹೇಮಪಟ್ಟಮ್ಹಿ, ಸಬ್ಬರತನಸುತ್ತಕಂ;
ಮಹಾಪೂಜಮಕಾ ತಸ್ಸ, ಅಭಿಧಮ್ಮಂ ಕಥಾಪಯಿ.
ಆನನ್ದಪಟಿಮಂ ನೇತ್ವಾ, ಪುರಂ ಕತ್ವಾ ಪದಕ್ಖಿಣಂ;
ಪರಿತ್ತಂ ಭಿಕ್ಖುಸಙ್ಘೇನ, ಭಣಾಪೇತ್ವಾ ಯಥಾವಿಧಿಂ.
ಪರಿತ್ತೋದಕಸೇಕೇನ, ಜನಂ ಕತ್ವಾ ನಿರಾತುರಂ;
ರಾಜಾ ರೋಗಭಯಂ ಪೇವಂ, ನೀಹರಿತ್ಥ ಸದೇಸತೋ.
ಅಭಿಸೇಕಂ ಗಹೇತ್ವಾನ, ಹೇಮವಾಲುಕ ಚೇತಿಯೇ;
ಅನುಸಂವಚ್ಛರಂ ಕಾತುಂ, ತಂ ಚಾರಿತ್ತಂ ಲಿಖಾಪಯಿ.
ಅದಾ ಮಾಸಸ್ಸ ಚತೂಸು, ಉಪೋಸಥದಿನೇಸು ಸೋ;
ಚತುನ್ನಞ್ಚ ಸಹಸ್ಸಾನಂ, ವತ್ಥದಾನಂ ಸಭತ್ತಕಂ.
ವೇಸಾಖಕೀಳಂ ¶ ಕೀಳಿತ್ಥ, ಸದ್ಧಿಂ ದುಗ್ಗತಕೇಹಿ ಸೋ;
ಅನ್ನಂ ಪಾನಞ್ಚ ವತ್ಥಞ್ಚ, ತೇಸಂ ದತ್ವಾ ಯಥಾರುಚಿಂ.
ಭಿಕ್ಖುಸಙ್ಘಸ್ಸ ದೀಪಮ್ಹಿ, ನಿಚ್ಚದಾನಂ ಪವತ್ತಯಿ;
ಸನ್ತಪ್ಪೇಸಿ ಚ ದಾನೇನ, ಕಪಣದ್ಧಿಕವಣಿಬ್ಬಕೇ.
ತಸ್ಸ ರಞ್ಞೋ ಮಹೇಸೀ ಚ, ಸಙ್ಘನಾಮಾ ಅಕಾರಯಿ;
ಪಬ್ಬತಂ ಸಙ್ಘಸೇನವ್ಹಂ, ಸಭೋಗಮಭಯುತ್ತರೇ.
ನೀಲಚೂಳಾಮಣಿಞ್ಚಾಕಾ, ಸಿಲಾಮಯ ಮಹೇಸಿನೋ;
ಪೂಜಂ ಸಬ್ಬೋಪಹಾರೇಹಿ, ಕಾಸಿ ಸತ್ಥುಸ್ಸ ಸಬ್ಬದಾ.
ತಸ್ಸ ಸೇನಾಪತಿಚಾ’ಕಾ, ಸೇನಸೇನಾಪತಿವ್ಹಯಂ;
ಪರಿವೇಣಂ ಮಹಾಭೋಗಂ, ಸೂರೋ ತುಟ್ಠಕನಾಮಕೋ.
ಏವಂ ಸಪರಿಸೋ ಕತ್ವಾ, ಸಪುಞ್ಞಾನಿ ಮಹಾಯಸೋ;
ಪಞ್ಚತಿಂಸತಿಮೇ ವಸ್ಸೇ, ದೇವಲೋಕಮುಪಾಗಮಿ.
ತತೋ ತಸ್ಸಾ’ನುಜೋ ಆಸಿ, ಉದಯೋ ನಾಮ ಖತ್ತಿಯೋ;
ರಾಜಾ ಸಬ್ಬಪ್ಪಯೋಗೇಹಿ, ಹಿತೇಸೀ ದೀಪವಾಸೀನಂ.
ಹುತ್ವಾ ಸೋ ಸಯಂ ರಾಜಾ, ಕಣಿಟ್ಠಂ ಸಕಭಾತರಂ;
ಮಹಾದೀಪಾದಠಾನಮ್ಹಿ, ಠಪಿ ಕಸ್ಸಪನಾಮಕಂ.
ರಾಜಾ ಚಿನ್ತಿಯ ಞಾತೀನಂ, ಕಾತಬ್ಬೋ ಸಙ್ಗಹೋ ಇತಿ;
ಏವಂ ಕಸ್ಸಪನಾಮಸ್ಸ, ಭಾತುಪುತ್ತಸ್ಸ ಧೀತರಂ.
ಯುವರಾಜಸ್ಸ ತಸ್ಸಾ’ಕಾ, ಭರಿಯಂ ಸೇನನಾಮಿಕಂ;
ಧಾರೇಸಿಚ ಸಯಂ ರಾಜಾ, ಅಪರಂ ತಿಸ್ಸಸವ್ಹಯಂ.
ಮಹಿನ್ದಸ್ಸುಪರಾಜಸ್ಸ, ರಾಜಧೀತಾಯ ಕಿತ್ತಿಯಾ;
ಪುತ್ತೋ ಕಿತ್ತಗ್ಗಬೋಧೀತಿ, ಆದಿಪಾದೋ ವಿಬುದ್ಧಿಕೋ.
ಚೋರೋ ಹುತ್ವಾ ಮಹಾರಞ್ಞೋ, ನಿಕ್ಖಮಿತ್ವಾನ ರತ್ತಿಯಂ;
ಏಕೋ ಅಞ್ಞಾತವೇಸೇನ, ಸಮುಪಾಗಮ್ಮರೋಹಣಂ.
ಜನಂ ಹತ್ತಗತಂ ಕತ್ವಾ, ದೇಸಂ ಸಬ್ಬಂ ವಿನಾಸಿಯ;
ಘಾತಾಪಯಿತ್ಥ ತತ್ರಟ್ಠಂ, ಸೋ ತಂ ಮಾತುಲಮತ್ತನೋ.
ತಂ ಸುತ್ವಾ ಧರಣೀಪಾಲೋ, ತಸ್ಮಿಂ’ತೀವ ಪಕುಪ್ಪಿಯ;
ಆನೇತುಂ ತಮುಪಾಯಂ ಸೋ, ಗವೇಸನ್ತೋ ತಥಾ ತಥಾ.
ಭಾತುಪುತ್ತಂ ತಮಾಹುಯ, ಯುವರಾಜಂ ಸಕಸ್ಸಪಂ;
ಆಮನ್ತೇಸಿ ಮಹಾಪುಞ್ಞ, ಸಹಾಯೋ ಹೋತಿ ಮೇ ಇತಿ.
ಕಿಂ ¶ ಮೇ ಕತ್ತಬ್ಬ’ಮಿಚ್ಚಾಹ, ಪಚ್ಚಾಹ ಧರಣೀಪತಿ;
ಪುತ್ತೋ ತವ ಮಹಿನ್ದೋ ಸೋ, ವುದ್ಧಿಪ್ಪತ್ತೋ ಮಹಾಬಲೋ.
ಲಾಭೀ ರೋಹಣದೇಸಸ್ಸ, ಮಾತಿತೋ ಪಿತಿತೋ’ಪಿ ಚ;
ಸೂರೋ ಸಬ್ಬಸಹೋ ವೀರೋ, ಕುಸಲೋ ಕತೂಪಾಸನೋ.
ಸಙ್ಗಾಮಯೋಗ್ಗೋ ಮತಿಮಾ, ನಿಪುಣೋ ನಯಕೋವಿದೋ;
ತಂ ಪೇಸೇತ್ವಾ ನಯಿಸ್ಸಾಮ, ಪಾಪಂ ಮಾತುಲಘಾತಕಂ.
ತಂ ಸುತ್ವಾ ವಚನಂ ರಞ್ಞೋ, ಕಸ್ಸಪೋ ಭಾಸಿ ಸಾದರೋ;
ದೇವ ದೇವೇನ ವುತ್ತೋ’ಹಂ, ಗಚ್ಛೇಯ್ಯಂ ಕಿನ್ತು ಮೇ ಸುತೋ.
ವಂಸೋ ಮೇ ಪಾಲಿತೋ ಹೋತಿ, ಪಸಾದೋ ಚ ತವಾಧಿಪ;
ತಸ್ಮಾ ಕಾಲಮಹಾಪೇತ್ವಾ, ಯಂ ಇಚ್ಛಸಿ ತಥಾ ಕುರು.
ಸುತ್ವಾ ಅತೀವಸನ್ತುಟ್ಠೋ, ನರಿನ್ದೋ ತಸ್ಸ ತಂ ವಚೋ;
ಮಹನ್ಥಂ ಬಲಕಾಯಂ ಸೋ, ಸಬ್ಬಸೋ ಪಟಿಯಾದಿಯ.
ಮಹತಾ ಪರಿಹಾರೇನ, ಮಹಿನ್ದಂ ರಾಜಪೋತಕಂ;
ರಕ್ಖಿತುಂ ತಂ ನಿಯೋಜೇತ್ವಾ, ವಜಿರಗ್ಗಞ್ಚ ನಾಯಕಂ.
ತುಚ್ಛಂ ವಿಯ ಪುರಂ ಕತ್ವಾ, ಸಬ್ಬಞ್ಚ ಬಲವಾಹನಂ;
ಸಬ್ಬೋಪಕರಣಞ್ಚೇವ, ಅನೂನಂ ತಸ್ಸ ದಾಪಿಯ.
ಸಯಂ ತಮನುಗಚ್ಛನ್ತೋ, ಪದಸಾ’ವ ನರಿಸ್ಸರೋ;
ಉಯ್ಯೋಜೇಸಿ ಮಹಾಪುಞ್ಞ, ಗಚ್ಛ ರುಕ್ಖಾತಿ ಮೇದಿನಿಂ.
ಮಹಿನ್ದೋ ಸೋ ಮಹಿನ್ದೋ’ವ, ದೇವಸೇನಾ ಪುರಕ್ಖತೋ;
ಗಚ್ಛನ್ತೋ ಸುವೀರೋಚಿತ್ಥ, ದೇವಾಸುರಮಹಾಹವಂ.
ತತೋ ಗನ್ತ್ವಾ ನ ಚಿರೇನ, ಗುತ್ತಸಾಲಮುಪಾಗಮಿ;
ತತೋ ಜಾನಪದಾ ಸಬ್ಬೇ, ಮಣ್ಡಲಿಕಾ ಚ ರಟ್ಠಿಯಾ.
ತೇನ ಮಾತುಲಘಾತೇನ, ಪಾಪಕೇನ ಉಪದ್ದುತಾ;
ಗನ್ತ್ವಾ ತಂ ಪರಿವಾರೇಸುಂ, ಲದ್ಧೋ ನೋ ಸಾಮಿಕೋ ಇತಿ.
ಪತನ್ತೋ ಸೋಪಿ ಖೋ ಚೋರೋ, ಠಿತೋವ ಗಿರಿಮಣ್ಡಲೇ;
ಸಬ್ಬಂ ಹತ್ಥಗತಂ ಕತ್ವಾ, ರಾಜಭಣ್ಡಂ ಮಹಗ್ಘಿಯಂ.
ಹತ್ಥೀ ಅಸ್ಸೇಚ ಆದಾಯ, ಗನ್ತ್ವಾ ಮಲಯಮಾರುಹಿ;
ಮಹಿನ್ದಸೇನಾ ಘಾತೇನ್ತೀ, ತಸ್ಸ ಸೇನಂ ತಹಿಂ ತಹಿಂ.
ಪದಾನುಪದಮಸ್ಸೇ’ವ, ಗಚ್ಛನ್ತಿ ಹತ್ಥಿಅಸ್ಸಕೇ;
ದಿಸ್ವಾ ಮಲಯಪಾದಮ್ಹಿ, ಗಹೇತ್ವಾ ಏತ್ಥ ಸೋ ಇತಿ.
ತತ್ಥ ¶ ಪಾವಿಸಿಮದ್ದನ್ತೀ, ಸಬ್ಬಂ ಮಲಯಕಾನನಂ;
ನದೀಯೋ ಪಲ್ಲಲೇ ಚೇವ, ಕರೋನ್ತಿ ಮಗ್ಗಸಾದಿಸೇ.
ಬಾಲಕೋವ ಜನಂ ದಿಸ್ವಾ, ಸಬ್ಬಂ ರತನಮತ್ತನೋ;
ಕೋಧಾಭಿಭೂತೋ ಛಡ್ಡೇಸಿ, ನದೀ ಸೋಬ್ಭತಟಾದೀಸು.
ಏಕಕೋವ ನಿಲೀಯಿತ್ಥ, ವನೇ ಪಬ್ಬತಕನ್ದರೇ;
ಗವೇಸನ್ತೋ ಜನೋ ದಿಸ್ವಾ, ತಮಗ್ಗಹಿ ನರಾಧಮ್ಮಂ.
ತಮಾದಾಯ’ತಿ ತುಟ್ಠೋ ಸೋ, ಜನೋ ಆಗಮ್ಮ ಸಜ್ಜುಕಂ;
ಮಹಿನ್ದಮುಪದಸ್ಸೇಸಿ, ನಿಸಿನ್ನಂ ಗುತ್ತಸಾಲಕೇ.
ಸೋ ತಂ ದಿಸ್ವಾ ಹಸಿತ್ವಾನ,
ಭುತ್ತೋ ಕಿಂ ರೋಹಣೋ’’ಇತಿ;
ನಾಯಕಸ್ಸ ನಿಯ್ಯಾತೇತ್ವಾ,
ವಜಿರಗ್ಗಸ್ಸ ರಾಜಿನೋ.
ಸಯಂ ಸೇನಂ ಸಮಾದಾಯ, ಮಹಾಗಾಮಮುಪಾಗತೋ;
ರೋಹಣಾ ಧಿಪತಿ ಹುತ್ವಾ, ಕರೋನ್ತೋ ಲೋಕಸಙ್ಗಹಂ.
ಜನಂ ಪಾಕತಿಕಂ ಕತ್ವಾ, ಬಾಲಕೇನ ವಿಬಾಧಿತಂ;
ಸಾಸನಞ್ಚ ಯಥಾಠಾನೇ, ಠಪೇತ್ವಾ ತೇನ ನಾಸಿತಂ.
ಪುಪ್ಫಾರಾಮೇ ಫಲಾರಾಮೇ, ಕಾರಯಿತ್ವಾ ತಹಿಂ ತಹಿಂ;
ವಾಪಿಯೋ’ಪಿ ಚ ಗಣ್ಹಿತ್ವಾ, ಬನ್ಧಾಪೇತ್ವಾ ಮಹಾನದಿಂ.
ಸಬ್ಬತ್ಥ ಸುಲಭಂ ಕತ್ವಾ, ಸಙ್ಘಸ್ಸ ಚತುಪಚ್ಚಯಂ;
ದುಟ್ಠೇ ಚ ಪಟಿಬಾಹೇತ್ವಾ, ಮಣ್ಡಲೀಕೇ ಚ ರಟ್ಠಿಯೇ.
ಚೋರೇ ಚ ಪರಿಸೋಧೇತ್ವಾ, ಕತ್ವಾ ವಿಗತಕಣ್ಟಕಂ;
ತೋಸಯನ್ತೋ’ಖಿಲಂ ಲೋಕಂ, ಚಾಗಭೋಗಸಮಪ್ಪಿತೋ.
ಉಪಾಸನಿಯೋ ವಿಞ್ಞೂಹಿ, ಸೇವನೀಯೋ ಧನತ್ಥೀಹಿ;
ಕಪ್ಪರುಕ್ಖೂಪಮೋ ಸಬ್ಬ-ಯಾಚಕಾನಂ ಹಿತಾವಹೋ.
ಹಿತ್ವಾ ದುಬ್ಬಿನಯಂ ದೇಸೇ, ಪುಬ್ಬಕೇಹಿ ಪವತ್ತಿತಂ;
ಸಮಾಚರನ್ತೋ ಧಮ್ಮಞ್ಚ, ವಾಸಂ ತತ್ಥೇವ ಕಪ್ಪಯಿ.
ಆದಿಪಾದಂ ಗಹೇತ್ವಾನ, ವಜಿರಗ್ಗೋ ವಿನಾಯಕೋ;
ಅನುರಾಧಮುಪಾಗಮ್ಮ, ರಾಜಾನಮಭಿದಸ್ಸಯಿ.
ರಾಜಾಪಿ ದಿಸ್ವಾ ತಂ ಕುದ್ಧೋ, ಖಿಪ್ಪಂ ಪಕ್ಖಿಪ್ಪ ಚಾರಕೇ;
ರಕ್ಖಾವರಣಮಸ್ಸಾದಾ, ವಿಹೇಠೇಸಿ ಚ ಸಬ್ಬಾಸೋ.
ಅದಾಸಿ ¶ ಚ ತುಲಾಭಾರಂ, ತಿಕ್ಖತ್ತುಂ ಸೋ ಮಹಾಯಸೋ;
ಥೂಪಾರಾಮಮ್ಹಿ ಥೂಪಞ್ಚ, ಹೇಮಪಟ್ಟೇನ ಛಾದಯಿ.
ಕತ್ವಾ ತತ್ಥೇವ ಪಾಸಾದಂ, ಭಿಕ್ಖುಸಙ್ಘಂ ನಿವಾಸಿಯ;
ವಿಹಾರೇ ನಗರೇ ಚೇವ, ಪಟಿಸಙ್ಖಾಸಿ ಜಿಣ್ಣಕಂ.
ಕದಮ್ಬನದೀಯಾ’ಕಾಸಿ, ನಿಜ್ಝರಂ ಥಿರಬನ್ಧನಂ;
ಮರಿಯಾದಂ ಪವಡ್ಢೇಸಿ, ವಾಪಿಯಂ ಸೋ ಮಯೇತ್ತಿಯಂ.
ತತ್ಥ ನಿದ್ಧಮನಂಚಾ’ಕಾ, ಅನುವಸ್ಸಮ್ಪಿ ಭೂಮಿಪೋ;
ಚೀವರತ್ಥಂ ಸುವತ್ಥಾನಿ, ಸುಸಣ್ಹಾನಿ ಚ ದಾಪಯಿ.
ದುಬ್ಭಿಕ್ಖೇ ದಾನಸಾಲಾಯೋ, ಕಾರೇತ್ವಾ ಸಬ್ಬಪಾಣಿನಂ;
ಮಹಾದಾನಂ ಪವತ್ತೇಸಿ, ಮಹಾಪಾಳಿಞ್ಚ ವಡ್ಢಯಿ.
ದಧಿಭತ್ತಞ್ಚ ದಾಪೇಸಿ, ನಿಕಾಯತ್ತಯವಾಸಿನಂ;
ನಿಚ್ಚಂ ದುಗ್ಗತಭತ್ತಞ್ಚ, ಯಾಗುಞ್ಚೇವ ಸಖಜ್ಜಕಂ.
ಏವಮಾದೀನಿ ಪುಞ್ಞಾನಿ, ಕತ್ವಾ ಸೋವಗ್ಗಿಯಾನಿ ಸೋ;
ಏಕಾದಸಹಿ ವಸ್ಸೇಹಿ, ಗತೋ ದೇವಸಹಬ್ಯತಂ.
ತಸ್ಸೇಕಾದಸವಸ್ಸೇಸು, ವಿಸ್ಸಟ್ಠಂ ಸೋಣ್ಣಮೇವ ತು;
ಅಹು ಸತಸಹಸ್ಸಾನಂ, ತಯೋ ದಸಹಿ ಸಮ್ಮಿತಂ.
ಸುದುಜ್ಜಯಂ ಪಣ್ಡುನರಾಧಿರಾಜ,
ಮೇಕೋಪರೋ ರೋಹಣಮುಗ್ಗದುಗ್ಗಂ;
ಕತ್ವಾ’ಪಿ ಏತೇ ಸವಸೇ ನರಿನ್ದಾ,
ಸಯಂ ವಸಂ ಮಚ್ಚುಮುಪಾಗಮಿಂಸು.
ಸುಜನಪ್ಪಸಾದ ಸಂವೇಗತ್ಥಾಯ ಕತೇ ಮಹಾವಂಸೇ
ರಾಜದ್ವಯದೀಪನೋ ನಾಮ
ಏಕೂನಪಞ್ಞಾಸತಿಮೋ ಪರಿಚ್ಛೇದೋ.
ಪಞ್ಞಾಸತಿಮ ಪರಿಚ್ಛೇದ
ದ್ವಿರಾಜಕೋನಾಮ
ತತೋ ¶ ರಜ್ಜೇ ಪತಿಟ್ಠಾಯ, ಕಸ್ಸಪೋ ದಕ್ಖಿಣಂ ದಿಸಂ;
ಅದಾ ಕಸ್ಸಪನಾಮಸ್ಸ, ಯುವರಾಜಸ್ಸ ಧೀಮತೋ.
ಅಗ್ಗಾಭಿಸೇಕಂ ದಾಪೇಸಿ, ಯುವರಾಜಸ್ಸ ಧೀತುಯಾ;
ರಾಜಕಞ್ಞಾಯ ತಿಸ್ಸಾಯ, ಭರಿಯಾಯೇ’ವ ಅತ್ತನೋ.
ಯಾಚಕಾನಞ್ಚ ಸಿಪ್ಪೀನಂ, ಆಗತಾನಂ ತತೋ ತತೋ;
ದಾನಂ ದಣ್ಡಿಸ್ಸರಂ ನಾಮ, ಸದಾ ದಾಪೇಸಿ ಭೂಪತಿ.
ಆದಿಪಾದೋ ಮಹಿನ್ದೋ ಸೋ,
ವಸನ್ತೋ ರೋಹಣೇ ತದಾ;
ಗಹೇತುಂ ರಾಜಿನೋರಟ್ಠ-
ಮಾದಾಯ ಬಲಮಾಗತೋ.
ತಂ ಸುತ್ವಾ ಕುಪಿತೋ ರಾಜಾ, ಬಲಂ ಪೇಸೇಸಿ ಅತ್ತನೋ;
ಯುಜ್ಝಿತ್ವಾ ತಂ ಪರಾಜೇಸಿ, ಮಹಿನ್ದೋ ಸೋ ಮಹಾಭಟೋ.
ತತೋ ರಾಜಾ ನಿವತ್ತೇತುಂ, ಪಿತರಂ ತಸ್ಸ ಪೇಸಯಿ;
ಕಸ್ಸಪಂ ಯುವರಾಜಂ ತಂ, ಸೋ ಗನ್ತ್ವಾ ಪುತ್ತಸನ್ತಿಕಂ.
ನಾನಾಧಮ್ಮಕಥೋಪೇತಂ, ವತ್ವಾ ಯುತ್ತಿಮನೇಕಧಾ;
ಸಙ್ಘಾಮತೋ ನಿವತ್ತೇತ್ವಾ, ಪುತ್ತಂ ಸೋ ಪುನರಾಗಮಿ.
ಆದಿಪಾದೋ ತು ಸೋ ಪಚ್ಛಾ, ಘಾತೇತ್ವಾ ಮಣ್ಡಲಾಧಿಪೇ;
ಕುದ್ಧೇಜನಪದೇ ದಿಸ್ವಾ, ಅಗಮಾಸಿ ಪುರನ್ತಿಕಂ.
ಭಿಕ್ಖುಸಙ್ಘೋ ತಮಾನೇತ್ವಾ, ದಸ್ಸೇಸಿ ವಸುಧಾಧಿಪಂ;
ದತ್ವಾ ಸೋ ಧೀತರಂ ತಸ್ಸಾ, ಪೇಸೇಸಿ ಪುನ ರೋಹಣಂ.
ನೀಹರಿತ್ವಾನ ದುಸ್ಸೀಲೇ, ನಿಕಾಯತ್ತಯವಾಸೀಸು;
ಗಾಹಾಪೇಸಿ ನವೇ ಭಿಕ್ಖೂ, ಆವಾಸೇ ತತ್ಥ ತತ್ಥ ಸೋ.
ದ್ವಯಾಭಿಸೇಕಜಾತೇನ, ಆದಿಪಾದೇನ ಸುನುನಾ;
ಮಹಾವಿಹಾರೇ ಬೋಧಿಮ್ಹಿ, ಪಂಸುಂ ವಡ್ಢೇಸಿ ಪೂಜಯಂ.
ಅಕಾಸಿ ¶ ಚ ನಿಕಾಯೇಸು, ತೀಸು ಬಿಮ್ಬೇ ಸಿಲಾಮಯೇ;
ಸೋವಣ್ಣಯೇ ರಂಸಿಜಾಲೇ, ಛತ್ತಂ ಚೂಳಾಮಣಿಂ ತಥಾ.
ಅಭಯಗಿರಿವಿಹಾರಮ್ಹಿ, ಪಾಸಾದಂ ಸಕನಾಮಕಂ;
ಕತ್ವಾ ತತ್ಥ ನಿವಾಸೇತ್ವಾ, ಭಿಕ್ಖು ಗಾಮಮದಾಪಯಿ.
ಮಹಿಯಙ್ಗಣವಿಹಾರಸ್ಮಿಂ, ಗಾಮಂ ಸೋ ಚೇತಿಯಸ್ಸ’ದಾ;
ಸವತ್ಥಂ ಪಟಿಮಾಭತ್ತಂ, ಸಬ್ಬಭಿಕ್ಖೂನ ದಾಪಯಿ.
ಥಲೇ ಜಲೇ ಚ ಸತ್ತಾನಂ, ಅದಾಸಿ ಅಭಯಂ ತದಾ;
ಚಾರಿತ್ತಪುಬ್ಬರಾಜೂನಂ, ಪರಿಪಾಲೇಸಿ ಸಬ್ಬದಾ.
ತಸ್ಸ ಸೇನಾಪತಿ ಸೇನೋ, ಇಲಙ್ಗೋರಾಜವಂಸಜೋ;
ಥೇರಿಯಾನಂ ಅಕಾ’ವಾಸಂ; ಥೂಪಾರಾಮಸ್ಸ ಪಚ್ಛತೋ.
ಧಮ್ಮಾರುಚಿಕಭಿಕ್ಖೂನಂ, ಧಮ್ಮಾರಾಮಮಕಾರಯಿ;
ತಥಾ ಸಾಗಲಿಕಾನಞ್ಚ, ಕಸ್ಸಪಸೇನನಾಮಕಂ.
ಹದಯುಣ್ಹಾಭಿಧಾನಂ ಸೋ, ಕತ್ವಾ ಚೇತಿಯಪಬ್ಬತೇ;
ಪರಿವೇಣಂ ಅದಾಧಮ್ಮ-ರುಚಿಕಾನಞ್ಚ ಭಿಕ್ಖೂನಂ.
ಆರಾಮಿಕಾನಂ ಭಿಕ್ಖೂನಂ, ಆರಾಮೇಸು ತಹಿಂ ತಹಿಂ;
ಏಕಮೇಕಂ ಕುಟಿಂ ಕತ್ವಾ, ದಾಪೇಸಿ ಚ ಚಮೂಪತಿ.
ರತ್ತಮಾಲಗಿರಿಸ್ಮಿಂ ಸೋ, ಕತ್ವಾ ರಮ್ಮಂ ತರಂ ಸುಭಂ;
ಕುಚಿಂ ಅದಾ ಸಾಸನಸ್ಸ, ಸಾಮಿಕಾನಂ ತಪಸ್ಸಿನಂ.
ಮಹಾವಿಹಾರೇ ಕಾರೇತ್ವಾ, ಪವಿವೇಣಂ ವರಂ ಅದಾ;
ಪಂಸುಕೂಲಿಕಭಿಕ್ಖೂನಂ, ಸಮುದ್ದಗಿರಿನಾಮಕಂ.
ವಾಸಂ ಅರಞ್ಞೇ ಕಾರೇತ್ವಾ, ಅತ್ತನೋ ವಂಸನಾಮಕಂ;
ಮಹಾವಿಹಾರೇ ಭಿಕ್ಖೂನಂ, ವನೇ ನಿವಾಸತಂ ಅದಾ.
ವಿಹಾರೇಸೂ ಚ ಜಿಣ್ಣೇಸು, ನವಕಮ್ಮಮಕಾರಯಿ;
ದಾಪೇಸಿ ಅಗ್ಗಲಂ ಸಬ್ಬ-ಭಿಕ್ಖೂನಂ ಜಿಣ್ಣಚೀವರೇ.
ತಿಸ್ಸಾರಾಮಂ ಕರಿತ್ವಾನ, ಭಿಕ್ಖೂನೀನಮುಪಸ್ಸಯಂ;
ಮರಿಚವಟ್ಟಿಮಹಾಬೋಧಿ, ಪರಿಹಾರೇ ನಿವೇಸಯಿ.
ಅನುರಾಧಪುರೇ ಚೇವ, ಪುಲತ್ಥಿನಗರೇಪಿ ಚ;
ಉಪಸಗ್ಗರೋಗನಾಸಾಯ, ವೇಜ್ಜಸಾಲಾಪಿ ಕಾರಯಿ.
ಅತ್ತನಾ ಕತವಾಸನಂ, ಭೋಗಗಾಮೇ ಚ ದಾಪಯಿ;
ತಥಾರಾಮಿಕಗಾಮೇ ಚ, ಪಟಿಮಾಭರಣಞ್ಚ ಸೋ.
ಭೇಸಜ್ಜಗೇಹಂ ¶ ಕಾರೇಸಿ, ನಗರೇ ತತ್ಥ ತತ್ಥ ಸೋ;
ಪಂಸುಕೂಲಿಕಭಿಕ್ಖೂನಂ, ಭತ್ತಂ ವತ್ಥಞ್ಚ ದಾಪಯಿ.
ಖನ್ಧೀಕತೇ ಅಮೋಚೇಸಿ, ತಿರಚ್ಛಾನಗತೇ ಬಹೂ;
ಕಪಣಾನಞ್ಚ ದಾಪೇಸಿ, ಮಹಾದಾನಂ ಚಮೂಪತಿ.
ವಿಚಿತ್ತಂ ಬ್ಯಞ್ಜನಂ ಭತ್ತಂ, ಯಾಗುಂ ವಿವಿಧಖಜ್ಜಕಂ;
ಕತ್ವಾ ಸೂಕರರೂಪಞ್ಚ, ಗುಳಂ ಭಿಕ್ಖೂನಂ ದಾಪಯಿ.
ಏವಾಮಾದೀನಿ ಪುಞ್ಞಾನಿ, ಕತ್ವಾ ಸೇನಾಯ ನಾಯಕೋ;
ಸೇನೋ ಕಿತ್ತಿನ್ದುಪಾದೇಹಿ, ಸಬ್ಬಾ ಓಭಾಸಯೀ ದಿಸಾ.
ತಸ್ಸೇವ ಞಾತಕೋ ಕತ್ವಾ, ನಾಯಕೋ ರಕ್ಖಸವ್ಹಯೋ;
ಸವಾರಕಮ್ಹಿ ಗಾಮಮ್ಹಿ, ವಿಹಾರಂ ಸುಮನೋಹರಂ.
ಮಹಾವಿಹಾರವಾಸೀನಂ, ಸಾರಾನಂ ಪಟಿಪತ್ತಿಯಾ;
ಭಿಕ್ಖೂನಂ ಸೋ ಅದಾ ಸಾಧು, ಠಪೇತ್ವಾ ವತ್ತಮುತ್ತಮಂ.
ಸೇನೋ ನಾಮ ಮಹಾಲೇಖೋ, ಮಹಾಲೇಖಕಪಬ್ಬತಂ;
ಮಹಾವಿಹಾರೇ ಕಾರೇಸಿ, ಭಿಕ್ಖೂನಂ ವಾಸಮುತ್ತಮಂ.
ಚೋಳರಾಜಾಭಿಧಾನೋ, ಚ, ಅಮಚ್ಚೋ ತಸ್ಸ ರಾಜಿನೋ;
ಪರಿವೇಣಂ ಅಕಾರಮ್ಮಂ, ನಟ್ಠಂ ತಂ ಸುಪ್ಪತಿಟ್ಠಿತಂ.
ರಾಜಾ ತೀಸು ನಿಕಾಯೇಸು, ರೂಪಕಮ್ಮಮನೋರಮಂ;
ಮಣ್ಡಪಾನಿ ವಿಚಿತ್ತಾನಿ, ವೇಜಯನ್ತೋ ಪಮಾನಿ ಚ.
ಕಾರೇತ್ವಾ ಧಾತುಪೂಜಾಯೋ, ಕತ್ವಾ ಜನಮನೋಹರಾ;
ಯಥಾ ಕಮ್ಮಂ ಗತೋ ಠತ್ವಾ, ವಸ್ಸಾನಿ ದಸಸತ್ತ ಚ.
ದ್ವಯಾಭಿಸೇಕಸಞ್ಜಾತೋ, ಯುವರಾಜಾಥ ಕಸ್ಸಪೋ;
ಆಸಿ ಲದ್ಧಾಭಿಸೇಕೋ ಸೋ, ಲಂಕಾರಜ್ಜೇಕಮಾಗತೇ.
ಸದ್ಧೋ ಆಗತಮಗ್ಗೋವ, ಸಾಭಿಞ್ಞೋ ವಿಯ ಪಞ್ಞವಾ;
ವತ್ತಾ ಸೋ ಮರಮನ್ತಿವ, ಚಾಗವಾ ಧನದೋ ವಿಯ.
ಬಹುಸ್ಸುತೋ ಧಮ್ಮಕಥೀ, ಸಬ್ಬಸಿಪ್ಪವಿಸಾರದೋ;
ಯುತ್ತಾಯುತ್ತವಿಚಾರಾಯ, ನಿಪುಣೋ ನಯಕೋವಿದೋ.
ಅಚಲೋ ಇನ್ದಲೀಲೋ’ವ, ಠಿತೋ ಸುಗತಸಾಸನೇ;
ಪರಪ್ಪವಾದಿವಾತೇಹಿ, ಸಬ್ಬೇಹಿ’ಪಿ ಅಕಮ್ಪಿಯೋ.
ಮಾಯಾಸಾಠೇಯ್ಯಮಾನಾದಿ, ಪಾಪಾನಞ್ಚ ಅಗೋಚರೋ;
ಗುಣಾನಂ ಆಕರೋ ಸಬ್ಬ-ರತನಾನಂ ವಸಾಗರೋ.
ಭೂಮಿಚನ್ದೋ ¶ ನರಿನ್ದೋ ಸೋ, ವಂಸೇ ಜಾತಸ್ಸ ಅತ್ತನೋ;
ದಪ್ಪುಳಸ್ಸಾದೀಪಾದಸ್ಸ, ಯುವರಾಜಪದಂ ಅದಾ.
ರಜ್ಜಂ ದಸಹಿ ಧಮ್ಮೇಹಿ, ಚತುಸಙ್ಗಹವತ್ಥೂಹಿ;
ಕರೋನ್ತೋ ಪರಿಪಾಲೇಸಿ, ಲೋಕಂ ನೇತ್ತಂವ ಅತ್ತನೋ.
ಸೋ ಧೇತ್ವಾ ಸಾಸನಂ ಸಬ್ಬಂ, ಧಮ್ಮಕಮ್ಮೇನ ಸತ್ಥುನೋ;
ಗಹೇತ್ವಾ ನವಕೇ ಭಿಕ್ಖೂ, ಅಕಾಸಾ’ವಾಸಪೂರಣಂ.
ದುಟ್ಠಗಾಮಣಿರಾಜೇನ, ಕತಂ ಮರಿಚವಟ್ಟಿಕಂ;
ನಟ್ಠಂ ವಿಹಾರಂ ಕಾರೇತ್ವಾ, ನಾನಾಆವಾಸ ಭೂಸಿತಂ.
ಥೇರವಂಸಜಭಿಕ್ಖೂನಂ, ಅದಾ ಕತ್ವಾ ಮಹಾಮಹಂ;
ತೇಸಂ ಪಞ್ಚಸತಾನಞ್ಚ, ಭೋಗಗಾಮೇ ಚ ದಾಪಯಿ.
ತತ್ಥ ಸೋ ತುಸಿತೇ ರಮ್ಮೇ, ದೇವಸಙ್ಘಪುರಕ್ಖತಂ;
ಮೇತ್ತೇಯ್ಯಂ ಲೋಕನಾಥಂ ತಂ, ದೇಸೇನ್ತಂ ಧಮ್ಮಮುತ್ತಮಂ.
ದಸ್ಸೇನ್ತೋ ವಿಯ ಲೋಕಸ್ಸ, ವಿಹಾರೇ ಸಬ್ಬಸಜ್ಜಿತೇ;
ನಿಸಿನ್ನೋ ಮಣ್ಡಪೇ ರಮ್ಮೇ, ನಾನಾರತನಭೂಸಿತೇ.
ನಗರೇಹಿ ಚ ಸಬ್ಬೇಹಿ, ಭಿಕ್ಖೂಹಿ ಪರಿವಾರಿತೋ;
ಬುದ್ಧಲಿಲಾಯ ಲಂಕಿನ್ದೋ, ಅಭಿಧಮ್ಮ ಮಭಾಸಯಿ.
ಸೋಣ್ಣಪಟ್ಟೇ ಲಿಖಾಪೇತ್ವಾ-ಭಿಧಮ್ಮಪಿಟಕಂ ತದಾ;
ಧಮ್ಮಸಙ್ಗಣಿಕಂ ಪೋತ್ಥಂ, ನಾನಾರತನ ಭೂಸಿತಂ.
ಕತ್ವಾ ನಗರಮಜ್ಝಮ್ಹಿ, ಕಾರೇತ್ವಾ ಹೇಮಮುತ್ತಮಂ;
ತಂ ತತ್ಥ ಠಪಯಿತ್ವಾನ, ಪರಿಹಾರಮದಾಪಯಿ.
ಸಕ್ಕಸೇನಾಪತಿಟ್ಠಾನಂ, ದತ್ವಾ ಪುತ್ತಸ್ಸ ಅತ್ತನೋ;
ಪರಿಹಾರೇ ನಿಯೋಜೇಸಿ, ತತ್ಥ ತಂ ಧಮ್ಮಪೋತ್ಥಕೇ.
ಅನುಸಂವಚ್ಛರಂ ರಾಜಾ, ಪುರಂ ದೇವಪುರೀ ವಿಯ;
ವಿಭೂಸಿತಾಯ ಸೇನಾಯ, ಸಜ್ಜೇತ್ವಾ ಪರಿವಾರಿತೋ.
ದೇವರಾಜಾವ ಸೋಭನ್ತೋ, ಸಬ್ಬಾಭರಣಭೂಸಿತೋ;
ಹತ್ಥಿಖಣ್ಡೇ ನಿಸೀದಿತ್ವಾ, ಚರನ್ತೋ ಪುರವೀಥಿಯಂ.
ಮಹತಾ ಪರಿಹಾರೇನ, ನೇತ್ವಾ ತಂ ಧಮ್ಮಸಙ್ಗಹಂ;
ಅತ್ತನಾ ಕಾರಿತಂ ರಮ್ಮಂ, ವಿಹಾರಂ ಸಬ್ಬಸಜ್ಜಿತಂ.
ತತ್ಥ ಧಾತುಗತೇ ರಮ್ಮೇ, ನಾನಾರತನಭೂಸಿತೇ;
ಮಣ್ಡಪೇ ಧಾತುಪಿಠಸ್ಮಿಂ, ಪತಿಟ್ಠಾಪಿಯ ಪೂಜಯಿ.
ಗನ್ಥಾಕರಪರಿವೇಣಂ ¶ , ಮಹಾಮೇಘವನೇ ಅಕಾ;
ನಗರೇ ವಜ್ಜಸಾಲಾ ಚ, ತೇಸಂ ಗಾಮೇ ಚ ದಾಪಯಿ.
ಭಣ್ಡಿಕಪರಿವೇಣಞ್ಚ, ಸಿಲಾಮೇಘಞ್ಚ ಪಬ್ಬತಂ;
ಕತ್ವಾ’ಭಯಗಿರಿಸ್ಮಿಂ ಸೋ, ತೇಸಂ ಗಾಮಮದಾಪಯಿ.
ಜೋತಿವನವಿಹಾರಸ್ಮಿಂ, ರಾಜಾ ಲಙ್ಕಾಯ ನಾಯಕೋ;
ಭತ್ತಗ್ಗಸ್ಸ ಅದಾ ಗಾಮಂ, ತಥಾ’ಭಯಗಿರಿಮ್ಹಿ ಚ.
ದಕ್ಖಿಣಗಿರಿನಾಮಸ್ಸ, ವಿಹಾರಸ್ಸ ಚ ದಾಪಯಿ;
ಗಾಮಂ ಕತಞ್ಞುಭಾವೇನ, ರಾಜಾ ಪರಮಧಮ್ಮಿಕೋ.
ಸಕ್ಕಸೇನಾಪತಿ ರಮ್ಮಂ, ಪರಿವೇಣಂ ಸುಮಾಪಿಯ;
ಅದಾಸಿ ಸಹಗಾಮೇಹಿ, ಥೇರಿಯಾನಂ ಸನಾಮಿಕಂ.
ಭರಿಯಾ ವಜಿರಾ ತಸ್ಸ, ತೇಸಂಯೇವ ಅದಾಪಯಿ;
ಪರಿವೇಣಂ ಕರಿತ್ವಾನ, ಸಗಾಮಂ ಸಕನಾಮಕಂ.
ಉಪಸ್ಸಯಂ ಕರಿತ್ವಾನ, ಸಾ ಏವ ಪದಲಞ್ಛನೇ;
ಭಿಕ್ಖೂನೀನಂ ಅದಾ ಥೇರ-ವಂಸೇ ಸಬ್ಬತ್ಥ ಪೂಜಿತೇ.
ಸಕ್ಕಸೇನಾಪತಿ ಮಾತಾ, ದೇವಾ’ರಞ್ಞಕ ಭಿಕ್ಖೂನಂ;
ಥೇರವಂಸಪ್ಪದೀಪಾನಂ, ಅಕಾ’ವಾಸಂ ಸನಾಮಕಂ.
ಸಾ ಏವ ಪಟಿಬಿಮ್ಬಸ್ಸ, ಸತ್ಥು ಮರಿಚವಟ್ಟಿಯಂ;
ಚೂಳಾಮಣಿಂ ಪಾದಜಲಂ, ಅಕಾ ಛತ್ತಞ್ಚ ಚೀವರಂ.
ರಾಜಾ ರಾಜಾಲಯೇಯೇವ, ರಾಜವಂಸಂ ಸನಾಮಕಂ;
ಅಕಾಸಿ ಪಾಳಿಕಂ ನಾಮ, ಪಾಸಾದಂ ಸುಮನೋ ಹರಂ.
ಪೂಜೇಸಿ ರಾಜಿನೀ ನಾಮ, ರಾಜಿನೋ ಭರಿಯಾ’ಪರಾ;
ಪಟ್ಟಕಞ್ಚುಕಪೂಜಾಯ, ಹೇಮಮಾಲಿಕ ಚೇತಿಯಂ.
ತಸ್ಸಾ ಪುತ್ತೋಸಿ ಸಿದ್ಧತ್ಥೋ, ನಾಮ ಇಸ್ಸರಿಯೇ ಠಿತೋ;
ಸುತೋ ಮಲಯರಾಜಾತಿ, ರೂಪೇನ ಮಕರದ್ಧಜೋ.
ರಾಜಾ ತಸ್ಮಿಂ ಮತೇ ಕತ್ವಾ, ಸಾಲಂ ಭಿಕ್ಖುನಮುತ್ತಮಂ;
ದಾನವಟ್ಟಂ ಪಟ್ಠಪೇತ್ವಾ, ತಸ್ಸ ಪತ್ತಿಮದಾ ತದಾ.
ಏವಂ ಧಮ್ಮೇನ ಕಾರೇನ್ತೇ, ರಜ್ಜಂ ಲಙ್ಕಾದೀಪೇ ತದಾ;
ಚೋಳರಾಜೇನ ಯುಜ್ಝಿತ್ವಾ, ಪಣ್ಡುರಾಜಾ ಪರಾಜಿತೋ.
ಪಣ್ಣಾಕಾರಾನಿ ನೇಕಾನಿ, ಬಲಂ ಸನ್ಧಾಯ ಪೇಸಯಿ;
ರಾಜಾಲಂಕಿಸ್ಸರೋ ಸದ್ಧಿಂ, ಮನ್ತೇತ್ವಾ ಸಚಿವೇಹಿ ಸೋ.
ಸನ್ನಯ್ಹ ¶ ಬಲಕಾಯಂ ಸೋ, ಸಕ್ಕಸೇನಾಪತಿಂ ಸಕಂ;
ಬಲಸ್ಸ ನಾಯಕಂ ಕತ್ವಾ, ಮಹಾಯಿತ್ಥಮುಪಾಗಮಿ.
ವಿಜಯಂ ಪುಬ್ಬರಾಜೂನಂ, ವತ್ವಾ ವೇಲಾತಟೇ ಠಿತೋ;
ಉಸ್ಸಾಹಂ ಜನಯಿತ್ವಾನ, ನಾವಂ ಆರೋಪಯೀ ಬಲಂ.
ಬಲಕಾಯಂ ಸಮಾದಾಯ, ಸಕ್ಕಸೇನಾಪತಿಂ ತದಾ;
ಸುಖೇನ ಸಾಗರಂ ತಿಣ್ಣೋ, ಪಣ್ಡುದೇಸಮುಪಾಗಮಿ.
ದಿಸ್ವಾ ಬಲಞ್ಚ ತಞ್ಚೇವ, ಪಣ್ಡುರಾಜಾ ಸುಮಾನಸೋ;
ಏಕಚ್ಛತ್ತಂ ಕರಿಸ್ಸಾಮಿ, ಜಮ್ಬುದೀಪನ್ತಿ ಅಬ್ರವಿ.
ಬಲದ್ವಯಂ ಗಹೇತ್ವಾನ, ರಾಜಾ ಸೋ ಚೋಳವಂಸಜಂ;
ಜೇತುಂ ಅಸಕ್ಕುಣಿತ್ವಾನ ಯುದ್ಧಮುಜ್ಝಿಯ ನಿಕ್ಖಮಿ.
ಯುಜ್ಝಿಸ್ಸಾಮೀತಿ ಗನ್ತಾನ, ಸಕ್ಕಸೇನಾಪತೀ ಪುನ;
ನಿಸಿನ್ನೋ ಉಪಸಗ್ಗೇನ, ಮತೋ ಪಾಪೇನ ಪಣ್ಡುತೋ.
ಲಂಕಿಸ್ಸರೋ ಬಲಸ್ಸಾಪಿ, ತೇನ ರೋಗೇನ ನಾನಸಂ;
ಸುತ್ವಾ ದಯಾಲುಭಾವೇನ, ಸೇನಂ ಆಣಾಪಯೀ ತತೋ.
ಸಕ್ಕ ಸೇನಾಪತಿಟ್ಠಾನಂ, ತಸ್ಸ ಪುತ್ತಸ್ಸ’ದಾ ತದಾ;
ವಡ್ಢೇಸಿ ತೇನ ತಂ ಪುತ್ತಂ, ಕತ್ವಾ ಸೇನಾಯ ನಾಯಕಂ.
ನಿಕಾಯತ್ತಯವಾಸೀಹಿ, ಪರಿತ್ತಂ ನಗರೇ ತದಾ;
ಕಾರೇತ್ವಾ ರೋಗದುಬ್ಬುಟ್ಠಿ-ಭಯಂ ನಾಸೇಸಿ ಜನ್ತುನಂ.
ಸಾಸನಸ್ಸ ಚ ಲೋಕಸ್ಸ, ಸನ್ತಿಂ ಕತ್ವಾ ಅನೇಕಧಾ;
ರಾಜಾ ಸೋ ದಸಮೇ ವಸ್ಸೇ, ಸುಖೇನ ತಿದಿವಂ ಗತೋ.
ಲಂಕಾರಜ್ಜೇಪಿ ಠತ್ವಾ ಕಥಿತತಿಪಿಟಕೋ ಸಬ್ಬವಿಜ್ಜಾಪದೀಪೋ,
ವತ್ತಾವಾದೀ ಕವೀ ಸೋ ಸತಿಧೀತಿವಿಸದೋ ದೇಸಕೋ ಭಾವಕೋ ಚ;
ಪಞ್ಞಾಸದ್ಧಾದಯಾ ವಾ ಪರಹಿತನಿರತೋ ಲೋಕವೇದೀವದಞ್ಞೂ;
ರಾಜಿನ್ದೋ ಕಸ್ಸಪೋ’ಯಂ ವಿಯ ವಿಮಲಗುಣೋ ಹೋತುಲೋಕೋಪಿ ಸಬ್ಬೋ.
ಸುಜನಪ್ಪಸಾದಸಂವೇಗತ್ಥಾಯ ಕತೇ ಮಹಾವಂಸೇ
ದ್ವಿರಾಜಕೋ ನಾಮ
ಪಞ್ಞಾಸತಿಮೋ ಪರಿಚ್ಛೇದೋ.
ಏಕಪಞ್ಞಾಸತಿಮ ಪರಿಚ್ಛೇದ
ಪಞ್ಚರಾಜಕೋ ನಾಮ
ಯುವರಾಜಾ ¶ ತದಾ ಹುತ್ವಾ, ರಾಜಾ ದಪ್ಪುಳನಾಮಕೋ;
ಠಪೇಸಿ ಓಪರಜ್ಜಮ್ಹಿ, ಆದಿಪದಂ ಸನಾಮಕಂ.
ಮರಿಚವಟ್ಟಿವಿಹಾರಸ್ಸ, ಗಾಮಂ ದತ್ವಾ ತತೋ ಪುರೇ;
ಚಾರಿತ್ತಂ ಪುಬ್ಬರಾಜೂನಂ, ರಕ್ಖಿತ್ವಾನ ಮಹಿಂ ಇಮಂ.
ಅಭುತ್ವಾ ದೀಘಕಾಲಞ್ಹಿ, ಪುಬ್ಬಕಮ್ಮೇನ ಅತ್ತನೋ;
ರಾಜಾ ಸೋ ಸತ್ತಮೇ ಮಾಸೇ, ಪವಿಟ್ಠೋ ಪಚ್ಚುನೋ ಮುಖಂ.
ಉಪರಾಜಾ ಅಹುರಾಜಾ, ದಪ್ಪುಳೋ ತದನನ್ತರಂ;
ಉದಯಸ್ಸಾದಿಪಾದಸ್ಸ, ಯುವರಾಜಪದಂ ಅದಾ.
ತದಾ ಚೋಳಭಯಾ ಪಣ್ಡು-ರಾಜಂ ಜನಪದಂ ಸಕಂ;
ಚಜಿತ್ವಾ ನಾವಮಾರುಯ್ಹ, ಮಹಾತಿತ್ಥಮುಪಾಗಮಿ.
ಆಣಾಪೇತ್ವಾನ ತಂ ರಾಜಾ, ದಿಸ್ವಾ ಸನ್ತುಟ್ಠಮಾನಸೋ;
ಮಹಾಭೋಗಂ ಅದಾ ತಸ್ಸ, ನಿವಾಸೇಸಿ ಪುರಾ ಬಹಿ.
ಚೋಳರಾಜೇನ ಯುಜ್ಝಿತ್ವಾ, ಗಹೇತ್ವಾ ಪಟ್ಟನದ್ವಯಂ;
ಪಣ್ಡುರಾಜಸ್ಸ ದಮ್ಮೀತಿ, ಸನ್ನದ್ಧೇ ಲಙ್ಕರಾಜಿನಿ.
ಕೇನಾ’ಪಿ ಕರಣೀಯೇನ, ಖತ್ತಿಯಾ ದೀಪವಾಸಿನೋ;
ಅಕಂಸು ವಿಗ್ಗಹಂ ಘೋರಂ, ಪಾಪಕಮ್ಮೇನ ಪಣ್ಡುನೋ.
ಪಣ್ಡುರಾಜೇ’ತ್ಥ ವಾಸೇನ, ಕಮ್ಮಂ ನತ್ಥೀತಿ ಚಿನ್ತಿಯ;
ಠಪೇತ್ವಾ ಮಕುಟಾದೀನಿ, ಗತೋ ಕೇರಳಸನ್ತಿಕಂ.
ವಿಗ್ಗಹೇ ನಿಟ್ಠಿತೇ ರಾಜಾ, ಮಹಾಮೇಘವನೇ ತದಾ;
ಮಹಾಬೋಧಿಘರಸ್ಸಾ’ದಾ, ಗಾಮಂ ನಗರಸನ್ತಿಕೇ.
ಆವಾಸಂ ರಕ್ಖಕೋ ನಾಮ, ತಸ್ಸ ಸೇನಾಪತೀ ಅಕಾ;
ಥೂಪಾರಾಮಸಮೀಪಮ್ಹಿ, ಇಳಙ್ಗೋ ರಾಜನಾಮಕಂ.
ಕತಂ ತಂ ಪುಬ್ಬರಾಜೇಹಿ, ರಾಜಾ ಸೋ ಪರಿಪಾಲಿಯ;
ಪತ್ತೋ ದ್ವಾದಸಮಂ ವಸ್ಸಂ, ಯಥಾಕಮ್ಮಮುಪಾಗಮಿ.
ಉದಯೋ ¶ ಯುವರಾಜಾ’ಸಿ, ಲಂಕಾವಾಸೀನಮಿಸ್ಸರೋ;
ಸೇನನಾಮಾದಿಪಾದಂ ಸೋ, ಓಪರಜ್ಜೇ’ಭಿಸೇಚಯಿ.
ರಞ್ಞೋ ಭೀತಾ ತದಾಮಚ್ಚಾ, ಪವಿಸಿಂಸು ತಪೋವನಂ;
ರಾಜೋಪರಾಜಾ ಗನ್ತ್ವಾನ, ತೇಸಂ ಸೀಸಾನಿ ಛೇದಯುಂ.
ತೇನ ಕಮ್ಮೇನ ನಿಬ್ಬಿನ್ನಾ, ಯತಯೋ ತನ್ನಿವಾಸಿನೋ;
ಹಿತ್ವಾ ಜನಪದಂ ರಞ್ಞೋ, ತದಾಗಚ್ಛಿಂಸು ರೋಹಣಂ.
ತದಾ ಜಾನಪದಾ ಚೇವ, ನಾಗರಾ ಚ ಬಲಾನಿ ಚ;
ಕುಪಿತಾ ಚಣ್ಡುವಾತೇನ, ಸಾಗರೋ ವಿಯ ಕಮ್ಪಿತೋ.
ರತನಪಾಸಾದಮಾರುಯ್ಹ, ವಿಹಾರೇ ಅಭಯುತ್ತರೇ;
ಸನ್ತಾಸೇತ್ವಾನ ರಾಜಾನಂ, ದಸ್ಸೇತ್ವಾನ ವಿಭೀಸಿಕಂ.
ಉಪತ್ಥಮ್ಭಕಮಚ್ಚಾನಂ, ವಿಗ್ಗಹಸ್ಸ ತಪೋವನೇ;
ತದಾ ಸೀಸಾನಿ ಛಿನ್ದಿತ್ವಾ, ಕವಾತೇನ ನಿಪಾತಯುಂ.
ತಂ ಸುತ್ವಾ ಯುವರಾಜಾ ಚ, ಆದಿಪಾದೋ ಚ ತಂ ಸಖಾ;
ಉಲ್ಲಙ್ಘಿತ್ವಾನ ಪಾಕಾರಂ, ಸೀಘಂ ಗಚ್ಛಿಂಸು ರೋಹಣಂ.
ಬಲಕಾಯೋನುಬನ್ಧಿತ್ವಾ, ಯಾವ ಕಣ್ಹನದೀತಟಾ;
ಅಲಾಭೇನ ಚ ನಾವಾನಂ, ತಿಣ್ಣತ್ತಾ ತೇಸಮಾಗಮಿ.
ರಾಜಪುತ್ತಾಗತಾ ತತ್ಥ, ವನೇ ಅಭಯಭೇದಿನೋ;
ಯತೀನಂ ಪುರತೋ ತೇಸಂ, ನಿಪಜ್ಜಿತ್ವಾ ಉರೇನ ತೇ.
ಅಲ್ಲವತ್ಥಾ’ಲ್ಲಕೇಸಾ ಚ, ಪರಿದೇವಿತ್ಥ’ನೇಕಧಾ;
ಕನ್ದೀತ್ವಾ ರೋದನಂ ಕತ್ವಾ, ಖಮಾಪೇಸುಂ ತಪಸ್ಸಿನೋ.
ಖನ್ತಿಮೇತ್ತಾನುಭಾವೇನ, ತೇಸಂ ಸಾಸನಸಾಮಿನಂ;
ಪುಞ್ಞೋದಯೋ ಅಹು ತೇಸಂ, ಉಭಿನ್ನಂ ದೀಪಸಾಮಿನಂ.
ಯುವರಾಜಬಲಞ್ಚೇವ, ನಿಕಾಯತ್ತಯವಾಸಿನೋ;
ಗಮಿಂಸು ತೇಸಮಾನೇತುಂ, ಸನ್ತಿಭೂತೇ ಮಹಾಬಲೇ.
ರಾಜಪುತ್ತಾ ಉಭೋ ಬ್ಯತ್ತಾ, ಪಣ್ಡಿತಾ ಪಂಸುಕೂಲಿನೋ;
ಯಾಚಿತ್ವಾ ತೇಸಮಾದಾಯ, ಅಗಮಂಸು ಸಕಂ ಪುರಂ.
ಭಿಕ್ಖೂನಂ ಪುರತೋ ಮಗ್ಗಂ, ರಾಜಾಗನ್ತಾ ಖಮಾಪಯಿ;
ಆದಾಯ ತೇ ವನಂ ತೇಸಂ, ನೇತ್ವಾ ರಾಜಘರಂ ಗತೋ.
ತತೋ ಪಟ್ಠಾಯ ಚಾರಿತ್ಥಂ, ಪಾಲೇತ್ವಾ ಪುಬ್ಬರಾಜುನಂ;
ರಾಜಾ ಸೋ ತತಿಯೇ ವಸ್ಸೇ, ಯಥಾಕಮ್ಮಮುಪಾಗಮಿ.
ಲಂಕಾಭಿಸೇಕಂ ¶ ಪತ್ವಾನ, ಸೇನೋ ಸೋ ಮತಿಮಾ ತತೋ;
ಉದಯಂ ಆದಿಪಾದಂ ತಂ, ಯುವರಾಜಂ ಅಕಾ ಸಖಂ.
ಕಹಾಪಣಸಹಸ್ಸಂ ಸೋ, ದುಗ್ಗತಾನಂ ಉಪೋಸಥೇ;
ಹೋತು’ಪೋಸಥಿಕೋ ದತ್ವಾ, ಯಾವಜೀವಂ ನರಾಧಿಪೋ.
ಪಟಿಮಾ ಭತ್ತವತ್ಥಾನಿ, ಭಿಕ್ಖೂನಂ ಧರಣೀ ಪತಿ;
ಅದಾ ದಣ್ಡಿಸ್ಸರಂ ದಾನಂ, ಯಾಚಕಾನಞ್ಚ ಸಿಪ್ಪೀನಂ.
ಠಾನೇ ಕತ್ಥಚಿ ಸಿಪ್ಪೀನಂ, ಪಾಸಾದೇಸು ಮನೋಹರೇ;
ಕಾರೇತ್ವಾ ಭೋಗಗಾಮೇ ಚ, ಅದಾಪೇಸಿ ಮಹಾಮತಿ.
ಕಹಾಪಣಸಹಸ್ಸಂ ವಾ, ದತ್ವಾ ಪಞ್ಚಸತಾನಿ ವಾ;
ಲಙ್ಕಾಯಂ ಜಿಣ್ಣಕಾವಾಸೇ, ನವಕಮ್ಮಮಕಾರಯೀ.
ಚತ್ತಾಲೀಸಸಹಸ್ಸಾನಿ, ಅಭಯುತ್ತರಚೇತಿಯೇ;
ಸಿಲಾಪತ್ಥರಣತ್ಥಾಯ, ದಾಪೇಸಿ ಚ ಮಹೀಪತಿ.
ಮಹಾವಾಪೀಸು ಲಂಕಾಯಂ, ಜಿಣ್ಣನಿದ್ಧಮನೇ ಅಕಾ;
ನವಕಮ್ಮಞ್ಚ ಮರಿಯಾದಂ, ಥಿಯಂ ಪಾಸಾಣಪಂಸುನಾ.
ಅಕಾ ರಾಜಘರೇ ರಮ್ಮಂ, ಮಾಲಾಗೇಹಂ ಮಹಾರಹಂ;
ಠಪಿತಂ ಪುನರಾಜೂಹಿ, ದಾನಂ ಸಮ್ಮಾಪವತ್ತಯಿ.
ಕತಂ ಮಲಯರಾಜೇನ, ಅಮಚ್ಚೇನ’ಗ್ಗ ಬೋಧಿನಾ;
ಪರಿವೇಣಂ ನಾಗಸಾಲಂ, ದಿಸ್ವಾ ಗಾಮ ಮದಾ ತದಾ.
ಕತ್ವಾ ಚತುವಿಹಾರೇಸು, ರೂಪಕಮ್ಮಾನಿ ಸಾಧುಕಂ;
ಮಣ್ಡಪಾನಿ ಚ ರಮ್ಮಾನಿ, ಧಾತುಪೂಜಂ ಅಕಾ ಸದಾ.
ಏವಮಾದೀನಿ ಪುಞ್ಞಾನಿ, ಅನೇಕಾನಿ ಅನೇಕಧಾ;
ಕತ್ವಾ ಸೋ ನವಮೇ ವಸ್ಸೇ, ಯಥಾಕಮ್ಮಮುಪಾಗಮಿ.
ಲಂಕಾಭಿಸೇಕಂ ಪತ್ವಾನ, ಯುವರಾಜೋದಯೋ ತತೋ;
ಸೇನನಾಮಾದಿಪಾದಂ ಸೋ, ಓಪರಜ್ಜೇ’ಭಿ ಸೇಚಯಿ.
ನಿದ್ದಾಲು ಮಜ್ಜಪೋ ಆಸಿ, ರಾಜಾ ಪಾಪೇನ ಜನ್ತುನಂ;
ಚೋಳೋ ಪಮತ್ತತಂ ತಸ್ಸ, ಸುತ್ವಾ ಸನ್ತುಟ್ಠಮಾನಸೋ.
ಪಣ್ಡುದೇಸಾತಿಸೇಕಂ ಸೋ, ಪತ್ತುಕಾ ಮೇತ್ಥ ಪೇಸಯಿ;
ಮಕುಟಾದೀನಮತ್ಥಾಯ, ಠಪಿತಾನಂವ ಪಣ್ಡುನಾ.
ತಾನಿ ನಾದಾಸಿ ಸೋ ರಾಜಾ, ತೇನ ಚೋಳೋ ಮಹಬ್ಬಲೋ;
ಬಲಂ ಸನ್ನಯ್ಹ ಪೇಸೇಸಿ, ಬಲಕ್ಕಾರೇನ ಗಣ್ಹಿತುಂ.
ತದಾ ¶ ಸೇನಾಪತಿ ಏತ್ಥ, ಪಚ್ಚನ್ತೇ ಕುಪಿತೇ ಗತೋ;
ಆಣಾಪೇತ್ವಾನ ತಂ ರಾಜಾ, ಯುಜ್ಝನತ್ಥಾಯ ಪೇಸಯಿ.
ಹತೋ ಸೇನಾಪತಿ ತತ್ಥ, ಯುಜ್ಝಿ ನ ರಣೇ ಮತೋ;
ಕಕೂಟಾದೀನಿ ಆದಾಯ, ರಾಜಾ ಸೋ ರೋಹಣಂ ಅಗಾ.
ಗನ್ತ್ವಾ ಚೋಳಬಲಂ ತತ್ಥ, ಅಲಭಿತ್ವಾ ಪವೇಸನಂ;
ನಿವತ್ತಿತ್ವಾ ಸಕಂ ರಟ್ಠಂ, ಅಗಮಾಸಿ ಇಧತಾ ಭಯಾ.
ತತೋ ಸೇನಾಪತಿಟ್ಠಾನೇ, ವಿದುರಗ್ಗಂ ತು ನಾಯಕಂ;
ಠಪೇಸಿ ರಾಜಾ ಲಂಕಿನ್ದೋ, ತೇಜವನ್ತಂ ಮಹಾಮತಿಂ.
ಪಚ್ಚನ್ತಂ ಚೋಳರಾಜಸ್ಸ, ಘಾತೇತ್ವಾ ಸೋ ಚಮೂಪತಿ;
ಆಣಾಪೇಸಿ ಇತೋ ನೀತಂ, ದಸ್ಸೇತ್ವಾನ ವಿಭೀಸಿತಂ.
ತತೋ ದಾಪೇಸಿ ಸೋ ಸಬ್ಬ-ಪರಿಕ್ಖಾರಂ ಮಹಾರಹಂ;
ಪಂಸುಕೂಲಿಕಭಿಕ್ಖೂನಂ, ಸಬ್ಬೇಸಂ ದೀಪವಾಸಿನಂ.
ಮಹಾವಿಹಾರೇ ಲಂಕಿನ್ದೋ, ಪಟಿಬಿಮ್ಬಸ್ಸ ಸತ್ಥುನೋ;
ಜಲನ್ತಂ ಮಣಿರಂಸೀಹಿ, ಅಕಾ ಚೂಳಾಮಣಿಂ ತದಾ.
ಓರೋಧಾ ವಿದುರಾ ತಸ್ಸ, ಪಾದಜಾಲೇನ ಪೂಜಯಿ;
ಮಣೀಹಿ ಪಜ್ಜಲನ್ತೇಹಿ, ಪಟಿಮಂ ತಂ ಸಿಲಾಮಯಂ.
ಝಾಪಿತಂ ಚೋಳರಾಜಸ್ಸ, ಬಲೇನ ಮಣಿನಾಮಕಂ;
ಪಾಸಾದಂ ಕಾತುಮಾರದ್ಧೋ, ಚುತೋ ವಸ್ಸಮ್ಹಿ ಅಟ್ಠಮೇ.
ಪಞ್ಚೇತೇ ವಸುಧಾಧಿಪಾ ವಸುಮಹಿಂ ಏಕಾತಪತ್ತಙ್ಕಿತಂ;
ಭುತ್ವಾ ನಿಗ್ಗಹಸಙ್ಗಹೇಹಿ ಸಕಲಂ ಲೋಕಂ ವಸೇ ವತ್ತಿಯ;
ಯಾ ತಾ ಮಚ್ಚುವಸಂ ಸಪುತ್ತವಣಿತಾ ಸಾಮಚ್ಚಮಿತ್ತಾನುಗಾ;
ಇಚ್ಚೇವಂ ಸತತಂ ಸರನ್ತು ಸುಜನಾ ಹಾತುಂ ಪಮಾದಂ ಮದಂ.
ಸುಜನಪ್ಪಸಾದಸಂವೇಗತ್ಥಾಯ ಕತೇ ಮಹಾವಂಸೇ
ಪಞ್ಚರಾಜಕೋ ನಾಮ
ಏಕಪಞ್ಞಾಸತಿಮೋ ಪರಿಚ್ಛೇದೋ.
ದ್ವಿಪಞ್ಞಾಸತಿಮ ಪರಿಚ್ಛೇದ
ತಿರಾಜಕೋನಾಮ
ತತೋ ¶ ಲಙ್ಕಾಭಿಸೇಕಂ ಸೋ, ಪತ್ವಾ ಸೇನೋ ಕಮಾಗತಂ;
ಮಹಿನ್ದಸ್ಸಾದಿಪಾದಸ್ಸ, ಯುವರಾಜಪದಂ ಅದಾ.
ಪಞ್ಞೋ ಮಹಾಕವೀ ಬ್ಯತ್ತೋ, ಮಜ್ಝತ್ತೋ ಮಿತ್ತಸತ್ತುಸು;
ಯುತ್ತೋ ದಯಾಯ ಮೇತ್ತಾಯ, ರಾಜಾ ಸೋ ಸಬ್ಬದಾ ಅಹು.
ಕಾಲಂ ದೇವೋ’ನತಿಕ್ಕಮ್ಮ, ಸಮ್ಮಾ ಧಾರಾಭಿವಸ್ಸತಿ;
ರಟ್ಠೇ ತಸ್ಮಿಂ ವಸನ್ತಾ’ಸುಂ, ಸುಖಿತಾ ನಿಬ್ಭಯಾ ಸದಾ.
ಸುತ್ತನ್ತಂ ಲೋಹಪಾಸಾದೇ, ನಿಸಿನ್ನೋ ವಣ್ಣಯೀ ತದಾ;
ನಿಕಾಯತ್ತಯವಾಸೀಹಿ, ರಾಜಾ ಸೋ ಪರಿವಾರಿತೋ.
ದಾಠಧಾತುಕರಣ್ಡಂ ಸೋ, ನಾನಾರತನಭೂಸಿತಂ;
ಅಕಾ ಚತುವಿಹಾರೇಸು, ಧಾತುಪೂಜಾ ಚ’ನೇಕಧಾ.
ಪರಿವೇಣಂ ಸಿತ್ಥಗಾಮಂ, ಕಾರೇತ್ವಾ ವುತ್ಥಮತ್ತನಾ;
ಲೋಕಂ ಪುತ್ತಂವ ಪಾಲೇತ್ವಾ, ತಿವಸ್ಸೇನ ದಿವಙ್ಗತೋ.
ಯುವರಾಜಾ ಮಹಿನ್ದೋ ಸೋ, ರಾಜಾಸಿ ತದನನ್ತರಂ;
ಮಹಾಪುಞ್ಞೋ ಮಹಾತೇಜೋ, ಮಹಾಸೇನೋ ಮಹಾಯಸೋ.
ಏಕಚ್ಛತ್ತಂ ಅಕಾ ಲಙ್ಕಂ, ಘಾತೇತ್ವಾ ಚೋರುಪದ್ದವಂ;
ಅಕಂಸು ತಮುಪಟ್ಠಾನಂ, ನಿಚ್ಚಮಣ್ಡಲನಾಯಕಂ.
ವಿಜ್ಜಮಾನೇಪಿ ಲಙ್ಕಾಯಂ, ಖತ್ತಿಯಾನಂ ನರಾಧಿಪೋ;
ಕಾಲಿಙ್ಗಚಕ್ಕವತ್ತಿಸ್ಸ, ವಂಸೇ ಜಾತಂ ಕುಮಾರಿಕಂ.
ಆಣಾಪೇತ್ವಾನ ತಂ ಅಗ್ಗ-ಮಹೇಸಿಂ ಅತ್ತನೋ ಅಕಾ;
ತಸ್ಸಾ ಪುತ್ತಾ ದುವೇ ಜಾತಾ, ಧೀತಾ ಏಕಾ ಮನೋರಮಾ.
ಆದಿಪಾದೇ ಅಕಾ ಪುತ್ತೇ, ಧೀತರಂ ಚೋಪರಾಜಿನಿಂ;
ಇತಿ ಸೀಹಳವಂಸಞ್ಚ, ಪಟ್ಠಪೇಸಿ ಸಭೂಪತಿ.
ಬಲಕಾಯಂ ಇಮಂ ದೇಸಂ, ಮದ್ದನತ್ಥಾಯ ವಲ್ಲಭೋ;
ಪೇಸೇಸಿ ನಾಗದೀಪಂ ಸೋ, ಸುತ್ವಾ ತಂ ಭೂಪತಿ ಇಧ.
ಬಲಂ ¶ ದತ್ವಾನ ಸೇನವ್ಹ-ರಾಜಸೇನಾಪತಿಂ ತದಾ;
ವಲ್ಲಭಸ್ಸ ಬಲೇನೇ’ಸ, ಯುಜ್ಝಿತುಂ ತತ್ಥ ಪೇಸಯಿ.
ಗನ್ತ್ವಾ ಸೇನಾಪತೀ ತತ್ಥ, ಬಲೇನೇ’ತಸ್ಸ ರಾಜಿನೋ;
ಯುಜ್ಝಿತ್ವಾ ತಂ ವಿನಾಸೇತ್ವಾ, ಗಣ್ಹಿ ಸೋ ಯುದ್ಧಮಣ್ಡಲೇ.
ಅಸಕ್ಕೇನ್ತೋ ಇಮಂ ಜೇತುಂ, ರಾಜಾ ನಂ ವಲ್ಲಭಾದಯೋ;
ರಾಜಾನೋ ಮಿತ್ತಸಮ್ಬನ್ಧಂ, ಲಂಕಿನ್ದೇನ ಅಕಂಸು ತೇ.
ಇಚ್ಛೇವಂ ರಾಜಿನೋ ತೇಜೋ, ಜಮ್ಬುದೀಪಮವತ್ಥರಿ;
ಪತ್ಥರಿತ್ವಾನ ಲಂಕಾಯಂ, ಉಲ್ಲಙ್ಘಿತ್ವಾನ ಸಾಗರಂ.
ಸದ್ಧಮ್ಮಂ ಕಥಾಯನ್ತಾನಂ, ಕತ್ವಾ ಸಮ್ಮಾ ನ ಮುತ್ತಮಂ;
ಧಮ್ಮಂ ಸುತ್ವಾನ ಸೋ ರಾಜಾ, ಪಸನ್ನೋ ಬುದ್ಧಸಾಸನೇ.
ರಾಜಾ ಸೋ ಸನ್ನಿಪಾತೇತ್ವಾ, ಪಂಸುಕೂಲಿಕಭಿಕ್ಖವೋ;
ಯಾಚಿತ್ವಾ ಅತ್ತನೋ ಗೇಹಂ, ಆಣಾಪೇತ್ವಾನ ಸಾಧುಕಂ.
ಆಸನಂ ಪಞ್ಞಪೇತ್ವಾನ, ನಿಸೀದಾಪಿಯ ಭೋಜನಂ;
ದಾಪೇಸಿ ವಿಪುಲಂ ಸುದ್ಧಂ, ಸದಾ ಏಕದಿನೇ ವಿಯ.
ಅನೇಕಬ್ಯಞ್ಜನಂ ರಾಜಾ-ರಞ್ಞಕಾನಂ ತಪಸ್ಸಿನಂ;
ಪೇಸೇಸಿ ಭೋಜನಂ ಸುದ್ಧಂ, ಮಹಗ್ಘಂ ವಿಪುಲಂ ಸದಾ.
ವೇಜ್ಜೇವ ಪೇಸಯಿತ್ವಾನ, ವಿಲಾನಾನಂ ತಪಸ್ಸಿನಂ;
ಸನ್ತಿಕಂ ಸೋ ದಯಾವಾಸೋ, ತಿಕಿಚ್ಛಾಪೇಸಿ ನಿಚ್ಚಸೋ.
ಗುಳಾನಿ ಘನಪಾಕಾನಿ, ಲಸುಣಾನಂ ರಸಾನಿ ಚ;
ತಮ್ಬುಲಮುಖವಾಸಞ್ಚ, ಪಚ್ಛಭತ್ತೇ ಅದಾ ಸದಾ.
ಪತ್ತೇಸು ಪೂರಯಿತ್ವಾನ, ಲಸುಣಂ ಮರಿಚಮ್ಪಿ ಚ;
ಪಿಪ್ಫಲಿಸಙ್ಗೀವೇರಾನಿ, ಗುಳಾನಿ ತಿಫಲಾನಿ ಚ.
ಘತಂ ತೇಲಂ ಮಧುಞ್ಚಾಯ, ಪಾಪುರತ್ಥರಣಾನಿ ಚ;
ಪಂಸುಕೂಲಿಕಭಿಕ್ಖೂನಂ, ಪಚ್ಚೇಕಂ ಸಬ್ಬದಾ ಅದಾ.
ಚೀವರಾದೀನಿ ಸಬ್ಬಾನಿ, ಪರಿಕ್ಖಾರಾನಿ ಭೂಪತಿ;
ಕಾರಾಪೇತ್ವಾನ ದಾಪೇಸಿ, ಭಿಕ್ಖೂನಂ ಪಂಸುಕುಲಿನಂ.
ರಾಜಾ ಮಹಾವಿಹಾರಸ್ಮಿಂ, ಏಕೇಕಸ್ಸ ಹಿ ಭಿಕ್ಖುನೋ;
ಪಚ್ಚೇಕಂ ನವವತ್ಥಾನಿ, ಚೀವರತ್ಥಾಯ ದಾಪಯಿ.
ನಿಕಾಯತ್ತಯವಾಸೀನಂ, ಭಿಕ್ಖೂನಂ ಲಾಭವಾಸಿನಂ;
ತುಲಾಭಾರಮದಾ ದ್ವೀಸು, ವಾರೇಸು ಸಮಹೀಪತಿ.
ರಾಜಾ ¶ ಸೋ ನಾಗತೇಭೋಗಂ,
ರಾಜಾನೋ ಸಙ್ಘಭೋಗತೋ;
ನ ಗಣ್ಹನ್ತೂನಿ ಪಾಸಾಣೇ,
ಲಿಖಾಪೇತ್ವಾ ನಿಧಾಪಯಿ.
ಕಥಾಪೇತ್ವಾನ ಬುದ್ಧಸ್ಸ, ಸರಣಾನಿ ಗುಣೇನವ;
ಅನಾಥೇಹಿ ಚ ತೇಸಞ್ಚ, ಭತ್ತವತ್ಥಾನಿ ದಾಪಯಿ.
ದಾನಸಾಲಂ ಕರಿತ್ವಾನ, ಹತ್ಥಿಸಾಲಕಭೂಮಿಯಂ;
ಯಾಚಕಾನಂ ಅದಾ ದಾನಂ, ತೇಸಞ್ಚ ಸಯನಾಸನಂ.
ವೇಜ್ಜಸಾಲಾಸು ಸಬ್ಬಾಸು, ಭೇಸಜ್ಜಂ ಮಞ್ಚಕಞ್ಚ ಸೋ;
ಚೋರಾನಂ ಬನ್ಧನಾಗಾರೇ, ನಿಚ್ಚಂ ಭತ್ತಾನಿ ದಾಪಯಿ.
ವಾನರಾನಂ ವರಹಾನಂ, ಮಿಗಾನಂ ಸುನಖಾನ ಚ;
ಭತ್ತಂ ಪೂವಞ್ಚ ದಾಪೇಸಿ, ದಯಾವಾಸೋ ಯಥಿಚ್ಛಕಂ.
ರಾಜಾ ಚತುವಿಹಾರೇಸು, ಕತ್ವಾ ಸೋ ವೀಹಿರಾಸಯೋ;
ಯಥಿಚ್ಛಿತೇನ ಗಣ್ಹನ್ತು, ಅನಾಥಾ ಇತಿ ದಾಪಯಿ.
ನಾನಾಪೂಜಾಹಿ ಪೂಜೇತ್ವಾ, ಕತ್ವಾ ಮಙ್ಗಲಮುತ್ತಮಂ;
ಕಥಾಪೇಸಿ ಚ ಭಿಕ್ಖೂಹಿ, ಬ್ಯತ್ತೇಹಿ ವಿನಯಂ ತದಾ.
ಥೇರೇನ ಧಮ್ಮಮಿತ್ತೇನ-ಸಿತ್ಥಗಾಮಕವಾಸಿನಾ;
ಪೂಜಯಿತ್ವಾನ ಕಾರೇಸಿ, ಅಭಿಧಮ್ಮಸ್ಸ ವಣ್ಣನಂ.
ದಾಠಾನಾಗಾ’ಭಿಧಾನೇನ, ಥೇರೇನಾ’ರಞ್ಞವಾಸಿನಾ;
ಲಂಕಾಲಂಕಾರಭೂತೇನ, ಅಭಿಧಮ್ಮಂ ಕಥಾಪಯಿ.
ಪಟ್ಟಕಞ್ಚುಕಪೂಜಾಹಿ, ಹೇಮಮಾಲಿಕಚೇತಿಯಂ;
ನಚ್ಚಗೀತೇಹಿ ಗನ್ಧೇಹಿ, ಪುಪ್ಫೇಹಿ ವಿವಿಧೇಹಿ ಚ.
ದೀಪಮಾಲಾಹಿ ಧೂಪೇಹಿ, ಪೂಜಯಿತ್ವಾನ’ನೇಕಧಾ;
ತಸ್ಸ ವತ್ಥಾನಿ ಭಾಜೇತ್ವಾ, ಭಿಕ್ಖೂನಂ ದಾಪಯೀ ಸಯಂ.
ಸದಾ ಸೋ ಅತ್ತನೋ ರಜ್ಜೇ, ಉಯ್ಯಾನೇಸು ತಹಿಂತಹಿಂ;
ಆಣಾಪೇತ್ವಾನ ಪುಪ್ಫಾನಿ, ಪೂಜೇಸಿ ರತನತ್ತಯಂ.
ಪಾಸಾದಂ ಚನ್ದನಂ ನಾಮ, ಕಾತುಂ ಮರಿಚವಟ್ಟಿಯಂ;
ಅಕಾರಮ್ಭಞ್ಚ ಭಿಕ್ಖೂನಂ ಭೋಗಗಾಮೇ ಚ ದಾಪಯಿ.
ಕೇಸಧಾತುಂ ನಿಧಾಪೇತ್ವಾ, ಕರಣ್ಡಂ ರತನೇಹಿ ಸೋ;
ಕಾರಯಿತ್ವಾನ ಪೂಜೇಸಿ, ಠಪೇತ್ವಾ ತತ್ಥ ಭೂಪತಿ.
ಸೋಣ್ಣರಜತಪಟ್ಟೇಹಿ ¶ , ಥೂಪಾರಾಮಮ್ಹಿ ಚೇತಿಯಂ;
ಛಾದಾಪೇತ್ವಾ ಯಥಾರಜ್ಜಂ, ಪೂಜಂ ಕಾರೇಸಿ ಭೂಪತಿ.
ತಸ್ಮಿಂ ಧಾತುಘರೇ ರಾಜಾ, ಸೋಣ್ಣದ್ವಾರಮಕಾರಯಿ;
ಪಜ್ಜಲನ್ತಂ ಸಿನೇರುಂವ, ರಂಸೀಹಿ ಸೂರಿಯಸ್ಸ ಸೋ.
ಝಾಪಿತಂ ಚೋಳರಾಜಸ್ಸ, ಬಲೇನ ಪದಲಞ್ಛನೇ;
ಚತುನ್ನಂ ಚೇತಿಯಾನಂ ಸೋ, ರಮನೀಯಂ ಘರಂ ಅಕಾ.
ಝಾತಂ ನಗರಮಜ್ಝಮ್ಹಿ, ದಾಠಾಧಾತುಘರಂ ಅಕಾ;
ಧಮ್ಮಸಙ್ಗಣೀಗೇಹಞ್ಚ, ಮಹಾಪಾಳಿಞ್ಚ ಭೂಪತಿ.
ತಮ್ಬೂಲಮಣ್ಡಪಂ ಕತ್ವಾ, ತತ್ಥ ಸುಙ್ಕಂ ಮಹೀಪತಿ;
ಭಿಕ್ಖೂನಂ ಥೇರವಂಸೇ ಸೋ, ಭೇಸಜ್ಜತ್ಥಾಯ ದಾಪಯಿ.
ಉಪಸ್ಸಯಂ ಕರಿತ್ವಾನ, ಮಹಾಮಙ್ಗಲನಾಮಕಂ;
ಥೇರವಂಸಮ್ಹಿ ಜಾತಾನಂ, ಭಿಕ್ಖುನೀನಂ ಅದಾಪಯಿ.
ಮಾತುಲೋದಯರಾಜೇನ, ಆರದ್ಧಂ ಸಾಧುನಾ ತದಾ;
ನಿಟ್ಠಾಪೇಸಿ ಮಹೀಪಾಲೋ, ಪಾಸಾದಂ ಮಣಿನಾಮಕಂ.
ಪರಿವೇಣಾನಿ ಚತ್ತಾರಿ, ತಸ್ಮಿಂ ಜೇತವನೇ ತದಾ;
ಕಾರಾಪಯಿಂಸು ಚತ್ತಾರೋ, ಅಮಚ್ಚಾ ತಸ್ಸ ರಾಜಿನೋ.
ರಞ್ಞೋ ಕಿತ್ತಿಸಮಾದೇವೀ, ಕಿತ್ತಿನಾಮಾ ಮನೋರಮಾ;
ಪರಿವೇಣಂ ಅಕಾರಾಮಂ, ಥೂಪಾರಾಮಸ್ಸ ಪಚ್ಛತೋ.
ಸಾ ತಸ್ಮಿಂ ಪರಿವೇಣೇ ಚ, ಅಕಾ ಕಪ್ಪಾಸಗಾಮಕೇ;
ಚೀವರಚೇತಿಯೇ ಚೇವ, ತಿಸ್ಸೋ ಪೋಕ್ಖರಣೀ ಸುಚಿ.
ದ್ವಾದಸರತನಾಯಾಮಂ, ಧಜಂ ಸೋಣ್ಣಮಯಞ್ಚ ಸಾ;
ಪೂಜೇಸಿ ಪುಞ್ಞಸಮ್ಭಾರಂ, ಹೇಮಮಾಲಿಕ ಚೇತಿಯೇ.
ಗಿಹೀನಂ ವಜ್ಜಸಾಲಞ್ಚ, ಪುತ್ತೋ ತಸ್ಸಾ ಪುರೇಅಕಾ;
ಗುಣವಾಸಕ್ಕಸೇನಾನೀ, ಭಿಕ್ಖೂನಞ್ಚ ಪುರಾಬಹಿ.
ರಾಜಾ ಚತುವಿಹಾರೇಸು, ದಿಬ್ಬಪಾಸಾದಸನ್ನಿಭೇ;
ಮಣ್ಡಪೇ ಕಾರಯಿತ್ವಾನ, ಧಾತುಪೂಜಾ ಅನೇಕಧಾ.
ವಸ್ಸಮೇಕಮತಿಕ್ಕಮ್ಮ, ಕಾರಾಪೇತ್ವಾ ಮಹೀಪತಿ;
ಚಾರಿತ್ತಂ ಪುಬ್ಬರಾಜೂನಂ, ಪರಿಪಾಲೇಸಿ ಸಾಧುಕಂ.
ಏವಮಾದೀನಿ ಪುಞ್ಞಾನಿ, ಉಳಾರಾನಿ ಅನೇಕಧಾ;
ಕತ್ವಾ ಸೋಳಸಮೇ ವಸ್ಸೇ, ರಾಜಾ ಸೋ ತಿದಿವಂ ಗತೋ.
ಜಾತೋ ¶ ಪಟಿಚ್ಚ ತಂ ರಾಜಂ, ಸೇನಾ ದ್ವಾದಸವಸ್ಸಿಕೋ;
ಕಾಲಿಙ್ಗದೇವಿಯಾ ಪುತ್ತೋ, ಪತ್ತರಜ್ಜೋ ತದಾ ಅಹು.
ಉದಯಸ್ಸ ಕನಿಟ್ಠಸ್ಸ, ಯುವರಾಜಪದಂ ಅದಾ;
ಪಿತು ಸೇನಾಪತಿ ಸೇನೋ, ತಸ್ಸ ಸೇನಾಪತಿ ಅಹು.
ಪಚ್ಚನ್ತಂ ಬಲಮಾದಾಯ, ಗತೇ ಸೇನಾಪತಿಮ್ಹಿ ಸೋ;
ಮಾತರಾ ಸಹ ವತ್ತನ್ತಂ, ಕಣಿಟ್ಠಂ ತಸ್ಸ ಭಾತರಂ.
ಮಾರಾಪೇತ್ವಾ ಮಹಾಮಲ್ಲಂ, ಅಕಾ ಸೇನಾಪತಿಂ ತದಾ;
ಅಮಚ್ಚಂ ಉದಯಂ ನಾಮ, ಸಕಂ ವಚನಕಾರಕಂ.
ತಂ ಸುತ್ವಾ ಕುಪಿತೋ ಹುತ್ವಾ, ಸೇನೋ ಸೇನಾಪತಿ ತದಾ;
ಬಲಮಾದಾಯ ಆಗಞ್ಛಿ, ಗಣ್ಹಿಸ್ಸಾಮೀತಿ ಸತ್ತವೋ.
ಸುತ್ವಾನ ತಂ ಮಹೀಪಾಲೋ, ಕತವನ್ತಂ ವಾಚಮತ್ತನೋ;
ರಕ್ಖಾಮಿ ತಂ ಅಮಚ್ಚನ್ತಿ, ಗತೋ ನಿಕ್ಖಮ್ಮ ರೋಹಣಂ.
ತಸ್ಸ ಮಾಯಾ ನಿವತ್ತಿತ್ವಾ, ಯುವರಾಜಞ್ಚ ರಾಜಿನಿಂ;
ಆದಾಯ ಕುಪಿತಾ ತೇನ ಆಣಾಪೇಸಿ ಚಮೂಪತಿಂ.
ತಾಯ ಸೋ ಸಙ್ಗಹೀತೋವ, ದಮಿಳೇ ಸನ್ನಿಪಾತಿಯ;
ದತ್ವಾ ಜನಪದಂ ತೇಸಂ, ಪುಟತ್ಥಿನಗರೇ ವಸೀ.
ಯುಜ್ಝಿತುಂ ತೇನ ಸೋ ರಾಜಾ, ಬಲಂ ಪೇಸೇಸಿ ರೋಹಣಾ;
ಸೇನಾಪತಿ ವಿನಾಸೇಸಿ, ಸಬ್ಬಂ ತಂ ರಾಜಿನೋ ಬಲಂ.
ದಮಿಳಾ ತೇ ಜನಪದಂ, ಪೀಳೇತ್ವಾ ರಕ್ಖಸಾ ವಿಯ;
ವಿಲುಮ್ಪಿತ್ವಾನ ಗಣ್ಹನ್ತಿ, ನರಾನಂ ಸನ್ತಕಂ ತದಾ.
ಖಿತ್ತಾ ಮನುಸ್ಸಾ ಗನ್ತ್ವಾನ, ರೋಹಣಂ ರಾಜಸನ್ತಿಕಂ;
ನಿವೇದೇಸುಂ ಪವತ್ತಿಂ ತಂ, ಮನ್ತೇತ್ವಾ ಸಚೀವೇಹಿ ಸೋ.
ರಕ್ಖಿತುಂ ಸಾಸನಂ ರಟ್ಠಂ, ತಮ್ಪಹಾಯ ಚಮೂಪತಿಂ;
ಸನ್ಧಿಂ ಕತ್ವಾನ ಸೇನೇನ, ಪುಳತ್ಥಿನಗರಂ ಅಗಾ.
ಮಹೇಸಿಂ ಅತ್ತಜಂ ಕತ್ವಾ, ಪಾಲೇತುಂ ವಂಸಮತ್ತನೋ;
ಪುತ್ತಂ ಉಪ್ಪಾದಯಿತ್ವಾನ, ಕಸ್ಸಪಂ ನಾಮ ಉತ್ತಮಂ.
ವಸನ್ತೇ ತತ್ಥ ಲಂಕಿನ್ದೇ, ಅಹಿತಾ ವಲ್ಲಭಾ ಜನಾ;
ಅಲಭನ್ತಾ ಸುರಂ ಪಾತು-ಮಾರಿಯಾ ತಸ್ಸ ಸನ್ತಿಕೇ.
ಮಜ್ಜಪಾನೇ ಗುಣಂ ವತ್ವಾ, ಪಾಯೇಸುಂ ತಂ ಮಹೀಪತಿಂ;
ಪಿವಿತ್ವಾ ಮಜ್ಜಪಾನಂ ಸೋ, ಮತ್ತಬ್ಯಾಳೋ ಅಹು ತದಾ.
ಆಹಾರಾನಂ ¶ ಖಯಂ ಪತ್ವಾ, ಚಜಿತ್ವಾ ದುಲ್ಲಭಂ ಪದಂ;
ಮತೋ ಸೋ ದಸಮೇ ವಸ್ಸೇ, ತರುಣೋಯೇವ ಭೂಪತಿ.
ಇತೋ ವಿದಿತ್ವಾ ಖಲುಪಾಪಮಿತ್ತ-
ವಿಧೇಯ್ಯಭಾವಂ ಪರಿಹಾನಿ ಹೇತುಂ;
ಸುಖತ್ತಿತೋಯೇವ ಇದ ವಾ ಹುರಂ ವಾ;
ಜಹನ್ತು ತೇ ಘೋರವಿಸಂ’ವ ಬಾಲಂ.
ಸುಜನಪ್ಪಸಾದಸಂವೇಗತ್ಥಾಯ ಕತೇ ಮಹಾವಂಸೇತಿ ರಾಜಕೋ ನಾಮ
ದ್ವಿಪಞ್ಞಾಸತಿಮೋ ಪರಿಚ್ಛೇದೋ.
ತಿವಞ್ಞಾಸತಿಮ ಪಚ್ಛೇದ
ಲಂಕಾವಿಲೋಪೋನಾಮ
ಮಹಿನ್ದೋ ತಂ ಕಣಿಟ್ಠೋ ಸೋ, ರಾಜಪುತ್ತೋ ತದಚ್ಚಯೇ;
ಉಸ್ಸಾಪಿಯ ಸೇತಚ್ಛತ್ತ-ಮನುರಾಧಪುರೇ ವರೇ.
ಸೇನ ಸೇನಾನೀನಾ’ನೀತ ದೇಸನ್ತರಜನಾ ಕುಲೇ;
ತತ್ಥ ವಾಸಮಕಪ್ಪೇಸಿ, ಕಿಚ್ಛೇನ ದಸವಚ್ಛರೇ.
ಅಪೇತನೀತಿ ಮಗ್ಗಸ್ಸ, ಮುದುಭೂತಸ್ಸ ಸಬ್ಬಸೋ;
ಉಪ್ಪಾದಭಾಗಂ ನಾದಂಸು, ತಸ್ಸ ಜಾನಪದಾ ತದಾ.
ಅಚ್ಚನ್ತಂ ಖೀಣಚಿತ್ತೋ ಸೋ, ವಸ್ಸಮ್ಹಿ ದಸಮೇ ವಿಭೂ;
ವುತ್ತಿದಾನೇನ ನಾಸಕ್ಖಿ, ಸಙ್ಗಹೇತುಂ ಸಕಂ ಬಲಂ.
ಅಲದ್ಧ ವುತ್ತಿನೋ ಸಬ್ಬೇ, ಕೇರಳಾ ಸಹಿತಾ ತತೋ;
ನ ವುತ್ತಿದಾನಂ ನೋ ಯಾವ, ಹೋತಿ ಮಾತಾವ ಭುಞ್ಜತು.
ಇತಿ ರಾಜಘರದ್ವಾರೇ, ಸಾಹಸೇಕರಸಾ ಭುಸಂ;
ಚಾಪಹತಾ ನಿಸೀದಿಂಸು, ಸನ್ನದ್ಧಛುರಿಕಾಯುಧಾ.
ಹತ್ಥಸಾರಂ ಸಮಾದಾಯ, ತೇ ವಿವಞ್ಚಿಯ ಭೂಪತಿ;
ಉಮ್ಮಗ್ಗತೋ ವಿನಿಗ್ಗಮ್ಮ, ತುರಿತೋ ರೋಹಣಂ ಅಗಾ.
ಸೀದುಪಬ್ಬತಗಾಮಮ್ಹಿ ¶ , ಖನ್ಧವಾರಂ ನಿಬನ್ಧಿಯ;
ಭಾತು ಜಾಯಮ್ಮ ಹೇಸಿತ್ತೇ, ಠಪೇತ್ವಾ ಸೋ ತಹಿಂ ವಸೀ.
ನ ಚಿರಸ್ಸೇವ ತಸ್ಸಾಯ, ಮತಾ ಯಸಮಹೀಪತಿ;
ಮಹೇಸಿತ್ತೇ ನಿವೇಸೇಸಿ, ಸಕಭಾತುಸ್ಸ ಧೀತರಂ.
ದೇವಿಯಾ ತಾಯ ಸಞ್ಜಾತೇ, ಸುತೇ ಕಸ್ಸಪನಾಮಕೇ;
ಅಜ್ಝಾವುತ್ತಂ ವಿಹಾಯಾ’ಥ, ಖನ್ಧಾವಾರಂ ಮಹೀಮತಿ.
ಕಾರಯಿತ್ವಾನ ನಗರಂ, ಕಪ್ಪಗಲ್ಲಕಗಾಮಕೇ;
ಅಧಿಪಚ್ಚಂ ಪವತ್ತೇನ್ತೋ, ರೋಹಣೇ ಸುಚಿರಂ ವಸೀ.
ತತೋ ಸೇಸೇಸು ಠಾನೇಸು, ಕೇರಳಾ ಸೀಹಳಾ ತದಾ;
ಕಣ್ಣಾಟಾ ಚ ಯಥಾಕಾಮ-ಮಾಧಿಪಚ್ಚಂ ಪವತ್ತಯುಂ.
ಅಥಸ್ಸ ವಾಣಿಜೋ ಏಕೋ, ಪರತೀರಂ ಇಧಾಗತೋ;
ಗನ್ತ್ವಾ ಪವತ್ತಿಂ ಲಂಕಾಯ, ಚೋಳರಞ್ಞೋ ನಿವೇದಯಿ.
ಸೋತಂ ಸುಣಿತ್ವಾ ಪೇಸೇಸಿ, ಲಂಕಾಗಹಣಮಾನಸೋ;
ಬಲಂ ಮಹನ್ತಂ ಬಲವಾ, ತಂ ಖಿಪ್ಪಂ ಲಂಕಮೋತರಿ.
ಪಟ್ಠಾಯೋ ತಿಣ್ಣಠಾನಮ್ಹಾ, ವಿಹೇಠೇನ್ತಂ ಬಹೂ ಜನೇ;
ಅನುಕ್ಕಮೇನ ತಂ ಚೋಳ-ಬಲಂ ರೋಹಣಮಜ್ಝಗಾ.
ಛತ್ತಿಂಸೇ ರಾಜಿನೋ ವಸ್ಸೇ, ಮಹೇಸಿಂ ರತನಾನಿ ಚ;
ಮಕುಟಞ್ಚ ಕಮಾಯಾತಂ, ಸಬ್ಬಮಾಭರಣಂ ತಥಾ.
ಅಮೂಲಿಕಞ್ಚವಜಿರ-ವಲಯಂ ದೇವದತ್ತಿಯಂ;
ಅಚ್ಛೇಜ್ಜಚ್ಛುರಿಕಂ ಛಿನ್ನ-ಪಟ್ಟಿಕಾ ಧಾತುಕಞ್ಚ ತೇ.
ಪವಿಟ್ಠಂ ವನದುಗ್ಗಮ್ಹಿ, ಭಯಾತಞ್ಚ ಮಹೀಪತಿಂ;
ಜೀವಗ್ಗಾಹಮಗಣ್ಹಿಂಸು, ಸನ್ಧಿಲೇಸಮ್ಪದಸ್ಸಿಯ.
ಮಹೀಪಾಲಂ ಧನಂ ತಞ್ಚ, ಸಬ್ಬಂ ಹತ್ಥಗತಂ ತತೋ;
ಪೇಸಯಿಂಸು ಲಹುಂ ಚೋಳ-ಮಹೀಪಾಲಸ್ಸ ಸನ್ತಿಕಂ.
ನಿಕಾಯತ್ತಿತಯೇ ಧಾತು-ಗಬ್ಭೇ ಲಂಕಾತಲೇ ಖಿಲೇ;
ಮಹಾರಹೇ ಸುವಣ್ಣಾದಿ-ಪಟಿಬಿಮ್ಬೇ ಚ’ನಪ್ಪಕೇ.
ಭಿನ್ದಿತ್ವಾ ಸಹಸಾ ಸಬ್ಬೇ, ವಿಹಾರೇ ಚ ತಹಿಂ ತಹಿಂ;
ಯಥೋ ಜೋಹಾರಿನೋ ಯಕ್ಖಾ, ಲಙ್ಕಾಯಂ ಸಾರಮಗ್ಗಹುಂ.
ತೇ ಚೋಳಾ ರಾಜರಟ್ಠಂ ತಂ, ಪುಲತ್ಥಿಪುರನಿಸ್ಸಿತಾ;
ರಕ್ಖಪಾಸಾಣಕಣ್ಡವ್ಹ, ಠಾನಾವಧಿಮಭುಞ್ಜಿಸುಂ.
ತಂ ¶ ಕುಮಾರಕಮಾದಾಯ, ಕಸ್ಸಪಂ ರಟ್ಠವಾಸಿನೋ;
ವಡ್ಢೇನ್ತಿ ಚೋಳಭಯತೋ, ಗೋಪಯನ್ತಾ ಸುಸಾದರಾ.
ಚೋಳರಾಜಾ ಕುಮಾರಂ ತಂ, ಸುತ್ವಾ ದ್ವಾದಸವಸ್ಸಿಕಂ;
ಗಹಣತ್ಥಾಯ ಪೇಸೇಸಿ, ಮಹಾಮಚ್ಚೇ ಮಹಾಬಲೇ.
ಊನಂ ಪಞ್ಚಸಹಸ್ಸೇನ, ಯೋಧಲಕ್ಖಂ ಸಮಾದಿಯ;
ಸಬ್ಬಂ ತೇ ರೋಹಣಂ ದೇಸಂ, ಸಙ್ಖೋಭೇಸು ಮಿತೋ ತತೋ.
ಕಿತ್ತಿನಾಮೋ’ಥ ಸಚಿವೋ, ಮಕ್ಖಕುದ್ರೂಸವಾಸಿಕೋ;
ಮುದ್ಧನಾಮೋ ತಥಾಮಚ್ಚೋ, ಮಾರಗಲ್ಲಕವಾಸಿಕೋ.
ಉಭೋಪಿ ತೇ ಮಹಾವೀರಾ, ಯುದ್ಧೋಪಾಯವಿಚಕ್ಖಣಾ;
ಚೋಳಸೇನಂ ವಿನಾಸೇತು-ಮಚ್ಚನ್ತಕತನಿಚ್ಛಯಾ.
ಪಲುಟ್ಠಗಿರಿನಾಮಮ್ಹಿ, ಠಾನೇ ದುಗ್ಗೇ ನಿವೇಸಿಯ;
ಕತ್ವಾ ಛಮಾಸಂ ಸಙ್ಗಾಮಂ, ಹನಿಂಸು ದಮಿಳೇ ಬಹೂಂ.
ಹತಾವಸಿಟ್ಠಾ ಚೋಳಾತಾ, ರಣೇ ತಸ್ಮಿಂ ಭಯದ್ದಿತಾ;
ಪಲಾಯಿತ್ವಾ ಯಥಾಪುಬ್ಬಂ, ಪುಲತ್ತಿಪುರಮಾವಸುಂ.
ಕುಮಾರೋ ಜಯಿತೋ ದಿಸ್ವಾ, ಉಭೋ ತೇ ಸಚಿವೇ ತದಾ;
ಹಟ್ಠತುಟ್ಠೋ ‘‘ವರಂ ತಾತಾ, ಗಣ್ಹಥಾ’’ತಿ ಸ ಚಬ್ರವೀ.
ಬುದ್ಧೋ ಪವೇಣಿಗಾಮಂ ಸೋ, ವರಂ ಯಾಚಿತ್ಥ ಕಿತ್ತಿಕೋ;
ಸಙ್ಘಿಕಂ ಗಹಿತಂ ಭಾಗಂ, ವಿಸ್ಸಜ್ಜೇತುಂ ವರಂ ವರಿ.
ರಾಜಪುತ್ತವರಾಲದ್ಧ-ವರಾ’ಮಚ್ಚವರಾ ತದಾ;
ನಿದ್ದರಾ ಸಾದರಾ ವೀರಾ, ಪಾದೇ ವನ್ದಿಂಸು ತಸ್ಸ ತೇ.
ರಾಜಾ ದ್ವಾದಸವಸ್ಸಾನಿ, ವಸಿತ್ವಾ ಚೋಳಮಣ್ಡಲೇ;
ಅಟ್ಠತಾಲೀಸವಸ್ಸಮ್ಹಿ, ಮಹಿನ್ದೋ ಸೋ ದಿವಂಗತೋ.
ಪಮಾದ ದೋಸಾನಗತೇನ ಏವಂ,
ಲದ್ಧಾ’ಪಿ ಭೋಗಾನನಥಿರಾ ಭವನ್ತಿ;
ಇಚ್ಚಪ್ಪಮಂದಂ ಹಿತಮಾಸಸಾನೋ,
ನಿಚ್ಚಂ ಸುವಿಞ್ಞೂಸುಸಮಾ ಚರೇಯ್ಯ.
ಸುಜನಪ್ಪಸಾದಸಂವೇಗತ್ಥಾಯ ಕತೇ ಮಹಾವಂಸೇ
ಲಂಕಾವಿಲೋಪೋ ನಾಮ
ತಿಪಞ್ಞಾಸತಿಮೋ ಪರಿಚ್ಛೇದೋ.
ಚತುಪಞ್ಞಾಸತಿಮ ಪರಿಚ್ಛೇದ
ಛ ರಾಜಕೋನಾಮ
ಕತ್ವಾ ¶ ವಿಕ್ಕಮ್ಮ ಬಾಹೂ’ತಿ, ನಾಮ ಭೂಪಾಲಸೂನುತೋ;
ತಸ್ಸಾಣಾಯ ಪವತ್ತಿಂಸು, ಸಾದರಂ ಸೀಹಳಾ ಖಿಲಾ.
ಸೋ ರಾಜಾ ದಮಿಳೇ ಹನ್ತುಂ, ಧನಂ ಸಞ್ಚಿಯ’ನೇಕಾಧಾ;
ಸಙ್ಗಹಂ ಸೇವಕಾನಞ್ಚ, ಕುರುಮಾನೋ ಯಥೋಚಿತಂ.
ಅಲಙ್ಕಾರಕಿರೀಟಾನಿ, ಛತ್ತಸೀಹಾಸನಾನಿ ಚ;
ಕಾರಯಿತ್ವಾ’ಭಿಸೇಕತ್ಥಂ, ಸಚಿವೇಹಾ’ಭಿಯಾಚಿತೋ.
ನ ಯಾವ ರಾಜರಟ್ಠಸ್ಸ, ಗಹಣಂ ಹೋತಿ ತಾವ ಮೇ;
ಛತ್ತುಸ್ಸಾಪನಕಮ್ಮೇನ, ಕಿಂ ತೇನಾ’ತಿ ವಿವಾರಿಯ.
ಸತಂ ನರಸಹಸ್ಸಾನಂ, ಸಙ್ಕಲೇತ್ವಾ ಮಹಬ್ಬಲೋ;
ಸಙ್ಗಾಮಾರಬ್ಭ ಕಾಲಮ್ಹಿ, ವಾತರೋಗಾಭಿಪೀಳಿತೋ.
ಯುಜ್ಝಿತುಂ ಸಮಯೋ ನೇತಿ, ದ್ವಾದಸೇ ವಚ್ಛರೇ ಲಹುಂ;
ಉಪೇಚ್ಚ ದೇವನಗರಂ, ಗಞ್ಛಿದೇವಸಹಬ್ಯತಂ.
ಕಿತ್ತಿನಾಮೋ ಚ ಸಚಿವೋ, ಸೇನಾಪಚ್ಚಮಧಿಟ್ಠಿತೋ;
ರಜ್ಜತ್ಥಿಕೋ ದಿನಾನಟ್ಠ, ನಿಜಾಣಂ ಸಮ್ಪವತ್ತಯಿ.
ಘಾತೇತ್ವಾ ತಂ ಮಹಾಲಾನ-ಕಿತ್ತಿನಾಮೋ ಮಹಬ್ಬಲೋ;
ಪತ್ವಾ’ಭಿಸೇಕಂ ಭುಞ್ಜನ್ತೋ, ದೇಸಂ ತಂ ರೋಹಣವ್ಹಯಂ.
ಸಂವಚ್ಛರಮ್ಹಿ ತತಿಯೇ, ಚೋಳಯುದ್ಧೇ ಪರಾಜಿತೋ;
ಸಹತ್ಥೇನ ಸಕಂ ಸೀಸಂ, ಛಿನ್ದಿತ್ವಾ ಸಹಸಾ ಮರಿ.
ತದಾಪಿತೇ ಕಿರೀಟಾದಿ-ಧನಸಾರಂ ಸಮಾದಿಯ;
ಪೇಸೇಸುಂ ದಮಿಳಾ ಚೋಳ-ಮಹೀಪಾಲಸ್ಸ ಸನ್ತಿಕಂ.
ಭಯಾ ಸರಟ್ಠಂ ಹಿತ್ವಾ’ಥ, ದುಟ್ಠದೇಸೇ ವಸಂ ತದಾ;
ಏಕೋ ವಿಕ್ಕಮಪಣ್ಡೂತಿ, ವಿಸ್ಸುತೋ ಪತ್ಥಿವತ್ತಜೋ.
ವಿಞ್ಞಾತಲಙ್ಕಾವುತ್ತನ್ತೋ, ದೇಸಮಾಗಮ್ಮ ರೋಹಣಂ;
ಕಾಳತಿತ್ಥೇ ವಸಂ ವಸ್ಸ-ಮೇಕಂ ರಜ್ಜಮಕಾರಯಿ.
ರಾಮನ್ವಯಸಮುಬ್ಭೂತೋ ¶ , ತದಾಯುಜ್ಝ ಪುರಾಗತೋ;
ಜಗತೀ ಪಾಲನಾಮೇನ, ವಿಸ್ಸುತೋ ಭೂಭುಜತ್ತಜೋ.
ರಣೇ ವಿಕ್ಕಮಪಣ್ಡುತಂ, ಘಾತಾಪೇತ್ವಾ ಮಹಬ್ಬಲೋ;
ತತೋ ಚತ್ತಾರಿ ವಸ್ಸಾನಿ, ರಜ್ಜಂ ಕಾರೇಸಿ ರೋಹಣೇ.
ತಮ್ಪಿ ಚೋಳಾರಣೇ ಹನ್ತ್ವಾ, ಮಹೇಸಿಂ ಧೀತರಾ ಸಹ;
ವಿತ್ತಸಾರಞ್ಚ ಸಾಕಲಂ, ಚೋಳರಟ್ಠಮಪೇಸಯುಂ.
ರಾಜಾ ಪರಕ್ಕಮೋ ನಾಮ, ಪಣ್ಡುರಾಜಸುತೋ ತತೋ;
ಅಕಾ ವಸ್ಸದ್ವಯಂ ಚೋಳಾ, ಘಾತೇಸುಂ ತಮ್ಪಿ ಯುಜ್ಝಿಯ.
ಇಮೇ ಭುಸಂ ಲೋಭಬಲಾಭಿಭೂತಾ,
ಗತಾ ಅಸೇಸಾ ವಿವಸಾ ವಿನಾಸಂ;
ಇಚ್ಚೇವಮಞ್ಞಾಯ ಸದಾ ಸಪಞ್ಞೋ,
ತಣ್ಹಕ್ಖಯೇಯೇವ ರತಿಂ ಕರೇಯ್ಯ.
ಸುಜನಪ್ಪಸಾದಸಂವೇಗತ್ಥಾಯ ಕತೇ ಮಹಾವಂಸೇ
ಛ ರಾಜಕೋ ನಾಮ
ಚತುಪಞ್ಞಾಸತಿಮೋ ಪರಿಚ್ಛೇದೋ.
ಪಞ್ಚಪಞ್ಞಾಸತಿಮ ಪರಿಚ್ಛೇದ
ರೋಹಣಾರಾತಿ ವಿಜಯೋನಾಮ
ಲೋಕನಾಮೋ ಚಮೂನಾಥೋ, ಮಕ್ಖಕುದ್ರೂಸವಾಸಿಕೋ;
ಸಚ್ಚಪಟಿಞ್ಞೋ ಧೀತಿಮಾ, ಚೋಳದಪ್ಪವಿಘಾತನೋ.
ಅಭಿಭೂಯ ಜನೇ ಪತ್ವಾ, ರಜ್ಜಂ ರೋಹಣಮಣ್ಡಲೇ;
ವಸೀ ಕಾಜರಗಾಮಮ್ಹಿ, ಚಾರಿತ್ತವಿಧಿಕೋವಿದೋ.
ಅಹು ತದಾ ಕಿತ್ತಿನಾಮೋ, ರಾಜಪುತ್ತೋ ಮಹಬ್ಬಲೋ;
ತಸ್ಸ ವಂಸಾದಿಸಮ್ಪತ್ತೀ, ನುಪುಬ್ಬೇನ ಪವುಚ್ಚತೇ.
ಸುತೋ ಕಸ್ಸಪಭೂಪಸ್ಸ, ಮಾಣನಾಮೇನ ವಿಸ್ಸುತೋ;
ಆದಿಪಾದೋ ಅಹು ಧೀರೋ, ಸದಾಚಾರವಿಭೂಸಿತೋ.
ತಸ್ಸಾ’ಥ ¶ ಜೇಟ್ಠಕೋ ಭಾತಾ, ಮಾಣವಮ್ಮೋ ಮಹಾಮತಿ;
ಗೋಕಣ್ಣಕಸಮೀಪಟ್ಠ-ನದೀತೀರೇ ನಿಸೀದಿಯ.
ಕತಮನ್ತುಪಚಾರೋ ಸೋ, ಯಥಾವಿಧಿಮಸೇಸತೋ;
ಅಕ್ಖಮಾಲಂ ಗಹೇತ್ವಾನ, ಮನ್ತಂ ಜಪ್ಪಿತುಮಾರಭಿ.
ಕುಮಾರೋ ಕಿರ ಭತ್ತಗ್ಗೇ, ಪಾತುರಾಸಿ ಸವಾಹನೋ;
ಸಿಖಣ್ಡಿ ಮುಖತುಣ್ಡೇನ, ಬಲಿಪಟ್ಟಂ ವಿಖಣ್ಡಿಯ.
ಸಚ್ಛಿದ್ದಕೇ ನಾಳಿಕೇರ-ಕಪಾಲೇ ವಿಚ್ಚುನೋದಕೇ;
ಲೂಖೇ ಜಲಮಪಸ್ಸನ್ತೋ, ಜಪನ್ತಸ್ಸ ಮುಖಂಗತೋ.
ತತೋ ಭಾವಿನಿಂ ಸಿದ್ಧಿ, ಮಪೇಕ್ಖಂ ನಯನಂ ಸಕಂ;
ತಸ್ಸೋಪನೇಸಿ, ನಿಬ್ಭಿಜ್ಜ, ಸೋಪಿ ತಂ ಸಹಸಾಪಿಚಿ.
ಕುಮಾರೋ ತಸ್ಸ ಸನ್ತುಟ್ಠೋ, ಕುಮಾರಸ್ಸಾಭಿಪತ್ಥಿತಂ;
ವರಂ ಪದಾಯ ನಭಸಾ, ರಾಜಮಾನೋ ಗತೋ ತತೋ.
ಭಿನ್ನೇಕನಯನಂ ದಿಸ್ವಾ, ಸಚಿವಾತಂ ಪರೋ ದಿಸುಂ;
ವರಲಾಭಂ ಪಕಾಸೇತ್ವಾ, ಸಮಸ್ಸಾಸೇಸಿ ಸೋ ಜನೇ.
ತತೋ ಸೋ ಸಚಿವಾತಸ್ಸ, ಸನ್ತುಟ್ಠಾರಾಧಯಿಂಸು ತಂ;
ಅನುರಾಧಪುರಂ ಪತ್ವಾ, ಭಿಸೇಕೋ ಕಾರಿಯೋ ಇತಿ.
ಅತ್ಥೋ ಕೋ ಮಮರಜ್ಜೇನ, ವಿಕಲಙ್ಗಸ್ಸ ಸಮ್ಪತಿ;
ತಪೋಕಮ್ಮಂ ಕರಿಸ್ಸಾಮಿ, ಪಬ್ಬಜ್ಜಮುಪಗಮ್ಮಹಂ.
ಕಣಿಟ್ಠೋ ಮಾಣನಾಮೋ ಚ, ಲಙ್ಕಾರಜ್ಜಂ ಕಮಾಗತಂ;
ಪಾಲೇತು ಇತಿ ಸೋ ರಜ್ಜಂ, ಸಮ್ಪತ್ತಂ ಸಮ್ಪಟಿಕ್ಖಿಪಿ.
ವಿಞ್ಞಾತಚಿತ್ತಸಞ್ಚಾರಾ, ಸಚಿವಾ ತಸ್ಸ ಸಬ್ಬಥಾ;
ವತ್ತುಮೇತಂ ಕಣಿಟ್ಠಸ್ಸ, ಪೇಸೇಸುಂ ಪುರಿಸೇ ತದಾ.
ಸುತ್ವಾ ತಂ ಸೀಘಮಾಗಮ್ಮ, ಪಸ್ಸಿತ್ವಾ ಸಕಭಾತರಂ;
ಪತಿತ್ವಾ ಪಾದಮೂಲಮ್ಹಿ, ಬಹುಂ ಕನ್ದಿಯ ರೋದಿಯ.
ಜೇಟ್ಠೇನ ಭಾತರಾ ಸದ್ಧಿ-ಮನುರಾಧಪುರಂ ಗತೋ;
ಮಕುಟಂ ತತ್ಥ ಧಾರೇಸಿ, ಜೇಟ್ಠಚಿತ್ತಾನುವತ್ತಕೋ.
ತತೋ’ಭಯಗಿರಿಂ ಗನ್ತ್ವಾ, ಪಬ್ಬಜ್ಜಂ ಸಕಭಾತುನೋ;
ಯತ ಯೋ ತತ್ಥ ಯಾಚಿತ್ಥ, ಬಹುಮಾನಪುರಸ್ಸರಂ.
ತತೋ ತೇ ಯತಯೋ ತಸ್ಸ, ಪಬ್ಬಜ್ಜಮುಪಸಮ್ಪದಂ;
ಅಕಂಸು ವಿಕಲಙ್ಗಸ್ಸ, ಸಿಕ್ಖಾಪದನಿರಾದರಾ.
ಪರಿವೇಣಮುತ್ತರೋಳ-ಮುಳಾರಂ ¶ ತಸ್ಸ ಕಾರಿಯ;
ಕತ್ವಾ ತಂ ಪರಿವೇಣಸ್ಸ, ಸಾಮಿಕಂ ಧರಣೀ ಪತಿ.
ಭಿಕ್ಖೂನಂ ಛಸತಂ ತತ್ಥ, ವಿಧಾಯ ತದಧೀನಕಂ;
ಪರಿಹಾರೇ ಅದಾ ತಸ್ಸ, ಪೇಸ್ಸವಗ್ಗೇ ಚ ಪಞ್ಚ ಸೋ.
ಸಮಪ್ಪೇಸಿ ಚ ಸೋ ನಾನಾ-ಸಿಪ್ಪಕಮ್ಮವಿಚಕ್ಖಣೇ;
ಜನೇ ಚಾಕಾ ತದಾಯತ್ತೇ, ಸೋ ದಾಠಾಧಾತುರಕ್ಖಿಯೇ.
ತಸ್ಸೇವಾದಕರಾ’ಹೇಸುಂ, ಭಿಕ್ಖೂ’ಭಯಗಿರಿಮ್ಹಿ ತೇ;
ರಾಜಾ ಚ ಲೋಕಂ ಪಾಲೇಸಿ, ಸಮ್ಮಾ ತಸ್ಸಾನುಸಿಟ್ಠಿಯಾ.
ಜನಾ ತಬ್ಬಂಸಜಾ ಕೇಚಿ, ತಂ ರಜ್ಜನಿರಪೇಕ್ಖಕಾ;
ನಿವಸಿಂಸು ಯಥಾಕಾಮಂ, ಮಹಾಸಾಮಿ ಪದಂಸಿತಾ.
ಏತಸ್ಸ ಮಾಣವಮ್ಮಸ್ಸ, ರಞ್ಞೋ ಧಮ್ಮನಯಞ್ಞುನೋ;
ಅಗ್ಗಬೋಧಿಕುಮಾರಾದಿ-ಪುತ್ತನತ್ತುಕ್ಕಮಾಗತೇ.
ವಂಸೇ ವಿಸುದ್ಧೇ ಜಾತಸ್ಸ, ಭೂಪಾಲನ್ವಯಮುದ್ಧನಿ;
ಸಮಾಸೋಳಸಕಙ್ಕಾಯಂ, ಸಮ್ಮಾ ರಜ್ಜಾನುಸಾಸಿನೋ.
ಮಹೀಪಸ್ಸ ಮಹಿನ್ದಸ್ಸ, ದುವೇ ಮಾಕುಲಧೀತರೋ;
ದೇವಲಾ ಲೋಕಿಕಾ ಚಾತಿ, ನಾಮತೋ ವಿಸ್ಸುತಾ ಸುಭಾ.
ಏತಾಸು ದ್ವೀಸು ಧೀತಾಸು, ಲೋಕಿಕಾ ಮಾತುಲತ್ತಜಂ;
ಪಟಿಚ್ಚ ರಾಜತನಯಂ, ಸುಭಂ ಕಸ್ಸಪನಾಮಕಂ.
ಸಾ ಮೋಗ್ಗಲ್ಲಾನ ಲೋಕವ್ಹೇ, ಪುತ್ತೇ ದ್ವೇ ಲಭಿ ಸೋಭನೇ;
ತೇಸು ಜೇಟ್ಠಸುತೋ ಲೋಕ-ಸಾಸನಾಧಾರಕೋವಿದೋ.
ಮಹಾಸಾಮೀತಿ ಪಞ್ಞಾತೋ, ಸಙ್ಘುಪಾಸನಪಾಲಯೋ;
ನೇಕಸಾರಗುಣಾವಾಸೋ, ವಾಸಂ ಕಪ್ಪೇಸಿ ರೋಹಣೇ.
ದಾಠೋಪತಿಸ್ಸ ರಾಜಸ್ಸ, ನತ್ತಾ ಸುಗತಸಾಸನೇ;
ಪಬ್ಬಜ್ಜೂಪಗತೋ ಸದ್ಧೋ, ಧುತವಾ ಸೀಲಸಂವುತೋ.
ಪಹಿತತ್ತೋ ವಿಚಿತ್ತೋಸೋ, ಪನ್ತಸೇನಾಸನೇ ವಸೀ;
ಗುಣಂ ಸಬ್ಬತ್ಥ ವಣ್ಣೇಸುಂ, ತಸ್ಮಿಂ ದೇವಾ ಪಸೀದಿಯ.
ಗುಣಂ ಸುಣಿತ್ವಾ ಲಂಕಿನ್ದೋ, ತದಾ ಸಬ್ಬತ್ಥ ಪತ್ಥಟಂ;
ಉಪಸಙ್ಕಮ್ಮ ತಂ ನತ್ವಾ, ಕಾತುಮತ್ತಾನುಸಾಸನಂ.
ಆರಾಧಯಮನಿಚ್ಛನ್ತಂ, ಯಾಚಿತ್ವಾನ ಪುನಪ್ಪುನಂ;
ಆನೀಯ ವಾಸಯಿತ್ವಾ ತಂ, ಪಾಸಾದೇ ಸಾಧುಕಾರಿತೇ.
ಯತಿಸ್ಸರಸ್ಸ ¶ ವಸತೋ, ಕತ್ಥ ರಾಜಾಗುಣಪ್ಪಿಯೋ;
ತಸ್ಸಾನುಸಿಟ್ಠಿಮಗ್ಗಟ್ಠೋ, ಲೋಕಂ ಧಮ್ಮೇನ ಪಾಲಯಿ.
ಉದ್ದಿಸ್ಸಾರಾಧನಂ ಸಮ್ಮಾ, ಲಂಕಿನ್ದೇನ ಕತಂ ತದಾ;
ಸೇಲನ್ತರಾಭಿನಿಕ್ಖಮ್ಮ, ಯತಿನ್ದೋ ಸೋ ದಯಾನುಗೋ.
ಯತೋ ಭಿಕ್ಖೂ ಸಮೂಹೇತ್ವಾ, ವಾಸಂ ಕಪ್ಪೇಸಿ ಯತ್ಥ ಸೋ;
ಸೇಲನ್ತರಸಮೂಹೋ’ತಿ, ವಿಕ್ಖ್ಯಾತಿಂ ಸೋ ತತೋ ಗತೋ.
ತತೋ ಪಟ್ಠಾಯ ವಾಸೇತ್ವಾ, ರತ್ತಿಯಂ ದೇವಪಲ್ಲಿಯಂ;
ದೇವತಾನುಮತಂ ಭಿಕ್ಖುಂ, ಮೂಲಠಾನೇ ಠಪೇನ್ತಿ ಹಿ.
ಮೂಲತ್ತಮಾವಸನ್ತಾನಂ, ಯತೀನಮನುಸಾಸನಾ;
ಲಂಕಿಸ್ಸರಾ ಪವತ್ತನ್ತಿ, ಪಾಲೇನ್ತಾ ಲೋಕಸಾಸನಂ.
ತಸ್ಸ ದಾಠೋಪತಿಸ್ಸಸ್ಸ, ವಂಸಜಂ ರಾಜಪುತ್ತಕಂ;
ಬೋಧಿಂ ಪಟಿಚ್ಚ ತಬ್ಬಂಸಾ, ಬುದ್ಧನಾಮಾ ಕುಮಾರಿಕಾ.
ಅಲತ್ಥ ಲೋಕಿತಂ ನಾಮ, ಧೀತರಂ ವರಲಕ್ಖಣಂ;
ಕಾಲೇನ ಸಾ ಪದಿನ್ನಾ’ಸಿ, ಮೋಗ್ಗಲ್ಲಾನಸ್ಸ ಧೀಮತೋ.
ಸಾ ತಂ ಪಟಿಚ್ಚ ಕಿತ್ತಿಞ್ಚ, ಮಿತ್ತಂ ನಾಮ ಕುಮಾರಿಕಂ;
ಮಹಿನ್ದಂ ರಕ್ಖಿತಂ ಚಾಪಿ, ಲತಿತ್ಥ ಚತುರೋ ಪಜಾ.
ಅಹು ಜೇಟ್ಠಸುತೋ ಧೀರೋ, ವೀರೋ ತೇರಸವಸ್ಸಿಕೋ;
ಕತಹತ್ಥೋ ವಿಸೇಸೇನ, ಧನುಸಿಪ್ಪಮ್ಹಿ ಸೋ ತತೋ.
ಕಥಂ ಲಙ್ಕಂ ಗಹೇಸ್ಸಾಮಿ, ದೂರೇತ್ವಾ’ರಾತಿ ಕಣ್ಟಕಂ;
ಇತಿ ಚಿನ್ತಾಪರೋಗಾಮೇ, ಮೂಲಸಾಲವ್ಹಯೇ ವಸೀ.
ಏಕೋ ಮಹಾಬಲೋ ವೀರೋ, ಬುದ್ಧರಾಜೋತಿ ವಿಸ್ಸುತೋ;
ವಿಲೋಮವತ್ತೀ ಹುತ್ವಾನ, ಲೋಕಸೇನಾನಿನೋ ತದಾ.
ಪಲಾತೋ ಚುಣ್ಣಸಾಲವ್ಹಂ, ಖಿಪ್ಪಂ ಜನಪದಂ ತಹಿಂ;
ಕಿತ್ತಾದಿಕೇ ಜನೇ ನೇಕೇ, ವಸೇ ವತ್ತಿಯ ಸಬ್ಬಥಾ.
ಸದ್ಧಿಂ ಬನ್ಧೂಹಿ ಸಙ್ಗಾಮ-ಸೂರೇಹಿ ಬಹುಕೇಹಿ ಸೋ;
ಮಲಯಾಚಲಪಾದೇಸು, ವಸೀ ದುಪ್ಪಸಹೋ ತದಾ.
ತಸ್ಸ’ನ್ತಿಕಮುಪಾಗಮ್ಮ, ಸಂವಚ್ಛರಿಕನಾಯಕೋ;
ಸಙ್ಘೋ ನಾಮ ಕುಮಾರಸ್ಸ, ಸರೂಪಂ ಸಾಧುವಂ ಬ್ರವಿ.
ಮಹಾಸಾಮಿಸ್ಸ ತನಯೋ, ಜೇಟ್ಠೋ ಕಿತ್ತಿ ಸನಾಮಕೋ;
ಧಞ್ಞಲಕ್ಖಣಸಮ್ಪನ್ನೋ, ಸಮ್ಪನ್ನಮತಿವಿಕ್ಕಮೋ.
ಜಮ್ಬುದೀಪೇಪಿ ¶ ತಂ ರಜ್ಜಂ, ಕತ್ತುಮೇಕಾತಪತ್ತಕಂ;
ಸಮತ್ಥೋತಿ ವಿಚಿನ್ತೇಪಿ, ಲಙ್ಕಾದೀಪಮ್ಹಿ ಕಾ ಕಥಾ.
ತಸ್ಸ ಸೋ ವಚನಂ ಸುತ್ವಾ, ಸೇವಿತಬ್ಬೋ ಕುಮಾರಕೋ;
ಇತಿ ನಿಚ್ಛಿಯ ಪೇಸೇಸಿ, ಕುಮಾರಸ್ಸ’ನ್ತಿಕಂ ಜನೇ.
ಸುಣಿತ್ವಾ ಸೋ ವಚೋ ತೇಸಂ, ನಿವತ್ತನಭಯಾ ವಿಭೂ;
ಅಜಾನಹಂ ಪಿತುನ್ನಂ ಸೋ, ವೀರೋ ಧನುಸಹಾಯಕೋ.
ಗೇಹಾ ನಿಕ್ಖಮ್ಮ ಪಸ್ಸನ್ತೋ, ಸುನಿಮಿತ್ತಾನಿನೇಕಧಾ;
ಅಗಾಲಹುಂ ಸರೀವಗ್ಗ-ಪಿಟ್ಠಿಗಾಮಂ ಮಹಾಮತಿ.
ತಹಿಂ ಸೋ ನಿವಸಂ ವೀರೋ, ಪೇಸಯಿತ್ವಾ ಸಸೇವಕೇ;
ವಿಪಕ್ಖಾಧಿಟ್ಠಿತಂ ಜೇಸಿ, ಬೋಧಿವಾಲವ್ಹಗಾಮಕಂ.
ತತೋ’ಭಿಮಾನೀ ಸೇನಾನೀ, ಸೇನಂ ಸೋ ತತ್ಥ ಪೇಸಯಿ;
ಸಾ ಪರಿಕ್ಖಿಪತಂ ಗಾಮಂ, ಸಙ್ಗಾಮಾಯ ಸಮಾರಭೀ.
ಕುಮಾರೋ ತೇಹಿ ಯುಜ್ಝನ್ತೋ, ಸುಭಟೋ ಪಟುವಿಕ್ಕಮೋ;
ದಿಸಾಸು ವಿಕಿರೀಸಬ್ಬೇ, ತುಲಂ ಚಣ್ಡೋವ ಮಾಳುತೋ.
ಚುಣ್ಣಸಾಲಂ ಜನಪದಂ, ಗನ್ತ್ವಾ ಠಾನವಿದೂ ತದಾ;
ತಹಿಂ ವಸಂ ವಸೇಕಾಸಿ, ಸಬ್ಬಂ ಮಲಯಮಣ್ಡಲಂ.
ತದಾಪಿ ಸೇನಂ ಸೇನಿನ್ದೋ, ಪೇಸೇತ್ವಾ ಅಸಕಿಂ ಸಕಂ;
ಅಭಿಭೂತಿಮಸಕ್ಕೋನ್ತೋ, ಕಾತುಂ ದುಮ್ಮನತಂ ಗತೋ.
ಮಕ್ಖಕುದ್ರುಸವಾಸಿಸ್ಸ, ಸಚಿಪಸ್ಸಾಥ ಕಿತ್ತಿನೋ;
ಸುತೋ ಮಹಬ್ಬಲೋ ದೇವ-ಮಲ್ಲೋತಿ ವಿದಿತೋ ತದಾ.
ಸಹಿತೋ ಬನ್ಧುಮಿತ್ತೇಹಿ, ಬಹೂ ರೋಹಣವಾಸಿನೋ;
ಸಮಾದಾಯಾ’ಭಿಗನ್ತ್ವಾನ, ಕುಮಾರಂ ಪಸ್ಸಿ ಸಾದರೋ.
ಬನ್ಧಿಯ ಛುರಿಕಂ ಛೇಕೋ, ಸೋ ಪನ್ನರಸವಸ್ಸಿಕೋ;
ಆದಿಪಾದಪದಂ ತತ್ಥ, ಸಮ್ಪಾಪುಣಿ ಮಹಾಯಸೋ.
ತತೋ ಹಿರಞ್ಞಮಲಯ, ಮುಪಾಗಮ್ಮ ಮಹಬ್ಬಲೋ;
ತಹಿಂ ರೇಮುಣಸೇಲಮ್ಹಿ, ಖನ್ಧಾವಾರಂ ನಿಬನ್ಧಯಿ.
ತತ್ಥಾಪಿ ಸೇನಂ ಪೇಸೇತ್ವಾ, ಸಙ್ಗಾಮೇನ್ತೋ ಚಮೂಪತಿ;
ಅಲದ್ಧವಿಜಯೋ ಛನ್ದಂ, ಪುನಯುದ್ಧೇ ಜಹಿತತೋ.
ಲೋಕನಾಮೋ ಚಮೂನಾಥೋ, ಲೋಕಂ ಹಿತ್ವಾ ಸಕಂ ತದಾ;
ಅಹು ವಸ್ಸಮ್ಹಿ ಛಟ್ಠೇಸೋ, ಪರಲೋಕಪರಾಯನೋ.
ತದಾ ¶ ಕಸ್ಸಪನಾಮೇಕೋ, ಕೇಸಧಾತುಕನಾಯಕೋ;
ಜನೇ’ಭಿಭೂಯವತ್ತೇಸಿ, ನೀಜಾಣಂ ರೋಹಣೇ ತದಾ.
ಸುತ್ವಾ ತಂ ಚೋಳಸಾಮನ್ತೋ, ಪುಳತ್ಥಿನಗರಾ ತದಾ;
ನಿಕ್ಖಮ್ಮ ಯುದ್ಧಸನದ್ಧೋ, ಗನ್ತ್ವಾ ಕಾಜರಗಾಮಕಂ.
ಕೇಸಾಧಾತು ತತೋ ಯುದ್ಧೇ, ಭಿನ್ದಿತ್ವಾ ದಮಿಳಂ ಬಲಂ;
ರಕ್ಖಪಾಸಾಣಸೀಮಾಯಂ, ಠಪೇತ್ವಾ ರಕ್ಖಿಯೇ ಜನೇ.
ಪಟಿಲದ್ಧಜಯುದ್ದಾಮೋ, ಮಹಾಸೇನಾ ಪುರಕ್ಖತೋ;
ಪುನರಾಗಮ್ಮ ಪಾವೇಕ್ಖಿ, ವೀರೋ ಕಾಜರಗಾಮಕಂ.
ತದಾದಿಪಾದೋ ಸುತ್ವಾನ, ಸಬ್ಬಂ ಸುತ್ಥೀರಧಾತುಕೋ;
ಕೇಸಧಾತುಂ ನಿಘಾತೇತುಂ, ಬಲಂ ಸನ್ನಯ್ಹಿ ವೇಗಸಾ.
ಪವತ್ತಿಂ ತಂ ಸುಣಿತ್ವಾ ಸೋ, ಸಾಭಿಮಾನೋ ಭುಸಂತತೋ;
ಸಮತ್ತಂ ಬಲಮಾದಾಯ, ಸಿಪ್ಪತ್ಥಲಕಮಾಗಮಾ.
ಪಞ್ಚಯೋಜನರಟ್ಠಾದಿ-ವಾಸಿಕೇಸು ಬಹೂಜನೇ;
ಸಮಾದಾಯ ಸಮಾಸನ್ನೇ, ರಾಜಪುತ್ತೇ ಸುದುಜ್ಜಯೇ.
ವಿರತ್ತತಞ್ಚ ಸೋ ಞತ್ವಾ, ಬಹುನ್ನಂ ರಟ್ಠವಾಸಿನಂ;
ದುಕ್ಕರಂ ಏತ್ಥ ಯುದ್ಧನ್ತಿ, ಗತೋ ಸೋ ಖದಿರಙ್ಗಣಿಂ.
ಮಹಾಸೇನಾಯ ಭೂಪಾಲ ಸುತೋ ಸೋಳಸವಸ್ಸೀಕೋ;
ಖಿಪ್ಪಂ ವಾಪೇಕ್ಖಿ ಸೋ ವೀತ-ದರೋ ಕಾಜರಗಾಮಕಂ.
ಛಮ್ಮಾಸಮನುಭೋತ್ವಾನ, ರೋಹಣಂ ರುಟ್ಠಮಾನಸೋ;
ಕೇಸಧಾತುಕನಾಥೋಪಿ, ಸಙ್ಗಾಮತ್ಥಾಯ ತತ್ಥಗಾ.
ರಾಜಪುತ್ತಸ್ಸ ಸೇನಾ’ಥ, ವತ್ತೇನ್ತಿ ಸಮರಂ ಖರಂ;
ಕೇಸಧಾತುಕನಾಥಸ್ಸ, ಸೀಸಂ ಗಣ್ಹಿ ಮಹಬ್ಬಲಾ.
ಆಗಮ್ಮ ಸತ್ತರಸವಯಂ ಕುಮಾರೋ;
ಸಬ್ಬತ್ಥ ಪತ್ಥಟಮಹಾಯಸಕಿತ್ತಿತೇಜೋ;
ಸುಮಾದಿನೇಕ ವಿಧಿಯೋಗವಿಸೇಸದಕ್ಖೋ;
ಖೀಣಾರಿಕಣ್ಟಕಮಕಾ’ಖಿಲರೋಹಣಂ ತಂ.
ಸುಜನಪ್ಪಸಾದಸಂವೇಗತ್ಥಾಯ ಕತೇ ಮಹಾವಂಸೇ
ರೋಹಣಾರಾತಿವಿಜಯೋ ನಾಮ
ಪಞ್ಚಪಞ್ಞಾಸತಿಮೋ ಪರಿಚ್ಛೇದೋ.
ಛಪಞ್ಞಾಸತಿಮ ಪರಿಚ್ಛೇದ
ಅನುರಾಧಪುರಾಭಿಗಮನೋ
ಯುವರಾಜಪದೇ ¶ ತಸ್ಸ, ಠಿತಸ್ಸಾ’ಥ ನಯಞ್ಞುನೋ;
ಅಹೂ ವಿಜಯಬಾಹೂತಿ, ನಾಮಂ ಸಬ್ಬತ್ಥ ಪಾಕಟಂ.
ಮಹಾಞ್ಞಣೋ ನಿಜಾಣಾಯ, ತತ್ಥ ಭೇರಿಂ ಚರಾವಿಯ;
ಠಪೇನ್ತೋ ಸಚಿವೇ’ನೇಕೇ, ಪತಿರೂಪೇ ಪದನ್ತರೇ.
ಚೋಳಾನಂ ಮದ್ದನತ್ಥಾಯ, ರಾಜರಟ್ಠಾಧಿವಾಸಿನಂ;
ಚತುರೋ ಚತುರೋಪಾಯೇ, ಯೋ ಜಯಂ ತತ್ಥ ಸೋ ವಸೀ.
ಚೋಳರಾಜಾ ಸುಣಿತ್ವಾ ತಂ, ಪುಳತ್ಥಿನಗರೇ ಠಿತಂ;
ಸೇನಾಪತಿಮ ಪೇಸೇಸಿ, ದತ್ವಾನ ಬಲವಾಹನಂ.
ಸೇನಿನ್ದಂ ಕಾಜರಗ್ಗಾಮ-ಸಮೀಪಂ ಸಮುಪಾಗತಂ;
ದುಪ್ಪಸಯ್ಹಂ ವಿದಿತ್ವಾನ, ಗಿರಿದುಗ್ಗಮಗಾ ತತೋ.
ಸೇನಿನ್ದೋ ಕಾಜರಗ್ಗಾಮಂ, ವಿಲುಮ್ಪಿತ್ವಾನ ವೇಗಸಾ;
ತತ್ಥ ವತ್ಥುಮಸಕ್ಕೋನ್ತೋ, ಸದೇಸಂ ಪುನ ರಾಗಮಿ.
ತತೋ ಮಹಾದಿಪಾದೋ’ಪಿ, ಆಗಮ್ಮ ಮಲಯಾ ಲಹುಂ;
ಮಹತಾ ಬಲಕಾಯೇನ, ಸಿಪ್ಪತ್ಥಲಕಮಾವಸಿ.
ರಾಜಾ ರಾಮಞ್ಞವಿಸಯೇ, ರಾಜಿನೋ ಸನ್ತಿಕಂ ಜನೇ;
ಪೇಸೇಸಿ ಬಹುಕೇಸಾರಂ, ಧನಜಾತಞ್ಚ’ನಪ್ಪಕಂ.
ವಿಚಿತ್ತವತ್ಥಕಪ್ಪೂರ-ಚನ್ದನಾದೀಹಿ ವತ್ಥೂಹಿ;
ಪರಿಪುಣ್ಣಾ ಚ ನಾವಾಯೋ, ನೇಕಾತಿತ್ಥೇ ಸಮೋಸಟಾ.
ಧನಜಾ ತೇಹಿ ನೇಕೇಹಿ, ಕರೋನ್ತೋ ಭಟಸಙ್ಗಹಂ;
ತತೋ ತಮ್ಬಲಗಾಮಮ್ಹಿ, ನಿವಸಿತ್ಥ ಮಹಬ್ಬಲೋ.
ಅಞ್ಞಮಞ್ಞವಿರುದ್ಧತ್ತಾ, ರಾಜಾರಟ್ಠಾಧಿವಾಸಿನೋ;
ಉಪಗ್ಗಮ್ಮ ಜನಾ ಸಬ್ಬೇ, ಕರಂ ನೋ ದೇನ್ತಿ ಸಬ್ಬಸೋ.
ವಿಪಕ್ಖಾಚೋಳರಾಜಸ್ಸ, ಭಿನ್ದನ್ತಾ’ಣಂ ಮದುದ್ಧತಾ;
ಆಯುತ್ತಕೇ ವಿಹಿಂಸೇನ್ತೋ, ಯಥಾಕಾಮಂ ಚರನ್ತಿ ಚ.
ತಂ ¶ ಸುತ್ವಾ ಚೋಳಭೂಪಾಲೋ, ಸಮ್ಪಕೋಪವಸೀಕತೋ;
ಸೇನಂ ಮಹನ್ತಿಂ ದತ್ವಾನ, ಪೇಸೇಸಿ ಸಚಿವಂ ನಿಜಂ.
ಮಹಾತಿತ್ಥೇ’ವಹಿಣ್ಣೋ ಸೋ, ತತ್ಥ ತತ್ಥ ಬಹೂಜನೇ;
ಘಾತೇನ್ತೋ ಸವಸೇ ಕತ್ವಾ, ರಾಜಾರಟ್ಠಾಧಿವಾಸಿನೋ.
ಅನುಕ್ಕಮೇನ ಗನ್ತ್ವಾನ, ಖರಾಣೋ ರೋಹಣಂ ತದಾ;
ಅಜ್ಝೋತ್ಥರಿ ಸಸೇನೋ ಸ, ಭಿನ್ನೋ ವೇಲೋವಸಾಗರೋ.
ರಞ್ಞೋ ಪಚ್ಚತ್ಥಿಕಾ ಹುತ್ವಾ, ರವಿದೇವಚಲವ್ಹಯಾ;
ಉಭೋ ದಮಿಳಸೇನಿನ್ದ-ವಸಂ ಯಾತಾ ಮಹಬ್ಬಲಾ.
ಮಹಾಪಕ್ಖಬಲೋಪೇತೇ, ತೇ ಪಸ್ಸಿಯ ಚಮೂಪತಿ;
ರೋಹಣಂ ಸಕಲಂ ಖಿಪ್ಪಂ, ಮಞ್ಞಿತ್ಥ ಸಕಹತ್ಥಗಂ.
ಏಕಾದಸಮ್ಹಿ ಸೋ ವಸ್ಸೇ, ರಾಜಾ ಚೋಳಾಭಿಭೂತಿಯಾ;
ಪಲುಟ್ಠಪಬ್ಬತೇ ದುಗ್ಗಂ, ಪವಿಧಾಯ ತಹಿಂ ವಸೀ.
ಚೋಳಸೇನಾ ತದಾಸೇಲಂ, ಸಮನ್ತಾ ಸಮ್ಪರಿಕ್ಖಿಪಿ;
ತತ್ಥೋ’ಭಯೇಸಂ ಸೇನಾನ-ಮಹೂ ಭಿಂಸನಕಂ ರಣಂ.
ರಞ್ಞೋ ಭಟಾ ವಿನಾಸೇತ್ವಾ, ಸಬ್ಬಂ ತಂ ದಮಿಳಂ ಬಲಂ;
ಪಲಾಯನ್ತಂ ಮಹಾಚೋಳ-ಸಾಮನ್ತಞ್ಚಾನುಬನ್ಧಿಯ.
ಗಹೇತ್ವಾನ ಸಿರಂ ತಸ್ಸ, ಗಾಮಸ್ಮಿಂ ತಮ್ಬವಿಟ್ಠಿಕೇ
ಸದ್ಧಿಂ ವಾಹನಯಾನೇಹಿ, ಸಾರಭೂತಧನೇಹಿ ಚ.
ತಹಿಂ ತಂ ಸಕಲಂ ಭಣ್ಡಂ, ನೇತ್ವಾ ರಞ್ಞೋ ಪದಸ್ಸಿಯ;
ಪುಳತ್ಥಿನಗರಂ ಗನ್ತುಂ, ಕಾಲೋ ಇತಿ ಸಮಬ್ರವುಂ.
ಮಹೀಪಾಲೋಪಿ ತಂ ಸುತ್ವಾ, ಸಚಿವಾನಂ ವಚೋ ತದಾ;
ಮಹತಾ ಬಲಕಾಯೇನ, ಪುಲತ್ಥಿನಗರಂ ಗತೋ.
ಪವತ್ತಿಮೇತಂ ಸಕಲಂ, ಸುತ್ವಾ ಚೋಳನರಿಸ್ಸರೋ;
ತಿಬ್ಬಕೋಪವಸಂಯಾತೋ, ಭೂಪಾಲಗಹಣತ್ಥಿಕೋ.
ಸಾಮಂ ಖಿಪ್ಪಂ ಸಮಾಗಮ್ಮ, ವೀರೋ ಸಾಗರಪಟ್ಟನಂ;
ಭಿಯ್ಯೋಪಿ ಮಹತಿಂ ಸೇನಂ, ಲಂಕಾದೀಪಮಪೇಸಯೀ.
ತಂ ವಿಜಾನಿಯ ಭೂಮಿನ್ದೋ, ಸೇನಿನ್ದಂ ಪೇಸಯೀ ಸಕಂ;
ಬಲಂ ಮಹನ್ತಂ ದತ್ವಾನ, ಚೋಳಸೇನಾಯ ಯುಜ್ಝಿತುಂ.
ಗಚ್ಛಮಾನೋ ಚಮೂನಾಥೋ, ಸೋ’ನುರಾಧಪುರನ್ತಿಕೇ;
ಸದ್ಧಿಂ ದಮಿಳಸೇನಾಯ, ವತ್ತೇಸಿ ತುಮುಲಂ ರಣಂ.
ಪತಿಂಸು ¶ ತಸ್ಮಿಂ ಸಙ್ಗಾಮೇ, ಭೂಪಾಲಸ್ಸ ನರಾ ಬಹೂ;
ಭಿಯ್ಯೋಪಿ ದಮಿಳಾಯತ್ತಾ, ಜಾತಾ ತಂ ರಟ್ಠವಾಸಿನೋ.
ವಿಹಾಯ ಧರಣೀಪಾಲೋ, ಪುಲತ್ಥಿನಗರಂ ತದಾ;
ವಿಲ್ಲಿಕಾಬಾಣಕಂ ರಟ್ಠಂ, ಸಮ್ಪಾಪುಣಿಯ ವೇಗಸಾ.
ನಿಹಚ್ಚಾಮಚ್ಚಯುಗಲಂ, ತಂ ರಟ್ಠಾಧಿಟ್ಠಿತಂ ತದಾ;
ತಹಿಂ ವಾಸಮಕಪ್ಪೇಸಿ, ಸಭಟೇ ಸನ್ನಿಪಾತಯಂ.
ಅತ್ತಾನಮನುಬನ್ಧನ್ತಂ, ಸುತ್ವಾ ಚೋಳಚಮೂಪತಿಂ;
ಗನ್ತ್ವಾ ವಾತಗಿರಿಂ ನಾಮ, ಸಮಯಞ್ಞೂ ಸಿಲುಚ್ಚಯಂ.
ಉಪಚ್ಚಕಾಯ ಸೇಲಸ್ಸ, ತತ್ಥ ದುಗ್ಗಂ ನಿವೇಸಿಯ;
ರಣಂ ಕರೋನ್ತೋ ತೇಮಾಸಂ, ದಮಿಳೇ ಪಟಿಬಾಹಯಿ.
ಕೇಸಧಾತುಕನಾಥಸ್ಸ, ಮಾರಿತಸ್ಸ ಪುರಾರಣೇ;
ಭಾತಾ ಕಣಿಟ್ಠೋ ಸಮ್ಪತ್ತ, ಮಹಾಪಕ್ಖಬಲೋ ತದಾ.
ಮಾರಣಂ ಸಕಭಾತುಸ್ಸ, ಸರನ್ತೋ ರುಟ್ಠಮಾನಸೋ;
ಸಕಲಂ ಪರಿವತ್ತೇಸಿ, ಗುತ್ತಹಾಲಕಮಣ್ಡಲಂ.
ಅಥೋ ಲಂಕಿಸ್ಸರೋ ತತ್ಥ, ಖಿಪ್ಪಂ ಗನ್ತ್ವಾ ಮಹಬ್ಬಲೋ;
ಠಾನೇ ಮಚ್ಚುತ್ಥಲೇ ನಾಮ, ಖನ್ಧಾವಾರಂ ನಿಬನ್ಧಿಯ.
ಖದಿರಙ್ಗಣಿದುಗ್ಗಮ್ಹಾ, ಪಲಾಪೇತ್ವಾನ ತಂ ರಣೇ;
ಠಾನಾ ಕುಬುಲಗಲ್ಲಾ ಚ, ಯುಜ್ಝನ್ತೋ ತಂ ಪಲಾಪಯಿ.
ವಿಹಾಯ ಪುತ್ತದಾರಾದಿ-ಸಬ್ಬಂ ನೇಕಧನಂ ಬಲಂ;
ಪಲಾಯಮಾನೋ ಸೋ ರಟ್ಠಂ, ಚೋಳಾಯತ್ತ ಮಗಾಲಹುಂ.
ತದಾ ನರಿಸ್ಸರೋ ತತ, ತಸ್ಸ ಸಬ್ಬಂ ಸಮಾದಿಯ;
ಗನ್ತ್ವಾ ತಮ್ಬಲಗಾಮಮ್ಹಿ, ನವಂ ದುಗ್ಗಂ ನಿವೇಸಿಯ.
ಅನುಕ್ಕಮೇನ ಗನ್ತ್ವಾನ, ಮಹಾನಾಗಹುಲವ್ಹಯೇ;
ಪುರೇವಸೀ ಸುಸಜ್ಜೇನ್ತೋ, ಬಲಂ ಚೋಳೇಹಿ ಯುಜ್ಝಿತುಂ.
ತತೋ ರಾಜಾ ಸಮವ್ಹಾಯ, ಸಚೀವೇ ದ್ವೇ ಮಹಬ್ಬಲೇ;
ಪೇಸೇಸಿ ದಿಕ್ಖಿಣಂ ಪಸ್ಸಂ, ವಸಂ ನೇತುಂ ತಹಿಂ ಜನೇ.
ಸಮ್ಪೇಸೇಸಿ ಮಹಾಮಚ್ಚ-ಯುಗಲಂ ಕಕ್ಖಲಂ ವಿಭೂ;
ಚೋಳದಪ್ಪವಿನಾಸಾಯ, ತತೋ ವೇಲಾ ಮಹಾಪಥೇ.
ಪೇಸಿತಾ ದಕ್ಖಿಣಂ ಪಸ್ಸಂ, ಅಮಚ್ಚಾ’ಮೇ ಮಹಬ್ಬಲಾ;
ಮುಹುನ್ನರುಗ್ಗಮದುಗ್ಗಂ, ಬದಳತ್ಥಲಮೇವ ಚ.
ವಾಪೀನಗರದುಗ್ಗಞ್ಚ ¶ , ಬುದ್ಧಗಾಮಕಮೇವ ಚ;
ತಿಲಗುಲ್ಲಂ ಮಹಾಗಲ್ಲಂ, ಮಣ್ಡಗಲ್ಲಕಮೇವ ಚ.
ಅನುರಾಧಪುರಞ್ಚಾತಿ, ಗಹೇತ್ವಾನ ಕಮೇನ ತೇ;
ವತ್ತೇನ್ತಾ ಸವಸೇ ರಟ್ಠಂ, ಮಹಾತಿತ್ಥಮುಪಾಗತಾ.
ಪೇಸಿತಾ ಸಚಿವಾದ್ವೇತು, ತತೋ ವೇಲಾ ಮಹಾಪಥೇ;
ವಿಲುಮ್ಪನ್ತಾ ಛಗಾಮಾದಿ-ಖನ್ಧಾವಾರೇ ತಹಿಂ ತಹಿಂ.
ಪುಲತ್ಥಿನಗರಾಸನ್ನಂ, ಕಮೇನಾ’ಗಮ್ಮ ಪೇಸಯುಂ;
ದೂತೇ ರಾಜನ್ತಿಕಖಿಪ್ಪ-ಮಾಗನ್ತುಂ ವಟ್ಟತೀತಿಹ.
ದಿಸಾಸಾ ದ್ವೀಸು ಯಾನೇಹಿ, ಸಚಿವೇಹಿ ಪವತ್ತಿತಂ;
ವಿಕ್ಕಮಾತಿ ಸಯಂ ಸುತ್ವಾ, ಕಾಲಞ್ಞೂ ಸೋ ಮಹೀಪಹಿ.
ಸೀಘಂ ಸನ್ನಯ್ಹ ಸೇನಙ್ಗಂ, ಸಮಗ್ಗಂ ವಿದಿಕೋವಿದೋ;
ಉಮ್ಮೂಲನಾಯಚೋಳಾನಂ, ಪುರಾತಮ್ಹಾ’ಭಿನಿಕ್ಖಮಿ.
ಗಚ್ಛಂ ಗಙ್ಗಾಯ ಮಹಿಯ-ಙ್ಗಣಥೂಪನ್ತಿಕೇ ವಿಭೂ;
ಸೇನಾನಿವೇಸಂ ಕಾರೇತ್ವಾ ಕಞ್ಚಿಕಾಲಂ ತಹಿಂ ವಸೀ.
ಕಮೇನಾಗಮ್ಮ ಠಾನಞ್ಞೂ, ಪುಳತ್ಥಿನಗರನ್ತಿಕೇ;
ಬನ್ಧಾಪೇಸಿ ಮಹಾವೀರೋ, ಖನ್ಧಾವಾರಂ ಥಿರಂ ವರಂ.
ತತ್ಥ ತತ್ಥ ಠಿತಾ ಸೂರಾ, ಚೋಳಾ ಯೇ ಕಕ್ಖಲಾ’ಖಿಲಾ;
ಪುಲತ್ಥಿನಗರೇ ಯುದ್ಧಂ, ಕಾತುಂ ಸನ್ನಿಪತಿಂಸು ತೇ.
ನಿಕ್ಖಮ್ಮ ನಗರಾ ಗನ್ತ್ವಾ, ಚೋಳಾ ಬಹಿ ಮಹಾರಣಂ;
ಕತ್ವಾ ಪರಾಜಿತಾ ಭೀತಾ, ಪವಿಸ್ಸ ನಗರಂ ಸಕಂ.
ಗುತ್ತಾ ಸೇಸಪುರದ್ವಾರಾ, ಗೋಪುರಟ್ಟಾಲನಿಸ್ಸಿತಾ;
ಮಹಾಹವಂ ಬಹುಸ್ಸಾಹಾ, ಪವತ್ತೇಸುಂ ಭಯಾವಹಂ.
ದಿಯಡ್ಢಮಾಸಂ ಯುಜ್ಝನ್ತಿ, ನಗರಂ ತಮುಪರುನ್ಧಿಯ;
ಸಾಧೇತುಂ ನೇವಸಾ’ಸಕ್ಖಿ, ಭೂಪಾಲಸ್ಸ ಮಹಾಚಮೂ.
ಮಹಾರಞ್ಞೋ ಮಹಾವೀರಾ, ಮಹಾಸೂರಾ ಮಹಬ್ಬಲಾ;
ಮಹಾಭಟಾ ಮಹಾಮಾನಾ, ರವಿದೇವಚಲಾದಯೋ.
ಉಲ್ಲಙ್ಘಿತ್ವಾನ ಪಾಕಾರಂ, ಪವಿಸ್ಸ ಸಹಸಾ ಪುರಂ;
ಖಣೇನ ದಮಿಳೇ ಸಬ್ಬೇ, ಮೂಲಘಚ್ಚಮಘಾತಯುಂ.
ಏವಂ ಲದ್ಧಜಯೋ ರಾಜಾ, ತದಾ ವಿಜಯಬಾಹುಸೋ;
ಚರಾಪೇಸಿ ನಿಜಾಣಾಯ, ಭೇರಿಂ ಭೂರಿಮತಿಪುರೇ.
ತಂ ¶ ಸುತ್ವಾ ಸಕಸೇನಾಯ, ವಿನಾಸಂ ಚೋಳಭೂಪತಿ;
ಸೀಹಳಾ ಬಲವನ್ತೋತಿ, ಭಿಯ್ಯೋ ಸೇನಂ ನ ಪಾಹಿಣಿ.
ವೀರೋ ಅಸೇಸನಿಹತುದ್ಧಟ ಚೋಳಸೇಟ್ಠೋ;
ವಿಞ್ಞೂ ಸುಸಾಧುಟ್ಠಪಿತಾಖಿಲರಾಜರಟ್ಠೋ;
ಇಟ್ಠನ್ನುರಾಧಪುರಸೇಟ್ಠಮತೀವ ಹಟ್ಠೋ;
ವಸ್ಸಮ್ಹಿ ಪಞ್ಚದಸಮೇ ಗಮಿ ರಾಜಸೇಟ್ಠೋ.
ಸುಜನಪ್ಪಸಾದಸಂವೇಗತ್ಥಾಯ ಕತೇ ಮಹಾವಂಸೇ
ಅನುರಾಧಪುರಾಭಿಗಮನೋ ನಾಮ
ಛಪ್ಪಞ್ಞಾಸತಿಮೋ ಪರಿಚ್ಛೇದೋ
ಸತ್ತಪಞ್ಞಾಸತಿಮ ಪರಿಚ್ಛೇದ
ಸಂಗಹಕರಣೋನಾಮ
ಲಙ್ಕಾರಕ್ಖಾಯ ಸಚಿವೇ, ಬಲಿನೋ ಯೋಧಸಮ್ಮತೇ;
ಪಟಿಪಾಟಿಂ ಸಮುದ್ದಿಸ್ಸ, ಸಮನ್ತಾ ಸನ್ನಿಯೋಜಯಿ.
ಅಭಿಸೇಕಮಙ್ಗಲತ್ಥಾಯ, ಪಾಸಾದಾದಿಮನೇಕತಂ;
ಕಿಚ್ಚಂ ಸಮ್ಪಾದನೀಯನ್ತಿ, ಸಚಿವಂ ಸನ್ನಿಯೋಜಿಯ.
ವನ್ದನೀಯೇ’ಭಿವನ್ದನ್ತೋ, ಪದೇಸೇನೇಕಕೇತಹಿಂ;
ನೇತ್ವಾ ಮಾಸತ್ತಯಂ ಗಞ್ಛಿ, ಪುಲತ್ಥಿನಗರಂ ಪುನ.
ವಿಸ್ಸುತೋ ಆದಿಮಲಯ-ನಾಮೇನ ಬಲನಾಯಕೋ;
ಉಜುಪಚ್ಚತ್ಥಿಕೋ ಹುತ್ವಾ, ಮಹೀಪಾಲಸ್ಸ ಸಬ್ಬಸೋ.
ಗಙ್ಗಾ ಮತ್ಥಯು’ಪಾಗಞ್ಛಿ, ಬಲಂ ಸಬ್ಬಂ ಸಮಾದಿಯ;
ಅನ್ದೂತಿ ವಿಸ್ಸುತಂ ಮನ್ದ-ಪಞ್ಞೋ ಗಾಮಂ ಪುರನ್ತಿಕೇ.
ಲಂಕಿಸ್ಸರೋ ತಹಿಂ ಗನ್ತ್ವಾ, ಉದ್ಧರಿತ್ವಾ ತಮುದ್ಧತಂ;
ಪುಲತ್ಥಿನಗರಂ ಗಞ್ಛಿ, ವಸೇ ವತ್ತಿಯ ತಂ ಬಲಂ.
ಯುವರಾಜಪದಂಯೇವ, ಸಿತೋ ಸನ್ತೋ ಲಿಖಾಪಯಿ;
ಸೋ ಸತ್ತರಸವಸ್ಸಾನಿ, ಸಪ್ಪಞ್ಞೋ ನರಸತ್ತಮೋ.
ತತೋ’ನುರಾಧನಗರ-ಮಭಿಗಮ್ಮ ¶ ಯಥಾವಿಧಿಂ;
ಅನುಭೋತ್ವಾ ವಿಧಾನಞ್ಞೂ, ಅಭಿಸೇಕಮಹುಸ್ಸವಂ.
ಅಟ್ಠಿತೋ ಪಾಪಧಮ್ಮೇಸು, ಸುಟ್ಠಿತೋ ಸೇಟ್ಠಕಮ್ಮನಿ;
ಸೋ ಅಟ್ಠಾರಸಮಂ ವಸ್ಸಂ, ಲಿಖಾಪಯಿ ಸುಸಣ್ಠಿತೋ.
ತತೋ ಆಗಮ್ಮ ನಿವಸಿ, ಪುಲತ್ಥಿನಗರೇ ವರೇ;
ಸೋ ಸಿರೀಸಙ್ಘಬೋಧೀ’ತಿ, ನಾಮಧೇಯ್ಯೇನ ವಿಸ್ಸುತೋ.
ಅನುಜಂ ಸೋ ವೀರಬಾಹು-ಮೋಪರಜ್ಜೇ ನಿವೇಸಿಯ;
ದತ್ವಾನ ದಕ್ಖಿಣಂ ದೇಸಂ, ತಂ ಸಙ್ಗಣ್ಹಿ ಯಥಾವಿಧಿಂ.
ಕಣಿಟ್ಠಸ್ಸಾಥ ಭಾತುಸ್ಸ, ಜಯಬಾಹುಸ್ಸ ಭೂಭುಜೋ;
ಆದಿಪಾದಪದಂ ದತ್ವಾ, ರಟ್ಠಂ ಚಾ’ದಾಸಿ ರೋಹಣಂ.
ಠಾನನ್ತರಾನಿ ಸಬ್ಬೇಸ-ಮಮಚ್ಚಾನಂ ಯಥಾರಹಂ;
ದತ್ವಾ ರಜ್ಜೇ ಯಥಾಞಾಯಂ, ಕರಂ ಯೋಜೇಸಿ ಗಣ್ಹಿತುಂ.
ಚಿರಸ್ಸಂ ಪರಿಹೀನಂ ಸೋ, ದಯಾವಾಸೋ ಮಹೀಪತಿ;
ಪವತ್ತೇಸಿ ಯಥಾಧಮ್ಮಂ, ಠಿತಧಮ್ಮೋ ವಿನಿಚ್ಛಯಂ.
ಏವಂ ಸಮುದ್ಧಟಾನೇಕ, ರಿಪುಕಣ್ಟಕಸಞ್ಚಯೇ;
ನಿಚ್ಚಂ ರಜ್ಜಂ ಪಸಾಸೇನ್ತೇ, ಲಙ್ಕಂಸಮ್ಮಾನರಿಸ್ಸರೇ.
ಛತ್ತಗ್ಗಾಹಕನಾಥೋ ಚ, ಧಮ್ಮಗೇಹಕನಾಯಕೋ;
ತಥೇವ ಸೇಟ್ಠಿನಾಥೋ ಚ, ಇಚ್ಚೇತೇ ಭಾತರೋ ತಯೋ.
ರಞ್ಞೋ ವಿರೋಧಿತಂ ಯಾತಾ, ಫಲಾತಾ ಜಮ್ಪುದೀಪಕಂ;
ಲಙ್ಕಂ ವೀಸತಿಮೇ ವಸ್ಸೇ, ಏಕೇನೂನೇ ಸಮೋತರುಂ.
ತೇ ಸಬ್ಬೇ ರೋಹಣಂ ರಟ್ಠಂ, ಸಬ್ಬಂ ಮಲಯಮಣ್ಡಲಂ;
ಸಬ್ಬಂ ದಕ್ಖಿಣಪಸ್ಸಞ್ಚ, ಸಹಸಾ ಪರಿವತ್ತಯುಂ.
ನಿಪುಣೋ ರೋಹಣಂ ಗನ್ತ್ವಾ, ತಥಾ ಮಲಯಮಣ್ಡಲಂ;
ನಿಘಾತೇನ್ತೋ ಬಹೂ ತತ್ಥ, ತತ್ಥ ಪಚ್ಚತ್ಥಿಕೇ ಜನೇ.
ಸಮ್ಮಾವುಪಸಮೇತ್ವಾ ತಂ, ಠಪೇತ್ವಾ ಸಚಿವೇ ತಹಿಂ;
ದಕ್ಖಿಣೋ ದಕ್ಖಿಣಂ ದೇಸಂ, ಸಯಂ ಗನ್ತ್ವಾ ಮಹಬ್ಬಲೋ.
ಪೇಸೇತ್ವಾ ಸಮಣೀಭಾತು-ವಂಸಜಂ ಸಚಿವಂ ತದಾ;
ಗಾಹೇತ್ವಾ ಸಮರೇಘೋರೇ, ವೀರೋ ತೇ ಸಕವೇರಿನೋ.
ಸಮಾರೋಪಿಯಸೂಲಮ್ಹಿ, ಲಙ್ಕಂ ವಿಗತಕಣ್ಟಕಂ;
ಕಾರೇತ್ವಾನ ನಿರಾತಙ್ಕಂ, ಪುಲತ್ಥಿಪುರಮಾಗಮಿ.
ವಸನ್ತೀ ¶ ಚೋಳವಿಸಯೇ, ಜಗತಿಪಾಲರಾಜಿನೀ;
ಚೋಳಹತ್ಥಾ ಪಮುಞ್ಚಿತ್ವಾ, ಸದ್ಧಿಂ ಧೀತು ಕುಮಾರಿಯಾ.
ಲೀಲಾವತ್ಯಾಭಿಧಾನಾಯ, ನಾವಾಮಾರುಯ್ಹ ವೇಗಸಾ;
ಲಂಕಾದೀಪಮ್ಹಿ ಓತಿಣ್ಣಾ, ಪಸ್ಸಿ ಲಂಕಿಸ್ಸರಂ ತದಾ.
ಸುತ್ವಾ ವಂಸಕ್ಕಮಂ ತಸ್ಸಾ, ಸೋ ಞತ್ವಾ ಸುದ್ಧವಂಸತಂ;
ಲೀಲಾವತಿಂ ಮಹಿಸಿತ್ತೇ, ಅಭಿಸಿಞ್ಚಿ ನರಿಸ್ಸರೋ.
ಸಾ ತಂ ಪಟಿಚ್ಚ ರಾಜಾನಂ, ಮಹೇಸೀ ಧೀತರಂ ಲಭಿ;
ನಾಮಂ ಯಸೋಧರಾತಿ’ಸ್ಸಾ, ಅಕಾಸಿ ಧರಣೀ ಪತಿ.
ಮೇರುಕನ್ದರರಟ್ಠೇನ, ಸದ್ಧಿಂ ರಾಜಾ ಸಧೀತರಂ;
ವೀರವಮ್ಮಸ್ಸ ಪಾದಾಸಿ, ಸಾ ಲಭಿ ಧೀತರೋ ದುವೇ.
ಸಮಾನನಾಮಿಕಾ ಜೇಟ್ಠಾ, ಸಾ ಮಾತಾ ಮಹಿಯಾ ಅಹು;
ಸುಗಲಾ ನಾಮಿಕಾ ಆಸಿ, ತಾಸು ದ್ವೀಸು ಕಣಿಟ್ಠಿಕಾ.
ಕಾಲಿಙ್ಗಧರಣೀಪಾಲ-ವಂಸಜಂ ಚಾರುದಸ್ಸನಂ;
ತಿಲೋಕಸುನ್ದರಂ ನಾಮ, ಸುಕುಮಾರಂ ಕುಮಾರಿಕಂ.
ಕಾಲಿಙ್ಗರಟ್ಠತೋ ರಾಜಾ, ಆಣಾಪೇತ್ವಾ ಚಿರಟ್ಠಿತಿಂ;
ನಿಜವಂಸಸ್ಸ ಇಚ್ಛನ್ತೋ, ಮಹೇಸಿತ್ತೇ’ಭಿ ಸೇಚಯಿ.
ಸುಭದ್ದಾ ಚ ಸುಮಿತ್ತಾ ಚ, ಲೋಕನಾಥವ್ಹಯಾಪಿ ಚ;
ರತನಾವಲೀ ರೂಪವತೀ, ಇತಿಮಾ ಪಞ್ಚ ಧೀತರೋ.
ಪುತ್ತಂ ವಿಕ್ಕಮಬಾಹುಞ್ಚ, ಸಾ ಲಭೀ ಧಞ್ಞಲಕ್ಖಣಂ;
ಸಮ್ಪತ್ತಾ ಸಾ ಪಜವುದ್ಧಿಂ, ಹರನ್ತಿ ರಾಜಿನೋ ಮತಂ.
ಇತ್ಥಾಗಾರೇಸು ಸೇಸೇಸು, ವೀತಾ ಸಮಕುಲಙ್ಗನಾ;
ಗಬ್ಭೋ ಜಾತುಮಹೀಪಾಲಂ, ತಂ ಪಟಿಚ್ಚ ನ ಸಣ್ಠಹಿ.
ಅಥೇಕದಿವಸಂ ರಾಜಾ, ಅಮಚ್ಚಗಣಮಜ್ಝಗೋ;
ಪಿಲೋಕಿಯಠಿಭಾ ಸಬ್ಬಾ, ಧೀತರೋ ಪಟಿಪಾಟಿಯಾ.
ಧೀತು ನವಮವಸೇಸಾನಂ, ಠಪೇತ್ವಾ ರತನಾವಲಿಂ;
ಧಞ್ಞಲಕ್ಖಣಸಮ್ಪನ್ನ-ಪುತ್ತಸ್ಸುಪ್ಪತ್ತಿಸುಚಕಂ.
ಲಕ್ಖಣಂ ಲಕ್ಖಣಞ್ಞೂ ಸೋ, ಅಪಸ್ಸಂ ಪೇಮಚೇಗವಾ;
ರತನಾವಲಿಮಾಹೂಯ, ತಸ್ಸಾ ಮುದ್ಧನಿ ಚುಮ್ಬಿಯ.
ತೇಜೋಗುಣೇಹಿ ¶ ಚಾಗೇಹಿ, ಧಿಯಾ ಸೂರತ್ತನೇನ ಚ;
ಭೂತೇ ಚ ಭಾವಿನೋ ಚೇವ, ಸಬ್ಬೇ ಭೂಪೇ’ತಿಸಾಯಿನೋ.
ನಿಚ್ಚಂ ಲಙ್ಕಂ ನಿರಾಸಙ್ಕ-ಮೇಕಚ್ಛತ್ತಕಮೇವ ಚ;
ಪವಿಧಾತುಂ ಸಮತ್ಥಸ್ಸ, ಸಮ್ಮಾಸಾಸನತಾಯಿನೋ.
ಸೋಭನಾನೇಕವತ್ತಸ್ಸ, ಇಮಿಸ್ಸಾ ಕುಚ್ಛಿಹೇಸ್ಸತಿ;
ಪುತ್ತಸ್ಸುಪ್ಪತ್ತಿಠಾನನ್ತಿ, ಮುದುತೋ ಸೋ ಸಮಬ್ರವಿ.
ಯಾವನ್ತಸ್ಸಾಪಿಖೋಚೋಳ-ಮಹೀಪಾಲಸ್ಸ ನೇಕಸೋ;
ಕುಲಾಭಿಮಾನೀ ರಾಜಾ ಸೋ, ಅದತ್ವಾನ ಕಣೀಯಸಿಂ.
ಆಣಾಪೇತ್ವಾ ಪಣ್ಡುರಾಜಂ, ವಿಸುದ್ಧತ್ವಯಸಮ್ಭವಂ;
ಅನುಜಂ ರಾಜಿನಿಂ ವಸ್ಸ, ಮಿತ್ತವ್ಹಯಮದಾಸಿಸೋ.
ಸಾಮಾಣಭರಣಂ ಕಿತ್ತಿ, ಸಿರೀ ಮೇಘಾಭಿಧಾನಕಂ;
ಸಿರಿವಲ್ಲಭನಾಮಞ್ಚ, ಜನೇಸಿ ತನಯೇ ತಯೋ.
ಸುಭದ್ದ ವೀರಬಾಹುಸ್ಸ, ಸುಮಿತ್ತಂ ಜಯಬಾಹುನೋ;
ಮಹತಾ ಪರಿಹಾರೇನ, ಪಾದಾಸಿ ಧರಣೀ ಪತಿ.
ಅದಾಸಿ ಮಾಣಾಭರಣೇ, ಧೀತರಂ ರತನಾವಲಿಂ;
ಲೋಕನಾಥವ್ಹಯಂ ಕಿತ್ತಿ ಸಿರಿಮೇಘಸ್ಸ’ದಾಸಿಸೋ.
ರೂಪತ್ಯಭಿಧಾನಾಯ, ಧೀತುಯೋ ಪರತಾಯಹಿ;
ಸರೀರಿವಲ್ಲಭಸಾದಾ, ಸುಗಲವ್ಹ ಕುಮಾರಿಕಂ.
ಮಧುಕಣ್ಣವಭೀಮರಾಜ, ಬಲಕ್ಕಾರ ಸನಾಮಕೇ;
ಮಹೇಸೀ ಬನ್ಧವೇರಾಜ-ಪುತ್ತೇ ಸೀಹಪುರಾಗತೇ.
ಪಸ್ಸಿತ್ವಾನ ಪಹೀಪಾಲೋ, ತದಾ ಸಞ್ಜಾತಪೀತಿಕೋ;
ತೇಸಂ ಪಾದಾಸಿ ಪಚ್ಚೇಕಂ, ವುತ್ತಿಂ ಸೋ ಅನುರೂಪಕಂ.
ತೇ ಸಬ್ಬೇ ಲದ್ಧಸಕ್ಕಾರ ಸಮ್ಮಾನಾಧರಣೀಪತಿಂ;
ಆರಾಧಯನ್ತಾ ಸಸತಂ, ನಿವಸಿಂಸು ಯಥಾರುಚಿಂ.
ಏತೇಸಂ ರಾಜಪುತ್ತಾನಂ, ಸುನ್ದರಿವ್ಹಂ ಕಣಿಟ್ಠಕಂ;
ಅದಾ ವಿಕ್ಕಮಬಾಹುಸ್ಸ, ನಿಜವಂಸಠಿತಟ್ಠಿಕೋ.
ಭಿಯ್ಯೋ ¶ ವಿಕ್ಕಮಬಾಹುಸ್ಸ, ತತೋ ಲೀಲಾವತಿಂ ಸತಿಂ;
ಸಹ ಭೋಗೇನ ಪಾದಾಸಿ, ತದಾ ಬನ್ಧು ಹಿತೇರತೋ.
ವಿಧಾಯ ಏವಂ ಸಜನೇ ಜನಿನ್ದೋ;
ನಿಸ್ಸೇಸತೋ ಭೋಗಸಮಪ್ಪಿತೋ;
ದಯಾಪರೋ ಞಾತಿಜನಾತಮತ್ಥಂ;
ಸಮಾಚರೀ ನೀತಿಪಥಾನುರೂಪಂ.
ಸುಜನಪ್ಪಸಾದಸಂವೇಗತ್ಥಾಯ ಕತೇ ಮಹಾವಂಸೇ
ಸಂಗಹಕರಣೋ ನಾಮ
ಸತ್ತಪಞ್ಞಾಸತಿಮೋ ಪರಿಚ್ಛೇದೋ
ಅಟ್ಠಪಞ್ಞಾಸತಿಮ ಪರಿಚ್ಛೇದ
ಲೋಕಸಾಸನ ಸಂಗಹಕರಣೋ
ವಿಚಿನಿತ್ವಾ ಕುಲೀನೇ ಸೋ, ಜನೇ ಸಬ್ಬೇ ಸಮಾದಿಯ;
ಸಕಾರಕ್ಖಾಯ ಯೋಜೇಸಿ, ಯಥಾಚಾರಂ ಮಹೀಪತಿ.
ಉಚ್ಚಂ ಪುಲತ್ಥಿನಗರೇ, ಪಾಕಾರಂ ಕಾರಯೀ ಥಿರಂ;
ನೇಕಗೋಪುರಸಂಯುತ್ತಂ, ಯುಧಾಕಮ್ಮಸುರಞ್ಜಿತಂ.
ಸಮನ್ತಾಯತವಿತ್ಥಿಣ್ಣ-ಗಮ್ಭೀರಪರಿಖಾಯುತಂ;
ಉಚ್ಚಪತ್ಥಣ್ಡಿಲೋಪೇತಂ, ದುಪ್ಪಧಂಸಮರಾತಿಹಿ.
ಉಪಸಮ್ಪದಕಮ್ಮಸ್ಸ, ಗಣಪೂರಕಭಿಕ್ಖೂನಂ;
ಅಪ್ಪಹೋನೇಕಭಾವೇನ, ಸಾಸನಠಿತಿಮಾನಸೋ.
ಅನುರುದ್ಧನರಿನ್ದಸ್ಸ, ಸಹಾಯಸ್ಸಾಥ ಸನ್ತಿಕಂ;
ರಾಮಞ್ಞವಿಸಯಂ ದೂತೇ, ಪೇಸೇತ್ವಾ ಸಹಪಾಭತೇ.
ತತೋ ಆಣಾಪಯಿತ್ವಾನ, ಪಿಟಕತ್ತಯಪಾರಗೇ;
ಸೋ ಸೀಲಾದಿಗುಣಾವಾಸೇ, ಭಿಕ್ಖವೋ ಥೇರಸಮ್ಮತೇ.
ತೇ ಉಳಾರಾಹಿ ಪೂಜಾಹಿ, ಪೂಜಯಿತ್ವಾ ನರಿಸ್ಸರೋ;
ಪಬ್ಬಜ್ಜಾ ಉಪಸಮ್ಪತ್ತಿ, ಕಾರಯಿತ್ವಾ ಅನೇಕಸೋ.
ಪಿಟಕತ್ತಯಞ್ಚ ಬಹುಸೋ, ಕಥಾಪೇತ್ವಾ ಸವಣ್ಣನಂ;
ಲಙ್ಕಾಯೋ’ಸಕ್ಕಮಾನಂ ಸೋ, ಜೋತಯೀ ಜಿನಸಾಸನಂ.
ಪುತತ್ಥಿನಗರಸ್ಸನ್ತೋ ¶ , ಪದೇಸಸ್ಮಿಂ ತಹಿಂ ತಹಿಂ;
ವಿಹಾರೇ ಕಾರಯಿತ್ವಾನ, ಬಹುಕೇ ಸುಮನೋಹರೇ.
ಭಿಕ್ಖವೋ ತತ್ಥ ವಾಸೇತ್ವಾ, ನಿಕಾಯತ್ತಯವಾಸಿನೋ;
ಪಚ್ಚಯೇಹಿ ಉಳಾರೇಹಿ, ಸನ್ತಪ್ಪೇಸಿ ಚತೂಹಿಪಿ.
ಫಲಿಕತ್ಥಮ್ಭಕಚಾರು-ಪಾಕಾರಪರಿಖಾಯುತಂ;
ಪಞ್ಚಭೂಮಕಪಾಸಾದ-ಪವರೇ ನೋ’ಪಸೋಭಿತಂ.
ಸಮಸನ್ತಾ ವಾಸಪನ್ತೀಹಿ, ಸುಭಾಹಿ ಸುವಿರಾಜಿತಂ;
ನಿರಕಿಣ್ಣಮಸಮ್ಬಾಧ ವರಭಾಸುರ ಗೋಪುರಂ.
ವಿಹಾರಂ ಕಾರಯಿತ್ವಾನ, ವತ್ಥುತ್ತಯಪರಾಯನೋ;
ನಿಕಾಯತ್ತಯವಾಸಿಸ್ಸ, ಭಿಕ್ಖುಸಙ್ಘಸ್ಸ’ದಾಸಿಸೋ.
ಸಙ್ಘಸ್ಸ ಪಾಕವಟ್ಟತ್ಥಂ, ರಟ್ಠಂ ದತ್ವಾ’ಳಿಸಾರಕಂ;
ಸಕಲಂ ಸನ್ನಿವಾಸೀಹಿ, ನೇತ್ತಿಕೇಹಿ ಸಹೇವ ಸೋ.
ನೇಕಸತಾನಿಭಿಕ್ಖೂನಂ, ವಾಸಯಿತ್ವಾನ ತತ್ಥ ಸೋ;
ಸತತಂ ಸಮ್ಪವತ್ತೇಸಿ, ಉಳಾರಂ ಚತುಪಚ್ಚಯಂ.
ದಾಟ್ಠಾಧಾತುಘರಂಚಾರು, ಕಾರಯಿತ್ವಾ ಮಹಾರಹಂ;
ದಾಠಾಧಾತುಸ್ಸ ನಿಚ್ಚಂ ಸೋ, ಮಹಾಮಹಮಕಾರಯಿ.
ಗಣಸಙ್ಗಣಿಕಾ’ಪೇತೋ, ಪೋತ್ಥಕಂ ಧಮ್ಮಸಙ್ಗಣಿಂ;
ಪರಿವತ್ತೇಸಿ ಸೋಪಾತೋ, ಸುನ್ದರೇ ಧಮ್ಮಮನ್ದಿರೇ.
ನಚ್ಚಾದಿಗನ್ಧಮಾಲಾದಿ-ನೇಕಪೂಜಮ್ಪವತ್ತಿಯ;
ಸೀರೇನ ಸದ್ಧಾಸಮ್ಬನ್ಧೋ, ಸಮ್ಬುದ್ಧಮಭಿವನ್ದತಿ.
ಜಮ್ಬುದೀಪಾಗತೇ ಚಾಗ, ಸೂರೋ ಸೋ ಭುವಿರಿಸೂರಯೋ;
ತಪ್ಪೇಸಿ ಧನದಾನೇನ, ದಾನಿಯೇನೇಕ ಸೋ ವಿಭೂ.
ಸದ್ಧಮ್ಮಕಥಿಕಾನಂ ಸೋ, ಪೂಜಾ ಕತ್ವಾನ ನೇಕಸೋ;
ದೇಸಾಪೇಸಿಚ ಸದ್ಧಮ್ಮಂ, ಸದಾಧಮ್ಮಗುಣೇ ರತೋ.
ತಿಕ್ಖತ್ತುಂ ಸೋ ತುಲಾಭಾರ-ದಾನಂ ದಿನೇಸು ದಾಪಯಿ;
ಉಪೋಸಥಂ ವೋಪವಸಿ, ಸುವಿಸುದ್ಧಮುಪೋಸಥೇ.
ಅದಾ ದಣ್ಡಿಸ್ಸರಂ ದಾನ-ಮನುಸಂವಚ್ಛರಂ ವಿಭೂ;
ಪಿಟಕತ್ತಯಂ ಲಿಖಾಪೇತ್ವಾ, ಭಿಕ್ಖುಸಙ್ಘಸ್ಸ ದಾಪಯಿ.
ಮಹಗ್ಘಮಣಿಮುತ್ತಾದಿ-ರತನಾನಿ ¶ ಸಪೇಸಿಯ;
ಜಮ್ಬುದೀಪೇ ಮಹಾಬೋಧಿಂ-ನೇಕಕ್ಖತ್ತುಮ ಪೂಜಯಿ.
ಕಣ್ಣಾಟಭೂಮಿಪಾಲೇನ, ಚೋಳರಞ್ಞಾ ಚ ಪೇಸಿತಾ;
ದೂತಾಮಹನ್ತಮಾದಾಯ, ಪಣ್ಣಾಕಾರಮಿಧಾಗತಾ.
ಅದ್ದಸಂಸು ಮಹೀಪಾಲಂ, ತತೋ ಸೋ ತುಟ್ಠಮಾನಸೋ;
ತೇಸಂ ಉಭಿನ್ನಂ ದೂತಾನಂ, ಕತ್ತಬ್ಬಂ ಸಾಧುಕಾರಿಯ.
ತೇಸು ಆದೋ’ವ ಕಣ್ಣಾಟ-ದೂತೇಹಿ ಸಹ ಪೇಸಿಯ;
ದೂತೇ ಸಕೀಯೇ ಕಣ್ಣಾಟ-ನಿಕಟಂ ಸಾರಪಾಭತೇ.
ಅತ್ತನೋ ವಿಸಯಂ ಪತ್ತೇ, ಚೋಳೋ ಸೀಹಳ ದೂತಕೇ;
ಸಹಸಾ ಕಣ್ಣನಾಸಾಸು, ಪಾಪಯಿಂಸು ವಿರೂಪತಂ.
ಸಮ್ಪತ್ತವಿಪ್ಪಕಾರಾಕೇ, ಇಧಾಗನ್ತ್ವಾನ ರಾಜಿನೋ;
ಕಥಯಿಂಸು ತದಾ ಸಬ್ಬಂ, ಚೋಳೇನ ಕತಮತ್ತನಿ.
ಉದ್ದಿಪಿತಾಭಿಮಾನೋ ಸೋ, ಸಕಲಾಮಚ್ಚಮಜ್ಝಗೋ;
ಅವ್ಹಾಯ ದಮಿಳೇ ದೂತೇ, ಇತಿ ಚೋಳಸ್ಸ ಸನ್ದಿಸಿ.
ಸೇನಂ ವಿನಾ’ವ ಏಕಸ್ಮಿಂ, ದೀಪೇ ಮಜ್ಝೇ ಮಹಣ್ಣವೇ;
ಬಾಹಾಬಲಪರಿಕ್ಖಾವಾ, ಹೋತುನೋ ದ್ವನ್ದಯುದ್ಧತೋ.
ಬಲಂ ಸನ್ನಯ್ಹ ಸಕಲಂ, ರಜ್ಜೇ ತುಯ್ಹಂ ಮಮಾ’ಥ ವಾ;
ತವಾ’ಭಿಮತ ದೋಸಮ್ಹಿ, ಸಙ್ಗಾಮೋ ವಾ ಕರೀಯತಂ.
ಮಯಾ ವುತ್ತಕ್ಕಮೇನೇವ, ವತ್ತಬ್ಬೋ ವೋ ಜನಾಧಿಪೋ;
ಇತಿ ವತ್ವಾನ ತೇ ದೂತೇ, ಇತ್ಥಲಙ್ಕಾರ ಮಣ್ಡಿತೇ.
ವಿಸ್ಸಜ್ಜಿಯ ಲಹುಂಚೋಳ-ಮಹೀಪಾಲಸ್ಸ ಸನ್ತಿಕಂ;
ತತೋ ಸೇನಙ್ಗಮಾದಾಯ, ಅನುರಾಧ ಪುರಂ ಗಮಿ.
ಮತ್ತಿಕಾವಾಟತಿತ್ಥೇ ಚ, ಮಹಾತಿತ್ಥೇ ಚ ಪೇಸಯೀ;
ಚೋಳರಟ್ಠಂ’ವ ಗನ್ತ್ವಾನ, ಯುಜ್ಝಿತುಂ ದ್ವೇ ಚಮೂಪತಿ.
ಸಜ್ಜನ್ತೇಸು ಚಮೂಪೇಸು, ನಾವಾಪಾಥೇಯ್ಯಕಾನಿ ಚ;
ಯುದ್ಧತ್ಥಾಯ ಬಲಂ ಚೋಳ-ರಟ್ಠಪೇಸನಕಾರಣಾ.
ತದಾ ತಿಂಸತಿಮೇ ವಸ್ಸೇ, ವೇಳಕ್ಕಾರಸನಾಮಕಾ;
ಬಲಕಾಯಾ ತಹಿಂಗನ್ತು-ಮನಿಚ್ಛನ್ತಾ ವಿರೋಧಿನೋ.
ಮಾರೇತ್ವಾನ ಉಭೋ ಸೇನಾ-ನಾಥೇ ಮತ್ತಗಜಾವಿಯ;
ಸಮನ್ತತೋ ವಿಲುಮ್ಪಿಂಸು, ಪುಲತ್ಥಿಪುರಮುದ್ಧತಾ.
ಪುತ್ತೇಹಿ ¶ ತೀಹಿ ಸಹಿತಂ, ರಾಜಿನೋ ಚ ಕಣೀಯಸಿಂ;
ಗಣಿತ್ವಾ ಸಹಸಾ ರಾಜ-ಪಾಸಾದಂ ಚಾಪಿ ಝಾಪಯುಂ.
ರಾಜಾ ನಿಕ್ಖಮ್ಮ ಖಿಪ್ಪಂ ಸೋ, ಗನ್ತ್ವಾ ದಕ್ಖಿಣಪಸ್ಸಕಂ;
ಸೇಲೇ ವಾತಗಿರಿವ್ಹಸ್ಮಿಂ, ಸಾರಂ ಭಣ್ಡಂ ಠಪಾಪಿಯ.
ವೀರಬಾಹುಪರಾಜೇನ, ಸೀಹವಿಕ್ಕಮಸಾಲಿನಾ;
ಮಹತಾ ಚ ಬಲೋಘೇನ, ಸಮನ್ತಾ ಪರಿವಾರಿತೋ.
ಪುಲತ್ಥಿಪುರಮಾಗಮ್ಮ, ವತ್ತೇನ್ತೋ ದಾರುಣಂ ರಣಂ;
ಪಲಾಪೇಸಿ ಖಣೇನೇವ, ಬಲಕಾಯೇ ಸಮಾಗತೇ.
ಮಾರಿತಾನ ಚಮೂಪಾನ-ಮಟ್ಠಿಸಙ್ಘಾಟಧಿಟ್ಠಿತಂ;
ಪರಿಕ್ಖಿಪಿತ್ವಾ ಚಿತಕಂ, ವೇರಿಭೂತೇ ಬಲಾಧಿಪೇ.
ಬನ್ಧಯಿತ್ವಾನ ಖಾಣುಮ್ಹಿ, ಪಚ್ಛಾ ಬಾಹಂ ಸುಬನ್ಧನಂ;
ಪರಿತೋ ವಿಪ್ಫುರನ್ತೀಹಿ, ಅಗ್ಗಿಜಾಲಾಹಿ ಝಾಪಯಿ.
ಘಾತೇತ್ವಾ ತತ್ಥ ಮಾನೀತಂ, ಗಾಮಾನಿ ಧರಣೀಪತಿ;
ಅಕಾಸಿ ಲಙ್ಕಾವಸುಧಂ, ಸಬ್ಬಥಾ ವೀತಕಣ್ಟಕಂ.
ಯುಜ್ಝಿತುಂ ಸಹ ಚೋಳೇನ, ರಾಜಾ ಅತ್ತಕತಾವಧಿಂ;
ಅನತಿಕ್ಕಮ್ಮ ಸೋ ಪಞ್ಚ-ಚತ್ತಾಲೀಸಮ್ಹಿ ವಚ್ಛರೇ.
ಸನ್ನದ್ಧಂ ಬಲಮಾದಾಯ, ಗನ್ತ್ವಾ ಸಾಗರಪಟ್ಟನಂ;
ತಸ್ಸಾಭಿಗಮನಂ ಪಸ್ಸಂ, ಕಞ್ಚಿಕಾಲಂ ತಹಿಂ ವಸಂ.
ಅನಾಗತತ್ತಾ ಚೋಳಸ್ಸ, ತಸ್ಸ ದೂತೇ ವಿಸ್ಸಜ್ಜಿಯ;
ಪುನಾಗನ್ತ್ವಾ ವಸೀರಾಜಾ, ಪುಲತ್ಥಿನಗರೇ ಚಿರಂ.
ಮಹಾಹೇಳಿ ಸರೇಹರು, ಮಹಾದತ್ತಿಕನಾಮಿಕಾ;
ಕಟುನ್ನರೂಪಣ್ಡವಾಪೀ, ಕಲ್ಲಗಲ್ಲಿಕ ನಾಮಿಕಾ.
ಏರಣ್ಡೇಗಲ್ಲವಾಪೀ ಚ, ದೀಘವತ್ಥುಕವಾಪಿಕಾ;
ಮಣ್ಡವಾಟಕವಾಪೀ, ಚ, ಕಿತ್ತಗ್ಗಬೋಧಿಪಬ್ಬತಾ.
ವಲಾಹಸ್ಸ ಮಹಾದಾರು, ಗಲ್ಲಕುಮ್ಭೀಲಸೋಬ್ಭಕಾ;
ಪತ್ತಪಾಸಾಣವಾಪೀ ಚ, ವಾಪೀ ಚ ಕಾಣನಾಮಿಕಾ.
ಏತಾ ಚಞ್ಞಾ ಚ ಸೋ ಛಿನ್ನ-ಮರಿಯಾದಾ ವಾಪಿಯೋ ಬಹೂ;
ಬನ್ಧಾಪೇಸಿ ಸದಾದೀನ-ಸತ್ತೇ ಬದ್ಧ ಹಿತಾಸಯೋ.
ಭೂಮಿನ್ದೋ ¶ ಕನ್ದರಾ-ಗಙ್ಗಾ-ನದೀಸು ಚ ತಹಿಂ ತಹಿಂ;
ಸುಭಿಕ್ಖಂ ಕಾರಯೀ ರಟ್ಠಂ, ಬನ್ಧೇತ್ವಾ’ವರಣಾನಿ ಸೋ.
ವಿಹಾರಾ’ಭಯಚಾರಿತ್ತ-ಭೇದಿನಿಂ ಮಹಿಸಂಸಕ;
ಪರಿಹಾರೇ ಸಬ್ಬಸೋಚ್ಛಿಜ್ಜ-ಗಾಹಯಿತ್ವಾ ಗಲಮ್ಹಿ ತಂ.
ಪುರಮ್ಭಾ ಬಹಿ ಕಾರೇತ್ವಾ, ಮಹಾಸಙ್ಘಂ ಖಮಾಪಿಯ;
ಪಕಾಸೇಸಿ ಚ ಲೋಕಸ್ಸ, ಸಙ್ಘಗಾರವಮತ್ತನೋ.
ಮಹಾಗಾಮೇ ನಿಕಾಯಾನಂ, ತಿತಯೇ ಚೋಳನಾಸಿತೇ;
ಧಾತುಗಬ್ಭೇ ಚ ಬನ್ಧೇಸಿ, ಥೂಪಾರಾಮದ್ವಯೇ’ಪಿ ಚ.
ಮಾತುಯಾ’ಳಾಹಣಠಾನೇ, ತಥೇವ ಪಿತುನೋಪಿ ಚ;
ಅಕಾ ಪಞ್ಚ ಮಹಾವಾಸೇ, ತಥಾ ಬುದಲವಿಟ್ಠಿಯಂ.
ಪಣ್ಡವಾಪೀ ಚ ಪಾಠೀನೋ, ರಕ್ಖಚೇತಿಯಪಬ್ಬತೋ;
ತಥೇವ ಮಣ್ಡಲಗಿರಿ-ಮಧುತ್ಥಲವಿಹಾರಕೋ.
ಉರುವೇಲವ್ಹಯೋ ದೇವ-ನಗರೇ ಚ ವಿಹಾರಕೋ;
ಮಹಿಯಙ್ಗಣವಿಹಾರೋ ಚ, ಸೀತಲಗ್ಗಾಮಲೇಣಕಂ.
ಜಮ್ಬುಕೋಲವಿಹಾರೋ ಚ, ತಥೇವ ಗಿರಿಕಣ್ಡಕೋ;
ಕುರುನ್ದಿಯವಿಹಾರೋ ಚ, ಜಮ್ಬುಕೋಲಕಲೇಣಕಂ.
ಭಲ್ಲಾತಕವಿಹಾರೋ ಚ, ತಥೇವ ಪರಗಾಮಕೋ;
ಕಾಸಗಲ್ಲವ್ಹಯೋ ಚನ್ದ-ಗಿರಿವ್ಹಯ ವಿಹಾರಕೋ.
ವೇಲಗಾಮವಿಹಾರೋ ಚ, ಮಹಾಸೇನವ್ಹಗಾಮಕೋ;
ವಿಹಾರೋ ಚಾ’ನುರಾಧಮ್ಹಿ, ಪುರೇ ಬೋಧಿಘರಂ ತಥಾ.
ಇಚ್ಚೇವಮಾದಯೋನೇಕೇ, ವಿಹಾರೇ ಚ ಬಹೂ ವಿಭೂ;
ಪಟಿಸಙ್ಖರಿಜಿಣ್ಣೇ ಸೋ, ಗಾಮೇ ಚಾ’ದಾ ವಿಸುಂ ವಿಸುಂ.
ಸಮನ್ತಕೂಟ ಸೇಲತ್ಥಂ, ಮುನಿನ್ದಪದಲಞ್ಜನಂ;
ಪಣಮತ್ಥಾಯ ಗಚ್ಛನ್ತಾ, ಮನುಸ್ಸಾ ದುಗ್ಗಮಞ್ಜಸೇ.
ಸಬ್ಬೇ ಮಾ ಕಿಲಮನ್ತೂ’ತಿ, ದಾನವಟ್ಟಾಯ ದಾಪಯಿ;
ಸಾಲಿಕ್ಖೇತ್ತಾದಿಸಮ್ಪನ್ನಂ, ಗಿಲೀಮಲಯನಾಮಕಂ.
ಕದಲೀಗಾಮಮಗ್ಗೇ ಚ, ಹೂವರಳಞ್ಜಸೇ ತಥಾ;
ಗಾಮೇ ದತ್ವಾನ ಪಚ್ಚೇಕಂ, ಸಾಲಾಯೋ ಚಾಪಿ ಕಾರಯಿ.
ಅನಾಗತೇ ತಂ ಭೂಪಾಲಾ, ಮಾ ಗಣ್ಹನ್ತೂ’ತಿ ಲೇಖಿಯ;
ಅಕ್ಖರಾನಿ ಸಿಲಾಥಮ್ಭೇ, ಪತಿಟ್ಠಾಪೇಸಿ ಭೂಮಿಪೋ.
ಗಾಮಂ ¶ ಅನ್ತರವಿಟ್ಠಿಞ್ಚ, ತಥಾ ಸಙ್ಘಾಟಗಾಮಕಂ;
ಸಿರಿಮಣ್ಡಗಲಾರಾಮಞ್ಚ, ಅದಾಸೋ ಲಾಭವಾಸಿನಂ.
ವನಜೀವಕಭಿಕ್ಖೂನ-ಮದಾ ಸೋ ಚತುಪಚ್ಚಯೇ;
ಬನ್ಧೂನಮ್ಪಿ ಚ ಸೋ ತೇಸಂ, ಭೋಗಗಾಮೇ ಪದಾಪಯಿ.
ಪಾವಾರಗ್ಗಿಕಪಲ್ಲಾನಿ, ವಿವಿಧೇ ಓಸಧೇಪಿ ಚ;
ಸೀತೇ ಉತುಮ್ಹಿ ಬಹುಸೋ, ಭಿಕ್ಖುಸಙ್ಘಸ್ಸ ದಾಪಯಿ.
ಅದಾ ಸಬ್ಬಪರಿಕ್ಖಾರೇ, ಪರಿಕ್ಖಾರೇ ತಥಾತ್ಥ ಸೋ;
ನೇಕವಾರೇಸು ಸಕ್ಕಚ್ಚಂ, ಭಿಕ್ಖುಸಙ್ಘಸ್ಸ ಬುದ್ಧಿಮಾ.
ಸಙ್ಘಸ್ಸ ಪಾಕವಟ್ಟತ್ಥಂ, ಭಿಕ್ಖೂನಂ ಲಾಭವಾಸಿನಂ;
ವೇಯ್ಯಾವಚ್ಚಕರಾನಞ್ಚ, ಪೂಜೇತುಂ ಚೇತಿಯಾದಿಕಂ.
ಪದಿನ್ನಾ ಪುಬ್ಬರಾಜೂಹಿ, ಯೇ ಗಾಮಾ ರೋಹಣೇ ಬಹೂ;
ತೇಪಿ ಸಬ್ಬೇ ಅನೂನೇ ಸೋ, ಯಥಾಪುಬ್ಬಂ ಠಪೇಸಿ ಚ.
ಅದಾಸಿ ಪಿಠಸಪ್ಪೀನ-ಮುಸಭೇ ಬಲಿನೋ ಬಹಿ;
ಭತ್ತಂ ಚಾ’ದಾಸಿ ಸೋ ಕಾಕ ಸೋಣಾದೀನಂ ದಯಾಪರೋ.
ಅದಾಸಿನೇಕತಾ ವೇಯ್ಯ-ಕಾರಕಾನಂ ಮಹಾಕವೀ;
ಸದ್ಧಿಂ ಪವೇಣಿಗಾಮೇಹಿ, ವಿತ್ತಜಾತಮನಪ್ಪಕಂ.
ರಾಜಾಮಚ್ಚಾದಿಪುತ್ತಾನಂ, ಸಿಲೋಕೇ ರಚಿತೇ ಸುಣಂ;
ಯಥಾನುರೂಪಂ ಪಾದಾಸಿ, ಧನಂ ತೇಸಂ ಕವಿಸ್ಸರೋ.
ಅನ್ಧಾನಂ ಪಙ್ಗುಲಾನಞ್ಚ, ಗಾಮೇ ಚಾ’ದಾ ವಿಸುಂ ವಿಸುಂ;
ನಾನಾದೇವಕುಲಾನಞ್ಚ, ದಿನ್ನಂ ಪುಬ್ಬಂ ನ ಹಾಪಯಿ.
ಪತ್ತಿ ವೋ ಸೋ ಕುಲಿತ್ಥೀನ-ಮನಾಥಾನಂ ಯಥಾರಹಂ;
ವಿಧವಾನಮದಾಗಾಮೇ, ಭತ್ತಅಚ್ಛಾದನಾನಿ ಚ.
ರಾಜಾ ಸೀಹಳಕಾ ವೇಯ್ಯ-ಕರಣೇ ಸೋ ಮಹಾಪತಿ;
ಅಗ್ಗೋ ಸೀಹಳಕಾವೇಯ್ಯ-ಕಾರಕಾನಮಹೋಸಿ ಚ.
ಸುಭೇ ಬದ್ಧಾದರೋ ಬದ್ಧ ಗುಣವ್ಹಯ ವಿಹಾರಕೇ;
ಬನ್ಧೇಸಿ ಉಪರಾಜಾ ಸೋ, ಚೇತಿಯಂ ಚೋಳನಾಸಿತಂ.
ಮುತ್ತಚಾಗೀ ತತೋ ತಸ್ಸ, ವಿಹಾರಪವರಸ್ಸ ಸೋ;
ದತ್ವಾ ಗಾಮವರೇ ನಿಚ್ಚಂ, ಪೂಜಾಯೋ ಸಮ್ಪವತ್ತಯಿ.
ಸೋವ ತಸ್ಸ ವಿಹಾರಸ್ಸ, ಉಪಚಾರವನನ್ತಿಕೇ;
ಬನ್ಧಾಪೇಸಿ ಮಹಾವಾಪಿಂ, ಥೀರೀಭೂತಮಹೋದಕಂ.
ಕಪ್ಪೂರಮೂಲಾಯತನೇ ¶ , ರಞ್ಞೋ ಧೀತಾ ಯಸೋಧರಾ;
ಅಕಾರೇಸಿ ಥಿರಂ ರಮ್ಮಂ, ಮಹನ್ತಂ ಪಟಿಮಾಘರಂ.
ಸೇಲನ್ತರಸಮೂಹಸ್ಮಿಂ, ರಾಜಿನೋ ರಾಜಿನೋ ಸಕಾ;
ಕಾರೇಸಿ ಚಾರುಪಾಸಾದಂ, ಪಸಾದಾವಹಮುಗ್ಗತಂ.
ತದಾ ನೇಕೇ ಚ ಸಚಿವಾ, ತಸ್ಸೋ ರೋಧಜನಾಪಿ ಚ;
ಸಮಾಚಿನಿಂಸು ಪುಞ್ಞಾನಿ, ಅನೇಕಾನಿ ಅನೇಕಸೋ.
ಏವಂ ಸಮನುಸಾಸನ್ತೇ, ಲಂಕಂ ಲಂಕಾ ನರಿಸ್ಸರೇ;
ಉಪರಾಜಾ ವಸಂನೀತೋ, ವಿನೀತೋ ಘೇರಮಚ್ಚುನಾ.
ತಸ್ಸ ಕತ್ತಬ್ಬಕಿಚ್ಚಾನಿ, ಸಕಲಾನಿ ಸಮಾಪಿಯ;
ಜಯಬಾಹುಸ್ಸೋಪರಜ್ಜಂ, ಭಿಕ್ಖೂನಂ ಮತಿಯಾ ಅದಾ.
ಅಥಾದಿಪಾದಪದವಿಂ, ದತ್ವಾ ವಿಕ್ಕಮಬಾಹುನೋ;
ಗಜಬಾಹೂ’ತಿ ವಿದಿತೇ, ತಸ್ಸ ಜಾತೇ ಸುತೇ ತತೋ.
ಮಹಾಮಚ್ಚೇಹಿ ಮನ್ತೇತ್ವಾ, ರಾಜಾಪುತ್ತಹಿತತ್ಥಿಕೋ;
ರೋಹಣಂ ಕಸಿಣಂ ದತ್ವಾ, ತಹಿಂ ವಾಸಾಯ ಪೇಸಯಿ.
ತತೋ ಸೋ ತತ್ಥ ಗನ್ತ್ವಾನ, ಮಹಾನಾಗಹುಲಂ ಪುರಂ;
ರಾಜಧಾನಿಂ ಕರಿತ್ವಾನ, ತತ್ಥ ವಾಸಮಕಪ್ಪಯೀ.
ಏವಂ ಪಞ್ಞಾಸವಸ್ಸಾನಿ’ಹ ವಿಜಯಭುಜೋ ವತ್ತಯಿತ್ವಾನ ಸಮ್ಮಾ,
ಆಣಾಚಕ್ಕಂ ಜನಿನ್ದೋ ಪ್ಯಪಗತಖಲನಂ ಏಸ ಪಞ್ಚಾಧಿಕಾನಿ;
ವಡ್ಢೇತ್ವಾ ಸಾಸನಂ ತಂ ಖಲದಮಿಳಭಯೋ ಪದ್ದುತಞ್ಚಾಪಿಲೋಕಂ,
ಸಗ್ಗಂ ಲೋಕಂ ಸಪುಞ್ಞಪ್ಪಭವಮುರುಫಲಂ ಪಸ್ಸಿತುಂ ಚಾ’ರು ರೋಹ.
ಸುಜನಪ್ಪಸಾದ ಸಂವೇಗತ್ಥಾಯ ಕತೇ ಮಹಾವಂಸೇ
ಲೋಕಸಾಸನಸಂಗಹಕರಣೋ ನಾಮ
ಅಟ್ಠಪಞ್ಞಾಸತಿಮೋ ಪರಿಚ್ಛೇದೋ
ಏಕೂನಸಟ್ಠಿಮ ಪರಿಚ್ಛೇದ
ಚತುರಾಜಚರಿಯ ನಿದ್ದೇಸೋ
ತದಾರಞ್ಞೋ ¶ ನುಜಾಮಿತ್ತಾ, ತಸ್ಸ ಪುತ್ತಾ ತಯೋ’ಪಿ ಚ;
ಮಹಾಮಚ್ಚಾ ಚಯತಯೋ, ತಥಾ ಯತನವಾಸಿನೋ.
ತಬ್ಬೇತೇ ಆದಿಪಾದಸ್ಸ, ರೋಹಣೇ ವಸತೋ ಸತೋ;
ಅನಾರೋಚಾಪಯಿತ್ವಾನ, ಭೂಪಾಲಮತಸಾಸನಂ.
ಸಮ್ಭೂಯಮನ್ತಯಿತ್ವಾನ, ಸಮಾನಚ್ಛನ್ದತಂ ಗತಾ;
ಅದಂಸು ಯುವರಾಜಸ್ಸ, ಲಙ್ಕಾರಜ್ಜಾಭಿಸೇಚನಂ.
ಓಪರಜ್ಜೇ ನಿವೇಸೇಸುಂ, ಮಾನಭರಣನಾಮಕಂ;
ಕುಮಾರಂ ಪುಬ್ಬಚಾರಿತ್ತ-ಮಗ್ಗಂ ಲಙ್ಘಿತ್ಥ ತೇ’ಖಿಲಾ.
ತಯೋ’ಥ ಭಾತರೋ ಸಬ್ಬೇ, ತೇ ಮಾಣಭರಣಾದಯೋ;
ಜಯಬಾಹುಮಹೀಪಾಲ-ಸಹಿತಾ ಸಹಸಾ ತದಾ.
ಮುತ್ತಾಮಣಿಪ್ಪಭೂತಿಕಂ, ರತನಂ ಸಾರಸಮ್ಮತಂ;
ಸಬ್ಬಂ ಹತ್ಥಗತಂ ಕತ್ವಾ, ವಾಹನಞ್ಚ ಗಜಾದಿಕಂ.
ಸಕಲಂ ಬಲಮಾದಾಯ, ಪುಲತ್ಥಿನಗರಾ ತದಾ;
ಖಿಪ್ಪಂ ತಂ ವಿಕ್ಕಮಭುಜಂ, ಗಣ್ಹಿಸಾಮಾ’ತಿ ನಿಕ್ಖಮುಂ.
ಸುತ್ವಾ ಪವತ್ತಿಂ ಸಕಲಂ, ಇಮಂ ವಿಕ್ಕಮಬಾಹುಸೋ;
ತಾ ತಸ್ಸನ್ತಿಮಸಕ್ಕಾರಂ, ವಿಧಾತುಂ ಹನ್ದನೋ ಲಭಿಂ.
ಇದಾನಿ ಖಿಪ್ಪಂ ಗನ್ತ್ವಾನ, ಪುಲತ್ಥಿನಗರಂ ತಹಿಂ,
ತಾ ತಸ್ಸಾಳಾಹನಟ್ಠಾನ ದಸ್ಸನೇ ನೇವ ಸೋ ಅಹಂ.
ಸೋಕಭಾರಂ ವಿನೋದೇಸ್ಸಂ, ಮಮ ಚೇತೋ ಗತಂ ಇತಿ;
ಕತದಳ್ಹ ವವತ್ಥಾನೋ, ವಿನಿಗ್ಗಮ್ಮ ತತೋ ಪುರಾ.
ಪುಲತ್ಥಿಪುರಮಾಗಚ್ಛಂ, ಆದಿಪಾದೋ’ತಿ ಸಾಸಸೋ;
ಸತ್ತಟ್ಠಸತಸಙ್ಖೇನ, ಬಲೇನ ಪರಿವಾರಿತೋ.
ಅನ್ತರಾಲಪಥೇಯೇವ, ಗುತ್ತಹಾಲಕಮಣ್ಡಲೇ;
ಗಾಮೇ ಪನ ಸಮುಕ್ಕವ್ಹೇ, ದಿಸ್ವಾ ಸೇನಙ್ಗಮಾಗತಂ.
ಮಹನ್ತಂ ¶ ಯುದ್ಧಸನ್ನದ್ಧಂ, ಏಕವೀರೋ ಭಯಾತಿಕೋ;
ಯುಜ್ಝಿತ್ವಾ ತೇ ಪಲಾಪೇಸಿ, ಖಣೇನೇವ ದಿಸೋದಿಸಂ.
ತಯೋ ತೇ ಭಾತರೋ ತತ್ಥ, ಸಮ್ಪತ್ತಾವ ಜಯಾ ತತೋ;
ಅಭಿಮಾನುದ್ಧತಾ ಖಿಪ್ಪಂ, ಅನ್ನಯ್ಹ ಬಲವಾಹನಂ.
ಆದಿಪಾದಕಜಮ್ಬೂತಿ, ವಿಸ್ಸುತಮ್ಹಿ ಪದೇಸಕೇ;
ಸಙ್ಗಾಮೇಸುಂ ಪರಾಜೇಸಿ, ಭಿಯ್ಯೋ ಯುಜ್ಝಿತ್ಥ ಸೋ ತಯೋ.
ತತಿಯಂ ಕಟಗಾಮಸ್ಮಿಂ, ಕಾಳವಾಪ್ಯಂ ಚತುತ್ಥಕಂ;
ಪಞ್ಚಮಂ ಉದ್ಧಟದ್ವಾರೇ, ಛಟ್ಠಂಸೋ ಪಙ್ಕವೇಲಕೇ.
ತೇಹಿ ಯುದ್ಧಂ ಕರಿತ್ವಾನ, ಗಹೀತವಿಜಯೋ ಸದಾ;
ಪುಲತ್ಥಿಪುರಮಾಗಞ್ಚಿ, ಸಹಾಮಚ್ಚ ಪರಿಜ್ಜನೋ.
ಸಚಿನ್ತಿತಕ್ಕಮೇನೇವ, ಪಸ್ಸಿತ್ವಾಳಾಹನಂ ಪಿತು;
ವಿದೂರಿತಮಹಾಸೇಕೋ, ಲದ್ಧಸ್ಸಾಸೋ ಪುರೇವಸಂ.
ದುಕ್ಖೇ ಸಹಾಯ ಭೂತಾನ-ಮತ್ತನೋ ಸೋ ಯಥಾರಹಂ;
ಅಮಚ್ಚಾನಮದಾ ಸಬ್ಬ-ಭೋಗೇ ಠಾನನ್ತರೇ ಹಿ ಸೋ.
ಭಟಾನಞ್ಚಾಪಿ ಸಬ್ಬೇಸಂ, ಸಹಾಯಾತಾನಮತ್ತನೋ;
ಅನುರೂಪಮದಾ ವುತ್ತಿಂ, ಸರಂ ದುಕ್ಖಸಹಾಯತಂ.
ಮಾಣಾಭರಣಭೂಪೋಪಿ, ಸದ್ಧಿಂ ಸೇಸೇಹಿ ಭಾತೂಹಿ;
ಕರಿತ್ವಾ ರೋಹಣಂ ಪಸ್ಸಂ, ರೋಹಣಞ್ಚ ಸಹತ್ಥಗಂ.
ತತೋ ಕಿತ್ತಿಸಿರೀಮೇಘೇ, ಸದ್ವಾದಸಸಹಸ್ಸಕಂ;
ರಟ್ಠಂ ದತ್ವಾನ ವಸಿತುಂ, ತಹಿಂಯೇವ ಸಮಾದಿಸಿ.
ಆಣತ್ತೋ ಭಾತರಾಕಿತ್ತಿ-ಸಿರೀಮೇಘೋ ಜನಾಧಿಪೋ;
ಗನ್ತ್ವಾ ವಸಿ ಪುರೇತತ್ಥ, ಮಹಾನಾಗಹುಲವ್ಹಯೇ.
ಸಿರೀವಲ್ಲಭನಾಮಸ್ಸ, ಕುಮಾರಸ್ಸಾಪಿ ಚಾದಿಸಿ;
ದೇಸಮಟ್ಠಸಹಸ್ಸವ್ಹಂ, ದತ್ವಾನ ವಸಿತುಂ ತಹಿಂ.
ತಥೇವ ಸೋಪಿ ಗನ್ತ್ವಾನ, ಉದ್ಧನದ್ವಾರನಾಮಕಂ;
ಗಾಮಂ ಕತ್ವಾ ರಾಜದಾನಿಂ, ವಸನ್ತೋ ಅನುಸಾಸಿತಂ.
ಸಯಞ್ಚ ಸಹಸೇನಾಯ, ಗನ್ತ್ವಾ ದಕ್ಖಿಣಪಸ್ಸಕಂ;
ವೀರಬಾಹೂತಿ ಪಞ್ಞಾತೋ, ಪುಙ್ಖಗಾಮಂ ಸಮಾವಸಿ.
ಮಾತಾ ಚ ತಿಣ್ಣಂ ಭಾತೂನಂ, ಜಯಬಾಹು ಚ ಭೂಮಿಪೋ;
ನಿವಸಿಂಸು ತದಾ ಕಿತ್ತಿ-ಸಿರಿಮೇಘಸ್ಸ ಸನ್ತಿಕೇ.
ತತೋ ¶ ಸಂವಚ್ಛರೇ’ತೀತೇ, ತೇ ಮಾಣಭರಣಾದಯೋ;
ತೇನತ್ತನಿ ಕತಂ ಯುದ್ಧೇ, ಸಬ್ಬಂ ವಿಕ್ಕಮಬಾಹುನಾ.
ದುರಾರೋಹಂ ಮಹನ್ತಂ ತಂ, ಪರಾಜಯತರಾಭವಂ;
ಅನುಸ್ಸರನ್ತಬಹುಸೋ, ಅಭಿಮಾನಸಮುನ್ನತಾ.
ಮುದ್ಧಾಭಿಸಿತ್ತರಾಜೂನ-ಮೇಕಾಕೀರಾಜರಟ್ಠಕಂ;
ವಿನಾಯಮಭಿಸೇಕೇನ, ಕಥಂ ನಾಮಾನುಭೋಸ್ಸತಿ.
ಇತಿ ಇಸ್ಸಾ ಪರತ್ತಞ್ಚ, ಯಾತಾ ಸಙ್ಗಯ್ಹಸಾವಕೇ;
ಭಿಯ್ಯೋ ಸಮ್ಭೂಯಸಙ್ಗಾಮ-ಕರಣತ್ಥಾಯ ನಿಕ್ಖಮುಂ.
ಸುತ್ವಾ ತಮತ್ಥಂ ದೂತೇಹಿ, ಸೋ ವಿಕ್ಕಮಭುಜೋಪಿ ಚ;
ಅಗಾ ತೇಸಂವ ವಿಸಯಂ, ಮಹಾಸೇನಾಪುರಕ್ಖತೋ.
ದೇಸೇ ದಕ್ಖಿಣಕೇ ಬೋಧಿ-ಸೇನಪಬ್ಬತಗಾಮಕೇ;
ಯುಜ್ಝಿತ್ವಾ ತೇ ಪರಾಜೇಸಿ, ತಯೋ ವಿಕ್ಕಮಬಾಹುಸೋ.
ರಿಪವೋ ದಾನಿ ಮೇ ಸಬ್ಬೇ, ಉಮ್ಮೂಲೇಸ್ಸಾಮಹಂ ಇತಿ;
ಪಲಾಯನ್ತೇ ನುಬನ್ಧಿತ್ಥ, ಪದಾನುಪದಿಕಂ’ವ ತೇ.
ತೇ ಚ ದುಗ್ಗಂ ಪಲಾಯಿಂಸು, ಪಞ್ಚಯೋಜನರಟ್ಠಕೇ;
ಖಿಪ್ಪಂ ಪಾವೇಕ್ಖಿ ಕಲ್ಯಾಣಿಂ, ಸೋ’ಪಿ ತೇ ಗಹಣತ್ಥಿಕೋ.
ವೀರೋ ಅರಿಯದೇಸಿಯೋ, ವೀರದೇವೋತಿ ಪಾಕಟೋ;
ಪಳನ್ದೀಪಿಸ್ಸರೋ ಏಕೋ, ಭೂಸಂ ಸಹಸಿಕೋ ತದಾ.
ಸದ್ಧಿಂ ಸೂರೇಹಿ ಯೋಧೇಹಿ, ಮಹಾತಿತ್ಥಮ್ಹಿ ಓತರಿ;
ಕಾತುಂ ಹತ್ಥಗಹಂ ಸಕ್ಕಾ, ಲಂಕಾದೀಪನ್ತಿ ಚಿನ್ತಿಯ.
ಸೋ ವಿಕ್ಕಮಭುಜೋ ಸುತ್ವಾ, ಪವತ್ತಿಂ ಭೂಭುಜೋ ತದಾ;
ಯಾವತಾ ನಾತ್ರ ಲಂಕಾಯಂ, ಲದ್ಧೋಗಾಹೋ ಭವಿಸ್ಸತಿ.
ತಾವ ಉಮ್ಮೂಲನೀಯೋತಿ, ಕಲ್ಯಾಣಿಮ್ಹಾ ವಿನಿಗ್ಗತೋ;
ಮಹಾತಿತ್ಥಮ್ಹಿ ಮನ್ನಾರ-ನಾಮಕಂ ಗಾಮಕಂ ಗತೋ.
ಕತ್ವಾನ ವೀರದೇವೋ’ಪಿ, ಸಙ್ಗಾಮಂ ತೇನ ರಾಜಿನಾ;
ಅನೀಕಙ್ಗಾದಯೋ ರಾಜ-ಪುತ್ತೇ ದ್ವೇ ಭಾತರೋಪಿ ಚ.
ಸೇನಾಧಿನಾಯಕಞ್ಚೇವ, ಕಿತ್ತಿನಾಮಪ್ಪಕಾಸಿತಂ;
ಘಾತೇತ್ವಾ ಸಹಸಾ ವೀರ-ಸಮ್ಮತೇ ಚ ಬಹೂಜನೇ.
ಗಾಹೇತ್ವಾ ಜೀವಗ್ಗಾಹಂಸೋ, ರಕ್ಖಕಞ್ಚ ಚಮೂಪತಿಂ;
ಸಬಲಂ ತಂ ಪರಾಜೇತ್ವಾ, ಅನುಬನ್ಧಿ ಪದಾಪದಂ.
ಪಲಾಯಮಾನೋ ¶ ಸೋ ಭೀತೋ, ಆಗನ್ತ್ವಾನ ನಿಜಂ ಪುರಂ;
ಹತ್ಥಸಾರಂ ಸಮಾದಾಯ, ಕೋಟ್ಠಸಾರಂ ಗತೋ ಲಹುಂ.
ಪಚ್ಛತೋ ಪಚ್ಛತೋ ವೀರ-ದೇವೋ ತಮನುಬನ್ಧಿಯ;
ಆಗನ್ತ್ವಾನ ಪುರೇವಾಸಂ, ಕತಿಪಾಹಂ ವಿಧಾಯಸೋ.
ಗಣ್ಹಿತುಂ ವಿಕ್ಕಮಭುಜಂ, ತತ್ಥೇವ ತುರಿತಂ ಅಗಾ;
ಪೇಸಯಿತ್ವಾ ಸಕಂ ಸೋಪಿ, ಮಹನ್ತಂ ಸಕಲಂ ಬಲಂ.
ಯುಜ್ಝಾಪೇತ್ವಾನ ಘಾತೇತ್ವಾ, ಗಾಮೇ ಅನ್ತರವಿಟ್ಠಿಕೇ;
ಮಹಾಕದ್ದಮದುಗ್ಗಮ್ಹಿ, ವೀರದೇವಂ ಮಹಬ್ಬಲೋ.
ಅಭಿಸೇಕಂ ವಿನಾಯೇವ, ಪುಲತ್ಥಿ ನಗರೇ ವಸಂ;
ಅಕಾಸಿ ರಾಜರಟ್ಠಸ್ಸ, ಪಸಾಸನವಿಧಿಂ ವಿಭೂ.
ಅಪನೀಯರಣೇ ಛನ್ದಂ, ಭಾತರೋಪಿ ತಯೋ ತತೋ;
ಆವಸಿಂಸು ಯಥಾಪುಬ್ಬಂ, ಗನ್ತ್ವಾ ರಟ್ಠಂ ಸಕಂ ಸಕಂ.
ಚತುರೋಪಿ ಮಹೀಪಾಲಾ, ಯತಮಾನಾ ಚಿರಂ ತಹಿಂ;
ಏಕಚ್ಛತ್ತಙ್ಕಿತಂ ಕಾತುಂ, ನೇವ ಸಕ್ಖಿಂಸು ಸಬ್ಬಸೋ.
ಅನಿಸಮ್ಮಕಾರಿಭಾವೇನ, ಕುಲೀನೇ ಪರಿಹಾಪಯುಂ;
ಠಪೇಸುಞ್ಚ ಮಹನ್ತತ್ತೇ, ಹೀನೇ ಸಾಭಿಮತೇ ಜನೇ.
ವಡ್ಢಿತಂನೇಕಧಾ ಸಮ್ಮಾ, ರಞ್ಞಾ ವಿಜಯಬಾಹುನಾ;
ಸಾಸನಞ್ಚ ತಥಾಲೋಕಂ, ಹಾಪಯಿಂಸು ಸುಬುದ್ಧಿನೋ.
ಕುಲೀನಾನಂ ಮನುಸ್ಸಾನ-ಮಭಾವೇಪಿ ಚ ತಾದಿಸೇ;
ದೋಸೇ ವಿತ್ತಂ ತದಾಯತ್ತಂ, ಪಸಯ್ಹಾವಹರಿಂಸು ಚ.
ಪೀಳೇತುಂ ಸಕಲಂ ಲೋಕ-ಮುದ್ಧರನ್ತಾಧಿಕಂ ಬಲಿಂ;
ಉಚ್ಛೂವ ಉಚ್ಛುಯನ್ತೇತೇ, ಖೀಣಕೋ ಸಾಧನೇಸಿನೋ.
ಉದ್ಧರಿತ್ವಾನ ಬುದ್ಧಾದಿ-ಸನ್ತಕೇ ಭೋಗಗಾಮಕೇ;
ಸೋ ವಿಕ್ಕಮಭುಜೋ ರಾಜಾ, ಸೇವಕೇಸು ಸಮಪ್ಪಯೀ.
ಪುಲತ್ಥಿನಗರೇ ನೇಕ-ವಿಹಾರೇ ಧಾತುಮಣ್ಡಿತೇ;
ಸೋವ ದೇಸನ್ತರೀಯಾನಂ, ಭಟಾನಂ ವಸಿತುಂ ಅದಾ.
ಸದ್ಧೇಹಿ ಪತ್ತಧಾತುಸ್ಸ, ದಾಠಾಧಾತುವರಸ್ಸ ಚ;
ಪೂಜನತ್ಥಾಯ ದಿನ್ನಾನಿ, ಮಣಿಮುತ್ತಾದಿಕಾನಿ ಚ.
ಚನ್ದನಾಗರುಕಪ್ಪುರಂ, ಸುವಣ್ಣಾದಿಮಯಾ ಬಹೂ;
ಪಟಿಮಾಯೋ ಚ ಅಚ್ಛಿಜ್ಜ, ಯಥಾಕಾಮಂ ವಯಂ ನಯೀ.
ಸಾಸನಸ್ಸ ¶ ಚ ಲೋಕಸ್ಸ, ಕ್ರಿಯಮಾನಮುಪದ್ದವಂ;
ಪಸ್ಸನ್ತಾ ಬಹುಸೋ ತಸ್ಮಿಂ, ತದಾ ನಿಬ್ಬನ್ನಮಾನಸಾ.
ಅಟ್ಠಮೂಲವಿಹಾರೇಸು, ಯತಯೋ ಗರುಸಮ್ಮತಾ;
ಪಂಸುಕೂಲಿಕಭಿಕ್ಖೂ ಚ, ಕೋಟ್ಠಾಸದ್ವಯನಿಸ್ಸಿತಾ.
ಏವಂ ತಿತ್ಥಿಯತುಲ್ಯಾನಂ, ಸಾಸನೋಪದ್ದವಂ ಬಹುಂ;
ಕರೋನ್ತಾನಂ ಸಕಾ ಸಮ್ಭಾ-ಪಯಾತಂ ಪವರಂ ಇತಿ.
ದಾಠಾಧಾತುವರಂ ಪತ್ತ-ಧಾತುಮಾದಾಯ ರೋಹಣಂ;
ಗನ್ತ್ವಾ ವಾಸಮಕಪ್ಪೇಸುಂ, ಫಾಸುಠಾನೇ ತಹಿಂ ತಹಿಂ.
ತಥೇವ ಫಾಸುಠಾನೇಸು, ವಿಪ್ಪಕಿಣ್ಣಾ ತಹಿಂ ತಹಿಂ;
ತೇ ಕುಲೀನಾ ನಿಲೀನಾ’ವ, ಹುತ್ವಾ ವಾಸಮಕಪ್ಪಯುಂ.
ಪಕ್ಖದ್ವಯಮಹೀಪಾಲ-ಗಯ್ಹಾಸೀಮಾ ಸುಠಾಪಿತಾ;
ಸಾಮನ್ತಾ ಅಞ್ಞಮಞ್ಞೇಹಿ, ಕರೋನ್ತೋ ಬಹುಸೋ ರಣಂ.
ಸುಸಮಿದ್ಧೇಸು ನೇಕೇಸು, ಗಾಮೇಸು ನಿಗಮೇಸು ಚ;
ಅಗ್ಗಿಂ ದೇನ್ತಾ ತಳಾಕೇ ಚ, ಛಿನ್ದನ್ತಾ ಜಲಪೂರಿತೇ.
ನಾಸೇನ್ತಾ ಸಬ್ಬಥಾ ಸಬ್ಬ-ಮಾತಿಕಾವರಣಾನಿ ಚ;
ಛಿನ್ದನ್ತಾ ನಾಳಿಕೇರಾದಿ, ಸೋ ಪಕಾರೇ ಚ ಭೂರುಹೇ.
ಯಥಾ ಪೋರಾಣಕಗ್ಗಾಮ-ಠಾನನ್ತಿಪಿ ನ ಞಾಯತೇ;
ವಿನಾಸೇಸುಂ ತಥಾ ರಟ್ಠಂ, ಅಞ್ಞಮಞ್ಞವಿರೋಧಿನೋ.
ತೇ ಚ ಭೂಮಿ ಪತೀಗಾಮ-ವಿಲೋಪಂ ಪತ್ಥಮೋಸನಂ;
ಕಾರೇನ್ತಾ ನಿಜಚಾರೇಹಿ, ಆಚರುಂ ಲೋಕುಪದ್ದವಂ.
ಕುಲೀನಾನಂ ಮನುಸ್ಸಾನಂ, ದಾಸಕಮ್ಮಕರಾಪಿ ಚ;
ಸಸಾಮಿನೋ’ತಿ ವತ್ತನ್ತಾ, ನಿಸ್ಸಙ್ಕಾ ವೀತಭೀತಿಕಾ.
ಹುತ್ವಾ ಯುಧೀಯಾ ರಾಜೂನಂ, ಅಬ್ಭನ್ತರಪವತ್ತಿನೋ;
ಬಲವನ್ತತರಾ ಜಾತಾ, ಲದ್ಧಠಾನನ್ತರಾ ತದಾ.
ಜನಾ ಸಮನ್ತಕೂಟಾದಿ-ನೇಕದುಗ್ಗನಿವಾಸಿನೋ;
ಅದೇನ್ತಾ ಭೂಮಿಪಾಲಾನಂ, ಪುಬ್ಬಪಟ್ಠಪಿತಂ ಕರಂ.
ರಾಜಾಣಮಗಣೇನ್ತಾ ತೇ, ಗತಾ ದಾಮರಿಕತ್ತನಂ;
ಸಕಂ ಸಕಂ’ವ ವಿಸಯ-ಮಾವಸಿಂಸು ಸಮುದ್ಧತಾ.
ಅನತ್ಥೇ ನಿಚಿತಾ ನಾಮ, ಪರಿವತ್ತನ್ತಿ ಸಬ್ಬತಾ;
ಇತಿ ವತ್ತಬ್ಬ ತಂಯೇವ, ಯಾತಂ ಲಙ್ಕಾತಲಂ ತದಾ.
ಏವಂ ¶ ಗಾಮಕಭೋಜಕಾ ವಿಯ ಭುಸಂತೇಜೋ ವಿಹೀನಾ ಸದಾ;
ಅಚ್ಚನ್ತಂ ಬ್ಯಸನಾತಿ ಸತ್ತಹದಯಾ ರಾಜಾಭಿಮಾನುಜ್ಝಿತಾ.
ನಿಚ್ಚಂ ಅತ್ತಪರತ್ಥಸಿದ್ಧಿವಿಧುರಾಸಙ್ಗಾ ವಿಹೀನಾಸಯಾ;
ಸಬ್ಬೇ ತೇ ವಿಹರಿಂಸು ಭೂಮಿಪತಯೋ ಚಾರಿತ್ತಮಗ್ಗಾತಿಗಾ.
ಸುಜನಪ್ಪಸಾದಸಂವೇಗತ್ಥಾಯ ಕತೇ ಮಹಾವಂಸೇ
ಚತುರಾಜಚರಿಯನಿದ್ದೇಸೋ ನಾಮ
ಏಕೂನಸಟ್ಠಿಮೋ ಪರಿಚ್ಛೇದೋ.
ಸಟ್ಠಿಮ ಪರಿಚ್ಛೇದ
ಕುಮಾರೋದಯೋ
ರೋಹಣೇ ನಿವಸಿತ್ಥಾ’ವ, ಜಯಬಾಹುಮಹೀಪತಿ;
ಮಿತ್ತಾವ್ಹಾ ರಾಜಿನೀ ಚೇವ, ತದಾ ಕಾಲಮಕಂಸು ತೇ.
ಸಿರೀವಲ್ಲಭಜಾಯಾ’ಥ, ಜನೇಸಿ ಸುಗಲಾ ದುವೇ;
ಮಾಣಭರಣಕಂ ಪುತ್ತಂ, ಪುತ್ತಿಂ ಲೀಲಾವತಿಮ್ಪಿ ಚ.
ಮಾಣಾಭರಣಭೂಪಾಲ-ದೇವೀ’ಪಿ ರತನಾವಲೀ;
ಮಿತ್ತಂ ಪಭಾವತಿಞ್ಚಾಪಿ, ಅಲಭೀ ಧೀತರೋ ದುವೇ.
ಪಸ್ಸನ್ತಸ್ಸ ಉಭೋ ತಾಯೋ, ಧೀತರೋ ವೀರಬಾಹುನೋ;
ತದಾ ಮಹಾದಿಪಾದಸ್ಸ, ಏವಂ ಆಸಿ ವಿತಕ್ಕಿತಂ.
ಲೋಕಾಭಿಸಮ್ಮತೇ ಸಬ್ಬ-ಭೂಪಾಲನ್ವಯಮುದ್ಧನಿ;
ವಿಸುದ್ಧೇ ಸೋಮವಂಸಮ್ಹಿ, ಅಭಿಜಾತಾ ಮಯಂ ಪನ.
ಪಿಹನೀಯತರಾಕಾರಾ, ಸಬ್ಬಸತ್ತಿಸಮುನ್ನತಾ;
ನಾನಾವಿಜ್ಜಾಸು ನಿಪುಣಾ, ಹತ್ಥಿಅಸ್ಸಾದಿಸುಕ್ಖಮಾ.
ತಥಾ ಪೇಕಾಕಿನಾ ವೇ’ತೇ, ತಯೋ ವಿಕ್ಕಮಬಾಹುನಾ;
ಪರಾಜಯಂ ಪರಿಭವಂ, ಪಾಪಿತಾ ಬಹುಸೋ ರಣೇ.
ಸೂನುನೋ ಸುಸಮತ್ಥಸ್ಸ, ವಿಸೋಧೇತು ಮಿಮಂ ಮಲಂ;
ನ ದಿಸ್ಸತೇ ಪಾತುಭಾವೋ, ಅಹೋ ನೋ ಅಪ್ಪಪುಞ್ಞತಾ.
ಜನವಾದಕಿಲಿಟ್ಠೇನ ¶ , ರಾಜತ್ತೇನಾಪಿ ಕಿಂ ಮಮ;
ಇದಾನಿ ವಿಸಯಾಸಙ್ಗಂ, ಹಿತ್ವಾ ಕಲ್ಯಾಣಕಮ್ಮಸು.
ಅಪ್ಪಮತ್ತಸ್ಸ ಸತತಂ, ನೇತಬ್ಬಾ ವಾಸರಾ’ಇತಿ;
ನಿಯ್ಯಾತೇತ್ವಾ ಅಮಚ್ಚಾನಂ, ಸಬ್ಬಂ ರಜ್ಜವಿಚಾರಣಂ.
ತಹಿಂ ಸತ್ತ’ಟ್ಠಮಾಸಞ್ಹಿ, ವಸಂ ರತ್ತಿಯಮೇಕದಾ;
ದೇವರಾಜಘರೇಸೇಯ್ಯಂ, ಕಪ್ಪೇಸಿ ಸೀಲಸಂಯತೋ.
ತತೋ ಪಚ್ಚೂಸಕಾಲಮ್ಹಿ, ದೇವಪುತ್ತಂ ಮಹಿದ್ಧಿಕಂ;
ವಿಚಿತ್ತವತ್ಥಾಭರಣಂ, ಗನ್ಧಮಾಲಾವಿಭೂಸಿತಂ.
ಉಳಾರತರರೂಪೇನ, ದೇಹೋಭಾಸೇನ ಅತ್ತನೋ;
ಓಭಾಸೇನ್ತಂ ಅಸೇಸಾ’ಸಾ, ಸೂರಿಯಞ್ಚ ನ ಭುಗ್ಗತಂ.
ವದನ್ತಂ ಸುಪಿನೇ ಏವಂ, ಅದಕ್ಖಿ ದರಣೀಪತಿ;
ಪಸೀದಸ್ಸು ಮಹಾಭಾಗ, ಪಿತೋಭವ ಮಹಿಪತಿ.
ಧಞ್ಞಲಕ್ಖಣಸಮ್ಪನ್ನೋ, ಇಚ್ಛಿತತ್ಥಸ್ಸಸಾಧಕೋ;
ವಿನೀತೋ ಲೋಕಕುಹರ-ಬ್ಯಾಪಿತೇಜೋ ಪರಕ್ಕಮೋ.
ಆಣಬಲಯಸೋಕಿತ್ತಿ-ಭಾಸುರೋ ಸಗ್ಗುಣಾಕರೋ;
ಲೋಕಸಾಸನಸಂವುದ್ಧಿ-ಕರೋ ಪುತ್ತವರೋ ತವ.
ಲಬ್ಭೀಸ್ಸತೇ ಮಹಾರಾಜ, ನ ಚಿರಸ್ಸೇವ ಸಮ್ಪತಿ;
ಪುತ್ತದಾರಾಧಿವುತ್ಥಂ ತಂ, ಪುರಂ ಖಿಪ್ಪಂ ಪಯಾಹೀತಿ.
ಪಬುಜ್ಝಿತ್ವಾನ ಸಞ್ಜಾತ-ಪೀತಿವೇಗೋಥ ರತ್ತಿಯಾ;
ವಿಭಾತಾಯ ತತೋಪೋಙ್ಖ-ಗಾಮಂ ಗಞ್ಛಿನರುತ್ತಮೋ.
ಯಥಾ ದಿಟ್ಠಪ್ಪಕಾರನ್ತಂ, ಕಥೇಸಿ ಸುಪಿನಂ ಸುಭಂ;
ಮಹೇಸೀ ಪಮುಖಾನಂ ಸೋ, ಅಮಚ್ಚಾನಂ ಮಹೀಪತಿ.
ಸದ್ಧಿಂ ಮಹೇಸಿಯಾ ತತ್ಥ, ಪತ್ಥೇನ್ತೋ ಪುತ್ತಮುತ್ತಮಂ;
ಚಿನ್ತೋನ್ತೋ ದಾನಸೀಲಾದಿಂ, ಸುಭಂ ನಾನಪ್ಪಕಾರಕಂ.
ಅಥೇಕದಿವಸಂಕಾಲೇ, ಪಚ್ಚೂಸೇ ಸುಪಿನೇ ಪನ;
ಸಬ್ಬಲಕ್ಖಣಸಮ್ಪನ್ನಂ, ಸಬ್ಬಸೇತಂ ಮನೋಹರಂ.
ದನ್ತೀಪೋತವರಂ ದನ್ತಂ, ಕಣ್ಣೇ ಗಣಿಯಪೇಮತೋ;
ಪವಿಸನ್ತಮಿವತ್ತಾನಂ, ಸೇಯ್ಯಾಗಬ್ಭಂ ಮಹೇಸಿಯಾ.
ಸಮ್ಪಸ್ಸಿಯ ಪಬುಜ್ಝಿತ್ವಾ, ಉಟ್ಠಾಯ ಸಯನಾವರಾ;
ಸಞ್ಜಾತಪೀತಿಪಾಮೋಜ್ಜ-ವೇಗಪೀಣಿತಮಾನಸೋ.
ತಾಯಂ ¶ ವೇಲಾಯಮೇದಾಸು-ಸೇಯ್ಯಾಗಬ್ಭಂ ಮಹೇಸಿಯಾ;
ಪವಿಸ್ಸಸುಪಿನಂ ತಸ್ಸಾ, ಯಥಾದಿಟ್ಠಂ ಪಕಾಸಯೀ.
ಅಹಮ್ಪಿ ತಾದಿಸಂ ಹತ್ಥಿ-ಪೋತಕಂ ಸಯನಂ ಮಮ;
ಪದಕ್ಖಿಣಂ ಕರಿತ್ವಾನ, ಠಿತಂ ಸೋಣ್ಡೇ ಸಮಾದಿಯ.
ಆಕಡ್ಢಿತ್ವಾನ ಸಯನಂ, ಸಮಾರೋಪಿಯ ಪೇಮತೋ;
ಆಲಿಙ್ಗಿಂ ಸುಪಿನಮ್ಹೀತಿ, ದೇವೀ ಚಾಪಿ ತಮಬ್ರವೀ.
ಉಭೋ ತೇ ಅಞ್ಞಮಞ್ಞಸ್ಸ, ದಿಟ್ಠಮೇವಂ ಪಕಾಸಿಯ;
ಉಟ್ಠಾಪೇಸುಂ ಪಹಟ್ಠಾವ, ವೀತನಿದ್ದಾರುಣಂ ತದಾ.
ತತೋ ಪಾತೋ ಉಪಟ್ಠಾತು, ಮುಪಯಾತಂ ಪುರೋಹಿತಂ;
ನೇಮಿತ್ತಕೇ ಚ ಪುಚ್ಛಿಂಸು, ಸುನಿತ್ವಾ ತೇ ಪಮೋದಿತಾ.
ನ ಚಿರಸ್ಸೇವ ಪುತ್ತಸ್ಸ, ಧಞ್ಞಲಕ್ಖಣಸಾಲಿನೋ;
ಉಪ್ಪತ್ತಿಯಾ ಅವಸ್ಸಂ’ವ, ಭವಂತಬ್ಬನ್ತಿ ಕಿತ್ತಯುಂ.
ತಂ ಸುಣಿತ್ವಾ ಅಮಚ್ಚಾ ಚ, ತಥಾ ನಗರವಾಸಿನೋ;
ಅವಿನ್ದಿಂಸು ಜನಿನ್ದೋ ಚ, ಸಬ್ಬೇಪೀತಿ ಮಹುಸ್ಸವಂ.
ತತೋ ಪಟ್ಠಾಯ ಸೋತ್ಥಾನಂ, ಪತ್ಥಯಂ ಪತ್ಥಿವೋಭುಸಂ;
ಭಿಕ್ಖುಸಙ್ಘೇನ ಬಹುಸೋ, ಭಣಾಪೇಸಿ ಪರಿತ್ತಕಂ.
ಮಣಿಮುತ್ತಾದಿಕಂ ಚಿತ್ತಂ, ಮಹಗ್ಘಮನುವಾಸರಂ;
ಪರಿಚ್ಚಜಿ ದಾನಮುಖೇ, ಯಾಚಕಾನಮನೇಕಸೋ.
ಪುರೋಹಿತಾದಿವಿಪ್ಪೇಹಿ, ವೇದವೇದಙ್ಗವಿಞ್ಞೂಹಿ;
ವತ್ತಾಪೇಸಿ ಚ ಹೋಮಾದಿ-ವಿಧಾನಂ ಸೋತ್ಥಿ ಸಮ್ಮತಂ.
ಸುವಿನಟ್ಠೇ ವಿಹಾರೇ ಚ, ಧಾತುಗಬ್ಭೇ ಚ ವಾಪಿಯೋ;
ಜಿಣ್ಣಾ ಚ ಪಟಿಸಙ್ಖತ್ತುಂ, ಯೋಜಯೀ ರಾಜಕಪ್ಪಿಕೇ.
ದಿನಂ ನಯನ್ತೇ ಕಲ್ಯಾಣ-ಕಮ್ಮೇನೇ’ವಂ ನರಿಸ್ಸರೇ;
ನ ಚಿರಂ ಸಣ್ಠಹಿ ಗಬ್ಭ-ವರೋ ಕುಚ್ಛಿಮ್ಹಿ ದೇವಿಯಾ.
ತತೋವಗಮ್ಮ ತಂ ಹಟ್ಠ-ಪಹಟ್ಠೋ ಸೋ ನರಿಸ್ಸರೋ;
ಮಹನ್ತಂ ದೇವಿಯಾ ಗಬ್ಭ-ಪರಿಹಾರಮದಾಪಯಿ.
ಪರಿಪಕ್ಕಗಬ್ಭಾ ದೇವೀ, ಕಮೇನ ಜನಯೀಸುಕಂ;
ಸಮಯೇ ಭದ್ದನಕ್ಖತ್ತ-ಮುಹುತ್ತೇನಭಿಲಕ್ಖಿತೇ.
ಸುಪ್ಪಸನ್ನಾ ಅಸೇಸಾ ಚ, ದಿಸಾಯೋ ತಂಖಣೇ ಅಹು;
ಸಮೀರಣೇ ಚ ವಾಸಿಂಸು, ಸುಗನ್ಧಿಮುದುಸೀತಲಾ.
ದನ್ತೀನಂ ¶ ಕೋಞ್ಚನಾದೇನ, ಹಯಾನಂ ಹೇಸಿತೇನ ಚ;
ರಾಜಙ್ಗಣಂ ತದಾಜಾತಂ, ಮಹಾಕೋಲಾಹಲಾ ಕೂಲಂ.
ಅಚ್ಛೇರಾತಿಸಯೇ ಏವಂ, ಪಾತುಭೂತೇ ಅನೇಕಧಾ;
ದಿಸ್ವಾ ತಂ ವಿಮ್ಹಯಪ್ಪತ್ತೋ, ಮಾಣಭರಣಭೂಪತಿ.
ಸುತ್ವಾ ನಿಜಸ್ಸ ಪುತ್ತಸ್ಸ, ತದಾ ಸಞ್ಜಾತಸಾಸನಂ;
ಅಮತೇನಾಭಿಸಿತ್ತೋವ, ಪೀತಿಪುಣ್ಣಮನೋರಥೋ.
ಮೋಚಾಪೇತ್ವಾ ತದಾ ಕಾರಾ-ಘರೇ ಬದ್ಧೇ ಬಹೂಜನೇ;
ದಾನಂ ಉಳಾರಂ ಸಮಣ-ಬ್ರಾಹ್ಮಣಾನಂ ಪದಾಪಯಿ.
ಅಮಚ್ಚಪಮುಖಾ ಚಾಪಿ, ಜನಾಪುರನಿವಾಸಿನೋ;
ಕದಲೀತೋರಣಾದೀಹಿ, ರಾಜಧಾನೀ ಮನೇಕಧಾ.
ಅಲಙ್ಕರಿತ್ವಾ ಸಕಲಂ, ಸುಮಣ್ಡಿತಪಸಾಧಿತಾ;
ಛಣಂ ಮಹನ್ತಂ ವತ್ತೇಸುಂ, ಕತಿಪಾಹಂ ಮನೋರಮಂ.
ವೇದೇ ವುತ್ತವಿಧಾನೇನ, ಜಾತಕಮ್ಮಾದಿಕಂ ವಿಧಿಂ;
ಸಬ್ಬಂ ಸಮಾಪಯಿತ್ವಾನ, ಕುಮಾರಸ್ಸಾ’ವನೀಪತಿ.
ಪುರೋಹಿತಾದಯೋ ವಿಪ್ಪೇ, ತತೋ ಲಕ್ಖಣಪಾಠಕೇ;
ಆಣಾಪೇತ್ವಾನ ಸಕ್ಕಾರ-ಸಮ್ಮಾನವಿಧಿಪುಬ್ಬಕಂ.
ನಿಯೋಜೇಸಿ ಕುಮಾರಸ್ಸ, ಲಕ್ಖಣಾನಂ ಪಟಿಗ್ಗಹೇ;
ಸಾಧಕಂ ಸಕಲಂ ತಸ್ಸ, ಯತ್ಥಪಾದಾದಿಲಕ್ಖಣಂ.
ಉಪಧಾರಿಯ ಮಹಾಮಚ್ಚ-ಗಣಮಜ್ಝಗತಸ್ಸ ತೇ;
ರಾಜಿನೋ ದೇವಿಯಾ ಚಾಪಿ, ಪಕಾಸೇಸುಂ ಪಮೋದಿತಾ.
ಲಙ್ಕಾದೀಪಂ ಠಪೇತ್ವಾನ, ಜಮ್ಬುದೀಪತಲಮ್ಪಿ ಚ;
ಏಕಚ್ಛತ್ತಙ್ಕಿತಂ ಕತ್ವಾ-ನುಭೋತ್ತುಂ ನಿಪುಣೋ ಇತಿ.
ತೇ ಸನ್ತಪ್ಪಿಯ ಭೋಗೇಹಿ, ಭಿಯ್ಯೋ ಪುಚ್ಛಿತ್ಥ ಸಾದರಂ;
ಸನ್ದಿಸ್ಸಮಾನಂ ಯಂಕಿಞ್ಚಿ, ಅರಿಟ್ಠಂ ಅತ್ಥಿ ನತ್ಥೀ’ತಿ.
ದೀಘಾಯುಕೋ ಕುಮಾರೋ’ಯಂ, ಕಿಞ್ಚಿ ಪಞ್ಞಾಯತೇ ವತ;
ಜನಕಾರಿಟ್ಠಯೋಗೋ’ತಿ, ತೇ ಮಹೀಪತಿನೋ’ಬ್ರವುಂ.
ತಸ್ಸಾರಿಜನಸಮ್ಮದ್ದಿ-ಪತಾಪಭುಜಯೋ ಗತೋ;
ಸೋ ಪರಕ್ಕಮಬಾಹೂ’ತಿ, ಅನ್ವತ್ಥನಾಮಮಗ್ಗಹೀ.
ಕಣ್ಣವೇ ಧಮಹಞ್ಚೇವ, ಅನ್ನುಪಾಸನಮಙ್ಗಲಂ;
ಕಾರಾಪಿಯ ವಿಧಾನಞ್ಞೂ, ಯಥಾವಿಧಿಮಸೇಸತೋ.
ರಞ್ಞೋ ¶ ವಿಕ್ಕಮಬಾಹುಸ್ಸ, ಸಪುತ್ತುಪ್ಪತ್ತಿಸಾಸನಂ;
ವತ್ತುಂ ಸದೂತೇ ಪೇಸೇಸಿ, ಪುಲತ್ಥಿನಗರಂ ತದಾ.
ತೇಹಿಸೋ ಭಾಗಿನೇಯ್ಯಸ್ಸ, ಮಹಾಭಾಗತ್ತನಮ್ಪಿ ಚ;
ಜನಕಾರಿಟ್ಠಯೋಗಞ್ಚ, ಸುತ್ವಾ ವಿಕ್ಕಮಬಾಹುಸೋ.
ಧಞ್ಞಂ ವಿಜಯರಾಜಾದಿ-ರಾಜಮಾಲಾಯ ನಾಯಕಂ;
ಮಣಿಂವ ಭಾಸುರಂ ಮಯ್ಹಂ, ಭಾಗಿನೇಯ್ಯಂ ಜನೇಸಿಸೋ.
ಹಾನಿ ಯಾಕಾಚಿಸತತಂ, ಯಥಾ ತಸ್ಸ ನ ಹೇಸ್ಸತಿ;
ತಥಾ ಮಮನ್ತಿಕೇಯೇವ, ಕುಮಾರೋ ಏತ್ಥ ವಡ್ಢತಂ.
ಅಲದ್ಧಂ ಲಭಿತುಂ ಲಾಭಂ, ಲದ್ಧಞ್ಚ ಪರಿರಕ್ಖಿತುಂ;
ಸಬ್ಬಥಾ ನ ಸಮತ್ಥೋಯಂ, ಪುತ್ತೋ ಗಜಬಾಹು ಮಮ.
ಸೂರಭಾವಾದಿಯುತ್ತೋ’ಪಿ, ಮಹಿನ್ದವ್ಹಪರೋಸುತೋ;
ನಿಹೀನೋ ಮಾತುಗೋತ್ತೇನ, ನ ರಜ್ಜಸ್ಸ ರಹೋ ಮಮ.
ಠಿತಸ್ಸ ವಿಕ್ಕಜಾತೇನ, ನೇಕಸೋ ಸಞ್ಚಿತೇನ ಮೇ;
ರಜ್ಜಸ್ಸ ಭಾಗಿನೇಯ್ಯೋ’ವ, ಕಾಮಂ ಭಾಗೀ ಭವಿಸ್ಸತಿ.
ಇತಿಪೇಸೇಸಿ ದೂತೇ ಸೋ, ಆನೇತುಂ ತಂ ಕುಮಾರಕಂ;
ಕುಮಾರಾ ಭರಣಂ ದತ್ವಾ, ಸೇಸಂ ಸಾರಞ್ಚುಪಾಯನಂ.
ಸಬ್ಬಂ ದೂತಮುಖಾ ಸುತ್ವಾ, ವೀರಬಾಹು ಮಹೀಪತಿ;
ತಸ್ಸೇತಂ ವಚನಂ ಯುತ್ತಂ, ವುತ್ತಂ ಮೇಹಿತ ಬುದ್ಧಿಯಾ.
ತಥಾಪಿ ಚ ನಿಜಾರಿಟ್ಠ-ಪಟಿಕಾರತ್ಥಮೀದಿಸಂ;
ಓರಸಂ ಪುತ್ತರತನಂ, ಪೇಸೇತುಂ ನಾ’ನುರೂಪಕಂ.
ಕಿಞ್ಚ ತತ್ಥ ಕುಮಾರಮ್ಹಿ, ನೀತೇ ವಿಕ್ಕಮ ಬಾಹುನೋ;
ಪಕ್ಖೋ ಲದ್ಧಮಹಾವಾಹ-ಬಲೋ ವಿಯ ಹುತಾಸನೋ.
ಅಚ್ಚುನ್ನತೇನ ಮಹತಾ, ತೇಜಸಾ ಸಞ್ಜಲಿಸ್ಸತಿ;
ಹಾನಿರೇವ ವತಮ್ಹಾಕಂ, ಮಹತೀ ಹೇಸ್ಸತೇ ಭುಸಂ.
ಇತಿ ಹತ್ಥೇ ಗತಾನಂ ಸೋ, ದೂತಾನಂ ಥನಯಂ ಸಕಂ;
ಅಪೇಸೇತ್ವಾ ವಿಸಜ್ಜೇಸಿ, ಪಸಾದಿಯ ಮನೇನ ಸೋ.
ಸಪುತ್ತದಾರೇಹಿ ¶ ಸಮಗ್ಗವಾಸಂ,
ನರಾದಿನಾಥೋ ನಿವಸಂ ತಹಿಂಸೋ;
ತಿಬ್ಬೇನ ಫುಟ್ಠೋ ಮಹತಾಗದೇನ,
ರಜ್ಜೇನ ಸದ್ಧಿಂ ವಿಜಹಿತ್ಥ ದೇಸಂ.
ಸುಜನಪ್ಪಸಾದಸಂವೇ ಗತ್ಥಾಯ ಕತೇ ಮಹಾವಂಸೇ
ಕುಮಾರೋದಯೋ ನಾಮ
ಸಟ್ಠಿಮೋ ಪರಿಚ್ಛೇದೋ.
ಏಕಸಟ್ಠಿಮ ಪರಿಚ್ಛೇದ
ಸಙ್ಖತ್ಥಲಿಪುರಾಭಿಗಮನೋ
ಸುತ್ವಾ ದ್ವೇ ಭಾತರೋ ಅಞ್ಞೇ, ಜೇಟ್ಠಸ್ಸೋ ಪರತಿಂಸದಾ;
ಖಿಪ್ಪಂ ಸರಟ್ಠಾ ಆಗಮ್ಮ, ಕಾರೇಸುಂ ಅನ್ತಿಮಂ ವಿಧಿಂ.
ಅಥ ಕಿತ್ತಿಸಿರಿಮೇಘೋ, ರಟ್ಠಂ ಜೇಟ್ಠಸ್ಸ ಭಾತುನೋ;
ಅತ್ತಾಧೀನಂ ಕರಿತ್ವಾನ, ಆಮನ್ತಿಯ ಕಣಿಟ್ಠಕಂ.
ದತ್ವಾ ರಟ್ಠದ್ವಯಂ ಅಞ್ಞಂ, ವತ್ಥುಂ ತತ್ಥೇವ ಆದಿಸಿ;
ಸೋ’ಪಿ ಜೇಟ್ಠಸ್ಸ ಭಾತುಸ್ಸ, ವಚನಂ ಸಮ್ಪಟಿಚ್ಛಿಯ.
ಸಮಾದಾಯ ಕುಮಾರಞ್ಚ, ದೇವಿಞ್ಚ ರತನಾವಲಿಂ;
ಧೀತರೋ ದ್ವೇ ಚ ಗನ್ತಾನ, ಮಹಾ ನಾಮಹುಲಂ ಪುರಂ.
ಸಮಗ್ಗಾ ನಿವಸಂ ತತ್ಥ, ಕುಮಾರಸ್ಸ ಸಿಖಾಮಹಂ;
ಕಾರೇತ್ವಾ ಪರಿಹಾರೇನ, ವಡ್ಢೇಸಿ ಮಹತಾ ಸದಾ.
ತತೋ ಸೋ ದೇವಿಯಾ ಜೇಟ್ಠಂ-ಧೀತರಂ ಮಿತ್ತನಾಮಿಕಂ;
ದಾತುಕಾಮೋ ಸಪುತ್ತಸ್ಸ, ಸಹಾಮಚ್ಚೇಹಿ ಮನ್ತಯಿ.
ಕಾಲಿಙ್ಗನ್ವಯಸಮ್ಭೂತಾ, ಪಾಯೇನಖಲು ಭೂಮಿಪಾ;
ಸಾಮಿಭಾವಂ ಗತಾ ಅಸ್ಮಿಂ, ಲಙ್ಕಾದೀಪಮ್ಹೀ ಭೂಯಸೋ.
ಕಾಲಿಙ್ಗಗೋತ್ತ ಸಮ್ಭೂತ, ಗಜಬಾಹುಸ್ಸ ದಾತವೇ;
ಗೂಳರೂಪೇನ ದೇವೀ’ಯಂ, ಯದಿ ಪೇಸೇಯ್ಯ ಧೀತರಂ.
ಭಿಯ್ಯೋ ¶ ವಿವಾಹಸಮ್ಬದ್ಧೋ, ಬಲವಾ ಸೋ ಭವಿಸ್ಸತಿ;
ಮಯ್ಹಂ ಏಸೋ ನಿರಾಲಮ್ಬೋ, ಪುತ್ತೋ ಹೇಹೀತಿ ಸಬ್ಬಥಾ.
ತಸ್ಮಾ ಮೇ ಸುನೂನೋ ಏಸಾ, ದಾತುಂ ಯುತ್ತಾ ಕುಮಾರಿಕಾ;
ಏವಂ ಸತಿ ವತಮ್ಹಾಕಂ, ವಡ್ಢಿಯೇ’ವ ಸಿಯಾ ‘‘ಇತಿ’’.
ದೇವೀಪಿ ಸುತ್ವಾ ತಂ ಸಬ್ಬ-ಮಾದಿಚ್ಚನ್ವಯ ಮಣ್ಡನಾ;
ಸಬ್ಬಥಾ ತಮನಿಚ್ಛನ್ತಿ, ಇದಮಾಹ ಮಹೀಪತಿಂ.
ಘಾತೇತ್ವಾ ಸಕಲೇ ಯಕ್ಖೇ, ಕುಮಾರೋ ವಿಜಯವ್ಹಯೋ;
ಲಂಕಾದೀಪಮಿಮಂ’ಕಾಸಿ, ಮನುಸ್ಸಾವಾಸಕಂ ಸದಾ.
ತತೋ ಪಭುತಿ ಅಮ್ಹಾಕಂ, ಘಟೇಸುಂ ವಿಜಯನ್ವಯಂ;
ಕಾಲಿಙ್ಗವಂಸಜೇಹೇವ, ಸಮ್ಬನ್ಧಂ ಕತ್ವ ಪುಬ್ಬಕಂ.
ಅಞ್ಞಭೂಪಾಲ ಸಮ್ಬನ್ಧೋ, ಸುತಪುಬ್ಬೋ ಪಿನತ್ಥಿನೋ;
ಸೋಮವಂಸ ಸಮುಮ್ಭೂತೇ, ಠಪೇತ್ವಾ ಧರಣಿಸ್ಸರೇ.
ತುಯ್ಹಂ ಜಾತೋತಿ ಅಮ್ಹಾಕಂ, ಸಮ್ಬನ್ಧೋ ಸೋ ಕಥಂ ಸಿಯಾ;
ಅರಿಯನ್ವಯ ಸಮ್ಭೂತ, ಕುಮಾರೇನ ಸಹಾಮುನಾ.
ಏವಂ ಸೋ ದೇವಿಯಾ ತಾಯ, ನೇಕಸೋ ವಾರಯನ್ತಿಯಾ;
ಪಸಯ್ಹಸಕ ಪುತ್ಥಸ್ಸ, ತಂ ಕುಮಾರಿಮದಾಪಯಿ.
ಸೋ ಅನೇಕಗುಣೋದಾರ- ಭರಿಯಾನುಗತೋ ತತೋ;
ರಞ್ಜಯನ್ತೋ ಜನೇ ಸಬ್ಬೇ, ಜನಕಸನ್ತಿಕೇ ವಸಿ.
ಏಕವೀಸತಿಂ ವಸ್ಸಾನಿ, ರಜ್ಜಂ ವಿಕ್ಕಮ ಬಾಹುಸೋ;
ಅನುಭೋತ್ವಾ ಯಥಾಕಮ್ಮಂ, ಕಾಯಭೇದಾ ಗತೋ ಪರಂ.
ತತೋ ಗಜಭುಜೋ ಠಿತಂ, ಸಮ್ಪನ್ನಬಲವಾಹನಂ;
ರಜ್ಜಂ ಹತ್ಥಗತಂ ಕತ್ವಾ, ಪುಲತ್ತಿನಗರೇ ವಸೀ.
ತತೋ ಕಿತ್ತಿಸಿರೀಮೇಘ, ಸಿರೀವಲ್ಲಭ ಭೂಮಿಪಾ;
ವುತ್ತನ್ತ ಮೇತಂ ವಿಞ್ಞಾಯ, ಏವಂ ಸಮನುಚಿನ್ತಯುಂ.
ತಸ್ಸ ವಿಕ್ಕಮ ಬಾಹುಸ್ಸ, ವುದ್ಧಭಾವೇನ ನೇಕಧಾ;
ಮೂಲರಜ್ಜಾಧಿಪಚ್ಚಂ ತಂ, ಅಮ್ಮಂ ನಿನ್ದಾಕರಂ ನ ಹಿ.
ತದತ್ಥಜಸ್ಸ ಬಾಲಸ್ಸ, ಮೂಲರಜ್ಜಂ ಪಸಾಸನೋ;
ಉಪೇಕ್ಖಣಂ ಪನಮ್ಹಾಕಂ, ನೇವಾನುಚ್ಛವಿಕಂ ವತ.
ತೇ ಸೋಯಾವ ಸರಜ್ಜಮ್ಹಿ, ಬದ್ಧಮೂಲೋ ಭವಿಸ್ಸತಿ;
ಪಸಯ್ಹ ತಾವ ತಂ ರಜ್ಜಂ, ವಟ್ಟತಿ ಗಣ್ಹಿತುಂ ಇತಿ.
ವೇಲಕ್ಕಾರ ¶ ಬಲಂ ಸಬ್ಬಂ, ಭಿನ್ದಿಂಸು ಧನ ದಾನತೋ;
ಠಪೇತ್ವಾ ಸೇವಕೇ ಕೇಚಿ, ತಸ್ಸಬ್ಭನ್ತರಿಕೇ ತದಾ.
ಗಜಬಾಹು ಮಹೀಪಾಲೇ, ವಿರತ್ತಾ ರಟ್ಠವಾಸಿನೋ;
ಉಭಿನ್ನಂ ರಾಜೂನಂ ದೂತೇ, ಪೇಸಯುಂ ನೇಕಸೋ ತತೋ.
ರಜ್ಜಂ ಸಾಧೇತ್ವಾ ದಸ್ಸಾಮ, ಏಕೀಭೂತಾ ಮಯಂ ಪನ;
ಉಪತ್ಥಮ್ಭಕಭಾವೋ’ವ, ಕಾತಬ್ಬೋ ಕೇವಲಂ ಇತಿ.
ತತೋ ದ್ವೇ ಭಾತುಕಾ ಸೇನಂ, ಸಕಂ ಸನ್ನಯ್ಹ ವೇಗಸಾ;
ಉಭತೋ ಮುಖತೋ ತಸ್ಸ, ರಟ್ಠಮಜ್ಝಮುಪಾಗಮುಂ.
ಪಹಿಣಿಂಸು ಚ ತೇ ದೂತೇ, ತತೋ ಗಜಬೋಹುವ್ಹಯೋ;
ಭೂಮಿಪಾಲೋ ನಿಜಾಮಚ್ಚೇ, ಸನ್ನಿಪಾತಿಯ ಮನ್ತಯಿ.
ವೇಳಕ್ಕಾರಬಲಂ ಸಬ್ಬ-ಮುಜುಪಚ್ಚತ್ತಿಕಂ ಅಹು;
ರಾಜಾನೋ ದ್ವೇ ಚ ನೋ ರಟ್ಠಂ, ಸಙ್ಗಾಮತ್ಥಮುಪಾಗತಾ.
ಪಠಮಂ ತೇಸು ಪಕ್ಖಸ್ಸ, ಏಕಸ್ಸ ಬಲಿನೋ ಭುಸಂ;
ಮುಖಭಙ್ಗೇ ಕತೇ ಖಿಪ್ಪಂ, ತತೋ ಅಞ್ಞೇ ಸುಸಾಧಿಯಾ.
ಇತಿ ನಿಚ್ಛಿಯ ಸೇನಙ್ಗಂ, ಸಬ್ಬಮಾದಾಯ ಅತ್ತನೋ;
ಸಿರಿವಲ್ಲಭರಾಜಾಭಿ-ಮುಖಂ ಯುದ್ಧಾ’ಯುಪಾಗಮಿ.
ಸಿರಿವಲ್ಲಭರಾಜಾಪಿ, ಸಙ್ಗಾಮ ಮಹಿಭಿಂಸನಂ;
ಪಾತೋ ಪಟ್ಠಾಯ ಸಾಯನ್ಹ-ಕಾಲಂ ಯಾವ ಪವತ್ತಯಂ.
ಅಸಕ್ಕುಣನ್ತೋ’ಭಿಭವಂ, ವಿಧಾತುಂ ತಸ್ಸ ಕಞ್ಚಿಪಿ;
ತತೋವ ಸೋ ನಿವತ್ತಿತ್ವಾ, ಸಕಂ ರಟ್ಠಂ ಗತೋ ಲಹುಂ.
ಗಜಬಾಹುಸ್ಸಗೋಕಣ್ಣ-ಸಚಿವೇನ ಪರಾಜಿತೋ;
ಅಗಾ ರಟ್ಠಂ ಸಕಂ ಕಿತ್ತಿ-ಸಿರಿಮೇಘೋ’ಪಿ ಭೂಪತಿ.
ಗಜಬಾಹುನರಿನ್ದೋಪಿ, ಸಙ್ಗಾಮೇ ತಮ್ಹಿ ಕಿಞ್ಚಿಪಿ;
ಪರಿಹಾನಿಮಸಮ್ಪತ್ತೋ, ಪುನಾ’ಗಮ್ಮ ಪುರನ್ತಿಕಂ.
ಬಲನಾಥೇ ವಿನಿಗ್ಗಯ್ಹ, ಸಾಪರಾಧೇ ಬಹೂ ಬಲೀ;
ರಟ್ಠಂ ವೂಪಸಮೇತ್ವಾನ, ಪಾವೇಕ್ಖಿ ನಗರಂ ಸಕಂ.
ರಟ್ಠೇ ಸಕೇ ಸಕೇಯೇವ, ತತೋ ಪಭೂತಿ ಭೂಮಿಪಾ;
ಅಞ್ಞೋಞ್ಞಮಿತ್ತೇ ಸಮ್ಬನ್ಧಂ, ವಿಧಾಯ ವಿಹರಿಂಸು ತೇ.
ತತೋ ಪರಕ್ಕಮಭುಜೋ, ಧರಣೀ ಪಾಲನನ್ದನೋ;
ಮೇಧಾವೀನೇಕಸಿಪ್ಪೇಸು, ಸಿಕ್ಖಮಾನೋ ಸುಸಾಧುಕಂ.
ವಿಚಾರಕ್ಖಮಪಞ್ಞತ್ತಾ ¶ , ಕಿಚ್ಚಾ ಕಿಚ್ಚೇಸು ನೇಕಸೋ;
ಅಚ್ಚುಳಾರಾಸಯತ್ತಾ ಚ, ಮಹಾಭಾಗತ್ತನೇನ ಚ.
ಅತ್ತನೋ ಮಾತುಭಗಿನೀ, ಸಹವಾಸ ಸುಖಮ್ಹಿ ಚ;
ಅಲಗ್ಗಮಾನಸೋನೇಕ, ಬಲಾಕೀಳಾರಸೇಸು ಚ.
ಸೂರಭಾವಾದಿಸಂಯುತ್ತಾ, ರಾಜಪುತ್ತಾ ತು ಮಾದಿಸಾ;
ಪಚ್ಚನ್ತೇ ಈದಿಸೇ ದೇಸೇ, ಕಥಂ ನಾಮ ವಸಿಸ್ಸರೇ.
ಜಾತದೇಸಞ್ಚ ಮೇ ದಾನಿ, ಯುವರಾಜಪಭೋಗಿಯಂ;
ಗಮಿಸ್ಸಾಮೀತಿ ನಿಗ್ಗಞ್ಛಿ, ತಮ್ಹಾ ಪರಿಜನತ್ಥಿತೋ.
ಕಮೇನ ಸನ್ತಿಕಂ ಸಙ್ಖ-ನಾಯಕತ್ಥಲಿಸಞ್ಞಿನೋ;
ಗಾಮಸ್ಸಾಗಾ ಅಹಿಂ ಕಿತ್ತಿ-ಸಿರಿಮೇಘೋ ನಿಸಮ್ಮ ತಂ.
ಅಭಾವಾ ರಜ್ಜ ದಾಯಾದ-ಸಮಾನಸ್ಸ’ತ್ರಜಸ್ಸ ಮೇ;
ಏಕಾಕೀ’ಹನ್ತಿ ಯೋ ಚಿತ್ತ-ಸನ್ತಾಪೋ ಸನ್ತತಂ ಗತೋ.
ಜೇಟ್ಠಂವ ಭಾತರಂ ಮಯ್ಹಂ, ತಂ ದೇಹಪಟಿಬಿಮ್ಬಕಂ;
ದಟ್ಠುಂ ಮೇ ಸತ್ತತಂ ಪುಞ್ಞಂ, ಮಹನ್ತಮುದಿತಂತಿಚ.
ಪಾಮುಜ್ಜವೇಗವಸಗೋ, ನಗರಂ ತಂ ಮನೋಹರಂ;
ಅಲಙ್ಕಾರಾ ಪಯಿತ್ವಾನ, ತೋರಣಾದೀಹಿ ನೇಕಧಾ.
ಗನ್ತ್ವಾ ಪಟಿಪಥಂಯೇವ, ಬಲೋಘಪರಿವಾರಿತೋ;
ನರಿನ್ದೋ ತಿಥಿನಕ್ಖತ್ತ-ವಿಸೇಸೇ ಸುಭಸಮ್ಮತೇ.
ಅನಞ್ಞಸಾಧಾರಣತಂ, ಸಮ್ಪತ್ತೇಹಿ ಗುಣೇಹಿ ಚ;
ಲಕ್ಖಣೇಹಿ ಚ ಸಬ್ಬೇಹಿ, ಕಲ್ಯಾಣೇಯಿ ಸುಸಂಯುತಂ.
ದಿಸ್ವಾ ಕುಮಾರಂ ಸನ್ತುಟ್ಠೋ, ಆಲಿಙ್ಗಿತ್ವಾನ ಪೇಮತೋ;
ಉರೇ ಕತ್ವಾನ ಚುಮ್ಬಿತ್ವಾ, ಮತ್ಥಕಮ್ಹಿ ಪುನಪ್ಪುನಂ.
ಜನಸ್ಸ ಬಲತೋ ತಸ್ಸ, ಪಸ್ಸತೋ ಲೋಚನೇಹಿ ಸೋ;
ಸನ್ತೋಸ ಅಸ್ಸುಧಾರಾಯೋ, ವಸ್ಸಾಪೇನ್ತೋ ನಿರನ್ತರಂ.
ಮನುಞ್ಞಮೇಕ ಮಾರುಯ್ಹ, ವಾಹನಂ ಸಹ ಸೂನುನಾ;
ಭೇರಿನಿ ದೇನ ಪೂರೇನ್ತೋ, ದಿಸಾ ದಸ ಸಮನ್ತತೋ.
ಪವಿಸಿತ್ವಾ ಪುರಂ ತತ್ಥ, ಅಲಙ್ಕಾರೇ ಮನೋರಮೇ;
ದಸ್ಸಯನ್ತೋ ಸಪುತ್ತಸ್ಸ, ಪಾವಿಸಿ ರಾಜಮನ್ದಿರಂ.
ಲದ್ಧಾ ¶ ತತೋ ಕಞ್ಚುಕೀ-ಸುಪಕಾರ,
ವಗಾದಿನೇಕೇ ಪರಿಚಾರಕೇ ಸೋ;
ನಾನಾಗುಣಾ ರಾಧಿತಮಾನಸಸ್ಸ,
ವಸೀಸಕಾಸೇ ಪಿತುನೋ ಸುಖೇನ.
ಸುಜನಪ್ಪಸಾದಸಂವೇಗತ್ಥಾಯ ಕತೇ ಮಹಾವಂಸೇ
ಸಙ್ಖತ್ಥಲಿಪುರಾಭಿಗಮನೋ ನಾಮ
ಏಕಸಟ್ಠಿಮೋ ಪರಿಚ್ಛೇದೋ.
ದ್ವಿಸಟ್ಠಿಮಪರಿಚ್ಛೇದ
ಪರಮಣ್ಡಲಾಭಿಗಮನೋ
ಅತ್ತನಾಭಿಮತಸ್ಸಾ’ಸು, ಜಾತದೇಸಸ್ಸ ಪತ್ತಿಯಾ;
ಸಮ್ಪುಣ್ಣಮನಸಙ್ಕಪ್ಪೋ, ದುಸ್ಸಙ್ಕಪವಿವಜ್ಜಿತೋ.
ವಜಿರೂಪಮೋರುಪಞ್ಞಾ, ಬಲೇನ ಗುರುಸನ್ತಿಕೇ;
ಲಹುಂ ಬಹುಞ್ಚ ಗಣ್ಹನ್ತೋ, ಸಿಪ್ಪಜಾತಮನೇಕ ಕಂ.
ಜಿನಾಗಮೇಸು ನೇಕೇಸು, ಕೋಟಿಲ್ಲಾ ದೀಸು ನೀತಿಸು;
ಸದ್ದಸತ್ಥೇ ಚ ಕಾವೇಯ್ಯೇ, ಸನಿಘಣ್ಡುಕ ಕೇಟುಭೇ.
ನಚ್ಚಗೀತೇಸು ಸತ್ಥೇಸು, ಹತ್ಥಿಸಿಪ್ಪಾದಿಕೇಸು ಚ;
ಧನು ಖಗ್ಗಾದಿನೇಕೇಸು, ಸತ್ಥೇಸು ಚ ವಿಸೇಸತೋ.
ಪಾರಪ್ಪತ್ತೋ ವಿನೀತತ್ತೋ, ಪಿತು ರಞ್ಞೋ ಸಮಾಚರಿ;
ಅಧಿಪ್ಪಾಯಾನುಕುಲಂ’ವ, ಸದಾ ಭತ್ತಿಪುರಸ್ಸರೋ.
ತದಾ ಸದಾ ದರಾಚಾರ-ಗುಣಾರಾಧಿತಮಾನಸೋ;
ಪಿಯೇನ ವಿಯ ಮಿತ್ತೇನ, ತೇನ ಸದ್ಧಿಂ ಮಹೀಪತಿ.
ಉಯ್ಯಾನಜಲಕೀಳಾದಿ-ಸುಖಂ ನಾನಪ್ಪಕಾರಕಂ;
ಅನುಭೋತ್ವಾ ಸದೇಸಸ್ಮಿಂ, ಸಞ್ಚರನ್ತೋ ತಹಿಂ ತಹಿಂ.
ಏಕದಾಸಙ್ಖಸೇನಾಧಿ-ಪತಿನಾ ದಳ್ಹಭತ್ತಿನಾ;
ಸರಟ್ಠಸೀಮಾ ರಕ್ಖಾಯ, ಯೋ ಜಿತೇನ ಬಲೀಯಸಾ.
ಅಜ್ಝಾವುತ್ಥಸ್ಸ ¶ ಚ ಬಲತ್ಥ-ಲಿನಮಸ್ಸ ಚ ಸನ್ತಿಕಂ;
ಗಾಮಸಾ’ಗಞ್ಛಿ ಸುತ್ವಾನ, ತಮತ್ಥಂ ಧಜಿನೀಪತಿ.
ಗಾಮಂ ತಂ ಸಾಧುಕಂ ಸಜ್ಜು, ಸಜ್ಜಾಪೇತ್ವಾ ಸಪುತ್ತಕಂ;
ಪಚ್ಚುಗ್ಗನ್ತ್ವಾ ಮಹೀಪಾಲಂ, ಪಣಮಿತ್ವಾ ಠಿತೋ ತದಾ.
ಪಿತಾ ಪುತ್ತೋ ಉಭೋ ತಸ್ಸ, ಸಮ್ಭಾಸಿಯ ಪಿಯಂ ವಚೋ;
ನೇಕಧಾ’ರಾಧಿತಾ ತೇನ, ತಂ ಗಾಮಂ ಸಮುಪಾಗಗುಂ.
ತಹಿಂ ಕತಿಚಿ ಭೂಪಾಲೋ, ವಾಸರೇ ವೀತಿನಾಮಿಯ;
ಸೇನಾಪತಿಂ ಸಮಾಹೂಯ, ಇದಂ ವಚನಂ ಮಬ್ರವಿ.
ಪುತ್ತೋ ಮೇ ದಾನಿವಯಸಿ, ಠಿತೋ’ ಪನಯನಾರಹೇ;
ತಸ್ಸೋಪನಯನಂ ಕಾತುಂ, ಮಹೋಪಕರಣಂ ಲಹುಂ.
ಸಜ್ಜೇತಬ್ಬನ್ತಿ ತಂ ಸುತ್ವಾ, ಸೋಪಿ ಸೇನಾಧಿನಾಯಕೋ;
ಸಬ್ಬುಪಕರಣಂ ಖಿಪ್ಪಂ, ಮಙ್ಗಲತ್ಥಂ ಸುಸಜ್ಜಯಿ.
ಸುಗನ್ಧ ದೀಪಪುಪ್ಫಾದಿ-ವತ್ಥೂಹಿ ದಿವಸತ್ತಯಂ;
ಪುಬ್ಬಕಾರಂ ಕರಿತ್ವಾನ, ಮಹನ್ತಂ ರತನತ್ತಯೇ.
ವೇದಿಕಾಚಾರದಕ್ಖೇಹಿ, ದ್ವಿಜೇಹಿ ಪುಥುವೀಪತಿ;
ಸಮ್ಪಭಾವಾನು ರೂಪಂವ, ಮಙ್ಗಲಂ ತಂ ಸಮಾಪಿಯ.
ಪರಕ್ಕಮಕುಮಾರೇನ, ತೇನ ಸದ್ಧಿಂ ಸಮಾರಭಿ;
ವಸನ್ತಕೀಳಂ ಮಹತಿಂ, ಸಾಮಚ್ಚೋ ಕೀಳಿತುಂ ತದಾ.
ರಾಜಾ ಕಿತ್ತಿ ಸಿರೀಮೇಘೋ-ರೋಹಣೇ ವಸತೋ ತದಾ;
ಸಿರೀವಲ್ಲಭನಾಮಸ್ಸ, ಸಭಾತು ಮರಣಮ್ಪಿ ಚ.
ಮಾಣಭರಣನಾಮಸ್ಸ, ರಜ್ಜಲಾಭಞ್ಚ ದೇವಿಯಾ;
ಮಿತ್ತಾಯ ಪಟಿಲಾಭಞ್ಚ, ಸಿರೀವಲ್ಲಭಸೂನು ನೋ.
ರೋಹಣಾಗತದೂತೇಹಿ, ಸುಣಿತ್ವಾ ಸಕಭಾತುನೋ;
ಕಾಲಕ್ರಿಯಾಯ ಸಞ್ಜಾತ-ಸೋಕವೇಗಂ ಸುದುಸ್ಸಹಂ.
ಮಿತ್ತಾಯತನಯುಪ್ಪತ್ತಿ ಪವತ್ತಿಂ ಸವಣೇನ ತಂ;
ವಿನೇಯ್ಯ ವಿರತೋ ತಮ್ಹಾ, ವಸನ್ತಸಮಯುಸ್ಸವಾ.
ನಿವತ್ತೇತ್ವಾನ ತತ್ಥೇವ, ಸೇನಾನಿಂ ಸಙ್ಖನಾಮಕಂ;
ಪುತ್ತೇನ ಸಹ ಸೋ ಸಙ್ಖ-ತ್ಥಲಿ ನಾಮಂ ಪುರಂ ಗಮಿ.
ಪರಕ್ಕಮಕುಮಾರೇನ, ತೇನ ಸದ್ಧಿಂ ತಹಿಂ ಸುಖಂ;
ವಸತೋ ತಸ್ಸ ಭೂಪಸ್ಸ, ವಸ್ಸಮೇಕಮತಿಕ್ಕಮಿ.
ಮಾಣಾಭರಣಭೂಪಸ್ಸ ¶ , ದೇವೀ ಚಾಪಿ ಪಭಾವತೀ;
ಲಭಿತ್ಥ ದುತಿಯಾ ಕಿತ್ತಿ-ಸಿರೀ ಮೇಘವ್ಹಯಂ ಸುತಂ.
ಸುಣಿತ್ವಾ ತಞ್ಚ ಸೋ ಅಮ್ಹಂ, ವಂಸೋ ಜಾತೋ ಮಹಾ’’ಇತಿ;
ಅಹು ಕಿತ್ತಿಸಿರೀಮೇಘೋ, ತದಾ ಅತ್ತಮನೋ ಭುಸಂ.
ಲಂಕಾದೀಪೋಪಭೋಗೇಕ-ಹೇತುನಾ ಮಹತಾ ಸತಾ;
ಅಸಾಧಾರಣಭೂಭೇನ, ಚೋದಿತೋ ಪುಞ್ಞಕಮ್ಮುನಾ.
ಕುಮಾರೋ ಸೋ’ಥ ಪಿತರಾ, ಪಿಯಮಿತ್ತೇ ವಿಯತ್ತನಿ;
ಕರಿಯಮಾನಂ ಸಸ್ನೇಹಂ, ಮಹನ್ತಂ ಚೋ’ಪಲಾಲನಂ.
ಸಚಿವಾನಮನೇಕೇಸಂ, ಭಯಭತ್ತೀ ಪುರಸ್ಸರಂ;
ಕ್ರಿಯಮಾನಮುಪಟ್ಠಾನಂ, ನ ಮಞ್ಞನ್ತೋ ತಿಣಾಯಪಿ.
ಲಂಕಾದೀಪಮಿಮಂ ಸಬ್ಬ ಮೇಕಚ್ಛತ್ತೋ ಪಸೋಭಿತಂ;
ಖಿಪ್ಪಂ ಕಾರೇತುಕಾಮೋ ಸೋ, ಸಯಂ ಇತಿ ವಿಚಿನ್ತಯಿ.
ಕೇಸ ಅಕ್ಖಕ ಗೀವಟ್ಠಿ-ದಾಠಾ ಪತ್ತಾನ ಮೇವ ಚ;
ಪದಚೇತ್ಯ ಮಹಾಬೋಧಿ-ಸಾಖಾನಞ್ಚಾಪಿ ಸತ್ಥುನೋ.
ಚತುರಾಸೀತಿಸಹಸ್ಸಾನಂ, ಧಮ್ಮಕ್ಖನ್ಧಾನ ಮೇವ ಚ;
ಸಮ್ಮಾಸಮ್ಬುದ್ಧಕಪ್ಪಾನಂ, ಆಧಾರತ್ತಾ ಚ ನಿಚ್ಚಸೋ.
ಆಕರತ್ತಾ ಚ ನೇಕೇಸಂ, ಮಣಿಮುತ್ತಾದಿವತ್ಥೂನಂ;
ಸಮ್ಮತೋಪಿ ವಿಸಿಟ್ಠೋತಿ, ದೀಪೋನಾತಿ ಮಹಾ ಅಯಂ.
ತಯೋ ಮೇ ಪಿತರೋ ಭೂಪಾ, ಮಾತುಲೋಪಿ ಚ ಸಬ್ಬಥಾ;
ಏಕಚ್ಛತ್ತೇನ ವತ್ತೇತು, ಮಸಮತ್ಥಾ ವಿಭಜ್ಜಿ’ಮಂ.
ಭುಞ್ಜನ್ತಾ ಏತ್ತಕೇನೇವ, ಕತಕಿಚ್ಚಾ ಮಯಂ ಇತಿ;
ಮಞ್ಞನ್ತಾ ವಿಗತಚ್ಛನ್ದಾ’ಭಿಸೇಕಮ್ಹಿ ಕುಲೋಚಿತೇ.
ರಟ್ಠೇಸಕೇ ಸಕೇಯೇವ, ಇಸ್ಸೇರಂ ಸಮ್ಪವತ್ತಯುಂ;
ಕಸಿಕಮ್ಮಾದಿಕಂ ಗಾಮ-ಭೋಜಕಾ ವಿಯ ನಿಸ್ಸಿತಾ.
ತೇಸು ಕಿತ್ತಿಸಿರಿ ಮೇಘಂ, ಪೇತ್ತೇಯ್ಯಂ ಮೇ ಠಪೇತ್ವ ತೇ;
ಅಗಮಂಸು ಯಥಾಕಮ್ಮಂ, ಸೇಸಾ ಭೂಪತಯೋ ತಯೋ.
ಮಚ್ಚಾನಂ ಪರಮಂ ಆಯು, ವತೇ’ದಾನಿ ಪರಿತ್ತಕಂ;
ಬಾಲಾಯುವಾನೋ ವುದ್ಧಾ ಚ, ಇಮೇ ಸತ್ತಾ’ನುಪುಬ್ಬಸೋ.
ಪಾಪುಣಿಸ್ಸನ್ತಿ ಮರಣ-ಮೀತಿ’ಯಂ ನಿಯಮೋಪಿ ಚ;
ನ ಹೇವ ಅಸ್ಮಿಂ ಲೋಕಸ್ಮಿಂ, ಸಂವಿಜ್ಜತಿ ಕದಾಚಿಪಿ.
ತಸ್ಮಾ ¶ ಸರೀರಕೇ ಅಸ್ಮಿಂ, ಭಙ್ಗುರೇ ಸಾರವಜ್ಜಿತೇ;
ಹೀಳಿತೇ ಸಾರದಸ್ಸೀಹಿ, ಅಪೇಕ್ಖಂ ಹಿತ್ವಾ ಸಬ್ಬಥಾ.
ಪಿಹನಿಯೇ ಯಸೋದೇಹೇ, ಚಿರಟ್ಠಾಯಿಮ್ಹಿ ಸಬ್ಬದಾ;
ಅಮ್ಹಾದಿಸೇಹಿ ಕತ್ತಬ್ಬೋ, ರಾಜಪುತ್ತೇಹಿ ಆದರೋ.
ಉಮ್ಮಗ್ಗಜಾತಕಾದೀಸು, ಚಾರಿತ್ತಞ್ಚಾಪಿ ಭೂಮಿಸು;
ವಿಹಿತಂ ಬೋಧಿಸತ್ತೇನ, ವೀರಭಾವಾದಿನಿಸ್ಸಿತಂ.
ರಾಮಾಯಣಭಾರತಾದಿ-ಲೋಕಿಯಾಸು ಕಥಾಸುಪಿ;
ರಾಮಸ್ಸ ವಿಕ್ಕಮಞ್ಚೇವ, ತಸ್ಸ ರಾವಣಘಾತಿನೋ.
ದುಯೋಧನಾದಿರಾಜಾನೋ, ಹನ್ತ್ವಾಯುದ್ಧೇ ಪವತ್ತಿತಂ;
ವಿಕ್ಕಮಾತಿ ಸಯಞ್ಚೇವ, ಪಞ್ಚನ್ನಂ ಪಣ್ಡುಸೂನೂನಂ.
ಇತಿಹಾಸಕಥಾಯಞ್ಚ, ದೇವಾಸುರರಣೇ ಪುರಾ;
ದುಸ್ಸನ್ತಾದಿಮಹೀಪೇಹಿ, ಕತಞ್ಚ ಚರಿತಬ್ಭೂತಂ.
ಉಮ್ಮೂಲಿತವತೋ ತಸ್ಸ, ನನ್ದವಂಸನರಿಸ್ಸರೇ;
ಚಾರಕ್ಕದ್ವಿಜಸೇಟ್ಠಸ್ಸ, ಸುತ್ವಾ ಬುದ್ಧಿಬಲಮ್ಪಿ ಚ.
ಸಬ್ಬಾ ನೇತಾನಿ ಲೋಕಮ್ಹಿ, ಯಾವಜ್ಜದಿವಸಾ ಭುವಿ;
ತೇಸಂ ಅಸನ್ನಿಧಾನೇಪಿ, ಸುಪ್ಪಸಿದ್ಧಿಂ ಗತಾನಿ ಹಿ.
ಸುಲದ್ಧಂ ಜೀವಿತಂ ತೇಸಂ, ಅಸಾಧಾರಣಮೀದಿಸಂ;
ಚರಿತಾತಿಸಯಂ ಕತ್ತುಂ, ಸಮತ್ಥಾ ಹೋನ್ತಿ ಯೇ ಭುವಿ.
ಜಾಯಿತ್ವಾ ಖತ್ತವಂಸಮ್ಹಿ, ಖತ್ತವೀರವರೋಧಿತಂ;
ಯದಿಹಂ ನ ಕರಿಸ್ಸಾಮಿ, ಮೋಘಾ ಮೇ ಜಾತಿ ಹೇಸ್ಸತಿ.
ತೇಸಮಬ್ಭಧಿಕಾ ಕಾಲ-ಸಮ್ಪದಾಯೇವ ಕೇವಲಂ;
ಮಯಾ ತೇ ಅಧಿಕಾ ಕಿನ್ತು, ಪಞ್ಞಾದೀಹೀತಿ ಚಿನ್ತಿಯ.
ಪಿತುರಾಜಾ ಚ ಮೇ’ದಾನಿ, ಪಚ್ಛಿಮೇ ವಯಸಿಟ್ಠಿತೋ;
ಯದಿದಂ ಪೇತ್ತಿಕಂ ರಜ್ಜಂ, ಮಮ ಹತ್ಥಗತಬ್ಭವೇ.
ರಾಜಲಕ್ಖಿವ ಸೋ ಪೇತ-ಚೇತಸೋ ಮೇ ಪಮಾದತೋ;
ಯಥಿಚ್ಛಿತಞ್ಚೇ ನ ಭವೇ, ಮಹತೀ ಜಾನಿ ಮೇ ಭುಸಂ.
ಏತ್ಥೇವ ನಿವಸನ್ತೋ’ಹಂ, ಚರಾಪಿಯ ಸಕೇ ವರೇ;
ಪರಮಣ್ಡಲವುತ್ತನ್ತಂ, ಜಾನೇಯ್ಯಂ ಯದಿ ತತ್ತನೋ.
ರನ್ಧಂ ಪಚ್ಚತ್ಥಿಕಾನನ್ತು, ಪಕಾಸೇತುಂ ರಥಾತಥಂ;
ಅಧಿಪ್ಪಾಯಾನುರೂಪಂ ಮೇ, ಸಮತ್ಥಾ ವಾ ನ ವಾಚರಾ.
ಯೇ ¶ ಕೇಚಿ’ಧ ಜನಾ ಸನ್ತಿ, ಸಬ್ಬೇ ತೇ ಮಮ ಸಮ್ಮುಖಾ;
ಬಲೀಯತ್ತಂ’ವ ಸತ್ತೂನಂ, ಕಥಯನ್ತಿ ಅನೇಕಸೋ.
ಪಚ್ಚೇಕರಟ್ಠಸಾಮೀಹಿ, ಪಿತುಭೂಪೇಹಿ ತಿಹಿಪಿ;
ಏಕೀಭೂಯ ಕರಿತ್ವಾನ, ಸತ್ತಕ್ಖತ್ತುಂ ಮಹಾಹವಂ.
ಸಾಧೇತುಂ ದುಕ್ಕರಂ ರಟ್ಠಂ, ಭವತೇ ಕಾಕಿನಾ ಕಥಂ;
ಸಿಸುನಾ ಗಣ್ಹಿತುಂ ಸಕ್ಕಾ, ಖುದ್ದರಜ್ಜೋ ಪಭೋಗಿನಾ.
ಸುಕರಂ ಮೂಲಭೂತಸ್ಸ, ತಸ್ಸ ರಜ್ಜಸ್ಸ ಸಾಧನಂ;
ಇತಿ ದುಚ್ಚಿನ್ತಂತಂ ತುಯ್ಹಂ, ದೂರೇ ತಬ್ಬಮಿದಂ’’ಇತಿ.
ಕಣ್ಣೇ ತತ್ಥಸಲಾಕಾಯೋ, ಪವೇಸೇನ್ತಾ’ವ ನೇಕಸೋ;
ಮಹನ್ತತ್ತಂ ಕಥೇನ್ತೇ’ವಂ, ಬಹುಧಾ ಪರಮಣ್ಡಲೇ.
ಅಜಾನನಂ ಯಥಾಭೂತಂ, ವದನ್ತಾನಂ ಕುಬುದ್ಧಿನಂ;
ಸಬ್ಬಮೇತಂ ವಚೋ ಜಾತು, ಸದ್ಧಾತಬ್ಬಂ ಸಿಯಾ ನ ಹಿ.
ಲೇಸೇನೇಕೇನ ಗನ್ತ್ವಾನ, ಖಿಪ್ಪಂ’ವ ಪರಮಣ್ಡಲಂ;
ಸರೂಪಂ ತತ್ಥ ಉಸ್ಸಾಮಿ, ಅಹಮೇವೇತಿ ಚಿನ್ತಯಿ.
ಯದಿ ಮೇ ಪೀತುಭೂಪಾಲೋ, ವಿಞ್ಞಾಯೇತಂ ವಿತಕ್ಕಿತಂ;
ಅಭಿಜಾತಸ್ಸ ಪುತ್ತಸ್ಸ, ವಂಸಜೋತಿಕರಸ್ಸ ಮೇ.
ಗತಸ್ಸ ಸತ್ಥು ವಿಸಯ-ಮನತ್ಥೋಪಿ ಸಿಯಾ ಇತಿ;
ಅನುಕಮ್ಪಾಧಿಯಾ ಮಯ್ಹಂ, ಗಮನಂ ವಾರಯಿಸ್ಸತಿ.
ಮನೋರಥಸ್ಸ ಸಂಸಿದ್ಧಿ, ಸಬ್ಬಥಾ ಮೇನ ಹೇಸ್ಸತಿ;
ತಸ್ಮಾ ನಿಗುಳರೂಪೇನ, ಗಮನಂ ಭದ್ದಕಂ ಇತಿ.
ಲದ್ಧಾನ ರತ್ತಿಯಮ ಥೇಕದಿನಂ ಖಣಞ್ಞೂ,
ಸೋ ತಾದಿಸಂ ಖಣಮಖೀಣತರೋರೂಪಾಯೋ;
ಜಾನಾತಿ ನೋ ಸಕಪಿತಾಗಮನಂ ತಥಾತಂ,
ಗೇಹಾ’ಭಿನಿಕ್ಖಮಿತಥಾ ಚತುರೋ ಕುಮಾರೋ.
ಸುಜನಪ್ಪಸಾದಸಂವೇಗತ್ಥಾಯ ಕತೇ ಮಹಾವಂಸೇ
ಪರಮಣ್ಡಲಾಭಿಗಮನೋ ನಾಮ
ದ್ವಿಸಟ್ಠಿಮೋ ಪರಿಚ್ಛೇದೋ.
ತಿಸಟ್ಠಿಮ ಪರಿಚ್ಛೇದ
ಸೇನಾಪತಿವಧೋ
ನಿಜಾಯುಧದುತಿಯಸ್ಸ ¶ , ನಿಕ್ಖಮನ್ತಸ್ಸ ತಸ್ಸ ಹಿ;
ತಂ ಖಣಂ ಪುರತೋ ಕೋ’ಪಿ, ಸಙ್ಖಸದ್ದೋ ಸಮುಗ್ಗತೋ.
ತತೋ ನೇಕನಿಮಿತ್ತಞ್ಞೂ, ಕುಮಾರೋ ತಂ ಸುಣಿ ತ್ವ ಸೋ;
ನಿಪ್ಫಜ್ಜಿಸ್ಸತಿ ಸಙ್ಕಪ್ಪೋ, ಖಿಪ್ಪಂ ಯೇವೇತಿ ಮೋದವಾ.
ತತ್ಥ ತತ್ಥ ನಿಯುತ್ತಾನಂ, ರಕ್ಖಕಾನಮಜಾನತಂ;
ನಿಕ್ಖಮಿತ್ವಾ ಪುರಾವೀತ-ಭಯೋ ಸೀಹಪರಕ್ಕಮೋ.
ವೇಗೇನ ಮಗ್ಗಂ ಗನ್ತ್ವಾನ, ಪಞ್ಚಗಾವುತಮತ್ತಕಂ;
ಬದಲತ್ಥಲಗಾಮಸ್ಸ, ಪದೇಸೇನಾತಿ ದೂರಕೇ.
ಗಾಮ ಮೇಕಮುಪಾಗಞ್ಚಿ, ಪಿಲಿಂ ವತ್ಥೂತಿ ಸಞ್ಞಿತಂ;
ಜನಾನಂ ಸನ್ನಿಪಾತಾಯ, ನಿಜಾನಂ ಸೋ ಕತಾವಧಿ.
ನಿಜಾಗಮನತೋ ಪುಬ್ಬಂ, ಪಟಿಮಗ್ಗೇ ನಿಸೀದಿತುಂ;
ಪಟಿಲದ್ಧನಿಯೋಗಾನಂ, ಯೇಚಿ ದೇವಾಗತೇ ತದಾ.
ತಹಿಂ ಠಿತೇ ಸೋ ಪಸ್ಸಿತ್ವಾ, ಏತ್ತಕಾ ಕಿನ್ನು ಆಗತಾ;
ಇತಿ ಪುಚ್ಛಿ ಕುಮಾರೋಥ, ತೇಪಿ ತಂ ಇದ ಮಬ್ರವುಂ.
ಲೋಕಪ್ಪವತ್ತಿಂ ಸಕಲಂ, ಜಾನನ್ತೇನಾಪಿ ಸಾಮಿನಾ;
ಕಿಮೇವ ಮುಚ್ಚತೇ ಮಚ್ಚು-ಭಯಂ ಕೇಸಂ ನ ವಿಜ್ಜತಿ.
ಬಾಲಾತಾನುಗತೋ ಸಾಮಿ, ಠಿತೋ ವಯಸಿ ಈದಿಸೇ;
ಅಜ್ಜಾಪಿ ಹಿ ಮುಖೇ ತುಯ್ಹಂ, ಖೀರಗನ್ಧೋ ಪವಾಯತಿ.
ನ ಹೇವತ್ಥಿ ವಿಸುಂ ವಿತ್ತ-ಜಾತಂ ಸಙ್ಗಹಿತಂ ತವ;
ತದಞ್ಞಾ ಚೋಪಕರಣ-ಸಾಮಗ್ಗೀ ನೇವ ವಿಜ್ಜತೇ.
ಚಿರಮ್ಪರಿಚಿತತ್ತೇಹಿ, ದಳ್ಹಂ ಸಾರುಳಭತ್ತಿಹಿ;
ವಿನಾ’ಮ್ಹೇಹಿ ವಿಸುಂ ಕೇವಾ’ನುಗನ್ತಾರೋ ಜನಾತುವಂ.
ಕಿಞ್ಚಾಗತಾನಮಮ್ಹಾಕಂ, ಪಿತಾ ತುಯ್ಹಂ ನರಿಸ್ಸರೋ;
ಕಾರೇಸ್ಸತಿ ಇದಂ ನಾಮ, ಸಬ್ಬಥಾ ನೇವ ಞಾಯತೇ.
ಅಮ್ಹಾಕಮನ್ತರಾಮಗ್ಗೇ ¶ , ಸಙ್ಖೋ ನಾಮ ಚಮೂಪತಿ;
ಮಹಬ್ಬಲೋ ಮಹಾವೀರೋ, ರಜ್ಜಸೀಮಂ ತಮಾವಸಂ.
ಪಚ್ಚತ್ಥಿತೇ ಠಪೇತ್ವಞ್ಞೇ, ಏತೇ ಕತಿಪಯಾ ಮಯಂ;
ಅಞ್ಞಮಞ್ಞಮ್ಹಿ ನಿಯತ-ಮಾಸಙ್ಕೀ ಹದಯಾ ಭುಸಂ.
ಅರುಣುಗ್ಗಮವೇಲಾ ಚ, ಸಮಾಸನ್ನತರಾಧುನಾ;
ಇತಿ ಭೀತಿಂ ಪಕಾಸೇಸುಂ, ಪಚ್ಚೇಕಂ ಹದಯಸ್ಸಿತಂ.
ನಿಸಮ್ಮ ತೇಸಂ ವಚನಂ, ವಿಧಾಯ ಮಧುರಂ ಸಿತಂ;
ವೀತಸಙ್ಕೋ ಕುಮಾರೋ ಸೋ, ಮುಖಾನೇ’ಸಂ ವಿಲೋಕಿಯ.
ಚರಿತ್ವಾಪಿ ಮಯಾ ಸದ್ಧಿ-ಮೇತೇ’ಹೋ ಕಾಲಮೇತ್ತಕಂ;
ನ ಜಾನಿಂಸು ಮಮಂ ಸಬ್ಬೇ, ಯೇಸಞ್ಹಿ ಭಯಮಿದಿಸಂ.
ಇತಿ ವತ್ವಾ ಭಯಂ ತೇಸಂ, ವಿನೋದೇತು ಮುಪಟ್ಠಿತಂ;
ಸೀಹನಾದಂ ತದಾ’ಕಾಸಿ, ಮಹನ್ತಂ ಸೀಹವಿಕ್ಕಮೋ.
ತಿಟ್ಠನ್ತು ಮಾನುಸಾ ಸಬ್ಬೇ, ಮಯಿ ಹತ್ಥಗತಾಯುಧೇ;
ಸಕ್ಕೋ ದೇವಾನಮಿನ್ದೋಪಿ, ಕುಪಿತೋ ಕಿಂ ಕರಿಸ್ಸತಿ.
ಬಾಲೋತಿ ಮಂ ಚಿನ್ತಯ ತಂ, ಜಾತಾ ವೋ ಕುಮತೀದಿಸೀ;
ಪರಿಕ್ಖೀಯತಿ ತೇ ಜಾಣಾ, ನವಯೋ’ತಿ ನ ಕಿಂ ಸುತಂ.
ಅಜ್ಜೇವ ಕಾತುಮೇಕೇನ, ಕಮ್ಮುನಾ ಚಿನ್ತಿತೇನ ಮೇ;
ಸದೇಸಪರ ದೇಸಟ್ಠಾ, ಭಯಭತ್ತೀ ಯಥಾಮಯಿ.
ಕರಿಸ್ಸನ್ತಿ ಯಥಾ ವೇದಂ, ಭಯಂ ತುಮ್ಹೇ ಜಹಿಸ್ಸಥ;
ತಥಾ ರತ್ತಿಯಮೇತಾಯ, ವಿಭಾತಾಮಯ ಖಣೇನ ಮೇ.
ಉನ್ನತೇ ದಸ್ಸಯಿಸ್ಸಾಮಿ, ಬುದ್ಧಿ ಸಾಹಸವಿಕ್ಕಮೇ;
ಅನುಧಾವತಿ ಮಂ ತಾತ, ಸೇತೇಹಿ ಯದಿ ವೋ ಭಯಂ.
ಪುರತೋ ಹೋಥ ತುಮ್ಹೇಹಿ, ವತ್ವಾ ತೇ ಗಹಿತಾಯುಧೋ;
ಸಾಹಸೇಕರಸೋ ವೀರೋ, ತಮ್ಹಾ ನಿಕ್ಖಮ್ಮ ಗಾಮತೋ.
ಉದಯಾ’ಚಲಸೀಸಟ್ಠಂ, ಜೇತುಮಾದಿಚ್ಚಮಣ್ಡಲಂ;
ಅಪರಂ ರವಿ ಬಿಮ್ಬಂವ, ಪಚ್ಛಿಮಾ ಸಾ ಮುಖೋದಿತಂ.
ತೇಜಸಾ ಪಸರನ್ತೇನ, ಜನಾನಂ ಪವಿಕಾಸಯಂ;
ನೇತಮ್ಬುಜವನಂ ಪಾತೋ, ಬದಲತ್ಥಲಿಮಾಗಮಿ.
ಜಘಸಙ್ಖಸ್ಸರೇನಾ’ಥ, ಸೇನಾ ನಾಥೋ ಪಬುಜ್ಝಿಯ;
ಸಞ್ಜಾತಸಮ್ಭಮೋ ಞತ್ವಾ, ರಾಜಪುತ್ತಮುಪಾಗತಂ.
ಸದ್ಧಿಂ ¶ ಬಲೇನ ಮಹತಾ, ಪಧುಗ್ಗಮ್ಮಕತಾದರೋ;
ಪಣಾಮಮುಚಿತಂ ಕತ್ತು-ಮಾನತೋ ವಸುಧಾತಲೇ.
ಅಮ್ಹಾಕಮೇಸಜೀವನ್ತೋ, ಕಿಂ ನಾಮತ್ಥಂ ಕರಿಸ್ಸತಿ;
ಮಾರೇತಬ್ಬೋ’ಧುನೇವೇತಿ, ಪಸ್ಸನ್ತೇ ಸಮುಖಂ ಭಟೇ.
ನೇವಾ’ದಿಟ್ಠಾಪರಾಧಸ್ಸ, ಮರಣಂ ಪುರಿಸೋ ಚಿತಂ;
ವಧೋ ವಿರೋಧೇ ಸಕ್ಕಾ’ತಿ, ಇಙ್ಗಿತೇನ ನಿವಾರಿಯ.
ಸೇನಾಪತಿಸ್ಸ ಸೋ ಹತ್ಥಂ, ಗಹೇತ್ವಾ ಸೀಹಸನ್ನಿಭೋ;
ಭಾಸನ್ತೋ ಮಧುರಂ ವಾಚಂ, ತಸ್ಸೇವಾ’ಗಞ್ಛಿ ಮನ್ದಿರಂ.
ಅಥಸ್ಸ ಗಮನಂ ರಞ್ಞೋ, ಭವಿತಬ್ಬಮಜಾನತಾ;
ಸರೂಪಂ ಯಾವ ಜಾನಾಮಿ, ತಾವಸ್ಸೇತೇ ಸಹಾಗತಾ.
ಯಥಾ ನ ಸಹಿತಾ ಹೋನ್ತಿ, ಠಪೇತಬ್ಬಾ ವಿಸುಂ ವಿಸುಂ;
ಕುಮಾರೋ’ವ ಮಮಾಗಾರೇ, ವಸತೂ’ತಿ ವಿಚಿನ್ತಿಯ.
ತಥಾ ಸೇನಾಪತಿ ಕತ್ವಾ, ವಞ್ಚೇತುಂ ತಂ ಮಹಾಮತಿಂ;
ದಸ್ಸೇತ್ವಾ’ತಿ ಥೀಸಕ್ಕಾರಂ, ರಞ್ಞೋ ದೂತೇ ಸ ಪೇಸಯಿ.
ಕುಮಾರೋ’ಥ ವಿದಿತ್ವಾನ, ತೇನ ತಂ ವಞ್ಚನಂ ಕತಂ;
ಕತ್ತಬ್ಬಮೇತ್ಥಾ’ಕತ್ವಾಹ, ಮುದಾಸೀನೋ ಭವೇ ಯದಿ.
ಇಚ್ಛಿತತ್ಥಸ್ಸ ನಿಪ್ಫತ್ತಿ, ನ ಮೇ ಜಾತು ಭವಿಸ್ಸತಿ;
ಅಯಂ ತಾವಾ’ಧುನಾವಸ್ಸಂ, ಮಾರೇತಬ್ಬೋತಿ ಚಿನ್ತಿಯ.
ಸಹಾಗತಂ ಪಯೋಜೇತ್ವಾ, ಘಾತಾಪಯಿ ಚಮೂಪತಿಂ;
ಹತೋ ಸೇನಾಧಿನಾಥೋ’ತಿ, ಮಹನ್ತಂ ಖುಭಿತಂ ಅಹು.
ಸೇನಾನಾಥಭಟೋ ಏಕೋ, ಸುತ್ವಾ ಸೇನಾಪತಿಂ ಹತಂ;
ಮಾರಣಂ ಸಾಮಿನೋ ಮಯ್ಹಂ, ಕಿಂ ನಿಮಿತ್ತಮೀತಿ ಬ್ರವಿ.
ನೇತ್ತಿಂ ಸಪಾಣೀ ಸಹಸಾ, ಕುಮಾರಂ ಠಿತಮೇಕಕಂ;
ಅಭಿದಾವಿ ಸಸಾಮಿಸ್ಸ, ಪರಿಚತ್ತತ್ತಜೀವಿನೋ.
ಕುಮಾರಸ್ಸ ಮುಖಂ ದಿಸ್ವಾ, ವೇಧಮಾನೋ ಭಯೇನ ಸೋ;
ಪುರೇ ಠಾತುಮಸಕ್ಕೋನ್ತೋ, ಪಾದಮೂಲೇ ತತೋ ಸಯಿ.
ಗಣ್ಹಥೇ’ತನ್ತಿವಚನಾ-ಕುಮಾರಸ್ಸ ¶ ಪುರೇತರಂ;
ತಸ್ಸೇವೇಕೋ ಸಹಚರೋ, ಭಟಮೇತಂ ವಿಘಾತಯಿ.
ನಿಯೋಗಂ ಮೇ ವಿನಾ ತೇನ, ಕತಂ ಕಮ್ಮಂ ನ ಯುಜ್ಜತಿ;
ಇತಿ ದಣ್ಡನಮೇತಸ್ಸ, ಕಾರಾಪೇಸಿಯಥೋಚಿತಂ.
ಅಥ ತಂ ಕಾಲಯಮ್ಭೂತ-ಸಙ್ಖೋಭಮತಿಭಿಂಸನಂ;
ಭಮುಕ್ಖಿಪನಮತ್ತೇನ, ರಾಜಪುತ್ತೋ ಸಮಂ ನಯಿ.
ವೀರೋ ಯಸೋಧರಧನೋ ಧಿತಿಮಾ ಕುಮಾರೋ;
ವೀರೋಪಕಾರಚತುರೋ ವರಕಿತ್ತಿಸಾರೋ;
ಸೇನಿನ್ದಸಞ್ಚಿತಮನಪ್ಪಧನಂ ಭಟಾನಂ;
ಸಬ್ಬಂ ವಿಸಜ್ಜಯಿ ಯಥಾರುಚಿಯಾ ಗಹೇತುಂ.
ಸುಜನಪ್ಪಸಾದಸಂವೇಗತ್ಥಾಯ ಕತೇ ಮಹಾವಂಸೇ
ಸೇನಾಪತಿವಧೋ ನಾಮ
ತಿಸಟ್ಠಿಮೋ ಪರಿಚ್ಛೇದೋ.