ಅಞ್ಞ > ಬ್ಯಾಕರಣ ಗನ್ಥ-ಸಙ್ಗಹೋ > ಸುಬೋಧಾಲಙ್ಕಾರಪಾಠ

MMR Vol 0

Misc. Paragraph

ಸುಬೋಧಾಲಙ್ಕಾರೋ

೧. ದೋಸಾವಬೋಧ-ಪಠಮಪರಿಚ್ಛೇದ

೨. ದೋಸಪರಿಹಾರಾವಬೋಧ-ದುತಿಯಪರಿಚ್ಛೇದ

೩. ಗುಣಾವಬೋಧ-ತತಿಯಪರಿಚ್ಛೇದ

೪. ಅತ್ಥಾಲಙ್ಕಾರಾವಬೋಧ-ಚತುತ್ಥಪರಿಚ್ಛೇದ

ವಙ್ಕವುತ್ತಿ ಅತ್ಥಾಲಙ್ಕಾರ

೫. ಭಾವಾವಬೋಧ-ಪಞ್ಚಮಪರಿಚ್ಛೇದ

ಠಾಯೀಭಾವ ನಿದ್ದೇಸ ರತಿಟ್ಠಾಯೀಭಾವ

ನಮೋ ತಸ್ಸ ಭಗವತೋ ಅರಹತೋ ಸಮ್ಮಾಸಮ್ಬುದ್ಧಸ್ಸ

ಮುನಿನ್ದವದನಮ್ಭೋಜ, ಗಬ್ಭಸಮ್ಭವಸುನ್ದರೀ;

ಸರಣಂ ಪಾಣಿನಂ ವಾಣೀ, ಮಯ್ಹಂ ಪೀಣಯತಂ ಮನಂ.

ರಾಮ, ಸಮ್ಮಾ’ದ್ಯ’ಲಙ್ಕಾರಾ, ಸನ್ತಿ ಸನ್ತೋ ಪುರಾತನಾ;

ತಥಾಪಿ ತು ವಳಞ್ಜೇನ್ತಿ, ಸುದ್ಧಮಾಗಧಿಕಾ ನ ತೇ.

ತೇನಾ’ಪಿ ನಾಮ ತೋಸೇಯ್ಯ, ಮೇತೇ ಲಙ್ಕಾರವಜ್ಜಿತೇ;

ಅನುರೂಪೇನಾ’ಲಙ್ಕಾರೇ, ನೇ’ಸ ಮೇಸೋ ಪರಿಸ್ಸಮೋ.

ಯೇಸಂ ನ ಸಞ್ಚಿತಾ ಪಞ್ಞಾ, ನೇಕಸತ್ಥನ್ತರೋ’ಚಿತಾ;

ಸಮ್ಮೋಹ’ಬ್ಭಾಹತಾ ವೇ’ತೇ, ನಾವಬುಜ್ಝನ್ತಿ ಕಿಞ್ಚಿಪಿ.

ಕಿಂ ತೇಹಿ ಪಾದಸುಸ್ಸೂಸಾ, ಯೇಸಂ ನತ್ಥಿ ಗರೂನಿ’ಹ;

ಯೇ ತಪ್ಪಾದರಜೋಕಿಣ್ಣಾ, ತೇ’ವ ಸಾಧೂ ವಿವೇಕಿನೋ.

ಕಬ್ಬ, ನಾಟಕನಿಕ್ಖಿತ್ತ, ನೇತ್ತಚಿತ್ತಾ ಕವಿಜ್ಜನಾ;

ಯಂಕಿಞ್ಚಿ ರಚಯನ್ತೇ’ತಂ, ನ ವಿಮ್ಹಯಕರಂ ಪರಂ.

ತೇಯೇ’ವ ಪಟಿಭಾವೇನ್ತೋ, ಸೋ’ವ ಬನ್ಧೋ ಸವಿಮ್ಹಯೋ;

ಯೇನ ತೋಸೇನ್ತಿ ವಿಞ್ಞೂ ಯೇ, ತತ್ಥ ಪ್ಯ’ವಿಹಿತಾ’ದರಾ.

ಬನ್ಧೋ ¶ ಚ ನಾಮ ಸದ್ದ,ತ್ಥಾ, ಸಹಿತಾ ದೋಸವಜ್ಜಿತಾ;

ಪಜ್ಜ ಗಜ್ಜ ವಿಮಿಸ್ಸಾನಂ, ಭೇದೇನಾ’ಯಂ ತಿಧಾ ಭವೇ.

ನಿಬನ್ಧೋ ಚಾ’ನಿಬನ್ಧೋ ಚ, ಪುನ ದ್ವಿಧಾ ನಿರುಪ್ಪತೇ;

ತಂ ತು ಪಾಪೇನ್ತ್ಯ’ಲಙ್ಕಾರಾ, ವಿನ್ದನೀಯತರತ್ತನಂ.

ಅನವಜ್ಜಂ ಮುಖಮ್ಭೋಜ [‘‘ಅಮ್ಭೋಜ’’ನ್ತಿ ಪದಂ ಪಾಳಿಯಂ ನತ್ಥಿ, ವಾರಿಜವಾಚಕಂ, ಸಕ್ಕಟಗನ್ಥತೋ ಅನೀತಂ], ಮನವಜ್ಜಾ ಚ ಭಾರತೀ;

ಅಲಙ್ಕತಾ’ವ ಸೋಭನ್ತೇ, ಕಿಂ ನು ತೇ ನಿರ’ಲಙ್ಕತಾ?

ವಿನಾ ಗರೂಪದೇಸಂ ತಂ, ಬಾಲೋ’ಲಙ್ಕತ್ತು ಮಿಚ್ಛತಿ;

ಸಮ್ಪಾಪುಣೇ ನ ವಿಞ್ಞೂಹಿ, ಹಸ್ಸಭಾವಂ ಕಥಂ ನು ಸೋ?

ಗನ್ಥೋಪಿ ಕವಿವಾಚಾನ, ಮಲಙ್ಕಾರ’ಪ್ಪಕಾಸಕೋ;

ಯಾತಿ ತಬ್ಬಚನೀಯತ್ತಂ, ತ’ಬ್ಬೋಹಾರೂ’ಪಚಾರತೋ.

ದ್ವಿಪ್ಪಕಾರಾ ಅಲಙ್ಕಾರಾ, ತತ್ಥ ಸದ್ದ, ತ್ಥಭೇದತೋ;

ಸದ್ದತ್ಥಾ ಬನ್ಧನಾಮಾ’ವ, ತಂಸಜ್ಜಿತ ತದಾವಲಿ.

ಗುಣಾಲಙ್ಕಾರಸಂಯುತ್ತಾ, ಅಪಿ ದೋಸಲವ’ಙ್ಕಿತಾ;

ಪಸಂಸಿಯಾ ನ ವಿಞ್ಞೂಹಿ, ಸಾ ಕಞ್ಞಾ ವಿಯ ತಾದಿಸೀ.

ತೇನ ದೋಸನಿರಾಸೋ’ವ, ಮಹುಸ್ಸಾಹೇನ ಸಾಧಿಯೋ;

ನಿದ್ದೋಸಾ ಸಬ್ಬಥಾ ಸಾ’ಯಂ, ಸಗುಣಾ ನ ಭವೇಯ್ಯ ಕಿಂ?

ಸಾ’ಲಙ್ಕಾರವಿಯುತ್ತಾ’ಪಿ, ಗುಣಯುತ್ತಾ ಮನೋಹರಾ;

ನಿದ್ದೋಸಾ ದೋಸರಹಿತಾ, ಗುಣಯುತ್ತಾ ವಧೂ ವಿಯ.

ಪದೇ ವಾಕ್ಯೇ ತದತ್ಥೇ ಚ, ದೋಸಾ ಯೇ ವಿವಿಧಾ ಮತಾ;

ಸೋ’ದಾಹರಣ ಮೇತೇಸಂ, ಲಕ್ಖಣಂ ಕಥಯಾಮ್ಯ’ಹಂ.

ವಿರುದ್ಧತ್ಥನ್ತರಾ, ಝತ್ಥ, ಕಿಲಿಟ್ಠಾನಿ, ವಿರೋಧಿ ಚ;

ನೇಯ್ಯಂ, ವಿಸೇಸನಾಪೇಕ್ಖಂ, ಹೀನತ್ಥಕ ಮನತ್ಥಕಂ.

ದೋಸಾ ಪದಾನ ವಾಕ್ಯಾನ, ಮೇಕತ್ಥಂ ಭಗ್ಗರೀತಿಕಂ;

ತಥಾ ಬ್ಯಾಕಿಣ್ಣ ಗಾಮ್ಮಾನಿ, ಯತಿಹೀನಂ ಕಮಚ್ಚುತಂ;

ಅತಿವುತ್ತ ಮಪೇತತ್ಥಂ, ಸಬನ್ಧಫರುಸಂ ತಥಾ.

ಅಪಕ್ಕಮೋ’ ¶ , ಚಿತ್ಯಹೀನಂ, ಭಗ್ಗರೀತಿ, ಸಸಂಸಯಂ;

ಗಾಮ್ಮಂ ದುಟ್ಠಾಲಙ್ಕತೀತಿ, ದೋಸಾ ವಾಕ್ಯತ್ಥನಿಸ್ಸಿತಾ.

ವಿರುದ್ಧತ್ಥನ್ತರಂ ತಞ್ಹಿ, ಯಸ್ಸ’ಞ್ಞತ್ಥೋ ವಿರುಜ್ಝತಿ;

ಅಧಿಪ್ಪೇತೇ ಯಥಾ ಮೇಘೋ, ವಿಸದೋ ಸುಖಯೇ ಜನಂ.

ವಿಸೇಸ್ಯ ಮಧಿಕಂ ಯೇನಾ, ಝತ್ಥ ಮೇತಂ ಭವೇ ಯಥಾ;

ಓಭಾಸಿತಾ’ಸೇಸದಿಸೋ, ಖಜ್ಜೋತೋ’ಯಂ ವಿರಾಜತೇ.

ಯಸ್ಸ’ತ್ಥಾ’ವಗಮೋ ದುಕ್ಖೋ, ಪಕತ್ಯಾ’ದಿವಿಭಾಗತೋ;

ಕಿಲಿಟ್ಠಂ ತಂ ಯಥಾ ತಾಯ, ಸೋ’ಯ ಮಾಲಿಙ್ಗ್ಯತೇ ಪಿಯಾ.

ಯಂ ಕಿಲಿಟ್ಠಪದಂ ಮನ್ದಾ, ಭಿಧೇಯ್ಯಂ ಯಮಕಾದಿಕಂ;

ಕಿಲಿಟ್ಠಪದದೋಸೇ’ವ, ತಮ್ಪಿ ಅನ್ತೋ ಕರೀಯತಿ.

ಪತೀತಸದ್ದರಚಿತಂ, ಸಿಲಿಟ್ಠಪದಸನ್ಧಿಕಂ;

ಪಸಾದಗುಣಸಂಯುತ್ತಂ, ಯಮಕಂ ಮತ ಮೇದಿಸಂ.

ಅಬ್ಯಪೇತಂ ಬ್ಯಪೇತ’ಞ್ಞ, ಮಾವುತ್ತಾ’ನೇಕವಣ್ಣಜಂ;

ಯಮಕಂ ತಞ್ಚ ಪಾದಾನ, ಮಾದಿ, ಮಜ್ಝ, ನ್ತ, ಗೋಚರಂ.

ಸುಜನಾ’ಸುಜನಾ ಸಬ್ಬೇ, ಗುಣೇನಾಪಿ ವಿವೇಕಿನೋ;

ವಿವೇಕಂ ನ ಸಮಾಯನ್ತಿ, ಅವಿವೇಕಿಜನನ್ತಿಕೇ.

ಕುಸಲಾ’ಕುಸಲಾ ಸಬ್ಬೇ, ಪಬಲಾ’ಪಬಲಾ ಥವಾ;

ನೋ ಯಾತಾ ಯಾವ’ಹೋಸಿತ್ತಂ, ಸುಖದುಕ್ಖಪ್ಪದಾ ಸಿಯುಂ;

ಅಬ್ಯಪೇತ ಪಠಮ ದುತಿಯ ತತಿಯಪಾದಾದಿ ಯಮಕಂ.

ಸಾದರಂ ಸಾ ದರಂ ಹನ್ತು, ವಿಹಿತಾ ವಿಹಿತಾ ಮಯಾ;

ವನ್ದನಾ ವನ್ದನಾಮಾನ, ಭಾಜನೇ ರತನತ್ತಯೇ.

ಕಮಲಂ ಕ’ಮಲಂ ಕತ್ತುಂ, ವನದೋ ವನದೋ’ಮ್ಬರಂ;

ಸುಗತೋ ಸುಗತೋ ಲೋಕಂ, ಸಹಿತಂ ಸ ಹಿತಂ ಕರಂ.

ಅಬ್ಯಪೇತಾದಿಯಮಕ ¶ , ಸ್ಸೇಸೋ ಲೇಸೋ ನಿದಸ್ಸಿತೋ;

ಞೇಯ್ಯಾನಿ’ಮಾಯೇವ ದಿಸಾ, ಯ’ಞ್ಞಾನಿ ಯಮಕಾನಿಪಿ.

ಅಚ್ಚನ್ತಬಹವೋ ತೇಸಂ, ಭೇದಾ ಸಮ್ಭೇದಯೋನಿಯೋ;

ತಥಾಪಿ ಕೇಚಿ ಸುಕರಾ, ಕೇಚಿ ಅಚ್ಚನ್ತದುಕ್ಕರಾ.

ಯಮಕಂ ತಂ ಪಹೇಲೀ [ಪಹೇಳಿ (ಕ.)] ಚ, ನೇಕನ್ತಮಧುರಾನಿ’ತಿ;

ಉಪೇಕ್ಖಿಯನ್ತಿ ಸಬ್ಬಾನಿ, ಸಿಸ್ಸಖೇದಭಯಾ ಮಯಾ.

ದೇಸಕಾಲಕಲಾಲೋಕ, ಞಾಯಾಗಮವಿರೋಧಿ ಯಂ;

ತಂ ವಿರೋಧಿಪದಂ ಚೇ’ತ, ಮುದಾಹರಣತೋ ಫುಟಂ.

ಯ ದಪ್ಪತೀತ ಮಾನೀಯ, ವತ್ತಬ್ಬಂ ನೇಯ್ಯ ಮಾಹು ತಂ;

ಯಥಾ ಸಬ್ಬಾಪಿ ಧವಲಾ, ದಿಸಾ ರೋಚನ್ತಿ ರತ್ತಿಯಂ.

ನೇದಿಸಂ ಬಹು ಮಞ್ಞನ್ತಿ, ಸಬ್ಬೇ ಸಬ್ಬತ್ಥ ವಿಞ್ಞುನೋ;

ದುಲ್ಲಭಾ’ವಗತೀ ಸದ್ದ, ಸಾಮತ್ಥಿಯವಿಲಙ್ಘಿನೀ.

ಸಿಯಾ ವಿಸೇಸನಾಪೇಕ್ಖಂ, ಯಂ ತಂ ಪತ್ವಾ ವಿಸೇಸನಂ;

ಸಾತ್ಥಕಂ ತಂ ಯಥಾ ತಂ ಸೋ, ಭಿಯ್ಯೋ ಪಸ್ಸತಿ ಚಕ್ಖುನಾ.

ಹೀನಂ ಕರೇ ವಿಸೇಸ್ಯಂ ಯಂ, ತಂ ಹೀನತ್ಥಂ ಭವೇ ಯಥಾ;

ನಿಪ್ಪಭೀ ಕತ ಖಜ್ಜೋತೋ, ಸಮುದೇತಿ ದಿವಾಕರೋ.

ಪಾದಪೂರಣಮತ್ತಂ ಯಂ, ಅನತ್ಥಮಿತಿ ತಂ ಮತಂ;

ಯಥಾ ಹಿ ವನ್ದೇ ಬುದ್ಧಸ್ಸ, ಪಾದಪಙ್ಕೇರುಹಂ ಪಿ ಚ.

ಸದ್ದತೋ ಅತ್ಥತೋ ವುತ್ತಂ, ಯತ್ಥ ಭಿಯ್ಯೋಪಿ ವುಚ್ಚತಿ;

ತ ಮೇಕತ್ಥಂ ಯಥಾ’ಭಾತಿ, ವಾರಿದೋ ವಾರಿದೋ ಅಯಂ.

ತಿತ್ಥಿಯಙ್ಕುರಬೀಜಾನಿ, ಜಹಂ ದಿಟ್ಠಿಗತಾನಿ’ಹ;

ಪಸಾದೇತಿ ಪಸನ್ನೇ’ಸೋ, ಮಹಾಮುನಿ ಮಹಾಜನೇ.

ಆರದ್ಧಕ್ಕಮವಿಚ್ಛೇದಾ, ಭಗ್ಗರೀತಿ ಭವೇ ಯಥಾ;

ಕಾಪಿ ಪಞ್ಞಾ, ಕೋಪಿ ಪಗುಣೋ, ಪಕತೀಪಿ ಅಹೋ ತವ.

ಪದಾನಂ ¶ ದುಬ್ಬಿನಿಕ್ಖೇಪಾ, ಬ್ಯಾಮೋಹೋ ಯತ್ಥ ಜಾಯತಿ;

ತಂ ಬ್ಯಾಕಿಣ್ಣನ್ತಿ ವಿಞ್ಞೇಯ್ಯಂ, ತದುದಾಹರಣಂ ಯಥಾ.

ಬಹುಗುಣೇ ಪಣಮತಿ, ದುಜ್ಜನಾನಂ ಪ್ಯಯಂ ಜನೋ;

ಹಿತಂ ಪಮುದಿತೋ ನಿಚ್ಚಂ, ಸುಗತಂ ಸಮನುಸ್ಸರಂ.

ವಿಸಿಟ್ಠವಚನಾ’ಪೇತಂ, ಗಾಮ್ಮಂ’ತ್ಯ’ಭಿಮತಂ ಯಥಾ;

ಕಞ್ಞೇ ಕಾಮಯಮಾನಂ ಮಂ, ನ ಕಾಮಯಸಿ ಕಿಂನ್ವಿ’ದಂ?

ಪದಸನ್ಧಾನತೋ ಕಿಞ್ಚಿ, ದುಪ್ಪತೀತಿಕರಂ ಭವೇ;

ತಮ್ಪಿ ಗಾಮ್ಮಂ ತ್ಯ’ಭಿಮತಂ, ಯಥಾ ಯಾಭವತೋ ಪಿಯಾ.

ವುತ್ತೇಸು ಸೂಚಿತೇ ಟ್ಠಾನೇ, ಪದಚ್ಛೇದೋ ಭವೇ ಯತಿ;

ಯಂ ತಾಯ ಹೀನಂ ತಂ ವುತ್ತಂ, ಯತಿಹೀನನ್ತಿ ಸಾ ಪನ.

ಯತಿ ಸಬ್ಬತ್ಥಪಾದನ್ತೇ, ವುತ್ತಡ್ಢೇ ಚ ವಿಸೇಸತೋ;

ಪುಬ್ಬಾಪರಾನೇಕವಣ್ಣ, ಪದಮಜ್ಝೇಪಿ ಕತ್ಥಚಿ.

ತಂ ನಮೇ ಸಿರಸಾ ಚಾಮಿ, ಕರವಣ್ಣಂ ತಥಾಗತಂ;

ಸಕಲಾಪಿ ದಿಸಾ ಸಿಞ್ಚ, ತಿವ ಸೋಣ್ಣರಸೇಹಿ ಯೋ.

ಸರೋ ಸನ್ಧಿಮ್ಹಿ ಪುಬ್ಬನ್ತೋ, ವಿಯ ಲೋಪೇ ವಿಭತ್ತಿಯಾ;

ಅಞ್ಞಥಾ ತ್ವ’ಞ್ಞಥಾ ತತ್ಥ, ಯಾ’ದೇಸಾದಿ ಪರಾ’ದಿ’ವ.

ಚಾದೀ ಪುಬ್ಬಪದನ್ತಾ’ವ, ನಿಚ್ಚಂ ಪುಬ್ಬಪದಸ್ಸಿತಾ;

ಪಾದಯೋ ನಿಚ್ಚಸಮ್ಬನ್ಧಾ, ಪರಾದೀವ ಪರೇನ ತು.

ನಮೇ ತಂ ಸಿರಸಾ ಸಬ್ಬೋ, ಪಮಾ’ತೀತಂ ತಥಾಗತಂ;

ಯಸ್ಸ ಲೋಕಗ್ಗತಂ ಪತ್ತ, ಸ್ಸೋ’ಪಮಾ ನ ಹಿ ಯುಜ್ಜತಿ.

ಮುನಿನ್ದಂ ತಂ ಸದಾ ವನ್ದಾ, ಮ್ಯ’ನನ್ತಮತಿ ಮುತ್ತಮಂ;

ಯಸ್ಸ ಪಞ್ಞಾ ಚ ಮೇತ್ತಾ ಚ, ನಿಸ್ಸೀಮಾತಿ ವಿಜಮ್ಭತಿ.

ಚಾದಿಪಾದೀಸು ಪಚ್ಚುದಾಹರಣಾನಿ ಯಥಾ

ಮಹಾಮೇತ್ತಾ ಮಹಾಪಞ್ಞಾ, ಚ ಯತ್ಥ ಪರಮೋದಯಾ;

ಪಣಮಾಮಿ ಜಿನಂ ತಂ ಪ, ವರಂ ವರಗುಣಾ’ಲಯಂ.

ಪದತ್ಥಕ್ಕಮತೋ ಮುತ್ತಂ, ಕಮಚ್ಚುತ ಮಿದಂ ಯಥಾ;

ಖೇತ್ತಂ ವಾ ದೇಹಿ ಗಾಮಂ ವಾ, ದೇಸಂ ವಾ ಮಮ ಸೋಭನಂ.

ಲೋಕಿಯತ್ಥ ¶ ಮತಿಕ್ಕನ್ತಂ, ಅತಿವುತ್ತಂ ಮತಂ ಯಥಾ;

ಅತಿಸಮ್ಬಾಧ ಮಾಕಾಸ, ಮೇತಿಸ್ಸಾ ಥನಜಮ್ಭನೇ.

ಸಮುದಾಯತ್ಥತೋ’ಪೇತಂ, ತಂ ಅಪೇತತ್ಥಕಂ ಯಥಾ;

ಗಾವಿಪುತ್ತೋ ಬಲಿಬದ್ಧೋ, ತಿಣಂ ಖಾದೀ ಪಿವೀ ಜಲಂ.

ಬನ್ಧೇ ಫರುಸತಾ ಯತ್ಥ, ತಂ ಬನ್ಧಫರುಸಂ ಯಥಾ;

ಖರಾ ಖಿಲಾ ಪರಿಕ್ಖೀಣಾ, ಖೇತ್ತೇ ಖಿತ್ತಂ ಫಲತ್ಯ’ಲಂ.

ಞೇಯ್ಯಂ ಲಕ್ಖಣ ಮನ್ವತ್ಥ, ವಸೇನಾ’ಪಕ್ಕಮಾದಿನಂ;

ಉದಾಹರಣ ಮೇತೇಸಂ, ದಾನಿ ಸನ್ದಸ್ಸಯಾಮ್ಯ’ಹಂ.

ಭಾವನಾ, ದಾನ, ಸೀಲಾನಿ, ಸಮ್ಮಾ ಸಮ್ಪಾದಿತಾನಿ’ಹ;

ಭೋಗ, ಸಗ್ಗಾದಿ, ನಿಬ್ಬಾನ, ಸಾಧನಾನಿ ನ ಸಂಸಯೋ.

ಪೂಜನೀಯತರೋ ಲೋಕೇ, ಅಹ ಮೇಕೋ ನಿರನ್ತರಂ;

ಮಯೇಕಸ್ಮಿಂ ಗುಣಾ ಸಬ್ಬೇ, ಯತೋ ಸಮುದಿತಾ ಅಹುಂ.

ಯಾಚಿತೋ’ಹಂ ಕಥಂ ನಾಮ, ನ ದಜ್ಜಾಮ್ಯ’ಪಿ ಜೀವಿತಂ;

ತಥಾಪಿ ಪುತ್ತದಾನೇನ, ವೇಧತೇ ಹದಯಂ ಮಮ.

ಇತ್ಥೀನಂ ದುಜ್ಜನಾನಞ್ಚ, ವಿಸ್ಸಾಸೋ ನೋಪಪಜ್ಜತೇ;

ವಿಸೇ ಸಿಙ್ಗಿಮ್ಹಿ ನದಿಯಂ, ರೋಗೇ ರಾಜಕುಲಮ್ಹಿ ಚ.

ಮುನಿನ್ದಚನ್ದಿಮಾ ಲೋಕ, ಸರಲೋಲವಿಲೋಚನೋ;

ಜನೋ’ ವಕ್ಕನ್ತಪನ್ಥೋ’ವ, ಗೋಪದಸ್ಸನಪೀಣಿತೋ.

ವಾಕ್ಯತ್ಥತೋ ದುಪ್ಪತೀತಿ, ಕರಂ ಗಾಮ್ಮಂ ಮತಂ ಯಥಾ;

ಪೋಸೋ ವೀರಿಯವಾ ಸೋ’ಯಂ, ಪರಂ ಹನ್ತ್ವಾ ನ ವಿಸ್ಸಮೀ.

ದುಟ್ಠಾಲಙ್ಕರಣಂ ತೇತಂ [ತ್ವೇಥಂ (?)], ಯತ್ಥಾ’ಲಙ್ಕಾರದೂಸನಂ;

ತಸ್ಸಾ’ಲಙ್ಕಾರನಿದ್ದೇಸೇ, ರೂಪ ಮಾವಿ ಭವಿಸ್ಸತಿ.

ಇತಿ ಸಙ್ಘರಕ್ಖಿತಮಹಾಸಾಮಿವಿರಚಿತೇ ಸುಬೋಧಾಲಙ್ಕಾರೇ

೨. ದೋಸಪರಿಹಾರಾವಬೋಧ-ದುತಿಯಪರಿಚ್ಛೇದ

ಕದಾಚಿ ಕವಿಕೋಸಲ್ಲಾ, ವಿರೋಧೋ ಸಕಲೋ ಪ್ಯ’ಯಂ;

ದೋಸಸಙ್ಖ್ಯ ಮತಿಕ್ಕಮ್ಮ, ಗುಣವೀಥಿಂ ವಿಗಾಹತೇ.

ತೇನ ವುತ್ತವಿರೋಧಾನ, ಮವಿರೋಧೋ ಯಥಾ ಸಿಯಾ;

ತಥಾ ದೋಸಪರಿಹಾರಾ, ವಬೋಧೋ ದಾನಿ ನೀಯತೇ.

ತತ್ಥ ವಿರುದ್ಧತ್ಥನ್ತರಸ್ಸ ಪರಿಹಾರೋ ಯಥಾ

ವಿನ್ದನ್ತಂ ಪಾಕಸಾಲೀನಂ, ಸಾಲೀನಂ ದಸ್ಸನಾ ಸುಖಂ;

ತಂ ಕಥಂ ನಾಮ ಮೇಘೋ’ಯಂ, ವಿಸದೋ ಸುಖಯೇ ಜನಂ?

ವಿನಾಯಕೋಪಿ ನಾಗೋ ಸಿ, ಗೋತಮೋಪಿ ಮಹಾಮತಿ;

ಪಣೀತೋಪಿ ರಸಾ’ಪೇತೋ, ಚಿತ್ತಾ ಮೇ ಸಾಮಿ ತೇ ಗತಿ.

ಕಥಂ ತಾದಿಗುಣಾಭಾವೇ, ಲೋಕಂ ತೋಸೇತಿ ದುಜ್ಜನೋ?

ಓಭಾಸಿತಾಸೇಸದಿಸೋ, ಖಜ್ಜೋತೋ ನಾಮ ಕಿಂ ಭವೇ?

ಪಹೇಲಿಕಾಯ [ಪಹೇಳಿಕಾಯ (ಕ.)] ಮಾರುಳ್ಹಾ, ನ ಹಿ ದುಟ್ಠಾ ಕಿಲಿಟ್ಠತಾ;

ಪಿಯಾ ಸುಖಾ’ಲಿಙ್ಗಿತಂ ಕ, ಮಾಲಿಙ್ಗತಿ ನು ನೋ ಇತಿ.

ಯಮಕೇ ನೋ ಪಯೋಜೇಯ್ಯ, ಕಿಲಿಟ್ಠಪದ ಮಿಚ್ಛಿತೇ;

ತತೋ ಯಮಕ ಮಞ್ಞಂ ತು, ಸಬ್ಬ ಮೇತಂಮಯಂ ವಿಯ.

ಬೋಧಿಸತ್ತಪ್ಪಭಾವೇನ ¶ , ಥಲೇಪಿ ಜಲಜಾನ್ಯ’ಹುಂ;

ನುದನ್ತಾನಿ’ವ ಸುಚಿರಾ, ವಾಸಕ್ಲೇಸಂ ತಹಿಂ ಜಲೇ.

ಮಹಾನುಭಾವ ಪಿಸುನೋ, ಮುನಿನೋ ಮನ್ದ ಮಾರುತೋ;

ಸಬ್ಬೋತುಕಮಯಂ ವಾಯಿ, ಧುನನ್ತೋ ಕುಸುಮಂ ಸಮಂ.

ನಿಮುಗ್ಗಮಾನಸೋ ಬುದ್ಧ, ಗುಣೇ ಪಞ್ಚಸಿಖಸ್ಸಪಿ;

ತನ್ತಿಸ್ಸರ ವಿರೋಧೋ ಸೋ, ನ ಸಮ್ಪೀಣೇತಿ ಕಂ ಜನಂ?

ಗಣಯೇ ಚಕ್ಕವಾಳಂ ಸೋ, ಚನ್ದನಾಯಪಿ ಸೀತಲಂ;

ಸಮ್ಬೋಧಿ ಸತ್ತ ಹದಯೋ, ಪದಿತ್ತ’ಙ್ಗಾರಪೂರಿತಂ.

ಪರಿಚ್ಚತ್ತಭವೋಪಿ ತ್ವ, ಮುಪನೀತಭವೋ ಅಸಿ;

ಅಚಿನ್ತ್ಯಗುಣಸಾರಾಯ, ನಮೋ ತೇ ಮುನಿಪುಙ್ಗವ.

ನೇವಾ’ಲಪತಿ ಕೇನಾ’ಪಿ, ವಚೀವಿಞ್ಞತ್ತಿತೋ ಯತಿ;

ಸಮ್ಪಜಾನಮುಸಾವಾದಾ, ಫುಸೇಯ್ಯಾ’ಪತ್ತಿದುಕ್ಕಟಂ.

ಮರೀಚಿಚನ್ದನಾ’ಲೇಪ, ಲಾಭಾ ಸೀತಮರೀಚಿನೋ;

ಇಮಾ ಸಬ್ಬಾಪಿ ಧವಲಾ, ದಿಸಾ ರೋಚನ್ತಿ ನಿಬ್ಭರಂ.

ಮನೋನುರಞ್ಜನೋ ಮಾರ, ಙ್ಗನಾಸಿಙ್ಗಾರವಿಬ್ಭಮೋ;

ಜಿನೇನಾ’ಸಮನುಞ್ಞಾತೋ, ಮಾರಸ್ಸ ಹದಯಾ’ನಲೋ.

ಅಪಯಾತಾ’ಪರಾಧಮ್ಪಿ, ಅಯಂ ವೇರೀ ಜನಂ ಜನೋ;

ಕೋಧಪಾಟಲಭೂತೇನ, ಭಿಯ್ಯೋ ಪಸ್ಸತಿ ಚಕ್ಖುನಾ.

ಅಪ್ಪಕಾನಮ್ಪಿ ಪಾಪಾನಂ, ಪಭಾವಂ ನಾಸಯೇ ಬುಧೋ;

ಅಪಿ ನಿಪ್ಪಭಾತಾ’ನೀತ, ಖಜ್ಜೋತೋ ಹೋತಿ ಭಾಣುಮಾ.

ನ ¶ ಪಾದಪೂರಣತ್ಥಾಯ, ಪದಂ ಯೋಜೇಯ್ಯ ಕತ್ಥಚಿ,

ಯಥಾ ವನ್ದೇ ಮುನಿನ್ದಸ್ಸ, ಪಾದಪಙ್ಕೇರುಹಂ ವರಂ.

ಭಯಕೋಧಪಸಂಸಾದಿ, ವಿಸೇಸೋ ತಾದಿಸೋ ಯದಿ;

ವತ್ತುಂ ಕಾಮೀಯತೇ ದೋಸೋ, ನ ತತ್ಥೇ’ಕತ್ಥತಾಕತೋ.

ಸಪ್ಪೋ ಸಪ್ಪೋ! ಅಯಂ ಹನ್ದ, ನಿವತ್ತತು ಭವಂ ತತೋ,

ಯದಿ ಜೀವಿತುಕಾಮೋ’ಸಿ, ಕಥಂ ತ ಮುಪಸಪ್ಪಸಿ?

ಯೋಕೋಚಿ ರೂಪಾ’ತಿಸಯೋ, ಕನ್ತಿ ಕಾಪಿ ಮನೋಹರಾ;

ಅಬ್ಯಾಮೋಹಕರಂ ಬನ್ಧಂ, ಅಬ್ಯಾಕಿಣ್ಣಂ ಮನೋಹರಂ;

ಅದೂರಪದ ವಿನ್ಯಾಸಂ, ಪಸಂಸನ್ತಿ ಕವಿಸ್ಸರಾ.

ನೀಲುಪ್ಪಲಾ’ಭಂ ನಯನಂ, ಬನ್ಧುಕರುಚಿರೋ’ಧರೋ;

ನಾಸಾ ಹೇಮ’ಙ್ಕುಸೋ ತೇನ, ಜಿನೋ’ಯಂ ಪಿಯದಸ್ಸನೋ.

ಸಮತಿಕ್ಕನ್ತ ಗಾಮ್ಮತ್ತಂ, ಕನ್ತ ವಾಚಾ’ಭಿಸಙ್ಖತಂ;

ಬನ್ಧನಂ ರಸಹೇತುತ್ತಾ, ಗಾಮ್ಮತ್ತಂ ಅತಿವತ್ತತಿ.

ದುನೋತಿ ಕಾಮಚಣ್ಡಾಲೋ, ಸೋ ಮಂ ಸದಯ ನಿದ್ದಯೋ;

ಈದಿಸಂ ಬ್ಯಸನಾ’ಪನ್ನಂ, ಸುಖೀಪಿ ಕಿ ಮುಪೇಕ್ಖಸೇ?

ಯತಿಹೀನಪರಿಹಾರೋ, ನ ಪುನೇ’ದಾನಿ ನೀಯತೇ;

ಯತೋ ನ ಸವನು’ಬ್ಬೇಗಂ, ಹೇಟ್ಠಾ ಯೇಸಂ ವಿಚಾರಿತಂ.

ಉದಾರಚರಿತೋ’ಸಿ ತ್ವಂ, ತೇನೇ’ವಾ’ರಾಧನಾ ತ್ವಯಿ;

ದೇಸಂ ವಾ ದೇಹಿ ಗಾಮಂ ವಾ, ಖೇತ್ತಂ ವಾ ಮಮ ಸೋಭನಂ.

ಮುನಿನ್ದಚನ್ದಸಮ್ಭೂತ, ಯಸೋರಾಸಿಮರೀಚಿನಂ;

ಸಕಲೋಪ್ಯ’ಯ ಮಾಕಾಸೋ, ನಾ’ವಕಾಸೋ ವಿಜಮ್ಭನೇ.

ವಾಕ್ಯಂ ¶ ಬ್ಯಾಪನ್ನಚಿತ್ತಾನಂ, ಅಪೇತತ್ಥಂ ಅನಿನ್ದಿತಂ;

ತೇನು’ಮ್ಮತ್ತಾದಿಕಾನಂ ತಂ, ವಚನಾ’ಞ್ಞತ್ರ ದುಸ್ಸತಿ.

ಸಮುದ್ದೋ ಪೀಯತೇ ಸೋ’ಯ, ಮಹ’ಮಜ್ಜ ಜರಾತುರೋ;

ಇಮೇ ಗಜ್ಜನ್ತಿ ಜೀಮೂತಾ, ಸಕ್ಕಸ್ಸೇ’ರಾವಣೋ ಪಿಯೋ.

ಸುಖುಮಾಲಾ’ವಿರೋಧಿತ್ತ, ದಿತ್ತಭಾವಪ್ಪಭಾವಿತಂ;

ಬನ್ಧನಂ ಬನ್ಧಫರುಸ, ದೋಸಂ ಸಂದೂಸಯೇಯ್ಯ ತಂ.

ಪಸ್ಸನ್ತಾ ರೂಪವಿಭವಂ, ಸುಣನ್ತಾ ಮಧುರಂ ಗಿರಂ;

ಚರನ್ತಿ ಸಾಧೂ ಸಮ್ಬುದ್ಧ, ಕಾಲೇ ಕೇಳಿಪರಮ್ಮುಖಾ.

ಭಾವನಾ, ದಾನ, ಸೀಲಾನಿ, ಸಮ್ಮಾ ಸಮ್ಪಾದಿತಾನಿ’ಹ;

ನಿಬ್ಬಾನ, ಭೋಗ, ಸಗ್ಗಾದಿ, ಸಾಧನಾನಿ ನ ಸಂಸಯೋ.

ಉದ್ದಿಟ್ಠವಿಸಯೋ ಕೋಚಿ, ವಿಸೇಸೋ ತಾದಿಸೋ ಯದಿ;

ಅನು’ದ್ದಿಟ್ಠೇಸು ನೇವ’ತ್ಥಿ, ದೋಸೋ ಕಮವಿಲಙ್ಘನೇ.

ಕುಸಲಾ’ಕುಸಲಂ ಅಬ್ಯಾ, ಕತ’ಮಿಚ್ಚೇಸು ಪಚ್ಛಿಮಂ;

ಅಬ್ಯಾಕತಂ ಪಾಕದಂ ನ, ಪಾಕದಂ ಪಠಮದ್ವಯಂ.

ಸಗುಣಾನಾ’ವಿಕರಣೇ, ಕಾರಣೇ ಸತಿ ತಾದಿಸೇ;

ಓಚಿತ್ಯಹೀನತಾ’ಪತ್ತಿ, ನತ್ಥಿ ಭೂತತ್ಥಸಂಸಿನೋ.

ಓಚಿತ್ಯಂ ನಾಮ ವಿಞ್ಞೇಯ್ಯಂ, ಲೋಕೇ ವಿಖ್ಯಾತ ಮಾದರಾ;

ತತ್ಥೋ’ಪದೇಸಪಭವಾ, ಸುಜನಾ ಕವಿಪುಙ್ಗವಾ.

ವಿಞ್ಞಾತೋಚಿತ್ಯವಿಭವೋ, ಚಿತ್ಯಹೀನಂ ಪರಿಹರೇ;

ಯೋ ಮಾರಸೇನ ಮಾಸನ್ನ, ಮಾಸನ್ನವಿಜಯು’ಸ್ಸವೋ;

ತಿಣಾಯಪಿ ನ ಮಞ್ಞಿತ್ಥ, ಸೋ ವೋ ದೇತು ಜಯಂ ಜಿನೋ.

ಆರದ್ಧಕತ್ತುಕಮ್ಮಾದಿ, ಕಮಾ’ತಿಕ್ಕಮಲಙ್ಘನೇ;

ಭಗ್ಗರೀತಿವಿರೋಧೋ’ಯಂ, ಗತಿಂ ನ ಕ್ವಾ’ಪಿ ವಿನ್ದತಿ.

ಸುಜನ’ಞ್ಞಾನ ಮಿತ್ಥೀನಂ, ¶ ವಿಸ್ಸಾಸೋ ನೋ’ಪಪಜ್ಜತೇ;

ವಿಸಸ್ಸ ಸಿಙ್ಗಿನೋ ರೋಗ, ನದೀರಾಜಕುಲಸ್ಸ ಚ.

ಭೇಸಜ್ಜೇ ವಿಹಿತೇ ಸುದ್ಧ, ಬುದ್ಧಾದಿರತನತ್ತಯೇ;

ಪಸಾದ ಮಾಚರೇ ನಿಚ್ಚಂ, ಸಜ್ಜನೇ ಸಗುಣೇಪಿ ಚ.

ಮುನಿನ್ದಚನ್ದಿಮಾ’ಲೋಕ, ರಸ ಲೋಲ ವಿಲೋಚನೋ;

ಜನೋ’ವಕ್ಕನ್ತಪನ್ಥೋ’ವ, ರಂಸಿದಸ್ಸನಪೀಣಿತೋ.

ಸಂಸಯಾಯೇ’ವ ಯಂಕಿಞ್ಚಿ, ಯದಿ ಕೀಳಾದಿಹೇತುನಾ;

ಪಯುಜ್ಜತೇ ನ ದೋಸೋ’ವ, ಸಸಂಸಯಸಮಪ್ಪಿತೋ.

ಯಾತೇ ದುತಿಯಂ ನಿಲಯಂ, ಗರುಮ್ಹಿ ಸಕಗೇಹತೋ;

ಪಾಪುಣೇಯ್ಯಾಮ ನಿಯತಂ, ಸುಖ’ಮಜ್ಝಯನಾ’ದಿನಾ.

ಸುಭಗಾ ಭಗಿನೀ ಸಾ’ಯಂ, ಏತಸ್ಸಿ’ಚ್ಚೇವಮಾದಿಕಂ;

ನ ‘ಗಾಮ್ಮ’ಮಿತಿ ನಿದ್ದಿಟ್ಠಂ, ಕವೀಹಿ ಸಕಲೇಹಿಪಿ.

ದುಟ್ಠಾ’ಲಙ್ಕಾರವಿಗಮೇ, ಸೋಭನಾ’ಲಙ್ಕತಿಕ್ಕಮೋ;

ಅಲಙ್ಕಾರಪರಿಚ್ಛೇದೇ, ಆವಿಭಾವಂ ಗಮಿಸ್ಸತಿ.

ವಿಞ್ಞಾಯಿ’ಮಂ ಗರುವರಾನ’ಧಿಕ’ಪ್ಪಸಾದಾ,

ಇತಿ ಸಙ್ಘರಕ್ಖಿತಮಹಾಸಾಮಿವಿರಚಿತೇ ಸುಬೋಧಾಲಙ್ಕಾರೇ

ಸಮ್ಭವನ್ತಿ ¶ ಗುಣಾ ಯಸ್ಮಾ, ದೋಸಾನೇ’ವ’ಮತಿಕ್ಕಮೇ;

ದಸ್ಸೇಸ್ಸಂ ತೇ ತತೋ ದಾನಿ, ಸದ್ದೇ ಸಮ್ಭೂಸಯನ್ತಿ ಯೇ.

ಪಸಾದೋ’ಜೋ, ಮಧುರತಾ, ಸಮತಾ, ಸುಖುಮಾಲತಾ;

ಸಿಲೇಸೋ’ದರತಾ, ಕನ್ತಿ, ಅತ್ಥಬ್ಯತ್ತಿ, ಸಮಾಧಯೋ.

ಗುಣೇಹೇ’ತೇಹಿ ಸಮ್ಪನ್ನೋ, ಬನ್ಧೋ ಕವಿಮನೋಹರೋ;

ಸಮ್ಪಾದಿಯತಿ ಕತ್ತೂನಂ, ಕಿತ್ತಿ ಮಚ್ಚನ್ತನಿಮ್ಮಲಂ.

ಅದೂರಾಹಿತಸಮ್ಬನ್ಧ, ಸುಭಗಾ ಯಾ ಪದಾ’ವಲಿ;

ಸುಪಸಿದ್ಧಾ’ಭಿಧೇಯ್ಯಾ’ಯಂ, ಪಸಾದಂ ಜನಯೇ ಯಥಾ.

ಅಲಙ್ಕರೋನ್ತಾ ವದನಂ, ಮುನಿನೋ’ಧರರಂಸಿಯೋ;

ಸೋಭನ್ತೇ’ರುಣರಂಸೀ’ವ, ಸಮ್ಪತನ್ತಾ’ಮ್ಬುಜೋ’ದರೇ.

ಓಜೋ ಸಮಾಸಬಾಹುಲ್ಯ, ಮೇಸೋ ಗಜ್ಜಸ್ಸ ಜೀವಿತಂ;

ಮುನಿನ್ದ ಮನ್ದ ಸಞ್ಜಾತ, ಹಾಸ ಚನ್ದನ ಲಿಮ್ಪಿತಾ;

ಪಲ್ಲವಾ ಧವಲಾ ತಸ್ಸೇ, ವೇಕೋ ನಾ’ಧರಪಲ್ಲವೋ.

ಪದಾ’ಭಿಧೇಯ್ಯವಿಸಯಂ, ಸಮಾಸ ಬ್ಯಾಸ ಸಮ್ಭವಂ;

ಯಂ ಪಾರಿಣತ್ಯಂ ಹೋತೀ’ಹ, ಸೋಪಿ ಓಜೋ’ವ ತಂ ಯಥಾ.

ಜೋತಯಿತ್ವಾನ ಸದ್ಧಮ್ಮಂ, ಸನ್ತಾರೇತ್ವಾ ಸದೇವಕೇ;

ಜಲಿತ್ವಾ ಅಗ್ಗಿಖನ್ಧೋ’ವ, ನಿಬ್ಬುತೋ ಸೋ ಸಸಾವಕೋ.

ಮತ್ಥಕಟ್ಠೀ ಮತಸ್ಸಾ’ಪಿ, ರಜೋಭಾವಂ ವಜನ್ತು ಮೇ;

ಯತೋ ಪುಞ್ಞೇನ ತೇ ಸೇನ್ತು, ಜಿನ ಪಾದ’ಮ್ಬುಜದ್ವಯೇ.

ಇಚ್ಚತ್ರ ¶ ನಿಚ್ಚಪ್ಪಣತಿ, ಗೇಧೋ ಸಾಧು ಪದಿಸ್ಸತಿ;

ಜಾಯತೇ’ಯಂ ಗುಣೋ ತಿಕ್ಖ, ಪಞ್ಞಾನಮಭಿಯೋಗತೋ.

ಮಧುರತ್ತಂ ಪದಾಸತ್ತಿ, ರ’ನುಪ್ಪಾಸವಸಾ ದ್ವಿಧಾ;

ಸಿಯಾ ಸಮಸುತಿ ಪುಬ್ಬಾ, ವಣ್ಣಾ’ವುತ್ತಿ ಪರೋ ಯಥಾ.

ಯದಾ ಏಸೋ’ಭಿಸಮ್ಬೋಧಿಂ, ಸಮ್ಪತ್ತೋ ಮುನಿಪುಙ್ಗವೋ;

ತದಾ ಪಭುತಿ ಧಮ್ಮಸ್ಸ, ಲೋಕೇ ಜಾತೋ ಮಹು’ಸ್ಸವೋ.

ಮುನಿನ್ದಮನ್ದಹಾಸಾ ತೇ, ಕುನ್ದ ಸನ್ದೋಹವಿಬ್ಭಮಾ;

ದಿಸನ್ತ ಮನುಧಾವನ್ತಿ, ಹಸನ್ತಾ ಚನ್ದಕನ್ತಿಯೋ.

ಸಬ್ಬಕೋಮಲವಣ್ಣೇಹಿ, ನಾ’ನುಪ್ಪಾಸೋ ಪಸಂಸಿಯೋ;

ಯಥಾ’ಯಂ ಮಾಲತೀಮಾಲಾ, ಲಿನ ಲೋಲಾ’ಲಿಮಾಲಿನೀ.

ಮುದೂಹಿ ವಾ ಕೇವಲೇಹಿ, ಕೇವಲೇಹಿ ಫುಟೇಹಿ ವಾ,

ಮಿಸ್ಸೇಹಿ ವಾ ತಿಧಾ ಹೋತಿ, ವಣ್ಣೇಹಿ ಸಮತಾ ಯಥಾ.

ಕೋಕಿಲಾ’ಲಾಪಸಂವಾದೀ, ಮುನಿನ್ದಾ’ಲಾಪವಿಬ್ಭಮೋ;

ಹದಯಙ್ಗಮತಂ ಯಾತಿ, ಸತಂ ದೇತಿ ಚ ನಿಬ್ಬುತಿಂ.

ಸಮ್ಭಾವನೀಯಸಮ್ಭಾವಂ, ಭಗವನ್ತಂ ಭವನ್ತಗುಂ;

ಭವನ್ತಸಾಧನಾ’ಕಙ್ಖೀ, ಕೋ ನ ಸಮ್ಭಾವಯೇ ವಿಭುಂ.

ಲದ್ಧಚನ್ದನಸಂಸಗ್ಗ, ಸುಗನ್ಧಿ ಮಲಯಾ’ನಿಲೋ;

ಮನ್ದ ಮಾಯಾತಿ ಭೀತೋ’ವ, ಮುನಿನ್ದಮುಖಮಾರುತಾ.

ಅನಿಟ್ಠುರ’ಕ್ಖರ’ಪ್ಪಾಯಾ, ಸಬ್ಬಕೋಮಲ ನಿಸ್ಸಟಾ;

ಕಿಚ್ಛಮುಚ್ಚಾರಣಾ’ಪೇತ, ಬ್ಯಞ್ಜನಾ ಸುಖುಮಾಲತಾ.

ಪಸ್ಸನ್ತಾ ರೂಪವಿಭವಂ, ಸುಣನ್ತಾ ಮಧುರಂ ಗಿರಂ;

ಚರನ್ತಿ ಸಾಧೂ [ಸಾಧು (ಸೀ-ಛನ್ಧಾನುರಕ್ಖಣತ್ಥಂ)] ಸಮ್ಬುದ್ಧ, ಕಾಲೇ ಕೇಳಿಪರಮ್ಮುಖಾ.

ಅಲಙ್ಕಾರವಿಹೀನಾ’ಪಿ, ಸತಂ ಸಮ್ಮುಖತೇ’ದಿಸೀ;

ಆರೋಹತಿ ವಿಸೇಸೇನ, ರಮಣೀಯಾ ತ’ದುಜ್ಜಲಾ.

ರೋಮಞ್ಚ ¶ ಪಿಞ್ಛ ರಚನಾ, ಸಾಧು ವಾದಾಹಿತದ್ಧನೀ;

ಲಳನ್ತಿ’ಮೇ ಮುನಿಮೇಘು, ಮ್ಮದಾ ಸಾಧು ಸಿಖಾವಲಾ.

ಸುಖುಮಾಲತ್ತ ಮತ್ಥೇ’ವ, ಪದತ್ಥವಿಸಯಮ್ಪಿ ಚ;

ಯಥಾ ಮತಾದಿಸದ್ದೇಸು, ಕಿತ್ತಿಸೇಸಾದಿಕಿತ್ತನಂ.

ಸಿಲಿಟ್ಠ ಪದ ಸಂಸಗ್ಗ, ರಮಣೀಯ ಗುಣಾ’ಲಯೋ;

ಸಬನ್ಧಗಾರವೋ ಸೋ’ಯಂ, ಸಿಲೇಸೋ ನಾಮ ತಂ ಯಥಾ.

ಬಾಲಿ’ನ್ದುವಿಬ್ಭಮ’ಚ್ಛೇದಿ, ನಖರಾ’ವಲಿ ಕನ್ತಿಭಿ;

ಸಾ ಮುನಿನ್ದಪದ’ಮ್ಭೋಜ, ಕನ್ತಿ ವೋ ವಲಿತಾ’ವತಂ.

ಉಕ್ಕಂಸವನ್ತೋ ಯೋಕೋಚಿ, ಗುಣೋ ಯದಿ ಪತೀಯತೇ;

ಉದಾರೋ’ಯಂ ಭವೇ ತೇನ, ಸನಾಥಾ ಬನ್ಧಪದ್ಧತಿ.

ಪಾದಮ್ಭೋಜ ರಜೋ ಲಿತ್ತ, ಗತ್ತಾ ಯೇ ತವ ಗೋತಮ;

ಅಹೋ! ತೇ ಜನ್ತವೋ ಯನ್ತಿ, ಸಬ್ಬಥಾ ನಿರಜತ್ತನಂ.

ಏವಂ ಜಿನಾ’ನುಭಾವಸ್ಸ, ಸಮುಕ್ಕಂಸೋ’ತ್ರ ದಿಸ್ಸತಿ;

ಪಞ್ಞವಾ ವಿಧಿನಾ’ನೇನ, ಚಿನ್ತಯೇ ಪರ ಮೀದಿಸಂ.

ಉದಾರೋ ಸೋಪಿ ವಿಞ್ಞೇಯ್ಯೋ, ಯಂ ಪಸತ್ಥ ವಿಸೇಸನಂ;

ಯಥಾ ಕೀಳಾಸರೋ ಲೀಲಾ, ಹಾಸೋ ಹೇಮಙ್ಗದಾ’ದಯೋ.

ಲೋಕಿಯ’ತ್ಥಾ’ನ’ತಿಕ್ಕನ್ತಾ, ಕನ್ತಾ ಸಬ್ಬಜನಾನಪಿ;

ಕನ್ತಿ ನಾಮಾ’ತಿವುತ್ತಸ್ಸ, ವುತ್ತಾ ಸಾ ಪರಿಹಾರತೋ.

ಸಾ’ಯಂ ತದುಭಯಾ ನೇಯ್ಯ, ಪರಿಹಾರೇ ಪದಸ್ಸಿತಾ;

ಯಥಾ ಮರೀಚಿಚ್ಚಾದಿ ಚ, ಮನೋನುರಞ್ಜನೋಚ್ಚಾದಿ.

ಸಭಾವಾ’ಮಲತಾ ಧೀರ, ಮುಧಾ ಪಾದನಖೇಸು ತೇ;

ಯತೋ ತೇ’ವನತಾ’ನನ್ತ, ಮೋಳಿಚ್ಛಾಯಾ ಜಹನ್ತಿ ನೋ.

‘ಬನ್ಧಸಾರೋ’ತಿ ಮಞ್ಞನ್ತಿ, ಯಂ ಸಮಗ್ಗಾಪಿ ವಿಞ್ಞುನೋ;

ದಸ್ಸನಾ’ವಸರಂ ಪತ್ತೋ, ಸಮಾಧಿ ನಾಮ’ಯಂ ಗುಣೋ.

ಅಞ್ಞಧಮ್ಮೋ ತತೋ’ಞ್ಞತ್ಥ, ಲೋಕಸೀಮಾ’ನುರೋಧತೋ;

ಸಮ್ಮಾ ಆಧೀಯತೇ’ಚ್ಚೇ’ಸೋ, ‘ಸಮಾಧೀ’ತಿ ನಿರುಚ್ಚತಿ.

ಅಪಾಣೇ ¶ ಪಾಣೀನಂ ಧಮ್ಮೋ, ಸಮ್ಮಾ ಆಧೀಯತೇ ಕ್ವಚಿ,;

ನಿರೂಪೇ ರೂಪಯುತ್ತಸ್ಸ, ನಿರಸೇ ಸರಸಸ್ಸ, ಚ.

ಅದ್ರವೇ ದ್ರವಯುತ್ತಸ್ಸ, ಅಕತ್ತರಿಪಿ ಕತ್ತುತಾ,;

ಕಠಿನಸ್ಸಾ’ಸರೀರೇ,ಪಿ, ರೂಪಂ ತೇಸಂ ಕಮಾ ಸಿಯಾ.

ಉಣ್ಣಾ ಪುಣ್ಣಿ’ನ್ದುನಾ ನಾಥ! ದಿವಾಪಿ ಸಹ ಸಙ್ಗಮಾ;

ವಿನಿದ್ದಾ ಸಮ್ಪಮೋದನ್ತಿ, ಮಞ್ಞೇ ಕುಮುದಿನೀ ತವ.

ದಯಾರಸೇಸು ಮುಜ್ಜನ್ತಾ, ಜನಾ’ಮತರಸೇಸ್ವಿ’ವ;

ಸುಖಿತಾ ಹತದೋಸಾ ತೇ, ನಾಥ! ಪಾದ’ಮ್ಬುಜಾ’ನತಾ.

ಮಧುರೇಪಿ ಗುಣೇ ಧೀರ, ನ’ಪ್ಪಸೀದನ್ತಿ ಯೇ ತವ;

ಕೀದಿಸೀ ಮನಸೋವುತ್ತಿ, ತೇಸಂ ಖಾರಗುಣಾನ ಭೋ’.

ಸಬ್ಬತ್ಥಸಿದ್ಧ! ಚೂಳಕ, ಪುಟಪೇಯ್ಯಾ ಮಹಾಗುಣಾ;

ದಿಸಾ ಸಮನ್ತಾ ಧಾವನ್ತಿ, ಕುನ್ದಸೋಭಾ ಸ ಲಕ್ಖಣಾ.

ಮಾರಾ’ರಿಬಲವಿಸ್ಸಟ್ಠಾ, ಕುಣ್ಠಾ ನಾನಾವಿಧಾ’ಯುಧಾ;

ಲಜ್ಜಮಾನಾ’ಞ್ಞವೇಸೇನ, ಜಿನ! ಪಾದಾ’ನತಾ ತವ.

ಸದ್ಧಮ್ಮರಂಸಿನಾ ಭಾತಿ, ಭಿನ್ದ ಮನ್ದತಮಂ ಪರಂ.

ವಮನು’ಗ್ಗಿರನಾದ್ಯೇ’ತಂ, ಗುಣವುತ್ಯ’ಪರಿಚ್ಚುತಂ;

ಅತಿಸುನ್ದರ ಮಞ್ಞಂ ತು, ಕಾಮಂ ವಿನ್ದತಿ ಗಾಮ್ಮತಂ.

ಕನ್ತೀನಂ ವಮನಬ್ಯಾಜಾ, ಮುನಿಪಾದನಖಾ’ವಲೀ;

ಚನ್ದಕನ್ತೀ ಪಿವನ್ತೀ’ವ, ನಿಪ್ಪಭಂ ತಂ ಕರೋನ್ತಿಯೋ.

ಅಚಿತ್ತಕತ್ತುಕಂ ¶ ರುಚ್ಯ [ರುಚ್ಚ (ಸೀ.)], ಮಿಚ್ಚೇವಂ ಗುಣಕಮ್ಮತಂ;

ಸಚಿತ್ತಕತ್ತುಕಂ ಪೇ’ತಂ, ಗುಣಕಮ್ಮಂ ಯದು’ತ್ತಮಂ.

ಉಗ್ಗಿರನ್ತೋ’ವ ಸಸ್ನೇಹ, ರಸಂ ಜಿನವರೋ ಜನೇ;

ಭಾಸನ್ತೋ ಮಧುರಂ ಧಮ್ಮಂ, ಕಂ ನ ಸಪ್ಪೀಣಯೇ ಜನಂ.

ಯೋ ಸದ್ದಸತ್ಥಕುಸಲೋ ಕುಸಲೋ ನಿಘಣ್ಡು,

ಛನ್ದೋಅಲಙ್ಕತಿಸು ನಿಚ್ಚಕತಾ’ಭಿಯೋಗೋ;

ಸೋ’ಯಂ ಕವಿತ್ತವಿಕಲೋಪಿ ಕವೀಸು ಸಙ್ಖ್ಯ,

ಮೋಗ್ಗಯ್ಹ ವಿನ್ದತಿ ಹಿ ಕಿತ್ತಿ’ ಮಮನ್ದರೂಪಂ.

ಇತಿ ಸಙ್ಘರಕ್ಖಿತಮಹಾಸಾಮಿವಿರಚಿತೇ ಸುಬೋಧಾಲಙ್ಕಾರೇ

೪. ಅತ್ಥಾಲಙ್ಕಾರಾವಬೋಧ-ಚತುತ್ಥಪರಿಚ್ಛೇದ

ಅತ್ಥಾಲಙ್ಕಾರಸಹಿತಾ, ಸಗುಣಾ ಬನ್ಧಪದ್ಧತಿ;

ಅಚ್ಚನ್ತಕನ್ತಾ ಕನ್ತಾ [ಯತೋ ಅಚ್ಚನ್ತಕನ್ತಾ (ಕ.)] ವ ವುಚ್ಚನ್ತೇ ತೇ ತತೋ’ಧುನಾ.

ಸಭಾವ, ವಙ್ಕವುತ್ತೀನಂ, ಭೇದಾ ದ್ವಿಧಾ ಅಲಂಕ್ರಿಯಾ;

ಪಠಮಾ ತತ್ಥ ವತ್ಥೂನಂ, ನಾನಾವತ್ಥಾ’ವಿಭಾವಿನೀ.

ಲೀಲಾ ವಿಕನ್ತಿ ಸುಭಗೋ, ದಿಸಾ ಥಿರ ವಿಲೋಕನೋ;

ಬೋಧಿಸತ್ತಙ್ಕುರೋ ಭಾಸಂ, ವಿರೋಚಿ ವಾಚ ಮಾಸಭಿಂ.

ವುತ್ತಿ ವತ್ಥುಸಭಾವಸ್ಸ, ಯಾ’ಞ್ಞಥಾ ಸಾ’ಪರಾ ಭವೇ;

ತಸ್ಸಾ’ನನ್ತವಿಕಪ್ಪತ್ತಾ, ಹೋತಿ ಬೀಜೋ’ಪದಸ್ಸನಂ.

ತತ್ಥಾ’ತಿಸಯ, ಉಪಮಾ, ರೂಪಕಾ, ವುತ್ತಿ, ದೀಪಕಂ,;

ಅಕ್ಖೇಪೋ, ತ್ಥನ್ತರನ್ಯಾಸೋ, ಬ್ಯತಿರೇಕೋ, ವಿಭಾವನಾ.

ಹೇತು ¶ , ಕ್ಕಮೋ, ಪಿಯತರಂ, ಸಮಾಸ, ಪರಿಕಪ್ಪನಾ;

ಸಮಾಹಿತಂ, ಪರಿಯಾಯ, ವುತ್ತಿ, ಬ್ಯಾಜೋಪವಣ್ಣನಂ.

ವಿಸೇಸ, ರುಳ್ಹಾಹಙ್ಕಾರಾ, ಸಿಲೇಸೋ, ತುಲ್ಯಯೋಗಿತಾ;

ನಿದಸ್ಸನಂ, ಮಹನ್ತತ್ತಂ, ವಞ್ಚನಾ, ಪ್ಪಕತತ್ಥುತಿ,.

ಏಕಾವಲಿ, ಅಞ್ಞಮಞ್ಞಂ, ಸಹವುತ್ತಿ, ವಿರೋಧಿತಾ;

ಪರಿವುತ್ತಿ, ಬ್ಭಮೋ, ಭಾವೋ, ಮಿಸ್ಸ, ಮಾಸೀ, ರಸೀ, ಇತಿ.

ಏತೇ ಭೇದಾ ಸಮುದ್ದಿಟ್ಠಾ, ಭಾವೋ ಜೀವಿತ ಮುಚ್ಚತೇ;

ವಙ್ಕವುತ್ತೀಸು ಪೋಸೇಸಿ, ಸಿಲೇಸೋ ತು ಸಿರಿಂ ಪರಂ.

ಪಕಾಸಕಾ ವಿಸೇಸಸ್ಸ, ಸಿಯಾ’ತಿಸಯವುತ್ತಿ ಯಾ;

ಲೋಕಾ’ತಿಕ್ಕನ್ತವಿಸಯಾ, ಲೋಕಿಯಾ,ತಿ ಚ ಸಾ ದ್ವಿಧಾ.

ಪಟಿಪಾದೀಯತೇ ತ್ವ’ಜ್ಜ, ಲೋಕಾತಿಕ್ಕನ್ತಗೋಚರಾ.

ಪಿವನ್ತಿ ದೇಹಕನ್ತೀ ಯೇ, ನೇತ್ತಞ್ಜಲಿಪುಟೇನ ತೇ;

ನಾ’ಲಂ ಹನ್ತುಂ ಜಿನೇ’ಸಂ ತ್ವಂ, ತಣ್ಹಂ ತಣ್ಹಾಹರೋಪಿ ಕಿಂ?

ಉಪಮಾನೋ’ಪಮೇಯ್ಯಾನಂ, ಸಧಮ್ಮತ್ತಂ ಸಿಯೋ’ಪಮಾ;

ಸದ್ದ, ತ್ಥಗಮ್ಮಾ, ವಾಕ್ಯತ್ಥ, ವಿಸಯಾ,ತಿ ಚ ಸಾ ಭಿಧಾ.

ಸಮಾಸ, ಪಚ್ಚಯೇ, ವಾ’ದೀ, ಸದ್ದಾ ತೇಸಂ ವಸಾ ತಿಧಾ;

ಸದ್ದಗಮ್ಮಾ ಸಮಾಸೇನ, ಮುನಿನ್ದೋ ಚನ್ದಿಮಾ’ನನೋ.

ಆಯಾದೀ ಪಚ್ಚಯಾ ತೇಹಿ, ವದನಂ ಪಙ್ಕಜಾಯತೇ;

ಮುನಿನ್ದನಯನ ದ್ವನ್ದಂ, ನೀಲುಪ್ಪಲದಲೀಯತಿ.

ಇವಾದೀ ಇವ, ವಾ, ತುಲ್ಯ, ಸಮಾನ, ನಿಭ, ಸನ್ನಿಭಾ;

ಯಥಾ, ಸಙ್ಕಾಸ, ತುಲಿತ, ಪ್ಪಕಾಸ, ಪತಿರೂಪಕಾ.

ಸರೀ, ಸರಿಕ್ಖ, ಸಂವಾದೀ, ವಿರೋಧಿ, ಸದಿಸಾ, ವಿಯ;

ಪಟಿಪಕ್ಖ, ಪಚ್ಚನೀಕಾ, ಸಪಕ್ಖೋ, ಪಮಿತೋ, ಪಮಾ.

ಪಟಿಬಿಮ್ಬ, ಪಟಿಚ್ಛನ್ನ, ಸರೂಪ, ಸಮ, ಸಮಿತಾ;

ಸವಣ್ಣಾ, ಭಾ, ಪಟಿನಿಧಿ, ಸಧಮ್ಮಾ, ದಿ ಸಲಕ್ಖಣಾ.

ಜಯತ್ಯ ¶ , ಕ್ಕೋಸತಿ, ಹಸತಿ, ಪತಿಗಜ್ಜತಿ, ದೂಭತಿ;

ಉಸೂಯತ್ಯ, ವಜಾನಾತಿ, ನಿನ್ದತಿ, ಸ್ಸತಿ, ರುನ್ಧತಿ.

ತಸ್ಸ ಚೋರೇತಿ ಸೋಭಗ್ಗಂ, ತಸ್ಸ ಕನ್ತಿಂ ವಿಲುಮ್ಪತಿ;

ತೇನ ಸದ್ಧಿಂ ವಿವದತಿ, ತುಲ್ಯಂ ತೇನಾ’ಧಿರೋಹತಿ.

ಕಚ್ಛಂ ವಿಗಾಹತೇ, ತಸ್ಸ, ತ ಮನ್ವೇತ್ಯ, ನುಬನ್ಧತಿ;

ತಂಸೀಲಂ, ತಂನಿಸೇಧೇತಿ, ತಸ್ಸ ಚಾ’ನುಕರೋತಿ, ಮೇ.

ಉಪಮಾನೋ’ಪಮೇಯ್ಯಾನಂ, ಸಧಮ್ಮತ್ತಂ ವಿಭಾವಿಭಿ;

ಇಮೇಹಿ ಉಪಮಾಭೇದಾ, ಕೇಚಿ ನಿಯ್ಯನ್ತಿ ಸಮ್ಪತಿ.

ವಿಕಾಸಿಪದುಮಂ’ವಾ’ತಿ, ಸುನ್ದರಂ ಸುಗತಾ’ನನಂ;

ಇತಿ ಧಮ್ಮೋಪಮಾ ನಾಮ, ತುಲ್ಯಧಮ್ಮನಿದಸ್ಸನಾ.

ಧಮ್ಮಹೀನಾ ‘‘ಮುಖ’ಮ್ಭೋಜ, ಸದಿಸಂ ಮುನಿನೋ’’ಇತಿ;

ವಿಪರೀತೋ’ಪಮಾ ‘‘ತುಲ್ಯ, ಮಾನನೇನ’ಮ್ಬುಜಂ ತವ’’.

ತವಾ’ನನ’ಮಿವ’ಮ್ಭೋಜಂ, ಅಮ್ಭೋಜ’ಮಿವ ತೇ ಮುಖಂ;

ಅಞ್ಞಮಞ್ಞೋಪಮಾ ಸಾ’ಯಂ, ಅಞ್ಞಮಞ್ಞೋಪಮಾನತೋ.

‘‘ಯದಿ ಕಿಞ್ಚಿ ಭವೇ’ಮ್ಭೋಜಂ, ಲೋಚನ’ಬ್ಭಮುವಿಬ್ಭಮಂ;

ಧಾರೇತುಂ ಮುಖಸೋಭಂ ತಂ, ತವೇ’’ತಿ ಅಬ್ಭುತೋಪಮಾ.

‘‘ಸುಗನ್ಧಿ ಸೋಭಾ ಸಮ್ಬನ್ಧೀ, ಸಿಸಿರಂ’ಸು ವಿರೋಧಿ ಚ;

ಮುಖಂ ತವ’ಮ್ಬುಜಂವೇ’ತಿ’’, ಸಾ ಸಿಲೇಸೋಪಮಾ ಮತಾ.

ಸರೂಪಸದ್ದವಾಚ್ಚತ್ತಾ, ಸಾ ಸನ್ತಾನೋಪಮಾ ಯಥಾ;

ಬಾಲಾ’ವು’ಯ್ಯಾನಮಾಲಾ’ಯಂ, ಸಾ’ಲಕಾ’ನನಸೋಭಿನೀ.

ಖಯೀ ಚನ್ದೋ, ಬಹುರಜಂ, ಪದುಮಂ, ತೇಹಿ ತೇ ಮುಖಂ;

ಸಮಾನಮ್ಪಿ ಸಮುಕ್ಕಂಸಿ, ತ್ಯ’ಯಂ ನಿನ್ದೋಪಮಾ ಮತಾ.

ಅಸಮತ್ಥೋ ಮುಖೇನಿ’ನ್ದು, ಜಿನ! ತೇ ಪಟಿಗಜ್ಜಿತುಂ;

ಜಳೋ ಕಲಙ್ಕೀ’ತಿ ಅಯಂ, ಪಟಿಸೇಧೋಪಮಾ ಸಿಯಾ.

‘‘ಕಚ್ಛಂ ಚನ್ದಾರವಿನ್ದಾನಂ, ಅತಿಕ್ಕಮ್ಮ ಮುಖಂ ತವ;

ಅತ್ತನಾ’ವ ಸಮಂ ಜಾತ’’, ಮಿತ್ಯ’ಸಾಧಾರಣೋಪಮಾ.

‘‘ಸಬ್ಬ’ಮ್ಭೋಜ’ಪ್ಪಭಾಸಾರೋ, ರಾಸಿಭೂತೋ’ವ ಕತ್ಥಚಿ;

ತವಾ’ನನಂ ವಿಭಾತೀ’’ತಿ, ಹೋತಾ’ಭೂತೋಪಮಾ ಅಯಂ.

ಪತೀಯತೇ’ತ್ಥಗಮ್ಮಾ ತು, ಸದ್ದಸಾಮತ್ಥಿಯಾ ಕ್ವಚಿ;

ಸಮಾಸ, ಪ್ಪಚ್ಚಯೇ, ವಾದಿ, ಸದ್ದಯೋಗಂ ವಿನಾ ಅಪಿ.

ಭಿಙ್ಗಾನೇ’ಮಾನಿ ¶ ಚಕ್ಖೂನಿ, ನಾ’ಮ್ಬುಜಂ ಮುಖ’ಮೇವಿ’ದಂ;

ಸುಬ್ಯತ್ತಸದಿಸತ್ತೇನ, ಸಾ ಸರೂಪೋಪಮಾ ಮತಾ.

‘‘ಮಯೇ’ವ ಮುಖಸೋಭಾ’ಸ್ಸೇ, ತ್ಯಲ’ಮಿನ್ದು! ವಿಕತ್ಥನಾ;

ಯತೋ’ಮ್ಬುಜೇಪಿ ಸಾ’ತ್ಥೀತಿ’’, ಪರಿಕಪ್ಪೋಪಮಾ ಅಯಂ.

‘‘ಕಿಂ ವಾ’ಮ್ಬುಜ’ನ್ತೋಭನ್ತಾಲಿ, ಕಿಂ ಲೋಲನಯನಂ ಮುಖಂ;

ಮಮ ದೋಲಾಯತೇ ಚಿತ್ತ’’, ಮಿಚ್ಚ’ಯಂ ಸಂಸಯೋಪಮಾ.

ಕಿಞ್ಚಿ ವತ್ಥುಂ ಪದಸ್ಸೇತ್ವಾ, ಸಧಮ್ಮಸ್ಸಾ’ಭಿಧಾನತೋ;

ಸಾಮ್ಯಪ್ಪತೀತಿಸಬ್ಭಾವಾ, ಪತಿವತ್ಥುಪಮಾ ಯಥಾ.

ಜನೇಸು ಜಾಯಮಾನೇಸು, ನೇ’ಕೋಪಿ ಜಿನಸಾದಿಸೋ;

ದುತಿಯೋ ನನು ನತ್ಥೇ’ವ, ಪಾರಿಜಾತಸ್ಸ ಪಾದಪೋ.

ವಾಕ್ಯತ್ಥೇನೇ’ವ ವಾಕ್ಯತ್ಥೋ, ಯದಿ ಕೋಚೂ’ಪಮೀಯತೇ;

ಇವಯುತ್ತಾ, ವಿಯುತ್ತತ್ತಾ, ಸಾ ವಾಕ್ಯತ್ಥೋಪಮಾ ದ್ವಿಧಾ.

ಜಿನೋ ಸಂಕ್ಲೇಸತತ್ತಾನಂ, ಆವಿಭೂತೋ ಜನಾನ’ಯಂ;

ಘಮ್ಮಸನ್ತಾಪತತ್ತಾನಂ, ಘಮ್ಮಕಾಲೇ’ಮ್ಬುದೋ ವಿಯ.

ಮುನಿನ್ದಾನನ ಮಾಭಾತಿ, ವಿಲಾಸೇಕಮನೋಹರಂ;

ಉದ್ಧಂ ಸಮುಗ್ಗತಸ್ಸಾ’ಪಿ, ಕಿಂ ತೇ ಚನ್ದ ವಿಜಮ್ಭನಾ.

ಸಮುಬ್ಬೇಜೇತಿ ಧೀಮನ್ತಂ, ಭಿನ್ನಲಿಙ್ಗಾದಿಕಂ ತು ಯಂ;

ಉಪಮಾದೂಸನಾಯಾ’ಲ, ಮೇತಂ ಕತ್ಥಚಿ ತಂ ಯಥಾ.

ಹಂಸೀ’ವಾ’ಯಂ ಸಸೀ ಭಿನ್ನ, ಲಿಙ್ಗಾ, ಕಾಸಂ ಸರಾನಿ’ವ;

ವಿಜಾತಿ ವಚನಾ, ಹೀನಾ, ಸಾ’ವ ಭತ್ತೋ ಭಟೋ’ಧಿಪೇ.

‘‘ಖಜ್ಜೋತೋ ಭಾಣುಮಾಲೀ’ವ, ವಿಭಾತಿ’’ತ್ಯಧಿಕೋಪಮಾ;

ಅಫುಟ್ಠತ್ಥಾ ‘‘ಬಲಮ್ಬೋಧಿ, ಸಾಗರೋ ವಿಯ ಸಂಖುಭಿ.’’

‘‘ಚನ್ದೇ ಕಲಙ್ಕೋ ಭಿಙ್ಗೋ’ವೇ’, ತ್ಯು’ಪಮಾಪೇಕ್ಖಿನೀ ಅಯಂ;

ಖಣ್ಡಿತಾ ಕೇರವಾ’ಕಾರೋ, ಸಕಲಙ್ಕೋ ನಿಸಾಕರೋ.

ಇಚ್ಚೇವಮಾದಿರೂಪೇಸು, ಭವನ್ತಿ ವಿಗತಾ’ದರಾ;

ಕರೋನ್ತಿ ಚಾ’ದರಂ ಧೀರಾ, ಪಯೋಗೇ ಕ್ವಚಿ ದೇ’ವ ತು.

ಇತ್ಥೀಯಂ’ವಾ’ಜನೋ ಯಾತಿ, ವದತ್ಯೇ’ಸಾ ಪುಮಾ ವಿಯ;

ಪಿಯೋ ಪಾಣಾ ಇವಾ’ಯಂ ಮೇ, ವಿಜ್ಜಾ ಧನ’ಮಿವ’ಚ್ಚಿತಾ.

ಭವಂ ¶ ವಿಯ ಮಹೀಪಾಲ, ದೇವರಾಜಾ ವಿರೋಚತೇ;

ಅಲ’ಮಂಸುಮತೋ ಕಚ್ಛಂ, ತೇಜಸಾ ರೋಹಿತುಂ ಅಯಂ.

ಉಪಮಾನೋ’ಪಮೇಯ್ಯಾನಂ, ಅಭೇದಸ್ಸ ನಿರೂಪನಾ;

ಉಪಮಾ’ವ ತಿರೋಭೂತ, ಭೇದಾ ರೂಪಕ ಮುಚ್ಚತೇ.

ಅಸೇಸ ವತ್ಥು ವಿಸಯಂ, ಏಕದೇಸ ವಿವುತ್ತಿ [ವಿವತ್ತಿ (ಟೀಕಾ)], ಚ;

ತಂ ದ್ವಿಧಾ ಪುನ ಪಚ್ಚೇಕಂ, ಸಮಾಸಾದಿವಸಾ ತಿಧಾ.

ಅಙ್ಗುಲಿದಲ ಸಂಸೋಭಿಂ, ನಖದೀಧಿತಿ ಕೇಸರಂ;

ಸಿರಸಾ ನ ಪಿಲನ್ಧನ್ತಿ, ಕೇ ಮುನಿನ್ದ ಪದ’ಮ್ಬುಜಂ.

ರತನಾನಿ ಗುಣಾ ಭೂರೀ, ಕರುಣಾ ಸೀತಲಂ ಜಲಂ;

ಗಮ್ಭೀರತ್ತ ಮಗಾಧತ್ತಂ, ಪಚ್ಚಕ್ಖೋ’ಯಂ ಜಿನೋ’ಮ್ಬುಧಿ.

ಚನ್ದಿಕಾ ಮನ್ದಹಾಸಾ ತೇ, ಮುನಿನ್ದ! ವದನಿ’ನ್ದುನೋ;

ಪಬೋಧಯತ್ಯ’ಯಂ ಸಾಧು, ಮನೋ ಕುಮುದ ಕಾನನಂ.

ಅಸೇಸವತ್ಥುವಿಸಯೇ, ಪಭೇದೋ ರೂಪಕೇ ಅಯಂ;

ಏಕದೇಸವಿವುತ್ತಿಮ್ಹಿ, ಭೇದೋ ದಾನಿ ಪವುಚ್ಚತಿ.

ವಿಲಾಸ ಹಾಸ ಕುಸುಮಂ, ರುಚಿರಾ’ಧರ ಪಲ್ಲವಂ;

ಸುಖಂ ಕೇ ವಾ ನ ವಿನ್ದನ್ತಿ, ಪಸ್ಸನ್ತಾ ಮುನಿನೋ ಮುಖಂ.

ಪಾದದ್ವನ್ದಂ ಮುನಿನ್ದಸ್ಸ, ದದಾತು ವಿಜಯಂ ತವ;

ನಖರಂಸೀ ಪರಂ ಕನ್ತಾ, ಯಸ್ಸ ಪಾಪಜಯದ್ಧಜಾ.

ಸುನಿಮ್ಮಲಕಪೋಲಸ್ಸ, ಮುನಿನ್ದ ವದನಿ’ನ್ದುನೋ;

ಸಾಧು’ಪ್ಪಬುದ್ಧ ಹದಯಂ, ಜಾತಂ ಕೇರವ ಕಾನನಂ.

ರೂಪಕಾನಿ ¶ ಬಹೂನ್ಯೇ’ವ [ಟೀಕಾಯಂ ಉದ್ಧಟಂ ಯುತ್ತರೂಪಕಂ ಸಿತಪುಪ್ಫುಜಲಂ ಲೋಲ, ನೇತ್ತಭಿಙ್ಗ ತವಾ’ನನಂ; ಕಸ್ಸ ನಾಮ ಮನೋ ಧೀರ, ನಾಕಡ್ಢತಿ ಮನೋಹರಂ;], ಯುತ್ತಾ, ಯುತ್ತಾದಿಭೇದತೋ;

ವಿಸುಂ ನ ತಾನಿ ವುತ್ತಾನಿ, ಏತ್ಥೇ’ವ’ನ್ತೋಗಧಾನಿ’ತಿ.

‘‘ಚನ್ದಿಮಾ’ಕಾಸಪದುಮ’’, ಮಿಚ್ಚೇತಂ ಖಣ್ಡರೂಪಕಂ;

ದುಟ್ಠ, ‘‘ಮಮ್ಬೋರುಹವನಂ, ನೇತ್ತಾನಿ’ಚ್ಚಾ’’ದಿ ಸುನ್ದರಂ.

ಪರಿಯನ್ತೋ ವಿಕಪ್ಪಾನಂ, ರೂಪಕಸ್ಸೋ’ಪಮಾಯ ಚ;

ನತ್ಥಿ ಯಂ ತೇನ ವಿಞ್ಞೇಯ್ಯಂ, ಅವುತ್ತ ಮನುಮಾನತೋ.

ಪುನಪ್ಪುನ ಮುಚ್ಚಾರಣಂ [ಪುನಪ್ಪುನುಚ್ಚಾರಣಂ ಯಂ (ಸೀ. ಕ.)], ಯಮತ್ಥಸ್ಸ, ಪದಸ್ಸ ಚ;

ಉಭಯೇಸಞ್ಚ ವಿಞ್ಞೇಯ್ಯಾ, ಸಾ’ಯ’ಮಾವುತ್ತಿ ನಾಮತೋ.

ಮನೋ ಹರತಿ ಸಬ್ಬೇಸಂ, ಆದದಾತಿ ದಿಸಾ ದಸ;

ಗಣ್ಹಾತಿ ನಿಮ್ಮಲತ್ತಞ್ಚ, ಯಸೋರಾಸಿ ಜಿನಸ್ಸ’ಯಂ.

ವಿಭಾಸೇನ್ತಿ ದಿಸಾ ಸಬ್ಬಾ, ಮುನಿನೋ ದೇಹಕನ್ತಿಯೋ;

ವಿಭಾ ಸೇನ್ತಿ ಚ ಸಬ್ಬಾಪಿ, ಚನ್ದಾದೀನಂ ಹತಾ ವಿಯ.

ಜಿತ್ವಾ ವಿಹರತಿ ಕ್ಲೇಸ, ರಿಪುಂ ಲೋಕೇ ಜಿನೋ ಅಯಂ;

ವಿಹರತ್ಯ’ರಿವಗ್ಗೋ’ಯಂ, ರಾಸಿಭೂತೋ’ವ ದುಜ್ಜನೇ.

ಏಕತ್ಥ ವತ್ತಮಾನಮ್ಪಿ, ಸಬ್ಬವಾಕ್ಯೋ’ಪಕಾರಕಂ;

ದೀಪಕಂ ನಾಮ ತಂ ಚಾದಿ, ಮಜ್ಝ, ನ್ತವಿಸಯಂ ತಿಧಾ.

ಅಕಾಸಿ ಬುದ್ಧೋ ವೇನೇಯ್ಯ, ಬನ್ಧೂನ ಮಮಿತೋ’ದಯಂ;

ಸಬ್ಬಪಾಪೇಹಿ ಚ ಸಮಂ, ನೇಕತಿತ್ಥಿಯಮದ್ದನಂ.

ದಸ್ಸನಂ ಮುನಿನೋ ಸಾಧು, ಜನಾನಂ ಜಾಯತೇ’ಮತಂ;

ತದ’ಞ್ಞೇಸಂ ತು ಜನ್ತೂನಂ, ವಿಸಂ ನಿಚ್ಚೋ’ಪತಾಪನಂ.

ಅಚ್ಚನ್ತ ¶ ಕನ್ತ ಲಾವಣ್ಯ, ಚನ್ದಾ’ತಪ ಮನೋಹರೋ;

ಜಿನಾ’ನನಿ’ನ್ದು ಇನ್ದು ಚ, ಕಸ್ಸ ನಾ’ನನ್ದಕೋ ಭವೇ.

ಹೋತಾ’ವಿಪ್ಪಟಿಸಾರಾಯ, ಸೀಲಂ, ಪಾಮೋಜ್ಜಹೇತು ಸೋ;

ತಂ ಪೀತಿಹೇತು, ಸಾ ಚಾ’ಯಂ, ಪಸ್ಸದ್ಧ್ಯಾ’ದಿ ಪಸಿದ್ಧಿಯಾ.

ಇಚ್ಚಾ’ದಿದೀಪಕತ್ತೇಪಿ, ಪುಬ್ಬಂ ಪುಬ್ಬ ಮಪೇಕ್ಖಿನೀ;

ವಾಕ್ಯಮಾಲಾ ಪವತ್ತಾತಿ, ತಂ ಮಾಲಾದೀಪಕಂ ಮತಂ.

ಅನೇನೇ’ವ’ಪ್ಪಕಾರೇನ, ಸೇಸಾನ ಮಪಿ ದೀಪಕೇ;

ವಿಕಪ್ಪಾನಂ ವಿಧಾತಬ್ಬಾ, ನುಗತಿ ಸುದ್ಧಬುದ್ಧಿಭಿ.

ವಿಸೇಸ ವಚನಿ’ಚ್ಛಾಯಂ, ನಿಸೇಧವಚನಂ ತು ಯಂ;

ಅಕ್ಖೇಪೋ ನಾಮ ಸೋಯಞ್ಚ, ತಿಧಾ ಕಾಲಪ್ಪಭೇದತೋ.

ಏಕಾಕೀ’ ನೇಕಸೇನಂ ತಂ, ಮಾರಂ ಸ ವಿಜಯೀ ಜಿನೋ;

ಕಥಂ ತ ಮಥವಾ ತಸ್ಸ, ಪಾರಮೀಬಲ ಮೀದಿಸಂ.

ಕಿಂ ಚಿತ್ತೇ’ಜಾಸಮುಗ್ಘಾತಂ, ಅಪತ್ತೋ’ಸ್ಮೀತಿ ಖಿಜ್ಜಸೇ;

ಪಣಾಮೋ ನನು ಸೋ ಯೇ’ವ, ಸಕಿಮ್ಪಿ ಸುಗತೇ ಗತೋ.

ಸಚ್ಚಂ ನ ತೇ ಗಮಿಸ್ಸನ್ತಿ, ಸಿವಂ ಸುಜನಗೋಚರಂ;

ಮಿಚ್ಛಾದಿಟ್ಠಿ ಪರಿಕ್ಕನ್ತ [ಪರಿಕನ್ತ (ಕ.)], ಮಾನಸಾ ಯೇ ಸುದುಜ್ಜನಾ.

ಞೇಯ್ಯೋ ಅತ್ಥನ್ತರನ್ಯಾಸೋ, ಯೋ, ಞ್ಞವಾಕ್ಯತ್ಥಸಾಧನೋ;

ಸಬ್ಬಬ್ಯಾಪೀ ವಿಸೇಸಟ್ಠೋ, ಹಿವಿಸಿಟ್ಠ’ಸ್ಸ ಭೇದತೋ.

ತೇಪಿ ಲೋಕಹಿತಾ ಸತ್ತಾ, ಸೂರಿಯೋ ಚನ್ದಿಮಾ ಅಪಿ;

ಅತ್ಥಂ ಪಸ್ಸ ಗಮಿಸ್ಸನ್ತಿ, ನಿಯಮೋ ಕೇನ ಲಙ್ಘ್ಯತೇ.

ಸತ್ಥಾ ದೇವಮನುಸ್ಸಾನಂ, ವಸೀ ಸೋಪಿ ಮುನಿಸ್ಸರೋ;

ಗತೋ’ವ ನಿಬ್ಬುತಿಂ ಸಬ್ಬೇ, ಸಙ್ಖಾರಾ ನ ಹಿ ಸಸ್ಸತಾ.

ಜಿನೋ ¶ ಸಂಸಾರಕನ್ತಾರಾ, ಜನಂ ಪಾಪೇತಿ [ಪಾಪೇಸಿ (ಕ.)] ನಿಬ್ಬುತಿಂ;

ನನು ಯುತ್ತಾ ಗತಿ ಸಾ’ಯಂ, ವೇಸಾರಜ್ಜ ಸಮಙ್ಗಿನಂ.

ಸುರತ್ತಂ ತೇ’ಧರಫುಟಂ, ಜಿನ! ರಞ್ಜೇತಿ ಮಾನಸಂ;

ಸಯಂ ರಾಗಪರೀತಾ ಹಿ, ಪರೇ ರಞ್ಜೇನ್ತಿ ಸಙ್ಗತೇ.

ವಾಚ್ಚೇ ಗಮ್ಮೇ ಥ ವತ್ಥೂನಂ, ಸದಿಸತ್ತೇ ಪಭೇದನಂ;

ಬ್ಯತಿರೇಕೋ’ಯ’ಮಪ್ಯೇ’ಕೋ, ಭಯಭೇದಾ ಚತುಬ್ಬಿಧೋ.

ಗಮ್ಭೀರತ್ತ ಮಹತ್ತಾದಿ, ಗುಣಾ ಜಲಧಿನಾ ಜಿನ!;

ತುಲ್ಯೋ ತ್ವ ಮಸಿ ಭೇದೋ ತು, ಸರೀರೇನೇ’ದಿಸೇನ ತೇ.

ಮಹಾಸತ್ತಾ’ತಿಗಮ್ಭೀರಾ, ಸಾಗರೋ ಸುಗತೋಪಿ ಚ;

ಸಾಗರೋ’ಞ್ಜನಸಙ್ಕಾಸೋ, ಜಿನೋ ಚಾಮೀಕರಜ್ಜುತಿ.

ನ ಸನ್ತಾಪಾಪಹಂ ನೇವಿ, ಚ್ಛಿತದಂ ಮಿಗಲೋಚನಂ;

ಮುನಿನ್ದ! ನಯನದ್ವನ್ದಂ, ತವ ತಗ್ಗುಣ ಭೂಸಿತಂ.

ಮುನಿನ್ದಾನನ ಮಮ್ಭೋಜ, ಮೇಸಂ ನಾನತ್ತ ಮೀದಿಸಂ;

ಸುವುತ್ತಾ’ಮತಸನ್ದಾಯೀ, ವದನಂ ನೇ’ದಿಸ’ಮ್ಬುಜಂ.

ಪಸಿದ್ಧಂ ಕಾರಣಂ ಯತ್ಥ, ನಿವತ್ತೇತ್ವಾ’ ಞಾಕಾರಣಂ;

ಸಾಭಾವಿಕತ್ತ ಮಥವಾ, ವಿಭಾಬ್ಯಂ ಸಾ ವಿಭಾವನಾ.

ಅನಞ್ಜಿತಾ’ಸಿತಂ ನೇತ್ತಂ, ಅಧರೋ ರಞ್ಜಿತಾ’ರುಣೋ;

ಸಮಾನತಾ ಭಮು ಚಾ’ಯಂ, ಜಿನಾ’ನಾವಞ್ಚಿತಾ ತವ.

ನ ಹೋತಿ ಖಲು ದುಜ್ಜನ್ಯ, ಮಪಿ ದುಜ್ಜನಸಙ್ಗಮೇ;

ಸಭಾವನಿಮ್ಮಲತರೇ, ಸಾಧುಜನ್ತೂನ ಚೇತಸಿ.

ಜನಕೋ ¶ , ಞಾಪಕೋ ಚೇತಿ, ದುವಿಧಾ ಹೇತವೋ ಸಿಯುಂ;

ಪಟಿಸಙ್ಖರಣಂ ತೇಸಂ, ಅಲಙ್ಕಾರತಾಯೋ’ದಿತಂ.

ಭಾವಾ’ಭಾವ ಕಿಚ್ಚವಸಾ, ಚಿತ್ತಹೇತುವಸಾಪಿ ಚ;

ಭೇದಾ’ನನ್ತಾ ಇದಂ ತೇಸಂ, ಮುಖಮತ್ತ ನಿದಸ್ಸನಂ.

ಪರಮತ್ಥಪಕಾಸೇ’ಕ, ರಸಾ ಸಬ್ಬಮನೋಹರಾ;

ಮುನಿನೋ ದೇಸನಾ’ಯಂ ಮೇ, ಕಾಮಂ ತೋಸೇತಿ ಮಾನಸಂ.

ಧೀರೇಹಿ ಸಹ ಸಂವಾಸಾ, ಸದ್ಧಮ್ಮಸ್ಸಾ’ಭಿಯೋಗತೋ;

ನಿಗ್ಗಹೇನಿ’ನ್ದ್ರಿಯಾನಞ್ಚ, ದುಕ್ಖಸ್ಸು’ಪಸಮೋ ಸಿಯಾ.

ಮುನಿನ್ದ’ಚನ್ದ ಸಂವಾದಿ, ಕನ್ತಭಾವೋ’ಪಸೋಭಿನಾ;

ಮುಖೇನೇ’ವ ಸುಬೋಧಂ ತೇ, ಮನಂ ಪಾಪಾ’ಭಿನಿಸ್ಸಟಂ.

ಸಾಧುಹತ್ಥಾ’ರವಿನ್ದಾನಿ, ಸಙ್ಕೋಚಯತಿ ತೇ ಕಥಂ;

ಮುನಿನ್ದ! ಚರಣದ್ವನ್ದ, ರಾಗಬಾಲಾ’ತಪೋ ಫುಸಂ?

ಸಙ್ಕೋಚಯನ್ತಿ ಜನ್ತೂನಂ, ಪಾಣಿಪಙ್ಕೇರುಹಾನಿ’ಹ;

ಮುನಿನ್ದ! ಚರಣದ್ವನ್ದ, ನಖ ಚನ್ದಾನ’ ಮಂಸವೋ.

ಉದ್ದಿಟ್ಠಾನಂ ಪದತ್ಥಾನಂ, ಅನುದ್ದೇಸೋ ಯಥಾಕ್ಕಮಂ;

‘ಸಙ್ಖ್ಯಾನ’ಮಿತಿ ನಿದ್ದಿಟ್ಠಂ, ಯಥಾಸಙ್ಖ್ಯಂ ಕಮೋಪಿ ಚ.

ಆಲಾಪ ಹಾಸ ಲೀಳಾಹಿ, ಮುನಿನ್ದ! ವಿಜಯಾ ತವ;

ಕೋಕಿಲಾ ಕುಮುದಾನಿ ಚೋ, ಪಸೇವನ್ತೇ ವನಂ ಜಲಂ.

ಸಿಯಾ ಪಿಯತರಂ ನಾಮ, ಅತ್ಥರೂಪಸ್ಸ ಕಸ್ಸಚಿ;

ಪಿಯಸ್ಸಾ’ತಿಸಯೇನೇ’ತಂ, ಯಂ ಹೋತಿ ಪಟಿಪಾದನಂ.

ಪೀತಿಯಾ ಮೇ ಸಮುಪ್ಪನ್ನಾ, ಸನ್ತ! ಸನ್ದಸ್ಸನಾ ತವ;

ಕಾಲೇನಾ’ಯಂ ಭವೇ ಪೀತಿ, ತವೇ’ವ ಪುನ ದಸ್ಸನಾ.

ವಣ್ಣಿತೇನೋ’ಪಮಾನೇನ, ವುತ್ಯಾ’ಧಿಪ್ಪೇತ ವತ್ಥುನೋ;

ಸಮಾಸವುತ್ತಿ ನಾಮಾ’ಯಂ, ಅತ್ಥ ಸಙ್ಖೇಪ ರೂಪತೋ.

ಸಾ’ಯಂ ¶ ವಿಸೇಸ್ಯಮತ್ತೇನ, ಭಿನ್ನಾ’ಭಿನ್ನವಿಸೇಸನಾ;

ಅತ್ಥೇ’ವ ಅಪರಾ ಪ್ಯ’ತ್ಥಿ, ಭಿನ್ನಾ’ಭಿನ್ನವಿಸೇಸನಾ.

ವಿಸುದ್ಧಾ’ಮತಸನ್ದಾಯೀ, ಪಸತ್ಥರತನಾ’ಲಯೋ;

ಗಮ್ಭೀರೋ ಚಾ’ಯ’ ಮಮ್ಬೋಧಿ, ಪುಞ್ಞೇನಾ’ಪಾದಿತೋ ಮಯಾ.

ಇಚ್ಛಿತ’ತ್ಥಪದೋ ಸಾರೋ, ಫಲಪುಪ್ಫೋ’ಪಸೋಭಿತೋ;

ಸಚ್ಛಾಯೋ’ಯ’ಮಪುಬ್ಬೋವ ಕಪ್ಪರುಕ್ಖೋ ಸಮುಟ್ಠಿತೋ.

ಸಾಗರತ್ತೇನ ಸದ್ಧಮ್ಮೋ, ರುಕ್ಖತ್ತೇನೋ’ದಿತೋ ಜಿನೋ;

ಸಬ್ಬೇ ಸಾಧಾರಣಾ ಧಮ್ಮಾ, ಪುಬ್ಬತ್ರಾ’ಞ್ಞತ್ರ ತು’ತ್ತಯಂ.

ವತ್ಥುನೋ’ಞ್ಞಪ್ಪಕಾರೇನ, ಠಿತಾ ವುತ್ತಿ ತದ’ಞ್ಞಥಾ;

ಪರಿಕಪ್ಪೀಯತೇ ಯತ್ಥ, ಸಾ ಹೋತಿ ಪರಿಕಪ್ಪನಾ.

ಉಪಮಾ’ಬ್ಭನ್ತರತ್ತೇನ, ಕಿರಿಯಾದಿವಸೇನ ಚ;

ಕಮೇನೋ’ದಾಹರಿಸ್ಸಾಮಿ, ವಿವಿಧಾ ಪರಿಕಪ್ಪನಾ.

ಇಚ್ಛಾಭಙ್ಗಾ’ತುರಾ’ಸೀನಾ, ತಾ’ತಿನಿಚ್ಚಲ ಮಚ್ಛರಾ;

ವಸಂ ನೇನ್ತಿ’ವ ಧೀರಂ ತಂ, ತದಾ ಯೋಗಾ’ಭಿಯೋಗತೋ.

ಗಜಂ ಮಾರೋ ಸಮಾರುಳ್ಹೋ, ಯುದ್ಧಾಯ’ಚ್ಚನ್ತ’ಮುನ್ನತಂ;

ಮಗ್ಗ ಮನ್ವೇಸತೀ ನೂನ, ಜಿನಭೀತೋ ಪಲಾಯಿತುಂ.

ಮುನಿನ್ದ! ಪಾದದ್ವನ್ದೇ ತೇ, ಚಾರು ರಾಜಿವ ಸುನ್ದರೇ;

ಮಞ್ಞೇ ಪಾಪಾ’ಭಿ’ಸಮ್ಮದ್ದ, ಜಾತಸೋಣೇನ ಸೋಣಿಮಾ.

ಮಞ್ಞೇ, ಸಙ್ಕೇ, ಧುವಂ, ನೂನ, ಮಿವ, ಮಿಚ್ಚೇವ ಮಾದಿಹಿ;

ಸಾ’ಯಂ ಬ್ಯಞ್ಜೀಯತೇ ಕ್ವಾ’ಪಿ, ಕ್ವಾ’ಪಿ ವಾಕ್ಯೇನ ಗಮ್ಯತೇ.

ದಯಾ ಸಞ್ಜಾತ ಸರಸಾ, ದೇಹಾ ನಿಕ್ಖನ್ತಕನ್ತಿಯೋ;

ಪೀಣೇನ್ತಾ ಜಿನ! ತೇ ಸಾಧು, ಜನಂ ಸರಸತಂ ನಯುಂ.

ಆರಬ್ಭನ್ತಸ್ಸ ¶ ಯಂಕಿಞ್ಚಿ, ಕತ್ತುಂ ಪುಞ್ಞವಸಾ ಪುನ;

ಸಾಧನ’ನ್ತರಲಾಭೋ ಯೋ, ತಂ ವದನ್ತಿ ಸಮಾಹಿತಂ.

ಮಾರಾ’ರಿಭಙ್ಗಾ’ಭಿಮುಖ, ಮಾನಸೋ ತಸ್ಸ ಸತ್ಥುನೋ;

ಮಹಾಮಹೀ ಮಹಾರವಂ, ರವೀ’ಯ’ಮುಪಕಾರಿಕಾ.

ಅವತ್ವಾ’ಭಿಮತಂ ತಸ್ಸ, ಸಿದ್ಧಿಯಾ ದಸ್ಸನ’ಞ್ಞಥಾ;

ವದನ್ತಿ ತಂ ‘ಪರಿಯಾಯ, ವುತ್ತೀ’ತಿ ಸುಚಿಬುದ್ಧಯೋ.

ವಿವಟ’ಙ್ಗಣನಿಕ್ಖಿತ್ತಂ, ಧನ’ಮಾರಕ್ಖ ವಜ್ಜಿತಂ;

ಧನಕಾಮ! ಯಥಾಕಾಮಂ, ತುವಂ ಗಚ್ಛ ಯದಿಚ್ಛಸಿ.

ಥುತಿಂ ಕರೋತಿ ನಿನ್ದನ್ತೋ, ವಿಯ ತಂ ಬ್ಯಾಜವಣ್ಣನಂ;

ದೋಸಾ’ಭಾಸಾ ಗುಣಾ ಏವ, ಯನ್ತಿ ಸನ್ನಿಧಿ ಮತ್ರ ಹಿ.

ಸಞ್ಚಾಲೇತು ಮಲಂ ತ್ವಂ’ಸಿ, ಭುಸಂ ಕುವಲಯಾ’ಖಿಲಂ;

ವಿಸೇಸಂ ತಾವತಾ ನಾಥ!, ಗುಣಾನಂ ತೇ ವದಾಮ ಕಿಂ?

ವಿಸೇಸಿ’ಚ್ಛಾಯಂ ದಬ್ಬಸ್ಸ, ಕ್ರಿಯಾ, ಜಾತಿ, ಗುಣಸ್ಸ ಚ;

ವೇಕಲ್ಲದಸ್ಸನಂ ಯತ್ರ, ವಿಸೇಸೋ ನಾಮ ಯಂ ಭವೇ.

ನ ರಥಾ, ನ ಚ ಮಾತಙ್ಗಾ, ನ ಹಯಾ, ನ ಪದಾತಯೋ;

ಜಿತೋ ಮಾರಾರಿ ಮುನಿನಾ, ಸಮ್ಭಾರಾವಜ್ಜನೇನ ಹಿ.

ನ ಬದ್ಧಾ ಭೂಕುಟಿ, ನೇವ, ಫುರಿತೋ ದಸನಚ್ಛದೋ;

ಮಾರಾರಿಭಙ್ಗಂ ಚಾ’ಕಾಸಿ, ಮುನಿ ವೀರೋ ವರೋ ಸಯಂ.

ನ ದಿಸಾಸು ಬ್ಯಾತ್ತಾ [ತತಾ (ಕ.)] ರಂಸಿ,

ತಥಾಪ್ಯ’ನ್ಧತಮಹರಂ, ಪರಂ ಸಾಧುಸುಭಾಸಿತಂ.

ನ ಖರಂ, ನ ಹಿ ವಾ ಥದ್ಧಂ, ಮುನಿನ್ದ! ವಚನಂ ತವ;

ತಥಾಪಿ ಗಾಳ್ಹಂ ಖಣತಿ, ನಿಮ್ಮೂಲಂ ಜನತಾಮದಂ.

ದಸ್ಸೀಯತೇ’ತಿರಿತ್ತಂ ¶ ತು, ಸೂರವೀರತ್ತನಂ ಯಹಿಂ;

ವದನ್ತಿ ವಿಞ್ಞೂವಚನಂ, ರುಳ್ಹಾಹಙ್ಕಾರ ಮೀದಿಸಂ.

ದಮೇ ನನ್ದೋಪನನ್ದಸ್ಸ, ಕಿಂ ಮೇ ಬ್ಯಾಪಾರದಸ್ಸನಾ?

ಪುತ್ತಾ ಮೇ ಪಾದಸಮ್ಭತ್ತಾ, ಸಜ್ಜಾ ಸನ್ತೇ’ವ ತಾದಿಸೇ.

ಸಿಲೇಸೋ ವಚನಾ’ನೇಕಾ, ಭಿಧೇಯ್ಯೇ’ಕಪದಾಯುತಂ;

ಅಭಿನ್ನಪದವಾಕ್ಯಾದಿ, ವಸಾ ತೇಧಾ’ಯ ಮೀರಿತೋ.

ಅನ್ಧತಮಹರೋ ಹಾರೀ, ಸಮಾರುಳ್ಹೋ ಮಹೋದಯಂ;

ರಾಜತೇ ರಂಸಿಮಾಲೀ’ಯಂ, ಭಗವಾ ಬೋಧಯಂ ಜನೇ.

ಸಾರದಾ’ಮಲಕಾ’ಭಾಸೋ, ಸಮಾನೀತ ಪರಿಕ್ಖಯೋ;

ಕುಮುದಾ’ಕರಸಮ್ಬೋಧೋ, ಪೀಣೇತಿ ಜನತಂ ಸುಧೀ.

ಸಮಾಹಿತ’ತ್ತವಿನಯೋ, ಅಹೀನ ಮದ ಮದ್ದನೋ;

ಸುಗತೋ ವಿಸದಂ ಪಾತು, ಪಾಣಿನಂ ಸೋ ವಿನಾಯಕೋ.

ವಿರುದ್ಧಾ, ವಿರುದ್ಧಾ, ಭಿನ್ನ, ಕಮ್ಮಾ, ನಿಯಮವಾ, ಪರೋ;

ನಿಯಮ’ಕ್ಖೇಪವಚನೋ, ಅವಿರೋಧಿ, ವಿರೋಧ್ಯ’ಪಿ.

ಓಚಿತ್ಯ ಸಮ್ಪೋಸಕಾದಿ, ಸಿಲೇಸೋ, ಪದಜಾ’ದಿ [ಪದಜಾತಿ (ಕ.)] ಪಿ;

ಏಸಂ ನಿದಸ್ಸನೇಸ್ವೇ’ವ, ರೂಪ ಮಾವಿ ಭವಿಸ್ಸತಿ.

ಸವಸೇ ವತ್ತಯಂ ಲೋಕಂ, ಅಖಿಲಂ ಕಲ್ಲವಿಗ್ಗಹೋ;

ಪರಾಭವತಿ ಮಾರಾರಿ, ಧಮ್ಮರಾಜಾ ವಿಜಮ್ಭತೇ.

ಸಭಾವಮಧುರಂ ಪುಞ್ಞ ವಿಸೇಸೋ’ದಯ ಸಮ್ಭವಂ;

ಸುಣನ್ತಿ ವಾಚಂ ಮುನಿನೋ, ಜನಾ ಪಸ್ಸನ್ತಿ ಚಾ’ಮತಂ.

ಅನ್ಧಕಾರಾ’ಪಹಾರಾಯ ¶ , ಸಭಾವ ಮಧುರಾಯ ಚ;

ಮನೋ ಪೀಣೇತಿ ಜನ್ತೂನಂ, ಜಿನೋ ವಾಚಾಯ ಭಾಯ ಚ.

ಕೇಸ’ಕ್ಖೀನಂ’ವ ಕಣ್ಹತ್ತಂ, ಭಮೂನಂಯೇವ ವಙ್ಕತಾ;

ಪಾಣಿಪಾದಾ’ಧರಾನಂ’ವ, ಮುನಿನ್ದಸ್ಸಾ’ಭಿರತ್ತತಾ.

ಪಾಣಿಪಾದಾ’ಧರೇಸ್ವೇ’ವ, ಸಾರಾಗೋ ತವ ದಿಸ್ಸತಿ;

ದಿಸ್ಸತೇ ಸೋ’ಯ ಮಥವಾ, ನಾಥ! ಸಾಧುಗುಣೇಸ್ವ’ಪಿ.

ಸಲಕ್ಖಣೋ’ತಿಸುಭಗೋ, ತೇಜಸ್ಸೀ ನಿಯತೋ’ದಯೋ;

ಸದಯೋ ಪ್ಯ’ದಯೋ ಪಾಪೇ, ಚಿತ್ತಾ’ಯಂ ಮುನಿನೋ ಗತಿ.

ಸಂಸಾರದುಕ್ಖೋ’ಪಹತಾ, ವನತಾ ಜನತಾ ತ್ವಯಿ;

ಸುಖ ಮಿಚ್ಛಿತ ಮಚ್ಚನ್ತಂ, ಅಮತನ್ದದ! ವಿನ್ದತಿ.

ಗುಣಯುತ್ತೇಹಿ ವತ್ಥೂಹಿ, ಸಮಂ ಕತ್ವಾನ ಕಸ್ಸಚಿ;

ಸಂಕಿತ್ತನಂ ಭವತಿ ಯಂ, ಸಾ ಮತಾ ತುಲ್ಯಯೋಗಿತಾ.

ಸಮ್ಪತ್ತಸಮ್ಮದೋ ಲೋಕೋ, ಸಮ್ಪತ್ತಾ’ಲೋಕಸಮ್ಪದೋ;

ಉಭೋಹಿ ರಂಸಿಮಾಲೀ ಚ, ಭಗವಾ ಚ ತಮೋನುದೋ.

ಅತ್ಥನ್ತರಂ ಸಾಧಯತಾ, ಕಿಞ್ಚಿ ತಂ ಸದಿಸಂ ಫಲಂ;

ದಸ್ಸೀಯತೇ ಅಸನ್ತಂ ವಾ, ಸನ್ತಂ ವಾ ತಂ ನಿದಸ್ಸನಂ.

ಉದಯಾ ¶ ಸಮಣಿನ್ದಸ್ಸ, ಯನ್ತಿ ಪಾಪಾ ಪರಾಭವಂ;

ಧಮ್ಮರಾಜವಿರುದ್ಧಾನಂ, ಸೂಚಯನ್ತಾ ದುರ’ನ್ತತಂ.

ಸಿರೋ ನಿಕ್ಖಿತ್ತ ಚರಣೋ, ಚ್ಛರಿಯಾನ’ಮ್ಬುಜಾನ’ಯಂ;

ಪರಮ’ಬ್ಭುತತಂ ಲೋಕೇ, ವಿಞ್ಞಾಪೇತ’ತ್ತನೋ ಜಿನೋ.

ವಿಭೂತಿಯಾ ಮಹನ್ತತ್ತಂ, ಅಧಿಪ್ಪಾಯಸ್ಸ ವಾ ಸಿಯಾ;

ಪರಮುಕ್ಕಂಸತಂ ಯಾತಂ, ತಂ ಮಹನ್ತತ್ತ ಮೀರಿತಂ.

ಕಿರೀಟ ರತನ’ಚ್ಛಾಯಾ, ನುವಿದ್ಧಾ’ತಪ ವಾರಣೋ;

ಪುರಾ ಪರಂ ಸಿರಿಂ ವಿನ್ದಿ, ಬೋಧಿಸತ್ತೋ’ ಭಿನಿಕ್ಖಮಾ.

ಸತ್ತೋ ಸಮ್ಬೋಧಿಯಂ ಬೋಧಿ, ಸತ್ತೋ ಸತ್ತಹಿತಾಯ ಸೋ;

ಹಿತ್ವಾ ಸ್ನೇಹರಸಾಬನ್ಧ, ಮಪಿ ರಾಹುಲಮಾತರಂ.

ಗೋಪೇತ್ವಾ ವಣ್ಣನೀಯಂ ಯಂ, ಕಿಞ್ಚಿ ದಸ್ಸೀಯತೇ ಪರಂ;

ಅಸಮಂ ವಾ ಸಮಂ ತಸ್ಸ, ಯದಿ ಸಾ ವಞ್ಚನಾ ಮತಾ.

ಪುರತೋ ನ ಸಹಸ್ಸೇಸು, ನ ಪಞ್ಚೇಸು ಚ ತಾದಿನೋ;

ಮಾರೋ ಪರೇಸು ತಸ್ಸೇ’ಸಂ, ಸಹಸ್ಸಂ ದಸವಡ್ಢಿತಂ.

ವಿವಾದ ಮನುಯುಞ್ಜನ್ತೋ, ಮುನಿನ್ದವದನಿ’ನ್ದುನಾ;

ಸಮ್ಪುಣ್ಣೋ ಚನ್ದಿಮಾ ನಾ’ಯಂ, ಛತ್ತ ಮೇತಂ ಮನೋಭುನೋ.

ಪರಾನುವತ್ತನಾದೀಹಿ, ನಿಬ್ಬಿನ್ದೇನಿ’ಹ ಯಾ ಕತಾ;

ಥುತಿ ರ’ಪ್ಪಕತೇ ಸಾ’ಯಂ, ಸಿಯಾ ಅಪ್ಪಕತತ್ಥುತಿ.

ಸುಖಂ ಜೀವನ್ತಿ ಹರಿಣಾ, ವನೇಸ್ವ’ಪರಸೇವಿನೋ;

ಅನಾಯಾಸೋ ಪಲಾಭೇಹಿ, ಜಲದಬ್ಭಙ್ಕುರಾದಿಭಿ.

ಉತ್ತರಂ ಉತ್ತರಂ ಯತ್ಥ, ಪುಬ್ಬಪುಬ್ಬವಿಸೇಸನಂ;

ಸಿಯಾ ಏಕಾವಲಿ ಸಾ’ಯಂ, ದ್ವಿಧಾ ವಿಧಿ, ನಿಸೇಧತೋ.

ಪಾದಾ ¶ ನಖಾಲಿ ರುಚಿರಾ, ನಖಾಲಿ ರಂಸಿ ಭಾಸುರಾ;

ರಂಸೀತಮೋಪಹಾನೇ’ಕ, ರಸಾ ಸೋಭನ್ತಿ ಸತ್ಥುನೋ.

ನಾ’ಲಯೋ ಯೋ ಸ ಜನ್ತೂನಂ, ನಾ’ನನ್ತ ಬ್ಯಸನಾ ವಹೋ.

ಯಹಿಂ ಭೂಸಿಯ ಭೂಸತ್ತಂ, ಅಞ್ಞಮಞ್ಞಂ ತು ವತ್ಥುನಂ;

ವಿನಾ’ವ ಸದಿಸತ್ತಂ ತಂ, ಅಞ್ಞಮಞ್ಞವಿಭೂಸನಂ.

ಬ್ಯಾಮಂ’ಸು ಮಣ್ಡಲಂ ತೇನ, ಮುನಿನಾ ಲೋಕಬನ್ಧುನಾ;

ಮಹನ್ತಿಂ ವಿನ್ದತೀ ಕನ್ತಿಂ, ಸೋಪಿ ತೇನೇವ ತಾದಿಸಿಂ.

ಕಥನಂ ಸಹಭಾವಸ್ಸ, ಕ್ರಿಯಾಯ ಚ, ಗುಣಸ್ಸ ಚ;

‘ಸಹವುತ್ತೀ’ತಿ ವಿಞ್ಞೇಯ್ಯಂ, ತ’ದುದಾಹರಣಂ ಯಥಾ.

ಜಲನ್ತಿ ಚನ್ದರಂಸೀಹಿ, ಸಮಂ ಸತ್ಥು ನಖಂ ಸವೋ;

ವಿಜಮ್ಭತಿ ಚ ಚನ್ದೇನ, ಸಮಂ ತಮ್ಮುಖಚನ್ದಿಮಾ.

ಜಿನೋ’ದಯೇನ ಮಲೀನಂ, ಸಹ ದುಜ್ಜನ ಚೇತಸಾ;

ಪಾಪಂ ದಿಸಾ ಸುವಿಮಲಾ, ಸಹ ಸಜ್ಜನ ಚೇತಸಾ.

ವಿರೋಧೀನಂ ಪದ’ತ್ಥಾನಂ, ಯತ್ಥ ಸಂಸಗ್ಗದಸ್ಸನಂ;

ಸಮುಕ್ಕಂಸಾ’ಭಿಧಾನತ್ಥಂ, ಮತಾ ಸಾ’ಯಂ ವಿರೋಧಿತಾ.

ಗುಣಾ ಸಭಾವ ಮಧುರಾ, ಅಪಿ ಲೋಕೇ’ಕ ಬನ್ಧುನೋ;

ಸೇವಿತಾ ಪಾಪ ಸೇವೀನಂ, ಸಮ್ಪದೂಸೇನ್ತಿ ಮಾನಸಂ.

ಯಸ್ಸ ಕಸ್ಸ ಚಿ ದಾನೇನ, ಯಸ್ಸ ಕಸ್ಸ ಚಿ ವತ್ಥುನೋ;

ವಿಸಿಟ್ಠಸ್ಸ ಯ ಮಾದಾನಂ, ‘ಪರಿವುತ್ತೀ’ತಿ ಸಾ ಮತಾ.

ಪುರಾ ಪರೇಸಂ ದತ್ವಾನ, ಮನುಞ್ಞಂ ನಯನಾದಿಕಂ;

ಮುನಿನಾ ಸಮನುಪ್ಪತ್ತಾ, ದಾನಿ ಸಬ್ಬಞ್ಞುತಾಸಿರೀ [ಮುನಿನ್ದ! ಸಮನುಪ್ಪತ್ತೋ, ದಾನಿ ಸಬ್ಬಞ್ಞುತಾಸಿರಿಂ (ಕ.)].

ಕಿಞ್ಚಿ ¶ ದಿಸ್ವಾನ ವಿಞ್ಞಾತಾ, ಪಟಿಪಜ್ಜತಿ ತಂಸಮಂ;

ಸಂಸಯಾ’ಪಗತಂ ವತ್ಥುಂ, ಯತ್ಥ ಸೋ’ಯಂ ಭಮೋ ಮತೋ.

ಸಮಂ ದಿಸಾಸು’ಜ್ಜಲಾಸು, ಜಿನ ಪಾದ ನಖಂ’ಸುನಾ;

ಪಸ್ಸನ್ತಾ ಅಭಿನನ್ದನ್ತಿ, ಚನ್ದಾ’ತಪ ಮನಾ ಜನಾ.

ಪವುಚ್ಚತೇ ಯಂ ನಾಮಾದಿ, ಕವೀನಂ ಭಾವಬೋಧನಂ;

ಯೇನ ಕೇನಚಿ ವಣ್ಣೇನ, ಭಾವೋ ನಾಮಾ’ಯ ಮೀರಿತೋ.

ನನು ತೇಯೇ’ವ ಸನ್ತಾನೋ, ಸಾಗರಾ ನ ಕುಲಾಚಲಾ;

ಮನಮ್ಪಿ ಮರಿಯಾದಂ ಯೇ, ಸಂವಟ್ಟೇಪಿ ಜಹನ್ತಿ ನೋ.

ಅಙ್ಗಙ್ಗಿ ಭಾವಾ ಸದಿಸ, ಬಲಭಾವಾ ಚ ಬನ್ಧನೇ;

ಸಂಸಗ್ಗೋ’ಲಙ್ಕತೀನಂ ಯೋ, ತಂ ‘ಮಿಸ್ಸ’ನ್ತಿ ಪವುಚ್ಚತಿ.

ಪಸತ್ಥಾ ಮುನಿನೋ ಪಾದ, ನಖ ರಂಸಿ ಮಹಾನದೀ;

ಅಹೋ! ಗಾಳ್ಹಂ ನಿಮುಗ್ಗೇಪಿ, ಸುಖಯತ್ಯೇ’ವ ತೇ ಜನೇ.

ವೇಸೋ ಸಭಾವ ಮಧುರೋ, ರೂಪಂ ನೇತ್ತ ರಸಾಯನಂ;

ಮಧೂ’ವ ಮುನಿನೋ ವಾಚಾ, ನ ಸಮ್ಪೀಣೇತಿ ಕಂ ಜನಂ.

ಆಸೀ ನಾಮ ಸಿಯಾ’ತ್ಥಸ್ಸ, ಇಟ್ಠಸ್ಸಾ’ಸೀಸನಂ ಯಥಾ;

ರಸ’ಪ್ಪತೀತಿ ಜನಕಂ, ಜಾಯತೇ ಯಂ ವಿಭೂಸನಂ;

‘ರಸವನ್ತ’ನ್ತಿ ತಂ ಞೇಯ್ಯಂ, ರಸವನ್ತ ವಿಧಾನತೋ.

ರಾಗಾ’ನತ’ಬ್ಭುತ ಸರೋಜ ಮುಖಂ ಧರಾಯ,

ಪಾದಾ ತಿಲೋಕಗರುನೋ’ಧಿಕ ಬನ್ಧರಾಗಾ;

ಆದಾಯ ನಿಚ್ಚಸರಸೇನ ಕರೇನ ಗಾಳ್ಹಂ,

ಸಞ್ಚುಮ್ಬಯನ್ತಿ ಸತತಾ’ಹಿತ ಸಮ್ಭಮೇನ.

ಇಚ್ಚಾ’ನುಗಮ್ಮ ¶ ಪುರಿಮಾಚರಿಯಾ’ನುಭಾವಂ,

ಸಙ್ಖೇಪತೋ ನಿಗದಿತೋ’ಯ ಮಲಙ್ಕತೀನಂ;

ಭೇದೋ’ಪರೂಪರಿ ಕವೀಹಿ ವಿಕಪ್ಪಿಯಾನಂ,

ಕೋ ನಾಮ ಪಸ್ಸಿತು ಮಲಂ ಖಲು ತಾಸ ಮನ್ತಂ.

ಇತಿ ಸಙ್ಘರಕ್ಖಿತಮಹಾಸಾಮಿ ವಿರಚಿತೇ ಸುಬೋಧಾಲಙ್ಕಾರೇ

ಪಟಿಭಾನವತಾ ಲೋಕ, ವೋಹಾರ’ಮನುಸಾರಿನಾ;

ತತೋ’ಚಿತ್ಯ ಸಮುಲ್ಲಾಸ, ವೇದಿನಾ ಕವಿನಾ ಪರಂ.

ಠಾಯಿಸಮ್ಬನ್ಧಿನೋ ಭಾವ, ವಿಭಾವಾ ಸಾ’ನುಭಾವಕಾ;

ಸಮ್ಬಜ್ಝನ್ತಿ ನಿಬನ್ಧಾ ತೇ, ರಸ’ಸ್ಸಾದಾಯ ಸಾಧುನಂ.

ಚಿತ್ತ ವುತ್ತಿ ವಿಸೇಸಾ ತು, ಭಾವಯನ್ತಿ ರಸೇ ಯತೋ;

ರತ್ಯಾದಯೋ ತತೋ ಭಾವ, ಸದ್ದೇನ ಪರಿಕಿತ್ತಿತಾ.

ವಿರೋಧಿನಾ’ಞ್ಞಭಾವೇನ, ಯೋ ಭಾವೋ ನ ತಿರೋಹಿತೋ;

ಸೀಲೇನ ತಿಟ್ಠತಿ’ಚ್ಚೇಸೋ, ‘ಠಾಯೀಭಾವೋ’ತಿ ಸದ್ದಿತೋ.

ಜಿಗುಚ್ಛಾ, ವಿಮ್ಹಯೋ, ಚೇವ, ಸಮೋ ಚ ನವ ಠಾಯಿನೋ.

ತಿರೋಭಾವಾ, ವಿಭಾವಾ’ದಿ, ವಿಸೇಸನಾ’ಭಿಮುಖ್ಯತೋ;

ಯೇ ತೇ ಚರನ್ತಿ ಸೀಲೇನ, ತೇ ಹೋನ್ತಿ ಬ್ಯಭಿಚಾರಿನೋ.

ಸುತ್ತಂ, ತಾಸೋ, ಗಿಲಾನು, ಸ್ಸುಕ, ಹರಿಸ,

ಸತಿ, ಸ್ಸಾ, ವಿಸಾದಾ, ಬಹಿತ್ಥಾ [ಬಹಿದ್ಧಾ (ಕ.)];

ಚಪಲತಾ [ಸಚಪಲಾ (ಕ.)], ಬ್ಯಾಧಿ, ತೇತ್ತಿಂಸ ಮೇತೇ.

ಸಮಾಹಿತ’ತ್ತ’ಪ್ಪಭವಂ, ಸತ್ತಂ [ಸತ್ವಂ (ಕ.)] ತೇನೋ’ಪಪಾದಿತಾ;

ಸತ್ತಿಕಾ [ಸಾತ್ವಿಕಾ (ಕ.)] ಪ್ಯ’ನುಭಾವತ್ತೇ, ವಿಸುಂ ಭಾವಾ ಭವನ್ತಿ ತೇ.

ಥಮ್ಭೋ, ಪಳಯ, ರೋಮಞ್ಚಾ, ತಥಾ ಸೇದ, ಸ್ಸು, ವೇಪಥು;

ವೇವಣ್ಣಿಯಂ, ವಿಸರತಾ, ಭಾವಾ’ಟ್ಠೇ’ತೇ ತು ಸತ್ತಿಕಾ.

ಯದಾ ರತ್ಯಾದಯೋ ಭಾವಾ, ಠಿತಿಸೀಲಾ ನ ಹೋನ್ತಿ ಚೇ;

ತದಾ ಸಬ್ಬೇಪಿ ತೇ ಭಾವಾ, ಭವನ್ತಿ ಬ್ಯಭಿಚಾರಿನೋ.

ವಿಭಾವೋ ಕಾರಣಂ ತೇಸು, ಪ್ಪತ್ತಿಯು’ದ್ದೀಪನೇ ತಥಾ;

ನೇಕಹೇತುಂ ಮನೋವುತ್ತಿ, ವಿಸೇಸಞ್ಚ ವಿಭಾವಿತುಂ;

ಭಾವಂ ವಿಭಾವಾ’ನುಭಾವಾ, ವಣ್ಣಿಯಾ ಬನ್ಧನೇ ಫುಟಂ.

ಸವಿಭಾವಾ’ನುಭಾವೇಹಿ, ಭಾವಾ ತೇ ತೇ ಯಥಾರಹಂ;

ವಣ್ಣನೀಯಾ ಯಥೋ’ಚಿತ್ಯಂ, ಲೋಕರೂಪಾ’ನುಗಾಮಿನಾ.

ಚಿತ್ತ ¶ ವುತ್ತಿ ವಿಸೇಸತ್ತಾ, ಮಾನಸಾ ಸತ್ತಿಕಾ’ಙ್ಗತೋ;

ಬಹಿ ನಿಸ್ಸಟ ಸೇದಾದಿ, ಅನುಭಾವೇಹಿ ವಣ್ಣಿಯಾ.

ಸಾಮಾಜಿಕಾನ ಮಾನನ್ದೋ, ಯೋ ಬನ್ಧತ್ಥಾ’ನುಸಾರಿನಂ;

ರಸೀಯತೀತಿ ತಞ್ಞೂಹಿ, ರಸೋ ನಾಮಾ’ಯ’ಮೀರಿತೋ.

ಸವಿಭಾವಾ, ನುಭಾವೇಹಿ, ಸತ್ತಿಕ,ಬ್ಯಭಿಚಾರಿಭಿ;

ಅಸ್ಸಾದಿಯತ್ತ ಮಾನೀಯ, ಮಾನೋ ಠಾಯೇ’ವ ಸೋ ರಸೋ.

ಸಿಙ್ಗಾರ,ಹಸ್ಸ,ಕರುಣಾ, ರುದ್ದ,ವೀರ,ಭಯಾನಕಾ;

ಬೀಭಚ್ಛ,ಬ್ಭುತ,ಸನ್ತಾ, ಚ, ರಸಾ ಠಾಯೀನ ನುಕ್ಕಮಾ.

ದುಕ್ಖರೂಪೇ’ಯ’ ಮಾನನ್ದೋ, ಕಥಂ ನು ಕರುಣಾದಿಕೇ?

ಠಾಯೀಭಾವ ನಿದ್ದೇಸ ರತಿಟ್ಠಾಯೀಭಾವ

ರಮ್ಮ,ದೇಸ, ಕಲಾ, ಕಾಲ, ವೇಸಾದಿ, ಪಟಿಸೇವನಾ;

ಯುವಾನ’ಞ್ಞೋಞ್ಞರತ್ತಾನಂ, ಪಮೋದೋ ರತಿ ರುಚ್ಚತೇ.

ಯುತ್ಯಾ ಭಾವಾನುಭಾವಾ ತೇ, ನಿಬನ್ಧಾ ಪೋಸಯನ್ತಿ ನಂ;

ಸೋಪ್ಯ’ಯೋಗ, ವಿಪ್ಪಯೋಗ, ಸಮ್ಭೋಗಾನಂ ವಸಾ ತಿಧಾ.

ವಿಕಾರಾ’ಕತಿಆದೀಹಿ, ಅತ್ತನೋ ಥ ಪರಸ್ಸ ವಾ;

ಹಸ್ಸೋ ನಿದ್ದಾ, ಸಮಾ’ಲಸ್ಯ, ಮುಚ್ಛಾದಿ,ಬ್ಯಭಿಚಾರಿಭಿ;

ಪರಿಪೋಸೇ ಸಿಯಾ ಹಸ್ಸೋ, ಭಿಯ್ಯೋ’ತ್ಥಿಪಭುತೀನಂ ಸೋ.

ಕಿಞ್ಚಾ’ಲಕ್ಖಿಯ ದಿಜಂ ತು ತಂ ಹಸಿತಂ;

ಮಧುರಸ್ಸರಂ ವಿಹಸಿತಂ, ಅಂಸಸಿರೋಕಮ್ಪಮುಪಹಸಿತಂ.

ಅಪಹಸಿತಂ ¶ ಸಜಲ’ಕ್ಖಿ, ವಿಕ್ಖಿತ್ತಙ್ಗಂ ಭವತ್ಯ’ತಿಹಸಿತಂ;

ಜೇಟ್ಠೇ [ಮಜ್ಝೇ’ಧಮೇತಿ ಏತ್ಥ ಮಜ್ಝೇ ಅಧಮೇತಿ ಪದಚ್ಛೇದೋ] ಮಜ್ಝೇ’ಧಮೇ ಚ ಕಮಸೋ.

ಸೋಕರೂಪೋ ತು ಕರುಣೋ, ನಿಟ್ಠಪ್ಪತ್ತಿ’ಟ್ಠ ನಾಸತೋ;

ತತ್ಥಾ’ನುಭಾವಾ ರುದಿತ, ಪಳಯ,ತ್ಥಮ್ಭಕಾದಯೋ;

ವಿಸಾದಾ,ಲಸ್ಯ,ಮರಣ, ಚಿನ್ತಾ’ದೀ ಬ್ಯಭಿಚಾರಿನೋ.

ಕೋಧೋ ಮಚ್ಛರಿಯಾ’ದೀಹಿ, ಪೋಸೇ ತಾಸ, ಮದಾದಿಭಿ;

ನಯನಾ’ರುಣತಾದೀಹಿ, ರುದ್ದೋ ನಾಮ ರಸೋ ಭವೇ.

ಪತಾಪ, ವಿಕ್ಕಮಾ’ದೀಹು, ಸ್ಸಾಹೋ ‘ವೀರೋ’ತಿ ಸಞ್ಞಿತೋ;

ರಣ,ದಾನ,ದಯಾಯೋಗಾ, ವೀರೋ’ಯಂ ತಿವಿಧೋ ಭವೇ;

ತೇವಾ’ನುಭಾವಾ ಧಿತಿ,ಮ, ತ್ಯಾ’ದಯೋ ಬ್ಯಭಿಚಾರಿನೋ.

ವಿಕಾರಾ,ಸನಿ,ಸತ್ತಾ’ದಿ, ಭಯು’ಕ್ಕಂಸೋ ಭಯಾನಕೋ;

ಸೇದಾ’ದಯೋ ನುಭಾವೇ’ತ್ಥ, ತಾಸಾ’ದೀ ಬ್ಯಭಿಚಾರಿನೋ.

ಜಿಗುಚ್ಛಾ ರುಧಿರಾ’ದೀಹಿ, ಪೂತ್ಯಾ’ದೀಹಿ ವಿರಾಗತೋ;

ಬೀಭಚ್ಛೋ ಖೋಭನು’ಬ್ಬೇಗೀ, ಕಮೇನ ಕರುಣಾಯುತೋ;

ನಾಸಾ ವಿಕೂಣನಾದೀಹಿ, ಸಙ್ಕಾದೀಹಿ’ಸ್ಸ ಪೋಸನಂ.

ಅತಿ ಲೋಕ ಪದತ್ಥೇಹಿ, ವಿಮ್ಹಯೋ’ಯಂ ರಸೋ’ಬ್ಭುತೋ;

ತಸ್ಸಾ’ನುಭಾವಾ ಸೇದ,ಸ್ಸು, ಸಾಧುವಾದಾ’ದಯೋ ಸಿಯುಂ;

ತಾಸಾ,ವೇಗ,ಧಿತಿ,ಪ್ಪಞ್ಞಾ, ಹೋನ್ತೇ’ತ್ಥ ಬ್ಯಭಿಚಾರಿನೋ.

ಠಾಯೀಭಾವೋ ಸಮೋ ಮೇತ್ತಾ, ದಯಾ,ಮೋದಾ’ದಿ ಸಮ್ಭವೋ;

ಭಾವಾದೀಹಿ ತ’ದುಕ್ಕಂಸೋ, ಸನ್ತೋ ಸನ್ತ ನಿಸೇವಿತೋ.

ಇತಿ ಸಙ್ಘರಕ್ಖಿತ ಮಹಾಸಾಮಿವಿರಚಿತೇ ಸುಬೋಧಾಲಙ್ಕಾರೇ