ಅಞ್ಞ > ಸಙ್ಗಾಯನ-ಪುಚ್ಛ ವಿಸ್ಸಜ್ಜನಾ

ಪುಚ್ಛಾ – ಸಾಧು ¶ ಸಾಧು ಆವುಸೋ ಮಯಮ್ಪಿ ದಾನಿ ತತೋಯೇವ ಪಟ್ಠಾಯ ಸಂಗಾಯಿತುಂ ಪುಬ್ಬಕಿಚ್ಚಾನಿ ಸಮಾರಭಾಮ…, ತೇನಾವುಸೋ ಭಗವತಾ ಜಾನತಾ ಪಸ್ಸತಾ ಅರಹತಾ ಸಮ್ಮಾಸಮ್ಬುದ್ಧೇನ ಬ್ರಹ್ಮಜಾಲಸುತ್ತಂ ಕತ್ಥ ಭಾಸಿತಂ.

ವಿಸ್ಸಜ್ಜನಾ – ಅನ್ತರಾ ಚ ಭನ್ತೇ ರಾಜಗಹಂ ಅನ್ತರಾ ಚ ನಾಳನ್ದಂ ಅಮ್ಬಲಟ್ಠಿಕಾಯಂ ರಾಜಾಗಾರಕೇ ಭಾಸಿತಂ.

ಪುಚ್ಛಾ – ಕಂ ¶ ಆವುಸೋ ಆರಬ್ಭ ಭಾಸಿತಂ.

ವಿಸ್ಸಜ್ಜನಾ – ಸುಪ್ಪಿಯಞ್ಚ ಭನ್ತೇ ಪರಿಬ್ಬಾಜಕಂ ಬ್ರಹ್ಮದತ್ತಞ್ಚ ಮಾಣವಂ ಆರಬ್ಭ ಭಾಸಿತಂ.

ಪುಚ್ಛಾ – ಕಿಸ್ಮಿಂ ಆವುಸೋ ವತ್ಥುಸ್ಮಿಂ ಭಾಸಿತಂ.

ವಿಸ್ಸಜ್ಜನಾ – ವಣ್ಣಾವಣ್ಣೇ ಭನ್ತೇ, ಸುಪ್ಪಿಯೋ ಹಿ ಭನ್ತೇ ಅನೇಕಪರಿಯಾಯೇನ ಬುದ್ಧಸ್ಸ ಅವಣ್ಣಂ ಭಾಸತಿ ಧಮ್ಮಸ್ಸ ಅವಣ್ಣಂ ಭಾಸತಿ ಸಙ್ಘಸ್ಸ ಅವಣ್ಣಂ ಭಾಸತಿ, ಸುಪ್ಪಿಯಸ್ಸ ಪನ ಪರಿಬ್ಬಾಜಕಸ್ಸ ಅನ್ತೇವಾಸೀ ಬ್ರಹ್ಮದತ್ತೋ ಮಾಣವೋ ಅನೇಕಪರಿಯಾಯೇನ ಬುದ್ಧಸ್ಸ ವಣ್ಣಂ ಭಾಸತಿ ಧಮ್ಮಸ್ಸ ವಣ್ಣಂ ಭಾಸತಿ ಸಙ್ಘಸ್ಸ ವಣ್ಣಂ ಭಾಸತಿ, ತಸ್ಮಿಂ ಭನ್ತೇ ವತ್ಥುಸ್ಮಿಂ ಭಾಸಿತಂ.

ಪುಚ್ಛಾ – ಕತಿ ¶ ಆವುಸೋ ತತ್ಥ ಅನುಸನ್ಧಯೋ.

ವಿಸ್ಸಜ್ಜನಾ – ತಯೋ ಭನ್ತೇ ತತ್ಥ ಅನುಸನ್ಧಯೋ, ಏಕೋ ಅವಣ್ಣಾನುಸನ್ಧಿ, ದ್ವೇ ವಣ್ಣಾನುಸನ್ಧಿಯೋ.

ಪುಚ್ಛಾ – ತತ್ಥಾವುಸೋ ಪಠಮೇ ಅನುಸನ್ಧಿಮ್ಹಿ ಕಥಂ ಭಗವತಾ ಭಾಸಿತಂ, ತಂ ಸಂಖೇಪತೋ ಕಥೇಹಿ.

ವಿಸ್ಸಜ್ಜನಾ – ಪಠಮೇ ಭನ್ತೇ ಅನುಸನ್ಧಿಮ್ಹಿ ಅವಣ್ಣೇ ಮನೋಪದೋಸಂ ನಿವಾರೇತ್ವಾ, ತತ್ಥ ಚ ಆದೀನವಂ ದಸ್ಸೇತ್ವಾ, ತತ್ಥ ಪಟಿಪಜ್ಜಿತಬ್ಬಾಕಾರೋ ಭಗವತಾ ಭಾಸಿತೋ.

ಮಮಂ ¶ ವಾ ಭಿಕ್ಖವೇ ಪರೇ ಅವಣ್ಣಂ ಭಾಸೇಯ್ಯುಂ, ಧಮ್ಮಸ್ಸ ವಾ ಅವಣ್ಣಂ ಭಾಸೇಯ್ಯುಂ ಸಙ್ಘಸ್ಸ ವಾ ಅವಣ್ಣಂ ಭಾಸೇಯ್ಯುಂ, ತತ್ರ ತುಮ್ಹೇಹಿ ನ ಆಘಾತೋ ಅಪ್ಪಚ್ಚಯೋ ನ ಚೇತಸೋ ಅನಭಿರದ್ಧಿ ಕರಣೀಯಾ…

ಪುಚ್ಛಾ – ಸಾಧು ¶ ಸಾಧು ಆವುಸೋ, ಸಾಧು ಖೋ ಭಗವಾ ಅತ್ತನಾ ಪರಮುಕ್ಕಂ ಸಾಗತಖನ್ತೀಗುಣಸಮನ್ನಾಗತೋ ಅತ್ತನೋ ಸಾವಕಭೂತೇ ಅಮ್ಹೇಪಿ ತತ್ಥ ಸಮಾದಾಪೇಸಿ, ಅತ್ತನಾ ಚ ಲೋಕಧಮ್ಮೇಸು ಅನಿಞ್ಜನಸಭಾವೋ ಅಮ್ಹಾಕಮ್ಪಿ ತಥತ್ತಾಯ ಓವಾದಮದಾಸಿ, ದುತಿಯೇಪನಾವುಸೋ ಅನುಸನ್ಧಿಮ್ಹಿ ಕಥಂ ಭಗವತಾ ಭಾಸಿತಂ, ತಮ್ಪಿ ಸಂಖೇಪತೋ ಪಕಾಸೇಹಿ.

ವಿಸ್ಸಜ್ಜನಾ – ದುತಿಯೇ ಪನ ಭನ್ತೇ ಅನುಸನ್ಧಿಮ್ಹಿ ವಣ್ಣೇ ಚೇತಸೋ ಉಪ್ಪಿಲಾವಿತತ್ತಂ ನಿಸೇಧೇತ್ವಾ, ತತ್ಥ ಚ ಆದೀನವಂ ದಸ್ಸೇತ್ವಾ, ತತ್ಥ ಚ ಪಟಿಪಜ್ಜನಾಕಾರಂ ದಸ್ಸೇತ್ವಾ, ಪುಥುಜ್ಜನಸ್ಸ ವಣ್ಣಭೂಮಿಭೂತಾನಿ ತೀಣಿ ಸೀಲಾನಿ ವಿತ್ಥಾರತೋ ಭಗವತಾ ಭಾಸಿತಾನಿ.

ಮಮಂ ¶ ವಾ ಭಿಕ್ಖವೇ ಪರೇ ವಣ್ಣಂ ಭಾಸೇಯ್ಯುಂ, ಧಮ್ಮಸ್ಸ ವಾ ವಣ್ಣಂ ಭಾಸೇಯ್ಯುಂ, ಸಙ್ಘಸ್ಸ ವಾ ವಣ್ಣಂ ಭಾಸೇಯ್ಯುಂ, ತತ್ರ ತುಮ್ಹೇಹಿ ನ ಆನನ್ದೋ ನ ಸೋಮನಸ್ಸಂ ನ ಚೇತಸೋ ಅಭಿರದ್ಧಿ ಕರಣೀಯಾ –

ಪುಚ್ಛಾ – ಸಾಧು ¶ ಸಾಧು ಆವುಸೋ, ಸಾಧು ಖೋ ಭಗವಾ ಅತ್ತನಾ ಪರಮುಕ್ಕಂಸಗತಸುಪರಿಸುದ್ಧಸೀಲಸಮನ್ನಾಗತೋ, ತಂ ಅತ್ತನೋ ಸುಪರಿಸುದ್ಧಸೀಲಂ ದಸ್ಸೇತ್ವಾ ಪರೇಪಿ ತತ್ಥ ನಿಯೋಜೇಸಿ, ತತಿಯೇ ಪನಾವುಸೋ ಅನುಸನ್ಧಿಮ್ಹಿ ಕಥಂ ಭಗವತಾ ಭಾಸಿತಂ, ತಂ ಸಂಖೇಪತೋ ಪಕಾಸೇಹಿ.

ವಿಸ್ಸಜ್ಜನಾ – ತತಿಯೇ ಪನ ಭನ್ತೇ ಅನುಸನ್ಧಿಮ್ಹಿ ದ್ವಾಸಟ್ಠಿ ದಿಟ್ಠಿಯೋ ಸಬ್ಬಞ್ಞುತ ಞಾಣೇನ ವಿತ್ಥಾರತೋ ವಿಭಜಿತ್ವಾ, ತಾಸಞ್ಚ ಛ ಫಸ್ಸಾಯತನಪದಟ್ಠಾನಭಾವಂ ವಿಭಾವೇತ್ವಾ, ಮಿಚ್ಛಾದಿಟ್ಠಿಗತಿಕಾಧಿಟ್ಠಾ ನಞ್ಚ ವಟ್ಟಂ ಕಥೇತ್ವಾ, ಯುತ್ತಯೋಗಭಿಕ್ಖುಅಧಿಟ್ಠಾನಞ್ಚ ವಿವಟ್ಟಂ ಕಥೇತ್ವಾ, ಮಿಚ್ಛಾದಿಟ್ಠಿಗತಿಕಸ್ಸ ದೇಸನಾಜಾಲತೋ ಅವಿಮುತ್ತಭಾವಂ ¶ ದೇಸನಾಜಾಲತೋ ವಿಮುತ್ತಸ್ಸ ನತ್ಥಿಕಭಾವಞ್ಚ ವಿಭಾವೇತ್ವಾ, ಅತ್ತನೋ ಚ ಕತ್ಥಚಿ ಅಪರಿಯಾಪನ್ನಭಾವಂ ದಸ್ಸೇತ್ವಾ, ಉಪಾದಿಸೇಸನಿಬ್ಬಾನಧಾತುಂ ಪಾಪೇತ್ವಾ ದೇಸನಾ ಭಗವತಾ ನಿಟ್ಠಾಪಿತಾ.

ಉಚ್ಛಿನ್ನಭಾವನೇತ್ತಿಕೋ ¶ ಭಿಕ್ಖವೇ ತಥಾಗತಸ್ಸ ಕಾಯೋ ತಿಟ್ಠತಿ, ಯಾವಸ್ಸ ಕಾಯೋ ಠಸ್ಸತಿ ತಾವ ನಂ ದಕ್ಖನ್ತಿ ದೇವಮನುಸ್ಸಾ, ಕಾಯಸ್ಸ ಭೇದಾ ಉದ್ಧಂ ಜೀವಿತಪರಿಯಾದಾನಾ ನ ನಂ ದಕ್ಖನ್ತಿ ದೇವಮನುಸ್ಸಾ.

ಪುಚ್ಛಾ – ಸಾಧು ¶ ಸಾಧು ಆವುಸೋ, ಸಾಧು ಖೋ ಭಗವಾ ಅತ್ತನಾ ದ್ವಾಸಟ್ಠಿ ದಿಟ್ಠಿಯೋ ಚ ಛ ಫಸ್ಸಾಯತನಾನಿ ಚ ದ್ವಾದಸ ಪಟಿಚ್ಚಸಮುಪ್ಪಾದಙ್ಗಾನಿ ಚ ಸಬ್ಬಸೋ ಪರಿಜಾನಿತ್ವಾ ತೇಸಂ ಪರಿಜಾನನತ್ಥಾಯ ಪರೇಸಮ್ಪಿ ತಥತ್ತಾಯ ಧಮ್ಮಂ ಪಕಾಸೇತಿ, ಸುತ್ತಞ್ಚ ನಾಮ ಆವುಸೋ ಚತುನ್ನಂ ಸುತ್ತನಿಕ್ಖೇಪಾನಂ ಅಞ್ಞತರವಸೇನೇವ ನಿಕ್ಖಿತ್ತಂ, ತಸ್ಮಾ ತೇಸು ಇದಂ ಸುತ್ತಂ ಕತರೇನ ಸುತ್ತನಿಕ್ಖೇಪೇನ ಭಗವತಾ ನಿಕ್ಖಿತ್ತಂ.

ವಿಸ್ಸಜ್ಜನಾ – ಚತೂಸು ಭನ್ತೇ ಸುತ್ತನಿಕ್ಖೇಪೇಸು ಅಟ್ಠುಪ್ಪತ್ತಿನಿಕ್ಖೇಪನ ಇದಂ ಸುತ್ತಂ ನಿಕ್ಖಿತ್ತಂ.

ವಿಸ್ಸಜ್ಜನಾ – ಭಗವತೋ ಭನ್ತೇ ವಚನಂ ಅರಹತೋ ಸಮ್ಮಾಸಮ್ಬುದ್ಧಸ್ಸ.

ವಿಸ್ಸಜ್ಜನಾ – ಪರಮ್ಪರಾಯ ಭನ್ತೇ ಆಭತಂ.

ಪುಚ್ಛಾ – ಅತ್ಥಿ ನು ಖೋ ಆವುಸೋ ಏತ್ಥ ಕೋಚಿ ವಿರದ್ಧದೋಸಾ, ಯೇನ ಪಚ್ಛಿಮಾ ಜನಾ ಮಿಚ್ಛಾಅತ್ಥಂ ಗಣ್ಹೇಯ್ಯುಂ.

ಪುಚ್ಛಾ – ತೇನಾವುಸೋ ¶ ಭಗವತಾ…ಪೇ… ಸಮ್ಮಾಸಮ್ಬುದ್ಧೇನ ಸಾಮಞ್ಞಫಲಸುತ್ತಂ ಕತ್ಥ ಭಾಸಿತಂ.

ವಿಸ್ಸಜ್ಜನಾ – ರಾಜಗಹೇ ಭನ್ತೇ ಜೀವಕಸ್ಸ ಕೋಮಾರಭಚ್ಚಸ್ಸ ಅಮ್ಬವನೇ ಭಾಸಿತಂ.

ಪುಚ್ಛಾ – ಕೇನಾವುಸೋ ಸದ್ಧಿಂ ಭಗವತಾ ಭಾಸಿತಂ.

ವಿಸ್ಸಜ್ಜನಾ – ರಞ್ಞಾ ಭನ್ತೇ ಮಾಗಧೇನ ಅಜಾತಸತ್ತುನಾ ವೇದೇಹಿಪುತ್ತೇನ ಸದ್ಧಿಂ ಭಾಸಿತಂ.

ಪುಚ್ಛಾ – ತಂ ¶ ಪನಾವುಸೋ ಸುತ್ತಂ ಚತುನ್ನಂ ಸುತ್ತನಿಕ್ಖೇಪಾನಂ ಕತರೇನ ಸುತ್ತನಿಕ್ಖೇಪೇನ ಭಗವತಾ ನಿಕ್ಖಿತ್ತಂ.

ವಿಸ್ಸಜ್ಜನಾ – ಚತುನ್ನಂ ಭನ್ತೇ ಸುತ್ತನಿಕ್ಖೇಪಾನಂ ಪುಚ್ಛಾವಸಿಕೇನ ಸುತ್ತನಿಕ್ಖೇಪೇನ ನಿಕ್ಖಿತಂ ಭಗವತಾ.

ಪುಚ್ಛಾ – ಸಾ ಪನಾವುಸೋ ಪುಚ್ಛಾ ಕೇನಾಕಾರೇನ ಸಮುಪ್ಪನ್ನಾ.

ವಿಸ್ಸಜ್ಜನಾ – ರಾಜಾ ಭನ್ತೇ ಮಾಗಧೋ ಅಜಾಸತ್ತು ವೇದೇಹಿಪುತ್ತೋ ತದಹುಪೋಸಥೇ ಪನ್ನರಸೇ ಕೋಮುದಿಯಾ ಚಾತುಮಾಸಿನಿಯಾ ಪುಣ್ಣಾಯ ಪುಣ್ಣಮಾಯ ರತ್ತಿಯಾ ಯೇನ ಭಗವಾ ತೇನುಪಸಂಕಮಿ, ಉಪಸಂಕಮಿತ್ವಾ ಭಗವನ್ತಂ ದಿಟ್ಠೇವ ಧಮ್ಮೇ ಸಂದಿಟ್ಠಿಕಂ ಸಾಮಞ್ಞಫಲಂ ಪುಚ್ಛಿ, ಏವಂ ಖೋ ಸಾ ಭನ್ತೇ ಪುಚ್ಛಾ ಉಪ್ಪನ್ನಾ.

ರಮ್ಮಣೀಯಾ ¶ ವತ ಭೋ ದೋಸಿನಾ ರತ್ತಿ, ಅಭಿರೂಪಾ ವತ ಭೋ ದೋಸಿನಾ ರತ್ತಿ, ದಸ್ಸನೀಯಾ ವತ ಭೋ ದೋಸಿನಾ ರತ್ತಿ, ಪಾಸಾದಿಕಾ ವತ ಭೋ ದೋಸಿನಾ ರತ್ತಿ, ಲಕ್ಖಞ್ಞಾ ವತ ಭೋ ದೋಸಿನಾ ರತ್ತಿ….

ಕಂ ನುಖ್ವಜ್ಜ ಸಮಣಂ ವಾ ಬ್ರಾಹ್ಮಣಂ ವಾ ಪಯಿರುಪಾಸೇಯ್ಯಾಮ….

ಯಂ ¶ ನೋ ಪಯಿರುಪಸತೋ ಚಿತ್ತಂ ಪಸೀದೇಯ್ಯ….

ತ್ವಂ ಪನ ಸಮ್ಮ ಜೀವಕ ಕಿಂ ತುಣ್ಹೀಸಿ –

ಅಯಂ ¶ ದೇವ ಅಮ್ಹಾಕಂ ಭಗವಾ ಅರಹಂ ಸಮ್ಮಾಸಮ್ಬುದ್ಧೋ ಅಮ್ಹಾಕಂ ಅಮ್ಬವನೇ ವಿಹರತಿ.

ತಂ ಖೋ ಪನ ಭಗವನ್ತಂ ಏವಂ ಕಲ್ಯಾಣೋ ಕಿತ್ತಿಸದ್ದೋ ಅಬ್ಭುಗ್ಗತೋ ‘‘ಇತಿಪಿ ಸೋ ಭಗವಾ ಅರಹಂ ಸಮ್ಮಾಸಮ್ಬುದ್ಧೋ ವಿಜ್ಜಾಚರಣಸಮ್ಪನ್ನೋ ಸುಗತೋ ಲೋಕವಿದೂ ಅನುತ್ತರೋಪುರಿಸದಮ್ಮಸಾರಥಿ ಸತ್ಥಾದೇವಮನುಸ್ಸಾನಂ ಬುದ್ಧೋ ಭಗವಾ’’ತಿ.

ತಂ ದೇವೋ ಭಗವನ್ತಂ ಪಯಿರುಪಾಸತು, ಅಪ್ಪೇವನಾಮ ದೇವಸ್ಸ ಭಗವನ್ತಂ ಪಯಿರುಪಾಸತೋ ಚಿತ್ತಂ ಪಸೀದೇಯ್ಯ.

ತೇನ ಹಿ ಸಮ್ಮ ಜೀವಕ ಹತ್ಥಿಯಾನಾನಿ ಕಪ್ಪಾಪೇಹಿ.

ಕಪ್ಪಿತಾನಿ ¶ ಖೋ ತೇ ದೇವ ಹತ್ಥಿಯಾನಾನಿ, ಯಸ್ಸ ದಾನಿ ಕಾಲಂ ಮಞ್ಞಸಿ.

ಕಿಚ್ಚಿ ಮಂ ಸಮ್ಮ ಜೀವಕ ನ ವಞ್ಚೇಸಿ, ಕಚ್ಚಿ ಮಂ ಸಮ್ಮ ಜೀವಕ ನ ಪಲಮ್ಭೇಸಿ….

ಮಾ ಭಾಯಿ ಮಹಾರಾಜ, ಮಾ ಭಾಯಿ ಮಹಾರಾಜ….

ನ ತಂ ದೇವ ವಞ್ಚೇಮಿ, ನ ತಂ ದೇವ ಪಲಮ್ಭಾಮಿ….

ಏಸೋ ¶ ಮಹಾರಾಜ ಭಗವಾ, ಏಸೋ ಮಹಾರಾಜ ಭಗವಾ ಮಜ್ಝಿಮಂ ಥಮ್ಭಂ ನಿಸ್ಸಾಯ ಪುರತ್ಥಾಭಿಮುಖೋ ನಿಸಿನ್ನೋ ಪುರಕ್ಖತೋ ಭಿಕ್ಖುಸಙ್ಘಸ್ಸ….

ಇಮಿನಾ ಮೇ ಉಪಸಮೇನ ಉದಯಭದ್ದೋ ಕುಮಾರೋ ಸಮನ್ನಾಗತೋ ಹೋತು…

ಪುಚ್ಛೇಯ್ಯಾಮಹಂ ಭನ್ತೇ ಭಗವನ್ತಂ ಕಿಞ್ಚಿದೇವ ದೇಸಂ ಸಚೇ ಮೇ ಭಗವಾ ಓಕಾಸಂ ಕರೋತಿ ಪಞ್ಹಸ್ಸ ವೇಯ್ಯಾಕರಣಾಯ.

ಯಥಾ ¶ ನು ಖೋ ಇಮಾನಿ ಭನ್ತೇ ಪುಥುಸಿಪ್ಪಾಯತನಾನಿ, ಸೇಯ್ಯಥಿದಂ, ಹತ್ಥಾರೋಹಾ ಅಸ್ಸಾರೋಹಾ ರಥಿಕಾ ಧನುಗ್ಗಹಾ ಚೇಲಕಾ ಚಲಕಾ ಪಿಣ್ಡದಾಯಕಾ (ಪೇಯ್ಯಾಲ) ಗಣಕಾ ಮುದ್ದಿಕಾ, ಅಞ್ಞಾನಿಪಿ ಏವಂ ಗತಿಕಾನಿ ಪುಥುಸಿಪ್ಪಾಯತನಾನಿ, ತೇ ತೇನ ಸಿಪ್ಪೇನ ಸನ್ದಿಟ್ಠಿಕಂ ಸಿಪ್ಪಫಲಂ ಜೀವನ್ತಿ, ತೇ ತೇನ ಅತ್ತಾನಂ ಸುಖೇನ್ತಿ ಪೀಣೇನ್ತಿ, ಮಾತಾಪಿತರೋ ಸುಖೇನ್ತಿ, ಪೀಣೇನ್ತಿ, ಪುತ್ತದಾರಂ ಸುಖೇನ್ತಿ ಪೀಣೇನ್ತಿ, ಮಿತ್ತಾಮಚ್ಚೇ ಸುಖೇನ್ತಿ ಪೀಣೇನ್ತಿ ಸಮಣಬ್ರಾಹ್ಮಣೇಸು ಉದ್ಧಗ್ಗಿಕಂ ದಕ್ಖಿಣಂ ಪತಿಟ್ಠಪೇನ್ತಿ ಸೋವಗ್ಗಿಕಂ ಸುಖವಿಪಾಕಂ ಸಗ್ಗಸಂವತ್ತನಿಕಂ, ಸಕ್ಕಾ ನು ಖೋ ಭನ್ತೇ ಏವಮೇವ ದಿಟ್ಠೇವ ಧಮ್ಮೇ ಸನ್ದಿಟ್ಠಿಕಂ ಸಾಮಞ್ಞಫಲಂ ಪಞ್ಞಪೇತುಂ.

ಪುಚ್ಛಾ – ತದಾ ¶ ಆವುಸೋ ಕಥಂ ಭಗವತಾ ರಾಜಾ ಅಜಾತಸತ್ತು ವೇದೇಹಿ ಪುತ್ತೋ ಪಟಿಪುಚ್ಛಿತೋ ಕಥಞ್ಚ ತೇನ ಭಗವತೋ ಆರೋಚಿತಂ.

ವಿಸ್ಸಜ್ಜನಾ – ‘‘ಅಭಿಜಾನಾಸಿ ನೋ ತ್ವಂ ಮಹಾರಾಜ ಇಮಂ ಪಞ್ಹಂ ಅಞ್ಞೇ ಸಮಣಬ್ರಾಹ್ಮಣೇ ಪುಚ್ಛಿತಾತಿ, ಅಭಿಜಾನಾಮಹಂ ಭನ್ತೇ ಅಞ್ಞೇ ಸಮಣಬ್ರಾಹ್ಮಣೇ ಪುಚ್ಛಿತಾತಿ, ಯಥಾಕಥಂ ಪನ ತೇ ಮಹಾರಾಜ ಬ್ಯಾಕರಿಂಸು, ಸಚೇ ತೇ ಅಗರು, ಭಾಸಸ್ಸೂತಿ ನ ಖೋ ಮೇ ಭನ್ತೇ ಗರು, ಯತ್ಥಸ್ಸ ಭಗವಾ ನಿಸಿನ್ನೋ ಭವನ್ತರೂಪೋ ವಾತಿ, ತೇನೇಹಿ ಮಹಾರಾಜ ಭಾಸಸ್ಸೂ’’ತಿ, ಏವಂ ಖೋ ಭನ್ತೇ ತದಾ ಭಗವತಾ ರಾಜಾ ಮಾಗಧೋ ಅಜಾತಸತ್ತು ವೇದೇಹಿ ಪುತ್ತೋ ಪಟಿಪುಚ್ಛಿತೋ, ಏವಂ ಖೋ ಭನ್ತೇ ತೇನ ತದಾ ಭಗವತೋ ಆರೋಚಿತಂ.

ಪುಚ್ಛಾ – ಕಥಞ್ಚಾವುಸೋ ¶ ಪೂರಣಕಸ್ಸಪಸ್ಸ ಸನ್ತಿಕೇ ಪುಚ್ಛಾವಿಸ್ಸಜ್ಜನಾ ಅಹೋಸಿ.

ವಿಸ್ಸಜ್ಜನಾ – ಏಕಮಿದಂ ಭನ್ತೇ ಸಮಯಂ ರಾಜಾ ಮಾಗಧೋ ಅಜಾತಸತ್ತು ವೇದೇಹಿಪುತ್ತೋ ಯೇನ ಪೂರಣೋ ಕಸ್ಸಪೋ ತೇನುಪಸಙ್ಕಮಿ, ಉಪಸಙ್ಕಮಿತ್ವಾ ಪೂರಣಂ ಕಸ್ಸಪಂ ಸನ್ದಿಟ್ಠಿಕಂ ಸಾಮಞ್ಞಫಲಂ ಪುಚ್ಛಿ, ಅಥ ಖೋ ಭನ್ತೇ ಪೂರಣೋ ಕಸ್ಸಪೋ ಕರೋತೋ ಖೋ ಮಹಾರಾಜ ಕಾರಯತೋ, ಛಿನ್ದತೋ ಛೇದಾಪಯತೋ, ಪಚತೋ ಪಾಚಾಪಯತೋ, ಸೋಚಯತೋ ಸೋಚಾಪಯತೋ (ಪೇಯ್ಯಾಲ) ಕರೋತೋ ನ ಕರೀಯತಿ ಪಾಪಂ ತ್ಯಾದಿನಾ ರಞ್ಞೋ ಮಾಗಧಸ್ಸ ಅಜಾತಸತ್ತುಸ್ಸ ವೇದೇಹಿಪುತ್ತಸ್ಸ ಸಂದಿಟ್ಠಿ ಕಂ ಸಾಮಞ್ಞಫಲಂ ಪುಟ್ಠೋ ಸಮಾನೋ ಅಕಿರಿಯಂ ಬ್ಯಾಕಾಸಿ, ಏವಂ ಖೋ ಭನ್ತೇ ಪೂರಣಸ್ಸ ಕಸ್ಸಪಸ್ಸ ಸನ್ತಿಕೇ ಪುಚ್ಛಾವಿಸ್ಸಜ್ಜನಾ ಅಹೋಸಿ.

ನಿಸ್ಸಿರಿಕೋ ¶ ವತ ಆವುಸೋ ಪೂರಣಸ್ಸ ಕಸ್ಸಪಸ್ಸ ವಾದೋ ಅನತ್ಥಸಂಹಿತೋ ಜಿಗುಚ್ಛನೀಯೋ ಅತಿವಿಯ ಭಯಾನಕೋ, ಯೇ ತಸ್ಸ ವಚನಂ ಸೋತಬ್ಬಂ ಸದ್ಧಾತಬ್ಬಂ ಮಞ್ಞೇಯ್ಯುಂ, ತೇಸಂ ತಂ ಅಸ್ಸ ದೀಘರತ್ತಂ ಅಹಿತಾಯ ದುಕ್ಖಾಯ, ಏತ್ತಕೇನೇವ ಅಜ್ಜ ಮಯಂ ಪುಚ್ಛಾವಿಸ್ಸಜ್ಜನಂ ಥಪೇಸ್ಸಾಮ.

ಪುಚ್ಛಾ – ಪುರಿಮದಿವಸೇ ಆವುಸೋ ಮಯಾ ಸಾಮಞ್ಞಫಲಸುತ್ತಸ್ಸ ನಿದಾನಪರಿಯಾಪನ್ನಾನಿ ಪುಚ್ಛಿತಬ್ಬಟ್ಠಾನಾನಿ ಕಾನಿಚಿ ಕಾನಿಚಿ ಪುಚ್ಛಿತಾನಿ, ತಯಾ ಚ ಸುಟ್ಠು ವಿಸ್ಸಜ್ಜಿತಾನಿ, ಅಜ್ಜ ಪನ ಯಥಾನುಪ್ಪತ್ತಮಕ್ಖಲಿಗೋಸಾಯ ವಾದತೋ ಪಟ್ಠಾಯ ಪುಚ್ಛಿಸ್ಸಾಮಿ, ಮಕ್ಖಲಿ ಪನ ಆವುಸೋ

ಗೋಸಾಲೋ ¶ ರಞ್ಞಾ ಮಾಗಧೇನ ಅಜಾತಸತ್ತುನಾ ವೇದೇಹಿಪುತ್ತೇನ ಸನ್ದಿಟ್ಠಿಕಂ ಸಾಮಞ್ಞಫಲಂ ಪುಟ್ಠೋ ಕಥಂ ಬ್ಯಾಕಾಸಿ.

ವಿಸ್ಸಜ್ಜನಾ – ಏಕಮಿದಂ ಭನ್ತೇ ಸಮಯಂ ರಾಜಾ ಮಾಗಧೋ ಅಜಾತಸತ್ತು ವೇದೇಹಿಪುತ್ತೋ ಯೇನ ಮಕ್ಖಲಿಗೋಸಾಲೋ ತೇನುಪಸಂಕಮಿ, ಉಪಸಂಕಮಿತ್ವಾ ಮಕ್ಖಲಿಂ ಗೋಸಾಲಂ ಸನ್ದಿಟ್ಠಿಕಂ ಸಾಮಞ್ಞಫಲಂ ಪುಚ್ಛಿ, ಅಥ ಖೋ ಭನ್ತೇ ಮಕ್ಖಲಿಗೋಸಾಲೋ ರಾಜಾನಂ ಮಾಗಧಂ ಅಜಾತಸತ್ತುಂ ವೇದೇಹಿಪುತ್ತಂ ಏತದವೋಚ ‘‘ನತ್ಥಿ ಮಹಾರಾಜ ಹೇತು ನತ್ಥಿ ಪಚ್ಚಯೋ ಸತ್ತಾನಂ ಸಂಕಿಲೇಸಾಯ, ಅಹೇತೂ ಅಪಚ್ಚಯಾ ಸತ್ತಾ ಸಂಕಿಲಿಸ್ಸನ್ತಿ. ನತ್ಥಿ ಮಹಾರಾಜ ಹೇತು ನತ್ಥಿ ಪಚ್ಚಯೋ ಸತ್ತಾನಂ ವಿಸುದ್ಧಿಯಾ, ಅಹೇತೂ ಅಪಚ್ಚಯಾ ಸತ್ತಾ ವಿಸುಜ್ಝನ್ತಿ, (ಪೇಯ್ಯಾಲ) ಚುಲ್ಲಾಸೀತಿ ಮಹಾಕಪ್ಪಿನೋ ಸತಸಹಸ್ಸಾನಿ, ಯಾನಿ ಬಾಲೇ ಚ ಪಣ್ಡಿತೇ ಚ ಸನ್ಧಾವಿತ್ವಾ ಸಂಸರಿತ್ವಾ ದುಕ್ಖಸ್ಸನ್ತಂ ಕರಿಸ್ಸನ್ತಿ, ತತ್ಥ ನತ್ಥಿ ‘ಇಮಿನಾಹಂ ಸೀಲೇನ ವಾ ವತೇನ ವಾ ತಪೇನ ವಾ ಬ್ರಹ್ಮಚರಿಯೇನ ವಾ ಅಪರಿಪಕ್ಕಂ ವಾ ಕಮ್ಮಂ ಪರಿಪಾಚೇಸ್ಸಾಮಿ, ಪರಿಪಕ್ಕಂ ವಾ ಕಮ್ಮಂ ಫುಸ್ಸ ಫುಸ್ಸ ಬ್ಯನ್ತಿಂ ಕರಿಸ್ಸಾಮೀ’ತಿ ಹೇವಂ ನತ್ಥಿ. ದೋಣಮಿತೇ ಸುಖದುಕ್ಖೇ, ಪರಿಯನ್ತಕತೇ ಸಂಸಾರೇ ನತ್ಥಿ ಹಾಯನವಡ್ಢನೇ, ನತ್ಥಿ ಉಕ್ಕಂಸಾವಕಂಸೇ. ಸೇಯ್ಯಥಾಪಿ ನಾಮ ಸುತ್ತಪುಟ್ಠೇ ಖಿತ್ತೇ ನಿಬ್ಬೇಠಿಯಮಾನಮೇವ ಪಲೇತಿ, ಏವಮೇವ ಬಾಲೇ ಚ ಪಣ್ಡಿತೇ ಚ ಸನ್ಧಾವಿತ್ವಾ ಸಂಸರಿತ್ವಾ ದುಕ್ಖಸ್ಸನ್ತಂ ಕರಿಸ್ಸನ್ತೀ’’ತಿ, ಇತ್ಥಂ ಖೋ ಭನ್ತೇ ರಞ್ಞೋ ಮಾಗಧಸ್ಸ ಅಜಾತಸತ್ತುಸ್ಸ ವೇದೇಹಿಪುತ್ತಸ್ಸ ಮಕ್ಖಲಿಗೋಸಾಲೋ ಸನ್ದಿಟ್ಠಿಕಂ ಸಾಮಞ್ಞಫಲಂ ಪುಟ್ಠೋ ಸಮಾನೋ ಸಂಸಾರಸುದ್ಧಿಂ ಬ್ಯಾಕಾಸಿ.

ಅಯಮ್ಪಿ ¶ ಆವುಸೋ ವಾದೋ ನಿಸ್ಸಿರಿಕೋಯೇವ ಅನತ್ಥಸಂಹಿತೋ ಜಿಗುಚ್ಛನೀಯೋ ಅತಿ ವಿಯ ಭಯಾನಕೋ, ಯೇ ತಸ್ಸ ವಚನಂ ಸೋತಬ್ಬಂ ಸದ್ಧಾತಬ್ಬಂ ಮಞ್ಞೇಯ್ಯುಂ, ತೇಸಂ ತಂ ಅಸ್ಸ ದೀಘರತ್ತಂ ಅಹಿತಾಯ ದುಕ್ಖಾಯ.

ಪುಚ್ಛಾ – ಅಥಾಪರಮ್ಪಿ ¶ ಪುಚ್ಛಾಮಿ, ಅಜಿತೋ ಪನ ಆವುಸೋ ಕೇಸಕಮ್ಬಲೋ ರಞ್ಞಾ ಮಾಗಧೇನ ಅಜಾತಸತ್ತುನಾ ವೇದೇಹಿಪುತ್ತೇನ ಸನ್ದಿಟ್ಠಿಕಂ ಸಾಮಞ್ಞಫಲಂ ಪುಟ್ಠೋ ಕಥಂ ಬ್ಯಾಕಾಸಿ.

ವಿಸ್ಸಜ್ಜನಾ – ಏಕಮಿದಂ ಭನ್ತೇ ಸಮಯಂ ರಾಜಾ ಮಾಗಧೋ ಅಜಾತಸತ್ತು ವೇದೇಹಿಪುತ್ತೋ ಯೇನ ಅಜಿತೋ ಕೇಸಕಮ್ಬಲೋ ತೇನುಪಸಙ್ಕಮಿ, ಉಪಸಙ್ಕಮಿತ್ವಾ ಅಜಿತಂ ಕೇಸಕಮ್ಬಲಂ ಸನ್ದಿಟ್ಠಿಕಂ ಸಾಮಞ್ಞಫಲಂ ಪುಚ್ಛಿ, ಅಥ ಖೋ ಭನ್ತೇ ಅಜಿತೋ ಕೇಸಕಮ್ಬಲೋ ರಾಜಾನಂ ಮಾಗಧಂ ಅಜಾತಸತ್ತುಂ ವೇದೇಹಿಪುತ್ತಂ ಏತದವೋಚ ‘‘ನತ್ಥಿ ಮಹಾರಾಜ ದಿನ್ನಂ, ನತ್ಥಿ ಯಿಟ್ಠಂ, ನತ್ಥಿ ಹುತಂ, ನತ್ಥಿ ಸುಕತದುಕ್ಕಟಾನಂ ಕಮ್ಮಾನಂ ಫಲಂ ವಿಪಾಕೋ, ನತ್ಥಿ ಅಯಂ ಲೋಕೋ, ನತ್ಥಿ ಪರೋ ಲೋಕೋ, ನತ್ಥಿ ಮಾತಾ, ನತ್ಥಿ ಪಿತಾ, ನತ್ಥಿ ಸತ್ತಾ ಓಪಪಾತಿಕಾ, ನತ್ಥಿ ಲೋಕೇ ಸಮಣಬ್ರಾಹ್ಮಣಾ ಸಮ್ಮಗ್ಗತಾ ಸಮ್ಮಾಪಟಿಪನ್ನಾ, ಯೇ ಇಮಞ್ಚ ಲೋಕಂ ಪರಞ್ಚ ಲೋಕಂ ಸಯಂ ಅಭಿಞ್ಞಾ ಸಚ್ಛಿಕತ್ವಾ ಪವೇದೇನ್ತಿ. (ಪೇಯ್ಯಾಲ) ಬಾಲೇ ಚ ಪಣ್ಡಿತೇ ಚ ಕಾಯಸ್ಸ ಭೇದಾ ಉಚ್ಛಿಜ್ಜನ್ತಿ ವಿನಸ್ಸನ್ತೀ’’ತಿ. ಇತ್ಥಂ ಖೋ ಭನ್ತೇ ರಞ್ಞೋ ಮಾಗಧಸ್ಸ ಅಜಾತಸತ್ತುಸ್ಸ ವೇದೇಹಿಪುತ್ತಸ್ಸ ಅಜಿತೋ ಕೇಸಕಮ್ಬಲೋ ¶ ಸನ್ದಿಟ್ಠಿಕಂ ಸಾಮಞ್ಞಫಲಂ ಪುಟ್ಠೋ ಸಮಾನೋ ಉಚ್ಛೇದಂ ಬ್ಯಾಕಾಸಿ.

ಅಯಮ್ಪಿ ¶ ಖೋ ಆವುಸೋ ನಿಸ್ಸಿರಿಕೋಯೇವ, ಅನತ್ಥಸಂಹಿತೋ ಜಿಗುಚ್ಛನೀಯೋ ಅತಿ ವಿಯ ಭಯಾನಕೋ, ಯೇ ತಸ್ಸ ವಚನಂ ಸೋತಬ್ಬಂ ಸದ್ಧಾತಬ್ಬಂ ಮಞ್ಞೇಯ್ಯುಂ, ತೇಸಂ ತಂ ಅಸ್ಸ ದೀಘರತ್ತಂ ಅಹಿತಾಯ ದುಕ್ಖಾಯ.

ಪುಚ್ಛಾ – ಅಥಾಪರಮ್ಪಿ ¶ ಪುಚ್ಛಾಮಿ, ಪಕುಧೋ ಪನ ಆವುಸೋ ಕಚ್ಚಾಯನೋ ರಞ್ಞಾ ಮಾಗಧೇನ ಅಜಾತಸತ್ತುನಾ ವೇದೇಹಿಪುತ್ತೇನ ಸನ್ದಿಟ್ಠಿಕಂ ಸಾಮಞ್ಞಫಲಂ ಪುಟ್ಠೋ ಕಥಂ ಬ್ಯಾಕಾಸಿ.

ವಿಸ್ಸಜ್ಜನಾ – ಏಕಮಿದಂ ಭನ್ತೇ ಸಮಯಂ ರಾಜಾ ಮಾಗಧೋ ಅಜಾತಸತ್ತು ವೇದೇಹಿಪುತ್ತೋ ಯೇನ ಪಕುಧೋ ಕಚ್ಚಾಯನೋ ತೇನುಪಸಙ್ಕಮಿ, ಉಪಸಙ್ಕಮಿತ್ವಾ ಪಕುಧಂ ಕಚ್ಚಾಯನಂ ಸನ್ದಿಟ್ಠಿಕಂ ಸಾಮಞ್ಞಫಲಂ ಪುಚ್ಛಿ, ಅಥ ಖೋ ಭನ್ತೇ ಪಕುಧೋ ಕಚ್ಚಾಯನೋ ರಾಜಾನಂ ಮಾಗಧಂ ಅಜಾಸತ್ತುಂ ವೇದೇಹಿಪುತ್ತಂ ಏತದವೋಚ ‘‘ಸತ್ತಿಮೇ ಮಹಾರಾಜ ಕಾಯಾ ಅಕಟಾ ಅಕಟವಿಧಾ ಅನಿಮ್ಮಿತಾ ಅನಿಮ್ಮಾತಾ ವಞ್ಚಾ ಕೂಟಟ್ಠಾ ಏಸಿಕಟ್ಠಾಯಿತಾ, ತೇ ನ ಇಞ್ಜನ್ತಿ, ನ ವಿಪರಿಣಾಮೇನ್ತಿ, ನ ಅಞ್ಞಮಞ್ಞಂ ಬ್ಯಾಬಾಧೇನ್ತಿ, ನಾಲಂ ಅಞ್ಞಮಞ್ಞಸ್ಸ ಸುಖಾಯ ವಾ ದುಕ್ಖಾಯ ವಾ ಸುಖದುಕ್ಖಾಯ ವಾ. ಕತಮೇ ಸತ್ತ, ಪಥವೀಕಾಯೋ, ಆಪೋಕಾಯೋ, ತೇಜೋಕಾಯೋ ¶ ವಾಯೋಕಾಯೋ, ಸುಖೇ, ದುಕ್ಖೇ, ಜೀವೇ ಸತ್ತಮೇ. ಇಮೇ ಸತ್ತಕಾಯಾ ಅಕಟಾ ಅಕಟವಿಧಾ ಅನಿಮ್ಮಿತಾ ಅನಿಮ್ಮಾತಾ ವಞ್ಚ್ಯಾ ಕೂಟಟ್ಠಾ ಏಸಿಕಟ್ಠಾಯಿತಾ, ತೇ ನ ಇಞ್ಜನ್ತಿ, ನ ವಿಪರಿಣಾಮೇನ್ತಿ, ನ ಅಞ್ಞಮಞ್ಞಂ ಬ್ಯಾಬಾಧೇನ್ತಿ, ನಾಲಂ ಅಞ್ಞಮಞ್ಞಸ್ಸ ಸುಖಾಯ ವಾ ದುಕ್ಖಾಯ ವಾ ಸುಖದುಕ್ಖಾಯ ವಾ. ತತ್ಥ ನತ್ಥಿ ಹನ್ತಾ ವಾ ಘಾತೇತಾ ವಾ, ಸೋತಾ ವಾ ಸಾವೇತಾ ವಾ, ವಿಞ್ಞಾತಾ ವಾ ವಿಞ್ಞಾಪೇತಾ ವಾ, ಯೋಪಿ ತಿಣ್ಹೇನ ಸತ್ಥೇನ ಸೀಸಂ ಛಿನ್ದತಿ, ನ ಕೋಚಿ ಕಿಞ್ಚಿ ಜಿವಿತಾ ವೋರೋಪೇತಿ, ಸತ್ತನ್ನಂತ್ವೇವ ಕಾಯಾನಮನ್ತರೇನ ಸತ್ಥಂ ವಿವರಮನುಪತತೀ’’ತಿ. ಇತ್ಥಂ ಖೋ ಭನ್ತೇ ರಞ್ಞೋ ಮಾಗಧಸ್ಸ ಅಜಾತಸತ್ತುಸ್ಸ ವೇದೇಹಿಪುತ್ತಸ್ಸ ಪಕುಧೋ ಕಚ್ಚಾಯನೋ ಸಾಮಞ್ಞಫಲಂ ಪುಟ್ಠೋ ಸಮಾನೋ ಅಞ್ಞೇನ ಅಞ್ಞಂ ಬ್ಯಾಕಾಸಿ.

ಅಯಮ್ಪಿ ¶ ಖೋ ಆವುಸೋ ವಾದೋ ಪುರಿಮವಾದೋವಿಯ ನಿಸ್ಸಿರಿಕೋಯೇವ ಅನತ್ಥಸಂಹಿತೋ ಜಿಗುಚ್ಛನೀಯೋ ಅತಿವಿಯ ಭಯಾನಕೋ.

ಪುಚ್ಛಾ – ಅಥಾಪರಮ್ಪಿ ಪುಚ್ಛಾಮಿ, ನಿಗಣ್ಠೋ ಪನಾವುಸೋ ನಾಟಪುತ್ತೋ ರಞ್ಞಾ ಮಾಗಧೇನ ಅಜಾತಸತ್ತುನಾ ವೇದೇಹಿಪುತ್ತೇನ ಸನ್ದಿಟ್ಠಿಕಂ ಸಾಮಞ್ಞಫಲಂ ಪುಟ್ಠೋ ಕಥಂ ಬ್ಯಾಕಾಸಿ.

ವಿಸ್ಸಜ್ಜನಾ – ಏಕಮಿದಂ ಭನ್ತೇ ಸಮಯಂ ರಾಜಾ ಮಾಗಧೋ ಅಜಾತಸತ್ತು ವೇದೇಹಿಪುತ್ತೋ ಯೇನ ನಿಗಣ್ಠೋ ನಾಟಪುತ್ತೋ ತೇನುಪಸಂಕಮಿ, ಉಪಸಂಕಮಿತ್ವಾ ನಿಗಣ್ಠಂ ನಾಟಪುತ್ತಂ ಸನ್ದಿಟ್ಠಿಕಂ ಸಾಮಞ್ಞಫಲಂ ಪುಚ್ಛಿ, ಅಥ ಖೋ ನಿಗಣ್ಠೋ ನಾಟಪುತ್ತೋ ರಾಜಾನಂ ಮಾಗಧಂ ಅಜಾತಸತ್ತುಂ ವೇದೇಹಿಪುತ್ತಂ ಏತದವೋಚ, ‘‘ಇಧ ಮಹಾರಾಜ ನಿಗಣ್ಠೋ ಚಾತುಯಾಮಸಂವರಸಂವುತೋ ಹೋತಿ, ಕಥಞ್ಚ ಮಹಾರಾಜ

ನಿಗಣ್ಠೋ ¶ ಚಾತುಯಾಮಸಂವರಸಂವುತೋ ಹೋತಿ, ಇಧ ಮಹಾರಾಜ ನಿಗಣ್ಠೋ ಸಬ್ಬವಾರಿವಾರಿತೋ ಚ ಹೋತಿ, ಸಬ್ಬವಾರಿಯುತ್ತೋ ಚ, ಸಬ್ಬವಾರಿಧುತೋ ಚ, ಸಬ್ಬವಾರಿಫುಟೋ ಚ. ಏವಂ ಖೋ ಮಹಾರಾಜ ನಿಗಣ್ಠೋ ಚಾತುಯಾಮಸಂವರಸಂವುತೋ ಹೋತಿ, ಯತೋ ಖೋ ಮಹಾರಾಜ ನಿಗಣ್ಠೋ ಏವಂ ಚಾತುಯಾಮಸಂವರಸಂವುತೋ ಹೋತಿ. ಅಯಂ ವುಚ್ಚತಿ ಮಹಾರಾಜ ನಿಗಣ್ಠೋ ಗತತ್ತೋ ಚ ಯತತ್ತೋ ಚ ಠಿತತ್ತೋ ಚಾ’’ತಿ. ಇತ್ಥಂ ಖೋ ಭನ್ತೇ ರಞ್ಞೋ ಮಾಗಧಸ್ಸ ಅಜಾತಸತ್ತುಸ್ಸ ವೇದೇಹಿಪುತ್ತಸ್ಸ ನಿಗಣ್ಠೋ ನಾಟಪುತ್ತೋ ಸನ್ದಿಟ್ಠಿಕಂ ಸಾಮಞ್ಞಫಲಂ ಪುಟ್ಠೋ ಸಮಾನೋ ಚಾತುಯಾಮಸಂವರಂ ಬ್ಯಾಕಾಸಿ.

ಏತಸ್ಸ ¶ ಪನಾವುಸೋ ವಾದೇ ಕೋಚಿ ಸಾಸನಾನುಲೋಮವಾದೋ ಅತ್ಥಿ, ಅಸುದ್ಧಲದ್ಧಿತಾಯ ಪನ ಏಸೋಪಿ ವಾದೋ ಜಿಗುಚ್ಛನೀಯೋಯೇವ, ಸೇಯ್ಯಥಾಪಿ ಭೋಜನಂ ಗೂಥಮಿಸ್ಸಂ ಗಾರಯ್ಹೋಯೇವ ಆರಕಾ ಪರಿವಜ್ಜಿತಬ್ಬೋಯೇವ, ಸೇಯ್ಯಥಾಪಿ ವಿಸಸಂಸಟ್ಠೋ ಆಪಾನೀಯಕಂಸೋ.

ಪುಚ್ಛಾ – ಅಥಾಪರಮ್ಪಿ ¶ ಪುಚ್ಛಾಮಿ, ಸಞ್ಚಯೋ ಪನಾವುಸೋ ಬೇಲಟ್ಠಪುತ್ತೋ ಸನ್ದಿಟ್ಠಿಕಂ ಸಾಮಞ್ಞಫಲಂ ಪುಟ್ಠೋ ಕಥಂ ಬ್ಯಾಕಾಸಿ.

ವಿಸ್ಸಜ್ಜನಾ – ಏಕಮಿದಂ ಭನ್ತೇ ಸಮಯಂ ರಾಜಾ ಮಾಗಧೋ ಅಜಾತಸತ್ತು ವೇದೇಹಿಪುತ್ತೋ ಯೇನ ಸಞ್ಚಯೋ ಬೇಲಟ್ಠಪುತ್ತೋ ತೇನುಪಸಙ್ಕಮಿ, ಉಪಸಙ್ಕಮಿತ್ವಾ ಸಞ್ಚಯಂ ಬೇಲಟ್ಠಪುತ್ತಂ ಏತದವೋಚ, ‘‘ಯಥಾ ನು ಖೋ ಇಮಾನಿ ಭೋ ಸಞ್ಚಯ ಪುಥುಸಿಪ್ಪಾಯತನಾನಿ, ಸೇಯ್ಯಥಿದಂ, ಹತ್ಥಾರೋಹಾ ಅಸ್ಸರೋಹಾ…ಪೇ… ಸಕ್ಕಾ ನು ಖೋ ಭೋ ಸಞ್ಚಯ ಏವಮೇವ ದಿಟ್ಠೇವ ಧಮ್ಮೇ ಸನ್ದಿಟ್ಠಿಕಂ ಸಾಮಞ್ಞಫಲಂ ಪಞ್ಞಪೇತು’’ನ್ತಿ, ಏವಂ ವುತ್ತೇ ಭನ್ತೇ ಸಞ್ಚಯೋ ಬೇಲಟ್ಠಪುತ್ತೋ ರಾಜಾನಂ ಮಾಗಧಂ ಅಜಾತಸತ್ತುಂ ವೇದೇಹಿಪುತ್ತಂ ಏತದವೋಚ.

‘‘ಅತ್ಥಿ ಪರೋಲೋಕೋತಿ ಇತಿ ಚೇ ಮಂ ಪುಚ್ಛಸಿ, ಅತ್ಥಿ ಪರೋ ಲೋಕೋತಿ ಇತಿ ಚೇ ಮೇ ಅಸ್ಸ, ಅತ್ಥಿ ಪರೋ

ಲೋಕೋತಿ ¶ ಇತಿ ತೇ ನಂ ಬ್ಯಾಕರೇಯ್ಯಂ, ಏವನ್ತಿಪಿ ಮೇ ನೋ, ತಥಾತಿಪಿ ಮೇ ನೋ, ಅಞ್ಞಥಾತಿಪಿ ಮೇ ನೋ, ನೋತಿಪಿ ಮೇ ನೋ, ನೋ ನೋತಿಪಿ ಮೇ ನೋ…ಪೇ… ನೇವ ಹೋತಿ ನ ನ ಹೋತಿ ತಥಾಗತೋ ಪರಂ ಮರಣಾತಿ ಇತಿ ಚೇ ಮಂ ಪುಚ್ಛಸಿ, ನೇವ ಹೋತಿ ನ ನ ಹೋತಿ ತಥಾಗತೋ ಪರಂ ಮರಣಾತಿ ಇತಿ ಚೇ ಮೇ ಅಸ್ಸ, ನೇವ ಹೋತಿ ನ ನ ಹೋತಿ ತಥಾಗತೋ ಪರಂ ಮರಣಾತಿ ಇತಿ ತೇ ನಂ ಬ್ಯಾಕರೇಯ್ಯಂ, ಏವನ್ತಿಪಿ ಮೇ ನೋ, ತಥಾತಿಪಿ ಮೇ ನೋ, ಅಞ್ಞಥಾತಿಪಿ ಮೇ ನೋ, ನೋತಿಪಿ ಮೇ ನೋ, ನೋ ನೋತಿಪಿ ಮೇ ನೋ’’ತಿ. ಇತ್ಥಂ ಖೋ ಭನ್ತೇ ರಞ್ಞೋ ಮಾಗಧಸ್ಸ ಅಜಾತಸತ್ತುಸ್ಸ ವೇದೇಹಿಪುತ್ತಸ್ಸ ಸಞ್ಚಯೋ ಬೇಲಟ್ಠಪುತ್ತೋ ಸನ್ದಿಟ್ಠಿಕಂ ಸಾಮಞ್ಞಫಲಂ ಪುಟ್ಠೋ ಸಮಾನೋ ವಿಕ್ಖೇಪಂ ಬ್ಯಾಕಾಸಿ.

ಸಬ್ಬೇಪಿ ¶ ಆವುಸೋ ಏತೇ ಛನ್ನಂ ಸತ್ಥಾರಾನಂ ವಾದಾ ನಿಸ್ಸಿರಿಕಾಯೇವ ಜಿಗುಚ್ಛನೀಯಾಯೇವ ಅನತ್ಥಸಂಹಿತಾಯೇವ, ಬಾಲಾನಂ ಭಿಯ್ಯೋಸೋ ಮತ್ತಾಯ ಸಮ್ಮೋಹಾಯ ಸಂವತ್ತನ್ತಿ ಅನತ್ಥಾಯ.

ಅಜ್ಜ ¶ ಪನ ಆವುಸೋ ಕಾಲೋ ಅತಿಕ್ಕನ್ತೋ, ಸ್ವೇಯೇವ ಭಗವತಾ ವುತ್ತಂ ಪಣೀತಂ ಪಸಟ್ಠಂ ಸನ್ದಿಟ್ಠಿಕಫಲಂ ಪುಚ್ಛಾಮ.

ಪುಚ್ಛಾ – ಪುರಿಮದಿವಸೇಸು ಆವುಸೋ ಸಾಮಞ್ಞಫಲಸುತ್ತಸ್ಸ ಪುಬ್ಬಭಾಗೇ ಯಾವ ಛಸತ್ಥಾರಮಿಚ್ಛಾವಾದಪರಿಯೋಸಾನಂ ಪುಚ್ಛನವಿಸ್ಸಜ್ಜನಂ ಅಮ್ಹೇಹಿ ಕತಂ, ಅಜ್ಜ ಪನ ಯಥಾನುಪ್ಪತ್ತಂ ಭಗವತಾ ದೇಸಿತಸಾಮಞ್ಞಫಲಸುತ್ತಾಧಿಕಾರೇ ಪುಚ್ಛಾವಿಸ್ಸಜ್ಜನಂ ಕರಿಸ್ಸಾಮ. ಭಗವಾ ಪನ ಆವುಸೋ ರಞ್ಞಾ ಮಾಗಧೇನ ಅಜಾತಸತ್ತುನಾ ವೇದೇಹಿಪುತ್ತೇನ ಸನ್ದಿಟ್ಠಿಕಂ ಸಾಮಞ್ಞಫಲಂ ಪುಟ್ಠೋ ಕಥಂ ಬ್ಯಾಕಾಸಿ.

ವಿಸ್ಸಜ್ಜನಾ – ಭಗವಾ ಭನ್ತೇ ತಿಧಾ ವಿಭಜಿತ್ವಾ ರಞ್ಞೋ ಮಾಗಧಸ್ಸ ಅಜಾತಸತ್ತುಸ್ಸ ವೇದೇಹಿಪುತ್ತಸ್ಸ ಸನ್ದಿಟ್ಠಿಕಂ ಸಾಮಞ್ಞಫಲಂ ಪುಟ್ಠೋ ಬ್ಯಾಕಾಸಿ.

ಪುಚ್ಛಾ – ಕಥಞ್ಚಾವುಸೋ ¶ ಭಗವಾ ರಞ್ಞೋ ಮಾಗಧಸ್ಸ ಅಜಾತಸತ್ತುನೋ ವೇದೇಹಿಪುತ್ತಸ್ಸ ಪಠಮಂ ಸನ್ದಿಟ್ಠಿಕಂ ಸಾಮಞ್ಞಫಲಂ ದೇಸೇಸಿ.

ವಿಸ್ಸಜ್ಜನಾ – ದಾಸಂ ಭನ್ತೇ ಪಬ್ಬಜಿತಂ ಉಪಮಾಭಾವೇನ ನಿದ್ದಿಸಿತ್ವಾ ರಞ್ಞೋ ಮಾಗಧಸ್ಸ ಅಜಾತಸತ್ತುಸ್ಸ ವೇದೇಹಿಪುತ್ತಸ್ಸ ಭಗವಾ ಪಠಮಂ ಸನ್ದಿಟ್ಠಿಕಂ ಸಾಮಞ್ಞಫಲಂ ದೇಸೇಸಿ.

ಸೋಹಂ ¶ ಭನ್ತೇ ಭಗವನ್ತಮ್ಪಿ ಪುಚ್ಛಾಮಿ, ಯಥಾ ನು ಖೋ ಇಮಾನಿ ಭನ್ತೇ ಪುಥುಸಿಪ್ಪಾಯತನಾನಿ ಸೇಯ್ಯಥಿದಂ…ಪೇ… ಸಕ್ಕಾ ನು ಖೋ ಭನ್ತೇ ಏವ ಮೇವ ದಿಟ್ಠೇವ ಧಮ್ಮೇ ಸನ್ದಿಟ್ಠಿಕಂ ಸಾಮಞ್ಞಫಲಂ ಪಞ್ಞಪೇತುಂ –

ಅಚ್ಛರಿಯಂ ¶ ಆವುಸೋ ಅಬ್ಭುತಂ ಆವುಸೋ, ಯಾವ ಸ್ವಾಖಾತಸ್ಸ ಬುದ್ಧಸಾಸನಸ್ಸ ಮಹಿದ್ಧಿಕತಾ ಮಹಾನುಭಾವತಾ, ಯತ್ರಹಿ ನಾಮ ದಾಸೋಪಿ ನಿಹೀನಜಚ್ಚೋ ಏವಂ ಸ್ವಾಖಾತೇ ಬುದ್ಧಸಾಸನೇ ಪಬ್ಬಜಿತ್ವಾ ಅತ್ತನೋ ಇಸ್ಸರಭೂತೇನ ರಞ್ಞಾಪಿ ವನ್ದನೀಯತ್ತಂ ಗರುಕರಣೀಯತ್ತಂ ಪಾಪುಣಿಸ್ಸತಿ, ಸುಪಞ್ಞತ್ತಮೇತಂ ಭಗವತಾ ಪಠಮಂ ಸನ್ದಿಟ್ಠಿಕಫಲಂ.

ಪುಚ್ಛಾ – ಕಥಂ ¶ ಪನಾವುಸೋ ಭಗವಾ ರಞ್ಞೋ ಮಾಗಧಸ್ಸ ಅಜಾತಸತ್ತುನೋ ವೇದೇಹಿಪುತ್ತಸ್ಸ ದುತಿಯಂ ಸನ್ದಿಟ್ಠಿಕಂ ಸಾಮಞ್ಞಫಲಂ ದೇಸೇಸಿ.

ವಿಸ್ಸಜ್ಜನಾ – ಕಸ್ಸಕಂ ಭನ್ತೇ ಪಬ್ಬಜಿತಂ ಉಪಮಾಭಾವೇನ ದಸ್ಸೇತ್ವಾ ಭಗವಾ ರಞ್ಞೋ ಮಾಗಧಸ್ಸ ಅಜಾತಸತ್ತುಸ್ಸ ವೇದೇಹಿಪುತ್ತಸ್ಸ ಸನ್ದಿಟ್ಠಿಕಂ ಸಾಮಞ್ಞಫಲಂ ದೇಸೇಸಿ.

ಅಚ್ಛರಿಯಂ ¶ ಆವುಸೋ ಅಬ್ಭುತಂ ಆವುಸೋ, ಯಾವ ಬುದ್ಧಸಾಸನಸ್ಸ ಸ್ವಾಖಾತತಾ ಮಹಿದ್ಧಿಕತಾ ಮಹಾನುಭಾವತಾ, ಯತ್ರಹಿ ನಾಮ ಕಸ್ಸ ಕೋಪಿ ಗುಣರಹಿತೋ ಏವಂ ಸ್ವಾಖಾತೇ ಬುದ್ಧಸಾಸನೇ ಪಬ್ಬಜಿತ್ವಾ ರಟ್ಠಧಿಪತಿನಾ ಮನುಸ್ಸಲೋಕೇ ದೇವಭೂತೇನ ರಞ್ಞಾಪಿ ಗರುಕರಣೀಯತಂ ವನ್ದನೀಯತಂ ಪಾಪುಣಿಸ್ಸತಿ, ಸುಪಞ್ಞತ್ತಮೇತಂ ಆವುಸೋ ಭಗವತಾ ದುತಿಯಂ ಸನ್ದಿಟ್ಠಿಕಫಲಂ.

ಪುಚ್ಛಾ – ಕಥಞ್ಚಾ ¶ ಪನಾವುಸೋ ಭಗವಾ ಪುರಿಮೇಹಿ ಸನ್ದಿಟ್ಠಿಕಸಾಮಞ್ಞಫಲೇಹಿ ಅಭಿಕ್ಕನ್ತತರಞ್ಚ ಪಣೀತತರಞ್ಚ ಸನ್ದಿಟ್ಠಿಕಂ ಸಾಮಞ್ಞಫಲಂ ರಞ್ಞೋ ದೇಸೇಸಿ.

ವಿಸ್ಸಜ್ಜನಾ – ಭಗವಾ ಭನ್ತೇ ಬುದ್ಧುಪ್ಪಾದತೋ ಪಟ್ಠಾಯ ಕುಲಪುತ್ತಸ್ಸ ಪಬ್ಬಜಿತ ಭಾವಂ, ತಸ್ಸ ಚ ಸೀಲಸಮ್ಪದಂ, ತಸ್ಸ ಚ ಇನ್ದ್ರಿಯೇಸು ಗುತ್ತದ್ವಾರತಂ, ಅರಿಯಞ್ಚಸತಿಸಮ್ಪಜಞ್ಞಂ, ಅರಿಯಞ್ಚ ಸನ್ತುಟ್ಠಿಂ, ಪಞ್ಚನ್ನಞ್ಚ ನೀವರಣಾನಂ ಪಹಾನಂ, ಚತ್ತಾರಿ ಚ ಝಾನಾನಿ, ಅಟ್ಠ ಚ ವಿಜ್ಜಾಯೋ, ತಾಹಿ ತಾಹಿ ಉಪಮಾಹಿ ವಿತ್ಥಾರತೋ ವಿಭಜಿತ್ವಾ ರಞ್ಞೋ ಮಾಗಧಸ್ಸ ಅಜಾತಸತ್ತುಸ್ಸ ವೇದೇಹಿಪುತ್ತಸ್ಸ ಸನ್ದಿಟ್ಠಿಕಂ ಸಾಮಞ್ಞಫಲಂ ಪುರಿಮೇಹಿ ಸನ್ದಿಟ್ಠಿಕೇಹಿ ಸಾಮಞ್ಞಫಲೇಹಿ ಅಭಿಕ್ಕನ್ತತರಞ್ಚ ಪಣೀತತರಞ್ಚ ದೇಸೇಸಿ.

ಸಕ್ಕಾ ¶ ಪನ ಭನ್ತೇ ದಿಟ್ಠೇವ ಧಮ್ಮೇ ಸನ್ದಿಟ್ಠಿಕಂ ಸಾಮಞ್ಞಫಲಂ, ಪುರಿಮೇಹಿ ಸನ್ದಿಟ್ಠಿಕೇಹಿ ಸಾಮಞ್ಞಫಲೇಹಿ ಅಭಿಕ್ಕನ್ತತರಞ್ಚ ಪಣೀತತರಞ್ಚ ಪಞ್ಞಪೇತುಂ.

ಸಕ್ಕಾ ಮಹಾರಾಜಾ, ತೇನ ಹಿ ಮಹಾರಾಜ ಸುಣೋಹಿ ಸಾಧುಕಂ ಮನಸಿಕರೋಹಿ ಭಾಸಿಸ್ಸಾಮಿ.

ಪುಚ್ಛಾ – ಕಥಞ್ಚ ¶ ಪನಾವುಸೋ ಭಿಕ್ಖು ಸೀಲಸಮ್ಪನ್ನೋ ಹೋತಿ, ಕಥಞ್ಚ ಭಗವಾ ರಞ್ಞೋ ಮಾಗಧಸ್ಸ ಅಜಾತಸತ್ತುನೋ ವೇದೇಹಿಪುತ್ತಸ್ಸ ಚೂಳಸೀಲಂ ವಿಭಜಿತ್ವಾ ದೇಸೇಸಿ.

ವಿಸ್ಸಜ್ಜನಾ – ‘‘ಕಥಞ್ಚ ¶ ಮಹಾರಾಜ ಭಿಕ್ಖು ಸೀಲಸಮ್ಪನ್ನೋ ಹೋತಿ. ಇಧ ಮಹಾರಾಜ ಭಿಕ್ಖು ಪಾಣಾತಿಪಾತಂ ಪಹಾಯ ಪಾಣಾತಿಪಾತಾ ಪಟಿವಿರತೋ ಹೋತಿ ನಿಹಿತದಣ್ಡೋ ನಿಹಿತಸತ್ಥೋ ಲಜ್ಜೀ ದಯಾಪನ್ನೋ, ಸಬ್ಬಪಾಣಭೂತಹಿತಾನುಕಮ್ಪೀ ವಿಹರತಿ. ಇದಮ್ಪಿಸ್ಸ ಹೋತಿ ಸೀಲಸ್ಮಿಂ’’ ಏವಮಾದಿನಾ ಭನ್ತೇ ಭಗವಾ ರಞ್ಞೋ ಮಾಗಧಸ್ಸ ಅಜಾತಸತ್ತುಸ್ಸ ವೇದೇಹಿಪುತ್ತಸ್ಸ ಛಬ್ಬೀಸತಿಯಾ ಆಕಾರೇಹಿ ಚೂಳಸೀಲಂ ವಿಭಜಿತ್ವಾ ದೇಸೇಸಿ.

ಸಾಧು ¶ ಸಾಧು ಆವುಸೋ, ಸಾಧು ಸಾಧು ಆವುಸೋ ಯಂ ಭಿಕ್ಖು ಏವಂ ಸ್ವಾಖಾತೇ ಬುದ್ಧಸಾಸನೇ ಸದ್ಧಾಪಬ್ಬಾಜಿತೋ ಇಮಿನಾ ಚ ಚೂಳಸೀಲೇನ ಸಮನ್ನಾಗತೋ ವಿಹರೇಯ್ಯ.

ಸುವೇ ಯಥಾನುಪ್ಪತ್ತಟ್ಠಾನತೋ ಪಟ್ಠಾಯ ಪುಚ್ಛಾವಿಸ್ಸಜ್ಜನಂ ಕರಿಸ್ಸಾಮ.

ಪುಚ್ಛಾ – ಕಥಂ ಪನಾವುಸೋ ರಞ್ಞೋ ಮಾಗಧಸ್ಸ ಅಜಾತಸತ್ತುನೋ ವೇದೇಹಿಪುತ್ತಸ್ಸ ಮಜ್ಝಿಮಸೀಲಞ್ಚ ಮಹಾಸೀಲಞ್ಚ ವಿಭಜಿತ್ವಾ ದೇಸೇಸಿ.

ವಿಸ್ಸಜ್ಜನಾ – ‘‘ಯಥಾ ವಾ ಪನೇಕೇ ಭೋನ್ತೋ ಸಮಣಬ್ರಾಹ್ಮಣಾ ಸದ್ಧಾದೇಯ್ಯಾನಿ ಭೋಜನಾನಿ ಭುಞ್ಜಿತ್ವಾ ತೇ ಏವರೂಪಂ ಬೀಜಗಾಮಭೂತಗಾಮಸಮಾರಮ್ಭಂ ಅನುಯುತ್ತಾ ವಿಹರನ್ತಿ. ಸೇಯ್ಯಥಿದಂ. ಮೂಲಬೀಜಂ ಖನ್ಧಬೀಜಂ ಫಳುಬೀಜಂ ಅಗ್ಗಬೀಜಂ ಬೀಜಬೀಜಮೇವ ಪಞ್ಚಮಂ, ಇತಿ ಏವರೂಪಾ ಬೀಜಗಾಮಭೂತಗಾಮಸಮಾರಮ್ಭಾ ಪಟಿವಿರತೋ ಹೋತಿ. ಇದಮ್ಪಿಸ್ಸ ಹೋತಿ ಸೀಲಸ್ಮಿಂ’’ ಏವಮಾದಿನಾ ಭನ್ತೇ ಭಗವಾ ರಞ್ಞೋ ಮಾಗಧಸ್ಸ ಅಜಾತಸತ್ತುಸ್ಸ ವೇದೇಹಿಪುತ್ತಸ್ಸ ಮಜ್ಝಿಮಸೀಲಞ್ಚ ಮಹಾಸೀಲಞ್ಚ ವಿತ್ಥಾರತೋ ವಿಭಜಿತ್ವಾ ದೇಸೇಸಿ.

ಸಾಧು ¶ ಸಾಧು ಆವುಸೋ, ಸಾಧು ಖೋ ಆವುಸೋ ಯಂ ಭಿಕ್ಖು ಏವಂ ಸ್ವಾಖಾತೇ ಬುದ್ಧಸಾಸನೇ ಸದ್ಧಾಪಬ್ಬಜಿತೋ ಏವಂ ಅರಿಯೇನ ಸೀಲೇನ ಸಮನ್ನಾಗತೋ ವಿಹರೇಯ್ಯ.

ಪುಚ್ಛಾ – ಕಥಂ ಪನಾವುಸೋ ಅರಿಯಂ ಇನ್ದ್ರಿಯಸಂವರಞ್ಚ ಅರಿಯಂ ಸತಿಸಮ್ಪಜಞ್ಞಞ್ಚ ಅರಿಯಂ ಸನ್ತೋಸಞ್ಚ ಭಗವಾ ರಞ್ಞೋ ಮಾಗಧಸ್ಸ ಅಜಾತಸತ್ತುಸ್ಸ ವಿಭಜಿತ್ವಾ ದೇಸೇಸಿ.

ವಿಸ್ಸಜ್ಜನಾ – ಇಧ ಮಹಾರಾಜ ಭಿಕ್ಖು ಚಕ್ಖುನಾ ರೂಪಂ ದಿಸ್ವಾ ನ ನಿಮಿತ್ತಗ್ಗಾಹೀ ಹೋತಿ ನನುಬ್ಯಞ್ಜನಗ್ಗಾಹೀ, ಯತ್ವಾಧಿಕರಣಮೇನಂ ಚಕ್ಖುನ್ದ್ರಿಯಂ ಅಸಂವುತಂ ವಿಹರನ್ತಂ ಅಭಿಜ್ಝಾದೋಮನಸ್ಸಾ ಪಾಪಕಾ ಅಕುಸಲಾ ಧಮ್ಮಾ ಅನ್ವಾಸ್ಸವೇಯ್ಯುಂ, ತಸ್ಸ ಸಂವರಾಯ ಪಟಿಪಜ್ಜತಿ, ರಕ್ಖತಿ ಚಕ್ಖುನ್ದ್ರಿಯಂ, ಚಕ್ಖುನ್ದ್ರಿಯೇ ಸಂವರಂ ಆಪಜ್ಜತಿ, ಏವಮಾದಿನಾ ಚ.

ಇಧ ಮಹಾರಾಜ ಭಿಕ್ಖು ಸತಿಸಮ್ಪಜಞ್ಞೇನ ಸಮನ್ನಾಗತೋ ಹೋತಿ, ಅಭಿಕ್ಕನ್ತೇ ಪಟಿಕ್ಕನ್ತೇ ಸಮ್ಪಜನಕಾರೀ ಹೋತಿ,

ಆಲೋಕಿತೇ ¶ ವಿಲೋಕಿತೇ ಸಮ್ಪಜಾನಕಾರೀ ಹೋತಿ, ಸಮಿಞ್ಜಿತೇ ಪಸಾರಿತೇ ಸಮ್ಪಜಾನಕಾರೀ ಹೋತಿ, ಸಙ್ಘಾಟಿಪತ್ತಚೀವರಧಾರಣೇ ಸಮ್ಪಜಾನಕಾರೀ ಹೋತಿ, ಅಸಿತೇ ಪೀತೇ ಖಾಯಿತೇ ಸಾಯಿತೇ ಸಮ್ಪಜಾನಕಾರೀ ಹೋತಿ, ಉಚ್ಚಾರಪಸ್ಸಾವಕಮ್ಮೇ ಸಮ್ಪಜಾನಕಾರೀ ಹೋತಿ, ಗತೇ ಠಿತೇ ನಿಸಿನ್ನೇ ಸುತ್ತೇ ಜಾಗರಿತೇ ಭಾಸಿತೇ ತುಣ್ಹೀಭಾವೇ ಸಮ್ಪಜಾನಕಾರೀ ಹೋತಿ, ಏವಂ ಖೋ ಮಹಾರಾಜ ಭಿಕ್ಖು ಸತಿಸಮ್ಪಜಞ್ಞೇನ ಸಮನ್ನಾಗತೋ ಹೋತಿ.

ಕಥಞ್ಚ ಮಹಾರಾಜ ಭಿಕ್ಖು ಸನ್ತುಟ್ಠೋ ಹೋತಿ, ಇಧ ಮಹಾರಾಜ ಭಿಕ್ಖು ಸನ್ತುಟ್ಠೋ ಹೋತಿ ಕಾಯಪರಿಹಾರಿಕೇನ ಚೀವರೇನ ಕುಚ್ಛಿಪರಿಹಾರಿಕೇನ ಪಿಣ್ಡಪಾತೇನ.

ಏವಮಾದಿನಾ ಭನ್ತೇ ಭಗವಾ ರಞ್ಞೋ ಮಾಗಧಸ್ಸ ಅಜಾತಸತ್ತುಸ್ಸ ವೇದೇಹಿಪುತ್ತಸ್ಸ ಅರಿಯಞ್ಚ ಇನ್ದ್ರಿಯೇಸುಗುತ್ತದ್ವಾರತಂ ಅರಿಯಞ್ಚ ಸತಿಸಮ್ಪಜಞ್ಞಂ ಅರಿಯಞ್ಚ ಸನ್ತೋಸಂ ವಿಭಜಿತ್ವಾ ದೇಸೇಸಿ.

ಸಾಧು ¶ ಸಾಧು ಆವುಸೋ, ಸಾಧು ಖೋ ಆವುಸೋ ಯಂ ಭಿಕ್ಖು ಏವಂ ಸ್ವಾಖಾತೇ ಬುದ್ಧಸಾಸನೇ ಸದ್ಧಾಪಬ್ಬಜಿತೋ ಇಮಿನಾ ಚ ಅರಿಯೇನ ಇನ್ದ್ರಿಯಸಂವರೇನ ಸಮನ್ನಾಗತೋ, ಇಮಿನಾ ಚ ಅರಿಯೇನ ಸತಿಸಮ್ಪಜಞ್ಞೇನ

ಸಮನ್ನಾಗತೋ ¶ , ಇಮಾಯ ಚ ಅರಿಯಾಯ ಸನ್ತುಟ್ಠಿಯಾ ಸಮನ್ನಾಗತೋ ವಿಹರೇಯ್ಯ.

ಪುಚ್ಛಾ – ಕಥಂ ಪನಾವುಸೋ ಭಗವಾ ರಞ್ಞೋ ಮಾಗಧಸ್ಸ ಅಜಾತಸತ್ತುಸ್ಸ ವೇದೇಹಿಪುತ್ತಸ್ಸ ನೀವರಣಪಹಾನಂ ವಿಭಜಿತ್ವಾ ದೇಸೇಸಿ.

ವಿಸ್ಸಜ್ಜನಾ – ಸೋ ಏವಂ ಅರಿಯೇನ ಸೀಲಕ್ಖನ್ಧೇನ ಸಮನ್ನಾಗತೋ, ಅರಿಯೇನ ಇನ್ದ್ರಿಯಸಂವರೇನ ಸಮನ್ನಾಗತೋ, ಅರಿಯೇನ ಸತಿಸಮ್ಪಜಞ್ಞೇನ ಸಮನ್ನಾಗತೋ, ಅರಿಯಾಯ ಸನ್ತುಟ್ಠಿಯಾ ಸಮನ್ನಾಗತೋ, ವಿವಿತ್ತಂ ಸೇನಾಸನಂ ಭಜತಿ ಅರಞ್ಞಂ ರುಕ್ಖಮೂಲಂ ಪಬ್ಬತಂ ಕನ್ದರಂ ಗಿರಿಗುಹಂ ಸುಸಾನಂ ವನಪತ್ತಂ ಅಬ್ಭೋಕಾಸಂ ಪಲಾಲಪುಞ್ಜಂ. ಸೋ ಪಚ್ಛಾಭತ್ತಂ ಪಿಣ್ಡಪಾತಪಟಿಕ್ಕನ್ತೋ ನಿಸೀದತಿ ಪಲ್ಲಙ್ಕಂ ಆಭುಞ್ಜಿತ್ವಾ ಉಜುಂ ಕಾಯಂ ಪಣಿಧಾಯ ಪರಿಮುಖಂ ಸತಿಂ ಉಪಟ್ಠಪೇತ್ವಾ. ಸೋ ಅಭಿಜ್ಝಂ ಲೋಕೇ ಪಹಾಯ ವಿಗತಾಭಿಜ್ಝೇನ ಚೇತಸಾ ವಿಹರತಿ…ಪೇ… ತಸ್ಸಿಮೇ ಪಞ್ಚ ನೀವರಣೇ ಪಹೀನೇ ಅತ್ತನಿ ಸಮನುಪಸ್ಸತೋ ಪಾಮೋಜ್ಜಂ ಜಾಯತಿ, ಪಮುದಿತಸ್ಸ ಪೀತಿ ಜಾಯತಿ, ಪೀತಿಮನಸ್ಸ ಕಾಯೋ ಪಸ್ಸಮ್ಭತಿ, ಪಸ್ಸದ್ಧಕಾಯೋ ¶ ಸುಖಂ ವೇದೇಹಿ, ಸುಖಿನೋ ಚಿತ್ತಂ ಸಮಾಧಿಯತಿ. ಏವಂ ಖೋ ಭನ್ತೇ ಭಗವಾ ರಞ್ಞೋ ಮಾಗಧಸ್ಸ ಅಜಾತಸತ್ತುಸ್ಸ ವೇದೇಹಿಪುತ್ತಸ್ಸ ನೀವರಣಪ್ಪಹಾನಂ ವಿಭಜಿತ್ವಾ ವಿತ್ಥಾರತೋ ದೇಸೇಸಿ.

ಸಾಧು ¶ ಸಾಧು ಆವುಸೋ, ಸಾಧು ಖೋ ಆವುಸೋ ಯಂ ಭಿಕ್ಖು ಏವಂ ಸ್ವಾಖಾತೇ ಬುದ್ಧಸಾಸನೇ ಸದ್ಧಾಪಬ್ಬಜಿತೋ ಏವಂ ಪಞ್ಚನೀವರಣೇ ಪಜಹಿತ್ವಾ ತೇಹಿ ಚಿತ್ತಂ ವಿಸೋಧೇತ್ವಾ ವಿಹರೇಯ್ಯ.

ಪುಚ್ಛಾ – ಕಥಞ್ಚಾವುಸೋ ¶ ಭಗವಾ ರಞ್ಞೋ ಮಾಗಧಸ್ಸ ಅಜಾತಸತ್ತುಸ್ಸ ವೇದೇಹಿಪುತ್ತಸ್ಸ ಪಠಮಂ ಸನ್ದಿಟ್ಠಿಕಂ ಸಾಮಞ್ಞಫಲಂ ದೇಸೇಸಿ, ಪುರಿಮೇಹಿ ಸನ್ದಿಟ್ಠಿಕೇಹಿ ಸಾಮಞ್ಞಫಲೇಹಿ ಅಭಿಕ್ಕನ್ತತರಞ್ಚ ಪಣೀತತರಞ್ಚ.

ವಿಸ್ಸಜ್ಜನಾ – ಸೋ ವಿವಿಚ್ಚೇವ ಕಾಮೇಹಿ ವಿವಿಚ್ಚ ಅಕುಸಲೇಹಿ ಧಮ್ಮೇಹಿ ಸವಿತಕ್ಕಂ ಸವಿಚಾರಂ ವಿವೇಕಜಂ ಪೀತಿಸುಖಂ ಪಠಮಂ ಝಾನಂ ಉಪಸಮ್ಪಜ್ಜ ವಿಹರತಿ…ಪೇ… ಇದಮ್ಪಿ ಖೋ ಮಹಾರಾಜ ಸನ್ದಿಟ್ಠಿಕಂ ಸಾಮಞ್ಞಫಲಂ ಪುರಿಮೇಹಿ ಸನ್ದಿಟ್ಠಿಕೇಹಿ ಸಾಮಞ್ಞಫಲೇಹಿ ಅಭಿಕ್ಕನ್ತತರಞ್ಚ

ಪಣೀತತರಞ್ಚ ¶ . ಏವಂ ಖೋ ಭನ್ತೇ ಭಗವಾ ರಞ್ಞೋ ಮಾಗಧಸ್ಸ ಅಜಾತಸತ್ತುಸ್ಸ ವೇದೇಹಿಪುತ್ತಸ್ಸ ಪಠಮಂ ಸನ್ದಿಟ್ಠಿಕಂ ಸಾಮಞ್ಞಫಲಂ ಪುರಿಮೇಹಿ ಸನ್ದಿಟ್ಠಿಕೇಹಿ ಸಾಮಞ್ಞಫಲೇಹಿ ಅಭಿಕ್ಕನ್ತತರಞ್ಚ ಪಣೀತತರಞ್ಚ ದೇಸೇಸಿ.

ಸಾಧು ¶ ಸಾಧು ಆವುಸೋ, ಸಾಧು ಖೋ ಆವುಸೋ ಯಂ ಭಿಕ್ಖು ಏವಂ ಸ್ವಾಖಾತೇ ಬುದ್ಧಸಾಸನಸಙ್ಖಾತೇ ಧಮ್ಮವಿನಯೇ ಪಬ್ಬಜಿತ್ವಾ ಏವಂ ಪಠಮಂ ಝಾನಂ

ಉಪಸಮ್ಪಜ್ಜ ¶ ವಿವೇಕಜೇನ ಪೀತಿಸುಖೇನ ಅತ್ತನೋ ಕಾಯಂ ಅಭಿಸನ್ದೇಯ್ಯ ಪರಿಸನ್ದೇಯ್ಯ ಪರಿಪೂರೇಯ್ಯ.

ಪುಚ್ಛಾ – ಕಥಞ್ಚಾವುಸೋ ¶ ಭಗವಾ ದುತಿಯಞ್ಚ ತತಿಯಞ್ಚ ಚತುತ್ಥಞ್ಚ ಸನ್ದಿಟ್ಠಿಕಂ ಸಾಮಞ್ಞಫಲಂ ದೇಸೇಸಿ, ಪುರಿಮೇಹಿ ಸನ್ದಿಟ್ಠಿಕೇಹಿ ಸಾಮಞ್ಞಫಲೇಹಿ ಅಭಿಕ್ಕನ್ತತರಞ್ಚ ಪಣೀತತರಞ್ಚ.

ವಿಸ್ಸಜ್ಜನಾ – ಪುನ ಚ ಪರಂ ಮಹಾರಾಜ ಭಿಕ್ಖು ವಿತಕ್ಕವಿಚಾರಾನಂ ವೂಪಸಮಾ ಅಜ್ಝತ್ತಂ ಸಮ್ಪಸಾದನಂ ಚೇತಸೋ ಏಕೋದಿಭಾವಂ ಅವಿತಕ್ಕಂ ಅವಿಚಾರಂ ಸಮಾಧಿಜಂ ಪೀತಿಸುಖಂ ದುತಿಯಂಝಾನಂ ಉಪಸಮ್ಪಜ್ಜ ವಿಹರತಿ ಏವಮಾದಿನಾ ಭನ್ತೇ ಭಗವಾ ರಞ್ಞೋ ಮಾಗಧಸ್ಸ ಅಜಾತಸತ್ತುಸ್ಸ ವೇದೇಹಿಪುತ್ತಸ್ಸ ದುತಿಯಞ್ಚ ತತಿಯಞ್ಚ ಚತುತ್ಥಞ್ಚ ಸನ್ದಿಟ್ಠಿಕಂ ಸಾಮಞ್ಞಫಲಂ ಪುರಿಮೇಹಿ ಸನ್ದಿಟ್ಠಿಕೇಹಿ ಸಾಮಞ್ಞಫಲೇಹಿ ಅಭಿಕ್ಕನ್ತತರಞ್ಚ ಪಣೀತತರಞ್ಚ ದೇಸೇಸಿ.

ಸಾಧು ¶ ಸಾಧು ಆವುಸೋ, ಸಾಧು ಖೋ ಆವುಸೋ ಯಂ ಭಿಕ್ಖು ಏವಂ ಸ್ವಾಖಾತೇ ಬುದ್ಧಸಾಸನಸಙ್ಖಾತೇ ಧಮ್ಮವಿನಯೇ ಸದ್ಧಾಪಬ್ಬಜಿತೋ ಏವಂ ದುತಿಯಝಾನಞ್ಚ ತತಿಯಝಾನಞ್ಚ ಚತುತ್ಥಝಾನಞ್ಚ ಉಪಸಮ್ಪಜ್ಜ ತೇಹಿ ಝಾನಸುಖೇಹಿ ಅತ್ತನೋ ಕಾಯಂ ಅಭಿಸನ್ದೇತ್ವಾ ಪರಿಸನ್ದೇತ್ವಾ ಪರಿಪೂರೇತ್ವಾ ವಿಹರೇಯ್ಯ.

ಪುಚ್ಛಾ – ಕಥಞ್ಚ ¶ ಪನಾವುಸೋ ಭಗವಾ ರಞ್ಞೋ ಮಾಗಧಸ್ಸ ಅಜಾತಸತ್ತುಸ್ಸ ವೇದೇಹಿಪುತ್ತಸ್ಸ ಅಪರಮ್ಪಿ ಸನ್ದಿಟ್ಠಿಕಂ ಸಾಮಞ್ಞಫಲಂ ದೇಸೇಸಿ, ಪುರಿಮೇಹಿ ಸನ್ದಿಟ್ಠಿಕೇಹಿ ಸಾಮಞ್ಞಫಲೇಹಿ ಅಭಿಕ್ಕನ್ತತರಞ್ಚ ಪಣೀತತರಞ್ಚ.

ವಿಸ್ಸಜ್ಜನಾ – ಸೋ ಏವಂ ಸಮಾಹಿತೇ ಚಿತ್ತೇ ಪರಿಸುದ್ಧೇ ಪರಿಯೋದಾತೇ ಅನಙ್ಗಣೇ ವಿಗತೂಪಕ್ಕಿಲೇಸೇ ಮುದುಭೂತೇ ಕಮ್ಮನಿಯೇ ಠಿತೇ ಆನಞ್ಜಪ್ಪತ್ತೇ ಞಾಣದಸ್ಸನಾಯ ಚಿತ್ತಂ ಅಭಿನೀಹರತಿ ಅಭಿನಿನ್ನಾಮೇತಿ, ಸೋ ಏವಂ ಪಜಾನಾತಿ ‘‘ಅಯಂ ಖೋ ಮೇ ಕಾಯೋ ರೂಪೀ ಚಾತುಮಹಾಭೂತಿಕೋ ಮಾತಾಪೇತ್ತಿಕಸಮ್ಭವೋ ಓದನಕುಮ್ಮಾಸೂಪಚಯೋ ಅನಿಚ್ಚುಚ್ಛಾದನಪರಿಮದ್ದನಭೇದನವಿದ್ಧಂಸನಧಮ್ಮೋ, ಇದಞ್ಚ ಪನ ಮೇ ವಿಞ್ಞಾಣಂ ಏತ್ಥ ಸಿತಂ ಏತ್ಥ ಪಟಿಬನ್ಧನ್ತಿ…ಪೇ… ಇದಮ್ಪಿ ಖೋ ಮಹಾರಾಜ ಸನ್ದಿಟ್ಠಿಕಂ ಸಾಮಞ್ಞಫಲಂ ಪುರಿಮೇಹಿ ಸನ್ದಿಟ್ಠಿಕೇಹಿ ಸಾಮಞ್ಞಫಲೇಹಿ ಅಭಿಕ್ಕನ್ತತರಞ್ಚ ಪಣೀತತರಞ್ಚ. ಏವಂ ಖೋ ಭನ್ತೇ ಭಗವಾ ರಞ್ಞೋ ಮಾಗಧಸ್ಸ ಅಜಾತಸತ್ತುಸ್ಸ ವೇದೇಹಿಪುತ್ತಸ್ಸ ಅಪರಮ್ಪಿ ಸನ್ದಿಟ್ಠಿಕಂ ಸಾಮಞ್ಞಫಲಂ ಪುರಿಮೇಹಿ ಸನ್ದಿಟ್ಠಿಕೇಹಿ ಸಾಮಞ್ಞಫಲೇಹಿ ಅಭಿಕ್ಕನ್ತತರಞ್ಚ ಪಣೀತತರಞ್ಚ ದೇಸೇಸಿ.

ಸುಞ್ಞಾರಂಗಾ ¶ ಪವಿಟ್ಠಸ್ಸ, ಸನ್ತಚಿತ್ತಸ್ಸ ಭಿಕ್ಖುನೋ. ಅಮಾನುಸೀ ರತೀ ಹೋತಿ, ಸಮ್ಮಾಧಮ್ಮಂ ವಿಪಸ್ಸತೋ.

ಸಾಧು ¶ ಸಾಧು ಆವುಸೋ, ಸಾಧು ಖೋ ಆವುಸೋ ಯಂ ಭಿಕ್ಖು ಏವಂ ಸ್ವಾಖಾತೇ ಬುದ್ಧಸಾಸನಸಙ್ಖಾತೇ ಧಮ್ಮವಿನಯೇ ಸದ್ಧಾಪಬ್ಬಜಿತೋ ಏವಂ ಞಾಣದಸ್ಸನಂ ಉಪ್ಪಾದೇತ್ವಾ ಏವಂ ಞಾಣದಸ್ಸನೇನ ಸಮನ್ನಾಗತೋ ಹುತ್ವಾ ವಿಹರೇಯ್ಯ.

ಪುಚ್ಛಾ – ಕಥಞ್ಚಾವುಸೋ ¶ ಭಗವಾ ಅಪರಮ್ಪಿ ಸನ್ದಿಟ್ಠಿಕಂ ಸಾಮಞ್ಞಫಲಂ ದೇಸೇಸಿ, ಪುರಿಮೇಹಿ ಸನ್ದಿಟ್ಠಿಕೇಹಿ ಸಾಮಞ್ಞಫಲೇಹಿ ಅಭಿಕ್ಕನ್ತತರಞ್ಚ ಪಣೀತತರಞ್ಚ.

ವಿಸ್ಸಜ್ಜನಾ – ಸೋ ಏವಂ ಸಮಾಹಿತೇ ಚಿತ್ತೇ ಪರಿಸುದ್ಧೇ ಪರಿಯೋದಾತೇ ಅನಙ್ಗಣೇ ವಿಗತೂಪಕ್ಕಿಲೇಸೇ ಮುದುಭೂತೇ ಕಮ್ಮನಿಯೇ ಠಿತೇ ಆನಞ್ಜಪ್ಪತ್ತೇ ಮನೋಮಯಂ ಕಾಯಂ ಅಭಿನಿಮ್ಮಾನಾಯ ಚಿತ್ತಂ ಅಭಿನೀಹರತಿ ಅಭಿನಿನ್ನಾಮೇತಿ, ಸೋ ಇಮಮ್ಹಾ ಕಾಯಾ ಅಞ್ಞಂ ಕಾಯಂ ಅಭಿನಿಮ್ಮಿನಾತಿ ರೂಪಿಂ ಮನೋಮಯಂ ಸಬ್ಬಙ್ಗಪಚ್ಚಙ್ಗಿಂ ಅಹೀನಿನ್ದ್ರಿಯಂ ಏವಮಾದಿನಾ ಭನ್ತೇ ಭಗವಾ ರಞ್ಞೋ ಮಾಗಧಸ್ಸ ಅಜಾತಸತ್ತುಸ್ಸ ವೇದೇಹಿಪುತ್ತಸ್ಸ ಅಪರಮ್ಪಿ ಸನ್ದಿಟ್ಠಿಕಂ ಸಾಮಞ್ಞಫಲಂ ಪುರಿಮೇಹಿ ಸನ್ದಿಟ್ಠಿಕೇಹಿ ಸಾಮಞ್ಞಫಲೇಹಿ ಅಭಿಕ್ಕನ್ತತರಞ್ಚ ಪಣೀತತರಞ್ಚ ದೇಸೇಸಿ.

ಸಾಧು ¶ ಸಾಧು ಆವುಸೋ, ಸಾಧು ಖೋ ಆವುಸೋ ಯಂ ಭಿಕ್ಖು ಏವಂ ಸ್ವಾಖಾತೇ ಬುದ್ಧಸಾಸನಸಙ್ಖಾತೇ ಧಮ್ಮವಿನಯೇ ಸದ್ಧಾಪಬ್ಬಜಿತೋ ಏವಂ ವಿಸೇಸೇನ ಮನೋಮಯಞಾಣೇನ ಸಮನ್ನಾಗತೋ ವಿಹರೇಯ್ಯ.

ಪುಚ್ಛಾ – ಭಗವಾ ¶ ಆವುಸೋ ರಞ್ಞೋ ಮಾಗಧಸ್ಸ ಅಜಾತಸತ್ತುಸ್ಸ ವೇದೇಹಿಪುತ್ತಸ್ಸ ಝಾನಚತುಕ್ಕಸಙ್ಖಾತಞ್ಚ ಪಠಮ ದುತಿಯ ವಿಜ್ಜಾಸಙ್ಖಾತಞ್ಚ ಸನ್ದಿಟ್ಠಿಕಂ ಸಾಮಞ್ಞಫಲಂ ದಸ್ಸೇತ್ವಾ, ಅಪರಂ ಕೀದಿಸಂ ಸಂನ್ದಿಟ್ಠಿಕಂ ಸಾಮಞ್ಞಫಲಂ ದೇಸೇಸಿ, ಪುರಿಮೇಹಿ ಸನ್ದಿಟ್ಠಿಕೇಹಿ ಸಾಮಞ್ಞಫಲೇಹಿ ಅಭಿಕ್ಕನ್ತತರಞ್ಚ ಪಣೀತತರಞ್ಚ.

ವಿಸ್ಸಜ್ಜನಾ – ಸೋ ಏವಂ ಸಮಾಹಿತೇ ಚಿತ್ತೇ ಪರಿಸುದ್ಧೇ ಪರಿಯೋದಾತೇ ಅನಙ್ಗಣೇ ವಿಗತೂಪಕ್ಕಿಲೇಸೇ ಮುದುಭೂತೇ ಕಮ್ಮನಿಯೇ ಠಿತೇ ಆನಞ್ಜಪ್ಪತ್ತೇ ಇದ್ಧಿವಿಧಾಯ ಚಿತ್ತಂ ಅಭಿನೀಹರತಿ ಅಭಿನಿನ್ನಾಮೇತಿ, ಸೋ ಅನೇಕವಿಹಿತಂ ಇದ್ಧಿವಿಧಂ ಪಚ್ಚನುಭೋತಿ, ಏಕೋಪಿ ಹುತ್ವಾ ಬಹುಧಾ ಹೋತಿ, ಬಹುಧಾಪಿ ಹುತ್ವಾ ಏಕೋ ಹೋತಿ…ಪೇ… ಇದಮ್ಪಿ ಖೋ ಮಹಾರಾಜ ಸನ್ದಿಟ್ಠಿಕಂ ಸಾಮಞ್ಞಫಲಂ ಪುರಿಮೇಹಿ ಸನ್ದಿಟ್ಠಿಕೇಹಿ ಸಾಮಞ್ಞಫಲೇಹಿ ಅಭಿಕ್ಕನ್ತತರಞ್ಚ ಪಣೀತತರಞ್ಚಾತಿ. ಇತ್ಥಂ ಖೋ ಭನ್ತೇ ಭಗವಾ ರಞ್ಞೋ ಮಾಗಧಸ್ಸ ಅಜಾತಸತ್ತುಸ್ಸ ವೇದೇಹಿಪುತ್ತಸ್ಸ ಅಪರಮ್ಪಿ ಸನ್ದಿಟ್ಠಿಕಂ ಸಾಮಞ್ಞಫಲಂ ಪುರಿಮೇಹಿ ಸನ್ದಿಟ್ಠಿಕೇಹಿ ಸಾಮಞ್ಞಫಲೇಹಿ ಅಭಿಕ್ಕನ್ತತರಞ್ಚ ಪಣೀತತರಞ್ಚ ದೇಸೇಸಿ.

ಅಚ್ಛರಿಯಂ ¶ ಆವುಸೋ ಅಬ್ಭುತಂ ಆವುಸೋ, ಯಾವ ಬುದ್ಧಸಾಸನಸ್ಸ ಸ್ವಾಖಾತತಾ, ಯತ್ರಹಿ ನಾಮ ಏವಂ ಸ್ವಾಖಾತೇ ಬುದ್ಧಸಾಸನೇ ಪಬ್ಬಜಿತ್ವಾ ಸಾವಕೋಪಿ ಸಮ್ಮಾಪಟಿಪನ್ನೋ ಏವಂ ಮಹಿದ್ಧಿಕಂ ಏವಂ ಮಹಾನುಭಾವಂ ಇದ್ಧಿವಿಧಞಾಣಮ್ಪಿ ಪಚ್ಚನುಭೋಸ್ಸತಿ.

ಪುಚ್ಛಾ – ಕಥಂ ¶ ಪನಾವುಸೋ ಭಗವಾ ಅಪರಮ್ಪಿ ಸನ್ದಿಟ್ಠಿಕಂ ಸಾಮಞ್ಞಫಲಂ ದೇಸೇಸಿ, ಪುರಿಮೇಹಿ ಸನ್ದಿಟ್ಠಿಕೇಹಿ ಸಾಮಞ್ಞಫಲೇಹಿ ಅಭಿಕ್ಕನ್ತತರಞ್ಚ ಪಣೀತತರಞ್ಚ.

ವಿಸ್ಸಜ್ಜನಾ – ಸೋ ಏವಂ ಸಮಾಹಿತೇ ಚಿತ್ತೇ ಪರಿಸುದ್ಧೇ ಪರಿಯೋದಾತೇ ಅನಙ್ಗಣೇ ವಿಗತೂಪಕ್ಕಿಲೇಸೇ ಮುದುಭೂತೇ ಕಮ್ಮನಿಯೇ ಠಿತೇ ಆನಞ್ಜಪ್ಪತ್ತೇ ದಿಬ್ಬಾಯ ಸೋತಧಾತುಯಾ ಚಿತ್ತಂ ಅಭಿನೀಹರತಿ ಅಭಿನಿನ್ನಾಮೇತಿ, ಸೋ ದಿಬ್ಬಾಯ ಸೋತಧಾತುಯಾ ವಿಸುದ್ಧಾಯ ಅತಿಕ್ಕನ್ತ ಮಾನುಸಿಕಾಯ ಉಭೋ ಸದ್ದೇ ಸುಣಾತಿ ದಿಬ್ಬೇ ಚ ಮಾನುಸೇ ಚ ಯೇ ದೂರೇ ಸನ್ತಿಕೇ ಚ…ಪೇ… ಇದಮ್ಪಿ ಖೋ ಮಹಾರಾಜ ಸನ್ದಿಟ್ಠಿಕಂ ಸಾಮಞ್ಞಫಲಂ ಪುರಿಮೇಹಿ ಸನ್ದಿಟ್ಠಿಕೇಹಿ ಸಾಮಞ್ಞಫಲೇಹಿ ಅಭಿಕ್ಕನ್ತತರಞ್ಚ ಪಣೀತತರಞ್ಚ. ಏವಂ ಖೋ ಭನ್ತೇ ಭಗವಾ ರಞ್ಞೋ ಮಾಗಧಸ್ಸ ಅಜಾತಸತ್ತುಸ್ಸ ವೇದೇಹಿಪುತ್ತಸ್ಸ ಅಪರಮ್ಪಿ ಸನ್ದಿಟ್ಠಿಕಂ ಸಾಮಞ್ಞಫಲಂ ಪುರಿಮೇಹಿ ಸನ್ದಿಟ್ಠಿಕೇಹಿ ಸಾಮಞ್ಞಫಲೇಹಿ ಅಭಿಕ್ಕನ್ತತರಞ್ಚ ಪಣೀತತರಞ್ಚ ದೇಸೇಸಿ.

ಅಚ್ಛರಿಯಂ ¶ ಆವುಸೋ, ಅಬ್ಭುತಂ ಆವುಸೋ, ಯಾವ ಬುದ್ಧಸಾಸನಸ್ಸ ಸ್ವಾಖಾತತಾ, ಯತ್ರಹಿ ನಾಮ ಏವಂ ಸ್ವಾಖಾತೇ ಬುದ್ಧಸಾಸನೇ ಸದ್ಧಾಪಬ್ಬಜಿತೋ ಸಮ್ಮಾಪಟಿಪನ್ನೋ ಸಾವಕೋಪಿ ಏವಂ ವಿಸೇಸಂ ದಿಬ್ಬಸೋತಞಾಣಂ ಪಟಿಲಭಿಸ್ಸತಿ.

ಪುಚ್ಛಾ – ಕಥಂ ಪನಾವುಸೋ ಭಗವಾ ಅಪರಮ್ಪಿ ಸನ್ದಿಟ್ಠಿಕಂ ಸಾಮಞ್ಞಫಲಂ ದೇಸೇಸಿ, ಪುರಿಮೇಹಿ ಸನ್ದಿಟ್ಠಿಕೇಹಿ ಸಾಮಞ್ಞಫಲೇಹಿ ಅಭಿಕ್ಕನ್ತತರಞ್ಚ ಪಣೀತತರಞ್ಚ.

ವಿಸ್ಸಜ್ಜನಾ – ಸೋ ಏವಂ ಸಮಾಹಿತೇ ಚಿತ್ತೇ ಪರಿಸುದ್ಧೇ ಪರಿಯೋದಾತೇ. ಅನಙ್ಗಣೇ ವಿಗತೂಪಕ್ಕಿಲೇಸೇ ಮುದುಭೂತೇ ಕಮ್ಮನಿಯೇ ಠಿತೇ

ಆನಞ್ಜಪ್ಪತ್ತೇ ¶ ಚೇತೋಪರಿಯಞಾಣಾಯ ಚಿತ್ತಂ ಅಭಿನೀಹರತಿ ಅಭಿನಿನ್ನಾಮೇತಿ, ಸೋ ಪರಸತ್ತಾನಂ ಪರಪುಗ್ಗಲಾನಂ ಚೇತಸಾ ಚೇತೋ ಪರಿಚ್ಚ ಪಜಾನಾತಿ, ಸರಾಗಂ ವಾ ಚಿತ್ತಂ ಸರಾಗಂ ಚಿತ್ತನ್ತಿ ಪಜಾನಾತಿ, ವೀತರಾಗಂ ವಾ ಚಿತ್ತಂ ವೀತರಾಗಂ ಚಿತ್ತನ್ತಿ ಪಜಾನಾತಿ…ಪೇ… ಇದಮ್ಪಿ ಖೋ ಮಹಾರಾಜ ಸನ್ದಿಟ್ಠಿಕಂ ಸಾಮಞ್ಞಫಲಂ ಪುರಿಮೇಹಿ ಸನ್ದಿಟ್ಠಿಕೇಹಿ ಸಾಮಞ್ಞಫಲೇಹಿ ಅಭಿಕ್ಕನ್ತತರಞ್ಚ ಪಣೀತತರಞ್ಚ. ಏವಂ ಖೋ ಭನ್ತೇ ಭಗವಾ ರಞ್ಞೋ ಮಾಗಧಸ್ಸ ಅಜಾತಸತ್ತುಸ್ಸ ವೇದೇಹಿಪುತ್ತಸ್ಸ ಅಪರಮ್ಪಿ ಸನ್ದಿಟ್ಠಿಕಂ ಸಾಮಞ್ಞಫಲಂ ಪುರಿಮೇಹಿ ಸನ್ದಿಟ್ಠಿಕೇಹಿ ಸಾಮಞ್ಞಫಲೇಹಿ ಅಭಿಕ್ಕನ್ತತರಞ್ಚ ಪಣೀತತರಞ್ಚ ದೇಸೇಸಿ.

ಅಚ್ಛರಿಯಂ ¶ ಆವುಸೋ, ಅಬ್ಭುತಂ ಆವುಸೋ, ಯಾವ ಬುದ್ಧಸಾಸನಸ್ಸ ಸ್ವಾಖಾತತಾ, ಯತ್ರಹಿ ನಾಮ ಏವಂ ಸ್ವಾಖಾತೇ ಬುದ್ಧಸಾಸನೇ ಪಬ್ಬಜಿತೋ ಸಮ್ಮಾಪಟಿಪನ್ನೋ ಸಾವಕೋಪಿ ಏವಂ ವಿಸೇಸಂ ಚೇತೋಪರಿಯಞಾಣಂ ಪಟಿಲಭಿಸ್ಸತಿ.

ವಿಸ್ಸಜ್ಜನಾ – ಸೋ ಏವಂ ಸಮಾಹಿತೇ ಚಿತ್ತೇ ಪರಿಸುದ್ಧೇ ಪರಿಯೋದಾತೇ ಅನಙ್ಗಣೇ ವಿಗತೂಪಕ್ಕಿಲೇಸೇ ಮುದುಭೂತೇ ಕಮ್ಮನಿಯೇ ಠಿತೇ ಆನಞ್ಜಪ್ಪತ್ತೇ ಪುಬ್ಬೇನಿವಾಸಾನುಸ್ಸತಿಞಾಣಾಯ ಚಿತ್ತಂ ಅಭಿನೀಹರತಿ ಅಭಿನಿನ್ನಾಮೇತಿ, ಸೋ ಅನೇಕವಿಹಿತಂ ಪುಬ್ಬೇನಿವಾಸಂ ಅನುಸ್ಸರತಿ, ಸೇಯ್ಯಥಿದಂ, ಏಕಮ್ಪಿಜಾತಿಂ ದ್ವೇಪಿ ಜಾತಿಯೋ…ಪೇ… ಇದಮ್ಪಿ ಖೋ ಮಹಾರಾಜ ಸನ್ದಿಟ್ಠಿಕಂ ಸಾಮಞ್ಞಫಲಂ ಪುರಿಮೇಹಿ ಸನ್ದಿಟ್ಠಿಕೇಹಿ ಸಾಮಞ್ಞಫಲೇಹಿ ಅಭಿಕ್ಕನ್ತತರಞ್ಚ ಪಣೀತತರಞ್ಚ. ಏವಂ ಖೋ ಭನ್ತೇ ಭಗವಾ ರಞ್ಞೋ ಮಾಗಧಸ್ಸ ಅಜಾತಸತ್ತುಸ್ಸ ವೇದೇಹಿಪುತ್ತಸ್ಸ ಅಪರಮ್ಪಿ ಸನ್ದಿಟ್ಠಿಕಂ ಸಾಮಞ್ಞಫಲಂ ಪುರಿಮೇಹಿ ಸನ್ದಿಟ್ಠಿಕೇಹಿ ಸಾಮಞ್ಞಫಲೇಹಿ ಅಭಿಕ್ಕನ್ತತರಞ್ಚ ಪಣೀತತರಞ್ಚ ದೇಸೇಸಿ.

ಅಚ್ಛರಿಯಂ ¶ ಆವುಸೋ, ಅಬ್ಭುತಂ ಆವುಸೋ, ಯಾವ ಬುದ್ಧಸಾಸನಸ್ಸ ಸ್ವಾಖಾತತಾ, ಯತ್ರಹಿ ನಾಮ ಏವಂ ಸ್ವಾಖಾತೇ ಬುದ್ಧಸಾಸನೇ ಪಬ್ಬಜಿತ್ವಾ ಸಾವಕೋಪಿ ಸಮ್ಮಾಪಟಿಪನ್ನೋ ಏವಂ ವಿಸೇಸಂ ಪುಬ್ಬೇನಿವಾಸಞಾಣಂ ಪಟಿಲಭಿಸ್ಸತಿ.

ಪುಚ್ಛಾ – ಕಥಞ್ಚ ಪನಾವುಸೋ ಭಗವಾ ಸನ್ದಿಟ್ಠಿಕಂ ಸಾಮಞ್ಞಫಲಂ ದೇಸೇಸಿ, ಪುರಿಮೇಹಿ ಸನ್ದಿಟ್ಠಿಕೇಹಿ ಸಾಮಞ್ಞಫಲೇಹಿ ಅಭಿಕ್ಕನ್ತತರಞ್ಚ ಪಣೀತತರಞ್ಚ.

ವಿಸ್ಸಜ್ಜನಾ – ಸೋ ಏವಂ ಸಮಾಹಿತೇ ಚಿತ್ತೇ ಪರಿಸುದ್ಧೇ ಪರಿಯೋದಾತೇ ಅನಙ್ಗಣೇ ವಿಗತೂಪಕ್ಕಿಲೇಸೇ ಮುದುಭೂತೇ ಕಮ್ಮನಿಯೇ ಠಿತೇ ಆನೇಞ್ಜಪ್ಪತ್ತೇ ಸತ್ತಾನಂ ಚುತೂಪಪಾತಞಾಣಾಯ ಚಿತ್ತಂ ಅಭಿನೀಹರತಿ ¶ ಅಭಿನಿನ್ನಾಮೇತಿ, ಸೋ ದಿಬ್ಬೇನ ಚಕ್ಖುನಾ ವಿಸುದ್ಧೇನ ಅತಿಕ್ಕನ್ತಮಾನುಸಕೇನ ಸತ್ತೇ ಪಸ್ಸತಿ ಚವಮಾನೇ ಉಪಪಜ್ಜಮಾನೇ ಹೀನೇ ಪಣೀತೇ ಸುವಣ್ಣೇ ದುಬ್ಬಣ್ಣೇ ಸುಗತೇ ದುಗ್ಗತೇ ಯಥಾಕಮ್ಮುಪಗೇ ಸತ್ತೇ ಪಜಾನಾತಿ…ಪೇ… ಇದಮ್ಪಿ ಖೋ ಮಹಾರಾಜ ಸನ್ದಿಟ್ಠಿಕಂ ಸಾಮಞ್ಞಫಲಂ ಪುರಿಮೇಹಿ ಸನ್ದಿಟ್ಠಿಕೇಹಿ ಸಾಮಞ್ಞಫಲೇಹಿ ಅಭಿಕ್ಕನ್ತತರಞ್ಚ ಪಣೀತತರಞ್ಚ. ಇತ್ಥಂ ಖೋ ಭನ್ತೇ ಭಗವಾ ರಞ್ಞೋ ಮಾಗಧಸ್ಸ ಅಜಾತಸತ್ತುಸ್ಸ ವೇದೇಹಿಪುತ್ತಸ್ಸ ಅಪರಮ್ಪಿ ಸನ್ದಿಟ್ಠಿಕಂ ಸಾಮಞ್ಞಫಲಂ ಪುರಿಮೇಹಿ ಸನ್ದಿಟ್ಠಿಕೇಹಿ ಸಾಮಞ್ಞಫಲೇಹಿ ಅಭಿಕ್ಕನ್ತತರಞ್ಚ ಪಣೀತತರಞ್ಚ ದೇಸೇಸಿ.

ಅಚ್ಛರಿಯಂ ¶ ಆವುಸೋ, ಅಬ್ಭುತಂ ಆವುಸೋ, ಯಾವ ಬುದ್ಧಸಾಸನಸ್ಸ ಸ್ವಾಖಾತತಾ, ಯತ್ರಹಿ ನಾಮ ಏವಂ ಸ್ವಾಖಾತೇ ಬುದ್ಧಸಾಸನೇ ಪಬ್ಬಜಿತೋ ಸಾವಕೋಪಿ ಸಮ್ಮಾಪಟಿಪನ್ನೋ ಏವಂ ವಿಸೇಸಂ ದಿಬ್ಬಚಕ್ಖುಞಾಣಂ ಪಟಿಲಭಿಸ್ಸತಿ.

ಪುಚ್ಛಾ – ಕಥಂ ¶ ಪನಾವುಸೋ ಭಗವಾ ಪರಿಯೋಸಾನೇ ಉತ್ತರಿತರಂ ಸಾಮಞ್ಞಫಲಂ ದೇಸೇಸಿ.

ವಿಸ್ಸಜ್ಜನಾ – ಸೋ ಏವಂ ಸಮಾಹಿತೇ ಚಿತ್ತೇ ಪರಿಸುದ್ಧೇ ಪರಿಯೋದಾತೇ ಅನಙ್ಗಣೇ ವಿಗತೂಪಕ್ಕಿಲೇಸೇ ಮುದುಭೂತೇ ಕಮ್ಮನಿಯೇ ಠಿತೇ ಆನೇಞ್ಜಪ್ಪತ್ತೇ ಆಸವಾನಂ ಖಯಞಾಣಾಯ ಚಿತ್ತಂ ಅಭಿನೀಹರತಿ ಅಭಿನಿನ್ನಾಮೇತಿ…ಪೇ… ಇದಂ ಖೋ ಮಹಾರಾಜ ಸನ್ದಿಟ್ಠಿಕಂ ಸಾಮಞ್ಞಫಲಂ ಪುರಿಮೇಹಿ ಸನ್ದಿಟ್ಠಿಕೇಹಿ ಸಾಮಞ್ಞಫಲೇಹಿ ಅಭಿಕ್ಕನ್ತತರಞ್ಚ ಪಣೀತತರಞ್ಚ. ಇಮಸ್ಮಾ ಚ ಪನ ಮಹಾರಾಜ ಸನ್ದಿಟ್ಠಿಕಾ ಸಾಮಞ್ಞಫಲಾ ಅಞ್ಞಂ ಸನ್ದಿಟ್ಠಿಕಂ ಸಾಮಞ್ಞಫಲಂ ಉತ್ತರಿತರಂ ವಾ ಪಣೀತತರಂ ವಾ ನತ್ಥೀತಿ. ಇತ್ಥಂ ಖೋ ಭನ್ತೇ ಭಗವಾ ರಞ್ಞೋ ಮಾಗಧಸ್ಸ ಅಜಾತಸತ್ತುಸ್ಸ ವೇದೇಹಿಪುತ್ತಸ್ಸ ಪರಿಯೋಸಾನಂ ಸನ್ದಿಟ್ಠಿಕಂ ಸಾಮಞ್ಞಫಲಂ ಪುರಿಮೇಹಿ ಸನ್ದಿಟ್ಠಿಕೇಹಿ ಸಾಮಞ್ಞಫಲೇಹಿ ಅಭಿಕ್ಕನ್ತತರಞ್ಚ ಪಣೀತತರಞ್ಚ ದೇಸೇಸಿ.

ಸಾಧು ¶ ಸಾಧು ಆವುಸೋ, ಸಾಧು ಖೋ ಆವುಸೋ, ಯಂ ಭಿಕ್ಖು ಬುದ್ಧಸಾಸನೇ ಸದ್ಧಾಪಬ್ಬಜಿತೋ ಏವಂ ಸ್ವಾಖಾತೇ ಧಮ್ಮವಿನಯೇ ಸಮ್ಮಾಪಟಿಪನ್ನೋ ಆಸವಕ್ಖಯಞಾಣಂ ಪಾಪುಣಿತ್ವಾ ದುಕ್ಖಸ್ಸನ್ತಂ ಕರೋತಿ.

ಪುಚ್ಛಾ – ಕಥಂ ¶ ಪನಾವುಸೋ ರಾಜಾ ಮಾಗಧೋ ಅಜಾತಸತ್ತು ವೇದೇಹಿಪುತ್ತೋ ಇಮಿಸ್ಸಾ ದೇಸನಾಯ ಪರಿಯೋಸಾನೇ ಭಗವತಿ ಚ ದೇಸನಾಯಞ್ಚ ಪಸನ್ನೋ ಪಸನ್ನಾಕಾರಂ ಅಕಾಸಿ, ಕೀದಿಸಞ್ಚ ಆನಿಸಂಸಂ ಪಟಿಲಭಿ.

ವಿಸ್ಸಜ್ಜನಾ – ಏವಂ ವುತ್ತೇ ಭನ್ತೇ ಮಾಗಧೋ ಅಜಾತಸತ್ತು ವೇದೇಹಿಪುತ್ತೋ ಭಗವನ್ತಂ ಏತದವೋಚ, ಅಭಿಕ್ಕನ್ತಂ ಭನ್ತೇ, ಅಭಿಕ್ಕನ್ತಂ ಭನ್ತೇ, ಸೇಯ್ಯಥಾಪಿ ಭನ್ತೇ ನಿಕ್ಕುಜ್ಜಿತಂ ವಾ ಉಕ್ಕುಜ್ಜೇಯ್ಯ, ಪಟಿಚ್ಛನ್ನಂ ವಾ ವಿವರೇಯ್ಯ…ಪೇ… ಅಜ್ಜತಗ್ಗೇ ಪಾಣ್ಣುಪೇತಂ ಸರಣಂ ಗತನ್ತಿ, ಅಯಞ್ಹಿ ಭನ್ತೇ ರಾಜಾ ಪಿತುಮಾರಿತಕಾಲತೋ ಪಟ್ಠಾಯ ನೇವ ರತ್ತಿಂ ನ ದಿವಾ ನಿದ್ದಂ ಪಟಿಲಭತಿ, ಸತ್ಥಾರಂ ಪನ ಉಪಸಙ್ಕಮಿತ್ವಾ ಇಮಾಯ ಮಧುರಾಯ ಓಜವನ್ತಿಯಾ ಧಮ್ಮದೇಸನಾಯ ಸುತಕಾಲತೋ ಪಟ್ಠಾಯ ನಿದ್ದಂ ಪಟಿಲಭತಿ, ತಿಣ್ಣಂ ರತನಾನಂ ಮಹಾಸಕ್ಕಾರಮಕಾಸಿ, ಪುಥುಜ್ಜನಿಕಾಯ ಸದ್ಧಾಯ ಸಮನ್ನಾಗತೋ ನಾಮ ಇಮಿನಾ ರಞ್ಞಾ ಸದಿಸೋ ನಾಹೋಸಿ, ಅನಾಗತೇ ಪನ ವಿಜಿತಾವೀ ನಾಮ ಪಚ್ಚೇಕಬುದ್ಧೋ ಹುತ್ವಾ ಪರಿನಿಬ್ಬಾಯಿಸ್ಸತಿ. ಏವಂ ಖೋ ಭನ್ತೇ ರಾಜಾ ಮಾಗಧೋ ಅಜಾತಸತ್ತು ವೇದೇಹಿಪುತ್ತೋ ¶ ದೇಸನಾಪರಿಯೋಸಾನೇ ಪಸನ್ನೋ ಪಸನ್ನಾಕಾರಮಕಾಸಿ, ಇದಿಸಞ್ಚ ಭನ್ತೇ ಮಹಾನಿಸಂಸಂ ಪಟಿಲಭಿ.

ಪುಚ್ಛಾ – ತೇನಾವುಸೋ ¶ ಭಗವಾ ಜಾನತಾ ಅರಹತಾ ಪಸ್ಸತಾ ಸಮ್ಮಾಸಮ್ಬುದ್ಧೇನ ಅಮ್ಬಟ್ಠಂ ಟಾಮ ಸುತ್ತಂ ಕತ್ಥ ಕಂ ಆರಬ್ಭ ಭಾಸಿತಂ.

ವಿಸ್ಸಜ್ಜನಾ – ಕೋಸಲೇಸು ಭನ್ತೇ ಜನಪದೇ ಇಚ್ಛಾನಙ್ಗಲೇ ನಾಮ ಕೋಸಲಾನಂ ಬ್ರಾಹ್ಮಣಗಾಮೇ ಅಮ್ಬಟ್ಠಂ ನಾಮ ಮಾಣವಂ ಬ್ರಾಹ್ಮಣಸ್ಸ ಪೋಕ್ಖರಸಾತಿಸ್ಸ ಅನ್ತೇವಾಸಿಂ ಆರಬ್ಭ ಭಾಸಿತಂ.

ಪುಚ್ಛಾ – ಸೋಣದಣ್ಡಂ ¶ ಪನಾವುಸೋ ಸುತ್ತಂ ಭಗವತಾ ಕತ್ಥ ಕಂ ಆರಬ್ಭ ಭಾಸಿತಂ.

ವಿಸ್ಸಜ್ಜನಾ – ಅಙ್ಗೇಸು ಭನ್ತೇ ಜನಪದೇ ಚಮ್ಪಾಯಂ ಸೋಣದಣ್ಡಂ ಬ್ರಾಹ್ಮಣಂ ಆರಬ್ಭ ಭಾಸಿತಂ.

ಪುಚ್ಛಾ – ಕೂಟದನ್ತಂ ¶ ಪನಾವುಸೋ ಸುತ್ತಂ ಭಗವತಾ ಕತ್ಥ ಕಂ ಆರಬ್ಭ ಭಾಸಿತಂ.

ವಿಸ್ಸಜ್ಜನಾ – ಮಗಧೇಸು ಭನ್ತೇ ಖಾಣುಮತೇ ನಾಮ ಬ್ರಾಹ್ಮಣಗಾಮೇ ಕೂಟದನ್ತ ಬ್ರಾಹ್ಮಣಂ ಆರಬ್ಭ ಭಾಸಿತಂ.

ಪುಚ್ಛಾ – ಮಹಾಲಿಂ ¶ ಪನಾವುಸೋ ಸುತ್ತಂ ಭಗವತಾ ಕತ್ಥ ಕಂ ಆರಬ್ಭ ಭಾಸಿತಂ.

ವಿಸ್ಸಜ್ಜನಾ – ವೇಸಾಲಿಯಂ ಭನ್ತೇ ಓಟ್ಠದ್ಧಂ ನಾಮ ಲಿಚ್ಛವಿಂ ಆರಬ್ಭ ಭಾಸಿತಂ.

ಪುಚ್ಛಾ – ಜಾಲಿಯಂ ¶ ಪನಾವುಸೋ ಸುತ್ತಂ ಭಗವತಾ ಕತ್ಥ ಕಂ ಆರಬ್ಭ ಭಾಸಿತಂ.

ವಿಸ್ಸಜ್ಜನಾ – ಕೋಸಮ್ಬಿಯಂ ಭನ್ತೇ ದ್ವೇ ಪಬ್ಬಜಿತೇ ಆರಬ್ಭ ಭಾಸಿತಂ.

ಪುಚ್ಛಾ – ಮಹಾಸೀಹನಾದಂ ¶ ಪನಾವುಸೋ ಸುತ್ತಂ ಭಗವತಾ ಕತ್ಥ ಕಂ ಆರಬ್ಭ ಭಾಸಿತಂ.

ವಿಸ್ಸಜ್ಜನಾ – ಉರುಞ್ಞಾಯಂ ಭನ್ತೇ ಕಣ್ಣಕಥಲೇ ಅಚೇಲಂ ಕಸ್ಸಪಂ ಆರಬ್ಭ ಭಾಸಿತಂ.

ಪುಚ್ಛಾ – ಪೋಟ್ಠಪಾದಂ ¶ ಪನಾವುಸೋ ಸುತ್ತಂ ಭಗವತಾ ಕತ್ಥ ಕಂ ಆರಬ್ಭ ಭಾಸಿತಂ.

ವಿಸ್ಸಜ್ಜನಾ – ಸಾವತ್ಥಿಯಂ ಭನ್ತೇ ಪೋಟ್ಠಪಾದಞ್ಚ ಪರಿಬ್ಬಾಜಕಂ ಚಿತ್ತಞ್ಚ ಹತ್ಥಿಸಾರಿಪುತ್ತಂ ಆರಬ್ಭ ಭಾಸಿತಂ.

ಪುಚ್ಛಾ – ಸುಭಸುತ್ತಂ ¶ ಪನಾವುಸೋ ಕತ್ಥ ಕಂ ಆರಬ್ಭ ಕೇನ ಭಾಸಿತಂ.

ವಿಸ್ಸಜ್ಜನಾ – ಸಾವತ್ಥಿಯಂ ಭನ್ತೇ ಆಯಸ್ಮತಾ ಆನನ್ದೇನ ಧಮ್ಮಭಣ್ಡಾಗಾರಿಕೇನ ಸುಭಂ ಮಾಣವಂ ತೋದೇಯ್ಯಪುತ್ತಂ ಆರಬ್ಭ ಭಾಸಿತಂ.

ಪುಚ್ಛಾ – ಕೇವಟ್ಟಂ ¶ ಪನಾವುಸೋ ಸುತ್ತಂ ಭಗವತಾ ಕತ್ಥ ಕಂ ಆರಬ್ಭ ಭಾಸಿತಂ.

ವಿಸ್ಸಜ್ಜನಾ – ನಾಳನ್ದಾ ಯಂ ಭನ್ತೇ ಕೇವಟ್ಟಂ ಗಹಪತಿಪುತ್ತಂ ಆರಬ್ಭ ಭಾಸಿತಂ.

ಪುಚ್ಛಾ – ಲೋಹಿಚ್ಚಸುತ್ತ ¶ ಪನಾವುಸೋ ಭಗವತಾ ಕತ್ಥ ಕಂ ಆರಬ್ಭ ಭಾಸಿತಂ.

ವಿಸ್ಸಜ್ಜನಾ – ಕೋಸಲೇಸು ಭನ್ತೇ ಜನಪದೇ ಸಾಲವತಿಕಾಯಂ ಲೋಹಿಚ್ಚಂ ಬ್ರಾಹ್ಮಣಂ ಆರಬ್ಭ ಭಾಸಿತಂ.

ಪುಚ್ಛಾ – ತೇವಿಜ್ಜಸುತ್ತಂ ¶ ಪನಾವುಸೋ ಭಗವತಾ ಕತ್ಥ ಕಂ ಆರಬ್ಭ ಭಾಸಿತಂ.

ವಿಸ್ಸಜ್ಜನಾ – ಕೋಸಲೇಸು ಭನ್ತೇ ಮನಸಾಕಟೇ ನಾಮ ಕೋಸಲಾನಂ ಬ್ರಾಹ್ಮಣಗಾಮೇ ವಾಸೇಟ್ಠಂ ಭಾರದ್ವಾಜಂ ಮಾಣವಂ ಆರಬ್ಭ ಭಾಸಿತಂ.

ಪುಚ್ಛಾ – ತೇನ ¶ ಆವುಸೋ ಭಗವತಾ ಜಾನತಾ ಪಸ್ಸತಾ ಅರಹತಾ ಸಮ್ಮಾಸಮ್ಬುದ್ಧೇನ ಮಹಾಪದಾನಸುತ್ತಂ ದೀಘನಿಕಾಯೇ ಮಹಾವಗ್ಗೇ ಪೋರಾಣಕೇಹಿ ಸಙ್ಗಿತಿಕಾರೇಹಿ ಪಠಮಂ ಸಙ್ಗಿತಂ ಭಗವತಾ ಕತ್ಥ ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಭಾಸಿತಂ.

ವಿಸ್ಸಜ್ಜನಾ – ಸಾವತ್ಥಿಯಂ ಭನ್ತೇ ಸಮ್ಬಹುಲೇ ಭಿಕ್ಖೂ ಆರಬ್ಭ ಭಾಸಿತಂ, ಸಮ್ಬಹುಲಾನಂ ಭನ್ತೇ ಭಿಕ್ಖೂನಂ ಪಚ್ಛಾಭತ್ತಂ ಪಿಣ್ಡಪಾತಪಟಿಕ್ಕನ್ತಾನಂ ಮಣ್ಡಲಮಾಳೇ ಸನ್ನಿಸಿನ್ನಾನಂ ಸನ್ನಿಪತಿತಾನಂ ಪುಬ್ಬೇನಿವಾಸಪಟಿಸಂಯುತ್ತಾ ಧಮ್ಮೀಕಥಾ ಉದಪಾದಿ, ಇತಿಪಿ ಪುಬ್ಬೇನಿವಾಸೋ ಇತಿಪಿ ಪುಬ್ಬೇನಿವಾಸೋತಿ, ತಸ್ಮಿಂ ಭನ್ತೇ ವತ್ಥುಸ್ಮಿಂ ಭಾಸಿತಂ.

ಪುಚ್ಛಾ – ಮಹಾನಿದಾನಸುತ್ತಂ ¶ ಪನಾವುಸೋ ಭಗವತಾ ಕತ್ಥ ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಭಾಸಿತಂ.

ವಿಸ್ಸಜ್ಜನಾ – ಕುರೂಸು ಭನ್ತೇ ಕಮ್ಮಾಸಧಮ್ಮೇ ನಾಮ ಕುರೂನಂ ನಿಗಮೇ ಆಯಸ್ಮನ್ತಂ ಆನನ್ದಂ ಆರಬ್ಭ ಭಾಸಿತಂ, ಆಯಸ್ಮಾ ಭನ್ತೇ ಆನನ್ದೋ ಭಗವನ್ತಂ ಉಪಸಙ್ಕಮಿತ್ವಾ ಏತದವೋಚ ‘‘ಅಚ್ಛರಿಯಂ ಭನ್ತೇ, ಅಬ್ಭುತಂ ಭನ್ತೇ, ಯಾವ ಗಮ್ಭೀರೋಚಾಯಂ ಭನ್ತೇ ಪಟಿಚ್ಚಸಮುಪ್ಪಾದೋ

ಗಮ್ಭೀರಾವಭಾಸೋ ¶ ಚ, ಅಥ ಚ ಪನ ಮೇ ಉತ್ತಾನಕುತ್ತಾನಕೋ ವಿಯ ಖಾಯತೀ’’ತಿ, ತಸ್ಮಿಂ ಭನ್ತೇ ವತ್ಥುಸ್ಮಿಂ ಭಾಸಿತಂ.

ಪುಚ್ಛಾ – ಮಹಾಪರಿನಿಬ್ಬಾನಸುತ್ತಂ ¶ ಪನಾವುಸೋ ಬಹುಅನುಸನ್ಧಿಕಂ, ಬಹುದೇಸನಾ ಸಙ್ಗಹಂ, ಬುದ್ಧಸ್ಸ ಭಗವತೋ ಪರಿನಿಬ್ಬಾನಾಸನ್ನವಸ್ಸೇ ಪವತ್ತಅಟ್ಠುಪ್ಪತ್ತಿದೀಪಕವಚನಪಬನ್ಧಭೂತಂ, ತಸ್ಮಾ ತಂ ಅನ್ತರಾಭೇದವಸೇನ ವಿಭಜ್ಜ ಪರಿಚ್ಛಿಜ್ಜ ಪರಿಚ್ಛಿಜ್ಜ ಪುಚ್ಛಿಸ್ಸಾಮಿ, ತತ್ಥಾವುಸೋ ಭಗವತಾ ಪಠಮಂ

ರಾಜೂನಂ ¶ ಅಪರಿಹಾನಿಯಧಮ್ಮದೇಸನಾ ಕತ್ಥ ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಭಾಸಿತಾ.

ವಿಸ್ಸಜ್ಜನಾ – ರಾಜಗಹೇ ಭನ್ತೇ ವಸ್ಸಕಾರಂ ಬ್ರಾಹ್ಮಣಂ ಮಗಧಮಹಾಮತ್ತಂ ಆರಬ್ಭ ಭಾಸಿತಾ, ವಸ್ಸಕಾರೋ ಭನ್ತೇ ಬ್ರಾಹ್ಮಣೋ ಮಗಧಮಹಾಮತ್ತೋ ಭಗವನ್ತಂ ಉಪಸಙ್ಕಮಿತ್ವಾ ಏತದವೋಚ ‘‘ರಾಜಾ ಭೋ ಗೋತಮ ಮಾಗಧೋ ಅಜಾತಸತ್ತು ವೇದೇಹಿಪುತ್ತೋ ವಜ್ಜೀ ಅಭಿಯಾತುಕಾಮೋ ಸೋ ಏವಮಾಹ ಅಹಂ ಹಿಮೇ ವಜ್ಜೀ ಏವಂ ಮಹಿದ್ಧಿಕೇ ಏವಂ ಮಹಾನುಭಾವೇ ಉಚ್ಛೇಚ್ಛಾಮಿ ವಜ್ಜೀ ವಿನಾಸೇಸ್ಸಾಮಿ ವಜ್ಜೀ ಅನಯಬ್ಯಸನಂ ಆಪಾದೇಸ್ಸಾಮೀ ವಜ್ಜೀ’’ತಿ ತಸ್ಮಿಂ ಭನ್ತೇ ವತ್ಥುಸ್ಮಿಂ ಭಾಸಿತಾ.

ಪುಚ್ಛಾ – ಭಿಕ್ಖೂನಂ ¶ ಪನಾವುಸೋ ಅಪರಿಹಾನಿಯಧಮ್ಮದೇಸನಾ ಭಗವತಾ ಕತ್ಥ ಕಿಸ್ಮಿಂ ವತ್ಥುಸ್ಮಿಂ ಭಾಸಿತಾ.

ವಿಸ್ಸಜ್ಜನಾ – ತಸ್ಮಿಂಯೇವ ಭನ್ತೇ ರಾಜಗಹೇ ತಸ್ಮಿಂಯೇವ ವತ್ಥುಸ್ಮಿಂ ಭಾಸಿತಾ.

ಪುಚ್ಛಾ – ಧಮ್ಮಾದಾಸೋ ¶ ಆವುಸೋ ಧಮ್ಮಪರಿಯಾಯೋ ಭಗವತಾ ಕತ್ಥ ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಭಾಸಿತೋ.

ವಿಸ್ಸಜ್ಜನಾ – ನಾತಿಕೇ ಭನ್ತೇ ಗಿಞ್ಜಕಾವಸಥೇ ಆಯಸ್ಮನ್ತಂ ಆನನ್ದ ಆರಬ್ಭ ಭಾಸಿತೋ, ಆಯಸ್ಮಾ ಭನ್ತೇ ಆನನ್ದೋ ಭಗವನ್ತಂ ಉಪಸಙ್ಕಮಿತ್ವಾ ನಾತಿಕಿಯಾನಂ ದ್ವಾದಸನ್ನಂ ಪುಗ್ಗಲಾನಂ ಗತಿಅಭಿಸಮ್ಪರಾಯಂ ಪುಚ್ಛಿ, ತಸ್ಮಿಂ ಭನ್ತೇ ವತ್ಥುಸ್ಮಿಂ ಭಾಸಿತೋ.

ಪುಚ್ಛಾ – ಅತ್ತದೀಪಧಮ್ಮದೇಸನಾ ¶ ಪನಾವುಸೋ ಭಗವತಾ ಕತ್ಥ ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಭಾಸಿತಾ.

ವಿಸ್ಸಜ್ಜನಾ – ವೇಸಾಲಿಯಂ ಭನ್ತೇ ವೇಳುವಗಾಮಕೇ ಆಯಸ್ಮನ್ತಂ ಆನನ್ದಂ ಆರಬ್ಭ ಭಾಸಿತಾ, ಆಯಸ್ಮಾ ಭನ್ತೇ ಆನನ್ದೋ ಭಗವತೋ ಗಿಲಾನವುಟ್ಠಿತಸ್ಸ ಅಚಿರವುಟ್ಠಿತಸ್ಸ ಗೇಲಞ್ಞಾ ಭಗವತೋ ಗೇಲಞ್ಞೇನ ಅತ್ತನೋ ಖೇದಪತ್ತಕಾರಣಂ ಆರೋಚೇಸಿ, ತಸ್ಮಿಂ ಭನ್ತೇ ವತ್ಥುಸ್ಮಿಂ ಭಾಸಿತಾ.

‘‘ತಸ್ಮಾತಿಹಾನನ್ದ ¶ ಅತ್ತದೀಪಾ ವಿಹರಥ ಅತ್ತಸರಣಾ ಅನಞ್ಞಸರಣಾ’’.

ಪುಚ್ಛಾ – ಭಗವತಾ ಆವುಸೋ ಪುರಿಮ ದುತಿಯದಿವಸೇ ಪುಚ್ಛಿತವಿಸ್ಸಜ್ಜಿತಕ್ಕಮೇನ ಅತ್ತದೀಪಧಮ್ಮದೇಸನಞ್ಚ ಅಞ್ಞಾನಿ ಚ ಧಮ್ಮದೇಸನಾನಿ ಕಥೇತ್ವಾ ಪರಿನಿಟ್ಠಿತ ಸಬ್ಬಬುದ್ಧಕಿಚ್ಚೇನ ಆಯುಸಙ್ಖಾರೋ ಕತ್ಥ ಓಸ್ಸಟ್ಠೋ.

ವಿಸ್ಸಜ್ಜನಾ – ವೇಸಾಲಿಯಂ ಭನ್ತೇ ಚಾಪಾಲೇ ಚೇತಿಯೇ ಮಾರೇನ ಪಾಪಿಮತಾ ಯಾಚಿತೋ ಭಗವಾ ಸತೇನ ಸಮ್ಪಜಾನೇನ ಆಯುಸಙ್ಖಾರೋ ಓಸ್ಸಟ್ಠೋ.

‘‘ಪರಿನಿಬ್ಬಾತು ¶ ದಾನಿ ಭನ್ತೇ ಭಗವಾ, ಪರಿನಿಬ್ಬಾತು ಸುಗತೋ, ಪರಿನಿಬ್ಬಾನ ಕಾಲೋ ದಾನಿ ಭನ್ತೇ ಭಗವತೋ.

ಅಪ್ಪೋಸುಕ್ಕೋ ತ್ವಂ ಪಾಪಿಮ ಹೋತಿ, ನ ಚಿರಂ ತಥಾಗತಸ್ಸ ಪರಿನಿಬ್ಬಾನಂ ಭವಿಸ್ಸತಿ, ಇತೋ ತಿಣ್ಣಂ ಮಾಸಾನಂ ಅಚ್ಚಯೇನ ತಥಾಗತೋ ಪರಿನಿಬ್ಬಾಯಿಸ್ಸತಿ.

ಪುಚ್ಛಾ – ಚತುಮಹಾಪದೇಸಧಮ್ಮದೇಸನಾ ¶ ಪನಾವುಸೋ ಭಗವತಾ ಕತ್ಥ ಭಾಸಿತಾ.

ವಿಸ್ಸಜ್ಜನಾ – ಭೋಗನಗರೇ ಭನ್ತೇ ಆನನ್ದೇ ಚೇತಿಯೇ ಭಾಸಿತಾ.

ಪರಿಪಕ್ಕೋ ¶ ವಯೋ ಮಯ್ಹಂ, ಪರಿತ್ತಂ ಮಮ ಜೀವಿತಂ. ಪಹಾಯ ವೋ ಗಮಿಸ್ಸಾಮಿ, ಕತಂ ಮೇ ಸರಣಮತ್ತನೋ.

ಪುಚ್ಛಾ – ಚತುಸಂವೇಜನೀಯಕಥಾ ¶ ಪನಾವುಸೋ ಭಗವತಾ ಕತ್ಥ ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಭಾಸಿತಾ.

ವಿಸ್ಸಜ್ಜನಾ – ಕುಸಿನಾರಾಯಂ ಭನ್ತೇ ಆಯಸ್ಮನ್ತಂ ಆನನ್ದಂ ಆರಬ್ಭ ಭಾಸಿತಾ, ಆಯಸ್ಮಾ ಭನ್ತೇ ಆನನ್ದೋ ಭಗವನ್ತಂ ಏತದವೋಚ ‘‘ಪುಬ್ಬೇ ಭನ್ತೇ ದಿಸಾಸು ವಸ್ಸಂವುಟ್ಠಾ ಭಿಕ್ಖೂ ಆಗಚ್ಛನ್ತಿ ತಥಾಗತಂ ದಸ್ಸನಾಯ, ತೇ ಮಯಂ ಲಭಾಮ ಮನೋಭಾವನೀಯೇ ಭಿಕ್ಖೂ ದಸ್ಸನಾಯ, ಲಭಾಮ ಪಯಿರುಪಾಸನಾಯ. ಭಗವತೋ ಪನ ಮಯಂ ಭನ್ತೇ ಅಚ್ಚಯೇನ ನ ಲಭಿಸ್ಸಾಮ ಮನೋಭಾವನೀಯೇ ಭಿಕ್ಖೂ ದಸ್ಸನಾಯ, ನ ಲಭಿಸ್ಸಾಮ ಪಯಿರುಪಾಸನಾಯಾ’’ತಿ, ತಸ್ಮಿಂ ಭನ್ತೇ ವತ್ಥುಸ್ಮಿಂ ಭಾಸಿತಾ.

ಯೇಹಿ ¶ ಕೇಚಿ ಆನನ್ದ ಚೇತಿಯಚಾರಿಕಂ ಆಹಿಣ್ಡನ್ತಾ ಪಸನ್ನಚಿತ್ತಾ ಕಾಲಂ ಕರಿಸ್ಸನ್ತಿ, ಸಬ್ಬೇತೇ ಕಾಯಸ್ಸ ಭೇದಾ ಪರಂ ಮರಣಾ ಸುಗತಿಂ ಸಗ್ಗಂ ಲೋಕಂ ಉಪಪಜ್ಜಿಸ್ಸನ್ತಿ ಹು –

ಪುಚ್ಛಾ – ಕಥಞ್ಚಾವುಸೋ ¶ ಭಗವಾ ಭಿಕ್ಖೂನಂ ಮಾತುಗಾಮೇಸು ಪಟಿಪಜ್ಜಿತಬ್ಬವತ್ತಂ ಕಥೇಸಿ.

ವಿಸ್ಸಜ್ಜನಾ – ಅದಸ್ಸನಂ ಆನನ್ದಾತಿ ಚ ಅನಾಲಾಪೋ ಆನನ್ದಾತಿ ಚ ಸತಿ ಆನನ್ದ ಉಪಟ್ಠಬ್ಬೇತಬ್ಬಾತಿ ಚ ಏವಂ ಖೋ ಭನ್ತೇ ಭಗವಾ ಮಾತುಗಾಮೇಸು ಪಟಿಪಜ್ಜಿತಬ್ಬಾಕಾರಂ ಕಥೇಸಿ.

ಪುಚ್ಛಾ – ಮಹಾಸುದಸ್ಸನಸುತ್ತಂ ¶ ಪನಾವುಸೋ ಭಗವತಾ ಕತ್ಥ ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಭಾಸಿತಂ.

ವಿಸ್ಸಜ್ಜನಾ – ತಿಸ್ಸಂಯೇವ ಭನ್ತೇ ಕುಸಿನಾರಾಯಂ ಆಯಸ್ಮನ್ತಂ ಆನನ್ದಂ ಆರಬ್ಭ ಭಾಸಿತಂ, ಆಯಸ್ಮಾ ಭನ್ತೇ ಆನನ್ದೋ ಭಗವನ್ತಂ ಏತದವೋಚ ‘‘ಮಾ ಭನ್ತೇ ಭಗವಾ ಇಮಸ್ಮಿಂ ಖುದ್ದಕನಗರಕೇ

ಉಜ್ಜಙ್ಗಲನಗರಕೇ ¶ ಸಾಖಾನಗರಕೇ ಪರಿನಿಬ್ಬಾಯಿ. ಸನ್ತಿ ಭನ್ತೇ ಅಞ್ಞಾನಿ ಮಹಾನಗರಾನಿ. ಸೇಯ್ಯಥಿದಂ, ಚಮ್ಪಾ, ರಾಜಗಹಂ, ಸಾವತ್ಥೀ, ಸಾಕೇತಂ, ಕೋಸಮ್ಬೀ, ಬಾರಾಣಸೀ, ಏತ್ಥ ಭಗವಾ ಪರಿನಿಬ್ಬಾಯತು, ಏತ್ಥ ಬಹೂ ಖತ್ತಿಯಮಹಾಸಾಲಾ ಬ್ರಾಹ್ಮಣ ಮಹಾಸಾಲಾ ಗಹಪತಿ ಮಹಾಸಾಲಾ ತಥಾಗತೇ ಅಭಿಪ್ಪಸನ್ನಾ. ತೇ ತಥಾಗತಸ್ಸ ಸರೀರಪೂಜಂ ಕರಿಸ್ಸನ್ತೀ’’ತಿ, ತಸ್ಮಿಂ ಭನ್ತೇ ವತ್ಥುಸ್ಮಿಂ ಭಾಸಿತಂ.

ಪುಚ್ಛಾ – ಭಗವಾ ¶ ಆವುಸೋ ಪುರಿಮದಿವಸೇ ಪುಚ್ಛಿತ ವಿಸ್ಸಜ್ಜಿತಕ್ಕಮೇನ ಮಹಾಸುದಸ್ಸನ ಸುತ್ತನ್ತಂ ದೇಸೇತ್ವಾ ಸುಭದ್ದಂನಾಮ ಪರಿಬ್ಬಾಜಕಂ ಬುದ್ಧವೇನೇಯ್ಯೇಸು ಪಚ್ಛಿಮಸಾವಕಭೂತಂ ಕಥಂ ವಿನೇಸಿ.

ವಿಸ್ಸಜ್ಜನಾ – ಯಸ್ಮಿಂ ಖೋ ಸುಭದ್ದ ಧಮ್ಮವಿನಯೇ ಅರಿಯೋ ಅಟ್ಠಙ್ಗಿಕೋ ಮಗ್ಗೋ ನ ಉಪಲಬ್ಭತಿ, ಸಮಣೋಪಿ ತತ್ಥ ನ ಉಪಲಬ್ಭತಿ, ದುತಿಯೋಪಿ ತತ್ಥ ಸಮಣೋ ನ ಉಪಲಬ್ಭತಿ, ತತಿಯೋಪಿ ತತ್ಥ ಸಮಣೋ ನ ಉಪಲಬ್ಭತಿ, ಚತುತ್ಥೋಪಿ ತತ್ಥ ಸಮಣೋ ನ ಉಪಲಬ್ಭತಿ (ಪೇಯ್ಯಾಲ). ಇಮೇ ಚ ಸುಭದ್ದ ಭಿಕ್ಖೂ ಸಮ್ಮಾ ವಿಹರೇಯ್ಯುಂ, ಅಸುಞ್ಞೋ ಲೋಕೋ ಅರಹನ್ತೇಹಿ ಅಸ್ಸ, ಏವಂ ಖೋ ಭನ್ತೇ ಭಗವಾ ಸುಭದ್ದಂ ಪರಿಬ್ಬಾಜಕಂ ಬುದ್ಧವೇನೇಯ್ಯೇಸು ಪಚ್ಛಿಮಂ ಸಕ್ಖಿಸಾವಕಂ ವಿನೇಸಿ.

ಪುಚ್ಛಾ – ಪಚ್ಛಿಮೇ ¶ ಪನಾವುಸೋ ಕಾಲೇ ಭಗವಾ ಆಯಸ್ಮತೋ ಆನನ್ದಸ್ಸ ಕೀದಿಸಂ ವಚನಂ ಕಥೇತ್ವಾ, ಕಥಞ್ಚ ಭಿಕ್ಖೂ ಪವಾರೇತ್ವಾ, ಕೀದಿಸಞ್ಚ ಭಿಕ್ಖೂನಂ ವಚನಂ ಆಮನ್ತೇತ್ವಾ, ಕಥಞ್ಚ ಅನುಪಾದಿಸೇಸಾಯ ನಿಬ್ಬಾನಧಾತುಯಾ ಪರಿನಿಬ್ಬಾಯಿ.

ವಿಸ್ಸಜ್ಜನಾ – ಭಗವಾ ಭನ್ತೇ ಪಚ್ಛಿಮೇ ಕಾಲೇ ಆಯಸ್ಮತೋ ಆನನ್ದಸ್ಸ ಸಿಯಾ ಖೋ ಪನಾನನ್ದ ತುಮ್ಹಾಕಂ ಏವಮಸ್ಸ ಅತೀತಸತ್ಥುಕಂ ಪಾವಚನಂ ನತ್ಥಿ ನೋ ಸತ್ಥಾತಿ ಏವಮಾದಿಕಂ ವಚನಂ ಕಥೇತ್ವಾ, ಸಿಯಾ ಖೋ ಪನ ಭಿಕ್ಖವೇ ಏಕಭಿಕ್ಖುಸ್ಸಾಪಿ ಕಙ್ಖಾ ವಾ ವಿಮತಿ ವಾ ಬುದ್ಧೇ ವಾ ಧಮ್ಮೇ ವಾ ಸಙ್ಘೇ ವಾ ಮಗ್ಗೇ ವಾ ಪಟಿಪದಾಯ ವಾತಿ ಏವಮಾದಿನಾ ಭಿಕ್ಖೂ ಪವಾರೇತ್ವಾ, ಹನ್ದದಾನಿ ಭಿಕ್ಖವೇ ಆಮನ್ತಯಾಮಿ ವೋ, ವಯಧಮ್ಮಾ ಸಙ್ಖಾರಾ ಅಪ್ಪಮಾದೇನ ಸಮ್ಪಾದೇಥಾತಿ ಪಚ್ಛಿಮಞ್ಚ ಓವಾದವಚನಂ ಭಿಕ್ಖೂನಂ ಆಮನ್ತೇತ್ವಾ, ನವ ಅನುಪುಬ್ಬಸಮಾಪತ್ತಿಯೋ ಅನುಲೋಮಂ ಪಟಿಲೋಮಂ ಸಮಾಪಜ್ಜಿತ್ವಾ, ಚತುತ್ಥಜ್ಝಾನಾ ವುಟ್ಠಹಿತ್ವಾ ಸಮನನ್ತರಾ ಅನುಪಾದಿಸೇಸಾಯ ನಿಬ್ಬಾನಧಾತುಯಾ ಪರಿನಿಬ್ಬಾಯಿ.

ನಾವುಸೋ ¶ ಆನನ್ದ ಭಗವಾ ಪರಿನಿಬ್ಬುತೋ, ಸಞ್ಞಾವೇದಯಿತ ನಿರೋಧಂ ಸಮಾಪನ್ನೋ.

ಪುಚ್ಛಾ – ಮಹಾಸುದಸ್ಸನಸುತ್ತಂ ¶ ಪನಾವುಸೋ ಪುರಿಮದಿವಸೇ ಪುಚ್ಛಿತಞ್ಚ ವಿಸ್ಸಜ್ಜಿತಞ್ಚ, ಜನವಸಭಸುತ್ತಂ ಪನಾವುಸೋ ಭಗವತಾ ಕತ್ಥ ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಭಾಸಿತಂ.

ವಿಸ್ಸಜ್ಜನಾ – ನಾತಿಕೇ ಭನ್ತೇ ಗಿಞ್ಜಕಾವಸಥೇ ಆಯಸ್ಮನ್ತಂ ಆನನ್ದಂ ಆರಬ್ಭ ಭಾಸಿತಂ, ಆಯಸ್ಮಾ ಭನ್ತೇ ಆನನ್ದೋ ಮಾಗಧಕೇ ಪರಿಚಾರಕೇ ಆರಬ್ಭ ಭಗವತೋ ಸಮ್ಮುಖಾ ಪರಿಕಥಂ ಕಥೇಸಿ, ತಸ್ಮಿಂ ಭನ್ತೇ ವತ್ಥುಸ್ಮಿಂ ಭಾಸಿತಂ.

ಪುಚ್ಛಾ – ಮಹಾಗೋವಿನ್ದಸುತ್ತಂ ¶ ಪನಾವುಸೋ ಭಗವತಾ ಕತ್ಥ ಭಾಸಿತಂ.

ವಿಸ್ಸಜ್ಜನಾ – ರಾಜಗಹೇ ಭನ್ತೇ ಭಾಸಿತಂ.

ಪುಚ್ಛಾ – ಮಹಾಸಮಯಸುತ್ತಂ ¶ ಪನಾವುಸೋ ಭಗವತಾ ಕತ್ಥ ಭಾಸಿತಂ.

ವಿಸ್ಸಜ್ಜನಾ – ಸಕ್ಕೇಸು ಭನ್ತೇ ಕಪಿಲವತ್ಥುಸ್ಮಿಂ ಭಾಸಿತಂ.

ಪುಚ್ಛಾ – ಸಕ್ಕಪಞ್ಹಸುತ್ತಂ ¶ ಪನಾವುಸೋ ಭಗವತಾ ಕತ್ಥ ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಭಾಸಿತಂ.

ವಿಸ್ಸಜ್ಜನಾ – ಮಗಧೇಸು ಭನ್ತೇ ಪಾಚೀನತೋ ರಾಜಗಹಸ್ಸ ಅಮ್ಬಸಣ್ಡಾ ನಾಮ ಬ್ರಾಹ್ಮಣಗಾಮೋ, ತಸ್ಸುತ್ತರತೋ ವೇದಿಯಕೇ ಪಬ್ಬತೇ ಇನ್ದಸಾಲಗುಹಾಯಂ ಸಕ್ಕಂ ದೇವಾನಮಿನ್ದಂ ಆರಬ್ಭ ಭಾಸಿತಂ, ಸಕ್ಕೋ ಭನ್ತೇ ದೇವಾನಮಿನ್ದೋ ಭಗವನ್ತಂ ಉಪಸಙ್ಕಮಿತ್ವಾ ಪಞ್ಹಂ ಪುಚ್ಛಿ, ತಸ್ಮಿಂ ಭನ್ತೇ ವತ್ಥುಸ್ಮಿಂ ಭಾಸಿತಂ.

ಪುಚ್ಛಾ – ಮಹಾಸತಿಪಟ್ಠಾನಸುತ್ತಂ ¶ ಪನಾವುಸೋ ಭಗವತಾ ಕತ್ಥ ಭಾಸಿತಂ.

ವಿಸ್ಸಜ್ಜನಾ – ಕುರೂಸು ಭನ್ತೇ ಕಮ್ಮಾಸಧಮ್ಮೇ ನಾಮ ಕುರೂನಂ ನಿಗಮೇ ಭಾಸಿತಂ.

ಪುಚ್ಛಾ – ಪಾಯಾಸಿ ¶ ಸುತ್ತಂ ಪನಾವುಸೋ ಕತ್ಥ ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಕೇನ ಭಾಸಿತಂ.

ವಿಸ್ಸಜ್ಜನಾ – ಕೋಸಲೇಸು ಭನ್ತೇ ಸೇತಬ್ಯಾನಾಮ ಕೋಸಲಾನಂ ನಗರಂ ಉತ್ತರೇನ ಸೇತಬ್ಯಂ ಸಿಂಸಪಾವನೇ ಆಯಸ್ಮತಾ ಕುಮಾರಕಸ್ಸಪೇನ ಪಾಯಾಸಿಂ ರಾಜಞ್ಞಂ ಆರಬ್ಭ ಭಾಸಿತಂ, ಪಾಯಾಸಿಸ್ಸ ಭನ್ತೇ ರಾಜಞ್ಞಸ್ಸ ಏವರೂಪಂ ಪಾಪಕಂ ದಿಟ್ಠಿಗತಂ ಉಪ್ಪನ್ನಂ ಹೋತಿ, ಇತಿಪಿ ನತ್ಥಿ ಪರೋಲೋಕೋ ನತ್ಥಿ ಸತ್ತಾ ಓಪಪಾತಿಕಾ ನತ್ಥಿ ಸುಕತದುಕ್ಕಟಾನಂ ಕಮ್ಮಾನಂ ಫಲಂ ವಿಪಾಕೋತಿ, ತಸ್ಮಿಂ ಭನ್ತೇ ವತ್ಥುಸ್ಮಿಂ ಭಾಸಿತಂ.

ಪುಚ್ಛಾ – ತತ್ಥಾವುಸೋ ¶ ಪಾಯಾಸಿಸ್ಸ ರಾಜಞ್ಞಸ್ಸ ದಿಟ್ಠಿಪಕಾಸನಾಚ ಆಯಸ್ಮತೋ ಕುಮಾರಕಸ್ಸಪತ್ಥೇರಸ್ಸ ದಿಟ್ಠಿವಿನಿವೇಟ್ಠನಕಥಾ ಚ ಅನೇಕವಾರಂ ಆಗತಾ, ತತ್ಥಾವುಸೋ ಪಠಮಂ ಪಾಯಾಸಿ ರಾಜಞ್ಞೋ ಅತ್ತನೋ ದಿಟ್ಠಿಂ ಕಥಂ ಪಕಾಸೇಸಿ, ಕಥಞ್ಚಾಯಸ್ಮಾ ಕುಮಾರಕಸ್ಸಪೋ ತಂ ಮಿಚ್ಛಾದಿಟ್ಠಿಂ ವಿನಿವೇಠೇಸಿ.

ವಿಸ್ಸಜ್ಜನಾ – ಪಾಯಾಸಿ ಭನ್ತೇ ರಾಜಞ್ಞೋ ಆಯಸ್ಮನ್ತಂ ಕುಮಾರಕಸ್ಸಪಂ ಉಪಸಙ್ಕಮಿತ್ವಾ ಏತದವೋಚ ‘‘ಅಹಞ್ಹಿ ಭೋ ಕಸ್ಸಪ ಏವಂ ವಾದೀ ಏವಂ ದಿಟ್ಠೀ ಇತಿಪಿ ನತ್ಥಿ ಪರೋಲೋಕೋ, ನತ್ಥಿ ಸತ್ತಾ ಓಪಪಾತಿಕಾ, ನತ್ಥಿ ಸುಕತದುಕ್ಕಟಾನಂ ಕಮ್ಮಾನಂ ಫಲಂ ವಿಪಾಕೋ’’ಕಿ, ಏವಂ ಖೋ ಭನ್ತೇ ಪಾಯಾಸಿರಾಜಞ್ಞೋ ಅತ್ತನೋ ಮಿಚ್ಛಾದಿಟ್ಠಿಂ ಆಯಸ್ಮತೋ ಕುಮಾರಕಸ್ಸಪಸ್ಸ ಸನ್ತಿಕೇ ಪಕಾಸೇಸಿ. ಆಯಸ್ಮಾ ಚ ಕುಮಾರಕಸ್ಸಪೋ ಸಕ್ಖಿಕಾರಣಂ ಚನ್ದಿಮಸೂರಿಯಉಪಮಂ ದಸ್ಸೇತ್ವಾ ಪಾಯಾಸಿಸ್ಸ ರಾಜಞ್ಞಸ್ಸ ತಂ ಪಾಪಕಂ ದಿಟ್ಠಿಗತಂ ವಿನಿವೇಠೇಸಿ.

ಸಾಧು ¶ ಸಾಧು ಆವುಸೋ, ಸಾಧು ಖೋ ಆವುಸೋ ಆಯಸ್ಮಾ ಕುಮಾರಕಸ್ಸಪೋ ಪಾಯಾಸಿಸ್ಸ ರಾಜಞ್ಞಸ್ಸ ಮಿಚ್ಛಾದಿಟ್ಠಿಕಸ್ಸ ಸದ್ಧಮ್ಮವಿಮುಖಿಭೂತಸ್ಸ ಪಚ್ಚಕ್ಖತೋ ಪರಲೋಕಂ ದಸ್ಸೇತ್ವಾ ತಂ ಮಿಚ್ಛಾದಿಟ್ಠಿಂ ವಿನಿವೇಠೇಸಿ.

ಪುಚ್ಛಾ – ಅಥ ಪನಾವುಸೋ ಪಾಯಾಸಿರಾಜಞ್ಞೋ ದುತಿಯಮ್ಪಿ ಕೀದಿಸಂ ಸಾಧಕಪರಿಯಾಯಂ ದಸ್ಸೇತ್ವಾ ಅತ್ತನೋ ವಾದಂ ಪತಿಟ್ಠಾಪೇಸಿ, ಕಥಞ್ಚಾಯಸ್ಮಾ ಕುಮಾರಕಸ್ಸಪೋ ತಂ ಮಿಚ್ಛಾವಾದಂ ಸಹಧಮ್ಮೇನ ಸುನಿಗ್ಗಹಂ ನಿಗ್ಗಹೇತ್ವಾ ಧಮ್ಮವಾದಂ ಪತಿಟ್ಠಾಪೇಸಿ.

ವಿಸ್ಸಜ್ಜನಾ – ದುತಿಯೇ ಪನ ಭನ್ತೇ ಪಾಯಾಸಿರಾಜಞ್ಞೋ ಅತ್ತನೋ ಮಿತ್ತಾಮಚ್ಚೇ ಞಾತಿಸಾಲೋಹಿತೇ ದುಚ್ಚರಿತಸಮಙ್ಗಿನೋ ಕಾಲಂಕತೇ ಸಾಧಕಪರಿಯಾಯಂ ದಸ್ಸೇತ್ವಾ ಅತ್ತನೋ ಮಿಚ್ಛಾವಾದಂ ಪತಿಟ್ಠಾಪೇಸಿ ¶ , ಆಯಸ್ಮಾ ಚ ಕುಮಾರಕಸ್ಸಪೋ ಚೋರಉಪಮಾಯ ತಂ ಮಿಚ್ಛಾವಾದಂ ಸಹಧಮ್ಮೇನ ಸುನಿಗ್ಗಹಂ ನಿಗ್ಗಹೇತ್ವಾ ಧಮ್ಮವಾದಂ ಪತಿಟ್ಠಾಪೇಸಿ.

ಸಾಧು ¶ ಸಾಧು ಆವುಸೋ, ಸಾಧು ಖೋ ಆವುಸೋ ಯಂ ಆಯಸ್ಮಾ ಕುಮಾರಕಸ್ಸಪೋ ಉಪ್ಪನ್ನಂ ಪರಪ್ಪವಾದಂ ಸಹಧಮ್ಮೇನ ಸುನಿಗ್ಗಹಂ ನಿಗ್ಗಹೇತ್ವಾ ಧಮ್ಮವಾದಂ ಪತಿಟ್ಠಾಪೇಸಿ.

ಪುಚ್ಛಾ – ಅಥ ಪನಾವುಸೋ ಪಾಯಾಸಿರಾಜಞ್ಞೋ ತತಿಯಮ್ಪಿ ಕೀದಿಸಂ ಸಾಧಕ ಪರಿಯಾಯಂ ದಸ್ಸೇತ್ವಾ ಅತ್ತನೋವಾದಂ ಪತಿಟ್ಠಾಪೇಸಿ, ಕಥಞ್ಚಾಯಸ್ಮಾ ಕುಮಾರಕಸ್ಸಪೋ ತಂ ಮಿಚ್ಛಾವಾದಂ ಸಹಧಮ್ಮೇನ ಸುನಿಗ್ಗಹ ನಿಗ್ಗಹೇತ್ವಾ ಧಮ್ಮವಾದಂ ಪತಿಟ್ಠಾಪೇಸಿ.

ವಿಸ್ಸಜ್ಜನಾ – ತತಿಯಮ್ಪನ ¶ ಭನ್ತೇ ಪಾಯಾಸಿರಾಜಞ್ಞೋ ಅತ್ತನೋ ಮಿತ್ತಾಮಚ್ಚೇ ಞಾತಿಸಾಲೋಹಿತೇ ಸುಚರಿತಸಮಙ್ಗಿನೋ ಕಾಲಂಕತೇ ದಸ್ಸೇತ್ವಾ ಅತ್ತನೋ ಮಿಚ್ಛಾವಾದಂ ಪತಿಟ್ಠಾಪೇಸಿ, ಆಯಸ್ಮಾ ಚ ಕುಮಾರಕಸ್ಸಪೋ ಗೂಥಕೂಪೇ ಪತಪುರಿಸೋಪಮಾಯ ತಂ ಮಿಚ್ಛಾವಾದಂ ಸಹಧಮ್ಮೇನ ಸುನಿಗ್ಗಹಿತಂ ನಿಗ್ಗಹೇತ್ವಾ ಧಮ್ಮವಾದಂ ಪತಿಟ್ಠಾಪೇಸಿ.

ಪುಚ್ಛಾ – ಆಯಸ್ಮತಾ ಆವುಸೋ ಕುಮಾರಕಸ್ಸಪೇನ ಪುರಿಮದಿವಸೇ ಪುಚ್ಛಿತವಿಸ್ಸಜ್ಜಿತಕ್ಕಮೇನ ಗೂಥಕೂಪಪುರಿಸಉಪಮಾಯ ಮಿಚ್ಛಾವಾದಂ ಪಟಿಕ್ಖಿಪಿತ್ವಾ ಧಮ್ಮವಾದೇ ಪತಿಟ್ಠಾಪಿಯಮಾನೇ ಪಿಯಾಸಿರಾಜಞ್ಞೋ

ಚತುತ್ಥಂ ¶ ವಾ ಪಞ್ಚಮಂ ವಾ ಕೀದಿಸಂ ಸಾಧಕಪರಿಯಾಯಂ ದಸ್ಸೇತ್ವಾ ಅತ್ತನೋವಾದಂ ಪತಿಟ್ಠಾಪೇಸಿ, ಕಥಞ್ಚಾಯಸ್ಮಾ ಕುಮಾರಕಸ್ಸಪೋ ಸಹಧಮ್ಮೇನ ತಂ ಮಿಚ್ಛಾವಾದಂ ಪಟಿಕ್ಖಿಪಿತ್ವಾ ಧಮ್ಮವಾದಂ ಪತಿಟ್ಠಾಪೇಸಿ.

ವಿಸ್ಸಜ್ಜನಾ – ಪಾಯಾಸಿ ಭನ್ತೇ ರಾಜಞ್ಞೋ ಆಯಸ್ಮತಾ ಕುಮಾರಕಸ್ಸಪೇನ ಗೂಥಕೂಪೇ ನಿಮುಗ್ಗಪುರಿಸೋ ಪಮಾಯ ಮಿಚ್ಛಾವಾದಂ ಸುನಿಗ್ಗಹಿತಂ ನಿಗ್ಗಹೇತ್ವಾ ಧಮ್ಮವಾದೇ ಪತಿಟ್ಠಾಪಿತೇ ಚತುತ್ಥಂ ವಾ ಪಞ್ಚಮಂ ವಾ ಅತ್ತನೋ ಮಿತ್ತಾಮಚ್ಚೇ ಞಾತಿಸಾಲೋಹಿತೇ ಸಮಾದಿನ್ನ ಪಞ್ಚಸೀಲೇ ಸಾಧಕಪರಿಯಾಯಂ ದಸ್ಸೇತ್ವಾ ಅತ್ತನೋ ಮಿಚ್ಛಾವಾದಂ ಪತಿಟ್ಠಾಪೇಸಿ. ಆಯಸ್ಮಾ ಚ ಕುಮಾರಕಸ್ಸಪೋ ತಾವತಿಂಸದೇವೋಪಮಾಯ ಚ ಜಚ್ಚನ್ಧೋಪಮಾಯ ಚಾತಿ ದ್ವೀಹಿ ಉಪಮಾಹಿ ತಂ ಪಾಪಕಂ ದಿಟ್ಠಿಗತಂ ಸಹಧಮ್ಮೇನ ಸುನಿಗ್ಗಹಿತಂ ನಿಗ್ಗಹೇತ್ವಾ, ಧಮ್ಮವಾದಂ ಪತಿಟ್ಠಾಪೇಸಿ.

ಸಾಧು ¶ ಸಾಧು ಆವುಸೋ, ಸಾಧು ಖೋ ಆವುಸೋ ಯಂ ಕುಮಾರಕಸ್ಸಪೋ ಪಾಯಾಸಿಸ್ಸ ರಾಜಞ್ಞಸ್ಸ ದ್ವೇ ಉಪಮಾಯೋ ದಸ್ಸೇತ್ವಾ ಉಪ್ಪನ್ನಂ ಪಾಪಕಂ ಮಿಚ್ಛಾವಾದಂ ಸಹಧಮ್ಮೇನ ಸನಿಗ್ಗಹಂ ನಿಗ್ಗಹೇತ್ವಾ ಧಮ್ಮವಾದಂ ಪತಿಟ್ಠಾಪೇಸಿ.

ಪುಚ್ಛಾ – ಅಥ ಪನಾವುಸೋ ಪಾಯಾಸಿರಾಜಞ್ಞೋ ಛಟ್ಠಂಪಿ ಕೀದಿಸಂ ಸಾಧಕಪರಿಯಾಯಂ ದಸ್ಸೇತ್ವಾ ಅತ್ತನೋ ವಾದಂ ಪತಿಟ್ಠಾಪೇಸಿ, ಕಥಞ್ಚಾಯಸ್ಮಾ ಕುಮಾರಕಸ್ಸಪೋ ಸಹಧಮ್ಮೇನ ತಂ ಮಿಚ್ಛಾವಾದಂ ಸುನಿಗ್ಗಹಂ ನಿಗ್ಗಹೇತ್ವಾ ಧಮ್ಮವಾದಂ ಪತಿಟ್ಠಾಪೇಸಿ.

ವಿಸ್ಸಜ್ಜನಾ – ಛಟ್ಠಂ ಪನ ಭನ್ತೇ ಪಾಯಾಸಿರಾಜಞ್ಞೋ ಸೀಲವನ್ತೇ ಸಮಣಬ್ರಾಹ್ಮಣೇ ಕಲ್ಯಾಣಧಮ್ಮೇ ಜೀವಿತುಕಾಮೇ ಅಮರಿತುಕಾಮೇ

ಸುಖಕಾಮೇ ¶ ದುಕ್ಖಪಟಿಕೂಲೇ ಸಾಧಕಪರಿಯಾಯಂ ದಸ್ಸೇತ್ವಾ ಅತ್ತನೋ ವಾದಂ ಪತಿಟ್ಠಾಪೇಸಿ, ಆಯಸ್ಮಾಚ ಕುಮಾರಕಸ್ಸಪೋ ಗಬ್ಭಿನೀ ಉಪಮಾಯ ತಂ ಮಿಚ್ಛಾವಾದಂ ಸಹಧಮ್ಮೇನ ಸುನಿಗ್ಗಹಿತಂ ನಿಗ್ಗಹೇತ್ವಾ ಧಮ್ಮವಾದಂ ಪತಿಟ್ಠಾಪೇಸಿ.

ಸಾಧು ¶ ಸಾಧು ಆವುಸೋ, ಸಾಧು ಖೋ ಆವುಸೋ ಯಂ ಆಯಸ್ಮಾ ಕುಮಾರಕಸ್ಸಪೋ ಗಬ್ಭಿನೀಉಪಮಂ ದಸ್ಸೇತ್ವಾ ತಂ ಮಿಚ್ಛಾವಾದಂ ಪಟಿಕ್ಖಿಪಿತ್ವಾ ಧಮ್ಮವಾದಂ ಪತಿಟ್ಠಾಪೇಸಿ.

ಪುಚ್ಛಾ – ಅಥ ಪನಾವುಸೋ ಪಾಯಾಸಿರಾಜಞ್ಞೋ ಸತ್ತಮಂಪಿ ಕೀದಿಸಂ ಸಾಧಕಪರಿಯಾಯಂ ದಸ್ಸೇತ್ವಾ ಅತ್ತನೋ ವಾದಂ ಪತಿಟ್ಠಾಪೇಸಿ, ಕಥಞ್ಚಾಯಸ್ಮಾ ಕುಮಾರಕಸ್ಸಪೋ ತಂ ಮಿಚ್ಛಾವಾದಂ ಸಹಧಮ್ಮೇನ ಸುನಿಗ್ಗಹಂ ನಿಗ್ಗಹೇತ್ವಾ ಧಮ್ಮವಾದಂ ಪತಿಟ್ಠಾಪೇಸಿ.

ವಿಸ್ಸಜ್ಜನಾ – ಸತ್ತಮಂ ಪನ ಭನ್ತೇ ಪಾಯಾಸಿರಾಜಞ್ಞೋ ಕುಬ್ಭಿಯಂ ಪಕ್ಖಿಪಿತ್ವಾ ಮಾರಿತಪುರಿಸಂ ಸಾಧಕಪರಿಯಾಯಂ ದಸ್ಸೇತ್ವಾ ಅತ್ತನೋ ವಾದಂ ಪತಿಟ್ಠಾಪೇಸಿ, ಆಯಸ್ಮಾಚ ಕುಮಾರಕಸ್ಸಪೋ ಸುಪಿನಕೂಪಮಾಯ ತಂ ಮಿಚ್ಛಾವಾದಂ ಸಹಧಮ್ಮೇನ ಸುನಿಗ್ಗಹಿತಂ ನಿಗ್ಗಹೇತ್ವಾ ಧಮ್ಮವಾದಂ ಪತಿಟ್ಠಾಪೇಸಿ.

ಸಾಧು ¶ ಸಾಧು ಆವುಸೋ, ಸಾಧು ಖೋ ಆವುಸೋ ಯಂ ಆಯಸ್ಮಾ ಕುಮಾರಕಸ್ಸಪೋ ಸುಪಿನಕೂಪಮಂ ದಸ್ಸೇತ್ವಾ ಉಪ್ಪನ್ನಂ ಮಿಚ್ಛಾವಾದಂ ಸಹಧಮ್ಮೇನ ಸುನಿಗ್ಗಹಂ ನಿಗ್ಗಹೇತ್ವಾ ಧಮ್ಮವಾದಂ ಪತಿಟ್ಠಾಪೇಸಿ.

ಪುಚ್ಛಾ – ಅಥ ¶ ಪನಾವುಸೋ ಪಾಯಾಸಿರಾಜಞ್ಞೋ ಅಟ್ಠಮಮ್ಪಿ ನವಮಮ್ಪಿ ಕಥೇತಬ್ಬಂ ಕಥೇತ್ವಾ ದಸಮಂ ಕೀದಿಸಂ ಸಾಧಕಪರಿಯಾಯಂ ದಸ್ಸೇತ್ವಾ ಅತ್ತನೋ ವಾದಂ ಪತಿಟ್ಠಾಪೇಸಿ, ಕಥಞ್ಚಾಯಸ್ಮಾ ಕುಮಾರಕಸ್ಸಪೋ ಸಹಧಮ್ಮೇನ ತಂ ಮಿಚ್ಛಾವಾದಂ ಪಟಿನಿಸ್ಸಜ್ಜಾಪೇಸಿ.

ವಿಸ್ಸಜ್ಜನಾ – ಅಟ್ಠಮಮ್ಪಿ ಭನ್ತೇ ನವಮಮ್ಪಿ ಪಾಯಾಸಿರಾಜಞ್ಞೋ ಯಂ ವಾ ತಂ ವಾ ಪರಿಯಾಯಂ ದಸ್ಸೇತ್ವಾ ಅತ್ತನೋ ವಾದಂ ಪತಿಟ್ಠಾಪೇಸಿ, ದಸಮಂ ಪನ ಭನ್ತೇ ಪಾಯಾಸಿರಾಜಞ್ಞೋ ಛವಿಆದೀನಿ ಛಿನ್ದಿತ್ವಾ ಮಾರಿತಪುರಿಸಂ ಸಾಧಕಪರಿಯಾಯಂ ದಸ್ಸೇತ್ವಾ ಅತ್ತನೋ ವಾದಂ ಪತಿಟ್ಠಾಪೇಸಿ, ಆಯಸ್ಮಾ ಚ ಕುಮಾರಕಸ್ಸಪೋ ಅಗ್ಗಿಕಜಟಿಲೋಪಮಾಯ ತಂ ಮಿಚ್ಛಾವಾದಂ ಸಹಧಮ್ಮೇನ ಸುನಿಗ್ಗಹಿತಂ ನಿಗ್ಗಹೇತ್ವಾ ಧಮ್ಮವಾದಂ ಪತಿಟ್ಠಾಪೇಸಿ.

ಪಟಿನಿಸ್ಸಜ್ಜೇತಂ ¶ ರಾಜಞ್ಞ ಪಾಪಕಂ ದಿಟ್ಠಿಗತಂ. ಪಟಿನಿಸ್ಸಜ್ಜೇತಂ ರಾಜಞ್ಞ ಪಾಪಕಂ ದಿಟ್ಠಿಗತಂ.

ಸಾಧು ¶ ಸಾಧು ಆವುಸೋ, ಸಾಧು ಖೋ ಆವುಸೋ ಯಂ ಆಯಸ್ಮಾ ಕುಮಾರಕಸ್ಸಪೋ ಓಪಾಯಿಕಂ ಉಪಮಂ ದಸ್ಸೇತ್ವಾ ತಂ ಪಾಪಿಕಂ ಮಿಚ್ಛಾದಿಟ್ಠಿಂ ಪಟಿನಿಸ್ಸಜ್ಜಾಪೇಸಿ, ಯಂ ತಸ್ಸ ಭವೇಯ್ಯ ದೀಘರತ್ತಂ ಹಿತಾಯ ಸುಖಾಯ.

ಪುಚ್ಛಾ – ಆಯಸ್ಮತಾ ಆವುಸೋ ಕುಮಾರಕಸ್ಸಪೇನ ಪುರಿಮದಿವಸೇ ಪುಚ್ಛಿತವಿಸ್ಸಜ್ಜಿತಾಕಾರೇನ ಪಾಯಾಸಿಸ್ಸ ರಾಜಞ್ಞಸ್ಸ ಅಗ್ಗಿಕಜಟಿಲೋಪಮಂ ದಸ್ಸೇತ್ವಾ ತಸ್ಮಿಂ ಪಾಪಕೇ ದಿಟ್ಠಿಗತೇ ಪಟಿನಿಸ್ಸಜ್ಜಾಪಿತೇ ಸೋ ತಾವ ಥೇರಸ್ಸ ವಚನಂ ಅನಾದಿಯಿತ್ವಾ ಕೀದಿಸಞ್ಚ ಪಚ್ಚನೀಕಕಥಂ ಕಥೇಸಿ, ಕಥಞ್ಚ ಥೇರೋ ಕರುಣಾಸೀತಲಹದಯೋ ಹುತ್ವಾ ಅಪರಮ್ಪಿ ಉಪಮಂ ದಸ್ಸೇತ್ವಾ ತಂ ಪಾಪಕಂ ದಿಟ್ಠಿಗತಂ ಪಟಿನಿಸ್ಸಜ್ಜಾಪೇಸಿ.

ವಿಸ್ಸಜ್ಜನಾ – ಪಾಯಾಸಿ ಭನ್ತೇ ರಾಜಞ್ಞೋ ಆಯಸ್ಮತಾ ಕುಮಾರಕಸ್ಸಪೇನ ಅಗ್ಗಿಕಜಟಿಲೋಪಮಂ ದಸ್ಸೇತ್ವಾ ತಂ ಪಾಪಕಂ ದಿಟ್ಠಿಗತಂ ಪಟಿನಿಸ್ಸಜ್ಜಾಪಿತೇ ಕಿಞ್ಚಾಪಿ ಭವಂ ಕಸ್ಸಪೋ ಏವಮಾಹ, ಅಥ ಖೋ ನೇವಾಹಂ ಸಕ್ಕೋಮಿ ಇದಂ ಪಾಪಕಂ ದಿಟ್ಠಿಗತಂ ಪಟಿನಿಸ್ಸಜ್ಜಿತುನ್ತಿ ಏವಮಾದಿಕಂ ಪಚ್ಚನೀಕಕಥಂ ಕಥೇಸಿ, ಥೇರೋ ಚ ಭನ್ತೇ ಕುಮಾರಕಸ್ಸಪೋ ದ್ವೇ ಸತ್ಥವಾಹೋಪಮಂ ದಸ್ಸೇತ್ವಾ ತಂ ಪಾಪಕಂ ಮಿಚ್ಛಾವಾದಂ ಪಟಿನಿಸ್ಸಜ್ಜಾಪೇಸಿ.

ಸಾಧು ¶ ಸಾಧು ಆವುಸೋ, ಸಾಧು ಖೋ ಆವುಸೋ ಯಂ ಆಯಸ್ಮಾ ಕುಮಾರಕಸ್ಸಪೋ ಪಾಯಾಸಿಸ್ಸ ರಾಜಞ್ಞಸ್ಸ ದ್ವೇ ಸತ್ಥವಾಹೋಪಮಮ್ಪಿ ದಸ್ಸೇತ್ವಾ ತಂ ಪಾಪಕಂ ದಿಟ್ಠಿಗತಂ ಪಟಿನಿಸ್ಸಜ್ಜಾಪೇಸಿ, ತಞ್ಹಿ ತಸ್ಸ ಚ ತದನುಯಾಯೀನಞ್ಚ ಭವೇಯ್ಯ ದೀಘರತ್ತಂ ಹಿತಾಯ ಸುಖಾಯ.

ಪುಚ್ಛಾ – ಏವಂ ¶ ಪನಾವುಸೋ ಆಯಸ್ಮತಾ ಕುಮಾರಕಸ್ಸಪೇನ ಯಥಾ ವುತ್ತಾಹಿ ಬಹೂಹಿ ಉಪಮಾಹಿ ಚ ಅಪರಾಹಿ ಗೂಥಭಾರಿಕಅಕ್ಖಧುತ್ತಕೋಪಮಾಹಿ ಚ ತಸ್ಮಿಂ ಪಾಪಕೇ ದಿಟ್ಠಿಗತೇ ವಿಸ್ಸಜ್ಜಾಪಿತೇ ಸೋ ತಾವ ಥೇರಸ್ಸ ವಚನಂ ಅನಾದಿಯಿತ್ವಾವ ಪಚ್ಛಿಮಪಟಿಕ್ಖೇಪವಸೇನ ಕೀದಿಸಂ ಪಚ್ಚನೀಕಕಥಂ ಕಥೇಸಿ, ಕಥಞ್ಚ ಥೇರೋ ಕರುಣಾಸೀತಲಹದಯೋ ಹುತ್ವಾ ಪಚ್ಛಿಮಮ್ಪಿ ಉಪಮಂ ದಸ್ಸೇತ್ವಾ ತಂ ಪಾಪಕಂ ದಿಟ್ಠಿಗತಂ ಪಟಿನಿಸ್ಸಜ್ಜಾಪೇಸಿ.

ವಿಸ್ಸಜ್ಜನಾ – ಪಾಯಾಸಿ ಭನ್ತೇ ರಾಜಞ್ಞೋ ಏವಂ ಥೇರೇನ ನಾನಾಉಪಮಾಹಿ ತಸ್ಮಿಂ ಪಾಪಕೇ ದಿಟ್ಠಿಗತೇ ಪಟಿನಿಸ್ಸಜ್ಜಾಪಿತೇಪಿ ಪುರಿಮನಯೇನೇವ ಥೇರಸ್ಸ ಪಚ್ಚನೀಕಕಥಂ ಕಥೇಸಿ, ಥೇರೋಪಿ ಚ ಭನ್ತೇ ಪಚ್ಛಿಮಂ ಸಾಣಭಾರಿಕೂಪಮಂ ದಸ್ಸೇತ್ವಾ ಕರುಣಾಸೀತಲಹದಯೋ ತಂ ಪಾಪಕಂ ದಿಟ್ಠಿಗತಂ ಪಟಿನಿಸ್ಸಜ್ಜಾಪೇಸಿ.

ಸಾಧು ¶ ಸಾಧು ಆವುಸೋ, ಸಾಧು ಖೋ ಆವುಸೋ ಯಂ ಆಯಸ್ಮಾ ಕುಮಾರಕಸ್ಸಪೋ ಪಾಯಾಸಿಸ್ಸ ರಾಜಞ್ಞಸ್ಸ ಸಾಣಭಾರಿಕೋಪಮಮ್ಪಿ ದಸ್ಸೇತ್ವಾ ತಂ ಪಾಪಕಂ ದಿಟ್ಠಿಗತಂ ಪಟಿನಿಸ್ಸಜ್ಜಾಪೇಸಿ, ತಞ್ಹಿ ತಸ್ಸ ಚ ತದನುಯಾಯೀನಞ್ಚ ಭವೇಯ್ಯ ದೀಘರತ್ತಂ ಹಿತಾಯ ಸುಖಾಯ.

ಪುಚ್ಛಾ – ಇಮಾಯ ¶ ಪನಾವುಸೋ ಪಚ್ಛಿಮಿಕಾಯ ಸಾಣಭಾರಿಕೋಪಮಾಯ ದಸ್ಸಿತಾಯ ಪಾಯಾಸಿರಾಜಞ್ಞೋ ಥೇರಸ್ಸ ಧಮ್ಮದೇಸನಾನುಭಾವೇನ ಇಮಸ್ಮಿಂ ಧಮ್ಮವಿನಯೇ ಪಸನ್ನೋ ಹುತ್ವಾ ಕೀದಿಸಂ ಪಸನ್ನಾಕಾರಮಕಾಸಿ, ಕಥಞ್ಚ ಆಯಸ್ಮನ್ತಂ ಕುಮಾರಕಸ್ಸಪಂ ಅನುಸಾಸನಿಂ ಯಾಚಿ, ಕಥಞ್ಚಾಯಸ್ಮಾ ಕುಮಾರಕಸ್ಸಪೋ ಅನುಸಾಸಿ.

ವಿಸ್ಸಜ್ಜನಾ – ಇಮಾಯ ಚ ಪನ ಭನ್ತೇ ಉಪಮಾಯ ದಸ್ಸಿತಾಯ ಪಾಯಾಸಿ ರಾಜಞ್ಞೋ ‘‘ಪುರಿಮೇನೇವ ಅಹಂ ಓಪಮ್ಮೇನ ಭೋತೋ ಕಸ್ಸಪಸ್ಸ ಅತ್ತಮನೋ ಅಭಿರದ್ಧೋ ಏವಮಾದಿನಾ ಭನ್ತೇ ಪಾಯಾಸಿರಾಜಞ್ಞೋ ಇಮಸ್ಮಿಂ ಧಮ್ಮವಿನಯೇ ಆಯಸ್ಮತೋ ಕುಮಾರಕಸ್ಸಪಸ್ಸ ಧಮ್ಮದೇಸನಾಯ ಪಸನ್ನೋ ಪಸನ್ನಾಕಾರಮಕಾಸಿ. ಇಚ್ಛಾಮಿ ಚಾಹಂ ಭೋ ಕಸ್ಸಪ ಮಹಾಯಞ್ಞಂ ಯಜಿತುಂ, ಅನುಸಾಸತು ಮಂ ಭವಂ ಕಸ್ಸಪೋ ಯಂ ಮಮಸ್ಸ ದೀಘರತ್ತಂ ಹಿತಾಯ ಸುಖಾಯಾತಿ ಪಾಯಾಸಿ ರಾಜಞ್ಞೋ ಆಯಸ್ಮನ್ತಂ ಕುಮಾರಕಸ್ಸಪಂ ಅನುಸಾಸನಿಂ ಯಾಚಿ, ಆಯಸ್ಮಾ ಚ ಭನ್ತೇ ಕುಮಾರಕಸ್ಸಪೋ ದುಕ್ಖೇತ್ತೇ ದುಬ್ಭೂಮೇ ಪವುತ್ತಬೀಜೋಪಮಾಯ ದುಸ್ಸೀಲೇಸು ದಿನ್ನದಾನಸ್ಸ ನ ಮಹಪ್ಫಲಭಾವಂ ದಸ್ಸೇತ್ವಾ ಸುಖೇತ್ತೇ ಸುಭೂಮೇ ಪವುತ್ತಬೀಜೋಪಮಾಯ ಸೀಲವನ್ತೇಸು ದಿನ್ನದಾನಸ್ಸ ಮಹಪ್ಫಲಭಾವಂ ದಸ್ಸೇತ್ವಾ ಪಾಯಾಸಿಂ ರಾಜಞ್ಞಮನುಸಾಸಿ.

ಪುಚ್ಛಾ – ಕಥಞ್ಚಾವುಸೋ ¶ ಪಾಯಾಸಿರಾಜಞ್ಞೋ ದಾನಂ ಅದಾಸಿ, ಕಥಞ್ಚಸ್ಸ ಸಮ್ಪರಾಯೋ ಅಹೋಸಿ.

ವಿಸ್ಸಜ್ಜನಾ – ಪಾಯಾಸಿ ಭನ್ತೇ ರಾಜಞ್ಞೋ ಅಸಕ್ಕಚ್ಚಂ ದಾನಮದಾಸಿ, ಅಸಹತ್ಥಾ ದಾನಮದಾಸಿ, ಅಚಿತ್ತೀಕತಂ ದಾನಮದಾಸಿ, ಅಪವಿದ್ಧಂ ದಾನಮದಾಸಿ, ಸೋ ಅಸಕ್ಕಚ್ಚಂ ದಾನಂ ದತ್ವಾ ಅಸಹತ್ಥಾ ದಾನಂ ದತ್ವಾ ಅಚಿತ್ತೀಕತಂ ದಾನಂ ದತ್ವಾ ಅಪವಿದ್ಧಂ ದಾನಂ ದತ್ವಾ ಕಾಯಸ್ಸಭೇದಾ ಪರಂ ಮರಣಾ ಚಾತುಮಹಾರಾಜಿಕಾನಂ ದೇವಾನಂ ಸಹಬ್ಯತಂ ಉಪಪಜ್ಜಿ ಸುಞ್ಞಂ ಸೇರೀಸಕಂ ವಿಮಾನಂ.

ಪುಚ್ಛಾ – ತೇನಾವುಸೋ ¶ ಭಗವತಾ ಜಾನತಾ ಪಸ್ಸತಾ ಅರಹತಾ ಸಮ್ಮಾಸಮ್ಬುದ್ಧೇನ ಪಾಥಿಯವಗ್ಗೇ ಪಠಮಂ ಪಾಥಿಯಸುತ್ತಂ ಕತ್ಥ ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಭಾಸಿತಂ.

ವಿಸ್ಸಜ್ಜನಾ – ಮಲ್ಲೇಸು ಭನ್ತೇ ಅನುಪಿಯೇ ನಾಮ ಮಲ್ಲಾನಂ ನಿಗಮೇ ಭಗ್ಗವಗೋತ್ತಂ ಪರಿಬ್ಬಾಜಕಂ ಆರಬ್ಭ ಭಾಸಿತಂ, ಭಗ್ಗವಗೋತ್ತೋ ಭನ್ತೇ ಪರಿಬ್ಬಾಜಕೋ ಭಗವನ್ತಂ ಏತದವೋಚ ‘‘ಪುರಿಮಾನಿ ಭನ್ತೇ ದಿವಸಾನಿ ಪುರಿಮತರಾನಿ ಸುನಕ್ಖತ್ತೋ ಲಿಚ್ಛವಿಪುತ್ತೋ ಯೇನಾಹಂ ತೇನುಪಸಙ್ಕಮಿ, ಉಪಸಙ್ಕಮಿತ್ವಾ ಮಂ ಏತದವೋಚ ‘‘ಪಚ್ಚಕ್ಖಾತೋ ದಾನಿ ಮಯಾ ಭಗ್ಗವ ಭಗವಾ, ನ ದಾನಾಹಂ ಭಗವನ್ತಂ ಉದ್ದಿಸ್ಸ ವಿಹರಾಮೀ’ತಿ, ಕಚ್ಚೇ ತಂ ಭನ್ತೇ ತಥೇವ, ಯಥಾ ಸುನಕ್ಖತ್ತೋ, ಲಿಚ್ಛವಿಪುತ್ತೋ ಅವಚಾ’’ತಿ, ತಸ್ಮಿಂ ಭನ್ತೇ ವತ್ಥುಸ್ಮಿಂ ಭಾಸಿತಂ.

ಪುಚ್ಛಾ – ಉದುಮ್ಬರಿಕಸುತ್ತಂ ¶ ಪನಾವುಸೋ ಭಗವತಾ ಕತ್ಥ ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಭಾಸಿತಂ.

ವಿಸ್ಸಜ್ಜನಾ – ರಾಜಗಹೇ ಭನ್ತೇ ನಿಗ್ರೋಧಂ ಪರಿಬ್ಬಾಜಕಂ ಆರಬ್ಭ ಭಾಸಿತಂ, ನಿಗ್ರೋಧೋ ಭನ್ತೇ ಪರಿಬ್ಬಾಜಕೋ ಭಗವತೋ ಪರಮ್ಮುಖಾ ಭಗವನ್ತಂಯೇವ ಆರಬ್ಭ ಅನೇಕವಿಹಿತಂ ಅಭೂತಕಥಂ ಕಥೇಸಿ, ತಸ್ಮಿಂ ವತ್ಥುಸ್ಮಿಂ ಭಾಸಿತಂ.

ಪುಚ್ಛಾ – ಚಕ್ಕವತ್ತಿಸುತ್ತಂ ಪನಾವುಸೋ ಭಗವತಾ ಕತ್ಥ ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಭಾಸಿತಂ.

ವಿಸ್ಸಜ್ಜನಾ – ಮಗಧೇಸು ಭನ್ತೇ ಮಾತುಲಾಯಂ ಸಮ್ಬಹುಲೇ ಭಿಕ್ಖೂ ಆರಬ್ಭ ಅತ್ತಜ್ಝಾಸಯೇನ ಸುತ್ತನಿಕ್ಖೇಪೇನ ಭಗವತಾ ಭಾಸಿತಂ.

ಪುಚ್ಛಾ – ಅಗ್ಗಞ್ಞಸುತ್ತಂ ಪನಾವುಸೋ ಭಗವತಾ ಕತ್ಥ ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಭಾಸಿತಂ.

ವಿಸ್ಸಜ್ಜನಾ – ಸಾವತ್ಥಿಯಂ ಭನ್ತೇ ಪುಬ್ಬಾರಾಮೇ ಮಿಗಾರಮಾತುಪಾಸಾದೇ ವಾಸೇಟ್ಠಂ ಪಬ್ಬಜಿತಂ ಆರಬ್ಭ ಭಾಸಿತಂ, ಬ್ರಾಹ್ಮಣಾ ಭನ್ತೇ ವಾಸೇಟ್ಠ ಭಾರದ್ವಾಜೇ ಪಬ್ಬಜಿತೇ ಅಕ್ಕೋಸನ್ತಿ ಪರಿಭಾಸನ್ತಿ ಅತ್ತರೂಪಾಯ

ಪರಿಭಾಸಾಯ ¶ ಪರಿಪುಣ್ಣಾಯ ನೋ ಅಪರಿಪುಣ್ಣಾಯ, ತಸ್ಮಿಂ ಭನ್ತೇ ವತ್ಥುಸ್ಮಿಂ ಭಾಸಿತಂ.

ಪುಚ್ಛಾ – ಸಮ್ಪಸಾದನೀಯ ಸುತ್ತಂ ಪನಾವುಸೋ ಕತ್ಥ ಕೇನ ಭಾಸಿತಂ.

ವಿಸ್ಸಜ್ಜನಾ – ನಾಳನ್ದಾಯಂ ಭನ್ತೇ ಪಾವಾರಿಕಮ್ಬವನೇ ಆಯಸ್ಮತಾ ಸಾರಿಪುತ್ತೇನ ಭಾಸಿತಂ.

ಪುಚ್ಛಾ – ಪಾಸಾದಿಕಸುತ್ತಂ ಪನಾವುಸೋ ಭಗವತಾ ಕತ್ಥ ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಭಾಸಿತಂ.

ವಿಸ್ಸಜ್ಜನಾ – ಸಕ್ಕೇಸು ಭನ್ತೇ ವೇಧಞ್ಞಾನಾಮ ಸಕ್ಯಾನಂ ಅಮ್ಬವನೇ ಪಾಸಾದೇ ಚುನ್ದಂ ಸಮಣುದ್ದೇಸಂ ಆರಬ್ಭ ಭಾಸಿತಂ, ಚುನ್ದೋ ಭನ್ತೇ ಸಮಣುದ್ದೇಸೋ ಪಾವಾಯಂ ನಿಗಣ್ಠಸ್ಸ ನಾಟಪುತ್ತಸ್ಸ ಕಾಲಂ ಕಿರಿಯಾಯ ಭಿನ್ನಾನಂ ನಿಗಣ್ಠಾನಂ ದ್ವೇಧಿಕಜಾತಾನಂ ಭಣ್ಡನಜಾತಾನಂ ಕಲಹಜಾತಾನಂ ವಿವಾದಾಪನ್ನಾನಂ ಅಞ್ಞಮಞ್ಞಂ ಮುಖಸತ್ತೀಹಿ ವಿತುಜ್ಜನಕಾರಣಂ ಆಯಸ್ಮತೋ ಆನನ್ದಸ್ಸ ಆರೋಚೇಸಿ, ಆಯಸ್ಮಾ ಚ ಭನ್ತೇ ಆನನ್ದೋ ಭಗವತೋ ಏತಮತ್ಥಂ ಆರೋಚೇಸಿ, ತಸ್ಮಿಂ ಭನ್ತೇ ವತ್ಥುಸ್ಮಿಂ ಭಾಸಿತಂ.

ಪುಚ್ಛಾ – ಲಕ್ಖಣಸುತ್ತಂ ¶ ಪನಾವುಸೋ ಭಗವತಾ ಕತ್ಥ ಭಾಸಿತಂ.

ವಿಸ್ಸಜ್ಜನಾ – ಸಾವತ್ಥಿಯಂ ಭನ್ತೇ ಜೇತವನಮಹಾವಿಹಾರೇ ಭಾಸಿತಂ.

ಪುಚ್ಛಾ – ಸಿಙ್ಗಾಲಸುತ್ತಂ ಪನಾವುಸೋ ಭಗವತಾ ಕತ್ಥ ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಭಾಸಿತಂ.

ವಿಸ್ಸಜ್ಜನಾ – ರಾಜಗಹೇ ಭನ್ತೇ ಸಿಙ್ಗಾಲಂ ಗಹಪತಿಪುತ್ತಂ ಆರಬ್ಭ ಭಾಸಿತಂ, ಸಿಙ್ಗಾಲೋ ಭನ್ತೇ ಗಹಪತಿಪುತ್ತೋ ಕಾಲಸ್ಸೇವ ಉಟ್ಠಾಯ ರಾಜಗಹಾ ನಿಕ್ಖಮಿತ್ವಾ ಅಲ್ಲವತ್ಥೋ ಅಲ್ಲಕೇಸೋ ಪಞ್ಜಲಿಕೋ ಪುಥುದಿಸಾ ನಮಸ್ಸತಿ ಪುರತ್ಥಿಮಂ ದಿಸಂ ದಕ್ಖಿಣಂ ದಿಸಂ ಪಚ್ಛಿಮಂ ದಿಸಂ ಉತ್ತರಂ ದಿಸಂ ಹೇಟ್ಠಿಮಂ ದಿಸಂ ಉಪರಿಮಂ ದಿಸಂ, ತಸ್ಮಿಂ ಭನ್ತೇ ವತ್ಥುಸ್ಮಿಂ ಭಾಸಿತಂ.

ಪುಚ್ಛಾ – ಆಟಾನಾಟಿಯಸುತ್ತಂ ¶ ಪನಾವುಸೋ ಭಗವತಾ ಕತ್ಥ ಕಿಸ್ಮಿಂ ವತ್ಥುಸ್ಮಿಂ ಭಾಸಿತಂ.

ವಿಸ್ಸಜ್ಜನಾ – ರಾಜಗಹೇ ¶ ಭನ್ತೇ ಗಿಜ್ಝಕೂಟೇ ಪಬ್ಬತೇ ಭಾಸಿತಂ, ಭಗವತಿ ಭನ್ತೇ ರಾಜಗಹೇ ವಿಹರತಿ ಚತ್ತಾರೋ ಮಹಾರಾಜಾನೋ ಚತುದ್ದಿಸಂ ರಕ್ಖಂ ಠಪೇತ್ವಾ ಚತುದ್ದಿಸಂ ಗುಮ್ಬಂ ಠಪೇತ್ವಾ ಚತುದ್ದಿಸಂ ಓವರಣಂ ಠಪೇತ್ವಾ ಕೇವಲಕಪ್ಪಂ ಗಿಜ್ಝಕೂಟಪಬ್ಬತಂ ಓಭಾಸೇತ್ವಾ ಯೇನ ಭಗವಾ ತೇನುಪಸಙ್ಕಮಿಂಸು, ಉಪಸಙ್ಕಮಿತ್ವಾ ಭಗವನ್ತಂ ಅಭಿವಾದೇತ್ವಾ ಏಕಮನ್ತಂ ನಿಸೀದಿಂಸು, ಏಕಮನ್ತಂ ನಿಸಿನ್ನೋ ಖೋ ಭನ್ತೇ ವೇಸ್ಸವಣೋ ಮಹಾರಾಜಾ ಆಟಾನಾಟಿಯಂ ರಕ್ಖಂ ಭಗವತೋ ಆರೋಚೇಸಿ ಭಿಕ್ಖೂನಂ ಭಿಕ್ಖುನೀನಂ ಉಪಾಸಕಾನಂ ಉಪಾಸಿಕಾನಂ ಫಾಸುವಿಹಾರಾಯ, ತಸ್ಮಿಂ ಭನ್ತೇ ವತ್ಥುಸ್ಮಿಂ ಭಾಸಿತಂ.

ಪುಚ್ಛಾ – ಸಙ್ಗೀತಿ ¶ ಸುತ್ತಂ ಪನಾವುಸೋ ಕತ್ಥ ಕೇನ ಭಾಸಿತಂ.

ವಿಸ್ಸಜ್ಜನಾ – ಪಾವಾಯಂ ಭನ್ತೇ ಆಯಸ್ಮತಾ ಸಾರಿಪುತ್ತೇನ ಭಾಸಿತಂ.

ಪುಚ್ಛಾ – ದಸುತ್ತರಸುತ್ತಂ ಪನಾವುಸೋ ಕತ್ಥ ಕೇನ ಭಾಸಿತಂ.

ವಿಸ್ಸಜ್ಜನಾ – ದಸುತ್ತರಸುತ್ತಂ ಭನ್ತೇ ಚಮ್ಪಾಯಂ ಗಗ್ಗರಾಯ ಪೋಕ್ಖರಣಿಯಾ ತೀರೇ ಆಯಸ್ಮತಾ ಸಾರಿಪುತ್ತೇನ ಭಾಸಿತಂ.

ಪುಚ್ಛಾ – ಕೇ ¶ ಆವುಸೋ ಸಿಕ್ಖನ್ತಿ.

ವಿಸ್ಸಜ್ಜನಾ – ಸೇಕ್ಖಾ ಚ ಭನ್ತೇ ಪುಥುಜ್ಜನಕಲ್ಯಾಣಕಾ ಚ ಸಿಕ್ಖನ್ತಿ.

ಪುಚ್ಛಾ – ಕೇ ಆವುಸೋ ಸಿಕ್ಖಿತಸಿಕ್ಖಾ.

ವಿಸ್ಸಜ್ಜನಾ – ಅರಹನ್ತೋ ಭನ್ತೇ ಸಿಕ್ಖಿತಸಿಕ್ಖಾ.

ವಿಸ್ಸಜ್ಜನಾ – ಭಗವತೋ ಭನ್ತೇ ವಚನಂ ಅರಹತೋ ಸಮ್ಮಾಸಮ್ಬುದ್ಧಸ್ಸ.

ವಿಸ್ಸಜ್ಜನಾ – ಪರಮ್ಪರಾಯ ಭನ್ತೇ ಆಭತಂ.