📜

ನಮೋ ತಸ್ಸ ಭಗವತೋ ಅರಹತೋ ಸಮ್ಮಾಸಮ್ಬುದ್ಧಸ್ಸ

ವಿನಯಪಿಟಕ

ಸಂಗಾಯನಸ್ಸ ಪುಚ್ಛಾ ವಿಸ್ಸಜ್ಜನಾ

ಓಕಾಸ ದಾನಕಥಾ

ಸುಣಾತು ¶ ಮೇ ಭನ್ತೇ ಸಙ್ಘೋ, ಮಹತೀ ಅಯಂ ಪರಿಸಾ, ಏವರೂಪಾಯ ಪರಿಸಾಯ ನ ಸುಕರಾ ಸಬ್ಬಸೋ ಕಥಂ ಸಾವೇತುಂ, ತಸ್ಮಾ ಆಯಸ್ಮತೋ ಚ ಜವನತ್ಥೇರಸ್ಸ ಪಖುಕ್ಕೂನಗರವಾಸಿನೋ ಆಯಸ್ಮತೋ ಚ ವಿಚಿತ್ತಸಾರಾಭಿವಂಸಸ್ಸ ತಿಪಿಟಕಧರ ಧಮ್ಮಭಣ್ಡಾಗಾರಿಕಸ್ಸ ವಿನಯಪುಚ್ಛನಭಾರಞ್ಚ ವಿನಯವಿಸ್ಸಜ್ಜನ ಭಾರಞ್ಚ ಆವಹಿತುಂ ಓಕಾಸಂ ದಮ್ಮಿ, ಕರೋಥ ತುಮ್ಹೇ ಆವುಸೋ ಛಟ್ಠಸಂಗೀತಿಪುಬ್ಬಙ್ಗಮಾನಿ ವಿನಯಪುಚ್ಛನ ವಿನಯವಿಸ್ಸಜ್ಜನ ಕಿಚ್ಚಾನಿ ಯಥಾಧಮ್ಮಂ ಯಥಾವಿನಯಂ.

ಅಗ್ಗಮಹಾಪಣ್ಡಿತ ¶ ಭದನ್ತಜವನ ಮಹಾಥೇರೇನ

ಠಪಿತಾ

ಪುಚ್ಛಕ ಸಮ್ಮುತಿ ಞಾತ್ತಿ

ಸುಣಾತು ಮೇ ಭನ್ತೇ ಸಙ್ಘೋ, ಯದಿ ಸಙ್ಘಸ್ಸ ಪತ್ತಕಲ್ಲಂ, ಅಹಂ ಆಯಸ್ಮನ್ತಂ ವಿಚಿತ್ತಸಾರಾಭಿವಂಸಂ ತಿಪಿಟಕಧರ ಧಮ್ಮಭಣ್ಡಾಗಾರಿಕಂ ವಿನಯಂ ಪುಚ್ಛೇಯ್ಯಂ.

ತಿಪಿಟಕಧರ ಧಮ್ಮಭಣ್ಡಾಗಾರಿಕ

ಭದನ್ತವಿಚಿತ್ತಸಾರಾಭಿವಂಸೇನ

ಠಪಿತಾ ವಿಸ್ಸಜ್ಜಕ ಸಮ್ಮುತಿ ಞಾತ್ತಿ

ಸುಣಾತು ಮೇ ಭನ್ತೇ ಸಙ್ಘೋ, ಯದಿ ಸಙ್ಘಸ್ಸ ಪತ್ತಕಲ್ಲಂ, ಅಹಂ ಆಯಸ್ಮತಾ ಜವನತ್ಥೇರೇನ ಸಙ್ಘನಾಯಕ ಮಹಾಥೇರಸ್ಸ ಪಟಿನಿಧಿಭೂತೇನ ವಿನಯಂ ಪುಟ್ಠೋ ವಿಸ್ಸಜ್ಜೇಯ್ಯಂ.

ಪಠಮ ಪಾರಾಜಿಕ ಸಿಕ್ಖಾಪುಚ್ಛಾ

ಪುಚ್ಛಾ – ಯಂ ¶ ತೇನ ಆವುಸೋ ಭಗವತಾ ಜಾನತಾ ಪಸ್ಸತಾ ಅರಹತಾ ಸಮ್ಮಾಸಮ್ಬುದ್ಧೇನ ಪಠಮಂ ಪಾರಾಜಿಕಂ ಕತ್ಥ ಪಞ್ಞತ್ತಂ.

ವಿಸ್ಸಜ್ಜನಾ – ವೇಸಾಲಿಯಂ ಭನ್ತೇ ಪಞ್ಞತ್ತಂ.

ಪುಚ್ಛಾ – ಕಂ ಆವುಸೋ ಆರಬ್ಭ ಪಞ್ಞತ್ತಂ.

ವಿಸ್ಸಜ್ಜನಾ – ಸುದಿನ್ನಂ ಭನ್ತೇ ಕಲನ್ದಪುತ್ತಂ ಆರಬ್ಭ ಪಞ್ಞತ್ತಂ.

ಪುಚ್ಛಾ – ಕಿಸ್ಮಿಂ ಆವುಸೋ ವತ್ಥುಸ್ಮಿಂ ಪಞ್ಞತ್ತಂ.

ವಿಸ್ಸಜ್ಜನಾ – ಸುದಿನ್ದೋ ಭನ್ತೇ ಕಲನ್ದಪುತ್ತೋ ಪುರಾಣದುತಿಯಿಕಾಯ ಮೇಥುನಂ ಧಮ್ಮಂ ಪಟಿಸೇವಿ, ತಸ್ಮಿಂ ಭನ್ತೇ ವತ್ಥುಸ್ಮಿಂ ಪಞ್ಞತ್ತಂ.

ಪುಚ್ಛಾ – ಅತ್ಥಿ ಆವುಸೋ ತತ್ಥ ಪಞ್ಞತ್ತಿ ಅನುಪಞ್ಞತ್ತಿ ಅನುಪ್ಪನ್ನಪಞ್ಞತ್ತಿ.

ವಿಸ್ಸಜ್ಜನಾ – ಏಕಾ ಭನ್ತೇ ಪಞ್ಞತ್ತಿ ದ್ವೇ ಅನುಪಞ್ಞತ್ತಿಯೋ, ಅನುಪ್ಪನ್ನಪಞ್ಞತ್ತಿ ತಸ್ಮಿಂ ನತ್ಥಿ.

ಪುಚ್ಛಾ – ಸಬ್ಬತ್ಥಪಞ್ಞತ್ತಿನುಖೋ ¶ ಆವುಸೋ ಪದೇಸಪಞ್ಞತ್ತಿನುಖೋ.

ವಿಸ್ಸಜ್ಜನಾ – ಸಬ್ಬತ್ಥಪಞ್ಞತ್ತಿ ಭನ್ತೇ.

ಪುಚ್ಛಾ – ಸಾಧಾರಣಪಞ್ಞತ್ತಿನುಖೋ ಆವುಸೋ ಅಸಾಧಾರಣಪಞ್ಞತ್ತಿನುಖೋ.

ವಿಸ್ಸಜ್ಜನಾ – ಸಾಧಾರಣಪಞ್ಞತ್ತಿ ಭನ್ತೇ.

ಪುಚ್ಛಾ – ಏಕತೋಪಞ್ಞತ್ತಿನುಖೋ ಆವುಸೋ ಉಭತೋಪಞ್ಞತ್ತಿನುಖೋ.

ವಿಸ್ಸಜ್ಜನಾ – ಉಭತೋಪಞ್ಞತ್ತಿ ಭನ್ತೇ.

ಪುಚ್ಛಾ – ಪಞ್ಚನ್ನಂ ಆವುಸೋ ಪಾತಿಮೋಕ್ಖುದ್ದೇಸಾನಂ ಕತ್ಥೋಗಧಂ ಕತ್ಥ ಪರಿಯಾಪನ್ನಂ.

ವಿಸ್ಸಜ್ಜನಾ – ನಿದಾನೋಗಧಂ ¶ ಭನ್ತೇ ನಿದಾನಪರಿಯಾಪನ್ನಂ.

ಪುಚ್ಛಾ – ಕತಮೇನ ಆವುಸೋ ಉದ್ದೇಸೇನ ಉದ್ದೇಸಂ ಆಗಚ್ಛತಿ.

ವಿಸ್ಸಜ್ಜನಾ – ದುತಿಯೇನ ಭನ್ತೇ ಉದ್ದೇಸೇನ ಉದ್ದೇಸಂ ಆಗಚ್ಛತಿ.

ಪುಚ್ಛಾ – ಚತುನ್ನಂ ಆವುಸೋ ವಿಪತ್ತೀನಂ ಕತಮಾ ವಿಪತ್ತಿ.

ವಿಸ್ಸಜ್ಜನಾ – ಸೀಲವಿಪತ್ತಿ ಭನ್ತೇ.

ಪುಚ್ಛಾ – ಕಾ ಆವುಸೋ ವಿಪತ್ತಿ.

ವಿಸ್ಸಜ್ಜನಾ – ಅಸಂವರೋ ಭನ್ತೇ ವಿಪತ್ತಿ.

ಪುಚ್ಛಾ – ಕಾ ಆವುಸೋ ಸಮ್ಪತ್ತಿ.

ವಿಸ್ಸಜ್ಜನಾ – ಸಂವರೋ ಭನ್ತೇ ಸಮ್ಮತ್ತಿ.

ಪುಚ್ಛಾ – ಕಾ ¶ ಆವುಸೋ ಪಟಿಪತ್ತಿ.

ವಿಸ್ಸಜ್ಜನಾ – ನ ಏವರೂಪಂ ಕರಿಸ್ಸಾಮೀತಿ ಯಾವಜೀವಂ ಆಪಾಣಕೋಟಿಕಂ ಸಮಾದಾಯ ಸಿಕ್ಖತಿ ಸಿಕ್ಖಾಪದೇಸು, ಅಯಂ ಭನ್ತೇ ಪಟಿಪತ್ತಿ.

ಪುಚ್ಛಾ – ಕತಿ ಆವುಸೋ ಅತ್ಥವಸೇ ಪಟಿಚ್ಚ ಭಗವತಾ ಪಠಮಂ ಪಾರಾಜಿಕಂ ಪಞ್ಞತ್ತಂ.

ವಿಸ್ಸಜ್ಜನಾ – ದಸ ಭನ್ತೇ ಅತ್ಥವಸೇ ಪಟಿಚ್ಚ ಭಗವತಾ ಪಠಮಂ ಪಾರಾಜಿಕಂ ಪಞ್ಞತ್ತಂ, ೧ - ಸಙ್ಘಸುಟ್ಠುತಾಯ, ೨ - ಸಙ್ಘಫಾಸುತಾಯ, ೩ - ದುಮ್ಮಙ್ಕೂನಂ ಪುಗ್ಗಲಾನಂ ನಿಗ್ಗಹಾಯ, ೪ - ಪೇಸಲಾನಂ ಭಿಕ್ಖೂನಂ ಫಾಸುವಿಹಾರಾಯ, ೫ - ದಿಟ್ಠಧಮ್ಮಿಕಾನಂ ಆಸವಾನಂ ಸಂವರಾಯ, ೬ - ಸಮ್ಪರಾಯಿಕಾನಂ ಆಸವಾನಂ ಪಟಿಘಾತಾಯ, ೭ - ಅಪ್ಪಸನ್ನಾನಂ ಪಸಾದಾಯ, ೮ - ಪಸನ್ನಾನಂ ಭಿಯ್ಯೋಭಾವಾಯ, ೯ - ಸದ್ಧಮ್ಮಟ್ಠಿತಿಯಾ, ೧೦ - ವಿನಯಾನುಗ್ಗಹಾಯ.

ಪುಚ್ಛಾ – ಕೇ ¶ ಆವುಸೋ ಸಿಕ್ಖನ್ತಿ.

ವಿಸ್ಸಜ್ಜನಾ – ಸೇಕ್ಖಾಚ ಭನ್ತೇ ಪುಥುಜ್ಜನಕಲ್ಯಾಣಕಾಚ ಸಿಕ್ಖನ್ತಿ.

ಪುಚ್ಛಾ – ಕೇ ಆವುಸೋ ಸಿಕ್ಖಿತಸಿಕ್ಖಾ.

ವಿಸ್ಸಜ್ಜನಾ – ಅರಹನ್ತೋ ಭನ್ತೇ ಸಿಕ್ಖಿತಸಿಕ್ಖಾ.

ಪುಚ್ಛಾ – ಕತ್ಥ ಆವುಸೋ ಠಿತಂ.

ವಿಸ್ಸಜ್ಜನಾ – ಸಿಕ್ಖಾಕಾಮೇಸು ಭನ್ತೇ ಠಿತಂ.

ಪುಚ್ಛಾ – ಕೇ ಆವುಸೋ ಧಾರೇನ್ತಿ.

ವಿಸ್ಸಜ್ಜನಾ – ಯೇಸಂ ಭನ್ತೇ ವತ್ತತಿ ತೇ ಧಾರೇನ್ತಿ.

ಪುಚ್ಛಾ – ಕಸ್ಸ ¶ ಆವುಸೋ ವಚನಂ.

ವಿಸ್ಸಜ್ಜನಾ – ಭಗವತೋ ಭನ್ತೇ ವಚನಂ ಅರಹತೋ ಸಮ್ಮಾಸಮ್ಬುದ್ಧಸ್ಸ.

ಪುಚ್ಛಾ – ಕೇನಾವುಸೋ ಆಭತಂ.

ವಿಸ್ಸಜ್ಜನಾ – ಪರಮ್ಪರಾಯ ಭನ್ತೇ ಆಭತಂ.

ಸಂಗಾಯನತ್ಥಾಯ ಸಙ್ಘಸ್ಸ ಞಾಪನಂ

ಸುಣಾತು ಮೇ ಭನ್ತೇ ಸಙ್ಘೋ ಅಹಂ ಭನ್ತೇ ಆಯಸ್ಮನ್ತಂ ವಿಚಿತ್ಥಸಾರಾಭಿವಂಸಂ ತಿಪಿಟಕಧರ ಧಮ್ಮಭಣ್ಡಾಗಾರಿಕಂ ಪಠಮಸ್ಸ ಪಾರಾಜಿಕಸ್ಸ ನಿದಾನಮ್ಪಿ ಪುಚ್ಛಿಂ, ಪುಗ್ಗಲಮ್ಪಿ ಪುಚ್ಛಿಂ, ವತ್ಥುಮ್ಪಿ ಪುಚ್ಛಿಂ, ಪಞ್ಞತ್ತಿ ಅನುಪಞ್ಞತ್ತಿಆದೀನಿಪಿ ಪುಚ್ಛಿಂ, ಪುಟ್ಠೋ ಪುಟ್ಠೋಚ ಸೋ ಆಯಸ್ಮಾವಿಚಿತ್ತಸಾರಾಭಿವಂಸೋ ವಿಸ್ಸಜ್ಜೇಸಿ, ಇತಿಹಿದಂ ಭನ್ತೇ ಪಠಮಂ ಪಾರಾಜಿಕ ಸಿಕ್ಖಾಪದಂ ನಿಮ್ಮಲಂ ಸುಪರಿಸುದ್ಧಂ ತಸ್ಸೇವ ಭಗವತೋ ವಚನಂ ಅರಹತೋ ಸಮ್ಮಾಸಮ್ಬುದ್ಧಸ್ಸ, ತಸ್ಮಾ ಯಥಾಪುರೇ ಮಹಾಕಸ್ಸಪಾದಯೋ ಮಹಾಥೇರವರಾ ಪೋರಾಣಸಂಗೀತಿಕಾರಾ ಬ್ರಹ್ಮಚರಿಯ ಸಙ್ಖಾತಸ್ಸ ಬುದ್ಧಸಾಸನಸ್ಸ ಚಿರಟ್ಠಿತಿಯಾ ಬಹುಜನಹಿತಾಯ ಬಹುಜನಸುಖಾಯ ಲೋಕಾನುಕಮ್ಪಾಯ ಅತ್ಥಾಯ ಹಿತಾಯ ಸುಖಾಯ ದೇವಮನುಸ್ಸಾನಂ ಧಮ್ಮವಿನಯಂ ಸಙ್ಗಾಯಿಂಸುಚೇವ ಅನುಸಙ್ಗಾಯಿಂಸುಚ, ಏವಮೇವ ಮಯಮ್ಪಿ ದಾನಿ ಸಬ್ಬೇವ ಛಟ್ಠಸಂಗೀತಿಮಹಾಧಮ್ಮಸಭಾಪರಿಯಾಪನ್ನಾ ಇದಂ ಪಠಮ ಪಾರಾಜಿಕ ಸಿಕ್ಖಾಪದಂ ಏಕತೋಸಜ್ಝಾಯನವಸೇನ ಸಂಗಾಯೇಯ್ಯಾಮ.

ರೇವತಾಭಿ ಪಣ್ಡಿತಧಜ ಸಾಸನವಂಸ ಮಹಾಧಮ್ಮರಾಜಗುರುನೋ

ಅಭಿಧಜಮಹಾರಟ್ಠಗುರುನೋಚ ಸಙ್ಘನಾಯಕ ಮಹಾಥೇರಸ್ಸ

ಓಕಾಸ ದಾನಕಥಾ

ಸುಣಾತು ¶ ಮೇ ಭನ್ತೇ ಸಙ್ಘೋ, ಮಹತೀ ಅಯಂ ಪರಿಸಾ, ಏವರೂಪಾಯ ಪರಿಸಾಯ ನ ಸುಕರಾ ಸಬ್ಬಸೋ ಕಥಂ ಸಾವೇತುಂ, ತಸ್ಮಾ ಆಯಸ್ಮತೋಚ ಸೋಭನಸ್ಸ ಸಾಸನರಿ ಸಾರಾಮಾಧಿವಾಸಿನೋ ಆಯಸ್ಮತೋಚ ವಿಚಿತ್ತಸಾರಾಭಿವಂಸಸ್ಸ ತಿಪಿಟಕಧರ ಧಮ್ಮಭಣ್ಡಾಗಾರಿಕಸ್ಸ ವಿನಯಪುಚ್ಛನಭಾರಞ್ಚ ವಿನಯವಿಸ್ಸಜ್ಜನಭಾರಞ್ಚ ಆವಹಿತುಂ ಓಕಾಸಂ ದಮ್ಮಿ, ಕರೋಥ ತುಮ್ಹೇ ಆವುಸೋ ಛಟ್ಠಸಂಗೀತಿಪುಬ್ಬಙ್ಗಮಾನಿ ವಿನಯಪುಚ್ಛನ ವಿನಯವಿಸ್ಸಜ್ಜನ ಕಿಚ್ಚಾನಿ ಯಥಾಧಮ್ಮಂ ಯಥಾವಿನಯಂ.

ಅಗ್ಗಮಹಾಪಣ್ಡಿತ ಭದನ್ತ ಸೋಭನತ್ಥೇರೇನ

ಠಪಿತಾ ಪುಚ್ಛಕ ಸಮ್ಮುತಿ ಞಾತ್ತಿ

ಸುಣಾತು ಮೇ ಭನ್ತೇ ಸಙ್ಘೋ, ಯದಿ ಸಙ್ಘಸ್ಸ ಪತ್ತಕಲ್ಲಂ, ಅಹಂ ಆಯಸ್ಮನ್ತಂ ವಿಚಿತ್ತಸಾರಾಭಿವಂಸಂ ತಿಪಿಟಕಧರ ಧಮ್ಮಭಣ್ಡಾಗಾರಿಕಂ ವಿನಯಂ ಪುಚ್ಛೇಯ್ಯಂ.

ತಿಪಿಟಕಧರ ಧಮ್ಮಭಣ್ಡಾಗಾರಿಕ

ಭದನ್ತವಿಚಿತ್ತಸಾರಾಭಿವಂಸೇನ

ಠಪಿತಾ ವಿಸ್ಸಜ್ಜಕ ಸಮ್ಮುತಿ ಞಾತ್ತಿ

ಸುಣಾತು ¶ ಮೇ ಭನ್ತೇ ಸಙ್ಘೋ, ಯದಿಸಙ್ಘಸ್ಸ ಪತ್ತಕಲ್ಲಂ, ಅಹಂ ಆಯಸ್ಮತಾ ಸೋಭನತ್ಥೇರೇನ ಸಙ್ಘನಾಯಕ ಮಹಾಥೇರಸ್ಸ ಪಟಿನಿಧಿಭೂತೇನ ವಿನಯಂ ಪುಟ್ಠೋ ವಿಸ್ಸಜ್ಜೇಯ್ಯಂ.

ದುತಿಯ ಪಾರಾಜಿಕ ಸಿಕ್ಖಾಪುಚ್ಛಾ

ಪುಚ್ಛಾ – ಯಂ ¶ ತೇನ ಆವುಸೋ ಭಗವತಾ ಜಾನತಾ ಪಸ್ಸತಾ ಅರಹತಾ ಸಮ್ಮಾಸಮ್ಬುದ್ಧೇನ ದುತಿಯಂ ಪಾರಾಜಿಕಂ ಕತ್ಥ ಪಞ್ಞತ್ತಂ.

ವಿಸ್ಸಜ್ಜನಾ – ರಾಜಗಹೇ ಭನ್ತೇ ಪಞ್ಞತ್ತಂ.

ಪುಚ್ಛಾ – ಕಂ ಆವುಸೋ ಆರಬ್ಭ ಪಞ್ಞತ್ತಂ.

ವಿಸ್ಸಜ್ಜನಾ – ಧನಿಯಂ ಭನ್ತೇ ಕುಮ್ಭಕಾರಪುತ್ತಂ ಆರಬ್ಭ ಪಞ್ಞತ್ತಂ.

ಪುಚ್ಛಾ – ಕಿಸ್ಮಿಂ ಆವುಸೋ ವತ್ಥುಸ್ಮಿಂ ಪಞ್ಞತ್ತಂ.

ವಿಸ್ಸಜ್ಜನಾ – ಧನಿಯೋ ಭನ್ತೇ ಕುಮ್ಭಕಾರಪುತ್ತೋ ರಞ್ಞೋ ದಾರೂನಿ ಅದಿನ್ನಂ ಆದಿಯಿ, ತಸ್ಮಿಂ ವತ್ಥುಸ್ಮಿಂ ಪಞ್ಞತ್ತಂ.

ಪುಚ್ಛಾ – ಅತ್ಥಿ ¶ ಆವುಸೋ ತತ್ಥ ಪಞ್ಞತ್ತಿ ಅನುಪಞ್ಞತ್ತಿ ಅನುಪ್ಪನ್ನಪಞ್ಞತ್ತಿ.

ವಿಸ್ಸಜ್ಜನಾ – ಏಕಾ ಭನ್ತೇ ಪಞ್ಞತ್ತಿ ಏಕಾ ಅನುಪಞ್ಞತ್ತಿ ಅನುಪ್ಪನ್ನಪಞ್ಞತ್ತಿ ತಸ್ಮಿಂ ನತ್ಥಿ.

ಪುಚ್ಛಾ – ಕಾ ಆವುಸೋ ತತ್ಥ ಮೂಲಪಞ್ಞತ್ತಿ.

ವಿಸ್ಸಜ್ಜನಾ – ಯೋ ಪನ ಭಿಕ್ಖು ಅದಿನ್ನಂ ಥೇಯ್ಯಸಙ್ಖಾತಂ ಆದಿಯೇಯ್ಯ, ಯಥಾರೂಪೇ ಅದಿನ್ನಾದಾನೇ ರಾಜಾನೋ ಚೋರಂ ಗಹೇತ್ವಾ ಹನೇಯ್ಯುಂವಾ ಬನ್ಧೇಯ್ಯುಂವಾ ಪಬ್ಬಾಜೇಯ್ಯುಂವಾ ಚೋರೋಸಿ ಬಾಲೋಸಿ ಮುಳ್ಹೋಸಿ ಥೇನೋಸೀತಿ ತಥಾರೂಪಂ ಭಿಕ್ಖು ಅದಿನ್ನಂ ಆದಿಯಮಾನೋ ಅಯಮ್ಪಿ ಪಾರಾಜಿಕೋ ಹೋತಿ ಅಸಂವಾಸೋತಿ ಅಯಂ ಭನ್ತೇ ತತ್ಥ ಮೂಲಪಞ್ಞತ್ತಿ.

ಪುಚ್ಛಾ – ಕಾ ¶ ಆವುಸೋ ತತ್ಥ ಅನುಪಞ್ಞತ್ತಿ.

ವಿಸ್ಸಜ್ಜನಾ – ಗಾಮಾವಾ ಅರಞ್ಞಾವಾತಿ ಅಯಂ ಭನ್ತೇ ತತ್ಥ ಅನುಪಞ್ಞತ್ತಿ.

ಪುಚ್ಛಾ – ಕಾ ಆವುಸೋ ತತ್ಥ ಪರಿಪುಣ್ಣಪಞ್ಞತ್ತಿ.

ವಿಸ್ಸಜ್ಜನಾ – ಯೋ ಪನ ಭಿಕ್ಖು ಗಾಮಾವಾ ಅರಞ್ಞಾವಾ ಅದಿನ್ನಂ ಥೇಯ್ಯಸಙ್ಖಾತಂ ಆದಿಯೇಯ್ಯ, ಕಥಾರೂಪೇ ಅದಿನ್ನಾದಾನೇ ರಾಜಾನೋ ಚೋರಂ ಗಹೇತ್ವಾ ಹನೇಯ್ಯುಂವಾ ಬನ್ಧೇಯ್ಯುಂವಾ ಪಬ್ಬಾಜೇಯ್ಯುಂವಾ ಚೋರೋಸಿ ಬಾಲೋಸಿ ಮೂಳ್ಹೋಸಿ ಥೇನೋಸೀತಿ ತಥಾರೂಪಂ ಭಿಕ್ಖು ಅದಿನ್ನಂ ಆದಿಯಮಾನೋ ಅಯಮ್ಪಿ ಪಾರಾಜಿಕೋ ಹೋತಿ ಅಸಂವಾಸೋತಿ ಅಯಂ ಭನ್ತೇ ತತ್ಥ ಪರಿಪುಣ್ಣಪಞ್ಞತ್ತಿ.

ಪುಚ್ಛಾ – ಸಬ್ಬತ್ಥಪಞ್ಞತ್ತಿ ¶ ನುಖೋ ಆವುಸೋ ಪದೇಸಪಞ್ಞತ್ತಿನುಖೋ.

ವಿಸ್ಸಜ್ಜನಾ – ಸಬ್ಬತ್ಥಪಞ್ಞತ್ತಿ ಭನ್ತೇ.

ಪುಚ್ಛಾ – ಸಾಧಾರಣಪಞ್ಞತ್ತಿನುಖೋ ಆವುಸೋ ಅಸಾಧಾರಣಪಞ್ಞತ್ತಿ ನುಖೋ.

ವಿಸ್ಸಜ್ಜನಾ – ಸಾಧಾರಣಪಞ್ಞತ್ತಿ ಭನ್ತೇ.

ಪುಚ್ಛಾ – ಏಕತೋಪಞ್ಞತ್ತಿನುಖೋ ಆವುಸೋ ಉಭತೋಪಞ್ಞತ್ತಿನುಖೋ.

ವಿಸ್ಸಜ್ಜನಾ – ಉಭತೋಪಞ್ಞತ್ತಿ ಭನ್ತೇ.

ಪುಚ್ಛಾ – ತಸ್ಮಿಂ ¶ ಆವುಸೋ ದುತಿಯ ಪಾರಾಜಿಕೇ ಅದಿನ್ನಂ ಆದಿಯನ್ತೋ ಕತಿ ಆಪತ್ತಿಯೋ ಆಪಜ್ಜತಿ ವಿಭಜಿತ್ವಾ ವಿಸ್ಸಜ್ಜೇಹಿ.

ವಿಸ್ಸಜ್ಜನಾ – ಅದಿನ್ನಂ ಭನ್ತೇ ಆದಿಯನ್ತೋ ತಿಸ್ಸೋ ಆಪತ್ತಿಯೋ ಆಪಜ್ಜತಿ, ಪಞ್ಚ ಮಾಸಕಂವಾ ಅತಿರೇಕ ಪಞ್ಚ ಮಾಸಕಂವಾ ಅಗ್ಘನಕಂ ಅದಿನ್ನಂ ಥೇಯ್ಯಸಙ್ಖಾತಂ ಆದಿಯತಿ ಆಪತ್ತಿ ಪಾರಾಜಿಕಸ್ಸ, ಊನಪಞ್ಚಮಾಸಕಂವಾ ಅತಿರೇಕಮಾಸಕಂವಾ ಅದಿನ್ನಂ ಥೇಯ್ಯಸಙ್ಖಾತಂ ಆದಿಯತಿ ಆಪತ್ತಿ ಥುಲ್ಲಚ್ಚಯಸ್ಸ, ಮಾಸಕಂವಾ ಊನಮಾಸಕವಾ ಅಗ್ಘನಕಂ ಅದಿನ್ನಂ ಥೇಯ್ಯಸಙ್ಖಾತಂ ಆದಿಯತಿ ಆಪತ್ತಿ ದುಕ್ಕಟಸ್ಸ, ಅದಿನ್ನಂ ಭನ್ತೇ ಆದಿಯನ್ತೋ ಇಮಾ ತಿಸ್ಸೋ ಆಪತ್ತಿಯೋ ಆಪಜ್ಜತಿ.

ಪುಚ್ಛಾ – ಕೇಸಂ ¶ ಆವುಸೋ ಅನಾಪತ್ತಿ.

ವಿಸ್ಸಜ್ಜನಾ – ದಸನ್ನಂ ಭನ್ತೇ ಪುಗ್ಗಲಾನಂ ಅನಾಪತ್ತಿ, ಸಕಸಞ್ಞಿಸ್ಸ, ವಿಸ್ಸಾಸಗ್ಗಾಹೇನ ಗಣ್ಹನ್ತಸ್ಸ, ತಾವಕಾಲಿಕಂ ಗಣ್ಹನ್ತಸ್ಸ, ಪೇತಪರಿಗ್ಗಹಂ ಗಣ್ಹನ್ತಸ್ಸ, ತಿರಚ್ಛಾನಗತಪರಿಗ್ಗಹಂ ಗಣ್ಹನ್ತಸ್ಸ, ಪಂಸುಕೂಲಸಞ್ಞಿಸ್ಸ, ಉಮ್ಮತ್ತಕಸ್ಸ, ಖಿತ್ತಚಿತ್ತಸ್ಸ, ವೇದನಾಟ್ಟಸ್ಸ, ಆದಿಕಮ್ಮಿಕಸ್ಸಾತಿ.

ಪುಚ್ಛಾ – ಪಞ್ಚನ್ನಂ ಆವುಸೋ ಪಾತಿಮೋಕ್ಖುದ್ದೇಸಾನಂ ಕತ್ಥೋಗಧಂ ಕತ್ಥಪರಿಯಾಪನ್ನಂ.

ವಿಸ್ಸಜ್ಜನಾ – ನಿದಾನೋಗಧಂ ಭನ್ತೇ ನಿದಾನಪರಿಯಾಪನ್ನಂ.

ಪುಚ್ಛಾ – ಕತಮೇನ ¶ ಆವುಸೋ ಉದ್ದೇಸೇನ ಉದ್ದೇಸಂ ಆಗಚ್ಛತಿ.

ವಿಸ್ಸಜ್ಜನಾ – ದುತಿಯೇನ ಭನ್ತೇ ಉದ್ದೇಸೇನ ಉದ್ದೇಸಂ ಆಗಚ್ಛತಿ.

ಪುಚ್ಛಾ – ಚತುನ್ನಂ ಆವುಸೋ ವಿಪತ್ತೀನಂ ಕತಮಾ ವಿಪತ್ತಿ.

ವಿಸ್ಸಜ್ಜನಾ – ಸೀಲವಿಪತ್ತಿ ಭನ್ತೇ.

ಪುಚ್ಛಾ – ಸತ್ತನ್ನಂ ಆವುಸೋ ಆಪತ್ತಿಕ್ಖನ್ಧಾನಂ ಕತಮೋ ಆಪತ್ತಿಕ್ಖನ್ಧೋ.

ವಿಸ್ಸಜ್ಜನಾ – ಪಾರಾಜಿಕಾಪತ್ತಿಕ್ಖನ್ಧೋ ಭನ್ತೇ.

ಪುಚ್ಛಾ – ಛನ್ನಂ ಆವುಸೋ ಆಪತ್ತಿಸಮುಟ್ಠಾನಾನಂ ಕತಿಹಿ ಸಮುಟ್ಠಾನೇಹಿ ಸಮುಟ್ಠಾತಿ.

ವಿಸ್ಸಜ್ಜನಾ – ತೀಹಿ ಭನ್ತೇ ಸಮುಟ್ಠಾನೇಹಿ ಸಮುಟ್ಠಾತಿ, ಸಿಯಾ ಕಾಯತೋಚ ಚಿತ್ತತೋಚ ಸಮುಟ್ಠಾತಿ, ನ ವಾಚಾತೋ, ಸಿಯಾ ವಾಚಾತೋಚ

ಚಿತ್ತತೋಚ ¶ ಸಮುಟ್ಠಾತಿ, ನ ಕಾಯತೋ, ಸಿಯಾ ಕಾಯತೋಚ ವಾಚಾತೋಚ ಚಿತ್ತತೋಚ ಸಮುಟ್ಠಾತಿ.

ಪುಚ್ಛಾ – ಚತುನ್ನಂ ಆವುಸೋ ಅಧಿಕರಣಾನಂ ಕತಮಂ ಅಧಿಕರಣಂ.

ವಿಸ್ಸಜ್ಜನಾ – ಆಪತ್ತಾಧಿಕರಣಂ ಭನ್ತೇ.

ಪುಚ್ಛಾ – ಸತ್ತನ್ನಂ ಆವುಸೋ ಸಮಥಾನಂ ಕತಿಹಿ ಸಮಥೇಹಿ ಸಮ್ಮತಿ.

ವಿಸ್ಸಜ್ಜನಾ – ದ್ವಿಹಿ ಭನ್ತೇ ಸಮಥೇಹಿ ಸಮ್ಮತಿ ಸಮ್ಮುಖಾವಿನಯೇನಚ ಪಟಿಞ್ಞಾತ ಕರಣೇನಚ.

ಪುಚ್ಛಾ – ಕೋ ¶ ಆವುಸೋ ತತ್ಥ ವಿನಯೋ, ಕೋ ತತ್ಥ ಅಭಿವಿನಯೋ.

ವಿಸ್ಸಜ್ಜನಾ – ಪಞ್ಞತ್ತಿ ಭನ್ತೇ ವಿನಯೋ ವಿಭತ್ತಿ ಅಭಿವಿನಯೋ.

ಪುಚ್ಛಾ – ಕಿಂಆವುಸೋ ತತ್ಥ ಪಾತಿಮೋಕ್ಖಂ ಕಿಂ ತತ್ಥ ಅಧಿಪಾತಿಮೋಕ್ಖಂ.

ವಿಸ್ಸಜ್ಜನಾ – ಪಞ್ಞತ್ತಿ ಭನ್ತೇ ಪಾತಿಮೋಕ್ಖಂ, ವಿಭತ್ತಿ ಅಧಿಪಾತಿಮೋಕ್ಖಂ.

ಪುಚ್ಛಾ – ಕಾ ಆವುಸೋ ವಿಪತ್ತಿ.

ವಿಸ್ಸಜ್ಜನಾ – ಅಸಂವರೋ ಭನ್ತೇ ವಿಪತ್ತಿ.

ಪುಚ್ಛಾ – ಕಾ ¶ ಆವುಸೋ ಸಮ್ಪತ್ತಿ.

ವಿಸ್ಸಜ್ಜನಾ – ಸಂವರೋ ಭನ್ತೇ ಸಮ್ಪತ್ತಿ.

ಪುಚ್ಛಾ – ಕಾ ಆವುಸೋ ಪಟಿಪತ್ತಿ.

ವಿಸ್ಸಜ್ಜನಾ – ನ ಏವರೂಪಂ ಕರಿಸ್ಸಾಮೀತಿ ಯಾವಜೀವಂ ಆಪಾಣಕೋಟಿಕಂ ಸಮಾದಾಯ ಸಿಕ್ಖತಿ ಸಿಕ್ಖಾಪದೇಸು ಅಯಂ ಭನ್ತೇ ತತ್ಥ ಪಟಿಪತ್ತಿ.

ಪುಚ್ಛಾ – ಕತಿ ಆವುಸೋ ಅತ್ಥವಸೇ ಪಟಿಚ್ಚ ಭಗವತಾ ದುತಿಯಂ ಪಾರಾಜಿಕಂ ಪಞ್ಞತ್ತಂ.

ವಿಸ್ಸಜ್ಜನಾ – ದಸ ಭನ್ತೇ ಅತ್ಥವಸೇ ಪಟಿಚ್ಚ ಭಗವತಾ ದುತಿಯಂ ಪಾರಾಜಿಕಂ ಪಞ್ಞತ್ತಂ. ಸಙ್ಘಸುಟ್ಠುತಾಯ ಸಙ್ಘಫಾಸುತಾಯ ದುಮ್ಮಙ್ಕೂನಂ ಪುಗ್ಗಲಾನಂ ನಿಗ್ಗಹಾಯ ಪೇಸಲಾನಂ ಭಿಕ್ಖೂನಂ ಫಾಸುವಿಹಾರಾಯ ದಿಟ್ಠಧಮ್ಮಿಕಾನಂ ಆಸವಾನಂ ಸಂವರಾಯ ಸಮ್ಪರಾಯಿಕಾನಂ ಆಸವಾನಂ ಪಟಿಘಾತಾಯ ಅಪ್ಪಸನ್ನಾನಂ ಪಸಾದಾಯ ಪಸನ್ನಾನಂ ಭಿಯ್ಯೋಭಾವಾಯ ಸದ್ಧಮ್ಮಟ್ಠಿತಿಯಾ ವಿನಯಾನುಗ್ಗಹಾಯ.

ಪುಚ್ಛಾ – ಕೋ ¶ ಆವುಸೋ ಸಿಕ್ಖನ್ತಿ.

ವಿಸ್ಸಜ್ಜನಾ – ಸೇಕ್ಖಾಚ ಭನ್ತೇ ಪುಥುಜ್ಜನಕಲ್ಯಾಣಕಾಚ ಸಿಕ್ಖನ್ತಿ.

ಪುಚ್ಛಾ – ಕೇ ಆವುಸೋ ಸಿಕ್ಖಿತಸಿಕ್ಖಾ.

ವಿಸ್ಸಜ್ಜನಾ – ಅರಹನ್ತೋ ಭನ್ತೇ ಸಿಕ್ಖಿತಸಿಕ್ಖಾ.

ಪುಚ್ಛಾ – ಕತ್ಥ ¶ ಆವುಸೋ ಠಿತಂ.

ವಿಸ್ಸಜ್ಜನಾ – ಸಿಕ್ಖಾಕಾಮೇಸು ಭನ್ತೇ ಠಿತಂ.

ಪುಚ್ಛಾ – ಕೇ ಆವುಸೋ ಧಾರೇನ್ತಿ.

ವಿಸ್ಸಜ್ಜನಾ – ಯೇಸಂ ಭನ್ತೇ ವತ್ತತಿ ತೇ ಧಾರೇನ್ತಿ.

ಪುಚ್ಛಾ – ಕಸ್ಸ ಆವುಸೋ ವಚನಂ.

ವಿಸ್ಸಜ್ಜನಾ – ಭಗವತಾ ಭನ್ತೇ ವಚನಂ ಅರಹತೋ ಸಮ್ಮಾಸಮ್ಮುದ್ಧಸ್ಸ.

ಪುಚ್ಛಾ – ಕೇನಾವುಸೋ ¶ ಆಭತಂ.

ವಿಸ್ಸಜ್ಜನಾ – ಪರಮ್ಪರಾಯ ಭನ್ತೇ ಆಭತಂ.

ಪುಚ್ಛಾ – ಅತ್ಥಿ ನು ಖೋ ಆವುಸೋ ತತ್ಥ ಉಪನೇತಬ್ಬಂ ವಾ ಅಪನೇತಬ್ಬಂ ವಾ ಅಕ್ಖರಪದಪಚ್ಚಾಭಟ್ಠಂ ವಾ ವಿರದ್ಧಪದಬ್ಯಞ್ಜನಂ ವಾ.

ವಿಸ್ಸಜ್ಜನಾ – ನತ್ಥಿ ಭನ್ತೇ.

‘‘ಸಂಗಾಯನತ್ಥಾಯ ಸಙ್ಘಸ್ಸ ಞಾಪನಂ’’

ಸುಣಾತು ¶ ಮೇ ಭನ್ತೇ ಸಙ್ಘೋ ಅಹಂ ಭನ್ತೇ ಆಯಸ್ಮನ್ತಂ ವಿಚಿತ್ತಸಾರಾಭಿವಂಸ ತಿಪಿಟಕಧರಧಮ್ಮಭಣ್ಡಾಗಾರಿಕಂ ದುತಿಯಸ್ಸ ಪಾರಾಜಿಕಸ್ಸ ನಿದಾನಮ್ಪಿ ಪುಚ್ಛಿಂ, ಪುಗ್ಗಲಮ್ಪಿ ಪುಚ್ಛಿಂ, ವತ್ಥುಮ್ಪಿ ಪುಚ್ಛಿಂ, ಪಞ್ಞತ್ತಿಮ್ಪಿ ಪುಚ್ಛಿಂ, ಅನುಪಞ್ಞತ್ತಿಮ್ಪಿ ಪುಚ್ಛಿಂ, ಆಪತ್ತಿಮ್ಪಿ ಪುಚ್ಛಿಂ, ಅನಾಪತ್ತಿಮ್ಪಿ ಪುಚ್ಛಿಂ, ಅಞ್ಞಾನಿಪಿ ಈದಿಸಾನಿ ಪುಚ್ಛಿತಬ್ಬಟ್ಠಾನಾನಿ ಅನೇಕಾನಿ ಪುಚ್ಛಿಂ, ಪುಟ್ಠೋ ಪುಟ್ಠೋಚ ಸೋ ಆಯಸ್ಮಾ ವಿಚಿತ್ತಸಾರಾಭಿವಂಸೋ ವಿಸ್ಸಜ್ಜೇಸಿ. ಇತಿ ಹಿದಂ ಭನ್ತೇ ಇದಂ ದುತಿಯಂ ಪಾರಾಜಿಕ ಸಿಕ್ಖಾಪದಂ ನಿಮ್ಮಲಂ, ಸುಪರಿಸುದ್ಧಂ, ತಸ್ಸೇವ ಭಗವತೋ ವಚನಂ ಅರಹತೋ ಸಮ್ಮಾಸಮ್ಬುದ್ಧಸ್ಸ, ತಸ್ಮಾ ಯಥಾ ಪುರೇ ಮಹಾಕಸ್ಸ ಪಾದಯೋ ಮಹಾಥೇರವರಾ ಪೋರಾಣಸಂಗೀತಿಕಾರಾ ಬ್ರಹ್ಮಚರಿಯಸಙ್ಖಾತಸ್ಸ ಬುದ್ಧಸಾಸನಸ್ಸ ಚಿರಟ್ಠಿತಿಯಾ, ಬಹುಜನಹಿತಾಯ, ಬಹುಜನಸುಖಾಯ ಲೋಕಾನುಕಮ್ಪಾಯ ಅತ್ಥಾಯ, ಹಿತಾಯ, ಸುಖಾಯ, ದೇವಮನುಸ್ಸಾನಂ ಧಮ್ಮವಿನಯಂ ಸಙ್ಗಾಯಿಂಸುಚೇವ ಅನುಸಙ್ಗಾಯಿಂಸುಚ, ಏವಮೇವ ಮಯಮ್ಪಿ ದಾನಿ ಸಬ್ಬೇವ ಛಟ್ಠಸಂಗೀತಿಮಹಾಧಮ್ಮಸಭಾಪರಿಯಾಪನ್ನಾ ಇದಂ ದುತಿಯ ಪಾರಾಜಿಕ ಸಿಕ್ಖಾಪದಂ ಏಕತೋ ಗಣಸಜ್ಝಾಯಂ ಕತ್ವಾ ಸಮಗ್ಗಾ ಸಮ್ಮೋದಮಾನಾ ಹುತ್ವಾ ಸಙ್ಗಾಯೇಯ್ಯಾಮ.

ತತಿಯ ಪಾರಾಜಿಕ ಸಿಕ್ಖಾಪುಚ್ಛಾ

ಪುಚ್ಛಾ – ಯಂ ¶ ತೇನ ಆವುಸೋ ಭಗವತಾ (ಪ) ಸಮ್ಮಾಸಮ್ಬುದ್ಧೇನ ತತಿಯಂ ಪಾರಾಜಿಕಂ ಕತ್ಥ ಪಞ್ಞತ್ತಂ.

ವಿಸ್ಸಜ್ಜನಾ – ವೇಸಾಲಿಯಂ ಭನ್ತೇ ಪಞ್ಞತ್ತಂ.

ಪುಚ್ಛಾ – ಕಂ ಆವುಸೋ ಆರಬ್ಭ ಪಞ್ಞತ್ತಂ.

ವಿಸ್ಸಜ್ಜನಾ – ಸಮ್ಬಹುಲೇ ಭನ್ತೇ ಭಿಕ್ಖೂ ಆರಬ್ಭ ಪಞ್ಞತ್ತಂ.

ಪುಚ್ಛಾ – ಕಿಸ್ಮಿಂ ಆವುಸೋ ವತ್ಥುಸ್ಮಿಂ ಪಞ್ಞತ್ತಂ.

ವಿಸ್ಸಜ್ಜನಾ – ಸಮ್ಬಹುಲಾ ಭನ್ತೇ ಭಿಕ್ಖು ಅಞ್ಞಮಞ್ಞಂ ಜೀವಿತಾ ವೋರೋಪೇಸುಂ, ತಸ್ಮಿಂ ಭನ್ತೇ ವತ್ಥುಸ್ಮಿಂ ಪಞ್ಞತ್ತಂ.

ಪುಚ್ಛಾ – ಅತ್ಥಿ ¶ ನುಖೋ ಆವುಸೋ ತತ್ಥ ಪಞ್ಞತ್ತಿ ಅನುಪಞ್ಞತ್ತಿ ಅನುಪ್ಪನ್ನಪಞ್ಞತ್ತಿ.

ವಿಸ್ಸಜ್ಜನಾ – ಏಕಾ ಭನ್ತೇ ಪಞ್ಞತ್ತಿ, ಏಕಾ ಅನುಪಞ್ಞತ್ತಿ, ಅನುಪ್ಪನ್ನಪಞ್ಞತ್ತಿ ತಸ್ಮಿಂ ನತ್ಥಿ.

ಪುಚ್ಛಾ – ಕಾ ಆವುಸೋ ತತ್ಥ ಮೂಲಪಞ್ಞತ್ತಿ.

ವಿಸ್ಸಜ್ಜನಾ – ಯೋಪನ ಭಿಕ್ಖು ಸಞ್ಚಿಚ್ಚ ಮನುಸ್ಸವಿಗ್ಗಹಂ ಜೀವಿತಾ ವೋರೋಪೇಯ್ಯ, ಸತ್ಥಹಾರಕಂವಾಸ್ಸ ಪರಿಯೇಸೇಯ್ಯ ಅಯಮ್ಪಿ ಪಾರಾಜಿಕೋ ಹೋತಿ ಅಸಂವಾಸೋತಿ ಅಯಂ ಭನ್ತೇ ತತ್ಥ ಮೂಲಪಞ್ಞತ್ತಿ.

ಪುಚ್ಛಾ – ಕಾ ಆವುಸೋ ತತ್ಥ ಅನುಪಞ್ಞತ್ತಿ.

ವಿಸ್ಸಜ್ಜನಾ – ಮರಣವಣ್ಣಂ ವಾ ಸಂವಣ್ಣೇಯ್ಯ ಮರಣಾಯ ವಾ ಸಮಾದಪೇಯ್ಯ ಅಮ್ಭೋಪುರಿಸ ಕಿಂ ತುಯ್ಹಿಮಿನಾ ಪಾಪಕೇನ ದುಜ್ಜೀವಿತೇನ ಮತನ್ತೇ ಜೀವಿತಾ

ಸೇಯ್ಯಾತಿ ¶ ಇತಿ ಚಿತ್ತಮನೋ ಚಿತ್ತಸಙ್ಕಪ್ಪೋ ಅನೇಕಪರಿಯಾಯೇನ ಮರಣವಣ್ಣಂ ವಾ ಸಂವಣ್ಣೇಯ್ಯ ಮರಣಾಯ ವಾ ಸಮಾದಪೇಯ್ಯಾತಿ ಅಯಂ ಭನ್ತೇ ತತ್ಥ ಅನುಪಞ್ಞತ್ತಿ.

ಪುಚ್ಛಾ – ಕಾ ಆವುಸೋ ತತ್ಥ ಪರಿಪುಣ್ಣಪಞ್ಞತ್ತಿ.

ವಿಸ್ಸಜ್ಜನಾ – ಯೋ ಪನ ಭಿಕ್ಖು ಸಞ್ಚಿಚ್ಚ ಮನುಸ್ಸವಿಗ್ಗಹಂ ಜೀವಿತಾ ವೋರೋಪೇಯ್ಯ, ಸತ್ಥಹಾರಕಂವಾಸ್ಸ ಪರಿಯೇಸೇಯ್ಯ, ಮರಣವಣ್ಣಂ ವಾ ಸಂವಣ್ಣೇಯ್ಯ, ಮರಣಾಯ ವಾ ಸಮಾದಪೇಯ್ಯ, ಅಮ್ಭೋ ಪುರಿಸ ಕಿಂ ತುಯ್ಹಿಮಿನಾ ಪಾಪಕೇನ ದುಜ್ಜೀವಿತೇನ ಮತನ್ತೇ ಜೀವಿತಾ ಸೇಯ್ಯೋತಿ ಇತಿ ಚಿತ್ತಮನೋ ಚಿತ್ತಸಙ್ಕಪ್ಪೋ ಅನೇಕಪರಿಯಾಯೇನ ಮರಣವಣ್ಣಂವಾ ಸಂವಣ್ಣೇಯ್ಯ, ಮರಣಾಯ ವಾ ಸಮಾದಪೇಯ್ಯ, ಅಯಮ್ಪಿ ಪಾರಾಜಿಕೋ ಹೋತಿ ಅಸಂವಾಸೋತಿ ಅಯಂ ಭನ್ತೇ ತತ್ಥ ಪರಿಪುಣ್ಣಪಞ್ಞತ್ತಿ.

ಪುಚ್ಛಾ – ಸಬ್ಬತ್ಥಪಞ್ಞತ್ತಿ ¶ ನುಖೋ ಆವುಸೋಪದೇಸಪಞ್ಞತ್ತಿ ನುಖೋ.

ವಿಸ್ಸಜ್ಜನಾ – ಸಬ್ಬತ್ಥಪಞ್ಞತ್ತಿ ಭನ್ತೇ.

ಪುಚ್ಛಾ – ಸಾಧಾರಣಪಞ್ಞತ್ತಿನುಖೋ ಆವುಸೋ ಅಸಾಧಾರಣಪಞ್ಞತ್ತಿ ನುಖೋ.

ವಿಸ್ಸಜ್ಜನಾ – ಸಾಧಾರಣಪಞ್ಞತ್ತಿ ಭನ್ತೇ.

ಪುಚ್ಛಾ – ಏಕತೋಪಞ್ಞತ್ತಿ ¶ ನುಖೋ ಆವುಸೋ ಉಭತೋಪಞ್ಞತ್ತಿ ನುಖೋ.

ವಿಸ್ಸಜ್ಜನಾ – ಉಭತೋಪಞ್ಞತ್ತಿ ಭನ್ತೇ.

ಪುಚ್ಛಾ – ತಸ್ಮಿಂ ಆವುಸೋ ತತಿಯ ಪಾರಾಜಿಕೇ ಸಞ್ಚಿಚ್ಚ ಮನುಸ್ಸವಿಗ್ಗಹಂ ಜೀವಿತಾ ವೋರೋಪೇನ್ತೋ ಕತಿ ಆಪತ್ತಿಯೋ ಆಪಜ್ಜತಿ.

ವಿಸ್ಸಜ್ಜನಾ – ಸಞ್ಚಿಸ್ಸ ಭನ್ತೇ ಮನುಸ್ಸವಿಗ್ಗಹಂ ಜೀವಿತಾ ವೋರೋಪೇನ್ತೋ ತಿಸ್ಸೋ ಆಪತ್ತಿಯೋ ಆಪಜ್ಜತಿ, ಮನುಸ್ಸಂ ಓದಿಸ್ಸ ಪಪಾತಂ ಖಣತಿ ಪಪತಿತ್ವಾ ಮರಿಸ್ಸತೀತಿ ಆಪತ್ತಿ ದುಕ್ಕಟಸ್ಸ, ಪಪತಿತೇ ದುಕ್ಖಾ ವೇದನಾ ಉಪ್ಪಜ್ಜತಿ ಆಪತ್ತಿ ಥುಲ್ಲಚ್ಚಯಸ್ಸ, ಮರತಿ ಆಪತ್ತಿ ಪಾರಾಜಿಕಸ್ಸ, ಸಞ್ಚಿಚ್ಚ ಭನ್ತೇ ಮನುಸ್ಸವಿಗ್ಗಹಂ ಜೀವಿತಾ ವೋರೋಪೇನ್ತೋ ಇಮಾ ತಿಸ್ಸೋ ಆಪತ್ತಿಯೋ ಆಪಜ್ಜತಿ.

ಪುಚ್ಛಾ – ಕೇಸಂ ¶ ಆವುಸೋ ಅನಾಪತ್ತಿ.

ವಿಸ್ಸಜ್ಜನಾ – ಸತ್ತನ್ನಂ ಭನ್ತೇ ಪುಗ್ಗಲಾನಂ ಅನಾಪತ್ತಿ, ಅಸಞ್ಚಿಚ್ಚ ಮಾರೇನ್ತಸ್ಸ, ಅಜಾನನ್ತಸ್ಸ, ನ ಮರಣಾಧಿಪ್ಪಾಯಸ್ಸ, ಉಮ್ಮತ್ತಕಸ್ಸ, ಖಿತ್ತಚಿತ್ತಸ್ಸ, ವೇದನಾಟ್ಟಸ್ಸ, ಆದಿಕಮ್ಮಿಕಸ್ಸ.

ಪುಚ್ಛಾ – ಪಞ್ಚನ್ನಂ ಆವುಸೋ ಪಾತಿಮೋಕ್ಖುದ್ದೇಸಾನಂ ಕತ್ಥೋಗಧಂ ಕತ್ಥ ಪರಿಯಾಪನ್ನಂ.

ವಿಸ್ಸಜ್ಜನಾ – ನಿದಾನೋಗಧಂ ಭನ್ತೇ ನಿದಾನಪರಿಯಾಪನ್ನಂ.

ಪುಚ್ಛಾ – ಕತಮೇನ ¶ ಆವುಸೋ ಉದ್ದೇಸೇನ ಉದ್ದೇಸಂ ಆಗಚ್ಛತಿ.

ವಿಸ್ಸಜ್ಜನಾ – ದುತಿಯೇನ ಭನ್ತೇ ಉದ್ದೇಸೇನ ಉದ್ದೇಸಂ ಆಗಚ್ಛತಿ.

ಪುಚ್ಛಾ – ಚತುನ್ನಂ ಆವುಸೋ ವಿಪತ್ತೀನಂ ಕತಮಾ ವಿಪತ್ತಿ.

ವಿಸ್ಸಜ್ಜನಾ – ಸೀಲವಿಪತ್ತಿ ಭನ್ತೇ.

ಪುಚ್ಛಾ – ಸತ್ತನ್ನಂ ಆವುಸೋ ಆಪತ್ತಿಕ್ಖನ್ಧಾನಂ ಕತಮೋ ಆಪತ್ತಿಕ್ಖನ್ಧೋ.

ವಿಸ್ಸಜ್ಜನಾ – ಪಾರಾಜಿಕಾಪತ್ತಿಕ್ಖನ್ಧೋ ಭನ್ತೇ.

ಪುಚ್ಛಾ – ಛನ್ನಂ ಆವುಸೋ ಆಪತ್ತಿಸಮುಟ್ಠಾನಾನಂ ಕತಿಹಿ ಸಮುಟ್ಠಾನೇಹಿ ಸಮುಟ್ಠಾತಿ.

ವಿಸ್ಸಜ್ಜನಾ – ಛನ್ನಂ ಭನ್ತೇ ಆಪತ್ತಿಸಮುಟ್ಠಾನಾನಂ ತೀಹಿ ಸಮುಟ್ಠಾನೇಹಿ ಸಮುಟ್ಠಾತಿ, ಸಿಯಾ ಕಾಯತೋಚ ಚಿತ್ತತೋಚ ಸಮುಟ್ಠಾತಿ, ನ ವಾಚತೋ ¶ , ಸಿಯಾ ವಾಚತೋಚ ಚಿತ್ತತೋಚ ಸಮುಟ್ಠಾತಿ, ನ ಕಾಯತೋ, ಸಿಯಾ ಕಾಯತೋಚ ವಾಚತೋಚ ಚಿತ್ತತೋಚ ಸಮುಟ್ಠಾತಿ.

ಪುಚ್ಛಾ – ಚತುನ್ನಂ ಆವುಸೋ ಅಧಿಕರಣಾನಂ ಕತಮಂ ಅಧಿಕರಣಂ.

ವಿಸ್ಸಜ್ಜನಾ – ಆಪತ್ತಾಧಿಕರಣಂ ಭನ್ತೇ.

ಪುಚ್ಛಾ – ಸತ್ತನ್ನಂ ¶ ಆವುಸೋ ಸಮಥಾನಂ ಕತಿಹಿ ಸಮಥೇಹಿ ಸಮ್ಮತಿ.

ವಿಸ್ಸಜ್ಜನಾ – ಸತ್ತಾನಂ ಭನ್ತೇ ಸಮಥಾನಂ ದ್ವೀಹಿ ಸಮಥೇಹಿ ಸಮ್ಮತಿ, ಸಮ್ಮುಖಾ ವಿನಯೇನಚ ಪಟಿಞ್ಞಾತಕರಣೇನಚ.

ಪುಚ್ಛಾ – ಕೋ ತತ್ಥ ಆವುಸೋ ವಿನಯೋ ಕೋ ತತ್ಥ ಅಭಿವಿನಯೋ.

ವಿಸ್ಸಜ್ಜನಾ – ಪಞ್ಞತ್ತಿ ಭನ್ತೇ ವಿನಯೋ ವಿಭತ್ತಿ ಅಭಿವಿನಯೋ.

ಪುಚ್ಛಾ – ಕಿಂ ಆವುಸೋ ತತ್ಥ ಪಾತಿಮೋಕ್ಖಂ ಕಿಂ ಅಧಿಪಾತಿಮೋಕ್ಖಂ.

ವಿಸ್ಸಜ್ಜನಾ – ಪಞ್ಞತ್ತಿ ಭನ್ತೇ ಪಾತಿಮೋಕ್ಖಂ ವಿಭತ್ತಿ ಅಧಿಪಾತಿಮೋಕ್ಖಂ.

ಪುಚ್ಛಾ – ಕಾ ¶ ಆವುಸೋ ವಿಪತ್ತಿ.

ವಿಸ್ಸಜ್ಜನಾ – ಅಸಂವರೋ ಭನ್ತೇ ವಿಪತ್ತಿ.

ಪುಚ್ಛಾ – ಕಾ ಆವುಸೋ ಸಮ್ಪತ್ತಿ.

ವಿಸ್ಸಜ್ಜನಾ – ಸಂವರೋ ಭನ್ತೇ ಸಮ್ಪತ್ತಿ.

ಪುಚ್ಛಾ – ಕಾ ಆವುಸೋ ತತ್ಥ ಪಟಿಪತ್ತಿ.

ವಿಸ್ಸಜ್ಜನಾ – ನ ಏವರೂಪಂ ಕರಿಸ್ಸಾಮೀತಿ ಯಾವಜೀವಂ ಆಪಾಣಕೋಟಿಕಂ ಸಮಾದಾಯ ಸಿಕ್ಖತಿ ಸಿಕ್ಖಾಪದೇಸು ಅಯಂ ಭನ್ತೇ ತತ್ಥ ಪಟಿಪತ್ತಿ.

ಪುಚ್ಛಾ – ಕತಿ ¶ ಆವುಸೋ ಅತ್ಥವಸೇ ಪಟಿಚ್ಚ ಭಗವತಾ ತತಿಯಂ ಪಾರಾಜಿಕಂ ಪಞ್ಞತ್ತಂ.

ವಿಸ್ಸಜ್ಜನಾ – ದಸ ಭನ್ತೇ ಅತ್ಥವಸೇ ಪಟಿಚ್ಚ ಭಗವತಾ ತತಿಯಂ ಪಾರಾಜಿಕಂ ಪಞ್ಞತ್ತಂ ಸಙ್ಘಸುಟ್ಠುತಾಯ ಸಙ್ಘಫಾಸುತಾಯ (ಪ) ವಿನಯಾನುಗ್ಗಹಾಯ.

ಪುಚ್ಛಾ – ಕೇ ¶ ಆವುಸೋ ಸಿಕ್ಖನ್ತಿ.

ವಿಸ್ಸಜ್ಜನಾ – ಸೇಕ್ಖಾಚ ಭನ್ತೇ ಪುಥುಜ್ಜನಕಲ್ಯಾಣಕಾಚ ಸಿಕ್ಖನ್ತಿ.

ಪುಚ್ಛಾ – ಕೇ ಆವುಸೋ ಸಿಕ್ಖಿತಸಿಕ್ಖಾ.

ವಿಸ್ಸಜ್ಜನಾ – ಅರಹನ್ತೋ ಭನ್ತೇ ಸಿಕ್ಖಿತಸಿಕ್ಖಾ.

ಪುಚ್ಛಾ – ಕತ್ಥ ಆವುಸೋ ಠಿತಂ.

ವಿಸ್ಸಜ್ಜನಾ – ಸಿಕ್ಖಾಕಾಮೇಸು ಭನ್ತೇ ಠಿತಂ.

ಪುಚ್ಛಾ – ಕೇ ಆವುಸೋ ಧಾರೇನ್ತಿ.

ವಿಸ್ಸಜ್ಜನಾ – ಯೇಸಂ ಭನ್ತೇ ವತ್ತತಿ ತೇ ಧಾರೇನ್ತಿ.

ಪುಚ್ಛಾ – ಕಸ್ಸ ¶ ಆವುಸೋ ವಚನಂ.

ವಿಸ್ಸಜ್ಜನಾ – ಭಗವತೋ ಭನ್ತೇ ವಚನಂ ಅರಹತೋ ಸಮ್ಮಾಸಮ್ಬುದ್ಧಸ್ಸ.

ಪುಚ್ಛಾ – ಕೇನಾವುಸೋ ಆಭತಂ.

ವಿಸ್ಸಜ್ಜನಾ – ಪರಮ್ಪರಾಯ ಭನ್ತೇ ಆಭತಂ.

ಪುಚ್ಛಾ – ಅತ್ಥಿನುಖೋ ಆವುಸೋ ತತ್ಥ ಕಿಞ್ಚಿ ಉಪನೇತಬ್ಬಂ ವಾ ಅಪನೇತಬ್ಬಂ ವಾ ಅಕ್ಖರಪದಪಚ್ಚಾಭಟ್ಠಂ ವಾ ವಿರದ್ಧಪದಬ್ಯಞ್ಜನಂ ವಾ.

ವಿಸ್ಸಜ್ಜನಾ – ನತ್ಥಿ ಭನ್ತೇ.

ಸಂಗಾಯನತ್ಥಾಯ ಸಙ್ಘಸ್ಸ ಞಾಪನಂ

ಸುಣಾತು ¶ ಮೇ ಭನ್ತೇ ಸಙ್ಘೋ, ಅಹಂ ಭನ್ತೇ ಆಯಸ್ಮನ್ತಂ ವಿಚಿತ್ತಸಾರಾಭಿವಂಸಂ ತಿಪಿಟಕಧರ ಧಮ್ಮಭಣ್ಡಾಗಾರಿಕಂ ತತಿಯಸ್ಸ ಪಾರಾಜಿಕಸ್ಸ ನಿದಾನಮ್ಪಿ ಪುಚ್ಛಿಂ, ಪುಗ್ಗಲಮ್ಪಿ ಪುಚ್ಛಿಂ, ವತ್ಥುಮ್ಪಿ ಪುಚ್ಛಿಂ, ಪಞ್ಞತ್ತಿಮ್ಪಿ ಪುಚ್ಛಿಂ, ಅನುಪಞ್ಞತ್ತಿಮ್ಪಿ ಪುಚ್ಛಿಂ, ಆಪತ್ತಿಮ್ಪಿ ಪುಚ್ಛಿಂ, ಅನಾಪತ್ತಿಮ್ಪಿ ಪುಚ್ಛಿಂ, ಅಞ್ಞಾನಿಪಿ ಏವರೂಪಾನಿ ಪುಚ್ಛಿತಬ್ಬಟ್ಠಾನಾನಿ ಅನೇಕಾನಿ ಪುಚ್ಛಿಂ, ಪುಟ್ಠೋ ಪುಟ್ಠೋಚ ಸೋ ಆಯಸ್ಮಾ ವಿಚಿತ್ತಸಾರಾಭಿವಂಸೋ ವಿಸ್ಸಜ್ಜೇಸಿ, ಇತಿಹಿದಂ ಭನ್ತೇ ತತಿಯಪಾರಾಜಿಕಸಿಕ್ಖಾಪದಂ ನಿಮ್ಮಲಂ ಸುಪರಿಸುದ್ಧಂ ತಸ್ಸೇವ ಭಗವತೋ ವಚನಂ ಅರಹತೋ ಸಮ್ಮಾಸಮ್ಮುದ್ಧಸ್ಸ, ತಸ್ಮಾ ಯಥಾ ಪುರೇ ಮಹಾಕಸ್ಸಪಾದಯೋ ಮಹಾಥೇರವರಾ ಪೋರಾಣಸಂಗೀತಿಕಾರಾ ಬ್ರಹ್ಮಚರಿಯಸಙ್ಖಾತಸ್ಸ ಬುದ್ಧಸಾಸನಸ್ಸ ಚಿರಟ್ಠಿತಿಯಾ ಬಹುಜನಹಿತಾಯ ಬಹುಜನಸುಖಾಯ ಲೋಕಾನುಕಮ್ಪಾಯ ಅತ್ಥಾಯ ಹಿತಾಯ ಸುಖಾಯ ದೇವಮನುಸ್ಸಾನಂ ಧಮ್ಮವಿನಯಂ ಸಙ್ಗಾಯಿಂಸುಚೇವ ಅನುಸಙ್ಗಾಯಿಂಸುಚ, ಏವಮೇವ ಮಯಮ್ಪಿ ದಾನಿ ಸಬ್ಬೇವ ಛಟ್ಠಸಂಗೀತಿಮಹಾಧಮ್ಮಸಭಾಪರಿಯಾಪನ್ನಾ ಇದಂ ತತಿಯಪಾರಾಜಿಕಸಿಕ್ಖಾಪದಂ ಏಕತೋ ಗಣಸಜ್ಝಾಯಂ ಕತ್ವಾ ಸಮಗ್ಗಾ ಸಮ್ಮೋದಮಾನಾ ಹುತ್ವಾ ಸಂಗಾಯೇಯ್ಯಾಮ.

ಚತುತ್ಥ ಪಾರಾಜಿಕ ಸಿಕ್ಖಾಪುಚ್ಛಾ

ಪುಚ್ಛಾ – ಯಂ ¶ ತೇನ ಆವುಸೋ ಭಗವತಾ ಜಾನತಾ ಪಸ್ಸತಾ…ಪೇ… ಸಮ್ಮಾಸಮ್ಬುದ್ಧೇನ ಚತುತ್ಥಂ ಪಾರಾಜಿಕಂ ಕತ್ಥ ಪಞ್ಞತ್ತಂ.

ವಿಸ್ಸಜ್ಜನಾ – ವೇಸಾಲಿಯಂ ಭನ್ತೇ.

ಪುಚ್ಛಾ – ಕಂ ಆವುಸೋ ಆರಬ್ಭ ಪಞ್ಞತ್ತಂ.

ವಿಸ್ಸಜ್ಜನಾ – ವಗ್ಗುಮುದಾತೀರಿಯೇ ಭನ್ತೇ ಭಿಕ್ಖೂ ಆರಬ್ಭ ಪಞ್ಞತ್ತಂ.

ಪುಚ್ಛಾ – ಕಿಸ್ಮಿಂ ಆವುಸೋ ವತ್ಥುಸ್ಮಿಂ ಪಞ್ಞತ್ತಂ.

ವಿಸ್ಸಜ್ಜನಾ – ವಗ್ಗುಮುದಾತೀರಿಯಾ ಭನ್ತೇ ಭಿಕ್ಖೂ ಗಿಹೀನಂ ಅಞ್ಞಮಞ್ಞಸ್ಸ ಉತ್ತರಿಮನುಸ್ಸಧಮ್ಮಸ್ಸ ವಣ್ಣಂ ಭಾಸಿಂಸು, ತಸ್ಮಿಂ ಭನ್ತೇ ವತ್ಥುಸ್ಮಿಂ ಪಞ್ಞತ್ತಂ.

ಪುಚ್ಛಾ – ಅತ್ಥಿ ¶ ಆವುಸೋ ತತ್ಥ ಪಞ್ಞತ್ತಿ ಅನುಪಞ್ಞತ್ತಿ ಅನುಪ್ಪನ್ನಪಞ್ಞತ್ತಿ.

ವಿಸ್ಸಜ್ಜನಾ – ಏಕಾ ಭನ್ತೇ ಪಞ್ಞತ್ತಿ ಏಕಾ ಅನುಪಞ್ಞತ್ತಿ ಅನುಪ್ಪನ್ನಪಞ್ಞತ್ತಿ ತಸ್ಮಿಂ ನತ್ಥಿ.

ಪುಚ್ಛಾ – ಕತಮಾ ಆವುಸೋ ತತ್ಥ ಮೂಲಪಞ್ಞತ್ತಿ.

ವಿಸ್ಸಜ್ಜನಾ – ಯೋ ಪನ ಭಿಕ್ಖು ಅನಭಿಜಾನಂ ಉತ್ತರಿಮನುಸ್ಸಧಮ್ಮಂ ಉತ್ತರಿಮನುಸ್ಸಧಮ್ಮಂ ಅತ್ತುಪನಾಯಿಕಂ ಅಲಮರಿಯಞಾಣದಸ್ಸನಂ ಸಮುದಾಚರೇಯ್ಯ, ಇತಿಜಾನಾಮಿ ಇತಿಪಸ್ಸಾಮೀತಿ, ತತೋ ಅಪರೇನ ಸಮಯೇನ ಸಮನುಗ್ಗಾಹೀಯ ಮಾನೋವಾ ಅಸಮನುಗ್ಗಾಹೀಯ ಮಾನೋವಾ ಆಪನ್ನೋ ವಿಸುದ್ಧಾಪೇಕ್ಖೋ ಏವಂ ವದೇಯ್ಯ ಅಜಾನಮೇವಂ ಆವುಸೋ ಅವಚಂ ಜಾನಾಮಿ ಅಪಸ್ಸಂ ಪಸ್ಸಾಮಿ ತುಚ್ಛಂ ಮುಸಾವಿಲಪಿನ್ತಿ ಅಯಮ್ಪಿ ಪಾರಾಜಿಕೋ ಹೋತಿ ಅಸಂವಾಸೋತಿ ಅಯಂ ಭನ್ತೇ ತತ್ಥ ಮೂಲಪಞ್ಞತ್ತಿ.

ಪುಚ್ಛಾ – ಕತಮಾ ¶ ಆವುಸೋ ತತ್ಥ ಅನುಪಞ್ಞತ್ತಿ.

ವಿಸ್ಸಜ್ಜನಾ – ಅಞ್ಞತ್ರ ಅಧಿಮಾನಾತಿ ಅಯಂ ಭನ್ತೇ ತತ್ಥ ಅನುಪಞ್ಞತ್ತಿ.

ಹೋನ್ತಿ ಯೇ ತೇ ಆನನ್ದ ಭಿಕ್ಖೂ ಅದಿಟ್ಠೇ ದಿಟ್ಠಸಞ್ಞಿನೋ ಅಪತ್ತೇ ಪತ್ತಸಞ್ಞಿನೋ ಅನಧಿಗತೇ ಅಧಿಗತಸಞ್ಞಿನೋ ಅಸಚ್ಛಿಕತೇ ಸಚ್ಛಿಕತಸಞ್ಞನೋ ಅಧಿಮಾನೇನ ಅಞ್ಞಂ ಬ್ಯಾಕರೋನ್ತಿ, ತಞ್ಚ ಖೋ ಏತಂ ಅಬ್ಬೋಹಾರಿಕಂ.

ಪುಚ್ಛಾ – ಕತಮಾ ¶ ಆವುಸೋ ತತ್ಥ ಪರಿಪುಣ್ಣಪಞ್ಞತ್ತಿ.

ವಿಸ್ಸಜ್ಜನಾ – ಯೋಪನ ಭಿಕ್ಖು ಅನಭಿಜಾನಂ ಉತ್ತರಿಮನುಸ್ಸಧಮ್ಮಂ ಅತ್ತುಪನಾಯಿಕಂ ಅಲಮರಿಯಞಾಣದಸ್ಸನಂ ಸಮುದಾಚರೇಯ್ಯ, ಇತಿ ಜಾನಾಮಿ ಇತಿ ಪಸ್ಸಾಮೀತಿ, ತತೋ ಅಪರೇನ ಸಮಯೇನ ಸಮನುಗ್ಗಾಹೀಯಮಾನೋವಾ ಅಸಮನುಗ್ಗಾಹೀಯಮಾನೋವಾ ಆಪನ್ನೋ ವಿಸುದ್ಧಾಪೇಕ್ಖೋ ಏವಂ ವದೇಯ್ಯ ಅಜಾನಮೇವಂ ಆವುಸೋ ಅವಚಂಜಾನಾಮಿ ಅಪಸ್ಸಂ ಪಸ್ಸಾಮಿ ತುಚ್ಛಂ ಮುಸಾ ವಿಲಪಿನ್ತಿ, ಅಞ್ಞತ್ರ ಅಧಿಮಾನಾ ಅಯಮ್ಪಿ ಪಾರಾಜಿಕೋ ಹೋತಿ ಅಸಂವಾಸೋತಿ ಅಯಂ ಭನ್ತೇ ತತ್ಥ ಪರಿಪುಣ್ಣ ಪಞ್ಞತ್ತಿ.

ಪುಚ್ಛಾ – ಸಬ್ಬತ್ಥಪಞ್ಞತ್ತಿ ¶ ನುಖೋ ಆವುಸೋ ಪದೇಸಪಞ್ಞತ್ತಿ ನುಖೋ.

ವಿಸ್ಸಜ್ಜನಾ – ಸಬ್ಬತ್ಥಪಞ್ಞತ್ತಿ ಭನ್ತೇ.

ಪುಚ್ಛಾ – ಸಾಧಾರಣಪಞ್ಞತ್ತಿ ನುಖೋ ಆವುಸೋ ಅಸಾಧಾರಣಪಞ್ಞತ್ತಿನುಖೋ.

ವಿಸ್ಸಜ್ಜನಾ – ಸಾಧಾರಣಪಞ್ಞತ್ತಿ ಭನ್ತೇ.

ಪುಚ್ಛಾ – ಏಕತೋಪಞ್ಞತ್ತಿ ನುಖೋ ಆವುಸೋ ಉಭತೋ ಪಞ್ಞತ್ತಿ ನುಖೋ.

ವಿಸ್ಸಜ್ಜನಾ – ಉಭತೋಪಞ್ಞತ್ತಿ ಭನ್ತೇ.

ಪುಚ್ಛಾ – ತಸ್ಮಿಂ ¶ ಆವುಸೋ ಚತುತ್ಥ ಪಾರಾಜಿಕೇ ಅಸನ್ತಂ ಅಭೂತಂ ಉತ್ತರಿಮನುಸ್ಸಧಮ್ಮಂ ಉಲ್ಲಪನ್ತೋ ಕತಿ ಆಪತ್ತಿಯೋ ಆಪಜ್ಜತಿ, ವಿಭಜಿತ್ವಾ ವಿಸ್ಸಜ್ಜೇಹಿ.

ವಿಸ್ಸಜ್ಜನಾ – ತಸ್ಮಿಂ ಭನ್ತೇ ಚತುತ್ಥಪಾರಾಜಿಕೇ ಅಸನ್ತಂ ಅಭೂತಂ ಉತ್ತರಿಮನುಸ್ಸಧಮ್ಮಂ ಉಲ್ಲಪನ್ತೋ ತಿಸ್ಸೋ ಆಪತ್ತಿಯೋ ಆಪಜ್ಜತಿ, ಅಸನ್ತಂ ಅಭೂತಂ ಉತ್ತರಿಮನುಸ್ಸಧಮ್ಮಂ ಉಲ್ಲಪತಿ ಆಪತ್ತಿಪಾರಾಜಿಕಸ್ಸ, ಯೋ ತೇ ವಿಹಾರೇ ವಸತಿ ಸೋ ಭಿಕ್ಖು ಅರಹಾತಿ ಭಣತಿ ಪಟಿವಿಜಾನನ್ತಸ್ಸ ಆಪತ್ತಿ ಥುಲ್ಲಚ್ಚಯಸ್ಸ, ಅಪ್ಪಟಿವಿಜಾನನ್ತಸ್ಸ ಆಪತ್ತಿ ದುಕ್ಕಟಸ್ಸ, ಉತ್ತರಿಮನುಸ್ಸಧಮ್ಮಂ ಭನ್ತೇ ಉಲ್ಲಪನ್ತೋ ಇಮಾ ತಿಸ್ಸೋ ಆಪತ್ತಿಯೋ ಆಪಜ್ಜತಿ.

ಪುಚ್ಛಾ – ಕೇಸಂ ¶ ಆವುಸೋ ಅನಾಪತ್ತಿ.

ವಿಸ್ಸಜ್ಜನಾ – ಛನ್ನಂ ಭನ್ತೇ ಪುಗ್ಗಲಾನಂ ಅನಾಪತ್ತಿ ಅಧಿಮಾನೇನ ಭಣನ್ತಸ್ಸ ಅನುಲ್ಲಪನಾಧಿಪ್ಪಾಯಸ್ಸ ಉಮ್ಮತ್ತಕಸ್ಸ ಖಿತ್ತಚಿತ್ತಸ್ಸ ವೇದನಾಟ್ಟಸ್ಸ ಆದಿಕಮ್ಮಿಕಸ್ಸ.

ಪುಚ್ಛಾ – ಪಞ್ಚನ್ನಂ ¶ ಆವುಸೋ ಪಾತಿಮೋಕ್ಖುದ್ದೇಸಾನಂ ಕತ್ಥೋಗಧಂ ಕತ್ಥ ಪರಿಯಾಪನ್ನಂ.

ವಿಸ್ಸಜ್ಜನಾ – ನಿದಾನೋಗಧಂ ಭನ್ತೇ ನಿದಾನಪರಿಯಾಪನ್ನಂ.

ಪುಚ್ಛಾ – ಕತಮೇನ ಆವುಸೋ ಉದ್ದೇಸೇನ ಉದ್ದೇಸಂ ಆಗಚ್ಛತಿ.

ವಿಸ್ಸಜ್ಜನಾ – ದುತಿಯೇನ ಭನ್ತೇ ಉದ್ದೇಸೇನ ಉದ್ದೇಸಂ ಆಗಚ್ಛತಿ.

ಪುಚ್ಛಾ – ಚತುನ್ನಂ ಆವುಸೋ ವಿಪತ್ತೀನಂ ಕತಮಾ ವಿಪತ್ತಿ.

ವಿಸ್ಸಜ್ಜನಾ – ಸೀಲವಿಪತ್ತಿ ಭನ್ತೇ.

ಪುಚ್ಛಾ – ಸತ್ತನ್ನಂ ¶ ಆವುಸೋ ಆಪತ್ತಿಕ್ಖನ್ಧಾನಂ ಕತಮೋ ಆಪತ್ತಿಕ್ಖನ್ಧೋ.

ವಿಸ್ಸಜ್ಜನಾ – ಪಾರಾಜಿಕಾಪತ್ತಿಕ್ಖನ್ಧೋ ಭನ್ತೇ.

ಪುಚ್ಛಾ – ಛನ್ನಂ ಆವುಸೋ ಆಪತ್ತಿಸಮುಟ್ಠಾನಾನಂ ಕತಿಹಿ ಸಮುಟ್ಠಾನೇಹಿ ಸಮುಟ್ಠಾತಿ.

ವಿಸ್ಸಜ್ಜನಾ – ಛನ್ನಂ ಭನ್ತೇ ಆಪತ್ತಿಸಮುಟ್ಠಾನಾನಂ ತೀಹಿ ಸಮುಟ್ಠಾನೇಹಿ ಸಮುಟ್ಠಾತಿ, ಸಿಯಾ ಕಾಯತೋಚ ಚಿತ್ತತೋಚ ಸಮುಟ್ಠಾತಿ, ನ ವಾಚತೋ, ಸಿಯಾ ವಾಚತೋಚ ಚಿತ್ತತೋಚ ಸಮುಟ್ಠಾತಿ, ನ ಕಾಯತೋ, ಸಿಯಾ ಕಾಯತೋಚ ವಾಚತೋಚ ಚಿತ್ತತೋಚ ಸಮುಟ್ಠಾತಿ.

ಪುಚ್ಛಾ – ಚತುನ್ನಂ ¶ ಆವುಸೋ ಅಧಿಕರಣಾನಂ ಕತಮಂ ಅಧಿಕರಣಂ.

ವಿಸ್ಸಜ್ಜನಾ – ಆಪತ್ತಾಧಿಕರಣಂ ಭನ್ತೇ.

ಪುಚ್ಛಾ – ಸತ್ತನ್ನಂ ಆವುಸೋ ಸಮಥಾನಂ ಕತಿಹಿ ಸಮಥೇಹಿ ಸಮ್ಮತಿ.

ವಿಸ್ಸಜ್ಜನಾ – ಸತ್ತನ್ನಂ ಭನ್ತೇ ಸಮಥಾನಂ ದ್ವೀಹಿ ಸಮಥೇಹಿ ಸಮ್ಮತಿ, ಸಮ್ಮುಖಾವಿನಯೇನಚ ಪಟಿಞ್ಞಾತಕರಣೇನಚ.

ಪುಚ್ಛಾ – ಕೋ ತತ್ಥ ಆವುಸೋ ವಿನಯೋ, ಕೋ ತತ್ಥ ಅಭಿವಿನಯೋ.

ವಿಸ್ಸಜ್ಜನಾ – ಪಞ್ಞತ್ತಿ ಭನ್ತೇ ವಿನಯೋ, ವಿಭತ್ತಿ ಅಭಿವಿನಯೋ.

ಪುಚ್ಛಾ – ಕಿಂ ¶ ಆವುಸೋ ತತ್ಥ ಪಾತಿಮೋಕ್ಖಂ, ಕಿಂ ಅಧಿಪಾತಿಮೋಕ್ಖಂ.

ವಿಸ್ಸಜ್ಜನಾ – ಪಞ್ಞತ್ತಿ ಭನ್ತೇ ಪಾತಿಮೋಕ್ಖಂ, ವಿಭತ್ತಿ ಅಧಿಪಾತಿಮೋಕ್ಖಂ.

ಪುಚ್ಛಾ – ಕಾ ಆವುಸೋ ವಿಪತ್ತಿ.

ವಿಸ್ಸಜ್ಜನಾ – ಅಸಂವರೋ ಭನ್ತೇ ವಿಪತ್ತಿ.

ಪುಚ್ಛಾ – ಕಾ ಆವುಸೋ ಸಮ್ಪತ್ತಿ.

ವಿಸ್ಸಜ್ಜನಾ – ಸಂವರೋ ಭನ್ತೇ ಸಮ್ಪತ್ತಿ.

ಪುಚ್ಛಾ – ಕಾ ¶ ಆವುಸೋ ತತ್ಥ ಪಟಿಪತ್ತಿ.

ವಿಸ್ಸಜ್ಜನಾ – ನ ಏವರೂಪಂ ಕರಿಸ್ಸಾಮೀತಿ ಯಾವಜೀವಂ ಆಪಾಣಕೋಟಿಕಂ ಸಮಾದಾಯ ಸಿಕ್ಖತಿ ಸಿಕ್ಖಾಪದೇಸು ಅಯಂ ಭನ್ತೇ ತತ್ಥ ಪಟಿಪತ್ತಿ.

ಪುಚ್ಛಾ – ಕತಿ ಆವುಸೋ ಅತ್ಥವಸೇ ಪಟಿಚ್ಚ ಭಗವತಾ ಚತುತ್ಥಂ ಪಾರಾಜಿಕಂ ಪಞ್ಞತ್ತಂ.

ವಿಸ್ಸಜ್ಜನಾ – ದಸ ಭನ್ತೇ ಅತ್ಥವಸೇ ಪಟಿಚ್ಚ ಭಗವತಾ ಚತುತ್ಥಂ ಪಾರಾಜಿಕಂ ಪಞ್ಞತ್ತಂ, ಸಙ್ಘಸುಟ್ಠುತಾಯ ಸಙ್ಘಫಾಸುತಾಯ…ಪೇ… ವಿನಯಾನುಗ್ಗಹಾಯ.

ಪುಚ್ಛಾ – ಕೇ ¶ ಆವುಸೋ ಸಿಕ್ಖನ್ತಿ.

ವಿಸ್ಸಜ್ಜನಾ – ಸೇಕ್ಖಾಚ ಭನ್ತೇ ಪುಥುಜ್ಜನಕಲ್ಯಾಣಕಾಚ ಸಿಕ್ಖನ್ತಿ.

ಪುಚ್ಛಾ – ಕೇ ಆವುಸೋ ಸಿಕ್ಖಿತಸಿಕ್ಖಾ.

ವಿಸ್ಸಜ್ಜನಾ – ಅರಹನ್ತೋ ಭನ್ತೇ ಸಿಕ್ಖಿತಸಿಕ್ಖಾ.

ಪುಚ್ಛಾ – ಕತ್ಥ ಆವುಸೋ ಠಿತಂ.

ವಿಸ್ಸಜ್ಜನಾ – ಸಿಕ್ಖಾಕಾಮೇಸು ಭನ್ತೇ ಠಿತಂ.

ಪುಚ್ಛಾ – ಕೇ ಆವುಸೋ ಧಾರೇನ್ತಿ.

ವಿಸ್ಸಜ್ಜನಾ – ಯೇಸಂ ಭನ್ತೇ ವತ್ತತಿ ತೇ ಧಾರೇನ್ತಿ.

ಪುಚ್ಛಾ – ಕಸ್ಸ ¶ ಆವುಸೋ ವಚನಂ.

ವಿಸ್ಸಜ್ಜನಾ – ಭಗವತೋ ಭನ್ತೇ ವಚನಂ ಅರಹತೋ ಸಮ್ಮಾಸಮ್ಬುದ್ಧಸ್ಸ.

ಪುಚ್ಛಾ – ಕೇನಾವುಸೋ ಆಭತಂ.

ವಿಸ್ಸಜ್ಜನಾ – ಪರಮ್ಪರಾಯ ಭನ್ತೇ ಆಭತಂ.

ಪುಚ್ಛಾ – ಅತ್ಥಿ ನುಖೋ ಆವುಸೋ ತತ್ಥ ಕಿಞ್ಚಿ ಉಪನೇತಬ್ಬಂ ವಾ ಅಪನೇತಬ್ಬಂ ವಾ ಅಕ್ಖರಪದಪಚ್ಚಾಭಟ್ಠಂ ವಾ ವಿರದ್ಧಪದಬ್ಯಞ್ಜನಂ ವಾ.

ವಿಸ್ಸಜ್ಜನಾ – ನತ್ಥಿ ಭನ್ತೇ.

ಸಙ್ಘಾದಿಸೇಸ ಸಿಕ್ಖಾಪುಚ್ಛಾ

೧. ಸುಕ್ಕವಿಸ್ಸಟ್ಠಿಸಙ್ಘಾದಿಸೇಸ ಸಿಕ್ಖಾಪುಚ್ಛಾ

ಪುಚ್ಛಾ – ಯಂ ¶ ತೇನ ಆವುಸೋ ಭಗವತಾ ಜಾನತಾ ಪಸ್ಸತಾ ಅರಹತಾ ಸಮ್ಮಾಸಮ್ಬುದ್ಧೇನ ಉಪಕ್ಕಮಿತ್ವಾ ಅಸುಚಿಂ ಮೋಚೇನ್ತಸ್ಸ ಸಙ್ಘಾದಿಸೇಸೋ ಕತ್ಥ ಪಞ್ಞತ್ತೋ.

ವಿಸ್ಸಜ್ಜನಾ – ಸಾವತ್ಥಿಯಂ ಭನ್ತೇ ಪಞ್ಞತ್ತೋ.

ಪುಚ್ಛಾ – ಕಂ ಆವುಸೋ ಆರಬ್ಭ ಪಞ್ಞತ್ತೋ.

ವಿಸ್ಸಜ್ಜನಾ – ಆಯಸ್ಮನ್ತಂ ಭನ್ತೇ ಸೇಯ್ಯಸಕಂ ಆರಬ್ಭ ಪಞ್ಞತ್ತೋ.

ಪುಚ್ಛಾ – ಕಿಸ್ಮಿಂ ಆವುಸೋ ವತ್ಥುಸ್ಮಿಂ ಪಞ್ಞತ್ತೋ.

ವಿಸ್ಸಜ್ಜನಾ – ಆಯಸ್ಮಾ ಭನ್ತೇ ಸೇಯ್ಯಸಕೋ ಹತ್ಥೇನ ಉಪಕ್ಕಮಿತ್ವಾ ಅಸುಚಿಂ ಮೋಚೇಸಿ, ತಸ್ಮಿಂ ಭನ್ತೇ ವತ್ಥುಸ್ಮಿಂ ಪಞ್ಞತ್ತೋ.

ಪುಚ್ಛಾ – ಅತ್ಥಿ ¶ ಆವುಸೋ ತತ್ಥ ಪಞ್ಞತ್ತಿ ಅನುಪಞ್ಞತ್ತಿ ಅನುಪ್ಪನ್ನಪಞ್ಞತ್ತಿ.

ವಿಸ್ಸಜ್ಜನಾ – ಏಕಾ ಭನ್ತೇ ಪಞ್ಞತ್ತಿ, ಏಕಾ ಅನುಪಞ್ಞತ್ತಿ, ಅನುಪ್ಪನ್ನಪಞ್ಞತ್ತಿ ತಸ್ಮಿಂ ನತ್ಥಿ.

ಪುಚ್ಛಾ – ಕತಮಾ ಆವುಸೋ ತತ್ಥ ಮೂಲಪಞ್ಞತ್ತಿ.

ವಿಸ್ಸಜ್ಜನಾ – ಸಞ್ಚೇತನಿಕಾ ಸುಕ್ಕವಿಸ್ಸಟ್ಠಿ ಸಙ್ಘಾದಿಸೇಸೋತಿ ಅಯಂ ಭನ್ತೇ ತತ್ಥ ಮೂಲಪಞ್ಞತ್ತಿ.

ಪುಚ್ಛಾ – ಕತಮಾ ಪನಾವುಸೋ ತತ್ಥ ಅನುಪಞ್ಞತ್ತಿ.

ವಿಸ್ಸಜ್ಜನಾ – ಅಞ್ಞತ್ರ ಸುಪಿನನ್ತಾತಿ ಅಯಂ ಭನ್ತೇ ತತ್ಥ ಅನುಪಞ್ಞತ್ತಿ.

ಪುಚ್ಛಾ – ಕತಮಾ ¶ ಪನಾವುಸೋ ತತ್ಥ ಪರಿಪುಣ್ಣಪಞ್ಞತ್ತಿ.

ವಿಸ್ಸಜ್ಜನಾ – ಸಞ್ಚೇತನಿಕಾ ಸುಕ್ಕವಿಸ್ಸಟ್ಠಿ ಅಞ್ಞತ್ರಸುಪಿನನ್ತಾ ಸಙ್ಘಾದಿಸೋತಿ ಅಯಂ ಭನ್ತೇ ತತ್ಥ ಪರಿಪುಣ್ಣಪಞ್ಞತ್ತಿ.

ಪುಚ್ಛಾ – ಸಾಧಾರಣ ಪಞ್ಞತ್ತಿನುಖೋ ಆವುಸೋ ಅಸಾಧಾರಣ ಪಞ್ಞತ್ತಿನುಖೋ.

ವಿಸ್ಸಜ್ಜನಾ – ಅಸಾಧಾರಣಪಞ್ಞತ್ತಿ ಭನ್ತೇ.

ಪುಚ್ಛಾ – ತತ್ಥ ಆವುಸೋ ಉಪಕ್ಕಮಿತ್ವಾ ಅಸುಚಿಂ ಮೋಚೇನ್ತೋ ಕತಿ ಆಪತ್ತಿಯೋ ಆಪಜ್ಜತಿ.

ವಿಸ್ಸಜ್ಜನಾ – ಉಪಕ್ಕಮಿತ್ವಾ ಭನ್ತೇ ಅಸುಚಿಂ ಮೋಚೇನ್ತೋ ತಿಸ್ಸೋ ಆಪತ್ತಿಯೋ ಆಪಜ್ಜತಿ, ಚೇತೇತಿ ಉಪಕ್ಕಮತಿ ಮುಚ್ಚತಿ ಆಪತ್ತಿ

ಸಙ್ಘಾದಿಸೇಸಸ್ಸ ¶ , ಚೇತೇತಿ ಉಪಕ್ಕಮತಿ ನ ಮುಚ್ಚತಿ ಆಪತ್ತಿ ಥುಲ್ಲಚ್ಚಯಸ್ಸ, ಪಯೋಗೇ ದುಕ್ಕಟಂ.

ಪುಚ್ಛಾ – ಕೇಸಂ ಆವುಸೋ ಅನಾಪತ್ತಿ.

ವಿಸ್ಸಜ್ಜನಾ – ಛನ್ನಂ ಭನ್ತೇ ಅನಾಪತ್ತಿ ಸುಪಿನನ್ತೇನ ಮೋಚೇನ್ತಸ್ಸ ನ ಮೋಚನಾಧಿಪ್ಪಾಯಸ್ಸ ಉಮ್ಮತ್ತಕಸ್ಸ ಖಿತ್ತಚಿತ್ತಸ್ಸ ವೇದನಾಟ್ಟಸ್ಸ ಆದಿಕಮ್ಮಿಕಸ್ಸ ಇಮೇಸಂ ಖೋ ಭನ್ತೇ ಛನ್ನಂ ಅನಾಪತ್ತಿ.

ಪುಚ್ಛಾ – ಪಞ್ಚನ್ನಂ ¶ ಆವುಸೋ ಪಾತಿಮೋಕ್ಖುದ್ದೇಸಾನಂ ಕತಮೇನ ಉದ್ದೇಸೇನ ಉದ್ದೇಸಂ ಆಗಚ್ಛತಿ.

ವಿಸ್ಸಜ್ಜನಾ – ಪಞ್ಚನ್ನಂ ಭನ್ತೇ ಪಾತಿಮೋಕ್ಖುದ್ದೇಸಾನಂ ತತಿಯೇನ ಉದ್ದೇಸೇನ ಉದ್ದೇಸಂ ಆಗಚ್ಛತಿ.

ಪುಚ್ಛಾ – ಚತುನ್ನಂ ಆವುಸೋ ವಿಪತ್ತೀನಂ ಕತಮಾ ವಿಪತ್ತಿ.

ವಿಸ್ಸಜ್ಜನಾ – ಚತುನ್ನಂ ಭನ್ತೇ ವಿಪತ್ತೀನಂ ಸೀಲವಿಪತ್ತಿ.

ಪುಚ್ಛಾ – ಕಾ ಆವುಸೋ ವಿಪತ್ತಿ.

ವಿಸ್ಸಜ್ಜನಾ – ಅಸಂವರೋ ಭನ್ತೇ ವಿಪತ್ತಿ.

ಪುಚ್ಛಾ – ಕಾ ¶ ಆವುಸೋ ಸಮ್ಪತ್ತಿ.

ವಿಸ್ಸಜ್ಜನಾ – ಸಂವರೋ ಭನ್ತೇ ಸಮ್ಪತ್ತಿ.

ಪುಚ್ಛಾ – ಕಾ ಆವುಸೋ ಪಟಿಪತ್ತಿ.

ವಿಸ್ಸಜ್ಜನಾ – ನ ಏವ ರೂಪಂ ಕರಿಸ್ಸಾಮೀತಿ ಯಾವಜೀವಂ ಆಪಾಣಕೋಟಿಕಂ ಸಮಾದಾಯ ಸಿಕ್ಖತಿ ಸಿಕ್ಖಾಪದೇಸು ಅಯಂ ಭನ್ತೇ ಪಟಿಪತ್ತಿ.

ಪುಚ್ಛಾ – ಕತಿ ಆವುಸೋ ಅತ್ಥವಸೇ ಪಟಿಚ್ಚ ಭಗವತಾ ಉಪಕ್ಕಮಿತ್ವಾ ಅಸುಚಿಂ ಮೋಚೇನ್ತಸ್ಸ ಸಙ್ಘಾದಿಸೇಸೋ ಪಞ್ಞತ್ತೋ.

ವಿಸ್ಸಜ್ಜನಾ – ದಸ ¶ ಭನ್ತೇ ಅತ್ಥವಸೇ ಪಟಿಚ್ಚ ಭಗವತಾ ಉಪಕ್ಕಮಿತ್ವಾ ಅಸುಚಿಂ ಮೋಚೇನ್ತಸ್ಸ ಸಙ್ಘಾದಿಸೇಸೋ ಪಞ್ಞತ್ತೋ ಸಙ್ಘಸುಟ್ಠುತಾಯ…ಪೇ… ವಿನಯಾನುಗ್ಗಹಾಯ.

ಪುಚ್ಛಾ – ಕತ್ಥ ಆವುಸೋ ಠಿತಂ.

ವಿಸ್ಸಜ್ಜನಾ – ಸಿಕ್ಖಾಕಾಮೇಸು ಭನ್ತೇ ಠಿತಂ.

ಪುಚ್ಛಾ – ಕೇ ಆವುಸೋ ಧಾರೇನ್ತಿ.

ವಿಸ್ಸಜ್ಜನಾ – ಯೇಸಂ ಭನ್ತೇ ವತ್ತತಿ ತೇ ಧಾರೇನ್ತಿ.

ಪುಚ್ಛಾ – ಕಸ್ಸ ¶ ಆವುಸೋ ವಚನಂ.

ವಿಸ್ಸಜ್ಜನಾ – ಭಗವತೋ ಭನ್ತೇ ವಚನಂ ಅರಹತೋ ಸಮ್ಮಾಸಮ್ಬುದ್ಧಸ್ಸ.

ಪುಚ್ಛಾ – ಕೇನಾವುಸೋ ಆಭತಂ.

ವಿಸ್ಸಜ್ಜನಾ – ಪರಮ್ಪರಾಯ ಭನ್ತೇ ಆಭತಂ.

ಪುಚ್ಛಾ – ಅತ್ಥಿ ನುಖೋ ಆವುಸೋ ತತ್ಥ ಸನಿದಾನೇ ಸಪದಭಾಜನೀಯೇ ಸವಿನೀತವತ್ಥುಕೇ ಉಪನೇತಬ್ಬಂ ವಾ ಅಪನೇತಬ್ಬಂ ವಾ ಅಕ್ಖರಪದಪಚ್ಚಾಭಟ್ಠಂ ವಾ ವಿರದ್ಧಪದಬ್ಯಞ್ಜನಂ ವಾ.

ಸಂಗಾಯನತ್ಥಾಯ ಸಙ್ಘಸ್ಸ ಞಾಪನಂ

ಸುಣಾತು ¶ ಮೇ ಭನ್ತೇ ಸಙ್ಘೋ ಆಯಸ್ಮನ್ತಂ ವಿಚಿತ್ತಸಾರಾಭಿವಂಸಂ ತಿಪಿಟಕಧರ ಧಮ್ಮಭಣ್ಡಾಗಾರಿಕಂ ಪಠಮಸ್ಸ ಸಙ್ಘಾದಿಸೇಸ ಸಿಕ್ಖಾಪದಸ್ಸ ನಿದಾನಮ್ಪಿ ಪುಚ್ಛಿಂ, ಪುಗ್ಗಲಮ್ಪಿ ಪುಚ್ಛಿಂ, ವತ್ಥುಮ್ಪಿ ಪುಚ್ಛಿಂ, ಪಞ್ಞತ್ತಿಮ್ಪಿ ಪುಚ್ಛಿಂ, ಅನುಪಞ್ಞತ್ತಿಮ್ಪಿ ಪುಚ್ಛಿ, ಆಪತ್ತಿಮ್ಪಿ ಪುಚ್ಛಿಂ, ಅನಾಪತ್ತಿಮ್ಪಿ ಪುಚ್ಛಿಂ, ಅಞ್ಞಾನಿಪಿ ಏವರೂಪಾನಿ ಅನೇಕಾನಿ ಪುಚ್ಛಿತಬ್ಬಟ್ಠಾನಾನಿ ಪುಚ್ಛಿಂ, ಪುಟ್ಠೋ ಪುಟ್ಠೋ ಚ ಸೋ ಆಯಸ್ಮಾ ವಿಚಿತ್ತಸಾರಾಭಿವಂಸೋ ವಿಸ್ಸಜ್ಜೇಸಿ, ಇತಿಹಿದಂ ಭನ್ತೇ ಪಠಮ ಸಙ್ಘಾದಿಸೇಸ ಸಿಕ್ಖಾಪದಂ ಸಪರಿವಾರಂ ನಿಮ್ಮಲಂ ಸುಪರಿಸುದ್ಧಂ ತಸ್ಸೇವ ಭಗವತೋ ವಚನಂ ಅರಹತೋ ಸಮ್ಮಾಸಮ್ಬುದ್ಧಸ್ಸ. ತಸ್ಮಾ ಯಥಾಪುರೇ ಮಹಾಕಸ್ಸಪಾದಯೋ ಮಹಾಥೇರವರಾ ಪೋರಾಣಸಂಗೀತಿಕಾರಾ ಬ್ರಹ್ಮಚರಿಯಸ್ಸ ಚಿರಟ್ಠಿತಿಯಾ ಬಹುಜನಹಿತಾಯ ಬಹುಜನಸುಖಾಯ ಲೋಕಾನುಕಮ್ಪಾಯ ಅತ್ಥಾಯ ಹಿತಾಯ ಸುಖಾಯ ದೇವಮನುಸ್ಸಾನಂ ¶ ಧಮ್ಮವಿನಯಂ ಸಂಗಾಯಿಂಸುಚೇವ ಅನುಸಂಗಾಯಿಂಸುಚ, ಏವಮೇವ ಮಯಮ್ಪಿ ಸಬ್ಬೇವ ಛಟ್ಠಸಂಗೀತಿಮಹಾಧಮ್ಮಸಭಾ ಪರಿಯಾಪನ್ನಾ ಇದಂ ಪಠಮಂ ಸಙ್ಘಾದಿಸೇಸ ಸಿಕ್ಖಾಪದಂ ನಿದಾನತೋ ಪಟ್ಠಾಯ ಏಕಚ್ಚಾನಂ ವಚಸಾ ಸಜ್ಝಾಯವಸೇನ ಏಕಚ್ಚಾನಂ ಮನಸಾ ಮನಸಿಕರಣವಸೇನಚ ಏಕತೋ ಗಣಸಜ್ಝಾಯಂ ಕತ್ವಾ ಸಂಗಾಯೇಯ್ಯಾಮ.

ಪುಚ್ಛಾ – ಯಂ ¶ ತೇನ ಆವುಸೋ ಭಗವತಾ…ಪೇ… ಸಮ್ಮಾಸಮ್ಬುದ್ಧೇನ ಮಾತುಕಾಮೇನ ಸದ್ಧಿಂ ಕಾಯಸಂಸಗ್ಗಂ ಸಮಾಪಜ್ಜನ್ತಸ್ಸ ಚ, ಮಾತುಗಾಮಂ ದುಟ್ಠುಲ್ಲಾಹಿ ವಾಚಾಹಿ ಓಭಾಸನ್ತಸ್ಸ ಚ, ಮಾತುಗಾಮಸ್ಸ ಸನ್ತಿಕೇ ಅತ್ತಕಾಮ ಪಾರಿಚರಿಯಾಯ ವಣ್ಣಂ ಭಾಸನ್ತಸ್ಸ ಚ, ಸಞ್ಚರಿತ್ತಂ ಸಮಾಪಜ್ಜನ್ತಸ್ಸ ಚ ಸಙ್ಘಾದಿಸೇಸೋ ಕತ್ಥ ಪಞ್ಞತ್ತೋ.

ವಿಸ್ಸಜ್ಜನಾ – ಸಾವತ್ಥಿಯಂ ಭನ್ತೇ ಪಞ್ಞತ್ತೋ.

ಪುಚ್ಛಾ – ಕಂ ¶ ಆವುಸೋ ಆರಬ್ಭ ಪಞ್ಞತ್ತೋ.

ವಿಸ್ಸಜ್ಜನಾ – ಆಯಸ್ಮನ್ತಂ ಭನ್ತೇ ಉದಾಯಿತ್ಥೇರಂ ಆರಬ್ಭ ಪಞ್ಞತ್ತೋ.

ಪುಚ್ಛಾ – ಕಿಸ್ಮಿಂ ಆವುಸೋ ವತ್ಥುಸ್ಮಿಂ ಪಞ್ಞತ್ತೋ.

ವಿಸ್ಸಜ್ಜನಾ – ಆಯಸ್ಮಾ ಭನ್ತೇ ಉದಾಯಿತ್ಥೇರೋ ಮಾತುಗಾಮೇನ ಸದ್ಧಿಂ ಕಾಯಸಂಸಗ್ಗಂ ಸಮಾಪಜ್ಜಿ, ಆಯಸ್ಮಾಯೇವ ಭನ್ತೇ ಉದಾಯಿತ್ಥೇರೋ ಮಾತುಗಾಮಂ ದುಟ್ಠುಲ್ಲಾಹಿ ವಾಚಾಹಿ ಓಭಾಸಿ, ಆಯಸ್ಮಾಯೇವ ಭನ್ತೇ ಉದಾಯಿತ್ಥೇರೋ ಮಾತುಗಾಮಸ್ಸ ಸನ್ತಿಕೇ ಅತ್ತಕಾಮ ಪಾರಿಚರಿಯಾಯ ವಣ್ಣಂ ಅಭಾಸಿ, ಆಯಸ್ಮಾಯೇವ ಭನ್ತೇ ಉದಾಯಿತ್ಥೇರೋ ಸಞ್ಚರಿತ್ತಂ ಸಮಾಪಜ್ಜಿಂ, ತಸ್ಮಿಂ ಭನ್ತೇ ವತ್ಥುಸ್ಮಿಂ ಪಞ್ಞತ್ತೋ.

೬. ಕುಟಿಕಾರ ಸಙ್ಘಾದಿಸೇಸ ಸಿಕ್ಖಾಪುಚ್ಛಾ

ಪುಚ್ಛಾ – ಯಂ ¶ ತೇನ ಆವುಸೋ…ಪೇ… ಸಮ್ಮಾಸಮ್ಬುದ್ಧೇನ ಸಞ್ಞಾಚಿಕಾಯ ಕುಟಿಂ ಕಾರಾಪೇನ್ತಸ್ಸ ಸಙ್ಘಾದಿಸೇಸೋ ಕತ್ಥ ಪಞ್ಞತ್ತೋ.

ವಿಸ್ಸಜ್ಜನಾ – ಆಳವಿಯಂ ಭನ್ತೇ ಪಞ್ಞತ್ಥೋ.

ಪುಚ್ಛಾ – ಕಂ ಆವುಸೋ ಆರಬ್ಭ ಪಞ್ಞತ್ತೋ.

ವಿಸ್ಸಜ್ಜನಾ – ಆಳವಿಕೇ ಭನ್ತೇ ಭಿಕ್ಖೂ ಆರಬ್ಭ ಪಞ್ಞತ್ತೋ.

ಪುಚ್ಛಾ – ಕಿಸ್ಮಿಂ ¶ ಆವುಸೋ ವತ್ಥುಸ್ಮಿಂ ಪಞ್ಞತ್ತೋ.

ವಿಸ್ಸಜ್ಜನಾ – ಆಳವಿಕಾ ಭನ್ತೇ ಭಿಕ್ಖೂ ಸಞ್ಞಾಚಿಕಾಯೋ ಕುಟಿಯೋ ಕಾರಾಪೇಸುಂ, ತಸ್ಮಿಂ ಭನ್ತೇ ವತ್ಥುಸ್ಮಿಂ ಪಞ್ಞತ್ತೋ.

೭. ವಿಹಾರಕಾರ ಸಙ್ಘಾದಿಸೇಸ ಸಿಕ್ಖಾಪುಚ್ಛಾ

ಪುಚ್ಛಾ – ಯಂ ತೇನ ಆವುಸೋ…ಪೇ… ಸಮ್ಮಾಸಮ್ಬುದ್ಧೇನ ಮಹಲ್ಲಕಂ ವಿಹಾರಂ ಕಾರಾಪೇನ್ತಸ್ಸ ಸಙ್ಘಾದಿಸೇಸೋ ಕತ್ಥ ಪಞ್ಞತ್ತೋ.

ವಿಸ್ಸಜ್ಜನಾ – ಕೋಸಮ್ಬಿಯಂ ಭನ್ತೇ.

ಪುಚ್ಛಾ – ಕಂ ¶ ಆವುಸೋ ಆರಬ್ಭ ಪಞ್ಞತ್ತೋ.

ವಿಸ್ಸಜ್ಜನಾ – ಆಯಸ್ಮನ್ತಂ ಭನ್ತೇ ಛನ್ನತ್ಥೇರಂ ಆರಬ್ಭ ಪಞ್ಞತ್ತೋ.

ಪುಚ್ಛಾ – ಕಿಸ್ಮಿಂ ಆವುಸೋ ವತ್ಥುಸ್ಮಿಂ ಪಞ್ಞತ್ತೋ.

ವಿಸ್ಸಜ್ಜನಾ – ಆಯಸ್ಮಾ ಭನ್ತೇ ಛನ್ನೋ ವಿಹಾರವತ್ಥುಂ ಸೋಧೇನ್ತೋ ಅಞ್ಞತರಂ ಚೇತಿಯರುಕ್ಖಂ ಛೇದಾಪೇಸಿ ಗಾಮಪೂಜಿತಂ ನಿಗಮಪೂಜಿತಂ ನಗರ ಪೂಜಿತಂ ಜನಪದಪೂಜಿತಂ ರಟ್ಠಪೂಜಿತಂ, ತಸ್ಮಿಂ ಭನ್ತೇ ವತ್ಥುಸ್ಮಿಂ ಪಞ್ಞತ್ತೋ.

೮-೯. ದುಟ್ಠದೋಸ ಸಙ್ಘಾದಿಸೇಸ ಸಿಕ್ಖಾಪುಚ್ಛಾ

ಪುಚ್ಛಾ – ಯಂ ತೇನ ಆವುಸೋ ಭಗವತಾ…ಪೇ… ಸಮ್ಮಾಸಮ್ಬುದ್ಧೇನ ಭಿಕ್ಖುಂ ಅಮೂಲಕೇನ ಪಾರಾಜಿಕೇನ ಧಮ್ಮೇನ ಅನುದ್ಧಂಸೇನ್ತಸ್ಸ ಚ, ಭಿಕ್ಖುಂ ಅಞ್ಞಭಾಗಿಯಸ್ಸ ಅಧಿಕರಣಸ್ಸ ಕಿಞ್ಚಿದೇಸಂ ಲೇಸಮತ್ತಂ ಉಪಾದಾಯ ಪಾರಾಜಿಕೇನ ಧಮ್ಮೇನ ಅನುದ್ಧಂಸೇನ್ತಸ್ಸ ಚ ಸಙ್ಘಾದಿಸೇಸೋ ಕತ್ಥ ಪಞ್ಞತ್ತೋ.

ವಿಸ್ಸಜ್ಜನಾ – ರಾಜಗಹೇ ¶ ಭನ್ತೇ ಪಞ್ಞತ್ತೋ.

ಪುಚ್ಛಾ – ಕಂ ಆವುಸೋ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಪಞ್ಞತ್ತೋ.

ವಿಸ್ಸಜ್ಜನಾ – ಮೇತ್ತಿಯಭೂಮಜಕಾ ಭನ್ತೇ ಭಿಕ್ಖೂ ಆರಬ್ಭ ಪಞ್ಞತ್ತೋ, ಮೇತ್ತಿಯಭೂಮಜಕಾ ಭನ್ತೇ ಭಿಕ್ಖೂ ಆಯಸ್ಮನ್ತಂ ದಬ್ಬಂ ಮಲ್ಲಪುತ್ತಂ ಅಮೂಲಕೇನ ಪಾರಾಜಿಕೇನ ಧಮ್ಮೇನ ಅನುದ್ಧಂಸೇಸುಂ, ತೇಯೇವ ಭನ್ತೇ ಮೇತ್ತಿಯಭೂಮಜಕಾ ಭಿಕ್ಖೂ ಆಯಸ್ಮನ್ತಂ ದಬ್ಬಂ ಮಲ್ಲಪುತ್ತಂ ಅಞ್ಞಭಾಗಿಯಸ್ಸ ಅಧಿಕರಣಸ್ಸ ಕಿಞ್ಚಿದೇಸಂ ಲೇಸಮತ್ತಂ ಉಪಾದಾಯ ಪಾರಾಜಿಕೇನ ಧಮ್ಮೇನ ಅನುದ್ಧಂಸೇಸುಂ, ತಸ್ಮಿಂ ಭನ್ತೇ ವತ್ಥುಸ್ಮಿಂ, ಪಞ್ಞತ್ತೋ.

೧೦. ಸಙ್ಘಭೇದಕ ಸಙ್ಘಾದಿಸೇಸ ಸಿಕ್ಖಾಪುಚ್ಛಾ

ಪುಚ್ಛಾ – ಯಂ ¶ ತೇನ ಆವುಸೋ ಭಗವತಾ…ಪೇ… ಸಮ್ಮಾಸಮ್ಬುದ್ಧೇನ ಸಙ್ಘಭೇದಕಸ್ಸ ಭಿಕ್ಖುನೋ ಯಾವತತಿಯಂ ಸಮನುಭಾಸನಾಯ ಅಪ್ಪಟಿನಿಸ್ಸಜ್ಜನ್ತಸ್ಸ ಸಙ್ಘಾದಿಸೇಸೋ ಕತ್ಥ ಪಞ್ಞತ್ತೋ.

ವಿಸ್ಸಜ್ಜನಾ – ರಾಜಗಹೇ ಭನ್ತೇ ಪಞ್ಞತ್ತೋ.

ಪುಚ್ಛಾ – ಕಂ ¶ ಆವುಸೋ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಪಞ್ಞತ್ಥೋ.

ವಿಸ್ಸಜ್ಜನಾ – ದೇವದತ್ತಂ ಭನ್ತೇ ಆರಬ್ಭ ಪಞ್ಞತ್ತೋ.

ದೇವದತ್ತೋ ಭನ್ತೇ ಸಮಗ್ಗಸ್ಸ ಸಙ್ಘಸ್ಸ ಭೇದಾಯ ಪರಕ್ಕಮಿ, ತಸ್ಮಿಂ ಭನ್ತೇ ವತ್ಥುಸ್ಮಿಂ ಪಞ್ಞತ್ತೋ.

೧೧. ಭೇದಾನುವತ್ತಕ ಸಿಕ್ಖಾಪುಚ್ಛಾ

ಪುಚ್ಛಾ – ಯಂ ¶ ತೇನ ಆವುಸೋ ಭಗವತಾ…ಪೇ… ಸಮ್ಮಾಸಮ್ಬುದ್ಧೇನ ಭೇದಾನುವತ್ತಕಾನಂ ಭಿಕ್ಖೂನಂ ಯಾವತತಿಯಂ ಸಮನುಭಾಸನಾಯ ಅಪ್ಪಟಿನಿಸ್ಸಜ್ಜನ್ತಾನಂ ಸಙ್ಘಾದಿಸೇಸೋ ಕತ್ಥ ಪಞ್ಞತ್ತೋ.

ವಿಸ್ಸಜ್ಜನಾ – ರಾಜಗಹೇ ಭನ್ತೇ ಪಞ್ಞತ್ತೋ.

ಪುಚ್ಛಾ – ಕಂ ಆವುಸೋ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಪಞ್ಞತ್ತೋ.

ವಿಸ್ಸಜ್ಜನಾ – ಸಮ್ಬಹುಲೇ ಭನ್ತೇ ಭಿಕ್ಖೂ ಆರಬ್ಭ ಪಞ್ಞತ್ತೋ, ಸಮ್ಬಹುಲಾ ಭನ್ತೇ ಭಿಕ್ಖೂ ದೇವದತ್ತಸ್ಸ ಸಙ್ಘಾಭೇದಾಯ ಪರಕ್ಕಮನ್ತಸ್ಸ ಅನುವತ್ತಕಾ ಅಹೇಸುಂ ವಗ್ಗವಾದಕಾ, ತಸ್ಮಿಂ ಭನ್ತೇ ವತ್ಥುಸ್ಮಿಂ ಪಞ್ಞತ್ತೋ.

೧೨. ದುಬ್ಬಚ, ಸಙ್ಘಾದಿಸೇಸ ಸಿಕ್ಖಾಪುಚ್ಛಾ

ಪುಚ್ಛಾ – ಯಂ ¶ ತೇನ ಆವುಸೋ ಭಗವತಾ…ಪೇ… ಸಮ್ಮಾಸಮ್ಬುದ್ಧೇನ ದುಬ್ಬಚಸ್ಸ ಭಿಕ್ಖುನೋ ಯಾವತತಿಯಂ ಸಮನುಭಾಸನಾಯ ಅಪ್ಪಟಿನಿಸ್ಸಜ್ಜನ್ತಸ್ಸ ಸಙ್ಘಾದಿಸೇಸೋ ಕತ್ಥ ಪಞ್ಞತ್ತೋ.

ವಿಸ್ಸಜ್ಜನಾ – ಕೋಸಮ್ಬಿಯಂ ಭನ್ತೇ ಪಞ್ಞತ್ತೋ.

ಪುಚ್ಛಾ – ಕಂ ¶ ಆವುಸೋ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಪಞ್ಞತ್ತೋ.

ವಿಸ್ಸಜ್ಜನಾ – ಆಯಸ್ಮನ್ತಂ ಭನ್ತೇ ಛನ್ನಂ ಆರಬ್ಭ ಪಞ್ಞತ್ತೋ, ಆಯಸ್ಮಾ ಭನ್ತೇ ಛನ್ನೋ ಭಿಕ್ಖೂಹಿ ಸಹಧಮ್ಮಿಕಂ ವುಚ್ಚಮಾನೋ ಅತ್ತಾನಂ ಅವಚನೀಯಂ ಅಕಾಸಿ, ತಸ್ಮಿಂ ಭನ್ತೇ ವತ್ಥುಸ್ಮಿಂ ಪಞ್ಞತ್ತೋ.

೧೩. ಕುಲದೂಸಕ ಸಙ್ಘಾದಿಸೇಸ ಸಿಕ್ಖಾಪುಚ್ಛಾ

ಪುಚ್ಛಾ – ಯಂ ¶ ತೇನ ಆವುಸೋ ಭಗವತಾ…ಪೇ… ಸಮ್ಮಾಸಮ್ಬುದ್ಧೇನ ಕುಲದೂಸಕಸ್ಸ ಭಿಕ್ಖುನೋ ಯಾವತತಿಯಂ ಸಮನುಭಾಸನಾಯ ಅಪ್ಪಟಿನಿಸ್ಸಜ್ಜನ್ತಸ್ಸ ಸಙ್ಘಾದಿಸೇಸೋ ಕತ್ಥ ಪಞ್ಞತ್ತೋ.

ವಿಸ್ಸಜ್ಜನಾ – ಸಾವತ್ಥಿಯಂ ¶ ಭನ್ತೇ ಪಞ್ಞತ್ತೋ.

ಪುಚ್ಛಾ – ಕಂ ಆರಬ್ಭ ಆವುಸೋ ಕಿಸ್ಮಿಂ ವತ್ಥುಸ್ಮಿಂ ಪಞ್ಞತ್ತೋ.

ವಿಸ್ಸಜ್ಜನಾ – ಅಸ್ಸಜಿ ಪುನಬ್ಬಸುಕೇ ಭನ್ತೇ ಭಿಕ್ಖೂ ಆರಬ್ಭ ಪಞ್ಞತ್ತೋ, ಅಸ್ಸಜಿಪುನಬ್ಬಸುಕಾ ಭನ್ತೇ ಭಿಕ್ಖೂ ಸಙ್ಘೇನ ಪಬ್ಬಾಜನೀಯಕಮ್ಮಕತಾ ಛನ್ದಗಾಮಿತಾ ದೋಸಗಾಮಿತಾ ಮೋಹಗಾಮಿತಾ ಭಯಗಾಮಿತಾ ಪಾಪೇಸುಂ, ತಸ್ಮಿಂ ಭನ್ತೇ ವತ್ಥುಸ್ಮಿಂ ಪಞ್ಞತ್ತೋ.

ಅನಿಯತ ಸಿಕ್ಖಾಪುಚ್ಛಾ

ಪುಚ್ಛಾ – ಯಂ ¶ ತೇನ ಆವುಸೋ ಭಗವತಾ…ಪೇ… ಸಮ್ಮಾಸಮ್ಬುದ್ಧೇನ ಪಠಮೋ ಚ ಅನಿಯತೋ ದುತಿಯೋ ಚ ಅನಿಯತೋ ಕತ್ಥ ಪಞ್ಞತ್ತೋ.

ವಿಸ್ಸಜ್ಜನಾ – ಸಾವತ್ಥಿಯಂ ಭನ್ತೇ ಪಞ್ಞತ್ತೋ.

ಪುಚ್ಛಾ – ಕಂ ಆವುಸೋ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಪಞ್ಞತ್ತೋ.

ವಿಸ್ಸಜ್ಜನಾ – ಆಯಸ್ಮನ್ತಂ ಭನ್ತೇ ಉದಾಯಿಂ ಆರಬ್ಭ ಪಞ್ಞತ್ತೋ, ಆಯಸ್ಮಾ ಭನ್ತೇ ಉದಾಯೀ ಮಾತುಗಾಮೇನ ಸದ್ಧಿಂ ಏಕೋಏಕಾಯ ರಹೋ ಪಟಿಚ್ಛನ್ನೇ ಆಸನೇ ಅಲಂಕಮ್ಮನಿಯೇ ನಿಸಜ್ಜಂ ಕಪ್ಪೇಸಿ, ತಸ್ಮಿಞ್ಚ ವತ್ಥುಸ್ಮಿಂ, ಆಯಸ್ಮಾಯೇವ ಭನ್ತೇ ಉದಾಯೀ ಮಾತುಗಾಮೇನ ಸದ್ಧಿಂ ರಹೋ ನಿಸಜ್ಜಂ ಅಕಾಸಿ, ತಸ್ಮಿಞ್ಚ ಭನ್ತೇ ವತ್ಥುಸ್ಮಿಂ ಪಞ್ಞತ್ತೋ.

ಪುಚ್ಛಾ – ಕಸ್ಸ ¶ ಆವುಸೋ ವಚನಂ.

ವಿಸ್ಸಜ್ಜನಾ – ಭಗವತೋ ಭನ್ತೇ ವಚನಂ ಅರಹತೋ ಸಮ್ಮಾಸಮ್ಬುದ್ಧಸ್ಸ.

ಪುಚ್ಛಾ – ಕೇನಾವುಸೋ ಆಭತಂ.

ವಿಸ್ಸಜ್ಜನಾ – ಪರಮ್ಪರಾಯ ಭನ್ತೇ ಆಭತಂ.

ಪುಚ್ಛಾ – ಅತ್ಥಿ ನುಖೋ ಆವುಸೋ ಏತ್ಥ ಕೋಚಿಪಿ ವಿರದ್ಧದೋಸೋ.

ವಿಸ್ಸಜ್ಜನಾ – ನತ್ಥಿ ಭನ್ತೇ.

ಸಂಗಾಯನತ್ಥಾಯ ಸಙ್ಘಸ್ಸಞಾಪನಂ

ಸುಣಾತು ¶ ಮೇ ಭನ್ತೇ ಸಙ್ಘೋ, ಅಹಂ ಭನ್ತೇ ಆಯಸ್ಮನ್ತಂ ವಿಚಿತ್ತಸಾರಾಭಿವಂಸಂ ತಿಪಿಟಕಧರ ಧಮ್ಮಭಣ್ಡಾಗಾರಿಕಂ ಪಠಮ ದುಟ್ಠದೋಸ ಸಿಕ್ಖಾಪದತೋ ಪಟ್ಠಾಯ ಪುಚ್ಛಿತಬ್ಬಾನಿ ಅನೇಕಾನಿ ಠಾನಾನಿ ಪುಚ್ಛಿಂ, ಸೋ ಚ ಆಯಸ್ಮಾ ಪುಟ್ಠೋ ಪುಟ್ಠೋ ವಿಸ್ಸಜ್ಜೇತಿ, ಇತಿಹಿದಂ ಭನ್ತೇ ಸಬ್ಬಂ ಸಿಕ್ಖಾಪದಂ ನಿಮ್ಮಲಂ ಸುಪರಿಸುದ್ಧಂ ತಸ್ಸೇವ ಭಗವತೋ ವಚನಂ ಅರಹತೋ ಸಮ್ಮಾಸಮ್ಬುದ್ಧಸ್ಸ, ತಸ್ಮಾ ಯಥಾಪುರೇ ಮಹಾಕಸ್ಸಪಾದಯೋ ಮಹಾಥೇರವರಾ ಪೋರಾಣಸಂಗೀತಿಕಾರಾ ಬ್ರಹ್ಮಚರಿಯಸ್ಸ ಚಿರಟ್ಠಿತಿಯಾ ಬಹುಜನಹಿತಾಯ ಬಹುಜನಸುಖಾಯ ಲೋಕಾನುಕಮ್ಪಾಯ ಅತ್ಥಾಯ ಹಿತಾಯ ಸುಖಾಯ ದೇವಮನುಸ್ಸಾನಂ ಸಂಗಾಯಿಂಸುಚೇವ ಅನುಸಂಗಾಯಿಂಸುಚ, ಏವಮೇವ ಮಯಮ್ಪಿ ದಾನಿ ಸಬ್ಬೇವ ಛಟ್ಠಸಂಗೀತಿ ಮಹಾಧಮ್ಮಸಭಾಪರಿಯಾಪನ್ನಾ ಇಮಾನಿ ಸಿಕ್ಖಾಪದಾನಿ ಏಕತೋ ಗಣಸಜ್ಝಾಯಂ ಕತ್ವಾ ಸಂಗಾಯೇಯ್ಯಾಮ.

ನಿಸ್ಸಗ್ಗಿಪಾಚಿತ್ತಿಯ

೧. ಚೀವರವಗ್ಗ ೧. ಪಠಮಕಥಿನ ಸಿಕ್ಖಾಪುಚ್ಛಾ

ಪುಚ್ಛಾ – ಯಂ ¶ ತೇನ ಆವುಸೋ ಭಗವತಾ…ಪೇ… ಸಮ್ಮಾಸಮ್ಬುದ್ಧೇನ ಅತಿರೇಕಚೀವರಂ ದಸಾಹಂ ಅತಿಕ್ಕಾಮೇನ್ತಸ್ಸ ನಿಸ್ಸಗ್ಗಿಯಂ ಪಾಚಿತ್ತಿಯಂ ಕತ್ಥ ಪಞ್ಞತ್ತಂ.

ವಿಸ್ಸಜ್ಜನಾ – ವೇಸಾಲಿಯಂ ಭನ್ತೇ ಪಞ್ಞತ್ತಂ.

ಪುಚ್ಛಾ – ಕಂ ಆವುಸೋ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಪಞ್ಞತ್ತಂ.

ವಿಸ್ಸಜ್ಜನಾ – ಛಬ್ಬಗ್ಗಿಯೇ ಭನ್ತೇ ಭಿಕ್ಖೂ ಆರಬ್ಭ ಪಞ್ಞತ್ತಂ, ಛಬ್ಬಗ್ಗಿಯಾ ಭನ್ತೇ ಭಿಕ್ಖೂ ಅತಿರೇಕಚೀವರಂ ಧಾರೇಸುಂ, ತಸ್ಮಿಂ ಭನ್ತೇ ವತ್ಥುಸ್ಮಿಂ ಪಞ್ಞತ್ತಂ.

೧. ಚೀವರವಗ್ಗ ೨. ಉದೋಸಿತ ಸಿಕ್ಖಾಪುಚ್ಛಾ

ಪುಚ್ಛಾ – ಏಕರತ್ತಂ ¶ ಆವುಸೋ ತಿಚಿವರೇನ ವಿಪ್ಪವಸನ್ತಸ್ಸ ನಿಸ್ಸಗ್ಗಿಯಂ ಪಾಚಿತ್ತಿಯಂ ಭಗವತಾ ಕತ್ಥ ಪಞ್ಞತ್ತಂ.

ವಿಸ್ಸಜ್ಜನಾ – ಸಾವತ್ಥಿಯಂ ಭನ್ತೇ ಪಞ್ಞತ್ತಂ.

ಪುಚ್ಛಾ – ಕಂ ಆವುಸೋ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಪಞ್ಞತ್ತಂ.

ವಿಸ್ಸಜ್ಜನಾ – ಸಮ್ಬಹುಲೇ ಭನ್ತೇ ಭಿಕ್ಖೂ ಆರಬ್ಭ ಪಞ್ಞತ್ತಂ, ಸಮ್ಬಹುಲಾ ಭನ್ತೇ ಭಿಕ್ಖೂ ಭಿಕ್ಖೂನಂ ಹತ್ಥೇ ಚೀವರಂ ನಿಕ್ಖಿಪಿತ್ವಾ ಸನ್ತರುತ್ತರೇನ ಜನಪದಚಾರಿಕಂ ಪಕ್ಕಮಿಂಸು, ತಸ್ಮಿಂ ಭನ್ತೇ ವತ್ಥುಸ್ಮಿಂ ಪಞ್ಞತ್ತಂ.

೧. ಚೀವರವಗ್ಗ ೩. ತತಿಯಕಥಿನ ಸಿಕ್ಖಾಪುಚ್ಛಾ

ಪುಚ್ಛಾ – ಅಕಾಲಚೀವರಂ ¶ ಆವುಸೋ ಪಟಿಗ್ಗಹೇತ್ವಾ ಮಾಸಂ ಅತಿಕ್ಕಾಮೇನ್ತಸ್ಸ ನಿಸ್ಸಗ್ಗಿಯಂ ಪಾಚಿತ್ತಿಯಂ ಭಗವತಾ ಕತ್ಥ ಪಞ್ಞತ್ತಂ.

ವಿಸ್ಸಜ್ಜನಾ – ಸಾವತ್ಥಿಯಂ ಭನ್ತೇ ಪಞ್ಞತ್ತಂ.

ಪುಚ್ಛಾ – ಕಂ ಆವುಸೋ ಆರಬ್ಬ್ಭ ಕಿಸ್ಮಿಂ ವತ್ಥುಸ್ಮಿಂ ಪಞ್ಞತ್ತಂ.

ವಿಸ್ಸಜ್ಜನಾ – ಸಮ್ಬಹುಲೇ ಭನ್ತೇ ಭಿಕ್ಖೂ ಆರಬ್ಭ ಪಞ್ಞತ್ತಂ, ಸಮ್ಬಹುಲಾ ಭನ್ತೇ ಭಿಕ್ಖೂ ಅಕಾಲಚೀವರಂ ಪಟಿಗ್ಗಹೇತ್ವಾ ಮಾಸಂ ಅತಿಕ್ಕಾಮೇಸುಂ, ತಸ್ಮಿಂ ಭನ್ತೇ ವತ್ಥುಸ್ಮಿಂ ಪಞ್ಞತ್ತಂ.

೧. ಚೀವರವಗ್ಗ ೪. ಪುರಾಣಚೀವರ ಸಿಕ್ಖಾಪುಚ್ಛಾ

ಪುಚ್ಛಾ – ಅಞ್ಞಾತಿಕಾಯ ¶ ಆವುಸೋ ಭಿಕ್ಖುನಿಯಾ ಪುರಾಣಚೀವರಂ ಧೋವಾಪೇನ್ತಸ್ಸ ನಿಸ್ಸಗ್ಗಿಯಂ ಪಾಚಿತ್ತಿಯಂ ಭಗವತಾ ಕತ್ಥ ಪಞ್ಞತ್ತಂ.

ವಿಸ್ಸಜ್ಜನಾ – ಸಾವತ್ಥಿಯಂ ಭನ್ತೇ ಪಞ್ಞತ್ತಂ.

ಪುಚ್ಛಾ – ಕಂ ಆವುಸೋ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಪಞ್ಞತ್ತಂ.

ವಿಸ್ಸಜ್ಜನಾ – ಆಯಸ್ಮನ್ತಂ ಭನ್ತೇ ಉದಾಯಿಂ ಆರಬ್ಭ ಪಞ್ಞತ್ತಂ, ಆಯಸ್ಮಾ ಭನ್ತೇ ಉದಾಯೀ ಅಞ್ಞಾತಿಕಾಯ ಭಿಕ್ಖುನಿಯಾ ಪುರಾಣಚೀವರಂ ಧೋವಾಪೇಸಿ, ತಸ್ಮಿಂ ಭನ್ತೇ ವತ್ಥುಸ್ಮಿಂ ಪಞ್ಞತ್ತಂ.

೧. ಚೀವರವಗ್ಗ ೫. ಚೀವರಪಟಿಗ್ಗಹಣ ಸಿಕ್ಖಾಪುಚ್ಛಾ

ಪುಚ್ಛಾ – ಅಞ್ಞಾತಿಕಾಯ ¶ ಆವುಸೋ ಭಿಕ್ಖುನಿಯಾ ಹತ್ಥತೋ ಚೀವರಂ ಪಟಿಗ್ಗಣ್ಹನ್ತಸ್ಸ ನಿಸ್ಸಗ್ಗಿಯಂ ಪಾಚಿತ್ತಿಯಂ ಭಗವತಾ ಕತ್ಥ ಪಞ್ಞತ್ತಂ.

ವಿಸ್ಸಜ್ಜನಾ – ರಾಜಗಹೇ ಭನ್ತೇ ಪಞ್ಞತ್ತಂ.

ಪುಚ್ಛಾ – ಕಂ ಆವುಸೋ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಪಞ್ಞತ್ತಂ.

ವಿಸ್ಸಜ್ಜನಾ – ಆಯಸ್ಮನ್ತಂ ಭನ್ತೇ ಉದಾಯಿಂ ಆರಬ್ಭ ಪಞ್ಞತ್ತಂ, ಆಯಸ್ಮಾ ಭನ್ತೇ ಉದಾಯೀ ಅಞ್ಞಾತಿಕಾಯ ಭಿಕ್ಖುನಿಯಾ ಹತ್ಥತೋ ಚೀವರಂ ಪಟಿಗ್ಗಹೇಸಿ, ತಸ್ಮಿಂ ಭನ್ತೇ ವತ್ಥುಸ್ಮಿಂ ಪಞ್ಞತ್ತಂ.

೧. ಚೀವರವಗ್ಗ ೬. ಅಞ್ಞಾತಕವಿಞ್ಞತ್ತಿ ಸಿಕ್ಖಾಪುಚ್ಛಾ

ಪುಚ್ಛಾ – ಅಞ್ಞಾತಕಂ ¶ ಆವುಸೋ ಗಹಪತಿಂವಾ ಗಹತಾನಿಂವಾ ಚೀವರಂ ವಿಞ್ಞಾಪೇನ್ತಸ್ಸ ನಿಸ್ಸಗ್ಗಿಯಂ ಪಾಚಿತ್ತಿಯಂ ಭಗವತಾ ಕತ್ಥ ಪಞ್ಞತ್ತಂ.

ವಿಸ್ಸಜ್ಜನಾ – ಸಾವತ್ಥಿಯಂ ಭನ್ತೇ ಪಞ್ಞತ್ತಂ.

ಪುಚ್ಛಾ – ಕಂ ಆವುಸೋ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಪಞ್ಞತ್ತಂ.

ವಿಸ್ಸಜ್ಜನಾ – ಆಯಸ್ಮನ್ತಂ ಭನ್ತೇ ಉಪನನ್ದಂ ಸಕ್ಯಪುತ್ತಂ ಆರಬ್ಭ ಪಞ್ಞತ್ತಂ, ಆಯಸ್ಮಾ ಭನ್ತೇ ಉಪನನ್ದೋ ಸಕ್ಯಪುತ್ತೋ ಅಞ್ಞಾತಕಂ ಸೇಟ್ಠಿಪುತ್ತಂ ಚೀವರಂ ವಿಞ್ಞಾಪೇಸಿ, ತಸ್ಮಿಂ ಭನ್ತೇ ವತ್ಥುಸ್ಮಿಂ ಪಞ್ಞತ್ತಂ.

೧. ಚೀವರವಗ್ಗ ೭. ತತುತ್ತರಿ ಸಿಕ್ಖಾಪುಚ್ಛಾ

ಪುಚ್ಛಾ – ಅಞ್ಞಾತಕಂ ¶ ಆವುಸೋ ಗಹಪತಿಂ ವಾ ಗಹಪತಾನಿಂ ವಾ ತತುತ್ತರಿ ಚೀವರಂ ವಿಞ್ಞಾಪೇನ್ತಸ್ಸ ನಿಸ್ಸಗ್ಗಿಯಂ ಪಾಚಿತ್ತಿಯಂ ಭಗವತಾ ಕತ್ಥ ಪಞ್ಞತ್ತಂ.

ವಿಸ್ಸಜ್ಜನಾ – ಸಾವತ್ಥಿಯಂ ಭನ್ತೇ ಪಞ್ಞತ್ತಂ.

ಪುಚ್ಛಾ – ಕಂ ಆವುಸೋ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಪಞ್ಞತ್ತಂ.

ವಿಸ್ಸಜ್ಜನಾ – ಛಬ್ಬಗ್ಗಿಯೇ ಭನ್ತೇ ಭಿಕ್ಖೂ ಆರಬ್ಭ ಪಞ್ಞತ್ತಂ, ಛಬ್ಬಗ್ಗಿಯಾ ಭನ್ತೇ ಭಿಕ್ಖೂ ನ ಮತ್ತಂ ಜಾನಿತ್ವಾ ಬಹುಮ್ಪಿ ಚೀವರಂ ವಿಞ್ಞಾಪೇಸುಂ, ತಸ್ಮಿಂ ಭನ್ತೇ ವತ್ಥುಸ್ಮಿಂ ಪಞ್ಞತ್ತಂ.

ಪುಚ್ಛಾ – ಪುಬ್ಬೇ ¶ ಅಪ್ಪವಾರಿತಸ್ಸ ಆವುಸೋ ಅಞ್ಞಾತಕಂ ಗಹಪತಿಂ ವಾ ಗಹತಾನಿಂ ವಾ ಉಪಸಙ್ಕಮಿತ್ವಾ ಚೀವರೇ ವಿಕಪ್ಪಂ ಆಪಜ್ಜನ್ತಸ್ಸ ಚ ಅಞ್ಞಾತಕೇ ಗಹಪತಿಕೇ ಉಪಸಙ್ಕಮಿತ್ವಾ ಚೀವರೇ ವಿಕಪ್ಪಂ ಆಪಜ್ಜನ್ತಸ್ಸ ಚ ನಿಸ್ಸಗ್ಗಿಯಂ ಪಾಚಿತ್ತಿಯಂ ಭಗವತಾ ಕತ್ಥ ಪಞ್ಞತ್ತಂ.

ವಿಸ್ಸಜ್ಜನಾ – ಸಾವತ್ಥಿಯಂ ಭನ್ತೇ ಪಞ್ಞತ್ತಂ.

ಪುಚ್ಛಾ – ಕಂ ಆವುಸೋ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಪಞ್ಞತ್ತಂ.

ವಿಸ್ಸಜ್ಜನಾ – ಆಯಸ್ಮನ್ತಂ ಭನ್ತೇ ಉಪನನ್ದಂ ಸಕ್ಯಪುತ್ತಂ ಆರಬ್ಭ ಪಞ್ಞತ್ತಂ, ಆಯಸ್ಮಾ ಭನ್ತೇ ಉಪನನ್ದೋ ಸಕ್ಯಪುತ್ತೋ ಪುಬ್ಬೇ ಅಪ್ಪವಾರಿತೋ ಅಞ್ಞಾತಕಂ ಗಹಪತಿಕಂ ಉಪಸಙ್ಕಮಿತ್ವಾ ಚೀವರೇ ವಿಕಪ್ಪಂ ಆಪಜ್ಜಿ. ಸೋಯೇವ ಭನ್ತೇ ಆಯಸ್ಮಾ ಉಪನನ್ದೋ ಸಕ್ಯಪುತ್ತೋ ಪುಬ್ಬೇ ಅಪ್ಪವಾರಿತೋ ಅಞ್ಞಾತಕೇ ಗಹಪತಿಕೇ ಉಪಸಙ್ಕಮಿತ್ವಾ ಚೀವರೇ ವಿಕಪ್ಪಂ ಆಪಜ್ಜಿ, ತಸ್ಮಿಂ ಭನ್ತೇ ವತ್ಥುಸ್ಮಿಂ ಪಞ್ಞತ್ತಂ.

೧. ಚೀವರವಗ್ಗ ೧೦. ರಾಜ ಸಿಕ್ಖಾಪುಚ್ಛಾ

ಪುಚ್ಛಾ – ಅತಿರೇಕತಿಕ್ಖತ್ತುಂ ಆವುಸೋ ಚೋದನಾಯ ಅತಿರೇಕ ಛಕ್ಖತ್ತುಂ ಠಾನೇನ ಚೀವರಂ ಅಭಿನಿಪ್ಫಾದೇನ್ತಸ್ಸ ನಿಸ್ಸಗ್ಗಿಯಂ ಪಾಚಿತ್ತಿಯಂ ಭಗವತಾ ಕತ್ಥ ಪಞ್ಞತ್ತಂ.

ವಿಸ್ಸಜ್ಜನಾ – ಸಾವತ್ಥಿಯಂ ಭನ್ತೇ ಪಞ್ಞತ್ತಂ.

ಪುಚ್ಛಾ – ಕಂ ¶ ಆವುಸೋ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಪಞ್ಞತ್ತಂ.

ವಿಸ್ಸಜ್ಜನಾ – ಆಯಸ್ಮನ್ತಂ ಭನ್ತೇ ಉಪನನ್ದಂ ಸಕ್ಯಪುತ್ತಂ ಆರಬ್ಭ ಪಞ್ಞತ್ತಂ, ಆಯಸ್ಮಾ ಭನ್ತೇ ಉಪನನ್ದೋ ಸಕ್ಯಪುತ್ತೋ ಉಪಾಸಕೇನ ಅಜ್ಜಣ್ಹೋ ಭನ್ತೇ ಆಗಮೇಹೀತಿ ವುಚ್ಚಮಾನೋ ನಾಗಮೇಸಿ, ತಸ್ಮಿಂ ಭನ್ತೇ ವತ್ಥುಸ್ಮಿಂ ಪಞ್ಞತ್ತಂ.

೨. ಕೋಸಿಯವಗ್ಗ, ೧. ಕೋಸಿಯ ಸಿಕ್ಖಾಪುಚ್ಛಾ

ಪುಚ್ಛಾ – ಕೋಸಿಯಮಿಸ್ಸಕಂ ಆವುಸೋ ಸನ್ಥಕಂ ಕಾರಾಪೇನ್ತಸ್ಸ ನಿಸ್ಸಗ್ಗಿಯಂ ಪಾಚಿತ್ತಿಯಂ ಭಗವತಾ ಕತ್ಥ ಪಞ್ಞತ್ತಂ.

ವಿಸ್ಸಜ್ಜನಾ – ಆಳವಿಯಂ ಭನ್ತೇ ಪಞ್ಞತ್ತಂ.

ಪುಚ್ಛಾ – ಕಂ ¶ ೦ ಆವುಸೋ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಪಞ್ಞತ್ತಂ.

ವಿಸ್ಸಜ್ಜನಾ – ಛಬ್ಬಗ್ಗಿಯೇ ಭನ್ತೇ ಆರಬ್ಭ ಪಞ್ಞತ್ತಂ, ಛಬ್ಬಗ್ಗಿಯಾ ಭನ್ತೇ ಭಿಕ್ಖೂ ಕೋಸಿಯಕಾರಕೇ ಉಪಸಙ್ಕಮಿತ್ವಾ ಏವಮಹಂಸು ಬಹೂ ಆವುಸೋ ಕೋಸಕಾರಕೇ ಪಚಥ ಅಮ್ಹಾಕಮ್ಪಿ ದಸ್ಸಥ ಮಯಮ್ಪಿ ಇಚ್ಛಾಮ ಕೋಸಿಯಮಿಸ್ಸಕಂ ಸನ್ತಕಂ ಕಾತುನ್ತಿ, ತಸ್ಮಿಂ ಭನ್ತೇ ವತ್ಥುಸ್ಮಿಂ ಪಞ್ಞತ್ತಂ.

೨. ಕೋಸಿಯವಗ್ಗ ೨. ಸುದ್ಧಕಾಳಕ ಸಿಕ್ಖಾಪುಚ್ಛಾ

ಪುಚ್ಛಾ – ಸುದ್ಧಕಾಳಕಾನಂ ಆವುಸೋ ಏಳಕಲೋಮಾನಂ ಸನ್ಥತಂ ಕಾರಾಪೇನ್ತಸ್ಸ ನಿಸ್ಸಗ್ಗಿಯಂ ಪಾಚಿತ್ತಿಯಂ ಭಗವತಾ ಕತ್ಥ ಪಞ್ಞತ್ತಂ.

ವಿಸ್ಸಜ್ಜನಾ – ವೇಸಾಲಿಯಂ ಭನ್ತೇ ಪಞ್ಞತ್ಥಂ.

ಪುಚ್ಛಾ – ಕಂ ¶ ಆವುಸೋ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಪಞ್ಞತ್ತಂ.

ವಿಸ್ಸಜ್ಜನಾ – ಛಬ್ಬಗ್ಗಿಯೇ ಭನ್ತೇ ಭಿಕ್ಖೂ ಆರಬ್ಭ ಪಞ್ಞತ್ತಂ, ಛಬ್ಬಗ್ಗಿಯಾ ಭನ್ತೇ ಭಿಕ್ಖೂ ಸುದ್ಧಕಾಳಕಾನಂ ಏಳಕಲೋಮಾನಂ ಸನ್ಥತಂ ಕಾರಾಪೇಸುಂ, ತಸ್ಮಿಂ ಭನ್ತೇ ವತ್ಥುಸ್ಮಿಂ ಪಞ್ಞತ್ತಂ.

೨. ಕೋಸಿಯವಗ್ಗ ೩. ದ್ವೇಭಾಗ ಸಿಕ್ಖಾಪುಚ್ಛಾ

ಪುಚ್ಛಾ – ಅನಾದಿಯಿತ್ವಾ ಆವುಸೋ ತುಲಂ ಓದಾತಾನಂ ತುಲಂ ಗೋಚರಿಯಾನಂ ನವಂ ಸನ್ಥತಂ ಕಾರಾಪೇನ್ತಸ್ಸ ನಿಸ್ಸಗ್ಗಿಯಂ ಪಾಚಿತ್ತಿಯಂ ಭಗವತಾ ಕತ್ಥ ಪಞ್ಞತ್ತಂ.

ವಿಸ್ಸಜ್ಜನಾ – ಸಾವತ್ಥಿಯಂ ಭನ್ತೇ ಪಞ್ಞತ್ತಂ.

ಪುಚ್ಛಾ – ಕಂ ¶ ಆವುಸೋ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಪಞ್ಞತ್ತಂ.

ವಿಸ್ಸಜ್ಜನಾ – ಛಬ್ಬಗ್ಗಿಯೇ ಭನ್ತೇ ಭಿಕ್ಖೂ ಆರಬ್ಭ ಪಞ್ಞತ್ತಂ, ಛಬ್ಬಗ್ಗಿಯಾ ಭನ್ತೇ ಭಿಕ್ಖೂ ಥೋಕಂಯೇವ ಓದಾತಂ ಅನ್ತೇ ಆದಿಯಿತ್ವಾ ತಥೇವ ಸುದ್ಧಕಾಳಕಾನಂ ಏಳಕಲೋಮಾನಂ ಸನ್ಥತಂ ಕಾರಾಪೇಸುಂ, ತಸ್ಮಿಂ ಭನ್ತೇ ವತ್ಥುಸ್ಮಿಂ ಪಞ್ಞತ್ತಂ.

೨. ಕೋಸಿಯವಗ್ಗ ೪. ಛಬ್ಬಸ್ಸ ಸಿಕ್ಖಾಪುಚ್ಛಾ

ಪುಚ್ಛಾ – ಯಂ ತೇನ ಆವುಸೋ ಭಗವತಾ…ಪೇ… ಸಮ್ಮಾಸಮ್ಬುದ್ಧೇನ ಅನುವಸ್ಸಂ ಕಾರಾಪೇನ್ತಸ್ಸ ನಿಸ್ಸಗ್ಗಿಯಂ ಪಾಚಿತ್ತಿಯಂ ಕತ್ಥ ಪಞ್ಞತ್ತಂ.

ವಿಸ್ಸಜ್ಜನಾ – ಸಾವತ್ಥಿಯಂ ಭನ್ತೇ ಪಞ್ಞತ್ತಂ.

ಪುಚ್ಛಾ – ಕಂ ¶ ಆವುಸೋ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಪಞ್ಞತ್ತಂ.

ವಿಸ್ಸಜ್ಜನಾ – ಸಮ್ಬಹುಲೇ ಭನ್ತೇ ಭಿಕ್ಖೂ ಆರಬ್ಭ ಪಞ್ಞತ್ತಂ, ಸಮ್ಬಹುಲಾ ಭನ್ತೇ ಭಿಕ್ಖೂ ಅನುವಸ್ಸಂ ಸನ್ಥತಂ ಕಾರಾಪೇಸುಂ, ತಸ್ಮಿಂ ಭನ್ತೇ ವತ್ಥುಸ್ಮಿಂ ಪಞ್ಞತ್ತಂ.

ಪುಚ್ಛಾ – ಕಸ್ಸ ಆವುಸೋ ವಚನಂ.

ವಿಸ್ಸಜ್ಜನಾ – ಭಗವತೋ ಭನ್ತೇ ವಚನಂ ಅರಹತೋ ಸಮ್ಮಾಸಮ್ಬುದ್ಧಸ್ಸ.

ಪುಚ್ಛಾ – ಕೇನಾವುಸೋ ಆಭತಂ.

ವಿಸ್ಸಜ್ಜನಾ – ಪರಮ್ಪರಾಯ ಭನ್ತೇ ಆಭತಂ.

ಪುಚ್ಛಾ – ಅತ್ಥಿ ¶ ನುಖೋ ಆವುಸೋ ಏತ್ಥ ಕೋಚಿ ವಿರದ್ಧದೋಸೋ.

ವಿಸ್ಸಜ್ಜನಾ – ನತ್ಥಿ ಭನ್ತೇ.

ಸಂಗಾಯನತ್ಥಾಯ ಸಙ್ಘಸ್ಸ ಞಾಪನಂ

ಸುಣಾತು ಮೇ ಭನ್ತೇ ಸಙ್ಘೋ, ಅಹಂ ಆಯಸ್ಮನ್ತಂ ವಿಚಿತ್ತಸಾರಾಭಿವಂಸಂ ತಿಪಿಟಕಧರ ಧಮ್ಮಭಣ್ಡಾಗಾರಿಕಂ ಇಮೇಸಂ ನಿಸ್ಸಗ್ಗಿಯಪಾಚಿತ್ತಿಯಸಿಕ್ಖಾಪದಾನಂ ಯಾವ ಛಬ್ಬಸ್ಸಸಿಕ್ಖಾಪದಂ ನಿದಾನಾದೀನಿ ಪುಚ್ಛಿತಬ್ಬಾನಿ ಅನೇಕಾನಿ ಠಾನಾನಿ ಪುಚ್ಛಿಂ, ಪುಟ್ಠೋಪುಟ್ಠೋ ಚ ಸೋ ಆಯಸ್ಮಾ ವಿಚಿತ್ತಸಾರಾಭಿವಂಸೋ ವಿಸ್ಸಜ್ಜೇಸಿ, ಇತಿಹಿದಂ ಭನ್ತೇ ಇಮಾನಿ ಸಿಕ್ಖಾಪದಾನಿ ನಿಮ್ಮಲಾನಿ ಸುಪರಿಸುದ್ಧಾನೀ ತಸ್ಸೇವ ಭಗವತೋ ವಚನಾನಿ ಅರಹತೋ ಸಮ್ಮಾಸಮ್ಬುದ್ಧಸ್ಸ, ತಸ್ಮಾ ಯಥಾಪುರೇ ಮಹಾಕಸ್ಸಪಾದಯೋ ಮಹಾಥೇರವರಾ ಪೋರಾಣಸಂಗೀತಿಕಾರಾ ಬ್ರಹ್ಮಚರಿಯಸ್ಸ ಚಿರಟ್ಠಿತಿಯಾ ಬಹುಜನಹಿತಾಯ ಬಹುಜನಸುಖಾಯ ಲೋಕಾನುಕಮ್ಪಾಯ ಅತ್ಥಾಯ ಹಿತಾಯ ಸುಖಾಯ ದೇವಮನುಸ್ಸಾನಂ ಧಮ್ಮವಿನಯಂ ಸಂಗಾಯಿಂಸು ಚೇವ ಅನುಸಂಗಾಯಿಂಸು ಚ, ಏವಮೇವ ಮಯಮ್ಪಿ ದಾನಿ ಸಬ್ಬೇವ ಛಟ್ಠಸಂಗೀತಿ ಮಹಾಧಮ್ಮಸಭಾ ಪರಿಯಾಪನ್ನಾ ಛಬ್ಬಸ್ಸ ನಿಸ್ಸಗ್ಗಿಯ ಸಿಕ್ಖಾಪದತೋ ಪಟ್ಠಾಯ ಇಮಾನಿ ನಿಸ್ಸಗ್ಗಿಯಸಿಕ್ಖಾಪದಾನಿ ಏಕತೋ ಗಣಸಜ್ಝಾಯಂ ಕತ್ವಾ ಸಂಹಾಯೇಯ್ಯಾಮ.

೨. ಕೋಸಿಯವಗ್ಗ ೫. ನಿಸೀದನಸನ್ಥತ ಸಿಕ್ಖಾಪುಚ್ಛಾ

ಪುಚ್ಛಾ – ಯಂ ¶ ತೇನ ಆವುಸೋ ಭಗವತಾ…ಪೇ… ಸಮ್ಮಾಸಮ್ಬುದ್ಧೇನ ಅನಾದಿಯಿತ್ವಾ ಪುರಾಣಸನ್ಥತಸ್ಸ ಸಾಮನ್ತಾ ಸುಗತವಿದತ್ತಿಂ ನವಂ ನಿಸೀದನಸನ್ಥತಂ ಕಾರಾಪೇನ್ತಸ್ಸ ನಿಸ್ಸಗ್ಗಿಯಂ ಪಾಚಿತ್ತಿಯಂ ಕತ್ಥ ಪಞ್ಞತ್ತಂ.

ವಿಸ್ಸಜ್ಜನಾ – ಸಾವತ್ಥಿಯಂ ಭನ್ತೇ ಪಞ್ಞತ್ತಂ.

ಪುಚ್ಛಾ – ಕಂ ¶ ಆವುಸೋ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಪಞ್ಞತ್ತಂ.

ವಿಸ್ಸಜ್ಜನಾ – ಸಮ್ಬಹುಲೇ ಭನ್ತೇ ಭಿಕ್ಖೂ ಆರಬ್ಭ ಪಞ್ಞತ್ತಂ, ಸಮ್ಬಹುಲಾ ಭನ್ತೇ ಭಿಕ್ಖೂ ಸನ್ಥತಾನಿ ಉಜ್ಝಿತ್ವಾ ಆರಞ್ಞಿಕಂ ಪಿಣ್ಡಪಾತಿಕಙ್ಗಂ ಪಂಸುಕೂಲಕಙ್ಗಂ ಸಮಾದಿಯಿಂಸು, ತಸ್ಮಿಂ ಭನ್ತೇ ವತ್ಥುಸ್ಮಿಂ ಪಞ್ಞತ್ತಂ.

೨. ಕೋಸಿಯವಗ್ಗ ೬. ಏಳಕಲೋಮ ಸಿಕ್ಖಾಪುಚ್ಛಾ

ಪುಚ್ಛಾ – ಏಳಕಲೋಮಾನಿ ಆವುಸೋ ಪಟಿಗ್ಗಹೇತ್ವಾ ತಿಯೋಜನಂ ಅತಿಕ್ಕಾಮೇನ್ತಸ್ಸ ನಿಸ್ಸಗ್ಗಿಯಂ ಪಾಚಿತ್ತಿಯಂ ಕತ್ಥ ಪಞ್ಞತ್ತಂ.

ವಿಸ್ಸಜ್ಜನಾ – ಸಾವತ್ಥಿಯಂ ಭನ್ತೇ ಪಞ್ಞತ್ತಂ.

ಪುಚ್ಛಾ – ಕಂ ¶ ಆವುಸೋ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಪಞ್ಞತ್ತಂ.

ವಿಸ್ಸಜ್ಜನಾ – ಅಞ್ಞತರಂ ಭನ್ತೇ ಭಿಕ್ಖುಂ ಆರಬ್ಭ ಪಞ್ಞತ್ತಂ, ಅಞ್ಞತರೋ ಭನ್ತೇ ಭಿಕ್ಖು ಏಳಕಲೋಮಾನಿ ಪಟಿಗ್ಗಹೇತ್ವಾ ತಿಯೋಜನಂ ಅತಿಕ್ಕಾಮೇಸಿ, ತಸ್ಮಿಂ ಭನ್ತೇ ವತ್ಥುಸ್ಮಿಂ ಪಞ್ಞತ್ತಂ.

೨. ಕೋಸಿಯವಗ್ಗ ೭. ಏಳಕಲೋಮಧೋವಾಪನ ಸಿಕ್ಖಾಪುಚ್ಛಾ

ಪುಚ್ಛಾ – ಅಞ್ಞಾತಿಕಾಯ ¶ ಆವುಸೋ ಭಿಕ್ಖುನಿಯಾ ಏಳಕಲೋಮಾನಿ ಧೋವಾಪೇನ್ತಸ್ಸ ನಿಸ್ಸಗ್ಗಿಯಂ ಪಾಚಿತ್ತಿಯಂ ಕತ್ಥ ಪಞ್ಞತ್ತಂ.

ವಿಸ್ಸಜ್ಜನಾ – ಸಕ್ಕೇಸು ಭನ್ತೇ ಪಞ್ಞತ್ತಂ.

ಪುಚ್ಛಾ – ಕಂ ಆವುಸೋ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಪಞ್ಞತ್ತಂ.

ವಿಸ್ಸಜ್ಜನಾ – ಛಬ್ಬಗ್ಗಿಯೇ ಭನ್ತೇ ಭಿಕ್ಖೂ ಆರಬ್ಭ ಪಞ್ಞತ್ತಂ, ಛಬ್ಬಗ್ಗಿಯಾ ಭನ್ತೇ ಭಿಕ್ಖೂ ಅಞ್ಞಾತಿಕಾಹಿ ಭಿಕ್ಖೂನೀಹಿ ಏಳಕಲೋಮಾನಿ ಧೋವಾಪೇಸುಂ, ತಸ್ಮಿಂ ಭನ್ತೇ ವತ್ಥುಸ್ಮಿಂ ಪಞ್ಞತ್ತಂ.

೨. ಕೋಸಿಯವಗ್ಗ ೮. ರೂಪಿಯ ಸಿಕ್ಖಾಪುಚ್ಛಾ

ಪುಚ್ಛಾ – ರೂಪಿಯಂ ¶ ಆವುಸೋ ಪಟಿಗ್ಗಣ್ಹನ್ತಸ್ಸ ನಿಸ್ಸಗ್ಗಿಯಂ ಪಾಚಿತ್ತಿಯಂ ಭಗವತಾ ಕತ್ಥ ಪಞ್ಞತ್ತಂ.

ವಿಸ್ಸಜ್ಜನಾ – ರಾಜಗಹೇ ಭನ್ತೇ ಪಞ್ಞತ್ತಂ.

ಪುಚ್ಛಾ – ಕಂ ಆವುಸೋ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಪಞ್ಞತ್ತಂ.

ವಿಸ್ಸಜ್ಜನಾ – ಆಯಸ್ಮನ್ತಂ ಭನ್ತೇ ಉಪನನ್ದಂ ಸಕ್ಯಪುತ್ತಂ ಆರಬ್ಭ ಪಞ್ಞತ್ತಂ, ಆಯಸ್ಮಾ ಭನ್ತೇ ಉಪನನ್ದೋ ಸಕ್ಯಪುತ್ತೋ ರೂಪಿಯಂ ಪಟಿಗ್ಗಹೇಸಿ, ತಸ್ಮಿಂ ಭನ್ತೇ ವತ್ಥುಸ್ಮಿಂ ಪಞ್ಞತ್ತಂ.

ಪುಚ್ಛಾ – ಕಥಂ ¶ ಆವುಸೋ ತತ್ಥ ಪಟಿಪಜ್ಜನ್ತೋ ರೂಪಿಯಂ ಪಟಿಗ್ಗಣ್ಹಾತಿ ನಾಮ.

ವಿಸ್ಸಜ್ಜನಾ – ಸಯಂ ಭನ್ತೇ ಗಣ್ಹಾತಿ, ಅಞ್ಞಂ ವಾ ಗಣ್ಹಾಪೇಸಿ, ಇದಂ ಅಯ್ಯಸ್ಸ ಹೋತೂತಿ ಉಪನಿಕ್ಖಿತ್ತಂ ಸಾದಿಯತಿ, ಏವಂ ಖೋ ಭನ್ತೇ ಪಟಿಪಜ್ಜನ್ತೋ ಭಿಕ್ಖು ರೂಪಿಯಂ ಪಟಿಗ್ಗಣ್ಹಾತಿ ನಾಮ.

ಪುಚ್ಛಾ – ಕಥಂ ಆವುಸೋ ತತ್ಥ ಪಟಿಪಜ್ಜನ್ತೋ ಭಿಕ್ಖು ರೂಪಿಯಂ ನ ಪಟಿಗ್ಗಣ್ಹಾತಿ ನಾಮ.

ವಿಸ್ಸಜ್ಜನಾ – ಯಥಾ ¶ ಭನ್ತೇ ರಾಜಸಿಕ್ಖಾಪದೇ ಯಥಾ ಚ ಭನ್ತೇ ಮೇಣ್ಡಕಸಿಕ್ಖಾಪದೇ ಆಗಚ್ಛತಿ, ತಥಾ ಭನ್ತೇ ಪಟಿಪಜ್ಜನ್ತೋ ಭಿಕ್ಖು ರೂಪಿಯಂ ನ ಪಟಿಗ್ಗಣ್ಹಾತಿನಾಮ.

೨. ಕೋಸಿಯವಗ್ಗ ೯. ರೂಪಿಯಸಂವೋಹಾರ ಸಿಕ್ಖಾಪುಚ್ಛಾ

ಪುಚ್ಛಾ – ರೂಪಿಯಸಂವೋಹಾರಂ ¶ ಆವುಸೋ ಸಮಾಪಜ್ಜನ್ತಸ್ಸ ನಿಸ್ಸಗ್ಗಿಯಂ ಪಾಚಿತ್ತಿಯಂ ಭಗವತಾ ಕತ್ಥ ಪಞ್ಞತ್ತಂ.

ವಿಸ್ಸಜ್ಜನಾ – ಸಾವತ್ಥಿಯಂ ಭನ್ತೇ ಪಞ್ಞತ್ತಂ.

ಪುಚ್ಛಾ – ಕಂ ಆವುಸೋ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಪಞ್ಞತ್ತಂ.

ವಿಸ್ಸಜ್ಜನಾ – ಛಬ್ಬಗ್ಗಿಯೇ ಭನ್ತೇ ಭಿಕ್ಖೂ ಆರಬ್ಭ ಪಞ್ಞತ್ತಂ, ಛಬ್ಬಗ್ಗಿಯಾ ಭನ್ತೇ ಭಿಕ್ಖೂ ನಾನಪ್ಪಕಾರಕಂ ರೂಪಿಯಸಂವೋಹಾರಂ ಸಮಾಪಜ್ಜಿಂಸು, ತಸ್ಮಿಂ ಭನ್ತೇ ವತ್ಥುಸ್ಮಿಂ ಪಞ್ಞತ್ತಂ.

೨. ಕೋಸಿಯವಗ್ಗ, ೧೦. ಕಯವಿಕ್ಕಯ ಸಿಕ್ಖಾಪುಚ್ಛಾ

ಪುಚ್ಛಾ – ನಾನಪ್ಪಕಾರಕಂ ಆವುಸೋ ಕಯವಿಕ್ಕಯಂ ಆಪಜ್ಜನ್ತಸ್ಸ ನಿಸ್ಸಗ್ಗಿಯಂ ಪಾಚಿತ್ತಿಯಂ ಭಗವತಾ ಕತ್ಥ ಪಞ್ಞತ್ತಂ.

ವಿಸ್ಸಜ್ಜನಾ – ಸಾವತ್ಥಿಯಂ ಭನ್ತೇ ಪಞ್ಞತ್ತಂ.

ಪುಚ್ಛಾ – ಕಂ ಆವುಸೋ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಪಞ್ಞತ್ತಂ.

ವಿಸ್ಸಜ್ಜನಾ – ಆಯಸ್ಮನ್ತಂ ಭನ್ತೇ ಉಪನನ್ದಂ ಸಕ್ಯಪುತ್ತಂ ಆರಬ್ಭ ಪಞ್ಞತ್ತಂ, ಆಯಸ್ಮಾ ಭನ್ತೇ ಉಪನನ್ದೋ ಸಕ್ಯಪುತ್ತೋ ಪರಿಬ್ಬಾಜಕೇನ ಸದ್ಧಿ ಕಯವಿಕ್ಕಯಂ ಸಮಾಪಜ್ಜಿ, ತಸ್ಮಿಂ ಭನ್ತೇ ವತ್ಥುಸ್ಮಿಂ ಪಞ್ಞತ್ತಂ.

ಪುಚ್ಛಾ – ಕಥಂ ಆವುಸೋ ತತ್ಥ ಪಟಿಪಜ್ಜನ್ತೋ ಭಿಕ್ಖು ಕಯವಿಕ್ಕಯಂ ಸಮಾಪಜ್ಜತಿನಾಮ.

ವಿಸ್ಸಜ್ಜನಾ – ಇಮಿನಾ ಇಮಂ ದೇಹಿ ಇಮಿನಾ ಇಮಂ ಆಹರ ಇಮಿನಾ ಇಮಂ ಪರಿವತ್ತೇಹಿ ಇಮಿನಾ ಇಮಂ ಚೇತಾಮೇಹೀತಿ ಅಜ್ಝಾಚರತಿ, ಏವಂ ಖೋ ಭನ್ತೇ ಪಟಿಪಜ್ಜನ್ತೋ ಕಯವಿಕ್ಕಯಂ ಸಮಾಪಜ್ಜತಿನಾಮ.

ಪುಚ್ಛಾ – ಕಥಂ ¶ ಆವುಸೋ ತತ್ಥ ಪಟಿಪಜ್ಜನ್ತೋ ಭಿಕ್ಖು ನ ಕಯವಿಕ್ಕಯಂ ಸಮಾಪಜ್ಜತಿನಾಮ.

ವಿಸ್ಸಜ್ಜನಾ – ಯೋ ಭನ್ತೇ ಅಗ್ಘಂ ಪುಚ್ಛತಿ, ಯೋ ಚ ಭನ್ತೇ ಕಪ್ಪಿಯಕಾರಕಸ್ಸ ಆಚಿಕ್ಖತಿ, ಯೋ ಚ ಭನ್ತೇ ಅಮ್ಹಾಕಞ್ಚ ಇದಂ ಅತ್ಥಿ ಅಮ್ಹಾಕಞ್ಚ ಇಮಿನಾ ಚ ಇಮಿನಾ ಚ ಅತ್ಥೋತಿ ಭಣತಿ, ಏವಂ ಖೋ ಭನ್ತೇ ಪಟಿಪಜ್ಜನ್ತೋ ಭಿಕ್ಖು ನ ಕಯವಿಕ್ಕಯಂ ಸಮಾಪಜ್ಜತಿನಾಮ.

೩. ಪತ್ತವಗ್ಗ, ೧. ಪತ್ತ ಸಿಕ್ಖಾಪುಚ್ಛಾ

ಪುಚ್ಛಾ – ಅತಿರೇಕಪತ್ತಂ ಆವುಸೋ ದಸಾಹಂ ಅತಿಕ್ಕಾಮೇನ್ತಸ್ಸ ನಿಸ್ಸಗ್ಗಿಯಂ ಪಾಚಿತ್ತಿಯಂ ಕತ್ಥ ಪಞ್ಞತ್ತಂ.

ವಿಸ್ಸಜ್ಜನಾ – ಸಾವತ್ಥಿಯಂ ಭನ್ತೇ ಪಞ್ಞತ್ತಂ.

ಪುಚ್ಛಾ – ಕಂ ¶ ಆವುಸೋ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಪಞ್ಞತ್ತಂ.

ವಿಸ್ಸಜ್ಜನಾ – ಛಬ್ಬಗ್ಗಿಯೇ ಭನ್ತೇ ಭಿಕ್ಖೂ ಆರಬ್ಭ ಪಞ್ಞತ್ತಂ, ಛಬ್ಬಗ್ಗಿಯಾ ಭನ್ತೇ ಭಿಕ್ಖೂ ಅತಿರೇಕಪತ್ತಂ ಧಾರೇಸುಂ, ತಸ್ಮಿಂ ಭನ್ತೇ ವತ್ಥುಸ್ಮಿಂ ಪಞ್ಞತ್ತಂ.

೫೧೪ ೩. ಪತ್ತವಗ್ಗ, ೨. ಊನಪಞ್ಚಬನ್ಧನ ಸಿಕ್ಖಾಪುಚ್ಛಾ

ಪುಚ್ಛಾ – ಊನಪಞ್ಚಬನ್ಧನೇನ ಪತ್ತೇನ ಅಞ್ಞಂ ನವಂ ಪತ್ತಂ ಚೇತಾಪೇನ್ತಸ್ಸ ನಿಸ್ಸಗ್ಗಿಯಂ ಪಾಚಿತ್ತಿಯಂ ಕತ್ಥ ಪಞ್ಞತ್ತಂ.

ವಿಸ್ಸಜ್ಜನಾ – ಸಕ್ಕೇಸು ಭನ್ತೇ ಪಞ್ಞತ್ತಂ.

ಪುಚ್ಛಾ – ಕಂ ¶ ಆವುಸೋ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಪಞ್ಞತ್ತಂ.

ವಿಸ್ಸಜ್ಜನಾ – ಛಬ್ಬಗ್ಗಿಯೇ ಭನ್ತೇ ಭಿಕ್ಖೂ ಆರಬ್ಭ ಪಞ್ಞತ್ತಂ, ಛಬ್ಬಗ್ಗಿಯಾ ಭನ್ತೇ ಭಿಕ್ಖೂ ಅಪ್ಪಮತ್ತಕೇನಪಿ ಭಿನ್ನೇನ ಅಪ್ಪಮತ್ತಕೇನಪಿ ಖಣ್ಡೇನ ವಿಲಿಖಿತಮತ್ತೇನಪಿ ಬಹೂ ಪತ್ತೇ ವಿಯ್ಯಾಪೇಸುಂ, ತಸ್ಮಿಂ ಭನ್ತೇ ವತ್ಥುಸ್ಮಿಂ ಪಞ್ಞತ್ತಂ.

ನ ಭಿಕ್ಖವೇ ಪತ್ತೋ ವಿಞ್ಞಾಪೇತಬ್ಬೋ, ಯೋ ವಿಞ್ಞಾಪೇಯ್ಯ ಆಪತ್ತಿ ದುಕ್ಕಟಸ್ಸ.

೩. ಪತ್ತವಗ್ಗ ೩. ಭೇಸಜ್ಜ ಸಿಕ್ಖಾಪುಚ್ಛಾ

ಪುಚ್ಛಾ – ಭೇಸಜ್ಜಾನಿ ¶ ಆವುಸೋ ಪಟಿಗ್ಗಹೇತ್ವಾ ಸತ್ತಾಹಂ ಅತಿಕ್ಕಾಮೇನ್ತಸ್ಸ ನಿಸ್ಸಗ್ಗಿಯಂ ಪಾಚಿತ್ತಿಯಂ ಕತ್ಥ ಪಞ್ಞತ್ತಂ.

ವಿಸ್ಸಜ್ಜನಾ – ಸಾವತ್ಥಿಯಂ ಭನ್ತೇ ಪಞ್ಞತ್ತಂ.

ಪುಚ್ಛಾ – ಕಂ ಆವುಸೋ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಪಞ್ಞತ್ತಂ.

ವಿಸ್ಸಜ್ಜನಾ – ಸಮ್ಬಹುಲೇ ಭನ್ತೇ ಭಿಕ್ಖೂ ಆರಬ್ಭ ಆರಬ್ಭ ಪಞ್ಞತ್ತಂ, ಸಮ್ಬಹುಲಾ ಭನ್ತೇ ಭಿಕ್ಖೂ ಭೇಸಜ್ಜಾನಿ ಪಟಿಗ್ಗಹೇತ್ವಾ ಸತ್ತಾಹಂ ಅತಿಕ್ಕಾಮೇಸುಂ, ತಸ್ಮಿಂ ಭನ್ತೇ ವತ್ಥುಸ್ಮಿಂ ಪಞ್ಞತ್ತಂ.

೩. ಪತ್ತವಗ್ಗ ೪. ವಸ್ಸಿಕಸಾಟಿಕ ಸಿಕ್ಖಾಪುಚ್ಛಾ

ಪುಚ್ಛಾ – ಅತಿರೇಕಮಾಸೇ ¶ ಸೇಸೇ ಗಿಮಾನೇ ಆವುಸೋ ವಸ್ಸಿಕಸಾಟಿಕಚೀವರಂ ಪರಿಯೇಸನ್ತಸ್ಸ ನಿಸ್ಸಗ್ಗಿಯಂ ಪಾಚಿತ್ತಿಯಂ ಕತ್ಥ ಪಞ್ಞತ್ತಂ.

ವಿಸ್ಸಜ್ಜನಾ – ಸಾವತ್ಥಿಯಂ ಭನ್ತೇ ಪಞ್ಞತ್ತಂ.

ಪುಚ್ಛಾ – ಕಂ ¶ ಆವುಸೋ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಪಞ್ಞತ್ತಂ.

ವಿಸ್ಸಜ್ಜನಾ – ಛಬ್ಬಗ್ಗಿಯೇ ಭನ್ತೇ ಭಿಕ್ಖೂ ಆರಬ್ಭ ಪಞ್ಞತ್ತಂ, ಛಬ್ಬಗ್ಗಿಯಾ ಭನ್ತೇ ಭಿಕ್ಖೂ ಅತಿರೇಕಮಾಸೇ ಸೇಸೇ ಗಿಮ್ಹಾನೇ ವಸ್ಸಿಕಸಾಟಿಕಚೀವರಂ ಪರಿಯೇಸಿಂಸು, ತಸ್ಮಿಂ ಭನ್ತೇ ವತ್ಥುಸ್ಮಿಂ ಪಞ್ಞತ್ತಂ.

೩. ಪತ್ತವಗ್ಗ ೫. ಚೀವರಅಚ್ಛಿನ್ದನ ಸಿಕ್ಖಾಪುಚ್ಛಾ

ಪುಚ್ಛಾ – ಭಿಕ್ಖುಸ್ಸ ಆವುಸೋ ಸಾಮಂ ಚೀವರಂ ದತ್ವಾ ಕುಪಿತೇನ ಅನತ್ತಮನೇನ ಅಚ್ಛಿನ್ದನ್ತಸ್ಸ ನಿಸ್ಸಗ್ಗಿಯಂ ಪಾಚಿತ್ತಿಯಂ ಕತ್ಥ ಪಞ್ಞತ್ತಂ.

ವಿಸ್ಸಜ್ಜನಾ – ಸಾವತ್ಥಿಯಂ ಭನ್ತೇ ಪಞ್ಞತ್ತಂ.

ಪುಚ್ಛಾ – ಕಂ ¶ ಆವುಸೋ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಪಞ್ಞತ್ತಂ.

ವಿಸ್ಸಜ್ಜನಾ – ಆಯಸ್ಮನ್ತಂ ಭನ್ತೇ ಉಪನನ್ದಂ ಸಕ್ಯಪುತ್ತಂ ಆರಬ್ಭ ಪಞ್ಞತ್ತಂ, ಆಯಸ್ಮಾ ಭನ್ತೇ ಉಪನನ್ದೋ ಸಕ್ಯಪುತ್ತೋ ಭಿಕ್ಖುಸ್ಸ ಸಾಮಂ ಚೀವರಂ ದತ್ವಾ ಕುಪಿತೋ ಅನತ್ತಮನೋ ಅಚ್ಛಿನ್ದಿ, ತಸ್ಮಿಂ ಭನ್ತೇ ವತ್ಥುಸ್ಮಿಂ ಪಞ್ಞತ್ತಂ.

೩. ಪತ್ತವಗ್ಗೋ, ೬. ಸುತ್ತವಿಞ್ಞತ್ತಿ ಸಿಕ್ಖಾಪುಚ್ಛಾ

ಪುಚ್ಛಾ – ಸಾಮಂ ಆವುಸೋ ಸುತ್ತಂ ವಿಞ್ಞಾಪೇತ್ವಾ ತನ್ತವಾಯೇಹಿ ಚೀವರಂ ವಾಯಾಪೇನ್ತಸ್ಸ ನಿಸ್ಸಗ್ಗಿಯಂ ಪಾಚಿತ್ತಿಯಂ ಕತ್ಥ ಪಞ್ಞತ್ತಂ.

ವಿಸ್ಸಜ್ಜನಾ – ರಾಜಗಹೇ ಭನ್ತೇ ಪಞ್ಞತ್ತಂ.

ಪುಚ್ಛಾ – ಕಂ ಆವುಸೋ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಪಞ್ಞತ್ತಂ.

ವಿಸ್ಸಜ್ಜನಾ – ಛಬ್ಬಗ್ಗಿಯೇ ಭನ್ತೇ ಭಿಕ್ಖೂ ಆರಬ್ಭ ಪಞ್ಞತ್ತಂ, ಛಬ್ಬಗ್ಗಿಯಾ ಭನ್ತೇ ಭಿಕ್ಖೂ ಸಾಮಂ ಸುತ್ತಂ ವಿಞ್ಞಾಪೇತ್ವಾ ತನ್ತವಾಯೇಹಿ ಚೀವರಂ ವಾಯಾಪೇಸುಂ, ತಸ್ಮಿಂ ಭನ್ತೇ ವತ್ಥುಸ್ಮಿಂ ಪಞ್ಞತ್ತಂ.

೩. ಪತ್ತವಗ್ಗ, ೭. ಮಹಾಪೇಸಕಾರ ಸಿಕ್ಖಾಪುಚ್ಛಾ

ಪುಚ್ಛಾ – ಪುಬ್ಬೇ ¶ ಅಪ್ಪವಾರಿತಸ್ಸ ಆವುಸೋ ಅಞ್ಞಾತಕಸ್ಸ ಗಹಪತಿಕಸ್ಸ ತನ್ತವಾಯೇ ಉಪಸಙ್ಕಮಿತ್ವಾ ಚೀವರೇ ವಿಕಪ್ಪಂ ಆಪಜ್ಜನ್ತಸ್ಸ ನಿಸ್ಸಗ್ಗಿಯಂ ಪಾಚಿತ್ತಿಯಂ ಕತ್ಥ ಪಞ್ಞತ್ತಂ.

ವಿಸ್ಸಜ್ಜನಾ – ಸಾವತ್ಥಿ ಯಂ ಭನ್ತೇ ಪಞ್ಞತ್ತಂ.

ಪುಚ್ಛಾ – ಕಂ ¶ ಆವುಸೋ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಪಞ್ಞತ್ತಂ.

ವಿಸ್ಸಜ್ಜನಾ – ಆಯಸ್ಮನ್ತಂ ಭನ್ತೇ ಉಪನನ್ದಂ ಸಕ್ಯಪುತ್ತಂ ಆರಬ್ಭ ಪಞ್ಞತ್ತಂ, ಆಯಸ್ಮಾ ಭನ್ತೇ ಉಪನನ್ದೋ ಸಕ್ಯಪುತ್ತೋ ಪುಬ್ಬೇ ಅಪ್ಪವಾರಿತೋ ಅಞ್ಞಾತಕಸ್ಸ ಗಹಪತಿಕಸ್ಸ ತನ್ತವಾಯೇ ಉಪಸಙ್ಕಮಿತ್ವಾ ಚೀವರೇ ವಿಕಪ್ಪಂ ಆಪಜ್ಜಿ, ತಸ್ಮಿಂ ಭನ್ತೇ ವತ್ಥುಸ್ಮಿಂ ಪಞ್ಞತ್ತಂ.

೩. ಪತ್ತವಗ್ಗೋ, ೮. ಅಚ್ಚೇಕಚೀವರ ಸಿಕ್ಖಾಪುಚ್ಛಾ

ಪುಚ್ಛಾ – ಅಚ್ಚೇಕ ಚೀವರಂ ಆವುಸೋ ಪಟಿಗ್ಗಹೇತ್ವಾ ಚೀವರಕಾಲಸಮಯಂ ಅತಿಕ್ಕಾಮೇನ್ತಸ್ಸ ನಿಸ್ಸಗ್ಗಿಯಂ ಪಾಚಿತ್ತಿಯಂ ಕತ್ಥ ಪಞ್ಞತ್ತಂ.

ವಿಸ್ಸಜ್ಜನಾ – ಸಾವತ್ಥಿಯಂ ಭನ್ತೇ ಪಞ್ಞತ್ತಂ.

ಪುಚ್ಛಾ – ಕಂ ¶ ಆವುಸೋ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಪಞ್ಞತ್ತಂ.

ವಿಸ್ಸಜ್ಜನಾ – ಸಮ್ಬಹುಲೇ ಭನ್ತೇ ಭಿಕ್ಖೂ ಆರಬ್ಭ ಪಞ್ಞತ್ತಂ, ಸಮ್ಬಹುಲಾ ಭನ್ತೇ ಭಿಕ್ಖೂ ಅಚ್ಚೇಕಚೀವರಂ ಪಟಿಗ್ಗಹೇತ್ವಾ ಚೀವರಕಾಲಸಮಯಂ ಅತಿಕ್ಕಾಮೇಸುಂ, ತಸ್ಮಿಂ ಭನ್ತೇ ವತ್ಥುಸ್ಮಿಂ ಪಞ್ಞತ್ತಂ.

೩. ಪತ್ತವಗ್ಗೋ, ೯. ಸಾಸಙ್ಕ ಸಿಕ್ಖಾಪುಚ್ಛಾ

ಪುಚ್ಛಾ – ತಿಣ್ಣಂ ಆವುಸೋ ಚೀವರಾನಂ ಅಞ್ಞತರಂ ಚೀವರಂ ಅನ್ತರಘರೇ ನಿಕ್ಖಿಪಿತ್ವಾ ಅತಿರೇಕಛಾರತ್ತಂ ವಿಪ್ಪವಸನ್ತಸ್ಸ ನಿಸ್ಸಗ್ಗಿಯಂ ಪಾಚಿತ್ತಿಯಂ ಕತ್ಥ ಪಞ್ಞತ್ತಂ.

ವಿಸ್ಸಜ್ಜನಾ – ಸಾವತ್ಥಿಯಂ ಭನ್ತೇ ಪಞ್ಞತ್ತಂ.

ಪುಚ್ಛಾ – ಕಂ ¶ ಆವುಸೋ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಪಞ್ಞತ್ತಂ.

ವಿಸ್ಸಜ್ಜನಾ – ಸಮ್ಬಹುಲೇ ಭನ್ತೇ ಭಿಕ್ಖೂ ಆರಬ್ಭ ಪಞ್ಞತ್ತಂ, ಸಮ್ಬಹುಲಾ ಭನ್ತೇ ಭಿಕ್ಖೂ ತಿಣ್ಣಂ ಚೀವರಾನಂ ಅಞ್ಞತರಂ ಚೀವರಂ ಅನ್ತರಘರೇ ನಿಕ್ಖಿಪಿತ್ವಾ ಅತಿರೇಕಛಾರತ್ತಂ ವಿಪ್ಪವಸಿಂಸು, ತಸ್ಮಿಂ ಭನ್ತೇ ವತ್ಥುಸ್ಮಿಂ ಪಞ್ಞತ್ತಂ.

೩. ಪತ್ತವಗ್ಗೋ, ೧೦. ಪರಿಣತ ಸಿಕ್ಖಾಪುಚ್ಛಾ

ಪುಚ್ಛಾ – ಯಂ ತೇನ ಆವುಸೋ ಭಗವತಾ ಪಸ್ಸತಾ ಅರಹತಾ ಸಮ್ಮಾಸಮ್ಬುದ್ಧೇನ ಜಾನಂ ಸಙ್ಘಿಕಂ ಲಾಭಂ ಅತ್ಥನೋ ಪರಿಣಾಮೇನ್ತಸ್ಸ ನಿಸ್ಸಗ್ಗಿಯಂ ಪಾಚಿತ್ತಿಯಂ ಕತ್ಥ ಪಞ್ಞತ್ತಂ.

ವಿಸ್ಸಜ್ಜನಾ – ಸಾವತ್ಥಿಯಂ ಭನ್ತೇ ಪಞ್ಞತ್ತಂ.

ಪುಚ್ಛಾ – ಕಂ ¶ ಆವುಸೋ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಪಞ್ಞತ್ತಂ.

ವಿಸ್ಸಜ್ಜನಾ – ಛಬ್ಬಗ್ಗಿಯೇ ಭನ್ತೇ ಭಿಕ್ಖೂ ಆರಬ್ಭ ಪಞ್ಞತ್ತಂ, ಛಬ್ಬಗ್ಗಿಯಾ ಭನ್ತೇ ಭಿಕ್ಖೂ ಜಾನಂ ಸಙ್ಘಿಕಂ ಲಾಭಂ ಪರಿಣತಂ ಅತ್ತನೋ ಪರಿಣಾಮೇಸುಂ, ತಸ್ಮಿಂ ಭನ್ತೇ ವತ್ಥುಸ್ಮಿಂ ಪಞ್ಞತ್ತಂ.

ಪುಚ್ಛಾ – ಜಾನಂ ¶ ಆವುಸೋ ಸಙ್ಘಿಕಂ ಲಾಭಂ ಪರಿಣತಂ ಅತ್ತನೋ ಪರಿಣಾಮೇನ್ತೋ, ಕತಿ ಆಪತ್ತಿಯೋ ಆಪಜ್ಜತಿ.

ವಿಸ್ಸಜ್ಜನಾ – ಜಾನಂ ಭನ್ತೇ ಸಙ್ಘಿಕಂ ಲಾಭಂ ಪರಿಣತಂ ಅತ್ತನೋ ಪರಿಣಾಮೇನ್ತೋ ದ್ವೇ ಆಪತ್ತಿಯೋ ಆಪಜ್ಜತಿ, ಪರಿಣಾಮೇತಿ ಪಯೋಗೇ ದುಕ್ಕಟಂ, ಪರಿಣಾಮಿತೇ ನಿಸ್ಸಗ್ಗಿಯಂ ಪಾಚಿತ್ತಿಯಂ, ಜಾನಂ ಭನ್ತೇ ಸಙ್ಘಿಕಂ ಲಾಭಂ ಪರಿಣತಂ ಅತ್ತನೋ ಪರಿಣಾಮೇನ್ತೋ ಇಮಾ ದ್ವೇ ಆಪತ್ತಿಯೋ ಆಪಜ್ಜತಿ.

ಪುಚ್ಛಾ – ಕಸ್ಸ ¶ ಆವುಸೋ ವಚನಂ.

ವಿಸ್ಸಜ್ಜನಾ – ಭಗವತೋ ಭನ್ತೇ ವಚನಂ ಅರಹತೋ ಸಮ್ಮಾಸಮ್ಬುದ್ಧಸ್ಸ.

ಪುಚ್ಛಾ – ಕೇನಾವುಸೋ ಆಭತಂ.

ವಿಸ್ಸಜ್ಜನಾ – ಪರಮ್ಪರಾಯ ಭನ್ತೇ ಆಭತಂ.

ಪುಚ್ಛಾ – ಅತ್ಥಿ ನುಖೋ ಆವುಸೋ ತತ್ಥ ಕೋಚಿಪಿ ವಿರದ್ಧದೋಸೋ.

ವಿಸ್ಸಜ್ಜನಾ – ನತ್ಥಿ ಭನ್ತೇ.

ಸಂಗಾಯನತ್ಥಾಯ ಞಾಪನಂ

ಸುಣಾತು ¶ ಮೇ ಭನ್ತೇ ಸಙ್ಘೋ, ಅಹಂ ಭನ್ತೇ ಇಮೇಸಂ ಸೋಳಸನ್ನಂ ನಿಸ್ಸಗ್ಗಿಯಪಾಚಿತ್ತಿಯಸಿಕ್ಖಾಪದಾನಂ ನಿದಾನಾದೀನಿ ಅನೇಕಾನಿ ಪುಚ್ಛಿತಬ್ಬಾನಿ ಆಯಸ್ಮನ್ತಂ ವಿಚಿತ್ತಸಾರಾಭಿವಂಸಂ ತಿಪಿಟಕಧರ ಧಮ್ಮಭಣ್ಡಾಗಾರಿಕಂ ಪುಚ್ಛಿಂ, ಸೋ ಚ ಪುಟ್ಠೋ ಪುಟ್ಠೋ ವಿಸ್ಸಜ್ಜೇತಿ, ಇತಿಹಿದಂ ಭನ್ತೇ ಸಿಕ್ಖಾಪದಸಞ್ಜಾತಂ ನಿಮ್ಮಲಂ ಸು ಪರಿಸುದ್ಧಂ ತಸ್ಸೇವ ಭಗವತೋ ವಚನಂ ಅರಹತೋ ಸಮ್ಮಾಸಮ್ಬುದ್ಧಸ್ಸ, ತಸ್ಮಾ ಯಥಾ ಪುರೇ ಮಹಾಕಸ್ಸಪಾದಯೋ ಮಹಾಥೇರ ವರಾ ಪೋರಾಣಸಂಗೀತಿಕಾರಾ ಬ್ರಹ್ಮಚರಿಯಸಙ್ಖಾತಸ್ಸ ಬುದ್ಧಸಾಸನಸ್ಸ ಚಿರಟ್ಠಿತಿಯಾ ಬಹುಜನಹಿತಾಯ ಬಹುಜನಸುಖಾಯ ಲೋಕಾನುಕಮ್ಪಾಯ ಅತ್ಥಾಯ ಹಿತಾಯ ಸುಖಾಯ ದೇವಮನುಸ್ಸಾನಂ ಧಮ್ಮವಿನಯಂ ಸಂಗಾಯಿಂಸುಚೇವ ಅನುಸಂಗಾಯಿಂಸುಚ, ಏವಮೇವ ಮಯಮ್ಪಿ ದಾನಿ ಛಟ್ಠಸಂಗೀತಿ ಮಹಾಧಮ್ಮಸಭಾಪರಿಯಾಪನ್ನಾ ಇಮಾನಿ ಸಿಕ್ಖಾಪದಾನಿ ಯಥಾನುಪ್ಪತ್ತಟ್ಠಾನತೋ ಪಟ್ಠಾಯ ಏಕತೋ ಗಣಸಜ್ಝಾಯಂ ಕತ್ವಾ ಸಂಗಾಯೇಯ್ಯಾಮ.

ಪಾಚಿತ್ತಿಯಪಾಳಿ

೧. ಮುಸಾವಾದವಗ್ಗ, ೧. ಮುಸಾವಾದ ಸಿಕ್ಖಾಪುಚ್ಛಾ

ಪುಚ್ಛಾ – ಯಂ ತೇನ ಆವುಸೋ ಭಗವತಾ ಜಾನತಾ ಪಸ್ಸತಾ ಅರಹತಾ ಸಮ್ಮಾಸಮ್ಬುದ್ಧೇನ ಸಮ್ಪಜಾನಮುಸಾವಾದೇ ಪಾಚಿತ್ತಿಯಂ ಕತ್ಥ ಪಞ್ಞತ್ತಂ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಪಞ್ಞತ್ತಂ.

ವಿಸ್ಸಜ್ಜನಾ – ಸಾವತ್ಥಿಯಂ ಭನ್ತೇ ಪಞ್ಞತ್ತಂ, ಹತ್ಥಕಂ ಸಕ್ಯಪುತ್ತಂ ಆರಬ್ಭ ಪಞ್ಞತ್ತಂ, ಹತ್ಥಕೋ ಭನ್ತೇ ಸಕ್ಯಪುತ್ತೋ ತಿತ್ಥಿಯೇಹಿ ಸದ್ಧಿಂ ಸಲ್ಲಪನ್ತೋ ಅವಜಾನಿತ್ವಾ ಪಟಿಜಾನಾತಿ ಪಟಿಜಾನಿತ್ವಾ ಅವಜಾನಾತಿ, ತಸ್ಮಿಂ ಭನ್ತೇ ವತ್ಥುಸ್ಮಿಂ ಪಞ್ಞತ್ತಂ.

೧. ಮುಸಾವಾದವಗ್ಗೋ, ೨-೩. ಓಮಸವಾದ, ಪೇಸುಞ್ಞ ಸಿಕ್ಖಾಪುಚ್ಛಾ

ಪುಚ್ಛಾ – ಓಮಸವಾದೇ ಪಾಚಿತ್ತಿಯಞ್ಚ ಆವುಸೋ ಭಿಕ್ಖುಪೇಸುಞ್ಞೇ ಪಾಚಿತ್ತಿಯಞ್ಚ ಭಗವತಾ ಕತ್ಥಪಞ್ಞತ್ತಂ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಪಞ್ಞತ್ತಂ.

ವಿಸ್ಸಜ್ಜನಾ – ಸಾವತ್ಥಿಯಂ ¶ ಭನ್ತೇ ಪಞ್ಞತ್ತಂ, ಛಬ್ಬಗ್ಗಿಯೇ ಭಿಕ್ಖೂ ಆರಬ್ಭ ಪಞ್ಞತ್ತಂ, ಛಬ್ಬಗ್ಗಿಯಾ ಭನ್ತೇ ಭಿಕ್ಖೂ ಭಿಕ್ಖೂಹಿ ಸದ್ಧಿಂ ಭಣ್ಡನ್ತಾ ಓಮಸಿಂಸು ತಸ್ಮಿಂಚ ವತ್ಥುಸ್ಮಿಂ, ಛಬ್ಬಗ್ಗಿಯಾ ಭನ್ತೇ ಭಿಕ್ಖೂ ಭಿಕ್ಖೂನಂ ಭಣ್ಡನಜಾತಾನಂ ಕಲಹಜಾತಾನಂ ವಿವಾದಾಪನ್ನಾನಂ ಪೇಸುಞ್ಞಂ ಉಪಸಂಹರಿಂಸು, ತಸ್ಮಿಂ ಭನ್ತೇ ವತ್ಥುಸ್ಮಿಂ ಪಞ್ಞತ್ತಂ.

೧. ಮುಸಾವಾದವಗ್ಗ, ೪. ಪದಸೋಧಮ್ಮ ಸಿಕ್ಖಾಪುಚ್ಛಾ

ಪುಚ್ಛಾ – ಅನುಪಸಮ್ಪನ್ನಂ ಆವುಸೋ ಪದಸೋ ವಾಚೇನ್ತಸ್ಸ ಪಾಚಿತ್ತಿಯಂ ಕತ್ಥ ಪಞ್ಞತ್ತಂ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಪಞ್ಞತ್ತಂ.

ವಿಸ್ಸಜ್ಜನಾ – ಸಾವತ್ಥಿಯಂ ಭನ್ತೇ ಪಞ್ಞತ್ತಂ, ಛಬ್ಬಗ್ಗಿಯೇ ಭಿಕ್ಖೂ ಆರಬ್ಭ ಪಞ್ಞತ್ತಂ, ಛಬ್ಬಗ್ಗಿಯಾ ಭನ್ತೇ ಭಿಕ್ಖೂ ಉಪಾಸಕೇ ಪದಸೋ ಧಮ್ಮಂ ವಾಚೇಸುಂ, ತಸ್ಮಿಂ ಭನ್ತೇ ವತ್ಥುಸ್ಮಿಂ ಪಞ್ಞತ್ತಂ.

೧. ಮುಸಾವಾದವಗ್ಗೋ ೫. ಸಹಸೇಯ್ಯ ಸಿಕ್ಖಾಪುಚ್ಛಾ

ಪುಚ್ಛಾ – ಅನುಪಸಮ್ಪನ್ನೇನ ಆವುಸೋ ಉತ್ತರಿದಿರತ್ತತಿರತ್ತಂ ಸಹಸೇಯ್ಯಂ ಕಪ್ಪೇನ್ತಸ್ಸ ಪಾಚಿತ್ತಿಯಂ ಕತ್ಥ ಪಞ್ಞತ್ತಂ, ಕಂಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಪಞ್ಞತ್ತಂ.

ವಿಸ್ಸಜ್ಜನಾ – ಆಳವಿಯಂ ಭನ್ತೇ ಪಞ್ಞತ್ತಂ, ಸಮ್ಬಹುಲೇ ಭಿಕ್ಖೂ ಆರಬ್ಭ ಪಞ್ಞತ್ತಂ, ಸಮ್ಬಹುಲಾ ಭನ್ತೇ ಭಿಕ್ಖೂ ಅನುಪಸಮ್ಪನ್ನೇನ ಸಹಸೇಯ್ಯಂ ಕಪ್ಪೇಸುಂ, ತಸ್ಮಿಂ ಭನ್ತೇ ವತ್ಥುಸ್ಮಿಂ ಪಞ್ಞತ್ತಂ.

ಪುಚ್ಛಾ – ಕೇಸಂ ¶ ಆವುಸೋ ಏತ್ಥ ಅನುಪಸಮ್ಪನ್ನೇನ ಸಹಸೇಯ್ಯಂ ಕಪ್ಪೇನ್ತಾನಮ್ಪಿ ಅನಾಪತ್ತಿ ಹೋತಿ.

ವಿಸ್ಸಜ್ಜನಾ – ಏಕಾದಸನ್ನಂ ಭನ್ತೇ ಪುಗ್ಗಲಾನಂ ಅನುಪಸಮ್ಪನ್ನೇನ ಸಹಸೇಯ್ಯಂ ಕಪ್ಪೇನ್ತಾನಂ ಅನಾಪತ್ತಿ, ದ್ವೇತಿಸ್ಸೋ ರತ್ತಿಯೋ ವಸತೀ, ಊನಕದ್ವೇ ತಿಸ್ಸೋ ರತ್ತಿಯೋ ವಸತಿ, ದ್ವೇರತ್ತಿಯೋ ವಸಿತ್ವಾ ತತಿಯಾಯರತ್ತಿಯಾ ಪುರಾರುಣಾ ನಿಕ್ಖಮಿತ್ವಾ ಪುನ ವಸತಿ, ಸಬ್ಬಚ್ಛನ್ನೇ ಸಬ್ಬಅಪರಿಚ್ಛನ್ನೇ, ಸಬ್ಬಪರಿಚ್ಛನ್ನೇ ಸಬ್ಬಅಚ್ಛನ್ನೇ, ಯೇಭುಯ್ಯೇನ ಅಚ್ಛನ್ನೇ ಯೇಭುಯ್ಯೇನ ಅಪರಿಚ್ಛನ್ನೇ, ಅನುಪಸಮ್ಪನ್ನೇ ನಿಪನ್ನೇ ಭಿಕ್ಖು ನಿಸೀದತಿ, ಭಿಕ್ಖುನಿಪನ್ನೇ ಅನುಪಸಮ್ಪನ್ನೋ ನಿಸೀದತಿ, ಉಭೋವಾ ನಿಸೀದನ್ತಿ, ಉಮ್ಮತ್ತಕಸ್ಸ, ಆದಿಕಮ್ಮಿಕಸ್ಸ, ಇಮೇಸಂಖೋ ಭನ್ತೇ ಏಕಾದಸನ್ನಂ ಪುಗ್ಗಲಾನಂ ಅನುಪಸಮ್ಪನ್ನೇನ ಸಹಸೇಯ್ಯಂ ಕಪ್ಪೇನ್ತಾನಂ ಅನಾಪತ್ತಿ.

೧. ಮುಸಾವಾದವಗ್ಗೋ, ೬. ದುತಿಯ ಸಹಸೇಯ್ಯ ಸಿಕ್ಖಾಪುಚ್ಛಾ

ಪುಚ್ಛಾ – ಮಾತುಗಾಮೇನ ¶ ಆವುಸೋ ಸಹಸೇಯ್ಯಂ ಕಪ್ಪೇನ್ತಸ್ಸ ಪಾಚಿತ್ತಿಯಂ ಕತ್ಥ ಪಞ್ಞತ್ತಂ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಪಞ್ಞತ್ತಂ.

ವಿಸ್ಸಜ್ಜನಾ – ಸಾವತ್ಥಿಯಂ ಭನ್ತೇ ಆಯಸ್ಮನ್ತಂ ಅನುರುದ್ಧಂ ಆರಬ್ಭ ಪಞ್ಞತ್ತಂ, ಆಯಸ್ಮಾ ಭನ್ತೇ ಅನುರುದ್ಧೋ ಮಾತುಗಾಮೇನ ಸಹಸೇಯ್ಯಂ ಕಪ್ಪೇಸಿ, ತಸ್ಮಿಂ ಭನ್ತೇ ವತ್ಥುಸ್ಮಿಂ ಪಞ್ಞತ್ತಂ.

೧. ಮುಸಾವಾದವಗ್ಗೋ, ೭. ಧಮ್ಮದೇಸನಾ ಸಿಕ್ಖಾಪುಚ್ಛಾ

ಪುಚ್ಛಾ – ಮಾತುಗಾಮಸ್ಸ ¶ ಆವುಸೋ ಉತ್ತರಿ ಛಪ್ಪಞ್ಚವಾಚಾಹಿ ಧಮ್ಮಂ ದೇಸೇನ್ತಸ್ಸ ಪಾಚಿತ್ತಿಯಂ ಕತ್ಥ ಪಞ್ಞತ್ತಂ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಪಞ್ಞತ್ತಂ.

ವಿಸ್ಸಜ್ಜನಾ – ಸಾವತ್ಥಿಯಂ ಭನ್ತೇ ಆಯಸ್ಮನ್ತಂ ಉದಾಯಿಂ ಆರಬ್ಭ ಪಞ್ಞತ್ತಂ, ಆಯಸ್ಮಾ ಭನ್ತೇ ಉದಾಯೀ ಮಾತುಗಾಮಸ್ಸ ಧಮ್ಮಂದೇಸೇತಿ, ತಸ್ಮಿಂ ಭನ್ತೇ ವತ್ಥುಸ್ಮಿಂ ಪಞ್ಞತ್ತಂ.

೧. ಮುಸಾವಾದವಗ್ಗೋ, ೮. ಭೂತಾರೋಚನ ಸಿಕ್ಖಾಪುಚ್ಛಾ

ಪುಚ್ಛಾ – ಅನುಪಸಮ್ಪನ್ನಸ್ಸ ¶ ಆವುಸೋ ಉತ್ತರಿಮನುಸ್ಸಧಮ್ಮಂ ಭೂತಂ ಆರೋಚೇನ್ತಸ್ಸ ಪಾಚಿತ್ತಿಯಂ ಕತ್ಥ ಪಞ್ಞತ್ತಂ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಪಞ್ಞತ್ತಂ.

ವಿಸ್ಸಜ್ಜನಾ – ವೇಸಾಲಿಯಂ ಭನ್ತೇ ವಗ್ಗುಮುದಾತೀರಿಯೇ ಭಿಕ್ಖೂ ಆರಬ್ಭ ಪಞ್ಞತ್ತಂ, ವಗ್ಗುಮುದಾತೀರಿಯಾ ಭನ್ತೇ ಭಿಕ್ಖೂ ಗಿಹೀನಂ ಅಞ್ಞಮಞ್ಞಸ್ಸ ಉತ್ತರಿಮನುಸ್ಸಧಮ್ಮಸ್ಸ ವಣ್ಣಂ ಭಾಸಿಂಸು, ತಸ್ಮಿಂ ಭನ್ತೇ ವತ್ಥುಸ್ಮಿಂ ಪಞ್ಞತ್ತಂ.

೧. ಮುಸಾವಾದವಗ್ಗೋ, ೯. ದುಟ್ಠುಲ್ಲಾರೋಚನ ಸಿಕ್ಖಾಪುಚ್ಛಾ

ಪುಚ್ಛಾ – ಭಿಕ್ಖುಸ್ಸ ¶ ಆವುಸೋ ದುಟ್ಠುಲ್ಲಾಪತ್ತಿಂ ಅನುಪಸಮ್ಪನ್ನಸ್ಸ ಆರೋಚೇನ್ತಸ್ಸ ಪಾಚಿತ್ತಿಯಂ ಕತ್ಥ ಪಞ್ಞತ್ತಂ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಪಞ್ಞತ್ತಂ.

ವಿಸ್ಸಜ್ಜನಾ – ಸಾವತ್ಥಿಯಂ ಭನ್ತೇ ಛಬ್ಬಗ್ಗಿಯೇ ಭಿಕ್ಖೂ ಆರಬ್ಭ ಪಞ್ಞತ್ತಂ, ಛಬ್ಬಗ್ಗಿಯಾ ಭನ್ತೇ ಭಿಕ್ಖೂ ಭಿಕ್ಖುಸ್ಸ ದುಟ್ಠುಲ್ಲಾಪತ್ತಿಂ ಅನುಪಸಮ್ಪನ್ನಸ್ಸ ಆರೋಚೇಸುಂ, ತಸ್ಮಿಂ ಭನ್ತೇ ವತ್ಥುಸ್ಮಿಂ ಪಞ್ಞತ್ತಂ.

೧. ಮುಸಾವಾದವಗ್ಗೋ, ೧೦. ಪಥವೀಖಣನ ಸಿಕ್ಖಾಪುಚ್ಛಾ

ಪುಚ್ಛಾ – ಪಥವಿಂಖಣನ್ತಸ್ಸ ¶ ಆವುಸೋ ಪಾಚಿತ್ತಿಯಂ ಕತ್ಥ ಪಞ್ಞತ್ತಂ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಪಞ್ಞತ್ತಂ.

ವಿಸ್ಸಜ್ಜನಾ – ಆಳವಿಯಂ ಭನ್ತೇ ಆಳವಿಕೇ ಭಿಕ್ಖೂ ಆರಬ್ಭ ಪಞ್ಞತ್ತಂ, ಆಳವಿಕಾ ಭನ್ತೇ ಭಿಕ್ಖೂ ಪಥವಿಂಖಣಿಂಸು, ತಸ್ಮಿಂ ಭನ್ತೇ ವತ್ಥುಸ್ಮಿಂ ಪಞ್ಞತ್ತಂ.

೨. ಭೂತಗಾಮವಗ್ಗೋ, ೧. ಭೂತಗಾಮ ಸಿಕ್ಖಾಪುಚ್ಛಾ

ಪುಚ್ಛಾ – ಭೂತಗಾಮಪಾತಬ್ಯತಾಯ ¶ ಪಾಚಿತ್ತಿಯಂ ಆವುಸೋ ಭಗವತಾ ಕತ್ಥ ಪಞ್ಞತ್ತಂ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಪಞ್ಞತ್ತಂ.

ವಿಸ್ಸಜ್ಜನಾ – ಆಳವಿಯಂ ಭನ್ತೇ ಆಳವಿಕೇ ಭಿಕ್ಖೂ ಆರಬ್ಭ ಪಞ್ಞತ್ತಂ, ಆಳವಿಕಾ ಭನ್ತೇ ಭಿಕ್ಖೂ ರುಕ್ಖಂ ಛಿನ್ದಿಂ ಸು, ತಸ್ಮಿಂ ಭನ್ತೇ ವತ್ಥುಸ್ಮಿಂ ಪಞ್ಞತ್ತಂ.

೨. ಭೂತಗಾಮವಗ್ಗ, ೨. ಅಞ್ಞವಾದಕ ಸಿಕ್ಖಾಪುಚ್ಛಾ

ಪುಚ್ಛಾ – ಅಞ್ಞವಾದಕೇ ವಿಹೇಸಕೇ ಪಾಚಿತ್ತಿಯಂ ಆವುಸೋ ಭಗವತಾ ಕತ್ಥ ಪಞ್ಞತ್ತಂ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಪಞ್ಞತ್ತಂ.

ವಿಸ್ಸಜ್ಜನಾ – ಕೋಸಮ್ಬಿಯಂ ¶ ಭನ್ತೇ ಆಯಸ್ಮನ್ತಂ ಛನ್ನಂ ಆರಬ್ಭ ಪಞ್ಞತ್ತಂ, ಆಯಸ್ಮಾ ಭನ್ತೇ ಛನ್ನೋ ಸಙ್ಘಮಜ್ಝೇ ಆಪತ್ತಿಯಾ ಅನುಯುಞ್ಜೀಯಮಾನೋ ಅಞ್ಞೇನಞ್ಞಂ ಪಟಿಚರಿ, ತಸ್ಮಿಂ ಭನ್ತೇ ವತ್ಥುಸ್ಮಿಂ ಪಞ್ಞತ್ತಂ.

೨. ಭೂತಗಾಮವಗ್ಗ, ೩. ಉಜ್ಝಾಪನಕ ಸಿಕ್ಖಾಪುಚ್ಛಾ

ಪುಚ್ಛಾ – ಉಜ್ಝಾಪನಕೇ ಖಿಯ್ಯನಕೇ ಪಾಚಿತ್ತಿಯಂ ಆವುಸೋ ಭಗವತಾ ಕತ್ಥ ಪಞ್ಞತ್ತಂ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಪಞ್ಞತ್ತಂ.

ವಿಸ್ಸಜ್ಜನಾ – ರಾಜಗಹೇ ಭನ್ತೇ ಮೇತ್ತಿಯಭೂಮಜಕೇ ಭಿಕ್ಖೂ ಆರಬ್ಭ ಪಞ್ಞತ್ತಂ, ಮೇತ್ತಿಯಭೂಮಜಕಾ ಭನ್ತೇ ಭಿಕ್ಖೂ ಆಯಸ್ಮನ್ತಂ ದಬ್ಬಂ ಮಲ್ಲಪುತ್ತಂ ಭಿಕ್ಖೂ ಉಜ್ಝಾಪೇಸುಂ, ತಸ್ಮಿಂ ಭನ್ತೇ ವತ್ಥುಸ್ಮಿಂ ಪಞ್ಞತ್ತಂ.

೨. ಭೂತಗಾಮವಗ್ಗ, ೪. ಪಠಮ ಸೇನಾಸನ ಸಿಕ್ಖಾಪುಚ್ಛಾ

ಪುಚ್ಛಾ – ಸಙ್ಘಿಕಂ ¶ ಆವುಸೋ ಮಞ್ಚಂವಾ ಪೀಠಂವಾ ಭಿಸಿಂವಾ ಕೋಚ್ಛಂವಾ ಅಜ್ಝೋಕಾಸೇ ಸನ್ಥರಿತ್ವಾ ಅನುದ್ಧರಿತ್ವಾ ಅನಾಪುಚ್ಛಾ ಪಕ್ಕಮನ್ತಸ್ಸ ಪಾಚಿತ್ತಿಯಂ ಕತ್ಥ ಪಞ್ಞತ್ತಂ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಪಞ್ಞತ್ತಂ.

ವಿಸ್ಸಜ್ಜನಾ – ಸಾವತ್ಥಿಯಂ ಭನ್ತೇ ಸಮ್ಬಹುಲೇ ಭಿಕ್ಖೂ ಆರಬ್ಭ ಪಞ್ಞತ್ತಂ, ಸಮ್ಬಹುಲಾ ಭನ್ತೇ ಭಿಕ್ಖೂ ಸಙ್ಘಿಕಂ ಸೇನಾಸನಂ ಅಜ್ಝೋಕಾಸೇ ಸನ್ಥರಿತ್ವಾ ಅನುದ್ಧರಿತ್ವಾ ಅನಾಪುಚ್ಛಾ ಪಕ್ಕಮಿಂಸು, ತಸ್ಮಿಂ ಭನ್ತೇ ವತ್ಥುಸ್ಮಿಂ ಪಞ್ಞತ್ತಂ.

೨. ಭೂತಗಾಮವಗ್ಗ, ೫. ದುತಿಯ ಸೇನಾಸನ ಸಿಕ್ಖಾಪುಚ್ಛಾ

ಪುಚ್ಛಾ – ಸಙ್ಘಿಕೇ ¶ ಆವುಸೋ ವಿಹಾರೇ ಸೇಯ್ಯಂ ಸನ್ಥರಿತ್ವಾ ಅನುದ್ಧರಿತ್ವಾ ಅನಾಪುಚ್ಛಾ ಪಕ್ಕಮನ್ತಸ್ಸ ಪಾಚಿತ್ತಿಯಂ ಕತ್ಥ ಪಞ್ಞತ್ತಂ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಪಞ್ಞತ್ತಂ.

ವಿಸ್ಸಜ್ಜನಾ – ಸಾವತ್ಥಿಯಂ ಭನ್ತೇ ಸತ್ತರಸವಗ್ಗಿಯೇ ಭಿಕ್ಖೂ ಆರಬ್ಭ ಪಞ್ಞತ್ತಂ, ಸತ್ತರಸವಗ್ಗಿಯಾ ಭನ್ತೇ ಭಿಕ್ಖೂ ಸಙ್ಘಿಕೇ ವಿಹಾರೇ ಸೇಯ್ಯಂ ಸನ್ಥರಿತ್ವಾ ಅನುದ್ಧರಿತ್ವಾ ಅನಾಪುಚ್ಛಾ ಪಕ್ಕಮಿಂಸು, ತಸ್ಮಿಂ ಭನ್ತೇ ವತ್ಥುಸ್ಮಿಂ ಪಞ್ಞತ್ತಂ.

ಪುಚ್ಛಾ – ಕಸ್ಸ ¶ ಆವುಸೋ ವಚನಂ.

ವಿಸ್ಸಜ್ಜನಾ – ಭಗವತಾ ಭನ್ತೇ ವಚನಂ ಅರಹತೋ ಸಮ್ಮಾಸಮ್ಬುದ್ಧಸ್ಸ.

ಪುಚ್ಛಾ – ಕೇನಾವುಸೋ ಆಭತಂ.

ವಿಸ್ಸಜ್ಜನಾ – ಪರಮ್ಪರಾಯ ಭನ್ತೇ ಆಭತಂ.

ಪುಚ್ಛಾ – ಅತ್ಥಿ ¶ ನುಖೋ ಆವುಸೋ ಏತ್ಥ ಕೋಚಿಪಿ ವಿರದ್ಧದೋಸೋ.

ವಿಸ್ಸಜ್ಜನಾ – ನತ್ಥಿ ಭನ್ತೇ.

ಸಙ್ಘಸ್ಸ ಞಾಪನಂ

ಸುಣಾತು ಮೇ ಭನ್ತೇ ಸಙ್ಘೋ, ಅಹಂ ಭನ್ತೇ ಆಯಸ್ಮನ್ತಂ ವಿಚಿತ್ತಸಾರಾಭಿವಂಸಂ ಇಮೇಸಂ ಪನ್ನರಸನ್ನಂ ಸಿಕ್ಖಾಪದಾನಂ ನಿದಾನಾದೀನಿ ಪುಚ್ಛಿತಬ್ಬಾನಿ ಅನೇಕಾನಿ ಠಾನಾನಿ ಪುಚ್ಛಿಂ, ಸೋ ಚ ಪುಟ್ಠೋ ಪುಟ್ಠೋ ವಿಸ್ಸಜ್ಜೇತಿ, ಇತಿ ಹಿದಂ ಭನ್ತೇ ನಿಮ್ಮಲಂ ಸುಪರಿಸುದ್ಧಂ ತಸ್ಸೇವ ಭಗವತೋ ವಚನಂ ಅರಹತೋ ಸಮ್ಮಾಸಮ್ಬುದ್ಧಸ್ಸ, ತಸ್ಮಾ ಯಥಾಪುರೇ ಮಹಾಕಸ್ಸಪಾದಯೋ ಮಹಾಥೇರವರಾ ಪೋರಾಣಸಂಗೀತಿಕಾರಾ ಬ್ರಹ್ಮಚರಿಯಸ್ಸ ಚಿರಟ್ಠಿತಿಯಾ ಬಹುಜನಹಿತಾಯ ಬಹುಜನಸುಖಾಯ ಲೋನುಕಮ್ಪಾಯ ಅತ್ಥಾಯ ಹಿತಾಯ ಸುಖಾಯ ದೇವಮನುಸ್ಸಾನಂ ಧಮ್ಮವಿನಯಂ ಸಂಗಾಯಿಂಸುಚೇವ ಅನುಸಂಗಾಯಿಂಸುಚ, ಏವಮೇವ ಮಯಮ್ಪಿ ದಾನಿ ಛಟ್ಠಸಂಗೀತಿಮಹಾಧಮ್ಮಸಭಾ ಪರಿಯಾಪನ್ನಾ ಯಥಾನುಪ್ಪಟ್ಠಾನತೋ ಪಟ್ಠಾಯ ಇಮಾನಿ ಸಿಕ್ಖಾಪದಾನಿ ಏಕತೋ ಗಣಸಜ್ಝಾಯಂ ಕತ್ವಾ ಸಂಗಾಯೇಯ್ಯಾಮ.

೨. ಭೂತಗಾಮವಗ್ಗ, ೬. ಅನುಪಖಜ್ಜ ಸಿಕ್ಖಾಪುಚ್ಛಾ

ಪುಚ್ಛಾ – ಯಂ ¶ ತೇನ ಆವುಸೋ…ಪೇ… ಸಮ್ಮಾಸಮ್ಬುದ್ಧೇನ ಸಙ್ಘಿಕೇ ವಿಹಾರೇ ಜಾನಂ ಪುಬ್ಬುಪಗತಂ ಭಿಕ್ಖುಂ ಅನುಪಖಜ್ಜ ಸೇಯ್ಯಂ ಕಪ್ಪೇನ್ತಸ್ಸ ಪಾಚಿತ್ತಿಯಂ ಕತ್ಥ ಪಞ್ಞತ್ತಂ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಪಞ್ಞತ್ತಂ.

ವಿಸ್ಸಜ್ಜನಾ – ಸಾವತ್ಥಿಯಂ ಭನ್ತೇ ಛಬ್ಬಗ್ಗಿಯೇ ಭಿಕ್ಖೂ ಆರಬ್ಭ ಪಞ್ಞತ್ತಂ, ಛಬ್ಬಗ್ಗಿಯಾ ಭನ್ತೇ ಭಿಕ್ಖೂ ಥೇರೇ ಭಿಕ್ಖೂ ಅನುಪಖಜ್ಜ ಸೇಯ್ಯಂ ಕಪ್ಪೇಸುಂ, ತಸ್ಮಿಂ ಭನ್ತೇ ವತ್ಥುಸ್ಮಿಂ ಪಞ್ಞತ್ತಂ.

೨. ಭೂತಗಾಮವಗ್ಗ, ೭. ನಿಕಡ್ಢನ ಸಿಕ್ಖಾಪುಚ್ಛಾ

ಪುಚ್ಛಾ – ಭಿಕ್ಖುಂ ¶ ಆವುಸೋ ಕುಪಿತೇನ ಅನತ್ತಮನೇನ ಸಙ್ಘಿಕಾ ವಿಹಾರಾ ನಿಕ್ಕಡ್ಢೇನ್ತಸ್ಸ ಪಾಚಿತ್ತಿಯಂ ಭಗವತಾ ಕತ್ಥ ಪಞ್ಞತ್ತಂ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಪಞ್ಞತ್ತಂ.

ವಿಸ್ಸಜ್ಜನಾ – ಸಾವತ್ಥಿಯಂ ಭನ್ತೇ ಛಬ್ಬಗ್ಗಿಯೇ ಭಿಕ್ಖೂ ಆರಬ್ಭ ಪಞ್ಞತ್ತಂ, ಛಬ್ಬಗ್ಗಿಯಾ ಭನ್ತೇ ಭಿಕ್ಖೂ ಕುಪಿತಾ ಅನತ್ತಮನಾ ಭಿಕ್ಖೂ ಸಙ್ಘಿಕಾವಿಹಾರಾ ನಿಕ್ಕಡ್ಢಿಂಸು, ತಸ್ಮಿಂ ಭನ್ತೇ ವತ್ಥುಸ್ಮಿಂ ಪಞ್ಞತ್ತಂ.

೨. ಭೂತಗಾಮವಗ್ಗ, ೮. ವೇಹಾಸಕುಟಿ ಸಿಕ್ಖಾಪುಚ್ಛಾ

ಪುಚ್ಛಾ – ಉಪರಿವೇಹಾಸಕುಟಿಯಾ ಆವುಸೋ ಆಹಚ್ಚಪಾದಕಂ ಮಞ್ಚಂವಾ ಪೀಠಂವಾ ಅಭಿನಿಸೀದನ್ತಸ್ಸ ಪಾಚಿತ್ತಿಯಂ ಕತ್ಥ ಪಞ್ಞತ್ತಂ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಪಞ್ಞತ್ತಂ.

ವಿಸ್ಸಜ್ಜನಾ – ಸಾವತ್ಥಿಯಂ ¶ ಭನ್ತೇ ಅಞ್ಞತರಂ ಭಿಕ್ಖುಂ ಆರಬ್ಭ ಪಞ್ಞತ್ತಂ, ಅಞ್ಞತರೋ ಭನ್ತೇ ಭಿಕ್ಖು ಸಙ್ಘಿಕೇ ವಿಹಾರೇ ಉಪರಿವೇಹಾಸ ಕುಟಿಯಾ ಆಹಚ್ಚಪಾದಕಂ ಮಞ್ಚಂ ಸಹಸಾ ಅಭಿನಿಸೀದಿ, ತಸ್ಮಿಂ ಭನ್ತೇ ವತ್ಥುಸ್ಮಿಂ ಪಞ್ಞತ್ತಂ.

೨. ಭೂತಗಾಮವಗ್ಗ, ೯. ಮಹಲ್ಲಕವಿಹಾರ ಸಿಕ್ಖಾಪುಚ್ಛಾ

ಪುಚ್ಛಾ – ದ್ವತ್ತಿ ಪರಿಯಾಯೇ ಆವುಸೋ ಅಧಿಟ್ಠಹಿತ್ವಾ ತತುತ್ತರಿ ಅಧಿಟ್ಠಹನ್ತಸ್ಸ ಪಾಚಿತ್ತಿಯಂ ಕತ್ಥ ಪಞ್ಞತ್ತಂ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಪಞ್ಞತ್ತಂ.

ವಿಸ್ಸಜ್ಜನಾ – ಕೋಸಮ್ಬಿಯಂ ಭನ್ತೇ ಆಯಸ್ಮನ್ತಂ ಛನ್ನತ್ಥೇರಂ ಆರಬ್ಭ ಪಞ್ಞತ್ತಂ, ಆಯಸ್ಮಾ ಭನ್ತೇ ಛನ್ದೋ ಕತಪರಿಯೋಸಿತಂ ವಿಹಾರಂ ಪುನಪ್ಪುನಂ ಛಾದಾಪೇಸಿ ಪುನಪ್ಪುನಂ ಲೇಪಾಪೇಸಿ, ಅತಿಭಾರಿತೋ ವಿಹಾರೋ ಪರಿಪತಿ, ತಸ್ಮಿಂ ಭನ್ತೇ ವತ್ಥುಸ್ಮಿಂ ಪಞ್ಞತ್ತಂ.

೨. ಭೂತಗಾಮವಗ್ಗ, ೧೦. ಸಪ್ಪಾಣಕ ಸಿಕ್ಖಾಪುಚ್ಛಾ

ಪುಚ್ಛಾ – ಜಾನಂ ¶ ಆವುಸೋ ಸಪ್ಪಾಣಕಂ ಉದಕಂ ತಿಣಂವಾ ಮತ್ತಿಕಂವಾ ಸಿಞ್ಚನ್ತಸ್ಸ ಪಾಚಿತ್ತಿಯಂ ಕತ್ಥ ಪಞ್ಞತ್ತಂ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಪಞ್ಞತ್ತಂ.

ವಿಸ್ಸಜ್ಜನಾ – ಆಳವಿಯಂ ಭನ್ತೇ ಆಳವಿಕೇ ಭಿಕ್ಖೂ ಆರಬ್ಭ ಪಞ್ಞತ್ತಂ, ಆಳವಿಕಾ ಭನ್ತೇ ಭಿಕ್ಖೂ ಜಾನಂ ಸಪ್ಪಾಣಕಂ ಉದಕಂ ತಿಣಮ್ಪಿ ಮತ್ತಿಕಮ್ಪಿ ಸಿಞ್ಚಿಂಸು, ತಸ್ಮಿಂ ಭನ್ತೇ ವತ್ಥುಸ್ಮಿಂ ಪಞ್ಞತ್ತಂ.

೩. ಓವಾದವಗ್ಗ, ೧. ಓವಾದ ಸಿಕ್ಖಾಪುಚ್ಛಾ

ಪುಚ್ಛಾ – ಅಸಮ್ಮತೇನ ¶ ಆವುಸೋ ಭಿಕ್ಖುನಿಯೋ ಓವದನ್ತಸ್ಸ ಪಾಚಿತ್ತಿಯಂ ಭಗವತಾ ಕತ್ಥ ಪಞ್ಞತ್ತಂ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಪಞ್ಞತ್ತಂ.

ವಿಸ್ಸಜ್ಜನಾ – ಸಾವತ್ಥಿಯಂ ಭನ್ತೇ ಛಬ್ಬಗ್ಗಿಯೇ ಭಿಕ್ಖೂ ಆರಬ್ಭ ಪಞ್ಞತ್ತಂ, ಛಬ್ಬಗ್ಗಿಯಾ ಭನ್ತೇ ಭಿಕ್ಖೂ ಅಸಮ್ಮತಾ ಭಿಕ್ಖುನಿಯೋ ಓವದಿಂಸು, ತಸ್ಮಿಂ ಭನ್ತೇ ವತ್ಥುಸ್ಮಿಂ ಪಞ್ಞತ್ತಂ.

೩. ಓವಾದವಗ್ಗ, ೨. ಅತ್ಥಙ್ಗತ ಸಿಕ್ಖಾಪುಚ್ಛಾ

ಪುಚ್ಛಾ – ಅತ್ಥಙ್ಗತೇ ಆವುಸೋ ಸೂರಿಯೇ ಭಿಕ್ಖುನಿಯೋ ಓವದನ್ತಸ್ಸ ಪಾಚಿತ್ತಿಯಂ ಭಗವತಾ ಕತ್ಥ ಪಞ್ಞತ್ತಂ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಪಞ್ಞತ್ತಂ.

ವಿಸ್ಸಜ್ಜನಾ – ಸಾವತ್ಥಿಯಂ ಭನ್ತೇ ಆಯಸ್ಮನ್ತಂ ಚೂಳಪನ್ಥಕಂ ಆರಬ್ಭ ಪಞ್ಞತ್ತಂ, ಆಯಸ್ಮಾ ಭನ್ತೇ ಚೂಳಪನ್ಥಕೋ ಅತ್ಥಙ್ಗತೇ ಸೂರಿಯೇ ಭಿಕ್ಖುನಿಯೋ ಓವದಿ, ತಸ್ಮಿಂ ಭನ್ತೇ ವತ್ಥುಸ್ಮಿಂ ಪಞ್ಞತ್ತಂ.

೩. ಓವಾದವಗ್ಗ, ೩-೪. ಭಿಕ್ಖುನುಪಸ್ಸಯ, ಆಮಿಸ ಸಿಕ್ಖಾಪುಚ್ಛಾ

ಪುಚ್ಛಾ – ಭಿಕ್ಖುನುಪಸ್ಸಯಂ ¶ ಆವುಸೋ ಉಪಸಙ್ಕಮಿತ್ವಾ ಭಿಕ್ಖುನಿಯೋ ಓವದನ್ತಸ್ಸಚ ಆಮಿಸಹೇತು ಥೇರಾ ಭಿಕ್ಖೂ ಭಿಕ್ಖುನಿಯೋ ಓವದನ್ತೀತಿ ಭಣನ್ತಸ್ಸಚ ಪಾಚಿತ್ತಿಯಂ ಭಗವತಾ ಕತ್ಥ ಪಞ್ಞತ್ತಂ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಪಞ್ಞತ್ತಂ.

ವಿಸ್ಸಜ್ಜನಾ – ಭಿಕ್ಖುನುಪಸ್ಸಯಂ ಉಪಸಙ್ಕಮಿತ್ವಾ ಭಿಕ್ಖುನಿಯೋ ಓವದನ್ತಸ್ಸ ಪಾಚಿತ್ತಿಯಂ ಭನ್ತೇ ಸಕ್ಕೇಸು ಛಬ್ಬಗ್ಗಿಯೇ ಭಿಕ್ಖೂ ಆರಬ್ಭ ಪಞ್ಞತ್ತಂ, ಛಬ್ಬಗ್ಗಿಯಾ ಭನ್ತೇ ಭಿಕ್ಖೂ ಭಿಕ್ಖುನುಪಸ್ಸಯಂ ಉಪಸಙ್ಕಮಿತ್ವಾ ಭಿಕ್ಖುನಿಯೋ ಓವದಿಂಸು, ಆಮಿಸಹೇತು ಥೇರಾ ಭಿಕ್ಖೂ ಭಿಕ್ಖುನಿಯೋ ಓವದನ್ತೀತಿ ಭಣನ್ತಸ್ಸ ಪಾಚಿತ್ತಿಯಂ ಸಾವತ್ಥಿಯಂ ಛಬ್ಬಗ್ಗಿಯೇ ಭಿಕ್ಖೂ ಆರಬ್ಭ ಪಞ್ಞತ್ತಂ, ಛಬ್ಬಗ್ಗಿಯಾ ಭನ್ತೇ ಭಿಕ್ಖೂ ಆಮಿಸಹೇತು ಥೇರಾ ಭಿಕ್ಖೂ ¶ ಭಿಕ್ಖುನಿಯೋ ಓವದನ್ತೀತಿ ಭಣಿಂಸು, ತಸ್ಮಿಂ ಭನ್ತೇ ವತ್ಥುಸ್ಮಿಂ ಪಞ್ಞತ್ತಂ.

೩. ಓವಾದವಗ್ಗ, ೫. ಚೀವರದಾನ ಸಿಕ್ಖಾಪುಚ್ಛಾ

ಪುಚ್ಛಾ – ಅಞ್ಞಾತಿಕಾಯ ¶ ಆವುಸೋ ಭಿಕ್ಖುನಿಯಾ ಚೀವರಂ ದೇನ್ತಸ್ಸ ಪಾಚಿತ್ತಿಯಂ ಭಗವತಾ ಕತ್ಥ ಪಞ್ಞತ್ತಂ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಪಞ್ಞತ್ತಂ.

ವಿಸ್ಸಜ್ಜನಾ – ಸಾವತ್ಥಿಯಂ ಭನ್ತೇ ಅಞ್ಞತರಂ ಭಿಕ್ಖುಂ ಆರಬ್ಭ ಪಞ್ಞತ್ತಂ, ಅಞ್ಞತರೋ ಭನ್ತೇ ಭಿಕ್ಖು ಅಞ್ಞಾತಿಕಾಯ ಭಿಕ್ಖುನಿಯಾ ಚೀವರಂ ಅದಾಸಿ, ತಸ್ಮಿಂ ಭನ್ತೇ ವತ್ಥುಸ್ಮಿಂ ಪಞ್ಞತ್ತಂ.

೩. ಓವಾದವಗ್ಗ, ೬. ಚೀವರಸಿಬ್ಬನ ಸಿಕ್ಖಾಪುಚ್ಛಾ

ಪುಚ್ಛಾ – ಅಞ್ಞಾತಿಕಾಯ ಆವುಸೋ ಭಿಕ್ಖುನಿಯಾ ಚೀವರಂ ಸಿಬ್ಬೇನ್ತಸ್ಸ ಪಾಚಿತ್ತಿಯಂ ಭಗವತಾ ಕತ್ಥ ಪಞ್ಞತ್ತಂ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಪಞ್ಞತ್ತಂ.

ವಿಸ್ಸಜ್ಜನಾ – ಸಾವತ್ಥಿಯಂ ಭನ್ತೇ ಆಯಸ್ಮನ್ತಂ ಉದಾಯಿಂ ಆರಬ್ಭ ಪಞ್ಞತ್ತಂ, ಆಯಸ್ಮಾ ಭನ್ತೇ ಉದಾಯೀ ಅಞ್ಞಾತಿಕಾಯ ಭಿಕ್ಖುನಿಯಾ ಚೀವರಂ ಸಿಬ್ಬೇಸಿ, ತಸ್ಮಿಂ ಭನ್ತೇ ವತ್ಥುಸ್ಮಿಂ ಪಞ್ಞತ್ತಂ.

೩. ಓವಾದವಗ್ಗ, ೭. ಸಂವಿಧಾನ ಸಿಕ್ಖಾಪುಚ್ಛಾ

ಪುಚ್ಛಾ – ಭಿಕ್ಖುನಯಾ ¶ ಆವುಸೋ ಸದ್ಧಿಂ ಸಂವಿಧಾಯ ಏಕದ್ಧಾನಮಗ್ಗಂ ಪಟಿಪಜ್ಜನ್ತಸ್ಸ ಪಾಚಿತ್ತಿಯಂ ಭಗವತಾ ಕತ್ಥ ಪಞ್ಞತ್ತಂ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಪಞ್ಞತ್ತಂ.

ವಿಸ್ಸಜ್ಜನಾ – ಸಾವತ್ಥಿಯಂ ಭನ್ತೇ ಛಬ್ಬಗ್ಗಿಯೇ ಭಿಕ್ಖೂ ಆರಬ್ಭ ಪಞ್ಞತ್ತಂ, ಛಬ್ಬಗ್ಗಿಯಾ ಭನ್ತೇ ಭಿಕ್ಖೂ ಭಿಕ್ಖುನೀಹಿ ಸದ್ಧಿಂ ಸಂವಿಧಾಯ ಏಕದ್ಧಾನಮಗ್ಗಂ ಪಟಿಪಜ್ಜಿಂಸು, ತಸ್ಮಿಂ ಭನ್ತೇ ವತ್ಥುಸ್ಮಿಂ ಪಞ್ಞತ್ತಂ.

೩. ಓವಾದವಗ್ಗ, ೮. ನಾವಾಭಿರುಹನ ಸಿಕ್ಖಾಪುಚ್ಛಾ

ಪುಚ್ಛಾ – ಭಿಕ್ಖುನಿಯಾ ¶ ಆವುಸೋ ಸದ್ಧಿಂ ಸಂವಿಧಾಯ ಏಕಂ ನಾವಂ ಅಭಿರುಹನ್ತಸ್ಸ ಪಾಚಿತ್ತಿಯಂ ಭಗವತಾ ಕತ್ಥ ಪಞ್ಞತ್ತಂ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಪಞ್ಞತ್ತಂ.

ವಿಸ್ಸಜ್ಜನಾ – ಸಾವತ್ಥಿಯಂ ಭನ್ತೇ ಛಬ್ಬಗ್ಗಿಯೇ ಭಿಕ್ಖೂ ಆರಬ್ಭ ಪಞ್ಞತ್ತಂ, ಛಬ್ಬಗ್ಗಿಯಾ ಭನ್ತೇ ಭಿಕ್ಖೂ ಭಿಕ್ಖೂನೀಹಿ ಸದ್ಧಿಂ ಸಂವಿಧಾಯ ಏಕಂ ನಾವಂ ಅಭಿರುಹಿಂಸು, ತಸ್ಮಿಂ ಭನ್ತೇ ವತ್ಥುಸ್ಮಿಂ ಪಞ್ಞತ್ತಂ.

೩. ಓವಾದವಗ್ಗ, ೯. ಪರಿಪಾಚಿತ ಸಿಕ್ಖಾಪುಚ್ಛಾ

ಪುಚ್ಛಾ – ಜಾನಂ ಆವುಸೋ ಭಿಕ್ಖುನಿಪರಿಪಾಚಿತಂ ಪಿಣ್ಡಪಾತಂ ಭುಞ್ಜನ್ತಸ್ಸ ಪಾಚಿತ್ತಿಯಂ ಭಗವತಾ ಕತ್ಥ ಪಞ್ಞತ್ತಂ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಪಞ್ಞತ್ತಂ.

ವಿಸ್ಸಜ್ಜನಾ – ರಾಜಗಹೇ ಭನ್ತೇ ದೇವದತ್ತಂ ಆರಬ್ಭ ಪಞ್ಞತ್ತಂ, ದೇವದತ್ತೋ ಭನ್ತೇ ಜಾನಂ ಭಿಕ್ಖುನಿಪರಿಪಾಚಿತಂ ಪಿಣ್ಡಪಾತಂ ಭುಞ್ಜಿ, ತಸ್ಮಿಂ ಭನ್ತೇ ವತ್ಥುಸ್ಮಿಂ ಪಞ್ಞತ್ತಂ.

೩. ಓವಾದವಗ್ಗ, ೧೦. ರಹೋನಿಸಜ್ಜ ಸಿಕ್ಖಾಪುಚ್ಛಾ

ಪುಚ್ಛಾ – ಭಿಕ್ಖುನಿಯಾ ¶ ಸದ್ಧಿಂ ಆವುಸೋ ಏಕೋ ಏಕಾಯ ರಹೋ ನಿಸಜ್ಜಂ ಕಪ್ಪೇನ್ತಸ್ಸ ಪಾಚಿತ್ತಿಯಂ ಭಗವತಾ ಕತ್ಥ ಪಞ್ಞತ್ತಂ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಪಞ್ಞತ್ತಂ.

ವಿಸ್ಸಜ್ಜನಾ – ಸಾವತ್ಥಿಯಂ ಭನ್ತೇ ಆಯಸ್ಮನ್ತಂ ಉದಾಯಿಂ ಆರಬ್ಭ ಪಞ್ಞತ್ತಂ, ಆಯಸ್ಮಾ ಭನ್ತೇ ಉದಾಯೀ ಭಿಕ್ಖುನಿಯಾ ಸದ್ಧಿಂ ಏಕೋ ಏಕಾಯ ರಹೋ ನಿಸಜ್ಜಂ ಕಪ್ಪೇಸಿ, ತಸ್ಮಿಂ ಭನ್ತೇ ವತ್ಥುಸ್ಮಿಂ ಪಞ್ಞತ್ತಂ.

೪. ಭೋಜನವಗ್ಗ, ೧. ಆವಸಥಪಿಣ್ಡ ಸಿಕ್ಖಾಪುಚ್ಛಾ

ಪುಚ್ಛಾ – ತತುತ್ತರಿ ¶ ಆವುಸೋ ಆವಸಥಪಿಣ್ಡಂ ಭುಞ್ಜನ್ತಸ್ಸ ಪಾಚಿತ್ತಿಯಂ ಭಗವತಾ ಕತ್ಥ ಪಞ್ಞತ್ತಂ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಪಞ್ಞತ್ತಂ.

ವಿಸ್ಸಜ್ಜನಾ – ಸಾವತ್ಥಿಯಂ ಭನ್ತೇ ಛಬ್ಬಗ್ಗಿಯೇ ಭಿಕ್ಖೂ ಆರಬ್ಭ ಪಞ್ಞತ್ತಂ, ಛಬ್ಬಗ್ಗಿಯಾ ಭನ್ತೇ ಭಿಕ್ಖೂ ಅನುವಸಿತ್ವಾ ಅನುವಸಿತ್ವಾ ಆವಸಥಪಿಣ್ಡಂ ಪರಿಭುಞ್ಜಿಂಸು, ತಸ್ಮಿಂ ಭನ್ತೇ ವತ್ಥುಸ್ಮಿಂ ಪಞ್ಞತ್ತಂ.

೪. ಭೋಜನವಗ್ಗ, ೨. ಗಣಭೋಜನ ಸಿಕ್ಖಾಪುಚ್ಛಾ

ಪುಚ್ಛಾ – ಗಣಭೋಜನೇ ಪಾಚಿತ್ತಿಯಂ ಆವುಸೋ ಭಗವತಾ ಕತ್ಥ ಪಞ್ಞತ್ತಂ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಪಞ್ಞತ್ತಂ.

ವಿಸ್ಸಜ್ಜನಾ – ರಾಜಗಹೇ ಭನ್ತೇ ದೇವದತ್ತಂ ಆರಬ್ಭ ಪಞ್ಞತ್ತಂ, ದೇವದತ್ತೋ ಭನ್ತೇ ಸಪರಿಸೋ ಕುಲೇಸು ವಿಞ್ಞಾಪೇತ್ವಾ ಭುಞ್ಜಿ, ತಸ್ಮಿಂ ಭನ್ತೇ ವತ್ಥುಸ್ಮಿಂ ಪಞ್ಞತ್ತಂ.

೪. ಭೋಜನವಗ್ಗ ೩. ಪರಮ್ಪರಭೋಜನ ಸಿಕ್ಖಾಪುಚ್ಛಾ

ಪುಚ್ಛಾ – ಪರಮ್ಪರ ¶ ಭೋಜನೇ ಪಾಚಿತ್ತಿಯಂ ಆವುಸೋ ಭಗವತಾ ಕತ್ಥ ಪಞ್ಞತ್ತಂ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಪಞ್ಞತ್ತಂ.

ವಿಸ್ಸಜ್ಜನಾ – ವೇಸಾಲಿಯಂ ಭನ್ತೇ ಸಮ್ಬಹುಲೇ ಭಿಕ್ಖೂ ಆರಬ್ಭ ಪಞ್ಞತ್ತಂ, ಸಮ್ಬಹುಲಾ ಭನ್ತೇ ಭಿಕ್ಖೂ ಅಞ್ಞತ್ರ ನಿಮನ್ತಿತಾ ಅಞ್ಞತ್ರ ಭುಞ್ಜಿಂಸು, ತಸ್ಮಿಂ ಭನ್ತೇ ವತ್ಥುಸ್ಮಿಂ ಪಞ್ಞತ್ತಂ.

೪. ಭೋಜನವಗ್ಗ, ೪. ಕಾಣಮಾತು ಸಿಕ್ಖಾಪುಚ್ಛಾ

ಪುಚ್ಛಾ – ದ್ವತ್ತಿಪತ್ತಪೂರಂ ¶ ಪೂವಂ ಪಟಿಗ್ಗಹೇತ್ವಾ ತತುತ್ತರಿ ಪಟಿಗ್ಗಣ್ಹನ್ತಸ್ಸ ಪಾಚಿತ್ತಿಯಂ ಕತ್ಥ ಪಞ್ಞತ್ತಂ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಪಞ್ಞತ್ತಂ.

ವಿಸ್ಸಜ್ಜನಾ – ಸಾವತ್ಥಿಯಂ ಭನ್ತೇ ಸಮ್ಬಹುಲೇ ಭಿಕ್ಖೂ ಆರಬ್ಭ ಪಞ್ಞತ್ತಂ, ಸಮ್ಬಹುಲಾ ಭನ್ತೇ ಭಿಕ್ಖೂ ನ ಮತ್ತಂ ಜಾನಿತ್ವಾ ಪೂವಂ ಪಟಿಗ್ಗಹೇಸುಂ, ತಸ್ಮಿಂ ಭನ್ತೇ ವತ್ಥುಸ್ಮಿಂ ಪಞ್ಞತ್ತಂ.

ಪುಚ್ಛಾ – ಕಸ್ಸ ಆವುಸೋ ವಚನಂ.

ವಿಸ್ಸಜ್ಜನಾ – ಭಗವತೋ ಭನ್ತೇ ವಚನಂ ಅರಹತೋ ಸಮ್ಮಾಸಮ್ಬುದ್ಧಸ್ಸ.

ಪುಚ್ಛಾ – ಕೇನಾವುಸೋ ಆಭತಂ.

ವಿಸ್ಸಜ್ಜನಾ – ಪರಮ್ಪರಾಯ ಭನ್ತೇ ಆಭತಂ.

ಪುಚ್ಛಾ – ಅತ್ಥಿ ನುಖೋ ಆವುಸೋ ಏತ್ಥ ಕೋಚಿಪಿ ವಿರದ್ಧದೋಸೋ.

ವಿಸ್ಸಜ್ಜನಾ – ನತ್ಥಿ ಭನ್ತೇ.

೪. ಭೋಜನವಗ್ಗ, ೫. ಪಠಮಪವಾರಣಾ ಸಿಕ್ಖಾಪುಚ್ಛಾ

ಪುಚ್ಛಾ – ಯಂ ¶ ತೇನ ಸಾವುಸೋ…ಪೇ… ಸಮ್ಮಾಸಮ್ಬುದ್ಧೇನ ಭುತ್ತಾವಿನಾ ಪರಿವಾತೇನ ಅನತಿರಿತ್ತಂ ಖಾದನೀಯಂವಾ ಭೋಜನೀಯಂವಾ ಭುಞ್ಜನ್ತಸ್ಸ ಪಾಚಿತ್ತಿಯಂ ಕತ್ಥ ಪಞ್ಞತ್ತಂ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಪಞ್ಞತ್ತಂ.

ವಿಸ್ಸಜ್ಜನಾ – ಸಾವತ್ಥಿಯಂ ಭನ್ತೇ ಸಮ್ಬಹುಲೇ ಭಿಕ್ಖೂ ಆರಬ್ಭ ಪಞ್ಞತ್ತಂ, ಸಮ್ಬಹುಲಾ ಭನ್ತೇ ಭಿಕ್ಖೂ ಭುತ್ತಾವೀ ಪವಾರಿತಾ ಅಞ್ಞತ್ರ ಭುಞ್ಜಿಂಸು, ತಸ್ಮಿಂ ಭನ್ತೇ ವತ್ಥುಸ್ಮಿಂ ಪಞ್ಞತ್ತಂ.

೪. ಭೋಜನವಗ್ಗ, ೬. ದುತಿಯ ಪವಾರಣಾ ಸಿಕ್ಖಾಪುಚ್ಛಾ

ಪುಚ್ಛಾ – ಭಿಕ್ಖುಂ ¶ ಆವುಸೋ ಭುತ್ತಾವಿಂ ಪವಾರಿತಂ ಅನತಿರಿತ್ತೇನ ಖಾದನೀಯೇನ ಭೋಜನೀಯೇನ ಅಭಿಹಟ್ಠುಂ ಪವಾರೇನ್ತಸ್ಸ ಪಾಚಿತ್ತಿಯಂ ಕತ್ಥ ಪಞ್ಞತ್ತಂ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಪಞ್ಞತ್ತಂ.

ವಿಸ್ಸಜ್ಜನಾ – ಸಾವತ್ಥಿಯಂ ಭನ್ತೇ ಅಞ್ಞತರಂ ಭಿಕ್ಖುಂ ಆರಬ್ಭ ಪಞ್ಞತ್ತಂ, ಅಞ್ಞತರೋ ಭನ್ತೇ ಭಿಕ್ಖು ಭಿಕ್ಖುಂ ಭುತ್ತಾವಿಂ ಪವಾರಿತಂ ಅನತಿರಿತ್ತೇನ ಭೋಜನೀಯೇನ ಅಭಿಹಟ್ಠುಂ ಪವಾರೇಸಿ, ತಸ್ಮಿಂ ಭನ್ತೇ ವತ್ಥುಸ್ಮಿಂ ಪಞ್ಞತ್ತಂ.

೪. ಭೋಜನವಗ್ಗ, ೭. ವಿಕಾಲಭೋಜನ ಸಿಕ್ಖಾಪುಚ್ಛಾ

ಪುಚ್ಛಾ – ವಿಕಾಲೇ ಆವುಸೋ ಖಾದನೀಯಂ ವಾ ಭೋಜನೀಯಂ ವಾ ಭುಞ್ಜನ್ತಸ್ಸ ಪಾಚಿತ್ತಿಯಂ ಕತ್ಥ ಪಞ್ಞತ್ತಂ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಪಞ್ಞತ್ತಂ.

ವಿಸ್ಸಜ್ಜನಾ – ರಾಜಗಹೇ ಭನ್ತೇ ಸತ್ತರಸವಗ್ಗಿಯೇ ಭಿಕ್ಖೂ ಆರಬ್ಭ ಪಞ್ಞತ್ತಂ, ಸತ್ತರಸವಗ್ಗಿಯಾ ಭನ್ತೇ ಭಿಕ್ಖೂ ವಿಕಾಲೇ ಭೋಜನಂ ಭುಞ್ಜಿಂಸು, ತಸ್ಮಿಂ ಭನ್ತೇ ವತ್ಥುಸ್ಮಿಂ ಪಞ್ಞತ್ತಂ.

೪. ಭೋಜನವಗ್ಗ, ೮. ಸನ್ನಿಧಿಕಾರಕ ಸಿಕ್ಖಾಪುಚ್ಛಾ

ಪುಚ್ಛಾ – ಸನ್ನಿಧಿಕಾರಕಂ ಆವುಸೋ ಖಾದನೀಯಂ ವಾ ಭೋಜನೀಯಂ ವಾ ಭುಞ್ಜನ್ತಸ್ಸ ಪಾಚಿತ್ತಿಯಂ ಕತ್ಥ ಪಞ್ಞತ್ತಂ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಪಞ್ಞತ್ತಂ.

ವಿಸ್ಸಜ್ಜನಾ – ಸಾವತ್ಥಿಯಂ ಭನ್ತೇ ಆಯಸ್ಮನ್ತಂ ಬೇಲಟ್ಠಸೀಸಂ ಆರಬ್ಭ ಪಞ್ಞತ್ತಂ, ಆಯಸ್ಮಾ ಭನ್ತೇ ಬೇಲಟ್ಠಸೀಸೋ ಸನ್ನಿಧಿಕಾರಕಂ ಭೋಜನಂ ಭುಞ್ಜಿ, ತಸ್ಮಿಂ ಭನ್ತೇ ವತ್ಥುಸ್ಮಿಂ ಪಞ್ಞತ್ತಂ.

೪. ಭೋಜನವಗ್ಗ, ೯. ಪಣೀತಭೋಜನ ಸಿಕ್ಖಾಪುಚ್ಛಾ

ಪುಚ್ಛಾ – ಪಣೀತ ಭೋಜನಾನಿ ಆವುಸೋ ಅತ್ತನೋ ಅತ್ಥಾಯ ವಿಞ್ಞಾಪೇತ್ವಾ ಭುಞ್ಜನ್ತಸ್ಸ ಪಾಚಿತ್ತಿಯಂ ಕತ್ಥ ಪಞ್ಞತ್ತಂ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಪಞ್ಞತ್ತಂ.

ವಿಸ್ಸಜ್ಜನಾ – ಸಾವತ್ಥಿಯಂ ¶ ಭನ್ತೇ ಛಬ್ಬಗ್ಗಿಯೇ ಭಿಕ್ಖೂ ಆರಬ್ಭ ಪಞ್ಞತ್ತಂ, ಛಬ್ಬಗ್ಗಿಯಾ ಭನ್ತೇ ಭಿಕ್ಖೂ ಪಣೀತಭೋಜನಾನಿ ಅತ್ತನೋ ಅತ್ಥಾಯ ವಿಞ್ಞಾಪೇತ್ವಾ ಭುಞ್ಜಿಂಸು, ತಸ್ಮಿಂ ಭನ್ತೇ ವತ್ಥುಸ್ಮಿಂ ಪಞ್ಞತ್ತಂ.

೪. ಭೋಜನವಗ್ಗ, ೧೦. ದನ್ತಪೋನ ಸಿಕ್ಖಾಪುಚ್ಛಾ

ಪುಚ್ಛಾ – ಅದಿನ್ನಂ ಆವುಸೋ ಮುಖದ್ವಾರಂ ಆಹಾರಂ ಆಹರನ್ತಸ್ಸ ಪಾಚಿತ್ತಿಯಂ ಕತ್ಥ ಪಞ್ಞತ್ತಂ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಪಞ್ಞತ್ತಂ.

ವಿಸ್ಸಜ್ಜನಾ – ವೇಸಾಲಿಯಂ ಭನ್ತೇ ಅಞ್ಞತರಂ ಭಿಕ್ಖುಂ ಆರಬ್ಭ ಪಞ್ಞತ್ತಂ, ಅಞ್ಞತರೋ ಭನ್ತೇ ಭಿಕ್ಖು ಅದಿನ್ನಂ ಮುಖದ್ವಾರಂ ಆಹಾರಂ ಆಹರಿ, ತಸ್ಮಿಂ ಭನ್ತೇ ವತ್ಥುಸ್ಮಿಂ ಪಞ್ಞತ್ತಂ.

೫. ಅಚೇಲಕವಗ್ಗ, ೧. ಅಚೇಲಕ ಸಿಕ್ಖಾಪುಚ್ಛಾ

ಪುಚ್ಛಾ – ಅಚೇಲಕಸ್ಸವಾ ¶ ಆವುಸೋ ಪರಿಬ್ಬಾಜಕಸ್ಸವಾ ಪರಿಬ್ಬಾಜಿಕಾಯವಾ ಸಹತ್ಥಾ ಖಾದನೀಯಂವಾ ಭೋಜನೀಯಂವಾ ದೇನ್ತಸ್ಸ ಪಾಚಿತ್ತಿಯಂ ಕತ್ಥ ಪಞ್ಞತ್ತಂ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಪಞ್ಞತ್ತಂ.

ವಿಸ್ಸಜ್ಜನಾ – ವೇಸಾಲಿಯಂ ಭನ್ತೇ ಆಯಸ್ಮನ್ತಂ ಆನನ್ದಂ ಆರಬ್ಭ ಪಞ್ಞತ್ತಂ, ಆಯಸ್ಮಾ ಭನ್ತೇ ಆನನ್ದೋ ಅಞ್ಞತರಿಸ್ಸಾ ಪರಿಬ್ಬಾಜಿಕಾಯ ಏಕಂ ಮಞ್ಞಮಾನೋ ದ್ವೇ ಪೂವೇ ಅದಾಸಿ, ತಸ್ಮಿಂ ಭನ್ತೇ ವತ್ಥುಸ್ಮಿಂ ಪಞ್ಞತ್ತಂ.

೫. ಅಚೇಲಕವಗ್ಗ, ೨. ಉಯ್ಯೋಜನ ಸಿಕ್ಖಾಪುಚ್ಛಾ

ಪುಚ್ಛಾ – ಭಿಕ್ಖುಂ ¶ ಏಹಾವುಸೋ ಗಾಮಂವಾ ನಿಗಮಂವಾ ಪಿಣ್ಡಾಯ ಪವಿಸಿಸ್ಸಾಮಾತಿ ತಸ್ಸ ದಾಪೇತ್ವಾವಾ ಅದಾಪೇತ್ವಾವಾ ಉಯ್ಯೋಜೇನ್ತಸ್ಸ ಆವುಸೋ ಪಾಚಿತ್ತಿಯಂ ಕತ್ಥ ಪಞ್ಞತ್ತಂ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಪಞ್ಞತ್ತಂ.

ವಿಸ್ಸಜ್ಜನಾ – ಸಾವತ್ಥಿಯಂ ಭನ್ತೇ ಆಯಸ್ಮನ್ತಂ ಉಪನನ್ದಂ ಸಕ್ಯಪುತ್ತಂ ಆರಬ್ಭ ಪಞ್ಞತ್ತಂ, ಆಯಸ್ಮಾ ಭನ್ತೇ ಉಪನನ್ದೋ ಸಕ್ಯಪುತ್ತೋ ಭಿಕ್ಖು ಏಹಾವುಸೋ ಗಾಮಂ ಪಿಣ್ಡಾಯ ಪವಿಸಿಸ್ಸಾಮಾತಿ ತಸ್ಸ ಅದಾಪೇತ್ವಾ ಉಯ್ಯೋಜೇಸಿ, ತಸ್ಮಿಂ ಭನ್ತೇ ವತ್ಥುಸ್ಮಿಂ ಪಞ್ಞತ್ತಂ.

೫. ಅಚೇಲಕವಗ್ಗ, ೩. ಸಭೋಜನ ಸಿಕ್ಖಾಪುಚ್ಛಾ

ಪುಚ್ಛಾ – ಸಭೋಜನೇ ಕುಲೇ ಅನುಪಖಜ್ಜ ನಿಸಜ್ಜಂ ಕಪ್ಪೇನ್ತಸ್ಸ ಆವುಸೋ ಪಾಚಿತ್ತಿಯಂ ಕತ್ಥ ಪಞ್ಞತ್ತಂ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಪಞ್ಞತ್ತಂ.

ವಿಸ್ಸಜ್ಜನಾ – ಸಾವತ್ಥಿಯಂ ¶ ಭನ್ತೇ ಆಯಸ್ಮನ್ತಂ ಉಪನನ್ದಂ ಸಕ್ಯಪುತ್ತಂ ಆರಬ್ಭ ಪಞ್ಞತ್ತಂ, ಆಯಸ್ಮಾ ಭನ್ತೇ ಉಪನನ್ದೋ ಸಕ್ಯಪುತ್ತೋ ಸಭೋಜನೇ ಕುಲೇ ಅನುಪಖಜ್ಜ ನಿಸಜ್ಜಂ ಕಪ್ಪೇಸಿ, ತಸ್ಮಿಂ ಭನ್ತೇವತ್ಥುಸ್ಮಿಂ ಪಞ್ಞತ್ತಂ.

೫. ಅಚೇಲಕವಗ್ಗ ೪-೫. ರಹೋಪಟಿಚ್ಛನ್ನ, ರಹೋನಿಸಜ್ಜ ಸಿಕ್ಖಾಪುಚ್ಛಾ

ಪುಚ್ಛಾ – ಮಾತುಗಾಮೇನ ಸದ್ಧಿಂ ರಹೋ ಪಟಿಚ್ಛನ್ನೇ ಆಸನೇ ನಿಸಜ್ಜಂ ಕಪ್ಪೇನ್ತಸ್ಸಚ ಆವುಸೋ ಮಾತುಗಾಮೇನ ಸದ್ಧಿಂ ಏಕೋ ಏಕಾಯ ರಹೋ ನಿಸಜ್ಜಂ ಕಪ್ಪೇನ್ತಸ್ಸಚ ಪಾಚಿತ್ತಿಯಂ ಕತ್ಥ ಪಞ್ಞತ್ತಂ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಪಞ್ಞತ್ತಂ.

ವಿಸ್ಸಜ್ಜನಾ – ಸಾವತ್ಥಿಯಂ ಭನ್ತೇ ಆಯಸ್ಮನ್ತಂ ಉಪನನ್ದಂ ಸಕ್ಯಪುತ್ತಂ ಆರಬ್ಭ ಪಞ್ಞತ್ತಂ, ಆಯಸ್ಮಾ ಭನ್ತೇ ಉಪನನ್ದೋ ಸಕ್ಯಪುತ್ತೋ ಮಾತುಗಾಮೇನ ಸದ್ಧಿಂ ರಹೋ ಪಟಿಚ್ಛನ್ನೇ ಆಸನೇ ನಿಸಜ್ಜಂ ಕಪ್ಪೇಸಿ, ಮಾತುಗಾಮೇನ ಸದ್ಧಿಂ ಏಕೋ ಏಕಾಯ ರಹೋ ನಿಸಜ್ಜಂ ಕಪ್ಪೇಸಿ, ತಸ್ಮಿಂ ಭನ್ತೇ ವತ್ಥುಸ್ಮಿಂ ಪಞ್ಞತ್ತಂ.

೫. ಅಚೇಲಕವಗ್ಗ, ೬. ಚಾರಿತ್ತ ಸಿಕ್ಖಾಪುಚ್ಛಾ

ಪುಚ್ಛಾ – ನಿಮನ್ತಿತೇನ ¶ ಆವುಸೋ ಸಭತ್ತೇನ ಸನ್ತಂ ಭಿಕ್ಖುಂ ಅನಾಪುಚ್ಛಾ ಪುರೇಭತ್ತಂವಾ ಪಚ್ಛಾಭತ್ತಂವಾ ಕುಲೇಸು ಚಾರಿತ್ತಂ ಆಪಜ್ಜನ್ತಸ್ಸ ಪಾಚಿತ್ತಿಯಂ ಕತ್ಥ ಪಞ್ಞತ್ತಂ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಪಞ್ಞತ್ತಂ.

ವಿಸ್ಸಜ್ಜನಾ – ರಾಜಗಹೇ ಭನ್ತೇ ಆಯಸ್ಮನ್ತಂ ಉಪನನ್ದಂ ಸಕ್ಯಪುತ್ತಂ ಆರಬ್ಭ ಪಞ್ಞತ್ತಂ, ಆಯಸ್ಮಾ ಭನ್ತೇ ಉಪನನ್ದೋ ಸಕ್ಯಪುತ್ತೋ ನಿಮನ್ತಿತೋ ಸಭತ್ತೋ ಸಮಾನೋ ಪುರೇಭತ್ತಂ ಪಚ್ಛಾಭತ್ತಂ ಕುಲೇಸು ಚಾರಿತ್ತಂ ಆಪಜ್ಜಿ, ತಸ್ಮಿಂ ಭನ್ತೇ ವತ್ಥುಸ್ಮಿಂ ಪಞ್ಞತ್ತಂ.

೫. ಅಚೇಲಕವಗ್ಗ, ೭. ಮಹಾನಾಮ ಸಿಕ್ಖಾಪುಚ್ಛಾ

ಪುಚ್ಛಾ – ತತುತ್ತರಿ ಆವುಸೋ ಭೇಸಜ್ಜಂ ವಿಞ್ಞಾಪೇನ್ತಸ್ಸ ಪಾಚಿತ್ತಿಯಂ ಕತ್ಥ ಪಞ್ಞತ್ತಂ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಪಞ್ಞತ್ತಂ.

ವಿಸ್ಸಜ್ಜನಾ – ಸಕ್ಕೇಸು ¶ ಭನ್ತೇ ಛಬ್ಬಗ್ಗಿಯೇ ಭಿಕ್ಖೂ ಆರಬ್ಭ ಪಞ್ಞತ್ತಂ, ಛಬ್ಬಗ್ಗಿಯಾ ಭನ್ತೇ ಭಿಕ್ಖೂ ಮಹಾನಾಮೇನ ಸಕ್ಕೇನ ಅಜ್ಜಣ್ಹೋ ಭನ್ತೇ ಆಗಮೇತಾತಿ ವುಚ್ಚಮಾನಾ ನಾಗಮೇಸುಂ, ತಸ್ಮಿಂ ಭನ್ತೇ ವತ್ಥುಸ್ಮಿಂ ಪಞ್ಞತ್ತಂ.

೫. ಅಚೇಲಕವಗ್ಗ ೮-೯-೧೦. ಉಯ್ಯುತ್ತಸೇನಾ ಚಸೋ ಸಿಕ್ಖಾಪುಚ್ಛಾ

ಪುಚ್ಛಾ – ಉಯ್ಯುತ್ತಂ ಆವುಸೋ ಸೇನಂ ದಸ್ಸನಾಯ ಗಚ್ಛನ್ತಸ್ಸ ಚ ಅತಿರೇಕತಿರತ್ತಂ ಸೇನಾಯ ವಸನ್ತಸ್ಸ ಚ ಉಯ್ಯೋಧಿಕಂ ಗಚ್ಛನ್ತಸ್ಸ ಚ ಪಾಚಿತ್ತಿಯಂ ಕತ್ಥ ಪಞ್ಞತ್ತಂ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಪಞ್ಞತ್ತಂ.

ವಿಸ್ಸಜ್ಜನಾ – ಸಾವತ್ಥಿಯಂ ಭನ್ತೇ ಛಬ್ಬಗ್ಗಿಯೇ ಭಿಕ್ಖೂ ಆರಬ್ಭ ಪಞ್ಞತ್ತಂ, ಛಬ್ಬಗ್ಗಿಯಾ ಭನ್ತೇ ಭಿಕ್ಖೂ ಉಯ್ಯುತ್ತಂ ಸೇನಂ ದಸ್ಸನಾಯ ಅಗಮಂಸು, ತೇಯೇವ ಭನ್ತೇ ಛಬ್ಬಗ್ಗಿಯಾ ಭಿಕ್ಖೂ ಅತಿರೇಕತಿರತ್ತಂ ಸೇನಾಯ ವಸಿಂಸು, ತೇಯೇವ ಭನ್ತೇ ಛಬ್ಬಗ್ಗಿಯಾ ಭಿಕ್ಖೂ ಉಯ್ಯೋಧಿಕಂ ಅಗಮಂಸು, ತಸ್ಮಿಂ ಭನ್ತೇ ವತ್ಥುಸ್ಮಿಂ ಪಞ್ಞತ್ತಂ.

೬. ಸುರಾಪಾನವಗ್ಗ, ೧. ಸುರಾಪಾನ ಸಿಕ್ಖಾಪುಚ್ಛಾ

ಪುಚ್ಛಾ – ಸುರಾಮೇರಯಪಾನೇ ¶ ಆವುಸೋ ಪಾಚಿತ್ತಿಯಂ ಕತ್ಥ ಪಞ್ಞತ್ತಂ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಪಞ್ಞತ್ತಂ.

ವಿಸ್ಸಜ್ಜನಾ – ಕೋಸಮ್ಬಿಯಂ ಭನ್ತೇ ಆಯಸ್ಮನ್ತಂ ಸಾಗತಂ ಆರಬ್ಭ ಪಞ್ಞತ್ತಂ, ಆಯಸ್ಮಾ ಭನ್ತೇ ಸಾಗತೋ ಮಜ್ಜಂ ಪಿವಿ, ತಸ್ಮಿಂ ಭನ್ತೇ ವತ್ಥುಸ್ಮಿಂ ಪಞ್ಞತ್ತಂ.

೬. ಸುರಾಪಾನವಗ್ಗ, ೨. ಅಙ್ಗುಲಿಪತೋದಕ ಸಿಕ್ಖಾಪುಚ್ಛಾ

ಪುಚ್ಛಾ – ಅಙ್ಗುಲಿಪತೋದಕೇ ¶ ಆವುಸೋ ಪಾಚಿತ್ತಿಯಂ ಕತ್ಥ ಪಞ್ಞತ್ತಂ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಪಞ್ಞತ್ತಂ.

ವಿಸ್ಸಜ್ಜನಾ – ಸಾವತ್ಥಿಯಂ ಭನ್ತೇ ಛಬ್ಬಗ್ಗಿಯೇ ಭಿಕ್ಖೂ ಆರಬ್ಭ ಪಞ್ಞತ್ತಂ, ಛಬ್ಬಗ್ಗಿಯಾ ಭನ್ತೇ ಭಿಕ್ಖೂ ಭಿಕ್ಖುಂ ಅಙ್ಗುಲಿಪತೋದಕೇನ ಹಾಸೇಸುಂ, ತಸ್ಮಿಂ ಭನ್ತೇ ವತ್ಥುಸ್ಮಿಂ ಪಞ್ಞತ್ತಂ.

೬. ಸುರಾಪಾನವಗ್ಗ, ೩. ಹಸಧಮ್ಮ ಸಿಕ್ಖಾಪುಚ್ಛಾ

ಪುಚ್ಛಾ – ಉದಕೇ ಹಸಧಮ್ಮೇ ಆವುಸೋ ಪಾಚಿತ್ತಿಯಂ ಕತ್ಥ ಪಞ್ಞತ್ತಂ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಪಞ್ಞತ್ತಂ.

ವಿಸ್ಸಜ್ಜನಾ – ಸಾವತ್ಥಿಯಂ ಭನ್ತೇ ಸತ್ತರಸವಗ್ಗಿಯೇ ಭಿಕ್ಖೂ ಆರಬ್ಭ ಪಞ್ಞತ್ತಂ, ಸತ್ತರಸವಗ್ಗಿಯಾ ಭನ್ತೇ ಭಿಕ್ಖೂ ಅಚಿರವತಿಯಾ ನದಿಯಾ ಉದಕೇ ಕೀಳಿಂಸು, ತಸ್ಮಿಂ ಭನ್ತೇ ವತ್ಥುಸ್ಮಿಂ ಪಞ್ಞತ್ತಂ.

೬. ಸುರಾಪಾನವಗ್ಗ, ೪. ಅನಾದರಿಯ ಸಿಕ್ಖಾಪುಚ್ಛಾ

ಪುಚ್ಛಾ – ಅನಾದರಿಯ ¶ ಆವುಸೋ ಪಾಚಿತ್ತಿಯಂ ಕತ್ಥ ಪಞ್ಞತ್ತಂ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಪಞ್ಞತ್ತಂ.

ವಿಸ್ಸಜ್ಜನಾ – ಕೋಸಮ್ಬಿಯಂ ಭನ್ತೇ ಆಯಸ್ಮನ್ತಂ ಛನ್ನಂ ಆರಬ್ಭ ಪಞ್ಞತ್ತಂ, ಆಯಸ್ಮಾ ಭನ್ತೇ ಛನ್ನೋ ಆಪತ್ತಿಯಾ ಅನುಯುಞ್ಜಿಯಮಾನೋ ಅನಾದರಿಯಂ ಅಕಾಸಿ, ತಸ್ಮಿಂ ಭನ್ತೇ ವತ್ಥುಸ್ಮಿಂ ಪಞ್ಞತ್ತಂ.

೬. ಸುರಾಪಾನವಗ್ಗ, ೫. ಭಿಂಸಾಪನ ಸಿಕ್ಖಾಪುಚ್ಛಾ

ಪುಚ್ಛಾ – ಭಿಕ್ಖುಂ ¶ ಭಿಂಸಾಪೇನ್ತಸ್ಸ ಆವುಸೋ ಪಾಚಿತ್ತಿಯಂ ಕತ್ಥ ಪಞ್ಞತ್ತಂ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಪಞ್ಞತ್ತಂ.

ವಿಸ್ಸಜ್ಜನಾ – ಸಾವತ್ಥಿಯಂ ಭನ್ತೇ ಛಬ್ಬಗ್ಗಿಯೇ ಭಿಕ್ಖೂ ಆರಬ್ಭ ಪಞ್ಞತ್ತಂ, ಛಬ್ಬಗ್ಗಿಯಾ ಭನ್ತೇ ಭಿಕ್ಖೂ ಭಿಕ್ಖುಂ ಭಿಂಸಾಪೇಸುಂ, ತಸ್ಮಿಂ ಭನ್ತೇ ವತ್ಥುಸ್ಮಿಂ ಪಞ್ಞತ್ತಂ.

೬. ಸುರಾಪಾನವಗ್ಗ, ೬. ಜೋತಿಕ ಸಿಕ್ಖಾಪುಚ್ಛಾ

ಪುಚ್ಛಾ – ಜೋತಿಂ ಆವುಸೋ ಸಮಾದಹಿತ್ವಾ ವಿಸಿಬ್ಬೇನ್ತಸ್ಸ ಪಾಚಿತ್ತಿಯಂ ಕತ್ಥ ಪಞ್ಞತ್ತಂ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಪಞ್ಞತ್ತಂ.

ವಿಸ್ಸಜ್ಜನಾ – ಭಗ್ಗೇಸು ಭನ್ತೇ ಸಮ್ಬಹುಲೇ ಭಿಕ್ಖೂ ಆರಬ್ಭ ಪಞ್ಞತ್ತಂ, ಸಮ್ಬಹುಲಾ ಭನ್ತೇ ಭಿಕ್ಖೂ ಜೋತಿಂ ಸಮಾದಪೇತ್ವಾ ವಿಸಿಬ್ಬೇಸುಂ, ತಸ್ಮಿಂ ಭನ್ತೇ ವತ್ಥುಸ್ಮಿಂ ಪಞ್ಞತ್ತಂ.

೬. ಸುರಾಪಾನವಗ್ಗ, ೭. ನಹಾನ ಸಿಕ್ಖಾಪುಚ್ಛಾ

ಪುಚ್ಛಾ – ಓರೇನದ್ಧಮಾಸಂ ¶ ಆವುಸೋ ನಹಾಯನ್ತಸ್ಸ ಪಾಚಿತ್ತಿಯಂ ಕತ್ಥ ಪಞ್ಞತ್ತಂ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಪಞ್ಞತ್ತಂ.

ವಿಸ್ಸಜ್ಜನಾ – ರಾಜಗಹೇ ಭನ್ತೇ ಸಮ್ಬಹುಲೇ ಭಿಕ್ಖೂ ಆರಬ್ಭ ಪಞ್ಞತ್ತಂ, ಸಮ್ಬಹುಲಾ ಭನ್ತೇ ಭಿಕ್ಖೂ ರಾಜಾನಮ್ಪಿ ಪಸ್ಸಿತ್ವಾ ನ ಮತ್ತಂ ಜಾನಿತ್ವಾ ನಹಾಯಿಂಸು, ತಸ್ಮಿಂ ಭನ್ತೇ ವತ್ಥುಸ್ಮಿಂ ಪಞ್ಞತ್ತಂ.

ಪುಚ್ಛಾ – ಕಸ್ಸ ¶ ಆವುಸೋ ವಚನಂ.

ವಿಸ್ಸಜ್ಜನಾ – ಭಗವತೋ ಭನ್ತೇ ವಚನಂ ಅರಹತೋ ಸಮ್ಮಾಸಮ್ಬುದ್ಧಸ್ಸ.

ಪುಚ್ಛಾ – ಕೇನಾವುಸೋ ಆಭತಂ.

ವಿಸ್ಸಜ್ಜನಾ – ಪರಮ್ಪರಾಯ ಭನ್ತೇ ಆಭತಂ.

ಪುಚ್ಛಾ – ಅತ್ಥಿ ನುಖೋ ಆವುಸೋ ಏತ್ಥ ಕೋಚಿಪಿ ವಿರುದ್ಧದೋಸೋ.

ವಿಸ್ಸಜ್ಜನಾ – ನತ್ಥಿ ಭನ್ತೇ.

ಸುಣಾತು ಮೇ ಭನ್ತೇ ಸಙ್ಘೋ…ಪೇ… ಸಂಗಾಯೇಯ್ಯಾಮ.

ಪುಚ್ಛಾ – ಯಂ ¶ ತೇನ ಆವುಸೋ…ಪೇ… ಸಮ್ಮಾಸಮ್ಬುದ್ಧೇನ ಅನಾದಿಯಿತ್ವಾ ತಿಣ್ಣಂ ದುಬ್ಬಣ್ಣಕರಣಾನಂ ಅಞ್ಞತರಂ ದುಬ್ಬಣ್ಣಕರಣಂ ನವಂ ಚೀವರಂ ಪರಿಭುಞ್ಜನ್ತಸ್ಸ ಪಾಚಿತ್ತಿಯಂ ಕತ್ಥ ಪಞ್ಞತ್ತಂ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಪಞ್ಞತ್ತಂ.

ವಿಸ್ಸಜ್ಜನಾ – ಸಾವತ್ಥಿಯಂ ಭನ್ತೇ ಸಮ್ಬಹುಲೇ ಭಿಕ್ಖೂ ಆರಬ್ಭ ಪಞ್ಞತ್ತಂ, ಸಮ್ಬಹುಲಾ ಭನ್ತೇ ಭಿಕ್ಖೂ ಅತ್ತನೋ ಚೀವರಂ ನ ಸಞ್ಜಾನಿಂಸು, ತಸ್ಮಿಂ ಭನ್ತೇ ವತ್ಥುಸ್ಮಿಂ ಪಞ್ಞತ್ತಂ.

೬. ಸುರಾಪಾನವಗ್ಗ, ೧೦. ಚೀವರಅಪನಿಧಾನ ಸಿಕ್ಖಾಪುಚ್ಛಾ

ಪುಚ್ಛಾ – ಭಿಕ್ಖುಸ್ಸ ಆವುಸೋ ಪತ್ತಂ ವಾ ಚೀವರಂ ವಾ ನಿಸೀದನಂ ವಾ ಸೂಚಿಘರಂ ವಾ ಕಾಯಬನ್ಧನಂ ವಾ ಅಪನಿಧೇನ್ತಸ್ಸ ಪಾಚಿತ್ತಿಯಂ ಕತ್ಥ ಪಞ್ಞತ್ತಂ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಪಞ್ಞತ್ತಂ.

ವಿಸ್ಸಜ್ಜನಾ – ಸಾವತ್ಥಿಯಂ ¶ ಭನ್ತೇ ಛಬ್ಬಗ್ಗಿಯೇ ಭಿಕ್ಖೂ ಆರಬ್ಭ ಪಞ್ಞತ್ತಂ, ಛಬ್ಬಗ್ಗಿಯಾ ಭನ್ತೇ ಭಿಕ್ಖೂ ಭಿಕ್ಖೂನಂ ಪತ್ತಮ್ಪಿ ಚೀವರಮ್ಪಿ ಅಪನಿಧೇಸುಂ, ತಸ್ಮಿಂ ಭನ್ತೇ ವತ್ಥುಸ್ಮಿಂ ಪಞ್ಞತ್ತಂ.

೭. ಸಪ್ಪಾಣಕವಗ್ಗ, ೧. ಸಞ್ಚಿಚ್ಚ ಸಿಕ್ಖಾಪುಚ್ಛಾ

ಪುಚ್ಛಾ – ಸಞ್ಚಿಚ್ಚ ಆವುಸೋ ಪಾಣಂ ಜೀವಿತಾ ವೋರೋಪೇನ್ತಸ್ಸ ಪಾಚಿತ್ತಿಯಂ ಕತ್ಥ ಪಞ್ಞತ್ತಂ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಪಞ್ಞತ್ತಂ.

ವಿಸ್ಸಜ್ಜನಾ – ಸಾವತ್ಥಿಯಂ ಭನ್ತೇ ಆಯಸ್ಮನ್ತಂ ಉದಾಯಿಂ ಆರಬ್ಭ ಪಞ್ಞತ್ತಂ ಆಯಸ್ಮಾ ಭನ್ತೇ ಉದಾಯೀ ಸಞ್ಚಿಚ್ಚ ಪಾಣಂ ಜೀವಿತಾ ವೋರೋಪೇಸಿ, ತಸ್ಮಿಂ ಭನ್ತೇ ವತ್ಥುಸ್ಮಿಂ ಪಞ್ಞತ್ತಂ.

೭. ಸಪ್ಪಾಣಕವಗ್ಗ, ೨. ಸಪ್ಪಾಣಕ ಸಿಕ್ಖಾಪುಚ್ಛಾ

ಪುಚ್ಛಾ – ಜಾನಂ ¶ ಆವುಸೋ ಸಪ್ಪಾಣಕಂ ಉದಕಂ ಪರಿಭುಞ್ಜನ್ತಸ್ಸ ಪಾಚಿತ್ತಿಯಂ ಕತ್ಥ ಪಞ್ಞತ್ತಂ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಪಞ್ಞತ್ತಂ.

ವಿಸ್ಸಜ್ಜನಾ – ಸಾವತ್ಥಿಯಂ ಭನ್ತೇ ಛಬ್ಬಗ್ಗಿಯೇ ಭಿಕ್ಖೂ ಆರಬ್ಭ ಪಞ್ಞತ್ತಂ, ಛಬ್ಬಗ್ಗಿಯಾ ಭನ್ತೇ ಭಿಕ್ಖೂ ಜಾನಂ ಸಪ್ಪಾಣಕಂ ಉದಕಂ ಪರಿಭುಞ್ಜಿಂಸು, ತಸ್ಮಿಂ ಭನ್ತೇ ವತ್ಥುಸ್ಮಿಂ ಪಞ್ಞತ್ತಂ.

೭. ಸಪ್ಪಾಣಕವಗ್ಗ, ೬. ಥೇಯ್ಯಸತ್ಥ ಸಿಕ್ಖಾಪುಚ್ಛಾ

ಪುಚ್ಛಾ – ಜಾನಂ ಆವುಸೋ ಥೇಯ್ಯಸತ್ಥೇನ ಸದ್ಧಿಂ ಸಂವಿಧಾಯ ಏಕದ್ಧಾನಮಗ್ಗಂ ಪಟಿಪಜ್ಜನ್ತಸ್ಸ ಪಾಚಿತ್ತಿಯಂ ಕತ್ಥ ಪಞ್ಞತ್ತಂ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಪಞ್ಞತ್ತಂ.

ವಿಸ್ಸಜ್ಜನಾ – ಸಾವತ್ಥಿಯಂ ಭನ್ತೇ ಅಞ್ಞತರಂ ಭಿಕ್ಖುಂ ಆರಬ್ಭ ಪಞ್ಞತ್ತಂ, ಅಞ್ಞತರೋ ಭನ್ತೇ ಭಿಕ್ಖು ಜಾನಂ ಥೇಯ್ಯಸತ್ಥೇನ ಸದ್ಧಿಂ ಸಂವಿಧಾಯ ಏಕದ್ಧಾನಮಗ್ಗಂ ಪಟಿಪಜ್ಜಿ, ತಸ್ಮಿಂ ಭನ್ತೇ ವತ್ಥುಸ್ಮಿಂ ಪಞ್ಞತ್ತಂ.

೭. ಸಪ್ಪಾಣಕವಗ್ಗ, ೭. ಸಂವಿಧಾನ ಸಿಕ್ಖಾಪುಚ್ಛಾ

ಪುಚ್ಛಾ – ಮಾತುಗಾಮೇನ ¶ ಸದ್ಧಿಂ ಆವುಸೋ ಸಂವಿಧಾಯ ಏಕದ್ಧಾನಮಗ್ಗಂ ಪಟಿಪಜ್ಜನ್ತಸ್ಸ ಪಾಚಿತ್ತಿಯಂ ಕತ್ಥ ಪಞ್ಞತ್ತಂ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಪಞ್ಞತ್ತಂ.

ವಿಸ್ಸಜ್ಜನಾ – ಸಾವತ್ಥಿಯಂ ಭನ್ತೇ ಅಞ್ಞತರಂ ಭಿಕ್ಖುಂ ಆರಬ್ಭ ಪಞ್ಞತ್ತಂ, ಅಞ್ಞತರೋ ಭನ್ತೇ ಭಿಕ್ಖು ಮಾತುಗಾಮೇನ ಸದ್ಧಿಂ ಸಂವಿಧಾಯ ಏಕದ್ಧಾನಮಗ್ಗಂ ಪಟಿಪಜ್ಜಿ, ತಸ್ಮಿಂ ಭನ್ತೇ ವತ್ಥುಸ್ಮಿಂ ಪಞ್ಞತ್ತಂ.

೮. ಸಹಧಮ್ಮಿಕವಗ್ಗ, ೧. ಸಹಧಮ್ಮಿಕ ಸಿಕ್ಖಾಪುಚ್ಛಾ

ಪುಚ್ಛಾ – ಭಿಕ್ಖೂಹಿ ಆವುಸೋ ಸಹಧಮ್ಮಿಕಂ ವುಚ್ಚಮಾನೇನ ನ ತಾವಾಹಂ ಆವುಸೋ ಏತಸ್ಮಿಂ ಸಿಕ್ಖಾಪದೇ ಸಿಕ್ಖಿಸ್ಸಾಮಿ, ಯಾವ ನ ಅಞ್ಞಂ ಭಿಕ್ಖುಂ ಬ್ಯತ್ತಂ ವಿನಯಧರಂ ಪರಿಪುಚ್ಛಿಸ್ಸಾಮೀತಿ ಭಣನ್ತಸ್ಸ ಪಾಚಿತ್ತಿಯಂ ಕತ್ಥ ಪಞ್ಞತ್ತಂ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಪಞ್ಞತ್ತಂ.

ವಿಸ್ಸಜ್ಜನಾ – ಕೋಸಮ್ಬಿಯಂ ¶ ಭನ್ತೇ ಆಯಸ್ಮನ್ತಂ ಛನ್ನಂ ಆರಬ್ಭ ಪಞ್ಞತ್ತಂ, ಆಯಸ್ಮಾ ಭನ್ತೇ ಛನ್ನೋ ಭಿಕ್ಖೂಹಿ ಸಹಧಮ್ಮಿಕಂ ವುಚ್ಚಮಾನೋ ನ ತಾವಾಹಂ ಆವುಸೋ ಏತಸ್ಮಿಂ ಸಿಕ್ಖಾಪದೇ ಸಿಕ್ಖಿಸ್ಸಾಮಿ, ಯಾವ ನ ಅಞ್ಞಂ ಭಿಕ್ಖುಂ ಬ್ಯತ್ತಂ ವಿನಯಧರಂ ಪರಿಪುಚ್ಛಿಸ್ಸಾಮೀತಿ ಭಣಿ, ತಸ್ಮಿಂ ಭನ್ತೇ ವತ್ಥುಸ್ಮಿಂ ಪಞ್ಞತ್ತಂ.

೮. ಸಹಧಮ್ಮಿಕವಗ್ಗ, ೨. ವಿಲೇಖನ ಸಿಕ್ಖಾಪುಚ್ಛಾ

ಪುಚ್ಛಾ – ವಿನಯಂ ವಿವಣ್ಣೇನ್ತಸ್ಸ ಆವುಸೋ ಪಾಚಿತ್ತಿಯಂ ಕತ್ಥ ಪಞ್ಞತ್ತಂ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಪಞ್ಞತ್ತಂ.

ವಿಸ್ಸಜ್ಜನಾ – ಸಾವತ್ಥಿಯಂ ಭನ್ತೇ ಛಬ್ಬಗ್ಗಿಯೇ ಭಿಕ್ಖೂ ಆರಬ್ಭ ಪಞ್ಞತ್ತಂ, ಛಬ್ಬಗ್ಗಿಯಾ ಭನ್ತೇ ಭಿಕ್ಖೂ ವಿನಯಂ ವಿವಣ್ಣೇಸುಂ, ತಸ್ಮಿಂ ಭನ್ತೇ ವತ್ಥುಸ್ಮಿಂ ಪಞ್ಞತ್ತಂ.

೮. ಸಹಧಮ್ಮಿಕವಗ್ಗ, ೩. ಮೋಹನ ಸಿಕ್ಖಾಪುಚ್ಛಾ

ಪುಚ್ಛಾ – ಮೋಹನಕೇ ¶ ಆವುಸೋ ಪಾಚಿತ್ತಿಯಂ ಕತ್ಥ ಪಞ್ಞತ್ತಂ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಪಞ್ಞತ್ತಂ.

ವಿಸ್ಸಜ್ಜನಾ – ಸಾವತ್ಥಿಯಂ ಭನ್ತೇ ಛಬ್ಬಗ್ಗಿಯೇ ಭಿಕ್ಖೂ ಆರಬ್ಭ ಪಞ್ಞತ್ತಂ, ಛಬ್ಬಗ್ಗಿಯಾ ಭನ್ತೇ ಭಿಕ್ಖೂ ಮೋಹೇಸುಂ, ತಸ್ಮಿಂ ಭನ್ತೇ ವತ್ಥುಸ್ಮಿಂ ಪಞ್ಞತ್ತಂ.

ಪುಚ್ಛಾ – ಭಿಕ್ಖುಸ್ಸ ¶ ಆವುಸೋ ಕುಪಿತೇನ ಅನತ್ತಮನೇನ ಪಹಾರಂ ದೇನ್ತಸ್ಸ ಚ ತಲಸತ್ತಿಕಂ ಉಗ್ಗಿರನ್ತಸ್ಸ ಚ ಪಾಚಿತ್ತಿಯಂ ಕತ್ಥ ಪಞ್ಞತ್ತಂ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಪಞ್ಞತ್ತಂ.

ವಿಸ್ಸಜ್ಜನಾ – ಸಾವತ್ಥಿಯಂ ಭನ್ತೇ ಛಬ್ಬಗ್ಗಿಯೇ ಭಿಕ್ಖೂ ಆರಬ್ಭ ಪಞ್ಞತ್ತಂ, ಛಬ್ಬಗ್ಗಿಯಾ ಭನ್ತೇ ಭಿಕ್ಖೂ ಕುಪಿತಾ ಅನತ್ತಮನಾ ಸತ್ತರಸವಗ್ಗಿಯಾನಂ ಭಿಕ್ಖೂನಂ ಪಹಾರಂ ಅದಂಸು, ತಲಸತ್ತಿಕಞ್ಚ ಉಗ್ಗಿರಿಂಸು, ತಸ್ಮಿಂ ಭನ್ತೇ ವತ್ಥುಸ್ಮಿಂ ಪಞ್ಞತ್ತಂ.

೮. ಸಹಧಮ್ಮಿಕವಗ್ಗ, ೭. ಸಞ್ಚಿಚ್ಚ ಸಿಕ್ಖಾಪುಚ್ಛಾ

ಪುಚ್ಛಾ – ಭಿಕ್ಖುಸ್ಸ ಆವುಸೋ ಸಞ್ಚಿಚ್ಚ ಕುಕ್ಕುಚ್ಚಂ ಉಪದಹನ್ತಸ್ಸ ಪಾಚಿತ್ತಿಯಂ ಕತ್ಥ ಪಞ್ಞತ್ತಂ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಪಞ್ಞತ್ತಂ.

ವಿಸ್ಸಜ್ಜನಾ – ಸಾವತ್ಥಿಯಂ ಭನ್ತೇ ಛಬ್ಬಗ್ಗಿಯೇ ಭಿಕ್ಖೂ ಆರಬ್ಭ ಪಞ್ಞತ್ತಂ, ಛಬ್ಬಗ್ಗಿಯಾ ಭನ್ತೇ ಭಿಕ್ಖೂ ಭಿಕ್ಖೂನಂ ಸಞ್ಚಿಚ್ಚ ಕುಕ್ಕುಚ್ಚಂ ಉಪದಹಿಂಸು, ತಸ್ಮಿಂ ಭನ್ತೇ ವತ್ಥುಸ್ಮಿಂ ಪಞ್ಞತ್ತಂ.

೮. ಸಹಧಮ್ಮಿಕವಗ್ಗ, ೮. ಉಪಸ್ಸುತಿ ಸಿಕ್ಖಾಪುಚ್ಛಾ

ಪುಚ್ಛಾ – ಭಿಕ್ಖೂನಂ ¶ ಆವುಸೋ ಭಣ್ಡನಜಾತಾನಂ ಕಲಹಜಾತಾನಂ ವಿವಾದಾ ಪನ್ನಾನಂ ಉಪಸ್ಸುತಿಂ ತಿಟ್ಠನ್ತಸ್ಸ ಪಾಚಿತ್ತಿಯಂ ಕತ್ಥ ಪಞ್ಞತ್ತಂ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಪಞ್ಞತ್ತಂ.

ವಿಸ್ಸಜ್ಜನಾ – ಸಾವತ್ಥಿಯಂ ಭನ್ತೇ ಛಬ್ಬಗ್ಗಿಯೇ ಭಿಕ್ಖೂ ಆರಬ್ಭ ಪಞ್ಞತ್ತಂ, ಛಬ್ಬಗ್ಗಿಯಾ ಭನ್ತೇ ಭಿಕ್ಖೂ ಭಿಕ್ಖೂನಂ ಭಣ್ಡನಜಾತಾನಂ ಕಲಹ ಜಾತಾನಂ ವಿವಾದಾಪನ್ನಾನಂ ಉಪಸ್ಸುತಿಂ ತಿಟ್ಠಹಿಂಸು, ತಸ್ಮಿಂ ಭನ್ತೇ ವತ್ಥುಸ್ಮಿಂ ಪಞ್ಞತ್ತಂ.

೮. ಸಹಧಮ್ಮಿಕವಗ್ಗ, ೯. ಕಮ್ಮಪಟಿಬಾಹನ ಸಿಕ್ಖಾಪುಚ್ಛಾ

ಪುಚ್ಛಾ – ಧಮ್ಮಿಕಾನಂ ಆವುಸೋ ಕಮ್ಮಾನಂ ಛನ್ದಂ ದತ್ವಾ ಪಚ್ಛಾ ಖೀಯನಧಮ್ಮಂ ಆಪಜ್ಜನ್ತಸ್ಸ ಪಾಚಿತ್ತಿಯಂ ಕತ್ಥ ಪಞ್ಞತ್ತಂ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಪಞ್ಞತ್ತಂ.

ವಿಸ್ಸಜ್ಜನಾ – ಸಾವತ್ಥಿಯಂ ¶ ಭನ್ತೇ ಛಬ್ಬಗ್ಗಿಯೇ ಭಿಕ್ಖೂ ಆರಬ್ಭ ಪಞ್ಞತ್ತಂ, ಛಬ್ಬಗ್ಗಿಯಾ ಭನ್ತೇ ಭಿಕ್ಖೂ ಧಮ್ಮಿಕಾನಂ ಕಮ್ಮಾನಂ ಛನ್ದಂ ದತ್ವಾ ಪಚ್ಛಾ ಖೀಯನಧಮ್ಮಂ ಆಪಜ್ಜಿಂಸು, ತಸ್ಮಿಂ ಭನ್ತೇ ವತ್ಥುಸ್ಮಿಂ ಪಞ್ಞತ್ತಂ.

೮. ಸಹಧಮ್ಮಿಕವಗ್ಗ ೧೦. ಛನ್ದಂ ಅದತ್ವಾಗಮನ ಸಿಕ್ಖಾಪುಚ್ಛಾ

ಪುಚ್ಛಾ – ಸಙ್ಘೇ ಆವುಸೋ ವಿನಿಚ್ಛಕಥಾಯ ವತ್ತಮಾನಾಯ ಛನ್ದಂ ಅದತ್ವಾ ಉಟ್ಠಾಯಾಸನಾ ಪಕ್ಕಮನ್ತಸ್ಸ ಪಾಚಿತ್ತಿಯಂ ಕತ್ಥ ಪಞ್ಞತ್ತಂ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಪಞ್ಞತ್ತಂ.

ವಿಸ್ಸಜ್ಜನಾ – ಸಾವತ್ಥಿಯಂ ಭನ್ತೇ ಅಞ್ಞತರಂ ಭಿಕ್ಖುಂ ಆರಬ್ಭ ಪಞ್ಞತ್ತಂ, ಅಞ್ಞತರೋ ಭನ್ತೇ ಛಬ್ಬಗ್ಗಿಯೋ ಭಿಕ್ಖು ಸಙ್ಘೇ ವಿನಿಚ್ಛಯಕಥಾಯ ವತ್ತಮಾನಾಯ ಛನ್ದಂ ಅದತ್ವಾ ಉಟ್ಠಾಯಾಸನಾ ಪಕ್ಕಾಮಿ, ತಸ್ಮಿಂ ಭನ್ತೇ ವತ್ಥುಸ್ಮಿಂ ಪಞ್ಞತ್ತಂ.

೮. ಸಹಧಮ್ಮಿಕವಗ್ಗ, ೧೨. ಪರಿಣಾಮನ ಸಿಕ್ಖಾಪುಚ್ಛಾ

ಪುಚ್ಛಾ – ಜಾನಂ ¶ ಆವುಸೋ ಸಙ್ಘಿಕಂ ಲಾಭಂ ಪರಿಣತಂ ಪುಗ್ಗಲಸ್ಸ ಪರಿಣಾಮೇನ್ತಸ್ಸ ಪಾಚಿತ್ತಿಯಂ ಕತ್ಥ ಪಞ್ಞತ್ತಂ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಪಞ್ಞತ್ತಂ.

ವಿಸ್ಸಜ್ಜನಾ – ಸಾವತ್ಥಿಯಂ ಭನ್ತೇ ಛಬ್ಬಗ್ಗಿಯೇ ಭಿಕ್ಖೂ ಆರಬ್ಭ ಪಞ್ಞತ್ತಂ, ಛಬ್ಬಗ್ಗಿಯಾ ಭನ್ತೇ ಭಿಕ್ಖೂ ಜಾನಂ ಸಙ್ಘಿಕಂ ಲಾಭಂ ಪರಿಣತಂ ಪುಗ್ಗಲಸ್ಸ ಪರಿಣಾಮೇಸುಂ, ತಸ್ಮಿಂ ಭನ್ತೇ ವತ್ಥುಸ್ಮಿಂ ಪಞ್ಞತ್ತಂ.

೯. ರತನವಗ್ಗ, ೧. ಅನ್ತೇಪುರ ಸಿಕ್ಖಾಪುಚ್ಛಾ

ಪುಚ್ಛಾ – ಪುಬ್ಬೇ ಅಪ್ಪಟಿಸಂವಿದಿತೇನ ಆವುಸೋ ರಞ್ಞೋ ಅನ್ತೇಪುರಂ ಪವಿಸನ್ತಸ್ಸ ಪಾಚಿತ್ತಿಯಂ ಕತ್ಥ ಪಞ್ಞತ್ತಂ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಪಞ್ಞತ್ತಂ.

ವಿಸ್ಸಜ್ಜನಾ – ಸಾವತ್ಥಿಯಂ ¶ ಭನ್ತೇ ಆಯಸ್ಮನ್ತಂ ಆನನ್ದಂ ಆರಬ್ಭ ಪಞ್ಞತ್ತಂ, ಆಯಸ್ಮಾ ಭನ್ತೇ ಆನನ್ದೋ ಪುಬ್ಬೇ ಅಪ್ಪಟಿಸಂವಿದಿತೋ ರಞ್ಞೋ ಅನ್ತೇಪುರಂ ಪಾವಿಸಿ, ತಸ್ಮಿಂ ಭನ್ತೇ ವತ್ಥುಸ್ಮಿಂ ಪಞ್ಞತ್ತಂ.

೯. ರತನವಗ್ಗ, ೨. ರತನ ಸಿಕ್ಖಾಪುಚ್ಛಾ

ಪುಚ್ಛಾ – ರತನಂ ಆವುಸೋ ಉಗ್ಗಣ್ಹನ್ತಸ್ಸ ಪಾಚಿತ್ತಿಯಂ ಕತ್ಥ ಪಞ್ಞತ್ತಂ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಪಞ್ಞತ್ತಂ.

ವಿಸ್ಸಜ್ಜನಾ – ಸಾವತ್ಥಿಯಂ ಭನ್ತೇ ಅಞ್ಞತರಂ ಭಿಕ್ಖುಂ ಆರಬ್ಭ ಪಞ್ಞತ್ತಂ, ಅಞ್ಞತರೋ ಭನ್ತೇ ಭಿಕ್ಖು ರತನಂ ಉಗ್ಗಹೇಸಿ, ತಸ್ಮಿಂ ಭನ್ತೇ ವತ್ಥುಸ್ಮಿಂ ಪಞ್ಞತ್ತಂ.

೯. ರತನವಗ್ಗ, ೩. ವಿಕಾಲಗಾಮಪ್ಪವಿಸನ ಸಿಕ್ಖಾಪುಚ್ಛಾ

ಪುಚ್ಛಾ – ಸನ್ತಂ ¶ ಆವುಸೋ ಭಿಕ್ಖುಂ ಅನಾಪುಚ್ಛಾ ವಿಕಾಲೇ ಗಾಮಂ ಪವಿಸನ್ತಸ್ಸ ಪಾಚಿತ್ತಿಯಂ ಕತ್ಥ ಪಞ್ಞತ್ತಂ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಪಞ್ಞತ್ತಂ.

ವಿಸ್ಸಜ್ಜನಾ – ಸಾವತ್ಥಿಯಂ ಭನ್ತೇ ಛಬ್ಬಗ್ಗಿಯೇ ಭಿಕ್ಖೂ ಆರಬ್ಭ ಪಞ್ಞತ್ತಂ, ಛಬ್ಬಗ್ಗಿಯಾ ಭನ್ತೇ ಭಿಕ್ಖೂ ಸನ್ತಂ ಭಿಕ್ಖುಂ ಅನಾಪುಚ್ಛಾ ವಿಕಾಲೇ ಗಾಮಂ ಪವಿಸಿಂಸು, ತಸ್ಮಿಂ ಭನ್ತೇ ವತ್ಥುಸ್ಮಿಂ ಪಞ್ಞತ್ತಂ.

ಪಾಟಿದೇಸನೀಯ

೩. ತತಿಯಪಾಟಿದೇಸನೀ ಸಿಕ್ಖಾಪುಚ್ಛಾ

ಪುಚ್ಛಾ – ಸೇಕ್ಖಸಮ್ಮತೇಸು ¶ ಆವುಸೋ ಕುಲೇಸು ಖಾದನೀಯಂ ವಾ ಭೋಜನೀಯಂ ವಾ ಸಹತ್ಥಾ ಪಟಿಗ್ಗಹೇತ್ವಾ ಭುಞ್ಜನ್ತಸ್ಸ ಪಾಟಿದೇಸನೀಯಂ ಕತ್ಥ ಪಞ್ಞತ್ತಂ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಪಞ್ಞತ್ತಂ.

ವಿಸ್ಸಜ್ಜನಾ – ಸಾವತ್ಥಿಯಂ ಭನ್ತೇ ಸಮ್ಬಹುಲೇ ಭಿಕ್ಖೂ ಆರಬ್ಭ ಪಞ್ಞತ್ತಂ, ಸಮ್ಬಹುಲಾ ಭನ್ತೇ ಭಿಕ್ಖೂ ನಮತ್ತಂ ಜಾನಿತ್ವಾ ಪಟಿಗ್ಗಹೇಸುಂ, ತಸ್ಮಿಂ ಭನ್ತೇ ವತ್ಥುಸ್ಮಿಂ ಪಞ್ಞತ್ತಂ.

ಸೇಖಿಯಕಣ್ಡ

ಪುಚ್ಛಾ – ಅನಾದರಿಯಂ ¶ ಆವುಸೋ ಪಟಿಚ್ಚ ಪುರತೋ ವಾ ಪಚ್ಛತೋ ವಾ ಓಲಮ್ಬೇನ್ತೇನ ನಿವಾಸೇನ್ತಸ್ಸಚ ಪಾರುಪನ್ತಸ್ಸಚ ದುಕ್ಕಟಂ ಕತ್ಥ ಪಞ್ಞತ್ತಂ, ಕಂ ಆರಬ್ಭ ಕಿಸ್ಮಿಂ ಪಞ್ಞತ್ತಂ.

ವಿಸ್ಸಜ್ಜನಾ – ಸಾವತ್ಥಿಯಂ ಭನ್ತೇ ಛಬ್ಬಗ್ಗಿಯೇ ಭಿಕ್ಖೂ ಆರಬ್ಭ ಪಞ್ಞತ್ತಂ, ಛಬ್ಬಗ್ಗಿಯಾ ಭನ್ತೇ ಭಿಕ್ಖೂ ಪುರತೋ ಚ ಪಚ್ಛತೋ ಚ ಓಲಮ್ಬನ್ತಾ ನಿವಾಸೇಸುಂಚೇವ ಪಾರುಪಿಂಸುಚ, ತಸ್ಮಿಂ ಭನ್ತೇ ವತ್ಥುಸ್ಮಿಂ ಪಞ್ಞತ್ತಂ.

ಪುಚ್ಛಾ – ಅನಾದರಿಯಂ ಆವುಸೋ ಪಟಿಚ್ಚ ಕಾಯಂ ವಿವರಿತ್ವಾ ಅನ್ತರಘರೇ ಗಚ್ಛನ್ತಸ್ಸ ಚ ನಿಸೀದನ್ತಸ್ಸ ಚ ದುಕ್ಕಟಂ ಕತ್ಥ ಪಞ್ಞತ್ತಂ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಪಞ್ಞತ್ತಂ.

ವಿಸ್ಸಜ್ಜನಾ – ಸಾವತ್ಥಿಯಂ ಭನ್ತೇ ಛಬ್ಬಗ್ಗೀಯೇ ಭಿಕ್ಖೂ ಆರಬ್ಭ ಪಞ್ಞತ್ತಂ, ಛಬ್ಬಗ್ಗಿಯಾ ಭನ್ತೇ ಭಿಕ್ಖೂ ಕಾಯಂ ವಿವರಿತ್ವಾ ಅನ್ತರಘರೇ ಗಚ್ಛಿಂಸು ಚೇವ ನಿಸೀದಿಂಸುಚ, ತಸ್ಮಿಂ ಭನ್ತೇ ವತ್ಥುಸ್ಮಿಂ ಪಞ್ಞತ್ತಂ.

ಪುಚ್ಛಾ – ಅನಾದರಿಯಂ ¶ ಆವುಸೋ ಪಟಿಚ್ಚ ಹತ್ಥಂ ವಾ ಪಾದಂ ವಾ ಕೀಳಾಪೇನ್ತೇನ ಅನ್ತರಘರೇ ಗಚ್ಛನ್ತಸ್ಸ ಚ ನಿಸೀದನ್ತಸ್ಸ ಚ, ತಹಂ ತಹಂ ಓಲೋಕೇನ್ತೇನ ಅನ್ತರಘರೇ ಗಚ್ಛನ್ತಸ್ಸ ಚ ನಿಸೀದನ್ತಸ್ಸ ಚ, ಉಕ್ಖಿತ್ತಕಾಯ ಅನ್ತರಘರೇ ಗಚ್ಛನ್ತಸ್ಸ ಚ ನಿಸೀದನ್ತಸ್ಸ ಚ ದುಕ್ಕಟಂ ಕತ್ಥ ಪಞ್ಞತ್ತಂ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಪಞ್ಞತ್ತಂ.

ವಿಸ್ಸಜ್ಜನಾ – ಸಾವತ್ಥಿಯಂ ಭನ್ತೇ ಛಬ್ಬಗ್ಗಿಯೇ ಭಿಕ್ಖೂ ಆರಬ್ಭ ಪಞ್ಞತ್ತಂ, ಛಬ್ಬಗ್ಗಿಯಾ ಭನ್ತೇ ಭಿಕ್ಖೂ ಹತ್ಥಮ್ಪಿ ಪಾದಮ್ಪಿ ಕೀಳಾಪೇನ್ತಾ ತಹಂ ತಹಂಪಿ ಓಲೋಕೇನ್ತಾ ಅನ್ತರಘರೇ ಗಚ್ಛಿಂಸುಚೇವ ನಿಸೀದಿಂಸು ಚ, ತೇಯೇವ ಭನ್ತೇ ಛಬ್ಬಗ್ಗಿಯಾ ಭಿಕ್ಖೂ ಉಕ್ಖಿತ್ತಕಾಯ ಅನ್ತರಘರೇ ಗಚ್ಛಿಂಸುಚೇವ ನಿಸೀದಿಂಸುಚ, ತಸ್ಮಿಂ ಭನ್ತೇ ವತ್ಥುಸ್ಮಿಂ ಪಞ್ಞತ್ತಂ.

ಪುಚ್ಛಾ – ಅನಾದರಿಯಂ ¶ ಆವುಸೋ ಪಟಿಚ್ಚ ಉಜ್ಜಗ್ಘಿಕಾಯ ವಾ ಉಚ್ಚಾಸದ್ದಂ ಮಹಾಸದ್ದಂ ಕರೋನ್ತೇನ ವಾ ಅನ್ತರಘರೇ ಗಚ್ಛನ್ತಸ್ಸಚ ನಿಸೀದನ್ತಸ್ಸಚ ದುಕ್ಕಟಂ ಕತ್ಥ ಪಞ್ಞತ್ತಂ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಪಞ್ಞತ್ತಂ.

ವಿಸ್ಸಜ್ಜನಾ – ಸಾವತ್ಥಿಯಂ ಭನ್ತೇ ಛಬ್ಬಗ್ಗಿಯೇ ಭಿಕ್ಖೂ ಆರಬ್ಭ ಪಞ್ಞತ್ತಂ, ಛಬ್ಬಗ್ಗಿಯಾ ಭನ್ತೇ ಭಿಕ್ಖೂ ಮಹಾಹಸಿತಂ ಹಸನ್ತಾ ಚ ಉಚ್ಚಾಸದ್ದಂ ಮಹಾಸದ್ದಂ ಕರೋನ್ತಾ ಚ ಅನ್ತರಘರೇ ಗಚ್ಛಿಂಸುಚೇವ ನಿಸೀದಿಂಸುಚ, ತಸ್ಮಿಂ ಭನ್ತೇ ವತ್ಥುಸ್ಮಿಂ ಪಞ್ಞತ್ತಂ.

ಪುಚ್ಛಾ – ಅನಾದರಿಯಂ ಆವುಸೋ ಪಟಿಚ್ಚ ಕಾಯಪ್ಪಚಾಲಕಂ ವಾ ಬಾಹುಪ್ಪ ಚಾಲಕಂ ವಾ ಸೀಸಪ್ಪಚಾಲಕಂ ವಾ ಖಮ್ಭಕತೇನ ವಾ ಓಗುಣ್ಠಿತೇನ ವಾ ಅನ್ತರಘರೇ ಗಚ್ಛನ್ತಸ್ಸ ಚ ನಿಸೀದನ್ತಸ್ಸ ಚ ಉಕ್ಕುಟಿಕಾಯ ಕಿಸ್ಮಿಂ ವತ್ಥುಸ್ಮಿಂ ಪಞ್ಞತ್ತಂ.

ವಿಸ್ಸಜ್ಜನಾ – ಸಾವತ್ಥಿಯಂ ಭನ್ತೇ ಛಬ್ಬಗ್ಗಿಯೇ ಭಿಕ್ಖೂ ಆರಬ್ಭ ಪಞ್ಞತ್ತಂ, ಛಬ್ಬಗ್ಗಿಯಾ ಭನ್ತೇ ಭಿಕ್ಖೂ ಕಾಯಪ್ಪಚಾಲಕಂ ಬಾಹುಪ್ಪಚಾಲಕಂ ಸೀಸಪ್ಪಚಾಲಕಂ ಕರೋನ್ತಾ ಚ ಖಮ್ಭೀಕತಾ ಚ ಓಗುಣ್ಠಿತಾ ಚ ಅನ್ತರಘರೇ ಗಚ್ಛಿಂಸುಚೇವ ನಿಸೀದಿಂಸುಚ, ಉಕ್ಕುಟಿಕಾಯಚ ಅನ್ತರಘರೇ ಗಚ್ಛಿಂಸು, ತಸ್ಮಿಂ ಭನ್ತೇ ವತ್ಥುಸ್ಮಿಂ ಪಞ್ಞತ್ತಂ.

ಪುಚ್ಛಾ – ಅನಾದರಿಯಂ ¶ ಆವುಸೋ ಪಟಿಚ್ಚ ಪಲ್ಲತ್ಥಿಕಾಯ ಅನ್ತರಘರೇ ನಿಸಿನ್ನಸ್ಸ ದುಕ್ಕಟಂ ಕತ್ಥ ಪಞ್ಞತ್ತಂ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಪಞ್ಞತ್ತಂ.

ವಿಸ್ಸಜ್ಜನಾ – ಸಾವತ್ಥಿಯಂ ಭನ್ತೇ ಛಬ್ಬಗ್ಗಿಯೇ ಭಿಕ್ಖೂ ಆರಬ್ಭ ಪಞ್ಞತ್ತಂ, ಛಬ್ಬಗ್ಗಿಯಾ ಭನ್ತೇ ಭಿಕ್ಖೂ ಪಲ್ಲತ್ಥಿಕಾಯ ಅನ್ತರಘರೇ ನಿಸೀದಿಂಸು, ತಸ್ಮಿಂ ಭನ್ತೇ ವತ್ಥುಸ್ಮಿಂ ಪಞ್ಞತ್ತಂ.

ಪುಚ್ಛಾ – ಅನಾದರಿಯಂ ¶ ಆವುಸೋ ಪಟಿಚ್ಚ ಅಸಕ್ಕಚ್ಚಂ ಪಿಣ್ಡಪಾತಂ ಪಟಿಗ್ಗಣ್ಹನ್ತಸ್ಸ ಚ ತಹಂ ತಹಂ ಓಲೋಕೇನ್ತೇನ ಪಿಣ್ಡಪಾತಂ ಪಟಿಗ್ಗಣ್ಹನ್ತಸ್ಸಚ ಸೂಪಞ್ಞೇವ ಬಹುಂ ಪಟಿಗ್ಗಣ್ಹನ್ತಸ್ಸಚ ಥೂಪೀಕತಂ ಪಿಣ್ಡಪಾತಂ ಪಟಿಗ್ಗಣ್ಹನ್ತಸ್ಸಚ ದುಕ್ಕಟಂ ಕತ್ಥ ಪಞ್ಞತ್ತಂ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಪಞ್ಞತ್ತಂ.

ವಿಸ್ಸಜ್ಜನಾ – ಸಾವತ್ಥಿಯಂ ಭನ್ತೇ ಛಬ್ಬಗ್ಗಿಯೇ ಭಿಕ್ಖೂ ಆರಬ್ಭ ಪಞ್ಞತ್ತಂ, ಛಬ್ಬಗ್ಗಿಯಾ ಭನ್ತೇ ಭಿಕ್ಖೂ ಅಸಕ್ಕಚ್ಚಂ ಪಿಣ್ಡಪಾತಂ ಪಟಿಗ್ಗಹೇಸುಂ, ತಹಂ ತಹಂ ಓಲೋಕೇನ್ತಾ ಪಿಣ್ಡಪಾತಂ ಪಟಿಗ್ಗಹೇಸುಂ, ಸೂಪಞ್ಞೇವ ಬಹುಂ ಪಟಿಗ್ಗಹೇಸುಂ, ಥೂಪೀಕತಂ ಪಿಣ್ಡಪಾತಂ ಪಟಿಗ್ಗಹೇಸುಂ, ತಸ್ಮಿಂ ಭನ್ತೇ ವತ್ಥುಸ್ಮಿಂ ಪಞ್ಞತ್ತಂ.

ಪುಚ್ಛಾ – ಅನಾದರಿಯಂ ¶ ಆವುಸೋ ಪಟಿಚ್ಚ ಆಸಕ್ಕಚ್ಚಂ ಪಿಣ್ಡಪಾತಂ ಭುಞ್ಜನ್ತಸ್ಸಚ ತಹಂ ತಹಂ ಓಲೋಕೇನ್ತನ ಪಿಣ್ಡಪಾತಂ ಭುಞ್ಜನ್ತಸ್ಸ ಚ ತಹಂ ತಹಂ ಓಮಸಿತ್ವಾ ಪಿಣ್ಡಪಾತಂ ಭುಞ್ಜನ್ತಸ್ಸ ಚ ಸೂಪಞ್ಞೇವ ಬಹುಂ ಭುಞ್ಜನ್ತಸ್ಸ ಚ ಥೂಪಕತೋ ಓಮದ್ದಿತ್ವಾ ಪಿಣ್ಡಪಾತಂ ಭುಞ್ಜನ್ತಸ್ಸ ಚ ಸೂಪಂ ವಾ ಬ್ಯಞ್ಜನಂ ವಾ ಓದನೇನ ಪಟಿಚ್ಛಾದೇನ್ತಸ್ಸ ಚ ದುಕ್ಕಟಂ ಕತ್ಥ ಪಞ್ಞತ್ತಂ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಪಞ್ಞತ್ತಂ.

ವಿಸ್ಸಜ್ಜನಾ – ಸಾವತ್ಥಿಯಂ ಭನ್ತೇ ಛಬ್ಬಗ್ಗಿಯೇ ಭಿಕ್ಖೂ ಆರಬ್ಭ ಪಞ್ಞತ್ತಂ, ಛಬ್ಬಗ್ಗಿಯಾ ಭನ್ತೇ ಭಿಕ್ಖೂ ಅಸಕ್ಕಚ್ಚಂ ಪಿಣ್ಡಪಾತಂ ಭುಞ್ಜಿಂಸು, ತಹಂ ತಹಂ ಓಲೋಕೇನ್ತಾ ಪಿಣ್ಡಪಾತಂ ಭುಞ್ಜಿಂಸು, ತೇಯೇವ ಭನ್ತೇ ಛಬ್ಬಗ್ಗಿಯಾ ಭಿಕ್ಖೂ ತಹಂ ತಹಂ ಓಮಸಿತ್ವಾ ಪಿಣ್ಡಪಾತಂ ಭುಞ್ಜಿಂಸು, ತೇಯೇವ ಭನ್ತೇ ಛಬ್ಬಗ್ಗಿಯಾ ಭಿಕ್ಖೂ ಬಹುಂ ಸೂಪಂ ಭುಞ್ಜಿಂಸು, ತೇಯೇವ ಭನ್ತೇ ಛಬ್ಬಗ್ಗಿಯಾ ಭಿಕ್ಖೂ ಥೂಪಕತೋ ಓಮದ್ದಿತ್ವಾ ಪಿಣ್ಡಪಾತಂ ಭುಞ್ಜಿಂಸು, ತೇಯೇವ ಭನ್ತೇ ಛಬ್ಬಗ್ಗಿಯಾ ಭಿಕ್ಖೂ ಸೂಪಮ್ಪಿ ಬ್ಯಞ್ಜನಮ್ಪಿ ಓದನೇನ ಪಟಿಚ್ಛಾದೇಸುಂ, ತಸ್ಮಿಂ ಭನ್ತೇ ವತ್ಥುಸ್ಮಿಂ ಪಞ್ಞತ್ತಂ.

ಪುಚ್ಛಾ – ಅನಾದರಿಯಂ ¶ ಆವುಸೋ ಪಟಿಚ್ಚ ಸೂಪಂವಾ ಓದನಂವಾ ಅಗಿಲಾನೇನ ಅತ್ತನೋ ಅತ್ಥಾಯ ವಿಞ್ಞಾಪೇತ್ವಾ ಭುಞ್ಜನ್ತಸ್ಸ ದುಕ್ಕಟಂ ಕತ್ಥ ಪಞ್ಞತ್ತಂ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಪಞ್ಞತ್ತಂ.

ವಿಸ್ಸಜ್ಜನಾ – ಸಾವತ್ಥಿಯಂ ಭನ್ತೇ ಛಬ್ಬಗ್ಗಿಯೇ ಭಿಕ್ಖೂ ಆರಬ್ಭ ಪಞ್ಞತ್ತಂ, ಛಬ್ಬಗ್ಗಿಯಾ ಭನ್ತೇ ಭಿಕ್ಖೂ ಸೂಪಮ್ಪಿ ಓದನಮ್ಪಿ ಅತ್ತನೋ ಅತ್ಥಾಯ ವಿಞ್ಞಾಪೇತ್ವಾ ಭುಞ್ಜಿಂಸು, ತಸ್ಮಿಂ ಭನ್ತೇ ವತ್ಥುಸ್ಮಿಂ ಪಞ್ಞತ್ತಂ.

ಪುಚ್ಛಾ – ಅನಾದರಿಯಂ ಆವುಸೋ ಪಟಿಚ್ಚ ಉಜ್ಝಾನಸಞ್ಞಿನಾ ಪರೇಸಂ ಪತ್ತಂ ಓಲೋಕೇನ್ತಸ್ಸ ಚ ಅತಿಮಹನ್ತಂ ಕಬಳಂ ಕರೋನ್ತಸ್ಸ ಚ ದೀಘಂ ಆಲೋಪಂ ಕರೋನ್ತಸ್ಸ ಚ ದುಕ್ಕಟಂ ಕತ್ಥ ಪಞ್ಞತ್ತಂ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಪಞ್ಞತ್ತಂ.

ವಿಸ್ಸಜ್ಜನಾ – ಸಾವತ್ಥಿಯಂ ¶ ಭನ್ತೇ ಛಬ್ಬಗ್ಗಿಯೇ ಭಿಕ್ಖೂ ಆರಬ್ಭ ಪಞ್ಞತ್ತಂ, ಛಬ್ಬಗ್ಗಿಯಾ ಭನ್ತೇ ಭಿಕ್ಖೂ ಉಜ್ಝಾನಸಞ್ಞಿನೋ ಪರೇಸಂ ಪತ್ತಂ ಓಲೋಕೇಸುಂ, ತೇಯೇವ ಭನ್ತೇ ಛಬ್ಬಗ್ಗಿಯಾ ಭಿಕ್ಖೂ ಅತಿಮಹನ್ತಂ ಕಬಳಂ ಕರಿಂಸು, ತೇಯೇವ ಭನ್ತೇ ಛಬ್ಬಗ್ಗಿಯಾ ಭಿಕ್ಖೂ ದೀಘಂ ಆಲೋಪಂ ಕರಿಂಸು, ತಸ್ಮಿಂ ಭನ್ತೇ ವತ್ಥುಸ್ಮಿಂ ಪಞ್ಞತ್ತಂ.

ಪುಚ್ಛಾ – ಅನಾದರಿಯಂ ಆವುಸೋ ಪಟಿಚ್ಚ ಅನಾಹಟೇ ಕಬಳೇ ಮುಖದ್ವಾರಂ ವಿವರನ್ತಸ್ಸ ಚ ಭುಞ್ಜಮಾನೇ ಸಬ್ಬಂ ಹತ್ಥಂ ಮುಖೇ ಪಕ್ಖಿಪನ್ತಸ್ಸ ಚ ಸಕಬಳೇನ ಮುಖೇನ ಬ್ಯಾಹರನ್ತಸ್ಸ ಚ ಪಿಣ್ಡುಕ್ಖೇಪಕಂ ಪಿಣ್ಡಪಾತಂ ಭುಞ್ಜನ್ತಸ್ಸ ಚ ಕಬಳಾವಚ್ಛೇದಕಂ ಪಿಣ್ಡಪಾತಂ ಭುಞ್ಜನ್ತಸ್ಸ ಚ ಅವಗಣ್ಡಕಾರಕಂ ಪಿಣ್ಡಪಾತಂ ಭುಞ್ಜನ್ತಸ್ಸ ಚ ಹತ್ಥನಿದ್ಧುನಕಂ ಸಿತ್ಥಾವಕಾರಕಂ ಜಿವ್ಹಾನಿಚ್ಛಾರಕಂ ಚಪುಚಪುಕಾರಕಂ ಪಿಣ್ಡಪಾತಂ ಭುಞ್ಜನ್ತಸ್ಸ ಚ ದುಕ್ಕಟಂ ಕತ್ಥ ಪಞ್ಞತ್ತಂ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಪಞ್ಞತ್ತಂ.

ವಿಸ್ಸಜ್ಜನಾ – ಸಾವತ್ಥಿಯಂ ಭನ್ತೇ ಛಬ್ಬಗ್ಗಿಯೇ ಭಿಕ್ಖೂ ಆರಬ್ಭ ಪಞ್ಞತ್ತಂ, ಛಬ್ಬಗ್ಗಿಯಾ ಭನ್ತೇ ಭಿಕ್ಖೂ ಅನಾಹಟೇ ಕಬಳೇ ಮುಖದ್ವಾರಂ ವಿವರಿಂಸು, ಭುಞ್ಜಮಾನಾ ಸಬ್ಬಂ ಹತ್ಥಂ ಮುಖೇ ಪಕ್ಖಿಪಿಂಸು, ಸಕಬಳೇನ ಮುಖೇನ ಬ್ಯಾಹರಿಂಸು, ಪಿಣ್ಡುಕ್ಖೇಪಕಂ ಭುಞ್ಜಿಂಸು, ಕಬಳಾವಚ್ಛೇದಕಂ ಭುಞ್ಜಿಂಸು, ಅವಗಣ್ಡಕಾರಕಂ ಭುಞ್ಜಿಂಸು, ಹತ್ಥನಿದ್ಧುನಕಂ ಸಿತ್ಥಾವಕಾರಕಂ ಜಿವ್ಹಾನಿಚ್ಛಾರಕಂ ¶ ಚಪುಚಪುಕಾರಕಂ ಭುಞ್ಜಿಂಸು, ತಸ್ಮಿಂ ಭನ್ತೇ ವತ್ಥುಸ್ಮಿಂ ಪಞ್ಞತ್ತಂ.

ಪುಚ್ಛಾ – ಅನಾದರಿಯಂ ಆವುಸೋ ಪಟಿಚ್ಚ ಸುರುಸುರುಕಾರಕಂ ಭುಞ್ಜನ್ತಸ್ಸಚ ಹತ್ಥನಿಲ್ಲೇಹಕಂವಾ ಪತ್ತನಿಲ್ಲೇಹಕಂ ವಾ ಓಟ್ಠನಿಲ್ಲೇಹಕಂ ವಾ ಭುಞ್ಜನ್ತಸ್ಸ ಚ ಸಾಮಿಸೇನ ಹತ್ಥೇನ ಪಾನೀಯಥಾಲಕಂ ಪಟಿಗ್ಗಣ್ಹನ್ತಸ್ಸ ಚ ಸಸಿತ್ಥಕಂ ಪತ್ತಧೋವನಂ ಅನ್ತರಘರೇ ಚಡ್ಡೇನ್ತಸ್ಸ ಚ ದುಕ್ಕಟಂ ಕತ್ಥ ಪಞ್ಞತ್ತಂ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಪಞ್ಞತ್ತಂ.

ವಿಸ್ಸಜ್ಜನಾ – ಸುರು ಸುರುಕಾರಕಂ ಭನ್ತೇ ಭುಞ್ಜನ್ತಸ್ಸ ದುಕ್ಕಟಂ ಕೋಸಮ್ಬಿಯಂ ಪಞ್ಞತ್ತಂ, ಸಮ್ಬಹುಲೇ ಭನ್ತೇ ಭಿಕ್ಖೂ ಆರಬ್ಭ ಪಞ್ಞತ್ತಂ, ಸಮ್ಬಹುಲಾ ಭನ್ತೇ ಭಿಕ್ಖೂ ಸುರುಸುರುಕಾರಕಂ ಖೀರಂ ಪಿವಿಂಸು, ತಸ್ಮಿಂ ಭನ್ತೇ ವತ್ಥುಸ್ಮಿಂ ಪಞ್ಞತ್ತಂ. ಹತ್ಥನಿಲ್ಲೇಹಕಂ ¶ ಭುಞ್ಜನ್ತಸ್ಸ ಚ ಪತ್ತನಿಲ್ಲೇಹಕಂ ಭುಞ್ಜನ್ತಸ್ಸ ಚ ಓಟ್ಠನಿಲ್ಲೇಹಕಂ ಭುಞ್ಜನ್ತಸ್ಸ ದುಕ್ಕಟಂ ಸಾವತ್ಥಿಯಂ ಪಞ್ಞತ್ತಂ, ಛಬ್ಬಗ್ಗಿಯೇ ಭನ್ತೇ ಭಿಕ್ಖೂ ಆರಬ್ಭ ಪಞ್ಞತ್ತಂ, ಛಬ್ಬಗ್ಗಿಯಾ ಭನ್ತೇ ಭಿಕ್ಖೂ ಹತ್ಥನಿಲ್ಲೇಹಕಂ ಭುಞ್ಜಿಂಸು, ಪತ್ತನಿಲ್ಲೇಹಕಂ ಭುಞ್ಜಿಂಸು, ಓಟ್ಠನಿಲ್ಲೇಹಕಂ ಭುಞ್ಜಿಂಸು, ತಸ್ಮಿಂ ಭನ್ತೇ ವತ್ಥುಸ್ಮಿಂ ಪಞ್ಞತ್ತಂ.

ಸಾಮಿಸೇನ ಹತ್ಥೇನ ಪಾನೀಯಥಾಲಕಂ ಪಟಿಗ್ಗಣ್ಹನ್ತಸ್ಸ ಚ ಸಸಿತ್ಥಕಂ ಪತ್ತಧೋವನಂ ಅನ್ತರಘರೇ ಛಡ್ಡೇನ್ತಸ್ಸ ಚ ದುಕ್ಕಟಂ ಭಗ್ಗೇಸು ಪಞ್ಞತ್ತಂ, ಸಮ್ಬಹುಲೇ ಭಿಕ್ಖೂ ಆರಬ್ಭ ಪಞ್ಞತ್ತಂ, ಸಮ್ಬಹುಲಾ ಭಿಕ್ಖೂ ಸಾಮಿಸೇನ ಹತ್ಥೇನ ಪಾನೀಯಥಾಲಕಂ ಪಟಿಗ್ಗಹೇಸುಂ, ತೇಯೇವ ಭನ್ತೇ ಸಮ್ಬಹುಲಾ ಭಿಕ್ಖೂ ಸಸಿತ್ಥಕಂ ಪತ್ತಧೋವನಂ ಅನ್ತರಘರೇ ಛಡ್ಡೇಸುಂ, ತಸ್ಮಿಂ ಭನ್ತೇ ವತ್ಥುಸ್ಮಿಂ ಪಞ್ಞತ್ತಂ.

ಪುಚ್ಛಾ – ಅನಾದರಿಯಂ ¶ ಆವುಸೋ ಪಟಿಚ್ಚ ಛತ್ತಪಾಣಿಸ್ಸ ಧಮ್ಮಂ ದೇಸೇನ್ತಸ್ಸ ಚ ದಣ್ಡಪಾಣಿಸ್ಸ ವಾ ಸತ್ಥಪಾಣಿಸ್ಸ ವಾ ಆವುಧಪಾಣಿಸ್ಸ ವಾ ಧಮ್ಮಂ ದೇಸೇನ್ತಸ್ಸ ಚ ದುಕ್ಕಟಂ ಕತ್ಥ ಪಞ್ಞತ್ತಂ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಪಞ್ಞತ್ತಂ.

ವಿಸ್ಸಜ್ಜನಾ – ಸಾವತ್ಥಿಯಂ ಭನ್ತೇ ಛಬ್ಬಗ್ಗಿಯೇ ಭಿಕ್ಖೂ ಆರಬ್ಭ ಪಞ್ಞತ್ತಂ, ಛಬ್ಬಗ್ಗಿಯಾ ಭನ್ತೇ ಭಿಕ್ಖೂ ಛತ್ತಪಾಣಿಸ್ಸ ದಣ್ಡಪಾಣಿಸ್ಸ ಸತ್ಥಪಾಣಿಸ್ಸ ಆವುಧಪಾಣಿಸ್ಸ ಧಮ್ಮಂ ದೇಸೇಸುಂ, ತಸ್ಮಿಂ ಭನ್ತೇ ವತ್ಥುಸ್ಮಿಂ ಪಞ್ಞತ್ತಂ.

ಪುಚ್ಛಾ – ಅನಾದರಿಯಂ ಆವುಸೋ ಪಟಿಚ್ಚ ಪಾದುಕಾರುಳ್ಹಸ್ಸ ಚ ಉಪಹನಾರುಳ್ಹಸ್ಸ ಚ ಯಾನಗತಸ್ಸ ಚ ಸಯನಗತಸ್ಸ ಚ ಧಮ್ಮಂ ದೇಸೇನ್ತಸ್ಸ ದುಕ್ಕಟಂ ಕತ್ಥ ಪಞ್ಞತ್ತಂ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಪಞ್ಞತ್ತಂ.

ವಿಸ್ಸಜ್ಜನಾ – ಸಾವತ್ಥಿಯಂ ಭನ್ತೇ ಛಬ್ಬಗ್ಗಿಯೇ ಭಿಕ್ಖೂ ಆರಬ್ಭ ಪಞ್ಞತ್ತಂ, ಛಬ್ಬಗ್ಗಿಯಾ ಭನ್ತೇ ಭಿಕ್ಖೂ ಪಾದುಕಾರುಳ್ಹಸ್ಸ ಉಪಹನಾರುಳ್ಹಸ್ಸ ಯಾನಗತಸ್ಸ ಸಯನಗತಸ್ಸ ಧಮ್ಮಂ ದೇಸೇಸುಂ, ತಸ್ಮಿಂ ಭನ್ತೇ ವತ್ಥುಸ್ಮಿಂ ಪಞ್ಞತ್ತಂ.

ಪುಚ್ಛಾ – ಅನಾದರಿಯಂ ¶ ಆವುಸೋ ಪಟಿಚ್ಚ ಪಲ್ಲತ್ಥಿಕಾಯ ನಿಸಿನ್ನಸ್ಸ ಚ ವೇಠಿತಸೀಸಸ್ಸ ಚ ಓಗುಣ್ಠಿತಸೀಸಸ್ಸ ಚ ಛಮಾಯಂ ನಿಸೀದಿತ್ವಾ ಆಸನೇ ನಿಸಿನ್ನಸ್ಸ ಚ ನೀಚೇ ಆಸನೇ ನಿಸೀದಿತ್ವಾ ಉಚ್ಚೇ ಆಸನೇ ನಿಸಿನ್ನಸ್ಸ ಚ ಠಿತೇನ ನಿಸಿನ್ನಸ್ಸ ಚ ಪಚ್ಛತೋ ಗಚ್ಛನ್ತೇನ ಪುರತೋ ಗಚ್ಛನ್ತಸ್ಸ ಚ ಉಪ್ಪಥೇನ ಗಚ್ಛನ್ತೇನ ಪಥೇನ ಗಚ್ಛನ್ತಸ್ಸ ಚ ಧಮ್ಮಂ ದೇಸೇನ್ತಸ್ಸ ದುಕ್ಕಟಂ ಕತ್ಥ ಪಞ್ಞತ್ತಂ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಪಞ್ಞತ್ತಂ.

ವಿಸ್ಸಜ್ಜನಾ – ಸಾವತ್ಥಿಯಂ ಭನ್ತೇ ಛಬ್ಬಗ್ಗಿಯೇವ ಭಿಕ್ಖೂ ಆರಬ್ಭ ಪಞ್ಞತ್ತಂ, ಛಬ್ಬಗ್ಗಿಯಾ ಭನ್ತೇ ಭಿಕ್ಖೂ ಪಲ್ಲತ್ಥಿಕಾಯ ನಿಸಿನ್ನಸ್ಸ ಚ ವೇಠಿತಸೀಸಸ್ಸ ಚ ಓಗುಣ್ಠಿತಸೀಸಸ್ಸ ಚ ಛಮಾಯಂ ನಿಸೀದಿತ್ವಾ ಆಸನೇ ನಿಸಿನ್ನಸ್ಸ ಚ ನೀಚೇ ಆಸನೇ ನಿಸೀದಿತ್ವಾ ಉಚ್ಚೇ ಆಸನೇ ನಿಸಿನ್ನಸ್ಸ ಚ ಠಿತಾನಿಸಿನ್ನಸ್ಸ ಚ ಪಚ್ಛತೋ ಗಚ್ಛನ್ತಾ ಪುರತೋ ಗಚ್ಛನ್ತಸ್ಸ ಚ ಉಪ್ಪಥೇನ ಗಚ್ಛನ್ತಾ ಪಥೇನ ಗಚ್ಛನ್ತಸ್ಸ ಚ ಧಮ್ಮಂ ದೇಸೇಸುಂ, ತಸ್ಮಿಂ ಭನ್ತೇ ವತ್ಥುಸ್ಮಿಂ ಪಞ್ಞತ್ತಂ.

ಪುಚ್ಛಾ – ಅನಾದರಿಯಂ ¶ ಆವುಸೋ ಪಟಿಚ್ಚ ಠಿತೇನ ಉಚ್ಚಾರಂ ವಾ ಪಸ್ಸಾವಂ ವಾ ಕರೋನ್ತಸ್ಸ ಚ ಹರಿತೇ ವಾ ಉದಕೇ ವಾ ಉಚ್ಚಾರಂ ವಾ ಪಸ್ಸಾವಂ ವಾ ಖೇಳಂ ವಾ ಕರೋನ್ತಸ್ಸ ಚ ದುಕ್ಕಟಂ ಕತ್ಥ ಪಞ್ಞತ್ತಂ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಪಞ್ಞತ್ತಂ.

ವಿಸ್ಸಜ್ಜನಾ – ಸಾವತ್ಥಿಯಂ ಭನ್ತೇ ಛಬ್ಬಗ್ಗಿಯೇವ ಭಿಕ್ಖೂ ಆರಬ್ಭ ಪಞ್ಞತ್ತಂ, ಛಬ್ಬಗ್ಗಿಯಾ ಭನ್ತೇ ಭಿಕ್ಖೂ ಠಿತಾ ಉಚ್ಚಾರಮ್ಪಿ ಪಸ್ಸಾವಮ್ಪಿ ಅಕಂಸು, ತೇಯೇವ ಭನ್ತೇ ಛಬ್ಬಗ್ಗಿಯಾ ಭಿಕ್ಖೂ ಹರಿತೇಪಿ ಉದಕೇಪಿ ಉಚ್ಚಾರಮ್ಪಿ ಪಸ್ಸಾವಮ್ಪಿ ಖೇಳಮ್ಪಿ ಅಕಂಸು, ತಸ್ಮಿಂ ಭನ್ತೇ ವತ್ಥುಸ್ಮಿಂ ಪಞ್ಞತ್ತಂ.

ಭಿಕ್ಖುನೀವಿಭಙ್ಗ

೫. ಪಞ್ಚಮ ಪಾರಾಜಿಕ ಸಿಕ್ಖಾಪುಚ್ಛಾ

ಪುಚ್ಛಾ – ಭಿಕ್ಖುನೀನಂ ¶ ಆವುಸೋ ಪಞ್ಚಮ ಪಾರಾಜಿಕಂ ಕತ್ಥ ಪಞ್ಞತ್ತಂ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಪಞ್ಞತ್ತಂ.

ವಿಸ್ಸಜ್ಜನಾ – ಸಾವತ್ಥಿಯಂ ಭನ್ತೇ ಸುನ್ದರೀನನ್ದಂ ಭಿಕ್ಖುನಿಂ ಆರಬ್ಭ ಪಞ್ಞತ್ತಂ, ಸುನ್ದರೀನನ್ದಾ ಭನ್ತೇ ಭಿಕ್ಖುನೀ ಅವಸ್ಸುತಾ ಅವಸ್ಸುತಸ್ಸ ಪುರಿಸಪುಗ್ಗಲಸ್ಸ ಕಾಯಸಂಸಗ್ಗಂ ಸಾದಿಯಿ, ತಸ್ಮಿಂ ಭನ್ತೇ ವತ್ಥುಸ್ಮಿಂ ಪಞ್ಞತ್ತಂ.

ಭಿಕ್ಖುನೀವಿಭಙ್ಗ, ಸಙ್ಘಾದಿಸೇಸ ಸಿಕ್ಖಾಪುಚ್ಛಾ

ಪುಚ್ಛಾ – ಉಸ್ಸಯವಾದಿಕಾಯ ಆವುಸೋ ಭಿಕ್ಖುನಿಯಾ ಅಡ್ಡಂ ಕರೋನ್ತಿಯಾ ಸಙ್ಘಾದಿಸೇಸೋ ಕತ್ಥ ಪಞ್ಞತ್ತೋ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಪಞ್ಞತ್ತೋ.

ವಿಸ್ಸಜ್ಜನಾ – ಸಾವತ್ಥಿಯಂ ಭನ್ತೇ ತುಲ್ಲನನ್ದಂ ಭಿಕ್ಖುನಿಂ ಆರಬ್ಭ ಪಞ್ಞತ್ತೋ, ಥುಲ್ಲನನ್ದಾ ಭನ್ತೇ ಭಿಕ್ಖುನೀ ಉಸ್ಸಯವಾದಿಕಾ ವಿಹರಿ, ತಸ್ಮಿಂ ಭನ್ತೇ ವತ್ಥುಸ್ಮಿಂ ಪಞ್ಞತ್ತೋ.

ಪುಚ್ಛಾ – ಚೋರಿಂ ¶ ಆವುಸೋ ವುಟ್ಠಾಪೇನ್ತಿಯಾ ಸಙ್ಘಾದಿಸೇಸೋ ಕತ್ಥ ಪಞ್ಞತ್ತೋ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಪಞ್ಞತ್ತೋ.

ವಿಸ್ಸಜ್ಜನಾ – ಸಾವತ್ಥಿಯಂ ಭನ್ತೇ ಥುಲ್ಲನನ್ದಂ ಭಿಕ್ಖುನಿಂ ಆರಬ್ಭ ಪಞ್ಞತ್ತೋ, ಥುಲ್ಲನನ್ದಾ ಭನ್ತೇ ಭಿಕ್ಖುನೀ ಚೋರಿಂ ವುಟ್ಠಾಪೇಸಿ, ತಸ್ಮಿಂ ಭನ್ತೇ ವತ್ಥುಸ್ಮಿಂ ಪಞ್ಞತ್ತೋ.

ಪುಚ್ಛಾ – ಏಕಾಯ ¶ ಆವುಸೋ ಗಾಮನ್ತರಂ ಗಚ್ಛನ್ತಿಯಾ ಸಙ್ಘಾದಿಸೇಸೋ ಕತ್ಥ ಪಞ್ಞತ್ತೋ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಪಞ್ಞತ್ತೋ.

ವಿಸ್ಸಜ್ಜನಾ – ಸಾವತ್ಥಿಯಂ ಭನ್ತೇ ಅಞ್ಞತರಂ ಭಿಕ್ಖುನಿಂ ಆರಬ್ಭ ಪಞ್ಞತ್ತೋ, ಅಞ್ಞತರಾ ಭನ್ತೇ ಭಿಕ್ಖುನೀ ಏಕಾ ಗಾಮನ್ತರಂ ಗಚ್ಛಿ, ತಸ್ಮಿಂ ಭನ್ತೇ ವತ್ಥುಸ್ಮಿಂ ಪಞ್ಞತ್ತೋ.

ಪುಚ್ಛಾ – ಅವಸ್ಸುತಾಯ ಆವುಸೋ ಭಿಕ್ಖುನಿಯಾ ಅವಸ್ಸುತಸ್ಸ ಪುರಿಸಪುಗ್ಗಲಸ್ಸ ಹತ್ಥತೋ ಖಾದನೀಯಂವಾ ಭೋಜನೀಯಂವಾ ಸಹತ್ಥಾ ಪಟಿಗ್ಗಹೇತ್ವಾ ಭುಞ್ಜನ್ತಸ್ಸ ಸಙ್ಘಾದಿಸೇಸೋ ಕತ್ಥ ಪಞ್ಞತ್ತೋ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಪಞ್ಞತ್ತೋ.

ವಿಸ್ಸಜ್ಜನಾ – ಸಾವತ್ಥಿಯಂ ಭನ್ತೇ ಸುನ್ದರೀನನ್ದಂ ಭಿಕ್ಖುನಿಂ ಆರಬ್ಭ ಪಞ್ಞತ್ತೋ, ಸುನ್ದರೀನನ್ದಾ ಭನ್ತೇ ಭಿಕ್ಖುನೀ ಅವಸ್ಸುತಾ ಅವಸ್ಸುತಸ್ಸ ಪುರಿಸಪುಗ್ಗಲಸ್ಸ ¶ ಹತ್ಥತೋ ಆಮಿಸಂ ಪಟಿಗ್ಗಹೇಸಿ ತಸ್ಮಿಂ ಭನ್ತೇ ವತ್ಥುಸ್ಮಿಂ ಪಞ್ಞತ್ತೋ.

ಪುಚ್ಛಾ – ಕುಪಿತಾಯ ಆವುಸೋ ಅನತ್ತಮನಾಯ ಭಿಕ್ಖುನಿಯಾ ಯಾವತತಿಯಂ ಸಮನುಭಾಸನ್ತಿಯಾ ನ ಪಟಿನಿಸಜ್ಜನ್ತಿಯಾ ಸಙ್ಘಾದಿಸೇಸೋ ಕತ್ಥ ಪಞ್ಞತ್ತೋ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಪಞ್ಞತ್ತೋ.

ವಿಸ್ಸಜ್ಜನಾ – ಸಾವತ್ಥಿಯಂ ಭನ್ತೇ ಚಣ್ಡಕಾಳಿಂ ಭಿಕ್ಖುನಿಂ ಆರಬ್ಭ ಪಞ್ಞತ್ತೋ, ಚಣ್ಡಕಾಳೀ ಭನ್ತೇ ಭಿಕ್ಖುನೀ ಕುಪಿತಾ ಅನತ್ತಮನಾ ಏವಂ ಅಭಣಿ, ಬುದ್ಧಂ ಪಚ್ಚಾಚಿಕ್ಖಾಮಿ, ಧಮ್ಮಂ ಪಚ್ಚಾಚಿಕ್ಖಾಮಿ, ಸಙ್ಘಂ ಪಚ್ಚಾಚಿಕ್ಖಾಮಿ, ಸಿಕ್ಖಂ ಪಚ್ಚಾಚಿಕ್ಖಾಮಿ, ಕಿನ್ನುಮಾವ ಸಮಣಿಯೋ ಯಾ ಸಮಣಿಯೋ ಸಕ್ಯಧೀತರೋ, ಸನ್ತಞ್ಞಾಪಿ ಸಮಣಿಯೋ ಲಜ್ಜಿನಿಯೋ ಕುಕ್ಕುಚ್ಚಿಕಾ ಸಿಕ್ಖಾಕಾಮಾ, ತಾಸಾಹಂ ಸನ್ತಿಕೇ ಬ್ರಹ್ಮಚರಿಯಂ ಚರಿಸ್ಸಾಮೀತಿ, ತಸ್ಮಿಂ ಭನ್ತೇ ವತ್ಥುಸ್ಮಿಂ ಪಞ್ಞತ್ತೋ.

ಪುಚ್ಛಾ – ಕಸ್ಸ ¶ ಆವುಸೋ ವಚನಂ.

ವಿಸ್ಸಜ್ಜನಾ – ಭಗವತೋ ಭನ್ತೇ ವಚನಂ ಅರಹತೋ ಸಮ್ಮಾಸಮ್ಬುದ್ಧಸ್ಸ.

ಪುಚ್ಛಾ – ಕೇನಾವುಸೋ ಆಭತಂ.

ವಿಸ್ಸಜ್ಜನಾ – ಪರಮ್ಪರಾಯ ಭನ್ತೇ ಆಭತಂ.

ಪುಚ್ಛಾ – ಅತ್ಥಿ ನುಖೋ ಆವುಸೋ ಏತ್ಥ ಕೋಚಿಪಿ ವಿರದ್ಧದೋಸೋ.

ವಿಸ್ಸಜ್ಜನಾ – ನತ್ಥಿ ಭನ್ತೇ.

ಭಿಕ್ಖುನೀ ವಿಭಙ್ಗಪಾಚಿತ್ತಿಯ

೧. ಲಸುಣವಗ್ಗ, ೧. ಪಠಮ ಸಿಕ್ಖಾಪುಚ್ಛಾ

ಪುಚ್ಛಾ – ಯಂ ¶ ತೇನ ಆವುಸೋ ಭಗವತಾ…ಪೇ… ಸಮ್ಮಾಸಮ್ಬುದ್ಧೇನ ಲಕ್ಖಣಂ ಖಾದನ್ತಿಯಾ ಪಾಚಿತ್ತಿಯಂ ಕತ್ಥ ಪಞ್ಞತ್ತಂ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಪಞ್ಞತ್ತಂ.

ವಿಸ್ಸಜ್ಜನಾ – ಸಾವತ್ಥಿಯಂ ಭನ್ತೇ ಥುಲ್ಲನನ್ದಂ ಭಿಕ್ಖುನಿಂ ಆರಬ್ಭ ಪಞ್ಞತ್ತಂ, ಥುಲ್ಲನನ್ದಾ ಭನ್ತೇ ಭಿಕ್ಖುನೀ ನ ಮತ್ತಂ ಜಾನಿತ್ವಾ ಬಹುಂ ಲಸುಣಂ ಹರಾಪೇಸಿ, ತಸ್ಮಿಂ ಭನ್ತೇ ವತ್ಥುಸ್ಮಿಂ ಪಞ್ಞತ್ತಂ.

೧. ಲಸುಣವಗ್ಗ, ೬. ಛಟ್ಠ ಸಿಕ್ಖಾಪುಚ್ಛಾ

ಪುಚ್ಛಾ – ಭಿಕ್ಖುಸ್ಸ ಆವುಸೋ ಭುಞ್ಜಮಾನಸ್ಸ ಅನ್ನೇನ ವಾ ಪಾನೇನ ವಾ ವಿಧೂಪನೇನ ವಾ ಉಪತಿಟ್ಠನ್ತಿಯಾ ಭಿಕ್ಖುನಿಯಾ ಪಾಚಿತ್ತಿಯಂ ಕತ್ಥ ಪಞ್ಞತ್ತಂ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಪಞ್ಞತ್ತಂ.

ವಿಸ್ಸಜ್ಜನಾ – ಸಾವತ್ಥಿಯಂ ¶ ಭನ್ತೇ ಅಞ್ಞತರಂ ಭಿಕ್ಖುನಿಂ ಆರಬ್ಭ ಪಞ್ಞತ್ತಂ, ಅಞ್ಞತರಾ ಭನ್ತೇ ಭಿಕ್ಖುನೀ ಭಿಕ್ಖುಸ್ಸ ಭುಞ್ಜಮಾನಸ್ಸ ಪಾನೀಯೇನ ವಿಧೂಪನೇನ ಚ ಉಪತಿಟ್ಠತಿ, ತಸ್ಮಿಂ ಭನ್ತೇ ವತ್ಥುಸ್ಮಿಂ ಪಞ್ಞತ್ತಂ.

೧. ಲಸುಣವಗ್ಗ, ೮. ಅಟ್ಠಮ ಸಿಕ್ಖಾಪುಚ್ಛಾ

ಪುಚ್ಛಾ – ಉಚ್ಚಾರಂವಾ ಆವುಸೋ ಪಸ್ಸಾವಂವಾ ಸಙ್ಕಾರಂವಾ ವಿಘಾಸಂವಾ ಥಿರೋಕುಟ್ಟೇ ಛಡ್ಡೇನ್ತಿಯಾ ಪಾಚಿತ್ತಿಯಂ ಕತ್ಥ ಪಞ್ಞತ್ತಂ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಪಞ್ಞತ್ತಂ.

ವಿಸ್ಸಜ್ಜನಾ – ಸಾವತ್ಥಿಯಂ ಭನ್ತೇ ಅಞ್ಞತರಂ ಭಿಕ್ಖುನಿಂ ಆರಬ್ಭ ಪಞ್ಞತ್ತಂ, ಅಞ್ಞತರಾ ಭನ್ತೇ ಭಿಕ್ಖುನೀ ಉಚ್ಚಾರಂ ತಿರೋಕುಟ್ಟೇ ಛಡ್ಡೇಸಿ, ತಸ್ಮಿಂ ಭನ್ತೇ ವತ್ಥುಸ್ಮಿಂ ಪಞ್ಞತ್ತಂ.

೧. ಲಸುಣವಗ್ಗ, ೧೦. ದಸಮ ಸಿಕ್ಖಾಪುಚ್ಛಾ

ಪುಚ್ಛಾ – ನಚ್ಚಂ ¶ ವಾ ಆವುಸೋ ಗೀತಂ ವಾ ವಾದಿತಂ ವಾ ದಸ್ಸನಾಯ ಗಚ್ಛನ್ತಿಯಾ ಪಾಚಿತ್ತಿಯಂ ಕತ್ಥ ಪಞ್ಞತ್ತಂ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಪಞ್ಞತ್ತಂ.

ವಿಸ್ಸಜ್ಜನಾ – ಸಾವತ್ಥಿಯಂ ಭನ್ತೇ ಛಬ್ಬಗ್ಗಿಯಾ ಭಿಕ್ಖುನಿಯೋ ಆರಬ್ಭ ಪಞ್ಞತ್ತಂ, ಛಬ್ಬಗ್ಗಿಯಾ ಭನ್ತೇ ಭಿಕ್ಖುನಿಯೋ ನಚ್ಚಮ್ಪಿ ಗೀತಮ್ಪಿ ವಾದಿತಮ್ಪಿ ದಸ್ಸನಾಯ ಅಗಮಂಸು, ತಸ್ಮಿಂ ಭನ್ತೇ ವತ್ಥುಸ್ಮಿಂ ಪಞ್ಞತ್ತಂ.

ಪುಚ್ಛಾ – ಭಿಕ್ಖುಪನ ¶ ಆವುಸೋ ನಚ್ಚಂ ವಾ ಗೀತಂ ವಾ ವಾದಿತಂ ವಾ ದಸ್ಸನಾಯ ಗಚ್ಛನ್ತೋ ಕಂ ನಾಮ ಆಪತ್ತಿಂ ಆಪಜ್ಜತಿ.

ವಿಸ್ಸಜ್ಜನಾ – ದುಕ್ಕಟಂ ಭನ್ತೇ ಆಪತ್ತಿಂ ಆಪಜ್ಜತಿ.

೧. ಪಠಮ ಸಿಕ್ಖಾಪುಚ್ಛಾ

ಪುಚ್ಛಾ – ರತ್ತನ್ಧಕಾರೇ ಆವುಸೋ ಅಪದೀಪೇ ಪುರಿಸೇನ ಸದ್ಧಿಂ ಏಕೇನೇಕಾಯ ಸನ್ತಿಟ್ಠನ್ತಿಯಾ ಪಾಚಿತ್ತಿಯಂ ಕತ್ಥ ಪಞ್ಞತ್ತಂ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಪಞ್ಞತ್ತಂ.

ವಿಸ್ಸಜ್ಜನಾ – ಸಾವತ್ಥಿಯಂ ಭನ್ತೇ ಅಞ್ಞತರಂ ಭಿಕ್ಖುನಿಂ ಆರಬ್ಭ ಪಞ್ಞತ್ತಂ, ಅಞ್ಞತರಾ ಭನ್ತೇ ಭಿಕ್ಖುನೀ ರತ್ತನ್ಧಕಾರೇ ಅಪದೀಪೇ ಪುರಿಸೇನ ಸದ್ಧಿಂ ಏಕೇನೇಕಾ ಸನ್ತಿಟ್ಠಿ, ತಸ್ಮಿಂ ಭನ್ತೇ ವತ್ಥುಸ್ಮಿಂ ಪಞ್ಞತ್ತಂ.

೨. ಅನ್ಧಕಾರವಗ್ಗ, ೨-೩. ದುತಿಯ, ತತಿಯ ಸಿಕ್ಖಾಪುಚ್ಛಾ

ಪುಚ್ಛಾ – ಪಟಿಚ್ಛನ್ನೇ ¶ ವಾ ಆವುಸೋ ಓಕಾಸೇ ಅಜ್ಝೋಕಾಸೇ ವಾ ಪುರಿಸೇನ ಸದ್ಧಿಂ ಏಕೇನೇಕಾಯ ಸನ್ತಿಟ್ಠನ್ತಿಯಾ ಪಾಚಿತ್ತಿಯಂ ಕತ್ಥ ಪಞ್ಞತ್ತಂ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಪಞ್ಞತ್ತಂ.

ವಿಸ್ಸಜ್ಜನಾ – ಸಾವತ್ಥಿಯಂ ಭನ್ತೇ ಅಞ್ಞತರಂ ಭಿಕ್ಖುನಿಂ ಆರಬ್ಭ ಪಞ್ಞತ್ತಂ, ಅಞ್ಞತರಾ ಭನ್ತೇ ಭಿಕ್ಖುನೀ ಪಟಿಚ್ಛನ್ನೇ ಓಕಾಸೇ ಅಜ್ಝೋಕಾಸೇ ಚ ಪುರಿಸೇನ ಸದ್ಧಿಂ ಏಕೇನೇಕಾ ಸನ್ತಿಟ್ಠಿ, ತಸ್ಮಿಂ ಭನ್ತೇ ವತ್ಥುಸ್ಮಿಂ ಪಞ್ಞತ್ತಂ.

೨. ಅನ್ಧಕಾರವಗ್ಗ, ೮. ಅಟ್ಠಮ ಸಿಕ್ಖಾಪುಚ್ಛಾ

ಪುಚ್ಛಾ – ದುಗ್ಗಹಿತೇನ ಆವುಸೋ ದೂಪಧಾರಿತೇನ ಪರಂ ಉಜ್ಝಾಪೇನ್ತಿಯಾ ಪಾಚಿತ್ತಿಯಂ ಕತ್ಥ ಪಞ್ಞತ್ತಂ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಪಞ್ಞತ್ತಂ.

ವಿಸ್ಸಜ್ಜನಾ – ಸಾವತ್ಥಿಯಂ ಭನ್ತೇ ಅಞ್ಞತರಂ ಭಿಕ್ಖುನಿಂ ಆರಬ್ಭ ಪಞ್ಞತ್ತಂ, ಅಞ್ಞತರಾ ಭನ್ತೇ ಭಿಕ್ಖುನೀ ದುಗ್ಗಹಿತೇನ ದೂಪಧಾರಿತೇನ ಪರಂ ಉಜ್ಝಾಪೇಸಿ, ತಸ್ಮಿಂ ಭನ್ತೇ ವತ್ಥುಸ್ಮಿಂ ಪಞ್ಞತ್ತಂ.

೨. ಅನ್ಧಕಾರವಗ್ಗ, ೯. ನವಮ ಸಿಕ್ಖಾಪುಚ್ಛಾ

ಪುಚ್ಛಾ – ಅತ್ತಾನಂ ¶ ವಾ ಆವುಸೋ ಪರಂ ವಾ ನಿರಯೇನ ವಾ ಬ್ರಹ್ಮಚರಿಯೇನ ವಾ ಅಭಿಸಪನ್ತಿಯಾ ಪಾಚಿತ್ತಿಯಂ ಕತ್ಥ ಪಞ್ಞತ್ತಂ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಪಞ್ಞತ್ತಂ.

ವಿಸ್ಸಜ್ಜನಾ – ಸಾವತ್ಥಿಯಂ ಭನ್ತೇ ಚಣ್ಡಕಾಳಿಂ ಭಿಕ್ಖುನಿಂ ಆರಬ್ಭ ಪಞ್ಞತ್ತಂ, ಚಣ್ಡಕಾಳೀ ಭನ್ತೇ ಭಿಕ್ಖುನೀ ಅತ್ತಾನಮ್ಪಿ ಪರಮ್ಪಿ ನಿರಯೇನಪಿ ಬ್ರಹ್ಮಚರಿಯೇನಪಿ ಅಭಿಸಪಿ, ತಸ್ಮಿಂ ಭನ್ತೇ ವತ್ಥುಸ್ಮಿಂ ಪಞ್ಞತ್ತಂ.

೨. ಅನ್ಧಕಾರವಗ್ಗ, ೧೦. ದಸಮ ಸಿಕ್ಖಾಪುಚ್ಛಾ

ಪುಚ್ಛಾ – ಅತ್ತಾನಂ ¶ ಆವುಸೋ ವಧಿತ್ವಾ ವಧಿತ್ವಾ ರೋದನ್ತಿಯಾ ಪಾಚಿತ್ತಿಯಂ ಕತ್ಥ ಪಞ್ಞತ್ತಂ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಪಞ್ಞತ್ತಂ.

ವಿಸ್ಸಜ್ಜನಾ – ಸಾವತ್ಥಿಯಂ ಭನ್ತೇ ಚಣ್ಡಕಾಳಿಂ ಭಿಕ್ಖುನಿಂ ಆರಬ್ಭ ಪಞ್ಞತ್ತಂ, ಚಣ್ಡಕಾಳೀ ಭನ್ತೇ ಭಿಕ್ಖುನೀ ಭಿಕ್ಖುನೀಹಿ ಸದ್ಧಿಂ ಭಣ್ಡಿತ್ವಾ ಅತ್ತಾನಂ ವಧಿತ್ವಾ ವಧಿತ್ವಾ ರೋದಿ, ತಸ್ಮಿಂ ಭನ್ತೇ ವತ್ಥುಸ್ಮಿಂ ಪಞ್ಞತ್ತಂ.

೩. ನಗ್ಗವಗ್ಗ, ೩. ತತಿಯ ಸಿಕ್ಖಾಪುಚ್ಛಾ

ಪುಚ್ಛಾ – ಭಿಕ್ಖುನಿಯಾ ¶ ಆವುಸೋ ಚೀವರಂ ವಿಸಿಬ್ಬೇತ್ವಾ ವಾ ವಿಸಿಬ್ಬಾಪೇತ್ವಾ ವಾ ನೇವ ಸಿಬ್ಬೇನ್ತಿಯಾ ನ ಸಿಬ್ಬಾಪನಾಯ ಉಸ್ಸುಕ್ಕಂ ಕರೋನ್ತಿಯಾ ಪಾಚಿತ್ತಿಯಂ ಕತ್ಥ ಪಞ್ಞತ್ತಂ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಪಞ್ಞತ್ತಂ.

ವಿಸ್ಸಜ್ಜನಾ – ಸಾವತ್ಥಿಯಂ ಭನ್ತೇ ಥುಲ್ಲನನ್ದಂ ಭಿಕ್ಖುನಿಂ ಆರಬ್ಭ ಪಞ್ಞತ್ತಂ, ಥುಲ್ಲನನ್ದಾ ಭನ್ತೇ ಭಿಕ್ಖುನೀ ಭಿಕ್ಖುನಿಯಾ ಚೀವರಂ ವಿಸಿಬ್ಬಾಪೇತ್ವಾ ನೇವ ಸಿಬ್ಬೇಸಿ ನ ಸಿಬ್ಬಾಪನಾಯ ಉಸ್ಸುಕ್ಕಂ ಅಕಾಸಿ, ತಸ್ಮಿಂ ಭನ್ತೇ ವತ್ಥುಸ್ಮಿಂ ಪಞ್ಞತ್ತಂ.

೩. ನಗ್ಗವಗ್ಗ, ೮. ಅಟ್ಠಮ ಸಿಕ್ಖಾಪುಚ್ಛಾ

ಪುಚ್ಛಾ – ಅಗಾರಿಕಸ್ಸ ¶ ವಾ ಆವುಸೋ ಪರಿಬ್ಬಾಜಕಸ್ಸ ವಾ ಪರಿಬ್ಬಾಜಿಕಾಯ ವಾ ಸಮಣಚೀವರಂ ದೇನ್ತಿಯಾ ಪಾಚಿತ್ತಿಯಂ ಕತ್ಥ ಪಞ್ಞತ್ತಂ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಪಞ್ಞತ್ತಂ.

ವಿಸ್ಸಜ್ಜನಾ – ಸಾವತ್ಥಿಯಂ ಭನ್ತೇ ಥುಲ್ಲನನ್ದಂ ಭಿಕ್ಖುನಿಂ ಆರಬ್ಭ ಪಞ್ಞತ್ತಂ, ಥುಲ್ಲನನ್ದಾ ಭನ್ತೇ ಭಿಕ್ಖುನೀ ಅಗಾರಿಕಸ್ಸ ಸಮಣಚೀವರಂ ಅದಾಸಿ, ತಸ್ಮಿಂ ಭನ್ತೇ ವತ್ಥುಸ್ಮಿಂ ಪಞ್ಞತ್ತಂ.

೪. ತುವಟ್ಟವಗ್ಗ, ೧-೨. ಪಠಮ, ದುತಿಯ ಸಿಕ್ಖಾಪುಚ್ಛಾ

ಪುಚ್ಛಾ – ದ್ವಿನ್ನಂ ಆವುಸೋ ಭಿಕ್ಖುನೀನಂ ಏಕಮಞ್ಚೇ ವಾ ಏಕತ್ಥರಣಪಾವುರಣೇ ವಾ ತುವಟ್ಟೇನ್ತೀನಂ ಪಾಚಿತ್ತಿಯಂ ಕತ್ಥ ಪಞ್ಞತ್ತಂ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಪಞ್ಞತ್ತಂ.

ವಿಸ್ಸಜ್ಜನಾ – ಸಾವತ್ಥಿಯಂ ಭನ್ತೇ ಸಮ್ಬಹುಲಾ ಭಿಕ್ಖುನಿಯೋ ಆರಬ್ಭ ಪಞ್ಞತ್ತಂ, ಸಮ್ಬಹುಲಾ ಭನ್ತೇ ಭಿಕ್ಖುನಿಯೋ ದ್ವೇ ಏಕಮಞ್ಚೇ ತುವಟ್ಟೇಸುಂ, ಏಕತ್ಥರಣಪಾವುರಣೇ ತುವಟ್ಟೇಸುಂ, ತಸ್ಮಿಂ ಭನ್ತೇ ವತ್ಥುಸ್ಮಿಂ ಪಞ್ಞತ್ತಂ.

೪. ತುವಟ್ಟವಗ್ಗ, ೩. ತತಿಯ ಸಿಕ್ಖಾಪುಚ್ಛಾ

ಪುಚ್ಛಾ – ಭಿಕ್ಖುನಿಯಾ ¶ ಆವುಸೋ ಸಞ್ಚಿಚ್ಚ ಅಫಾಸುಂ ಕರೋನ್ತಿಯಾ ಪಾಚಿತ್ತಿಯಂ ಕತ್ಥ ಪಞ್ಞತ್ತಂ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಪಞ್ಞತ್ತಂ.

ವಿಸ್ಸಜ್ಜನಾ – ಸಾವತ್ಥಿಯಂ ಭನ್ತೇ ಥುಲ್ಲನನ್ದಂ ಭಿಕ್ಖುನಿಂ ಆರಬ್ಭ ಪಞ್ಞತ್ತಂ, ಥುಲ್ಲನನ್ದಾ ಭನ್ತೇ ಭಿಕ್ಖುನೀ ಭಿಕ್ಖುನಿಯಾ ಸಞ್ಚಿಚ್ಚ ಅಫಾಸುಂ ಅಕಾಸಿ, ತಸ್ಮಿಂ ಭನ್ತೇ ವತ್ಥುಸ್ಮಿಂ ಪಞ್ಞತ್ತಂ.

೪. ತುವಟ್ಟವಗ್ಗ, ೪. ಚತುತ್ಥ ಸಿಕ್ಖಾಪುಚ್ಛಾ

ಪುಚ್ಛಾ – ದುಕ್ಖಿತಂ ¶ ಆವುಸೋ ಸಹಜೀವಿನಿಂ ನೇವ ಉಪಟ್ಠೇನ್ತಿಯಾ ನ ಉಪಟ್ಠಾಪನಾಯ ಉಸ್ಸುಕ್ಕಂ ಕರೋನ್ತಿಯಾ ಪಾಚಿತ್ತಿಯಂ ಕತ್ಥ ಪಞ್ಞತ್ತಂ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಪಞ್ಞತ್ತಂ.

ವಿಸ್ಸಜ್ಜನಾ – ಸಾವತ್ಥಿಯಂ ಭನ್ತೇ ಥುಲ್ಲನನ್ದಂಯೇವ ಭಿಕ್ಖುನಿಂ ಆರಬ್ಭ ಪಞ್ಞತ್ತಂ, ಥುಲ್ಲನನ್ದಾ ಭನ್ತೇ ಭಿಕ್ಖುನೀ ದುಕ್ಖಿತಂ ಸಹಜೀವಿನಿಂ ನೇವಉಪಟ್ಠೇಸಿ ನ ಉಪಟ್ಠಾಪನಾಯ ಉಸ್ಸುಕ್ಕಂ ಅಕಾಸಿ, ತಸ್ಮಿಂ ಭನ್ತೇ ವತ್ಥುಸ್ಮಿಂ ಪಞ್ಞತ್ತಂ.

೪. ತುವಟ್ಟವಗ್ಗ, ೫. ಪಞ್ಚಮ ಸಿಕ್ಖಾಪುಚ್ಛಾ

ಪುಚ್ಛಾ – ಭಿಕ್ಖುನಿಯಾ ¶ ಆವುಸೋ ಉಪಸ್ಸಯಂ ದತ್ವಾ ಕುಪಿತಾಯ ಅನತ್ತಮನಾಯ ನಿಕ್ಕಡ್ಢನ್ತಿಯಾ ಪಾಚಿತ್ತಿಯಂ ಕತ್ಥ ಪಞ್ಞತ್ತಂ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಪಞ್ಞತ್ತಂ.

ವಿಸ್ಸಜ್ಜನಾ – ಸಾವತ್ಥಿಯಂ ಭನ್ತೇ ಥುಲ್ಲನನ್ದಂಯೇವ ಭಿಕ್ಖುನಿಂ ಆರಬ್ಭ ಪಞ್ಞತ್ತಂ, ಥುಲ್ಲನನ್ದಾ ಭನ್ತೇ ಭಿಕ್ಖುನೀ ಭಿಕ್ಖುನಿಯಾ ಉಪಸ್ಸಯಂ ದತ್ವಾ ಕುಪಿತಾ ಅನತ್ತಮನಾ ನಿಕ್ಕಡ್ಢಿ, ತಸ್ಮಿಂ ಭನ್ತೇ ವತ್ಥುಸ್ಮಿಂ ಪಞ್ಞತ್ತಂ.

೪. ತುವಟ್ಟವಗ್ಗ, ೬. ಛಟ್ಠ ಸಿಕ್ಖಾಪುಚ್ಛಾ

ಪುಚ್ಛಾ – ಸಂಸಟ್ಠಾಯ ¶ ಆವುಸೋ ಭಿಕ್ಖುನಿಯಾ ಯಾವತತಿಯಂ ಸಮನುಭಾಸನಾಯ ನ ಪಟಿನಿಸ್ಸಜ್ಜನ್ತಿಯಾ ಪಾಚಿತ್ತಿಯಂ ಕತ್ಥ ಪಞ್ಞತ್ತಂ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಪಞ್ಞತ್ತಂ.

ವಿಸ್ಸಜ್ಜನಾ – ಸಾವತ್ಥಿಯಂ ಭನ್ತೇ ಚಣ್ಡಕಾಳಿಂ ಭಿಕ್ಖುನಿಂ ಆರಬ್ಭ ಪಞ್ಞತ್ತಂ, ಚಣ್ಡಕಾಳೀ ಭನ್ತೇ ಭಿಕ್ಖುನೀ ಸಂಸಟ್ಠಾ ವಿಹರಿ, ತಸ್ಮಿಂ ಭನ್ತೇ ವತ್ಥುಸ್ಮಿಂ ಪಞ್ಞತ್ತಂ.

೪. ತುವಟ್ಟವಗ್ಗ, ೭-೮. ಸತ್ತಮ ಅಟ್ಠಮ ಸಿಕ್ಖಾಪುಚ್ಛಾ

ಪುಚ್ಛಾ – ಅನ್ತೋರಟ್ಠೇ ¶ ವಾ ಆವುಸೋ ತಿರೋರಟ್ಠೇ ವಾ ಸಾಸಙ್ಕಸಮ್ಮತೇ ಸಪ್ಪಟಿಭಯೇ ಅಸತ್ಥಿಕಾಯ ಚಾರಿಕಂ ಚರನ್ತಿಯಾ ಪಾಚಿತ್ತಿಯಂ ಕತ್ಥ ಪಞ್ಞತ್ತಂ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಪಞ್ಞತ್ತಂ.

ವಿಸ್ಸಜ್ಜನಾ – ಸಾವತ್ಥಿಯಂ ಭನ್ತೇ ಸಮ್ಬಹುಲಾ ಭಿಕ್ಖುನಿಯೋ ಆರಬ್ಭ ಪಞ್ಞತ್ತಂ, ಸಮ್ಬಹುಲಾ ಭನ್ತೇ ಭಿಕ್ಖುನಿಯೋ ಅನ್ತೋರಟ್ಠೇಪಿ ತಿರೋರಟ್ಠೇಪಿ ಸಾಸಙ್ಕಸಮ್ಮತೇ ಸಪ್ಪಟಿಭಯೇ ಅಸತ್ಥಿಕಾಯೋ ಚಾರಿಕಂ ಚರಿಂಸು, ತಸ್ಮಿಂ ಭನ್ತೇ ವತ್ಥುಸ್ಮಿಂ ಪಞ್ಞತ್ತಂ.

೪. ತುವಟ್ಟವಗ್ಗ, ೯. ನವಮ ಸಿಕ್ಖಾಪುಚ್ಛಾ

ಪುಚ್ಛಾ – ಅನ್ತೋವಸ್ಸಂ ಆವುಸೋ ಚಾರಿಕಂ ಚರನ್ತಿಯಾ ಪಾಚಿತ್ತಿಯಂ ಕತ್ಥ ಪಞ್ಞತ್ತಂ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಪಞ್ಞತ್ತಂ.

ವಿಸ್ಸಜ್ಜನಾ – ರಾಜಗಹೇ ಭನ್ತೇ ಸಮ್ಬಹುಲಾ ಭಿಕ್ಖುನಿಯೋ ಆರಬ್ಭ ಪಞ್ಞತ್ತಂ, ಸಮ್ಬಹುಲಾ ಭನ್ತೇ ಭಿಕ್ಖುನಿಯೋ ಅನ್ತೋವಸ್ಸಂ ಚಾರಿಕಂ ಪಕ್ಕಮಿಂಸು, ತಸ್ಮಿಂ ಭನ್ತೇ ವತ್ಥುಸ್ಮಿಂ ಪಞ್ಞತ್ತಂ.

೪. ತುವಟ್ಟವಗ್ಗ, ೧೦. ದಸಮ ಸಿಕ್ಖಾಪುಚ್ಛಾ

ಪುಚ್ಛಾ – ವಸ್ಸಂ ¶ ವುಟ್ಠಾಯ ಆವುಸೋ ಭಿಕ್ಖುನಿಯಾ ಚಾರಿಕಂ ನ ಪಕ್ಕಮನ್ತಿಯಾ ಪಾಚಿತ್ತಿಯಂ ಕತ್ಥ ಪಞ್ಞತ್ತಂ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಪಞ್ಞತ್ತಂ.

ವಿಸ್ಸಜ್ಜನಾ – ರಾಜಗಹೇ ಭನ್ತೇ ಸಮ್ಬಹುಲಾ ಭಿಕ್ಖುನಿಯೋ ಆರಬ್ಭಂ ಪಞ್ಞತ್ತಂ, ಸಮ್ಬಹುಲಾ ಭನ್ತೇ ಭಿಕ್ಖುನಿಯೋ ವಸ್ಸಂವುಟ್ಠಾ ಚಾರಿಕಂ ನ ಪಕ್ಕಮಿಂಸು, ತಸ್ಮಿಂ ಭನ್ತೇ ವತ್ಥುಸ್ಮಿಂ ಪಞ್ಞತ್ತಂ.

ಪುಚ್ಛಾ – ಕಸ್ಸ ¶ ಆವುಸೋ ವಚನಂ.

ವಿಸ್ಸಜ್ಜನಾ – ಭಗವತೋ ಭನ್ತೇ ವಚನಂ ಅರಹತೋ ಸಮ್ಮಾಸಮ್ಬುದ್ಧಸ್ಸ.

ಪುಚ್ಛಾ – ಕೇನಾವುಸೋ ಆಭತಂ.

ವಿಸ್ಸಜ್ಜನಾ – ಪರಮ್ಪರಾಯ ಭನ್ತೇ ವಚನಂ.

ಸುಣಾತು ಮೇ ಭನ್ತೇ ಸಙ್ಘೋ…ಪೇ… ಸಂಗಾಯೇಯ್ಯಾಮ.

೫. ಚಿತ್ತಾಗಾರವಗ್ಗ, ೧. ಪಠಮ ಸಿಕ್ಖಾಪುಚ್ಛಾ

ಪುಚ್ಛಾ – ಯಂ ತೇನ ಆವುಸೋ ಭಗವತಾ…ಪೇ… ಸಮ್ಮಾಸಮ್ಬುದ್ಧೇನ ರಾಜಾಗಾರಂ ವಾ ಚಿತ್ತಾಗಾರಂ ವಾ ಆರಾಮಂ ವಾ ಉಯ್ಯಾನಂ ವಾ ಪೋಕ್ಖರಣಿಂ ವಾ ದಸ್ಸನಾಯ ಗಚ್ಛನ್ತಿಯಾ ಪಾಚಿತ್ತಿಯಂ ಕತ್ಥ ಪಞ್ಞತ್ತಂ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಪಞ್ಞತ್ತಂ.

ವಿಸ್ಸಜ್ಜನಾ – ಸಾವತ್ಥಿಯಂ ¶ ಭನ್ತೇ ಛಬ್ಬಗ್ಗಿಯಾ ಭಿಕ್ಖುನಿಯೋ ಆರಬ್ಭ ಪಞ್ಞತ್ತಂ, ಛಬ್ಬಗ್ಗಿಯಾ ಭನ್ತೇ ಭಿಕ್ಖುನಿಯೋ ರಾಜಾಗಾರಮ್ಪಿ ಚಿತ್ತಾಗಾರಮ್ಪಿ ದಸ್ಸನಾಯ ಗಚ್ಛಿಂಸು, ತಸ್ಮಿಂ ಭನ್ತೇ ವತ್ಥುಸ್ಮಿಂ ಪಞ್ಞತ್ತಂ.

೫. ಚಿತ್ತಾಗಾರವಗ್ಗ, ೪. ಚತುತ್ಥ ಸಿಕ್ಖಾಪುಚ್ಛಾ

ಪುಚ್ಛಾ – ಗಿಹಿವೇಯ್ಯಾವಚ್ಚಂ ಆವುಸೋ ಕರೋನ್ತಿಯಾ ಪಾಚಿತ್ತಿಯಂ ಕತ್ಥ ಪಞ್ಞತ್ತಂ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಪಞ್ಞತ್ತಂ.

ವಿಸ್ಸಜ್ಜನಾ – ಸಾವತ್ಥಿಯಂ ಭನ್ತೇ ಸಮ್ಬಹುಲಾ ಭಿಕ್ಖುನಿಯೋ ಆರಬ್ಭ ಪಞ್ಞತ್ತಂ, ಸಮ್ಬಹುಲಾ ಭನ್ತೇ ಭಿಕ್ಖುನಿಯೋಗಿಹಿ ವೇಯ್ಯಾವಚ್ಚಂ ಅಕಂಸು, ತಸ್ಮಿಂ ಭನ್ತೇ ವತ್ಥುಸ್ಮಿಂ ಪಞ್ಞತ್ತಂ.

೫. ಚಿತ್ತಾಗಾರವಗ್ಗ, ೬. ಛಟ್ಠ ಸಿಕ್ಖಾಪುಚ್ಛಾ

ಪುಚ್ಛಾ – ಅಗಾರಿಕಸ್ಸ ¶ ವಾ ಆವುಸೋ ಪರಿಬ್ಬಾಜಕಸ್ಸ ವಾ ಪರಿಬ್ಬಾಜಿಕಾಯ ವಾ ಸಹತ್ಥಾ ಖಾದನೀಯಂ ಭೋಜನೀಯಂ ದೇನ್ತಿಯಾ ಪಾಚಿತ್ತಿಯಂ ಕತ್ಥ ಪಞ್ಞತ್ತಂ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಪಞ್ಞತ್ತಂ.

ವಿಸ್ಸಜ್ಜನಾ – ಸಾವತ್ಥಿಯಂ ಭನ್ತೇ ಥುಲ್ಲನನ್ದಂ ಭಿಕ್ಖುನಿಂ ಆರಬ್ಭ ಪಞ್ಞತ್ತಂ, ಥುಲ್ಲನನ್ದಾ ಭನ್ತೇ ಭಿಕ್ಖುನೀ ಅಗಾರಿಕಸ್ಸ ಸಹತ್ಥಾ ಖಾದನೀಯಮ್ಪಿ ಭೋಜನೀಯಮ್ಪಿ ಅದಾಸಿ, ತಸ್ಮಿಂ ಭನ್ತೇ ವತ್ಥುಸ್ಮಿಂ ಪಞ್ಞತ್ತಂ.

೫. ಚಿತ್ತಾಗಾರವಗ್ಗ, ೯-೧೦. ನವಮ, ದಸಮ ಸಿಕ್ಖಾಪುಚ್ಛಾ

ಪುಚ್ಛಾ – ತಿರಚ್ಛಾನವಿಜ್ಜಂ ಆವುಸೋ ಪರಿಯಾಪುಣನ್ತಿಯಾ ಚ ವಾಚೇನ್ತಿಯಾ ಚ ಪಾಚಿತ್ತಿಯಂ ಕತ್ಥ ಪಞ್ಞತ್ತಂ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಪಞ್ಞತ್ತಂ.

ವಿಸ್ಸಜ್ಜನಾ – ಸಾವತ್ಥಿಯಂ ಭನ್ತೇ ಛಬ್ಬಗ್ಗಿಯಾ ಭಿಕ್ಖುನಿಯೋ ಆರಬ್ಭ ಪಞ್ಞತ್ತಂ, ಛಬ್ಬಗ್ಗಿಯಾ ಭನ್ತೇ ಭಿಕ್ಖುನಿಯೋ ತಿರಚ್ಛಾನವಿಜ್ಜಂ ಪರಿಯಾಪುಣಿಂಸುಚೇವ ವಾಚೇಸುಞ್ಚ, ತಸ್ಮಿಂ ಭನ್ತೇ ವತ್ಥುಸ್ಮಿಂ ಪಞ್ಞತ್ತಂ.

ಪುಚ್ಛಾ – ಭಿಕ್ಖು ¶ ಪನ ಆವುಸೋ ತಾದಿಸಂ ತಿರಚ್ಛಾನವಿಜ್ಜಂ ಪರಿಯಾಪುಣನ್ತೋ ಚ ವಾಚೇನ್ತೋ ಚ ಕಿಂ ನಾಮ ಆಪತ್ತಿಂ ಆಪಜ್ಜತಿ.

ವಿಸ್ಸಜ್ಜನಾ – ದುಕ್ಕಟಂ ಭನ್ತೇ ಆಪತ್ತಿಂ ಆಪಜ್ಜತಿ.

೬. ಆರಾಮವಗ್ಗ, ೧. ಪಠಮ ಸಿಕ್ಖಾಪುಚ್ಛಾ

ಪುಚ್ಛಾ – ಜಾನಂ ಆವುಸೋ ಸಭಿಕ್ಖುಕಂ ಆರಾಮಂ ಅನಾಪುಚ್ಛಾ ಪವಿಸನ್ತಿಯಾ ಪಾಚಿತ್ತಿಯಂ ಕತ್ಥ ಪಞ್ಞತ್ತಂ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಪಞ್ಞತ್ತಂ.

ವಿಸ್ಸಜ್ಜನಾ – ಸಾವತ್ಥಿಯಂ ಭನ್ತೇ ಸಮ್ಬಹುಲಾ ಭಿಕ್ಖುನಿಯೋ ಆರಬ್ಭ ಪಞ್ಞತ್ತಂ, ಸಮ್ಬಹುಲಾ ಭನ್ತೇ ಭಿಕ್ಖುನಿಯೋ ಆರಾಮಂ ಅನಾಪುಚ್ಛಾ ಪವಿಸಿಂಸು, ತಸ್ಮಿಂ ಭನ್ತೇ ವತ್ಥುಸ್ಮಿಂ ಪಞ್ಞತ್ತಂ.

೬. ಆರಾಮವಗ್ಗ, ೨. ದುತಿಯ ಸಿಕ್ಖಾಪುಚ್ಛಾ

ಪುಚ್ಛಾ – ಭಿಕ್ಖುಂ ¶ ಆವುಸೋ ಅಕ್ಕೋಸನ್ತಿಯಾ ಪಾಚಿತ್ತಿಯಂ ಕತ್ಥ ಪಞ್ಞತ್ತಂ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಪಞ್ಞತ್ತಂ.

ವಿಸ್ಸಜ್ಜನಾ – ವೇಸಾಲಿಯಂ ಭನ್ತೇ ಛಬ್ಬಗ್ಗಿಯಾ ಭಿಕ್ಖುನಿಯೋ ಆರಬ್ಭ ಪಞ್ಞತ್ತಂ, ಛಬ್ಬಗ್ಗಿಯಾ ಭನ್ತೇ ಭಿಕ್ಖುನಿಯೋ ಆಯಸ್ಮನ್ತಂ ಉಪಾಲಿಂ ಅಕ್ಕೋಸಿಂಸು, ತಸ್ಮಿಂ ಭನ್ತೇ ವತ್ಥುಸ್ಮಿಂ ಪಞ್ಞತ್ತಂ.

೬. ಆರಾಮವಗ್ಗ, ೩. ತತಿಯ ಸಿಕ್ಖಾಪುಚ್ಛಾ

ಪುಚ್ಛಾ – ಚಣ್ಡಿಕತಾಯ ¶ ಆವುಸೋ ಗಣಂ ಪರಿಭಾಸನ್ತಿಯಾ ಪಾಚಿತ್ತಿಯಂ ಕತ್ಥ ಪಞ್ಞತ್ತಂ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಪಞ್ಞತ್ತಂ.

ವಿಸ್ಸಜ್ಜನಾ – ಸಾವತ್ಥಿಯಂ ಭನ್ತೇ ಥುಲ್ಲನನ್ದಂ ಭಿಕ್ಖುನಿಂ ಆರಬ್ಭ ಪಞ್ಞತ್ತಂ, ಥುಲ್ಲನನ್ದಾ ಭನ್ತೇ ಭಿಕ್ಖುನೀ ಚಣ್ಡಿಕತಾಯ ಗಣಂ ಪರಿಭಾಸಿ, ತಸ್ಮಿಂ ಭನ್ತೇ ವತ್ಥುಸ್ಮಿಂ ಪಞ್ಞತ್ತಂ.

೬. ಆರಾಮವಗ್ಗ, ೫. ಪಞ್ಚಮ ಸಿಕ್ಖಾಪುಚ್ಛಾ

ಪುಚ್ಛಾ – ಕುಲಂ ¶ ಆವುಸೋ ಮಚ್ಛರಾಯನ್ತಿಯಾ ಪಾಚಿತ್ತಿಯಂ ಕತ್ಥ ಪಞ್ಞತ್ತಂ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಪಞ್ಞತ್ತಂ.

ವಿಸ್ಸಜ್ಜನಾ – ಸಾವತ್ಥಿಯಂ ಭನ್ತೇ ಅಞ್ಞತರಂ ಭಿಕ್ಖುನಿಂ ಆರಬ್ಭ ಪಞ್ಞತ್ತಂ, ಅಞ್ಞತರಾ ಭನ್ತೇ ಭಿಕ್ಖುನೀ ಕುಲಂ ಮಚ್ಛರಾಯಿ, ತಸ್ಮಿಂ ಭನ್ತೇ ವತ್ಥುಸ್ಮಿಂ ಪಞ್ಞತ್ತಂ.

೬. ಆರಾಮವಗ್ಗ, ೬. ಛಟ್ಠ ಸಿಕ್ಖಾಪುಚ್ಛಾ

ಪುಚ್ಛಾ – ಅಭಿಕ್ಖುಕೇ ¶ ಆವುಸೋ ಆವಾಸೇ ವಸ್ಸಂ ವಸನ್ತಿಯಾ ಪಾಚಿತ್ತಿಯಂ ಕತ್ಥ ಪಞ್ಞತ್ತಂ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಪಞ್ಞತ್ತಂ.

ವಿಸ್ಸಜ್ಜನಾ – ಸಾವತ್ಥಿಯಂ ಭನ್ತೇ ಸಮ್ಬಹುಲಾ ಭಿಕ್ಖುನಿಯೋ ಆರಬ್ಭ ಪಞ್ಞತ್ತಂ, ಸಮ್ಬಹುಲಾ ಭನ್ತೇ ಭಿಕ್ಖುನಿಯೋ ಅಭಿಕ್ಖುಕೇ ಆವಾಸೇ ವಸ್ಸಂ ವಸಿಂಸು, ತಸ್ಮಿಂ ಭನ್ತೇ ವತ್ಥುಸ್ಮಿಂ ಪಞ್ಞತ್ತಂ.

೬. ಆರಾಮವಗ್ಗ, ೭. ಸತ್ತಮ ಸಿಕ್ಖಾಪುಚ್ಛಾ

ಪುಚ್ಛಾ – ವಸ್ಸಂ ¶ ವುಟ್ಠಾಯ ಆವುಸೋ ಭಿಕ್ಖುನಿಯಾ ಉಭತೋಸಙ್ಘೇ ತೀಹಿ ಠಾನೇಹಿ ನ ಪವಾರೇನ್ತಿಯಾ ಪಾಚಿತ್ತಿಯಂ ಕತ್ಥ ಪಞ್ಞತ್ತಂ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಪಞ್ಞತ್ತಂ.

ವಿಸ್ಸಜ್ಜನಾ – ಸಾವತ್ಥಿಯಂ ಭನ್ತೇ ಸಮ್ಬಹುಲಾ ಭಿಕ್ಖುನಿಯೋ ಆರಬ್ಭ ಪಞ್ಞತ್ತಂ, ಸಮ್ಬಹುಲಾ ಭನ್ತೇ ಭಿಕ್ಖುನಿಯೋ ವಸ್ಸಂ ವುಟ್ಠಾ ಭಿಕ್ಖುಸಙ್ಘಂ ನ ಪವಾರೇಸುಂ, ತಸ್ಮಿಂ ಭನ್ತೇ ವತ್ಥುಸ್ಮಿಂ ಪಞ್ಞತ್ತಂ.

೬. ಆರಾಮವಗ್ಗ, ೮. ಅಟ್ಠಮ ಸಿಕ್ಖಾಪುಚ್ಛಾ

ಪುಚ್ಛಾ – ಓವಾದಾಯ ವಾ ಆವುಸೋ ಸಂವಾಸಾಯ ವಾ ನಗಚ್ಛನ್ತಿಯಾ ಪಾಚಿತ್ತಿಯಂ ಕತ್ಥ ಪಞ್ಞತ್ತಂ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಪಞ್ಞತ್ತಂ.

ವಿಸ್ಸಜ್ಜನಾ – ಸಕ್ಕೇಸು ಭನ್ತೇ ಛಬ್ಬಗ್ಗಿಯಾ ಭಿಕ್ಖುನಿಯೋ ಆರಬ್ಭ ಪಞ್ಞತ್ತಂ, ಛಬ್ಬಗ್ಗಿಯಾ ಭನ್ತೇ ಭಿಕ್ಖುನಿಯೋ ಓವಾದಂ ನಗಚ್ಛಿಂಸು, ತಸ್ಮಿಂ ಭನ್ತೇ ವತ್ಥುಸ್ಮಿಂ ಪಞ್ಞತ್ತಂ.

೬. ಆರಾಮವಗ್ಗ, ೯. ನವಮ ಸಿಕ್ಖಾಪುಚ್ಛಾ

ಪುಚ್ಛಾ – ಉಪೋಸಥಮ್ಪಿ ¶ ಆವುಸೋ ನ ಪುಚ್ಛನ್ತಿಯಾ ಓವಾದಮ್ಪಿ ನ ಯಾಚನ್ತಿಯಾ ಪಾಚಿತ್ತಿಯಂ ಕತ್ಥ ಪಞ್ಞತ್ತಂ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಪಞ್ಞತ್ತಂ.

ವಿಸ್ಸಜ್ಜನಾ – ಸಾವತ್ಥಿಯಂ ಭನ್ತೇ ಸಮ್ಬಹುಲಾ ಭಿಕ್ಖುನಿಯೋ ಆರಬ್ಭ ಪಞ್ಞತ್ತಂ, ಸಮ್ಬಹುಲಾ ಭನ್ತೇ ಭಿಕ್ಖುನಿಯೋ ಉಪೋಸಥಂ ನ ಪುಚ್ಛಿಂಸು, ಓವಾದಮ್ಪಿ ನ ಯಾಚಿಂಸು, ತಸ್ಮಿಂ ಭನ್ತೇ ವತ್ಥುಸ್ಮಿಂ ಪಞ್ಞತ್ತಂ.

೭. ಗಬ್ಭಿನೀವಗ್ಗ, ೧-೨. ಪಠಮ, ದುತಿಯ ಸಿಕ್ಖಾಪುಚ್ಛಾ

ಪುಚ್ಛಾ – ಗಬ್ಭಿನಿಂ ವಾ ಆವುಸೋ ಪಾಯನ್ತಿಂ ವಾ ವುಟ್ಠಾಪೇನ್ತಿಯಾ ಪಾಚಿತ್ತಿಯಂ ಕತ್ಥ ಪಞ್ಞತ್ತಂ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಪಞ್ಞತ್ತಂ.

ವಿಸ್ಸಜ್ಜನಾ – ಸಾವತ್ಥಿಯಂ ¶ ಭನ್ತೇ ಸಮ್ಬಹುಲಾ ಭಿಕ್ಖುನಿಯೋ ಆರಬ್ಭ ಪಞ್ಞತ್ತಂ, ಸಮ್ಬಹುಲಾ ಭನ್ತೇ ಭಿಕ್ಖುನಿಯೋ ಗಬ್ಭಿನಿಂ ವುಟ್ಠಾಪೇಸುಂ, ಪಾಯನ್ತಿಂ ವುಟ್ಠಾಪೇಸುಂ, ತಸ್ಮಿಂ ಭನ್ತೇ ವತ್ಥುಸ್ಮಿಂ ಪಞ್ಞತ್ತಂ.

೭. ಗಬ್ಭಿನೀವಗ್ಗ, ೩. ತತಿಯ ಸಿಕ್ಖಾಪುಚ್ಛಾ

ಪುಚ್ಛಾ – ದ್ವೇ ವಸ್ಸಾನಿ ಆವುಸೋ ಛಸು ಧಮ್ಮೇಸು ಅಸಿಕ್ಖಿತಸಿಕ್ಖಂ ಸಿಕ್ಖಮಾನಂ ವುಟ್ಠಾಪೇನ್ತಿಯಾ ಪಾಚಿತ್ತಿಯಂ ಕತ್ಥ ಪಞ್ಞತ್ತಂ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಪಞ್ಞತ್ತಂ.

ವಿಸ್ಸಜ್ಜನಾ – ಸಾವತ್ಥಿಯಂ ಭನ್ತೇ ಸಮ್ಬಹುಲಾ ಭಿಕ್ಖುನಿಯೋ ಆರಬ್ಭ ಪಞ್ಞತ್ತಂ, ಸಮ್ಬಹುಲಾ ಭನ್ತೇ ಭಿಕ್ಖುನಿಯೋ ದ್ವೇ ವಸ್ಸಾನಿ ಛಸು ಧಮ್ಮೇಸು ಅಸಿಕ್ಖಿತಸಿಕ್ಖಂ ಸಿಕ್ಖಮಾನಂ ವುಟ್ಠಾಪೇಸುಂ, ತಸ್ಮಿಂ ಭನ್ತೇ ವತ್ಥುಸ್ಮಿಂ ಪಞ್ಞತ್ತಂ.

೮. ಕುಮಾರೀಭೂತವಗ್ಗ, ೯. ನವಮ ಸಿಕ್ಖಾಪುಚ್ಛಾ

ಪುಚ್ಛಾ – ಪುರಿಸಸಂಸಟ್ಠಂ ¶ ಆವುಸೋ ಕುಮಾರಕಸಂಸಟ್ಠಂ ಚಣ್ಡಿಂ ಸೋಕಾವಾಸಂ ಸಿಕ್ಖಮಾನಂ ವುಟ್ಠಾಪೇನ್ತಿಯಾ ಪಾಚಿತ್ತಿಯಂ ಕತ್ಥ ಪಞ್ಞತ್ತಂ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಪಞ್ಞತ್ತಂ.

ವಿಸ್ಸಜ್ಜನಾ – ಸಾವತ್ಥಿಯಂ ಭನ್ತೇ ಥುಲ್ಲನನ್ದಂ ಭಿಕ್ಖುನಿಂ ಆರಬ್ಭ ಪಞ್ಞತ್ತಂ, ಥುಲ್ಲನನ್ದಾ ಭನ್ತೇ ಭಿಕ್ಖುನೀ ಪುರಿಸಸಂಸಟ್ಠಂ ಕುಮಾರಕಸಂಸಟ್ಠಂ ಚಣ್ಡಿಂ ಸೋಕಾವಾಸಂ ಚಣ್ಡಕಾಳಿಂ ಸೇಕ್ಖಮಾನಂ ವುಟ್ಠಾಪೇಸಿ, ತಸ್ಮಿಂ ಭನ್ತೇ ವತ್ಥುಸ್ಮಿಂ ಪಞ್ಞತ್ತಂ.

೮. ಕುಮಾರೀಭೂತವಗ್ಗ, ೧೦. ದಸಮ ಸಿಕ್ಖಾಪುಚ್ಛಾ

ಪುಚ್ಛಾ – ಮಾತಾಪಿತೂಹಿ ¶ ವಾ ಆವುಸೋ ಸಾಮಿಕೇನ ವಾ ಅನನುಞ್ಞಾತಂ ಸಿಕ್ಖಮಾನಂ ವುಟ್ಠಾಪೇನ್ತಿಯಾ ಪಾಚಿತ್ತಿಯಂ ಕತ್ಥ ಪಞ್ಞತ್ತಂ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಪಞ್ಞತ್ತಂ.

ವಿಸ್ಸಜ್ಜನಾ – ಸಾವತ್ಥಿಯಂ ಭನ್ತೇ ಥುಲ್ಲನನ್ದಂ ಭಿಕ್ಖುನಿಂ ಆರಬ್ಭ ಪಞ್ಞತ್ತಂ, ಥುಲ್ಲನನ್ದಾ ಭನ್ತೇ ಭಿಕ್ಖುನೀ ಮಾತಾಪಿತೂಹಿಪಿ ಸಾಮಿಕೇನಪಿ ಅನನುಞ್ಞಾತಂ ಸಿಕ್ಖಮಾನಂ ವುಟ್ಠಾಪೇಸಿ, ತಸ್ಮಿಂ ಭನ್ತೇ ವತ್ಥುಸ್ಮಿಂ ಪಞ್ಞತ್ತಂ.

೯. ಛತ್ತುಪಾಹನವಗ್ಗ, ೧-೨. ಪಠಮ, ದುತಿಯ ಸಿಕ್ಖಾಪುಚ್ಛಾ

ಪುಚ್ಛಾ – ಛತ್ತುಪಾಹನಂ ಆವುಸೋ ಧಾರೇನ್ತಿಯಾ ಚ ಯಾನೇನ ಯಾಯನ್ತಿಯಾ ಚ ಪಾಚಿತ್ತಿಯಂ ಕತ್ಥ ಪಞ್ಞತ್ತಂ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಪಞ್ಞತ್ತಂ.

ವಿಸ್ಸಜ್ಜನಾ – ಸಾವತ್ಥಿಯಂ ಭನ್ತೇ ಛಬ್ಬಗ್ಗಿಯಾ ಭಿಕ್ಖುನಿಯೋ ಆರಬ್ಭ ಪಞ್ಞತ್ತಂ, ಛಬ್ಬಗ್ಗಿಯಾ ಭನ್ತೇ ಭಿಕ್ಖುನಿಯೋ ಛತ್ತುಪಾಹನಂ ಧಾರೇಸುಂ, ಯಾನೇನ ಯಾಯಿಂಸು, ತಸ್ಮಿಂ ಭನ್ತೇ ವತ್ಥುಸ್ಮಿಂ ಪಞ್ಞತ್ತಂ.

೯. ಛತ್ತುಪಾಹನವಗ್ಗ, ೪. ಚತುತ್ಥ ಸಿಕ್ಖಾಪುಚ್ಛಾ

ಪುಚ್ಛಾ – ಇತ್ಥಾಲಙ್ಕಾರಂ ¶ ಆವುಸೋ ಧಾರೇನ್ತಿಯಾ ಪಾಚಿತ್ತಿಯಂ ಕತ್ಥ ಪಞ್ಞತ್ತಂ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಪಞ್ಞತ್ತಂ.

ವಿಸ್ಸಜ್ಜನಾ – ಸಾವತ್ಥಿಯಂ ಭನ್ತೇ ಛಬ್ಬಗ್ಗಿಯಾ ಭಿಕ್ಖುನಿಯೋ ಆರಬ್ಭ ಪಞ್ಞತ್ತಂ, ಛಬ್ಬಗ್ಗಿಯಾ ಭನ್ತೇ ಭಿಕ್ಖುನಿಯೋ ಇತ್ಥಾಲಙ್ಕಾರಂ ಧಾರೇಸುಂ, ತಸ್ಮಿಂ ಭನ್ತೇ ವತ್ಥುಸ್ಮಿಂ ಪಞ್ಞತ್ತಂ.

ಪುಚ್ಛಾ – ಭಿಕ್ಖು ಪನ ಆವುಸೋ ಪುರಿಸಾಲಙ್ಕಾರಂ ಧಾರೇನ್ತೋ ಕಿಂ ನಾಮ ಆಪತ್ತಿಂ ಆಪಜ್ಜೇಯ್ಯ.

ವಿಸ್ಸಜ್ಜನಾ – ದುಕ್ಕಟಂ ಭನ್ತೇ ಆಪತ್ತಿಂ ಆಪಜ್ಜೇಯ್ಯ.

೯. ಛತ್ತುಪಾಹನವಗ್ಗ, ೫. ಪಞ್ಚಮ ಸಿಕ್ಖಾಪುಚ್ಛಾ

ಪುಚ್ಛಾ – ಗನ್ಧವಣ್ಣಕೇನ ¶ ಆವುಸೋ ನಹಾಯನ್ತಿಯಾ ಪಾಚಿತ್ತಿಯಂ ಕತ್ಥ ಪಞ್ಞತ್ತಂ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಪಞ್ಞತ್ತಂ.

ವಿಸ್ಸಜ್ಜನಾ – ಸಾವತ್ಥಿಯಂ ಭನ್ತೇ ಛಬ್ಬಗ್ಗಿಯಾ ಭಿಕ್ಖುನಿಯೋ ಆರಬ್ಭ ಪಞ್ಞತ್ತಂ, ಛಬ್ಬಗ್ಗಿಯಾ ಭನ್ತೇ ಭಿಕ್ಖುನಿಯೋ ಗನ್ಧವಣ್ಣಕೇನ ನಹಾಯಿಂಸು, ತಸ್ಮಿಂ ಭನ್ತೇ ವತ್ಥುಸ್ಮಿಂ ಪಞ್ಞತ್ತಂ.

೯. ಛತ್ತುಪಾಹನವಗ್ಗ, ೧೧. ಏಕಾದಸಮ ಸಿಕ್ಖಾಪುಚ್ಛಾ

ಪುಚ್ಛಾ – ಭಿಕ್ಖುಸ್ಸ ಆವುಸೋ ಪುರತೋ ಅನಾಪುಚ್ಛಾ ಆಸನೇ ನಿಸೀದನ್ತಿಯಾ ಪಾಚಿತ್ತಿಯಂ ಕತ್ಥ ಪಞ್ಞತ್ತಂ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಪಞ್ಞತ್ತಂ.

ವಿಸ್ಸಜ್ಜನಾ – ಸಾವತ್ಥಿಯಂ ಭನ್ತೇ ಸಮ್ಬಹುಲಾ ಭಿಕ್ಖುನಿಯೋ ಆರಬ್ಭ ಪಞ್ಞತ್ತಂ, ಸಮ್ಬಹುಲಾ ಭನ್ತೇ ಭಿಕ್ಖುನಿಯೋ ಭಿಕ್ಖುಸ್ಸ ಪುರತೋ ಅನಾಪುಚ್ಛಾ ಆಸನೇ ನಿಸೀದಿಂಸು, ತಸ್ಮಿಂ ಭನ್ತೇ ವತ್ಥುಸ್ಮಿಂ ಪಞ್ಞತ್ತಂ.

೯. ಛತ್ತುಪಾಹನವಗ್ಗ, ೧೨. ದ್ವಾದಸಮ ಸಿಕ್ಖಾಪುಚ್ಛಾ

ಪುಚ್ಛಾ – ಅನೋಕಾಸಕತಂ ¶ ಆವುಸೋ ಭಿಕ್ಖುಂ ಪಞ್ಹಂ ಪುಚ್ಛನ್ತಿಯಾ ಪಾಚಿತ್ತಿಯಂ ಕತ್ಥ ಪಞ್ಞತ್ತಂ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಪಞ್ಞತ್ತಂ.

ವಿಸ್ಸಜ್ಜನಾ – ಸಾವತ್ಥಿಯಂ ಭನ್ತೇ ಸಮ್ಬಹುಲಾ ಭಿಕ್ಖುನಿಯೋ ಆರಬ್ಭ ಪಞ್ಞತ್ತಂ, ಸಮ್ಬಹುಲಾ ಭನ್ತೇ ಭಿಕ್ಖುನಿಯೋ ಅನೋಕಾಸಕತಂ ಭಿಕ್ಖುಂ ಪಞ್ಹಂ ಪುಚ್ಛಿಂಸು, ತಸ್ಮಿಂ ಭನ್ತೇ ವತ್ಥುಸ್ಮಿಂ ಪಞ್ಞತ್ತಂ.

ಪುಚ್ಛಾ – ಸಪ್ಪಿಂ ವಾ ಆವುಸೋ ತೇಲಂ ವಾ ಮಧುಂ ವಾ ಫಾಣಿತಂ ವಾ ಮಚ್ಛಂ ವಾ ಮಂಸಂ ವಾ ಖೀರಂ ವಾ ದಧಿಂ ವಾ ವಿಞ್ಞಾಪೇತ್ವಾ ಭುಞ್ಜನ್ತಿಯಾ ಪಾಟಿದೇಸನೀಯಂ ಕತ್ಥ ಪಞ್ಞತ್ತಂ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಪಞ್ಞತ್ತಂ.

ವಿಸ್ಸಜ್ಜನಾ – ಸಾವತ್ಥಿಯಂ ಭನ್ತೇ ಛಬ್ಬಗ್ಗಿಯಾ ಭಿಕ್ಖುನಿಯೋ ಆರಬ್ಭ ಪಞ್ಞತ್ತಂ, ಛಬ್ಬಗ್ಗಿಯಾ ಭನ್ತೇ ಭಿಕ್ಖುನಿಯೋ ಸಪ್ಪಿಮ್ಪಿ ತೇಲಮ್ಪಿ ಮಧುಮ್ಪಿ ಫಾಣಿತಮ್ಪಿ ಮಚ್ಛಮ್ಪಿ ಮಂಸಮ್ಪಿ ಖೀರಮ್ಪಿ ದಧಿಮ್ಪಿ ವಿಞ್ಞಾಪೇತ್ವಾ ಭುಞ್ಜಿಂಸು, ತಸ್ಮಿಂ ಭನ್ತೇ ವತ್ಥುಸ್ಮಿಂ ಪಞ್ಞತ್ತಂ.

ಪುಚ್ಛಾ – ಚತುನ್ನಂ ¶ ಆವುಸೋ ವಿಪತ್ತೀನಂ ಕತಮಾ ವಿಪತ್ತಿ.

ವಿಸ್ಸಜ್ಜನಾ – ಆಚಾರವಿಪತ್ತಿ ಭನ್ತೇ.

ಪುಚ್ಛಾ – ಛನ್ನಂ ಆವುಸೋ ಆಪತ್ತಿಸಮುಟ್ಠಾನಾನಂ ಕತಿಹಿ ಸಮುಟ್ಠಾನೇಹಿ ಸಮುಟ್ಠಾತಿ.

ವಿಸ್ಸಜ್ಜನಾ – ಚತೂಹಿ ಭನ್ತೇ ಸಮುಟ್ಠಾನೇಹಿ ಸಮುಟ್ಠಾತಿ, ಸಿಯಾ ಕಾಯತೋ ಸಮುಟ್ಠಾತಿ, ನವಾಚತೋ ನಚಿತ್ತತೋ, ಸಿಯಾ ಕಾಯತೋ ಚ ವಾಚತೋ ಚ ಸಮುಟ್ಠಾತಿ, ನಚಿತ್ತತೋ, ಸಿಯಾ ಕಾಯತೋ ಚ ಚಿತ್ತತೋ ಚ ಸಮುಟ್ಠಾತಿ, ನವಾಚತೋ, ಸಿಯಾ ಕಾಯತೋ ಚ ವಾಚತೋ ಚ ಚಿತ್ತತೋ ಚ ಸಮುಟ್ಠಾತಿ, ಇಮೇಹಿ ಭನ್ತೇ ಚತೂಹಿ ಸಮುಟ್ಠಾನೇಹಿ ಸಮುಟ್ಠಾತಿ.

ಪುಚ್ಛಾ – ಕಾ ¶ ಆವುಸೋ ವಿಪತ್ತಿ.

ವಿಸ್ಸಜ್ಜನಾ – ಅಸಂವರೋ ಭನ್ತೇ ವಿಪತ್ತಿ.

ಪುಚ್ಛಾ – ಕಾ ಆವುಸೋ ಸಮ್ಪತ್ತಿ.

ವಿಸ್ಸಜ್ಜನಾ – ಸಂವರೋ ಭನ್ತೇ ಸಮ್ಪತ್ತಿ.

ಪುಚ್ಛಾ – ಕಾ ¶ ಆವುಸೋ ಪಟಿಪತ್ತಿ.

ವಿಸ್ಸಜ್ಜನಾ – ನ ಏವರೂಪಂ ಕರಿಸ್ಸಾಮೀತಿ ಯಾವಜೀವಂ ಆಪಾಣಕೋಟಿಕಂ ಸಮಾದಾಯ ಸಿಕ್ಖತಿ ಸಿಕ್ಖಾಪದೇಸು, ಅಯಂ ಭನ್ತೇ ಪಟಿಪತ್ತಿ.

ಪುಚ್ಛಾ – ಕಸ್ಸ ಆವುಸೋ ವಚನಂ.

ವಿಸ್ಸಜ್ಜನಾ – ಭಗವತೋ ಭನ್ತೇ ವಚನಂ ಅರಹತೋ ಸಮ್ಮಾಸಮ್ಬುದ್ಧಸ್ಸ.

ಪುಚ್ಛಾ – ಕೇನಾವುಸೋ ಆಭತಂ.

ವಿಸ್ಸಜ್ಜನಾ – ಪರಮ್ಪರಾಯ ಭನ್ತೇ ಆಭತಂ.

ಸುಣಾತು ಮೇ ಭನ್ತೇ ಸಙ್ಘೋ…ಪೇ… ಸಂಗಾಯೇಯ್ಯಾಮ.

ಮಹಾವಗ್ಗಪಾಳಿ

ಸಂಗಾಯನಸ್ಸ ಪುಚ್ಛಾ ವಿಸ್ಸಜ್ಜನಾ

ಪುಚ್ಛಾ – ಉಭತೋ ¶ ವಿಭಙ್ಗಾನನ್ತರಂ ಆವುಸೋ ಪೋರಾಣಕೇಹಿ ಸಂಗೀತಿಕಾರಮಹಾಥೇರೇಹಿ ಕಂ ನಾಮ ಪಾವಚನಂ ಸಂಗೀತಂ.

ವಿಸ್ಸಜ್ಜನಾ – ಉಭತೋ ವಿಭಙ್ಗಾನನ್ತರಂ ಭನ್ತೇ ಪೋರಾಣಕೇಹಿ ಸಂಗೀತಿಕಾರಮಹಾಥೇರೇಹಿ ಖನ್ಧಕಾ ಸಂಗೀತಾ.

ಪುಚ್ಛಾ – ತೇ ಪನ ಆವುಸೋ ಖನ್ಧಕಾ ವಗ್ಗಭೇದೇನ ಕತಿವಿಧಾ.

ವಿಸ್ಸಜ್ಜನಾ – ತೇ ¶ ಪನ ಭನ್ತೇ ಖನ್ಧಕಾ ದುವಿಧಾ ವಗ್ಗಭೇದೇನ ಮಹಾವಗ್ಗೋ ಚೂಳವಗ್ಗೋತಿ.

ಪುಚ್ಛಾ – ಮಹಾವಗ್ಗೇ ಆವುಸೋ ಕತಿ ಖನ್ಧಕಾ ಪರಿಯಾಪನ್ನಾ.

ವಿಸ್ಸಜ್ಜನಾ – ಮಹಾವಗ್ಗೇ ಭನ್ತೇ ದಸಖನ್ಧಕಾ ಪರಿಯಾಪನ್ನಾ, ಸೇಯ್ಯಥಿದಂ, ಮಹಾಖನ್ಧಕೋ ಉಪೋಸಥಕ್ಖನ್ಧಕೋ ವಸ್ಸೂಪನಾಯಿಕಕ್ಖನ್ಧಕೋ ಪವಾರಣಾಕ್ಖನ್ಧಕೋ ಚಮ್ಮಕ್ಖನ್ಧಕೋ ಭೇಸಜ್ಜಕ್ಖನ್ಧಕೋ ಕಥಿನಕ್ಖನ್ಧಕೋ ಚೀವರಕ್ಖನ್ಧಕೋ ಚಮ್ಪೇಯ್ಯಕ್ಖನ್ಧಕೋ ಕೋಸಮ್ಬಕಕ್ಖನ್ಧಕೋತಿ.

ಪುಚ್ಛಾ – ಮಹಾಖನ್ಧಕೇ ಆವುಸೋ ಬಹೂ ಕಥಾಯೋ, ಕತಮಾ ತಾಸಂ ಆದಿಕಥಾ.

ವಿಸ್ಸಜ್ಜನಾ – ಮಹಾಖನ್ಧಕೇ ಭನ್ತೇ ಬೋಧಿಕಥಾ ಆದಿ.

ಮಹಾಖನ್ಧಕ

ಮಹಾಬೋಧಿಪುಚ್ಛಾ

ಪುಚ್ಛಾ – ತಸ್ಮಾತಿಹ ¶ ಆವುಸೋ ತತೋ ಪಟ್ಠಾಯ ತಂ ಪುಚ್ಛಿಸ್ಸಾಮಿ, ಭಗವಾ ಆವುಸೋ ಪಠಮಾಭಿಸಮ್ಬುದ್ಧಕಾಲೇ ಕತ್ಥ ಕೀವಚೀರಂ ಕೇನಾಕಾರೇನ ವಿಹಾಸಿ.

ವಿಸ್ಸಜ್ಜನಾ – ಭಗವಾ ಭನ್ತೇ ಪಠಮಾಭಿಸಮ್ಬುದ್ಧೋ ಬೋಧಿರುಕ್ಖಮೂಲೇ ಸತ್ತಾಹಂ ಏಕಪಲ್ಲಙ್ಕೇನ ವಿಹಾಸಿ ವಿಮುತ್ತಿಸುಖಂ ಪಟಿಸಂವೇದೀ.

ಪುಚ್ಛಾ – ತದಾ ಆವುಸೋ ಭಗವಾ ಕೀದಿಸಂ ಧಮ್ಮಂ ಮನಸಿಕತ್ವಾ ಕೀದಿಸಂ ಉದಾನಂ ಉದಾನೇಸಿ.

ವಿಸ್ಸಜ್ಜನಾ – ತದಾ ಭನ್ತೇ ಭಗವಾ ರತ್ತಿಯಾ ಪಠಮಂ ಯಾಮಂ ರತ್ತಿಯಾ ಮಜ್ಝಿಮಂ ಯಾಮಂ ರತ್ತಿಯಾ ಪಚ್ಛಿಮಂ ಯಾಮಂ ಪಟಿಚ್ಚಸಮುಪ್ಪಾದಂ ಅನುಲೋಮಂ ಪಟಿಲೋಮಂ ಮನಸಿಕತ್ವಾ ತೀಣಿ ಉದಾನಾನಿ ಉದಾನೇಸಿ.

ಅಜಪಾಲ

ಪುಚ್ಛಾ – ತಸ್ಸ ¶ ಆವುಸೋ ಸತ್ತಾಹಸ್ಸ ಅಚ್ಚಯೇನ ಭಗವಾ ಕತ್ಥ ವಿಹಾಸಿ.

ವಿಸ್ಸಜ್ಜನಾ – ತಸ್ಸ ಭನ್ತೇ ಸತ್ತಾಹಸ್ಸ ಅಚ್ಚಯೇನ ಭಗವಾ ಅಜಪಾಲ ನಿಗ್ರೋಧಮೂಲೇ ವಿಹಾಸಿ, ಸತ್ತಾಹಂ ಏಕಪಲ್ಲಙ್ಕೇನ ವಿಹಾಸಿ ವಿಮುತ್ತಿಸುಖಂ ಪಟಿಸಂವೇದೀ.

ಮುಚಲಿನ್ದಾ

ಪುಚ್ಛಾ – ತಸ್ಸಪಿ ಆವುಸೋ ಸತ್ತಾಹಸ್ಸ ಅಚ್ಚಯೇನ ಭಗವಾ ಕತ್ಥ ವಿಹಾಸಿ.

ವಿಸ್ಸಜ್ಜನಾ – ತಸ್ಸ ¶ ಭನ್ತೇ ಸತ್ತಾಹಸ್ಸ ಅಚ್ಚಯೇನ ಭಗವಾ ಮುಚಲಿನ್ದಮೂಲೇ ಸತ್ತಾಹಂ ಏಕಪಲ್ಲಙ್ಕೇನ ನಿಸೀದಿ.

ಪುಚ್ಛಾ – ತಸ್ಸಪಿ ಆವುಸೋ ಸತ್ತಾಹಸ್ಸ ಅಚ್ಚಯೇನ ಭಗವಾ ಕತ್ಥ ವಿಹಾಸಿ.

ವಿಸ್ಸಜ್ಜನಾ – ತಸ್ಸಪಿ ಭನ್ತೇ ಸತ್ತಾಹಸ್ಸ ಅಚ್ಚಯೇನ ಭಗವಾ ರಾಜಾಯತನಮೂಲೇ ಸತ್ತಾಹಂ ಏಕಪಲ್ಲಙ್ಕೇನ ನಿಸೀದಿ ವಿಮುತ್ತಿಸುಖಂ ಪಟಿಸಂವೇದೀ.

ಪುಚ್ಛಾ – ತಸ್ಸಪಿ ¶ ಆವುಸೋ ಸತ್ತಾಹಸ್ಸ ಅಚ್ಚಯೇನ ಭಗವಾ ಕತ್ಥ ವಿಹಾಸಿ.

ವಿಸ್ಸಜ್ಜನಾ – ತಸ್ಸ ಭನ್ತೇ ಸತ್ತಾಹಸ್ಸ ಅಚ್ಚಯೇನ ಭಗವಾ ಪುನದೇವ ಅಜಪಾಲನಿಗ್ರೋಧಮೂಲೇ ವಿಹಾಸಿ.

ಪುಚ್ಛಾ – ತಸ್ಮಿಂ ಪನ ಆವುಸೋ ಅಜಪಾಲನಿಗ್ರೋಧೇ ವಿಹರನ್ತಸ್ಸ ಭಗವತೋ ಕಥಂ ಚೇತಸೋ ಪರಿವಿತಕ್ಕೋ ಉದಪಾದಿ.

ವಿಸ್ಸಜ್ಜನಾ – ತಸ್ಮಿಂ ಪನ ಭನ್ತೇ ಅಜಪಾಲನಿಗ್ರೋಧೇ ವಿಹರನ್ತಸ್ಸ ಭಗವತೋ ರಹೋಗತಸ್ಸ ಪಟಿಸಲ್ಲೀನಸ್ಸ ಧಮ್ಮಗಮ್ಭೀರತಾಪಟಿಸಂಯುತ್ತೋ ಚೇತಸೋ ಪರಿವಿತಕ್ಕೋ ಉದಪಾದಿ.

ಅಧಿಗತೋ ಖೋ ಮ್ಯಾಯಂ ಧಮ್ಮೋ ಗಮ್ಭೀರೋ ದುದ್ದಸೋ ಅರನುಬೋಧೋ ಸನ್ತೋ ಪಣೀತೋ ಅತಕ್ಕಾವಚರಾ ನಿಪುಣೋ ಪಣ್ಡಿತವೇದನೀಯೋ.

ಆಲಯರಾಮಾಖೋ ¶ ಪನಾಯಂ ಪಜಾ ಆಲಯರತಾ ಆಲಯಸಮ್ಮುದಿತಾ,

ಸಹಮ್ಪತಿ ಬ್ರಹ್ಮಾ

ಪುಚ್ಛಾ – ಕಥಂ ಆವುಸೋ ತದಾ ಧಮ್ಮದೇಸನಾಯ ಬ್ರಹ್ಮಯಾಚನಾ ಚ ಭಗವತೋ ಪಟಿಞ್ಞಾಚ ಅಹೋಸಿ.

ವಿಸ್ಸಜ್ಜನಾ – ದೇಸೇತು ಭನ್ತೇ ಭಗವಾ ಧಮ್ಮಂ, ದೇಸೇತು ಸುಗತೋ ಧಮ್ಮಂ, ಸನ್ತಿ ಸತ್ತಾ ಅಪ್ಪರಜಕ್ಖಜಾತಿಕಾ ಅಸ್ಸವನತಾ ಧಮ್ಮಸ್ಸ ಪರಿಹಾಯನ್ತಿ, ಭವಿಸ್ಸನ್ತಿ ಧಮ್ಮಸ್ಸ ಅಞ್ಞಾತಾರೋತಿ ಇತಿ ಭನ್ತೇ ಬ್ರಹ್ಮುನೋ ಧಮ್ಮದೇಸನಾಯ ಯಾಚನಾ ಅಹೋಸಿ,

‘‘ಅಪಾರುತಾ ತೇಸಂ ಅಮತಸ್ಸ ದ್ವಾರಾ,

ಯೇ ಸೋತವನ್ತೋ ಪಮುಞ್ಚನ್ತು ಸದ್ಧಂ;

ವಿಹಿಂಸಸಞ್ಞೀ ಪಗುಣಂ ನಭಾಸಿಂ,

ಧಮ್ಮಂ ಪಣೀತಂ ಮನುಜೇಸು ಬ್ರಹ್ಮೇ’’ತಿ.

ಏವಂ ಖೋ ಭನ್ತೇ ಭಗವತೋ ಧಮ್ಮದೇಸನಾಯ ಪಟಿಞ್ಞಾ ಚ ಅಹೋಸಿ.

ನಸ್ಸತಿ ¶ ವತ ಲೋಕೋ…

ದೇಸೇತು ಭನ್ತೇ ಭಗವಾ ಧಮ್ಮಂ…

ಅಪಾರುತಾ ತೇಸಂ ಅಮತಸ್ಸ ದ್ವಾರಾ,

ಯೇ ಸೋತವನ್ತೋ ಪಮುಞ್ಚನ್ತು ಸದ್ಧಂ.

ಪುಚ್ಛಾ – ಏವಂ ¶ ಖೋ ಆವುಸೋ ಭಗವಾ ಧಮ್ಮದೇಸನಾಯ ಪಟಿಞ್ಞಂ ಕತ್ವಾ ಪಠಮಂ ಧಮ್ಮಂ ದೇಸೇನ್ತೋ ಕತ್ಥ ಕೀದಿಸಂ ಧಮ್ಮಂ ಕಸ್ಸ ದೇಸೇಸಿ.

ವಿಸ್ಸಜ್ಜನಾ – ಬಾರಾಣಸಿಯಂ ಭನ್ತೇ ಇಸಿಪತನೇ ಮಿಗದಾಯೇ ಪಞ್ಚವಗ್ಗಿಯ ಭಿಕ್ಖುಪಮುಖಾನಂ ಬ್ರಹ್ಮಗಣಾನಂ ಧಮ್ಮಚಕ್ಕಪವತ್ತನಸುತ್ತಂ ದೇಸೇಸಿ.

ಪುಚ್ಛಾ – ತಸ್ಮಿಂ ¶ ಖೋ ಪನ ಆವುಸೋ ಧಮ್ಮಚಕ್ಕಪವತ್ತನಸುತ್ತೇ ದೇಸಿಯಮಾನೇ ಮನುಸ್ಸಲೋಕೇ ಕಸ್ಸ ಧಮ್ಮಾಭಿಸಮಯೋ ಅಹೋಸಿ.

ವಿಸ್ಸಜ್ಜನಾ – ಆಯಸ್ಮತೋ ಭನ್ತೇ ಕೋಣ್ಡಞ್ಞಸ್ಸ ಧಮ್ಮಾಭಿಸಮಯೋ ಅಹೋಸಿ.

ಪುಚ್ಛಾ – ಕಥಂ ನು ಖೋ ಆವುಸೋ ಇಮಸ್ಮಿಂ ಬುದ್ಧಸಾಸನೇ ಪಠಮಂ ಪಬ್ಬಜ್ಜಾ ಚ ಉಪಸಮ್ಪದಾ ಚ ಅಹೋಸಿ.

ವಿಸ್ಸಜ್ಜನಾ – ಇಮಸ್ಮಿಂ ಭನ್ತೇ ಬುದ್ಧಸಾಸನೇ ಪಠಮಂ ಏಹಿಭಿಕ್ಖುಪಸಮ್ಪದಾ ಅಹೋಸಿ.

ಲಭೇಯ್ಯಾಹಂ ¶ ಭನ್ತೇ ಭಗವತೋ ಸನ್ತಿಕೇ ಪಬ್ಬಜಂ, ಲಭೇಯ್ಯಂ ಉಪಸಮ್ಪದಂ.

ಏಹಿ ಭಿಕ್ಖು ಸ್ವಾಖಾತೋ ಧಮ್ಮೋ, ಚರ ಬ್ರಹ್ಮಚರಿಯಂ ಸಮ್ಮಾ ದುಕ್ಖಸ್ಸ ಅನ್ತಕಿರಿಯಾಯ.

ಪುಚ್ಛಾ – ಇತರೇಸಂ ಪನ ಆವುಸೋ ಚತುನ್ನಂ ಪಞ್ಚವಗ್ಗಿಯಾನಂ ಕದಾ ಧಮ್ಮಾಭಿಸಮಯೋ ಅಹೋಸಿ.

ವಿಸ್ಸಜ್ಜನಾ – ಪಾಟಿಪದೇ ಭನ್ತೇ ದಿವಸೇ ಆಯಸ್ಮತೋ ವಪ್ಪಸ್ಸ, ದುತಿಯೇ ಭನ್ತೇ ದಿವಸೇ ಆಯಸ್ಮತೋ ಭದ್ದಿಯಸ್ಸ, ತತಿಯೇ ಭನ್ತೇ ದಿವಸೇ ಆಯಸ್ಮತೋ ಮಹಾನಾಮಸ್ಸ, ಚತುತ್ಥೇ ಭನ್ತೇ ದಿವಸೇ ಆಯಸ್ಮತೋ ಅಸ್ಸಜಿಸ್ಸ ಧಮ್ಮಾಭಿಸಮಯೋ ಅಹೋಸಿ.

ಪುಚ್ಛಾ – ಸಬ್ಬೇಸಮ್ಪಿ ¶ ಆವುಸೋ ತೇಸಂ ಪಞ್ಚವಗ್ಗಿಯಾನಂ ಭಿಕ್ಖೂನಂ ಕದಾ ಅರಹತ್ತಪತ್ತಿ ಹೋತಿ.

ವಿಸ್ಸಜ್ಜನಾ – ಸಬ್ಬೇಸಮ್ಪಿ ಭನ್ತೇ ತೇಸಂ ಪಞ್ಚವಗ್ಗಿಯಾನಂ ಭಿಕ್ಖೂನಂ ಪಕ್ಖಸ್ಸ ಪಞ್ಚಮಿಯಂ ಅನತ್ತಲಕ್ಖಣಸುತ್ತೇ ದೇಸಿಯಮಾನೇ ಅರಹತ್ತಪತ್ತಿ ಹೋತಿ.

ಪುಚ್ಛಾ – ಕದಾ ಆವುಸೋ ಭಗವತಾ ಭಿಕ್ಖೂ ತತ್ಥ ತತ್ಥ ಚಾರಿಕಂ ಚರಿತ್ವಾ ಧಮ್ಮದೇಸನತ್ಥಾಯ ಪೇಸಿತಾ.

ವಿಸ್ಸಜ್ಜನಾ – ಯಸಪ್ಪಮುಖಾನಂ ಭನ್ತೇ ಚತುಪಞ್ಞಾಸ ಸಹಾಯಕಾನಂ ಪಬ್ಬಜಿತಕಾಲೇ ಭಗವತಾ ಭಿಕ್ಖೂ ತತ್ಥ ತತ್ಥ ಚಾರಿಕಂ ಚರಿತ್ವಾ ಧಮ್ಮದೇಸನತ್ಥಾಯ ಪೇಸಿತಾ.

ಸರಣಗಮನ

ಪುಚ್ಛಾ – ಕದಾ ¶ ಆವುಸೋ ಭಗವತಾ ತೀಹಿ ಸರಣಗಮನೇಹಿ ಪಬ್ಬಜ್ಜೂಪ ಸಮ್ಪದಾ ಅನುಞ್ಞಾತೋ ಅಹೋಸಿ.

ವಿಸ್ಸಜ್ಜನಾ – ಯಸಪ್ಪಮುಖಾನಂ ಭನ್ತೇ ಚತುಪಞ್ಞಾಸಾಯ ಗಿಹಿ ಸಹಾಯಕಾನಂ ಪಬ್ಬಜಿತ್ವಾ ತತ್ಥ ತತ್ಥ ಚಾರಿಕಂ ಚರಿತ್ವಾ ಧಮ್ಮದೇಸನತ್ಥಾಯ ಪೇಸಿತಕಾಲೇ ಭಗವತಾ ತೀಹಿ ಸರಣಗಮನೇಹಿ ಪಬ್ಬಜ್ಜಾ ಚ ಉಪಸಮ್ಪದಾ ಚ ಅನುಞ್ಞಾತಾ.

ಅನುಜಾನಾಮಿ ¶ ಭಿಕ್ಖವೇ ತುಮ್ಹೇವ ದಾನಿ ತಾಸು ತಾಸು ದಿಸಾಸು ತೇಸು ತೇಸು ಜನಪದೇಸು ಪಬ್ಬಾಜೇಥ ಉಪಸಮ್ಪಾದೇಥ.

ಪುಚ್ಛಾ – ಭಗವತಾ ಆವುಸೋ ಭಿಕ್ಖೂನಂ ಆರಾಮೋ ಪಟಿಗ್ಗಣ್ಹಿತುಂ ಕತ್ಥ ಕಿಸ್ಮಿಂ ವತ್ಥುಸ್ಮಿಂ ಅನುಞ್ಞಾತೋ.

ವಿಸ್ಸಜ್ಜನಾ – ಭಗವತಾ ಭನ್ತೇ ಭಿಕ್ಖೂನಂ ಆರಾಮಂ ಪಟಿಗ್ಗಣ್ಹಿತುಂ ರಾಜಗಹೇ ಅನುಞ್ಞಾತೋ, ರಾಜಾ ಭನ್ತೇ ಮಾಗಧೋ ಸೇನಿಯೋ ಬಿಮ್ಬಿಸಾರೋ ಬುದ್ಧಪ್ಪಮುಖಸ್ಸ ಭಿಕ್ಖುಸಙ್ಘಸ್ಸ ವೇಳುವನಂ ಉಯ್ಯಾನಂ ಅದಾಸಿ, ತಸ್ಮಿಂ ಭನ್ತೇ ವತ್ಥುಸ್ಮಿಂ ಅನುಞ್ಞಾತೋ.

ಏತಾಹಂ ¶ ಭನ್ತೇ ವೇಳುವನಂ ಉಯ್ಯಾನಂ ಬುದ್ಧಪ್ಪಮುಖಸ್ಸ ಭಿಕ್ಖುಸಙ್ಘಸ್ಸ ದಮ್ಮಿ –

ಅನುಜಾನಾಮಿ ಭಿಕ್ಖವೇ ಆರಾಮಂ.

ಪುಚ್ಛಾ – ಕಥಞ್ಚ ¶ ಆವುಸೋ ದ್ವಿನ್ನಂ ಅಗ್ಗಸಾವಕಾನಂ ಪಬ್ಬಜ್ಜೂಪಸಮ್ಪದಾ ಅಹೋಸಿ.

ವಿಸ್ಸಜ್ಜನಾ – ದ್ವಿನ್ನಂ ಭನ್ತೇ ಅಗ್ಗಸಾವಕಾನಂ ಏಹಿ ಭಿಕ್ಖುಪಸಮ್ಪದಾ ಅಹೋಸಿ.

ವಿಪ್ಪಸನ್ನಾನಿ ¶ ಖೋ ತೇ ಆವುಸೋ ಇನ್ದ್ರಿಯಾನಿ.

ಕಂಸಿ ತ್ವಂ ಆವುಸೋ ಉದ್ದಿಸ್ಸ ಪಬ್ಬಜಿತೋ.

ಕೋ ವಾ ತೇ ಸತ್ಥಾ.

ಕಸ್ಸ ವಾ ತ್ವಂ ಧಮ್ಮಂ ರೋಚೇಸಿ.

ಅತ್ಥಾವುಸೋ ಮಹಾಸಮಣೋ ಸಕ್ಯಪುತ್ತೋ ಸಕ್ಯಕುಲಾ ಪಬ್ಬಜಿತೋ.

ಕಿಂ ವಾದೀ ಪನಾಯಸ್ಮತೋ ಸತ್ಥಾ ಕಿಮಕ್ಖಾಯೀ.

ಯೇ ¶ ಧಮ್ಮಾ ಹೇತುಪ್ಪಭವಾ, ತೇಸಂ ಹೇತುಂ ತಥಾಗತೋ;

ಆಹ ತೇಸಞ್ಚ ಯೋ ನಿರೋಧೋ, ಏವಂ ವಾದೀ ಮಹಾಸಮಣೋ.

ಅಲಂ ಆವುಸೋ ಮಾ ಅಗಮಿತ್ಥ.

ಏತೇ ಭಿಕ್ಖವೇ ದ್ವೇ ಸಹಾಯಕಾ ಆಗಚ್ಛನ್ತಿ ಕೋಲಿತೋ ಉಪತಿಸ್ಸೋ ಚ ಏತಂ ಮೇ ಸಾವಕಯುಗಂ ಭವಿಸ್ಸತಿ ಅಗ್ಗಂ ಭದ್ದಯುಗಂ.

ಲಭೇಯ್ಯಾಮ ¶ ಮಯಂ ಭನ್ತೇ ಭಗವತೋ ಸನ್ತಿಕೇ ಪಬ್ಬಜ್ಜಂ ಲಭೇಯ್ಯಾಮ ಉಪಸಮ್ಪದಂ.

ಏಥ ಭಿಕ್ಖವೋ ಸ್ವಾಖಾತೋ ಧಮ್ಮೋ, ಚರಥ ಬ್ರಹ್ಮಚರಿಯಂ ಸಮ್ಮಾ ದುಕ್ಖಸ್ಸ ಅನ್ತಕಿರಿಯಾಯ.

ಪುಚ್ಛಾ – ಉಪಜ್ಝಾಯೋ ಆವುಸೋ ಗಣ್ಹಿತುಂ ಭಗವತಾ ಕತ್ಥ ಅನುಞ್ಞಾತೋ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಅನುಞ್ಞಾತೋ.

ವಿಸ್ಸಜ್ಜನಾ – ರಾಜಗಹೇ ಭನ್ತೇ ಸಮ್ಬಹುಲೇ ಭಿಕ್ಖೂ ಆರಬ್ಭ ಅನುಞ್ಞಾತೋ, ಸಮ್ಬಹುಲಾ ಭನ್ತೇ ಭಿಕ್ಖೂ ಅನುಪಜ್ಝಾಯಕಾ ಅನಾಚರಿಯಕಾ ಅನೋವದಿಯಮಾನಾ ಅನನುಸಾಸಿಯಮಾನಾ ದುನ್ನಿವತ್ಥಾ ದುಪ್ಪಾರುತಾ ಅನೋಕಪ್ಪಸಮ್ಪನ್ನಾ ಪಿಣ್ಡಾಯ ಚರಿಂಸು, ತಸ್ಮಿಂ ಭನ್ತೇ ವತ್ಥುಸ್ಮಿಂ ಅನುಞ್ಞಾತೋ.

ಪುಚ್ಛಾ – ಉಪಜ್ಝಾಯಮ್ಹಿ ಆವುಸೋ ನ ಸಮ್ಮಾವತ್ತನ್ತಸ್ಸ ದುಕ್ಕಟಂ ಕತ್ಥ ಪಞ್ಞತ್ತಂ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಪಞ್ಞತ್ತಂ.

ವಿಸ್ಸಜ್ಜನಾ – ರಾಜಗಹೇ ¶ ಭನ್ತೇ ಸಮ್ಬಹುಲೇ ಸದ್ಧಿವಿಹಾರಿಕೇ ಆರಬ್ಭ ಪಞ್ಞತ್ತಂ, ಸಮ್ಬಹುಲಾ ಭನ್ತೇ ಸದ್ಧಿವಿಹಾರಿಕಾ ಉಪಜ್ಝಾಯಮ್ಹಿ ನ ಸಮ್ಮಾವತ್ತಿಂಸು, ತಸ್ಮಿಂ ಭನ್ತೇ ವತ್ಥುಸ್ಮಿಂ ಪಞ್ಞತ್ತಂ.

ಪುಚ್ಛಾ – ಕದಾ ಆವುಸೋ ಭಗವತಾ ತೀಹಿ ಸರಣಗಮನೇಹಿ ಉಪಸಮ್ಪದಂ ಪಟಿಕ್ಖಿಪಿತ್ವಾ ಞಾತಿಚತುತ್ಥೇನ ಕಮ್ಮೇನ ಉಪಸಮ್ಪದಾ ಅನುಞ್ಞಾತಾ.

ವಿಸ್ಸಜ್ಜನಾ – ರಾಧಬ್ರಾಹ್ಮಣಸ್ಸ ಭನ್ತೇ ಪಬ್ಬಜಿತಕಾಲೇ ಭಗವತಾ ತೀಹಿ ಸರಣಗಮನೇಹಿ ಉಪಸಮ್ಪದಂ ಪಟಿಕ್ಖಿಪಿತ್ವಾ ಞಾತ್ತಿಚತುತ್ಥೇನ ಕಮ್ಮೇನ ಉಪಸಮ್ಪದಾ ಅನುಞ್ಞಾತಾ.

ಕೋನು ¶ ಖೋ ಭಿಕ್ಖವೇ ತಸ್ಸ ಬ್ರಾಹ್ಮಣಸ್ಸ ಅಧಿಕಾರಂ ಸರತಿ.

ಅಹಂ ಖೋ ಭನ್ತೇ ತಸ್ಸ ಬ್ರಾಹ್ಮಣಸ್ಸ ಅಧಿಕಾರಂ ಸರಾಮಿ.

ಸಾಧು ಸಾಧು ಸಾರಿಪುತ್ತ, ಕತಞ್ಞುನೋ ಹಿ ಸಾರಿಪುತ್ತ ಸಪ್ಪುರಿಸಾ ಕತವೇದಿನೋ.

ಕಥಾಹಂ ಭನ್ತೇ ತಂ ಬ್ರಾಹ್ಮಣಂ ಉಪಸಮ್ಪಾದೇಮಿ.

ಯಾಸಾ ¶ ಭಿಕ್ಖವೇ ಮಯಾ ತೀಹಿ ಸರಣಗಮನೇಹಿ ಉಪಸಮ್ಪದಾಅನುಞ್ಞಾತಾ, ತಂ ಅಜ್ಜತಗ್ಗೇ ಪಟಿಕ್ಖಿಪಾಮಿ.

ಅನುಜಾನಾಮಿ ಭಿಕ್ಖವೇ ಞಾತ್ತಿಚತುತ್ಥೇನ ಕಮ್ಮೇನ ಉಪಸಮ್ಪಾದೇತುಂ.

ಪುಚ್ಛಾ – ಅಯಾಚಿತಕಂ ಆವುಸೋ ಉಪಸಮ್ಪದಾಪೇಕ್ಖಂ ಉಪಸಮ್ಪಾದೇನ್ತಸ್ಸ ದುಕ್ಕಟಂ ಭಗವತಾ ಕತ್ಥ ಪಞ್ಞತ್ತಂ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಪಞ್ಞತ್ತಂ.

ವಿಸ್ಸಜ್ಜನಾ – ರಾಜಗಹೇ ಭನ್ತೇ ಅಞ್ಞತರಂ ಭಿಕ್ಖುಂ ಆರಬ್ಭ ಪಞ್ಞತ್ತಂ, ಅಞ್ಞತರೋ ಭನ್ತೇ ಭಿಕ್ಖು ಉಪಸಮ್ಪನ್ನಸಮನನ್ತರಂ ಅನಾಚಾರಂ ಅಚರಿ, ತಸ್ಮಿಂ ಭನ್ತೇ ವತ್ಥುಸ್ಮಿಂ ಪಞ್ಞತ್ತಂ.

ಪುಚ್ಛಾ – ಚತುನ್ನಂ ¶ ಆವುಸೋ ನಿಸ್ಸಯಾನಂ ಆಚಿಕ್ಖಣಾ ಭಗವತಾ ಕತ್ಥ ಅನುಞ್ಞಾತಾ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಅನುಞ್ಞಾತಾ.

ವಿಸ್ಸಜ್ಜನಾ – ರಾಜಗಹೇ ಭನ್ತೇ ಅಞ್ಞತರಂ ಭಿಕ್ಖುಂ ಆರಬ್ಭ ಅನುಞ್ಞಾತಾ, ಅಞ್ಞತರೋ ಭನ್ತೇ ಭಿಕ್ಖು ಉದರಸ್ಸ ಕಾರಣಾ ಪಬ್ಬಜಿ, ತಸ್ಮಿಂ ಭನ್ತೇ ವತ್ಥುಸ್ಮಿಂ ಅನುಞ್ಞಾತಾ.

ಏಹಿ ¶ ದಾನಿ ಆವುಸೋ ಪಿಣ್ಡಾಯ ಚರಿಸ್ಸಾಮ.

ಕಥಞ್ಹಿ ನಾಮ ಭಿಕ್ಖು ಏವಂ ಸ್ವಾಕ್ಖಾತೇ ಧಮ್ಮವಿನಯೇ ಉದರಸ್ಸ ಕಾರಣಾ ಪಬ್ಬಜಿಸ್ಸತಿ.

ಪುಚ್ಛಾ – ಊನದಸವಸ್ಸೇನ ¶ ಆವುಸೋ ಉಪಸಮ್ಪಾದೇನ್ತಸ್ಸ ದುಕ್ಕಟಂ ಭಗವತಾ ಕತ್ಥ ಪಞ್ಞತ್ತಂ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಪಞ್ಞತ್ತಂ.

ವಿಸ್ಸಜ್ಜನಾ – ರಾಜಗಹೇ ಭನ್ತೇ ಆಯಸ್ಮನ್ತಂ ಉಪಸೇನಂ ವಙ್ಗನ್ತಪುತ್ತಂ ಆರಬ್ಭ ಪಞ್ಞತ್ತಂ, ಆಯಸ್ಮಾ ಭನ್ತೇ ಉಪಸೇನೋ ವಙ್ಗನ್ತಪುತ್ತೋ ಏಕವಸ್ಸೋ ಸದ್ಧಿವಿಹಾರಿಕಂ ಉಪಸಮ್ಪಾದೇಸಿ, ತಸ್ಮಿಂ ಭನ್ತೇ ವತ್ಥುಸ್ಮಿಂ ಪಞ್ಞತ್ತಂ.

ಪುಚ್ಛಾ – ಬಾಲೇನ ¶ ಆವುಸೋ ಅಬ್ಯತ್ತೇನ ಉಪಸಮ್ಪಾದೇನ್ತಸ್ಸ ದುಕ್ಕಟಂ ಭಗವತಾ ಕತ್ಥ ಪಞ್ಞತ್ತಂ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಪಞ್ಞತ್ತಂ.

ವಿಸ್ಸಜ್ಜನಾ – ರಾಜಗಹೇ ಭನ್ತೇ ಸಮ್ಬಹುಲೇ ಭಿಕ್ಖೂ ಆರಬ್ಭ ಪಞ್ಞತ್ತಂ, ಸಮ್ಬಹುಲಾ ಭನ್ತೇ ಭಿಕ್ಖೂ ‘‘ದಸವಸ್ಸಮ್ಹಾ ದಸವಸ್ಸಮ್ಹಾ’’ತಿ ಬಾಲಾ ಅಬ್ಯತ್ತಾ ಉಪಸಮ್ಪಾದೇಸುಂ, ತಸ್ಮಿಂ ಭನ್ತೇ ವತ್ಥುಸ್ಮಿಂ ಪಞ್ಞತ್ತಂ.

ಪುಚ್ಛಾ – ಆಚರಿಯೋ ¶ ಆವುಸೋ ಗಣ್ಹಿತುಂ ಭಗವತಾ ಕತ್ಥ ಅನುಞ್ಞಾತೋ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಅನುಞ್ಞಾತೋ.

ವಿಸ್ಸಜ್ಜನಾ – ರಾಜಗಹೇ ಭನ್ತೇ ಸಮ್ಬಹುಲೇ ಭಿಕ್ಖೂ ಆರಬ್ಭ ಅನುಞ್ಞಾತೋ, ಸಮ್ಬಹುಲಾ ಭನ್ತೇ ಭಿಕ್ಖೂ ಉಪಜ್ಝಾಯೇಸು ಪಕ್ಕನ್ತೇಸುಪಿ ವಿಬ್ಭನ್ತೇಸುಪಿ ಕಾಲಙ್ಕತೇಸುಪಿ ಪಕ್ಖಸಙ್ಕನ್ತೇಸುಪಿ ಅನಾಚರಿಯಕಾ ಅನೋವದಿಯಮಾನಾ ಅನನುಸಾಸಿಯಮಾನಾ ದುನ್ನಿವತ್ಥಾ ದುಪ್ಪಾರುತಾ ಅನಾಕಪ್ಪಸಮ್ಪನ್ನಾ ಪಿಣ್ಡಾಯ ಚರಿಂಸು, ತಸ್ಮಿಂ ಭನ್ತೇ ವತ್ಥುಸ್ಮಿಂ ಅನುಞ್ಞಾತೋ.

ಪುಚ್ಛಾ – ಪಞ್ಚಹಿ ¶ ಆವುಸೋ ಆಬಾಧೇಹಿ ಫುಟ್ಠಂ ಪಬ್ಬಾಜೇನ್ತಸ್ಸ ದುಕ್ಕಟಂ ಭಗವತಾ ಕತ್ಥ ಪಞ್ಞತ್ತಂ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಪಞ್ಞತ್ತಂ.

ವಿಸ್ಸಜ್ಜನಾ – ರಾಜಗಹೇ ಭನ್ತೇ ಸಮ್ಬಹುಲೇ ಭಿಕ್ಖೂ ಆರಬ್ಭ ಪಞ್ಞತ್ತಂ, ಸಮ್ಬಹುಲಾ ಭನ್ತೇ ಭಿಕ್ಖೂ ಪಞ್ಚಹಿ ಆಬಾಧೇಹಿ ಫುಟ್ಠಂ ಪಬ್ಬಾಜೇಸುಂ, ತಸ್ಮಿಂ ಭನ್ತೇ ವತ್ಥುಸ್ಮಿಂ ಪಞ್ಞತ್ತಂ.

ಸಾಧು ¶ ಭನ್ತೇ ಅಯ್ಯಾ ಪಞ್ಚಹಿ ಆಬಾಧೇಹಿ ಫುಟ್ಠಂ ನ ಪಬ್ಬಾಜೇಯ್ಯುಂ…

ಪುಚ್ಛಾ – ರಾಜಭಟಂ ಆವುಸೋ ಪಬ್ಬಾಜೇನ್ತಸ್ಸ ದುಕ್ಕಟಂ ಭಗವತಾ ಕತ್ಥ ಪಞ್ಞತ್ತಂ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಪಞ್ಞತ್ತಂ.

ವಿಸ್ಸಜ್ಜನಾ – ರಾಜಗಹೇ ಭನ್ತೇ ಸಮ್ಬಹುಲೇ ಭಿಕ್ಖೂ ಆರಬ್ಭ ಪಞ್ಞತ್ತಂ, ಸಮ್ಬಹುಲಾ ಭನ್ತೇ ಭಿಕ್ಖೂ ರಾಜಭಟೇ ಪಬ್ಬಾಜೇಸುಂ, ತಸ್ಮಿಂ ಭನ್ತೇ ವತ್ಥುಸ್ಮಿಂ ಪಞ್ಞತ್ತಂ.

ಪುಚ್ಛಾ – ಧಜಬನ್ಧಂ ¶ ಆವುಸೋ ಚೋರಂ ಪಬ್ಬಾಜೇನ್ತಸ್ಸ ದುಕ್ಕಟಂ ಭಗವತಾ ಕತ್ಥ ಪಞ್ಞತ್ತಂ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಪಞ್ಞತ್ತಂ.

ವಿಸ್ಸಜ್ಜನಾ – ರಾಜಗಹೇಯೇವ ಭನ್ತೇ ಅಙ್ಗುಲಿಮಾಲಂ ಚೋರಂ ಆರಬ್ಭ ಪಞ್ಞತ್ತಂ, ಅಙ್ಗುಲಿಮಾಲೋ ಭನ್ತೇ ಚೋರೋ ಭಿಕ್ಖೂಸು ಪಬ್ಬಜಿತೋ ಹೋತಿ, ತಸ್ಮಿಂ ಭನ್ತೇ ವತ್ಥುಸ್ಮಿಂ ಪಞ್ಞತ್ತಂ.

ಪುಚ್ಛಾ – ಕಾರಭೇದಕಂ ಆವುಸೋ ಚೋರಂ ಪಬ್ಬಾಜೇನ್ತಸ್ಸ ದುಕ್ಕಟಂ ಭಗವತಾ ಕತ್ಥ ಪಞ್ಞತ್ತಂ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಪಞ್ಞತ್ತಂ.

ವಿಸ್ಸಜ್ಜನಾ – ರಾಜಗಹೇಯೇವ ¶ ಭನ್ತೇ ಸಮ್ಬಹುಲೇ ಭಿಕ್ಖೂ ಆರಬ್ಭ ಪಞ್ಞತ್ತಂ, ಸಮ್ಬಹುಲಾ ಭನ್ತೇ ಭಿಕ್ಖೂ ಕಾರಭೇದಕಚೋರಂ ಪಬ್ಬಾಜೇಸುಂ, ತಸ್ಮಿಂ ಭನ್ತೇ ವತ್ಥುಸ್ಮಿಂ ಪಞ್ಞತ್ತಂ.

ಪುಚ್ಛಾ – ಇಣಾಯಿಕಂ ಆವುಸೋ ಪಬ್ಬಾಜೇನ್ತಸ್ಸ ದುಕ್ಕಟಂ ಭಗವತಾ ಕತ್ಥ ಪಞ್ಞತ್ತಂ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಪಞ್ಞತ್ತಂ.

ವಿಸ್ಸಜ್ಜನಾ – ರಾಜಗಹೇಯೇವ ಭನ್ತೇ ಸಮ್ಬಹುಲೇ ಭಿಕ್ಖೂ ಆರಬ್ಭ ಪಞ್ಞತ್ತಂ, ಸಮ್ಬಹುಲಾ ಭನ್ತೇ ಭಿಕ್ಖೂ ಇಣಾಯಿಕಂ ಪಬ್ಬಾಜೇಸುಂ, ತಸ್ಮಿಂ ಭನ್ತೇ ವತ್ಥುಸ್ಮಿಂ ಪಞ್ಞತ್ತಂ.

ಪುಚ್ಛಾ – ದಾಸಂ ¶ ಆವುಸೋ ಪಬ್ಬಜೇನ್ತಸ್ಸ ದುಕ್ಕಟಂ ಭಗವತಾ ಕತ್ಥ ಪಞ್ಞತ್ತಂ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಪಞ್ಞತ್ತಂ.

ವಿಸ್ಸಜ್ಜನಾ – ರಾಜಗಹೇಯೇವ ಭನ್ತೇ ಸಮ್ಬಹುಲೇ ಭಿಕ್ಖೂ ಆರಬ್ಭ ಪಞ್ಞತ್ತಂ, ಸಮ್ಬಹುಲಾ ಭನ್ತೇ ಭಿಕ್ಖೂ ದಾಸಂ ಪಬ್ಬಾಜೇಸುಂ, ತಸ್ಮಿಂ ಭನ್ತೇ ವತ್ಥುಸ್ಮಿಂ ಪಞ್ಞತ್ತಂ.

ಪುಚ್ಛಾ – ಭಣ್ಡುಕಮ್ಮಾಯ ಆವುಸೋ ಅಪಲೋಕನಂ ಭಗವತಾ ಕತ್ಥ ಅನುಞ್ಞಾತಂ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಅನುಞ್ಞಾತಂ.

ವಿಸ್ಸಜ್ಜನಾ – ರಾಜಗಹೇಯೇವ ಭನ್ತೇ ಅಞ್ಞತರಂ ಕಮ್ಮಾರಭಣ್ಡುಪುತ್ತಂ ಆರಬ್ಭ ಅನುಞ್ಞಾತಂ ಅಞ್ಞತರೋ ಭನ್ತೇ ಕಮ್ಮಾರಭಣ್ಡುಪುತ್ತೋ ಮಾತಾಪಿತೂಹಿ ಸದ್ಧಿಂ ಭಣ್ಡಿತ್ವಾ ಭಿಕ್ಖೂಸು ಪಬ್ಬಜಿತೋ ಹೋತಿ, ತಸ್ಮಿಂ ಭನ್ತೇ ವತ್ಥುಸ್ಮಿಂ ಅನುಞ್ಞಾತಂ.

ಪುಚ್ಛಾ – ಊನವೀಸತಿವಸ್ಸಸ್ಸ ¶ ಆವುಸೋ ಪುಗ್ಗಲಸ್ಸ ಉಪಸಮ್ಪದಾ ಭಗವತಾ ಕತ್ಥ ಪಟಿಕ್ಖಿತ್ತಾ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಪಟಿಕ್ಖಿತ್ತಾ.

ವಿಸ್ಸಜ್ಜನಾ – ರಾಜಗಹೇ ¶ ಭನ್ತೇ ಸಮ್ಬಹುಲೇ ಭಿಕ್ಖೂ ಆರಬ್ಭ ಪಟಿಕ್ಖಿತ್ತಾ, ಸಮ್ಬಹುಲಾ ಭನ್ತೇ ಭಿಕ್ಖೂ ಊನವೀಸತಿವಸ್ಸಂ ಪುಗ್ಗಲಂ ಉಪಸಮ್ಪಾದೇಸುಂ, ತಸ್ಮಿಂ ಭನ್ತೇ ವತ್ಥುಸ್ಮಿಂ ಪಟಿಕ್ಖಿತ್ತಾ.

ನ ¶ ಭಿಕ್ಖವೇ ಜಾನಂ ಊನವೀಸತಿವಸ್ಸೋ ಪುಗ್ಗಲೋ ಉಪಸಮ್ಪಾದೇತಬ್ಬೋ, ಯೋಉಪಸಮ್ಪಾದೇಯ್ಯ, ಯಥಾಧಮ್ಮೋ ಕಾರೇತಬ್ಬೋ.

ಪುಚ್ಛಾ – ಮಾತಾಪಿತೂಹಿ ¶ ಆವುಸೋ ಅನನುಞ್ಞಾತಂ ಪುತ್ತಂ ಪಬ್ಬಾಜೇನ್ತಸ್ಸ ದುಕ್ಕಟಂ ಭಗವತಾ ಕತ್ಥ ಪಞ್ಞತ್ತಂ, ಕಿಸ್ಮಿಂ ವತ್ಥುಸ್ಮಿಂ ಪಞ್ಞತ್ತಂ.

ವಿಸ್ಸಜ್ಜನಾ – ಸಕ್ಕೇಸು ಭನ್ತೇ ಪಞ್ಞತ್ತಂ, ರಾಜಾ ಭನ್ತೇ ಸುದ್ಧೋದನೋ ಭಗವನ್ತಂ ಉಪಸಙ್ಕಮಿತ್ವಾ ವರಂ ಯಾಚಿ, ಸಾಧು ಭನ್ತೇ ಅಯ್ಯಾಅನನುಞ್ಞಾತಂ ಮಾತಾಪಿತೂಹಿ ಪುತ್ತಂ ಪಬ್ಬಾಜೇಯ್ಯುನ್ತಿ, ತಸ್ಮಿಂ ಭನ್ತೇ ವತ್ಥುಸ್ಮಿಂ ಪಞ್ಞತ್ತಂ.

ನ ¶ ಭಿಕ್ಖವೇ ಅನನುಞ್ಞಾತೋ ಮಾತಾಪಿತೂಹಿ ಪುತ್ತೋ ಪಬ್ಬಾಜೇತಬ್ಬೋ, ಯೋ ಪಬ್ಬಾಜೇಯ್ಯ, ಆಪತ್ತಿದುಕ್ಕಟಸ್ಸ.

ಪುಚ್ಛಾ – ಥೇಯ್ಯಸಂವಾಸಕಸ್ಸ ಆವುಸೋ ಉಪಸಮ್ಪದಾ ಭಗವತಾ ಕತ್ಥ ಪಟಿಕ್ಖಿತ್ತಾ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಪಟಿಕ್ಖಿತ್ತಾ.

ವಿಸ್ಸಜ್ಜನಾ – ಸಾವತ್ಥಿಯಂ ಭನ್ತೇ ಅಞ್ಞತರಂ ಪುರಾಣಕುಲಪುತ್ತಂ ಆರಬ್ಭ ಪಟಿಕ್ಖಿತ್ತಾ, ಅಞ್ಞತರೋ ಭನ್ತೇ ಪುರಾಣಕುಲಪುತ್ತೋ ಖೀಣ ಕೋಲಞ್ಞೋ ಸಾಮಂ ಪತ್ತಚೀವರಂ ಪಟಿಯಾದೇತ್ವಾ ಕೇಸಮಸ್ಸುಂ ಓಹಾರೇತ್ವಾ ¶ ಕಾಸಾಯಾನಿ ವತ್ಥಾನಿ ಅಚ್ಛಾದೇತ್ವಾ ಆರಾಮಂ ಗನ್ತ್ವಾ ಭಿಕ್ಖೂಹಿ ಸದ್ಧಿಂ ಸಂವಸಿ, ಭನ್ತೇ ವತ್ಥುಸ್ಮಿಂ ಪಟಿಕ್ಖಿತ್ತಾ.

ಪುಚ್ಛಾ – ತಿರಚ್ಛಾನಗತಸ್ಸ ¶ ಆವುಸೋ ಉಪಸಮ್ಪದಾ ಭಗವತಾ ಕತ್ಥ ಪಟಿಕ್ಖಿತ್ತಾ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಪಟಿಕ್ಖಿತ್ತಾ.

ವಿಸ್ಸಜ್ಜನಾ – ಸಾವತ್ಥಿಯಂ ಭನ್ತೇ ಅಞ್ಞತರಂ ನಾಗಂ ಆರಬ್ಭ ಪಟಿಕ್ಖಿತ್ತಾ, ಅಞ್ಞತರೋ ಭನ್ತೇ ನಾಗೋ ಮಾಣವಕವಣ್ಣೇನ ಭಿಕ್ಖೂ ಉಪಸಙ್ಕಮಿತ್ವಾ ಪಬ್ಬಜ್ಜಂ ಯಾಚಿ, ತಂ ಭಿಕ್ಖೂ ಪಬ್ಬಾಜೇಸುಂ ಉಪಸಮ್ಪಾದೇಸುಂ, ತಸ್ಮಿಂ ಭನ್ತೇ ವತ್ಥುಸ್ಮಿಂ ಪಟಿಕ್ಖಿತ್ತಾ.

ಪುಚ್ಛಾ – ಮಾತುಘಾತಕಸ್ಸ ¶ ಚ ಆವುಸೋ ಪಿತುಘಾತಕಸ್ಸ ಚ ಉಪಸಮ್ಪದಾ ಭಗವತಾ ಕತ್ಥ ಪಟಿಕ್ಖಿತ್ತಾ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಪಟಿಕ್ಖಿತ್ತಾ.

ವಿಸ್ಸಜ್ಜನಾ – ಸಾವತ್ಥಿಯಂಯೇವ ¶ ಭನ್ತೇ ಅಞ್ಞತರಂ ಮಾಣವಕಂ ಆರಬ್ಭ ಪಟಿಕ್ಖಿತ್ತಾ, ಅಞ್ಞತರೋ ಚ ಭನ್ತೇ ಮಾಣವಕೋ ಅಞ್ಞತರೋ ಚ ಮಾಣವಕೋ ಮಾತರಂ ಜೀವಿತಾ ವೋರೋಪೇಸಿ ಪಿತರಂ ಜೀವಿತಾ ವೋರೋಪೇಸಿ, ತಸ್ಮಿಂ ಭನ್ತೇ ವತ್ಥುಸ್ಮಿಂ ಪಟಿಕ್ಖಿತ್ತಾ.

ಮಾತುಘಾತಕೋ ¶ ಭಿಕ್ಖವೇ ಅನುಪಸಮ್ಪನ್ನೋ ನಉಪಸಮ್ಪಾದೇತಬ್ಬೋ, ಉಪಸಮ್ಪನ್ನೋ ನಾಸೇತಬ್ಬೋ, ಪಿತುಘಾತಕೋ ಭಿಕ್ಖವೇ ಅನುಪಸಮ್ಪನ್ನೋ ನಉಪಸಮ್ಪಾದೇತಬ್ಬೋ, ಉಪಸಮ್ಪನ್ನೋ ನಾಸೇತಬ್ಬೋ.

ಪುಚ್ಛಾ – ಅಪತ್ತಚೀವರಕಂ ವಾ ಆವುಸೋ ಯಾಚಿತಪತ್ತಚೀವರಕಂ ವಾ ಉಪಸಮ್ಪಾದೇನ್ತಸ್ಸ ದುಕ್ಕಟಂ ಭಗವತಾ ಕತ್ಥ ಪಞ್ಞತ್ತಂ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಪಞ್ಞತ್ತಂ.

ವಿಸ್ಸಜ್ಜನಾ – ಸಾವತ್ಥಿಯಂ ಭನ್ತೇ ಸಮ್ಬಹುಲೇ ಭಿಕ್ಖೂ ಆರಬ್ಭ ಪಞ್ಞತ್ತಂ, ಸಮ್ಬಹುಲಾ ಭನ್ತೇ ಭಿಕ್ಖೂ ಅಪತ್ತಚೀವರಕಂ ಉಪಸಮ್ಪಾದೇಸುಂ, ಯಾಚಿತಕೇನ ಪತ್ತಚೀವರೇನ ಉಪಸಮ್ಪಾದೇಸುಂ, ತಸ್ಮಿಂ ಭನ್ತೇ ವತ್ಥುಸ್ಮಿಂ ಪಞ್ಞತ್ತಂ.

ಪುಚ್ಛಾ – ಉಪಸಮ್ಪದಂ ¶ ಪುಚ್ಛಿಸ್ಸಂ, ಸನಿದಾನಂ ಸಉದ್ದೇಸಂ. ಸಮುಕ್ಕಟ್ಠಪದಾನಂ ಆವುಸೋ ಕತಿ ಆಪತ್ತಿಯೋ.

ವಿಸ್ಸಜ್ಜನಾ – ಉಪಸಮ್ಪದಂ ವಿಸ್ಸಜ್ಜಿಸ್ಸಂ, ಸನಿದಾನಂ ಸನಿದ್ದೇಸಂ. ಸಮುಕ್ಕಟ್ಠಪದಾನಂ ಭನ್ತೇ ದ್ವೇ ಆಪತ್ತಿಯೋ.

೨. ಉಪೋಸಥಕ್ಖನ್ಧಕ

ಪುಚ್ಛಾ – ಚಾತುದ್ದಸೇ ¶ ಚ ಆವುಸೋ ಪನ್ನರಸೇ ಚ ಪಕ್ಖಸ್ಸ ಚ ಅಟ್ಠಮಿಯಾ ಸನ್ನಿಪತಿತ್ವಾ ಧಮ್ಮಂ ಭಾಸಿತುಂ ಭಗವತಾ ಕತ್ಥ ಅನುಞ್ಞಾತಂ, ಕಿಸ್ಮಿಂ ವತ್ಥುಸ್ಮಿಂ ಅನುಞ್ಞಾತಂ.

ವಿಸ್ಸಜ್ಜನಾ – ರಾಜಗಹೇ ಭನ್ತೇ ಸಮ್ಬಹುಲೇ ಭಿಕ್ಖೂ ಆರಬ್ಭ ಅನುಞ್ಞಾತಾ, ಸಮ್ಬಹುಲಾ ಭನ್ತೇ ಭಿಕ್ಖೂ ಚಾತುದ್ದೇಸ ಪನ್ನರಸೇ ಅಟ್ಠಮಿಯಾ ಚ ಪಕ್ಖಸ್ಸ ಸನ್ನಿಪತಿತ್ವಾ ತುಣ್ಹೀ ನಿಸೀದಿಂಸು, ತಸ್ಮಿಂ ಭನ್ತೇ ವತ್ಥುಸ್ಮಿಂ ಅನುಞ್ಞಾತಾ.

ಅನುಜಾನಾಮಿ ¶ ಭಿಕ್ಖವೇ ಚಾತುದ್ದಸೇ ಪನ್ನರಸೇ ಅಟ್ಠಮಿಯಾ ಚ ಪಕ್ಖಸ್ಸ ಸನ್ನಿಪತಿತುಂ.

ನನು ನಾಮ ಸನ್ನಿಪತಿತೇಹಿ ಧಮ್ಮೋ ಭಾಸಿತಬ್ಬೋ.

ಪುಚ್ಛಾ – ಕದಾ ಆವುಸೋ ಭಿಕ್ಖೂನಂ ಪಾತಿಮೋಕ್ಖುದ್ದೇಸೋ ಭಗವತಾ ಅನುಞ್ಞಾತೋ.

ವಿಸ್ಸಜ್ಜನಾ – ಯದಾ ಭನ್ತೇ ಭಗವತೋ ರಹೋಗತಸ್ಸ ಪಟಿಸಲ್ಲೀನಸ್ಸ ಏವಂ ಚೇತಸೋ ಪರಿವಿತಕ್ಕೋ ಉದಪಾದಿ ‘‘ಯಂನೂನಾಹಂ ಯಾನಿ ಮಯಾ ಭಿಕ್ಖೂನಂ ಪಞ್ಞತ್ತಾನಿ ಸಿಕ್ಖಾಪದಾನಿ, ತಾನಿ ನೇಸಂ ಪಾತಿಮೋಕ್ಖುದ್ದೇಸಂ ಅನುಜಾನೇಯ್ಯಂ, ಸೋ ನೇಸಂ ಭವಿಸ್ಸತಿ ಉಪೋಸಥಕಮ್ಮ’’ನ್ತಿ ¶ ತದಾ ಭನ್ತೇ ಭಗವತಾ ಭಿಕ್ಖೂನಂ ಪಾತಿಮೋಕ್ಖುದ್ದೇಸೋ ಅನುಞ್ಞಾತೋ.

ಪುಚ್ಛಾ – ಸೀಮಂ ಆವುಸೋ ಸಮ್ಮನಿತುಂ ಭಗವತಾ ಕತ್ಥ ಅನುಞ್ಞಾತಂ, ಕಿಸ್ಮಿಞ್ಚ ವತ್ಥುಸ್ಮಿಂ ಅನುಞ್ಞಾತಂ.

ವಿಸ್ಸಜ್ಜನಾ – ರಾಜಗಹೇ ಭನ್ತೇ ಅನುಞ್ಞಾತಂ, ರಾಜಗಹೇ ಭನ್ತೇ ಭಗವತಿ ವಿಹರತಿ ಭಿಕ್ಖೂನಂ ಏತದಹೋಸಿ ‘‘ಭಗವತಾ ಪಞ್ಞತ್ತಂ ಏತ್ತಾವತಾ ಸಾಮಗ್ಗೀ, ಯಾವತಾ ಏಕಾವಾಸೋತಿ ಕಿತ್ತಾವತಾನುಖೋ ಏಕಾವಾಸೋ ಹೋತೀ’’ತಿ, ತಸ್ಮಿಂ ಭನ್ತೇ ವತ್ಥುಸ್ಮಿಂ ಅನುಞ್ಞಾತಂ.

ಪುಚ್ಛಾ – ಕತಿ ¶ ಆವುಸೋ ಉಪೋಸಥಾ ದಿವಸವಸೇನ ಚ ಕಾರಕಪುಗ್ಗಲವಸೇನ ಚ ಕಾತಬ್ಬಾಕಾರವಸೇನ ಚ.

ವಿಸ್ಸಜ್ಜನಾ – ದಿವಸವಸೇನ ಭನ್ತೇ ತಯೋ ಉಪೋಸಥಾ, ಪುಗ್ಗಲವಸೇನ ಚ ಭನ್ತೇ ತಯೋ ಉಪೋಸಥಾ, ಕಾತಬ್ಬಾಕಾರವಸೇನ ಚ ಭನ್ತೇ ತಯೋ ಉಪೋಸಥಾ.

ಪುಚ್ಛಾ – ಕತಿ ¶ ಆವುಸೋ ಉಪೋಸಥಕಮ್ಮಾನಿ ತೇಸು ಚ ಕೀದಿಸಂ ಉಪೋಸಥಕಮ್ಮಂ ಭಗವತಾ ಅನುಞ್ಞಾತಂ, ಕೀದಿಸಂ ಅನನುಞ್ಞಾತಂ.

ವಿಸ್ಸಜ್ಜನಾ – ಚತ್ತಾರಿಮಾನಿ ಭನ್ತೇ ಉಪೋಸಥಕಮ್ಮಾನಿ, ಅಧಮ್ಮೇನ ವಗ್ಗಂ ಉಪೋಸಥಕಮ್ಮಂ, ಅಧಮ್ಮೇನ ಸಮಗ್ಗಂ ಉಪೋಸಥಕಮ್ಮಂ, ಧಮ್ಮೇನ ವಗ್ಗಂ ಉಪೋಸಥಕಮ್ಮಂ, ಧಮ್ಮೇನ ಸಮಗ್ಗಂ ಉಪೋಸಥಕಮ್ಮಂ. ತತ್ರ ಭನ್ತೇ ಯದಿದಂ ಅಧಮ್ಮೇನ ವಗ್ಗಂ ಉಪೋಸಥಕಮ್ಮಂ, ಅಧಮ್ಮೇನ ಸಮಗ್ಗಂ ಉಪೋಸಥಕಮ್ಮಂ ಧಮ್ಮೇನ ವಗ್ಗಂ ಉಪೋಸಥಕಮ್ಮಂ, ಏವರೂಪಂ ಭನ್ತೇ ಉಪೋಸಥಕಮ್ಮಂ ಅನನುಞ್ಞಾತಂ, ತತ್ರ ಭನ್ತೇ ಯದಿದಂ ಧಮ್ಮೇನ ಸಮಗ್ಗಂ ಉಪೋಸಥಕಮ್ಮಂ, ಏವರೂಪಂ ಭನ್ತೇ ಉಪೋಸಥಕಮ್ಮಂ ಅನುಞ್ಞಾತಂ.

ಪುಚ್ಛಾ – ಉಪೋಸಥಂ ¶ ಪುಚ್ಛಿಸ್ಸಂ, ಸನಿದಾನಂ ಸನಿದ್ದೇಸಂ. ಸಮುಕ್ಕಟ್ಠಪದಾನಂ ಆವುಸೋ ಕತಿ ಆಪತ್ತಿಯೋ.

ವಿಸ್ಸಜ್ಜನಾ – ಉಪೋಸಥಂ ವಿಸ್ಸಜ್ಜಿಸ್ಸಂ, ಸನಿದಾನಂ ಸನಿದ್ದೇಸಂ. ಸಮುಕ್ಕಟ್ಠಪದಾನಂ ಭನ್ತೇ ತಿಸ್ಸೋ ಆಪತ್ತಿಯೋ.

೩. ವಸ್ಸುಪನಾಯಿಕಕ್ಖನ್ಧಕ

ಪುಚ್ಛಾ – ವಸ್ಸೂಪನಾಯಿಕಂ ಆವುಸೋ ಭಗವತಾ ಕತ್ಥ ಪಞ್ಞತ್ತಂ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಪಞ್ಞತ್ತಂ.

ವಿಸ್ಸಜ್ಜನಾ – ರಾಜಗಹೇ ಭನ್ತೇ ಸಮ್ಬಹುಲಾ ಭಿಕ್ಖೂ ಆರಬ್ಭ ಪಞ್ಞತ್ತಂ, ಸಮ್ಬಹುಲಾ ಭನ್ತೇ ಭಿಕ್ಖೂ ಹೇಮನ್ತಮ್ಪಿ ಗಿಮ್ಹಮ್ಪಿ ವಸ್ಸಮ್ಪಿ ಚಾರಿಕಂ ಚರಿಂಸು, ತಸ್ಮಿಂ ಭನ್ತೇ ವತ್ಥುಸ್ಮಿಂ ಪಞ್ಞತ್ತಂ.

ಪುಚ್ಛಾ – ಕತಿಪನಾವುಸೋ ವಸ್ಸೂಪನಾಯಿಕಾ ಭಗವತಾ ಅನುಞ್ಞಾತಾ.

ವಿಸ್ಸಜ್ಜನಾ – ದ್ವೇಮಾ ಭನ್ತೇ ವಸ್ಸೂಪನಾಯಿಕಾ ಭಗವತಾ ಅನುಞ್ಞಾತಾ ಪುರಿಮಿಕಾ ಪಚ್ಛಿಮಿಕಾ, ಅಪರಜ್ಜುಗತಾಯ ಭನ್ತೇ ಆಸಳ್ಹಿಯಾ ಪುರಿಮಿಕಾ ಉಪಗನ್ತಬ್ಬಾ, ಮಾಸಗತಾಯ ಭನ್ತೇ ಆಸಳ್ಹಿಯಾ ಪಚ್ಛಿಮಿಕಾ ಉಪಗನ್ತಬ್ಬಾ, ಇಮಾ ಖೋ ಭನ್ತೇ ದ್ವೇ ವಸ್ಸೂಪನಾಯಿಕಾ ಭಗವತಾ ಅನುಞ್ಞಾತಾ.

ಪುಚ್ಛಾ – ವಸ್ಸಂ ¶ ಆವುಸೋ ಉಪಗನ್ತ್ವಾ ಪುರಿಮಂ ವಾ ತೇಮಾಸಂ ಪಚ್ಛಿಮಂ ವಾ ತೇಮಾಸಂ ಅವಸಿತ್ವಾ ಚಾರಿಕಂ ಪಕ್ಕಮನ್ತಸ್ಸ ದುಕ್ಕಟಂ ಕತ್ಥ ಪಞ್ಞತ್ತಂ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಪಞ್ಞತ್ತಂ.

ವಿಸ್ಸಜ್ಜನಾ – ರಾಜಗಹೇ ಭನ್ತೇ ಛಬ್ಬಗ್ಗಿಯೇ ಭಿಕ್ಖೂ ಆರಬ್ಭ ಪಞ್ಞತ್ತಂ, ಛಬ್ಬಗ್ಗಿಯಾ ಭನ್ತೇ ಭಿಕ್ಖೂ ವಸ್ಸಂ ಉಪಗನ್ತ್ವಾ ಅನ್ತರಾ ವಸ್ಸಂ ಚಾರಿಕಂ ಪಕ್ಕಮಿಂಸು, ತಸ್ಮಿಂ ಭನ್ತೇ ವತ್ಥುಸ್ಮಿಂ ಪಞ್ಞತ್ತಂ.

ಪುಚ್ಛಾ – ಸತ್ತಾಹ ಕರಣೀಯೇನ ಆವುಸೋ ಪಹಿತೇ ಗನ್ತುಂ ಭಗವತಾ ಕತ್ಥ ಅನುಞ್ಞಾತಂ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಅನುಞ್ಞಾತಂ.

ವಿಸ್ಸಜ್ಜನಾ – ಸಾವತ್ಥಿಯಂ ಭನ್ತೇ ಸಮ್ಬಹುಲೇ ಭಿಕ್ಖೂ ಆರಬ್ಭ ಅನುಞ್ಞಾತಂ, ಸಮ್ಬಹುಲಾ ಭನ್ತೇ ಭಿಕ್ಖೂ ಉದೇನೇನ ಉಪಾಸಕೇನ ಪಹಿತೇ ನ ಗಚ್ಛಿಂಸು, ತಸ್ಮಿಂ ಭನ್ತೇ ವತ್ಥುಸ್ಮಿಂ ಅನುಞ್ಞಾತಂ.

ಪುಚ್ಛಾ – ಸತ್ತಾಹಕರಣೀಯೇನ ¶ ಆವುಸೋ ಸತ್ತನ್ನಂ ಅಪಹಿತೇಪಿ ಗನ್ತುಂ ಭಗವತಾ ಕತ್ಥ ಅನುಞ್ಞಾತಂ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಅನುಞ್ಞಾತಂ.

ವಿಸ್ಸಜ್ಜನಾ – ಸಾವತ್ಥಿಯಂ ಭನ್ತೇ ಅಞ್ಞತರಸ್ಸ ಭಿಕ್ಖುನೋ ಮಾತುಗಿಲಾನ ವತ್ಥುಸ್ಮಿಂ ಅನುಞ್ಞಾತಂ.

ಅನುಜಾನಾಮಿ ¶ ಭಿಕ್ಖವೇ ಸತ್ತನ್ನಂ ಸತ್ತಾಹಕರಣೀಯೇನ ಅಪಹಿತೇಪಿ ಗನ್ತುಂ, ಪಗೇವ ಪಹಿತೇ.

ಪುಚ್ಛಾ – ಕಿಸ್ಮಿಂಚಿ ಆವುಸೋ ಅನ್ತರಾಯೇ ಸತಿ ಅನ್ತೋವಸ್ಸಂ ಪಕ್ಕಮಿತುಂ ಭಗವತಾ ಕತ್ಥ ಅನುಞ್ಞಾತಂ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಅನುಞ್ಞಾತಂ.

ವಿಸ್ಸಜ್ಜನಾ – ಸಾವತ್ಥಿಯಂ ಭನ್ತೇ ಸಮ್ಬಹುಲೇ ಭಿಕ್ಖೂ ಆರಬ್ಭ ಅನುಞ್ಞಾತಂ, ಸಮ್ಬಹುಲಾ ಭನ್ತೇ ಭಿಕ್ಖೂ ಕೋಸಲೇಸು ಜನಪದೇಸು ವಸ್ಸಂ ಉಪಗಚ್ಛಿಂಸು, ತೇ ವಸ್ಸೂಪಗತಾ ವಾಳೇಹಿ ಉಬ್ಬಾಳ್ಹಾ ಅಹೇಸುಂ, ತಸ್ಮಿಂ ಭನ್ತೇ ವತ್ಥುಸ್ಮಿಂ ಅನುಞ್ಞಾತಂ.

ಪುಚ್ಛಾ – ರುಕ್ಖ ¶ ಸುಸಿರೇ ವಾ ಆವುಸೋ ರುಕ್ಖವಿಟಭಿಯಾ ವಾ ಅಜ್ಝೋಕಾಸೇ ವಾ ವಸ್ಸಂ ಉಪಗಚ್ಛನ್ತಸ್ಸ ದುಕ್ಕಟಂ ಭಗವತಾ ಕತ್ಥ ಪಞ್ಞತ್ತಂ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಪಞ್ಞತ್ತಂ.

ವಿಸ್ಸಜ್ಜನಾ – ಸಾವತ್ಥಿಯಂ ಭನ್ತೇ ಸಮ್ಬಹುಲೇ ಭಿಕ್ಖೂ ಆರಬ್ಭ ಪಞ್ಞತ್ತಂ, ಸಮ್ಬಹುಲಾ ಭನ್ತೇ ಭಿಕ್ಖೂ ರುಕ್ಖಸುಸಿರೇಪಿ ರುಕ್ಖವಿಟಭಿಯಾಪಿ ಅಜ್ಝೋಕಾಸೇಪಿ ವಸ್ಸಂ ಉಪಗಚ್ಛಿಂಸು, ತಸ್ಮಿಂ ಭನ್ತೇ ವತ್ಥುಸ್ಮಿಂ ಪಞ್ಞತ್ತಂ.

ಪುಚ್ಛಾ – ಅಸೇನಾಸನಿಕೇನ ¶ ಆವುಸೋ ವಸ್ಸಂ ಉಪಗಚ್ಛನ್ತಸ್ಸ ದುಕ್ಕಟಂ ಭಗವತಾ ಕತ್ಥ ಪಞ್ಞತ್ತಂ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಪಞ್ಞತ್ತಂ.

ವಿಸ್ಸಜ್ಜನಾ – ತಸ್ಮಿಂಯೇವ ಭನ್ತೇ ಸಾವತ್ಥಿಯಂ ಸಮ್ಬಹುಲೇ ಭಿಕ್ಖೂ ಆರಬ್ಭ ಪಞ್ಞತ್ತಂ, ಸಮ್ಬಹುಲಾ ಭನ್ತೇ ಭಿಕ್ಖೂ ಅಸೇನಾಸನಿಕಾ ವಸ್ಸಂ ಉಪಗಚ್ಛಿಂಸು, ತಸ್ಮಿಂ ಭನ್ತೇ ವತ್ಥುಸ್ಮಿಂ ಪಞ್ಞತ್ತಂ.

ಪುಚ್ಛಾ – ಛವಕುಟಿಕಾಯ ವಾ ಆವುಸೋ ಛತ್ತೇ ವಾ ಚಾಟಿಯಾ ವಾ ವಸ್ಸಂ ಉಪಗಚ್ಛನ್ತಸ್ಸ ದುಕ್ಕಟಂ ಭಗವತಾ ಕತ್ಥ ಪಞ್ಞತ್ತಂ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಪಞ್ಞತ್ತಂ.

ವಿಸ್ಸಜ್ಜನಾ – ಸಾವತ್ಥಿಯಂಯೇವ ಭನ್ತೇ ಸಮ್ಬಹುಲೇ ಭಿಕ್ಖೂ ಆರಬ್ಭ ಪಞ್ಞತ್ತಂ, ಸಮ್ಬಹುಲಾ ಭನ್ತೇ ಭಿಕ್ಖೂ ಛವಕುಟಿಕಾಯಪಿ ಛತ್ತೇಪಿ ಚಾಟಿಯಾಪಿ ವಸ್ಸಂ ಉಪಗಚ್ಛಿಂಸು, ತಸ್ಮಿಂ ಭನ್ತೇ ವತ್ಥುಸ್ಮಿಂ ಪಞ್ಞತ್ತಂ.

ಪುಚ್ಛಾ – ಪಟಿಸ್ಸವಂ ¶ ಆವುಸೋ ವಿಸಂ ವಾದೇನ್ತಸ್ಸ ದುಕ್ಕಟಂ ಭಗವತಾ ಕತ್ಥ ಪಞ್ಞತ್ತಂ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಪಞ್ಞತ್ತಂ.

ವಿಸ್ಸಜ್ಜನಾ – ಸಾವತ್ಥಿಯಂ ಭನ್ತೇ ಆಯಸ್ಮನ್ತಂ ಉಪನನ್ದಂ ಸಕ್ಯಪುತ್ತಂ ಆರಬ್ಭ ಪಞ್ಞತ್ತಂ, ಆಯಸ್ಮಾ ಭನ್ತೇ ಉಪನನ್ದೋ ಸಕ್ಯಪುತ್ತೋ ರಞ್ಞೋ ಪಸೇನದಿಸ್ಸ ಕೋಸಲಸ್ಸ ವಸ್ಸಂ ವಾಸಂ ಪಟಿಸ್ಸುಣಿತ್ವಾ ವಿಸಂವಾದೇಸಿ, ತಸ್ಮಿಂ ಭನ್ತೇ ವತ್ಥುಸ್ಮಿಂ ಪಞ್ಞತ್ತಂ.

ಪುಚ್ಛಾ – ವಸ್ಸೂಪನಾಯಿಕಂ ¶ ಪುಚ್ಛಿಸ್ಸಂ, ಸನಿದಾನಂ ಸನಿದ್ದೇಸಂ. ಸಮುಕ್ಕಟ್ಠಪದಾನಂ ಆವುಸೋ ಕತಿ ಆಪತ್ತಿಯೋ.

ವಿಸ್ಸಜ್ಜನಾ – ವಸ್ಸೂಪನಾಯಿಕಂ ವಿಸ್ಸಜ್ಜಿಸ್ಸಂ, ಸನಿದಾನಂ ಸನಿದ್ದೇಸಂ. ಸಮುಕ್ಕಟ್ಠಪದಾನಂ ಭನ್ತೇ ಏಕಾ ಆಪತ್ತಿ.

೪. ಪವಾರಣಾಕ್ಖನ್ಧಕ

ಪುಚ್ಛಾ – ವಸ್ಸಂ ¶ ವುಟ್ಠಾನಂ ಆವುಸೋ ಭಿಕ್ಖೂನಂ ತೀಹಿ ಠಾನೇಹಿ ಪವಾರಿತುಂ ಭಗವತಾ ಕತ್ಥ ಪಞ್ಞತ್ತಂ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಪಞ್ಞತ್ತಂ.

ವಿಸ್ಸಜ್ಜನಾ – ಸಾವತ್ಥಿಯಂ ಭನ್ತೇ ಸಮ್ಬಹುಲೇ ಭಿಕ್ಖೂ ಆರಬ್ಭ ಅನುಞ್ಞಾತಂ, ಸಮ್ಬಹುಲಾ ಭನ್ತೇ ಭಿಕ್ಖೂ ಸನ್ದಿಟ್ಠಾ ಸಮ್ಭತ್ತಾ ಅನ್ತೋವಸ್ಸಂ ನೇವ ಆಲಪಿಂಸು ನ ಸಲ್ಲಪಿಂಸು, ತಸ್ಮಿಂ ಭನ್ತೇ ವತ್ಥುಸ್ಮಿಂ ಅನುಞ್ಞಾತಂ.

ಅನುಜಾನಾಮಿ ¶ ಭಿಕ್ಖವೇ ವಸ್ಸಂ ವುಟ್ಠಾನಂ ಭಿಕ್ಖೂನಂ ತೀಹಿ ಠಾನೇಹಿ ಪವಾರೇತುಂ, ದಿಟ್ಠೇವ ವಾ ಸುತೇನ ವಾ ಪರಿಸಙ್ಕಾಯ ವಾ.

ಪುಚ್ಛಾ – ಕತಿ ಆವುಸೋ ಪವಾರಣಾ ದಿವಸವಸೇನ ಚ ಪುಗ್ಗಲವಸೇನ ಚ ಕಾತಬ್ಬಾಕಾರವಸೇನ ಚ.

ವಿಸ್ಸಜ್ಜನಾ – ದಿವಸವಸೇನ ಭನ್ತೇ ತಿಸ್ಸೋ ಪವಾರಣಾ, ತಥಾ ಪುಗ್ಗಲವಸೇನ ಕಾತಬ್ಬಾಕಾರವಸೇನಚ.

ಪುಚ್ಛಾ – ಕತೀನಂ ¶ ಆವುಸೋ ಸಙ್ಘೇ ಪವಾರೇತುಂ ಭಗವತಾ ಅನುಞ್ಞಾತಂ, ಕತೀನಂ ಪನಾವುಸೋ ಅಞ್ಞಮಞ್ಞಂ ಪವಾರೇತುಂ ಭಗವತಾ ಅನುಞ್ಞಾತಂ.

ವಿಸ್ಸಜ್ಜನಾ – ಪಞ್ಚನ್ನಂ ಭನ್ತೇ ಭಿಕ್ಖೂನಂ ಸಙ್ಘೇ ಪವಾರೇತುಂ ಭಗವತಾ ಅನುಞ್ಞಾತಂ, ಚತುನ್ನಂ ವಾ ಭನ್ತೇ ತಿಣ್ಣಂ ವಾ ದ್ವಿನ್ನಂ ವಾ ಅಞ್ಞಮಞ್ಞಂ ಪವಾರೇತುಂ ಅನುಞ್ಞಾತಂ.

ಪುಚ್ಛಾ – ಏಕೇನ ಪನಾವುಸೋ ವಸ್ಸಂವುಟ್ಠೇನ ಭಿಕ್ಖುನಾ ಕಥಂ ಪಟಿಪಜ್ಜಿತಬ್ಬನ್ತಿ ಭಗವತಾ ಅನುಞ್ಞಾತಂ.

ವಿಸ್ಸಜ್ಜನಾ – ಏಕೇನ ಪನ ಭನ್ತೇ ಭಿಕ್ಖುನಾ ‘‘ಅಜ್ಜ ಮೇ ಪವಾರಣಾ’’ತಿ ಅಧಿಟ್ಠಾತಬ್ಬನ್ತಿ ಭಗವತಾ ಅನುಞ್ಞಾತಂ.

ಪುಚ್ಛಾ – ಪವಾರಣಂ ¶ ಪುಚ್ಛಿಸ್ಸಂ, ಸನಿದಾನಂ ಸನಿದ್ದೇಸಂ. ಸಮುಕ್ಕಟ್ಠಪದಾನಂ ಆವುಸೋ ಕತಿ ಆಪತ್ತಿಯೋ.

ವಿಸ್ಸಜ್ಜನಾ – ಪವಾರಣಂ ವಿಸ್ಸಜ್ಜಿಸ್ಸಂ, ಸನಿದಾನಂ ಸನಿದ್ದೇಸಂ. ಸಮುಕ್ಕಟ್ಠಪದಾನಂ ಭನ್ತೇ ತಿಸ್ಸೋ ಆಪತ್ತಿಯೋ.

೫. ಚಮ್ಮಕ್ಖನ್ಧಕ

ಸೋಣಮಥೇರ ವತ್ಥು

ಪುಚ್ಛಾ – ಉಪಾಹನಂ ¶ ಆವುಸೋ ಭಗವತಾ ಕತ್ಥ ಅನುಞ್ಞಾತಂ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಅನುಞ್ಞಾತಂ.

ವಿಸ್ಸಜ್ಜನಾ – ರಾಜಗಹೇ ಭನ್ತೇ ಆಯಸ್ಮನ್ತಂ ಸೋಣಂ ಆರಬ್ಭ ಅನುಞ್ಞಾತಂ, ಆಯಸ್ಮತೋ ಭನ್ತೇ ಸೋಣಸ್ಸ ಅಚ್ಚಾರದ್ಧವೀರಿಯಸ್ಸ ಚಙ್ಕಮತೋ ಪಾದಾ ಭಿಜ್ಜಿಂಸು, ಚಙ್ಕಮೋ ಲೋಹಿತೇನ ಫುಟೋ ಅಹೋಸಿ, ತಸ್ಮಿಂ ಭನ್ತೇ ವತ್ಥುಸ್ಮಿಂ ಅನುಞ್ಞಾತಂ.

ಪುಚ್ಛಾ – ಸಬ್ಬನೀಲಿಕಾ ¶ ವಾ ಆವುಸೋ ಸಬ್ಬಪೀತಿಕಾ ವಾ ಸಬ್ಬಲೋಹಿತಿಕಾ ವಾ ಸಬ್ಬಮಞ್ಜಿಟ್ಠಿಕಾ ವಾ ಸಬ್ಬಕಣ್ಹಾ ವಾ ಸಬ್ಬಮಹಾರಙ್ಗರತ್ತಾ ವಾ ಸಬ್ಬಮಹಾನಾಮರತ್ತಾ ¶ ವಾ ಉಪಾಹನಾಯೋ ಧಾರೇನ್ತಸ್ಸ ದುಕ್ಕಟಂ ಭಗವತಾ ಕತ್ಥ ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಪಞ್ಞತ್ತಂ.

ವಿಸ್ಸಜ್ಜನಾ – ರಾಜಗಹೇ ಭನ್ತೇ ಛಬ್ಬಗ್ಗಿಯೇ ಭಿಕ್ಖೂ ಆರಬ್ಭ ಪಞ್ಞತ್ತಂ, ಛಬ್ಬಗ್ಗಿಯಾ ಭನ್ತೇ ಭಿಕ್ಖೂ ಸಬ್ಬನೀಲಿಕಾಯೋ ಉಪಾಹನಾಯೋ ಧಾರೇಸುಂ, ಸಬ್ಬಪೀತಿಕಾಯೋ ಸಬ್ಬಲೋಹಿತಿಕಾಯೋ ಸಬ್ಬಮಞ್ಜಿಟ್ಠಿಕಾಯೋ ಸಬ್ಬಕಣ್ಹಾಯೋ ಸಬ್ಬಮಹಾರಙ್ಗರತ್ತಾ ಸಬ್ಬಮಹಾನಾಮರತ್ತಾಯೋಪಿ ಉಪಾಹನಾಯೋ ಧಾರೇಸುಂ, ತಸ್ಮಿಂ ಭನ್ತೇ ವತ್ಥುಸ್ಮಿಂ ಪಞ್ಞತ್ತಂ.

ಪುಚ್ಛಾ – ಖಲ್ಲಕಬನ್ಧಾ ¶ ವಾ ಆವುಸೋ ಪುಟಬನ್ಧಾ ವಾ ಪಾಲಿಗುಣ್ಠಿಮಾ ವಾ ತೂಲಪುಣ್ಣಿಕಾ ವಾ ತಿತ್ತಿರಪತ್ತಿಕಾ ವಾ ಮೇಣ್ಡವಿಸಾಣವದ್ಧಿಕಾ ವಾ ಅಜವಿಸಾಣವದ್ಧಿಕಾ ವಾ ವಿಚ್ಛಿಕಾಳಿಕಾ ವಾ ಮೋರಪಿಞ್ಛ ಪರಿಸಿಬ್ಬಿಕಾ ವಾ ಚಿತ್ರಾ ವಾ ಉಪಾಹನಾಯೋ ಧಾರೇನ್ತಸ್ಸ ದುಕ್ಕಟಂ ಭಗವತಾ ಕತ್ಥ ಪಞ್ಞತ್ತಂ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಪಞ್ಞತ್ತಂ.

ವಿಸ್ಸಜ್ಜನಾ – ರಾಜಗಹೇ ಭನ್ತೇ ಛಬ್ಬಗ್ಗಿಯೇ ಭಿಕ್ಖೂ ಆರಬ್ಭ ಪಞ್ಞತ್ತಂ, ಛಬ್ಬಗ್ಗಿಯಾ ಭನ್ತೇ ಭಿಕ್ಖೂ ಖಲ್ಲಕಬನ್ಧಾ ಉಪಾಹನಾಯೋಪಿ ಧಾರೇಸುಂ, ಪುಟಬನ್ಧಾ ಉಪಾಹನಾಯೋಪಿ ಧಾರೇಸುಂ, ಪಾಲಿಗುಣ್ಠಿಮಾ ಉಪಾಹನಾಯೋಪಿ ಧಾರೇಸುಂ, ತೂಲಪುಣ್ಣಿಕಾ ಉಪಾಹನಾಯೋಪಿ ಧಾರೇಸುಂ, ತಿತ್ತಿರಪತ್ತಿಕಾ ಉಪಾಹನಾಯೋಪಿ ಧಾರೇಸುಂ, ಮೇಣ್ಡವಿಸಾಣವದ್ಧಿಕಾ ಉಪಾಹನಾಯೋಪಿ ಧಾರೇಸುಂ, ಅಜವಿಸಾಣವದ್ಧಿಕಾ ಉಪಾಹನಾಯೋಪಿ ಧಾರೇಸುಂ, ವಿಚ್ಛಿಕಾಳಿಕಾ ಉಪಾಹನಾಯೋಪಿ ಧಾರೇಸುಂ, ಮೋರಪಿಞ್ಛ ಪರಿಸಿಬ್ಬಿತಾ ಉಪಾಹನಾಯೋ ಧಾರೇಸುಂ, ಚಿತ್ರಾ ಉಪಾಹನಾಯೋಪಿ ಧಾರೇಸುಂ, ತಸ್ಮಿಂ ಭನ್ತೇ ವತ್ಥುಸ್ಮಿಂ ಪಞ್ಞತ್ತಂ.

ಪುಚ್ಛಾ – ಕಟ್ಠಪಾದುಕಾಯೋ ¶ ಆವುಸೋ ಧಾರೇನ್ತಸ್ಸ ದುಕ್ಕಟಂ ಭಗವತಾ ಕತ್ಥ ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಪಞ್ಞತ್ತಂ.

ವಿಸ್ಸಜ್ಜನಾ – ರಾಜಗಹೇ ಭನ್ತೇ ಛಬ್ಬಗ್ಗೀಯೇವ ಭಿಕ್ಖೂ ಆರಬ್ಭ ಪಞ್ಞತ್ತಂ, ಛಬ್ಬಗ್ಗಿಯಾ ಭನ್ತೇ ಭಿಕ್ಖೂ ರತ್ತಿಯಾ ಪಚ್ಚೂಸಸಮಯಂ ಪಚ್ಚುಟ್ಠಾಯ ಕಟ್ಠಪಾದುಕಾಯೋ ಅಭಿರುಹಿತ್ವಾ ಅಜ್ಝೋಕಾಸೇ ಚಙ್ಕಮನ್ತಿ ಉಚ್ಚಾಸದ್ದಾ ಮಹಾಸದ್ದಾ ಖಟಖಟಸದ್ದಾ ಅನೇಕವಿಹಿತಂ ತಿರಚ್ಛಾನಕಥಂ ಕಥೇನ್ತಾ, ತಸ್ಮಿಂ ಭನ್ತೇ ವತ್ಥುಸ್ಮಿಂ ಪಞ್ಞತ್ತಂ.

ಪುಚ್ಛಾ – ಯಾನೇನ ¶ ಆವುಸೋ ಯಾಯನ್ತಸ್ಸ ದುಕ್ಕಟಂ ಭಗವತಾ ಕತ್ಥ ಪಞ್ಞತ್ತಂ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಪಞ್ಞತ್ತಂ.

ವಿಸ್ಸಜ್ಜನಾ – ಸಾವತ್ಥಿಯಂ ಭನ್ತೇ ಛಬ್ಬಗ್ಗಿಯೇ ಭಿಕ್ಖೂ ಆರಬ್ಭ ಪಞ್ಞತ್ತಂ, ಛಬ್ಬಗ್ಗಿಯಾ ಭನ್ತೇ ಭಿಕ್ಖೂ ಯಾನೇನ ಯಾಯಿಂಸು, ತಸ್ಮಿಂ ಭನ್ತೇ ವತ್ಥುಸ್ಮಿಂ ಪಞ್ಞತ್ತಂ.

ಪುಚ್ಛಾ – ಗಿಲಾನಸ್ಸ ¶ ಆವುಸೋ ಯಾನಂ ಭಗವತಾ ಕತ್ಥ ಅನುಞ್ಞಾತಂ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಅನುಞ್ಞಾತಂ.

ವಿಸ್ಸಜ್ಜನಾ – ಸಾವತ್ಥಿಯಂ ಭನ್ತೇ ಅಞ್ಞತರಂ ಗಿಲಾನಂ ಭಿಕ್ಖುಂ ಆರಬ್ಭ ಅನುಞ್ಞಾತಂ, ಅಞ್ಞತರೋ ಭನ್ತೇ ಭಿಕ್ಖು ಕೋಸಲೇಸು ಜನಪದೇ ಸಾವತ್ಥಿಂ ಗಚ್ಛನ್ತೋ ಭಗವನ್ತಂ ದಸ್ಸನಾಯ ಅನ್ತರಾಮಗ್ಗೇ ಗಿಲಾನೋ ಕುಕ್ಕುಚ್ಚಾಯನ್ತೋ ಯಾನಂ ನಾಭಿರುಹಿ, ತಸ್ಮಿಂ ಭನ್ತೇ ವತ್ಥುಸ್ಮಿಂ ಅನುಞ್ಞಾತಂ.

ಪುಚ್ಛಾ – ಉಚ್ಚಾಸಯನಮಹಾಸಯನಾನಿ ¶ ಆವುಸೋ ಧಾರೇನ್ತಸ್ಸ ದುಕ್ಕಟಂ ಭಗವತಾ ಕತ್ಥ ಪಞ್ಞತ್ತಂ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಪಞ್ಞತ್ತಂ.

ವಿಸ್ಸಜ್ಜನಾ – ಸಾವತ್ಥಿಯಂ ಭನ್ತೇ ಛಬ್ಬಗ್ಗಿಯೇ ಭಿಕ್ಖೂ ಆರಬ್ಭ ಪಞ್ಞತ್ತಂ, ಛಬ್ಬಗ್ಗಿಯಾ ಭನ್ತೇ ಭಿಕ್ಖೂ ಉಚ್ಚಾಸಯನಮಹಾಸಯನಾನಿ ಧಾರೇಸುಂ, ತಸ್ಮಿಂ ಭನ್ತೇ ವತ್ಥುಸ್ಮಿಂ ಪಞ್ಞತ್ತಂ.

ಪುಚ್ಛಾ – ಗೋಚಮ್ಮಾನಿ ಆವುಸೋ ಧಾರೇನ್ತಸ್ಸ ದುಕ್ಕಟಂ ಭಗವತಾ ಕತ್ಥ ಪಞ್ಞತ್ತಂ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಪಞ್ಞತ್ತಂ.

ವಿಸ್ಸಜ್ಜನಾ – ಸಾವತ್ಥಿಯಂ ಭನ್ತೇ ಅಞ್ಞತರಂ ಪಾಪಭಿಕ್ಖುಂ ಆರಬ್ಭ ಪಞ್ಞತ್ತಂ, ಅಞ್ಞತರೋ ಭನ್ತೇ ಭಿಕ್ಖು ಪಾಣಾತಿಪಾತೇ ಸಮಾದಪೇಸಿ, ತಸ್ಮಿಂ ಭನ್ತೇ ವತ್ಥುಸ್ಮಿಂ ಪಞ್ಞತ್ತಂ.

ಪುಚ್ಛಾ – ಪಚ್ಚನ್ತಿಮೇಸು ¶ ಆವುಸೋ ಜನಪದೇಸು ವಿನಯಧರಪಞ್ಚಮೇನ ಗಣೇನ ಉಪಸಮ್ಪದಾ ಚ ಗುಣಙ್ಗುಣೂಪಹನಞ್ಚ ಧುವನಹಾನಞ್ಚ ಚಮ್ಮಾನಿ ಅತ್ಥರಣಾನಿ ಚ ನಿಸ್ಸೀಮಗತಾನಂ ಚೀವರದಾನಞ್ಚಾತಿ ಇಮಾನಿ ಪಞ್ಚ ಭಗವತಾ ಕತ್ಥ ಅನುಞ್ಞಾತಾನಿ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಅನುಞ್ಞಾತಾನಿ.

ವಿಸ್ಸಜ್ಜನಾ – ಸಾವತ್ಥಿಯಂ ಭನ್ತೇ ಆಯಸ್ಮನ್ತಂ ಸೋಣಂ ಕುಟಿಕಣ್ಣಂ ಆರಬ್ಭ ಅನುಞ್ಞಾತಾ, ಆಯಸ್ಮಾ ಭನ್ತೇ ಸೋಣೋ ಕುಟಿಕಣ್ಣೋ ಏತಾನಿ ಪಞ್ಚವತ್ಥೂನಿ ಆಯಸ್ಮತೋ ಮಹಾಕಚ್ಚಾನಸ್ಸ ವಚನೇನ ಭಗವನ್ತಂ ಯಾಚಿ, ತಸ್ಮಿಂ ಭನ್ತೇ ವತ್ಥುಸ್ಮಿಂ ಅನುಞ್ಞಾತಾ.

ಪುಚ್ಛಾ – ಚಮ್ಮಸಞ್ಞುತ್ತಂ ¶ ಪುಚ್ಛಿಸ್ಸಂ, ಸನಿದಾನಂ ಸನಿದ್ದೇಸಂ. ಸಮುಕ್ಕಟ್ಠಪದಾನಂ ಆವುಸೋ ಕತಿ ಆಪತ್ತಿಯೋ.

ವಿಸ್ಸಜ್ಜನಾ – ಚಮ್ಮಸಞ್ಞುತ್ತಂ ವಿಸ್ಸಜ್ಜಿಸ್ಸಂ, ಸನಿದಾನಂ ಸನಿದ್ದೇಸಂ. ಸಮುಕ್ಕಟ್ಠಪದಾನಂ ಭನ್ತೇ ತಿಸ್ಸೋ ಆಪತ್ತಿಯೋ.

೬. ಭೇಸಜ್ಜಕ್ಖನ್ಧಕ

ಪುಚ್ಛಾ – ಪಞ್ಚ ¶ ಆವುಸೋ ಭೇಸಜ್ಜಾನಿ ಪಟಿಗ್ಗಹೇತ್ವಾ ಕಾಲೇಪಿ ವಿಕಾಲೇಪಿ ಪರಿಭುಞ್ಜಿತುಂ ಭಗವತಾ ಕತ್ಥ ಅನುಞ್ಞಾತಂ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಅನುಞ್ಞಾತಂ.

ವಿಸ್ಸಜ್ಜನಾ – ಸಾವತ್ಥಿಯಂ ಭನ್ತೇ ಸಮ್ಬಹುಲೇ ಭಿಕ್ಖೂ ಆರಬ್ಭ ಅನುಞ್ಞಾತಂ, ಸಮ್ಬಹುಲಾನಂ ಭನ್ತೇ ಭಿಕ್ಖೂನಂ ಸಾರದಿಕೇನ ಆಬಾಧೇನ ಪುಟ್ಠಾನಂ ಯಾಗುಪಿ ನ ಸಮ್ಮಾ ಪರಿಣಾಮಂ ಗಚ್ಛಿ, ಭತ್ತಮ್ಪಿ ಭುತ್ತಂ ನ ಸಮ್ಮಾ ಪರಿಣಾಮಂ ಗಚ್ಛಿ, ತೇ ತೇನ ಕಿಸಾ ಅಹೇಸುಂ ಲೂಖಾ ದುಬ್ಬಣ್ಣಾ ಉಪ್ಪಣ್ಡುಪ್ಪಣ್ಡುಕಜಾತಾ ಧಮನಿಸನ್ಥತಗತ್ತಾ, ತಸ್ಮಿಂ ಭನ್ತೇ ವತ್ಥುಸ್ಮಿಂ ಅನುಞ್ಞಾತಂ.

ಪುಚ್ಛಾ – ಮೂಲಾದಿಭೇಸಜ್ಜಾನಿ ¶ ಆವುಸೋ ಭಗವತಾ ಕತ್ಥ ಅನುಞ್ಞಾತಾನಿ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಅನುಞ್ಞಾತಾನಿ.

ವಿಸ್ಸಜ್ಜನಾ – ಸಾವತ್ಥಿಯಂ ಭನ್ತೇ ಸಮ್ಬಹುಲೇ ಗಿಲಾನೇ ಭಿಕ್ಖೂ ಆರಬ್ಭ ಅನುಞ್ಞಾತಾನಿ, ಸಮ್ಬಹುಲಾನಂ ಗಿಲಾನಾನಂ ಭಿಕ್ಖೂನಂ ಮೂಲೇಹಿ ಭೇಸಜ್ಜೇಹಿ ಅತ್ಥೋ ಅಹೋಸಿ, ತಸ್ಮಿಂ ಭನ್ತೇ ವತ್ಥುಸ್ಮಿಂ ಅನುಞ್ಞಾತಾನಿ.

ಪುಚ್ಛಾ – ಅನ್ತೋವುಟ್ಠಂವಾ ಆವುಸೋ ಅನ್ತೋಪಕ್ಕಂ ವಾ ಸಾಮಂಪಕ್ಕಂ ವಾ ಪರಿಭುಞ್ಜನ್ತಸ್ಸ ದುಕ್ಕಟಂ ಭಗವತಾ ಕತ್ಥ ಪಞ್ಞತ್ತಂ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಪಞ್ಞತ್ತಂ.

ವಿಸ್ಸಜ್ಜನಾ – ರಾಜಗಹೇ ಭನ್ತೇ ಆಯಸ್ಮನ್ತಂ ಆನನ್ದಂ ಆರಬ್ಭ ಪಞ್ಞತ್ತಂ, ಆಯಸ್ಮಾ ಭನ್ತೇ ಆನನ್ದೋ ಸಾಮಂ ತಿಲಮ್ಪಿ ತಣ್ಡುಲಮ್ಪಿ ಮುಗ್ಗಮ್ಪಿ ವಿಞ್ಞಾಪೇತ್ವಾ ಅನ್ತೋ ವಾಸೇತ್ವಾ ಅನ್ತೋ ಸಾಮಂ ಪಚಿ, ತಸ್ಮಿಂ ಭನ್ತೇ ವತ್ಥುಸ್ಮಿಂ ಪಞ್ಞತ್ತಂ.

ಸುಪ್ಪಿಯಾ ವತ್ಥು

ಪುಚ್ಛಾ – ಮನುಸ್ಸಮಂಸಂ ¶ ಆವುಸೋ ಪರಿಭುಞ್ಜನ್ತಸ್ಸ ಥುಲ್ಲಚ್ಚಯಞ್ಚ ಅಪ್ಪಟಿವೇಕ್ಖಿತ್ವಾ ಮಂಸಂ ಪರಿಭುಞ್ಜನ್ತಸ್ಸ ದುಕ್ಕಟಞ್ಚ ಭಗವತಾ ಕತ್ಥ ಪಞ್ಞತ್ತಂ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಪಞ್ಞತ್ತಂ.

ವಿಸ್ಸಜ್ಜನಾ – ಬಾರಾಣಸಿಯಂ ಭನ್ತೇ ಅಞ್ಞತರಂ ಭಿಕ್ಖುಂ ಆರಬ್ಭ ಪಞ್ಞತ್ತಂ, ಅಞ್ಞತರೋ ಭನ್ತೇ ಭಿಕ್ಖು ಅಪ್ಪಟಿವೇಕ್ಖಿತ್ವಾ ಮನುಸ್ಸಮಂಸಂ ಭುಞ್ಜಿ, ತಸ್ಮಿಂ ಭನ್ತೇ ವತ್ಥುಸ್ಮಿಂ ಪಞ್ಞತ್ತಂ.

ನ ¶ ಭಿಕ್ಖವೇ ಮನುಸ್ಸಮಂಸಂ ಪರಿಭುಞ್ಜಿತಬ್ಬಂ, ಯೋ ಪರಿಭುಞ್ಜೇಯ್ಯ, ಆಪತ್ತಿ ಥುಲ್ಲಚ್ಚಯಸ್ಸ, ನ ಚ ಭಿಕ್ಖವೇ ಅಪ್ಪಟಿವೇಕ್ಖಿತ್ವಾ ಮಂಸಂ ಪರಿಭುಞ್ಜಿತಬ್ಬಂ, ಯೋ ಪರಿಭುಞ್ಜೇಯ್ಯ ಆಪತ್ತಿ ದುಕ್ಕಟಸ್ಸ.

ಪುಚ್ಛಾ – ಹತ್ಥಿಮಂಸಂ ವಾ ಆವುಸೋ ಅಸ್ಸಮಂಸಂ ವಾ ಪರಿಭುಞ್ಜನ್ತಸ್ಸ ದುಕ್ಕಟಂ ಭಗವತಾ ಕತ್ಥ ಪಞ್ಞತ್ತಂ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಪಞ್ಞತ್ತಂ.

ವಿಸ್ಸಜ್ಜನಾ – ಬಾರಾಣಸಿಯಂ ಭನ್ತೇ ಸಮ್ಬಹುಲೇ ಭಿಕ್ಖೂ ಆರಬ್ಭ ಪಞ್ಞತ್ತಂ, ಸಮ್ಬಹುಲಾ ಭನ್ತೇ ಭಿಕ್ಖೂ ಹತ್ಥಿಮಂಸಮ್ಪಿ ಅಸ್ಸಮಂಸಮ್ಪಿ ಪರಿಭುಞ್ಜಿಂಸು, ತಸ್ಮಿಂ ಭನ್ತೇ ವತ್ಥುಸ್ಮಿಂ ಪಞ್ಞತ್ತಂ.

ಪುಚ್ಛಾ – ಸುನಕ್ಖಮಂಸಂ ¶ ವಾ ಆವುಸೋ ಅಹಿಮಂಸಂ ವಾ ಭುಞ್ಜನ್ತಸ್ಸ ದುಕ್ಕಟಂ ಭಗವತಾ ಕತ್ಥ ಪಞ್ಞತ್ತಂ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಪಞ್ಞತ್ತಂ.

ವಿಸ್ಸಜ್ಜನಾ – ಬಾರಾಣಸಿಯಂ ಭನ್ತೇ ಸಮ್ಬಹುಲೇ ಭಿಕ್ಖೂ ಆರಬ್ಭ ಪಞ್ಞತ್ತಂ, ಸಮ್ಬಹುಲಾ ಭನ್ತೇ ಭಿಕ್ಖೂ ಸುನಕ್ಖಮಂಸಮ್ಪಿ ಅಹಿಮಂಸಮ್ಪಿ ಪರಿಭುಞ್ಜಿಂಸು, ತಸ್ಮಿಂ ಭನ್ತೇ ವತ್ಥುಸ್ಮಿಂ ಪಞ್ಞತ್ತಂ.

ಪುಚ್ಛಾ – ಸೀಹಮಂಸಂ ¶ ವಾ ಆವುಸೋ ಬ್ಯಗ್ಘಮಂಸಂ ವಾ ದೀಪಿಮಂಸಂ ವಾ ಅಚ್ಛಮಂಸಂ ವಾ ತರಚ್ಛಮಂಸಂ ವಾ ಭುಞ್ಜನ್ತಸ್ಸ ದುಕ್ಕಟಂ ಭಗವತಾ ಕತ್ಥ ಪಞ್ಞತ್ತಂ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಪಞ್ಞತ್ತಂ.

ವಿಸ್ಸಜ್ಜನಾ – ಬಾರಾಣಸಿಯಂಯೇವ ಭನ್ತೇ ಸಮ್ಬಹುಲೇ ಭಿಕ್ಖೂ ಆರಬ್ಭ ಪಞ್ಞತ್ತಂ, ಸಮ್ಬಹುಲಾ ಭನ್ತೇ ಭಿಕ್ಖೂ ಸೀಹಮಂಸಮ್ಪಿ ಬ್ಯಗ್ಘಮಂಸಮ್ಪಿ ದೀಪಿಮಂಸಮ್ಪಿ ಅಚ್ಛಮಂಸಮ್ಪಿ ತರಚ್ಛಮಂಸಮ್ಪಿ ಪರಿಭುಞ್ಜಿಂಸು, ತಸ್ಮಿಂ ಭನ್ತೇ ವತ್ಥುಸ್ಮಿಂ ಪಞ್ಞತ್ತಂ.

ಪುಚ್ಛಾ – ಗಿಲಾನಸ್ಸ ¶ ಆವುಸೋ ಗುಳಂ ವಾ ಅಗಿಲಾನಸ್ಸ ಗುಳೋದಕಂ ವಾ ಭಗವತಾ ಕತ್ಥ ಅನುಞ್ಞಾತಂ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಅನುಞ್ಞಾತಂ.

ವಿಸ್ಸಜ್ಜನಾ – ರಾಜಗಹೇ ಭನ್ತೇ ಸಮ್ಬಹುಲೇ ಭಿಕ್ಖೂ ಆರಬ್ಭ ಅನುಞ್ಞಾತಂ, ಸಮ್ಬಹುಲಾ ಭನ್ತೇ ಭಿಕ್ಖೂ ಗಿಲಾನಸ್ಸೇವ ಭಗವತಾ ಗುಳೋ ಅನುಞ್ಞಾತೋ ನೋ ಅಗಿಲಾನಸ್ಸಾತಿ ಕುಕ್ಕುಚ್ಚಾಯನ್ತಾ ಗುಳಂ ನ ಭುಞ್ಜಿಂಸು, ತಸ್ಮಿಂ ಭನ್ತೇ ವತ್ಥುಸ್ಮಿಂ ಅನುಞ್ಞಾತಂ.

ಪುಚ್ಛಾ – ಜಾನಂ ¶ ಆವುಸೋ ಉದ್ದಿಸ್ಸ ಕತಂ ಮಂಸಂ ಪರಿಭುಞ್ಜನ್ತಸ್ಸ ದುಕ್ಕಟಂ ಪಞ್ಞಪೇತ್ವಾ ತಿಕೋಟಿಪರಿಸುದ್ಧಂ ಮಂಸಂ ಭಗವತಾ ಕತ್ಥ ಅನುಞ್ಞಾತಂ.

ವಿಸ್ಸಜ್ಜನಾ – ವೇಸಾಲಿಯಂ ಭನ್ತೇ ಸೀಹಸ್ಸ ಸೇಟಾಪತಿನೋ ವತ್ಥುಸ್ಮಿಂ ಅನುಞ್ಞಾತಂ.

ಮೇಣ್ಡಕ ವತ್ಥು

ಪುಚ್ಛಾ – ಪಾಥೇಯ್ಯಂ ¶ ಆವುಸೋ ಪರಿಯೇಸಿತುಞ್ಚ ಕಪ್ಪಿಯಕಾರಕಾನಂ ಹತ್ಥೇ ಉಪನಿಕ್ಖಿತ್ತಹಿರಞ್ಞತೋ ನಿಬ್ಬತ್ತಂ ಕಪ್ಪಿಯಪಚ್ಚಯಂ ಸಾದಿತುಞ್ಚ ಭಗವತಾ ಕತ್ಥ ಅನುಞ್ಞಾತಂ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಅನುಞ್ಞಾತಂ.

ವಿಸ್ಸಜ್ಜನಾ – ಅನ್ತರಾ ¶ ಚ ಭನ್ತೇ ಭದ್ದಿಯಂ ಅನ್ತರಾ ಚ ಅಙ್ಗುತ್ತರಾಪಂ ಮೇಣ್ಡಕಂ ಗಹಪತಿಂ ಆರಬ್ಭ ಅನುಞ್ಞಾತಂ, ಮೇಣ್ಡಕೋ ಭನ್ತೇ ಗಹಪತಿ ಭಗವನ್ತಂ ಯಾಚಿ ‘‘ಸನ್ತಿ ಭನ್ತೇ ಮಗ್ಗಾ ಕನ್ತಾರಾ ಅಪ್ಪೋದಕಾ ಅಪ್ಪಭಕ್ಖಾ ನ ಸುಕರಾ ಅಪಾಥೇಯ್ಯೇನ ಗನ್ತುಂ, ಸಾಧು ಭನ್ತೇ ಭಗವಾ ಭಿಕ್ಖೂನಂ ಪಾಥೇಯ್ಯಂ ಅನುಜಾನಾತೂ’’ತಿ, ತಸ್ಮಿಂ ಭನ್ತೇ ವತ್ಥುಸ್ಮಿಂ ಅನುಞ್ಞಾತಂ.

ಕೇಣಿಯ ವತ್ಥು

ಪುಚ್ಛಾ – ಅಟ್ಠ ¶ ಆವುಸೋ ಪಾನಾನಿ ಭಗವತಾ ಕತ್ಥ ಅನುಞ್ಞಾತಾನಿ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಅನುಞ್ಞಾತಾನಿ.

ವಿಸ್ಸಜ್ಜನಾ – ಆಪಣೇ ಭನ್ತೇ ಸಮ್ಬಹುಲೇ ಭಿಕ್ಖೂ ಆರಬ್ಭ ಅನುಞ್ಞಾತಾನಿ, ಸಮ್ಬಹುಲಾ ಭನ್ತೇ ಭಿಕ್ಖೂ ಕುಕ್ಕುಚ್ಚಾಯನ್ತಾ ಪಾನಾನಿ ನ ಪಟಿಗ್ಗಣ್ಹಿಂಸು, ತಸ್ಮಿಂ ಭನ್ತೇ ವತ್ಥುಸ್ಮಿಂ ಅನುಞ್ಞಾತಾನಿ.

ರೋಜಮಲ್ಲಾ ವತ್ಥು

ಪುಚ್ಛಾ – ಸಬ್ಬಞ್ಚ ¶ ಆವುಸೋ ಡಾಕಂ ಸಬ್ಬಞ್ಚ ಪಿಟ್ಠಖಾದನೀಯಂ ಭಗವತಾ ಕತ್ಥ ಅನುಞ್ಞಾತಂ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಅನುಞ್ಞಾತಂ.

ವಿಸ್ಸಜ್ಜನಾ – ಕುಸಿನಾರಾಯಂ ಭನ್ತೇ ಸಮ್ಬಹುಲೇ ಭಿಕ್ಖೂ ಆರಬ್ಭ ಅನುಞ್ಞಾತಂ, ಸಮ್ಬಹುಲಾ ಭನ್ತೇ ಭಿಕ್ಖೂ ಕುಕ್ಕುಚ್ಚಾಯನ್ತಾ ಡಾಕಞ್ಚ ಪಿಟ್ಠಖಾದನೀಯಞ್ಚ ನ ಪಟಿಗ್ಗಹೇಸುಂ, ತಸ್ಮಿಂ ಭನ್ತೇ ವತ್ಥುಸ್ಮಿಂ ಅನುಞ್ಞಾತಂ.

ಪುಚ್ಛಾ – ಅಕಪ್ಪಿಯಂ ¶ ಆವುಸೋ ಸಮಾದಪೇನ್ತಸ್ಸ ದುಕ್ಕಟಂ ಭಗವತಾ ಕತ್ಥ ಪಞ್ಞತ್ತಂ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಪಞ್ಞತ್ತಂ.

ವಿಸ್ಸಜ್ಜನಾ – ಆತುಮಾಯಂ ಭನ್ತೇ ಅಞ್ಞತರಂ ವುಡ್ಢಪಬ್ಬಜಿತಂ ಆರಬ್ಭ ಪಞ್ಞತ್ತಂ, ಅಞ್ಞತರೋ ಭನ್ತೇ ವುಡ್ಢಪಬ್ಬಜಿತೋ ಅಕಪ್ಪಿಯೇ ಸಮಾದಪೇತಿ, ತಸ್ಮಿಂ ಭನ್ತೇ ವತ್ಥುಸ್ಮಿಂ ಪಞ್ಞತ್ತಂ.

ಪುಚ್ಛಾ – ಸಙ್ಘಿಕಾನಿ ¶ ವಾ ಆವುಸೋ ಪುಗ್ಗಲಿಕಾನಿ ವಾ ಬೀಜಾನಿ ಪುಗ್ಗಲಿಕಾಯ ವಾ ಸಙ್ಘಿಕಾಯ ವಾ ಭೂಮಿಯಾ ರೋಪಿತಾನಿ ಭಾಗಂ ದತ್ವಾ ಪರಿಭುಞ್ಜಿತುಂ ಭಗವತಾ ಕತ್ಥ ಅನುಞ್ಞಾತಂ, ಕಿಸ್ಮಿಂ ವತ್ಥುಸ್ಮಿಂ ಅನುಞ್ಞಾತಂ.

ವಿಸ್ಸಜ್ಜನಾ – ಸಾವತ್ಥಿಯಂ ಭನ್ತೇ ಅನುಞ್ಞಾತಂ, ಸಾವತ್ಥಿಯಂ ಭನ್ತೇ ಭಗವತಿ ವಿಹರತಿ ಸಙ್ಘಿಕಾನಿಪಿ ಬೀಜಾನಿ ಪುಗ್ಗಲಿಕಾಯ ಭೂಮಿಯಾ ರೋಪಿಯಿಂಸು, ಪುಗ್ಗಲಿಕಾನಿಪಿ ಬೀಜಾನಿ ಸಙ್ಘಿಕಾಯ ಭೂಮಿಯಾ ರೋಪಿಯಿಂಸು, ತಸ್ಮಿಂ ಭನ್ತೇ ವತ್ಥುಸ್ಮಿಂ ಅನುಞ್ಞಾತಂ.

ಪುಚ್ಛಾ – ವಿನಯಮಹಾಪದೇಸಸಙ್ಖಾತಾನಿ ¶ ಆವುಸೋ ಚತ್ತಾರಿ ಕಪ್ಪಿಯಾಕಪ್ಪಿಯಅನುಲೋಮಾನಿ ಭಗವತಾ ಕತ್ಥ ಪಞ್ಞತ್ತಾನಿ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಪಞ್ಞತ್ತಾನಿ.

ವಿಸ್ಸಜ್ಜನಾ – ಸಾವತ್ಥಿಯಂ ಭನ್ತೇ ಸಮ್ಬಹುಲೇ ಭಿಕ್ಖೂ ಆರಬ್ಭ ಪಞ್ಞತ್ತಾನಿ, ಸಮ್ಬಹುಲಾನಂ ಭನ್ತೇ ಭಿಕ್ಖೂನಂ ಕಿಸ್ಮಿಞ್ಚಿ ಕಿಸ್ಮಿಞ್ಚಿಠಾನೇ ಕುಕ್ಕುಚ್ಚಂ ಉಪ್ಪಜ್ಜಿ, ತಸ್ಮಿಂ ಭನ್ತೇ ವತ್ಥುಸ್ಮಿಂ ಪಞ್ಞತ್ತಾನಿ.

ಪುಚ್ಛಾ – ಯಾವಕಾಲಿಕಾದೀಹಿ ¶ ಸಂಸಟ್ಠಾನಂ ಆವುಸೋ ಯಾಮಕಾಲಿಕಾದೀನಂ ಪರಿಭೋಗಕಾಲಮರಿಯಾದಂ ಭಗವತಾ ಕತ್ಥ ಪಞ್ಞತ್ತಂ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಪಞ್ಞತ್ತಂ.

ವಿಸ್ಸಜ್ಜನಾ – ಸಾವತ್ಥಿಯಂ ಭನ್ತೇ ಸಮ್ಬಹುಲೇ ಭಿಕ್ಖೂ ಆರಬ್ಭ ಪಞ್ಞತ್ತಂ, ಸಮ್ಬಹುಲಾನಂ ಭನ್ತೇ ಭಿಕ್ಖೂನಂ ಏತದಹೋಸಿ ‘‘ಕಪ್ಪತಿ ನುಖೋ ಯಾವಕಾಲಿಕೇನ ಯಾಮಕಾಲಿಕಂ ಸತ್ತಾಹಕಾಲಿಕಂ ಯಾವಜೀವಿಕಂ, ನ ನುಖೋ ಕಪ್ಪತಿ. ಕಪ್ಪತಿನುಖೋ ಯಾಮಕಾಲಿಕೇನ ಸತ್ತಾಹಕಾಲಿಕಂ ಯಾವಜೀವಿಕಂ, ನ ನುಖೋ ಕಪ್ಪತಿ. ಕಪ್ಪತಿ ನುಖೋ ಸತ್ತಾಹಕಾಲಿಕೇನ ಯಾವಜೀವಿಕಂ, ನ ನುಖೋ ಕಪ್ಪತೀ’’ತಿ. ತಸ್ಮಿಂ ಭನ್ತೇ ವತ್ಥುಸ್ಮಿಂ ಪಞ್ಞತ್ತಂ.

ಪುಚ್ಛಾ – ಭೇಸಜ್ಜಕಂ ¶ ಪುಚ್ಛಿಸ್ಸಂ, ಸನಿದಾನಂ ಸನಿದ್ದೇಸಂ. ಸಮುಕ್ಕಟ್ಠಪದಾನಂ ಆವುಸೋ ಕತಿ ಆಪತ್ತಿಯೋ.

ವಿಸ್ಸಜ್ಜನಾ – ಭೇಸಜ್ಜಕಂ ವಿಸ್ಸಜ್ಜಿಸ್ಸಂ ಸನಿದಾನಂ ಸನಿದ್ದೇಸಂ. ಸಮುಕ್ಕಟ್ಠಪದಾನಂ ಭನ್ತೇ ತಿಸ್ಸೋ ಆಪತ್ತಿಯೋ.

೭. ಕಥಿನಕ್ಖನ್ಧಕ

ಪುಚ್ಛಾ – ವಸ್ಸಂವುಟ್ಠಾನಂ ¶ ಆವುಸೋ ಭಿಕ್ಖೂನಂ ಕಥಿನಂ ಅತ್ಥರಿತುಂ ಭಗವತಾ ಕತ್ಥ ಅನುಞ್ಞಾತಂ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಅನುಞ್ಞಾತಂ.

ವಿಸ್ಸಜ್ಜನಾ – ಸಾವತ್ಥಿಯಂ ಭನ್ತೇ ತಿಂಸಮತ್ತೇ ಪಾವೇಯ್ಯಕೇ ಭಿಕ್ಖೂ ಆರಬ್ಭ ಅನುಞ್ಞಾತಂ, ತಿಂಸಮತ್ತಾ ಭನ್ತೇ ಪಾವೇಯ್ಯಕಾ ಭಿಕ್ಖೂ ಸಾವತ್ಥಿಂ ಆಗಚ್ಛನ್ತಾ ಭಗವನ್ತಂ ದಸ್ಸನಾಯ ಉಪಕಟ್ಠಾಯ ವಸ್ಸೂಪನಾಯಿಕಾಯ ನಾಸಕ್ಖಿಂಸು ಸಾವತ್ಥಿಯಂ ವಸ್ಸೂಪನಾಯಿಕಂ ಸಮ್ಭಾವೇತುಂ, ತಸ್ಮಿಂ ಭನ್ತೇ ವತ್ಥುಸ್ಮಿಂ ಅನುಞ್ಞಾತಂ.

ಪುಚ್ಛಾ – ಕಥಿನಕಂ ¶ ಪುಚ್ಛಿಸ್ಸಂ, ಸನಿದಾನಂ ಸನಿದ್ದೇಸಂ. ಸಮುಕ್ಕಟ್ಠಪದಾನಂ ಆವುಸೋ ಕತಿ ಆಪತ್ತಿಯೋ.

ವಿಸ್ಸಜ್ಜನಾ – ಕಥಿನಕಂ ವಿಸ್ಸಜ್ಜಿಸ್ಸಂ, ಸನಿದಾನಂ ಸನಿದ್ದೇಸಂ. ಸಮುಕ್ಕಟ್ಠಪದಾನಂ ಭನ್ತೇ ನ ಕತಮಾ ಆಪತ್ತಿ.

೮. ಚೀವರಕ್ಖನ್ಧಕ

ಜೀವಕವತ್ಥು

ಪುಚ್ಛಾ – ಗಹಪತಿಚೀವರಂ ¶ ಆವುಸೋ ಸಾದಿಯಿತುಂ ಭಗವತಾ ಕತ್ಥ ಅನುಞ್ಞಾತಂ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಅನುಞ್ಞಾತಂ.

ವಿಸ್ಸಜ್ಜನಾ – ರಾಜಗಹೇ ಭನ್ತೇ ಜೀವಕಂ ಕೋಮಾರಭಚ್ಚಂ ಆರಬ್ಭ ಅನುಞ್ಞಾತಂ, ಜೀವಕೋ ಭನ್ತೇ ಕೋಮಾರಭಚ್ಚೋ ಭಿಕ್ಖೂನಂ ಗಹಪತಿಚೀವರಂ ಅನುಜಾನಿತುಂ ಭಗವನ್ತಂ ಯಾಚಿ, ತಸ್ಮಿಂ ಭನ್ತೇ ವತ್ಥುಸ್ಮಿಂ ಅನುಞ್ಞಾತಂ.

ಪುಚ್ಛಾ – ಛ ¶ ಆವುಸೋ ರಜನಾನಿ ಭಗವತಾ ಕತ್ಥ ಅನುಞ್ಞಾತಾನಿ, ಕಿಸ್ಮಿಂ ವತ್ಥುಸ್ಮಿಂ ಅನುಞ್ಞಾತಾನಿ.

ವಿಸ್ಸಜ್ಜನಾ – ರಾಜಗಹೇ ಭನ್ತೇ ಸಮ್ಬಹುಲೇ ಭಿಕ್ಖೂ ಆರಬ್ಭ ಅನುಞ್ಞಾತಾನಿ, ಸಮ್ಬಹುಲಾ ಭನ್ತೇ ಭಿಕ್ಖೂ ಛಕಣೇನಪಿ ಪಣ್ಡುಮತ್ತಿಕಾಯಪಿ ಚೀವರಂ ರಜಿಂಸು, ಚೀವರಂ ದುಬ್ಬಣ್ಣಂ ಹೋತಿ, ತಸ್ಮಿಂ ಭನ್ತೇ ವತ್ಥುಸ್ಮಿಂ ಅನುಞ್ಞಾತಾನಿ.

ಪುಚ್ಛಾ – ಅಚ್ಛಿನ್ನಕಾನಿ ¶ ಆವುಸೋ ಚೀವರಾನಿ ಧಾರೇನ್ತಸ್ಸ ದುಕ್ಕಟಂ ಭಗವತಾ ಕತ್ಥ ಪಞ್ಞತ್ತಂ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಪಞ್ಞತ್ತಂ.

ವಿಸ್ಸಜ್ಜನಾ – ರಾಜಗಹೇ ಭನ್ತೇ ಸಮ್ಬಹುಲೇ ಭಿಕ್ಖೂ ಆರಬ್ಭ ಪಞ್ಞತ್ತಂ, ಸಮ್ಬಹುಲಾ ಭನ್ತೇ ಭಿಕ್ಖೂ ಅಚ್ಛಿನ್ನಕಾನಿ ಚೀವರಾನಿ ಧಾರೇಸುಂ ದನ್ತಕಸಾವಾನಿ, ತಸ್ಮಿಂ ಭನ್ತೇ ವತ್ಥುಸ್ಮಿಂ ಪಞ್ಞತ್ತಂ.

ಪುಚ್ಛಾ – ಕದಾ ಆವುಸೋ ಭಗವಾ ಅನುಞ್ಞಾಸಿ ಛಿನ್ನಕಂ ಸಙ್ಘಾಟಿಂ ಛಿನ್ನಕಂ ಉತ್ತರಾಸಙ್ಗಂ ಛಿನ್ನಕಂ ಅನ್ತರವಾಸಕಂ.

ವಿಸ್ಸಜ್ಜನಾ – ದಕ್ಖಿಣಾಗಿರಿತೋ ಭನ್ತೇ ಪಚ್ಛಾಗತಕಾಲೇ ಭಗವಾ ಅನುಞ್ಞಾಸಿ ಛಿನ್ನಕಂ ಸಙ್ಘಾಟಿಂ ಛಿನ್ನಕಂ ಉತ್ತರಾಸಙ್ಗಂ ಛಿನ್ನಕಂ ಅನ್ತರವಾಸಕಂ.

ಪುಚ್ಛಾ – ಅಗ್ಗಳಂ ¶ ಚ ಆವುಸೋ ತುನ್ನಞ್ಚ ಓವಟ್ಟಿಕಞ್ಚ ಕಣ್ಡುಸಕಞ್ಚ ದಳ್ಹೀಕಮ್ಮಞ್ಚ ಭಗವತಾ ಕತ್ಥ ಅನುಞ್ಞಾತಂ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಅನುಞ್ಞಾತಂ.

ವಿಸ್ಸಜ್ಜನಾ – ಬಾರಾಣಸಿಯಂ ಭನ್ತೇ ಅಞ್ಞತರಂ ಭಿಕ್ಖುಂ ಆರಬ್ಭ ಅನುಞ್ಞಾತಂ, ಅಞ್ಞತರೋ ಭನ್ತೇ ಭಿಕ್ಖು ಅಗ್ಗಳಂ ಅಚ್ಛುಪೇಸಿ, ತಸ್ಮಿಂ ಭನ್ತೇ ವತ್ಥುಸ್ಮಿಂ ಅನುಞ್ಞಾತಂ.

ಪುಚ್ಛಾ – ವಸ್ಸಿಕಸಾಟಿಕಾ ¶ ಚ ಆವುಸೋ ಆಗನ್ತುಕಭತ್ತಞ್ಚ ಗಮಿಕಭತ್ತಞ್ಚ ಗಿಲಾನಭತ್ತಞ್ಚ ಗಿಲಾನುಪಟ್ಠಾಕಭತ್ತಞ್ಚ ಗಿಲಾನಭೇಸಜ್ಜಞ್ಚ ಧುವಯಾಗು ಚ ಭಿಕ್ಖುನಿಸಙ್ಘಸ್ಸ ಉದಕಸಾಟಿಕಾಚಾತಿ ಇಮಾ ಅಟ್ಠ ಭಗವತಾ ಕತ್ಥ ಅನುಞ್ಞಾತಾ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಅನುಞ್ಞಾತಾ.

ವಿಸ್ಸಜ್ಜನಾ – ಸಾವತ್ಥಿಯಂ ಭನ್ತೇ ವಿಸಾಖಂ ಮಿಗಾರಮಾತರಂ ಆರಬ್ಭ ಅನುಞ್ಞಾತಾ, ವಿಸಾಖಾ ಭನ್ತೇ ಮಿಗಾರಮಾತಾ ಭಗವನ್ತಂ ಅಟ್ಠವರಾನಿ ಯಾಚಿ, ತಸ್ಮಿಂ ಭನ್ತೇ ವತ್ಥುಸ್ಮಿಂ ಅನುಞ್ಞಾತಾ.

ಪುಚ್ಛಾ – ಭಗವತಾ ¶ ಆವುಸೋ ಮಾತಾಪಿತೂನಂ ದಾನಂ ಅನುಜಾನಿತ್ವಾ ಸದ್ಧಾದೇಯ್ಯಂ ವಿನಿಪಾತೇನ್ತಸ್ಸ ದುಕ್ಕಟಂ ಕತ್ಥ ಪಞ್ಞತ್ತಂ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಪಞ್ಞತ್ತಂ.

ವಿಸ್ಸಜ್ಜನಾ – ಸಾವತ್ಥಿಯಂ ಭನ್ತೇ ಅಞ್ಞತರಂ ಭಿಕ್ಖುಂ ಆರಬ್ಭ ಪಞ್ಞತ್ತಂ, ಅಞ್ಞತರಸ್ಸ ಭನ್ತೇ ಭಿಕ್ಖುನೋ ಬಹುಂ ಚೀವರಂ ಉಪ್ಪನ್ನಂ ಅಹೋಸಿ, ಸೋ ಚ ತಂಚೀವರಂ ಮಾತಾಪಿತೂನಂ ದಾತುಕಾಮೋ ಅಹೋಸಿ, ತಸ್ಮಿಂ ಭನ್ತೇ ವತ್ಥುಸ್ಮಿಂ ಪಞ್ಞತ್ತಂ.

ಮಾತಾಪಿತರೋತಿ ¶ ಖೋ ಭಿಕ್ಖವೇ ದದಮಾನೇ ಕಿಂ ವದೇಯ್ಯಾಮ, ಅನುಜಾನಾಮಿ ಭಿಕ್ಖವೇ ಮಾತಾಪಿತೂನಂ ದಾತುಂ, ನ ಚ ಭಿಕ್ಖವೇ ಸದ್ಧಾದೇಯ್ಯಂ ವಿನಿಪಾತೇತಬ್ಬಂ, ಯೋ ವಿನಿಪಾತೇಯ್ಯ ಆಪತ್ತಿ ದುಕ್ಕಟಸ್ಸ –

ಪುಚ್ಛಾ – ಅಞ್ಞತ್ರ ವಸ್ಸಂ ವುಟ್ಠೇನ ಆವುಸೋ ಅಞ್ಞತ್ರ ಚೀವರಭಾಗಂ ಸಾದಿಯನ್ತಸ್ಸ ದುಕ್ಕಟಂ ಭಗವತಾ ಕತ್ಥ ಪಞ್ಞತ್ತಂ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಪಞ್ಞತ್ತಂ.

ವಿಸ್ಸಜ್ಜನಾ – ಸಾವತ್ಥಿಯಂ ಭನ್ತೇ ಆಯಸ್ಮನ್ತಂ ಉಪನನ್ದಂ ಸಕ್ಯಪುತ್ತಂ ಆರಬ್ಭ ಪಞ್ಞತ್ತಂ, ಆಯಸ್ಮಾ ಭನ್ತೇ ಉಪನನ್ದೋ ಸಕ್ಯಪುತ್ತೋ ಅಞ್ಞತ್ರ ವಸ್ಸಂ ವುಟ್ಠೋ ಅಞ್ಞತ್ರ ಚೀವರಭಾಗಂ ಸಾದಿಯಿ, ತಸ್ಮಿಂ ಭನ್ತೇ ವತ್ಥುಸ್ಮಿಂ ಪಞ್ಞತ್ತಂ.

ಪುಚ್ಛಾ – ಅನಾಥಕಂ ¶ ಆವುಸೋ ಭಿಕ್ಖುಂ ಗಿಲಾನಂ ನ ಉಪಟ್ಠಹನ್ತಸ್ಸ ದುಕ್ಕಟಂ ಭಗವತಾ ಕತ್ಥ ಪಞ್ಞತ್ತಂ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಪಞ್ಞತ್ತಂ.

ವಿಸ್ಸಜ್ಜನಾ – ಸಾವತ್ಥಿಯಂ ಭನ್ತೇ ಅಞ್ಞತರಂ ಭಿಕ್ಖುಂ ಆರಬ್ಭ ಪಞ್ಞತ್ತಂ, ಭಗವತಿ ಭನ್ತೇ ಸಾವತ್ಥಿಯಂ ವಿಹರತಿ ಅಞ್ಞತರಸ್ಸ ಭಿಕ್ಖುನೋ ಕುಚ್ಛಿವಿಕಾರಾಬಾಧೋ ಅಹೋಸಿ, ಸೋ ಸಕೇ ಮುತ್ತಕರೀಸೇ ಪಲಿಪನ್ನೋ ಸಯಿ, ತಸ್ಮಿಂ ಭನ್ತೇ ವತ್ಥುಸ್ಮಿಂ ಪಞ್ಞತ್ತಂ.

ಪುಚ್ಛಾ – ನಗ್ಗಿಯಂ ¶ ಆವುಸೋ ತಿತ್ಥಿಯಸಮಾದಾನಂ ಸಮಾದಿಯನ್ತಸ್ಸ ಥುಲ್ಲಚ್ಚಯಂ ಭಗವತಾ ಕತ್ಥ ಪಞ್ಞತ್ತಂ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಪಞ್ಞತ್ತಂ.

ವಿಸ್ಸಜ್ಜನಾ – ಸಾವತ್ಥಿಯಂ ಭನ್ತೇ ಅಞ್ಞತರಂ ಭಿಕ್ಖುಂ ಆರಬ್ಭ ಪಞ್ಞತ್ತಂ, ಅಞ್ಞತರೋ ಭನ್ತೇ ಭಿಕ್ಖು ನಗ್ಗಿಯಂ ತಿತ್ಥಿಯಸಮಾದಾನಂ ಸಮಾದಿಯಿ, ತಸ್ಮಿಂ ಭನ್ತೇ ವತ್ಥುಸ್ಮಿಂ ಪಞ್ಞತ್ತಂ.

ಪುಚ್ಛಾ – ಸಬ್ಬನೀಲಕಾನಿ ¶ ವಾ ಆವುಸೋ ಚೀವರಾನಿ ಸಬ್ಬಪೀತಕಾನಿ ವಾ ಸಬ್ಬಲೋಹಿತಕಾನಿ ವಾ ಸಬ್ಬಮಞ್ಜಿಟ್ಠಕಾನಿ ವಾ ಸಬ್ಬಕಣ್ಹಾನಿವಾತಿ ಏವರೂಪಾನಿ ಚೀವರಾನಿ ಧಾರೇನ್ತಸ್ಸ ದುಕ್ಕಟಂ ಭಗವತಾ ಕತ್ಥ ಪಞ್ಞತ್ತಂ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಪಞ್ಞತ್ತಂ.

ವಿಸ್ಸಜ್ಜನಾ – ಸಾವತ್ಥಿಯಂ ¶ ಭನ್ತೇ ಛಬ್ಬಗ್ಗಿಯೇ ಭಿಕ್ಖೂ ಆರಬ್ಭ ಪಞ್ಞತ್ತಂ, ಛಬ್ಬಗ್ಗಿಯಾ ಭನ್ತೇ ಭಿಕ್ಖೂ ಸಬ್ಬನೀಲಕಾದೀನಿ ಚೀವರಾನಿ ಧಾರೇಸುಂ, ತಸ್ಮಿಂ ಭನ್ತೇ ವತ್ಥುಸ್ಮಿಂ ಪಞ್ಞತ್ತಂ.

ಪುಚ್ಛಾ – ಕಞ್ಚುಕಂ ¶ ವಾ ಆವುಸೋ ವೇಠನಂ ವಾ ಧಾರೇನ್ತಸ್ಸ ದುಕ್ಕಟಂ ಭಗವತಾ ಕತ್ಥ ಪಞ್ಞತ್ತಂ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಪಞ್ಞತ್ತಂ.

ವಿಸ್ಸಜ್ಜನಾ – ಸಾವತ್ಥಿಯಂ ಭನ್ತೇ ಛಬ್ಬಗ್ಗಿಯೇವ ಭಿಕ್ಖೂ ಆರಬ್ಭ ಪಞ್ಞತ್ತಂ, ಛಬ್ಬಗ್ಗಿಯಾ ಭನ್ತೇ ಭಿಕ್ಖೂ ಕಞ್ಚುಕಮ್ಪಿ ಧಾರೇಸುಂ ವೇಠನಮ್ಪಿ ಧಾರೇಸುಂ, ತಸ್ಮಿಂ ಭನ್ತೇ ವತ್ಥುಸ್ಮಿಂ ಪಞ್ಞತ್ತಂ.

ಪುಚ್ಛಾ – ಚೀವರಸಞ್ಞುತ್ತಂ ಪುಚ್ಛಿಸ್ಸಂ, ಸನಿದಾನಂ ಸನಿದ್ದೇಸಂ. ಸಮುಕ್ಕಟ್ಠಪದಾನಂ ಆವುಸೋ ಕತಿ ಆಪತ್ತಿಯೋ.

ವಿಸ್ಸಜ್ಜನಾ – ಚೀವರಸಞ್ಞುತ್ತಂ ವಿಸ್ಸಜ್ಜಿಸ್ಸಂ, ಸನಿದಾನಂ ಸನಿದ್ದೇಸಂ. ಸಮುಕ್ಕಟ್ಠಪದಾನಂ ಭನ್ತೇ ತಿಸ್ಸೋ ಆಪತ್ತಿಯೋ.

೬. ಚಮ್ಪೇಯ್ಯಕ್ಖನ್ಧಕ

ಪುಚ್ಛಾ – ಸುದ್ಧಂ ¶ ಆವುಸೋ ಭಿಕ್ಖುಂ ಅನಾಪತ್ತಿಕಂ ಅವತ್ಥುಸ್ಮಿಂ ಅಕಾರಣೇ ಉಕ್ಖಿಪನ್ತಸ್ಸ ದುಕ್ಕಟಂ ಭಗವತಾ ಕತ್ಥ ಪಞ್ಞತ್ತಂ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಪಞ್ಞತ್ತಂ.

ವಿಸ್ಸಜ್ಜನಾ – ಚಮ್ಪಾಯಂ ಭನ್ತೇ ಸಮ್ಬಹುಲೇ ಭಿಕ್ಖೂ ಆರಬ್ಭ ಪಞ್ಞತ್ತಂ, ಭಗವತಿ ಭನ್ತೇ ಚಮ್ಪಾಯಂ ವಿಹರತಿ ಸಮ್ಬಹುಲಾ ಭಿಕ್ಖೂ ಕಾಸೀಸು ವಾಸಭಗಾಮೇ ಸುದ್ಧಂ ಕಸ್ಸಪಗೋತ್ತಂ ಭಿಕ್ಖುಂ ಅನಾಪತ್ತಿಕಂ ಅವತ್ಥುಸ್ಮಿಂ ಅಕಾರಣೇ ಉಕ್ಖಿಪಿಂಸು, ತಸ್ಮಿಂ ಭನ್ತೇ ವತ್ಥುಸ್ಮಿಂ ಪಞ್ಞತ್ತಂ.

ಪುಚ್ಛಾ – ಚಮ್ಪೇಯ್ಯಕಂ ¶ ಪುಚ್ಛಿಸ್ಸಂ, ಸನಿದಾನಂ ಸನಿದ್ದೇಸಂ. ಸಮುಕ್ಕಟ್ಠಪದಾನಂ ಆವುಸೋ ಕತಿ ಆಪತ್ತಿಯೋ.

ವಿಸ್ಸಜ್ಜನಾ – ಚಮ್ಪೇಯ್ಯಕಂ ವಿಸ್ಸಜ್ಜಿಸ್ಸಂ, ಸನಿದಾನಂ ಸನಿದ್ದೇಸಂ. ಸಮುಕ್ಕಟ್ಠಪದಾನಂ ಭನ್ತೇ ಏಕಾ ಆಪತ್ತಿ.

೧೦. ಕೋಸಮ್ಬಕಕ್ಖನ್ಧಕ

ಪುಚ್ಛಾ – ಭೇದಗರುಕೇಹಿ ¶ ಭಿಕ್ಖವೇ ಭಿಕ್ಖೂಹಿ ನ ಸೋ ಭಿಕ್ಖು ಆಪತ್ತಿಯಾ ಅದಸ್ಸನೇ ಉಕ್ಖಿಪಿತಬ್ಬೋತಿ ಚ, ಭೇದಗರುಕೇನ ಭಿಕ್ಖವೇ ಭಿಕ್ಖುನಾ ಪರೇಸಮ್ಪಿ ಸದ್ಧಾಯ ಆಪತ್ತಿದೇಸೇತಬ್ಬಾತಿ ಚ ಆವುಸೋ ಅಯಂ ಸಾಮಗ್ಗಿರಸಓವಾದೋ ಭಗವತಾ ಕತ್ಥ ದಿನ್ನೋ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ದಿನ್ನೋ.

ವಿಸ್ಸಜ್ಜನಾ – ಕೋಸಮ್ಬಿಯಂ ಭನ್ತೇ ಸಮ್ಬಹುಲೇ ಭಿಕ್ಖೂ ಆರಬ್ಭ ದಿನ್ನೋ, ಭಗವತಿ ಭನ್ತೇ ಕೋಸಮ್ಬಿಯಂ ವಿಹರತಿ ಅಞ್ಞತರೋ ಭಿಕ್ಖು ಆಪತ್ತಿಂ ಆಪನ್ನೋ ಅಹೋಸಿ, ಸೋ ತಸ್ಸಾ ಆಪತ್ತಿಯಾ ಆಪತ್ತಿ ದಿಟ್ಠಿ ಅಹೋಸಿ, ಅಞ್ಞೇ ಭಿಕ್ಖೂ ತಸ್ಸಾ ಆಪತ್ತಿಯಾ ಅನಾಪತ್ತಿ ದಿಟ್ಠಿನೋ ಅಹೇಸುಂ. ಸೋ ಅಪರೇನ ಸಮಯೇನ ತಸ್ಸಾ ಆಪತ್ತಿಯಾ ಅನಾಪತ್ತಿದಿಟ್ಠಿ ಅಹೋಸಿ, ಅಞ್ಞೇ ಭಿಕ್ಖೂ ತಸ್ಸಾ ಆಪತ್ತಿಯಾ ಆಪತ್ತಿದಿಟ್ಠಿನೋ ಅಹೇಸುಂ. ಅಥ ಖೋ ತೇ ಭನ್ತೇ ಭಿಕ್ಖೂ ಸಾಮಗ್ಗಿಂ ಲಭಿತ್ವಾ ತಂ ಭಿಕ್ಖುಂ ಆಪತ್ತಿಯಾ ಅದಸ್ಸನೇ ಉಕ್ಖಿಪಿಂಸು, ತಸ್ಮಿಂ ಭನ್ತೇ ವತ್ಥುಸ್ಮಿಂ ದಿನ್ನೋ.

ಪುಚ್ಛಾ – ಸಙ್ಘಭೇದಸ್ಸ ¶ ಆವುಸೋ ಮೂಲಭೂತೇ ಭಿಕ್ಖುಮ್ಹಿ ಉಕ್ಖಿತ್ತಕೇ ಓಸಾರಿತೇ ತಸ್ಸ ವತ್ಥುಸ್ಸ ವೂಪಸಮಾಯ ಸಙ್ಘಸಾಮಗ್ಗಿಞ್ಚ ಕಾತುಂ ಸಾಮಗ್ಗೀ ಉಪೋಸಥಞ್ಚ ಕಾತುಂ ಭಗವತಾ ಕತ್ಥ ಅನುಞ್ಞಾತಂ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಅನುಞ್ಞಾತಂ.

ವಿಸ್ಸಜ್ಜನಾ – ಸಾವತ್ಥಿಯಂ ಭನ್ತೇ ತೇಯೇವ ಉಕ್ಖಿತ್ತಕಾನುವತ್ತಕೇ ಭಿಕ್ಖೂ ಆರಬ್ಭ ಅನುಞ್ಞಾತಂ, ತೇ ಭನ್ತೇ ಉಕ್ಖಿತ್ತಕಾನುವತ್ತಕಾ ಭಿಕ್ಖೂ ತಂ ಉಕ್ಖಿತ್ತಕಂ ಭಿಕ್ಖುಂ ಓಸಾರೇತ್ವಾ ಯೇನ ಉಕ್ಖೇಪಕಾ ಭಿಕ್ಖೂ ತೇನುಪಸಙ್ಕಮಿಂಸು ಉಪಸಙ್ಕಮಿತ್ವಾ ತೇ ಉಕ್ಖೇಪಕೇ ಭಿಕ್ಖೂ ಏಕದವೋಚುಂ ‘‘ಯಸ್ಮಿಂ ಆವುಸೋ ವತ್ಥುಸ್ಮಿಂ ಅಹೋಸಿ ಸಙ್ಘಸ್ಸ ¶ ಭಣ್ಡನಂ ಕಲಹೋ ವಿಗ್ಗಹೋ ವಿವಾದೋ ಸಙ್ಘಭೇದೋ ಸಙ್ಘರಾಜಿ ಸಙ್ಘವವತ್ಥಾನಂ ಸಙ್ಘನಾನಾಕರಣಂ, ಸೋ ಏಸೋ ಭಿಕ್ಖುಂ ಆಪನ್ನೋ ಚ ಉಕ್ಖಿತ್ತೋ ಚ ಪಸ್ಸಿ ಚ ಓಸಾರಿತೋ ಚ, ಹನ್ದ ಮಯಂ ಆವುಸೋ ತಸ್ಸ ವತ್ಥುಸ್ಸ ವೂಪಸಮಾಯ ಸಙ್ಘಸಾಮಗ್ಗಿಂ ಕರೋಮಾ’’ತಿ, ತಸ್ಮಿಂ ಭನ್ತೇ ವತ್ಥುಸ್ಮಿಂ ಅನುಞ್ಞಾತಂ.

ಪುಚ್ಛಾ – ಕೋಸಮ್ಬಕಂ ¶ ಪುಚ್ಛಿಸ್ಸಂ, ಸನಿದಾನಂ ಸನಿದ್ದೇಸಂ. ಸಮುಕ್ಕಟ್ಠಪದಾನಂ ಆವುಸೋ ಕತಿ ಆಪತ್ತಿಯೋ.

ವಿಸ್ಸಜ್ಜನಾ – ಕೋಸಮ್ಬಕಂ ವಿಸ್ಸಜ್ಜಿಸ್ಸಂ, ಸನಿದಾನಂ ಸನಿದ್ದೇಸಂ. ಸಮುಕ್ಕಟ್ಠಪದಾನಂ ಭನ್ತೇ ಏಕಾ ಆಪತ್ತಿ.

ಚೂಳವಗ್ಗಪಾಳಿ

೧. ಕಮ್ಬಕ್ಖನ್ಧಕ

ಪುಚ್ಛಾ – ಭಣ್ಡನಾದಿಕಾರಕಸ್ಸ ¶ ಆವುಸೋ ಭಿಕ್ಖುನೋ ತಜ್ಜನೀಯಕಮ್ಮಂ ಕಾತುಂ ಭಗವತಾ ಕತ್ಥ ಅನುಞ್ಞಾತಂ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಅನುಞ್ಞಾತಂ.

ವಿಸ್ಸಜ್ಜನಾ – ಸಾವತ್ಥಿಯಂ ಭನ್ತೇ ಪಣ್ಡುಕಲೋಹಿತಕೇ ಭಿಕ್ಖೂ ಆರಬ್ಭ ಅನುಞ್ಞಾತಂ, ಪಣ್ಡುಕಲೋಹಿತಕಾ ಭನ್ತೇ ಭಿಕ್ಖೂ ಅತ್ತನಾ ಭಣ್ಡನಕಾರಕಾ ಕಲಹಕಾರಕಾ ವಿವಾದಕಾರಕಾ ಭಸ್ಸಕಾರಕಾ ಸಙ್ಘೇ ಅಧಿಕರಣಕಾರಕಾ, ಯೇಪಿ ಚಞ್ಞೇ ಭಿಕ್ಖೂ ಭಣ್ಡನಕಾರಕಾ ಕಲಹಕಾರಕಾ ವಿವಾದಕಾರಕಾ ಭಸ್ಸಕಾರಕಾ ಸಙ್ಘೇ ಅಧಿಕರಣಕಾರಕಾ ತೇ ಉಪಸಙ್ಕಮಿತ್ವಾ ಏವಮಾಹಂಸು ‘‘ಮಾ ಖೋ ತುಮ್ಹೇ ಆಯಸ್ಮನ್ತೋ ಏಸೋ ಅಜೇಸಿ, ಬಲವಾಬಲವಂ ಪಟಿಮನ್ತೇಥ, ತುಮ್ಹೇ ತೇನ ಪಣ್ಡಿತತರಾ ಚ ಬ್ಯತ್ತತರಾ ಚ ಬಹುಸ್ಸುತತರಾ ಚ ಅಲಮತ್ತತರಾ ಚ, ಮಾ ಚಸ್ಸ ಭಾಯಿತ್ಥ, ಮಯಮ್ಪಿ ತುಮ್ಹಾಕಂ ಪಕ್ಖಾ ಭವಿಸ್ಸಾಮಾ’’ತಿ, ತೇನ ಅನುಪ್ಪನ್ನಾನಿ ಚೇವ ಭಣ್ಡನಾನಿ ಉಪ್ಪಜ್ಜನ್ತಿ, ಉಪ್ಪನ್ನಾನಿ ಚ ಭಣ್ಡನಾನಿ ಭಿಯ್ಯೋಭಾವಾಯ ವೇಪುಲ್ಲಾಯ ಸಂವತ್ತನ್ತಿ. ತಸ್ಮಿಂ ಭನ್ತೇ ವತ್ಥುಸ್ಮಿಂ ಅನುಞ್ಞಾತಂ.

ಪುಚ್ಛಾ – ತಜ್ಜನೀಯಕಮ್ಮಕತಸ್ಸ ¶ ಆವುಸೋ ಭಿಕ್ಖುನೋ ಕತಿಸು ವತ್ತೇಸು ಸಮ್ಮಾ ವತ್ತನ್ತಸ್ಸ ತಂ ಕಮ್ಮಂ ಪಟಿಪ್ಪಸ್ಸಮ್ಭೇತುಂ ಭಗವತಾ ಕತ್ಥ ಅನುಞ್ಞಾತಂ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಅನುಞ್ಞಾತಂ.

ವಿಸ್ಸಜ್ಜನಾ – ಅಟ್ಠಾರಸಸು ¶ ಭನ್ತೇ ವತ್ತೇಸು ಸಮ್ಮಾ ವತ್ತನ್ತಸ್ಸ ತಜ್ಜನೀಯಕಮ್ಮಕತಸ್ಸ ಭಿಕ್ಖುನೋ ತಂ ಕಮ್ಮಂ ಪಟಿಪ್ಪಸ್ಸಮ್ಭೇತುಂ ಭಗವತಾ ಸಾವತ್ಥಿಯಂ ಅನುಞ್ಞಾತಂ, ತೇಯೇವ ಪಣ್ಡುಕಲೋಹಿತಕಾ ಭಿಕ್ಖೂ ಸಙ್ಘೇನ ತಜ್ಜನೀಯಕಮ್ಮಕತಾ ಸಮ್ಮಾ ವತ್ತಿತ್ವಾ ಸಙ್ಘಂ ಉಪಸಙ್ಕಮಿತ್ವಾ ಯಾಚಿಂಸು, ತಸ್ಮಿಂ ಭನ್ತೇ ವತ್ಥುಸ್ಮಿಂ ಅನುಞ್ಞಾತಂ.

ಪುಚ್ಛಾ – ಬಾಲಸ್ಸ ¶ ಆವುಸೋ ಅಬ್ಯತ್ತಸ್ಸ ಆಪತ್ತಿಬಹುಲಸ್ಸ ಅನಪದಾನಸ್ಸ ಗಿಹಿಸಂಸಟ್ಠಸ್ಸ ಅನನುಲೋಮಿಕೇಹಿ ಗಿಹಿಸಂಸಗ್ಗೇಹಿ ನಿಯಸ್ಸಕಮ್ಮಂ ಕಾತುಂ ಕತ್ಥ ಪಞ್ಞತ್ತಂ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಪಞ್ಞತ್ತಂ.

ವಿಸ್ಸಜ್ಜನಾ – ಸಾವತ್ಥಿಯಂ ಭನ್ತೇ ಆಯಸ್ಮನ್ತಂ ಸೇಯ್ಯಸಕಂ ಆರಬ್ಭ ಪಞ್ಞತ್ತಂ, ಆಯಸ್ಮಾ ಭನ್ತೇ ಸೇಯ್ಯಸಕೋ ಬಾಲೋ ಅಹೋಸಿ ಅಬ್ಯತ್ತೋ ಆಪತ್ತಿಬಹುಲೋ ಅನಪದಾನೋ ಗಿಹಿಸಂಸಟ್ಠೋ ವಿಹಾಸಿ ಅನನುಲೋಮಿಕೇಹಿ ಗಿಹಿಸಂಸಗ್ಗೇಹಿ, ತಸ್ಮಿಂ ಭನ್ತೇ ವತ್ಥುಸ್ಮಿಂ ಪಞ್ಞತ್ತಂ.

ಪುಚ್ಛಾ – ನಿಯಸ್ಸಕಮ್ಮಕತಸ್ಸ ¶ ಆವುಸೋ ಭಿಕ್ಖುನೋ ಕತಿಸು ವತ್ತೇಸು ಸಮ್ಮಾ ವತ್ತನ್ತಸ್ಸ ತಂ ಕಮ್ಮಂ ಪಟಿಪ್ಪಸ್ಸಮ್ಭೇತುಂ ಭಗವತಾ ಅನುಞ್ಞಾತಂ.

ವಿಸ್ಸಜ್ಜನಾ – ಅಟ್ಠಾರಸಸು ಭನ್ತೇ ವತ್ತೇಸು ಸಮ್ಮಾ ವತ್ತನ್ತಸ್ಸ ನಿಯಸ್ಸ ಕಮ್ಮಕತಸ್ಸ ಭಿಕ್ಖುನೋ ತಂ ಕಮ್ಮಂ ಪಟಿಪ್ಪಸ್ಸಮ್ಭೇತುಂ ಭಗವತಾ ಅನುಞ್ಞಾತಂ, ನ ಉಪಸಮ್ಪಾದೇತಬ್ಬಂ, ನ ನಿಸ್ಸಯೋ ದಾತಬ್ಬೋ, ನ ಸಾಮಣೇರೋ ಉಪಟ್ಠಾಪೇತಬ್ಬೋ, ನ ಭಿಕ್ಖುನೋವಾದಕಸಮ್ಮುತಿ ಸಾದಿತಬ್ಬಾ, ಸಮ್ಮತೇನಪಿ ಭಿಕ್ಖುನಿಯೋ ನ ಓವದಿತಬ್ಬಾ, ಏವಮಾದೀಸು ಭನ್ತೇ ಅಟ್ಠಾರಸಸು ವತ್ತೇಸು ಸಮ್ಮಾ ವತ್ತನ್ತಸ್ಸ ನಿಯಸ್ಸಕಮ್ಮಕತಸ್ಸ ಭಿಕ್ಖುನೋ ತಂ ಕಮ್ಮಂ ಪಟಿಪ್ಪಸ್ಸಮ್ಭೇತುಂ ಭಗವತಾ ಅನುಞ್ಞಾತಂ.

ಪುಚ್ಛಾ – ಕುಲದೂಸಕಸ್ಸ ¶ ಆವುಸೋ ಪಾಪಸಮಾಚಾರಸ್ಸ ಭಿಕ್ಖುನೋ ಪಬ್ಬಾಜನೀಯಕಮ್ಮಂ ಕಾತುಂ ಭಗವತಾ ಕತ್ಥ ಅನುಞ್ಞಾತಂ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಅನುಞ್ಞಾತಂ.

ವಿಸ್ಸಜ್ಜನಾ – ಸಾವತ್ಥಿಯಂ ಭನ್ತೇ ಅಸ್ಸಜಿಪುನಬ್ಬಸುಕೇ ಭಿಕ್ಖೂ ಆರಬ್ಭ ಅನುಞ್ಞಾತಂ, ಅಸ್ಸಜಿಪುನಬ್ಬಸುಕಾ ಭನ್ತೇ ಭಿಕ್ಖೂ ಕೀಟಾಗಿರಿಸ್ಮಿಂ ಕುಲದೂಸಕಾ ಅಹೇಸುಂ ಪಾಪಸಮಾಚಾರಾ, ತಸ್ಮಿಂ ಭನ್ತೇ ವತ್ಥುಸ್ಮಿಂ ಅನುಞ್ಞಾತಂ.

ಪುಚ್ಛಾ – ಪಟಿಸಾರಣೀಯಕಮ್ಮಂ ¶ ಆವುಸೋ ಪುಚ್ಛಾಮಿ, ಸದ್ಧಂ ಆವುಸೋ ಪಸನ್ನಂ ಗಹಪತಿಂ ದಾಯಕಂ ಕಾರಕಂ ಸಙ್ಘುಪಟ್ಠಾಕಂ ಹೀನೇನ ಖುಂಸೇನ್ತಸ್ಸ ಭಿಕ್ಖುನೋ ¶ ಪಟಿಸಾರಣೀಯಕಮ್ಮಂ ಕಾತುಂ ಭಗವತಾ ಕತ್ಥ ಅನುಞ್ಞಾತಂ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಅನುಞ್ಞಾತಂ.

ವಿಸ್ಸಜ್ಜನಾ – ಸಾವತ್ಥಿಯಂ ಭನ್ತೇ ಆಯಸ್ಮನ್ತಂ ಸುಧಮ್ಮಂ ಆರಬ್ಭ ಅನುಞ್ಞಾತಂ, ಭಗವತಿ ಭನ್ತೇ ಸಾವತ್ಥಿಯಂ ವಿಹರತಿ ಆಯಸ್ಮಾ ಸುಧಮ್ಮೋ ಮಚ್ಛಿಕಾಸಣ್ಡೇ ಚಿತ್ತಂ ಗಹಪತಿಂ ಸದ್ಧಂ ಪಸನ್ನಂ ದಾಯಕಂ ಕಾರಕಂ ಸಙ್ಘುಪಟ್ಠಾಕಂ ಹೀನೇನ ಖುಂಸೇಸಿ ಹೀನೇನ ವಮ್ಭೇಸಿ, ತಸ್ಮಿಂ ಭನ್ತೇ ವತ್ಥುಸ್ಮಿಂ ಅನುಞ್ಞಾತಂ.

ತೇನಹಿ ¶ ಭಿಕ್ಖವೇ ಸಙ್ಘೋ ಸುಧಮ್ಮಸ್ಸ ಭಿಕ್ಖುನೋ ಪಟಿಸಾರಣೀಯಕಮ್ಮಂ ಕರೋತು ‘‘ಚಿತ್ತೋ ತೇ ಗಹಪತಿ ಖಮಾಪೇತಬ್ಬೋ’’ತಿ –

ಪುಚ್ಛಾ – ಪಟಿಸಾರಣೀಯಕಮ್ಮಕತಸ್ಸ ¶ ಆವುಸೋ ಭಿಕ್ಖುನೋ ಅನುದೂತಂ ದಾತುಞ್ಚ ತೇನ ಅನುದೂತೇನ ಸದ್ಧಿಂ ಗನ್ತ್ವಾ ಯಥಾಖುಂಸಿತಂ ಗಹಪತಿಂ ಖಮಾಪೇತುಂ ¶ ಚ ಭಗವತಾ ಕತ್ಥ ಅನುಞ್ಞಾತಂ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಅನುಞ್ಞಾತಂ.

ವಿಸ್ಸಜ್ಜನಾ – ಸಾವತ್ಥಿಯಂ ಭನ್ತೇ ಆಯಸ್ಮನ್ತಂಯೇವ ಸುಧಮ್ಮಂ ಆರಬ್ಭ ಅನುಞ್ಞಾತಂ, ಆಯಸ್ಮಾ ಭನ್ತೇ ಸುಧಮ್ಮೋ ಮಚ್ಛಿಕಾಸಣ್ಡಂ ಗನ್ತ್ವಾ ಮಙ್ಕುಭೂತೋ ನಾಸಕ್ಖಿ ಚಿತ್ತಂ ಗಹಪತಿಂ ಖಮಾಪೇತುಂ, ತಸ್ಮಿಂ ಭನ್ತೇ ವತ್ಥುಸ್ಮಿಂ ಅನುಞ್ಞಾತಂ.

ಪುಚ್ಛಾ – ಪಟಿಸಾರಣೀಯಕಮ್ಮಕತಸ್ಸ ¶ ಆವುಸೋ ಭಿಕ್ಖುನೋ ಕತಿಸು ವತ್ತೇಸು ಸಮ್ಮಾ ವತ್ತನ್ತಸ್ಸ ತಂ ಕಮ್ಮಂ ಪಟಿಪ್ಪಸ್ಸಮ್ಭೇತುಂ ಭಗವತಾ ಅನುಞ್ಞಾತಂ.

ವಿಸ್ಸಜ್ಜನಾ – ಅಟ್ಠಾರಸಸು ಭನ್ತೇ ವತ್ತೇಸು ಸಮ್ಮಾ ವತ್ತನ್ತಸ್ಸ ಪಟಿಸಾರಣೀಯ ಕಮ್ಮಕತಸ್ಸ ಭಿಕ್ಖುನೋ ತಂ ಕಮ್ಮಂ ಪಟಿಪ್ಪಸ್ಸಮ್ಭೇತುಂ ಭಗವತಾ ಅನುಞ್ಞಾತಂ.

ಪುಚ್ಛಾ – ಆಪತ್ತಿಂ ¶ ಆವುಸೋ ಆಪಜ್ಜಿತ್ವಾ ತಂ ಆಪತ್ತಿಂ ಪಸ್ಸಿತುಂ ವಾ ಪಟಿಕಾತುಂ ವಾ ನ ಇಚ್ಛನ್ತಸ್ಸ ಭಿಕ್ಖುನೋ ಆಪತ್ತಿಯಾ ಅದಸ್ಸನೇ ವಾ ಅಪ್ಪಟಿಕಮ್ಮೇ ವಾ ಉಕ್ಖೇಪನೀಯಕಮ್ಮಂ ಕಾತುಂ ಭಗವತಾ ಕತ್ಥ ಪಞ್ಞತ್ತಂ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಪಞ್ಞತ್ತಂ.

ವಿಸ್ಸಜ್ಜನಾ – ಕೋಸಮ್ಬಿಯಂ ಭನ್ತೇ ಆಯಸ್ಮನ್ತಂ ಛನ್ನತ್ಥೇರಂ ಆರಬ್ಭ ಪಞ್ಞತ್ತಂ, ಆಯಸ್ಮಾ ಭನ್ತೇ ಛನ್ನೋ ಆಪತ್ತಿಂ ಆಪಜ್ಜಿತ್ವಾ ನ ಇಚ್ಛಿ ತಂ ಆಪತ್ತಿಂ ಪಸ್ಸಿತುಂ ವಾ ಪಟಿಕಾತುಂ ವಾ, ತಸ್ಮಿಂ ಭನ್ತೇ ವತ್ಥುಸ್ಮಿಂ ಪಞ್ಞತ್ತಂ.

ಪುಚ್ಛಾ – ಆಪತ್ತಿಯಾ ¶ ಆವುಸೋ ಅದಸ್ಸನೇನ ವಾ ಅಪ್ಪಟಿಕಮ್ಮೇ ವಾ ಉಕ್ಖೇಪನೀಯ ಕಮ್ಮಕತೇನ ಭಿಕ್ಖುನಾ ಕತಿಸು ವತ್ತೇಸು ಸಮ್ಮಾ ವತ್ತಿತಬ್ಬಂ.

ವಿಸ್ಸಜ್ಜನಾ – ತೇಚತ್ತಾಲೀಸಾಯ ಭನ್ತೇ ವತ್ತೇಸು ಸಮ್ಮಾ ವತ್ತಿತಬ್ಬಂ.

ಪುಚ್ಛಾ – ಉಕ್ಖೇಪನೀಯಕಮ್ಮಕತಸ್ಸ ¶ ಆವುಸೋ ಭಿಕ್ಖುನೋ ಸಮ್ಮಾ ವತ್ತನ್ತಸ್ಸ ತಂ ಕಮ್ಮಂ ಪಟಿಪ್ಪಸ್ಸಮ್ಭೇತುಂ ಭಗವತಾ ಕತ್ಥ ಅನುಞ್ಞಾತಂ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಅನುಞ್ಞಾತಂ.

ವಿಸ್ಸಜ್ಜನಾ – ಕೋಸಮ್ಬಿಯಂ ಭನ್ತೇ ಆಯಸ್ಮನ್ತಂಯೇವ ಛನ್ನಂ ಆರಬ್ಭ ಅನುಞ್ಞಾತಂ, ಆಯಸ್ಮಾ ಭನ್ತೇ ಛನ್ನೋ ಸಙ್ಘೇನ ಆಪತ್ತಿಯಾ ಅದಸ್ಸನೇ ವಾ ಅಪ್ಪಟಿಕಮ್ಮೇ ವಾ ಉಕ್ಖೇಪನೀಯಕಮ್ಮಕತೋ ಸಮ್ಮಾ ವತ್ತೇಸಿ ಲೋಮಂಪಾತೇಸಿ ನೇತ್ಥಾರಂ ವತ್ತೇಸಿ ಸಙ್ಘಂ ಉಪಸಙ್ಕಮಿತ್ವಾ ತಸ್ಸ ಕಮ್ಮಸ್ಸ ಪಟಿಪ್ಪಸ್ಸದ್ಧಿಯಾ ಯಾಚಿ, ತಸ್ಮಿಂ ಭನ್ತೇ ವತ್ಥುಸ್ಮಿಂ ಅನುಞ್ಞಾತಂ.

ಪುಚ್ಛಾ – ಪಾಪಿಕಂ ¶ ಆವುಸೋ ದಿಟ್ಠಿಂ ಗಹೇತ್ವಾ ತಂ ದಿಟ್ಠಿಂ ನ ಪಟಿನಿಸ್ಸಜ್ಜನ್ತಸ್ಸ ಪಾಪಿಕಾಯ ದಿಟ್ಠಿಯಾ ಅಪ್ಪಟಿನಿಸ್ಸಗ್ಗೇ ಉಕ್ಖೇಪನೀಯಕಮ್ಮಂ ಕಾತುಂ ಭಗವತಾ ಕತ್ಥ ಪಞ್ಞತ್ತಂ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಪಞ್ಞತ್ತಂ.

ವಿಸ್ಸಜ್ಜನಾ – ಸಾವತ್ಥಿಯಂ ಭನ್ತೇ ಅರಿಟ್ಠಂ ಭಿಕ್ಖುಂ ಗದ್ಧಬಾಧಿಪುಬ್ಬಂ ಆರಬ್ಭ ಪಞ್ಞತ್ತಂ, ಭಗವತಿ ಭನ್ತೇ ಸಾವತ್ಥಿಯಂ ವಿಹರತಿ ಅರಿಟ್ಠಸ್ಸ ನಾಮ ಭಿಕ್ಖುನೋ ಗದ್ಧಬಾಧಿಪುಬ್ಬಸ್ಸ ಏವರೂಪಂ ಪಾಪಕಂ ದಿಟ್ಠಿಗತಂ ಉಪ್ಪನ್ನಂ ಅಹೋಸಿ ‘‘ತಥಾಹಂ ಭಗವತಾ ಧಮ್ಮಂ ದೇಸಿತಂ ಆಜಾನಾಮಿ, ಯಥಾಯೇಮೇ ಅನ್ತರಾಯಿಕಾ ಧಮ್ಮಾ ವುತ್ತಾ ಭಗವತಾ, ತೇ ಪಟಿಸೇವತೋ ¶ ನಾಲಂ ಅನ್ತರಾಯಾಯಾ’’ತಿ, ತಸ್ಮಿಂ ಭನ್ತೇ ವತ್ಥುಸ್ಮಿಂ ಪಞ್ಞತ್ತಂ.

ಪುಚ್ಛಾ – ಪಾಪಿಕಾಯ ಆವುಸೋ ದಿಟ್ಠಿಯಾ ಅಪ್ಪಟಿನಿಸ್ಸಗ್ಗೇ ಉಕ್ಖೇಪನೀಯಕಮ್ಮಕತೇನ ಭಿಕ್ಖುನಾ ಕತಿಸು ವತ್ತೇಸು ಸಮ್ಮಾ ವತ್ತಿತಬ್ಬಂ.

ವಿಸ್ಸಜ್ಜನಾ – ತೇಚತ್ತಾಲೀಸಾಯ ¶ ಭನ್ತೇ ವತ್ತೇಸು ಸಮ್ಮಾ ವತ್ತಿತಬ್ಬಂ.

ಪುಚ್ಛಾ – ಕಮ್ಮಕ್ಖನ್ಧಕಂ ಪುಚ್ಛಿಸ್ಸಂ, ಸನಿದಾನಿ ಸನಿದ್ದೇಸಂ. ಸಮುಕ್ಕಟ್ಠಪದಾನಂ ಆವುಸೋ ಕತಿ ಆಪತ್ತಿಯೋ.

ವಿಸ್ಸಜ್ಜನಾ – ಕಮ್ಮಕ್ಖನ್ಧಕಂ ವಿಸ್ಸಜ್ಜಿಸ್ಸಂ, ಸನಿದಾನಂ ಸನಿದ್ದೇಸಂ. ಸಮುಕ್ಕಟ್ಠಪದಾನಂ ಭನ್ತೇ ಏಕಾ ಆಪತ್ತಿ.

೨. ಪಾರಿವಾಸಿಕಕ್ಖನ್ಧಕ

ಪುಚ್ಛಾ – ಪಾರಿವಾಸಿಕಸ್ಸ ¶ ಆವುಸೋ ಪಕತತ್ತಾನಂ ಭಿಕ್ಖೂನಂ ಅಭಿವಾದನಾದೀನಿ ಸಾದಿಯನ್ತಸ್ಸ ದುಕ್ಕಟಂ ಭಗವತಾ ಕತ್ಥ ಪಞ್ಞತ್ತಂ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಪಞ್ಞತ್ತಂ.

ವಿಸ್ಸಜ್ಜನಾ – ಸಾವತ್ಥಿಯಂ ಭನ್ತೇ ಪಾರಿವಾಸಿಕೇ ಭಿಕ್ಖೂ ಆರಬ್ಭ ಪಞ್ಞತ್ತಂ, ಪಾರಿವಾಸಿಕಾ ಭನ್ತೇ ಭಿಕ್ಖೂ ಸಾದಿಯಿಂಸು ಪಕತತ್ತಾನಂ ಭಿಕ್ಖೂನಂ ಅಭಿವಾದನಾದೀನಿ, ತಸ್ಮಿಂ ಭನ್ತೇ ವತ್ಥುಸ್ಮಿಂ ಪಞ್ಞತ್ತಂ.

ಪುಚ್ಛಾ – ಪಾರಿವಾಸಿಕೇನ ¶ ಆವುಸೋ ಭಿಕ್ಖುನಾ ಕತಿಸು ವತ್ತೇಸು ಸಮ್ಮಾ ವತ್ತಿತಬ್ಬಂ.

ವಿಸ್ಸಜ್ಜನಾ – ಪಾರಿವಾಸಿಕೇನ ಭನ್ತೇ ಭಿಕ್ಖುನಾ ಚತುನವುತಿಯಾ ವತ್ತೇಸು ಸಮ್ಮಾ ವತ್ತಿತಬ್ಬಂ.

ಪುಚ್ಛಾ – ಪಾರಿವಾಸಿಕಂ ಪುಚ್ಛಿಸ್ಸಂ, ಸನಿದಾನಂ ಸನಿದ್ದೇಸಂ. ಸಮುಕ್ಕಟ್ಠಪದಾನಂ ಆವುಸೋ ಕತಿ ಆಪತ್ತಿಯೋ.

ವಿಸ್ಸಜ್ಜನಾ – ಪಾರಿವಾಸಿಕಂ ವಿಸ್ಸಜ್ಜಿಸ್ಸಂ, ಸನಿದಾನಂ ಸನಿದ್ದೇಸಂ. ಸಮುಕ್ಕಟ್ಠಪದಾನಂ ಭನ್ತೇ ಏಕಾ ಆಪತ್ತಿ.

೩. ಸಮುಚ್ಚಯಕ್ಖನ್ಧಕ

ಪುಚ್ಛಾ – ಸಮುಚ್ಚಯಂ ¶ ಪುಚ್ಛಿಸ್ಸಂ, ಸನಿದಾನಂ ಸನಿದ್ದೇಸಂ. ಸಮುಕ್ಕಟ್ಠಪದಾನಂ ಆವುಸೋ ಕತಿ ಆಪತ್ತಿಯೋ.

ವಿಸ್ಸಜ್ಜನಾ – ಸಮುಚ್ಚಯಂ ವಿಸ್ಸಜ್ಜಿಸ್ಸಂ, ಸನಿದಾನಂ ಸನಿದ್ದೇಸಂ. ಸಮುಕ್ಕಟ್ಠಪದಾನಂ ಭನ್ತೇ ಏಕಾ ಆಪತ್ತಿ.

೪. ಸಮಥಕ್ಖನ್ಧಕ

ಪುಚ್ಛಾ – ಅಸಮ್ಮುಖೀಭೂತಾನಂ ¶ ಆವುಸೋ ಭಿಕ್ಖೂನಂ ತಜ್ಜನೀಯಂ ವಾ ನಿಯಸ್ಸಂ ವಾ ಪಬ್ಬಾಜನೀಯಂ ವಾ ಪಟಿಸಾರಣೀಯಂ ವಾ ಉಕ್ಖೇಪನೀಯಂ ವಾ ಕಮ್ಮಂ ಕರೋನ್ತಸ್ಸ ದುಕ್ಕಟಂ ಭಗವತಾ ಕತ್ಥ ಪಞ್ಞತ್ತಂ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಪಞ್ಞತ್ತಂ.

ವಿಸ್ಸಜ್ಜನಾ – ಸಾವತ್ಥಿಯಂ ಭನ್ತೇ ಛಬ್ಬಗ್ಗಿಯೇ ಭಿಕ್ಖೂ ಆರಬ್ಭ ಪಞ್ಞತ್ತಂ, ಛಬ್ಬಗ್ಗಿಯಾ ಭನ್ತೇ ಭಿಕ್ಖೂ ಅಸಮ್ಮುಖೀಭೂತಾನಂ ಭಿಕ್ಖೂನಂ ಕಮ್ಮಂ ಅಕಂಸು ತಜ್ಜನೀಯಮ್ಪಿ ನಿಯಸ್ಸಮ್ಪಿ ಪಬ್ಬಾಜನೀಯಮ್ಪಿ ಪಟಿಸಾರಣೀಯಮ್ಪಿ ಉಕ್ಖೇಪನೀಯಮ್ಪಿ, ತಸ್ಮಿಂ ಭನ್ತೇ ವತ್ಥುಸ್ಮಿಂ ಪಞ್ಞತ್ತಂ.

ಪುಚ್ಛಾ – ಸತಿವೇಪುಲ್ಲಪತ್ತಸ್ಸ ¶ ಆವುಸೋ ಭಿಕ್ಖುನೋ ಸತಿವಿನಯಂ ದಾನಂ ಭಗವತಾ ಕತ್ಥ ಅನುಞ್ಞಾತಂ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಅನುಞ್ಞಾತಂ.

ವಿಸ್ಸಜ್ಜನಾ – ರಾಜಗಹೇ ಭನ್ತೇ ಮೇತ್ತಿಯಭೂಮಜಕೇ ಭಿಕ್ಖೂ ಆರಬ್ಭ ಅನುಞ್ಞಾತಂ ಮೇತ್ತಿಯಭೂಮಜಕಾ ಭನ್ತೇ ಭಿಕ್ಖೂ ಆಯಸ್ಮನ್ತಂ ದಬ್ಬಂ ಮಲ್ಲಪುತ್ತಂ ಅಮೂಲಿಕಾಯ ಸೀಲವಿಪತ್ತಿಯಾ ಅನುದ್ಧಂಸೇಸುಂ, ತಸ್ಮಿಂ ಭನ್ತೇ ವತ್ಥುಸ್ಮಿಂ ಅನುಞ್ಞಾತಂ.

ಪುಚ್ಛಾ – ಕತಿಪನಾವುಸೋ ¶ ಏತ್ಥ ಧಮ್ಮಿಕಾನಿ ಸತಿವಿನಯದಾನಾನಿ.

ವಿಸ್ಸಜ್ಜನಾ – ಪಞ್ಚಿಮಾನಿ ಭನ್ತೇ ಧಮ್ಮಿಕಾನಿ ಸತಿವಿನಯಸ್ಸ ದಾನಾನಿ, ಸುದ್ಧೋ ಹೋತಿ ಭಿಕ್ಖು ಅನಾಪತ್ತಿಕೋ, ಅನುವದನ್ತಿ ಚ ನಂ, ಯಾಚತಿ ಚ, ತಸ್ಸ ಸಙ್ಘೋ ಸತಿವಿನಯಂ ದೇತಿ ಧಮ್ಮೇನ ಸಮಗ್ಗೇನ, ಇಮಾನಿ ಖೋ ಭನ್ತೇ ಪಞ್ಚ ಧಮ್ಮಿಕಾನಿ ಸತಿ ವಿನಯಸ್ಸ ದಾನಾನಿ.

ಪುಚ್ಛಾ – ಅಮೂಳ್ಹಸ್ಸ ¶ ಆವುಸೋ ಭಿಕ್ಖುನೋ ಅಮೂಳ್ಹವಿನಯಂ ದಾತುಂ ಭಗವತಾ ಕತ್ಥ ಅನುಞ್ಞಾತಂ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಅನುಞ್ಞಾತಂ.

ವಿಸ್ಸಜ್ಜನಾ – ರಾಜಗಹೇ ಭನ್ತೇ ಸಮ್ಬಹುಲೇ ಭಿಕ್ಖೂ ಆರಬ್ಭ ಅನುಞ್ಞಾತಂ, ಸಮ್ಬಹುಲಾ ಭನ್ತೇ ಭಿಕ್ಖೂ ಗಗ್ಗಂ ಭಿಕ್ಖುಂ ಉಮ್ಮತ್ತಕೇನ ಚಿತ್ತವಿಪರಿಯಾಸಕತೇನ ¶ ಅಜ್ಝಾಚಿಣ್ಣೇನ ಆಪತ್ತಿಯಾ ಚೋದೇಸುಂ ‘‘ಸರತಾ ಯಸ್ಮಾ ಏವರೂಪಿಂ ಆಪತ್ತಿಂ ಆಪಜ್ಜಿತಾ’’ತಿ, ಸೋ ಏವಂ ವದೇತಿ ‘‘ಅಹಂ ಖೋ ಆವುಸೋ ಉಮ್ಮತ್ತಕೋ ಅಹೋಸಿ ಚಿತ್ತವಿಪರಿಯಾಸಕತೋ, ತೇನ ಮೇ ಉಮ್ಮತ್ತಕೇನ ಚಿತ್ತವಿಪರಿಯಾಸಕತೇನ ಬಹುಂ ಅಸ್ಸಾಮಣಕಂ ಅಜ್ಝಾಚಿಣ್ಣಂ ಭಾಸಿತಪರಿಕ್ಕನ್ತಂ, ನಾಹಂ ತಂ ಸರಾಮಿ, ಮೂಳ್ಹೇನ ಮೇ ಏತಂ ಕತ’’ನ್ತಿ. ಏವಮ್ಪಿ ನಂ ವುಚ್ಚಮಾನಾ ಚೋದೇನ್ತೇವ ‘‘ಸರತಾ ಯಸ್ಮಾ ಏವರೂಪಿಂ ಆಪತ್ತಿಂ ಆಪಜ್ಜಿತಾ’’ತಿ, ತಸ್ಮಿಂ ಭನ್ತೇ ವತ್ಥುಸ್ಮಿಂ ಅನುಞ್ಞಾತಂ.

ಪುಚ್ಛಾ – ಕತಿ ¶ ಆವುಸೋ ಅಧಮ್ಮಿಕಾನಿ ಅಮೂಳ್ಹವಿನಯಸ್ಸ ದಾನಾನಿ, ವಿಭಜಿತ್ವಾ ಕಥೇಹಿ.

ವಿಸ್ಸಜ್ಜನಾ – ತೀಣಿ ಭನ್ತೇ ಅಧಮ್ಮಿಕಾನಿ ಅಮೂಳ್ಹವಿನಯಸ್ಸ ದಾನಾನಿ, ಇಧ ಭನ್ತೇ ಭಿಕ್ಖು ಆಪತ್ತಿಂ ಆಪನ್ನೋ ಹೋತಿ, ತಮೇನಂ ಚೋದೇತಿ ಸಙ್ಘೋ ವಾ ಸಮ್ಬಹುಲಾ ವಾ ಏಕಪುಗ್ಗಲೋ ವಾ ‘‘ಸರತಾಯಸ್ಮಾ ಏವರೂಪಿಂ ಆಪತ್ತಿಂ ಆಪಜ್ಜಿತಾ’’ತಿ, ಸೋ ಸರಮಾನೋವ ಏವಂ ವದೇತಿ ‘‘ನ ಖೋ ಅಹಂ ಆವುಸೋ ಸರಾಮಿ ಏವರೂಪಿಂ ಆಪತ್ತಿಂ ಆಪಜ್ಜಿತಾ’’ತಿ. ಅಞ್ಞೋ ಸರಮಾನೋವ ಏವಂ ವದೇತಿ ‘‘ಸರಾಮಿ ಖೋ ಅಹಂ ಆವುಸೋ ಯಥಾ ಸುಪಿನನ್ತೇನಾ’’ತಿ. ಅಞ್ಞೋ ಅನುಮ್ಮತ್ತಕೋವ ಉಮ್ಮತ್ತಕಾಲಯಂ ಕರೋತಿ ‘‘ಅಹಮ್ಪಿ ಖೋ ಏವಂ ಕರೋಮಿ, ತುಮ್ಹೇಪಿ ಏವಂ ಕರೋಥ, ಮಯ್ಹಮ್ಪಿ ಏತಂ ಕಪ್ಪತಿ, ತುಮ್ಹಾಕಮ್ಪೇತಂ ಕಪ್ಪತೀ’’ತಿ. ಏಸಂ ಸಙ್ಘೋ ಅಮೂಳ್ಹವಿನಯಂ ದೇತಿ, ಅಧಮ್ಮಿಕಂ ಭನ್ತೇ ಅಮೂಳ್ಹವಿನಯಸ್ಸ ದಾನಂ. ಇಮಾನಿ ಖೋ ಭನ್ತೇ ತೀಣಿ ಅಧಮ್ಮಿಕಾನಿ ಅಮೂಳ್ಹವಿನಯಸ್ಸ ದಾನಾನಿ.

ಪುಚ್ಛಾ – ಕತಿ ¶ ಆವುಸೋ ಧಮ್ಮಿಕಾನಿ ಅಮೂಳ್ಹವಿನಯಸ್ಸ ದಾನಾನಿ, ವಿಭಜಿತ್ವಾ ಕಥೇಹಿ.

ವಿಸ್ಸಜ್ಜನಾ – ತೀಣಿ ಭನ್ತೇ ಧಮ್ಮಿಕಾನಿ ಅಮೂಳ್ಹವಿನಯಸ್ಸ ದಾನಾನಿ, ಇಧ ಭನ್ತೇ ಭಿಕ್ಖು ಉಮ್ಮತ್ತಕೋ ಹೋತಿ ಚಿತ್ತವಿಪರಿಯಾಸಕತೋ ತೇನ ಉಮ್ಮತ್ತಕೇನ ಚಿತ್ತವಿಪರಿಯಾಸಕತೇನ ಬಹುಂ ಅಸ್ಸಾಮಣಕಂ ಅಜ್ಝಾಚಿಣ್ಣಂ ಹೋತಿ ಭಾಸಿತಪರಿಕ್ಕನ್ತಂ, ತಮೇನಂ ಚೋದೇತಿ ಸಙ್ಘೋ ವಾ ಸಮ್ಬಹುಲಾ ವಾ ಏಕಪುಗ್ಗಲೋ ವಾ ‘‘ಸರತಾಯಸ್ಮಾ ಏವರೂಪಿಂ ಆಪತ್ತಿಂ ಆಪಜ್ಜಿತಾ’’ತಿ, ಸೋ ಅಸ್ಸರಮಾನೋವ ಏವಂ ವದೇತಿ ‘‘ನ ಖೋ ಅಹಂ ಆವುಸೋ ಸರಾಮಿ ಏವರೂಪಿಂ ಆಪತ್ತಿಂ ಆಪಜ್ಜಿತಾ’’ತಿ. ಅಞ್ಞೋಪಿ ಅಸ್ಸರಮಾನೋವ ಏವಂ ವದೇತಿ ‘‘ಸರಾಮಿ ಖೋ ಅಹಂ ಆವುಸೋ ಯಥಾ ಸುಪಿನನ್ತೇನಾ’’ತಿ. ಅಞ್ಞೋಪಿ ಉಮ್ಮತ್ತಕೋವ ಉಮ್ಮತ್ತಕಾಲಯಂ ಕರೋತಿ ‘‘ಅಹಮ್ಪಿ ಏವಂ ಕರೋಮಿ, ತುಮ್ಹೇಪಿ ಏವಂ ಕರೋಥ, ಮಯ್ಹಮ್ಪಿ ಏತಂ ಕಪ್ಪತಿ, ತುಮ್ಹಾಕಮ್ಪೇತಂ ಕಪ್ಪತೀ’’ತಿ. ಏಸಂ ಭನ್ತೇ ತಿಣ್ಣಂ ಭಿಕ್ಖೂನಂ ಸಙ್ಘೋ ಅಮೂಳ್ಹವಿನಯಂ ದೇತಿ, ಧಮ್ಮಿಕಂ ಭನ್ತೇ ಅಮೂಳ್ಹವಿನಯಸ್ಸ ದಾನಂ. ಇಮಾನಿ ಖೋ ಭನ್ತೇ ತೀಣಿ ಧಮ್ಮಿಕಾನಿ ಅಮೂಳ್ಹವಿನಯಸ್ಸ ದಾನಾನಿ.

ಪುಚ್ಛಾ – ಅಪ್ಪಟಿಞ್ಞಾಯ ¶ ಆವುಸೋ ಭಿಕ್ಖೂನಂ ತಜ್ಜನೀಯಾದೀನಿ ಕಮ್ಮಾನಿ ಕರೋನ್ತಸ್ಸ ದುಕ್ಕಟಂ ಭಗವತಾ ಕತ್ಥ ಪಞ್ಞತ್ತಂ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಪಞ್ಞತ್ತಂ.

ವಿಸ್ಸಜ್ಜನಾ – ರಾಜಗಹೇ ¶ ಭನ್ತೇ ಛಬ್ಬಗ್ಗಿಯೇ ಭಿಕ್ಖೂ ಆರಬ್ಭ ಪಞ್ಞತ್ತಂ, ಛಬ್ಬಗ್ಗಿಯಾ ಭನ್ತೇ ಭಿಕ್ಖೂ ಅಪ್ಪಟಿಞ್ಞಾಯ ಭಿಕ್ಖೂನಂ ಕಮ್ಮಾನಿ ಅಕಂಸು ತಜ್ಜನೀಯಾದೀನಿ, ತಸ್ಮಿಂ ಭನ್ತೇ ವತ್ಥುಸ್ಮಿಂ ಪಞ್ಞತ್ತಂ.

ಪುಚ್ಛಾ – ಕಥಂ ಆವುಸೋ ಅಧಮ್ಮಿಕಂ ಹೋತಿ ಪಟಿಞ್ಞಾತಕರಣಂ.

ವಿಸ್ಸಜ್ಜನಾ – ಅಞ್ಞಥಾ ಭನ್ತೇ ಆಪತ್ತಿಂ ಆಪಜ್ಜನ್ತಸ್ಸ ಅಞ್ಞಥಾ ಪಟಿಜಾನನ್ತಸ್ಸ ಯಥಾ ಸೋ ಪಟಿಜಾನಾತಿ, ತಥಾ ಸಙ್ಘೋ ಕಾರೇತಿ, ಏವಂ ಖೋ ಭನ್ತೇ ಅಧಮ್ಮಿಕಂ ಹೋತಿ ಪಟಿಞ್ಞಾತಕರಣಂ.

ಪುಚ್ಛಾ – ಕಥಂ ¶ ಆವುಸೋ ಧಮ್ಮಿಕಂ ಹೋತಿ ಪಟಿಞ್ಞಾತಕರಣಂ.

ವಿಸ್ಸಜ್ಜನಾ – ಯಂ ಭನ್ತೇ ಆಪತ್ತಿಂ ಆಪಜ್ಜನ್ತಸ್ಸ ತಮೇವ ಪಟಿಜಾನನ್ತಸ್ಸ ತೇನೇವ ಸಙ್ಘೋ ಕಾರೇತಿ, ಏವಂ ಖೋ ಭನ್ತೇ ಧಮ್ಮಿಕಂ ಪಟಿಞ್ಞಾತಕರಣಂ.

ಪುಚ್ಛಾ – ಯೇಭುಯ್ಯಸಿಕಾಯ ¶ ಆವುಸೋ ಅಧಿಕರಣಂ ವೂಪಸಮೇತುಂ ಭಗವತಾ ಕತ್ಥ ಅನುಞ್ಞಾತಂ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಅನುಞ್ಞಾತಂ.

ವಿಸ್ಸಜ್ಜನಾ – ರಾಜಗಹೇ ¶ ಭನ್ತೇ ಸಮ್ಬಹುಲೇ ಭಿಕ್ಖೂ ಆರಬ್ಭ ಅನುಞ್ಞಾತಂ, ಸಮ್ಬಹುಲಾ ಭನ್ತೇ ಭಿಕ್ಖೂ ಭಣ್ಡನಜಾತಾ ಕಲಹಜಾತಾ ವಿವಾದಾಪನ್ನಾ ಅಞ್ಞಮಞ್ಞಂ ಮುಖಸತ್ತೀಹಿ ವಿತುದನ್ತಾ ವಿಹರಿಂಸು, ನ ಸಕ್ಕೋನ್ತಿ ತಂ ಅಧಿಕರಣಂ ವೂಪಸಮೇತುಂ, ತಸ್ಮಿಂ ಭನ್ತೇ ವತ್ಥುಸ್ಮಿಂ ಅನುಞ್ಞಾತಂ.

ಪುಚ್ಛಾ – ಕಥಂ ಆವುಸೋ ಅಧಿಕರಣಂ ಯೇಭುಯ್ಯಸಿಕಾಯ ವೂಪಸಮೇತಬ್ಬಂ.

ವಿಸ್ಸಜ್ಜನಾ – ಪಞ್ಚಹಿ ಭನ್ತೇ ಅಙ್ಗೇಹಿ ಸಮನ್ನಾಗತೋ ಭಿಕ್ಖು ಸಲಾಕಗ್ಗಾಹಾಪಕೋ ಸಮ್ಮನ್ನಿತಬ್ಬೋ, ತೇನ ಭನ್ತೇ ಸಲಾಕಗ್ಗಾಹಾಪಕೇನ ¶ ಸಲಾಕಾ ಗಾಹಾತಬ್ಬಾ ಯಥಾ ಬಹುತರಾ ಭಿಕ್ಖೂ ಧಮ್ಮವಾದಿನೋ ವದನ್ತಿ ತಥಾ ತಂ ಅಧಿಕರಣಂ ವೂಪಸಮೇತಬ್ಬಂ, ಏವಂ ಖೋ ಭನ್ತೇ ಯೇಭುಯ್ಯಸಿಕಾಯ ಅಧಿಕರಣಂ ವೂಪಸಮೇತಬ್ಬಂ.

ಪುಚ್ಛಾ – ಕತಿ ¶ ಆವುಸೋ ಅಧಮ್ಮಿಕಾ ಸಲಾಕಗ್ಗಾಹಾ.

ವಿಸ್ಸಜ್ಜನಾ – ದಸ ಭನ್ತೇ ಅಧಮ್ಮಿಕಾ ಸಲಾಕಗ್ಗಾಹಾ, ಓರಮತ್ತಕಞ್ಚ ಅಧಿಕರಣಂ ಹೋತಿ, ನ ಚ ಗತಿಗತಂ ಹೋತಿ, ನ ಚ ಸರಿತಸಾರಿತಂ ಹೋತಿ, ಜಾನಾತಿ ‘ಅಧಮ್ಮವಾದೀ ಬಹುತರಾ’ತಿ, ಅಪ್ಪೇವ ನಾಮ ಅಧಮ್ಮವಾದೀ ಬಹುತರಾ ಅಸ್ಸೂತಿ, ಜಾನಾತಿ ‘ಸಙ್ಘೋ ಭಿಜ್ಜಿಸ್ಸತೀ’ತಿ, ಅಪ್ಪೇವ ನಾಮ ಸಙ್ಘೋ ಭಿಜ್ಜೇಯ್ಯಾತಿ, ಅಧಮ್ಮೇನ ಗಣ್ಹನ್ತಿ, ವಗ್ಗಾ ಗಣ್ಹನ್ತಿ, ನ ಚ ಯಥಾದಿಟ್ಠಿಯಾ ಗಣ್ಹನ್ತಿ, ಇಮೇ ಖೋ ಭನ್ತೇ ದಸ ಅಧಮ್ಮಿಕಾ ಕಲಾಕಗ್ಗಾಹಾ.

ಪುಚ್ಛಾ – ಕತಿ ¶ ಆವುಸೋ ಧಮ್ಮಿಕಾ ಸಲಾಕಗ್ಗಾಹಾ.

ವಿಸ್ಸಜ್ಜನಾ – ದಸ ಭನ್ತೇ ಧಮ್ಮಿಕಾ ಸಲಾಕಗ್ಗಾಹಾ ವುತ್ತವಿಪರಿಯಾಯೇನ.

ಪುಚ್ಛಾ – ಪಾಪುಸ್ಸನ್ನಸ್ಸ ಆವುಸೋ ಭಿಕ್ಖುಸ್ಸ ತಸ್ಸ ಪಾಪಿಯಸಿಕಾ ಕಮ್ಮಂ ಕಾತುಂ ಭಗವತಾ ಕತ್ಥ ಪಞ್ಞತ್ತಂ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಪಞ್ಞತ್ತಂ.

ವಿಸ್ಸಜ್ಜನಾ – ರಾಜಗಹೇ ಭನ್ತೇ ಉಪವಾಳಂ ಭಿಕ್ಖುಂ ಆರಬ್ಭ ಪಞ್ಞತ್ತಂ, ಉಪವಾಳೋ ಭನ್ತೇ ಭಿಕ್ಖು ಸಙ್ಘಮಜ್ಝೇ ಆಪತ್ತಿಯಾ ಅನುಯುಞ್ಜಿಯಮಾನೋ ಅವಜಾನಿತ್ವಾ ಪಟಿಜಾನಾತಿ, ಪಟಿಜಾನಿತ್ವಾ ಅವಜಾನಾತಿ, ಅಞ್ಞೇನಞ್ಞಂ ಪಟಿಚರತಿ, ಸಮ್ಪಜಾನಮುಸಾ ಭಾಸತಿ, ತಸ್ಮಿಂ ಭನ್ತೇ ವತ್ಥುಸ್ಮಿಂ ಪಞ್ಞತ್ತಂ.

ಪುಚ್ಛಾ – ಕತಿ ¶ ಆವುಸೋ ಧಮ್ಮಿಕಾನಿ ತಸ್ಸಪಾಪಿಯಸಿಕಾ ಕಮ್ಮಸ್ಸ ಕರಣಾನಿ.

ವಿಸ್ಸಜ್ಜನಾ – ಪಞ್ಚಿಮಾನಿ ಭನ್ತೇ ಧಮ್ಮಿಕಾನಿ ತಸ್ಸಪಾಪಿಯಸಿಕಾ ಕಮ್ಮಸ್ಸ ಕರಣಾನಿ. ಅಸುಚಿ ಚ ಹೋತಿ, ಅಲಜ್ಜೀ ಚ, ಸಾನುವಾದೋ ಚ, ತಸ್ಸ ಸಙ್ಘೋ ತಸ್ಸಪಾಪಿಯಸಿಕಾ ಕಮ್ಮಂ ಕರೋತಿ ಧಮ್ಮೇನ ಸಮಗ್ಗೇನ, ಇಮಾನಿ ಖೋ ಭನ್ತೇ ಪಞ್ಚ ಧಮ್ಮಿಕಾನಿ ತಸ್ಸ ಪಾಪಿಯಸಿಕಾ ಕಮ್ಮಸ್ಸ ಕರಣಾನಿ.

ಪುಚ್ಛಾ – ತಸ್ಸ ¶ ಪಾಪಿಯಸಿಕಾಕಮ್ಮಕತೇನ ಆವುಸೋ ಭಿಕ್ಖುನಾ ಕತಿಸು ವತ್ತೇಸು ಸಮ್ಮಾ ವತ್ತಿತಬ್ಬಂ.

ವಿಸ್ಸಜ್ಜನಾ – ತಸ್ಸ ಪಾಪಿಯಸಿಕಾಕಮ್ಮಕತೇನ ಭನ್ತೇ ಭಿಕ್ಖುನಾ ಅಟ್ಠಾರಸಸು ವತ್ತೇಸು ಸಮ್ಮಾ ವತ್ತಿತಬ್ಬಂ. ನ ಉಪಸಮ್ಪಾದೇತಬ್ಬಂ, ನ ನಿಸ್ಸಯೋ ದಾತಬ್ಬೋ, ನ ಸಾಮಣೇರೋ ಉಪಟ್ಠಾಪೇತಬ್ಬೋ, ಏವಮಾದೀಸು ಭನ್ತೇ ಅಟ್ಠಾರಸಸು ವತ್ತೇಸು ಸಮ್ಮಾ ವತ್ತಿತಬ್ಬಂ.

ಪುಚ್ಛಾ – ಕತಿ ¶ ಆವುಸೋ ಅಧಿಕರಣಾನಿ ಸಮಥೇಹಿ ವೂಪಸಮೇತಬ್ಬಾನಿ.

ವಿಸ್ಸಜ್ಜನಾ – ಚತ್ತಾರಿಮಾನಿ ಭನ್ತೇ ಅಧಿಕರಣಾನಿ ಸಮಥೇಹಿ ವೂಪಸಮೇತಬ್ಬಾನಿ, ವಿವಾದಾಧಿಕರಣಂ ಅನುವಾದಾಧಿಕರಣಂ ಆಪತ್ತಾಧಿಕರಣಂ ಕಿಚ್ಚಾಧಿಕರಣಂ, ಇಮಾನಿ ಭನ್ತೇ ಚತ್ತಾರಿ ಅಧಿಕರಣಾನಿ ಸಮಥೇಹಿ ವೂಪಸಮೇತಬ್ಬಾನಿ.

ಪುಚ್ಛಾ – ಕಿಂ ¶ ಆವುಸೋ ವಿವಾದಾಧಿಕರಣಸ್ಸ ಮೂಲಂ.

ವಿಸ್ಸಜ್ಜನಾ – ಛ ಭನ್ತೇ ವಿವಾದಮೂಲಾನಿ ವಿವಾದಾಧಿಕರಣಸ್ಸ ಮೂಲಂ, ತೀಣಿಪಿ ಅಕುಸಲಮೂಲಾನಿ ವಿವಾದಾಧಿಕರಣಸ್ಸ ಮೂಲಂ, ತೀಣಿಪಿ ಕುಸಲಮೂಲಾನಿ ವಿವಾದಾಧಿಕರಣಸ್ಸ ಮೂಲಂ, ಇದಂ ಭನ್ತೇ ವಿವಾದಾಧಿಕರಣಸ್ಸ ಮೂಲಂ.

ಪುಚ್ಛಾ – ಕಿಂ ¶ ಪನಾವುಸೋ ಅನುವಾದಾಧಿಕರಣಸ್ಸ ಮೂಲಂ.

ವಿಸ್ಸಜ್ಜನಾ – ಛ ಭನ್ತೇ ಅನುವಾದಮೂಲಾನಿ ಅನುವಾದಾಧಿಕರಣಸ್ಸ ಮೂಲಂ, ತೀಣಿಪಿ ಅಕುಸಲಮೂಲಾನಿ ಅನುವಾದಾಧಿಕರಣಸ್ಸ ಮೂಲಂ, ತೀಣಿಪಿ ಕುಸಲಮೂಲಾನಿ ಅನುವಾದಾಧಿಕರಣಸ್ಸ ಮೂಲಂ, ಕಾಯೋಪಿ ಅನುವಾದಾಧಿಕರಣಸ್ಸ ಮೂಲಂ, ವಾಚಾಪಿ ಅನುವಾದಾಧಿಕರಣಸ್ಸ ಮೂಲಂ, ಇದಂ ಖೋ ಭನ್ತೇ ಅನುವಾದಾಧಿಕರಣಸ್ಸ ಮೂಲಂ.

ಪುಚ್ಛಾ – ಕಿಂ ¶ ಪನಾವುಸೋ ಆಪತ್ತಾಧಿಕರಣಸ್ಸ ಮೂಲಂ.

ವಿಸ್ಸಜ್ಜನಾ – ಛ ಭನ್ತೇ ಆಪತ್ತಿಸಮುಟ್ಠಾನಾ ಆಪತ್ತಾಧಿಕರಣಸ್ಸ ಮೂಲಂ, ಅತ್ತಿ ಭನ್ತೇ ಆಪತ್ತಿ ಕಾಯತೋ ಸಮುಟ್ಠಾತಿ ನ ವಾಚತೋ ನ ಚಿತ್ತತೋ, ಅತ್ಥಿ ಭನ್ತೇ ಆಪತ್ತಿ ವಾಚತೋ ಸಮುಟ್ಠಾತಿ ನ ಕಾಯತೋ ನ ಚಿತ್ತತೋ, ಅತ್ಥಿ ಭನ್ತೇ ಆಪತ್ತಿ ಕಾಯತೋ ¶ ಚ ವಾಚತೋ ಚ ಸಮುಟ್ಠಾತಿ ನ ಚಿತ್ತತೋ, ಅತ್ಥಿ ಭನ್ತೇ ಆಪತ್ತಿ ಕಾಯತೋ ಚ ಚಿತ್ತತೋ ಚ ಸಮುಟ್ಠಾತಿ ನ ವಾಚತೋ, ಅತ್ಥಿ ಭನ್ತೇ ಆಪತ್ತಿ ವಾಚತೋ ಚ ಚಿತ್ತತೋ ಚ ಸಮುಟ್ಠಾತಿ ನ ಕಾಯತೋ, ಅತ್ಥಿ ಭನ್ತೇ ಆಪತ್ತಿ ಕಾಯತೋ ಚ ವಾಚತೋ ಚ ಚಿತ್ತತೋ ಚ ಸಮುಟ್ಠಾತಿ, ಇಮಾನಿ ಭನ್ತೇ ಛ ಆಪತ್ತಿ ಸಮುಟ್ಠಾನಾನಿ ಆಪತ್ತಾಧಿಕರಣಸ್ಸ ಮೂಲಂ.

ಪುಚ್ಛಾ – ಕಿಂ ¶ ಪನಾವುಸೋ ಕಿಚ್ಚಾಧಿಕರಣಸ್ಸ ಮೂಲಂ.

ವಿಸ್ಸಜ್ಜನಾ – ಕಿಚ್ಚಾಧಿಕರಣಸ್ಸ ಭನ್ತೇ ಏಕಂ ಮೂಲಂ ಸಙ್ಘೋ.

ಪುಚ್ಛಾ – ಸಮಥಂ ಆವುಸೋ ಪುಚ್ಛಿಸ್ಸಂ, ಸನಿದಾನಂ ಸನಿದ್ದೇಸಂ. ಸಮುಕ್ಕಟ್ಠಪದಾನಂ ಆವುಸೋ ಕತಿ ಆಪತ್ತಿಯೋ.

ವಿಸ್ಸಜ್ಜನಾ – ಸಮಥಂ ಭನ್ತೇ ವಿಸ್ಸಜ್ಜಿಸ್ಸಂ, ಸನಿದಾನಂ ಸನಿದ್ದೇಸಂ. ಸಮುಕ್ಕಟ್ಠಪದಾನಂ ಭನ್ತೇ ದ್ವೇ ಆಪತ್ತಿಯೋ.

೫. ಖುದ್ದಕವತ್ಥುಕ್ಖನ್ಧಕ

ಪುಚ್ಛಾ – ನಹಾಯನ್ತೇನ ¶ ಆವುಸೋ ಭಿಕ್ಖುನಾ ರುಕ್ಖೇ ವಾ ಥಮ್ಭೇ ವಾ ಕುಟ್ಟೇ ವಾ ಕಾಯಂ ಉಗ್ಘಂಸೇನ್ತಸ್ಸ ದುಕ್ಕಟಂ ಭಗವತಾ ಕತ್ಥ ಪಞ್ಞತ್ತಂ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಪಞ್ಞತ್ತಂ.

ವಿಸ್ಸಜ್ಜನಾ – ರಾಜಗಹೇ ಭನ್ತೇ ಛಬ್ಬಗ್ಗಿಯೇ ಭಿಕ್ಖೂ ಆರಬ್ಭ ಪಞ್ಞತ್ತಂ, ಛಬ್ಬಗ್ಗಿಯಾ ಭನ್ತೇ ಭಿಕ್ಖೂ ನಹಾಯಮಾನಾ ರುಕ್ಖೇಪಿ ಥಮ್ಭೇಪಿ ಕುಟ್ಟೇಪಿ ಕಾಯಂ ಉಗ್ಘಂಸೇಸುಂ, ತಸ್ಮಿಂ ಭನ್ತೇ ವತ್ಥುಸ್ಮಿಂ ಪಞ್ಞತ್ತಂ.

ಪುಚ್ಛಾ – ಗನ್ಧಬ್ಬಹತ್ಥಕೇನ ವಾ ಆವುಸೋ ಕುರುವಿನ್ದಕಸುತ್ತಿಯಾ ವಾ ಮಲ್ಲಕೇನ ವಾ ನಹಾಯನ್ತಸ್ಸ ದುಕ್ಕಟಂ ಭಗವತಾ ಕತ್ಥ ಪಞ್ಞತ್ತಂ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಪಞ್ಞತ್ತಂ.

ವಿಸ್ಸಜ್ಜನಾ – ರಾಜಗಹೇ ಭನ್ತೇ ಛಬ್ಬಗ್ಗಿಯೇವ ಭಿಕ್ಖೂ ಆರಬ್ಭ ಪಞ್ಞತ್ತಂ, ಛಬ್ಬಗ್ಗಿಯಾ ಭನ್ತೇ ಭಿಕ್ಖೂ ಗನ್ಧಬ್ಬಹತ್ಥಕೇನಪಿ ಕುರುವಿನ್ದಕಸುತ್ತಿಯಾಪಿ ¶ ಮಲ್ಲಕೇನಪಿ ನಹಾಯಿಂಸು, ತಸ್ಮಿಂ ಭನ್ತೇ ವತ್ಥುಸ್ಮಿಂ ಪಞ್ಞತ್ತಂ.

ಪುಚ್ಛಾ – ಪಾಣಿನಾ ಆವುಸೋ ಪರಿಕಮ್ಮಂ ಕಾತುಂ ಭಗವತಾ ಕತ್ಥ ಅನುಞ್ಞಾತಂ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಅನುಞ್ಞಾತಂ.

ವಿಸ್ಸಜ್ಜನಾ – ರಾಜಗಹೇ ಭನ್ತೇ ಸಮ್ಬಹುಲೇ ಭಿಕ್ಖೂ ಆರಬ್ಭ ಅನುಞ್ಞಾತಂ, ಸಮ್ಬಹುಲಾ ಭನ್ತೇ ಭಿಕ್ಖೂ ಪಿಟ್ಠಿಪರಿಕಮ್ಮಂ ಕಾತುಂ ಕುಕ್ಕುಚ್ಚಾಯಿಂಸು, ತಸ್ಮಿಂ ಭನ್ತೇ ವತ್ಥುಸ್ಮಿಂ ಅನುಞ್ಞಾತಂ.

ಪುಚ್ಛಾ – ವಲ್ಲಿಕಂ ¶ ವಾ ಆವುಸೋ ಪಾಮಙ್ಗಂ ವಾ ಕಣ್ಠಸುತ್ತಕಂ ವಾ ಕಟಿಸುತ್ತಕಂ ವಾ ಓವಟ್ಟಿಕಂ ವಾ ಕಾಯುರಂ ವಾ ಹತ್ಥಾಭರಣಂ ವಾ ಅಙ್ಗುಲಿಮುದ್ದಿಕಂ ವಾ ಧಾರೇನ್ತಸ್ಸ ದುಕ್ಕಟಂ ಭಗವತಾ ಕತ್ಥ ಪಞ್ಞತ್ತಂ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಪಞ್ಞತ್ತಂ.

ವಿಸ್ಸಜ್ಜನಾ – ರಾಜಗಹೇ ಭನ್ತೇ ಛಬ್ಬಗ್ಗಿಯೇ ಭಿಕ್ಖೂ ಆರಬ್ಭ ಪಞ್ಞತ್ತಂ, ಛಬ್ಬಗ್ಗಿಯಾ ಭನ್ತೇ ಭಿಕ್ಖೂ ವಲ್ಲಿಕಾದೀನಿ ಧಾರೇಸುಂ, ತಸ್ಮಿಂ ಭನ್ತೇ ವತ್ಥುಸ್ಮಿಂ ಪಞ್ಞತ್ತಂ.

ಪುಚ್ಛಾ – ದೀಘೇ ¶ ಆವುಸೋ ಕೇಸೇ ಧಾರೇನ್ತಸ್ಸ ದುಕ್ಕಟಂ ಭಗವತಾ ಕತ್ಥ ಪಞ್ಞತ್ತಂ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಪಞ್ಞತ್ತಂ.

ವಿಸ್ಸಜ್ಜನಾ – ರಾಜಗಹೇ ಭನ್ತೇ ಛಬ್ಬಗ್ಗಿಯೇ ಭಿಕ್ಖೂ ಆರಬ್ಭ ಪಞ್ಞತ್ತಂ, ಛಬ್ಬಗ್ಗಿಯಾ ಭನ್ತೇ ಭಿಕ್ಖೂ ದೀಘೇ ಕೇಸೇ ಧಾರೇಸುಂ, ತಸ್ಮಿಂ ಭನ್ತೇ ವತ್ಥುಸ್ಮಿಂ ಪಞ್ಞತ್ತಂ.

ಪುಚ್ಛಾ – ಕೋಚ್ಛೇನವಾ ¶ ಆವುಸೋ ಫಣಕೇನವಾ ಹತ್ಥಫಣಕೇನವಾ ಕೇಸೇ ಓಸಣ್ಠೇನ್ತಸ್ಸ ದುಕ್ಕಟಂ ಭಗವತಾ ಕತ್ಥ ಪಞ್ಞತ್ತಂ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಪಞ್ಞತ್ತಂ.

ವಿಸ್ಸಜ್ಜನಾ – ರಾಜಗಹೇ ಭನ್ತೇ ಛಬ್ಬಗ್ಗಿಯೇವ ಭಿಕ್ಖೂ ಆರಬ್ಭ ಪಞ್ಞತ್ತಂ, ಛಬ್ಬಗ್ಗಿಯಾ ಭನ್ತೇ ಭಿಕ್ಖೂ ಕೋಚ್ಛಾದೀಹಿ ಕೇಸೇ ಓಸಣ್ಠೇಸುಂ, ತಸ್ಮಿಂ ಭನ್ತೇ ವತ್ಥುಸ್ಮಿಂ ಪಞ್ಞತ್ತಂ.

ಪುಚ್ಛಾ – ಆದಾಸೇ ¶ ವಾ ಆವುಸೋ ಉದಕಪತ್ತೇ ವಾ ಮುಖನಿಮಿತ್ತಂ ಓಲೋಕೇನ್ತಸ್ಸ ದುಕ್ಕಟಂ ಭಗವತಾ ಕತ್ಥ ಪಞ್ಞತ್ತಂ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಪಞ್ಞತ್ತಂ.

ವಿಸ್ಸಜ್ಜನಾ – ರಾಜಗಹೇ ಭನ್ತೇ ಛಬ್ಬಗ್ಗಿಯೇವ ಭಿಕ್ಖೂ ಆರಬ್ಭ ಪಞ್ಞತ್ತಂ, ಛಬ್ಬಗ್ಗಿಯಾ ಭನ್ತೇ ಭಿಕ್ಖೂ ಆದಾಸೇಪಿ ಉದಕಪತ್ತೇಪಿ ಮುಖನಿಮಿತ್ತಂ ಓಲೋಕೇಸುಂ, ತಸ್ಮಿಂ ಭನ್ತೇ ವತ್ಥುಸ್ಮಿಂ ಪಞ್ಞತ್ತಂ.

ಪುಚ್ಛಾ – ಆಬಾಧಪಚ್ಚಯಾ ¶ ಪನಾವುಸೋ ಆದಾಸೇ ವಾ ಉದಕಪತ್ತೇ ವಾ ಮುಖನಿಮಿತ್ತಂ ಓಲೋಕೇತುಂ ಭಗವತಾ ಕತ್ಥ ಅನುಞ್ಞಾತಂ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಅನುಞ್ಞಾತಂ.

ವಿಸ್ಸಜ್ಜನಾ – ರಾಜಗಹೇ ಭನ್ತೇ ಅಞ್ಞತರಂ ಭಿಕ್ಖುಂ ಆರಬ್ಭ ಅನುಞ್ಞಾತಂ, ಭಗವತಿ ಭನ್ತೇ ರಾಜಗಹೇ ವಿಹರತಿ ಅಞ್ಞತರಸ್ಸ ಭಿಕ್ಖುನೋ ಮುಖೇ ವಣೋ ಅಹೋಸಿ, ಸೋ ಭಿಕ್ಖೂ ಏತದವೋಚ ‘‘ಕೀದಿಸೋ ಮೇ ಆವುಸೋ ವಣೋ’’ತಿ, ಭಿಕ್ಖೂ ಏವಮಾಹಂಸು ‘‘ಏದಿಸೋ ತೇ ಆವುಸೋ ವಣೋ’’ತಿ, ಸೋ ನ ಸದ್ದಹತಿ, ತಸ್ಮಿಂ ಭನ್ತೇ ವತ್ಥುಸ್ಮಿಂ ಅನುಞ್ಞಾತಂ.

ಪುಚ್ಛಾ – ಮುಖಾಲೇಪನಾದೀನಿ ¶ ಆವುಸೋ ಕರೋನ್ತಸ್ಸ ದುಕ್ಕಟಂ ಭಗವತಾ ಕತ್ಥ ಪಞ್ಞತ್ತಂ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಪಞ್ಞತ್ತಂ.

ವಿಸ್ಸಜ್ಜನಾ – ರಾಜಗಹೇ ಭನ್ತೇ ಛಬ್ಬಗ್ಗಿಯೇ ಭಿಕ್ಖೂ ಆರಬ್ಭ ಪಞ್ಞತ್ತಂ, ಛಬ್ಬಗ್ಗಿಯಾ ಭನ್ತೇ ಭಿಕ್ಖೂ ಮುಖಾಲೇಪನಾದೀನಿ ಅಕಂಸು, ತಸ್ಮಿಂ ಭನ್ತೇ ವತ್ಥುಸ್ಮಿಂ ಪಞ್ಞತ್ತಂ.

ಪುಚ್ಛಾ – ನಚ್ಚಂ ¶ ವಾ ಆವುಸೋ ಗೀತಂ ವಾ ವಾದಿತಂ ವಾ ದಸ್ಸನಾಯ ಗಚ್ಛನ್ತಸ್ಸ ದುಕ್ಕಟಂ ಭಗವತಾ ಕತ್ಥ ಪಞ್ಞತ್ತಂ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಪಞ್ಞತ್ತಂ.

ವಿಸ್ಸಜ್ಜನಾ – ರಾಜಗಹೇ ಭನ್ತೇ ಛಬ್ಬಗ್ಗಿಯೇ ಭಿಕ್ಖೂ ಆರಬ್ಭ ಪಞ್ಞತ್ತಂ, ಛಬ್ಬಗ್ಗಿಯಾ ಭನ್ತೇ ನಚ್ಚಮ್ಪಿ ಗೀತಮ್ಪಿ ವಾದಿತಮ್ಪಿ ದಸ್ಸನಾಯ ಗಚ್ಛಿಂಸು, ತಸ್ಮಿಂ ಭನ್ತೇ ವತ್ಥುಸ್ಮಿಂ ಪಞ್ಞತ್ತಂ.

ಪುಚ್ಛಾ – ಕಥಂ ಆವುಸೋ ನಚ್ಚಾದೀನಿ ಪಸ್ಸನ್ತಸ್ಸ ಆಪತ್ತಿ ಹೋತಿ, ಕಥಂ ಪನ ಅನಾಪತ್ತಿ.

ವಿಸ್ಸಜ್ಜನಾ – ನಚ್ಚಂ ವಾ ಭನ್ತೇ ಗೀತಂ ವಾ ವಾದಿತಂ ವಾ ದಸ್ಸನಾಯ ಗಚ್ಛತಿ ಆಪತ್ತಿ ದುಕ್ಕಟಸ್ಸ, ಯತ್ಥ ಠಿತೋ ಪಸ್ಸತಿ ವಾ ಸುಣಾತಿ ವಾ ಆಪತ್ತಿ ದುಕ್ಕಟಸ್ಸ ¶ , ದಸ್ಸನೂಪಚಾರಂ ವಿಜಹಿತ್ವಾ ಪುನಪ್ಪುನಂ ಪಸ್ಸತಿ ಆಪತ್ತಿ ದುಕ್ಕಟಸ್ಸ, ಆರಾಮೇ ಠಿತಸ್ಸ ಪಸ್ಸತೋ ಅನಾಪತ್ತಿ, ವಿಹಾರತೋ ಪನ ವಿಹಾರಂ ಪಸ್ಸಿಸ್ಸಾಮೀತಿ ಗಚ್ಛತೋ ಆಪತ್ತಿಯೇವ, ಯತ್ಥ ಠಿತೋ ಪಸ್ಸತಿ ವಾ ಸುಣಾತಿ ವಾ ಆಪತ್ತಿ ದುಕ್ಕಟಸ್ಸ, ಆಸನಸಾಲಾಯ ನಿಸಿನ್ನೋ ಪಸ್ಸತಿ ಅನಾಪತ್ತಿ, ಪಸ್ಸಿಸ್ಸಾಮೀತಿ ವುಟ್ಠಹಿತ್ವಾ ಗಚ್ಛತಿ ಆಪತ್ತಿ ದುಕ್ಕಟಸ್ಸ, ಯತ್ಥ ಠಿತೋ ಪಸ್ಸತಿ ವಾ ಸುಣಾತಿ ವಾ ಆಪತ್ತಿ ದುಕ್ಕಟಸ್ಸ, ಪತಿಪಥಂ ಗಚ್ಛನ್ತೋ ಪಸ್ಸತಿ ಅನಾಪತ್ತಿ, ಗೀವಂ ಪರಿವತ್ತೇತ್ವಾ ಪಸ್ಸತೋ ಪನ ಆಪತ್ತಿ ಭನ್ತೇ.

ಪುಚ್ಛಾ – ಆಯತಕೇನ ¶ ಆವುಸೋ ಗೀತಸ್ಸರೇನ ಧಮ್ಮಂ ಗಾಯನ್ತಸ್ಸ ದುಕ್ಕಟಂ ಭಗವತಾ ಕತ್ಥ ಪಞ್ಞತ್ತಂ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಪಞ್ಞತ್ತಂ.

ವಿಸ್ಸಜ್ಜನಾ – ರಾಜಗಹೇ ಭನ್ತೇ ಛಬ್ಬಗ್ಗಿಯೇ ಭಿಕ್ಖೂ ಆರಬ್ಭ ಪಞ್ಞತ್ತಂ, ಛಬ್ಬಗ್ಗಿಯಾ ಭನ್ತೇ ಭಿಕ್ಖೂ ಆಯತಕೇನ ಗೀತಸ್ಸರೇನ ಧಮ್ಮಂ ಗಾಯಿಂಸು, ತಸ್ಮಿಂ ಭನ್ತೇ ವತ್ಥುಸ್ಮಿಂ ಪಞ್ಞತ್ತಂ.

ಪುಚ್ಛಾ – ದಾರುಪತ್ತಂ ¶ ಆವುಸೋ ಧಾರೇನ್ತಸ್ಸ ದುಕ್ಕಟಂ ಭಗವತಾ ಕತ್ಥ ಪಞ್ಞತ್ತಂ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಪಞ್ಞತ್ತಂ.

ವಿಸ್ಸಜ್ಜನಾ – ರಾಜಗಹೇ ಭನ್ತೇ ಆಯಸ್ಮನ್ತಂ ಪಿಣ್ಡೋಲಭಾರದ್ವಾಜಂ ಆರಬ್ಭ ಪಞ್ಞತ್ತಂ, ಆಯಸ್ಮಾ ಭನ್ತೇ ಪಿಣ್ಡೋಲಭಾರದ್ವಾಜೋ ಛವಸ್ಸ ದಾರುಪತ್ತಸ್ಸ ಕಾರಣಾ ಗಿಹೀನಂ ಉತ್ತರಿಮನುಸ್ಸಧಮ್ಮಂ ಇದ್ಧಿಪಾಟಿಹಾರಿಯಂ ದಸ್ಸೇತಿ, ತಸ್ಮಿಂ ಭನ್ತೇ ವತ್ಥುಸ್ಮಿಂ ಪಞ್ಞತ್ತಂ.

ನ ¶ ಚ ಭಿಕ್ಖವೇ ದಾರುಪತ್ತೋ ಧಾರೇತಬ್ಬೋ, ಯೋ ಧಾರೇಯ್ಯ ಆಪತ್ತಿ ದುಕ್ಕಟಸ್ಸ –

ಪುಚ್ಛಾ – ಭಗವತಾ ಆವುಸೋ ಉಚ್ಚಾವಚೇ ಪತ್ತೇ ಪಟಿಕ್ಖಿಪಿತ್ವಾ ಅಯೋ ಪತ್ತೋ ಭೂಮಿಪತ್ತೋತಿ ಇಮೇಯೇವ ದ್ವೇ ಪತ್ತಾ ಕತ್ಥ ಅನುಞ್ಞಾತಾ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಅನುಞ್ಞಾತಾ.

ವಿಸ್ಸಜ್ಜನಾ – ರಾಜಗಹೇ ಭನ್ತೇ ಛಬ್ಬಗ್ಗಿಯೇ ಭಿಕ್ಖೂ ಆರಬ್ಭ ಅನುಞ್ಞಾತಾ, ಛಬ್ಬಗ್ಗಿಯಾ ಭನ್ತೇ ಭಿಕ್ಖೂ ಉಚ್ಚಾವಚೇ ಪತ್ತೇ ಧಾರೇಸುಂ ಸೋವಣ್ಣಮಯಾ ¶ ರೂಪಿಯಮಯಾ, ತಸ್ಮಿಂ ಭನ್ತೇ ವತ್ಥುಸ್ಮಿಂ ಅನುಞ್ಞಾತಾ.

ಪುಚ್ಛಾ – ಸೋದಕಂ ¶ ಆವುಸೋ ಪತ್ತಂ ಪಟಿಸಾಮೇನ್ತಸ್ಸ ಚ ಓತಾಪೇನ್ತಸ್ಸಚ ಉಣ್ಹೇ ಪತ್ತಂ ನಿದಹನ್ತಸ್ಸ ಚ ದುಕ್ಕಟಂ ಭಗವತಾ ಕತ್ಥ ಪಞ್ಞತ್ತಂ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಪಞ್ಞತ್ತಂ.

ವಿಸ್ಸಜ್ಜನಾ – ರಾಜಗಹೇ ಭನ್ತೇ ಸಮ್ಬಹುಲೇ ಭಿಕ್ಖೂ ಆರಬ್ಭ ಪಞ್ಞತ್ತಂ, ಸಮ್ಬಹುಲಾ ಭನ್ತೇ ಭಿಕ್ಖೂ ಸೋದಕಂ ಪತ್ತಂ ಪಟಿಸಾಮೇಸುಂ, ಓತಾಪೇಸುಂ, ಉಣ್ಹೇ ಪತ್ತಂ ನಿದಹಿಂಸು, ತಸ್ಮಿಂ ಭನ್ತೇ ವತ್ಥುಸ್ಮಿಂ ಪಞ್ಞತ್ತಂ.

ಪುಚ್ಛಾ – ಛವಸೀಸಪತ್ತಂ ¶ ಆವುಸೋ ಧಾರೇನ್ತಸ್ಸ ಚ ಸಬ್ಬಪಂಸುಕೂಲಿಕಸ್ಸ ಚ ದುಕ್ಕಟಂ ಭಗವತಾ ಕತ್ಥ ಪಞ್ಞತ್ತಂ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಪಞ್ಞತ್ತಂ.

ವಿಸ್ಸಜ್ಜನಾ – ರಾಜಗಹೇ ಭನ್ತೇ ಅಞ್ಞತರಂ ಭಿಕ್ಖುಂ ಆರಬ್ಭ ಪಞ್ಞತ್ತಂ, ಅಞ್ಞತರೋ ಭನ್ತೇ ಭಿಕ್ಖು ಸಬ್ಬಪಂಸುಕೂಲಿಕೋ ಅಹೋಸಿ, ಸೋ ಛವಸೀಸಸ್ಸ ಪತ್ತಂ ಧಾರೇಸಿ, ಅಞ್ಞತರಾ ಇತ್ಥೀ ಪಸ್ಸಿತ್ವಾ ಭೀತಾ ¶ ವಿಸ್ಸರಮಕಾಸಿ ‘‘ಅಭುಂ ಮೇ ಪಿಸಾಚೋ ವತಾಯ’’ನ್ತಿ, ತಸ್ಮಿಂ ಭನ್ತೇ ವತ್ಥುಸ್ಮಿಂ ಪಞ್ಞತ್ತಂ.

ಪುಚ್ಛಾ – ಚಲಕಾನಿ ವಾ ಆವುಸೋ ಅಟ್ಠಿಕಾನಿ ವಾ ಉಚ್ಛಿಟ್ಠೋದಕಂ ವಾ ಪತ್ತೇನ ನೀಹರನ್ತಸ್ಸ ದುಕ್ಕಟಂ ಭಗವತಾ ಕತ್ಥ ಪಞ್ಞತ್ತಂ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಪಞ್ಞತ್ತಂ.

ವಿಸ್ಸಜ್ಜನಾ – ರಾಜಗಹೇ ಭನ್ತೇ ಸಮ್ಬಹುಲೇ ಭಿಕ್ಖೂ ಆರಬ್ಭ ಪಞ್ಞತ್ತಂ, ಸಮ್ಬಹುಲಾ ಭನ್ತೇ ಭಿಕ್ಖೂ ಚಲಕಾನಿಪಿ ಅಟ್ಠಿಕಾನಿಪಿ ಉಚ್ಛಿಟ್ಠೋ ದಕಮ್ಪಿ ಪತ್ತೇನ ನೀಹರಿಂಸು, ತಸ್ಮಿಂ ಭನ್ತೇ ವತ್ಥುಸ್ಮಿಂ ಪಞ್ಞತ್ತಂ.

ಪುಚ್ಛಾ – ಉಪಾಹನತ್ಥವಿಕಾ ¶ ಆವುಸೋ ಭಗವತಾ ಕತ್ಥ ಅನುಞ್ಞಾತಾ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಅನುಞ್ಞಾತಾ.

ವಿಸ್ಸಜ್ಜನಾ – ಅನ್ತರಾ ಚ ಭನ್ತೇ ರಾಜಗಹಂ ಅನ್ತರಾ ಚ ವೇಸಾಲಿಂ ಅಞ್ಞತರಂ ಭಿಕ್ಖುಂ ಆರಬ್ಭ ಅನುಞ್ಞಾತಾ, ಅಞ್ಞತರೋ ಭನ್ತೇ ಭಿಕ್ಖು ಉಪಾಹನಾಯೋ ಕಾಯಬನ್ಧನೇನ ಬನ್ಧಿತ್ವಾ ಗಾಮಂ ಪಿಣ್ಡಾಯ ಪಾವಿಸಿ, ಅಞ್ಞತರೋ ಉಪಾಸಕೋ ತಂ ಭಿಕ್ಖುಂ ಅಭಿವಾದೇನ್ತೋ ಉಪಾಹನಾಯೋ ಸೀಸೇನ ಘಟ್ಟೇತಿ, ಸೋ ಭಿಕ್ಖು ಮಙ್ಕು ಅಹೋಸಿ, ತಸ್ಮಿಂ ಭನ್ತೇ ವತ್ಥುಸ್ಮಿಂ ಅನುಞ್ಞಾತಾ.

ಪುಚ್ಛಾ – ಅದ್ಧಾನಮಗ್ಗಪ್ಪಟಿಪನ್ನೇನ ¶ ಆವುಸೋ ಪರಿಸ್ಸಾವನಂ ಯಾಚಿಯಮಾನೇನ ನ ದದನ್ತಸ್ಸ ಚ ಅಪ್ಪಟಿಸ್ಸಾವನಕೇನ ಅದ್ಧಾನಂ ಪಟಿಪಜ್ಜನ್ತಸ್ಸ ಚ ದುಕ್ಕಟಂ ಭಗವತಾ ಕತ್ಥ ಪಞ್ಞತ್ತಂ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಪಞ್ಞತ್ತಂ.

ವಿಸ್ಸಜ್ಜನಾ – ಅನ್ತರಾ ಚ ಭನ್ತೇ ರಾಜಗಹಂ ಅನ್ತರಾ ಚ ವೇಸಾಲಿಂ ಅಞ್ಞತರಂ ಭಿಕ್ಖುಂ ಆರಬ್ಭ ಪಞ್ಞತ್ತಂ, ಅಞ್ಞತರೋ ಭನ್ತೇ ಭಿಕ್ಖು ಪರಿಸ್ಸಾವನಂ ಯಾಚಿಯಮಾನೋ ನ ಅದಾಸಿ, ತಸ್ಮಿಂ ಭನ್ತೇ ವತ್ಥುಸ್ಮಿಂ ಪಞ್ಞತ್ತಂ.

ಪುಚ್ಛಾ – ಪುಪ್ಫಾಭಿಕಿಣ್ಣೇ ¶ ಆವುಸೋ ಸಯನೇ ಸಯನ್ತಸ್ಸ ದುಕ್ಕಟಂ ಭಗವತಾ ಕತ್ಥ ಪಞ್ಞತ್ತಂ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಪಞ್ಞತ್ತಂ.

ವಿಸ್ಸಜ್ಜನಾ – ವೇಸಾಲಿಯಂ ಭನ್ತೇ ಛಬ್ಬಗ್ಗಿಯೇ ಭಿಕ್ಖೂ ಆರಬ್ಭ ಪಞ್ಞತ್ತಂ, ಛಬ್ಬಗ್ಗಿಯಾ ಭನ್ತೇ ಭಿಕ್ಖೂ ಪುಪ್ಫಾಭಿಕಿಣ್ಣೇಸು ಸಯನೇಸು ಸಯಿಂಸು, ತಸ್ಮಿಂ ಭನ್ತೇ ವತ್ಥುಸ್ಮಿಂ ಪಞ್ಞತ್ತಂ.

ಪುಚ್ಛಾ – ಏಕಭಾಜನೇ ವಾ ಆವುಸೋ ಭುಞ್ಜನ್ತಾನಂ ಏಕಥಾಲಕೇ ವಾ ಪಿವನ್ತಾನಂ ಏಕತ್ಥರಣಪಾವುರಣಾನಂ ವಾ ತುವಟ್ಟಾನಂ ದುಕ್ಕಟಂ ಭಗವತಾ ಕತ್ಥ ಪಞ್ಞತ್ತಂ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಪಞ್ಞತ್ತಂ.

ವಿಸ್ಸಜ್ಜನಾ – ವೇಸಾಲಿಯಂ ಭನ್ತೇ ಛಬ್ಬಗ್ಗಿಯೇವ ಭಿಕ್ಖೂ ಆರಬ್ಭ ಪಞ್ಞತ್ತಂ, ಛಬ್ಬಗ್ಗಿಯಾ ಭನ್ತೇ ಭಿಕ್ಖೂ ಏಕಭಾಜನೇಪಿ ಭುಞ್ಜಿಂಸು, ಏಕಥಾಲಕೇಪಿ ¶ ಪಿವಿಂಸು, ಏಕಮಞ್ಚಕೇಪಿ ತುವಟ್ಟೇಸುಂ, ಏಕತ್ಥರಣಾಪಿ ತುವಟ್ಟೇಸುಂ, ಏಕಪಾವುರಣಾಪಿ ತುವಟ್ಟೇಸುಂ, ಏಕತ್ಥರಣಪಾವುರಣಾಪಿ, ತಸ್ಮಿಂ ಭನ್ತೇ ವತ್ಥುಸ್ಮಿಂ ಪಞ್ಞತ್ತಂ.

ಪುಚ್ಛಾ – ಚಾಮರಿಬೀಜನಿಂ ಆವುಸೋ ಪಟಿಕ್ಖಿಪಿತ್ವಾ ತಿಸ್ಸೋ ಬೀಜನಿಯೋ ಭಗವತಾ ಕತ್ಥ ಅನುಞ್ಞಾತಾ, ಕಿಸ್ಮಿಞ್ಚ ವತ್ಥುಸ್ಮಿಂ ಅನುಞ್ಞಾತಾ.

ವಿಸ್ಸಜ್ಜನಾ – ಸಾವತ್ಥಿಯಂ ಭನ್ತೇ ಅನುಞ್ಞಾತಾ, ಸಾವತ್ಥಿಯಂ ಭನ್ತೇ ಭಗವತಿ ವಿಹರತಿ ಸಙ್ಘಸ್ಸ ಚಾಮರಿಬೀಜನೀ ಉಪ್ಪನ್ನಾ ಅಹೋಸಿ, ಭಗವತೋ ಏತಮತ್ಥಂ ಆರೋಚೇಸುಂ, ತಸ್ಮಿಂ ಭನ್ತೇ ವತ್ಥುಸ್ಮಿಂ ಅನುಞ್ಞಾತಾ.

ನ ¶ ಭಿಕ್ಖವೇ ಚಾಮರಿಬೀಜನೀ ಧಾರೇತಬ್ಬಾ, ಯೋ ಧಾರೇಯ್ಯ, ಆಪತ್ತಿ ದುಕ್ಕಟಸ್ಸ. ಅನುಜಾನಾಮಿ ಭಿಕ್ಖವೇ ತಿಸ್ಸೋ ಬೀಜನಿಯೋ ವಾಕಮಯಂ ಉಸೀರಮಯಂ ಮೋರಪಿಞ್ಛಾ ಮಯಂ.

ಪುಚ್ಛಾ – ದೀಘೇ ಆವುಸೋ ನಖೇ ಧಾರೇನ್ತಸ್ಸ ದುಕ್ಕಟಂ ಭಗವತಾ ಕತ್ಥ ಪಞ್ಞತ್ತಂ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಪಞ್ಞತ್ತಂ.

ವಿಸ್ಸಜ್ಜನಾ – ಸಾವತ್ಥಿಯಂ ¶ ಭನ್ತೇ ಅಞ್ಞತರಂ ಭಿಕ್ಖುಂ ಆರಬ್ಭ ಪಞ್ಞತ್ತಂ, ಅಞ್ಞತರೋ ಭನ್ತೇ ಭಿಕ್ಖು ದೀಘೇ ನಖೇ ಧಾರೇಸಿ, ತಸ್ಮಿಂ ಭನ್ತೇ ವತ್ಥುಸ್ಮಿಂ ಪಞ್ಞತ್ತಂ.

ಪುಚ್ಛಾ – ಕತ್ತರಿಕಾಯ ¶ ಆವುಸೋ ಕೇಸೇ ಛೇದಾಪೇನ್ತಸ್ಸ ದುಕ್ಕಟಂ ಭಗವತಾ ಕತ್ಥ ಪಞ್ಞತ್ತಂ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಪಞ್ಞತ್ತಂ.

ವಿಸ್ಸಜ್ಜನಾ – ಸಾವತ್ಥಿಯಂ ಭನ್ತೇ ಛಬ್ಬಗ್ಗಿಯೇ ಭಿಕ್ಖೂ ಆರಬ್ಭ ಪಞ್ಞತ್ತಂ, ಛಬ್ಬಗ್ಗಿಯಾ ಭನ್ತೇ ಭಿಕ್ಖೂ ಕತ್ತರಿಕಾಯ ಕೇಸೇ ಛಿನ್ದಿಂಸು, ತಸ್ಮಿಂ ಭನ್ತೇ ವತ್ಥುಸ್ಮಿಂ ಪಞ್ಞತ್ತಂ.

ಪುಚ್ಛಾ – ದೀಘೇ ¶ ಆವುಸೋ ನಾಸಿಕಾಲೋಮೇ ಧಾರೇನ್ತಸ್ಸ ದುಕ್ಕಟಂ ಭಗವತಾ ಕತ್ಥ ಪಞ್ಞತ್ತಂ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಪಞ್ಞತ್ತಂ.

ವಿಸ್ಸಜ್ಜನಾ – ಸಾವತ್ಥಿಯಂ ಭನ್ತೇ ಸಮ್ಬಹುಲೇ ಭಿಕ್ಖೂ ಆರಬ್ಭ ಪಞ್ಞತ್ತಂ, ಸಮ್ಬಹುಲಾ ಭನ್ತೇ ಭಿಕ್ಖೂ ದೀಘಾನಿ ನಾಸಿಕಾಲೋಮಾನಿ ಧಾರೇಸುಂ, ತಸ್ಮಿಂ ಭನ್ತೇ ವತ್ಥುಸ್ಮಿಂ ಪಞ್ಞತ್ತಂ.

ಪುಚ್ಛಾ – ಉಚ್ಚಾವಚಾ ಆವುಸೋ ಕಣ್ಣಮಲಹರಣಿಯೋ ಪಟಿಕ್ಖಿಪಿತ್ವಾ ದಸ ಕಣ್ಣಮಲಹರಣಿಯೋ ಭಗವತಾ ಕತ್ಥ ಅನುಞ್ಞಾತಾ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಅನುಞ್ಞಾತಾ.

ವಿಸ್ಸಜ್ಜನಾ – ಸಾವತ್ಥಿಯಂ ಭನ್ತೇ ಛಬ್ಬಗ್ಗಿಯೇ ಭಿಕ್ಖೂ ಆರಬ್ಭ ಅನುಞ್ಞಾತಾ, ಛಬ್ಬಗ್ಗಿಯಾ ಭನ್ತೇ ಭಿಕ್ಖೂ ಉಚ್ಚಾವಚಾ ಕಣ್ಣಮಲಹರಣಿಯೋ ಧಾರೇಸುಂ ¶ ಸೋವಣ್ಣಮಯಂ ರೂಪಿಯಮಯಂ, ತಸ್ಮಿಂ ಭನ್ತೇ ವತ್ಥುಸ್ಮಿಂ ಅನುಞ್ಞಾತಾ.

ಪುಚ್ಛಾ – ಸಙ್ಘಾಟಿಪಲ್ಲತ್ಥಿಕಾಯ ನಿಸೀದನ್ತಸ್ಸ ಆವುಸೋ ದುಕ್ಕಟಂ ಭಗವತಾ ಕತ್ಥ ಪಞ್ಞತ್ತಂ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಪಞ್ಞತ್ತಂ.

ವಿಸ್ಸಜ್ಜನಾ – ಸಾವತ್ಥಿಯಂ ಭನ್ತೇ ಛಬ್ಬಗ್ಗಿಯೇ ಭಿಕ್ಖೂ ಆರಬ್ಭ ಪಞ್ಞತ್ತಂ, ಛಬ್ಬಗ್ಗಿಯಾ ಭನ್ತೇ ಭಿಕ್ಖೂ ಸಙ್ಘಾಟಿಪಲ್ಲತ್ಥಿಕಾಯ ನಿಸೀದಿಂಸು, ಸಙ್ಘಾಟಿಯಾ ¶ ಪತ್ತಾ ಲುಜ್ಜಿಂಸು, ತಸ್ಮಿಂ ಭನ್ತೇ ವತ್ಥುಸ್ಮಿಂ ಪಞ್ಞತ್ತಂ.

ಪುಚ್ಛಾ – ಅಕಾಯಬನ್ಧನೇನ ಆವುಸೋ ಗಾಮಂ ಪವಿಸನ್ತಸ್ಸ ದುಕ್ಕಟಂ ಭಗವತಾ ಕತ್ಥ ಪಞ್ಞತ್ತಂ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಪಞ್ಞತ್ತಂ.

ವಿಸ್ಸಜ್ಜನಾ – ಸಾವತ್ಥಿಯಂ ಭನ್ತೇ ಅಞ್ಞತರಂ ಭಿಕ್ಖುಂ ಆರಬ್ಭ ಪಞ್ಞತ್ತಂ, ಅಞ್ಞತರೋ ಭನ್ತೇ ಭಿಕ್ಖು ಅಕಾಯಬನ್ಧನೋ ಗಾಮಂ ಪಿಣ್ಡಾಯ ಪಾವಿಸಿ, ತಸ್ಮಿಂ ಭನ್ತೇ ವತ್ಥುಸ್ಮಿಂ ಪಞ್ಞತ್ತಂ.

ಪುಚ್ಛಾ – ಗಿಹಿನಿವತ್ಥಂ ¶ ಆವುಸೋ ನಿವಾಸೇನ್ತಸ್ಸ ಚ, ಗಿಹಿಪಾರುತಂ ಪಾರುಪನ್ತಸ್ಸ ಚ, ಸಂವೇಲ್ಲಿಯಂ ನಿವಾಸೇನ್ತಸ್ಸ ಚ ದುಕ್ಕಟಂ ಭಗವತಾ ಕತ್ಥ ಪಞ್ಞತ್ತಂ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಪಞ್ಞತ್ತಂ.

ವಿಸ್ಸಜ್ಜನಾ – ಸಾವತ್ಥಿಯಂ ಭನ್ತೇ ಛಬ್ಬಗ್ಗಿಯೇ ಭಿಕ್ಖೂ ಆರಬ್ಭ ಪಞ್ಞತ್ತಂ, ಛಬ್ಬಗ್ಗಿಯಾ ಭನ್ತೇ ಭಿಕ್ಖೂ ಗಿಹಿನಿವತ್ಥಂ ನಿವಾಸಿಂಸು, ಗಿಹಿಪಾರುತಮ್ಪಿ ಪಾರುಪಿಂಸು, ಸಂವೇಲ್ಲಿಯಮ್ಪಿ ನಿವಾಸಿಂಸು, ತಸ್ಮಿಂ ಭನ್ತೇ ವತ್ಥುಸ್ಮಿಂ ಪಞ್ಞತ್ತಂ.

ಪುಚ್ಛಾ – ಉಭತೋ ¶ ಕಾಜಂ ಆವುಸೋ ಧಾರೇನ್ತಸ್ಸ ದುಕ್ಕಟಂ ಭಗವತಾ ಕತ್ಥ ಪಞ್ಞತ್ತಂ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಪಞ್ಞತ್ತಂ.

ವಿಸ್ಸಜ್ಜನಾ – ಸಾವತ್ಥಿಯಂ ಭನ್ತೇ ಛಬ್ಬಗ್ಗಿಯೇ ಭಿಕ್ಖೂ ಆರಬ್ಭ ಪಞ್ಞತ್ತಂ, ಛಬ್ಬಗ್ಗಿಯಾ ಭನ್ತೇ ಭಿಕ್ಖೂ ಉಭತೋ ಕಾಜಂ ಧಾರೇಸುಂ, ತಸ್ಮಿಂ ಭನ್ತೇ ವತ್ಥುಸ್ಮಿಂ ಪಞ್ಞತ್ತಂ.

ಪುಚ್ಛಾ – ಲೋಕಾಯತಂ ¶ ಆವುಸೋ ಪರಿಯಾಪುಣನ್ತಸ್ಸ ಚ ವಾಚೇನ್ತಸ್ಸ ಚ ದುಕ್ಕಟಂ ಭಗವತಾ ಕತ್ಥ ಪಞ್ಞತ್ತಂ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಪಞ್ಞತ್ತಂ.

ವಿಸ್ಸಜ್ಜನಾ – ಸಾವತ್ಥಿಯಂ ಭನ್ತೇ ಛಬ್ಬಗ್ಗಿಯೇ ಭಿಕ್ಖೂ ಆರಬ್ಭ ಪಞ್ಞತ್ತಂ, ಛಬ್ಬಗ್ಗಿಯಾ ಭನ್ತೇ ಭಿಕ್ಖೂ ಲೋಕಾಯತಂ ಪರಿಯಾಪುಣಿಂಸುಪಿ ವಾಚೇಸುಮ್ಪಿ, ತಸ್ಮಿಂ ಭನ್ತೇ ವತ್ಥುಸ್ಮಿಂ ಪಞ್ಞತ್ತಂ.

ಪುಚ್ಛಾ – ತಿರಚ್ಛಾನವಿಜ್ಜಂ ¶ ಆವುಸೋ ಪರಿಯಾಪುಣನ್ತಸ್ಸ ಚ ವಾಚೇನ್ತಸ್ಸ ಚ ದುಕ್ಕಟಂ ಭಗವತಾ ಕತ್ಥ ಪಞ್ಞತ್ತಂ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಪಞ್ಞತ್ತಂ.

ವಿಸ್ಸಜ್ಜನಾ – ಸಾವತ್ಥಿಯಂ ಭನ್ತೇ ಛಬ್ಬಗ್ಗಿಯೇ ಭಿಕ್ಖೂ ಆರಬ್ಭ ಪಞ್ಞತ್ತಂ, ಛಬ್ಬಗ್ಗಿಯಾ ಭನ್ತೇ ಭಿಕ್ಖೂ ತಿರಚ್ಛಾನವಿಜ್ಜಂ ಪರಿಯಾಪುಣಿಂಸುಪಿ ವಾಚೇಸುಮ್ಪಿ, ತಸ್ಮಿಂ ಭನ್ತೇ ವತ್ಥುಸ್ಮಿಂ ಪಞ್ಞತ್ತಂ.

ಪುಚ್ಛಾ – ಖಿಪಿತೇ ಆವುಸೋ ‘‘ಜೀವಾ’’ತಿವದನ್ತಸ್ಸ ದುಕ್ಕಟಂ ಭಗವತಾ ಕತ್ಥ ಪಞ್ಞತ್ತಂ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಪಞ್ಞತ್ತಂ.

ವಿಸ್ಸಜ್ಜನಾ – ಸಾವತ್ಥಿಯಂ ¶ ಭನ್ತೇ ಸಮ್ಬಹುಲೇ ಭಿಕ್ಖೂ ಆರಬ್ಭ ಪಞ್ಞತ್ತಂ, ಭಗವಾ ಭನ್ತೇ ಮಹತಿಯಾ ಪರಿಸಾಯ ಪರಿವುತೋ ಧಮ್ಮಂ ದೇಸೇನ್ತೋ ಖಿಪಿ, ಭಿಕ್ಖೂ ‘‘ಜೀವತು ಭನ್ತೇ ಭಗವಾ, ಜೀವತು ಸುಗತೋತಿ’’ ಉಚ್ಚಾಸದ್ದಂ ಮಹಾಸದ್ದಂ ಅಕಂಸು, ತೇನ ಸದ್ದೇನ ಧಮ್ಮಕಥಾ ಅನ್ತರಾ ಅಹೋಸಿ, ತಸ್ಮಿಂ ಭನ್ತೇ ವತ್ಥುಸ್ಮಿಂ ಪಞ್ಞತ್ತಂ.

ಪುಚ್ಛಾ – ಆರಾಮೇ ಆವುಸೋ ಪಸ್ಸಾವವಚ್ಚಾನಂ ತಹಂ ತಹಂ ಕರಣಂ ಪಟಿಕ್ಖಿಪಿತ್ವಾ ಏಕಮನ್ತಂ ಕಾತುಂ ಭಗವತಾ ಕತ್ಥ ಪಞ್ಞತ್ತಂ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಪಞ್ಞತ್ತಂ.

ವಿಸ್ಸಜ್ಜನಾ – ಸಾವತ್ಥಿಯಂ ಭನ್ತೇ ಸಮ್ಬಹುಲೇ ಭಿಕ್ಖೂ ಆರಬ್ಭ ಪಞ್ಞತ್ತಂ, ಸಮ್ಬಹುಲಾ ಭನ್ತೇ ಭಿಕ್ಖೂ ಆರಾಮೇ ತಹಂ ತಹಂ ಪಸ್ಸಾವಂ ಅಕಂಸು, ತಹಂ ತಹಂ ವಚ್ಚಂ ಅಕಂಸು, ಆರಾಮೋ ದುಸ್ಸಿ, ತಸ್ಮಿಂ ಭನ್ತೇ ವತ್ಥುಸ್ಮಿಂ ಪಞ್ಞತ್ತಂ.

ಖುದ್ದಕವತ್ಥುಕ್ಖನ್ಧಕ

ಪುಚ್ಛಾ – ಖುದ್ದಕವತ್ಥುಂ ¶ ಪುಚ್ಛಿಸ್ಸಂ, ಸನಿದಾನಂ ಸನಿದ್ದೇಸಂ. ಸಮುಕ್ಕಟ್ಠಪದಾನಂ ಆವುಸೋ ಕತಿ ಆಪತ್ತಿಯೋ.

ವಿಸ್ಸಜ್ಜನಾ – ಖುದ್ದಕಂ ವಿಸ್ಸಜ್ಜಿಸ್ಸಂ, ಸನಿದಾನಂ ಸನಿದ್ದೇಸಂ. ಸಮುಕ್ಕಟ್ಠಪದಾನಂ ಭನ್ತೇ ತಿಸ್ಸೋ ಆಪತ್ತಿಯೋ.

೬. ಸೇನಾಸನಕ್ಖನ್ಧಕ

ಪುಚ್ಛಾ – ಪಞ್ಚ ¶ ಆವುಸೋ ಲೇಣಾನಿ ಭಗವತಾ ಕತ್ಥ ಅನುಞ್ಞಾತಾನಿ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಅನುಞ್ಞಾತಾನಿ.

ವಿಸ್ಸಜ್ಜನಾ – ರಾಜಗಹೇ ಭನ್ತೇ ಸಮ್ಬಹುಲೇ ಭಿಕ್ಖೂ ಆರಬ್ಭ ಅನುಞ್ಞಾತಾನಿ, ಸಮ್ಬಹುಲಾ ಭನ್ತೇ ಭಿಕ್ಖೂ ಭಗವನ್ತಂ ಉಪಸಙ್ಕಮಿತ್ವಾ ಏತದವೋಚುಂ ‘‘ರಾಜಗಹಕೋ ಭನ್ತೇ ಸೇಟ್ಠೀ ವಿಹಾರೇ ಕಾರಾಪೇತುಕಾಮೋ, ಕಥಂ ನು ಖೋ ಭನ್ತೇ ಪಟಿಪಜ್ಜಿತಬ್ಬ’’ನ್ತಿ, ತಸ್ಮಿಂ ಭನ್ತೇ ವತ್ಥುಸ್ಮಿಂ ಅನುಞ್ಞಾತಾನಿ.

ಪುಚ್ಛಾ – ಕಥಂ ¶ ಆವುಸೋ ವಿಹಾರಾ ಪಠಮಂ ಉಪ್ಪನ್ನಾ, ಕಥಞ್ಚ ತೇ ಪತಿಟ್ಠಾಪಿ ತಾ.

ವಿಸ್ಸಜ್ಜನಾ – ಏಕಾಹೇನೇವ ¶ ಭನ್ತೇ ರಾಜಗಹಕೇನ ಸೇಟ್ಠಿನಾ ಛಟ್ಠಿವಿಹಾರಾ ಪತಿಟ್ಠಾಪಿತಾ, ತೇ ಇಧ ಭನ್ತೇ ಸಟ್ಠಿವಿಹಾರಾ ಬುದ್ಧಪ್ಪಮುಖಸ್ಸ ಆಗತಾನಾಗತಸ್ಸ ಚಾತುದ್ದಿಸಸ್ಸ ಸಙ್ಘಸ್ಸ ಪತಿಟ್ಠಾಪಿತಾ.

ಪುಚ್ಛಾ – ವಿಹಾರೇ ¶ ಆವುಸೋ ಪಟಿಭಾನಕಮ್ಮಂ ಪಟಿಕ್ಖಿಪಿತ್ವಾ ಮಾಲಾಕಮ್ಮಾದೀನಿ ಭಗವತಾ ಕತ್ಥ ಅನುಞ್ಞಾತಾನಿ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಅನುಞ್ಞಾತಾನಿ.

ವಿಸ್ಸಜ್ಜನಾ – ರಾಜಗಹೇ ಭನ್ತೇ ಛಬ್ಬಗ್ಗಿಯೇ ಭಿಕ್ಖೂ ಆರಬ್ಭ ಅನುಞ್ಞಾತಾನಿ. ಛಬ್ಬಗ್ಗಿಯಾ ಭನ್ತೇ ಭಿಕ್ಖೂ ವಿಹಾರೇ ಪಟಿಭಾನಚಿತ್ತಂ ಕಾರಾಪೇಸುಂ ಇತ್ಥಿರೂಪಕಂ ಪುರಿಸರೂಪಕಂ, ತಸ್ಮಿಂ ಭನ್ತೇ ವತ್ಥುಸ್ಮಿಂ ಅನುಞ್ಞಾತಾನಿ.

ಪುಚ್ಛಾ – ಯಥಾವುಡ್ಢಂ ¶ ಆವುಸೋ ಅಭಿವಾದನಾದೀನಿ ಚ ಅಗ್ಗಾಸನಾದೀನಿ ಚ ಅನುಜಾನಿತ್ವಾ ಸಙ್ಘಿಕಂ ಯಥಾವುಡ್ಢಂ ಪಟಿಬಾಹನ್ತಸ್ಸ ದುಕ್ಕಟಂ ಭಗವತಾ ಕತ್ಥ ಪಞ್ಞತ್ತಂ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಪಞ್ಞತ್ತಂ.

ವಿಸ್ಸಜ್ಜನಾ – ಅನ್ತರಾ ಚ ಭನ್ತೇ ವೇಸಾಲಿಂ ಅನ್ತರಾ ಚ ಸಾವತ್ಥಿಂ ಛಬ್ಬಗ್ಗಿಯಾನಂ ಭಿಕ್ಖೂನಂ ಅನ್ತೇವಾಸಿಕೇ ಭಿಕ್ಖೂ ಆರಬ್ಭ ಪಞ್ಞತ್ತಂ, ಛಬ್ಬಗ್ಗಿಯಾನಂ ಭನ್ತೇ ಭಿಕ್ಖೂನಂ ಅನ್ತೇವಾಸಿಕಾ ಭಿಕ್ಖೂ ಬುದ್ಧಪ್ಪಮುಖಸ್ಸ ಸಙ್ಘಸ್ಸ ಪುರತೋ ಪುರತೋ ಗನ್ತ್ವಾ ವಿಹಾರೇ ಪಟಿಗ್ಗಹೇಸುಂ, ಸೇಯ್ಯಾಯೋ ಪಟಿಗ್ಗಹೇಸುಂ ‘‘ಇದಂ ಅಮ್ಹಾಕಂ ಉಪಜ್ಝಾಯಾನಂ ಭವಿಸ್ಸತಿ, ಇದಂ ಅಮ್ಹಾಕಂ ಆಚರಿಯಾನಂ ಭವಿಸ್ಸತಿ, ಇದಂ ಅಮ್ಹಾಕಂ ಭವಿಸ್ಸತೀ’’ತಿ, ತಸ್ಮಿಂ ಭನ್ತೇ ವತ್ಥುಸ್ಮಿಂ ಪಞ್ಞತ್ತಂ.

ಪುಚ್ಛಾ – ಏಕೇನ ¶ ಆವುಸೋ ದ್ವೇ ಪಟಿಬಾಹನ್ತಸ್ಸ ದುಕ್ಕಟಂ ಭಗವತಾ ಕತ್ಥ ಪಞ್ಞತ್ತಂ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಪಞ್ಞತ್ತಂ.

ವಿಸ್ಸಜ್ಜನಾ – ಸಾವತ್ಥಿಯಂ ಭನ್ತೇ ಆಯಸ್ಮನ್ತಂ ಉಪನನ್ದಂ ಸಕ್ಯಪುತ್ತಂ ಆರಬ್ಭ ಪಞ್ಞತ್ತಂ, ಆಯಸ್ಮಾ ಭನ್ತೇ ಉಪನನ್ದೋ ಸಕ್ಯಪುತ್ತೋ ಏಕೋ ದ್ವೇ ಪಟಿಬಾಹಿ, ತಸ್ಮಿಂ ಭನ್ತೇ ವತ್ಥುಸ್ಮಿಂ ಪಞ್ಞತ್ತಂ.

ಪುಚ್ಛಾ – ನವಕೇನ ¶ ಆವುಸೋ ಉದ್ದಿಸನ್ತೇನ ಸಮಕೇ ವಾ ಆಸನೇ ನಿಸೀದಿತುಂ ಉಚ್ಚತರೇ ವಾ ಧಮ್ಮಗಾರವೇನ, ಥೇರೇನ ಪನ ಭಿಕ್ಖುನಾ ಉದ್ದಿಸಾಪೇನ್ತೇನ ಸಮಕೇ ವಾ ಆಸನೇ ನಿಸೀದಿತುಂ ನೀಚತರೇ ವಾ ಧಮ್ಮಗಾರವೇನ ಭಗವತಾ ಕತ್ಥ ಅನುಞ್ಞಾತಂ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಅನುಞ್ಞಾತಂ.

ವಿಸ್ಸಜ್ಜನಾ – ಸಾವತ್ಥಿಯಂ ಭನ್ತೇ ಸಮ್ಬಹುಲೇ ಭಿಕ್ಖೂ ಆರಬ್ಭ ಅನುಞ್ಞಾತಂ, ಸಮ್ಬಹುಲಾ ಭನ್ತೇ ಭಿಕ್ಖೂ ಆಯಸ್ಮತೋ ಉಪಾಲಿಸ್ಸ ಸನ್ತಿಕೇ ವಿನಯಂ ಪರಿಯಾಪುಣಿಂಸು, ಆಯಸ್ಮಾ ಭನ್ತೇ ಉಪಾಲಿ ಠಿತಕೋವ ಉದ್ದಿಸತಿ ಥೇರಾನಂ ಭಿಕ್ಖೂನಂ ಗಾರವೇನ, ತತ್ಥ ಭನ್ತೇ ಥೇರಾ ಚೇವ ಭಿಕ್ಖೂ ಕಿಲಮಿಂಸು ಆಯಸ್ಮಾ ಚ ಉಪಾಲಿ ಕಿಲಮಿ, ತಸ್ಮಿಂ ಭನ್ತೇ ವತ್ಥುಸ್ಮಿಂ ಅನುಞ್ಞಾತಂ.

ಪುಚ್ಛಾ – ತಿವಸ್ಸನ್ತರೇನ ¶ ಆವುಸೋ ಸಹ ನಿಸೀದಿತುಂ ಭಗವತಾ ಕತ್ಥ ಅನುಞ್ಞಾತಂ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಅನುಞ್ಞಾತಂ.

ವಿಸ್ಸಜ್ಜನಾ – ಸಾವತ್ಥಿಯಂ ಭನ್ತೇ ಸಮ್ಬಹುಲೇ ಭಿಕ್ಖೂ ಆರಬ್ಭ ಅನುಞ್ಞಾತಂ, ಸಮ್ಬಹುಲಾನಂ ಭನ್ತೇ ಭಿಕ್ಖೂನಂ ಏತದಹೋಸಿ ‘‘ಕಿತ್ತಾವತಾನು ಖೋ ಸಮಾನಾಸನಿಕೋ ಹೋತೀ’’ತಿ, ತಸ್ಮಿಂ ಭನ್ತೇ ವತ್ಥುಸ್ಮಿಂ ಅನುಞ್ಞಾತಂ.

ಪುಚ್ಛಾ – ಮಞ್ಚೇ ¶ ಚ ಆವುಸೋ ಪೀಠೇ ಚ ದ್ವಿನ್ನಂಯೇವ ನಿಸೀದಿತುಂ ಭಗವತಾ ಕತ್ಥ ಅನುಞ್ಞಾತಂ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಅನುಞ್ಞಾತಂ.

ವಿಸ್ಸಜ್ಜನಾ – ಸಾವತ್ಥಿಯಂ ಭನ್ತೇ ಸಮ್ಬಹುಲೇ ಸಮಾನಾಸನಿಕೇ ಆರಬ್ಭ ಪಞ್ಞತ್ತಂ, ಸಮ್ಬಹುಲಾ ಭನ್ತೇ ಭಿಕ್ಖೂ ಸಮಾನಾಸನಿಕಾ ಮಞ್ಚೇ ನಿಸೀದಿತ್ವಾ ಮಞ್ಚಂ ಭಿನ್ದಿಂಸು, ಪೀಠೇ ನಿಸೀದಿತ್ವಾ ಪೀಠಂ ಭಿನ್ದಿಂಸು, ತಸ್ಮಿಂ ಭನ್ತೇ ವತ್ಥುಸ್ಮಿಂ ಅನುಞ್ಞಾತಂ.

ಪುಚ್ಛಾ – ದೀಘಾಸನೇ ¶ ಪನಾವುಸೋ ಅಸಮಾನಾಸನಿಕೇಹಿಪಿ ನಿಸೀದಿತುಂ ಭಗವತಾ ಕತ್ಥ ಅನುಞ್ಞಾತಂ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಅನುಞ್ಞಾತಂ.

ವಿಸ್ಸಜ್ಜನಾ – ಸಾವತ್ಥಿಯಂ ಭನ್ತೇ ಸಮ್ಬಹುಲೇ ಭಿಕ್ಖೂ ಆರಬ್ಭ ಅನುಞ್ಞಾತಂ, ಸಮ್ಬಹುಲಾ ಭನ್ತೇ ಭಿಕ್ಖೂ ದೀಘಾಸನೇ ಅಸಮಾನಾಸನಿಕೇಹಿ ಸಹ ನಿಸೀದಿತುಂ ಕುಕ್ಕುಚ್ಚಾಯಿಂಸು, ತಸ್ಮಿಂ ಭನ್ತೇ ವತ್ಥುಸ್ಮಿಂ ಅನುಞ್ಞಾತಂ.

ಪುಚ್ಛಾ – ಪಞ್ಚ ¶ ಆವುಸೋ ಅವಿಸ್ಸಜ್ಜಿಯಾನಿ ಭಗವತಾ ಕತ್ಥ ಪಞ್ಞತ್ತಾನಿ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಪಞ್ಞತ್ತಾನಿ.

ವಿಸ್ಸಜ್ಜನಾ – ಸಾವತ್ಥಿಯಂ ಭನ್ತೇ ಸಮ್ಬಹುಲೇ ಭಿಕ್ಖೂ ಆರಬ್ಭ ಪಞ್ಞತ್ತಾನಿ, ಸಮ್ಬಹುಲಾ ಭನ್ತೇ ಭಿಕ್ಖೂ ಸಙ್ಘಿಕಂ ಸೇನಾಸನಂ ವಿಸ್ಸಜ್ಜೇಸುಂ, ತಸ್ಮಿಂ ಭನ್ತೇ ವತ್ಥುಸ್ಮಿಂ ಪಞ್ಞತ್ತಂ.

ಪುಚ್ಛಾ – ಪಞ್ಚ ¶ ಆವುಸೋ ಅವೇಭಙ್ಗಿಯಾನಿ ಭಗವತಾ ಕತ್ಥ ಪಞ್ಞತ್ತಾನಿ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಪಞ್ಞತ್ತಾನಿ.

ವಿಸ್ಸಜ್ಜನಾ – ಕೀಟಾಗಿರಿಸ್ಮಿಂ ಭನ್ತೇ ಅಸ್ಸಜಿಪುನಬ್ಬಸುಕೇ ಭಿಕ್ಖೂ ಆರಬ್ಭ ಪಞ್ಞತ್ತಾನಿ, ಅಸ್ಸಜಿಪುನಬ್ಬಸುಕಾ ಭನ್ತೇ ಭಿಕ್ಖೂ ಸಙ್ಘಿಕಂ ಸೇನಾಸನಂ ವಿಭಜಿಂಸು, ತಸ್ಮಿಂ ಭನ್ತೇ ವತ್ಥುಸ್ಮಿಂ ಪಞ್ಞತ್ತಾನಿ.

ಪುಚ್ಛಾ – ಅಞ್ಞತ್ರ ¶ ಪರಿಭೋಗಂ ಆವುಸೋ ಅಞ್ಞತ್ರ ಪರಿಭುಞ್ಜನ್ತಸ್ಸ ದುಕ್ಕಟಂ ಭಗವತಾ ಕತ್ಥ ಪಞ್ಞತ್ತಂ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಪಞ್ಞತ್ತಂ.

ವಿಸ್ಸಜ್ಜನಾ – ಆಳವಿಯಂ ಭನ್ತೇ ಸಮ್ಬಹುಲೇ ಭಿಕ್ಖೂ ಆರಬ್ಭ ಪಞ್ಞತ್ತಂ, ಸಮ್ಬಹುಲಾ ಭನ್ತೇ ಭಿಕ್ಖೂ ಅಞ್ಞತರಸ್ಸ ಉಪಾಸಕಸ್ಸ ವಿಹಾರಪರಿಭೋಗಂ ಸೇನಾಸನಂ ಅಞ್ಞತ್ರ ಪರಿಭುಞ್ಜಿಂಸು, ತಸ್ಮಿಂ ಭನ್ತೇ ವತ್ಥುಸ್ಮಿಂ ಪಞ್ಞತ್ತಂ.

ಪುಚ್ಛಾ – ಅಧೋತೇಹಿ ಚ ಆವುಸೋ ಅಲ್ಲೇಹಿ ಚ ಪಾದೇಹಿ ಸೇನಾಸನಂ ಅಕ್ಕಮನ್ತಸ್ಸ ಚ ಸಉಪಾಹನೇನ ಸೇನಾಸನಂ ಅಕ್ಕಮನ್ತಸ್ಸ ಚ ದುಕ್ಕಟಂ ಭಗವತಾ ಕತ್ಥ ಪಞ್ಞತ್ತಂ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಪಞ್ಞತ್ತಂ.

ವಿಸ್ಸಜ್ಜನಾ – ಆಳವಿಯಂ ¶ ಭನ್ತೇ ಸಮ್ಬಹುಲೇ ಭಿಕ್ಖೂ ಆರಬ್ಭ ಪಞ್ಞತ್ತಂ, ಸಮ್ಬಹುಲಾ ಭನ್ತೇ ಭಿಕ್ಖೂ ಅಧೋತೇಹಿ ಪಾದೇಹಿ ಸೇನಾಸನಂ ಅಕ್ಕಮಿಂಸು, ಅಲ್ಲೇಹಿ ಚ ಪಾದೇಹಿ ಸೇನಾಸನಂ ಅಕ್ಕಮಿಂಸು, ಸಉಪಾಹನಾಪಿ ಸೇನಾಸನಂ ಅಕ್ಕಮಿಂಸು, ಸೇನಾಸನಂ ದುಸ್ಸಿ, ತಸ್ಮಿಂ ಭನ್ತೇ ವತ್ಥುಸ್ಮಿಂ ಪಞ್ಞತ್ತಂ.

ಪುಚ್ಛಾ – ಪರಿಕಮ್ಮಕತಾಯ ಆವುಸೋ ಭೂಮಿಯಾ ನಿಟ್ಠುಭನ್ತಸ್ಸ ಚ ಪರಿಕಮ್ಮಕತಂ ಭಿತ್ತಿಂ ಅಪಸ್ಸಯನ್ತಸ್ಸ ಚ ದುಕ್ಕಟಂ ಭಗವತಾ ಕತ್ಥ ಪಞ್ಞತ್ತಂ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಪಞ್ಞತ್ತಂ.

ವಿಸ್ಸಜ್ಜನಾ – ಆಳವಿಯಂ ¶ ಭನ್ತೇ ಸಮ್ಬಹುಲೇವ ಭಿಕ್ಖೂ ಆರಬ್ಭ ಪಞ್ಞತ್ತಂ, ಸಮ್ಬಹುಲಾ ಭನ್ತೇ ಭಿಕ್ಖೂ ಪರಿಕಮ್ಮಕತಾಯ ಭೂಮಿಯಾ ನಿಟ್ಠುಭಿಂಸು, ಪರಿಕಮ್ಮಕತಂ ಭಿತ್ತಿಂ ಅಪಸ್ಸಯಿಂಸು, ತಸ್ಮಿಂ ಭನ್ತೇ ವತ್ಥುಸ್ಮಿಂ ಪಞ್ಞತ್ತಂ.

ಪುಚ್ಛಾ – ಸೇನಾಸನಕ್ಖನ್ಧಕಂ ಪುಚ್ಛಿಸ್ಸಂ, ಸನಿದಾನಂ ಸನಿದ್ದೇಸಂ. ಸಮುಕ್ಕಟ್ಠಪದಾನಂ ಆವುಸೋ ಕತಿ ಆಪತ್ತಿಯೋ.

ವಿಸ್ಸಜ್ಜನಾ – ಸೇನಾಸನಕ್ಖನ್ಧಕಂ ¶ ವಿಸ್ಸಜ್ಜಿಸ್ಸಂ, ಸನಿದಾನಂ ಸನಿದ್ದೇಸಂ. ಸಮುಕ್ಕಟ್ಠಪದಾನಂ ಭನ್ತೇ ತಿಸ್ಸೋ ಆಪತ್ತಿಯೋ.

೭. ಸಙ್ಘತೇದಕಕ್ಖನ್ಧಕ

ಪುಚ್ಛಾ – ಕಥಂ ¶ ಆವುಸೋ ಛನ್ನಂ ಸಕ್ಯಕುಮಾರಾನಂ ಸಹ ಉಪಾಲಿಕಪ್ಪಕೇನ ಪಬ್ಬಜ್ಜಾ ಅಹೋಸಿ, ಕಥಞ್ಚ ನೇಸಂ ವಿಸೇಸೋ ಉದಪಾದಿ.

ವಿಸ್ಸಜ್ಜನಾ – ಭಗವಾ ಭನ್ತೇ ಉಪಾಲಿಂ ಕಪ್ಪಕಂ ಪಠಮಂ ಪಬ್ಬಾಜೇಸಿ, ಪಚ್ಛಾ ತೇ ಸಕ್ಯಕುಮಾರೇ, ಅಥ ಭನ್ತೇ ಆಯಸ್ಮಾ ಭದ್ದಿಯೋ ತೇನೇವ ಅನ್ತರವಸ್ಸೇನ ತಿಸ್ಸೋ ವಿಜ್ಜಾ ಸಚ್ಛಾಕಾಸಿ, ಆಯಸ್ಮಾ ಅನುರುದ್ಧೋ ದಿಬ್ಬಚಕ್ಖುಂ ಉಪ್ಪಾದೇಸಿ, ಆಯಸ್ಮಾ ಆನನ್ದೋ ಸೋತಾಪತ್ತಿಫಲಂ ಸಚ್ಛಾಕಾಸಿ, ದೇವದತ್ತೋ ಪೋಥುಜ್ಜನಿಕಂ ಇದ್ಧಿಂ ಅಭಿನಿಪ್ಫಾದೇಸಿ. ಏವಂ ಖೋ ಭನ್ತೇ ಛನ್ನಂ ಸಕ್ಯಕುಮಾರಾನಂ ಉಪಾಲಿಕಪ್ಪಕೇನ ಸಹ ಪಬ್ಬಜ್ಜಾ ಅಹೋಸಿ, ಏವಞ್ಚ ಪನ ಭನ್ತೇ ತೇಸಂ ವಿಸೇಸಾಧಿಗಮೋ ಅಹೋಸಿ.

ಪಕಾಸನೀಯ

ಪುಚ್ಛಾ – ಪಕಾಸನೀಯಕಮ್ಮಂ ¶ ಆವುಸೋ ಕಾತುಂ ಭಗವತಾ ಕತ್ಥ ಪಞ್ಞತ್ತಂ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಪಞ್ಞತ್ತಂ.

ವಿಸ್ಸಜ್ಜನಾ – ರಾಜಗಹೇ ಭನ್ತೇ ದೇವದತ್ತಂ ಆರಬ್ಭ ಪಞ್ಞತ್ತಂ, ದೇವದತ್ತೋ ಭನ್ತೇ ‘‘ಸರಾಜಿಕಾಯ ಮಂ ಭಗವಾ ಪರಿಸಾಯ ಖೇಳಾಸಕವಾದೇನ ಅಪಸಾದೇತಿ, ಸಾರಿಪುತ್ತಮೋಗ್ಗಲ್ಲಾನೇವ ಉಕ್ಕಂಸತೀ’’ತಿ ಕುಪಿತೋ ಅನತ್ತಮನೋ ಭಗವತಿ ಆಘಾತಂ ಬನ್ಧಿ, ತಸ್ಮಿಂ ಭನ್ತೇ ವತ್ಥುಸ್ಮಿಂ ಪಞ್ಞತ್ತಂ.

ಪಕಾಸನೀಯ

ಪುಚ್ಛಾ – ದೇವದತ್ತಸ್ಸ ¶ ಆವುಸೋ ಪಕಾಸನೀಯಕಮ್ಮಂ ಕಾರಾಪೇತ್ವಾ ಕಥಂ ಭಗವಾ ಪಕಾಸೇತುಂ ಆಣಾಪೇಸಿ.

ವಿಸ್ಸಜ್ಜನಾ – ಭಗವಾ ಭನ್ತೇ ದೇವದತ್ತಸ್ಸ ಪಕಾಸನೀಯಕಮ್ಮಂ ಕಾತುಂ ಪಞ್ಞಪೇತ್ವಾ ಆಯಸ್ಮನ್ತಂ ಸಾರಿಪುತ್ತಂ ಆಮನ್ತೇಸಿ ‘‘ತೇನ ಹಿ ತ್ವಂ ಸಾರಿಪುತ್ತ ದೇವದತ್ತಂ ರಾಜಗಹೇ ಪಕಾಸೇಹೀ’’ತಿ, ಏವಂ ಖೋ ಭನ್ತೇ ದೇವದತ್ತಸ್ಸ ಪಕಾಸನೀಯಕಮ್ಮಂ ಕತ್ವಾ ದೇವದತ್ತಂ ರಾಜಗಹೇ ಪಕಾಸೇತುಂ ಭಗವಾ ಆಣಾಪೇಸಿ.

ದೇವದತ್ತ

ಪುಚ್ಛಾ – ಕಥಂ ¶ ಆವುಸೋ ದೇವದತ್ತೇನ ದುಟ್ಠಚಿತ್ತೇನ ವಧಕಚಿತ್ತೇನ ತಥಾ ಗತಸ್ಸ ರುಹಿರಂ ಉಪ್ಪಾದೇತ್ವಾ ಪಠಮಂ ಆನನ್ತರಿಯಂ ಕಮ್ಮಂ ಉಪಚಿತಂ.

ವಿಸ್ಸಜ್ಜನಾ – ಭಗವಾ ಭನ್ತೇ ಗಿಜ್ಝಕೂಟಸ್ಸ ಪಬ್ಬತಸ್ಸ ಛಾಯಾಯಂ ಚಙ್ಕಮಿ, ಅಥ ಭನ್ತೇ ದೇವದತ್ತೋ ಗಿಜ್ಝಕೂಟಂ ಪಬ್ಬತಂ ಆರುಹಿತ್ವಾ ಮಹತಿಂ ಸಿಲಂ ಪವಿಜ್ಝಿ ‘‘ಇಮಾಯ ಸಮಣಂ ಗೋತಮಂ ಜೀವಿತಾ ವೋರೋಪೇಸ್ಸಾಮೀ’’ತಿ, ಅಥ ಖೋ ಭನ್ತೇ ದ್ವೇ ಪಬ್ಬತಕೂಟಾನಿ ಸಮಾಗನ್ತ್ವಾ ತಂ ಸಿಲಂ ಸಮ್ಪಟಿಚ್ಛಿಂಸು, ತತೋ ಪಪತಿಕಾ ಉಪ್ಪತಿತ್ವಾ ಭಗವತೋ ಪಾದೇ ರುಹಿರಂ ಉಪ್ಪಾದೇಸಿ. ಏವಂ ಖೋ ಭನ್ತೇ ದೇವದತ್ತೇನ ದುಟ್ಠೇನ ವಧಕಚಿತ್ತೇನ ತಥಾಗತಸ್ಸ ರುಹಿರಂ ಉಪ್ಪಾದೇತ್ವಾ ಪಠಮಂ ಆನನ್ತರಿಯಕಮ್ಮಂ ಉಪಚಿತಂ.

ಪುಚ್ಛಾ – ಕುಲೇಸು ¶ ಆವುಸೋ ತಿಕಭೋಜನಂ ಭಗವತಾ ಕತ್ಥ ಪಞ್ಞತ್ತಂ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಪಞ್ಞತ್ತಂ.

ವಿಸ್ಸಜ್ಜನಾ – ರಾಜಗಹೇ ಭನ್ತೇ ದೇವದತ್ತಂ ಆರಬ್ಭ ಪಞ್ಞತ್ತಂ, ದೇವದತ್ತೋ ಭನ್ತೇ ಪರಿಹೀನಲಾಭಸಕ್ಕಾರೋ ಸಪರಿಸೋ ಕುಲೇಸು ವಿಞ್ಞಾಪೇತ್ವಾ ವಿಞ್ಞಾಪೇತ್ವಾ ಭುಞ್ಜಿ, ತಸ್ಮಿಂ ಭನ್ತೇ ವತ್ಥುಸ್ಮಿಂ ಪಞ್ಞತ್ತಂ.

ಪುಚ್ಛಾ – ಅಲಂ ¶ ದೇವದತ್ತ, ಮಾ ತೇ ರುಚ್ಚಿ ಸಙ್ಘಭೇದೋ, ಗರುಕೋ ಖೋ ದೇವದತ್ತ ಸಙ್ಘಭೇದೋತಿಆದಿಕೋ ಆವುಸೋ ಓವಾದೋ ಭಗವತಾ ಕತ್ಥ ದಿನ್ನೋ, ಕಿಸ್ಮಿಂ ವತ್ಥುಸ್ಮಿಂ ದಿನ್ನೋ.

ವಿಸ್ಸಜ್ಜನಾ – ರಾಜಗಹೇ ಭನ್ತೇ ದೇವದತ್ತಂ ಆರಬ್ಭ ದಿನ್ನೋ, ದೇವದತ್ತೋ ಭನ್ತೇ ಸಙ್ಘಭೇದಾಯ ಪರಕ್ಕಮಿ ಚಕ್ಕಭೇದಾಯ, ತಸ್ಮಿಂ ಭನ್ತೇ ವತ್ಥುಸ್ಮಿಂ ದಿನ್ನೋ.

ಅಲಂ ¶ ದೇವದತ್ತ, ಮಾ ತೇ ರುಚ್ಚಿ ಸಙ್ಘಭೇದೋ, ಗರುಕೋ ಖೋ ದೇವದತ್ತ ಸಙ್ಘಭೇದೋ –

ಪುಚ್ಛಾ – ‘‘ಸುಕರಂ ಸಾಧುನಾ ಸಾಧುಂ, ಸಾಧುಂ ಪಾಪೇನ ದುಕ್ಕರಂ. ಪಾಪಂ ಪಾಪೇನ ಸುಕರಂ, ಪಾಪಮರಿಯೇಹಿ ದುಕ್ಕರ’’ನ್ತಿ- ಆವುಸೋ ¶ ಇದಂ ಉದಾನಂ ಭಗವತಾ ಕತ್ಥ ಉದಾನಿತಂ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಉದಾನಿತಂ.

ವಿಸ್ಸಜ್ಜನಾ – ರಾಜಗಹೇ ಭನ್ತೇ ದೇವದತ್ತಂಯೇವ ಆರಬ್ಭ ಉದಾನಿತಂ, ಆಯಸ್ಮಾ ಭನ್ತೇ ಆನನ್ದೋ ಪುಬ್ಬಣ್ಹಸಮಯಂ ನಿವಾಸೇತ್ವಾ ಪತ್ತಚೀವರಮಾದಾಯ ರಾಜಗಹಂ ಪಿಣ್ಡಾಯ ಪಾವಿಸಿ, ಅಥ ಖೋ ಭನ್ತೇ ದೇವದತ್ತೋ ಯೇನಾಯಸ್ಮಾ ಆನನ್ದೋ ತೇನುಪಸಙ್ಕಮಿ, ಉಪಸಙ್ಕಮಿತ್ವಾ ಆಯಸ್ಮನ್ತಂ ಆನನ್ದಂ ಏತದವೋಚ ‘‘ಅಜ್ಜತಗ್ಗೇ ದಾನಾಹಂ ಆವುಸೋ ಆನನ್ದ ಅಞ್ಞತ್ರೇವ ಭಗವತಾ ಅಞ್ಞತ್ರೇವ ಭಿಕ್ಖುಸಙ್ಘಾ ಉಪೋಸಥಂ ಕರಿಸ್ಸಾಮಿ ಸಙ್ಘಕಮ್ಮಂ ಕರಿಸ್ಸಾಮೀ’’ತಿ, ತಸ್ಮಿಂ ಭನ್ತೇ ವತ್ಥುಸ್ಮಿಂ ಉದಾನಿತಂ.

ಸುಕರಂ ಸಾಧುನಾ ಸಾಧುಂ, ಸಾಧುಂ ಪಾಪೇನ ದುಕ್ಕರಂ;

ಪಾಪಂ ಪಾಪೇನ ಸುಕರಂ, ಪಾಪಮರಿಯೇಹಿ ದುಕ್ಕರಂ.

ಪುಚ್ಛಾ – ಭೇದಾನುವತ್ತಕಾನಂ ¶ ಆವುಸೋ ಭಿಕ್ಖೂನಂ ಥುಲ್ಲಚ್ಚಯಂ ಭಗವತಾ ಕತ್ಥ ಪಞ್ಞತ್ತಂ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಪಞ್ಞತ್ತಂ.

ವಿಸ್ಸಜ್ಜನಾ – ರಾಜಗಹೇ ಭನ್ತೇ ಸಮ್ಬಹುಲೇ ಭಿಕ್ಖೂ ಆರಬ್ಭ ಪಞ್ಞತ್ತಂ, ಆಯಸ್ಮಾ ಭನ್ತೇ ಸಾರಿಪುತ್ತೋ ಭಗವನ್ತಂ ಉಪಸಙ್ಕಮಿತ್ವಾ ಏತದವೋಚ ‘‘ಸಾಧು ಭನ್ತೇ ಭೇದಾನುವತ್ತಕಾ ಭಿಕ್ಖೂ ಪುನ ಉಪಸಮ್ಪಜ್ಜೇಯ್ಯು’’ನ್ತಿ, ತಸ್ಮಿಂ ಭನ್ತೇ ವತ್ಥುಸ್ಮಿಂ ಪಞ್ಞತ್ತಂ.

‘‘ಸಾಧು ¶ ಭನ್ತೇ ಭೇದಾನುವತ್ತಕಾ ಭಿಕ್ಖೂ ಪುನ ಉಪಸಮ್ಪಜ್ಜೇಯ್ಯು’’ನ್ತಿ –

ಪುಚ್ಛಾ – ಕಿತ್ತಾವತಾ ¶ ನು ಖೋ ಆವುಸೋ ಸಙ್ಘರಾಜಿ ಹೋತಿ ನೋ ಚ ಸಙ್ಘಭೇದೋ, ಕಿತ್ತಾವತಾ ಚ ಪನ ಸಙ್ಘರಾಜಿ ಚೇವ ಹೋತಿ ಸಙ್ಘಭೇದೋ ಚ.

ವಿಸ್ಸಜ್ಜನಾ – ಏಕತೋ ಭನ್ತೇ ಏಕೋ ಹೋತಿ, ಏಕತೋ ದ್ವೇ ಚತುತ್ಥೋ ಅನುಸ್ಸಾವೇತಿ, ಸಲಾಕಂ ಗಾಹೇತಿ ‘‘ಅಯಂ ಧಮ್ಮೋ ಅಯಂ ವಿನಯೋ ಇದಂ ಸತ್ಥುಸಾಸನಂ ಇಮಂ ಗಣ್ಹಥ ಇಮಂ ರೋಚೇಥಾತಿ’’, ಏತೇನೇವ ಭನ್ತೇ ನಯೇನ ಚತುನ್ನಂ ವಾ ಪಞ್ಚನ್ನಂ ವಾ ಛನ್ನಂ ವಾ ಸತ್ತನ್ನಂ ವಾ ಅಟ್ಠನ್ನಂ ವಾ ಸಙ್ಘರಾಜಿ ಹೋತಿ, ನೋ ಚ ಸಙ್ಘಭೇದೋ, ಏಕತೋ ಭನ್ತೇ ಚತ್ತಾರೋ ಹೋನ್ತಿ, ಏಕತೋ ಚತ್ತಾರೋ, ನವಮೋ ಅನುಸ್ಸಾವೇತಿ, ಸಲಾಕಂ ಗಾಹೇತಿ ‘‘ಅಯಂ ಧಮ್ಮೋ ಅಯಂ ವಿನಯೋ ಇದಂ ಸತ್ಥುಸಾಸನಂ ಇಮಂ ಗಣ್ಹಥ ಇಮಂ ರೋಚೇಥಾ’’ತಿ, ಏವಂ ಖೋ ಭನ್ತೇ ಸಙ್ಘರಾಜಿ ಚೇವ ಹೋತಿ ಸಙ್ಘಭೇದೋ ಚ. ಏವಂ ಖೋ ಭನ್ತೇ ಸಙ್ಘರಾಜಿ ಹೋತಿ, ನೋ ಚ ಸಙ್ಘಭೇದೋ, ಏವಞ್ಚ ಪನ ಭನ್ತೇ ಸಙ್ಘರಾಜಿ ಚೇವ ಹೋತಿ ಸಙ್ಘಭೇದೋ ಚ.

ಪುಚ್ಛಾ – ಕಿತ್ತಾವತಾ ¶ ನು ಖೋ ಆವುಸೋ ಸಙ್ಘೋ ಭಿನ್ನೋ ಹೋತಿ.

ವಿಸ್ಸಜ್ಜನಾ – ಇಧ ಭನ್ತೇ ಭಿಕ್ಖೂ ಅಧಮ್ಮಾದಿಂ ಧಮ್ಮಾದೀನೀತಿ ದೀಪೇನ್ತಿ, ತೇ ಇಮೇಹಿ ಅಟ್ಠಾರಸಹಿ ವತ್ಥೂಹಿ ಅಪಕಸ್ಸನ್ತಿ, ಅವಪಕಸ್ಸನ್ತಿ, ಆವೇನಿಂ ¶ ಉಪೋಸಥಂ ಕರೋನ್ತಿ, ಆವೇನಿಂ ಪವಾರಣಂ ಕರೋನ್ತಿ, ಆವೇನಿಂ ಸಙ್ಘಕಮ್ಮಂ ಕರೋನ್ತಿ, ಏವಂ ಖೋ ಭನ್ತೇ ಸಙ್ಘೋ ಭಿನ್ನೋ ಹೋತಿ.

ಪುಚ್ಛಾ – ಕಿತ್ತಾವತಾ ನು ಖೋ ಆವುಸೋ ಸಙ್ಘೋ ಸಮಗ್ಗೋ ಹೋತಿ.

ವಿಸ್ಸಜ್ಜನಾ – ಇಧ ಭನ್ತೇ ಭಿಕ್ಖೂ ಅಧಮ್ಮಂ ಅಧಮ್ಮೋತಿ ದೀಪೇನ್ತಿ, ಧಮ್ಮಂ ಧಮ್ಮೋತಿ ದೀಪೇನ್ತಿ, ಅವಿನಯಂ ಅವಿನಯೋತಿ ದೀಪೇನ್ತಿ…ಪೇ… ದುಟ್ಠುಲ್ಲಂ ಆಪತ್ತಿಂ ದುಟ್ಠುಲ್ಲಾ ಆಪತ್ತೀತಿ ದೀಪೇನ್ತಿ, ಅದುಟ್ಠುಲ್ಲಂ ಆಪತ್ತಿಂ ಅದುಟ್ಠುಲ್ಲಾ ಆಪತ್ತೀತಿ ದೀಪೇನ್ತಿ, ತೇ ಇಮೇಹಿ ಅಟ್ಠಾರಸಹಿ ವತ್ಥೂಹಿ ನ ಅಪಕಸ್ಸನ್ತಿ, ನ ಅವಪಕಸ್ಸನ್ತಿ, ನ ಆವೇನಿಂ ಉಪೋಸಥಂ ಕರೋನ್ತಿ, ನ ಆವೇನಿಂ ಪವಾರಣಂ ಕರೋನ್ತಿ, ನ ಆವೇನಿಂ ಸಙ್ಘಕಮ್ಮಂ ಕರೋನ್ತಿ, ಏತ್ತಾವತಾ ಖೋ ಭನ್ತೇ ಸಙ್ಘೋ ಸಮಗ್ಗೋ ಹೋತಿ.

ಪುಚ್ಛಾ – ಸಮಗ್ಗಂ ¶ ಆವುಸೋ ಸಙ್ಘಂ ಭಿನ್ದಿತ್ವಾ ಕಿಂ ಸೋ ಪಸವತಿ.

ವಿಸ್ಸಜ್ಜನಾ – ಸಮಗ್ಗಂ ಖೋ ಭನ್ತೇ ಸಙ್ಘಂ ಭಿನ್ದಿತ್ವಾ ಕಪ್ಪಟ್ಠಿತಿಕಂ ಕಿಬ್ಬಿಸಂ ಪಸವತಿ, ಕಪ್ಪಂ ನಿರಯಮ್ಹಿ ಪಚ್ಚತಿ.

ಪುಚ್ಛಾ – ಭಿನ್ನಂ ¶ ಖೋ ಆವುಸೋ ಸಙ್ಘಂ ಸಮಗ್ಗಂ ಕತ್ವಾ ಕಿಂ ಸೋ ಪಸವತಿ.

ವಿಸ್ಸಜ್ಜನಾ – ಭಿನ್ನಂ ಖೋ ಭನ್ತೇ ಸಙ್ಘಂ ಸಮಗ್ಗಂ ಕತ್ವಾ ಬ್ರಹ್ಮಂ ಪುಞ್ಞಂ ಪಸವತಿ, ಕಪ್ಪಂ ಸಗ್ಗಮ್ಹಿ ಮೋದತಿ.

ಪುಚ್ಛಾ – ಸಙ್ಘಭೇದಂ ¶ ಪುಚ್ಛಿಸ್ಸಂ, ಸನಿದಾನಂ ಸನಿದ್ದೇಸಂ. ಸಮುಕ್ಕಟ್ಠಪದಾನಂ ಆವುಸೋ ಕತಿ ಆಪತ್ತಿಯೋ.

ವಿಸ್ಸಜ್ಜನಾ – ಸಙ್ಘಭೇದಂ ವಿಸ್ಸಜ್ಜಿಸ್ಸಂ, ಸನಿದಾನಂ ಸನಿದ್ದೇಸಂ. ಸಮುಕ್ಕಟ್ಠಪದಾನಂ ಭನ್ತೇ ದ್ವೇ ಆಪತ್ತಿಯೋ.

೮. ವತ್ತಕ್ಖನ್ಧಕ

ಪುಚ್ಛಾ – ಆಗನ್ತುಕಾನಂ ¶ ಆವುಸೋ ಭಿಕ್ಖೂನಂ ವತ್ತಂ ಭಗವತಾ ಕತ್ಥ ಪಞ್ಞತ್ತಂ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಪಞ್ಞತ್ತಂ.

ವಿಸ್ಸಜ್ಜನಾ – ಸಾವತ್ಥಿಯಂ ಭನ್ತೇ ಸಮ್ಬಹುಲೇ ಆಗನ್ತುಕೇ ಭಿಕ್ಖೂ ಆರಬ್ಭ ಪಞ್ಞತ್ತಂ, ಆಗನ್ತುಕಾ ಭನ್ತೇ ಭಿಕ್ಖೂ ಸಉಪಾಹನಾಪಿ ಆರಾಮಂ ಪವಿಸಿಂಸು, ಛತ್ತಪಗ್ಗಹಿತಾಪಿ ಆರಾಮಂ ಪವಿಸಿಂಸು, ಓಗುಣ್ಠಿತಾಪಿ ಆರಾಮಂ ಪವಿಸಿಂಸು, ಸೀಸೇಪಿ ಚೀವರಂ ಕರಿತ್ವಾ ಆರಾಮಂ ಪವಿಸಿಂಸು, ಪಾನೀಯೇನಪಿ ಪಾದೇ ದೋವಿಂಸು, ವುಡ್ಢತರೇಪಿ ಆವಾಸಿಕೇ ಭಿಕ್ಖೂ ನಾಭಿವಾದೇಸುಂ, ನಪಿ ಸೇನಾಸನಂ ಪುಚ್ಛಿಂಸು, ತಸ್ಮಿಂ ಭನ್ತೇ ವತ್ಥುಸ್ಮಿಂ ‘‘ತೇನ ಹಿ ಭಿಕ್ಖವೇ ಆಗನ್ತುಕಾನಂ ಭಿಕ್ಖೂನಂ ವತ್ತಂ ಪಞ್ಞಪೇಸ್ಸಾಮಿ, ಯಥಾ ಆಗನ್ತುಕೇಹಿ ಭಿಕ್ಖೂಹಿ ಸಮ್ಮಾ ವತ್ತಿತಬ್ಬಂ, ಆಗನ್ತುಕೇನ ಭಿಕ್ಖವೇ ಭಿಕ್ಖುನಾ ಇದಾನಿ ಆರಾಮಂ ಪವಿಸಿಸ್ಸಾಮೀತಿ ಉಪಾಹನಾ ಓಮುಞ್ಚಿತ್ವಾ ನೀಚಂ ಕತ್ವಾ ಪಪ್ಫೋಟೇತ್ವಾ ಗಹೇತ್ವಾ ಛತ್ತಂ ಅಪನಾಮೇತ್ವಾ ಸೀಸಂ ವಿವರಿತ್ವಾ ಸೀಸೇ ಚೀವರಂ ಖನ್ಧೇ ಕತ್ವಾ ಸಾಧುಕಂ ಅತರಮಾನೇನ ಆರಾಮೋ ಪವಿಸಿತಬ್ಬೋ’’ ಏವಮಾದಿನಾ ಭನ್ತೇ ಆಗನ್ತುಕಾನಂ ಭಿಕ್ಖೂನಂ ವತ್ತಂ ಪಞ್ಞತ್ತಂ.

ಪುಚ್ಛಾ – ಆವಾಸಿಕಾನಂ ¶ ಆವುಸೋ ಭಿಕ್ಖೂನಂ ವತ್ತಂ ಭಗವತಾ ಕತ್ಥ ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಪಞ್ಞತ್ತಂ, ಕಥಞ್ಚ ಪನ ಪಞ್ಞತ್ತಂ.

ವಿಸ್ಸಜ್ಜನಾ – ಸಾವತ್ಥಿಯಂ ಭನ್ತೇ ಸಮ್ಬಹುಲೇ ಆವಾಸಿಕೇ ಭಿಕ್ಖೂ ಆರಬ್ಭ ಪಞ್ಞತ್ತಂ, ಸಮ್ಬಹುಲಾ ಭನ್ತೇ ಆವಾಸಿಕಾ ಭಿಕ್ಖೂ ಆಗನ್ತುಕೇ ಭಿಕ್ಖೂ ದಿಸ್ವಾ ನೇವ ಆಸನಂ ಪಞ್ಞಪೇಸುಂ, ನ ಪಾದೋದಕಂ ಪಾದಪೀಠಂ ಪಾದಕಥಲಿಕಂ ಉಪನಿಕ್ಖಿಪಿಂಸು, ನ ಪಚ್ಚುಗ್ಗನ್ತ್ವಾ ಪತ್ತಚೀವರಂ ಪಟಿಗ್ಗಹೇಸುಂ, ನ ಸೇನಾಸನಂ ಪಞ್ಞಪೇಸುಂ, ತಸ್ಮಿಂ ಭನ್ತೇ ವತ್ಥುಸ್ಮಿಂ ಪಞ್ಞತ್ತಂ, ತಸ್ಮಿಂ ಭನ್ತೇ ವತ್ಥುಸ್ಮಿಂ –

‘‘ಆವಾಸಿಕೇನ ಭಿಕ್ಖವೇ ಭಿಕ್ಖುನಾ ಆಗನ್ತುಕಂ ಭಿಕ್ಖುಂ ವುಡ್ಢತರಂ ದಿಸ್ವಾ ಆಸನಂ ಪಞ್ಞಪೇತಬ್ಬಂ, ಪಾದೋದಕಂ ಪಾದಪೀಠಂ ಪಾದಕಥಲಿಕಂ ಉಪನಿಕ್ಖಿಪಿತಬ್ಬಂ, ಪಚ್ಚುಗ್ಗನ್ತ್ವಾ ಪತ್ತಚೀವರಂ ಪಟಿಗ್ಗಹೇತಬ್ಬಂ ¶ ಪಾನೀಯೇನ ಪುಚ್ಛಿತಬ್ಬೋ’’ ಏವಮಾದಿನಾ ಭನ್ತೇ ಆವಾಸಿಕಾನಂ ಭಿಕ್ಖೂನಂ ವತ್ತಂ ಭಗವತಾ ಪಞ್ಞತ್ತಂ.

ಪುಚ್ಛಾ – ಗಮಿಕಾನಂ ¶ ಆವುಸೋ ಭಿಕ್ಖೂನಂ ವತ್ತಂ ಭಗವತಾ ಕತ್ಥ ಪಞ್ಞತ್ತಂ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಪಞ್ಞತ್ತಂ, ಕಥಞ್ಚಪನ ಪಞ್ಞತ್ತಂ.

ವಿಸ್ಸಜ್ಜನಾ – ಸಾವತ್ಥಿಯಂ ಭನ್ತೇ ಸಮ್ಬಹುಲೇ ಗಮಿಕೇ ಭಿಕ್ಖೂ ಆರಬ್ಭ ಪಞ್ಞತ್ತಂ, ಸಮ್ಬಹುಲಾ ಭನ್ತೇ ಗಮಿಕಾ ಭಿಕ್ಖೂ ದಾರುಭಣ್ಡಂ ಮತ್ತಿಕಾಭಣ್ಡಂ ಅಪ್ಪಟಿಸಾಮೇತ್ವಾ ದ್ವಾರವಾತಪಾನಂ ವಿವರಿತ್ವಾ ಸೇನಾಸನಂ ಅನಾಪುಚ್ಛಾ ಪಕ್ಕಮಿಂಸು, ತಸ್ಮಿಂ ಭನ್ತೇ ವತ್ಥುಸ್ಮಿಂ ‘‘ಗಮಿಕೇನ ಭಿಕ್ಖವೇ ಭಿಕ್ಖುನಾ ದಾರುಭಣ್ಡಂ ಪಟಿಸಾಮೇತ್ವಾ ದ್ವಾರವಾತಪಾನಂ ಥಕೇತ್ವಾ ಸೇನಾಸನಂ ಆಪುಚ್ಛಾ ಪಕ್ಕಮಿತಬ್ಬಂ’’ ಏವಮಾದಿನಾ ಭನ್ತೇ ಆಕಾರೇನ ಭಗವತಾ ಗಮಿಕಾನಂ ಭಿಕ್ಖೂನಂ ವತ್ತಂ ಪಞ್ಞತ್ತಂ.

ಪುಚ್ಛಾ – ಭತ್ತಗ್ಗೇ ¶ ಆವುಸೋ ಅನುಮೋದಿತುಂ ಭಗವತಾ ಕತ್ಥ ಅನುಞ್ಞಾತಂ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಅನುಞ್ಞಾತಂ.

ವಿಸ್ಸಜ್ಜನಾ – ಸಾವತ್ಥಿಯಂ ¶ ಭನ್ತೇ ಸಮ್ಬಹುಲೇ ಭಿಕ್ಖೂ ಆರಬ್ಭ ಅನುಞ್ಞಾತಂ, ಸಮ್ಬಹುಲಾ ಭನ್ತೇ ಭಿಕ್ಖೂ ಭತ್ತಗ್ಗೇ ನಾನುಮೋದಿಂಸು, ತಸ್ಮಿಂ ಭನ್ತೇ ವತ್ಥುಸ್ಮಿಂ ಅನುಞ್ಞಾತಂ.

ಪುಚ್ಛಾ – ಭಿಕ್ಖೂನಂ ಆವುಸೋ ಭತ್ತಗ್ಗವತ್ತಂ ಭಗವತಾ ಕತ್ಥ ಪಞ್ಞತ್ತಂ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಪಞ್ಞತ್ತಂ.

ವಿಸ್ಸಜ್ಜನಾ – ಸಾವತ್ಥಿಯಂ ಭನ್ತೇ ಛಬ್ಬಗ್ಗಿಯೇ ಭಿಕ್ಖೂ ಆರಬ್ಭ ಪಞ್ಞತ್ತಂ, ಛಬ್ಬಗ್ಗಿಯಾ ಭನ್ತೇ ಭಿಕ್ಖೂ ದುನ್ನಿವತ್ಥಾ ದುಪ್ಪಾರುತಾ ಅನಾಕಪ್ಪಸಮ್ಪನ್ನಾ ಭತ್ತಗ್ಗಂ ಗಚ್ಛಿಂಸು, ತಸ್ಮಿಂ ಭನ್ತೇ ವತ್ಥುಸ್ಮಿಂ ‘‘ಸಚೇ ಆರಾಮೇ ಕಾಲೋ ಆರೋಚಿತೋ ಹೋತಿ, ತಿಮಣ್ಡಲಂ ಪಟಿಚ್ಛಾದೇನ್ತೇನ ಪರಿಮಣ್ಡಲಂ ನಿವಾಸೇತ್ವಾ ಕಾಯಬನ್ಧನಂ ಬನ್ಧಿತ್ವಾ ಸಗುಣಂ ಕತ್ವಾ ಸಙ್ಘಾಟಿಯೋ ಪಾರುಪಿತ್ವಾ ಗಣ್ಠಿಕಂ ಪಟಿಮುಞ್ಚಿತ್ವಾ ಧೋವಿತ್ವಾ ¶ ಪತ್ತಂ ಗಹೇತ್ವಾ ಸಾಧುಕಂ ಅತರಮಾನೇನ ಗಾಮೋ ಪವಿಸಿತಬ್ಬೋ’’ತಿ ಏವಮಾದಿನಾ ಭನ್ತೇ ಭತ್ತಗ್ಗವತ್ತಂ ಪಞ್ಞತ್ತಂ.

ಪುಚ್ಛಾ – ಭಿಕ್ಖೂನಂ ¶ ಆವುಸೋ ಸೇನಾಸನವತ್ತಂ ಭಗವತಾ ಕತ್ಥ ಪಞ್ಞತ್ತಂ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಪಞ್ಞತ್ತಂ, ಕಥಞ್ಚ ತಂ ಪಞ್ಞತ್ತಂ.

ವಿಸ್ಸಜ್ಜನಾ – ಸಾವತ್ಥಿಯಂ ಭನ್ತೇ ಛಬ್ಬಗ್ಗಿಯೇ ಭಿಕ್ಖೂ ಆರಬ್ಭ ಪಞ್ಞತ್ತಂ, ಛಬ್ಬಗ್ಗಿಯಾ ಭನ್ತೇ ಭಿಕ್ಖೂ ಭಿಕ್ಖೂಸು ಅಜ್ಝೋಕಾಸೇ ಚೀವರಂ ಕರೋನ್ತೇಸು ಪಟಿವಾತೇ ಅಙ್ಗಣೇ ಸೇನಾಸನಂ ಪಪ್ಫೋಟೇಸುಂ, ತಸ್ಮಿಂ ಭನ್ತೇ ವತ್ಥುಸ್ಮಿಂ ‘‘ಯಸ್ಮಿಂ ವಿಹಾರೇ ವಿಹರತಿ, ಸಚೇ ಸೋ ವಿಹಾರೋ ಉಕ್ಲಾಪೋ ಹೋತಿ, ಸಚೇ ಉಸ್ಸಹತಿ ಸೋಧೇತಬ್ಬೋ’’ತಿ ಏವಮಾದಿನಾ ಭನ್ತೇ ಭಿಕ್ಖೂನಂ ಸೇನಾಸನವತ್ತಂ ಭಗವತಾ ಪಞ್ಞತ್ತಂ.

ಪುಚ್ಛಾ – ಸಮಾಚಾರಂ ಪುಚ್ಛಿಸ್ಸಂ, ಸನಿದಾನಂ ಸನಿದ್ದೇಸಂ. ಸಮುಕ್ಕಟ್ಠಪದಾನಂ ಆವುಸೋ ಕತಿ ಆಪತ್ತಿಯೋ.

ವಿಸ್ಸಜ್ಜನಾ – ಸಮಾಚಾರಂ ವಿಸ್ಸಜ್ಜಿಸ್ಸಂ, ಸನಿದಾನಂ ಸನಿದ್ದೇಸಂ. ಸಮುಕ್ಕಟ್ಠಪದಾನಂ ಭನ್ತೇ ಏಕಾ ಆಪತ್ತಿ.

೯. ಪಾತಿಮೋಕ್ಖಟ್ಠಪನಕ್ಖನ್ಧಕ

ಪುಚ್ಛಾ – ಸಾಪತ್ತಿಕೇನ ¶ ಆವುಸೋ ಪಾತಿಮೋಕ್ಖಂ ಸುಣನ್ತಸ್ಸ ಪಾತಿಮೋಕ್ಖಂ ಠಪೇತುಂ ಭಗವತಾ ಕತ್ಥ ಪಞ್ಞತ್ತಂ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಪಞ್ಞತ್ತಂ.

ವಿಸ್ಸಜ್ಜನಾ – ಸಾವತ್ಥಿಯಂ ಭನ್ತೇ ಅಞ್ಞತರಂ ಪುಗ್ಗಲಂ ದುಸ್ಸೀಲಂ ಪಾಪಧಮ್ಮಂ ಆರಬ್ಭ ಪಞ್ಞತ್ತಂ, ಅಞ್ಞತರೋ ಭನ್ತೇ ಪುಗ್ಗಲೋ ದುಸ್ಸೀಲೋ ಪಾಪಧಮ್ಮೋ ತದಹುಪೋಸಥೇ ಸಙ್ಘಮಜ್ಝೇ ನಿಸಿನ್ನೋ ಅಹೋಸಿ, ತಸ್ಮಿಂ ಭನ್ತೇ ವತ್ಥುಸ್ಮಿಂ ಪಞ್ಞತ್ತಂ.

ಪುಚ್ಛಾ – ಠಪನಂ ¶ ಆವುಸೋ ಪುಚ್ಛಿಸ್ಸಂ, ಸನಿದಾನಂ ಸನಿದ್ದೇಸಂ. ಸಮುಕ್ಕಟ್ಠಪದಾನಂ ಆವುಸೋ ಕತಿ ಆಪತ್ತಿಯೋ.

ವಿಸ್ಸಜ್ಜನಾ – ಠಪನಂ ವಿಸ್ಸಜ್ಜಿಸ್ಸಂ, ಸನಿದಾನಂ ಸನಿದ್ದೇಸಂ. ಸಮುಕ್ಕಟ್ಠಪದಾನಂ ಭನ್ತೇ ಏಕಾ ಆಪತ್ತಿ.

೧೦. ಭಿಕ್ಖುನಿಕ್ಖನ್ಧಕ

ಪುಚ್ಛಾ – ಅಟ್ಠಹಿ ¶ ಆವುಸೋ ಗರುಧಮ್ಮೇಹಿ ಉಪಸಮ್ಪದಾ ಭಗವತಾ ಕತ್ಥ ಅನುಞ್ಞಾತಾ, ಕಸ್ಸ ಅನುಞ್ಞಾತಾ, ಕಿಸ್ಮಿಞ್ಚ ವತ್ಥುಸ್ಮಿಂ ಅನುಞ್ಞಾತಾ.

ವಿಸ್ಸಜ್ಜನಾ – ವೇಸಾಲಿಯಂ ಭನ್ತೇ ಮಹಾಪಜಾಪತಿಯಾ ಗೋತಮಿಯಾ ಅನುಞ್ಞಾತಾ, ಮಹಾಪಜಾಪತಿ ಭನ್ತೇ ಗೋತಮೀ ಸೂನೇಹಿ ಪಾದೇಹಿ ರಜೋಕಿಣ್ಣೇನ ಗತ್ತೇನ ದುಕ್ಖೀ ದುಮ್ಮನಾ ಅಸ್ಸುಮುಖೀ ರುದಮಾನಾ ಬಹಿದ್ವಾರಕೋಟ್ಠಕೇ ಅಟ್ಠಾಸಿ, ಅಥ ಖೋ ಭನ್ತೇ ಆಯಸ್ಮಾ ಆನನ್ದೋ ಮಹಾಪಜಾಪತಿಂ ಗೋತಮಿಂ ತಂ ಕಾರಣಂ ಪುಚ್ಛಿತ್ವಾ ಭಗವನ್ತಂ ಚತುಕ್ಖತ್ತುಂ ಯಾಚಿ ಮಾತುಗಾಮಸ್ಸ ತಥಾಗತಪ್ಪವೇದಿತೇ ಧಮ್ಮವಿನಯೇ ಆಗಾರಸ್ಮಾ ಅನಾಗಾರಿಯಂ ಪಬ್ಬಜ್ಜಂ, ತಸ್ಮಿಂ ಭನ್ತೇ ವತ್ಥುಸ್ಮಿಂ ಅನುಞ್ಞಾತಾ.

ಪುಚ್ಛಾ – ಭಿಕ್ಖೂಹಿ ¶ ಆವುಸೋ ಭಿಕ್ಖುನಿಯೋ ಉಪಸಮ್ಪಾದೇತುಂ ಭಗವತಾ ಕತ್ಥ ಅನುಞ್ಞಾತಂ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಅನುಞ್ಞಾತಂ.

ವಿಸ್ಸಜ್ಜನಾ – ವೇಸಾಲಿಯಂ ಭನ್ತೇ ಮಹಾಪಜಾಪತಿಂ ಗೋತಮಿಂ ಆರಬ್ಭ ಅನುಞ್ಞಾತಂ, ಮಹಾಪಜಾಪತಿ ಭನ್ತೇ ಗೋತಮೀ ಭಗವನ್ತಂ ಏತದವೋಚ ‘‘ಕಥಾಹಂ ಭನ್ತೇ ಇಮಾಸು ಸಾಕಿಯಾನೀಸು ಪಟಿಪಜ್ಜಾಮೀ’’ತಿ, ತಸ್ಮಿಂ ಭನ್ತೇ ವತ್ಥುಸ್ಮಿಂ ಅನುಞ್ಞಾತಂ.

ಪುಚ್ಛಾ – ಏಕತೋ ¶ ಉಪಸಮ್ಪನ್ನಾಯ ಆವುಸೋ ಭಿಕ್ಖುನಿಸಙ್ಘೇ ವಿಸುದ್ಧಾಯ ಭಿಕ್ಖುಸಙ್ಘೇ ಉಪಸಮ್ಪಾದೇತುಂ ಭಗವತಾ ಕತ್ಥ ಅನುಞ್ಞಾತಂ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಅನುಞ್ಞಾತಂ.

ವಿಸ್ಸಜ್ಜನಾ – ಸಾವತ್ಥಿಯಂ ಭನ್ತೇ ಸಮ್ಬಹುಲೇ ಭಿಕ್ಖೂ ಆರಬ್ಭ ಅನುಞ್ಞಾತಂ, ಸಮ್ಬಹುಲಾ ಭನ್ತೇ ಭಿಕ್ಖೂ ಭಿಕ್ಖುನೀನಂ ಅನ್ತರಾಯಿಕೇ ಧಮ್ಮೇ ಪುಚ್ಛಿಂಸು, ಉಪಸಮ್ಪದಾಪೇಕ್ಖಾಯೋ ವಿತ್ಥಾಯಿಂಸು, ಮಙ್ಕೂ ಅಹೇಸುಂ, ನ ಸಕ್ಖಿಂಸು ವಿಸ್ಸಜ್ಜೇತುಂ, ತಸ್ಮಿಂ ಭನ್ತೇ ವತ್ಥುಸ್ಮಿಂ ಅನುಞ್ಞಾತಂ.

ಪುಚ್ಛಾ – ಭಿಕ್ಖುನಿಕ್ಖನ್ಧಕಂ ¶ ಪುಚ್ಛಿಸ್ಸಂ, ಸನಿದಾನಂ ಸನಿದ್ದೇಸಂ. ಸಮುಕ್ಕಟ್ಠಪದಾನಂ ಆವುಸೋ ಕತಿ ಆಪತ್ತಿಯೋ.

ವಿಸ್ಸಜ್ಜನಾ – ಭಿಕ್ಖುನಿಕ್ಖನ್ಧಕಂ ವಿಸ್ಸಜ್ಜಿಸ್ಸಂ, ಸನಿದಾನಂ ಸನಿದ್ದೇಸಂ. ಸಮುಕ್ಕಟ್ಠಪದಾನಂ ಭನ್ತೇ ದ್ವೇ ಆಪತ್ತಿಯೋ.

೧೧. ಪಞ್ಚಸತಿಕಕ್ಖನ್ಧಕ

ಪಠಮ ಸಂಗಾಯನಾ

ಪುಚ್ಛಾ – ಪಞ್ಚಸತಿಕಂ ¶ ಪುಚ್ಛಿಸ್ಸಂ, ಸನಿದಾನಂ ಸನಿದ್ದೇಸಂ. ಸಮುಕ್ಕಟ್ಠಪದಾನಂ ಆವುಸೋ ಕತಿ ಆಪತ್ತಿಯೋ.

ವಿಸ್ಸಜ್ಜನಾ – ಪಞ್ಚಸತಿಕಂ ವಿಸ್ಸಜ್ಜಿಸ್ಸಂ, ಸನಿದಾನಂ ಸನಿದ್ದೇಸಂ. ಸಮುಕ್ಕಟ್ಠಪದಾನಂ ಭನ್ತೇ ನ ಕತಮಾ ಆಪತ್ತಿ.

೧೨. ಸತ್ತಸತಿಕಕ್ಖನ್ಧಕ

ದುತಿಯ ಸಂಗಾಯನಾ

ಪುಚ್ಛಾ – ಸತ್ತಸತಿಕಂ ¶ ಪುಚ್ಛಿಸ್ಸಂ, ಸನಿದಾನಂ ಸನಿದ್ದೇಸಂ. ಸಮುಕ್ಕಟ್ಠಪದಾನಂ ಆವುಸೋ ಕತಿ ಆಪತ್ತಿಯೋ.

ವಿಸ್ಸಜ್ಜನಾ – ಸತ್ತಸತಿಕಂ ವಿಸ್ಸಜ್ಜಿಸ್ಸಂ, ಸನಿದಾನಂ ಸನಿದ್ದೇಸಂ. ಸಮುಕ್ಕಟ್ಠಪದಾನಂ ಭನ್ತೇ ನ ಕತಮಾ ಆಪತ್ತಿ.

ಪುಚ್ಛಾ – ಕಸ್ಸ ¶ ಆವುಸೋ ವಚನಂ.

ವಿಸ್ಸಜ್ಜನಾ – ಭಗವತೋ ಭನ್ತೇ ವಚನಂ ಅರಹತೋ ಸಮ್ಮಾಸಮ್ಬುದ್ಧಸ್ಸ.

ಪುಚ್ಛಾ – ಕೇ ಆವುಸೋ ಸಿಕ್ಖನ್ತಿ.

ವಿಸ್ಸಜ್ಜನಾ – ಸೇಕ್ಖಾ ಚ ಭನ್ತೇ ಪುಥುಜ್ಜನಕಲ್ಯಾಣಕಾ ಚ ಸಿಕ್ಖನ್ತಿ.

ಪುಚ್ಛಾ – ಕೇ ¶ ಆವುಸೋ ಸಿಕ್ಖಿತಸಿಕ್ಖಾ.

ವಿಸ್ಸಜ್ಜನಾ – ಅರಹನ್ತೋ ಭನ್ತೇ ಸಿಕ್ಖಿತಸಿಕ್ಖಾ.

ಪುಚ್ಛಾ – ಕತ್ಥ ಆವುಸೋ ಠಿತಂ.

ವಿಸ್ಸಜ್ಜನಾ – ಸಿಕ್ಖಾಕಾಮೇಸು ಭನ್ತೇ ಠಿತಂ.

ಪುಚ್ಛಾ – ಕೇನಾವುಸೋ ಆಭತಂ.

ವಿಸ್ಸಜ್ಜನಾ – ಪರಮ್ಪರಾಯ ಭನ್ತೇ ಆಭತಂ.