ಅಞ್ಞ > ನೀತಿ-ಗನ್ಥ-ಸಙ್ಗಹೋ

(೧) ಆಚರಿಯಕಥಾ (೨) ಸಿಪ್ಪಕಥಾ (೩) ಪಞ್ಞಾಕಥಾ (೪) ಸುತಕಥಾ (೫) ಕಥಾನಕಥಾ (೬) ಧನಕಥಾ (೭) ದೇಸಕಥಾ (೮) ನಿಸ್ಸಯಕಥಾ (೯) ಮಿತ್ತಕಥಾ (೧೦) ದುಜ್ಜನಕಥಾ (೧೧) ಸುಜನಕಥಾ (೧೨) ಬಲಕಥಾ (೧೩) ಇತ್ಥಿಕಥಾ (೧೪) ಯುತ್ತಕಥಾ (೧೫) ದಾಸಕಥಾ (೧೬) ಘರಾವಾಸಕಥಾ (೧೭) ಕಾತಬ್ಬಕಥಾ (೧೮) ಅಕಾತಬ್ಬಕಥಾ (೧೯) ಞಾತಬ್ಬಕಥಾ (೨೦) ಅಲಙ್ಕಾರಕಥಾ (೨೧) ರಾಜಧಮ್ಮಕಥಾ (೨೨) ಉಪಸೇವಕಕಥಾ (೨೩) ದುಕ್ಖಾದಿಮಿಸ್ಸಕಕಥಾ (೨೪) ಪಕಿಣ್ಣಕಕಥಾ

ಚಕ್ಕಾತಿಚಕ್ಕಚಕ್ಕಿನ್ದೋ, ದೇವಾತಿದೇವಾದೇವಿನ್ದೋ,

ಬ್ರಹ್ಮಾತಿ ಬ್ರಹ್ಮಬ್ರಹ್ಮಿನ್ದೋ, ಜಿನೋ ಪೂರೇತು ಮೇ ಭಾವಂ.

ಚಿರಂ ತಿಟ್ಠತು ಲೋಕಮ್ಹಿ, ಧಂಸಕಂ ಸಬ್ಬಪಾಣಿನಂ;

ಮಹಾಮೋಹತಮಂ ಜಯಂ, ಜೋತನ್ತಂ ಜಿನಸಾಸನಂ.

ವನ್ದಿತ್ವಾ ರತನಂ ಸೇಟ್ಠಂ, ನಿಸ್ಸಾಯ ಪುಬ್ಬಕೇ ಗರು;

ನೀತಿಧಮ್ಮಂ ಪವಕ್ಖಾಮಿ, ಸಬ್ಬಲೋಕ ಸುಖಾವಹಂ.

ಆಚರಿಯೋ ಚ ಸಿಪ್ಪಞ್ಚ, ಪಞ್ಞಾಸುತಕಥಾಧನಂ;

ದೇಸಞ್ಚ ನಿಸ್ಸಯೋ ಮಿತ್ತಂ, ದುಜ್ಜನೋ ಸುಜನೋ ಬಲಂ.

ಇತ್ಥೀ ಪುತ್ತೋ ಚ ದಾಸೋ ಚ, ಘರಾವಾಸೋ ಕತಾಕತೋ;

ಞಾತಬ್ಬೋ ಚ ಅಲಙ್ಕಾರೋ, ರಾಜಧಮ್ಮಾ ಪಸೇವಕೋ;

ದುಕ್ಖಾದಿಮಿಸ್ಸಕೋ ಚೇವ, ಪಕಿಣ್ಣಕಾತಿ ಮಾತಿಕಾ.

ಸೀಹಾ ಏಕಂ ಬಕಾ ಏಕಂ, ಸಿಕ್ಖೇ ಚತ್ತಾರಿ ಕುಕ್ಕುಟಾ;

ಪಞ್ಚ ಕಾಕಾ ರಾಜಾ ನಾಮ, ಛ ಸುನಕ್ಖಾ ತೀಣಿ ಗದ್ರಭಾ.

ಮಹಾಕಮ್ಮಂ ಖುದ್ದಕಂ ವಾ, ಯಂ ಕಮ್ಮಂ ಕಾತುಮಿಚ್ಛತಿ;

ಸಬ್ಬಾರಮ್ಭೇನ ಕಾತಬ್ಬಂ, ಸೀಹಾ ಏಕಂ ತದಾ ಭವೇ.

ಇನ್ದ್ರಿಯಾನಿ ಸುಸಂಯಮ, ಬಕೋವ ಪಣ್ಡಿತೋ ಭವೇ;

ದೇಸಕ ಲೋಮಪನ್ನಾನಿ, ಸಬ್ಬಕಮ್ಮಾನಿ ಸಾಧಯೇ.

ಪುಬ್ಬಟ್ಠಾನಞ್ಚ ಯುದ್ಧಞ್ಚ, ಸಂವಿಭಾಗಞ್ಚ ಬನ್ಧು ಹಿ;

ಥಿಯಾ ಅಕ್ಕಮ್ಮ ಭುತ್ತಞ್ಚ, ಸಿಕ್ಖೇ ಚತ್ತಾರಿ ಕುಕ್ಕುಟೋ.

ಗುಯ್ಹೇ ಮೇಥುನಂ ಪೇಕ್ಖಿತ್ವಾ, ಭೋಜನಂ ಞಾತಿಸಙ್ಗಹೋ;

ವಿಲೋಕಾ ಪೇಕ್ಖನಾಲಸ್ಯಂ, ಪಞ್ಚ ಸಿಕ್ಖೇಯ್ಯ ವಾಯಸಾ.

ಅನಾಲಸ್ಸಂತಿಸವನ್ತಾಸೋ, ಸುನಿದ್ಧಾ ಸುಪ್ಪಬೋಧನಾ;

ದಳ್ಹಭತ್ತಿ ಚ ಸೂರಞ್ಚ, ಛ ಏತೇಸ್ವಾನತೋ ಗುಣೋ.

ಖಿನ್ನೋವ ವಹತೇ ಭಾರಂ, ಸೀತುಣ್ಹಞ್ಚ ನ ಚಿನ್ತಯೀ;

ಸನ್ತುಟ್ಠೋ ಚ ಭವೇ ನಿಚ್ಚಂ, ತೀಣಿ ಸಿಕ್ಖೇಯ್ಯ ಗದ್ರಭಾ.

ವೀಸತಿ ತಾನಿ ಗುಣಾನಿ, ಚರೇಯ್ಯ ಇಹ ಪಣ್ಡಿತೋ;

ವಿಜೇಯ್ಯ ರಿಪೂ ಸಬ್ಬೇಪಿ, ತೇಜಸ್ಸೀ ಸೋ ಭವಿಸ್ಸತಿ.

(೧) ಪಣ್ಡಿತಕಣ್ಡ (೨) ಸುಜನಕಣ್ಡ (೩) ಬಾಲದುಜ್ಜನಕಣ್ಡ (೪) ಮಿತ್ತಕಣ್ಡ (೫) ರಾಜಕಣ್ಡ (೬) ನಾಯಕಕಣ್ಡ (೭) ಪುತ್ತಕಣ್ಡ (೮) ವೇಜ್ಜಾಚರಿಯಕಣ್ಡ (೯) ದಾಸಕಕಣ್ಡ (೧೦) ಇತ್ಥಿಕಣ್ಡ (೧೧) ಪಕಿಣ್ಣಕಕಣ್ಡ

ಕವಿದಪ್ಪಣನೀತಿಂಯೋ, ವಾಚುಗ್ಗತಂ ಕರೋತಿ ಚೇ;

ಭುವನಮಜ್ಝೇ ಏಸೋ ಹಿ, ವಿಞ್ಞೂ ಪಣ್ಡಿತಜಾತಿಕೋ.

ನಮೋ ತಸ್ಸ ಭಗವತೋ ಅರಹತೋ ಸಮ್ಮಾಸಮ್ಬುದ್ಧಸ್ಸ

ಮಹಾಕವಿವರಂ ¶ ಬುದ್ಧಂ, ಧಮ್ಮಞ್ಚ ತೇನ ಸೇವಿತಂ;

ಸಙ್ಘಂ ನಿರಙ್ಗಣಞ್ಚಾಪಿ, ವನ್ದಾಮಿ ಸಿರಸಾ ದರಂ.

ಕರಿಸ್ಸಾಮಿ ಸಮಾಸೇನ, ನಾನಾಸತ್ಥ ಸಮುದ್ಧಟಂ;

ಹಿತಾಯ ಕವಿನಂ ನೀತಿಂ, ಕವಿದಪ್ಪಣನಾಮಕಂ.

ನೀತಿ ¶ ಸಾರೋ ಮನುಸ್ಸಾನಂ, ಮಿತ್ತೋ ಆಚರಿಯೋಪಿ ಚ;

ಮಾತಾ ಪಿತಾ ಚ ನೀತಿಮಾ, ಸುತವಾ ಗನ್ಥಕಾರಕೋ.

ಅಲಸಸ್ಸ ¶ ಕುತೋ ಸಿಪ್ಪಂ, ಅಸಿಪ್ಪಸ್ಸ ಕುತೋ ಧನಂ;

ಅಧನಸ್ಸ ಕುತೋ ಮಿತ್ತಂ, ಅಮಿತ್ತಸ್ಸ ಕುತೋ ಸುಖಂ;

ಅಸುಖಸ್ಸ ಕುತೋ ಪುಞ್ಞಂ, ಅಪುಞ್ಞಸ್ಸ ಕುತೋ ವರಂ.

ಸುಚಿನ್ತಿತಚಿನ್ತೀ ¶ ಚೇವ, ಸುಭಾಸಿತಭಾಸೀಪಿ ಚ;

ಸುಕತಕಮ್ಮಕಾರೀ ಚ, ಪಣ್ಡಿತೋ ಸಾಧುಮಾನುಸೋ.

ಕವಿಹೇರಞ್ಞಕಾ ¶ ಕತ್ವಾ, ಉತ್ತತ್ತಂ ಸತ್ಥಕಞ್ಚನಂ;

ಭೂಸನಂ ಗಜ್ಜಪಜ್ಜಾದಿಂ, ಕರೋನ್ತಿ ಚ ಮನೋಹರಂ.

ಬಹುಂ ¶ ಲಹುಞ್ಚ ಗಹಣಂ, ಸಮ್ಮೂಪಧಾರಣಮ್ಪಿ ಚ;

ಗಹಿತ ಅಸಮ್ಮುಸ್ಸನಂ, ಏತಂ ಸುವಿಞ್ಞುಲಕ್ಖಣಂ.

ಅಜರಾಮರಂವ ಪಞ್ಞೋ, ವಿಜ್ಜಮತ್ಥಞ್ಚ ಚಿನ್ತಯೇ;

ಗಹಿತೋ ಇವ ಕೇಸೇಸು, ಮಚ್ಚುನಾ ಧಮ್ಮಮಾಚರೇ.

ಸಿಪ್ಪಸಮಂ ¶ ಧನಂ ನತ್ಥಿ, ಸಿಪ್ಪಂ ಚೋರಾ ನ ಗಣ್ಹರೇ;

ಇಧ ಲೋಕೇ ಸಿಪ್ಪಂ ಮಿತ್ತಂ, ಪರಲೋಕೇ ಸುಖಾವಹಂ.

ಭುಞ್ಜನತ್ಥಂ ¶ ಕಥನತ್ಥಂ, ಮುಖಂ ಹೋತೀತಿ ನೋ ವದೇ;

ಯಂ ವಾತಂ ವಾ ಮುಖಾರುಳ್ಹಂ, ವಚನಂ ಪಣ್ಡಿತೋ ನರೋ.

ದುಮ್ಮೇಧೇಹಿ ಪಸಂಸಾ ಚ, ವಿಞ್ಞೂಹಿ ಗರಹಾ ಚ ಯಾ;

ಗರಹಾವ ಸೇಯ್ಯೋ ವಿಞ್ಞೂಹಿ, ಯಞ್ಚೇ ಬಾಲಪ್ಪಸಂಸನಾ.

ಅಚಿನ್ತಿಯೇ ¶ ಸಾಟ್ಠಕಥೇ, ಪಣ್ಡಿತೋ ಜಿನಭಾಸಿತೇ;

ಉಪದೇಸಂ ಸದಾ ಗಣ್ಹೇ, ಗರುಂ ಸಮ್ಮಾ ಉಪಟ್ಠಹಂ.

ತಸ್ಮಾ ಸಾಟ್ಠಕಥೇ ಧೀರೋ, ಗಮ್ಭೀರೇ ಜಿನಭಾಸಿತೇ;

ಉಪದೇಸಂ ಸದಾ ಗಣ್ಹೇ, ಗರುಂ ಸಮ್ಮಾ ಉಪಟ್ಠಹಂ.

ಗರೂಪದೇಸಹೀನೋ ¶ ಹಿ, ಅತ್ಥಸಾರಂ ನ ವಿನ್ದತಿ;

ಅತ್ಥಸಾರವಿಹೀನೋ ಸೋ, ಸದ್ಧಮ್ಮಾ ಪರಿಹಾಯತಿ.

ಗರೂಪದೇಸಲಾಭೀ ಚ, ಅತ್ಥಸಾರಸಮಾಯುತೋ;

ಸದ್ಧಮ್ಮಂ ಪರಿಪಾಲೇನ್ತೋ, ಸದ್ಧಮ್ಮಸ್ಮಾ ನ ಹಾಯತಿ.

ಸಬ್ಬದಬ್ಬೇಸು ¶ ವಿಜ್ಜೇವ, ದಬ್ಬಮಾಹು ಅನುತ್ತರಂ;

ಅಹಾರತ್ತಾ ಅನಗ್ಘತ್ತಾ, ಅಕ್ಖಯತ್ತಾ ಚ ಸಬ್ಬದಾ.

ಅಪ್ಪಕೇನಪಿ ಮೇಧಾವೀ, ಪಾಭತೇನ ವಿಚಕ್ಖಣೋ;

ಸಮುಟ್ಠಾಪೇತಿ ಅತ್ತಾನಂ, ಅಣುಂ ಅಗ್ಗಿಂವ ಸನ್ಧಮಂ.

ಪಣ್ಡಿತೇ ¶ ಚ ಗುಣಾ ಸಬ್ಬೇ, ಮೂಳ್ಹೇ ದೋಸಾ ಹಿ ಕೇವಲಂ;

ತಸ್ಮಾ ಮೂಳ್ಹಸಹಸ್ಸೇಸು, ಪಞ್ಞೋ ಏಕೋ ವಿಸೇಸಿಯತೇ.

ಬಾಲಾ ¶ ಇಸ್ಸನ್ತಿ ದುಮ್ಮೇಧಾ, ಗುಣೀ ನಿದ್ದೋಸಕಾರಿನೋ;

ಗರುಕೋ ಪಣ್ಡಿತೋ ಏತಸ-ಮಿಸ್ಸಂ ತೇಹ್ಯವಿದ್ವಾ ಸಮೋ.

ಮನುಞ್ಞಮೇವ ¶ ಭಾಸೇಯ್ಯ, ನಾಮನುಞ್ಞಂ ಕುದಾಚನಂ;

ಮನುಞ್ಞಂ ಭಾಸಮಾನಸ್ಸ, ಗರುಂ ಭಾರಂ ಉದದ್ಧರಿ;

ಧನಞ್ಚ ನಂ ಅಲಾಭೇಸಿ, ತೇನ ಚತ್ತಮನೋ ಅಹು.

ವಿಜ್ಜಾ ¶ ದದಾತಿ ವಿನಯಂ, ವಿನಯಾ ಯಾತಿ ಪತ್ತತಂ;

ಪತ್ತತ್ತಾ ಧನಂ ಪಪ್ಪೋತಿ, ಧನಾ ಧಮ್ಮಂ ತತೋ ಸುಖಂ.

ಯೇ ವುಡ್ಢಮಪಚಯನ್ತಿ, ನರಾ ಧಮ್ಮಸ್ಸ ಕೋವಿದಾ;

ದಿಟ್ಠೇವ ಧಮ್ಮೇ ಪಾಸಂಸಾ, ಸಮ್ಪರಾಯೇ ಚ ಸುಗ್ಗತಿಂ.

ಮಾತರಿವ ¶ ಪರದಾರೇಸು, ಪರದಬ್ಬೇಸು ಲೇದ್ದುಂವ;

ಅತ್ತನೀವ ಸಬ್ಬಭೂತೇಸು, ಯೋ ಪಸ್ಸತಿ ಸೋ ಪಣ್ಡಿತೋ.

ಆಸೀಸೇಥೇವ ¶ ಪುರಿಸೋ, ನ ನಿಬ್ಬಿನ್ದೇಯ್ಯ ಪಣ್ಡಿತೋ;

ಅನವಜ್ಜೇಸು ಕಮ್ಮೇಸು, ಪಸಂಸಿತೇಸು ಸಾಧುಭಿ.

ಆಸೀಸೇಥೇವ ¶ ಪುರಿಸೋ, ನ ನಿಬ್ಬಿನ್ದೇಯ್ಯ ಪಣ್ಡಿತೋ;

ಪಸ್ಸಾಮಿ ವೋಹಂ ಅತ್ತಾನಂ, ಯಥಾ ಇಚ್ಛಿಂ ತಥಾ ಅಹು.

ವಾಯಮೇಥೇವ ಪುರಿಸೋ, ನ ನಿಬ್ಬಿನ್ದೇಯ್ಯ ಪಣ್ಡಿತೋ;

ಪುಞ್ಞಕ್ರಿಯವತ್ಥೂಸು, ಪಸಂಸಿತೇಸು ವಿಞ್ಞುಭಿ.

ಲೋಕೇ ¶ ಉಸ್ಸಾಹವನ್ತಾನಂ, ಜನಾನಂ ಕಿಮಸಾಧಿಯಂ;

ಸಾಗರೇಪಿ ಮಹಾಸೇತುಂ, ಕಪಿಯೂಥೇಹಿ ಬನ್ಧತಿ.

ಕಿಂ ಕುಲೇನ ವಿಸಾಲೇನ, ಗುಣಹೀನೋ ತು ಯೋ ನರೋ;

ಅಕುಲಿನೋಪಿ ಸತ್ಥಞ್ಞೋ, ದೇವತಾಹಿಪಿ ಪುಜ್ಜತೇ.

ಉಕ್ಕಟ್ಠೇ ¶ ಸೂರಮಿಚ್ಛನ್ತಿ, ಮನ್ತೀಸು ಅಕುತೂಹಲಂ;

ಪಿಯಞ್ಚ ಅನ್ನಪಾನಮ್ಹಿ, ಅತ್ಥೇ ಜಾತೇ ಚ ಪಣ್ಡಿತಂ.

ರೂಪಯೋಬ್ಬನ್ನಸಮ್ಪನ್ನಾ ¶ , ವಿಸಾಲಕುಲಸಮ್ಭವಾ;

ವಿಜ್ಜಾಹೀನಾ ನ ಸೋಭನ್ತೇ, ನಿಗ್ಗನ್ಧಾ ಇವ ಕಿಂ ಸುಕಾ.

ವುತ್ಯಂ ¶ ವಿಸದಞಾಣಸ್ಸ, ಞಾತೋ ಅತ್ಥೋ ತರಸ್ಸನ;

ಸೂರಪ್ಪಭಾಯ ಆದಾಸೋ, ಛಾಯಂ ದಿಸ್ಸೇ ನ ಮಾಕರೇ.

ಅವೇಯ್ಯಾಕರಣೋ ತ್ವನ್ಧೋ, ಬಧಿರೋ ಕೋಸವಜ್ಜಿತೋ;

ಸಾಹಿಚ್ಚರಹಿತೋ ಪಙ್ಗು, ಮೂಗೋ ತಕ್ಕವಿವಜ್ಜಿತೋ.

ಧೀರೋ ¶ ಚ ವಿವಿಧಾನಞ್ಞೂ, ಪರೇಸಂ ವಿವರಾನುಗೂ;

ಸಬ್ಬಾಮಿತ್ತೇ ವಸೀಕತ್ವಾ, ಕೋಸಿಯೋವ ಸುಖೀ ಸಿಯಾ.

ಮಹಾತೇಜೋಪಿ ¶ ತೇಜೋಯಂ, ಮತ್ತಿಕಂ ನ ಮುದುಂ ಕರೇ;

ಆಪೋ ಆಪೇಸಿ ಮುದುಕಂ, ಸಾಧುವಾಚಾವ ಕಕ್ಖಳಂ.

ಕೋತ್ಥೋ ಪುತ್ತೇನ ಜಾತೇನ, ಯೋ ನ ವಿದೂ ನ ಧಮ್ಮಿಕೋ;

ಕಾಣೇನ ಚಕ್ಖುನಾ ಕಿಂ ವಾ, ಚಕ್ಖು ಪೀಳೇವ ಕೇವಲಂ.

ಮುದುನಾವ ¶ ರಿಪುಂ ಜೇತಿ, ಮುದುನಾ ಜೇತಿ ದಾರುಣಂ;

ನೋ ನ ಸಿದ್ಧಂ ಮುದು ಕಿಞ್ಚಿ, ತತೋ ಚ ಮುದುನಾ ಜಯೇ.

ಸಜಾತೋ ಯೇನ ಜಾತೇನ, ಯಾತಿ ವಂಸೋ ಸಮುನ್ನತಿಂ;

ಪರಿವತ್ತಿನಿಸಂಸಾರೇ, ಮತೋ ಕೋ ವಾ ನ ಜಾಯತೇ.

ದಾನೇ ¶ ತಪಸಿ ಸೂರೇ ಚ, ಯಸ್ಸ ನ ಪತ್ಥಿತೋ ಯಸೋ;

ವಿಜ್ಜಾಯ ಮತ್ಥಲಾಭೇ ಚ, ಕೇವಲಂ ಅಧಿಕೋವಸೋ.

ವರೋ ಏಕೋ ಗುಣೀ ಪುತ್ತೋ, ನ ಚ ಮೂಳ್ಹಸತಾನ್ಯಪಿ;

ಏಕೋ ಚನ್ದೋ ತಮೋ ಹನತಿ, ನ ಚ ತಾರಾಗಣೋ ತಥಾ.

ಪುಞ್ಞತಿತ್ಥಕತೋ ಯೇನ, ತಪೋ ಕ್ವಾಪಿ ಸುದುಕ್ಕರೋ;

ತಸ್ಸ ಪುತ್ತೋ ಭವೇ ವಸ್ಸೋ, ಸಮಿದ್ಧೋ ಧಮ್ಮಿಕೋ ಸುದ್ಧೇ.

ಲಾಲಯೇ ಪಞ್ಚವಸ್ಸಾನಿ, ದಸವಸ್ಸಾನಿ ತಾಲಯೇ;

ಪತ್ತೇತು ಸೋಳಸೇ ವಸ್ಸೇ, ಪುತ್ತಂ ಮಿತ್ತಂವ ಆಚರೇ.

ಲಾಲನೇ ¶ ಬಹವೋ ದೋಸಾ, ತಾಲನೇ ಬಹವೋ ಗುಣಾ;

ತಸ್ಮಾ ಪುತ್ತಞ್ಚ ಸಿಸ್ಸಞ್ಚ, ತಾಲಯೇ ನ ತು ಲಾಲಯೇ.

ಮಾಗಧಾ ಪಾಕತಾ ಚೇವ, ಸಕ್ಕತವೋಹಾರೋಪಿ ಚ;

ಏತೇಸು ಕೋವಿದೋ ಪಞ್ಞೋ, ಧೀರೋ ಪಾಳಿಂ ವಿಸೋಧಯೇ.

ಸಕ್ಕತಂ ¶ ಪಾಕತಞ್ಚೇವ-ಪಭಂಸೋ ಚ ಪಿಸಾಚಿಕೀ;

ಮಾಗಧೀ ಸೋರಸೇನೀವ, ಛ ಭಾಸಾ ಪರಿಕಿತ್ತಿತಾ.

ಚನ್ದನಂ ¶ ಸೀತಲಂ ಲೋಕೇ, ಚನ್ದಿಕಾ ಸೀತಲಾ ತತೋ;

ಚನ್ದನ ಚನ್ದಿಕಾತೋಪಿ, ವಾಕ್ಯಂ ಸಾಧು ಸುಭಾಸಿತಂ.

ಪತ್ತಕಾಲೋದಿತಂ ಅಪ್ಪಂ, ವಾಕ್ಯಂ ಸುಭಾಸಿತಂ ಭವೇ;

ಖುದಿತಸ್ಸ ಕದನ್ನಮ್ಪಿ, ಭುತ್ತಂ ಸಾದುರಸಂ ಸಿಯಾ.

ಸತ್ಥಕಾಪಿ ¶ ಬಹೂವಾಚಾ, ನಾದರಾ ಬಹುಭಾಣಿನೋ;

ಸೋಪಕಾರಮುದಾಸಿನಾ, ನನು ದಿಟ್ಠಂ ನದೀಜಲಂ.

ಪಾಸಾಣಛತ್ತಂ ಗರುಕಂ, ತತೋ ದೇವಾನಾಚಿಕ್ಖನಾ;

ತತೋ ವುಡ್ಢಾನಮೋವಾದೋ, ತತೋ ಬುದ್ಧಸ್ಸ ಸಾಸನಂ.

ತೂಲಂ ¶ ಸಲ್ಲಹುಕಂ ಲೋಕೇ, ತತೋ ಚಪಲಜಾತಿಕೋ;

ತತೋನೋಸಾವಕೋ ತತೋ, ಯತಿ ಧಮ್ಮಪಮಾದಕೋ.

ಪಣ್ಡಿತಸ್ಸ ಪಸಂಸಾಯ, ದಣ್ಡೋ ಬಾಲೇನ ದೀಯತೇ;

ಪಣ್ಡಿತೋ ಪಣ್ಡಿತೇನೇವ, ವಣ್ಣಿತೋವ ಸುವಣ್ಣಿತೋ.

ಸತೇಸು ಜಾಯತೇ ಸೂರೋ, ಸಹಸ್ಸೇಸು ಚ ಪಣ್ಡಿತೋ;

ವುತ್ತಾ ಸತಸಹಸ್ಸೇಸು, ದಾತಾ ಭವತಿ ವಾ ನ ವಾ.

ವಿದ್ವತ್ತಞ್ಚ ರಾಜತ್ತಞ್ಚ, ನೇವ ತುಲ್ಯಂ ಕದಾಚಿಪಿ;

ಸದೇಸೇ ಪೂಜಿತೋ ರಾಜಾ, ವಿದ್ವಾ ಸಬ್ಬತ್ಥ ಪೂಜಿತೋ.

ಸತಂ ¶ ದೀಘಾಯುಕಂ ಸಬ್ಬ-ಸತ್ತಾನಂ ಸುಖಕಾರಣಂ;

ಅಸತಂ ಪನ ಸಬ್ಬೇಸಂ, ದುಕ್ಖಹೇತು ನ ಸಂಸಯೋ.

ಪಣ್ಡಿತೇ ಸುಜನೇ ಸನ್ತೇ, ಸಬ್ಬೇಪಿ ಸುಜನಾ ಜನಾ;

ಜಾತೇಕಸ್ಮಿಂ ಸಾರಗನ್ಧೇ, ಸಬ್ಬೇ ಗನ್ಧಮಯಾ ದುಮಾ.

ಅತ್ತಾವ ಯದಿ ವಿನೀತೋ, ನಿಜಸ್ಸಿತಾ ಮಹಾಜನಾ;

ವಿನೀತಂ ಯನ್ತಿ ಸಬ್ಬೇಪಿ, ಕೋ ತಂ ನಾಸೇಯ್ಯ ಪಣ್ಡಿತೋ.

ಸರೀರಸ್ಸ ಗುಣಾನಞ್ಚ, ದೂರಮಚ್ಚನ್ತಮನ್ತರಂ;

ಸರೀರಂ ಖಣವಿದ್ಧಂಸೀ, ಕಪ್ಪನ್ತಟ್ಠಾಯಿನೋ ಗುಣಾ.

ಅಮ್ಬುಂ ಪಿವನ್ತಿ ನೋ ನಜ್ಜೋ, ರುಕ್ಖೋ ಖಾದತಿ ನೋ ಫಲಂ;

ಮೇಘೋ ಕ್ವಚಿಪಿ ನೋ ಸಸ್ಸಂ, ಪರತ್ಥಾಯ ಸತಂ ಧನಂ.

ಸಚ್ಚಂ ಪುನಪಿ ಸಚ್ಚನ್ತಿ, ಭುಜಮುಕ್ಖಿಪ್ಪ ಮುಚ್ಚತೇ;

ಸಕತ್ಥೋ ನತ್ಥಿ ನತ್ಥೇವ, ಪರಸ್ಸತ್ಥ ಮಕುಬ್ಬತೋ.

ಸತಂ ¶ ಫರುಸವಾಚಾಹಿ, ನ ಯಾತಿ ವಿಕತಿಂ ಮನೋ;

ತಿಣುಕ್ಕಾಹಿ ನ ಸಕ್ಕಾವ, ತಾಪೇತುಂ ಸಾಗರೇ ಜಲಂ.

ಏವಂ ನಿನ್ದಾಪಸಂಸಾಸು, ನ ಸಮಿಞ್ಜನ್ತಿ ಪಣ್ಡಿತಾ.

ಧಮ್ಮತ್ಥಕಾಮಮೋಕ್ಖಾನಂ ¶ , ಯಸ್ಸೇಕೋಪಿ ನ ವಿಜ್ಜತಿ;

ಅಜಗಲಥನಸ್ಸೇವ, ತಸ್ಸ ಜಾತಿ ನಿರತ್ಥಕಾ.

ನ ಕಮ್ಮಮಪಿ ಚಿನ್ತೇತ್ವಾ, ಚಜೇ ಉಯ್ಯೋಗಮತ್ತನೋ;

ಅನುಯ್ಯೋಗೇನ ತೇಲಾನಿ, ತಿಲೇಹಿ ನ ಸಕ್ಕಾ ಲದ್ಧುಂ.

ಯಥಾ ¶ ಹ್ಯೇಕೇನ ಚಕ್ಕೇನ, ನ ರಥಸ್ಸ ಪತಿ ಭವೇ;

ಏವಂ ಪುರಿಸಕಾರೇನ, ವಿನಾ ಕಮ್ಮಂ ನ ಸಿಜ್ಝತಿ.

ಉಯ್ಯಾಮೇನ ಹಿ ಸಿಜ್ಝನ್ತಿ, ಕಾರಿಯಾನಿ ನ ಮನೋರಥಂ;

ನ ಹಿ ಸುತ್ತಸ್ಸ ಸೀಹಸ್ಸ, ಪವಿಸನ್ತಿ ಮಿಗಾಮುಖೇ.

ಮಾತಾಪಿತು ¶ ಕತಾಭ್ಯಾಸೋ, ಗುಣಿತಮೇತಿ ಬಾಲಕೋ;

ನ ಗಬ್ಭಜಾತಿಮತ್ತೇನ, ಪುತ್ತೋ ಭವತಿ ಪಣ್ಡಿತೋ.

ಮಾತಾ ಸತ್ತು ಪಿತಾ ವೇರೀ, ಯೇನ ಬಾಲೋ ನ ಪಾಠಿತೋ;

ನ ಸೋಭತೇ ಸಭಾಮಜ್ಝೇ, ಹಂಸಮಜ್ಝೇ ಬಕೋ ಯಥಾ.

ಕಾಚೋ ¶ ಕಞ್ಚನಸಂಸಗ್ಗೋ, ಧತ್ತೇ ಮರಕತಿಂ ಜುತಿಂ;

ತಥಾ ಸಬ್ಭಿಸನ್ನಿಧಾನಾ, ಮೂಳ್ಹೋ ಯಾತಿ ಪವೀಣತಂ.

ತಸ್ಮಾ ಅಕ್ಖರಕೋಸಲ್ಲಂ, ಸಮ್ಮಾದೇಯ್ಯ ಹಿತತ್ಥಿಕೋ;

ಉಪಟ್ಠಹಂ ಗರುಂ ಸಮ್ಮಾ, ಉಟ್ಠಾನಾದೀಹಿ ಪಞ್ಚಹಿ.

ಉಟ್ಠಾನಾ ¶ ಉಪಟ್ಠಾನಾ, ಚ, ಸುಸ್ಸೂಸಾ ಪಾರಿಚರೀಯಾ;

ಸಕ್ಕಚ್ಚಂ ಸಿಪ್ಪುಗ್ಗಹಣಾ, ಗರುಂ ಆರಾಧಯೇ ಬುಧೋ.

ಕಾಬ್ಯಸತ್ಥ ¶ ವಿನೋದೇನ, ಕಾಲೋ ಗಚ್ಛತಿ ಧೀಮತಂ;

ಬ್ಯಸನೇನ ಚ ಮೂಳ್ಹಾನಂ, ನಿದಾಯ ಕಲಹೇನ ವಾ.

ಛ ದೋಸಾ ಪುರಿಸೇನೇಹ, ಹಾತಬ್ಬಾ ಭೂತಿಮಿಚ್ಛತಾ;

ನಿದ್ದಾತನ್ದೀ ಭಯಂ ಕೋಧೋ, ಆಲಸ್ಯಂ ದೀಘಸುತ್ತತಾ.

ನಿದ್ದಾಸೀಲೀ ¶ ಸಭಾಸೀಲೀ, ಅನುಟ್ಠಾತಾ ಚ ಯೋ ನರೋ;

ಅಲಸೋ ಕೋಧಪಞ್ಞಾಣೋ, ತಂ ಪರಾಭವತೋ ಮುಖಂ.

ನಿಗ್ಗುಣೇಸುಪಿ ಸತ್ತೇಸು, ದಯಾ ಕುಬ್ಬನ್ತಿ ಸಾಧವೋ;

ನ ಹಿ ಸಂಹರತೇ ಜುತಿಂ, ಚನ್ದೋ ಚಣ್ಡಾಲವೇಸ್ಮೇ.

ಯತ್ರ ¶ ವಿದ್ವಜ್ಜನೋ ನತ್ಥಿ, ಸೀಲಾಘ್ಯೋ ತತ್ರ ಅಪ್ಪಧಿಪಿ;

ನಿರತ್ಥಪಾದಮೇ ದೇಸೇ, ಏರಣ್ಡೋಪಿ ದುಮಾಯತೇ.

ಠಾನಭಟ್ಠಾ ನ ಸೋಭನ್ತೇ, ದನ್ತಾ ಕೇಸಾ ನಖಾ ನರಾ;

ಇತಿವಿಞ್ಞಾಯ ಮತಿಮಾ, ಸಟ್ಠಾನಂ ನ ಪರಿಚ್ಚಜೇ.

ಪರೋಪದೇಸೇ ¶ ಪಣ್ಡಿಚ್ಚಂ, ಸಬ್ಬೇಸಂ ಸುಕರಞ್ಹಿ ಖೋ;

ಧಮ್ಮೇ ಸಯಮನುಟ್ಠಾನಂ, ಕಸ್ಸಚಿಸುಮಹತ್ತನೋ.

ಅಪ್ಪಮಾದಂ ಪಸಂಸನ್ತಿ, ಪುಞ್ಞಕಿರಿಯಾಸು ಪಣ್ಡಿತಾ;

ಅಪ್ಪಮತ್ತೋ ಉಭೋ ಅತ್ಥೇ, ಅಧಿಗ್ಗಣ್ಹಾತಿ ಪಣ್ಡಿತೋ.

ನಿಧೀನಂವ ¶ ಪವತ್ತಾರಂ, ಯಂ ಪಸ್ಸೇ ವಜ್ಜದಸ್ಸಿನಂ;

ನಿಗ್ಗಯ್ಹವಾದಿಂ ಮೇಧಾವಿಂ, ತಾದಿಸಂ ಪಣ್ಡಿತಂ ಭಜೇ;

ತಾದಿಸಂ ಭಜಮಾನಸ್ಸ, ಸೇಯ್ಯೋ ಹೋತಿ ನ ಪಾಪಿಯೋ.

ಮುಹುತ್ತಮಪಿ ¶ ಚೇ ವಿಞ್ಞೂ, ಪಣ್ಡಿತಂ ಪಯಿರುಪಾಸತಿ;

ಖಿಪ್ಪಂ ಧಮ್ಮಂ ವಿಜಾನಾತಿ, ಜಿವ್ಹಾ ಸೂಪರಸಂ ಯಥಾ.

ದುಲ್ಲಭೋ ಪುರಿಸಾಜಞ್ಞೋ, ನ ಸೋ ಸಬ್ಬತ್ಥ ಜಾಯತಿ;

ಯತ್ಥ ಸೋ ಜಾಯತೀ ಧೀರೋ, ತಂ ಕುಲಂ ಸುಖ ಮೇಧತಿ.

ತಗರಞ್ಚ ¶ ಪಲಾಸೇನ, ಯೋ ನರೋ ಉಪನಯ್ಹತಿ;

ಪತ್ತಾಪಿ ಸುರತಿ ವಾಯನ್ತಿ, ಏವಂ ಧೀರೂಪಸೇವನಾ.

ನಿಪುಣೇ ಸುತಮೇಸೇಯ್ಯ, ವಿಚಿನಿತ್ವಾ ಸುತತ್ಥಿಕೋ;

ಭತ್ತಂ ಉಕ್ಖಲಿಯಂ ಪಕ್ಕಂ, ಭಾಜನೇಪಿ ತಥಾ ಭವೇ.

ಅಪ್ಪಕಂ ¶ ನಾತಿಮಞ್ಞೇಯ್ಯ, ಚಿತ್ತೇ ಸುತಂ ನಿಧಾಪಯೇ;

ವಮ್ಮಿಕೋದಕಬಿನ್ದೂವ, ಚಿರೇನ ಪರಿಪೂರತಿ.

ಗಚ್ಛಂ ¶ ಕಿಪಿಲ್ಲಿಕೋ ಯಾತಿ, ಯೋಜನಾನಂ ಸತಾನಿಪಿ;

ಅಗಚ್ಛಂ ವೇನಯ್ಯೋಅಪಿ, ಪದಮೇಕಂ ನ ಗಚ್ಛತಿ.

ಸೇಲೇ ಸೇಲೇ ನ ಮಣಿಕಂ, ಗಜೇ ಗಜೇ ನ ಮುತ್ತಿಕಂ;

ವನೇ ವನೇ ನ ಚನ್ದನಂ, ಠಾನೇ ಠಾನೇ ನ ಪಣ್ಡಿತೋ.

ಪಣ್ಡಿತೋ ¶ ಸುತಸಮ್ಪನ್ನೋ, ಯತ್ಥ ಅತ್ಥೀತಿ ಚೇ ಸುತೋ;

ಮಹುಸ್ಸಾಹೇನ ತಂ ಠಾನಂ, ಗನ್ತಬ್ಬಂವ ಸುತೇಸಿನಾ.

ಪೋತ್ಥಕೇಸು ಚ ಯಂ ಸಿಪ್ಪಂ, ಪರಹತ್ಥೇಸು ಯಂ ಧನಂ;

ಯಥಾಕಿಚ್ಚೇ ಸಮುಪ್ಪನ್ನೇ, ನ ತಂ ಸಿಪ್ಪಂ ನ ತಂ ಧನಂ.

ಉಪ್ಪಲೇನ ¶ ಜಲಂ ಜಞ್ಞಾ, ಕಿರಿಯಾಯ ಕುಲಂ ನರೋ;

ಬ್ಯತ್ತಿಪ್ಪಮಾಣ ವಾಚಾಯ, ಜಞ್ಞಾ ತಿಣೇನ ಮೇದನಿಂ.

ಅಪ್ಪಸ್ಸುತೋ ¶ ಸುತಂ ಅಪ್ಪಂ, ಬಹುಂ ಮಞ್ಞತಿ ಮಾನವಾ;

ಸಿನ್ಧುದಕಮಪಸ್ಸನ್ತೋ, ಕೂಪೇ ತೋಯಂವ ಮಣ್ಡುಕೋ.

ಪಠಮೇ ಸಿಪ್ಪಂ ಗಣ್ಹೇಯ್ಯ, ಏಸೇಯ್ಯ ದುತಿಯೇ ಧನಂ;

ಚರೇಯ್ಯ ತತಿಯೇ ಧಮ್ಮಂ, ಏಸಾ ಜನಾನ ಧಮ್ಮತಾ.

ಸುಸ್ಸೂಸಾ ¶ ಸುತ್ತವದ್ಧನೀ, ಸುತಂ ಪಞ್ಞಾಯ ವದ್ಧನಂ;

ಪಞ್ಞಾಯ ಅತ್ಥಂ ಜಾನಾತಿ, ಅತ್ಥೋ ಞಾತೋ ಸುಖಾವಹೋ.

ನತ್ಥಿ ¶ ವಿಜ್ಜಾಸಮಂ ಮಿತ್ತಂ, ನ ಚ ಬ್ಯಾಧಿಸಮೋ ರಿಪು;

ನ ಚ ಅತ್ಥಸಮಂ ಪೇಮಂ, ನ ಚ ಕಮ್ಮಸಮಂ ಬಲಂ.

ವಿನಾ ಸತ್ಥಂ ನ ಗಚ್ಛೇಯ್ಯ, ಸೂರೋ ಸಙ್ಗಾಮಭೂಮಿಯಂ;

ಪಣ್ಡಿತ್ವದ್ಧಗೂ ವಾಣಿಜೋ, ವಿದೇಸಗಮನೋ ತಥಾ.

ಧನನಾಸಂ ¶ ಮನೋತಾಪಂ, ಘರೇ ದುಚ್ಚರಿತಾನಿ ಚ;

ವಞ್ಚನಞ್ಚ ಅವಮಾನಂ, ಪಣ್ಡಿತೋ ನ ಪಕಾಸಯೇ.

ಅನವ್ಹಾಯಂ ಗಮಯನ್ತೋ, ಅಪುಚ್ಛಾ ಬಹುಭಾಸಕೋ;

ಅತ್ತಗುಣಂ ಪಕಾಸನ್ತೋ, ತಿವಿಧೋ ಹೀನಪುಗ್ಗಲೋ.

ಹಂಸೋ ¶ ಮಜ್ಝೇ ನ ಕಾಕಾನಂ, ಸೀಹೋ ಗುನ್ನಂ ನ ಸೋಭತೇ;

ಗದ್ರಭಮಜ್ಝೇ ತುರಙ್ಗೋ, ಬಾಲಮಜ್ಝೇವ ಪಣ್ಡಿತೋ.

ಪತ್ತಾನುರೂಪಕಂ ವಾಕ್ಯಂ, ಸಭಾವಾನುರೂಪಂ ಪಿಯಂ;

ಅತ್ತಾನುರೂಪಕಂ ಕೋಧಂ, ಯೋ ಜಾನಾತಿ ಸ ಪಣ್ಡಿತೋ.

ಅಪ್ಪರೂಪೋ ¶ ಬಹುಂಭಾಸೋ, ಅಪ್ಪಪಞ್ಞೋ ಪಕಾಸಕೋ;

ಅಪ್ಪಪೂರೋ ಘಟೋ ಖೋಭೇ, ಅಪ್ಪಖೀರಾ ಗಾವೀ ಚಲೇ.

ನ ತಿತ್ತಿ ರಾಜಾ ಧನಮ್ಹಿ, ಪಣ್ಡಿತೋಪಿ ಸುಭಾಸಿತೇ;

ಚಕ್ಖುಪಿ ಪಿಯದಸ್ಸನೇ, ನ ತಿತ್ತಿ ಸಾಗರೋ ಜಲೇ.

ಹೀನಪುತ್ತೋ ¶ ರಾಜಮಚ್ಚೋ, ಬಾಲಪುತ್ತೋ ಚ ಪಣ್ಡಿತೋ;

ಅಧನಸ್ಸ ಧನಂಬಹು, ಪುರಿಸಾನಂ ನ ಮಞ್ಞಥ.

ಯೋ ¶ ಸಿಸ್ಸೋ ಸಿಪ್ಪಲೋಭೇನ, ಬಹುಂ ಗಣ್ಹಾತಿ ತಂ ಸಿಪ್ಪಂ;

ಮೂಗೋವ ಸುಪಿನಂ ಪಸ್ಸಂ, ಕಥೇತುಮ್ಪಿ ನ ಉಸ್ಸಹೇ.

ನ ಭಿಜ್ಜೇತುಂ ಕುಮ್ಭಕಾರೋ, ಸೋಭೇತುಂ ಕುಮ್ಭ ಘಟತಿ;

ನ ಖಿಪಿತುಂ ಅಪಾಯೇಸು, ಸಿಸ್ಸಾನಂ ವುಡ್ಢಿಕಾರಣಾ.

ಅಧನಸ್ಸ ¶ ರಸಂಖಾದೋ, ಅಬಲಸ್ಸ ಹತೋ ನರೋ;

ಅಪ್ಪಞ್ಞಸ್ಸ ವಾಕ್ಯಕರೋ, ಉಮ್ಮತ್ತಕ ಸಮಾಹಿಖೋ.

ಏಕೇನಾಪಿ ಸುರುಕ್ಖೇನ, ಪುಪ್ಫಿತೇನ ಸುಗನ್ಧಿನಾ;

ವಾಸಿತಂ ಕಾನನಂ ಸಬ್ಬಂ, ಸುಪುತ್ತೇನ ಕುಲಂ ಯಥಾ.

ಇಣಕತ್ತಾ ¶ ಪಿತಾ ಸತ್ತು, ಮಾತಾ ಚ ಬ್ಯಭಿಚಾರಿನೀ;

ಭರಿಯಾ ರೂಪವತೀ ಸತ್ತು, ಪುತ್ತೋ ಸತ್ತು ಅಪಣ್ಡಿತೋ.

ಗುಣದೋಸಮಸತ್ಥಞ್ಞೂ, ಜನೋ ವಿಭಜತೇ ಕಥಂ;

ಅಧಿಕಾರೋ ಕಿಮನ್ಧಸ್ಸ, ರೂಪಭೇದೋಪಲದ್ಧಿಯಂ.

ಸಬ್ಬತ್ಥ ¶ ಸತ್ಥತೋಯೇವ, ಗುಣದೋಸವಿಚೇಚನಂ;

ಯಂ ಕರೋತಿ ವಿನಾಸತ್ಥಂ, ಸಾಹಸಂ ಕಿಮತೋಧಿಕಂ.

ಪಚ್ಚುಪ್ಪನ್ನಞ್ಚ ¶ ಯೋ ಧಮ್ಮಂ, ತತ್ಥ ತತ್ಥ ವಿಪಸ್ಸತಿ;

ಅಸಂಹೀರಂ ಅಸಂಕುಪ್ಪಂ, ತಂ ವಿದ್ವಾ ಮನುಬ್ರೂಹಯೇ.

ಛನ್ದಾ ದೋಸಾ ಭಯಾ ಮೋಹಾ, ಯೋ ಧಮ್ಮಂ ನಾತಿವತ್ತತಿ;

ಆಪೂರತಿ ತಸ್ಸ ಯಸೋ, ಸುಕ್ಕಪಕ್ಖೇವ ಚನ್ದಿಮಾ.

ಪಣ್ಡಿತೋ ¶ ಸೀಲಸಮ್ಪನ್ನೋ, ಸಣ್ಹೋ ಚ ಪಟಿಭಾನವಾ;

ನಿವಾತವುತ್ತಿ ಅಥದ್ಧೋ, ತಾದಿಸೋ ಲಭತೇ ಯಸಂ.

ದುಲ್ಲಭಂ ¶ ಪಾಕತಿಕಂ ವಾಕ್ಯಂ, ದುಲ್ಲಭೋ ಖೇಮಕರೋ ಸುತೋ;

ದುಲ್ಲಭಾ ಸದಿಸೀ ಜಾಯಾ, ದುಲ್ಲಭೋ ಸಜನೋ ಪಿಯೋ.

ಅತ್ಥಂ ಮಹನ್ತಮಾಪಜ್ಜ, ವಿಜ್ಜಂ ಸಮ್ಪತ್ತಿಮೇವ ಚ;

ಚರೇಯ್ಯಾಮಾನಥದ್ಧೋ ಯೋ, ಪಣ್ಡಿತೋ ಸೋ ಪವುಚ್ಚತಿ.

ಸುತಸನ್ನಿಚ್ಚಯಾ ¶ ಧೀರಾ, ತುಣ್ಹೀಭೂತಾ ಅಪುಚ್ಛಿತಾ;

ಪುಣ್ಣಾಸುಭಾಸಿತೇನಾಪಿ, ಘಣ್ಟಾದೀ ಘಟ್ಟಿತಾ ಯಥಾ.

ಅಪುಟ್ಠೋ ಪಣ್ಡಿತೋ ಭೇರೀ, ಪಜ್ಜುನ್ನೋ ಹೋತಿ ಪುಚ್ಛಿತೋ;

ಬಾಲೋ ಪುಟ್ಠೋ ಅಪುಟ್ಠೋ ಚ, ಬಹುಂ ವಿಕತ್ಥತೇ ಸದಾ.

ಪರೂಪವಾದೇ ¶ ಬಧಿರೋ, ಪರವಜ್ಜೇ ಅಲೋಚನೋ;

ಪಙ್ಗುಲೋ ಅಞ್ಞನಾರೀಸು, ದುಸ್ಸತಕ್ಕೇ ಅಚೇತನೋ.

ಚಕ್ಖುಮಾಸ್ಸ ಯಥಾ ಅನ್ಧೋ, ಸೋತವಾ ಬಧಿರೋ ಯಥಾ;

ಪಞ್ಞವಾಸ್ಸ ಯಥಾಮೂಗೋ, ಬಲವಾ ದುಬ್ಬಲೋರಿವ;

ಅಥ ಅತ್ಥೇ ಸಮುಪ್ಪನ್ನೇ, ಸಯೇಥ ಮತಸಾಯಿತಂ.

ಪಾಪಮಿತ್ತೇ ¶ ವಿವಜ್ಜೇತ್ವಾ, ಭಜೇಯ್ಯುತ್ತಮಪುಗ್ಗಲಂ;

ಓವಾದೇ ಚಸ್ಸ ತಿಟ್ಠೇಯ್ಯ, ಪತ್ಥೇನ್ತೋ ಅಚಲಂ ಸುಖಂ.

ಅತಿಸೀತಂ ಅತಿಉಣ್ಹಂ, ಅತಿಸಾಯಮಿದಂ ಅಹು;

ಇತಿ ವಿಸ್ಸಟ್ಠಕಮ್ಮನ್ತೇ, ಅತ್ಥಾ ಅಚ್ಚೇನ್ತಿ ಮಾಣವೇ.

ಯೋ ¶ ಚ ಸೀತಞ್ಚ ಉಣ್ಹಞ್ಚ, ತಿಣಾಭಿಯ್ಯೋ ನ ಮಞ್ಞತಿ;

ಕರಂ ಪುರಿಸಕಿಚ್ಚಾನಿ, ಸೋ ಸುಖಂ ನ ವಿಹಾಯತಿ.

ಯಸ್ಮಿಂದೇಸೇ ¶ ನ ಸಮ್ಮಾನೋ, ನ ಪಿಯೋ ನ ಚ ಬನ್ಧವೋ;

ನ ಚ ವಿಜ್ಜಾಗಮೋ ಕೋಚಿ, ನ ತತ್ಥ ದಿವಸಂ ವಸೇ.

ಧನವಾ ಸುತವಾ ರಾಜಾ, ನದೀ ವಜ್ಜೋ ಇಮೇ ಪಞ್ಚ;

ಯತ್ಥ ದೇಸೇ ನ ವಿಜ್ಜನ್ತಿ, ನ ತತ್ಥ ದಿವಸಂ ವಸೇ.

ನಭಸ್ಸ ¶ ಭೂಸನಂ ಚನ್ದೋ, ನಾರೀನಂ ಭೂಸನಂ ಪತಿ;

ಛಮಾಯ ಭೂಸನಂ ರಾಜಾ, ವಿಜ್ಜಾ ಸಬ್ಬಸ್ಸ ಭೂಸನಂ.

ಸುಖತ್ಥಿಕೋ ಸಚೇ ವಿಜ್ಜಂ, ವಿಜ್ಜತ್ಥಿಕೋ ಚಜೇ ಸುಖಂ;

ಸುಖತ್ಥಿನೋ ಕುತೋ ವಿಜ್ಜಾ, ಕುತೋ ವಿಜ್ಜತ್ಥಿನೋ ಸುಖಂ.

ಖಣೇನ ¶ ಕಣೇನ ಚೇವ, ವಿಜ್ಜಾಮತ್ಥಞ್ಚ ಸಾಧಯೇ;

ಖಣಚಾಗೇ ಕುತೋ ವಿಜ್ಜಾ, ಕಣಚಾಗೇ ಕತೋ ಧನಂ.

ಆಚರಿಯಾ ಪಾದಮಾದತ್ತೇ, ಪಾದಂ ಸಿಸ್ಸೋ ಸಜಾನನಾ;

ಪಾದಂ ಸಬ್ರಹ್ಮಚಾರೀಹಿ, ಪಾದಂ ಕಾಲಕ್ಕಮೇನ ಚ.

ಧಮ್ಮೋ ¶ ಜಯೇ ನೋ ಅಧಮ್ಮೋ, ಸಚ್ಚಂ ಜಯತಿ ನಾಸಚ್ಚಂ;

ಖಮಾ ಜಯತಿ ನೋ ಕೋಧೋ, ದೇವೋ ಜಯತಿ ನಾಸೂರೋ.

ಹತ್ಥಸ್ಸ ಭೂಸನಂ ದಾನಂ, ಸಚ್ಚಂ ಕಣ್ಠಸ್ಸ ಭೂಸನಂ;

ಸೋತಸ್ಸ ಭೂಸನಂ ಸತ್ಥಂ, ಭೂಸನೇ ಕಿಂ ಪಯೋಜನಂ.

ವಿದೇಸೇತು ¶ ಧನಂ ವಿಜ್ಜಾ, ಬ್ಯಸನೇಸು ಧನಂ ಮತಿ;

ಪರಲೋಕೇ ಧನಂ ಧಮ್ಮೋ, ಸೀಲಂ ಸಬ್ಬತ್ಥ ವೇ ಧನಂ.

ಪದೋಸೇ ¶ ದೀಪಕೋ ಚನ್ದೋ, ಪಭಾತೇ ದೀಪಕೋ ರವಿ;

ತಿಲೋಕೇ ದೀಪಕೋ ಧಮ್ಮೋ, ಸುಪುತ್ತೋ ಕುಲದೀಪಕೋ.

ವಿದ್ವಾ ಏವ ವಿಜಾನಾತಿ, ವಿದ್ವಜ್ಜನಪರಿಸ್ಸಮಂ;

ನ ಹಿ ವಞ್ಝಾ ವಿಜಾನಾತಿ, ಗುರುಂ ಪಸವವೇದನಂ.

ಯಸ್ಸ ¶ ನತ್ಥಿ ಸಯಂ ಪಞ್ಞಾ, ಸತ್ಥಂ ತಸ್ಸ ಕರೋತಿ ಕಿಂ;

ಲೋಚನೇಹಿ ವಿಹೀನಸ್ಸ, ದಪ್ಪಣೋ ಕಿಂ ಕರಿಸ್ಸತಿ.

ಕಿಂ ಕರಿಸ್ಸನ್ತಿ ವತ್ತಾರೋ, ಸೋತಂ ಯತ್ಥ ನ ವಿಜ್ಜತೇ;

ನಗ್ಗಕಪಣಕೇ ದೇಸೇ, ರಜಕೋ ಕಿಂ ಕರಿಸ್ಸತಿ.

ಮೂಳ್ಹಸಿಧಸ್ಸಾಪದೇಸೇನ, ¶ ಕುನಾರೀಭರಣೇನ ಚ;

ಖಲಸತ್ತೂಹಿ ಸಂಯೋಗಾ, ಪಣ್ಡಿತೋಪ್ಯಾವಸೀದತಿ.

ನತ್ಥಿ ಅತ್ತಸಮಂ ಪೇಮಂ, ನತ್ಥಿ ಧಞ್ಞಸಮಂ ಧನಂ;

ನತ್ಥಿ ಪಞ್ಞಾಸಮಾ ಆಭಾ, ವುಟ್ಠಿ ವೇ ಪರಮಾ ಸರಾ.

ಭುಜಙ್ಗಮಂ ¶ ಪಾವಕಞ್ಚ ಖತ್ತಿಯಞ್ಚ ಯಸಸ್ಸಿನಂ;

ಭಿಕ್ಖುಞ್ಚ ಸೀಲಸಮ್ಪನ್ನಂ, ಸಮ್ಮದೇವ ಸಮಾಚರೇ.

ತಸ್ಮಾ ಹಿ ಪಣ್ಡಿತೋ ಪೋಸೋ, ಸಮ್ಪಸ್ಸಂ ಅತ್ಥಮತ್ತನೋ;

ಬುದ್ಧೇ ಧಮ್ಮೇ ಚ ಸಙ್ಘೇ ಚ, ಧೀರೋ ಸದ್ಧಂ ನಿವೇಸಯೇ.

ಗುಣೋ ¶ ಸೇಟ್ಠಙ್ಗತಂ ಯಾತಿ, ನ ಉಚ್ಚೇ ಸಯನೇ ವಸೇ;

ಪಾಸಾದಸಿಖರೇ ವಾಸೋ, ಕಾಕೋ ಕಿಂ ಗರುಳೋ ಸಿಯಾ.

ಅನಾಗತಂ ಭಯಂ ದಿಸ್ವಾ, ದೂರತೋ ಪರಿವಜ್ಜಯೇ;

ಆಗತಞ್ಚ ಭಯಂ ದಿಸ್ವಾ, ಅಭೀತೋ ಹೋತಿ ಪಣ್ಡಿತೋ.

ಅಸಜ್ಜಾಯ ಮಲಾಮನ್ತಾ, ಅನುಟ್ಠಾನಮಲಾ ಘರಾ;

ಮಲಂ ವಣ್ಣಸ್ಸ ಕೋಸಜ್ಜಂ, ಪಮಾದೋ ರಕ್ಖತೋ ಮಲಂ.

ಅನುಪುಬ್ಬೇನ ¶ ಮೇಧಾವೀ, ಥೋಕಂ ಥೋಕಂ ಖಣೇ ಖಣೇ;

ಕಮ್ಮಾರೋ ರಜತಸ್ಸೇವ, ನಿದ್ಧಮೇ ಮಲಮತ್ತನೋ.

ಯಞ್ಹಿ ¶ ಕಯಿರಾ ತಞ್ಹಿ ವದೇ, ಯಂ ನ ಕಯಿರಾ ನ ತಂ ವದೇ;

ಅಕರೋನ್ತಂ ಭಾಸಮಾನಂ, ಪರಿಜಾನನ್ತಿ ಪಣ್ಡಿತಾ.

ವಿಸಮಂ ಸಭಯಂ ಅತಿವಾತೋ, ಪಟಿಚ್ಛನ್ನಂ ದೇವನಿಸ್ಸಿತಂ;

ಪನ್ಥೋ ಚ ಸಙ್ಗಾಮೋ ತಿತ್ಥಂ, ಅಟ್ಠೇತೇ ಪರಿವಜ್ಜಿಯಾ.

ರತ್ತೋದುಟ್ಠೋ ¶ ಚ ಮುಳ್ಹೋ ಚ, ಮಾನೀ ಲುದ್ಧೋ ತಥಾಲಸೋ;

ಏಕಚಿನ್ತೀ ಚ ಬಾಲೋ ಚ, ಏತೇ ಅತ್ಥವಿನಾಸಕಾ.

ರತ್ತೋ ದುಟ್ಠೋ ಚ ಮೂಳ್ಹೋ ಚ, ಭೀರು ಆಮಿಸಗರುಕೋ;

ಇತ್ಥೀ ಸೋಣ್ಡೋ ಪಣ್ಡಕೋ ಚ, ನವಮೋ ದಾರಕೋಪಿ ಚ.

ನವತೇ ಪುಗ್ಗಲಾ ಲೋಕೇ, ಇತ್ತರಾ ಚಲಿತಾ ಚಲಾ;

ಏತೇಹಿ ಮನ್ತಿತಂ ಗುಯ್ಹಂ, ಖಿಪ್ಪಂ ಭವತಿ ಪಾಕಟಂ.

ಯೋ ¶ ನಿರುತ್ತಿಂ ನ ಸಿಕ್ಖೇಯ್ಯ, ಸಿಕ್ಖನ್ತೋ ಪಿಟಕತ್ತಯಂ;

ಪದೇ ಪದೇ ವಿಕಙ್ಖೇಯ್ಯ, ವನೇ ಅನ್ಧಗಜೋ ಯಥಾ.

ಸುತ್ತಂ ¶ ಧಾತು ಗಣೋಣ್ವಾದಿ, ನಾಮಲಿಙ್ಗಾನುಸಾಸನಂ;

ಯಸ್ಸ ತಿಟ್ಠತಿ ಜಿವ್ಹಗ್ಗೇ, ಸಬ್ಯಾಕರಣಕೇಸರೀ.

ಸದ್ದತ್ಥಲಕ್ಖಣೇ ಭೇದೀ, ಯೋ ಯೋ ನಿಚ್ಛಿತಲಕ್ಖಣೇ;

ಸೋ ಸೋ ಞಾತುಮಕಿಚ್ಛೇನ, ಪಹೋತಿ ಪಿಟಕತ್ತಯೇ.

ಯೋ ¶ ಸದ್ದಸತ್ಥಕುಸಲೋ ಕುಸಲೋ ನಿಘಣ್ಡು,

ಛನ್ದೋ ಅಲಙ್ಕತಿಸು ನಿಚ್ಚಕತಾಭಿಯೋಗೋ;

ಸೋ ಯಂ ಕವಿತ್ತವಿಕಲೋಪಿ ಕವೀಸು ಸಙ್ಖ್ಯಂ,

ಮೋಗ್ಗಯ್ಹ ವಿನ್ದತಿ ಹಿ ಕಿತ್ತಿ’ ಮಮನ್ದರೂಪಂ.

ಸುಕ್ಖೋಪಿ ¶ ಚನ್ದನತರು ನ ಜಹಾತಿ ಗನ್ಧಂ,

ದುಕ್ಖೋಪಿ ಪಣ್ಡಿತಜನೋ ನ ಜಹಾತಿ ಧಮ್ಮಂ.

ಧನಧಞ್ಞಪ್ಪಯೋಗೇಸು, ತಥಾ ವಿಜ್ಜಾಗಮೇಸು ಚ;

ಆಹಾರೇ ಬ್ಯವಹಾರೇ ಚ, ಚತ್ತಲಜ್ಜೋ ಸದಾ ಭವೇ.

ಸಾಭಾವಿಕೀ ¶ ಚ ಪಟಿಭಾ, ಸುತಞ್ಚ ಬಹುನಿಮ್ಮಲಂ;

ಅಮನ್ದೋ ಚಾಭಿಯೋಗೋಯಂ, ಹೇತು ಹೋತಿಹ ಬನ್ಧನೇ.

ಜಹೇಯ್ಯ ¶ ಪಾಪಕೇ ಮಿತ್ತೇ, ಭಜೇಯ್ಯ ಪಣ್ಡಿತೇ ಜನೇ;

ಸಾಧವೋ ಅಭಿಸೇವೇಯ್ಯ, ಸುಣೇಯ್ಯ ಧಮ್ಮಮುತ್ತಮಂ.

ಕಲ್ಯಾಣಕಾರೀ ಕಲ್ಯಾಣಂ, ಪಾಪಕಾರೀ ಚ ಪಾಪಕಂ;

ಯಾದಿಸಂ ವಪ್ಪತೇ ಬೀಜಂ, ತಾದಿಸಂ ಹರತೇ ಫಲಂ.

ಛನ್ದೋ ¶ ನಿದಾನಂ ಗಾಥಾನಂ, ಅಕ್ಖರಾ ತಾಸಂ ವಿಯಞ್ಜನಂ;

ನಾಮಸನ್ನಿಸ್ಸಿತಾ ಗಾಥಾ, ಕವಿ ಗಾಥಾನಮಾಸಯೋ.

ತಸ್ಮಾ ¶ ಹಿ ಪಣ್ಡಿತೋ ಪೋಸೋ, ಸಮ್ಪಸ್ಸಂ ಹಿತಮತ್ತನೋ;

ಪಞ್ಞವನ್ತಂಭಿಪೂಜೇಯ್ಯ, ಚೇತಿಯಂ ವಿಯ ಸಾದರೋ.

ಧೀರಂ ಪಸ್ಸೇ ಸುಣೇ ಧೀರಂ, ಧೀರೇನ ಸಹಸಂವಸೇ;

ಧೀರೇನಲ್ಲಾಪಸಲ್ಲಾಪಂ, ತಂ ಕರೇ ತಞ್ಚ ರೋಚಯೇ.

ನಯಂ ¶ ನಯತಿ ಮೇಧಾವೀ, ಅಧುರಾಯಂ ನ ಯುಞ್ಜತಿ;

ಸುನಯೋ ಸೇಯ್ಯಸೋ ಹೋತಿ, ಸಮ್ಮಾ ವುತ್ತೋ ನ ಕುಪ್ಪತಿ;

ವಿನಯಂ ಸೋ ಪಜಾನಾತಿ, ಸಾಧು ತೇನ ಸಮಾಗಮೋ.

ಸೋಕಟ್ಠಾನಸಹಸ್ಸಾನಿ ¶ , ಭಯಟ್ಠಾನಸತಾನಿ ಚ;

ದಿವಸೇ ದಿವಸೇ ಮೂಳ್ಹ-ಮಾವಿಸನ್ತಿ ನ ಪಣ್ಡಿತಂ.

ಜಲಬಿನ್ದುನಿಪಾತೇನ, ಚಿರೇನ ಪೂರತೇ ಘಟೋ;

ತಥಾ ಸಕಲವಿಜ್ಜಾನಂ, ಧಮ್ಮಸ್ಸ ಚ ಧನಸ್ಸ ಚ.

ಪಣ್ಡಿತಾ ¶ ದುಕ್ಖಂ ಪತ್ವಾನ, ನ ಭವನ್ತಿ ವಿಸಾದಿನೋ;

ಪವಿಸ್ಸ ರಾಹುನೋ ಮುಖಂ, ಕಿಂ ನೋ ದೇತಿ ಪುನ ಸಸೀ.

ಜವೇನ ಅಸ್ಸಂ ಜಾನನ್ತಿ, ವಾಹೇನ ಚ ಬಲಿಬದ್ಧಂ;

ದುಹೇನ ಧೇನುಂ ಜಾನನ್ತಿ, ಭಾಸಮಾನೇನ ಪಣ್ಡಿತಂ.

ಮನಸಾ ¶ ಚಿನ್ತಿತಂ ಕಮ್ಮಂ, ವಚಸಾ ನ ಪಕಾಸಯೇ;

ಅಞ್ಞಲಕ್ಖಿತಕಾರಿಯಸ್ಸ, ಯತೋ ಸಿದ್ಧಿ ನ ಜಾಯತೇ.

ಅನಭ್ಯಾಸೇ ವಿಸಂ ವಿಜ್ಜಾ, ಅಜಿಣ್ಣೇ ಭೋಜನಂ ವಿಸಂ;

ವಿಸಂ ಸಭಾ ದಲಿದ್ದಸ್ಸ, ವುದ್ಧಸ್ಸ ತರುಣೀ ವಿಸಂ.

ಚತ್ತಾರೋ ಪಞ್ಚ ಆಲೋಪೇ, ಆಭುತ್ವಾ ಉದಕಂ ಪಿವೇ;

ಅಲಂ ಫಾಸುವಿಹಾರಾಯ, ಪಹಿತತ್ತಸ್ಸ ಭಿಕ್ಖುನೋ.

ಯಸ್ಸ ಏಸೋ ಪಸುತೋಪಿ, ಗುಣವಾ ಪುಜ್ಜತೇ ನರೋ;

ಧನು ವಂಸವಿಸುದ್ಧೋಪಿ, ನಿಗ್ಗುಣೋ ಕಿಂ ಕರಿಸ್ಸತಿ.

ಇಸ್ಸೀ ¶ ದಯೀ ಅಸಂತುಟ್ಠೋ, ಕೋಧನೋ ನಿಚ್ಚಸಙ್ಕೀತೋ;

ಪರಭಾಗ್ಯೋಪಜೀವೀ ಚ, ಛಳೇತೇ ದುಕ್ಖಭಾಗಿನೋ.

ಸುಮಹನ್ತಾನಿ ಸತ್ತಾನೀ, ಧಾರಯನ್ತಾ ಬಹುಸ್ಸುತಾ;

ಛೇತ್ತಾರೋ ಸಂಸಯಾನಞ್ಚ, ಕಲಿಂ ಯನ್ತಿ ಲೋಭಮೋಹಿತಾ.

ನದೀತೀರೇ ¶ ಖತೇ ಕೂಪೇ, ಅರಣೀತಾಲವಣ್ಟಕೇ;

ನ ವದೇ ದಕಾದೀ ನತ್ಥೀತಿ, ಮುಖೇ ಚ ವಚನಂ ತಥಾ.

ಸಬ್ಬಂ ಸುಣಾತಿ ಸೋತೇನ, ಸಬ್ಬಂ ಪಸ್ಸತಿ ಚಕ್ಖುನಾ;

ನ ಚ ದಿಟ್ಠಂ ಸುತಂ ಧೀರೋ, ಸಬ್ಬಂ ಉಚ್ಚಿತು ಮರಹತಿ.

ಬಾಲಾದಪಿ ¶ ಗಹೇತಬ್ಬಂ, ಯುತ್ತಮುತ್ತಮನೀಸಿಭಿ;

ರವಿಸ್ಸಾವಿಸಯೇ ಕಿಂ ನ, ಪದೀಪಸ್ಸ ಪಕಾಸನಂ.

ತಸ್ಮಾ ¶ ಹಿ ಪಣ್ಡಿತೋ ಪೋಸೋ, ಸಮ್ಪಸ್ಸಂ ಅತ್ತಮತ್ತನೋ;

ಯೋನಿಸೋ ವಿಚಿನೇ ಧಮ್ಮಂ, ಏವಂ ತತ್ಥ ವಿಸುಜ್ಝತಿ.

ಕಿಂ ತೇನ ಜಾತುಜಾತೇನ, ಮಾತುಯೋಬ್ಬನ್ನಹಾರಿನಾ;

ಆರೋಹತಿ ನ ಯೋ ಸಕ-ವಂಸಅಗ್ಗೇ ಧಜೋ ಯಥಾ.

ಸಮ್ಮಾ ಉಪಪರಿಕ್ಖಿತ್ವಾ, ಅಕ್ಖರೇಸು ಪದೇಸು ಚ;

ಚೋರಘಾತೋ ಸಿಯಾ ಸಿಸ್ಸೋ, ಗುರು ಚೋರಟ್ಟಕಾರಕೋ.

ಅದನ್ತದಮನಂ ¶ ಸತ್ಥಂ, ಖಲಾನಂ ಕುರುತೇ ಮದಂ;

ಚಕ್ಖುಸಙ್ಖಾರಕಂ ತೇಜಂ, ಉಲೂಕಾನಂಮಿವನ್ಧಕಂ.

ನರತ್ತಂ ದುಲ್ಲಭಂ ಲೋಕೇ, ವಿಜ್ಜಾ ತತ್ರ ಸುದುಲ್ಲಭಾ;

ಕವಿತ್ತಂ ದುಲ್ಲಭಂ ತತ್ರ, ಸತ್ತಿ ತತ್ರ ಸುದುಲ್ಲಭಾ.

ಯೇಭುಯ್ಯೇನ ¶ ಹಿ ಸತ್ತಾನಂ, ವಿನಾಸೇ ಪಚ್ಚುಪಟ್ಠಿತೇ;

ಅನಯೋ ನಯರೂಪೇನ, ಬುದ್ಧಿಮಾಗಮ್ಮ ತಿಟ್ಠತಿ.

ಸದ್ಧಾಸೀಲಾದಿಧಮ್ಮೇಹಿ, ¶ ಸಪ್ಪನ್ನೋ ಸೇಟ್ಠಮಾನುಸೋ;

ವುತ್ತೋ ಬುದ್ಧಾದಿಸನ್ತೇಹಿ, ಸಾಧುಸಪ್ಪುರಿಸೋ ಇತಿ.

ಸದ್ದಾಧನಂ ಸೀಲಧನಂ, ಹಿರೀಓತ್ತಪ್ಪಿಯಂ ಧನಂ;

ಸುತಧನಞ್ಚ ಚಾಗೋ ಚ, ಪಞ್ಞಾ ವೇ ಸತ್ತಮಂ ಧನಂ.

ಯಸ್ಸ ಏತೇ ಧನಾ ಅತ್ಥಿ, ಇತ್ಥಿಯಾ ಪುರಿಸಸ್ಸ ವಾ;

ಅದಲಿದ್ದೋತಿ ತಂ ಆಹು, ಅಮೋಘಂ ತಸ್ಸ ಜೀವಿತಂ.

ತಸ್ಮಾ ಸದ್ಧಞ್ಚ ಸೀಲಞ್ಚ, ಪಸಾದಂ ಧಮ್ಮದಸ್ಸನಂ;

ಅನುಯುಞ್ಜೇಥ ಮೇಧಾವೀ, ಸರಂ ಬುದ್ಧಾನಸಾಸನಂ.

ಸಬ್ಭಿರೇವ ¶ ಸಮಾಸೇಥ, ಸಬ್ಭಿ ಕುಬ್ಬೇಥ ಸನ್ಥವಂ;

ಸತಂ ಸದ್ಧಮ್ಮಮಞ್ಞಾಯ, ಸೇಯ್ಯೋ ಹೋತಿ ನ ಪಾಪಿಯೋ.

ಚಜ ದುಜ್ಜನಸಂಸಗ್ಗಂ, ಭಜ ಸಾಧುಸಮಾಗಮಂ;

ಕರ ಪುಞ್ಞಮಹೋರತ್ತಂ, ಸರ ನಿಚ್ಚಮನಿಚ್ಚತಂ.

ಕಲ್ಯಾಣಮಿತ್ತೋ ದಳ್ಹಭತ್ತಿ ಚ ಹೋತಿ;

ದುಕ್ಖಿತಸ್ಸ ಸಕ್ಕಚ್ಚ ಕರೋತಿ ಕಿಚ್ಚಂ,

ಮಾತಾಪೇತ್ತಿಭರಂ ¶ ಜನ್ತುಂ, ಕುಲೇ ಜೇಟ್ಠಾಪಚಾಯಿನಂ;

ಸಣ್ಹಂ ಸಖಿಲಸಮ್ಭಾಸಂ, ಪೇಸುಣೇಯ್ಯಪ್ಪಹಾಯಿನಂ.

ಮಚ್ಛೇರವಿನಯೇ ಯುತ್ತಂ, ಸಚ್ಚಂ ಕೋಧಾಭಿಭುಂ ನರಂ;

ತಂ ವೇ ದೇವಾ ತಾವತಿಂಸಾ, ಆಹು ‘‘ಸಪ್ಪುರಿಸೋ’’ಇತಿ.

ಕುಲಜಾತೋ ಕುಲಪುತ್ತೋ, ಕುಲವಂಸಸುರಕ್ಖತೋ;

ಅತ್ತನಾ ದುಕ್ಖಪ್ಪತ್ತೋಪಿ, ಹೀನಕಮ್ಮಂ ನ ಕಾರಯೇ.

ಉದೇಯ್ಯ ¶ ಭಾಣು ಪಚ್ಛಿಮೇ, ನಮೇಯ್ಯ ಮೇರುಅದ್ದಿಪಿ;

ಸೀತಲಂ ಯದಿ ನರಗ್ಗಿ, ಪಬ್ಬತಗ್ಗೇ ಚ ಉಪ್ಪಲಂ;

ವಿಕಸೇ ನ ವಿಪರಿತಾ, ಸಾಧುವಾಚಾ ಕುದಾಚನಂ.

ಸುಖಾ ರುಕ್ಖಸ್ಸ ಛಾಯಾವ, ತತೋ ಞಾತಿಮಾತಾಪಿತು;

ತತೋ ಆಚೇರಸ್ಸ ರಞ್ಞೋ, ತತೋ ಬುದ್ಧಸ್ಸನೇಕಧಾ.

ಭಮರಾ ¶ ಪುಪ್ಫಮಿಚ್ಛನ್ತಿ, ಗುಣಮಿಚ್ಛನ್ತಿ ಸಜ್ಜನಾ;

ಮಕ್ಖಿಕಾ ಪೂತಿಮಿಚ್ಛನ್ತಿ, ದೋಸಮಿಚ್ಛನ್ತಿ ದುಜ್ಜನಾ.

ಮಾತುಹೀನೋ ¶ ದುಬ್ಭಾಸೋ ಹಿ, ಪಿತುಹೀನೋ ದುಕ್ಕಿರಿಯೋ;

ಉಭೋ ಮಾತುಪಿತುಹೀನಾ, ದುಬ್ಭಾಸಾ ಚ ದುಕ್ಕಿರಿಯಾ.

ಮಾತುಸೇಟ್ಠೋ ಸುಭಾಸೋ ಹಿ, ಪಿತುಸೇಟ್ಠೋ ಸುಕಿರಿಯೋ;

ಉಭೋಮಾತು ಪಿತುಸೇಟ್ಠಾ, ಸುಭಾಸಾ ಚ ಸುಕಿರಿಯಾ.

ಸುನಖೋ ¶ ಸುನಖಂ ದಿಸ್ವಾ, ದನ್ತಂ ದಸ್ಸೇತಿ ಹಿಂಸಿತುಂ;

ದುಜ್ಜನೋ ಸುಜನಂ ದಿಸ್ವಾ, ರೋಸಯಂ ಹಿಂಸಮಿಚ್ಛತಿ.

ನ ಚ ವೇಗೇನ ಕಿಚ್ಚಾನಿ, ಕತ್ತಬ್ಬಾನಿ ಕುದಾಚನಂ;

ಸಹಸಾ ಕಾರಿತಂ ಕಮ್ಮಂ, ಬಾಲೋ ಪಚ್ಛಾನುತಪ್ಪತಿ.

ದುಕ್ಖೋ ನಿವಾಸೋ ಸಮ್ಬಾಧೇ, ಠಾನೇ ಅಸುಚೀಸಙ್ಕತೇ;

ತತೋ ಅರಿಮ್ಹಿ ಅಪ್ಪಿಯೇ, ತತೋಪಿ ಅಕತಞ್ಞುನಾ.

ಓವದೇಯ್ಯಾ’ನುಸಾಸೇಯ್ಯ ¶ , ಅಸಬ್ಭಾ ಚ ನಿವಾರಯೇ;

ಸತಞ್ಹಿ ಸೋ ಪಿಯೋ ಹೋತಿ, ಅಸತಂ ಹೋತಿಅಪ್ಪಿಯೋ.

ಉತ್ತಮತ್ತನಿವಾತೇನ, ಕಕ್ಖಳಂ ಮುದುನಾ ಜಯೇ;

ನೀಚಂ ಅಪ್ಪಕದಾನೇನ, ವಾಯಾಮೇನ ಸಮಂ ಜಯೇ.

ನ ¶ ವಿಸಂ ವಿಸಮಿಚ್ಚಾಹ, ಧನಂ ಸಙ್ಘಸ್ಸ ಉಚ್ಚತೇ;

ವಿಸಂ ಏಕಂವ ಹನತಿ, ಹನತಿ ಸಙ್ಘಸ್ಸ ಸಬ್ಬಂ.

ಧನಮಪ್ಪಮ್ಪಿ ¶ ಸಾಧೂನಂ, ಕೂಪೇ ವಾರಿವ ನಿಸ್ಸಯೋ;

ಬಹುಂಅಪಿ ಅಸಾಧೂನಂ, ನ ಚ ವಾರಿವ ಅಣ್ಣವೇ.

ಅಪತ್ಥೇಯ್ಯಂ ನ ಪತ್ಥೇಯ್ಯ, ಅಚಿನ್ತೇಯ್ಯಂ ನ ಚಿನ್ತಯೇ;

ಧಮ್ಮಮೇವ ಸುಚಿನ್ತೇಯ್ಯ, ಕಾಲಂ ಮೋಘಂ ನ ಇಚ್ಛಯೇ.

ಅಚಿನ್ತಿತಮ್ಪಿ ¶ ಭವತಿ, ಚಿನ್ತಿತಮ್ಪಿ ವಿನಸ್ಸತಿ;

ನ ಹಿ ಚಿನ್ತಾಮಯಾ ಭೋಗಾ, ಇತ್ಥಿಯಾ ಪುರಿಸಸ್ಸ ವಾ.

ಅಸನ್ತಸ್ಸ ಪಿಯೋ ಹೋತಿ, ಸನ್ತೇ ನ ಕುರುತೇ ಪಿಯಂ;

ಅಸತಂ ಧಮ್ಮಂ ರೋಚೇತಿ, ತಂ ಪರಾಭವತೋ ಮುಖಂ.

ಗುಣಾ ¶ ಕುಬ್ಬನ್ತಿ ದೂತತ್ತಂ, ದೂರೇಪಿ ವಸತಂ ಸತಂ;

ಕೇತಕೇ ಗನ್ಧಂ ಘಾಯಿತ್ವಾ, ಗಚ್ಛನ್ತಿ ಭಮರಾ ಸಯಂ.

ಪುಬ್ಬಜಾತಿಕತಂ ಕಮ್ಮಂ, ತಂ ಕಮ್ಮಮೀತಿ ಕಥ್ಯತೇ;

ತಸ್ಮಾ ಪುರಿಸಾಕಾರೇನಂ, ಯತಂ ಕರೇ ಅತನ್ದಿತೋ.

ಮತ್ತಿಕಪಿಣ್ಡತೋ ಕತ್ತಾ, ಕುರುತೇ ಯಂ ಯದಿಚ್ಛತಿ;

ಏವಮತ್ತಕತಂ ಕಮ್ಮಂ, ಮಾಣವೋ ಪಟಿಪಜ್ಜತೇ.

ಉಟ್ಠಾಯೋಟ್ಠಾಯ ¶ ಬೋಧೇಯ್ಯಂ, ಮಹಬ್ಭಯ ಮುಪಟ್ಠಿತಂ;

ಮರಣಬ್ಯಾಧಿಸೋಕಾನಂ, ಕಿಮಜ್ಜ ನಿಪತಿಸ್ಸತಿ.

ಪಾಣಾ ಯಥಾತ್ತನೋಭಿಟ್ಠಾ, ಭೂತಾನಮಪಿ ತೇ ತಥಾ;

ಅತ್ತೋಪಮೇನ ಭೂತೇಸು, ದಯಂ ಕುಬ್ಬನ್ತಿ ಸಾಧವೋ.

ಸಬ್ಬೇ ¶ ತಸನ್ತಿ ದಣ್ಡಸ್ಸ, ಸಬ್ಬೇ ಭಾಯನ್ತಿ ಮಚ್ಚುನೋ;

ಅತ್ತಾನಂ ಉಪಮಂ ಕತ್ವಾ, ನ ಹನೇಯ್ಯ ನ ಘಾತಯೇ.

ಬಾಲೋ ವಾ ಯದಿ ವಾ ವುದ್ಧೋ, ಯುವಾ ವಾ ಗೇಹಮಾಗತೋ;

ತಸ್ಸ ಪೂಜಾ ವಿಧಾತಬ್ಬಾ, ಸಬ್ಬಸ್ಸಾಭ್ಯಾಗತೋ ಗರು.

ಆಕಿಣ್ಣೋಪಿ ಅಸನ್ತೇಹಿ, ಅಸಂಸಟ್ಠೋವ ಭದ್ದಕೋ;

ಬಹುನಾ ಸನ್ನಜಾತೇನ, ಗಚ್ಛೇನ ಉಬ್ಬತ್ತೇನಿಧ.

ಕಾಯದುಚ್ಚರಿತಾದೀಹಿ ¶ , ಸಮ್ಪನ್ನೋ ಪಾಪಮಾನುಜೋ;

ಬಾಲೋತಿ ಲೋಕನಾಥೇನ, ಕಿತ್ತಿತೋ ಧಮ್ಮಸಾಮಿನಾ.

ದುಚಿನ್ತಿತಚಿನ್ತೀ ಚೇವ, ದುಬ್ಭಾಸಿತಭಾಸೀಪಿ ಚ;

ದುಕ್ಕಟಕಮ್ಮಕಾರೀ ಚ, ಪಾಪಕೋ ಬಾಲಮಾನುಜೋ.

ಅತಿಪಿಯೋ ¶ ನ ಕಾತಬ್ಬೋ, ಖಲೋ ಕೋತುಹಲಂ ಕರೋ;

ಸಿರಸಾ ವಹಮಾನೋಪಿ, ಅಡ್ಢಪೂರೋ ಘಟೋ ಯಥಾ.

ಸಪ್ಪೋ ದುಟ್ಠೋ ಖಲೋ ದುಟ್ಠೋ, ಸಪ್ಪಾ ದುಟ್ಠತರೋ ಖಲೋ;

ಮನ್ತೋಸಧೇಹಿ ತಂ ಸಪ್ಪಂ, ಖಲಂ ಕೇನುಪಸಮ್ಮತಿ.

ಯೋ ¶ ಬಾಲೋ ಮಞ್ಞತಿ ಬಾಲ್ಯಂ, ಪಣ್ಡಿತೋ ವಾಪಿ ತೇನಸೋ;

ಬಾಲೋ ಚ ಪಣ್ಡಿತಮಾನೀ, ಸ ವೇ ಬಾಲೋತಿ ವುಚ್ಚತಿ.

ಮಧೂವ ಮಞ್ಞತಿ ಬಾಲೋ, ಯಾವ ಪಾಪಂ ನ ಪಚ್ಚತಿ;

ಯದಾ ಚ ಪಚ್ಚತಿ ಪಾಪಂ, ಅಥ ದುಕ್ಖಂ ನಿಗಚ್ಛತಿ.

ನ ¶ ಸಾಧು ಬಲವಾ ಬಾಲೋ, ಸಾಹಸಾ ವಿನ್ದತೇ ಧನಂ;

ಕಾಯಸ್ಸ ಭೇದಾ ದುಪ್ಪಞ್ಞೋ, ನಿರಯಂ ಸೋಪಪಜ್ಜತಿ.

ಘರೇ ¶ ದುಟ್ಠೋ ಮೂಸಿಕೋ ಚ, ವನೇ ದುಟ್ಠೋ ಚ ವಾನರೋ;

ಸಕುಣೇ ಚ ದುಟ್ಠೋ ಕಾಕೋ, ನರೇದುಟ್ಠೋ ಚ ಬ್ರಾಹ್ಮಣೋ.

ದೀಘಾ ಜಾಗರತೋ ರತ್ತಿ, ದೀಘಂ ಸನ್ತಸ್ಸ ಯೋಜನಂ;

ದೀಘೋ ಬಾಲಾನಸಂಸಾರೋ, ಸದ್ಧಮ್ಮಂ ಅವಿಜಾನತಂ.

ತಿಲಮತ್ತಂ ¶ ಪರೇಸಞ್ಚ, ಅಪ್ಪದೋಸಞ್ಚ ಪಸ್ಸತಿ;

ನಾಳಿಕೇರಮ್ಪಿ ಸದೋಸಂ, ಖಲಜಾತೋ ನ ಪಸ್ಸತಿ.

ನತ್ತದೋಸಂ ಪರೇ ಜಞ್ಞಾ, ಜಞ್ಞಾ ದೋಸಂ ಪರಸ್ಸತು;

ಗುಯ್ಹೋ ಕುಮ್ಮಾವ ಅಙ್ಗಾನಿ, ಪರದೋಸಞ್ಚ ಲಕ್ಖಯೇ.

ಲುದ್ಧಂ ¶ ಅತ್ಥೇನ ಗಣ್ಹೇಯ್ಯ, ಥದ್ಧಂ ಅಞ್ಜಲಿಕಮ್ಮುನಾ;

ಛನ್ದಾನುವತ್ತಿಯಾ ಮೂಳ್ಹಂ, ಯಥಾಭೂತೇನ ಪಣ್ಡಿತಂ.

ಯಥಾ ಉದುಮ್ಬರಪಕ್ಕಾ, ಬಹಿ ರತ್ತಕಾ ಏವ ಚ;

ಅನ್ತೋಕಿಮಿಲ ಸಮ್ಪುಣ್ಣಾ, ಏವಂ ದುಜ್ಜನಹದಯಾ.

ಯಾವಜೀವಮ್ಪಿ ¶ ಚೇ ಬಾಲೋ, ಪಣ್ಡಿತಂ ಪಯಿರುಪಾಸತಿ;

ನ ಸೋ ಧಮ್ಮಂ ವಿಜಾನಾತಿ, ದಬ್ಬೀ ಸೂಪರಸಂ ಯಥಾ.

ಚರಞ್ಚೇ ನಾಧಿಗಚ್ಛೇಯ್ಯ, ಸೇಯ್ಯಂ ಸದಿಸಮತ್ತನೋ;

ಏಕಚರಿಯಂ ದಳ್ಹಂ ಕಯಿರಾ, ನತ್ಥಿ ಬಾಲೇ ಸಹಾಯತಾ.

ಅಜಾತಮತಮೂಳ್ಹಾನಂ ¶ , ವರಮಾದಯೋ ನ ಚನ್ತಿಮೋ;

ಸಕಿಂ ದುಕ್ಖಕರಾವಾದ-ಯೋನ್ತಿಮೋ ತು ಪದೇ ಪದೇ.

ದುಜ್ಜನೇನ ¶ ಸಮಂ ವೇರಂ, ಸಖ್ಯಞ್ಚಾಪಿ ನ ಕಾರಯೇ;

ಉಣ್ಹೋ ದಹತಿ ಚಙ್ಗಾರೋ, ಸೀತೋ ಕಣ್ಹಾಯತೇ ಕರಂ.

ದುಜ್ಜನೋ ಪಿಯವಾದೀ ಚ, ನೇತಂ ವಿಸ್ಸಾಸಕಾರಣಂ;

ಮಧು ತಿಟ್ಠತಿ ಜಿವ್ಹಗ್ಗೇ, ಹದಯೇ ಹಲಾಹಲಂ ವಿಸಂ.

ದುಜ್ಜನೋ ¶ ಪರಿಹಾತಬ್ಬೋ, ವಿಜ್ಜಾಯಾಲಙ್ಕತೋಪಿ ಚ;

ಮಣಿನಾ ಭೂಸಿತೋ ಸಪ್ಪೋ, ಕಿಮೇಸೋ ನ ಭಯಙ್ಕರೋ.

ನಾಳಿಕೇರಸಮಾಕಾರಾ, ದಿಸ್ಸನ್ತೇಪಿ ಹಿ ಸಜ್ಜನಾ;

ಅಞ್ಞೇ ಬದರಿಕಾಕಾರಾ, ಬಹಿರೇವ ಮನೋಹರಾ.

ಯಥಾಪಿ ¶ ಪನ ಸಪಕ್ಕಾ, ಬಹಿ ಕಣ್ಟಕಮೇವ ಚ;

ಅನ್ತೋ ಅಮತಸಮ್ಪುಣ್ಣಾ, ಏವಂ ಸುಜನಹದಯಾ.

ಯಥಾ ಉದುಮ್ಬರಪಕ್ಕಾ, ಬಹಿ ರತ್ತಕಮೇವ ಚ;

ಏವಂ ಕಿಮಿಲಸಮ್ಪುಣಾ, ಏವಂ ದುಜ್ಜನಹದಯಾ.

ದೋಸಭೀತೋ ಅನಾರಮ್ಭೋ, ತಂ ಕಾ ಪುರಿಸಲಕ್ಖಣಂ;

ಕೋಹ್ಯಜಿಣ್ಣಭಯಾ ನನು, ಭೋಜನಂ ಪರಿಹೀಯತೇ.

ಪಯೋಪಾನಂ ಭುಜಙ್ಗಾನಂ, ಕೇವಲಂ ವಿಸವಡ್ಢನಂ;

ಉಪದೇಸೋ ಹಿ ಮೂಳ್ಹಾನಂ, ಪಕೋಪಾಯ ನ ಸನ್ತಿಯಾ.

ನ ¶ ಠಾತಬ್ಬಂ ನ ಗನ್ತಬ್ಬಂ, ದುಜ್ಜನೇನ ಸಮಂ ಕ್ವಚಿ;

ದುಜ್ಜನೋ ಹಿ ದುಕ್ಖಂ ದೇತಿ, ನ ಸೋ ಸುಖಂ ಕದಾಚಿಪಿ.

ಅಬದ್ಧಾ ತತ್ಥ ಬಜ್ಝನ್ತಿ, ಯತ್ಥ ಬಾಲಾ ಪಭಾಸರೇ;

ಬದ್ಧಾಪಿ ತತ್ಥ ಮುಚ್ಚನ್ತಿ, ಯತ್ಥ ಧೀರಾ ಪಭಾಸರೇ.

ಪರಿತ್ತಂ ¶ ದಾರುಮಾರುಯ್ಹ, ಯಥಾ ಸೀದೇ ಮಹಣ್ಣವೇ;

ಏವಂ ಕುಸಿತಮಾಗಮ್ಮ, ಸಾಧು ಜೀವಿಪಿ ಸೀದತಿ;

ತಸ್ಮಾ ತಂ ಪರಿವಜ್ಜೇಯ್ಯ, ಕುಸೀತಂ ಹೀನವೀರಿಯಂ.

ಸದ್ಧಾಸೀಲಾದಿಸಮ್ಪನ್ನೋ ¶ , ಸುಮಿತ್ತೋ ಸಾಧುಮಾನುಸೋ;

ತಾದಿಸಂ ಮಿತ್ತಂ ಸೇವೇಯ್ಯ, ವುದ್ಧಿಕಾಮೋ ವಿಚಕ್ಖಣೋ.

ದಾನಾದಿಗುಣಸೇಟ್ಠೇಹಿ, ಮಿದಿತಬ್ಬೋ ಮಿತ್ತೋ ಹಿ ಖೋ;

ತಾದಿಸಂ ಅವಙ್ಕೇನೇವ, ಮನಸಾ ಭಜೇಯ್ಯ ಸುಧೀ.

ಹಿತಕ್ಕರೋ ¶ ಪರೋ ಬನ್ಧು, ಬನ್ಧುಪಿ ಅಹಿತೋ ಪರೋ;

ಅಹಿತೋ ದೇಹಜೋ ಬ್ಯಾಧಿ, ಹಿತಂ ಅರಞ್ಞಮೋಸಧಂ.

ಪರೋಕ್ಖೇ ¶ ಕಿಚ್ಚಹನ್ತಾರಂ, ಪಚ್ಚಕ್ಖೇ ಪಿಯವಾದಿನಂ;

ವಜ್ಜಯೇ ತಾದಿಸಂ ಮಿತ್ತಂ, ವಿಸಕುಮ್ಭಂ ಪಯೋಮುಖಂ.

ಧನಹೀನೇ ಚಜೇ ಮಿತ್ತೋ, ಪುತ್ತದಾರಾ ಸಹೋದರಾ;

ಧನವನ್ತೇವ ಸೇವನ್ತಿ, ಧನಂ ಲೋಕೇ ಮಹಾಸಖಾ.

ಜಾನಿಯಾ ¶ ಪೇಸನೇ ಭಚ್ಚೇ, ಬನ್ಧವೇ ಬ್ಯಸನಾಗಮೇ;

ಮಿತ್ತಞ್ಚ ಆಪದಿಕಾಲೇ, ಭರಿಯಞ್ಚ ವಿಭವಕ್ಖಯೇ.

ಉಸ್ಸವೇ ಬ್ಯಸನೇ ಚೇವ, ದುಬ್ಭಿಕ್ಖೇ ಸತ್ತುವಿಗ್ಗಹೇ;

ರಾಜದ್ವಾರೇ ಸುಸಾನೇ ಚ, ಯೋ ತಿಟ್ಠತಿ ಸೋ ಬನ್ಧವಾ.

ನ ¶ ೨ ವಿಸ್ಸಸೇ ಅಮಿತ್ತಸ್ಸ, ಮಿತ್ತಞ್ಚಾಪಿ ನ ವಿಸ್ಸಸೇ;

ಕದಾಚಿ ಕುಪಿತೇ ಮಿತ್ತೇ, ಸಬ್ಬದೋಸಂ ಪಕಾಸತಿ.

ಮಾತಾ ಮಿತ್ತಂ ಪಿತಾ ಚೇತಿ, ಸಭಾವಾ ತಂ ತಯಂ ಹಿತಂ;

ಕಮ್ಮಕರಣತೋ ಚಞ್ಞೇ, ಭವನ್ತಿ ಹಿತಬುದ್ಧಿಯೋ.

ಆಪದಾಸು ¶ ಮಿತ್ತಂ ಜಞ್ಞಾ, ಯುದ್ಧೇ ಸೂರಂ ಇಣೇ ಸುಚಿಂ;

ಭರಿಯಂ ಖೀಣೇಸು ವಿತ್ತೇಸು, ಬ್ಯಸನೇಸು ಚ ಬನ್ಧವಂ.

ಸಕಿಂ ದುಟ್ಠಞ್ಚ ಯೋ ಮಿತ್ತಂ, ಪುನ ಸನ್ಧಾತುಮಿಚ್ಛತಿ;

ಸ ಮಚ್ಚುಮುಪಗಣ್ಹಾತಿ, ಗಬ್ಭಂ ಅಸ್ಸತರೀ ಯಥಾ.

ಇಣಸೇಸೋ ¶ ಅಗ್ಗಿಸೇಸೋ, ರೋಗಸೇಸೋ ತಥೇವ ಚ;

ಪುನಪ್ಪುನಂ ವಿವಡ್ಢನ್ತಿ, ತಸ್ಮಾ ಸೇಸಂ ನ ಕಾರಯೇ.

ಪದುಮಂವ ಮುಖಂ ಯಸ್ಸ, ವಾಚಾ ಚನ್ದನಸೀತಲಾ;

ತಾದಿಸಂ ನೋ ಪಸೇವೇಯ್ಯ, ಹದಯೇ ತು ಹಲಾಹಲಂ.

ನ ¶ ಸೇವೇ ಫರುಸಂ ಸಾಮಿಂ, ನ ಚ ಸೇವೇಯ್ಯ ಮಚ್ಛರಿಂ;

ತತೋ ಅಪಗ್ಗಣ್ಹ ಸಾಮಿಂ, ನೇವ ನಿಗ್ಗಹಿತಂ ತತೋ.

ಕುದೇಸಞ್ಚ ¶ ಕುಮಿತ್ತಞ್ಚ, ಕುಕುಲಞ್ಚ ಕುಬನ್ಧವಂ;

ಕುದಾರಞ್ಚ ಕುದಾಸಞ್ಚ, ದೂರತೋ ಪರಿವಜ್ಜಯೇ.

ಸೀತವಾಚೋ ಬಹುಮಿತ್ತೋ, ಫರುಸೋ ಅಪ್ಪಮಿತ್ತಕೋ;

ಉಪಮಾ ಏತ್ಥ ಞಾತಬ್ಬಾ, ಸೂರಿಯಚನ್ದರಾಜೂನಂ.

ಅಹಿತಾ ಪಟಿಸೇಧೋ ಚ, ಹಿತೇಸು ಚ ಪಯೋಜನಂ;

ಬ್ಯಸನೇ ಅಪರಿಚ್ಚಾಗೋ, ಇತಿದಂ ಮಿತ್ತಲಕ್ಖಣಂ.

ಪಿಯೋ ¶ ಗರು ಭಾವನೀಯೋ, ವತ್ತಾ ಚ ವಚನಕ್ಖಮೋ;

ಗಮ್ಭೀರಞ್ಚ ಕಥಂ ಕತ್ತಾ, ನೋ ಚಟ್ಠಾನೇ ನಿಯೋಜಕೋ;

ತಾದಿಸಂ ಮಿತ್ತಂ ಸೇವೇಯ್ಯ, ಭೂತಿಕಾಮೋ ವಿಚಕ್ಖಣೋ.

ಪಿಯೋ ¶ ಗರು ಭಾವ ನೀಯೋ, ವತ್ತಾ ಚ ವಚನಕ್ಖಮೋ;

ಗಮ್ಭಿರಞ್ಚ ಕಥಂ ಕತ್ತಾ, ನೋ ಚಟ್ಠಾನೇ ನಿಯೋಜಕೋ.

ಯಮ್ಹಿ ಏತಾನಿ ಠಾನಾನಿ, ಸಂವಿಜ್ಜನ್ತಿಧ ಪುಗ್ಗಲೇ;

ಸೋ ಮಿತ್ತೋ ಮಿತ್ತಕಾಮೇನ, ಅತ್ಥಕಾಮಾನುಕಮ್ಪತೋ;

ಅಪಿ ನಾಸಿಯಮಾನೇನ, ಭಜಿತಬ್ಬೋ ತಥಾವಿಧೋ.

ಓರಸಂ ಕತಸಮ್ಬನ್ಧಂ, ತಥಾ ವಂಸಕ್ಕಮಾಗತಂ;

ರಕ್ಖಕೋ ಬ್ಯಸನೇಹಿ, ಮಿತ್ತಂ ಞೇಯ್ಯಂ ಚತುಬ್ಬಿಧಂ.

ಪಿಯೋ ಗರು ಭಾವನಿಯೋ, ವತ್ತಾ ಚ ವಚನಕ್ಖಮೋ;

ಗಮ್ಭಿರಞ್ಚ ಕಥಂ ಕತ್ತಾ, ನ ಚಟ್ಠಾನೇ ನಿಯೋಜಕೋ;

ತಂ ಮಿತ್ತಂ ಮಿತ್ತಕಾಮೇನ, ಯಾವಜೀವಮ್ಪಿ ಸೇವಿಯಂ.

ಪಿಯೋ ಗರು ಭಾವನೀಯೋ, ವತ್ತಾ ಚ ವಚನಕ್ಖಮೋ;

ಗಮ್ಭಿರಞ್ಚ ಕಥಂ ಕತ್ತಾ, ನೋ ಚಟ್ಠಾನೇ ನಿಯೋಜಕೋ;

ತಾದಿಸಂ ಮಿತ್ತಂ ಸೇವೇಯ್ಯ, ಭೂತಿಕಾಮೋ ವಿಚಕ್ಖಣೋ.

ಮಹಾಜನಂ ¶ ಯೋ ರಞ್ಜೇತಿ, ಚತೂಹಿಪಿ ವತ್ಥೂಹಿ ವಾ;

ರಾಜಾತಿ ವುಚ್ಚತೇ ಲೋಕೇ, ಇತಿ ಸಲ್ಲಕ್ಖಯೇ ವಿದ್ವಾ.

ದಾನಞ್ಚ ಅತ್ಥಚರಿಯಾ, ಪಿಯವಾಚಾ ಅತ್ತಸಮಂ;

ಸಙ್ಗಹಾ ಚತುರೋ ಇಮೇ, ಮುನಿನ್ದೇನ ಪಕಾಸಿತಾ.

ದಾನಮ್ಪಿ ¶ ಅತ್ಥಚರಿಯತಞ್ಚ, ಪಿಯವಾದಿತಞ್ಚ ಸಮಾನತ್ತತಞ್ಚ;

ಕರಿಯಚರಿಯಸುಸಙ್ಗಹಂ ಬಹೂನಂ, ಅನವಮತೇನ ಗುಣೇನ ಯಾತಿ ಸಗ್ಗಂ;

ದಾನಞ್ಚ ಪೇಯ್ಯವಜ್ಜಞ್ಚ, ಅತ್ಥಚರಿಯಾ ಚ ಯಾ ಇಧ;

ಸಮಾನತ್ತತಾ ಚ ಧಮ್ಮೇಸು, ತತ್ಥ ತತ್ಥ ಯಥಾರಹಂ;

ಏತೇ ಖೋ ಸಙ್ಗಹಾ ಲೋಕೇ, ರಥಸ್ಸಾಣೀವ ಯಾಯತೋ.

ದಾನಂ ಸೀಲಂ ಪರಿಚ್ಚಾಗಂ, ಅಜ್ಜವಂ ಮದ್ದವಂ ತಪಂ;

ಅಕ್ಕೋಧಂ ಅವಿಹಿಂಸಞ್ಚ, ಖನ್ತೀ ಚ ಅವಿರೋಧನಂ;

ದಸೇತೇ ಧಮ್ಮೇ ರಾಜಾನೋ, ಅಪ್ಪಮತ್ತೇನ ಧಾರಯ್ಯುಂ.

ಏಕಯಾಮಂ ¶ ಸಯೇ ರಾಜಾ, ದ್ವಿಯಾ ಮಞ್ಞೇವ ಪಣ್ಡಿತೋ;

ಘರಾವಾಸೋ ತಿಯಾಮೋವ, ಚತುಯಾಮೋ ತು ಯಾಚಕೋ.

ಅಪುತ್ತಕಂ ಘರಂ ಸುಞ್ಞಂ, ರಟ್ಠಂ ಸುಞ್ಞಂ ಅರಾಜಕಂ;

ಅಸಿಪ್ಪಸ್ಸ ಮುಖಂ ಸುಞ್ಞಂ, ಸಬ್ಬಸುಞ್ಞಂ ದಲಿದ್ದತ್ತಂ.

ಧನಮಿಚ್ಛೇ ¶ ವಾಣಿಜೇಯ್ಯ, ವಿಜ್ಜಮಿಚ್ಛೇ ಭಜೇ ಸುತಂ;

ಪುತ್ತಮಿಚ್ಛೇ ತರುಣಿತ್ಥಿಂ, ರಾಜಾಮಚ್ಚಂ ಇಚ್ಛಾಗತೇ.

ಪಕ್ಖೀನಂ ಬಲಮಾಕಾಸೋ, ಮಚ್ಛಾನಮುದಕಂ ಬಲಂ;

ದುಬ್ಬಲಸ್ಸ ಬಲಂ ರಾಜಾ, ಕುಮಾರಾನಂ ರುದಂ ಬಲಂ.

ಖಮಾ ¶ ಜಾಗರಿಯುಟ್ಠಾನಂ, ಸಂವಿಭಾಗೋ ದಯಿಕ್ಖಣಾ;

ನಾಯಕಸ್ಸ ಗುಣಾ ಏತೇ, ಇಚ್ಛಿತಬ್ಬಾ ಸತಂ ಸದಾ.

ಸಕಿಂ ವದನ್ತಿ ರಾಜಾನೋ, ಸಕಿಂ ಸಮಣಬ್ರಾಹ್ಮಣಾ;

ಸಕಿಂ ಸಪ್ಪುರಿಸಾ ಲೋಕೇ, ಏಸ ಧಮ್ಮೋ ಸನನ್ತನೋ.

ಆಯಂ ಖಯಂ ಸಯಂ ಜಞ್ಞಾ, ಕತಾಕತಂ ಸಯಂ ಜಞ್ಞಾ;

ನಿಗ್ಗಹೇ ನಿಗ್ಗಹಾರಹಂ, ಪಗ್ಗಹೇ ಪಗ್ಗಹಾರಹಂ.

ಮಾತಾ ¶ ಪುತ್ತಕತಂ ಪಾಪಂ, ಸಿಸ್ಸಕತಂ ಗುರು ತಥಾ;

ರಾಜಾ ರಟ್ಠಕತಂ ಪಾಪಂ, ರಾಜಕತಂ ಪುರೋಹಿತೋ.

ಅಕ್ಕೋಧೇನ ಜಿನೇ ಕೋಧಂ, ಅಸಾಧುಂ ಸಾಧುನಾ ಜಿನೇ;

ಜಿನೇ ಕದರಿಯಂ ದಾನೇನ, ಸಚ್ಚೇನಾಲಿಕವಾದಿನಂ.

ಅದನ್ತದಮನಂ ¶ ದಾನಂ, ದಾನಂ ಸಬ್ಬತ್ಥಸಾಧಕಂ;

ದಾನೇನ ಪಿಯವಾಚಾಯ, ಉನ್ನಮನ್ತಿ ನಮನ್ತಿ ಚ.

ಅದನ್ತದಮನಂ ¶ ದಾನಂ, ಅದಾನಂ ದನ್ತದೂಸಕಂ;

ದಾನೇನ ಪಿಯವಾಚಾಯ, ಉನ್ನಮನ್ತಿ ನಮನ್ತಿ ಚ.

ದಾನಂ ಸಿನೇಹಭೇಸಜ್ಜಂ, ಮಚ್ಛೇರಂ ದೋಸನೋಸಧಂ;

ದಾನಂ ಯಸಸ್ಸೀಭೇಸಜ್ಜಂ, ಮಚ್ಛೇರಂ ಕಪಣೋಸಧಂ.

ನ ರಞ್ಞಾ ಸಮಕಂ ಭುಞ್ಜೇ, ಕಾಮಭೋಗಂ ಕುದಾಚನಂ;

ಆಕಪ್ಪಂ ರಸಭುತ್ತಂ ವಾ, ಮಾಲಾಗನ್ಧವಿಲೇಪನಂ;

ವತ್ಥಸಬ್ಬಮಲಙ್ಕಾರಂ, ನ ರಞ್ಞಾ ಸದಿಸಂ ಕರೇ.

ನ ¶ ಮೇ ರಾಜಾ ಸಖಾ ಹೋತಿ, ನ ರಾಜಾ ಹೋತಿ ಸಮಕೋ;

ಏಸೋ ಸಾಮಿಕೋ ಮಯ್ಹನ್ತಿ, ಚಿತ್ತೇ ನಿಟ್ಠಂ ಸಣ್ಠಾಪಯೇ.

ನಾತಿದೂರೇ ಭಜೇ ರಞ್ಞೋ, ನಚ್ಚಾಸನ್ನೇ ಪವಾತಕೇ;

ಉಜುಕೇ ನಾತಿನಿನ್ನೇ ಚ, ನ ಭಜೇ ಉಚ್ಚಮಾಸನೇ;

ಛ ದೋಸೇ ವಜ್ಜೇ ಸೇವಕೋ, ಅಗ್ಗೀವ ಸಂಯತೋ ತಿಟ್ಠೇ.

ನ ¶ ಪಚ್ಛತೋ ನ ಪುರತೋ, ನಾಪಿ ಆಸನ್ನದೂರತೋ;

ನ ಕಚ್ಛೇ ನೋಪಿ ಪಟಿವಾತೇ, ನ ಚಾಪಿ ಓಣತುಣ್ಣತೇ;

ಇಮೇ ದೋಸೇ ವಿವಜ್ಜೇತ್ವಾ, ಏಕಮನ್ತಂ ಠಿತಾ ಅಹು –

ಕಸ್ಸಕೋ ¶ ವಾಣಿಜೋ ಮಚ್ಚೋ, ಸಮಣೋ ಸುತಸೀಲ ವಾ;

ತೇಸು ವಿಪುಲಜಾತೇಸು, ರಟ್ಠಮ್ಪಿ ವಿಪುಲಂ ಸಿಯಾ.

ತೇಸು ¶ ದುಬ್ಬಲಜಾತೇಸು, ರಟ್ಠಮ್ಪಿ ದುಬ್ಬಲಂ ಸಿಯಾ;

ತಸ್ಮಾ ಸರಟ್ಠಂ ವಿಪುಲಂ, ಧಾರಯೇ ರಟ್ಠಭಾರವಾ.

ಮಹಾರುಕ್ಖಸ್ಸ ¶ ಫಲಿನೋ, ಆಮಂ ಛಿನ್ದತಿ ಯೋ ಫಲಂ;

ರಸಞ್ಚಸ್ಸ ನ ಜಾನಾತಿ, ಬೀಜಞ್ಚಸ್ಸ ವಿನಸ್ಸತಿ.

ಮಹಾರುಕ್ಖೂಪಮಂ ರಟ್ಠಂ, ಅಧಮ್ಮೇನ ಪಸಾಸತಿ;

ರಸಞ್ಚಸ್ಸ ನ ಜಾನಾತಿ, ರಟ್ಠಞ್ಚಸ್ಸ ವಿನಸ್ಸತಿ.

ಮಹಾರುಕ್ಖಸ್ಸ ಫಲಿನೋ, ಪಕ್ಕಂ ಛಿನ್ದತಿ ಯೋ ಫಲಂ;

ರಸಞ್ಚಸ್ಸ ವಿಜಾನಾತಿ, ಬೀಜಞ್ಜಸ್ಸ ನ ನಸ್ಸತಿ.

ಮಹಾರುಕ್ಖೂಪಮಂ ¶ ರಟ್ಠಂ, ಧಮ್ಮೇನ ಯೋ ಪಸಾಸತಿ;

ರಸಞ್ಚಸ್ಸ ವಿಜಾನಾತಿ, ರಟ್ಠಞ್ಚಸ್ಸ ನ ನಸ್ಸತಿ.

ಅನಾಯಕಾ ¶ ವಿನಸ್ಸನ್ತಿ, ನಸ್ಸನ್ತಿ ಬಹುನಾಯಕಾ;

ಥೀನಾಯಕಾ ವಿನಸ್ಸನ್ತಿ, ನಸ್ಸನ್ತಿ ಸುಸುನಾಯಕಾ.

ಗವಂ ¶ ಚೇ ತರಮಾನಾನಂ, ಉಜುಂ ಗಚ್ಛತಿ ಪುಙ್ಗವೋ;

ಸಬ್ಬಾ ಗಾವೀ ಉಜುಂ ಯನ್ತಿ, ನೇತ್ತೇ ಉಜುಂ ಗತೇ ಸತಿ.

ಏವಮೇವ ಮನುಸ್ಸೇಸು, ಯೋ ಹೋತಿ ಸೇಟ್ಠಸಮ್ಮತೋ;

ಸೋ ಸಚೇ ಧಮ್ಮಂ ಚರತಿ, ಪಗೇವ ಇತರಾ ಪಜಾ.

ಗವಂ ಚೇ ತರಮಾನಾನಂ, ಉಜುಂ ಗಚ್ಛತಿ ಪುಙ್ಗವೋ;

ಸಬ್ಬಾ ಗಾವೀ ಉಜುಂಯನ್ತಿ, ನೇತ್ತೇ ಉಜುಂ ಗತೇ ಸತಿ.

ಏವಮೇವ ¶ ಮನುಸ್ಸೇಸು, ಯೋ ಹೋತಿ ಸೇಟ್ಠಸಮ್ಮತೋ;

ಸೋ ಸಚೇ ಧಮ್ಮಂ ಚರತಿ, ಪಗೇವ ಇತರಾ ಪಜಾ;

ಸಬ್ಬಂ ರಟ್ಠಂ ಸುಖಂ ಸೇತಿ, ರಾಜಾ ಚೇ ಹೋತಿ ಧಮ್ಮಿಕೋ.

ನೋದಯಾಹ ವಿನಾಸಾಯ, ಬಹುನಾಯಕತಾ ಭುಸಂ;

ಮಿಲಾಯನ್ತಿ ವಿನಸ್ಸನ್ತಿ, ಪದ್ಮಾನ್ಯಕ್ಕೇಹಿ ಸತ್ತಹಿ.

ಸುತಾರಕ್ಖೋ ಅಭಿಯೋಗೋ, ಕುಲಾರಕ್ಖೋ ವತ್ತಂ ಭವೇ;

ವಿಜ್ಜಾ ಹಿ ಕುಲಪುತ್ತಸ್ಸ, ನಾಯಕಸ್ಸಾಪಮಾದಕೋ.

ಅಭಿಜಾತಂ ¶ ಅನುಜಾತಂ, ಪುತ್ತಮಿಚ್ಛನ್ತಿ ಪಣ್ಡಿತಾ;

ಅವಜಾತಂ ನ ಇಚ್ಛನ್ತಿ, ಯೋ ಹೋತಿ ಕುಲಗನ್ಧನೋ.

ಪಞ್ಚಟ್ಠಾನಾನಿ ¶ ಸಮ್ಪಸ್ಸಂ, ಪುತ್ತಮಿಚ್ಛನ್ತಿ ಪಣ್ಡಿತಾ;

ಭತೋ ವಾ ನೋ ಭರಿಸ್ಸತಿ, ಕಿಚ್ಚಂ ವಾ ನೋ ಕರಿಸ್ಸತಿ.

ಕುಲವಂಸೋ ಚಿರಂ ತಿಟ್ಠೇ, ದಾಯಜ್ಜಂ ಪಟಿಪಜ್ಜತಿ;

ಅಥ ವಾ ಪನ ಪೇತಾನಂ, ದಕ್ಖಿನಂ ಅನುಪದಸ್ಸತಿ.

ಬಹುಪುತ್ತೇ ¶ ಪಿತಾ ಏಕೋ, ಅವಸ್ಸಂ ಪೋಸೇತಿ ಸದಾ;

ಬಹುಪುತ್ತಾ ನ ಸಕ್ಕೋನ್ತಿ, ಪೋಸೇತುಂ ಪಿತರೇಕಕಂ.

ಪುತ್ತಂ ವಾ ಭಾತರಂ ದುಟ್ಠು, ಅನುಸಾಸೇಯ್ಯ ನೋ ಜಹೇ;

ಕಿನ್ನು ಛೇಜ್ಜಂ ಕರಂ ಪಾದಂ, ಲಿತ್ತಂ ಅಸುಚಿನಾ ಸಿಯಾ.

ಆಯುಬೇದಕತಾಭ್ಯಾಸೋ ¶ , ಸಬ್ಬೇಸಂ ಪಿಯದಸ್ಸನೋ;

ಅರಿಯಸೀಲಗುಣೋಪೇತೋ, ಏಸ ವೇಜ್ಜೋ ವಿಧೀಯತೇ.

ನಾನಾಗನ್ಥಜಾನನಞ್ಚ, ಸುದಿಟ್ಠಕಮ್ಮಸಮ್ಪದಾ;

ದಕ್ಖತಾ ಹತ್ಥಸೀಘತಾ, ಪಸಾದಸೂರಸತ್ತಿತಾ.

ಸಾಭಾವಿಕತಙ್ಖಣಿಕ-ಞಾಣಸುಭಾಸಿತಾಪಿ ಚ;

ಉಸ್ಸಾಹೋ ದಬ್ಬೋ ಸಬ್ಬತಾ, ವೇಜ್ಜಾಚೇರಸ್ಸ ಲಕ್ಖಣಂ;

ಕಿಲಿಟ್ಠವತ್ಥಂ ¶ ಕೋಧೋ ಚ, ಅತಿಮಾನಞ್ಚ ಗಮ್ಮತಾ;

ಅನಿಮನ್ತಿತಗಮನಂ, ಏತೇ ಪಞ್ಚ ವಿವಜ್ಜಿಯಾ.

ದಿಟ್ಠಕಮ್ಮತಾ ¶ ಸೋಚಞ್ಚ, ದಕ್ಖತಾ ವಿದಿತಾಗಮೋ;

ಚತ್ತಾರೋ ಸುಭಿಸಕ್ಕಸ್ಸ, ಸುಗುಣಾ ವಿಞ್ಞುನಾ ಮತಾ.

ರುಜಾಯ ಜಯಲಕ್ಖಣಂ, ರಸೋ ಚ ಭೇಸಜ್ಜಮ್ಪಿ ಚ;

ತಿಲಕ್ಖಣಭೇದೋ ಚೇವ, ವಿಞ್ಞೇಯ್ಯೋ ಭಿಸಕ್ಕೇನ ವೇ.

ಅನ್ತೋಜಾತೋ ¶ ಧನಕ್ಕೀತೋ, ದಾಸಬ್ಯೋಪಗತೋ ಸಯಂ;

ದಾಸಾಕರಮರಾನೀತೋ-ಚ್ಚೇವಂ ತೇ ಚತುಧಾ ಸಿಯುಂ.

ಪುಬ್ಬುಟ್ಠಾ ಪಚ್ಛಾನಿಪಾತೀ, ದಿನ್ನಸ್ಸ ಆದಾಯೀಪಿ ಚ;

ಸುಕತಕಮ್ಮಕರೋ ಚ, ಕಿತ್ತಿವಣ್ಣಹರೋಪಿ ಚ.

ದಾಸಾ ೦.೦೧೭೭ ಪಞ್ಚೇವ ಚೋರಯ್ಯ-ಸಖಾಞಾತ್ಯತ್ತಸಾದಿಸಾ;

ತಥಾ ವಿಞ್ಞೂಹಿ ವಿಞ್ಞೇಯ್ಯಾ, ಮಿತ್ತದಾರಾ ಚ ಬನ್ಧವಾ.

ಆಸಾ ¶ ಲೋಕಿತ್ಥಿಯೋ ನಾಮ, ವೇಲಾ ತಾಸಂ ನ ವಿಜ್ಜತಿ;

ಸಾರತ್ತಾ ಚ ಪಗಬ್ಭಾ ಚ, ಸಿಖೀ ಸಬ್ಬಘಸೋ ಯಥಾ;

ತಸ್ಮಾ ತಾಯೋ ಹಿತ್ವಾನ, ಬ್ರೂಹೇಯ್ಯ ವಿವೇಕಂ ಸುಧೀ.

ಆಸಾ ¶ ಲೋಕಿತ್ಥಿಯೋ ನಾಮ, ವೇಲಾ ತಾಸಂ ನ ವಿಜ್ಜತಿ;

ಸಾರತ್ಥಾ ಚ ಪಗಬ್ಭಾ ಚ, ಸಿಖೀ ಸಬ್ಬಘಸೋ ಯಥಾ;

ತಾ ಹಿತ್ವಾ ಪಬ್ಬಜಿಸ್ಸಾಮಿ, ವಿವೇಕಮನುಬ್ರೂಹಯಂ.

ಲೋಕೇ ಹಿ ಅಙ್ಗನಾ ನಾಮ, ಕೋಧನಾ ಮಿತ್ತಭೇದಿಕಾ;

ಪಿಸುಕಾ ಅಕತಞ್ಞೂ ಚ ದೂರತೋ ಪರಿವಜ್ಜಯೇ.

ಯಥಾ ನದೀ ಚ ಪನ್ಥೋ ಚ, ಪಾನಾಗಾರಂ ಸಭಾ ಪಪಾ;

ಏವಂ ಲೋಕಿತ್ಥಿಯೋ ನಾಮ, ನಾಸಂ ಕುಜ್ಝನ್ತಿ ಪಣ್ಡಿತಾ.

ಸಬ್ಬಾ ¶ ನದೀ ವಙ್ಕಗತೀ, ಸಬ್ಬೇ ಕಟ್ಠಮಯಾ ವನಾ;

ಸಬ್ಬಿತ್ಥಿಯೋ ಕರೇ ಪಾಪಂ, ಲಭಮಾನೇ ನಿವಾತಕೇ.

ಘಟಕುಮ್ಭಸಮಾ ¶ ನಾರೀ, ತತ್ಥಙ್ಗಾರಸಮೋ ಪುಮಾ;

ತಸ್ಮಾ ಘತಞ್ಚ ಅಗ್ಗಿಞ್ಚ, ನೇಕತ್ರ ಠಪಯೇ ಬುಧೋ.

ಇತ್ಥೀನಞ್ಚ ಧನಂ ರೂಪಂ, ಪುರಿಸಾನಂ ವಿಜ್ಜಾ ಧನಂ;

ಭಿಕ್ಖೂನಞ್ಚ ಧನಂ ಸೀಲಂ, ರಾಜಾನಞ್ಚ ಧನಂ ಬಲಂ.

ಪಞ್ಚಾರತ್ಯಾ ¶ ಸುಗನ್ಧಬ್ಬಾ, ಸತ್ತಾರತ್ಯಾ ಧನುಗ್ಗಹಾ;

ಏಕಮಾಸಾ ಸುಭರಿಯಾ, ಅಡ್ಢಮಾಸಾ ಸಿಸ್ಸಾ ಮಲಾ.

ಜಿಣ್ಣೇ ಅನ್ನಂ ಪಸಂಸೇಯ್ಯ, ದಾರಞ್ಚ ಗತಯೋಬ್ಬನೇ;

ರಣಪುನಾಗತೇ ಸೂರಂ, ಸಸ್ಸಞ್ಚ ಗೇಹಮಾಗತೇ.

ದ್ವಿತಿಪತಿ ¶ ನಾರೀ ಚೇವ, ವಿಹಾರದ್ವಿತಿ ಭಿಕ್ಖು ಚ;

ಸಕುಣೋ ದ್ವಿತಿಪಾತೋ ಚ, ಕತಮಾಯಾಬಹುತರಾ.

ರತ್ತಿ ವಿನಾ ನ ಚನ್ದಿಮಾ, ವೀಚಿವಿನಾ ಚ ಸಾಗರೋ;

ಹಂಸವಿನಾ ಪೋಕ್ಖರಣೀ, ಪತಿವಿನಾ ಕಞ್ಞಾ ಸೋಭೇ.

ಅಸನ್ತುಟ್ಠಾ ¶ ಯತೀ ನಟ್ಠಾ, ಸನ್ತುಟ್ಠಾಪಿ ಚ ಪತ್ಥಿ ವಾ;

ಸಲಜ್ಜಾ ಗಣಿಕಾ ನಟ್ಠಾ, ನಿಲ್ಲಜ್ಜಾ ಚ ಕುಲಿತ್ಥಿಯೋ.

ಚೋರೀನಂ ಬಹುಬುದ್ಧೀನಂ, ಯಾಸು ಸಚ್ಚಂ ಸುದುಲ್ಲಭಂ;

ಥೀನಂ ಭಾವೋ ದುರಾಜಾನೋ, ಮಚ್ಛಸ್ಸೇವೋ’ದಕೇ ಗತಂ.

ಅನಲಾ ¶ ಮುದುಸಮ್ಭಾಸಾ, ದುಪ್ಪೂರಾ ತಾ ನದೀಸಮಾ;

ಸೀದನ್ತಿ ನಂ ವಿದಿತ್ವಾನ, ಆರಕಾ ಪರಿವಜ್ಜಯೇ.

ಆವಟ್ಟನೀ ಮಹಾಮಾಯಾ, ಬ್ರಹ್ಮಚರಿಯವಿಕೋಪನಾ;

ಸೀದನ್ತಿ ನಂ ವಿದಿತ್ವಾನ, ಆರಕಾ ಪರಿವಜ್ಜಯೇ.

ಇತ್ಥೀಪಿ ¶ ಹಿ ಏಕಚ್ಚಿಯಾ, ಸೇಯ್ಯಾ ಪೋಸ ಜನಾಧಿಪ;

ಮೇಧಾವಿನೀ ಸೀಲವತೀ, ಸಸ್ಸುದೇವಾ ಪತಿಬ್ಬತಾ;

ಸಲ್ಲಪೇ ¶ ಅಸಿಹತ್ಥೇನ, ಪಿಸಾಚೇನಾಪಿ ಸಲ್ಲಪೇ;

ಆಸೀವಿಸಮ್ಪಿ ಆಸೀದೇ, ಯೇನ ದಟ್ಠೋ ನ ಜೀವತಿ;

ನ ತ್ವೇವ ಏಕೋ ಏಕಾಯ, ಮಾತುಗಾಮೇನ ಸಲ್ಲಪೇ.

ನ ¶ ಹಿ ಸಬ್ಬೇಸು ಠಾನೇಸು, ಪುರಿಸೋ ಹೋತಿ ಪಣ್ಡಿತೋ;

ಇತ್ಥೀಪಿ ಪಣ್ಡಿತಾ ಹೋತಿ, ತತ್ಥ ತತ್ಥ ವಿಚಕ್ಖಣಾ.

ನ ಹಿ ಸಬ್ಬೇಸು ಠಾನೇಸು, ಪುರಿಸೋ ಹೋತಿ ಪಣ್ಡಿತೋ;

ಇತ್ಥೀಪಿ ಪಣ್ಡಿತಾ ಹೋತಿ, ಲಹುಂ ಅತ್ಥವಿಚಿನ್ತಿಕಾ.

ಕೂಪೋದಕಂ ¶ ವಟಚ್ಛಾಯಾ, ಸಾಮಾಥೀ ಇಟ್ಠಕಾಲಯಂ;

ಸೀತಕಾಲೇ ಭವೇ ಉಣ್ಹಂ, ಉಣ್ಹಕಾಲೇ ಚ ಸೀತಲಂ.

ಇತ್ಥಿಯೋ ಏಕಚ್ಚಿಯಾಪಿ, ಸೇಯ್ಯಾ ವುತ್ತಾವ ಮುನಿನಾ;

ಭಣ್ಡಾನಂ ಉತ್ತಮಾ ಇತ್ಥೀ, ಅಗ್ಗೂಪಟ್ಠಾಯಿಕಾ ಇತಿ.

ಕುಲಸೀಲಗುಣೋಪೇತೋ ¶ , ಸಬ್ಬಧಮ್ಮಪರಾಯಣೋ;

ಪವೀಣೋ ಪೇಸನಾಜ್ಝಕ್ಖೋ, ಧಮ್ಮಜ್ಝಕ್ಖೋ ವಿಧೀಯತೇ.

ವೇದವೇದಙ್ಗತತ್ವಞ್ಞೋ, ಜಪ್ಪಹೋಮಪರಾಯಣೋ;

ಆಸೀವಾದವಚೋಯುತ್ತೋ, ಏಸ ರಾಜಪುರೋಹಿತೋ.

ಕಪ್ಪೋ ¶ ಬ್ಯಾಕರಣಂ ಜೋತಿ – ಸತ್ಥಂ ಸಿಕ್ಖಾ ನಿರುತ್ತಿ ಚ;

ಛನ್ದೋವಿಚಿತಿ ಚೇತಾನಿ, ವೇದಙ್ಗಾನಿ ವದನ್ತಿ ಛ.

ಸಕಿಂ ವುತ್ತಗಹಿತತ್ತೋ, ಲಹುಹತ್ಥೋ ಜಿತಕ್ಖರೋ;

ಸಬ್ಬಸತ್ಥಸಮಾಲೋಕೀ, ಪಕಟ್ಠೋ ನಾಮ ಲೇಖಕೋ.

ಸಮತ್ತನೀತಿಸತ್ಥಞ್ಞೋ ¶ , ವಾಹನೇ ಪೂರಿತಸ್ಸಮೋ;

ಸೂರವೀರಗುಣೋಪೇತೋ, ಸೇನಾಝಕ್ಖೋ ವಿಧೀಯತೇ.

ಸುಧೀ ವಾಕ್ಯಪಟು, ಪಞ್ಞೋ, ಪರಚಿತ್ತೋಪಲಕ್ಖಣೋ;

ಧೀರೋ ಯಥಾತ್ಥವಾದೀ ಚ, ಏಸ ದೂತೋ ವಿಧೀಯತೇ.

ಪುತ್ತನತ್ತಗುಣೋಪೇತೋ, ಸತ್ಥಞ್ಞೋ ರಸಪಾಚಕೋ;

ಸೂರೋ ಚ ಕಥಿನೋ ಚೇವ, ಸೂಪಕಾರೋ ಸ ವುಚ್ಚತೇ.

ಇಙ್ಗಿತಾಕಾರತತ್ತಞ್ಞೋ, ಬಲವಾಪಿಯದಸ್ಸನೋ;

ಅಪ್ಪಮಾದೀ ಸದಾ ದಕ್ಖೋ, ಪತೀಹಾರೋ ಸ ಉಚ್ಚತೇ.

ಇತ್ಥಿಮಿಸ್ಸೇ ಕುತೋ ಸೀಲಂ, ಮಂಸಭಕ್ಖೇ ಕುತೋ ದಯಾ;

ಸುರಾಪಾನೇ ಕುತೋ ಸಚ್ಚಂ, ಮಹಾಲೋಭೇ ಕುತೋ ಲಜ್ಜಾ;

ಮಹಾತನ್ದೇ ಕುತೋ ಸಿಪ್ಪಂ, ಮಹಾಕೋಧೇ ಕುತೋ ಧನಂ.

ಸುರಾಯೋಗೋ ವೇಲಾಲೋ ಚ, ಸಮಜ್ಜಚರಣಙ್ಗತೋ;

ಖಿಡ್ಡಾ ಧುತ್ತೋ ಪಾಪಮಿತ್ತೋ, ಅಲಸೋ ಭೋಗನಾಸಕಾ.

ಜೀವನ್ತಾಪಿ ¶ ಮತಾ ಪಞ್ಚ, ಬ್ಯಾಸೇನ ಪರಿಕಿತ್ತಿತಾ;

ದುಕ್ಖಿತೋ ಬ್ಯಾಧಿತಿ ಮೂಳ್ಹೋ, ಇಣವಾ ನಿಚ್ಚಸೇವಕೋ.

ನಿದ್ದಾಲುಕೋ ¶ ಪಮಾದೋ ಚ, ಸುಖಿತೋ ರೋಗವಾಲಸೋ;

ಕಾಮುಕೋ ಕಮ್ಮಾರಾಮೋ ಚ, ಸತ್ತೇತೇ ಸತ್ಥವಜ್ಜಿತಾ.

ಗೋಣಾಹಿ ಸಬ್ಬಗಿಹೀನಂ, ಪೋಸಕಾ ಭೋಗದಾಯಕೋ;

ತಸ್ಮಾ ಹಿ ಮಾತಾಪಿತೂವ, ಮಾನಯೇ ಸಕ್ಕರೇಯ್ಯ ಚ.

ಯಥಾ ¶ ಮಾತಾ ಪಿತಾ ಭಾತಾ, ಅಞ್ಞೇವಾಪಿ ಚ ಞಾತಕಾ;

ಗಾವೋ ನೋ ಪರಮಾ ಮಿತ್ತಾ, ಯಾಸು ಜಾಯನ್ತಿ ಓಸಧಾ.

ಅನ್ನದಾ ¶ ಬಲದಾ ಚೇತಾ, ವಣ್ಣದಾ ಸುಖದಾ ತಥಾ;

ಏತಮತ್ಥವಸಂ ಞತ್ವಾ, ನಾಸು ಗಾವೋ ಹನಿಂಸು ತೇ.

ಯೇ ಚ ಖಾದನ್ತಿ ಗೋಮಂಸಂ, ಮಾತುಮಂಸಂವ ಖಾದರೇ;

ಮತೇಸು ತೇಸು ಗಿಜ್ಝಾನಂ, ದದೇ ಸೋತೇ ಚ ವಾಹಯೇ.

ದ್ವಿಗುಣೋ ¶ ಥೀನಮಾಹಾರೋ, ಬುದ್ಧಿಚಾಪಿ ಚತುಗ್ಗುಣೋ;

ಛಗ್ಗುಣೋ ಹೋತಿ ವಾಯಾಮೋ, ಕಾಮೋತ್ವಟ್ಠಗುಣೋ ಭವೇ.

ನ ¶ ಲೋಕೇ ಸೋಭತೇ ಮೂಳ್ಹೋ, ಕೇವಲತ್ತಪಸಂಸಕೋ;

ಅಪಿ ಸಮ್ಪಿಹಿತೇ ಕೂಪೇ, ಕತವಿಜ್ಜೋ ಪಕಾಸತೇ.

ಕೋಸಜ್ಜಂ ಭಯತೋ ದಿಸ್ವಾ, ವೀರಿಯಾರಮ್ಭಞ್ಚ ಖೇಮತೋ;

ಆರದ್ಧವೀರಿಯಾ ಹೋಥ, ಏಸಾ ಬುದ್ಧಾನುಸಾಸನೀ.

ವಿವಾದಂ ¶ ಭಯತೋ ದಿಸ್ವಾ, ಅವಿವಾದಞ್ಚ ಖೇಮತೋ;

ಸಮಗ್ಗಾ ಸಖಿಲಾ ಹೋಥ, ಏಸಾ ಬುದ್ಧಾನುಸಾಸನೀ.

ಪಮಾದಂ ಭಯತೋ ದಿಸ್ವಾ, ಅಪ್ಪಮಾದಞ್ಚ ಖೇಮತೋ;

ಭಾವೇಥಟ್ಠಙ್ಗಿಕಂ ಮಗ್ಗಂ, ಏಸಾ ಬುದ್ಧಾನುಸಾಸನೀ.

ಗರಹಾ ¶ ಚ ಪಸಂಸಾ ಚ, ಅನಿಚ್ಚಾ ತಾವಕಾಲಿಕಾ;

ಅಪ್ಪಕಾಚೇಕದೇಸಾವ, ನ ತಾ ಇಕ್ಖೇಯ್ಯ ಪಣ್ಡಿತೋ;

ಧಮ್ಮಾಧಮ್ಮಂವ ಇಕ್ಖೇಯ್ಯ, ಅತ್ಥಾನತ್ಥಂ ಹಿತಾಹಿತಂ.

ಪಖುಕ್ಕೂಪುರಸೇಟ್ಠಸ್ಸ ¶ , ಪಚ್ಛಿಮೇ ಆಸಿ ವಿಸ್ಸುತೋ;

ಚತುಗಾವುತದೇಸಮ್ಹೀ, ಕನರಯಗಾಮೋ ಸುಸೋಭನೋ.

ದ್ವಿನೋ ¶ ದ್ವಿವೇಕ ಸಾಕಮ್ಹಿ, ತಮ್ಹಿ ಜಾತೇನ ಜಾತಿಯಾ;

ಲಙ್ಕಾಭಾರತಆದೀಸು, ವುಟ್ಠಪುಬ್ಬ ಸುತೇಸಿನಾ.

ವಿಸುತಾರಾಮ ಸೀಹಾನಂ, ಸಿಕ್ಖಿತೇನ ತಿಪೇಟಕಂ;

ಸನ್ತಿಕೇ ನವವಸ್ಸಾನಿ, ಸಂಗೀತಿಕಿಚ್ಚಕಾರಿನಾ.

ದಕ್ಖಿಣಾರಾಮ ವಾಸೀನಂ, ಸನ್ತಿಕೇಪಿ ಸುವಿಞ್ಞುನಂ;

ಸಿಕ್ಖಿತೇನ ಸತ್ತವೀಸ-ವಸ್ಸಿತ್ವಾನ ಯಸಸ್ಸಿನಾ.

ಸುನ್ದರೇ ¶ ಪುರಸೇಟ್ಠಮ್ಹಿ, ಸುನ್ದರೇ ವಿಸುತೇ ಸುಭೇ;

ಸುನ್ದರೇ ಜೋತಿಪಾಲಮ್ಹಿ, ವಸತಾ ಗಣವಾಚಿನಾ.

ನಿಸ್ಸಾಯ ಪೇಟಕೇ ಚೇವ, ಅನೇಕನೀತಿ ಪೋತ್ಥಕೇ;

ಬಹುಲೇ ಗನ್ಥಸೇಟ್ಠೇಪಿ, ಕತೋಯಂ ವಿಧುಮಾನಿತೋ.

ತಿಟ್ಠತಂ ¶ ಅಯಂ ಮೇ ಗನ್ಥೋ, ಸುಸಾರೋ ಯಾವ ಸಾಸನಂ;

ತಿಟ್ಠತೇವ ಸುತೇಸೀನಂ, ಸುಸಾರಂ ಸುಪಕಾಸಯಂ.

ಅನೇನ ಸುವಿಸಿಟ್ಠೇನ, ಪುಞ್ಞೇನಞ್ಞೇನ ಕಮ್ಮುನಾ;

ಮನಿಸಿಭಿಗುರೂಹೇವ, ಗಚ್ಛೇಯ್ಯಂ ಅಮತಂ ಸಿವಂ.

‘‘ಅಙ್ಗಾರಿನೋ ¶ ದಾನಿ ದುಮಾ ಭದನ್ತೇ’’

‘‘ಯಥಾಪಿ ರಮ್ಮಕೋ ಮಾಸೋ, ಗಿಮ್ಹಾನಂ ಹೋತಿ ಬ್ರಾಹ್ಮಣ;

ಅತೇ‘ವ’ಞ್ಞೇಹಿ ಮಾಸೇಹಿ, ದುಮಪುಮ್ಫೇಹಿ ಸೋಭತಿ’’.

‘‘ವನಪ್ಪಗುಮ್ಬೇ ¶ ಯಥಫುಸ್ಸಿತಗ್ಗೇ,

ಗಿಮ್ಹಾನ ಮಾಸೇ ಪಠಮಸ್ಮಿಂ ಗಿಮ್ಹೇ’’ –

ನಮೋ ತಸ್ಸ ಭಗವತೋ ಅರಹತೋ ಸಮ್ಬಾಸಮ್ಬುದ್ಧಸ್ಸ

ವತ್ಥುತ್ತಯಂ ¶ ನಮಸಿತ್ವಾ, ಆಚೇರೇ ಕವಿಪುಙ್ಗವೇ;

ಕಸ್ಸಂ ದ್ವಾದಸಮಾಸಾನಂ, ಬನ್ಧಂ ತಮ್ಮಾಸವಸಿಕಂ.

ಚಿತ್ತಸಮ್ಮತಮಾಸೋ ¶ ಹಿ, ಅತೇವಞ್ಞೇಹಿ ಸೋಭತಿ;

ರಮ್ಮಕಮಾಸೋ ರಮ್ಮಮಾಸೋ, ತೇನೇವ ವೋಹಾರೋ ಭವಿ.

ತಸ್ಮಿಂ ಸುಚಿತ್ತಮಾಸಮ್ಹಿ, ನಾಗದುಮಾ ಸುಪುಪ್ಫರೇ;

ಪುಪ್ಫನ್ತಿ ಅಸನದುಮಾ, ವಾಯನ್ತಿ ಕಾನನೇ ಹಿ ವೇ.

ಸಙ್ಕನ್ತ ಮಹುಸ್ಸವೋಪಿ, ತಮ್ಹಿ ಮಾಸಮ್ಹಿ ವತ್ತತೇ;

ಗನ್ಧೋದಕೇಹಿ ಅಞ್ಞೋಞ್ಞಂ, ಸಿಞ್ಚಮಾನಾ ಸುಮೋದರೇ.

ಯಥಾಪಿ ¶ ರಮ್ಮಕೋ ಮಾಸೋ, ಗಿಮ್ಹಾನಂ ಹೋತಿ ಬ್ರಾಹ್ಮಣ;

ಅತೇ‘ವ’ಞ್ಞೇಹಿ ಮಾಸೇಹಿ, ದುಮಪುಪ್ಫೇಹಿ ಸೋಭತಿ.

ಸಮ್ಬುದ್ಧೋ ಚಿತ್ತಮಾಸಸ್ಸ, ಕಾಳಪಕ್ಖೇ ಉಪೋಸಥೇ;

ಪಾತೋಯೇವ ಸಮಾದಾಯ, ಪವರಂ ಪತ್ತಚೀವರಂ;

ಅನುಕಮ್ಪಾಯ ನಾಗಾನಂ, ನಾಗದೀಪಮುಪಾಗಮಿ.

ವೇಸಾಖವ್ಹಯಮಾಸೋ ತು, ಸುವಿಸಿಟ್ಠೋ ಸುಪಾಕಟೋ;

ಲೋಕಗ್ಗನಾಥಂ ಪಟಿಚ್ಚ, ಸನ್ತೇಹಿ ಅಭಿಲಕ್ಖಿತೋ.

ತಮ್ಹಿ ¶ ವೇಸಾಖಮಾಸಮ್ಹಿ, ಚಮ್ಪಕಾಪಿ ಸುಪುಪ್ಫರೇ;

ಬೋಧಿಂ ದಕೇಹಿ ಸಿಞ್ಚಿತ್ವಾ, ಸಜ್ಜನಾ ಸಮ್ಪಮೋದರೇ.

ವನೇಸುವ ಪೋತಕಾಪಿ, ಪಕ್ಖನ್ದನ್ತಿ ದಿಸೋದಿಸಂ;

ವಿಕೂಜನ್ತಾ ಸಭಾಸಾಯ, ಜನಸೋತರಸಾಯನಂ.

ದುತಿಯೇ ¶ ದಿವಸೇ ಭತ್ತ-ಕಾಲೇ ಆರೋಚಿತೇ ಜಿನೋ;

ರಮ್ಮೇ ವೇಸಾಖಮಾಸಮ್ಹಿ, ಪುಣ್ಣಾಮಾಯಂ ಮುನಿಸ್ಸರೋ.

ಜೇಟ್ಠಸಮ್ಮತಮಾಸೋಪಿ, ಸೋಗತಜನಬ್ಭನ್ತರೇ;

ವಿಖ್ಯಾತೋ ಲಕ್ಖಞ್ಞೋ ಚೇವ, ಜೇಟ್ಠೇನ ಸಂಯುತೋ ಹಿ ವೇ.

ತಸ್ಮಿಂಹಿ ಜೇಟ್ಠಮಾಸಮ್ಹಿ, ಸುಮನಾ ವನಮಲ್ಲಿಕಾ;

ಪುಪ್ಫನ್ತಿ ಚ ಪವಾಯನ್ತಿ, ಸಬ್ಬಜನಮನೋಹರಾ.

ಪರಿಕ್ಖಣಾಸುಸಭಾಪಿ, ಅಭವಿ ಮ್ರನಮಾಮಣ್ಡಲೇ;

ಖೇತಲೇ ಜೇಟ್ಠಜೋತಿಪಿ, ಪಜ್ಜಲಿ ತಸ್ಮಿಞ್ಹಿ ವೇ.

ಆಸಾಳ್ಹೋ ನಾಮ ಮಾಸೋಪಿ, ಅತೀವ ವಿಸಿಟ್ಠೋ ಭವಿ;

ಪಟಿಸನ್ಧಿಂ ಗಣ್ಹಿ ಬುದ್ಧೋ, ತಸ್ಮಿಞ್ಹಿ ಮುನಿ ಸುಧೀ.

ನಿಕ್ಖಮಿಪಿ ಚ ಸಮ್ಬುದ್ಧೋ, ಧಮ್ಮಚಕ್ಕಂ ಪವತ್ತಯಿ;

ಉಪಸಮ್ಪದಕಮ್ಮಮ್ಪಿ, ಕರೋನ್ತಿ ತಸ್ಮಿಂಪಿ ಹಿ.

ಪುನ್ನಾಗದುಮಾ ಪುಪ್ಫನ್ತಿ, ಪವಾಯನ್ತಿ ದಿಸೋದಿಸಂ;

ಆದಿಚ್ಚೋ ತಿಟ್ಠತಿ ತಮ್ಹಿ, ಉತ್ತರಾಯಾನಕೋಟಿಯಂ.

ಸೀಹೇ ¶ ಸಾವಣಮಾಸಮ್ಹಿ, ಸಲಾಕದಾನಮುತ್ತಮಂ;

ದೇನ್ತಿ ಸಾಧವೋ ಮಾನುಸಾ, ಸದ್ದಹನ್ತಾ ವತ್ಥುತ್ತಯಂ.

ಪುಪ್ಫನ್ತಿ ಕಟೇರುಹಾಪಿ, ತಮ್ಹಿ ಸಾವಣಮಾಸಕೇ;

ಖೇ ಸವಣನಕ್ಖತ್ತಮ್ಪಿ, ಅತೀವ ಜೋತಯೀ ಹಿ ವೇ.

ವಸ್ಸಬ್ಭನ್ತರಭೂತೇ ಚ, ಸಮಣಾ ಸುಗತೋರಸಾ;

ಮಾಸೇ ವಾಚನಉಗ್ಗಣ್ಹ-ಕಮ್ಮಂಕಂಸು ಸುಖಾಸಯಾ.

ಕಞ್ಞಾರಾಸಿಸಮ್ಮತೇಹಿ ¶ , ಪೋಟ್ಠಪಾದಸುಮಾಸಕೇ;

ನದೀಸು ದಕಪೂರಿತಾ, ಕಟಪತ್ಥತಸಾದಿಸಾ.

ನಾವಾಮಹಾಉಸ್ಸವಮ್ಪಿ, ಕರೋನ್ತಿ ಮಾನುಜಾ ತದಾ;

ಕೀಳನ್ತಿ ಸಮ್ಪಮೋದನ್ತಿ, ವಿಜಿತೇ ನರ ನಾರಿಯೋ.

ಕಞ್ಚನಯಮದುಮಾಪಿ, ವಿಕಸನ್ತಿ ತದಾ ಹಿ ವೇ;

ಮೇಘೋ ಥೋಕಂ ಥೋಕಂ ಹಿಮಂ, ವಸ್ಸತಿ ಪತತಿಪಿ ಚ.

ವಸ್ಸಿಕೇ ¶ ಅಸ್ಸಯುಜಿಮ್ಹಿ, ವಿಕಸನ್ತಿ ಅನೇಕಧಾ;

ಪದುಮಾದಿದಕಜಾನಿ, ಪುಪ್ಫಾನಿ ಮನುಞ್ಞಾನಿ ವೇ.

ಮಹಾಪದೀಪಪನ್ತೀಹಿ, ಸಕಲಮ್ರನಮಾಭೂತಲೇ;

ಪೂಜೇನ್ತಿ ಲೋಕಗ್ಗನಾಥಂ, ಸಾಧವೋ ಸೋಗತಾಜನಾ.

ತಪೋಧನಾ ವಿಚರನ್ತಿ, ವಸ್ಸಂವುಟ್ಠಾ ದಿಸೋದಿಸಂ;

ಸಾಧವೋ ದಾನಸೋಣ್ಡಾವ, ಸೀತಾಯನ್ತಿ ಸುಖನ್ತಿ ಚ.

ಕತ್ತಿಕಮಾಸಸೇಟ್ಠೇಪಿ ¶ , ಸಮ್ಪಮೋದನ್ತಿ ಮಾನುಜಾ;

ಕೋಸೀತಕೀಪುಪ್ಫಾನಿ ಚ, ವಿಕಸನ್ತಿ ವಾಯನ್ತಿ ಚ.

ಕಥಿನಮಹಾದಾನಮ್ಪಿ, ದದನ್ತಿ ಸಾಧವೋ ಜನಾ;

ತದಾ ಚನ್ದಕಿರಣೋಪಿ, ಅತೀವ ಪಜ್ಜೋತೋ ಅಹು.

ಅಹೋಸಿ ಹಿಮಪಾತೋ ಚ, ಉತ್ತರವಾತೋ ಪವಾಯತಿ;

ಕತ್ತಿಕಜೋತಿಛಣೋಪಿ, ಅಹೋಸಿ ತಸ್ಮಿಞ್ಹಿ ವೇ.

ಧನುರಾಸೀಮಾಗಸಿರ ¶ , ಮಾಸೇ ಹೇಮನ್ತಸಮ್ಮತೇ;

ಸತ್ತಿಧರಸುಪೂಜಾವ್ಹ, ಸಭಾಪಿ ಸಮ್ಪವತ್ತಿತಾ.

ದೇವಸಮ್ಮತಪುಪ್ಫಾನಿ, ಮನುಞ್ಞರುಚಿರಾನಿಪಿ;

ಪುಪ್ಫನ್ತಿ ತಮ್ಹಿ ಮಾಸಮ್ಹಿ, ಹಿಮಪಾತೋ ಅಹೋಸಿ ಚ.

ವೀಹಯೋ ಹೋನ್ತಿ ಪಕ್ಕಾ ಚ, ಖೇತ್ತೇಸು ಮ್ರನಮಾಭೂತಲೇ;

ಮಿಗಸಿರನಕ್ಖತ್ತಮ್ಪಿ, ಜೋತೇತಿ ಆಕಾಸಙ್ಗಣೇ.

ಮಕಾರೇ ¶ ಫುಸ್ಸಮಾಸೇಪಿ, ಪುಪ್ಫನ್ತಿ ಪವಾಯನ್ತಿ ಚ;

ಸುನೀಲವಲ್ಲಿಪುಪ್ಫಾನಿ, ಜನಮನೋಹರಾನಿಪಿ.

ಸೇನಾಬ್ಯೂಹಮ್ಪಿ ¶ ಕರೋನ್ತಿ, ಭೂಪಾಲಾ ಮ್ರನಮಾರಟ್ಠಿಕಾ;

ಸಪರಿಸಾ ಉದಿಕ್ಖನ್ತಿ, ಹತ್ಥಿಅಸ್ಸಾದಿಆದಯೋ.

ತಮ್ಹಿಸೀ ಅತಿಸೀತಲಮ್ಪಿ, ದಕ್ಖಿಣಾಯನಕೋಟಿಯಂ;

ಅಟ್ಠಾಪುಣ್ಣಮದಿನಮ್ಹಿ, ಸೂರಿಯೋ ಲೋಕಮಾನಿತೋ.

ಬೋಧಿತೋ ನವಮೇ ಮಾಸೇ, ಫುಸ್ಸಪುಣ್ಣಮಿಯಂ ಜಿನೋ;

ಲಂಕಾದೀಪಂ ವಿಸೋಧೇತುಂ, ಲಙ್ಕಾದೀಪಮುಪಾಗಮಿ.

ಕುಮ್ಭೇಸು ¶ ಮಾಘಮಾಸೇಹಿ, ತೂಲದುಮಾ ಸುಪುಪ್ಫರೇ;

ಪುಮ್ತಾಲಾ ಮಧುರರಸಂ, ಮಾನುಜಾನಂ ದದನ್ತಿ ಚ.

ಯಾಗುಮಹಾಉಸ್ಸವೋಪಿ, ಪಾಕಟೋ ಮ್ರನಮಾಭೂತಲೇ;

ಅವಸೇಸಸು ಮೇಘೋಪಿ, ಥನಯಂ ಅಭಿವಸ್ಸತಿ.

ನರನಾರೀ ಮನುಞ್ಞಾನಿ, ಪದರಾನಿ ಪಣ್ಡಾನಿ ಚ;

ಪುಚಿಮನ್ದದುಮಾ ನವ-ಪತ್ತಾನಿ ಧಾರೇನ್ತಿಪಿ ಚ.

ಮಿನೇ ¶ ಫಗ್ಗುಣಮಾಸಮ್ಹಿ, ಸುರಭಿಗನ್ಧಿಕಾ ಸುಭಾ;

ಪುಪ್ಫನ್ತಿ ವನಮ್ಹಿ ದುಮಾ, ನವಪತ್ತೇಹಿ ಸೋಭರೇ.

ದಕ್ಖಿಣದೇಸತೋ ತಮ್ಹಿ, ವಾತೋ ಪವಾಯತಿ ಹಿ ವೇ;

ವಾಳುಕಪಿಟ್ಠೇ ವಾಲುಕ-ಥೂಪೇ ಕತ್ವಾನ ಪೂಜಯ್ಯುಂ.

ಪಥಮಗಿಮ್ಹ ಮಾಸಮ್ಹಿ, ನಾನಾದುಮಾತಿ ಪುಪ್ಫರೇ;

ತೇನ ಸಬ್ಬಮ್ಪಿ ವಿಪಿನಂ, ವಿಚಿತ್ತಂ ದಸ್ಸನಿಯಞ್ಹಿ ವೇ.

ವಿಸುತೇ ಜೋತಿಪಾಲಮ್ಹಿ, ವಿಸುತಮ್ಹಿ ನಿಕೇತನೇ;

ವಸತಾ ನೇಕಗನ್ಥಾನಂ, ಲೇಖಕೇನ ಕತೋ ಅಯಂ.