📜

ನಮೋ ತಸ್ಸ ಭಗವತೋ ಅರಹತೋ ಸಮ್ಮಾಸಮ್ಬುದ್ಧಸ್ಸ

ಸುತ್ತನ್ತನೀತಿ

೧.

ಪರಾ ಭವನ್ತಂ ಪುರಿಸಂ,

ಮಯಂ ಪುಚ್ಛಾಮ ಗೋತಮಂ;

ಭವನ್ತಂ ಪುಟ್ಠು ಮಾಗಮ್ಮ,

ಕಿಂ ಪರಾಭವತೋ ಮುಖಂ.

೨.

ಸುವಿಜಾನೋ ಭವಂಹೋತಿ,

ದುವಿಜಾನೋ ಪರಾಭವೋ;

ಧಮ್ಮಕಾಮೋ ಭವಂ ಹೋತಿ,

ಧಮ್ಮದೇಸ್ಸೀ ಪರಾಭವೋ.

೩.

ಇತಿಹೇ ತಂ ವಿಜಾನಾಮ,

ಪಥಮೋ ಸೋ ಪರಾಭವೋ;

ದುತೀಯಂ ಭಗವಾ ಬ್ರೂಹಿ,

ಕಿಂ ಪರಾಭವತೋ ಮುಖಂ.

೪.

ಅಸನ್ತಸ್ಸ ಪಿಯೋ ಹೋತಿ,

ಸನ್ತೇ ನ ಕುರುತೇ ಪಿಯಂ;

ಅಸತಂ ಧಮ್ಮಂ ರೋಚೇತಿ,

ತಂ ಪರಾಭವತೋ ಮುಖಂ.

ಕಮ್ಮಾಪರಾಧಸತ್ತಾನಂ,

ವಿನಾಸೇ ಪಚ್ಚುಪಟ್ಠಿತೇ;

ಅನಯೋ ನಯರೂಪೇನ,

ಬುದ್ಧಿಮಾಕಮ್ಯ ತಿಟ್ಠತಿ.

೫.

ನಿದ್ದಾಸೀಲೀ ಸಭಾಸೀಲೀ,

ಅನುಟ್ಠಾತಾ ಚ ಯೋ ನರೋ;

ಅಲಸೋ ಕೋಧಪಞ್ಞಾಣೋ,

ತಂ ಪರಾಭವತೋ ಮುಖಂ.

೬.

ಯೋ ಮಾತರಂ ಪಿತರಂ ವಾ,

ಜಿಣ್ಣಕಂ ಗತಯೋಬ್ಬನಂ;

ಪಹುಸನ್ತೋ ನ ಭರತಿ,

ತಂ ಪರಾಭವತೋ ಮುಖಂ.

೭.

ಯೋ ಬ್ರಾಹ್ಮಣಂ ಸಮಣಂ ವಾ,

ಅಞ್ಞಂ ವಾಪಿ ವಣಿಬ್ಬಕಂ;

ಮುಸಾವಾದೇನ ವಞ್ಚೇತಿ,

ತಂ ಪರಾಭವತೋ ಮುಖಂ.

೮.

ಪಹುತವಿತ್ತೋ ಪುರಿಸೋ,

ಸಹಿರಞ್ಞೋ ಸಭೋಜನೋ;

ಏಕೋ ಭುಞ್ಜತಿ ಸಾದೂನಿ,

ತಂ ಪರಾಭವತೋ ಮುಖಂ.

೯.

ಜಾತಿಥದ್ಧೋ ಧನಥದ್ಧೋ,

ಗೋತ್ತಥದ್ಧೋ ಚ ಯೋ ನರೋ;

ಸಞಾತಿಂ ಅತಿಮಞ್ಞೇತಿ,

ತಂ ಪರಾಭವತೋ ಮುಖಂ.

೧೦.

ಇತ್ಥಿಧುತ್ತೋ ಸುರಾಧುತ್ತೋ,

ಅಕ್ಖಧುತ್ತೋ ಚ ಯೋ ನರೋ;

ಲದ್ಧಂಲದ್ಧಂ ವಿನಾಸೇತಿ,

ತಂ ಪರಾಭವತೋ ಮುಖಂ.

ನ ಬಾಳ್ಹಂ ಇತ್ಥಿಂ ಗಚ್ಛೇಯ್ಯ,

ಸಮ್ಪಸ್ಸಂ ತೇಜಸಙ್ಖಯಂ;

ಕಾಸಂ ಸಾಸಂ ದರಂ ಬಾಲ್ಯಂ,

ಖೀಣಮೇದೋ ನಿಗಚ್ಛತಿ.

(ಕ)

ಮಾಯಾಚೇತಾ ಮರೀಚೀ ಚ,

ಸೋಕೋ ರೋಗೋ ಉಪದ್ದವೋ;

ಖರಾ ಚ ಬನ್ಧನಾಚೇತಾ,

ಮಚ್ಚುಪಾಸೋ ಗುಹಾಸಯೋ.

(ಖ)

ಬಲವನ್ತೋ ದುಬ್ಬಲಾ ಹೋನ್ತಿ,

ಥಾಮವನ್ತೋಪಿ ಹಾಯರೇ;

ಚಕ್ಖುಮಾ ಅನ್ಧಕಾ ಹೋನ್ತಿ,

ಮಾತುಗಾಮವಸಂಗತಾ.

(ಗ)

ಗುಣವನ್ತೋ ನಿಗ್ಗುಣಾ ಹೋನ್ತಿ,

ಪಞ್ಞವನ್ತೋಪಿ ಹಾಯರೇ;

ಪಮುತ್ತಾ ಬನ್ಧನಾ ಸೇನ್ತಿ,

ಮಾತುಗಾಮವಸಂಗತಾ.

(ಘ)

ಯಸಂ ಕಿತ್ತಿಂ ಧಿತಿಂ ಸೂರಂ;

ಬಾಹುಸ್ಸಚ್ಚಂ ಪಜಾನನಂ;

ಹಾಪಯನ್ತಿ ಪಮತ್ತಸ್ಸ;

ಕಟ್ಠಪುಞ್ಚಂವ ಪಾವಕೋ.

೧೧.

ಸೇಹಿ ದಾರೇಹಿ ಸನ್ತುಟ್ಠೋ,

ವೇಸಿಯಾಸು ಪದುಸ್ಸತಿ;

ದುಸ್ಸತಿ ಪರದಾರೇಸು,

ತಂ ಪರಾಭವತೋ ಮುಖಂ.

(ಕ)

ಮಯಞ್ಚ ಭರಿಯಂ ನಾತಿಕ್ಕಮಾಮ,

ಅಮ್ಹೇಚ ಭರಿಯಾ ನಾತಿಕ್ಕಮನ್ತಿ;

ಅಞ್ಞತ್ರ ತಾಹಿ ಬ್ರಹ್ಮಚರಿಯಂ ಚರಾಮ,

ತಸ್ಮಾ ಹಿ ಅಮ್ಹಂ ದಹರಾ ನ ಮಿಯ್ಯರೇ.

(ಖ)

ಏತಾಸು ಜಾಯರೇ ಸುತ್ತಮಾಸು,

ಮೇಧಾವಿನೋ ಹೋನ್ತಿ ಪಹುತಪಞ್ಞಾ;

ಬಹುಸ್ಸುತಾ ಥೇರಗುಣಾ ಚ ಹೋನ್ತಿ,

ತಸ್ಮಾ ಹಿ ಅಮ್ಹಂ ದಹರಾ ನ ಮಿಯ್ಯರೇ.

೧೨.

ಅತೀತಯೋಬ್ಬನೋ ಪೋಸೋ,

ಆನೇತಿ ತಿಮ್ಬರುತ್ಥನಿಂ;

ತಸ್ಸ ಇಸ್ಸಾ ನ ಸುಪತಿ,

ತಂ ಪರಾಭವತೋ ಮುಖಂ.

(ಕ)

ನ ದುಕ್ಖಂ ಅಹಿನಾ ದಟ್ಠಂ,

ನ ದುಕ್ಖಂ ಸತ್ತಿಯಾ ಹತಂ;

ತಞ್ಚ ದುಕ್ಖಞ್ಚ ತಿಬ್ಬಞ್ಚ,

ಯಂ ಪಸ್ಸೇ ಜಿಣ್ಣಕಂ ಪತಿಂ.

(ಖ)

ನತ್ಥಿ ಖಿಟ್ಟಾ ನತ್ಥಿ ರತಿ,

ಜಿಣ್ಣೇನ ಪತಿನಾ ಸಹ;

ನತ್ಥಿ ಅಲ್ಲಾಪಸಲ್ಲಾಪೋ,

ಜಗ್ಘಿತುಂಪಿ ನ ಸೋಭತಿ.

(ಗ)

ಯದಾ ಚ ದಹರೋ ದಹರೀ,

ಮನ್ತಯಿಂಸು ರಹೋಗತಾ;

ಸಬ್ಬೇ ಸೋಕಾ ವಿನಸ್ಸನ್ತಿ,

ಯೇಕೇಚಿ ಹದಯಸ್ಸಿತಾ.

೧೩.

ಇತ್ಥಿಂ ಸೋಣ್ಡಿಂ ವಿಕಿರಣಿಂ,

ಪುರಿಸಂ ವಾಪಿ ತಾದಿಸಂ;

ಇಸ್ಸರಿಯಸ್ಮಿಂ ಥಪೇತಿ,

ತಂ ಪರಾಭವತೋ ಮುಖಂ.

೧೪.

ಅಪ್ಪಭೋಗೋ ಮಹಾತಣ್ಹೋ,

ಖತ್ತಿಯೇ ಜಾಯತೇ ಕುಲೇ;

ಸೋ ಚ ರಜ್ಜಂ ಪತ್ಥಯತಿ,

ತಂ ಪರಾಭವತೋ ಮುಖಂ.

‘‘ಸುವಿಜಾನೋ ಭವಂಹೋತಿ,

ದುವಿಜಾನೋ ಪರಾಭವೋ’’;

ಅಪ್ಪಭೋಗೋ ಮಹಾತಣ್ಹೋ.

೧೫.

ಏತೇ ಪರಾಭವೇ ಲೋಕೇ,

ಪಣ್ಡಿತೋ ಸಮವೇಕ್ಖಿಯ;

ಅರಿಯೋ ದಸ್ಸನಸಮ್ಪನ್ನೋ,

ಸ ಲೋಕಂ ಭಜತೇ ಸಿವಂ.

ವಸಲಸುತ್ತ

೧.

ಕೋಧನೋ ಉಪನಾಹೀಚ,

ಪಾಪಮಕ್ಖೀ ಚ ಯೋ ನರೋ;

ವಿಪನ್ನದಿಟ್ಠೀ ಮಾಯಾವೀ,

ತಂ ಜಞ್ಞಾ ವಸಲೋ ಇತಿ.

೨.

ಏಕಜಂ ವಾ ದ್ವಿಜಂ ವಾಪಿ,

ಯೋಧ ಪಾಣಂ ವಿಹಿಂಸತಿ;

ಯಸ್ಸ ಪಾಣೇ ದಯಾ ನತ್ಥಿ,

ತಂ ಜಞ್ಞಾ ವಸಲೋ ಇತಿ.

೩.

ಯೋ ಹನ್ತಿ ಉಪರುನ್ಧತಿ,

ಗಾಮಾನಿ ನಿಗಮಾನಿ ಚ;

ನಿಗ್ಗಾಹಕೋ ಸಮಞ್ಞಾತೋ,

ತಂ ಜಞ್ಞಾ ವಸಲೋ ಇತಿ.

೪.

ಗಾಮೇ ವಾ ಯದಿ ವಾ ರಞ್ಞೇ,

ಯಂ ಪರೇಸಂ ಮಮಾಯಿತಂ;

ಥೇಯ್ಯಾ ಅದಿನ್ನಂ ಆದೇತಿ,

ತಂ ಜಞ್ಞಾ ವಸಲೋ ಇತಿ.

೫.

ಯೋ ಹವೇ ಇಣಮಾದಾಯ,

ವುಚ್ಚಮಾನೋ ಪಲಾಯತಿ;

ನ ಹಿ ತೇ ಇಣಮತ್ಥೀತಿ,

ತಂ ಜಞ್ಞಾ ವಸಲೋ ಇತಿ.

೬.

ಯೋಧ ಕಿಞ್ಚಿಕ್ಖಕಮ್ಯತಾ,

ಪಥಸ್ಮಿಂ ವಜತಂ ಜನಂ;

ಹನ್ತ್ವಾ ಕಿಞ್ಚಿಕ್ಖ ಮಾದೇತಿ;

ತಂ ಜಞ್ಞಾ ವಸಲೋ ಇತಿ.

೭.

ಯೋ ಅತ್ತಹೇತು ಪರಹೇತು,

ಧನಹೇತು ಚ ಯೋ ನರೋ;

ಸಕ್ಖಿಪುಟ್ಠೋ ಮುಸಾಬ್ರೂತಿ,

ತಂ ಜಞ್ಞಾ ವಸಲೋ ಇತಿ.

೮.

ಯೋ ಞಾತೀನಂ ಸಖೀನಂ ವಾ,

ದಾರೇಸು ಪಟಿದಿಸ್ಸತಿ;

ಸಹಸಾ ಸಮ್ಪಿಯೇನ ವಾ,

ತಂ ಜಞ್ಞಾ ವಸಲೋ ಇತಿ.

೯.

ಯೋ ೪ ಮಾತರಂ ಪಿತರಂ ವಾ,

ಜಿಣ್ಣಕಂ ಗತಯೋಬ್ಬನಂ;

ಪಹುಸನ್ತೋ ನ ಭರತಿ,

ತಂ ಜಞ್ಞಾ ವಸಲೋ ಇತಿ.

೧೦.

ಯೋ ಮಾತರಂ ಪಿತರಂ ವಾ,

ಭಾತರಂ ಭಗಿನಿಂ ಸಸ್ಸುಂ;

ಹನ್ತಿ ರೋಸೇತಿ ವಾಚಾಯ,

ತಂ ಜಞ್ಞಾ ವಸಲೋ ಇತಿ.

೧೧.

ಯೋ ಅತ್ಥಂ ಪುಚ್ಛಿತೋ ಸನ್ತೋ,

ಅನತ್ಥ ಮನುಸಾಸತಿ;

ಪಟಿಚ್ಛನ್ನೇನ ಮನ್ತೇತಿ,

ತಂ ಜಞ್ಞಾ ವಸಲೋ ಇತಿ.

೧೨.

ಯೋ ಕತ್ವಾ ಪಾಪಕಂ ಕಮ್ಮಂ,

ಮಾಮಂ ಜಞ್ಞಾತಿ ಇಚ್ಛತಿ;

ಯೋ ಪಟಿಚ್ಛನ್ನಕಮ್ಮನ್ತೋ,

ತಂ ಜಞ್ಞಾ ವಸಲೋ ಇತಿ.

೧೩.

ಯೋ ವೇ ಪರಕುಲಂ ಗನ್ತ್ವಾ,

ಭುತ್ವಾನ ಸುಚಿಭೋಜನಂ;

ಆಗತಂ ನಪ್ಪಟಿಪೂಜೇತಿ,

ತಂ ಜಞ್ಞಾ ವಸಲೋ ಇತಿ.

೧೪.

ಯೋ ಸಮಣಂ ವಾ ಬ್ರಾಹ್ಮಣಂ,

ಅಞ್ಞಂ ವಾಪಿ ವಣಿಬ್ಬಕಂ;

ಮುಸಾವಾದೇನ ವಞ್ಚೇತಿ,

ತಂ ಜಞ್ಞಾ ವಸಲೋ ಇತಿ.

೧೫.

ಯೋ ಸಮಣಂ ವಾ ಬ್ರಾಹ್ಮಣಂ,

ಭತ್ತಕಾಲೇ ಉಪಟ್ಠಿತಂ;

ರೋಸೇತಿ ವಾ ನ ಚ ದೇತಿ,

ತಂ ಜಞ್ಞಾ ವಸಲೋ ಇತಿ.

೧೬.

ಅಸನ್ತಂ ಯೋಧ ಪಬ್ರೂತಿ,

ಮೋಹೇನ ಪಲಿಗುಣ್ಠಿತೋ;

ಕಿಞ್ಚನಂ ನಿಜಿಗೀಸಾನೋ,

ತಂ ಜಞ್ಞಾ ವಸಲೋ ಇತಿ.

೧೭.

ಯೋಚತ್ತಾನಂ ಸಮುಕ್ಕಂಸೇ,

ಪರೇಚ ಮವಜಾನಾತಿ;

ನಿಹೀನೋ ಸೇನ ಮಾನೇನ,

ತಂ ಜಞ್ಞಾ ವಸಲೋ ಇತಿ.

೧೮.

ರೋಸಕೋ ಕದರೀಯೋ ಚ,

ಪಾಪಿಚ್ಛೋ ಮಚ್ಛರೀ ಸಠೋ;

ಅಹಿರೀಕೋ ಅನೋತ್ತಪ್ಪೀ,

ತಂ ಜಞ್ಞಾ ವಸಲೋ ಇತಿ.

೧೯.

ಯೋ ಬುದ್ಧಂ ಪರಿಭಾಸತಿ,

ಅಥವಾ ತಸ್ಸ ಸಾವಕಂ;

ಪರಿಬ್ಬಜಂ ಗಹಟ್ಠಂ ವಾ,

ತಂ ಜಞ್ಞಾ ವಸಲೋ ಇತಿ.

ಅಟ್ಠಹಿ ಭಿಕ್ಖವೇ ಅಙ್ಗೇಹಿ ಸಮ್ಪನ್ನಾಗತಸ್ಸ ಉಪಾಸಕಸ್ಸ ಪತ್ತೋ ನಿಕುಜ್ಜಿತಬ್ಬೋ. ಭಿಕ್ಖೂನಂ ಅಲಾಭಾಯ ಪರಿಸಕ್ಕತಿ, ಭಿಕ್ಖೂನಂ ಅನತ್ಥಾಯ ಪರಿಸಕ್ಕತಿ, ಭಿಕ್ಖೂನಂ ಅನಾವಾಸಾಯ ಪರಿಸಕ್ಕತಿ, ಭಿಕ್ಖೂನಂ ಅಕ್ಕೋಸತಿ ಪರಿಭಾಸತಿ, ಭಿಕ್ಖೂಭಿಕ್ಖೂಹಿ ಭೇದೇತಿ, ಬುದ್ಧಸ್ಸ ಅವಣ್ಣಂ ಭಾಸತಿ, ಧಮ್ಮಸ್ಸ ಅವಣ್ಣಂ ಭಾಸತಿ, ಸಙ್ಘಸ್ಸ ಅವಣ್ಣಂ ಭಾಸತಿ, ಅನುಜಾನಾಮಿ ಭಿಕ್ಖವೇ ಇಮೇಹಿ ಅಟ್ಠಹಿ ಅಙ್ಗೇಹಿ ಸಮ್ಪನ್ನಾಗತಸ್ಸ ಉಪಾಸಕಸ್ಸ ಪತ್ತಂ ನಿಕುಜ್ಜಿತುಂ.

೨೦.

ಯೋ ಅನರಹಂ ಸನ್ತೋ,

ಅರಹಾತಿ ಪಟಿಜಾನಾತಿ;

ಚೋರೋ ಸಬ್ರಹ್ಮಕೇ ಲೋಕೇ,

ತಂ ಜಞ್ಞಾ ವಸಲೋ ಇತಿ.

೨೧.

ಏತೇ ಖೋ ವಸಲಾ ವುತ್ತಾ,

ಮಯಾ ಯೇ ತೇ ಪಕಾಸಿತಾ;

ನ ಜಚ್ಚಾ ವಸಲೋ ಹೋತಿ,

ನ ಜಚ್ಚಾ ಹೋತಿ ಬ್ರಾಹ್ಮಣೋ.

೨೨.

ಕಮ್ಮುನಾ ವಸಲೋ ಹೋತಿ,

ಕಮ್ಮುನಾ ಹೋತಿ ಬ್ರಾಹ್ಮಣೋ.

೨೩.

ತದಮಿನಾಪಿ ಜಾನಾಥ,

ಯಥಾಹೇತಂ ನಿದಸ್ಸನಂ;

ಚಣ್ಡಾಲಪುತ್ತೋ ಸೋಪಾಕೋ,

ಮಾತಙ್ಗೋ ಇತಿ ವಿಸ್ಸುತೋ.

೨೪.

ಸೋ ಯಸಂ ಪರಮಂ ಪತ್ತೋ,

ಮಾತಙ್ಗೋ ಯಂ ಸುದುಲ್ಲಭಂ;

ಆಗಚ್ಛುಂ ತಸ್ಸುಪಟ್ಠಾನಂ,

ಖತ್ತಿಯಾ ಬ್ರಾಹ್ಮಣಾ ಬಹೂ.

೨೫.

ಸೋ ದೇವಯಾನಂ ಅಭಿರುಯ್ಹ,

ವಿರಜಂ ಸೋ ಮಹಾಪಥಂ;

ಕಾಮರಾಗಂ ವಿರಾಜೇತ್ವಾ,

ಬ್ರಹ್ಮಲೋಕೂಪಗೋ ಅಹು.

ಗಿರಿಂ ನಖೇನ ಖಣಸಿ,

ಅಯೋ ದನ್ತೇಭಿ ಖಾದಸಿ;

ಜಾತವೇದಂ ಪದಹಸಿ,

ಯೋ ಇಸಿಂ ಪರಿಭಾಸತಿ.

ಆವೇಲಿತಂ ಪಿಟ್ಠಿತೋ ಉತ್ತಮಙ್ಗಂ,

ಬಾಹುಂ ಪಸಾರೇತಿ ಅಕಮ್ಪಣೇಯ್ಯಂ;

ಸೇತಾನಿ ಅಕ್ಖೀನಿ ಯಥಾ ಮತಸ್ಸ,

ಕೋ ಮೇ ಇಮಂ ಪುತ್ತಮಕಾಸಿ ಏವಂ.