📜

ನಮೋ ತಸ್ಸ ಭಗವತೋ ಅರಹತೋ ಸಮ್ಮಾಸಮ್ಬುದ್ಧಸ್ಸ

ನರದಕ್ಖದೀಪನೀ

ಪಾಲಿತೋ ಯೇವ ಸದ್ಧಮ್ಮೋ,

ಪಾಲಿತೇನ ವರೇನ ಚ;

ಪಾಲಿತೇ ಸುಟ್ಠು ಯಂ ಸೀಲಂ,

ಪಾಲಿತಂ ಧಮ್ಮ-ಸುನ್ದರಂ.

ಸಮ್ಮಾ ಆರದ್ಧಂ ಸಬ್ಬ-ಸಮ್ಪತ್ತೀನಂ,

ಮೂಲಂ ಹೋತೀತಿ ದಟ್ಠಬ್ಬಂ.

ವೀರಿಯಾರಬ್ಭೋ ಭಿಕ್ಖವೇ,

ಮಹತೋ ಅತ್ಥಾಯ ಸಂವತ್ತತೀತಿ.

ತಸ್ಮಾ ವೀರಿಯಮೇವ ಕತ್ತಬ್ಬಂ,

ವೀರಿಯವತೋ ಹಿ ಅಚಿನ್ತಿತಂಪಿ ಹೋತಿ.

ಯಥಾ ಹಿ ತಚ್ಛಕಾನಂ ಸುತ್ತಂ,

ಪಮಾಣಂ ಹೋತಿ;

ಏವ ಮೇತಮ್ಪಿ ವಿಞ್ಞೂನಂ.

ಸುವಿಜಾನೋ ಭವಂ ಹೋತಿ,

ದುಬ್ಬಿಜಾನೋ ಪರಾಭವೋ;

ಧಮ್ಮಕಾಮೋ ಭವಂ ಹೋತಿ,

ಧಮ್ಮದೇಸ್ಸೀ ಪರಾಭವೋ.

ಅಯಂ ಧಮ್ಮತಾತಿ ಅಯಂ ಸಭಾವೋ,

ಅಯಂ ನಿಯಾಮೋತಿ ವುತ್ತಂ ಹೋತಿ.

ಯೇ ಧಮ್ಮಾ ಹೇತುಪಭವಾ,

ತೇಸಂ ಹೇತುಂ ತಥಾಗತೋ.

ರತನತ್ತಯಂ, ಸನ್ತತಂ, ಅಹಂ ವನ್ದಾಮಿ;

ಆಚರಿಯಂ, ಸೋ ಅಹಂ, ನಿಚ್ಚಂ ನಮಾಮಿ;

‘‘ಹೋತು ಸಬ್ಬಂ, ಮಙ್ಗಲಂ, ಮಮಂ ಸಬ್ಬಧಿ’’.

ನರದಕ್ಖದೀಪನೀ

ನಮೋ ತಸ್ಸ ಭಗವತೋ ಅರಹತೋ ಸಮ್ಮಾಸಮ್ಬುದ್ಧಸ್ಸ

ಪಣಾಮ

ನರದಕ್ಖದೀಪಕಸ್ಸ,

ನಮೋ ಸಮನ್ತಚಕ್ಖುನೋ;

ಸಂಸಾರಾ ವಿಪ್ಪಮುತ್ತಸ್ಸ,

ಸಂಸಾರಾ ವಿಪ್ಪಮುತ್ತಸ್ಸ,

ಸ-ಸದ್ಧಮ್ಮಸ್ಸ ಸಙ್ಘಿನೋ.

ಮತ್ಥನಾ

೨.

ಪಾಲಿತೇಹಿ ವರುತ್ತಮಂ,

ಪಾಲಿತಂ ಸೀಲ-ಪಾರಮಿಂ;

ಪಾಲೇತು ವರಸಮ್ಬುದ್ಧೋ,

ಪಾಲಿತಂ ಗನ್ಥ-ಕಾರಣಂ.

ಆಸೀಸ

೩.

ಬಹುಸ್ಸುತೋ ಚ ಮೇಧಾವೀ,

ಸೀಲೇಸುಚ ಸಮಾಹಿತೋ;

ಚೇತೋಸಮಥಾನುಯುತ್ತೋ,

ಅಪಿ ಮುದ್ಧನಿ ತಿಟ್ಠತು.

ಅಭಿಯಾಚಕ

೪.

ಧಮ್ಮ-ಸಙ್ಘಂ ವನ್ದಿತ್ವಾನ,

ಸಬ್ಬ-ಲೋಕಸ್ಸ ನಾಯಕಂ;

ಯಾಚಿತೋ ತಿಕಕ್ರಪ-ಥೇರೇನ,

ಮಾಣವೇನ ಚ ಧೀಮತಾ.

೫.

ಉತ್ತಾನಮೇವ ಸಙ್ಖೇಪಂ,

ನಾನಾ-ಸತ್ಥ-ಸುಧಾರಿತಂ;

ನರ-ದಕ್ಖಂ ಲಿಖಿಸ್ಸಮಿ,

ಪಸ್ಸನ್ತು ಧೀರ-ಮಾಮಕಾ.

೬.

ಕೋಸಜ್ಜಂ ಭಯತೋ ದಿಸ್ವಾ,

ವೀರಿಯಞ್ಜಾಪಿ ಖೇಮತೋ;

ಆರದ್ಧವೀರಿಯಾ ಹೋಥ;

ಏಸಾ ಬುದ್ಧಾನುಸಾಸನೀ.

೭.

ವೀರಿಯವಾ ಖೋ ಭಿಕ್ಖವೇ ಅರಿಯಸಾವಕೋ,

ಅಕುಸಲಂ ಪಜಹತಿ, ಕುಸಲಂ ಭಾವೇತಿ;

ಸಾವಜ್ಜಂ ಪಜಹತಿ, ಅನವಜ್ಜಂ ಭಾವೇತಿ,

ಸುದ್ಧಮತ್ತಾನಂ ಪರಿಹರತೀತಿ.

ವೀರಿಯವತೋ ಕಿಂ ನಾಮ ಕಮ್ಮಂ ನ ಸಿಜ್ಝತಿ;

ಪುರಿಸಕಾರೋ ನಾಮ ನ ನಸ್ಸತಿ,

ಸುಖೇ ಪತಿಟ್ಠಾಪೇತೀತಿ ಜಾನಾಮಿ.

೮.

ಯಥಾ ಖಿತ್ತಂ ನಭೇ ಲೇಡ್ಡು,

ಧುವಂ ಪತತಿ ಭೂಮಿಯಂ;

ತಥೇವ ಬುದ್ಧ-ಸೇಟ್ಠಾನಂ,

ವಚನಂ ಧುವ-ಸಸ್ಸತಂ.

೯.

ಅ-ದ್ವೇಜ್ಝವಚನಾ ಬುದ್ಧಾ,

ಅ-ಮೋಘವಚನಾ ಜಿನಾ.

೧೦.

ಸುಸ್ಸುಸಾ ಲಭತೇ ಪಞ್ಞಂ,

ಉಟ್ಠಾತಾ ವಿನ್ದತೇ ಧನಂ;

ತಸ್ಮಾ ಪಾಳಿಂ ಗುರುಂ ಕತ್ವಾ,

ಇಮಂ ಪಸ್ಸಾಹಿ ಸೋಭಣಂ.

೧೧.

ಸುಸ್ಸುಸಾ ಸುತ-ಬುದ್ಧಿನೀ,

ಸುತಂ ಪಞ್ಞಾಯ ವಡ್ಢನಂ;

ಪಞ್ಞಾಯ ಅತ್ಥಂ ಜಾನಾತಿ,

ಞಾತೋ ಅತ್ಥೋ ಸುಖಾವಹೋ.

೧೨.

ಸತತಂಜ್ಝಾಯನಂ ವಾದ,

ಪರ-ತನ್ತವಲೋಕನಂ;

ಸಬ್ಬಿಜ್ಜಾಚೇರ-ಸೇವಾಚ,

ಬುದ್ಧಿ-ಮತಿ-ಕರೋ ಗುಣೋ.

೧೩.

ಅತಿ-ದೀಘೋವ ನೀಘೋ ಹಿ,

ಕುಸೀತೋ ಹೀನ-ವೀರಿಯೋ;

ತಸ್ಮಾ ವೀರಿಯಂ ಕತ್ವಾನ,

ವಿಜ್ಜಂ ಏಸನ್ತು ಸಾಧವೋ.

೧೪.

ಸುಪೋರಿಸೋ ತಾವ ಸಿಪ್ಪಂ,

ಉಗ್ಗಣ್ಹೇಯ್ಯ ಪರಂ ಧನಂ;

ಗವೇಸೇಯ್ಯ ತತೋ ಮನ್ತಂ,

ಕಥೇಯ್ಯ ಸಚ್ಚ-ಭಾಸಿತಂ.

೧೫.

ಪಥಮಂ ನ ಪರಾಜಯೇ ಸಿಪ್ಪಂ,

ದುತೀಯಂ ನ ಪರಾಜಯೇ ಧನಂ;

ತತೀಯಂ ನ ಪರಾಜಯೇ ಧನಂ,

ಚತುತ್ಥಮತ್ಥಂ ಕಿಂ ಕರಿಸ್ಸತಿ.

೧೬.

ಸೋಭನ್ತಿ ಅ-ಮಿಲಾತಾನಿ,

ಪುಪ್ಫಾನಿವ ಪಿಲನ್ಧಿತುಂ;

ತಥಾ ಸೋಭನ್ತಿ ದಾರಕಾ,

ಯೋಬ್ಬನೇಯೇವ ಸಿಕ್ಖಿತುಂ.

೧೭.

ತಸ್ಮಾ ಹವೇ ಗುಣಾಧಾರಂ,

ಪಞ್ಞಾ-ವಡ್ಢನಮುತ್ತಮಂ;

ಸಿಕ್ಖೇಯ್ಯ ಮತಿಮಾ ಪೋಸೋ,

ಪತ್ಥೇನ್ತೋ ಹಿತಮತ್ತನೋ.

೧೮.

ಅಲಂ ವಾಯಮಿತುಂ ಸಿಪ್ಪೇ,

ಅತ್ಥ-ಕಾಮೇನ ಜನ್ತುನಾ;

ಕತಂ ವಿಜಞ್ಞಾ ವಿಜ್ಜಾದಿ,

ವಯೋ ತೇ ಮಾ ಉಪಜ್ಝಗಾ.

೧೯.

ವಿಜ್ಜಂ ಸಿಕ್ಖೇ, ಚರೇ ಸೀಲಂ,

ಧೀರೇನ ಸಹ ಸಂವಸೇ;

ಧನಾಚಯೇ, ಕರೇ ಕಮ್ಮಂ,

ಪಿಯಂ ವಾಚಞ್ಚ ಸಂವದೇ.

೨೦.

ನ ತ್ವೇವ ಸುಪಿತುಂ ಹೋತಿ,

ರತ್ತಿ ನಕ್ಖತ್ತ-ಮಾಲಿನೀ;

ಪಟಿಜಗ್ಗಿತುಮೇವೇಸಾ,

ರತ್ತಿ ಹೋತಿ ವಿಜಾನತಂ.

೨೧.

ಉಟ್ಠಾಹಥ ನಿಸೀದಥ,

ಕೋ ಅತ್ಥೋ ಸುಪಿತೇನ ವೋ;

ಸಾಧು ಖೋ ಸಿಪ್ಪ-ವಿಜ್ಜಾಹ್ವಾ,

ವಿಜ್ಜಂ ಸಿಕ್ಖಥ ಸನ್ತತಂ.

೨೨.

ಆರಬ್ಭಥ ಸದಾ ಪುತ್ತಾ,

ಬಹುಸ್ಸುತಂ ಗವೇಸಿತುಂ;

ಯಸ್ಮಾ ಲೋಕೇ ಸಿಪ್ಪವನ್ತಾ,

ಸಬ್ಬಾ-ದಿಸಾಸು ಪಾಕಟಾ.

೨೩.

ಸಕ್ಯರೂಪಂ ಪುರೇ ಸನ್ತಂ,

ಮಯಾ ಸಿಪ್ಪಂ ನ ಸಿಕ್ಖಿತಂ;

ಕಿಚ್ಛಾ ವುತ್ತಿ ಅ-ಸಿಪ್ಪಸ್ಸ,

ಇತಿ ಪಚ್ಛಾ ನುತಪ್ಪತಿ.

೨೪.

ಲೋಕತ್ಥಂ ಲೋಕ-ಕಮ್ಮನ್ತಂ,

ಇಚ್ಛನ್ತೋ ಪರಿಯೇಸಿತುಂ;

ನಿಚ್ಚಮೇವ ವೀರಿಯಞ್ಚ,

ಅತ್ಥಂ ಮನ್ತಞ್ಜ ಚಿನ್ತಯೇ.

೨೫.

ಧನವಾ ಗುಣವಾ ಲೋಕೇ,

ಸಬ್ಬಾ-ದಿಸಾಯ ಪಾಕಟೋ;

ಸೀಲವಾ ಪಞ್ಞವಾ ಮಚ್ಚೋ,

ಸಬ್ಬ-ಲೋಕೇಹಿ ಪೂಜಿತೋ.

೨೬.

ಸಜೀವತಿ ಯಸೋ ಯಸ್ಸ,

ಕಿತ್ತಿ ಯಸ್ಸ ಸಜೀವತಿ;

ಯಸ-ಕಿತ್ತಿ ವಿಹೀನಸ್ಸ,

ಜೀವನ್ತೋಪಿ ಮತೋಪಮಾ.

೨೭.

ಸದ್ಧೀಧ ವಿತ್ತಂ ಪುರಿಸಸ್ಸ ಸೇಟ್ಠಂ,

ಧಮ್ಮೋ ಸುಚಿಣ್ಣೋ ಸುಖಮಾವಹಾತಿ;

ಸಚ್ಚಂ ಹವೇ ಸಾದುತರಂ ರಸಾನಂ,

ಪಞ್ಞಾಜೀವಿಂ ಜೀವಿತಮಾಹು ಸೇಟ್ಠನ್ತಿ.

೨೮.

ಸತಿಮತೋ ಸದಾ ಭದ್ದಂ,

ಸತಿಮಾ ಸುಖಮೇಧತಿ;

ಸತಿಮತೋ ಸುವೇ ಸೇಯ್ಯೋ,

ವೇರಾ ಚ ಪರಿಮುಚ್ಚತಿ.

೨೯.

ಮಾ ವೋ ಖಣಂ ವಿರಾಧೇಥ,

ಖಣಾತೀತಾ ಹಿ ಸೋಚರೇ;

ಸದತ್ಥೇ ವಾಯಮೇಯ್ಯಾಥ,

ಖಣೋ ವೋ ಪಟಿಪಾದಿತೋ.

೩೦.

ಯಥಿಚ್ಛಿತಂ ನ ಪಪ್ಪೋತಿ,

ಅ-ಫಿಯೋ ನಾವಿಕೋಣ್ಣವೇ;

ತಥೇವಾವೀರಿಯೋಪೇತ್ಥ,

ತಸ್ಮಾರಭೇಯ್ಯ ಸಾಸನಂ.

೩೧.

ವಾಯಮೇಥೇವ ಪುರಿಸೋ,

ಯಾವ ಅತ್ಥಸ್ಸ ನಿಪ್ಫದಾ;

ನಿಪ್ಫನ್ನಸೋಭಣೋ ಅತ್ಥೋ,

ಖನ್ತಾ ಭಿಯ್ಯೋ ನ ವಿಜ್ಜತಿ.

೩೨.

ಸಮೇವ ಞಾಣ-ವಾಯಾಮೇ,

ಸುಖಾವಹೋ ಸು-ಮಙ್ಗಲೋ;

ಞುನೇಧಿಕೇ ತಥಾ ನೋ ಹಿ,

ದ್ವಯೇನ ಸಾಧು ಸಮ್ಪದಾ.

೩೩.

ಕಾಯ-ಕಮ್ಮಾನಿ ಸಿಜ್ಝನ್ತಿ,

ವಚೀ-ಕಮ್ಮಾನಿ ವೀರಿಯಂ;

ನ ಹಿ ಕಿಚ್ಚಾನಿ ಚಿನ್ತಾಹಿ,

ಕರೇಯ್ಯಾಥೀಧ ವಾಯಮಂ.

೩೪.

ಪಟಿಕಚ್ಚೇವ ಕರೇಯ್ಯ,

ತಂ ಜಞ್ಞಾ ಹಿತಮತ್ತನೋ;

ನ ಸಾಕಟಿಕಚಿನ್ತಾಯ,

ಮನ್ದಾ ಧೀರೋ ಪರಕ್ಕಮೇ.

೩೫.

ಥಿರೇನ ಸಕ-ಕಮ್ಮೇನ,

ವಡ್ಢತಿಯೇವ ಸಂ ಫಲಂ;

ಅ-ಥಿರೇನ ಅಲಸೇನ,

ಕರ-ಕಮ್ಮಂ ಫಲಞ್ಚ ನೋ.

೩೬.

ಆಸೀಸೇಥೇವ ಪುರಿಸೋ,

ನ ನಿಬ್ಬಿನ್ದೇಯ್ಯ ಪಣ್ಡಿತೋ;

ಪಸ್ಸಾಮಿ ವೋಹಂ ಅತ್ತಾನಂ,

ಯಥಾ ಇಚ್ಛಿಂ ತಥಾ ಅಹು.

೩೭.

ಅಣಣೋ ಞಾತೀನಂ ಹೋತಿ,

ದೇವಾನಂ ಪಿತುನಞ್ಚ ಸೋ;

ಕರಂ ಪುರಿಸ-ಕಿಚ್ಚಾನಿ,

ನ ಚ ಪಚ್ಛಾನುತಪ್ಪತಿ.

೩೮.

ಹಿಯ್ಯೋತಿ ಹಿಯ್ಯತಿ ಪೋಸೋ,

ಕರಿಸ್ಸಾಮಿ ಪರೇತಿ ಯೋ;

ಅಜ್ಜ ಕತ್ತಬ್ಬ ಕಮ್ಮಂ ಸ್ವೇ,

ಸೋ ತತೋ ಪರಿಹಾಯತಿ.

೩೯.

ಸೋ ಅ-ಪ್ಪಮತ್ತೋ ಅ-ಕುದ್ಧೋ,

ತಾತ ಕಿಚ್ಚಾನಿ ಕಾರಯ;

ವಾಯಾಮಸ್ಸು ಸ-ಕಿಚ್ಚೇಸು,

ನಾಲಸೋ ವಿನ್ದತೇ ಸುಖಂ.

೪೦.

ಹೀನ-ಜಚ್ಚೋಪಿ ಚೇ ಹೋತಿ,

ಉಟ್ಠಾತಾ ಧಿತಿಮಾ ನರೋ;

ಆಚಾರ-ಸೀಲ-ಸಮ್ಪನ್ನೋ,

ನಿಸೇ ಅಗ್ಗೀವ ಭಾಸತಿ.

೪೧.

ಯೋ ಪುಬ್ಬೇ ಕರಣೀಯಾನಿ,

ಪಚ್ಛಾ ಸೋ ಕಾತುಮಿಚ್ಛತಿ;

ವರುಣಕಟ್ಠಭಞ್ಜೋವ,

ಸ ಪಚ್ಛಾ ಅನುತಪ್ಪತಿ.

೪೨.

ಉಟ್ಠಾನಕಾಲಮ್ಹಿ ಅನುಟ್ಠಹಾನೋ,

ಯುವಾ ಬಲೀ ಆಲಸಿಯಂ ಉಪೇತೋ;

ಅ-ಪುಣ್ಣಸಙ್ಕಪ್ಪಮನೋ ಕುಸೀತೋ,

ಪಞ್ಞಾಯ ಮಗ್ಗಂ ಅಲಸೋ ನ ವಿನ್ದತಿ.

೪೩.

ದುಮ್ಮೇಧೋ ಪುರಿಸೋ ಲೋಕೇ,

ಕುಸೀತೋ ಹೀನ-ವೀರಿಯೋ;

ಅಪ್ಪಸ್ಸುತೋ ಅನಾಚಾರೋ,

ಪರಿಹಾಯತಿ ವುಡ್ಢಿಯಾ.

೪೪.

ಅಪ್ಪಸ್ಸುತಾಯಂ ಪುರಿಸೋ,

ಬಲೀಬದ್ದೋವ ಜೀರತಿ;

ಮಂಸಾನಿ ತಸ್ಸ ವಡ್ಢನ್ತಿ,

ಪಞ್ಞಾ ತಸ್ಸ ನ ವಡ್ಢತಿ.

೪೫.

ಯಸ್ಸ ಮನುಸ್ಸ-ಭೂತಸ್ಸ,

ನತ್ಥಿ ಭೋಗಾ ಚ ಸಿಪ್ಪಕಂ;

ಕಿಂಫಲಂ ತಸ್ಸ ಮಾನುಸ್ಸಂ,

ದ್ವಿಪಾದಟ್ಠೋ ಹಿ ಸೋ ಮಿಗೋ.

೪೬.

ಯೋ ಚ ವಸ್ಸಸತಂ ಜೀವೇ,

ಕುಸೀತೋ ಹೀನ-ವೀರಿಯೋ;

ಏಕಾಹಂ ಜೀವಿತಂ ಸೇಯ್ಯೋ,

ವೀರಿಯಾರಬ್ಭತೋ ದಳಂ.

೪೭.

ಯೋ ಚ ಧಮ್ಮ-ವಿಭಙ್ಗಞ್ಞೂ,

ಕಾಲುಟ್ಠಾಯೀ ಅ-ತನ್ದಿತೋ;

ಅನುಟ್ಠಹತಿ ಕಾಲೇನ,

ಫಲಂ ತಸ್ಸ ಸಮಿಜ್ಝತಿ.

೪೮.

ಅ-ಚರಿತ್ವಾ ಬ್ರಹ್ಮಚರಿಯಂ,

ಅ-ಲದ್ಧಾ ಯೋಬ್ಬನೇ ಧನಂ;

ಜಿಣ್ಣಕೋಞ್ಚಾವ ಝಾಯನ್ತಿ,

ಖೀಣಮಚ್ಛೇವ ಪಲ್ಲಲೇ.

೪೯.

ಅ-ಚರಿತ್ವಾ ಬ್ರಹ್ಮಚರಿಯಂ,

ಅ-ಲದ್ಧಾ ಯೋಬ್ಬನೇ ಧನಂ;

ಸೇನ್ತ್ತಿ ಚಾಪಾತಿಖೀಣಾವ,

ಪುರಾಣಾನಿ ಅನುತ್ಥುನಂ.

೫೦.

ಅಪ್ಪಕೇನಾಪಿ ಮೇಧಾವೀ,

ಪಾಭತೇನ ವಿಚಕ್ಖಣೋ;

ಸಮುಟ್ಠಾಪೇತಿ ಅತ್ತಾನಂ,

ಅಣುಂ ಅಗ್ಗಿಂವ ಸನ್ಧಮಂ.

೫೧.

ವಾಯಾಮೇಥೇವ ಪುರಿಸೋ,

ನ ನಿಬ್ಬಿನ್ದೇಯ್ಯ ಪಣ್ಡಿತೋ;

ವಾಯಾಮಸ್ಸ ಫಲಂ ಪಸ್ಸ,

ಭುತ್ತಾ ಅಮ್ಬಾ ಅನೀತಿಹಂ.

೫೨.

ಅನುಟ್ಠಹಂ ಅ-ವಾಯಾಮಂ,

ಸುಖಂ ಯತ್ರಾಧಿ ಗಚ್ಛತಿ;

ಸುವಿರ ತತ್ಥ ಗಚ್ಛಾಹಿ,

ಮಞ್ಚ ತತ್ಥೇವ ಪಾಪಯ.

೫೩.

ಯತ್ಥಾಲಸೋ ಅನುಟ್ಠಾತಾ,

ಅಚ್ಚನ್ತಂ ಸುಖಮೇಧತಿ;

ಸುವಿರ ತತ್ಥ ಗಚ್ಛಾಹಿ,

ಮಞ್ಚ ತ್ತತ್ಥೇವ ಪಾಪಯ.

೫೪.

ಅಧಿಪ್ಪಾಯ-ಫಲಂ ಲೋಕೇ,

ಧೀತಿಮನ್ತ್ತಸ್ಸ ಸಿಜ್ಝತಿ;

ವೀರಿಯಮೇವ ಕತ್ತಬ್ಬಂ,

ಏತಂ ಬುದ್ಧೇಹಿ ವಣ್ಣಿತಂ.

ಪಞ್ಞಾ-ನಿದ್ದೇಸ

೫೫.

ಪಞ್ಞಂ ಪಥಮಮೇಸೇಹಿ,

ಪಞ್ಞಾ-ಬಲಂ ಬಹುತ್ತಮಂ;

ಕುಲ-ಪುತ್ತ ಬಲಂ ಪಞ್ಞಾ,

ಕಿಂಹಿನಾಮ ನ ಸಾಧ್ಯತಿ.

೫೬.

ಅನೇಕ-ಸಂಸಯುಚ್ಛೇದಿ,

ಪರೋಕ್ಖತ್ಥಸ್ಸ ದಸ್ಸಕಂ;

ಸಬ್ಬಸ್ಸ ಲೋಚನಂ ಸತ್ಥಂ,

ಯಸ್ಸ ನತ್ಥ್ಯನ್ಧಮೇವ ಸೋ.

೫೭.

ಪಞ್ಞಾ ಸುತಂ ವಿನಿಚ್ಛಿನ್ದಿ,

ಕಿತ್ತಿ-ಸಿಲೋಕ-ವಡ್ಢನೀ;

ಪಞ್ಞಾಸಹಿತೋ ನರೋ ಇಧ,

ಅಪಿ ಸುಖಾನಿವಿನ್ದತಿ.

೫೮.

ಸಬ್ಬಞ್ಞುಬುದ್ಧ-ಪಚ್ಚೇಕ,

ಚತುಸಚ್ಚ-ಸುತಾ ಇತಿ;

ಚತು-ಬುದ್ಧೇಸು ಏಕೋವ,

ಬಹುಸ್ಸುತೋ ನರೋ ಭವೇ.

೫೯.

ಲೇಖಛೇಕೋ ವಾಚಛೇಕೋ,

ಗನ್ಥಛೇಕೋ ಸುವಾಚಕೋ;

ವಿಧಾಯಕಛೇಕೋ ಸೂರೋ,

ನಿದ್ದುಕ್ಖೋವ ಸಕಮ್ಮನಿ.

೬೦.

ಪಞ್ಞಾ ಹಿ ಸೇಟ್ಠಾ ಕುಸಲಾ ವದನ್ತಿ,

ನಕ್ಖತ್ತ-ರಾಜಾರಿವ ತಾರಕಾನಂ;

ಸೀಲಂ ಸಿರೀಚಾಪಿ ಸತಞ್ಚ ಧಮ್ಮೋ,

ಅನ್ವಾಯಿಕಾ ಪಞ್ಞಾವತೋ ಭವನ್ತಿ.

೬೧.

ಸೇವೇಥ ಬುದ್ಧೇ ನಿಪುಣೇ ಬಹುಸ್ಸುತ್ತೇ,

ಉಗ್ಗಾಹಕೋ ಚ ಪರಿಪುಚ್ಛಕೋ;

ಸುಣೇಯ್ಯ ಸಕ್ಕಚ್ಚಂ ಸುಭಾಸಿತಾನಿ,

ಏವಂ ಕರೋ ಪಞ್ಞವಾ ಹೋತಿ ಮಚ್ಚೋ.

೬೨.

ವಯೇನ ಯಸ-ಪುಚ್ಛಾಹಿ,

ತಿಟ್ಠ-ವಾಸೇನ ಯೋನಿಸೋ;

ಸಾಕಚ್ಛಾ ಸ್ನೇಹಸಂಸೇವಾ,

ಪತಿರೂಪ-ವಾಸೇನಚ.

೬೩.

ಏತಾನಿ ಅಟ್ಠಠಾನಾನಿ,

ಬುದ್ಧಿ-ವಿಸದ-ಕಾರಣಾ;

ಯೇಸಂ ಏತಾನಿ ಸಮ್ಭೋನ್ತಿ,

ತೇಸಂ ಬುದ್ಧಿ ಪಭಿಜ್ಜತಿ.

೬೪. ಚತ್ತಾರೋಮೇ ಭಿಕ್ಖವೇ ಧಮ್ಮಾ ಪಞ್ಞಾವುದ್ಧಿಯಾ ಸಂವತ್ತನ್ತಿ. ಕತಮೇ ಚತ್ತಾರೋ. ಸಪ್ಪುರಿಸಸಂಸೇವೋ ಸದ್ಧಮ್ಮಸವನಂ ಯೋನಿಸೋ ಮನಸಿಕಾರೋ ಧಮ್ಮಾನುಧಮ್ಮ-ಪಟಿಪತ್ತಿ. ಇಮೇ ಖೋ ಭಿಕ್ಖವೇ ಚತ್ತಾರೋ ಧಮ್ಮಾ ಪಞ್ಞಾ-ವುದ್ಧಿಯಾ ಸಂವತ್ತನ್ತೀತ್ತಿ.

೬೫.

ಚಕ್ಖುಪಸಾದ-ಸಮ್ಪನ್ನೋ,

ಅಚ್ಛಿಮನ್ತಞ್ಚ ಪಸ್ಸತಿ;

ಅನ್ಧಂ ಕಾಣಂ ಸು-ಪಸ್ಸನ್ತಂ,

ಅನ್ಧೋ ಸಬ್ಬಂ ನ ಪಸ್ಸತಿ.

೬೬.

ಪಸ್ಸತ್ತಿ ಪಸ್ಸೋ ಪಸ್ಸನ್ತಂ,

ಅ-ಪಸ್ಸನ್ತಞ್ಚ ಪಸ್ಸತಿ;

ಅ-ಪಸ್ಸನ್ತೋ ಅ-ಪಸ್ಸನ್ತಂ,

ಪಸ್ಸನ್ತಞ್ಚ ನ ಪಸ್ಸತಿ.

೬೭.

ಪಾಕಟಂ ಅ-ಪಟಿಚ್ಛನ್ನಂ,

ರೂಪಂ ಪಸಾದ-ಚಕ್ಖುನಾ;

ನಾಞ್ಞಂ ಪಸ್ಸತ್ತಿ ಸಬ್ಬಂಪಿ,

ತಥತೋ ಞಾಣ-ಚಕ್ಖುನಾ.

೬೮.

ಸುಜನಾಸುಜನಾ ಸಬ್ಬೇ,

ಗುಣೇನಾಪಿ ವಿವೇಕಿನೋ;

ವಿವೇಕಂ ನ ಸಮಾಯನ್ತಿ,

ಅ-ವಿವೇಕೀಜನನ್ತಿಕೇ.

೬೯.

ಯೋ ಚ ಉಪ್ಪತಿತಂ ಅತ್ಥಂ,

ನ ಖಿಪ್ಪಮನುಬುಜ್ಝತಿ;

ಅ-ಮಿತ್ತವಸಮನ್ವೇತಿ,

ಪಚ್ಛಾ ಚ ಅನುತಪ್ಪತಿ.

೭೦.

ಏವಂ ಮಹಿದ್ಧಿಕಾ ಪಞ್ಞಾ,

ನಿಪುಣಾ ಸಾಧುಚಿನ್ತಿನೀ;

ದಿಟ್ಠಧಮ್ಮ-ಹಿತತ್ಥಾಯ,

ಸಮ್ಪರಾಯ-ಸುಖಾಯ ವಾ.

೭೧.

ತಂ ಬಲಾನಂ ಬಲಂ ಸೇಟ್ಠ,

ಅಗ್ಗ ಪಞ್ಞಾಬಲಂ ಬಲಂ;

ಪಞ್ಞಾಬಲೇನುಪತ್ಥದ್ಧೋ,

ಏತ್ಥಂ ವಿನ್ದತಿ ಪಣ್ಡಿತ್ತೋ.

೭೨.

ಯೇನ ಞಾಣೇನ ಬುಜ್ಝನ್ತಿ,

ಅರಿಯಾ ಕತ-ಕಿಚ್ಚತಂ;

ತಂ ಞಾಣ-ರತನಂ ಲದ್ಧಂ,

ವಾಯಾಮೇಥ ಜಿನೋರಸಾ.

೭೩.

ಪಞ್ಞಾರತನಮಾಲಸ್ಸ,

ನ ಚಿರಂ ವತ್ತತೇ ಭವೋ;

ಖಿಪ್ಪಂ ದಸ್ಸೇತಿ ಅಮತಂ,

ನ ಚ ಸೋ ರೋಚತೇ ಭವೇ.

೭೪.

ಪಮಾದಮನುಯುಞ್ಜನ್ತಿ,

ಬಾಲಾ ದುಮ್ಮೇಧಿನೋ ಜನಾ;

ಅಪ್ಪಮಾದಞ್ಚ ಮೇಧಾವೀ,

ಧನಂ ಸೇಟ್ಠಂವ ರಕ್ಖತಿ.

೭೫.

ಧನ-ಪುಞ್ಞ-ಧೀ-ಲಾಭೇನ,

ಕಾಲಂ ಖಿಯ್ಯತಿ ಪಣ್ಡಿತೋ;

ಕೀಳನೇನ ಚ ದುಮ್ಮೇಧೋ,

ನಿದ್ದಾಯ ಕಲಹೇನ ವಾ.

೭೬.

ಪಮಾದಂ ಅಪ್ಪಮಾದೇನ,

ಯದಾ ನೂದತಿ ಪಣ್ಡಿತೋ;

ಪಞ್ಞಾಪಾಸಾದ-ಮಾರುಯ್ಹ,

ಅ-ಸೋಕೋ ಸೋಕಿನಿಂ ಪಜಂ,

ಪಬ್ಬತಟ್ಠೋವ ಭೂಮಟ್ಠೇ,

ಧೀರೋ ಬಾಲೇ ಅವೇಕ್ಖತಿ.

೭೭.

ನತ್ತಿ ಅತ್ತಸಮಂ ಪೇಮಂ,

ನತ್ಥಿ ಧಞ್ಞಸಮಂ ಧನಂ;

ನತ್ಥಿ ಪಞ್ಞಾಸಮಾ ಆಭಾ,

ವುಟ್ಠಿ ವೇ ಪರಮಾ ಸರಾ.

೭೮.

ದಿಟ್ಠೇ ಧಮ್ಮೇ ಚ ಯೋ ಅತ್ಥೋ,

ಯೋ ಚತ್ಥೋ ಸಮ್ಪರಾಯಿಕೋ;

ಅತ್ಥಾಭಿಸಮಯಾ ಧೀರೋ,

ಪಣ್ಡಿತೋತಿ ಪವುಚ್ಚತಿ.

೭೯.

ನ ತೇನ ಪಣ್ಡಿತೋ ಹೋತಿ,

ಯಾವತಾ ಬಹು ಭಾಸತಿ;

ಖೇಮೀ ಅ-ವೇರೀ ಅ-ಭಯೋ,

ಪಣ್ಡಿತೋತ್ತಿ ಪವುಚ್ಚತಿ.

೮೦.

ಯಮ್ಹಿ ಸಚ್ಚಞ್ಚ ಧಮ್ಮೋ ಚ,

ಅ-ಹಿಂಸಾ ಸಂಯಮೋ ದಮೋ;

ಸ ವೇ ವನ್ತಮಲೋ ಧೀರೋ,

ಥೇರೋ ಇತಿ ಪವುಚ್ಚತ್ತಿ.

೮೧.

ಸಕ-ಗುಣಂ ಸಕ-ದೋಸಂ,

ಯೋ ಜಾನಾತಿ ಸಪಣ್ಡಿತೋ;

ಪರ-ಗುಣಂ ಪರ-ದೋಸಂ,

ಯೋ ಜಾನಾತಿ ಸಪಣ್ಡಿತೋ.

೮೨.

ಸತಿ-ವೀರಿಯ-ಪಞ್ಞಾಯ,

ಯೋ ಕರೋತಿ ಇರಿಯಾಪಥೇ;

ಸೋ ಪಣ್ಡಿತೋ ಹವೇ ಭವೇ,

ಉಭಯತ್ಥ-ಪರಿಗ್ಗಹೋ.

೮೩.

ಕತಞ್ಞೂ ವಿಜ್ಜಾ-ಸಮ್ಪನ್ನೋ,

ಜಾತಿಮಾ ಧನವಾ ಹವೇ;

ಸೋ ವಿಚಾರಣ-ಸೀಲೋ ಚ,

ನಿದ್ದುಕ್ಖೋ ಪಣ್ಡಿತೋ ಭವೇ.

ಸಬ್ಬೇ ಕಮ್ಮಸ್ಸಕಾ ಸತ್ತಾ,

ಕಮ್ಮಂ ಸತ್ತೇ ವಿಭಜ್ಜತಿ.

೮೪.

ಯೋ ಪಸ್ಸತಿ ಪಚ್ಚಕ್ಖತ್ಥಂ,

ಯೋ ಚ ಸಂಸಾರತ್ಥಂ ತೇಸು;

ಪಚ್ಛಿಮೋವ ಪೂಜನೀಯೋ,

ಉಭಯತ್ಥ-ಸುದಿಟ್ಠತ್ತಾ.

೮೫.

ಅಪ್ಪೇನ ಅನವಜ್ಜೇನ,

ಸನ್ತುಟ್ಠೋ ಸುಲಭೇನ ಚ;

ಮತ್ತಞ್ಞೂ ಸುಭರೋ ಹುತ್ವಾ,

ಚರೇಯ್ಯ ಪಣ್ಡಿತೋ ನರೋ.

೮೬.

ಅತ್ತಾನಮೇವ ಪಥಮಂ,

ಪತಿರೂಪೇ ನಿವೇಸಯೇ;

ಅಥಞ್ಞಮನುಸಾಸೇಯ್ಯ,

ನ ಕಿಲಿಸ್ಸೇಯ್ಯ ಪಣ್ಡಿತೋ.

೮೭.

ಉತ್ತಮ-ಪರಿಸಾಯ ವೇ,

ಉತ್ತ್ತಮಂ ವಾಚಮುತ್ತಮೋ;

ಭಣೇಯ್ಯಾಖೇಪ-ವಿತ್ಥಾರಂ,

ಸಾ ಅನಗ್ಘ್ಯಾ ಲೋಕತ್ತಯೇ.

೮೮.

ಪಣ್ಡಿತಸ್ಸ ಸುಭಾಸಿತ್ತಂ,

ಪಣ್ಡಿತೋವ ಸುಜಾನಿಯಾ;

ದುಮ್ಮೇಧೋ ತಂ ನ ಜಾನಾತಿ,

ಧೀರೋ ಧೀರಂ ಮಮಾಯತಿ.

೮೯.

ಯೇನ ಕೇನಚಿ ವಣ್ಣೇನ,

ಪರೋ ಲಭತಿ ರೂಪ್ಪನಂ;

ಅತ್ಥೋ ವಾಚಾಯ ಚೇ ಹೋತಿ,

ತಂ ನ ಭಾಸೇಯ್ಯ ಪಣ್ಡಿತೋ.

೯೦.

ಭುಞ್ಜನತ್ಥಂ ಕಥನತ್ಥಂ,

ಮುಖಂ ಹೋತೀತ್ತಿ ನೋ ವದೇ;

ಯಂವಾ ತಂವಾ ಮುಖಾರುಳ್ಹಂ,

ವಚನಂ ಪಣ್ಡಿತೋ ನರೋ.

೯೧.

ಪರ-ಸತ್ತಿತ್ತೋ ಸ-ಸತ್ತಿಂ,

ದುಜ್ಜಾನೋ ಹಿ ನರೋ ಮಿತೇ;

ಚೇ ಜಾನೇ ಸಕ-ಸತ್ತಿಂಚ,

ಕಾ ಕಥಾ ಪರ-ಸತ್ತಿಯಾ.

೯೨.

ಕತ್ತ-ಗುಣಂ ಪರೇಸಂ ಯೋ,

ಪಟಿಕರೋತಿ ಪಣ್ಡಿತೋ;

ಜಾನಾತಿ ಸೋ ಆಚಿಕ್ಖತಿ,

ನ ಬಾಲೋ ಗುಣ-ಮಾಮಕೋ.

೯೩.

ಪಭೂತಂ ನೇವ ಕಾತಬ್ಬಂ,

ಭವಿಸ್ಸಂ ನೇವ ಚಿನ್ತಯೇ;

ವತ್ತಮಾನೇನ ಕಾಲೇನ,

ವಿಚರನ್ತಿ ವಿಚಕ್ಖಣಾ.

೯೪.

ಧಮ್ಮೇಸು ಸತಿ ಇಚ್ಛಿತಾ,

ರಸೇಸು ಲೋಣಮಿಚ್ಛಿತಂ;

ರಾಜ-ಕಿಚ್ಚೇಸು ಅಮಚ್ಚಂ,

ಸಬ್ಬ-ಠಾನೇಸು ಪಣ್ಡಿತಂ.

೯೫.

ಖತ್ತಿಯೋ ಸೇಟ್ಠೋ ಜನೇ ತಸ್ಮಿಂ,

ಯೇ ಗೋತ್ತಪಟಿಸಾರಿನೋ;

ವಿಜ್ಜಾ-ಚರಣ-ಸಮ್ಪನ್ನೋ,

ಸೋ ಸೇಟ್ಠೋ ದೇವ-ಮಾನುಸೇ.

೯೬.

ಸಮ್ಬುದ್ಧೋ ದ್ವಿಪದಂ ಸೇಟ್ಠೋ,

ಆಜಾನೀಯೋ ಚತುಪ್ಪದಂ;

ಸುಸ್ಸುಸಾ ಸೇಟ್ಠಾ ಭರಿಯಾನಂ,

ಯೋ ಚ ಪುತ್ತಾನಮಸ್ಸವೋ.

೯೭.

ಸಾತ್ಥಕೋ ಚ ಅ-ಸಮ್ಮೋಹೋ,

ಸಪ್ಪಾಯೋ ಗೋಚರೋ ತಥಾ;

ಚತ್ತಾರಿಮಾನಿ ಸಿಕ್ಖೇಯ್ಯುಂ,

ಸಮ್ಪಜಞ್ಞಾಭಿವಡ್ಢಕಾ.

೯೮.

ಪಞ್ಞಞ್ಚ ಖೋ ಅ-ಸುಸ್ಸುಸಂ,

ನ ಕೋಚಿ ಅಧಿಗಚ್ಛತಿ;

ಬಹುಸ್ಸುತಂ ಅನಾಗಮ್ಮ,

ಧಮ್ಮಟ್ಠಂ ಅ-ವಿನಿಬ್ಭಜಂ.

೯೯.

ಅಧಿಪ್ಪಾಯೋ ಸುದುಬ್ಬೋಧೋ,

ಯಸ್ಮಾ ವಿಜ್ಜತಿ ಪಾಳಿಯಂ;

ತಸ್ಮಾ ಉಪಟ್ಠಹಂ ಗಣ್ಹೇ,

ಗರುಂ ಗರುಮತಂ ವಿದೂ.

ಚಾರಿತ್ತ-ನಿದ್ದೇಸ

೧೦೦.

ಅತ್ತಾ ಹಿ ಅತ್ತನೋ ನಾಥೋ,

ಕೋ ಹಿ ನಾಥೋ ಪರೋ ಸಿಯಾ;

ಅತ್ತನಾ ಹಿ ಸುದನ್ತೇನ,

ನಾಥಂ ಲಭತಿ ದುಲ್ಲಭಂ.

೧೦೧.

ಅತ್ತಾನಞ್ಚೇ ಪಿಯಂ ಜಞ್ಞಾ,

ರಕ್ಖೇಯ್ಯ ನಂ ಸುರಕ್ಖಿತಂ;

ತಿಣ್ಣಮಞ್ಞತರಂ ಯಾಮಂ,

ಪಟಿಜಗ್ಗೇಯ್ಯ ಪಣ್ಡಿತೋ.

೧೦೨.

ಅತ್ತನಾ ಕುರುತೇ ಲಕ್ಖಿಂ,

ಅ-ಲಕ್ಖಿಂ ಕುರುತೇತ್ತನಾ;

ನ ಹಿ ಲಕ್ಖಿಂ ಅ-ಲಕ್ಖಿಂ ವಾ,

ಅಞ್ಞೋ ಅಞ್ಞಸ್ಸ ಕಾರಕೋ.

೧೦೩.

ನ ಪೀಳಿತಾ ಅತ್ತ-ದುಕ್ಖೇನ ಧೀರಾ,

ಸುಖಪ್ಫಲಂ ಕಮ್ಮಂ ಪರಿಚ್ಚಜನ್ತಿ;

ಸಮ್ಮೋಹಿತಾವಾಪಿ ಸುಖೇನ ಮತ್ತಾ,

ನ ಪಾಪ-ಕಮ್ಮಞ್ಚ ಸಮಾಚರನ್ತಿ.

೧೦೪.

ಯೋ ನೇವ ನಿನ್ದಂ ನಪ್ಪಸಂಸಂ,

ಆದಿಯತಿ ಗರಹಂ ನೋಪಿ ಪೂಜಂ;

ಸಿರೀಚ ಲಕ್ಖೀಚ ಅಪೇತಿ ತಮ್ಹಾ,

ಆಪೋ ಸುವುಟ್ಠೀವ ಯಥಾ ಥಲಮ್ಹಾ.

೧೦೫.

ಸಾಧು ಧಮ್ಮರುಚಿ ರಾಜಾ,

ಸಾಧು ಪಞ್ಞಾಣವಾ ನರೋ;

ಸಾಧು ಮಿತ್ತಾನಮ-ದ್ದುಬ್ಭೋ,

ಪಾಪಸ್ಸ ಅ-ಕರಂ ಸುಖಂ.

೧೦೬.

ಕಲ್ಯಾಣಕಾರೀ ಕಲ್ಯಾಣಂ,

ಪಾಪಕಾರೀ ಚ ಪಾಪಕಂ;

ಯಾದಿಸಂ ವಪತ್ತೇ ಬೀಜಂ,

ತಾದಿಸಂ ವಹತೇ ಫಲಂ.

೧೦೭.

ಜೀವಂ ಪಞ್ಞಾಯ ರಕ್ಖೇಯ್ಯ,

ಧನಂ ಕಮ್ಮೇನ ರಕ್ಖಯೇ;

ಏವಂ ಹ್ಯರೋಗೋ ಸುಖಿತೋ,

ಪೋರಾಣಕ-ವಚೋ ಇದಂ.

೧೦೮.

ಅನುಪುಬ್ಬೇನ ಮೇಧಾವೀ,

ಥೋಕಂ ಥೋಕಂ ಖಣೇ ಖಣೇ;

ಕಮ್ಮಾರೋ ರಜತಸ್ಸೇವ,

ನಿದ್ದಮೇ ಮಲಮತ್ತನೋ.

೧೦೯.

ವಾಚಾನುರಕ್ಖೀ ಮನಸಾ ಸುಸಂವುತೋ,

ಕಾಯೇನ ಚ ನಾಕುಸಲಂ ಕಯಿರಾ;

ಏತೇತಯೋ ಕಮ್ಮಪಥೇವಿಸೋಧಯೇ,

ಆರಾಧಯೇ ಮಗ್ಗಮಿಸಿ-ಪ್ಪವೇದಿತಂ.

೧೧೦.

ಅ-ಸನ್ತೇ ನೋಪಸೇವೇಯ್ಯ,

ಸನ್ತೇ ಸೇವೇಯ್ಯ ಪಣ್ಡಿತೋ;

ಅ-ಸನ್ತೋ ನಿರಯಂ ಯನ್ತಿ,

ಸನ್ತೋ ಪಾಪೇನ್ತಿ ಸುಗ್ಗತಿಂ.

೧೧೧.

ಅ-ಕರೋನ್ತೋಪಿ ಚೇ ಪಾಪಂ,

ಕರೋನ್ತಂ ಮುಪಸೇವತಿ;

ಸಙ್ಕಿಯೋ ಹೋತಿ ಪಾಪಸ್ಮಿಂ,

ಅ-ವಣ್ಣೋ ಚಸ್ಸ ರೂಹತಿ.

೧೧೨.

ಸಙ್ಘಾಗತೋ ಅನಿಟ್ಠೇಹಿ,

ಅಮ್ಬೋಪಿ ಮಧುರಪ್ಫಲೋ;

ತಿತ್ತಪುಬ್ಬೋವ ಪಾ ಏವ,

ಮನುಸ್ಸೋ ತು ಸ-ಜೀವಕೋ.

೧೧೩.

ನಿಹೀನ-ಸೇವಿತೋ ಪೋಸೋ,

ನಿಹೀಯತಿ ಚ ಸಬ್ಬದಾ;

ಕದಾಚಿ ನ ಚ ಹಾಯೇಥ,

ತುಲ್ಯಸೇವೀಪಿ ಅತ್ತನಾ.

೧೧೪.

ವಣ್ಣ-ಗನ್ಧ-ರಸೋಪೇತೋ,

ಅಮ್ಬೋಯಂ ಅಹುವಾ ಪುರೇ;

ತಮೇವ ಪೂಜಂ ಲಭಮಾನೋ;

ಕೇನಮ್ಬೋ ಕಟುಕಪ್ಫಲೋ.

೧೧೫.

ಪುಚಿಮನ್ದ-ಪರಿವಾರೋ,

ಅಮ್ಬೋ ತೇ ದಧಿವಾಹನ;

ಮೂಲಂ ಮೂಲೇನ ಸಂಸಟ್ಠಂ,

ಸಾಖಾ ಸಾಖಂ ನಿಸೇವರೇ;

ಅಸಾತ್ತ-ಸನ್ನಿವಾಸೇನ,

ತೇನಮ್ಬೋ ಕಟುಕಪ್ಫಲೋ.

೧೧೬.

ಪಾಮೋಕ್ಖ-ಭಜನಂ ಖಿಪ್ಪಂ,

ಅತ್ಥ-ಕಾಮೋ ಸು-ವುಡ್ಢಿಯಂ;

ಭಜೇ ಉತ್ತರಿ ಅತ್ತನಾ,

ತಸ್ಮಾ ಉದೇತಿ ಪಣ್ಡಿತೋ.

೧೧೭.

ಕಾಚೋ ಕಞ್ಚನ-ಸಂಸಗ್ಗಾ,

ಧತ್ತೇ ಮಾರ-ಕತಿಂ ಜುತಿಂ;

ತಥಾ ಸಂಸನ್ನಿಧಾನೇನ,

ಮೂಳ್ಹೋ ಯಾತಿ ಪವೀಣತಂ.

೧೧೮.

ಕೀಟೋಪಿ ಸುಮನೋ-ಸಙ್ಗಾ,

ಆರೋಹತಿ ಸತಂ ಸಿರೋ;

ಅಸ್ಮಾಪಿ ಯಾತಿ ದೇವತ್ವಂ,

ಮಹಬ್ಭಿ ಸುಪ್ಪತಿಟ್ಠಿತೋ.

೧೧೯.

ಸಬ್ಭಿರೇವ ಸಮಾಸೇಥ,

ಸಬ್ಭಿ ಕುಬ್ಬೇಥ ಸನ್ಧವಂ;

ಸತಂ ಸದ್ಧಮ್ಮಮಞ್ಞಾಯ,

ಪಞ್ಞಂ ಲಭತಿ ನಾಞ್ಞತೋ.

೧೨೦.

ಸಬ್ಭಿರೇವ ಸಮಾಸೇಥ,

ಸಬ್ಭಿ ಕುಬ್ಬೇಥ ಸನ್ಧವಂ;

ಸತಂ ಸದ್ಧಮ್ಮಮಞ್ಞಾಯ,

ಸಬ್ಬ-ದುಕ್ಖಾ ಪಮುಚ್ಚತ್ತಿ.

೧೨೧.

ಸಕಿಂದೇವ ಕುಲಪುತ್ತ,

ಸಬ್ಭಿ ಹೋತಿ ಸಮಾಗಮೋ;

ಸಾ ನಂ ಸಙ್ಗತಿ ಪಾಲೇತಿ,

ನಾಸಬ್ಭಿ ಬಹು ಸಙ್ಗಮೋ.

೧೨೨.

ಸೇಯ್ಯೋ ಅ-ಮಿತ್ತೋ ಮೇಧಾವೀ,

ಯಞ್ಚೇ ಬಾಲಾನುಕಮ್ಪಕೋ.

೧೨೩.

ಸೀಲವನ್ತಂ ಪಞ್ಞವನ್ತಂ,

ದಿವಾ ನಿಸ್ಸಯ-ದಾಯಕಂ;

ಬಹುಸ್ಸುತಂ ಗವೇಸನ್ತೋ,

ಭಜೇಯ್ಯ ಅತ್ಥ-ಮಾಮಕೋ.

೧೨೪.

ಪಾಪ-ಮಿತ್ತೇ ವಿವಜ್ಜೇತ್ವಾ,

ಭಜೇಯ್ಯುತ್ತಮ-ಪುಗ್ಗಲಂ;

ಓವಾದೇ ಚಸ್ಸ ತಿಟ್ಠೇಯ್ಯ,

ಪತ್ಥೇನ್ತೋ ಅ-ಚಲಂ ಸುಖಂ.

೧೨೫.

ನ ಭಜೇ ಪಾಪಕೇ ಮಿತ್ತೇ,

ನ ಭಜೇ ಪುರಿಸಾಧಮೇ;

ಭಜೇಥ ಮಿತ್ತ್ತೇ ಕಲ್ಯಾಣೇ,

ಭಜೇಥ ಪುರಿಸುತ್ತಮೇ.

೧೨೬.

ಅನವಜ್ಜಂ ಮುಖಮ್ಬೋಜ,

ಮನವಜ್ಜಾ ಚ ಭಾರತೀ;

ಅಲಙ್ಕತಾವ ಸೋಭನ್ತೇ,

ಕಿಂಸು ತೇ ನಿರಲಙ್ಕತಾ.

೧೨೭.

ನ ಹಿ ವಣ್ಣೇನ ಸಮ್ಪನ್ನಾ,

ಮಞ್ಜುಕಾ ಪಿಯ-ದಸ್ಸಿನಾ;

ಖರಾ ವಾಚಾ ಪಿಯಾ ಹೋತಿ,

ಅಸ್ಮಿಂ ಲೋಕೇ ಪರಮ್ಹಿ ಚ.

೧೨೮.

ನನು ಪಸ್ಸಸಿಮಂ ಕಾಳಿಂ,

ದುಬ್ಬಣ್ಣಂ ತಿಲಕಾಹತಂ;

ಕೋಲಿಲಂ ಸಣ್ಹ-ವಾಚೇನ,

ಬಹೂನಂ ಪಾಣಿನಂ ಪಿಯಂ.

೧೨೯.

ತಸ್ಮಾ ಸಖಿಲ-ವಾಚಾಯ,

ಮನ್ತ-ಭಾಣೀ ಅನುದ್ಧತೋ;

ಅತ್ಥಂ ಧಮ್ಮಞ್ಚ ದೀಪೇತಿ,

ಮಧುರಂ ತಸ್ಸ ಭಾಸಿತಂ.

೧೩೦.

ತಮೇವ ವಾಚಂ ಭಾಸೇಯ್ಯ,

ಯಾ ಸತ್ತಾನಂ ನ ತಾಪಯೇ;

ಪರೇ ಚ ನ ವಿಹಿಂಸೇಯ್ಯ,

ಸಾ ವೇ ವಾಚಾ ಸುಭಾಸಿತಾ.

೧೩೧.

ಪಿಯಂ ವಾಚಂವ ಭಾಸೇಯ್ಯ,

ಯಾ ವಾಚಾ ಪಟಿನನ್ದಿತಾ;

ಯಂ ಅನಾದಾಯ ಪಾಪಾನಿ;

ಪರೇಸಂ ಭಾಸತೇ ಪಿಯಂ.

೧೩೨.

ಸಚ್ಚಂ ವೇ ಅಮತಾ ವಾಚಾ,

ಏಸ ಧಮ್ಮೋ ಸನನ್ತನೋ;

ಸಚ್ಚೇ ಅತ್ಥೇ ಚ ಧಮ್ಮೇ ಚ,

ಆಹು ಸನ್ತೋ ಪತಿಟ್ಠಿತಾ.

೧೩೩.

ಸುಭಾಸಿತಞ್ಚ ಧಮ್ಮಞ್ಚ,

ಪಿಯಞ್ಚ ಸಚ್ಚಮೇವ ಚ;

ಚತು-ಅಙ್ಗೇಹಿ ಸಮ್ಪನ್ನಂ,

ವಾಚಂ ಭಾಸೇಯ್ಯ ಪಣ್ಡಿತೋ.

೧೩೪.

ಮನಾಪಮೇವ ಭಾಸೇಯ್ಯ,

ನಾಮನಾಪಂ ಕುದಾಚನಂ;

ಮನಾಪಂ ಭಾಸಮಾನಸ್ಸ,

ಸಿದ್ಧಂ ಪಿಯೋಸಧಂ ಭವೇ.

೧೩೫.

ಯಂ ವದೇಯ್ಯ ತಂ ಕರೇಯ್ಯ,

ಯಂ ನ ವದೇ ನ ತಂ ಕರೇ;

ಅ-ಕರೋನ್ತಂ ಭಾಸಮಾನಂ,

ಪರಿಜಾನನ್ತಿ ಪಣ್ಡಿತಾ.

೧೩೬.

ರಹೋವಾದಂ ನ ಭಾಸೇಯ್ಯ,

ನ ಸಮ್ಮುಖಾ ಖಿಣಂ ಭಣೇ;

ಅ-ತರಮಾನೋವ ಭಣೇಯ್ಯ,

ತರಮಾನೋವ ನೋ ಭಣೇ.

೧೩೭.

ಮಾವೋಚ ಫರುಸಂ ಕಿಞ್ಚಿ,

ವುತ್ತಾ ಪಟಿವದೇಯ್ಯುಂ ತಂ;

ದುಕ್ಖಾ ಹಿ ಸಾರಮ್ಭಕಥಾ,

ಪಟಿದಣ್ಡಾ ಫುಸೇಯ್ಯುಂ ತಂ.

೧೩೮.

ಸಕ-ಯುತ್ತಂ ಕರೇ ಕಮ್ಮಂ,

ಸಕ-ಯುತ್ತಂ ವಚಿಂ ಭಣೇ;

ಅ-ಯುತ್ತಕೇ ಧನಂ ನಟ್ಠಂ,

ಅ-ಯುತ್ತೇ ಜೀವಿತಂ ಖಯೇ.

೧೩೯.

ಯೇ ವುಡ್ಢಮಪಚಾಯನ್ತಿ,

ನರಾ ಧಮ್ಮಸ್ಸ ಧಕಾವಿದಾ;

ದಿಟ್ಠೇ ಧಮ್ಮೇವ ಪಾಸಂಸಾ,

ಸಮ್ಪರಾಯೇ ಚ ಸುಗ್ಗತಿಂ.

೧೪೦.

ಪೋರೀ-ಕಥಂ-ವ ಭಾಸೇಯ್ಯ,

ಯುತ್ತಾ ಕಥಾ ಹಿ ಪೂರಿನೋ;

ಭಾತಿ-ಮತ್ತಞ್ಚ ಭಾತಾತಿ,

ಪಿತು-ಮತ್ತಂ ಪಿತಾ ಇತಿ.

೧೪೧.

ದಾನಞ್ಚ ಪಿಯ-ವಜ್ಜಞ್ಚ,

ಅತ್ಥ-ಚರಿಯಾ ಚ ಯಾ ಇಧ;

ಸಮಾನತ್ತತಾ ಧಮ್ಮೇಸ,

ತತ್ಥ ತತ್ಥ ಯಥಾರಹಂ.

೧೪೨.

ಸಕಿಂ ವದನ್ತಿ ರಾಜಾನೋ,

ಸಕಿಂ ಸಮಣ-ಬ್ರಾಹ್ಮಣಾ;

ಸಕಿಂವ ಪುರಿಸಾ ಲೋಕೇ,

ಏಸಧಮ್ಮೋ ಸನನ್ತನೋ.

೧೪೩.

ಏಕ-ವಾಚಂವ ದ್ವೇವಾಚಂ,

ಭಣೇಯ್ಯ ಅನುಕಮ್ಪಕೋ;

ತದುತ್ತರಿ ನ ಭಾಸೇಯ್ಯ,

ದಾಸೋವಯ್ಯಸ್ಸ ಸನ್ತಿಕೇ.

೧೪೪.

ತಸ್ಸೇವ ತೇನ ಪಾಪಿಯೋ,

ಯೋ ಕುದ್ಧಂ ಪಟಿಕುಜ್ಝತ್ತಿ;

ಕುದ್ಧಂ ಅ-ಪಟಿಕುಜ್ಝನ್ತೋ,

ಸಙ್ಗಾಮಂ ಜೇತಿ ದುಜ್ಜಯಂ.

೧೪೫.

ಉಭಿನ್ನಮತ್ಥಂ ಚರತಿ,

ಅತ್ತನೋ ಚ ಪರಸ್ಸ ಚ;

ಪರಂ ಸಂಕುಪಿತಂ ಞತ್ವಾ,

ಯೋ ಸತೋ ಉಪಸಮ್ಮತಿ.

ಅತ್ತಾನಂ ರಕ್ಖನ್ತೋ ಪರಂ ರಕ್ಖತಿ,

ಪರಂ ರಕ್ಖನ್ತೋ ಅತ್ತಾನಂ ರಕ್ಖತಿ.

೧೪೬.

ಸೀಲ-ಸಮಾಧಿ-ಪಞ್ಞಾನಂ,

ಖನ್ತೀ ಪಧಾನ-ಕಾರಣಂ;

ಸಬ್ಬೇಪಿ ಕುಸಲಾ ಧಮ್ಮಾ,

ಖನ್ತ್ಯಾಯತ್ತಾವ ವಡ್ಢರೇ.

೧೪೭.

ಖಮಾ-ಖಗ್ಗ-ಕರೇತಸ್ಸ,

ದುಜ್ಜನೋ ಕಿಂ ಕರಿಸ್ಸತಿ;

ಅ-ತಿಣೇ ಪತಿತೋ ವನ್ಹಿ,

ಸಯಮೇವೂಪಸಮ್ಮತಿ.

೧೪೮.

ಸುಸ್ಸುಸಾ ಸವಣಞ್ಚೇವ,

ಗಹಣಂ ಧಾರಣಂ ತಥಾ;

ಉಹಾಪೋಹತ್ಥವಿಞ್ಞಾಣಂ,

ತತ್ವ-ಞ್ಞಾಣಞ್ಚಧೀಗುಣಂ.

೧೪೯.

ಯಸ್ಸೇತೇ ಚತುರೋ ಧಮ್ಮಾ,

ಅತ್ಥಿ ಪೋಸೇಸು ಪಣ್ಡಿತ;

ಸಚ್ಚಂ ಧಮ್ಮೋ ಧೀತಿ ಚಾಗೋ,

ದಿಟ್ಠಂ ಸೋ ಅತಿವತ್ತತಿ.

೧೫೦.

ವೇಜ್ಜೋ ಪುರೋಹಿತೋ ಮನ್ತೀ,

ವೇದಞ್ಞೋತ್ರ ಚತುತ್ಥಕೋ;

ಪಭಾತ-ಕಾಲೇ ದಟ್ಠಬ್ಬಾ,

ನಿಚ್ಚಂ ಸ್ವ-ಸೀರಿಮಿಚ್ಛತಾ.

೧೫೧.

ಮಿತ್ತಾನಂ ಸನ್ತಿಕಂ ಗಚ್ಛೇ,

ಕಾಲೇ ನ ರತ್ತಿಯಂ ಕಿಸಂ;

ಚೇ ಬಹುಂ ಭಿಜ್ಜೇ ಚಿನಿತ್ವಾ,

ತಂ ಮಿತ್ತೇಸು ಸಮಾಕರೇ.

೧೫೨.

ನ ಪರೇಸಂ ವಿಲೋಮಾನಿ,

ನ ಪರೇಸಂ ಕತಾಕತಂ;

ಅತ್ತನೋವ ಅವೇಕ್ಖೇಯ್ಯ,

ಕತಾನಿ ಅ-ಕತಾನಿ ಚ.

೧೫೩.

ದೇಸ-ಜಾತಿ-ಪುಬ್ಬೇ-ಚರಾ,

ಅನು-ಚರಾ ಜನೋ ಕರೇ;

ಪರೇಸಂ ವೇಧಕಂ ಮಾಯಂ,

ತಂ ಜಾನಿತ್ವಾ ಸಖಂ ಕರೇ.

೧೫೪.

ಪರಿತ್ತಂ ದಾರುಮಾರುಯ್ಹ,

ಯಥಾ ಸೀದೇ ಮಹಣ್ಣವೇ;

ಏವಂ ಕುಸೀತಮಾಗಮ್ಮ,

ಸಾಧು-ಜೀವೀಪಿ ಸೀದತಿ;

ತಸ್ಮಾ ತಂ ಪರಿವಜ್ಜೇಯ್ಯ,

ಕುಸೀತಂ ಹೀನ-ವೀರಿಯಂ.

೧೫೫.

ಅಲಸಞ್ಚ ಪಮಾದೋ ಚ,

ಅನುಟ್ಠಾನಂ ಅ-ಸಂಯಮೋ;

ನಿದ್ದಾ ತನ್ದಿ ಚ ತೇ ಛಿದ್ದೇ,

ಸಬ್ಬಸೋ ತಂ ವಿವಜ್ಜಯೇ.

೧೫೬.

ಚಜೇಯ್ಯ ದುಮ್ಮಿತ್ತಂ ಬಾಲಂ,

ಆಸೀವಿಸಂವ ಮಾಣವೋ;

ಭಞ್ಜೇಯ್ಯ ಪಾಪಕಂ ಕಮ್ಮಂ,

ನಳಾಗಾರಂವ ಕುಞ್ಜರೋ.

೧೫೭.

ನ ಹಿ ಅಞ್ಞಞ್ಞ-ಚಿತ್ತಾನಂ,

ಇತ್ಥೀನಂ ಪುರಿಸಾನ ವಾ;

ನಾನಾವೀಕತ್ವಾ ಸಂಸಗ್ಗಂ,

ತಾದಿಸಂ ಪಿಚ ನಾಸ್ಮಸೇ.

೧೫೮.

ನಾಸ್ಮಸೇ ಕತ-ಪಾಪಮ್ಹಿ,

ನಾಸ್ಮಸೇ ಅಲಿಕ-ವಾದಿನೇ;

ನಾಸ್ಮತೇ ಅತ್ತತ್ಥಪಞ್ಞಮ್ಹಿ,

ಅತ್ತ-ಸನ್ತೇಪಿ ನಾಸ್ಮತೇ.

೧೫೯.

ಘತಾಸನಂ ಕುಞ್ಜರಂ ಕಣ್ಹ-ಸಪ್ಪಂ,

ಮುದ್ಧಾ-ಭಿಸಿತ್ತಂ ಪಮದಾ ಚ ಸಬ್ಬಾ;

ಏತೇ ನರೋ ನಿಚ್ಚಸತೋ ಭಜೇಥ,

ತೇಸಂ ಹವೇ ದುಬ್ಬಿದೂ ಸಬ್ಬ-ಭಾವೋ.

೧೬೦.

ಇತ್ಥೀನಂ ದುಜ್ಜನಾನ-ಞ್ಚ,

ವಿಸ್ಸಾಸೋ ನೋ-ಪ ಪಜ್ಜತೇ;

ವಿಸೇ ಸಿಙ್ಗಿಮ್ಹಿ ನದಿಯಂ,

ರೋಗೇ ರಾಜ-ಕುಲಮ್ಹಿ ಚ.

೧೬೧.

ಇತ್ಥಿ-ಧುತ್ತೋ ಸುರಾ-ಧುತ್ತೋ,

ಅಕ್ಖ-ಧುತ್ತೋ ಚ ಯೋ ನರೋ;

ಲದ್ಧಂ ಲದ್ಧಂ ವಿನಾಸೇತಿ,

ತಂ ಪರಾಭವತೋ ಮುಖಂ.

೧೬೨.

ಪಾಪ-ಮಿತ್ತೋ ಪಾಪ-ಸಖೋ,

ಪಾಪ-ಆಚಾರ ಗೋಚರೋ;

ಅಸ್ಮಾ ಲೋಕಾ ಪರಮ್ಹಾ ಚ,

ಉಭಯಾ ಧಂಸತೇ ನರೋ.

೧೬೩.

ಮಚ್ಛೇರೇನ ಯಸಂ ಹತಂ,

ಕುಪ್ಪನೇನ ಗುಣೋ ಹತೋ;

ಕೂಟೇನ ನಸ್ಸತೇ ಸಚ್ಚಂ,

ಖುದ್ದೇನ ಧಮ್ಮ-ರಕ್ಖನಂ.

೧೬೪.

ಅಕ್ಖ-ದೇವೀ ಧನಾನಿ ಚ,

ವಿನಾಸೋ ಹೋತಿ ಆಪದಾ;

ಠಿತಿ ಹತಾ ಪಮಾದೋ ಚ,

ದ್ವಿಜಂ ಭಿಕ್ಖುಞ್ಚ ನಸ್ಸತಿ.

೧೬೫.

ಪೇಸುಞ್ಞೇನ ಕುಲಂ ಹತಂ,

ಮಾನೇನ ಹಿತಮತ್ತನೋ;

ದುಚ್ಚರಿತೇನ ಮಾನುಸೋ,

ದಲಿದ್ದಾಯಾದರೋ ಹತೋ.

೧೬೬.

ಅ-ಮಾನನಾ ಯತ್ಥ ಸಿಯಾ,

ಸನ್ತಾನಂಪಿ ವಿಮಾನನಾ;

ಹೀನ-ಸಮ್ಮಾನನಾವಾಪಿ,

ನ ತತ್ಥ ವಸತಿಂ ವಸೇ.

೧೬೭.

ಯತ್ಥಾಲಸೋ ಚ ದಕ್ಖೋ ಚ,

ಸೂರೋ ಭೀರು ಚ ಪೂಜಿಯಾ;

ನ ತತ್ಥ ಸನ್ತೋ ವಸನ್ತಿ,

ಅ-ವಿಸೇಸ-ಕರೇ ನರೇ.

೧೬೮.

ನೋ ಚೇ ಅಸ್ಸ ಸಕಾ-ಬುದ್ಧಿ,

ವಿನಯೋ ವಾ ಸು-ಸಿಕ್ಖಿತೋ;

ವನೇ ಅನ್ಧ-ಮಹಿಂಸೋವ,

ಚರೇಯ್ಯ ಬಹುಕೋ ಜನೋ.

೧೬೯.

ಫಲಂ ವೇ ಕದಲಿಂ ಹನ್ತಿ,

ಫಲಂ ವೇಳುಂ ಫಲಂ ನಳಂ;

ಸಕ್ಕಾರೋ ಕಾ-ಪುರಿಸಂ ಹನ್ತಿ,

ಗಬ್ಭೋ ಅಸ್ಸತರಿಂ ಯಥಾ.

೧೭೦.

ವಜ್ಜಞ್ಚ ವಜ್ಜತೋ ಞತ್ವಾ,

ಅ-ವಜ್ಜಞ್ಚ ಅ-ವಜ್ಜತೋ;

ಸಮ್ಮಾದಿಟ್ಠಿ-ಸಮಾದಾನಾ,

ಸತ್ತಾ ಗಚ್ಛನ್ತ್ತಿ ಸುಗ್ಗತಿಂ.

ಘರಾವಾಸ-ನಿದ್ದೇಸ

೧೭೧.

ದುಕ್ಖಂ ಗಹಬ್ಬತಂ ಸಾಧು,

ಸಂವಿಭಜ್ಜಞ್ಚ ಭೋಜನಂ;

ಅ-ಹಾಸೋ ಅತ್ಥ-ಲೋಭೇಸು,

ಅತ್ಥ-ಬ್ಯಾಪತ್ತಿ ಅಬ್ಯಥೋ.

೧೭೨.

ಯೋಧ ಸೀತಞ್ಚ ಉಣ್ಹಞ್ಚ,

ತಿಣಾ ಭಿಯ್ಯೋ ನ ಮಞ್ಞತಿ;

ಕರಂ ಪುರಿಸ-ಕಿಚ್ಚಾನಿ,

ಸೋ ಸುಖಾ ನ ವಿಹಾಯತಿ.

೧೭೩.

ಪಣ್ಡಿತೋ ಸೀಲ-ಸಮ್ಪನ್ನೋ,

ಸಣ್ಹಾ ಚ ಪಟಿಭಾನವಾ;

ನಿವಾತ-ವುತ್ತಿ ಅತ್ಥದ್ಧೋ,

ತಾದಿಸೋ ಲಭತೇ ಯಸಂ.

೧೭೪.

ಉಟ್ಠಾನಕೋ ಅನಲಸೋ,

ಆಪದಾಸು ನ ವೇಧತಿ;

ಅಚ್ಛಿನ್ನವುತ್ತಿ ಮೇಧಾವೀ,

ತಾದಿಸೋ ಲಭತೇ ಯಸಂ.

೧೭೫.

ಸಙ್ಗಾಹಕೋ ಮಿತ್ತ-ಕರೋ,

ವದಞ್ಞೂ ವೀತ್ತ-ಮಚ್ಛರೋ;

ನೇತಾ ವಿ-ನೇತಾ ಅನು-ನೇತಾ,

ತಾದಿಸೋ ಲಭತೇ ಯಸಂ.

೧೭೬.

ಉಟ್ಠಾನವಕೋ ಸತೀಮತೋ,

ಸುಚಿ-ಕಮ್ಮಸ್ಸ ನಿಸಮ್ಮಕಾರಿನೋ;

ಸಞ್ಞತಸ್ಸ ಧಮ್ಮ-ಜೀವಿನೋ,

ಅ-ಪ್ಪಮತ್ತಸ್ಸ ಯಸೋಭಿ-ವಡ್ಢತಿ.

೧೭೭.

ದ್ವೇವ ತಾತ ಪದಾಕಾನಿ,

ಯತ್ಥ ಸಬ್ಬಂ ಪತಿಟ್ಠಿತಂ;

ಅ-ಲದ್ಧಸ್ಸ ಚ ಯೋ ಲಾಭೋ,

ಲದ್ಧಸ್ಸ ಅನುರಕ್ಖಣಾ.

೧೭೮.

ಚತುಧಾ ವಿಭಜೇ ಭೋಗೇ,

ಪಣ್ಡಿತೋ ಘರಮಾವಸಂ;

ಏಕೇನ ಭೋಗಂ ಭುಞ್ಜೇಯ್ಯ,

ದ್ವೀಹಿ ಕಮ್ಮಂ ಪಯೋಜಯೇ;

ಚತುತ್ಥಞ್ಚ ನಿಧಾಪೇಯ್ಯ,

ಆಪದಾಸು ಭವಿಸ್ಸತಿ.

೧೭೯.

ಅಞ್ಜನಾನಂ ಖಯಂ ದಿಸ್ವಾ,

ಉಪಚಿಕಾನಞ್ಚ ಆಚಯಂ;

ಮಧೂನಞ್ಚ ಸಮಾಹಾರಂ,

ಪಣ್ಡಿತ್ತೋ ಘರಮಾವಸೇ.

೧೮೦.

ವಿಭವಂ ರಕ್ಖತೋ ಲದ್ಧಂ,

ಪರಿಹಾನಿ ನ ವಿಜ್ಜತಿ;

ಆರಕ್ಖಮ್ಹಿ ಅ-ಸನ್ತಮ್ಹಿ,

ಲದ್ಧಂ ಲದ್ಧಂ ವಿನಸ್ಸತಿ.

೧೮೧.

ಪಞ್ಞಾ ನತ್ಥಿ ಧನಂ ನತ್ಥಿ,

ಯಸ್ಸ ಲೋಕೇ ನ ವಿನ್ದತಿ;

ಪುತ್ತ-ದಾರಾ ನ ಪೀಯನ್ತಿ,

ತಸ್ಸ ಮಿತ್ತಂ ಸುಖಾವಹಂ.

೧೮೨.

ಚತ್ತಾರೋ ಚ ವೇದಿತಬ್ಬಾ,

ಮಿತ್ತಾ ಚೇವ ಸುಹದಾ ಚ;

ಉಪಕಾರೋ ಸುಹದೋಪಿ,

ಸಮಾನ-ಸುಖ-ದುಕ್ಖೋ ಚ;

ಅತ್ಥಕ್ಖಾಯೀನುಕಮ್ಪಕೋ,

ತಥಾ ಮಿತ್ತೋ ವೇದಿತಬ್ಬೋ.

೧೮೩.

ಭೋಗಾ ನಟ್ಠೇನ ಜಿಣ್ಣೇನ,

ಅ-ಮಿತೇನ ಚ ಭೋಜನೇ;

ನ ತಿಟ್ಠನ್ತಿ ಚಿರಂ ದಿಸ್ವಾ,

ತಂ ಪಣ್ಡಿತೋ ಘರೇ ವಸೇ.

೧೮೪.

ಅತಿ-ಸೀತಂ ಅತಿ-ಉಣ್ಹಂ,

ಅತಿ-ಸಾಯಮಿದಂ ಅಹು;

ಇತಿ ವಿಸ್ಸಟ್ಠ-ಕಮ್ಮನ್ತೇ,

ಅತ್ಥಾ ಅಚ್ಚೇನ್ತಿ ಮಾಣವೇ.

೧೮೫.

ನ ದಿವಾ ಸುಪ್ಪ-ಸೀಲೇನ,

ರತ್ತಿನಟ್ಠಾನದೇಸ್ಸಿನಾ;

ನಿಚ್ಚಂ ಮತ್ತೇನ ಸೋಣ್ಡೇನ,

ಸಕ್ಕಾ ಆವಸಿತುಂ ಘರಂ.

೧೮೬.

ಹನನ್ತಿ ಭೋಗಾ ದುಮ್ಮೇಧಂ,

ನೋ ಚೇ ಪಾರ-ಗವೇಸಿನೋ;

ಭೋಗ-ತಣ್ಹಾಯ ದುಮ್ಮೇಧೋ,

ಹನ್ತಿ ಅಞ್ಞೇವ ಅತ್ತನಂ.

೧೮೭.

ದುಜ್ಜೀವಿತಮಜೀವಿಮ್ಹಾ,

ಯೇಸಂ ನೋ ನ ದದಾಮಸೇ;

ವಿಜ್ಜಮಾನೇಸು ಭೋಗೇಸು,

ದೀಪಂ ನಾ ಕಮ್ಹ ಮತ್ತನೋ.

೧೮೮.

ಸಟ್ಠಿ-ವಸ್ಸ-ಸಹಸ್ಸಾನಿ,

ಪರಿಪುಣ್ಣಾನಿ ಸಬ್ಬಸೋ;

ನಿರಯೇ ಪಚ್ಚಮಾನಾನಂ,

ಕದಾ ಅನ್ತೋ ಭವಿಸ್ಸತಿ.

೧೮೯.

ನತ್ಥಿ ಅನ್ತೋ ಕುತೋ ಅನ್ತೋ,

ನ ಅನ್ತೋ ಪತಿದಿಸ್ಸತಿ;

ತದಾ ಹಿ ಪಕತಂ ಪಾಪಂ,

ಮಮ ತುಯ್ಹಞ್ಚೇ ಮಾರಿಸಾ;

೧೯೦.

ಸೋಹಂ ನೂನ ಇತೋ ಗನ್ತಾ,

ಯೋನಿ ಲದ್ಧಾನ ಮಾನುಸಂ;

ವದಞ್ಞೂ ಸೀಲ-ಸಮ್ಪನ್ನೋ,

ಕಾಹಾಮಿ ಕುಸಲಂ ಬಹುಂ.

೧೯೧.

ಮಾ ಗಿಜ್ಝೇ ಪಚ್ಚಯೇ ಮಚ್ಚೋ,

ಬಹು-ದೋಸಾ ಹಿ ಪಚ್ಚಯಾ;

ಚರನ್ತೋ ಪಚ್ಚಯೇ ಞಾಯಾ,

ಉಭಯತ್ಥಾಪಿ ವಡ್ಢತಿ.

೧೯೨.

ಅ-ಲದ್ಧಾ ವಿತ್ತಂ ತಪ್ಪತಿ,

ಪುಬ್ಬೇ ಅ-ಸಮುದಾನಿತಂ;

ನ ಪುಬ್ಬೇ ಧನಮೇಸಿಸ್ಸಂ,

ಇತಿ ಪಚ್ಛಾನುತಪ್ಪತಿ.

೧೯೩.

ಕೂಟವೇದೀ ಪುರೇ ಆಸಿಂ,

ಪಿಸುಣೋ ಪಿಟ್ಠಿ-ಮಂಸಿಕೋ;

ಚಣ್ಡೋ ಚ ಫರುಸೋ ಚಾಪಿ,

ಇತಿ ಪಚ್ಛಾನುತಪ್ಪತಿ.

೧೯೪.

ಪಾಣಾತಿಪಾತೀ ಪುರೇ ಆಸಿಂ,

ಲುದ್ದೋ ಚಾಪಿ ಅನರಿಯೋ;

ಭೂತಾನಂ ನಾನುಕಮ್ಪಿಯಂ,

ಇತಿ ಪಚ್ಛಾನುತಪ್ಪತಿ.

೧೯೫.

ಬಹೂಸು ವತ ಸನ್ತೀಸು,

ಅನಾಪಾದಾಸು ಇತ್ಥಿಸು;

ಪರ-ದಾರಂ ಅಸೇವಿಸ್ಸಂ,

ಇತಿ ಪಚ್ಛಾನುತಪ್ಪತಿ.

೧೯೬.

ಬಹುಮ್ಹಿ ತವ ಸನ್ತಮ್ಹಿ,

ಅನ್ನ-ಪಾನೇ ಉಪಟ್ಠಿತೇ;

ನ ಪುಬ್ಬೇ ಅದದಂ ದಾನಂ,

ಇತಿ ಪಚ್ಛಾನುತಪ್ಪತಿ.

೧೯೭.

ಮಾತರಂ ಪಿತರಞ್ಚಾಪಿ,

ಜಿಣ್ಣಕಂ ಗತ-ಯೋಬ್ಬನಂ;

ಪಹು ಸನ್ತೋ ನ ಪೋಸಿಸ್ಸಂ,

ಇತಿ ಪಚ್ಛಾನುಕಪ್ಪತಿ.

೧೯೮.

ಆಚರಿಯಮನುಸತ್ಥಾರಂ,

ಸಬ್ಬ-ಕಾಮ-ರಸಾಹರಂ;

ಪಿತರಂ ಅತಿಮಞ್ಞಿಸ್ಸಂ,

ಇತಿ ಪಚ್ಛಾನುತಪ್ಪತಿ.

೧೯೯.

ಸಮಣೇ ಬ್ರಾಹ್ಮಣೇ ಚಾಪಿ,

ಸೀಲವನ್ತೇ ಬಹುಸ್ಸುತೇ;

ನ ಪುಬ್ಬೇ ಪಯಿರುಪಾಸಿಸ್ಸಂ,

ಇತಿ ಪಚ್ಛಾನುತಪ್ಪತಿ.

೨೦೦.

ಸಾಧು ಹೋತಿ ತಪೋ ಚಿಣ್ಣೋ,

ಸನ್ತೋ ಚ ಪಯಿರುಪಾಸಿತೋ;

ನ ಪುಬ್ಬೇವ ತಪೋಚಿಣ್ಣೋ,

ಇತಿ ಪಚ್ಛಾನುತಪ್ಪತಿ.

೨೦೧.

ಯೋ ಚ ಏತಾನಿ ಠಾನಾನಿ,

ಯೋನಿಸೋ ಪಟಿಪಜ್ಜತಿ;

ಕರಂ ಪುರಿಸ-ಕಿಚ್ಚಾನಿ,

ಸ ಪಚ್ಛಾ ನಾನುತಪ್ಪತಿ.

೨೦೨.

ನ ಸಾಧಾರಣ-ದಾರಸ್ಸ,

ನ ಭುಞ್ಜೇ ಸಾಧುಮೇಕಕೋ;

ನ ಸೇವೇ ಲೋಕಾಯತಿಕಂ,

ನೇತಂ ಪಞ್ಞಾಯ ವಡ್ಢನಂ.

೨೦೩.

ಸೀಲವಾ ವತ್ತ-ಸಮ್ಪನ್ನೋ,

ಅ-ಪ್ಪಮತ್ತೋ ವಿಚಕ್ಖಣೋ;

ನಿವಾತ್ತ-ವುತ್ತಿ ಅತ್ಥದ್ಧೋ,

ಸುರತೋ ಸಖಿತೋ ಮುದು.

೨೦೪.

ಸಙ್ಗಹೇತಾ ಚ ಮಿತ್ತಾನಂ,

ಸಂವಿಭಾಗೀ ವೀಧಾನವಾ;

ತಪ್ಪೇಯ್ಯ ಅನ್ನ-ಪಾನೇನ,

ಸದಾ ಸಮಣ-ಬ್ರಾಹ್ಮಣೇ.

೨೦೫.

ಧಮ್ಮ-ಕಾಮೋ ಸುತಾ-ಧಾರೋ,

ಭವೇಯ್ಯ ಪರಿಪುಚ್ಛಕೋ;

ಸಕ್ಕಚ್ಚಂ ಪಯಿರುಪಾಸೇಯ್ಯ,

ಸೀಲವನ್ತೇ ಬಹುಸ್ಸುತ್ತೇ.

೨೦೬.

ಘರಮಾವಸಮಾನಸ್ಸ,

ಗಹಟ್ಠಸ್ಸ ಸಕಂ ಘರಂ;

ಖೇಮಾ ವುತ್ತಿ ಸಿಯಾ ಏವಂ,

ಏವಂ ನು ಅಸ್ಸ ಸಙ್ಗಹೋ.

೨೦೭.

ಅ-ಬ್ಯಪಜ್ಜೋ ಸಿಯಾ ಏವಂ,

ಸಚ್ಚ-ವಾದೀ ಚ ಮಾಣವೋ;

ಅಸ್ಮಾ ಲೋಕಾ ಪರಂ ಲೋಕಂ,

ಏವಂ ಪೇಚ್ಚ ನ ಸೋಚತಿ.

೨೦೮.

ಸುಖಾ ಮತ್ತೇಯ್ಯತಾ ಲೋಕೇ,

ಅಥೋ ಪೇತ್ತೇಯ್ಯತಾ ಸುಖಾ;

ಸುಖಾ ಸಾಮಞ್ಞತಾ ಲೋಕೇ,

ಅಥೋ ಬ್ರಹ್ಮಞ್ಞತಾ ಸುಖಾ.

೨೦೯.

ಪಥವೀ ವೇಳುಕಂ ಪತ್ತಂ,

ಚಕ್ಕವಾಳಂ ಸುಚಿಪ್ಫಲಂ;

ಸಿನೇರು ವಮ್ಮಿಕೋ ಖುದ್ದೋ,

ಸಮುದ್ದೋ ಪಾತಿಕೋ ಯಥಾ.

೨೧೦.

ಬ್ರಹ್ಮಾತಿ ಮಾತಾ-ಪಿತರೋ,

ಪುಬ್ಬಾಚರಿಯಾತಿ ವುಚ್ಚರೇ;

ಆಹುನೇಯ್ಯಾ ಚ ಪುತ್ತಾನಂ,

ಪಜಾನಮನುಕಮ್ಪಕಾ.

೨೧೧.

ತಸ್ಮಾ ಹಿ ನೇ ನಮಸೇಯ್ಯ,

ಸಕ್ಕರೇಯ್ಯ ಚ ಪಣ್ಡಿತೋ;

ಅನ್ನೇನ ಅಥೋ ಪಾನೇನ,

ವತ್ಥೇನ ಸಯನೇನ ಚ.

ಸಾಧುಜನ-ನಿದ್ದೇಸ

೨೧೨.

ಕಾಯ-ಕಮ್ಮಂ ಸುಚಿ ತೇಸಂ,

ವಾಚಾ-ಕಮ್ಮಂ ಅನಾವಿಲಂ;

ಮನೋ-ಕಮ್ಮಂ ಸುಚಿ-ಸುದ್ಧಂ,

ತಾದಿಸಾ ಸುಜನಾ ನರಾ.

೨೧೩.

ಸೇಟ್ಠ-ವಿತ್ತಂ ಸುತಂ ಪಞ್ಞಾ,

ಸದ್ಧನಂ ಸತ್ತಧಾ ಹೋತ್ತಿ;

ಸದ್ಧಾ ಸೀಲಂ ಸುತಂ ಚಾಗೋ,

ಪಞ್ಞಾ ಚೇವ ಹಿರೋತ್ತಪ್ಪಂ.

೨೧೪.

ಸದ್ಧಮ್ಮಾಪಿ ಚ ಸತ್ತೇವ,

ಸದ್ಧಾ ಹಿರೀ ಚ ಓತ್ತಪ್ಪಂ;

ಬಾಹುಸ್ಸಚ್ಚಂ ಧಿರೋ ಚೇವ,

ಸತಿ ಪಞ್ಞಾ ಚ ಇಚ್ಚೇವಂ.

೨೧೫.

ಹಿರೀ-ಓತ್ತಪ್ಪ-ಸಮ್ಪನ್ನಾ,

ಸುಕ್ತ್ಕ-ಧಮ್ಮ-ಸಮಾಹಿತಾ;

ಸನ್ತೋ ಸಪ್ಪುರಿಸಾ ಲೋಕೇ,

ದೇವ-ಧಮ್ಮಾತಿ ವುಚ್ಚರೇ.

೨೧೬.

ಸದ್ಧೋ ಹಿರಿಮಾ ಓತ್ತಪ್ಪೀ,

ವೀರೋ ಪಞ್ಞೋ ಸ-ಗಾರವೋ;

ಭಬ್ಬೋ ಆಪಜ್ಜಿತುಂ ಬುದ್ಧಿಂ,

ವಿರೂಳ್ಹಿಞ್ಚ ವಿಪುಲ್ಲತಂ.

೨೧೭.

ಯೋ ವೇ ಕತಞ್ಞೂ ಕತ-ವೇದಿ ಧೀರೋ,

ಕಲ್ಯಾಣ-ಮಿತ್ತೋ ದಳ್ಹಅ-ಭತ್ತೋ ಚ ಹೋತಿ;

ದುಕ್ಖಿತ್ತಸ್ಸ ಸಕ್ಕಚ್ಚಂ ಕರೋತಿ ಕಿಚ್ಚಂ,

ತಥಾವಿಧಂ ಸಪ್ಪುರಿಸಂ ವದನ್ತಿ.

೨೧೮.

ಮಾತಾ-ಪೇತ್ತಿ-ಭರಂ ಜನ್ತುಂ,

ಕುಲೇ ಜೇಟ್ಠಾಪಚಾಯಿನಂ;

ಸಣ್ಹಂ ಸಖಿಲ-ಸಮ್ಭಾಸಂ,

ಪೇಸುಣೇಯಪ್ಪಹಾಯಿನಂ.

೨೧೯.

ಮಚ್ಛೇರ-ವಿನಯೇ ಯುತ್ತಂ,

ಸಚ್ಚಂ ಕೋಧಾಭಿತುಂ ನರಂ;

ತಂ ವೇ ದೇವಾ ತಾವತಿಂಸಾ,

ಆಹು ಸಪ್ಪುರಿಸೋ ಇತಿ.

೨೨೦.

ಅ-ಪ್ಪಮಾದೇನ ಮಘವಾ,

ದೇವಾನಂ ಸೇಟ್ಠತಂ ಗತೋ;

ಅ-ಪ್ಪಮಾದಂ ಪಸಂಸನ್ತಿ,

ಪಮಾದೋ ಗರಹಿತೋ ಸದಾ.

೨೨೧.

ದಾನಂ ಸೀಲಂ ಪರಿಚ್ಚಾಗಂ,

ಆಜ್ಜವಂ ಮದ್ದವಂ ತಪಂ;

ಅ-ಕೋಧಂ ಅ-ವಿಹಿಂಸಞ್ಚ,

ಖನ್ತೀಚ ಅ-ವಿರೋಧನಂ.

೨೨೨.

ಇಚ್ಚೇತೇ ಕುಸಲೇ ಧಮ್ಮೇ,

ಠಿತೇ ಪಸ್ಸಾಮಿ ಅತ್ತನಿ;

ತತೋ ಮೇ ಜಾಯತೇ ಪೀತಿ,

ಸೋಮನಸ್ಸಞ್ಚನಪ್ಪಕಂ.

೨೨೩.

ನನು ತೇಯೇವ ಸನ್ತಾ ನೋ,

ಸಾಗರಾ ನ ಕುಲಾಚಲಾ;

ಮನಂಪಿ ಮರಿಯಾದಂ ಯೇ,

ಸಂವಟ್ಟೇಪಿ ಜಹನ್ತಿ ನೋ.

೨೨೪.

ನ ಪುಪ್ಫ-ಗನ್ಧೋ ಪಟಿವಾತಮೇತಿ,

ನ ಚನ್ದನಂ ತಗ್ಗರ ಮಲ್ಲಿಕಾ ವಾ;

ಸತಞ್ಚ ಗನ್ಧೋ ಪಟಿವಾತಮೇತಿ,

ಸಬ್ಬಾ ದಿಸಾ ಸಪ್ಪುರಿಸೋ ಪವಾಯತಿ.

೨೨೫.

ತೇಪಿ ಲೋಕ-ಹಿತಾ ಸತ್ತಾ,

ಸೂರಿಯೋ ಚನ್ದಿಮಾ ಅಪಿ;

ಅತ್ಥಂ ಪಸ್ಸ ಗಮಿಸ್ಸನ್ತಿ,

ನಿಯಮೋ ಕೇನ ಲಙ್ಘತೇ.

೨೨೬.

ಸತ್ಥಾ ದೇವ-ಮನುಸ್ಸಾನಂ,

ವಸೀ ಸೋಪಿ ಮುನಿಸ್ಸರೋ;

ಗತೋವ ನಿಬ್ಬುತಿಂ ಸಬ್ಬೇ,

ಸಙ್ಖಾರಾ ನ ಹಿ ಸಸ್ಸತಾ.

೨೨೭.

ಕರೇಯ್ಯ ಕುಸಲಂ ಸಬ್ಬಂ,

ಸಿವಂ ನಿಬ್ಬಾನಮಾವಹಂ;

ಸರೇಯ್ಯಅ ಅ-ನಿಚ್ಚಂ ಖನ್ಧಂ,

ನಿಬ್ಬಿದಾ-ಞಾಣ-ಗೋಚರಂ.

೨೨೮.

ಯಾತಾನುಯಾಯೀ ಚ ಭವಾಹಿ ಮಾಣವ,

ಅಲ್ಲಞ್ಚ ಪಾಣಿಂ ಪರಿವಜ್ಜಯಸ್ಸು;

ಮಾ ಚಸ್ಸು ಮಿತ್ತೇಸು ಕದಾಚಿ ದುಬ್ಭಿ,

ಮಾ ಚ ವಸಂ ಅ-ಸತೀನಂ ಗಚ್ಛ.

೨೨೯.

ಅ-ಸನ್ಧವಂ ನಾಪಿ ಚ ದಿಟ್ಠ-ಪುಬ್ಬಂ,

ಯೋ ಆಸನೇನಾಪಿ ನಿಮನ್ತಯೇಯ್ಯ;

ತಸ್ಸೇವ ಅತ್ಥಂ ಪುರಿಸೋ ಕರೇಯ್ಯ,

ಯಾತಾನುಯಾಯೀತಿತಮಾಹುಪಣ್ಡಿತಾ.

೨೩೦.

ಯಸ್ಸೇಕರತ್ತಿಪಿ ಘರೇ ವಸೇಯ್ಯ,

ಯತ್ಥನ್ನ-ಪಾನಂ ಪುರಿಸೋ ಲಭೇಯ್ಯ;

ನ ತಸ್ಸ ಪಾಪಂ ಮನಸಾಪಿ ಚಿನ್ತೇಯ್ಯ,

ಅ-ದುಬ್ಭ-ಪಾಣಿ ದಹತೇ ಮಿತ್ತ-ದುಬ್ಭೋ.

ತತೀಯ ಸಾಧುನರ

೨೩೧.

ಯಸ್ಸ ರುಕ್ಖಸ್ಸ ಛಾಯಾಯ,

ನಿಸೀದೇಯ್ಯ ಸಯೇಯ್ಯ ವಾ;

ನ ತಸ್ಸ ಸಾಖಂ ಭಞ್ಜೇಯ್ಯ,

ಮಿತ್ತ-ದುಬ್ಭೋ ಹಿ ಪಾಪಕೋ.

ಚತುತ್ಥ ಸಾಧುನರ

೨೩೨.

ಪುಣ್ಣಂಪಿ ಚೇ ಮಂ ಪಥವಿಂ ಧನೇನ,

ದಜ್ಜಿತ್ಥಿಯಾ ಪುರಿಸೋ ಸಮ್ಮತಾಯ;

ಸದ್ಧಾ ಖಣಂ ಅತಿಮಞ್ಞೇಯ್ಯ ತಂಪಿ,

ತಾಸಂ ವಸಂ ಅ-ಸತೀನಂ ನ ಗಚ್ಛೇ.

೨೩೩.

ಏವಂ ಖೋ ಯಾತಂ ಅನುಯಾಯೀ ಹೋತಿ,

ಅಲ್ಲಞ್ಚ ಪಾಣಿಂ ದಹತೇ ಪುನೇವಂ;

ಅ-ಸತೀ ಚ ಸಾ ಸೋ ಪನ ಮಿತ್ತಂ-ದುಬ್ಭೋ,

ಸೋ ಧಮ್ಮಿಕೋ ಹೋಹಿ ಜಹಸ್ಸು ಅ-ಧಮ್ಮಂ.

ಕಾಯಖಮನೀಯ-ನಿದ್ದೇಸ

೨೩೪.

ಅಭಿವಾದನ-ಸೀಲಿಸ್ಸ,

ನಿಚ್ಚಂ ವುಡ್ಢಾಪಚಾಯಿನೋ;

ಚತ್ತಾರೋ ಧಮ್ಮಾ ವಡ್ಢನ್ತಿ,

ಆಯು ವಣ್ಣೋ ಸುಖಂ ಬಲಂ.

೨೩೫. ಪಞ್ಚಿಮೇ ಭಿಕ್ಖವೇ ಧಮ್ಮಾ ಆಯುಸ್ಸಾ, ಕತಮೇ ಪಞ್ಚ. ಸಪ್ಪಾಯ-ಕಾರೀ ಹೋತಿ. ಸಪ್ಪಾಯೇಚ ಮತ್ತಂ ಜಾನಾತಿ. ಪರಿಣತ್ತಭೋಜೀ ಚ ಹೋತಿ. ಕಾಲ-ಚಾರೀ ಚ, ಬ್ರಹ್ಮ-ಚಾರೀಚ. ಇಮೇ ಖೋ ಭಿಕ್ಖವೇ ಪಞ್ಚ ಧಮ್ಮಾ ಆಯುಸ್ಸಾತಿ.

೨೩೬. ಪಞ್ಚಿಮೇ ಭಿಕ್ಖವೇ ಧಮ್ಮಾ ಆಯುಸ್ಸಾ, ಕತಮೇ ಪಞ್ಚ. ಸಪ್ಪಾಯ-ಕಾರೀ ಹೋತಿ. ಸಪ್ಪಾಯೇಚ ಮತ್ತಂ ಜಾನಾತಿ. ಪರಿಣತಭೋಜೀಚಹೋತಿ. ಸೀಲವಾಚ, ಕಲ್ಯಾಣ ಮಿತ್ತೋಚ. ಇಮೇ ಖೋ ಭಿಕ್ಖವೇ ಪಞ್ಚ ಧಮ್ಮಾ ಆಯುಸ್ಸಾತಿ.

೨೩೭.

ಪಞ್ಚ-ಸೀಲಂ ಸಮಾದಾಯ,

ಸಮಂ ಕತ್ವಾ ದಿನೇ ದಿನೇ;

ಸತಿಮಾ ಪಞ್ಞವಾ ಹುತ್ವಾ,

ಚರೇ ಸಬ್ಬಿರಿಯಾಪಥೇ.

೨೩೮. ಪಞ್ಚಿಮೇ ಭಿಕ್ಖವೇ ಚಙ್ಕಮೇ ಆನಿಸಂಸಾ, ಕತಮೇ ಪಞ್ಚ, ಅದ್ಧಾನಕ್ಖಮೋ ಹೋತಿ. ಪಧಾನಕ್ಖಮೋ ಹೋತಿ. ಅಪ್ಪಾಬಾಧೋ ಹೋತಿ. ಅಸಿತಂಪೀತಂಖಾಯಿತಂಸಾಯಿತಂ ಸಮ್ಮಾ ಪರಿಣಾಮಂ ಗಚ್ಛತಿ. ಚಙ್ಕಮಾಧಿಗತೋ ಸಮಾಧಿ ಚಿರಟ್ಠಿತಿಕೋ ಹೋತಿ. ಇಮೇಖೋ ಭಿಕ್ಖವೇ ಪಞ್ಚ ಚಙ್ಕಮೇ ಆನಿ ಸಂಸಾತಿ.

೨೩೯.

ಪರಿಸ್ಸಾವನ-ದಾನಞ್ಚ,

ಆವಾಸ-ದಾನಮೇವ ಚ;

ಗಿಲಾನ-ವತ್ಥು-ದಾನಞ್ಚ,

ದಾತಬ್ಬಂ ಮನುಜಾಧಿಪ.

೨೪೦.

ಕಾತಬ್ಬಂ ಜಿಣ್ಣಕಾವಾಸಂ,

ಪಟಿಸಙ್ಖರಣಂ ತಥಾ;

ಪಞ್ಚ-ಸೀಲ-ಸಮಾದಾನಂ,

ಕತ್ವಾ ತಂ ಸಾಧು-ರಕ್ಖಿತಂ;

ಉಪೋಸಥೋಪವಾಸೋ ಚ,

ಕಾತಬ್ಬೋಪೋಸಥೇ ಇತಿ.

೨೪೧.

ಅತಿ-ಭೋತ್ತಾ ರೋಗ-ಮೂಲಂ,

ಆಯುಕ್ಖಯಂ ಕರೋತಿ ವೇ;

ತಸ್ಮಾ ತಂ ಅತಿ-ಭುತ್ತಿಂವ,

ಪರಿಹರೇಯ್ಯ ಪಣ್ಡಿತೋ.

೨೪೨.

ಅ-ಜಿಣ್ಣೇ ಭೋಜನಂ ವಿಸಂ,

ದುಲ್ಲದ್ಧೇ ಅ-ವಿಚಾರಕೇ;

ಜಿಣ್ಣೇ ಸು-ಲದ್ಧೇ ವಿಚಾರೇ,

ನ ವಜ್ಜಂ ಸಬ್ಬ-ಭೋಜನಂ.

೨೪೩.

ಚತ್ತಾರೋ ಪಞ್ಚ ಆಲೋಪೇ,

ಆಭುತ್ವಾ ಉದಕಂ ಪಿವೇ;

ಅಲಂ ಫಾಸು-ವಿಹಾರಾಯ;

ಪಹಿತತ್ತಸ್ಸ ಭಿಕ್ಖುನೋ.

೨೪೪.

ಮನುಜಸ್ಸ ಸದಾ ಸತಿಮತೋ,

ಮತ್ತಂ ಜಾನತೋ ಲದ್ಧ-ಭೋಜನಂ;

ತನುಕಸ್ಸ ಭವನ್ತಿ ವೇದನಾ,

ಸನಿಕಂ ಜೀರತಿ ಆಯು ಪಾಲಯಂ.

೨೪೫.

ಗರೂನಂ ಅಡ್ಢ-ಸೋಹಿಚ್ಚಂ,

ಲಹೂನಂ ನಾತಿ-ಕಿತ್ತಿಯಾ;

ಮತ್ತಾ-ಪಮಾಣಂ ನಿದ್ದಿಟ್ಠಂ,

ಸುಖಂ ಜೀರತಿ ತಾವತಾ.

೨೪೬.

ತೋಯಾಭಾವೇ ಪಿಪಾಸತ್ತಾ,

ಖಣಾ ಪಾಣೇಹಿ ಮುಚ್ಚತೇ;

ತಸ್ಮಾ ಸಬ್ಬಾಸುವತ್ಥಾಸು,

ದೇಯ್ಯಂ ವಾರಿಂ ಪಿಪಾಸಯೇ.

೨೪೭.

ಸೀತೋದಕಂ ಪಯೋ ಖುದ್ದಂ,

ಘತಮೇಕೇಕಸೋ ದ್ವಿಸೋ;

ತಿಸ್ಸೋ ಸಮಗ್ಗಮಥ ವಾ,

ಪಗೇ ಪಿತಂ ಯುವತ್ತದಂ.

೨೪೮.

ಅನ್ನಂ ಬ್ರಹ್ಮಾ ರಸೇ ವಿಣ್ಹು,

ಭುತ್ತೇ ಚೇವ ಮಹೇಸರೋ;

ಏವಂ ಞತ್ವಾತು ಯೋ ಭುಞ್ಜೇ,

ಅನ್ನ-ದೋಸಂ ನ ಲಿಮ್ಪತೇ.

೨೪೯.

ಕತ್ತಿಕಸ್ಸನ್ತಿಮೋ ಭಾಗೋ,

ಯಂ ಚಾದೋ ಮಿಗ-ಮಾಸಜೋ;

ತಾವುಭೋ ಯಮ-ದಾಠಾಖ್ಯೋ,

ಲಘ್ವಾಹಾರೋವ ಜೀವತಿ.

೨೫೦.

ಸತ್ಥಾನುಕುಲ-ಚರಿಯಾ,

ಚಿತ್ತಞ್ಞಾವಸವತ್ತಿನಾ;

ಬುದ್ಧಿ-ರಕ್ಖಿಲಿತತ್ಥೇನ,

ಪರಿಪುಣ್ಣಂ ರಸಾಯನಂ.

೨೫೦.

ಅ-ಜಾತಿಯಾ ಅ-ಜಾತಾನಂ,

ಜಾತಾನಂ ವಿನಿವತ್ತಿಯಾ;

ರೋಗಾನಂ ಯೋ ವಿಧಿ ದಿಟ್ಠೋ,

ತಂ ಸುಖತ್ಥೀ ಸಮಾಚರೇ.

೨೫೨.

ಆರೋಗ್ಯಂ ಪರಮಾ ಲಾಭಾ,

ಸನ್ತುಟ್ಠಿ ಪರಮಂ ಧನಂ;

ವಿಸ್ಸಾಸಾ ಪರಮಾ ಞಾತಿ,

ನಿಬ್ಬಾನಂ ಪರಮಂ ಸುಖಂ.

ಪಕಿಣ್ಣಕ-ನಿದ್ದೇಸ

೨೫೩.

ಕುಮುದಂ ಕೋ ಪಬೋಧಯಿ,

ನಾಥೋ ರವಿನ್ದು ಪಣ್ಡಿತೋ;

ಕಮಲಂ ಕೋ ಕುಮುದಂ ಕೋ,

ನರಪಂ ಕೋ ಪಬೋಧಯಿ.

೨೫೪.

ಚಿತ್ತೇನ ನಿಯ್ಯತಿ ಲೋಕೋ,

ಚಿತ್ತೇನ ಪರಿಕಸ್ಸತಿ;

ಚಿತ್ತಸ್ಸ ಏಕ-ಧಮ್ಮಸ್ಸ,

ಸಬ್ಬೇವ ವಸಮನ್ವಗೂ.

೨೫೫.

ಸಮಣೋ ರಾಜಾನುರಾಜಾ,

ಸೇನಾಪತಿ ಮಹಾ-ಮತ್ತೋ;

ಧಮ್ಮಟ್ಠೋ ಪಣ್ಡಿತೋ ದಿಸ್ವಾ,

ಪಚ್ಚಕ್ಖತ್ಥಂ ನ ಕಾರಿಯಾ.

೨೫೬.

ದೀಪೋ ನವ-ದಿಸಂ ತೇಜೋ,

ನ ಹೇಟ್ಠಾ ಚ ತಥಾ ಸಕಂ;

ಪರ-ವಜ್ಜಂ ವಿದೂ ಪಸ್ಸೇ,

ಸಕ-ವಜ್ಜಂಪಿ ಪಸ್ಸತು.

೨೫೭.

ಸ-ಫಲಂ ಪಣ್ಡಿತೋ ಲೋಕೇ,

ಸ-ಕಾರಣಂ ವಚಂ ಭಣೇ;

ಅ-ಕಾರಣಂಫಲಂ ಬಾಲೋ,

ಇದಂ ಉಭಯ-ಲಕ್ಖಣಂ.

೨೫೮.

ತಸ್ಸ ವಾಚಾಯ ಜಾನೇಯ್ಯ,

ಕುಟಿಲಂ ಬಾಲ-ಪಣ್ಡಿತಂ;

ವಾಚಾ-ರೂಪಂ ಮಿತ್ತಂ ಕರೇ,

ವಾಚಾ-ರೂಪಂ ಧುವಂ ಜಹೇ.

೨೫೯.

ದುಚ್ಚಿನ್ತಿತಸ್ಸ ಚಿನ್ತಾ ಚ,

ದುಬ್ಭಾಸಿತಸ್ಸ ಭಾಸನಾ;

ದುಕ್ಕಮ್ಮಸ್ಸ ಕತಞ್ಚಾತಿ,

ಏತಂ ಬಾಲಸ್ಸ ಲಕ್ಖಣಂ.

೨೬೦.

ಸು-ಚಿನ್ತಿತಸ್ಸ ಚಿನ್ತಾ ಚ,

ಸು-ಭಾಸಿತಸ್ಸ ಭಾಸನಾ;

ಸು-ಕಮ್ಮಸ್ಸ ಕತಞ್ಚಾತಿ,

ಏತಂ ಧೀರಸ್ಸ ಲಕ್ಖಣಂ.

೨೬೧.

ಅ-ನಯಂ ನಯತಿ ದುಮ್ಮೇಧೋ,

ಅ-ಧುರಾಯಂ ನಿ-ಯುಞ್ಜತಿ;

ದುನ್ನಯೋ ಸೇಯ್ಯಸೋ ಹೋತಿ,

ಸಮ್ಮಾ ವುತ್ತೋ ಪಕುಪ್ಪತಿ;

ವಿನಯಂ ಸೋ ನ ಜಾನಾತಿ,

ಸಾಧು ತಸ್ಸ ಅ-ದಸ್ಸನಂ.

೨೬೨.

ನಯಂ ನಯತಿ ಮೇಧಾವೀ,

ಅ-ಧುರಾಯಂ ನ ಯುಞ್ಜತಿ;

ಸು-ನಯೋ ಸೇಯ್ಯಸೋ ಹೋತಿ,

ಸಮ್ಮಾ ವುತ್ತೋ ನ ಕುಪ್ಪತಿ;

ವಿನಯಂ ಸೋ ಪಜಾನಾತಿ,

ಸಾಧು ತೇನ ಸಮಾಗಮೋ.

೨೬೩.

ಅ-ನಾಯಕಾ ವಿನಸ್ಸನ್ತಿ,

ನಸ್ಸನ್ತಿ ಬಹು-ನಾಯಕಾ;

ಥೀ-ನಾಯಕಾ ವಿನಸ್ಸನ್ತಿ,

ನಸ್ಸನ್ತಿ ಸುಸು-ನಾಯಕಾ.

೨೬೪.

ಜೇಟ್ಠೋ ಕಮ್ಮೇಸು ನೀಚಾನಂ,

ಜಾನಂಜಾನಂವ ಆಚರೇ;

ಅ-ಜಾನೇವಂ ಕರೇ ಜಾನಂ,

ನೀಚೋ ಏತಿ ಭಯಂ ಪಿಯಂ.

೨೬೫.

ಕಮ್ಮಂ ದುಜ್ಜನ-ಸಾರುಪ್ಪಂ,

ದುಧಾ ಸುಜನ-ಸಾರುಪ್ಪಂ;

ದುಜ್ಜನಂ ತೇಸು ದುಕ್ಕಮ್ಮೇ,

ಸು-ಕಮ್ಮೇ ಸುಜನಂ ಇಚ್ಛೇ.

೨೬೬.

ಪಣ್ಡಿತೋ ವೇರೀ ಬಾಲೋ ಚ,

ದುಜ್ಜಯೋ ಬಾಲ-ವೇರಿತೋ;

ಪಣ್ಡಿತಂ-ವೇರೀ ಪಮಾದೇನ,

ನ ತಂ ಜಯೋ ಹಿ ಸಬ್ಬದಾ.

೨೬೭.

ಗುಯ್ಹಸ್ಸ ಹಿ ಗುಯ್ಹಮೇವ ಸಾಧು,

ನ ಹಿ ಗುಯ್ಹಸ್ಸ ಪಸತ್ಥಮಾವಿ-ಕಮ್ಮಂ;

ಅ-ನಿಪ್ಫನ್ನತಾಯ ಸಹೇಯ್ಯ ಧೀರೋ,

ನಿಪ್ಫನ್ನತ್ಥೋವ ಯಥಾ-ಸುಖಂ ಭಣೇಯ್ಯ.

೨೬೮.

ಗುಯ್ಹಮತ್ಥಂ ನ ವಿವರೇಯ್ಯ,

ರಕ್ಖೇಯ್ಯ ನಂ ಯಥಾ ನಿಧಿಂ;

ನ ಹೀ ಪಾತುಕತೋ ಸಾಧು,

ಗುಯ್ಹೋ ಅತ್ಥೋ ಪಜಾನತಾ.

೨೬೯.

ಥಿಯಾ ಗುಯ್ಹಂ ನ ಸಂಸೇಯ್ಯ,

ಅ-ಮಿತ್ತಸ್ಸ ಚ ಪಣ್ಡಿತೋ;

ಯೋ ಚಾಮಿಸೇನ ಸಂಹೀರೋ,

ಹದಯ-ತ್ಥೇನೋ ಚ ಯೋ ನರೋ.

೨೭೦.

ವಿವಿಚ್ಚ ಭಾಸೇಯ್ಯ ದಿವಾ ರಹಸ್ಸಂ,

ರತ್ತಿಂ ಗಿರಂ ನಾತಿ-ವೇಲಂ ಪಮುಞ್ಚೇ;

ಉಪಸ್ಸುತಿಕಾ ಹಿ ಸುಣನ್ತಿ ಮನ್ತಂ,

ತಸ್ಮಾ ಹಿ ಮನ್ತೋ ಖಿಪ್ಪಮುಪೇತಿ ಭೇದಂ.

೨೭೧.

ನ ಪಕಾಸತಿ ಗುಯ್ಹಂ ಯೋ,

ಸೋ ಗುಯ್ಹಂ ಪಟಿಗುಯ್ಹತಿ;

ಭಯೇಸು ನ ಜಹೇ ಕಿಚ್ಚೇ,

ಸು-ಮಿತ್ತೋನುಚರೋ ಭವೇ.

೨೭೨.

ಕರೋತಿ ದುಕ್ಕರಂ ಸಾಧುಂ,

ಉಜುಂ ಖಮತಿ ದುಕ್ಖಮಂ;

ದುದ್ದದಂ ಸಾಮಂ ದದಾತಿ,

ಯೋ ಸು-ಮಿತ್ತೋ ಹವೇ ಭವೇ.

೨೭೩.

ಪಿಯ-ವಾಚಾ ಸದಾ ಮಿತ್ತೋ,

ಪಿಯ-ವತ್ಥುಂ ನ ಯಾಚನಾ;

ಇಚ್ಛಾಗತೇನ ದಾನೇನ,

ಸು-ದಳ್ಹೋ ಸು-ಪ್ಪಿಯೋ ಹವೇ;

ತದಙ್ಗತೋ ಚ ಹೀನೇನ,

ಅ-ಪ್ಪಿಯೋ ಭಿಜ್ಜನೋ ಭವೇ.

೨೭೪.

ದೇಹೀತಿ ಯಾಚನೇ ಹಿರೀ,

ಸಿರೀ ಚ ಕಾಯ-ದೇವತಾ;

ಪಲಾಯನ್ತಿ ಸಿರಿಚ್ಛಿತೋ,

ನ ಯಾಚೇ ಪರ-ಸನ್ತಕಂ.

೨೭೫.

ಸ್ವಾನೋ ಲದ್ಧಾನ ನಿಮ್ಮಂಸಂ,

ಅಟ್ಠಿಂ ತುಟ್ಠೋ ಪಮೋದತಿ;

ಸಕನ್ತಿಕಂ ಮಿಗಂ ಸೀಹೋ,

ಹಿತ್ವಾ ಹತ್ಥಿಂನುಧಾವತಿ.

೨೭೬.

ಏವಂ ಛನ್ದಾನುರೂಪೇನ,

ಜನೋ ಆಸೀಸತೇ ಫಲಂ;

ಮಹಾ ಛನ್ದಾ ಮಹನ್ತಂವ,

ಹೀನಂವ ಹೀನ-ಛನ್ದಕಾ.

೨೭೭.

ನಾನಾ-ಛನ್ದಾ ಮಹಾರಾಜ,

ಏಕಾಗಾರೇ ವಸಾಮಸೇ;

ಅಹಂ ಗಾಮ-ವರಂ ಇಚ್ಛೇ,

ಬ್ರಾಹ್ಮಣೀ ಚ ಗವಂ ಸತಂ.

೨೭೮.

ಪುತ್ತೋ ಚ ಆಜಞ್ಞ-ರಥಂ,

ಕಞ್ಞಾ ಚ ಮಣಿ-ಕುಣ್ಡಲಂ;

ಯಾ ಚೇಸಾ ಪುಣ್ಣಕಾ ಜಮ್ಮೀ,

ಉಜುಕ್ಖಲಂಭಿ-ಕಙ್ಖತಿ.

೨೭೯.

ಠಾನಂ ಮಿತ್ತೇ ಧನೇ ಕಮ್ಮೇ,

ಸತುಸ್ಸಾಹೇ ಸು-ಲಬ್ಭಿತಂ;

ತಂ ದಳ್ಹಂ ದುಕ್ಕರಂ ಕರೇ,

ಪಞ್ಞಾ-ಸತಿ-ಸಮಾಧಿನಾ.

೨೮೦.

ಭೇಸಜ್ಜೇ ವಿಹಿತೇ ಸುದ್ಧ,

ಬುದ್ಧಾದಿ-ರತನತ್ತಯೇ;

ಪಸಾದಮಾಚರೇ ನಿಚ್ಚಂ,

ಸಜ್ಜನೇ ಸ-ಗುಣೇಪಿ ಚ.

೨೮೧.

ರಾಜಾ ರಟ್ಠೇನ ಧಾತುಸೋ,

ಬಾಲೋ ಪಾಪೇಹಿ ದುಮ್ಮನೋ,

ಅಲಙ್ಕಾರೇನ ಇತ್ಥೀಪಿ,

ಕಾಮೇಹಿ ಚ ನ ತಪ್ಪತಿ.

೨೮೨.

ಅಪ್ಪಿಚ್ಛೋ ಚ ಧುತಙ್ಗೇನ,

ಆರದ್ಧೋ ವೀರಿಯೇನ ಹಿ;

ವಿಸಾರದೋ ಪರಿಸಾಯ,

ಪರಿಚ್ಚಾಗೇನ ದಾಯಕೋ;

ಸವನೇನ ಸು-ಧಮ್ಮಂಪಿ,

ನ ತಪ್ಪತಿವ ಪಣ್ಡಿತೋ.

೨೮೩.

ಜೇಟ್ಠಸ್ಸ ಸಿತಂ ಹಸಿತಂ,

ಮಜ್ಝಸ್ಸ ಮಧುರಸ್ಸರಂ;

ಲೋಕೇ ಅಂಸ-ಸಿರೋ-ಕಮ್ಪಂ,

ಜಮ್ಮಸ್ಸ ಅಪ-ಹಸ್ಸಿತಂ;

ಏತೇಸಂ ಅತಿ-ಹಸ್ಸಿತಂ,

ಹಾಸೋ ಹೋತಿ ಯಥಾಕ್ಕಮಂ.

೨೮೪.

ನತ್ಥಿ ದುಟ್ಠೇ ನಯೋ ಅತ್ಥಿ,

ನ ಧಮ್ಮೋ ನ ಸು-ಭಾಸಿತಂ;

ನಿಕ್ಕಮಂ ದುಟ್ಠೇ ಯುಞ್ಜೇಯ್ಯ,

ಸೋ ಹಿ ಸಬ್ಭಿಂ ನ ರಞ್ಜತಿ.

೨೮೫.

ದುಲ್ಲಭಂ ಪಕತಿಂ ವಾಚಂ,

ದುಲ್ಲಭೋ ಖೇಮಕೋ ಸುತೋ;

ದುಲ್ಲಭಾ ಸದಿಸೀ ಜಾಯಾ,

ದುಲ್ಲಭೋ ಸ-ಜನೋ ಪಿಯೋ.

೨೮೬.

ಧಜೋ ರಥಸ್ಸ ಪಞ್ಞಾಣಂ,

ಧೂಮೋ ಪಞ್ಞಾಣಮಗ್ಗಿನೋ;

ರಾಜಾ ರಟ್ಠಸ್ಸ ಪಞ್ಞಾಣಂ,

ಭತ್ತಾ ಪಞ್ಞಾಣಮಿತ್ಥಿಯಾ.

೨೮೭.

ದುನ್ನಾರಿಯಾ ಕುಲಂ ಸುದ್ಧಂ,

ಪುತ್ತೋ ನಸ್ಸತಿ ಲಾಲನಾ;

ಸಮಿದ್ಧಿ ಅ-ನಯಾ ಬನ್ಧು,

ಪವಾಸಾ ಮದನಾ ಹಿರೀ.

೨೮೮.

ಮಾತಾ ಪಿತಾ ಚ ಪುತ್ತಾನಂ,

ನೋವಾದೇ ಬಹು-ಸಾಸನ್ನಂ;

ಪಣ್ಡಿತಾ ಮಾತರೋ ಅಪ್ಪಂ,

ವದೇಯ್ಯುಂ ವಜ್ಜ-ದೀಪನಂ.

೨೮೯.

ಲಾಳಯೇ ಪಞ್ಛ-ವಸ್ಸಾನಿ,

ದಸ-ವಸ್ಸಾನಿ ತಾಳಯೇ;

ಪತ್ತೇ ತು ಸೋಳಸೇ ವಸ್ಸೇ,

ಪುತ್ತಂ ಮಿತ್ತಂವದಾಚರೇ.

೨೯೦.

ಲಾಲನೇ ಧೀತರಂ ದೋಸಾ,

ಪಾಲನೇ ಬಹವೋ ಗುಣಾ;

ಧೀತುಯಾ ಕಿರಿಯಂ ನಿಚ್ಚಂ,

ಪಸ್ಸನ್ತು ಸುಟ್ಠು ಮಾತರೋ.

ಇತಿ ಪಕಿಣ್ಣಕ-ನಿದ್ದೇಸೋ ನಾಮ

ಸತ್ತಮಾ ಪರಿಚ್ಛೇದೋ.

ಸೀಲ-ನಿದ್ದೇಸ

೨೯೧.

ಪಮಾದಂ ಭಯತೋ ದಿಸ್ವಾ,

ಅ-ಪ್ಪಮಾದಞ್ಚ ಖೇಮತೋ;

ಭಾವೇಥ ಅಟ್ಠಙ್ಗಿಕಂ ಮಗ್ಗಂ,

ಏಸಾ ಬುದ್ಧಾನುಸಾಸನೀ.

೨೯೨.

ಹೀನೇನ ಬ್ರಹ್ಮ-ಚರಿಯೇನ,

ಖತ್ತಿಯೇ ಉಪಪಜ್ಜತಿ;

ಮಜ್ಝಿಮೇನ ಚ ದೇವತ್ತಂ,

ಉತ್ತಮೇನ ವಿ-ಸುಜ್ಝತಿ.

ಕ.

ನಗರೇ ಬನ್ಧುಮತಿಯಾ,

ಬನ್ಧುಮಾ ನಾಮ ಖತ್ತಿಯೋ;

ದಿವಸೇ ಪುಣ್ಣಮಾಯ ಸೋ,

ಉಪಗಚ್ಛಿ ಉಪೋಸಥಂ.

ಖ.

ಅಹಂ ತೇನ ಸಮಯೇನ,

ಗುಮ್ಭ-ದಾಸೀ ಅಹಂ ತಹಿಂ;

ದಿಸ್ವಾ ಸ-ರಾಜಕಂ ಸೇನಂ,

ಏವಾಹಂ ಚಿನ್ತಯಿಂ ತದಾ.

ಗ.

ರಾಜಾಪಿ ರಜ್ಜಂ ಛಟ್ಟೇತ್ವಾ,

ಉಪಗಚ್ಛಿ ಉಪೋಸಥಂ;

ಸ-ಫಲಂ ನೂನ ತಂ ಕಮ್ಮಂ,

ಜನ-ಕಾಯೋ ಪಮೋದಿತೋ.

ಘ.

ಯೋನಿಸೋ ಪಚ್ಚವೇಕ್ಖಿತ್ವಾ,

ದುಗ್ಗಚ್ಚಞ್ಚ ದಲಿದ್ದತಂ;

ಮಾನಸಂ ಸಮ್ಪಹಂಸಿತ್ವಾ,

ಉಪಗಚ್ಛಿಮು ಪೋಸಥಂ.

ಙ.

ಅಹಂ ಉಪೋಸಥಂ ಕತ್ವಾ,

ಸಮ್ಮಾ-ಸಮ್ಬುದ್ಧಸಾಸನೇ;

ತೇನ ಕಮ್ಮೇನ ಸು-ಕತೇನ,

ತಾವತಿಂಸಂ ಅಗಚ್ಛಹಂ.

ಚ.

ತತ್ಥ ಮೇ ಸು-ಕತಂ ಬ್ಯಮ್ಹಂ,

ಉಬ್ಭ-ಯೋಜನಮುಗ್ಗತಂ;

ಕೂಟಾಗಾರ-ವರೂಪೇತಂ,

ಮಹಾಸನಸು-ಭೂಸಿತಂ.

ಛ.

ಅಚ್ಛರಾ ಸತ-ಸಹಸ್ಸಾ,

ಉಪತಿಟ್ಠನ್ತಿ ಮಂ ಸದಾ;

ಅಞ್ಞೇ ದೇವೇ ಅತಿಕ್ಕಮ್ಮ,

ಅತಿರೋಚಾಮಿ ಸಬ್ಬದಾ.

ಜ.

ಚತುಸಟ್ಠಿ-ದೇವ-ರಾಜೂನಂ,

ಮಹೇಸಿತ್ತಮಕಾರಯಿಂ;

ತೇಸಟ್ಠಿ-ಚಕ್ಕವತ್ತಿನಂ,

ಮಹೇಸಿತ್ತಮಕಾರಯಿಂ.

ಝ.

ಸುವಣ್ಣ-ವಣಾ ಹುತ್ವಾನ,

ಭವೇಸು ಸಂಸರಾಮಹಂ;

ಸಬ್ಬತ್ಥ ಪವರಾ ಹೋಮಿ,

ಉಪೋಸಥಸ್ಸಿದಂ ಫಲಂ.

ಞ.

ಹತ್ಥಿ-ಯಾನಂ ಅಸ್ಸ-ಯಾನಂ,

ರಥ-ಯಾನಞ್ಚ ಸಿವಿಕಂ;

ಲಭಾಮಿ ಸಬ್ಬಮೇತಮ್ಪಿ,

ಉಪೋಸಥಸ್ಸಿದಂ ಫಲಂ.

ಟ.

ಸೋಣ್ಣ-ಮಯಂ ರೂಪಿ-ಮಯಂ,

ಅಥೋಪಿ ಫಲಿಕಾ-ಮಯಂ;

ಲೋಹಿತಙ್ಗ-ಮಯಞ್ಚೇವ,

ಸಬ್ಬಂ ಪಟಿಲಭಾಮಹಂ.

ಠ.

ಕೋಸೇಯ್ಯ-ಕಮ್ಬಲಿಯಾನಿ,

ಖೋಮ-ಕಪ್ಪಾಸಿಕಾನಿ ಚ;

ಮಹಗ್ಘಾನಿ ಚ ವತ್ಥಾನಿ,

ಸಬ್ಬಂ ಪಟಿಲಭಾಮಹಂ.

ಡ.

ಅನ್ನಂ ಪಾನಂ ಖಾದನೀಯಂ,

ವತ್ಥಂ ಸೇನಾಸನಾನಿ ಚ;

ಸಬ್ಬಮೇತಂ ಪಟಿಲಭೇ,

ಉಪೋಸಥಸ್ಸಿದಂ ಫಲಂ.

ಢ.

ವರ-ಗನ್ಧಞ್ಚ ಮಾಲಞ್ಚ,

ಚುಣ್ಣಕಞ್ಛ ವಿಲೇಪನಂ;

ಸಬ್ಬಮೇತಂ ಪಟಿಲಭೇ,

ಉಪೋಸಥಸ್ಸಿದಂ ಫಲಂ.

ಣ.

ಕೂಟಾಗಾರಞ್ಚ ಪಾಸಾದಂ,

ಮಣ್ಡಪಂ ಹಮ್ಮಿಯಂ ಗುಹಂ;

ಸಬ್ಬಮೇತಂ ಪಟಿಲಭೇ,

ಉಪೋಸಥಸ್ಸಿದಂ ಫಲಂ.

ತ.

ಜಾತಿಯಾ ಸತ್ತ-ವಸ್ಸಾಹಂ,

ಪಬ್ಬಜಿಂ ಅನ-ಗಾರಿಯಂ;

ಅಡ್ಢ-ಮಾಸೇ ಅ-ಸಪ್ಪತ್ತೇ,

ಅರ ಹತ್ತಂ ಅಪಾಪುಣಿಂ.

ಥ.

ಕಿಲೇಸಾ ಝಾಪಿತಾ ಮಯ್ಹಂ,

ಭವಾ ಸಬ್ಬೇ ಸಮೂಹತಾ;

ಸಬ್ಬಾಸವ-ಪರಿಕ್ಖೀಣಾ,

ನತ್ಥಿ ದಾನಿ ಪುನ-ಬ್ಭವೋ.

ದ.

ಏಕ-ನವುತಿತೋ ಕಪ್ಪೇ,

ಯಂ ಕಮ್ಮಮಕರಿಂ ತದಾ;

ದುಗ್ಗತಿಂ ನಾಭಿಜಾನಾಮಿ,

ಉಪೋಸಥಸ್ಸಿದಂ ಫಲಂ.

ಧ.

ಸ್ವಾಗತಂ ವತ ಮೇ ಆಸಿ,

ಮಮ ಬುದ್ಧಸ್ಸ ಸನ್ತಿಕೇ;

ತಿಸ್ಸೋ ವಿಜ್ಜಾ ಅನು-ಪತ್ತಾ,

ಕತಂ ಬುದ್ಧಸ್ಸ ಸಾಸನಂ.

ನ.

ಪಟಿಸಮ್ಭಿದಾ ಚತಸ್ಸೋ,

ವಿಮೋಕಾಪಿ ಚ ಅಟ್ಠಿಮೇ;

ಛಳಾಭಿಞ್ಞಾ ಸಚ್ಛಿಕತಾ,

ಕತಂ ಬುದ್ಧಸ್ಸ ಸಾಸನಂ.

೨೯೩.

ಞಾತೀನಞ್ಚ ಪಿಯೋ ಹೋತಿ,

ಮಿತ್ತೇಸು ಚ ವಿರೋಚತಿ;

ಕಾಯಸ್ಸ ಭೇದಾ ಸು-ಗತಿಂ,

ಉಪಪಜ್ಜತಿ ಸೀಲವಾ.

೨೯೪.

ನಿಬ್ಬಾನಂ ಪತ್ಥಯನ್ತೇನ ಸಮಾದಿನ್ನಂ,

ಪಞ್ಚ-ಸೀಲಮ್ಪಿ ಅಧಿ-ಸೀಲಂ;

ದಸ-ಸೀಲಮ್ಪಿ ಅಧಿ-ಸೀಲಮೇವ.

ಕ.

ನಗರೇ ಚನ್ದವತಿಯಾ,

ಭಟಕೋ ಆಸಹಂ ತದಾ;

ಪರ-ಕಮ್ಮಾಯನೇ ಯುತ್ತೋ,

ಪಬ್ಬಜ್ಜಂ ನ ಲಭಾಮಹಂ.

ಖ.

ಮಹನ್ಧಕಾರ-ಪಿಹಿತಾ,

ತಿವಿಧಗ್ಗೀಹಿ ಡಯ್ಹರೇ;

ಕೇನ ನುಖೋ ಉಪಾಯೇನ,

ವಿ-ಸಂಯುತ್ತೋ ಭವೇ ಅಹಂ.

ಗ.

ದೇಯ್ಯಧಮ್ಮೋ ಚ ಮೇ ನತ್ಥಿ,

ಭಟಕೋ ದುಕ್ಖಿತೋ ಅಹಂ;

ಯಂ ನೂನಾಹಂ ಪಞ್ಚ-ಸೀಲಂ,

ರಕ್ಖೇಯ್ಯಂ ಪರಿಪೂರಯಂ.

ಘ.

ಅನೋಮದಸ್ಸಿಸ್ಸ ಮುನಿನೋ,

ನಿಸಭೋ ನಾಮ ಸಾವಕೋ;

ತಮಹಂ ಉಪಸಙ್ಕಮ್ಮ,

ಪಞ್ಚ-ಸಿಕ್ಖಾಪದಗ್ಗಹಿಂ.

ಙ.

ವಸ್ಸ-ಸತ-ಸಹಸ್ಸಾನಿ,

ಆಯು ವಿಜ್ಜತಿ ತಾವದೇ;

ತಾವತಾ ಪಞ್ಚ-ಸೀಲಾನಿ,

ಪರಿಪುಣ್ಣಾನಿ ಗೋಪಯಿಂ.

ಚ.

ಮಚ್ಚು-ಕಾಲಮ್ಹಿ ಸಮ್ಪತ್ತೇ,

ದೇವಾ ಅಸ್ಸಾಸಯನ್ತಿ ಮಂ;

ರಥೋ ಸಹಸ್ಸ-ಯುತ್ತೋ ತೇ,

ಮಾರಿಸಸ್ಸ ಉಪಟ್ಠಿತೋ.

ಛ.

ವತ್ತನ್ತೇ ಚರಿಮೇ ಚಿತ್ತೇ,

ಮಮ ಸೀಲಂ ಅನುಸ್ಸರಿಂ;

ತೇನ ಕಮ್ಮೇನ ಸು-ಕತೇನ,

ತಾವತಿಂಸಂ ಅಗಚ್ಛಹಂ.

ಜ.

ತಿಂಸಖತ್ತುಞ್ಚ ದೇವಿನ್ದೋ,

ದೇವ-ರಜ್ಜಮಕಾರಯಿಂ;

ದಿಬ್ಬ-ಸುಖಂ ಅನುಭವಿಂ,

ಅಚ್ಛರಾಹಿ ಪುರಕ್ಖತ್ತೋ.

ಝ.

ಪಞ್ಚ-ಸತ್ತತಿಖತ್ತ್ತು-ಞ್ಚ,

ಚಕ್ಕವತ್ತೀ ಅಹೋಸಹಂ;

ಪದೇಸ-ರಜ್ಜಂ ವಿಪುಲಂ,

ಗಣನಾತೋ ಅ-ಸಙ್ಖಯಂ.

ಞ.

ದೇವ-ಲೋಕಾ ಚವಿತ್ವಾನ,

ಸುಕ್ಕ-ಮೂಲೇನ ಚೋದಿತೋ;

ಪುರೇ ವೇಸಾಲಿಯಂ ಜಾತೋ,

ಮಹಾ-ಕುಲೇ ಸು-ಅಡ್ಢಕೇ.

ಟ.

ವಸ್ಸೂಪನಾಯಿಕೇ ಕಾಲೇ,

ದಿಬ್ಬನ್ತೇ ಜಿನ-ಸಾಸನೇ;

ಮಾತಾ ಚ ಮೇ ಪಿತಾ ಚೇವ,

ಪಞ್ಚ-ಸಿಕ್ಖಾಪದಗ್ಗಹುಂ.

ಠ.

ಸಹ ಸುತ್ವಾನಹಂ ಸೀಲಂ,

ಮಮ ಸೀಲಂ ಅನುಸ್ಸರಿಂ;

ಏಕಾಸನೇ ನಿಸೀದಿತ್ವಾ,

ಅರಹತ್ತಮಪಾಪುಣಿಂ.

ಡ.

ಜಾತಿಯಾ ಪಞ್ಚ-ವಸ್ಸೇನ,

ಅರಹತ್ತಮಪಾಪುಣಿಂ;

ಉಪಸಮ್ಪಾದಯಿ ಬುದ್ಧೋ,

ಗುಣಮಞ್ಞಾಯ ಚಕ್ಖುಮಾ.

ಢ.

ಪರಿಪುಣ್ಣಾನಿ ಗೋಪೇತ್ವಾ,

ಪಞ್ಚ-ಸಿಕ್ಖಾಪದಾನಹಂ;

ಅ-ಪರಿಮೇಯ್ಯಿತೋ ಕಪ್ಪೇ,

ವಿನಿಪಾತಂ ನ ಗಚ್ಛಹಂ.

ಣ.

ಸ್ವಾಹಂ ಯಸಮನುಭವಿಂ,

ತೇಸಂ ಸೀಲಾನ ವಾಹಸಾ;

ಕಪ್ಪ-ಕೋಟಿಪಿ ಕಿತ್ತೇನ್ತೋ,

ಕಿತ್ತಯೇ ಏಕ-ದೇಸಕಂ.

ತ.

ಪಞ್ಚ-ಸೀಲಾನಿ ಗೋಪೇತ್ವಾ,

ತಯೋ ಹೇತೂ ಲಭಾಮಹಂ;

ದೀಘಾಯುಕೋ ಮಹಾ-ಭೋಗೋ,

ತಿಕ್ಖ-ಪಞ್ಞೋ ಭವಾಮಹಂ.

ಥ.

ಸಂಕಿತ್ತೇನ್ತೋ ಚ ಸಬ್ಬೇಸಂ,

ಅಧಿ-ಮತ್ತಞ್ಚ ಪೋರಿಸಂ;

ಭವಾಭವೇ ಸಂಸರಿತ್ವಾ,

ಏತೇ ಠಾನೇ ಲಭಮಹಂ.

ದ.

ಅ-ಪರಿಮೇಯ್ಯ-ಸೀಲೇಸು,

ವತ್ತನ್ತಾ ಜಿನ-ಸಾವಕಾ;

ಭವೇಸು ಯದಿ ರಜ್ಜೇಯ್ಯುಂ,

ವಿಪಾಕೋ ಕೀದಿಸೋ ಭವೇ.

ಧ.

ಸು-ಚಿಣ್ಣಂ ಮೇ ಪಞ್ಚ-ಸೀಲಂ,

ಭಟಕೇನ ತಪಸ್ಸಿನಾ;

ತೇನ ಸೀಲೇನಹಂ ಅಜ್ಜ,

ಮೋಚಯಿಂ ಸಬ್ಬ-ಬನ್ಧನಾ.

ನ.

ಅ-ಪರಿಮೇಯ್ಯಿತೋ ಕಪ್ಪೇ,

ಪಞ್ಚ-ಸೀಲಾನಿ ಗೋಪಯಿಂ;

ದುಗ್ಗತಿಂ ನಾಭಿಜಾನಾಮಿ,

ಪಞ್ಚ-ಸೀಲಾನಿದಂ ಫಲಂ.

ಪ.

ಪಟಿಸಮ್ಭಿದಾ ಚತಸ್ಸೋ,

ವಿಮೋಕ್ಖಾಪಿ ಚ ಅಟ್ಠಿಮೇ;

ಛಳಾಭಿಞ್ಞಾ ಸಚ್ಛಿಕತಾ,

ಕತಂ ಬುದ್ಧಸ್ಸ ಸಾಸನಂ.

ಕ.

ತಂ ನಮಸ್ಸನ್ತಿ ತೇ ವಿಜ್ಜಾ,

ಸಬ್ಬೇ ಭೂಮಾ ಚ ಖತ್ತಿಯಾ;

ಚತ್ತಾರೋ ಚ ಮಹಾ-ರಾಜಾ,

ತಿದಸಾ ಚ ಯಸಸ್ಸಿನೋ;

ಅಥ ಕೋ ನಾಮ ಸೋ ಯಕ್ಖೋ,

ಯಂ ತ್ವಂ ಸಕ್ಕ ನಮಸ್ಸಸಿ.

ಖ.

ಮಂ ನಮಸ್ಸನ್ತಿ ತೇ-ವಿಜ್ಜಾ,

ಸಬ್ಬೇ ಭೂಮಾ ಚ ಖತ್ತಿಯಾ;

ಚತ್ತಾರೋ ಚ ಮಹಾ-ರಾಜಾ,

ತಿದಸಾ ಚ ಯಸಸ್ಸಿನೋ.

ಗ.

ಅಹಞ್ಚ ಸೀಲ-ಸಮ್ಪನ್ನೇ,

ಚಿರರತ್ತ-ಸಮಾಹಿತೇ;

ಸಮ್ಮಾ ಪಬ್ಬಜಿತೇ ವನ್ದೇ,

ಬ್ರಹ್ಮ-ಚರಿಯ ಪರಾಯನೇ.

ಘ.

ಯೇ ಗಹಟ್ಠಾ ಪುಞ್ಞ-ಕರಾ,

ಸೀಲವನ್ತೋ ಉಪಾಸಕಾ;

ಧಮ್ಮೇನ ದಾರಂ ಪೋಸೇನ್ತಿ,

ತೇ ನಮಸ್ಸಾಮಿ ಮಾತಲಿ.

ಙ.

ಸೇಟ್ಠಾ ಹಿ ಕಿರ ಲೋಕಸ್ಮಿಂ,

ಯೇ ತ್ವಂ ಸಕ್ಕ ನಮಸ್ಸಸಿ;

ಅಹಮ್ಪಿ ತೇ ನಮಸ್ಸಾಮಿ,

ಯೇ ನಮಸ್ಸಸಿ ವಾಸವ.

೧.

ಪಾಲಿತತ್ಥೇರನಾಗೇನ,

ವಿಸುದ್ಧಾರಾಮವಾಸಿನಾ;

ಸುತಿಚ್ಛಿತಾನಮತ್ಥಾಯ,

ಕತಾ ನರದಕ್ಖದೀಪನೀ.

೨.

ಪುಬ್ಬಾಚರಿಯ-ಸೀಹಾನಂ,

ಆಲಮ್ಬಿತ್ವಾನ ನಿಸ್ಸಯಂ;

ಪಾಲಿತೋ ನಾಮ ಯೋ ಥೇರೋ,

ಇಮಂ ಗನ್ಥ ಸು-ಲೇಖನೀ;

ಸುನ್ದರಮೇವ ಪಸ್ಸಿತುಂ,

ಯುಞ್ಜೇಯ್ಯಾಥೀಧ ಸಾಧವೇ.

‘‘ಛಪ್ಪದಿಕಾ’’.

೩.

ಇಮಂ ಗನ್ಥಂ ವಾಚುಗ್ಗತೋ,

ಸಚೇ ಭವಸಿ ಮಾಣವ;

ಪುಣ್ನಮಾಯಂ ಯಥಾ ಚನ್ದೋ,

ಅತಿ-ಸುದ್ಧೋ ವಿರೋಚತಿ;

ತಥೇವ ತ್ವಂ ಪುಣ್ಣ-ಮನೋ,

ವಿರೋಚ ಸಿರಿಯಾ ಧುವಂ.

೪.

ಸು-ನಿಟ್ಠಿತೋ ಅಯಂ ಗನ್ಥೋ,

ಸಕ್ಕರಾಜೇ ದಝಮ್ಫಿಯೇ;

ಪೋಟ್ಠಪಾದಮ್ಹಿ ಸೂರಮ್ಹಿ,

ಕಾಲಪಕ್ಖೇ ಚತುದ್ದಸಿಂ.

೫.

ಸಞ್ಚಿತೇತಂ ಮಯಾ ಪುಞ್ಞಂ,

ತಂ-ಕಮ್ಮೇನ ವರೇನ ಚ;

ಚಿರಂ ತಿಟ್ಠತು ಸದ್ಧಮ್ಮೋ,

ಅ-ವೇರಾ ಹೋನ್ತು ಪಾಣಿನೋ.

೬.

ಇಮಂ ಗನ್ಥಂ ಪಸ್ಸಿತ್ವಾನ,

ಹೋನ್ತು ಸಬ್ಬೇಪಿ ಜನ್ತುನೋ;

ಸುಖಿತಾ ಧಮ್ಮಿಕಾ ಞಾಣೀ,

ಧಮ್ಮಂ ಪಾಲೇತು ಪತ್ಥಿವೋ.

೭.

ನಿಬ್ಬಾನಂ ಪತ್ಥಯನ್ತೇನ,

ಸೀಲಂ ರಕ್ಖನ್ತು ಸಜ್ಜನಾ;

ಞತ್ವಾ ಧಮ್ಮಂ ಸುಖಾವಹಂ,

ಪಾಪುಣನ್ತು ಅನಾಸವಂ.

೮.

ಅಟ್ಠ-ಕಣ್ಡ-ಮಣ್ಡಿತಾಯ,

ದಕ್ಖಯ ಅತ್ಥ-ದೀಪಕೋ;

ನರ-ಸಾರೋ ಅಯಂ ಗನ್ಥೋ,

ಚಿರ-ಕಾಲಂ ಪತಿಟ್ಠತು.

೯.

ಯಾವತಾ ಚನ್ದ-ಸೂರಿಯಾ,

ನಾಗಚ್ಛೇಯ್ಯುಂ ಮಹೀ-ತಲೇ;

ಪಮೋದಿತಾ ಇಮಂ ಗನ್ಥಂ,

ದಿಸ್ಸನ್ತು ನಯ-ಕೋವಿದಾ.

೧೦.

ಸಮ್ಮಾ ಛನ್ದೇನಿಮಂ ಗನ್ಥ,

ವಾಚೇನ್ತಾ ಪರಿಯಾಪುಣಾ;

ಪಸನ್ನೇನಾನಾಯಾಸೇನ,

ಪತ್ವಾ ಸುಖೇನ ಕೋವಿದಂ.

೧೧.

ಚನ್ದಾದಿಚ್ಚಾವ ಆಕಾಸೇ,

ಬಹುಸ್ಸುತೇಹಿ ಸಮ್ಪದಾ;

ವಿಸೇಸ-ಪುಗ್ಗಲಾ ಹುತ್ವಾ,

ಪಪ್ಪೋನ್ತು ಅಮತಂ ಪದಂ.

೧೨.

ಉಕ್ಕಟ್ಠ-ಧಮ್ಮ-ದಾನೇನ,

ಪಾಪುಣೇಯ್ಯಮನುತ್ತರಂ;

ಲಿಙ್ಗ-ಸಮ್ಪತ್ತಿ-ಮೇಧಾವೀ,

ತಕ್ಕೀ-ಪಞ್ಞಾ ಸು-ಪೇಸಲೀ.

ನರದಕ್ಖ ಥೋಮನಾ ಆಸೀಸ

೩. ಗಾಥಾ

೧.

ಪಾಲಿತೋ ಪಾಳಿಯಾ ಛೇಕೋ,

ತ್ವಂಸಿ ಗಮ್ಭೀರ-ಞಾಣವಾ;

ಪಾಲಿಯಾವ ಪಾಲಿತಸ್ಸ,

ದದಾಮಿದಾನಿ ಭೋ ಅಹಂ.

೨.

ದಕ್ಖಾವಾದೇಸು ಕುಸಲೋ,

ಪಾಲಿತೋ ಸಾಸನನ್ಧರೀ;

ಪಿಟಕೇಸು ಅಜ್ಝೋಗಾಯ್ಹ,

ನರದಕ್ಖಂಭಿಸಙ್ಖರೀ.

೩.

ಸುತ-ಧರೇನ ರಚಿತಂ,

ಏತಂ ಸಾರ-ಗವೇಸಿನೋ;

ಅತನ್ದಿಕಾ ಸು-ದಕ್ಖನ್ತು,

ಅಗ್ಗಗ್ಗ-ಸಾಸನೇ ರತಾ.

ನರದಕ್ಖ ಥೋಮನಾ ಆಸೀಸ

೨. ಗಾಥಾ

೧.

ಞುಂ ಪಾಲಿತೋಧ ಜಾತೋ ಯೋ,

ಥೇರೋ ಸೋ ಅಬ್ಭುತೋವ ಞುಂ;

ಞುಂ ಮಹಾ-ಪಾಲಿತೋ ಸನ್ತೋ,

ನಿಕಾಯ-ಪಾಲಿತೋ ಚ ಞುಂ.

೨.

ಞುಂ ನರ-ದಕ್ಖ-ಗನ್ಥಂ ಯಂ,

ಸೋವಕಾ ನರ-ದಕ್ಖ-ದಂ;

ನರಾ ದಕ್ಖನ್ತು ಸಮ್ಮಾ ಚ,

ದಕ್ಖತ್ತಂ ಪಾಪುಣನ್ತು ಞುಂ.