📜

ನಮೋ ತಸ್ಸ ಭಗವತೋ ಅರಹತೋ ಸಮ್ಮಾಸಮ್ಬುದ್ಧಸ್ಸ.

ರಸವಾಹಿನೀ

ಪಣಾಮಾದಿಕಥಾ

೧.

ಸತ್ಥುಪ್ಪಸತ್ಥಚರಣಂ ¶ ಸರಣಂ ಜನಾನಂ,

ಬ್ರಹ್ಮಾದಿಮೋಳಿ ಮಣಿರಂಸಿ ಸಮಾವಹನ್ತಂ,

ಪಙ್ಕೇರುಹಾಭಮುದುಕೋಮಲಚಾರುವಣ್ಣಂ;

ವನ್ದಾಮಿ ಚಕ್ಕವರಲಕ್ಖಣಮಾದಧಾನಂ.

೨.

ಸಿದ್ಧಂ ಜಿನೇನ ಚಿರಕಾಲಮತನ್ದಿತೇನ,

ಯಂ ಭಾವಕೋ ಸಮಧಿಗಚ್ಛತಿ ಖೇಮಮಗ್ಗಂ;

ಯಂ ಕಪ್ಪರುಕ್ಖ ರುಚಿದಾನ ಮಣಿವ ಭಾತಿ,

ತಂ ಧಮ್ಮಮಗ್ಗ ಮಸಮಂ ಪಣಮಾಮಿ ನಿಚ್ಚಂ.

೩.

ಸನ್ತಿನ್ದ್ರಿಯಂ ಸುಗತಸೂನುವರಂ ವಿಸುದ್ಧಂ,

ಯಂ ದಕ್ಖಿಣೇಯ್ಯಮತದಂ ಸುಚಿಪುಞ್ಞಖೇತ್ತಂ;

ತಾಣೇಸಿನಂ ಸರಣಮುಜ್ಝಿತಸಬ್ಬದುಕ್ಖಂ,

ವನ್ದಾಮಿ ಸಙ್ಘ ಮನಘಂ ಸಿರಸಾ ಮಹಗ್ಘಂ.

೪.

ಯಮ್ಪತ್ತಮೇತ್ಥ ರತನತ್ತಯಥೋಮನೇನ,

ಪುಞ್ಞೇನ ತೇನ ದುರಿತಂ ಸಕಲಂ ಪಣುಜ್ಜ,

ವಕ್ಖಾಮಹಂ ಸುಮಧುರಂ ರಸವಾಹಿನಿನ್ತಂ,

ಭೋ ಭೋ ಸುಣನ್ತು ಸುಜನಾ ಭಿಮುದಾವಹಾ ಸಾ.

೫.

ತತ್ಥತತ್ಥೂಪಪನ್ನಾನಿ, ¶ ವತ್ಥೂನಿ ಅರಹಾ ಪುರೇ;

ಅಭಾಸುಂ ದೀಪಭಾಸಾಯ, ಠಪೇಸುಂ ತಂ ಪುರಾತನಾ.

೬.

ಮಹಾವಿಹಾರೇ ತಙ್ಗುತ್ತ, ವಙ್ಕಪರಿವೇಣವಾಸಿಕೋ;

ರಟ್ಠಪಾಲೋತಿ ನಾಮೇನ, ಸೀಲಾಚಾರ ಗುಣಾಕರೋ.

೭.

ಹಿತಾಯ ಪರಿವತ್ತೇಸಿ, ಪಜಾನಂ ಪಾಳಿಭಾಸತೋ;

ಪುನರುತ್ತಾದಿದೋಸೇಹಿ, ತಮಾಸಿ ಸಬ್ಬಮಾಕುಲಂ;

ಅನಾಕುಲಂ ಕರಿಸ್ಸಾಮಿ, ತಂ ಸುಣಾಥ ಸಮಾಹಿತಾ.

೮.

ವಿತರಾಗಾ ಪುರೇ ವೋಚುಂ, ಯಸ್ಮಾ ತಸ್ಮಾ ಹಿ ಭಾಸಿತಂ;

ಏತಮಾದರಣೀಯಞ್ಹಿ, ಸಾಧು ಸಾಧೂಹಿ ಸಬ್ಬದಾತಿ.

ಜಮ್ಬುದೀಪುಪ್ಪತ್ತಿ ವತ್ಥೂನಿ.

ಧಮ್ಮಸೋಣ್ಡಕವಗ್ಗೋ

೧. ಧಮ್ಮಸೋಣ್ಡಕಸ್ಸ ವತ್ಥುಮ್ಹಿ ಅಯಮಾನುಪುಬ್ಬೀಕಥಾ

ತತ್ಥ ತೇಸಂ ವತ್ಥೂನ ಮುಪ್ಪತ್ತಿಯೋ ದ್ವಿಧಾ ಭವನ್ತಿ ಜಮ್ಬುದೀಪೇ ಸೀಹಳದೀಪೇಚಾತಿ, ತತ್ಥ ಜಮ್ಬುದೀಪೇ ತಾಳೀಸ, ಸೀಹಳದೀಪೇ ತೇಸಟ್ಠಿ, ತೇಸು ತಾವ ಜಮ್ಬುದೀಪುಪ್ಪತ್ತಿವತ್ಥೂನಿ ಆವಿ ಭವಿಸ್ಸನ್ತಿ, ತತೋಪಿ ಧಮ್ಮಸೋಣ್ಡಕಸ್ಸ ವತ್ಥು ಆದಿ, ಕಥಂ, ಅಮ್ಹಾಕಂ ಕಿರ ಭಗವತೋ ಪುಬ್ಬೇ ಇಮಸ್ಮಿಂಯೇವ ಭದ್ದಕಪ್ಪೇ ಕಸ್ಸಪೋನಾಮ ಸತ್ಥಾ ಲೋಕೇ ಉದಪಾದಿ, ತಸ್ಸ ಖೋ ಪನ ಭಗವತೋ ಸಾಸನನ್ತರಧಾನತೋ ನ ಚಿರೇನೇವ ಕಾಲೇನ ಅಮ್ಹಾಕಂ ಬೋಧಿಸತ್ತೋ ಬಾರಾಣಸೀರಞ್ಞೋ ಅಗ್ಗಮಹೇಸಿಯಾ ಕುಚ್ಛಿಸ್ಮಿಂ ನಿಬ್ಬತ್ತಿ, ತಸ್ಸು ಪ್ಪತ್ತಿ ಕಾಲಸಮನನ್ತರಮೇವ ಸಬ್ಬಸತ್ತಾನಂ ಮನಸಿ ಧಮ್ಮಸಞ್ಞಾ ಉದಪಾದಿ, ತಸ್ಮಾಸ್ಸ ಧಮ್ಮಸೋಣ್ಡೋತಿನಾಮ ಮಕಂಸು, ಸೋ ಪನೇಸೋ ಕುಮಾರೋ ಮಹನ್ತೇನ ಪರಿವಾರೇನ ವಡ್ಢೇನ್ತೋ ಸಬ್ಬಸಿಪ್ಪೇಸು ನಿಪ್ಫತ್ತಿಂ ಪತ್ವಾ ಪಿತರಾ ಉಪರಜ್ಜೇನ ಪೂಜಿತೋ ಹುತ್ವಾ ದಾನಾದಯೋ ದಸಕುಸಲಕಮ್ಮಪಥೇ ಪೂರೇನ್ತೋ ಪಿತುಅಚ್ಚಯೇನಾಮಚ್ಚೇಹಿ ¶ ರಜ್ಜೇನಾಭಿಸಿಞ್ಚಿತೋ ಅಹೋಸಿ, ಸೋ ಪನೇಸ ಧಮ್ಮಸೋಣ್ಡಕಮಹಾರಾಜಾ ದೇವನಗರಸದಿಸೇ ಬಾರಾಣಸೀನಗರೇ ಚಕ್ಕವತ್ತಿಸದಿಸಂ ಬಾರಾಣಸೀರಜ್ಜಂ ಕಾರೇನ್ತೋ ಮಾಸದ್ಧಮಾಸಚ್ಚಯೇನ ಸಿರಿಸಯನಗತೋ ಏವಂ ಚಿನ್ತೇಸಿ, ಮಮೇವಂ ರಜ್ಜಸಿರಿಮನುಭವನಂ ನ ಸೋಭತಿ ಧಮ್ಮವಿಯೋಗೇನ, ದಿವಾಕರ ವಿರಹಿತೋ ನಭೋ ವಿಯಾತಿಆದಿನಾ ನಾನಾಕಾರಣಂ ಚಿನ್ತೇಸಿ, ತೇನೇತ್ಥ.

೧.

ಪುಞ್ಞೇನ ಸೀಲಾದಿಮಯೇನ ಪುಬ್ಬೇ,

ಕತೇನ ಪತ್ತೋಸ್ಮಿ ಅತನ್ದಿತೇನ,

ಮಸಕ್ಕಸಾರೇ ವಿಯ ದೇವರಾಜಾ;

ರಾಜತ್ತಮಿದ್ಧೇ ಪುರಮುತ್ತಮಮ್ಹಿ.

೨.

ರೂಪೇನ ಹಾರೀನಯನುಸ್ಸವೇನ,

ಸದ್ದೇನ ಸಮ್ಮಾ ಸವಣಾಮತೇನ,

ಗನ್ಧೇನ ಘಾನುಸ್ಸವಸೋಭನೇನ,

ರಸಞ್ಞಪುಞ್ಞೇನ ರಸೇನಚಾಪಿ.

೩.

ಫಸ್ಸೇನ ಗತ್ತಸ್ಸ ಸುಫಸ್ಸದೇನ,

ಸಮಿದ್ಧಿಪತ್ತೋಸ್ಮಿ ಮಹಿದ್ಧಿಕೋಹಂ,

ನೇವೇತ್ತಕೇನೇವ ಪಮಾದಭಾವ,

ಮಾ ಪಜ್ಜಿತುಂ ಯುತ್ತರೂಪನ್ತಿ ಞತ್ವಾ.

೪.

ದಸ್ಸಾಮಿ ಅಙ್ಗಅಪಿ ಜೀವಿತಞ್ಚ,

ಧಞ್ಞಂ ಧನಂ ಚಾಪಿ ಪಸನ್ನಚಿತ್ತೋ,

ಸೋಸ್ಸಾಮಿ ಧಮ್ಮಂ ಸಿವಮಾದಧಾನಂ,

ಜಿನೇರಿತಂ ಜಾತಿಜರಾಪಹಾಣಂ.

೫.

ನ ಸೋಭತಿ ಯಥಾಕಾಸಂ, ಜಲಂ ಧಾಮಪತಿಂವಿನಾ,

ರಜ್ಜಕರಣಂ ತಥಾ ಮಯ್ಹಂ, ವಿನಾ ಧಮ್ಮಾ ನ ಸೋಭತಿ.

೬.

ನ ಸೋಭತಿ ಹಥಾ ರತ್ತಿ, ನಿಸಾನಾಥಂ ವಿನಾ ಸದಾ,

ರಜ್ಜಕರಣಂ ತಥಾ ಮಯ್ಹಂ, ವಿನಾ ಧಮ್ಮಾ ನ ಸೋಭತಿ.

೭.

ಅಲಙ್ಕತೋಪಿ ¶ ಚೇ ಹತ್ಥೀ, ವಿನಾ ದಾಠಾ ನ ಸೋಭತಿ,

ರಜ್ಜಕರಣಂ ತಥಾ ಮಯ್ಹಂ, ವಿನಾ ಧಮ್ಮಾ ನ ಸೋಭತಿ.

೮.

ಯಥಾ ಕಲ್ಲೋಲಮಾಲೀಯಂ,

ವಿನಾ ವೇಲಾ ನ ಸೋಭತಿ,

ರಜ್ಜಕರಣಂ ತಥಾ ಮಯ್ಹಂ,

ವಿನಾ ಧಮ್ಮಾ ನ ಸೋಭತಿ.

೯.

ಯಥಾ ಸುಮಣ್ಡಿತೋ ರಾಜಾ,

ಕುಪಟೋ ನೇವ ಸೋಭತಿ,

ರಜ್ಜಕರಣಂ ತಥಾ ಮಯ್ಹಂ,

ವಿನಾ ಧಮ್ಮಾ ನ ಸೋಭತಿ.

೧೦.

ಧಮ್ಮಮೇವ ಸುಣಿಸ್ಸಾಮಿ, ಧಮ್ಮೇ ಮೇ ರಮತೀ ಮನೋ,

ನ ಹಿ ಧಮ್ಮಾ ಪರಂ ಅತ್ಥಿ, ಧಮ್ಮಮೂಲಂ ತಿಸಮ್ಪದನ್ತಿ.

ಏವಂ ಚಿನ್ತೇತ್ವಾ ಪಾತೋವ ಸಿರಿಗಬ್ಭಾ ನಿಕ್ಖಮ್ಮ ಸುಸಜ್ಜಿತೇ ಸಮುಸ್ಸಿತಸೇತಚ್ಛತ್ತೇ ರಾಜಪಲ್ಲೇಙ್ಕೇ ಅಮಚ್ಚಗಣ ಪರಿವುತೋ ನಿಸೀದಿ ದೇವರಾಜಾವಿಯ ವಿರೋಚಮಾನೋ, ನಿಸಿನ್ನೋ ಪನ ರಾಜಾ ಅಮಚ್ಚೇ ಏವಮಾಹ, ಯೋ ಪನೇತ್ಥ ಭೋನ್ತೋ ಬುದ್ಧಭಾಸಿತೇಸು ಧಮ್ಮೇಸು ಕಿಞ್ಚಿಧಮ್ಮಂ ಜಾನಾತಿ, ಸೋ ಭಾಸತು, ಸೋತುಮಿಚ್ಛಾಮಿಧಮ್ಮನ್ತಿ, ತೇ ಸಬ್ಬೇಪಿ ಮಯಂ ದೇವ ನ ಜಾನಾಮಾತಿ ಆಹಂಸು, ತಂ ಸುತ್ವಾ ಅ ನ ತ್ತ ಮ ನೋ ರಾಜಾ ಏವಂ ಚಿನ್ತೇಸಿ, ಯನ್ನೂನಾಹಂ ಹತ್ಥಿಕ್ಖನ್ಧೇ ಸಹಸ್ಸಂ ಠಪೇತ್ವಾ ನಗರೇ ಭೇರಿಂಚರಾಪೇಯ್ಯಂ, ಯಂ ಅಪ್ಪೇವನಾಮ ಕೋಚಿ ಧನಲೋಭೇನ ಚಾತುಪ್ಪದಿಕಾಯಪಿ ಗಾಥಾಯ ಧಮ್ಮಂ ದೇಸೇಯ್ಯ. ತಂ ಮೇ ದೀಘರತ್ತಂ ಹಿತಾಯ ಸುಖಾಯ ಭವಿಸ್ಸತೀತಿ, ತತೋ ಸೋ ತಥಾ ಕತ್ವಾಪಿ ಧಮ್ಮದೇಸಕಂ ಅಲಭನ್ತೋ ಪುನ ದ್ವಿಸಹಸ್ಸಂ ತಿಚತುಪಞ್ಚಸಹಸ್ಸನ್ತಿಯಾವಕೋಟಿಪ್ಪಕೋಟಿಂದಮ್ಮೀತಿ, ತತೋ ಗಾಮ ನಿಗಮ ಜನಪದೇ, ತತೋ ಸೇಟ್ಠಿಟ್ಠಾನಂ ಸೇನಾಪತಿ ಉಪರಾಜಟ್ಠಾನಾ ದಯೋಪಿ, ಪುನ ಸೇತಚ್ಛತ್ತಂ ದಮ್ಮಿ, ರಾಜವೇಸಂ ಪಹಾಯ ಅತ್ತಾನಂ ದಾಸಂ ಸಾವೇತ್ವಾ ಧಮ್ಮದೇಸೇನ್ತಸ್ಸ ದಮ್ಮಿತಿ ವತ್ವಾ ಭೇರಿ ಚರಾಪೇತ್ವಾಪಿ ಧಮ್ಮ ದೇಸಕಮಲಭಿತ್ವಾ ಸಂವಿಗ್ಗೋ ¶ ಕಿಮ್ಮೇ ಧಮ್ಮವಿಯೋಗೇನ ರಜ್ಜೇನಾತಿ ಅಮಚ್ಚಾನಂ ರಜ್ಜಂ ನೀಯ್ಯಾತೇತ್ವಾ ಸದ್ಧಮ್ಮಗವೇಸಕೋ ಧಮ್ಮಸೋಣ್ಡಕಮಹಾರಾಜಾ ಮಹಾವನಂ ಪಾವಿಸಿ ಗಾಮ ನಿಗಮ ರಾಜಧಾನಿ ಪರಮ್ಪರಾಯ, ತೇನೇತ್ಥ.

೧೧.

ಪುರೇ ಭೇರಿಂ ಚರಾಪೇತ್ವಾ,

ಧಮ್ಮಸೋಣ್ಡೋ ನರಾಧಿಪೋ;

ಸದ್ಧಮ್ಮಜ್ಝೇಸಕಂ ಸತ್ಥು,

ಅಲದ್ಧಾ ಧನಕೋಟಿಹಿ.

೧೨.

ದಾಸೋ ಹೋಮಿ ಪಹಾಯಾಹಂ,

ರಾಜತ್ತಂ ದೇಸಕಸ್ಸ ಮೇ;

ಇಚ್ಚಾಹ ಸೋ ಮಹೀಪಾಲೋ,

ಅಹೋ ಧಮ್ಮೇಸು ಲೋಲತಾ.

೧೩.

ರಜ್ಜಂ ನೀಯ್ಯಾತಯಿತ್ವಾನ, ಅಮಚ್ಚಾನಂ ಮನೋರಮಂ,

ವನಂ ಪಾವಿಸಿ ಸೋ ರಾಜಾ, ಗವೇಸಂ ಧಮ್ಮಮುತ್ತಮನ್ತಿ.

ಮಹಾವನಂ ಪವಿಟ್ಠಕ್ಖಣೇ ಪನ ಮಹಾಸತ್ತಸ್ಸ ಪುಞ್ಞತೇಜೇನ ಸಕ್ಕಸ್ಸಾಸನಂ ಉಣ್ಹಾಕಾರಂ ದಸ್ಸೇಸಿ, ಅಥ ದೇವರಾಜಾ ಚಿನ್ತೇಸಿ ಅಕಾಮಂ ಮೇ ಪಣ್ಡುಕಮ್ಬಲ ಸಿಲಾಸನಂ ಉಣ್ಹಮಹೋಸಿ, ಕಿನ್ನುಖೋ ಕಾರಣನ್ತಿ ಲೋಕಂ ಓಲೋಕೇನ್ತೋ ಸಕ್ಕೋ ದೇವರಾಜಾ ಧಮ್ಮಸೋಣ್ಡಕ ಮಹಾರಾಜಾನಂ ಸಕಲಜಮ್ಬುದೀಪಂ ವಿಚಿನಿತ್ವಾ ಸದ್ಧಮ್ಮಜ್ಝೇಸಕಂ ಅಲಭಿತ್ವಾ ವನಂ ಪವಿಟ್ಠಭಾವಂ ಅದ್ದಸ, ಧಮ್ಮಸೋಣ್ಡಕಮಹಾರಾಜಾ ಸದ್ಧಮ್ಮತ್ಥಾಯ ರಜ್ಜ ಧನ ಬನ್ಧು ಜೀವಿತಮ್ಪಿ ಪಹಾಯ ಅರಞ್ಞಂ ಪವಿಟ್ಠೋ, ನ ಸೋ ವತಾಯಂ ಯೋವಾ ಸೋವಾ ಸತ್ತೋ, ಇಮಸ್ಮಿಂಯೇವ ಕಪ್ಪೇ ಬುದ್ಧೋ ಭವಿಸ್ಸತಿ, ಬುದ್ಧಬೋಧಿಸತ್ತೋ ಚಾಯಂ ಅಜ್ಜೇವ ಮಹಾರಞ್ಞಂ ಪವಿಟ್ಠೋ ಸದ್ಧಮ್ಮಂ ಅಲದ್ಧಾ ಮಹಾದುಕ್ಖಂ ಪಾಪುಣೇಯ್ಯ, ನ ಚೇತಂ ಯುತ್ತಂ, ಅಜ್ಜ ಮಯಾ ತತ್ಥ ಗನ್ಥಬ್ಬಂ ಧಮ್ಮಾಮತರಸೇನ ತಮಭಿಸಿಞ್ಚಿತ್ವಾ ರಜ್ಜೇ ಪಹಿಟ್ಠಾಪೇತುನ್ತಿ ಚಿನ್ತೇತ್ವಾ ಅತ್ತಭಾವಂ ವಿಜಹಿತ್ವಾ ಭಯಾನಕಂ ಮಹನ್ತಂ ರಕ್ಖಸವೇಸಂ ನಿಮ್ಮಿಣಿತ್ವಾ ಮಹಾಸತ್ತಾಭಿಮುಖೋ ಅವಿದೂರೇ ಅತ್ತಾನಂ ದಸ್ಸೇಸಿ, ತೇನೇತ್ಥ.

೧೪.

ಬ್ಯಗ್ಘಚ್ಛಸೀಹಮಹಿಸೋ ¶ ರಗಹತ್ಥಿದೀಪಿ,

ಮಿಗಾಕುಲಂ ಕಣ್ಟಕಸೇಲರುಕ್ಖಂ;

ನರಾನಮಿನ್ದೋ ಪವಿಸಿತ್ವಕಾನನಂ,

ಇತೋಚಿತೋ ವಿಬ್ಭಮಿ ಧಮ್ಮಕಾಮೋ.

೧೫.

ತಸ್ಸಾನುಭಾವೇನ ಪುರಿನ್ದದಸ್ಸ,

ಸಿಲಾಸನಂ ಉಣ್ಹಮಹೋಸಿ ಕಾಮಂ;

ತೇನೇವ ಸೋ ಲೋಕಮುದಿಕ್ಖಮಾನೋ,

ಅದ್ದಕ್ಖಿ ಧೀರಂ ವಿಪಿನೇ ಚರನ್ತಂ.

೧೬.

ಮಯಜ್ಜ ತಂ ಧಮ್ಮರಸೇನ ಸಮ್ಮಾ,

ಸನ್ತಪ್ಪಯಿತ್ವಾ ಗಮನಂ ವರನ್ತಿ;

ಮನ್ತ್ವಾ ಸುಭೀಮಞ್ಜನಕೂಟವಣ್ಣಂ,

ಮಹಾಮುಖಂ ನಿಗ್ಗತ ಭೀಮದಾಠಂ.

೧೭.

ದಿತ್ತಗ್ಗಿಸಙ್ಕಾಸ ವಿಸಾಲನೇತ್ತಂ,

ಮಜ್ಝೇನ ಭಗ್ಗಂ ಚಿಪಿಟಗ್ಗನಾಸಂ;

ಖರತಮ್ಬದಾಠಿಂ ಘನಮಸ್ಸುವನ್ತಂ,

ನೀಲೋದರಂ ಗಜ್ಜಿತಭೀಮಘೋಸಂ.

೧೮.

ಕರೋರುಹಂ ತಿಕ್ಖಸಲೋಹಿತಾಯತಂ,

ವಿಸಾಲಧೋತಾಯತಖಗ್ಗಹತ್ಥಂ;

ಗದಾಯುಧೇನಙ್ಕಿತಮಞ್ಞಬಾಹುಂ,

ದಟ್ಠೋಟ್ಠಭೀಮಂ ಸವಲೀಲಲಾಟಂ.

೧೯.

ಮನುಸ್ಸಮಂಸಾದನರತ್ತಪಾನಂ,

ಭಯಾನಕಂ ಕಕ್ಖಲಯಕ್ಖವಣ್ಣಂ;

ಸುಮಾಪಯಿತ್ವಾನ ವನನ್ತರಸ್ಮಿಂ,

ದಸ್ಸೇಸಿ ಅತ್ತಂ ಸ ನರಾಧಿಪಸ್ಸಾತಿ.

ಅಥ ಮಹಾಸತ್ತೋ ಅತ್ತನೋ ಅವಿದೂರೇ ಠಿತಂ ರಕ್ಖಸಂ ಅದ್ದಕ್ಖಿ, ತಂ ದಿಸ್ವಾನಾಸ್ಸ ಭಯಂವಾ ಛಮ್ಭಿತತ್ತಂವಾ ಚಿತ್ಥುತ್ರಾಸಮತ್ತಂವಾ ನಾಹೋಸಿ, ಕಿಮತ್ರ ಚಿನ್ತೇಸಿ, ಅಪಿನಾಮ ಏವರೂಪೋ ಪಿರಕ್ಖಸೋ ಧಮ್ಮಂ ¶ ಜಾನೇಯ್ಯ, ಯನ್ನೂನಾಹಂ ತಸ್ಸ ಸನ್ತಿಕೇ ಧಮ್ಮಂ ಸುಣಿಸ್ಸಾಮಿ, ತಮ್ಮೇ ದೀಘರತ್ತಂ ಹಿತಾಯ ಸುಖಾಯ ಭವಿಸ್ಸತೀತಿ ಚಿನ್ತೇಸಿ. ಚಿನ್ತೇತ್ವಾ ಚಪನ ಅಜ್ಜ ಮಯಾ ತಮುಪಸಙ್ಕಮ್ಮ ಪುಚ್ಛಿತಂ ವಟ್ಟತೀತಿ ಗನ್ತ್ವಾ ರಕ್ಖಸೇನ ಸದ್ಧಿಂ ಸಲ್ಲಪನ್ತೋ ಆಹ.

೨೦.

ಅಸ್ಮಿಂ ವನಸ್ಮಿಂ ತರುಸಣ್ಡ ಮಣ್ಡಿತೇ;

ಸುಫುಲ್ಲಿತಾನೇಕಲತಾಕುಲಾಕುಲೇ;

ಅಧಿಗ್ಗಹೀತೋ ಸಿ ಮಹಾನುಭಾವ,

ಪುಚ್ಛಾಮಿ ತಂ ದೇವ ವದೇಹಿ ಕಙ್ಖಂ.

೨೧.

ಧಮ್ಮಂ ಗವೇಸಂ ವನಮಾಗತೋಮ್ಹಿ,

ಪಹಾಯ ರಜ್ಜಂ ಅಪಿ ಞಾತಿಸಙ್ಘಂ;

ಜಾನಾಸಿ ಚೇ ಸಮ್ಮ ವದೇಹಿ ಮಯ್ಹಂ,

ಏಕಮ್ಪಿ ಗಾಥಂ ಸುಗತೇನ ದೇಸಿತಂ.

ತತೋ ಯಕ್ಖೋ ಆಹ.

೨೨.

ಧಮ್ಮಂ ಪಜಾನಾಮಹಮೇಕದೇಸಂ,

ಜಿನೇರಿತಂ ಸಾಧುತರಂ ರಸಾನಂ,

ದೇಸೇಮಿ ಚೇಹಂ ತವ ಧಮ್ಮ ಮಗ್ಗಂ,

ತುವಞ್ಹಿ ಕಿಂ ಕಾಹಸಿ ದೇಸಕಸ್ಸಾತಿ.

ಅಥ ಮಹಾಸತ್ತೋ ಆಹ.

೨೩.

ರಜ್ಜೇ ಠಿತೋ ಅಸ್ಸಮಹಂ ಸಚೇ ಭೋ,

ಅನಪ್ಪರೂಪಂ ಪಕರೋಮಿ ಪೂಜಂ;

ಇದಾನಿ ಏಕೋ ವನಮಜ್ಝಪತ್ತೋ,

ಕರೋಮಿ ಕಿಂ ದೇಹಮಿಮಂ ಠಪೇತ್ವಾ.

೨೪.

ಯದಿಚ್ಛಸಿ ತ್ವಂ ಮಮ ಮಂಸಲೋಹಿತಂ,

ಕರೋಮಹಂ ಸಙ್ಗಹಮಜ್ಜ ತೇನ,

ನ ಚತ್ಥಿ ಅಞ್ಞಂ ತವ ಅಚ್ಚನೀಯಂ,

ದೇಸೇಹಿ ಧಮ್ಮಂ ಸುಗತ ಪ್ಪಸತ್ಥನ್ತಿ.

ತತೋ ¶ ಯಕ್ಖೋ ಆಹ.

೨೫.

ಭುತ್ವಾನ ಮಂಸಂ ಸುಹಿತೋವ ಸನ್ತೋ,

ಹನ್ತ್ವಾ ಪಿಪಾಸಂ ರುಧಿರಂ ಪಿವಿತ್ವಾ;

ಧಮ್ಮಂ ಕಥೇತುಂ ಪಭವಾಮಿ ತುಯ್ಹಂ,

ವತ್ತುಂ ನ ಸಕ್ಕೋಮಿ ಖುದಾಪರೇತೋತಿ.

ಅಥ ಮಹಾಸತ್ತೋ ಆಹ.

೨೬.

ಭುತ್ವಾ ತುವಂ ಮಂ ಪಥಮಞ್ಹಿ ಯಕ್ಖ,

ಪಚ್ಛಾ ತು ದೇಸೇಸ್ಸಸಿ ಕಸ್ಸ ಧಮ್ಮಂ;

ಧಮ್ಮಸ್ಸ ಮಯ್ಹಂ ತವ ಮಂಸಲಾಭಂ,

ತ್ವಮೇವ ಜಾನಾಹಿ ಯಥಾ ಭವೇಯ್ಯಾತಿ.

ಏವಂ ವುತ್ತೇ ಸಕ್ಕೋ ದೇವಾನಮಿನ್ದೋ ಸಾಧು ಮಹಾರಾಜ ಅಹಮೇವ ಯುತ್ತಂ ಜಾನಾಮೀತಿ ವತ್ವಾ ತಸ್ಸಾವಿದೂರೇ ತಿಗಾವುತುಬ್ಬೇಧಂ ಅಞ್ಜನವಣ್ಣಂ ಮಹನ್ತಂ ಪಬ್ಬತಂ ಮಾಪೇತ್ವಾ ಮಹಾರಾಜ ಇಮಮಾರುಯ್ಹ ಪಬ್ಬತಮುದ್ಧನಿಟ್ಠಿತೋ ಮಮ ಮುಖೇ ಪತತು, ಅಹಂ ಪತನ್ಥಸ್ಸ ತೇ ಧಮ್ಮಂ ದೇಸೇಸ್ಸಾಮಿ, ಏವಂ ಸನ್ತೇ ತುಯ್ಹಂ ಧಮ್ಮಪಟಿಲಾಭೋ, ಮಯ್ಹಂಚ ಮಂಸಪಟಿಲಾಭೋ ಭವಿಸ್ಸತೀತಿ. ತಂ ಸುತ್ವಾ ಮಹಾಸತ್ತೋ ಅನಮತಗ್ಗೇ ಸಂಸಾರೇ ಸಂಸರತೋ ಮೇ ಸೀಹಬ್ಯಗ್ಘಚ್ಛಮಚ್ಛಕಚ್ಛಪವಿಹಙ್ಗಾದೀನಂ ಭಕ್ಖಭೂತಸ್ಸ ಜಾತೀಸು ಪಮಾಣಂ ನತ್ತಿ, ಅಜ್ಜ ಮಯಾ ಸಮ್ಬುದ್ಧಸ್ಸ ಧಮ್ಮತ್ಥಾಯ ಜೀವಿತಂ ಪರಿಚ್ಚಜಿತುಂ ವಟ್ಟತೀತಿ ಚಿನ್ತೇತ್ವಾ ಏವಮಾಹ.

೨೭.

ಸಂಸಾರವಟ್ಟೇಸು ವಿವಟ್ಟಮಾನಾ,

ಪಪ್ಪೋನ್ತಿ ದುಕ್ಖಂ ಜನತಾ ಅನೇಕಾ;

ಏತಞ್ಹಿ ಭೋ ಅತ್ತನೋ ವಾ ಪರಸ್ಸ,

ಅತ್ಥಾಯ ನಾಹೋಸಿ ಅಹೋಸಿ ತುಚ್ಛಂ.

೨೮.

ತ್ವಮದಿನ್ನಹಾರೀ ತಿಚ ಪಾರದಾರಿಕೋ,

ಪಾಣಾತಿಪಾತೀಸಿ ಮುಸಾ ಅಭಾಸಿ;

ತ್ವ ಮಜ್ಜಪಾಯೀತಿ ಅಕಾಸಿ ದೋಸಂ,

ಪಗ್ಗಯ್ಹ ದುಕ್ಖಂ ಬಹುಸೋ ದದನ್ತಿ.

೨೯.

ಏತಞ್ಹಿ ¶ ಭೋ ಅತ್ತನೋ ವಾ ಪರಸ್ಸ,

ಅತ್ಥಾಯ ನಾಹೋಸಿ ಅಹೋಸಿ ತುಚ್ಛಂ;

ರುಕ್ಖಾ ಪಪಾತಾ ಪಪತಿತ್ವಕೇಚಿ,

ದುಬ್ಬನ್ಧಿಯಾ ದುಗ್ಗವಿಸಾದನೇನ.

೩೦.

ಬ್ಯಾಧೀಹಿ ನಾನಾಖರವೇದನಾಹಿ,

ಮರನ್ತಿ ಸತ್ತಾ ಉತುವೇದನಾಹಿ;

ಏತಞ್ಹಿ ಭೋ ಅತ್ತನೋ ವಾ ಪರಸ್ಸ,

ಅತ್ಥಾಯ ನಾಹೋಸಿ ಅಹೋಸಿ ತುಚ್ಛಂ.

೩೧.

ಬ್ಯಗ್ಘಚ್ಛಮಚ್ಛೋ ರಗಕುಚ್ಛಿಯಞ್ಹಿ,

ಮತಸ್ಸ ಮೇ ನತ್ಥಿ ಪಮಾಣಸಙ್ಖಾ;

ಏತಞ್ಹಿ ಭೋ ಅತ್ತನೋ ವಾ ಪರಸ್ಸ,

ಅತ್ಥಾಯ ನಾಹೋಸಿ ಅಹೋಸಿ ತುಚ್ಛಂ.

೩೨.

ಏತಜ್ಜ ಮೇ ದುಚ್ಚ ಜ ಮತ್ತದಾನಂ,

ನ ಹೋತಿ ದೇವಿಸ್ಸರಿಯಾದಿಕಾಯ;

ಸಬ್ಬಞ್ಞುಭಾವಂ ಪನ ಪಾಪುಣಿತ್ವಾ,

ಸಂಸಾರತೋ ನಿತ್ತರಣಾಯ ಸತ್ತೇ.

೩೩.

ತ್ವಂ ಸಮ್ಮ ಮಯ್ಹಂ ಬಹುಸೋ ಪಕಾರೀ,

ತಸ್ಮಾ ತವೇತಂ ವಚನಂ ಕರೋಮಿ;

ಅಸಂಕಿತೋ ದೇಸಯ ಮಯ್ಹಧಮ್ಮಂ,

ಸಮಿಜ್ಝತೇ ದಾನಿ ಮನೋರಥೋ ತೇತಿ.

ಏವಞ್ಚ ಪನ ವತ್ವಾ ಮಹಾಸತ್ತೋ ಪಬ್ಬತಮಾರುಯ್ಹ ಠಿತೋ ಆಹ, ಅಹಮಜ್ಜ ರಜ್ಜೇನ ಸದ್ಧಿಂ ಜೀವಿತಞ್ಚ ಸರೀರಮಂಸಞ್ಚ ಸದ್ಧಮ್ಮತ್ಥಾಯ ದಮ್ಮೀತಿ ಸೋಮನಸ್ಸಪ್ಪತ್ತೋ ಹುತ್ವಾ ಸಮ್ಮ ಧಮ್ಮಂ ದೇಸೇಹೀತಿ ವತ್ವಾ ತಸ್ಮಿಂ ಮಹಾದಾಠಂ ಮಹಾಮುಖಂ ವಿವರಿತ್ವಾ ಠಿತೇ ತಸ್ಸಾಭಿಮುಖೋ ಉಪಪತಿ. ಅಥ ಸಕ್ಕೋ ದೇವಾನಮಿನ್ದೋ ಸೋಮನಸ್ಸೋ ಅಚ್ಛರಿಯಪ್ಪತ್ತೋ ಅತ್ತಭಾವಂ ವಿಜಹಿತ್ವಾ ಅಲಙ್ಕತದಿಬ್ಬತ್ತಭಾವಂ ಮಾಪೇತ್ವಾ ಆಕಾಸೇ ¶ ತರುಣಸುರಿಯೋ ವಿಯ ಓಭಾಸಮಾನೋ ಆಕಾಸತೋ ಪತನ್ತಂ ಮಹಾಸತ್ತಂ ಉಭೋಹಿ ಹತ್ಥೇಹಿ ದಳ್ಹಂ ಪತಿಗಣ್ಹಿತ್ವಾ ದೇವಲೋಕಂ ನೇತ್ವಾ ಪಣ್ಡುಕಮ್ಬಲ ಸಿಲಾಸನೇ ನಿಸೀದಾಪೇತ್ವಾ ದಿಬ್ಬಮಯೇಹಿ ಗನ್ಧಮಾಲಾದೀಹಿ ಪೂಜೇತ್ವಾ ಸಯಂ ಧಮ್ಮಂ ಸುತ್ವಾ ಪಸನ್ನೋ ಪಸನ್ನಾಕಾರಂ ಕತ್ವಾ ಕಸ್ಸಪದಸಬಲೇನ ದೇಸಿತಾಯ ಅನಿಚ್ಚಾದಿಪರಿದೀಪಿಕಾಯ.

೩೪.

ಅನಿಚ್ಚಾವ ತ ಸಙ್ಖಾರಾ, ಉಪ್ಪಾದವಯಧಮ್ಮಿನೋ;

ಉಪ್ಪಜ್ಜಿತ್ವಾ ನಿರುಜ್ಝನ್ತಿ, ತೇಸಂ ವೂಪಸಮೋ ಸುಖೋತಿ.

ಗಾಥಾಯ ಧಮ್ಮದೇಸನೇನ ತಸ್ಸ ಮನೋರಥಂ ಮತ್ಥಕಂ ಪಾಪೇತ್ವಾ ದೇವಲೋಕೇ ಮಹನ್ತಂ ಸಿರಿವಿಭವಂ ದಸ್ಸೇತ್ವಾ ಆನೇತ್ವಾ ಸಕರಜ್ಜೇಯೇವ ಪತಿಟ್ಠಾಪೇತ್ವಾ ಅಪ್ಪಮತ್ತೋ ಹೋತಿ ಮಹಾರಾಜಾತಿ ಓವದಿತ್ವಾ ದೇವಲೋಕಮೇವ ಅಗಮಾಸೀತಿ.

೩೫.

ಇತಿ ಅಮಿತಸಿರಿಂ ವಾ ಜೀವಿತಂ ವಾಪಿ ಸನ್ತೋ,

ನ ಸುಮರಿಯ ಪಸತ್ಥಂ ಧಮ್ಮಮೇವಾ ಚರನ್ತಿ;

ತನುತರ ವಿಭವಾನಂ ಅಪ್ಪಮಾಯೂನಮಮ್ಭೋ,

ಇಹ ಕುಸಲಪಮಾದೋ ಕೋ ನು ತುಮ್ಹಾದಿಸಾನನ್ತಿ.

ಧಮ್ಮಸೋಣ್ಡಕವತ್ಥುಂ ಪಠಮಂ.

೨. ಮಿಗಲುದ್ದಕಸ್ಸ ವತ್ಥುಮ್ಹಿ ಅಯಮಾನುಪುಬ್ಬಿಕಥಾ

ಇತೋ ಕಿರ ಏಕ ತಿಂಸತಿಮೇ ಕಪ್ಪೇ ಸಿಖೀನಾಮ ಸಮ್ಮಾಸಮ್ಬುದ್ಧೋ ಸಮತಿಂಸ ಪಾರಮಿಯೋ ಪೂರೇತ್ವಾ ಪರಮಾತಿಸಮ್ಬೋಧಿಂ ಪತ್ವಾ ಸದೇವಕಂ ಲೋಕಂ ಸಂಸಾರಕನ್ತಾರಾ ಉತ್ತಾರೇನ್ತೋ ಧಮ್ಮರತನವಸ್ಸಂ ವಸ್ಸಾಪೇನ್ತೋ ಧಮ್ಮಭೇರಿಂಪಹರನ್ತೋ ಧಮ್ಮಕೇತುಂ ಉಸ್ಸಾಪೇನ್ತೋ ಏಕಸ್ಮಿಂ ಸಮಯೇ ವಿವೇಕ ಮನುಬ್ರೂಹನ್ತೋ ಅರಞ್ಞಾಯತನಂ ಪಾವಿಸಿ, ¶ ಪವಿಸಿತ್ವಾ ಚಪನ ಸುಪುಪ್ಫಿತನಾಗಪುನ್ನಾಗಾದಿನಾನಾತರುಸಣ್ಡಮಣ್ಡಿತೇ ಸುಫುಲ್ಲಸುಮನಮಾಲತಿಪ್ಪಭುತಿನಾನಾಲತಾಕುಲೇ ಅನೇಕವಿಧದಿಪದಚತುಪ್ಪದಸಙ್ಘನಿಸೇವಿತೇ ರಮಣೀಯೇ ಸೀತಲಸಿಲಾತಲೇ ಚತುಗ್ಗುಣಂ ಸಙ್ಘಾಟಿಂಪಞ್ಞಪೇತ್ವಾ ನಿಸೀದಿ ಛಬ್ಬಣ್ಣರಂಸೀಹಿ ದಿಸಂ ಪೂರಯನ್ತೋ, ತದಾ ತತ್ಥ ದೇವಬ್ರಹ್ಮನಾಗಸುಪಣ್ಣಾದಯೋ ಸನ್ನಿಪತಿತ್ವಾ ದಿಬ್ಬಮಯೇಹಿ ಗನ್ಧಮಾಲಾದೀಹಿ ಭಗವನ್ತಂ ಪೂಜಯಮಾನಾ ಥೋಮಯಮಾನಾ ನಮಸ್ಸಮಾನಾ ಅಟ್ಠಂಸು, ತಸ್ಮಿಂ ಪನಸಮಾಗಮೇ ಭಗವಾ ಮಧುರಸ್ಸರಂ ನಿಚ್ಛಾರೇನ್ತೋ ಬ್ರಹ್ಮಘೋಸೇನ ಚತುಸಚ್ಚಪಟಿಸಂಯುತ್ತಂ ಧಮ್ಮಂ ದೇಸೇತಿ ಅಮತವಸ್ಸಂ ವಸ್ಸಾಪೇನ್ತೋವಿಯ. ತದಾ ಏಕೋ ಮಿಗಲುದ್ದಕೋ ವನಂ ಪವಿಟ್ಠೋ ಮಿಗಸೂಕರೇ ಹನ್ತ್ವಾ ಮಂಸಂ ಖಾದನ್ತೋ ತಂ ಠಾನಂ ಪತ್ವಾ ಅದ್ದಸ ಭಗವನ್ತಂ ಧಮ್ಮಂ ದೇಸೇನ್ತಂ. ದಿಸ್ವಾ ಏಕಮನ್ತಂ ಠಿತೋ ಧಮ್ಮಂ ಸುತ್ವಾ ಚಿತ್ತಂ ಪಸಾದೇತ್ವಾ ತತೋ ಚುತೋ ದೇವಲೋಕೇ ನಿಬ್ಬತ್ತಿತ್ವಾ ಛಸು ಕಾಮಸಗ್ಗೇಸು ಮನುಸ್ಸೇಸುಚ ಅಪರಾಪರಂ ಇಸ್ಸರಿಯಂ ಅನುಭವನ್ತೋ ಇಮಸ್ಮಿಂ ಬುದ್ಧುಪ್ಪಾದೇ ಸಾವತ್ಥಿಯಂ ಕುಲಗೇಹೇ ನಿಬ್ಬತ್ತಿತ್ವಾ ವಿಞ್ಞುತಂ ಪತ್ತೋ ಭಗವತೋ ಸಾಸನೇ ಪಬ್ಬಜಿತ್ವಾ ಏಕದಿವಸಂ ಧಮ್ಮಂ ದೇಸೇನ್ತಸ್ಸ ಭಗವತೋ ಚತುಸಚ್ಚಪತಿ ಸಂಯುತ್ತಂ ಧಮ್ಮಕಥಂ ಸುತ್ವಾ ಚತುಪಟಿಸಮ್ಭಿದಾಹಿ ಅರಹತ್ತಂ ಪತ್ವಾ ಏಕದಿವಸಂ ಭಿಕ್ಖುಸಙ್ಘಮಜ್ಝಗತೋ ಅತ್ತನೋ ಕತಕಮ್ಮಪ್ಪಕಾಸನೇನ ಪೀತಿವಾಚಮುದಾಹರಿ.

೧.

ಏ ಕ ತಿಂ ಸೇ ಇತೋ ಕಪ್ಪೇ,

ಲೋಕೇ ಉಪ್ಪಜ್ಜಿ ನಾಯಕೋ;

ಪತ್ತಿಂಸ ಲಕ್ಖಣಾತಿಣ್ಣೋ,

ಸಮ್ಬುದ್ಧೋ ಸ ಸಿಖೀವ್ಹಯೋ.

೨.

ಜಲನ್ತೋ ದೀಪರುಕ್ಖೋವ, ಸೂರಿಯೋವ ನಭ ಮುಗ್ಗತೋ;

ಮೇರುರಾಜಾವ ಸಮ್ಬುದ್ಧೋ, ಜನೇಸಗ್ಗೋ ಪತಾಪವಾ.

೩.

ಪೂರೇತ್ವಾ ಧಮ್ಮನಾವಾಯಂ, ಸ ನಾಥೋ ಸಕಲಂ ಪಜಂ;

ಪತಿಟ್ಠಪೇನ್ತೋ ಸಂಸಾರ, ಕನ್ತಾರಾ ಸನ್ತಿಭೂಮಿಯಂ.

೪.

ಧಮ್ಮಕೇತುಂ ¶ ಸಮುಸ್ಸೇನ್ತೋ, ಹನನ್ತೋ ಧಮ್ಮದುನ್ದುಭಿಂ;

ಸತ್ತೇ ದುಕ್ಖಾ ಪಮೋಚೇನ್ತೋ, ವಸೀ ತತ್ಥ ಜಿನೋ ವಸೀ.

೫.

ಏಕಸ್ಮಿಂ ಸಮಯೇ ನಾಥೋ,

ಲೋಕಪಜ್ಜೋತಕೋ ಜಿನೋ;

ವಿವೇಕಕಾಮೋ ಸಮ್ಬುದ್ಧೋ,

ಸುರಮ್ಮಂ ಕಾನನಂ ಗತೋ.

೬.

ಪುನ್ನಾಗನಾಗಪೂಗಾದಿ, ನಾನಾಪಾದಪಸಂಕುಲಂ;

ಲತಾ ಲಿಙ್ಗಿತಸಾಖಾಹಿ, ಸಾ ಮೋದಕುಸುಮಾಯುತಂ.

೭.

ಕುಸುಮಾ ಮೋದಸಮ್ಮತ್ತ, ಛಪ್ಪದಾಲಿ ನಿಸೇವಿತಂ;

ನಾನಾಮಿಗ ಗಣಾಕಿಣ್ಣಂ, ಮಯೂರಗಣ ನಚ್ಚಿತಂ.

೮.

ಸೀತಲಚ್ಛೋದಿಕಾಸಾಧು, ಸುಪತಿತ್ಥಜಲಾಸಯಂ;

ಆಸಾರ ಸಾರಧಾರಾಹಿ, ನಿಜ್ಝರಾಸತ ಸಂಕುಲಂ.

೯.

ಗನ್ತ್ವಾನ ಸೋ ಮಹಾರಞ್ಞಂ,

ಸೀತಲಂ ಸಿಕತಾತಲಂ;

ಸಿಲಾತಲೇ ನಿಸಿನ್ನೋಸಿ,

ವಿಸ್ಸಜ್ಜೇನ್ತೋ ಛರಂಸಿಯೋ.

೧೦.

ದೇವಾ ತತ್ಥ ಸಮಾಗನ್ತ್ವಾ, ಪೂಜೇಸುಂ ದ್ವಿಪದುತ್ತಮಂ;

ದಿಬ್ಬೇಹಿ ಗನ್ಧಮಾಲಾಹಿ, ನಚ್ಚೇಹಿ ತುರಿಯೇಹಿಚ.

೧೧.

ದೇವದೇವೋ ತದಾ ದೇವ, ಸಙ್ಘಮಜ್ಝೇ ನಿಸೀದಿಯ;

ಚತುಸಚ್ಚ ಮದೇಸೇಸಿ, ನಿಚ್ಛರಂ ಮಧುರಂ ಗಿರಂ.

೧೨.

ತದಾಹಂ ಲುದ್ದಕೋ ಆಸಿಂ, ಮಿಗಸೂಕರಮಾರಕೋ;

ಮಿಗಮಂಸೇನ ಜಿವಾಮಿ, ತೇನ ಪೋಸೇಮಿ ದಾರಕೇ [ಪೋಸೇನ್ತೋಪುತ್ತದಾರಕೇ ಇತಿಕತ್ಥಚಿ].

೧೩.

ತದಾಹಂ ¶ ಮಿಗವಂ ಯಾತೋ,

ಸಬಾಣೋ ಸಸರಾಸನೋ;

ಅದ್ದಸಂ ವಿರಜಂ ಬುದ್ಧಂ,

ದೇವಸಙ್ಘಪುರಕ್ಖತಂ.

೧೪.

ಚನ್ದಂವ ತಾರಕಾಕಿಣ್ಣಂ, ಮೇರುಂವಣ್ಣವಮಜ್ಝಗಂ;

ವಿರೋಚಮಾನ ಮಾಸೀನಂ, ಚತುಸಚ್ಚಪ್ಪಕಾಸಕಂ.

೧೫.

ಏಕಪಸ್ಸೇ ಠಿತೋ ತತ್ಥ, ಅಸ್ಸೋಸಿಂ ಧಮ್ಮಮುತ್ತಮಂ;

ತತ್ಥ ಚಿತ್ತಂ ಪಸಾದೇತ್ವಾ, ಸೋಮನಸ್ಸಂ ಪವೇದಯಿಂ.

೧೬.

ಏಕತಿಂಸೇ ಇತೋ ಕಪ್ಪೇ,

ಯಂ ಪುಞ್ಞಂ ಪಸುತಂ ಮಯಾ;

ತೇನಾಹಂ ಪುಞ್ಞಕಮ್ಮೇನ,

ಜಾತೋಸಿಂ ದೇವಯೋನಿಯಂ.

೧೭.

ಸಮ್ಪತ್ತಿಮನುಭುತ್ವಾನ, ಛಕಾಮಗ್ಗೇ ಪರಾಪರಂ;

ದೇವಸಙ್ಘಪರಿಬ್ಬೂಳ್ಹೋ, ವಿಮಾನೇ ರತನಾಮಯೇ.

೧೮.

ಮನುಸ್ಸೇಸುಚ ಯಂ ಅಗ್ಗಂ, ತಸ್ಸ ಭಾಗೀ ಭವಾಮಹಂ;

ಭೋಗೇ ಮೇ ಊನತಾ ನತ್ಥಿ, ಸದ್ಧಮ್ಮಸವಣೇ ಫಲಂ.

೧೯.

ಇಮಸ್ಮಿಂ ಭದ್ದಕೇ ಕಪ್ಪೇ,

ಸಾವತ್ತಿಪುರಮುತ್ತಮೇ;

ಅಡ್ಢೇ ಮಹದ್ಧನೇ ಸಾಲೇ,

ಜಾತೋಹಂ ಉದಿತೇ ಕುಲೇ.

೨೦.

ಮಹತಾ ಪರಿವಾರೇನ, ಪತ್ತೋ ವುದ್ಧಿಂಚ ವಿಞ್ಞುತಂ;

ಚಾರಿಕಂ ಚರಮಾನೋಹಂ, ಪತ್ತೋ ಜೇತವನಂ ವರಂ.

೨೧.

ಅದ್ದಸಂ ಸಹ ಸಿಸ್ಸೇಹಿ, ನಿಸಿನ್ನಂ ಸುಗತಂ ತದಾ;

ಅಸ್ಸೋಸಿಂ ಮಧುರಂ ಧಮ್ಮಂ, ಚತುಸಚ್ಚಪ್ಪಕಾಸಕಂ.

೨೨.

ಸುತ್ವಾನ ಮಧುರಂ ಧಮ್ಮಂ, ಪಬ್ಬಜಿತ್ವಾನ ಸಾಸನೇ;

ಅ ಜರಾ ಮರಂ ಸೀತಿಭೂತಂ, ಪತ್ತೋ ನಿಬ್ಬಾಣಮುತ್ತಮಂ.

೨೩.

ಸುತಂ ¶ ಏಕಮುಹುತ್ತಂ ಮೇ, ತದಾ ಧಮ್ಮಂ ಸುದೇಸಿತಂ;

ತೇನಮ್ಹಿ ಚತುರಾಪಾಯೇ, ನ ಜಾತೋ ನ ಕುತೋಭಯಂ.

೨೪.

ಕರಮುಕ್ಖಿಪ್ಪ ವಕ್ಖಾಮಿ, ಕರೋಥೇ ಕಗಿರಂ ಮಮ;

ಮಮೋ ಪಮಂ ಕರಿತ್ವಾನ, ಧಮ್ಮಂ ಸುಣಾಥ ಸಾಧುಕನ್ತಿ.

ಏವಞ್ಚ ಪನ ವತ್ವಾ ಸತ್ತೇ ಧಮ್ಮಸವಣೇ ನಿಯೋಜೇಸೀತಿ.

೨೫.

ಇತಿ ತನುತರಕಾಲಂ ಸಾಧು ಧಮ್ಮಂ ಸುಣಿತ್ವಾ,

ಅಧಿಗತವಿಭವಾನಂ ಆನುಭಾವಂ ಸುಣಿತ್ವಾ;

ಭವವಿಭವಸುಖಂ ಭೋ ಪತ್ಥಯನ್ತಾ ಕುಸೀತಂ,

ಜಹಥ ಸುಣಥ ಧಮ್ಮಂ ದುಲ್ಲಭಂ ದುಲ್ಲಭಸ್ಸಾತಿ.

ಮಿಗಲುದ್ದಕಸ್ಸ ವತ್ಥುಂ ದುತಿಯಂ.

೩. ತಿಣ್ಣಂಜನಾನಂ ವತ್ಥುಮ್ಹಿ ಅಯಮಾನುಪುಬ್ಬೀಕಥಾ

ಜಮ್ಬುದೀಪಸ್ಮಿಂ ಕಿರ ಪುಬ್ಬೇ ಮಹಾನಿದಾಘೋ ಅಹೋಸಿ, ತದಾ ನಿದಾಘಸುರಿಯೇನ ಸಕಿರಣಕರಾ ವಾಪಿ ಪೋಕ್ಖರಣಿ ನದೀ ಗಿರಿಕನ್ದರನಿಜ್ಝರಾದೀಸು ಉದಕಂ ನಿಸ್ಸೇಸಂ ಕತ್ವಾ ಪೀತಮಿವ ಉದಕೇ ಪರಿಕ್ಖೀಣೇ ಮಚ್ಛಕಚ್ಛಪಾದಯೋ ಯೇಭುಯ್ಯೇನ ವಿನಾಸಂ ಪತ್ತಾ. ಅಥ ಮಹಾರಞ್ಞಭೂಮಿಯಂ ರುಕ್ಖತಿಣಲಭಾದಯೋ ಅತೀವ ಮಿಲಾತಾ ಅಹೇಸುಂ. ಮಿಗಪಕ್ಖಿನೋಪಿಘಮ್ಮಾಭಿತತ್ತಾ ಪಿಪಾಸಿತೋ ಮರೀಚಿಂ ತೋಯನ್ತಿಮಞ್ಞಮಾನಾ ಇತೋಚಿತೋಚ ಧಾವನ್ತಾ ಮಹಾದುಕ್ಖಪ್ಪತ್ತಾ ಅಹೇಸುಂ. ತದಾ ಏಕೋ ಸುವಪೋತಕೋ ಪಿಪಾಸಿತೋ ತತ್ಥ ತತ್ಥ ಪಾನೀಯಂ ಪರಿಯೇಸನ್ತೋ ಮಹಾರಞ್ಞೇ ಏಕಸ್ಮಿಂ ಪೂತಿಪಾದಪೇ ಸಟ್ಠಿರತನೇ ನರಕಾವಾಟೇ ಪಾನೀಯಗನ್ಧಂ ಘಾಯಿತ್ವಾ ಲೋಭೇನ ಪಾತುಂ ಓತಿಣ್ಣೋ ಅತಿಪಾನೇನ ಭಾರೋ ತತ್ಥೇವ ಪತಿತ್ವಾ ಉಗ್ಗನ್ತುಂ ನಾಸಕ್ಖಿ. ಅಥಾಪರೋಪಿ ಸಪ್ಪೋಚ ಮನುಸ್ಸೋಚಾತಿ ದ್ವೇ ಜನಾ ತತ್ಥೇವ ಪತಿಂಸು, ಸಪ್ಪಾನಾಮ ವಿವೇಕಂ ಲದ್ಧಾವ ಅತ್ತಂ ವಿಜಹನ್ತಿ. ತಸ್ಮಾಯಂ ಅಲದ್ಧಾ ¶ ವಿವೇಕತ್ತಂ ಉಗ್ಗನ್ತುಂ ನಾಸಕ್ಖಿ. ಅನಾಲಮ್ಬತ್ತಾ ಮನುಸ್ಸೋಪಿ. ತೇ ಉಗ್ಗನ್ತುಂ ಅಸಕ್ಕೋನ್ತಾ ಮರಣಭಯಭೀತಾ ಅಞ್ಞಮಞ್ಞ ಮವಿಹೇಠೇನ್ತಾ ತತ್ಥೇವ ವಸಿಂಸು. ಅಥೇಕೋ ಬರಾಣಸೀವಾಸಿಕೋ ಮನುಸ್ಸೋ ವನಂ ಪವಿಟ್ಠೋ ತಥೇವ ಪಾನೀಯಂ ಪರಿಯೇಸಮಾನೋ ತಂ ಠಾನಂ ಪತ್ವಾ ತೇ ತಯೋಪಿ ದಿಸ್ವಾ ಕಮ್ಪಮಾನಹದಯೋ ವಲ್ಲಿಯಾ ಪಿಟಕಂ ಬನ್ಧಿತ್ವಾ ಸಿಕ್ಕಾಯ ಪಕ್ಖಿಪಿತ್ವಾ ಓತಾರೇತ್ವಾ ತೇ ತಯೋಪಿ ಉದ್ಧರಿ, ಅಥಾನೇನ ತೇ ಅಮ್ಹಾಕಂ ಜೀವಿತಂ ದಿನ್ನನ್ತಿ ಸೋಮನಸ್ಸಾ ತಸ್ಸೇವಮಾಹಂಸು, ಸಾಮಿ ಮಯಂ ತುಮ್ಹೇ ನಿಸ್ಸಾಯ ಜೀವಿತಂ ಲಭಿಮ್ಹ, ತುಮ್ಹೇ ಇತೋ ಪಟ್ಠಾಯ ಅಮ್ಹಾಕಂ ಸಹಾಯೋ, ಮಯಮ್ಪಿ ತೇ ಸಹಾಯಾ, ಅಮ್ಹಾಕಂ ವಸನಟ್ಠಾನಾನಿ ಆಗನ್ತುಕಾಮಾತಿ ವತ್ವಾ ತೇಸು ತಾವ ಸುವಪೋತಕೋ ಆಹ, ಸಾಮಿ ಬಾರಾಣಸಿಯಂ ದಕ್ಖಿಣದ್ವಾರೇ ಮಹಾನಿಗ್ರೋಧೋ ಅತ್ಥಿ, ತತ್ಥಾಹಂ ವಸಾಮಿ, ತವ ತಥಾರೂಪೇ ಕಿಚ್ಚೇ ಸತಿ ಮಮ ಸನ್ತಿಕಮಾಗಮ್ಮ ಸುವಾತಿ ಸದ್ದಂಕರೋಹೀತಿ ವತ್ವಾ ಮೇತ್ತಿಥಿರಂ ಕತ್ವಾ ಪಕ್ಕಾಮಿ, ಸಪ್ಪೋಪಿ ಸಮ್ಮಾಹಂ ತಸ್ಸೇವ ನಿಗ್ರೋಧಸ್ಸಾ ವಿದೂರೇ ಮಹನ್ತಂ ವಮ್ಮಿಕಂ ಅತ್ಥಿ, ತತ್ಥ ವಸಾಮಿ, ತವತ್ಥೇ ಸತಿ ತತ್ಥಾಗನ್ತ್ವಾ ದೀಘಾತಿಸದ್ದಂ ಕರೋಹೀತಿ ವತ್ವಾ ತಥೇವಪಕ್ಕಾಮಿ, ಮನುಸ್ಸೋಪಿ ಬಾರಾಣಸಿಯಂ ಅಸುಕಾಯನಾಮ ವೀಥಿಯಾ ಅಸುಕಗೇಹೇ ವಸಾಮಿ, ತವತ್ಥೇ ಸತಿ ಮಮ ಸನ್ತಿಕಂ ಆಗಚ್ಛಾತಿ ವತ್ವಾ ಪಕ್ಕಾಮಿ, ಅಥಾ ಪರಭಾಗೇ ಸೋ ಉಪಕಾರಕೋ ಪುರಿಸೋ ಅತ್ತನೋ ಕಿಚ್ಚೇ ಸಞ್ಜಾತೇ ಮಮ ಸಹಾಯಾನಂ ಸನ್ತಿಕಂ ಗಮಿಸ್ಸಾಮೀತಿ ಸಙ್ಕೇತಾನುಸಾರೇನ ಗನ್ತ್ವಾ ನಿಗ್ರೋಧಮೂಲೇ ಠಿತೋ ಸುವಸ್ಸ ಸದ್ದಮಕಾಸಿ, ತಂ ಸುತ್ವಾ ಸುವಪೋತಕೋ ವೇಗೇನಾಗನ್ತ್ವಾ ತೇನ ಸದ್ಧಿಂ ಪಟಿಸಮ್ಮೋದಿತ್ವಾಸಮ್ಮ ಚಿರೇನಾ ಗತೋಸಿ, ಆಗತಕಾರಣಂ ಮೇ ಆಚಿಕ್ಖಾತಿ ಆಹ. ಸೋಪಾಹ ಸಮ್ಮಾಹಂ ಜೀವಿತು ಮಸಕ್ಕೋನ್ತೋ ಪುತ್ತದಾರಕೇ ಞಾತೀನಂ ಪಟಿಪಾದೇತ್ವಾ ತವ ಸನ್ತಿಕಮಾಗತೋಮ್ಹಿತಿ, ಸುವಪೋತಕೋಪಿ ಸಾಧು ಸಮ್ಮ ತಯಾ ಕತಂ ಮಮ ಸನ್ತಿಕಮಾಗಚ್ಛನ್ತೇನ, ತಯಾ ಮಮ ಜೀವಿತಂ ದಿನ್ನಂ, ಮಯಾಪಿ ತವ ಜೀವನುಪಾಯಂ ಕಾತುಂ ವಟ್ಟತಿ, ಯಾವಾಹಂ ಆಗಚ್ಛಾಮಿ, ತಾವೇತ್ಥ ಥೋಕಂ ವಿಸ್ಸಮಾತಿ ವತ್ವಾ ಪಕ್ಕಾಮಿ ಜೀವನುಪಾಯಂ ಪರಿಯೇಸಮಾನೋ, ¶ ತಸ್ಮಿಂ ಕಿರ ಸಮಯೇ ಬಾರಾಣಸೀರಾಜಾ ನಗರತೋ ನಿಕ್ಖಮ್ಮ ಸುಸಜ್ಜಿತುಯ್ಯಾನಂ ಪವಿಸಿತ್ವಾ ಸಪರಿಸೋ ಕೀಳಿತ್ವಾ ಮಜ್ಝನ್ತಿಕಸಮಯೇ ಸುಫುಲ್ಲಿತಂ ಪಞ್ಚಪದುಮಸಞ್ಛನ್ವಂ ಮಙ್ಗಲಪೋಕ್ಖರಣಿಂ ದಿಸ್ವಾ ನಹಾಯಿತುಕಾಮೋ ಸಬ್ಬಾಭರಣಾನಿ ಓಮುಞ್ಚಿತ್ವಾ ರಾಜಪುರಿಸೇ ಪಟಿಪಾದೇತ್ವಾ ನಹಾಯಿತುಂ ಓತರಿ, ತದಾ ಸುವಪೋತಕೋ ತಂ ಠಾನಂ ಪತ್ತೋ ಸಾಖನ್ತರೇ ನಿಲೀನೋ ರಾಜಪುರಿಸಾನಂ ಪಮಾದಂ ದಿಸ್ವಾ ರಞ್ಞೋ ಮುತ್ತಾಹಾರಂ ಡಸಿತ್ವಾ ಆಕಾಸಂ ಪಕ್ಖನ್ದಿತ್ವಾ ವೇಗೇನಾಗನ್ತ್ವಾ ಅತ್ತನೋ ಸಹಾಯಸ್ಸ ದತ್ವಾ ಅಪ್ಪಮತ್ತೋ ಇಮಂ ವಲಞ್ಜೇಹಿ ಸಮ್ಮಾತಿ ವತ್ವಾ ಅದಾಸಿ, ತತೋ ಸೋ ನಂ ಗಹೇತ್ವಾ ಇಮಂ ಕುಹಿಂ ಪಟಿಸಾಮೇಸ್ಸಾಮೀತಿ ಚಿನ್ತೋನ್ತೋ ಮಮೇಕೋ ಸಹಾಯಕೋ ಅನ್ತೋನಗರೇ ವಸತಿ, ತಸ್ಮಿಂ ಠಪೇಸ್ಸಾಮೀತಿ ಚಿನ್ತೇತ್ವಾ ಯಥಾಸಙ್ಕೇತಮುಪಗಮ್ಮ ತಂ ದಿಸ್ವಾ ಪಟಿಸನ್ಥಾರಂ ಕತ್ವಾ ಸುವಪೋತಕೇನ ಕತೋ ಪಕಾರಂ ಪಕಾಸೇತ್ವಾ ಇಮಂ ಮುತ್ತಾಹಾರಂ ಸಾಧುಕಂ ಠಪೇಹೀತಿ ವತ್ವಾ ಅದಾಸಿ, ತಂಖಣೇ ರಾಜಾ ನಹಾತ್ವಾನುಲಿತ್ತೋ ಆಭರಣಾನಿ ಪಿಲನ್ಧೇನ್ತೋ ಮುತ್ತಾಹಾರಂ ನಾದ್ದಸ. ತತೋ ರಾಜಪುರಿಸಾ ಅನ್ತೋಚ ಬಹಿಚ ಪರಿಜನೇ ಉಪಪರಿಕ್ಖಿತ್ವಾ ಮುತ್ತಾಹಾರಂ ಅಪಸ್ಸನ್ತಾ ನಗರೇ ಭೇರಿಂ ಚರಾಪೇಸುಂ, ಯೋ ಮುತ್ತಾಹಾರಂ ಪಸ್ಸತಿ, ತಸ್ಸ ರಾಜಾ ಮಹನ್ತಂ ಯಸಂ ದಸ್ಸತೀತಿ. ತಂ ಸುತ್ವಾ ಸೋ ಮಿತ್ತದೂಭೀ ಏವಂ ಚಿನ್ತೇಸಿ, ಅಹಂಚಮ್ಹಿ ದುಕ್ಖಿತೋ, ಯನ್ನೂನಾಹಂ ಮುತ್ತಾಹಾರಂ ರಞ್ಞೋ ದಸ್ಸೇತ್ವಾ ಸುಖೇನ ವಸೇಯ್ಯಂ, ಕಿಮ್ಮೇ ಏತೇನಾತಿ ತೇನ ಕತಂ ತಥಾರೂಪಂ ಉಪಕಾರಂ ಅಸಲ್ಲಕ್ಖೇನ್ತೋ ಮಹಾಮಿತ್ತದೂಭೀ ಪುರಿಸೋ ರಾಜಪುರಿಸೇ ಉಪಸಙ್ಕಮ್ಮ ಮುತ್ತಹಾರಂ ಅತ್ತನೋ ಸನ್ತಿಕೇ ಠಪಿತಭಾವಂ ಕಥೇಸಿ, ಭೋ ಮಮ ಸನ್ತಿಕೇ ಏಕೋ ಪುರಿಸೋ ಮುತ್ತಹಾರಂ ಠಪೇಸೀತಿ. ಏವಂ ಅಸಪ್ಪುರಿಸಸಂಸಗ್ಗೋತಿ, ತಥಾಹಿ.

೧.

ಯಥಾ ಸಂವಡ್ಢಿತೋ ನಿಮ್ಬೋ, ಮಧುಖೀರೋ ದಸಿಞ್ಚನಾ;

ನ ಯಾತಿ ಮಧುರಂ ತಂ ವೋ, ಪಕಾರ ಮಸತಂ ಕತಂ.

೨.

ಸೀಸೇನು ದಕ ಮಾದಾಯ, ವಡ್ಢಿತೋಪಿ ನುಹೀತರು;

ನ ಯಾತಿ ಮಧುರಂ ತಂವೋ, ಪಕಾರಮಸತಂ ಕತಂ.

೩.

ನಿಚ್ಚಂ ¶ ಖೀರೋದಪಾನೇನ, ವಡ್ಢಿತೋ ಸಿವಿಸೋ ಯಥಾ;

ವಿಸಂವ ಪರಿವತ್ತೇತಿ, ತಥಾ ನೀಚೋಪಕಾರಕಂ.

೪.

ಯಥಾತ್ತನಾ ಕತೋ ಅಗ್ಗಿ, ಸೀತಲಂ ನ ದದೇ ಖಲು;

ತಥಾ ನೀಚೇ ಕತಂ ಕಾರಂ, ಅಗ್ಗೀವ ದಹತೇ ತನುಂ.

೫.

ತಸ್ಮಾ ಉಪಪರಿಕ್ಖಿತ್ವಾ, ಹಾವಭಾವೇನ ಬುದ್ಧಿಯಾ;

ಕಾತಬ್ಬಾ ಮೇತ್ತಿ ಜನ್ತೂಹಿ, ನಾಮಿತ್ತೋ ಲಭತೇಸುಖನ್ತಿ.

ಅಥಸ್ಸ ಮಿತ್ತದುಭಿನೋ ವಚನೇನ ರಾಜಪುರಿಸಾ ಮುತ್ತಾಹಾರಂಚತಂಚ ಗಹೇತ್ವಾ ಸಭಣ್ಡಕಂ ಪುರಿಸಂ ದಸ್ಸೇಸುಂ. ಅಥ ರಾಜಾ ಸಭಣ್ಡಕಂ ಚೋರಂ ದಿಸ್ವಾ ಕುದ್ಧೋ ಇಮಂ ನೇತ್ವಾ ದಕ್ಖಿಣದ್ವಾರೇ ಜೀವಸೂಲೇ ಉತ್ತಾಸೇಥಾತಿ ಆಣಾಪೇಸಿ, ರಾಜಪುರಿಸಾ ತಸ್ಸ ರಾಜಾಣಂ ಕರೋನ್ತೋ ಅಗಮಂಸು, ತೇಹಿ ನೀಯಮಾನೋ ಪುರಿಸೋ ದಕ್ಖಿಣದ್ವಾರಾ ನಿಕ್ಖಮ್ಮ ಸಪ್ಪಸಹಾಯಂ ಸರಿತ್ವಾ ಅಪ್ಪೇವನಾಮೇ ತಸ್ಸ ಸನ್ತಿಕಾ ಕಿಞ್ಚಿ ಸೋತ್ಥಿ ಭವೇಯ್ಯಾತಿ ಪುಬ್ಬೇ ವುತ್ತಸಙ್ಕೇತಾ ನುಸಾರೇನ ವಮ್ಮಿಕಂ ದಿಸ್ವಾ ಸಮ್ಮ ದೀಘಾತಿ ಸದ್ದಮಕಾಸಿ, ಸೋ ವಮ್ಮಿಕಾ ನಿಕ್ಖಮ್ಮತಂ ತಥಾ ನಿಯಮಾನಂ ದಿಸ್ವಾ ಸಂವಿಗ್ಗೋ ದುಕ್ಖಪ್ಪತ್ತೋ ಸಹಾಯಸ್ಸಮೇ ಅಜ್ಜ ಅವಸ್ಸಯೇನ ಉಪತ್ಥಮ್ಭಂ ಭವಿತುಂ ವಟ್ಟತೀತಿ ತಂ ಸಮಸ್ಸಾಸೇತ್ವಾ ಅತ್ತಭಾವಂ ವಿಜಹಿತ್ವಾ ಅಞ್ಞತರವೇಸೇನ ರಾಜಪುರಿಸೇ ಉಪಸಙ್ಕಮ್ಮ ಇಮಂ ಪುರಿಸಂ ಮುಹುತ್ತಂಮಾ ಮಾರೇಥಾತಿ ದಳ್ಹಂ ವತ್ವಾ ಮುಹುತ್ತೇನ ರಞ್ಞೋ ಅಗ್ಗಮಹೇಸಿಯಾ ವಸನಟ್ಠಾನಂ ಗನ್ತ್ವಾ ಸಪ್ಪವಣ್ಣೇನ ದೇವಿಂ ಡಸಿತ್ವಾ ತಾಯ ವಿಸೇನ ಮುಚ್ಛಿತಕಾಲೇ ಮನುಸ್ಸವಣ್ಣೇನ ವಜ್ಝಪ್ಪತ್ತೋ ವಿಸೋಸಧಂ ಜಾನಾತಿತೀ ವತ್ವಾ ತಂಖಣೇವ ಸಹಾಯಸ್ಸ ಸನ್ತಿಕಂ ಗನ್ತ್ವಾ ರಞ್ಞಾ ತವ ಪಕ್ಕೋ ಸಿತಕಾಲೇ ಗನ್ತ್ವಾ ಉದಕಪ್ಪಸತೇನ ದೇವಿಯಾ ಸರೀರೇ ಪಹರಿತ್ವಾ ನಿಬ್ಬಿಸಂ ಕರಾಹೀತಿ ವತ್ವಾ ಪಕ್ಕಾಮಿ, ಅಥ ರಾಜಾ ವಿಸವೇಜ್ಜ ಪರಿಯೇಸನ್ತೋ ತಂ ಪವತ್ತಿಂ ಸುತ್ವಾ ವಜ್ಝಪ್ಪತ್ತಂ ಆನೇಥಾತಿ ಆಣಾಪೇತ್ವಾ ದೇವಿಯಾ ನಿಬ್ಬಿಸಂ ಕರೋಥಾತಿ ಆಹ, ಸೋ ನಾಗರಾಜೇನ ವುತ್ತನಯೇನ ನಿಬ್ಬಿಸಮಕಾಸಿ, ಸಾ ಸುಖಿತಾ ಅರೋಗಾ ಅಹೋಸಿ, ರಾಜಾ ತಂ ದಿಸ್ವಾ ತುಟ್ಠೋ ತಸ್ಸ ಖೇತ್ತವತ್ಥುಯಾನವಾಹನಾದಿದಾನೇನ ¶ ಮಹಾಸಕ್ಕಾರಮಕಾಸಿ, ಅಥ ಸೋ ರಾಜಾನಂ ಉಪಸಙ್ಕಮ್ಮ ಅತ್ತನಾ ಕತಂ ಸಬ್ಬಂ ಪಕಾಸೇಸಿ. ತೇನ ವುತ್ತಂ.

೬.

ಏಕದಾಹಂ ಮಹಾರಾಜ, ವನಂ ಕಮ್ಮೇನ ಕೇನಚಿ;

ಗತೋದ್ದಸಂ ಮಹಾವಾಟೇ, ಪತಿತಂ ಸುವಪೋತಕಂ.

೭.

ಅಥೋ ರಗಂ ಮನುಸ್ಸಂಚ;

ದುಕ್ಖಪ್ಪತ್ತೇ ಖುದಾಪರೇ;

ಉಕ್ಖಿಪಿಂ ಕರುಣಾಯಾಹಂ;

ತೇ ಮೇ ವೋಚುಂ ತದಾ ತಯೋ.

೮.

ಅದಾಸಿ ಜೀವಮಮ್ಹಾಕಂ, ಉಪಕಾರೋಸಿ ನೋ ತುವಂ;

ತವ ಕಿಚ್ಚೇ ಸಮುಪ್ಪನ್ನೇ, ಅಮ್ಹಾಕಂ ಏಹಿ ಸನ್ತಿಕಂ.

೯.

ಏವಂ ತೇಹಿ ಪವುತ್ತೋಹಂ, ಅಗಞ್ಛಿಂ ಸುವಸನ್ತಿಕಂ;

ತೇನ ಕತೂಪಕಾರೋಹಂ, ಮನುಸ್ಸಸ್ಸಾಪಿ ಸನ್ತಿಕಂ.

೧೦.

ತೇನಾಹಂ ಮರಣಪ್ಪತ್ತೋ, ಅದ್ದಸಂ ಉರಗಾಧಿಪಂ;

ಸೋದಾಸಿ ಜೀವಿತಂ ಮಯ್ಹಂ, ಅಲತ್ಥಂ [ಅಲದ್ಧ ಇತಿಸಬ್ಬತ್ಥ] ವಿಪುಲಂ ಧನಂ.

೧೧.

ಸುಜನೋ ನಾವಮನ್ತಬ್ಬೋ, ಖುದ್ದಕೋತಿ ನರಾಧಿಪ;

ಸುವೋಚ ಉರಗೋಚೇತೇ, ಮಿತ್ತಧಮ್ಮೇ ಪತಿಟ್ಠಿತಾ.

೧೨.

ಕಾರಣಞ್ಞೂ ಮನುಸ್ಸೇಸೋ,

ಅಮ್ಹೇಹಿ ಸಮಜಾತಿಕೋ;

ಕತೂಪಕಾರೋ ಏವಮ್ಪಿ,

ದಿಸೋ ಜಾತೋ ನರಾಧಮೋ.

೧೩.

ಅಕಸ್ಮಾ ದೇವ ಕುಪ್ಪನ್ತಿ, ಪಸೀದನ್ತಿನಿಮಿತ್ತತೋ;

ಸೀಲಂ ಹೇತಮಸಾಧೂನಂ, ಬಾಲಾನಮವಿಜಾನತಂ.

೧೪.

ಮನುಸ್ಸಾಪಿ ಮಹಾರಾಜ, ಕೇಚಿ ವಿಸ್ಸಾಸಿಯಾ ನ ವೇ;

ತಿರಚ್ಛಾನಾಪಿ ಹೋನ್ತೇವ, ಅಜಿಮ್ಹಮನಸಾಸಠಾತಿ.

ಏವಂ ¶ ಸೋ ಅತ್ತನೋ ಪವತ್ತಿಂ ಕಥೇಸಿ, ರಾಜಾ ತಂ ಸುತ್ವಾ ಪಸನ್ನೋ ಇಮಸ್ಸ ಪುರಿಸಸ್ಸ ಮಹನ್ತಂ ಗೇಹಂ ಕತ್ವಾ ಮಹಾಪರಿಹಾರಂ ಕರೋಥಾತಿ ಆಣಾಪೇಸಿ, ಸೋ ಪನ ಮಮ ಗೇಹಂ ನಿಗ್ರೋಧಸ್ಸ ಚ ವಮ್ಮಿಕಸ್ಸ ಚ ಅನ್ತರೇ ಕರೋಥಾತಿ ವತ್ವಾ ತಥಾ ಕಾರೇತ್ವಾ ತತ್ಥ ವಸನ್ತೋ ರಾಜೂಪಟ್ಠಾನಂ ಕರೋನ್ತೋ ತೇಹಿ ಸಹಾಯೇಹಿ ಸದ್ಧಿಂ ಸಮ್ಮೋದಮಾನೋ ಯಾವಜೀವಂ ವಸಿತ್ವಾ ಆಯು ಪರಿಯೋಸಾನೇ ತೇಹಿ ಸದ್ಧಿಂ ಯಥಾಕಮ್ಮಂ ಗತೋತಿ.

೧೫.

ಇತಿ ಪತಿತಸುಖಮ್ಹಾ ಅಙ್ಗತೋ ವಾ ಧನಮ್ಹಾ,

ಪರಮತರಪತಿಟ್ಠಾ ಹೋನ್ತಿ ಮಿತ್ತಾ ಸಖಾನಂ;

ವಿರಹಿತಸಖಿನಂ ಭೋ ನತ್ಥಿ ಯಸ್ಮಾಭಿವುದ್ಧಿ,

ಚಿಣುಥ ಕುಸಲಧಮ್ಮಂ ಮಿತ್ತವನ್ತಾ ಮಹನ್ತಂ.

ತಿಣ್ಣಂ ಜನಾನಂ ವತ್ಥುಂ ತತಿಯಂ.

೪. ಬುದ್ಧೇನಿಯಾ ವತ್ಥುಮ್ಹಿ ಅಯಮಾನುಪುಬ್ಬೀಕಥಾ

ಜಮ್ಬುದೀಪೇ ಕಿರ ಪುಬ್ಬೇ ಪಾಟಲಿಪುತ್ತನಗರೇ ಸತ್ತಾಸೀತೀಕೋಟಿನಿಹಿತಧನಂ ಏಕಂ ಸೇಟ್ಠಿಕುಲಂ ಅಹೋಸಿ, ತಸ್ಸ ಪನ ಸೇಟ್ಠಿನೋ ಏಕಾಯೇವ ಧೀತಾ ಅಹೋಸಿ ನಾಮೇನ ಬುದ್ಧೇನಿನಾಮ, ತಸ್ಸಾ ಸತ್ತವಸ್ಸಿಕಕಾಲೇ ಮಾತಾಪಿತರೋ ಕಾಲಮಕಂಸು, ತಸ್ಮಿಂ ಕುಲೇ ಸಬ್ಬಂ ಸಾಪತೇಯ್ಯಂ ತಸ್ಸಾಯೇವ ಅಹೋಸಿ, ಸಾ ಕಿರ ಅಭಿರೂಪಾ ಪಾಸಾದಿಕಾ ಪರಮಾಯ ವಣ್ಣಪೋಕ್ಖರತಾಯ ಸಮನ್ನಾಗತಾ ದೇವಚ್ಛರಪಟಿಭಾಗಾ ಪಿಯಾಚ ಅಹೋಸಿ ಮನಾಪಾ, ಸದ್ಧಾ ಪಸನ್ನಾ ರತನತ್ತಯಮಾಮಿಕಾ ಪಟಿವಸತಿ, ತಸ್ಮಿಂ ಪನ ನಗರೇ ಸೇಟ್ಠಿಸೇನಾಪತಿಉಪರಾಜಾದಯೋ ತಂ ಅತ್ತನೋ ಪಾದಪರಿಚಾರಿಕಂ ಕಾಮಯಮಾನಾ ಮನುಸ್ಸೇ ಪೇಸೇಸುಂ ಪಣ್ಣಾಕಾರೇಹಿ ಸದ್ಧಿಂ, ಸಾ ತಂ ಸುತ್ವಾ ಚಿನ್ತೇಸಿ, ಮಯ್ಹಂ ಮಾತಾಪಿತರೋ ಸಬ್ಬಂ ವಿಭವಂ ಪಹಾಯ ಮತಾ, ಮಯಾ ಪನ ತಥಾ ಅಗನ್ತಬ್ಬಂ, ಕಿಂ ಮೇ ಪತಿಕುಲೇನ, ಕೇವಲಂ ¶ ವಿತ್ತವಿನಾಸಾಯ ಭವತಿ, ಮಯಾ ಪನಿ ಮಂ ಧನಂ ಬುದ್ಧಸಾಸನೇಯೇವ ನಿದಹಿತುಂ ವಟ್ಟತೀತಿ ಚಿನ್ತೇಸಿ, ಚಿನ್ತೇತ್ವಾ ಚ ಪನ ತೇಸಂ ನ ಮಯ್ಹಂ ಪತಿಕುಲೇನತ್ಥೋತಿ ಪಟಿಕ್ಖಿಪಿ, ಸಾ ತತೋ ಪಟ್ಠಾಯ ಮಹಾದಾನಂ ಪವತ್ತೇನ್ತೀ ಸಮಣಬ್ರಹ್ಮಣೇ ಸನ್ತಪ್ಪೇಸಿ, ತೇನೇತ್ಥ.

೧.

ಚತುದ್ದಿಸಾಯಾತಜಿನತ್ರಜಾನಂ,

ಆಪಾನಭೂತಂ ಘರಮಾಸಿ ತಸ್ಸಾ;

ಯದಿಚ್ಛಿತ ಪ್ಪಚ್ಚಯಲಾಭ ಹೇತು,

ದೇವದ್ದುಮೋವಾಸಿ ಮಹಾನುಭಾವೋ.

೨.

ಪುಪ್ಫೂಪಹಾರಾದಿ ವಿತಾನಲಙ್ಕತಾ,

ಪದೀಪ ಪಞ್ಞತ್ತ ಸುಭಾಸನಾವಲೀ;

ಸುಖಾಸನಾಸೀನ ವಸೀಹಿಲಙ್ಕತಾ,

ತಸ್ಸಾಸಿ ತಸ್ಮಿಂ ವರದಾನಸಾಲಾ.

೩.

ಸುಧೋತಹತ್ಥಾ ಸುಚಿಪುಞ್ಞಚಿತ್ತಾ,

ಸದಾದರಾ ರಕ್ಖಿತಪಞ್ಚಸೀಲಾ;

ಬುದ್ಧೇನಿನಾಮಾ ಕರುಣಾ ಗುಣಗ್ಗಾ,

ಅದಾ ಮಹಾದಾನವರಂ ಪಸತ್ಥನ್ತಿ.

ಅಥಾಪರಭಾಗೇ ಏಕೋ ಅಸ್ಸವಾಣಿಜಕೋ ಅಸ್ಸ-ವಾಣಿಜ್ಜಾಯ ಪುಬ್ಬನ್ತಾಪರನ್ತಂ ಗಚ್ಛನ್ತೋ ಆಗಮ್ಮ ಇಮಿಸ್ಸಾ ಗೇಹೇ ನಿವಾಸಂ ಗಣ್ಹಿ, ಅಥ ಸೋ ವಾಣಿಜೋ ತಂ ದಿಸ್ವಾ ಧೀತುಸಿನೇಹಂ ಪತಿ ಟ್ಠಾ ಪೇ ತ್ವಾ ಗನ್ಧಮಾಲವತ್ಥಾಲಙ್ಕಾರಾದೀಹಿ ತಸ್ಸಾ ಉಪಕಾರಕೋ ಹುತ್ವಾ ಗಮನಕಾಲೇ ಅಮ್ಮ ಏತೇಸು ಅಸ್ಸೇಸು ತವ ರುಚ್ಚನಕಂ ಅಸ್ಸಂ ಗಣ್ಹಾಹೀತಿ ಆಹ, ಸಾಪಿ ಅಸ್ಸೇ ಓಲೋಕೇತ್ವಾ ಏಕಂ ಸಿನ್ಧವಪೋತಕಂ ದಿಸ್ವಾ ಏತಂ ಮೇ ದೇಹೀತಿ ಆಹ, ವಾಣಿಜೋ ಅಮ್ಮ ಏಸೋ ಸಿನ್ಧವಪೋತಕೋ, ಅಪ್ಪಮತ್ತಾ ಹುತ್ವಾ ಪಟಿಜಗ್ಗಾಹೀತಿ ವತ್ವಾ ತಂ ಪಟಿಪಾದೇತ್ವಾ ಅಗಮಾಸಿ. ಸಾಪಿ ತಂ ಪಟಿಜಗ್ಗಮಾನಾ ಆಕಾಸಗಾಮಿಭಾವಂ ಞತ್ವಾ ಸಮ್ಮಾ ಪಟಿಜಗ್ಗನ್ತೀ ಏವಂ ಚಿನ್ತೇಸಿ, ಪುಞ್ಞಕರಣಸ್ಸ ¶ ಮೇ ಸಹಾಯೋ ಲದ್ಧೋತಿ, ಅಗತಪುಬ್ಬಾಚ ಮೇ ಭಗವತೋ ಸಮಾರಂ ಮಾರಬಲಂ ವಿಧಮೇತ್ವಾ ಬುದ್ಧಭೂತಸ್ಸ ಜಯಮಹಾಬೋಧಿಭೂಮಿ, ಯನ್ನೂನಾಹಂ ತತ್ಥ ಗನ್ತ್ವಾ ಭಗವತೋ ಜಯಮಹಾಬೋಧಿಂ ವನ್ದೇಯ್ಯನ್ತಿ ಚಿನ್ತೇತ್ವಾ ಬ ಹೂ ರಜತಸುವಣ್ಣಮಾಲಾದಯೋ ಕಾರಾಪೇತ್ವಾ ಏಕದಿವಸಂ ಅಸ್ಸ ಮಭಿರುಯ್ಹ ಆಕಾಸೇನ ಗನ್ತ್ವಾ ಬೋಧಿಮಾಲಕೇ ಠತ್ವಾ ಆಗಚ್ಛನ್ತುಅಯ್ಯಾ ಸುವಣ್ಣಮಾಲಾ ಪೂಜೇತುಂತಿ ಉಗ್ಘೋಸೇಸಿ. ತೇನೇತ್ಥ.

೪.

ಯತೋ ಪಟ್ಠಾಯಹಂ ಬುದ್ಧ, ಸಾಸನೇ ಸುದ್ಧಮಾನಸಾ;

ಪಸನ್ನಾ ತೇನ ಸಚ್ಚೇನ, ಮಮಾನುಗ್ಗಹಬುದ್ಧಿಯಾ.

೫.

ಆಗಚ್ಛನ್ತು ನಮಸ್ಸನ್ತು, ಬೋಧಿಂ ಪೂಜೇನ್ತು ಸಾಧುಕಂ;

ಸೋಣ್ಣಮಾಲಾಹಿ ಸಮ್ಬುದ್ಧ, ಪುತ್ತಾ ಅರಿಯಸಾವಕಾ.

೬.

ಸುತ್ವಾ ತಂ ವಚನಂ ಅಯ್ಯಾ, ಬಹೂ ಸೀಹಳವಾಸಿನೋ;

ಆಗಮ್ಮ ನಭಸಾ ತತ್ಥ, ವನ್ದಿಂ ಸುಚ ಮಹಿಂಸುಚಾತಿ.

ತತೋ ಪ್ಪತುತಿ ಸಾ ಕುಮಾರಿಕಾ ಬುದ್ಧಸಾಸನೇ ಅತೀವ ಪಸನ್ನಾ ನಿಚ್ಚಮೇವ ಅಸ್ಸ ಮಭಿರುಯ್ಹ ಆಗನ್ತ್ವಾ ಅರಿಯೇಹಿ ಸದ್ಧಿಂ ಮಹಾಬೋಧಿಂ ಸುವಣ್ಣಮಾಲಾಹಿ ಪೂಜೇತ್ವಾ ಗಚ್ಛತಿ, ಅಥ ಪಾಟಲಿಪುತ್ತನಗರೋಪವನೇ ವನಚರಾ ತಸ್ಸಾ ಅಭಿಣ್ಹಂ ಗಚ್ಛನ್ತಿಯಾ ಚ ಆಗಚ್ಛನ್ತಿಯಾ ಚ ರೂಪಸಮ್ಪತ್ತಿಂ ದಿಸ್ವಾ ರಞ್ಞೋ ಕಥೇಸುಂ. ಮಹಾರಾಜ ಏವರೂಪಾ ಕುಮಾರಿಕಾ ಅಸ್ಸ ಮಭಿರುಯ್ಹ ಆಗನ್ತ್ವಾ ನಿಬದ್ಧಂ ವನ್ದಿತ್ವಾ ಗಚ್ಛತಿ. ದೇವಸ್ಸಾನುರೂಪಾ ಅಗ್ಗಮಹೇಸೀ ಭವಿತುನ್ತಿ, ರಾ ಜಾ ತಂ ಸುತ್ವಾ ತೇನಹಿ ಭಣೇ ಗಣ್ಹಥ ನಂ ಕುಮಾರಿಂ, ಮಮ ಅಗ್ಗಮಹೇಸಿಂ ಕರೋಮೀತಿ ಪುರಿಸೇ ಪಯೋಜೇಸಿ, ತೇನ ಪಯುತ್ತಪುರಿಸಾ ಬೋಧಿಪೂಜಂ ಕತ್ವಾ ಆಗಚ್ಛನ್ತಿಂ ಗಣ್ಹಾಮಾತಿ ತತ್ಥ ನಿಲೀನಾ ಗಹಣಸಜ್ಜಾ ಅಟ್ಠಂಸು, ತದಾ ಸಾ ಕುಮಾರಿಕಾ ಅಸ್ಸ ಮಭಿರುಯ್ಹ ಮಹಾಬೋಧಿಮಣ್ಡಂ ಗನ್ತ್ವಾ ವೀತರೋಗೇಹಿ ಸದ್ಧಿಂ ಪುಪ್ಫಪೂಜಂ ಕತ್ವಾ ವನ್ದಿತ್ವಾ ನಿವತ್ತಿ, ಅಥ ತೇಸು ಏಕೋ ಧಮ್ಮರಕ್ಖಿತ ತ್ಥೇರೋನಾಮ ತಸ್ಸಾ ಏವ ಮಾಹ, ಭಗಿನಿ ತಂ ಅನ್ತರಾಮಗ್ಗೇ ಚೋರಾ ಗಣ್ಹಿತುಕಾಮಾ ಠಿತಾ, ಅಸುಕಟ್ಠಾನಂ ಪತ್ವಾ ಅಪ್ಪಮತ್ತಾ ¶ ಸೀಘಂ ಗಚ್ಛಾತಿ, ಸಾಪಿ ಗಚ್ಛನ್ತೀ ತಂ ಠಾನಂ ಪತ್ವಾ ಚೋರೇಹಿ ಅನುಬನ್ಧಿತಾ ಅಸ್ಸಸ್ಸ ಪಣ್ಹಿಯಾ ಸಞ್ಞಂ ದತ್ವಾ ಪಕ್ಕಾಮಿ, ಚೋರಾ ಪಚ್ಛತೋ ಪಚ್ಛತೋ ಅನುಬನ್ಧಿಂಸು. ಅಸ್ಸೋ ವೇಗಂ ಜ ನೇ ತ್ವಾ ಆಕಾಸ ಮುಲ್ಲಙ್ಘಿ, ಕುಮಾರಿಕಾ ವೇಗಂ ಸನ್ಧಾರೇತುಂ ಅಸಕ್ಕೋನ್ತೀ ಅಸ್ಸಸ್ಸ ಪಿಟ್ಠಿತೋ ಪರಿಗಲಿತ್ವಾ ಪತನ್ತೀ ಮಯಾ ಕತೂಪಕಾರಂ ಸರ ಪುತ್ತಾತಿ ಆಹ, ಸೋ ಪತನ್ತಿಂ ದಿಸ್ವಾ ವೇಗೇನಾ ಗನ್ತ್ವಾ ಪಿಟ್ಠಿಯಂ ನಿಸೀದಾಪೇತ್ವಾ ಆಕಾಸತೋ ನೇತ್ವಾ ಸ ಕ ಟ್ಠಾ ನೇ ಯೇವ ಪತಿಟ್ಠಾಪೇಸಿ. ತಸ್ಮಾ.

೭.

ತಿರಚ್ಛಾನಗತಾಪೇವಂ, ಸರನ್ತಾ ಉಪಕಾರಕಂ;

ನ ಜಹನ್ತೀತಿ ಮನ್ತ್ವಾನ, ಕತಞ್ಞೂ ಹೋನ್ತು ಪಾಣಿನೋತಿ.

ತತೋ ಸಾ ಕುಮಾರಿಕಾ ಸತ್ತಾ ಸೀತಿಕೋಟಿಧನಂ ಬುದ್ಧಸಾಸನೇಯೇವ ಚಜಿತ್ವಾ ಯಾವಜೀವಂ ಸೀಲಂ ರಕ್ಖಿತ್ವಾ ಉಪೋಸಥಕಮ್ಮಂ ಕ ತ್ವಾ ತ ತೋ ಚುತಾ ಸುತ್ತ ಪ್ಪಬುದ್ಧೋ ವಿಯ ದೇವಲೋಕೇ ನಿಬ್ಬತ್ತೀತಿ.

೮.

ಅತಿತರುಣವಯಾ ಭೋ ಮಾತುಗಾಮಾಪಿ ಏವಂ,

ವಿವಿಧಕುಸಲಕಮ್ಮಂ ಕತ್ವ ಸಗ್ಗಂ ವಜನ್ತಿ;

ಕುಸಲಫಲಮಹನ್ತಂ ಮಞ್ಞಮಾನಾ ಭವನ್ತಾ,

ಭವಥ ಕಥ ಮುಪೇಕ್ಖಾ ದಾನಮಾನಾದಿಕಮ್ಮೇ.

ಬುದ್ಧೇನಿಯಾ ವತ್ಥುಂ ಚತುತ್ಥಂ.

೫. ಅಹಿತುಣ್ಡಿಕಸ್ಸ ವತ್ಥುಮ್ಹಿ ಅಯಮಾನುಪುಬ್ಬೀಕಥಾ

ಇಮಸ್ಮಿಂ ಕಿರ ಭದ್ದಕಪ್ಪಮ್ಹಿ ಅಮ್ಹಾಕಂ ಕಿರ ಭಗವತೋ ಪುಬ್ಬೇ ಕಸ್ಸಪೋನಾಮ ಸತ್ಥಾ ಲೋಕೇ ಉಪ್ಪಜ್ಜಿತ್ವಾ ಸದೇವಕಂ ಲೋಕಂ ಸಂಸಾರಸಾಗರಾ ತಾರೇತ್ವಾ ಸಬ್ಬಬುದ್ಧಕಿಚ್ಚಾನಿ ನಿಟ್ಠಪೇತ್ವಾ ಅತ್ಥಂ ಗತೋ ದಿವಸಕರೋವಿಯ ಸೇತಬ್ಯಮ್ಹಿ ಅನುಪಾದಿಸೇಸಾಯ ನಿಬ್ಬಾಣಧಾತುಯಾ ಪರಿನಿಬ್ಬಾಯಿ, ತದಾ ಸಕಲಜಮ್ಬುದೀಪವಾಸಿನೋ ಮನುಸ್ಸಾ ಸನ್ನಿಪತಿತ್ವಾ ¶ ಏಕೇಕಂ ಸುವಣ್ಣಿಟ್ಠಕಂ ಕೋಟಿಅಗ್ಘನಕಂ ರತನವಿಚಿತ್ತಂ ಬಹಿಚಿನನತ್ಥಾಯ ಏಕೇಕಂ ಅಡ್ಢಕೋಟಿಅಗ್ಘನಕಂ ಅಬ್ಭನ್ತರೂಪಪೂರಣತ್ಥಂ ಮನೋಸಿಲಾಯ ಮತ್ತಿಕಾಕಿಚ್ಚಂ ಕರೋನ್ತಾ ಯೋಜನಬ್ಬೇಧಂ ಥೂಪಂ ಕತ್ವಾ ಮಹನ್ತಂ ಸಕ್ಕಾರಂ ಕರೋನ್ತಿ. ತದಾ ಏಕೋ ಅಹಿತುಣ್ಡಿಕೋ ಗಾಮನಿಗಮರಾಜಧಾನೀಸು ಸಪ್ಪೇ ಕೀಳಾಪೇತ್ವಾ ಜೀವಿಕಂ ಕಪ್ಪೇನ್ತೋ ಏಕಂ ಗಾಮಕಂ ಪತ್ವಾ ತತ್ಥ ಸಪ್ಪೇ ಕೀಳಾಪೇತ್ವಾ ಸನ್ತುಟ್ಠೇಹಿ ಗಾಮವಾಸೀಹಿ ದಿನ್ನವಿವಿಧೋಪಾಯನೋ ಖಾದನೀಯಭೋಜನೀಯಂ ಖಾ ದಿ ತ್ವಾ ಭುಞ್ಜಿತ್ವಾ ತತ್ಥೇವ ನಿವಾಸಂ ಗಹೇತ್ವಾ ನಿಸೀದಿ. ತಸ್ಮಿಂ ಕಿರ ಗಾಮಕೇ ಮನುಸ್ಸಾ ಯೇಭುಯ್ಯೇನ ರತನತ್ತಯಮಾಮಕಾ. ತಸ್ಮಾ ತೇ ರತ್ತಿಭಾಗೇ ಸಯನ್ತಾ ‘‘ನಮೋ ಬುದ್ಧಾಯಾತಿ’’ ಏವಮಾದಿಂ ವದನ್ತಿ. ಸೋ ಪನ ಅಹಿತುಣ್ಡಿಕೋ ಮಿಚ್ಛಾದಿಟ್ಠಿಕೋ ತಿಣ್ಣಂ ರತನಾನಂ ಗುಣಂ ನ ಜಾನಾತಿ. ತಸ್ಮಾ ತೇಸಂ ತಂ ವಚನಂ ಸುತ್ವಾ ಸಯಮ್ಪಿ ಕೇ ಳಿಂ ಕುರುಮಾನೋ ಪರಿಹಾಸವಸೇನ ‘‘ನಮೋ ಬುದ್ಧಾಯಾತಿ’’ ವದತಿ, ಅಥೇಕದಿವಸಂ ಸೋ ಅತ್ತನೋ ಕೀಳಾಪನಸಮತ್ಥಂ ಏಕಂ ಸಪ್ಪಂ ಭತ್ಥ ತತ್ಥ ಪರಿಯೇಸಮಾನೋ ಆಹಿಣ್ಡತಿ. ತದಾ ಏಕೋ ನಾಗರಾಜಾ ಕಸ್ಸಪದಸಬಲಸ್ಸ ಥೂ ಪಂ ಗ ನ್ತ್ವಾ ವನ್ದಿತ್ವಾ ಏಕಂ ವಮ್ಮಿಕಂ ಪವಿಸತಿ. ತಂ ದಿ ಸ್ವಾ ಅಹಿತುಣ್ಡಿಕೋ ವೇಗೇನಾ ಗನ್ತ್ವಾ ನಾಗರಾಜಂ ಗಣ್ಹಿತುಂ ಮನ್ತಂ ಪರಿಜಪಿ, ಸೋ ಮನ್ತಂ ಸುತ್ವಾ ಕುಜ್ಝಿತ್ವಾ ತಂ ಮಾರೇತುಕಾಮೋ ಅನುಬನ್ಧಿ, ತಂ ದಿ ಸ್ವಾ ಅಹಿತುಣ್ಡಿಕೋ ವೇ ಗೇ ನ ಪಲಾಯನ್ತೋ ಏಕಸ್ಮಿಂ ಪಾಸಾಣೇ ಪಕ್ಖಲಿತ್ವಾ ಪತಮಾನೋ ಪುಬ್ಬೇವುತ್ತಪರಿಹಾಸ ವಚನಪರಿಚಯೇನ ‘‘ನಮೋ ಬುದ್ಧಾಯಾತಿ’’ ವದನ್ತೋ ಪತಿ. ತಸ್ಸ ತಂ ವಚನಂ ಅನುಬನ್ಧನ್ತಸ್ಸ ನಾಗರಞ್ಞೋ ಸೋತಪಥೇ ಅಮತಂವಿಯ ಪತಿ. ಅಥ ಸೋ ರತನತ್ತಯಗಾರವೇನ ತಸ್ಮಿಂ ಕೋಧಂ ನಿಬ್ಬಾಪೇತ್ವಾ ಸಮ್ಮ ಮಾ ಭಾಯಿ. ಅಹಂ ರತನತ್ತಯಮನ್ತಾನುಭಾವಪಾಸೇನ ಬದ್ಧೋ. ತಸ್ಮಾ ತು ವಂ ಡಸಿತುಂ ಮಯ್ಹಂ ಅನನುರೂಪಂ. ಅಜ್ಜ ತ ಯಿ ಪಸನ್ನೋಮ್ಹಿ, ಪಣ್ಣಾಕಾರಂ ತೇದಮ್ಮಿ, ಗಣ್ಹಾತಿ ತೀಣಿ ಸುವಣ್ಣಪುಪ್ಫಾನಿ ಅದಾಸಿ. ಏವಂ ರತನತ್ತಯಂ ನಾಮ ಘೋರಾಸಿವಿಸಾನಮ್ಪಿ ಸಪ್ಪಾನಂ ಮನಂ ಪೀಣೇತಿ. ಹೋನ್ತಿ ಚೇತ್ಥ.

೧.

ಬುದ್ಧೋತಿ ¶ ವಚನಂ ಸೇಟ್ಠಂ, ಬುದ್ಧೋತಿ ಪದ ಮುತ್ತಮಂ;

ನತ್ಥಿ ತೇನ ಸಮಂ ಲೋಕೇ, ಅಞ್ಞಂ ಸೋತರಸಾಯನಂ.

೨.

ಧಮ್ಮೋತಿವಚನಂ ಸೇಟ್ಠಂ, ಧಮ್ಮೋತಿ ಪದಮುತ್ತಮಂ;

ನತ್ಥಿ ತೇನ ಸಮಂ ಲೋಕೇ, ಅಞ್ಞಂ ಸೋತರಸಾಯನಂ.

೩.

ಸಙ್ಘೋತಿ ವಚನಂ ಸೇಟ್ಠಂ, ಸಙ್ಘೋತಿ ಪದಮುತ್ತಮಂ;

ನತ್ಥಿ ತೇನ ಸಮಂ ಲೋಕೇ, ಅಞ್ಞಂ ಸೋತರಸಾಯನಂ.

೪.

ತಸ್ಸ ಮುಖಂ ಮುಖಂ ನಾಮ, ಯಂ ವತ್ತತಿ ಮುಖೇ ಸದಾ;

ದುಲ್ಲಭಂ ಬುದ್ಧವಚನಂ, ಸಬ್ಬಸಮ್ಪತ್ತಿದಾಯಕಂ.

೫.

ತಸ್ಸ ಮನೋ ಮನೋ ನಾಮ, ಯಂ ಚೇ ಮನಸಿ ವತ್ತತಿ;

ದುಲ್ಲಭಂ ಬುದ್ಧವಚನಂ, ಸಬ್ಬಸಮ್ಪತ್ತಿದಾಯಕಂ.

೬.

ತಮೇವ ಕವಚಂ ದೇಹೇ, ತಮೇವ ಮಣಿ ಕಾಮದೋ;

ತಮೇವ ಸುರಭೀ ಧೇನು, ತಮೇವ ಸುರಪಾದಪೋ.

೭.

ತಸ್ಸೇವ ಸೋತಂ ಸೋತಂವ, ಯಂ ಸುಣಾತಿ ಜನೋ ಅಯಂ

ದುಲ್ಲಭಂ ಬುದ್ಧವಚನಂ, ಸಬ್ಬಸಮ್ಪತ್ತಿದಾಯಕಂ.

೮.

ಏವಂ ವಿಧೋ ರಗೋ ಘೋರೋ, ಹಳಾಹಳವಿಸೋ ಸದಾ;

ಬುದ್ಧೋತಿ ವಚನಂ ಸುತ್ವಾ, ಸನ್ತುಟ್ಠೋ ದಾಸಿ ಜೀವಿತಂ.

೯.

ಸೋಣ್ಣಪುಪ್ಫತ್ತಯಂಚಾಪಿ, ಮಹಗ್ಘಂ ಬಹಲಂ ಅದಾ;

ಪಸ್ಸ ಬುದ್ಧೋತಿ ವಾಚಾಯ, ಆನುಭಾವಮಹನ್ತತನ್ತಿ.

ಅಥ ನಾಗರಾಜಾ ತಸ್ಸ ತಾನಿ ಸುವಣ್ಣಪುಪ್ಫಾನಿ ದತ್ವಾ ಏವಮಾಹ. ಸಮ್ಮ ಏತೇಸು ಏಕಂ ತವ ಪುಞ್ಞತ್ತಾಯ ಏಕಂ ಮಮ ಪುಞ್ಞತ್ಥಾಯ ಪೂಜೇಹಿ. ಇತರೇನ ಯಾವಜೀವಂ ಸುಖೇನ ಜೀವನ್ತೋ ಪುತ್ತದಾರೇ ಪೋಸೇನ್ತೋ ದಾನಾದೀಸು ಅಪ್ಪಮಜ್ಜನ್ತೋ ಜೀವಿಕಂ ಕಪ್ಪೇಹಿ. ಮಾ ಹೀನಕಮ್ಮೇ ಬ್ಯವಟೋ ಹೋಹಿ, ಮಿಚ್ಛಾದಿಟ್ಠಿಞ್ಚ ಪಜಹಾತಿ ಓವದಿತ್ವಾ ಪಕ್ಕಾಮಿ. ಅಹಿತುಣ್ಡಿಕೋಪಿ ಸೋಮನಸ್ಸಪ್ಪತ್ತೋ ತೇನ ವುತ್ತನಯೇನೇವ ದ್ವಿಹಿ ಪುಪ್ಫೇಹಿ ಚೇತಿಯಂ ಪೂಜೇತ್ವಾ ಏಕೇನ ಸ ಹ ಸ್ಸಂ ಲಭಿತ್ವಾ ತೇ ನ ಪುತ್ತದಾರೇ ¶ ಪೋಸೇನ್ತೋ ಕಪಣದ್ಧಿಕವಣಿಬ್ಬಕಾದೀನಂ ದಾನಂ ದೇನ್ತೋ ಅಹಿತುಣ್ಡಿಕಕಮ್ಮಂ ಪಹಾಹ ಕುಸಲಮೇವ ಉಪಚಿನನ್ತೋ ಆಯುಪರಿಯೋಸಾನೇ ಸಗ್ಗಪರಾಯನೋ ಅಹೋಸಿ.

೧೦.

ಇತಿ ಅವಿದಿತಸತ್ತೋ ಕಿಞ್ಚಿ ಬುದ್ಧಾನುಭಾವಂ,

ಲಭತಿ ಧನವಿಸೇಸಂ ಯಸ್ಸ ನಾಮಪ್ಪಕಾಸಾ;

ವಿದಿತಜನನಿಕಾಯೋ ಕಿನ್ನು ತಸ್ಸಾನುಭಾವಂ,

ನ ಲಪತಿ ಜಿನನಾಮಂ ಕಿಚ್ಚ ಮಞ್ಞಪ್ಪಹಾಯಾತಿ.

ಅಹಿತುಣ್ಡಿಕಸ್ಸ ವತ್ಥುಂ ಪಞ್ಚಮಂ.

೬. ಸರಣತ್ಥೇರಸ್ಸ ವತ್ಥುಮ್ಹಿ ಅಯಮಾನುಪುಬ್ಬೀಕಥಾ

ಸಾವತ್ಥಿಯಂ ಕಿರ ಸುಮನೋ ನಾಮೇ ಕೋ ಗಹಪತಿ ಅಹೋಸಿ. ತಸ್ಸ ಭರಿಯಾ ಸುಜಮ್ಪತಿಕಾ ನಾಮ. ತೇ ಅಗಾರಂ ಅಜ್ಝಾವಸನ್ತಾ ಅಪರಭಾಗೇ ಪುತ್ತಂಚ ಧೀತರಂಚ ಲಭಿಂಸು. ಅಥ ತೇಸಂ ದಹರಕಾಲೇಯೇವ ಮಾತಾಪಿತರೋ ಕಾಲಂ ಕರೋನ್ತಾ ಜೇಟ್ಠಕಂಪಕ್ಕೋಸಿತ್ವಾ ಮಯಂ ಪುತ್ತ ತುವಂ ಪತಿರೂಪೇ ಠಾನೇ ನಿವೇಸಿತುಂ ನಾಸಕ್ಖಿಮ್ಹ, ಯಂ ನೋ ಘರೇ ವಿಭವಂ, ಸಬ್ಬಂ ತಂ ಗಣ್ಹ. ಇಮಾಯಚ ತೇ ಕಣಿಟ್ಠಿಕಾಯ ವುದ್ಧಿಂತ್ವಮೇವ ಜಾನಾಹೀತಿ ವತ್ವಾ ಜೇಟ್ಠಕಸ್ಸ ಹತ್ಥೇ ಕಣಿಟ್ಠಿಕಾಯ ಹತ್ಥಂ ಠಪೇತ್ವಾ ಕಾಲಮಕಂಸು. ಅಥ ಸೋ ಮಾತಾಪಿತುನ್ನಂ ಅಚ್ಚಯೇನ ಆಳಾಹನಕಿಚ್ಚಂ ಕತ್ವಾ ವಸನ್ತೋ ಕಾಲನ್ತರೇನ ಕಣಿಟ್ಠಿಕಂ ಪತಿರೂಪೇನ ಕುಲೇನ ಸಮ್ಬನ್ಧಿತ್ವಾ ಸಯಮ್ಪಿ ದಾರಪರಿಗ್ಗಹಮಕಾಸಿ. ಅಥಾಪರಭಾಗೇ ತಸ್ಸ ಕಣಿಟ್ಠಿಕಾ ಗಬ್ಭಿನೀ ಹುತ್ವಾ ಏಕದಿವಸಂ ಸಾಮಿಕಂ ಆಹ, ಸಾಮಿ ಮಮ ಭಾತರಂ ದಟ್ಠುಕಾಮಾಮ್ಹೀತಿ. ಸೋಪಿ ಸಾಧು ಭದ್ದೇತಿ ಅನುರೂಪೇನ ಪಣ್ಣಾಕಾರೇನ ತಾಯ ಸದ್ಧಿಂ ನಿಕ್ಖಮಿ. ತದಾ ಪನ ಭಗವಾ ಸುನಿವತ್ಥೋ ಸುಪಾರುತೋ ಭಿಕ್ಖುಸಙ್ಘಪರಿವುಸೋ ಪಿಣ್ಡಾಯ ನಗರಂ ಪಾವಿಸಿ ಛಬ್ಬಣ್ಣಘನಬುದ್ಧರಂಸಿಯೋ ವಿಸ್ಸಜ್ಜೇನ್ತೋ, ತ ತೋ ತೇ ಭಗವನ್ತಂ ದಿಸ್ವಾ ಪಸನ್ನಚಿತ್ತಾ ಪಞ್ಚಪತಿಟ್ಠಿತೇನ ¶ ವನ್ದಿತ್ವಾ ಅಟ್ಠಂಸು, ಅಥ ಸತ್ತಾ ತೇಸಂ ಜಯಮ್ಪತಿಕಾನಂ ಉಪನಿಸ್ಸಯಸಮ್ಪತ್ತಿಂದಿಸ್ವಾ ತೇ ಸರಣೇಸುಚ ಸೀಲೇಸುಚ ಪತಿಟ್ಠಾಪೇತ್ವಾ ಏವಮಾಹ, ಕದಾಚಿ ವೋ ದುಕ್ಖೇ ಉಪ್ಪನ್ನೇ ತಥಾಗತೋ ಅನುಸ್ಸರಿತಬ್ಬೋತಿ. ತಥಾಹಿ.

೧.

ಯಂಕಿಞ್ಚಿ ಭಯಮುಪ್ಪನ್ನಂ, ರಾಜಚೋರಾದಿಸಮ್ಭವಂ;

ತದಾ ಸರೇಯ್ಯ ಸಮ್ಬುದ್ಧಂ, ನಿಚ್ಛನ್ತೋತ ದುಪದ್ದವಂ.

೨.

ಯಂ ವೇ ಉಪದ್ದವಂ ಹೋತಿ, ಯಕ್ಖಪೇತಾ ದಿಸಮ್ಭವಂ;

ತದಾ ಸರೇಯ್ಯ ಸಮ್ಬುದ್ಧಂ, ನಿಚ್ಛನ್ತೋ ತದುಪದ್ದವಂ.

೩.

ಸೀಹಬ್ಯಗ್ಘತರಚ್ಛಾದಿ, ಪುಣ್ಡರೀಕಾದಿಸಮ್ಭವಂ;

ತದಾ ಸರೇಯ್ಯ ಸಮ್ಬುದ್ಧಂ, ನಿಚ್ಛನ್ತೋ ತದುಪದ್ದವಂ.

೪.

ಯಮಾತಪಗ್ಗಿ ವಾತಾದಿ, ಉದಕಾಸನಿಸಮ್ಭವಂ;

ತದಾ ಸರೇಯ್ಯ ಸಮ್ಬುದ್ಧಂ, ನಿಚ್ಛನ್ತೋ ತದುಪದ್ದವಂ.

೫.

ಪಜ್ಜರಾದೀಹಿ ರೋಗೇಹಿ, ವಿಸಮೋ ತುಹಿಸಮ್ಭವಂ;

ತದಾ ಸರೇಯ್ಯ ಸಮ್ಬುದ್ಧಂ, ನಿಚ್ಛನ್ತೋ ತದುಪದ್ದವಂ.

೬.

ಮಚ್ಚುನಾ ಚೇ ಯದಾ ಯುದ್ಧಂ, ಕರೇ ತೇನಾಪಿ ಜನ್ತುನಾ;

ಸರಿತಬ್ಬೋ ತದಾ ಬುದ್ಧೋ, ಪತ್ಥೇನ್ತೇನತ್ತನೋ ಜಯನ್ತಿ.

ತತೋ ತೇ ಭಗವತೋ ವಚನಂ ಪಟಿನನ್ದಿತ್ವಾ ವನ್ದಿತ್ವಾ ಅಗಮಂಸು. ಅಥ ಜೇಟ್ಠಕೋ ಆಗತೇ ತೇ ದಿಸ್ವಾ ಯಥಾನುರೂಪಂ ಸಕ್ಕಾರ ಮಕಾಸಿ. ತಸ್ಸಾ ಸಾಮಿಕೋ ಕತಿಪಾಹಂ ತತ್ಥ ವಸಿತ್ವಾ ಭರಿಯಂ ಜೇಟ್ಠಕಸ್ಸ ಪಟಿಪಾದೇತ್ವಾ ಮಮ ಗಾಮೇ ಕಿಚ್ಚಂ ಅತ್ಥೀತಿ ವತ್ವಾ ಪಕ್ಕಾಮಿ. ಅಥಸ್ಸಾ ಭಾತಾ ಭರಿಯಂ ಪಕ್ಕೋಸಿತ್ವಾ ಆಹ ಭದ್ದೇ ಇಮಿಸ್ಸಾ ಸಬ್ಬಂ ಕತ್ತಬ್ಬಂ ಕರೋಹೀತಿ. ಸಾ ತತೋ ಪಟ್ಠಾಯ ತಸ್ಸಾ ಉದಕನ್ನ ಪಾನಾ ದಿನಾ ವೇಯ್ಯಾವಚ್ಚಂ ಕುರುಮಾನಾ ಏತಿಸ್ಸಾ ಹತ್ಥಪಾದಗೀವೂಪಗೇಸು ಆಭರಣೇಸು ಲೋಭಂ ಉಪ್ಪಾದೇತ್ವಾ ತಂ ವೂಪಸಮೇತುಂ ಅಸಕ್ಕೋನ್ತೀ ಆಹಾರೂ ಪಚ್ಛೇದಂ ಕತ್ವಾ ಗಿಲಾನಾವಿಯ ಮಞ್ಚಕಂ ಉಪಗೂಹಿತ್ವಾ ನಿಪತಿ. ಅಥ ಸೋ ಗೇಹಂ ಗನ್ತ್ವಾ ತಂ ತಥಾ ಸಯಿತಂ ¶ ದಿಸ್ವಾ ಮಞ್ಚಕೇ ನಿಸಿನ್ನೋ ಕಿಂ ಭದ್ದೇ ಅಫಾಸುಕನ್ತಿ ಪುಚ್ಛಿ, ಸಾ ತುಣ್ಹೀ ಹುತ್ವಾ ಕತಿಪಯವಾರೇ ಪುಚ್ಛಿತಾ ನ ಸಕ್ಕಾ ಕಥೇತುನ್ತಿ ಆಹ. ಪುನ ಸಾಮಿಕೇನ ಗಾಳ್ಹಂ ನಿಬನ್ಧಿತೇ ಸಾ ಚಿನ್ತೇಸಿ, ಉಜುಕಂ ಮಯಾ ತಸ್ಸಾ ಪಿಳನ್ಧನಂ ಪತ್ಥೇಮೀತಿ ವುತ್ತೇ ನ ಪ್ಪತಿರುಪಂ, ತಸ್ಸಾ ಪಞ್ಚಮಧುರ ಮಂಸಂ ಪತ್ಥೇಮೀತಿ ವುತ್ತೇ ತಂ ಮಾರೇಸ್ಸತಿ, ತದಾ ಪಿಳನ್ಧನಾನಿ ಮಯ್ಹಮೇವಾತಿ, ತತೋ ಸಾಮಿ ತವ ಕಣಿಟ್ಠಿಕಾಯ ಪಞ್ಚಮಧುರಮಂಸಂ ಪತ್ಥೇಮಿ, ಅಲಭಮಾನಾಯ ಮೇ ಜೀವಿತಂ ನತ್ಥೀತಿ ಆಹ, ತಂ ಸುತ್ವಾ ಸೋ ಅನೇಕಪರಿಯಾಯೇನ ಮನುಸ್ಸಮಾರಣಂ ನಾಮ ಭಾರಿಯನ್ತಿ ವತ್ವಾ ನಿವಾರೇನ್ತೋಪಿ ನಿವಾರೇತುಂ ನಾಸಕ್ಖಿ, ಅಥ ತಾಯ ಪಟಿಬದ್ಧಚಿತ್ತೋ ಕಾಮಮುಚ್ಛಿತೋ ಮೋಹಮೂಳ್ಹೋ ಹುತ್ವಾ ಸಾಧು ಲಭಿಸ್ಸಸೀತಿ ತಸ್ಸಾ ವಚನಂ ಸಮ್ಪಟಿಚ್ಛಿ. ತಥಾಹಿ.

೭.

ಹಾಯನ್ತಿ ಇಧಲೋಕತ್ಥಾ, ಹಾಯನ್ತಿ ಪಾರಲೋಕಿಕಾ;

ಹಾಯನ್ತಿ ಮಹತಾ ಅತ್ಥಾ, ಯೇ ಇತ್ಥೀನಂ ವಸಙ್ಗತಾ.

೮.

ಏಸಾ ಮಾತಾ ಪಿತಾ ಏಸೋ, ಭಗಿನೀ ಭಾತರೋ ಇಮೇ;

ಗರುತಬ್ಬೇ ನ ಜಾನನ್ತಿ, ಯೇ ಇತ್ಥೀನಂ ವಸಙ್ಗತಾ.

೯.

ಕಾರಣಾಕಾರಣನ್ತೇತಂ, ಕತ್ತಬ್ಬಂವಾ ನ ವಾ ಇದಂ;

ಕಾಮನ್ಧತ್ತಾ ನ ಜಾನನ್ತಿ, ಯೇ ಇತ್ಥೀನಂ ವಸಙ್ಗತಾ.

೧೦.

ಪಾಣಂ ವಾ ಅತಿಪಾತೇನ್ತಿ, ಹೋನ್ತಿ ವಾ ಪಾರದಾರಿಕಾ;

ಭಾಸನ್ತಿ ಅಲಿಕಂ ವಾಚಂ, ಯೇ ಇತ್ಥೀನಂ ವಸಙ್ಗತಾ.

೧೧.

ಸನ್ಧಿಚ್ಛೇದಾದಿಕಂ ಥೇಯ್ಯಂ, ಮಜ್ಜಪಾನಂಚ ಪೇಸುನಂ;

ಕರೋನ್ತಿ ಸಾಹಸಂ ಸಬ್ಬಂ, ಯೇ ಇತ್ಥೀನಂ ವಸಙ್ಗತಾ.

೧೨.

ಅಹೋ ಅಚ್ಛರಿಯಂ ಲೋಕೇ, ಸರನ್ತಾನಂ ಭಯಾ ವಹಂ;

ಭರಿಯಾಯ ವಸಂ ಗನ್ತ್ವಾ, ಸೋದರಿಂಹನ್ತುಮಿಚ್ಛತೀತಿ.

ಅಥ ಸೋ ಸಾಹಸಿಕೋ ಪುರಿಸೋ ಭಗಿನಿ ಏವ ಮಾಹ, ಏಹಿ ಅಮ್ಮ ಅಮ್ಹಾಕಂ ಮಾತಾಪಿತುನ್ನಂ ಇಣಂ ಸಾಧೇಸ್ಸಾಮ, ಅಪ್ಪೇವನಾಮ ನೋ ದಿಸ್ವಾ ಇಣಾಯಿಕಾ ಇಣಂ ದಸ್ಸನ್ತೀತಿ, ತಂ ಸುತ್ವಾ ತಾಯ ಸಮ್ಪಟಿಚ್ಛಿತೇ ¶ ಸುಖಯಾನಕೇ ನಿಸೀದಾಪೇತ್ವಾ ಇಣಾಯಿಕಾನಂ ಗಾಮಂ ಗಚ್ಛನ್ತೋ ವಿಯ ಮಹಾಅಟವಿಂಪತ್ವಾ ಯಾನಂ ಮಗ್ಗಾ ಓಕ್ಕಮ್ಮ ಠಪೇತ್ವಾ ವಿರವನ್ತಿಮೇವ ನಂ ಹತ್ಥೇ ಗಹೇತ್ವಾ ಛಿನ್ದಿಸ್ಸಾಮೀತಿ ಚಿನ್ತೇತ್ವಾ ಕೇಸೇ ಗಹೇತ್ವಾ ಭೂಮಿಯಂ ಪಾತೇಸಿ, ತಸ್ಮಿಂ ಖಣೇ ತಸ್ಸಾ ಕಮ್ಮಜವಾತಾ ಚಲಿಂಸು. ಸಾ ಭಾತುಲಜ್ಜಾಯ ಸಾಮಿ ಕಮ್ಮಜವಾತಾ ಮೇ ಚಲಿಂಸು, ಯಾ ವಾ ಹಂ ವಿಜಾಯಾಮಿ, ತಾವ ಉಪಧಾರೇಹೀತಿ ವದನ್ತೀಪಿ ಅಪನೇತುಂ ಅಸಕ್ಕೋನ್ತೀ ಪುತ್ತಂ ವಿಜಾಯಿ, ಅಥ ಸೋ ತಂ ಸಮೀಪೇ ವಟರುಕ್ಖಮೂಲೇ ಮಾರೇಸ್ಸಾಮೀತಿ ಚಿಕುರೇ ಗಹೇತ್ವಾ ಆಕಡ್ಢಿ, ತಸ್ಮಿಂ ಕಾಲೇ ಸಾ ಸಾಮಿ ತವ ಭಾಗಿನೇಯ್ಯಸ್ಸ ಮುಖಂ ಓಲೋಕೇತ್ವಾ ತಸ್ಸ ಸಿನೇಹೇನಾಪಿ ಮಂ ನ ಮಾರೇಹೀತಿ ವದನ್ತೀ ಯಾಚಿ, ಅಥ ಸೋ ಕಕ್ಖಳೋ ತಸ್ಸಾ ತಂ ಕಾರುಣಿಕವಚನಂ ಅಸುಣನ್ತೋ ವಿಯ ಮಾರೇತುಂ ಉಸ್ಸಹತೇವ, ತತೋ ಸಾ ಕುಮಾರಿಕಾ ಅತ್ತನೋ ಅಸರಣಾ ಚಿನ್ತೇಸಿ, ಮಮ ಸದ್ದೇನಾ ಗನ್ತ್ವಾ ಯೋ ಕೋಚಿ ಮಮ ಭಾತು ಅನಯಂ ಕರೇಯ್ಯ, ತಂ ನ ಪ್ಪತಿರೂಪನ್ತಿ ಭಾತುಸಿನೇಹೇನ ನಿಸ್ಸದ್ದಾ ಅತ್ತನಾ ಗತಿತಸರಣಂ ಆವಜ್ಜಮಾನಾ ನಿಪಜ್ಜಿ, ಅಥಸ್ಸಾ ಭಾ ತ ರಿ ಮೇತ್ತಾನುಭಾವೇನಚ ಅನುಸ್ಸರಿತಸರಣಾನುಭಾವೇನಚ ತಸ್ಮಿಂ ನಿಗ್ರೋಧೇ ಅಧಿವತ್ಥಾ ದೇವತಾ ಏವರೂಪೋ ಮಾತುಗಾಮೋ ಏತ್ಥ ಮಾರಿತಾ ಅಭವಿಸ್ಸಾ, ಅದ್ಧಾಹಂ ದೇವಸಮಾಗಮಂ ಪವಿಸಿತುಂ ನ ಲಭಿಸ್ಸಾಮೀತಿ ಚಿನ್ತೇತ್ವಾ ಏತಿಸ್ಸಾ ಸಾ ಮಿ ಕೋ ವಿಯ ತಂ ತ ಜ್ಜೇ ತ್ವಾ ಪಲಾಪೇತ್ವಾ ತ್ವಂ ಮಾ ಭಾಯೀತಿ ಸಮಸ್ಸಾಸೇತ್ವಾ ಯಾ ನ ಕೇ ಸ ಪು ತ್ತಂ ಕುಮಾರಿಂ ನಿಸೀದಾಪೇತ್ವಾ ತಂ ದಿವಸಮೇವ ಸಾವತ್ಥಿಮಾಗಮ್ಮ ಅನ್ತೋನಗರೇ ಸಾ ಲಾ ಯ ನಂ ನಿಪಜ್ಜಾಪೇತ್ವಾ ಅನ್ತರಧಾಯಿ. ತಥಾಹಿ.

೧೩.

ಸಬ್ಬಸಮ್ಪತ್ತಿದಾತಾರಂ, ಸಬ್ಬಲೋಕೇಕನಾಯಕಂ;

ಮನಸಾಪಿ ಯೋ ವಿಭಾವೇತಿ, ತಂ ವೇ ಪಾಲೇನ್ತಿ ದೇವತಾ.

೧೪.

ಮುಹುತ್ತಮ್ಪಿಚ ಯೋ ಮೇತ್ತಂ, ಭಾವೇತಿ ಯದಿ ಸಾಧುಕಂ;

ತಂ ವೇ ಪಾಲೇನ್ತಿ ದೇವಾಪಿ, ತೋಸಯನ್ತಿ ಉಪಾಯನಾತಿ.

ತತೋ ¶ ತಸ್ಸಾ ಪನ ಸಾಮಿಕೋ ನಗರಾ ನಿಕ್ಖಮ್ಮ ಗಚ್ಛನ್ತೋ ಅತ್ತನೋ ಭರಿಯಂ ದಿಸ್ವಾ ತ್ವಂ ಕದಾ ಆಗತಾ, ಕೇನಾನೀತಾಸೀತಿ ಪುಚ್ಛಿ. ಸಾ ದೇವತಾಯ ಆನೀತಭಾವಂ ಅಜಾನನ್ತೀ ಕಿಂ ತ್ವಂ ಭಣಸಿ, ನನು ತಯಾ ಆನೀತಾಮ್ಹೀತಿ, ಸೋಪಿ ಕಿಂಭೋತಿ ಭಣಸಿ, ತವ ಭಾತುಗಾಮೇ ದಿಟ್ಠಕಾಲತೋ ಪ್ಪತುತಿ ಅಜ್ಜ ಚತ್ತಾರೋ ಮಾಸಾ ಜಾತಾ, ಏತ್ತಕಂ ಕಾಲಂ ತ್ವಂ ನ ದಿಟ್ಠಪುಬ್ಬಾ, ಕಥಂ ತ್ವಂ ಮಯಾ ಸದ್ಧಿಂಆಗತಾತಿ ಪುಚ್ಛಿ. ಸಾ ತಂ ಸುತ್ವಾ ತೇನಹಿ ಮಾಞ್ಞಸ್ಸ ಇಮಂ ರಹಸ್ಸಂ ಕಥೇಹಿ ಸಾಮೀತಿ ವತ್ವಾ ಭಾ ತ ರಾ ಅತ್ತನೋ ಕತಂ ಸಬ್ಬಂ ವಿತ್ಥಾರೇನ ಕಥೇಸಿ. ತಂ ಸುತ್ವಾ ತಸ್ಸ ಸಾಮಿಕೋ ಸಂವಿಗ್ಗೋ ಭಯಪ್ಪತ್ತೋ ಹುತ್ವಾ ತಂ ಅತ್ತನೋ ಗೇಹಂ ಪಾಪೇಸಿ, ತತೋ ಕತಿಪಾಹಂ ತಾಯ ವಿಸ್ಸಮಿತೇ ತೇ ಉಭೋಪಿ ಸತ್ಥಾರಂ ನಿಮನ್ತೇತ್ವಾ ಮಹಾದಾನಂ ದತ್ವಾ ವನ್ದಿತ್ವಾ ಏಕಮನ್ತೇ ನಿಸೀದಿಂಸು, ಅಥ ಸಾ ಭಗವತೋ ಸರಣಸೀಲಾನುಭಾವೇನ ಅತ್ತನೋ ಜೀವಿತಪಟಿಲಾಭಂ ಪಕಾಸೇತ್ವಾ ಅತ್ತನೋ ಪುತ್ತಂ ಭಗವನ್ತಂ ವನ್ದಾಪೇತ್ವಾ ಸರಣೋತಿನಾಮಮಕಂಸು, ಸತ್ಥಾ ತೇ ಸಂ ಅಜ್ಝಾಸಯಂ ಞತ್ವಾ ತದನುರೂಪಂ ಧಮ್ಮಂ ದೇಸೇಸಿ, ದೇಸನಾವಸಾನೇ ಉಭೋಪಿ ಸೋತಾಪನ್ನಾ ಅಹೇಸುಂ, ಅಥಸ್ಸಾ ಪುತ್ತೋ ಸರಣಕುಮಾರೋ ವೀಸತಿಮೇ ವಸ್ಸೇ ಬುದ್ಧಸಾಸನೇ ಪಬ್ಬಜಿತ್ವಾ ವಿಪಸ್ಸನಂ ವಡ್ಢೇತ್ವಾ ಅರಹತ್ತಂ ಪತ್ತೋ ಸರಣತ್ಥೇರೋನಾಮ ಪಞ್ಞಾಯೀತಿ.

೧೫.

ಖಣಮಪಿ ಮನಸೇವಂ ದೇವದೇವಂ ಸರನ್ತಾ,

ಪರಮತರಪತಿಟ್ಠಂ ಪಾಪುಣನ್ತೀತಿ ಮನ್ತ್ವಾ;

ಭವಗತಿ ಗುಣರಾಸಿಂ ಜಾನಮಾನಾ ಜನಾ ಭೋ;

ಭಜಥ ಸರಣಸೀಲಂ ಸಬ್ಬಥಾ ಸಬ್ಬಕಾಲನ್ತಿ.

ಸರಣತ್ಥೇರಸ್ಸ ವತ್ಥುಂ ಛಟ್ಠಮಂ.

೭. ವೇಸ್ಸಾಮಿತ್ತಾಯ ವತ್ಥುಮ್ಹಿ ಅಯಮಾನುಪುಬ್ಬೀಕಥಾ

ಜಮ್ಬುದೀಪೇ ¶ ಕಿರ ಕೋಸಮ್ಬಿನಗರೇ ಕೋಸಮ್ಬಿರಞ್ಞೋ ವೇಸ್ಸಾಮಿತ್ತಾನಾಮ ಅಗ್ಗಮಹೇಸೀ ಅಹೋಸಿ. ತದಾ ಭಗವಾ ಕೋಸಮ್ಬಿಯಂ ಪಟಿವಸತಿ ಮಹತಾ ಭಿಕ್ಖುಸಙ್ಘೇನ ಸದ್ಧಿಂ ಚಾರಿಕಂ ಚರಮಾನೋ. ತಸ್ಮಿಂ ಸಮಯೇ ಸಾ ರಞ್ಞಾ ಸದ್ಧಿಂ ವಿಹಾರಂ ಗನ್ತ್ವಾ ಅನೋಪಮಾಯ ಬುದ್ಧಲೀಳಾಯ ಮಧುರೇನ ಸರೇನ ದೇಸೇನ್ತಸ್ಸ ಭಗವತೋ ಧಮ್ಮಂ ಸುತ್ವಾ ಪಸನ್ನಾ ಸರಣೇಸು ಪತಿಟ್ಠಾಯ ಬುದ್ಧಮಾಮಿಕಾ ಹುತ್ವಾ ವಿಹರತಿ. ಅಥಾ ಪರಭಾಗೇ ತಸ್ಸ ರಞ್ಞೋ ರಜ್ಜತ್ಥಾಯ ಪಚ್ಚನ್ತರಾಜಾ ಯುದ್ಧಸಜ್ಜೋ ರಜ್ಜಂ ವಾ ದೇತು, ಯುದ್ಧಂವಾತಿ ಪಣ್ಣಂ ಪಹಿಣಿ. ತಂ ಸುತ್ವಾ ರಾಜಾ ಮಹತಿಯಾ ಸೇನಾಯ ಪರಿವುತೋ ಯುದ್ಧಭೂಮಿಂ ಗಚ್ಛನ್ತೋ ಮಹೇಸಿಯಾ ಸದ್ಧಿಂ ಗನ್ತ್ವಾ ಖನ್ಧಾವಾರಂ ನಿವಾಸೇತ್ವಾ ತಸ್ಸಾ ಏವಮಾಹ. ಭದ್ದೇ ಸಙ್ಗಾಮಸೀಸೇ ಜಯಪರಾಜಯೋ ನಾಮ ನ ಸಕ್ಕಾ ವಿಞ್ಞಾತುಂ. ಸಚೇ ಮೇ ಪರಾಜಯೋ ಅಭವಿಸ್ಸ, ಪುರೇತರಮೇವ ರತ್ತಪತಾಕಂ ಉಸ್ಸಾಪೇಸ್ಸಾಮಿ, ತೇನ ಅಭಿಞ್ಞಾಣೇನ ತ್ವಂ ಕೋಸಮ್ಬಿಮೇವ ಗಚ್ಛಾಹೀತಿ ಅನುಸಾಸಿತ್ವಾ ಸಙ್ಗಾಮ ಮಣ್ಡಲಂ ಗನ್ತ್ವಾ ಮಹಾರಣಂ ಕರೋನ್ತೋ ಅತ್ತನೋ ಪರಾಜಯಭಾವಂ ಞತ್ವಾ ಮಾತುಗಾಮಂ ಸರಿತ್ವಾ ರತ್ತದ್ಧಜಂ ಉಸ್ಸಾಪೇತ್ವಾ ಯುಜ್ಝನ್ತೋ ರಣೇ ಪತಿ. ಅಥ ಸಾ ರತ್ತಪತಾಕಂ ದಿಸ್ವಾ ಪರಾಜಿತೋ ನೂನ ಮೇ ಸಾಮಿಕೋತಿ ಭಯೇನ ಪಲಾಯಿತುಮಾರಭಿ. ಅಥ ತಂ ಚೋರರಞ್ಞೋ ಮನುಸ್ಸಾ ದಿಸ್ವಾ ನೂನಾಯಂ ರಞ್ಞೋ ಅಗ್ಗಮಹೇಸೀತಿ ಞತ್ವಾ ಅತ್ತನೋ ರಾಜಾನಂ ದಸ್ಸೇಸುಂ, ರಾಜಾ ತಂ ದಿಸ್ವಾ ಪಟಿಬದ್ಧಚಿತ್ತೋ ಮಮೇತಂ ಅಭಿಸೇಕಂ ಕರೋಥಾತಿ ಅಮಚ್ಚೇ ಆಣಾಪೇಸಿ. ಅಮಚ್ಚಾ ತಂ ಅಭಿಸೇಕತ್ಥಾಯ ಯಾಚಿಂಸು, ಸಾ ನ ಮೇ ಭಣೇ ಅಭಿಸೇಕೇನತ್ಥೋತಿ ನ ಇಚ್ಛಿ. ಅಮಚ್ಚಾ ತಮತ್ಥಂ ರಞ್ಞೋ ಆರೋಚೇಸುಂ. ರಾಜಾ ನಂ ಪಕ್ಕೋಸಾಪೇತ್ವಾ ಕಸ್ಮಾ ನ ಇಚ್ಛಸೀತಿ ಪುಚ್ಛಿ. ಸಾ ಏವಮಾಹ.

೧.

ಸುಣೋಹಿ ಸಾಧುಕಂ ದೇವ, ಭಾಸಮಾನಾಯ ಮೇ ವಚೋ;

ಭತ್ತಾ ಮಯ್ಹಂ ಮತೋ ಅಜ್ಜ, ಸಬ್ಬಸಮ್ಪತ್ತಿದಾಯಕೋ.

೨.

ಕತ್ವಾನ ¶ ಸೋಭಿಸೇಕಂ ಮಂ, ಅತ್ತನೋ ಹದಯಂ ವಿಯ;

ಪಾಲೇತಿ ತಂ ಸರನ್ತಸ್ಸಾ, ಸೋಕಗ್ಗಿ ದಹತೇ ಮನಂ.

೩.

ಮಹಾರಾಜ ಸಚಞ್ಞಸ್ಸ, ಅಸ್ಸ ಮಗ್ಗಮಹೇಸಿಕಾ;

ತಮ್ಹಾ ದುಕ್ಖಾ ನ ಮುಚ್ಚಾಮಿ, ತೇನಾಹಂ ತಂ ನ ಪತ್ಥಯೇ.

೪.

ಸೋಕಗ್ಗಿನಾ ಪದಿತ್ತಾಹಂ, ಸೋಕೇ ಸೋಕಂ ಕಥಂ ಖಿಪೇ;

ಜಲನ್ತಗ್ಗಿಮ್ಹೀ ಕೋ ನಾಮ, ಪಲಾಲಂ ಪಕ್ಖಿಪೇ ಬುಧೋ.

೫.

ಪಿಯವಿಪ್ಪಯೋಗದುಕ್ಖಂ, ತಂ ಚಿನ್ತಯನ್ತೀ ಪುನಪ್ಪುನಂ;

ತಮ್ಹಾ ದುಕ್ಖಾ ನ ಮುಚ್ಚಾಮಿ, ತಸ್ಮಾಹಂ ತಂ ನ ಪತ್ಥಯೇತಿ.

ತಂ ಸುತ್ವಾ ರಾಜಾ ಕೋಧೇನಾಭಿಭೂತೋ ಸಚೇ ನಾಭಿಸಿಞ್ಚಿಸ್ಸಸಿ, ಅಗ್ಗಿಮ್ಹಿ ತಂ ಪಕ್ಖಿಪಿಸ್ಸಾಮೀತಿ ವತ್ವಾ ಮಹನ್ತಂ ದಾರುಚಿತಕಂ ಕಾರಾಪೇತ್ವಾ ಅಗ್ಗಿಂ ದತ್ವಾ ಏಕಪಜ್ಜೋತೇ ಜಾತೇ ಏತ್ತ ಪವಿಸಾತಿ ಆಹ. ಅಥ ಸಾ ಯಾಚನ್ತೀ ರಾಜಾನಂ ಆಹ.

೬.

ಪಾಪೋ ನಿಪ್ಪಾಪಿನಂ ರಾಜ, ಪಾತನಂ ಖಲು ಪಾವಕೇ;

ಹೋತಿ ಪಾಪಫಲಂ ತಸ್ಸ, ಪಚ್ಚತ್ತೇಚ ಪರತ್ಥಚ.

೭.

ಪುರಾತನೇಹಿ ಭೂಪಾಲ, ಸಮಣಬ್ರಹ್ಮಣೇಸುಚ;

ಮಾತಾಪಿತುಸು ಬಾಲೇಸು, ರೋಗೇನಾ ತುರಇತ್ಥಿಸು;

ನಪ್ಪಸತ್ಥೋ ವಧೋ ದೇವ, ತಸ್ಮಾಹಂ ನ ವಧಾರಹಾತಿ.

ತಂ ಸುತ್ವಾಪಿ ರಾಜಾ ಅಸದ್ದಹನ್ತೋ ಮನುಸ್ಸೇ ಆಣಾಪೇಸಿ. ಏತಾಯ ಹತ್ಥಪಾದೇ ಗಹೇತ್ವಾ ಅಗ್ಗಿಮ್ಹಿ ಪಕ್ಖಿಪಥಾತಿ ತೇ ತಥಾ ಕರಿಂಸು, ಅಥ ಸಾ ಅಗ್ಗಿಮ್ಹಿ ಪಕ್ಖಿಪಮಾನಾ ನತ್ಥೇತ್ಥ ಮೇ ಕೋಚಿ ಪಟಿಸರಣೋತಿ ಸರಣಮೇವ ಸರಣಂ ಕರೋಮೀತಿ ಚಿನ್ತೇತ್ವಾ ‘‘ಬುದ್ಧಂ ಸರಣಂ ಗಚ್ಛಾಮಿ, ಧಮ್ಮಂ ಸರಣಂ ಗಚ್ಛಾಮಿ, ಸಙ್ಘಂ ಸರಣಂ ಗಚ್ಛಾಮೀತಿ’’ ವದನ್ತೀ ಮನಸಾಚ ಅನುಸ್ಸರನ್ತೀ ಅಗ್ಗಿಮ್ಹಿ ಪತಿ, ತಥಾವಿಧೋಪಿ ಅಗ್ಗಿ ತಸ್ಸಾ ಸರೀರೇ ಲೋಮಕೂಪಮತ್ತಮ್ಪಿ ಉಣ್ಹಾಕಾರಂ ಕಾತುಂ ನಾಸಕ್ಖಿ. ಪದುಮಗಬ್ಭಂ ಪವಿಟ್ಠಾ ವಿಯ ಸೀತಿಭೂತಸರೀರಾ ಅಹೋಸಿ. ರಾಜಾ ತಂ ಅಚ್ಛರಿಯಂ ¶ ದಿಸ್ವಾ ಸಂವಿಗ್ಗೋ ಲೋಮಹಟ್ಠಜಾತೋ ವೇಗೇನ ತಂ ಉಪಸಙ್ಕಮಿತ್ವಾ ಉಭೋಹಿ ಹತ್ಥೇಹಿ ಪಗ್ಗಯ್ಹ ಉರೇ ನಿಪಜ್ಜಾಪೇತ್ವಾ ರಾಜಾಸನೇ ನಿಸೀದಾಪೇತ್ವಾ ಅಞ್ಜಲಿಂ ಗಗ್ಗಯ್ಹ ಠಿತೋ ಕಸ್ಮಾ ತೇ ತಂ ಅಗ್ಗಿ ಸರೀರಂ ಮಾ ಪರಿದಹೀತಿ ಪುಚ್ಛಿ. ಸಾ ತಂ ಕಾರಣಂ ಕಥೇನ್ತೀ ಏವ ಮಾಹ.

೮.

ಮಾತಾ ಪಿತಾಚ ಞಾತೀಚ, ಪರಿವಾರಾಚ ಸೋಹದಾ;

ಮನ್ತೋ ಸಧಾದಯೋಚಾಪಿ, ಮಹೇಸಕ್ಖಾಚ ದೇವತಾ.

೯.

ಏತೇಚ ಞ್ಞೇಚ ಭೂಪಾಲ, ಸತ್ತಾನಂ ಭಯ ಮಾಗತೇ;

ರಕ್ಖಿತುಂ ನೇವ ಸಕ್ಕೋನ್ತಿ, ಹಿತ್ವಾನ ಸರಣತ್ತಯಂ.

೧೦.

ಅಗಾಹಂ ಬುದ್ಧಂ ಸರಣಂ, ಬುದ್ಧೋ ಮೇ ಸರಣಂ ಇತಿ;

ತೇನ ತೇಜೇನ ಮಂ ರಾಜ, ಜಲನ್ತೋ ಅಗ್ಗಿ ನೋ ದಹಿ.

೧೧.

ಅಗಾಹಂ ಧಮ್ಮಂ ಸರಣಂ, ಧಮ್ಮೋ ಮೇ ಸರಣಂ ಇತಿ;

ತೇನ ತೇಜೇನ ಮಂ ರಾಜ, ಜಲನ್ತೋ ಅಗ್ಗಿ ನೋ ದಹಿ.

೧೨.

ಅಗಾಹಂ ಸಙ್ಘಂ ಸರಣಂ, ಸಙ್ಘೋ ಮೇ ಸರಣಂ ಇತಿ;

ತೇನ ತೇಜೇನ ಮಂ ರಾಜ, ಜಲನ್ತೋ ಅಗ್ಗಿ ನೋ ದಹಿ.

೧೩.

ಏವಂ ಮಹಾನುಭಾವನ್ತಂ, ಪಚ್ಚಕ್ಖಂ ಏಹಿಪಸ್ಸಿಕಂ;

ನಾನೋ ಪದ್ದವ ವಿದ್ಧಂಸಿಂ, ನಾನಾಸಮ್ಪತ್ತಿದಾಯಕಂ.

೧೪.

ಸರಣತ್ತಯಞ್ಹಿ ಯೋ ಸತ್ತೋ, ನ ಸಮಾದಾಯ ಗಣ್ಹತಿ;

ಇಧವಾ ಪರತ್ಥವಾ ಲೋಕೇ, ಸೋ ಸುಖಂ ನಾನುಭೋಸ್ಸತಿ.

೧೫.

ಸರಣತ್ತಯಞ್ಹಿ ಯೋ ಸತ್ತೋ, ಸುಸಮಾದಾಯ ಗಣ್ಹತಿ;

ಇಧವಾಪರತ್ಥವಾ ಲೋಕೇ, ಸೋ ಸುಖಾ ನ ವಿಹಾಯತಿ.

೧೬.

ತಸ್ಮಾ ತುವಮ್ಪಿ ಭೂಪಾಲ, ಗಣ್ಹಾಹಿ ಸರಣತ್ತಯಂ;

ತಂ ತೇ ಭವತಿ ಸಬ್ಬತ್ಥ, ತಾಣಂ ಲೇಣಂ ಪರಾಯಣನ್ತಿ.

ತಂ ಸುತ್ವಾ ರಾಜಾ ಅತಿವಿಯ ಪಸನ್ನಮಾನಸೋ ತಂ ಖಮಾಪೇತ್ವಾ ಮಹನ್ತಂ ಸಕ್ಕಾರಸಮ್ಮಾನಂ ಕತ್ವಾ ಅಜ್ಜಪ್ಪಟ್ಠಾಯ ತ್ವಂ ಮಮ ಮಾತಾತಿ ತಂ ಮಾತುಟ್ಠಾನೇ ಠಪೇತ್ವಾ ಸರಣ ಮಗಮಾಸಿ. ತಸ್ಮಿಂ ಸನ್ನಿಪತಿತ್ವಾ ಠಿತಮಹಾಜನಾ ತಂ ಪಾಟಿಹಾರಿಯಂ ದಿಸ್ವಾ ಸರಣೇಸುಚ ಸೀಲೇಸುಚ ಪತಿಟ್ಠಾಯ ದಾನಾದೀನಿ ಪುಞ್ಞಕಮ್ಮಾನಿ ಕತ್ವಾ ಯಥಾಕಮ್ಮಂ ಗತಾತಿ.

೧೭.

ಇತಿ ¶ ಸರಣವರಂ ಸಾ ಕೇವಲಂ ಉಗ್ಗಹೇತ್ವಾ,

ಜಲಿತದಹನಮಜ್ಝೇ ಸೀತಿಭಾವಂ ಅಲತ್ಥ;

ಪರಮಸರಣಸೀಲಂ ಪಾಲಯನ್ತಾ ಕಥಂ ವೋ,

ನ ಲಭಥ ಭವಭೋಗಂ ನಿಬ್ಬುತಿಞ್ಚಾಪಿ ಅನ್ತೇತಿ.

ವೇಸ್ಸಾಮಿತ್ತಾಪ ವತ್ಥುಂ ಸತ್ತಮಂ.

೮. ಮಹಾಮನ್ಧಾತುವತ್ಥುಮ್ಹಿ ಅಯಮಾನುಪುಬ್ಬೀಕಥಾ

ಇತೋ ಕಿರ ಏಕನವುತಿಕಪ್ಪಮತ್ಥಕೇ ವಿಪಸ್ಸೀನಾಮ ಸಮ್ಮಾಸಮ್ಬುದ್ಧೋ ಲೋಕೇ ಉಪ್ಪಜ್ಜಿತ್ವಾ ಪವತ್ತವರಧಮ್ಮಚಕ್ಕೋ ಸದೇವಕೇಹಿ ಲೋಕೇಹಿ ಪೂಜಿಯಮಾನೋ ಬನ್ಧುಮತೀನಗರೇ ಪಟಿವಸತಿ. ತದಾ ಸೋ ಮನ್ಧಾತಾ ತಸ್ಮಿಂ ನಗರೇ ತುನ್ನಕಾರೋ ಹುತ್ವಾ ನಿಬ್ಬತ್ತಿ. ತುನ್ನಕಾರಕಮ್ಮೇನ ಜೀವಿಕಂ ಕಪ್ಪೇನ್ತೋ ವಿಹರತಿ. ತದಾ ಸಕಲನಗರವಾಸಿನೋ ಬುದ್ಧಪಮುಖಂ ಭಿಕ್ಖುಸಙ್ಘಂ ನಿಮನ್ತೇತ್ವಾ ಮಹಾದಾನ ಮದಂಸು. ಅಥ ಸೋ ಏವಂ ಚಿನ್ತೇಸಿ, ಸಬ್ಬೇಪಿಮೇ ನಗರವಾಸಿನೋ ದಾನಂ ದದನ್ತಿ. ಅಹಮೇಕೋವ ಸೇಸೋ ದುಗ್ಗತತ್ತಾ, ಯಜ್ಜಾಹಮಜ್ಜ ಬೀಜಂ ನ ರೋಪೇಮಿ, ಇಮಮ್ಹಾ ದುಕ್ಖಾ ನ ಪರಿಮುಚ್ಚಿಸ್ಸಾಮೀತಿ. ಸೋ ವೇಗೇನ ತುನ್ನಕಾರಕಮ್ಮಂ ಪರಿಯೇಸಿತ್ವಾ ಕಿಞ್ಚಿಮೂಲಂ ಲಭಿತ್ವಾ ತೇನ ಏಕಸ್ಸಾಪಿ ದಾನಂ ದಾತುಂ ಓಕಾಸ ಮಲದ್ಧಾ ಆಪಣಂ ಗನ್ತ್ವಾ ರಾಜಮಾಸಕೇ ಗಹೇತ್ವಾ ಚಙ್ಕೋಟಕಂ ಪೂರೇತ್ವಾ ಆದಾಯ ಬುದ್ಧಪಮುಖಸ್ಸ ಭಿಕ್ಖುಸಙ್ಘಸ್ಸ ಭತ್ತಗ್ಗಂ ಗನ್ತ್ವಾ ಠಿತೋ ಏವಂ ಚಿನ್ತೇಸಿ, ನತ್ಥಿ ದಾನಿ ಓಕಾಸಂ ಏಕಸ್ಸಾಪಿ ಭಿಕ್ಖುನೋ ಪತ್ತೇ ಓಕಿರಿತುಂ, ಅದ್ಧಾಹಂ ಇಮೇ ಆಕಾಸೇ ವಿಕಿರಿಸ್ಸಾಮೀತಿ ಅಪ್ಪೇವನಾಮ ಪತಮಾನಾನಂ ಏಕಸ್ಸಾಪಿ ಭಿಕ್ಖುನೋ ಪತ್ತೇ ಏಕಮ್ಪಿ ಪತೇಯ್ಯ, ತಂ ಮೇ ಭವಿಸ್ಸತಿ ದೀಘರತ್ತಂ ಹಿಭಾಯ ಸುಖಾಯಾತಿ ಪಸನ್ನಮಾನಸೋ ಉದ್ಧಂ ಖಿಪಿ, ತ ತೋ ಪತಮಾನಾ ತೇ ಪರಿವಾರಿಕದೇವತಾನಞ್ಚ ಭಗವತೋ ಆನುಭಾವೇನಚ ಬಹಿ ಅಪತಿತ್ವಾ ಭಗವನ್ತಮಾದಿಂ ಕತ್ವಾ ಸಬ್ಬೇಸಂ ಭಿಕ್ಖೂನಂ ¶ ಪತ್ತೇಯೇವ ಪತಿಂಸು. ಅಥ ಸೋ ತಂ ಅಚ್ಛರಿಯಂ ದಿಸ್ವಾ ಪಸನ್ನಮಾನಸೋ ಸಿರಸಿ ಅಞ್ಜಲಿಂ ಪಗ್ಗಯ್ಹ ಠಿತೋ ಏವಂ ಪತ್ಥನಮಕಾಸಿ.

೧.

ಇಮಿನಾ ಮೇ ಅಧಿಕಾರೇನ, ಪಸಾದೇನ ಯತಿಸ್ಸರೇ;

ಕಾಮಭೋಗೀನಹಂ ಅಗ್ಗೋ, ಭವೇಯ್ಯಂ ಜಾತಿಜಾತಿಯಂ.

೨.

ಪಹರಿತ್ವಾ ಯದಾ ಪಾಣಿಂ, ಓಲೋಕೇಮಿ ನಭೋತಲಂ;

ಸತ್ತರತನಸಮ್ಪನ್ನಂ, ವಸ್ಸಂ ವಸ್ಸತು ಸಬ್ಬದಾತಿ.

ಸೋ ತತೋ ಪಟ್ಠಾಯ ದೇವಮನುಸ್ಸೇಸು ಸಂಸರನ್ತೋ ಮಹನ್ತಂ ದಿಬ್ಬಸಮ್ಪತ್ತಿಂ ಅನುಭವಿತ್ವಾ ಇಮಸ್ಮಿಂ ಭದ್ದಕಪ್ಪೇ ಆದಿಮ್ಹಿ ಮಹಾಸಮ್ಮತೋ ನಾಮ ರಾಜಾ ಅಹೋಸಿ. ತಸ್ಸ ಪುತ್ತೋ ರೋಜೋ ನಾಮ. ತಸ್ಸ ಪುತ್ತೋ ವರರೋಜೋ ನಾಮ, ತಸ್ಸ ಪುತ್ತೋ ಕಲ್ಯಾಣೋ ನಾಮ, ತಸ್ಸ ಪುತ್ತೋ ವರಕಲ್ಯಾಣೋ ನಾಮ. ವರಕಲ್ಯಾಣಸ್ಸ ಪುತ್ತೋ ಉಪೋಸಥೋ ನಾಮ. ಉಪೋಸಥಸ್ಸ ಪುತ್ತೋ ಮನ್ಧಾತಾ ನಾಮ ಹುತ್ವಾ ನಿಬ್ಬತ್ತಿ. ಸೋ ಸತ್ತಹಿ ರತನೇಹಿ ಚತೂಹಿ ಚ ಇದ್ಧೀಹಿ ಸಮನ್ನಾಗತೋ ಚಕ್ಕವತ್ತಿರಜ್ಜಂ ಕಾರೇಸಿ, ತಸ್ಸ ವಾಮಹತ್ಥಂ ಸಮ್ಮಿಞ್ಜಿತ್ವಾ ದಕ್ಖಿಣಹತ್ಥೇನ ಅಪ್ಪೋಟ್ಠಿತೇ ಆಕಾಸತೋ ದಿಬ್ಬಮೇಘಾ ವಿಯ ಜಣ್ಣುಪ್ಪಮಾಣಂ ಸತ್ತರತನವಸ್ಸಂ ವಸ್ಸತಿ. ಏವರೂಪೋ ಅಚ್ಛರಿಯೋ ಅಹೋಸಿ. ಸೋ ಚತುರಾಸೀತಿವಸ್ಸಸಹಸ್ಸಾನಿ ಕುಮಾರಕೀಳಂ ಕೀಳಿ. ಚತುರಾಸೀತಿವಸ್ಸಸಹಸ್ಸಾನಿ ಓಪರಜ್ಜಂ ಕಾರೇಸಿ. ಚತುರಾಸೀತಿವಸ್ಸಸಹಸ್ಸಾನಿ ಚಕ್ಕವತ್ತಿರಜ್ಜಂ ಕಾರೇಸಿ, ಆಯು ಪನಸ್ಸ ಅಸಙ್ಖ್ಯೇಯ್ಯಂ ಅಹೋಸಿ. ಸೋ ಏಕದಿವಸಂ ಕಾಮತಣ್ಹಂ ಪೂರೇತುಂ ಅಸಕ್ಕೋನ್ತೋ ಉಕ್ಕಣ್ಠಿತಾಕಾರಂ ದಸ್ಸೇಸಿ, ಅಮಚ್ಚಾ ದೇವ ಕಿನ್ನಖೋ ಉಕ್ಕಣ್ಠಾ ಸೀತಿ ಪುಚ್ಛಿಂಸು. ಸೋ ಭಣೇ ಮಯ್ಹಂ ಪುಞ್ಞಕಮ್ಮೇ ಓಲೋಕಿಯಮಾನೇ ಇಮಂ ರಜ್ಜಂ ನಪ್ಪಹೋತಿ, ಕತರನ್ನು ಖೋ ಠಾನಂ ರಮಣೀಯನ್ತಿ. ದೇವಲೋಕೋ ಮಹಾರಾಜಾತಿ. ಸೋ ಚಕ್ಕರತನಂ ಅಬ್ಭುಕ್ಕಿರಿತ್ವಾ ಪರಿಸಾಯ ಸದ್ಧಿಂ ಚಾತುಮಹಾರಾಜಿಕದೇವಲೋಕಂ ಅಗಮಾಸಿ, ಅಥಸ್ಸ ಚತ್ತಾರೋ ಮಹಾರಾಜಾನೋ ದಿಬ್ಬಮಾಲಗನ್ಧ- ಹತ್ಥಾ ¶ ದೇವಗಣಪರಿವುತಾ ಪಚ್ಚುಗ್ಗಮನಂ ಕತ್ವಾ ತಂ ಆದಾಯ ಚಾತುಮಹಾರಾಜಿಕದೇವಲೋಕಂ ಗನ್ತ್ವಾ ರಜ್ಜಂ ಅದಂಸು, ತಸ್ಸ ಪರಿಸಾಯ ಪರಿವುತಸ್ಸ ತಸ್ಮಿಂ ರಜ್ಜಂ ಕರೋನ್ತಸ್ಸ ದೀಘೋ ಅದ್ಧಾ ವೀತಿವತ್ತೋ. ಸೋ ತತ್ಥಪಿ ತಣ್ಹಂ ಪೂರೇತು ಮಸಕ್ಕೋನ್ತೋ ಉಕ್ಕಣ್ಠಿತಾ ಕಾರಂ ದಸ್ಸೇಸಿ. ತತೋ ಚತ್ತಾರೋ ಮಹಾರಾಜಾನೋ ಕಿನ್ನುಖೋ ಮಹಾರಾಜ ಉಕ್ಕಣ್ಠಿತೋತಿ ಪುಚ್ಛಿಂಸು. ಇಮಮ್ಹಾ ದೇವಲೋಕಾ ಕತರನ್ನು ಖೋ ಠಾನಂ ರಮಣೀಯನ್ತಿ, ದೇವ ಪರೇಸಂ ಉಪಟ್ಠಾಕಮನುಸ್ಸಸದಿಸಾ ಮಯಂ. ತಾವತಿಂಸದೇವಲೋಕೋ ಇತೋ ಸತಗುಣೇನ ರಮಣೀಯೋತಿ. ಮನ್ಧಾತಾ ಚಕ್ಕರತನಂ ಅಬ್ಭುಕ್ಕಿರಿತ್ವಾ ಅತ್ತನೋ ಪರಿಸಪರಿವುತೋ ತಾವತಿಂಸಾಭಿಮುಖೋ ಪಾಯಾಸಿ, ಅಥಸ್ಸ ಸಕ್ಕೋ ದೇವರಾಜಾ ದಿಬ್ಬಮಾಲಗನ್ಧಹತ್ಥೋ ದೇವಗಣಪರಿವುತೋ ಪಚ್ಚುಗ್ಗಮನಂ ಕತ್ವಾ ತಂ ಹತ್ಥೇ ಗಹೇತ್ವಾ ಇತೋ ಏಹಿ ಮಹಾರಾಜಾತಿ ಆಹ. ತತೋ ರಞ್ಞೋ ದೇವಗಣಪರಿವುತಸ್ಸ ಗಮನಕಾಲೇ ಪರಿಣಾಯಕರತನಂ ಚಕ್ಕರತನಂ ಆದಾಯ ಸದ್ಧಿಂಪರಿಸಾಯ ಮನುಸ್ಸಪಥಂ ಓತರಿತ್ವಾ ಅತ್ತನೋ ಘರಂ ಪಾವಿಸಿ. ಸಕ್ಕೋ ಮನ್ಧಾತುಂ ಸಕ್ಕಭವನಂ ನೇತ್ವಾ ದೇವತಾ ದ್ವೇ ಕೋಟ್ಠಾಸೇ ಕತ್ವಾ ಅತ್ತನೋ ರಜ್ಜಂ ಮಜ್ಝೇ ಭಿನ್ದಿತ್ವಾ ಅದಾಸಿ. ತತೋ ಪಟ್ಠಾಯ ದ್ವೇಪಿ ರಾಜನೋ ರಜ್ಜಂ ಕಾರೇಸುಂ. ಏವಂ ಕಾಲೇ ಗಚ್ಛನ್ತೇ ಸಕ್ಕೋ ಸಟ್ಠಿಸತಸಹಸ್ಸಾಧಿಕಾನಿ ತಿಸ್ಸೋಚ ವಸ್ಸಕೋಟಿಯೋ ಆಯುಂ ಖೇಪೇತ್ವಾ ಚವಿ. ಅಞ್ಞೋ ಸಕ್ಕೋ ನಿಬ್ಬತ್ತಿ, ಸೋಪಿ ತಥೇವ ದೇವರಜ್ಜಂ ಕಾರೇತ್ವಾ ಆಯುಕ್ಖಯೇನ ಚವಿ, ಏತೇನು ಪಾಯೇನ ಛತ್ತಿಂಸ ಸಕ್ಕಾ ಚವಿಂಸು, ಮನ್ಧಾತಾ ಪನ ಮನುಸ್ಸಪರಿಹಾರೇನ ದೇವರಜ್ಜಂ ಕಾರೇಸಿಯೇವ, ತಸ್ಸೇವಂ ಕಾಲೇ ಗಚ್ಛನ್ತೇ ಭೀಯ್ಯೋಸೋ ಮತ್ತಾಯ ಕಾಮತಣ್ಹಾ ಉಪ್ಪಜ್ಜಿ, ಸೋ ಕಿಮ್ಮೇ ಉಪಡ್ಢರಜ್ಜೇನ. ಸಕ್ಕಂ ಮಾರೇತ್ವಾ ಏಕರಜ್ಜಂ ಕರಿಸ್ಸಾಮೀತಿ ಚಿನ್ತೇಸಿ. ಸಕ್ಕಂ ಪನ ಮಾರೇತುಂ ನ ಸಕ್ಕಾ, ಕಾಮತಣ್ಹಾ ಪನೇಸಾ ವಿಪತ್ತಿಮೂಲಾ. ತಥಾಹಿ.

೩.

ವರಮತ್ರ ಸುಖನ್ತ್ಯತ್ರ, ಅತ್ರಿಚ್ಛಾವಿಹತೋ ನರೋ;

ಇಧವಾ ಪರತ್ಥವಾ ಕಿಞ್ಚಿ, ನ ಸಾತಂ ವಿನ್ದತೇ ಸದಾ.

೪.

ತಣ್ಹಾಯ ¶ ಜಾಯತೇ ಸೋಕೋ,

ತಣ್ಹಾಯ ಜಾಯತೇ ಭಯಂ;

ತಣ್ಹಾಯ ವಿಪ್ಪಮುತ್ತಸ್ಸ,

ನತ್ಥಿ ಸೋಕೋ ಕುತೋ ಭಯಂ.

೫.

ತಣ್ಹಾದಾಸೋ ನರೋ ಏತ್ಥ, ರಾಜಚೋರಾದಿಸಮ್ಭವಂ;

ಹತ್ತಚ್ಛೇದಾದಿಕಂ ದುಕ್ಖಂ, ಪಾಪುಣಾತಿ ವಿಹಞ್ಞತಿ.

೬.

ಯೇನ ಲೋಭೇನ ಜಾತೇನ, ಸದಾ ಜೀಯನ್ತಿ ಪಾಣಿನೋ;

ಖೇತ್ತಂ ವತ್ಥುಂ ಹಿರಞ್ಞಂಚ, ಗವಾಸ್ಸಂ ದಾಸಪೋರಿಸಂ;

ಸಬ್ಬತ್ಥಾಮೇನ ಸೋ ಲೋಭೋ, ಪಹಾತಬ್ಬೋವ ವಿಞ್ಞುನಾತಿ.

ತತೋ ಅತ್ರಿಚ್ಛಾವಿಹತಸ್ಸ ತಸ್ಸ ಆಯುಸಙ್ಖಾರೋ ಪರಿಹಾಯಿ, ಜರಾ ಸರೀರಂ ಪಹರಿ, ಮನುಸ್ಸಸರೀರಞ್ಹಿ ನಾಮ ನ ದೇವಲೋಕೇಭಿಜ್ಜತಿ, ತಥ ಸೋ ದೇವಲೋಕಾ ಭಸ್ಸಿತ್ವಾ ಬನ್ಧುಮತೀನಗರುಯ್ಯಾನಂ ಪಾವಿಸಿ, ಉಯ್ಯಾನಪಾಲೋ ತಸ್ಸ ಆಗತಭಾವಂ ರಾಜಕುಲಂ ನಿವೇದೇಸಿ. ರಾಜಾ ರಾಜಕುಲಾ ಆಗನ್ತ್ವಾ ಉಯ್ಯಾನೇಯೇವ ಆಸನಂ ಪಞ್ಞಾಪೇಸಿ. ತತೋ ಮನ್ಧಾತಾ ಉಯ್ಯಾನೇ ಪಞ್ಞತ್ತವರಾಸನೇ ನಿಪನ್ನೋ ಅನುಟ್ಠಾನಸೇಯ್ಯಂ ಕಪ್ಪೇಸಿ. ತತೋ ಅಮಚ್ಚಾ ದೇವ ತುಮ್ಹಾಕಂ ಪರತೋ ಕಿನ್ನು ಕಥೇಸಾಮಾತಿ ಪುಚ್ಛಿಂಸು, ಮಮ ಪರತೋ ತುಮ್ಹೇ ಇಮಂ ಸಾಸನಂ ಮಹಾಜನಸ್ಸ ಕಥೇಯ್ಯಾಥ, ಮನ್ಧಾತುಮಹಾರಾಜಾ ದ್ವಿಸಹಸ್ಸದೀಪಪರಿವಾರೇಸು ಚತೂಸು ಮಹಾದೀಪೇಸು ಚಕ್ಕವತ್ತಿರಜ್ಜಂ ಕಾರೇತ್ವಾ ಚಾತುಮಹಾರಾಜಿಕೇಸು ರಜ್ಜಂ ಕಾರೇತ್ವಾ ಛತ್ತಿಂಸಸಕ್ಕಾನಂ ಆಯುಪರಿಮಾಣೇನ ದೇವಲೋಕೇ ರಜ್ಜಂ ಕಾರೇತ್ವಾ ಕಾಲಮಕಾಸೀತಿ. ಸೋ ಏವಂ ವತ್ವಾ ಕಾಲಂಕತ್ವಾ ಯಥಾಕಮ್ಮಂ ಗತೋತಿ ಇಮಮತ್ಥಂ ಪಕಾಸೇತುಂ ಭಗವಾ ಚತುಮಹಾಪರಿಸಮಜ್ಝೇ ಇಮಾ ಗಾಥಾಯೋ ಆಹ.

೭.

ಯಾವತಾ ಚನ್ದಿಮಸುರಿಯಾ, ಪರಿಹರನ್ತಿ ದಿಸಾ ಭನ್ತಿ ವಿರೋಚನಾ;

ಸಬ್ಬೇವ ದಾಸಾ ಮನ್ಧಾತಾ, ಯೇ ಪಾಣಾ ಪಥವಿನಿಸ್ಸಿತಾ.

೮.

ನ ¶ ಕಹಾಪಣವಸ್ಸೇನ, ತಿತ್ತಿ ಕಾಮೇಸು ವಿಜ್ಜತಿ;

ಅಪ್ಪಸ್ಸದಾ ದುಖಾ ಕಾಮಾ, ಇತಿ ವಿಞ್ಞಾಯ ಪಣ್ಡಿತೋ.

೯.

ಅಪಿ ದಿಬ್ಬೇಸು ಕಾಮೇಸು, ರತಿಂಸೋ ನಾಧಿಗಚ್ಛತಿ;

ತಣ್ಹಾಕ್ಖಯರತೋ ಹೋತಿ, ಸಮ್ಮಾಸಮ್ಬುದ್ಧಸಾವಕೋತಿ.

ತಂ ಸುತ್ವಾ ಬಹೂ ಸೋತಾಪತ್ತಿಫಲಾದೀನಿ ಪಾಪುಣಿಂಸೂತಿ.

೧೦.

ಇತಿ ಗತಿನಿಯತಾನಂ ಬೋಧಿಯಾ ಉತ್ತಮಾನಂ;

ಸಕವಸಮುಪನೇತ್ವಾ ದೇತಿ ದುಕ್ಖಾತಿತಣ್ಹಾ;

ಅನಿಯತಗತಿಕಾನಂ ಕಾ ಕಥಾ ಮಾದಿಸಾನಂ;

ಜಹಥ ತಮಿತಿ ಮನ್ತ್ವಾ ಭೋ ಭಜವ್ಹೋ ತಿವತ್ಥುಂತಿ.

ಮಹಾಮನ್ಧಾತುವತ್ಥುಂ ಅಟ್ಠಮಂ.

೯. ಬುದ್ಧವಮ್ಮವಾಣಿಜಕವತ್ಥುಮ್ಹಿ ಅಯಮಾನುಪುಬ್ಬೀಕಥಾ

ಜಮ್ಬುದೀಪೇ ಕಿರ ಪಾಟಲಿಪುತ್ತನಗರೇ ಬುದ್ಧವಮ್ಮೋ ನಾಮ ವಾಣಿಜಕೋ ಅಹೋಸಿ ವಾಣಿಜಕಕಮ್ಮೇನ ಜೀವಮಾನೋ. ಸೋ ಅಪರಭಾಗೇ ಸತ್ಥವಾಹೇಹಿ ಸದ್ಧಿಂ ಗಾಮನಿಗಮಜನಪದ ರಾಜಧಾನೀಸು ವಾಣಿಜ್ಜಂ ಪಯೋಜಯಮಾನೋ ವಿಚರತಿ, ತಸ್ಮಿಂ ಸಮಯೇ ಭಗವಾನೇಕಭಿಕ್ಖುಸಹಸ್ಸಪರಿವುತೋ ಜನಪದಚಾರಿಕಂ ಚರತಿ ಬಹೂ ದೇವಮನುಸ್ಸೇ ಸಂಸಾರಕನ್ತಾರಾ ಉತ್ತಾರೇನ್ತೋ. ತದಾ ಸೋ ಭಗವನ್ತಂ ಅದ್ದಸ ದ್ವತ್ತಿಂಸಲಕ್ಖಣಾನುಬ್ಯಞ್ಜನಪತಿಮಣ್ಡಿತಂ ಜಲಮಾನಸುವಣ್ಣಮೇರುಂ ವಿಯವಿರೋಚಮಾನಂ ಮಹಾಭಿಕ್ಖುಸಙ್ಘಪರಿವುತಂ, ದಿಸ್ವಾ ಪರಮಪೀತಿಯಾ ಫುಟಸರೀರೋ ಅಞ್ಜಲಿಂ ಪಗ್ಗಯ್ಹ ಭಗವನ್ತಂ ಉಪಸಙ್ಕಮಿತ್ವಾ ವನ್ದಿತ್ವಾ ಸಾಯಣ್ಹೇ ಭಗವನ್ತಂ ಭತ್ತೇನ ನಿಮನ್ತೇಸಿ ಬುದ್ಧಸಾಸನೇ ಅಪರಿಚಿತಭಾವೇನ. ಅಥಸ್ಸ ಭಗವಾ ವಿಕಾಲಭೋಜನಾ ಪಟಿವಿರತಾ ತಥಾಗತಾತಿ ಆಹ. ಅಥ ಸೋ ಭಗವನ್ತಂ ವನ್ದಿತ್ವಾ ಕಿಂ ಭನ್ತೇ ಭಗವನ್ತಾ ವಿಕಾಲೇ ಭುಞ್ಜಿಸ್ಸನ್ತೀತಿ, ಅಥಸ್ಸ ಕಥಂ ಪಟಿಚ್ಚ ಭಗವಾ ¶ ಅಟ್ಠವಿಧಂ ಪಾನಂ ತಥಾಗತಾನಂ ವಿಕಾಲೇ ಭುಞ್ಜಿತುಂ ಕಪ್ಪತಿ. ಸೇಯ್ಯಥಿದಂ, ಅಮ್ಬಪಾನಂ ಜಮ್ಬುಪಾನಂ ಚೋಚಪಾನಂ ಮೋಚಪಾನಂ ಫಾರುಸಕಪಾನಂ ಮಧುಪಾನಂ ಮುದ್ದಿಕಪಾನಂ ಸಾಲೂಕಪಾನನ್ತಿ. ತಂ ಸುತ್ವಾ ವಾಣಿಜೋ ಸಹಸಕ್ಕಾರಾರಸೇಹಿ ಮುದ್ದಿಕಪಾನಂ ಕತ್ವಾ ಬುದ್ಧಪಮುಖಸ್ಸ ಭಿಕ್ಖುಸಙ್ಘಸ್ಸ ಅದಾಸಿ, ಸಭಿಕ್ಖುಸಙ್ಘೋ ಸತ್ಥಾ ಪರಿಭುತ್ತಪಾನೀಯರಸೋ ತಸ್ಸ ಧಮ್ಮಂ ದೇಸೇತ್ವಾ ಜನಪದಚಾರಿಕಂ ಪಕ್ಕಾಮಿ. ಸೋಪಿ ಪಸನ್ನಮಾನಸೋ ಹುತ್ವಾ ನಿವತ್ತೋ ಸದ್ಧಿಂ ವಾಣಿಜಕೇಹಿ ತೇಸು ತೇಸು ಜನಪದೇಸು ವಾಣಿಜ್ಜಂ ಪಯೋಜೇನ್ತೋ ಮಹಾವತ್ತನೀಯಂನಾಮ ಕನ್ತಾರಂ ಪಾಪುಣಿ, ತತ್ತ ತೇಸಂ ಸಬ್ಬೇಸುಯೇವ ಸಕಟೇಸು ಪಾನೀಯಂ ಪರಿಕ್ಖಯಮಗಮಾಸಿ. ತತ್ಥ ಸಬ್ಬಮನುಸ್ಸಾನಂಚ ಬಲೀವದ್ದಾನಂಚ ಪಾನೀಯಂ ನಾಹೋಸಿ. ಅಥ ಸೋ ವಾಣಿಜೋ ಪಿಪಾಸಾಭಿಭೂತೋ ತೇಸು ತೇಸು ಸಕಟೇಸು ಪಾನೀಯಂ ಪರಿಯೇಸನ್ತೋ ವಿಚರತಿ. ಅಥೇಕಸ್ಮಿಂ ಸಕಟೇ ಮನುಸ್ಸಾ ತಂ ದಿಸ್ವಾ ಕಾರುಞ್ಞೇನ ಏತ್ಥಾಗಚ್ಛ, ಇಮಸ್ಮಿಂ ಕೋಳಮ್ಬೇ ಥೋಕಂ ಪಾನೀಯಂ ಅತ್ಥಿ ಪಿವಾತಿ ವದಿಂಸು. ತ ತೋ ಸೋ ಗನ್ತ್ವಾ ಪಾನೀಯಂ ಪಿವಿ. ತಸ್ಸ ತಂ ರಸಂ ಮುದ್ದಿಕಪಾನರಸಸದಿಸಂ ಅಹೋಸಿ, ಪಿವನ್ತೋವ ಸೋ ಏವಂ ಚಿನ್ತೇಸಿ. ಸಮ್ಮಾಸಮ್ಬುದ್ಧಸ್ಸ ತದಾ ಮೇ ದಿನ್ನಮುದ್ದಿಕಪಾನಸ್ಸ ನಿಸ್ಸನ್ದೋ ಅಜ್ಜ ಸಮ್ಪತ್ತೋ ಭವಿಸ್ಸತೀತಿ ಅಚ್ಛೇರಬ್ಭುತಚಿತ್ತೋ ಸೋಮನಸ್ಸಜಾತೋ ಗನ್ತ್ವಾ ಸಯಮೇವ ಚಾಟಿಯಾ ಪಿಧಾನಂ ವಿವರಿ. ಸಕಲಾಪಿ ಸಾ ಚಾಟಿ ಮುದ್ದಿಕಪಾನೇನ ಪರಿಪುಣ್ಣಾ ಅಹೋಸಿ. ತತೋ ಸೋ ರ ಸವ ನ್ತಂ ಓಜವನ್ತಂ ಅಪರಿಕ್ಖಯಂ ದಿಬ್ಬಪಾನಸದಿಸಂ ಪಾನೀಯಂ ದಿಸ್ವಾ ಪರಮಾಯ ಪೀತಿಯಾ ಫುಟಸರೀರೋ ಉಗ್ಘೋಸೇಸಿ ಸಬ್ಬೇ ಪಾನೀಯಂ ಪಿವನ್ತೂತಿ. ತಂ ಸುತ್ವಾ ಸಬ್ಬೇ ಸನ್ನಿಪತಿತ್ವಾ ಪಾನೀಯಂ ದಿಸ್ವಾ ಅಬ್ಭುತಚಿತ್ತಾ ಜಾತಾ. ವಾಣಿಜೋ ತೇಸಂ ಮಜ್ಝೇ ಬುದ್ಧಾನುಭಾವಂ ಪಕಾಸೇನ್ತೋ ಆಹ.

೧.

ಪಸ್ಸಥೇದಂ ಭವನ್ತೋ ಭೋ, ಆನುಭಾವಂ ಮಹೇಸಿನೋ;

ಅಚಿನ್ತನೀಯಮಚ್ಛೇರಂ, ಸನ್ದಿಟ್ಠಿಕ ಮಕಾಲಿಕಂ.

೨.

ಪಸನ್ನಮನಸಾ ಬುದ್ಧೇ, ದಿನ್ನಂ ಪಾನೀಯಕಂ ಮಯಾ;

ವಿಪಚ್ಚತಿ ಇದಾನೇವ, ತಂ ದಾನಂ ಮುನಿವಾಹಸಾ.

೩.

ಓಜವನ್ತಂ ¶ ಸುಖನ್ನಂವ, ಸೀತಲಂ ಮಧುರೋ ದಕಂ;

ದಿಬ್ಬಪಾನಂವ ದೇವಾನಂ, ಜಾತಮಬ್ಭುತಮಕ್ಖಯಂ.

೪.

ಸೀಲವನ್ತೇಸು ಕೋ ನಾಮ, ನ ದದೇಯ್ಯ ವಿಚಕ್ಖಣೋ;

ಇಧ ಲೋಕೇ ಪರತ್ತೇಚ, ಸುಖದಂ ದಾನ ಮುತ್ತಮಂ.

೫.

ಯಥಿ ಚ್ಛಿತಂ ಗಹೇತ್ವಾನ, ಪಿವನ್ತು ಮಧುರೋ ದಕಂ;

ಭಾಜನಾನಿಚ ಪೂರೇತ್ವಾ, ಯನ್ತು ಸಬ್ಬೇ ಯಥಿಚ್ಛಿತನ್ತಿ.

ಏವಞ್ಚ ಪನ ವತ್ವಾ ಸಬ್ಬೇ ಮನುಸ್ಸೇಚ ಬಲೀವದ್ದೇಚ ಮುದ್ದಿಕರಸೇನೇವ ಸನ್ತಪ್ಪೇಸಿ. ತತೋ ತತೋ ಆಗತಾಪಿ ಪಾನೀಯಂ ಪಿವನ್ತೋಚ ಪಾನೀಯಂ ಅಕ್ಖಯಂ ಅಹೋಸಿ. ತತೋ ವಾಣಿಜೋ ಸತ್ಥವಾಹೇಹಿ ಸದ್ಧಿಂ ವಾಣಿಜ್ಜಂ ಪಯೋಜೇತ್ವಾ ಸಕನಗರಂ ಆಗಚ್ಛನ್ತೋ ಭಗವನ್ತಂ ಪಸ್ಸಿತ್ವಾ ಗಮಿಸ್ಸಾಮೀತಿ ವೇಳುವನಂ ಗನ್ತ್ವಾ ಸತ್ಥಾರಂ ವನ್ದಿತ್ವಾ ಕತಾನುಞ್ಞೋ ಏಕಮನ್ತೇ ನಿಸೀದಿ. ಸತ್ಥಾಪಿ ತೇನ ಸದ್ಧಿಂ ಮಧುರಪಟಿಸನ್ಥಾರಮಕಾಸಿ. ಉಪಾಸಕೋಪಿ ಭನ್ತೇ ತುಮ್ಹಾಕಂ ಪಾಟಿಹಾರಿಯಂ ದಿಸ್ವಾ ಪಸನ್ನೋ ವನ್ದಿತ್ವಾ ಗಮಿಸ್ಸಾಮೀತಿ ಆಗತೋಮ್ಹಿ, ಏವಞ್ಚೇ ವಞ್ಚ ಪಾಟಿಹಾರಿಯನ್ತಿ ವಿತ್ಥಾರೇನ ಕಥೇಸಿ. ಅಥಸ್ಸ ಭಗವಾ ಧಮ್ಮಂ ದೇಸೇಸಿ. ಸೋ ಧಮ್ಮಂ ಸುತ್ವಾನ ಸತ್ಥಾರಂ ಸ್ವಾತನಾಯ ನಿಮನ್ತೇತ್ವಾ ಮಹಾದಾನಂ ದತ್ವಾ ಅತ್ತನೋ ಗೇಹಮೇವ ಅಗಮಾಸಿ. ಸೋ ತತೋ ಪಟ್ಠಾಯ ದಾನಾದೀನಿ ಪುಞ್ಞಾನಿ ಕತ್ವಾ ತತೋ ಚುತೋ ದೇವಲೋಕೇ ದ್ವಾದಸಯೋಜನಿಕೇ ಕನಕವಿಮಾನೇ ದೇವಚ್ಛರಾಪರಿವುತೋ ದೇವಿಸ್ಸರಿಯಸಮನ್ನಾಗತೋ ನಿಬ್ಬತ್ತಿ. ತಸ್ಸ ಪುಬ್ಬಕಮ್ಮಪಕಾಸನತ್ಥಂ ತತ್ಥ ತತ್ಥ ರತನಭಾಜನೇಸು ದಿಬ್ಬಮಯೇಹಿ ಮುದ್ದಿಕಪಾನೇಹಿ ಪರಿಪುಣ್ಣಂ ಅಹೋಸಿ. ಪಾನೀಯಂ ಪಿವಿತ್ವಾ ದೇವಾ ನಚ್ಚನ್ತಿ ವಾದೇನ್ತಿ ಕೀಳನ್ತೀತಿ.

೬.

ನ ವಿಪುಲಜಿನಸಾರಂ ಜಾನಮಾನೋ ಜನೇವಂ,

ಲಭತಿ ವಿಪುಲಭೋಗಂ ತೋಯಮತ್ತಸ್ಸ ದಾನಾ;

ವಿದಿತಗುಣಗಣಾ ಭೋ ತೀಸು ವತ್ಥೂಸು ತುಮ್ಹೇ,

ಲಭಥ ಖಲು ವಿಸೇಸಂ ಸೀಲವನ್ತೇಸು ದಾನಾತಿ.

ಬುದ್ಧವಮ್ಮವಾಣಿಜಕಸ್ಸ ವತ್ಥುಂ ನವಮಂ.

೧೦. ರೂಪದೇವಿಯಾ ವತ್ಥುಮ್ಹಿ ಅಯಮಾನುಪುಬ್ಬೀಕಥಾ

ಅತೀತೇ ¶ ಕಿರ ವಿಪಸ್ಸಿಸ್ಸ ಭಗವತೋ ಕಾಲೇ ತಸ್ಮಿಂ ನಗರೇ ಏಕಾ ಗಾಮದಾರಿಕಾ ವಿಹಾರೇ ಆಹಿಣ್ಡನ್ತೀ ಏಕಂ ಗಿಲಾನಭಿಕ್ಖುಂ ದಿಸ್ವಾ ಕಮ್ಪಮಾನಹದಯಾ ಉಪಸಙ್ಕಮಿತ್ವಾ ವನ್ದಿತ್ವಾ ಭನ್ತೇ ಕೋತೇ ಆಬಾಧೋ ಸರೀರಂ ಪೀಳೇತೀತಿ ಪುಚ್ಛಿ. ತೇನಾಪಿ ಭಗಿನಿ ಖರಾಬಾಧೋ ಮೇ ಪೀಳೇತೀತಿ ವುತ್ತೇ ಸಾ ತೇನಹಿ ಭನ್ತೇ ಅಹಂ ತಂ ರೋಗಂ ವೂಪಸಮೇಸ್ಸಾಮೀತಿ ನಿಮನ್ತೇತ್ವಾ ಗೇಹಂ ಗನ್ತ್ವಾ ತಂ ಪವತ್ತಿಂ ಮಾತಾಪಿತುನ್ನಂ ಕಥೇತ್ವಾ ತೇಹಿ ಅನುಞ್ಞಾತಾ ಪುನ ದಿವಸೇ ನಾನಗ್ಗರಸೇನ ಭೇಸಜ್ಜಾಹಾರಂ ಸಮ್ಪಾದೇಸಿ, ತತೋ ಸೋ ಭಿಕ್ಖು ಪುನದಿವಸೇ ಚೀವರಂ ಪಾರುಪಿತ್ವಾ ಭಿಕ್ಖಾಯ ಚರನ್ತೋ ತಸ್ಸಾ ಗೇಹಂ ಗನ್ತ್ವಾ ಅಟ್ಠಾಸಿ. ಸಾ ಥೇರಂ ಆಗತಂ ದಿಸ್ವಾ ಸೋಮನಸ್ಸಜಾತಾ ಪತ್ತಂ ಗಹೇತ್ವಾ ಆಸನಂ ಪಞ್ಞಾಪೇತ್ವಾ ಅದಾಸಿ. ತತ್ಥ ನಿಸಿನ್ನಂ ತಂ ಆಹಾರೇನ ಸಾಧುಕಂ ಪರಿವಿಸಿತ್ವಾ ಸಕ್ಕಾರ ಮಕಾಸಿ. ಅಥಸ್ಸಾ ಸದ್ಧಾಬಲೇನ ಭುತ್ತಮತ್ತೇಯೇವ ಸೋ ಆಬಾಧೋ ವೂಪಸಮಿ. ತತೋ ಸೋ ವೂಪಸನ್ತರೋಗೋ ದುತಿಯದಿವಸೇ ತಸ್ಸಾ ಗೇಹಂ ನಾ ಗಮಾಸಿ. ಅಥ ಸಾ ವಿಹಾರಂ ಗನ್ತ್ವಾ ತಂ ವನ್ದಿತ್ವಾ ಕಸ್ಮಾನಾಗತತ್ಥಾತಿ ಪುಚ್ಛಿತ್ವಾ ತೇನ ಮೇ ಭಗಿನಿ ಬ್ಯಾಧಿ ವೂಪಸಮಿ, ತಸ್ಮಾ ನಾಗತೋಸ್ಮೀತಿ ವುತ್ತೇ ಸಾ ಸಾಧು ಭನ್ತೇತಿ ಸೋಮನಸ್ಸಜಾತಾ ಗೇಹಮೇವ ಅಗಮಾಸಿ. ಸಾ ತೇನ ಪುಞ್ಞಕಮ್ಮೇನ ಕಾಲಂ ಕತ್ವಾ ದೇವಲೋಕೇ ನಿಬ್ಬತ್ತಿ. ತಸ್ಸಾ ತತ್ಥ ದ್ವಾದಸಯೋಜನಿಕಂ ಕನಕವಿಮಾನಂ ನಿಬ್ಬತ್ತಿ. ಸಾ ತತ್ಥ ದೇವಿಸ್ಸರಿಯಂ ಅನುಭವನ್ತೀ ಛಬುದ್ಧನ್ತರಂ ಖೇಪೇತ್ವಾ ಅಮ್ಹಾಕಂ ಭಗವತೋ ಕಾಲೇ ಜಮ್ಬುದೀಪೇ ದೇವಪುತ್ತನಗರೇ ಉದಿಚ್ಚಬ್ರಹ್ಮಣಕುಲೇ ಜೇಟ್ಠಬ್ರಾಹ್ಮಣಸ್ಸ ಭರಿಯಾಯ ಕುಚ್ಛಿಮ್ಹಿ ಪಟಿಸನ್ಧಿಂ ಗಣ್ಹಿ, ಸಾ ಪರಿಪಾಕ ಮನ್ವಾಯ ಮಾತುಕುಚ್ಛಿತೋ ನಿಕ್ಖಮಿ. ತಸ್ಸಾ ಮಾತುಕುಚ್ಛಿತೋ ನಿಕ್ಖನ್ತಕಾಲತೋ ಪಟ್ಠಾಯ ದಿವಸೇ ದಿವಸೇ ಅಟ್ಠಟ್ಠನಾಲಿಮತ್ತಂ ತಣ್ಡುಲಂ ನಿಬ್ಬತ್ತತಿ. ತಸ್ಸಾ ರೂಪಸಮ್ಪತ್ತಿಂ ದಿಸ್ವಾ ಪಸನ್ನಾ ಮಾತಾಪಿತರೋ ರೂಪದೇವೀತಿ ನಾಮ ಮಕಂಸು. ಪಚ್ಛಾ ತಂ ಪತಿರೂಪೇನ ದಾರಕೇನ ನಿಯೋಜೇಸುಂ. ಅಥಸ್ಸಾ ತಣ್ಡುಲ- ನಾಲಿಮತ್ತಂ ¶ ಗಹೇತ್ವಾ ಪಚಿತುಂ ಆರದ್ಧೇ ಇಚ್ಛಿತಿಚ್ಛಿತಮಂಸಾದಿಬ್ಯಞ್ಜನಞ್ಜ ಸಪ್ಪಿನವನೀತದಧಿಖೀರಾದಿಗೋರಸಞ್ಚ ಜೀರಮರಿಚಾದಿಕಟುಕಭಣ್ಡಞ್ಚ ಕದಲಿಪನಸಮಧುಗುಳಾದಿಉಪಕರಣಞ್ಚ ಭಾಜನಾನಿ ಪೂರೇತ್ವಾ ನಿಬ್ಬತ್ತತಿ, ತಾಯ ಹತ್ಥೇನ ಗಹಿತಂ ಕಿಞ್ಚಿ ಖಾದನೀಯಂ ಭೋಜನೀಯಂವಾ ಪೂತಿಭಾವಂ ನ ಗಚ್ಛತಿ, ಭತ್ತುಕ್ಖಲಿಂ ಗಹೇತ್ವಾ ಸಕಲನಗರವಾಸಿನೋ ಭೋಜೇನ್ತಿಯಾಪಿ ಏಕಕಟಚ್ಛುಮತ್ತಂ ಭತ್ತಂ ಗಹಿತಟ್ಠಾನಂ ನ ಪಞ್ಞಾಯತಿ. ಏವಂ ಅಪರಿಕ್ಖಯಪುಞ್ಞಾ ಅಹೋಸಿ, ಸಕಲದೇವಪುತ್ತನಗರೇ ಚನ್ದಸುರಿಯಾವ ಪಾಕಟಾ ಅಹೋಸಿ, ಅಥ ಸಾ ಪಞ್ಚಸತಭಿಕ್ಖೂ ನಿಮನ್ತೇತ್ವಾ ನಿಚ್ಚಂ ಸಕನಿವೇಸನೇಯೇವ ಭೋಜೇತಿ, ತದಾ ತೇಸಂ ಅನ್ತರೇ ಪಟಿಸಮ್ಭಿದಾಪತ್ತೋ ಮಹಾಸಙ್ಘರಕ್ಖಿತತ್ಥೇರೋನಾಮ ಇಮಿಸ್ಸಾ ಪುಞ್ಞಾನುಭಾವಂ ದಿಬ್ಬಚಕ್ಖುನಾ ದಿಸ್ವಾ ನ ಜಾನಾತಿ ಏಸಾ ಅತ್ಥನಾ ಪುಬ್ಬೇ ಕತಕಮ್ಮಂ. ಯನ್ನೂನಾಹಂ ಅಸ್ಸಾ ಪಕಾಸೇಯ್ಯನ್ತಿ ಏಕದಿವಸಂ ತಸ್ಸಾ ನಿವೇಸನೇ ಭುಞ್ಜಿತ್ವಾ ಅನುಮೋದನಂ ಕರೋನ್ತೋ ಜಾನಾಸಿ ಭಗಿನಿ ತಯಾ ಪುಬ್ಬೇ ಕತಕಮ್ಮನ್ತಿ ಪುಚ್ಛಿ, ನ ಜಾನಾಮಿ ಭನ್ತೇ. ಸೋತುಮಿಚ್ಛಾಮೀತಿ, ಅಥಸ್ಸಾ ಸೋ ಪುಬ್ಬಕಮ್ಮಂ ಪಕಾಸೇನ್ತೋ.

೧.

ಏಕನವುತೇ ಇತೋ ಕಪ್ಪೇ,

ವಿಪಸ್ಸೀನಾಮ ನಾಯಕೋ;

ಅಹೋಸಿ ಲೋಕೇ ಲೋಕೇಕ,

ನಾಯಕೋ ಛಿನ್ನಬನ್ಧನೋ.

೨.

ತದಾ ತಸ್ಮಿಂ ಪುರೇ ರಮ್ಮೇ, ಆಸಿ ತ್ವಂ ಗಾಮದಾರಿಕಾ;

ಆಹಿಣ್ಡನ್ತೀ ವಿಹಾರಸ್ಮಿಂ, ಅದ್ದಕ್ಖಿ ಜಿನಸಾವಕಂ.

೩.

ರೋಗಾತುರಂ ಕಿಸಂ ಪಣ್ಡುಂ, ಅಸ್ಸಸನ್ತಂ ಮುಹುಂ ಮುಹುಂ;

ದಿಸ್ವಾನ ಕಮ್ಪಿತಾ ಚಿತ್ತಾ, ನಿಮನ್ತೇತ್ವಾನ ತಂ ಮುನಿಂ.

೪.

ಭೇಸಜ್ಜಞ್ಚೇವ ಭತ್ತಞ್ಚ, ಅದಾ ತ್ವಂ ತೇನ ಸೋ ಯತಿ;

ಅಬ್ಯಾಬಾಧೋ ಅನೀಘೋಚ, ಅಹೋಸಿ ಅನುಪದ್ದವೋ.

೫.

ತತೋ ತ್ವಂ ತೇನ ಕಮ್ಮೇನ, ಸುಕತೇನ ತತೋ ಚುತಾ;

ಜಾತಾಸಿ ದೇವಲೋಕಸ್ಮಿಂ, ಸಬ್ಬಕಾಮಸಮಿದ್ಧಿನೀ.

೬.

ತತ್ಥ ¶ ತೇ ಪುಞ್ಞತೇಜೇನ, ಪಾಸಾದೋ ರತನಾಮಯೋ;

ಮಣಿಥೂಪಿಸತಾಕಿಣ್ಣೋ, ಕೂಟಾಗಾರೇಹಿ ಲಙ್ಕತೋ.

೭.

ನೇಕಗಬ್ಭಸತಾಕಿಣ್ಣೋ, ಸಯನಾಸನಮಣ್ಡಿತೋ;

ಅಚ್ಛರಾಸತಸಂಕಿಣ್ಣೋ, ನಚ್ಚಗೀತಾದಿಸಂಕುಲೋ.

೮.

ರಮ್ಭಾಮ್ಬಜಮ್ಬುಸನ್ನೀರ, ಪೂಗಪುನ್ನಾಗಪಾಟಲೀ;

ನಾಗಾದಿತರುಸಣ್ಡೇಹಿ, ಮಣ್ಡಿತುಯ್ಯಾನಪನ್ತಿಹಿ.

೯.

ಪದುಮುಪ್ಪಲಕಳಾರ, ಕುನ್ದಕಾನನಮಣ್ಡಿತೇ;

ಮಧುಮತ್ತಾಲಿಪಾಲೀಹಿ, ಸಾರಸೀಸರಸಂಕುಲೇ.

೧೦.

ದೇವಪುತ್ತೇಹಿ ನೇಕೇಹಿ, ತಥಾ ದೇವಚ್ಛರಾಹಿಚ;

ನಿಚ್ಚುಸ್ಸವೇ ಮಹಾಭೋಗೇ, ವಿಮಾನೇ ಮನನನ್ದನೇ.

೧೧.

ತ್ವಮೇವಂ ದೇವಲೋಕಮ್ಹಿ, ವಿನ್ದಮಾನಾ ಮಹಾಯಸಂ;

ಅದ್ಧಾನಂ ವೀತಿನಾಮೇತ್ವಾ, ನಿಬ್ಬುತೇ ಗೋತಮೇ ಜಿನೇ.

೧೨.

ಜಮ್ಬುದೀಪೇ ಇದಾನಿ ತ್ವಂ, ನಿಬ್ಬತ್ತಾ ಉದಿತೇ ಕುಲೇ;

ಪುಞ್ಞಪಞ್ಞಾಗುಣಾವಾಸಾ, ರೂಪೇನಗ್ಗಾ ಪಿಯಂವದಾ.

೧೩.

ಏತಂ ತೇ ದೇವಲೋಕಸ್ಮಿಂ, ದೇವಿಸ್ಸರಿಯಮಬ್ಭುತಂ,

ಇಮಂ ತೇ ಇಧ ಲೋಕಸ್ಮಿಂ, ಸಬ್ಬಂ ಮಾನುಸಿಕಂ ಸುಖಂ.

೧೪.

ವಿಪಸ್ಸಿಮುನಿನೋ ಕಾಲೇ, ತ್ವಂ ತಸ್ಸೇಕಸ್ಸ ಭಿಕ್ಖುನೋ;

ಅದಾ ದಾನಂ ಗಿಲಾನಸ್ಸ, ತಸ್ಸ ತಂ ಫಲಮೀದಿಸಂ.

೧೫.

ಕಾತಬ್ಬಞ್ಹಿ ಸದಾ ಪುಞ್ಞಂ, ಇಚ್ಛನ್ತೇನ ಸುಖಪ್ಪದಂ;

ತಸ್ಮಾ ತ್ವಂ ಸಬ್ಬದಾ ಭದ್ದೇ, ಉಸ್ಸುಕ್ಕಾ ಕುಸಲೇ ಭವಾತಿ.

ಏವಂ ಸೋ ತಸ್ಸ ಪುರಿಮತ್ತಭಾವೇ ಕತಕಮ್ಮಂ ಪಕಾಸೇತ್ವಾ ಇದಾನಿ ಪುಞ್ಞಕಮ್ಮೇ ಅಪ್ಪಮಾದಾ ಭವಾತಿ ಅನುಸಾಸಿ. ಸಾ ಥೇರಸ್ಸ ಧಮ್ಮದೇಸನಂ ಸುತ್ವಾ ಪರಮಸೋಮನಸ್ಸಾ ತತೋ ಪಟ್ಠಾಯ ದಾನಾದೀಸು ನಿರತಾ ಪುಞ್ಞಾನಿ ಕರೋನ್ತೀ ತೇನೇವ ಸೋಮನಸ್ಸೇನ ಸೋತಾಪನ್ನಾ ಅರಿಯಸಾವಿಕಾ ಅಹೋಸೀತಿ.

೧೬.

ಇತಿ ¶ ತರುಣಕುಮಾರೀ ಪುಞ್ಞಕಮ್ಮೇಸು ಸಾರಂ,

ಅವಿದಿತಗುಣಮತ್ತಾ ದತ್ವ ಭಿಕ್ಖುಸ್ಸ ದಾನಂ;

ದಿವಿಮನುಜಸುಖಂ ಸಾಲತ್ಥ ತುಮ್ಹೇ ಭವನ್ತಾ,

ವಿದಿತಕುಸಲಪಾಕಾ ಕಿಂ ನ ಲಬ್ಭೇಥ ಸನ್ತಿಂ.

ರೂಪದೇವಿಯಾ ವತ್ಥುಂ ದಸಮಂ.

ಧಮ್ಮಸೋಣ್ಡಕವಗ್ಗೋ ಪಥಮೋ.

ನನ್ದಿಯರಾಜವಗ್ಗೋ

೧೧. ನನ್ದಿಯರಾಜಸ್ಸ ವತ್ಥುಮ್ಹಿ ಅಯಮಾನುಪುಬ್ಬೀಕಥಾ

ಇತೋ ¶ ಕಿರ ಕಪ್ಪಸತಸಹಸ್ಸಮತ್ಥಕೇ ಪದುಮುತ್ತರೋ ನಾಮ ಸತ್ಥಾ ಲೋಕೇ ಉದಪಾದಿ ಸದೇವಕಂ ಲೋಕಂ ಸಂಸಾರಕನ್ತಾರಾ ಉತ್ತಾರೇನ್ತೋ. ತಸ್ಮಿಂ ಕಿರ ಸಮಯೇ ಏಕೋ ಕುಟುಮ್ಬಿಕೋ ಸತ್ಥು ಧಮ್ಮದೇಸನಂ ಸುತ್ವಾ ಪಸನ್ನಮಾನಸೋ ಬುದ್ಧಪಮುಖಂ ಭಿಕ್ಖುಸಙ್ಘಂ ನಿಮನ್ತೇತ್ವಾ ಮಹಾದಾನಂ ಸಜ್ಜೇತ್ವಾ ಅತ್ತನೋ ಭವನಂ ದೇವಭವನಮಿವ ಅಲಙ್ಕರಿತ್ವಾ ಬುದ್ಧಾರಹಂ ಮಹಾಸನಂ ಪಞ್ಞಾಪೇತ್ವಾ ಗನ್ತ್ವಾ ಭಗವನ್ತಂ ಯಾಚಿ ಕಾಲೋಯಂ ಭನ್ತೇ ಭಗವತೋ ಭತ್ತಗ್ಗಸ್ಸ ಉಪಸಙ್ಕಮನಾಯಾತಿ. ಅಥ ಭಗವಾ ಭಿಕ್ಖುಸಙ್ಘಪರಿವುತೋ ಮಹತಾ ಬುದ್ಧಾನುಭಾವೇನ ಗನ್ತ್ವಾ ನಿಸೀದಿ ಪಞ್ಞತ್ತವರಬುದ್ಧಾಸನೇ, ತತೋ ಕುಟುಮ್ಬಿಕೋ ಹಟ್ಠೋ ಉದಗ್ಗೋ ಸಪರಿಸೋ ಭಗವನ್ತಂ ಪರಿವಿಸತಿ ಅನೇಕೇಹಿ ಮಧುರನ್ನಪಾನಾದೀಹಿ. ತದಾ ತಸ್ಸ ಭಗವತೋ ಸಾಸನೇ ಧುತಙ್ಗಧರಾನಂ ಅಗ್ಗೋ ವಸಭತ್ಥೇರೋನಾಮ ಮಹಾಸಾವಕೋ ಸಪದಾನವತ್ತೇನ ಪಿಣ್ಡಾಯ ಚರಮಾನೋ ತಸ್ಸ ಕುಟುಮ್ಬಿಕಸ್ಸ ಗೇಹದ್ವಾರೇ ಅಟ್ಠಾಸಿ, ಅಥ ಸೋ ಥೇರಂ ದಿಸ್ವಾ ಭನ್ತೇ ಸತ್ಥಾ ಅನ್ತೋಗೇಹೇ ನಿಸಿನ್ನೋ, ತುಮ್ಹೇಪಿ ಪವಿಸಥಾತಿ ಯಾಚಿ, ಥೇರೋ ಅಪವಿಸಿತ್ವಾವ ಅಗಮಾಸಿ, ಕುಟುಮ್ಬಿಕೋ ಭಗವನ್ತಂ ಉಪಸಙ್ಕಮಿತ್ವಾ ತಮತ್ತಂ ವತ್ವಾ ಕಿಂ ಭನ್ತೇ ಸದೇವಕೇ ಲೋಕೇ ಭಗವತಾಪಿ ಉತ್ತರಿತರೋ ಗುಣೇನ ಸಂವಿಜ್ಜತೀತಿ ಆಹ. ಅಥಸ್ಸ ಸತ್ಥಾ ಪುತ್ತೋಪಮಂ ದಸ್ಸೇತ್ವಾ ಥೇರಸ್ಸ ಗುಣೇ ವಣ್ಣೇನ್ತೋ ಏವಮಾಹ.

೧.

ಪಾಲೇನ್ತಿ ನಿಮ್ಮಲಂ ಕತ್ವಾ, ಪಾತಿಮೋಕ್ಖಾದಿಸಂವರಂ;

ಸಮಾದಿನ್ನಧುತಙ್ಗಾಚ, ಅಪ್ಪಿಚ್ಛಾ ಮುನಿಸೂನವೋ.

೨.

ನಿಚ್ಚ ಮನ್ತಕಯುದ್ಧಮ್ಹಿ, ನದ್ಧಾ ಯೋಧಾವ ದಪ್ಪಿತಾ;

ಪುಞ್ಞಾನಂ ವತ್ಥುಭೂತಾ ತೇ, ದೇವಮಾನುಸಕಾ ದಿನಂ.

೩.

ಧಾರೇಮಹಂ ವಣ್ಣವನ್ತಂ, ಸೀವೇಯ್ಯಮ್ಪಿಚ ಚೀವರಂ;

ಬುದ್ಧಪುತ್ತಾ ಮಹಾನಾಗಾ ನ ಧಾರೇನ್ತಿ ತಥಾವಿಧಂ.

೪.

ಧಾರೇನ್ತಿ ¶ ತೇ ಪಂಸುಕೂಲಂ, ಸಙ್ಘಾಟೇತ್ವಾ ಪಿಲೋತಿಕೇ;

ವಣಚ್ಛಾದನಚೋಲಂವ, ಇಚ್ಛಾಲೋಭ ವಿವಜ್ಜಿತಾ.

೫.

ಸಾದಿಯಾಮಿ ಸದಾ ಹಮ್ಭೋ, ಉಪಾಸಕನಿಮನ್ತನಂ;

ನೇವ ಸಾದೇನ್ತಿ ಸಮ್ಬುದ್ಧ, ಪುತ್ತೋ ಪಾಸಕಯಾಚನಂ.

೬.

ಸಪದಾನೇನ ಯಂ ಲದ್ಧಂ, ಲೂಖಂವಾಪಿ ಪಣೀತಕಂ;

ತೇನ ತುಸ್ಸನ್ತಿ ಮೇ ಪುತ್ತಾ, ರಸಗೇಧವಿವಜ್ಜಿತಾ.

೭.

ನಿಪಜ್ಜಾಮಿ ಅಹಂ ಸಾಧು, ಸನ್ಥತೇ ಸಯನೇ ಸುಭೇ;

ನ ತೇ ಸೇಯ್ಯಂ ಪಕಪ್ಪೇನ್ತಿ, ಸಂಸಾರಭಯಭೀರುಕಾ.

೮.

ಠಾನಾ ಸನಗಮನೇನ, ಕಪ್ಪೇನ್ತಿ ಇರಿಯಾಪಥಂ;

ನೇಕಭೂಮಿಸಮಾಕಿಣ್ಣ, ಪಾಸಾದೇಸು ವಸಾಮಹಂ.

೯.

ಬುದ್ಧಪುತ್ತಾ ತಥಾಚ್ಛನ್ನಂ, ನ ಕದಾ ಪವಿಸನ್ತಿ ತೇ;

ರುಕ್ಖಮೂಲೇ ಸುಸಾನಸ್ಮಿಂ, ಅಬ್ಭೋಕಾಸೇ ರಮನ್ತಿ ತೇ.

೧೦.

ಭಾವೇತ್ವಾ ಭವನಾಸಾಯ, ಹೇತುಂ ಭಾವನಮುತ್ತಮಂ;

ಅಹಂ ಗಾಮೇ ವಸಿಸ್ಸಾಮಿ, ಪಾಪೇನ್ತೋ ಜನತಂ ಸಿವಂ.

೧೧.

ರಮನ್ತಿ ಮಮ ಪುತ್ತಾ ತೇ, ಪನ್ತಸೇನಾಸನೇ ಕಕಾ;

ತೇಸಂ ಮಹತ್ತರೋ ಸನ್ತೋ, ಥೇರೋಯಂ ವಸಭೋ ಮಹಾ;

ಧುತಪಾಪೋ ಧುತಙ್ಗಗ್ಗೋ, ಞಾತೋಯಂ ಮಮ ಸಾಸನೇತಿ.

ಏವಂ ಭಗವಾ ಹತ್ಥಂ ಉಕ್ಖಿಪಿತ್ವಾ ಚನ್ದಮಣ್ಡಲೇ ಪಹರನ್ತೋ ವಿಯ ಥೇರಸ್ಸ ಗುಣೇ ಪಕಾಸೇಸಿ, ತತೋ ಸೋ ತಸ್ಸ ಗುಣಕಥಂ ಸುತ್ವಾ ಸಯಮ್ಪಿತಂ ಠಾನನ್ತರಂ ಕಾಮಯಮಾನೋ ಯನ್ನೂನಾಹಂ ಅನಾಗತೇ ಅಞ್ಞತರಸ್ಸ ಸಮ್ಮಾಸಮ್ಬುದ್ಧಸ್ಸ ಸಾಸನೇ ಧುತಙ್ಗಧರಾನಂ ಅಗ್ಗೋ ಭವಿಸ್ಸಾಮೀತಿ ತಂ ಠಾನನ್ತರಂ ಪತ್ಥೇನ್ತೋ ಭಗವತೋ ಪಾದಮೂಲೇ ನಿಪಜ್ಜಿ, ಸತ್ಥಾ ತಂ ಕಾರಣಂ ಉಪಪರಿಕ್ಖಿತ್ವಾ ಇತೋ ಕಪ್ಪಸತಸಹಸ್ಸಮತ್ಥಕೇ ಗೋತಮೋ ನಾಮ ಸತ್ಥಾ ಉಪ್ಪಜ್ಜಿಸ್ಸತಿ. ತ್ವಂ ತದಾ ಧುತಙ್ಗಧರಾನಂ ಅಗ್ಗೋ ಹುತ್ವಾ ಕಸ್ಸ ಪೋತಿ ಪಞ್ಞಾಯಿಸ್ಸತೀತಿ ಬ್ಯಾಕರಣ ¶ ಮದಾಸಿ. ತತೋ ಪಟ್ಠಾಯ ಸೋ ಸೋಮನಸ್ಸೋ ಪುಞ್ಞಕಮ್ಮಂ ಕತ್ವಾ ತತೋ ಚುತೋ ದೇವಮನುಸ್ಸೇಸು ದೇವಿಸ್ಸರಿಯಂ ಅನುಭವನ್ತೋ ವಿಪಸ್ಸೀಸಮ್ಮಾಸಮ್ಬುದ್ಧಕಾಲೇ ಏಕಸಾಟಕೋ ನಾಮ ಬ್ರಾಹ್ಮಣೋ ಹುತ್ವಾ ಮಹಾದಾನಂ ಅದಾಸಿ. ತತೋ ಚುತೋ ಕಸ್ಸಪಸಮ್ಮಾಸಮ್ಬುದ್ಧೇ ಪರಿನಿಬ್ಬುತೇ ಬಾರಾಣಸೀನಗರೇ ಬಾರಾಣಸೀಸೇಟ್ಠಿ ಹುತ್ವಾ ನಿಬ್ಬತ್ತೋ ದಾನಾದೀನಿ ಪುಞ್ಞಾನಿ ಕತ್ವಾ ತತೋ ಚವಿತ್ವಾ ಸಂಸಾರೇ ಸಂಸರನ್ತೋ ದಸವಸ್ಸಸಹಸ್ಸಾ ಯುಕೇಸು ಮನುಸ್ಸೇಸು ಬಾರಾಣಸಿಯಂ ಏಕೋ ಕುಟುಮ್ಬಿಕೋ ಹುತ್ವಾ ನಿಬ್ಬತ್ತಿ. ಸೋ ಪನಾಯಂ ಕುಟುಮ್ಬಿಕೋ ಅರಞ್ಞೇ ಜಙ್ಘಾವಿಹಾರಂ ಅನುವಿಚರನ್ತೋ ಪಚ್ಚನ್ತಿಮೇ ಜನಪದೇ ಅರಞ್ಞಾಯತನೇ ಅಞ್ಞತರಂ ಪಚ್ಚೇಕಬುದ್ಧಂ ಅದ್ದಸ. ಸೋ ಚ ಪಚ್ಚೇಕಬುದ್ಧೋ ತತ್ಥ ಚೀವರಕಮ್ಮಂ ಕರೋನ್ತೋ ಅನುವಾತೇ ಅಪ್ಪಹೋನ್ತೇ ಸಂಹರಿತ್ವಾ ಠಪೇತುಂ ಆರದ್ಧೋ. ಕುಟುಮ್ಬಿಕೋ ತಂ ದಿಸ್ವಾ ಭನ್ತೇ ಕಿಂ ಕರೋಥಾತಿ ಪುಚ್ಛಿ. ಸೋ ಪಚ್ಚೇಕಬುದ್ಧೋ ಅಪ್ಪಿಚ್ಛತಾಯ ತೇನ ಪುಟ್ಠೋ ನ ಕಿಞ್ಚಿ ವುತ್ತೋ ಹೋತಿ. ಸೋ ಚೀವರದುಸ್ಸಂ ನಪ್ಪಹೋತೀತಿ ಞತ್ವಾ ಅತ್ತನೋ ಉತ್ತರಸಾಟಕಂ ಪಚ್ಚೇಕಬುದ್ಧಸ್ಸ ಪಾದಮೂಲೇ ಠಪೇತ್ವಾ ಅಗಮಾಸಿ. ಪಚ್ಚೇಕಬುದ್ಧೋ ತಂ ಗಹೇತ್ವಾ ಅನುವಾತಕಂ ಆರೋಪೇನ್ತೋ ಚೀವರಂ ಕತ್ವಾ ಪಾರುಪಿ. ಕುಟುಮ್ಬಿಕೋ ಜೀವಿತಪರಿಯೋಸಾನೇ ಕಾಲಂ ಕತ್ವಾ ತಾವತಿಂಸಭವನೇ ನಿಬ್ಬತ್ತಿತ್ವಾ ತತ್ಥ ಯಾವತಾಯುಕಂ ದಿಬ್ಬಸಮ್ಪತ್ತಿಂ ಅನುಭವಿತ್ವಾ ತತೋ ಚವಿತ್ವಾ ಬಾರಾಣಸಿತೋ ತಿಯೋಜನಮತ್ತಕೇ ಠಾನೇ ಅಞ್ಞತರಸ್ಮಿಂ ನಗರೇ ನಿಬ್ಬತ್ತಿ, ತಸ್ಸ ಮಾತಾಪಿತರೋ ನನ್ದಿಯೋತಿ [ನನ್ದೀತಿನಾಮಂ ಇತಿಸಬ್ಬತ್ಥ] ನಾಮಂ ಅಕಂಸು, ತಸ್ಸ ಸತ್ತ ಭಾತರೋ ಅಹೇಸುಂ, ಸೇಸಾ ಛ ಭಾತರೋ ನಾನಾಕಮ್ಮನ್ತೇಸು ಬ್ಯಾವಟಾ ಮಾತಾಪಿತುನ್ನಂ ಪೋಸೇನ್ತಿ. ನನ್ದಿಯೋ ಪನ ಅಕಮ್ಮಸೀಲೋ ಗೇಹೇಯೇವ ವಸತಿ. ತಸ್ಮಾ ತಸ್ಸ ಸೇಸಾ ಕುಜ್ಝನ್ತಿ. ಮಾತಾಪಿತರೋಪಿ ನನ್ದಿಯಂ ಆಮನ್ತೇತ್ವಾ ಓವದನ್ತಿ. ಸೋ ತುಣ್ಹೀ ಹೋತೇವ. ಅಥಾಪರಸ್ಮಿಂ ಸಮಯೇ ಗಾಮೇ ನಕ್ಖತ್ತಂ ಸಙ್ಘುಟ್ಠಂ, ತದಾ ಸೋ ಮಾತರಂ ಆಹ. ಅಮ್ಮ ಸಾಟಕಂ ದೇಹಿ, ನಕ್ಖತ್ತಂ ಕೀಳಿಸ್ಸಾಮೀತಿ, ಸಾ ಧೋತ- ವತ್ಥಂ ¶ ನೀಹರಿತ್ವಾ ಅದಾಸಿ, ಅಮ್ಮ ಥೂಲಂ ಇದನ್ತಿ, ಸಾ ಅಞ್ಞಂ ನೀಹರಿತ್ವಾ ಅದಾಸಿ, ತಮ್ಪಿ ಪಟಿಕ್ಖಿಪಿ. ಅಥ ನಂ ಮಾತಾ ಆಹ. ತಾತ ಯಾದಿಸೇ ಮಯಂ ಗೇಹೇ ಜಾತಾ, ನತ್ಥಿ ಇತೋ ಸುಖುಮತರಸ್ಸ ಪಟಿಲಾಭಾಯ ಪುಞ್ಞನ್ತಿ, ಲಭನಟ್ಠಾನಂ ಗಮಿಸ್ಸಾಮಿ ಅಮ್ಮಾತಿ. ಪುತ್ತ ಅಹಂ ಅಜ್ಜೇವ ತವ ಬಾರಾಣಸೀನಗರೇ ರಜ್ಜಪಟಿಲಾಭಂ ಇಚ್ಛಾಮೀತಿ ಆಹ. ಸೋ ಸಾಧು ಅಮ್ಮಾತಿ ಮಾತರಂ ವನ್ದಿತ್ವಾ ಪದಕ್ಖಿಣಂ ಕತ್ವಾ ಪಕ್ಕಾಮಿ. ಮಾತುಯಾ ಪನಸ್ಸ ಏವಂ ಅಹೋಸಿ. ಕಹಂ ಸೋ ಗಮಿಸ್ಸತಿ, ಪುಬ್ಬೇವಿಯ ಇಧವಾ ಏತ್ಥವಾ ಗೇಹೇ ನಿಸೀದಿತ್ವಾ ಆಗಚ್ಛತೀತಿ, ಸೋ ಪನ ಪುಞ್ಞನಿಯಾಮೇನ ಚೋದಿಯಮಾನೋ ಗಾಮತೋ ನಿಕ್ಖಮಿತ್ವಾ ಬಾರಾಣಸಿಂ ಗನ್ತ್ವಾ ಸೇನಗುತ್ತಸ್ಸ ಗೇಹೇ ಪಟಿವಸತಿ, ಅಥೇಕದಿವಸಂ ಸೋ ತಸ್ಸ ಕಮ್ಮಕಾರೇಹಿ ಸದ್ಧಿಂ ಸಲ್ಲಪನ್ತೋ ನಿಸೀದಿತ್ವಾ ಪಚಲಾಯನ್ತೋ ಸುಪಿನಂ ಅದ್ದಸ. ಮುಖೇನ ಅನ್ತಂ ನಿಕ್ಖಮಿತ್ವಾ ಸಕಲಜಮ್ಬುದೀಪೇ ಪತ್ಥರಿತ್ವಾ ಅನ್ತೋಕುಚ್ಛಿಮೇವ ಪಾವಿಸಿ. ಪಬುದ್ಧೋ ಸೋ ಭೀತೋ ಮಹಾಸದ್ದಮಕಾಸಿ. ಅಥ ನಂ ಮಹಾಸೇನಗುತ್ತೋ ಪುಚ್ಛಿ. ನನ್ದಿಯೋ ಸುಪಿನಂ ಅದ್ದಸನ್ತಿ ಆಹ. ಅಥ ತೇನ ಕೀದಿಸನ್ತಿ ಪುಟ್ಠೋ ಕಥೇಸಿ, ತತೋ ಸೇನಗುತ್ತೋ ತಂ ಅತ್ತನೋ ಕುಲೂಪಗಂ ಪರಿಬ್ಬಾಜಿಕಂ ಪುಚ್ಛಿ ಕೋ ತಸ್ಸ ವಿಪಾಕೋತಿ. ಪರಿಬ್ಬಾಜಿಕಾ ಯದಿ ಭೋ ಇತ್ಥೀ ಪಸ್ಸತಿ. ಸತ್ತದಿವಸಬ್ಭನ್ತರೇಯೇವ ಅಭಿಸೇಕಂ ಲಭತಿ, ಯದಿ ಪುರಿಸೋ ಪಸ್ಸತಿ, ತಥೇವ ರಾಜಾ ಹೋತೀತಿ ಕಥೇಸಿ. ಸೇನಗುತ್ತೋ ತಸ್ಸಾ ತಂ ಕಥಂ ಸುತ್ವಾ ಇಮಂ ಮಮ ಞಾತಿಂ ಕರೋಮೀತಿ ಅತ್ತನೋ ಸತ್ತ ಧೀತರೇ ಪಕ್ಕೋಸಿತ್ವಾ ಪಟಿಪಾಟಿಯಾ ಪುಚ್ಛಿ. ನನ್ದಿಯಸ್ಸ ಸನ್ತಿಕೇ ವಸಥಾತಿ, ಸೇಸಾ ಸಬ್ಬಾ ನ ಇಚ್ಛಿಂಸು, ನ ಮಯಂ ಜಾನಾಮ ಏತಂ ಅಧುನಾಗತಂ ಕುಲವನ್ತಂ ವಾ ದುಕ್ಕುಲವನ್ತಂವಾತಿ. ಅಥ ಕಣಿಟ್ಠಿಕಂ ಪುಚ್ಛಿ. ಸಾ ಯಸ್ಸ ಮಂ ಮಾತಾಪಿತರೋ ದಸ್ಸನ್ತಿ. ತೇಸಂ ವಚನಂ ನ ಭಿನ್ದಿಸ್ಸಾಮೀತಿ ಸಮ್ಪಟಿಚ್ಛಿ, ಅಥ ಸೇನಗುತ್ತೋ ನನ್ದಿಯಂ ಪಕ್ಕೋಸಿತ್ವಾ ಅತ್ತನೋ ಧೀತರಂ ದತ್ವಾ ತಸ್ಸ ಮಹಾಸಮ್ಪತ್ತಿ ಮದಾಸಿ. ತತೋ ಸತ್ತಮೇ ದಿವಸೇ ನನ್ದಿಯೋ ತತ್ಥ ತತ್ಥ ಆಹಿಣ್ಡನ್ತೋ ರಞ್ಞೋ ಮಙ್ಗಲುಯ್ಯಾನಂ ಪಸ್ಸಿಸ್ಸಾಮೀತಿ ಗನ್ತ್ವಾ ಧಙ್ಗಲಸಿಲಾಪಟ್ಟೇಸಸೀಸಂ ಪಾರುಪಿತ್ವಾ ನಿಪಜ್ಜಿ, ಸೋ ಚ ಬಾರಾಣಸೀರಞ್ಞೋ ಕಾಲಙ್ಕತಸ್ಸ ಸತ್ತಮೋ ¶ ದಿವಸೋ ಹೋತಿ. ಅಮಚ್ಚಾಚ ಪುರೋಹಿತೋಚ ರಞ್ಞೋ ಸರೀರಕಿಚ್ಚಂ ಕಾರೇತ್ವಾ ರಾಜಙ್ಗಣೇ ನಿಸೀದಿತ್ವಾ ಮನ್ತಯಿಂಸು. ರಞ್ಞೋ ಏಕಾವ ಧೀತಾ ಅತ್ಥಿ, ಪುತ್ತೋ ಪನಸ್ಸ ನತ್ಥಿ. ಅರಾಜಿಕಂ ರಜ್ಜಂ ನ ತಿಟ್ಠತಿ. ಫುಸ್ಸರಥಂ ವಿಸ್ಸಜ್ಜೇಸ್ಸಾಮಾತಿ. ತೇ ಕುಮುದಪತ್ತವಣ್ಣೇ ಚತ್ತಾರೋ ಸಿನ್ಧವೇ ಯೋಜೇತ್ವಾ ಸೇತಚ್ಛತ್ತಪಮುಖಂಪಞ್ಚವಿಧರಾಜಕಕುಧಭಣ್ಡಂ ರಥಸ್ಮಿಂಯೇವ ಠಪೇತ್ವಾ ರಥಂ ವಿಸ್ಸಜ್ಜೇತ್ವಾ ಪಚ್ಛತೋ ತುರಿಯಾನಿ ಪಗ್ಗಣ್ಹಾಪೇಸುಂ. ರಥೋ ಪಾಚೀದ್ವಾರೇನ ನಿಕ್ಖಮಿತ್ವಾ ಉಯ್ಯಾನಾಭಿಮುಖೋ ಅಹೋಸಿ. ಪರಿಚಯೇನ ಉಯ್ಯಾನಾಭಿಮುಖೋ ಗಚ್ಛತಿ. ನಿವತ್ತೇಮಾತಿ ಕೇಚಿ ಆಹಂಸು. ಪುರೋಹಿತೋ ಮಾ ನಿವಾರಯಿತ್ಥಾತಿ ಆಹ. ರಥೋ ಕುಮಾರಕಂ ಪದಕ್ಖಿಣಂ ಕತ್ವಾ ಆರೋಹಣಸಜ್ಜೋ ಹುತ್ವಾ ಅಟ್ಠಾಸಿ. ಪುರೋಹಿತೋ ಪಾರುಪಣಕಣ್ಣಂ ಅಪನೇತ್ವಾ ಪಾದತಲಾನಿ ಓಲೋಕೇನ್ತೋ ತಿಟ್ಠತು ಅಯಂ ದೀಪೋ. ದ್ವಿಸಹಸ್ಸದೀಪ ಪರಿವಾರೇಸು ಚತೂಸು ಮಹಾದೀಪೇಸು ಏಕರಜ್ಜಂ ಕಾತುಂ ಸಮತ್ಥೋತಿವತ್ವಾ ತಸ್ಸ ಧಿತಿಂ ಉಪಧಾರೇತುಂ ತಿಕ್ಖತ್ತುಂ ತುರಿಯಾನಿ ಪಗ್ಗಣ್ಹಾಪೇಸಿ. ಅಥ ಕುಮಾರೋ ಮುಖಂ ವಿವರಿತ್ವಾ ಓಲೋಕೇತ್ವಾ ಕೇನ ಕಾರಣೇನ ಆಗತತ್ಥಾತಿ ಆಹ, ದೇವ ತುಮ್ಹಾಕಂ ರಜ್ಜಂ ಪಾಪುಣಾತೀತಿ, ರಾಜಾ ಕಹನ್ತಿ, ದೇವತ್ತಂ ಗತೋ ಸಾಮೀತಿ, ಕತಿ ದಿವಸಾ ಅತಿಕ್ಕನ್ತಾತಿ, ಅಜ್ಜ ಸತ್ತಮೋ ದಿವಸೋತಿ. ಪುತ್ತೋ ವಾ ಧೀತಾ ವಾ ನತ್ಥೀತಿ, ಧೀತಾ ಅತ್ಥಿ ದೇವ. ಪುತ್ತೋ ನ ವಿಜ್ಜತೀತಿ, ತೇನಹಿ ಕರಿಸ್ಸಾಮಿ ರಜ್ಜನ್ತಿ, ತೇ ತಾವದೇವ ಅಭಿಸೇಕಮಣ್ಡಪಂ ಕಾರೇತ್ವಾ ರಾಜಧೀತರಂ ಸಬ್ಬಾಲಙ್ಕಾರೇಹಿ ಅಲಙ್ಕಾರಿತ್ವಾ ಉಯ್ಯಾನಂ ನೇತ್ವಾ ಕುಮಾರಸ್ಸ ಅಭಿಸೇಕಂ ಅಕಂಸು, ಅಥಸ್ಸ ಕತಾಭಿಸೇಕಸ್ಸ ಸತಸಹಸ್ಸಗ್ಘನಕಂ ವತ್ಥಂ ಆನೇಸುಂ, ಸೋ ಕಿಮಿದಂ ತಾತಾತಿ ಆಹ, ನಿವಾಸನವತ್ಥಂ ದೇವಾತಿ, ನನು ತಾತಾ ಥೂಲಂತಿ, ಮನುಸ್ಸಾನಂ ಪರಿಭೋಗವತ್ಥೇಸು ಇತೋ ಸುಖುಮತರಂ ನತ್ಥಿ ದೇವಾತಿ, ತುಮ್ಹಾಕಂ ರಾಜಾ ಏವರೂಪಂ ನಿವಾಸೇಸೀತಿ, ಆಮ ದೇವಾತಿ. ನ ಮಞ್ಞೇ ಪುಞ್ಞವಾ ತುಮ್ಹಾಕಂ ರಾಜಾತಿ ವತ್ವಾ ಹನ್ದ ಸುವಣ್ಣಭಿಙ್ಕಾರಂ ಆಹರಥ, ಲಭಿಸ್ಸಾಮ ವತ್ಥನ್ತಿ, ತೇ ಸುವಣ್ಣಭಿಙ್ಕಾರಂ ಆಹರಿಂಸು, ಸೋ ಉಟ್ಠಾಯ ಹತ್ಥೇ ಧೋವಿತ್ವಾ ಮುಖಂ ವಿಕ್ಖಾಲೇತ್ವಾ ಹತ್ಥೇನ ಉದಕಂ ಆದಾಯ ಪುರತ್ಥಿಮದಿಸಾಯ ಅಬ್ಭುಕ್ಕಿರಿ, ¶ ತಾವದೇವ ಘನಪಥವಿಂ ಭಿನ್ದಿತ್ವಾ ಸೋಳಸಕಪ್ಪರುಕ್ಖಾ ಉಟ್ಠಹಿಂಸು, ಪುನ ಉದಕಂ ಹತ್ಥೇನ ಗಹೇತ್ವಾ ದಕ್ಖಿಣಂ ಪಚ್ಛಿಮಂ ಉತ್ತರನ್ತಿ ಏವಂ ಚತಸ್ಸೋಪಿ ದಿಸಾ ಅಬ್ಭುಕ್ಕಿರಿ, ಸಬ್ಬದಿಸಾಸು ಸೋಳಸ ಸೋಳಸ ಹುತ್ವಾ ಚತುಸಟ್ಠಿಕಪ್ಪರುಕ್ಖಾ ಉಟ್ಠಹಿಂಸು, ಸೋ ಏಕಂ ದಿಬ್ಬದುಸ್ಸಂ ನಿವಾಸೇತ್ವಾ ಏಕಂ ಪಾರುಪಿತ್ವಾ ನನ್ದಿಯರಞ್ಞೋ ವಿಜಿತೇ ಸುತ್ತಕನ್ತಿಕಾ ಇತ್ಥಿಯೋ ಮಾ ಸುತ್ತಂ ಕನ್ತನ್ತೂತಿ ಭೇರಿಂ ಚರಾಪೇಥಾತಿ ವತ್ವಾ ಛತ್ತಂ ಉಸ್ಸಾಪೇತ್ವಾ ಅಲಙ್ಕತಪಟಿಯತ್ತೋ ಹತ್ಥಿಕ್ಖನ್ಧವರಗತೋ ನಗರಂ ಪವಿಸಿತ್ವಾ ಪಾಸಾದಮಭಿರುಯ್ಹ ಮಹಾಸಮ್ಪತ್ತಿಂ ಅನುಭವಿ. ಅಹೋ ತದಾ ಪಚ್ಚೇಕಬುದ್ಧಸ್ಸ ದಿನ್ನಾನುವಾತಕಸ್ಸ ವಿಪಾಕೋ. ತೇನಾಹು ಪೋರಾಣಾ.

೧೨.

ಯಥಾ ಸಾಸಪಮತ್ತಮ್ಹಾ, ಬೀಜಾ ನಿಗ್ರೋಧಪಾದಪೋ;

ಜಾಯತೇ ಸತಸಾಖಡ್ಢೋ, ಮಹಾನೀಲಮ್ಬುದೋಪಮೋ.

೧೩.

ತಥೇವ ಪುಞ್ಞಕಮ್ಮಮ್ಹಾ, ಅಣುಮ್ಹಾ ವಿಪುಲಂ ಫಲಂ;

ಹೋತೀತಿ ಅಪ್ಪಪುಞ್ಞನ್ತಿ, ನಾವಮಞ್ಞೇಯ್ಯ ಪಣ್ಡಿತೋತಿ.

ಏವಂ ಗಚ್ಛನ್ತೇ ಕಾಲೇ ಏಕದಿವಸಂ ದೇವೀ ರಞ್ಞೋ ಸಮ್ಪತ್ತಿಂ ದಿಸ್ವಾ ಅಹೋ ತಪಸ್ಸೀತಿ ಕಾರುಞ್ಞಾಕಾರಂ ದಸ್ಸೇಸಿ. ಕಿಮಿದಂ ದೇವೀತಿ ಚ ಪುಟ್ಠಾ ಅತಿಮಹತೀ ತೇ ದೇವ ಸಮ್ಪತ್ತಿ. ಅತೀತಮದ್ಧಾನಂ ಕಲ್ಯಾಣಂ ಕತತ್ತಾ. ಇದಾನಿ ಅನಾಗತಸ್ಸತ್ಥಾಯ ಕುಸಲಂ ಕರೋಥಾತಿ ಆಹ. ಕಸ್ಸ ದಸ್ಸಾಮ. ಸೀಲವನ್ತಾ ನತ್ಥೀತಿ. ಅಸುಞ್ಞೋ ದೇವ ಜಮ್ಬುದೀಪೋ ಅರಹನ್ತೇಹಿ, ತುಮ್ಹೇ ದಾನಂ ಸಜ್ಜೇಥ, ಅಹಂ ಅರಹನ್ತೇ ಲಚ್ಛಾಮೀತಿ ಆಹ. ಪುನದಿವಸೇ ರಾಜಾ ಮಹಾರಹಂ ದಾನಂ ಸಜ್ಜಾಪೇಸಿ. ದೇವೀ ಸಚೇ ಇಮಿಸ್ಸಾ ದಿಸಾಯ ಅರಹನ್ತೋ ಅತ್ಥಿ, ಇಧಾ ಗನ್ತ್ವಾ ಅಮ್ಹಾಕಂ ಭಿಕ್ಖಂ ಗಣ್ಹನ್ತೂತಿ ಉತ್ತರಹಿಮವನ್ತಾಭಿಮುಖೀ ಪುಪ್ಫಾನಿ ಉದ್ಧಂ ಖಿಪಿತ್ವಾ ಉರೇನ ನಿಪಜ್ಜಿ. ಅಥ ತಾನಿ ಪುಪ್ಫಾನಿ ಆಕಾಸತೋ ಗನ್ತ್ವಾ ಹಿಮವನ್ತಪದೇಸೇ ವಸನ್ತಾನಂ ಪದುಮವತಿಯಾ ಪುತ್ತಾನಂ ಪಞ್ಚಸತಾನಂಪಚ್ಚೇಕಬುದ್ಧಾನಂ ಜೇಟ್ಠಕಮಹಾಪದುಮಪಚ್ಚೇಕಬುದ್ಧಸ್ಸ ಪಾದಮೂಲೇ ಪತಿಂಸು. ತಥಾಹಿ.

೧೪.

ಅಹೋ ¶ ಪಸ್ಸಥ ಭೋ ದಾನಿ, ವಿಮ್ಹಯಂ ಪುಞ್ಞಕಮ್ಮುನೋ;

ಅಚೇತನಾಪಿ ಪುಪ್ಫಾನಿ, ದೂತಕಿಚ್ಚೇಸು ಬ್ಯಾವಟಾ.

೧೫.

ಕತ್ತುಕಾಮೇನ ಲೋಕಸ್ಮಿಂ, ಸಕಲಂ ಅತ್ತನೋ ವಸಂ;

ಸಬ್ಬತ್ಥಾಮೇನ ಕತ್ತಬ್ಬಂ, ಪುಞ್ಞಂ ಪಞ್ಞವತಾ ಸದಾತಿ.

ತತೋ ಮಹಾಪದುಮಪಚ್ಚೇಕಬುದ್ಧೋ ತಂ ಞತ್ವಾ ಸೇಸಭಾತರೇ ಆಮನ್ತೇಸಿ. ಮಾರಿಸಾ ನನ್ದಿಯರಾಜಾ ತುಮ್ಹೇ ನಿಮನ್ತೇಸಿ. ಅಧಿವಾಸೇಥ ತಸ್ಸ ನಿಮನ್ತನನ್ತಿ. ತೇ ಅಧಿವಾಸೇತ್ವಾ ತಾವದೇವ ಆಕಾಸೇನಾ ಗನ್ತ್ವಾ ಉತ್ತರದ್ವಾರೇ ಓತರಿಂಸು. ಮನುಸ್ಸಾ ಪಞ್ಚಸತಾ ದೇವ ಪಚ್ಚೇಕಬುದ್ಧಾ ಆಗತಾತಿ ರಞ್ಞೋ ಆರೋಚೇಸುಂ, ರಾಜಾ ಸದ್ಧಿಂ ದೇವಿಯಾ ಗನ್ತ್ವಾ ವನ್ದಿತ್ವಾ ಪತ್ತೇ ಗಹೇತ್ವಾ ಪಚ್ಚೇಕಬುದ್ಧೇ ಪಾಸಾದಂ ಆರೋಪೇತ್ವಾ ತತ್ಥ ತೇಸಂ ದಾನಂ ದತ್ವಾ ಭತ್ತಕಿಚ್ಚಾವಸಾನೇ ರಾಜಾ ಸಙ್ಘತ್ಥೇರಸ್ಸ ದೇವೀ ಸಙ್ಘನವಕಸ್ಸ ಚ ಪಾದಮೂಲೇ ನಿಪಜ್ಜಿತ್ವಾ ಅಯ್ಯಾ ಪಚ್ಚಯೇಹಿ ನ ಕಿಲಮಿಸ್ಸನ್ತು, ಮಯಂ ಪುಞ್ಞೇನ ನ ಹಾಯಿಸ್ಸಾಮ, ಅಮ್ಹಾಕಂ ಇಧ ವಾಸಾಯ ಪಟಿಞ್ಞಂ ದೇಥಾತಿ ಪಟಿಞ್ಞಂ ಕಾರೇತ್ವಾ ಉಯ್ಯಾನೇ ನಿವಾಸಟ್ಠಾನಾದಯೋ ಕಾರೇತ್ವಾ ಯಾವಜೀವಂ ಪಚ್ಚಕಬುದ್ಧೇ ಉಪಟ್ಠಹಿತ್ವಾ ತೇಸು ಪರಿನಿಬ್ಬುತೇಸು ಸಾಧುಕೀಳನಂ ಕಾರೇತ್ವಾ ಚನ್ದನಾ ಗರುಆದೀಹಿ ಸರೀರಕಿಚ್ಚಂ ಕಾರೇತ್ವಾ ಧಾತುಯೋ ಗಹೇತ್ವಾ ಚೇತಿಯಂ ಪತಿಟ್ಠಾಪೇತ್ವಾ ಏವರೂಪಾನಮ್ಪಿ ಮಹಾನುಭಾವಾನಂ ಮಹೇಸೀನಂ ಮರಣಂ ಭವಿಸ್ಸತಿ, ಕಿಮಙ್ಗಂ ಪನ ಮಾದಿಸಾನನ್ತಿ ಸಂವೇಗಜಾತೋ ಜೇಟ್ಠಪುತ್ತಂ ರಜ್ಜೇ ಪತಿಟ್ಠಾಪೇತ್ವಾ ಸಯಂ ಪಬ್ಬಜಂ ಪಬ್ಬಜಿ, ದೇವೀಪಿ ರಞ್ಞೇ ಪಬ್ಬಜಿತೇ ಅಹಂ ಕಿಂಕರಿಸ್ಸಾಮೀತಿ ಪಬ್ಬಜಿತ್ವಾ ದ್ವೇಪಿ ಉಯ್ಯಾನೇ ವಸನ್ತಾ ಝಾನಾಭಿಞ್ಞಂ ನಿಬ್ಬತ್ತೇತ್ವಾ ಝಾನಸುಖೇನ ವೀತಿನಾಮೇನ್ತಾ ಆಯುಪರಿಯೋಸಾನೇ ಬ್ರಹ್ಮಲೋಕೇ ನಿಬ್ಬತ್ತಿಂಸು. ತೇ ಅಮ್ಹಾಕಂ ಭಗವತೋ ಕಾಲೇ ಬ್ರಾಹ್ಮಣಕುಲೇ ನಿಬ್ಬತ್ತಿತ್ವಾ ಬುದ್ಧಸಾಸನೇ ಪಬ್ಬಜಿಂಸು, ತದಾ ನನ್ದಿಯರಾಜಾ ಧುತಙ್ಗಧರಾನಂ ಅಗ್ಗೋ ಮಹಾಕಸ್ಸಪತ್ಥೇರೋನಾಮ ಹುತ್ವಾ ಚನ್ದೋ ವಿಯ ಸುರಿಯೋ ವಿಯಚ ಲೋಕೇ ಪಾಕಟೋ ಹುತ್ವಾ ಭಗವತಿ ಪರಿ- ನಿಬ್ಬುತೇ ¶ ಬುದ್ಧಸಾಸನಂ ಅತಿವಿಯ ಸೋಭೇತಿ. ಭರಿಯಾಪಿಸ್ಸ ಭದ್ದಕಾಪಿಳಾನೀ ನಾಮ ಅಹೋಸೀತಿ.

೧೬.

ದತ್ವಾ ಪುರೇಕೋ ವಿಪಿನೇ ಚರನ್ತೋ,

ಪಚ್ಚೇಕಬುದ್ಧಸ್ಸನುವಾತಮತ್ತಂ;

ಕತ್ವಾ ಸರಟ್ಠಂ ಕುರುದೀಪಸೋಭಂ,

ಮಹಾನುಭಾವೋ ವಸುಧಾ ಧಿಪೋಸಿ.

೧೭.

ತುಮ್ಹೇಚ ಭೋನ್ತೋ ಖಲು ಸೀಲವನ್ತೇ,

ದದಾಥ ದಾನಾನಿ ಅನಪ್ಪಕಾನಿ;

ತಂ ವೋ ಪತಿಟ್ಠಾಚ ಭವನ್ತರಸ್ಮಿಂ,

ಚಿನ್ತಾಮಣಿಂ ಕಪ್ಪತರುಂವ ಸಾರನ್ತಿ.

ನನ್ದಿಯರಾಜಸ್ಸ ವತ್ಥುಂ ಪಥಮಂ.

೧೨. ಅಞ್ಞತರಮನುಸ್ಸಸ್ಸ ವತ್ಥುಮ್ಹಿ ಅಯಮಾನುಪುಬ್ಬೀಕಥಾ

ಅಮ್ಹಾಕಂ ಭಗವತಿ ಪರಿನಿಬ್ಬುತೇ ಪಾಟಲಿಪುತ್ತಸಮೀಪೇ ಅಞ್ಞತರಸ್ಮಿಂ ಗಾಮೇ ಅಞ್ಞತರೋ ದುಗ್ಗತಮನುಸ್ಸೋ ವಸತಿ, ಸೋ ಪನೇಕದಿವಸಂ ಅಞ್ಞತರಂ ಗಾಮಂ ಗಚ್ಛನ್ತೋ ದ್ವೇ ಸಾಟಕೇ ನಿವಾಸೇತ್ವಾ ಮಹನ್ತಂ ಅಟವಿಂಪಾಪುಣಿ, ತದೇವಂ ಗಚ್ಛನ್ತಂ ದಿಸ್ವಾ ಏತಸ್ಸ ವತ್ಥಂ ಗಣ್ಹಿಸ್ಸಾಮೀತಿ ಏಕೋ ಚೋರೋ ಅನುಬನ್ಧಿ, ಸೋ ದೂರತೋವ ಆಗಚ್ಛನ್ತಂ ಚೋರಂ ದಿಸ್ವಾ ಚಿನ್ತೇಸಿ, ಅಹಮೇತಸ್ಮಾ ಪಲಾಯಿತುಂ ವಾ ತೇನ ಸದ್ಧಿಂಯುಜ್ಝಿತುಂ ವಾ ನ ಸಕ್ಕೋಮಿ, ಅಯಮಾಗನ್ತ್ವಾ ಅವಸ್ಸಂ ಅನಿಚ್ಛನ್ತಸ್ಸಾಪಿ ಮೇ ವತ್ಥಂ ಗಣ್ಹಿಸ್ಸತಿ. ಮಯಾಪಿಸ್ಸ ನಿರತ್ಥಕೇನ ಹರಿತುಂ ನ ಸಕ್ಕಾ, ದಾನವಸೇನಸ್ಸ ದಸ್ಸಾಮೀತಿ ಸನ್ನಿಟ್ಠಾನ ಮಕಾಸಿ, ಅಥ ಚೋರೋ ಆಗನ್ತ್ವಾ ವತ್ಥಕಂ ಪರಾಮಸಿ, ಅಥ ಸೋ ಪುರಿಸೋ ಚಿತ್ತಂ ಪಸಾದೇತ್ವಾ ಇಮಂ ಮಮ ವತ್ಥದಾನಂ ಭವಭೋಗಸುಖತ್ಥಾಯ ಪಚ್ಚಯೋ ಹೋತೂತಿ ವತ್ಥಂ ದತ್ವಾ ದುಚ್ಛಾದಿತತ್ತಾ ಮಹಾಮಗ್ಗಂ ಪಹಾಯ ಅಞ್ಞೇನ ಜಙ್ಘಾಮಗ್ಗೇನ ಗಚ್ಛನ್ತೋ ಆಸಿವಿಸೇನ ದಟ್ಠೋ ಕಾಲಂ ಕತ್ವಾ ಹಿಮವನ್ತಪ್ಪದೇಸೇ ¶ ದ್ವಾದಸಯೋಜನಿಕೇ ಕನಕವಿಮಾನೇ ನೇಕಚ್ಛರಾಸಹಸ್ಸಪರಿವುತೋ ನಿಬ್ಬತ್ತಿ. ವಿಮಾನಂ ಪನಸ್ಸ ಪರಿವಾರೇತ್ವಾ ತಿಯೋಜನಿಕೇ ಠಾನೇ ಕಪ್ಪರುಕ್ಖಾ ನಿಬ್ಬತ್ತಿಂಸು, ಸೋ ಮಹನ್ತಂ ದಿಬ್ಬಸಮ್ಪತ್ತಿಂ ದಿಸ್ವಾ ಸೋಮನಸ್ಸಂ ಪವೇದೇನ್ತೋ ಆಹ.

೧.

ಪರಿಣಾಮಿತಮತ್ತೇನ, ದಾನಸ್ಸ ಸಕಸನ್ತಕಂ;

ದದಾತಿ ವಿಪುಲಂ ಭೋಗಂ, ದಿಬ್ಬಮಿಸ್ಸರಿಯಂ ವರಂ.

೨.

ದ್ವಾದಸಯೋಜನುಬ್ಬೇಧಂ, ದುದ್ದಿಕ್ಖಂ ಚಕ್ಖುಮೂಸನಂ;

ಕೂಟಾ ಗಾರವರುಪೇತಂ, ಸಬ್ಬಸೋವಣ್ಣಯಂ ಸುಭಂ.

೩.

ಮಮ ಪುಞ್ಞೇನ ನಿಬ್ಬತ್ತಂ, ನೇಕರಾಗದ್ಧಜಾಕುಲಂ,

ತಥೇವ ಪರಿಸುದ್ಧೇಹಿ, ವಿತಾನೇಹಿ ಚ ಲಙ್ಕತಂ.

೪.

ಪಾಸಾದಪರಿಯನ್ತಮ್ಹಿ, ದಿಬ್ಬವತ್ಥಾನಿ ಲಮ್ಬರೇ;

ವಾತೇರಿತಾ ತೇ ಸೋಭನ್ತಿ, ಅವ್ಹೇನ್ತಾವ ಸುಧಾಸಿನೋ.

೫.

ಪಾಸಾದಸ್ಸ ಸಮನ್ತಾ ಮೇ, ಭೂಮಿಭಾಗೇ ತಿಯೋಜನೇ;

ಇಚ್ಛಿತಿಚ್ಛಿತದಾತಾರೋ, ಜಾತಾಸುಂ ಸುರಪಾದಪಾ.

೬.

ತತ್ಥ ನಚ್ಚೇಹಿ ಗೀತೇಹಿ, ವಾದೇಹಿ ತುರಿಯೇಹಿ ಚ;

ನೇ ಕಚ್ಛರಾಸಹಸ್ಸೇಹಿ, ಮೋದಾಮಿ ಭವನೇ ಮಮ.

೭.

ನ ಸಮ್ಮಾ ದಿನ್ನವತ್ಥಸ್ಸ, ಅಕ್ಖೇತ್ತೇ ಫಲಮೀ ದಿಸಂ;

ಖೇತ್ತೇ ಸಮ್ಮಾ ದದನ್ತಸ್ಸ, ಕೋ ಫಲಂ ವಣ್ಣಯಿಸ್ಸತೀತಿ.

೮.

ಏವಂ ವಿಧಮ್ಪಿ ಕುಸಲಂ ಮನುಜೋ ಕರಿತ್ವಾ,

ಪಪ್ಪೋತಿ ದಿಬ್ಬವಿಭವಂ ಮುನಿವಣ್ಣನೀಯಂ;

ಮನ್ತ್ವಾನ ಭೋ ದದಥ ದಾನವರಂ ಸುಸೀಲೇ,

ಸದ್ಧಾಯ ಸುದ್ಧಮನಸಾಸ್ಸ ವಿಸೇಸಭಾಗೀತಿ.

ಅಞ್ಞತರಮನುಸ್ಸಸ್ಸ ವತ್ಥುಂ ದುತಿಯಂ.

೧೩. ವಿಸಮಲೋಮಕುಮಾರಸ್ಸ ವತ್ಥುಮ್ಹಿ ಅಯಮಾನುಪುಬ್ಬೀಕಥಾ

ಅತೀತೇ ¶ ಕಿರ ಇಮಸ್ಮಿಂ ಜಮ್ಬುದೀಪೇ ಕಸ್ಸಪೋ ನಾಮ ಸಮ್ಮಾಸಮ್ಬುದ್ಧೋ ಪಾರಮಿಯೋ ಪೂರೇತ್ವಾ ಸಬ್ಬಞ್ಞುತಂ ಪತ್ತೋ ಲೋಕಸ್ಸ ದುಕ್ಖಾಪನುದೋ ಸುಖಾವಹೋ ಪಟಿವಸತಿ ಲೋಕಂ ನಿಬ್ಬಾಣಮಹಾನಗರವರೇ ಪರಿಪೂರೇನ್ತೋ. ತಸ್ಮಿಂ ಸಮಯೇ ಅಞ್ಞತರೋ ಪುರಿಸೋ ಸತ್ಥು ಧಮ್ಮದೇಸನಂ ಸುತ್ವಾ ಪಸನ್ನೋ ಭಿಕ್ಖುಸಙ್ಘಸ್ಸ ದಾನಂ ದೇನ್ತೋ ಸೀಲಂ ರಕ್ಖನ್ತೋ ಉಪೋಸಥಕಮ್ಮಂ ಕರೋನ್ತೋ ನಾನಾವಿಧಾನಿ ಪುಞ್ಞಕಮ್ಮಾನಿ ಕತ್ವಾ ಸುತ್ತಪ್ಪಬುದ್ಧೋವಿಯ ಗನ್ತ್ವಾ ದೇವಲೋಕೇ ನಿಬ್ಬತ್ತಿ ಸಬ್ಬರತನಮಯೇ ದಿಬ್ಬವಿಧಾನೇ ದೇವಚ್ಛರಾಸಹಸ್ಸಪರಿವುತೋ. ತತ್ಥ ಯಾವತಾಯುಕಂ ಠತ್ವಾ ತತೋ ಚುತೋ ಅಮ್ಹಾಕಂ ಭಗವತಿ ಪರಿನಿಬ್ಬುತೇ ಜಮ್ಬುದೀಪೇ ಪಾಟಲಿಪುತ್ತನಗರೇ ಆಣಾಚಕ್ಕವತ್ತಿಧಮ್ಮಾಸೋಕಮಹಾನರಿನ್ದಸ್ಸ ಅಗ್ಗಮಹೇಸಿಯಾ ಕುಚ್ಛಿಮ್ಹಿ ನಿಬ್ಬತ್ತಿ. ತಸ್ಸ ನಾಮಂ ಕರೋನ್ತೋ ಸೀಸೇ ಲೋಮಂ ವಿಸಮಂ ಹುತ್ವಾ ಜಾತತ್ಥಾ ವಿಸಮಲೋಮಕುಮಾರೋತಿ ಸಞ್ಜಾನಿಂಸು. ಸೋ ಕಮೇನ ವಿಞ್ಞುತಂ ಪತ್ತೋ ಬಲಸಮ್ಪನ್ನೋ ಅಹೋಸಿ. ಮಹಾಥಾಮೋ ಅಭಿರೂಪೋಚ ಅಹೋಸಿ. ದಸ್ಸನೀಯೋ ಪಾಸಾದಿಕೋ ಯಸಪರಿವಾರಸಮ್ಪನ್ನೋ ಪಟಿವಸತಿ. ತತೋ ಅಪರೇನ ಸಮಯೇನ ಧಮ್ಮಾಸೋಕಮಹಾನರಿನ್ದೋ ಚತುರಾಸೀತಿಸಹಸ್ಸರಾಜಪರಿವುತೋ ಅನನ್ತಬಲವಾಹನೋ ಕೀ ಳಾ ಪ ರೋ ಹಿಮವನ್ತಂ ಗನ್ತ್ವಾ ಯಥಾಭಿರನ್ತಂ ಕೀಳಿತ್ವಾ ಆಗಚ್ಛನ್ತೋ ಚನ್ದಭಾಗಂ ನಾಮ ಗಙ್ಗಂ ಸಮ್ಪಾಪುಣಿ. ಸಾ ಪನ ಯೋಜನವಿತ್ಥತಾ ತಿಗಾವುತಗಮ್ಭೀರಾ ಅಹೋಸಿ. ತದಾ ಸಾ ಅಧುನಾಗತೇಹಿ ಓಘೇಹಿ ಮಹಾಫೇಣಸಮಾಕುಲಾ ಬಹೂಮಿಯೋ ಉಭೋಕೂಲೇ ಉತ್ತರನ್ತೀ ಮಹಾವೇಗಾ [ಮಹಾವೇಗಾಗಚ್ಛನ್ತೀ ಇತಿಸಬ್ಬತ್ಥ] ಗಚ್ಛನ್ತಿ. ತದಾ ರಾಜಾ ಗಙ್ಗಂ ದಿಸ್ವಾ ಕೋ ನಾಮೇತ್ಥ ಪುರಿಸೋ ಏವಂವಿಧಂ ಮಹಾಗಙ್ಗಂ ತರಿತುಂ ಸಮತ್ಥೋ ಭವಿಸ್ಸತೀತಿ ಆಹ. ತಂ ಸುತ್ವಾ ವಿಸಮಲೋಮ ಕುಮಾರೋ ಆಗನ್ತ್ವಾ ವನ್ದಿತ್ವಾ ಅಹಂ ದೇವ ಗಙ್ಗಂ ತರಿತ್ವಾ ಗನ್ತುಞ್ಚ ಆಗನ್ತುಞ್ಚ ಸಕ್ಕೋಮೀತಿ ಆಹ. ರಾಜಾ ಸಾಧೂತಿ ಸಮ್ಪಟಿಚ್ಛಿ. ಅಥ ಕುಮಾರೋ ಗಾಳ್ಹಂ ನಿವಾಸೇತ್ವಾ ಮಕರದನ್ತಿಯಾ ¶ ಕೇಸೇ ಬನ್ಧಿತ್ವಾ ಗಙ್ಗಾಕೂಲೇ ಠಿತೋ ಅಟ್ಠಾರಸಹತ್ಥಂ ಅಬ್ಭುಗ್ಗನ್ತ್ವಾ ಉಸಭಮತ್ತಟ್ಠಾನೇ ಪತಿತ್ವಾ ತರಿತು ಮಾರಭಿ. ತತೋ ಚಣ್ಡಸೋತಂ ಛಿನ್ದಿತ್ವಾ ತರನ್ತೋ ಗಮನಾ ಗಮನಕಾಲೇ ಗಣ್ಹನತ್ಥಾಯ ಆಗತೇ ಚಣ್ಡಸುಂಸುಮಾರೇ ಪಾಣಿನಾ ಪಹರಿತ್ವಾ ಚುಣ್ಣವಿಚುಣ್ಣಂ ಕರೋನ್ತೋ ವೀಸಸತಂ ಮಾರೇತ್ವಾ ಉತ್ತಾರೇತ್ವಾ ತಲಮುಗ್ಗಮ್ಮ ರಾಜಾನಂ ವನ್ದಿತ್ವಾ ಅಟ್ಠಾಸಿ. ರಾಜಾ ತಂ ಕಾರಣಂ ದಿಸ್ವಾ ಭಯಪ್ಪತ್ತೋ ಏಸೋ ಖೋ ಮಂ ಮಾರೇತ್ವಾ ರಜ್ಜಮ್ಪಿ ಗಹಿತುಂ ಸಮತ್ಥೋ. ಏತಂ ಮಾರೇತುಂ ವಟ್ಟತೀತಿ ಚಿನ್ತೇತ್ವಾ ನಗರಂ ಸಮ್ಪತ್ತೋ ಕುಮಾರಂ ಪಕ್ಕೋಸಾಪೇತ್ವಾ ಅಮಚ್ಚೇ ಆಹ. ಇಮಂ ಭಣೇ ಬನ್ಧನಾಗಾರೇ ಕರೋಥಾತಿ. ತೇ ತಥಾ ಕರಿಂಸು, ಅಥಸ್ಸ ಬನ್ಧನಾಗಾರೇ ವಸನ್ತಸ್ಸ ಚತ್ತಾರೋ ಮಾಸಾ ಅತಿಕ್ಕನ್ತಾ. ತತೋ ರಾಜಾ ಚತುಮಾಸಚ್ಚಯೇನ ದೀಘತೋ ಸಟ್ಠಿಹತ್ಥಪ್ಪಮಾಣೇ ಸಟ್ಠಿವೇಳುಕಲಾಪೇ ಆಹರಾಪೇತ್ವಾ ಗಣ್ಠಿಯೋ ಸೋಧಾಪೇತ್ವಾ ಅನ್ತೋ ಅಯೋಸಾರಂ ಪೂರೇತ್ವಾ ರಾಜಙ್ಗಣೇ ಠಪಾಪೇತ್ವಾ ವಿಸಮಲೋಮಕುಮಾರಂ ಬನ್ಧನಾಗಾರತೋ ಆಹಾರಾಪೇತ್ವಾ [ಆಣಾಪೇತ್ವಾ ಇತಿಸಬ್ಬತ್ಥ] ಅಮಚ್ಚೇ ಏವಮಾಹ. ಭಣೇ ಸ್ವಾಯಂ ಕುಮಾರೋ ಇಮಿನಾ ಖಗ್ಗೇನ ಇಮೇ ವೇಳುಕಲಾಪೇ ಚತುರಙ್ಗುಲಂ ಕತ್ವಾ ಛಿನ್ದತು. ನೋ ಚೇ ಛಿನ್ದಿತುಂ ಸಕ್ಕೋತಿ. ತಂ ಮಾರೇಥಾತಿ ಆಹ, ತಂ ಸುತ್ವಾ ಕುಮಾರೋ ಅಹಂ ಬನ್ಧನಾಗಾರೇ ಚಿ ರ ವು ತ್ಥೋ ಜಿಘಚ್ಛಾಪೀಳಿತೋ ಆಹಾರೇನ ಕಿಲಮಿಂ, ಯನ್ನೂನಾಹಂ ಆಹಾರಂ ಭುಞ್ಚಿತ್ವಾ ಛಿನ್ದೇಯ್ಯನ್ತಿ. ತೇ ನತ್ಥಿ ದಾನಿ ತುಯ್ಹಂ ಆಹಾರನ್ತಿ ಆಹಂಸು. ತೇನಹಿ ಪೋಕ್ಖರಣಿಯಾ ಪಾನೀಯಂ ಪಿವಿಸ್ಸಾಮೀತಿ ಆಹ. ತೇ ಸಾಧೂತಿ ಪೋಕ್ಖರಣಿಂ ನೇಸುಂ. ಕುಮಾರೋ ಪೋಕ್ಖರಣಿಂ ಓತರಿತ್ವಾ ನಹಾಯಿತ್ವಾ ನಿಮುಗ್ಗೋ ಯಾವದತ್ಥಂ ಕಲಲಂ ಭುಞ್ಚಿತ್ವಾ ಪಾನೀಯಂ ಪಿವಿತ್ವಾ ಉಟ್ಠಾಯ ಅಸಿಪತ್ತಂ ಗಹೇತ್ವಾ ಮಹಾಜನಾನಂ [ಮಹಾಜನಾನಂಪಸ್ಸನ್ತಮೇವ ಇತಿಸಬ್ಬತ್ಥ] ಪಸ್ಸನ್ತಾನಮೇವ ಅಟ್ಠಾಸೀತಿಹತ್ಥಟ್ಠಾನಂ ಆಕಾಸಂ ಉಲ್ಲಙ್ಘಿತ್ವಾ ಸಬ್ಬವೇಳುಕಲಾಪೇ ಚತುರಙ್ಗುಲಮತ್ತೇನ ಖಣ್ಡಾಖಣ್ಡಂ ಕುರುಮಾನೋ ಓತರಿತ್ವಾ ಮೂಲೇ ಥೂಲಅಯಸಲಾಕಂ ಪತ್ವಾ ಕಿಣೀತಿ ಸದ್ದಂ ಸುತ್ವಾ ಅಸಿಪತ್ತಂ ವಿಸ್ಸಜ್ಜೇತ್ವಾ ರೋದಮಾನೋ ಅಟ್ಠಾಸಿ. ತತೋ ರಾಜಪುರಿಸೇಹಿ ಕಿಮತ್ತಂ ರೋದಸೀತಿ ವುತ್ತೇ ¶ ಏತ್ತಕಾನಂ ಪುರಿಸಾನಮನ್ತರೇ ಮಯ್ಹಂ ಏಕೋಪಿ ಸುಹದೋ ನತ್ತಿ. ಸಚೇ ಭವೇಯ್ಯ, ಇಮೇಸಂ ವೇಳುಕಲಾಪಾನಮನ್ತರೇ ಅಯೋ ಸಾರಂ ಅತ್ಥಿಭಾವಂ ಕಥೇಯ್ಯ, ಅಹಂ ಪನ ಜಾನಮಾನೋ ಇಮೇ ವೇಳು ಕಲಾಪೇ ಅಙ್ಗುಲಙ್ಗುಲೇಸು ಛಿನ್ದೇಯ್ಯನ್ತಿ ಆಹ. ತತೋ ರಾಜಾ ಕುಮಾರೇನ ಕತಕಮ್ಮಂ ಓಲೋಕೇತ್ವಾ ಪಸನ್ನೋ ಉಪರಾಜಟ್ಠಾನಂ ಬಹುಞ್ಚ ವಿಭವಂ ದಾಪೇಸಿ, ಏವಮಸ್ಸ ಬಲಸಮ್ಪತ್ತಿಲಾಭೋ ನಾಮ ನ ಜಾತಿಗೋತ್ತಕುಲಪದೇಸಾದೀನಂ ಬಲಂ. ನ ಪಾಣಾತಿಪಾತಾದಿದುಚ್ಚರಿತಾನಂ ಬಲಂ. ಕಸ್ಸೇತಂ ಬಲನ್ತಿ. ಕಸ್ಸಪಸಮ್ಮಾಸಮ್ಬುದ್ಧಕಾಲೇ ಭಿಕ್ಖುಸಙ್ಘಸ್ಸ ದಿನ್ನದಾನಾದಿಸುಚರಿತಕಮ್ಮವಿಪಾಕಂ. ತೇನ ವುತ್ತಂ.

೧.

ಕಸ್ಸಪಸ್ಸ ಮುನಿನ್ದಸ್ಸ, ಕಾಲೇ ಅಞ್ಞತರೋ ನರೋ;

ಸಮ್ಬುದ್ಧಮುಪಸಂಕಮ್ಮ, ಸುತ್ವಾ ಧಮ್ಮಂ ಸುದೇಸಿತಂ.

೨.

ಪಟಿಲದ್ಧಸದ್ಧೋ ಹುತ್ವಾ, ಸೀಲವನ್ತಾನ ಭಿಕ್ಖುನಂ;

ಮಧುರನ್ನಪಾನೇ ಪಚುರೇ, ಅದಾಸಿ ಸುಮನೋ ತದಾ.

೩.

ಅದಾಸಿ ಚೀವರೇ ಪತ್ತೇ, ತಥೇವ ಕಾಯಬನ್ಧನೇ;

ಅದಾ ಖೀರಸಲಾಕಞ್ಚ, ಬಹೂ ಕತ್ತರಯಟ್ಠಿಯೋ.

೪.

ಅದಾ ಸುಪಸ್ಸಯಂ ದಾನಂ, ಮಞ್ಚಪೀಠಾದಿಕಂ ತಥಾ;

ಪಾವಾರ ಕಮ್ಬಲಾದೀನಿ, ಅದಾ ಸೀತನಿವಾರಣೇ.

೫.

ಅದಾ ಭೇಸಜ್ಜದಾನಾನಿ, ಆರೋಗ್ಯತ್ಥಾಯ ಭಿಕ್ಖುನಂ;

ಏವಂ ನಾನಾವಿಧಂ ಪುಞ್ಞಂ, ಕತ್ವಾನ ತಿದಿವಂ ಗತೋ.

೬.

ತತ್ಥ ದಿಬ್ಬವಿಮಾನಮ್ಹಿ, ಉಪ್ಪನ್ನೋ ಸೋ ಮಹಿದ್ಧಿಕೋ;

ದೇವಚ್ಛರಾಪರಿವುತೋ, ದೇವಸೇನಾಪುರಕ್ಖತೋ.

೭.

ದಿಬ್ಬೇಹಿ ನಚ್ಚಗೀತೇಹಿ, ದಿಬ್ಬವಾದಿತತನ್ತಿಹಿ;

ಮೋದಮಾನೋ ಅನೇಕೇಹಿ, ದಿಬ್ಬಸಮ್ಪತ್ತಿಯಾ ಸಹ.

೮.

ಯಾವತಾಯುಂ ತಹಿಂ ಠತ್ವಾ, ಜಮ್ಬುದೀಪೇ ಮನೋರಮೇ;

ಪುರೇ ಪಾಟಲಿಪುತ್ತಮ್ಹಿ, ಧಮ್ಮಾಸೋಕಸ್ಸ ರಾಜಿನೋ.

೯.

ಪುತ್ತೋ ¶ ಹುತ್ವಾನ ನಿಬ್ಬತ್ತಿ, ಮಹಾಥಾಮೋ ಮಹಾಬಲೋ;

ಮಹಾಯಸೋ ಮಹಾಭೋಗೋ, ಆಸಿ ಬುದ್ಧಾದಿಮಾಮಕೋ.

೧೦.

ಕಾತಬ್ಬಂ ಕುಸಲಂ ತಸ್ಮಾ, ಭವಸಮ್ಪತ್ತಿ ಮಿಚ್ಛತಾ;

ಪಾಲೇತಬ್ಬ ಮಥೋ ಸೀಲಂ, ಭಾವೇತಬ್ಬಞ್ಚ ಭಾವನನ್ತಿ.

ತತೋ ಕುಮಾರೋ ಉಪರಾಜಟ್ಠಾನಂ ಲಭಿತ್ವಾ ಸಮ್ಪತ್ತಿಂಅನುಭವಮಾನೋ ಮೋಗ್ಗಲಿಪುತ್ತತಿಸ್ಸತ್ಥೇರಮಾದಿಂ ಕತ್ವಾ ಮಹಾಭಿಕ್ಖುಸಙ್ಘಸ್ಸ ಚೀವರಪಿಣ್ಡಪಾತಸೇನಾಸನಗಿಲಾನಪಚ್ಚಯದಾನಾ ದಿವಸೇನ ಸಕ್ಕಾರಂ ಕತ್ವಾ ಸೀಲಂ ರಕ್ಖಿತ್ವಾ ಉಪೋಸಥಕಮ್ಮಂ ಕತ್ವಾ ಆಯುಪರಿಯೋಸಾನೇ ಯಥಾಕಮ್ಮಂ ಗತೋತಿ.

೧೧.

ಏವಂವಿಧಂ ಸುಚರಿತಂ ಸುಮನೋ ಕರಿತ್ವಾ,

ಭಾಗಿಸ್ಸ ನೇಕವಿಭವಸ್ಸ ಭವಾಭವೇಸು;

ತುಮ್ಹೇಪಿ ಭೋ ಸುಚರಿತಂ ವಿಭವಾನುರೂಪಂ,

ಕತ್ವಾನ ನಿಬ್ಬುತಿಪದಂ ಕರಗಂ ಕರೋಥಾತಿ.

ವಿಸಮಲೋಮಕುಮಾರಸ್ಸ ವತ್ಥುಂ ತತಿಯಂ.

೧೪. ಕಞ್ಚನದೇವಿಯಾ ವತ್ಥುಮ್ಹಿ ಅಯಮಾನುಪುಬ್ಬೀಕಥಾ

ಜಮ್ಬುದೀಪೇ ಕಿರ ದೇವಪುತ್ತನಗರಂ ನಾಮ ದಸ್ಸನೀಯಂ ಏಕಂ ನಗರಂ ಅಹೋಸಿ. ತಸ್ಮಿಂ ಸಮಯೇ ಮನುಸ್ಸಾ ಯೇಭುಯ್ಯೇನ ಪತ್ತಮಹಂ ನಾಮ ಪೂಜಂ ಕರೋನ್ತಿ, ಭಗವತಾ ಪರಿಭುತ್ತಪತ್ತಂ ಗಹೇತ್ವಾ ಕತಾನೇಕಪೂಜಾವಿಧಾನಾ ಉಸ್ಸವಂ ಕರೋನ್ತಿ. ತಂ ಪತ್ತಮಹನ್ತಿ ವುಚ್ಚತಿ. ತಸ್ಮಿಂ ಸಮಯೇ ದೇವಪುತ್ತನಗರೇ ರಾಜಾ ಸಬ್ಬರತನಮಯಂ ರಥಂ ಸಬ್ಬಾಲಙ್ಕಾರೇಹಿ ಅಲಙ್ಕಾರಾಪೇತ್ವಾ ಕುಮುದಪತ್ತವಣ್ಣೇ ಚತ್ತಾರೋ ಸಿನ್ಧವೇ ಯೋಜೇತ್ವಾ ಸುಸಿಕ್ಖಿತಸಿಪ್ಪಾಚರಿಯೇಹಿ ಸತ್ತರತನಪರಿನಿಟ್ಠಿತೇ ಅಸೀತಿಹತ್ಥವೇಳಗ್ಗೇ ಸತ್ಥುನಾ ಪರಿಭುತ್ತಂ ಸೇಲಮಯಪತ್ತಂ ಮುತ್ತಾಜಾಲಾದೀಹಿ ಅಲಙ್ಕರಿತ್ವಾ ವೇಳಗ್ಗಂ ಆರೋಪೇತ್ವಾ ವೇಳುಂ ¶ ರಥೇ ಠಪಾಪೇತ್ವಾ ನಗರಂ ದೇವನಗರಂ ವಿಯ ಅಲಙ್ಕರಿತ್ವಾ ಧಜಪತಾಕಾದಯೋ ಉಸ್ಸಾಪೇತ್ವಾ ತೋರಣಗ್ಘ ಕಪನ್ತಿಯೋಚ ಪುಣ್ಣಘಟದೀಪಮಾಲಾದಯೋಚ ಪತಿಟ್ಠಾಪೇತ್ವಾ ಅನೇಕೇಹಿ ಪೂಜಾವಿಧಾನೇಹಿ ನಗರಂ ಪದಕ್ಖಿಣಂ ಕಾರೇತ್ವಾ ನಗರಮಜ್ಝೇ ಸುಸಜ್ಜಿತರತನಮಣ್ಡಪೇ ಪತ್ತಧಾತುಂ ಠಪೇತ್ವಾ ಸತ್ತಮೇ ದಿವಸೇ ಮಹಾಧಮ್ಮಸವಣಂ ಕಾರಾಪೇಸಿ. ತದಾ ತಸ್ಮಿಂ ಜನಪದೇ ಬಹೂ ಮನುಸ್ಸಾಚ ದೇವತಾಚ ಯಕ್ಖರಕ್ಖಸನಾಗಸುಪಣ್ಣಾದಯೋಚ ಮನುಸ್ಸವೇಸೇನ ಯೇಭುಯ್ಯೇನ ತಂ ಸಮಾಗಮಂ ಓತರನ್ತಿ, ಏವಮಚ್ಛರಿಯಂ ತಂ ಪೂಜಾವಿಧಾನಂ ಅಹೋಸಿ.

ತದಾ ಏಕೋ ನಾಗರಾಜಾ ಉತ್ತಮರೂಪಧರಂ ಅಗತಪುಬ್ಬಪುರಿಸಂ ಏಕಂ ಕುಮಾರಿಕಂ ಧಮ್ಮಪರಿಸನ್ತರೇ ನಿಸಿನ್ನಂ ದಿಸ್ವಾ ತಸ್ಸಾ ಪಟಿಬದ್ಧಚಿತ್ತೋ ಅನೇಕಾಕಾರೇಹಿ ತಂ ಯಾ ಚಿ ತ್ವಾ ತಸ್ಸಾ ಅಲದ್ಧಮಾನೋ ಕುಜ್ಝಿತ್ವಾ ನಾಸಾವಾತಂ ವಿಸ್ಸಜ್ಜೇಸಿ ಇಮಂ ಮಾರೇಸ್ಸಾಮೀತಿ. ತಂ ತಸ್ಸಾ ಸದ್ಧಾಬಲೇನ ಕಿಞ್ಚಿ ಉಪದ್ದವಂ ಕಾತುಂ ಸಮತ್ಥೋ ನಾಹೋಸಿ. ಅಥಸ್ಸಾ ನಾಗೋ ಪಾದತೋ ಪಟ್ಠಾಯ ಯಾವಸಕಲಸರೀರಂ ಭೋಗೇನ ವೇಠೇತ್ವಾ ಸೀಸೇ ಫಣಂ ಕತ್ವಾ ಭಾಯಾಪೇನ್ತೋ ಅಟ್ಠಾಸಿ. ಅನಞ್ಞವಿಹಿತಾಯ ತಾಯ ಧಮ್ಮಸವಣಬಲೇನ ಅಣುಮತ್ತಮ್ಪಿ ದುಕ್ಖಂ ನಾಹೋಸಿ. ಪಭಾತಾಯ ರತ್ತಿಯಾ ತಂ ದಿಸ್ವಾ ಮನುಸ್ಸಾ ಕಿಮೇತನ್ತಿ ಕಾರಣಂ ಪುಚ್ಛಿಂಸು, ಸಾಪಿ ತೇಸಂ ಕಥೇತ್ವಾ ಏವಂ ಸಚ್ಚಕಿರಿಯಮಕಾಸಿ. ತಥಾಹಿ.

೧.

ಬ್ರಹ್ಮಚಾರೀ ಅಹೋಸಾಹಂ, ಸಞ್ಜಾತಾ ಇಧ ಮಾನುಸೇ;

ತೇನ ಸಚ್ಚೇನ ಮಂ ನಾಗೋ, ಖಿಪ್ಪಮೇವ ಪಮುಞ್ಚತು.

೨.

ಕಾಮಾತುರಸ್ಸ ನಾಗಸ್ಸ, ನೋಕಾಸಮಕರಿಂಯತೋ;

ತೇನ ಸಚ್ಚೇನ ಮಂ ನಾಗೋ, ಖಿಪ್ಪಮೇವ ಮುಞ್ಚತು.

೩.

ವಿಸವಾತೇನ ಖಿತ್ತಸ್ಸ, ಕುಪಿತಸ್ಸೋರಗಸ್ಸಹಂ;

ಅಕುದ್ಧಾ ತೇನ ಸಚ್ಚೇನ, ಸೋ ಮಂ ಖಿಪ್ಪಂ ಪಮುಞ್ಚತು.

೪.

ಸದ್ಧಮ್ಮಂ ಸುಣಮಾನಾಹಂ, ಗರುಗಾರವಭತ್ತಿಯಾ;

ಅಸ್ಸೋಸಿಂ ತೇನ ಸಚ್ಚೇನ, ಖಿಪ್ಪಂ ನಾಗೋ ಪಮುಞ್ಚತು.

೫.

ಅಕ್ಖರಂವಾ ¶ ಪದಂವಾಪಿ, ಅವಿನಾಸೇತ್ವಾವ ಆದಿತೋ;

ಅಸ್ಸೋಸಿಂ ತೇನ ಸಚ್ಚೇನ, ಖಿಪ್ಪಂ ನಾಗೋ ಪಮುಞ್ಚತೂತಿ.

ಸಚ್ಚಕಿರಿಯಾವಸಾನೇ ನಾಗರಾಜಾ ತಸ್ಸಾ ಅತೀವ ಪಸನ್ನೋ ಭೋಗಂ ವಿನಿವೇಠೇತ್ವಾ ಫಣಸತಂ ಮಾಪೇತ್ವಾ ತಂ ಫಣಗಬ್ಭೇ ನಿಸೀದಾಪೇತ್ವಾ ಬಹೂಹಿ ನಾಗಮಾನವಕೇಹಿ ಸದ್ಧಿಂ ಉದಕಪೂಜಂ ನಾಮ ಪೂಜ ಮಕಾಸಿ, ತಂ ದಿಸ್ವಾ ಬಹೂ ನಗರವಾಸಿನೋ ಅಚ್ಛರಿಯಬ್ಭುತಜಾತಾ ಅಟ್ಠಾರಸಕೋಟಿಧನೇನ ಪೂಜ ಮಕಂಸು. ತಥಾಹಿ.

೬.

ನತ್ಥಿ ಸದ್ಧಾಸಮೋ ಲೋಕೇ, ಸುಹದೋ ಸಬ್ಬಕಾಮದೋ;

ಪಸ್ಸಥಸ್ಸಾ ಬಲಂ ಸದ್ಧಾ, ಪೂಜೇನ್ತೇವಂ ನರೋ ರಗಾ.

೭.

ಇಧ ಲೋಕೇವ ಸಾಲತ್ಥ, ಭವಭೋಗ ಮನಪ್ಪಕಂ;

ತಸ್ಮಾ ಸದ್ಧೇನ ಕಾತಬ್ಬಂ, ರತನತ್ತಯಗಾರವನ್ತಿ.

ಅಥೇವಂ ಸಾ ಪಟಿಲದ್ಧಮಹಾವಿಭವಾ ಯಾವಜೀವಂ ಕೋಮಾರಿಯ ಬ್ರಹ್ಮಚಾರಿಣೀ ಹುತ್ವಾ ಆಯುಪರಿಯೋಸಾನೇ ಕಾಲಂ ಕತ್ವಾ ತಸ್ಮಿಂಯೇವ ನಗರೇ ರಞ್ಞೋ ಅಗ್ಗಮಹೇಸಿಯಾ ಕುಚ್ಛಿಮ್ಹಿ ಪಟಿಸನ್ಧಿಂ ಗಣ್ಹಿತ್ವಾ ದಸಮಾಸಚ್ಚಯೇನ ಮಾತುಕುಚ್ಛಿತೋ ನಿಕ್ಖಮಿ. ನಿಕ್ಖನ್ತದಿವಸೇ ಪನಸ್ಸಾ ಸಕಲದೇವಪುತ್ತನಗರೇ ರತನವಸ್ಸಂ ವಸ್ಸಿ. ತೇನಸ್ಸಾ ಕಞ್ಜನದೇವೀತಿ ನಾಮಂ ಕರಿಂಸು. ಸಮನ್ತಪಾಸಾದಿಕಾ ಅಹೋಸಿ. ಅಭಿರೂಪಾ ದೇವಚ್ಛರಪಟಿಭಾಗಾ. ಮುಖತೋ ಉಪ್ಪಲಗನ್ಧೋ ವಾಯತಿ. ಸರೀರತೋ ಚನ್ದನಗನ್ಧೋ ವಾಯತಿ. ಸಕಲಸರೀರತೋ ಬಾಲಸುರಿಯೋ ವಿಯ ರಂಸಿಯೋ ನಿಚ್ಛಾರೇನ್ತೀ ಚತುರತನಗಬ್ಭೇ ಪದೀಪಕಿಚ್ಚಂ ನಾಮ ನತ್ಥಿ. ಸಬ್ಬೋ ಗಬ್ಭೋ ಸರೀರಾ ಲೋಕೇನ ಏಕೋ ಭಾಸೋ ಹೋತಿ, ತಸ್ಸಾ ರೂಪಸಮ್ಪತ್ತಿ ಸಕಲಜಮ್ಬುದೀಪೇ ಪಾಕಟಾ ಅಹೋಸಿ. ತತೋ ಸಕಲಜಮ್ಬುದೀಪವಾಸೀ ರಾಜಾನೋ ತಸ್ಸಾ ಅತ್ಥಾಯ ಪಿತುರಞ್ಞೋ ಪಣ್ಣಾಕಾರಾನಿ ಪಹಿಣಿಂಸು. ಸಾ ಪನ ಪಞ್ಚಕಾಮೇ ಅನನುಲಿತ್ತಾ ಪಿತರಂ ಅನುಜಾನಾಪೇತ್ವಾ ಭಿಕ್ಖುನೂ ಪಸ್ಸಯಂ ಗನ್ತ್ವಾ ಪಬ್ಬಜಿತ್ವಾ ವಿಪಸ್ಸನಂ ವಡ್ಢೇತ್ವಾ ಸಹ ಪಟಿಸಮ್ಭಿದಾಹಿ ಅರಹತ್ತಂ ಪಾಪುಣೀತಿ.

೮.

ಸುತ್ವಾನ ¶ ಸಾದರವಸೇನ ಕುಮಾರಿಕೇವಂ;

ಧಮ್ಮಞ್ಹಿ ಸೀಲಮಮಲಂ ಪರಿಪಾಲಯನ್ತೀ;

ಲದ್ಧಾನ ನೇಕವಿಭವಂ ವಿಭವಂ ಪಯಾತಾ,

ಮಾ ಭೋ ಪಮಜ್ಜಥ ಸದಾ ಕುಸಲಪ್ಪಯೋಗೇತಿ.

ಕಞ್ಚನದೇವಿಯಾ ವತ್ಥುಂ ಚತುತ್ಥಂ.

೧೫. ಬ್ಯಗ್ಘಸ್ಸ ವತ್ಥುಮ್ಹಿ ಅಯಮಾನುಪುಬ್ಬೀಕಥಾ

ಜಮ್ಬುದೀಪೇ ಚೂಲರಟ್ಠಾ ಸನ್ನೇ ಬಾರಾಣಸೀನಗರೇ ಏಕಂ ಪಂಸುಪಬ್ಬತಂ ವಿನಿವಿಜ್ಝಿತ್ವಾ ಮಹಾಮಗ್ಗೋ ಹೋತಿ, ತತ್ಥ ವೇಮಜ್ಝೇ ಏಕೋ ಬ್ಯಗ್ಘೋ ಅತ್ತನೋ ಅನ್ಧಪಿತರಂ ಪಬ್ಬತಗುಹಾಯಂ ಕತ್ವಾ ಪೋಸೇನ್ತೋ ವಸತಿ. ತಸ್ಸೇವ ಪಬ್ಬತಸ್ಸ ವನದ್ವಾರೇ ತುಣ್ಡಿಲೋ ನಾಮ ಏಕೋ ಸುವಪೋತಕೋ ರುಕ್ಖಸ್ಮಿಂ ವಸತಿ. ತೇ ಉಭೋಪಿ ಅಞ್ಞಮಞ್ಞಂ ಪಿಯಸಹಾಯಾ ಅಹೇಸುಂ, ತಸ್ಮಿಂ ಸಮಯೇ ಪಚ್ಚನ್ತಗಾಮವಾಸೀ ಏಕೋ ಮನುಸ್ಸೋ ಅತ್ತನೋ ಮಾತುಗಾಮೇನ ಸದ್ಧಿಂ ಕಲಹಂ ಕತ್ವಾ ಬಾರಾಣಸಿಂ ಗಚ್ಛನ್ತೋ ತಂ ವನದ್ವಾರಂ ಸಮ್ಪಾಪುಣಿ. ಅಥ ಸುವಪೋತಕೋ ಪರಿಹೀನತ್ತಭಾವಂ ದುಕ್ಖಿತಂ ತಂ ದಿಸ್ವಾ ಕಮ್ಪಮಾನಹದಯೋ ತಂ ಪಕ್ಕೋಸಿತ್ವಾ ಭೋ ಕುಹಿಂ ಗಚ್ಛಸೀತಿ ಆಹ, ತೇನ ಪರಖಣ್ಡಂ ಗಚ್ಛಾಮೀತಿ ವುತ್ತೇ ತುಣ್ಡಿಲೋ ಭೋ ಇಮಸ್ಮಿಂ ವನಖಣ್ಡಮಜ್ಝೇ ಏಕೋ ಬ್ಯಗ್ಘೋ ವಸತಿ. ಕಕ್ಖಲೋ ಫರುಸೋ ಸಮ್ಪತ್ತಸಮ್ಪತ್ತೇ ಮಾರೇತ್ವಾ ಖಾದತಿ. ಮಾ ತ್ವಂ ತೇನ ಗಚ್ಛಾತಿ ಆಹ. ಸ್ವಾಯಂ ದುಬ್ಭಗೋ ಮನುಸ್ಸೋ ಹಿತಕಾಮಸ್ಸ ತಸ್ಸ ವಚನಂ ಅನಾದಿಯಿತ್ವಾ ಗಚ್ಛಾಮೇವಾತಿ ಆಹ. ತುಣ್ಡಿಲೋ ತೇನಹಿ ಸಮ್ಮ ಯದಿ ಅನಿವತ್ತಮಾನೋ ಗಚ್ಛಸಿ. ಏಸೋ ಬ್ಯಗ್ಘೋ ಮಮ ಸಹಾಯೋ. ಮೇ ವಚನಂ ತವ ಸನ್ತಿಕಾ ಸುತ್ವಾ ನ ಗಣ್ಹಾತೀತಿ. ತಸ್ಸ ತಂ ಅನಾದಿಯನ್ತೋ ಸೋ ಸುವರಾಜೇ ಪದುಟ್ಠಚಿತ್ತೋ ಮುಗ್ಗರೇನ ಪಹರಿತ್ವಾ ಮಾರೇತ್ವಾ ಅರಣಿಂ ಅಗ್ಗಿಂ ಕತ್ವಾ ಮಂಸಂ ಖಾದಿ. ಅಸಪ್ಪುರಿಸಸಂಸಗ್ಗೋ ನಾಮೇ ಸ ಇಧ ಲೋಕಪರಲೋಕೇಸು ದುಕ್ಖಾವಹೋಯೇವ. ತಥಾಹಿ.

೧.

ಮಯಾ ¶ ಕತಂ ಮಯ್ಹಮಿದಂ, ಇತಿ ವೇಸ್ಸಾನರಂ ನರೋ;

ಸಮಾಲಿಙ್ಗತಿ ಸಪ್ಪೇಮೋ, ದಹತೇವಸ್ಸ ವಿಗ್ಗಹಂ.

೨.

ಮಧುಖೀರಾದಿದಾನೇನ, ಪೇಮಸಾ ಪರಿಪಾಲಿತೋ;

ಸೋರಗೋ ಕುಪಿತೋವಸ್ಸ, ಡಸತೇವಸ್ಸ ವಿಗ್ಗಹಂ.

೩.

ಏವಂ ನಿಹೀನಜಚ್ಚೇನ, ಪಾಪೇನ ಅಕತಞ್ಞುನಾ;

ನರಾ ಧಮೇನ ದೀನೇನ, ಕತೋಪಿ ಖಣಸಙ್ಗಮೋ.

೪.

ಅಸಾಧುಕೋ ಅಯಂತೇವಂ, ಜಾನಮಾನೇನ ಜನ್ತುನಾ;

ಮುಹುತ್ತಮ್ಪಿ ನ ಕಾತಬ್ಬೋ, ಸಙ್ಗಮೋ ಸೋ ಅನತ್ಥದೋತಿ.

ತತೋ ಸೋ ಅಸಪ್ಪುರಿಸೋ ಮಂಸಂ ಖಾದಿತ್ವಾ ಗಚ್ಛನ್ತೋ ವನಖಣ್ಡಮಜ್ಝಂ ಸಮ್ಪಾಪುಣಿ. ಅಥ ಬ್ಯಗ್ಘೋ ತಂ ದಿಸ್ವಾ ಮಹಾನಾದಂ ಕರೋನ್ತೋ ಗಹಣತ್ಥಾಯ ಉಟ್ಠಾಸಿ. ಸೋ ಬ್ಯಗ್ಘಂ ದಿಸ್ವಾ ಭಯಪ್ಪತ್ತೋ ತುಣ್ಡಿಲಸ್ಸ ವಚನಂ ಸರಿತ್ವಾ ಅಹಂ ಭೋ ತವ ಸಹಾಯತುಣ್ಡಿಲಸ್ಸ ಸನ್ತಿಕಾ ಆಗತೋಮ್ಹೀತಿ ಆಹ, ತಂ ಸುತ್ವಾ ಬ್ಯಗ್ಘೋ ಅತ್ತಮನೋ ಏಹಿ ಸಮ್ಮಾತಿ ತಂ ಪಕ್ಕೋಸಿತ್ವಾ ಅತ್ತನೋ ವಸನಟ್ಠಾನಂ ನೇತ್ವಾ ಖಾದಿತಬ್ಬಾಹಾರೇನ ತಂ ಸನ್ತಪ್ಪೇತ್ವಾ ಪಿತುಸನ್ತಿಕೇ ನಿಸೀದಾಪೇತ್ವಾ ಪುನ ವನಖಣ್ಡ ಮಗಮಾಸಿ. ಅಥಸ್ಸ ಪಿತಾ ಪುತ್ತಸ್ಸ ಗತಕಾಲೇ ತೇನ ಸದ್ಧಿಂ ಸಲ್ಲಪನ್ತೋ ತಸ್ಸ ವಚನಾನುಸಾರೇನ ತುಣ್ಡಿಲಂ ಮಾರೇತ್ವಾ ಖಾದಿತಭಾವಂ ಅಞ್ಞಾಸಿ. ತತೋ ಸೋ ಪುತ್ತಸ್ಸ ಆಗತಕಾಲೇ ತವ ಸಹಾಯೋ ತೇನ ಮಾರಿತೋತಿ ಆಹ. ತಂ ಸುತ್ವಾ ಬ್ಯಗ್ಘೋ ಅನತ್ತಮನೋ ವೇಗೇನ ತಸ್ಸ ವಸನಟ್ಠಾನಂ ಗನ್ತ್ವಾ ಸಮ್ಮ ತುಣ್ಡಿಲಾತಿ ಸದ್ದಂ ಕತ್ವಾ ಅಪಸ್ಸನ್ತೋ ಲುಞ್ಚಿತಪತ್ತಂಚಸ್ಸ ದಿಸ್ವಾ ನಿಸ್ಸಂಸಯಂ ತೇನ ಮಾರಿತೋ ಮೇ ಸಹಾಯೋತಿ ಸೋಚನ್ತೋ ಪರಿದೇವನ್ತೋ ಆಗಞ್ಛಿ. ಅಥ ಸೋ ಅಸಪ್ಪುರಿಸೋ ತಸ್ಮಿಂ ತತ್ಥ ಗತೇ ತಸ್ಸ ಪಿತರಂ ಪಾಸಾಣೇನ ಪಹರಿತ್ವಾ ಮಾರೇತ್ವಾ ಬ್ಯಗ್ಘಂಚ ದಾನಿ ಮಾರೇಸ್ಸಾಮೀತಿ ಬ್ಯಗ್ಘಾಗಮನಮಗ್ಗಂ ಓಲೋಕೇನ್ತೋ ನಿಲೀನೋ ಅಟ್ಠಾಸಿ. ತಸ್ಮಿಂ ಖಣೇ ಬ್ಯಗ್ಘೋಪಿ ಆಗಞ್ಛಿ. ಸೋ ತಸ್ಸಾ ಗತಕಾಲೇ ತಸ್ಸ ತೇಜೇನ ಭೀತೋ ಗನ್ತ್ವಾ ¶ ಜೀವಿತಂ ಮೇ ಸಾಮಿ ದೇಹೀತಿ ಪಾದಮೂಲೇ ಉರೇನ ನಿಪಜ್ಜಿ, ಬ್ಯಗ್ಘೋ ಪನ ತೇನ ಕತಕಮ್ಮಂ ದಿಸ್ವಾ ತಸ್ಮಿಂ ಚಿತ್ತಂ ನಿಬ್ಬಾಪೇತ್ವಾ ಮಮ ಸಹಾಯಸ್ಸ ಸಾಸನಮಾದಾಯಾಗತಸ್ಸ ದುಬ್ಭಿತುಂ ನ ಯುತ್ತನ್ತಿ ಚಿನ್ತೇನ್ತೋ ತಂ ಸಮಸ್ಸಾಸೇತ್ವಾ ಗಚ್ಛ ಸಮ್ಮಾತಿ ಸುಖಂ ಪೇಸೇಸಿ. ಏವಞ್ಹಿ ಸಪ್ಪುರಿಸಸಮಾಗಮೋ ನಾಮ ಇಧ ಲೋಕಪರಲೋಕೇಸು ಸುಖಾವಹೋಯೇವ, ವುತ್ತಂಹಿ.

೫.

ಸಬ್ಭಿರೇವ ಸಮಾಸೇಥ, ಸಬ್ಭಿ ಕುಬ್ಬೇಥ ಸನ್ಥವಂ;

ಸಬ್ಬತ್ಥ ಸನ್ಥವೋ ತೇನ, ಸೇಯ್ಯೋ ಹೋತಿ ನ ಪಾಪಿಯೋ.

೬.

ಸುಖಾವಹೋ ದುಕ್ಖನುದೋ, ಸದಾ ಸಬ್ಭಿ ಸಮಾಗಮೋ;

ತಸ್ಮಾ ಸಪ್ಪುರಿಸೇಹೇವ, ಸಙ್ಗಮೋ ಹೋತು ಜನ್ತುನಂ.

ತತೋ ಸೋ ಬ್ಯಗ್ಘೋ ತೇನ ಮೇತ್ತಚಿತ್ತಾನುಭಾವೇನ ಕಾಲಂ ಕತ್ವಾ ಸಗ್ಗೇ ನಿಬ್ಬತ್ತೋತಿ.

೭.

ಏವಂವಿಧೋಪಿ ಫರುಸೋ ಪರಮಂಸಭೋಜೀ;

ಬ್ಯಗ್ಘೋ ದಯಾಯುಪಗತೋ ಸುಗತಿಂ ಸುಮೇಧೋ;

ತಸ್ಮಾ ಕರೋಥ ಕರುಣಂ ಸತತಂ ಜನಾನಂ,

ತಂ ವೋ ದದಾತಿ ವಿಭವಞ್ಚ ಭವೇಸು ಭೋಗನ್ತಿ.

ಬ್ಯಗ್ಘಸ್ಸ ವತ್ಥುಂ ಪಞ್ಚಮಂ.

೧೬. ಫಲಕಖಣ್ಡದಿನ್ನಸ್ಸ ವತ್ಥುಮ್ಹಿ ಅಯಮಾನುಪುಬ್ಬೀಕಥಾ

ಸಾವತ್ಥಿಯಂ ಕಿರೇಕೋ ಮನುಸ್ಸೋ ಉತ್ತರಾಪಥಂ ಗಚ್ಛಾಮೀತಿ ಅದ್ಧಾನಮಗ್ಗಪಟಿಪನ್ನೋ ಗಿಮ್ಹಾನಮಾಸೇ ಮಜ್ಝಣ್ಹೇ ಬಹಲಾತಪೇನ ಕಿಲನ್ತೋ ಹುತ್ವಾ ರುಕ್ಖಚ್ಛಾಯಂ ಪವಿಸಿತ್ವಾ ತಮ್ಬುಲಂ ಖಾದನ್ತೋ ಫಲಕೇ ನಿಸೀದಿ. ಅಥ ಉತ್ತರಾಪಥೇನಾಗಚ್ಛಾನ್ತೋ ಏಕೋ ತಥೇವ ಆತಪೇನ ಕಿಲನ್ತೋ ಆಗನ್ತ್ವಾ ಪುರಿಮಸ್ಸ ಸನ್ತಿಕೇ ನಿಸೀದಿತ್ವಾ ಭೋ ಪಾನೀಯಂ ಅತ್ಥೀತಿ ಪುಚ್ಛಿ. ಇತರೋ ಪಾನೀಯಂ ನತ್ಥೀತಿ ಆಹ. ಅಥಸ್ಸ ¶ ಸೋ ಮಯ್ಹಮ್ಪಿ ಭೋ ತಮ್ಬುಲಂ ದೇಹಿ ಪಿಪಾಸಿತೋಮ್ಹಿತಿ ವತ್ವಾಪಿ ನ ಲಭಿ. ಚತುಕಹಾಪಣೇನ ಏಕಂ ತಮ್ಬುಲಪಣ್ಣಂ ಕಿಣಿತ್ವಾ ಲದ್ಧೋ ತತ್ಥೇವ ನಿಸೀದಿತ್ವಾ ಖಾದಿತ್ವಾ ಪಿಪಾಸಂ ವಿನೋದೇತ್ವಾ ತೇನ ಉಪಕಾರೇನ ತಸ್ಸ ಸಿನೇಹಂ ಕತ್ವಾ ಅತ್ತನೋ ಗಮನಟ್ಠಾನ ಮಗಮಾಸಿ, ಅಥಾ ಪರಭಾಗೇ ಸೋ ಪಟ್ಟನಂ ಗನ್ತ್ವಾ ನಾವಾಯ ವಣಿಜ್ಜತ್ಥಾಯ ಗಚ್ಛನ್ತೋ ಸಮುದ್ದಮಜ್ಝಂ ಪಾಪುಣಿ. ತತೋ ಸತ್ತಮೇ ದಿವಸೇ ನಾವಾ ಭಿಜ್ಜಿ. ಮನುಸ್ಸಾ ಮಚ್ಛಕಚ್ಛಪಾನಂ ಭಕ್ಖಾ ಜಾತಾ. ಸೋ ಏವ ಪುರಿಸೋ ಅರೋಗೋ ಹುತ್ವಾ ಏಕಂ ಫಲಕಖಣ್ಡಂ ಉರೇ ಕತ್ವಾ ಸಮುದ್ದಂ ತರತಿ. ಅಥೇ ತರೋಪಿ ತಥೇವ ನಾವಾಯ ಭಿನ್ನಾಯ ಸೇಸೋ ಹುತ್ವಾ ಸಮುದ್ದಂ ತರನ್ತೋ ಪುರಿಮೇನ ಸಮಾಗಮಿ. ಅಥ ತೇ ಸತ್ತದಿವಸಂ ಸಮುದ್ದೇ ತರನ್ತಾ ಅಞ್ಞಮಞ್ಞಂ ಸಞ್ಜಾನಿಂಸು. ತೇಸು ಕಹಾಪಣೇ ದತ್ವಾ ತಮ್ಬುಲಂ ಗಹಿತೋ ಏಕಂ ಫಲಕಖಣ್ಡಂ ಉರೇ ಕತ್ವಾ ತರತಿ. ಇತರಸ್ಸೇತಂ ನತ್ಥಿ. ಅಥ ಸೋ ಕಹಾಪಣೇ ಗಹೇತ್ವಾ ದಿನ್ನತಮ್ಬುಲಮತ್ತಸ್ಸೋ ಪಕಾರಂ ಸರಿತ್ವಾ ಅತ್ತನೋ ಫಲಕಖಣ್ಡಂ ತಸ್ಸ ಅದಾಸಿ. ಸೋ ತಸ್ಮಿಂ ಸಯಿತ್ವಾ ತರನ್ತೋ ತಂ ಪಹಾಯ ಅಗಮಾಸಿ, ಅಪರೋ ಅನಾಧಾರಕೇನ ತರನ್ತೋ ಓಸ್ಸಟ್ಠವಿರಿಯೋ ಉದಕೇ ಓಸೀದಿತುಮಾರತಿ. ತಸ್ಮಿಂ ಖಣೇ ಸಮುದ್ದೇ ಅಧಿವತ್ಥಾ ಮಣಿಮೇಖಲಾ ನಾಮ ದೇವಧೀತಾ ಓಸೀದನ್ತಂ ತಂ ದಿಸ್ವಾ ಸಪ್ಪುರಿಸೋತಿ ತಸ್ಸ ಗುಣಾನುಸ್ಸರನ್ತೀ ವೇಗೇನಾ ಗನ್ತ್ವಾ ತಂ ಅತ್ತನೋ ಆನುಭಾವೇನ ಸಮುದ್ದತೀರಂ ಪಾಪೇಸಿ. ಇತರಂಪಿ ಸಾ ಏತಸ್ಸೇವ ಗುಣಾನುಭಾವೇನ ತೀರಂ ಪಾಪೇಸಿ. ಅಥ ಫಲಕೇನೋತಿಣ್ಣಪುರಿಸೋ ತಂ ದಿಸ್ವಾ ವಿಮ್ಹಿತೋ ಕಥಂ ಪುರತೋ ಅಹೋಸಿ ಸಮ್ಮಾತಿ ಪುಚ್ಛಿ. ಸೋ ನ ಜಾನಾಮಿ. ಅಪಿಚ ಖೋ ಸುಖೇನೇವ ತೀರಂ ಪತ್ತೋಸ್ಮೀತಿ ಆಹ. ಅಥ ದೇವಧೀತಾ ದಿಸ್ಸಮಾನಕಸರೀರೇನೇವ ಅತ್ತನಾ ಆನೀತಭಾವಂ ಆರೋಚೇನ್ತೀ ಆಹ.

೧.

ಯೋ ಮಾತರಂ ಪಿತರಂವಾ, ಧಮ್ಮೇನ ಇಧ ಪೋಸತಿ;

ರಕ್ಖನ್ತಿ ತಂ ಸದಾ ದೇವಾ, ಸಮುದ್ದೇ ವಾ ಥಲೇಪಿ ವಾ.

೨.

ಯೋ ಚೇ ಬುದ್ಧಞ್ಚ ಧಮ್ಮಞ್ಚ, ಸಂಘಞ್ಚ ಸರಣಂ ಗತೋ;

ರಕ್ಖನ್ತಿ ತಂ ಸದಾ ದೇವಾ, ಸಮುದ್ದೇ ವಾ ಥಲೇಪಿ ವಾ.

೩.

ಪಞ್ಚವಿಧಂ ¶ ಅಟ್ಠವಿಧಂ, ಪಾತಿಮೋಕ್ಖಞ್ಚ ಸಂವರಂ;

ಪಾಲೇತಿ ಯೋ ತಂ ಪಾಲೇನ್ತಿ, ದೇವಾ ಸಬ್ಬತ್ಥ ಸಬ್ಬದಾ.

೪.

ಕಾಯೇನ ವಾಚಾ ಮನಸಾ, ಸುಚರಿತ್ತಂ ಚರತೀ ಧ ಯೋ;

ಪಾಲೇನ್ತಿ ತಂ ಸದಾ ದೇವಾ, ಸಮುದ್ದೇ ವಾ ಥಲೇಪಿ ವಾ.

೫.

ಯೋ ಸಪ್ಪುರಿಸಧಮ್ಮೇಸು, ಠಿತೋ ಧ ಕತವೇದಿಕೋ;

ಪಾಲೇನ್ತಿ ತಂ ಸದಾ ದೇವಾ, ಸಮುದ್ದೇ ವಾ ಥಲೇಪಿ ವಾ.

ತತೋ ಸೋ ಆಹ.

೬.

ನೇವ ದಾನಂ ಅದಾಸಾಹಂ, ನ ಸೀಲಂ ಪರಿಪಾಲಯಿಂ;

ಕೇನ ಮೇ ಪುಞ್ಞಕಮ್ಮೇನ, ಮಮಂ ರಕ್ಖನ್ತಿ ದೇವತಾ;

ಪುಚ್ಛಾಮಿ ಸಂಸಯಂ ತುಯ್ಹಂ, ತಂ ಮೇ ಅಕ್ಖಾಹಿ ದೇವತೇತಿ.

ದೇವತಾ ಆಹ.

೭.

ಅಗಾಧಾ ಪಾರಗೇ ಭೀಮೇ, ಸಾಗರೇ ದುರಿತಾ ಕರೇ;

ಭಿನ್ನನಾವೋ ತರನ್ತೋ ತ್ವಂ, ಹದಯೇ ಕತ್ವಾ ಕಲಿಙ್ಗರಂ.

೮.

ಠತ್ವಾ ಸಪ್ಪುರಿಸೇ ಧಮ್ಮೇ, ಅತ್ತಾನ ಮನವೇಕ್ಖಿಯ;

ಖಣಸನ್ಥವಸ್ಸ ಪುರಿಸಸ್ಸ, ಅದಾಸಿ ಫಲಕಂ ಸಕಂ.

೯.

ತಂ ತುಯ್ಹಂ ಮಿತ್ತಧಮ್ಮಞ್ಚ, ದಾನಞ್ಚ ಫಲಕಸ್ಸ ತೇ;

ಪತಿಟ್ಠಾಸಿ ಸಮುದ್ದಸ್ಮಿಂ, ಏವಂ ಜಾನಾಹಿ ಮಾರಿಸಾತಿ.

ಏವಞ್ಚ ವತ್ವಾ ಸಾ ತೇ ದಿಬ್ಬಾಹಾರೇನ ಸನ್ತಪ್ಪೇತ್ವಾ ದಿಬ್ಬವತ್ಥಾಲಙ್ಕಾರೇಹಿ ಅಲಙ್ಕರಿತ್ವಾ ಅತ್ತನೋ ಆನುಭಾವೇನ ಸಾವತ್ಥಿನಗರೇಯೇವ ತೇ ಪತಿಟ್ಠಾಪೇಸಿ. ತತೋ ಪಟ್ಠಾಯ ತಮೇವ ಆರಮ್ಮಣಂ ಕತ್ವಾ ತೇ ದಾನಂ ದದನ್ತಾ ಸೀಲಂ ರಕ್ಖನ್ತಾ ಉಪೋಸಥಕಮ್ಮಂ ಕರೋನ್ತಾ ಆಯುಪರಿಯೋಸಾನೇ ಸಗ್ಗಪರಾಯಣಾ ಅಹೇಸುಂ.

೧೦.

ಏವಂ ಪರಿತ್ತಕುಸಲೇನಪಿ ಸಾಗರಸ್ಮಿಂ,

ಸತ್ತಾ ಲಭನ್ತಿ ಸರಣಂ ಖಲು ದೇವತಾಹಿ;

ತುಮ್ಹೇಪಿ ಸಪ್ಪುರಿಸತಂ ನ ವಿನಾಸಯನ್ತಾ,

ಮಾ ಭೋ ಪಮಜ್ಜಥ ಸದಾ ಕುಸಲಪ್ಪಯೋಗೇತಿ.

ಫಲಕಖಣ್ಡದಿನ್ನಸ್ಸ ವತ್ಥುಂ ಛಟ್ಠಮಂ.

೧೭. ಚೋರಸಹಾಯಸ್ಸ ವತ್ಥುಮ್ಹಿ ಅಯಮಾನುಪುಬ್ಬೀಕಥಾ

ಅಮ್ಹಾಕಂ ¶ ಭಗವತಿ ಪರಿನಿಬ್ಬುತೇ ಜಮ್ಬುದೀಪೇ ದೇವದಹನಗರೇ ಏಕೋ ಮನುಸ್ಸೋ ದುಕ್ಖಿತೋ ತತ್ಥ ತತ್ಥ ವಿಚರನ್ತೋ ಪಚ್ಚನ್ತೇ ಅಞ್ಞತರಂ ಗಾಮಂ ಗನ್ತ್ವಾ ತತ್ಥ ಏಕಸ್ಮಿಂ ಕುಲಗೇಹೇ ನಿವಾಸಂ ಕಪ್ಪೇಸಿ. ತತ್ಥ ಮನುಸ್ಸಾ ತಸ್ಸ ಯಾಗುಭತ್ತಂ ದತ್ವಾ ಪೋಸೇಸುಂ, ತತೋ ಸೋ ತತ್ಥ ಮನುಸ್ಸೇಹಿ ಮಿತ್ತಸನ್ಥವಂ ಕತ್ವಾ ಕತಿಪಾಹಂ ತತ್ಥ ವಸಿತ್ವಾ ಅಞ್ಞಟ್ಠಾನಂ ಗನ್ತ್ವಾ ಅಪರಭಾಗೇ ಚೋರಕಮ್ಮಂ ಕರೋನ್ತೋ ಜೀವಿಕಂ ಕಪ್ಪೇತಿ. ಅಥೇಕದಿವಸಂ ಚೋರೇನ್ತಂ ತಂ ರಾಜಪುರಿಸಾ ಗಹೇತ್ವಾ ರಞ್ಞೋ ದಸ್ಸೇಸುಂ. ರಾಜಾ ತಂ ಬನ್ಧನಾಗಾರೇ ಕರೋಥಾತಿ ಆಣಾಪೇಸಿ, ತೇ ತಂ ಬನ್ಧನಾಗಾರಂ ನೇತ್ವಾ ಸಙ್ಖಲಿಕಾಹಿ ಬನ್ಧಿತ್ವಾ ಆರಕ್ಖಕಾನಂ ಪಟಿಪಾದೇತ್ವಾ ಅಗಮಂಸು, ಬನ್ಧನಾಗಾರೇ ವಸನ್ತಸ್ಸ ತಸ್ಸ ದ್ವಾದಸಸಂವಚ್ಛರಾನಿ ಅತಿಕ್ಕನ್ತಾನಿ. ತತೋ ಅಪರಭಾಗೇ ತಸ್ಸ ಪುಬ್ಬಸಹಾಯೋ ಪಚ್ಚನ್ತಗಾಮವಾಸೀ ಮನುಸ್ಸೋ ಕೇನಚಿ ಕಮ್ಮೇನ ದೇವದಹ ಮಾಗತೋ ತತ್ಥ ತತ್ಥ ಆಹಿಣ್ಡನ್ತೋ ಬನ್ಧನಾಗಾರೇ ಬದ್ಧಂ ತಂ ಅದ್ದಸ. ದಿಸ್ವಾ ತಸ್ಸ ಹದಯಂ ಕಮ್ಪಿ, ಸೋ ರೋದಿತ್ವಾ ಪರಿದೇವಿತ್ವಾ ಕಿಂ ತೇ ಮಯಾ ಕತ್ತಬ್ಬಂ ಸಮ್ಮಾತಿ ಪುಚ್ಛಿ. ತತೋ ತೇನ ಸಮ್ಮ ಬನ್ಧನಾಗಾರೇ ವಸನ್ತಸ್ಸ ಮೇ ಇದಾನಿ ದ್ವಾದಸಸಂವಚ್ಛರಾನಿ ಅತಿಕ್ಕನ್ತಾನಿ, ಏತ್ತಕಂ ಕಾಲಂ ದುಬ್ಭೋಜನಾದಿನಾ ಮಹಾದುಕ್ಖಂ ಅನುಭೋಮಿ. ಯಾವಾಹಂ ಆಹಾರಂ ಪರಿಯೇಸಿತ್ವಾ ಭುಞ್ಜಿತ್ವಾ ಆಗಮಿಸ್ಸಾಮಿ. ತಾವ ಮಂ ಇತೋ ಮುಞ್ಚನುಪಾಯಂ ಜಾನಾಹೀತಿ ವುತ್ತೇ ಸೋ ಸಪ್ಪುರಿಸೋ.

೧.

ರೂಪೇನ ಕಿನ್ತು ಗುಣಸೀಲವಿವಜ್ಜಿತೇನ,

ಮಿಚ್ಛಾಲಯಸ್ಸ ಕಿತವಸ್ಸ ಧಿಯಾ ಕಿಮತ್ಥಂ;

ದಾನಾ ದಿಚಾಗವಿಗತೇನ ಧನೇನ ಕಿಂ ವಾ;

ಮಿತ್ತೇನ ಕಿಂ ಬ್ಯಸನಕಾಲಪರಮ್ಮುಖೇನಾತಿ.

ಏವಞ್ಚ ಪನ ವತ್ವಾ ಸಾಧು ಸಮ್ಮ ಕರೋಮಿ ತೇ ವಚನನ್ತಿ ಆರಕ್ಖಕಾನಂ ಸನ್ತಿಕಂ ಗನ್ತ್ವಾ ಭೋನ್ತೋ ಯಾವೇಸೋ ಭತ್ತಂ ಭುಞ್ಜಿತ್ವಾ ಆಗಚ್ಛತಿ. ತಾವಾಹಂ ತಸ್ಸ ಪಾಟಿಭೋಗೋ ಭವಿಸ್ಸಾಮಿ. ವಿಸ್ಸಜ್ಜೇಥ ¶ ನನ್ತಿ ಆಹ, ತೇಹಿ ನ ಸಕ್ಕಾ ಭೋ ಏತಂ ವಿಸ್ಸಜ್ಜೇತುಂ, ಅಪಿ ಚ ಖೋ ಯಾವಾಯಂ ಆಗಚ್ಛತಿ. ತಾವ ತ್ವಂ ಅಯಸಙ್ಖಲಿಕಾಯ ಬದ್ಧೋ ನಿಸೀದಿಸ್ಸಸಿ, ಏವಂ ತಂ ವಿಸ್ಸಜ್ಜೇಸ್ಸಾಮ, ನೋ ಚೇ ನ ಸಕ್ಕಾತಿ ಆಹಂಸು, ಸೋ ಏವಮ್ಪಿ ಹೋತು ಸಮ್ಮಾತಿ ವತ್ವಾ ತಸ್ಸ ಪಾದತೋ ಸಙ್ಖಲಿಕಂ ಮುಞ್ಚಿತ್ವಾ ಅತ್ತನೋ ಪಾದೇ ಕತ್ವಾ ಬನ್ಧನಾಗಾರಂ ಪವಿಸಿತ್ವಾ ಇತರಂ ಮುಞ್ಚಾಪೇಸಿ. ಸೋಪಿ ಅಸಪ್ಪುರಿಸೋ ಬನ್ಧನಾ ಮುತ್ತೋ ನ ಪುನ ತಂ ಠಾನ ಮಗಮಾಸಿ, ಅಹೋ ಅಕತಞ್ಞುನೋ ಪಕತಿಂ ಞಾತುಂ ಭಾರಿಯಂ. ಯಥಾಹ.

೨.

ವಾರಿಪೂರೇ ಯಥಾ ಸೋಬ್ಭೇ, ನೇವನ್ತೋ ವಿಸಮಂ ಸಮಂ;

ಪಞ್ಞಾಯತೇವಂಸಾಧುಸ್ಸ, ಭಾವಂ ಮನಸಿ ಸಮ್ಭವಂ.

೩.

ಭಾಸನ್ತಿ ಮುಖತೋ ಏಕಂ, ಚಿನ್ತೇನ್ತಿ ಮನಸಾ ಪರಂ;

ಕಾಯೇನೇಕಂ ಕರೋನ್ತೇವಂ, ಪಕತಾಯಮಸಾಧುನಂ.

೪.

ತೇಸಂ ಯೋ ಭಾವಮಞ್ಞಾಸಿ, ಸೋವ ಪಣ್ಡಿತಜಾತಿಕೋ;

ಬಹುಸ್ಸುತೋಪಿ ಸೋಯೇವ, ಪರಚಿತ್ತವಿದೂಪಿ ಸೋ.

ಅಥಸ್ಸ ಬನ್ಧನಾಗಾರೇ ವಸನ್ತಸ್ಸ ದ್ವಾದಸಸಂವಚ್ಛರಾನಿ ಅತಿಕ್ಕನ್ತಾನಿ. ಏತ್ತಕಂ ಕಾಲಂ ಜಿಘಚ್ಛಾಪೀಳಿತೇನ ತೇನ ಆಹಾರತ್ತಾಯ ಪರೋ ನ ಯಾಚಿತಪುಬ್ಬೋ, ಅನುಚ್ಛಿಟ್ಠಾಹಾರಂ ಲಭನದಿವಸತೋ ಅಲಭನದಿವಸಾಯೇವ ಬಹುತರಾ ಹೋನ್ತಿ, ಅಥ ದ್ವಾದಸಸಂವಚ್ಛರಾತಿಕ್ಕಮೇ ರಞ್ಞೋ ಪುತ್ತೋ ನಿಬ್ಬತ್ತಿ. ತದಾ ರಾಜಾ ಅತ್ತನೋ ವಿಜಿತೇ ಸಬ್ಬಬನ್ಧನಾಗಾರಾನಿ ವಿವರಾಪೇಸಿ. ಅನ್ತಮಸೋ ಮಿಗಪಕ್ಖಿನೋಪಿ ಬನ್ಧನಾ ಮುಞ್ಚಾಪೇಸಿ. ದ್ವಾರೇ ವಿವಟಮತ್ತೇಯೇವ ಬನ್ಧನಾಗಾರೇ ಮನುಸ್ಸಾ ಇಚ್ಛಿತಿಚ್ಛಿತಟ್ಠಾನಂ ಅಗಮಂಸು. ಸೋ ಪನೇಕೋವ ತೇಹಿ ಸದ್ಧಿಂ ಅಗನ್ತ್ವಾ ಓಹೀಯಿ. ಆರಕ್ಖಕೇಹಿ ತ್ವಂ ಭೋ ಕಸ್ಮಾ ನ ಗಚ್ಛಸೀತಿ ವುತ್ತೇ ಅಹಂ ಭೋ ಪಞ್ಞಾತಭಾವೇನ ಇದಾನಿ ನ ಗಮಿಸ್ಸಾಮಿ. ಅತೀವ ಪರಿಹೀನಗತ್ತೋಸ್ಮಿ. ಅನ್ಧಕಾರೇ ಗಮಿಸ್ಸಾಮೀತಿ ವತ್ವಾ ಅನ್ಧಕಾರೇ ಆಗತೇ ನಿಕ್ಖಮ್ಮ ಅನ್ತೋನಗರೇ ವಿಸ್ಸಾಸಿಕಾನಂ ಅಭಾವೇನ ಕುತೋ ಆಹಾರಂ ಲಭಿಸ್ಸಾಮೀತಿ ಚಿನ್ತೇನ್ತೋ ನಿಕ್ಖಮ್ಮ ರತ್ತನ್ಧಕಾರೇ ಆಮಕಸುಸಾನ ¶ ಮಗಮಾಸಿ. ಏತ್ಥಾಹಾರಂ ಲಭಿಸ್ಸಾಮೀತಿ. ತತ್ಥ ಸೋ ಅಧುನಾ ನಿಕ್ಖಿತ್ತಮತಮನುಸ್ಸಂ ದಿಸ್ವಾ ಮನುಸ್ಸಟ್ಠಿನಾ ಮಂಸಂ ಛಿನ್ದಿತ್ವಾ ಸೀಸಕಪಾಲೇ ಪಕ್ಖಿಪಿತ್ವಾ ತೀಹಿ ಮನುಸ್ಸಸೀಸೇಹಿ ಕತಉದ್ಧನೇ ಠಪೇತ್ವಾ ಚಿತಕತೋ ಓಮುಕ್ಕಅಲಾತೇಹಿ ಅಗ್ಗಿಂ ಕತ್ವಾ ಸುಸಾನಂ ನಿಬ್ಬಾಪನತ್ಥಾಯಾ ಭತಉದಕೇನ ಮನುಸ್ಸಟ್ಠಿನಾ ಆಲೋಲೇನ್ತೋ ಮಂಸಂ ಪಚಿತ್ವಾ ಓತಾರೇತ್ವಾ ಸಾಖಾಭಙ್ಗೇನ ಹಿರಿಕೋಪೀಣಂ ಪಟಿಚ್ಛಾದೇತ್ವಾ ನಿವತ್ಥಪಿಲೋಕಿಕಂ ವಾತಾವರಣಂ ಕತ್ವಾನಿಸೀದಿ. ತಸ್ಮಿಂ ಖಣೇ ತತ್ಥ ಪಿಪ್ಪಲೀರುಕ್ಖೇ ಅಧಿವತ್ಥಾ ದೇವತಾ ತಸ್ಸ ತಂ ಕಿರಿಯಂ ದಿಸ್ವಾ ಪುಚ್ಛಿಸ್ಸಾಮಿ ತಾವ ನನ್ತಿ ತಂ ಉಪಸಙ್ಕಮಿತ್ವಾ ಏವಮಾಹ. ಭೋ ತ್ವಂ ಘನತರತಿಮಿರಾಕುಲೇ ಮಹಾರತ್ತಿಯಂ ತತ್ಥ ತತ್ಥ ವಿಕಿಣ್ಣನರಟ್ಠಿಸಮಾಕಿಣ್ಣೇ ಸೋಣಸಿಗಾಲಾದಿಕುಣಪಾದಕಾಕುಲೇ ಮನುಸ್ಸಮಂಸಭಕ್ಖಯಕ್ಖರಕ್ಖಸಾಕುಲೇ ತತ್ಥ ತತ್ಥ ಪಜ್ಜಲನ್ತಾನೇಕಚಿತಕಭಯಾನಕೇ ಸುಸಾನೇ ಮನುಸ್ಸಮಂಸಂ ಪಚಿತ್ವಾ ಕಿಂಕರೋಸೀತಿ ಪುಚ್ಛನ್ತೀ ಆಹ.

೫.

ರತ್ತನ್ಧಕಾರೇ ಕುಣಪಾದಕೇಹಿ,

ಸಮಾಕುಲೇ ಸೀವಥಿಕಾಯ ಮಜ್ಝೇ;

ಮನುಸ್ಸಮಂಸಂ ಪಚಸೀ ಧ ಸೀಸೇ,

ವದೇಹಿ ಕಿಂ ತೇನ ಪಯೋಜನಂ ತೇತಿ.

ಅಥ ಸೋ ಆಹ.

೬.

ನ ಯಾಗಹೇತು ನ ಚ ದಾನಹೇತು,

ಸುಸಾನಮಜ್ಝಮ್ಹಿ ಪಚಾಮಿ ಮಂಸಂ;

ಖುದಾಸಮಂ ನತ್ಥಿ ನರಸ್ಸ ಅಞ್ಞಂ,

ಖುದಾವಿನಾಸಾಯ ಪಚಾಮಿಮಮ್ಭೋತಿ.

ತತೋ ದೇವತಾ ತಂ ತಥಾ ಹೋತು, ಇಮಿನಾ ಪಿಲೋತಿಕೇನ ವಾತಾವರಣಂ ಕರೋಸಿ. ಕಿಮತ್ಥಮೇತನ್ತಿ ಪುಚ್ಛನ್ತೀ.

೭.

ನಿವತ್ಥಸಾಖೋ ¶ ಹಿರಿಸಂವರಾಯ,

ಪಿಲೋತಿಕಂ ತತ್ಥ ಪಸಾರಯನ್ತೋ;

ಕರೋಸಿ ವಾತಾವರಣಞ್ಚ ಸಮ್ಮ,

ಕಿಮತ್ಥಮೇತಂ ವದ ಪುಚ್ಛಿತೋ ಮೇತಿ.

ಸೋ ತಸ್ಸಾ ಚಿಕ್ಖನ್ತೋ ಆಹ.

೮.

ಸುಭಾ ಸುಭಾಮಿಸ್ಸಿತಸೀತವಾತೋ,

ಸಯಂ ಅಚಿತ್ತೋವ ಅಚಿತ್ತಭಾವಾ;

ದೇಹಂ ಫುಸಿತ್ವಾನ ಅಸಾಧುಕಸ್ಸ,

ಅಕತಞ್ಞುನೋ ಮಿತ್ತಪಧಂಸಕಸ್ಸ.

೯.

ಸಮಾವಹನ್ತೋ ಯದಿ ಮೇ ಸರೀರೇ,

ಫುಸಾತಿ [ಫುಸಾತಿಸಾಸಙ್ಗತಿಮಜ್ಜದಾನಿ ಇತಿಕತ್ತಚಿ] ತಂ ವಾಯು ಮಮಾ ವಿಸಿತ್ವಾ;

ದುಕ್ಖಂ ದದಾತೀತಿ ವಿಸಂವ ತಂ ಭೋ,

ಪರಿವಜ್ಜಿತುಂ ಬದ್ಧಮಿಮಂ ಕುಚೇಲನ್ತಿ.

ದೇವತಾ ಆಹ.

೧೦.

ಕಿ ಮಕಾಸಿ ಭೋ ಸೋ ಕತನಾಸಕೋ ತೇ,

ಧನಞ್ಚ ಧಞ್ಞಂ ತವ ನಾಸಯೀ ಚ;

ಮಾತಾ ಪಿತಾ ಬನ್ಧವೋ ಖೇತ್ತ ವತ್ಥೂ,

ವಿನಾಸಿತಾ ತೇನ ವದೇಹಿ ಕಿಂ ತೇತಿ.

ತತೋ ಸೋ ಆಹ.

೧೧.

ಯಂ ರಾಜತೋ ಹೋತಿ ಭಯಂ ಮಹನ್ತಂ,

ಸಬ್ಬಸ್ಸ ಹರಣಾದಿವಧಾದಿಕಞ್ಚ;

ಅಕತಞ್ಞುನಾ ಸಪ್ಪುರಿಸೇನ ಹೋತಿ,

ಆರಾವ ಸೋ ಭೋ ಪರಿವಜ್ಜನೀಯೋ.

೧೨.

ಯಮತ್ಥಿ ¶ ಚೋರಾರಿಭಯಞ್ಹಿ ಲೋಕೇ,

ಅಥೋ ದಕೇನಾಪಿ ಚ ಪಾವಕೇನ;

ಅಕತಞ್ಞುನಾ ತಂ ಸಕಲಮ್ಪಿ ಹೋತಿ,

ಆರಾವ ಸೋ ಭೋ ಪರಿವಜ್ಜನೀಯೋ.

೧೩.

ಪಾಣಾತಿಪಾತಮ್ಪಿ ಅದಿನ್ನದಾನಂ,

ಪರಸ್ಸ ದಾರೂಪಗಮಂ ಮುಸಾ ಚ;

ಮಜ್ಜಸ್ಸ ಪಾನಂ ಕಲಹಞ್ಚ ಪೇಸುನಂ,

ಸಮ್ಫಂ ಗಿರಂ ಧುತ್ತಜನೇಹಿ [ಅಕ್ಖಧುತ್ತಾದಿಯೋಗಂ ಇತಿಕತ್ಥಚಿ] ಯೋಗಂ.

೧೪.

ಸಬ್ಬಂ ಅನತ್ಥಂ ಅಸಿವಂ ಅನಿಟ್ಠಂ,

ಅಪಾಯಿಕಂ [ಅಪಾಯಿಕಂ ಇತಿಕತ್ಥಚಿ] ದುಕ್ಖಮನನ್ತ ಮಞ್ಞಂ;

ಅಕತಞ್ಞುನಾ ಸಪ್ಪುರಿಸೇನ ಹೋತಿ;

ಆರಾವ ಸೋ ಭೋ ಪರಿವಜ್ಜನೀಯೋತಿ.

ವತ್ವಾ ಅತ್ತನಾ ಅಸಪ್ಪುರಿಸಸಂಸಗ್ಗೇನಾನುಭೂತಂ ಸಬ್ಬಂ ದುಕ್ಖಂ ಕಥೇಸಿ, ತತೋ ದೇವತಾ ಅಹಮ್ಪಿ ಭೋ ಸತ್ಥುನೋ ಮಙ್ಗಲಸುತ್ತದೇಸನಾದಿವಸೇ ಇಮಸ್ಮಿಂಯೇವ ರುಕ್ಖೇ ನಿಸಿನ್ನೋ.

ಅಸೇವನಾ ಚ ಬಾಲಾನಂ, ಪಣ್ಡಿತಾನಞ್ಚ ಸೇವನಾ;

ಪೂಜಾ ಚ ಪೂಜನೀಯ್ಯಾನಂ, ಏತಂ ಮಙ್ಗಲ ಮುತ್ತಮನ್ತಿ.

ಗಾಥಾಯ ಬಾಲಸ್ಸ ದೋಸೇ ಅಸ್ಸೋಸಿಂತಿ ವತ್ವಾ ತಸ್ಸ ಪಸನ್ನೋ ತಂ ಅತ್ತನೋ ವಿಮಾನಂ ನೇತ್ವಾ ನಹಾಪೇತ್ವಾ ದಿಬ್ಬವತ್ಥಾಲಙ್ಕಾರೇಹಿ ಅಲಙ್ಕರಿತ್ವಾ ದಿಬ್ಬನ್ನಪಾನಂ ದತ್ವಾ ಮಹನ್ತಂ ಸಕ್ಕಾರಸಮ್ಮಾನಂ ಕತ್ವಾ ಅತ್ತನೋ ಆನುಭಾವೇನ ತಸ್ಮಿಂ ನಗರೇ ರಜ್ಜೇ ಅಭಿಸಿಞ್ಚಾಪೇಸಿ. ಸೋ ತತ್ಥ ರಜ್ಜಂ ಕರೋನ್ತೋ ದಾನಾದೀನಿ ಪುಞ್ಞಾನಿ ಕತ್ವಾ ಆಯುಪರಿಯೋಸಾನೇ ಯಥಾಕಮ್ಮಂ ಗತೋತಿ.

೧೫.

ಏವಂ ¶ ಅಸಾಧುಜನಸಙ್ಗಮಸನ್ನಿವಾಸಂ,

ಸಞ್ಚಜ್ಜ ಸಾಧುಸುಚಿಸಜ್ಜನಸಙ್ಗಮೇನ;

ದಾನಾದಿ ನೇಕಕುಸಲಂ ಪರಿಪೂರಯನ್ತಾ,

ಸಗ್ಗಾ ಪವಗ್ಗವಿಭವಂ ಅಭಿಸಮ್ಭುನಾಥಾತಿ.

ಚೋರಸಹಾಯಸ್ಸ ವತ್ಥುಂ ಸತ್ತಮಂ.

೧೮. ಮರುತ್ತಬ್ರಾಹ್ಮಣಸ್ಸ ವತ್ಥುಮ್ಹಿ ಅಯಮಾನುಪುಬ್ಬೀಕಥಾ

ಜಮ್ಬುದೀಪೇ ಚನ್ದಭಾಗಾ ನಾಮ ಗಙ್ಗಾತೀರೇ ಹೋಮಗಾಮಂ ನಾಮ ಅತ್ಥಿ. ತಸ್ಮಿಂ ಏಕೋ ಮರುತ್ತೋ ನಾಮ ಬ್ರಾಹ್ಮಣೋ ಪಟಿವಸತಿ. ತದಾ ಸೋ ವೋಹಾರತ್ಥಾಯ ತಕ್ಕಸೀಲಂ ಗನ್ತ್ವಾ ಗೇಹಂ ಆಗಚ್ಛನ್ತೋ ಅನ್ತರಾಮಗ್ಗೇ ಏಕಾಯ ಸಾಲಾಯ ಕುಟ್ಠರೋಗಾ ತುರಂ ಸುನಖಂ ದಿಸ್ವಾ ತಸ್ಮಿಂ ಕಾರುಞ್ಞೇನ ನೀಲವಲ್ಲಿತಕ್ಕಮ್ಬಿಲೇನ ಮದ್ದಿತ್ವಾ ಪಾಯೇಸಿ. ಸುನಖೋ ವೂಪಸನ್ತರೋಗೋ ಪಾಕತಿಕೋ ಹುತ್ವಾ ಬ್ರಾಹ್ಮಣೇನ ಅತ್ತನೋ ಕತೂಪಕಾರಂ ಸಲ್ಲಕ್ಖೇನ್ತೋ ತೇನೇವ ಸದ್ಧಿಂ ಅಗಮಾಸಿ. ಅಪರಭಾಗೇ ಬ್ರಾಹ್ಮಣಸ್ಸ ಭರಿಯಾ ಗಬ್ಭಂ ಪಟಿಲಭಿ, ಪರಿಪುಣ್ಣಗಬ್ಭಾಯ ತಾಯ ವಿಜಾಯನಕಾಲೇ ದಾರಕೋ ತಿರಿಯಮ್ಪತಿತ್ವಾ ಅನ್ತೋಗಬ್ಭೇಯೇವ ಮತೋ. ತದಾ ತಂ ಸತ್ಥೇನ ಖಣ್ಡಾಖಣ್ಡಿಕಂ ಛಿನ್ದಿತ್ವಾ ನೀಹರಿಂಸು, ಅಥ ಬ್ರಾಹ್ಮಣೋ ತಂ ದಿಸ್ವಾ ನಿಬ್ಬಿನ್ದಹದಯೋ ಘರಾವಾಸಂ ಪಹಾಯ ಇಸಿಪಬ್ಬಜ್ಜಂ ಪಬ್ಬಜಿತ್ವಾ ಅರಞ್ಞೇ ವಿಹರತಿ. ಅಥಸ್ಸ ಭರಿಯಾ ಅಞ್ಞೇನ ಸದ್ಧಿಂ ಸಂವಸನ್ತೀ ಅಯಂ ಮಂ ಪಹಾಯ ಪಬ್ಬಜಿತೋತಿ ಬ್ರಾಹ್ಮಣೇ ಪದುಟ್ಠಚಿತ್ತಾ ಭೋ ಬ್ರಾಹ್ಮಣಂ ಮಾರೇಹೀತಿ ಸಾಮಿಕೇನ ಸದ್ಧಿಂ ಮನ್ತೇಸಿ. ತೇಸಂ ಮನ್ತನಂ ಸುನಖೋ ಸುತ್ವಾ ಬ್ರಾಹ್ಮಣೇನೇವ ಸದ್ಧಿಂ ಚರತಿ. ಅಥೇಕದಿವಸಂ ತಸ್ಸಾ ಸಾಮಿಕೋ ತಾ ಪ ಸಂ ಮಾರೇಸ್ಸಾಮೀತಿ ಧನು ಕಲಾಪಂ ಗಹೇತ್ವಾ ನಿಕ್ಖಮಿ, ತದಾ ತಾಪಸೋ ಫಲಾಫಲತ್ಥಾಯ ಅರಞ್ಞಂ ಗತೋ. ಸು ನ ಖೋ ಅಸ್ಸಮೇಯೇವ ಓ ಹೀ ಯಿ. ಪುರಿಸೋ ತಾಪಸಸ್ಸಾಗಮನಮಗ್ಗಂ ಓಲೋಕೇನ್ತೋ ಗಚ್ಛನ್ತರೇ ¶ ನಿಲೀನೋ ಅಚ್ಛಿ. ಸುನಖೋ ತಸ್ಸ ಪಮಾದಂ ಓಲೋಕೇತ್ವಾ ಧನುನೋ ಗುಣಂ ಖಾದಿತ್ವಾ ಛಿನ್ದಿ. ಸೋ ಪುನ ಗುಣಂ ಪಾಕತಿಕಂ ಕತ್ವಾ ಆರೋಪೇಸಿ. ಏವಂ ಸೋ ಆರೋಪಿತಂ ಆರೋಪಿತಂ ಖಾದತೇವ, ಅಥ ಸೋ ಪಾಪಪುರಿಸೋ ತಾಪಸಸ್ಸಾಗಮನಂ ಞತ್ವಾ ತಂ ಮಾರೇಸ್ಸಾಮೀತಿ ಧನುನಾ ಸದ್ಧಿಂ ಅಗಮಾಸಿ. ಅಥಸ್ಸ ಸುನಖೋ ಪಾದೇ ಡಸಿತ್ವಾ ಪಾತೇತ್ವಾ ತಸ್ಸ ಮುಖಂ ಖಾದಿತ್ವಾ ದುಬ್ಬಲಂ ಕತ್ವಾ ಭುಙ್ಕಾರಮಕಾಸಿ, ಏವಞ್ಹಿ ಸಪ್ಪುರಿಸಾ ಅತ್ತನೋ ಉಪಕಾರಕಾನಂ ಪಚ್ಚುಪಕಾರಂ ಕರೋನ್ತಿ. ವುತ್ತಞ್ಹಿ.

೧.

ಉಪಕಾರಂ ಕರೋನ್ತೋ ಸೋ, ಸುನಖೋ ಕತವೇದಿಕೋ;

ಸತ್ತೂಪಘಾತಕಂ ಕತ್ವಾ, ಇಸಿನೋ ದಾಸಿ ಜೀವಿತಂ.

೨.

ತಿರಚ್ಛಾನಾಪಿ ಜಾನನ್ತಿ, ಗುಣಮತ್ತನಿ ಕತಂ ಸದಾ;

ಇತಿ ಉತ್ವಾನ ಮೇಧಾವೀ, ಕತಞ್ಞೂ ಹೋನ್ತು ಪಾಣಿನೋತಿ.

ತತೋ ತಾಪಸೋ ಸುನಖಸ್ಸ ಸದ್ದೇನಾ ಗನ್ತ್ವಾ ತಸ್ಸ ತಂ ವಿಪ್ಪಕಾರಂ ದಿಸ್ವಾ ಕಾರುಞ್ಞೇನ ಪಟಿಜಿಗ್ಗಿತ್ವಾ ವೂಪಸನ್ತವಣಂ ಬಲಪ್ಪತ್ತಂ ಪೋಸೇತ್ವಾ ತತ್ಥೇವ ವಸನ್ತೋ ಝಾನಾಭಿಞ್ಞಂ ನಿಬ್ಬತ್ತೇತ್ವಾ ಆಯುಪರಿಯೋಸಾನೇ ಬ್ರಾಹ್ಮಲೋಕಪರಾಯಣೋ ಅಹೋಸೀತಿ.

೩.

ಸುತ್ವಾನ ಸಾಧು ಸುನಖೇನ ಕತೂಪಕಾರಂ,

ಮೇತ್ತಿಂದಿಸಸ್ಸ ಪಕತಂ ಇಸಿನಾ ಚ ಸುತ್ವಾ;

ಸಮ್ಮಾ ಕರೋಥ ಕರುಣಞ್ಚ ಪರೂಪಕಾರಂ,

ತಂ ಸಬ್ಬದಾ ಭವತಿ ವೋ ಭವಭೋಗಹೇತೂತಿ.

ಮರುತ್ತಬ್ರಾಹ್ಮಣಸ್ಸ ವತ್ಥುಂ ಅಟ್ಠಮಂ.

೧೯. ಪಾನೀಯದಿನ್ನಸ್ಸ ವತ್ಥುಮ್ಹಿ ಅಯಮಾನುಪುಬ್ಬೀಕಥಾ

ಜಮ್ಬುದೀಪೇ ¶ ಅಞ್ಞತರಸ್ಮಿಂ ಜನಪದೇ ಕಿರೇ ಕೋ ಮನುಸ್ಸೋ ರಟ್ಠತೋ ರಟ್ಠಂ ಜನಪದತೋ ಜನಪದಂ ವಿಚರನ್ತೋ ಅನುಕ್ಕಮೇನ ಚನ್ದಭಾಗಾನದೀತೀರಂ ಪತ್ವಾ ನಾವಂ ಅಭಿರುಹಿತ್ವಾ ಪರತೀರಂ ಗಚ್ಛತಿ. ಅಥಾಪರಾ ಗಬ್ಭಿನಿತ್ಥೀ ತಾಯ ಏವ ನಾವಾಯ ಗಚ್ಛತಿ, ಅಥ ನಾವಾ ಗಙ್ಗಾಮಜ್ಝಪ್ಪತ್ತಕಾಲೇ ತಸ್ಸಾ ಕಮ್ಮಜವಾತಾ ಚಲಿಂಸು. ತತೋ ಸಾ ವಿಜಾಯಿತುಮಸಕ್ಕೋನ್ತೀ ಕಿಲನ್ತಾ ಪಾನೀಯಂ ಮೇ ದೇಥ, ಪಿಪಾಸಿತಾಮ್ಹಿತಿ ಮನುಸ್ಸೇ ಯಾಚಿ. ತೇ ತಸ್ಸಾ ವಚನಂ ಅಸುಣನ್ತಾ ವಿಯ ಪಾನೀಯಂ ನಾದಂಸು, ಅಥ ಸೋ ಜಾನಪದಿಕೋ ತಸ್ಸಾ ಕರುಣಾಯನ್ತೋ [ಕರುಣಾಯಪಾನೀಯಂ, ಕರುಣಾಯನ್ತೋಪಾನೀಯಂ, ಕರುಣಾಯತೋಯಂ ಇತಿಚಕತ್ಥಚಿ] ತೋಯಂ ಗಹೇತ್ವಾ ಮುಖೇ ಆಸಿಞ್ಚಿ, ತಸ್ಮಿಂ ಖಣೇ ಸಾ ಲದ್ಧಸ್ಸಾಸಾ ಸುಖೇನ ದಾರಕಂ ವಿಜಾಯಿ, ಅಥ ತೇ ತೀರಂ ಪತ್ವಾ ಕತಿಪಯದಿವಸೇನ ಅತ್ತನೋ ಅತ್ತನೋ ಠಾನಂ ಪಾಪುಣಿಂಸು. ಅಥಾಪರಭಾಗೇ ಸೋ ಜಾನಪದಿಕೋ ಅಞ್ಞತರಕಿಚ್ಚಂ ಪಟಿಚ್ಚ ತಸ್ಸಾ ಇತ್ಥಿಯಾ ವಸನನಗರಂ ಪತ್ವಾ ತತ್ಥ ತತ್ಥ ಆಹಿಣ್ಡನ್ತೋ ನಿವಾಸನಟ್ಠಾನಂ ಅಲಭಿತ್ವಾ ನಗರದ್ವಾರೇ ಸಾಲಂ ಗನ್ತ್ವಾ ತತ್ಥ ನಿಪಜ್ಜಿ. ತಸ್ಮಿಂಯೇವ ದಿವಸೇ ಚೋರಾ ನಗರಂ ಪವಿಸಿತ್ವಾ ರಾಜಗೇಹೇ ಸನ್ಧಿಂ ಛಿನ್ದಿತ್ವಾ ಧನಸಾರಂ ಗಹೇತ್ವಾ ಗಚ್ಛನ್ತಾ ರಾಜಪುರಿಸೇಹಿ ಅನುಬನ್ಧಾ ಗನ್ತ್ವಾ ತಾಯೇವ ಸಾಲಾಯ ಛಡ್ಡೇತ್ವಾ ಪಲಾಯಿಂಸು. ಅಥ ರಾಜಪುರಿಸಾ ಆಗನ್ತ್ವಾ ಚೋರೇ ಅಪಸ್ಸನ್ತಾ ತಂ ಜಾನಪದಿಕಂ ದಿಸ್ವಾ ಅಯಂ ಚೋರೋತಿ ಗಹೇತ್ವಾ ಪಚ್ಛಾಬಾಹಂ ಗಾಳ್ಹಂ ಬನ್ಧಿತ್ವಾ ಪುನ ದಿವಸೇ ರಞ್ಞೋ ದಸ್ಸೇಸುಂ. ರಞ್ಞಾ ಕಸ್ಮಾ ಭಣೇ ಚೋರಕಮ್ಮ ಮಕಾಸೀತಿ ಪುಚ್ಛಿತೋ ನಾಹಂ ದೇವ ಚೋರೋ, ಆಗನ್ತುಕೋಮ್ಹೀತಿ ವುತ್ತೇ ರಾಜಾ ಚೋರೇ ಪರಿಯೇಸಿತ್ವಾ ಅಲಭನ್ತೋ ಅಯಮೇವ ಚೋರೋ, ಇಮಂ ಮಾರೇಥಾತಿ ಆಣಾಪೇಸಿ. ರಾಜಪುರಿಸೇಹಿ ತಂ ಗಾಳ್ಹಂ ಬನ್ಧಿತ್ವಾ ಆಘಾತನಂ ನೀತೇ ಸಾ ಇತ್ಥೀ ತಂ ತಥಾ ನೀಯಮಾನಂ ದಿಸ್ವಾ ಸಞ್ಜಾನಿತ್ವಾ ಕಮ್ಪಮಾನಹದಯಾ ಮುಹುತ್ತೇನ ರಞ್ಞೋ ಸನ್ತಿಕಂ ಗನ್ತ್ವಾ ವನ್ದಿತ್ವಾ ದೇವ ಏಸೋ ¶ ನ ಚೋರೋ ಆಗನ್ತುಕೋ ಮುಞ್ಚಥೇತಂ ದೇವಾತಿ ಆಹ. ರಾಜಾ ತಸ್ಸಾ ಕಥಂ ಅಸದ್ದಹನ್ತೋ ಯಜ್ಜೇತಂ ಮೋಚೇತು ಮಿಚ್ಛಸಿ. ತಸ್ಸಗ್ಘನಕಂ ಧನಂ ದತ್ವಾ ಮುಞ್ಚಾಪೇಹೀತಿ, ಸಾ ಸಾಮಿ ಮಮ ಗೇಹೇ ಧನಂ ನತ್ಥಿ. ಅಪಿಚ ಮಮ ಸತ್ತಪುತ್ತೇಹಿ ಸದ್ಧಿಂ ಮಂ ದಾಸಿಂ ಕರೋಹಿ, ಏತಂ ಮುಞ್ಚ ದೇವಾತಿ ಆಹ, ಅಥ ರಾಜಾ ತ್ವಂ ಏತಂ ಅಧುನಾಗತೋತಿ ವದಸಿ. ಏತಂ ನಿಸ್ಸಾಯ ಪುತ್ತೇಹಿ ಸದ್ಧಿಂ ಅತ್ತಾನಂ ದಾಸತ್ತಂ ಸಾವೇಸಿ. ಕಿಮೇಸೋ ತೇ ಞಾತಿ ವಾ, ಉದಾಹು ಉಪಕಾರಕೋತಿ ಪುಚ್ಛನ್ತೋ ಆಹ.

೧.

ಕಿಂತೇ ಭೋತಿ ಅಯಂ ಪೋಸೋ, ತುವಂ ಪುಚ್ಛಾಮಿ ಸಂಸಯಂ;

ಭಾತಾ ವಾ ತೇ ಪಿತಾ ಹೋತಿ, ಪತಿ ವಾ ದೇವರೋ ತವ.

೨.

ಞಾತಿ ಸಾಲೋಹಿತೋ ಕಿನ್ನು, ಉದಾಹು ಇಣದಾಯಕೋ;

ಅಥೋಪಕಾರಕೋ ಕಿನ್ನು, ಕಸ್ಮಾಸ್ಸ ದೇಸಿ ಜೀವಿತಂತಿ.

ತತೋ ಸಾ ಆಹ.

೩.

ಏಸೋ ಮೇ ಪುರಿಸೋ ದೇವ, ಕತಪುಬ್ಬೋಪಕಾರಕೋ;

ಅತಾಣಮೇಕಿಕಂ [ಅತ್ತಾನಮೇಕಿಕಂ ಇತಿಕತ್ಥಚಿ] ಚೇಸೋ, ದುಕ್ಖಿತಂ ಮರಣೇ ಠಿತಂ.

೪.

ವಿಜಾಯಿತು ಮಸಕ್ಕೋನ್ತಿಂ, ಗಬ್ಭಿನಿಂ ದುಕ್ಖವೇದಿನಿಂ;

ತೋಯೇನ ಮಂ ಉಪಟ್ಠಾಸಿ, ತೇನಾಹಂ ಸುಖಿತಾ ತದಾ.

೫.

ಭಙ್ಗಕಲ್ಲೋಲಮಾಲಾಯ, ಉತ್ತರನ್ತಂ ಮಹಣ್ಣವಂ;

ಪಹಾಯ ಪಾತುಂ ಕೂಪಸ್ಸ, ಯಾತಿ ಲೋಕೋ ಪಿಪಾಸಿತೋ.

೬.

ತಥೇವ ವಿಜ್ಜಮಾನೇಸು, ಜನೇಸು ಮನುಜಾಧಿಪ,

ಏಕಸ್ಸೇವ ಮನಸ್ಮಿಂಹಿ, ಗುಣಂ ತಿಟ್ಠತಿ ಸಾಧುಕಂ.

೭.

ಪಹತ್ವಾನ ಮತಂ ಹತ್ಥಿಂ, ಮಂಸತ್ಥೀ ಕೇಚಿ ಜನ್ತುನೋ;

ಅನುಬನ್ಧನ್ತಿ ಮಂಸತ್ಥಂ, ಸಸಂ ಧಾವನ್ತ ಮೇಕಕಂ.

೮.

ತಥೇವ ¶ ವಿಜ್ಜಮಾನೇಸು, ಜನೇಸು ಮನುಜಾಧಿಪ;

ಗುಣವನ್ತ ಮನುಬನ್ಧನ್ತಿ, ಸಪ್ಪುರಿಸಂ ಕತವೇದಿಕಂ.

೯.

ತಸ್ಮಾ ಸಪ್ಪುರಿಸೇ ಧಮ್ಮೇ, ಪತಿಟ್ಠಾಸ್ಮಿ ನರಾಧಿಪ;

ಅನುಸ್ಸರನ್ತಿ ಏತೇನ, ಕತಪುಬ್ಬೂ ಪಕಾರಕಂ.

೧೦.

ಅಹಞ್ಚ ಮಮ ಪುತ್ತಾ ಚ, ಏತೇನಮ್ಹ ಸುಖಾಪಿತಾ;

ಜೀವಿತಮ್ಪಿ ಪರಿಚ್ಚಜ್ಜ, ಮುಚ್ಚನೀಯೋ ಅಯಂ ಮಯಾತಿ.

ತತೋ ರಾಜಾ ದೋವಾರಿಕಂ ಪಕ್ಕೋಸಿತ್ವಾ ತಮ್ಪಿ ಪುಚ್ಛಿತ್ವಾ ಅಧುನಾಗತಭಾವಂ ಞತ್ವಾ ತಸ್ಸಾ ಸಪ್ಪುರಿಸಧಮ್ಮೇ ಸನ್ತುಟ್ಠೋ ತೇಸಂ ಉಭಿನ್ನಮ್ಪಿ ಮಹನ್ತಂ ಯಸಂ ಅನುಪ್ಪದಾಸಿ. ತೇ ಲದ್ಧಯಸಾ ತ ತೋ ಪಟ್ಠಾಯ ದಾನಾದೀನಿ ಪುಞ್ಞಕಮ್ಮಾನಿ ಕತ್ವಾ ಸಗ್ಗಪರಾಯಣಾ ಅಹೇಸುನ್ತಿ.

೧೧.

ಧಮ್ಮೇ ಪತಿಟ್ಠಿತಮನಾ ಅಪಿ ಮಾತುಗಾಮಾ,

ಏವಂ ಲಭನ್ತಿ ವಿಭವಞ್ಚ ಪಸಂಸನಞ್ಚ;

ಧಮ್ಮಞ್ಚ ಸಾಧುಚರಿತಂ ಮನಸೀಕರೋನ್ತೋ,

ಧಮ್ಮೇಸು ವತ್ತಥ ಸದಾ ಸುಚಿಸಜ್ಜನಾತಿ.

ಪಾನೀಯದಿನ್ನಸ್ಸ ವತ್ಥುಂ ನವಮಂ.

೨೦. ಸಹಾಯಸ್ಸ ಪರಿಚ್ಚತ್ತಜೀವಿತಕಸ್ಸ ವತ್ಥುಮ್ಹಿ ಅಯಮಾನುಪುಬ್ಬೀಕಥಾ

ಭಗವತಿ ಪರಿನಿಬ್ಬುತೇ ಸಾವತ್ಥಿಯಂ ಸೋಮಬ್ರಾಹ್ಮಣೋ ಸೋಮದತ್ತಬ್ರಾಹ್ಮಣೋತಿ ದ್ವೇ ಬ್ರಾಹ್ಮಣಾ ವಸನ್ತಿ. ತತ್ಥ ಸೋಮದತ್ತಬ್ರಾಹ್ಮಣೇನ ಸದ್ಧಿಂ ಸೋಮಬ್ರಾಹ್ಮಣೋ ಯೇಭುಯ್ಯೇನ ದೂತಂ ಕೀಳತಿ. ಅಥೇಕದಿವಸಂ ಸೋಮದತ್ತೋ ಸೋಮಬ್ರಾಹ್ಮಣಂ ತೇನ ಪರಾಜೇತ್ವಾ ತಸ್ಸ ಉತ್ತರಾಸಙ್ಗಞ್ಚ ಲಞ್ಛನಮುದ್ದಿಕಞ್ಚ ಗಹೇತ್ವಾ ಅತ್ತನೋ ಗೇಹಂ ಗಚ್ಛನ್ತೋ ಸೋಮಬ್ರಾಹ್ಮಣಸ್ಸ ಏಹಿ ಗೇಹಂ ಗಚ್ಛಾ- ಮಾತಿ ¶ ಆಹ. ತತೋ ಸೋಮೋ ನಾಹಂ ಸಮ್ಮ ಏಕಸಾಟಕೋ ಹುತ್ವಾ ಅನ್ತರವೀಥಿಂ ಓತರಿತುಂ ಸಕ್ಕೋಮಿ. ಗಮನತೋ ಏತ್ಥೇವ ಮೇ ಠಾನಂ ವರತರನ್ತಿ ಆಹ, ಸೋಮದತ್ತೇನ ಏವಂ ಸತಿ ಸಮ್ಮ ಇಮಂ ಉತ್ತರಾಸಙ್ಗಂ ಗಣ್ಹಾತಿ ತಸ್ಸ ತಂ ದತ್ವಾ ಇದಾನಿ ಸಮ್ಮ ಏಹೀತಿ ವುತ್ತೋಪಿ ನಾಗಚ್ಛತಿ. ಪುನ ತೇನ ಭೋ ಕಸ್ಮಾ ನಾಗಚ್ಛಸೀತಿ ಪುಟ್ಠೋ ಸಮ್ಮ ಮಮ ಹತ್ಥೇ ಮುದ್ದಿಕಂ ಅಪಸ್ಸನ್ತಾ ಮೇ ಪುತ್ತದಾರಾದಯೋ ಮಯಾ ಸದ್ಧಿಂ ಕಲಹಂ ಕರೋನ್ತೀತಿ ಆಹ, ಅಥ ಸೋ ಏವಂ ಸನ್ತೇ ಯದಾ ತೇ ಪಹೋತಿ. ತದಾ ಮಯ್ಹಂ ದೇಹೀತಿ ಮುದ್ದಿಕಮ್ಪಿ ದತ್ವಾ ತಂ ಗಹೇತ್ವಾ ಗೇಹಂ ಅಗಮಾಸಿ. ಅಥ ತೇ ಏತ್ತಕೇನ ಸಹಾಯಾ ಅಹೇಸುಂ. ಅಪರಭಾಗೇ ಸೋಮದತ್ತಬ್ರಾಹ್ಮಣಂ ಅಯಂ ಪರದಾರಕಮ್ಮಂ ಅಕಾಸೀತಿ ಮನುಸ್ಸಾ ಗಹೇತ್ವಾ ರಞ್ಞೋ ದಸ್ಸೇಸುಂ. ರಾಜಾ ತಸ್ಸ ರೂಪಸಮ್ಪತ್ತಿಂ ದಿಸ್ವಾ ರಾಜಾಣಂ ಅಕತ್ವಾ ಮಾ ಭೋ ಪುನ ಏವಮಕಾಸೀತಿ ಓವದಿತ್ವಾ ವಿಸ್ಸಜ್ಜೇಸಿ. ರಾಜಾ ನಂ ಯಾವತತಿಯವಾರಂ ಓವದನ್ತೋ ವಿಸ್ಸಜ್ಜೇತ್ವಾ ಚತುತ್ಥೇವಾರೇ ಗಚ್ಛಥೇತಂ ಆಘಾತನಂ ನೇತ್ವಾ ಮಾರೇಥಾತಿ ಆಣಾಪೇಸಿ. ಏವಂ ಪಾಪಕಮ್ಮೇ ನಿರತಾ ಅನೇಕಾಕಾರೇನ ಓವದನ್ತಾಪಿ ನ ಸಕ್ಕಾ ನಿವಾರೇತುಂ. ತಥಾಹಿ.

೧.

ಸೋಣಾ ಚೇವ ಸಿಗಾಲಾ ಚ, ವಾಯಸಾ ನೀಲಮಕ್ಖಿಕಾ;

ಇಚ್ಚೇತೇ ಕುಣಪೇ ಸತ್ತಾ, ನ ಸಕ್ಕಾ ತೇ ನಿಸೇಧಿತುಂ.

೨.

ತಥಾ ಪಾಣಾತಿಪಾತೇಸು, ಪರದಾರೇ ಸುರಾಯ ಚ;

ಮುಸಾವಾದೇಸು ಥೇಯ್ಯೇಸು, ಸತ್ತಸತ್ತಾ ನ ವಾರಿಯಾತಿ.

ತತೋ ರಾಜಪುರಿಸಾ ತಂ ಬನ್ಧಿತ್ವಾ ಪಕ್ಕಮಿಂಸು. ತದಾ ಸೋಮಬ್ರಾಹ್ಮಣೋ ಸೋಮದತ್ತಂ ತಥಾ ನೀಯಮಾನಂ ದಿಸ್ವಾ ಕಮ್ಪಮಾನಹದಯೋ ರಾಜಪುರಿಸಾನಂ ಸನ್ತಿಕಂ ಗನ್ತ್ವಾ ಇಮಂ ಭೋ ಮುಹುತ್ತಂ ಮಾ ಮಾರೇಥ. ಯಾವ ರಾಜಾನಂ ಜಾನಾಪೇಸ್ಸಾಮೀತಿ ವತ್ವಾ ರಞ್ಞೋ ಸನ್ತಿಕಂ ಗನ್ತ್ವಾ ವನ್ದಿತ್ವಾ ಠಿತೋ ದೇವ ಮಮ ಜೀವಿತಂ ಸೋಮದತ್ತಸ್ಸ ಬ್ರಾಹ್ಮಣಸ್ಸ ದಸ್ಸಾಮಿ. ಏತಂ ಮುಞ್ಚಥ. ಯದಿ ಮಾರೇತುಕಾಮಾ, ಮಂ ಮಾರೇಥಾತಿ ಆಹ. ರಾಜಾ ತುಣ್ಹೀ [ತುಟ್ಠೋ ಇತಿಕತ್ಥಚಿ] ಅಹೋಸಿ, ರಾಜಪುರಿಸಾ ಸೋಮದತ್ತಂ ಮುಞ್ಚಿತ್ವಾ ¶ ಸೋಮಬ್ರಾಹ್ಮಣಂ ಆಘಾತನಂ ನೇತ್ವಾ ಮಾರೇಸುಂ, ಅಹೋ ಕತಞ್ಞುನೋ ಕತವೇದಿತಾ.

ಹೋತಿ ಚೇತ್ಥ.

೩.

ಕಕೂಪಕಾರ ಮತ್ತಾನಂ, ಸರನ್ತಾ ಕೇಚಿ ಮಾನುಸಾ;

ಜೀವಿತಂ ದೇನ್ತಿ ಸೋಮೋವ, ಸೋಮದತ್ತಸ್ಸ ಅತ್ತನೋತಿ.

ಸೋ ತೇನ ಜೀವಿತದಾನೇನ ದೇವಲೋಕೇ ನಿಬ್ಬತ್ತಿತ್ವಾ ಮಹನ್ತೇ ಕನಕವಿಮಾನೇ ದೇವಚ್ಛರಾಸಹಸ್ಸಪರಿವುತೋ ದಿಬ್ಬಸಮ್ಪತ್ತಿಮನುಭೋನ್ತೋ ಪಟಿವಸತಿ. ತದಾ ಸೋಮದತ್ತಬ್ರಾಹ್ಮಣೋ ಏಸೋ ಮಂ ಮರಣಪ್ಪತ್ತಂ ಮೋಚೇಸೀತಿ ವತ್ವಾ ತಸ್ಸತ್ಥಾಯ ದಾನಂ ದತ್ವಾ ಪತ್ತಿಂ ಅದಾಸಿ. ತಾವದೇವಸ್ಸ ತತೋ ಬಹುತರಂ ದೇವಿಸ್ಸರಿಯಂ ಅಹೋಸಿ ದೇವಾನುಭಾವಞ್ಚ. ತತೋ ಸೋ ಸೋಮದೇವೋ ಅತ್ತನೋ ದೇವಿಸ್ಸರಿಯಂ ಓಲೋಕೇನ್ತೋ ಸಹಾಯಸ್ಸ ಅತ್ತನೋ ಜೀವಿತದಾನಂ ಅದ್ದಸ. ದಿಸ್ವಾ ಅತ್ತಭಾವಂ ವಿಜಹಿತ್ವಾ ಮಾಣವಕವಣ್ಣೇನ ಸೋಮದತ್ತಬ್ರಾಹ್ಮಣಂ ಉಪಸಙ್ಕಮಿತ್ವಾ ಪಟಿಸನ್ಥಾರಂ ಕತ್ವಾ ಅತ್ತಾನಂ ದೇವಲೋಕೇ ನಿಬ್ಬತ್ತಭಾವಂ ಪಕಾಸೇತ್ವಾ ತಂ ಗಹೇತ್ವಾ ಅತ್ತನೋ ಆನುಭಾವೇನ ದೇವಲೋಕಂ ನೇತ್ವಾ ಯಥಾಕಾಮಂ ಸಮ್ಪತ್ತಿ ಮನುಭವಾತಿ ವತ್ವಾ ಸತ್ತಾಹಂ ದೇವಸ್ಸರಿಯಂ ದತ್ವಾ ಸತ್ತಮೇ ದಿವಸೇ ನೇತ್ವಾ ತಸ್ಸ ಗೇಹೇಯೇವ ಪತಿಟ್ಠಾಪೇಸಿ. ತತ್ಥ ಹಿ ದಿಬ್ಬಸಮ್ಪತ್ತಿ ಮನುಭೂತಸ್ಸ ಮನುಸ್ಸಸಮ್ಪತ್ತಿ ಪಟಿಕ್ಕುಲಾ ಹೋತಿ. ತತೋ ಸೋ ದಿಬ್ಬಸಮ್ಪತ್ತಿಮನುಸ್ಸರನ್ತೋ ಕಿಸೋ ದುಬ್ಬಲೋ ಉಪ್ಪಣ್ಡುಪ್ಪಣ್ಡುಕಜಾತೋ ಅಹೋಸಿ. ಅಥೇಕದಿವಸಂ ದೇವಪುತ್ತೋ ತಂ ಓಲೋಕೇನ್ತೋ ತಥಾ ದುಕ್ಖಪ್ಪತ್ತಂ ದಿಸ್ವಾ ನ ಸಕ್ಕಾ ಮನುಸ್ಸೇನ ದಿಬ್ಬಸಮ್ಪತ್ತಿಮನುಭವಿತುನ್ತಿ ಇಚ್ಛಿತಿಚ್ಛಿತಸಮ್ಪತ್ತಿದಾಯಕಂ ಏಕಂ ಚಿನ್ತಾಮಣಿಂ ದತ್ವಾ ತಸ್ಸ ಭರಿಯಮ್ಪಿ ಅತ್ತನೋ ಆನುಭಾವೇನ ರೂಪವನ್ಥಂ ಯಸವನ್ತಂ ವಣ್ಣವನ್ತಂ ಅತಿಕ್ಕನ್ತಮನುಸ್ಸಿತ್ಥಿವಣ್ಣಂ ಅಕಾಸಿ, ಅಪರಭಾಗೇ ತೇ ಜಯಮ್ಪತಿಕಾ ಪಚ್ಚಕ್ಖತೋ ದಿಟ್ಠದಿಬ್ಬಸಮ್ಪತ್ತಿವಿಭವಾ ದಾನಂ ದತ್ವಾ ಸೀಲಂ ರಕ್ಖಿತ್ವಾ ಸಹಾಯದೇವಪುತ್ತಸ್ಸ ಸನ್ತಿಕೇಯೇವ ನಿಬ್ಬತ್ತಿಂಸೂತಿ.

೪.

ಮನ್ದೇನ ¶ ನನ್ದಿತಮನಾ ಉಪಕಾರಕೇನ,

ಪಾಣಮ್ಪಿ ದೇನ್ತಿ ಸುಜನಾ ಇತಿ ಚಿನ್ತಯಿತ್ವಾ;

ಮಿತ್ತದ್ದು ಮಾ ಭವಥ ಭೋ ಉಪಕಾರಕಸ್ಸ;

ಪಾಸಂಸಿಯಾ ಭವಥ ಸಾಧುಜನೇಹಿ ನಿಚ್ಚಂತಿ.

ಸಹಾಯಸ್ಸ ಪರಿಚ್ಚತ್ತಜೀವಿತಕಸ್ಸ ವತ್ಥುಂ ದಸಮಂ.

ನನ್ದಿಯರಾಜವಗ್ಗೋ ದುತಿಯೋ.

ಯಕ್ಖವಞ್ಚಿತವಗ್ಗೋ

೨೧. ಯಕ್ಖವಞ್ಚಿತ ವತ್ಥುಮ್ಹಿ ಅಯಮಾನುಪುಬ್ಬೀಕಥಾ

ಭಗವತಿ ¶ ಪರಿನಿಬ್ಬುತಮ್ಹಿ ಕೋಸಲರಞ್ಞೋ ಕಿರ ಜನಪದೇ ತುಣ್ಡಗಾಮೋನಾಮ ಅಹೋಸಿ. ತತ್ಥೇಕೋ ಬುದ್ಧದಾಸೋ ನಾಮ ಮನುಸ್ಸೋ ‘‘ಯಾವಜೀವಂ ಬುದ್ಧಂ ಸರಣಂ ಗಚ್ಛಾಮಿ. ಬುದ್ಧೋ ಮೇ ಸರಣಂ ತಾಣಂ ಲೇಣಂ ಪರಾಯಣನ್ತಿ’’ ಏವಂ ಜೀವಿತಪರಿಯನ್ತಂ ಬುದ್ಧಂ ಸರಣಂ ಗತೋ ಪಟಿವಸತಿ, ತಸ್ಮಿಂ ಸಮಯೇ ಏಕೋ ಜನಪದವಾಸಿಕೋ ತತ್ಥ ತತ್ಥ ಆಹಿಣ್ಡನ್ತೋ ತಂ ತುಣ್ಡಗಾಮಂ ಪತ್ವಾ ತಸ್ಸೇವ ಘರೇ ನಿವಾಸಂ ಕಪ್ಪೇಸಿ, ತಸ್ಸ ಪನ ಜಾನಪದಿಕಸ್ಸ ಸರೀರೇ ಏಕೋ ಯಕ್ಖೋ ಆವಿಸಿತ್ವಾ ಪೀಳೇತಿ, ತದಾ ತಸ್ಸ ಗಾಮಸ್ಸ ಪವಿಸನಕಾಲೇ ಯಕ್ಖೋ ಬುದ್ಧದಾಸೋ ಪಾಸಕಸ್ಸ ಗುಣತೇಜೇನ ತಸ್ಸ ಗೇಹಂ ಪವಿಸಿತುಂ ಅಸಕ್ಕೋನ್ತೋ ತಂ ಮುಞ್ಚಿತ್ವಾ ಬಹಿಗಾಮೇ ಸತ್ತಾಹಂ ಅಟ್ಠಾಸಿ ತಸ್ಸಾಗಮನಂ ಓಲೋಕೇನ್ತೋ. ತತೋ ಸೋ ಜಾನಪದಿಕೋ ಸತ್ತದಿವಸಂ ತತ್ಥ ವಸಿತ್ವಾ ಸತ್ತಮೇ ದಿವಸೇ ಸಕರಟ್ಠಂ ಗನ್ತುಕಾಮೋ ಗಾಮಾ ನಿಕ್ಖಮಿ. ಅಥ ತಂ ತಥಾ ನಿಕ್ಖನ್ತಂ ದಿಸ್ವಾ ಯಕ್ಖೋ ಅಗ್ಗಹೇಸಿ, ಅಥ ಸೋ ತಂ ಏತ್ತಕಂ ಕಾಲಂ ಕುಹಿಂಗತೋಸೀತಿ ಪುಚ್ಛಿ. ಯಕ್ಖೋ ಭೋ ತವತ್ಥಾಯ ಏತ್ಥ ವಸನ್ತಸ್ಸ ಮೇ ಸತ್ತಾಹಂ ಅತಿಕ್ಕನ್ತನ್ತಿ. ತತೋ ಸೋ ಕೋ ತೇ ಮಯಾ ಅತ್ಥೋ, ಕಿಂ ತೇ ದಮ್ಮೀತಿ, ಅಥ ಯಕ್ಖೇನ ಭೋ ಅಹಂ ಖುದಾಯ ಪೀಳಿತೋ ಭತ್ತೇನ ಮೇ ಅತ್ಥೋತಿ ವುತ್ತೋ ಸೋ ಏವಂ ಸತಿ ಕಸ್ಮಾ ಮಂ ಅನ್ತೋಗೇಹೇ ವಸನ್ತಂ ನ ಗಣ್ಹೀತಿ ಆಹ. ಯಕ್ಖೇನ ಭೋ ತಸ್ಮಿಂ ಘರೇ ಬುದ್ಧಂ ಸರಣಂ ಗತೋ ಏಕೋ ಉಪಸಕೋ ಅತ್ಥಿ, ತಸ್ಸ ಸೀಲತೇಜೇನ ಗೇಹಂ ಪವಿಸಿತುಮಸಕ್ಕೋನ್ತೋ ಅಟ್ಠಾಸಿನ್ತಿ ವುತ್ತೋ ಜಾನಪದಿಕೋ ಸರಣಂ ನಾಮ ಕಿನ್ತಿ ಅಜಾನನ್ತೋ ಕಿನ್ತಿ ವತ್ವಾ ಸೋ ಸರಣಂ ಅಗ್ಗಹೇಸೀತಿ ಯಕ್ಖಂ ಪುಚ್ಛಿ. ಯಕ್ಖೋ ‘‘ಬುದ್ಧಂ ಸರಣಂ ಗಚ್ಛಾಮೀ’’ತಿ ವತ್ವಾ ಸರಣಂ ಅಗ್ಗಹೇಸೀತಿ ಆಹ. ತಂ ಸುತ್ವಾ ಜಾನಪದಿಕೋ ಇದಾನಿ ಇಮಂ ವಞ್ಚೇಸ್ಸಾಮೀತಿ ಚಿನ್ತೇತ್ವಾ ತೇನಹಿ ಯಕ್ಖ ಅಹಮ್ಪಿ ಬುದ್ಧಂ ಸರಣಂ ಗಚ್ಛಾಮೀತಿ ಆಹ. ಏವಂ ವುತ್ತಮತ್ತೇಯೇವ ಯಕ್ಖೋ ಮಹಾಸದ್ದಂ ಕರೋನ್ತೋ ಭ ಯೇ ನ ಭಮನ್ತೋ ¶ ಪಲಾಯಿ, ಏವಂ ಸಮ್ಮಾಸಮ್ಬುದ್ಧಸ್ಸ ಸರಣಂ ಇಧಲೋಕೇ ಭಯೋ ಪದ್ದವ ನಿವಾರಣತ್ಥಂ ಹೋತಿ, ಪರಲೋಕೇ ಸಗ್ಗಮೋಕ್ಖಾವಹಂ. ತಥಾಹಿ.

೧.

ಬುದ್ಧೋತಿ ವಚನಂ ಏತಂ, ಅಮನುಸ್ಸಾನಂ ಭಯಾವಹಂ;

ಬುದ್ಧಭತ್ತಿಕಜನ್ತೂನಂ, ಸಬ್ಬದಾ ಮುದಮಾವಹಂ.

೨.

ಸಬ್ಬೋಪದ್ದವನಾಸಾಯ, ಪಚ್ಚಕ್ಖದಿಬ್ಬಮೋಸಧಂ;

ದಿಬ್ಬಮನ್ತಂ ಮಹಾತೇಜಂ, ಮಹಾಯನ್ತಂ ಮಹಬ್ಭುತಂ.

೩.

ತಸ್ಮಾ ಸೋ ದಾರುಣೋ ಯಕ್ಖೋ,

ದಿಸ್ವಾ ತಂ ಸರಣೇ ಠಿಥಂ;

ಉಬ್ಬಿಗ್ಗೋ ಚ ಭಯಪ್ಪತ್ತೋ,

ಲೋಮಹಟ್ಠೋ ಚ ಛಮ್ಭೀತೋ.

೪.

ಭಮನ್ತೋ ಧಾವಿತಂ ದಿಸ್ವಾ, ತಿಮಿರೋವ ಸುರಿಯುಗ್ಗತೇ,

ಸಿಮ್ಬಲಿತೂಲಭಟ್ಠಂವ, ಚಣ್ಡವಾತೇನ ಖಣ್ಡಿತಂ.

೫.

ಯಂ ದುಕ್ಖಂ ರಾಜಚೋರಾರಿ, ಯಕ್ಖಪೇತಾ ದಿಸಮ್ಭವಂ;

ನಿಚ್ಛನ್ತೇನ ಮನುಸ್ಸೇನ, ಗನ್ತಬ್ಬಂ ಸರಣತ್ತಯಂತಿ.

ತತೋ ಜಾನಪದಿಕೋ ಸರಣಾಗಮನೇ ಮಹಾಗುಣಂ ಮಹಾನಿಸಂಸಂ ಓಲೋಕೇತ್ವಾ ಬುದ್ಧೇ ಸಗಾರವೋ ಸಪ್ಪೇಮೋ ‘‘ಜೀವಿತಪರಿಯನ್ತಂ ಬುದ್ಧಂ ಸರಣಂ ಗಚ್ಛಾಮೀ’’ತಿ ಸರಣಂ ಗನ್ತ್ವಾ ತೇನೇವ ಸರಣಾಗಮನಾನುಭಾವೇನ ಜೀವಿತಪರಿಯೋಸಾನೇ ಸುತ್ತಪ್ಪಬುದ್ಧೋವಿಯ ದೇವಲೋಕೇ ನಿಬ್ಬತ್ತೀತಿ.

೬.

ದಿಸ್ವಾನ ಏವಂ ಸರಣಂ ಗತಂ ತಂ,

ಅಪೇನ್ತಿ ಯಕ್ಖಾಪಿ ಮಹಬ್ಭಯೇನ;

ಪಾಲೇಥ ಸೀಲಂ ಸರಣಞ್ಚ ತಸ್ಮಾ,

ಜಹಾಥ ದುರಿತಂ ಸುಗತಿಂ ಭಜವ್ಹೋತಿ.

ಯಕ್ಖವಞ್ಚಿತವತ್ಥುಂ ಪಥಮಂ.

೨೨. ಮಿಚ್ಛದಿಟ್ಠಿಕಸ್ಸ ವತ್ಥುಮ್ಹಿ ಅಯಮಾನುಪುಬ್ಬೀಕಥಾ

ಭಗವತಿ ¶ ಧರಮಾನೇ ರಾಜಗಹನಗರೇ ಕಿರ ಏಕೋ ಬ್ರಹ್ಮಭತ್ತಿಕೋ ಮಿಚ್ಛಾದಿಟ್ಠಿಕೋ ಪಟಿವಸತಿ, ತತ್ಥೇವ ಸಮ್ಮಾದಿಟ್ಠಿಕೋಪಿ. ತೇಸಂ ಉಭಿನ್ನಮ್ಪಿ ದ್ವೇ ಪುತ್ತಾ ಅಹೇಸುಂ. ತೇ ಏಕತೋ ಕೀಳನ್ತಾ ವಡ್ಢನ್ತಿ. ಅಥಾಪರಭಾಗೇ ಗುಳಕೀಳಂಕೀಳನ್ತಾನಂ ಸಮ್ಮಾದಿಟ್ಠಿಕಸ್ಸ ಪುತ್ತೋ ‘‘ನಮೋ ಬುದ್ಧಯಾ’’ತಿ ವತ್ವಾ ಗುಳ್ಹಂ ಖಿಪನ್ತೋ ದಿವಸೇ ದಿವಸೇ ಜಿನಾತಿ. ಮಿಚ್ಛಾದಿಟ್ಠಿಕಸ್ಸ ಪುತ್ತೋ ‘‘ನಮೋ ಬ್ರಹ್ಮುನೋ’’ತಿ ವತ್ವಾ ಖಿಪನ್ತೋ ಪರಾಜೇತಿ, ತತೋ ಮಿಚ್ಛಾದಿಟ್ಠಿಕಸ್ಸ ಪುತ್ತೋ ನಿಚ್ಚಂ ಜಿನನ್ತಂ ಸಮ್ಮಾದಿಟ್ಠಿಕಂ ಕುಮಾರಂ ದಿಸ್ವಾ ಸಮ್ಮ ತ್ವಂ ನಿಚ್ಚಮೇವ ಜಿನಾಸಿ, ಕಿಂ ವತ್ವಾ ಗುಳಂ ಖಿಪಸೀತಿ ಪುಚ್ಛಿ. ಸೋಹಂ ಸಮ್ಮ ‘‘ನಮೋ ಬುದ್ಧಾಯಾ’’ತಿ ವತ್ವಾ ಖಿಪಾಮೀತಿ ಆಹ. ಸೋಪಿ ತತೋ ಪಟ್ಠಾಯ ‘‘ನಮೋ ಬುದ್ಧಾಯಾ’’ತಿ ವತ್ವಾ ಖಿಪತಿ, ಅಥ ತೇ ಯೇಭುಯ್ಯೇನ ದೂತೇ ಸಮಸಮಾವ ಹೋನ್ತಿ. ಅಪರಭಾಗೇ ಮಿಚ್ಛಾದಿಟ್ಠಿಕಸ್ಸ ಪುತ್ತೋ ಪಿತರಾ ಸದ್ಧಿಂ ದಾರೂನಮತ್ಥಾಯ ವನಂ ಗನ್ತ್ವಾ ಸಕಟೇನ ದಾರುಂ ಗಹೇತ್ವಾ ಆಗಚ್ಛನ್ತೋ ನಗರದ್ವಾರಸಮೀಪೇ ಸಕಟಂ ವಿಸ್ಸಜ್ಜೇತ್ವಾ ತಿಣೇ ಖಾದನತ್ಥಾಯ ಗೋಣೇ ವಿಸ್ಸಜ್ಜೇಸಿ, ಗೋಣಾ ತಿಣಂ ಖಾದನ್ತೋ ಅಞ್ಞೇಹಿ ಗೋರೂಪೇಹಿ ಸದ್ಧಿಂ ಅನ್ತೋನಗರಂ ಪವಿಸಿಂಸು. ಅಥಸ್ಸ ಪಿತಾ ಗೋಣೇ ಪರಿಯೇಸನ್ತೋ ಸಕಟಂ ಓಲೋಕೇಹೀತಿ ಪುತ್ತಂ ನಿವತ್ತೇತ್ವಾ ನಗರಂ ಪವಿಟ್ಠೋ ಅಹೋಸಿ, ಅಥ ಸಾಯಣ್ಹೇ ಜಾತೇ ಮನುಸ್ಸಾ ನಗರದ್ವಾರಂ ಪಿದಹಿಂಸು, ತತೋ ಕುಮಾರೋ ಬಹಿನಗರೇ ದಾರುಸಕಟಸ್ಸ ಹೇಟ್ಠಾ ಸಯನ್ತೋ ನಿದ್ದೂಪಗತೋ ಅಹೋಸಿ. ಅಥ ತಸ್ಸಾ ರತ್ತಿಯಾ ಸಮ್ಮಾದಿಟ್ಠಿಕೋ ಚ ಮಿಚ್ಛಾದಿಟ್ಠಿಕೋ ಚಾತಿ ದ್ವೇ ಯಕ್ಖಾ ಗೋಚರಂ ಪರಿಯೇಸಮಾನಾ ಸಕಟಸ್ಸ ಹೇಟ್ಠಾ ನಿಪನ್ನಂ ಕುಮಾರಂ ಅದ್ದಸಂಸು, ತೇಸು ಮಿಚ್ಛಾದಿಟ್ಠಿಕೋ ಇಮಂ ಖಾದಾಮೀತಿ ಆಹ. ಅಥಾಪರೋ ಮಾ ಏವ ಮಕಾಸಿ, ‘‘ನಮೋ ಬುದ್ಧಾಯಾ’’ತಿ ವಾಚಕೋ ಏಸೋತಿ, ಖಾದಾಮೇವೇತನ್ತಿ ವತ್ವಾ ಇತರೇನ ಯಾವತತಿಯಂ ವಾರಿಯಮಾನೋಪಿ ಗನ್ತ್ವಾ ತಸ್ಸ ಪಾದೇ ಗಹೇತ್ವಾ ಆಕಡ್ಢಿ. ತಸ್ಮಿಂ ಖಣೇ ದಾರಕೋ ಪುಬ್ಬಪರಿಚಯೇನ ‘‘ನಮೋ ಬುದ್ಧಾಯಾ’’ತಿ ಆಹ ತಂ ಸುತ್ವಾ ಯಕ್ಖೋ ಭಯಪ್ಪತ್ತೋ ಲೋಮಹಟ್ಠೋ ¶ ಹತ್ಥಂ ವಿಸ್ಸಜ್ಜೇತ್ವಾ ಪಟಿಕ್ಕಮ್ಮ ಅಟ್ಠಾಸಿ. ಅಹೋ ಅಚ್ಛರಿಯಂ ಬುದ್ಧಾನುಭಾವಂ ಅಬ್ಭುತಂ, ಏವಂ ಅತ್ತಂ ಅನೀಯ್ಯಾತೇತ್ವಾ ಪರಿಚಯೇನ ‘‘ನಮೋ ಬುದ್ಧಾಯಾ’’ತಿ ವುತ್ತಸ್ಸಪಿ ಭಯಂ ಛಮ್ಭಿತತ್ತಂ ಉಪದ್ದವಂ ವಾ ನ ಹೋತಿ. ಪಗೇವ ಅತ್ತಂ ನೀಯ್ಯಾತೇತ್ವಾ ಯಾವಜೀವಂ ಬುದ್ಧಂ ಸರಣಂ ಗತಸ್ಸಾತಿ. ವುತ್ತಞ್ಹಿ.

೧.

ಯಥಾಪಿ ಸಿಖಿನೋ ನಾದಂ, ಭುಜಙ್ಗಾನಂ ಭಯಾವಹಂ;

ಏವಂ ಬುದ್ಧೋತಿ ವಚನಂ, ಅಮನುಸ್ಸಾನಂ ಭಯಾವಹಂ.

೨.

ಯಥಾ ಮನ್ತಸ್ಸ ಜಪ್ಪೇನ, ವಿಲಯಂ ಯಾತಿ ಕಿಬ್ಬಿಸಂ;

ಏವಂ ಬುದ್ಧೋತಿ ವಚನೇನ, ಅಪಯನ್ತಿ [ಪಹಾಯನ್ತಿ ಇತಿಸಬ್ಬತ್ಥ] ಪಿಸಾಚಕಾ.

೩.

ಅಗ್ಗಿಂ ದಿಸ್ವಾ ಯಥಾ ಸಿತ್ಥಂ, ದೂರತೋವ ವಿಲೀಯತಿ;

ದಿಸ್ವಾನೇವಂ ಸರಣಗತಂ, ಪೇತಾ ಪೇನ್ತಿವ [ಪೇತಾಪೇನ್ತಾವ ಇತಿಕತ್ಥಚಿ] ದೂರತೋ.

೪.

ಪವರಂ ಬುದ್ಧಇಚ್ಚೇತ, ಮಕ್ಖರದ್ವಯಮಬ್ಭುತಂ;

ಸಬ್ಬೋ ಪದ್ದವನಾಸಾಯ, ಥಿರಪಾಕಾರ ಮುಗ್ಗತಂ.

೫.

ಸತ್ತರತನಪಾಸಾದಂ, ತಮೇವ ವಜಿರಂ ಗುಹಂ;

ತಮೇವ ನಾವಂ ದೀಪಂ ತಂ, ತಮೇವ ಕವಚಂ ಸುಭಂ.

೬.

ತಮೇವ ಸಿರಸಿ ಭಾಸನ್ತಂ, ಕಿರೀಟಂ ರತನಾಮಯಂ;

ಲಲಾಟೇ ತಿಲಕಂ ರಮ್ಮಂ, ಕಪ್ಪೂರಂ ನಯನದ್ವಯೇ.

೭.

ತಾಡಙ್ಕಂ ಕಣ್ಣಯುಗಲೇ, ಸೋಣ್ಣಮಾಲಾ ಗಲೇ ಸುಭಾ;

ಏಕಾವಳಿ ತಾರಹಾರ, ಭಾರಾ ಜತ್ತುಸು ಲಙ್ಕತಾ.

೮.

ಅಙ್ಗದಂ ಬಾಹುಮೂಲಸ್ಸ, ಕರಗ್ಗೇ ವಲಯಂ ತಥಾ;

ಅಙ್ಗುಲಿಸ್ವಙ್ಗುಲಿಯಞ್ಚ, ಖಗ್ಗಂ ಮಙ್ಗಲಸಮ್ಮತಂ.

೯.

ಸೋಣ್ಣಾ ತಪತ್ತ ಮುಣ್ಹೀಸಂ, ಸಬಾಣಂವ ಸರಾಸನಂ;

ತಮೇವ ಸಬ್ಬಾಲಙ್ಕಾರಂ, ತಮೇವ ದುರಿತಾಪಹಂ.

೧೦.

ತಸ್ಮಾ ¶ ಹಿ ಪಣ್ಡಿತೋ ಪೋಸೋ,

ಲೋಕಲೋಚನಸತ್ಥುನೋ;

ಸರಣಂ ತಸ್ಸ ಗನ್ತೇವ,

ಗುಣನಾಮಂ ಏಹಿಪಸ್ಸಿಕಂ.

೧೧.

ನಮೋತಿ ವಚನಂ ಪುಬ್ಬಂ, ಬುದ್ಧಾಯೇತಿ ಗಿರಂ ತದಾ;

ಸುಪನ್ತೇನ ಕುಮಾರೇನ, ಮಿಚ್ಛಾದಿಟ್ಠಿಕಸೂನುನಾ.

೧೨.

ಸುತ್ವಾ ವುತ್ತಂ ಪಿಸಾ ಚಾಪಿ, ಮನುಸ್ಸಕುಣಪೇ ರತಾ;

ನ ಹಿಂಸನ್ತಿ ಅಹೋ ಬುದ್ಧ, ಗುಣಸಾರಮಹನ್ತತಾತಿ.

ಅಥ ಸಮ್ಮಾದಿಟ್ಠಿಕಯಕ್ಖೋ ಮಿಚ್ಛಾದಿಟ್ಠಿಕಸ್ಸ ಯಕ್ಖಸ್ಸ ಏವಮಾಹ, ಅಯುತ್ತಂ ಭೋ ತಯಾ ಕತಂ. ಬುದ್ಧಗುಣೇ ಪಹಾರೋ ದಿನ್ನೋ, ದಣ್ಡಕಮ್ಮಂ ತಯಾ ಕಾತಬ್ಬಂತಿ, ತೇನ ಕಿಂಮಯಾ ಸಮ್ಮ ಕಾತಬ್ಬನ್ತಿ ವುತ್ತೇ ಬುಭುಕ್ಖಿತಸ್ಸ ಆಹಾರಂ ದೇಹೀತಿ ಆಹ. ತತೋ ಸೋ ಸಾಧೂತಿ ವತ್ವಾ ಯಾವಾಹಂ ಆಗಚ್ಛಾಮಿ, ತ್ವಂ ತಾವೇತ್ಥ ವಚ್ಛಾಹೀತಿ ವತ್ವಾ ಬಿಮ್ಬಿಸಾರರಞ್ಞೋ ಕಞ್ಚನತಟ್ಟಕೇ ವಡ್ಢಿತಂ ರಸಭೋಜನಂ ಆಹರಿತ್ವಾ ಕುಮಾರಸ್ಸ ಪಿತುವಣ್ಣೇನ ದಾರಕಂ ಭೋಜೇತ್ವಾ ಪುನ ಕುಮಾರೇನ ವುತ್ತಬುದ್ಧವಚನಞ್ಚ ಅತ್ತನಾ ಕತವಾಯಾಮಂ ಚಾತಿ ಸಬ್ಬಂ ತಟ್ಟಕೇ ಲಿಖಿತ್ವಾ ಇದಂ ರಞ್ಞೋಯೇವ ಪಞ್ಞಾಯತೂತಿ ಅಧಿಟ್ಠಾಯ ಅಗಮಂಸು, ಅಥ ಪಭಾತಾಯ ರತ್ತಿಯಾ ರಞ್ಞೋ ಭೋಜನಕಾಲೇ ರಾಜಪುರಿಸಾ ತತ್ಥ ತಟ್ಟಕಂ ಅದಿಸ್ವಾ ನಗರಂ ಉಪಪರಿಕ್ಖನ್ತಾ ಸಕಟೇ ದಾರಕಞ್ಚ ತಟ್ಟಕಞ್ಚ ದಿಸ್ವಾ ತಟ್ಟಕೇನ ಸದ್ಧಿಂ ತಂ ಗಹೇತ್ವಾ ರಞ್ಞೋ ದಸ್ಸೇಸುಂ. ರಾಜಾ ತಟ್ಟಕೇ ಅಕ್ಖರಾದೀನಿ ದಿಸ್ವಾ ವಾಚೇತ್ವಾ ತಸ್ಸ ಗುಣೇ ಪಸನ್ನೋ ಮಹನ್ತೇನ ಯಸೇನ ಸದ್ಧಿಂ ಸೇಟ್ಠಿಟ್ಠಾನಮದಾಸಿ.

೧೩.

ಜಿನಸ್ಸ ನಾಮಂ ಸುಪಿನೇನ ಪೇವಂ,

ನ ಹೋತಿ ಭೀತಿಂ ಲಪನೇನ ಯಸ್ಮಾ;

ತಸ್ಮಾ ಮುನಿನ್ದಂ ಸತತಂ ಸರಾಥ,

ಗುಣೇ ಸರನ್ತಾ ಸರಣಞ್ಚ ಯಾಥಾತಿ.

ಮಿಚ್ಛಾದಿಟ್ಠಿಕಸ್ಸ ವತ್ಥುಂ ದುತಿಯಂ.

೨೩. ಪಾದಪೀಠಿಕಾಯ ವತ್ಥುಮ್ಹಿ ಅಯಮಾನುಪುಬ್ಬೀಕಥಾ

ಜಮ್ಬುದೀಪೇ ¶ ಮಹಾಬೋಧಿತೋ ಕಿರ ದಕ್ಖಿಣಪಸ್ಸೇ ಏತಂ ಪಚ್ಚನ್ತನಗರಂ ಅಹೋಸಿ. ತತ್ಥ ಸದ್ಧಾಸಮ್ಪನ್ನೋ ರತನತ್ತಯಮಾಮಕೋ ಏಕೋ ಉಪಾಸಕೋ ಪಟಿವಸತಿ. ತದಾ ಏಕೋ ಖೀಣಾಸವೋ ಭಗವತಾ ಪರಿಭುತ್ತಂ ಪಾದಪೀಠಂ ಥವಿಕಾಯ ಪಕ್ಖಿಪಿತ್ವಾ ಗತಗತಟ್ಠಾನೇ ಪೂಜೇನ್ತೋ ಅನುಕ್ಕಮೇನ ತಂ ನಗರಂ ಸಮ್ಪಾಪುಣಿತ್ವಾ ಸುನಿವತ್ಥೋ ಸುಪಾರುತೋ ಪತ್ತಂ ಗಹೇತ್ವಾ ಅನ್ತರವೀಥಿಂ ಪಟಿಪಜ್ಜಿ ಯುಗಮತ್ತದಸೋ ಪಬ್ಬಜ್ಜಾಲೀಲಾಯ ಜನಂ ಪರಿತೋಸೇನ್ತೋ. ಅಥ ಸೋ ಉಪಾಸಕೋ ತಥಾ ಗಚ್ಛನ್ತಂ ಥೇರಂ ದಿಸ್ವಾ ಪಸನ್ನಮಾನಸೋ ಉಪಗನ್ತ್ವಾ ಪಞ್ಚಪತಿಟ್ಠಿತೇನ ವನ್ದಿತ್ವಾ ಪತ್ತಂ ಗಹೇತ್ವಾ ಭೋಜೇತ್ವಾ ನಿಬದ್ಧಂ ಮಮ ಗೇಹಂ ಆಗಮನಮಿಚ್ಛಾಮಿ, ಮಮಾನುಕಮ್ಪಾಯ ಏತ್ಥೇವ ವಸಥ ಸಾಮೀತಿ ಯಾಚಿತ್ವಾ ನಗರಾಸನ್ನೇ ರಮಣೀಯೇ ವನಸಣ್ಡೇ ನದೀಕೂಲೇ ಪಣ್ಣಸಾಲಂ ಕತ್ವಾ ಥೇರಸ್ಸ ತಂ ನೀಯ್ಯಾತೇತ್ವಾ ಚತುಪಚ್ಚಯೇಹಿ ಪಟಿಜಗ್ಗನ್ತೋ ಮಾನೇನ್ತೋ ಪೂಜೇನ್ತೋ ವಸತಿ. ಥೇರೋಪಿ ತತ್ಥ ಫಾಸುಕಟ್ಠಾನೇ ಭಗವತಾ ಪರಿಭುತ್ತಪಾದಪೀಠಧಾತುಂ ನಿಧಾಯ ವಾಲುಕಾಹಿ ಥೂಪಂ ಕತ್ವಾ ನಿಚ್ಚಂ ಗನ್ಧಧೂಪದೀಪಪುಪ್ಫಪೂಜಾದೀಹಿ ಪೂಜಯಮಾನೋ ವಾಸಂ ಕಪ್ಪೇತಿ. ತಸ್ಮಿಂ ಸಮಯೇ ತಸ್ಸೋ ಪಾಸಕಸ್ಸ ಅನನ್ತರಗೇಹವಾಸಿಕೋ ಏಕೋ ಇಸ್ಸರಭತ್ತಿಕೋ ಅತ್ತನೋ ದೇವತಂ ನಿಬದ್ಧಂ ನಮಸ್ಸತಿ. ತಂ ದಿಸ್ವಾಸ್ಸ ಉಪಾಸಕೋ ಬುದ್ಧಗುಣೇ ವತ್ವಾ ಅಖೇತ್ತೇ ಸಮ್ಮ ಮಾ ವಿರಿಯಂ ಕರೋಹಿ. ಪಜಹೇತಂ ದಿಟ್ಠಿಂತಿ ಆಹ. ತತೋ ಸೋ ಕೇರಾಟಿಕೋ ಇಸ್ಸರಭತ್ತಿಕೋ ಕೋ ತೇ ಸತ್ಥು ಗುಣಾನುಭಾವೋ, ಅಮ್ಹಾಕಂ ಇಸ್ಸರಸ್ಸ ಗುಣೋವ ಮಹನ್ತೋತಿ ವತ್ವಾ ತಸ್ಸ ಅಗುಣಂ ಗುಣನ್ತಿ ಕಥೇನ್ತೋ ಆಹ.

೧.

ತಿಪುರಂ ಸೋ ವಿನಾಸೇಸಿ, ಲಲಾಟನಯನಗ್ಗಿನಾ;

ಅಸುರೇಚ ವಿನಾಸೇಸಿ, ತಿಸೂಲೇನ ಮಹಿಸ್ಸರೋ.

೨.

ಜಟಾಕಲಾಪಮಾವತ್ತಂ, ನಚ್ಚತೀ ದಿನಸನ್ಧಿಯಂ;

ವಾದೇತಿ ಭೇರಿವೀಣಾದಿಂ, ಗೀತಂಚಾಪಿ ಸ ಗಾಯತಿ.

೩.

ಭರಿಯಾಯೋ ¶ ತಸ್ಸ ತಿಸ್ಸೋ, ಜಟಾಯೇಕಂ ಸಮುಬ್ಬಹೇ;

ಏಕಮೇಕೇನ ಪಸ್ಸೇನ, ಪಸ್ಸಮಾನೋ ಚರೇಕಕಂ.

೪.

ಹತ್ಥಿಚಮ್ಮಮ್ಬರಧರೋ, ತೇನೇವ ವಾರಿತಾ ತಪೋ;

ಅಸಾದಿಸೇಹಿ ಪುತ್ತೇಹಿ, ರೂಪೇನ ಚ ಸುಪಾಕಟೋ.

೫.

ರತಿಯಾ ಚ ಮಧುಪಾನೇ ಚ, ಬ್ಯಾವಟೋ ಸಬ್ಬದಾ ಚ ಸೋ;

ಮನುಸ್ಸಟ್ಠಿಧರೋ ಸೀಸ, ಕಪಾಲೇನೇಸ ಭುಞ್ಜಕಿ.

೬.

ನ ಜಾತೋ ನ ಭಯಂ ತಸ್ಸ, ಮರಣಂ ನತ್ಥಿ ಸಸ್ಸತೋ;

ಈದಿಸೋ ಮೇ ಮಹಾದೇವೋ, ನತ್ಥಞ್ಞಸ್ಸೀದಿಸೋ ಗುಣೋತಿ.

ತಂ ಸುತ್ವಾ ಉಪಾಸಕೋ ಸಮ್ಮ ತುಯ್ಹಂ ಇಸ್ಸರಸ್ಸ ಏತೇ ಗುಣಾ ನಾಮ ತಾವ ಹೋನ್ತು. ಅಗುಣಾ ನಾಮ ಕಿತ್ತಕಾ ಹೋನ್ತೀತಿ ವತ್ವಾ ಭಗವತೋ ಸಕಲಗುಣೇ ಸಂಹರಿತ್ವಾ ಕಥೇನ್ತೋ ಆಹ.

೭.

ಲೋಕೇ ಸಬ್ಬಸವನ್ತೀನಂ, ಆಧಾರೋ ಸಾಗರೋ ಯಥಾ;

ಸಬ್ಬೇಸಂ ಗುಣರಾಸೀನಂ, ಆಧಾರೋವ ತಥಾಗತೋ.

೮.

ಚರಾಚರಾನಂ ಸಬ್ಬೇಸಂ, ಆಧಾರಾವ ಧರಾ ಅಯಂ;

ತಥಾ ಗುಣಾನಂ ಸಬ್ಬೇಸಂ, ಆಧಾರೋವ ತಥಾಗತೋ.

೯.

ಏವಂ ಸನ್ತೋ ವಿಯತ್ತೋಚ [ವಿಯನ್ತೋ ಇತಿಕತ್ಥಚಿ], ಏವಂ ಸೋ ಕರುಣಾಪರೋ;

ಏವ ಮಿದ್ಧಿವಿಧಾ ತಸ್ಸ, ಏವಮೇವಂ ಗುಣಾ ಇತಿ.

೧೦.

ಬುದ್ಧೋಪಿ ಸಕ್ಕೋತಿ ನ ಯಸ್ಸ ವಣ್ಣೇ,

ಕಪ್ಪಮ್ಪಿ ವತ್ವಾ ಖಯತಂ ಗಮೇತುಂ;

ಪಗೇವ ಚ ಬ್ರಹ್ಮಸುರಾ ಸುರೇಹಿ,

ವತ್ತುಂ ನ ಹಾನನ್ತಗುಣಸ್ಸ ವಣ್ಣನ್ತಿ.

ಏವಂ ವದನ್ತಾ ಪನ ತೇ ಉಭೋಪಿ ಅಮ್ಹಾಕಂ ದೇವೋ ಉತ್ತಮೋ ಅಮ್ಹಾಕಂ ದೇವೋ ಉತ್ತಮೋತಿ ಕಲಹಂ ವಡ್ಢೇತ್ವಾ ರಞ್ಞೋ ಸನ್ತಿಕಮಗಮಂಸು, ರಾಜಾ ¶ ತೇಸಂ ಕಥಂ ಸುತ್ವಾ ತೇನಹಿ ತುಮ್ಹಾಕಂ ದೇವತಾನಂ ಮಹನ್ತಭಾವಂ ಇದ್ಧಿಪಾಟಿಹಾರಿಯೇನ ಜಾನಿಸ್ಸಾಮ. ದಸ್ಸೇಥ ತೇಹಿ ನೋ ಇದ್ಧಿಂತಿ ನಗರೇ ಭೇರಿಂ ಚರಾಪೇಸಿ. ಇತೋ ಕಿರ ಸತ್ತಾಹಚ್ಚಯೇನ ಇಮೇಸಂ ದ್ವಿನ್ನಂ ಸತ್ಥಾರಾನಂ ಪಾಟಿಹಾರಿಯಾನಿ ಭವಿಸ್ಸನ್ತಿ. ಸಬ್ಬೇ ಸನ್ನಿಪತನ್ತೂತಿ ತಂ ಸುತ್ವಾ ನಾನಾದಿಸಾಸು ಬಹೂ ಮನುಸ್ಸಾ ಸಮಾಗಮಿಂಸು, ಅಥ ಮಿಚ್ಛಾದಿಟ್ಠಿಕಾ ಅಜ್ಜ ಅಮ್ಹಾಕಂ ದೇವಸ್ಸ ಆನುಭಾವಂ ಪಸ್ಸಾಮಾತಿ ಮಹನ್ತಂ ಪೂಜಂ ಕರೋನ್ತೋ ತತ್ಥ ಸಾರಂ ನಾದ್ದಸಂಸು, ಸಮ್ಮಾದಿಟ್ಠಿಕಾಪಿ ಅಜ್ಜ ಅಮ್ಹಾಕಂ ಭಗವತೋ ಆನುಭಾವಂ ಪಸ್ಸಿಸ್ಸಾಮಾತಿ ವಾಳುಕಾಥೂಪಂ ಗನ್ತ್ವಾ ಗನ್ಧಮಾಲಾದೀಹಿ ಪೂಜೇತ್ವಾ ಪದಕ್ಖಿಣಂ ಕತ್ವಾ ಅಞ್ಜಲಿಮ್ಪಗ್ಗಯ್ಹ ಅಟ್ಠಂಸು. ಅಥ ರಾಜಾಪಿ ಬಲವಾಹನಪರಿವುತೋ ಏಕಮನ್ತೇ ಅಟ್ಠಾಸಿ. ನಾನಾಸಮಯವಾದಿನೋಪಿ ಅಜ್ಜ ತೇಸಂ ಪಾಟಿಹಾರಿಯಂ ಪಸ್ಸಿಸ್ಸಾಮಾತಿ ಮಞ್ಚಾತಿಮಞ್ಚಂ ಕತ್ವಾ ಅಟ್ಠಂಸು. ತೇಸಂ ಸಮಾಗಮೇ ಸಮ್ಮಾದಿಟ್ಠಿಕಾ ವಾಳುಕಾಥೂಪ ಮಭಿಮುಖಂ ಕತ್ವಾ ಅಞ್ಜಲಿಮ್ಪಗ್ಗಯ್ಹ ಸಾಮಿ ಅಮ್ಹಾಕಂ ಭಗವಾ ಸಬ್ಬಬುದ್ಧಕಿಚ್ಚಾನಿ ನಿಟ್ಠಾಪೇತ್ವಾ ಅನುಪಾದಿಸೇಸಾಯ ನಿಬ್ಬಾಣಧಾತುಯಾ ಪರಿನಿಬ್ಬಾಯಿ. ಸಾರಿಪುತ್ತಮಹಾಮೋಗ್ಗಲ್ಲಾನಾದಯೋ ಅಸೀತಿಮಹಾಸಾವಕಾಪಿ ಪರಿನಿಬ್ಬಾಯಿಂಸು, ನತ್ಥೇತ್ಥ ಅಮ್ಹಾಕಂ ಅಞ್ಞಂ ಪಟಿಸರಣನ್ತಿ ವತ್ವಾ ಸಚ್ಚಕಿರಿಯಂ ಕರೋನ್ತಾ ಆಹಂಸು.

೧೧.

ಆಪಾಣಕೋಟಿಂ ಬುದ್ಧಸ್ಸ, ಸರಣಂ ನೋ ಗತಾ ಯದಿ;

ತೇನ ಸಚ್ಚೇನ ಯಂ ಧಾತು, ದಸ್ಸೇತು ಪಾಟಿಹಾರಿಯಂ.

೧೨.

ಆಪಾಣಕೋಟಿಂ ಧಮ್ಮಸ್ಸ, ಸರಣಂ ನೋ ಗತಾ ಯದಿ;

ತೇನ ಸಚ್ಚೇನ ಯಂ ಧಾತು, ದಸ್ಸೇತು ಪಾಟಿಹಾರಿಯಂ.

೧೩.

ಆಪಾಣಕೋಟಿಂ ಸಙ್ಘಸ್ಸ, ಸರಣಂ ನೋ ಗತಾ ಯದಿ;

ತೇನ ಸಚ್ಚೇನ ಯಂ ಧಾತು, ದಸ್ಸೇತು ಪಾಟಿಹಾರಿಯಂ.

೧೪.

ರಾಮಕಾಲೇ ಮುನಿನ್ದಸ್ಸ, ಪಾದುಕಾ ಚಾಸಿ ಅಬ್ಭುತಾ;

ತೇನ ಸಚ್ಚೇನ ಯಂ ಧಾತು, ದಸ್ಸೇತು ಪಾಟಿಹಾರಿಯಂ.

೧೫.

ಛದ್ದನ್ತಕಾಲೇ ¶ ಮುನಿನೋ, ದಾಠಾ ಛರಂಸಿರಞ್ಜಿತಾ;

ತೇನ ಸಚ್ಚೇನಯಂ ಧಾತು, ನಿಚ್ಛಾರೇತು ಛ ರಂಸಿಯೋ.

೧೬.

ಜಾತಮತ್ತೋ ತದಾ ಬುದ್ಧೋ, ಠಿತೋ ಪಙ್ಕಜಮುದ್ಧನಿ;

ನಿಚ್ಛಾರೇಸಾಸಭಿಂವಾಚಂ, ಅಗ್ಗೋ ಸೇಟ್ಠೋತಿಆದಿನಾ;

ತೇನ ಸಚ್ಚೇನಯಂ ಧಾತು, ದಸ್ಸೇತು ಪಾಟಿಹಾರಿಯಂ.

೧೭.

ನಿಮಿತ್ತೇ ಚತುರೋ ದಿಸ್ವಾ, ನಿಕ್ಖನ್ತೋ ಅಭಿನಿಕ್ಖಮಂ;

ತೇನ ಸಚ್ಚೇನ ಯಂ ಧಾತು, ದಸ್ಸೇತು ಪಾಟಿಹಾರಿಯಂ.

೧೮.

ಮಾರಸೇನಂ ಪಲಾಪೇತ್ವಾ, ನಿಸಿನ್ನೋ ಬುಜ್ಝಿ ಬೋಧಿಯಂ;

ತೇನ ಸಚ್ಚೇನ ಯಂ ಧಾತು ದಸ್ಸೇತು ಪಾಟಿಹಾರಿಯಂ.

೧೯.

ಧಮ್ಮಚಕ್ಕಂ ಪವತ್ತೇಸಿ, ಜಿನೋ ಸಿಪತನೇ ತದಾ;

ತೇನ ಸಚ್ಚೇನ ಯಂ ಧಾತು, ದಸ್ಸೇತು ಪಾಟಿಹಾರಿಯಂ.

೨೦.

ನನ್ದೋಪನನ್ದಭೋಗಿನ್ದಂ, ನಾಗಂ ನಾಲಾಗಿರಿವ್ಹಯಂ;

ಆಳವಕಾ ದಯೋ ಯಕ್ಖೇ, ಬ್ರಹ್ಮಾನೋ ಚ ಬಕಾ ದಯೋ.

೨೧.

ಸಚ್ಚಕಾದಿನಿಗಣ್ಠೇಚ, ಕೂಟದನ್ತಾ ದಯೋ ದ್ವಿಜೇ;

ದಮೇಸಿ ತೇನ ಸಚ್ಚೇನ, ದಸ್ಸೇತು ಪಾಟಿಹಾರಿಯಂತಿ.

ಏವಞ್ಚ ಪನ ವತ್ವಾ ಉಪಾಸಕಾ ಅಮ್ಹಾಕಂ ಅನುಕಮ್ಮಂ ಪಟಿಚ್ಚ ಮಹಾಜನಸ್ಸ ಮಿಚ್ಛಾದಿಟ್ಠಿಭೇದನತ್ತಂ ಪಾಟಿಹಾರಿಯಂ ದಸ್ಸೇಥ ಸಾಮೀತಿ ಆರಾಧೇಸುಂ. ಅಥ ಬುದ್ಧಾನುಭಾವಞ್ಚ ಥೇರಾನುಭಾವಞ್ಚ ಉಪಾಸಕಾನಂ ಸಚ್ಚಕಿರಿಯಾನುಭಾವಞ್ಚ ಪಟಿಚ್ಚ ವಾಳುಕಾಥೂಪಂ ದ್ವಿಧಾ ಭಿನ್ದಿತ್ವಾ ಪಾದಪೀಠಧಾತು ಆಕಾಸ ಮಬ್ಭುಗ್ಗನ್ತ್ವಾ ಛಬ್ಬಣ್ಣರಂಸಿಯೋ ವಿಸ್ಸಜ್ಜೇನ್ತೀ ವಿಲಾಸಮಾನಾ ಅಟ್ಠಾಸಿ. ಅಥ ಮಹಾಜನಾ ಚೇಲುಕ್ಖೇಪಸಹಸ್ಸಾನಿ ಪವತ್ತೇನ್ತಾ ಸಾಧುಕೀಳ್ಹಂ ಕೀಳನ್ತಾ ಮಹಾನಾದಂ ಪವತ್ತೇನ್ತಾ ಮಹನ್ತಂ ಪೂಜಮಕಂಸು. ಮಿಚ್ಛಾದಿಟ್ಠಿಕಾಪಿ ಇಮಂ ಅಚ್ಛರಿಯಂ ದಿಸ್ವಾ ವಿಮ್ಹಿತಮಾನಸಾ ಮಿಚ್ಛಾದಿಟ್ಠಿಂ ಭಿನ್ದಿತ್ವಾ ರತನತ್ತಯಪರಾಯಣಾ ಸರಣ ಮಗಮಂಸೂತಿ.

೨೨.

ಫುಟ್ಠೋಪಿ ¶ ಪಾದೇನ ಜಿನಸ್ಸ ಏವಂ,

ಕಲಿಙ್ಗರೋ ಪಾ ಸಿ ಮಹಾನುಭಾವೋ;

ಲೋಕೇಕನಾಥಸ್ಸ ಅನಾಸವಸ್ಸ,

ಮಹಾನುಭಾವೋ ಹಿ ಅಚಿನ್ತನೀಯೋತಿ.

ಪಾದಪೀಠಿಕಾಯ ವತ್ಥುಂ ತತಿಯಂ.

೨೪. ಉತ್ತರಸಾಮಣೇರಸ್ಸ ವತ್ಥುಮ್ಹಿ ಅಯಮಾನುಪುಬ್ಬೀಕಥಾ

ಸೋ ಕಿರ ಪುರಿಮಬುದ್ಧೇಸು [ಪುರಿಮಬುದ್ಧೇ ಇತಿಸಬ್ಬತ್ಥ] ಕತಾಧಿಕಾರೋ ತತ್ಥ ತತ್ಥ ಭವೇ ವಿವಟ್ಟೂಪನಿಸ್ಸಯಂ ಪುಞ್ಞಂ ಉಪಚಿನನ್ತೋ ಸುಮೇಧಸ್ಸ ಭಗವತೋ ಕಾಲೇ ವಿಜ್ಜಾಧರೋ ಹುತ್ವಾ ಹಿಮವತಿ ಪಟಿವಸತಿ. ತದಾ ಸುಮೇಧೋ ನಾಮ ಸಮ್ಮಾಸಮ್ಬುದ್ಧೋ ವಿವೇಕ ಮನುಬ್ರೂಹನ್ತೋ ಹಿಮವನ್ತಂ ಗನ್ತ್ವಾ ರಮಣೀಯೇ ಪದೇಸೇ ಪಲ್ಲಙ್ಕಂ ಆಭುಜಿತ್ವಾ ನಿಸೀದಿ. ತದಾ ವಿಜ್ಜಾಧರೋ ಆಕಾಸೇನ ಗಚ್ಛನ್ತೋ ಛಬ್ಬಣ್ಣರಂಸೀಹಿ ವಿರಾಜಮಾನಂ ಭಗವನ್ತಂ ದಿಸ್ವಾ ತೀಹಿ ಕಣಿಕಾರಪುಪ್ಫೇಹಿ ಪೂಜೇಸಿ, ಪುಪ್ಫಾನಿ ಬುದ್ಧಾನುಭಾವೇನ ಸತ್ಥು ಉಪರಿ ಛತ್ತಾಕಾರೇನ ಅಟ್ಠಂಸು, ಸೋ ತೇನ ಭೀಯ್ಯೋಸೋ ಮತ್ತಾಯ ಪಸನ್ನಚಿತ್ತೋ ಹುತ್ವಾ ಅಪರಭಾಗೇ ಕಾಲಂಕತ್ವಾ ತಾವತಿಂಸಭವನೇ ನಿಬ್ಬತ್ತಿತ್ವಾ ಉಳಾರಂ ದಿಬ್ಬಸಮ್ಪತ್ತಿಮನುಭವನ್ತೋ ಯಾವತಾಯುಕಂ ತತ್ಥ ಠತ್ವಾ ತತೋ ಚುತೋ ದೇವಮನುಸ್ಸೇಸು ಸಂಸರನ್ತೋ ಇಮಸ್ಮಿಂ ಬುದ್ಧುಪ್ಪಾದೇ ರಾಜಗಹನಗರೇ ಬ್ರಾಹ್ಮಣಮಹಾಸಾಲಸ್ಸ ಪುತ್ತೋ ಹುತ್ವಾ ನಿಬ್ಬತ್ತಿ. ಉತ್ತರೋತಿಸ್ಸ ನಾಮಂ ಅಹೋಸಿ. ಸೋ ಉತ್ತಮರೂಪಧರೋ ವಿಞ್ಞುತಂ ಪತ್ತೋ ಬ್ರಾಹ್ಮಣವಿಜ್ಜಾಸು ನಿಪ್ಫತ್ತಿಂ ಪತ್ವಾ ಜಾತಿಯಾ ರೂಪೇನ ವಿಜ್ಜಾಯ ಸೀಲಾಚಾರೇನ ಚ ಲೋಕಸ್ಸ ಮಹನೀಯೋ ಜಾತೋ, ತಸ್ಸ ತಂ ಪಞ್ಞಾಸಮ್ಪತ್ತಿಂದಿಸ್ವಾ ವಸ್ಸಕಾರೋ ಮಗಧಮಹಾಮತ್ತೋ ಅತ್ತನೋ ಧೀತರಂ ದಾತುಕಾಮೋ ಹುತ್ವಾ ಅತ್ತನೋ ಅಧಿಪ್ಪಾಯಂ ಪವೇದೇಸಿ. ಸೋ ನಿಸ್ಸರಣಜ್ಝಾಸಯತಾಯ ತಂ ಪಟಿಕ್ಖಿಪಿತ್ವಾ ಕಾಲೇನಕಾಲಂ ಧಮ್ಮಸೇನಾಪತಿಂ ಪಯಿರುಪಾಸನ್ತೋ ತಸ್ಸ ¶ ಸನ್ತಿಕೇ ಧಮ್ಮಂ ಸುತ್ವಾ ಪಟಿಲದ್ಧಸದ್ಧೋ ಪಬ್ಬಜಿತ್ವಾ ವತ್ತಸಮ್ಪನ್ನೋ ಹುತ್ವಾ ಥೇರಂ ಉಪಟ್ಠಹತಿ. ತೇನ ಚ ಸಮಯೇನ ಥೇರಸ್ಸ ಅಞ್ಞತರೋ ಆಬಾಧೋ ಉಪ್ಪನ್ನೋ ಹೋತಿ, ತಸ್ಸ ಭೇಸಜ್ಜತ್ಥಾಯ ಉತ್ತರಸಾಮಣೇರೋ ಪಾತೋವ ಪತ್ತಚೀವರ ಮಾದಾಯ ವಿಹಾರತೋ ನಿಕ್ಖಮ್ಮ ಅನ್ತರಾಮಗ್ಗೇ ತಳಾಕಸ್ಸ ತೀರೇ ಪತ್ತಂ ಠಪೇತ್ವಾ ಉದಕಸಮೀಪಂ ಗನ್ತ್ವಾ ಮುಖಂ ಧೋವತಿ, ತದಾ ಅಞ್ಞತರೋ ಉಮ್ಮಗ್ಗಚೋರೋ ಕತಕಮ್ಮೋ ಆರಕ್ಖಪುರಿಸೇಹಿ ಅನುಬದ್ಧೋ ಅಗ್ಗದ್ವಾರೇನೇವ ನಗರತೋ ನಿಕ್ಖಮಿತ್ವಾ ಪಲಾಯನ್ತೋ ಅತ್ತನಾ ಗಹಿತಂ ರತನಭಣ್ಡಿಕಂ ಸಾಮಣೇರಸ್ಸ ಪತ್ತೇ ಪಕ್ಖಿಪಿತ್ವಾ ಪಲಾಯಿ. ಸೋ ಸಾಮಣೇರೋಪಿ ಪತ್ತಸಮೀಪಂ [ಸತ್ತುಸಮೀಪಂ ಇತಿಪಿ ಕತ್ಥಚಿ] ಉಪಗತೋ ಹೋತಿ, ಚೋರಂ ಅನುಬನ್ಧನ್ತಾ ರಾಜಪುರಿಸಾ ಸಾಮಣೇರಸ್ಸ ಪತ್ತೇ ಭಣ್ಡಿಕಂ ದಿಸ್ವಾ ಅಯಂ ಚೋರೋ, ಇಮಿನಾ ಚೋರಿಯಂ ಕತನ್ತಿ ಸಾಮಣೇರಂ ಪಚ್ಛಾಬಾಹಂ ಬನ್ಧಿತ್ವಾ ವಸ್ಸಕಾರಸ್ಸ ಬ್ರಾಹ್ಮಣಸ್ಸ ದಸ್ಸೇಸುಂ. ವಸ್ಸಕಾರೋ ಚ ತದಾ ರಞ್ಞೋ ವಿನಿಚ್ಛಯೇ ನಿಯುತ್ತೋ ಹುತ್ವಾ ಛೇಜ್ಜಭೇಜ್ಜಂ ಅನುಸಾಸತಿ. ಸೋ ಏಸೋ ಪುಬ್ಬೇ ಮಮ ವಚನಂ ನಾದಿಯಿ. ಸುದ್ಧಪಾಸಣ್ಡಿಯೇಸು ಪಬ್ಬಜೀತಿ ಚ ಬದ್ಧಾಘಾತತ್ತಾ ತಂ ಕಮ್ಮಂ ಅಸೋಧೇತ್ವಾವ ಜೀವನ್ತಮೇವೇತಂ ಸೂಲೇ ಉತ್ತಾಸೇಥಾತಿ ಆಣಾ ಪೇಸಿ, ರಾಜಪುರಿಸಾ ತಂ ನಿಮ್ಬಸೂಲೇ ಉತ್ತಾಸೇಸುಂ. ಸಾಮಣೇರೋ ಸೂಲಗ್ಗೇ ನಿಸಿನ್ನೋ ಉಪಜ್ಝಾಯಸ್ಸ ಮೇ ಕೋ ಭೇಸಜ್ಜಂ ಆಹರಿಸ್ಸತೀತಿ ಸಾರಿಪುತ್ತತ್ಥೇರಂ ಸರಿ. ತತೋ ಥೇರೋ ತಂ ಪವತ್ತಿಂ ಞತ್ವಾ ಸಮ್ಮಾಸಮ್ಬುದ್ಧಸ್ಸ ಕಥೇಸಿ, ಭಗವಾಪಿ ಮಹಾಸಾವಕಪರಿವುತೋ ತಸ್ಸ ಞಾಣಪರಿಪಾಕಂ ಓಲೋಕೇತ್ವಾ ತಂ ಠಾನಮಗಮಾಸಿ. ತತೋ ಭಗವತೋ ನಿಕ್ಖನ್ತಭಾವಾ ಸಕಲನಗರೇ ಕೋಲಾಹಲಂ ಅಹೋಸಿ, ಮಹಾಜನಕಾಯೋ ಸನ್ನಿಪತಿ. ಅಥ ಭಗವಾ ವಿಪ್ಫುರನ್ತಹತ್ಥತಲೇ ನಖಮಣಿಮಯೂಖಸಮ್ಭಿನ್ನಪೀತಾಭಾಸತಾಯ ಪಗ್ಘರನ್ತಜಾತಿಹಿಙ್ಗುಲಕಸುವಣ್ಣರಸಧಾರಾವಿಯ ಜಾಲಾವಗುಣ್ಠಿತಮುದುತಲುನಙ್ಗುಲಂ ಹತ್ಥಂ ಉತ್ತರಸ್ಸ ಸೀಸೇ ಠಪೇತ್ವಾ ಉತ್ತರ ಇದಂ ತೇ ಪುಬ್ಬೇ ಕತಪಾಪಕಮ್ಮಸ್ಸ ಫಲಂ ಉಪ್ಪನ್ನಂ, ತತ್ಥ ತಯಾ ಪಚ್ಚವೇಕ್ಖಣಬಲೇನ ಅಧಿವಾಸನಾ ಕಾತಬ್ಬಾತಿ ಆಹ. ತೇನೇವ ಆಹ.

೧.

ಅತೀತೇ ¶ ಕಿರ ಏಕಸ್ಮಿಂ, ಗಾಮೇ ತ್ವ ಮಸಿ ದಾರಕೋ;

ದಾರೇಕೇಹಿ ಸಮಾಗಮ್ಮ, ಕೀಳನ್ತೋ ಕೇಳಿಮಣ್ಡಲೇ.

೨.

ಗಹೇತ್ವಾ ಸುಖುಮಂ ಸೂಕಂ, ತದಾ ತ್ವಂ ನಿಮ್ಬಜಲ್ಲಿಯಾ;

ಉತ್ತಾಸೇಸಿ ತತ್ಥ ಸೂಲೇ, ಜೀವಮಾನಕಮಕ್ಖಿಕಂ.

೩.

ಅಪರಮ್ಪಿ ತೇ ಪಾಪಕಮ್ಮಂ, ಪವಕ್ಖಾಮಿ ಸುಣೋಹಿ ಮೇ;

ಓವದನ್ತಿಂ ಹಿತೇನ ತ್ವಂ, ಅತೀತೇ ಸಕಮಾತರಂ.

೪.

ಜೀವಸೂಲೇ ನಿಸೀದಾತಿ, ಕೋಪೇನಾಭಿಸಪೀ ತುವಂ;

ಇಮೇಹಿ ದ್ವೀಹಿ ಪಾಪೇಹಿ, ಸರಂ ಸಂಸಾರಸಾಗರೇ.

೫.

ಪಞ್ಚಜಾತಿಸತೇ ಅಚ್ಛಿ, ಜೀವಸೂಲಮ್ಹಿ ನಿಮ್ಬಜೇ;

ಅಯಂ ತೇ ಚರಿಮಾ ಜಾತಿ, ಏತ್ಥಾಪಿಚ ವಿಪಚ್ಚಿ ಸೋತಿ.

ಏವಮಾದಿನಾ ನಯೇನ ತಸ್ಸ ಅಜ್ಝಾಸಯಾನುರೂಪೇನ ಧಮ್ಮಂ ದೇಸೇಸಿ, ಉತ್ತರೋ ಅಮತಾಭಿಸೇಕಸದಿಸೇನ ಸತ್ಥುನೋ ಹತ್ಥಸಮ್ಫಸ್ಸಸಞ್ಜಾತಪಸಾದಸೋಮನಸ್ಸತಾಯ ಉಳಾರಂ ಪೀತಿಪಾಮೋಜ್ಜಂ ಪಟಿಲಭಿತ್ವಾ ಯಥಾಪರಿಚಿತಂ ವಿಪಸ್ಸನಾಮಗ್ಗಂ ಸಮಾರೂಳ್ಹೋ ಞಾಣಸ್ಸ ಪರಿಪಾಕಂ ಗತತ್ತಾ ಸತ್ಥು ದೇಸನಾವಿಲಾಸೇನ ಮಗ್ಗಪಟಿಪಾಟಿಯಾ ಸಬ್ಬಕಿಲೇಸೇ ಖೇಪೇತ್ವಾ ಛಳಭಿಞ್ಞೋ ಅಹೋಸಿ. ಧಮ್ಮಂ ಸುತ್ವಾ ತತ್ಥ ಸಮಾಗತಾನಂ ದೇವಮನುಸ್ಸಾನಂ ಚತುರಾಸೀತಿಪಾಣಸಹಸ್ಸಾನಂ ಧಮ್ಮಾಭಿಸಮಯೋ ಅಹೋಸೀತಿ ವದನ್ತಿ. ಉತ್ತರೋ ಪನ ಛಳಭಿಞ್ಞೋ ಹುತ್ವಾ ಸೂಲತೋ ಉಟ್ಠಹಿತ್ವಾ ಆಕಾಸೇ ಠತ್ವಾ ಪಾಟಿಹಾರಿಯಂ ದಸ್ಸೇಸಿ. ಮಹಾಜನಾ ಅಚ್ಛರಿಯಬ್ಭುತಚಿತ್ತಾ ಜಾತಾ ಅಹೇಸುಂ. ತಾವದೇವಸ್ಸ ವಣೋರುನ್ಧಿ, ಸೋ ಭಿಕ್ಖೂಹಿ ಆವುಸೋ ತಾದಿಸಂ ದುಕ್ಖಂ ಅನುಭವನ್ತೋ ಕಥಂ ತ್ವಂ ವಿಪಸ್ಸನಂ ಅನುಯುಞ್ಜಿತುಂ ಸಕ್ಖೀತಿ ಪುಟ್ಠೋ ಪಗೇವ ಮೇ ಆವುಸೋ ಸಂಸಾರೇ ಆದೀನವೋ ಸಙ್ಖಾರಾನಞ್ಚ ಸಭಾವೋ ಸುದಿಟ್ಠೋ. ತಸ್ಮಾಹಂ ತಾದಿಸಂ ದುಕ್ಖಂ ಅನುಭವನ್ತೋಪಿ ಅಸಕ್ಖಿಂ ವಿಪಸ್ಸನಂ ವಡ್ಢೇತ್ವಾ ವಿಸೇಸಂ ಅಧಿಗನ್ತುಂತಿ ಆಹ. ಅಥಾಪರಭಾಗೇ ಸೋ ಭಿಕ್ಖುಸಙ್ಘಮಜ್ಝೇ ಅತ್ತನೋ ಪುಬ್ಬಚರಿತಾ ಪದಾನಂ ಪಕಾಸೇನ್ತೋ ಇಮಾ ಗಾಥಾ ಅಭಾಸಿ.

೬.

ಸುಮೇಧೋ ¶ ನಾಮ ಸಮ್ಬುದ್ಧೋ, ದ್ವತ್ತಿಂಸವರಲಕ್ಖಣೋ;

ವಿವೇಕಕಾಮೋ ಸಮ್ಬುದ್ಧೋ, ಹಿಮವನ್ತ ಮುಪಾಗಮಿ.

೭.

ಅಜ್ಝೋಗಹೇತ್ವಾ ಹಿಮವನ್ತಂ, ಅಗ್ಗೋ ಕಾರುಣಿಕೋ ಮುನಿ;

ಪಲ್ಲಙ್ಕಂ ಆಭುಜಿತ್ವಾನ, ನಿಸೀದಿ ಪುರಿಸುತ್ತಮೋ.

೮.

ವಿಜ್ಜಾಧರೋ ತದಾ ಆಸಿಂ, ಅನ್ತಲಿಕ್ಖಚರೋ ಅಹಂ;

ತಿಸೂಲಂ ಸುಕತಂ ಗಯ್ಹ, ಗಚ್ಛಾಮಿ ಅಮ್ಬರೇ ತದಾ.

೯.

ಪಬ್ಬತಗ್ಗೇ ಯಥಾ ಅಗ್ಗಿ, ಪುಣ್ಣಮಾಸೇವ ಚನ್ದಿಮಾ;

ವನಂ ಓಭಾಸತೇ ಬುದ್ಧೋ, ಸಾಲರಾಜಾವ ಫುಲ್ಲಿತೋ.

೧೦.

ವನಗ್ಗಾ ನಿಕ್ಖಮಿತ್ವಾನ, ಬುದ್ಧರಂಸೀ ವಿಧಾವರೇ;

ನಲಗ್ಗಿವಣ್ಣಸಙ್ಕಾಸಾ, ದಿಸ್ವಾ ಚಿತ್ತಂ ಪಸಾದಯಿಂ.

೧೧.

ವಿಚಿನಂ ಅದ್ದಸಂ ಪುಪ್ಫಂ, ಕಣಿಕಾರಂ ದೇವಗನ್ಧಿಕಂ;

ತೀಣಿ ಪುಪ್ಫಾನಿ ಆದಾಯ, ಬುದ್ಧಸೇಟ್ಠಂ ಅಪೂಜಯಿಂ.

೧೨.

ಬುದ್ಧಸ್ಸ ಆನುಭಾವೇನ, ತೀಣಿ ಪುಪ್ಫಾನಿ ಮೇ ತದಾ;

ಉದ್ಧವಣ್ಟಾ ಅಧೋಪತ್ತಾ, ಛಾಯಂ ಕುಬ್ಬನ್ತಿ ಸತ್ಥುನೋ.

೧೩.

ತೇನ ಕಮ್ಮೇನ ಸುಕತೇನ, ಚೇತನಾಪಣಿಧೀಹಿಚ;

ಜಹಿತ್ವಾ ಮಾನುಸಂ ದೇಹಂ, ತಾವತಿಂಸಮಗಞ್ಛಹಂ.

೧೪.

ತತ್ಥ ಮೇ ಸುಕತಂ ಬ್ಯಮ್ಹಂ, ಕಣಿಕಾರೀತಿ ಞಾಯತಿ;

ಸಟ್ಠಿಯೋಜನ ಮುಬ್ಬೇಧಂ, ತಿಂಸಯೋಜನವಿತ್ಥತಂ.

೧೫.

ಸಹಸ್ಸಖಣ್ಡಂ ಸತಭೇಣ್ಡು, ಧಜಾಲು ಹರಿತಾಮಯಂ;

ಸತಸಹಸ್ಸಾನಿ ಬ್ಯೂಹಾನಿ, ಬ್ಯಮ್ಹೇ ಪಾತುರಹಂಸು ಮೇ.

೧೬.

ಸೋಣ್ಣಮಯಾ ಮಣಿಮಯಾ, ಲೋಹಿತಙ್ಕಮಯಾ ಪಿಚ;

ಫಲಿಕಾ ಪಿಚ ಪಲ್ಲಙ್ಕಾ, ಯದಿಚ್ಛಕ ಯದಿಚ್ಛಕಾ.

೧೭.

ಮಹಾರಹಞ್ಚ ಸಯನಂ, ತೂಲಿಕಂ ವಿಕತೀಯಕಂ;

ಉದ್ದಲೋಮಿಕಏಕನ್ತಂ, ಬಿಮ್ಬೋಹನಸಮಾಯುತಂ.

೧೮.

ಭವನಾ ¶ ನಿಕ್ಖಮಿತ್ವಾನ, ಚರನ್ತೋ ದೇವಚಾರಿಕಂ;

ಯದಾ ಇಚ್ಛಾಮಿ ಗಮನಂ, ದೇವಸಂಘಪುರಕ್ಖತೋ.

೧೯.

ಪುಪ್ಫಸ್ಸ ಹೇಟ್ಠಾ ತಿಟ್ಠಾಮಿ, ಉಪರಿಚ್ಛದನಂ ಮಮ;

ಸಮನ್ತಾ ಯೋಜನಸತಂ, ಕಣಿಕಾರೇಹಿ ಛಾದಿತಂ.

೨೦.

ಸಟ್ಠಿತುರಿಯಸಹಸ್ಸಾನಿ, ಸಾಯಂ ಪಾತಂ ಉಪಟ್ಠಹುಂ;

ಪರಿವಾರೇನ್ತಿ ಮಂ ನಿಚ್ಚಂ, ರತ್ತಿನ್ದಿವಮತನ್ದಿತಾ.

೨೧.

ತತ್ಥ ನಚ್ಚೇಹಿ ಗೀತೇಹಿ, ತಾಲೇಹಿ ವಾದಿತೇಹಿ ಚ;

ರಮಾಮಿ ಖಿಡ್ಡಾರತಿಯಾ, ಮೋದಾಮಿ ಕಾಮಕಾಮಹಂ.

೨೨.

ತತ್ಥ ಭುತ್ವಾ ಚ ಪಿತ್ವಾ ಚ, ಮೋದಾಮಿ ತಿದಸೇ ತದಾ;

ನಾರೀಗಣೇಹಿ ಸಹಿತೋ, ಮೋದಾಮಿ ಬ್ಯಮ್ಹಮುತ್ತಮೇ.

೨೩.

ಸತಾನಂ ಪಞ್ಚಕ್ಖತ್ತುಞ್ಚ, ದೇವರಜ್ಜ ಮಕಾರಯಿಂ;

ಸತಾನಂ ತೀಣಿಕ್ಖತ್ತುಂಚ, ಚಕ್ಕವತ್ತೀ ಅಹೋಸಹಂ;

ಪದೇಸರಜ್ಜಂ ವಿಪುಲಂ, ಗಣನಾತೋ ಅಸಂಖಿಯಂ.

೨೪.

ಭವಾಭವೇ ಸಂಸರನ್ತೋ, ಮಹಾಭೋಗಂ ಲಭಾಮಹಂ;

ಭೋಗೇ ಮೇ ಊನತಾ ನತ್ಥಿ, ಬುದ್ಧಪೂಜಾಯಿ ದಂ ಫಲಂ.

೨೫.

ದ್ವೇ ಮೇ ಭವೇ ಸಂಸರಾಮಿ, ದೇವತ್ತೇ ಅಥ ಮಾನುಸೇ;

ಅಞ್ಞಂ ಗತಿಂ ನ ಜಾನಾಮಿ, ಬುದ್ಧಪೂಜಾಯಿದಂ ಫಲಂ.

೨೬.

ದ್ವೇ ಮೇ ಕುಲೇ ಪಜಾನಾಮಿ, ಖತ್ತಿಯೇ ಚಾಪಿ ಬ್ರಾಹ್ಮಣೇ;

ನೀಚೇ ಕುಲೇ ನ ಜಾನಾಮಿ, ಬುದ್ಧಪೂಜಾಯಿದಂ ಫಲಂ.

೨೭.

ಹತ್ಥಿಯಾನಂ ಅಸ್ಸಯಾನಂ, ಸಿವಿಕಂ ಸನ್ದಮಾನಿಕಂ;

ಲಭಾಮಿ ಸಬ್ಬಮೇವೇ ತಂ, ಬುದ್ಧಪೂಜಾಯಿದಂ ಫಲಂ.

೨೮.

ದಾಸೀಗಣಂ ದಾಸಗಣಂ, ನಾರಿಯೋ ಚ ಅಲಙ್ಕತಾ;

ಲಭಾಮಿ ಸಬ್ಬ ಮೇವೇ ತಂ, ಬುದ್ಧಪೂಜಾಯಿದಂ ಫಲಂ.

೨೯.

ಕೋಸೇಯ್ಯಕಮ್ಬಲಿಯಾನಿ, ಖೋಮಕಪ್ಪಾಸಿಕಾನಿಚ;

ಲಭಾಮಿ ಸಬ್ಬಮೇವೇತಂ, ಬುದ್ಧಪೂಜಾಯಿದಂ ಫಲಂ.

೩೦.

ನವವತ್ಥಂ ¶ ನವಫಲಂ, ನವಗ್ಗರಸಭೋಜನಂ;

ಲಭಾಮಿ ಸಬ್ಬಮೇವೇತಂ, ಬುದ್ಧಪೂಜಾಯಿದಂ ಫಲಂ.

೩೧.

ಇಮಂ ಖಾದ ಇಮಂ ಭುಞ್ಜ, ಇಮಮ್ಹಿ ಸಯನೇ ಸಯ;

ಲಭಾಮಿ ಸಬ್ಬಮೇವೇತಂ, ಬುದ್ಧಪೂಜಾಯಿದಂ ಫಲಂ.

೩೨.

ಸಬ್ಬತ್ಥ ಪೂಜಿತೋ ಹೋಮಿ, ಯಸೋ ಅಚ್ಚುಗ್ಗತೋ ಮಮ;

ಮಹೇಸಕ್ಖೋ ಘದಾ ಹೋಮಿ, ಅಭೇಜ್ಜಪರಿಸೋ ಸದಾ;

ಞಾತೀನಂ ಉತ್ತಮೋ ಹೋಮಿ, ಬುದ್ಧಪೂಜಾಯಿದಂ ಫಲಂ.

೩೩.

ಸೀತಂ ಉಣ್ಹಂ ನ ಜಾನಾಮಿ, ಪರಿಳಾಹೋ ನ ವಿಜ್ಜತಿ;

ಅಥೋ ಚೇತಸಿಕಂ ದುಕ್ಖಂ, ಹದಯೇ ಮೇ ನ ವಿಜ್ಜತಿ.

೩೪.

ಸುವಣ್ಣವಣ್ಣೋ ಹುತ್ವಾನ, ಸಂಸರಾಮಿ ಭವಾಭವೇ;

ವೇವಣ್ಣಿಯಂ ನ ಜಾನಾಮಿ, ಬುದ್ಧಪೂಜಾಯಿದಂ ಫಲಂ.

೩೫.

ದೇವಲೋಕಾ ಚವಿತ್ವಾನ, ಸುಕ್ಕಮೂಲೇನ ಚೋದಿತೋ;

ಸಾವತ್ಥಿಯಂ ಪುರೇ ಜಾತೋ, ಮಹಾಸಾಲೇ ಸುಅಡ್ಢಕೇ.

೩೬.

ಪಞ್ಚಕಾಮಗುಣೇ ಹಿತ್ವಾ, ಪಬ್ಬಜಿಂಅನಗಾರಿಯಂ;

ಜಾತಿಯಾ ಸತ್ತವಸ್ಸೋಹಂ, ಅರಹತ್ತಮಪಾಪುಣಿಂ.

೩೭.

ಉಪಸಮ್ಪಾದಯೀ ಬುದ್ಧೋ, ಗುಣಮಞ್ಞಾಯ ಚಕ್ಖುಮಾ;

ತರುಣೋವ ಪೂಜನೀಯೋ ಹಂ, ಬುದ್ಧಪೂಜಾಯಿದಂ ಫಲಂ.

೩೮.

ದಿಬ್ಬಚಕ್ಖುಂ ವಿಸುದ್ಧಂ ಮೇ, ಸಮಾಧಿಕುಸಲೋ ಅಹಂ;

ಅಭಿಞ್ಞಾಪಾರಮಿಪ್ಪತ್ತೋ, ಬುದ್ಧಪೂಜಾಯಿದಂ ಫಲಂ.

೩೯.

ಪಟಿಸಮ್ಭಿದಾ ಅನುಪ್ಪತ್ತೋ, ಇದ್ಧಿಪಾದೇಸು ಕೋವಿದೋ;

ಸದ್ಧಮ್ಮೇ ಪಾರಮಿಪ್ಪತ್ತೋ, ಬುದ್ಧಪೂಜಾಯಿದಂ ಫಲಂ.

೪೦.

ತಿಂಸಕಪ್ಪಸಹಸ್ಸಮ್ಹಿ, ಯಂ ಬುದ್ಧಮಭಿಪೂಜಯಿಂ;

ದುಗ್ಗತಿಂ ನಾಭಿಜಾನಾಮಿ, ಬುದ್ಧಪೂಜಾಯಿದಂ ಫಲಂ.

೪೧.

ಕಿಲೇಸಾ ಝಾಪಿತಾ ಮಯ್ಹಂ, ಭವಾ ಸಬ್ಬೇ ಸಮೂಹತಾ;

ನಾಗೋವ ಬನ್ಧನಂ ಛೇತ್ವಾ, ವಿಹರಾಮಿ ಅನಾಸವೋ.

೪೨.

ಸ್ವಾಗತಂ ¶ ವತ ಮೇ ಆಸಿ, ಬುದ್ಧಸೇಟ್ಠಸ್ಸ ಸನ್ತಿಕಂ;

ತಿಸ್ಸೋ ವಿಜ್ಜಾ ಅನುಪ್ಪತ್ತೋ, ಕತಂ ಬುದ್ಧಸ್ಸ ಸಾಸನಂ.

೪೩.

ಪಟಿಸಮ್ಭಿದಾ ಚತಸ್ಸೋ ಚ, ವಿಮೇಕ್ಖಾ ಪಿಚ ಅಟ್ಠಿಮೇ;

ಛಳಭಿಞ್ಞಾ ಸಚ್ಛಿಕತಾ, ಕತಂ ಬುದ್ಧಸ್ಸ ಸಾಸನಂತಿ;

ತಂ ಸುತ್ವಾ ಬಹೂ ಕುಸಲಕಮ್ಮಪರಾಯಣಾ ಅಹೇಸುಂ.

೪೪.

ಸಹೇತುಕಾ ಪಚ್ಛಿಮಿಕಾಪಿ ಸತ್ತಾ,

ಪಾಪಂ ನ ಸಕ್ಕೋನ್ತಿ ಜಹಾತುಮೇವಂ;

ಅನಿಚ್ಛಮಾನೇಹಿ ಜನೇಹಿ ದುಕ್ಖಂ,

ಆರಾವ ಪಾಪಂ ಪರಿವಜ್ಜನೀಯಂತಿ.

ಉತ್ತರಸಾಮಣೇರಸ್ಸ ವತ್ಥುಂ ಚತುತ್ಥಂ.

೨೫. ಕವೀರಪಟ್ಟನ ವತ್ಥುಮ್ಹಿ ಅಯಮಾನುಪುಬ್ಬೀಕಥಾ

ಜಮ್ಬುದೀಪೇ ಕಿರ ಚೋಳರಟ್ಠೇ ಕಾವೀರಪಟ್ಟನಂ ನಾಮ ಅಹೋಸಿ. ತತ್ಥ ಮಾಹಿಸ್ಸರಿಕಾ ಬಹೂ ಮಿಚ್ಛಾದಿಟ್ಠಿಕಾ ವಸನ್ತಿ. ತತ್ಥೇಕಸ್ಮಿಂ ದೇವಾಲಯೇ ಚಿತ್ತಕಮ್ಮಂ ಕರೋನ್ತಾ ಏಕಸ್ಮಿಂ ಫಲಕೇ ಇಸ್ಸರಸ್ಸ ಓನಮಿತ್ವಾ ವನ್ದನಾಕಾರಂ ಭಗವತೋ ರೂಪಂ ಅಕಂಸು. ತಸ್ಮಿಂ ಸಮಯೇ ತತ್ಥ ಬಹೂ ಉಪಾಸಕಾ ತಂ ದೇವಕುಲಂ ಗನ್ತ್ವಾ ತತ್ಥ ತತ್ಥ ಚಿತ್ತಕಮ್ಮಾನಿ ಓಲೋಕೇನ್ತಾ ತಸ್ಮಿಂ ಫಲಕೇ ತಂ ಚಿತ್ತಕಮ್ಮಂ ಅದ್ದಸಂಸು. ದಿಸ್ವಾನ ತೇ ಅಹೋ ಅಮ್ಹೇಹಿ ಅಪಸ್ಸಿತಬ್ಬಂ ಪಸ್ಸಿತಂ. ಸದೇವಕೇ ಲೋಕೇ ಸಮಾರಕೇ ಸಬ್ರಹ್ಮಕೇ ಸಸ್ಸಮಣಬ್ರಾಹ್ಮಣಿಯಾಸದೇವಮನುಸ್ಸಾಯ ಪಜಾಯ ಚ ಅಪರಿಮಾಣೇಸು ಚಕ್ಕವಾಳೇಸು ಭಗವತೋ ಉತ್ತರಿತರಂ ಠಪೇತ್ವಾ ಸಮಸಮೋಪಿ ನತ್ಥಿ. ಸಕಲೇಹಿ ಸತ್ತನಿಕಾಯೇಹಿ ವನ್ದನೀಯೋ ಪೂಜನೀಯೋ ಭಗವಾ. ಅನನುರೂಪಂ ತಸ್ಸ ಏತೇಹಿ ಕತಂತಿ ರೋದನ್ತಾ ಪರಿದೇವನ್ತಾ ರಾಜದ್ವಾರಂ ಗನ್ತ್ವಾ ಉಗ್ಘೋಸೇಸುಂ, ತಂ ಸುತ್ವಾ ರಾಜಾ ತೇ ಪಕ್ಕೋಸಾಪೇತ್ವಾ ಕಸ್ಮಾ ತುಮ್ಹೇ ¶ ಉಗ್ಘೋಸೇಥಾತಿ ಪುಚ್ಛಿ, ತೇ ಏವ ಮಾಹಂಸು. ದೇವ ಅಮ್ಹಾಕಂ ಭಗವಾ ದೇವಾತಿದೇವೋ ಸಕ್ಕಾತಿಸಕ್ಕೋ ಬ್ರಹ್ಮಾತಿಬ್ರಹ್ಮಾ ಮೇರುವ ಅಚಲೋ ಸಾಗರೋ ಗಮ್ಭೀರೋ ಆಕಾಸೋವ ಅನನ್ತೋ ಪಥವೀವ ಪತ್ಥಟೋತಿಆದೀಹಿ ಭಗವತೋ ಗುಣಂ ವಣ್ಣೇಸುಂ. ತೇನ ವುತ್ತಂ ಅಪದಾನೇ.

೧.

ಬತ್ತಿಂಸಲಕ್ಖಣಧರೋ, ಸುನಕ್ಖತ್ತೋವ ಚನ್ದಿಮಾ;

ಅನುಬ್ಯಞ್ಜನಸಮ್ಪನ್ನೋ, ಸಾಲರಾಜಾವ ಫುಲ್ಲಿತೋ.

೨.

ರಂಸಿಜಾಲಪರಿಕ್ಖಿತ್ತೋ, ದಿತ್ತೋವ ಕನಕಾಚಲೋ;

ಬ್ಯಾಮಪ್ಪಭಾಪರಿವುತೋ, ಸತರಂಸಿ ದಿವಾಕರೋ.

೩.

ಸೋಣ್ಣಾ ನನೋ ಜಿನವರೋ, ಸಮಣೀವ ಸಿಲುಚ್ಚಯೋ;

ಕರುಣಾಪುಣ್ಣಹದಯೋ, ವಿವಟ್ಟೋ ವಿಯ ಸಾಗರೋ.

೪.

ಲೋಕವಿಸ್ಸುತಕಿತ್ತೀವ, ಸಿನೇರುವ ನಗುತ್ತಮೋ;

ಯಸಸಾ ವಿತತೋ ಧೀರೋ, ಆಕಾಸಸದಿಸೋ ಮುನಿ.

೫.

ಅಸಙ್ಗಚಿತ್ತೋ ಸಬ್ಬತ್ಥ, ಅನಿಲೋ ವಿಯ ನಾಯಕೋ;

ಪತಿಟ್ಠಾ ಸಬ್ಬಭೂತಾನಂ, ಮಹೀವ ಮುನಿಸುತ್ತಮೋ.

೬.

ಅನೂಪಲಿತ್ತೋ ಲೋಕೇನ, ತೋಯೇನ ಪದುಮಂ ಯಥಾ;

ಕುವಾದಗಚ್ಛದಹನೋ, ಅಗ್ಗಿಕ್ಖನ್ಧೋವ ಸೋಭತಿ.

೭.

ಅಗದೋ ವಿಯ ಸಬ್ಬತ್ಥ, ಕಿಲೇಸವಿಸನಾಸಕೋ;

ಗನ್ಧಮಾದನಸೇಲೋವ, ಗುಣಗನ್ಧವಿಭೂಸಿತೋ.

೮.

ಗುಣಾನಂ ಆಕರೋ ಧೀರೋ, ರತನಾನಂವ ಸಾಗರೋ;

ಸಿನ್ಧೂವ ವನರಾಜೀನಂ, ಕಿಲೇಸಮಲಹಾರಕೋ.

೯.

ವಿಜಯೀವ ಮಹಾಯೋಧೋ, ಮಾರಸೇನಪ್ಪಮದ್ದನೋ;

ಚಕ್ಕವತ್ತೀವ ಸೋ ರಾಜಾ, ಬೋಜ್ಝಙ್ಗರತನಿಸ್ಸರೋ.

೧೦.

ಮಹಾಭಿಸಕ್ಕಸಙ್ಕಾಸೋ, ದೋಸಬ್ಯಾಧಿತಿಕಿಚ್ಛಕೋ;

ಸಲ್ಲಕತ್ತೋ ಯಥಾ ವೇಜ್ಜಾ, ದಿಟ್ಠಿಗಣ್ಡವಿಫಾಲಕೋ.

೧೧.

ಸತ್ಥಾ ¶ ನೋ ಭಗವಾ ದೇವ, ಮಹಾಬ್ರಹ್ಮೇಹಿ ವನ್ದಿತೋ;

ದೇವಿನ್ದಸುರಸಿದ್ಧೇಹಿ, ವನ್ದನೀಯೋ ಸದಾ ದರಾ.

೧೨.

ಸಬ್ಬೇಸು ಚಕ್ಕವಾಳೇಸು, ಯೇ ಅಗ್ಗಾ ಯೇ ಚ ಪೂಜಿತಾ;

ತೇಸಮಗ್ಗೋ ಮಹಾರಾಜ, ಭಗವಾ ನೋ ಪತಾಪವಾತಿ.

ಅಯುತ್ತಂ ದೇವ ದೇವಕುಲೇಹಿ ಕತಂತಿ ಆಹಂಸು. ತಂ ಸುತ್ವಾ ರಾಜಾ ಭೋ ಸಬ್ಬೇಪಿ ಮನುಸ್ಸಾ ಅತ್ತನೋ ಅತ್ತನೋ ದೇವತಾನಂ ಮಹನ್ತಭಾವಂ ಕಥೇನ್ತಿ. ತುಮ್ಹಾಕಂ ಪನ ಸತ್ಥುನೋ ಮಹನ್ತಭಾವಂ ಕಥಂ ಅಮ್ಹಾಕಂ ಜಾನಾಪೇಥಾತಿ, ಉಪಾಸಕಾ ನ ಗರು ತ್ವಂ ಮಹಾರಾಜ ಫಲಕಂ ಆಹರಾಪೇತ್ವಾ ಸುದ್ಧವತ್ಥೇನ ವೇಠೇತ್ವಾ ತಂ ಅತ್ತನೋ ಮುದ್ದಿಕಾಯ ಲಞ್ಛಿತ್ವಾ ಸುರಕ್ಖಿತಸುಗೋಪಿತೇ ಏಕಸ್ಮಿಂ ದೇವಕುಲೇ ಠಪೇತ್ವಾ ಸತ್ತಾಹಚ್ಚಯೇನ ಆಹರಾಪೇತ್ವಾ ತಂ ಓಲೋಕೇಥ, ತದಾ ನೋ ಸತ್ಥುನೋ ಮಹನ್ತಾನುಭಾವಂ ಜಾನಾಥಾತಿ ಆಹಂಸು, ಅಥ ರಾಜಾ ತೇಸಂ ವುತ್ತನಿಯಾಮೇನೇವ ಕಾರಾಪೇತ್ವಾ ಅನ್ತೋದೇವಕುಲೇ ಠಪೇತ್ವಾ ಸಬ್ಬದ್ವಾರಾನಿ ಪಿದಹಿತ್ವಾ ಲಞ್ಛೇತ್ವಾ ರಕ್ಖೇಯ್ಯಾಥಾತಿ ನಿಯೋಜೇಸಿ. ತತೋ ತೇ ಉಪಾಸಕಾ ಸಬ್ಬೇ ಸನ್ನಿಪತಿತ್ವಾ ಸತ್ತಾಹಂ ದಾನಂ ದೇನ್ತಾ ಸೀಲಂ ರಕ್ಖನ್ತಾ ಉಪೋಸಥಕಮ್ಮಂ ಕರೋನ್ತಾ ಸಬ್ಬಸತ್ತೇಸು ಮೇತ್ತಿಂ ಭಾವೇನ್ತಾ ಸಬ್ಬಸತ್ತಾನಂ ಅತ್ತನಾ ಕತಪುಞ್ಞೇಸು ಪತ್ತಿಂ ದೇನ್ತಾ ತಿಣ್ಣಂ ರತನಾನಂ ಪೂಜಂ ಕರೋನ್ತಾ ಏವಂ ಉಗ್ಘೋಸೇಸುಂ. ಅಮ್ಹಾಕಂ ಕತಕುಸಲನಿಸ್ಸನ್ದೇನ ಲೋಕೇ ಮಹಿದ್ಧಿಕಾ ಮಹಾನುಭಾವಾ ಸಬ್ಬೇ ದೇವಾ ಚ ಲೋಕಂ ಪಾಲೇನ್ತಾ ಚತ್ತಾರೋ ಮಹಾರಾಜಾನೋ ಚ ಅಮ್ಹಾಕಂ ಸತ್ಥುನೋ ಉಪಟ್ಠಾನಾಯ [ಉಪಟ್ಠಾಯ ಇತಿಸಬ್ಬತ್ಥ] ಠಿತಭಾವಂ ದಸ್ಸೇನ್ತೂತಿ ಸಚ್ಚಕಿರಿಯಂ ಅಕಂಸು. ಅಥ ತೇಸಂ ಪುಞ್ಞಾನುಭಾವೇನ ತಸ್ಮಿಂ ಖಣೇ ಸಕ್ಕಸ್ಸ ದೇವರಞ್ಞೋ ಪಣ್ಡುಕಮ್ಬಲಸಿಲಾಸನಂ ಉಣ್ಹಾಕಾರಂ ದಸ್ಸೇಸಿ. ತತೋ ಸೋ ಮನುಸ್ಸಲೋಕಂ ಓಲೋಕೇನ್ತೋ ಮಿಚ್ಛಾದಿಟ್ಠೀಹಿ ಕತಂ ತಂ ವಿಪ್ಪಕಾರಂ ದಿಸ್ವಾ ಸಂವಿಗ್ಗೋ ಆಗನ್ತ್ವಾ ಇಸ್ಸರಂ ಭಗವತೋ ಪಾದೇ ವನ್ದಿತ್ವಾ ಸಯಿತಾಕಾರಂ ¶ ಕತ್ವಾ ತಂ ಪವತ್ತಿಂ ಉಪಾಸಕಾನಂ ಕಥೇತ್ವಾ ಸಕಟ್ಠಾನಮೇವ ಅಗಮಾಸಿ. ತತೋ ಸತ್ತಮೇ ದಿವಸೇಪಾತೋವ ತೇ ಸಬ್ಬೇಪಿ ರಞ್ಞೋ ಸನ್ತಿಕಂ ಗನ್ತ್ವಾ ವನ್ದಿತ್ವಾ ಏವಮಾಹಂಸು. ದೇವ ಇಸ್ಸರೋ ಅಮ್ಹಾಕಂ ಭಗವತೋ ಪಾದೇ ಸಿರಸಾ ವನ್ದಿತ್ವಾ ನಿಪನ್ನೋತಿ. ಅಥ ರಾಜಾ ತೇಸಂ ಕಥಂ ಸುತ್ವಾ ನಗರೇ ಭೇರಿಂ ಚರಾಪೇತ್ವಾ ಮಹಾಜನೇ ಸನ್ನಿಪಾತೇತ್ವಾ ತೇಹಿ ಪರಿವುತೋ ದೇವಕುಲಂ ಗನ್ತ್ವಾ ಲಞ್ಛಂ ಭಿನ್ದಾಪೇತ್ವಾ ದ್ವಾರಂ ವಿವರಿತ್ವಾ ಫಲಕಂ ಆಹರಾಪೇತ್ವಾ ವೇಠಿತಸಾಟಕೇ ಮೋಚಾಪೇಸಿ. ಅಥ ರಾಜಾ ಚ ಮಹಾಜನೋ ಚ ತಂ ಮಹನ್ತಂ ಪಾಟಿಹಾರಿಯಂ ದಿಸ್ವಾ ಮಿಚ್ಛಾದಿಟ್ಠಿಂ ಪಹಾಯ ಸಬ್ಬೇ ಸತ್ಥುನೋ ಸರಣ ಮಗಮಂಸು. ಅಥ ರಾಜಾ ತಂ ದೇವಕುಲಂ ಭಿನ್ದಾಪೇತ್ವಾ ಮಹನ್ತಂ ರಮಣೀಯಂ ವಿಹಾರಂ ಕಾರಾಪೇತ್ವಾ ಯಾವಜೀವಂ ಪುಞ್ಞಕಮ್ಮಂ ಕತ್ವಾ ದೇವಲೋಕೇ ನಿಬ್ಬತ್ತಿ.

೧೩.

ಅನಬ್ಭುತಂ ಸತ್ಥು ಧರೀಯಮಾನೇ,

ಕರೋನ್ತಿ ದಿಸ್ವಾ ಕುಸಲಾನಿ ಇದ್ಧಿಂ;

ಯೇ ತಂ ಮುನಿನ್ದೇ ಪರಿನಿಬ್ಬುತಮ್ಹಿ,

ಕರೋನ್ತಿ ಪುಞ್ಞಾನಿ ಮಹಬ್ಭೂತಂ ಯೇತಿ.

ಕಾವೀರಪಟ್ಟನವತ್ಥುಂ ಪಞ್ಚಮಂ.

೨೬. ಚೋರಘಾತಕವತ್ಥುಮ್ಹಿ ಅಯಮಾನುಪುಬ್ಬೀಕಥಾ

ಏಕಸ್ಮಿಂ ಕಿರ ಸಮಯೇ ಅಮ್ಹಾಕಂ ಭಗವಾ ಸಾವತ್ಥಿಯಂ ಉಪನಿಸ್ಸಾಯ ಜೇತವನೇ ವಿಹರತಿ ಧಮ್ಮದೇಸನಾಯ ಮಹಾಜನಸ್ಸ ಸಗ್ಗಮೋಕ್ಖಸಮ್ಪದಂ ದದಮಾನೋ. ತಸ್ಮಿಂಸಮಯೇ ಪಞ್ಚಸತಾ ಚೋರಾ ಅಟವಿತೋ ನಗರಂ ಆಗನ್ತ್ವಾ ರತ್ತಿಭಾಗೇ ಚೋರಕಮ್ಮಂ ಕತ್ವಾ ತೇನ ಪುತ್ತದಾರೇ ಪೋಸೇನ್ತಿ. ಅಥೇಕದಿವಸಂ ಚೋರಾ ಚೋರಕಮ್ಮತ್ಥಾಯ ನಗರಂ ಪವಿಸನ್ತಾ ನಗರದ್ವಾರೇ ಏಕಂ ದುಕ್ಖಿತಂ ಜನಪದಮನುಸ್ಸಂ ಪಸ್ಸಿತ್ವಾ ಹಮ್ಭೋ ¶ ಕತ್ಥ ವಸತೀತಿ ಪುಚ್ಛಿಂಸು, ಸೋ ಅತ್ತಜನಾ ಜನಪದವಾಸಿಭಾವಂ ಪಕಾಸೇಸಿ. ಅಥಸ್ಸ ತೇ ಕಸ್ಮಾ ಭೋ ಇಮಿನಾ ದುಕ್ಖವಾಸೇನ ವಸಿಸ್ಸಸಿ, ಏಹಿ ಅಮ್ಹೇಹಿ ಸದ್ಧಿಂ ಚೋರಕಮ್ಮಂ ಕರೋನ್ತೋ ವತ್ಥಾಲಙ್ಕಾರಸಮ್ಪನ್ನೋ ಪುತ್ತದಾರಂ ಪೋಸೇಹಿ. ಇಮಿನಾ ಕಪಣವಾಸೇನ ನ ವಸಾತಿ ಆಹಂಸು. ಸೋ ಪನಿಮೇ ಯುತ್ತಂ ಕಥೇನ್ತೀತಿ ತೇಸಂ ವಚನಂ ಸಮ್ಪಟಿಚ್ಛಿ. ಅಥ ತೇ ಏವಂ ಸತಿ ಅಮ್ಹೇಹಿ ಸದ್ಧಿಂ ಆಗಚ್ಛಾಹೀತಿ ವತ್ವಾ ನಂ ಗಹೇತ್ವಾ ಅನ್ತೋನಗರಂ ಪವಿಟ್ಠಾ ತತ್ಥ ತತ್ಥ ವಿಲುಮ್ಪನ್ತಾ ಚೋರಕಮ್ಮಂ ಅಕಂಸು. ತದಾ ಜಾನಪದಿಕೋ ಲದ್ಧವಿಭವೋ ಇಮಮೇವ ವರತರನ್ತಿ ತೇಹಿ ಸದ್ಧಿಂ ಚೋರಕಮ್ಮಂ ಕರೋನ್ತೋ ಜೀವಿಕಂ ಕಪ್ಪೇಸಿ, ಅಥೇಕದಿವಸಂ ರಾಜಪುರಿಸಾ ಕತಕಮ್ಮೇ ತೇ ಸಬ್ಬೇವ ಗಹೇತ್ವಾ ಪಚ್ಛಾಬಾಹಂ ಗಾಳ್ಹಂ ಬನ್ಧಿತ್ವಾ ಕೋಸಲರಞ್ಞೋ ದಸ್ಸೇಸುಂ, ರಾಜಾ ತೇ ದಿಸ್ವಾ ಏವಮಾಹ, ಭಣೇ ತುಮ್ಹಾಕಂ ಅನ್ತರೇ ಯೋ ಏತೇಸಂ ಮಾರೇತ್ವಾ ಜೀವಿತಕ್ಖಯಂ ಪಾಪೇಸ್ಸತಿ, ತಸ್ಸ ಜೀವಿತದಾನಂ ದಮ್ಮೀತಿ, ತಂ ಸುತ್ವಾ ತೇ ಚೋರಾ ಸಬ್ಬೇ ಅಞ್ಞಮಞ್ಞಞಾತಿಸುಹದಸಮ್ಬನ್ಧಭಾವೇನ ತಂ ನ ಇಚ್ಛಿಂಸು. ಸೋ ಪನ ಜನಪದವಾಸೀ ಮನುಸ್ಸೋ ಅಹಮೇತೇ ಸಬ್ಬೇ ಮಾರೇಸ್ಸಾಮೀತಿ ರಞ್ಞೋ ವತ್ವಾ ತೇನಾನುಞ್ಞಾತೋ ತೇ ಸಬ್ಬೇ ಮಾರೇಸಿ. ತಂ ದಿಸ್ವಾ ತುಟ್ಠೋ ರಾಜಾ ತಸ್ಸ ಚೋರಘಾತಕಮ್ಮಂ ಅದಾಸಿ. ಸೋ ಚೋರೇ ಚ ವಜ್ಝಪ್ಪತ್ತೇ ಚ ಮಾರೇನ್ತೋ ಪಞ್ಚವೀಸತಿವಸ್ಸಾನಿ ವಸನ್ತೋ ಅಪರಭಾಗೇ ಮಹಲ್ಲಕೋ ಅಹೋಸಿ. ಅಥ ಸೋ ಮನ್ದಬಲತ್ತಾ ಕತಿಪಯಪಹಾರೇನಾಪಿ ಚೋರಂ ಮಾರೇತುಂ ನ ಸಕ್ಕೋತಿ, ರಾಜಾ ತಂ ಞತ್ವಾ ಅಞ್ಞಸ್ಸ ಚೋರಘಾತಕಮ್ಮಂ ಅದಾಸಿ. ಅಥ ಸೋ ಚೋರಘಾತಕಮ್ಮಾ [ಚೋರಘಾತಕಮ್ಮ ಇತಿಪಿಕತ್ಥಚಿ] ಪರಿಹೀನೋ ಅತ್ತನೋ ಗೇಹೇ ವಸತಿ. ತದಾ ಅಞ್ಞತರೋ ಮನುಸ್ಸೋ ಮನ್ತಂ ಪರಿವತ್ತೇತ್ವಾ ನಾಸಾವಾತೇನ ಮನುಸ್ಸಮಾರಣಕಮನ್ತಂ ಜಾನಾತಿ. ತಥಾಹಿ ಹತ್ಥಪಾದಕಣ್ಣನಾಸಸೀಸಾದೀಸು ಯಂಕಿಞ್ಚಿ ಛೇಜ್ಜಭೇಜ್ಜಂ ಕತ್ತುಕಾಮೋ ಮನ್ತಂ ಪರಿವತ್ತೇತ್ವಾ ನಾಸಾವಾತಂ ವಿಸ್ಸಜ್ಜೇತಿ. ತಂ ತಂ ಠಾನಂ ಛಿಜ್ಜತಿ ಭಿಜ್ಜತಿ, ಏವಂ ಮಹಾನುಭಾವೋ ಸೋ ಮನ್ತೋ, ಅಥ ಸೋ ತಂ ಪುರಿಸಂ ಉಪಟ್ಠಹಿತ್ವಾ ಮನ್ತಂ ಲಭಿತ್ವಾ ರಞ್ಞೋ ಸಾಸನಂ ಪೇಸೇಸಿ ¶ . ಅಹಂ ಇತೋ ಪುಬ್ಬೇ ಮಹಲ್ಲಕತ್ತಾ ಚೋರಾನಂ ಹತ್ಥಪಾದಾದಯೋ ದುಕ್ಖೇನ ಛೇಜ್ಜ ಭೇಜ್ಜಂ ಕರೋಮಿ, ಮಾರೇತಬ್ಬೇಪಿ ದುಕ್ಖೇನ ಮಾರೇಮಿ. ಇದಾನಿ ಪನಾಹಂ ತಥಾ ನ ಕರೋಮಿ, ಮಮ ಮನ್ತಾನುಭಾವೇನ ಛೇಜ್ಜಭೇಜ್ಜಕಮ್ಮಂ ಕರಿಸ್ಸಾಮೀತಿ. ರಾಜಾ ತಂ ಸಾಸನಂ ಸುತ್ವಾ ಸಾಧೂತಿ ತಂ ಪಕ್ಕೋಸಾಪೇತ್ವಾ ಠಾನನ್ತರಂ ತಸ್ಸೇವ ಪಾಕತಿಕ ಮಕಾಸಿ. ಸೋ ತತೋ ಪಟ್ಠಾಯ ತಂ ಕಮ್ಮಂ ಕರೋನ್ತೋ ಪುನ ಪಞ್ಚವಸ್ಸಾನಿ ಅತಿಕ್ಕಾಮೇಸಿ. ಸೋ ಮಹಲ್ಲಕೋ ಖೀಣಾಯುಕೋ ದುಬ್ಬಲೋ ಮರಣಮಞ್ಚಪರಾಯಣೋ ಹುತ್ವಾ ಮರಣವೇದನಾದುಕ್ಖೇನ ಮಹನ್ತೇನ ಭಯಾನಕೇನ ಸದ್ದೇನ ವಿಸ್ಸರಂ ವಿರವನ್ತೋ ನಿಮೀಲಿತೇನ ಚಕ್ಖುನಾ ಭಯಾನಕಂ ನರಕಗ್ಗಿಜಾಲಾಪಜ್ಜಲನ್ತಅಯಕೂಟಮುಗ್ಗರಧರೇ ನಿರಯಪಾಲೇ ಚ ಪಸ್ಸನ್ತೋ ನಿಪನ್ನೋ ಹೋತಿ, ತತೋ ತಸ್ಸ ಪಟಿವಿಸ್ಸಕಗೇಹೇ ಮನುಸ್ಸಾ ತಸ್ಸ ಭಯಾನಕಸದ್ದಸವಣೇನ ಗೇಹಂ ಛಟ್ಟೇತ್ವಾ ಪಲಾಯಿಂಸು. ತಸ್ಮಿಂ ಕಿರ ದಿವಸೇ ಮಹಾಸಾರಿಪುತ್ತತ್ಥೇರೋ ದಿಬ್ಬಚಕ್ಖುನಾ ಲೋಕಂ ಓಲೋಕೇನ್ತಾ ತಂ ಚೋರಘಾತಕಂ ತದಹೇವ ಕಾಲಂಕತ್ವಾ ನಿರಯೇ ನಿಬ್ಬತ್ತಮಾನಂ ದಿಸ್ವಾ ಮಯಿ ತತ್ಥ ಗತೇ ಪನೇಸ ಮಯಿ ಪಸಾದೇನ ಸಗ್ಗೇ ನಿಬ್ಬತ್ತತೀತಿ ಞತ್ವಾ ಅಜ್ಜ ಮಯಾ ತಸ್ಸಾನುಗ್ಗಹಂ ಕಾತುಂ ವಟ್ಟತೀತಿ ಪುಬ್ಬಣ್ಹಸಮಯಂ ನಿವಾಸೇತ್ವಾ ತಸ್ಸ ಘರದ್ವಾರ ಮಗಮಾಸಿ. ಅಥ ಸೋ ಥೇರಂ ದಿಸ್ವಾ ಕುದ್ಧೋ ಕೋಪೇನ ತಟತಟಾಯಮಾನದೇಹೋ ಅಜ್ಜ ತಂ ವಿಜ್ಝಿತ್ವಾ ಫಾಲೇತ್ವಾ ಮಾರೇಸ್ಸಾಮೀತಿ ನಿಪನ್ನೋವ ಮನ್ತಂ ಪರಿವತ್ತೇತ್ವಾ ನಾಸಾವಾತಂ ವಿಸ್ಸಜ್ಜೇಸಿ, ಥೇರೋ ತಸ್ಮಿಂ ಖಣೇ ನಿರೋಧಸಮಾಪನ್ನೋ ನಿರೋಧಾ ವುಟ್ಠಾಯ ಸುರಿಯೋ ವಿಯ ವಿರೋಚಮಾನೋ ಅಟ್ಠಾಸಿ, ಅಥ ಸೋ ಥೇರಸ್ಸ ತಯೋ ವಾರೇ ತಥೇವ ಕತ್ವಾ ಕಿಞ್ಚಿ ಕಾತುಂ ಅಸಕ್ಕೋನ್ತೋ ಅತಿವಿಯ ವಿಮ್ಹಿತಚಿತ್ತೋ ಥೇರೇ ಚಿತ್ತಂ ಪಸಾದೇತ್ವಾ ಅತ್ತನೋ ಪಟಿಯತ್ತಂ ಪಾಯಸಂ ಥೇರಸ್ಸ ದಾಪೇಸಿ, ಥೇರೋ ಮಙ್ಗಲಂ ವಡ್ಢೇತ್ವಾ ವಿಹಾರಮೇವ ಅಗಮಾಸಿ, ಚೋರಘಾತಕೋ ಥೇರಸ್ಸ ದಿನ್ನದಾನಂ ಅನುಸ್ಸರನ್ತೋ ತಸ್ಮಿಂ ಖಣೇ ಕಾಲಂ ಕತ್ವಾ ಸಗ್ಗೇ ನಿಬ್ಬತ್ತಿ. ಅಹೋ ವೀತರಾಗಾನಂ ಬುದ್ಧಪುತ್ತಾನಂ ಆನುಭಾವೋ. ಏವಂ ನರಕೇ ನಿಬ್ಬತ್ತಮಾನೋಪಿಸ್ಸ ಬಲೇನ ಸಗ್ಗೇ ನಿಬ್ಬತ್ತೋತಿ. ತಥಾಹಿ.

೧.

ದಾನಂ ¶ ತಾಣಂ ಮನುಸ್ಸಾನಂ, ದಾನಂ ದುಗ್ಗತಿವಾರಣಂ;

ದಾನಂ ಸಗ್ಗಸ್ಸ ಸೋಪಾನಂ, ದಾನಂ ಸನ್ತಿಕರಂ ಪರಂ.

೨.

ಇಚ್ಛಿತಿಚ್ಛಿತದಾನೇನ, ದಾನಂ ಚಿನ್ತಾಮಣೀ ವಿಯ;

ಕಪ್ಪರುಕ್ಖೋವ ಸತ್ತಾನಂ, ದಾನಂ ಭದ್ದಘಟೋವಿಯ.

೩.

ಸೀಲವನ್ತಸ್ಸ ದಾನೇನ, ಚಕ್ಕವತ್ತಿಸಿರಿಮ್ಪಿ ಚ;

ಲಭನ್ತಿ ಸಕ್ಕಸಮ್ಪತ್ತಿಂ, ತಥಾ ಲೋಕುತ್ತರಂ ಸುಖಂ.

೪.

ಪಾಪಕಮ್ಮೇಸು ನಿರತೋ, ಠಿತೋಯಂ ನರಕಾಯನೇ [ನರಕಾವನೇ ಇತಿಪಿಕತ್ಥಚಿ];

ಸಾರಿಪುತ್ತಸ್ಸ ಥೇರಸ್ಸ, ಪಿಣ್ಡಪಾತಸ್ಸ ವಾಹಸಾ.

೫.

ಅಪಾಯಂ ಪರಿವಜ್ಜೇತ್ವಾ, ನೇಕದುಕ್ಖಸಮಾಕುಲಂ;

ದೇವಸಙ್ಘಪರಿಬ್ಬೂಳ್ಹೋ, ಗತೋ ದೇವಪುರಂ ವರಂ.

೬.

ತಸ್ಮಾ ಸುಖೇತ್ತೇ ಸದ್ಧಾಯ, ದೇಥ ದಾನಾನಿ ಕಾಮದಂ;

ದಾನಂ ದೇನ್ತೇಹಿ ಸೀಲಮ್ಪಿ, ಪಾಲನೀಯಂತಿಸುನ್ದರನ್ತಿ [ಪಾಲನಂಚಾತಿಸುನ್ದರಂ ಇತಿಪಿಕತ್ಥಚಿ].

ಅಥ ಭಿಕ್ಖೂ ಧಮ್ಮಸಭಾಯಂ ಸನ್ನಿಪತಿತ್ವಾ ನಿಸಿನ್ನಾ ಭಗವನ್ತಂ ಪುಚ್ಛಿಂಸು, ಕಿಂಭನ್ತೇ ಸೋ ಪಾಪೋ ಚತೂಸು ಅಪಾಯೇಸು ಕತರಸ್ಮಿಂ ನಿಬ್ಬತ್ತೋತಿ. ಅಥ ಸತ್ಥಾ ಅಜ್ಜೇಸ ಭಿಕ್ಖವೇ ಸಾರಿಪುತ್ತಸ್ಸ ದಿನ್ನದಾನಾನುಭಾವೇನ ದೇವಲೋಕೇ ನಿಬ್ಬತ್ತೋ, ತಸ್ಸೇವ ನಿಸ್ಸನ್ದೇನ ಅನಾಗತೇ ಪಚ್ಚೇಕಬುದ್ಧೋ ಭವಿಸ್ಸತೀತಿ ಬ್ಯಾಕಾಸೀತಿ.

೭.

ಭೋ ಸಾರಿಪುತ್ತೇ ನಿಹಿತಪ್ಪದಾನಂ,

ಖಣೇನ ಪಾಪೇತಿ ಹಿ ಸಗ್ಗಮಗ್ಗಂ;

ತಸ್ಮಾ ಸುಖೇತ್ತೇಸು ದದಾಥ ದಾನಂ,

ಕಾಮತ್ಥ ಚೇ ಸಗ್ಗಮೋಕ್ಖಂ ಪರತ್ಥ.

ಚೋರಘಾತಕವತ್ಥುಂ ಛಟ್ಠಮಂ.

೨೭. ಸದ್ಧೋಪಾಸಕಸ್ಸ ವತ್ಥುಮ್ಹಿ ಅಯಮಾನುಪುಬ್ಬೀಕಥಾ

ಅತೀತೇ ¶ ಕಿರ ಕಸ್ಸಪದಸಬಲಸ್ಸ ಕಾಲೇ ಏಕೋ ಪುರಿಸೋ ಸದ್ಧೋ ರತನತ್ತಯೇಸು ಪಸನ್ನೋ ಉಚ್ಛುಯನ್ತಕಮ್ಮೇನ ಜೀವಿಕಂ ಕಪ್ಪೇನ್ತೋ ಪಟಿವಸತಿ. ಅಥ ಸೋ ಏಕಂ ಗಿಲಾನಭಿಕ್ಖುಂ ದಿಸ್ವಾ ತಸ್ಸ ಉಳುಙ್ಕಮತ್ತಂ ಸಪ್ಪಿಂ ಅದಾಸಿ, ತಥೇವೇಕಸ್ಸ ಭಿಕ್ಖುಸ್ಸ ಏಕಂ ಗುಳಪಿಣ್ಡಂ ಅದಾಸಿ, ಅಥಾಪರಸ್ಮಿಂದಿವಸೇ ಏಕಂ ಛಾತಜ್ಝತ್ತಂ ಸುನಖಂ ದಿಸ್ವಾ ತಸ್ಸ ಭತ್ತಪಿಣ್ಡೇನ ಸಙ್ಗಹ ಮಕಾಸಿ, ಅಥೇಕಸ್ಸ ಇಣಟ್ಠಕಸ್ಸ ಏಕಂ ಕಹಾಪಣಂ ಅದಾಸಿ, ಅಥೇಕದಿವಸಂ ಧಮ್ಮಂ ಸುಣಮಾನೋ ಧಮ್ಮದೇಸಕಸ್ಸ ಭಿಕ್ಖುಸ್ಸ ಸಾಟಕಂ ಪೂಜೇಸಿ, ಸೋ ಏತ್ತಕಂ ಪುಞ್ಞಕಮ್ಮಂ ಕತ್ವಾ ಭವೇಸು ಚರಮಾನೋಹಂ ಸಮುದ್ದಪಬ್ಬತಾದೀಸುಪಿ ಯಂ ಯಂ ಇಚ್ಛಾಮಿ. ತಂ ತಂ ಸಮಿಜ್ಝತೂತಿ ಪತ್ಥನಂ ಅಕಾಸಿ, ಸೋ ಅಪರಭಾಗೇ ಕಾಲಂ ಕತ್ವಾ ತೇಹೇವ ಕುಸಲಮೂಲೇಹಿ ಸುತ್ತಪ್ಪಬುದ್ಧೋ ವಿಯ ದೇವಲೋಕೇ ನಿಬ್ಬತ್ತಿತ್ವಾ ತತ್ಥ ಮಹನ್ತಂ ದಿಬ್ಬಸಮ್ಪತ್ತಿಂ ಅನುಭವಿತ್ವಾ ತತೋ ಚುತೋ ಅಮ್ಹಾಕಂ ಭಗವತೋ ಕಾಲೇ ಸಾವತ್ಥಿಯಂ ಮಹದ್ಧನೇ ಮಹಾಸಾಲಕುಲೇ ನಿಬ್ಬತ್ತಿತ್ವಾ ತತೋ ಸೋ ವಿಞ್ಞುತಂ ಪತ್ತೋ ಕಾಲೇನ ಕಾಲಂ ಧಮ್ಮಂ ಸುಣನ್ತೋ ಘರಾವಾಸೇ ಆದೀನವಂ ಪಬ್ಬಜ್ಜಾಯ ಚ ಆನಿಸಂಸಂ ಸುತ್ವಾ ಪಬ್ಬಜಿತೋ ನ ಚಿರೇನೇವ ಅರಹತ್ತಂ ಪಾಪುಣಿ. ಸೋ ಅಪರಭಾಗೇ ಸತ್ಥಾರಂ ವನ್ದಿತ್ವಾ ಪಞ್ಚಸತಭಿಕ್ಖುಪರಿವಾರೋ ಉಗ್ಗನಗರಂ ಅಗಮಾಸಿ, ತತ್ಥ ಸೇಟ್ಠಿನೋ ಭರಿಯಾ ಸದ್ಧಾ ಅಹೋಸಿ ಪಸನ್ನಾ. ಸಾ ಥೇರಂ ಪಞ್ಚಹಿ ಭಿಕ್ಖುಸತೇಹಿ ಸದ್ಧಿಂ ಭಿಕ್ಖಾಯ ಚರನ್ತಂ ದಿಸ್ವಾ ತುರಿತತುರಿತಾ ಗನ್ತ್ವಾ ಥೇರಸ್ಸ ಪತ್ತಂ ಗಹೇತ್ವಾ ಸದ್ಧಿಂ ಪಞ್ಚಸತೇಹಿ ಭಿಕ್ಖೂಹಿ ಭೋಜೇತ್ವಾ ಥೇರಂ ತತ್ಥ ನಿಬದ್ಧವಾಸತ್ಥಂ ಯಾಚಿತ್ವಾ ಪಞ್ಚಸತಕೂಟಾಗಾರಾನಿ ಕಾರಾಪೇತ್ವಾ ಅಲಙ್ಕರಿತ್ವಾ ಪಞ್ಚಸತಭಿಕ್ಖೂ ತತ್ಥ ವಾಸೇನ್ತೀ ನಿಬದ್ಧಂ ಚತುಪಚ್ಚಯೇಹಿ ಉಪಟ್ಠಾನಮಕಾಸಿ. ತತೋ ಥೇರೋ ತಂ ಪಞ್ಚಸು ಸೀಲೇಸು ಪತಿಟ್ಠಾಪೇತ್ವಾ ತತ್ಥ ಯಥಾಭಿರನ್ತಂ ವಿಹರಿತ್ವಾ ಅಞ್ಞತ್ತ ಗನ್ತುಕಾಮೋ ಅನುಪುಬ್ಬೇನ ಪಟ್ಟನಗಾಮಂ ಅಗಮಾಸಿ, ತತ್ಥ ವಸಿತ್ವಾ ತತೋ ನಾವಂ ಅಭಿರುಯ್ಹ ಪಞ್ಚಸತಭಿಕ್ಖೂಹಿ ಪರಿವುತೋ ಸಮುದ್ದಪಿಟ್ಠೇನ ಗಚ್ಛತಿ, ಸಮುದ್ದಂ ತರನ್ತಸ್ಸ ¶ ತಸ್ಸ ಸಾಗರಮಜ್ಝೇ ಉದರವಾತೋ ಸಮುಟ್ಠಹಿತ್ವಾ ಪೀಳೇತಿ, ತಂ ದಿಸ್ವಾ ಭಿಕ್ಖೂ ಭನ್ತೇ ಇದಂ ಪುಬ್ಬೇ ಕೇನ ವೂಪಸಮೇಸ್ಸತೀತಿ ಪುಚ್ಛಿಂಸು, ಥೇರೋ ಪುಬ್ಬೇ ಮೇ ಆವುಸೋ ಉಲುಙ್ಕಮತ್ತೇ ಸಪ್ಪಿಪೀತೇ ರೋಗೋ ವೂಪಸಮ್ಮತೀತಿ ಆಹ, ಭಿಕ್ಖೂ ಭನ್ತೇ ಸಮುದ್ದಪಿಟ್ಠೇ ಕಥಂ ಸಪ್ಪಿಂ ಲಭಿಸ್ಸಾಮ, ಅಧಿವಾಸೇಥಾತಿ ಆಹಂಸು, ತಂ ಸುತ್ವಾ ಥೇರೇನ [ಥೇರೋನನೋಆಯಸ್ಮನ್ತಾ ಇತಿಸಬ್ಬತ್ಥ] ನ ನೋ ಆಯಸ್ಮನ್ತಾ ಸಪ್ಪಿ ದುಲ್ಲಭಾ, ಮಮ ಪತ್ತಂ ಗಹೇತ್ವಾ ಸಮುದ್ದೋದಕಂ ಉದ್ಧರಿತ್ವಾ ಆನೇಥಾತಿ ವುತ್ತೇ ಭಿಕ್ಖೂ ತಥಾ ಅಕಂಸು. ಉದ್ಧಟಮತ್ತಮೇವ ತಂಉದಕಂ ಪರಿವತ್ತೇತ್ವಾ ಸಪ್ಪಿ ಅಹೋಸಿ, ಅಥ ಭಿಕ್ಖೂ ತಂ ದಿಸ್ವಾ ಅಚ್ಛರಿಯಬ್ಭುತಚಿತ್ತಾ ಜಾತಾ ಥೇರಸ್ಸ ಸಪ್ಪಿಂ ಉಪನಾಮೇಸುಂ, ಥೇರೇನ ಸಪ್ಪಿನೋ [ಸಪ್ಪಿನಾ ಇತಿಸಬ್ಬತ್ಥ] ಪೀತಮತ್ತೇ ಸೋ ಆಬಾಧೋ ವೂಪಸಮಿ, ಅಥಸ್ಸ ಭಿಕ್ಖೂಹಿ ಕಿ ಮೇತಂ ಭನ್ತೇ ಅಚ್ಛರಿಯಂ, ನ ನೋ ಇತೋ ಪುಬ್ಬೇ ಏವರೂಪಂ ದಿಟ್ಠಪುಬ್ಬಂತಿ ವುತ್ತೇ ಥೇರೋ ತೇನಹಿ ಕತಪುಞ್ಞಾನಂ ಪುಞ್ಞವಿಪಾಕಂ ಪಸ್ಸಿಸ್ಸಥಾತಿ ವತ್ವಾ ಸಮುದ್ದಂ ಓಲೋಕೇಸಿ ಇದಂ ಸಪ್ಪಿ ಹೋತೂತಿ. ಅಥಸ್ಸ ಚಕ್ಖುಪಥೇ ಸಮುದ್ದೇ ಸಬ್ಬೋದಕಂ ಪರಿವತ್ತೇತ್ವಾ ಸಪ್ಪಿ ಅಹೋಸಿ. ಅಥಸ್ಸ ಭಿಕ್ಖೂ ಅಬ್ಭುತಚಿತ್ತಾ ಅಞ್ಞಮ್ಪಿ ಈದಿಸಂ ಪುಞ್ಞಂ ಅತ್ಥಿ ಭನ್ತೇತಿ ಪುಚ್ಛಿಂಸು, ತತೋ ಥೇರೋ ತೇನಹಿ ಪಸ್ಸಥಾಯಸ್ಮನ್ತಾ ಮಮ ಪುಞ್ಞನ್ತಿ ವತ್ವಾ ಸಮನ್ತಾ ತತ್ಥ ತತ್ಥ ಘನಸೇಲಪಬ್ಬತೇ ಓಲೋಕೇಸಿ, ಸಬ್ಬಾನಿ ತಾನಿ ಗುಳಪಿಣ್ಡಾನಿ ಅಹೇಸುಂ, ತತೋ ಚಕ್ಖುಪಥೇ ಸಮನ್ತಾ ಭತ್ತಭಾಜನಾನಿ ದಸ್ಸೇಸಿ ಸಬ್ಯಞ್ಜನಂ ಸೋಪಕರಣಂ. ತತೋ ಹಿಮವನ್ತಂ ಓಲೋಕೇಸಿ, ಸಬ್ಬಂ ತಂ ಸುವಣ್ಣಮಯಂ ಅಹೋಸಿ. ಅಥಾಭಿಮುಖಟ್ಠಾನೇ ಮಹನ್ತಂ ವನಸಣ್ಡಂ ಓಲೋಕೇಸಿ, ಸಕಲವನಸಣ್ಡಂನಾನಾವಿರಾಗವತ್ಥೇಹಿ ಸಞ್ಛನ್ನಂ ಅಹೋಸಿ, ಭಿಕ್ಖೂ ತಂ ತಂ ಪಾಟಿಹಾರಿಯಂ ದಿಸ್ವಾ ಅತೀವ ವಿಮ್ಹಿತಾ ಭನ್ತೇ ಕೇನ ತೇ ಪುಞ್ಞಕಮ್ಮೇನ ಏತಾದಿಸಾನಿ ಪಾಟಿಹಾರಿಯಾನಿ ಭವಿಸ್ಸನ್ತೀತಿ ಪುಚ್ಛಿಂಸು, ಥೇರೋ ಕಸ್ಸಪದಸಬಲಸ್ಸ ಕಾಲೇ ಅತ್ತನಾ ಕತಂ ಸಬ್ಬಂ ತಂ ಕುಸಲಂ ಪಕಾಸೇಸಿ. ತೇನೇತ್ಥ.

೧.

ಇಮಸ್ಮಿಂ ¶ ಭದ್ದಕೇ ಕಪ್ಪೇ, ಕಸ್ಸಪೋ ನಾಮ ನಾಯಕೋ;

ಸಬ್ಬಲೋಕಹಿತತ್ಥಾಯ, ಲೋಕೇ ಉಪ್ಪಜ್ಜಿ ಚಕ್ಖುಮಾ.

೨.

ತದಾಹಂ ಉಚ್ಛುಯನ್ತಮ್ಹಿ, ನಿಯುತ್ತೋ ಗುಳಕಾರಕೋ;

ತೇನ ಕಮ್ಮೇನ ಜೀವಾಮಿ, ಪೋಸೇನ್ತೋ ಪುತ್ತದಾರಕೇ.

೩.

ಕಿಲನ್ತಿನ್ದ್ರಿಯಮದ್ದಕ್ಖಿಂ, ಭಿಕ್ಖುಂ ರೋಗಾತುರಂ ತದಾ;

ಭಿಕ್ಖಾಚಾರಕವತ್ತೇನ, ಘತತ್ಥಂ [ಘತಮತ್ತಮುಪಾಗತಂ ಇತಿಸಬ್ಬತ್ಥ] ಸಮುಪಾಗತಂ.

೪.

ಉಲುಙ್ಕಮತ್ತಂ ಸಪ್ಪಿಸ್ಸ, ಅದದಂ ತಸ್ಸ ಭಿಕ್ಖುನೋ;

ಸದ್ದಹನ್ತೋ ದಾನಫಲಂ, ದಯಾಯು ದಗ್ಗಮಾನಸೋ.

. ೫

ತೇನ ಕಮ್ಮೇನ ಸಂಸಾರೇ, ಸಂಸರನ್ತೋ ಭವಾಭವೇ;

ಯತ್ಥಿಚ್ಛಾಮಿ ಘತಂ ತತ್ಥ, ಉಪ್ಪಜ್ಜತಿ ಅನಪ್ಪಕಂ.

೬.

ಇಚ್ಛಾಮಹಂ ಸಮುದ್ದಸ್ಮಿಂ, ಫಲಮ್ಪಿ ಘತಮತ್ತನೋ;

ತಂ ತಂ ಸಬ್ಬಂ ಘತಂ ಹೋತಿ, ಘತದಾನಸ್ಸಿದಂ ಫಲಂ.

೭.

ಸುಣಾಥ ಮಯ್ಹಂ ಅಞ್ಞಮ್ಪಿ, ಪುಞ್ಞಕಮ್ಮಂ ಮನೋರಮಂ;

ತದಾ ದಿಸ್ವಾನಹಂ ಭಿಕ್ಖುಂ, ರೋಗೇನ ಪರಿಪೀಳಿತಂ.

೮.

ಗುಳಪಿಣ್ಡಂ ಗಹೇತ್ವಾನ, ಪತ್ತೇ ತಸ್ಸ ಸಮಾಕಿರಿಂ;

ತೇನ ಸೋ ಸುಖಿತೋ ಆಸಿ, ರೋಗಂ ಬ್ಯಪಗತಂ ತದಾ.

೯.

ತೇನ ಮೇ ಗುಳದಾನೇನ, ಸಂಸರಂ ದೇವಮಾನುಸೇ;

ಯತ್ಥತ್ಥೋಸ್ಮಿ ಗುಳೇನಾಹಂ, ತತ್ಥ ತಂ ಸುಲಭಂ ಮಮ.

೧೦.

ಸೇಲಾಚ ವಿಪುಲಾ ಮಯ್ಹಂ, ಹೋನ್ತಿ ಚಿತ್ತಾನುವತ್ತಕಾ;

ಮಹನ್ತಗುಳಪಿಣ್ಡಾವ, ಗುಳದಾನೇ ಇದಂ ಫಲಂ.

೧೧.

ಅಥಾಪಿ ಮೇ ಕತಂ ಪುಞ್ಞಂ, ಸುಣಾಥ ಸಾಧು ಭಿಕ್ಖವೋ;

ಛಾತಜ್ಝತ್ತಂ ಫನ್ದಮಾನಂ, ದಿಸ್ವಾನ ಸುನಖಂ ತದಾ.

೧೨.

ಭತ್ತಪೀಣ್ಡೇನ ¶ ಸಙ್ಗಣ್ಹಿಂ, ತಮ್ಪಿ ದಾನಂ ಫಲಾವಹಂ;

ತತೋ ಪಟ್ಠಾಯ ನಾಹೋಸಿ, ಅನ್ನಪಾನೇನ ಊನತಾ.

೧೩.

ಸುಲಭನ್ನಪಾನೋ ಸುಖಿತೋ, ಅಹೋಸಿಂಜಾತಿಜಾತಿಯಂ;

ಅಜ್ಜಾಪಿ ಯದಿ ಇಚ್ಛಾಮಿ, ಭೋಜನೇನ ಪಯೋಜನಂ.

೧೪.

ಚಕ್ಖುಪಥೇ ಸಮನ್ತಾ ಮೇ, ಜಾಯನ್ತುಕ್ಖಲಿಯೋ ಬಹೂ;

ಅಥಾಪರಮ್ಪಿ ಕುಸಲಂ, ಅಕಾಸಿಂತಂ ಸಣಾಥ ಮೇ.

೧೫.

ಇಣಟ್ಠಕಸ್ಸ ಪೋಸಸ್ಸ, ಅದಾಸೇಕಂ ಕಹಾಪಣಂ;

ತೇನ ಮೇ ಪುಞ್ಞಕಮ್ಮೇನ, ಅನೋಮಭವಸಮ್ಪದಂ.

೧೬.

ಪಚುರಂ ಜಾತರೂಪಞ್ಚ, ಲಭಾಮಿ ಜಾತಿಜಾತಿಯಂ;

ಸಚಜ್ಜ ಧನಕಾಮೋಹಂ, ಘನಸೇಲೋಪಿ ಪಬ್ಬತೋ;

ಹೋತಿ ಹೇಮಮಯಂ ಸಬ್ಬಂ, ಇಣತೋ ಮೋಚನೇ ಫಲಂ.

೧೭.

ಅಞ್ಞಮ್ಪಿ ಮಮ ಪುಞ್ಞಂ ಭೋ, ಸುಣಾಥ ಸುತಿಸೋಭನಂ;

ಕಸ್ಸಪಸ್ಸ ಭಗವತೋ, ಸಾಸನೇಕಂ ಬಹುಸ್ಸುತಂ.

೧೮.

ದೇಸೇನ್ತಂ ಮುನಿನೋ ಧಮ್ಮಂ, ಸುತ್ವಾ ಪೀಣಿತಮಾನಸೋ;

ಪೂಜೇಸಿಂಸಾಟಕಂ ಮಯ್ಹಂ, ಧಮ್ಮಸ್ಸ ಧಮ್ಮಸಾಮಿನೋ.

೧೯.

ತೇನಾಹಂ ಪುಞ್ಞಕಮ್ಮೇನ, ಸಂಸರಂ ದೇವಮಾನುಸೇ;

ಲಭಾಮಿ ಪಚುರಂ ವತ್ಥಂ, ಯಂ ಲೋಕಸ್ಮಿಂ ವರಂ ಪರಂ.

೨೦.

ಇಚ್ಛಮಾನೋ ಸಚೇ ಅಜ್ಜ [ಜಾನಮಾನೋಪಹಂಅಜ್ಜ; ಜಾನಧಾನೋಚಹಂಅಜ್ಜ ಇತಿಕತ್ಥಚಿ], ಹಿಮವನ್ತಮ್ಪಿ ಪಬ್ಬತಂ;

ನಾನಾವಿರಾಗವತ್ಥೇಹಿ, ಛಾದಯಿಸ್ಸಂ ಸಮನ್ತತೋ.

೨೧.

ಸಚೇ ಇಚ್ಛಾಮಿ ಅಜ್ಜೇವ, ವತ್ಥೇನಚ್ಛಾದಯಾ ಮಿತೇ;

ಜನ್ತವೋ ಚತುದೀಪಸ್ಮಿಂ, ವತ್ಥದಾನಸ್ಸಿದಂ ಫಲಂ.

೨೨.

ಏತೇಸಂ ಪುಞ್ಞಕಮ್ಮಾನಂ, ವಾಹಸಾ ಕಾಮಭೂಮಿಯಂ;

ಸಮ್ಪತ್ತಿ ಮನುಭುತ್ವಾನ, ಸಾವತ್ಥಿಪುರ ಮುತ್ತಮೇ.

೨೩.

ಜಾತೋ ಕುಲೇ ಮಹಾಭೋಗೇ,

ವುದ್ಧಿಪ್ಪತ್ತೋ ಸುಖೇಧಿತೋ;

ತಸ್ಸ ಧಮ್ಮಂ ಸುಣಿತ್ವಾನ,

ಪಬ್ಬಜಿತ್ವಾನ ಸಾಸನೇ.

೨೪.

ಲೋಕುತ್ತರಂ ಅಗ್ಗರಸಂ, ಭುಞ್ಚನ್ತೋ ಮುನಿವಾಹಸಾ;

ಕಿಲೇಸೇ ಪಜಹಿತ್ವಾನ, ಅರಹತ್ತಮಪಾಪುಣಿಂ.

೨೫.

ಕುಸಲಂ ನಾ ವಮನ್ತಬ್ಬಂ, ಖುದ್ದಕನ್ತಿ ಕದಾಚಿಪಿ;

ಅನನ್ತಫಲದಂ ಹೋತಿ, ನಿಬ್ಬಾಣಮ್ಪಿ ದದಾತಿ ತಂ.

ಅಥಸ್ಸ ಧಮ್ಮದೇಸನಂ ಸುತ್ವಾ ಭಿಕ್ಖೂ ಚ ಮಹಾಜನೋ ಚ ದಾನಾದಿಕುಸಲಕಮ್ಮಂ ಕತ್ವಾ ಯೇಭುಯ್ಯೇನ ಸಗ್ಗಪರಾಯಣಾ ಅಹೇಸುಂತಿ.

೨೬.

ಮನೋಪಸಾದೇನಪಿ ಅಪ್ಪಪುಞ್ಞಂ,

ಏವಂ ಮಹನ್ತಂ ಭವತೀತಿ ಞತ್ವಾ;

ಮಾ ಅಪ್ಪಪುಞ್ಞನ್ತಿ ಪಮಜ್ಜಥಮ್ಭೋ;

ಸರಾಥ ದೇವಿಂ ಇಧ ಲಾಜದಾಯಿಂ.

ಸದ್ಧೋಪಾಸಕಸ್ಸ ವತ್ಥುಂ ಸತ್ತಮಂ.

೨೮. ಕಪಣಸ್ಸ ವತ್ಥುಮ್ಹಿ ಅಯಮಾನುಪುಬ್ಬೀಕಥಾ

ಅಮ್ಹಾಕಂ ಭಗವತಿ ಪರಿನಿಬ್ಬುತೇ ಬಾರಾಣಸೀನಗರವಾಸೀ ಏಕೋ ದುಗ್ಗತಪುರಿಸೋ ಪರಗೇಹೇ ಭತಿಂಕತ್ವಾ ಜೀವಿಕಂ ಕಪ್ಪೇತಿ, ತಸ್ಮಿಂ ಸಮಯೇ ನಗರವಾಸಿನೋ ಯೇಭುಯ್ಯೇನ ತಸ್ಮಿಂ ತಸ್ಮಿಂ ಠಾನೇ ಮಣ್ಡಪಾದಯೋ ಕಾರಾಪೇತ್ವಾ ಮಹಾದಾನಂ ದೇನ್ತಿ, ತಂ ದಿಸ್ವಾ ದುಗ್ಗತೋ ಏವಂ ಚಿನ್ತೇಸಿ, ಅಹಂ ಪುಬ್ಬೇ ಅಕತಪುಞ್ಞತ್ತಾ ಪರಗೇಹೇ ಭತಿಂ ಕತ್ವಾ ಕಿಚ್ಛೇನ ಕಸಿರೇನ ಜೀವಾಮಿ. ನಿವಾಸನಪಾರುಪನಮ್ಪಿ ವಾಸಟ್ಠಾನಮತ್ತಮ್ಮಿ ದುಕ್ಖತೋ ಲಭಾಮಿ. ಇದಾನಿ ಬುದ್ಧುಪ್ಪಾದೋ ವತ್ತತಿ ಭಿಕ್ಖುಸಙ್ಘೋಪಿ.

ಸಬ್ಬೇ ¶ ಇಮೇ ದಾನಂ ದತ್ವಾ ಸಗ್ಗಮಗ್ಗಂ ಸೋಧೇನ್ತಿ. ಮಯಾಪಿ ದಾನಂ ದಾತುಂ ವಟ್ಟತಿ. ತಮ್ಮೇ ದೀಘರತ್ತಂ ಹಿತಾಯ ಸುಖಾಯ ಭವಿಸ್ಸತಿ. ಅಪಿ ಚ ಮಯ್ಹಂ ತಣ್ಡುಲನಾಲಿಮತ್ತಮ್ಪಿ ನತ್ಥಿ, ಅಕತವೀರಿಯೇನ ತಂ ಮತ್ಥಕಂ ಪಾಪೇತುಂ ನ ಸಕ್ಕಾ, ಏತದತ್ಥಾಯಾಹಂ ಉಯ್ಯೋಗಂ ಕತ್ವಾ ದಾನಂ ದಸ್ಸಾಮೀತಿ ಚಿನ್ತೇತ್ವಾ ತತೋ ಪಟ್ಠಾಯ ಭತಿಂ ಪರಿಯೇಸಮಾನೋ ಗನ್ತ್ವಾ ತತ್ಥ ತತ್ಥ ಭತಿಂ ಕತ್ವಾ ಲದ್ಧನಿವಾಪೇ ಚ ಭಿಕ್ಖಾಚರಿಯಾಯ ಲದ್ಧತಿಲತಣ್ಡುಲಾದಯೋ ಚ ಏಕತ್ಥ ಸಂಹರಿತ್ವಾ ಮನುಸ್ಸೇ ಸಮಾದಾಪೇತ್ವಾ ತಸ್ಮಿಂ ಮಣ್ಡಪಂ ಕಾರಾಪೇತ್ವಾ ವನಕುಸಮಾದೀಹಿ ತಂ ಅಲಙ್ಕರಿತ್ವಾ ಭಿಕ್ಖೂ ನಿಮನ್ತೇತ್ವಾ ಮಣ್ಡಪೇ ನಿಸೀದಾಪೇತ್ವಾ ಸಬ್ಬೇಸಂ ಪಾಯಸಂ [ಪಾಯಾಸಂ ಇತಿಸಬ್ಬತ್ಥ] ಪಟಿಯಾದೇತ್ವಾ ಭೋಜೇಸಿ. ಅಥ ಸೋ ಮರಣಕಾಲೇ ಅತ್ತನಾ ಕತಂ ತಂ ದಾನವರಂ ಅನುಸ್ಸರಿ. ಸೋ ತೇನ ಕುಸಲಕಮ್ಮೇನ ಸುತ್ತಪ್ಪಬುದ್ಧೋ ವಿಯ ದೇವಲೋಕೇ ನಿಬ್ಬತ್ತಿ. ತಸ್ಮಿಂ ತೇನ ಕತಪುಞ್ಞಾನುರೂಪಂ ಮಹನ್ತಂ ಕನಕವಿಮಾನಂ ನಿಬ್ಬತ್ತಿ. ಸಮನ್ತಾ ತಿಗಾವುತಟ್ಠಾನೇ ದೇವತಾ ನಾನಾ ವಿಧಾನಿ ತುರಿಯಾನಿ ಗಹೇತ್ವಾ ಉಪಹಾರಂ ಕರೋನ್ತಿ. ನಿಚ್ಚಂ ದೇವಚ್ಛರಾಸಹಸ್ಸಾನಿ [ದೇವಚ್ಛರಾಸಹಸ್ಸಂ ಇತಿಸಬ್ಬತ್ಥ] ತಂ ಪರಿವಾರೇತ್ವಾ ತಿಟ್ಠನ್ತಿ. ಏವಂ ಸೋ ಮಹನ್ತಂ ಸಮ್ಪತ್ತಿಂ ಅನುಭವತಿ. ಅಥೇಕದಿವಸಂ ಸುವಣ್ಣಸೇಲವಿಹಾರವಾಸೀ ಮಹಾಸಙ್ಘರಕ್ಖಿತತ್ಥೇರೋ ಪತ್ತಪಟಿಸಮ್ಭಿದೋ ದೇವಚಾರಿಕಂ ಚರಮಾನೋ ತಂ ದೇವಪುತ್ತಂ ಅನುಪಮಾಯ ದೇವಸಮ್ಪತ್ತಿಯಾ ವಿರೋಚಮಾನಂ ದಿಸ್ವಾ ಉಪಸಙ್ಕಮ್ಮ ಠಿತೋ ತೇನ ಕತಕಮ್ಮಂ ಪುಚ್ಛಿ. ಸೋಪಿಸ್ಸ ಯಥಾಭೂತಂ ಬ್ಯಾಕಾಸಿ, ತೇನತ್ಥ.

೧.

ಸಬ್ಬಸೋವಣ್ಣಯೋ ಆಸಿ, ಪಾಸಾದೋ ರತನಾಮಯೋ;

ಸೋಣ್ಣಸಿಙ್ಗಸತಾಕಿಣ್ಣೋ, ದುದ್ದಿಕ್ಖೋ ಚ ಪಭಸ್ಸರೋ.

೨.

ಕೂಟಾಗಾರ ಸತಾಕಿಣ್ಣೋ, ಸೋಣ್ಣಮಾಲಾಸಮಾಕುಲೋ;

ಮುತ್ತಾಕಲಾಪಾಲಮ್ಬನ್ತಿ, ತತ್ಥ ತತ್ಥ ಮನೋರಮಾ.

೩.

ನೇಕಗಬ್ಭಸತಾಕಿಣ್ಣೋ, ಸಯನಾಸನಮಣ್ಡಿತೋ;

ವಿಭತ್ತೋ ಭಬ್ಬಭಾಗೇಹಿ, ಪುಞ್ಞವಡ್ಢಕಿನಾ ಕತೋ.

೪.

ನಚ್ಚನ್ತಿ ¶ ಪಮದಾ ತತ್ಥ, ಭೇರಿಮಣ್ಡಲಮಜ್ಝಗಾ;

ಗಾಯನ್ತಿ ಕಾಚಿ ಕೀಳನ್ತಿ, ವಾದೇನ್ತಿ ಕಾಚಿ ತನ್ತಿಯೋ.

೫.

ತತೋ ತಿಗಾವುತೇ ಠಾನೇ, ಪಾಸಾದಸ್ಸ ಸಮನ್ತತೋ;

ಸಹಚ್ಛರಾ ದೇವಪುತ್ತಾ, ಗಹೇತ್ವಾ ಆತತಾದಯೋ.

೬.

ಮೋದನ್ತಿ ಪರಿವಾರೇತ್ವಾ, ನಚ್ಚಗೀತಾದಿನಾ ಸದಾ;

ಉಲ್ಲಙ್ಘನ್ತಿಚ ಸೇಲೇನ್ತಿ, ಸಿಲಾಘನ್ತಿ ಸಮನ್ತತೋ.

೭.

ಏವಂ ಮಹಿದ್ಧಿಕೋ ದಾನಿ, ತುವಂ ವನ್ದೋವ ಭಾಸತಿ;

ಪುಚ್ಛಾಮಿ ತಂ ದೇವಪುತ್ತ, ಕಿಂ ಕಮ್ಮಮಕರೀ ಪುರಾ.

ದೇವಪುತ್ತೋ ಆಹ.

೮.

ಅಹೋಸಿಂ ದುಗ್ಗತೋ ಪುಬ್ಬೇ, ಬಾರಾಣಸೀಪುರುತ್ತಮೇ;

ದಾನಂ ದೇನ್ತಿ ನರಾ ತತ್ಥ, ನಿಮನ್ತೇತ್ವಾನ ಭಿಕ್ಖವೋ.

೯.

ಜೀವನ್ತೋ ಭತಿಯಾ ಸೋಹಂ, ದಾನಂ ದೇನ್ತೇ ಮಹಾಜನೇ;

ತುಟ್ಠಹಟ್ಠೇ ಪಮುದಿತೇ, ಏವಂ ಚಿನ್ತೇಸಹಂ ತದಾ.

೧೦.

ಸಮ್ಪನ್ನವತ್ಥಾಲಙ್ಕಾರಾ, ದಾನಂ ದೇನ್ತಿ ಇಮೇ ಜನಾ;

ಪರತ್ಥಪಿ ಪಹಟ್ಠಾವ, ಸಮ್ಪತ್ತಿಮನುಭೋನ್ತಿ ತೇ.

೧೧.

ಬುದ್ಧುಪ್ಪಾದೋ ಅಯಂ ದಾನಿ, ಧಮ್ಮೋ ಲೋಕೇ ಪವತ್ತತಿ;

ಸುಸೀಲಾ ದಾನಿ ವತ್ತನ್ತಿ, ದಕ್ಖಿಣೇಯ್ಯಾ ಜಿನೋರಸಾ.

೧೨.

ಅನಾವಟ್ಠಿತೋ [ಅವಟ್ಠಿತೋಚ; ಅನ್ಧಟ್ಠಿತೋಚ ಇತಿಪಿಕತ್ತಚಿ] ಸಂಸಾರೋ, ಅಪಾಯಾ ಖಲು ಪೂರಿತಾ;

ಕಲ್ಯಾಣವಿಮುಖಾ ಸತ್ತಾ, ಕಾಮಂ ಗಚ್ಛನ್ತಿ ದುಗ್ಗತಿಂ.

೧೩.

ಇದಾನಿ ದುಕ್ಖಿತೋ ಹುತ್ವಾ, ಜೀವಾಮಿ ಕಸಿರೇನಹಂ;

ದಲಿದ್ದೋ ಕಪಣೋ ದೀನೋ, ಅಪ್ಪಭೋಗೋ ಅನಾಲಯೋ.

೧೪.

ಇದಾನಿ ಬೀಜಂ ರೋಪೇಮಿ, ಸುಖೇತ್ತೇ ಸಾಧುಸಮ್ಮತೇ;

ಅಪ್ಪೇವನಾಮ ತೇನಾಹಂ, ಪರತ್ಥ ಸುಖಿತೋ ಸಿಯಾ.

೧೫.

ಇತಿ ಚಿನ್ತಿಯ ಭಿಕ್ಖಿತ್ವಾ, ಭತಿಂ ಕತ್ವಾನ ನೇಕಧಾ;

ಮಣ್ಡಪಂ ತತ್ಥ ಕಾರೇತ್ವಾ, ನಿಮನ್ತೇತ್ವಾನ ಭಿಕ್ಖವೋ.

೧೬.

ಆಯಾಸೇನ ¶ ಅದಾಸಾಹಂ, ಪಾಯಸಂ ಅಮತಾಯ ಸೋ;

ತೇನ ಕಮ್ಮವಿಪಾಕೇನ, ದೇವಲೋಕೇ ಮನೋರಮೇ.

೧೭.

ಜಾತೋಮ್ಹಿ ದಿಬ್ಬಕಾಮೇಹಿ, ಮೋದಮಾನೋ ಅನೇಕಧಾ;

ದೀಘಾಯುಕೋ ವಣ್ಣವನ್ತೋ, ತೇಜಸ್ಸೀಚ ಅಹೋಸಹನ್ತಿ.

ಏವಂ ದೇವಪುತ್ತೋ ಅತ್ತನಾ ಕತಪುಞ್ಞಕಮ್ಮಂ ವಿತ್ತಾರೇನ ಕಥೇಸಿ, ಥೇರೋಪಿ ಮನುಸ್ಸಲೋಕಂ ಆಗನ್ತ್ವಾ ಮನುಸ್ಸಾನಂ ಅತ್ತನಾ ಪಚ್ಚಕ್ಖತೋ ದಿಟ್ಠದಿಬ್ಬಸಮ್ಪತ್ತಿಂ ಪಕಾಸೇಸಿ. ತಂ ಸುತ್ವಾ ಮಹಾಜನೋ ಕುಸಲಕಮ್ಮಂ ಕತ್ವಾ ಯೇಭುಯ್ಯೇನ ಸಗ್ಗೇ ನಿಬ್ಬತ್ತೋತಿ.

೧೮.

ಅನಾಲಯೋ ದುಗ್ಗತದೀನಕೋಪಿ,

ದಾನಂ ದದನ್ತೋ ಧಿಗತೋ ವಿಸೇಸಂ;

ಸಗ್ಗಾ ಪವಗ್ಗಂ ಯದಿ ಪತ್ಥಯವ್ಹೋ,

ಹನ್ತ್ವಾನ ಮಚ್ಛೇರಮಲಂ ದದಾಥಾತಿ.

ಕಪಣಸ್ಸ ವತ್ಥುಂ ಅಟ್ಠಮಂ.

೨೯. ದೇವಪುತ್ತಸ್ಸ ವತ್ಥುಮ್ಹಿ ಅಯಮಾನುಪುಬ್ಬೀಕಥಾ

ಇತೋ ಪುಬ್ಬೇ ನಾರದಸ್ಸ ಕಿರ ಸಮ್ಮಾಸಮ್ಬುದ್ಧಸ್ಸ ಕಾಲೇ ಅಯಂ ದೀಪೋ ಅಞ್ಞತರೇನ ನಾಮೇನ ಪಾಕಟೋ ಅಹೋಸಿ, ಸೋ ಪನೇಕಸ್ಮಿಂ ಕಾಲೇ ದುಬ್ಭಿಕ್ಖೋ ಅಹೋಸಿ ದುಸ್ಸಸ್ಸೋ, ಮಹಾಛಾತಕಭಯಂ ಸತ್ತೇ ಪೀಳೇತಿ. ತಸ್ಮಿಂ ಸಮಯೇ ನಾರದಸ್ಸ ಭಗವತೋ ಏಕೋ ಸಾಸನಿಕೋ ಸಾವಕೋ ಅಞ್ಞತರಸ್ಮಿಂ ಗಾಮೇ ಪಿಣ್ಡಾಯ ಚರಿತ್ವಾ ಯಥಾ ಧೋತಪತ್ತೋವ ನಿಕ್ಖಮಿ. ಅಥಞ್ಞತರಸ್ಮಿಂ ಗೇಹೇ ಮನುಸ್ಸಾ ಏಕಂ ತಣ್ಡುಲನಾಳಿಂಪೋಟಲಿಕಾಯ ಬನ್ಧಿತ್ವಾ ಉದಕೇ ಪಕ್ಖಿಪಿತ್ವಾ ಪಚಿತ್ವಾ ಉದಕಂ ಗಹೇತ್ವಾ ಪಿವನ್ತೋ ಜೀವನ್ತಿ, ತದಾ ಥೇರಂ ದಿಸ್ವಾ ವನ್ದಿತ್ವಾ ಪತ್ತಂ ಗಹೇತ್ವಾ ತೇನ ತಣ್ಡುಲೇನ ಭತ್ತಂ ಪಚಿತ್ವಾ ಪತ್ತೇ ಪಕ್ಖಿಪಿತ್ವಾ ಥೇರಸ್ಸ ಅದಂಸು. ಅಥ ¶ ತೇಸಂ ಸದ್ಧಾಬಲೇನ ಸಾ ಉಕ್ಖಲಿ ಭತ್ತೇನ ಪರಿಪುಣ್ಣಾ ಅಹೋಸಿ, ತೇ ತಂ ಅಬ್ಭುತಂ ದಿಸ್ವಾ ಅಯ್ಯಸ್ಸ ದಿನ್ನದಾನೇ ವಿಪಾಕೋ ಅಜ್ಜೇವ ನೋ ದಿಟ್ಠೋತಿ ಸೋಮನಸ್ಸಜಾತಾ ಮಹಾಜನಂ ಸನ್ನಿಪಾತೇತ್ವಾ ತೇ ಭತ್ತಂ ಭೋಜೇತ್ವಾ ಪಚ್ಛಾ ಸಯಂ ಭುಞ್ಜಿಂಸು. ಭತ್ತಸ್ಸ ಗಹಿತಗಹಿತಟ್ಠಾನಂ ಪೂರತೇವ. ತತೋ ಪಟ್ಠಾಯ ತೇ ಸಮ್ಪತ್ತಮಹಾಜನಸ್ಸ ದಾನಂ ದದನ್ತಾ ಆಯುಪರಿಯೋಸಾನೇ ದೇವಲೋಕೇ ನಿಬ್ಬತ್ತಿಂಸು, ಅಥ ಸೋ ಥೇರೋ ಭತ್ತಂ ಆದಾಯ ಗನ್ತ್ವಾ ಅಞ್ಞತರಸ್ಮಿಂ ರುಕ್ಖಮೂಲೇ ನಿಸೀದಿತ್ವಾ ಭುಞ್ಜಿತುಮಾರತಿ. ತಸ್ಮಿಂ ಕಿರ ರುಕ್ಖೇ ನಿಬ್ಬತ್ತೋ ಏಕೋ ದೇವಪುತ್ತೋ ಆಹಾರೇನ ಕಿಲನ್ತೋ ಭುಞ್ಜಮಾನಂ ಥೇರಂ ದಿಸ್ವಾ ಅತ್ತಭಾವಂ ವಿಜಹಿತ್ವಾ ಮಹಲ್ಲಕವೇಸೇನ ತಸ್ಸ ಸಮೀಪೇ ಅಟ್ಠಾಸಿ. ಥೇರೋ ಅನಾವಜ್ಜಿತ್ವಾವ ಭುಞ್ಜತಿ. ದೇವಪುತ್ತೋ ಚರಿಮಾಲೋಪಂ ಠಪೇತ್ವಾ ಭುತ್ತಕಾಲೇ ಉಕ್ಕಾಸಿತ್ವಾ ಅತ್ತಾನಂ ಠಿತಭಾವಂ ಜಾನಾಪೇಸಿ. ಥೇರೋ ತಂ ದಿಸ್ವಾ ವಿಪ್ಪಟಿಸಾರಿ ಹುತ್ವಾ ಚರಿಮಂ ಭತ್ಥಪಿಣ್ಡಂ ತಸ್ಸ ಹತ್ಥೇ ಠಪೇಸಿ, ತತೋ ಸೋ ಭತ್ತಪಿಣ್ಡಂ ಗಹೇತ್ವಾ ಠಿತೋ ಚಿನ್ತೇಸಿ. ಇತೋ ಕಿರ ಮಯಾ ಪುಬ್ಬೇ ಸಮಣಬ್ರಾಹ್ಮಣಾನಂ ವಾ ಕಪಣದ್ಧಿಕಾನಂ ವಾ ಅನ್ತಮಸೋ ಕಾಕಸುನಖಾ ದೀನಮ್ಪಿ ಆಹಾರಂ ಅದಿನ್ನಪುಬ್ಬಂ ಭವಿಸ್ಸತಿ, ತೇನವಾಹಂ ದೇವೋ ಹುತ್ವಾಪಿ ಭತ್ತಂ ನ ಲಭಾಮಿ. ಹನ್ದಾಹಂ ಇಮಂ ಭತ್ತಪಿಣ್ಡಂ ಥೇರಸ್ಸೇವ ದಸ್ಸಾಮಿ, ತಂ ಮೇ ಭವಿಸ್ಸತಿ ದೀಘರತ್ತಂ ಹಿತಾಯ ಸುಖಾಯ ಚಾತಿ. ಏವಞ್ಚ ಪನ ಚಿನ್ತೇತ್ವಾ ಭತ್ತಪಿಣ್ಡೇ ಆಸಂ ಪಹಾಯ ಥೇರಂ ಉಪಸಙ್ಕಮ್ಮ ಸಾಮಿ ದಾಸಸ್ಸ ವೋ ಅಲಂ ಇಧ ಲೋಕೇನ ಸಙ್ಗಹಂ. ಪರಲೋಕೇನ ಮೇ ಸಙ್ಗಹಂ ಕರೋಥಾತಿ ವತ್ವಾ ತಸ್ಸ ಪತ್ತೇ ಓಕಿರಿ. ಅಥಸ್ಸ ಭತ್ಥಪಿಣ್ಡಂ [ಭತ್ಥಪಿಣ್ಡಂ ಇತಿಸಬ್ಬತ್ಥ] ಪತ್ತೇ ಪತಿತಮತ್ತೇಯೇವ ತಿಗಾವುತಟ್ಠಾನೇ ದಿಬ್ಬಮಯಾನಿ ಭತ್ತಭಾಜನಾನಿಪಞ್ಞಾಯಿಂಸು. ದೇವಪುತ್ತೋ ಥೇರಂ ಪಞ್ಚಪತಿಟ್ಠಿತೇನ ವನ್ದಿತ್ವಾ ತತೋ ದಿಬ್ಬಭೋಜನಂ ಗಹೇತ್ವಾ ಪಥಮಂ ದಾನಂ ದತ್ವಾ ಪಚ್ಛಾ ಸಯಂ ಭುಞ್ಚಿ. ತತೋ ದೇಪುತ್ತೋ ದುತಿಯದಿವಸತೋ ಪಟ್ಠಾಯ ಥೇರಸ್ಸ ಚ ಸಮ್ಪತ್ತಮಹಾಜನಸ್ಸ ಚ ಮಹಾದಾನಂ ದೇನ್ತೋ ಆಯುಪರಿಯೋಸಾನೇ ¶ ೦ ದೇವಲೋಕೇ ನಿಬ್ಬತ್ತಿತ್ವಾ ಛಸು ಕಾಮಸಗ್ಗೇಸು ಅಪರಾಪರಂ ದಿಬ್ಬಸಮ್ಪತ್ತಿ ಮನುಭವಮಾನೋ ಪದುಮುತ್ತರಸ್ಸ ಭಗವತೋ ಕಾಲೇ ತತೋ ಚುತೋ ಬಾರಾಣಸಿಯಂ ಅನೇಕವಿಭವಸ್ಸ ಮಿಚ್ಛಾದಿಟ್ಠಿಕಸ್ಸ ಕುಟುಮ್ಬಿಕಸ್ಸ ಗೇಹೇ ನಿಬ್ಬತ್ತಿ. ದೇವೋತಿಸ್ಸ ನಾಮಂ ಅಕಂಸು. ಅಪರಭಾಗೇ ವಿಞ್ಞುತಂ ಪತ್ತಸ್ಸ ತಸ್ಸ ಮಾತಾಪಿತರೋ ಕಾಲಮಕಂಸು. ಸೋವಣ್ಣಮಣಿಮುತ್ತಾದಿಪೂರಿತಕೋಟ್ಠಾಗಾರಾದಯೋ ಓಲೋಕೇತ್ವಾ ಮಮ ಮಾತಾಪಿತರೋ ಮಿಚ್ಛಾದಿಟ್ಠಿಕತ್ತಾ ಇತೋ ದಾನಾದಿಕಿಞ್ಚಿಕಮ್ಮಂ ಅಕರಿತ್ವಾ ಪರಲೋಕಂ ಗಚ್ಛನ್ತಾ ಕಾಕಣಿಕಮತ್ತಮ್ಪಿ ಅಗಹೇತ್ವಾ ಗತಾ, ಅಹಂ ಪನ ತಂ ಗಹೇತ್ವಾವ ಗಮಿಸ್ಸಾಮೀತಿ ಸನ್ನಿಟ್ಠಾನಂ ಕತ್ವಾ ಭೇರಿಂ ಚರಾಪೇತ್ವಾ ಕಪಣದ್ಧಿಕವನಿಬ್ಬಕೇ ಸನ್ನಿಪಾತೇತ್ವಾ ಸತ್ತಾಹಬ್ಭನ್ತರೇ ಸಬ್ಬಂ ಸಾಪತೇಯ್ಯಂ ದಾನಮುಖೇನ ದತ್ವಾ ಅರಞ್ಞಂ ಪವಿಸಿತ್ವಾ ಇಸಿಪ್ಪಬ್ಬಜ್ಜಂ ಪಬ್ಬಜಿತ್ವಾ ಕಸಿಣಪರಿಕಮ್ಮಂ ಕತ್ವಾ ಪಞ್ಚ ಭಿಞ್ಞಾ ಅಟ್ಠ ಸಮಾಪತ್ತಿಯೋ ನಿಬ್ಬತ್ತೇತ್ವಾ ಆಕಾಸಚಾರೀ ಅಹೋಸಿ. ಅಥ ತಸ್ಮಿಂಸಮಯೇ ಪದುಮುತ್ತರೋ ನಾಮ ಭಗವಾ ಹಂಸವತೀನಗರೇ ಪಟಿವಸನ್ತೋ ದೇವಬ್ರಹ್ಮಾದಿಪರಿವುತೋ ಚತುಸಚ್ಚಪಟಿಸಂಯುತ್ತಂ ಧಮ್ಮಂ ದೇಸೇನ್ತೋ ನಿಸಿನ್ನೋ ಹೋತಿ, ತದಾ ಸೋ ತಾಪಸೋ ಆಕಾಸೇನ ಗಚ್ಛನ್ತೋ ಮಹಾಜನಸಮಾಗಮಞ್ಚ ಭಗವತೋ ಸರೀರತೋ ನಿಕ್ಖನ್ತಛಬ್ಬಣ್ಣರಂಸಿಯೋ ಚ ದಿಸ್ವಾ ಕಿಮೇತಂತಿ ವಿಮ್ಹಿತೋ ಆಕಾಸಾ ಓತರಿತ್ವಾ ಮಹತಿಯಾ ಬುದ್ಧಲೀಳಾಯ ನಿಸೀದಿತ್ವಾ ಧಮ್ಮಂ ದೇಸೇನ್ತಂ ಭಗವನ್ತಂ ದಿಸ್ವಾ ಪಸನ್ನಮಾನಸೋ ಪರಿಸನ್ತರೇ ನಿಸಿನ್ನೋ ಧಮ್ಮಂ ಸುತ್ವಾ ಭಗವನ್ತಂ ವನ್ದಿತ್ವಾ ಅತ್ತನೋ ಅಸ್ಸಮಮೇವ ಅಗಮಾಸಿ. ಅಥ ಸೋ ತತ್ಥ ಯಾವತಾಯುಕಂ ಠತ್ವಾ ಆಯುಪರಿಯೋಸಾನೇ ತಾವತಿಂಸಭವನೇ ನಿಬ್ಬತ್ತೋ ತಿಂಸಕಪ್ಪೇ ದಿಬ್ಬಸಮ್ಪತ್ತಿಮನುಭವನ್ತೋ ಛಸು ಕಾಮಸಗ್ಗೇಸು ಅಪರಾಪರಿಯವಸೇನ ಸಂಸರಿ. ಏಕಪಞ್ಞಾಸಅತ್ತಭಾವೇ ಸಕ್ಕೋ ದೇವರಾಜಾ ಅಹೋಸಿ, ಏಕಕವೀಸತಿಅತ್ತಭಾವೇ ಚಕ್ಕವತ್ತಿ ಹುತ್ವಾ ಮನುಸ್ಸಸಮ್ಪತ್ತಿ ಮನುಭವಿತ್ವಾ ಇಮಸ್ಮಿಂಬುದ್ಧುಪ್ಪಾದೇ ಭಗವತಿ ಪರಿನಿಬ್ಬುತೇ ಸಾವತ್ಥಿಯಂ ಅಞ್ಞತರಸ್ಮಿಂ ಕುಲಗೇಹೇ ನಿಬ್ಬತ್ತಿತ್ವಾ ಸತ್ತವಸ್ಸಿಕೋ ಏಕಂ ಭಿಕ್ಖುಂ ಧಮ್ಮಂ ದೇಸೇನ್ತಂ ಅದ್ದಸ. ದಿಸ್ವಾ ತಂ ಉಪಸಙ್ಕಮಿತ್ವಾ ಧಮ್ಮಂ ಸುತ್ವಾ ಅನಿಚ್ಚಸಞ್ಞಂ ¶ ಪಟಿಲಭಿತ್ವಾ ತತ್ಥ ನಿಸಿನ್ನೋವ ಅರಹತ್ತಂ ಪಾಪುಣಿ, ತತೋ ಸೋ ಪತ್ತಪಟಿಸಮ್ಭಿದೋ ಅತ್ತನಾ ಕತಪುಞ್ಞಕಮ್ಮಂ ಓಲೋಕೇನ್ತೋ ತಂ ಪುಬ್ಬಚರಿಯಂ ಭಿಕ್ಖೂನಂ ಮಜ್ಝೇ ಪಕಾಸೇನ್ತೋ ಆಹ. ತಸ್ಮಾ.

೧.

ನಾರದೋ ಕಿರ ಸಮ್ಬುದ್ಧೋ, ಪುಬ್ಬೇ ಆಸಿ ನರುತ್ತಮೋ;

ಲೋಕಂ ದುಕ್ಖಾ ಪಮೋಚೇನ್ತೋ, ದದನ್ತೋ ಅಮತಂ ಪದಂ.

೨.

ತಸ್ಮಿಂ ತು ಸಮಯೇ ತಸ್ಸ, ಸಾವಕೋ ಛಿನ್ನಬನ್ಧನೋ;

ಭಿಕ್ಖಿತ್ವಾ ದೀಪಕೇ ಲದ್ಧ, ಮಾಹಾರಂ ಪರಿಭುಞ್ಜಿತುಂ.

೩.

ರುಕ್ಖಮೂಲ ಮುಪಾ ಗಞ್ಛಿ, ತತ್ಥಾಸಿಂ ರುಕ್ಖದೇವತಾ;

ಬುಭುಕ್ಖಿತಾ ಉದಿಕ್ಖನ್ತೀ, ಅಟ್ಠಾಸಿಂ ತಸ್ಸ ಸನ್ತಿಕೇ.

೪.

ಅದಾಸಿ ಮೇ ಭತ್ತಪಿಣ್ಡಂ, ಕರುಣಾಪೂರಿತನ್ತರೋ;

ಗಹೇತ್ವಾನ ಠಿತೋ ಪಿಣ್ಡಂ, ಸಹಮಾನೋ ಖುದಂ ತದಾ.

೫.

ಅದಿನ್ನತ್ತಾ ಮಯಾ ಪುಬ್ಬೇ, ಕಿಞ್ಚಿ ದಾನಂ ಸುಪೇಸಲೇ;

ಜಿಘಚ್ಛಾಪೀಳಿತೋ ಹೋಮಿ, ಜಾತೋಪಿ ದೇವಯೋನಿಯಂ.

೬.

ಅಜ್ಜ ಖೇತ್ತಂ ಸುಲದ್ಧಂಮೇ, ದೇಯ್ಯಧಮ್ಮೋಪಿ ವಿಜ್ಜತಿ;

ಬೀಜಮೇತ್ಥ ಚ ರೋಪೇಮಿ, ಭವತೋ ಪರಿಮುತ್ತಿಯಾ.

೭.

ಇತಿ ಚಿನ್ತಿಯ ವನ್ದಿತ್ವಾ, ದಾಸಸ್ಸ ಸಾಮಿ ವೋ ಅಲಂ;

ಸಙ್ಗಹಂ ಇಧ ಲೋಕಸ್ಮಿಂ, ಕರೋಥ ಪಾರಲೋಕಿಕಂ.

೮.

ಇತಿ ವತ್ವಾ ಅದಾಸಾಹಂ, ಭುಞ್ಚಿ ಸೋಪಿ ದಯಾಪರೋ;

ತೇನಾಹಂ ಪುಞ್ಞಕಮ್ಮೇನ, ಸುಧನ್ನಮಲಭಿಂ ಖಣೇ.

೯.

ತತೋ ಚುತೋ ಛದೇವೇಸು, ವಿನ್ದನ್ತೋ ಮಹತಿಂಸಿರಿಂ;

ಚಿರಕಾಲಂ ವಸಿಂ ತತ್ಥ, ದೇವಿದ್ಧೀಹಿ ಸಮಙ್ಗಿತಾ.

೧೦.

ಸತಸಹಸ್ಸೇ ಇತೋ ಕಪ್ಪೇ, ಪದುಮುತ್ತರನಾಮಕೋ;

ಉಪ್ಪಜ್ಜಿ ಲೋಕನಾಯಕೋ, ಧಮ್ಮರಾಜಾ ತಥಾಗತೋ.

೧೧.

ಮಹಿದ್ಧಿಕೋ ¶ ತದಾ ಆಸಿಂ, ತಾಪಸೋ ಕಾನನೇ ವನೇ;

ಸಮ್ಪತ್ತಪಞ್ಚಾ ಭಿಞ್ಞಾಣೋ, ಆಕಾಸೇನ ಚರಾಮಹಂ.

೧೨.

ತದಾ ಕಾಸೇನ ಗಚ್ಛನ್ತೋ, ರಮ್ಮೇ ಹಂಸವತೀಪುರೇ;

ಬುದ್ಧರಂಸಿಪರಿಕ್ಖಿತ್ತಂ, ಕೇತುಮಾಲಾವಿಲಾಸಿತಂ.

೧೩.

ದೇವಸಙ್ಘಪರಿಬ್ಬೂಳ್ಹಂ, ದೇಸೇನ್ತಂ ಅದ್ದಸಂ ಜಿನಂ;

ಸೋ ತಂ ದಿಸ್ವಾನ ನಭಸಾ, ಠಿತೋಹಂ ಪರಿಸನ್ತರೇ.

೧೪.

ಧಮ್ಮಂ ಸುತ್ವಾ ಉದಗ್ಗೋಹಂ, ಕಾಲಂ ಕತ್ವಾನ ಸತ್ಥುನೋ;

ತತೋ ಚುತೋ ಪಪನ್ನೋಸ್ಮಿ, ತಾವತಿಂಸೇ ಮನೋರಮೇ.

೧೫.

ತಿಂಸಕಪ್ಪಸಹಸ್ಸಾನಿ, ಚರನ್ತೋ ದೇವಮಾನುಸೇ;

ದುಗ್ಗತಿಂ ನಾಭಿಜಾನಾಮಿ, ಲಭಾಮಿ ವಿಪುಲಂ ಸುಖಂ.

೧೬.

ಏಕಪಞ್ಞಾಸತಿಕ್ಖತ್ತುಂ, ದೇವರಜ್ಜಮಕಾರಯಿಂ;

ಅಥೇಕವೀಸತಿಕ್ಖತ್ತುಂ, ಚಕ್ಕವತ್ತೀ ಅಹೋಸಹಂ.

೧೭.

ಪದೇಸರಜ್ಜಂ ಕಾಸಾಹಂ, ಬಹುಕ್ಖತ್ತುಂ ತಹಿಂ ತಹಿಂ;

ಇಮಸ್ಮಿಂ ಭದ್ದಕೇ ಕಪ್ಪೇ, ನಿಬ್ಬುತೇತು [ನಿಬ್ಬುತೇಸು ಇತಿಸಬ್ಬತ್ಥ] ತಥಾಗತೇ.

೧೮.

ಚೋದಿತೋ ಪುಞ್ಞಕಮ್ಮೇನ, ಸಾವತ್ಥಿಪುರಮುತ್ತಮೇ;

ಉಪ್ಪಜ್ಜಿತ್ವಾ ಕುಲೇ ಸೇಟ್ಠೇ, ಜಾತಿಯಾ ಸತ್ತವಸ್ಸಿಕೋ.

೧೯.

ಸುತ್ವಾ ಧಮ್ಮಂ ಕಥೇನ್ತಸ್ಸ, ಭಿಕ್ಖುಸ್ಸಞ್ಞತರಸ್ಸಹಂ;

ಭವಸ್ಸನ್ತಂ ಕರಿತ್ವಾನ, ಅರಹತ್ತಮಪಾಪುಣಿಂ.

೨೦.

ಸುದಿನ್ನಂ ಮೇ ತದಾ ದಾನಂ, ಸುಸ್ಸುತಂ ಧಮ್ಮಮುತ್ತಮಂ;

ದುಕ್ಖಸ್ಸನ್ತಂ ಅಕಾಸಾಹಂ, ತಸ್ಸ ಕಮ್ಮಸ್ಸ ವಾಹಸಾತಿ.

ಏವಞ್ಚ ಪನ ವತ್ವಾ ಬಹೂ ಜನೇ ಕುಸಲಕಮ್ಮೇ ನಿಯೋಜೇಸೀತಿ.

೨೧.

ದಾನೇನಪೇವಂ ¶ ಚರಿಮಾಯ ಪಿಣ್ಡಿಯಾ,

ಸವಣಾಯ ಧಮ್ಮಸ್ಸ ಮುಹುತ್ತಕೇನ;

ಲಭನ್ತಿ ಸತ್ತಾ ತಿವಿಧಮ್ಪಿ ಸಮ್ಪದಂ,

ಫಲಂ ವದೇ ಕೋ ಬಹುದಾಯಕಸ್ಸ ಭೋ.

ದೇವಪುತ್ತಸ್ಸ ವತ್ಥುಂ ನವಮಂ.

೩೦. ಸೀವಲಿತ್ಥೇರಸ್ಸ ವತ್ಥುಮ್ಹಿ ಅಯಮಾನುಪುಬ್ಬೀಕಥಾ

ಇತೋ ಕಿರ ಕಪ್ಪಸತಸಹಸ್ಸಮತ್ಥಕೇ ಪದುಮುತ್ತರೋ ನಾಮ ಸತ್ಥಾ ಲೋಕೇ ಉದಪಾದಿ ಧಮ್ಮದೇಸನಾಯ ಸತ್ತೇ ಅಮತಮಹಾನಿಬ್ಬಾಣಂ ಪಾಪೇನ್ತೋ, ತಸ್ಮಿಂ ಸಮಯೇ ಭಗವಾ ಹಂಸಾವತಿಯಂ ಸರಾಜಿಕಾಯ ಪರಿಸಾಯ ಮಜ್ಝೇ ಏಕಂ ಭಿಕ್ಖುಂ ಲಾಭೀನಂ ಅಗ್ಗಟ್ಠಾನೇ ಠಪೇಸಿ. ತದಾ ರಾಜಾ ತಂ ದಿಸ್ವಾ ತಂ ಠಾನಂ ಕಾಮಯಮಾನೋ ಬುದ್ಧಪಮುಖಸ್ಸ ಸಙ್ಘಸ್ಸ ಮಹಾದಾನಂ ದತ್ವಾ ಭಗವತೋ ಪಾದಮೂಲೇ ಸಿರಸಾ ನಿಪಜ್ಜಿ, ತದಾಸ್ಸ ಭಗವಾ ಅನಾಗತೇ ಗೋತಮಸ್ಸ ಭಗವತೋ ಸಾಸನೇ ತಂ ಠಾನಂ ಲಭಿಸ್ಸಸೀತಿ ವತ್ವಾ ಬ್ಯಾಕಾಸಿ. ತಂ ಸುತ್ವಾ ಮುದಿತೋ ರಾಜಾ ಪುಞ್ಞಾನಿ ಕತ್ವಾ ದೇವಲೋಕೇ ನಿಬ್ಬತ್ತಿ. ತತೋ ಅಪರಭಾಗೇ ಬಾರಾಣಸಿಯಂ ಸೇಟ್ಠಿಪುತ್ತೋ ಹುತ್ವಾ ಪಚ್ಚೇಕಬುದ್ಧಸಹಸ್ಸಂ ಚತುಪಚ್ಚಯದಾನೇನ ಯಾವಜೀವಂ ಪಟಿಜಗ್ಗಿತ್ವಾ ದೇವಲೋಕೇ ನಿಬ್ಬತ್ತೋ ಮಹನ್ತಂ ಸಮ್ಪತ್ತಿ ಮನುಭವಿತ್ವಾ ತತೋ ಚುತೋ ವಿಪಸ್ಸಿಸ್ಸ ಭಗವತೋ ಕಾಲೇ ಬನ್ಧುಮತೀನಗರೇ ಅಞ್ಞತರಸ್ಮಿಂ ಕುಲಗೇಹೇ ನಿಬ್ಬತ್ತಿ. ಸೋ ತಸ್ಮಿಂ ಸಮಯೇ ಸೇನಗುತ್ತಟ್ಠಾನೇ ಠತ್ವಾ ರಞ್ಞೋ ಕಮ್ಮಂ ಕರೋತಿ, ತದಾ ನಗರವಾಸಿನೋ ಉಪಾಸಕಗಣಾ ವಿಪಸ್ಸೀಸಮ್ಮಾಸಮ್ಬುದ್ಧಂ ಉಪಸಙ್ಕಮ್ಮ ವನ್ದಿತ್ವಾ ಭಗವಾ ಭನ್ತೇ ಸಸಾವಕೋ ಅಮ್ಹಾಕಂ ಅನುಗ್ಗಹಂ ಕರೋತೂತಿ ಸ್ವಾತನಾಯ ನಿಮನ್ತೇತ್ವಾ ಮಹಾದಾನಂ ದತ್ವಾ ಸಬ್ಬೇ ಏಕಚ್ಛನ್ದಾ ಭಗವನ್ತ ಮುದ್ದಿಸ್ಸ ಮಹಾರಹಂ ಮಹಾಪರಿವೇಣಂ ಕಾರಾಪೇತ್ವಾ ಪರಿವೇಣಮಹೇ ಮಹಾದಾನಂ ದದನ್ತಾ ದಾನಗ್ಗೇ ಅಸುಕಂ ನಾಮ ¶ ನತ್ಥೀತಿ ನ ವತ್ತಬ್ಬನ್ತಿ ವತ್ವಾ ದಾನಂ ಪಟಿಯಾದೇತ್ವಾ ದಾನಗ್ಗಂ ಓಲೋಕೇನ್ತಾ ನವದಧಿಞ್ಚ ಪಟಲಮಧುಞ್ಚ ಅಪಸ್ಸನ್ತಾ ಪುರಿಸೇ ಪಕ್ಕೋಸಿತ್ವಾ ಸಹಸ್ಸಂ ದತ್ವಾ ದಧಿಮಧುಂ ಖಿಪ್ಪಂ ಪರಿಯೇಸಿತ್ವಾ ಆನೇಥಾತಿ ಪೇಸೇಸುಂ, ತೇ ಸಹಸ್ಸಂ ಗಹೇತ್ವಾ ದಧಿಮಧುಂ ಉಪಧಾರೇತುಂ ತತ್ಥ ತತ್ಥ ವಿಚರನ್ತಾ ದ್ವಾರನ್ತರೇ ಅಟ್ಠಂಸು, ತದಾ ಅಯಂ ಸೇನಗುತ್ತೋ ರಞ್ಞೋ ಸಭತ್ತಂ ದಧಿಮಧುಂ ಆದಾಯ ಗಚ್ಛನ್ತೋ ಮಹಾದ್ವಾರಂ ಸಮ್ಪಾಪುಣಿ, ಅಥ ತೇ ದಧಿಮಧುಂ ದಿಸ್ವಾ ಭೋ ಕಹಾಪಣಂ ಗಹೇತ್ವಾ ಇಮಂ ದೇಹೀತಿ ಯಾಚಿಂಸು. ತೇನ [ತೇನದಸ್ಸಾಮಿ ಇತಿಪಿಕತ್ತಚಿ] ನ ದಸ್ಸಾಮೀತಿ ವುತ್ತೇ ಯಾವಸಹಸ್ಸಂ ವಡ್ಢೇತ್ವಾ ಯಾಚಿಂಸು. ತತೋ ಸೇನಗುತ್ತೋ ಇಮಂ ಅಪ್ಪಗ್ಘಂ ಸಹಸ್ಸೇನ ಯಾಚಥ, ಕಿ ಮನೇನ ಕರೋಥಾತಿ ಪುಚ್ಛಿ, ತೇಹಿ ಸಮ್ಬುದ್ಧತ್ಥಾಯಾತಿ ವುತ್ತೇ ತೇನಹಿ ಅಹಮೇವ ದಸ್ಸಾಮೀತಿ ಜೀರಮರಿಚಾದೀಹಿ ಸಕ್ಖರಮಧುಫಾಣಿತಾದಯೋ ಯೋಜೇತ್ವಾ ದಾನಗ್ಗಂ ಉಪನಾಮೇಸಿ. ತಂ ಸತ್ಥು ಆನುಭಾವೇನ ಬುದ್ಧಪಮುಖಸ್ಸ ಅಟ್ಠಸಟ್ಠಿಭಿಕ್ಖುಸತಸಹಸ್ಸಸ್ಸ ಪಹೋಣಕಂ ಅಹೋಸಿ. ತತೋ ಸೋ ತೇನ ಪುಞ್ಞಕಮ್ಮೇನ ದೇವಮನುಸ್ಸಲೋಕೇಸು ಸಮ್ಪತ್ತಿ ಮನುಭವಿತ್ವಾ ಅಪರಭಾಗೇ ಅಮ್ಹಾಕಂ ಭಗವತೋ ಕಾಲೇ ಕೋಲಿಯನಗರೇ ಮಹಾಲಿಲಿಚ್ಛವಿರಞ್ಞೋ ಉಪನಿಸ್ಸಾಯ ಸುಪ್ಪಿಯಾಯ ನಾಮ ಅಗ್ಗಮಹೇಸಿಯಾ ಕುಚ್ಛಿಸ್ಮಿಂ ಪಟಿಸನ್ಧಿಂ ಗಣ್ಹಿ. ಸೋ ಸತ್ತಮಾಸಸತ್ತಸಂವಚ್ಛರಾನಿ ಮಾತುಕುಚ್ಛಿಯಂ ವಸಿತ್ವಾ ಸತ್ತದಿವಸಾನಿ ಮೂಳ್ಹಗಬ್ಭೋ ದುಕ್ಖಮನುಭವಿ. ಮಾತುಕುಚ್ಛಿತೋ ನಿಕ್ಖಮನ್ತಸ್ಸ ತಸ್ಸ ಮಾತಾಪಿತರೋ ಸೀವಲೀತಿ ನಾಮ ಮಕಂಸು. ಏವಂ ಮಹಾಪುಞ್ಞಸ್ಸ ಏತ್ತಕಂ ಕಾಲಂ ಮಾತುಕುಚ್ಛಿಮ್ಹಿ ದುಕ್ಖಾನುಭವನಂ ಅತ್ತನಾವ ಕತೇನ ಪಾಪಬಲೇನ ಅಹೋಸಿ, ಸೋ ಕಿರ ಅತೀತೇ ರಾಜಾ ಹುತ್ವಾ ಅತ್ತನೋ ಸಪತ್ತರಞ್ಞಾ ಸದ್ಧಿಂ ಸಙ್ಗಾಮೇನ್ತೋ ಮಾತರಾ ಸದ್ಧಿಂ ಮನ್ತೇಸಿ. ಸಾ ನಗರಂ ರುನ್ಧಿತ್ವಾ ಅಮಿತ್ತೇ ಗಣ್ಹಿತುಂ ಸಕ್ಕಾತಿ ಉಪಾಯ ಮದಾಸಿ, ಸೋಪಿ ತಸ್ಸಾ ವಚನೇನ ನಗರಂ ರುನ್ಧಿತ್ವಾ ಸತ್ತಮೇ ದಿವಸೇ ಅಗ್ಗಹೇಸಿ, ತೇನ ಪಾಪಕಮ್ಮಬಲೇನ ಮಾತಾಪುತ್ತಾನಂ ಏವಂ ಮಹನ್ತಂ ದುಕ್ಖಂ ಅಹೋಸೀತಿ. ತತೋ ¶ ಸಾ ಪುತ್ತಂ ವಿಜಾಯನಕಾಲೇ ಸತ್ತಮೇ ದಿವಸೇ ಭಗವನ್ತಂ ಅನುಸ್ಸರಿತ್ವಾ ಸುಖೇನ ಭಾರಂ ಮುಞ್ಚಿ. ತುಟ್ಠಾ ಸಾ ಸತ್ತಮೇ ದಿವಸೇ ಬುದ್ಧಪಮುಖಸ್ಸ ಭಿಕ್ಖುಸಙ್ಘಸ್ಸ ಮಹಾದಾನಂ ಅದಾಸಿ, ಅಥಸ್ಸಾ ಪುತ್ತೋ ಸತ್ತವಸ್ಸಿಕಕಾಲೇ ಗೇಹಾ ನಿಕ್ಖಮ್ಮ ಸತ್ಥಾರಂ ದಿಸ್ವಾ ಪಬ್ಬಜ್ಜಂ ಯಾಚಿ. ಸತ್ಥಾ ಸಾರಿಪುತ್ತತ್ಥೇರಸ್ಸ ನಿಯೋಜೇಸಿ, ತತೋ ಸಾರಿಪುತ್ತತ್ಥೇರೇನ ಉಪಜ್ಝಾಯೇನ ಮೋಗ್ಗಲ್ಲಾನಮಾಚರಿಯಂ ಕತ್ವಾ ಪಬ್ಬಜಿ, ಅಥ ಸೋ ಖುರಗ್ಗೇಯೇವ ಅರಹತ್ತಂ ಪತ್ವಾ ಬುದ್ಧಸಾಸನಂ ಸೋಭೇಸಿ, ಸೋ ಪುಬ್ಬೇ ಕತಪುಞ್ಞಾನುಭಾವೇನ ಮಹಾಪುಞ್ಞೋ ಅಹೋಸಿ ಲಾಭೀನಞ್ಚ ಅಗ್ಗೋ. ಅಥೇಕಸ್ಮಿಂ ಸಮಯೇ ಭಗವಾ ರೇವತತ್ಥೇರಂ ದಸ್ಸನಾಯ ಖದಿರವನವಿಹಾರಂ ಗಚ್ಛನ್ತೋ ತಿಂಸಭಿಕ್ಖುಸಹಸ್ಸೇಹಿ ಸದ್ಧಿಂ ತಿಂಸಯೋಜನಿಕಂ ಛಟ್ಟಿತಕನ್ತಾರಂ ಸಮ್ಪಾಪುಣಿ ನಿರೂದಕಂ ಅಪ್ಪಭಕ್ಖಂ. ಯೇಭುಯ್ಯೇನ ದೇವತಾ ಸೀವಲಿತ್ಥೇರೇ ಪಸನ್ನಾ. ತಸ್ಮಾ ಭಗವಾ ಸೀವಲಿತ್ಥೇರಂ ಪುರತೋ ಚಾರಿಕಂ ಕತ್ವಾ ದೇವತಾಹಿ ಕಾರಾಪಿತೇ ವಿಹಾರೇ ವಸನ್ತೋ ದೇವತಾಹಿ ಸಜ್ಜಿತದಾನಂ ಪರಿಭುಞ್ಜನ್ತೋ ರೇವತತ್ಥೇರಂ ಸಂಪಾಪುಣಿತ್ವಾ ಗತಕಮ್ಮಂ ನಿಟ್ಠಾಪೇತ್ವಾ ಜೇತವನಮಾಗಮ್ಮ ಲಾಭೀನಂ ಅಗ್ಗಟ್ಠಾನೇ ತಂ ಠಪೇಸೀತಿ. ತೇನ ವುತ್ತಂ ಅಪದಾನೇ.

೧.

ಪದುಮುತ್ತರೋ ನಾಮ ಜಿನೋ, ಸಬ್ಬಧಮ್ಮೇಸು ಚಕ್ಖುಮಾ;

ಇತೋ ಸತಸಹಸ್ಸಮ್ಹಿ, ಕಪ್ಪೇ ಉಪ್ಪಜ್ಜಿ ನಾಯಕೋ.

೨.

ಸೀಲಂ ತಸ್ಸ ಅಸಙ್ಖ್ಯೇಯ್ಯಂ, ಸಮಾಧಿ ವಜಿರೂಪಮೋ [ವಜಿರೂಪಮಾ ಇತಿಕತ್ಥಚಿ];

ಅಸಂಖಿಯಂ ಞಾಣವರಂ, ವಿಮುತ್ತಿ ಚ ಅನೋಪಮಾ.

೩.

ಮನುಜಾಮರನಾಗಾನಂ, ಬ್ರಹ್ಮಾನಞ್ಚ ಸಮಾಗಮೇ;

ಸಮಣಬ್ರಾಹ್ಮಣಾಕಿಣ್ಣೇ, ಧಮ್ಮಂ ದೇಸೇತಿ ನಾಯಕೋ.

೪.

ಸಸಾವಕಂ ಮಹಾಲಾಭಿಂ, ಪುಞ್ಞವನ್ತಂ ಜುತಿನ್ಧರಂ,

ಠಪೇಸಿ ಏತದಗ್ಗಮ್ಹಿ, ಪರಿಸಾಸು ವಿಸಾರದೋ.

೫.

ತದಾಹಂ ¶ ಖತ್ತಿಯೋ ಆಸಿಂ, ಪುರೇ ಹಂಸವತೀವ್ಹಯೇ [ಹಂಸಾವತವ್ಹಯೇ ಇತಿಸಬ್ಬತ್ಥ];

ಸುತ್ವಾ ಜಿನಸ್ಸ ತಂ ವಾಕ್ಯಂ, ಸಾವಕಸ್ಸ ಗುಣಂ ಬಹುಂ.

೬.

ನಿಮನ್ತಯಿತ್ವಾ ಸತ್ತಾಹಂ, ಭೋಜಯಿತ್ವಾ ಸಸಾವಕಂ;

ಮಹಾದಾನಂ ದದಿತ್ವಾನ, ತಂ ಠಾನಮಭಿಪತ್ಥಯಿಂ.

೭.

ತದಾ ಮಂ ವಿನತಂ ಪಾದೇ, ದಿಸ್ವಾನ ಪುರಿಸಾಸಭೋ;

ಸೋ ಸರೇನ ಮಹಾವೀರೋ, ಇಮಂ ವಚನಮಬ್ರವೀ.

೮.

ತತೋ ಜಿನಸ್ಸ ವಚನಂ, ಸೋತುಕಾಮಾ ಮಹಾಜನಾ;

ದೇವದಾನವಗನ್ಧಬ್ಬಾ, ಬ್ರಹ್ಮಾನೋಚ ಮಹಿದ್ಧಿಕಾ.

೯.

ಸಮಣಬ್ರಾಹ್ಮಣಾ ಚಾಪಿ, ನಮಸ್ಸಿಸುಂ ಕತಞ್ಜಲೀ;

ನಮೋ ತೇ ಪುರಿಸಾಜಞ್ಞ, ನಮೋ ತೇ ಪುರಿಸುತ್ತಮ.

೧೦.

ಖತ್ತಿಯೇನ ಮಹಾದಾನಂ, ದಿನ್ನಂ ಸತ್ತಾಹಕಮ್ಪಿ [ಸತ್ತಾಹಕಂಪಿತೋ ಇತಿಪಿಕತ್ಥಚಿ] ನೋ;

ಸೋತುಕಾಮಾ ಫಲಂ ತಸ್ಸ, ಬ್ಯಾಕರೋಹಿ ಮಹಾಮುನೇ.

೧೧.

ತತೋ ಅವೋಚ ಭಗವಾ, ಸುಣೋಥ ಮಮ ಭಾಸಿತಂ;

ಅಪ್ಪಮೇಯ್ಯಮ್ಹಿ ಬುದ್ಧಸ್ಮಿಂ, ಗುಣಮ್ಹಿ ಸುಪ್ಪತಿಟ್ಠಿತಾ.

೧೨.

ದಕ್ಖಿಣಾ ದಾಯಕಂ ಪತ್ವಾ, ಅಪ್ಪಮೇಯ್ಯಫಲಾವಹಾ;

ಅಪಿ ಚೇ ಸ ಮಹಾಭೋಗೋ, ಠಾನಂ ಪತ್ಥೇತಿ ಮುತ್ತಮಂ.

೧೩.

ಲಾಭೀ ವಿಪುಲಲಾಭೀನಂ, ಯಥಾ ಭಿಕ್ಖು ಸುದಸ್ಸನೋ;

ತಥಾಹಂಪಿ ಭವೇಯ್ಯನ್ತಿ, ಲಚ್ಛತೇ ತಂ ಅನಾಗತೇ.

೧೪.

ಸತಸಹಸ್ಸಿತೋ ಕಪ್ಪೇ, ಓಕ್ಕಾಕಕುಲಸಮ್ಭವೋ;

ಗೋತಮೋನಾಮ ನಾಮೇನ, ಸತ್ಥಾ ಲೋಕೇ ಭವಿಸ್ಸತಿ.

೧೫.

ತಸ್ಸ ಧಮ್ಮೇಸು ದಾಯಾದೋ, ಓರಸೋ ಧಮ್ಮನಿಮ್ಮಿತೋ;

ಸೀವಲಿ ನಾಮ ನಾಮೇನ, ಹೇಸ್ಸತಿ ಸತ್ಥುಸಾವಕೋ.

೧೬.

ತೇನ ¶ ಕಮ್ಮೇನ ಸುಕತೇನ, ಚೇತನಾಪಣಿಧೀಹಿ ಚ;

ಜಹಿತ್ವಾ ಮಾನುಸಂ ದೇಹಂ, ತಾವತಿಂಸೂಪಗೋ ಅಹಂ.

೧೭.

ತತೋಪರಸ್ಮಿಂಸಮಯೇ, ಬಾರಾಣಸಿಪುರುತ್ತಮೇ;

ಸೇಟ್ಠಿಪುತ್ತೋ ಅಹಂ ಆಸಿಂ, ಅಡ್ಢಪ್ಪತ್ತೋ ಮಹಾಧನೋ.

೧೮.

ಸಹಸ್ಸಮತ್ತೇ ಪಚ್ಚೇಕ, ನಾಯಕೇ ಚ ನಿಮನ್ತಿಯ;

ಮಧುರೇನನ್ನಪಾನೇನ, ಸನ್ತಪ್ಪೇಸಿಂತದಾದರೋ.

೧೯.

ತತೋ ಚುತೋ ಛಕಾಮಗ್ಗೇ, ಅನುಭೋಸಿಂಮಹಾಯಸಂ;

ದೇವಚ್ಛರಾಪರಿವುತೋ, ಪಾಸಾದೇ ರತನಾಮಯೇ.

೨೦.

ಏವಂ ಅಚಿನ್ತಿಯಾ ಬುದ್ಧಾ, ಬುದ್ಧಧಮ್ಮಾ ಅಚಿನ್ತಿಯಾ;

ಅಚಿನ್ತಿಯೇ ಪಸನ್ನಾನಂ, ವಿಪಾಕೋಪಿ ಅಚಿನ್ತಿಯೋ.

೨೧.

ಏಕನವುತಿತೋ ಕಪ್ಪೇ, ವಿಪಸ್ಸೀನಾಮ ನಾಯಕೋ;

ಉಪ್ಪಜ್ಜಿ ಚಾರುನಯನೋ, ಸಬ್ಬಧಮ್ಮವಿಪಸ್ಸಕೋ.

೨೨.

ತದಾಹಂ ಬನ್ಧುಮತಿಯಾ, ಕುಲಸ್ಸಞ್ಞತರಸ್ಸ ಚ;

ದಯಿತೋ ಪತ್ಥಿತೋ ಪುತ್ತೋ, ಆಸಿಂ ಕಮ್ಮನ್ತಬ್ಯಾವಟೋ.

೨೩.

ತದಾ ಅಞ್ಞತರೋ ಪೂಗೋ, ವಿಪಸ್ಸಿಸ್ಸ ಮಹೇಸಿನೋ;

ಪರಿವೇಣಂ ಅಕಾರೇಸಿ, ಮಹನ್ತ ಮಿತಿ ವಿಸ್ಸುತಂ.

೨೪.

ನಿಟ್ಠಿತೇ ಚ ಮಹಾದಾನಂ, ದದಂ ಖಜ್ಜಕಸಂಯುತಂ;

ನವಂ ದಧಿ ಮಧುಞ್ಚೇವ, ವಿಚಿನಂ ನ ಚ ಮದ್ದಸ.

೨೫.

ತದಾಹಂ ತಂ ಗಹೇತ್ವಾನ, ನವಂ ದಧಿ ಮಧುಮ್ಪಿಚ,

ಕಮ್ಮಸಾಮಿಘರಂ ಗಚ್ಛಂ, ತಮೇನಂ [ತಮೇಸಂ ಇತಿಸಬ್ಬತ್ಥ] ದಾನ ಮದ್ದಸಂ.

೨೬.

ಸಹಸ್ಸಮ್ಪಿ ಚ ದತ್ವಾನ, ನ ಲತಿಂಸು ಚ ತಂ ದ್ವಯಂ;

ತತೋ ಏವಂ ವಿಚಿನ್ತೇಸಿಂ, ನೇತಂ ಹೇಸ್ಸತಿ ಓರಕಂ.

೨೭.

ಯಥಾ ¶ ಇಮೇ ಜನಾ ಸಬ್ಬೇ, ಸಕ್ಕರೋನ್ತಿ ತಥಾಗತಂ;

ಅಹಮ್ಪಿ ಕಾರಂ ಕಸ್ಸಾಮಿ, ಸಸಙ್ಘೇ ಲೋಕನಾಯಕೇ.

೨೮.

ತದಾಹಮೇವಂ ಚಿನ್ತೇತ್ವಾ, ದಧಿಂಮಧುಞ್ಚ ಏಕತೋ;

ಯೋಜೇತ್ವಾ ಲೋಕನಾಥಸ್ಸ, ಸಸಙ್ಘಸ್ಸ ಅದಾಸಹಂ.

೨೯.

ತೇನ ಕಮ್ಮೇನ ಸುಕತೇನ, ಚೇತನಾಪಣಿಧೀಹಿ ಚ;

ಜಹಿತ್ವಾ ಮಾನುಸಂ ದೇಹಂ, ತಾವತಿಂಸ ಮಗಞ್ಛಹಂ.

೩೦.

ಪುನಾಹಂ ಬಾರಾಣಸಿಯಂ, ರಾಜಾ ಹುತ್ವಾ ಮಹಾಯಸೋ;

ಸತ್ತುಕಸ್ಸ ತದಾ ರುದ್ಧೋ, ದ್ವಾರರೋಧಂ ಅಕಾರಯಿಂ.

೩೧.

ತತೋ ಸಪತ್ತಿನೋ [ಸಮ್ಪತ್ತಿನೋ; ಸಪತ್ತಾನೋ ಇತಿಚಕತ್ಥಚಿ] ರುದ್ಧಾ, ಏಕಾಹಂ ರಕ್ಖಿತಾ ಅಹುಂ;

ತತೋ ತಸ್ಸ ವಿಪಾಕೇನ, ಪಾಪುಣಿಂ ನಿರಯಂ ಭುಸಂ.

೩೨.

ಪಚ್ಛಿಮೇ ಚ ಭವೇ ದಾನಿ, ಜಾತೋಹಂ ಕೋಲಿಯೇ ಪುರೇ;

ಸುಪ್ಪವಾಸಾ ಚ ಮೇ ಮಾತಾ, ಮಹಾಲಿ ಲಿಚ್ಛವೀ ಪಿತಾ.

೩೩.

ಖತ್ತಿಯೇ ಪುಞ್ಞಕಮ್ಮೇನ, ದ್ವಾರರೋಧಸ್ಸ ವಾಹಸಾ;

ಸತ್ತಮಾಸೇ ಸತ್ತವಸ್ಸೇ, ವಸಿಂಕುಚ್ಛಿಮ್ಹಿ ದುಕ್ಖಿತೋ.

೩೪.

ಸತ್ತಾಹಂ ದ್ವಾರಮೂಳ್ಹೋಹಂ, ಮಹಾದುಕ್ಖಸಮಪ್ಪಿತೋ;

ಮಾತಾ ಮೇ ಛನ್ದದಾನೇನ, ಏವ ಮಾಸಿ ಸುದುಕ್ಖಿತಾ.

೩೫.

ಸುವತ್ಥಿತೋಹಂ ನಿಕ್ಖನ್ತೋ, ಬುದ್ಧೇನ ಅನುಕಮ್ಪಿತೋ;

ನಿಕ್ಖನ್ತದಿವಸೇಯೇವ, ಪಬ್ಬಜಿಂ ಅನಗಾರಿಯಂ.

೩೬.

ಉಪಜ್ಝಾ ಸಾರಿಪುತ್ತೋ ಮೇ, ಮೋಗ್ಗಲ್ಲಾನೋ ಮಹಿದ್ಧಿಕೋ;

ಕೇಸೇ ಓರೋಪಯನ್ತೋ ಮೇ, ಅನುಸಾಸಿ ಮಹಾಮತಿ.

೩೭.

ಕೇಸೇಸು ಛಿಜ್ಜಮಾನೇಸು [ಛನ್ನಮನೇಸು ಇತಿಪಿಕತ್ಥಚಿ], ಅರಹತ್ತಮಪಾಪುಣೀಂ;

ದೇವೋ ನಾಗಾ ಮನುಸ್ಸಾ ಚ, ಪಚ್ಚಯಾನು ಪನೇನ್ತಿ ಮೇ.

೩೮.

ಪದುಮುತ್ತರನಾಮಞ್ಚ, ವಿಪಸ್ಸಿಂಚ ವಿನಾಯಕಂ;

ಸಂಪೂಜಯಿಂ ಪಮುದಿತೋ, ಪಚ್ಚಯೇಹಿ ವಿಸೇಸತೋ.

೩೯.

ತತೋ ¶ ತೇಸಂ ವಿಪಾಕೇನ, ಕಮ್ಮಾನಂ ವಿಪುಲುತ್ತಮಂ;

ಲಾಭಂ ಲಭಾಮಿ ಸಬ್ಬತ್ಥ, ವನೇ ಗಾಮೇ ಜಲೇ ಥಲೇ.

೪೦.

ರೇವತಂ ದಸ್ಸನತ್ಥಾಯ, ಯದಾ ಯಾತಿ ವಿನಾಯಕೋ;

ತಿಂಸಭಿಕ್ಖುಸಹಸ್ಸೇಹಿ, ಸಹ ಲೋಕಗ್ಗನಾಯಕೋ.

೪೧.

ತದಾ ದೇವೋ ಪನೀತೇಹಿ [ಪಣೀತೇಹಿ ಇತಿಸಬ್ಬತ್ಥ], ಮಮತ್ಥಾಯ ಮಹಾಮತಿ;

ಪಚ್ಚಯೇಹಿ ಮಹಾವೀರೋ, ಸಸಙ್ಘೋ ಲೋಕನಾಯಕೋ.

೪೨.

ಉಪಟ್ಠಿತೋ ಮಯಾ ಬುದ್ಧೋ, ಗನ್ತ್ವಾ ರೇವತಮದ್ದಸ;

ತತೋ ಜೇತವನಂ ಗನ್ತ್ವಾ, ಏತದಗ್ಗೇ ಠಪೇಸಿಮಂ.

೪೩.

ಲಾಭೀನಂ ಸೀವಲಿ ಅಗ್ಗೋ, ಮಮ ಸಿಸ್ಸೇಸು ಭಿಕ್ಖವೋ;

ಸಬ್ಬೇಲೋಕಹಿತೋ ಸತ್ಥಾ, ಕಿತ್ತಯೀ ಪರಿಸಾಸುಮಂ.

೪೪.

ಕಿಲೇಸಾ ಝಾಪಿತಾ ಮಯ್ಹಂ, ಭವಾ ಸಬ್ಬೇ ಸಮೂಹತಾ;

ನಾಗೋವ ಬನ್ಧನಂ ಛೇತ್ವಾ, ವಿಹರಾಮಿ ಅನಾಸವೋ.

೪೫.

ಸ್ವಾಗತಂ ವತ ಮೇ ಆಸಿ, ಬುದ್ಧಸೇಟ್ಠಸ್ಸ ಸನ್ತಿಕಂ;

ತಿಸ್ಸೋ ವಿಜ್ಜಾ ಅನುಪ್ಪತ್ತೋ, ಕತಂ ಬುದ್ಧಸ್ಸ ಸಾಸನಂ.

೪೬.

ಪಟಿಸಮ್ಭಿದಾ ಚತಸ್ಸೋಪಿ, ವಿಮೋಕ್ಖಾ ಪಿಚ ಅಟ್ಠಿಮೇ;

ಛಳಭಿಞ್ಞಾ ಸಚ್ಛಿಕತಾ, ಕತಂ ಬುದ್ಧಸ್ಸ ಸಾಸನನ್ತಿ.

ಇತ್ಥಂ ಸುದಂ ಆಯಸ್ಮಾ ಸೀವಲಿತ್ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.

೪೭.

ಸುತ್ವಾನ ಏತಂ ಚರಿತಂ ಮಹಬ್ಭುತಂ,

ಪುಞ್ಞಾನುಭಾವಞ್ಚ ಸಿರಿಂ ಸಿರೀಮತಂ;

ಹಿತ್ವಾ ಕುಸೀತಂ ಕುಸಲಂ ಕರೋಥ,

ಕಾಮಾತ್ಥ ಕಾಮಂ ಭವಭೋಗನಿಬ್ಬುತಿಂ.

ಸೀವಲಿತ್ಥೇರಸ್ಸ ವತ್ಥುಂ ದಸಮಂ.

ಯಕ್ಖವಞ್ಚಿತವಗ್ಗೋ ತತಿಯೋ.

ಮಹಾಸೇನವಗ್ಗೋ

೩೧. ಮಹಾಸೇನರಞ್ಞೋ ವತ್ಥುಮ್ಹಿ ಅಯಮಾನುಪುಬ್ಬೀಕಥಾ

ಭಗವತಿ ¶ ಪರಿನಿಬ್ಬುತೇ ಪಾಟಲಿಪುತ್ತನಗರೇ ಮಹಾಸೇನೋ ನಾಮ ರಾಜಾ ರಜ್ಜಂ ಕಾರೇಸಿ ಧಮ್ಮಿಕೋ ಧಮ್ಮರಾಜಾ. ಸೋ ಪನ ಪಿತುಪಿತಾಮಹಾದೀನಂ ಧನರಾಸಿಂ ಓಲೋಕೇತ್ವಾ ಇಮೇ ಇಮಂ ಸಾಪತೇಯ್ಯಂ ಪಹಾಯ ಮಚ್ಚುನೋ ಮುಖಮುಪಗತಾ. ಅಹೋ ಸಂಸಾರಿಕಾನಂ ಅಞ್ಞಾಣತಾ. ಧನಂ ಠಪೇತ್ವಾ ಅತ್ತನೋ ವಿನಾಸಞ್ಚ ಅತ್ತಾನಂ ಠಪೇತ್ವಾ ಧನವಿನಾಸಞ್ಚ ನ ಜಾನನ್ತೀತಿ ಸಮ್ಪತ್ತಿಯಾ ಅಧಿಗಮಞ್ಚ ವಿನಾಸಂ ಚಾತಿ ಸಬ್ಬಂ ಚಿನ್ತೇತ್ವಾ ಧಮ್ಮಞ್ಚ ಸುತ್ವಾ ಪಟಿಲದ್ಧಸದ್ಧೋ ದಿವಸೇ ದಿವಸೇ ದಸಸಹಸ್ಸಾನಂ ಭಿಕ್ಖೂನಂ ಮಧುರೇನ ಅನ್ನಪಾನೇನ ಸನ್ತಪ್ಪೇನ್ತೋ ಅನೇಕಾನಿ ಪುಞ್ಞಾನಿ ಉಪಚಿನನ್ತೋ ಏಕದಿವಸಂ ರಹೋ ಪಟಿಸಲ್ಲಿನೋ ಏವಂ ಚಿನ್ತೇಸಿ. ಏವಂ ರಾಜನಿಯೋಗೇನ ಜನಸ್ಸ ಪೀಳನಂ ಕತ್ವಾ ದಿನ್ನದಾನತೋ ಸಹತ್ಥೇನ ಕಮ್ಮಂ ಕತ್ವಾ ಲದ್ಧೇನ ದಿನ್ನದಾನಂ ಮಹಪ್ಫಲಂ ಮಹಾನಿಸಂಸಂ ಭವಿಸ್ಸತಿ, ಏವಂ ಮಯಾ ಕಾತಬ್ಬನ್ತಿ ಸೋ ಸುಹದಾ ಮಚ್ಚಸ್ಸ ರಜ್ಜಂ ನೀಯ್ಯಾತೇತ್ವಾ ಅತ್ತನೋ ಕಣಿಟ್ಠಿಕಂ ಆದಾಯ ಕಿಞ್ಚಿ ಅಜಾನಾಪೇತ್ವಾ ಅಞ್ಞತರವೇಸೇನ ನಗರಾ ನಿಕ್ಖಮ್ಮ ಉತ್ತರಮಧುರಂ ನಾಮ ನಗರಂ ಅಗಮಾಸಿ, ತತ್ಥ ಮಹಾವಿಭವೋ ಏಕೋ ಸೇಟ್ಠಿ ಪಟಿವಸತಿ, ತೇ ಸೇಟ್ಠಿನೋ ಸಮೀಪ ಮುಪಗಮ್ಮ ಠಿತಾ. ತೇನ ಕಿಮತ್ಥಾಯಾಗತಾತಿ ವುತ್ತೇ ರಾಜಾ ತವ ಗೇಹೇ ಭತಿಯಾ ಕಮ್ಮಂ ಕರಿಸ್ಸಾಮೀತಿ ವತ್ವಾ ತೇನಾನುಞ್ಞಾತೋ ತೀಣಿ ವಸ್ಸಾನಿ ಕಮ್ಮ ಮಕಾಸಿ, ತತೋ ಏಕದಿವಸಂ ಸೇಟ್ಠಿ ತೇ ದಿಸ್ವಾ ಪಕ್ಕೋಸಿತ್ವಾ ಅತೀವ ತುಮ್ಹೇ ಸುಖುಮಾಲತರಾ. ತಥಾಪಿ ಇಮಸ್ಮಿಂ ಗೇಹೇ ಕಮ್ಮಕರಣೇನ ಚಿರಂ ವಸಿತ್ಥ, ಏತ್ತಕಂ ಕಾಲಂ ಕಿಸ್ಮಿಞ್ಚಿ ಕಮ್ಮೇಪಿ ಕುಸೀತತ್ತಂ ನ ಪಞ್ಞಾಯತಿ. ಪಗೇವ ಅನಾಚಾರಮ್ಪಿ, ಯಾಗುಭತ್ತಂ ಠಪೇತ್ವಾ ಅಞ್ಞಂ ಉಪಕಾರಮ್ಪಿ ಮಮ ಸನ್ತಿಕಾ ನತ್ಥಿ, ಕೇನತ್ಥೇನ ಕಮ್ಮಂ ಕರೋಥಾತಿ ಪುಚ್ಛಿ. ರಾಜಾ ತಸ್ಸ ವಚನಂ ಸುತ್ವಾ ಇಮಸ್ಮಿಂ ಜನಪದೇ ಸಾಲಿನೋ ಮನಾಪಭಾವೋ ಬಹುಸೋ ಸೂಯತಿ. ತಸ್ಮಾ ಸಾಲೀನಮತ್ಥಾಯ ಇಧಾ ಗತಮ್ಹಾತಿ ಆಹ, ತಂ ಸುತ್ವಾ ತೇಸಂ ತುಟ್ಠೋ ಸೇಟ್ಠಿ ಸಾಲೀನಂ ಸಕಟಸಹಸ್ಸಂ ಅದಾಸಿ, ರಾಜಾ ಸಾಲಿಂಲಭಿತ್ವಾ ಸೇಟ್ಠಿನೋ ¶ ಏವಮಾಹ, ಭೋ ಇಮಂ ಅಮ್ಹಾಕಂ ನಗರಂ ಪಾಪೇಥಾತಿ, ತಂ ಸುತ್ವಾ ಸೇಟ್ಠಿ ಸಾಧೂತಿ ವತ್ವಾ ಸಾಲಿಪರಿಪುಣ್ಣಸಕಟಸಹಸ್ಸಂ ರಞ್ಞೋ ನಗರಂ ಪಾಪೇಸಿ, ರಾಜಾ ನಗರಂ ಗನ್ತ್ವಾ ಸೇಟ್ಠಿಸ್ಸ ನಾನಾವಣ್ಣವತ್ಥಹಿರಞ್ಞಸುವಣ್ಣಾದೀಹಿ ಸಕಟೇ ಪೂರೇತ್ವಾ ಪಟಿಪೇಸೇತ್ವಾ ಮೇತ್ತಿಂ ಥಿರಂ ಕತ್ವಾ ಆಭತವೀಹಯೋ ರಾಜಗೇಹೇ ಸನ್ನಿಚಯಮಕಾಸಿ, ಅಥ ರಾಜಾ ಕತಿಪಾಹಚ್ಚಯೇನ ಮುಸಲಂ ಪಗ್ಗಯ್ಹ ಸಹತ್ಥೇನೇವ ವೀಹಿಂ ಕೋಟ್ಟೇತಿ, ಕೋಟ್ಟಿತಕೋಟ್ಟಿತಂ ಕಣಿಟ್ಠಿಕಾ ಪಪ್ಫೋಟೇತಿ. ಏವಂ ಉಭೋಪಿ ತಣ್ಡುಲಾನಂ ಮಹನ್ತಂ ರಾಸಿಂ ಕತ್ವಾ ದಾರೂದಕಾದಯೋ ಆಹರಿತ್ವಾ ಅಮ್ಬಿಲಭತ್ತಂ ಪಚಿತ್ವಾ ರಾಜಗೇಹೇ ಪಞ್ಚಸತಆಸನಾನಿ ಪಞ್ಞಾಪೇತ್ವಾ ಕಾಲಂ ಉಗ್ಘೋಸೇಸುಂ, ಆಗಚ್ಛನ್ತು ಅಯ್ಯಾ ಅನುಕಮ್ಪಂ ಉಪಾದಾಯ ಮಮ ಗೇಹೇ ಭುಞ್ಜನ್ತೂತಿ. ತಂ ಸುತ್ವಾ ಪಞ್ಚಸತಾ ಭಿಕ್ಖೂ ಆಕಾಸೇನ ಆಗಮಿಂಸು, ರಾಜಾ ತೇ ಯಾವದತ್ಥಂ ಪರಿವಿಸಿ, ತತೋ ತೇಸಂ ಅನ್ತರೇ ಪಿಯಂಗುದೀಪವಾಸೀ ಏಕೋ ಮಹಾಸಿವತ್ಥೇರೋ ನಾಮ ಭತ್ತಂ ಗಹೇತ್ವಾ ಏತೇ ಮಂ ಪಸ್ಸನ್ತೂತಿ ಅಧಿಟ್ಠಹಿತ್ವಾ ಆಕಾಸೇನ ಪಿಯಂಗುದೀಪಂ ಗನ್ತ್ವಾ ಭತ್ತಂ ಪಞ್ಚಸತಾನಂ ಭಿಕ್ಖೂನಂ ದತ್ವಾ ಪರಿಭುಞ್ಚಿ. ತಂ ತಸ್ಸಾನುಭಾವೇನ ಸಬ್ಬೇಸಂ ಯಾವದತ್ಥಂ ಅಹೋಸಿ. ಏವಂ ಅಪ್ಪಕೇನಾಪಿ ದೇಯ್ಯಧಮ್ಮೇನ ಸಪ್ಪುರಿಸಾ ದಾಯಕಾನಂ ಮನಂ ಪಸಾದೇತ್ವಾ ಪತಿಟ್ಠಂ ಕರೋನ್ತೀತಿ. ವುತ್ತಞ್ಹಿ.

೧.

ಅಪ್ಪಕೇನಪಿ ಮೇಧಾವೀ, ದಾಯಕಾನಂ ಮನಂ ಪತಿ;

ಸದ್ಧಂ ವಡ್ಢೇನ್ತಿ ಚನ್ದೋವ, ರಂಸಿನಾ ಖೀರಸಾಗರಂ.

೨.

ಅಟ್ಠಾನೇ ನ ನಿಯೋಜೇನ್ತಾ, ಕರೋನ್ತಾ ನೇವ ಸನ್ನಿಧಿಂ;

ಪರಿಭೋಗ ಮಕತ್ವಾನ, ನೇವ ನಾಸೇನ್ತಿ ಪಚ್ಚಯಂ.

೩.

ನ ಪಾಪೇನ್ತಾಚ ಥೇಯ್ಯಸ್ಸ, ನ ಕರೋನ್ತಾ ತಥೇವಿಣಂ;

ವಿಭಜನ್ತಿ ಸುಸೀಲೇಸು, ಸಯಂ ಭುತ್ವಾನ ಸೀಲವಾತಿ.

ಅಥ ರಾಜಾ ಕಣಿಟ್ಠಿಕಾಯ ಸದ್ಧಿಂ ಥತ್ಥೇವ ಠಿತೋ ಪಿಯಂಗುದೀಪೇ ಪರಿಭುಞ್ಜನ್ತೇ ಪಞ್ಚಸತಭಿಕ್ಖೂ ದಿಸ್ವಾ ಹಟ್ಠೋ ಉದಗ್ಗೋ ಅಹೋಸಿ. ಅಥ ¶ ತೇ ಅಪರಭಾಗೇ ಅತ್ತನಾ ಕತಂ ದಾನವರಂ ಅನುಸ್ಸರನ್ತಾ ನ ಚಿರೇನೇವ ಉಭೋಪಿ ಸೋತಾಪನ್ನಾ ಅಹೇಸುಂತಿ.

೪.

ನ ಗಣೇನ್ತಾತ್ತನೋ ದುಕ್ಖಂ, ವಿಹಾಯ ಮಹತಿಂ ಸಿರಿಂ;

ಆಯತಿಂಭವಮಿಚ್ಛನ್ತಾ, ಸುಜನೇವಂ ಸುಭೇ ರತಾ.

೫.

ಆಯಾಸೇನ ಕತಂ ಪುಞ್ಞಂ, ಮಹನ್ತಫಲದಾಯಕಂ;

ಇತಿ ಮನ್ತ್ವಾನ ಮೇಧಾವೀ, ಸಹತ್ಥೇನೇವ ತಂ ಕರೇತಿ.

ಮಹಾಸೇನರಞ್ಞೋ ವತ್ಥುಂ ಪಥಮಂ.

೩೨. ಸುವಣ್ಣತಿಲಕಾಯ ವತ್ಥುಮ್ಹಿ ಅಯಮಾನುಪುಬ್ಬೀಕಥಾ

ಲಙ್ಕಾದೀಪೇ ಕಿರ ಅನುರಾಧಪುರನಗರೇ ಏಕೋ ಮಾತುಗಾಮೋ [ಏಕಾಮಾತುಗಾಮಾತಿವಾ ಏಕಾಮಾತುಗಾಮೋತಿವಾ ಕತ್ಥಚಿ] ಸದ್ಧಾಸಮ್ಪನ್ನಾ ನಿಚ್ಚಂ ಅಭಯುತ್ತರಚೇತಿಯೇ ಪುಪ್ಫಪೂಜಂ ಕರೋತಿ, ಅಥೇಕದಿವಸಂ ಸಾ ಅತ್ತನೋ ಧೀತುಯಾ ಸದ್ಧಿಂ ತಸ್ಮಿಂ ಚೇತಿಯೇ ಪುಪ್ಫಪೂಜನತ್ಥಾಯ [ಪುಪ್ಫಪೂಜತ್ಥಾಯ ಇತಿಕತ್ಥಚಿ] ಗನ್ತ್ವಾ ಪುಪ್ಫಾಸನಸಾಲಾಯ ಉದಕಂ ಅಪಸ್ಸನ್ತೀ ಧೀತು ಹತ್ಥೇ ಪುಪ್ಫಚಙ್ಗೋಟಕಂ ಠಪೇತ್ವಾ ಘಟ ಮಾದಾಯ ಪೋಕ್ಖರಣಿಂ ಅಗಮಾಸಿ, ತತೋ ಸಾ ದಾರಿಕಾ ಮಾತರಿ ಅನಾಗತಾಯಯೇವ [ಅನಾಗತೇಯೇವ ಇತಿಸಬ್ಬತ್ಥ] ಅಧೋತಾಸನೇ ಪುಪ್ಫಮುಟ್ಠಿಂಗಹೇತ್ವಾ ಮಣ್ಡಲಂ ಕತ್ವಾ ಪೂಜೇತ್ವಾ ಏವಂ ಪತ್ಥನಮಕಾಸಿ. ತಥಾ ಹಿ.

೧.

ಮಹಾವೀರಸ್ಸ ಧೀರಸ್ಸ, ಸಯಮ್ಭುಸ್ಸ ಮಹೇಸಿನೋ;

ತಿಲೋಕಗ್ಗಸ್ಸ ನಾಥಸ್ಸ, ಭಗವನ್ತಸ್ಸ ಸತ್ಥುನೋ.

೨.

ಯ ಮಹಂ ಪೂಜಯಿಂ ಪುಪ್ಫಂ, ತಸ್ಸ ಕಮ್ಮಸ್ಸ ವಾಹಸಾ;

ರೂಪೀನಂ ಪವರಾ ಹೇಸ್ಸಂ, ಆರೋಹಪರಿಣಾಹವಾ.

೩.

ಮಂ ¶ ದಿಸ್ವಾ ಪುರಿಸಾ ಸಬ್ಬೇ, ಮುಚ್ಛನ್ತು ಕಾಮಮುಚ್ಛಿತಾ;

ನಿಚ್ಛರನ್ತು ಸರೀರಾ ಮೇ, ರಂಸಿಮಾಲೀವ ರಂಸಿಯೋ.

೪.

ಹದಯಙ್ಗಮಾ ಕಣ್ಣಸುಖಾ, ಮಞ್ಜುಭಾಣೀ ಸುಭಾ ಮಮ;

ಕಿನ್ನರಾನಂ ಯಥಾ ವಾಣೀ, ಏವಮೇವ ಪವತ್ತತೂತಿ.

ಅಥಸ್ಸಾ ಮಾತಾ ಆಗಮ್ಮ ಅಧೋತಾಸನೇ ಪೂಜಿತಾನಿ ಪುಪ್ಫಾನಿ ದಿಸ್ವಾ ಕಸ್ಮಾ ಚಣ್ಡಾಲೀ ಅಧೋತಾಸನೇ ಭಗವತೋ ಪುಪ್ಫಾನಿ ಪೂಜೇಸಿ, ಅಯುತ್ತಂ ತಯಾ ಕತನ್ತಿ ಆಹ, ತಂ ಸುತ್ವಾ ಸಾ ಮಾತುಯಾ ಕುಜ್ಝಿತ್ವಾ ತ್ವಂ ಚಣ್ಡಾಲೀತಿ ಅಕ್ಕೋಸಿ, ಸಾ ಏತ್ತಕಂ ಪುಞ್ಞಾಪುಞ್ಞಂ ಕತ್ವಾ ಅಪರಭಾಗೇ ತತೋ ಚುತಾ ಜಮ್ಬುದೀಪೇ ಉತ್ತರಮಧುರಾಯಂ ಏಕಸ್ಸ ಚಣ್ಡಾಲಗನ್ಧಬ್ಬಬ್ರಾಹ್ಮಣಸ್ಸ ಧೀತಾ ಹುತ್ವಾ ನಿಬ್ಬತ್ತಿ, ಉತ್ತಮರೂಪಧರಾ ಅಹೋಸಿ, ತಸ್ಸಾ ಸರೀರತೋ ಮೇಘಮುಖತೋ ವಿಜ್ಜುಲ್ಲತಾವಿಯ ರಂಸಿಯೋ ನಿಚ್ಛರನ್ತಿ. ಸಮನ್ತಾ ಚತುಹತ್ಥಟ್ಠಾನೇ ಸರೀರಪ್ಪಭಾಯ ಅನ್ಧಕಾರೇ ವಿಧಮತಿ. ಮುಖತೋ ಉಪ್ಪಲಗನ್ಧೋ ವಾಯತಿ, ಕಾಯತೋ ಚನ್ದನಗನ್ಧೋ, ತಸ್ಸಾ ದ್ವಿನ್ನಂ ಥನಾನ ಮನ್ತರೇ ಸುವಣ್ಣವಣ್ಣಂ ಏಕಂ ತಿಲಕಂ ಅಹೋಸಿ, ತೇನ ಬಾಲಸುರಿಯಸ್ಸ ವಿಯ ಪಭಾ ನಿಚ್ಛರತಿ. ದಿಟ್ಠದಿಟ್ಠಾ ಯೇಭುಯ್ಯೇನ ಉಮ್ಮತ್ತಾ ವಿಯ ಕಾಮಮದೇನ ವಿಸಞ್ಞಿನೋ ಹೋನ್ತಿ, ಅಹೋ ಕುಸಲಾಕುಸಲಾನಂ ಆನುಭಾವೋ. ತಥಾ ಹಿ.

೫.

ಯೇನ ಸಾ ಕೋಧಸಾಮಾತು, ಚಣ್ಡಾಲೀ ಇತಿ ಭಾಸಿತಾ;

ತೇನ ಸಾ ಆಸಿ ಚಣ್ಡಾಲೀ, ಜೇಗುಚ್ಛಾ ಹೀನಜಾತಿಕಾ.

೬.

ಸಲ್ಲಕ್ಖೇತ್ವಾನ ಸಮ್ಬುದ್ಧ, ಗುಣಂ ಪೂಜೇಸಿ ಯಂ ತದಾ;

ತೇನ ಪುಞ್ಞಾನುಭಾವೇನ, ಸಾ ಭಿರೂಪೀ ಮನೋರಮಾ.

೭.

ಯೇನ ಯೇನ ಪಕಾರೇನ, ಪುಞ್ಞಪಾಪಾನಿ ಯೋ ಕರೇ;

ತಸ್ಸ ತಸ್ಸಾನುರೂಪೇನ, ಮೋರೋವ ಲಭತೇ ಫಲಂ.

೮.

ಪಾಪೇನ ಚ ತಿರಚ್ಛಾನೇ, ಜಾಯನ್ತಿ ಕುಸಲೇನ ತೇ;

ವಣ್ಣಪೋಕ್ಖರತಾ ಹೋತಿ, ಮೋರಾನಂ ಕಮ್ಮ ಮೀದಿಸನ್ತಿ.

ತತೋ ¶ ತಸ್ಸಾ ಮಾತಾಪಿತರೋ ಸುವಣ್ಣತಿಲಕಾತಿ ನಾಮ ಮಕಂಸು. ತಸ್ಮಿಂಕಿರ ನಗರೇ ಮನುಸ್ಸಾ ತಸ್ಸಾ ರುಪದಸ್ಸನೇನಚ ಸವಣೇನಚ ಸಮ್ಪತ್ತಾಪಿ ಚಣ್ಡಾಲಧೀತಾ ಅಯನ್ತಿ ಪರಿಭವಭಯೇನ ಆವಾಹಂ ನ ಕರೋನ್ತಿ. ಅಥ ತಸ್ಮಿಂ ನಗರೇ ಜೇಟ್ಠಚಣ್ಡಾಲಬ್ರಾಹ್ಮಣಸ್ಸ ಪುತ್ತೋ ಏತಮತ್ಥಾಯ ತಸ್ಸಾ ಮಾತಾಪಿತುನ್ನಂ ಸನ್ತಿಕಂ ವತ್ಥಾಭರಣಗನ್ಧಮಾಲಾದಯೋ ಪೇಸೇಸಿ ಸುವಣ್ಣತಿಲಕಂ ಅಮ್ಹಾಕಂ ದದನ್ತೂತಿ, ತೇ ತಂ ಪವತ್ತಿಂ ತಸ್ಸಾ ಆರೋಚೇಸುಂ. ಸಾಸ್ಸ ಜಿಗುಚ್ಛನ್ತೀ ಪರಿಹಾಸ ಮಕಾಸಿ. ತತೋ ಬ್ರಾಹ್ಮಣಸ್ಸ ಪುತ್ತೋ ಲಜ್ಜಿತೋ ರಞ್ಞೋ ಸನ್ತಿಕಂ ಗನ್ತ್ವಾ ವೀಣಂ ಮುಞ್ಚೇತ್ವಾ ಗಾಯಮಾನೋ ಏವಮಾಹ.

೯.

ಲಲನಾ ನನಾನೀ ಚಲಲೋಚನಾನೀ,

ತರುಣಾ ರುಣಾನೀ ಚಲಿತಾಧರಾಣೀ;

ಮನುಜೋ ಹಿ ಯೋ ನೇತ್ತಪಿಯಂ ಕರೋತಿ,

ಸ ತು ನೀಚಜಾತಿಂ ಅಪಿ ನೋ ಜಹಾತಿ.

ಕಿಮಿದನ್ತಿ ರಞ್ಞಾ ಪುಟ್ಠೋ ಆಹ.

೧೦.

ಸಮೇತಿ ಕಿಂ ದೇವ ಛಮಾಯ ಮತ್ತಿಕಾ,

ಕದಾಚಿ ಚಾಮೀಕರಜಾತಿಕಾಯ;

ಸಿಗಾಲಧೇನು ಅಪಿ ನೀಚಜಾತಿಕಾ,

ಸಮೇತಿ ಕಿಂಸೀಹವರೇನ ದೇವಾತಿ.

ಏವಞ್ಚ ಪನ ವತ್ವಾ ದೇವ ಇಮಸ್ಮಿಂನಗರೇ ಸುವಣ್ಣತಿಲಕಾ ನಾಮೇಕಾ ಚಣ್ಡಾಲಧೀತಾ ಅತ್ಥಿ, ಸಾ ಸಮಾನಜಾತಿಕೇಹಿ ಪೇಸಿತಪಣ್ಣಾಕಾರಂ ನ ಗಣ್ಹಾತಿ, ಕುಲವನ್ತೇಯೇವ ಪತ್ಥೇತಿ, ಕದಾ ನಾಮ ಕಾಕೀ ಸುವಣ್ಣಹಂಸೇನ ಸಮಾಗಚ್ಛತಿ ದೇವಾತಿ. ರಾಜಾ ತಂ ಸುತ್ವಾ ತಸ್ಸಾ ಪಿತರಂ ಪಕ್ಕೋಸಾಪೇತ್ವಾ ತಮತ್ಥಂ ವತ್ವಾ ಸಚ್ಚಂ ಭಣೇತಿ ಪುಚ್ಛಿ, ಸೋಪಿ ಸಚ್ಚಂ ದೇವ, ಸಾ ಜಾತಿಸಮ್ಪನ್ನಮೇವ ಕಾಮೇತೀತಿ ಆಹ. ರಾಜಾ ಏವಂ ಸತಿ ಭಣೇ ಪಞ್ಚಮಧುರನಗರೇ ಉದ್ದಾಳಬ್ರಾಹ್ಮಣೋ ನಾಮ ಅತ್ಥಿ, ಸೋ ಜಾತಿಸಮ್ಪನ್ನೋ ಮಾತಿತೋಚ ಪಿತಿತೋಚ ಅನುಪಕ್ಕುಟ್ಠೋ ¶ , ಜೇಗುಚ್ಛಾ ಪಟಿಕ್ಕೂಲಾ ಏತಾತಿ ಮಾತುಗಾಮೇನ ಸದ್ಧಿಂ ನ ಸಂವಸತಿ. ಅತ್ತನೋ ಗೇಹತೋ ರಾಜಗೇಹಂ ಗಚ್ಛನ್ತೋಚ ಆಗಚ್ಛನ್ತೋ ಚ ಸೋಳಸಖೀರೋದಕಘಟೇಹಿ ಮಗ್ಗೇ ಸಿಞ್ಚಾಪೇಸಿ. ಮಾತುಗಾಮೇ ದಿಸ್ವಾ ಕಾಲಕಣ್ಣೀ ಮಯಾ ದಿಟ್ಠಾತಿ ಖೀರೋದಕೇನ ಮುಖಂ ಧೋವತಿ. ತವ ಧೀತಾ ಸಕ್ಕೋನ್ತೀ ತೇನ ಸದ್ಧಿಂ ಸಂವಸತು, ಏತಮತ್ಥಂ ತವ ಧೀತರಂ ಕಥೇಹೀತಿ ಆಹ, ಸೋಪಿ ತಂ ಸುತ್ವಾ ಗೇಹಂ ಗನ್ತ್ವಾ ಧೀತರಂ ಪಕ್ಕೋಸಿತ್ವಾ ರಞ್ಞಾ ವುತ್ತನಿಯಾಮೇನೇವ ತಸ್ಸಾ ಕಥೇಸಿ. ತಾಯ ತಂ ಸುತ್ವಾ ಸಕ್ಕೋನ್ತೀ ಅಹಂ ಉದ್ದಾಳಬ್ರಾಹ್ಮಣೇನ ಸದ್ಧಿಂ ವಸಿಸ್ಸಾಮಿ, ಮಾ ತುಮ್ಹೇ ಚಿನ್ತೇಥ, ಪಪಞ್ಚಮ್ಪಿ ಮಾ ಕರೋಥ, ಪಾತೋವ ಗಮಿಸ್ಸಾಮೀತಿ ವುತ್ತೇ ಪಿತಾ ಪನಸ್ಸಾ ಸಾಧೂತಿ ಸಹಸ್ಸಗ್ಘನಕಚಿತ್ತಕಮ್ಬಲಕಞ್ಚುಕೇನ ಧೀತು ಸರೀರಂ ಪಾರುಪಾಪೇತ್ವಾ ವೀಣಾದಿತುರಿಯಭಣ್ಡಾನಿ ಗಾಹಾಪೇತ್ವಾ ಧೀತುಯಾ ಸದ್ಧಿಂ ಅದ್ಧಾನಮಗ್ಗಂ ಪಟಿಪಜ್ಜಿ. ಗಚ್ಛನ್ತೋ ಅನ್ತರಾಮಗ್ಗೇ ಅಞ್ಞತರಸ್ಮಿಂ ನಗರೇ ರಞ್ಞೋ ಗನ್ಧಬ್ಬಂ ಕರೋನ್ತೋ ಧೀತರಂ ಪಿಟ್ಠಿಪಸ್ಸೇ ನಿಸೀದಾಪೇತ್ವಾ ಗನ್ಧಬ್ಬಮಕಾಸಿ. ಅಥಸ್ಸ ಪಿಟ್ಠಿಪಸ್ಸನಿಸಿನ್ನಾ ಸುವಣ್ಣತಿಲಕಾ ನಯನಕೋಟಿಯಾ ದಿಟ್ಠಿಂ ಪಾಪೇನ್ತೀ ಸರಸೇನ ತಂ ಓಲೋಕೇತ್ವಾ ಪಾರುತಕಞ್ಚುಕಂ ಕಿಞ್ಚಿ ಅಪನೇತ್ವಾ ಸರೀರಪ್ಪಭಂ ಪಞ್ಞಾಪೇಸಿ, ರಾಜಾ ಪನಸ್ಸಾ ಸರೀರಪ್ಪಭಂಚ ರೂಪಸಮ್ಪದಂಚ ದಿಸ್ವಾ ಕಾಮಾತುರೋ ವಿಗತಸಞ್ಞೋ ಸಮ್ಮೂಳ್ಹೋ ಹುತ್ವಾ ಮುಹುತ್ತೇನ ಪಟಿಲದ್ಧಸ್ಸಾಸೋ ತಸ್ಸಾ ಸಸ್ಸಾಮಿಕಾಸ್ಸಾಮಿಕಭಾವಂ ಪುಚ್ಛಿತ್ವಾ ಚಣ್ಡಾಲಧೀತಾತಿ ಸುತ್ವಾ ಪರಿಭವಭಯೇನ ತಂ ಆನೇತು ಮಸಕ್ಕೋನ್ತೋ ಏವರೂಪಂ ವಣ್ಣಪೋಕ್ಖರಸಮ್ಪನ್ನಂ ಇತ್ಥಿರತನಂ ಅಲಭನ್ತಸ್ಸ ಮೇ ಕೋ ಅತ್ಥೋ ಜೀವಿತೇನಾತಿ ಸೋಚನ್ತೋ ಪರಿದೇವನ್ತೋ ಕಾಮಮುಚ್ಛಿತೋ ಕತ್ತಬ್ಬಾ ಕತ್ತಬ್ಬಂ ಅಜಾನನ್ತೋ ಅಸಿಂ ಗಹೇತ್ವಾ ಅತ್ತನೋ ಸೀಸಂ ಸಯಮೇವ ಛಿನ್ದಿತ್ವಾ ಕಾಲ ಮಕಾಸಿ. ಏವಮೇವ ಅನ್ತರಾಮಗ್ಗೇ ಪಞ್ಚರಾಜಾನೋ ತಸ್ಸಾ ರೂಪಸಮ್ಪತ್ತಿಮದಮತ್ತಾ ಅಸಿನಾ ಛಿನ್ನಸೀಸಾ ಜೀವಿತಕ್ಖಯಂ ಪಾಪುಣಿಂಸು. ತಥಾ ಹಿ ಸತ್ತಾ ಹಿರಞ್ಞಸುವಣ್ಣದಾಸಿದಾಸ ಪುತ್ತದಾರಾದೀಸು [ಪುತ್ತದಾರಾದೀಹಿ ಇತಿಸಬ್ಬತ್ಥ] ಪಿಯಂ ನಿಸ್ಸಾಯ ಕಾಮೇನ ಮುಚ್ಛಿತಾ ಅನಯಬ್ಯಸನಂ ಪಾಪುಣನ್ತೀತಿ. ವುತ್ತಞ್ಹೇತಂ ಭಗವತಾ.

೧೧.

ಪಿಯತೋ ¶ ಜಾಯತೇ ಸೋಕೋ,

ಪಿಯತೋ ಜಾಯತೇ ಭಯಂ;

ಪಿಯತೋ ವಿಪ್ಪಮುತ್ತಸ್ಸ,

ನತ್ಥಿ ಸೋಕೋ ಕುತೋ ಭಯಂ.

೧೨.

ಪೇಮತೋ ಜಾಯತೇ ಸೋಕೋ,

ಪೇಮತೋ ಜಾಯತೇ ಭಯಂ;

ಪೇಮತೋ ವಿಪ್ಪಮುತ್ತಸ್ಸ,

ನತ್ಥಿ ಸೋಕೋ ಕುತೋ ಭಯಂ.

೧೩.

ರತಿಯಾ ಜಾಯತೇ ಸೋಕೋ,

ರತಿಯಾ ಜಾಯತೇ ಭಯಂ;

ರತಿಯಾ ವಿಪ್ಪಮುತ್ತಸ್ಸ,

ನತ್ಥಿ ಸೋಕೋ ಕುತೋ ಭಯಂ.

೧೪.

ಕಾಮತೋ ಜಾಯತೇ ಸೋಕೋ,

ಕಾಮತೋ ಜಾಯತೇ ಭಯಂ;

ಕಾಮತೋ ವಿಪ್ಪಮುತ್ತಸ್ಸ,

ನತ್ಥಿ ಸೋಕೋ ಕುತೋ ಭಯಂ.

೧೫.

ತಣ್ಹಾಯ ಜಾಯತೇ ಸೋಕೋ,

ತಣ್ಹಾಯ ಜಾಯತೇ ಭಯಂ;

ತಣ್ಹಾಯ ವಿಪ್ಪಮುತ್ತಸ್ಸ,

ನತ್ಥಿ ಸೋಕೋ ಕುತೋ ಭಯಂ.

ತತೋ ಸೋ ಅನುಕ್ಕಮೇನ ಪಞ್ಚಮಧುರನಗರಂ ಗನ್ತ್ವಾ ಅತ್ತನೋ ಆಗತಭಾವಂ ರಞ್ಞಾ ಕಥಾಪೇತ್ವಾ ತೇನ ಅನುಞ್ಞಾತೋ ಗನ್ತ್ವಾ ರಾಜಾನಂ ಅದ್ದಸ. ತದಾ ಉದ್ದಾಳಬ್ರಾಹ್ಮಣೋ ರಞ್ಞೋ ಅವಿದೂರೇ ಕಮ್ಬಲಭದ್ದಪೀಠೇ ನಿಸಿನ್ನೋ ಹೋತಿ, ಗನ್ಧಬ್ಬಬ್ರಾಹ್ಮಣೋಪಿ ಧೀತುಯಾ ಸದ್ಧಿಂ ಗನ್ಧಬ್ಬಂ ಕುರುಮಾನೋ ನಿಸೀದಿ. ತಸ್ಮಿಂಖಣೇ ಪಿತು ಪಿಟ್ಠಿಪಸ್ಸೇ ನಿಸಿನ್ನಾ ಸುವಣ್ಣತಿಲಕಾ ಉದ್ದಾಳಬ್ರಾಹ್ಮಣೋ ಕತಮೋತಿ ಪುಚ್ಛಿತ್ವಾ ಏತಸ್ಮಿಂ ಭದ್ದಪೀಠೇ ನಿಸಿನ್ನೋಂ ಏಸೋತಿ ಸುತ್ವಾ ನಿಲಾಮಲಲೋಚನೇಹಿ ತಂ ಓಲೋಕನ್ತಿ ದಸನರಂಸಿನಾ ಸಮ್ಭಿನ್ನಸುರತ್ತಾಧರೇನ ಮನ್ದಹಸಿತಂ ¶ ಕರೋನ್ತೀ ತಂ ಓಲೋಕೇತ್ವಾ ಪಾರುತಕಞ್ಚುಕಂ ಅಪನೇತ್ವಾ ಸರೀರಪ್ಪಭಂ ವಿಸ್ಸಜ್ಜೇಸಿ. ತಂ ದಿಸ್ವಾ ಬ್ರಾಹ್ಮಣೋ ಉಮ್ಮತ್ತೋ ಸೋಕೇನ ಪರಿದಡ್ಢಗತ್ತೋ ಉಣ್ಹವಾತೇನ ಪೂರಿತಮುಖನಾಸೋ ಅಸ್ಸುನಾ ಕಿಲಿನ್ನನೇತ್ತೋ ವಿಸಞ್ಞೀ ಅಹೋಸಿ. ತತೋ ಸೋ ಮುಹುತ್ತೇನ ಲದ್ಧಸ್ಸಾಸೋ ರೋಗೀವಿಯ ರಞ್ಞೋ ಸಕಾಸಾ ಅಪಸರನ್ತೋ ಅತ್ತನೋ ಗೇಹಂ ಗನ್ತ್ವಾ ಸುಹದೇ ಪಕ್ಕೋಸಿತ್ವಾ ತೇಸಂ ಏವಮಾಹ. ಭವನ್ತೇತ್ಥ.

೧೬.

ಯೋ ಆಪದೇ ಸಮುಪ್ಪನ್ನೇ,

ಉಪತಿಟ್ಠತಿ ಸನ್ತಿಕೇ;

ಸುಖದುಕ್ಖೇ ಸಮೋ ಹೋತಿ,

ಸೋ ಮಿತ್ತೋ ಸೋಚ ಞಾತಕೋ.

೧೭.

ಯೋ ಗುಣಂ ಭಾಸತೇ ಯಸ್ಸ, ಅಗುಣಞ್ಚ ನಿಗೂಹತಿ;

ಪಟಿಸೇಧೇತ್ಯ [ಪಟಿಸೇಧೇತಿಕತ್ತಬ್ಬಾ ಇತಿಸಬ್ಬತ್ಥ] ಕತ್ತಬ್ಬಾ, ಸೋ ಮಿತ್ತೋ ಸೋಚ ಞಾತಕೋ.

೧೮.

ಸುವಣ್ಣತಿಲಕಾನಾಮ, ಲಲನಾ ಕಾಮಲಾಲಯಾ;

ನೀಲಕ್ಖಿಚಣ್ಡಕಣ್ಡೇಹಿ, ವಿಖಣ್ಡೇಸಿ ಮನೋ ಮಮ.

೧೯.

ತಸ್ಸಾ ಮುಖಮ್ಬುಜೇ ಸತ್ತಾ, ಮಮ ನೇತ್ತಮಧುಬ್ಬತಾ,

ಅಪ್ಪಮ್ಪಿನ ಸರನ್ತಾಮಂ, ತತ್ಥೇವಾ ಭಿರಮನ್ತಿ ತೇ.

೨೦.

ಸಹೇವ ತೇಹಿ ಮೇ ಚಿತ್ತಂ, ಗತಂ ಉಲ್ಲಂಘಿಯುದ್ಧತೋ;

ಲಜ್ಜಾಗಮ್ಭೀರಪರಿಖಂ, ಧಿತಿಪಾಕಾರಮುಗ್ಗತಂ.

೨೧.

ಸಮ್ಮುಯ್ಹಾಮಿ ಪಮುಯ್ಹಾಮಿ, ಸಬ್ಬಾ ಮುಯ್ಹನ್ತಿ ಮೇ ದಿಸಾ;

ತಸ್ಸ ಮೇ ಸರಣಂ ಹೋಥ, ಕರೋಥ ಮಮ ಸಙ್ಗಹನ್ತಿ.

ತಂ ಸುತ್ವಾ ತೇ ಏವಮಾಹಂಸು.

೨೨.

ಯಂ ತ್ವಮಾಚರಿಯ ಪತ್ಥೇಸಿ, ಚಣ್ಡಾಲೀ ಸಾ ಅಸಙ್ಗಮಾ;

ಕಿನ್ನು ಮೀಳ್ಹೇನ ಸಂಯೋಗೋ, ಚನ್ದನಸ್ಸ ಕದಾ ಸಿಯಾ.

೨೩.

ಅಗಮ್ಮಗಮನಾ ¶ ಯಾತಿ, ನರಾನಂ ದೂರತೋ ಸಿರೀ;

ಕಿತ್ತಿಚಾಯು ಬಲಂ ಬುದ್ಧಿ, ಅಯಸಂಚ ಸ ಗಚ್ಛತೀತಿ.

ಅಥ ತೇಸಂ ಬ್ರಹ್ಮಣೋ ಆಹ.

೨೪.

ನ ಪರಿಚ್ಚಜತಿ ಲೋಕೋಯಂ, ಅಮೇಜ್ಝೇ ಮಣಿಮುತ್ತಮಂ;

ಥೀರತನಂ ಯುವಾಣೀ ಚ, ದುಕ್ಕುಲಾ ಅಪಿ ಗಾಹಿಯಾತಿ.

ಏವಞ್ಚ ಪನ ವತ್ವಾ ತಸ್ಸಾ ಸಸ್ಸಾಮಿಕಾಸ್ಸಾಮಿಕಭಾವಂ ಞತ್ವಾ ಆನೇಥಾತಿ ಆಹ, ತೇ ತಥಾ ಅಕಂಸು. ತತೋ ಬ್ರಾಹ್ಮಣೋ ತಾಯ ಗೇಹಂ ಆಗತಕಾಲತೋ ಪಟ್ಠಾಯ ಚತ್ತಾರೋ ಮಾಸೇ ರಞ್ಞೋ ಉಪಟ್ಠಾನಂ ನೇವ ಅಗಮಾಸಿ. ತಸ್ಸ ಪನ ಬ್ರಹ್ಮಣಸ್ಸ ಸನ್ತಿಕೇ ಪಞ್ಚಸತರಾಜಕುಮಾರಾ ನಾನಾವಿಧಾನಿ ಸಿಪ್ಪಾನಿ ಉಗ್ಗಣ್ಹನ್ತಿ. ತೇ ತಂ ಕಾರಣಂ ಞತ್ವಾ ಸುವಣ್ಣತಿಲಕಾಯ ವಿಜ್ಜಮಾನಾಯ ಅಮ್ಹಾಕಂ ಸಿಪ್ಪುಗ್ಗಹಣಸ್ಸ ಅನ್ತರಾಯೋ ಭವಿಸ್ಸತಿ, ಯೇನ ಕೇನಚಿ ಉಪಾಯೇನ ಏತಂ ಮಾರೇತುಂ ವಟ್ಟತೀತಿ, ಚಿನ್ತೇತ್ವಾ ತೇ ಹತ್ಥಾ ಚರಿಯಂ ಪಕ್ಕೋಸಿತ್ವಾ ಲಞ್ಜಂ ದತ್ವಾ ಏವಮಾಹಂಸು, ಹತ್ಥಿಂ ಸುರಾಯ ಮತ್ತಂ ಕತ್ವಾ ಸುವಣ್ಣತಿಲಕಂ ಮಾರೇಹೀತಿ. ತತೋ ತೇ ಸಬ್ಬೇ ರಾಜಙ್ಗಣೇ ಸನ್ನಿಪತಿತ್ವಾ ದೂತಂ ಪಾಹೇಸುಂ, ಆಚರಿಯಂ ದಟ್ಠುಕಾಮಮ್ಹಾತಿ. ತತೋ ಬ್ರಾಹ್ಮಣೇನ ಆಗನ್ತ್ವಾ ನಿಸಿನ್ನೇನ ಪಟಿಸನ್ಥಾರಂ ಕತ್ವಾ ಆಚರಿಯ ಆಚರಿಯಾನಿಂ ಪಸ್ಸಿತುಕಾಮಮ್ಹಾತಿ ಆಹಂಸು. ಅಥ ಸೋ ಸುವಣ್ಣತಿಲಕಂ ಗಹೇತ್ವಾ ಆಗಚ್ಛಥಾತಿ ಮನುಸ್ಸೇ ಪೇಸೇಸಿ. ತೇ ತಥಾ ಕರಿಂಸು, ಅಥ ತಸ್ಸಾ ವೀಥಿಮಜ್ಝಂ ಸಮ್ಪತ್ತಕಾಲೇ ಹತ್ಥಿಂ ವಿಸ್ಸಜ್ಜಾಪೇಸುಂ. ಸೋ ಸೋಣ್ಡಾಯ ಭೂಮಿಯಂ ಪಹರನ್ತೋ [ಪಹರನ್ತೋಉಪಧಾವಿತ್ವಾ ಇತಿಕತ್ಥಚಿ] ಗಚ್ಛನ್ತೋ ಉಪಧಾವಿತ್ವಾ ಸೋಣ್ಡೇನ ತಂ ಉಕ್ಖಿಪಿತ್ವಾ ಕುಮ್ಭೇ ನಿಸೀದಾಪೇಸಿ. ತತೋ ರಾಜಾನೋ ತಥಾ ತಂ ಮಾರಾಪೇತು ಮಸಕ್ಕೋನ್ತಾ ಪುನ ದಿವಸೇ ಮನುಸ್ಸೇ ಪಯೋಜೇತ್ವಾ ರತ್ತಿಯಂ ಮಾರಾಪೇಸುಂ. ಬ್ರಾಹ್ಮಣೋಪಿ ಏವರೂಪಂ ಇತ್ಥಿಂ ಅಲಸಿತ್ವಾ ಜೀವನತೋ ಮತಮೇವ [ಮತಂಮೇಸೇಯ್ಯೋ ಇತಿಕತ್ಥಚಿ] ಸೇಯ್ಯೋತಿ ಸೋಚನ್ತೋ ಪರಿದೇವನ್ತೋ ರಾಜಙ್ಗಣೇ ದಾರುಚಿತಕಂ ಕಾರಾಪೇತ್ವಾ ಅಗ್ಗಿಂಪವಿಸಿತ್ವಾ ¶ ಮತೋತಿ. ಏವಂ ಮಾತುಗಾಮವಸಙ್ಗತಾ ಮಹನ್ತಂ ಅನಯಬ್ಯಸನಞ್ಚ ಮರಣಞ್ಚ ಪಾಪುಣನ್ತೀತಿ. ವುತ್ತಞ್ಹೇತಂ ಭಗವತಾ.

೨೫.

ಮಾಯಾವೇಸಾ [ಮಾಯಾಚೇಸಾ ಇತಿಕತ್ಥಚಿ] ಮರೀಚೀವ,

ಸೋಕೋ ರೋಗೋ ಚುಪದ್ದವೋ;

ಖರಾವ ಬನ್ಧನಾ ಚೇಸಾ,

ಮಚ್ಚುಪಾಸೋ ಗುಹಾಸಯೋ;

ತಾಸು ಯೋ ವಿಸ್ಸಸೇ ಪೋಸೋ,

ಸೋ ನರೇಸು ನರಾಧಮೋತಿ.

೨೬.

ಅಯೋನಿಸೋ ಸಾ ಪುರಿಮಾಯ ಜಾತಿಯಾ,

ಪುಞ್ಞಂ ಕರಿತ್ವಾ ಅಲಭೀದಿಸಂ ಗತಿಂ;

ಧೀಸಮ್ಪಯುತ್ತಂ [ಧಿತಿಸಮ್ಪಯುತ್ತಂ ಇತಿಕತ್ಥಚಿ] ಕುಸಲಂ ಕರೋನ್ತಾ,

ನಿಬ್ಬಾಣಮೇವಾಭಿಮುಖಂ ಕರೋಥಾತಿ.

ಸುವಣ್ಣತಿಲಕಾಯ ವತ್ಥುಂ ದುತಿಯಂ.

೩೩. ಕಪಣಾಯ ವತ್ಥುಮ್ಹಿ ಅಯಮಾನುಪುಬ್ಬೀಕಥಾ

ಭಗವತಿ ಪರಿನಿಬ್ಬುತೇ ಜಮ್ಬುದೀಪೇ ತತ್ಥ ತತ್ಥ ಭಿಕ್ಖುಭಿಕ್ಖುಣಿಯೋ ಚ ಉಪಾಸಕಉಪಾಸಿಕಾಯೋ ಚ ಜಯಮಹಾಬೋಧಿಂ ವನ್ದಿಸ್ಸಾಮೀತಿ ಯೇಭುಯ್ಯೇನ ಗನ್ತ್ವಾ ವನ್ದನ್ತಿ. ಅಥಾ ಪರಭಾಗೇ ಬಹೂ ಭಿಕ್ಖೂ ಸಙ್ಗಮ್ಮ ಮಹಾಬೋಧಿಂ ವನ್ದನತ್ಥಾಯ ಗಚ್ಛನ್ತಾ ಅಞ್ಞತರಸ್ಮಿಂ ಗಾಮಕೇ ಭಿಕ್ಖಾಯ ಚರಿತ್ವಾ ಆಸನಸಾಲಂ ಗನ್ತ್ವಾ ಕತಭತ್ತಕಿಚ್ಚಾ ಥೋಕಂ ವಿಸ್ಸಮಿಂಸು, ತದಾ ತತ್ಥ ಏಕಾ ಕಪಣಾ ದುಗ್ಗತಿತ್ಥೀ ತಥಾ ನಿಸಿನ್ನಭಿಕ್ಖೂ ದಿಸ್ವಾ ಉಪಸಙ್ಕಮಿತ್ವಾ ಪಞ್ಚಪತಿಟ್ಠಿತೇನ ವನ್ದಿತ್ವಾ ಏಕಮನ್ತೇ ಠಿತಾ ಅಯ್ಯಾ ಕುಹಿಂ ಗಚ್ಛನ್ತೀತಿ ಪುಚ್ಛಿ. ಭಿಕ್ಖೂ ತಂ ಸುತ್ವಾ ಜಯಮಹಾಬೋಧಿಸ್ಸ ಆನುಭಾವಞ್ಚ ತಂ ವನ್ದನತ್ಥಾಯ ಅತ್ತಾನಂ ಗಮನಞ್ಚ ಕಥೇನ್ತಾ ಏವಮಾಹಂಸು.

೧.

ಯತ್ಥಾಸೀನೋ ¶ ಜಿನೋ ಜೇಸಿ, ಸಸೇನಂ ಮಕರದ್ಧಜಂ;

ಹನ್ತ್ವಾ ಕಿಲೇಸಸೇನಞ್ಚ, ಬುದ್ಧೋ ಆಸಿ ನಿರುತ್ತರೋ.

೨.

ಯಂ ಪೂಜೇಸಿ ಮಹಾವೀರೋ, ಠಿತೋ ಪದ ಮಕೋಪಯಂ;

ಸತ್ತರತ್ತಿನ್ದಿವಂ ನೇತ್ತ, ನೀಲನೀರಜರಂಸಿನಾ.

೩.

ಸುರಾಸುರನರಾದೀನಂ, ನೇತ್ತಾಲಿ ಪಾಳಿಪಾತನಾ;

ಮೇಚಕಾಕಾರಪತ್ತೇಹಿ, ಸಿಖಣ್ಡೀವಿಯ ಭಾತಿ ಯೋ.

೪.

ಸುರಪಾದಪೋವ ಸತ್ತಾನಂ, ಯಂ ತಿಟ್ಠತಿ ಮಹೀತಲೇ;

ಇಹ ಲೋಕೇ ಪರತ್ತೇ ಚ, ದದನ್ತೋ ಇಚ್ಛಿತಿಚ್ಛಿತಂ.

೫.

ಯಸ್ಸ ಪುರಾಣಪಣ್ಣಮ್ಪಿ, ಪತಿತಂ ಯೋ ನರೋ ಇಧ;

ಪೂಜೇತಿ ತಸ್ಸ ಸೋ ದೇತಿ, ಭವಭೋಗಂ ಮಹೀರುಹೋ.

೬.

ಗನ್ಧಮಾಲೇಹಿ ಸಲಿಲೇಹಿ, ಯಮುಪಾಸತಿ ಸದಾ ನರೋ;

ಅಜ್ಝತ್ತಞ್ಚ ಬಹಿದ್ಧಾ ಚ, ದುರಿತಂ ಸೋ ನಿಹಞ್ಞತಿ.

೭.

ಯೋ ದೇತಿ ಇಹಲೋಕತ್ಥಂ,

ಯೋ ದೇತಿ ಪಾರಲೋಕಿಕಂ,

ಸಮ್ಪದಂ ಜಯಬೋಧಿಂತಂ,

ಭೋತಿ ಗಚ್ಛಾಮ ವನ್ದಿತುಂ.

ತಂ ಸುತ್ವಾ ಉದಗ್ಗಾ ಸೋಮನಸ್ಸಜಾತಾ ಭಿಕ್ಖೂನಂ ಏವಮಾಹ. ಅಹಂ ಭನ್ತೇ ಪರಕುಲೇ ಭತಿಯಾ ಕಮ್ಮಂ ಕರೋನ್ತೀ ದುಕ್ಖೇನ ಕಸಿರೇನ ಜೀವಿಕಂ ಕಪ್ಪೇಮಿ. ಸ್ವಾತನಾಯ ಮೇ ತಣ್ಡುಲನಾಲಿಪಿ [ಭಣ್ಡುಲನಾಮ್ಪ ಇತಿಸಬ್ಬತ್ಥ] ನತ್ಥಿ, ಪಗೇವ ಅಞ್ಞಂ ಧನಂ, ಇಮಂ ವಿನಾ ಅಞ್ಞಂ ಸಾಟಕಮ್ಪಿ ನತ್ಥಿ, ಕಸ್ಮಾ ಪುಬ್ಬೇ ಅಕತಪುಞ್ಞತ್ತಾ, ತಸ್ಮಾ ಇಮಂ ಭನ್ತೇ ಸಾಟಕಂ ಮಮಾನುಗ್ಗಹಾಯ ಬೋಧಿಮ್ಹಿ ಧಜಂ ಬನ್ಧಥಾತಿ ಯಾಚಿತ್ವಾ ಸಾಟಕಂ ಧೋವಿತ್ವಾ ತೇಸಂ ಅದಾಸಿ. ಭಿಕ್ಖೂಪಿ ತಸ್ಸಾನುಗ್ಗಹಾಯ ತಂ ಗಹೇತ್ವಾ ಅಗಮಂಸು. ಸಾ ಸಾಟಕಂ ದತ್ವಾ ಪೀತಿಪಾಮೋಜ್ಜಮಾನಸಾ ಗೇಹಂ ಗನ್ತ್ವಾ ತದಹೇವ ರತ್ತಿಯಾ ಮಜ್ಝಿಮಯಾಮೇ ಸತ್ಥಕವಾತೇನ ಉಪಹತಾ ಕಾಲಂ ಕತ್ವಾ ತೇಸಂ ¶ ಭಿಕ್ಖೂನಂ ಗಮನಮಗ್ಗೇ ಏಕಸ್ಮಿಂ ರಮಣೀಯೇ ವನಸಣ್ಡೇ ಭುಮ್ಮದೇವತಾ ಹುತ್ವಾ ನಿಬ್ಬತ್ತೀ, ಅಥಸ್ಸಾ ಪುಞ್ಞಾನುಭಾವೇನ ತಿಯೋಜನಿಕೇ ಠಾನೇ ದಿಬ್ಬಕಪ್ಪರುಕ್ಖಾ ಪಾತುರಹಂಸು, ತತ್ತ ತತ್ತ ನಾನಾವಿರಾಗಧಜಪತಾಕಾ ಓಲಮ್ಬನ್ತಿ. ದೇವಪುತ್ತಾ ಚ ದೇವಧೀತರೋ ಚ ಸಬ್ಬಾಭರಣವಿಭೂಸಿತಾ ತಥೇವ ಧಜಪತಾಕಾದಯೋ ಗಹೇತ್ವಾ ಕೀಳನ್ತಿ. ನಚ್ಚಗೀತಾದಿನೇಕಾನಿ ಅಚ್ಛರಿಯಾನಿ ಪಯೋಜೇನ್ತಿ. ಅಥ ದುತಿಯದಿವಸೇ ತೇಪಿ ಭಿಕ್ಖೂ ಬೋಧಿಮಣ್ಡಲಂ ಗಚ್ಛನ್ತಾ ಸಾಯಣ್ಹೇ ತಂ ಠಾನಂ ಪತ್ವಾ ಅಜ್ಜ ಇಮಸ್ಮಿಂ ವನಸಣ್ಡೇ ವಸಿತ್ವಾ ಗಮಿಸ್ಸಾಮಾತಿ ತತ್ಥ ವಾಸಂ ಉಪಗಮಿಂಸು, ತತೋ ತೇ ರತ್ತಿಭಾಗೇ ನಾನಾವಣ್ಣಧಜೇ ಚ ದೇವತಾಹಿ ಪಯೋಜಿಯಮಾನಾ ಗೀತವಾದಿತಾದಯೋ ಚ ತಿಯೋಜನಟ್ಠಾನೇ ಕಪ್ಪರುಕ್ಖಾನಿ ಚ ಇದಂ ಸಬ್ಬಂ ದೇವಿಸ್ಸರಿಯಂ ತಸ್ಸಾನುಭಾವೇನ ನಿಬ್ಬತ್ತಭಾವಂ ದಿಸ್ವಾ ವಿಮ್ಹಿತಮಾನಸಾ ದೇವಧೀತರಂ ಆಮನ್ತೇತ್ವಾ ತ್ವಂ ಕೇನ ಕಮ್ಮೇನ ಇಧ ನಿಬ್ಬತ್ತಾತಿ ಪುಚ್ಛಿಂಸು. ಸಾ ಭಿಕ್ಖೂ ವನ್ದಿತ್ವಾ ಅಞ್ಜಲಿಂ ಪಗ್ಗಯ್ಹ ಠಿತಾ ಭನ್ತೇ ಮಂ ನ ಸಞ್ಜಾನಿತ್ಥಾತಿ ಆಹ. ಭಿಕ್ಖೂಹಿ ನ ಮಯಂ ಸಞ್ಜಾನಾಮ ಭಗಿನೀತಿ ವುತ್ತೇ ಸಾ ಅತ್ತನೋ ಸಭಾವಂ ಕಥೇನ್ತೀ ಏವಮಾಹ.

೮.

ಹೀಯ್ಯೋ ಆಸನಸಾಲಾಯ, ನಿಸೀದಿತ್ಥ ಸಮಾಗತಾ;

ತುಮ್ಹಕಂ ಸನ್ತಿಕಂ ಗಮ್ಮ, ಯಾ ವರಾಕೀಭಿವಾದಯಿ.

೯.

ಯಾ ಬೋಧಿಂ ಪೂಜನತ್ಥಾಯ, ವತ್ಥಕಂ ಪಟಿಪಾದಯಿ;

ಸಾಹಂ ಹೀಯ್ಯೋ ಚುತಾ ಆಸಿಂ, ರತ್ತಿಯಂ ಬ್ಯಾಧಿಪೀಳಿತಾ.

೧೦.

ನಾನಾಸಮ್ಪತ್ತಿಸಂಯುತ್ತಾ, ನಾನಾಭೂಸನಭೂಸಿತಾ;

ವಿಮಾನೇ ರತನಾ ಕಿಣ್ಣೇ, ಜಾತಾಹಂ ಏತ್ಥ ಕಾನನೇ.

೧೧.

ಹೀಯ್ಯೋ ಪಸ್ಸಿತ್ಥ ಮೇ ಗತ್ತಂ, ರಜೋಜಲ್ಲೇಹಿ ಸಂಕುಲಂ;

ಅಜ್ಜ ಪಸ್ಸಥ ಮೇ ಗತ್ತಂ, ವಣ್ಣವನ್ತಂ ಪಭಸ್ಸರಂ.

೧೨.

ಹೀಯ್ಯೋ ಪಸ್ಸಿತ್ಥ ಮೇ ಭನ್ತೇ, ನಿವತ್ಥಂ ಮಲಿನಮ್ಬರಂ;

ಅಜ್ಜ ಪಸ್ಸಥ ಮೇ ಭನ್ತೇ, ದಿಬ್ಬಮಮ್ಬರಮುತ್ತಮಂ.

೧೩.

ವಿಕಿಣ್ಣಫಲಿತಗ್ಗೇಹಿ ¶ , ಕೇಸೇಹಿ ವಿರಲಾ ಕುಲಂ;

ಊಕಾಗೂಥಪಟಿಕ್ಕೂಲಂ, ಹೀಯ್ಯೋ ಆಸಿಸಿರಂ ಮಮ.

೧೪.

ಅಜ್ಜ ತಂ ಪರಿವತ್ತಿತ್ವಾ, ಮಮ ಪುಞ್ಞಾನುಭಾವತೋ;

ಸುನೀಲಮುದುಧಮ್ಮಿಲ್ಲಂ, ಕುಸುಮಾ ಭರಣಭೂಸಿತಂ.

೧೫.

ಪುರಾ ಮೇ ಸಕಸೀಸೇನ, ವಹಿತಂ ದಾರೂ ದಕಾದಿಕಂ;

ಪುಞ್ಞೇನಾಹಂ ಅಜ್ಜ ಮಾಲಾ, ಭಾರಂ ಸೀಸೇ ಸಮುಬ್ಬಹೇ.

೧೬.

ಧಜತ್ಥಾಯ ಮಯಾ ಹೀಯ್ಯೋ, ಪದಿನ್ನಂ ಥೂಲಸಾಟಕಂ;

ಅಜ್ಜ ನಿಬ್ಬತ್ತಿ ಮೇ ಭೋನ್ತೋ, ಮಹನ್ತಂ ದಿಬ್ಬಸಮ್ಪದಂ.

೧೭.

ಜಾನಮಾನೇನ ಕತ್ತಬ್ಬಂ, ದಾನಾದೀಸು ಮಹಪ್ಫಲಂ;

ದೇವಲೋಕೇ ಮನುಸ್ಸೇಸು, ಸುಖದಂ ದಾನ ಮುತ್ತಮನ್ತಿ.

ತಂ ಸುತ್ವಾ ಸಬ್ಬೇ ಭಿಕ್ಖೂ ಅಚ್ಛರಿಯಬ್ಭುತಚಿತ್ತಾ ಅಹೇಸುಂ. ಸಾ ದೇವತಾ ತಸ್ಸಾ ರತ್ತಿಯಾ ಅಚ್ಚಯೇನ ಭಿಕ್ಖೂ ನಿಮನ್ತೇತ್ವಾ ದಿಬ್ಬೇಹಿ ಖಜ್ಜಭೋಜ್ಜೇಹಿ ಸಹತ್ಥಾ ಸನ್ತಪ್ಪೇತ್ವಾ ತೇಹಿ ಸದ್ಧಿಂ ಆಗಚ್ಛನ್ತೀ ಅನ್ತರಾಮಗ್ಗೇ ದಾನಂ ದದಮಾನಾ ಮಹಾಬೋಧಿಂ ಗನ್ತ್ವಾ ಸಬ್ಬೇಹಿ ಧಜಪತಾಕಾ ದೀಹಿ ಚ ನಾನಾವಿಧವಣ್ಣಗನ್ಧಸಮ್ಪನ್ನಪುಪ್ಫೇಹಿ ಚ ದೀಪಧೂಪೇಹಿ ಚ ಬೋಧಿಂ ಪೂಜೇತ್ವಾ ಭಿಕ್ಖೂನಂ ಚೀವರತ್ಥಾಯ ದಿಬ್ಬವತ್ಥಾನಿ ದತ್ವಾ ಆಗಮ್ಮ ತಸ್ಮಿಂಯೇವ ವನಸಣ್ಡೇ ವಸನ್ತೀ ನಾನಾವಿಧಾನಿ ಪುಞ್ಞಾನಿ ಕತ್ವಾ ತಾವತಿಂಸಭವನೇ ನಿಬ್ಬತ್ತಿ. ಭಿಕ್ಖೂಪಿ ತಂ ಅಚ್ಛರಿಯಂ ತತ್ಥ ತತ್ಥ ಪಕಾಸೇನ್ತಾ ಬಹೂಜನೇ ಪುಞ್ಞಕಮ್ಮೇ ನಿಯೋಜೇಸುಂತಿ.

೧೮.

ಏವಂ ವಿಧಾಪಿ ಕಪಣಾ ಜಿನಸಾಸನಮ್ಹಿ,

ಕತ್ವಾ ಪಸಾದ ಮಥ ಥೂಲಕುಚೇಲಕೇನ;

ಪೂಜೇತ್ವ ದಿಬ್ಬವಿಭವಂ ಅಲಭೀತಿ ಞತ್ವಾ,

ಪೂಜಾಪರಾ ಭವಥ ವತ್ಥುಸು ತೀಸು ಸಮ್ಮಾತಿ.

ಕಪಣಾಯ ವತ್ಥುಂ ತತಿಯಂ.

೩೪. ಇನ್ದಗುತ್ತತ್ಥೇರಸ್ಸ ವತ್ಥುಮ್ಹಿ ಅಯಮಾನುಪುಬ್ಬೀಕಥಾ

ಅಮ್ಹಾಕಂ ಭಗವತೋ ಪರಿನಿಬ್ಬಾಣತೋ ಓರಭಾಗೇ ಜಮ್ಬುದೀಪೇ ಕಿರ ಪಾಟಲಿಪುತ್ತಂ ನಾಮ ನಗರಂ ಅಹೋಸಿ. ತತ್ಥ ಧಮ್ಮಾಸೋಕೋ ನಾಮ ಮಹಿದ್ಧಿಕೋ ಮಹಾನುಭಾವೋ ಆಣಾಚಕ್ಕವತ್ತಿ ರಾಜಾ ರಜ್ಜಂ ಕಾರೇತಿ. ಉದ್ಧಂ ಆಕಾಸತೋ ಹೇಟ್ಠಾ ಪಥವಿಯಾ ಯೋಜನಪ್ಪಮಾಣೇ ಸಕಲಜಮ್ಬೂದೀಪೇ ತಸ್ಸ ಆಣಾ ಪವತ್ತತಿ, ತದಾ ಸಕಲಜಮ್ಬುದೀಪವಾಸಿನೋ ಚ ಚತುರಾಸೀತಿ ನಗರಸಹಸ್ಸೇ ರಾಜಾನೋ ಚ ಅತ್ತನೋ ಅತ್ತನೋ ಬಲವಾಹನೇ ಗಹೇತ್ವಾ ಆಗಮ್ಮ ಧಮ್ಮಾಸೋಕಮಹಾರಞ್ಞೋ ಉಪಟ್ಠಾನಂ ಕರೋನ್ತಿ. ತಸ್ಮಿಂ ಸಮಯೇ ದೇವಪುತ್ತನಗರೇ ದೇವಪುತ್ತೋ ನಾಮ ಮಹಾರಾಜಾ ಅತ್ತನೋ ಬಲವಾಹನಂ ಗಹೇತ್ವಾ ರಞ್ಞೋ ಉಪಟ್ಠಾನಂ ಅಗಮಾಸಿ. ಧಮ್ಮಾಸೋಕೋ ದೇವಪುತ್ತಮಹಾರಾಜಾನಂ ದಿಸ್ವಾ ಮಧುರಪಟಿಸನ್ಥಾರಂ ಕತ್ವಾ ತುಮ್ಹಾಕಂ ರಟ್ಠೇ ಬಹುಸ್ಸುತಾ ಆಗತಾಗಮಾ ಮಹಾಗುಣವನ್ತಾ ಅಯ್ಯಾ ಅತ್ಥೀತಿ ಪುಚ್ಛಿ. ತಂ ಸುತ್ವಾ ದೇವಪುತ್ತರಾಜಾ ಅತ್ಥಿ ದೇವ ತಸ್ಮಿಂ ನಗರೇ ಸೀಹಕುಮ್ಭಕಂ ನಾಮ ಮಹಾವಿಹಾರಂ. ತತ್ಥ ಅನೇಕಸಹಸ್ಸಭಿಕ್ಖೂ ವಿಹರನ್ತಿ ಸೀಲವನ್ತಾ ಅಪ್ಪಿಚ್ಛಾ ಸನ್ತುಟ್ಠಾ ವಿವೇಕಕಾಮಿನೋ. ತೇಸು ಸಾಟ್ಠಕಥಾತಿಪಿಟಕಧರೋ ಇನ್ದಗುತ್ತತ್ಥೇರೋ ನಾಮ ತೇಸಂ ಪಾಮೋಕ್ಖೋ ಅಹೋಸಿ. ಸೋ ಅನೇಕಪರಿಯಾಯೇನ ಸನರಾಮರಾನಂ ಭಿಕ್ಖೂನಂ ಧಮ್ಮಂವಣ್ಣೇತಿ. ಗುಣವಾ ಅತ್ತನೋ ಗುಣಂ ನಿಸ್ಸಾಯ ಲೋಕೇ ಪಾಕಟೋತಿ. ತಂ ಸುತ್ವಾ ರಾಜಾ ತುಟ್ಠಮಾನಸೋ ಥೇರಂ ಪಸ್ಸಿತುಕಾಮೋ ಹುತ್ವಾ ಸಮ್ಮ ತ್ವಮೇವ ಗನ್ತ್ವಾ ಥೇರಂ ಯಾಚಿತ್ವಾ ಇಧಾ ನೇಹೀತಿ ಆಹ. ತಂ ಸುತ್ವಾ ದೇವಪುತ್ತರಾಜಾ ಅತ್ತನೋ ಹತ್ಥಸ್ಸಬಲವಾಹನಾ ದಿಮಹಾ ಸೇನಙ್ಗಪರಿವುತೋ ಇನ್ದಗುತ್ತತ್ಥೇರಸ್ಸ ಸನ್ತಿಕಂ ಗನ್ತ್ವಾ ವನ್ದಿತ್ವಾ ಅಯ್ಯ ಅಯ್ಯಂ ಧಮ್ಮಾಸೋಕಮಹಾರಾಜಾ ದಟ್ಠುಕಾಮೋತಿ ಆಹ. ಥೇರೇನ ಸಾಧೂತಿ ಸಮ್ಪಟಿಚ್ಛಿತೇ ರಾಜಾ ಥೇರೇನ ಸಮ್ಪಟಿಚ್ಛಿತಭಾವಂ ಧಮ್ಮಾಸೋಕಮಹಾರಾಜಿನೋ ಪೇಸೇಸಿ. ತತೋ ಧಮ್ಮಾಸೋಕಮಹಾರಾಜಾ ಸೋಮನಸ್ಸಪ್ಪತ್ತೋ ಅತ್ತನೋ ಆಣಾಪವತ್ತಿತಟ್ಠಾನೇ ರಾಜೂನಂ ಸಾಸನಂ ಪೇಸೇಸಿ. ಸಬ್ಬೇವ ಥೇರಾಗಮನಮಗ್ಗಂ ¶ ಅಲಙ್ಕರೋನ್ತೂತಿ. ಅಥ ತೇ ರಾಜಾನೋ ತುಟ್ಠಪಹಟ್ಠಾ ಅತ್ತನೋ ಅತ್ತನೋ ನಗರೇ ಭೇರಿಂ ಚರಾಪೇತ್ವಾ ದೇವಪುತ್ತನಗರತೋ ಯಾವ ಪಾಟಲಿಪುತ್ತನಗರಂ ಏತ್ಥನ್ತರೇ ಪಞ್ಚಪಣ್ಣಾಸಯೋಜನಿಕಂ ಮಗ್ಗಂ ವಿಸಮಂ ಸಮಂ ಕರೋನ್ತೋ ದೇವತಾನಂ ದಿಬ್ಬವೀಥಿಮಿವ ಅಲಙ್ಕರಿತ್ವಾ ಧಮ್ಮಾಸೋಕಮಹಾನರಿನ್ದಸ್ಸ ಏವಂ ಸಾಸನಂ ಪೇಸೇಸುಂ. ಭವನ್ತೇತ್ಥ.

೧.

ಇನ್ದಗುತ್ತಮಹಾಥೇರ, ಸಾಮಿನೋ ಗಮನಾಯ ನೋ;

ಮಗ್ಗಂ ಅಲಙ್ಕರೋನ್ತೂತಿ, ಮಹಾರಾಜೇನ ಪೇಸಿತಂ.

೨.

ತತೋ ತೇ ಅಪನೇತ್ವಾನ, ಪಾಸಾಣಕಣ್ಟಕಾದಿಕಂ;

ವಿಸಮಂ ಸಮಂ ಕರಿತ್ವಾನ, ಸಮ್ಮಜ್ಜಿತ್ವಾನ ಸಾಧುಕಂ.

೩.

ಧೋತಮುತ್ತಾ ಸಮಾಭಾಸಾ, ಓಕಿರಿತ್ವಾನ ವಾಲುಕಾ;

ಉಸ್ಸಾಪಿತಾ ತತ್ಥ ತತ್ಥ, ದುಸ್ಸತೋರಣಪನ್ತಿಯೋ.

೪.

ಕಲಧೋತಹೇಮರಮ್ಭಾದಿ, ನಾನಾತೋರಣಪನ್ತಿಯೋ;

ತಥಾ ಪುಪ್ಫಮಯಾ ನೇಕ, ತೋರಣೂಪರಿತೋರಣಾ.

೫.

ತೇಸು ತೇಸುಚ ಠಾನೇಸು, ಸಙ್ಖತಾ ಕುಸುಮಗ್ಘಿಕಾ;

ತಥೇವ ಗನ್ಧತೇಲೇಹಿ, ದೀಪಿತಾ ದೀಪಪನ್ತಿಯೋ.

೬.

ಪದುಮುಪ್ಪಲಸನ್ನೀರ, ಪುಪ್ಫಪಲ್ಲವ ಲಙ್ಕತಾ;

ಠಪಿತಾ ಘಟಮಾಲಾಯೋ, ಪುಣ್ಣಾ ಸೋಗನ್ಧವಾರಿಹಿ.

೭.

ನಿಲಪೀತಾ ದಿಸಮ್ಭಿನ್ನ, ಪತಾಕಾಹಿ ಧಜೇಹಿ ಚ;

ಮಗ್ಗಸ್ಸ ಉಭತೋ ಪಸ್ಸೇ, ವನಮಾಸಿ ಸಮಾಕುಲಂ.

೮.

ಕೇತವೋ ಉಗ್ಗತಾ ತತ್ಥ, ಮನ್ದಮನ್ದಸಮೀರಣಾ;

ಅವ್ಹಯನ್ತಾವ ಸೋಭನ್ತಿ, ಬ್ರಹ್ಮೋರಗಸುರಾದಯೋ.

೯.

ನಾಗಚಮ್ಪಪುನ್ನಾಗ, ಕೇತಕೀವಕುಲಾದಿಹಿ;

ಪದುಮುಪ್ಪಲಾ ದಿಜಲಜೇಹಿ, ಮಾಲತೀ ಕುಸುಮಾ ದಿಹಿ.

೧೦.

ಮಾಲಾದಾಮೇಹಿ ¶ ನೇಕೇಹಿ, ಮಗ್ಗಮಾಸಿ ವಿಚಿತ್ತಕಂ;

ಪತ್ಥರಿತ್ವಾ ಪಾದಪಟೇ, ಸಿತ್ತಸಮ್ಮತ್ತಭೂಮಿಯಂ.

೧೧.

ಲಾಜಾದಿಪಞ್ಚಪುಪ್ಫಾನಿ, ವಿಕಿರಿಂಸು ಮನೋರಮಂ;

ಅಲಙ್ಕರಿತ್ವಾ ಹತ್ತಸ್ಸಾ, ಕುಸುಮಾ ಭರಣಾದಿಹಿ.

೧೨.

ಮಗ್ಗಾಲಙ್ಕರಣತ್ಥಾಯ, ಠಪಿತಾಸುಂ ತತೋ ತತೋ;

ತೇಸು ತೇಸು ಚ ಠಾನೇಸು, ಭೇರಿಮಣ್ಡಲಮಜ್ಝಗಾ.

೧೩.

ನಚ್ಚನ್ತಿ ಚಾತುರಾ ನಾರೀ, ರಸಭಾವನಿರನ್ತರಾ;

ಕಂಸವಂಸಾದಿಪಗ್ಗಯ್ಹ, ವಜ್ಜೇನ್ತಾನೇಕತನ್ತಿಯೋ.

೧೪.

ಗಾಯನ್ತಿ ಮಧುರಂ ಗೀತಂ, ಗಾಯನ್ತೇತ್ಥ ಲಯಾನ್ವಿತಂ;

ಮಗ್ಗೋಸೋ ಸಾಧುವಾದೇಹಿ, ಭೇರಿತನ್ತಿನದೇಹಿಚ.

೧೫.

ಕರೀನಂ ಕೋಞ್ಚನಾದೇಹಿ, ಹಯಾನಂ ಹೇಸಿತೇಹಿ ಚ;

ನೇಕವಿಟಙ್ಕಸಙ್ಘೇಹಿ, ಸೋ ಕರೀಹಿ ಸಮಾಕುಲೋ.

೧೬.

ಮಗ್ಗಸ್ಸ ಉಭತೋ ಪಸ್ಸೇ, ದೇವಕಞ್ಞೂಪಮಾ ಸುಭಾ;

ಮಾಲಾಕಲಾಪೇ ಪಗ್ಗಯ್ಹ, ತಿಟ್ಠನ್ತಿ ತುಟ್ಠಮಾನಸಾ.

೧೭.

ತಥಾ ಪುಣ್ಣಘಟೇ ಗಯ್ಹ, ಪದುಮುಪ್ಪಲಸಂಕುಲೇ,

ಅಟ್ಠಮಙ್ಗಲಮುಗ್ಗಯ್ಹ, ತಿಟ್ಠನ್ತಿ ಪಮದಾ ತಹಿಂ.

೧೮.

ಸೀತಲೂದಕಸಮ್ಪನ್ನ, ಪಪಾಹಿ ಸಮಲಙ್ಕತಾ;

ಸಿನಾನತ್ಥಂ ಖತಾ ಆಸುಂ, ಪೋಕ್ಖರಞ್ಞೋ ತಹಿಂತಹಿಂ.

೧೯.

ತಹಿಂತಹಿಂಕತಾ ಆಸುಂ, ದಾನಸಾಲಾ ಮನೋರಮಾ;

ನಿಚಿತಾಸುಮನೇಕಾನಿ, ದಾನೋಪಕರಣಾ ತಹಿಂ.

೨೦.

ಏವಂ ನೇಕವಿಧಾ ಪೂಜಾ, ಅಮ್ಹೇಹಿ ಪಟಿಪಾದಿತಾ;

ಠಪೇತ್ವಾನ ಮಹಾಗಙ್ಗಂ, ತಂ ಜಾನಾತು ಮಹೀಪತೀತಿ.

ತಂ ಸುತ್ವಾ ಅಸೋಕಮಹಾರಾಜಾ ಗಙ್ಗಂ ಅಲಙ್ಕರೋಥಾತಿ ಸೋಳಸಯಕ್ಖೇ ಪೇಸೇಸಿ, ತೇ ಸಪರಿವಾರಾ ತತ್ಥ ಗನ್ತ್ವಾ ಅತ್ತನೋ ¶ ಆನುಭಾವೇನ ಗಙ್ಗಾಯ ಅನ್ತೋ ತಿಗಾವುತಟ್ಠಾನೇ ಉದುಕ್ಖಲಪಾಸಾಣೇ ಠಪೇಸುಂ. ಠಪೇತ್ವಾ ಥಮ್ಭೇ ಉಸ್ಸಾಪೇತ್ವಾ ತುಲಾಸಂಘಾಟೇ ದತ್ವಾ ಹಿಮವನ್ತತೋ ರತ್ತಚನ್ದನಸಾರೇ ಆಹರಿತ್ವಾ ಪದರೇ ಸನ್ಥರಿತ್ವಾ ಅನೇಕೇಹಿ ಪೂಜಾವಿಧಾನೇಹಿ ಅಲಙ್ಕರಿತ್ವಾ ರಞ್ಞೋ ಏವಂ ಸಾಸನಂ ಪೇಸೇಸುಂ. ಭವನ್ತೇತ್ಥ.

೨೧.

ಯಮತ್ಥಾಯ ಮಯಂ ಸಬ್ಬೇ, ಮಹಾರಾಜೇನ ಪೇಸಿತಾ;

ಅಮ್ಹೇಹಿ ದಾನಿ ತಂ ಸಬ್ಬಂ, ಕತಮೇವ ಸುಣೋಥ ತಂ.

೨೨.

ಗಾವುತತ್ತಯಗಮ್ಭೀರಂ, ಗಙ್ಗಂ ಯೋಜನವಿತ್ಥತಂ;

ಥಮ್ಭೇ ಪತಿಟ್ಠಪೇತ್ವಾನ, ಅನಗ್ಘಂ ರತ್ತಚನ್ದನಂ.

೨೩.

ಹಿಮವನ್ತತೋ ಹರಿತ್ವಾನ, ಸೇತುಂ ತತ್ಥ ಸುಮಾಪಿತಂ;

ತೋರಣಾ ಚ ಉಭೋ ಪಸ್ಸೇ, ರತನೇಹಿ ಸುನಿಮ್ಮಿತಾ.

೨೪.

ಪುಣ್ಣಕುಮ್ಭದ್ಧಜಾ ಚೇವ, ಪದೀಪಾವಲಿಯೋ ತಥಾ;

ಉಭೋ ಪಸ್ಸೇಸು ರತನಾನಿ, ಮಾಪೇತ್ವಾಲಮ್ಬನಾನಿಚ.

೨೫.

ಸುವಣ್ಣಮಣಿಮುತ್ತಾದಿ, ದಾಮೇಹಿ ಸಮಲಙ್ಕತಾ;

ವಾಲುಕತ್ಥಾಯ ಓಕಿಣ್ಣಾ, ಧೋತಮುತ್ತಾ ಪಭಸ್ಸರಾ.

೨೬.

ತೇಸು ತೇಸು ಚ ಠಾನೇಸು, ಠಪಿತಾಸುಂ ಮಹಾಮಣೀ;

ನಾನಾರಾಗವಿತಾನೇಹಿ, ಸೋಭಿತಾ ಸೇತುನೋ ಪರಿ.

೨೭.

ಓಲಮ್ಬಿತಾಸುಂ ತತ್ಥೇವ, ದಿಬ್ಬಾದಿಕುಸುಮಾದಯೋ;

ನಿಟ್ಠಿತಂ ಇಧ ಕಾತಬ್ಬ, ಯುತ್ತಂ ಪೂಜಾವಿಧಿಂತು ನೋ;

ದೇವೋತಂ ಪಟಿಜಾನಾತು, ಇತಿ ವತ್ವಾನ ಪೇಸಯುಂತಿ.

ತಮ್ಪಿ ಸುತ್ವಾ ಅಸೋಕೋ ಮಹಾರಾಜಾ ತುಮ್ಹೇವ ಥೇರಂ ಇಧಾನೇಥಾತಿ ತೇಸಂಯೇವ ಸಾಸನಂ ಪಟಿಪೇಸೇಸಿ, ತೇ ಸಾಧೂತಿ ಇನ್ದಗುತ್ತತ್ಥೇರಸ್ಸ ಸನ್ತಿಕಂ ಗನ್ತ್ವಾ ವನ್ದಿತ್ವಾ ಭನ್ತೇ ಪಾಟಲಿಪುತ್ತನಗರಸ್ಸ ಗಮನಾಯ ಕಾಲೋತಿ ಆಹಂಸು, ತತೋ ಥೇರೋ ಸಟ್ಠಿಸಹಸ್ಸಮತ್ತೇಹಿ ¶ ಭಿಕ್ಖುಸಙ್ಘೇಹಿ ಪರಿವುತೋ ಪಞ್ಚಪಣ್ಣಾಸಯೋಜನಮಗ್ಗಂ ಪಟಿಪಜ್ಜಿ. ಅಥಾಪರಂ ದೇವಪುತ್ತನಗರವಾಸಿನೋ ಅನೇಕವಿಧಮಾಲಾಗನ್ಧವಾಸಚುಣ್ಣದ್ಧಜಪತಾಕಾದೀಹಿ ಅನೇಕೇಹಿ ತಾಲಾವಚರೇಹಿ ನಚ್ಚಗೀತವಾದಿತೇಹಿ ಪೂಜೇತ್ವಾ ಅಗಮಂಸು. ಅಥ ಥೇರೋ ಮಹನ್ತೇನ ಪೂಜಾವಿಧಾನೇನ ಜಮ್ಬುದೀಪವಾಸೀಹಿ ಪೂಜಿಯಮಾನೋ ಅನುಕ್ಕಮೇನ ಚನ್ದಭಾಗಾಯ ಗಙ್ಗಾಯ ಸೇತುಂ ಪತ್ವಾ ತತ್ಥ ಮಹನ್ತಂ ಪೂಜಾವಿಧಾನಂ ಓಲೋಕೇನ್ತೋ ಏವಂ ಚಿನ್ತೇಸಿ, ಏವಂ ಉಳಾರಂ ಪೂಜಾವಿಧಾನಂ ಇದಾನಿ ಜಮ್ಬುದೀಪೇ ನಾಞ್ಞಸ್ಸ ಹೋತಿ, ಮಯ್ಹಮೇವೇತಂ ಕತಂ. ಅಹಮೇವೇತ್ತ ಉತ್ತಮೋ ಅಪ್ಪಟಿಮೋತಿ ಏವಂ ಸೇಯ್ಯಸ್ಸ ಸೇಯ್ಯೋಹಮಸ್ಮೀತಿ ಮಾನಂ ಉಪ್ಪಾದೇತ್ವಾ ಅಟ್ಠಾಸಿ. ತಸ್ಮಿಂ ಖಣೇ ಏಕೋ ಖೀಣಾಸವತ್ಥೇರೋ ತಂ ಮಾನೇನುಪತ್ಥದ್ಧಚೇತಸಾ ಠಿತಂ ದಿಬ್ಬಚಕ್ಖುನಾ ದಿಸ್ವಾ ಉಪಸಙ್ಕಮಿತ್ವಾ ವನ್ದಿತ್ವಾ ಥೇರಸ್ಸ ಓವದನ್ತೋ ಏವಮಾಹ. ತಸ್ಮಾ.

೨೮.

ಮಾ ಮಾನಸ್ಸ ವಸೀ ಹೋಥ, ಮಾನೋ ಭನ್ತೇ ವಸಂಗತಂ [ಮಾನಂಭನ್ತೇವಸೀಕತಂ ಇತಿಸಬ್ಬತ್ಥ];

ಅನತ್ಥದೋ ಸದಾ ಹೋತಿ, ಪಾತೇತ್ವಾನ ಭವಾ ವಟೇ.

೨೯.

ಮಾನೋ ಪಲಾಲಿತೋ ಸತ್ತೋ, ತಣ್ಹಾಪಟಿಘಸಙ್ಗತೋ;

ಮಕ್ಕಟೋರಗಸೋಣಾದಿ, ಹುತ್ವಾ ಜಾಯತಿ ಜಾತಿಸು.

೩೦.

ಮಾ ಮಾನಂ ಸಾಮಿ ಪೂರೇಹಿ, ಅತ್ತಾನಂ ಪರಿಸೋಧಯ;

ಅಪರಿಸುದ್ಧಾ ಸಯೋ ಭಿಕ್ಖು, ದಾಯಕಂ ನ ಪರಿತೋಸತಿ.

೩೧.

ದದನ್ತಾನಂ ಸರನ್ತಾನಂ, ಪೂಜೇನ್ತಾನಂ ಸಚೇ ತುವಂ;

ಮಹಪ್ಫಲಂ ಮಹಾಭೂತಿಂ, ಕಾಮತ್ಥ ಹೋಥ ನಿಬ್ಬಣಾತಿ [ನಿಮ್ಮನಾ ಇತಿಕತ್ತಚಿ].

ತಂ ಸುತ್ವಾ ಥೇರೋ ಸಂಸಾರೇ ನಿಬ್ಬಿನ್ದೋ ತತ್ಥೇವ ಠಿತೋ ತಿಲಕ್ಖಣಂ ಪಟ್ಠಪೇತ್ವಾ ಕರಜಕಾಯಂ ಸಮ್ಮಸನ್ತೋ ಸಹಪಟಿ ಸಮ್ಭಿದಾಹಿ ಅರಹತ್ತಂ ಪತ್ವಾವ ನಿಕ್ಖಮಿ. ತತೋ ಧಮ್ಮಾಸೋಕಮಹಾರಾಜಾ ಬಲವಾಹನಪರಿವುತೋ ಮಹನ್ತೇನ ಪೂಜಾವಿಧಾನೇನ ಪಟಿಮಗ್ಗಂ ಆಗಮ್ಮ ವನ್ದಿತ್ವಾ ¶ ತತೋ ದಿಗುಣಂ ಪೂಜಾಸಕ್ಕಾರಂ ಕುರುಮಾನೋ ಮಹಾಭಿಕ್ಖುಸಙ್ಘೇನ ಸದ್ಧಿಂ ಥೇರಂ ಅತ್ತನೋ ನಗರಂ ನೇತ್ವಾ ತಸ್ಸ ಧಮ್ಮಕಥಂ ಸುತ್ವಾ ಪಸನ್ನಮಾನಸೋ ಪಞ್ಚಸೀಲೇ ಪತಿಟ್ಠಾಯ ಮಹನ್ತಂ ವಿಹಾರಂ ಕಾರೇತ್ವಾ ಥೇರೇನ ಸಹಾಗತಾನಂ ಸಟ್ಠಿಸಹಸ್ಸಾನಂ ಭಿಕ್ಖೂನಂ ಚತುಪಚ್ಚಯೇಹಿ ಉಪಟ್ಠಾನ ಮಕಾಸಿ, ಅಥ ಥೇರೋ ಸಾಟ್ಠಕಥಂ ಪಿಟಕತ್ತಯಂ ಪಕಾಸೇನ್ತೋ ತಸ್ಮಿಂ ಚಿರಂ ವಸಿತ್ವಾ ತತ್ಥೇವ ಪರಿನಿಬ್ಬಾಯಿ. ತತೋ ರಾಜಾ ಸಪರಿಸೋ ತಸ್ಸ ಸರೀರನಿಕ್ಖೇಪಂ ಕಾರೇತ್ವಾ ಧಾತುಯೋ ಗಹೇತ್ವಾ ಮಹನ್ತಂ ಚೇತಿಯಂ ಕಾರಾಪೇಸೀತಿ.

೩೨.

ಪುರಾತನಾನಂ ಭುವಿ ಪುಞ್ಞಕಮ್ಮಿನಂ,

ಗುಣಾನುಭಾವೇನ ಮಹೇನ್ತಿ ಏವಂ;

ಸದೇವಕಾ ನಂ ಮನಸೀಕರೋನ್ತಾ,

ಪುಞ್ಞಂ ಕರೋಥಾ ಯತನೇ ಸದಾ ದರಾತಿ.

ಇನ್ದಗುತ್ತತ್ಥೇರಸ್ಸ ವತ್ಥುಂ ಚತುತ್ಥಂ.

೩೫. ಸಾಖಮಾಲಪೂಜಿಕಾಯ ವತ್ಥುಮ್ಹಿ ಅಯಮಾನುಪುಬ್ಬೀಕಥಾ

ಅಮ್ಹಾಕಂ ಭಗವಾ ದಸಪಾರಮಿಯೋ ಪೂರೇತ್ವಾ ಅನುಕ್ಕಮೇನ ತುಸಿತಭವನೇ ನಿಬ್ಬತ್ತೋ ದೇವೇಹಿ ಆರಾಧಿತೋ ಸಕ್ಕರಾಜಕುಲೇ ಪಟಿಸನ್ಧಿಂ ಗಹೇತ್ವಾ ಮಾತುಕುಚ್ಛಿತೋ ನಿಕ್ಖನ್ತೋ ಅನುಕ್ಕಮೇನ ಪರಮಾಭಿಸಮ್ಬೋಧಿಂ ಪತ್ವಾ ತತೋ ಪಟ್ಠಾಯ ಪಞ್ಚಚತ್ತಾಲೀಸಸಂವಚ್ಛರಾನಿ ಠತ್ವಾ ಚತುರಾಸೀತಿಧಮ್ಮಕ್ಖನ್ಧಸಹಸ್ಸಾನಿ ದೇಸೇತ್ವಾ ಗಣನಪಥಮತೀತೇ ಸತ್ತೇ ಭವಕನ್ತಾರತೋ ಸನ್ತಾರೇತ್ವಾ ಸಬ್ಬಬುದ್ಧಕಿಚ್ಚಾನಿ ನಿಟ್ಠಾಪೇತ್ವಾ ಕುಸಿನಾರಾಯಂ ಉಪವತ್ತನೇ ಮಲ್ಲಾನಂ ಸಾಲವನೇ ಯಮಕಸಾಲಾನ ಮನ್ತರೇ ಉತ್ತರಸೀಸಕಂ ಪಞ್ಞತ್ತೇ ಮಞ್ಚಕೇ ವೇಸಾಖಪುಣ್ಣದಿವಸೇ ದಕ್ಖಿಣೇನ ಪಸ್ಸೇನ ಸತೋ ಸಮ್ಪಜಾನೋ ಅನುಟ್ಠಾನಸೇಯ್ಯಾಯ ನಿಪನ್ನೋ ಪಚ್ಛಿಮಯಾಮೇ ಭಿಕ್ಖೂ ಓವದಿತ್ವಾ ಬಲವಪಚ್ಚೂ-ಸ ¶ ಸಮಯೇ ಮಹಾಪಥವಿಂಕಮ್ಪೇನ್ತೋ ಅನುಪಾದಿಸೇಸಾಯ ನಿಬ್ಬಾಣಧಾತುಯಾ ಪರಿನಿಬ್ಬಾಯಿ, ನಿಬ್ಬುತೇ ಪನ ಭಗವತಿ ಲೋಕನಾಥೇ ಆನನ್ದತ್ಥೇರೋ ಮಲ್ಲರಾಜೂನಂ ಏತಂ ಪವತ್ತಿಂ ಆರೋಚೇಸಿ. ತತೋ ಕೋಸಿನಾರಕಾ ಚ ದೇವಬ್ರಹ್ಮಾದಯೋ ಚ ಸನ್ನಿಪತಿತ್ವಾ ನಚ್ಚಗೀತವಾದಿತೇಹಿ ಮಾಲಾಗನ್ಧಾದೀಹಿ ಚ ಸಕ್ಕರೋನ್ತಾ ಗರುಕರೋನ್ತಾ ಮಾನೇನ್ತಾ ಪೂಜೇನ್ತಾ ಚೇಲವಿತಾನಾದಯೋ ಕರೋನ್ತಾ ಭಗವತೋ ಸರೀರಂ ನಗರಮಜ್ಝೇ ಯತ್ಥ ಮಕುಟಬನ್ಧನಂ ನಾಮ ಮಲ್ಲಾನಂ ಚೇತಿಯಂ, ತತ್ಥ ನೇತ್ವಾ ಚಕ್ಕವತ್ತಿಸ್ಸ ಸರೀರಂ ವಿಯ ಅಹತೇನ ವತ್ಥೇನ ವೇಠೇತ್ವಾ ತತೋ ವಿಹತೇನ ಕಪ್ಪಾಸೇನ ವೇಠೇತ್ವಾತಿ ಏವಂ ಪಞ್ಚದುಸ್ಸಯುಗಸತೇಹಿ ವೇಠೇತ್ವಾ ಆಯಸಾಯ ತೇಲದೋಣಿಯಾ ಪಕ್ಖಿಪಿತ್ವಾ ಅಞ್ಞಿಸ್ಸಾಯ ಆಯಸಾಯ ದೋಣಿಯಾ ಪಟಿಕುಜ್ಜಿತ್ವಾ ಸಬ್ಬಗನ್ಧಾನಂ ಚಿತಕಂ ಕರಿತ್ವಾ ಭಗವತೋ ಸರೀರಂ ಚಿತಕಂ ಆರೋಪೇಸುಂ. ಅಥ ಮಹಾಕಸ್ಸಪತ್ಥೇರೇನ ಭಗವತೋ ಪಾದೇ ಸಿರಸಾ ವನ್ದಿತೇ ದೇವತಾನುಭಾವೇನ ಚಿತಕೋ ಸಮನ್ತಾ ಏಕಪ್ಪಹಾರೇನೇವ ಪಜ್ಜಲಿ. ಭಗವತೋ ಪನ ಸರೀರೇ ದಡ್ಢೇ ಸುಮನಮಕುಳಸದಿಸಾ ಧಾತುಯೋ ಅವಸಿಸ್ಸಿಂಸು. ತಸ್ಮಿಂ ಕಿರ ಸಮಯೇ ಕೋಸಲರಞ್ಞೋ ಜನಪದೇ ಅಞ್ಞತರಾ ಗಾಮವಾಸಿಕಾ ಇತ್ಥೀ ಭಗವತಿ ಪರಿನಿಬ್ಬುತೇ ಸಾಧುಕೀಳ್ಹಂ ಆಗಚ್ಛಮಾನಾ ಅನ್ತರಾಮಗ್ಗೇ ಅತ್ತನೋ ಸರೀರೇ ಉಪ್ಪನ್ನವಾತರೋಗೇನ ಉಪದ್ದುತಾ ಸಾಧುಕೀಳ್ಹಂ ಸಮ್ಪಾಪುಣಿತುಂ ಅಸಕ್ಕೋನ್ತೀ ಸತ್ಥು ಆಳಾಹನಂ ಗನ್ತ್ವಾ ಭಗವತೋ ಧಾತುಸರೀರೇ ತೀಣಿ ಸಾಖಪುಪ್ಫಾನಿ ಪೂಜೇತ್ವಾ ಪಸನ್ನಮಾನಸಾ ಪಞ್ಚಪತಿಟ್ಠಿತೇನ ವನ್ದಿತ್ವಾ ಗತಾ ತಾಯ ಏವ ರತ್ತಿಯಾ ಮಜ್ಝಿಮಯಾಮೇ ಕಾಲಂ ಕತ್ವಾ ತಾವತಿಂಸಭವನೇ ತಿಂಸಯೋಜನಿಕೇ ಕನಕವಿಮಾನೇ ನಿಬ್ಬತ್ತಿ. ತಸ್ಸಾ ಪುಬ್ಬಕಮ್ಮಪಕಾಸನತ್ಥಂ ಚಕ್ಕಮತ್ತಾನಿ ಸಾಖಪುಪ್ಫಾನಿ ತತ್ತ ತತ್ಥ ಓಲಮ್ಬನ್ತಿ. ತೇಹೇವ ಸಬ್ಬಂ ವಿಮಾನಂ ಏಕೋಭಾಸೀ [ಏಕೋಭಾಸಿ ತತೋ ಇತಿಸಬ್ಬತ್ಥ] ಅಹೋಸಿ. ತತೋ ಸುಗನ್ಧಕರಣ್ಡಕಂ ವಿಯ ಚ ಅಹೋಸಿ, ಸಾ ಪನ ಅತ್ತನೋ ಸೋಭಗ್ಗಪ್ಪತ್ತಂ ಅತ್ತಭಾವಞ್ಚ ವಿಮಾನಸಮ್ಪದಞ್ಚ ಪರಿವಾರಸಮ್ಪತ್ತಿಯೋ ಚ ದಿಸ್ವಾ ವಿಮ್ಹಿತಮಾನಸಾ ಪುಬ್ಬೇ ಕತೇನ [ಪುಬ್ಬೇಕಿಸ್ಸಮೇ. ಪುಬ್ಬೇಕತೇನಮೇ ಇತಿಚಕತ್ಥಚಿ] ¶ ಕೇನ ಮೇ ಪುಞ್ಞಕಮ್ಮೇನಾ ಯಂ ಲದ್ಧಾತಿ ಓಲೋಕನ್ತೀ ಭಗವತೋ ಧಾತುಸರೀರಸ್ಮಿಂ ಪೂಜಿತಾನಿ ತೀಣಿ ಸಾಖಪುಪ್ಫಾನಿ ದಿಸ್ವಾ ಪಸನ್ನಮಾನಸಾ ಮಹಾಚಕ್ಕಪ್ಪಮಾಣಂ ಸಾಖಮಾಲಂ ಹತ್ಥೇನ ಧಾರೇನ್ತೀ ಧಾತುಪೂಜನತ್ಥಾಯ ಅಗಮಾಸಿ. ತದಾ ತತ್ಥ ಸನ್ನಿಪತಿತಾ ಮನುಸ್ಸಾ ತಸ್ಸಾ ರೂಪಸಮ್ಪದಞ್ಚ ಹತ್ತೇ ಮಹನ್ತಂ ಸಾಖಮಾಲಞ್ಚ ದಿಸ್ವಾ ವಿಮ್ಹಿತಮಾನಸಾ ಅಮ್ಮ ತ್ವಂ ಕತ್ಥ ವಾಸಿಕಾ. ಕತ್ಥ ಪನಿಮಂ ಪುಪ್ಫಂ ಪಟಿಲದ್ಧನ್ತಿ ಪುಚ್ಛಿಂಸು, ತಂ ಸುತ್ವಾ ದೇವಧೀತಾ ಅತ್ತನಾ ಭಗವತೋ ಧಾತುಸರೀರಸ್ಸ ಪೂಜಿತಸಾಖಮಾಲತ್ತಯಾನುಭಾವೇನ ಪಟಿಲದ್ಧಸಮ್ಪತ್ತಿಯೋ ಚ ದಿಬ್ಬವಿಮಾನಞ್ಚ ಪುಬ್ಬೇ ಮತಕಲೇವರಂ ಚಾತಿ ಸಬ್ಬಂ ತೇಸಂ ದಸ್ಸೇತ್ವಾ ಧಮ್ಮದೇಸನಾವಸಾನೇ ಆಹ.

೧.

ಸಮಾಗತಾ ಭವನ್ತಾ ಭೋ, ಪಸ್ಸನ್ತು ಮಮ ಸಮ್ಪದಂ;

ಕತಮಪ್ಪೇನ ಕಾರೇನ, ಸಮ್ಮಾಸಮ್ಬುದ್ಧಧಾತುಯಾ.

೨.

ಸಾಖಮಾಲಾನಿ ತೀಣೇವ, ಹೀಯ್ಯೋಹಂ ಮುನಿಧಾತುಯಾ;

ಪೂಜಯಿತ್ವಾನ ಸನ್ತುಟ್ಠಾ, ನಿವತ್ತಾ ತಾಯ ರತ್ತಿಯಾ.

೩.

ಮರನ್ತೀ ಖರವಾತೇನ, ತಮಹಂ ಸುಚರಿತಂ ಸರಿಂ;

ತೇನಾಹಂ ಪುಞ್ಞಕಮ್ಮೇನ, ತಾವತಿಂಸೂಪಗಾಅಹುಂ.

೪.

ತತ್ಥ ಮೇ ಆಸಿ ಪಾಸಾದೋ, ತಿಂಸಯೋಜನಮುಗ್ಗತೋ;

ಕೂಟಾಗಾರವರಾಕಿಣ್ಣೋ, ಸಾಖಮಾಲಾತಿ [ಸಾಧಮಾಲೋ ಇತಿಪಿಕತ್ಥಚಿ], ವಿಸ್ಸುತೋ.

೫.

ಯಥಾ ಸಬ್ಬಸುಗನ್ಧೇಹಿ, ಕರಣ್ಡಂ ಪರಿಭಾವಿತಂ;

ತಥಾ ದಿಬ್ಬಸುಗನ್ಧೇಹಿ, ಗನ್ಧಿತಂ ಭವನಂ ಮಮ.

೬.

ಚಕ್ಕಮತ್ತಾ ಸಾಖಪುಪ್ಫಾ, ತತ್ಥ ತತ್ಥೂಪಲಮ್ಬರೇ [ತತವತ್ಥುಪಲಬ್ಬರೇ ಇತಿಪಿಕತ್ಥಚಿ];

ದಿಬ್ಬಗನ್ಧಾ ಪವಾಯನ್ತಿ, ಮಧುಬ್ಬಭನಿಸೇವಿತಾ.

೭.

ಭಸ್ಸನ್ತಿ ಏಕಪುಪ್ಫಸ್ಮಾ, ತುಮ್ಬಮತ್ತಾ ಹಿ ರೇಣವೋ;

ತೇಹಿ ಪಿಞ್ಜರಿತಾ ದೇವಾ, ಕೀಳನ್ತಿ ಚ ಲಲನ್ತಿಚ.

೮.

ಪೀಳನ್ಧಿತ್ವಾನ ¶ ಮಾಲಾಧಯಾ, ಸುದಿಬ್ಬಾ ಭರಣಾನಿಚ;

ಸಹಚ್ಛರಾ ದೇವಪುತ್ತಾ, ನಚ್ಚಗೀತಾದಿಬ್ಯಾವಟಾ.

೯.

ಪಸ್ಸಥೇಮಂ ಭುಜಙ್ಗಾ ಭೋ, ಸತ್ತಾ ಮೋಹೇನ ಪಾರುತಾ;

ಹೀಯ್ಯೋ ಮತಂ ಪವಿದ್ಧಂ ಮೇ, ಪೂತಿಭೂತಂ ಕಲೇವರಂ.

೧೦.

ಪುಳವೇಹಿ ಸಮಾಕಿಣ್ಣಂ, ಮಕ್ಖಿಕಾಗಣಕೀಳಿತಂ;

ಕಾಕಸೋಣಾದಿಸತ್ತಾನ, ಮಾಹಾರಂ ಕುಣಪಾಲಯಂ.

೧೧.

ಪತ್ಥೇನ್ತಿ ಪುರಿಸಾ ಪುಬ್ಬೇ, ಅನೇಕೋಪಾಯನೇನ ತಂ;

ದಟ್ಠುಮ್ಪಿದಾನಿ ನಿಚ್ಛನ್ತಿ, ತಣ್ಹಾಯಞ್ಞಾಣತಾ ಅಹೋ.

೧೨.

ಲೋಕಪಜ್ಜೋತಕಸ್ಸಾಹಂ, ವಿಮಲಸ್ಸ ಯಸಸ್ಸಿನೋ;

ಧಾತುಂ ಹೀಯ್ಯೋ ಮಹಿಂ ಸಮ್ಮಾ, ಅಜ್ಜ ಸಗ್ಗೇ ಪತಿಟ್ಠಿತಾ.

೧೩.

ಹಿತ್ವಾನೇ ತಾದಿಸಂ ಕಾಯಂ, ಲದ್ಧಂದಾನಿ ಮಮೇದಿಸಂ;

ದಿಬ್ಬತ್ತಭಾವಂ ಸೋಭಾಹಿ, ಭಾಸಮಾನ ಮುದಿಕ್ಖಥ.

೧೪.

ಭಾಸಮಾನಾಯ ಮೇ ವಾಚಂ, ಸುಣೋಥೇತ್ಥ ಸಮಾಗತಾ;

ನತ್ಥೇವಾಕತಪುಞ್ಞಸ್ಸ, ಅಣುಮತ್ತಂ ಭವೇ ಸುಖಂ.

೧೫.

ಬಿನ್ದುಮತ್ತಮ್ಪಿ ಯೋ ಪುಞ್ಞ, ಬೀಜಂ ರೋಪೇತಿ ಸಾಸನೇ;

ನ ಹಾ ನತ್ಥಫಲಂ [ನಹಪನನ್ತಫಲಂ ಇತಿಪಿಕತ್ಥಚಿ] ಹೋತಿ, ಯಾವ ನಿಬ್ಬಾಣಪತ್ತಿಯಾತಿ.

ಏವಂ ಸಾ ದೇವತಾ ಅತ್ತನಾ ಪಟಿಲದ್ಧದಿಬ್ಬವಿಭವಂ ದಸ್ಸೇತ್ವಾ ಜನಕಾಯಂ ಓವದಿತ್ವಾ ದಿಬ್ಬಸಾಖಪುಪ್ಫೇಹಿ ಜಿನಧಾತುಂ ಪೂಜೇತ್ವಾ ಮನುಸ್ಸಾನಂ ಪಸ್ಸನ್ತಾನಂಯೇವ ಸದ್ಧಿಂ ವಿಮಾನೇನ ದೇವಲೋಕಮೇವ ಅಗಮಾಸಿ. ತಂ ದಿಸ್ವಾ ಮಹಾಜನೋ ದಾನಾದೀನಿ ಪುಞ್ಞಾನಿ ಕತ್ವಾ ದೇವಲೋಕಂ ಪೂರೇಸೀತಿ.

೧೬.

ಏವಞ್ಹಿ ¶ ಸಾ ಪುಪ್ಫಮತ್ತೇನ ಧಾತುಂ,

ಪೂಜೇತ್ವ ದೇವೇಸು ಅಲತ್ಥ ಭೂತಿಂ;

ತುಮ್ಹೇಪಿ ಭೋನ್ತೋ ತಿದಿವೇಸು ಸಾತಂ,

ಕಾಮತ್ಥ ಚೇ ಕತ್ಥ ಪುಞ್ಞಾನಿ ಸಾಧುಂತಿ.

ಸಾಖಮಾಲಪೂಜಿಕಾಯ ವತ್ಥುಂ ಪಞ್ಚಮಂ.

೩೬. ಮೋರಿಯಬ್ರಹ್ಮಣಸ್ಸ ವತ್ಥುಮ್ಹಿ ಅಯಮಾನುಪುಬ್ಬೀಕಥಾ

ಅಮ್ಹಾಕಂ ಭಗವತಿ ಪರಿನಿಬ್ಬುತೇ ಮಗಧರಟ್ಠೇ ಮಚಲಂ ನಾಮ ಮಹಾಗಾಮಂ ಅಹೋಸಿ. ತತ್ಥ ಮೋರಿಯೋನಾಮ ಬ್ರಾಹ್ಮಣೋ ಪಟಿವಸತಿ ಸದ್ಧೋ ಪಸನ್ನೋ, ತಸ್ಸ ಸೇನಾನಾಮೇ ಕಾ ಭರಿಯಾ ಅತ್ಥಿ. ಸಾಪಿ ಸದ್ಧಾ ಪಸನ್ನಾ ರತನತ್ತಯೇಸು. ತೇ ಉಭೋಪಿ ಸಮಗ್ಗಾ ಸಮ್ಮೋದಮಾನಾ ಭಿಕ್ಖುಸಙ್ಘಂ ನಿಮನ್ತೇತ್ವಾ ನಿಚ್ಚಂ ದಾನಂ ಪವತ್ತೇನ್ತಾ ಚೀವರಾದಿಚತುಪಚ್ಚಯೇಹಿ ಉಪಟ್ಠಹನ್ತಾ ಸೀಲಂ ರಕ್ಖನ್ತಾ ಉಪೋಸಥಕಮ್ಮಂ ಕರೋನ್ತಾ ದಿವಸಂ ವೀತಿನಾಮೇನ್ತಿ. ಅಥಸ್ಸ ಗೇಹೇ ವಿಭವಂ ಯೇಭುಯ್ಯೇನ ದಾನಾದೀಸು ಪರಿಕ್ಖಯಮಗಮಾಸಿ. ತತೋ ಬ್ರಾಹ್ಮಣೀ ಸಾಮಿ ನೋ ಗೇಹೇ ಧನಂ ಪರಿಕ್ಖೀಣಂ. ಕಥಂ ದಾನಂ ಪವತ್ತೇಯ್ಯಾಮಾತಿ ಬ್ರಾಹ್ಮಣಸ್ಸ ಆರೋಚೇಸಿ, ತತೋ ಬ್ರಾಹ್ಮಣೋ ಮಾ ಭದ್ದೇ ಚಿನ್ತೇಸಿ. ಯೇನಕೇನಚಿ ಉಪಾಯೇನ ದಾನಂ ಪತಿಟ್ಠಪೇಸ್ಸಾಮಾತಿ ವತ್ವಾ ತಸ್ಮಿಂಯೇವ ಅತ್ತನೋ ಸಉಸ್ಸಾಹತಂ ಪಕಾಸೋನ್ತೋ ಆಹ.

೧.

ಜಾನಮಾನೋ ಹಿ ಲೋಕಸ್ಮಿಂ, ದಾನಸ್ಸೇದಂ ಫಲಂ ಇತಿ;

ನ ದಜ್ಜಾ ಕೋ ಸುಸೀಲೇಸು, ಅಪ್ಪಮ್ಪಿ ದಿವಸಮ್ಪತಿ.

೨.

ಸಗ್ಗಲೋಕನಿದಾನಾನಿ, ದಾನಾನಿ ಮತಿಮಾ ಇಧ;

ಕೋಹಿನಾಮ ನರೋ ಲೋಕೇ, ನ ದದೇಯ್ಯ ಹಿತೇ ರತೋತಿ.

ಏವಞ್ಚ ಪನ ವತ್ವಾ ಭದ್ದೇ ವನಂ ಪವಿಸಿತ್ವಾ ಅನೇಕವಿಧಾನಿ ಪಣ್ಣಾನಿ ಚ ಫಲಾನಿ ಚ ಪಚ್ಛಿಪೂರಂ ಆಹರಿತ್ವಾ ವಿಕ್ಕಿಣಿತ್ವಾಪಿ ದಾನಂ ನ ಉಪಚ್ಛಿನ್ದಿಸ್ಸಾಮಾತಿ ¶ ವತ್ವಾ ತತೋ ಪಟ್ಠಾಯ ವನಂ ಗನ್ತ್ವಾ ಪಣ್ಣಾನಿ ಚ ಫಲಾನಿ ಚ ಆಹರಿತ್ವಾ ವಿಕ್ಕಿಣಿತ್ವಾ ದಾನಂ ದೇನ್ತೋ ಪಟಿವಸತಿ. ಅಥೇಕದಿವಸಂ ಬ್ರಾಹ್ಮಣೋ ವನಂ ಪವಿಟ್ಠೋ ಪಣ್ಣೇಹಿ ಚ ಫಲೇಹಿ ಚ ಪಚ್ಛಿಂ ಪೂರೇತ್ವಾ ಸೀಸೇನಾ ದಾಯ ಗೇಹಂ ಆಗಚ್ಛನ್ತೋ ಪುಪ್ಫಫಲಪಲ್ಲವೇಹಿ ವಿನತಂ ನೇಕತರುಗಣನಿಚಿತಂ ಸಮ್ಮತ್ತಾನೇಕಚಾತಕಚತುಪ್ಪದನಿಸೇವಿತಂ ವಿಪ್ಪಕಿಣ್ಣಾನನ್ತಪುಪ್ಫಪತ್ತಕಿಞ್ಜಕ್ಖಚ್ಛನ್ನವಾಳುಕಾತಲಂ ಸನ್ದಮಾನಸೀತಲಾ ಮಲಜಲಪ್ಪವಾಹಂ ಅಕದ್ದಮಾನಿನ್ನಸುಪತಿತ್ತೇಹಿ ಸುನ್ದರಂ ಕನ್ದರಂ ದಿಸ್ವಾ ಪಚ್ಛಿಂ ತೀರೇ ಠಪೇತ್ವಾ ಓತಿಣ್ಣೋ ನಹಾಯತಿ, ತಸ್ಮಿಂ ಖಣೇ ತತ್ಥ ಏಕಸ್ಮಿಂ ರುಕ್ಖೇ ಅಧಿವತ್ಥೋ ದೇವಪುತ್ತೋ ತಂ ತತ್ಥ ನಹಾಯನ್ತಂ ದಿಸ್ವಾ ಕಿನ್ನು ಖೋ ಏಸ ಕಲ್ಯಾಣಜ್ಝಾಸಯೋ ವಾ ಉದಾಹು ಪಾಪಜ್ಝಾಸಯೋ ಸತ್ತೋತಿ ದಿಬ್ಬಚಕ್ಖುನಾ ಉಪಧಾರನ್ತೋ ಅಚ್ಛರಿಯಪುರಿಸೋ ಏಸೋ ದುಗ್ಗತೋಪಿ ಹುತ್ವಾ ಅತ್ತನೋ ದಾನಪ್ಪವೇಣಿಯಾ ಉಪಚ್ಛಿಜ್ಜನಭಯೇನ ವನಂ ಗನ್ತ್ವಾ ಪಣ್ಣಾನಿ ಚ ಫಲಾನಿ ಚ ಆಹರಿತ್ವಾ ದುಕ್ಖೇನ ಕಸಿರೇನ ಜೀವಿಕಂ ಕಪ್ಪೇನ್ತೋ ದಾನಧಮ್ಮಂ ನ ಉಪಚ್ಛಿನ್ದತೀತಿ ಚಿನ್ತೇತ್ವಾ ತಸ್ಸ ಗುಣಾದಯೋ ಪಟಿಚ್ಚ ಪಚ್ಛಿಯಂ ಠಪಿತಪಣ್ಣಾನಿ ಚ ಫಲಾನಿ ಚ ಸಬ್ಬಾನಿ ಸುವಣ್ಣಾನಿ ಹೋನ್ತೂತಿ ಅಧಿಟ್ಠಾಸಿ. ಅಥಸ್ಸಾನುಭಾವೇನ ಸಬ್ಬಂ ಸುವಣ್ಣಂ ಅಹೋಭಿ, ಅಥ ಸೋ ಸುವಣ್ಣಪುಣ್ಣಪಚ್ಛಿಯಂ ಉಪರಿ ಸುವಣ್ಣರಾಸಿಮತ್ಥಕೇ ಸಬ್ಬಕಾಮದದಂ ಮಹನ್ತಂ ಮಣಿರತನಂ ಠಪೇತ್ವಾ ಅನ್ತರಹಿತೋ ಪಟಿಕ್ಕಮ್ಮ ಅಟ್ಠಾಸಿ, ತತೋ ಬ್ರಾಹ್ಮಣೋ ನಹಾತ್ವಾ ಉತ್ತಿಣ್ಣೋ ಪಚ್ಛಿಯಂ ಸಮ್ಪುಣ್ಣಸುವಣ್ಣವಣ್ಣರಂಸಿನಾ ಸಮ್ಭಿನ್ನವಿಜ್ಜೋತಮಾನಮಣಿರತನಂ ದಿಸ್ವಾ ಕಿಮೇತಂತಿ ಆಸಙ್ಕಿತಪರಿಸಙ್ಕಿತೋ ಪಚ್ಛಿಸಮೀಪಂ ಗನ್ತ್ವಾ ಹತ್ಥಂ ಪಸಾರೇತುಂ ಅವಿಸಹನ್ತೋ ಅಟ್ಠಾಸಿ. ತಂ ದಿಸ್ವಾ ದೇವಪುತ್ತೋ ದಿಸ್ಸಮಾನಸರೀರೇನ ಠತ್ವಾ ಮಾ ತ್ವಂ ಭಾಯಿ ಬ್ರಾಹ್ಮಣ. ಮಯಾ ಏತಾನಿ ನಿಮ್ಮಿತಾನಿ, ಗಹೇತ್ವಾ ಗಚ್ಛಾಹೀತಿ ಆಹ, ಅಥ ಬ್ರಾಹ್ಮಣೋ ದೇವಪುತ್ತಸ್ಸ ಕಥಂ ಸುತ್ವಾ ಅಯಂ ದೇವಪುತ್ತೋ ಇಮಂ ಮಯಾ ನಿಮ್ಮಿತಂ, ಗಹೇತ್ವಾ ಗಚ್ಛಾತಿ ವದತಿ. ಕಿನ್ನು ಖೋ ಸೋ ಅತ್ತನೋ ಆನುಭಾವೇನ ದೇತಿ, ಉದಾಹು ಮಯಾ ಕತಪುಞ್ಞೇನಾತಿ ಪುಚ್ಛಿಸ್ಸಾಮಿ ತಂತಿ ಪಞ್ಜಲಿಕೋವ ದೇವಪುತ್ತಂ ಪುಚ್ಛನ್ತೋ ಆಹ.

೩.

ಪುಚ್ಛಾಮಿ ¶ ಪಞ್ಜಲೀ ದಾನಿ, ದೇವಪುತ್ತ ಮಹಿದ್ಧಿಕ;

ದದಾಸಿ ಮೇ ಸುವಣ್ಣಞ್ಚ, ಕಾಮದಂ ಮಣಿಮುತ್ತಮಂ.

೪.

ನಾಪಿ ಕೋ ನೋ ತುವಂ ಞಾತಿ,

ನ ಮಿತ್ತೋ ನೋಪಕಾರಕೋ;

ಕಿಂ ತ್ವಂ ಅತ್ಥವಸಂ ದಿಸ್ವಾ,

ಮಮ ದಜ್ಜಾಸಿಮಂ ಧನಂ.

೫.

ಕೇನ ತಪೇನ ಸೀಲೇನ, ಕೇನಾಚಾರಗುಣೇನ ಚ;

ಯೇನ ದಜ್ಜಾಸಿ ಮೇ ದೇವ, ಕಿಂ ಮೇ ಸುಚರಿತಂ ಚಿತಂ.

೬.

ಕಿನ್ನು ಪುರಾತನಂ ಕಮ್ಮಂ, ಕೇನ ಕಮ್ಮೇನ ದಸ್ಸಸಿ;

ಅಥವಾ ತವಿದ್ಧಿಯಾ ದೇಸಿ, ತಂ ಮೇ ಅಕ್ಖಾಹಿ ಪುಚ್ಛಿತೋತಿ.

ತತೋ ದೇವಪುತ್ತೋ ನ ಖೋ ಪನಾಹಂ ಬ್ರಾಹ್ಮಣ ದೇವೋತಿ ಪರೇಸಂ ಕಿಞ್ಚಿ ದಾತುಂ ಸಕ್ಕೋಮಿ, ತಯಾ ಪುಬ್ಬೇ ಕತಸುಚರಿತಾನುಭಾವೇನ ನಿಬ್ಬತ್ತತೀತಿ ವತ್ವಾ ದಿಬ್ಬಚಕ್ಖುನಾ ತಸ್ಸ ಪುಬ್ಬಕಮ್ಮಂ ದಿಸ್ವಾ ತಸ್ಸ ಪಕಾಸೇನ್ತೋ ಆಹ.

೭.

ಕಸ್ಸಪೇ ಲೋಕಪಜ್ಜೋತೇ, ಸಮ್ಬುದ್ಧೇ ಪರಿನಿಬ್ಬುತೇ;

ಸಬ್ಬತ್ಥ ಪತ್ಥಟಂ ಆಸಿ, ತಸ್ಸ ಬುದ್ಧಸ್ಸ ಸಾಸನಂ.

೮.

ತದಾ ಪಚ್ಚನ್ತಿಮೇ ಗಾಮೇ, ತ್ವಮಾಸಿ ಕುಲದಾರಕೋ;

ಸದ್ಧೋ ಆಸಿ ಪಸನ್ನೋ ಚ, ದಾಯಕೋ ಕುಸಲೇ ರತೋ.

೯.

ತದಾ ಪಬ್ಬಜಿತೋ ಏಕೋ, ಗಚ್ಛನ್ತೋ ಅನ್ತರಾಪಥೇ;

ಚೋರೇಹಿ ಅನುಬದ್ಧೋಸಿ, ಅಚ್ಛಿನ್ನಪತ್ತಚೀವರೋ.

೧೦.

ಸಾಖಾಭಙ್ಗಂ ನಿವಾಸೇತ್ವಾ, ಪಾರುಪಿತ್ವಾ ತಥೇವ ತಂ;

ಅನ್ತೋಗಾಮಂ ಪವಿಟ್ಠೋಸಿ, ಏಸಮಾನೋ ಪಿಲೋತಿಕೇ.

೧೧.

ತತೋ ತ್ವಂ ಚರಮಾನಂ ತಂ, ದಿಸ್ವಾ ಕಮ್ಪಿತಮಾನಸೋ;

ವತ್ಥಯುಗಂ ಅದಾಸಿ ತ್ವಂ, ಸದ್ದಹಂ ದಾನತೋ ಫಲಂ.

೧೨.

ಪತ್ಥೋದನೇನ ¶ ತಂ ಭಿಕ್ಖುಂ, ಪರಿವಿಸಿತ್ವಾ ಯಥಾಬಲಂ;

ಪೇಸೇಸಿ ಅಭಿವಾದೇತ್ವಾ, ಸದ್ಧಾಯ ಸುದ್ಧಮಾನಸೋ.

೧೩.

ಇಮಂ ತ್ವಂ ಅಕರೀ ಪುಞ್ಞಂ, ತುಯ್ಹೇತಂ ಚರಿತಂ ಇಮಂ;

ತಸ್ಸ ತೇ ಪುಞ್ಞಕಮ್ಮಸ್ಸ, ಅಮುಖ್ಯಫಲ ಮೀದಿಸಂತಿ.

ಏವಞ್ಚ ಪನ ವತ್ವಾ ಇದಂ ತೇ ಬ್ರಾಹ್ಮಣ ಧನಂ ರಾಜಾದೀಹಿ ಮಯಾ ಅನಾಹರಣೀಯಂ ಕತಂ, ತ್ವಂ ಅಪರಿಸಙ್ಕನ್ತೋ ಗಹೇತ್ವಾ ಯಥಾಧಿಪ್ಪಾಯಂ ಕರೋಹಿ, ಇಮಂ ಖೋ ಪನ ಮಣಿರತನಂ ಇಚ್ಛಿತಿಚ್ಛಿತಂ ಪಸವತಿ, ತೇನಾಪಿ ಆನುಭಾವೇನ ತವ ದಾನಂ ಅನುಪಚ್ಛಿನ್ದನ್ತೋ ಪುತ್ತದಾರಾದಯೋ ಪೋಸೇಹೀತಿ ಅನುಸಾಸಿ, ತಂ ಸುತ್ವಾ ಬ್ರಾಹ್ಮಣೋ ತೇನ ವುತ್ತನಿಯಾಮೇನೇವ ಭಿಕ್ಖುಸಙ್ಘಸ್ಸ ಮಹಾದಾನಂ ದದನ್ತೋ ಸೀಲಂ ರಕ್ಖನ್ತೋ ಚಿರಂ ವಸಿತ್ವಾ ಅಪರಭಾಗೇ ತತೋ ಚುತೋ ದೇವಲೋಕೇ ನಿಬ್ಬತ್ತೀತಿ.

೧೪.

ಏವಂ ನಿಹೀನಾಪೀ ಧನೇನ ಸನ್ತೋ,

ದಾನನ್ವಯಂ ನೇವ ಪರಿಚ್ಚಜನ್ತಿ;

ತಸ್ಮಾ ಹಿ ಭೋನ್ತೋ ಸತಿ ದೇಯ್ಯಧಮ್ಮೇ,

ಮಾ ಕತ್ಥ ದಾನೇಸು ಪಮಾದಭಾವಂತಿ.

ಮೋರಿಯಬ್ರಾಹ್ಮಣಸ್ಸ ವತ್ಥುಂ ಛಟ್ಠಮಂ.

೩೭. ಪುತ್ತವತ್ಥುಮ್ಹಿ ಅಯಮಾನುಪುಬ್ಬೀಕಥಾ

ಏಕಸ್ಮಿಂ ಕಿರ ಸಮಯೇ ಲಙ್ಕಾದೀಪವಾಸಿನೋ ಸಟ್ಠಿಮತ್ತಾ ಭಿಕ್ಖೂ ಜಯಮಹಾಬೋಧಿಂ ವನ್ದಿತುಕಾಮಾ ಏಕತೋ ಮನ್ತೇತ್ವಾ ಮಹಾತಿತ್ಥೇನ ನಾವಂ ಆರುಯ್ಹ ಜಮ್ಬುದೀಪಂ ಪತ್ವಾ ತಾಮಲಿತ್ತಿಪಟ್ಠೇನೇ [ತಮಲಿತ್ತಪಟ್ಟನೇ ಇತಿಕತ್ಥಚಿ] ಓತರಿತ್ವಾ ಅನುಕ್ಕಮೇನ ಪಾಟಲಿಪುತ್ತನಗರಂ ಪಾಪುಣಿಂಸು. ಅಥ ತಸ್ಮಿಂ ¶ ನಗರೇ ಪಿಣ್ಡಾಯ ಚರನ್ತೇ ತೇ ಭಿಕ್ಖೂ ಏಕೋ ದುಗ್ಗತಮನುಸ್ಸೋ ದಿಸ್ವಾ ಚಿರೇನ [ಚಿರೇನಾಹಂದಿಟ್ಠಾ ಇತಿಸಬ್ಬತ್ಥ] ಮಯಾ ದಿಟ್ಠಾ ಬುದ್ಧಪುತ್ತಾತಿ ಸೋಮನಸ್ಸೋ ಭರಿಯಂ ಪಕ್ಕೋಸಿತ್ವಾ ಭದ್ದೇ ಇಮೇಸಂ ಅಯ್ಯಾನಂ ದಾನಂ ದಾತುಕಾಮೋಮ್ಹಿ, ಪುಬ್ಬೇ ನೋ ಅಕತಪುಞ್ಞತ್ತಾ ಇದಾನಿ ದುಗ್ಗತಾ ಜಾತಾ, ಇಮೇಸು ಪುಞ್ಞಕ್ಖೇತ್ತೇಸು ಬೀಜಂ ನೋ ಚೇ ರೋಪೇಸ್ಸಾಮ, ಪುನಪಿ ಏವಮೇವ ಭವಿಸ್ಸಾಮಾತಿ ವತ್ವಾ ಕಿಂ ಮೇ ಗೇಹೇ ದೇಯ್ಯಧಮ್ಮಂ ಅತ್ಥೀತಿ ಪುಚ್ಛಿ. ಸಾ ತಂ ಸುತ್ವಾ ಘರೇ ನೋ ಸಾಮಿ ಅಯ್ಯಾನಂ ಕಿಞ್ಚಿ ದಾತಬ್ಬಂ ನ ಪಸ್ಸಾಮಿ. ಅಪಿ ಚ ಮಮ ಪುತ್ತಂ ಮಾರೇತ್ವಾ ದಾನಂ ದಾತುಂ ಸಕ್ಕಾತಿ. ಸೋ ತಸ್ಸಾ ಕಥಂ ಸುತ್ವಾ ಭದ್ದೇ ಪುತ್ತಂ ಮಾರೇತ್ವಾ ಕಿಂ ದಾನಂ ದೇಮಾತಿ ಆಹ. ತಾಯ ತಂ ಸುತ್ವಾ ಸಾಮಿ ಕಿಂ ನ ಜಾನಾಸಿ, ಪುತ್ತೇ ನೋ ಮತೇ ಸನ್ದಿಟ್ಠಸಮ್ಭತ್ತಾ ಞಾತಿಮಿತ್ತಸುಹಜ್ಜಾ ಚ ಅಮ್ಹಾಕಂ ಸನ್ತಿಕಂ ಆಗಚ್ಛಾನ್ತಾ ಕಿಞ್ಚಿ ಪಣ್ಣಾಕಾರಂ ಗಹೇತ್ವಾ ಆಗಚ್ಛನ್ತಿ. ಮಯಂ ತೇನ ಪಣ್ಣಾಕಾರೇನ ದಾನಂ ದಸ್ಸಾಮಾತಿ ವುತ್ತೇ ಉಪಾಸಕೋ ಸಾಧು ತಥಾ ಕರೋಹೀತಿ ಮಾತುಯಾ ಏವ ಭಾರಮಕಾಸಿ, ಸಾ ಪುತ್ತಂ ಮಾರೇತುಂ ಅವಿಸಹನ್ತೀ ಆಹ. ತಥಾ ಹಿ.

೧.

ಕಿಚ್ಛಾ ಲದ್ಧಂ ಪಿಯಂ ಪುತ್ತಂ, ಅಮ್ಮಮ್ಮಾತಿ ಪಿಯಂ ವದಂ;

ಸುನೀಲನೇತ್ತಂ ಸುಭಮುಂ, ಕೋ ಪಕ್ಕಮಿತುಮಿಚ್ಛತಿ.

೨.

ಮಾತರಾ ಮಾರಿಯನ್ತೋಪಿ, ಮಾತರಮೇವ ರೋದತಿ;

ಮಾರೇತುಂ ತಂ ನ ಸಕ್ಕೋಮಿ, ಹದಯಂ ಮೇ ಪವೇಧತೀತಿ.

ಏವಞ್ಚ ಪನ ವತ್ವಾ ಅಹಂ ಸಾಮಿ ನ ಸಕ್ಕೋಮಿ ಪುತ್ತಂ ಮಾರೇತುಂ. ತ್ವಂ ಮಾರೇಹೀತಿ ಪುತ್ತಂ ಪಿತುಸನ್ತಿಕಂ ಪೇಸೇಸಿ. ಅಥ ಸೋಪಿ ತಂ ಮಾರೇತು ಮಸಕ್ಕೋನ್ತೋ ಏವಮಾಹ. ವುತ್ತಞ್ಹಿ.

೩.

ತಾಯನ್ತಿ ಪಿತುನೋ ದುಕ್ಖಂ, ಪುತ್ತಾ ಪುತ್ತಾತಿ ಕಿತ್ತಿತಾ;

ಪಿತು ದುಕ್ಖಂ ಸುಖಂ ಪುತ್ತಾ, ದಾಯಾದಾ ಹೋನ್ತಿ ಸಬ್ಬದಾ.

೪.

ತಸ್ಮಾ ¶ ಮೇ ಸದಿಸಂ ಪುತ್ತಂ, ಪಿಲ್ಲಕಂ ಮಞ್ಜುಭಾಸನಂ;

ನ ಸಕ್ಕೋಮಿ ಅಹಂ ಭದ್ದೇ, ಜೀವಿತಾ ತಂ ವಿಯೋಜಿತುಂ.

೫.

ಅಯಸಞ್ಚ ಅಕಿತ್ತಿಞ್ಚ, ಪಪ್ಪೋತಿ ಪುತ್ತಘಾತಕೋ;

ಪಾಣಾತಿಪಾತಕಮ್ಮಮ್ಪಿ, ಕಾಮಂ ಸೋ ಫುಸತೇ ನರೋತಿ.

ಏವಞ್ಚ ಪನ ವತ್ವಾ ಸೋ ತ್ವಮೇವ ತವ ಪುತ್ತಂ ಮಾರೇಹೀತಿ ಪೇಸೇಸಿ, ಏವಂ ತೇನ ವುತ್ತೇ ಪುತ್ಥಸ್ಸ ಮಾರಪಾಣೂಪಾಯಂ ಪರಿಯೇಸನ್ತಾ ಏವಮಾಹಂಸು, ಅಮ್ಹೇ ಪನಿಮಂ ಮಾರೇತುಂ ನ ಸಕ್ಕೋಮಿ, ಅಮ್ಹಾಕಂ ಪಚ್ಛಾಗೇಹೇ ಮಹನ್ತೋ ವಮ್ಮಿಕೋ ಅತ್ಥಿ, ತಸ್ಮಿಂ ಏಕೋ ನಾಗರಾಜಾ ಪಟಿವಸತಿ. ಕುಮಾರಂ ತತ್ಥ ಪೇಸೇಸ್ಸಾಮ, ಸೋ ತಂ ಡಸಿತ್ವಾ ಮಾರೇಸ್ಸತೀತಿ. ಇಚ್ಚೇತೇ ಏಸೋ ಖೋ ಉಪಾಯೋ ಏವಾತಿ ಚಿನ್ತೇತ್ವಾ ಕುಮಾರಂ ಪಕ್ಕೋಸಿತ್ವಾ ಅಞ್ಚನಾ ವಲಿವಲಯಾದೀಹಿ ಮಣ್ಡೇತ್ವಾ ತಸ್ಸ ಹತ್ಥೇ ಗೇಣ್ಡುಂ [ತೇಣ್ಡುಂ ಇತಿಸಬ್ಬತ್ಥ] ಠಪೇತ್ವಾ ತಾತ ಪಚ್ಛಾಗೇಹೇ ವಮ್ಮಿಕಸಮೀಪಂ ಗನ್ತ್ವಾ ಕೀಳಾತಿ ಪೇಸೇಸುಂ. ತತೋ ದಾರಕೋ ಗನ್ತ್ವಾ ಗೇಣ್ಡುಕೇನ ಕೀಳನ್ತೋ ವಮ್ಮಿಕಬಿಲೇ ಗೇಣ್ಡುಕಂ ಪಾತೇಸಿ. ಅಥ ಸೋ ಗೇಣ್ಡುಕಂ ಗಣ್ಹಿಸ್ಸಾಮೀತಿ ವಮ್ಮಿಕಸುಸಿರೇ ಹತ್ಥಂ ಪವೇಸೇಸಿ. ತತೋ ಸಪ್ಪೋ ಕುಜ್ಝಿತ್ವಾ ಸುಸೂತಿಸದ್ದಂ ಕರೋನ್ತೋ ಮಹನ್ತಂ ಫಣಂ ಕತ್ವಾ ಬಿಲತೋ ಸೀಸಂ ಉಕ್ಖಿಪಿತ್ವಾ ಓಲೋಕೇನ್ತೋ ಅಟ್ಠಾಸಿ ಕುಮಾರಸ್ಸ ಹತ್ಥತೋ ಪರಿಗಲಿತಪಾಸಂವಿಯ. ಅಥಸ್ಸ ಕುಮಾರೋ ಕಿಞ್ಚಿ ಅಜಾನನ್ತೋ ಸಪ್ಪಸ್ಸ ಗೀವಂ ದಳ್ಹಂ ಗಣ್ಹಿ. ಅಥಸ್ಸ ಮಾತಾಪಿತುನ್ನಂ ಸದ್ಧಾಬಲೇನ ನಾಗರಾಜಾ ಕುಮಾರಸ್ಸ ಕರತಲೇ ಅಟ್ಠಂಸಂ ಇಚ್ಛಾದಾಯಕಂ ಕಣ್ಠಮಣಿರತನಂ ಪಾತೇಸಿ. ಕುಮಾರಸ್ಸ ಮಾತಾಪಿತರೋ ದ್ವಾರಂ ನಿಸ್ಸಾಯ ಠಿತಾ ತಸ್ಸ ಕಿರಿಯಂ ಓಲೋಕೇನ್ತೋ ತಂ ಮಣಿರತನಂ ದಿಸ್ವಾ ಸೀಘಂ ಗನ್ತ್ವಾ ಪುತ್ತಂ ಉಕ್ಖಿಪಿತ್ವಾ ಹತ್ಥತೋ ಮಣಿರತನಂ ಗಣ್ಹಿಂಸು. ತತೋ ತೇ ತಂ ಮಣಿರತನಂ ಪರಿಸುದ್ಧಾಸನೇ ಠಪೇತ್ವಾ ಉಪಚಾರಂ ಕತ್ವಾ ಅಮ್ಹಾಕಂ ಇದಞ್ಚಿದಞ್ಚ ದೇಥಾತಿ ಅಬ್ಭುಕ್ಕಿರಿಂಸು. ಅಥ ತೇ ಮಣಿರತನಾನುಭಾವೇನ ಗೇಹದ್ವಾರೇ ಮಹನ್ತಂ ಮಣ್ಡಪಂ ಕಾರೇತ್ವಾ ವಿತಾನಾದಿನಾ ಮಣ್ಡಪಂ ¶ ಅಲಙ್ಕರಿತ್ವಾ ಭಿಕ್ಖೂನಂ ಆಸನಾನಿ ಪಞ್ಞಾಪೇತ್ವಾ ತೇ ಸಟ್ಠಿಮತ್ತೇ ಭಿಕ್ಖೂ ನಿಸೀದಾಪೇತ್ವಾ ಮಹಾದಾನಂ ಅದಂಸು. ತತೋ ನಗರವಾಸಿನೋ ಮಣಿರತನಾನುಭಾವಂ ಸುತ್ವಾ ಸನ್ನಿಪತಿಂಸು. ಅಥ ತೇ ತೇಸಂ ಮಜ್ಝೇ ಅತ್ತನೋ ಸದ್ಧಾಬಲೇನ ಮಣಿರತನಸ್ಸ ಲಾಭಂ ಪಕಾಸೇತ್ವಾ ಇಮಞ್ಹಿ ದಾನತ್ಥಾಯೇವ ಪರಿಚ್ಚಜ್ಜಾಮಾತಿ ಏಕಸ್ಮಿಂ ಠಾನೇ ಪತಿಟ್ಠಾಪೇತ್ವಾ ತೇನಾನುಭಾವೇನ ಯಾವಜೀವಂ ದಾನಂ ದದನ್ತಾ ಸೀಲಂ ರಕ್ಖನ್ತಾ ಆಯುಪರಿಯೋಸಾನೇ ದೇವಲೋಕೇ ನಿಬ್ಬತ್ತಿಂಸೂತಿ.

೬.

ಛೇತ್ವಾನ ಪೇಮಂ ಅಪಿ ಅತ್ರಜೇಸು,

ದದನ್ತಿ ದಾನಂ ಇಧ ಮಾನುಸೇವಂ;

ನ ದದಾತಿ ಕೋ ನಾಮ ನರೋ ಸಮಿದ್ಧೋ,

ದಾನಞ್ಹಿ ದಾನಸ್ಸ ಫಲಂ ಸರನ್ತೋತಿ.

ಪುತ್ತವತ್ಥುಂ ಸತ್ತಮಂ.

೩೮. ತೇಭಾತಿಕಮಧುವಾಣಿಜಕಾನಂ ವತ್ಥುಮ್ಹಿ ಅಯಮಾನುಪುಬ್ಬೀಕಥಾ

ಅತೀತೇ ಕಿರ ಬಾರಾಣಸಿಯಂ ತೇ ಭಾತಿಕಾ ಏಕತೋ ಹುತ್ವಾ ಮಧುಂ ವಿಕ್ಕಿಣನ್ತಾ ಪುತ್ತದಾರೇ ಪೋಸೇನ್ತಿ. ತತೋ ತೇಸು ಏಕೋ ಪಚ್ಚನ್ತಂ ಗನ್ತ್ವಾ ಮಲಯವಾಸೀನಂ [ಮಲವಾಸೀನಂ ಇತಿಪಿಕತ್ಥಚಿ] ಹತ್ಥತೋ ಮಧುಂ ಕಿಣಿತ್ವಾ [ವಕ್ಕಿಣಿತ್ವಾ ಇತಿಸಬ್ಬತ್ಥ] ಗಣ್ಹಾತಿ, ಏಕೋ ಗಹಿತಗಹಿತಮಧುಂ ನಗರಂ ಆಹರತಿ. ಏಕೋ ತೇನ ಆಹಟಾಹಟಮಧೂನಿ ಬಾರಾಣಸಿಯಂ ನಿಸೀದಿತ್ವಾ ವಿಕ್ಕಿಣಾತಿ. ತಸ್ಮಿಂ ಸಮಯೇ ಗನ್ಧಮಾದನಪಬ್ಬತೇ ಏಕೋ ಪಚ್ಚೇಕಬುದ್ಧೋ ವಣರೋಗೇನಾ ತುರೋ ಅಹೋಸಿ. ಅಥಞ್ಞತರೋ ಪಚ್ಚೇಕಬುದ್ಧೋ ತಸ್ಸ ಮಧುನಾ ಫಾಸು ಭವಿಸ್ಸತೀತಿ ಞತ್ವಾ ಗನ್ಧಮಾದನಪಬ್ಬತೇಯೇವ ಠಿತೋ ¶ ಚೀವರಂ ಪಾರುಪಿತ್ವಾ ಆಕಾಸೇನಾ ಗನ್ತ್ವಾ ನಗರದ್ವಾರೇ ಓತರಿತ್ವಾ ಕತ್ಥ ಮಧುಂ ಲಭಾಮೀತಿ [ಲಬ್ಭತಿ ಇತಿಸಬ್ಬತ್ಥ] ಓಲೋಕೇನ್ತೋ ಅಟ್ಠಾಸೀ, ತದಾ ತಸ್ಮಿಂಪರಕುಲೇ ಭತಿಂ ಕತ್ವಾ ಜೀವಮಾನಾ ಏಕಾ ಚೇಟಿಕಾ ಘಟಮಾದಾಯ ಉದಕತ್ಥಂ ತಿತ್ಥಂ ಗಚ್ಛನ್ತೀ ಮಗ್ಗಾ ಓಕ್ಕಮ್ಮ ಘಟಂ ಠಪೇತ್ವಾ ವನ್ದಿತ್ವಾ ಏಕಮನ್ತಂ ಅಟ್ಠಾಸಿ, ತದಾ ಪಚ್ಚೇಕಬುದ್ಧೋ ಭಗಿನೀ ಏತ್ಥ ಭಿಕ್ಖಾಯ ಚರನ್ತಾನಂ ಕತರಸ್ಮಿಂ ಠಾನೇ ಮಧು ಲಬ್ಭತೀತಿ ಪುಚ್ಛಿ. ಸಾ ತಸ್ಸ ಕಥಂ ಸುತ್ವಾ ಮಧುಆಪಣಸ್ಸ ಪಞ್ಞಾಯನಟ್ಠಾನೇ ಠತ್ವಾ ಹತ್ಥಂ ಪಸಾರೇತ್ವಾ ಏಸ ಭನ್ತೇ ಮಧುಆಪಣೋತಿ ದಸ್ಸೇತ್ವಾ ಯಜ್ಜಾಯಂ ಪಚ್ಚೇಕಬುದ್ಧೋ ಆಪಣತೋ ಮಧುಂ ನ ಲಭತಿ. ಮಮ ನಿವತ್ಥವತ್ಥಕಂ ದತ್ವಾಪಿ ಮಧುಂ ದಸ್ಸಾಮೀತಿ ಚಿನ್ತೇತ್ವಾ ಓಲೋಕೇನ್ತೀ ತತ್ಥೇವ ಅಟ್ಠಾಸಿ, ಅಥ ಪಚ್ಚೇಕಬುದ್ಧೋ ಅನುಪುಬ್ಬೇನ ವಿಚರನ್ತೋ [ಚರನ್ತೋ ಇತಿಪಿಕತ್ಥಚಿ] ಮಧುಆಪಣಂ ಸಮ್ಪಾಪುಣಿ, ತತೋ ಕುಟಿಮ್ಬಿಕೋ [ಕುಟಿಮ್ಬ ಕೋ ಇತಿಪಿಕತ್ಥಚಿ] ತಂ ದಿಸ್ವಾ ಹತ್ಥತೋ ಪತ್ತಂ ಗಹೇತ್ವಾ ಆಧಾರಕೇ ಠಪೇತ್ವಾ ಮಧುಘಟಂ ಆದಾಯ ಪತ್ತಸ್ಸ ಉಪನಾಮೇನ್ತೋ ಸಹಸಾ ನಿಕ್ಕುಜ್ಜಿ. ತತೋ ಮಧು ಪತ್ತಂ ಪೂರೇತ್ವಾ ಉತ್ತರನ್ತೋ ಪುನ ಭೂಮಿಯಂ ಪಗ್ಘರಿ. ತಂ ದಿಸ್ವಾ ಸೋಮನಸ್ಸೋ ವಾಣಿಜೋ ಏವಂ ಪತ್ಥನಮಕಾಸಿ.

ವುತ್ತಞ್ಹಿ ಮಹಾವಂಸೇ.

೧.

ತತ್ಥ ಪತ್ತಸ್ಸ ಬುದ್ಧಸ್ಸ, ವಾಣಿಜೋ ಸೋ ಪಸಾದವಾ;

ವಿಸ್ಸನ್ದಯನ್ತೋ ಮುಖತೋ, ಪತ್ತಪೂರಂ ಮಧುಂ ಅದಾ.

೨.

ಪುಣ್ಣಞ್ಚ ಉಪ್ಪತೀತಞ್ಚ, ಪತಿತಞ್ಚ ಮಹೀತಲೇ;

ದಿಸ್ವಾ ಮಧುಂ ಪಸನ್ನೋ ಸೋ, ಏವಂ ಪಣಿದಹೀ ತದಾ.

೩.

ಜಮ್ಬುದೀಪೇ ಏಕರಜ್ಜಂ, ದಾನೇನಾನೇನ ಹೋತು ಮೇ;

ಆಕಾಸೇ ಯೋಜನೇ ಆಣಾ, ಭೂಮಿಯಂ ಯೋಜನೇಪಿತಿ.

ಏವಞ್ಚ ಪನ ವತ್ವಾ ಪತ್ತಂ ಅದಾಸಿ, ಪಚ್ಚೇಕಬುದ್ಧೋ ಪತ್ತಂ ಪಟಿಗ್ಗಹೇತ್ವಾ ತತ್ಥೇವ ಠಿತೋ.

೪.

ಇಚ್ಛಿತಂ ¶ ಪತ್ಥಿತಂ ತುಯ್ಹಂ, ಖಿಪ್ಪಮೇವ ಸಮಿಜ್ಝತು;

ಪೂರೇನ್ತು ಚಿತ್ಥಸಂಕಪ್ಪಾ, ಚನ್ದೋ ಪಣ್ಣರಸೋ ಯಥಾ.

೫.

ಇಚ್ಛಿತಂ ಪತ್ಥಿತಂ ತುಯ್ಹಂ, ಸಬ್ಬಮೇವ ಸಮಿಜ್ಝತು;

ಪೂರೇನ್ತು ಚಿತ್ತಸಂಕಪ್ಪಾ, ಮಣಿಜೋತಿರಸೋ ಯಥಾತಿ.

ವತ್ವಾ ಮಙ್ಗಲಂ ವಡ್ಢೇತ್ವಾ ಅಗಮಾಸಿ. ಅಥನ್ತರಾಮಗ್ಗೇ ಠಿತಾ ಘಟಚೇಟಿಕಾ ಪಚ್ಚೇಕಬುದ್ಧಾಭಿಮುಖಂ ಗನ್ತ್ವಾ ಮಧುಂ ಲಭಿತ್ಥ ಭನ್ತೇತಿ ಪುಚ್ಛಿ. ತೇನ ಲದ್ಧಂ ಭಗಿನೀತಿ ವುತ್ತೇ ಕಿಂ ವತ್ವಾ ಸೋ ಅದಾಸೀತಿ ಪುಚ್ಛಿ. ಪಚ್ಚೇಕಬುದ್ಧೋ ಸಬ್ಬಂ ಕಥೇಸಿ. ಸಾ ತಂ ಸುತ್ವಾ ಥೋಕಂ ಭನ್ತೇ ಇಧೇವ ಹೋಥ ದಾಸಿಯಾ ಅನುಗ್ಗಹತ್ಥಾಯಾತಿ ಸೀಘಂ ಗೇಹಂ ಗನ್ತ್ವಾ ನಿವತ್ಥಪಿಳೋತಿಕಾ ಅತ್ತನೋ ಸಾಟಕಂ ಧೋವಿತ್ವಾ ಆಹರಿತ್ವಾ ಚುಮ್ಬಟಕಂ ಕತ್ವಾ ಪಚ್ಚೇಕಬುದ್ಧಸ್ಸ ಅದಾಸಿ, ಯದಾ ಸೋ ಭನ್ತೇ ಮಧುದಾಯಕೋ ಸಕಲಜಮ್ಬುದೀಪೇ ಏಕರಜ್ಜಂ ಕಾರೇತಿ. ತದಾಹಂ ತಸ್ಸ ಅಗ್ಗಮಹೇಸೀ ಭವೇಯ್ಯಂತಿ ವತ್ವಾ ಪತ್ಥನಂ ಕರೋನ್ತೀಏವಮಾಹ.

೬.

ಯದಾ ತೇ ಮಧುದೋ ಭನ್ತೇ, ಭೂಭುಜೋ ಹೋತಿ ಭೂತಲೇ;

ತಸ್ಸ ಹೇಸ್ಸಂ ತದಾ ಭನ್ತೇ, ಪಿಯಾ ಅಗ್ಗಮಹೇಸಿಕಾ.

೭.

ಸುರೂಪಾಚ ಸುವಾಣೀಚ, ಸುಯಸಾ ಸುಬ್ಬತಾ ಸುಭಾ;

ಅಸ್ಸಂ ತಸ್ಸ ಪಿಯಾಚಾಥ, ಮನಾಪಾ ಇಚ್ಛದಾ [ಇಚ್ಛಿದಾ ಇತಿಪಿಕತ್ಥಚಿ] ಸದಾತಿ.

ತಸ್ಸಾಪಿ ತದಾ ಪಚ್ಚೇಕಬುದ್ಧೋ ತಥೇವ ಹೋತೂತಿ ಮಙ್ಗಲಂ ವತ್ವಾ ಆಕಾಸೇನ ಗನ್ಧಮಾದನಮೇವ ಅಗಮಾಸಿ, ಅಥಾಪರಭಾಗೇ ತೇ ತಯೋಪಿ ಏಕತೋ ಹುತ್ವಾ ಮಧುಲೋಕನಂ ಕರೋನ್ತಾ ತಂ ಮಧುಘಟಂ ಕುಹಿಂತಿ ಪುಚ್ಛಿಂಸು, ಸೋ ತೇನತ್ತನಾ ಕತಕಮ್ಮಂ ವತ್ವಾ ಸಚೇ ತುಮ್ಹೇ ತಸ್ಮಿಂ ಪತ್ತಿಂ ಅನುಮೋದೇಯ್ಯಾಥ, ತಂ ಸಾಧು. ನೋ ಚೇ. ಮಧುಅಗ್ಘನಕಂ ಮಮ ಹತ್ಥತೋ ಗಣ್ಹಥಾತಿ ವತ್ವಾ ತೇಹಿ ತತೋ ನ ನೋ ಅತ್ಥೋ [ನನೋಹತ್ಥೋ ಇತಿಸಬ್ಬತ್ಥ] ಮಧುನಾ, ಕೀದಿಸಸ್ಸೇತಂ ಅದಾಸೀತಿ ವುತ್ತೇ ತಂ ಸುತ್ವಾ ಇತರೋ ಪಚ್ಚೇಕಬುದ್ಧಾ ನಾಮೇ ತೇ ಗನ್ಧಮಾದನೇ ವಸನ್ತಿ ಕಾಸಾವಂ ¶ ಪಾರುಪಿತ್ವಾ ಕುಲೇ ಕುಲೇ ಭಿಕ್ಖಂ ಚರನ್ತಿ, ಸನ್ತೋ ಏತೇ ಸೀಲವನ್ತಾತಿ ಕಥೇಸಿ, ಅಥ ತೇಸು ಜೇಟ್ಠೋ ಬ್ರಾಹ್ಮಣಚಣ್ಡಾಲಕಾಪಿ ಕಾಸಾವಂ ಪರಿದಹಿತ್ವಾ ಚರನ್ತಿ. ನೂನಾಯಂ ಚಣ್ಡಾಲಕೋತಿ ಮಞ್ಞಾಮೀತಿ ಆಹ, ಮಜ್ಝಿಮೋ ಕುಜ್ಝಿತ್ವಾ ತವ ಪಚ್ಚೇಕಬುದ್ಧಂ ಪರಸಮುದ್ದೇ ಖಿಪಾಹೀತಿ ಅವೋಚ, ಅಥ ತೇಸಂ ಕಥಂ ಸುತ್ವಾ ಮಧುದಾಯಕೋ ಮಾ ಭೋ ತುಮ್ಹೇ ಅರಿಯಾನಂ ಮಹೇಸಕ್ಖಾನಂ ಮಹಾನುಭಾವಾನಂ ಪಚ್ಚೇಕಬುದ್ಧಾನಂ ಫರುಸಂ ಕಥೇಥ. ನಿರಯದುಕ್ಖಾ ನ ಭಾಯಥಾತಿಆದಿನಾ ಅನೇಕಾ ಕಾರೇನ ನಿವಾರೇತ್ವಾ ತೇಸಂ ಗುಣಂ ಪಕಾಸೇಸಿ, ತಂ ಸುತ್ವಾ ತೇ ಉಭೋಪಿ ಸಾಧೂತಿ ಪಸನ್ನಾಚಿತ್ತಾ ಅನುಮೋದಿಂಸು, ಅಪರಭಾಗೇ ತೇ ಕಾಲಂ ಕತ್ವಾ ದೇವಮನುಸ್ಸೇಸು ಸಂಸರನ್ತಾ ತತ್ಥ ತತ್ಥ ಮಹಾಸಮ್ಪತ್ತಿಯೋ ಅನುಭವಿತ್ವಾ ಅಮ್ಹಾಕಂ ಸತ್ಥು ಪರಿನಿಬ್ಬಾಣತೋ ದ್ವಿನ್ನಂ ವಸ್ಸಸತಾನಂ ಅಚ್ಚಯೇನ ಅತ್ತನೋ ಅತ್ತನೋ ಸಮ್ಪತ್ತಟ್ಠಾನೇ ನಿಬ್ಬತ್ತಿಂಸು. ತೇನ ವುತ್ತಂ.

೮.

ಅಸೋಕೋ ಮಧುದೋ ಸನ್ಧಿ, ಮಿತ್ತಾದೇವೀ ತು ಚೇಟಿಕಾ;

ಚಣ್ಡಾಲವಾದೀ ನಿಗ್ರೋಧೋ, ತಿಸ್ಸೋ ಸೋ ಪಾರವಾದಿಕೋತಿ.

ತೇಸು ಚಣ್ಡಾಲವಾದೀ ಜೇಟ್ಠವಾಣಿಜೋ ಬಿನ್ದುಸಾರರಞ್ಞೋ ಜೇಟ್ಠಪುತ್ತಸ್ಸ ಸುಮನರಾಜಕುಮಾರಸ್ಸ ಪುತ್ತೋ ಹುತ್ವಾ ನಿಬ್ಬತ್ತಿ. ತಸ್ಸಾಯಮಾನುಪುಬ್ಬೀಕಥಾ. ಬಿನ್ದುಸಾರರಞ್ಞೋ ಕಿರ ದುಬ್ಬಲಕಾಲೇಯೇವ ಅಸೋಕಕುಮಾರೋ ಅತ್ತನಾ ಲದ್ಧಂ ಉಜ್ಜೇನಿಯಾ ರಜ್ಜಂ ಪಹಾಯ ಆಗನ್ತ್ವಾ ಸಬ್ಬನಗರಂ ಅತ್ತನೋ ಹತ್ಥಗತಂ ಕತ್ವಾ ಸುಮನರಾಜಕುಮಾರಂ ಅಗ್ಗಹೇಸಿ. ತಂ ದಿವಸಮೇವ ಸುಮನಸ್ಸ ರಾಜಕುಮಾರಸ್ಸ ಸುಮನಾ ನಾಮ ದೇವೀ ಪರಿಪುಣ್ಣಗಬ್ಭಾ ಅಹೋಸಿ. ಸಾ ಅಞ್ಞಾತಕವೇಸೇನ ನಿಕ್ಖಮಿತ್ವಾ ಅವಿದೂರೇ ಅಞ್ಞತರಂ ಚಣ್ಡಾಲಗಾಮಂ ಸನ್ಧಾಯ ಗಚ್ಛನ್ತೀ ಜೇಟ್ಠಕಚಣ್ಡಾಲಸ್ಸ ಗೇಹತೋ ಅವಿದೂರೇ ನಿಗ್ರೋಧೋ ಅತ್ಥಿ, ತಸ್ಮಿಂ ರುಕ್ಖೇ ಅಧಿವತ್ಥಾಯ ದೇವತಾಯ ಇತೋ ಏಹಿ ಸುಮನೇತಿ ವದನ್ತಿಯಾ ಸದ್ದಂ ಸುತ್ವಾ ತಸ್ಸಾ ಸಮೀಪಂ ಗತಾ, ದೇವತಾ ಅತ್ತನೋ ಆನುಭಾವೇನ ಏಕಂ ಸಾಲಂ ನಿಮ್ಮಿಣಿತ್ವಾ ಏತ್ಥ ವಸಾಹೀತಿ ಪಾದಾಸಿ. ಸಾ ¶ ತಂ ಸಾಲಂ ಪಾವಿಸಿ, ಗತದಿವಸೇಯೇವ ಸಾ ಪುತ್ತಂ ವಿಜಾಯಿ. ಸಾ ತಸ್ಸ ನಿಗ್ರೋಧದೇವತಾಯ ಪರಿಗ್ಗಹಿತತ್ತಾ ನಿಗ್ರೋಧೋತ್ವೇವ ನಾಮಂ ಅಕಾಸಿ. ಜೇಟ್ಠಕಚಣ್ಡಾಲೋ ದಿಟ್ಠದಿವಸತೋಪ್ಪಭುತಿ ತಂ ಅತ್ತನೋ ಸಾಮಿಧೀತರಂ ವಿಯ ಮಞ್ಞಮಾನೋ ನಿಬದ್ಧವತ್ತಂ ಪಟ್ಠಪೇಸಿ. ರಾಜಧೀತಾ ತತ್ಥ ಸತ್ತವಸ್ಸಾನಿ ವಸಿ, ನಿಗ್ರೋಧಕುಮಾರೋಪಿ ಸತ್ತವಸ್ಸಿಕೋ ಜಾತೋ, ತದಾ ಮಹಾವರುಣತ್ಥೇರೋ ನಾಮ ಏಕೋ ಅರಹಾ ದಾರಕಸ್ಸ ಹೇತುಸಮ್ಪದಂ ದಿಸ್ವಾ ವಿಹರಮಾನೋ ಸತ್ತವಸ್ಸಿಕೋ ದಾನಿ ದಾರಕೋ. ಕಾಲೋ ನಂ ಪಬ್ಬಾಜೇತುಂತಿ ಚಿನ್ತೇತ್ವಾ ರಾಜಧೀತಾಯ ಆರೋಚಾಪೇತ್ವಾ ನಿಗ್ರೋಧಕುಮಾರಂ ಪಬ್ಬಾಜೇಸಿ, ಕುಮಾರೋ ಖುರಗ್ಗೇಯೇವ ಅರಹತ್ತಂ ಪಾಪುಣಿ. ತೇನ ವುತ್ತಂ ಮಹಾವಂಸೇ.

೯.

ತಂ ಮಹಾವರುಣೋ ಥೇರೋ, ತದಾ ದಿಸ್ವಾ ಕುಮಾರಕಂ;

ಉಪನಿಸ್ಸಯಸಮ್ಪನ್ನಂ, ಅರಹಾ ಪುಚ್ಛಿ ಮಾತರಂ;

ಪಬ್ಬಾಜೇಸಿ ಖುರಗ್ಗೇ ಸೋ, ಅರಹತ್ತಮಪಾಪುಣೀತಿ.

ಸೋ ಕಿರ ಏಕದಿವಸಂ ಪಾತೋವ ಸರೀರಂ ಪಟಿಜಗ್ಗಿತ್ವಾ ಆಚರಿಯುಪಜ್ಝಾಯವತ್ತಂ ಕತ್ವಾ ಪತ್ತಚೀವರ ಮಾದಾಯ ಮಾತುಉಪಾಸಿಕಾಯ ಗೇಹದ್ವಾರಂ ಗಚ್ಛಾಮೀತಿ ನಿಕ್ಖಮಿ. ಮಾತುನಿವಾಸಟ್ಠಾನಞ್ಚಸ್ಸ ದಕ್ಖಿಣದ್ವಾರೇನ ನಗರಂ ಪವಿಸಿತ್ವಾ ನಗರಮಜ್ಝೇನ ಗನ್ತ್ವಾ ಪಾಚೀನದ್ವಾರೇನ ನಿಕ್ಖಮಿತ್ವಾ ಗನ್ತಬ್ಬಂ ಹೋತಿ. ತೇನ ಚ ಸಮಯೇನ ಅಸೋಕೋ ಧಮ್ಮರಾಜಾ ಪಾಚೀನದಿಸಾಭಿಮುಖೋ ಸೀಹಪಞ್ಜರೇ ಚಙ್ಕಮತಿ. ತಂ ಖಣಂಯೇವ ನಿಗ್ರೋಧೋ ರಾಜಙ್ಗಣಂ ಸಮ್ಪಾಪುಣಿ ಸನ್ತಿನ್ದ್ರಿಯೋ ಸನ್ತಮಾನಸೋ ಯುಗಮತ್ತಂ ಪೇಕ್ಖಮಾನೋ, ತೇನ ವುತ್ತಂ ಏಕದಿವಸಂ ಸೀಹಪಞ್ಜರೇ ಠಿತೋ ಅದ್ದಸ ನಿಗ್ರೋಧಂ ಸಾಮಣೇರಂ ರಾಜಙ್ಗಣೇನ ಗಚ್ಛನ್ತಂ ದನ್ತಂ ಗುತ್ತಂ ಸನ್ತಿನ್ದ್ರಿಯಂ ಇರಿಯಾಪಥಸಮ್ಪನ್ನನ್ತಿ. ದಿಸ್ವಾ ಪನಸ್ಸ ಏತದಹೋಸಿ. ಅಯಂ ಜನೋ ಸಬ್ಬೋಪಿ ವಿಕ್ಖಿತ್ತಚಿತ್ತೋ ಭನ್ತಮಿಗಪಟಿಭಾಗೋ. ಅಯಂ ಪನ ದಹರಕೋ ಅವಿಕ್ಖಿತ್ತೋ ಅತಿವಿಯಸ್ಸ ಆಲೋಕಿತವಿಲೋಕಿತಂ ಸಮ್ಮಿಞ್ಜನಪಸಾರಣಞ್ಚ ಸೋಭತಿ. ಅದ್ಧಾ ಏತಸ್ಸಬ್ಭನ್ತರೇ ಲೋಕುತ್ತರಧಮ್ಮೋ ಭವಿಸ್ಸತೀತಿ ರಞ್ಞೋ ಸಹ ¶ ದಸ್ಸನೇನೇವ ಸಾಮಣೇರೇ ಚಿತ್ತಂ ಪಸೀದಿ, ಪೇಮಂ ಸಣ್ಠಹಿ, ಕಸ್ಮಾ. ಪುಬ್ಬೇ ಕಿರ ಪುಞ್ಞಕರಣಕಾಲೇ ರಞ್ಞೋ ಜೇಟ್ಠಕಭಾತಾ ವಾಣಿಜಕೋಯಂ.

೧೦.

ಪುಬ್ಬೇವ [ಪುಬ್ಬೇನ ಇತಿಕತ್ಥಚಿ] ಸನ್ನಿವಾಸೇನ, ಪಚ್ಚುಪ್ಪನ್ನಹಿತೇನ ವಾ;

ಏವಂ ತಂ ಜಾಯತೇ ಪೇಮಂ, ಉಪ್ಪಲಂವ ಯಥೋದಕೇತಿ.

ಅಥ ರಾಜಾ ಸಞ್ಜಾತಪೇಮೋ ಸಬಹುಮಾನೋ ಸಾಮಣೇರಂ ಪಕ್ಕೋಸಥಾತಿ ಅಮಚ್ಚೇ ಪೇಸೇಸಿ, ತೇ ಅತಿಚಿರಾಯನ್ತೀತಿ ಪುನ ದ್ವೇ ತಯೋ ಪೇಸೇಸಿ ತುರಿತಂ ಆಗಚ್ಛತೂತಿ. ಸಾಮಣೇರೋ ಅತ್ತನೋ ಪಕತಿಯಾ ಏವ ಅಗಮಾಸಿ. ರಾಜಾ ಪತಿರೂಪಾಸನಂ ಞತ್ವಾ ನಿಸೀದಥಾತಿ ಆಹ. ಸೋ ಇತೋಚಿತೋ ಚ ವಿಲೋಕೇತ್ವಾ ನತ್ಥಿ ದಾನಿ ಅಞ್ಞೋ ಭಿಕ್ಖೂತಿ ಸಮುಸ್ಸಿತಸೇತಚ್ಛತ್ತಂ ರಾಜಪಲ್ಲಙ್ಕಂ ಉಪಸಙ್ಕಮಿತ್ವಾ ಪತ್ತಂ ಗಣ್ಹನತ್ಥಾಯ ರಞ್ಞೋ ಆಕಾರಂ ದಸ್ಸೇಸಿ. ರಾಜಾ ತಂ ಪಲ್ಲಙ್ಕಸಮೀಪಂ ಗಚ್ಛನ್ತಂ ಏವ ದಿಸ್ವಾ ಚಿನ್ತೇಸಿ ಅಜ್ಜೇವ ದಾನಿ ಅಯಂ ಸಾಮಣೇರೋ ಇಮಸ್ಸ ಗೇಹಸ್ಸ ಸಾಮಿಕೋ ಭವಿಸ್ಸತೀತಿ, ಸಾಮಣೇರೋ ರಞ್ಞೋ ಹತ್ಥೇ ಪತ್ತಂ ದತ್ವಾ ಪಲ್ಲಙ್ಕಂ ಅಭಿರುಹಿತ್ವಾ ನಿಸೀದಿ. ರಾಜಾ ಅತ್ತನೋ ಅತ್ಥಾಯ ಸಮ್ಪಾದಿತಂ ಸಬ್ಬಂ ಯಾಗುಖಜ್ಜಕಭತ್ತವಿಕತಿಂ ಉಪನಾಮೇಸಿ. ಸಾಮಣೇರೋ ಅತ್ತನೋ ಯಾಪನಮತ್ತಮೇವ ಸಮ್ಪಟಿಚ್ಛಿ. ಭತ್ತಕಿಚ್ಚಾವಸಾನೇ ರಾಜಾ ಆಹ ಸತ್ಥಾರಾ ತುಮ್ಹಾಕಂ ದಿನ್ನಓವಾದಂ ಜಾನಾಥಾತಿ. ಜಾನಾಮಿ ಮಹಾರಾಜ ಏಕದೇಸೇನಾತಿ. ತಾತ ಮಯ್ಹಮ್ಪೀ ನಂ ಕಥೇಹೀತಿ. ಸಾಧು ಮಹಾರಾಜಾತಿ ರಞ್ಞೋ ಅನುರೂಪಂ ಧಮ್ಮಪಏದ ಅಪ್ಪಮಾದವಗ್ಗಂ ಅನುಮೋದನತ್ಥಾಯ ಅಭಾಸಿ. ರಾಜಾ ಪನ ಅಪ್ಪಮಾದೋ ಅಮತಪದಂ, ಪಮಾದೋ ಮಚ್ಚುನೋ ಪದಂತಿ ಸುತ್ವಾವ ಅಞ್ಞಾತಂ ತಾತ, ಪರಿಯೋಸಾಪೇಹೀತಿ ಆಹ. ಸಾಮಣೇರೋ ಅನುಮೋದನಾ ವಸಾನೇ ದ್ವತ್ತಿಂಸಧುವಭತ್ತಾನಿ [ದ್ವಿತ್ತಿಂಸಧುರಭತ್ತಾನಿ ಇತಿಸಬ್ಬತ್ಥ] ಲಭಿತ್ವಾ ಪುನ ದಿವಸೇ ದ್ವತ್ತಿಂಸಭಿಕ್ಖೂ ಗಹೇತ್ವಾ ರಾಜನ್ತೋಪುರಂ ಪವಿಸಿತ್ವಾ ಭತ್ತಕಿಚ್ಚ ಮಕಾಸಿ. ರಾಜಾ ಅಞ್ಞೇಪಿ ದ್ವತ್ತಿಂಸಭಿಕ್ಖೂ ತುಮ್ಹೇಹಿ ಸದ್ಧಿಂಸ್ವೇ ಭಿಕ್ಖಂ ಗಣ್ಹನ್ತೂತಿ ಏತೇನೇವ ಉಪಾಯೇನ ದಿವಸೇ ¶ ದಿವಸೇ ವಡ್ಢಾಪೇನ್ತೋ ಸಟ್ಠಿಸಹಸ್ಸಾನಂ ಬ್ರಾಹ್ಮಣಪರಿಬ್ಬಾಜಕಾನಂ ಭತ್ತಂ ಉಪಚ್ಛಿನ್ದಿತ್ವಾ ಅನ್ತೋನಿವೇಸನೇ ಸಟ್ಠಿಸಹಸ್ಸಾನಂ ಭಿಕ್ಖೂನಂ ನಿಚ್ಚಭತ್ತಂ ಪಟ್ಠಪೇಸಿ ನಿಗ್ರೋಧತ್ಥೇರಗತೇನೇವ ಪಸಾದೇನ. ನಿಗ್ರೋಧತ್ಥೇರೋಪಿ ರಾಜಾನಂ ಸಪರಿಸಂ ತೀಸು ಸರಣೇಸು ಪಞ್ಚಸು ಸೀಲೇಸು ಪತಿಟ್ಠಾಪೇತ್ವಾ ಬುದ್ಧಸಾಸನೇ ಪೋಥುಜ್ಜನಿಕೇನ ಪಸಾದೇನ ಅಚಲಪ್ಪಸಾದಂ ಕತ್ವಾ ಪತಿಟ್ಠಾಪೇಸಿ. ರಾಜಾಪಿ ಅಸೋಕಾರಾಮಂ ನಾಮ ಮಹಾವಿಹಾರಂ ಕಾರಾಪೇತ್ವಾ ಸಟ್ಠಿಸಹಸ್ಸಾನಂ ಭಿಕ್ಖೂನಂ ನಿಚ್ಚಭತ್ತಂ ಪಟ್ಠಪೇಸಿ. ಸಕಲಜಮ್ಬುದೀಪೇ ಚತುರಾಸೀತಿಯಾ ನಗರಸಹಸ್ಸೇಸು ಚತುರಾಸೀತಿವಿಹಾರಸಹಸ್ಸಾನಿ ಕಾರಾಪೇಸಿ. ತೇನ ವುತ್ತಂ.

೧೧.

ಚಣ್ಡಾಲವಾದಿದೋಸೇನ,

ಜಾತೋ ಚಣ್ಡಾಲಗಾಮಕೇ;

ಪತ್ತಾನುಮೋದನಾ ಪಾಕಾ,

ಆಸೇ ಸೋ [ಅಸೇಸೋ ಇತಿಪಿಕತ್ಥಚಿ] ಹಿ ಅನಾಸವೋತಿ.

ಅಯಂ ನಿಗ್ರೋಧತ್ಥೇರಸ್ಸ ಕಥಾನಯೋ.

ಮಧುದಾಯಕೋ ಪನ ವಾಣಿಜೋ ದೇವಲೋಕತೋ ಚವಿತ್ವಾ ಪುಪ್ಫಪುರೇ ರಾಜಕುಲೇ ಉಪ್ಪಜ್ಜಿತ್ವಾ ಪಿಯದಾಸೋ ನಾಮ ಕುಮಾರೋ ಹುತ್ವಾ ಛತ್ತಂ ಉಸ್ಸಾಪೇತ್ವಾ ಸಕಲಜಮ್ಬುದೀಪೇ ಏಕರಜ್ಜಂ ಅಕಾಸಿ. ಕಥಂ.

ಬಿನ್ದುಸಾರರಾಜಸ್ಸ ಏಕಸತಪುತ್ತಾ ಅಹೇಸುಂ. ತೇ ಸಬ್ಬೇ ಅಸೋಕೋ ಅತ್ತನಾ ಸದ್ಧಿಂ ಏಕಮಾತಿಕಂ ತಿಸ್ಸಕುಮಾರಂ ಠಪೇತ್ವಾ ಘಾತೇಸಿ. ಘಾತೇನ್ತೋ ಚತ್ತಾರಿ ವಸ್ಸಾನಿ ಅನಭಿಸಿತ್ತೋವ ರಜ್ಜಂ ಕಾರೇತ್ವಾ ಚತುನ್ನಂ ವಸ್ಸಾನಂ ಅಚ್ಚಯೇನ ತಥಾಗತಸ್ಸ ಪರಿನಿಬ್ಬಾಣತೋ ದ್ವಿನ್ನಂ ವಸ್ಸಸತನಂ ಉಪರಿ ಅಟ್ಠಾರಸಮೇ ವಸ್ಸೇ ಸಕಲಜಮ್ಬುದೀಪೇ ಏಕರಜ್ಜಾಭಿಸೇಕಂ ಪಾಪುಣಿ. ಅಥ ತಂ ಸಕಲಜಮ್ಬುದೀಪೇ ಚತುರಾಸೀತಿನಗರಸಹಸ್ಸೇ ರಾಜಾನೋ ಆಗನ್ತ್ವಾ ಉಪಟ್ಠಹಿಸ್ಸನ್ತಿ. ತಿಣ್ಣಂ ಉತೂನಂ ಅನುಚ್ಛವಿಕಾ ತಯೋ ಪಾಸಾದಾ ಅಹೇಸುಂ. ಏಕೋ ಮಹಾಸಪ್ಪಿಕೋ ¶ , ಏಕೋ ಮೋರಗೀವೋ, ಏಕೋ ಮಙ್ಗಲೋ ನಾಮ, ತೇಸು ನೇಕನಾಟಕಸಹಸ್ಸಪರಿವುತೋ ಪಟಿವಸತಿ. ಯಾಸ್ಸ ಮಧುಆಪಣಂ ದಸ್ಸೇಸಿ, ಸಾ ಅಸನ್ಧಿಮಿತ್ತಾ ನಾಮ ದೇವಚ್ಛರಪರಿಭಾಗಾ ರಾಜಧೀತಾ ಹುತ್ವಾ ಸಟ್ಠಿಸಹಸ್ಸಾನಂ ಇತ್ಥೀನಂ ಜೇಟ್ಠಿಕಾ ಧಮ್ಮಾಸೋಕರಞ್ಞೋ ಅಗ್ಗಮಹೇಸೀ ಅಹೋಸಿ. ಅಭಿಸೇಕಾನನ್ತರಂ ತಸ್ಸ ಇಮಾ ರಾಜಿದ್ಧಿಯೋ ಆಗತಾ, ಪಥವಿಯಾ ಚ ಹೇಟ್ಠಾ ಯೋಜನಪ್ಪಮಾಣೇ ಆಣಾ ಪವತ್ತತಿ. ತಥಾ ಉಪರಿ ಆಕಾಸೇ. ಅನೋತತ್ತದಹತೋ ಅಟ್ಠಹಿ ಕಾಜೇಹಿ ಸೋಳಸಪಾನೀಯಘಟೇ ದಿವಸೇ ದಿವಸೇ ದೇವತಾ ಆಹರನ್ತಿ. ಯತೋ ಸಾಸನೇ ಉಪ್ಪನ್ನಸದ್ಧೋ ಹುತ್ವಾ ಅಟ್ಠಘಟೇ ಭಿಕ್ಖುಸಙ್ಘಸ್ಸ ಅದಾಸಿ. ದ್ವೇ ಘಟೇ ಸಟ್ಠಿಮತ್ತಾನಂ ತೇಪಿಟಕಭಿಕ್ಖೂನಂ ದ್ವೇ ಘಟೇ ಅಗ್ಗಮಹೇಸಿಯಾ ಅಸನ್ಧಿಮಿತ್ತಾಯ. ಚತ್ತಾರೋ ಘಟೇ ಅತ್ತನಾ ಪರಿಭುಞ್ಚಿ ದೇವತಾ [ದೇವತಾಏವಂ ಇತಿಸಬ್ಬತ್ಥ], ಏವ ಹಿಮವನ್ತತೋ ನಾಗಲತಾದನ್ತಕಟ್ಠಂ ಸಿನಿದ್ಧಂ ಮುದುಕಂ ರಸವನ್ತಂ ದಿವಸೇ ದಿವಸೇ ಆಹರನ್ತಿ, ತೇನ ರಞ್ಞೋ ಚ ಮಹೇಸಿಯಾ ಚ ಸೋಳಸನ್ನಂ ನಾಟಕಸಹಸ್ಸಾನಞ್ಚ ಸಟ್ಠಿಮತ್ತಾನಞ್ಚ ಭಿಕ್ಖುಸಹಸ್ಸಾನಂ ದೇವಸಿಕಂ ದನ್ತಪೋಣಕಿಚ್ಚಂ ನಿಪ್ಫಜ್ಜತಿ. ದೇವಸಿಕಮೇವಸ್ಸ ದೇವತಾ ಅಗದಾಮಲಕಂ ಅಗದಹರೀಟಕಂ ಸುವಣ್ಣವಣ್ಣಞ್ಚ ಗನ್ಧರಸಸಮ್ಪನ್ನಂ ಅಮ್ಬಪಕ್ಕಂ ಆಹರನ್ತಿ. ಛದ್ದನ್ತದಹತೋ ಪಞ್ಚವಣ್ಣಂ ನಿವಾಸನಪಾರುಪನಂ ಪೀತಕವಣ್ಣಂ ಹತ್ಥಪುಞ್ಛನಕಪಟಂ [ಹತ್ಥಪುಚ್ಛನಕಪಟ್ಟಂ ಇತಿಸಬ್ಬತ್ಥ] ದಿಬ್ಬಞ್ಚ ಪಾನಂ ಆಹರನ್ತಿ. ದೇವಸಿಕಮೇವಸ್ಸ ಅನುಲೇಪನಗನ್ಧಂ ಪಾರುಪನತ್ಥಾಯ ಅಸುತ್ತಮಯಿಕಂ ಸುಮನಪುಪ್ಫಪಟಂ ಮಹಾರಹಞ್ಜ ಅಞ್ಜನಂ ನಾಗಭವನತೋ ನಾಗರಾಜಾನೋ ಆಹರನ್ತಿ. ಛದ್ದನ್ತದಹತೋಯೇವ ಉಟ್ಠಿತಸ್ಸ ಸಾಲಿನೋ ನವವಾಹಸಹಸ್ಸನಿ ದಿವಸೇ ದಿವಸೇ ಸುವಾ ಆಹರನ್ತಿ. ತೇ ಮೂಸಿಕಾ ನಿತ್ಥುಸಕಾನಿ ಕರೋನ್ತಿ. ಏಕೋಪಿ ಖಣ್ಡತಣ್ಡುಲೋ ನಾಹೋಸಿ. ರಞ್ಞೋ ಸಬ್ಬಟ್ಠಾನೇಸು ಅಯಮೇವ ತಣ್ಡುಲೋ ಪರಿಭೋಗಂ ಗಚ್ಛತಿ. ಮಧುಮಕ್ಖಿಕಾ ಮಧುಂ ಕರೋನ್ತಿ. ಕಮ್ಮಾರಸಾಲಾಸು ಅಚ್ಛಾ ಕೂಟಂ ಪಹರನ್ತಿ. ಕರವೀಕಸಕುಣಾ ಆಗನ್ತ್ವಾ ಮಧುರಸ್ಸರಂ ವಿಕೂಜೇನ್ತಾ ರಞ್ಞೋ ಬಲಿಕಮ್ಮಂ ಕರೋನ್ತಿ. ಇಮಾಹಿ ಇದ್ಧೀಹಿ ಸಮನ್ನಾಗತೋ ರಾಜಾ ಏಕದಿವಸಂ ಸುವಣ್ಣಸಙ್ಖಲಿಕಬನ್ಧನಂ ¶ ಪೇಸೇತ್ವಾ ಚತುನ್ನಂ ಬುದ್ಧಾನಂ ಅಧಿಗತರೂಪದಸ್ಸನಂ ಕಪ್ಪಾ ಯುಕಂ ಮಹಾಕಾಲನಾಗರಾಜಾನಂ ಆನಯಿತ್ವಾ ಸೇತಚ್ಛತ್ತಸ್ಸ ಹೇಟ್ಠಾ ಮಹಾರಹೇ ಪಲ್ಲಙ್ಕೇ ನಿಸೀದಾಪೇತ್ವಾ ಅನೇಕಸತ ವಣ್ಣೇಹಿ ಜಲಜಥಲಜಪುಪ್ಫೇಹಿ ಸುವಣ್ಣಪುಪ್ಫೇಹಿ ಚ ಪೂಜಂ ಕತ್ವಾ ಸಬ್ಬಾ ಲಙ್ಕಾರಪತಿಮಣ್ಡಿತೇಹಿ ಸೋಳಸಹಿ ನಾಟಕಸಹಸ್ಸೇಹಿ ಸಮನ್ತತೋ ಪರಿಕ್ಖಿಪಿತ್ವಾ ಅನನ್ತಞಾಣಸ್ಸ ತಾವ ಮೇ ಸದ್ಧಮ್ಮವರಚಕ್ಕವತ್ತಿನೋ ಸಮ್ಮಾಸಮ್ಬುದ್ಧಸ್ಸ [ಸಮ್ಮಾಸಮ್ಬುದ್ಧರೂಪಂ ಇತಿಸಬ್ಬತ್ಥ] ರೂಪಂ ಇಮೇಸಂ ಅಕ್ಖೀನಂ ಆಪಾಥಂ ಕರೋಹೀತಿ ವತ್ವಾ ತೇನ ನಿಮ್ಮಿತಂ ಸಕಲಸರೀರೇ ವಿಪ್ಪಕಿಣ್ಣಪುಞ್ಞಪ್ಪಭಾವನಿಬ್ಬತ್ತಾಸೀತಿ ಅನುಬ್ಯಞ್ಜನಪತಿಮಣ್ಡಿತ ದ್ವತ್ತಿಂಸ ಮಹಾಪುರಿಸಲಕ್ಖಣ ಸಸ್ಸಿರೀಕತಾಯ ವಿಕಚಕಮಲುಪ್ಪಲಪುಣ್ಡರೀಕಪತಿಮಣ್ಡಿತಮಿವ ಸಲಿಲತಲಂ ತಾರಾಗಣರಂಸಿಜಾಲವಿಸರವಿಪ್ಫುರಿತಸೋಭಾಸಮುಜ್ಜಲಮಿವ ಗಗನತಲಂ ನೀಲಪೀತಲೋಹಿತಾ ದಿಭೇದಂ ವಿಚಿತ್ತವಣ್ಣರಂಸಿವಿನದ್ಧಬ್ಯಾಮಪ್ಪಭಾಪರಿಕ್ಖೇಪವಿಲಾಸಿತಾಯ ಸಞ್ಚ್ಯಾಪ್ಪಭಾನುರಾಗಇನ್ದಧನುವಿಜ್ಜುಲ್ಲತಾಪರಿಕ್ಖಿತ್ತಮಿವ ಕಣಕಗಿರಿಸಿಖರಂ ನಾನಾವಿರಾಗವಿಮಲಕೇತುಮಾಲಾಸಮುಜ್ಜಲಿತಚಾರುಮತ್ಥಕಸೋಭನಂ ನಯನರಸಾಯನಮಿವ ಚ ಬ್ರಹ್ಮದೇವಮನುಜನಾಗಯಕ್ಖಗಣಾನಂ ಬುದ್ಧರೂಪಂ ಪಸ್ಸನ್ತೋ ಸತ್ತದಿವಸಾನಿ ಅಕ್ಖಿಪೂಜಂ ನಾಮ ಅಕಾಸಿ. ರಾಜಾ ಕಿರ ಅಭಿಸೇಕಂ ಪಾಪುಣಿತ್ವಾ ತೀಣಿಯೇವ ಸಂವಚ್ಛರಾನಿ ಬಾಹಿರಕಪಾಸಣ್ಡಂ ಪರಿಗಣ್ಹಿ, ಚತುತ್ಥೇ ಸಂವಚ್ಛರೇ ಬುದ್ಧಸಾಸನೇ ಪಸೀದಿ, ತಸ್ಸ ಪನ ಪಿತಾ ಬಿನ್ದುಸಾರೋ ಬ್ರಾಹ್ಮಣಭತ್ತೋ ಅಹೋಸಿ. ಸೋ ಬ್ರಾಹ್ಮಣಾನಞ್ಚ ಬ್ರಾಹ್ಮಣಜಾತಿಪಾಸಣ್ಡಾನಂ ಪಣ್ಡರಙ್ಗಪರಿಬ್ಬಾಜಕಾನಞ್ಚ ಸಟ್ಠಿಸಹಸ್ಸಮತ್ತಾನಂ ನಿಚ್ಚಭತ್ತಂ ಪಟ್ಠಪೇಸಿ. ಅಸೋಕೋಪಿ ಪಿತರಾ ಪವತ್ತಿತಂ ದಾನಂ ಅತ್ತನೋ ಅನ್ತೋಪುರೇ [ಅನ್ತೇಪುರೇ ಇತಿಸಬ್ಬತ್ಥ] ತಥೇವ ದದಮಾನೋ ಏಕದಿವಸಂ ಸೀಹಪಞ್ಜರೇ ಠಿತೋ ತೇ ಉಪಸಮಪರಿಬಾಹಿರೇನ ಆಚಾರೇನ ಭುಞ್ಜಮಾನೇ ಅಸಂಯತಿನ್ದ್ರಿಯೇ ಅವಿನೀತಇರಿಯಾಪಥೇ ದಿಸ್ವಾ ಚಿನ್ತೇಸಿ, ಈದಿಸಂ ದಾನಂ ಉಪಪರಿಕ್ಖಿತ್ವಾ ಯುತ್ತಟ್ಠಾನೇ ದಾತುಂ ವಟ್ಟತೀತಿ. ಏವಂ ಚಿನ್ತೇತ್ವಾ ಅಮಚ್ಚೇ ಆಹ, ಗಚ್ಛಥ ಭಣೇ ಅತ್ತನೋ ಅತ್ತನೋ ಸಾಧುಸಮ್ಮತೇ ಸಮಣಬ್ರಾಹ್ಮಣೇ ಅನ್ತೋಪುರಂ ಅಭಿಹರಥ ದಾನಂ ದಸ್ಸಾಮೀತಿ, ಅಮಚ್ಚಾ ಸಾಧು ದೇವಾತಿ ರಞ್ಞೋ ¶ ಪಟಿಸ್ಸುತ್ವಾ ತೇ ತೇ ಪಣ್ಡರಙ್ಗಪರಿಬ್ಬಾಜಕಾ ಜೀವಕ ನಿಗಣ್ಠಾದಯೋ ಆನೇತ್ವಾ ಇಮೇ ಮಹಾರಾಜ ಅಮ್ಹಾಕಂ ಅರಹನ್ತೋತಿ ಆಹಂಸು, ಅಥ ರಾಜಾ ಅನ್ತೋಪುರೇ ಉಚ್ಚಾವಚಾನಿ ಆಸನಾನಿ ಪಞ್ಞಾಪೇತ್ವಾ ಆಗಚ್ಛನ್ತೂತಿ ವತ್ವಾ ಆಗತಾಗತೇ ಆಹ ಅತ್ತನೋ ಅನುರೂಪೇ ಆಸನೇ ನಿಸೀದಥಾತಿ, ಏಕಚ್ಚೇ ಭದ್ದಪೀಠಕೇಸು ಏಕಚ್ಚೇ ಫಲಕಪೀಠಕೇಸು ನಿಸೀದಿಂಸು, ತಂ ದಿಸ್ವಾ ರಾಜಾ ನತ್ಥಿ ಏತೇಸಂ ಅನ್ತೋ ಸಾರೋತಿ ಞತ್ವಾ ತೇಸಂ ಅನುರೂಪಂ ಖಾದನೀಯಭೋಜನೀಯಂ ದತ್ವಾ ಉಯ್ಯೋಜೇಸಿ. ಏವಂ ಗಚ್ಛನ್ತೇ ಕಾಲೇ ಏಕದಿವಸಂ ಸೀಹಪಞ್ಜರೇ ಠಿತೋ ನಿಗ್ರೋಧಸಾಮಣೇರಂ ದಿಸ್ವಾ ತಸ್ಮಿಂ ಗತೇನ ಪಸಾದೇನ ಬುದ್ಧಸಾಸನೇ ಪಸನ್ನೋ ಸಟ್ಠಿಸಹಸ್ಸಮತ್ತೇ ಪಾಸಣ್ಡಿಯೇ ಅಪನೇತ್ವಾ ಸಟ್ಠಿಸಹಸ್ಸಮತ್ತೇ ಭಿಕ್ಖೂ ಭೋಜೇನ್ತೋ ಬುದ್ಧಸಾಸನೇ ಪಸೀದಿತ್ವಾ ಅಸೋಕಾರಾಮಂ ಕಾರೇತ್ವಾ ತತ್ಥ ತೇ ವಸಾಪೇನ್ತೋ ಏಕದಿವಸಂ ಅಸೋಕಾರಾಮೇ ಸಟ್ಠಿಸಹಸ್ಸಭಿಕ್ಖೂನಂ ದಾನಂ ದತ್ವಾ ತೇಸಂ ಮಜ್ಝೇ ನಿಸಜ್ಜ ಸಙ್ಘಂ ಚತೂಹಿ ಪಚ್ಚಯೇಹಿ ಪವಾರೇತ್ವಾ ಇಮಂ ಪಞ್ಹಂ ಪುಚ್ಛಿ, ಭನ್ತೇ ಭಗವತಾ ದೇಸಿತಧಮ್ಮೋ ನಾಮ ಕಿತ್ತಕೋ ಹೋತೀತಿ, ಮಹಾರಾಜ ನವ ಅಙ್ಗಾನಿ, ಖನ್ಧತೋ ಚತುರಾಸೀತಿಧಮ್ಮಕ್ಖನ್ಧಸಹಸ್ಸಾನೀತಿ. ರಾಜಾ ಧಮ್ಮೇ ಪಸೀದಿತ್ವಾ ಏಕೇಕಂ ಧಮ್ಮಕ್ಖನ್ಧಂ ಏಕೇಕವಿಹಾರೇನ ಪೂಜೇಸ್ಸಾಮೀತಿ ಏಕದಿವಸಮೇವ ಛನ್ನವುತಿಕೋಟಿಖನಂ ವಿಸ್ಸಜ್ಜೇತ್ವಾ ಅಮಚ್ಚೇ ಆಣಾಪೇಸಿ, ಏಕಮೇಕಸ್ಮಿಂ ನಗರೇ ಏಕಮೇಕಂ ವಿಹಾರಂ ಕಾರೇನ್ತಾ ಚತುರಾಸೀತಿಯಾ ನಗರಸಹಸ್ಸೇಸು ಚತುರಾಸೀತಿವಿಹಾರಸಹಸ್ಸಾನಿ ಕಾರಾಪೇಥಾತಿ, ಸಯಞ್ಚ ಅಸೋಕಾರಾಮೇ ಅಸೋಕಮಹಾವಿಹಾರತ್ಥಾಯ [ಸಯಂಚಅಸೋಕಹೋವಿಹಾರತ್ಥಾಯ ಇತಿಪಿಕತ್ಥಚಿ] ಕಮ್ಮಂ ಪಟ್ಠಪೇಸಿ, ಸಙ್ಘೋ ಇನ್ದಗುತ್ತತ್ಥೇರಂ ನಾಮ ಮಹಿದ್ಧಿಕಂ ಮಹಾನುಭಾವಂ ಖೀಣಾಸವಂ ನವಕಮ್ಮಾಧಿಟ್ಠಾಯಕಂ ಅದಾಸಿ, ಥೇರೋ ಯಂ ಯಂ ನ ನಿಟ್ಠಾತಿ, ತಂ ತಂ ಅತ್ತನೋ ಆನುಭಾವೇನ ನಿಟ್ಠಾಪೇಸಿ, ಏವಂಪಿತೀಹಿ ಸಂವಚ್ಛರೇಹಿ ವಿಹಾರಕಮ್ಮಂ ನಿಟ್ಠಾಪೇಸಿ, ಏಕದಿವಸಮೇವ ಸಬ್ಬನಗರೇಹಿ ಪಣ್ಣಾನಿ ಆಗಮಿಂಸು, ಅಮಚ್ಚಾ ರಞ್ಞೋ ಆರೋಚೇಸುಂ ನಿಟ್ಠಿತಾನಿ ದೇವ ಚತುರಾಸೀತಿಮಹಾವಿಹಾರಸಹಸ್ಸಾನೀತಿ. ಅಥ ರಾಜಾ ¶ ಭಿಕ್ಖುಸಙ್ಘಂ ಉಪಸಙ್ಕಮಿತ್ವಾ ಭನ್ತೇ ಮಯಾ ಚತುರಾಸೀತಿವಿಹಾರಸಹಸ್ಸಾನಿ ಕಾರಿತಾನಿ, ಧಾತುಯೋ ಕುತೋ ಲಚ್ಛಾಮೀತಿ ಪುಚ್ಛಿ, ಮಹಾರಾಜ ಧಾತುನಿಧಾನಂ ನಾಮ ಅತ್ಥೀತಿ ಸುಣೋಮ, ನ ಪನ ಪಞ್ಞಾಯತಿ ಅಸುಕಟ್ಠಾನೇತಿ. ರಾಜಾ ರಾಜಗಹೇ ಚೇತಿಯಂ ಭಿನ್ದಾಪೇತ್ವಾ ಧಾತುಂ ಅಪಸ್ಸನ್ತೋ ಪಟಿಪಾಕತಿಕಂ ಕಾರಾಪೇತ್ವಾ ಭಿಕ್ಖುಭಿಕ್ಖುಣಿಯೋ ಉಪಾಸಕಉಪಾಸಿಕಾಯೋತಿ ಚತಸ್ಸೋ ಪರಿಸಾ ಗಹೇತ್ವಾ ವೇಸಾಲಿಯಂ ಗತೋ. ತತ್ರಾಪಿ ಅಲಭಿತ್ವಾ ಕಪಿಲವತ್ಥುಂ ಗತೋ, ತತ್ರಾಪಿ ಅಲಭಿತ್ವಾ ರಾಮಗಾಮಂ ಗತೋ, ರಾಮಗಾಮೇ ನಾಗಾ ಚೇತಿಯಂ ಭಿನ್ದಿತುಂ ನಾದಂಸು. ಚೇತಿಯೇ ನಿಪತಿತಕುದ್ದಾಲೋ ಖಣ್ಡಾವಣ್ಡಂ ಹೋತಿ, ಏವಂ ತತ್ರಾಪಿ ಅಲಭಿತ್ವಾ ಅಲ್ಲಕಪ್ಪಂ ಪಾವಂ ಕುಸಿನಾರಂತಿ ಸಬ್ಬಚೇತಿಯಾನಿ ಭಿನ್ದಿತ್ವಾ ಧಾತುಂ ಅಲಭಿತ್ವಾ ಪಟಿಪಾಕತಿಕಾನಿ ಕತ್ವಾ ರಾಜಗಹಂ ಗನ್ತ್ವಾ ಚತಸ್ಸೋ ಪರಿಸಾ ಸನ್ನಿಪಾತಾಪೇತ್ವಾ ಅತ್ಥಿ ಕೇನಚಿ ಸುತಪುಬ್ಬಂ ಅಸುಕಟ್ಠಾನೇ ಧಾತುನಿಧಾನಂತಿ ಪುಚ್ಛಿ. ತತ್ಥೇಕೋ ವೀಸಂವಸ್ಸ ಸತಿಕೋ ಥೇರೋ ಅಸುಕಟ್ಠಾನೇ ಧಾತುನಿಧಾನಂತಿ ನ ಜಾನಾಮಿ, ಮಯ್ಹಂ ಪನ ಪಿತಾಮಹತ್ಥೇರೋ ಮಯಿ ಸತ್ತವಸ್ಸಿಕಾಲೇ ಮಾಲಾಚಙ್ಗೋಟಕಂ ಗಾಹಾಪೇತ್ವಾ ಏಹಿ ಸಾಮಣೇರ ಅಸುಕಗಚ್ಛನ್ತರೇ ಪಾಸಾಣಥೂಪೋ ಅತ್ಥಿ. ತತ್ಥ ಗಚ್ಛಾಮಾತಿ ಗನ್ತ್ವಾ ಪೂಜೇತ್ವಾ ಇಮಂ ಠಾನಂ ಉಪಧಾರೇತುಂ ವಟ್ಟತಿ ಸಾಮಣೇರಾತಿ ಆಹ. ಅಹಂ ಏತಮೇವ ಜಾನಾಮಿ ಮಹಾರಾಜಾತಿ ಆಹ. ರಾಜಾ ಏತದೇವ ಠಾನಂತಿ ವತ್ವಾ ಗಚ್ಛೇ ಹರಾಪೇತ್ವಾ ಪಾಸಾಣಥೂಪಂ ಪಂಸುಂಚ ಅಪನೇತ್ವಾ ಹೇಟ್ಠಾ ಸುಧಾಭೂಮಿಂ ಅದ್ದಸ, ತತೋ ಸುಧಾ ಚ ಇಟ್ಠಕಾಯೋ ಚ ಹರಾಪೇತ್ವಾ ಅನುಪುಬ್ಬೇನ ಪರಿವೇಣಂ ಓರುಯ್ಹ ಸತ್ತರತನವಾಲಿಕಂ ಅಸಿಹತ್ಥಾನಿ ಚ ಕಟ್ಠರೂಪಕಾನಿ ಸಮ್ಪರಿವತ್ತನ್ತಾನಿ ಅದ್ದಸ, ಸೋ ಯಕ್ಖದಾಸಕೇ ಪಕ್ಕೋಸಾಪೇತ್ವಾ ಬಲಿಕಮ್ಮಂ ಕಾರಾಪೇತ್ವಾಪಿ ನೇವ ಅನ್ತಂ ಪಸ್ಸನ್ತೋ ದೇವತಾ ನಮಸ್ಸಮಾನೋ ಅಹಂ ಇಮಾ ಧಾತುಯೋ ಗಹೇತ್ವಾ ಚತುರಾಸೀತಿವಿಹಾರಸಹಸ್ಸೇ ನಿದಹಿತ್ವಾ ಸಕ್ಕಾರಂ ಕರೋಮಿ. ಮಾ ಮೇ ದೇವತಾ ಅನ್ತರಾಯಂ ಕರೋನ್ತೂತಿ ಆಹ, ಸಕ್ಕೋ ದೇವರಾಜಾ ಚಾರಿಕಂ ಚರನ್ತೋ ತಂ ದಿಸ್ವಾ ವಿಸ್ಸಕಮ್ಮಂ ಆಮನ್ತೇತ್ವಾ ತಾತ ಅಸೋಕಧಮ್ಮರಾಜಾ ಧಾತುಯೋ ¶ ನೀಹರಿಸ್ಸಾಮೀತಿ ಪರಿವೇಣಂ ಓತಿಣ್ಣೋ. ಗನ್ತ್ವಾ ಕಟ್ಠರೂಪಾನಿ ನೀಹರಾಪೇಹೀತಿ. ಸೋ ಪಞ್ಚಚೂಲಕಗಾಮದಾರಕವೇಸೇನ ಗನ್ತ್ವಾ ರಞ್ಞೋ ಪುರತೋ ಧನುಕಹತ್ಥೋ ಠತ್ವಾ ಹಾರೇಮಿ ಮಹಾರಾಜಾತಿ ಆಹ, ಹರ ತಾತಾತಿ ಸರಂ ಗಹೇತ್ವಾ ಸನ್ಧಿಮ್ಹಿಯೇವ ವಿಜ್ಝಿ, ಸಬ್ಬಂ ವಿಪ್ಪಕಿರೀಯಿತ್ಥ, ಅಥ ರಾಜಾ ಆವಿಞ್ಜನೇ [ಅವಿಞ್ಚಿನೇ ಇತಿಪಿಕತ್ಥಚಿ] ಬನ್ಧಕುಞ್ಚಿಕಮುದ್ದಿಕಂ ಗಣ್ಹಿ, ಮಣಿಕ್ಖನ್ಧಂ ಪಸ್ಸಿತ್ವಾ ಅನಾಗತೇ ದಳಿದ್ದರಾಜಾನೋ ಇಮಂ ಮಣಿಂ ಗಹೇತ್ವಾ ಧಾತೂನಂ ಸಕ್ಕಾರಂ ಕರೋನ್ತೂತಿ ಪಣ್ಣೇ ಅಕ್ಖರಾನಿ ದಿಸ್ವಾ ಕುಜ್ಝಿತ್ವಾ ಮಾದಿಸಾನಂ ಪನ ರಾಜೂನಂ [ರಾಜಾನಂ ಇತಿಸಬ್ಬತ್ಥ] ದಳಿದ್ದರಾಜಾತಿ ವತ್ತುಂ ಅಯುತ್ತಂತಿ ಪುನಪ್ಪುನಂ ಘಟೇತ್ವಾ ದ್ವಾರಂ ವಿವರಿತ್ವಾ ಅನ್ತೋಗೇಹಂ ಪವಿಟ್ಠೋ ಅಟ್ಠಾರಸವಸ್ಸಾಧಿಕಾನಂ ದ್ವಿನ್ನಂ ವಸ್ಸಸತಾನಂ ಉಪರಿ ಆರೋಪಿತದೀಪಾ ತಥೇವ ಪಜ್ಜಲನ್ತಿ, ನೀಲುಪ್ಪಲಪುಪ್ಫಾನಿ ತಂಖಣಂಯೇವ ಆಹರಿತ್ವಾ ಆರೋಪಿತಾನಿ ವಿಯ ಪುಪ್ಫಸನ್ಥಾರೋ ತಂ ಖಣಂ ಸನ್ಥತೋ ವಿಯ ಗನ್ಧಾ ತಂ ಮುಹುತ್ತಂ ಪಿಂಸಿತ್ವಾ ಠಪಿತಾ ವಿಯ ಅಹೇಸುಂ. ರಾಜಾ ಸುವಣ್ಣಪಟ್ಟಂ ಗಹೇತ್ವಾ ಅನಾಗತೇ ಪಿಯದಾಸೋ ನಾಮ ಕುಮಾರೋ ಛತ್ತಂ ಉಸ್ಸಾಪೇತ್ವಾ ಅಸೋಕೋ ನಾಮ ಧಮ್ಮರಾಜಾ ಭವಿಸ್ಸತಿ, ಸೋ ಇಮಾ ಧಾತುಯೋ ವಿತ್ಥಾರಿತಾ ಕರಿಸ್ಸತೀತಿ ವಾಚೇತ್ವಾ ದಿಟ್ಠೋಹಂ ಅಯ್ಯೇನ ಮಹಾಕಸ್ಸಪತ್ಥೇರೇನಾತಿ ವತ್ವಾ ವಾಮಹತ್ಥಂ ಆಭುಜಿತ್ವಾ ದಕ್ಖಿಣಹತ್ಥೇನ ಅಪ್ಫೋಟೇಸಿ. ಸೋ ತಸ್ಮಿಂ ಠಾನೇ ಪರಿಚರಣಕಧಾತುಮತ್ತಮೇವ ಠಪೇತ್ವಾ ಸೇಸಧಾತುಯೋ ಸಬ್ಬಾ ಗಹೇತ್ವಾ ಧಾತುಘರಂ ಪುಬ್ಬೇ ಪಿಹಿತನಯೇನೇವ ಪಿದಹಿತ್ವಾ ಸಬ್ಬಾ ಯಥಾ ಪಕತಿಯಾಯೇವ ಕಾರೇತ್ವಾ ಉಪರಿಪಾಸಾಣಚೇತಿಯಂ ಪತಿಟ್ಠಾಪೇತ್ವಾ ಚತುರಾಸೀತಿಯಾ ವಿಹಾರಸಹಸ್ಸೇಸು ಧಾತುಯೋ ಪತಿಟ್ಠಾಪೇಸಿ. ಅಥೇಕದಿವಸಂ ರಾಜಾ ವಿಹಾರಂ ಗನ್ತ್ವಾ ಭಿಕ್ಖುಸಂಘಂ ವನ್ದಿತ್ವಾ ಏಕಮನ್ತೇ ನಿಸಿನ್ನೋ ಯದಿ ಭನ್ತೇ ಛನ್ನವುತಿಕೋಟಿಧನಂ ವಿಸ್ಸಜ್ಜೇತ್ವಾ ಚತುರಾಸೀತಿವಿಹಾರಸಹಸ್ಸಾನಿಸಚೇತಿಯಾನಿ ಕಾರಾಪೇತ್ವಾಪಿ ಅಹಂ ನ ದಾಯಾದೋ. ಅಞ್ಞೋ ಕೋ ದಾಯಾದೋತಿ, ಪಚ್ಚಯದಾಯಕೋ ನಾಮ ತ್ವಂ ಮಹಾರಾಜ, ಯೋ ಪನ ಅತ್ತನೋ ಪುತ್ತಞ್ಚ ಧೀತರಞ್ಚ ಪಬ್ಬಾಜೇತಿ, ಅಯಂ ಸಾಸನೇ ದಾಯಾದೋ ನಾಮಾತಿ ಏವಂ ವುತ್ತೇ ¶ ಅಸೋಕೋ ರಾಜಾ ಸಾಸನೇ ದಾಯಾದಭಾವಂ ಪತ್ಥಯಮಾನೋ ಅವಿದೂರೇ ಠಿತಂ ಮಹಿನ್ದಕುಮಾರಂ ದಿಸ್ವಾ ಸಕ್ಖಿಸ್ಸಸಿ ತಾತ ತ್ವಂ ಪಬ್ಬಜಿತುಂತಿ ಆಹ. ಕುಮಾರೋ ಪಕತಿಯಾ ಪಬ್ಬಜಿತುಕಾಮೋ ರಞ್ಞೋ ವಚನಂ ಸುತ್ವಾ ಅತಿವಿಯ ಪಾಮೋಜ್ಜಜಾತೋ ಪುಬ್ಬಜಾಮಿ [ಪಬ್ಬಜ್ಜಾಮಿ ಇತಿಸಬ್ಬತ್ಥ] ದೇವ. ಮಂ ಪಬ್ಬಾಜೇತ್ವಾ ಸಾಸನೇ ದಾಯಾದೋ ಹೋಥಾತಿ ಆಹ. ತೇನ ಚ ಸಮಯೇನ ರಾಜಧೀತಾ ಸಂಘಮಿತ್ತಾಪಿ ತಸ್ಮಿಂ ಠಾನೇ ಠಿತಾ ಹೋತಿ. ತಂ ದಿಸ್ವಾ ಆಹ ತ್ವಮ್ಪಿ ಅಮ್ಮ ಪಬ್ಬಜಿತುಂ ಸಕ್ಖಿಸ್ಸಸೀತಿ, ಸಾಧು ತಾತಾತಿ ಸಮ್ಪಟಿಚ್ಛಿ. ರಾಜಾ ಪುತ್ತಾನಂ ಮನಂ ಲಭಿತ್ವಾ ಪಹಟ್ಠಚಿತ್ತೋ ಭಿಕ್ಖುಸಂಘಂ ಉಪಸಙ್ಕಮಿತ್ವಾ ಭನ್ತೇ ಇಮೇ ದಾರಕೇ ಪಬ್ಬಾಜೇತ್ವಾ ಮಂ ಸಾಸನೇ ದಾಯಾದಂ ಕರೋಥಾತಿ. ಸಙ್ಘೋ ರಞ್ಞೋ ವಚನಂ ಸಮ್ಪಟಿಚ್ಛಿತ್ವಾ ಕುಮಾರಂ ಮೋಗ್ಗಲಿಪುತ್ತತಿಸ್ಸತ್ಥೇರೇನ ಉಪಜ್ಝಾಯೇನ ಮಹಾದೇವತ್ಥೇರೇನ ಆಚರಿಯೇನ ಪಬ್ಬಜಾಪೇಸಿ [ಪಬ್ಬಜ್ಜಾಪೇಸಿ ಇತಿಸಬ್ಬತ್ಥ]. ಮಜ್ಝನ್ತಿಕತ್ಥೇರೇನ ಆಚರಿಯೇನ ಉಪಸಮ್ಪಾದೇಸಿ, ಸೋ ಉಪಸಮ್ಪದಾಮಾಲಕೇಯೇವ ಸಹ ಪಟಿಸಮ್ಭಿದಾಹಿ ಅರಹತ್ತಂ ಪಾಪುಣಿ. ಸಙ್ಘಮಿತ್ತಾಯಪಿ ರಾಜಧೀತಾಯ ಆಚರಿಯಾಣೀ ಆಯುಪಾಲತ್ಥೇರೀ ನಾಮ [ಅಚಾರಿಯಾ ಆಯುಪಾಲತ್ಥೇರೀನಾಮ ಇತಿಸಬ್ಬತ್ಥ]. ಉಪಜ್ಝಾಯಾ ಧಮ್ಮಪಾಲತ್ಥೇರೀ ನಾಮ ಅಹೋಸಿ. ರಾಜಾ ಪನ ಅನೇಕಾಕಾರೇನ ಬುದ್ಧಸಾಸನಂ ಸೋಭೇತ್ವಾ ಮೋಗ್ಗಲಿಪುತ್ತತಿಸ್ಸತ್ಥೇರಸ್ಸ ಸಹಾಯೇನ [ಸಹಯ್ಯೇನ. ಸಾಹಾಯ್ಯೇನ. ಸಾಹಯ್ಯೇನ ಇತಿಪಿಕತ್ಥಚಿ] ಸಟ್ಠಿಸಹಸ್ಸಮತ್ತೇ ದುಸ್ಸೀಲೇ ತಿತ್ಥಿಯೇ ಬುದ್ಧಸಾಸನಾ ಉಪ್ಪಬ್ಬಾಜೇತ್ವಾ ತತಿಯಧಮ್ಮಸಂಗೀತಿಂ ನಿಟ್ಠಾಪೇಸಿ. ತಸ್ಮಿಂ ಕಿರ ಸಮಾಗಮೇ ಭಿಕ್ಖುಭಿಕ್ಖುಣಿಯೋ ಕಿತ್ತಕಾತಿ [ಕಿತ್ತಕಾನೀತಿ ಇತಿಸಬ್ಬತ್ಥ], ವುತ್ತಞ್ಹಿ.

೧೨.

ತಸ್ಮಿಂ ಸಮಾಗಮೇ ಆಸುಂ, ಅಸೀತಿಭಿಕ್ಖುಕೋಟಿಯೋ;

ಅಹೇಸುಂ ಸತಸಹಸ್ಸಾನಿ, ತೇಸು ಖೀಣಾಸವಾ ಯತೀ.

೧೩.

ನವುತಿಸತಸಹಸ್ಸಾನಿ, ಅಹೂ ಭಿಕ್ಖುಣಿಯೋ ತಹಿಂ;

ಖೀಣಾಸವಾ ಸಿಕ್ಖುಣಿಯೋ, ಸಹಸ್ಸಂ ಆಸು ತಾಸು ಚಾತಿ.

ಏವಂ ¶ ಸೋ ಅಸೋಕೋ ಧಮ್ಮರಾಜಾ ಸಕಲಜಮ್ಬುದೀಪೇ ಅಗ್ಗರಾಜಾ ಹುತ್ವಾ ಬುದ್ಧಸಾಸನಂ ಸೋಭೇನ್ತೋ ವಿಹಾಸಿ. ಅಯಂ ಪನೇತ್ಥ ಸಙ್ಖೇಪೋ, ವಿತ್ಥಾರೋ ಪನ ಮಹಾವಂಸೇ ವುತ್ತೋತಿ. ವುತ್ತಞ್ಹಿ.

೧೪.

ಸಮ್ಪುಣ್ಣತ್ತಾ ಅಯಂ ತಿಸ್ಸೋ, ಚೇತನಾಯೋ ಮಧುಪ್ಪದೋ;

ಸಬ್ಬತ್ಥ ಸಬ್ಬದಾ ಸಬ್ಬ, ಸಮ್ಪತ್ತಿಮಭಿಸಮ್ಭುಣೀತಿ.

ಮಜ್ಝಿಮೋ ಪನ ವಾಣಿಜೋ ಅತ್ತನೋ ಪಾರವಾದಿದೋಸೇನ ಪರಸಮುದ್ದೇ ಲಙ್ಕಾಯಂ ನಿಬ್ಬತ್ತಿ. ತಸ್ಸೇವಂ ಕಥಾಪಟಿಪಾಟಿ ವೇದಿತಬ್ಬಾ. ತಮ್ಬಪಣ್ಣಿದೀಪೇ ಕಿರ ಮುಟಸೀವೋ ನಾಮ ರಾಜಾ ಸಟ್ಠಿವಸ್ಸಾನಿ ರಜ್ಜಂ ಕಾರೇಸಿ, ತಸ್ಸ ಪುಞ್ಞಪಞ್ಞಾಗುಣೋಪೇತಾ ಅಞ್ಞಮಞ್ಞಂ ಹಿತೇಸಿನೋ ದಸ ಪುತ್ತಾ ಅಹೇಸುಂ. ದ್ವೇ ಚ ಧೀತರೋ. ಸಬ್ಬೇ ತೇ ಸಮಗ್ಗಾ ಸಮ್ಮೋದಮಾನಾ ವಸನ್ತಿ. ಅಥಾಪರಸ್ಮಿಂ ಸಮಯೇ ಅಮಚ್ಚಾ ಮುಟಸೀವರಞ್ಞೇ ಕಾಲಕತೇ ದೇವಾನಂಪಿಯತಿಸ್ಸಕುಮಾರಂ ಅಭಿಸಿಞ್ಚಿಂಸು, ಅಭಿಸೇಕಸಮಕಾಲಮೇವಸ್ಸ ಅನೇಕಾನಿ ಅಚ್ಛರಿಯಾನಿ ಅಹೇಸುಂ. ತಾನಿ ಪಕಾಸೇನ್ತಾ ಮಹಾವಂಸಕಥಾಚರಿಯಾ ಆಹಂಸು.

೧೫.

ದೇವಾನಂಪಿಯತಿಸ್ಸೋತಿ, ವಿಸ್ಸುತೋ ದುತಿಯೋ ಸುತೋ;

ತೇಸು [ಅಹೋಸಿಮುಟಸೀವಸ್ಸ, ದಸಪುತ್ತೇಸುಪುಞ್ಞವಾ ಇತಿಕತ್ಥಚಿ] ಭಾತುಸು ಸಬ್ಬೇಸು, ಪುಞ್ಞಪಞ್ಞಾಧಿಕೋ ಅಹು.

೧೬.

ದೇವಾನಂಪಿಯತಿಸ್ಸೋ ಸೋ, ರಾಜಾಸಿ ಪಿತುಅಚ್ಚಯೇ;

ತಸ್ಸಾಭಿಸೇಕೇನ ಸಮಂ, ಬಹೂನಚ್ಛರಿಯಾನಹೂ.

೧೭.

ಲಙ್ಕಾದೀಪಮ್ಹಿ ಸಕಲೇ, ನಿಧಯೋ ರತನಾನಿಚ;

ಅನ್ತೋಠಿತಾನಿ ಉಗ್ಗನ್ತ್ವಾ, ಪಥವೀತಲಮಾರುಹುಂ.

೧೮.

ಲಙ್ಕಾದೀಪಸಮೀಪಮ್ಹಿ, ಭಿನ್ನನಾವಾ ಗತಾನಿ ಚ;

ತತ್ರ ಜಾತಾನಿ ಚ ಥಲಂ, ರತನಾನಿ ಸಮಾರುಹುಂ.

೧೯.

ಛಾತಪಬ್ಬತಪಾದಮ್ಹಿ, ತಿಸ್ಸೋ ಚ ವೇಳುಯಟ್ಠಿಯೋ;

ಜಾತಾ ರಥಪತೋದೇನ, ಸಮಾನಾ ಪರಿಮಾಣತೋ.

೨೦.

ತಾಸು ¶ ಏಕಾ ಲತಾಯಟ್ಠಿ, ರಜತಾಭಾ ತಹಿಂ ಲತಾ;

ಸುವಣ್ಣವಣ್ಣಾ ರುಚಿರಾ; ದಿಸ್ಸನ್ತೇತಾ ಮನೋರಮಾ.

೨೧.

ಏಕಾ ಕುಸುಮಯಟ್ಠೀತು; ಕುಸುಮಾನಿ ತಹಿಂಪನ;

ನಾನಾನಿ ನಾನಾವಣ್ಣಾನಿ; ದಿಸ್ಸನ್ತೇತಿಫುಟಾನಿ ಚ.

೨೨.

ಏಕಾ ಸಕುಣಯಟ್ಠೀ ತು, ತಹಿಂಪಕ್ಖಿಮಿಗಾ ಬಹೂ;

ನಾನಾ ಚ ನಾನಾವಣ್ಣಾ ಚ, ಸಜೀವಾವಿಯ ದಿಸ್ಸರೇ.

೨೩.

ಹಯಗಜರಥಾ ಮಲಕ್ಯಾ, ವಲಯಙ್ಗುಲಿವೇಠಕಾ ಚೇವ;

ಕಕುಧಫಲಾ ಪಾಕತಿಕಾ, ಇಚ್ಚೇ ತಾ ಅಟ್ಠ ಜಾತಿಯಾ.

೨೪.

ಮುತ್ತಾ ಸಮುದ್ದಾ ಉಗ್ಗನ್ತ್ವಾ; ತೀರೇ ವಟ್ಟಿವಿಯಟ್ಠಿತಾ;

ದೇವಾನಂಪಿಯತಿಸ್ಸಸ್ಸ; ಸಬ್ಬಂ ಪುಞ್ಞವಿಜಮ್ಭಿತಂ.

೨೫.

ಇನ್ದನೀಲಂ ವೇಳುರಿಯಂ, ಲೋಹಿತಙ್ಕಮಣೀ ಚಿ ಮೇ;

ರತನಾನಿ ಪನೇ ತಾನಿ, ಮುತ್ತಾ ತಾ ತಾಚ ಯಟ್ಠಿಯೋ;

ಸತ್ತಾಹಬ್ಭನ್ತರೇಯೇವ, ರಞ್ಞೋ ಸನ್ತಿಕಮಾಹರುಂತಿ.

ತೇನ ಚ ಸಮಯೇನ ದೇವಾನಂಪಿಯತಿಸ್ಸಮಹಾರಾಜಾ ಚ ಅಸೋಕೋ ಧಮ್ಮರಾಜಾ ಚ ಅದ್ದಿಟ್ಠಸಹಾಯಾ ಹೋನ್ತಿ. ತಸ್ಮಾ ಸೋ ಏತಾನಿ ರತನಾನಿ ಚ ಅಞ್ಞಾನಿ ಬಹೂನಿ ಉಪಾಯನಾನಿ ಮಮ ಸಹಾಯಸ್ಸ ದೇಥಾತಿ ಧಮ್ಮಾಸೋಕಮಹಾನರಿನ್ದಸ್ಸ ಪಣ್ಣಾಕಾರತ್ಥಾಯ ಪೇಸೇಸಿ. ಸೋಪಿ ತಂ ದಿಸ್ವಾ ಪಸೀದಿತ್ವಾ ಪಞ್ಚರಾಜಕಕುಧಭಣ್ಡಾನಿ ಚ ಅಞ್ಞಞ್ಚ ಬಹುಪಣ್ಣಾಕಾರಞ್ಚ ಅಭಿಸೇಕತ್ಥಾಯ ಪೇಸೇಸಿ. ಮಯ್ಹಂ ಸಹಾಯಂ ಅಭಿಸೇಕಂ ಕರೋನ್ತೂತಿ. ನ ಕೇವಲಞ್ಚೇತಂ ಆಮಿಸಪಣ್ಣಾಕಾರಂ. ಇಮಂ ಕಿರ ಧಮ್ಮಪಣ್ಣಾಕಾರಮ್ಪಿ ಪೇಸೇಸಿ.

೨೬.

ಅಹಂ ಬುದ್ಧಂಚ ಧಮ್ಮಂಚ; ಸಂಘಂಚ ಸರಣಂ ಗತೋ;

ಉಪಸಕತ್ತಂ ವೇದೇಸಿಂ; ಸಕ್ಯಪುತ್ತಸ್ಸ ಸಾಸನೇ.

೨೭.

ಇಮೇಸು ತೀಸು ವತ್ಥೂಸು; ಉತ್ತಮೇಸು ನರುತ್ತಮ;

ಚಿತ್ತಂ ಪಸಾದಯಿತ್ವಾನ, ಸದ್ಧಾಯ ಸರಣಂ ವಜಾತಿ.

ಅಮಚ್ಚಾ ¶ ಪುನ ಲಙ್ಕಮಾಗಮ್ಮ ರಾಜಾನಂ ಅಭಿಸಿಞ್ಚಿಂಸು, ತೇನ ಖೋ ಪನ ಸಮಯೇನ ಮೋಗ್ಗಲಿಪುತ್ತತಿಸ್ಸತ್ಥೇರೋ ಕತ್ಥ ನುಖೋ ಅನಾಗತೇ ಸಾಸನಂ ಸುಪ್ಪತಿಟ್ಠಿತಂ ಭವೇಯ್ಯಾತಿ ಉಪಪರಿಕ್ಖನ್ತೋ ಪಚ್ಚನ್ತಿಮೇ ಸುಪ್ಪತಿಟ್ಠಿತಂ ಭವಿಸ್ಸತೀತಿ ಞತ್ವಾ ತೇ ತೇ ಥೇರೇ ತತ್ಥ ತತ್ಥ ಪೇಸೇತ್ವಾ ಮಹಾಮಹಿನ್ದತ್ಥೇರಂ ಗನ್ತ್ವಾ ತಮ್ಬಪಣ್ಣಿದೀಪಂ ಪಸಾದೇಹೀತಿ ನಿಯೋಜೇಸಿ, ಸಕ್ಕೋ ಚ ದೇವಾನಮಿನ್ದೋ ಮಹಾಮಹಿನ್ದತ್ಥೇರಂ ಉಪಸಂಕಮಿತ್ವಾ ಕಾಲಕತೋ ಭನ್ತೇ ಮುಟಸೀವೋ ರಾಜಾ. ಇದಾನಿ ದೇವಾನಂಪಿಯತಿಸ್ಸಮಹಾರಾಜಾ ರಜ್ಜಂ ಕಾರೇತಿ. ಸಮ್ಮಾಸಮ್ಬುದ್ಧೇನ ಚ ತುಮ್ಹೇ ಬ್ಯಾಕತಾ ಅನಾಗತೇ ಮಹಿನ್ದೋ ನಾಮ ಭಿಕ್ಖು ತಮ್ಬಪಣ್ಣಿದೀಪಂ ಪಸಾದೇಸ್ಸತೀತಿ. ತಸ್ಮಾ ತಿಹ ಖೋ ಭನ್ತೇ ಕಾಲೋ ದೀಪವರಂ ಗಮನಾಯ, ಅಹಮ್ಪಿ ಸಹಾಯೋ ಭವಿಸ್ಸಾಮೀತಿ, ಥೇರೋ ತಸ್ಸ ವಚನಂ ಸಮ್ಪಟಿಚ್ಛಿತ್ವಾ ಅತ್ತಸತ್ತಮೋ ಚೇತಿಯಪಬ್ಬತವಿಹಾರತೋ ವೇಹಾಸಂ ಉಪ್ಪತಿತ್ವಾ ಅನುರಾಧಪುರಸ್ಸ ಪುರತ್ಥಿಮದಿಸಾಯ ಮಿಸ್ಸಕಪಬ್ಬತೇ ಪತಿಟ್ಠಹಿ, ಇಮಂ ಏತರಹಿ ಚೇತಿಯಪಬ್ಬತೋತಿಪಿ ಸಞ್ಜಾನನ್ತಿ. ತದಾ ತಮ್ಬಪಣ್ಣಿಯಂ ಉಸ್ಸವದಿವಸೋ ಹೋತಿ, ರಾಜಾ ಛಣಂ ಕರೋಥಾತಿ ಅಮಚ್ಚೇ ಆಣಾಪೇತ್ವಾ ಚತ್ತಾಳೀಸಸಹಸ್ಸಪುರಿಸೇಹಿ ಪರಿವಾರಿತೋ ನಗರಮ್ಹಾ ನಿಕ್ಖಮಿತ್ವಾ ಮಿಸ್ಸಕಪಬ್ಬತಂ ಪಾಯಾಸಿ ಮಿಗವಂ ಕೀಳಿತುಕಾಮೋ. ಅಥ ತಸ್ಮಿಂ ಪಬ್ಬತೇ ಅಧಿವತ್ಥಾ ಏಕಾ ದೇವತಾ ರಞ್ಞೋ ಥೇರೇ ದಸ್ಸೇಸ್ಸಾಮೀತಿ ರೋಹಿತಮೀಗವಣ್ಣೇನ ಅವಿದೂರೇ ತಿಣಪಣ್ಣಾನಿ ಖಾದಮಾನಾ ವಿಯ ಚರತಿ, ರಾಜಾ ಅಯುತ್ತಂ ದಾನಿ ಪಮತ್ತಂ ವಿಜ್ಝಿತುಂತಿ ಜಿಯಂ ಪೋಠೇಸಿ, ಮಿಗೋ ಅಮ್ಬತ್ಥಲಮಗ್ಗಂ ಗಹೇತ್ವಾ ಪಲಾಯಿತುಂ ಆರಭಿ, ರಾಜಾ ತಂ ಅನುಬನ್ಧನ್ತೋ ಅಮ್ಬತ್ಥಲಮೇವ ಅಭಿರುಹಿ, ಮಿಗೋಪಿ ಥೇರಾನಂ ಅವಿದೂರೇ ಅನ್ತರಧಾಯಿ, ಮಹಿನ್ದತ್ಥೇರೋ ರಾಜಾನಂ ಅವಿದೂರೇ ಆಗಚ್ಛನ್ತ ಮಂಯೇವ ರಾಜಾ ಪಸ್ಸತು, ಮಾ ಇತರೇತಿ ಅಧಿಟ್ಠಹಿತ್ವಾ ತಿಸ್ಸ ತಿಸ್ಸ ಇತೋ ಏಹೀತಿ ಆಹ, ರಾಜಾ ತಂ ಸುತ್ವಾ ಚಿನ್ತೇಸಿ. ಇಮಸ್ಮಿಂ ತಮ್ಬಪಣ್ಣಿದೀಪೇ ಜಾತೋ ಮಂ ತಿಸ್ಸೋತಿ ನಾಮಂ ಗಹೇತ್ವಾ ಆಲಪಿತುಂ ಸಮತ್ಥೋ ನಾಮ ನತ್ಥಿ. ಅಯಂ ಪನ ಛಿನ್ನಭಿನ್ನಪಟಧರೋ ಭಣ್ಡುಕಾಸಾವ ವಸನೋ ಮಂ ನಾಮೇನಾ ಲಪತಿ, ಕೋ ನುಖೋ ಯಂ ಭವಿಸ್ಸತಿ ಮನುಸ್ಸೋ ಅಮನುಸ್ಸೋ ವಾತಿ. ಥೇರೋ ಆಹ.

೨೮.

ಸಮಣಾ ¶ ಮಯಂ ಮಹಾರಾಜ, ಧಮ್ಮರಾಜಸ್ಸ ಸಾವಕಾ;

ತವೇವ ಅನುಕಮ್ಪಾಯ, ಜಮ್ಬುದೀಪಾ ಇಧಾಗತಾತಿ.

ರಾಜಾ ಧಮ್ಮಾಸೋಕನರಿನ್ದೇನ ಪೇಸಿತಸಾಸನಾನುಸಾರೇನ ಅನುಸ್ಸರಮಾನೋ ಅಯ್ಯಾ ನುಖೋ ಆಗತಾತಿ ತಾವದೇವ ಆಯುಧಂ ನಿಕ್ಖಿಪಿತ್ವಾ ಏಕಮನ್ತಂ ನಿಸೀದಿ ಸಮ್ಮೋದನೀಯಂ ಕಥಂ ಕಥಯಮಾನೋ ಸಾರಣೀಯಂ [ಸಮ್ಮೋದನೀಯಂ-ಇತಿಸಬ್ಬತ್ಥ] ಕಥಂ ಕುರುಮಾನೋ. ತಸ್ಮಿಂ ತಾನಿಪಿ ಚತ್ತಾಳೀಸಪುರಿಸಸಹಸ್ಸಾನಿ ಆಗನ್ತ್ವಾ ತಂ ಪರಿವಾರೇಸುಂ, ತದಾ ಥೇರೋ ಇತರೇಪಿ ಜನೇ ದಸ್ಸೇಸಿ, ರಾಜಾ ದಿಸ್ವಾ ಇಮೇ ಕದಾ ಆಗತಾತಿ ಪುಚ್ಛಿ, ಮಯಾ ಸದ್ಧಿಂಯೇವ ಮಹಾರಾಜಾತಿ. ಇದಾನಿ ಪನ ಜಮ್ಬುದೀಪೇ ಅಞ್ಞೇಪಿ ಏವರೂಪಾ ಸಮಣಾ ಸನ್ತೀತಿ. ಮಹಾರಾಜ ಏತರಹಿ ಜಮ್ಬುದೀಪೋ ಕಾಸಾವಪಜ್ಜೋತೋ ಇಸಿವಾತಪಟಿವಾತೋ, ತಸ್ಮಿಂ.

೨೯.

ತೇವಿಜ್ಜಾ ಇದ್ಧಿಪ್ಪತ್ತಾ ಚ, ಚೇತೋಪರಿಞ್ಞಕೋವಿದಾ;

ಖೀಣಾಸವಾ ಅರಹನ್ತೋ, ಬಹೂ ಬುದ್ಧಸ್ಸ ಸಾವಕಾತಿ.

ರಾಜಾ ತಂ ಸುತ್ವಾ ಪಸನ್ನೋ ಅಹೋಸಿ, ಅಥ ಥೇರೋ ರುಕ್ಖೋಪಮಾದಿನಾ ತಸ್ಸ ಪಞ್ಞಾವೇಯ್ಯತ್ತಿಯಂ ಞತ್ವಾ ಧಮ್ಮಂ ದೇಸೇಸಿ ಸನರಾಮರೇಹಿ ಸಾಧುಕಾರಂ ಕಾರಯಮಾನೋ. ತೇನ ವುತ್ಥಂ.

೩೦.

ಪಣ್ಡಿತೋತಿ ವಿದಿತ್ವಾನ, ಚುಲ್ಲಹತ್ಥಿಪದೋಪಮಂ;

ಸುತ್ತನ್ತಂ ದೇಸಯೀ ಥೇರೋ, ಮಹೀಪಸ್ಸ ಮಹಾಮತಿ [ಮಹೀಮತೀ ಇತಿಪಿಕತ್ಥಚಿ].

ದೇಸನಾಪರಿಯೋಸಾನೇ ಸೋ ಸದ್ಧಿಂ ತೇಹಿ ನರೇಹಿ ಚತ್ತಾಳೀಸಸಹಸ್ಸೇಹಿ ಸರಣೇಸು ಪತಿಟ್ಠಹೀತಿ. ಅಥಸ್ಸ ರಾಜಾ ಸ್ವೇ ಭನ್ತೇ ಮಮ ಗೇಹೇ ಭಿಕ್ಖಂ ಗಣ್ಹಾಥಾತಿ ಯಾಚಿತ್ವಾ ಗನ್ತ್ವಾ ನಗರಞ್ಚ ರಾಜಗೇಹಞ್ಚ ಅಲಙ್ಕರಿತ್ವಾ ಥೇರೇ ನಿಸೀದಾಪೇತ್ವಾ ಪಣೀತೇನಾಹಾರೇನ ಪರಿವಿಸಿತ್ವಾ ಅನುಳಾದೇವಿಪ್ಪಮುಖಾಹಿ ಪಞ್ಚಸತಇತ್ಥೀಹಿ ಸದ್ಧಿಂ ಏಕಮನ್ತಂ ನಿಸೀದಿ. ಅಥ ಥೇರೋ ಧಮ್ಮರತನ ವಸ್ಸಂ ವಸ್ಸಾಪೇಸಿ. ತತೋ ¶ ತಾ ಪಞ್ಚಸತಇತ್ಥಿಯೋ ಸೋತಾಪತ್ತಿಫಲಂ ಪಾಪುಣಿಂಸು. ತತೋ ಹತ್ಥಿಸಾಲಾಯಂ ಸಹಸ್ಸಂ, ನನ್ದನವನೇ ಸಹಸ್ಸಂತಿ ಏವಂ ದುತಿಯದಿವಸೇ ಅಡ್ಢತೇಯ್ಯಾನಿ ಪಾಣಸಹಸ್ಸಾನಿ ಸೋತಾಪತ್ತಿಫಲೇ ಪತಿಟ್ಠಾಪೇಸಿ. ತತಿಯದಿವಸೇ ಅಡ್ಢನವಪ್ಪಮಾಣಂ ಪಾಣಸಹಸ್ಸಂತಿ ಏವಂ ಅನೇಕಸತಾನಂ ಅನೇಕಸಹಸ್ಸಾನಂ ಅನೇಕಸತ ಸಹಸ್ಸಾನಂ ಧಮ್ಮಾ ಮತಂ ಪಾಯೇಸಿ. ವುತ್ತಞ್ಹಿ.

೩೧.

ಮಹಾಮಹಿನ್ದಸುರಿಯೋ, ಲಙ್ಕಾವೇಹಾಸಮಜ್ಝಗೋ;

ಬೋಧನೇಯ್ಯಮ್ಬುಜೇ ಕಾಸಿ, ವಿಕಾಸಂ ಧಮ್ಮರಂಸಿನಾ.

೩೨.

ಮಹಾಮಹಿನ್ದಚನ್ದೋ ಸೋ, ಲಙ್ಕಾವೇಹಾಸಮಜ್ಝಗೋ;

ಬೋಧೇಸಿ ಧಮ್ಮರಂಸೀಹಿ, ವೇನೇಯ್ಯಕುಮುದಾಕರೇ.

೩೩.

ಮಹಾಮಹಿನ್ದಮೇಘೋ ಸೋ, ವಸ್ಸಂ ಧಮ್ಮಮ್ಬುವುಟ್ಠಿಯಾ;

ಸಾಧೂನಂ ಚಿತ್ತಬೀಜೇಸು, ಜನೇಸಿ ಕುಸಲಙ್ಕುರೇತಿ.

ಅಥ ರಾಜಾ ಸುಮನಸಾಮಣೇರೇನ ಧಮ್ಮಾಸೋಕಸ್ಸ ಹತ್ಥತೋ ಸಮ್ಮಾಸಮ್ಬುದ್ಧಪರಿಭುತ್ತಪತ್ತಪೂರಧಾತುಯೋ ಚ ಸಕ್ಕಸ್ಸ ಸನ್ತಿಕಾ ದಕ್ಖಿಣಕ್ಖಕಧಾತುಂಚ ಆಹರಾಪೇತ್ವಾ [ಆಹಾರಿತ್ವಾ-ಇತಿಸಬ್ಬತ್ಥ] ಚೇತಿಯಪಬ್ಬತೇ ಥೂಪಂ ಆದಿಂಕತ್ವಾ ಸಕಲಲಙ್ಕಾದೀಪೇ ಯೋಜನೇ ಯೋಜನೇ ಥೂಪಾನಿ ಕಾರೇತ್ವಾ ದಕ್ಖಿಣಕಧಾತುಂ ನಿದಹಿತ್ವಾ ಥೂಪಾರಾಮಥೂಪಞ್ಚ ಪತಿಟ್ಠಾಪೇಸಿ. ಅಥ ಸಙ್ಘಮಿತ್ತಾಯ ಥೇರಿಯಾ ಆನೀತಂ ಜಯಮಹಾಬೋಧಿನೋ ದಕ್ಖಿಣಮಹಾಸಾಖಂ ಪತಿಟ್ಠಾಪೇತ್ವಾ ಪೂಜಂ ಕಾರೇಸಿ. ಸಬ್ಬೋ ಪನೇತ್ಥ ಕಥಾವಿತ್ಥರೋ ಮಹಾವಂಸತೋ ವೇದಿತಬ್ಬೋ.

೩೪.

ಪಾರವಾದಿಕದೋಸೇನ, ಜಾತೇವಂ ಪರಸಾಗರೇ;

ಪತ್ತಾನುಮೋದನಾ ಏವಂ, ಲಙ್ಕಾಯಂ ಆಸಿ ಇಸ್ಸರೋ.

೩೫.

ಪಾಪಮ್ಪಿ ಏವಂ ಫಲತೀತಿ ಮನ್ತ್ವಾ,

ಞತ್ವಾನ ಪುಞ್ಞಸ್ಸ ಫಲಂ ಇದನ್ತಿ;

ಭೋ ಯೋನಿಸೋ ಕುಬ್ಬಥ ಪುಞ್ಞಕಮ್ಮೇ,

ಗನ್ತ್ವಾನ ಯೇ ಯತ್ಥ ನ ಸೋಚಯನ್ತೀತಿ.

ತೇಭಾತಿಕಮಧುವಾಣಿಜಕಾನಂ ವತ್ಥುಂ ಅಟ್ಠಮಂ.

೩೯. ಬೋಧಿರಾಜಧೀತುಯಾ [ಬೋಧಿರಾಜಧೀತಾಯ ಇತಿಸಬ್ಬತ್ಥ] ವತ್ಥುಮ್ಹಿ ಅಯಮಾನುಪುಬ್ಬೀಕಥಾ

ಭಗವತಿ ಪರಿನಿಬ್ಬುತೇ ಲಙ್ಕಾಯಂ ಸಾಸನೇ ಸುಪ್ಪತಿಟ್ಠಿತೇ ತತ್ಥ ಹಕುರೇಳೀತಿ ಏಕೋ ಗಾಮೋ ಅಹೋಸಿ, ತತ್ಥೇಕಾ ದಾರಿಕಾ ಗಾಮಾದಾರಿಕಾಹಿ ಸದ್ಧಿಂ ತತ್ಥ ತತ್ಥ ಕೀಳನ್ತೀ ವಿಹರತಿ, ತದಾ ಗಾಮಸಮೀಪೇ ಮಹಾಸೋಬ್ಭಂ ಹೋತಿ. ತತ್ಥೇಕೋ ಮರುತ್ಥರುಕ್ಖೋ ಸಬ್ಬದಾ ಪಾಳಿಫುಲ್ಲೋವ ತಿಟ್ಠತಿ. ಮನುಸ್ಸಾ ಬುದ್ಧಪೂಜನತ್ಥಂ ಪುಪ್ಫಾನಿ ವಿಚಿಣನ್ತಾ ಉದಕಂ ಓಗಹೇತ್ವಾ ರುಕ್ಖಮಭಿರುಯ್ಹ ಪುಪ್ಫಾನಿ ಓಚಿಣನ್ತಿ, ಕುಮಾರಿಕಾ ತೇ ದಿಸ್ವಾ ಮನುಸ್ಸಾ ಸುಖೇನ ಗನ್ತ್ವಾ ಪುಪ್ಫಾನಿ ಓಚಿಣನ್ತೂತಿ ಏಕಂ ಸುಕ್ಖಪಾಲಿಭದ್ದದಣ್ಡಕಂ ಆಹರಿತ್ವಾ ಸೇತುಂ ಕತ್ವಾ ಠಪೇಸಿ, ತತೋ ಪಟ್ಠಾಯ ಮನುಸ್ಸಾ ತೇನಗನ್ತ್ವಾ ಪುಪ್ಫಾನಿ ಓಚಿಣನ್ತಿ. ಅಥ ಸಾ ತತೋ ಚುತಾ ತೇನೇವ ಕುಸಲಕಮ್ಮೇನ ಜಮ್ಬುದೀಪೇ ಪಾಟಲಿಪುತ್ತನಗರೇ ಸೋಮದತ್ತರಞ್ಞೋ ಧೀತಾ ಹುತ್ವಾ ನಿಬ್ಬತ್ತಿ, ಉತ್ತಮರೂಪಧರಾ ದೇವಚ್ಛರಪಟಿಭಾಗಾ ಅಹೋಸಿ. ಮಾತಾಪಿತರೋ ಪನಸ್ಸಾ ಬೋಧಿರಾಜಕುಮಾರಿಕಾತಿ ವೋಹರಿಂಸು. ಪುಬ್ಬೇ ಕತಸೇತುಆನುಭಾವೇನ ತಸ್ಸಾ ಸುವೀರಕೋ ನಾಮೇಕೋ ಆಕಾಸಗಾಮೀ ಸಿನ್ಧವಪೋತಕೋ ನಿಬ್ಬತ್ತಿ. ರಾಜಧೀತುಯಾ ಪನ ಪಿತಾ ಬುದ್ಧಮಾಮಕೋ ಧಮ್ಮಮಾಮಕೋ ಸಙ್ಘಮಾಮಕೋ ಹುತ್ವಾ ಮಹನ್ತಂ ಪುಞ್ಞಂ ಪಸವನ್ತೋ ಸಿನ್ಧವಪೋತಕಂ ದಿಸ್ವಾ ಪುಞ್ಞಕರಣಸ್ಸ ಮೇ ಸಹಾಯೋ ಲದ್ಧೋತಿ ತುಟ್ಠಮಾನಸೋ ಅಸ್ಸಂ ಅಭಿರುಹಿತ್ವಾ ದಿವಸಸ್ಸ ತಿಕ್ಖತ್ತುಂ ಗನ್ತ್ವಾ ಮಹಾಬೋಧಿಂ ¶ ವನ್ದತಿ. ರಾಜಧೀತಾ ನಂ ದಿಸ್ವಾ ಪಿತುಸನ್ತಿಕಂ ಗನ್ತ್ವಾ ಅಭಿಣ್ಹಂ ತಾತ ಕುಹಿಂ ಗಚ್ಛಸೀತಿ ಪುಚ್ಛಿ. ರಾಜಾ ನ ಕಿಞ್ಚಿ ಕಥೇಸಿ, ಅಥ ಸಾ ಪುನಪ್ಪುನಂ ಪಿತರಂ ನಿಬನ್ಧನ್ತೀ ಪುಚ್ಛಿ. ತತೋ ರಾಜಾ ತಸ್ಸಾವಿ ಕರೋನ್ತೋ ಏವಮಾಹ.

೧.

ಅಮ್ಹಾಕಂ ಭಗವಾ ಪುಬ್ಬೇ, ಪೂರೇನ್ತೋ ದಸಪಾರಮೀ;

ಅದಾಸಿ ಸೀಸರತ್ತಕ್ಖಿ, ಮಂಸಂ ಜೀವಿತಮೇವ ಚ.

೨.

ಪುತ್ತದಾರೇ ಚ ರಜ್ಜೇ ಚ, ಪತ್ವಾ [ದತ್ವಾ ಇತಿಪಿಕತ್ಥಚಿ] ಪಾರಮಿಮತ್ಥಕಂ;

ಅನಪ್ಪಕಪ್ಪಕೋಟೀನಂ, ಖೇಪೇತ್ವಾ ಕಪಿಲವುಯೇ.

೩.

ಸಕ್ಕರಾಜಕುಲೇ ಜಾತೋ, ಲೋಕೇ ಅಪ್ಪಟಿಪುಗ್ಗಲೋ;

ಸಮ್ಪತ್ತಚಕ್ಕವತ್ತಿತ್ತಂ, ಪಹನ್ತ್ವಾನ ನರಾಧಿಪೋ.

೪.

ದಿಸ್ವಾ ನಿಮಿತ್ತೇ ಚತುರೋ, ನಿಕ್ಖಮ್ಮ ಅಭಿನಿಕ್ಖಮಂ;

ಬೋಧಿಮೂಲಮುಪಾಗಮ್ಮ, ನಿಸಿನ್ನೋ ವಜಿರಾಸನೇ.

೫.

ಸಹಸ್ಸಬಾಹುಂ ಮಾಪೇತ್ವಾ, ನಾನಾಯುಧಸಮಾಕುಲಂ [ನಾನಾವುಧಸಮಾಕುಲಂ-ಇತಿಸಬ್ಬತ್ಥ];

ಮಹಾಭೀತಿಕರಂ ವೇಸಂ, ಕಾಳಪಬ್ಬತಸಾದಿಸಂ.

೬.

ಮಾಪೇತ್ವಾನ ಸಮಾರುಯ್ಹ, ಗಿರಿಮೇಖಲವಾರಣಂ;

ಮಾರಸೇನಂ ಸಮಾನೇತ್ವಾ, ಆಗತಂ ಮಕರದ್ಧಜಂ.

೭.

ಪಾರಮಿತಾಬಲೇನ ತಂ, ಮಾರಸೇನಂ ಪಲಾಪಿಯ;

ಯತ್ಥಾಸೀನೋ ಕಿಲೇಸಾರಿ, ಸಹಸ್ಸಂ ಘಾತಯೀ ಜಿನೋ.

೮.

ನಯನಂ ಸುಜಲಸೇಕೇಹಿ, ಸತ್ತಾಹಂ ಜಿನಸೇವಿತಂ;

ಪೂಜಿತಂ ದೇವಬ್ರಹ್ಮೇಹಿ, ಸಿದ್ಧೋರಗನರಾದಿಹಿ;

ವನ್ದಿತುಂ ಜಯಬೋಧಿಂತಂ, ಗಚ್ಛಾಮಿ ಸತತಂ ಅಹಂ.

೯.

ಉಪಾಸತಿ ಸದಾ ಗನ್ತ್ವಾ, ಯೋ ನರೋ ಬೋಧಿಪಾದಪಂ;

ಗನ್ಧೋದದೀಪಧೂಪಾದಿ, ನಾನಾಪೂಜಾಹಿ ಸಾಧುಕಂ.

೧೦.

ಸ ನರೋ ನಿರಾಮಯೋ ಹೋತಿ, ಪಚ್ಚತ್ತೇ ಚ ಪರತ್ಥ ಚ;

ಪೂಜಿತೋ ಮಾನಿತೋ ಹೋತಿ, ದೀಘಾಯು ಬಲವಾ ಸುಖೀ.

೧೧.

ತದತ್ಥಂ ಪತ್ಥಯನ್ತೇನ, ಅತ್ಥಕಾಮೇನ ಜನ್ತುನಾ;

ಉಪಾಸನೀಯಂ ಸದ್ಧಾಯ, ನಿಚ್ಚಂ ತಂ ಬೋಧಿಪಾದಪಂತಿ.

ತಂ ಸುತ್ವಾ ಕುಮಾರಿಕಾ ಪೀತಿಯಾ ಫುಟಸರೀರಾ ಪಿತರಂ ವನ್ದಿತ್ವಾ ಅಹಮ್ಪಿ ತಾತ ಗಚ್ಛಾಮೀತಿ ಆಹ. ರಾಜಾ ಪನಸ್ಸಾ ಉಪದ್ದವಭಯೇನ ಗಮನಂ ನ ಇಚ್ಛಿ. ತತೋ ಸಾ ಯಾವತತಿಯಂ ಪಿತರಂ ಯಾಚಿತ್ವಾ ರಞ್ಞಾ ಅನುಞ್ಞಾತಾ. ತತೋ ಪಟ್ಠಾಯ ಪಿತರಾ ಸದ್ಧಿಂ ಸಿನ್ಧವಮಾರುಯ್ಹ ಬೋಧಿಂ ವನ್ದಿತುಂ ಸತತಂ ಗಚ್ಛತಿ. ಅಥಾಪರಭಾಗೇ ರಾಜಾ ಮರಣಮಞ್ಚೇ ನಿಪನ್ನೋ ಚಿನ್ತೇಸಿ. ಧೀತಾ ಮೇ ನಿರನ್ತರಂ ಬೋಧಿಉಪಟ್ಠಾನಂಗಚ್ಛತಿ, ಏತಿಸ್ಸಾ ಅನಾಗತೇ ಯಂಕಿಞ್ಚಿ ಭಯಂ ಉಪ್ಪಜ್ಜಮಾನಂ ತತೋ ಉಪ್ಪಜ್ಜತಿ. ತತ್ಥ ಮೇ ಕಿಂ ಕಾತಬ್ಬನ್ತಿ. ತತೋ ಸಿನ್ಧವಂ ಪಕ್ಕೋಸಾಪೇತ್ವಾ ತಸ್ಸ ಕಣ್ಣಮೂಲೇ ಮನ್ತೇನ್ತೋ ಏವಮಾಹ, ತಾತ ಮಮ ಧೀತಾ ಅಭಿಣ್ಹಂ ತವ ಸಹಾಯಂ ಕತ್ವಾ ಬೋಧಿಂ ವನ್ದಿತುಂ ಗಚ್ಛತಿ. ತತ್ಥಸ್ಸಾ ಯಂಕಿಞ್ಚಿ ಭಯಂ ಭವೇಯ್ಯ. ತಂ ನಪ್ಪತಿರೂಪಂ. ತತ್ಥ ಗಮನಾಗಮನೇ ಮಮ ಧೀತರಂ ರಕ್ಖೇಯ್ಯಾಸೀತಿ ತಸ್ಸ ಧೀತರಂ ಪಟಿಪಾದೇತ್ವಾ ಕಾಲಮಕಾಸಿ. ತತೋ ರಾಜಧೀತಾ ಪಿತುಸರೀರಕಿಚ್ಚಂ ಕಾರೇತ್ವಾ ದಿವಸಸ್ಸ ತಿಕ್ಖತ್ತುಂ ಅಸ್ಸಮಭಿರುಯ್ಹ ಬೋಧಿಉಪಟ್ಠಾನಂ ಗಚ್ಛತಿ. ಮನುಸ್ಸಾ ಪನಸ್ಸಾ ರೂಪಸಮ್ಪತ್ತಿಂ ದಿಸ್ವಾ ವಿಮ್ಹಿತಮಾನಸಾ ರಾಜಾರಹಂ ವತ ನೋ ಇದಂ ಪಣ್ಣಾಕಾರಂ ದಿಟ್ಠಂ. ಗನ್ತ್ವಾ ರಞ್ಞೋ ಆಚಿಕ್ಖಿಸ್ಸಾಮ. ಅಪ್ಪೇವ ನಾಮ ರಾಜಾ ಸೋ ಕಿಞ್ಚಿ ನೋ ದದೇಯ್ಯಾತಿ ಚಿನ್ತೇತ್ವಾ ರಞ್ಞೋ ಸನ್ತಿಕಂ ಗನ್ತ್ವಾ ವನ್ದಿತ್ವಾ ಠಿತಾ ಏವಮಾಹಂಸು.

೧೨.

ಬೋಧಿಮಣ್ಡಂ ಸಮಾಗಮ್ಮ, ಅಭಿಣ್ಹಂ ತುಟ್ಠಮಾನಸಾ;

ವನ್ದನ್ತೀ ಯಾತಿ ಕಞ್ಞೇಕಾ, ವಿಜ್ಜೂವ ಸಿರಿಯಾ ಜಲಂ.

೧೩.

ನೀಲಧಮ್ಪಿಲ್ಲಭಾರಾ ಸಾ, ವಿಸಾಲಾಯತಲೋಚನಾ;

ಸೋಣ್ಣದೋಲಾಭಸವಣಾ, ಸಾಮಾ ಸುಭಪಯೋಧರಾ.

೧೪.

ಸತರಂಸೀಹಿ ಸಮ್ಮಿಸ್ಸ, ಸಞ್ಚ್ಯಾಮ್ಬುದಸಮಾಧರಾ;

ತುಙ್ಗನಾಸಾ ನೀಲಭಮು, ಹಾಸಭಾಸಾ ಮನೋರಮಾ.

೧೫.

ಈದಿಸಂ ¶ ನೋ ಮಹಾರಾಜಾ [ಮಹಾರಾಜದಿಟ್ಠಪುಬ್ಬ ಇತಿಪಿಕತ್ಥಚಿ], ದಿಟ್ಠಪುಬ್ಬಂ ಕುದಾಚನಂ;

ಏಹಿ ತಸ್ಸಾ ಸಿರಿಂದೇವ, ಬೋಧಿಮಣ್ಡಮ್ಹಿ ದಕ್ಖಸೀತಿ.

ತಂ ಸುತ್ವಾ ರಾಜಾ ಸವಣಸಂಸಗ್ಗೇನೇವ ತಾಯ ಪಟಿಬದ್ಧಚಿತ್ತೋ ಚತುರಙ್ಗಿನಿಂಸೇನಂ ಗಹೇತ್ವಾ ರಾಜಧೀತರಂ ಬೋಧಿವನ್ದನತ್ಥಾಯ ಆಗತಕಾಲೇ ಬಹಿಪಾಕಾರೇ ಸೇನಂ ಪರಿಕ್ಖಿಪಾಪೇತ್ವಾ ಗಣ್ಹಥೇತನ್ತಿ ಮನುಸ್ಸೇ ನಿಯೋಜೇಸಿ. ತತೋ ಸೇನಾಪಿ ತಂ ಗಹಣಸಜ್ಜಾ ಅಟ್ಠಾಸಿ. ರಾಜಧೀತಾ ತೇ ದಿಸ್ವಾ ಸೀಘಂ ಸಿನ್ಧವಂ ಉಪಸಙ್ಕಮಿತ್ವಾ ತಸ್ಸ ಪಿಟ್ಠಿಯಂ ನಿಸಿನ್ನಾ ಪಣ್ಹಿಯಾ ಸಞ್ಞಂ ಅದಾಸಿ. ಸೋ ತಂ ಗಹೇತ್ವಾ ವೇಗೇನ ಆಕಾಸಂ ಪಕ್ಖನ್ದಿ. ಸಾ ಪನ ದುನ್ನಿಸಿನ್ನಭಾವೇನ ಅಸ್ಸಸ್ಸ ವೇಗಂ ಸನ್ಧಾರೇತುಮಸಕ್ಕೋನ್ತೀ ಅಸ್ಸಪಿಟ್ಠಿತೋ ಪರಿಗಲಿ. ಸಿನ್ಧವೋ ರಾಜಧೀತರಂ ಪತಮಾನಂ ದಿಸ್ವಾ ರಾಜೋವಾದಂ ಸರಮಾನೋ ವೇಗೇನಾಗನ್ತ್ವಾ ತಸ್ಸಾ ಕೇಸೇ ಡಂಸಿತ್ವಾ ಉಕ್ಖಿಪಿತ್ವಾ ಪತಮಾನಾಯ ತಸ್ಸಾ ಪಿಟ್ಠಿಂದತ್ವಾ ನಿಸೀದಾಪೇತ್ವಾ ಆಕಾಸೇನ ತಂ ನೇತ್ವಾ ಪಾಟಲಿಪುತ್ತನಗರೇಯೇವ ಪತಿಟ್ಠಾಪೇಸಿ [ಪಾತಲಿಪುತ್ತನಗರೇಯೇವತಂ ಪವಿಠಾಪೇಸಿಇತಿಪಿಕತ್ಥಚಿ].

೧೬.

ತಿರಚ್ಛಾನಗತಾಪೇವಂ, ಸರನ್ತಾ ಉಪಕಾರಕಂ;

ನ ಜಹನ್ತೀತಿ ಮನ್ತ್ವಾನ, ಕತಞ್ಞೂ ಹೋನ್ತು [ಹೋನ್ತಿಪಾಣಿನೋ-ಇತಿಪಿಕತ್ಥಚಿ] ಪಾಣಿನೋತಿ.

ತತೋ ಪಟ್ಠಾಯ ಸಾ ಪುಞ್ಞಕಮ್ಮಂ ಕತ್ವಾ ಸಗ್ಗಪರಾಯನಾ ಅಹೋಸೀತಿ.

೧೭.

ಯೋ ಯಂ ದುಮಿನ್ದಂಯತಿನನ್ದನೇನ;

ಸಮ್ಪೂಜಿತಂ ಪೂಜಯತೇ ಸ ಪಞ್ಞೋ;

ಸ ಭೋಗವಾ ಹೋತಿ ಅನೀತಿಕೋ ಚ,

ಸಬ್ಬತ್ಥ ಸೋ ಹೋತಿ ಪಸತ್ಥರೂಪೋ.

ಬೋಧಿರಾಜಧೀತುಯಾ ವತ್ಥುಂ ನವಮಂ.

೪೦. ಕುಣ್ಡಲಿಯಾ ವತ್ಥುಮ್ಹಿ ಅಯಮಾನುಪುಬ್ಬೀಕಥಾ

ಲಙ್ಕಾದೀಪೇ ¶ ರೋಹಣಜಪದೇ ಮಹಾಗಾಮೋ ನಾಮ ಅಹೋಸಿ, ತತ್ಥ ತಿಸ್ಸವಿಹಾರಂ ನಾಮ ಅನೇಕಸತಭಿಕ್ಖೂಹಿ ಸಮಾಕಿಣ್ಣಂ ಅನೇಕಪರಿವೇಣಪತಿಮಣ್ಡಿತಂ ವಿಹಾರಂ ಅಹೋಸಿ. ತತ್ಥೇಕೋ ತಿಸ್ಸೋ ನಾಮ ಸಾಮಣೇರೋ ಪಟಿವಸತಿ. ಸೋ ಏಕಸ್ಮಿಂಸಮಯೇ ಜನಪದಚಾರಿಕಂ ಚರನ್ತೋ ಪಾಸಾಣವಾಪಿಗಾಮೇ ಭಿಕ್ಖಂ ಚರಿತ್ವಾ ಯಾಪನಮತ್ತಂ ಭತ್ತಂ ಸಪ್ಪಿನಾ ಸದ್ಧಿಂ ಲಭಿತ್ವಾ ನಿಕ್ಖಮ್ಮ ಗಾಮದ್ವಾರಂ ಪತ್ವಾ ಮಹಾಗಾಮಾಭಿಮುಖೋ ಗಚ್ಛನ್ತೋ ಮನುಸ್ಸೇ ಉದಕಫಾಸುಕಟ್ಠಾನಂ ಪುಚ್ಛಿ. ತೇಹಿ ಭನ್ತೇ ತುಮ್ಹಾಕಂ ಅಭಿಮುಖೇ ಅವಿದೂರಟ್ಠಾನೇ ಕಕುಬನ್ದಕನ್ದರಂ ನಾಮ ಸನ್ದಮಾನಸೀತಲೋದಕಂ ಧವಲವಾಲುಕಾತಲಂ ತತ್ಥ ತುಮ್ಹೇ ಗನ್ತ್ವಾ ನಹಾತ್ವಾ ಸೀತಲಚ್ಛಾಯಾಯ ವಾಲುಕಾತಲೇ ನಿಸಿನ್ನೋ ಭತ್ತಕಿಚ್ಚಂ ಕತ್ವಾ ಗಚ್ಛಥಾತಿ ವುತ್ತೇ ಸಾಮಣೇರೋ ¶ ಸಾಧೂತಿ ವತ್ವಾ ತತ್ಥ ಗನ್ತ್ವಾ ಫಾಸುಕಟ್ಠಾನೇ ನಿಸಿನ್ನೋ ಭತ್ತಂ ಭುಞ್ಜಿತುಮಾರಭಿ. ತದಾ ಏಕೇನ ವನಕಮ್ಮಿಕೇನ ಸದ್ಧಿಂಅರಞ್ಞಂ ಗತಾ ಏಕಾ ಸುನಖೀ ತಸ್ಮಿಂ ಕನ್ದರೇ ಏಕಸ್ಮಿಂ ಪಬ್ಭಾರಟ್ಠಾನೇ ದಾರಕೇ ವಿಜಾಯಿತ್ವಾ ಛಾತಜ್ಝತ್ತಾ ಪವೇಧಮಾನಗತ್ತಾ ದಾರಕಾನಂ ಸಮೀಪೇನಿಪನ್ನಾ ಸಾಮಣೇರಸ್ಸ ಪತ್ತೇ ಆಹಾರಗನ್ಧಂ ಘಾಯಿತ್ವಾ ನಿಪನ್ನಟ್ಠಾನತೋ ವುಟ್ಠಾಯ ಪವೇಧಮಾನಾ ತಸ್ಸ ಸಮೀಪಂ ಆಗಮ್ಮ ನಙ್ಗುಟ್ಠಂ ಚಾಲೇನ್ತೀ ಅಟ್ಠಾಸಿ, ಸಾಮಣೇರೋ ತಂ ದಿಸ್ವಾ ಕಮ್ಪಿತಮಾನಸೋ ಅತ್ತನೋ ಭೋಜನತ್ಥಾಯ ವಟ್ಟಿತಂ ಪಥಮಾಲೋಪಂ ತಸ್ಸಾ ಪುರತೋ ಠಪೇಸಿ, ತತೋ ಸಾ ಸೋಮನಸ್ಸಾ ತಂ ಭುಞ್ಜಿ. ತಂ ದಿಸ್ವಾ ತುಟ್ಠೋ ಪುನಪ್ಪುನಂ ಆಲೋಪಂ ಕರೋನ್ತೋ ತಸ್ಸಾ ಭತ್ತಂ ದತ್ವಾ ಪತ್ತಂ ಧೋವಿತ್ವಾ ಥವಿಕಾಯ ಪಕ್ಖಿಪಿತ್ವಾ ಅಗಮಾಸಿ. ತತೋ ಸಾ ಸುನಖೀ ಸಾಮಣೇರಗತೇನ ಪಸಾದೇನ ತತೋ ಚುತಾ ಜಮ್ಬುದೀಪೇ ದೇವಪುತ್ತನಗರೇ ರಾಜಾನಂ ಪಟಿಚ್ಚ ತಸ್ಸ ಮಹೇಸಿಯಾ ಕುಚ್ಛಿಮ್ಹಿ ಪಟಿಸನ್ಧಿಂ ಗಣ್ಹಿತ್ವಾ ದಸಮಾಸಚ್ಚಯೇನ ಮಾತುಕುಚ್ಛಿತೋ ನಿಕ್ಖಮಿ, ಅಥಸ್ಸಾ ಸಿಖಾಮಙ್ಗಲದಿವಸೇ ಸಮ್ಪತ್ತೇ ಮಾತಾಪಿತರೋ ಪನಸ್ಸಾ ಕುಣ್ಡಲಾವಟ್ಟಕೇಸತ್ತಾ ಕುಣ್ಡಲಾತಿ ನಾಮ ಮಕಂಸು. ಸಾ ಅನುಕ್ಕಮೇನ ಸೋಳಸವಸ್ಸುದ್ದೇಸಿಕಾ ಅಹೋಸಿ, ತಸ್ಮಿಂ ಕಿರ ಸಮಯೇ ತಿಸ್ಸೋ ಸಾಮಣೇರೋ ಮಹಾಬೋಧಿಂ ವನ್ದಿಸ್ಸಾಮೀತಿ ನಾವಂ ಅಭಿರುಯ್ಹ ಜಮ್ಬುದೀಪಂ ಗನ್ತ್ವಾ ಅನುಪುಬ್ಬೇನ ದೇವಪುತ್ತನಗರಂ ಪತ್ವಾ ಸುನಿವತ್ಥೋ ಸುಪಾರುತೋ ಯುಗಮತ್ತದಸೋ ಭಿಕ್ಖಾಯ ಚರನ್ತೋ ಮಹಾವೀಥಿಂ ಸಮ್ಪಾಪುಣಿ. ರಾಜಧೀತಾ ಸೀಹಪಞ್ಜರಂ ಉಗ್ಘಾಟೇತ್ವಾ ಅನ್ತರವೀಥಿಂ ಓಲೋಕೇನ್ತೀ ಭಿಕ್ಖನ್ತಂ ಸಾಮಣೇರಂ ದಿಸ್ವಾ ಪುಬ್ಬಸಿನೇಹಂ ಪಟಿಲಭಿ, ತಸ್ಮಿಂಖಣೇ ತಸ್ಸಾ ಜಾತಿಸ್ಸರಞಾಣಂ ಅಹೋಸಿ. ಸಾ ಕಿರ ಪುಬ್ಬೇ ಭಿಕ್ಖುಣೀ ಹುತ್ವಾ ಪಣ್ಣಸೂಚಿಯಾ ಸದ್ಧಿಂ ಪೋತ್ಥಕಞ್ಚ ಪದೀಪಿಯತೇಲಞ್ಚ ದತ್ವಾ ಜಾತಿಸ್ಸರಾ ಭವೇಯ್ಯಂತಿ ಪತ್ಥನಂ ಠಪೇಸಿ, ತತೋ ಸಾಜಾತಿಂ ಅನುಸ್ಸರನ್ತೀ ಸಾಮಣೇರೇನ ಅತ್ತನೋ ಕತೂಪಕಾರಂ ದಿತ್ವಾ ಸೋಮನಸ್ಸಾ ನಂ ಪಕ್ಕೋಸಾಪೇತ್ವಾ ರಾಜಗೇಹೇ ಆಸನಂ ಪಞ್ಞಾಪೇತ್ವಾ ತತ್ಥ ನಿಸಿನ್ನಂ ನಾನಗ್ಗರಸ ಭೋಜನೇನ ಪರಿವಿಸಿತ್ವಾ ಓನೀತಪತ್ತಪಾಣಿಂ ಸಾಮಣೇರಂ ಉಪಸಙ್ಕಮಿತ್ವಾ ವನ್ದಿತ್ವಾ ಏಕಮನ್ತಂ ನಿಸಿನ್ನಾ ತೇನ ಸದ್ಧಿಂ ಸಲ್ಲಪನ್ತೀ ಏವಮಾಹ.

೧.

ನ ಸಞ್ಜಾನಾಸಿ ಮಂ ಧೀರ, ಪುಬ್ಬೇಹಂ ತವ ದಾಸಿಕಾ;

ತೇನಾಹಂ ಸುಖಿತಾ ಆಸಿಂ, ತಸ್ಮಾ ತ್ವಮಸಿ ಇಸ್ಸರೋತಿ.

ತಂ ಸುತ್ವಾ ಸಾಮಣೇರೋ ಆಹ.

೨.

ನತ್ಥಿ ಮೇ ತಾದಿಸೀ ದಾಸೀ, ನ ಸಞ್ಜಾನಾಮಿ ತಂ ಅಹಂ;

ಕಾಸಿ ತ್ವಂ ಕಸ್ಸ ವಾ ಧೀತಾ, ತಂ ಮೇ ಅಕ್ಖಾಹಿ ಪುಚ್ಛಿತಾತಿ.

ತತೋ ಸಾ ತಂ ಸಾರಾಪೇನ್ತೀ ಆಹ.

೩.

ಸಾರಾಪೇಮಿ ತುವಂ ಅಜ್ಜ, ಯಥಾ ಜಾನಾಸಿಮಂ ಇಸೇ;

ಬುಜ್ಝಸ್ಸು ಬೋಧಿತೋ ದಾನಿ, ಮಯಾ ಜಾತಿಂಸರನ್ತಿಯಾ.

೪.

ಪಾಸಾಣವಾಪಿಗಾಮಮ್ಹಿ, ತಮ್ಬಪಣ್ಣಿಮ್ಹಿ ರೋಹಣೇ;

ಭಿಕ್ಖಿತ್ವಾನ ತುವಂ ಭನ್ತೇ, ಯದಾ ಕಕುಬನ್ದಕನ್ದರೇ.

೫.

ನಿಸೀದಿತ್ವಾನ ತ್ವಂ ಭತ್ತಂ, ಭುತ್ತಕಾಲಂ ಸರಿಸ್ಸಸಿ;

ತದಾಹಂ ಸುನಖೀ ಆಸಿಂ, ವಿಜಾತಾ ಲದ್ಧಗೋಚರಾ.

೬.

ದಾರಕೇ ¶ ಖಾದಿತುಂ ಮಯ್ಹ, ಮಾಸನ್ನಾ ಖುದಪೀಳಿತಾ;

ಪವೇಧಮಾನಸಬ್ಬಙ್ಗಾ, ಅಟ್ಠಾಸಿಂ ತವ ಸನ್ತಿಕೇ.

೭.

ದಿಸ್ವಾ ತಂ ಮಂ ತದಾ ಭನ್ತೇ, ವೇಧಮಾನಂ ಬುಭುಕ್ಖಿತಂ;

ಛಿನ್ನಭತ್ತೋ ತುವಂ ಹುತ್ವಾ, ಮಮಂ ಭತ್ತೇನ ತೋಸಯೀ.

೮.

ತದಾಹಂ ಮುದುಚಿತ್ತೇನ, ಚಿತ್ತಂ ತಯಿ ಪಸಾದಯಿಂ;

ತೇನಾಹಂ ಪುಞ್ಞಕಮ್ಮೇನ, ದುತಿಯೇ ಅತ್ತಸಮ್ಭವೇ.

೯.

ಇಧ ರಾಜಕುಲೇ ಜಾತಾ, ಸಬ್ಬಕಾಮಸಮಿದ್ಧಿನೀ;

ಚಿತ್ತಪ್ಪಸಾದಮತ್ತೇನ, ಲೋಕನಾಥಸ್ಸ ಸಾಸನೇ.

೧೦.

ತದಹುಪಬ್ಬಜಿತಸ್ಸಾಪಿ, ಈದಿಸಾ ಹೋನ್ತಿ ಸಮ್ಪದಾ;

ಕೀದಿಸಂ ಹೋತಿ ಸಮ್ಬುದ್ಧೇ, ಪಸಾದೇನ ಫಲಂ ಅಹೋ.

೧೧.

ಅಞ್ಞಾನಿ ಪನ ಕಿಚ್ಚಾನಿ, ಪಹಾಯಾತ್ತಹಿತೇ ರತೋ;

ಅತನ್ದಿತೋ ದಿವಾರತ್ತಿಂ, ಸರಾತು ರತನತ್ತಯಂತಿ.

ಏವಂ ಸಾಮಣೇರೇನ ಕತೂಪಕಾರಂ ಸಾರಾಪೇತ್ವಾ ಭನ್ತೇ ತವ ದಾಸಿಯಾ ಅನುಗ್ಗಹಂ ಪಟಿಚ್ಚ ಇಧೇವ ವಸಥಾತಿ ನಿಮನ್ತಿತ್ವಾ ತೇನ ಸಮ್ಪಟಿಚ್ಛಿತೇ ಮಹನ್ತಂ ವಿಹಾರಂ ಕಾರಾಪೇತ್ವಾ ಸಾಮಣೇರಂ ಆದಿಂ ಕತ್ವಾ ಅನೇಕಭಿಕ್ಖುಸತೇ ನಿಮನ್ತೇತ್ವಾ ವಿಹಾರೇ ವಸಾಪೇತ್ವಾ ಸುಲಭಂ ಕತ್ವಾ ಚತುಪಚ್ಚಯೇಹಿ ಉಪಟ್ಠಾಸಿ. ಸಾಮಣೇರೋಪಿ ಸುನಖಿಯಾ ದಿನ್ನದಾನಂ ಅನುಸ್ಸರಿತ್ವಾ ತುಟ್ಠೋ ಬುದ್ಧಾನುಸ್ಸತಿಂ ಮನಸಿಕರೋನ್ತೋ ನ ಚಿರೇನವ ಅರಹತ್ತಂ ಪತ್ವಾ ತಸ್ಮಿಂಯೇವ ವಿಹಾರೇ ವಸನ್ತೋ ಆಯುಪರಿಯೋಸಾನೇ ತತ್ಥೇವ ಪರಿನಿಬ್ಬಾಯೀತಿ.

೧೨.

ತಿಯದ್ಧೇಸು ತಿಲೋಕಸ್ಮಿಂ, ನತ್ಥಿ ವತ್ಥುತ್ತಯಂ ವಿನಾ;

ಸತ್ತಾನ ಮಞ್ಞ ಮಿಚ್ಛತ್ಥ, ದಾಯಕಂ ಸುರಪಾದಪಂ.

ಕುಣ್ಡಲಿಯಾ ವತ್ಥುಂ ದಸಮಂ.

ಮಹಾಸೇನವಗ್ಗೋ ಚತುತ್ಥೋ.

ಏತ್ತಾವತಾ ಜಮ್ಬುದೀಪುಪ್ಪತ್ತಿಕಥಾ ಸಮತ್ತಾ.