📜
ದಾಠಾವಂಸೋ ¶
ನಮೋ ತಸ್ಸ ಭಗವತೋ ಅರಹತೋ ಸಮ್ಮಾಸಮ್ಬುದ್ಧಸ್ಸ
ವಿಸಾರದಂ ವಾದಪಥಾತಿ ವತ್ತಿನಂ,
ತಿಲೋಕಪಜ್ಜೋತಮಸಯ್ಹಸಾಹಿನಂ;
ಅಸೇಸ ಞೇಯ್ಯಾವರಣಪ್ಪಹಾಯಿನಂ,
ನಮಾಮಿ ಸತ್ಥಾರಮನನ್ತಗೋಚರಂ.
೨. ¶
ತಿಲೋಕ ನಾಥಪ್ಪಭವಂ ಭಯಾಪಹಂ,
ವಿಸುದ್ಧವಿಜ್ಜಾಚರಣೇಹಿ ಸೇವಿತಂ;
ಪಪಞ್ಚ ಸಂಯೋಜನಬನ್ಧನಚ್ಛಿದಂ,
ನಮಾಮಿ ಧಮ್ಮಂ ನಿಪುಣಂ ಸುದುದ್ದಸಂ.
ಪಸಾದಮತ್ತೇನ’ಪಿ ಯತ್ಥ ಪಾಣಿನೋ,
ಫೂಸನ್ತಿ ದುಕ್ಖಕ್ಖಯಮಚ್ಚುತಂ ಪದಂ;
ತಮಾಹುಣೇಯ್ಯಂ ಸುಸಮಾಹಿತಿನ್ದ್ರಿಯಂ,
ನಮಾಮಿ ಸಙ್ಘಂ ಮುನಿರಾಜಸಾವಕಂ.
ವಿಭುಸಯಂ ಕಾಳಕನಾಗರನ್ವ ಯಂ,
ಪರಕ್ಕಮೋ ಕಾರುಣಿಕೋ ಚಮೂಪತಿ;
ಗವೇಸಮಾನೋ ಜಿನಸಾಸನಸ್ಸ ಯೋ,
ವಿರೂಳ್ಹಿಮತ್ಥಞ್ಚ ಜನಸ್ಸ ಪತ್ಥಯಂ.
೫. ¶
ಸುಧಾಮಯೂಖಾಮಲ ಪಣ್ಡುವಂಸಜಂ,
ವಿರೂಳ್ಹಸದ್ಧಂ ಮುನಿರಾಜಸಾಸನೇ;
ಪಿಯಂ ವದಂ ನೀತಿಪಥಾನುವತ್ತಿನಿಂ,
ಸದಾ ಪಜಾನಂ ಜನಿಕಂ’ವ ಮಾತರಂ.
ಪಿಯಂ ಪರಕ್ಕನ್ತಿಭುಜಸ್ಸ ರಾಜಿನೋ,
ಮಹೇಸಿ ಮಚ್ಚುನ್ನತಖುದ್ಧಿಸಮ್ಪದಂ;
ವಿಧಾಯ ಲೀಲಾವತಿಮಿಚ್ಛಿತತ್ಥದಂ,
ಅಸೇಸ ಲಙ್ಕಾತಲರಜ್ಜಲಕ್ಖಿಯಂ.
ಕುಮಾರಮಾರಾಧಿತಸಾಧುಮನ್ತಿನಂ,
ಮಹಾದಯಂ ಪಣ್ಡುನರಿನ್ದ ವಂಸಜಂ;
ವಿಧಾಯ ಸದ್ಧಂ ಮಧುರಿನ್ದನಾಮಕಂ,
ಸುಸಿಕ್ಖೀತಂ ಪಾವಚನೇ ಕಲಾಸು ಚ.
೮. ¶
ನರಿನ್ದಸುಞ್ಞಂ ಸುಚಿರಂ ತಿಸೀಹಳಂ,
ಇತಿಪ್ಪತೀತಂ ಅಯಸಂ ಅಪಾನುದಿ;
ಚಿರಂ ಪಣೀತೇನ ಚ ಚಿವರಾದಿನಾ,
ಸುಸಞ್ಞತೇ ಸಂಯಮಿನೋ ಅತಪ್ಪಯಿ.
ಚಿರಟ್ಠಿತಿಂ ಪಾವಚನಸ್ಸ ಇಚ್ಛತಾ,
ಕತಞ್ಞುನಾ ವಿಕ್ಕಮ ಬುದ್ದಿಸಾಲಿನಾ;
ಸತೀಮತಾ ಚನ್ದಿಮ ಬನ್ಧುಕಿತ್ತಿನಾ,
ಸಗಾರವಂ ತೇನ’ಭೀಯಾಚಿತೋ ಅಹಂ.
ಸದೇಸ ಭಾಸಾಯ ಕವೀಹಿ ಸೀಹಳೇ,
ಕತಮ್ಪಿ ವಂಸಂ ಜಿನದನ್ತಧಾತುಯಾ;
ನಿರುತ್ತಿಯಾ ಮಾಗಧಿಕಾಯ ವುದ್ಧಿಯಾ,
ಕರೋಮಿ ದೀಪನ್ತರವಾಸಿನಂ ಅಪಿ.
೧೧. ¶
ಜೀನೋ’ಯಮಿದ್ಧೇ ಅಮರವ್ಹಯೇ ಪುರೇ,
ಕದಾಚಿ ಹುತ್ವಾನ ಸುಮೇಧನಾಮಕೋ;
ಸವೇದವೇದಙ್ಗವಿಭಾಗಕೋವಿದೋ,
ಮಹದ್ಧನೇ ವಿಪ್ಪಕುಲಮ್ಹಿ ಮಾಣವೋ.
ಅಹಞ್ಹಿ ಜಾತಿಬ್ಯಸನೇನ ಪೀಳಿತೋ,
ಜರಾಭಿಭುತೋ ಮರಣೇನ ಓತ್ಥಟೋ;
ಸಿವಂ ಪದಂ ಜಾತಿಜರಾದಿನಿಸ್ಸಟಂ,
ಗವೇಸಯಿಸ್ಸಂ’ತಿ ರಹೋ ವಿಚಿನ್ತಿಯ.
ಅನೇಕಸಙ್ಖಂ ಧನಧಞ್ಞಸಮ್ಪದಂ,
ಪತಿಟ್ಠಪೇತ್ವಾ ಕಪಣೇಸಿ ದುಚ್ಚಜಂ;
ಅನಪ್ಪಕೇ ಪೇಮಭರಾನುಬನ್ಧಿನೋ,
ವಿಹಾಯ ಮಿತ್ತೇ ಚ ಸುತೇಚ ಬನ್ಧವೇ.
೧೪. ¶
ಪಹಾಯ ಕಾಮೇ ನಿಖಿಲೇ ಮನೋರಮೇ,
ಘರಾಭಿನಿಕ್ಖಮ್ಮ ಹಿಮಾಚಲನ್ತಿಕೇ;
ಮಹೀಧರಂ ಧಮ್ಮಿಕನಾಮ ವಿಸ್ಸುತಂ,
ಉಪೇಚ್ಚ ನಾನಾತರುರಾಜಿಭುಸಿತಂ.
ಮನೋನುಕೂಲೇ ಸುರರಾಜನಿಮ್ಮೀತೇ,
ಅಸಮ್ಮಿಗಾನಂ ಅಗತಿಮ್ಹಿ ಅಸ್ಸಮೇ;
ನಿವತ್ತಚೀರೋ ಅಜಿನಕ್ಖಿಪಂ ವಹಂ,
ಜಟಾಧರೋ ತಾಪಸ ವೇಸಮಗ್ಗಹೀ.
ಸುಸಞ್ಞತತ್ತೋಪರಿವಾರಿ ತಿನ್ದ್ರಿಯೋ,
ಫಲಾಫಲಾದೀಹಿ ಪವತ್ತಯಂ ತನುಂ;
ಗತೋ ಅಭಿಞ್ಗ್ಞಾಸು ಚ ಪಾರಮಿಂ ವಸೀ,
ತಹಿಂ ಸಮಾಪತ್ತಿ ಸುಖಂ ಅವಿನ್ದಿ ಸೋ.
೧೭. ¶
ಸುಸಜ್ಜಿತೇ ರಮ್ಮಪುರಾಧಿವಾಸಿನಾ,
ಮಹಾಜನೇನ’ತ್ತಮನೇನ ಅಞ್ಜಸೇ;
ಪಥಪ್ಪದೇಸೇ ಅಭಿಯನ್ತಮತ್ತನೋ,
ಅನಿಟ್ಠಿತೇಯೇವ ಸುಮೇಧ ತಾಪಸೋ.
ಅಗಾಧಞೇಯ್ಯೋದಧೀಪಾರದಸ್ಸಿನಂ,
ಭವನ್ತಗುಂ ನಿಬ್ಬನಥಂ ವಿನಾಯಕಂ;
ಅನೇಕಖೀಣಾಸವಲಕ್ಖಸೇವಿತಂ,
ಕದಾ ಚಿ ದೀಪಙ್ಕರಬುದ್ಧಮದ್ದಸ.
ತತೋ ಸಸಙ್ಘಸ್ಸ ತಿಲೋಕಭತ್ತುನೋ,
ಪರಿಚ್ಚಜಿತ್ವಾನ ತನುಮ್ಪಿ ಜೀವಿತಂ;
ಪಸಾರಯಿತ್ವಾನ ಜಟಾಜಿನಾದಿಕಂ,
ವಿಧಾಯ ಸೇತುಂ ತನುಮೇವ ಪಲ್ಲಲೇ.
೨೦. ¶
ಅನಕ್ಕಮಿತ್ವಾ ಕಲಲಂ ಮಹಾದಯೇ,
ಸಭಿಕ್ಖುಕೋ ಗಚ್ಚತು ಪಿಟ್ಠಿಯಾ ಇತಿ;
ಅಧಿಟ್ಠಹಿತ್ವಾನ ನಿಪನ್ನಕೋ ತಹಿಂ,
ಅನಾಥ ಮೇತಂ ತಿಭವಂ ಸಮೇಕ್ಖಿಯ.
ದಯಾಯ ಸಞ್ಚೋದಿತಮಾನಸೋ ಜನೇ,
ಭವಣ್ಣವಾ ಉದ್ಧರಿತುಂ ದುಖದ್ದಿತೇ;
ಅಕಾಸಿ ಸಮ್ಬೋಧಿಪದಸ್ಸ ಪತ್ತಿಯಾ,
ಮಹಾಭಿನೀಹಾರಮುದಗ್ಗವಿಕ್ಕಮೋ.
೨೨. ¶
ಅಥೋ ವಿದಿತ್ವಾ ವಸಿನೋ ತಮಾಸಯಂ,
ಅದಾಸಿ ಸೋ ವ್ಯಾಕರಣಂ ಮಹಾಮುನಿ;
ತತೋ ಪುರಂ ತಮ್ಹಿ ತಥಾಗತೇ ಗತೇ,
ಸಯಂವಸೀ ಸಮ್ಮಸಿ ಪಾರಮಿಗುಣೇ.
ತತೋ ಚ ಕಪ್ಪಾನಮಲೀನವಿಕ್ಕಮೋ,
ಅಸಂಖಿಯೇ ಸೋ ಚತುರೋ ಸಲಕ್ಖಕೇ;
ತಹಿಂ ತಹಿಂ ಜಾತಿಸು ಬೋಧಿಪಾಚನೇ,
ವಿಸುದ್ಧಸಮ್ಭಾರಗುಣೇ ಅಪೂರಯಿ;
ಅಥಾಭಿಜಾತೋ ತುಸಿತೇ ಮಹಾಯಸೋ,
ವಿಸುದ್ಧಸಮ್ಬೋಧಿಪದೋಪಲದ್ಧಿಯಾ;
ಉದಿಕ್ಖಮಾನೋ ಸಮಯಂ ದಯಾಧನೋ,
ಚಿರಂ ವಿಭುತಿಂ ಅನುಭೋಸಿ ಸಬ್ಬಸೋ.
೨೫. ¶
ಸಹಸ್ಸಸಙ್ಖಾ ದಸಚಕ್ಕವಾಲತೋ,
ಸಮಾಗತಾನೇಕಸುರಾಧಿಪಾದಿಹಿ;
ಉದಗ್ಗುದಗ್ಗೇಹಿ ಜಿನತ್ತಪತ್ತಿಯಾ,
ಸಗಾರವಂ ಸೋ ಅಭಿಗಮ್ಮ ಯಾಚಿತೋ.
ತತೋ ಚವಿತ್ವಾ ಕಪಿಳವ್ಹಯೇ ಪುರೇ,
ಸದಾ ಸತೋ ಸಕ್ಯಕುಲೇಕಕೇತುನೋ;
ಅಹೋಸಿ ಸುದ್ಧೋದನಭುಮಿಭತ್ತುನೋ,
ಮಹಾದಿಮಾಯಾಯ ಮಹೇಸಿಯಾ ಸುತೋ.
೨೭. ¶
ವಿಜಾತಮತ್ತೋ’ವ ವಸುನ್ಧರಾಯ ಸೋ,
ಪತಿಟ್ಠಹಿತ್ವಾನ ದಿಸಾ ವಿಲೋಕಯೀ;
ತದಾ ಅಹೇಸುಂ ವಿವಟಙ್ಗನಾ ದಿಸಾ,
ಅಪೂಜಯುಂ ತತ್ಥ ಚ ದೇವಮಾನುಸಾ.
ಆಧಾರಯುಂ ಆತಪವಾರಣಾದಿಕಂ,
ಅದಿಸ್ಸಮಾನಾವ ನಭಮ್ಭಿ ದೇವತಾ;
ಪದಾನಿ ಸೋ ಸತ್ತ ಚ ಉತ್ತರಾಮುಖೋ,
ಉಪೇಚ್ಚ ನಿಚ್ಛಾರಯಿ ವಾಚಮಾಸಭಿಂ.
ಯಥತ್ಥಸಿದ್ಧತ್ತಕುಮಾರನಾಮಕೋ,
ಮಹಬ್ಬಲೋ ಯೋಬ್ಬನಹಾರಿವಿಗ್ಗಹೋ;
ಉತುತ್ತಯಾನುಚ್ಛವಿಕೇಸು ತೀಸು ಸೋ,
ನುಭೋಸಿ ಪಾಸಾದವರೇಸು ಸಮ್ಪದಂ.
೩೦. ¶
ಕದಾಚಿ ಉಯ್ಯಾನಪಥೇ ಜರಾಹತಂ,
ತಥಾತುರಂ ಕಾಲಕತಞ್ಚ ಸಂಯಮಿಂ;
ಕಮೇನ ದಿಸ್ವಾನ ವಿರತ್ತಮಾನಸೋ,
ಭವೇಸು ಸೋ ಪಬ್ಬಜಿತುಂ ಅಕಾಮಯಿ.
ಸಪುಪ್ಫದೀಪಾದೀಕರೇಹಿ ರತ್ತಿಯಂ,
ಪುರಕ್ಖತೋ ಸೋ ತಿದಿವಾಧಿವಾಸಿಹಿ;
ಸಛನ್ನಕೋ ಕನ್ತಕವಾಜಿಯಾನತೋ,
ತತೋ ಮಹಾಕಾರುಣಿಕೋ’ಭಿನಿಕ್ಖಮಿ.
ಕಮೇನ ಪತ್ವಾನ ಅನೋಮಮಾಪಗಂ,
ಸುಧೋತಮುತ್ತಾಫಲಹಾರಿಸೇಕತೇ;
ಪತಿಟ್ಠಹಿತ್ವಾ ವರಮೋಳಿಬನ್ಧನಂ,
ಸಿತಾಸಿಲೂನಂ ಗಗನೇ ಸಮುಕ್ಖಿಪೀ.
೩೩. ¶
ಪಟಿಗ್ಗಹೇತ್ವಾ ತಿದಸಾನಮಿಸ್ಸರೋ,
ಸುವಣ್ನಚಙ್ಗೋಟವರೇನ ತಂ ತದಾ;
ತಿಯೋಜನಂ ನೀಲಮಣೀಹಿ ಚೇತಿಯಂ,
ಅಕಾಸಿ ಚೂಳಾಮಣಿಮತ್ತನೋ ಪುರೇ.
ತತೋ ಘಟೀಕಾರಸರೋಜಯೋನಿನಾ,
ಸಮಾಹಟಂ ಧಾರಯೀ ಚೀವರಾದಿಕಂ;
ಅಥೋ ಸಕಂ ವತ್ಥಯುಗಂ ನಭತ್ಥಲೇ,
ಪಸತ್ಥವೇಸಗ್ಗಹಣೋ ಸಮುಕ್ಖಿಪೀ.
ಪಟಿಗ್ಗಹೇತ್ವಾನ ತಮಮ್ಬುಜಾಸನೋ,
ಮಹಿದ್ಧಿಕೋ ಭತ್ತಿಭರೇನ ಚೋದಿತೋ;
ಸಕೇ ಭವೇ ದ್ವಾದಸಯೋಜನಂ ಅಕಾ,
ಮಣೀಹಿ ನೀಲಾದಿಹಿ ದುಸ್ಸಚೇತಿಯಂ.
೩೬. ¶
ಸುಸಞ್ಞತತ್ತೋ ಸತಿಮಾ ಜಿತಿನ್ದ್ರಿಯೋ,
ವಿನೀತವೇಸೋ ರಸಗೇಧವಜ್ಜಿತೋ;
ಛಹಾಯನಾನೇವ ಅನೋಮವಿಕ್ಕಮೋ,
ಮಹಾಪಧಾನಂ ಪದಹಿತ್ಥ ದುಕ್ಕರಂ.
ವಿಸಾಖಮಾಸಸ್ಸಥ ಪುಣ್ಣಮಾಸಿಯಂ,
ಉಪೇಚ್ಚ ಮೂಲಂ ಸಹಜಾಯ ಬೋಧಿಯಾ;
ತಿಣಾಸನೇ ಚುದ್ದಸಹತ್ಥಸಮ್ಮಿತೇ,
ಅಧಿಟ್ಠಹಿತ್ವಾ ವೀರಿಯಂ ನಿಸಜ್ಜಿ ಸೋ.
ಅವತ್ಥರನ್ತಿಂ ವಸುಧಂಚ ಅಮ್ಬರಂ,
ವಿರೂಪವೇಸಗ್ಗಹಣೇನ ಭಿಂಸನಂ;
ಪಕಮ್ಪಯನ್ತೋ ಸಧರಾಧರಂ ಮಹಿಂ,
ಜಿನೋ ಪದೋಸೇ’ಜಿನಿ ಮಾರವಾಹಿಣಿಂ.
೩೯. ¶
ಸುರಾಸುರಬ್ರಹ್ಮಗಣೇಹಿ ಸಜ್ಜಿತೇ,
ಜಗತ್ತಯೇ ಪುಪ್ಫಮಯಗಘಿಕಾದಿನಾ;
ಪವತ್ತಮಾನೇ ಸುರದುನ್ದುಭಿಸ್ಸರೇ,
ಅಬುಜ್ಝಿಬೋಧಿಂ ರಜನೀಪರಿಕ್ಖಯೇ.
ತದಾ ಪಕಮ್ಪಿಂಸು ಸಸೇಲಕಾನನಾ,
ಸಹಸ್ಸಸಂಖಾ ದಸಲೋಕಧಾತುಯೋ;
ಅಗಞ್ಜಿ ಸೋ ಲೋಣಪಯೋಧಿ ಸಾಧುತಂ,
ಮಹಾವಭಾಸೋ ಭುವನೇಸು ಪತ್ಥರೀ.
ಲಭಿಂಸು ಅನ್ಧಾ ವಿಮಲೇ ವಿಲೋಚನೇ,
ಸುಣಿಂಸು ಸದ್ದೇ ಬಧಿರಾಪಿ ಜಾತಿಯಾ;
ಲಪಿಂಸು ಮೂಗಾ ವಚನೇನ ವಗ್ಗುನಾ,
ಚರಿಂಸು ಖೇಲಂ ಪದಸಾ’ವ ಪಙ್ಗುಲಾ.
ಭವಿಂಸು ಖುಜ್ಜಾ ಉಜುಸೋಮ್ಮವಿಗ್ಗಹಾ,
ಸಿಖೀ’ಪಿ ನಿಬ್ಬಾಯಿ ಅವೀಚಿಆದಿಸು;
ಅಪಾಗಮುಂ ಬನ್ಧನತೋ’ಪಿ ಜನ್ತವೋ,
ಖುದಾದಿಕಂ ಪೇತಭವಾ ಅಪಕ್ಕಮೀ.
೪೩. ¶
ಸಮಿಂಸು ರೋಗವ್ಯಸನಾನಿ ಪಾಣಿನಂ,
ಭಯಂ ತಿರಚ್ಚಾನಗತೇ ನ ಪೀಳಯೀ;
ಜನಾ ಅಹೇಸುಂ ಸಖಿಲಾ ಪಿಯಂವದಾ,
ಪವತ್ತಯುಂ ಕೋಞ್ಚನದಂ ಮತಙ್ಗಜಾ.
ಹಯಾ ಚ ಹೇಸಿಂಸು ಪಹಟ್ಠಮಾನಸಾ,
ನದಿಂಸು ಸಬ್ಬಾ ಸಯಮೇವ ದುನ್ದುಭೀ;
ರವಿಂಸು ದೇಹಾಭರಣಾನಿ ಪಾಣಿನಂ,
ದಿಸಾ ಪಸೀದಿಂಸು ಸಮಾ ಸಮನ್ತತೋ.
ಪವಾಯಿ ಮನ್ದೋ ಸುಖಸೀತಮಾರುತೋ,
ಪವಸ್ಸಿ ಮೇಘೋ’ಪಿ ಅಕಾಲಸಮ್ಬವೋ;
ಜಹಿಂಸು ಆಕಾಸಗತಿಂ ವಿಹಙ್ಗಮಾ,
ಮಹಿಂ ಸಮುಭಿಜ್ಜಜಲಂ ಸಮುಟ್ಠಹೀ.
ಅಸನ್ದಮಾನಾ’ವ ಠಿತಾ ಸವನ್ತಿಯೋ,
ನಭೇ ವಿರೋಚಿಂಸು ಅಸೇಸಜೋತಿಯೋ;
ಭವಾ ಅಹೇಸುಂ ವಿವಟಾ ಸಮನ್ತತೋ,
ಜನಸ್ಸ ನಾಸುಂ ವಚನೂಪಪತ್ತಿಯೋ.
೪೭. ¶
ಸಮೇಕ್ಖತಂ ನಾವರಣಾ ನಗಾದಯೋ,
ಪವಾಯಿ ಗನ್ಧೋ ಅಪಿ ದಿಬ್ಬಸಮ್ಮತೋ;
ದುಮಾ ಅಹೇಸುಂ ಫಲಪುಪ್ಫ ಧಾರಿನೋ,
ಅಹೋಸಿ ಛನ್ನೋ ಕಮಲೇಹಿ ಅಣ್ಣವೋ.
ಥಲೇಸು ತೋಯೇಸು ಚ ಪುಪ್ಫಮಾನಕಾ,
ವಿಚಿತ್ತಪುಪ್ಫಾ ವಿಕಸಿಂಸು ಸಬ್ಬಥಾ;
ನಿರನ್ತರಂ ಪುಪ್ಫಸುಗನ್ಧವುಟ್ಠಿಯಾ,
ಅಹೋಸಿ ಸಬ್ಬಂ ವಸುಧಮ್ಬರನ್ನರಂ.
ನಿಸಜ್ಜ ಪಲ್ಲಙ್ಕವರೇ ತಹಿಂ ಜಿನೋ,
ಸುಖಂ ಸಮಾಪತ್ತಿವಿಹಾರಸಮ್ಭವಂ;
ತತೋ’ನುಭೋನ್ತೋ ಸುಚಿರಾಭಿಪತ್ಥಿತಂ,
ದಿನಾನಿ ಸತ್ತೇವ ಅತಿಕ್ಕಮಾಪಯೀ.
೫೦. ¶
ಸಮುಪ್ಪತಿತ್ವಾ ಗಗಣಙ್ಗನಂ ತತೋ,
ಪದಸ್ಸಯಿತ್ವಾ ಯಮಕಂ ಮಹಾಮುನಿ;
ಸಪಾಟಿಹೀರಂ ತಿದಿವಾಧಿವಾಸಿನಂ,
ಜಿನತ್ತನೇ ಸಂಸಯಿತಂ ನಿರಾಕರಿ.
ಅಥೋತರಿತ್ವಾನ ಜಯಾಸನಸ್ಸ ಸೋ,
ಠಿತೋ’ವ ಪುಬ್ಬುತ್ತರಕಣ್ಣನಿಸ್ಸಿತೋ;
ದಿನಾನಿ ಸತ್ತಾನಿಮಿಸೇನ ಚಕ್ಖುನಾ,
ತಮಾಸನಂ ಬೋಧಿತರುಂಚ’ಪೂಜಯಿ.
ಅಥ’ನ್ತರಾಳೇ ಮಣಿಚಙ್ಕಮೇ ಜಿನೋ,
ಠಿತಪ್ಪದೇಸಸ್ಸ ಚ ಆಸನಸ್ಸ ಚ;
ಮಹಾರಹೇ ದೇವವರಾಭಿನಿಮ್ಮಿತೇ,
ದಿನಾನಿ ಸತ್ತೇವ ಅಕಾಸಿ ವಙ್ಕಮಂ.
೫೩. ¶
ತತೋ ದಿಸಾಯಂ ಅಪರಾಯ ಬೋಧಿಯಾ,
ಉಪಾವಿಸಿತ್ವಾ ರತನಾಲಯೇ ಜಿನೋ;
ಸಮನ್ತಪಟ್ಠಾನನಯಂ ವಿಚಿನ್ತಯಂ,
ದಿನಾನಿ ಸತ್ತೇವ ಸವೀತಿನಾಮಯಿ.
ವಿನಿಗ್ಗತೋ ಸತ್ಥುಸರೀರತೋ ತದಾ,
ಜುತಿಪ್ಪಬನ್ಧೋ ಪಟಿಬನ್ಧವಜ್ಜಿತೋ;
ಪಮಾಣಸುಞ್ಞಾಸು ಚ ಲೋಕಧಾತುಸು,
ಸಮನ್ತತೋ ಉದ್ಧಮಧೋ ಚ ಪತ್ಥರೀ.
ವಟಸ್ಸ ಮೂಲೇ ಅಜಪಾಲಸಞ್ಞಿನೋ,
ಸುಖಂ ಫುಸನ್ತೋ ಪವಿವೇಕಸಮ್ಭವಂ;
ವಿನಾಯಕೋ ಸತ್ತ ವಿಹಾಸಿ ವಾಸರೇ,
ಅನನ್ತದಸ್ಸೀ ಸುರರಾಜಪೂಜಿತೋ.
೫೬. ¶
ವಿಹಾಸಿ ಮೂಲೇ ಮುಚಲಿನ್ದಸಾಖಿನೋ,
ನಿಸಜ್ಜ ಭೋಗಾವಲಿಮನ್ದಿರೋದರೇ;
ವಿಕಿಣ್ಣಪುಪ್ಫೇ ಮುಚಲಿನ್ದಭೋಗಿನೋ,
ಸಮಾಧಿನಾ ವಾಸರಸತ್ತಕಂ ಜಿನೋ.
ದುಮೇ’ಪಿ ರಾಜಾಯತನೇ ಸಮಾಧಿನಾ,
ವಿಹಾಸಿ ರತ್ತಿನ್ದಿವ ಸತ್ತಕಂ ಮುನಿ;
ಸಹಸ್ಸನೇತ್ತೋ ಅಥ ದನ್ತಪೋಣಕಂ,
ಮುಖೋದಕಞ್ಚಾಪಿ ಅದಾಸಿ ಸತ್ಥುನೋ.
ತತೋ ಮಹಾರಾಜವರೇಹಿ ಆಭತಂ,
ಸಿಲಾಮಯಂ ಪತ್ತ ಚತುಕ್ಕಮೇಕಕಂ;
ವಿಧಾಯ ಮತ್ಥಂ ಮಧುಪಿಣ್ಡಿಕಂ ತಹಿಂ,
ಪಟಿಗ್ಗಹೇತ್ವಾನ ಸವಾಣಿಜಾಹಟಾ.
೫೯. ¶
ಕತನ್ನಕಿಚ್ಚೋ ಸರಣೇಸು ತೇ ಉಭೋ,
ಪತಿಟ್ಠಪೇತ್ವಾನ ತಪಸ್ಸುಭಲ್ಲಿಕೇ;
ಅದಾಸಿ ತೇಸಂ ಅಭಿಪೂಜಿತುಂ ಸಕಂ,
ಪರಾಮಸಿತ್ವಾನ ಸಿರಂ ಸಿರೋರುಹೇ.
ವಟಸ್ಸಮುಲೇ ಅಜಪಾಲಸಞ್ಞಿನೋ,
ಸಹಮ್ಪತೀಬ್ರಹ್ಮವರೇನ ಯಾಚಿತೋ;
ಜನಸ್ಸ ಕಾತುಂ ವರಧಮ್ಮಸಙ್ಗಹಂ,
ಅಗಞ್ಛಿ ಬಾರಾಣಸಿಮೇಕಕೋ ಮುನಿ.
೬೧. ¶
ಗನ್ತ್ವಾ ಸೋ ಧಮ್ಮರಾಜಾ ವನಮಿಸಿಪತನಂ ಸಞ್ಞತಾನಂ ನಿಕೇತಂ,
ಪಲ್ಲಙ್ಕಸ್ಮಿಂ ನಿಸಿನ್ನೋ ತಹಿಮವಿಚಲಿತಟ್ಠಾನಸಮ್ಪಾದಿತಮ್ಹಿ;
ಆಸಾಳ್ಹೇ ಪುಣ್ಣಮಾಯಂ ಸಿತರುಚಿರುಚಿಯಾ ಜೋತಿತೇ ಚಕ್ಕವಾಳೇ,
ದೇವಬ್ರಹ್ಮಾದಿಕಾನಂ ದುರಿತಮಲಹರಂ ವತ್ತಯಿ ಧಮ್ಮಚಕ್ಕಂ.
ಸುತ್ವಾ ಸದ್ಧಮ್ಮಮಗ್ಗಂ ತಿಭೂವನಕುಹರಾಭೋಗವಿತ್ಥಾರಿಕಂ ತಂ,
ಅಞ್ಞಾಕೋಣ್ಡಞ್ಞನಾಮದ್ವಿಜಮುನಿಪಮುಖಾಟ್ಠಾರಸಬ್ರಹ್ಮಕೋಟೀ;
ಅಞ್ಞಾಸುಂ ಮಗ್ಗಧಮ್ಮಂ ಪರಿಮಿತರಹಿತೇ ಚಕ್ಕವಾಳೇ ಉಳಾರೋ,
ಓಭಾಸೋ ಪಾತುಭುತೋ ಸಪದಿ ಬಹುವಿಧಂ ಆಸಿ ಅಚ್ಛೇರಕಞ್ಚ.
ಪಠಮೋ ಪರಿಚ್ಛೇದೋ.
೬೩. ¶
ತತೋ ಪಟ್ಠಾಯ ಸೋ ಸತ್ಥಾ ವಿನೇನ್ತೋ ದೇವಮಾನುಸೇ,
ಬೋಧಿತೋ ಫುಸ್ಸಮಾಸಮ್ಹಿ ನವಮೇ ಪುಣ್ಣಮಾಸಿಯಂ.
ಲಙ್ಕಮಾಗಮ್ಮ ಗಙ್ಗಾಯ ತೀರೇ ಯೋಜನವಿತ್ಥತೇ,
ಮಹಾನಾಗವನುಯ್ಯಾನೇ ಆಯಾಮೇನ ತಿಯೋಜನೇ.
ಯಕ್ಖಾನಂ ಸಮಿತಿಂ ಗನ್ತ್ವಾ ಠತ್ವಾನ ಗಗನೇ ತಹಿಂ;
ವಾತನ್ಧಕಾರವುಟ್ಠಿಹಿ ಕತ್ವಾ ಯಕ್ಖೇ ಭಯದ್ದಿತೇ.
ಲದ್ಧಾಭಯೇಹಿ ಯಕ್ಖೇಹಿ ತೇಹಿ ದಿನ್ನಾಯ ಭುಮಿಯಾ;
ಚಮ್ಮಖಣ್ಡಂ ಪಸಾರೇತ್ವಾ ನಿಸೀದಿತ್ವಾನ ತಙ್ಖಣೇ.
ಚಮ್ಮಖಣ್ಡಂ ಪದಿತ್ತಗ್ಗಿ ಜಾಲಾಮಾಲಾಸಮಾಕುಲಂ;
ಇದ್ಧಿಯಾ ವಡ್ಢಯಿತ್ವಾನ ಯಾವ ಸಿನ್ಧುಂ ಸಮನ್ತತೋ.
೬೮. ¶
ಜವೇನ ಸಿನ್ಧುವೇಲಾಯ ರಾಸಿಭುತೇ ನಿಸಾಚರೇ;
ಗಿರಿದೀಪಮಿಧಾನೇತ್ವಾ ಪತಿಟ್ಠಾಪೇಸಿ ತೇ ತಹಿಂ.
ದೇಸಯಿತ್ವಾ ಜಿನೋ ಧಮ್ಮಂ ತದಾ ದೇವಸಮಾಗಮೇ;
ಬಹುನ್ನಂ ಪಾಣಕೋಟೀನಂ ಧಮ್ಮಾಭಿಸಮಯಂ ಅಕಾ.
ಮಹಾಸುಮನದೇವಸ್ಸ ಸೇಲೇ ಸುಮನಕೂಟಕೇ;
ದತ್ವಾ ನಮಸ್ಸಿತುಂ ಕೇಸೇ ಅಗಾ ಜೇತವನಂ ಜಿನೋ.
ಪತಿಟ್ಠಪೇತ್ವಾ ತೇ ಸತ್ಥು ನಿಸಿನ್ನಾಸನಭುಮಿಯಂ;
ಇನ್ದನೀಲಮಯಂ ಥೂಪಂ ಕರಿತ್ವಾ ಸೋ ಅಪೂಜಯಿ.
ನಿಸ್ಸಾಯ ಮಣಿಪಲ್ಲಙ್ಕಂ ಪಬ್ಬತಣ್ಣವವಾಸಿನೋ;
ದಿಸ್ವಾ ಯುದ್ಧತ್ಥಿಕೇ ನಾಗೇ ಚೂಳೋದರ ಮಹೋದರೇ.
ಬೋಧಿತೋ ಪಞ್ಚಮೇ ವಸ್ಸೇ ಚಿತ್ತಮಾಸೇ ಮಹಾಮುನಿ;
ಉಪೋಸಥೇ ಕಾಲಪಕ್ಖೇ ನಾಗದೀಪಮುಪಾಗಮೀ.
೭೪. ¶
ತದಾ ಸಮಿದ್ಧಿಸುಮನೋ ದೇವೋ ಜೇತವನೇ ಠಿತಂ;
ಅತ್ತನೋ ಭವನಂಯೇವ ರಾಜಾಯತನಪಾದಪಂ.
ಇನ್ದನೀಲದ್ದಿಕೂಟಂ’ವ ಗಹೇತ್ವಾತುಟ್ಠಮಾನಸೋ;
ಧಾರಯಿತ್ವಾ ಸಹಾಗಞ್ಛಿ ಛತ್ತಂ ಕತ್ವಾನ ಸತ್ಥುನೋ.
ಉಭಿನ್ನಂ ನಾಗರಾಜೂನಂ ವತ್ತಮಾನೇ ಮಹಾಹವೇ;
ನಿಸಿನ್ನೋ ಗಗನೇ ನಾಥೋ ಮಾಪಯಿತ್ಥ ಮಹಾತಮಂ.
ಆಲೋಕಂ ದಸ್ಸಯಿತ್ವಾಥ ಅಸ್ಸಾಸೇತ್ವಾನ ಭೋಗಿನೋ;
ಸಾಮಗ್ಗಿಕರಣಂ ಧಮ್ಮಂ ಅಭಾಸಿ ಪುರಿಸಾಸಭೋ.
ಅಸೀತಿಕೋಟಿಯೋ ನಾಗಾ ಅಚಲಮ್ಬುಧಿವಾಸಿನೋ;
ಪತಿಟ್ಠಹಿಂಸು ಮುದಿತಾ ಸೀಲೇಸು ಸರಣೇಸು ಚ.
೭೯. ¶
ದತ್ವಾನ ಮಣಿಪಲ್ಲಙ್ಕಂ ಸತ್ಥುನೋ ಭುಜಗಾಧಿಪಾ;
ತತ್ಥಾಸೀನಂ ಮಹಾವೀರಂ ಅನ್ನಪಾನೇಹಿ ತಪ್ಪಯುಂ.
ಪತಿಟ್ಠಪೇತ್ವಾ ಸೋ ತತ್ಥ ರಾಜಾಯತನಪಾದಪಂ;
ಪಲ್ಲಙ್ಕಂ ತಞ್ಚ ನಾಗಾನಂ ಅದಾಸಿ ಅಭಿಪೂಜಿತುಂ.
ಬೋಧಿತೋ ಅಟ್ಠಮೇ ವಸ್ಸೇ ವೇಸಾಖೇ ಪುಣ್ಣಮಾಸಿಯಂ;
ಮಣಿಅಕ್ಖಿಕನಾಮೇನ ನಾಗಿನ್ದೇನ ನಿಮನ್ತಿತೋ.
ನಾಗರಾಜಸ್ಸ ತಸ್ಸೇವ ಭವನಂ ಸಾಧು ಸಜ್ಜೀತಂ;
ಕಲ್ಯಾಣಿಯಂ ಪಞ್ಚಭಿಕ್ಖೂ ಸತೇಹಿ ಸಹ ಆಗಮಿ.
ಕಲ್ಯಾಣಿಚೇತಿಯಟ್ಠಾನೇ ಕತೇ ರತನ ಮಣ್ಡಪೇ;
ಮಹಾರಹಮ್ಹಿ ಪಲ್ಲಙ್ಕೇ ಉಪಾವಿಸಿ ನರಾಸಭೋ.
ದಿಬ್ಬೇಹಿ ಖಜ್ಜಭೋಜ್ಜೇಹಿ ಸಸಙ್ಘಂ ಲೋಕನಾಯಕಂ;
ಸನ್ತಪ್ಪೇಸಿ ಫಣಿನ್ದೋ ಸೋ ಭುಜಙ್ಗೇಹಿ ಪುರಕ್ಖತೋ.
೮೫. ¶
ದೇಸಯಿತ್ವಾನ ಸದ್ಧಮ್ಮಂ ಸಗ್ಗಮೋಕ್ಖಸುಖಾವಹಂ;
ಸೋ ಸತ್ಥಾ ಸುಮನೇ ಕೂಟೇ ದಸ್ಸೇಸಿ ಪದಲಞ್ಛನಂ.
ತತೋ ಪಬ್ಬತಪಾದಮ್ಹಿ ಸಸಙ್ಘೋ ಸೋ ವಿನಾಯಕೋ;
ದಿವಾವಿಹಾರಂ ಕತ್ವಾನ ದೀಘವಾಪಿಂ ಉಪಾಗಮಿ.
ಥೂಪಟ್ಠಾನೇ ತಹಿಂ ಬುದ್ಧೋ ಸಸಙ್ಘೋ’ಭಿನಿಸೀದಿಯ;
ಸಮಾಪತ್ತಿ ಸಮುಬಭುತಂ ಅವಿನ್ದಿ ಅಸಮಂ ಸುಖಂ.
ಮಹಾಬೋಧಿತರುಟ್ಠಾನೇ ಸಮಾಧಿಂ ಅಪ್ಪಯಿ ಜಿನೋ;
ಮಹಾಥೂಪಪ್ಪದೇಸೇ ಚ ವಿಹರಿತ್ಥ ಸಮಾಧಿನಾ.
ಥೂಪಾರಾಮಮ್ಹಿ ಥೂಪಸ್ಸ ಠಾನೇ ಝಾನಸುಖೇನ ಸೋ;
ಸಭಿಕ್ಖುಸಙ್ಘೋ ಸಮ್ಬುದ್ಧೋ ಮುಹುತ್ತಂ ವೀತಿನಾಮಯೀ.
೯೦. ¶
ಸಿಲಾಥುಪಪ್ಪದೇಸಮ್ಹಿ ಠತ್ವಾಕಾಲಾವಿದೂ ಮುನಿ;
ದೇವೇ ಸಮನುಸಾಸಿತ್ವಾ ತತೋ ಜೇತವನಂ ಅಗಾ.
ಅಗಿದ್ಧೋ ಲಾಭಸಕ್ಕಾರೇ ಅಸಯ್ಹಮವಮಾನನಂ;
ಸಹನ್ತೋ ಕೇವಲಂ ಸಬ್ಬ ಲೋಕನಿತ್ಥರಣತ್ಥಿಕೋ.
ಸಂವಚ್ಛರಾನಿ ಠತ್ವಾನ ಚತ್ತಾಳೀಸಞ್ಚ ಪಞ್ಚ ಚ;
ದೇಸಯಿತ್ವಾನ ಸುತ್ತಾದಿ ನವಙ್ಗಂ ಸತ್ಥುಸಾಸನಂ.
ತಾರೇತ್ವಾ ಭವಕನ್ತಾರಾ ಜನೇ ಸಙ್ಖ್ಯಾತಿವತ್ತಿನೋ;
ಬುದ್ಧಕಿಚ್ಚಾನಿ ಸಬ್ಬಾನಿ ನಿಟ್ಠಾಪೇತ್ವಾನ ಚಕ್ಖುಮಾ.
೯೪. ¶
ಕುಸಿನಾರಾಪುರೇ ರಞ್ಞಂ ಮಲ್ಲಾನಮುಪವತ್ತನೇ;
ಸಾಲವನಮ್ಹಿ ಯಮಕಸಾಲರುಕ್ಖಾನಮನ್ತರೇ.
ಮಹಾರಹೇ ಸುಪಞ್ಞತ್ತೇ ಮಞ್ಚೇ ಉತ್ತರಸೀಸಕಂ;
ನಿಪನ್ನೋ ಸೀಹಸೇಯ್ಯಾಯ ವೇಸಾಖೇ ಪುಣ್ಣಮಾಸಿಯಂ.
ದೇಸೇತ್ವಾ ಪಠಮೇ ಯಾಮೇ ಮಲ್ಲಾನಂ ಧಮ್ಮಮುತ್ತಮಂ;
ಸುಭದ್ದಂ ಮಜ್ಝಿಮೇ ಯಾಮೇ ಪಾಪೇತ್ವಾ ಅಮತಂ ಪದಂ.
ಭಿಕ್ಖು ಪಚ್ಛಿಮಯಾಮಮ್ಹಿ ಧಮ್ಮಕ್ಖನ್ಧೇ ಅಸೇಸಕೇ;
ಸಙ್ಗಯ್ಹ ಓವದಿತ್ವಾನ ಅಪ್ಪಮಾದ ಪದೇನ ಚ.
ಪಚ್ಚುಸಸಮಯೇ ಝಾನಸಮಾಪತ್ತಿವಿಹಾರತೋ;
ಉಟ್ಠಾಯ ಪರಿನಿಬ್ಬಾಯಿ ಸೇಸೋಪಾದಿವಿವಜ್ಜಿತೋ.
೯೯. ¶
ಮಹೀಕಮ್ಪಾದಯೋ ಆಸುಂ ತದಾ ಅಚ್ಛರಿಯಾವಹಾ;
ಪೂಜಾವಿಸೇಸಾ ವತ್ತಿಂಸು ದೇವಮಾನುಸಕಾ ಬಹೂ.
ಪರಿನಿಬ್ಬಾಣಸುತ್ತನ್ತೇ ವುತ್ತಾನುಕ್ಕಮತೋ ಪನ;
ಪೂಜಾವಿಸೇಸೋ ವಿಞ್ಞೇಯ್ಯೋ ಇಚ್ಛನ್ತೇಹಿ ಅಸೇಸತೋ.
ಅಹತೇಹಿ ಚ ವತ್ಥೇಹಿ ವೇಠೇತ್ವಾ ಪಠಮಂ ಜಿನಂ;
ವೇಠಯಿತ್ವಾನ ಕಪ್ಪಾಸಪಿಚುನಾ ವಿಹತೇನ ಚ.
ಏವಂ ಪಞ್ಚಸತಕ್ಖತ್ತುಂ ವೇಠಯಿತ್ವಾನ ಸಾಧುಕಂ;
ಪಕ್ಖಿಪಿತ್ವಾ ಸುವಣ್ಣಾಯ ತೇಲಪುಣ್ಣಾಯ ದೋಣಿಯಾ.
ವೀಸಂಹತ್ಥಸತುಬ್ಬೇಧಂ ಗನ್ಧದಾರೂಹಿ ಸಙ್ಖತಂ;
ಆರೋಪಯಿಂಸು ಚಿತಕಂ ಮಲ್ಲಾನಂ ಪಮುಖಾ ತದಾ.
ಮಹಾಕಸ್ಸಪಥೇರೇನ ಧಮ್ಮರಾಜೇ ಅವನ್ದಿತೇ;
ಚಿತಕಂ ಮಾ ಜಲಿತ್ಥಾತಿ ದೇವಧಿಟ್ಠಾನತೋ ಪನ.
೧೦೫. ¶
ಪಾಮೋಕ್ಖಾ ಮಲ್ಲರಾಜೂನಂ ವಾಯಮನ್ತೋಪ’ನೇಕಧಾ;
ಚಿತಕಂ ತಂ ನ ಸಕ್ಖಿಂಸು ಗಾಹಾಪೇತುಂ ಹುತಾಸನಂ.
ಮಹಾಕಸ್ಸಪಥೇರೇನ ಅಧಿಟ್ಠಾನೇನ ಅತ್ತನೋ;
ವತ್ಥಾದೀನಿ ಮಹಾದೋಣಿಂ ಚಿತಕಞ್ಚ ಮಹಾರಹಂ.
ದ್ವಿಧಾ ಕತ್ವಾನ ನಿಕ್ಖಮ್ಮ ಸಕಸೀಸೇ ಪತಿಟ್ಠಿತಾ;
ವನ್ದಿತಾ ಸತ್ಥುನೋ ಪಾದಾ ಯಥಾಟ್ಠಾನೇ ಪತಿಟ್ಠಿತಾ.
ತತೋ ದೇವಾನುಭಾವೇನ ಪಜ್ಜಲಿತ್ಥ ಚಿತಾನಲೋ;
ನ ಮಸಿ ಸತ್ಥುದೇಹಸ್ಸ ದಡ್ಢಸ್ಸಾಸಿ ನ ಛಾರಿಕಾ.
ಧಾತುಯೋ ಅವಸಿಸ್ಸಿಂಸು ಮುತ್ತಾಭಾ ಕಞ್ಚನಪ್ಪಭಾ;
ಅದಿಟ್ಠಾನೇನ ಬುದ್ಧಸ್ಸ ವಿಪ್ಪಕಿಣ್ಣಾ ಅನೇಕಧಾ.
೧೧೦. ¶
ಉಣ್ಹೀಸಂ ಅಕ್ಖಕಾ ದ್ವೇ ಚ ಚತಸ್ಸೋ ದನ್ತಧಾತುಯೋ;
ಇಚ್ಚೇತಾ ಧಾತುಯೋ ಸತ್ತ ವಿಪ್ಪಕಿಣ್ಣಾ ನ ಸತ್ಥುನೋ.
ಆಕಾಸತೋ ಪತಿತ್ವಾಪಿ ಉಗ್ಗನ್ತ್ವಾಪಿ ಮಹೀತಲಾ;
ಸಮನ್ತಾ ಜಲಧಾರಾಯೋ ನಿಬ್ಬಾಪೇಸುಂ ಚಿತಾನಲಂ.
ಥೇರಸ್ಸ ಸಾರಿಪುತ್ತಸ್ಸ ಅನ್ತೇವಾಸಿ ಮಹಿದ್ಧಿಕೋ;
ಸರಭುನಾಮಕೋ ಥೇರೋ ಪಭಿನ್ನ ಪಟಿಸಮ್ಭಿದೋ.
ಗೀವಾಧಾತುಂ ಗಹೇತ್ವಾನ ಚಿತತೋ ಮಹಿಯಙ್ಗಣೇ;
ಪತಿಟ್ಠಪೇತ್ವಾ ಥೂಪಮ್ಹಿ ಅಕಾ ಕಞ್ಚುಕಚೇತಿಯಂ.
ಖೇಮವ್ಹಯೋ ಕಾರುಣಿಕೋ ಖೀಣಸಂಯೋಜನೋ ಮುನಿ;
ಚಿತಕಾ ತೋ ತತೋ ವಾಮದಾಠಾಧಾತುಂ ಸಮಗ್ಗಹಿ.
ಅಟ್ಠನ್ನಮಥ ರಾಜುನಂ ಧಾತುಅತ್ಥಾಯ ಸತ್ಥುನೋ;
ಉಪ್ಪನ್ನಂ ವಿಗ್ಗಹಂ ದೋಣೋ ಸಮೇತ್ವಾನ ದ್ವಿಜುತ್ತಮೋ.
೧೧೬. ¶
ಕತ್ವಾನ ಅಟ್ಠ ಕೋಟ್ಠಾಸೇ ಭಾಜೇತ್ವಾ ಸೇಸಧಾತುಯೋ;
ಅದಾಸಿ ಅಟ್ಠರಾಜೂನಂ ತಂ ತಂ ನಗರವಾಸಿನಂ.
ಹಟ್ಠತುಟ್ಠಾ ಗಹೇತ್ವಾನ ಧಾತುಯೋ ತಾ ನರಾಧಿಪಾ;
ಗನ್ತ್ವಾ ಸಕೇ ಸಕೇ ರಟ್ಠೇ ಚೇತಿಯಾನಿ ಅಕಾರಯುಂ.
ಏಕಾ ದಾಠಾ ಸುರಿನ್ದೇನ ಏಕಾ ಗನ್ಧಾರವಾಸಿಹಿ;
ಏಕಾ ಭುಜಙ್ಗರಾಜೂಹಿ ಆಸಿ ಸಕ್ಕತಪೂಜಿತಾ.
ದನ್ತಧಾತುಂ ತತೋ ಖೇಮೋ ಅತ್ತನಾ ಗಹಿತಂ ಅದಾ;
ದನ್ತಪುರೇ ಕಲಿಙ್ಗಸ್ಸ ಬ್ರಹ್ಮದತ್ತಸ್ಸ ರಾಜಿನೋ.
ದೇಸಯಿತ್ವಾನ ಸೋ ಧಮ್ಮಂ ಭೇತ್ವಾ ಸಬ್ಬಾ ಕುದಿಟ್ಠಿಯೋ;
ರಾಜಾನಂ ತಂ ಪಸಾದೇಸಿ ಅಗ್ಗಮ್ಭೀ ರತನತ್ತಯೇ.
೧೨೧. ¶
ಅಜ್ಝೋಗಾಳ್ಹೋ ಮುನಿನ್ದಸ್ಸ ಧಮ್ಮಾಮತಮಹಣ್ಣವಂ;
ಸೋ ನರಿನ್ದೋಪವಾಹೇಸಿ ಮಲಂ ಮಚ್ಛರಿಯಾದಿಕಂ.
ಪಾವುಸ್ಸಕೋ ಯಥಾ ಮೇಘೋ ನಾನಾ ರತನವಸ್ಸತೋ;
ದಾಳಿದ್ದಿಯನಿದಾಘಂ ಸೋ ನಿಬ್ಬಾಪೇಸಿ ನರುತ್ತಮೋ.
ಸುವಣ್ಣಖಚಿತಾಲಮ್ಬ ಮುತ್ತಾಜಾಲೇಹಿ ಸೋಭಿತಂ;
ಕೂಟಾಗಾರಸತಾಕೀಣ್ಣಂ ತರುಣಾದಿಚ್ಚಸನ್ನಿಭಂ.
ನಾನಾರತನಸೋಭಾಯ ದುದಿಕ್ಖಂ ಚಕ್ಖುಮೂಸನಂ;
ಯಾನಂ ಸಗ್ಗಾಪವಗ್ಗಸ್ಸ ಪಸಾದಾತಿಸಯಾವಹಂ.
ಕಾರಯಿತ್ವಾನ ಸೋ ರಾಜಾ ದಾಠಾಧಾತುನಿವೇಸನಂ;
ಧಾತುಪೀಠಞ್ಚ ತತ್ಥೇವ ಕಾರೇತ್ವಾ ರತನುಜ್ಜಲಂ.
ತಹಿಂ ಸಮಪ್ಪಯಿತ್ವಾನ ದಾಠಾಧಾತುಂ ಮಹೇಸಿನೋ;
ಪೂಜಾವತ್ಥೂಹಿ ಪೂಜೇಸಿ ರತ್ತಿನ್ದಿವಮತನ್ದಿತೋ.
೧೨೭. ¶
ಇತಿ ಸೋ ಸಞ್ಚಿನಿತ್ವಾನ ಪುಞ್ಞಸಮ್ಭಾರ ಸಮ್ಪದಂ;
ಜಹಿತ್ವಾ ಮಾನುಸಂ ದೇಹಂ ಸಗ್ಗಕಾಯಮಲಙ್ಕರಿ.
ಅನುಜಾತೋ ತತೋ ತಸ್ಸ ಕಾಸಿರಾಜವ್ಹಯೋ ಸುತೋ;
ರಜ್ಜಂ ಲದ್ಧಾ ಅಮಚ್ಚಾನಂ ಸೋಕಸಲ್ಲಮಪಾನುದೀ.
ಪುಪ್ಫಗನ್ಧಾದಿನಾ ದನ್ತಧಾತುಂ ತಮಭಿಪೂಜಿಯ;
ನಿಚ್ಚಂ ಮಣಿಪ್ಪದೀಪೇಹಿ ಜೋತಯಿ ಧಾತುಮನ್ದಿರಂ.
ಇಚ್ಚೇವಮಾದಿಂ ಸೋ ರಾಜಾ ಕತ್ವಾ ಕುಸಲಸಞ್ಚಯಂ;
ಜಹಿತ್ವಾನ ನಿಜಂ ದೇಹಂ ದೇವಿನ್ದಪುರಮಜ್ಝಗಾ.
ಸುನನ್ದೋ ನಾಮ ರಾಜಿನ್ದೋ ಆನನ್ದಜನನೋ ಸತಂ;
ತಸ್ಸ’ತ್ರಜೋ ತತೋ ಆಸಿ ಬುದ್ಧಸಾಸನಮಾಮಕೋ.
ಸಮ್ಮಾನೇತ್ವಾನ ಸೋ ದನ್ತಧಾತುಂ ಞೇಯ್ಯನ್ತದಸ್ಸಿನೋ;
ಮಹತಾ ಭತ್ತಿಯೋಗೇನ ಅಗಾ ದೇವಸಹವ್ಯತಂ.
೧೩೩. ¶
ತತೋ ಪರಞ್ಚ ಅಞ್ಞೇ’ಪಿ ಬಹವೋ ವಸುಧಾಧಿಪಾ;
ದನ್ತಧಾತುಂ ಮುನಿನ್ದಸ್ಸ ಕಮೇನ ಅಭಿಪೂಜಯುಂ.
ಗುಹಸೀವವ್ಹಯೋ ರಾಜಾ ದುರತಿಕ್ಕಮ ಸಾಸನೋ;
ತತೋ ರಜ್ಜಸಿರಿಂ ಪತ್ವಾ ಅನುಗಣ್ಹಿ ಮಹಾಜನಂ.
ಸಪರತ್ಥಾನಭಿಞ್ಞೇ ಸೋ ಲಾಭಸಕ್ಕಾರಲೋಲುಪೇ;
ಮಾಯಾವಿನೋ ಅವಿಜ್ಜನ್ಧೇ ನಿಗನ್ಠೇ ಸಮುಪಟ್ಠಹಿ.
ವಸ್ಸಾರತ್ತೇ ಯಥಾ ಚನ್ದೋ ಮೋಹಕ್ಖನ್ಧೇನ ಆವಟೋ;
ನಾಸಕ್ಖೀ ಗುಣರಂಸೀಹಿ ಜಲಿತುಂ ಸೋ ನರಾಸಭೋ.
ಧಮ್ಮಮಗ್ಗಾ ಅಪೇತೇ’ಪಿ ಪವಿಟ್ಠೇ ದಿಟ್ಠಿಕಾನನಂ;
ತಸ್ಮಿಂ ಸಾಧುಪಥಂ ಅಞ್ಞೇ ನಾತಿವತ್ತಿಂಸು ಪಾಣಿನೋ
೧೩೮. ¶
ಹೇಮತೋರಣಮಾಲಾಹಿ ಧಜೇಹಿ ಕದಲಿಹಿ ಚ;
ಪುಪ್ಫಗಘಿಯೇಹಿ’ನೇಕೇಹಿ ಸಜ್ಜೇತ್ವಾ ನಾಗರಾ ಪುರಂ
ಮಙ್ಗಲತ್ಥುತಿ ಘೋಸೇಹಿ ನಚ್ಚಗೀತಾದಿಕೇಹಿ ಚ;
ಹೇಮರೂಪಿಯಪುಪ್ಫೇಹಿ ಗನ್ಧಚುಣ್ಣಾದಿಕೇಹಿ ಚ.
ಪೂಜೇನ್ತಾ ಮುನಿರಾಜಸ್ಸ ದಾಠಾಧಾತುಂ ಕುದಾಚನಂ;
ಅಕಂಸು ಏಕನಿಗ್ಘೋಸಂ ಸಂವಟ್ಟಮ್ಬುಧಿಸನ್ನಿಭಂ.
ಉಗ್ಘಾಟೇತ್ವಾ ನರಿನ್ದೋ ಸೋ ಪಾಸಾದೇ ಸಿಹಪಞ್ಜರಂ;
ಪಸ್ಸನ್ತೋ ಜನಮದ್ದಕ್ಖೀ ಪೂಜಾವಿಧಿಪರಾಯಣಂ.
ಅಥಾಮಚ್ಚಸಭಾಮಜೇತ್ಧ ರಾಜಾ ವಿಮ್ಭೀತ ಮಾನಸೋ;
ಕೋತುಹಲಾಕುಲೋ ಹುತ್ವಾ ಇದಂ ವಚನಮಬ್ರವೀ.
ಅಚ್ಛೇರಕಂ ಕಿಮೇತನ್ನು ಕೀದಿಸಂ ಪಾಟಿಹಾರಿಯಂ;
ಮಮೇತಂ ನಗರಂ ಕಸ್ಮಾ ಛಣನಿಸ್ಸಿತಕಂ ಇತಿ.
೧೪೪. ¶
ತತೋ ಅಮಚ್ಚೋ ಆಚಿಕ್ಖಿ ಮೇಧಾವೀ ಬುದ್ಧಮಾಮಕೋ;
ರಾಜಿನೋ ತಸ್ಸ ಸಮ್ಬುದ್ಧಾನುಭಾವಮವಿಜಾನತೋ.
ಸಬ್ಬಾಭಿಭುಸ್ಸಬುದ್ದಸ್ಸ ತನ್ಹಾಸಙ್ಕಯದಸ್ಸಿನೋ;
ಏಸಾ ಧಾತು ಮಹಾರಾಜ ಖೇಮತ್ಥೇರೇನ ಆಹಟಾ.
ತಂ ಧಾತುಂ ಪೂಜಯಿತ್ವಾನ ರಾಜಾನೋ ಪುಬ್ಬಕಾ ಇಧ;
ಕಲ್ಯಾಣಮಿತ್ತೇ ನಿಸ್ಸಾಯ ದೇವಕಾಯಮುಪಾಗಮುಂ.
ನಾಗರಾಪಿ ಇಮೇ ಸಬ್ಬೇ ಸಮ್ಪರಾಯ ಸುಕತ್ಥಿಕಾ;
ಪೂಜಯನ್ತಿ ಸಮಾಗಮ್ಮ ಧಾತುಂ ತಂ ಸತ್ಥುನೋ ಇತಿ.
ತಸ್ಸಾಮಚ್ಚಸ್ಸ ಸೋ ರಾಜಾ ಸುತ್ವಾ ಧಮ್ಮಂ ಸುಭಾಸಿತಂ;
ದುಲ್ಲದ್ಧೀಮಲಮುಜ್ಝಿತ್ವಾ ಪಸೀದಿ ರತನತ್ತಯೇ.
೧೪೯. ¶
ಧಾತುಪೂಜಂ ಕರೋನ್ತೋ ಸೋ ರಾಜಾ ಅಚ್ಛರಿಯಾ ವಹಂ;
ತಿತ್ಥಿಯೇ ದುಮ್ಮನೇ’ಕಾಸಿ ಸುಮನೇ ಚೇತರೇ ಜನೇ.
ಇಮೇ ಅಹಿರಿಕಾ ಸಬ್ಬೇ ಸದ್ಧಾದಿಗುಣವಜ್ಜಿತಾ;
ಥದ್ಧಾ ಸಠಾ ಚ ದುಪ್ಪಞ್ಞಾ ಸಗ್ಗಮೋಕ್ಖವಿಬನ್ಧಕಾ.
ಇತಿ ಸೋ ಚಿನ್ತಯಿತ್ವಾನ ಗುಹಸೀವೋ ನರಾಧಿಪೋ;
ಪಬ್ಬಾಜೇಸಿ ಸಕಾ ರಟ್ಠಾ ನಿಗಣ್ಠೇ ತೇ ಅಸೇಸಕೇ.
ತತೋ ನಿಗ್ಣ್ಠಾ ಸಬ್ಬೇ’ಪಿ ಘತಸಿತ್ತಾನಲಾ ಯಥಾ;
ಕೋಧಗ್ಗಿಜಲಿತಾ’ಗಞ್ಛುಂ ಪುರಂ ಪಾಟಲಿಪುತ್ತಕಂ.
ತತ್ಥ ರಾಜಾ ಮಹಾತೇಜೋ ಜಮ್ಬುದೀಪಸ್ಸ ಇಸ್ಸರೋ;
ಪಣ್ಡುನಾಮೋ ತದಾ ಆಸಿ ಅನನ್ತಬಲವಾಹಣೋ.
೧೫೪. ¶
ಕೋಧನ್ಧಾಥ ನಿಗಣ್ಠಾ ತೇ ಸಬ್ಬೇ ಪೇಸುಞ್ಞಕಾರಕಾ;
ಉಪಸಙ್ಕಮ್ಮ ರಾಜಾನಂ ಇದಂ ವಚನಮಬ್ರವೂಂ.
ಸಬ್ಬದೇವಮನುಸ್ಸೇಹಿ ವನ್ದನೀಯೇ ಮಹಿದ್ಧಿಕೇ;
ಸಿವಬ್ರಹ್ಮಾದಯೋ ದೇವೇ ನಿಚ್ಚಂ ತುಮ್ಹೇ ನಮಸ್ಸಥ.
ತುಯ್ಹಂ ಸಾಮನ್ತಭುಪಾಲೋ ಗುಹಸೀವೋ ಪನಾಧುನಾ;
ನಿನ್ದನ್ನೋ ತಾದಿಸೇ ದೇವೇ ಛವಟ್ಠಿಂ ವನ್ದತೇ ಇತಿ.
ಸುತ್ವಾನ ವಚನಂ ತೇಸಂ ರಾಜಾ ಕೋಧವಸಾನುಗೋ;
ಸೂರಂ ಸಾಮನ್ತಭೂಪಾಲಂ ಚಿತ್ತಯಾನಮಥ’ಬ್ರವೀ.
ಕಲಿಙ್ಗರಟ್ಠಂ ಗನ್ತ್ವಾನ ಗುಹಸೀವಮಿಧಾನಯ;
ಪೂಜಿತಂ ತಂ ಛವಟ್ಠಿಞ್ಚ ತೇನ ರತ್ತಿನ್ದಿವಂ ಇತಿ.
ಚಿತ್ತಯಾನೋ ತತೋ ರಾಜಾ ಮಹತಿಂ ಚತುರಙ್ಗಿನಿಂ;
ಸನ್ನಯಹಿತ್ವಾ ಸಕಂ ಸೇನಂ ಪುರಾ ತಮ್ಹಾಭಿನಿಕ್ಖಮಿ.
೧೬೦. ¶
ಗನ್ತ್ವಾನ ಸೋ ಮಹೀಪಾಲೋ ಸೇನಙ್ಗೇಹಿ ಪುರಕ್ಖತೋ;
ದನ್ತಪುರಸ್ಸಾವಿದೂರೇ ಖನ್ಧಾವಾರಂ ನಿವೇಸಯಿ.
ಸುತ್ವಾ ಆಗಮನಂ ತಸ್ಸ ಕಲಿಙ್ಗೋ ಸೋ ಮಹಿಪತಿ;
ಗಜಿನ್ದಪಾಭತಾದಿಹಿ ತಂ ತೋಸೇಸಿ ನರಾಧಿಪಂ.
ಹಿತಜ್ಝಾಸಯತಂ ಞತ್ವಾ ಗುಹಸೀವಸ್ಸ ರಾಜಿನೋ;
ದನ್ತಪುರಂ ಚಿತ್ತಯಾನೋ ಸದ್ಧಿಂ ಸೇನಾಯ ಪಾವಿಸಿ.
ಪಾಕಾರಗೋಪುರಟ್ಟಾಲಪಾಸಾದಗಘಿಕಚಿತ್ತಿತಂ;
ದಾನಸಾಲಾಹಿ ಸೋ ರಾಜಾ ಸಮಿದ್ಧಂ ಪುರಮದ್ದಸ.
ತತೋ ಸೋ ಸುಮನೋ ಗನ್ತ್ವಾ ಪವಿಟ್ಠೋ ರಾಜಮನ್ದಿರಂ;
ಗುಹಸೀವಸ್ಸ ಆಚಿಕ್ಖಿ ಪಣ್ಡುರಾಜಸ್ಸ ಸಾಸನಂ.
೧೬೫. ¶
ಸುತ್ವಾನ ಸಾಸನಂ ತಸ್ಸ ದಾರುಣಂ ದುರತಿಕ್ಕಮಂ;
ಪಸನ್ನಮುಖವಣ್ಣೋ’ವ ಚಿತ್ತಯಾನಂ ಸಮಬ್ರವೀ.
ಸಬ್ಬಲೋಕಹಿತತ್ಥಾಯ ಮಂಸನೇತ್ತಾದಿದಾನತೋ;
ಅನಪ್ಪಕಪ್ಪೇ ಸಮ್ಭಾರೇ ಸಮ್ಭರಿತ್ವಾ ಅತನ್ದಿತೋ.
ಜೇತ್ವಾ ನಮುಚಿನೋ ಸೇನಂ ಪತ್ವಾ ಸಬ್ಬಾಸವಕ್ಖಯಂ;
ಅನಾವರಣಞಾಣೇನ ಸಬ್ಬಧಮ್ಮೇಸು ಪಾರಗು.
ದಿಟ್ಠಧಮ್ಮಸುಕಸ್ಸಾದಂ ಅಗಣೇತ್ವಾನ ಅತ್ತನೋ;
ಧಮ್ಮನಾವಾಯ ತಾರೇಸಿ ಜನತಂ ಯೋ ಭವಣ್ಣವಾ.
ದೇವಾತಿದೇವಂ ತಂ ಬುದ್ಧಂ ಸರಣಂ ಸಬ್ಬಪಾಣಿನಂ;
ಜನೋ ಹಿ ಅವಜಾನನ್ತೋ ಅದ್ಧಾ ಸೋ ವಞ್ಚಿತೋ ಇತಿ.
೧೭೦. ¶
ಇಚ್ಚೇವಮಾದಿಂ ಸುತ್ವಾನ ಸೋ ರಾಜಾ ಸತ್ಥುವಣ್ಣನಂ;
ಆನನ್ದಸ್ಸುಪ್ಪಬನ್ಧೇಹಿ ಪವೇದೇಸಿ ಪಸನ್ನತಂ.
ಗುಹಸೀವೋ ಪಸನ್ನಂ ತಂ ಚಿತ್ತಯಾನಂ ಉದಿಕ್ಖಿಯ;
ತೇನ ಸದ್ಧಿಂ ಮಹಗ್ಘಂ ತಂ ಅಗಮಾ ಧಾತುಮನ್ದಿರಂ.
ಹರಿಚನ್ದನಸಮ್ಭುತಂ ದ್ವಾರಬಾಹಾದಿಕೇಹಿ ಚ;
ಪವಾಳವಾಳಮಾಲಾಹಿ ಲಮ್ಬಮುತ್ತಾಲತಾಹಿ ಚ.
ಇನ್ದನೀಲಕವಾಟೇಹಿ ಮಣಿಕಿಙ್ಕಿಣಿಕಾಹಿ ಚ;
ಸೋವಣ್ಣಕಣ್ಣಮಾಲಾಹಿ ಸೋಭಿತಂ ಮಣಿಥೂಪಿಕಂ.
ಉಚ್ಚಂ ವೇಲುರಿಯುಬ್ಭಾಸಿ ಛದನಂ ಮಕರಾಕುಲಂ;
ಧಾತುಮನ್ದಿರಮದ್ದಕ್ಖಿ ರತನುಜ್ಜಲ ಪೀಠಕಂ.
ತತೋ ಸೇತಾತಪತ್ತಸ್ಸ ಹೇಟ್ಠಾ ರತನಚಿತ್ತಿತಂ;
ದಿಸ್ವಾ ಧಾತುಕರನ್ಡಞ್ಚ ತುಟ್ಠೋ ವಿಮ್ಭಯಮಜ್ಝಗಾ.
೧೭೬. ¶
ತತೋ ಕಲಿಙ್ಗನಾಥೋ ಸೋ ವಿವರಿತ್ವಾ ಕರಣ್ಡಕಂ;
ಮಹೀತಲೇ ನಿಹನ್ತ್ವಾನ ದಕ್ಖಿಣಂ ಜಾನುಮಣ್ಡಲಂ.
ಅಞ್ಜಲಿಂ ಪಗ್ಗಹೇತ್ವಾನ ಗುಣೇ ದಸಬಲಾದಿಕೇ;
ಸರಿತ್ವಾ ಬುದ್ಧಸೇಟ್ಠಸ್ಸ ಅಕಾಸಿ ಅಭಿಯಾಚನಂ.
ಗಣ್ಡಮ್ಬರುಕ್ಖಮೂಲಮ್ಹಿ ತಯಾ ತಿತ್ಥೀಯಮದ್ದನೇ;
ಯಮಕಂ ದಸ್ಸಯನ್ತೇನ ಪಾಟಿಹಾರಿಯಮಬ್ಭುತಂ.
ಪುಬ್ಬಕಾಯಾದಿನಿಕ್ಖನ್ತಜಲಾನಲಸಮಾಕುಲಂ;
ಚಕ್ಕವಾಳಙ್ಗಣಂ ಕತ್ವಾ ಜನಾ ಸಬ್ಬೇ ಪಸಾದಿತಾ.
ದೇಸೇತ್ವಾನ ತಯೋ ಮಾಸೇ ಅಭಿಧಮ್ಮಂ ಸುಧಾಸಿನಂ;
ನಗರಂ ಓತರನ್ತೇನ ಸಙ್ಕಸ್ಸಂ ತಾವತಿಂಸತೋ.
೧೮೧. ¶
ಛತ್ತವಾಮರಸಙ್ಖಾದಿಗಾಹಕೇಹಿ ಅನೇಕಧಾ;
ಬ್ರಹ್ಮದೇವಾಸುರಾದೀಹಿ ಪೂಜಿತೇನ ತಯಾ ಪನ.
ಠತ್ವಾನ ಮಣಿಸೋಪಾಣೇ ವಿಸ್ಸಕಮ್ಮಾಭಿನಿಮ್ಮಿತೇ;
ಲೋಕವಿವರಣಂ ನಾಮ ದಸ್ಸಿತಂ ಪಾಟಿಹಾರಿಯಂ.
ತಥಾನೇಕೇಸು ಠಾನೇಸು ಮುನಿರಾಜ ತಯಾಪುನ;
ಬಹೂನಿ ಪಾಟಿಹಿರಾನಿ ದಸ್ಸಿತಾನಿ ಸಯಮ್ಭುನಾ.
ಪಾಟಿಹಾರಿಯಮಜ್ಜಾಪಿ ಸಗ್ಗಮೋಕ್ಖಸುಖಾವಹಂ;
ಪಸ್ಸನ್ತಾನಂ ಮನುಸ್ಸಾನಂ ದಸ್ಸನೀಯಂ ತಯಾ ಇತಿ.
೧೮೫. ¶
ಅಬ್ಭುಗ್ಗನ್ತ್ವಾ ಗಗಣ ಕುಹರಂ ಚನ್ದಲೇಖಾಭಿರಾಮಾ,
ವಿಸ್ಸಜ್ಜೇನ್ತಿ ರಜತ ಧವಲಾ ರಂಸಿಯೋ ದನ್ತಧಾತು;
ಧೂಪಾಯನ್ತಿ ಸಪದಿ ಬಹುಧಾ ಪಜ್ಜಲನ್ತೀ ಮುಹುತ್ತಂ,
ನಿಬ್ಬಾಯನ್ತೀ ನಯನಸುಭಗಂ ಪಾಟಿಹೀರಂ ಅಕಾಸಿ.
ಅಚ್ಛೇರಂ ತಂ ಪರಮ ರುಚಿರಂ ಚಿತ್ತಯಾನೋ ನರಿನ್ದೋ,
ದಿಸ್ವಾ ಹಟ್ಠೋ ಚಿರಪರಿಚಿತಂ ದಿಟ್ಠಿಜಾಲಂ ಜಹಿತ್ವಾ;
ಗನ್ತ್ವಾ ಬುದ್ಧಂ ಸರಣಮಸಮಂ ಸಬ್ಬಸೇಣೀಹಿ ಸದ್ಧಿಂ,
ಅಗ್ಗಂ ಪುಞ್ಞಂ ಪಸವಿ ಬಹುಧಾ ಧಾತುಸಮ್ಮಾನನಾಯ.
ದುತಿಯೋ ಪರಿಚ್ಛೇದೋ
೧೮೭. ¶
ತತೋ ಕಲಿಙ್ಗಾಧಿಪತಿಸ್ಸ ತಸ್ಸಸೋಚಿತ್ತಯಾನೋಪರಮಪ್ಪತೀತೋ;
ತಂ ಸಾಸನಂ ಪಣ್ಡುನರಾಧಿಪಸ್ಸ ಞಾಪೇಸಿ ಧೀರೋ ದುರತಿಕ್ಕಮಂ’ತಿ.
ರಾಜಾತತೋ ದನ್ತಪುರಂ ಧಜೇಹಿ ಪುಪ್ಫೇಹಿ ಧೂಪೇಹಿ ಚ ತೋರಣೇಹಿ;
ಅಲಙ್ಕರಿತ್ವಾನ ಮಹಾವಿತಾನ ನಿವಾರಿತಾದಿಚ್ಚಮರೀಚಿಜಾಲಂ.
ಅಸ್ಸುಪ್ಪಬನ್ಧಾವುತಲೋಚನೇಹಿ ಪುರಕ್ಖತೋ ನೇಗಮ ನಾಗರೇಹಿ;
ಸಮುಬ್ಬಹನ್ತೋ ಸಿರಸಾ ನಿಜೇನ ಮಹಾರಹಂ ಧಾತುಕರಣ್ಡಕಂ ತಂ.
ಸಮುಸ್ಸಿತೋದಾರ ಸಿತಾತಪತ್ತಂ ಸಙ್ಖೋದರೋದಾತ ತುರಙ್ಗಯುತ್ತಂ;
ರಥಂ ನವಾದಿಚ್ಚಸಮಾನವಣ್ಣ ಮಾರುಯ್ಹ ಚಿತ್ತತ್ಥರಣಾಭಿರಾಮಂ.
ಅನೇಕಸಙ್ಖೇಹಿ ಬಲೇಹಿ ಸದ್ಧಿಂ ವೇಲಾತಿವತ್ತಮ್ಬುಧಿಸನ್ನಿಭೇಹೀ;
ನಿವತ್ತಮಾನಸ್ಸ ಬಹುಜ್ಜನಸ್ಸ ವಿನಾಪಿ ದೇಹಂ ಮನಸಾನುಯಾತೋ
೧೯೨. ¶
ಸುಸನ್ಥತಂ ಸಬ್ಬಧಿವಾಲುಕಾಹಿ ಸುಸಜ್ಜಿತಂ ಪುಣ್ಣ ಘಟಾದಿಕೇಹಿ;
ಪುಪ್ಫಾಭಿಕಿಣ್ಣಂ ಪಟಿಪಜ್ಜಿ ದೀಘಂ ಸುವಿತ್ಥತಂ ಪಾಟಲಿಪುತ್ತಮಗ್ಗಂ.
ಕಲಿಙ್ಘನಾಥೋ ಕುಸುಮಾದಿಕೇಹಿ ನಚ್ಚೇಹಿ ಗೀತೇಹಿ ಚ ವಾದಿತೇಹಿ;
ದಿನೇ ದಿನೇ ಅದ್ಧನಿ ದನ್ತಧಾತುಂ ಪೂಜೇಸಿ ಸದ್ಧಿಂ ವನದೇವತಾಹಿ.
ಸುದುಗ್ಗಮಂ ಸಿನ್ಧುಮಹೀಧರೇಹಿ ಕಮೇನ ಮದ್ಧಾನಮತಿಕ್ಕಮಿತ್ವಾ;
ಆದಾಯ ಧಾತುಂ ಮನುಜಾಧಿನಾಥೋ ಅಗಾ ಪುರಂ ಪಾಟಲಿ ಪುತ್ತನಾಮಂ.
ರಾಜಾಧಿರಾಜೋ’ಥ ಸಭಾಯ ಮಜ್ಝೇ ದಿಸ್ವಾನ ತಂ ವೀತಭಯಂ ವಿಸಙ್ಕಂ;
ಕಲಿಙ್ಗರಾಜಂ ಪಟಿಘಾಭಿಭುತೋ ಅಭಾಸಿ ಪೇಸುಞ್ಞಕರೇ ನಿಗಣ್ಠೇ
ದೇವೇ ಜಹಿತ್ವಾನ ನಮಸ್ಸನೀಯೇ ಛವಟ್ಠಿಮೇತೇನ ನಮಸ್ಸಿತಂ’ತಂ;
ಅಙ್ಗಾರರಾಸಿಮ್ಹಿ ಸಜೋತಿಭೂತೇ ನಿಕ್ಖಿಪ್ಪ ಖಿಪ್ಪಂ ದಹಥಾಧುನೇತಿ.
೧೯೭. ¶
ಪಹಟ್ಠಚಿತ್ತಾ’ವತತೋ ನಿಗಣ್ಠಾರಾಜಙ್ಗಣೇ ತೇ ಮಹತಿಂ ಗಭೀರಂ;
ವೀತಚ್ಚಿಕಙ್ಗಾರಕ ರಾಸಿ ಪುಣ್ಣಂ ಅಙ್ಗಾರಕಾಸುಂ ಅಭಿಸಙ್ಖರಿಂಸು.
ಸಮನ್ತತೋ ಪಜ್ಜಲಿತಾಯ ತಾಯ ಸಜೋತಿಯಾ ರೋರುವಭೇರವಾಯ;
ಮೋಹನ್ಧಭುತಾ ಅಥ ತಿತ್ಥಿಯಾ ತೇ ತಂ ದನ್ತಧಾತುಂ ಅಭಿನಿಕ್ಖಿಪಿಂಸು.
ತಸ್ಸಾನುಭಾವೇನ ತಮಗ್ಗೀರಾಸಿಂ ಹೇತ್ವಾ ಸರೋಜಂ ರಥಚಕ್ಕಮತ್ತಂ;
ಸಮನ್ತತೋ ಉಗ್ಗತರೇಣುಜಾಲ ಮುಟ್ಠಾಸಿ ಕಿಞ್ಜಕ್ಖ ಭರಾಭಿರಾಮಂ.
ತಸ್ಮಿಂ ಖಣೇ ಪಙ್ಕಜ ಕಣ್ಣಿಕಾಯ ಪತಿಟ್ಠಹಿತ್ವಾ ಜಿನದನ್ತಧಾತು;
ಕುನ್ದಾವದಾತಾಹಿ ಪಭಾಹಿ ಸಬ್ಬಾ ದಿಸಾ ಪಭಾಸೇಸಿ ಪಭಸ್ಸರಾಹಿ.
೨೦೧. ¶
ದಿಸ್ವಾನ ತಂ ಅಚ್ಛರಿಯಂ ಮನುಸ್ಸಾ ಪಸನ್ನಚಿತ್ತಾ ರತನಾದಿಕೇಹಿ;
ಸಮ್ಪೂಜಯಿತ್ವಾ ಜಿನದನ್ತಧಾತುಂ ಸಕಂ ಸಕಂ ದಿಟ್ಠಿಮವೋಸ್ಸಜಿಂಸು.
ಸೋ ಪಣ್ಡುರಾಜಾ ಪನ ದಿಟ್ಠಿಜಾಲಂ ಚಿರಾನುಬದ್ಧಂ ಅಪರಿಚ್ಚಜನ್ತೋ;
ಪತಿಟ್ಠಪೇತ್ವಾ’ಧಿಕರಞ್ಞಮೇತಂ ಕುಟೇನ ಘಾತಾಪಯಿ ದನ್ತಧಾತುಂ.
ತಸ್ಸಂ ನಿಮುಗ್ಗಾ’ಧಿಕರಞ್ಞಮೇಸಾ ಉಪಡ್ಢಭಾಗೇ ನಚ ದಿಸ್ಸಮಾನಾ;
ಪುಬ್ಬಾಚಲಟ್ಠೋ’ವ ಸುಧಾಮರೀಚಿ ಜೋತೇಸಿ ರಂಸೀಹಿ ದಿಸಾ ಸಮನ್ತಾ.
ದಿಸ್ವಾನುಭಾವಂ ಜಿನದನ್ತಧಾತು ಯಾಪಜ್ಜಿ ಸೋ ವಿಮ್ಭಯ ಮಗ್ಗರಾಜಾ;
ಏಕೋ’ಥ ಇಸ್ಸಾಪಸುತೋ ನಿಗಣ್ಠೋ ತಂ ರಾಜರಾಜಾನಮಿದಂ ಅವೋಚ.
ರಾಮಾದಯೋ ದೇವ ಜನದ್ದನಸ್ಸ ನಾನಾವತಾರಾ ಭುವನೇ ಅಹೇಸುಂ;
ತಸ್ಸೇಕದೇಸೋ’ಚ ಇದಂ ಛವಟ್ಠಿನೋಚೇ’ನುಭಾವೋಕಥಮೀದಿಸೋತಿ.
೨೦೬. ¶
ಅದ್ಧಾ ಮನುಸ್ಸತ್ತಮುಪಾಗತಸ್ಸ ದೇವಸ್ಸ ಪಚ್ಛಾ ತಿದಿವಂ ಗತಸ್ಸ;
ದೇಹೇಕದೇಸೋ ಠಪಿತೋ ಹಿತತ್ಥಮೇತನ್ತಿ ಸಚ್ಚಂವಚನಂಭವೇಯ್ಯ.
ಸಂವಣ್ಣಯಿತ್ವಾನ ಗುಣೇ ಪಹೂತೇ ನಾರಾಯಣಸ್ಸ’ಸ್ಸಮಹಿದ್ಧಿಕಸ್ಸ;
ನಿಮುಗ್ಗಮೇತ್ತಾ’ಧಿಕರಞ್ಞಮೇತಂಸಮ್ಪಸ್ಸತೋ ಮೇಬಹಿನೀಹರಿತ್ವಾ.
ಸಮ್ಪಾದಯಿತ್ವಾನ ಮಹಾಜನಾನಂ ಮುಖಾನಿ ಪಙ್ಕೇರುಹಸುನ್ದರಾನಿ;
ಯಟಿಚ್ಛಿತಂ ಗಣ್ಹಥ ವತ್ಥುಜಾತಂ ಇಚ್ಚಾಹ ರಾಜಾ ಮುಖರೇ ನಿಗಣ್ಠೇ.
ತೇ ತಿತ್ಥಿಯಾ ವಿಣಹುಸುರಂ ಗುಣೇಹಿ ವಿಚಿತ್ತ ರೂಪೇಹಿ ಅಭಿತ್ಥವಿತ್ವಾ;
ತೋಯೇನ ಸಿಞ್ಚಿಂಸು ಸಠಾ ತಥಾಪಿ ಠಿತಪ್ಪದೇಸಾ ನ ಚಲಿತ್ಥ ಧಾತು.
ಜಿಗುಚ್ಛಮಾನೋ ಅಥ ತೇ ನಿಗಣ್ಠೇ ಸೋ ಧಾತುಯಾನೀಹರಣೇ ಉಪಾಯಂ;
ಅನ್ವೇಸಮಾನೋ ವಸುಧಾಧಿನಾಥೋ ಭೇರಿಂ ಚರಾಪೇಸಿ ಸಕೇ ಪುರಮ್ಹಿ.
೨೧೧. ¶
ನಿಮುಗ್ಗಮೇತ್ಥಾ’ಧಿಕರಞ್ಞಮಜ್ಜಿ ಯೋ ಧಾತುಮೇತಂ ಬಹಿ ನೀಹರೇಯ್ಯ;
ಲದ್ಧಾನ ಸೋ ಇಸ್ಸರಿಯಂ ಮಹನ್ತಂ ರಞ್ಞೋಸಕಾಸಾಸುಖಮೇಸ್ಸತೀತಿ
ಸುತ್ವಾ ನ ತಂ ಭೇರಿರವಂಉಳಾರಂಪುಞಞ್ಞತ್ಥಿಕೋಬುದ್ಧಬಲೇಪಸನ್ನೋ;
ತಸ್ಮಿಂ ಪುರೇ ಸೇಟ್ಠಿಸುತೋ ಸುಭದ್ದೋ ಪಾವೇಕ್ಖಿರಞ್ಞೋ ಸಮಿತಿಂ ಪಗಬ್ಭೋ.
ತಮಗ್ಗರಾಜಂ ಅಥ ಸೋ ನಮಿತ್ವಾ ಸಾಮಾಜಿಕಾನಂ ಹದಯಙ್ಗಮಾಯ;
ಭಾಸಾಯ ಸಬ್ಬಞ್ಞುಗುಣಪ್ಪಭಾವಂ ವಣ್ಣೇಸಿ ಸಾರಜ್ಜವಿಮುತ್ತ ಚಿತ್ತೋ.
ಭುಮಿಂ ಕಿಣಿತ್ವಾ ಮಹತಾ ಧನೇನ ಮನೋರಮಂ ಜೇತವನಂ ವಿಹಾರಂ;
ಯೋ ಕಾರಯಿತ್ವಾನ ಜಿನಸ್ಸ ದತ್ವಾ ಉಪಟ್ಠಹಿ ತಂ ಚತುಪಚ್ಚಯೇಹಿ.
೨೧೫. ¶
ಅನಾಥಪಿಣ್ಡಿಪ್ಪದಸೇಟ್ಠಿಸೇಟ್ಠೋಸೋದಿಟ್ಠಧಮ್ಮೋಪಪಿತಾಮಹೋಮೇ;
ತಿಲೋಕನಾಥೇ ಮಮ ಧಮ್ಮರಾಜೇ ತುಮ್ಹೇ’ಧುನಾಪಸ್ಸಥಭತ್ತಿಭಾರಂ.
ಇತ್ಥಂ ನದಿತ್ವಾನ ಪಹೂತಪಞೇಞ್ಞಾ ಕತ್ವಾನ ಏಕಂಸಮಥುತ್ತರೀಯಂ;
ಮಹೀತಲಂ ದಕ್ಖಿಣಜಾನುಕೇನ ಆಹಚ್ಚ ಬದ್ಧಞ್ಜಲಿಕೋ ಅವೋಚ.
ಛದ್ದನ್ತನಾಗೋ ಸವಿಸೇನ ವಿದ್ಧೋ ಸಲ್ಲೇನ ಯೋ ಲೋಹಿತಮಕ್ಖಿ ತಙ್ಗೋ;
ಛಬ್ಬಣ್ಣರಂಸೀಹಿ ಸಮುಜ್ಜಲನ್ತೇ ಛೇತ್ವಾನ ಲುದ್ದಾಯ ಅದಾಸಿ ದನ್ತೇ.
ಸಸೋ’ಪಿ ಹುತ್ವಾನ ವಿಸುದ್ಧಸೀಲೋ ಅಜ್ಝತ್ತದಾನಾಭಿರತೋ ದ್ವಿಜಾಯ;
ಯೋ’ದಜ್ಜಿದೇಹಮ್ಪಿ ಸಕಂ ನಿಪಚ್ಚ ಅಙ್ಗಾರರಾಸಿಮ್ಹಿ ಬುಭುಕ್ಖಿತಾಯ.
೨೧೯. ¶
ಯೋ ಬೋಧಿಯಾ ಬಾಹಿರವತ್ಥುದಾನಾ ಅತಿತ್ತರೂಪೋ ಸಿವಿರಾಜ ಸೇಟ್ಠೋ;
ಅದಾಸಿ ಚಕ್ಖೂನಿ ಪಭಸ್ಸರಾನಿ ದ್ವಿಜಾಯ ಜಿಣ್ಣಾಯ ಅಚಕ್ಖುಕಾಯ.
ಯೋಖನ್ತಿವಾದೀ’ಪಿ ಕಲಾಬುರಾಜೇ ಛೇದಾಪಯನ್ತೇ’ಪಿ ಸಹತ್ಥಪಾದಂ;
ಪರಿಪ್ಲುತಙ್ಗೋರುಧಿರೇ ತಿತಿಕ್ಖಿಮೇತ್ತಾಯಮಾನೋ ಯಸದಾಯಕೇ’ವ.
ಯೋ ಧಮ್ಮಪಾಲೋ ಅಪಿ ಸತ್ತಮಾಸ ಜಾತೋಪದುಟ್ಠೇ ಜನಕೇಸಕಮ್ಹಿ;
ಕಾರಾಪಯನ್ತೇ ಅಸಿಮಾಲಕಮ್ಮಂ ಚಿತ್ತಂ ನ ದೂಸೇಸಿ ಪತಾಪರಾಜೇ.
ಸಾಖಾಮಿಗೋ ಯೋ ಅಸತಾ ಪುಮೇನ ವನೇ ಪಪಾತಾ ಸಯಮುದ್ಧಟೇನ;
ಸಿಲಾಯ ಭಿನ್ನೇ’ಪಿ ಸಕೇ ಲಲಾಟೇ ತಂ ಖೇಮಭುಮಿಂ ಅನಯಿತ್ಥಮೂಳ್ಹಂ.
ರುಟ್ಠೇನ ಮಾರೇನ’ಭಿನಿಮ್ಮಿತಮ್ಪಿ ಅಙ್ಗಾರಕಾಸುಂ ಜಲಿತಂ ವಿಹಿಜ್ಜ;
ಸಮುಟ್ಠಿತೇ ಸಜ್ಜುಮಹಾರವಿನ್ದೇ ಠತ್ವಾನ ಯೋ ಸೇಟ್ಠಿ ಅದಾಸಿ ದಾನಂ.
೨೨೪. ¶
ಮಿಗೇನ ಯೇನಾಪೇವಿಜಞ್ಞಮೇಕಂ ಭೀತಂವಧಾಮೋಚಯಿತುಂಕುರಙ್ಗಿಂ;
ಆಘಾತನೇ ಅತ್ತಸಿರಂಠಪೇತ್ವಾಪಮೋಚಿತಾ’ಞ್ಞ್ಞಪಿಪಾಣಿಸಙ್ಘಾ.
ಯೋ ಸತ್ತವಸ್ಸೋ ವಿಸಿಖಾಯ ಪಂಸು ಕೀಳಾಪರೋ ಸಮ್ಭವನಾಮಕೋ’ಪಿ;
ಸಬ್ಬಞ್ಞುಲೀಳ್ಹಾಯ ನಿಗುಳ್ಹಪಞ್ಹಂ ಪುಟ್ಠೋ ವಿಯಾಕಾಸಿ ಸುಚೀರತೇನ.
ಹಿತ್ವಾ ನಿಕನ್ತಿಂ ಸಕಜೀವಿತೇ’ಪಿ ಬದ್ಧಾಸಕುಚ್ಛಿಮ್ಹಿ ಚ ವೇತ್ತವಲ್ಲಿಂ;
ಸಾಖಾಮಿಗೇ ನೇಕಸಹಸ್ಸಸಙ್ಖೇ ವಧಾಪಮೋಚೇಸಿ ಕಪಿಸ್ಸರೋಯೋ.
ಸನ್ತಪ್ಪಯಂ ಧಮ್ಮಸುಧಾರಸೇನ ಯೋ ಮಾನುಸೇ ತುಣ್ಡಿಲಸೂಕರೋ’ಪಿ;
ಇಸೀ’ವ ಕತ್ವಾ ಅಥ ಞಾಯಗನ್ಥಂ ನಿಜಂ ಪವತ್ತೇಸಿ ಚಿರಾಯ ಧಮ್ಮಂ.
೨೨೮. ¶
ಪಚ್ಚತ್ಥಿಕಂ ಪುಣ್ಣಕಯಕ್ಖಮುಗ್ಗಂ ಮಹಿದ್ಧಿಕಂ ಕಾಮಗುಣೇಸು ಗಿದ್ಧಂ;
ಯೋ ತಿಕ್ಖಪಞ್ಞೋವಿಧುರಾಭಿಧಾನೋದಮೇಸಿ ಕಾಳಾಗಿರಿಮತ್ತಕಮ್ಹಿ.
ಕುಲಾವಸಾಯಿ ಅವಿರೂಳ್ಹಪಕ್ಖೋ ಯೋ ಬುದ್ಧಿಮಾ ವಟ್ಟಕಪೋತಕೋ’ಪಿ;
ಸಚ್ಚೇನ ದಾವಗ್ಗಿಮಭಿಜ್ಜಲನ್ತಂ ವಸ್ಸೇನ ನಿಬ್ಬಾಪಯಿ ವಾರಿದೋ’ವ.
ಯೋ ಮಚ್ಛರಾಜಾಪಿ ಅವುಟ್ಠಿಕಾಲೇದಿಸ್ವಾನಮಚ್ಛೇ ತಸಿತೇಕಿಲನ್ತೇ;
ಸಚ್ಚೇನವಾಕ್ಯೇನಮಹೋಘಪುಣ್ಣಂಮುಹುತ್ತಮತ್ತೇನಅಕಾಸಿರಟ್ಠಂ.
ವಿಚಿತ್ತಹತ್ಥಸ್ಸ ರಥಾದಿಕಾನಿ ವಸುನ್ಧರಾ ಕಮ್ಪನ ಕಾರಣಾನಿ;
ಪುತ್ತೇ’ನುಜಾತೇ ಸದಿಸೇಚದಾರೇಯೋ’ದಜ್ಜಿವೇಸ್ಸನ್ತರಜಾತಿಯಮ್ಪಿ.
೨೩೨. ¶
ಬುದ್ಧೋ ಭವಿತ್ವಾ ಅಪಿ ದಿಟ್ಠಧಮ್ಮ ಸುಖಾನಪೇಕ್ಖೋ ಕರುಣಾನುವತ್ತೀ;
ಸಬ್ಬಂ ಸಹನ್ತೋ ಅವಮಾನನಾದಿಂ ಯೋದುಕ್ಕರಂ ಲೋಕಹಿತಂಅಕಾಸಿ.
ಬಲೇನ ಸದ್ಧಿಂ ಚತುರಙ್ಗಿಕೇನ ಅಭಿದ್ದವನ್ತಂ ಅತಿಭಿಂಸನೇನ;
ಅಜೇಯ್ಯಸತ್ಥಂ ಪರಮಿದ್ಧಿಪತ್ತಂ ದಮೇಸಿ ಯೋ ಆಲವಕಮ್ಪೀ ಯಕ್ಖಂ.
ದೇಹಾಭಿನಿಕ್ಖನ್ತ ಹುತಾಸನಚ್ಚಿ ಮಾಲಾಕುಲಂ ಬ್ರಹ್ಮಭವಂ ಕರಿತ್ವಾ;
ಭೇತ್ವಾನ ದಿಟ್ಠಿಂ ಸುಚಿರಾನುಬದ್ಧಂ ದಮೇಸಿ ಯೋ ಬ್ರಹ್ಮವರಂ ಮುನಿನ್ದೋ.
ಅಚ್ಚಙ್ಕುಸಂ ದಾನಸುಧೋತ ಗಣ್ಡಂ ನಿಪಾತಿತಟ್ಠಾಲಕ ಗೋಪುರಾದಿಂ;
ಧಾವನ್ತಮಗ್ಗೇ ಧನಪಾಲಹತ್ಥಿಂ ದಮೇಸಿ ಯೋ ದಾರುಣಮನ್ತಕಂ’ವ.
೨೩೬. ¶
ಮನುಸ್ಸರತ್ತಾರುಣಪಾಣಿಪಾದಮುಕ್ಖಿಪ್ಪ ಖಗ್ಗಂ ಅನುಬನ್ಧಮಾನಂ;
ಮಹಾದಯೋ ದುಪ್ಪಸಹಂ ಪರೇಹಿ ದಮೇಸಿ ಯೋ ಅಙ್ಗುಲಿಮಾಲಚೋರಂ.
ಯೋ ಧಮ್ಮರಾಜಾ ವಿಜಿತಾರಿಸಙ್ಘೋ ಪವತ್ತಯನ್ತೋ ವರಧಮ್ಮಚಕ್ಕಂ;
ಸದ್ಧಮ್ಮ ಸಞ್ಞಂ ರತನಾಕರಞ್ಚ ಓಗಾಹಯೀ ಸಂ ಪರಿಸಂ ಸಮಗ್ಗಂ.
ತಸ್ಸೇವ ಸದ್ಧಮ್ಮ ವರಾಧಿಪಸ್ಸತಥಾಗತಸ್ಸ’ಪ್ಪಟಿಪುಗ್ಗಲಸ್ಸ;
ಅನನ್ತಞಾಣಸ್ಸ ವಿಸಾರದಸ್ಸ ಏಸಾ ಮಹಾಕಾರುಣಿಕಸ್ಸ ಧಾತು.
ಅನೇನ ಸಚ್ಚೇನ ಜಿನಸ್ಸ ಧಾತು ಖಿಪ್ಪಂ ಸಮಾರುಯ್ಹ ನಭನ್ತರಾಳಂ;
ಸುಧಂಸುಲೇಖೇವ ಸಮುಜ್ಜಲನ್ತಿ ಕಙ್ಖಂ ವಿನೋದೇತು ಮಹಾಜನಸ್ಸ.
೨೪೦. ¶
ತಸ್ಮಿಂ ಖಣೇ ಸಾ ಜಿನದನ್ತಧಾತು ನಭಂ ಸಮುಗ್ಗಮ್ಮ ಪಭಾಸಯನ್ತೀ;
ಸಬ್ಬಾ ದಿಸಾ ಓಸಧಿತಾರಕಾ’ವ ಜನಂ ಪಸಾದೇಸಿ ವ್ತಿಣ್ಣಕಙ್ಖಂ.
ಅಥೋತರಿತ್ವಾ ಗಗನಙ್ಗಣಮ್ಹಾ ಸಾ ಮತ್ಥಕೇ ಸೇಟ್ಠಿಸುತಸ್ಸ ತಸ್ಸ;
ಪತಿಟ್ಠಹಿತ್ವಾನ ಸುಧಾಭಿಸಿತ್ತಗತ್ತಂ’ವ ತಂ ಪೀಣಯಿ ಭತ್ತಿತಿನ್ನಂ.
ದಸ್ವಾನ ತಂ ಅಚ್ಛರಿಯಂ ನಿಗಣ್ಠಾ ಇಚ್ಚಬ್ರವುಂ ಪಣ್ಡುನರಾಧಿಪಂ ತಂ;
ವಿಜ್ಜಾಬಲಂ ಸೇಟ್ಠಿಸುತಸ್ಸ ಏತಂ ನ ಧಾತುಯಾ ದೇವ ಅಯಮ್ಪಭಾವೋ.
ನಿಸಮ್ಮ ತೇಸಂ ವಚನಂ ನರಿನ್ದೋ ಇಚ್ಚಬ್ರವೀ ಸೇಟ್ಠಿಸುತಂ ಸುಭದ್ದಂ;
ಯಥಾ ಚ ಏತೇ ಅಭಿಸದ್ದಹೇಯ್ಯುಂ ತಥಾವಿಧಂ ದಸ್ಸಯ ಇದ್ಧಿಮಞ್ಞಂ.
ತತೋ ಸುಭದ್ದೋ ತಪನೀಯಪತ್ತೇ ಸುಗನ್ಧಿಸೀತೋದಕಪೂರಿತಮ್ಹಿ;
ವಡ್ಢೇಸಿ ಧಾತುಂ ಮುನಿಪುಙ್ಗವಸ್ಸ ಅನುಸ್ಸರನ್ತೋ ಚರಿತಬ್ಭುತಾನಿ.
೨೪೫. ¶
ಸಾ ರಾಜಹಂ ಸೀ’ವ ವಿಧಾವಮಾನಾ ಸುಗನ್ಧಿತೋಯಮ್ಹಿ ಪದಕ್ಖಿಣೇನ;
ಉಮ್ಮುಜ್ಜಮಾನಾ ಚ ನಿಮುಜ್ಜಮಾನಾ ಜನೇ ಪಮೋದಸ್ಸುಧರೇ ಅಕಾಸಿ.
ತತೋ ಚ ಕಾಸುಂ ವಿಸಿಖಾಯಮಜ್ಝೇ ಕತ್ವಾ ತಹಿಂ ಧಾತುಮಭಿಕ್ಖಿಪಿತ್ವಾ;
ಪಂಸೂಹಿ ಸಮ್ಮಾ ಅಭಿಪೂರಯಿತ್ವಾ ಬಹೂಹಿ ಮದ್ದಾಪಯಿ ಕುಞ್ಜರೇಹಿ.
ಭೇತ್ವಾ ಮಹಿಂಉಟ್ಠಹಿ ಚಕ್ಕಮತ್ತಂ ವಿರಾಜಮಾನಂ ಮಣಿಕಣ್ಣಿಕಾಯ;
ಪಭಸ್ಸರಂ ರೂಪಿಯಕೇಸರೇಹಿ ಸರೋರುಹಂ ಕಞ್ಚನಪತ್ತಪಾಳಿಂ.
ಪತಿಟ್ಠಭಿತ್ವಾನ ತಹಿಂ ಸರೋಜೇ ಮನ್ದಾನಿಲಾವತ್ತಿತರೇಣು ಜಾಲೇ;
ಓಭಾಸಯನ್ತಿ’ವ ದಿಸಾ ಪಭಾಹಿ ದಿಟ್ಠಾ ಮುಹುತ್ತೇನ ಜಿನಸ್ಸಧಾತು.
ಖಿಪಿಂಸು ವತ್ಥಾಭರಣಾನಿ ಮಚ್ಚಾ ಪವಸ್ಸಯುಂ ಪುಪ್ಫಮಯಞ್ಚ ವಸ್ಸಂ;
ಉಕ್ಕುಟ್ಠಿಸದ್ದೇಹಿ ಚ ಸಧುಕಾರನಾದೇಹಿ ಪುಣ್ಣಂ ನಗರಂ ಅಕಂಸು.
೨೫೦. ¶
ತೇ ತಿತ್ಥಿಯಾ ತಂ ಅಭಿವಞ್ಚನಂ’ತಿ ರಾಜಾಧಿರಾಜಂ ಅಥ ಸಞ್ಞಪೇತ್ವಾ;
ಜಿಗುಚ್ಛನೀಯೇ ಕುಣಪಾದಿಕೇಹಿ ಖಿಪಿಂಸು ಧಾತುಂ ಪರಿಖಾಯ ಪಿಟ್ಠೇ.
ತಸ್ಮಿಂ ಖಣೇ ಪಞ್ಚವಿಧಮ್ಬುಜೇಹಿಸಞ್ಛಾದಿತಾಹಂಸಗಣೋಪಭುತ್ತಾ;
ಮಧುಬ್ಬತಾಲೀ ವಿರುತಾಭಿರಾಮಾ ಅಹೋಸಿ ಸಾ ಪೋಕ್ಖರಣೀ’ವ ನನ್ದಾ.
ಗಜಾಧಿಪಾ ಕೋಞ್ಞ್ಚರವಂ ರವಿಂಸು ಕರಿಂಸು ಹೇಸಾನಿನದಂ ತುರಙ್ಗಾ;
ಉಕ್ಕುಟ್ಠಿನಾದಂ ಅಕರಿಂಸು ಮಚ್ಚಾ ಸುವಾದಿತಾ ದುನ್ದುಭಿಆದಯೋ’ಪಿ.
ಥೋಮಿಂಸು ಮಚ್ಚಾ ಥುತಿಗೀತಕೇಹಿ ನಚ್ಚಿಂಸು ಓತ್ತಪ್ಪವಿಭುಸನಾ’ಪಿ;
ವತ್ಥಾನಿ ಸೀಸೇ ಭಮಯಿಂಸು ಮತ್ತಾ ಭುಜಾನಿ ಪೋಠೇಸುಮುದಗ್ಗಚಿತ್ತಾ.
೨೫೪. ¶
ಧೂಪೇಹಿ ಕಾಲಾಗರುಸಮ್ಭವೇಹಿ ಘನಾವನದ್ಧಂ’ವ ನಭಂ ಅಹೋಸಿ;
ಸಮುಸ್ಸಿತಾನೇಕಧಜಾವಲೀಹಿ ಪುರಂ ತದಾ ವತ್ಥಮಯಂ’ವ ಆಸಿ.
ದಿಸ್ವಾ ತಮಚ್ಛೇರಮಚಿನ್ತನೀಯಂ ಆಮೋದಿತಾಮಚ್ಚಗಣಾ ಸಮಗ್ಗಾ;
ಅತ್ಥೇ ನಿಯೋಜೇತು ಮುಪೇಚ್ಚ ತಸ್ಸ ವದಿಂಸು ಪಣ್ಡುಸ್ಸ ನರಾಧಿಪಸ್ಸ.
ದಿಸ್ವಾನ ಯೋ ಈದಿಸಕಮ್ಪಿ ರಾಜ ಇದ್ಧಾನುಭಾವಂ ಮುನಿಪುಙ್ಗವಸ್ಸ;
ಪಸಾದಮತ್ತಮ್ಪಿ ಕರೇಯ್ಯ ನೋಚೇ ಕಿಮತ್ಥಿಯಾ ತಸ್ಸ ಭವೇಯ್ಯ ಪಞ್ಞಾ.
ಪಸಾದನೀಯೇಸು ಗುಣೇಸು ರಾಜ ಪಸಾದನಂ ಸಾಧುಜನಸ್ಸ ಧಮ್ಮೋ;
ಪುಪ್ಫನ್ತಿ ಸಬ್ಬೇ ಸಯಮೇವ ವನ್ದೇ ಸಮುಗ್ಗತೇ ಕೋಮುದಕಾನನಾನಿ.
೨೫೮. ¶
ವಾಚಾಯ ತೇಸಂ ಪನ ದುಮ್ಮತೀನಂ ಮಾ ಸಗ್ಗಮಗ್ಗಂ ಪಜಹಿತ್ಥ ರಾಜ;
ಅನ್ಧೇ ಗಹೇತ್ವಾ ವಿಚರೇಯ್ಯ ಕೋ ಹಿ ಅನ್ವೇಸಮಾನೋ ಸುಪಥಂ ಅಮೂಳ್ಹೋ.
ನರಾಧಿಪಾ ಕಪ್ಪಿಣ ಬಿಮ್ಬಿಸಾರ ಸುದ್ಧೋದನಾದಿ ಅಪಿ ತೇಜವನ್ತಾ;
ತಂ ಧಮ್ಮರಾಜಂ ಸರಣಂ ಉಪೇಚ್ಚ ಪಿವಿಂಸು ಧಮ್ಮಾಮತಮಾದರೇನ.
ಸಹಸ್ಸನೇತ್ತೋ ತಿದಸಾಧಿಪೋ’ಪಿ ಖೀಣಾಯುಕೋ ಖಿಣಭವಂ ಮುನಿನ್ದಂ;
ಉಪೇಚ್ಚ ಧಮ್ಮಂ ವಿಮಲಂ ನಿಸಮ್ಮ ಅಲತ್ಥ ಆಯುಂ ಅಪಿ ದಿಟ್ಠಧಮ್ಮೋ.
ತುವಮ್ಪಿ ತಸ್ಮಿಂ ಜಿತಪಞ್ಚಮಾರೇ ದೇವಾತಿದೇವೇ ವರಧಮ್ಮರಾಜೇ;
ಸಗ್ಗಾಪವಗ್ಗಾಧಿಗಮಾಯ ಖಿಪ್ಪಂ ಚಿತ್ತಂ ಪಸಾದೇಹಿ ನರಾಧಿರಾಜ.
೨೬೨. ¶
ಸುತ್ವಾನತೇಸಂ ವಚನಂ ನರಿನ್ದೋ ವಿಕಿಣ್ಣಕಙ್ಖೋ ರತನತ್ತಯಮ್ಹಿ;
ಸೇನಾಪತಿಂ ಅತ್ಥವರಂ ಅವೋಚ ಪಹಟ್ಠಭಾವೋ ಪರಿಸಾಯ ಮಜ್ಝೇ.
ಅಸದ್ದಹಾನೋ ರತನತ್ತಯಸ್ಸ ಗುಣೇ ಭವಚ್ಛೇದನಕಾರಣಸ್ಸ;
ಚಿರಾಯ ದುಲ್ಲದ್ಧಿಪಥೇ ಚರನ್ತೋ ಠಿತೋ ಸರಜ್ಜೇ ಅಪಿ ವಞ್ಚಿತೋಹಂ.
ಮೋಹೇನ ಖಜ್ಜೋಪನಕಂ ಧಮೇಸಿಂ ಸೀತದ್ದಿತೋ ಧುಮಸಿಖೇ ಜಲನ್ತೇ;
ಪಿಪಾಸಿತೋ ಸಿನ್ಧುಜಲಂ ಪಹಾಯ ಪಿವಿಂ ಪಮಾದೇನ ಮರೀಚಿತೋಯಂ.
ಪರಿಚ್ಚಜಿತ್ವಾ ಅಮತಂ ಚಿರಾಯ ಜಿವತ್ಥಿಕೋ ತಿಕ್ಖವಿಸಂ ಅಖಾದಿಂ;
ವಿಹಾಯ’ಹಂ ಚಮ್ಪಕಪುಪ್ಫದಾಮಂ ಅಧಾರಯಿಂ ಜತ್ತುಸು ನಾಗಭಾರಂ.
೨೬೬. ¶
ಗನ್ತ್ವಾನ ಖಿಪ್ಪಂ ಪರಿಖಾ ಸಮೀಪಂ ಆರಾಧಯಿತ್ವಾ ಜಿನದನ್ತಧಾತುಂ;
ಆನೇಹಿ ಪೂಜಾವಿಧಿನಾ ಕರಿಸ್ಸಂ ಪುಞ್ಞಾನಿ ಸಬ್ಬತ್ಥ ಸುಖಾವಹಾನಿ.
ಗನ್ತ್ವಾತತೇಸೋಪರಿಖಾಸಮೀಪಂ ಸೇನಾಧಿನಾಥೋ ಪರಮಪ್ಪತೀತೋ;
ಧಾತುಂ ಮುನಿನ್ದಸ್ಸ ನಮಸ್ಸಮಾನೋ ಅಜ್ಝೇಸಿ ರಞ್ಞೋ ಹಿತಮಾ ಚರನ್ತೋ
ಚಿರಾಗತಂ ದಿಟ್ಠಿಮಲಂ ಪಹಾಯ ಅಲತ್ಥ ಸದ್ಧಂ ಸುಗತೇ ನರಿನ್ದೋ;
ಪಾಸಾದಮಾಗಮ್ಮ ಪಸಾದಮಸ್ಸ ವಡ್ಢೇಹಿ ರಞ್ಞೋ ರತನತ್ತಯಮ್ಹಿ.
ತಸ್ಮಿಂ ಖಣೇ ಪೋಕ್ಖರಣೀ ವಿಚಿತ್ತಾ ಫುಲ್ಲೇಹಿ ಸೋವಣ್ಣಸರೋರುಹೇಹಿ;
ಅಲಙ್ಕರೋನ್ತೀ ಗಗನಂ ಅಹೋಸಿ ಮನ್ದಾಕಿನೀವಾಭಿನವಾವತಾರಾ.
ಹಂಸಙ್ಗಣೇವಾಥ ಮುನಿನ್ದಧಾತು ಸಾ ಪಙ್ಕಜಾ ಪಙ್ಕಜಮೋಕ್ಕಮನ್ತಿ;
ಕುನ್ದಾವದಾತಾಹಿ ಪಭಾಹಿ ಸಬ್ಬಂ ಖಿರೋದಕುಚ್ಛಿಂ’ವ ಪುರಂ ಅಕಾಸಿ.
೨೭೧. ¶
ತತೋ ಸುರತ್ತಞ್ಜಲಿಪಙ್ಕಜಮ್ಹಿ ಪತಿಟ್ಠಹಿತ್ವಾನ ಚಮುಪತಿಸ್ಸ;
ಸನ್ದಿಸ್ಸಮಾನಾ ಮಹತಾ ಜನೇನ ಮಹಪ್ಫಲಂ ಮಾನುಸಕಂ ಅಕತ್ಥ.
ಸುತ್ವಾನ ವುತ್ತನ್ತಮಿಮಂ ನರಿನ್ದೋ ಪಹಟ್ಠಭಾವೋಪದಸಾ’ವ ಗನ್ತ್ವಾ;
ಸಂಸೂಚಯನ್ತೋ ದಿಗುಣಂ ಪಸಾದಂ ಸುವಿಮ್ಹಿತೋಪಞ್ಜಲಿಕೋಅವೋಚ.
ವೋಹಾರದಕ್ಖಾ ಮನುಜಾ ಮುನಿನ್ದ ಸಙ್ಘಟ್ಟಯಿತ್ವಾ ನಿಕಸೋಪಲಮ್ಹಿ;
ಕರೋನ್ತಿಅಗ್ಘಂ ವರಕಞ್ಚನಸ್ಸ ಏಸೋಹಿ ಧಮ್ಮೋ ಚರಿತೋಪುರಾಣೋ.
ಮಣಿಂ ಪಸತ್ಥಾಕರಸಮ್ಭವಮ್ಪಿ ಹುತಾಸಕಮ್ಮೇಹಭೀಸಙ್ಖರಿತ್ವಾ;
ಪಾಪೇನ್ತಿರಾಜಞ್ಞಕಿರೀಟಕೋಟಿಂ ವಿಭುಸನತ್ತಂ ವಿದುನೋಮನುಸ್ಸಾ.
೨೭೫. ¶
ವೀಮಂಸನತ್ಥಾಯ ತವಾಧುನಾಪಿ ಮಯಾ ಕತಂ ಸಬ್ಬಮಿದಂ ಮುನಿನ್ದ;
ಆಗುಂ ಮಹನ್ತಂ ಖಮ ಭುರಿಪಞ್ಞ ಖಿಪ್ಪಂ ಮಮಾಲಙ್ಕುರು ಉತ್ತಮಙ್ಗಂ.
ಪತಿಟ್ಠಿತಾ ತಸ್ಸ ತತೋ ಕಿರೀಟೇ ಮಣಿಪ್ಪಭಾ ಭಾಸಿನಿ ದನ್ತಧಾತು;
ಅಮುಞ್ಚಿ ರಂಸೀ ಧವಲಾ ಪಜಾಸು ಸಿನೇಹಜಾತಾ ಇವ ಖೀರಧಾರಾ.
ಸೋ ದನ್ತಧಾತುಂ ಸಿರಸಾವಹನ್ತೋ ಪದಕ್ಖಿಣಂತಂನಗರಂ ಕರಿತ್ವಾ;
ಸಮ್ಪೂಜಯನ್ತೋ ಕುಸುಮಾದಿಕೇಹಿ ಸುಸಜ್ಜಿತನ್ತೇ ಪುರಮಾಹರಿತ್ಥ.
ಸಮುಸ್ಸಿತೋದಾರಸಿತಾತಪತ್ತೇ ಪಲ್ಲಙ್ಕಸೇಟ್ಠೇ ರತನುಜ್ಜಲಮ್ಹಿ;
ಪತಿಟ್ಠಪೇತ್ವಾನ ಜಿನಸ್ಸ ಧಾತುಂ ಪೂಜೇಸಿ ರಾಜಾ ರತನಾದಿಕೇಹಿ.
ಬುದ್ಧಾದಿವತ್ಥುತ್ತಯಮೇವ ರಾಜಾ ಆಪಾಣಕೋಟಿಂ ಸರಣಂ ಉಪೇಚ್ಚ;
ಹಿತ್ವಾ ವಿಹಿಂಸಂ ಕರುಣಾಧಿವಾಸೋ ಆರಾಧಯೀ ಸಬ್ಬಜನಂ ಗುಣೇಹಿ.
೨೮೦. ¶
ಕಾರೇಸಿ ನಾನಾರತನಪ್ಪಭಾಹಿ ಸಹಸ್ಸರಂಸೀಂ’ವ ವಿರೋಚಮಾನಂ;
ನರಾಧಿಪೋ ಭತ್ತಿಭರಾನುರೂಪಂ ಸುಚಿತ್ತಿತಂ ಧಾತುನಿವೇಸನಮ್ಪಿ.
ವಡ್ಢೇಸಿ ಸೋ ಧಾತುಘರಮ್ಹಿ ಧಾತುಂ ಅಲಙ್ಕರಿತ್ವಾ ಸಕಲಂ ಪುರಮ್ಪಿ;
ಸೇಸೇನ ಪೂಜಾವಿಧಿನಾ ಅತಿತ್ತೋ ಪೂಜೇಸಿ ರಟ್ಠಂ ಸಧನಂ ಸಭೋಗ್ಗಂ.
ಆಮನ್ತಯಿತ್ವಾ ಗುಹಸೀವರಾಜಂ ಸಮ್ಮಾನಿತಂ ಅತ್ತಸಮಂ ಕರಿತ್ವಾ;
ದಾನಾದಿಕಂ ಪುಞ್ಞಮನೇಕರೂಪಂ ಸದ್ಧಾಧನೋ ಸಞ್ಚಿಣಿರಾಜಸೇಟ್ಠೋ.
ತತೋ ಸೋ ಭುಪಾಲೋ ಕುಮತಿಜನಸಂಸಗ್ಗಮನಯಂ,
ನಿರಾಕತ್ವಾ ಮಗ್ಗೇ ಸುಗತವಚನುಜ್ಜೋತಸುಗಮೇ;
ಪಧಾವನ್ತೋ ಸಮ್ಮಾ ಸಪರಹಿತಸಮ್ಪತ್ತಿಚತುರೋ,
ಪಸತ್ಥಂ ಲೋಕತ್ಥಂ ಅಚರಿ ಚರಿತಾವಜ್ಜಿತಜನೋ.
ತತಿಯೋ ಪರಿಚ್ಛೇದೋ.
೨೮೪. ¶
ಚರತಿ ಧರಣಿ ಪಾಲೇ ರಾಜಧಮ್ಮೇಸು ತಸ್ಮಿಂ,
ಸಮರಚತುರಸೇನೋ ಖೀರಧಾರೋ ನರಿನ್ದೋ;
ನಿಜಭುಜಬಲಲೀಲಾ’ರಾತಿದಪ್ಪಪ್ಪಮಾಥೀ,
ವಿಭವಜನಿತಮಾನೋ ಯುದ್ಧಸಜ್ಜೋ’ಭಿಗಞ್ಛಿ.
ಕರಿವರಮಥ ದಿಸ್ವಾ ಸೋ ಗುಹಾದ್ವಾರಯಾತಂ,
ಪಟಿಭಯರಹಿತತ್ತೋ ಸೀಹರಾಜಾ’ವ ರಾಜಾ;
ನಿಜನಗರಸಮೀಪಾಯಾತಮೇತಂ ನರಿನ್ದಂ,
ಅಮಿತಬಲಮಮಹೋಘೇನೋತ್ಥರನ್ತಾ’ಭಿಯಾಯಿ.
ಉದಿತಬಹಳಧೂಲೀಪಾಳಿರುದ್ಧನ್ತಳಿಕ್ಖೋ,
ಸಮದವಿವಿಧಯೋಧಾರಾವಸಂರಮ್ಭಭೀಮೇ;
ನಿಸಿತಸರಸತಾಲೀವಸ್ಸಧಾರಾಕರಾಳೇ,
ಅಜಿನಿ ಮಹತಿ ಯುದ್ಧೇ ಪಣ್ಡುಕೋ ಖೀರಧಾರಂ.
೨೮೭. ¶
ಅಥ ನರಪತಿಸೇಟ್ಠೋ ಸಙ್ಗಹೇತ್ವಾನ ರಟ್ಠಂ,
ನಿಜ ತನುಜ ವರಸ್ಮಿಂ ರಜ್ಜಭಾರಂ ನಿಧಾಯ;
ಸುಗತ ದಸನ ಧಾತುಂ ಸಮ್ಪಟಿಚ್ಛಾಪಯಿತ್ವಾ,
ಪಹಿಣಿ ಚ ಗುಹಸೀವಂ ಸಕ್ಕರಿತ್ವಾ ಸರಟ್ಠಂ.
ಸುವಿರಮವನೀಪಾಲೋ ಸಞ್ಞಮಂ ಅಜ್ಝುಪೇತೋ,
ವಿವಿಧ ವಿಭವ ದಾನಾಯಾಚಕೇ ತಪ್ಪಯಿತ್ವಾ;
ತಿದಸಪುರ ಸಮಾಜಂ ದೇಹಭೇದಾ ಪಯಾತೋ,
ಕುಸಲ ಫಲಮನಪ್ಪಂ ಪತ್ಥಿತಂ ಪಚ್ಚಲತ್ಥ.
ನರಪತಿ ಗುಹಸೀವೋ ತಂ ಮುನಿನ್ದಸ್ಸ ಧಾತುಂ,
ಸಕಪುರಮುಪನೇತ್ವಾ ಸಾಧು ಸಮ್ಮಾನಯನ್ತೋ;
ಸುಗತಿ ಗಮನ ಮಗ್ಗೇ ಪಾಣಿನೋ ಯೋಜಯನ್ತೋ,
ಸುಚರಿತ ಮಭಿರೂಪಂ ಸಞ್ಚಿಣನ್ತೋ ವಿಹಾಸಿ.
೨೯೦. ¶
ಅಗಣಿತಮಹಿಮಸ್ಸುಜ್ಜೇ ನಿರಞ್ಞೋ ತನೂಜೋ,
ಪುರಿಮ ವಯಸಿ ಯೇವಾರದ್ಧಸದ್ಧಾಭಿಯೋಗೋ;
ದಸಬಲ ತನುಧಾತುಂ ಪೂಜಿತುಂ ತಸ್ಸ ರಞ್ಞೋ,
ಪುರವರ ಮುಪಾಯಾತೋ ದನ್ತನಾಮೋ ಕುಮಾರೋ.
ಗುಣಜನಿತ ಪಸಾದಂ ತಂ ಕಲಿಙ್ಗಾಧಿನಾಥಂ,
ನಿಖಿಲ ಗುಣ ನಿವಾಸೋ ಸೋ ಕುಮಾರೋ ಕರಿತ್ವಾ;
ವಿವಿಧ ಮಹವಿಧಾನಂ ಸಾಧುಸಮ್ಪಾದಯನ್ತೋ,
ಅವಸಿ ಸುಗತಧಾತುಂ ಅನ್ವಹಂ ವನ್ದಮಾನೋ.
ಅಭವಿ ಚ ಗುಹಸೀವಸ್ಸಾವನೀಸಸ್ಸ ಧಿತಾ,
ವಿಕಚ ಕುವಲಯಕ್ಖೀ ಹಂಸಕನ್ತಾಭಿಯಾತಾ;
ವದನ ಜಿತ ಸರೋಜಾ ಹಾರಿಧಮ್ಮಿಲ್ಲಭಾರಾ,
ಕುಚಭರನಮಿತಙ್ಗಿ ಹೇಮ ಮಾಲಾಭಿಧಾನಾ.
೨೯೩. ¶
ಅಖಿಲಗುಣನಿಧಾನಂ ಬನ್ಧುಭಾವಾನುರೂಪಂ,
ಸುವಿಮಲಕುಲಜಾತಂ ತಂ ಕುಮಾರಂ ವಿದಿತ್ವಾ;
ನರಪತಿ ಗುಹಸೀವೋ ಅತ್ತನೋ ಧೀತರಂ ತಂ,
ಅದದಿ ಸಬಹುಮಾನಂ ರಾಜಪುತ್ತಸ್ಸ ತಸ್ಸ.
ಮನುಜಪತಿ ಕುಮಾರಂ ಧಾತುರಕ್ಖಾಧಿಕಾರೇ,
ಪಚುರಪರಿಜನಂ ತಂ ಸಬ್ಬಥಾ ಯೋಜಯಿತ್ವಾ;
ಗವ ಮಹಿಸ ಸಹಸ್ಸಾದೀಹಿ ಸಮ್ಪೀಣಯಿತ್ವಾ,
ಸಕ ವಿಭವ ಸರಿಕ್ಖೇ ಇಸ್ಸರತ್ತೇ ಠಪೇಸಿ.
ಸಮರಭುವಿ ವಿನಟ್ಠೇ ಖೀರಧಾರೇ ನರಿನ್ದೇ,
ಮಲಯವನಮುಪೇತಾ ಭಾಗಿನೇಯ್ಯಾ ಕುಮಾರಾ;
ಪಬಲ ಮತಿ ಮಹನ್ತಂ ಸಂಹರಿತ್ವಾ ಬಲಗ್ಗಂ,
ಉಪಪುರಮುಪಗಞ್ಛುಂ ಧಾತುಯಾ ಗಣ್ಹನತ್ಥಂ.
ಅಥ ನಗರಸಮೀಪೇ ತೇ ನಿವೇಸಂ ಕರಿತ್ವಾ,
ಸವಣಕಟುಕಮೇತಂ ಸಾಸನಂ ಪೇಸಯಿಂಸು;
ಸುಗತದಸನಧಾತುಂ ದೇಹಿ ವಾ ಖಿಪ್ಪಮಮ್ಹಂ,
ಯಸಸಿರಿಜನನಿಂ ವಾ ಕೀಳ ಸಙ್ಗಾಮಕೇಳಿಂ.
೨೯೭. ¶
ಸಪದಿ ಧರಣಿಪಾಲೋ ಸಾಸನಂ ತಂ ಸುಣಿತ್ವಾ,
ಅವದಿ ರಹಸಿ ವಾಚಂ ರಾಜಪುತ್ತಸ್ಸ ತಸ್ಸ;
ನಹಿ ಸತಿ ಮಮ ದೇಹೇ ಧಾತುಮಞ್ಞಸ್ಸ ದಸ್ಸಂ,
ಅಹಮಪಿ ಯದಿ ಜೇತುಂ ನೇವ ತೇ ಸಕ್ಕುಣೇಯ್ಯಂ.
ಸುರನರ ನಮಿತಂ ತಂ ದನ್ತಧಾತುಂ ಗಹೇತ್ವಾ,
ಗಹಿತ ದಿಜವಿಲಾಸೋ ಸೀಹಳಂ ಯಾಹಿ ದೀಪಂ;
ಇತಿ ವಚನಮುದಾರಂ ಮಾತುಲಸ್ಸಾಥ ಸುತ್ವಾ,
ತಮವಚ ಗುಹಸೀವಂ ದನ್ತನಾಮೋ ಕುಮಾರೋ.
ತವಚ ಮಮಚ ಕೋ ವಾ ಸೀಹಳೇ ಬನ್ಧುಭೂತೋ,
ಜಿನವರಣಸರೋಜೇ ಭತ್ತಿಯುತ್ತೋ ಚ ಕೋವಾ;
ಜಲನೀಧಿಪರತೀರೇ ಸೀಹಳಂ ಖುದ್ದದೇಸಂ,
ಕಥಮಹಮತಿನೇಸ್ಸಂ ದನ್ತಧಾತುಂ ಜಿನಸ್ಸ.
೩೦೦. ¶
ತಮವದಿ ಗುಹಸೀವೋ ಭಾಗಿನೇಯ್ಯಂ ಕುಮಾರಂ,
ದಸಬಲತನುಧಾತು ಸಣ್ಠಿತಾ ಸೀಹಳಸ್ಮಿಂ;
ಭವಭಯಹತಿದಕ್ಖೋ ವತ್ತತೇ ಸತ್ಥುಧಮ್ಮೋ,
ಗಣನಪಥಮತೀತಾ ಭಿಕ್ಖವೋ ಚಾವಸಿಂಸು.
ಮಮ ಚ ಪಿಯಸಹಾಯೋ ಸೋ ಮಹಾಸೇನ ರಾಜಾ,
ಜಿನಚರಣಸರೋಜದ್ವನ್ದಸೇವಾಭಿಯುತ್ತೋ;
ಸಲಿಲಮಪಿ ಚ ಫುಟ್ಠಂ ಧಾತುಯಾ ಪತ್ಥಯನ್ತೋ,
ವಿವಿಧರತನಜಾತಂ ಪಾಭತಂ ಪೇಸಯಿತ್ಥ.
ಪಭವತಿ ಮನುಜಿನ್ದೋ ಸಬ್ಬದಾ ಬುದ್ಧಿಮಾ ಸೋ,
ಸುಗತದಸನಧಾತುಂ ಪೂಜಿತುಂ ಪೂಜನೇಯ್ಯಂ;
ಪರಿಚಿತವಿಸಯಮ್ಹಾ ವಿಪ್ಪವುತ್ಥಂ ಭವನ್ತಂ,
ವಿವಿಧವಿಭವದಾನಾ ಸಾಧು ಸಙ್ಗಣ್ಹಿತುಞ್ಚ.
೩೦೩. ¶
ನಿಜ ದುಹಿತುಪತಿಂ ತಂ ಇತ್ಥಮಾರಾಧಯಿತ್ವಾ,
ನರಪತಿ ಗುಹಸೀವೋ ಸಙ್ಗಹೇತ್ವಾನ ಸೇನಂ;
ರಣಧರಣಿಮುಪೇತೋ ಸೋ ಕುಮಾರೇಹಿ ಸದ್ಧಿಂ,
ಮರಣಪರವಸತ್ತಂ ಅಜ್ಝಗಾ ಯುಜ್ಝಮಾನೋ.
ಅಥ ನರಪತಿ ಪುತ್ತೋ ದನ್ತನಾಮೋ ಸುಣಿತ್ವಾ,
ಸವಣ ಕಟುಕಮೇತಂ ಮಾತುಲಸ್ಸಪ್ಪವತ್ತಿಂ;
ಗಹಿತ ದಿಜವಿಲಾಸೋ ದನ್ತಧಾತುಂ ಗಹೇತ್ವಾ,
ತುರಿತ ತುರಿತ ಭೂತೋ ಸೋ ಪುರಮ್ಹಾ ಪಳಾಯಿ.
ಸರಭಸ ಮುಪಗನ್ತ್ವಾ ದಕ್ಖಿಣಂ ಚಾಥ ದೇಸಂ,
ಅವಿಚಲಿತಸಭಾವೋ ಇದ್ಧಿಯಾ ದೇವತಾನಂ;
ನದಿಮತಿಮಹತಿಂ ಸೋ ಉತ್ತರಿತ್ವಾನ ಪುಣ್ಣಂ,
ನಿದಹಿ ದಸನಧಾತುಂ ವಾಲುಕಾರಾಸಿಮಜ್ಝೇ.
ಪುನ ಪುರಮುಪಗನ್ತ್ವಾ ತಂ ಗಹೀತಞ್ಞವೇಸಂ,
ಭರಿಯಮಪಿ ಗಹೇತ್ವಾ ಆಗತೋ ತತ್ಥ ಖಿಪ್ಪಂ;
ಸುಗತದಸನಧಾತುಂ ವಾಲುಕಾಥುಪಕುಚ್ಛಿಂ,
ಠಪಿತಮುಪಚರನ್ತೋ ಅಚ್ಛಿ ಗುಮ್ಬನ್ತರಸ್ಮಿಂ.
೩೦೭. ¶
ಸಪದಿ ನಭಸಿ ಥೇರೋ ಗಚ್ಛಮಾನೋ ಪನೇಕೋ,
ವಿವಿಧಕಿರಣಜಾಲಂ ವಾಲುಕಾರಾಸಿಥೂಪಾ;
ಅವಿರಳಿತಮುದೇನ್ತಂ ಧಾತುಯಾ ತಾಯ ದಿಸ್ವಾ,
ಪಣಮಿ ಸುಗತಧಾತುಂ ಓತರಿತ್ವಾನ ತತ್ಥ.
ಮುನಿಸುತಮಥ ದಿಸ್ವಾ ಜಮ್ಪತೀ ತೇ ಪತೀತಾ,
ನಿಜಗಮನವಿಧಾನಂ ಸಬ್ಬಮಾರೋಚಯಿಂಸು;
ದಸಬಲತನುಜೋ ಸೋ ಧಾತುರಕ್ಖಾ ನಿಯುತ್ತೋ,
ಪರಹಿತನಿರತತ್ತೋ ತೇ ಉಭೋ ಅಜ್ಝಭಾಸಿ.
ದಸಬಲತನುಧಾತುಂ ಸೀಹಳಂ ನೇಥ ತುಮ್ಹೇ,
ಅಗಣಿತ ತನುಖೇದಾ ವೀತಸಾರಜ್ಜಮೇತಂ;
ಅಪಿ ಚ ಗಮನಮಗ್ಗೇ ಜಾತಮತ್ತೇ ವಿಘಾತೇ,
ಸರಥ ಮಮಮನೇಕೋಪದ್ದವಚ್ಛೇದದಕ್ಖಂ.
೩೧೦. ¶
ಇತಿ ಸುಗತನನೂಜೋ ಜಮ್ಪತೀನಂ ಕಥೇತ್ವಾ,
ಪುನ’ಪಿ ತದನುರೂಪಂ ದೇಸಯಿತ್ವಾನ ಧಮ್ಮಂ;
ಪುಥುತರಮಪನೇತ್ವಾ ಸೋಕಸಲ್ಲಞ್ಚ ಗಾಳ್ಹಂ,
ಸಕವಸತಿಮುಪೇತೋ ಅನ್ತಲಿಕ್ಖೇನ ಧೀರೋ.
ಭುಜಗಭವನವಾಸೀ ನಿನ್ನಗಾಯಾಥ ತಸ್ಸಾ,
ಭುಜಗಪತಿ ಮಹಿದ್ಧಿ ಪಣ್ಡುಹಾರಾಭಿಧಾನೋ;
ಸಕಪುರಪವರಮ್ಹಾ ನಿಕ್ಖಮಿತ್ವಾ ಚರನ್ತೋ,
ಸಮುಪಗಮಿ ತದಾ ತಂ ಠಾನಮಿಚ್ಛಾವಸೇನ.
ವಿಮಲಪುಲಿನಥೂಪಾ ಸೋ ಸಮುಗ್ಗಚ್ಛಮಾನಂ,
ಸಸಿರುಚಿರಮರೀಚಿಜ್ಜಾಲಮಾಲೋಕಯಿತ್ವಾ;
ಠಿತಮಥ ಮುನಿಧಾತುಂ ವಾಲುಕಾರಸಿಗಬ್ಭೇ,
ಕಿಮಿದಮಿತಿ ಸಕಙ್ಖಂ ಪೇಕ್ಖಮಾನೋ ಅವೇದಿ.
೩೧೩. ¶
ಸಪದಿ ಸಬಹುಮಾನೋ ಸೋ ಅಸನ್ದಿಸ್ಸಮಾನೋ,
ರತನಮಯಕರಣ್ಡಂ ಧಾತುಯುತ್ತಂ ಗಿಲಿತ್ವಾ;
ವಿತತಪುಥುಲದೇಹೋ ಭೋಗಮಾಲಾಹಿ ತುಙ್ಗಂ,
ಕಣಕಸಿಖರಿರಾಜಂ ವೇಠಯಿತ್ವಾ ಸಯಿತ್ಥ.
ಸಲಿಲನಿಧಿಸಮೀಪಂ ಜಮ್ಪತೀ ಗನ್ತುಕಾಮಾ,
ಪುಲಿನತಲಗತಂ ತಂ ದನ್ತಧಾತುಂ ಅದಿಸ್ವಾ;
ನಯನಸಲಿಲಧಾರಂ ಸೋಕಜಾತಂ ಕಿರನ್ತಾ,
ಸುಗತಸುತವರಂ ತಂ ತಙ್ಖಣೇ’ನುಸ್ಸರಿಂಸು.
ಅಥ ಸುಗತಸುತೋ ಸೋ ಚಿನ್ತಿತಂ ಸಂವಿದಿತ್ವಾ,
ಅಗಮಿ ಸವಿಧಮೇಸಂ ಸೋಕದಿನಾನನಾನಂ;
ಅಸುಣಿ ಚ ಜಿನಧಾತುಂ ವಾಲುಕಾರಾಸಿಮಜ್ಝೇ,
ನೀಹಿತಮಪಿ ಅದಿಟ್ಠಂ ಪೂಜಿತಂ ಜಮ್ಪತೀಹಿ.
ಸಯಿತಮಥ ಯತೀಸೋ ದಿಬ್ಬಚಕ್ಖುಪ್ಪಭಾವಾ,
ರತನಗಿರಿನಿಕುಞ್ಜೇ ನಾಗರಾಜಂ ಅಪಸ್ಸಿ;
ವಿಹಗಪತಿಸರೀರಂ ಮಾಪಯಿ ತಮ್ಮುಹುತ್ತೇ,
ವಿತತಪುಥುಲಪಕ್ಖೇನ’ನ್ತಳಿಕ್ಖಂ ಥಕೇನ್ತಂ.
೩೧೭. ¶
ಜಲಧಿಮತಿಗಭೀರಂ ತಂ ದ್ವಿಧಾ ಸೋ ಕರಿತ್ವಾ,
ಪಬಲಪವನವೇಗೇನ’ತ್ತನೋ ಪಕ್ಖಜೇನ;
ಸರಭಸ ಮಹಿಧಾವಂ ಭೀಮಸಂರಮ್ಭಯೋಗಾ,
ಅಭಿಗಮಿ ಭುಜಗಿನ್ದಂ ಮೇರುಪಾದೇ ನಿಪನ್ನಂ.
ಜಹಿತಭುಜಗವೇಸೋ ತಙ್ಖಣೇ ಸೋ ಫಣಿನ್ದೋ,
ಪಟಿಭಯಚಕಿತತ್ತೋ ಸಂಖಿಪಿತ್ವಾನ ಭೋಗೇ;
ಸರಭಸ ಮುಪಗನ್ತ್ವಾ ತಸ್ಸ ಪಾದೇ ನಮಿತ್ವಾ,
ವಿನಯಮಧುರಮಿತ್ಥಂ ತಂ ಮುನೀಸಂ ಅವೋಚ.
ಸಕಲಜನಹಿತತ್ಥಂ ಏವ ಜಾಯನ್ತಿ ಬುದ್ಧಾ,
ಭವತಿ ಜನಹಿತತ್ಥಂ ಧಾತುಮತ್ತಸ್ಸ ಪೂಜಾ;
ಅಹಮಪಿ ಜಿನಧಾತುಂ ಪೂಜಯಿತ್ವಾ ಮಹಗ್ಘಂ,
ಕುಸಲಫಲಮನಪ್ಪಂ ಸಞ್ಚಿಣಿಸ್ಸಂ’ತಿ ಗಣ್ಹಿಂ.
೩೨೦. ¶
ಅಥ ಮನುಜಗಣಾನಂ ಸಚ್ಚಬೋಧಾರಹಾನಂ,
ವಸತಿಭವನಮೇಸಾ ನೀಯ್ಯತೇ ಸೀಹಳಂ ತಂ;
ಮುನಿವರತನುಧಾತುಂ ತೇನ ದೇಹೀತಿ ವುತ್ತೋ,
ಭುಜಗಪತಿ ಕರಣ್ಡಂ ಧಾತುಗಬ್ಭಂ ಅದಜ್ಜಿ.
ವಿಹಗಪತಿತನುಂ ತಂ ಸಂಹರಿತ್ವಾನ ಥೇರೋ,
ಜಲಚರಸತಭೀಮಾ ಅಣ್ಣವಾ ಉಪ್ಪತಿತ್ವಾ;
ಸಕಲಪಥವಿಚಕ್ಕೇ ರಜ್ಜಲಕ್ಖಿಂ’ವ ಧಾತುಂ,
ನರಪತಿತನುಜಾನಂ ಜಮ್ಪತೀನಂ ಅದಾಸಿ.
ಇತಿ ಕತಬಹುಕಾರೇ ಸಂಯಮಿನ್ದೇ ಪಯಾತೇ,
ಸುಗತದಸನಧಾತುಂ ಮುದ್ಧನಾ ಉಬ್ಬಹನ್ತಾ;
ಮಹತಿ ವಿಪಿನದೇವಾದೀಹಿ ಮಗ್ಗೇ ಪಯುತ್ತೇ,
ವಿವಿಧಮಹವಿಧಾನೇ ತೇ ತತೋ ನಿಕ್ಖಮಿಂಸು.
೩೨೩. ¶
ಮುದುಸುರಭೀಸಮೀರೋ ಕಣ್ಟಕಾದಿವ್ಯಪೇತೋ,
ವಿಮಲಪುಲಿನಹಾರೀ ಆಸೀ ಸಬ್ಬತ್ಥ ಮಗ್ಗೋ;
ಅಯನಮುಪಗತೇ ತೇ ದನ್ತಧಾತುಪ್ಪಭಾವಾ,
ನಿಗಮನಗರವಾಸೀ ಸಾಧು ಸಮ್ಮಾನಯಿಂಸು.
ಕುಸುಮಸುರಭಿಚುಣ್ಣಾಕಿಣ್ಣಹತ್ಥಾಹಿ ನಿಚ್ಚಾ,
ಸಕುತುಕಮನುಯಾತಾ ಕಾನನೇ ದೇವತಾಹೀ;
ಅಚಲಗಹಣದುಗ್ಗಂ ಖೇಪಯಿತ್ವಾನ ಮಗ್ಗಂ,
ಅಗಮುಮತುರಿತಾ ತೇ ಪಟ್ಟನಂ ತಾಮಲಿತ್ತಿಂ.
ಅಚಲಪದರಬದ್ಧಂ ಸುಟ್ಠಿತೋದಾರಕೂಪಂ,
ಉದಿತಪುಥುಲಕಾರಂ ದಕ್ಖನೀಯಾಮಕಞ್ಚ;
ಸಯಮಭಿಮತಲಙ್ಕಾಗಾಮಿನಿಂ ನಾವಮೇತೇ,
ಸಪದಿ ಸಮುಪರೂಳ್ಹಂ ಅದ್ದಸುಂ ವಾಣಿಜೇಹಿ.
೩೨೬. ¶
ಅಥ ದಿಜಪವರಾ ತೇ ಸೀಹಳಂ ಗನ್ತುಮಿಚ್ಛಂ,
ಸರಭಸ ಮುಪಗನ್ತ್ವಾ ನಾವಿಕಸ್ಸಾವದಿಂಸು;
ಸುತಿಸುಖವಚಸಾ ಸೋ ಸಾಧುವುತ್ತೇನ ಚೇಸಂ,
ಪಮುದಿತಹದಯೋ ತೇ ನಾವಮಾರೋಪಯಿತ್ಥ.
ಜಲನಿಧಿಮಭಿರೂಳ್ಹೇಸ್ವೇಸು ಆದಾಯ ಧಾತುಂ,
ಸಮಭವುಮುಪಸನ್ನಾ ಲೋಲಕಲ್ಲೋಲಮಾಲಾ;
ಸಮಸುರಭಿಮನುಞ್ಞೋ ಉತ್ತರೋ ವಾಯಿ ವಾತೋ,
ವಿಮಲರುಚಿರಸೋಭಾ ಸಬ್ಬಥಾ’ಸುಂ ದಿಸಾ’ಪಿ.
ನಭಸಿ ಅಸಿತಸೋಭೇ ವೇನತೇಯ್ಯೋ’ವ ನಾವಾ,
ಪಬಲಪವನವೇಗಾ ಸತ್ತತಂ ಧಾವಮಾನಾ;
ನಯನವಿಸಯಭಾವಾತೀತತೀರಾಚಲಾದಿಂ,
ಪವಿಸಿ ಜಲಧಿಮಜ್ಝಂ ಫೇಣಪುಪ್ಫಾಭಿಕಿಣ್ಣಂ.
೩೨೯. ¶
ಅಥ ಅಭವಿ ಸಮುದ್ದೋ ಭೀಮಸಂವಟ್ಟವಾತಾ,
ಭೀಹತಸಿಖರಿಕೂಟಾಕಾರವೀಚಿಪ್ಪಬನ್ಧೋ;
ಸವನಭಿದುರಘೋರಾರಾವರುನ್ಧನ್ತಲಿಕ್ಖೋ,
ಭಯಚಕಿತಮನುಸ್ಸಕ್ಕನ್ದಿತೋ ಸಬ್ಬರತ್ತಿಂ.
ಉದಯಸಿಖರಿಸೀಸಂ ನೂತನಾದಿಚ್ಚಬಿಮ್ಬೇ,
ಉಪಗತವತಿ ತಸ್ಸಾ ರತ್ತಿಯಾ ಅಚ್ಚಯಮ್ಹಿ;
ಸಲಿಲನಿಧಿಜಲಂ ತಂ ಸನ್ತಕಲ್ಲೋಲಮಾಲಂ,
ಅಸಿತಮಣಿವಿಚಿತ್ತಂ ಕೋಟ್ಟಿಮಂ’ವಾವಭಾಸಿ.
ಅಥ ವಿತತಫಣಾಲೀ ಭಿಂಸನಾ ಕೇಚಿ ನಾಗಾ,
ಸುರಭಿಕುಸುಮಹತ್ಥಾ ಕೇಚಿ ದಿಬ್ಬತ್ತಭಾವಾ;
ರುಚಿರಮಣಿಪದೀಪೇ ಕೇಚಿ ಸನ್ಧಾರಯನ್ತಾ,
ನಿಜಸಿರಸಿ ಕರೋನ್ತಾ ಕೇಚಿ ಕಣ್ಡುಪ್ಪಲಾನೀ.
೩೩೨. ¶
ಫುಟಕುಮುದಕಲಾಪೇ ಜತ್ತುನೇಕೇ ವಹನ್ತಾ,
ಕಣಕಕಲಸಮಾಲಾ ಉಕ್ಖಿಪತ್ತಾ ಚ ಕೇಚಿ;
ಪವನಚಲಿತಕೇತುಗ್ಗಾಹಕಾ ಕೇಚಿ ಏಕೇ,
ರುಚಿರ ಕಣಕ ಚುಣ್ಣಾಪುಣ್ಣಚಙ್ಗೋಟಹತ್ಥಾ.
ಸಲಳಿತರಮಣಿಯಂ ಕೇಚಿ ನಚ್ಚಂ ಕರೋನ್ತಾ,
ಸಲಯಮಧುರಗೀತಂ ಗಾಯಮಾನಾ’ವ ಕೇಚಿ;
ಪಚುರತುರಿಯಭಣ್ಡೇ ಆಹನನ್ತಾ’ವ ಏಕೇ,
ಮುನಿವರತನುಧಾತುಂ ಪೂಜಿತುಂ ಉಟ್ಠಹಿಂಸು.
ರುಚಿರಕಚಕಲಾಪಾ ರಾಜಕಞ್ಞಾಯ ತಸ್ಸಾ,
ಮುನಿವರದಸನಂ ತಂ ನಿಗ್ಗತೇವಿನ್ದುಲೇಖಾ;
ಉಜುರಜತಸಲಾಕಾ ಸನ್ನಿಭೇ ಮುಞ್ಚಿ ರಂಸೀ.
೩೩೫. ¶
ಅತುಲಿತಮನುಭಾವಂ ಧಾತುಯಾ ಪೇಕ್ಖತಂ ತಂ,
ಪಮುದಿತಹದಯಾನಂ ತಙ್ಖಣೇ ಪನ್ನಗಾನಂ;
ಪಟಿರವಹರಿತಾನಂ ಸಾಧುವಾದಾದಿಕಾನಂ,
ಗಗನಮಪರಿಯನ್ತಂ’ವಾಸಿ ವಿತ್ಥಾರಿತಾನಂ.
ಪವಿಸಿ ಸುಗತ ದಾಠಾಧಾತು ಸಾ ಮೋಳಿಗಬ್ಭಂ,
ಪುನ ಗಗನತಲಮ್ಹಾ ಓತರಿತ್ವಾನ ತಸ್ಸಾ;
ಫಣಧರನಿವಹಾ ತೇ ತಂ ತರಿಂ ವಾರಯಿತ್ವಾ,
ಮಹಮಕರುಮುದಾರಂ ಸತ್ತರತ್ತಿನ್ದಿವಂಹಿ.
ಅಚಲಮಿವ ವಿಮಾನಂ ಅನ್ತಲಿಕ್ಖಮ್ಹಿ ನಾವಂ,
ಗತಿವಿರಹಿತಮಮ್ಹೋರಾಸಿಮಜ್ಝಮ್ಹಿ ದಿಸ್ವಾ;
ಭಯವಿಲುಲಿತಚಿತ್ತಾ ಜಮ್ಪತೀ ತೇ ಸಮಗ್ಗಾ,
ದಸಬಲತನುಜಂ ತಂ ಇದ್ಧಿಮನ್ತಂ ಸರಿಂಸು.
ಸಪದಿ ಮುನಿಸುತೋ ಸೋ ಚಿತ್ತಮೇಸಂ ವಿದಿತ್ವಾ,
ನಭಸಿ ಜಲಧರಾಲೀ ಮದ್ದಮಾನೋ’ಭಿಗನ್ತ್ವಾ;
ವಿಹಗಪತಿಸರೀರಂ ಮಾಪಯಿತ್ವಾ ಮಹನ್ತಂ,
ಭಯಚಕಿತಭುಜಙ್ಗೇ ತೇ ಪಳಾಪೇಸಿ ಖಿಪ್ಪಂ.
೩೩೯. ¶
ಇತ್ಥಂ ಬುದ್ಧಿಸುತೇ ಭುಜಙ್ಗಜನಿತಂ ಭೀತಿಂ ಸಮೇತ್ವಾ ಗತೇ,
ಸಾ ನಾವಾ ಪವನಾ ಪಕಮ್ಪಿತಧಜಾ ತುಙ್ಗಂ ತರಙ್ಗಾವಲಿಂ;
ಭೀನ್ದನ್ತೀ ಗತಿವೇಗಸಾ ಪುಥುತರಂ ಮೇಘಾವಲೀಸನ್ನಿಭಂ,
ಲಙ್ಕಾಪಟ್ಟನಮೋತರಿತ್ಥ ಸಹಸಾ ಥೇರಸ್ಸ ತಸ್ಸಿದ್ಧಿಯಾ.
ಚತುತ್ಥೋ ಪರಿಚ್ಛೇದೋ.
ಸಂವಚ್ಛರಮ್ಹಿ ನವಮಮ್ಹಿ ಮಹಾದಿಸೇನ,
ಪುತ್ತಸ್ಸ ಕಿತ್ತಿಸಿರಿಮೇಘನರಾಧಿಪಸ್ಸ;
ತೇ ಜಮ್ಪತೀ ತಮಥ ಪಟ್ಟನಮೋತರಿತ್ವಾ,
ದೇವಾಲಯೇ ಪಟಿವಸಿಂಸು ಮನೋಭಿರಾಮೇ.
೩೪೧. ¶
ದಿಸ್ವಾನ ತೇ ದ್ವಿಜವರೋ ಪಥಿಕೇ ನಿಸಾಯಂ,
ಸನ್ತಪ್ಪಯಿತ್ಥ ಮಧುರಾಸನಪಾನಕೇಹಿ;
ರತ್ತಿಕ್ಖಯೇ ಚ ಅನುರಾಧಪುರಸ್ಸ ಮಗ್ಗಂ,
ಛಾಯಾಪತೀನಮಥ ಸೋ ಅಭಿವೇದಯಿತ್ಥ.
ಆದಾಯ ತೇ ದಸನಧಾತುವರಂ ಜಿನಸ್ಸ,
ಸಮ್ಮಾನಿತಾ ದ್ವಿಜವರೇನ’ಥ ಪಟ್ಟನಮ್ಹಾ;
ನಿಕ್ಖಮ್ಮ ದೂರತರಮಗ್ಗಮತಿಕ್ಕಮಿತ್ವಾ,
ಪದ್ವಾರಗಾಮಮನುರಾಧಪುರಸ್ಸ’ಗಞ್ಛುಂ.
ಯಂ ಧಮ್ಮಿಕಂ ನರವರಂ ಅಭಿತಕ್ಕಯಿತ್ವಾ,
ಜಾಯಾಪತೀ ವಿಸಯಮೇತಮುಪಾಗಮಿಂಸು;
ತಂ ವ್ಯಾಧಿನಾ ಸಮುದಿತೇನ ಮಹಾದಿಸೇನ,
ಲಙ್ಕಿಸ್ಸರಂಸುಚಿರಕಾಲಕತಂ ಸುಣಿಂಸು.
ಸೋಕೇನ ತೇ ಸಿಖರಿನೇವ ಸಮುಗ್ಗತೇನ,
ಅಜ್ಝೋತ್ಥಟಾ ಬಹುತರಂ ವಿಲಪೀಂಸು ಮುಳ್ಹಾ;
ಕಾಯಿಂಸು ತೇಸಮಥ ಮುಚ್ಛಿತಮಾನಸಾನಂ,
ಸಬ್ಬಾ ದಿಸಾ ಚ ವಿದಿಸಾ ಚ ಘನನ್ಧಕಾರಾ
೩೪೫. ¶
ಸುತ್ವಾನ ಕಿತ್ತಿಸಿರಿಮೇಘನರಾಧಿಪಸ್ಸ,
ರಜ್ಜೇಠಿತಸ್ಸ ರತನತ್ತಯಮಾಮಕತ್ತಂ;
ವಸ್ಸೇನ ನಿಬ್ಬುತಮಹಾದಹನಾ’ವ ಕಚ್ಛಾ,
ತೇ ಜಮ್ಪತೀ ಸಮಭವುಂ ಹತಸೋಕತಾಪಾ.
ಸುತ್ವಾನ ಮೇಘಗಿರಿನಾಮಮಹಾವಿಹಾರೇ,
ಭಿಕ್ಖುಸ್ಸ ಕಸ್ಸಚಿ ನರಾಧಿಪವಲ್ಲಭತ್ತಂ;
ತಸ್ಸ’ನ್ತಿಕಂ ಸಮುಪಗಮ್ಮ ಕತಾತಿಥೇಯ್ಯಾ,
ಧಾತುಪ್ಪವತ್ತಿಮವದಿಂಸು ಉಭೋ ಸಮೇಚ್ಚ.
ಸುತ್ವಾನ ಸೋ ಮುನಿವರೋ ದಸನಪ್ಪವತ್ತಿಂ,
ಹಟ್ಠೋ ಯಥಾಮತರಸೇನ’ಹಿಸಿತ್ತಗತ್ತೋ;
ಗೇಹೇ ಸಕೇ ಸಪದಿ ಪಟ್ಟವಿತಾನಕೇಹಿ,
ವಡ್ಢೇಸಿ ಧಾತುಮಮಲಂ ಸಮಲಙ್ಕತಮ್ಹಿ.
೩೪೮. ¶
ತೇಸಞ್ಚ ಜಾನಿಪತಿಕಾನಮುಭಿನ್ನಮೇಸೋ,
ಕತ್ವಾನ ಸಙ್ಗಹಮುಳಾರತರಂ ಯಥಿಚ್ಛಂ;
ವುತ್ತನ್ತಮೇತಮಭಿವೇದಯಿತುಂ ಪಸತ್ಥಂ,
ಲಙ್ಕಾಧಿಪಸ್ಸ ಸವಿಧಂ ಪಹಿಣಿತ್ಥ ಭಿಕ್ಖುಂ.
ರಾಜಾ ವಸನ್ತಸಮಯೇ ಸಹ ಕಾಮಿನೀಹಿ,
ಉಯ್ಯಾನಕೇಳಿಸುಖ ಮೇಕದಿನೇ’ನುಭೋನ್ತೋ;
ಆಗಚ್ಛಮಾನಮಥ ತತ್ಥ ಸುದುರತೋ’ಚ,
ತಂ ವಿಪ್ಪಸನ್ನಮುಖವಣ್ಣಮಪಸ್ಸಿ ಭಿಕ್ಖುಂ.
ಸೋ ಸಂಯಮಿ ಸಮುಪಗಮ್ಮ ನರಾಧಿಪಂ ತಂ,
ವುತ್ತನ್ತಮೇತಮಭಿವೇದಯಿ ತುಟ್ಠಚಿತ್ತೋ;
ಸುತ್ವಾನ ತಂ ಪರಮಪೀತಿಭರಂ ವಹನ್ತೋ,
ಸಮ್ಪತ್ತಚಕ್ಕರತನೋ’ವ ಅಹೋಸಿ ರಾಜಾ.
೩೫೧. ¶
ಲಙ್ಕಿಸ್ಸರೋ ದ್ವಿಜವರಾ ಜಿನದನ್ತಧಾತು,
ಮಾದಾಯ ಜಾನಿಪತಯೋ ಉಭಯೇ ಸಮೇಚ್ಚ;
ಏಸ್ಸನ್ತಿ ಲಙ್ಕಮಚಿರೇನ ಇತೀರಿತಂ ತಂ,
ನೇಮಿತ್ತಿಕಸ್ಸ ವಚನಞ್ಚ ತಥಂ ಅಮಞ್ಞಿ.
ರಾಜಾ ತತೋ ಮಹತಿಯಾ ಪರಿಸಾಯ ಸದ್ಧಿಂ,
ತಸ್ಸಾನುರಾಧನಗರಸ್ಸ ಪುರುತ್ತರಾಯ;
ಆಸಾಯ ತಂ ಸಪದಿ ಮೇಘಗಿರಿಂ ವಿಹಾರಂ,
ಸದ್ಧೋ ಅಗಞ್ಛಿ ಪದಸಾ’ವ ಪಸನ್ನಚಿತ್ತೋ.
ದಿಸ್ವಾ ತತೋ ಸುಗತಧಾತುಮಲಬ್ಭನೇಯ್ಯಂ,
ಆನನ್ದಜಸ್ಸುನಿವಹೇಹಿ ಚ ತಾರಹಾರಂ;
ಸಿಞ್ಚಂ ವಿಧಾಯ ಪಣಿಧಿಂ ಬಹುಮಾನಪುಬ್ಬಂ,
ರೋಮಞ್ಚಕಞ್ಚುಕಧರೋ ಇತಿ ಚಿನ್ತಯಿತ್ಥ.
೩೫೪. ¶
ಸೋ’ಹಂ ಅನೇಕರತನುಜ್ಜಲಮೋಳಿಧಾರಿಂ,
ಪೂಜೇಯ್ಯಮಜ್ಜ ಯದಿ ದುಚ್ಚಜಮುತ್ತಮಙ್ಗಂ;
ಲೋಕತ್ತಯೇಕಸರಣಸ್ಸ ತಥಾಗತಸ್ಸ,
ನೋ ಧಾತುಯಾ ಮಹಮನುಚ್ಛವಿಕಂ ಕರೇಯ್ಯಂ.
ಏತಂ ಪಹೂತರತನಂ ಸಧನಂ ಸಭೋಗ್ಗಂ,
ಸಮ್ಪೂಜಯಂ ಅಪಿ ಧರಾವಲಯಂ ಅಸೇಸಂ;
ಪೂಜಂ ಕರೋಮಿ ತದನುಚ್ಛವಿಕಂ ಅಹಂ’ತಿ,
ಚಿನ್ತೇಯ್ಯ ಕೋಹಿ ಭುವನೇಸು ಅಮೂಳ್ಹತಿತ್ತೋ.
ಲಙ್ಕಾಧಿಪಚ್ಚಮಿದಮಪ್ಪತರಂ ಮಮಾಸಿ,
ಬುದ್ಧೋ ಗುಣೇಹಿ ವಿವಿಧೇಹಿ ಪಮಾಣ ಸುಞ್ಞೋ;
ಸೋ’ಹಂ ಪರಿತ್ತವಿಭವೋ ತಿಭವೇಕನಾಥಂ,
ತಂ ತಾದಿಸಂ ದಸಬಲಂ ಕಥಮಚ್ಚಯಿಸ್ಸಂ.
೩೫೭. ¶
ಇತ್ಥಂ ಪುನಪ್ಪುನ ತದೇವ ವಿಚಿನ್ತಯನ್ತೋ,
ಆಪಜ್ಜಿ ಸೋ ಧಿತಿಯುತೋ’ಪಿ ವಿಸಞ್ಞಿಭಾವಂ;
ಸಂವೀಜಿತೋ ಸಪದಿ ಚಾಮರಮಾರುತೇನ,
ಖಿನ್ನೇನ ಸೇವಕಜನೇನ ಅಲತ್ಥ ಸಞ್ಞಂ.
ಥೋಕಮ್ಪಿ ಬೀಜಮಥ ವಾ ಅಭಿರೋಪಯನ್ತಾ,
ಮೇಧಾವಿನೋ ಮಹತಿಯಾ’ಪಿ ಮಸುನ್ಧರಾಯ;
ಕಾಲೇನ ಪತ್ತ ತವ ಪುಪ್ಫಫಲದಿಕಾನಿ,
ವಿನ್ದನ್ತಿ ಪತ್ಥಿತಫಲಾನಿ ಅನಪ್ಪಕಾನಿ.
ಏವಂ ಗುಣೇಹಿ ವಿವಿಧೇಹಿ’ಪಿ ಅಪ್ಪಮೇಯ್ಯ,
ಧಮ್ಮಿಸ್ಸರಮ್ಹಿ ಮಹಮಪ್ಪತರಮ್ಪಿ ಕತ್ವಾ;
ಕಾಲಚ್ಚಯೇನ ಪರಿಣಾಮ ವಿಸೇಸರಮ್ಮಂ,
ಸಗ್ಗಾಪವಗ್ಗಸುಖಮಪ್ಪಟಿಮಂ ಲಭಿಸ್ಸಂ.
೩೬೦. ¶
ಇತ್ಥಂ ವಿಚಿನ್ತಿಯ ಪಮೋದಭರಾತಿರೇಕ,
ಸಮ್ಪುಣ್ಣಚನ್ದಿಮಸರಿಕ್ಖಮುಖೋ ನರಿನ್ದೋ;
ಸಬ್ಬಞ್ಞುನೋ ದಸನಧಾತುವರಸ್ಸ ತಸ್ಸ,
ಪೂಜೇಸಿ ಸಬ್ಬಮಪಿ ಸೀಹಳದೀಪಮೇತಂ.
ಭಿಕ್ಖೂ’ಪಿ ತೇಪಿಟಕ ಜಾತಕಭಾಣಕಾದಿ,
ತಕ್ಕಗಮಾದಿ ಕುಸಲಾ ಅಪಿ ಬುದ್ಧಿಮನ್ತೋ;
ವತ್ಥುತ್ತಯೇಕಸರಣಾ ಅಪಿ ಪೋರವಗ್ಗಾ,
ಕೋತುಹಲಾ ಸಪದಿ ಸನ್ನಿಪತಿಂಸು ತತ್ಥ.
ರಾಜಾ ತತೋ ಮಹತಿಯ ಪರಿಸಾಯ ಮಜ್ಝೇ,
ಇಚ್ಚಬ್ರುವೀ ಮುನಿವರೋ ಹಿ ಸುಸುಕ್ಕದಾಠೋ;
ದಾಠಾ ಜಿನಸ್ಸ ಯದಿ ಓಸಧಿತಾರಕಾ’ವ,
ಸೇತಾ ಭವೇಯ್ಯ ಕಿಮಯಂ ಮಲಿನಾವಭಾಸಾ.
೩೬೩. ¶
ತಸ್ಮಿಂ ಖಣೇ ದಸನಧಾತು ಮುನಿಸ್ಸರಸ್ಸ,
ಪಕ್ಖೇ ಪಸಾರಿಯ ದುವೇ ವಿಯ ರಾಜಹಂಸೀ;
ವಿತ್ಥಾರಿತಂ’ಸುನಿ ವಹಾ ಗಗನಙ್ಗನಮ್ಹಿ,
ಆವಟ್ಟತೋ ಛವಿ ಜವೇನ ಮುಹುತ್ತಮತ್ತಂ.
ಪಚ್ಚಗ್ಘಮತ್ಥರಣಕಂ ಸಿತಮತ್ಥರಿತ್ವಾ,
ಭದ್ದಾಸನಮ್ಹಿ ವಿನಿಧಾಯ ಮುನಿನ್ದಧಾತುಂ;
ತಂ ಜಾತಿಪುಪ್ಫನಿಕರೇನ ಥಕೇಸಿ ರಾಜಾ,
ವಸ್ಸಚ್ಚಯಮ್ಬುಧರಕೂಟಸಮಪ್ಪಭೇನ.
ಉಗ್ಗಮ್ಮ ಖಿಪ್ಪಮಥ ಧಾತು ಮುನಿಸ್ಸರಸ್ಸ,
ಸಾ ಪುಪ್ಫರಾಸಿಸಿಖರಮ್ಹಿ ಪತಿಟ್ಠಹಿತ್ವಾ;
ರಂಸೀಹಿ ದುದ್ಧಧವಲೇಹಿ ವಿರೋಚಮಾನಾ,
ಸಮ್ಪಸ್ಸತಂ ಅನಿಮಿಸೇ ನಯನೇ ಅಕಾಸಿ.
೩೬೬. ¶
ತಂ ಧಾತುಮಾಸನಗತಮ್ಹಿ ಪತಿಟ್ಠಪೇತ್ವಾ,
ಖೀರೋದಏಣೇಪಟಲಪ್ಪಟಿಮೇ ದುಕುಳೇ;
ಛಾದೇಸಿ ಸಾಟಕಸತೇಹಿ ಮಹಾರಹೇಹಿ,
ಭಿಯ್ಯೋ’ಪಿ ಸೋ ಉಪಪರಿಕ್ಖಿತುಕಾಮತಾಯ.
ಅಬ್ಭುಗ್ಗತಾ ಸಪದಿ ವತ್ಥಸತಾನಿ ಭೇತ್ವಾ,
ಸೇತಮ್ಬುದೋದರವಿನಿಗ್ಗತಚನ್ದಿಮಾ’ವ;
ಠತ್ವಾನ ಸಾ ಉಪರಿ ತೇಸಮಭಾಸಯಿತ್ಥ,
ರಂಸೀಹಿ ಕುನ್ದವಿಸದೇಹಿ ದಿಸಾ ಸಮನ್ತಾ
ತಸ್ಮಿಂ ಖಣೇ ವಸುಮತೀ ಸಹ ಭೂಧರೇಹಿ,
ಗಜ್ಜಿತ್ಥ ಸಾಧುವಚನಂ’ವ ಸಮುಗ್ಗಿರನ್ತೀ;
ತಂ ಅಬ್ಭೂತಂ ವಿಯ ಸಮೇಕ್ಖಿತುಮಮ್ಬುರಾಸಿ,
ಸೋ ನಿಚ್ಚಲೋ ಅಭವಿ ಸನ್ತತರಙ್ಗಬಾಹು.
೩೬೯. ¶
ಮತ್ತೇಭಕಮ್ಪಿತಸುಪುಪಫಿತಸಾಲತೋ’ವ,
ಭಸ್ಸಿಂಸು ದಿಬ್ಬಕುಸುಮಾನಿ’ಪಿ ಅನ್ತಳಿಕ್ಖಾ;
ನಚ್ಚೇಸು ಚಾತುರಿಯಯಮಚ್ಛರಿಯಂ ಜನಸ್ಸ,
ಸನ್ದಸ್ಸಯಿಂಸು ಗಗನೇ ಸುರಸುನ್ದರೀ’ಪಿ.
ಆನನ್ದಸಞ್ಜನಿತತಾರರವಾಭಿರಾಮಂ,
ಗಾಯಿಂಸು ಗೀತಮಮತಾಸನಗಾಯಕಾ’ಪಿ;
ಮುಞ್ಚಿಂಸು ದಿಬ್ಬತುರಿಯಾನಿ’ಪಿ ವಾದಿತಾನಿ,
ಗಮ್ಭೀರಮುಚ್ಚಮಧುರಂ ದ್ವಿಗುಣಂ ನಿನಾದಂ.
ಸಂಸಿಬ್ಬಿತಂ ರಜತರಜ್ಜುಸತಾನುಕಾರೀ,
ಧಾರಾಸತೇಹಿ ವಸುಧಮ್ಬರಮಮ್ಬುದೇನ;
ಸಬ್ಬಾ ದಿಸಾ ಜಲದಕುಟಮಹಗಘಿಯೇಸು,
ದಿತ್ತಾಚಿರಜ್ಜುತಿಪದೀಪಸತಾವಭಾಸಾ.
೩೭೨. ¶
ಆಧುಯಮಾನ ಮಲಯಾವಲ ಕಾನನನ್ತೋ,
ಸಮಥುಲ್ಲ ಪುಪ್ಫಜ ಪರಾಗಹರಾಭಿಹಾರಿ;
ಸೇದೋದ ಬಿನ್ದುಗಣ ಸಂಹರಣಪ್ಪವೀಣೋ,
ಮನ್ದಂ ಅವಾಸಿ ಸಿಸಿರೋ ಅಪಿ ಗನ್ಧವಾಹೋ.
ರಾಜಾ ತಮಬ್ಭುತಮವೇಕ್ಖಿಯ ಪಾಟಿಹೀರಂ,
ಲೋಕುಸ್ಸವಂ ಬಹುತರಞ್ಚ ಅದಿಟ್ಠಪುಬ್ಬಂ;
ಚಿಪ್ಫಾರಿತಕ್ಖಿಯುಗಲೋ ಪರಮಪ್ಪಮೋದಾ,
ಪೂಜಂ ಕರಿತ್ಥ ಮಹತಿಂ ರತನಾದಿಕೇಹಿ.
ಸೋ ಧಾತುಮತ್ತಸಿರಸಾ’ಥ ಸಮುಬ್ಬಹನ್ತೋ,
ಠತ್ವಾ ಸಮುಸ್ಸಿತ ಸಿತಾತಪವಾರಣಮ್ಹಿ;
ಚಿತ್ತತ್ಥರೇ ರಥವರೇ ಸಿತವಾಜಿಯುತ್ತೇ,
ಲಕ್ಖಿನಿಧಾನನುರಾಧಪುರಂ ಪವೇಕ್ಖಿ.
೩೭೫. ¶
ದೇವಿನ್ದ ಮನ್ದಿರ ಸಮೇ ಸಮಲಙ್ಕತಮ್ಹಿ,
ರಾಜಾ ಸಕಮ್ಹಿ ಭವನೇ ಅತುಲಾನುಭಾವೋ;
ಸೀಹಾಸನೇ ಪಟಿಕ ಕೋಜವ ಸನ್ಥತಮ್ಹಿ,
ಧಾತುಂ ಠಪೇಸಿ ಮುನಿನೋ ಸಸಿತಾತಪತ್ತೇ.
ಅನ್ತೋ’ವ ಭುಮಿಪತಿ ಧಾತುಘರಂ ಮಹಗ್ಘಂ,
ಕತ್ವಾನ ತತ್ಥ ವಿನಿಧಾಯ ಮುನಿನ್ದಧಾತುಂ;
ಸಮ್ಪೂಜಯಿತ್ಥ ವಿವಿಧೇಹಿ ಉಪಾಯನೇಹಿ,
ರತ್ತೀನ್ದಿವಂ ತಿದಿವಮೋಕ್ಖ ಸುಖಾಭಿಕಙ್ಖೀ.
ತೇಸಞ್ಚ ಜಾನಿಪತಿಕಾನಮುಭಿನ್ನಮೇವ,
ತುಟ್ಠೋ ಬಹೂನಿ ರತನಾಭರಣಾದಿಕಾನಿ;
ಗಾಮೇಚ ಇಸ್ಸರಕುಲೇಕ ನೀವಾಸಭುತೇ,
ದತ್ವಾನ ಸಙ್ಗಹಮಕಾಸಿ ತಿಸೀಹಳಿನ್ದೋ.
೩೭೮. ¶
ಸಙ್ಗಮ್ಮ ಜಾನಪದ ನೇಗಮ ನಾಗರಾದೀ,
ಉಕ್ಕಣ್ಠಿತಾ ಸುಗತಧಾತುಮಪಸ್ಸಮಾನಾ;
ಲೋಕುತ್ತಮಸ್ಸ ಚರಿತಾನಿ ಅಭಿತ್ಥವನ್ತಾ,
ಉಗ್ಘೋಸಯಿಂಸು ಧರಣೀಪತಿಸನ್ನಿಧಾನಿ;
ಧಮ್ಮಿಸ್ಸರೋ ಸಕಲಲೋಕಹಿತಾಯ ಲೋಕೇ,
ಜಾಯಿತ್ಥ ಸಬ್ಬಜನತಾಹಿತಮಾಚರಿತ್ಥ;
ವಿತ್ಥಾರಿತಾ ಬಹುಜನಸ್ಸ ಹಿತಾಯ ಧಾತು,
ಇಚ್ಛಾಮ ಧಾತುಮಭಿಪೂಜಯಿತುಂ ಮಯಮ್ಪಿ.
ಸೋ ಸನ್ನಿಪಾತಿಯ ಮಹೀಪತಿ ಭಿಕ್ಖುಸಙ್ಘ,
ಮಾರಾಮವಾಸಿಮನುರಾಧಪುರೋಪಕಣ್ಠೇ;
ಅಜ್ಝಾಸಯಂ ತಮಭಿವೇದಯಿ ಸತ್ಥುಧಾತು,
ಪೂಜಾಯ ಸನ್ನಿಪತಿತಸ್ಸ ಮಹಾಜನಸ್ಸ.
೩೮೧. ¶
ಥೇರೋ ತಹಿಂ ಮಹತಿ ಭಿಕ್ಖುಗಣೇ ಪನೇಕೋ,
ಮೇಧಾಬಲೇನ ಅಸಮೋ ಕರುಣಾಧಿವಾಸೋ;
ಏವಂ ತಿಸೀಹಳಪತಿಸ್ಸ ಮಹಾಮತಿಸ್ಸ,
ಲೋಕತ್ಥಚಾರಚತುರಸ್ಸ ನಿವೇದಯಿತ್ಥ.
ಯೋ ಆಚರೇಯ್ಯ ಅನುಜೀವಿಜನಸ್ಸ ಅತ್ಥಂ,
ಏಸೋ ಭವೇ’ನುಚರಿತೋ ಮಹತಂ ಸಭಾವೋ;
ಧಾತುಂ ವಸನ್ತಸಮಯೇ ಬಹಿ ನೀಹರಿತ್ವಾ,
ದಸ್ಸೇಹಿ ಪುಞ್ಞಮಭಿಪತ್ಥಯತಂ ಜನಾನಂ.
ಸುತ್ವಾನ ಸಂಯಮಿವರಸ್ಸ ಸುಭಾಸಿತಾನಿ,
ಪುಚ್ಛಿತ್ಥ ಸೋ ನರವರೋ ಪುನ ಭಿಕ್ಖುಸಙ್ಘಂ;
ಧಾತುಂ ನಮಸ್ಸಿತುಮನೇನ ಮಹಾಜನೇನ,
ಠಾನಂ ಕಿಮೇತ್ಥ ರಮಣೀಯತರಂ ಸಿಯಾ’ತಿ.
೩೮೪. ¶
ಸಬ್ಬೇ’ಪಿ ತೇ ಅಥ ನಿಕಾಯ ನಿವಾಸಿ ಭಿಕ್ಖೂ,
ಠಾನಂ ಸಕಂ ಸಕಮ ವಣ್ಣಯುಮಾದರೇನ;
ಅಞ್ಞೋಞ್ಞಭಿನ್ನವಚನೇಸು ಚ ತೇಸು ರಾಜಾ,
ನೇವಾಭಿನನ್ದಿ ನ ಪಟಿಕ್ಖಿಪಿ ಕಿಞ್ಚಿವಾಕ್ಯಂ.
ಮಜ್ಝತ್ತತಾನುಗತಮಾನಸತಾಯ ಕಿನ್ತು,
ರಾಜಾ ಅವೋ ಚ ಪುನ ಭಿಕ್ಖುಗಣಸ್ಸ ಮಜ್ಝೇ;
ಅತ್ತಾನುರೂಪಮಯಮೇವ ಮುನಿನ್ದಧಾತು,
ಠಾನಂ ಖಣೇನ ಸಯಮೇವ ಗಮಿಸ್ಸತೀತಿ.
ರಾಜಾ ತತೋ ಭವನಮೇವ ಸಕಂ ಉಪೇಚ್ಚ,
ಧಾತುಪ್ಪಣಾಮಮಭಿಪತ್ಥಯತಂ ಜನಾನಂ;
ಖಿಪ್ಪಂಮುಖಮ್ಬುಜವನಾನೀ ವಿಕಾಸಯನ್ತೋ,
ಸಜ್ಜೇತುಮಾಹ ನಗರಞ್ಚ ವಿಹಾರಮಗ್ಗಂ.
ಸಮ್ಮಜ್ಜಿತಾ ಸಲಿಲ ಸೇವನ ಸನ್ತಧೂಲೀ,
ರಚ್ಛಾ ತದಾ’ಸಿ ಪುಲಿನತ್ಥರಣಾಭಿರಾಮಾ;
ಉಸ್ಸಾಪಿತಾನಿ ಕಣಕಾದಿವಿಚಿತ್ತಿತಾನಿ,
ವ್ಯಗ್ಘಾದಿ ರೂಪಖಚಿತಾನಿ ಚ ತೋರಣಾನಿ.
೩೮೮. ¶
ಛಾಯಾ ನಿವಾರಿತ ವಿರೋಚನ ರಂಸಿತಾಪಾ,
ನಚ್ಚಂ’ವ ದಸ್ಸಯತಿ ವಾತಧೂತಾ ಧಜಾಲಿ;
ವೀಥಿ ವಸನ್ತವನರಾಜಿ ಸಮಾನವಣ್ಣಾ,
ಜಾತಾ ಸುಜಾತಕದಲೀತರುಮಾಲಿಕಾಹಿ.
ಸಂಸೂಚಯನ್ತಿ ಚ ಸತಂ ನವಪುಣ್ಣಕುಮ್ಭಾ,
ಸಗ್ಗಾಪವಗ್ಗಸುಖಮಿಚ್ಛಿತಮಿಜ್ಝತೀತಿ;
ಕಪ್ಪುರಸಾರತಗರಾಗರುಸಮ್ಭವೇಹಿ,
ಧೂಪೇಹಿ ದುದ್ದಿನಮಥೋ ಸುದಿನಂ ಅಹೋಸಿ.
ಓಲಮ್ಬಮಾನಸಿತಮುತ್ತಕಜಾಲಕಾನಿ,
ಸಜ್ಜಾಪಿತಾನಿ ವಿವಿಧಾನಿ ಚ ಮಣ್ಡಪಾನಿ;
ಸಮ್ಪಾದಿತಾನಿ ಚ ತಹಿಂ ಕುಸುಮಗಘಿಕಾನಿ,
ಆಮೋದ ಲುದ್ಧ ಮಧುಪಾವಲಿ ಕುಜಿತಾನಿ.
೩೯೧. ¶
ಗಚ್ಛಿಂಸು ಕೇಚಿ ಗಹಿತುಸ್ಸವ ವೇಸಸೋಭಾ,
ಏಕೇ ಸಮುಗ್ಗಪರಿಪುರಿತಪುಪ್ಫಹತ್ಥಾ;
ಅಞ್ಞೇ ಜನಾ ಸುರಭಿಚುಣ್ಣಭರಂ ವಹನ್ತಾ,
ತತ್ಥೇತರೇ ಧತವಿಚಿತ್ತಮಹಾತಪತ್ತಾ.
ಲಙ್ಕಿಸ್ಸರೋ’ಥ ಸಸಿಪಣ್ಡರವಾಜಿಯುತ್ತೇ,
ಉಜ್ಜೋತಿತೇ ರಥವರೇ ರತನಪ್ಪಭಾಹಿ;
ಧಾತುಂ ತಿಲೋಕತಿಲಕಸ್ಸ ಪತಿಟ್ಠಪೇತ್ವಾ,
ಏತಂ ಅವೋಚ ವಚನಂ ಪಣಿಪಾತಪುಬ್ಬಂ.
ಸಮ್ಬೋಧಿಯಾ ಇವ ಮುನಿಸ್ಸರ ಬೋಧಿಮಣ್ಡಂ,
ಗಣ್ಡಮ್ಬರುಕ್ಖಮಿವ ತಿತ್ಥಿಯಮದ್ದನಾಯ;
ಧಮ್ಮಞ್ಚ ಸಂವಿಭಜಿತುಂ ಮಿಗದಾಯಮಜ್ಜ,
ಪೂಜಾನುರೂಪಮುಪಗಚ್ಛ ಸಯಂ ಪದೇಸಂ.
೩೯೪. ¶
ರಾಜಾ ತತೋ ಸಮುಚಿತಾಚರಣೇಸು ದಕ್ಖೋ,
ವಿಸ್ಸಜ್ಜಿ ಫುಸ್ಸರಥಮಟ್ಠಿತಸಾರಥಿಂ ತಂ;
ಪಚ್ಛಾ ಸಯಂ ಮಹತಿಯಾ ಪರಿಸಾಯ ಸದ್ಧಿಂ,
ಪೂಜಾವಿಸೇಸಮಸಮಂ ಅಗಮಾ ಕರೋನ್ತೋ.
ಉಕ್ಕುಟ್ಠಿನಾದವಿಸರೇನ ಮಹಾಜನಸ್ಸ,
ಹೇಸಾರವೇನ ವಿಸಟೇನ ತುರಙ್ಗಮಾನಂ;
ಭೇರೀರವೇನ ಮಹತಾ ಕರಿ ಗಜ್ಜಿತೇನ,
ಉದ್ದಾಮಸಾಗರ ಸಮಂ ನಗರಂ ಅಹೋಸಿ.
ಆಮೋದಿತಾ ಉಭಯವೀಥಿಗತಾ ಕುಲಿತ್ಥಿ,
ವಾತಾಯನೇಹಿ ಕನಕಾಭರಣೇ ಖಿಪಿಂಸು;
ಸಬ್ಬತ್ಥಕಂ ಕುಸುಮವಸ್ಸಮವಸ್ಸಯಿಂಸು,
ಚೇಲಾನಿಚೇವ ಭಮಯಿಂಸುನಿಜುತ್ತಮಙ್ಗೇ.
೩೯೭. ¶
ಪಾಚೀನಗೋಪುರಸಮೀಪಮುಪಾಗತಮ್ಹಿ,
ತಸ್ಮಿಂ ರಥೇ ಜಲಧಿಪಿಟ್ಠಿಗತೇ’ವ ಪೋತೇ;
ತುಟ್ಠಾ ತಹಿಂ ಯತಿಗಣಾ ಮನುಜಾ ಚ ಸಬ್ಬೇ,
ಸಮ್ಪುಜಯಿಂಸು ವಿವಿಧೇಹಿ ಉಪಾಯನೇಹಿ.
ಕತ್ವಾ ಪದಕ್ಖಿಣಮಥೋ ಪುರಮುತ್ತರೇನ,
ದ್ವಾರೇನ ಸೋ ರಥವರೋ ಬಹಿ ನಿಕ್ಖಮಿತ್ವಾ;
ಠಾನೇ ಮಹಿನ್ದಮಿನುಧಮ್ಮಕಥಾಪವಿತ್ತೇ,
ಅಟ್ಠಾಸಿ ತಿತ್ಥಗಮಿತಾ ಇವ ಭಣ್ಡನಾವಾ.
ಠಾನೇ ತಹಿಂ ದಸನಧಾತುವರಂ ಜಿನಸ್ಸ,
ಲಙ್ಕಿಸ್ಸರೋ ರತನವಿತ್ತಕರಣ್ಡಗಬ್ಭಾ;
ಸಞ್ಝಾಘನಾ ಇವ ವಿಧುಂ ಬಹಿನೀಹರಿತ್ವಾ,
ದಸ್ಸೇಸಿ ಜಾನಪದ ನೇಗಮ ನಾಗರಾನಂ.
೪೦೦. ¶
ತಸ್ಮಿಂ ಜನೇ ಸಪದಿ ಆಭರಣಾದಿವಸ್ಸ,
ಮಚ್ಚನ್ತಪೀತಿಭರಿತೇ ಅಭಿವಸ್ಸಯನ್ತೇ;
ಸಾನನ್ದಿವನ್ದಿಜನಮಙ್ಗಲಗೀತಕೇಹಿ,
ಸಮ್ಪಾದಿತೇಸು ಮುಖರೇಸು ದಿಸಾಮುಖೇಸು.
ಹತ್ಥಾರವಿನ್ದನಿವಹೇಸು ಮಹಾಜನಸ್ಸ,
ಚನ್ದೋದಯೇ’ಚ ಮುಕುಲತ್ತನಮಾಗತೇಸು;
ಬ್ರಹ್ಮಾಮರಾದಿಜನಿತಾಮಿತ ಸಾಧುವಾದೇ,
ತಾರಾಪಥಮ್ಹಿ ಭುವನೋದರ ಮೋತ್ಥರನ್ತೇ.
ಸಾದನ್ತಧಾತು ಸಸಿಖಣ್ಡ ಸಮಾನವಣ್ಣಾ,
ರಂಸೀಹಿ ಕುನ್ದ ನವಚನ್ದನ ಪಣ್ಡರೇಹಿ;
ಪಾಸಾದ ಗೋಪುರ ಸಿಲುಚ್ಚಯ ಪಾದಪಾದಿಂ,
ನಿದ್ಧೋತ ರೂಪಿಯಮಯಂ’ವ ಅಕಾ ಖಣೇನ.
ತಂ ಪಾಟಿಹಾರಿಯ ಮಚಿನ್ತಿಯ ಮಚ್ಚುಳಾರಂ,
ದಿಸ್ವಾನ ಕೇ ತಹೀಮಹೇಸು ಮಹಟ್ಠಲೋಮಾ;
ಕೇವಾ’ನಯುಂ ಸಕಸಕಾಭರಣಾನಿ ಗೇಹಂ,
ಕೇವಾ ನ ಅತ್ತಪಟಿಲಾಭಮವಣ್ಣಯಿಂಸು.
೪೦೪. ¶
ಕೇ ನೋಜಹಿಂಸು ಸಕದಿಟ್ಠಿಮಲಾನುಬದ್ಧಂ,
ಕೇ ವಾ ನ ಬುದ್ಧಮಹಿಮಂ ಅಭಿಪತ್ಥಯಿಂಸು;
ಕೇ ನಾಮ ಮಚ್ಛರಿಯಪಾಸವಸಾ ಅಹೇಸುಂ,
ವತ್ಥುತ್ತಯಞ್ಚ ಸರಣಂ ನಗಮಿಂಸು ಕೇವಾ.
ಲಙ್ಕಿಸ್ಸರೋ’ಪಿ ನವಲಕ್ಖ ಪರಿಬ್ಬಯೇನ,
ಸಬ್ಬಞ್ಞುಧಾತುಮತುಲಂ ಅಭಿಪೂಜಯಿತ್ವಾ;
ತಂ ದನ್ತಧಾತುಭವನಂ ಪುನ ವಡ್ಢಯಿತ್ವಾ,
ಅನ್ತೇಪುರಮ್ಹಿ ಪಟಿವಾಸರಮಚ್ಚಯಿತ್ಥ.
ಧಾತುಂ ವಿಹಾರಮಹಯುತ್ತರಮೇವ ನೇತ್ವಾ,
ಪೂಜಂ ವಿಧಾತುಮನುವಚ್ಛರಮೇವರೂಪಂ;
ರಾಜಾ’ಥ ಕಿತ್ತಿಸಿರಿಮೇಘಸಮವ್ಹಯೋ ಸೋ,
ವಾರಿತ್ತಲೇಖ ಮಭಿಲೇಖಯಿ ಸಚ್ಚಸನ್ಧೋ.
೪೦೭. ¶
ವಾರಿತ್ತಮೇತಮಿತರೇ’ಪಿ ಪವತ್ತಯನ್ತಾ,
ತೇ ಬುದ್ಧದಾಸಪಮುಖಾ ವಸುಧಾಧಿನಾಥಾ;
ಸದ್ಧಾದಯಾಧಿಕಗುಣಾಭರಣಾಭಿರಾಮಾ,
ತಂ ಸಕ್ಕರಿಂಸು ಬಹುಧಾ ಜಿನದನ್ತಧಾತುಂ.
ಸತ್ಥಾರಾ ಸಮ್ಭತತ್ಥಂ ಪುರಿಮತರಭವೇ ಸಮ್ಪಜಾನಂ ಪಜಾನಂ,
ಸಮ್ಬೋಧಿಂ ತಸ್ಸ ಸಬ್ಬಾಸವವಿಗಮಕರಿಂ ಸದ್ದಹನ್ತೋ’ದಹನ್ತೋ;
ಸೋತಂ ತಸ್ಸ’ಗ್ಗಧಮ್ಮೇ ನಿಪುಣಮತಿ ಸತಂ ಸಙ್ಗಮೇಸಙ್ಗಮೇಸಂ,
ನಿಬ್ಬಾಣಂ ಸನ್ತಮಿಚ್ಛೇ ತಿಭವಭಯಪರಿಚ್ಚಾಗಹೇತುಂ ಗಹೇತುಂ.
ಪಞ್ಚಮೋ ಪರಿಚ್ಛೇದೋ.
೪೦೯. ¶
ಯೋ ಚನ್ದಗೋಮಿ ರಚಿತೇವರಸದ್ದಸತ್ಥೇ,
ಟೀಕಂ ಪಸತ್ಥಮಕರಿತ್ಥ ಚ ಪಞ್ಚಿಕಾಯ;
ಬುದ್ಧಪ್ಪಭಾವಜನ ನಿಂಚ ಅಕಾ ಸಮನ್ತ,
ಪಾಸಾದಿಕಾಯ ವಿನಯಟ್ಠಕಥಾಯ ಟೀಕಂ.
ಅಙ್ಗುತ್ತರಾಗಮವರಟ್ಠಕಥಾಯ ಟೀಕಂ,
ಸಮ್ಮೋಭವಿಬ್ಭಮ ವಿಘಾತಕರಿಂ ಅಕಾಸಿ;
ಅತ್ಥಾಯ ಸಂಯಮಿಗಣಸ್ಸ ಪಧಾನಿಕಸ್ಸ,
ಗನ್ಥಂ ಅಕಾ ವಿನಯಸಙ್ಗಹನಾಮಧೇಯ್ಯಂ.
ಸನ್ತಿನ್ದ್ರಿಯಸ್ಸಪಟಿಪತ್ತಿ ಪರಾಯಣಸ್ಸ,
ಸಲ್ಲೇಖ ವುತ್ತಿ ನಿರತಸ್ಸ ಸಮಾಹಿತಸ್ಸ;
ಅಪ್ಪಿಚ್ಛತಾದಿ ಗುಣಯೋಗ ವಿಭುಸನಸ್ಸ,
ಸಮ್ಬುದ್ಧಸಾಸನಮಹೋದಯಕಾರಣಸ್ಸ.
೪೧೨. ¶
ಸಬ್ಬೇಸುಆಚರಿಯತಂ ಪರಮಂ ಗತಸ್ಸ,
ಸತ್ಥೇಸು ಸಬ್ಬಸಮಯನ್ತರ ಕೋವಿದಸ್ಸ;
ಸಿಸ್ಸೇನಸಾರಿತನುಜಸ್ಸ ಮಹಾದಿಸಾಮಿ.
ಸುದ್ಧನ್ವಯೇನ ಕರುಣಾದಿಗುಣೋದಯೇನ,
ತಕ್ಕಾಗಮಾದಿ ಕುಸಲೇನ ವಿಸಾರದೇನ;
ಸಬ್ಬತ್ಥ ಪತ್ಥಟ ಸುಧಾಕರರಂಸಿಜಾಲ,
ಸಙ್ಕಾಸಕಿತ್ತಿವಿಸರೇನ ಪರಿಕ್ಖಕೇನ.
೪೧೪. ¶
ಸದ್ಧಾಧನೇನ ಸಖಿಲೇನ ಚ ಧಮ್ಮಕಿತ್ತಿ,
ನಾಮೇನ ರಾಜಗರುನಾ ಚರಿಯೇನ ಏಸೋ;
ಸೋತುಪ್ಪಸಾದಜನನೋ ಜಿನದನ್ತಧಾತು,
ವಂಸೋ ಕತೋ ನಿಖಿಲದಸ್ಸಿಪಭಾವದೀಪೋ.
ಧಮ್ಮೋ ಪವತ್ತತು ಚಿರಾಯ ಮುನಿಸ್ಸರಸ್ಸ,
ಧಮ್ಮೇ ಠಿತಾ ವಸುಮತೀಪತಯೋ ಭವನ್ತು;
ಕಾಲೇ ಪವಸ್ಸತು ಘನೋ ನಿಖಿಲಾ ಪಜಾ’ಪಿ,
ಅಞ್ಞೋಞ್ಞಮೇತ್ತಿಪಟಿಲಾಭಸುಖಂ ಲಭನ್ತು.