📜

ಧಾತುವಂಸೋ ¶

ನಮೋ ತಸ್ಸ ಭಗವತೋ ಅರಹತೋ ಸಮ್ಮಾಸಮ್ಬುದ್ಧಸ್ಸ

೧. ತಥಾಗತಸ್ಸಾಗಮನಕಥಾ

ಸಮ್ಬುದ್ಧಮತುಲಂ ಸುದ್ಧಂ ಧಮ್ಮಂ ಸಙ್ಘಂ ಅನುತ್ತರಂ,

ನಮಸ್ಸಿತ್ವಾ ಪವಕ್ಖಾಮಿ ಧಾತುವಂಸಪ್ಪಕಾಸನಂ;

ತಿಕ್ಖತ್ತುಮಗಮಾ ನಾಥೋ ಲಙ್ಕಾದೀಪಂ ಮನೋರಮಂ,

ಸತ್ತಾನಂ ಹಿತಮಿಚ್ಛನ್ತೋ ಸಾಸನಸ್ಸ ಚಿರಟ್ಠಿತಿಂ.

ತತ್ಥ ತಿಕ್ಖತ್ತುಮಗಮಾ ನಾಥೋ’ತಿ ಅನಮತಗ್ಗೇ ಸಂಸಾರವಟ್ಟೇ ಪರಿನಾಮೇತ್ವಾ ಅಪ್ಪತಿಸರಣಭಾವಪ್ಪತ್ತಾನಂ ಲೋಕಿಯಲೋಕುತ್ತರಸುಖನಿಪ್ಫಾದನಭಾವೇನ ನಾಥೋ ಪತಿಸರಣ ಭೂತೋ ಭಗವಾ ಬುದ್ಧಧಮ್ಮಸಙ್ಘರತನತ್ತಯಮಗ್ಗಂ ಆಚಿಕ್ಖನ್ತೋ ಲಙ್ಕಾದೀಪಂ ತಿಕ್ಖತ್ತುಂ ಗತೋ. ತತ್ಥ ಪಠಮಗಮನೇ ತಾವ ಬೋಧಿಮಣ್ಡಂ ಆರುಯ್ಹ ಪುರತ್ಥೀಮಾಭಿಮುಖೋ ನಿಸೀದಿತ್ವಾ ಸೂರಿಯೇ ಅನತ್ಥಮಿತೇಯೇವ ಮಾರಬಲಂ ವಿಧಮೇತ್ವಾ, ಪಠಮಯಾಮೇ ಪುಬ್ಬೇನಿವಾಸಞಾಣಂ ಅನುಸ್ಸರಿತ್ವಾ ಮಜ್ಝಿಮಯಾಮೇ ಚುತುಪಪಾತಞಾಣಂ ಪತ್ವಾ ಪಚ್ಛಿಮಯಾಮಾವಸಾನೇ ಪಚ್ಚಯಾಕಾರೇ ಞಾಣಂ ಓತಾರೇತ್ವಾ ದಸಬಲಚತುವೇಸಾರಜ್ಜಾದಿ ಗುಣಪತಿಮಣ್ಡಿತಂ ಸಬ್ಬಞ್ಞುತಞಾಣಂ ಪಟಿವಿಜ್ಝಿತ್ವಾ ಬೋಧಿಮಣ್ಡಪ್ಪದೇಸೇ ಅನುಕ್ಕಮೇನ ಸತ್ತಸತ್ತಾಹಂ ವೀತಿನಾಮೇತ್ವಾ ಅಟ್ಠಮೇ ಸತ್ತಾಹೇ ಅಜಪಾಲನಿಗ್ರೋಧಮೂಲೇ ನಿಸಿನ್ನೋ ಧಮ್ಮಗಮ್ಭಿರತಂ ಪಚ್ಚವೇಕ್ಖನೇನ ಅಪ್ಪೋಸ್ಸುಕ್ಕತಂ ಆಪಜ್ಜಮಾನೋ ದಸಸಹಸ್ಸ ಬ್ರಹ್ಮಪರಿವಾರೇನ ಸಹಮ್ಪತಿಮಹಾಬ್ರಹ್ಮುನಾ ಆಯಾಚಿತಧಮ್ಮದೇಸನೋ ಹುತ್ವಾ ¶ ಬುದ್ಧಚಕ್ಖುನಾ ಲೋಕಂ ಓಲೋಕೇನ್ತೋ ಪಞ್ಚವಗ್ಗಿಯಾನಂ ಭಿಕ್ಖುನಂ ಬಹೂಪಕಾರಕಂ ಅನುಸ್ಸರಿತ್ವಾ ಉಟ್ಠಾಯಾಸನಾ ಕಾಸೀನಂ ಪುರಂ ಗನ್ತ್ವಾ ಅಞ್ಞಾಕೋಣಡಞ್ಞಪ್ಪಮುಖೇ ಅಟ್ಠಾರಸ ಬ್ರಹ್ಮಕೋಟಿಯೋ ಅಮತಂ ಪಾಯೇನ್ತೋ ಧಮ್ಮಚಕ್ಕಂ ಪವತ್ತೇತ್ವಾ ಪಕ್ಖಸ್ಸ ಪಞ್ಚಮಿಯಂ ಪಞ್ಚವಗ್ಗಿಯೇ ಸಬ್ಬೇಪಿ ತೇ ಅರಹನ್ತೇ ಪತಿಟ್ಠಾಪೇತ್ವಾ ತಂ ದಿವಸಮೇವ ಯಸಕುಲಪುತ್ತಸ್ಸ ರತ್ತಿಭಾಗೇ ಸೋತಾಪತ್ತಿಫಲಂ ದತ್ವಾ ಪುನದಿವಸೇ ಅರಹನ್ತಂ ದತ್ವಾ ತಸ್ಸ ಸಹಾಯಕೇ ಚತುಪಞ್ಞಾಸಜನೇ ಅರಹನ್ತಂ ಪಾಪೇತ್ವಾ ಏವಂ ಲೋಕೇ ಏಕಸಟ್ಠಿಯಾ ಅರಹನ್ತೇಸು ಜಾತೇಸು ವುತ್ಥವಸ್ಸೋ ಪವಾರೇತ್ವಾ, ‘ಚರಥ ಭಿಕ್ಖವೇ ಚಾರಿಕ’ ನ್ತಿ ಭಿಕ್ಖು ದಿಸಾಸು ಪೇಸೇತ್ವಾ ಸಯಂ ಉರುವೇಲಂ ಗಚ್ಛನ್ತೋ ಅನ್ತರಾಮಗ್ಗೇ ಕಪ್ಪಾಸಿಕವನಸಣ್ಡೇ ಭದ್ದವಗ್ಗಿಯೇ ಕುಮಾರೇ ತಿಂಸಜನೇ ವಿನೇತ್ವಾ ಏಹಿಭಿಕ್ಖುಭಾವೇನ ಪಬ್ಬಾಜೇತ್ವಾ ಉರುವೇಲಂ ಗನ್ತ್ವಾ ಅಡ್ಢುಡ್ಢಾನಿ ಪಾಟಿಹಾರಿಯಸಹಸ್ಸಾನಿ ದಸ್ಸೇನ್ತೋ ಉರುವೇಲಕಸ್ಸಪಾದಯೋ ಸಹಸ್ಸಜಟಿಲಪರಿವಾರೇ ತೇಭಾತಿಕಜಟಿಲೇ ವಿನೇನ್ತೋ ತತ್ಥೇವ ವಿಹಾಸಿ. ಅಪರಭಾಗೇ ಅಙ್ಗಮಗಧರಟ್ಠವಾಸಿನೋ ಉರುವೇಲಕಸ್ಸಪಸ್ಸ ಮಹಾಯಞ್ಞಂ ಉಪಟ್ಠಾಪೇಸುಂ. ಸೋ ಪನ ಇಚ್ಛಾಚಾರಾಭಿಭೂತೋ ಚಿನ್ತೇಸಿ? ‘‘ಸಚಾಯಂ ಮಹಾಸಮಣೋ ಇಮಸ್ಸ ಸಮಾಗಮಸ್ಸ ಮಜ್ಝೇ ಪಾಟಿಹಾರಿಯಂ ಕರೇಯ್ಯ ಲಾಭಸಕ್ಕಾರೋ ಮೇ ಪರಿಹಾಯಿಸ್ಸತಿ’’ತಿ. ತಸ್ಸೇವಂ ಪವತ್ತಅಜ್ಝಾಸಯಂ ಞತ್ವಾ ಪಾತೋವ ಉತ್ತರಕುರುತೋ ಭಿಕ್ಖಂ ಆಹರಿತ್ವಾ ಅನೋತತ್ತೇ ಆಹಾರಂ ಪರಿಭುಞ್ಜಿತ್ವಾ ಸಾಯನ್ಹ ಸಮಯೇ ಫುಸ್ಸಪುಣ್ಣಮೀಉಪೋಸಥದಿವಸೇ ಲಙ್ಕಾದೀಪಸ್ಸತ್ಥಾಯ ಲಙ್ಕಾದೀಪಮುಪಾಗಮಿ.

ತಸ್ಸ ಪನ ದೀಪಸ್ಸ ಮಹಾಗಙ್ಗಾಯ ದಕ್ಖಿಣಪಸ್ಸೇ ಆಯಾಮತೋ ತಿಯೋಜನೇ ಪುಥುಲತೋ ಏಕಯೋಜನಪ್ಪಮಾಣೇ ಮಹಾನಾಗವನುಯ್ಯಾನೇ ಯಕ್ಖಸಮಾಗಮಸ್ಸ ಮಜ್ಝೇ ತಸ್ಸ ಉಪರಿ ಮಹಿಯಙ್ಗಣಥೂಪಸ್ಸ ಪತಿಟ್ಠಾನಟ್ಠಾನೇ ಆಕಾಸೇಯೇವ ಠೀತೋ ವುಟ್ಠಿವಾತನ್ಧಕಾರಂ ದಸ್ಸೇತ್ವಾ ತೇಸಂ ಭಯಂ ಉಪ್ಪಾದೇಸಿ. ತೇ ಭಯೇನ ಉಪದ್ದುತಾ ‘‘ಕಸ್ಸ ನು ಖೋ ಇಮಂ ಕಮ್ಮ’’ನ್ತಿ ಇತೋ ಚಿತೋ ಓಲೋಕೇನ್ತೋ ಅದ್ದಸಂಸು ಭಗವನ್ತಂ ಆಕಾಸೇ ನಿಸಿನ್ನಂ. ದಿಸ್ವಾನ ಭಗವನ್ತಂ ಅಭಯಂ ಯಾವಿಂಸು. ತೇಸಂ ಭಗವಾ ಆಹ?

‘‘ಸಚೇ ¶ ತುಮ್ಹೇ ಅಭಯಂ ಇಚ್ಛಥ ಮಯ್ಹಂ ನಿಸಜ್ಜಟ್ಠಾನಸ್ಸ ಓಕಾಸಂ ದೇಥಾ’’ತಿ. ಸಬ್ಬೇಪಿ ತೇ ತಸ್ಸ ನಿಸಜ್ಜಟ್ಠಾನಂ ಅದಂಸು. ಭಗವಾ ನಿಸಜ್ಜಾಯ ಓಕಾಸಂ ಗಹೇತ್ವಾ ತೇಸಂ ಭಯಂ ವಿನೋದೇತ್ವಾ ತೇಹಿ ದಿನ್ನೇ ಭುಮಿಭಾಗೇ ಚಮ್ಮಖಣ್ಡಂ ಪತ್ಥರಿತ್ವಾ ನಿಸೀದಿ. ನಿಸಿನ್ನೋವ ಪನ ಭಗವಾ ಚಮ್ಮಖಣ್ಡಂ ಪಸಾರೇಸಿ. ತೇ ಯಕ್ಖಾ ಭೀತತಸಿತಾ ಅಞ್ಞತ್ಥ ಗನ್ತುಂ ಅಸಹಮಾನಾ ಸಮನ್ತತೋ ಸಾಗರತೀರೇ ರಾಸಿಭೂತಾ ಅಹೇಸುಂ. ಸತ್ಥಾ ಗಿರಿದೀಪಂ ಇದ್ಧಾನುಭಾವೇನ ಆಹರಿತ್ವಾ ದಸ್ಸೇಸಿ. ತೇಸು ತತ್ಥ ಪತಿಟ್ಠಿತೇಸು ಪುನ ಯಥಾಟ್ಠಾನೇವ ಠಪೇತ್ವಾ ಪತ್ಥರಿತಚಮ್ಮಖಣ್ಡಮ್ಪಿ ಸಂಖಿಪಿ. ತಸ್ಮಿಂ ಖಣೇ ತತೋ ತತೋ ದೇವಾ ಸನ್ನಿಪತಿಂಸು. ತೇಸಂ ಸಮಾಗಮೇ ಧಮ್ಮಂ ದೇಸೇಸಿ. ಅನೇಕೇಸಂ ಪಾಣಕೋಟೀನಂ ಧಮ್ಮಾಭಿಸಮಯೋ ಅಹೋಸಿ. ಸರಣೇಸು ಚ ಸೀಲೇಸು ಚ ಪತಿಟ್ಠಿತಾ ಅಸಙ್ಖೇಯ್ಯಾ ಅಹೇಸುಂ. ಸುಮನಕೂಟೇ ಪನ ಮಹಾಸುಮನದೇವೋ ಸೋತಾಪತ್ತಿಫಲಂ ಪತ್ವಾ ಅತ್ತನೋ ಪೂಜನೀಯಂ ಭಗವನ್ತಂ ಯಾಚಿ. ಭಗವಾ ತೇನ ಯಾಚಿತೋ ಸೀಸಂ ಪಾಣಿನಾ ಪರಾಮಸಿತ್ವಾ ಕೇಸಧಾತುಂಗಹೇತ್ವಾ ತಸ್ಸ ಅದಾಸಿ. ದತ್ವಾ ಚ ಪನ ಲಙ್ಕಾದೀಪಂ ತಿಕ್ಖತ್ತುಂ ಪದಕ್ಖಿಣಂ ಕತ್ವಾ ಪರಿತ್ತಂ ಕತ್ವಾ ಆರಕ್ಖಂ ಸಂವಿಧಾಯ ಪುನ ಉರುವೇಲಮೇವ ಆಗತೋ. ಸೋ ಪನ ಕೇಸಧಾತುಯೋ ಸುವಣ್ಣಚಙ್ಗೋಟಕೇನಾದಾಯ ಸತ್ಥು ನಿಸಿನ್ನಟ್ಠಾನೇ ನಾನಾರತನೇಹಿ ವಿಚಿತ್ತಂ ಥೂಪಂ ಪತಿಟ್ಠಾಪೇತ್ವಾ ಉಪರಿ ಇನ್ದನೀಲಮಣಿಥೂಪಿಕಾಹಿ ಪಿದಹಿತ್ವಾ ಗನ್ಧಮಾಲಾದೀಹಿ ಪೂಜೇನ್ತೋ ವಿಹಾಸಿ. ಪರಿನಿಬ್ಬುತೇ ಪನ ಭಗವತಿ ಸಾರಿಪುತ್ತಸ್ಸ ಅನ್ತೇವಾಸಿಕೋ ಸರಭೂ ನಾಮ ಥೇರೋ ಖೀಣಾಸವೋ ಚಿತಕತೋ ಇದ್ಧಿಯಾ ತಥಾಗತಸ್ಸ ಗೀವಟ್ಠಿಂ ಆದಾಯ ತಸ್ಮಿಂ ಇನ್ದನೀಲಮಣಿಥೂಪೇ ಪತಿಟ್ಠಾಪೇತ್ವಾ ಮೇಘವಣ್ಣಪಾಸಾಣೇಹಿ ದ್ವಾದಸಹತ್ಥಂ ಥೂಪಂ ಕಾರಾಪೇತ್ವಾ ಗತೋ. ತತೋ ದೇವಾನಮ್ಪಿಯತಿಸ್ಸರಞ್ಞೋ ಭಾತಾ ಚೂಳಾಭಯೋ ನಾಮ ಕುಮಾರೋ ತಮಬ್ಭುತಂ ಚೇತಿಯಂ ದಿಸ್ವಾ ಅಭಿಪ್ಪಸನ್ನೋ ತಂ ಪಟಿಚ್ಛಾದೇನ್ತೋ ತಿಂಸಹತ್ಥಂ ಚೇತಿಯಂ ಪತಿಟ್ಠಾಪೇಸಿ. ಪುನ ದುಟ್ಠಗಾಮಣೀ ಅಭಯಮಹಾರಾಜಾ ತಂ ಪಟಿಚ್ಛಾದೇತ್ವಾ ಅಸೀತಿಹತ್ಥಂ ಕಞ್ಚುಕಚೇತಿಯಂ ಕಾರಾಪೇಸಿ. ಮಹಿಯಙ್ಗಣ ¶ ಥೂಪಸ್ಸ ಪತಿಟ್ಠಾನಾಧಿಕಾರೋ ಏವಂ ವಿತ್ಥಾರತೋ ವೇದಿತಬ್ಬೋ?

ಬೋಧಿಂ ಪತ್ವಾನ ಸಮ್ಬುದ್ಧೋ ಬೋಧಿಮೂಲೇ ನರಾಸಭೋ

ನಿಸೀದಿತ್ವಾನ ಸತ್ತಾಹಂ ಪಾಟಿಹೀರಂ ತತೋ ಅಕಾ.

ತತೋ ಪುಬ್ಬುತ್ತರೇ ಠತ್ವಾ ಪಲ್ಲಙ್ಕಾ ಈಸಕೇ ಜಿನೋ

ಅನಿಮಿಸೇನ ನೇತ್ತೇನ ಸತ್ತಾಹಂ ತಂ ಉದಿಕ್ಖಯಿ.

ಚಙ್ಕಮಿತ್ವಾನ ಸತ್ತಾಹಂ ಚಕ್ಖಮೇ ರತನಾಮಯೇ

ವಿಚಿನಿತ್ವಾ ಜಿನೋ ಧಮ್ಮಂ ವರಂ ಸೋ ರತನಾಘರೇ.

ಅಜಪಾಲಮ್ಹಿ ಸತ್ತಾಹಂ ಅನುಭೋಸಿ ಸಮಾಧಿಜಂ

ರಮ್ಮೇ ಚ ಮುಚಲಿನ್ದಸ್ಮಿಂ ವಿಮುತ್ತಿಸುಖಮುತ್ತಮಂ.

ರಾಜಾಯತನಮೂಲಮ್ಹಿ ಸತ್ತರತ್ತಿನ್ದಿವಂ ವಸೀ

ದನ್ತಪೋನೋದಕಂ ಸಕ್ಕೋ ಅದಾಸಿ ಸತ್ಥುನೋ ತದಾ.

ಚತುಹಿ ಲೋಕಪಾಲೇಹಿ ಸಿಲಾಪತ್ತಂ ಸಮಾಹಟಂ ಚತುಕ್ಕಮೇಕಕಂ ಕತ್ವಾ ಅಧಿಟ್ಠಾನೇನ ನಾಯಕೋ.

ವಾಣಿಜೇಹಿ ತದಾ ದಿನ್ನಂ ಮನ್ಥಞ್ಚ ಮಧುಪಿಣ್ಡಿಕಂ

ತಹಿಂ ಪನ ಗಹೇತ್ವಾನ ಭತ್ತಕಿಚ್ಚಂ ಅಕಾ ಜಿನೋ.

ಗಣ್ಹಿಂಸು ಸರಣಂ ತಸ್ಸ ತಪುಸ್ಸಭಲ್ಲಿಕಾ ಉಭೋ

ಸರಣಂ ಅಗಮುಂ ತೇ ತಂ ಸತ್ಥು ದಿನ್ನಸಿರೋರುಹಾ.

ಗನ್ತ್ವಾನ ತೇ ಸಕಂ ರಟ್ಠಂ ಥೂಪಂ ಕತ್ವಾ ಮನೋರಮಂ

ನಮಸ್ಸಿಂಸು ಚ ಪೂಜೇಸುಂ ದ್ವೇಭಾತಿಕೋಪಾಸಕಾ.

ಇತಿ ಸೋ ಸತ್ತಸತ್ತಾಹಂ ವೀತಿನಾಮೇಸಿ ನಾಯಕೋ?

ಬ್ರಹ್ಮುನಾ ಯಾಚಿತೋ ಸತ್ಥಾ ಧಮ್ಮಚಕ್ಕಂ ಪವತ್ತಿತುಂ.

ತತೋ ಬಾರಾಣಸಿಂ ಗನ್ತ್ವಾ ಧಮ್ಮಚಕ್ಕಂ ಪವತ್ತಯಿ

ಕೋಣ್ಡಞ್ಞೋ ದೇಸಿತೇ ಧಮ್ಮೇ ಸೋತಾಪತ್ತಿಫಲಂ ಲಭಿ.

ಬ್ರಹ್ಮಾನೋ’ಟ್ಠಾರಸಕೋಟೀ ದೇವತಾ ಚ ಅಸಙ್ಖಿಯಾ

ಸೋತಾಪತ್ತಿಫಲಂ ಪತ್ತಾ ಧಮ್ಮಚಕ್ಕೇ ಪವತ್ತಿತೇ.

ಪತ್ತೋ ¶ ಪಾಟಿಪದೇ ವಪ್ಪೋ ಭದ್ದಿಯೋ ದುತಿಯೇ ಫಲಂ,

ತತಿಯೇ ಚ ಮಹಾನಾಮೋ ಅಸ್ಸಜೀ ಚ ಚತುತ್ಥೀಯಂ.

ತೇ ಸಬ್ಬೇ ಸನ್ನಿಪಾತೇತ್ವಾ ಪಞ್ಚ’ಮೇ ಪಞ್ಚವಗ್ಗಿಯೇ,

ಅನತ್ತಸುತ್ತಂ ದೇಸೇತ್ವಾ ಬೋಧಿಯಗ್ಗ ಫಲೇನ ತೇ.

ಬೋಧಿಂ ಪಾಪೇತ್ವಾ ಪಞ್ಚಾಹೇ ಯಸತ್ಥೇರಾದಿಕೇ ಜನೇ,

ತತೋ ಮಗ್ಗನ್ತರೇ ತಿಂಸಕುಮಾರೇ ಭದ್ದವಗ್ಗಿಯೇ.

ಉರುವೇಲಂ ತತೋ ಗನ್ತ್ವಾ ಉರುವೇಲಾಯ ಸಞ್ಞಿತಂ,

ಉರುವೇಲೇನನುಞ್ಞಾತೋ ಉರುವೇಲನಾಗಂ ದಮಿ.

ತಂ ತಂ ದಮೀ ಜಿನೋ ನಾಗಂ ದಮನೇನ ಉರಾದಿಗಂ,

ತಥಾಗತಂ ನಿಮನ್ತಿಂಸು ದಿಸ್ವಾ ತೇ ಪಾಟಿಹಾರಿಯಂ.

ಇಧೇವ ವನಸಣ್ಡಸ್ಮಿಂ ವಿಹಾರೇತ್ವಾ ಮಹಾಮುನೀ,

ಉಪಟ್ಠಾಹಾಮಸೇ ಸಬ್ಬೇ ನಿಚ್ಚಭತ್ತೇನ ತಂ ಮಯಂ.

ಉರುವೇಲಕಸ್ಸಪಸ್ಸ ಮಹಾಯಞ್ಞೇ ಉಪಟ್ಠಿತೇ,

ತಸ್ಸ’ತ್ತನೋ ನಾಗಮನೇ ಇಚ್ಛಾಚಾರಂ ವಿಜಾನಿಯ.

ಉತ್ತರಕುರುತೋ ಭಿಕ್ಖಂ ಹರಿತ್ವಾ ದಿಪದುತ್ತಮೋ,

ಅನೋತತ್ತದಹೇ ಭುತ್ವಾ ಸಾಯನ್ಹ ಸಮಯೇ ಸಯಂ.

ಬೋಧಿತೋ ನವಮೇ ಮಾಸೇ ಫುಸ್ಸಪುಣ್ಣಮಿಯಂ ಜಿನೋ,

ಲಙ್ಕಾದೀಪಂ ವಿಸೋಧೇತುಂ ಲಙ್ಕಾದೀಪಮುಪಾಗಮಿ.

ಯಕ್ಖೇ ದಮಿತ್ವಾ ಸಮ್ಬುದ್ಧೋ ಧಾತುಂ ದತ್ವಾನ ನಾಯಕೋ,

ಗನ್ತ್ವಾನ ಉರುವೇಲಂ ಸೋ ವಸೀ ತತ್ಥ ವನೇ ಜಿನೋ.

ಪಠಮಗಮನಕಥಾ ಸಮತ್ತಾ.

ದುತಿಯಗಮನೇ ಪನ ಬೋಧಿತೋ ಪಞ್ಚಮೇ ವಸ್ಸೇ ಜೇತವನಮಹಾವಿಹಾರೇ ವಸನ್ತೋ ಚೂಳೋದರ’ಮಹೋದರಾನಂ ಮಾತುಲಭಾಗಿನೇಯ್ಯಾನಂ ನಾಗಾನಂ ಮಣಿಪಲ್ಲಙ್ಕಂ ನಿಸ್ಸಾಯ ಸಙ್ಗಾಮಂ ಪಚ್ಚುಪಟ್ಠಿತಂ ದಿಸ್ವಾ ಸಯಂ ಪತ್ತಚೀವರಮಾದಾಯ ಚಿತ್ತಮಾಸಸ್ಸ ಕಾಳಪಕ್ಖೇ ಉಪೋಸಥದಿವಸೇ ¶ ನಾಗದೀಪಂ ಗನ್ತ್ವಾ ತೇಸಂ ಸಙ್ಗಾಮಮಜ್ಝೇ ಆಕಾಸೇ ನಿಸಿನ್ನೋ ಅನ್ಧಕಾರಂ ಅಕಾಸಿ. ತೇ ಅನ್ಧಕಾರಾಭಿಭೂತೇ ಸಮಸ್ಸಾಸೇತ್ವಾ ಆಲೋಕಂ ದಸ್ಸೇತ್ವಾ ಅತ್ತನೋ ಸರಣಭೂತಾನಂ ತೇಸಂ ಸಾಮಗ್ಗಿಕರಣತ್ಥಂ ಫಲಭರಿತರುಕ್ಖಂ ಚಾಲೇನ್ತೋ ವಿಯ ಧಮ್ಮಂ ದೇಸೇಸಿ. ತೇ ಉಭೋಪಿ ಧಮ್ಮೇ ಪಸೀದಿತ್ವಾ ತಮ್ಪಿ ಪಲ್ಲಙ್ಕಂ ತಥಾಗತಸ್ಸ ಅದಂಸು. ಭಗವಾ ಪಲ್ಲಙ್ಕೇ ನಿಸಿನ್ನೋ ದಿಬ್ಬನ್ನಪಾನೇಹಿ ಸನ್ತಪ್ಪಿತೋ ಭತ್ತಾನುಮೋದನಂ ಕತ್ವಾ ಅಸೀತಿಕೋಟಿಯೋ ನಾಗೇ ಸರಣೇಸು ಚ ಸೀಲೇಸು ಚ ಪತಿಟ್ಠಾಪೇಸಿ. ತಸ್ಮಿಂ ಸಮಾಗಮೇ ಮಹೋದರಸ್ಸ ಮಾತುಲೋ ಮಣಿಅಕ್ಖಿಕೋ ನಾಮ ನಾಗರಾಜಾ ಭಗವನ್ತಂ ಪುನ ಕಲ್ಯಾಣಿದೇಸಮಾಗಮನತ್ಥಂ. ಅಯಾಚಿ. ಭಗವಾ ಪನ ತುಣ್ಹೀಭಾವೇನ ಅಧಿವಾಸೇತ್ವಾ ‘‘ಜೇತವನಮೇವ ಗತೋ.

ಏವಞ್ಹಿ ಸೋ ನಾಗದೀಪಂ ಉಪೇತೋ,

ಮಾರಾಭಿಭು ಸಬ್ಬವಿದು ಸುಮೇಧೋ;

ದಮೇತ್ವ ನಾಗೇ ಕರುಣಾಯುಪೇತೋ,

ಗನ್ತ್ವಾ ವಸೀ ಜೇತವನೇ ಮುನಿನ್ದೋ.

ದುತಿಯಗಮನಕಥಾ ಸಮತ್ತಾ.

ತತಿಯಗಮನೇ ಪನ ಬೋಧಿತೋ ಅಟ್ಠಮೇ ವಸ್ಸೇ ಜೇತವನಮಹಾವಿಹಾರೇ ವಿಹರನ್ತೋ ಭಗವಾ? ‘‘ಮಮ ಪರಿನಿಬ್ಬಾನತೋ ಪಚ್ಛಾ ತಮ್ಬಪಣ್ಣಿದೀಪೇ ಸಾಸನಂ ಪತಿಟ್ಠಹಿಸ್ಸತಿ, ಸೋ ದೀಪೋ ಬಹು ಭಿಕ್ಖುಭಿಕ್ಖುನೀಉಪಾಸಕೋಪಾಸಿಕಾದಿ ಅರಿಯಗಣಸೇವಿತೋ ಕಾಸಾವಪಜ್ಜೋತೋ ಭವಿಸ್ಸತಿ, ಮಯ್ಹಂ ಚತುನ್ನಂ ದಾಠಾಧಾತುನಂ ಅನ್ತರೇ ಏಕಾ ದಾಠಾ ಚ ದಕ್ಖಿಣಅಕ್ಖಧಾತು ಚ ನಲಾಟಧಾತು ಚ ರಾಮಗಾಮವಾಸೀಹಿ ಲದ್ಧೋ ಏಕಕೋಟ್ಠಾಸೋ ಚ ಅಞ್ಞೇ ಬಹುಸರೀರಧಾತು ಚ ಕೇಸಧಾತುಯೋ ಚ ತತ್ಥೇವ ಪತಿಟ್ಠಹಿಸ್ಸನ್ತಿ ಅನೇಕಾನಿ ಸಙ್ಘಾರಾಮಸಹಸ್ಸಾನಿ ಚ. ಬುದ್ಧಧಮ್ಮಸಙ್ಘರತನೇ ಪತಿಟ್ಠಿತಸದ್ಧೋ ಮಹಾಜನೋ ಭವಿಸ್ಸತಿ. ತಸ್ಮಾ ಲಙ್ಕಾದೀಪಂ ಗನ್ತ್ವಾ ತತ್ಥ ಸಮಾಪತ್ತಿಂ ಸಮಾಪಜ್ಜಿತ್ವಾ ಆಗನ್ತುಂ ವಟ್ಟತೀ ‘‘ತಿ ಚಿನ್ತೇತ್ವಾ ಆನನ್ದತ್ಥೇರಂ ಆಮನ್ತೇಸಿ? ‘‘ಆನನ್ದ ಚತುಪಟಿಸಮ್ಭಿದಪ್ಪತ್ತಾನಂ ಪಞ್ಚಸತಮಹಾಖೀಣಾಸವಾನಂ ಭಿಕ್ಖೂನಂ ಪಟಿವೇದೇಸಿ. ಅಮ್ಹೇಹಿ ಸದ್ಧಿಂ ಗನ್ತಬ್ಬ ‘‘ನ್ತಿ. ಆನನ್ದತ್ಥೇರೋ ಕಪಿಲವತ್ಥುಕೋಳಿಯ ನಗರವಾಸೀನಂ ಪಞ್ಚಸತಮಹಾಖೀಣಾಸವಾನಂ ಭಿಕ್ಖೂನಂ ಪಟಿವೇದೇಸಿ. ತೇ ಪಟಿವೇದಿತಾ ಪಞ್ಚಸತಖೀಣಾಸವಾ ಪತ್ತಚೀವರಧಾರಾ ಹುತ್ವಾ ಸತ್ಥಾರಂ ವನ್ದಿತ್ವಾ ¶ ಅಞ್ಜಲಿಂ ಪಗ್ಗಯ್ಹ ನಮಸ್ಸಮಾನಾ ಅಟ್ಠಂಸು. ಸತ್ಥುನೋ ಪನ ಸಲಲಾಯ ನಾಮ ಗನ್ಧಕುಟಿಯಾ ಅವಿದೂರೇ ರತ್ತಸೇತನೀಲುಪ್ಪಲಕುಮುದಪದುಮಪುಣ್ಡರೀಕಸತಪತ್ತಸಹಸ್ಸಪತ್ತಜಲಜೇಹಿ ಸೋಗನ್ಧಿಕ ನಾನಾಪುಪ್ಫೇಹಿ ಸಞ್ಚನ್ನಾ,ಸುಭಸೋಪಾನಾ, ಪಸಾದಿತಸಮತಿತ್ತಿಕಕಾಕಪೇಯ್ಯಸುರಮಣೀಯಸೀತಲಮಧುರೋದಕಾ ಸುಫುಲ್ಲಪುಪ್ಫಫಲಧಾರಿತ ನಾನಾವಿಧವಿಚಿತ್ತಸಾಲಸಲಲಚಮ್ಪಕಾಸೋಕರುಕ್ಖಾನಾಗರುಕ್ಖಾದೀಹಿ ಸುಸಜ್ಜಿತಭೂಮಿಪದೇಸಾ ಅಚ್ಚನ್ತರಮಣಿಯಾ ಪೋಕ್ಖರಣೀ ಅತ್ಥಿ. ತತ್ಥ ಅಧಿವತ್ಥೋ ಮಹಾನುಭಾವೋ ಸುಮನೋನಾಮ ನಾಗರಾಜಾ ಸೋಳಸಸಹಸ್ಸಮತ್ತಾಹಿ ನಾಗಮಾಣವಿಕಾಹಿ ಪರಿವುತೋ ಮಹನ್ತಂ ಸಿರಿಸಮ್ಪತ್ತಿಂ ಅನುಭವಮಾನೋ ತಥಾಗತಸ್ಸ ರೂಪಸೋಭಗ್ಗಪ್ಪತ್ತಂ ಅತ್ತಭಾವಂ ಓಲೋಕೇತ್ವಾ ಮಹನ್ತಂ ಸುಖಸೋಮನಸ್ಸಂ ಅನುಭವಮಾನೋ ಅತ್ತನೋ ಮಾತರಂ ನನ್ದನಾಗಮಾನವಿಕಂ ಗರುಟ್ಠಾನೇ ಠಪೇತ್ವಾ ತಸ್ಸಾ ವೇಯ್ಯಾವಚ್ಚಂ ಕುರುಮಾನೋ ತಸ್ಮಿಂಯೇವ ಪೋಕ್ಖರಣಿಂ ಅಜ್ಝಾವಸತಿ. ಸತ್ಥಾ ಪನ ಅತ್ತನೋ ಗಮನಂ ಸಂವಿಧಾನಾನನ್ತರೇ ಸುಮನಂ ನಾಗರಾಜಾನಂ ಅವಿದುರೇ ಠಿತಂ ಆಮನ್ತೇತ್ವಾ ಸಪರಿವಾರೋ ಆಗಚ್ಛಾ ಹೀತಿ ಆಹ. ಸೋ ಸಾಧುತಿ ಸಮ್ಪಟಿಚ್ಛಿತ್ವಾ ಅತ್ತನೋ ಪರಿವಾರೇ ಛಕೋಟಿಮತ್ತೇ ನಾಗೇ ಗಹೇತ್ವಾ ಸುಪುಪ್ಪೀತಚಮ್ಪಕರುಕ್ಖಂ ತಥಾಗತಸ್ಸ ಸೂರಿಯರಂಸಿನಿವಾರಣತ್ಥಂ ಛತ್ತಂ ಕತ್ವಾ ಗಣ್ಹಿ. ಅಥ ಭಗವಾ ರವಿರಸ್ಮಿಪತ್ಥಟಸುವಣ್ಣಪಬ್ಬತೋ ವಿಯ ವಿರೋಚಮಾನೋ ಅತ್ತನೋ ಪತ್ತಚೀವರಮಾದಾಯ ಆಕಾಸಂ ಅಬ್ಭೂಗ್ಗಞ್ಛಿ. ಸತ್ಥಾರಂ ಪರಿವಾರೇತ್ವಾ ಠೀತಾ ತೇ ಪಞ್ಚಸತಖೀಣಾಸವಾಪಿ ಸಕಂ ಸಕಂ ಪತ್ತಚೀವರಮಾದಾಯ ಆಕಾಸಂ ಉಗ್ಗನ್ತ್ವಾ ಸತ್ಥಾರಂ ಪರಿವಾರಯಿಂಸು. ಸತ್ಥಾ ಪಞ್ಚಸತಖೀಣಾಸವಪರಿವುತೋ ವಿಸಾಖಪುಣ್ಣಮುಪೋಸಥದಿವಸೇ ಕಲ್ಯಾಣಿಯಂ ಗನ್ತ್ವಾ ಮಹಾರಹೇ ಮಣ್ಡಪಮಜ್ಝೇ ಪಞ್ಞತ್ತವರ ಬುದ್ಧಾಸನೇ ಪಞ್ಚಸತಖೀಣಾಸವಪರಿವುತೋ ಹುತ್ವಾ ನಿಸೀದಿ.

ಅಥ ಮಣಿಅಕ್ಖಿಕೋ ನಾಮ ನಾಗರಾಜಾ ಬುದ್ಧಪಮುಖಂ ಭಿಕ್ಖು ಸಙ್ಘಂ ಅನೇಕೇಹಿ ದಿಬ್ಬೇಹಿ ಖಜ್ಜಭೋಜ್ಜೇಹಿ ಸನ್ತಪ್ಪೇತ್ವಾ ಏಕಮನ್ತಂ ನಿಸೀದಿ. ಸತ್ಥಾ ತಸ್ಸ ಭತ್ತಾನುಮೋದನಂ ಕತ್ವಾ ಸುಮನಕುಟೇ ಪದಲಞ್ಛನಂ ದಸ್ಸೇತ್ವಾ ತಸ್ಮಿಂ ಪಬ್ಬತಪಾದೇ ಅನೇಕಪಾದಪಾಕಿಣ್ಣಭೂಮಿಪ್ಪದೇಸೇ ನಿಸಿನ್ನೋ ದಿವಾವಿಹಾರಂ ಕತ್ವಾ ತತೋ ವುಟ್ಠಾಯ ದೀಘವಾಪಿಚೇತಿಯಟ್ಠಾನೇ ಸಮಾಪತ್ತಿಂ ಸಮಾಪಜ್ಜಿ. ಮಹಾಪಥವೀ ಉದಕಪರಿಯನ್ತಂ ಕತ್ವಾ ಸತವಾರಂ ಸಹಸ್ಸವಾರಂ ಸಙ್ಕಮ್ಪಿ. ತತ್ಥ ಮಹಾಸೇನಂ ನಾಮ ದೇವಪುತ್ತಂ ಆರಕ್ಖತ್ಥಾಯ ನಿವತ್ತೇತ್ವಾ ತತೋ ¶ ವುಟ್ಠಾಯ ಮಹಾಥೂಪಟ್ಠಾನೇ ತಥೇವ ಸಮಾಪತ್ತಿಂ ಸಮಾಪಜ್ಜಿ. ಮಹಾಪಥವಿ ತಥೇವ ಕಮ್ಪಿ. ತತ್ರಾಪಿ ವಿಸಾಲರೂಪ ದೇವಪುತ್ತಂ ಆರಕ್ಖಂ ಗಣ್ಹನತ್ಥಾಯ ಠಪೇತ್ವಾ ತತೋ ವುಟ್ಠಾಯ ಥೂಪಾರಾಮ ಚೇತಿಯಟ್ಠಾನೇ ತಥೇವ ನಿರೋಧಸಮಾಪತ್ತಿಂ ಸಮಾಪಜ್ಜಿ. ಮಹಾಪಥವೀ ತಥೇವ ಕಮ್ಪಿ. ತತ್ಥ ಚ ಪಥವಿಪಾಲ ದೇವಪುತ್ತಂ ಆರಕ್ಖತ್ಥಾಯ. ನಿವತ್ತೇತ್ವಾ ತತೋ ವುಟ್ಠಾಯ ಮರಿಚವಟ್ಟಿಚೇತಿಯಟ್ಠಾನಂ ಗನ್ತ್ವಾ ಪಞ್ಚಹಿ ಭಿಕ್ಖುಸತೇಹಿ ಸದ್ಧಿಂ ಸಮಾಪತ್ತಿಂ ಅಪ್ಪಯಿ. ಪಥವಿ ತಥೇವ ಕಮ್ಪಿ. ತಸ್ಮಿಂ ಠಾನೇ ಇನ್ದಕದೇವಪುತ್ತಂ ಆರಕ್ಖಂ ಗಣ್ಹನತ್ಥಾಯ ಠಪೇಸಿ. ತತೋ ವುಟ್ಠಾಯ ಕಾಚರಗಾಮಚೇತಿಯಟ್ಠಾನೇ ತಥೇವ ಸಮಾಪತ್ತಿಂ ಸಮಾಪಜ್ಜಿ. ಪಥವಿ ತಥೇವ ಕಮ್ಪಿ. (ತಸ್ಮಿಂ ಠಾನೇ ಮಹಾಘೋಸ ದೇವಪುತ್ತಂ ಆರಕ್ಖಂ ಗಣ್ಹನತ್ಥಾಯ ನಿಯ್ಯಾದೇಸಿ) ಏತಸ್ಮಿಂ ಮಹಾಚೇತಿಯಟ್ಠಾನೇ ಮಹಾಘೋಸಂ ನಾಮ ದೇವಪುತ್ತಂ ಆರಕ್ಖಂ ಗಹಣತ್ಥಾಯ ನಿವತ್ತೇತ್ವಾ ತತೋ ವುಟ್ಠಾಯ ತಿಸ್ಸಮಹಾವಿಹಾರಚೇತಿಯಟ್ಠಾನೇ ತಥೇವ ಸಮಾಪತ್ತಿಂ ಸಮಾಪಜ್ಜಿ. ಪಥವಿ ತಥೇವ ಕಮ್ಪಿ. ತತ್ಥ ಮಣಿಮೇಖಲಂ ನಾಮ ದೇವಧೀತರಂ ಆರಕ್ಖಂ ಗಾಹಾಪೇತ್ವಾ ತತೋ ನಾಗಮಹಾವಿಹಾರಚೇತಿಯಟ್ಠಾನೇ ತಥೇವ ಸಮಾಪತ್ತಿಂ ಸಮಾಪಜ್ಜಿ. ಪಥವಿ ತಥೇವ ಕಮ್ಪಿ. ತಸ್ಮಿಮ್ಪಿ ಮಹಿನ್ದಂ ನಾಮ ದೇವಪುತ್ತಂ ಆರಕ್ಖಂ ಗಹಣತ್ಥಾಯ ಠಪೇಸಿ. ತತೋ ವುಟ್ಠಾಯ ಮಹಾಗಙ್ಗಾಯ ದಕ್ಖಿಣದಿಸಾಭಾಗೇ ಸೇರು ನಾಮ ದಹಸ್ಸ ಅನ್ತೇ ವರಾಹ ನಾಮ ಸೋಣ್ಡಿಮತ್ಥಕೇ ಅತಿಮನೋರಮಂ ಉದಕಬುಬ್ಬುಳಕೇಲಾಸಕೂಟಪಟಿಭಾಗಂ ಚೇತಿಯಂ ಪತಿಟ್ಠಹಿಸ್ಸತೀ’ತಿ ಪಞ್ಚಸತಖೀಣಾಸವೇಹಿ ಸದ್ಧಿಂ ನಿರೋಧಸಮಾಪತ್ತಿಂ ಸಮಾಪಜ್ಜಿ. ಬಹಲಘನಮಹಾಪಥವಿ ಪರಿಬ್ಭಮಿತಕುಮ್ಭಕಾರಚಕ್ಕಂ ವಿಯ ಪಭಿನ್ತಮದಮಹಾ ಹತ್ಥಿನಾಗಸ್ಸ ಕುಞ್ಚನಾದಕರಣಂ ವಿಯ ಉಚ್ಛುಕೋಟ್ಟನ ಯನ್ತ-ಮುಖಸದ್ದೋ ¶ ವಿಯ (ಚ) ಸತವಾರಂ ಸಹಸ್ಸವಾರಂ ನದಮಾನಾ ಸೋಮನಸ್ಸಪ್ಪತ್ತಾ ವಿಯ ಸಕಲಲಙ್ಕಾದೀಪಂ ಉನ್ನಾದಂ ಕುರುಮಾನಾ ಸಂಕಮ್ಪಿ. ತತೋ ವುಟ್ಠಾಯ ಸುಮನನಾಗರಞ್ಞೋ ಹತ್ಥೇಸು ಠಿತ ಚಮ್ಪಕರುಕ್ಖತೋ ಪುಪ್ಫಾನಿ ಆದಾಯ ತತ್ಥ ಪೂಜೇತ್ವಾ ಪುನಪ್ಪುನಂ ತಂ ಓಲೋಕೇಸಿ. ಸೋ ಸತ್ಥಾರಂ ವನ್ದಿತ್ವಾ ಮಯಾ ಭನ್ತೇ ಕಿಂ ಕತ್ತಬ್ಬನ್ತಿ ಪುಚ್ಛಿ. ಇಮಸ್ಸ ಠಾನಸ್ಸ ಆರಕ್ಖಂ ಕರೋಹೀತಿ ಆಹ. ಸೋ ತಂ ಸುತ್ವಾ ಭನ್ತೇ ತುಮ್ಹಾಕಂ ಗನ್ಧಕುಟಿಂ ಮಮ ಆರಕ್ಖಂ ಕರೋನ್ತಸ್ಸ ರೂಪಸೋಭಗ್ಗಪ್ಪತ್ತಂ ಅಸೀತ್ಯಾನುಬ್ಯಞ್ಜನಬ್ಯಾಮಪ್ಪಭಾದ್ವತ್ತಿಂಸಮಹಾಪುರಿಸಲಕ್ಖಣವಿಚಿತ್ತಂ ದಸ್ಸನಾನುತ್ತರಿಯಭೂತಂ ಪಸ್ಸನ್ತಸ್ಸ ಮನೋಸಿಲಾತಲೇ ಸೀಹನಾದಂ ನದನ್ತೋ ತರುಣಸೀಹೋ ವಿಯ ಗಜ್ಜನ್ತೋ ಪಾವುಸ್ಸಕಮಹಾಮೇಘೋ ವಿಯ ಆಕಾಸಗಙ್ಗಂ ಓತರನ್ತೋ ವಿಯ ರತನದಾಮಂ ಗನ್ಥೇನ್ತೋ ವಿಯ ಚ ಅಟ್ಠಙ್ಗಸಮನ್ನಾಗತಂ ಸವನೀಯಸರಂ ವಿಸ್ಸಜ್ಜೇತ್ವಾ ಬ್ರಮ್ಹಘೋಸಂ ನಿಚ್ಛಾರೇನ್ತೋ ನಾನಾನಯೇಹಿ ವಿಚಿತ್ತಕಥಂ ಕಥಯಮಾನಾನಂ ಸವನಾನುರಿತ್ತಯಭೂತಂ ಸಂಸಾರಣ್ಣವನಿಮುಗ್ಗಾನಂ ತಾರಣಸಮತ್ಥಂ ಮಧುರ ಧಮ್ಮದೇಸನಂ ಸುಣನ್ತಸ್ಸ, ಞಾಣಿದ್ಧಿಯಾ ಕೋಟಿಪ್ಪತ್ತೇ ಸಾರಿಪುತ್ತಮೋಗ್ಗಲ್ಲಾನಾದಯೋ ಅಸೀತಿಮಹಾಸಾವಕೇ ಪಸ್ಸನ್ತಸ್ಸ, ತತ್ಥೇವ ಮಯ್ಹಂ ವಸನಂ ರುಚ್ಚತಿ. ನ ಸಕ್ಕೋಮಿ ಅಞ್ಞತ್ಥ ತುಮ್ಹೇಹಿ ವಿನಾ ವಸಿತುನ್ತಿ ಆಹ. ಭಗವಾ ತಸ್ಸ ಕಥಂ ಸುತ್ವಾ ನಗರಾಜ, ಇಮಂ ಪದೇಸಂ ತಯಾ ಚಿರಂ ವಸಿತಟ್ಠಾನಂ. ಕಕುಸನ್ಧಸ್ಸ ಭಗವತೋ ಧಾತು ಇಮಸ್ಮಿಂಯೇವ ಠಾನೇ ಪತಿಟ್ಠಿತಾ, ತ್ವಮೇವ ತಸ್ಮಿಂ ಕಾಲೇ ವರನಿದ್ದೋ ನಾಮ ನಾಗರಾಜಾ ಹುತ್ವಾ ತಸ್ಸಾ ಧಾತುಯಾ ಆರಕ್ಖಂ ಗಹೇತ್ವಾ ಗನ್ಧಮಾಲಾದೀಹಿ ಪೂಜಂ ಕರೋನ್ತೋ ಚಿರಂ ವಿಹಾಸಿ. ಪುನ ಕೋಣಾಗಮನಸ್ಸ ಭಗವತೋ ಧಾತು ಇಮಸ್ಮಿಂಯೇವ ಠಾನೇ ಪತಿಟ್ಠಿತಾ ತ್ವಮೇವ ತಸ್ಮಿಂ ಕಾಲೇ ಜಯಸೇನೋ ನಾಮ ದೇವಪುತ್ತೋ ಹುತ್ವಾ ತಸ್ಸಾ ಧಾತುಯಾ ಆರಕ್ಖಂ ಗಹೇತ್ವಾ ಗನ್ಧಮಾಲಾದೀಹಿ ಪೂಜಂ ಕತ್ವಾ ತತ್ಥೇವ ಚಿರಂ ವಿಹಾಸಿ. ಪುನ ಕಸ್ಸಪಸ್ಸ ಭಗವತೋ ಧಾತು ಇಮಸ್ಮಿಂಯೇವ ಠಾನೇ ಪತಿಟ್ಠಿತಾ. ತ್ವಮೇವ ತಸ್ಮಿಂ ಕಾಲೇ ದೀಘಸಾಲೋ ನಾಮ ನಾಗರಾಜಾ ಹುತ್ವಾ ತಾಯ ಧಾತುಯಾ ಆರಕ್ಖಂ ಗಹೇತ್ವಾ ಗನ್ಧಮಾಲಾದೀಹಿ ಪೂಜಂ ಕರೋನ್ತೋ ವಿಹಾಸಿ. ಮಯಿ ಪನ ಪರಿನಿಬ್ಬುತೇ ಕಾಕವಣ್ಣತಿಸ್ಸಮಹಾರಾಜಾ ಮಯ್ಹಂ ನಲಾಟಧಾತುಂ ಇಮಸ್ಮಿಂಯೇವ ¶ ಠಾನೇ ಪತಿಟ್ಠಾಪೇಸ್ಸತಿ, ತಸ್ಮಾ ತ್ವಂ ಇಮಸ್ಸ ಠಾನಸ್ಸ ಆರಕ್ಖಂ ಕರೋಹೀತಿ ವತ್ವಾ ಪಞ್ಚಸೀಲೇಸು ಪತಿಟ್ಠಾಪೇತ್ವಾ ಪಞ್ಚಸತಖೀಣಾಸವೇಹಿ ಸದ್ಧಿಂ ಚೇತಿಯಟ್ಠಾನಂ ಪದಕ್ಖಿಣಂ ಕತ್ವಾ ತ್ವಂ ಅಪ್ಪಮತ್ತೋ ಹೋಹೀತಿ ವತ್ವಾ ಆಕಾಸಂ ಉಪ್ಪತಿತ್ವಾ ಜೇತವನಮೇವ ಗತೋ.

ತಸ್ಸ ಪನ ನಾಗರಞ್ಞೋ ಮಾತಾ ಇನ್ದಮಾನವಿಕಾ ನಾಮ ಆಗನ್ತ್ವಾ ತಥಾಗತಂ ವನ್ದಿತ್ವಾ ಏಕಮನ್ತಂ ಠಿತಾ, ಭನ್ತೇ ಮಮ ಪುತ್ತೋ ಸುಮನೋ ನಾಮ ನಾಗರಾಜಾ ಕುಹಿನ್ತಿ ಆಹ. ತವ ಪುತ್ತೋ ತಮ್ಬಪಣ್ಣಿದೀಪೇ ಮಹಾವಾಲುಕಗಙ್ಗಾಯ ದಕ್ಖಿಣಭಾಗೇ ಸೇರು ನಾಮ ದಹಸ್ಸ ಸಮೀಪೇ ವರಾಹ ನಾಮ ಸೋಣ್ಡಿಯಂ ಸಮಾಧಿ ಅಪ್ಪಿತತ್ತಾ ಅತ್ತನೋ ಪರಿವಾರೇ ಛಕೋಟಿಮತ್ತೇ ನಾಗೇ ಗಹೇತ್ವಾ ಸತ್ಥಾರಂ ವನ್ದಿತ್ವಾ ಭನ್ತೇ ಇತೋ ಪಟ್ಠಾಯ ತುಮ್ಹಾಕಂ ದಸ್ಸನಂ ದುಲ್ಲಭಂ, ಖಮಥ ಮೇತಿ ಅಚ್ಚಯಂ ದೇಸೇತ್ವಾ ಮಹತಿಂ ನಾಗಸಮ್ಪತ್ತಿಂ ಗಹೇತ್ವಾ ಪುತ್ತಸ್ಸ ಸುಮನನಾಗರಾಜಸ್ಸ ಸನ್ತಿಕಂ ಗನ್ತ್ವಾ ಮಹತಿಂ ಇಸ್ಸರಿಯಸಮ್ಪತ್ತಿಂ ಅನುಭವನ್ತಿ ತತ್ಥೇವ ಆರಕ್ಖಂ ಗಹೇತ್ವಾ ಚಿರಂ ವಿಹಾಸಿ.

ಮಹಾಪಞ್ಞೋ ಮಹಾಸದ್ಧೋ ಮಹಾವೀರೋ ಮಹಾಇಸಿ,

ಮಹಾಬಲೇನ ಸಮ್ಪನ್ನೋ ಮಹನ್ತಗುಣಭುಸಿತೋ;

ಗನ್ತ್ವಾನ ತಮ್ಬಪಣ್ಣಿಂ ಸೋ ಸತ್ತಾನುದ್ದಯಮಾನಸೋ,

ಗನ್ತ್ವಾ ನಾಗವರಂ ದೀಪಂ ಅಗಾ ಜೇತವನಂ ವಿದು.

ಅತಿಸಯಮತಿಸಾರೋ ಸಾರದಾನಂ ಕರೋನ್ತೋ,

ಅತಿಅಧಿರಮಣಿಯೋ ಸಬ್ಬಲೋಕೇಕನೇತ್ತೋ;

ಅತಿಗುಣಧರಣೀಯೋ ಸಬ್ಬಸತ್ತೇ ತಮಗ್ಗಂ,

ಅತಿವಿಪುಲದಯೋ ತಾನೇತುಮಾಗಾ ಸುದೀಪಂ.

ತತಿಯಗಮನಕಥಾ ಸಮತ್ತಾ.

ಇತಿ ಅರಿಯಜನಪಸಾದನತ್ಥಾಯ ಕತೇ ಧಾತುವಂಸೇ ತಥಾಗತಸ್ಸ ಗಮನಂ ನಾಮ ಪಠಮೋ ಪರಿಚ್ಛೇದೋ.

ಆಗನ್ತ್ವಾ ತಮ್ಬಪಣ್ಣಿಂ ಸೋ ಸತ್ತಾನುದ್ದಯಮಾನಸೋ

ಪುನ ಗನ್ತ್ವಾ ನಾಗದೀಪಂ ಅಗಾ ಜೇತವನಂ ವರಂ

ಅತಿಸಯಮತಿಸಾರೋ ಸಾರದಾನೇಕ ರತ್ತೋ

ಅತಿಧಿತಿರಮಣಿಯೋ ಸಬ್ಬಲೋಕೇಕನೇತ್ತೋ

ಅತಿಗುಣರಮಣೀಯಂ ಸಬ್ಬಸನ್ತೇಕಮಗ್ಗಂ

ಅತಿವಿಪುಲದಯತ್ತಾ ಲಙ್ಕಮಾಗಾ ಸುದೀಪಂ

ಇತಿ ಸೀಹಳಭಾಸಾಯ ಕತೇ ಧಾತುವಂಸೇ ದಿಸ್ಸತೇ.

೨. ¶ ಪರಿನಿಬ್ಬಾನಕಥಾ

ಸತ್ಥಾ ಪನ ತತೋ ಪಞ್ಚಚತ್ತಾಲೀಸವಸ್ಸಾನಿ ತಿಪಿಟಕಪರಿಯತ್ತಿಧಮ್ಮಂ ದೇಸೇತ್ವಾ ವೇನೇಯ್ಯಜನೇ ಸಂಸಾರತೋ ಚತುಅರಿಯಮಗ್ಗಫಲಪಟಿಲಾಭವಸೇನ ಉದ್ಧಾರೇತ್ವಾ ನಿಬ್ಬಾನೇ ಪತಿಟ್ಠಾಪೇತ್ವಾ ಪಚ್ಛಿಮೇ ಕಾಲೇ ವೇಸಾಲಿನಗರಂ ಉಪನಿಸ್ಸಾಯ ಚಾಪಾಲಚೇತಿಯಂ ನಿಸ್ಸಾಯ ವಿಹರನ್ತೋ ಮಾರೇನ ಪರಿನಿಬ್ಬಾನತ್ಥಾಯ ಆರಾಧಿತೋ ಸತೋ ಸಮ್ಪಜಾನೋ ಆಯುಸಙ್ಖಾರೇ ವಿಸ್ಸಜ್ಜೇಸಿ. ತಸ್ಸ ವಿಸ್ಸಟ್ಠಭಾವಂ ಆನನ್ದೋಯೇವ ಅಞ್ಞಾಸಿ. ಅಞ್ಞೋ ಕೋಚಿಪಿ ಜಾನನ್ತೋ ನಾಮ ನತ್ಥಿ. ತಸ್ಮಾ ಭಿಕ್ಖುಸಙ್ಘಮ್ಪಿ ಜಾನಾಪೇಸ್ಸಾಮೀತಿ ಜೇತವನಮಹಾವಿಹಾರಂ ಗನ್ತ್ವಾ ಸಬ್ಬಂ ಭಿಕ್ಖುಸಙ್ಘಂ ಸನ್ನಿಪಾತಾಪೇತ್ವಾ ಭಿಕ್ಖವೇ ತಥಾಗತಸ್ಸ ನ ಚಿರಸ್ಸೇವ ತಿಣ್ಣಂ ಮಾಸಾನಂ ಅಚ್ಚಯೇನ ಪರಿನಿಬ್ಬಾನಂ ಭವಿಸ್ಸತಿ, ತುಮ್ಹೇ ಸತ್ತತಿಂಸಬೋಧಿ ಪಕ್ಖಿಯಧಮ್ಮೇಸು ಸಮಗ್ಗಾ ಹುತ್ವಾ ಏಕೀಭಾವಾ ಹೋಥ, ತುಮ್ಹೇ ವಿವಾದಂ ಮಾ ಕರೋಥ. ಅಪ್ಪಮಾದೇನ ತಿಸ್ಸೋ ಸಿಕ್ಖಾ ಸಮ್ಪಾದೇಥಾತಿ ವತ್ವಾ ಪುನ ದಿವಸೇ ವೇಸಾಲಿಯಂ ಪಿಣ್ಡಾಯ ಚರಿತ್ವಾ ಪಿಣ್ಡಪಾತಾ ಪಟಿಕ್ಕಮಿತ್ವಾ ಭಣ್ಡಗಾಮಂ ಗತೋ. ಭಣ್ಡಗಾಮತೋ ಹತ್ಥಿಗಾಮಂ ಹತ್ಥಿಗಾಮತೋ ಅಮ್ಬಗಾಮಂ ಅಮ್ಬಗಾಮತೋ ಜಮ್ಬುಗಾಮಂ ಜಮ್ಬುಗಾಮತೋ ನಿಗ್ರೋಧಗಾಮಂ ನಿಗ್ರೋಧಗಾಮತೋ ಭೋಗನಗರಂ ಭೋಗನಗರತೋ ಪಾವಾನಗರಂ ಪಾವಾನಗರತೋ ಕುಸಿನಾರಾನಗರಂ ಪತ್ತೋ. ತತ್ಥ ಯಮಕಸಾಲಾನಮನ್ತರೇ ಠೀತೋ ಆನನ್ದತ್ಥೇರಂ ಆಮನ್ತೇತ್ವಾ ಉನ್ತರಸೀಸಕಂ ಕತ್ವಾ ಮಞ್ಚಕಂ ಪಞ್ಞಾಪೇಹಿ ಕಿಲನ್ತೋಸ್ಮಿ ಆನನ್ದ ನಿಪಜ್ಜಿಸ್ಸಾಮಿ’ತಿ ಆಹ. ತಂ ಸುತ್ವಾ ಆನನ್ದತ್ಥೇರೋ ಉತ್ತರಸೀಸಕಂ ಕತ್ವಾ ಮಞ್ಚಕಂ ಪಞ್ಞಾಪೇತ್ವಾ ಚತುಗ್ಗುಣಂ ಸಙ್ಘಾಟಿಂ ಅತ್ಥರಿತ್ವಾ ಪಞ್ಚಚತ್ತಾಲೀಸವಸ್ಸಾನಿ ಅಸಯಿತಬುದ್ಧಸೇಯ್ಯಂ ಸಯನ್ತೋ ದಕ್ಖಿಣಪಸ್ಸೇನ ಸತೋ ಸಮ್ಪಜಾನೋ ಅನುಟ್ಠಾನಸಞ್ಞಂ ಮನಸಿಕರಿತ್ವಾ ಸೀಹಸೇಯ್ಯಂ ಕಪ್ಪೇಸಿ.

ಅತೀತಮದ್ಧಾನ ಭವೇ ಚರನ್ತೋ,

ಅನನ್ತಸತ್ತೇ ಕರುಣಾಯುಪೇತೋ;

ಕತ್ವಾನ ಪುಞ್ಞಾನಿ ಅನಪ್ಪಕಾನಿ,

ಪತ್ತೋ ಸಿವಂ ಲೋಕಹಿತಾಯ ನಾಥೋ.

ಏವಂ ¶ ಹಿ ಸೋ ದಸಬಲೋಪಿ ವಿಹೀನಥಾಮೋ,

ಯಮಸ್ಸ ಸಾಲಾನ ನಿಪಜ್ಜಿ ಮಜ್ಝೇ;

ಕತ್ವಾನ ಸಞ್ಞಞ್ಹಿ ಅನುಟ್ಠಹಾನಂ,

ಸ ಇದ್ಧಿಮಾ ಮಾರಮುಖಂ ಪವಿಟ್ಠೋ.

ತಸ್ಮಿಂ ಖಣೇ ಸಮಕಸಾಲಾ ಸುಪುಪ್ಫಿತಾ ಅಹೇಸುಂ. ನ ಕೇವಲಂ ಯಮಕಸಾಲಾಯೇವ ಸುಪುಪ್ಫೀತಾ, ಅಥ ಖೋ ದಸಸಹಸ್ಸೀ ಲೋಕಧಾತು ಚಕ್ಕವಾಳೇಸು ಸಾಲರುಕ್ಖಾಪಿ ಪುಪ್ಫಿತಾ. ನ ಸಾಲರುಕ್ಖಾಯೇವ ಸುಪುಪ್ಫಿತಾ, ಅಥ ಖೋ ಯಂ ಕಿಞ್ಚಿ ಪುಪ್ಫುಪಗಫಲೂಪಗ ರುಕ್ಖಜಾತಂ ಸಬ್ಬಮ್ಪಿ ಪುಪ್ಫಞ್ಚ ಫಲಞ್ಚ ಗಣ್ಹಿ. ಜಲೇಸು ಜಲಪದುಮಾನಿ ಥಲೇಸು ಥಲಪದುಮಾನಿ ಖನ್ಧೇಸು ಖನ್ಧಪದುಮಾನಿ ಸಾಖಾಸು ಸಾಖಾಪದುಮಾನಿ ಲತಾಸು ಲತಾಪದುಮಾನಿ ಆಕಾಸೇ ಓಲಮ್ಬಪದುಮಾನಿ ಪಿಟ್ಠಿಪಾಸಾಣೇ ಹಿನ್ದಿತ್ವಾ ಸತಪತ್ತಪದುಮಾನಿ ಸುಪುಪ್ಫಿತಾನಿ ಅಹೇಸುಂ. ಪಥವಿತೋ ಯಾವ ಬ್ರಹ್ಮಲೋಕೋ ತಾವ ದಸಸಹಸ್ಸಿ ಚಕ್ಕವಾಳಾ ಏಕಮಾಲಾಗುಣಾ ವಿಯ ಅಹೇಸುಂ. ದೇವಾ ಆಕಾಸತೋ ದಿಬ್ಬಮನ್ದಾರವಪಾರಿಚ್ಛತ್ತಕಕೋವಿಳಾರಪುಪ್ಫಾನಿ ಚ ಚನ್ದನಚುಣ್ಣಾನಿ ಚ ಸಮಾಕಿರನ್ತಿ. ದಿಬ್ಬತುರಿಯಸಙ್ಗಿತಿಯೋ ಚ ಅನ್ತಲಿಕ್ಖೇ ಪವತ್ತನ್ತಿ. ಅನೇಕಾನಿ ಅಚ್ಛರಿಯಸಹಸ್ಸಾನಿ ಅಹೇಸುಂ. ಏವಂ ಪೂಜಾವಿಸೇಸೇ ಪವತ್ತಮಾನೇ ಪಠಮಯಾಮೇ ಸುಭದ್ದಪರಿಬ್ಬಾಜಕಂ ವಿನೇತ್ವಾ ಮಜ್ಝಿಮಯಾಮೇ ದಸಸಹಸ್ಸಿ ಲೋಕಧಾತು ದೇವತಾನಂ ಅನುಸಾಸಿತ್ವಾ ಪಚ್ಛಿಮಯಾಮಾವಸಾನೇ ಪಠಮಜ್ಝಾನಂ ಸಮಾಪಜ್ಜಿತ್ವಾ ತತೋ ವುಟ್ಠಾಯ ದುತಿಯಜ್ಝಾನಂ ಚತುತ್ಥಜ್ಝಾನಂ ಸಮಾಪಜ್ಜಿ. ತತೋ ವುಟ್ಠಾಯ ಆಕಾಸಾನಞ್ಚಾಯತನಂ ವಿಞ್ಞಾಣಞ್ಚಾಯತನಂ ಆಕಿಞ್ಚಞ್ಞಾಯತನಂ ನೇವಸಞ್ಞಾನಾಸಞ್ಞಾಯತನಂ ಸಮಾಪಜ್ಜಿತ್ವಾ ತತೋ ವುಟ್ಠಾಯ ನಿರೋಧಸಮಾಪತ್ತಿಂ ಸಮಾಪಜ್ಜಿ. ತತೋ ವುಟ್ಠಾಯ ಪಠಮಜ್ಝಾನಂ ದುತಿಯಜ್ಝಾನಂ ತತಿಯಜ್ಝಾನಂ ಚತುತ್ಥಜ್ಝಾನಞ್ಚ ಸಮಾಪಜ್ಜಿ. ತತೋ ವುಟ್ಠಾಯ ಏತ್ಥನ್ತರತೋ ಅನುಪಾದಿಸೇಸನಿಬ್ಬಾನಧಾತುಯಾ ಪರಿನಿಬ್ಬಾಯಿ.

ಮಹಾಮೋಹತಮಂ ಹನ್ತ್ವಾ ಸತ್ತಾನಂ ಹದಯಸ್ಸಿತಂ,

ರವೀವ ಜೋತಮಾನೋ ಸೋ ಲೋಕಸ್ಸ ಅನುಕಮ್ಪಕೋ;

ವಸ್ಸಾನಿ ¶ ಪಞ್ಚತಾಲೀಸಂ ಕತ್ವಾ ಸತ್ತಹಿತಂ ಬಹುಂ,

ಅಧುನಾ ಅಗ್ಗಿಕ್ಖನ್ಧೋವ ಪರಿನಿಬ್ಬಾಯಿ ಸೋ ಜಿನೋ.

ಏವಂ ಪನ ಭಗವತಿ ಪರಿನಿಬ್ಬುತೇ ವಿಸ್ಸಕಮ್ಮದೇವಪುತ್ತೋ ತಥಾಗತಸ್ಸ ಸರೀರಪ್ಪಮಾಣಂ ವರದೋಣಿಂ ರತನೇಹಿ ಮಾಪೇತ್ವಾ ವಿಸುದ್ಧಕಪ್ಪಾಸೇಹಿ ತಥಾಗತಸ್ಸ ಸರೀರಂ ವೇಠೇತ್ವಾ ರತನದೋಣಿಯಂ ಪಕ್ಖಿಪಿತ್ವಾ ಗನ್ಧತೇಲೇಹಿ ಪೂರೇತ್ವಾ ಅಪರಾಯ ದೋಣಿಯಾ ಪಿದಹಿತ್ವಾ ಸಬ್ಬಗನ್ಧದಾರುಚಿತಕಂ ಕತ್ವಾ ಯೇಭುಯ್ಯೇನ ದೇವತಾಯೋ ಲೋಹಿತಚನ್ದನಘಟಿಕಾಯೋ ಆದಾಯ ಚಿತಕಾಯಂ ಪಕ್ಖಿಪಿತ್ವಾ ಅಗ್ಗಿಂ ಗಾಹಾಪೇತುಂ ನಾಸಕ್ಖಿಂಸು. ಕಸ್ಮಾ? ಮಹಾಕಸ್ಸಪತ್ಥೇರಸ್ಸ ಅನಾಗತತ್ತಾ. ಸೋ ಆಯಸ್ಮಾ ಮಹಾಕಸ್ಸಪತ್ಥೇರೋ ಯೇಭುಯ್ಯೇನ ಬಹುನ್ನಂ ದೇವಾನಂ ಪಿಯೋ ಮನಾಪೋ. ಥೇರಸ್ಸ ಹಿ ದಾನಂ ದತ್ವಾ ಸಗ್ಗೇ ನಿಬ್ಬತ್ತಾನಂ ಪಮಾಣೋ ನಾಮ ನತ್ಥಿ. ತಸ್ಮಾ ದೇವತಾ ತಸ್ಮಿಂ ಸಮಾಗಮೇ ಅತ್ತನೋ ಕುಲೂಪಗತ್ಥೇರಂ ಅದಿಸ್ವಾ ಅಮ್ಹಾಕಂ ಮಹಾಕಸ್ಸಪತ್ಥೇರೋ ಕುಹಿನ್ತಿ ಓಲೋಕೇನ್ತೋ ಅತ್ತನೋ ಪರಿವಾರೇಹಿ ಪಞ್ಚಮತ್ತೇಹಿ ಭಿಕ್ಖುಸತೇಹಿ ಸದ್ಧಿಂ ಮಗ್ಗಂ ಪಟಿಪನ್ನೋತಿ ಞತ್ವಾ ಯಾವ ಥೇರೋ ಇಮಸ್ಮಿಂ ನ ಸಮ್ಪತ್ತೋ ಚಿತಕಂ ತಾವ ನ ಪಜ್ಜಲತುತಿ ಅಧಿಟ್ಠಹಿಂಸು. ತಸ್ಮಿಂ ಕಾಲೇ ಥೇರೋ ಯೇಭುಯ್ಯೇನ ತೇರಸಧುತಙ್ಗಧರೇಹಿ ಪಞ್ಚಮತ್ತೇಹಿ ಭಿಕ್ಖುಸತೇಹಿ ಸದ್ಧಿಂ ಆಗನ್ತ್ವಾ ಚಿತಕಂ ತಿಕ್ಖತ್ತುಂ ಪದಕ್ಖಿಣಂ ಕತ್ವಾ ಪಾದಪಸ್ಸೇ ಠೀತೋ, ಭನ್ತೇ ತುಮ್ಹಾಕಂ ದಸ್ಸನತ್ಥಾಯ ಇತೋ ಕಪ್ಪಸತಸಹಸ್ಸಮತ್ಥಕೇ ಪದುಮುತ್ತರಸತ್ಥುನೋ ಪಾದಮುಲೇ ಅಭಿನೀಹಾರತೋ ಪಟ್ಠಾಯ ಅವಿಜಹಿತ್ವಾ ಆಗತೋ. ಇದಾನಿ ಮೇ ಅವಸಾನದಸ್ಸನನ್ತಿ ಪಾದೇ ಗಹೇತ್ವಾ ವನ್ದಿತುಂ ಅಧಿಟ್ಠಾಸಿ.

ಮಹಾಕಸ್ಸಪಥೇರೋ ಸೋ ಭಿಕ್ಖುಸಙ್ಘಪುರಕ್ಖತೋ;

ಏಕಂಸಂ ಚೀವರಂ ಕತ್ವಾ ಪಗ್ಗಹೇತ್ವಾನ ಅಞ್ಜಲಿಂ.

ಪದಕ್ಖಿಣಞ್ಚ ತಿಕ್ಖತ್ತುಂ ಕತ್ವಾ ಠತ್ವಾ ಪದನ್ತಿಕೇ;

ಪತಿಟ್ಠಹನ್ತು ಸೀಸೇ ಮೇ ಜಿನಪಾದೇತಿ’ಧಿಟ್ಠಹಿ.

ಸಹಾಧಿಟ್ಠಾನಂ ಚಿತಕಾ ದುಸ್ಸಾನಿ ಚ ವಿಭಿನ್ದಿಯ;

ನಿಕ್ಖಮಿಂಸು ತದಾ ಪಾದಾ ಘನಮುತ್ತೋವ ಚನ್ದಿಮಾ.

ಉಹೋ ಹತ್ಥೇಹಿ ಪಗ್ಗಯ್ಹ ಠಪೇತ್ವಾ ಅತ್ತನೋ ಸಿರೇ;

ವನ್ದಿತ್ವಾ ಸತ್ಥುನೋ ಪಾದೇ ಖಮಾಪೇತ್ವಾ ವಿಸಜ್ಜಯೀ.

ಪುಣ್ಣಚನ್ದೋ ಯಥಾ ಅಬ್ಭಂ ಚಿತಕಂ ಪಾವಿಸಿ ತದಾ;

ಇದಂ ಅಚ್ಛೇರಕಂ ದಿಸ್ವಾ ರವಂ ರವಿ ಮಹಾಜನೋ.

ಉಟ್ಠಹಿತ್ವಾನ ಪಾಚೀನಾ ವನ್ದೋ ಅತ್ಥಙ್ಗತೋ ಯಥಾ;

ಪಾದೇ ಅನ್ತರಧಾಯನ್ತೇ ಅರೋದಿಂಸು ಮಹಾಜನಾ.

ತದಾ ಮಲ್ಲರಾಜಾನೋ ಭಗವತೋ ಸರೀರಕಿಚ್ಚಂ ಕರಿಸ್ಸಾಮಾತಿ ವತ್ವಾ ನಾನಾವತ್ಥಾಭರಣಾನಿ ನಿವಾಸೇತ್ವಾ ಪರಿವಾರಯಿಂಸು. ತತೋ ರಾಜಾನೋ ಮನುಸ್ಸಾ ಚ ಅಗ್ಗಿಂ ದಾತುಂ ಆರಹಿಂಸು. ತದಾ ಸಕ್ಕೋ? ಮಯಿ ಪನ ಪರಿನಿಬ್ಬುತೇ ಸಕ್ಕೋ ದೇವರಾಜಾ ಮಣಿಜೋತಿರಸಂ ಪಸಾರೇತ್ವಾ ನಿಕ್ಖನ್ತಅಗ್ಗಿನಾ ಮಮ ಸರೀರಕಿಚ್ಚಂ ಕರಿಸ್ಸತಿ. ಮಣಿಅಗ್ಗಿನೋ ಅವಸಾನೇ ಮನುಸ್ಸಾ ಅಗ್ಗಿಂ ಕರಿಸ್ಸನ್ತಿತಿ. ಏವಂ ಬುದ್ಧವಚನಂ ಪರಿಭಾವೇತ್ವಾ ನಿಕ್ಖತ್ತುಂ ಪದಕ್ಖಿಣಂ ಕತ್ವಾ ಭಗವತೋ ಸರೀರಕಿಚ್ಚಂ ಕತ್ವಾ ಸಮನ್ತತೋ ಉಟ್ಠಹತುತಿ ಅಧಿಟ್ಠಹಿ.

ತಸ್ಮಿಂ ಖಣೇ ಸಯಮೇವ ಚಿತಕಂ ಅಗ್ಗಿ ಗಣ್ಹಿ. ಸರೀರಂ ಪನ ಭಗವತೋ ಝಾಯಾಮಾನಂ ಛವಿಚಮ್ಮಮಂಸನಹಾರುಅಟ್ಠಿಅಟ್ಠಿಮಿಞ್ಜಂ ಅಸೇಸೇತ್ವಾ ಸುಮನಮಕುಳಮುತ್ತಾರಾಸಿಸದಿಸಮೇವ ಧಾತುಯೋ ಅವಸೇಸಾ ಅಹೇಸುಂ.

ಪರಿನಿಬ್ಬುತಕಾಲೇಪಿ ಸಕಲಂ ಕಲುನಂ ಅಹು;

ಪರಿದೇವೋ ಮಹಾ ಆಸಿ ಮಹೀ ಉದ್ರಿಯನಂ ಯಥಾ.

ದೇವತಾಯಾನುಭಾವೇನ ಸತ್ಥುನೋ ಚಿತಕೋ ಸಯಂ;

ತತೋ ಏಕಪ್ಪಹಾರೇನ ಪಜ್ಜಲಿತ್ಥ ಸಮನ್ತತೋ.

ಯಞ್ಚ ಅಬ್ಭನ್ತರಂ ದುಸ್ಸಂ ಯಂ ದುಸ್ಸಂ ಸಬ್ಬಬಾಹಿರಂ

ದುಸ್ಸೇ ದ್ವೇವ ನ ಝಾಯಿಂಸು ತೇಸಂ ದುಸ್ಸಾನಮನ್ತರೇ;

ಯಥಾ ನಿರುದ್ಧತೇಲಸ್ಸ ನ ಮಸೀ ನ ಚ ಛಾರಿಕಾ;

ಏವಮಸ್ಸ ನ ದಿಸ್ಸತಿ ಬುದ್ಧಗತ್ತಸ್ಸ ಝಾಯತೋ.

ಸುಮನಮಕುಳಸಭಾವಾ ಚ ಧೋತಮುತ್ತಾಭಮೇವ ಚ;

ಸುವಣ್ಣವಣ್ಣಸಂಕಾಸಾ ಅವಸಿಸ್ಸಂಸು ಧಾತುಯೋ.

ದಾಠಾ ಚತಸ್ಸೋ ಉಣ್ಹೀಸಂ ಅಕ್ಖಕಾ ದ್ವೇ ಚ ಸತ್ತಿಮಾ;

ನ ವಿಕಿಣ್ಣಾ ತತೋ ಸೇಸಾ ವಿಪ್ಪಕಿಣ್ಣಾವ ಧಾತುಯೋ.

ಅಹೋಸಿ ತನುಕಾ ಧಾತು ಸಾಸಪಬೀಜಮತ್ತಿಕಾ;

ಧಾತುಯೋ ಮಜ್ಝಿಮಾ ಮಜ್ಝೇಭಿನ್ನತಣ್ಡುಲಮತ್ತಿಕಾ.

ಧಾತುಯೋ ¶ ಮಹತಿ ಮಜ್ಝೇ ಭಿನ್ನಮುಗ್ಗಪ್ಪಮಾಣಿಕಾ;

ಧಾತುವಣ್ಣಾ ತಯೋ ಆಸುಂ ಬುದ್ಧಾಧಿಟ್ಠಾನತೇಜಸಾ.

ಸಾರಿಪುತ್ತಸ್ಸ ಥೇರಸ್ಸ ಸಿಸ್ಸೋ ಸರಭುನಾಮಕೋ;

ಆದಾಯ ಜಿನಗೀವಟ್ಠಿಂ ಚಿತಕಾತೋವ ಧಾತು ಸೋ.

ಸದ್ಧಿಂ ಸಿಸ್ಸಸಹಸ್ಸೇನ ಚೇತಿಯೇ ಮಹಿಯಙ್ಗಣೇ;

ಠಪೇತ್ವಾ ಚೇತಿಯಂ ಕತ್ವಾ ಕುಸಿನಾರಮಗಾ ಮುನಿ.

ಛಳಭಿಞ್ಞೋ ವಸಿಪ್ಪತ್ತೋ ಖೇಮೋ ಕಾರುಣಿಕೋ ಮುನಿ;

ಸಹಸಾ ಚಿತಕಾತೋವ ವಾಮದಾಠಂ ಸಮಗ್ಗಹೀ.

ಆಕಾಸತೋ ಪತಿತ್ವಾಪಿ ನಿಕ್ಖಮಿತ್ವಾಪಿ ಸಾಲತೋ;

ಸಮನ್ತತೋಮ್ಬುಮುಗ್ಗನ್ತ್ವಾ ನಿಬ್ಬಾಪೇಸುಂ ಜಲಾನಲಂ.

ಮಲ್ಲರಾಜಗಣಾ ಸಬ್ಬೇ ಸಬ್ಬಗನ್ಧೋದಕೇನ ತಂ;

ಚಿತಕಂ ಲೋಕನಾಥಸ್ಸ ನಿಬ್ಬಾಪೇಸುಂ ಮಹೇಸಿನೋ.

ಏವಂ ಪನ ಸಬ್ಬಲೋಕೇ ಕರುಣಾಧಿಕೋ ಸಮ್ಮಾಸಮ್ಬುದ್ಧೋ ವೇಸಾಖಪುಣ್ಣಮುಪೋಸಥೇ ಅಙ್ಗಾರದಿವಸೇ ಪರಿನಿಬ್ಬುತೋ. ದೇವಮನುಸ್ಸಾನಂ ಸಙ್ಗಹಕರಣತ್ಥಾಯ ಯಮಕಸಾಲಾನಮನ್ತರೇ ಚಿತಕಂ ಸತ್ತರತ್ತಿನ್ದಿವಂ ವಸೀ. ತತೋ ವೀಸಂ ಹತ್ಥಸತಿಕಸ್ಸ ಉಪರಿ ಸತ್ತರತ್ತಿನ್ದಿವಂ ವಸಿ. ಯಾವ ಅಗ್ಗಿಪರಿನಿಬ್ಬಾಪನಂ ಸತ್ತರತ್ತಿನ್ದಿವಂ ಹೋತಿ.

ತತೋ ಸತ್ತದಿವಸಾನಿ ಕುಸಿನಾರಾಯಂ ಮಲ್ಲರಾಜಪುತ್ತೇಸು ಗನ್ಧೋದಕೇನ ಚಿತಕಂ ನಿಬ್ಬಾಪಯಮಾನೇಸು ಸಾಲರುಕ್ಖತೋ ಉದಕಧಾರಾ ನಿಕ್ಖಮಿತ್ವಾ ಚಿತಕಂ ನಿಬ್ಬಾಪಯಿಂಸು. ತತೋ ದಸಬಲಸ್ಸ ಧಾತುಯೋ ಸುವಣ್ಣಚಙ್ಗೋಟಕೇ ಪಕ್ಖಿಪಿತ್ವಾ ಅತ್ತನೋ ನಗರೇ ಸನ್ಥಾಗಾರೇ ಠಪೇತ್ವಾ ಸತ್ತಿಪಞ್ಜರಂ ಕತ್ವಾ ಧನುಪಾಕಾರೇಹಿ ಪರಿಕ್ಖಿಪಾಪೇತ್ವಾ ಸತ್ತಾಹಂ ನಚ್ಚಗೀತವಾದಿತಗನ್ಧಮಾಲಾದೀಹಿ ಮಲ್ಲರಾಜಪುತ್ತಾ ಸಕ್ಕಾರಂ ಕರಿಂಸು.

ತತೋ ತೇ ಮಲ್ಲರಾಜಾನೋ ರಮ್ಮಂ ದೇವಸಭೋಪಮಂ;

ಸಬ್ಬಥಾ ಮಣ್ಡುಯಿತ್ವಾನ ಸನ್ಥಾಗಾರಂ ತತೋ ಪನ.

ಮಗ್ಗಂ ¶ ಅಲಙ್ಕರಿತ್ವಾನ ಯಾವ ಮಕುಟಚೇತಿಯಾ;

ಹತ್ಥೀಕ್ಖನ್ಧೇ ಠಪೇತ್ವಾನ ಹೇಮದೋಣಿಂ ಸಧಾತುಕಂ.

ಗನ್ಧಾದೀಹಿಪಿ ಪೂಜೇತ್ವಾ ಕೀಳನ್ತಾ ಸಾಧುಕೀಳಿತಂ;

ಪವೇಸೇತ್ವಾನ ನಗರಂ ಸನ್ಥಾಗಾರೇ ಮನೋರಮೇ.

ದಸಭೂಮಸ್ಮಿಂ ಪಲ್ಲಙ್ಕೇ ಠಪೇತ್ವಾ ಜಿನಧಾತುಯೋ;

ಉಸ್ಸಯುಂ ತೇ ತದಾ ಛತ್ತೇ ಸನ್ಥಾಗಾರಸಮನ್ತತೋ.

ಹತ್ಥೀಹಿ ಪರಿಕ್ಖಿಪಾಪೇಸುಂ ತತೋ ಅಸ್ಸೇ ತತೋ ರಥೇ,

ಅಞ್ಞೋ’ಞ್ಞಂ ಪರಿವಾರೇತ್ವಾ ತತೋ ಯೋಧೇ ತತೋ ಧನು;

ಇತಿ ಪರಿಕ್ಖಿಪಾಪೇಸುಂ ಸಮನ್ತಾ ಯೋಜನಂ ಕಮಾ,

ತದಾ ನಚ್ಚೇಹಿ ಗೀತೇಹಿ ವಾದಿತೇಹಿ ಚ ಪೂಜಯುಂ.)

ಪರಿನಿಬ್ಬಾನಕಥಾ ಸಮತ್ತಾ.

ತತೋ ಭಗವತೋ ಪರಿನಿಬ್ಬುತಭಾವಂ ಸುತ್ವಾ ಅಜಾತಸತ್ತು ಮಹಾರಾಜಾ ಕೋಸಿನಾರಕಾನಂ ಮಲ್ಲಾನಂ ಸಾಸನಂ ಪೇಸೇಸಿ. ಅಹಮ್ಪಿ ಖತ್ತಿಯೋ ಭಗವಾಪಿ ಖತ್ತಿಯೋ ಸತ್ಥುನೋ ಸರೀರಧಾತುನಂ ಥೂಪಞ್ಚ ಮಹಞ್ಚ ಕರೋಮೀತಿ. ತೇನೇವ ಉಪಾಯೇನ ವೇಸಾಲಿಯಂ ಲಿಚ್ಛವಿರಾಜಾನೋ ಚ ಕಪಿಲವತ್ಥುಮ್ಹಿ ಸಕ್ಯರಾಜಾನೋ ಚ ಅಲ್ಲಕಪ್ಪಕೇ ಬುಲಯೋ ಚ ರಾಮಗಾಮಕೇ ಕೋಳಿಯಾ ಚ ವೇಠದೀಪಕೇ ಬ್ರಾಹ್ಮಣೋ ಚ ಪಾವಾಯಂ ಪಾವೇಯ್ಯಕಾ ಚ ಸಾಸನಂ ಪೇಸೇತ್ವಾ ಸಬ್ಬೇ ಏಕತೋ ಹುತ್ವಾ ಕೋಸಿನಾರಕೇಹಿ ಸದ್ಧಿಂ ವಿವಾದಂ ಉಪ್ಪಾದೇಸುಂ. ತೇಸಂ ಪನ ಆಚರಿಯೋ ದ್ರೋಣಬ್ರಾಹ್ಮಣೋ ನಾಮ. ಸೋ ತೇಸಂ? ಮಾ ಭೋನ್ತೋ ವಿಗ್ಗಹವಿವಾದಂ ಕರೋಥ, ಅಮ್ಹಾಕಂ ಭಗವಾ ಖನ್ತಿವಾದೀಯೇವಾತಿ ವತ್ವಾ ತಾದಿಸಸ್ಸ ಚ ಖನ್ತಿಮೇತ್ತಾನುದ್ದಯಸಮ್ಪನ್ನಸ್ಸ ಸರೀರಭಾಗೇ ಕಲಹಂ ಕಾತುಂ ಅಯುತ್ತನ್ತಿ ಆಹ.

(ರಾಜಾ ಅಜಾತಸತ್ತು ಚ ಲಿಚ್ಛವೀ ಚ ನರಾಧಿಪಾ;

ಸಕ್ಯಾ ಚ ಅಲ್ಲಕಪ್ಪಾ ಚ ಕೋಳಿಯಾಪಿ ಚ ರಾಮಕೇ.

ಬ್ರಾಹ್ಮಣೋ ವೇಠದೀಪೋ ಚ ಮಲ್ಲಪಾವೇಯ್ಯಕಾಪಿ ಚ;

ಮಲ್ಲಾ ಚ ಧಾತು ಅತ್ಥಾಯ ಅಞ್ಞಮಞ್ಞಂ ವಿವಾದಯುಂ.

ಏವಂ ¶ ಸನ್ತೇ ತದಾ ದೋಣೋ ಬ್ರಾಹ್ಮಣೋ ಏತದಬ್ರವೀ;

ಸುಣನ್ತು ಭೋನ್ತೋ ಮೇ ವಾಚಂ ಹಿತಮತ್ಥುಪಸಂಹಿತಂ.

ಖನ್ತಿವಾದೀ ಇಸಿಕಾಲೇ ಧಮ್ಮಪಾಲಕುಮಾರಕೇ;

ಛದ್ದನ್ತೇ ಭುರಿದತ್ತೇ ಚ ಚಮ್ಪೇಯ್ಯೇ ಸಙ್ಖಪಾಲಕೇ.

ಮಹಾಕಪಿಜಾತಕಾಲೇ ಅಮ್ಹಾಕಂ ಲೋಕನಾಯಕೋ;

ಕೋಪಂ ಅಕತ್ವಾ ಅಞ್ಞೇಸು ಖನ್ತಿಮೇವ ಅಕಾ ಜಿನೋ.

ಸಿಟ್ಠಾಸಿಟ್ಠೇ ಸುಖೇ ದುಕ್ಖೇ ಲಾಭಾಲಾಭೇ ಯಸಾಯಸೇ;

ತಾದೀ ಲಕ್ಖಣಸಮ್ಪನ್ನೋ ಖನ್ತಿವಾದೇಸು ಕಾ ಕಥಾ.

ಏವಂ ಭವತಂ ವಿವಾದೇ ಸಮ್ಪಹಾರೋ ನ ಸಾಧುಕೋ;

ಸಬ್ಬೇವ ಸಹಿತಾ ಹೋಥ ಸಮಗ್ಗಾ ಮೋದಮಾನಕಾ.

ತಥಾಗತಸ್ಸ ಸಾರೀರಂ ಅಟ್ಠಭಾಗಂ ಕರೋಮಸೇ;

ಥೂಪಾ ವಿತ್ಥಾರಿತಾ ಹೋನ್ತು ಪಸನ್ನಾ ಹಿ ಬಹುಜ್ಜನಾ.

ತೇನ ಹಿ ವಿಭಜೇಹಿ ತ್ವಂ ಅಟ್ಠಭಾಗನ್ತು ಬ್ರಾಹ್ಮಣ;

ಥೂಪಾ ವಿತ್ಥಾರಿತಾ ಹೋನ್ತು ಪಸನ್ನಾ ಹಿ ಬಹುಜ್ಜನಾ.

ಏವಂ ವುತ್ತೇ ತದಾ ದೋಣೋ ಬ್ರಾಹ್ಮಣೋ ಗಣಜೇಟ್ಠಕೋ;

ಸುವಣ್ಣಂ ನಾಳಿಂ ಕತ್ವಾನ ಸಮಂ ಭಾಜೇಸಿ ರಾಜುನಂ.

ಸೋಳಸನಾಳಿಯೋ ಆಸುಂ ಸಬ್ಬಾ ತಾ ಸೇಸಧಾತುಯೋ;

ಏಕೇಕಪುರವಾಸೀನಂ ದ್ವೇ ದ್ವೇ ದೋಣೋ ಅದಾ ತದಾ.

ಧಾತುಯೋ ಚ ಗಹೇತ್ವಾನ ಹಟ್ಠತುಟ್ಠಾ ನರಾಧಿಪಾ;

ಗನ್ತ್ವಾ ಸಕೇ ಸಕೇ ರಟ್ಠೇ ಚೇತಿಯಾನಿ ಅಕಾರಯುಂ.

ದೋಣೋ ತುಮ್ಬಂ ಗಹೇತ್ವಾನ ಕಾರೇಸಿ ತುಮ್ಬಚೇತಿಯಂ;

ಅಙ್ಗಾರಥೂಪಂ ಕಾರೇಸುಂ ಮೋರಿಯಾ ಹಟ್ಠಮಾನಸಾ.

ಏಕಾ ದಾಠಾ ತಿದಸಪುರೇ ಏಕಾ ನಾಗಪುರೇ ಅಹು;

ಏಕಾ ಗನ್ಧಾರವಿಸಯೇ ಏಕಾ ಕಾಲಿಙ್ಗರಾಜಿನೋ.)

ತತ್ಥ ¶ ದೋಣೋತಿ? ತದಾ ಗಣಾಚರಿಯೋ. ಸೋ ಧಾತುಯೋ ವಿಭಜನ್ತೋ ಏಕಂ ದಕ್ಖಿಣದಾಠಾಧಾತುಂ ಗಹೇತ್ವಾ ವೇಠನ್ತರೇ ಠಪೇಸಿ. ತದಾ ಸಕ್ಕೋ ಅಜ್ಜ ದಕ್ಖಿಣದಾಠಾಧಾತುಂ ಕೋ ಲಭತೀತಿ ಚಿನ್ತೇತ್ವಾ ವೇಠನ್ತರೇ ಪಸ್ಸಿ. ಸೋ ರತನಚಙ್ಗೋಟಕಂ ಗಹೇತ್ವಾ ಅದಿಸ್ಸಮಾನಕಾಯೇನ ಗನ್ತ್ವಾ ಧಾತುಂ ಗಹೇತ್ವಾ ತಾವತಿಂಸಭವನೇ ಚೂಳಾಮಣಿಚೇತಿಯ ಏಕಯೋಜನುಬ್ಬೇಧಂಯೇವ ಮಹನ್ತಂ ಥೂಪಂ ಕತ್ವಾ ಠಪೇಸಿ. ಏಕಂ ದಕ್ಖಿಣದಠಾಧಾತುಂ ಪಾದಗ್ಗನ್ತರೇ ಅಕ್ಕಮಿತ್ವಾ ಗಣ್ಹಿ. ಏತ್ತಾವತಾ ತಾವತಿಂಸಭವನದನ್ತಧಾತುಕಥಾ ಪರಿಪುಣ್ಣಾ ವೇದಿತಬ್ಬಾ.

ತದಾ ಜಯಸೇನೋ ನಾಮ ನಾಗರಾಜಾ ಭಗವತೋ ಪರಿನಿಬ್ಬುತಭಾವಂ ಸುತ್ವಾ ಅಜ್ಜ ಪಚ್ಛಿಮದಸ್ಸನಂ ಪಸ್ಸಿಸ್ಸಾಮೀತಿ ಮಹನ್ತಂ ನಾಗರಾಜಸಮ್ಪತ್ತಿಂ ಗಹೇತ್ವಾ ಕುಸಿನಾರಂ ಗನ್ತ್ವಾ ಮಹಾಪೂಜಂ ಕತ್ವಾ ಏಕಮನ್ತಂ ಠತ್ವಾ ಪಾದಗ್ಗನ್ತರೇ ಠಿತಂ ಧಾತುಂ ದಿಸ್ವಾ ನಾಗೇದ್ಧಿಬಲೇನ ಗಹೇತ್ವಾ ನಾಗಭವನಂ ನೇತ್ವಾ ನಾಗಪುರಸ್ಸ ಮಜ್ಝೇ ರತನಖಚಿತೇ ಚೇತಿಯೇ ಠಪೇಸಿ. ತಂ ತಮ್ಬಪಣ್ಣಿಯಂ ಕಾಕವಣ್ಣತಿಸ್ಸರಾಜಕಾಲೇ ಮಹಾದೇವತ್ಥೇರಸ್ಸ ಸಿಸ್ಸೋ ಮಹಿನ್ದತ್ಥೇರೋ ನಾಮ ನಾಗಭವನಂ ಗನ್ತ್ವಾ ದಕ್ಖಿಣದಾಠಂ ಗಹೇತ್ವಾ ತಮ್ಬಪಣ್ಣಿಯಂ ಸೇರುನಗರಂ ಹರಿತ್ವಾ ಗಿರಿಅಭಯಸ್ಸ ಸೇರುನಗರಪಬ್ಬತನ್ತರೇ ಚೇತಿಯಂ ಕಾರಾಪೇತ್ವಾ ಠಪೇಸಿ.

ಏತ್ತಾವತಾ ನಾಗಭವನದನ್ತಧಾತುಕಥಾ ಪರಿಪುಣ್ಣಾ ವೇದಿತಬ್ಬಾ.

ತತ್ರಾಯಂ ಗನ್ಧಾರವಾಸಿನೋತಿ? ಏಕಾ ವಾಮದಾಠಾ ದೋಣೋ ನಾಮ ಆಚರಿಯೋ ನಿವತ್ಥ ವತ್ಥನ್ತರೇ ಠಪೇತ್ವಾ ಗಣ್ಹಿ. ತದಾ ಏಕೋ ಗನ್ಧಾರವಾಸೀ ಪುಬ್ಬೇ ಲದ್ಧಬ್ಯಾಕರಣೋ ಕತಾಭಿನೀಹಾರೋ ವತ್ಥನ್ತರೇ ಠತಪಿದನ್ತಧಾತುಂ ದಿಸ್ವಾ ಕುಸಲಚಿತ್ತೇನ ತತೋ ದನ್ತಧಾತುಂ ಗಹೇತ್ವಾ ಗನ್ಧಾರವಾಸಿಕೇಹಿ ಸದ್ಧಿಂ ಅತ್ತನೋ ರಟ್ಠಂ ಗನ್ತ್ವಾ ಚೇತಿಯವನೇ ಠಪೇಸಿ.

ಏತ್ತಾವತಾ ವಾಮದನ್ತಧಾತುಕಥಾ ಪರಿಪುಣ್ಣಾ ವೇದಿತಬ್ಬಾ.

ತತ್ಥ ಅಧೋ ವಾಮದನ್ತಧಾತುಂ ಸಾರಿಪುತ್ತತ್ಥೇರಸ್ಸ ಸಿಸ್ಸೋ ಖೇಮೋ ನಾಮ ಮುನಿ ಜಾಲಚಿತಕತೋವ ಉಪ್ಪತಿತ್ವಾ ವಾಮದಾಠಂ ಗಹೇತ್ವಾ ಕಾಲಿಙ್ಗಪುರಂ ನೇತ್ವಾ ಬ್ರಹ್ಮದತ್ತಸ್ಸ ರಞ್ಞೋ ಸಮೀಪಂ ಗನ್ತ್ವಾ ¶ ದನ್ತಧಾತುಂ ದಸ್ಸೇತ್ವಾ? ಮಹಾರಾಜ ವಾಮದನ್ತಧಾತುಂ ಭಗವಾ ತಮೇವ ಇಮಸ್ಮಿಂ ಜಮ್ಬುದೀಪೇ ಯಾವ ಗುಹಸೀವಪರಮ್ಪರಾ ದೇವಮನುಸ್ಸಾನಂ ಅತ್ಥಂ ಕರಿತ್ವಾ ಪರಿಯೋಸಾನೇ ಗುಹಸೀವರಞ್ಞೋ ಪಾಹೇಸ್ಸತೀತಿ (ನೀಯಾದೇತುಂ) ಆಹಾತಿ ನೀಯ್ಯಾದೇಸಿ.

ಅಪರಭಾಗೇ ಹೇಮಮಾಲಾ ರಾಜಕಞ್ಞಾ ದನ್ತಕುಮಾರೇನ ಸದ್ಧಿಂ ಬ್ರಾಹ್ಮಣವೇಸಂ ಗಹೇತ್ವಾ ದನ್ತಧಾತುಂ ಆದಾಯ ಪಲಾಯಿತ್ವಾ ವಾಣಿಜೇ ಆರೋಚೇತ್ವಾ ನಾವಾ ವೇಗೇನ ಗನ್ತ್ವಾ ಚೇವ ನಾಗಸುಪಣ್ಣೇಹಿ ಮಹನ್ತಂ ಪೂಜಂ ಕಾರೇತ್ವಾ ಅನುಕ್ಕಮೇನಾಗನ್ತ್ವಾ ಜಮ್ಬುಕೋಳಪಟ್ಟನಂ ಪತ್ವಾ ದಿಜವರಸ್ಸ ಆಚಿಕ್ಖಿತಮಗ್ಗೇನ ಅನುರಾಧಪುರಂ ಪತ್ವಾ ಕಿತ್ತಿಸ್ಸಿರಿಮೇಘಸ್ಸ ಪವತ್ತಿಂ ಪುಚ್ಛಿತ್ವಾ ನವವಸ್ಸಆಯುಸಮಾನೋ ತೀಸು ಸರಣೇಸು ಪಸನ್ನಭಾವಂ ಸುತ್ವಾ ಮೇಘಗಿರಿ ಮಹಾಥೇರಸ್ಸ ಸನ್ತಿಕಂ ಗನ್ತ್ವಾ ವನ್ದಿತ್ವಾ ಏಕಮನ್ತಂ ನಿಸೀದಿತ್ವಾ ದನ್ತಧಾತುಂ ಜಮ್ಬುದೀಪತೋ ಗಹೇತ್ವಾ ಆಗತಭಾವಂ ಆರೋಚೇತ್ವಾ ದಸ್ಸೇಸಿ. ದಿಸ್ವಾ ಚ ಪನ ಪೀತಿಯಾ ಫುಟೋ ಉಭಿನ್ನಮ್ಪಿ ಸಙ್ಗಹಂ ಕತ್ವಾ ಮಹಾವಿಹಾರಂ ಅಲಙ್ಕಾರೇತ್ವಾ ಜಿನದನ್ತಧಾತುಂ ಠಪೇತ್ವಾ ಏಕಂ ಭಿಕ್ಖುಂ ಪೇಸೇತ್ವಾ ತಂ ಪವತ್ತಿಂ ರಞ್ಞೋ ಆರೋಚಾಪೇಸಿ. ತಂ ಸುತ್ವಾ ರಾಜಾ ಪೀತಿಪಾಮೋಜ್ಜೋ ಚಕ್ಕವತ್ತಿಸ್ಸ ಸಿರಿಸಮ್ಪತ್ತೋ ದಳಿದ್ದೋ ವಿಯ ತಸ್ಸ ಪಾಟಿಹಾರಿಯಂ ದಿಸ್ವಾ ವೀಮಂಸಿತ್ವಾ ನಿಕ್ಕಙ್ಖೋ ಹುತ್ವಾ ಸಕಲಲಙ್ಕಾದೀಪೇನ ಪೂಜೇಸಿ. ಏತೇನ ನಯೇನ ಪೂಜಂ ಕತ್ವಾ ಏಕದಿವಸೇನೇವ ನವಲಕ್ಖಂ ಪೂಜೇಸಿ.

ಸೀಹಳಿನ್ದೋ ಉಭಿನ್ನಮ್ಪಿ ಬಹೂನಿ ರತನಾನಿ ಚ;

ಗಾಮೇ ಚ ಇಸ್ಸರೇ ಚೇವ ದತ್ವಾನ ಸಙ್ಗಹಂ ಅಕಾ.

ಏತ್ತಾವತಾ ಅಧೋದಾಠಾಧಾತುಕಥಾ ಪರಿಪುಣ್ಣಾ ವೇದಿತಬ್ಬಾ.

ಚತ್ತಾಲೀಸ ಸಮಾ ದನ್ತಾ ಕೇಸಾ ಲೋಮಾ ಚ ಸಬ್ಬಸೋ ದೇವಾ ಹರಿಂಸು ಏಕೇಕಂ ಚಕ್ಕವಾಳಪರಮ್ಪರಾ.

ತತ್ರ ವಚನೇ, ಚತ್ತಾಲೀಸ ಸಮಾ ದನ್ತಾತಿ? ಸೇಸದನ್ತಾ ಚ ಕೇಸಾ ಚ ಲೋಮಾ ಚ ನಖಾ ಚ ಸಬ್ಬಸೋಪಿ ಮಯಿ ಪರಿನಿಬ್ಬುತ-ಕಾಲೇ ¶ ಮಾ ಡಯ್ಹನ್ತು ಲುಞ್ಚಿತ್ವಾ ಆಕಾಸೇ ಪತಿಟ್ಠನ್ತು ಏಕೇಕಚಕ್ಕವಾಳಞ್ಚ ಏಕೇಕಕೇಸಲೋಮನಖದನ್ತಧಾತುಪರಮ್ಪರಾ ನೇತ್ವಾ ಚೇತಿಯಂ ಕಾರೇತ್ವಾನ ದೇವಮನುಸ್ಸಾನಂ ಅತ್ಥಂ ಕರೋತುತಿ ಅಧಿಟ್ಠಹಿ. ತಸ್ಮಾ ಪರಿನಿಬ್ಬುತಕಾಲತೋ ಯಾವ ಸರೀರಂ ನ ಡಯ್ಹತಿ ತಾವ ಛಬ್ಬಣ್ಣರಸ್ಮಿಯೋ ಲೋಮಧಾತು ನ ಪಜಹತಿ. ದೋಣಬ್ರಾಹ್ಮಣೋಪಿ ಧಾತುವಿಭಜನಾವಸಾನೇ ವೇಠನ್ತರೇ ಚ ನಿವಾಸನನ್ತರೇ ಚ ಪಾದಗ್ಗನ್ತರೇ ಚ ಧಾತುನಂ ವಿನಟ್ಠಭಾವಂ ಞತ್ವಾ ಪಥವಿಯಂ ಉತ್ತಾನಕೋಯೇವಜಾತೋ. ತದಾ ಸಕ್ಕೋ ದೇವರಾಜಾ ದಿಸ್ವಾ ಅಯಂ ದೇಣಾಚರಿಯೋ ಧಾತು ಅತ್ಥಾಯ ಅನುಪರಿವತ್ತೇತ್ವಾ ವಿನಾಸಂ ಪಾಪುಣೇಯ್ಯ ಅಹಂ ವೀಣಾಚರಿಯವೇಸಂ ಗಹೇತ್ವಾ ತಸ್ಸ ಸನ್ತಿಕಂ ಗನ್ತ್ವಾ ಸೋಕಂ ವಿನೋದೇಸ್ಸಾಮೀತಿ ಸಕ್ಕರೂಪಂ ಜಹಿತ್ವಾ ವೀಣಾಚರಿಯವೇಸಂ ಗಹೇತ್ವಾ ತಸ್ಸ ಸನ್ತಿಕಂ ಗನ್ತ್ವಾ ಏಕಮನ್ತಂ ಠಿತೋ ದಿಬ್ಬಗೀತಂ ಗಾಯಿತ್ವಾ ವೀಣಂ ವಾದೇನ್ತೋ ನಾನಪ್ಪಕಾರಂ ಉದಾನೇಸಿ. ಯಂ ಧಮ್ಮಮೇತಂ ಪುರಿಸಸ್ಸ ವಾದಂ ಛಿನ್ದಿಸ್ಸಾಮೀತಿ ವತ್ವಾ ಕಥಾಯ ಸೋತುನಂ ಲೋಭಂ ಪರಸ್ಸ ಅತ್ಥಂ ವಿನಾಸೇತ್ವಾ ಅತಿಲೋಭೇನ ಪುರಿಸೋ ಪಾಪಕೋ ಹೋತೀತಿ. ಹಂಸರಾಜಜಾತಕಂ ದೀಪೇತ್ವಾ ಯಂ ಲದ್ಧಂ ತಂ ಸುಲದ್ಧನ್ತಿ ಆಹ. ತಂ ಸುತ್ವಾ ದೋಣೋ ಅಯಂ ವೀಣಾಚರಿಯೋ ಮಯ್ಹಂ ಥೇನಭಾವಂ ಅಞ್ಞಾಸೀತಿ ಸೋಕಂ ವಿನೋದೇತ್ವಾ ಉಟ್ಠಾಯ ಆವಜ್ಜಮಾನೋ ತುಮ್ಬಂ ದಿಸ್ವಾ ಯೇನ ಭಗವತೋ ಸರೀರಧಾತುಯೋ ಮಿತಾ ಸೋಪಿ ಧಾತುಗತಿಕೋವ. ಇದಂ ಥೂಪಂ ಕರಿಸ್ಸಾಮೀತಿ ಚಿನ್ತೇತ್ವಾ ತುಮ್ಬಂ ಗಹೇತ್ವಾನ ಚೇತಿಯೇ ಠಪೇಸಿ. ಮೋರಿಯಾ ಅಙ್ಗಾರಂ ಗಹೇತ್ವಾ ಅಙ್ಗಾರಚೇತಿಯಂ ನಾಮ ಕಾರೇಸುಂ.

(ನಗರೇ ಕಪಿಲವತ್ಥುಮ್ಹಿ ಸಮ್ಮಾದಿಟ್ಠಿ ಬಹುಜ್ಜನೋ;

ತತ್ಥ ಸಾರೀರಿಕಂ ಥೂಪಂ ಅಕಾಸಿ ರತನಾಮಯಂ.

ನಗರೇ ¶ ಅಲ್ಲಕೇ ರಮ್ಮೇ ಬುದ್ಧಧಾತು ಪತಿಟ್ಠಿಯ;

ಸಿಲಾಯ ಮುಗ್ಗವಣ್ಣಾಯ ಥೂಪಂ ಸಧಾತುಕಂ ಅಕಾ.

ಜನೋ ಪಾವೇಯ್ಯರಟ್ಠಸ್ಮಿಂ ಪತಿಟ್ಠಿಯ ಸಾರೀರಿಕಂ;

ಸಿಲಾಯ ಮಣಿವಣ್ಣಾಯ ಪಾವೇಯ್ಯಂ ಚೇತಿಯಂ ಅಕಾ.

ಚೀವರಂ ಪತ್ತದಣ್ಡಞ್ಚ ಮಧುರಾಯಂ ಅಪೂಜಯುಂ;

ನಿವಾಸನಂ ಕುಸಘರೇ ಪೂಜಯಿಂಸು ಮಹಾಜನಾ.

ಪಚ್ಚತ್ಥರಣಂ ಕಪಿಲೇ ಉಣ್ಣಲೋಮಞ್ಚ ಕೋಸಲೇ;

ಪೂಜೇಸುಂ ಪಾಟಲಿಪುತ್ತೇ ಕರಕಂ ಕಾಯಬನ್ಧನಂ.

ನಿಸೀದನಂ ಅವನ್ತಿಸು ಚಮ್ಪಾಯಂ’ದಕಸಾಟಕಂ;

ದೇವರಟ್ಠೇ ಅತ್ಥರಣಂ ವಿದೇಹೇ ಪರಿಸ್ಸಾವನಂ.

ವಾಸಿ-ಸೂಚಿಘರಞ್ಚಾಪಿ ಇನ್ದಪತ್ಥೇ ಅಪೂಜಯುಂ;

ಪಾಸಾಣಕೇ ಪದಂ ಸೇಟ್ಠಂ ಭಣ್ಡಸೇಸಂ ಪರನ್ತಕೇ.

ಮಹಿಂಸು ಮನುಜಾ ಧಾತುಂ ಅಟ್ಠದೋಣಮಿತಂ ತದಾ;

ಧಾತು ವಿತ್ಥಾರಿತಾ ಆಸಿ ಲೋಕನಾಥಸ್ಸ ಸತ್ಥುನೋ).

ತೇ ಪನ ರಾಜಾನೋ ಹಿ ಅತ್ತನೋಲದ್ಧಧಾತುಂ ಗಹೇತ್ವಾ ಸಕಸಕನಗರಂ ಗನ್ತ್ವಾ ಚೇತಿಯಂ ಕಾರಾಪೇತ್ವಾ ಮಹನ್ತಂ ಪೂಜಾವಿಧಾನಂ ಕರಿಂಸು. ಚಕ್ಖುಮನ್ತಸ್ಸ ಭಗವತೋ ಸರೀರಧಾತು ಅಟ್ಠದೋಣಮತ್ತಂ ಸುವಣ್ಣನಾಳಿಯಾ ಏಕಸತಅಟ್ಠವೀಸತಿನಾಳಿಕಾ ಅಹೋಸಿ? ಸತ್ಥಾ ಪನ ಉತ್ತರಾಸಾಳ್ಹನಕ್ಖತ್ತೇನ ಮಾತುಕುಚ್ಛಿಯಂ ಪಟಿಸನ್ಧಿಂ ಗಣ್ಹಿ. ವಿಸಾಖನಕ್ಖತ್ತೇನ ಮಾತುಕುಚ್ಛಿತೋ ನಿಕ್ಖಮಿ. ಉತ್ತರಾಸಾಳ್ಹನಕ್ಖತ್ತೇನ ಮಹಾಭಿನಿಕ್ಖಮನಂ ನಿಕ್ಖಮಿ. ವಿಸಾಖನಕ್ಖತ್ತೇನ ಬುದ್ಧೋ ಅಹೋಸಿ. ಉತ್ತರಾಸಾಳ್ಹನಕ್ಖತ್ತೇನ ಧಮ್ಮಚಕ್ಕಂ ಪವತ್ತೇಸಿ. ತೇನೇವ ಯಮಕಪಾಟಿಹಾರಿಯಂ ಅಕಾಸಿ. ಅಸ್ಸಯುಜನಕ್ಖತ್ತೇನ ದೇವೋರೋಹಣಂ ಅಕಾಸಿ. ವಿಸಾಖನಕ್ಖತ್ತೇನ ಪರಿನಿಬ್ಬಾಯಿ. ಮಹಾಕಸ್ಸಪತ್ಥೇರಾ ಚ ಅನುರುದ್ಧತ್ಥೇರೋ ಚ ದ್ವೇ ಮಹಾಥೇರಾ ಭಗವತೋ ಸರೀರಧಾತುಯೋ ವಿಸ್ಸಜ್ಜಾಪೇತ್ವಾ ಅದಂಸು.

ತೇಸಂ ¶ ರಾಜುನಂ ಭಗವತೋ ಸರೀರಧಾತುಂ ಲಭಿತ್ವಾ ಸತ್ತದಿವಸಸತ್ತಮಾಸಾಧಿಕಾನಿ ಸತ್ತವಸ್ಸಾನಿ ಮಹಾರಹಂ ಪೂಜಂ ಕತ್ವಾ ಗತಕಾಲೇ ಮಿಚ್ಛಾದಿಟ್ಠಿಕಮನುಸ್ಸಾ? ಸಮಣೋ ಗೋತಮೋ ಪರಿನಿಬ್ಬುತೋ. ತಸ್ಸ ಧಾತು ಅತ್ಥಾಯ ಅಮ್ಹಾಕಂ ಜೀವಿತಕಪ್ಪನಂ ನಾಸೇತ್ವಾ ಪೂಜಂ ಕರೋತೀ’ತಿ ಸಮ್ಮಾಸಮ್ಬುದ್ಧೇ ಪದುಸ್ಸನ್ತಿ. ಸಕ್ಕೋ ಆವಜ್ಜೇನ್ತೋ ತಂ ಕಾರಣಂ ಞತ್ವಾ ಮಹಾಕಸ್ಸಪತ್ಥೇರಸ್ಸ ಆರೋಚೇಸಿ;’ಭನ್ತೇ ಮಿಚ್ಛಾದಿಟ್ಠಿಕಾ ಮನುಸ್ಸಾ ಭಗವತಿ ಪದುಟ್ಠಚಿತ್ತೇನ ಇತೋ ಚುತಾ ಅವೀಚಿನಿರಯಂ ಉಪ್ಪಜ್ಜನ್ತಿ. ಬಹುತರಾ ಅನಾಗತೇ ಮಿಚ್ಛಾದಿಟ್ಠಿಕಾ ಮಾತುಪಿತುಘಾತಕಾ ರಾಜಾನೋ ಭವಿಸ್ಸನ್ತಿ. ಅಜ್ಜೇವ ಧಾತುಯೋ ನಿದಹಿತುಂ ವಟ್ಟತೀ’ತಿ ಥೇರೋ ವಿಚಾರೇತ್ವಾ ಅದ್ದಸ.

ಅನನ್ತಮತ್ಥಂ ಧರಮಾನಕಾಲೇ ಕತ್ವಾನ ಸತ್ತಾನಮಲೀನಚಿತ್ತೋ ಸೇಸಾನಮತ್ಥಾಯ ಸರೀರಧಾತುಂ ಠಪೇತ್ವ ಸೋ ಮಚ್ಚುಮುಖಂ ಉಪೇತೋ. (ಕತ್ವಾ ಯೋ ಬೋಧಿಞಾಣಂ ವಿವಿಧಬಲವರಂ ಬುಜ್ಝಿತುಂ ಪಾರಮೀಯೋ ವತ್ವಾ ಸಙ್ಖೇಯ್ಯಪುಣ್ಣೇ ಅಪರಿಮಿತಭವೇ ಉತ್ತರಿತ್ವಾ ಸುಮುತ್ತಂ. ಆರೋಹಿತ್ವಾನ ಸೀಘಂ ಅರಿಯಸಿವಪದಂ ಅಚ್ಚುತಂ ಸೀತಿಭಾವಂ ಪತ್ತೋ ಸೋ ಜಾತಿಪಾರಂ ನಿಖಿಲಪದಹನಂ ದುಕ್ಕರಂ ಕಾರಯಿತ್ವಾ.

ಧಾತ್ವನ್ತರಾಯಂ ದಿಸ್ವಾನ ಥೇರೋ ಕಸ್ಸಪಸವ್ಹಯೋ;

ನಿಧಾನಂ ಸಬ್ಬಧಾತುನಂ ಕರೋಹೀತ್ಯಾಹ ಭೂಪತಿಂ.

ಸಾಧೂತಿ ಸೋ ಪಟಿಸ್ಸುತ್ವಾ ಮಾಗಧೋ ತುಟ್ಠಮಾನಸೋ;

ಧಾತುನಿಧಾನಂ ಕಾರೇಸಿ ಸಬ್ಬತ್ಥ ವತ್ತಿತಾದಿಯ.

ಕಾರಾಪೇತ್ವಾನ ಸೋ ರಾಜಾ ಕಸ್ಸಪಸ್ಸ ನಿವೇದಯೀ;

ಧಾತುಯೋ ಆಹರೀ ಥೇರೋ ಇದಂ ಕಾರಣಮದ್ದಸ.

ಭುಜಙ್ಗಾ ¶ ಪರಿಗಣ್ಹಿಂಸು ರಾಮಗಾಮಮ್ಹಿ ಧಾತುಯೋ;

ಚೇತಿಯೇ ಧಾರಯಿಸ್ಸನ್ತಿ ಲಙ್ಕಾದೀಪೇ ಅನಾಗತೇ.

ತಾ ಧಾತುಯೋ ಠಪೇತ್ವಾನ ಥೇರೋ ಕಸ್ಸಪಸವ್ಹಯೋ;

ರಞ್ಞೋ ಅಜಾತಸತ್ತುಸ್ಸ ಅದಾಸಿ ಧಾತುಯೋ ತದಾ.

ಗೇಹೇ ಚೂಪಕರಣಾನಿ ಚತುಸಟ್ಠಿಸತಾನಿ ಸೋ;

ಅಬ್ಭನ್ತರೇ ಠಪೇಸಿ ರಾಜಾ ಸಬ್ಬಾ ತಾ ಬುದ್ಧಧಾತುಯೋ.

ಕರಣ್ಡಾಸೀತಿ ಸಂಕಿಣ್ಣಂ ಚೇತಿಯಾಸೀತಿಲಙ್ಕತಂ;

ಗೇಹೇ ಬಹುಸಮಾಕಿಣ್ಣಂ ಥೂಪಾರಾಮಪ್ಪಮಾಣಕಂ.

ಕಾರೇತ್ವಾ ಸಬ್ಬಕರಣಂ ವಾಲಿಕಂ ಓಕಿರೀ ತಹಿಂ;

ನಾನಾಪುಪ್ಫಸಹಸ್ಸಾನಿ ನಾನಾ ಗನ್ಧಂ ಸಮಾಕಿರಿ.

ಅಸೀತಿಥೇರರೂಪಾನಿ ಅಟ್ಠಚಕ್ಕಸತಾನಿ ಚ;

ಸುದ್ಧೋಧನಸ್ಸ ರೂಪಮ್ಪಿ ಮಾಯಾಪಜಾಪತಾದಿನಂ.

ಸಬ್ಬಾನಿ ತಾನಿ ರೂಪಾನಿ ಸುವಣ್ಣಸ್ಸೇವ ಕಾರಯಿ;

ಪಞ್ಚ ಛತ್ತಧಜಸತೇ ಉಸ್ಸಾಪೇಸಿ ಮಹೀಪತೀ.

ಜಾತರೂಪಮಯೇ ಕುಮ್ಭೇ ಕುಮ್ಭೇ ಚ ರತನಾಮಯೇ;

ಪಞ್ಚ ಪಞ್ಚ ಸತೇಯೇವ ಠಪಾಪೇಸಿ ಸಮನ್ತತೋ.

ಸೋವಣ್ಣನಿಕ್ಖಮಯೇನ ಚ ಕಪಾಲೇ ರಜತಾಮಯೇ;

ಪುರೇಸಿ ಗನ್ಧತೇಲಸ್ಸ ಜಾಲಾಪೇತ್ವಾ ಪದೀಪಕೇ.

ಪಞ್ಚ ಪಞ್ಚ ಸತೇಯೇವ ಠಪಾಪೇಸಿ ದಿಸಮ್ಪತಿ;

ಇಮೇ ತಥೇವ ತಿಟ್ಠನ್ತ ಅಧಿಟ್ಠಾಸಿ ಮಹಾಮುನಿ.

ವಿತ್ಥಾರಿತಾ ಧಮ್ಮಾಸೋಕೋ ಭವಿಸ್ಸತಿ ಅನಾಗತೇ;

ಅಕ್ಖರೇ ಸೋಣ್ಣಪತ್ತಮ್ಹಿ ಛಿನ್ದಾಪೇಸಿ ಮಹಾಮತೀ.

ಪಕಪ್ಪಿತ್ವಾ ವಿಸುಕಮ್ಮಂ ಧಾತುಗಬ್ಭಸಮನ್ತತೋ;

ವಾತವೇಗೇನ ಯಾಯನ್ತಂ ಯನ್ತರೂಪಮಕಾರಯೀ.

ಕತ್ವಾ ಸಿಲಾಪರಿಕ್ಖೇಪಂ ಪಿದಹಿತ್ವಾ ಸಿಲಾಹಿ ತಂ;

ತಸ್ಸೂಪರಿ ಕರೀ ಥೂಪಂ ಸಮಂ ಪಾಸಾಣಥೂಪಿಯಂ.)

ಧಾತುನಿಧಾನಕಥಾ ಸಮತ್ತಾ.

ಇತಿ ಅರಿಯಜನಪ್ಪಸಾದನತ್ಥಾಯ ಕತೇ ಧಾತುವಂಸೇ ತಥಾಗತಸ್ಸ ಪರಿನಿಬ್ಬುತಾಧಿಕಾರೋ ನಾಮ ದುತಿಯೋ ಪರಿಚ್ಛೇದೋ.

೩. ¶ ಧಾತುಪರಮ್ಪರಾಕಥಾ

ಧಾತುಸು ಪನ ವಿಭಜಿತ್ವಾ ದೀಯಮಾನೇಸು ಸತ್ಥುನೋ ನಲಾಟಧಾತು ಕೋಸಿನಾರಕಾನಂ ಮಲ್ಲಾನಂ ಲದ್ಧಕೋಟ್ಠಾಸೇಯೇವ ಅಹೋಸಿ. ಮಹಾಕಸ್ಸಪತ್ಥೇರೋ ತೇ ಉಪಸಙ್ಕಮಿತ್ವಾ ಸತ್ಥುನೋ ನಲಾಟಧಾತು ತುಮ್ಹಾಕಂ ಕೋಟ್ಠಾಸೇ ಅಹೋಸಿ, ತಂ ಗಹೇತುಂ ಆಗತೋ, ಭಗವಾ ಹಿ ಧರಮಾನೇಯೇವ ತಮ್ಬಪಣ್ಣಿದೀಪಸ್ಸ ಅನುಜಾನಿ, ‘ತಸ್ಮಾ ತಂ ಅಮ್ಹಾಕಂ ದೇಥಾ’ತಿ. ತಂ ಸುತ್ವಾ ಮಲ್ಲರಾಜಾನೋ?’ಏವಂ ಪತಿಗಣ್ಹಥ ಭನ್ತೇ ಧಾತು’ತಿ ಮಹಾಕಸ್ಸಪತ್ಥೇರಸ್ಸ ಅದಂಸು. ಸೋ ಅತ್ತನೋ ಸದ್ಧಿವಿಹಾರಿಕಂ ಮಹಾನನ್ದತ್ಥೇರಂ ಪಕ್ಕೋಸಾಪೇತ್ವಾ ನಲಾಟಧಾತುಂ ಥೇರಸ್ಸ ನಿಯ್ಯಾದೇತ್ವಾ’ ಇಮಂ ಧಾತುಂ ತಮ್ಬಪಣ್ಣಿ ದೀಪೇ ಮಹಾವಾಲುಕಗಙ್ಗಾಯ ದಕ್ಖಿಣಭಾಗೇ ಸೇರುನಾಮ ದಹಸ್ಸ ಅನ್ತೇ ವರಾಹ ನಾಮ ಸೋಣ್ಡಿಮತ್ಥಕೇ ಕಾಕವಣ್ಣತಿಸ್ಸೋ ನಾಮ ರಾಜಾ ಪತಿಟ್ಠಾಪೇಸ್ಸತಿ, ಚೇತಿಯಂ ಸಙ್ಘಾರಾಮಂ ಕಾರಾಪೇಸ್ಸತಿ, ತ್ವಂ ಇಮಂ ಧಾತುಂ ಗಹೇತ್ವಾ ವೇಸಾಲಿಯಂ ಉಪನಿಸ್ಸಾಯ ಮಹಾವನವಿಹಾರೇ ಕುಟಾಗಾರಸಾಲಾಯಂ ಸತ್ಥುನೋ ವಸಿತಗನ್ಧಕುಟಿಯಂ ಠಪೇತ್ವಾ ಧಾತುಪೂಜಂ ಕತ್ವಾ ಆಯುಸಙ್ಖಾರೇ ಓಸ್ಸಟ್ಠೇ ಪರಿನಿಬ್ಬಾಪಯಮಾನೇ ಅತ್ತನೋ ಸದ್ಧಿವಿಹಾರಿಕಸ್ಸ ಚನ್ದಗುತ್ತತ್ಥೇರಸ್ಸ ಧಾತುವಂಸಂ ಕಥೇತ್ವಾ ಅಪ್ಪಮತ್ತೋ ಹೋಹೀ’ತಿ ವತ್ವಾ ಧಾತುಂ ಥೇರಸ್ಸ ದತ್ವಾ ಅನುಪಾದಿಸೇಸನಿಬ್ಬಾನಧಾತುಯಾ ಪರಿನಿಬ್ಬಾಯಿ.

ಸಾವಕೋ ಸತ್ಥುಕಪ್ಪೋ ಸೋ ಪಭೀನ್ನಪಟಿಸಮ್ಭಿದೋ;

ಗಹೇತ್ವಾ ಮಾನಯೀ ಧಾತುಂ ಮಹಾನನ್ದೋ ಮಹಾವನೇ.

ತಸ್ಸ ಥೇರಸ್ಸ ಸದ್ಧಿವಿಹಾರಿಕೋ ಚನ್ದಗುತ್ತತ್ಥೇರೋ ಧಾತುಂ ಗಹೇತ್ವಾ ಆಕಾಸಂ ಉಗ್ಗನ್ತ್ವಾ ಸಾವತ್ಥೀಯಂ ಜೇತವನಮಹಾವಿಹಾರೇ ದಸಬಲೇನ ವಸಿತಗನ್ಧಕುಟಿಯಂ ಠಪೇತ್ವಾ ಧಾತುಪೂಜಂ ಕತ್ವಾ ಚಿರಂ ವಿಹಾಸಿ. ಸೋಪಿ ಆಯುಸಙ್ಖಾರೇ ಓಸ್ಸಟ್ಠೇ ಪರಿನಿಬ್ಬಾಪಯಮಾನೇ ಅತ್ತನೋ. ಸದ್ಧಿವಿಹಾರಿಕಂ ಭದ್ದಸೇನತ್ಥೇರಂ ಪಕ್ಕೋಸಾಪೇತ್ವಾ ಧಾತುಂ ಥೇರಸ್ಸ ನಿಯ್ಯಾದೇತ್ವಾ ಧಾತುವಂಸಂ ಕಥೇತ್ವಾ ಅನುಸಾಸಿತ್ವಾ ಅನುಪಾದಿಸೇಸಾಯ ನಿಬ್ಬಾನಧಾತುಯಾ ಪರಿನಿಬ್ಬಾಯಿ.

ಚನ್ದಗುತ್ತೋ ಮಹಾಪಞ್ಞೋ ಛಳಭಿಞ್ಞೋ ವಿಸಾರದೋ;

ರಮ್ಮೇ ಜೇತವನೇ ಧಾತುಂ ಠಪೇತ್ವಾ ವನ್ದನಂ ಅಕಾ.

ತಸ್ಸ ¶ ಸಿಸ್ಸೋ ಭದ್ದಸೇನತ್ಥೇರೋ ಧಾತುಂ ಗಹೇತ್ವಾ ಆಕಾಸೇನ ಗನ್ತ್ವಾ ಧಮ್ಮಚಕ್ಕಪ್ಪವತ್ತನೇ ಇಸಿಪತನೇ ಮಹಾ ವಿಹಾರೇ ಸತ್ಥುನೋ ವಸಿತಗನ್ಧಕುಟಿಯಂ ಠಪೇತ್ವಾ ಗನ್ಧಮಾಲಾದೀಹಿ ಪೂಜೇತ್ವಾ ಚಿರಂ ವಿಹಾಸಿ. ಸೋ ಪರಿನಿಬ್ಬಾಪಯಮಾನೋ ಅತ್ತನೋ ಸದ್ಧಿವಿಹಾರಿಕಸ್ಸ ಜಯಸೇನತ್ಥೇರಸ್ಸ ಧಾತುಂ ನಿಯ್ಯಾದೇತ್ವಾ ಧಾತುವಂಸಂ ಕಥೇತ್ವಾ ಅನುಪಾದಿಸೇಸಾಯ ನಿಬ್ಬಾನಧಾತುಯಾ ಪರಿನಿಬ್ಬಾಯಿ.

ಭದ್ದಸೇನೋ ಮಹಾಥೇರೋ ಕತಕಿಚ್ಚೋ ಮಹಾಇಸಿ;

ಧಾತುಂ ಠಪೇತ್ವಾ ಇಸಿಪತನೇ ವನ್ದಿತ್ವಾ ನಿಬ್ಬುತಿಂ ಗತೋ.

ಸೋ ಪನ ಜಯಸೇನತ್ಥೇರೋ ತಂ ಧಾತುಂ ಗಹೇತ್ವಾ ವೇಲುವನಮಹಾವಿಹಾರೇ ಸತ್ಥುನೋ ವಸಿತಗನ್ಧಕುಟಿಯಂ ಠಪೇತ್ವಾ ಗನ್ಧಮಾಲಾದೀಹಿ ಪೂಜೇತ್ವಾ ಚಿರಂ ವಸಿತ್ವಾ ಪರಿನಿಬ್ಬಾಪಯಮಾನೋ ಅತ್ತನೋ ಸದ್ಧಿವಿಹಾರಿಕಸ್ಸ ಮಹಾಸಙ್ಘರಕ್ಖಿತತ್ಥೇರಸ್ಸ ಧಾತುಂ ನಿಯ್ಯಾದೇತ್ವಾ ಧಾತುವಂಸಂ ಕಥೇತ್ವಾ ಅನುಪಾದಿಸೇಸಾಯ ನಿಬ್ಬಾನಧಾತುಯಾ ಪರಿನಿಬ್ಬಾಯಿ.

ಗಹೇತ್ವಾನ ಧಾತುವರಂ ಜಯಸೇನೋ ಮಹಾಮುನಿ;

ನಿಧಾಯ ವೇಲುವನೇ ರಮ್ಮೇ ಅಕಾ ಪೂಜಂ ಮನೋರಮಂ.

ಸೋ ಪನಾಯಸ್ಮಾ ಸಙ್ಘರಕ್ಖಿತತ್ಥೇರೋ ಧಾತುಂ ಗಹೇತ್ವಾ ಆಕಾಸೇನ ಆಗನ್ತ್ವಾ ಕೋಸಮ್ಬಿಂ ಉಪನಿಸ್ಸಾಯ ಘೋಸಿತ ಸೇಟ್ಠಿನಾ ಕಾರಾಪಿತೇ ಘೋಸಿತಾರಾಮೇ ಭಗವತೋ ವಸಿತಗನ್ಧಕುಟಿಯಂ ಠಪೇತ್ವಾ ಗನ್ಧಮಾಲಾದೀಹಿ ಪೂಜಂ ಕತ್ವಾ ಚಿರಂ ವಿಹಾಸಿ. ಸೋ’ಪಿ ಪರಿನಿಬ್ಬಾಪಯಮಾನೋ ಅತ್ತನೋ ಸದ್ಧಿವಿಹಾರಿಕಂ ಮಹಾದೇವತ್ಥೇರಂ ಪಕ್ಕೋಸಾಪೇತ್ವಾ ಧಾತುವಂಸಂ ಕಥೇತ್ವಾ ಅಪ್ಪಮತ್ತೋ ಹೋಹೀ’ತಿ ವತ್ವಾ ಅನುಪಾದಿಸೇಸಾಯ ನಿಬ್ಬಾನಧಾತುಯಾ ಪರಿನಿಬ್ಬಾಯಿ.

ಸಙ್ಘರಕ್ಖಿತವ್ಹಯೋ ಥೇರೋ ಚನ್ದೋ ವಿಯ ಸುಪಾಕಟೋ;

ಠಪೇತ್ವಾ ಘೋಸಿತಾರಾಮೇ ಅಕಾ ಪೂಜಂ ಮನೋರಮಂ.

ತಸ್ಸ ಥೇರಸ್ಸ ಸದ್ಧಿವಿಹಾರಿಕೋ ಮಹಾದೇವತ್ಥೇರೋ ಧಾತುಂ ಗಹೇತ್ವಾ ದೇವಾನಮ್ಪಿಯತಿಸ್ಸಸ್ಸ ಮಹಾರಞ್ಞೋ ಭಾತು ಮಹಾನಾಗಸ್ಸ ಉಪರಾಜಸ್ಸ ಮಹಾಗಾಮೇ ಸೇತಚ್ಛತ್ತಂ ಉಸ್ಸಾಪಿತಕಾಲೇ ಹತ್ಥೋಟ್ಠ ನಾಮಜನಪದೇ ಕುಕ್ಕುಟಪಬ್ಬತನ್ತರೇ ಮಹಾಸಾಲರುಕ್ಖಮೂಲೇ ಆಕಾಸತೋ ಓತರಿತ್ವಾ ನಿಸೀದಿ. ತಸ್ಮಿಂ ಸಮಯೇ ಮಹಾಕಾಳೋ ನಾಮ ಉಪಾಸಕೋ ಅತ್ತನೋ ಪುತ್ತದಾರೇಹಿ ಸದ್ಧಿಂ ಮಾಲಾಗನ್ಧವಿಲೇಪನಂ ಧಜಪತಾಕಾದೀನಿ ಗಾಹಾಪೇತ್ವಾ ದಿವಸಸ್ಸ ತಿಕ್ಖತ್ತುಂ ಮಹನ್ತೇಹಿ ಪೂಜಾವಿಧಾನೇಹಿ ಧಾತುಂ ಪರಿಹರಿತ್ವಾ ಚಿರಂ ವಸಿ. ಮಾಸಸ್ಸ ಅಟ್ಠ-ಉಪೋಸಥದಿವಸೇ ¶ ಧಾತುತೋ ಛಬ್ಬಣ್ಣರಂಸಿಯೋ ಉಗ್ಗಚ್ಛಿಂಸು. ತಸ್ಮಿಂ ಸಮಯೇ ಸೋ ಪದೇಸೋ ಬುದ್ಧಸ್ಸ ಧರಮಾನಕಾಲೋ ವಿಯ ಅಹೋಸಿ. ಜನಪದವಾಸೀ ಮನುಸ್ಸಾಪಿ ಥೇರಸ್ಸ ಸನ್ತಿಕೇ ಸೀಲಾನಿ ಗಣ್ಹನ್ತಿ, ಉಪೋಸಥವಾಸಂ ವಸನ್ತಿ, ದಾನಂ ದೇನ್ತಿ, ಚೇತಿಯಸ್ಸ ಮಹನ್ತಂ ಪೂಜಂ ಕರೋನ್ತೀ. ತತೋ ಅಪರಭಾಗೇ ಉಪರಾಜಾ ಮಹಾಗಾಮೇ ವಿಹರನ್ತೋ ಭೇರಿಂ ಚರಾಪೇಸಿ? ಯೋ ಅಮ್ಹಾಕಂ ದಸಬಲಸ್ಸ ಧಾತುಂ ಗಹೇತ್ವಾ ಇಧಾಗತೋ, ತಸ್ಸ ಮಹನ್ತಂ ಸಮ್ಪತ್ತಿಂ ದಸ್ಸಾಮೀತಿ. ತಸ್ಮಿಂ ಕಾಲೇ ಕುಟುಮ್ಬಿಕೋ ಮಹಾಕಾಳೋ ಉಪರಾಜಂ ಪಸ್ಸಿಸ್ಸಾಮೀತಿ ತಸ್ಸ ಅನುಚ್ಛವಿಕಂ ಪಣ್ಣಾಕಾರಂ ಗಹೇತ್ವಾ ರಾಜದ್ವಾರೇ ಠತ್ವಾ ಸಾಸನಂ ಪಹಿಣಿ. ಉಪರಾಜಾ ತಂ ಪಕ್ಕೋಸಾಪೇಸಿ. ಸೋ ಗನ್ತ್ವಾ ವನ್ದಿತ್ವಾ ಠಿತೋ ತಂ ಪಣ್ಣಾಕಾರಂ ರಾಜಪುರಿಸಾನಂ ಪಟಿಚ್ಛಾಪೇಸಿ. ಉಪರಾಜಾ? ಮಾತುಲ ಮಹಾಕಾಳ, ತುಮ್ಹಾಕಂ ಜನಪದೇ ಅಮ್ಹಾಕಂ ಸತ್ಥುನೋ ಧಾತು ಅತ್ಥೀ’ತಿ ಆಹ. ಮಹಾಕಾಳೋ ಉಪ ರಾಜಸ್ಸ ಕಥಂ ಸುತ್ವಾ ಅತ್ಥಿ ದೇವ, ಮಯ್ಹಂ ಕುಲುಪಗತ್ಥೇರಸ್ಸ ಸನ್ತಿಕೇ ಆದಾಸಮಣ್ಡಲಪ್ಪಮಾಣಂ ಸತ್ಥುನೋ ನಲಾಟಧಾತು ಛಬ್ಬಣ್ಣರಂಸೀಹಿ ಆಕಾಸಪ್ಪದೇಸೇ ಸೂರಿಯಸಹಸ್ಸಚನ್ದಸಹಸ್ಸಾನಂ ಉಟ್ಠಿತಕಾಲೋ ವಿಯ ಓಭಾಸೇತಿ. ಸೋ ಜನಪದೋ ಬುದ್ಧಸ್ಸ ಉಪ್ಪನ್ನಕಾಲೋ ವಿಯ ಅಹೋಸೀತಿ ಆಹ. ತಸ್ಸ ಕುಟುಮ್ಬಿಕಸ್ಸ ಕಥಂ ಸುಣನ್ತಸ್ಸಏವ ರಞ್ಞೋ ಸಕಲಸರೀರಂ ಪಞ್ಚವಣ್ಣಾಯ ಪೀತಿಯಾ ಪರಿಪುಣ್ಣಂ ಅಹೋಸಿ. ಅತಿವಿಯ ಸೋಮನಸ್ಸಪ್ಪತ್ತೋ ರಾಜಾ ಮಯ್ಹಂ ಮಾತುಲಸ್ಸ ಮಹಾಕಾಳಸ್ಸ ಸತಸಹಸ್ಸಂ ಕಹಾಪಣಾನಿ ಚ ಚತುಸಿನ್ಧವಯುತ್ತರಥಞ್ಚ ಸುವಣ್ಣಾಲಙ್ಕಾರೇಹಿ ಸುಸಜ್ಜಿತಂ ಏಕಂ ಅಸ್ಸಞ್ಚ ಉದಕಫಾಸುಕಟ್ಠಾನಕೇ ಖೇತ್ತಞ್ಚ ಪಞ್ಚದಾಸೀಸತಞ್ಚ ದೇಥಾ’ತಿ ವತ್ವಾ ಅಞ್ಞಞ್ಚ ಪಸಾದಂ ದಾಪೇಸಿ. ಸೋ ಉಪರಾಜಾ ಏತ್ತಕಂ ಕುಟುಮ್ಬಿಕಸ್ಸ ದಾಪೇತ್ವಾ ತಂ ದಿವಸಮೇವ ನಗರೇ ಭೇರಿಂ ಚರಾಪೇತ್ವಾ ಹತ್ಥಸ್ಸರಥಯಾನಾನಿ ಗಹೇತ್ವಾ ಕುಟುಮ್ಬಿಕಂ ಮಗ್ಗದೇಸಕಂ ಕತ್ವಾ ಅನುಪುಬ್ಬೇನ ಹತ್ಥೋಟ್ಠಜನಪದಂ ಪತ್ವಾ ರಮಣೀಯೇ ಭೂಮಿಪ್ಪದೇಸೇ ಖನ್ಧಾವಾರಂ ಬನ್ಧಿತ್ವಾ ಅಮಚ್ಚಗಣಪರಿವುತೋ ಕುಟುಮ್ಬಿಕಂ ಗಹೇತ್ವಾ ಥೇರಸ್ಸ ವಸನಟ್ಠಾನಂ ಗನ್ತ್ವಾ ವನ್ದಿತ್ವಾ ಏಕಮನ್ತಂ ಅಟ್ಠಾಸಿ. ಸೇಸಾ ಅಮಚ್ಚಾ ಕುಟುಮ್ಬಿಕೋ ಚ ಥೇರಂ ವನ್ದಿತ್ವಾ ಏಕಮನ್ತಂ ¶ ಅಟ್ಠಂಸು. ಉಪರಾಜಾ ಥೇರಂ ವನ್ದಿತ್ವಾ ಸಾರಾಣೀಯಂ ಕಥಂ ಕತ್ವಾ ಏಕಮನ್ತಂ ನಿಸಿನ್ನೋ ಪಟಿಸನ್ಥಾರಮಕಾಸಿ. ಮಹಾದೇವತ್ಥೇರೋಪಿ ಸಮ್ಮೋದನೀಯಂ ಕಥಂ ಕತ್ವಾ ಕಿಸ್ಸ ತ್ವಂ ಮಹಾರಾಜ ಇಧಾಗತೋಸಿ ಆಗತಕಾರಣಂ ಮೇ ಆರೋಚೇಹೀ’ತಿ ಆಹ. ಭನ್ತೇ ತುಮ್ಹಾಕಂ. ಸನ್ತಿಕೇ ಅಮ್ಹಾಕಂ ಭಗವತೋ ನಲಾಟಧಾತು ಅತ್ಥೀ ಕಿರ. ತಂ ವನ್ದಿಸ್ಸಾಮಿ’ತಿ ಆಗತೋಮ್ಹೀ’ತಿ ಆಹ. ಥೇರೋ? ಭದ್ದಕಂ ಮಹಾ ರಾಜ ತಯಾ ಕತನ್ತಿ ವತ್ವಾ ಧಾತುಘರದ್ವಾರಂ ವಿವರಿತ್ವಾ ಮಹಾರಾಜ ಬುದ್ಧಸ್ಸ ನಲಾಟಧಾತು ಅತಿದುಲ್ಲಭಾ’ತಿ ಆಹ. ರಾಜಾ ಸೋಳಸೇಹಿ ಗನ್ಧೋದಕೇಹಿ ನಹಾಯಿತ್ವಾ ಸಬ್ಬಾಲಙ್ಕಾರಪತಿಮಣ್ಡಿತೋ ಏಕಂಸಂ ಉತ್ತರಾಸಙ್ಗಂ ಕರಿತ್ವಾ ಅಞ್ಜಲಿಂ ಪಗ್ಗಯ್ಹ ನಮಸ್ಸಮಾನೋ ಅಟ್ಠಾಸಿ. ಬುದ್ಧಾರಮ್ಮಣಾಯ ಪೀತಿಯಾ ಸಕಲಸರೀರಂ ಫುಟಂ ಅಹೋಸಿ.

(ರಾಜಾ ಪೀತಿವೇಗೇನ ಇಮಾ ಗಾಥಾ ಆಹ;

ನಮಾಮಿ ವೀರ ಪಾದೇ ತೇ ಚಕ್ಕಙ್ಕಿತ ತಲೇ ಸುಭೇ;

ವನ್ದಿತೇ ನರದೇವೇಹಿ ಅಮತಂ ದೇಹಿ ವನ್ದಿತೇ.

ಲೋಕನಾಥ ತುವಂ ಏಕೋ ಸರಣಂ ಸಬ್ಬಪಾಣಿನಂ;

ಲೋಕೇ ತಯಾ ಸಮೋ ನತ್ಥಿ ತಾರೇಹಿ ಜನತಂ ಬಹುಂ.

ಮಹಣ್ಣವೇ ಮಯಂ ಭನ್ತೇ ನಿಮುಗ್ಗಾ ದೀಘಸಮ್ಭವೇ;

ಅಪ್ಪತಿಸ್ಸಾ ಅಪ್ಪತಿಟ್ಠಾ ಸಂಸರಾಮ ಚಿರಂ ತಹಿಂ.

ಏತರಹಿ ತುಮ್ಹೇ ಆಪಜ್ಜ ಪತಿಟ್ಠಂ ಅಧಿಗಚ್ಛರೇ;

ತುಮ್ಹಾಕಂ ವನ್ದನಂ ಕತ್ವಾ ಉತ್ತಿಣ್ಣಮ್ಹ ಭವಣ್ಣವಾ’ತಿ.)

ತಸ್ಮಿಂ ಖಣೇ ಧಾತುತೋ ರಸ್ಮಿಯೋ ನಿಕ್ಖಮಿಂಸು. ಸಕಲ ಲಙ್ಕಾದೀಪಂ ಸುವಣ್ಣರಸಧಾರಾಹಿ ಸಞ್ಛನ್ನಂ ವಿಯ ಅಹೋಸಿ. ಮಹನ್ತಂ ಪೀತಿಸೋಮನಸ್ಸಂ ಉಪ್ಪಜ್ಜಿ. ರಾಜಾ ಮಹನ್ತಂ ಸೋಮನಸ್ಸಂ ಪತ್ತೋ ಹುತ್ವಾ ಹಟ್ಠತುಟ್ಠೋ ಅಹೋಸಿ. ಸೋ ಧಾತುಘರತೋ ನಿಕ್ಖಮಿತ್ವಾ ಥೇರೇನ ಸದ್ಧಿಂ ಅಲಙ್ಕತಮಣ್ಡಪೇ ಏಕಮನ್ತಂ ನಿಸೀದಿ. ಏಕಮನ್ತಂ ನಿಸಿನ್ನೋ (ನಿಸಜ್ಜಾದೋಸೇ ವಜ್ಜೇತ್ವಾ ಸೇಯ್ಯಥಿದಂ? ಅತಿದುರಚ್ಚಾಸನ್ತ-ಉಪರಿವಾತ-ಉನ್ನತಪ್ಪದೇಸ-ಅತಿಸಮ್ಮುಖ-ಅತಿಪಚಛಾ’ತಿ. ¶ ಅತಿದೂರೇ ನಿಸಿನ್ನೋ ಸಚೇ ಕಥೇತುಕಾಮೋ ಉಚ್ಚಾಸದ್ದೇನ ಕಥೇತಬ್ಬಂ ಹೋತಿ. ಅಚ್ಚಾಸನ್ನೇ ನಿಸಿನ್ನೋ ಸಙ್ಕರಂ ಕರೋತಿ. ಉಪರಿವಾತೇ ನಿಸಿನ್ನೋ ಸರೀರಗನ್ಧೋ ವಾಯತಿ. ಉನ್ನತಪ್ಪದೇಸೇ ನಿಸಿನ್ನೋ ಅಗಾರವಂ ಕರೋತಿ. ಅತಿಸಮ್ಮುಖೇ ನಿಸಿನ್ನೋ ಚಕ್ಖುನಾ ಚಕ್ಖುಂ ಪಹರಿತ್ವಾ ದಟ್ಠಬ್ಬಂ ಹೋತಿ. ಅತಿಪಚ್ಛಾ ನಿಸಿನ್ನೋ ಗೀವಂ ಪರಿವತ್ತೇತ್ವಾ ದಟ್ಠಬ್ಬಂ ಹೋತಿ. ಇತಿ ನಿಸಜ್ಜಾದೋಸಂ ವಜ್ಜೇತ್ವಾ ನಿಸಿನ್ನೋ). ಏವಮಾಹ. ಭನ್ತೇ ಇಮಂ ಧಾತುಂ ಮಯ್ಹಂ ದೇಥ. ಮಹನ್ತಂ ಪೂಜಾಸಕ್ಕರಂ ಕತ್ವಾ ಪರಿಹರಾಮೀತಿ. ಭದ್ದಕಂ ಮಹಾರಾಜ ಇಮಾಯ ಧಾತುಯಾ ಸಮ್ಮಾಸಮ್ಬುದ್ಧೋ ಧರಮಾನೋಯೇವ ವ್ಯಾಕರಣಂ ಅಕಾಸಿ. ತುಮ್ಹಾಕಂ ವಂಸೇ ಜಾತೋ ಕಾಕವಣ್ಣತಿಸ್ಸೋ ನಾಮ ರಾಜಾ ಇಮಸ್ಮಿಂ ದೀಪೇ ಮಹಾವಾಲುಕಗಙ್ಗಾಯ ದಕ್ಖಿಣತೀರೇ ಸೇರು ನಾಮ ದಹಸ್ಸ ಅನ್ತೇ ವರಾಹ ನಾಮ ಸೋಣ್ಡಿಯಾ ಮತ್ಥಕೇ ಪತಿಟ್ಠಪೇತ್ವಾ ಮಹನ್ತಂ ಥೂಪಂ ಕರಿಸ್ಸತೀ’ತಿ ವತ್ವಾ ಸತ್ಥಾ ತತ್ಥ ಸಮಾಪತ್ತಿಂ ಸಮಾಪಜ್ಜಿತ್ವಾ ಪಞ್ಚಸತಖೀಣಾಸವೇಹಿ ಸದ್ಧಿಂ ತಿಕ್ಖತ್ತುಂ ಪದಕ್ಖಿಣಂ ಕತ್ವಾ ಗತೋ. ತಸ್ಮಾ ಗಣ್ಹಥ ಮಹಾರಾಜಾ’ತಿ ವತ್ವಾ ಧಾತುಂ ಅದಾಸಿ.

ರಾಜಾ ಧಾತುಂ ಗಹೇತ್ವಾ ಚತುರಸ್ಸಪಲ್ಲಙ್ಕೇ ಧಾತುಕರಣ್ಡಕಂ ನಿದಹಿತ್ವಾ ಕರಣ್ಡಕೇ ಧಾತುಂ ಪತಿಟ್ಠಾಪೇತ್ವಾ ತಂ ಕುಮುದಪತ್ತಸನ್ನಿಹಮಙ್ಗಲಸಿನ್ಧವಯುತ್ತರಥೇ ಠಪೇತ್ವಾ ಸಮನ್ತಾ ಆರಕ್ಖಂ ಸಂವಿದಹಿತ್ವಾ (ರಾಜಾ ಧಾತುಂ ಗಹೇತ್ವಾ) ಪಞ್ಚಙ್ಗತುರಿಯೇ ಪಗ್ಗಣ್ಹಾಪಯಮಾನೋ ಪಚ್ಛಾ ಆಗಚ್ಛತು’ತಿ ಮಹಾಜನಸ್ಸ ಸಾಸನಂ ವತ್ವಾ ಮಹಾದೇವತ್ಥೇರಸ್ಸ ಸನ್ತಿಕಂ ಗನ್ತ್ವಾ? ತುಮ್ಹೇ ಭನ್ತೇ, ಧಾತುಯಾ ಉಪಟ್ಠಾನಂ ಕರೋನ್ತೋ ಆಗಚ್ಛಥಾ’ತಿ ಆಹ. ಥೇರೋ ತಸ್ಸ ಕಥಂ ಸುತ್ವಾ;’ಮಹಾರಾಜ ಅಯಂ ಧಾತು ಪರಮ್ಪರಾ ಆಗತಾ. ಅಹಂ ಭಗವತೋ ಧಮ್ಮಭಣ್ಡಾಗಾರಿಕಆನನ್ದತ್ಥೇರೋ ವಿಯ ಇಮಂ ಧಾತುಂ ಪರಿಹರಿಸ್ಸಾಮೀ’ತಿ ವತ್ವಾ ಅತ್ತನೋ ಪಚ್ಚಯದಾಯಕಂ ಕುಟುಮ್ಬಿಕಂ ಆಪುಚ್ಛಿತ್ವಾ ಪತ್ತಚೀವರಮಾದಾಯ ಧಾತುಂ ಉಪಟ್ಠಹಿಯಮಾನೋ ಪಚ್ಛತೋ ಪಚ್ಛತೋ ಗಚ್ಛತಿ. ರಾಜಾ ಧಾತುಂ ಗಹೇತ್ವಾ ಅನುಪುಬ್ಬೇನ ಮಹಾಗಾಮಂ ಪತ್ತೋ ಮಹಾಸೇನಗುತ್ತಂ ಪಕ್ಕೋಸಾಪೇತ್ವಾ ನಗರಂ ಅಲಙ್ಕರಾಪೇಹೀ’ತಿ ಆಹ. ಸೋ ನಗರೇ ಭೇರಿಂ ಚರಾಪೇತ್ವಾ ಅಟ್ಠಾರಸ ವೀಥಿಯೋ ಸಮ್ಮಜ್ಜನ್ತು, ಪುಣ್ಣಘಟೇ ಠಪೇನ್ತು, ಧಜಪತಾಕಾದಯೋ ಉಸ್ಸಾಪೇನ್ತು, ತೋರಣಾನಿ ಉಸ್ಸಾಪೇನ್ತು, ಪಞ್ಚವಣ್ಣಾನಿ ಪುಪ್ಫಾನಿ ¶ ಓಕಿರನ್ತು, ಸಕಲನಗರಂ ಅಲಙ್ಕರೋನ್ತು, ಗನ್ಧಮಾಲಾದಯೋ ಗಹೇತ್ವಾ ಸುದ್ಧುತ್ತರಾಸಙ್ಗಾ ಹುತ್ವಾ ಸಕಲನಾಗರಾ ಪಟಿಪಥಂ ಆಗಚ್ಛನ್ತುತಿ ಆಣಾಪೇಸಿ. ತತೋ ಮಹಾಜನೋ ಸಬ್ಬತುರಿಯಾನಿ ಘೋಸಾಪಯಮಾನೋ ಗನ್ಧಮಾಲಾದಿಹತ್ಥೋ ಪಟಿಪಥಂ ನಿಕ್ಖನ್ತೋ. ದೇವಮನುಸ್ಸಾ ಭಿಕ್ಖುಭಿಕ್ಖುನಿಯೋ ಉಪಾಸಕೋಪಾಸಿಕಾ ಅಪ್ಪಮಾಣಾ ಅಹೇಸುಂ. (ಗನ್ಧಮಾಲಾದಿ ಪುಣ್ಣಘಟಸಮುಸ್ಸಿತಧಜಾಕಿಣ್ಣಾ) ಪರಿಸಾ ವೇಲುಕ್ಖೇಪಸಹಸ್ಸಾನಿ ಪವತ್ತಯಿಂಸು. ಸುಗನ್ಧವಾತಾಭಿಘಾತಸಮುದ್ದಘೋಸೋ ವಿಯ ಸಕಲನಗರಂ ಏಕನಿನ್ನಾದಜಾತಂ. ಸೋ ರಾಜಾ ನಗರೇ ಬನ್ಧನಾಗಾರೇ ಸಬ್ಬಸತ್ತೇ ಬನ್ಧನಾ ಮುಞ್ಚನ್ತು, ಧಮ್ಮೇನ ಸಮೇನ ಅನುಸಾಸನ್ತುತಿ ವತ್ವಾ ಧಾತುಂ ಗಹೇತ್ವಾ ಅತ್ತನೋ ನಗರಂ ಪವೇಸೇತ್ವಾ ಅತ್ತನೋ ರಾಜನಿವೇಸನಂ ಆಗನ್ತ್ವಾ ನಾಟಕೀನಂ ಸಞ್ಞಮದಾಸಿ ಧಾತುಂ ವನ್ದನ್ತುತಿ. ನಾಟಕೀ ನಾನಾಭರಣೇಹಿ ಪತಿಮಣ್ಡಿತಾ ರಾಜಗೇಹತೋ ನಿಕ್ಖಮಿತ್ವಾ ಧಾತುಂ ವನ್ದಿತ್ವಾ ಅತ್ತನೋ ಅತ್ತನೋ ಹತ್ಥಗತಾನಿ ತುರಿಯಭಣ್ಡಾನಿ ಸಾಧುಕಂ ಪಗ್ಗಣ್ಹಿತ್ವಾ ಮಹನ್ತಂ ಪೂಜಮಕಂಸು.

ತತೋ ವಡ್ಢಕಿಂ ಪಕ್ಕೋಸಾಪೇತ್ವಾ ರಾಜನಿವೇಸನತೋ ನಾತಿದೂರೇ ನಾಚ್ಚಾಸನ್ತೇ ಸುಭುಮಿತಲೇ ಧಾತುಘರಂ ಕಾರಾಪೇತ್ವಾ ಮಾಲಾಕಮ್ಮಲತಾಕಮ್ಮಾದಿಂ ಪತಿಟ್ಠಾಪೇತ್ವಾ ಧಾತುಘರೇ ವಿಚಿತ್ತಮಣ್ಡಪಂ ಕಾರಾಪೇತ್ವಾನ ಸತ್ತರತನಮಯಂ ಧಾತುಕರಣ್ಡಕಂ ಕಾರಾಪೇತ್ವಾ ಧಾತುಕರಣ್ಡಕೇ ಧಾತುಂ ಠಪೇತ್ವಾ ರತನಪಲ್ಲಙ್ಕ ಮತ್ಥಕೇ ಧಾತುಂ ಠಪೇತ್ವಾ ಉಪರಿ ವಿಚಿತ್ತವಿತಾನಂ ಬನ್ಧಿತ್ವಾ ಸಾಣಿಯಾ ಪರಿಕ್ಖಿಪಾಪೇತ್ವಾ ಮಹನ್ತೇನ ಪರಿವಾರೇನ ಮಹನ್ತಂ ಧಾತುಪೂಜಂ ಅಕಾಸಿ. ಮಹಾಜನಾ ಗನ್ಧಮಾಲಂ ಗಹೇತ್ವಾ ಮಾಸಸ್ಸ ಅಟ್ಠೂಪೋಸಥದಿವಸೇ ಧಾತುಯಾ ಮಹನ್ತಂ ಪೂಜಂ ಅಕಂಸು. ಧಾತುತೋ ರಂಸಿಯೋ ಸಮುಗ್ಗಚ್ಛನ್ತಿ. ಮಹಾಜನಾ ವಿಮ್ಭಯಜಾತಾ ಸಾಧುಕಾರಂ ಕರೋನ್ತಿ. ಸೋಮನಸ್ಸಭೂತಾ ಸಕಲನಗರವಾಸಿನೋ ಬುದ್ಧಾರಮ್ಮಣ ಪೀತಿಂ ಗಹೇತ್ವಾ ದಿವಸೇ ದಿವಸೇ ಧಾತುಯಾ ಮಹನ್ತಂ ಪೂಜಂ ಕರೋನ್ತಾ ವೀತಿನಾಮೇನ್ತಿ. ಪಞ್ಚಸೀಲಾನಿ ರಕ್ಖನ್ತಿ, ಬುದ್ಧಮಾಮಕಾ ಧಮ್ಮಮಾಮಕಾ ಸಙ್ಘಮಾಮಕಾ ಹುತ್ವಾ ಸರಣಾನಿ ಗಚ್ಛನ್ತಿ. ರಾಜಾ ಮಹಾಜನಸ್ಸ ಓವದತಿ. ‘‘ಮೇತ್ತಂ ಭಾವೇಥ, ಕರುಣಂ ಮುದಿತಂ ಉಪೇಕ್ಖಂ ಭಾವೇಥ, ಕುಲೇ ಜೇಟ್ಠಾಪಚಾಯನಕಮ್ಮಂ ಕರೋಥಾ‘‘ತಿ. ಓವದಿತ್ವಾ ಭಿಕ್ಖುಸಙ್ಘಸ್ಸಪಿ ಚತ್ತಾರೋ ಪಚ್ಚಯೇ ಗಙ್ಗಾಯ ಮಹೋ-ಘಪ್ಪವತ್ತನಕಾಲೋ ¶ ವಿಯ ಮಹಾದಾನಂ ಪವತ್ತೇಸಿ. ಮಾತಾಪಿತುಟ್ಠಾನೇ ಠತ್ವಾ ಭಿಕ್ಖುಸಙ್ಘಂ ಸಙ್ಗಣ್ಹಿ. ಮಹಾಜನಾ ತಸ್ಸ ಓವಾದೇ ಠತ್ವಾ ದಾನಾದೀನಿ ಪುಞ್ಞಾನಿ ಕತ್ವಾ ಯೇಭುಯ್ಯೇನ ತಸ್ಮಿಂ ಕಾಲೇ ಮತಾ ಸಗ್ಗಂ ಗತಾ.

ಕಲ್ಯಾಣವಗ್ಗಮ್ಹಿ ಪತಿಟ್ಠಿತಾ ಜನಾ,

ದಾನಾದಿ ಪುಞ್ಞಾನಿ ಕರಿತ್ವ ಸಬ್ಬದಾ;

ಚುತಾ ಚುತಾ ಸಬ್ಬಜನಾ ಸುಮಾನಸಾ,

ಗತಾ ಅಸೇಸಂ ಸುಗತಿಂ ಸುಭೇ ರತಾ.

ರಾಜಾ ಧಾತುಯಾ ಮಹನ್ತಂ ಪೂಜಂ ಕರೋನ್ತೋ ಮಹಗಾಮೇ ವಿಹಾಸಿ. ತೇನ ಪತಿಟ್ಠಾಪಿತವಿಹಾರಾ ಕಥೇತಬ್ಬಾ? ಕಥಂ? ಲೇನವಿಹಾರಂ ಚನ್ದಗಿರಿವಿಹಾರಂ ಕೋಟಿಪಬ್ಬತವಿಹಾರಂ ನಗರಙ್ಗಣವಿಹಾರಂ ಸೇಲಕಾ ವಿಹಾರಂ ತಲಾಕಾವಿಹಾರನ್ತಿ ಏವಮಾದಯೋ ವಿಹಾರೇ ಪತಿಟ್ಠಾಪೇತ್ವಾ ತಿಪಿಟಕಮಹಾಅರಿಟ್ಠತ್ಥೇರಸ್ಸ ದಕ್ಖಿಣೋದಕಂ ದತ್ವಾ ಮಹಾವಿಹಾರೇ ನಿಯ್ಯಾದೇಸಿ. ಏವಂ ಸೋ ರಾಜಾ ಯಾವಜೀವಂ ಧಾತುಂ ಪರಿಹರಿತ್ವಾ ಪಚ್ಛಿಮೇ ಕಾಲೇ ಮರಣಮಞ್ಚೇ ನಿಪನ್ನೋ ಅತ್ತನೋ ಪುತ್ತಂ ಯಟಾಲತಿಸ್ಸ ಕುಮಾರಂ ಪಕ್ಕೋಸಾಪೇತ್ವಾ; ತಾತ ತಿಸ್ಸ, ಅಮ್ಹೇಹಿ ಪರಿಹರಿತ ನಲಾಟಧಾತು ಪೂಜೇಹೀ’ತಿ ಧಾತುವಂಸಂ ಕಥೇತ್ವಾ ಪುತ್ತಂ ಅನುಸಾಸಿತ್ವಾ ಕಾಲಂ ಕತ್ವಾ ಸಗ್ಗಪುರಂ ಗತೋ.

ರಾಜಾ ಮಹಾನಾಗವರೋ ಯಸಸ್ಸಿ,

ಕತ್ವಾಪಿ ರಜ್ಜಂ ಮತಿಮಾ ಸುಸದ್ಧೋ;

ಮಾನೇತ್ವ ಸಙ್ಘಂ ಚತುಪಚ್ಚಯೇಹಿ,

ಅಗಾ ಅಸೋಕೋ ವರದೇವಲೋಕಂ;

ತಸ್ಸ ಪುತ್ತೋ ಯಟಾಲತಿಸ್ಸಕುಮಾರೋ ಪಿತು ಅಚ್ಚಯೇನ ಪಿತರಾ ವುತ್ತನಿಯಾಮೇನೇವ ಧಾತುಯಾ ಮಹನ್ತಂ ಪೂಜಂ ಕಾರೇಸಿ. ಸೋ’ಪಿ ದಿವಸಸ್ಸ ತಯೋ ವಾರೇ ಧಾತುಪಟ್ಠಾನಂ ಕರೋನ್ತೋ ರಜ್ಜಂ ಕಾರೇತ್ವಾ ಚಿರಂ ವಿಹಾಸಿ. ಇಮಿನಾ’ಪಿ ಪತಿಟ್ಠಾಪಿತವಿಹಾರಾ ಕಥೇತಬ್ಬಾ; ಧಮ್ಮಸಾಲವಿಹಾರಂ ಮಹಾಧಮ್ಮಸಾಲವಿಹಾರಂ ಸೇಲಾಭಯವಿಹಾರನ್ತಿ ಏವಮಾದಯೋ ¶ ಪತಿಟ್ಠಾಪೇತ್ವಾ-ತಿಪಿಟಕಮಹಾಅರಿಟ್ಠತ್ಥೇರಸ್ಸ ಸದ್ಧಿವಿಹಾರಿಕೋ ತಿಪಿಟಕಮಹಾಅಭಯತ್ಥೇರೋ ಉಪರಾಜಸ್ಸ ಮಹಾನಾಗಸ್ಸ ಅಯ್ಯಕೋ. ತಸ್ಸ ಥೇರಸ್ಸ ದಕ್ಖಿಣೋದಕಂ ಅದಾಸಿ. ಸೋ’ಪಿ ರಾಜಾ ಯಾವಜೀವಂ ಧಾತುಂ ಪರಿಹರಿತ್ವಾ ಪಚ್ಛಿಮೇ ಕಾಲೇ ಮರಣಮಞ್ಚೇ ನಿಪನ್ನೋ ಅತ್ತನೋ ಪುತ್ತಂ ಗೋಠಾಭಯಕುಮಾರಂ ಪಕ್ಕೋಸಾಪೇತ್ವಾ’ಧಾತುಯಾ ಮಹನ್ತಂ ಪೂಜಂ ಕರೋನ್ತೋ ಅಪ್ಪಮತ್ತೋ ಹೋಹೀ’ತಿ ವತ್ವಾ ಧಾತುವಂಸಂ ಕಥೇತ್ವಾ ಕಾಲಂ ಕತ್ವಾ ಸಗ್ಗೇ ನಿಬ್ಬತ್ತಿ.

ಯಟ್ಠಾಲಕೋ ನಾಮ ಮಹಾಮಹೀಪತಿ,

ಮಹಾಜನಸ್ಸತ್ಥಕರೋ ಗುಣಾಲಯೋ;

ಸೋ ಧಾತುಪೂಜಂ ವಿಪುಲಂ ಅನೇಕಧಾ,

ಕತ್ವಾ ಗತೋ ದೇವಪುರಂ ಅನಿನ್ದಿತೋ.

ತಸ್ಸ ಪುತ್ತೋ ಗೋಠಾಭಯಕುಮಾರೋ ಪಿತು ಅಚ್ಚಯೇನ ಪಿತರಾ ವುತ್ತನಿಯಾಮೇನೇವ ಧಾತುಯಾ ಮಹನ್ತಂ ಪೂಜಂ ಕತ್ವಾ ಗೋಠಾಭಯ ಮಹಾರಾಜಾ ಹುತ್ವಾ ರಜ್ಜಂ ಕರೋನ್ತೋ ಕಾಚರಗಾಮೇ ದಸಭಾತಿಕೇ ರಾಜಾನೋ ಘಾತೇತ್ವಾ ದಣ್ಡಕಮ್ಮತ್ಥಾಯ ಗೋಠಾಭಯಮಹಾಥೇರಸ್ಸ ಹತ್ಥೋಟ್ಠಜನಪದೇ ವಸನ್ತಸ್ಸ ಮತ್ತಿಕಲೇನವಿಹಾರಂ ಖೀರಸಾಲ ವಿಹಾರಂ ನಾಗಮಹಾವಿಹಾರಂ ಕುಮ್ಭಸೇಲವಿಹಾರಂ ಚೇತಿಯಪಬ್ಬತವಿಹಾರಂ ಸಾನುಪಬ್ಬತವಿಹಾರಂ ಕಣಿಕಾರ ಸೇಲವಿಹಾರಂ ಅಮ್ಬಸೇಲ ವಿಹಾರಂ ತಿನ್ದುಕಲೇನ ವಿಹಾರಂ ಕರಣ್ಡಕವಿಹಾರಂ ಗೋಧಸಾಲವಿಹಾರಂ ವಾಲುಕತಿತ್ಥವಿಹಾರನ್ತಿ ಏವಮಾದಯೋ ಗಙ್ಗಾಯ ಪರತೀರೇ ಪಞ್ಚಸತವಿಹಾರೇ ಓರಿಮತೀರೇ ಪಞ್ಚಸತವಿಹಾರೇ ಚಾ’ತಿ ವಿಹಾರಸಹಸ್ಸಂ ಕಾರೇತ್ವಾ ಅತ್ತನೋ ಸದಿಸನಾಮಸ್ಸ ಗೋಠಾಭಯತ್ಥೇರಸ್ಸ ದಕ್ಖಿಣೋದಕಂ ದತ್ವಾ ಅದಾಸಿ. ಸೋ ಯಾವಜೀವಂ ಧಾತುಪೂಜಂ ಕತ್ವಾ ಪಚ್ಛಿಮೇ ಕಾಲೇ ಮರಣಮಞ್ಚೇ ನಿಪನ್ನೋ ಅತ್ತನೋ ಪುತ್ತಂ ಕಾಕವಣ್ಣತಿಸ್ಸ ಕುಮಾರಂ ಪಕ್ಕೋಸಾಪೇತ್ವಾ ಆಲಿಙ್ಗಿತ್ವಾ;’ತಾತ ತಿಸ್ಸ, ಅಯಂ ನಲಾಟಧಾತು ಅಮ್ಹಾಕಂ ಪರಮ್ಪರಾಯ ಆಗತಾ. ತ್ವಂ ಕಿರ ಧಾತುಂ ಗಹೇತ್ವಾ ಮಹಾಗಙ್ಗಾಯ ಪಸ್ಸೇ ಸೇರು ನಾಮ ದಹಸ್ಸ ಅನ್ತೇ ವರಾಹ ನಾಮ ಸೋಣ್ಡಿಯಾ ಮತ್ಥಕೇ ಪತಿಟ್ಠಾಪೇತ್ವಾ ಸಙ್ಘಾರಾಮಂ ಕಾರಾಪೇಸ್ಸಸೀ’ತಿ ಸತ್ಥಾ ಜೀವಮಾನೋ ವ್ಯಾಕರಣಮಕಾಸಿ. ತಸ್ಮಾ ತ್ವಂ ಇಮಂ ಧಾತುಂ ಗಹೇತ್ವಾ ಮಮಚ್ಚಯೇನ ತಸ್ಮಿಂ ಠಾನೇ ಪತಿಟ್ಠಾಪೇಹೀ’ತಿ ಪುತ್ತಂ ಅನುಸಾಸಿತ್ವಾ ಕಾಲಕಿರಿಯಂ ಕತ್ವಾ ಸಗ್ಗೇ ನಿಬ್ಬತ್ತಿ.

ಗೋಠಾಭಯೋ ¶ ನಾಮ ಮಹೀಪತಿಸ್ಸರೋ,

ಮಹಾಜನೇ ತೋಸಯಿ ಅಪ್ಪಮತ್ತೋ;

ಸೋ ಧಾತುಪೂಜಂ ವಿಪುಲಂ ಕರಿತ್ವಾ,

ಅಗಾ ಅಸೋಕೋ ವರದೇವಲೋಕಂ.

ಮಹಾನನ್ದೋ ಮಹಾಪಞ್ಞೋ ಚನ್ದಗುತ್ತೋ ಬಹುಸ್ಸುತೋ;

ಭದ್ದಸೇನೋ ಮಹಾಥೇರೋ ಭದ್ದಧಮ್ಮೇ ವಿಸಾರದೋ.

ಜಯಸೇನೋ ಚ ಸೋ ವೀರೋ ಥೇರೋ ಸೋ ಸಙ್ಘರಕ್ಖಿತೋ;

ದೇವತ್ಥೇರೋ ಚ ಮೇಧಾವೀ ರಕ್ಖಕಾ ಧಾತು ಭದ್ದಕಾ.

ಉಪರಾಜಾ ಮಹಾನಾಗೋ ಯಟ್ಠಾಲಕೋ ಮಹಾಬಲೋ;

ಗೋಠಾಭಯೋ ಮಹಾಪುಞ್ಞೋ ಕಾಕವಣ್ಣೋ ಚ ವೀರಿಯವಾ.

ಏತೇ ಥೇರಾ ಚ ರಾಜಾನೋ ಪುಞ್ಞವನ್ತೋ ಸುಮಾನಸಾ;

ಧಾತು ಪರಮ್ಪರಾನೀತಾ ಧಾತಾ ಧಾತುಸುಕೋವಿದಾ.

ಕಸ್ಸಪಾದೀನಥೇರಾನಂ ಪರಮ್ಪರಾಯಮಾಗತಾ;

ಮಹಾನಾಗಾದಿ ಹತ್ಥತೋ ಯಾವ ತಿಸ್ಸಮುಪಾಗತಾ.

ಇತಿ ಅರಿಯಜನಪ್ಪಸಾದನತ್ಥಾಯ ಕತೇ ಧಾತುವಂಸೇ

ಧಾತುಪರಮ್ಪರಾ ಕಥಾ ನಾಮ

ತತಿಯೋ ಪರಿಚ್ಛೇದೋ.

೪. ¶ ಪಕಿಣ್ಣಕಕಥಾ

ತತ್ರ ಠತ್ವಾ ರಞೇಞೋ ಉಪ್ಪತ್ತಿ ಕಥೇತಬ್ಬಾ. (ಸೋ ಪನ) ಅಮ್ಹಾಕಂ ಸತ್ಥುನೋ ಬೋಧಿಪ್ಪತ್ತಿತೋ ಪುರೇತರಮೇವ ಮಹಾಮಲಯ ರಟ್ಠೇ ವನಚರಕಂ ಪಟಿಚ್ಚ ತಸ್ಸ ಭರಿಯಾಯ ಕುಚ್ಛಿಯಂ ಪಟಿಸನ್ಧಿಂ ಗಣ್ಹಿ. ನವಡ್ಢಮಾಸಾವಸಾನೇ ಮಾತುಕುಚ್ಛಿತೋ ನಿಕ್ಖಮಿತ್ವಾ ಕಮೇನ ವಡ್ಢನ್ತೋ ವಿಞ್ಞುಭಾವಂ ಪಾಪುಣಿ. ತಸ್ಸ ಪಿತಾ ಏಕಂ ದಾರಿಕಂ ಆನೇತ್ವಾ ಪುತ್ತಸ್ಸ ಗೇಹೇ ಅಕಾಸಿ. ಅಪರಭಾಗೇ ತಸ್ಸ ಪಿತಾ ಕಾಲಮಕಾಸಿ. ಕುಮಾರೋ’ಚರಕೋ’ತಿ ಪಞ್ಞಾಯಿ. ಸೋ ತತೋ ಪಟ್ಠಾಯ ಪಚ್ಚೇಕಬುದ್ಧಂ ಉಪಟ್ಠಹಿ. ಚರಕೋ ಅತ್ತನೋ ನಿವಾಸವತ್ಥುಸ್ಮಿಂ ಕದಲಿಪನಸಾದೀನಿ ರೋಪೇತ್ವಾ ಫಲಾರಾಮಂ ಅಕಾಸಿ. ತತೋ ಅಪರಭಾಗೇ ತೇನ ರೋಪಿತಪನಸರುಕ್ಖೋ ಮಹನ್ತಂ ಚಾಟಿಪ್ಪಮಾಣಂ ಪನಸಫಲಂ ಗಣ್ಹಿ. ಚರಕೋ ಅತ್ತನೋ ವತ್ಥುಂ ಗನ್ತ್ವಾ ಸಾಖಾಯ ಸುಪಕ್ಕಂ ಪನಸಫಲಂ ಪಸ್ಸಿತ್ವಾ ಛಿನ್ದಿತ್ವಾ ಗೇಹಂ ಆಹರಿತ್ವಾ ಅಪಸ್ಸಾಯಂ ಲುಞ್ಚಿತ್ವಾ ಉಪಧಾರೇಸಿ. ತತೋ ಸಮನ್ತಾ ಚತುಮಧುರಂ ವಿಯ ಯೂಸಂ ಓತರಿತ್ವಾ ಅಪಸ್ಸಯಂ ಅಪನೀತ ಆವಾಟಂ ಪೂರೇತ್ವಾ ಅಟ್ಠಾಸಿ. ತತೋ ಚರಕೋ ಏವಂ ಚಿನ್ತೇಸಿ. ಇಮಂ ಪನಸಫಲಂ ಅಮ್ಹಾಕಂ ಪಚ್ಚೇಕಬುದ್ಧೇನ ವಿನಾ ಅಞ್ಞೇಸಂ ನಾನುಚ್ಛವಿಕನ್ತಿ. ಪಟಿಸಾಮೇತ್ವಾ ಠಪೇಸಿ.

ಪುನದಿವಸೇ ಪಚ್ಚೇಕಬುದ್ಧೋ ಲೇನತೋ ನಿಕ್ಖಮಿತ್ವಾ ಸರೀರಪಟಿಜಗ್ಗನಂ ಕತ್ವಾ ಸುರತ್ತಪಲ್ಲವಸದಿಸಂ ಅನ್ತರವಾಸಕಂ ಪರಿಮಣ್ಡಲಂ ಕತ್ವಾ ನಿವಾಸೇತ್ವಾ ಬಹಲಪವರಮಹಾಪಂಸುಕೂಲಚೀವರಂ ಪಾರುಪಿತ್ವಾ ನೀಲಭಮರವಣ್ಣಂ ಪತ್ತಂ ಹತ್ಥೇನ ಗಹೇತ್ವಾ ಆಕಾಸೇನ ಆಗನ್ತ್ವಾ ತಸ್ಸ ಕುಟಿದ್ವಾರೇ ಪಾಕಟೋ ಅಹೋಸಿ. ಚರಕೋ ಕುಟಿತೋ ನಿಕ್ಖಮಿತ್ವಾ ತಂ ವನ್ದಿತ್ವಾ ಹತ್ಥತೋ ಪತ್ತಂ ಗಹೇತ್ವಾ ಗೇಹಂ ಪವೇಸೇತ್ವಾ ಪೀಠೇ ನಿಸೀದಾಪೇತ್ವಾ ಅತ್ತನಾ ಠಪಿತಟ್ಠಾನತೋ ಪನಸಫಲಂ ಗಹೇತ್ವಾ ಯೂಸಂ ಪತ್ತೇ ಪೂರೇತ್ವಾ ಪಟಿಗ್ಗಹಾಪೇಸಿ. ಪಚ್ಚೇಕಬುದ್ಧೋ ¶ ತಂ ಪರಿಭುಞ್ಜಿತ್ವಾ ಆಕಾಸತೋ ಅತ್ತನೋ ವಸನಟ್ಠಾನಮೇವ ಗತೋ. ಅಥೇಕದಿವಸಂ ಚರಕೋ ಪರದೇಸಾ ಗಚ್ಛನ್ತೋ ಭರಿಯಂ ಪಕ್ಕೋಸಾಪೇತ್ವಾ;’ ಅಮ್ಮ, ಅಯ್ಯಸ್ಸ ಅಪ್ಪಮತ್ತೋ ಹುತ್ವಾ ದಾನಂ ದೇಹೀ’ತಿ ಸಬ್ಬೂಪಕರಣಂ ನಿಯ್ಯಾದೇತ್ವಾ ಪರದೇಸಂ ಗತೋ. ಪುನದಿವಸೇ ಪಚ್ಚೇಕಬುದ್ಧೋ ಲೇನತೋ ನಿಕ್ಖಮಿತ್ವಾ ಚೀವರಂ ಪಾರುಪಿತ್ವಾ ಪತ್ತಮಾದಾಯ ಆಕಾಸತೋ ಆಗನ್ತ್ವಾ ಕುಟಿದ್ವಾರೇ ಓತರಿತ್ವಾ ಅಟ್ಠಾಸಿ. ತಸ್ಮಿಂ ಖಣೇ ಚರಕಸ್ಸ ಭರಿಯಾ ಕುಟಿತೋ ನಿಕ್ಖಮಿತ್ವಾ ಪಚ್ಚೇಕಬುದ್ಧಸ್ಸ ಹತ್ಥತೋ ಪತ್ತಂ ಗಹೇತ್ವಾ ಗೇಹೇ ನಿಸೀದಾಪೇತ್ವಾ ಭತ್ತಂ ಅದಾಸಿ.

ತೇನ ಭತ್ತಕಿಚ್ಚೇ ಪರಿನಿಟ್ಠಿತೇ ಸಾ ತರುಣಪಚ್ಚೇಕಬುದ್ಧಂ ಪಸ್ಸಿತ್ವಾ ಕಿಲೇಸಪಟಿಸಂಯುತ್ತಂ ಚಿತ್ತಂ ಉಪ್ಪಾದೇತ್ವಾ ಪಚ್ಚೇಕಬುದ್ಧಸ್ಸ ಅತ್ತನೋ ಅಜ್ಝಾಸಯಂ ಕಥೇಸಿ. ಪಚ್ಚೇಕಬುದ್ಧೋ ತಸ್ಸಾ ಕಥಂ ಸುತ್ವಾ ಜಿಗುಚ್ಛಮಾನೋ ಉಪ್ಪತಿತ್ವಾ ಆಕಾಸತೋ ಅತ್ತನೋ ವಸನಟ್ಠಾನಮೇವ ಗತೋ. ಸಾ ಪಚ್ಚೇಕಬುದ್ಧಸ್ಸ ಗತಕಾಲೇ ಅತ್ತನೋ ಸರೀರಂ ತೇಲೇನ ಮಕ್ಖೇತ್ವಾ ಭಣ್ಡನಕಾ ವಿಯ ನಿತ್ಥುನಮಾನಾ ಮಞ್ಚೇ ನಿಪಜ್ಜಿ. ಚರಕೋ ಪರದೇಸತೋ ಆಗನ್ತ್ವಾ ಭರಿಯಂ ನಿಪಜ್ಜಮಾನಂ ಏವಮಾಹ?’ಭದ್ದೇ, ಕಿಂ ಅಯ್ಯಸ್ಸ ಭಿಕ್ಖಂ ಅದಾಸೀ’ತಿ. ಸಾ ನಿತ್ಥುನಮಾನಾ ಆಹ? ಮಾ ಪುಚ್ಛ ತವ ಅಯ್ಯಸ್ಸ ಕಮ್ಮನ್ತಿ. ಕಥೇಹಿ ಭದ್ದೇ, ಕಿಂ ತೇನ ಕಮ್ಮಂ ಕತನ್ತಿ. ಸೋ ಅತ್ತನಾ ಸದ್ಧಿಂ ಕಿಲೇಸವಸ್ನೇ ಓಕಾಸಂ ಕಾರಾಪೇತುಂ ವಾಯಮಿತ್ವಾ ಮಯಾ ಅಯುತ್ತನ್ತಿ ವುತ್ತೇ ಮಮ ಕೇಸೇ ಗಹೇತ್ವಾ ಹತ್ಥಪಾದೇಹಿ ಆಕೋಟೇತ್ವಾ ಸರೀರಂ ನಖೇನ ಓತ್ಥರಿತ್ವಾ ಸೀಸೇ ಪಹರಿತ್ವಾ ಗತೋ’ತಿ ವುತ್ತೇ ಚರಕೋ ತಂ ಸುತ್ವಾ ಅಸಹನ್ತೋ (ಏಸೋ ಮಯಾ) ಏವರೂಪಸ್ಸ ಅಸ್ಸಮಣಕಮ್ಮಸ್ಸ ಪೋಸಿತೋ’ತಿ ವತ್ವಾ ತಸ್ಸಾ ಸೋಕಂ ವಿನೋದೇತ್ವಾ ಧನುಂ ಆದಾಯ ತಿಕ್ಖಸರಂ ಗಹೇತ್ವಾ ಏತಂ ಮಾರೇತ್ವಾ ಆಗಮಿಸ್ಸಾಮೀ’ತಿ ವತ್ವಾ ವಸನಟ್ಠಾನಂ ಅಗಮಾಸಿ.

ತಸ್ಮಿಂ ಸಮಯೇ ಪಚ್ಚೇಕಬುದ್ಧೋ ನಹಾನತ್ಥಾಯ ಗತೋ. ಗನ್ತ್ವಾ ಚ ಪನ ಕಾಯಬನ್ಧನಂ ಆಕಾಸೇ ಚೀವರವಂಸಂ ವಿಯ ಕತ್ವಾ ನಿವಾಸನಪಾಪುರಣಂ ತಸ್ಮಿಂ ಠಪೇತ್ವಾ ಜಲಸಾಟಕಂ ನಿವಾಸೇತ್ವಾ ಉದಕಮತ್ಥಕಾ ಆಕಾಸೇ ನಿಸೀದಿತ್ವಾ ನಹಾಯಿತುಂ ಆರಭಿ. ಚರಕೋ ಪಚ್ಚೇಕಬುದ್ಧಸ್ಸ ಗರುಗಾರವಕಾರಣಂ ಪಸ್ಸನ್ತೋ ಗುಮ್ಬನ್ತರೇ ನಿಲೀನೋ ¶ ಅಟ್ಠಾಸಿ. ಠತ್ವಾ ಚ ಪನ ಏವರೂಪಂ ಅಚ್ಛರಿಯಂ ದಿಸ್ವಾ ಚಿನ್ತೇಸಿ? ಅಯಞ್ಚ ಏವರೂಪಂ ನ ಕರೋತಿ, ಅದ್ಧಾ ಏಸಾ ಮುಸಾವಾದಾ’ತಿ. ಅಹಂ ಏತಿಸ್ಸಾ ವಚನಂ ಗಹೇತ್ವಾ ಏವರೂಪಸ್ಸ ಸಮಣಸ್ಸ ಅಕಾರಣೇ ಅಪರಾಧಂ ಕತಂ. ಏಸೋ ತಾದಿಸಂ ನ ಕರೋತೀ’ತಿ ಚಿನ್ತೇತ್ವಾ ಪಚ್ಚೇಕಬುದ್ಧಸ್ಸ ನಹತ್ವಾ ಠೀತಕಾಲೇ ಗನ್ತ್ವಾ ಪಾದೇಸು ನಿಪತಿತ್ವಾ?’ಮಯ್ಹಂ ಖಮಥ ಅಯ್ಯಾ’ತಿ ಆಹ. ಪಚ್ಚೇಕ ಬುದ್ಧೋ? ಕಿಂ ಕಥೇಸಿ ಉಪಾಸಕಾ’ತಿ. ಸೋ ಅತ್ತನೋ ಮಾತುಗಾಮಸ್ಸ ಕಥಿತಂ ಆಚಿಕ್ಖಿ. ಏವಞ್ಹಿ ಸತಿ ಉಪಾಸಕ ತುಮ್ಹಾಕಂ ಆಗತಕಮ್ಮಂ ನಿಟ್ಠಪೇತ್ವಾ ಗನ್ತುಂ ವಟ್ಟತೀ’ತಿ ಆಹ. ಮಾ ಏವಂ ಕಥೇಥ ಸಾಮಿ, ಅಹಂ ಅಞ್ಞಾಣಭಾವೇನ ತಸ್ಸಾ ವಚನಂ ಗಹೇತ್ವಾ ತುಮ್ಹಾಕಂ ಅಕಾರಣೇ ದುಬ್ಭಿತುಂ ಆಗತೋಮ್ಹಿ’ತಿ ಸಬ್ಬಂ ಅತ್ತನಾ ಚಿನ್ತಿತಂ ಆಚಿಕ್ಖಿ.

ಪಚ್ಚೇಕಬುದ್ಧೋ? ಆಮ ಉಪಾಸಕ, ಸಾ ಅತ್ತನಾ ಸದ್ಧಿಂ ಅಸದ್ಧಮ್ಮಪಟಿಸಂಯುತ್ತಕಥಂ ಕಥೇಸೀ’ತಿ ಆಹ. ಸೋ ತಸ್ಸಾ ಕುಜ್ಝಿತ್ವಾ ಅಹಂ ಏತಂ ನಿಸ್ಸಾಯ ಇಮಸ್ಸ ಅಪರಜ್ಝಾಮಿ. ಗನ್ತ್ವಾ ತಂ ಮಾರೇಸ್ಸಾಮೀ’ತಿ ಪಚ್ಚೇಕಬುದ್ಧಂ ಪಞ್ಚಪತಿಟ್ಠಿತೇನ ವನ್ದಿತ್ವಾ ನಿಕ್ಖಮಿ. ಪಚ್ಚೇಕಬುದ್ಧೋ ತಂ ನಿವತ್ತೇತ್ವಾ ಮಾತುಗಾಮಂ ಮಾ ಮಾರೇಹೀ’ತಿ ಅನೇಕವಿಧಾನಿ ಕಾರಣಾನಿ ಕಥೇತ್ವಾ ಪಞ್ಚಸೀಲೇ ಪತಿಟ್ಠಪೇತ್ವಾ ತಸ್ಸ ಧಮ್ಮಂ ದೇಸೇನ್ತೋ ಇಮಂ ಗಾಥಮಾಹ?

ಯೋ ಅಪ್ಪದುಟ್ಠಸ್ಸ ನರಸ್ಸ ದುಸ್ಸತಿ,

ಸುದ್ಧಸ್ಸ ಪೋಸಸ್ಸ ಅನಙ್ಗಣಸ್ಸ;

ತಮೇವ ಬಾಲಂ ಪಚ್ಚೇತಿ ಪಾಪಂ,

ಸುಖುಮೋ ರಜೋ ಪಟಿವಾತಂವ ಖಿತ್ತೋ’ತಿ;

ಚರಕೋ ತಸ್ಸ ಧಮ್ಮದೇಸನಂ ಸುತ್ವಾ ಪಸನ್ತಚಿತ್ತೋ ಹುತ್ವಾ ಪಞ್ಚಪತಿಟ್ಠಿತೇನ ವನ್ದಿತ್ವಾ ಗೇಹಂ ಗನ್ತ್ವಾ ತಾಯ ಸದ್ಧಿಂ ಸಮಗ್ಗವಾಸಂ ವಸಿತ್ವಾ ತತೋ ಪಟ್ಠಾಯ ಯಾವಜೀವಂ ಪಚ್ಚೇಕಬುದ್ಧಸ್ಸ ಚೀವರಪಿಣ್ಡಪಾತಸೇನಾಸನಗಿಲಾನಪಚ್ಚಯಭೇಸಜ್ಜಪರಿಕ್ಖಾರಾದಯೋ ಪರಿಕ್ಖಾರೇ ಚ ದತ್ವಾ ಪಟಿಜಗ್ಗಿ. ಸೋ ತಸ್ಮಿಂಯೇವ ಲೇನೇ ವಸನ್ತೋ ಅಪರಭಾಗೇ ಅನುಪಾದಿಸೇಸಾಯ ನಿಬ್ಬಾನಧಾತುಯಾ ಪರಿನಿಬ್ಬಾಯಿ.

ಸಯಮ್ಭುಞಾಣೇನ ¶ ವಿಗಯ್ಹ ಧಮ್ಮಂ,

ದುಕ್ಖಂ ಅನನ್ತಂ ಸಕಲಂ ಪಹಾಯ;

ಸಮಾಧಿಝಾನಾಭಿರತೋ ಯಸಸ್ಸಿ,

ಗತೋ ವಿನಾಸಂ ಪವರೋ ಯಸಸ್ಸಿ.

ಅಥ ಪಚ್ಛಾ ಚರಕೋ ಕಾಲಂ ಕತ್ವಾ ಸಗ್ಗೇ ನಿಬ್ಬತ್ತಿ. ತತ್ಥ ಚಿರಂ ದಿಬ್ಬಸಮ್ಪತ್ತಿಂ ಅನುಭವಿತ್ವಾ ದೇವಲೋಕತೋ ಚವಿತ್ವಾ ಇಮಸ್ಮಿಂ ದೀಪೇ ಮಲಯ ರಟ್ಠೇ ಅಮರುಪ್ಪಲ ಲೇನಸ್ಸ ಆಸನ್ನಟ್ಠಾನೇ ಉಪಚರಕಸ್ಸ ಪುತ್ತೋ ಹುತ್ವಾ ನಿಬ್ಬತ್ತಿ. ಸೋ ನವಮಾಸಡ್ಢಪರಿಯೋಸಾನೇ ಮಾತುಕುಚ್ಛಿತೋ ನಿಕ್ಖಮಿ. ತಸ್ಸ ನಾಮಗಹಣದಿವಸೇ ಞಾತಕಾ ಅಮರುಪ್ಪಲ ಕುಮಾರೋತಿ ನಾಮಂ ಅಕಂಸು. ಸೋ ಪನ ಅಪರಭಾಗೇ ವಡ್ಢೇನ್ತೋ ದಾರಕೇಹಿ ಸದ್ಧಿಂ ಕೀಳನ್ತೋ ಪತ್ತಪುಟೇನ ವಾಲುಕಭತ್ತಂ ಪಚಿತ್ವಾ, ದಾರಕಾ ಇಮೇ ಸಮಣಾತಿ ವತ್ವಾ ಪಟಿಪಾಟಿಯಾ ನಿಸೀದಾಪೇತ್ವಾ ದಾನಂ ದಸ್ಸಾಮೀ’ತಿ ವತ್ವಾ ಕೀಳಾದಾನಂ ದೇತಿ. ಏಕದಿವಸಂ ಅಮರುಪ್ಪಲ ಕುಮಾರೋ ವಾಲುಕಥುಪಂ ಕತ್ವಾ ಅತ್ತನೋ ನಿವಾಸನವತ್ಥದುಸ್ಸಂ ಗಹೇತ್ವಾ ಖುದ್ದಕದಣ್ಡಕೇ ಬನ್ಧಿತ್ವಾ ಪಟಾಕಂ ಕತ್ವಾ ಪೂಜನತ್ಥಾಯ ಠಪೇಸಿ. ಅಮರುಪ್ಪಲ ಲೇನವಾಸೀ ಮಲಿಯ ದೇವತ್ಥೇರಂ ನಿಸ್ಸಾಯ ದಾನಾದೀನಿ ಪುಞ್ಞಾನಿ ಕತ್ವಾ ತತೋ ಚುತೋ ಇಮಸ್ಮಿಂಯೇವ ದೀಪೇ ಮಹಾಗಾಮೇ ಗೋಠಾಭಯಮಹಾರಾಜಸ್ಸ ಅಗ್ಗಮಹೇಸಿಯಾ ಕುಚ್ಛಿಮ್ಹಿ ಪಟಿಸನ್ಧಿಂ ಗಣ್ಹಿ. ಸೋ ನವಮಾಸಡ್ಢಪರಿಯೋಸಾನೇ ಮಾತುಕುಚ್ಛಿತೋ ನಿಕ್ಖಮಿ. ತಸ್ಸ ನಾಮಗಹಣ ದಿವಸೇ’ಕಾಕವಣ್ಣತಿಸ್ಸೋ’ತಿ ನಾಮಂ ಅಕಂಸು. ಸೋ ಅನುಪುಬ್ಬೇನ ವಡ್ಢಿತ್ವಾ ಪಿತು ಅಚ್ಚಯೇನ ಛತ್ತಂ ಉಸ್ಸಾಪೇತ್ವಾ ಕಾಕವಣ್ಣತಿಸ್ಸಮಹಾರಾಜಾ ಅಹೋಸಿ. ತಸ್ಸ ಛತ್ತೇ ಉಸ್ಸಾಪಿತೇಯೇವ ಸಕಲರಟ್ಠಂ ಸುಭಿಕ್ಖಂ ಅಹೋಸಿ. ಪಞ್ಚ ವಾ ದ್ವಾದಸ ವಾ ದಿವಸೇ ಅನತಿಕ್ಕಮಿತ್ವಾ ದೇವೋ ಸಮ್ಮಾ ವಸ್ಸತಿ. ವೇಸ್ಸನ್ತರಬೋಧಿಸತ್ತಸ್ಸ ದಾನಗ್ಗೇ ಯಾಚಕಾನಂ ಹತ್ಥೇ ಭಿಕ್ಖಾಭಾಜನಂ ವಿಯ ತಸ್ಮಿಂ ಕಾಲೇ ವಾಪೀಪೋಕ್ಖರಣೀ-ನದೀ-ಕನ್ದರ-ಸೋಬ್ಭ-ಜಾತಸರಾದಯೋ ವಸ್ಸೋದಕೇನ ಪೂರಿತಾ ಅಹೇಸುಂ. ಪಞ್ಚವಿಧಪದುಮಸಞ್ಛನ್ನಾ ಅನೇಕದಿಜಸಮಾಕಿಣ್ಣಾ ನಾನಾರುಕ್ಖೇಹಿ ವಿರೋಚಿತಾ ಅಹೇಸುಂ. ನಾನಾ ಸಸ್ಸಾನಿ ಸಮ್ಪಜ್ಜಿಂಸು, ಉತ್ತರಕುರು ಆಲಕಮನ್ದಾ ರಾಜಧಾನಿಸದಿಸಂವ ಹಿರಞ್ಞಸುವಣ್ಣಾದಿ ರತನಟ್ಠಾನಂ.

ಸೋ ¶ ರಾಜಾ ಸದ್ಧಾಯ ಸಮ್ಪನ್ನೋ ಮಹಾಭಿಕ್ಖುಸಙ್ಘಸ್ಸ ಚತ್ತಾರೋ ಪಚ್ಚಯೇ ಅನೂನಂ ಕತ್ವಾ ದಾಪೇಸಿ. ಸಟ್ಠಿಮತ್ತಾನಂ ತಿಪಿಟಕಧರಾನಂ ಚನ್ದನದೋಣಿಯಾ ಸತಪಾಕತೇಲಸ್ಸ ಪೂರಾಪೇತ್ವಾ ಯಾವಪಿಟ್ಠಿಪಾದಂ ತಾವ ಓಸೀದಾಪೇತ್ವಾ ನಿಸಿನ್ನಾನಂ ಲಟ್ಠಿಮ ಧುದನ್ತಕಟ್ಠಂ ಚತುಮಧುರಂ ಪಕ್ಖಿಪಿತ್ವಾ ದಾಪೇಸಿ. ಉಚ್ಛುಕಣ್ಡ-ಸಕ್ಖರಾ-ನಾಲಿಕೇರ-ಫಲಮೂಲಖನ್ಧಖಾದನಞ್ಚ ನಾನಾವಿಧಮಚ್ಛರಸೇಹಿ ಸುಗನ್ಧಸಾಲಿತಣ್ಡುಲೇನ ಸಾಧಿತಯಾಗುಭತ್ತಞ್ಚ ಪಾತೋವ ಅದಾಸಿ. ಅನ್ತರಾಭತ್ತೇ ಅಟ್ಠಾರಸವಿಧ-ಅನ್ತರಖಜ್ಜಕಞ್ಚ ಉಚ್ಛುಕದಲಿಪನಸಫಲಾದಯೋ ಚ ನಾನಾವಿಧೋತ್ತರಿಭಙ್ಗೇನ ಸದ್ಧಿಂ ಸುಗನ್ಧಸಾಲಿತಣ್ಡುಲಭತ್ತಂ ನಾನಗ್ಗರಸಂ ದಾಪೇತ್ವಾ ಪಚ್ಛಾಭತ್ತಂ ಅಟ್ಠವಿಧಕಪ್ಪೀಯಪಾನಕೇ ಚ ದಾಪೇಸಿ. ಅಞ್ಞೇ ಸಮಣಪರಿಕ್ಖಾರೇ ಚ ದಾಪೇಸಿ. ಇಮಿನಾ ನಿಯಾಮೇನೇವ ಭಿಕ್ಖುಸಙ್ಘಸ್ಸ ತಿಪಿಟಕಧರಭಿಕ್ಖೂನಞ್ಚ ನಿರನ್ತರಂ ಮಹಾ ದಾನಂ ದತ್ವಾ ವಸತಿ.

ಅಥಾಪರೇನ ಸಮಯೇನ ಕಲ್ಯಾಣಿಯಂ ಸಿವೋ ನಾಮ ಮಹಾರಾಜಾ ಅತ್ತನೋ ಭಾಗಿನೇಯ್ಯಸ್ಸ ಅಭಯಕುಮಾರಸ್ಸ ಕಾಕವಣ್ಣತಿಸ್ಸ ರಞ್ಞೋ ಭಗಿನಿಯಾ ಸೋಮದೇವಿಯಾ ನಾಮ ರಾಜಪುತ್ತಿಯಾ ಆವಾಹಮಙ್ಗಲಂ ಕತ್ವಾ ಆನೇತ್ವಾ ಪಾದಪರಿಚಾರಿಕಂ ದಾಪೇಸಿ. ದತ್ವಾ ಚ ಪನ ಅಭಯ ಕುಮಾರಂ ಗಿರಿನಗರಮ್ಹಿ ನಿಸೀದಾಪೇಸೀ. ಸೋ ಗಿರಿನಗರೇ ರಜ್ಜಂ ಕಾರಾಪೇತ್ವಾ ಗಿರಿಅಭಯೋ ನಾಮ ರಾಜಾ ಹುತ್ವಾ ಮಹನ್ತಂ ಸಮ್ಪತ್ತಿಂ ಅನುಭವಮಾನೋ ವಿಹಾಸಿ. ತತೋ ಅಪರಭಾಗೇ ಕಾಕವಣ್ಣತಿಸ್ಸ ಮಹಾರಾಜಾ ಮಹಾಗಾಮೇ ವಿಹರನ್ತೋ ಅಞ್ಞತರಸ್ಸ ಭಿಕ್ಖುಸ್ಸ ಗತ್ತೇ ಮಙ್ಕುನಾ ದಟ್ಠಟ್ಠಾನೇ ಗಣ್ಡಂ ಉಟ್ಠಿತಂ ದಿಸ್ವಾ ಕಿಮೇತಂ ಅಯ್ಯಾ’ತಿ ಪುಚ್ಛಿ. ಮಙ್ಕುನಾ ದಟ್ಠಟ್ಠಾನಂ ಮಹಾರಾಜಾತಿ. ತಂ ಸುತ್ವಾ ಸಂವೇಗಪ್ಪತ್ತೋ, ಭನ್ತೇ ಮಙ್ಕುನಾ ಕಿಸ್ಮಿಂ ನ ಭವನ್ತಿ’ತಿ ಪುಚ್ಛಿ. ಪಟ್ಟಸಾಟಕೇ ನ ಭವನ್ತಿ’ತಿ. ಇಮೇ ಪನ ಭದ್ದನ್ತಾ ಪಟ್ಟಸಾಟಕೇ ಕುತೋ ಲಭನ್ತೀ’ತಿ ಚಿನ್ತೇತ್ವಾ ಗತೋ. ತಂ ದಿವಸಮೇವ ಪಾನೀಯಮಾಳಕೇ ನಿಸಿನ್ನೋ ತಿಪಿಟಕತಿಸ್ಸತ್ಥೇರೋ ನಾಮ ರಞ್ಞೋ ಬುದ್ಧಸೀಹನಾದಸುತ್ತಂ ನಾಮ ಕಥೇಸಿ. ಸೋ ಥೇರೇ ಪಸನ್ನೋ; ಉತ್ತರಾಸಙ್ಗೇ ದೀಯಮಾನೇ’ಏಕಸಾಟಕೋ ಭವಿಸ್ಸಾಮಿ’ ತಸ್ಮಾ ಇಮಮೇವ ದಾತುಂ ನ ಸಕ್ಕಾ, ಕಥಂ ಕರಿಸ್ಸಾಮೀ’ತಿ ಚಿನ್ತೇನ್ತೋ ಥೇರೇನ ಸದ್ಧಿಂ ಕಥಯಮಾನೋ ತತ್ಥ ಮಾಳಕೇಯೇವ ಅಟ್ಠಾಸಿ. ತಸ್ಮಿಂ ಖಣೇ ಏಕೋ ಕಾಕೋ ಅಮ್ಬಸಾಖನ್ತರೇ ನಿಸೀದಿತ್ವಾ

ಸದ್ದಂ ¶ ಕರೋನ್ತೋ ಏವಮಾಚಿಕ್ಖಿ. ಅಯ್ಯ ಕಾಕವಣ್ಣತಿಸ್ಸಮಹಾರಾಜ, ತುಮ್ಹಾಕಂ ಕಙ್ಖಾ ನಾಮ ನತ್ಥೀ, ಪಸಾದಕ್ಖಣೇ ಧಮ್ಮಕಥಿಕಸ್ಸ ಉತ್ತರಾಸಙ್ಗಂ ದೇಹೀ’ತಿ ಆಹ.

(ಕಾಕೋ ಸೋ ಕಾಕವಣ್ಣಸ್ಸ ವದೇತಿ ವಚನಕ್ಖಮೋ,

ಪಸಾದಜಾತೋ ಥೇರಸ್ಸ ತುವಂ ಸದ್ಧಮ್ಮದೇಸನೇ;

ದದಾಹಿ ಉತ್ತರಾಸಙ್ಗಂ ಮಹಾಥೇರಸ್ಸ ಭೂಮಿಪಾ’ತಿ.)

ಮಹಾರಾಜ, ಅಹಂ ತುಮ್ಹಾಕಂ ಪಞ್ಚಸಾಸನಂ ಗಹೇತ್ವಾ ಆಗತೋ. ವಿಹಾರದೇವಿ ಪುತ್ತಂ ವಿಜಾಯಿ. ಇದಮೇಕಂ ಸಾಸನಂ. ಏಕಾ ಕರೇಣುಕಾ ಸುವೀರಹತ್ಥಿಪೋತಕಂ ತಿತ್ಥಸರೇ ವಿಜಾಯೀ. ಇದಂ ದುತಿಯಂ ಸಾಸನಂ. ಗೋಠಸಮುದ್ದಮಜ್ಝೇನ ಸತ್ತಮತ್ತಾ ನಾವಾ ಪಟ್ಟನೇ ಪಚ್ಚುಟ್ಠಿತಾ, ಇದಂ ತತಿಯಂ ಸಾಸನಂ ಉತ್ತರ ವಡ್ಢಮಾನಪಬ್ಬತಪಾದೇ ದ್ವಿಕರೀಸಪ್ಪಮಾಣೇ ಖೇತ್ತೇ ತರುಣತಾಲಕ್ಖನ್ಧಪ್ಪಮಾಣಾ ಸುವಣ್ಣಕ್ಖನ್ಧಾ ಉಗ್ಗಚ್ಛಿಂಸು, ಇದಂ ಚತುತ್ಥಂ ಸಾಸನಂ. ಗಿರಿಪಬ್ಬತಪಾದೇ ಕೋಟ ರಟ್ಠಕ ವಿಹಾರೇ ಕೋಟರಟ್ಠಕೋ ನಾಮ ಥೇರೋ ಮಗ್ಗೋಪಸಮಂ ವತ್ವಾ ಗಿರಿಪಬ್ಬತಮತ್ಥಕೇ ಸತ್ತತಾಲಪ್ಪಮಾಣಂ ಉಗ್ಗನ್ತ್ವಾ ಆಕಾಸೇ ನಿಸಿನ್ನೋ ಪರಿನಿಬ್ಬಾಯಿ, ಇದಂ ಪಞ್ಚಮಂ ಸಾಸನಂ.

(ಪುತ್ತೋ ಹತ್ಥೀ ಚ ನಾವಾ ಚ ಚತುತ್ಥಂ ಹೇಮಖನ್ಧಕಂ;

ಥೇರಸ್ಸ ಪರಿನಿಬ್ಬಾನಂ ಪಞ್ಚಮಂ ಸಾಸನಂ ಇದಂ.

ಇಮಂ ಗಹೇತ್ವಾನ ಅಹಂ ಆಗತೋ ತವ ಸನ್ತಿಕಂ;

ಸಾಸನಂ ಈದಿಸಂ ಸುತ್ವಾ ಪುಞ್ಞಕಮ್ಮೇ ರತೋ ಭವ.

ವತ್ಥಂ ಸಹಸಾ ದಾಪೇಹಿ ಕತೋ ಸಬ್ಬಸಮಾಗಮೋ;

ಇದಂ ನಿಚ್ಚಂ ಜಾನನ್ತೋ ಕಿಂ ಲಗ್ಗೋ ಉತ್ತರಾಸಙ್ಗೇ’ತಿ.)

ರಾಜಾ ಕಾಕಸ್ಸ ವಚನಂ ಸುತ್ವಾ ಹಸಿ. ಥೇರೋ? ಕಸ್ಮಾ ಮಹಾರಾಜ ಹಸೀ’ತಿ ಪುಚ್ಛಿ. ಭನ್ತೇ, ಏತಸ್ಮಿಂ ಅಮ್ಬಸಾಖನ್ತರೇ ನಿಸೀದಿತ್ವಾ ಸದ್ದಂ ಕರೋನ್ತಸ್ಸ ಕಾಕಸ್ಸ ಕಥಂ ಸುತ್ವಾ ಹಸಿನ್ತಿ ಸಬ್ಬಂ ಆರೋಚೇಸಿ. ಥೇರೋ’ಪಿ ರಞ್ಞಾ ಪುರಿಮತ್ತಭಾವೇ ಕತಕಮ್ಮಂ ¶ ಪಸ್ಸಿತ್ವಾ ಹಸಿ. ರಾಜಾ ಕಸ್ಮಾ ಅಯ್ಯೋ ಹಸೀ’ತಿ ಪುಚ್ಛಿ. ಮಹಾರಾಜ, ತುಮ್ಹಾಕಂ ಅನನ್ತರೇ ಅತ್ತಭಾವೇ ಮಲಯರಟ್ಠೇ ಅಮರುಪ್ಪಲ ನಾಮ ಕಾಲೇ ಕತಕಮ್ಮಂ ಪಸ್ಸಿತ್ವಾ ಹಸಿತ್ತಿ. ತೇನ ಪುಟ್ಠೋ ಕತಕುಸಲಕಮ್ಮಂ ಸಬ್ಬಂ ವಿತ್ಥಾರೇನ ತಸ್ಸ ಆಚಿಕ್ಖಿ. ರಾಜಾ ಸೋಮನಸ್ಸಪ್ಪತ್ತೋ ಅತ್ತನೋ ಉತ್ತರಾಸಙ್ಗಂ ದತ್ವಾ ಥೇರಂ ವನ್ದಿತ್ವಾ ಗೇಹಂ ಗತೋ. ಕೋಟರಟ್ಠಕವಿಹಾರಂ ಗನ್ತ್ವಾ ಥೇರಸ್ಸ ಸರೀರಜ್ಝಾಪನಂ ಕಾರಾಪೇತ್ವಾ ಧಾತುಂ ಆದಾಯ ಚೇತಿಯಂ ಕಾರಾಪೇತ್ವಾ ಮಹನ್ತಂ ಪೂಜಂ ಕತ್ವಾ ಮಹಾಗಾಮಂ ಗತೋ. ಸುವಣ್ಣಂ ಆಹರಾಪೇತ್ವಾ ರಾಜಙ್ಗಣೇ ಠಪಾಪೇಸಿ. ಗೋಠಸಮುದ್ದಕುಚ್ಛಿಯಂ ಪತ್ತ ನಾವಾತೋ ವತ್ಥಾನಿ ಆಹರಾಪೇತ್ವಾ ಭಿಕ್ಖುಸಙ್ಘಸ್ಸ ಚೀವರತ್ಥಾಯ ದಾಪೇತ್ವಾ ಮಹಾದಾನಂ ಪವತ್ತೇತ್ವಾ ಮಹಾಗಾಮಸಮೀಪೇ ವಿಹಾರಂ ಕಾರಾಪೇತ್ವಾ ವಿಹರನ್ತೋ ಅತ್ತನೋ ಪುತ್ತಂ ದುಟ್ಠಗಾಮಣಿಂ ಪಕ್ಕೋಸಾಪೇತ್ವಾ; ತಾತ, ತ್ವಂ ಗನ್ತ್ವಾ ಗಿರಿಮ್ಹಿ ನಗರೇ ನಿಸೀದಾ’ತಿ ವತ್ವಾ ಅಮಚ್ಚಞ್ಚಸ್ಸ ಪಿತುಟ್ಠಾನೇ ಠಪೇತ್ವಾ ಗಿರಿನಗರಂ ಪಾಹೇಸಿ. ತಂ ದಿಸ್ವಾ ಗಿರಿಅಭಯ ಕುಮಾರೋ ಕುಮಾರೇನ ಸದ್ಧಿಂ ಆಗತಬಳಸ್ಸ ವತ್ಥಾಹಾರಾದೀನಿ ದಾಪೇತ್ವಾ ಮಹನ್ತಂ ಸಮ್ಮಾನಂ ಅಕಾಸಿ. ರಾಜಕುಮಾರೋ ಗಿರಿಪಬ್ಬತಪಾದೇ ವಿಹಾಸಿ.

ತತೋ ಅಪರಭಾಗೇ ಜಾತಿಂ ನಿಸ್ಸಾಯ ಖತ್ತಿಯಾನಂ ವಿವಾದೋ ಅಹೋಸಿ. ಸೋ ಅಭಯರಾಜಾ ಕಿಂ ಮೇವಿವಾದೇನಾ’ತಿ ಅತ್ತನೋ ಭರಿಯಾಯ ಸೋಮದೇವಿಯಾ ಸದ್ಧಿಂ ಬಲವಾಹನಂ ಗಹೇತ್ವಾ ಅನುಕ್ಕಮೇನ ಗಚ್ಛನ್ತೋ ಸೇರುನಗರೇ ರಜ್ಜಂ ಕಾರೇನ್ತಂ ಅತ್ತಸಹಾಯಂ ಸಿವರಾಜಂ ಸನ್ಧಾಯ ತಸ್ಸ ಸನ್ತಿಕಂ ಆಗಞ್ಜಿ. ಸೋ’ಪಿ ಸಿವರಾಜಾ ಗಿರಿಅಭಯರಞ್ಞಾ ಸದ್ಧಿಂ ಆಗತಬಳಸ್ಸ ಮಹನ್ತಂ ಸಕ್ಕಾರಂ ಕಾರೇತ್ವಾ ಅಹತವತ್ಥತಿಲತಣ್ಡುಲಾದೀನಿ ಆಹರಾಪೇತ್ವಾ ದಾಪೇಸಿ. ಕತಿಪಾಹಚ್ಚಯೇ; ಸಮ್ಮ, ಕಸ್ಮಾ ಆಗತೋಸಿ’ತಿ ಪುಚ್ಛಿ. ಸೋ ಆಗತಕಾರಣಂ ಸಬ್ಬಮಸ್ಸ ಆಚಿಕ್ಖಿ. ಭದ್ದಕಂ ಸಮ್ಮ, ತೇ ಕತಂ ಆಗನ್ತಬ್ಬಮೇವ ಆಗತೋ. ಅಹಂ ತೇ ಕತ್ತಬ್ಬಂ ಜಾನಿಸ್ಸಾಮಿ. ತ್ವಂ ಮಾ ಚಿನ್ತಯೀ’ತಿ ವತ್ವಾ ತಸ್ಸ ವಸನತ್ಥಾಯ ನಗರಭೂಮಿಂ ಗವೇಸನ್ತೋ ಸರಕೋಟಿಯಂ ಅತಿರಮಣೀಯಭೂಮಿಂ ಪಸ್ಸಿತ್ವಾ ತಸ್ಮಿಂ ಭೂಮಿಭಾಗೇ ಸೋ ನಗರಂ ಮಾಪೇತ್ವಾ ದೇವಿಯಾ ಏಕಸದಿಸನಾಮಂ ಕರಿಸ್ಸಾಮೀ’ತಿ ಸೋಮನಗರನ್ತಿ ನಾಮಂ ಅಕಾಸಿ. ತಂ ನಗರಂ ಸುಸಮಿದ್ಧಂ ಸಮ್ಪನ್ನಧನಧಞ್ಞಾದೀಹಿ ಉಪಕರಣೇಹಿ ದ್ವಾರಟ್ಟಾಲಕಗೋಪುರಪರಿಖಾಪೋಕ್ಖರ-ಣಿಯಾದೀಹಿ ¶ ಸಹಿತಂ ಹತ್ಥಿಅಸ್ಸರಥಪತ್ತಿಆದೀಹಿ ಸಮಾಕುಲಂ ಸಙ್ಖಪಣವಭೇರಿಸದ್ದಾದೀಹಿ ಸಮಾಕಿಣ್ಣಂ ನಗರಂ ಅಹೋಸಿ. ಸೋ ಅಭಯೋ ಚಿರಂ ಸೋಮನಗರೇ ಮಹನ್ತಂ ಇಸ್ಸರಿಯಂ ಅನುಭವನ್ತೋ ವಿಹಾಸಿ.

ಅಥಾಪರಸ್ಮಿಂ ಕಾಲೇ ಸೋಮದೇವೀ ರಞ್ಞಾ ಸದ್ಧಿಂ ಕಥೇಸಿ; ಅಯ್ಯ ಅಮ್ಹಾಕಂ ಪಟಿಸರಣಂ ಚೇತಿಯಞ್ಚ ವಿಹಾರಞ್ಚ ಕಾರೇತುಂ ವಟ್ಟತೀ’ತಿ. ಭದ್ದಕಂ ತೇ ಕಥಿತನ್ತಿ ಸೋಮನಸ್ಸಪ್ಪತ್ತೋ ಹುತ್ವಾ ವಿಹಾರಭೂಮಿಂ ಗವೇಸನ್ತೋ ನಗರತೋ ನಾತಿದುರೇ ನಾಚ್ಚಾಸನ್ನೇ ಮಹನ್ತಂ ಸಾಲವನಂ ಅತ್ಥಿ. ತಂ ಪಸ್ಸಿತುಂ ಗತೋ. ತದಾ ತಸ್ಮಿಂ ಸಾಲವನೇ ಮಹಾಅರಿಟ್ಠತ್ಥೇರಸ್ಸ ವಂಸೇ ಮಹಾಮಹಿನ್ದತ್ಥೇರೋ ನಾಮ ಏಕೋ ಥೇರೋ ಅತ್ಥಿ. ಸೋ ಸಟ್ಠಿಮತ್ತೇ ಭಿಕ್ಖೂ ಗಹೇತ್ವಾ ವಿಹರತಿ. ತಂ ದಿಸ್ವಾ ಇರಿಯಾಪಥೇ ಪಸನ್ನೋ ಥೇರಂ ಏವಮಾಹ; ‘ಅಯ್ಯ ತುಮ್ಹಾಕಂ ಇಮಸ್ಮಿಂ ಸಾಲವನೇ ವಿಹಾರಂ ಕರಿಸ್ಸಾಮಿ’ತಿ. ಥೇರೋ ತಸ್ಸ ವಚನಂ ಸುತ್ವಾ ತುಣ್ಹೀಹಾವೇನ ಅಧಿವಾಸೇಸಿ. ರಾಜಾ ಸೋಮನಸ್ಸಪ್ಪತ್ತೋ ಥೇರಂ ವನ್ದಿತ್ವಾ ನಗರಮೇವ ಗನ್ತ್ವಾ ಸೋಮದೇವಿಂ ಆಮನ್ತೇತ್ವಾ; ಭದ್ದೇಸೋಮದೇವಿ, ಅಮ್ಹಾಕಂ ಮನೋರಥೋ ಮತ್ಥಕಂ ಪತ್ತೋ. ವಿಹಾರಕರಣತ್ಥಾಯ ಮನಾಪೋ ಭೂಮಿಭಾಗೋ ಲದ್ಧೋ. ತತ್ಥ ಚ ಮಹಿನ್ದೋ ನಾಮ ಥೇರೋ ಸಮಣಾನಂ ಸಟ್ಠಿಮತ್ತಂ ಗಹೇತ್ವಾ ವಿಹರತಿ. ತಂ ವನ್ದಿತ್ವಾ ವಿಹರಣತ್ಥಾಯ ಪಟಿಞ್ಞಂ ಗಹೇತ್ವಾ ಆಗತೋ. ತತ್ಥ ವಿಹಾರಂ ಕರಿಸ್ಸಾಮೀ’ತಿ ಆಹ. ಸಾ ತಂ ಸುತ್ವಾ ಸೋಮನಸ್ಸಪ್ಪತ್ತಾ ಸಾಧೂ’ತಿ ಸಮ್ಪಟಿಚ್ಛಿ. ಪುನದಿವಸೇ ದೇವಿಯಾ ಸದ್ಧಿಂ ಥೇರಸ್ಸ ಸನ್ತಿಕಂ ಗನ್ತ್ವಾ ವನ್ದಿತ್ವಾ ಏಕಮನ್ತಂ ನಿಸೀದಿ. ಥೇರೋ ತೇಸಂ ಮಹಾಸಮಯಸುತ್ತಂ ಕಥೇಸಿ. ತೇ ಉಭೋ’ಪಿ ಧಮ್ಮಂ ಸುತ್ವಾ ಸೋಮನಸ್ಸಜಾತಾ ಅಹೇಸುಂ. ಅಥ ರಾಜಾ ಅಯ್ಯ ಧಾತುಂ ಕುತೋ ಲಭಿಸ್ಸಾಮಾ’ತಿ ಥೇರಂ ಪುಚ್ಛಿ. ಮಾ ಚಿನ್ತಯಿ ಮಹಾರಾಜ, ಧಾತುಂ ಅಮ್ಹೇ ಜಾನಿಸ್ಸಾಮಾ’ತಿ ಆಚಿಕ್ಖಿ.

ಸೋ ತತೋ ಪಟ್ಠಾಯ ವಿಹಾರಭುಮಿಂ ಸೋಧಾಪೇತ್ವಾ ಖಾಣುಕಣ್ಟಕಾದಯೋ ನೀಹರಿತ್ವಾ ಭೇರಿತಲಮಿವ ರಮಣೀಯಂ ಸಮಂ ಕಾರಾಪೇತ್ವಾ ಇಟ್ಠಕವಡ್ಢಕಿಂ ಪಕ್ಕೋಸಾಪೇತ್ವಾ ಇಟ್ಠಚಿತಂ ಕಾರಾಪೇತ್ವಾ ಚೇತಿಯಕಮ್ಮಂ ಪಟ್ಠಪೇಸಿ. ವಡ್ಢಕೀ ಚೇತಿಯಂ ಚಿನನ್ತೋ ಕತಿಪಾಹೇನ ಪುಪ್ಫಾಧಾನತ್ತಯಂ ನಿಟ್ಠಪೇತ್ವಾ ಧಾತುಗಬ್ಭೇ ಸಬ್ಬಂ ಕತ್ತಬ್ಬಂ ಕಮ್ಮಂ ನಿಟ್ಠಪೇತ್ವಾ ರಞ್ಞೋ ಪಟಿವೇದೇಸಿ. ರಾಜಾ, ಆಗನ್ತ್ವಾ ಥೇರಸ್ಸ ಆರೋಚೇಸಿ. ನಿಟ್ಠಾಪಿತೋ ಅಯ್ಯ ಧಾತು ಗಬ್ಭೋ’ತಿ. ಥೇರೋ ರಞ್ಞೋ ವಚನಂ ಸುತ್ವಾ ಅತ್ತನಾ ಪರಿಹರಿತಂ ¶ ತಥಾಗತಸ್ಸ ದಕ್ಖಿಣದಾಠಾಧಾತುಂ ತಸ್ಸ ಅದಾಸಿ. ರಾಜಾ ಧಾತುಂ ಗಹೇತ್ವಾ ಸುನಕ್ಖತ್ತೇನ ಸುಮುಹುತ್ತೇನ ಮಹತಾ ಪರಿವಾರೇನ ಧಾತುಗಬ್ಭೇ ನಿದಹಿತ್ವಾ ಅತಿಮನೋರಮಂ ಉದಕಬುಬ್ಬುಳಕೇಲಾಸಕುಟಪಟಿಭಾಗಂ ಚೇತಿಯಂ ಕಾರಾಪೇಸಿ.

ಸದ್ಧಾದಿಗುಣಸಮ್ಪನ್ನೋ ಲೋಕಸಾಸನರಕ್ಖಕೋ;

ಸಚೇತಿಯಂ ಮಹಾರಾಜಾ ಕಾರಾಪೇಸಿ ವಿಹಾರಕಂ.

ತತೋ ಥೇರಸ್ಸ ಸನ್ತಿಕೇ ಸಟ್ಠಿಮತ್ತಾನಂ ಭಿಕ್ಖುನಂ ಅತ್ಥಾಯ ಸಟ್ಠಿಮತ್ತಾನಿ ಪರಿವೇಣಾನಿ ಕಾರಾಪೇತ್ವಾ ದ್ವಾರಟ್ಟಾಲಕಪಾಕಾರೇಹಿ ಸೋಭಿತಂ ವಿಹಾರಂ ನಿಟ್ಠಪೇತ್ವಾ ಅತ್ತನೋ ದೇವಿಯಾ ಏಕನಾಮಂ ಕತ್ವಾ ಮಹಿನ್ದತ್ಥೇರಸ್ಸ ದಕ್ಖಿಣೋದಕಂ ದತ್ವಾ ಗನ್ಧಮಾಲಾಧೂಪಧಜೇಹಿ ಪೂಜಂ ಕರೋನ್ತೋ ದಿವಸಸ್ಸ ತಿಕ್ಖತ್ತುಂ ಧಾತುಪಟ್ಠಾನಂ ಗನ್ತ್ವಾ ದಾನಾದೀನಿ ಪುಞ್ಞಾನಿ ಕುರುಮಾನೋ ಗಿರಿಅಭಯರಾಜಾ ಮಹನ್ತಂ ಸಮ್ಪತ್ತಿಂ ಅನುಭವಮಾನೋ ಸೋಮನಗರಂ ಪಟಿವಸತಿ.

(ನಗರೇ ಸೋಮನಾಮಮ್ಹಿ ರಮಣೀಯೇ ಮನೋರಮೇ;

ದೇವಿಯಾ ಸಹ ಮೋದನ್ತೋ ರಜ್ಜಂ ಕಾರೇಸಿ ನಾಯಕೋ.)

ತತೋ ವಿಹಾರದೇವಿಯಾ ಭಾತಾ ಚುಲ್ಲಪಿಣ್ಡಪಾತಿಯತಿಸ್ಸತ್ಥೇರೋ ನಾಮ ಏಕದಿವಸಂ ಕಾಕವಣ್ಣತಿಸ್ಸಮಹಾರಞ್ಞೋ ಆಯುಸಙ್ಖಾರಮೋಲೋಕೇನ್ತೋ ನ ಚಿರಪ್ಪವತ್ತನಭಾವಂ ಞತ್ವಾ ಪುನದಿವಸೇ ರಞ್ಞೋ ಸನ್ತಿಕಂ ಗನ್ತ್ವಾ ತೇನ ಸದ್ಧಿಂ ಕಥೇಸಿ. ಮಹಾರಾಜ ತುಮ್ಹಾಕಂ ನಲಾಟಧಾತುಯಾ ಸತ್ಥಾರಾ ಬ್ಯಾಕರಣಂ ದಿನ್ನಂ;’ಮಹಾವಾಲುಕಗಙ್ಗಾಯ ದಕ್ಖಿಣಭಾಗೇ ಸೇರು ನಾಮ ದಹಸ್ಸ ಅನ್ತೇ ವರಾಹ ನಾಮ ಸೋಣ್ಡಿಯಾ ಮತ್ಥಕೇ ಅನಾಗತೇ ಕಾಕವಣ್ಣತಿಸ್ಸೋ ನಾಮ ಮಹಾರಾಜಾ ಮಯ್ಹಂ ನಲಾಟಧಾತುಂ ಪತಿಟ್ಠಪೇಸ್ಸತೀ’ತಿ ವತ್ವಾ ತಂ ಸನ್ಧಾಯ ಭಗವಾ ಸಮಾಪತ್ತಿಂ ಸಮಾಪಜ್ಜಿತ್ವಾ ಗತೋ. ತಸ್ಸ ವಚನಂ ಮನಸಿಕರೋಹೀ’ತಿ ಆಹ. ತಸ್ಸ ಕಥಂ ಸುತ್ವಾ ಅಮ್ಹಾಕಂ ಕುಸಲಸಮ್ಪತ್ತಿಂ ಅವಿನಾಸೇತ್ವಾ ಅಯ್ಯಸ್ಸ ವಚನಮುದ್ದಿಸ್ಸ ಚೇತಿಯಂ ಕಾರಾಪನತ್ಥಾಯ ಗನ್ತಬ್ಬನ್ತಿ ಮನ್ತ್ವಾ ಭದ್ದಕಂ ಅಯ್ಯಾ’ತಿ ಥೇರಸ್ಸ ವಚನಂ ಸಮ್ಪಟಿಚ್ಛಿತ್ವಾ ಅತ್ತನೋ ಪುತ್ತಂ ದುಟ್ಠಗಾಮಣಿಂ ಗಿರಿನಗರತೋ ಪಕ್ಕೋಸಾಪೇತ್ವಾ ಮಹಾಗಾಮೇ ನಿಸೀದಾಪೇತ್ವಾ ನಗರೇ ಭೇರಿಂ ಚರಾಪೇಸಿ; ಅಹಂ ಮಹಾವಾಲುಕಾಯ ಗಙ್ಗಾಯ ಸಮೀಪೇ ಸೇರು ನಾಮ ¶ ದಹಸ್ಸ ಅನ್ತೇ ವರಾಹ ನಾಮ ಸೋಣ್ಡಿಯಾ ಮತ್ಥಕೇ ಚೇತಿಯಂ ಕಾರಾಪನತ್ಥಾಯ ಗಮಿಸ್ಸಾಮಿ, ಸಬ್ಬಸೇನಿಯೋ ಚ ಮಹಾ ಜನೋ ಚ ಮಯಾ ಸದ್ಧಿಂ ಆಗಚ್ಛನ್ತು’ತಿ ವತ್ವಾ ರಾಜಾ ಚುಲಪಿಣ್ಡಪಾತಿಯತಿಸ್ಸತ್ಥೇರಸ್ಸ ತಿಸ್ಸಮಹಾವಿಹಾರೇ ಸಾಗಲತ್ಥೇರಸ್ಸ ಚ ಸನ್ತಿಕಂ ಗನ್ತ್ವಾ ಭನ್ತೇ ತುಮ್ಹಾಕಂ ಪರಿವಾರೇ ಪಞ್ಚಸತಮತ್ತೇ ಭಿಕ್ಖು ಗಹೇತ್ವಾ ಧಾತುಂ ಉಪಟ್ಠಹನ್ತಾ ಮಯಾ ಸದ್ಧಿಂಯೇವ ಆಗಚ್ಛಥಾ’ತಿ ವತ್ವಾ ಭದ್ದಮಾಸೇ ಭದ್ದದಿವಸೇ ಸುನಕ್ಖತ್ತೇ ಸುಮುಹುತ್ತೇ ಬನ್ಧಾವಾರಂ ಸಜ್ಜೇತ್ವಾ ಧಾತುಘರತೋ ಧಾತುಕರಣ್ಡಕಂ ನೀಹರಿತ್ವಾ ಸುಸಜ್ಜಿತರಥೇ ಠಪೇತ್ವಾ ಉಪರಿ ಸೇತಚ್ಛತ್ತಞ್ಚ ಕತ್ವಾ ಪುರತೋ ಪುರತೋ ರತನಮಣಡಪೇ ಕಾರಾಪೇತ್ವಾ ಪುರೇತರಮಕಾಸಿ.

ತತೋ ರಾಜಾ ಪುತ್ತಂ ದುಟ್ಠಗಾಮಣಿಂ ಪಕ್ಕೋಸಾಪೇತ್ವಾ ಅನುಸಾಸಿತ್ವಾ ಪುತ್ತಂ ಸದ್ಧಾತಿಸ್ಸಕುಮಾರಞ್ಚ ವಿಹಾರದೇವಿಞ್ಚ ಗಹೇತ್ವಾ ಸೀಘಂ ನಿಕ್ಖಮಿ. ಚೂಳಪಿಣ್ಡಪಾತಿಯತಿಸ್ಸತ್ಥೇರೋ ಚ ಅತ್ತನೋ ಪರಿವಾರೇ ಪಞ್ಚಸತಭಿಕ್ಖೂ ಗಹೇತ್ವಾ ಧಾತುಂ ಉಪಟ್ಠಹನ್ತೋ ಪಚ್ಛತೋ ಆಗಞ್ಛಿ. ಸಬ್ಬಸೇನಿಯೋ ಚ ರಾಜಾ ಚ ಭಿಕ್ಖುಸಙ್ಘಸ್ಸ ಮಹಾದಾನಂ ದತ್ವಾ ಭಿಕ್ಖು ಸಙ್ಘೇನ ಸದ್ಧಿಂ ಗನ್ತ್ವಾ ದೀಘವಾಪಿಂ ಪಾಪುಣಿಂಸು. ತಸ್ಮಿಂ ಸದ್ಧಾತಿಸ್ಸಕುಮಾರಂ ನಿಸೀದಾಪೇತ್ವಾ ಅನುಕ್ಕಮೇನ ಆಗನ್ತ್ವಾ ಸುಮನಮಾಲಾಪಿಟ್ಠಿಯಂ ಖನ್ಧವಾರಂ ಬನ್ಧಿತ್ವಾ ನಿಸೀದಿ. ಕಸ್ಮಾ ಪನ ತಂ ಠಾನಂ ಏವಂ ನಾಮಕಂ ಜಾತನ್ತಿ. ಸುಮನನಾಗರಾಜಾ ಸತ್ತದಿವಸಾನಿ ನಾಗಸಮ್ಪತ್ತಿಂ ಅಭಿರಮಮಾನೋ (ನಲಾಟಧಾತುಂ ವಿಸ್ಸರಿ.) ಸತ್ತಾಹಚ್ಚಯೇನ ನಲಾಟಧಾತುಂ ಅನುಸ್ಸರಿತ್ವಾ ಪಚ್ಛಾ ಆವಜ್ಜಮಾನೋ ರಞ್ಞೋ ಧಾತುಂ ಗಹೇತ್ವಾ ಆಗತಭಾವಂ ಞತ್ವಾ ಮಹನ್ತಂ ಸೋಮನಸ್ಸಂ ಪತ್ತೋ ಮಹನ್ತಜ್ಝಾಸಯೋ ಅತ್ತನೋ ಪರಿವಾರೇ ಛಕೋಟಿಮತ್ತೇ ನಾಗೇ ಗಹೇತ್ವಾ ಧಾತುಪಟಿಪಥಂ ಗನ್ತ್ವಾ ಧಾತುಪತಿಟ್ಠಿತಟ್ಠಾನೇವ ಪಥವಿಯಂ ನಾಭಿಪ್ಪಮಾಣತೋ ಸುಮನಮಾಲಾವಸ್ಸಂ ವಸ್ಸೇಸಿ. ತಸ್ಮಾ ತಂ ಠಾನಂ ಸುಮನಮಾಲಾಪಿಟ್ಠಿತಿ ಜಾತಂ. ಪುನದಿವಸೇ ರಾಜಾ ಧಾತುಂ ಗಹೇತ್ವಾ ವರಾಹ ¶ ನಾಮ ಸೋಣ್ಡಿಂ ಪಾಪುಣಿ. ಸಮ್ಪತ್ತಾಯ ಧಾತುಯಾ ತಸ್ಮಿಂ ಠಾನೇ ಸುಮನನಾಗರಾಜಾ ರಥಚಕ್ಕೇ ಯಾವ ನಾಭಿಂ ತಾವ ಓಸೀದಾಪೇತ್ವಾ ಅಪರಿವತ್ತನಂ ಅಕಾಸಿ. ತಂ ದಿಸ್ವಾ ರಾಜಾ ಸಂವೇಗಪ್ಪತ್ತೋ ಥೇರಂ ಪುಚ್ಛಿ. ಮಾ ಭಾಯಿ ಮಹಾರಾಜ, ಧಾತು ಪತಿಟ್ಠಾನಟ್ಠಾನಂ ಆಗತೋ. ಇಮಸ್ಮಿಂ ಠಾನೇ ಪತಿಟ್ಠಹಿಸ್ಸತೀ’ತಿ ಆಹ.

ತಂ ಸುತ್ವಾ ರಾಜಾ ಧಾತುಪತಿಟ್ಠಾನ ಭೂಮಿಭಾಗಂ ಭವಿಸ್ಸತೀ’ತಿ ಚಿನ್ತೇತ್ವಾ ತತ್ಥೇವ ಸೇನಂನಿವೇಸೇತ್ವಾ ಇದಂ ಠಾನಂ ಸಮನ್ತತೋ ಸಕಣ್ಟಕಂ ವನಂ ನೀಹರಾಪೇತ್ವಾ ಭೂಮಿಭಾಗಂ ಅತಿರಮಣೀಯಂ ಭೇರಿತಲಮಿವ ಸಮಂ ಕಾರಾಪೇತ್ವಾ ಸೇನಿಯಪಾಮೋಕ್ಖಂ ಆಮನ್ತೇತ್ವಾ ತುಮ್ಹೇ ಧಾತುಂ ಠಪನತ್ಥಾಯ ಪಠಮಂ ಧಾತುಘರಂ ಕಾರಾಪೇತ್ವಾ ಧಾತು ಗಬ್ಭಂ ಪತಿಟ್ಠಾಪೇತ್ವಾ ನಿವೇದೇಸಿ. ರಾಜಾ ಅನ್ತೋ ಧಾತುಘರೇ ತಸ್ಮಿಂ ಧಾತುಗಬ್ಭೇ ಧಾತುಕರಣ್ಡಕಂ ಪತಿಟ್ಠಪೇತ್ವಾ ಬಹಿ ಆರಕ್ಖಂ ಸಂವಿಧಾಯ ತತ್ಥ ಮಹನ್ತಂ ಪೂಜಾವಿಧಾನಂ ಕಾರಾಪೇತ್ವಾ ಧಾತುಘರಂ ಚತುಜಾತಿಯಗನ್ಧೇನ ವಿಲಿಮ್ಪಾಪೇಸಿ. ತದುಪಾದಾಯ ತಂ ಗೇಹಂ ಗನ್ಧಮೂಲಂ ನಾಮ ಜಾತಂ. ತಸ್ಮಿಂ ಠಾನೇ ಬಹೂ ಸನ್ನಿಪತಿಂಸು. ತತ್ಥ ಮಹಿನ್ದೋ ನಾಮ ಥೇರೋ ಆಗನ್ತುಕ ಭಿಕ್ಖೂನಂ ವತ್ತಪಟಿವತ್ತಂ ಅಕಾಸಿ. ಪುನದಿವಸೇ ರಾಜಾ ವಿಹಾರಂ ಗನ್ತ್ವಾ ಸುಖೇನ ವಸಿತ್ಥ ಅಯ್ಯಾ’ತಿ ಪುಚ್ಛಿತ್ವಾ ಸಬ್ಬೇ ಭಿಕ್ಖು ನಿಮನ್ತೇತ್ವಾ ರಾಜಗೇಹೇ ನಿಸೀದಾಪೇತ್ವಾ ಯಾಗುಭತ್ತಂ ಸಕ್ಕಚ್ಚಂ ದತ್ವಾ ಪಚ್ಛಾ ಭತ್ತಂ ಅನುಮೋದನಂ ಸುತ್ವಾ ನಿಸಿನ್ನಕಾಲೇ ಥೇರೋ ಓವದನ್ತೋ ಮಹಾರಾಜ, ಪಮಾದೇನ ವಸಿತುಂ ನ ವಟ್ಟತಿ ಜೀವಿತಂ ನಾಮ ನ ಚಿರಟ್ಠಿತಿಕಂ, ಧಾತುಪತಿಟ್ಠಾಪನಂ ಪಪಞ್ಚಂ ಅಕತ್ವಾ ಕಾರೇಹೀ’ತಿ ವತ್ವಾ ಗಾಥಮಾಹ?

ಯಸ್ಮಾ ಹಿ ಜೀವಿತಂ ನಾಮ ಅಪ್ಪಂ ಬುಬ್ಬುಲಕುಪಮಂ;

ತಸ್ಮಾ ಹಿ ಪಣ್ಡಿತೋ ಪೋಸೋ ಕರೇಯ್ಯ ಕುಸಲಂ ಸದಾ’ತಿ.

ಇಮಿನಾ ¶ ನಯೇನ ಧಮ್ಮಂ ಕಥೇತ್ವಾ ಚೂಳಪಿಣ್ಡಪಾತಿಯತಿಸ್ಸ ತ್ಥೇರೋ ಚ ಸಾಗಲತ್ಥೇರೋ ಚ ಮಹಿನ್ದತ್ಥೇರೋ ಚಾ’ತಿ ತಯೋ ಥೇರಾ ಅತ್ತನೋ ಅತ್ತನೋ ಪರಿವಾರೇ ಭಿಕ್ಖೂ ಗಹೇತ್ವಾ ಧಾತು ಪರಿಹರಣತ್ಥಾಯ ಆಗಚ್ಛಿಂಸು.

ವಿಪುಲಯಸೋ ಪರಹಿತಾವಹನ್ತೋ,

ಸುಜನಹಿತೋ ಧಿತಿಮಾ ಅವೀತಸದ್ಧೋ;

ಸುಪರಿವುತೋ ಮಹತಿಯಾ ಹಿ ಪರಿಸಾ,

ರಾಜಸೇಟ್ಠೋ ಪವರಥೂಪಮಾರಭೀ’ತಿ.

ಇತಿ ಅರಿಯಜನಪ್ಪಸಾದನತ್ಥಾಯ ಕತೇ ಧಾತುವಂಸೇ

ಪಕಿಣ್ಣಕೋ ನಾಮ

ಚತುತ್ಥೋ ಪರಿಚ್ಛೇದೋ.

೫. ¶ ಧಾತುನಿಧಾನಾಧಿಕಾರೋ

ತತೋ ವಿಮಂಸೇತ್ವಾ ಭುಮಿಭಾಗಂ ಗಹೇತುಂ ವಟ್ಟತೀ’ತಿ ಭೂಮಿ ಭಾಗಂ ವೀಮಂಸೇನ್ತೋ ಮಙ್ಗಲಸಮ್ಮತೇ ಅಟ್ಠ ಗೋಣೇ ಆಹರಾಪೇತ್ವಾ ಗನ್ಧೋದಕೇನ ನಹಾಪೇತ್ವಾ ಸಿಙ್ಗೇಸು ಸುವಣ್ಣಕಞ್ಚುಕಂ ಪತಿಮುಞ್ಚಾಪೇತ್ವಾ ಗನ್ಧಪಞ್ಚಙ್ಗುಲಿಕಂ ದಾಪೇತ್ವಾ ಗೀವಾಯ ಮಾಲಾದಾಮಂ ಬನ್ಧಾಪೇತ್ವಾ ಅಯೋದಾಮೇನ ಬನ್ಧಾಪೇತ್ವಾ ಏವಂ ಚಿನ್ತೇಸಿ? ಯದಿ ಪನ ಭಗವತೋ ನಲಾಟಧಾತು ಯಸ್ಮಿಂ ಠಾನೇ ಪತಿಟ್ಠಹಿತ್ವಾ ಲೋಕತ್ಥಚರಿಯಂ ಕರೋನ್ತೀ ಪಞ್ಚವಸ್ಸಸಹಸ್ಸಾನಿ ಸಾಸನಂ ಪತಿಟ್ಠಹಿಸ್ಸತಿ ತಸ್ಮಿಂ ಠಾನೇ ಗೋಣಾ ಸಯಮೇವ ಅಯೋದಾಮತೋ ಮುಞ್ಚಿತ್ವಾ ಥುಪಟ್ಠಾನಂ ಸಮನ್ತತೋ ವಿಚರಿತ್ವಾ ಚತುಸು ದಿಸಾಸು ಸಯನ್ತುತಿ ಅಧಿಟ್ಠಹಿತ್ವಾ ಪುರಿಸೇ ಆಣಾಪೇಸಿ. ತೇ ತಥೇವ ಅಕಂಸು. ತತೋ ವಿಭಾತಾಯ ರತ್ತಿಯಾ ರಾಜಾಗೋಣೇ ಗಾಹಾಪನತ್ಥಾಯ ಆಯುತ್ತಕೇ ಆಣಾಪೇಸಿ. ತೇ ಮನುಸ್ಸಾ ಗನ್ತ್ವಾ ಗೋಣೇ ಅಪಸ್ಸಿತ್ವಾ ನ ಪಸ್ಸಾಮ ದೇವಾ’ತಿ ರಞ್ಞೋ ಆರೋಚೇಸುಂ. ಗಚ್ಛ ಭಣೇ, ಗೋಣಾನಂ ಗತಟ್ಠಾನಂ ಓಲೋಕೇಥಾ’ತಿ ಆಹ. ತೇ ಗವೇಸಮಾನಾ ಬನ್ಧನಟ್ಠಾನೇ ಅದಿಸ್ವಾ ಪದಾನುಪದಂ ಗನ್ತ್ವಾ ಥೂಪಕರಣಟ್ಠಾನಂ ಸಮನ್ತಾ ವಿಚರಿತ್ವಾ ಚತುಸು ದಿಸಾಸು ಸಯಿತಗೋಣೇ ದಿಸ್ವಾ ಸಯಿತಟ್ಠಾನತೋ ನಙ್ಗುಟ್ಠಾದೀನಿ ಮದ್ದನ್ತಾಪಿ ಉಟ್ಠಾಪೇತುಂ ಅಸಕ್ಕೋನ್ತಾ ಗನ್ತ್ವಾ ರಞ್ಞೋ ಆರೋಚೇಸುಂ; ದೇವ, ಗೋಣಾ ನ ಉಟ್ಠಹನ್ತಿ, ಏಕಂ ಠಾನಂ ಸಮನ್ತಾ ವಿಚರಿತ್ವಾ ಚತುಸು ದಿಸಾಸು ಸಯಿತಾ’ತಿ. ತಂ ಸುತ್ವಾ ರಾಜಾ ಸೇನಙ್ಗಪರಿವುತೋ ಸಯಮೇವ ಗನ್ತ್ವಾ’ಪಿ ಗೋಣೇ ಉಟ್ಠಾಪೇತುಂ ಅಸಕ್ಕೋನ್ತೋ ರಾಜಾ ಏವಂ ಅಧಿಟ್ಠಾಸಿ; ಯದಿ ಇಮಸ್ಮಿಂ ಠಾನೇ ಧಾತು ಪತಿಟ್ಠಾಪೇತಬ್ಬಾ ಭವೇಯ್ಯ ಗೋಣಾ ಉಟ್ಠಹಿತ್ವಾ ಗಚ್ಛನ್ತು’ತಿ. ಗೋಣಾ ಚಿತ್ತಕ್ಖಣೇಯೇವ ಉಟ್ಠಹಿತ್ವಾ ಪಲಾಯಿಂಸು. ರಾಜಾ ತಂ ಅಚ್ಛರಿಯಂ ದಿಸ್ವಾ ಪಸನ್ನಮನೋ ಹುತ್ವಾ ಪುನೇಕದಿವಸಂ ವುತ್ತನಿಯಾಮೇನೇವ ಅಸ್ಸೇ ¶ ಅಲಙ್ಕಾರಾಪೇತ್ವಾ ಅಯೋದಾಮೇನ ಬನ್ಧಾಪೇತ್ವಾ ಠಪೇಸಿ. ಅಸ್ಸಾಪಿ ತೇ ಗೋಣಾ ವಿಯ ಗನ್ತ್ವಾ ನಿಪಜ್ಜಿಂಸು. ರಾಜಾ ಗನ್ತ್ವಾ ತಥೇವ ಅಧಿಟ್ಠಹಿತ್ವಾ ಅಸ್ಸೇ ಉಟ್ಠಾಪೇಸಿ. ಪುನೇಕದಿವಸಂ ಹತ್ಥೀಂ ಅಲಙ್ಕಾರಾಪೇತ್ವಾ ತಥೇವ ಅಧಿಟ್ಠಾಸಿ. ಸೋಪಿ ಬನ್ಧದಾಮೇ ಛಿನ್ದಿತ್ವಾ ಪಚ್ಛಿಮಯಾಮಸಮನನ್ತರೇ ಗನ್ತ್ವಾ ಚೇತಿಯಕರಣಟ್ಠಾನೇ ನಿಪಜ್ಜಿ. ಪಭಾತಾಯ ರತ್ತಿಯಾ ರಾಜಾ ಹತ್ಥೀಗೋಪಕೇ ಪಕ್ಕೋಸಾಪೇತ್ವಾ ಹತ್ಥಿಂ ಆನೇಥಾ’ತಿ ಆಹ. ಹತ್ಥಿಗೋಪಕಾ ಹತ್ಥಿಂ ಬನ್ಧನಟ್ಠಾನೇ ಅದಿಸ್ವಾ, ಹತ್ಥಿಂ ಬನ್ಧನಟ್ಠಾನೇ ನ ಪಸ್ಸಾಮ ದೇವಾ’ತಿ ಆಹಂಸು. ತೇನಹಿ ಭಣೇ, ಸೀಘಂ ಉಪಧಾರೇಥಾ’ತಿ ವುತ್ತೇ ಹತ್ಥಿಗೋಪಕಾ ಪದಾನುಪದಂ ಗವೇಸಮಾನಾ ಚೇತಿಯಟ್ಠಾನೇ ನಿಪನ್ನಂ ಹತ್ಥಿಂ ದಿಸ್ವಾ ಆಗನ್ತ್ವಾ ರಞ್ಞೋ ಆರೋಚೇಸುಂ. ತಂ ಸುತ್ವಾ ರಾಜಾ ಹೇಟ್ಠಾ ವುತ್ತಪ್ಪಕಾರೇನ ಪಟಿಪಜ್ಜಿತ್ವಾ ಹತ್ಥಿಂ ಪುರೇ ಕತ್ವಾ ಆಗಚ್ಛಿ.

ಏವಂ ತೀಹಿ ವಿಮಂಸನಾಹಿ ವೀಮಂಸೇತ್ವಾ ಭುಮಿಗಹಿತಭಾವಂ ಥೇರಸ್ಸ ಸನ್ತಿಕಂ ಗನ್ತ್ವಾ ವನ್ದಿತ್ವಾ ಉಪಟ್ಠಹಮಾನೋ ಆರೋಚೇಸಿ. ತಸ್ಮಿಂ ಕಾಲೇ ಸೇರುನಗರೇ ಸಿವರಾಜಾ ಬಹೂ ಪಣ್ಣಾಕಾರೇ ಗಾಹಾಪೇತ್ವಾ ರಾಜಾನಂ ಪಸ್ಸಿಸ್ಸಾಮಿ’ತಿ ಆಗನ್ತ್ವಾ ವನ್ದಿತ್ವಾ ಏಕಮನ್ತಂ ಅಟ್ಠಾಸಿ. ರಾಜಾ ತೇನ ಸದ್ಧಿಂ ಸಮ್ಮೋದನೀಯಂ ಕಥಂ ಕತ್ವಾ ನಿಸಿನ್ನಕಾಲೇ ಲೋಣನಗರೇ ಮಹಾನಾಗರಾಜಾ’ಪಿ ಬಹುಪಣ್ಣಾಕಾರಂ ಗಾಹಾಪೇತ್ವಾ ರಾಜಾನಂ ಪಸ್ಸಿಸ್ಸಾಮಿ’ತಿ ಆಗನ್ತ್ವಾ ವನ್ದಿತ್ವಾ ಏಕಮನ್ತಂ ನಿಸೀದಿ. ತೇನ ಸದ್ಧಿಂ ಸಮ್ಮೋದನೀಯಂ ಕಥಂ ಅಕಾಸಿ; ಇಮಸ್ಮಿಂ ಠಾನೇ ದಸಬಲಧಾತುಂ ಪತಿಟ್ಠಾಪೇಸ್ಸಾಮಿ, ತುಮ್ಹೇ ಮಮ ಸಹಾಯಾ ಹೋಥಾ’ತಿ ತೇ ಗಹೇತ್ವಾ ಗನ್ತ್ವಾ ಧಾತುಂ ವನ್ದಥಾ’ತಿ ವನ್ದಾಪೇಸಿ. ತಸ್ಮಿಂ ಖಣೇ ಧಾತುತೋ ಛಬ್ಬಣ್ಣರಂಸಿಯೋ ಉಗ್ಗಚ್ಛಿಂಸು. ದೇವಾ ಸಾಧುಕಾರಂ ಕರೋನ್ತಾ ಆಕಾಸತೋ ಮಾಲಾಯೋ ಖಿಪಿಂಸು. ರಾಜಾನೋ ಸೋಮನಸ್ಸಪ್ಪತ್ತಾ ಅಮ್ಹಾಕಂ ಲಙ್ಕಾಯಂ ದಸಬಲಸ್ಸ ನಲಾಟಧಾತು ಅಮ್ಹಾಕಂ ರಟ್ಠೇ ಪತಿಟ್ಠಹಿಸ್ಸತಿ. ಏಸಾ ಧಾತು ಮಹಾ ಜನಸ್ಸ ಸತ್ಥುಕಿಚ್ಚಂ ಸಾಧೇಯ್ಯಾತಿ ವನ್ದಿತ್ವಾ ಗತಾ. ರಾಜಾ ತೇಸಂ ಗತಕಾಲೇ ಗಿರಿಅಭಯಂ ಪಕ್ಕೋಸಾಪೇತ್ವಾ ತಾತ, ಇಟ್ಠಕಂ ಜನಸ್ಸ ಪೀಳನಂ ಅಕತ್ವಾ ಕಾರಾಪೇಮಾ’ತೀ ಆಹ. ಮಾ ಚಿನ್ತಯಿತ್ಥ ದೇವ, ಅಹಂ ¶ ಇಟ್ಠಕಂ ಕಾರಾಪೇಸ್ಸಾಮೀತಿ. ಏವಞ್ಹಿ ಸತಿ ಪಪಞ್ಚೋ ಭವಿಸ್ಸತೀ’ತಿ ಆಹ. ಅಮ್ಹಾಕಂ ಸನ್ತಿಕೇ ಸುವಣ್ಣರಜತಾನಿ ಮನ್ದಾನಿ ಕುತೋ ಲಭಿಸ್ಸಾಮಾ’ತಿ ವುತ್ತೇ ಗಿರಿಅಭಯೋ ಏವಮಾಹ; ದೇವ, ಸತ್ಥಾ ಮಹಾಪುಞ್ಞೋ ಮಹನ್ತಂ ಪೂಜಾಸಕ್ಕಾರಸಮ್ಮಾನಂ ಲಭಿಸ್ಸತಿ. ತ್ವಂ ಅಚಿನ್ತೇತ್ವಾ ಚೇತಿಯಕಮ್ಮಂ ಪಟ್ಠಪೇಹೀ’ತಿ ಆಹ.

ಸೋ ತಸ್ಸ ತಂ ಅಚಿನ್ತನೀಯಂ ಕಥಂ ಸುತ್ವಾ ಸೋಮನಸ್ಸಪ್ಪತ್ತೋ ಥೇರಸ್ಸ ಸನ್ತಿಕೇ ಧಮ್ಮಂ ಸುತ್ವಾ ಧಾತುಂ ವನ್ದಿತ್ವಾ ನಗರಂ ಗನ್ತ್ವಾ ಭುತ್ತಸಾಯಮಾಸೋ ಸಯನೇ ನಿಪನ್ನೋ ನಿದ್ದಂ ಓಕ್ಕಮಿ. ವಿಭಾತಾಯ ರತ್ತಿಯಾ ಪಬುಜ್ಝಿತ್ವಾ ಇಟ್ಠಕಂ ಚಿನ್ತಯಮಾನಸ್ಸ ದೋಮನಸ್ಸಂ ಅಹೋಸಿ. ತಸ್ಮಿಂ ಕಾಲೇ ಸಕ್ಕೋ ದೇವರಾಜಾ ವಿಸ್ಸಕಮ್ಮಂ ದೇವಪುತ್ತಂ ಆಮನ್ತೇತ್ವಾ; ತಾತ, ವಿಸ್ಸಕಮ್ಮ, ಕಾಕವಣ್ಣತಿಸ್ಸಮಹಾರಾಜಾ ಅಮ್ಹಾಕಂ ಸತ್ಥುನೋ ನಲಾಟ ಧಾತುಂ ನಿದಹಿತ್ವಾ ಮಹನ್ತಂ ಚೇತಿಯಂ ಕಾರಾಪೇತುಕಾಮೋ ಇಟ್ಠಕಂ ಚಿನ್ತಯಿ. ತ್ವಂ ಗನ್ತ್ವಾ ಫಾಸುಕಟ್ಠಾನೇ ಇಟ್ಠಕಂ ಮಾಪೇಹೀತಿ ಆಹ. ತಂ ಸುತ್ವಾ ವಿಸ್ಸಕಮ್ಮದೇವಪುತ್ತೋ ದುಗ್ಗತಸ್ಸ ಬ್ರಾಹ್ಮಣಸ್ಸ ಖೇತ್ತೇ ಇಟ್ಠಕಂ ಮಾಪೇತ್ವಾ ದೇವಲೋಕಮೇವ ಗತೋ. ತಸ್ಮಿಂ ಖಣೇ ಖೇತ್ತಸಾಮಿಕೋ ದುಗ್ಗತಬ್ರಾಹ್ಮಣೋ ಪಾತೋವ ಅತ್ತನೋ ಖೇತ್ತಂ ಓಲೋಕನತ್ಥಾಯ ಗತೋ ಇತೋವಿತೋ ಓಲೋಕೇನ್ತೋ ಇಟ್ಠಕರಾಸಿಂ ದಿಸ್ವಾ ಚಿನ್ತೇಸಿ; ಹೀಯೋ ರಾಜಾ ಇಟ್ಠಕಂ ಕಥಂ ಲಭಿಸ್ಸಾಮೀತಿ ಕಥೇಸಿ. ಮಹನ್ತಂ ವತ ಪಣ್ಣಾಕಾರಂ ಮಯಾ ಲದ್ಧನ್ತಿ ತುಟ್ಠೋ ದೇವ್ैಟ್ಠಕಾನಿ ಕಾಜೇನ ಗಹೇತ್ವಾ ರಞ್ಞೋ ದಸ್ಸನತ್ಥಾಯ ಗನ್ತ್ವಾ ರಾಜದ್ವಾರೇ ಠತ್ವಾ ಸಾಸನಂ ಪಹಿಣಿ. ತಂ ಪಕ್ಕೋಸಾಪೇತ್ವಾ ಕಸ್ಮಾ ಪಾತೋ’ವ ಆಗತೋಸೀ’ತಿ ಪುಚ್ಛಿ. ದೇವ ಮಯ್ಹಂ ಖೇತ್ತೇ ಇಟ್ಠಕರಾಸಿಂ ದಿಸ್ವಾ ಪಾತೋ’ವ ಇಟ್ಠಕಾನಿ ಗಹೇತ್ವಾ ಆಗತೋಮ್ಹೀ’ತಿ. ಈದಿಸಾನಿ ಇಟ್ಠಕಾನಿ ಚೇತಿಯಸ್ಸ ಅನುಚ್ಛವಿಕಾನೀತಿ ದಸ್ಸೇಸಿ. ರಾಜಾ ಪಸ್ಸಿತ್ವಾ ಸೋಮನಸ್ಸಪ್ಪತ್ತೋ ಬ್ರಾಹ್ಮಣಸ್ಸ ಬಹುಂ ಧನಂ ದಾಪೇಸಿ.

ತಸ್ಮಿಂ ¶ ಖಣೇ ಅಞ್ಞಂ ಸಾಸನಂ ಆಹರಿ. ಮದನಪಟ್ಟನದ್ವಾರತೋ ಚತಸ್ಸೋ ರಜತನಾವಾ ಸುವಣ್ಣಭುಮಿತೋ ಚತಸ್ಸೋ ಸುವಣ್ಣನಾವಾ ಉಕ್ಕಮಿಂಸೂತಿ ಪಟ್ಟನಮುಖದ್ವಾರೇ ವಿಹರನ್ತೋ ಆರಕ್ಖಕ ಜೇಟ್ಠಕೋ ಧಮ್ಮಪಾಲೋ ನಾಮ ಆಗನ್ತ್ವಾ ರಞ್ಞೋ ಆರೋಚೇಸಿ. ರಾಜಾ ತುಟ್ಠೋ ಸುವಣ್ಣರಜತೇ ಆಹರಾಪೇಸಿ.

(ಇಟ್ಠಕಂ ರಜತಞ್ಚೇವ ಸುವಣ್ಣಞ್ಚ ಮಹಾರಹಂ;

ಆಹರಿತ್ವಾನ ತಂ ಸಬ್ಬಂ ಕಮ್ಮಂ ಆರಭಿ ಚೇತಿಯೇ.

ಸತ್ಥು ಪುಞ್ಞಾನುಭಾವೇನ ರಞ್ಞೋ ಪುಞ್ಞಬಲೇನ ಚ;

ಚಿನ್ತಿತಚಿನ್ತಿತಂ ಸಬ್ಬಂ ಖಣೇನೇವ ಸಮಿಜ್ಝತಿ.)

ತತೋ ರಾಜಾ ಚೂಳಪಿಣ್ಡಪಾತಿಯತಿಸ್ಸತ್ಥೇರಸ್ಸ ಸನ್ತಿಕಂ ಗನ್ತ್ವಾ? ಅಯ್ಯ ಇಟ್ಠಕಭುಮಿಂ ಗಮಿಸ್ಸಾಮೀತಿ ಆಹ. ಥೇರೋ ಸುತ್ವಾ ತುಟ್ಠೋ ಅತ್ತನೋ ಪರಿವಾರೇಹಿ ಪಞ್ಚಸತಭಿಕ್ಖೂಹಿ ಸದ್ಧಿಂ ಇಟ್ಠಕ ಭೂಮಿಂ ಗತೋ. ತತೋ ಮಹಾಸಾಗಲತ್ಥೇರೋ ಚ ಮಹಿನ್ದತ್ಥೇರೋ ಚ ಅತ್ತನೋ ಪರಿವಾರೇಹಿ ಭಿಕ್ಖುಹಿ ಸದ್ಧಿಂ ಇಟ್ಠಕಭುಮಿಂ ಗತಾ. ಸಿವ ನಗರೇ ರಾಜಾಪಿ ಇಟ್ಠಕಭುಮಿಂ ಗತೋ. ಲೋಣನಗರೇ ನಾಗರಾಜಾಪಿ ಇಟ್ಠಕಭುಮಿಂ ಗತೋ. ಸೋಮನಗರೇ ಗಿರಿಅಭಯರಾಜಾಪಿ ಅತ್ತನೋ ಸೇನಙ್ಗೇಹಿ ಪರಿವಾರೇತ್ವಾ ಇಟ್ಠಕಭುಮಿಂ ಗತೋ. ತೇಸಂ ಸಮಣ ಬ್ರಾಹ್ಮಣಾನಂ ರಾಜಬಳಾನಞ್ಚ ಸಮ್ಪಿಣ್ಡಿತತ್ತಾ ಸೋ ಪಿಟ್ಠಿಪಾಸಾಣೋ ಬಲವಾಹನೋ ನಾಮ ಜಾತೋ. ತೇ ಸಬ್ಬೇ ಇಟ್ಠಕಭುಮಿಂ ಸಮೋಸರಿಂಸು. ಥೇರೋ ಇಟ್ಠಕರಾಸಿಂ ಓಲೋಕೇತ್ವಾ ರಾಜಾನಂ ಏವಮಾಹ? ಮಹಾರಾಜ, ಅಯಂ ಇಟ್ಠಕರಾಸಿ ಚೇತಿಯೇ ಸಬ್ಬಕಮ್ಮತ್ಥಾಯ ಪಹೋತೀ’ತಿ. ರಾಜಾ ಅತ್ತಮನೋ ಸೇನಙ್ಗಪರಿವುತೋ ಸಯಮೇವ ಪಠಮಂ ಇಟ್ಠಕಂ ಗಣ್ಹಿ. ತಂ ದಿಸ್ವಾ ಸೇಸರಾಜಾನೋ ಚ ಅಮಚ್ಚಾದಯೋ ಚ ಪರಿಸಾ ಚ ಸಬ್ಬೇ ಭಿಕ್ಖು ಚ ಇಟ್ಠಕಾನಿ ಗಣ್ಹಿಂಸು ತಸ್ಮಿಂ ಕಾಲೇ ಭಾರಂ ಉಕ್ಖಿಪಿತ್ವಾ ಗಮನಂ ಪಪಞ್ಚಂ ಭವಿಸ್ಸತೀ’ತಿ ರಾಜಾ ಚಿನ್ತೇಸಿ. ಥೇರೋ ತಸ್ಸ ಚಿತ್ತಂ ಜಾನಿತ್ವಾ ಏವಮಾಹ? ಮಾ ಚಿನ್ತಯಿತ್ಥ ಮಹಾರಾಜ, ಇಟ್ಠಕಾನಿ ಗಹೇತ್ವಾ ಗಚ್ಛ. ಪಚ್ಛಾ ದೇವನಾಗಾದಯೋ ಇಟ್ಠಕಭುಮಿತೋ ಪಟ್ಠಾಯ ಯಾವ ಚೇತಿಯಟ್ಠಾನಂ ನಿರನ್ತರಾ ಠಿತಾ ಆಹರಿಸ್ಸನ್ತೀ’ತಿ. ತೇ ಆಹರಿತ್ವಾ ಚೇತಿಯಟ್ಠಾನೇ ರಾಸಿಂ ಕರೋನ್ತಿ. ತೇನೇವ ¶ ನೀಯಾಮೇನ ಯಾವ ಚೇತಿಯಸ್ಸ ನಿಟ್ಠಙ್ಗಮಾ ತಾವ ದೇವನಾಗಸುಪಣ್ಣಾದಯೋ ನಿರನ್ತರಂ ಠತ್ವಾ ಇಟ್ಠಕಾನಿ ಆಹರಿತ್ವಾ ಚೇತಿಯಕರಣಟ್ಠಾನೇವ ಚತುಸು ದಿಸಾಸು ರಾಸಿಂ ಅಕಂಸು.

ತತೋ ರಾಜಾ ಸಬ್ಬೇ ಇಟ್ಠಕವಡ್ಢಕೀ ರಾಸಿಂ ಕಾರಾಪೇತ್ವಾ ತೇಸಂ ವಡ್ಢಕೀನಂ ಅನ್ತರೇ ಜಯಸೇನಂ ನಾಮ ಇಟ್ಠಕವಡ್ಢಕಿಂ ಪರಿಗಣ್ಹಿತ್ವಾ ತಸ್ಸ ಪನ ಸತಸಹಸ್ಸಗ್ಘನಕಾನಿ ದ್ವೇ ಸಾಟಕಾನಿ ಕಹಾಪಣಸತಸಹಸ್ಸಾನಿ ಚ ಸುವಣ್ಣಕುಣ್ಡಲಾದಯೋ ಆಭರಣಾನಿ ಚ ದಾಪೇಸಿ. ತಸ್ಸ ಪರಿವಾರಾನಂ ವಡ್ಢಕೀನಂ ಅಹತವತ್ಥಾದೀನಿ ಸಬ್ಬುಪಕರಣಾನಿ ದಾಪೇಸಿ. ಅನೇಕವಿಧಂ ಮಹನ್ತಂ ಸಮ್ಮಾನಂ ಕಾರೇತ್ವಾ ಥೇರೇನ ಸದ್ಧಿಂ ಮನ್ತೇನ್ತೋ; ಅಯ್ಯ ಅಜ್ಜ ವಿಸಾಖಪುಣ್ಣಮೀ ಉಪೋಸಥದಿವಸೋ, ತಸ್ಮಾ ನಲಾಟಧಾತುಯಾ ಮಙ್ಗಲಂ ಕರಿತ್ವಾ ಚೇತಿಯಟ್ಠಾನೇ ಇಟ್ಠಕಂ ಪತಿಟ್ಠಾಪೇತುಂ ವಟ್ಟತೀ’ತಿ ಆಹ. ತಂ ಸುತ್ವಾ ಥೇರೋ; ಭದ್ದಕಂ ಮಹಾರಾಜ, ಬುದ್ಧಸ್ಸ ಭಗವತೋ ಜಾತದಿವಸೋ’ತಿ ವತ್ವಾ ಚೇತಿಯಕಮ್ಮಕರಣತ್ಥಾಯ ಪಞ್ಚ ಜನೇ ಗಣ್ಹಿ. ತೇಸು ಏಕೋ ವರದೇವೋ ನಾಮ, ಏಕೋ ಸಙ್ಖೋ ನಾಮ, ಏಕೋ ವಿಜ್ಜೋ ನಾಮ, ಏಕೋ ಪುಸ್ಸದೇವೋ ನಾಮ, ಏಕೋ ಮಹಾದೇವೋ ನಾಮ. ಇಮೇಸಂ ವಡ್ಢಕೀನಂ ಮಙ್ಗಲಂ ಕಾರಾಪೇತ್ವಾ ಛಣವೇಸಂ ಗಹೇತ್ವಾ ಸಬ್ಬಾಲಙ್ಕಾರೇನ ಅಲಙ್ಕಾರಾಪೇತ್ವಾ ರಾಜಾ ಸಯಮ್ಪಿ ಸಬ್ಬಾಲಙ್ಕಾರೇನ ಪತಿಮಣ್ಡಿತೋ ಮಙ್ಗಲವಿಧಾನಂ ಕಾರಾಪೇತ್ವಾ ಭಿಕ್ಖುಸಙ್ಘಂ ಗನ್ಧಮಾಲಾದೀಹಿ ಪೂಜೇತ್ವಾ ತಿಕ್ಖತ್ತುಂ ಪದಕ್ಖಿಣಂ ಕತ್ವಾ ಚತುಸು ಠಾನೇಸು ಪಞ್ಚಪತಿಟ್ಠಿತೇನ ವನ್ದಿತ್ವಾ ವಿಜಮ್ಹೇತ್ವಾ ಸುವಣ್ಣಘಟ್ಠಾನಂ ಪವಿಸಿತ್ವಾ ಸುವಣ್ಣಖಚಿತಂ ಮಣಿಮುತ್ತಾರತನಮಯಂ ಪರಿಬ್ಭಮನದಣ್ಡಂ ಜೀವಮಾನಕಮಾತಾಪಿತರೇನ ಉಭತೋಸುಮಣ್ಡಿತಪಸಾಧಿತೇನ ಅಭಿಮಙ್ಗಲಸಮ್ಮತೇನ ಅಮಚ್ಚಪುತ್ತೇನ ಗಾಹಾಪೇತ್ವಾ ಮಹನ್ತಂ ಚೇತಿಯಂ ತತ್ಥ ಕರೋನ್ತೋ ಸಯಮ್ಪಿ ಪರಿಬ್ಭಮನದಣ್ಡಂ ಗಹೇತ್ವಾ ಪರಿಕಮ್ಮಕತಭುಮಿಯಂ ಪರಿಬ್ಭಮಿತ್ವಾ ಏಕಮನ್ತಂ ಅಟ್ಠಾಸಿ. ತತೋ ಮಹಾವಡ್ಢಕೀ ಸುನಕ್ಖತ್ತೇನ ಸುಮುಹುತ್ತೇನ ಚೇತಿಯಟ್ಠಾನೇ ಇಟ್ಠಕಂ ಪತಿಟ್ಠಾಪೇಸಿ.

ತಸ್ಮಿಂ ¶ ಖಣೇ ಚತುನಹುತಾಧಿಕ ದ್ವಿಯೋಜನ ಸತಸಹಸ್ಸಬಹುಲಾ ಅಯಂ ಮಹಾಪಥವೀ ಸಾಧುಕಾರಂ ಪವತ್ತೇನ್ತೀ ವಿಯ ಮಹಾನಾದಂ ಪವತ್ತೇಸಿ. ದೇವಮನುಸ್ಸಾ ದಿವಸೇ ದಿವಸೇ ಪಹೋನಕ-ಮತ್ತಿಕಂ ನಿಸದೇನ ಪಿಂಸಿತ್ವಾ ಸುಪ್ಪೇಹಿ ಪಪ್ಫೋಠೇತ್ವಾ ದೇನ್ತಿ. ಏವಂ ಕರೋನ್ತೋ ಕತಿಪಯೇನೇವ ದಿವಸೇನ ಪುಪ್ಫಾಧಾನತ್ತಯಂ ಚಿನಿತ್ವಾ ಮಹಾಭಿಕ್ಖು ಸಙ್ಘಸ್ಸ ನಿವೇದೇಸಿ. ತಂ ಸುತ್ವಾ ಸಙ್ಘೋ ಚುನ್ದುತ್ತರನಾಮಕೇ ದ್ವೇ ಸಾಮಣೇರೇ ಆಣಾಪೇಸಿ? ತುಮ್ಹೇ ಹಿಮವನ್ತಂ ಗನ್ತ್ವಾ ಮೇದವಣ್ಣಪಾಸಾಣೇ ಆಹರಥಾ’ತಿ. ತೇ ಪನ ಸಾಮಣೇರಾ ಜಾತಿಯಾ ಸೋಳಸವಸ್ಸಿಕಾ ಛಳಭಿಞ್ಞಾಪ್ಪಭೇದೇನ ಪಟಿಸಮ್ಭಿದಪ್ಪತ್ತಾ. ಮಹಾಖೀಣಾಸವಭಿಕ್ಖುಸಙ್ಘಸ್ಸ ಸನ್ತಿಕಾ ಭಿಕ್ಖುಸಙ್ಘಸ್ಸ ವಚನಂ ಸಮ್ಪಟಿಚ್ಛಿತ್ವಾ ಆಕಾಸಂ ಅಬ್ಭುಗ್ಗನ್ತ್ವಾ ಹಿಮವನ್ತತೋ ಅತ್ತನೋ ಇದ್ಧಿಬಲೇನ ಮೇದವಣ್ಣಪಾಸಾಣೇ ಆಹರಿಂಸು. ಏತೇಸು ಏಕಂ ಪಾಸಾಣಂ ಧಾತುಗಬ್ಭಸ್ಸ ಭುಮಿಯಂ ಪತ್ಥರಿತ್ವಾ ಚತುಸು ಪಸ್ಸೇಸು ಚತ್ತಾರೋ ಪಾಸಾಣೇ ಪತಿಟ್ಠಾಪೇತ್ವಾ ಅಪರಂ ಧಾತುಗಬ್ಭಂ ಪಿದಹಿತುಂ ಅದಸ್ಸನಂ ಕತ್ವಾ ಠಪಯಿಂಸು.

ತದಾ ರಾಜಾ ಧಾತುಗಬ್ಭೇ ಕಮ್ಮಂ ನಿಟ್ಠಪೇನ್ತೋ ನವ ಕೋಟಿಪ್ಪಮಾಣಂ ಸುವಣ್ಣಂ ಆಹರಾಪೇತ್ವಾ ಸುವಣ್ಣಕಾರಾನಂ ದತ್ವಾ ಧಾತುಗಬ್ಭಸ್ಸ ಇಟ್ಠಕಾನಿ ಕರೋಥಾ’ತಿ ಆಣಾಪೇಸಿ. ತೇ ಸುವಣ್ಣಕಾರಾ ದೀಘತೋ ರತನಪ್ಪಮಾಣಂ ಪುಥುಲತೋ ವಿದತ್ಥೀಪ್ಪಮಾಣಂ ಬಹಲತೋ ಚತುರಙ್ಗುಲಪ್ಪಮಾಣಂ ಇಟ್ಠಕಂ ಕತ್ವಾ ಧಾತುಗಬ್ಭಂ ಚಿನಿಂಸು. ತಂ ಪನ ಧಾತುಗಬ್ಭಂ ಉಚ್ಚತೋ ಸೋಳಸಹತ್ಥಂ ವಿತ್ಥಾರತೋಪಿ ಇತೋಚಿತೋ ದಸದಸರತನಂ ಕತ್ವಾ ಸುವಣ್ಣಿಟ್ಠಕೇಹೇವ ನಿಟ್ಠಪೇತ್ವಾ ಧಾತುಗಬ್ಭಸ್ಸ ಮಜ್ಝೇ ಸತ್ತರತನಮಯಂ ಸಿನೇರುಂ ಕಾರಾಪೇತ್ವಾ ಸಿನೇರುಸ್ಸ ಉಪರಿ ಜಾತಿಹಿಙ್ಗುಲಕೇನ ಪಣ್ಡುಕಮ್ಬಲಸಿಲಾಸನಂ ಸತ್ತರತನೇನ ಪಾರಿಚ್ಛತ್ತಕರುಕ್ಖಂ ರಜತಮಯಂ ಸೇತಚ್ಛತ್ತಂ ಬ್ರಹ್ಮುನಾ ಗಾಹಾಪೇತ್ವಾ ಸತ್ಥುನೋ ಪಟಿಮಾಯ ಉಪರಿ ಧಾರಿಯಮಾನಂ ಕಾರೇಸಿ. ಸಿನೇರುಪಾದಮೂಲೇ ಗನ್ಧಕಲಲಪೂರಿತ ನೀಲುಪ್ಪಲವಿಭುಸಿತಸುವಣ್ಣಮಯಅಟ್ಠುತ್ತರಸತಘಟಪನ್ತಿಯೋ ಠಪಾಪೇಸಿ. ತದನನ್ತರಂ ಗನ್ಧಕಲಲಪೂರಿತರತ್ನಪದುಮವಿಭುಸಿತರಜತಮಯಅಟ್ಠುತ್ತರ- ¶ ಸತಘಟಪನ್ತಿಯೋ ಠಪಾಪೇಸಿ. ತದನನ್ತರಂ ಗನ್ಧಕಲಲಪೂರಿತ ಸೇತುಪ್ಪಲಮಾಲಾವಿಭುಸಿತಮಣಿಮಯಅಟ್ಠುತ್ತರಸತಘಟಪತ್ತಿಯೋ ಠಪಾಪೇಸಿ. ತದನನ್ತರಂ ಗನ್ಧಕಲಲಪೂರಿತಸೇತುಪ್ಪಲವಿಭುಸಿತ-ಮಸಾರಗಲ್ಲಮಯ ಅಟ್ಠುತ್ತರಸತಘಟಪನ್ತಿಯೋ ಠಪಾಪೇಸಿ. ತದನನ್ತರಂ ಗನ್ಧಕಲಲಪೂರಿತಚಮ್ಪಕಪುಪ್ಫವಿಭುಸಿತಲೋಹಿತಙ್ಕಮಯಅಟ್ಠುತ್ತರಸತ ಘಟಪತ್ತಿಯೋ ಠಪಾಪೇಸಿ. ತದನನ್ತರಂ ಗನ್ಧಕಲಲಪೂರಿತಪಞ್ಚುಪ್ಪಲವಿಭುಸಿತಮತ್ತಿಕಾಮಯಅಟ್ಠುತ್ತರಸತಘಟಪನ್ತಿಯೋ ಠಪಾಪೇಸಿ. ತಾಸಂ ಘಟಪನ್ತೀನಂ ಅನ್ತರೇ ಗನ್ಧಕಲಲಪೂರಿತಸತ್ತರತನಮಯಸರಾವಕೇ ಠಪಾಪೇಸಿ. ಕಞ್ಚನಮಯ-ಸತ್ತರತನಮಯ-ವಿಚಿತ್ತಮಾಲಾಲತಾಪುಣ್ಣಘಟಸಿರಿವಚ್ಛನನ್ದಿಯಾವಟ್ಟಭದ್ದಪೀಠಾದಯೋ ಚ ಹತ್ಥಿಅಸ್ಸಸೀಹವ್ಯಗ್ಘೋಸಭಪನ್ತಿಆದಯೋ ಚ ಕಾರೇಸಿ. ದೇವೋರೋಹಣಂ ಯಮಕಪಾಟಿಹೀರಾದಯೋ ಧನಪಾಲ-ಅಙ್ಗುಲಿಮಾಲ-ಆಳವಕದಮನಾದಯೋ, ಸಾರಿಪುತ್ತ-ಮೋಗ್ಗಲ್ಲಾನ-ಮಹಾಕಸ್ಸಪತ್ಥೇರಾದಯೋ, ಅಸೀತಿಮಹಾಸಾವಕರೂಪಾದೀನಿ ಚ ಕಾರಾಪೇಸಿ. ಸಿನೇರುಸ್ಸ ಮಜ್ಝಿಮಭಾಗೇ ತಾರಾಗಣಪರಿವಾರಿತಂ ರಜತಮಯಂ ಚನ್ದಮಣ್ಡಲಞ್ಚ ಕಾರಾಪೇಸಿ. ರಂಸಿಜಾಲವಿಭುಸಿತಂ ಕನಕಮಯಂ ಸೂರಿಯಮಣ್ಡಲಞ್ಚ ಕಾರಾಪೇಸಿ.

ತತೋ ಸಿನೇರುಸ್ಸ ಮತ್ಥಕೇ ಪಾರಿಚ್ಛತ್ತಕಮುಲೇ ಪಣ್ಡುಕಮ್ಬಲಸಿಲಾಸನೇ ಅಮ್ಹಾಕಂ ಸತ್ಥುನೋ ಪಟಿಮಂ ಘನಕೋಟ್ಟಿಮ ರತ್ತಸುವಣ್ಣಮಯಂ ಕಾರಾಪೇತ್ವಾ ಮಾತುದೇವಪಾಮೋಕ್ಖ ದಸಸಹಸ್ಸ ಚಕ್ಕವಾಳದೇವತಾನಂ ಸತ್ತಪ್ಪಕರಣಂ ಅಭಿಧಮ್ಮಂ ದೇಸನಾಕಾರೇನ ನಿಸೀದಾಪೇಸಿ. ತಸ್ಸ ವೀಸತಿನಖಾ ಅಕ್ಖಿತಲಾನಂ ಸೇತಟ್ಠಾನಾನಿ ಜಾತಿಫಲಿಕಮಯಾನಿ. ಅಙ್ಗುಲಿಯೋ ಸುವಣ್ಣಮಯಾ ಹತ್ಥಪಾದತಲಾನಿ ಚ ದನ್ತಾವರಣಾನಿ ಚ ಅಕ್ಖೀನಂ ರತ್ತಟ್ಠಾನಾನಿ ಚ ಜಾತಿಪವಾಳಮಯಾನಿ, ಕೇಸಮಸ್ಸುಭಮುಕಟ್ಠಾನಾನಿ ಇನ್ದನೀಲಮಯಾನಿ, ಸಮಚತ್ತಾಲೀಸ ದನ್ತಾ ವಜಿರಮಯಾ ಅಹೇಸುಂ. ಉಣ್ಣಲೋಮಂ ಪನ ಸುವಣ್ಣ ಭಿತ್ತಿಯಂ ಠಪಿತರಜತಬುಬ್ಬುಳವಿಲಾಸಂ ರಜತಮಯಂ ಅಹೋಸಿ. ಭಗವತೋ ಅನವಲೋಕಿತ ಮುದ್ಧನಿ ಮತ್ಥಕೇ ಸತ್ತರತನಮಯಂ ವಿಚಿತ್ತಕಿಂಕಿಣಿಜಾಲಂ ಪರಿಕ್ಖಿಪಾಪೇಸಿ. ಮಣ್ಡಪಸ್ಸ ಅನ್ತೋ ನವಸತಸಹಸ್ಸಗ್ಘನಕಂ ಮುತ್ತಾಕಲಾಪಮೋಲಮ್ಬಕಂ ಮನೋರಮಂ ಚೇಲವಿತಾನಂ ಬನ್ಧಾಪೇತ್ವಾ ಮಣ್ಡಪಕೋಟಿಯಂ ಮುತ್ತಾಜಾಲಂ ತದನನ್ತರಂ ಸತ್ತ ರತನವಿಚಿತ್ತಂ ಕಿಂಕಿಣಿಜಾಲಂ ಪರಿಕ್ಖಿಪಾಪೇಸಿ.

ಅಮ್ಹಾಕಂ ¶ ಭಗವತೋ ಮಾತುದೇವಪುತ್ತಮ್ಪಿ ಸತ್ತರತನೇನ ಕಾರಾಪೇಸಿ. ತಥಾ ಏರಾವಣವಿಸ್ಸಕಮ್ಮದೇವಪುತ್ತಾದಯೋ ಚ ಸಪರಿವಾರೋ ಸಕ್ಕೋ ದೇವರಾಜಾ ಚ ಚತ್ತಾರೋ ಮಹಾರಾಜಾನೋ ಚ ಪಞ್ಚಸಿಖದೇವಪುತ್ತಾದಯೋ ಗನ್ಧಬ್ಬದೇವಪುತ್ತಾ ಚ ಸಹಮ್ಪತಿ ಮಹಾ ಬ್ರಹ್ಮಾದಯೋ ಮಹಾಬ್ರಹ್ಮನೋ ಚ ಕಾರಾಪೇಸಿ. ವೇಸ್ಸನ್ತರಜಾತಕಂ ಕರೋನ್ತೋ ಸಂಜಯಮಹಾರಾಜಾ ಫುಸತೀದೇವೀ ಆದಯೋ ಚ ಮದ್ದೀದೇವೀ ದ್ವೇ ದಾರಕೇ ಚ ಜೂಜಕಬ್ರಾಹ್ಮಣಾದಯೋ ಚ ಕಾರಾಪೇಸಿ. ವಿಧುರ-ಸೋಣದತ್ತ ಮಹಾನಾರದಕಸ್ಸಪ-ಸುತಸೋಮ-ಸುಪ್ಪಾರಕ-ಸಙ್ಖಪಾಲಜಾತಕಾದೀನಿ ಚ, ಧಮ್ಮಚಕ್ಕಪ್ಪವತ್ತನ-ಮಹಾಸಮಯಸುತ್ತಾದಿ ದೇಸನಾಕಾರೋ ಚ, ಸುದ್ಧೋದನಮಹಾರಾಜಾ ಮಹಾಮಾಯಾ ಮಹಾಪಜಾಪತೀ ಗೋತಮೀ ಭದ್ದಕಚ್ಚಾನಾ ರಾಹುಲಮಾತಾದೇವೀ ಚ ರಾಹುಲಕುಮಾರೋ ಚ ಛನ್ನಞ್ಚ ಕನ್ಥಕಞ್ಚ ಮಹಾಭಿನಿಕ್ಖಮನಂ ಮಹಾಬೋಧಿಮಣ್ಡಲಂ ಅಸೀತಿಮಹಾಸಾವಕಾ ಕೋಸಲಮಹಾರಾಜಾ ಅನಾಥಪಿಣ್ಡಿಕಮಹಾಸೇಟ್ಠಿ ಚೂಳಅನಾಥಪಿಣ್ಡಿಕ-ವಿಸಾಖಾ ಸುಪ್ಪವಾಸಾ ಚ ಪಚ್ಛಾ ಚೂಳಪಿಣ್ಡಪಾತಿಯ ತಿಸ್ಸತ್ಥೇರಞ್ಚ ಅತ್ತಾನಞ್ಚ ಕಾರಾಪೇತ್ವಾ ತೇ ಸಬ್ಬೇ ಧಾತು ಗಬ್ಭೇ ಪತಿಟ್ಠಾಪೇಸಿ.

ಧಾತುಗಬ್ಭವಣ್ಣಣಾ ಸಮತ್ತಾ.

ಏವಂ ಧಾತುಗಬ್ಭೇ ಪೂಜಾವಿಧಾನಂ ಸುವಿಭತ್ತಂ ಸುಮನೋರಮಂ ಕಾರಾಪೇತ್ವಾ ಥೇರೇನ ಸದ್ಧಿಂ ಕಥೇಸಿ? ಭನ್ತೇ ಧಾತುಗಬ್ಭೇ ಮಯಾ ಕತ್ತಬ್ಬಂ ನಿಟ್ಠಾಪಿತಂ. ಸ್ವೇ ರೋಹಿಣೀನಕ್ಖತ್ತೇನ ಧಾತು ನಿಧಾನಂ ಕರಿಸ್ಸಾಮೀ. ಅಯ್ಯಾ ಪನ ಕೇಸಧಾತುಯೋ ಗಹೇತ್ವಾ ಆಗಚ್ಛನ್ತುತಿ. ತಿಸ್ಸತ್ಥೇರಸ್ಸ ಭಾರಮಕಾಸಿ. ಥೇರೋ ತಂ ಸುತ್ವಾ ಭದ್ದಕಂ ಮಹಾರಾಜ, ಕೇಸಧಾತುಯೋ ವಿಚಿನಿತ್ವಾ ಆಹರಾಪೇಸ್ಸಾಮಾತಿ ವತ್ವಾ ಅತ್ತನೋ ಸದ್ಧಿವಿಹಾರಿಕಂ ಸಿವತ್ಥೇರಂ ಪಕ್ಕೋಸಾಪೇತ್ವಾ ಆವುಸೋ ಭೂಮಿನ್ಧರನಾಗವಿಮಾನೇ ಜಯಸೇನೋ ನಾಮ ನಾಗರಾಜಾ ವಸತಿ. ತಸ್ಸ ಸನ್ತಿಕೇ (ಕೇಸಧಾತುಯೋ ಸನ್ತಿ.) ತಪುಸ್ಸ ಭಲ್ಲಿಕಾನಂ ದ್ವೇಭಾತಿಕವಾಣಿಜಾನಂ ಪರಿಚರಣಕಾಲೇ ತೇಸಂ ಪಮಾದಂ ಞತ್ವಾ ನಾಗರಾಜಾ ದ್ವೇ ಕೇಸಧಾತುಯೋ ಗಹೇತ್ವಾ ನಾಗಭವನೇ ಠಪೇಸಿ. ತ್ವಂ ತಾ ಧಾತುಯೋ ಆಹರಿತ್ವಾ ರಞ್ಞೋ ದೇಹೀತಿ ಆಣಾಪೇಸಿ. ಥೇರೋ ತಂ ವಚನಂ ಸಮ್ಪಟಿಚ್ಛಿತ್ವಾ ಗತೋ.

ತತೋ ರಾಜಾ ಅತ್ತನೋ ಭಗಿನಿಯಾ ಸೋಮದೇವಿಯಾ ಚ ಭಾಗಿನೇಯ್ಯಸ್ಸ ಗಿರಿಅಭಯರಞ್ಞೋ ಚ ಸಾಸನಂ ಪೇಸೇಸಿ? ಸ್ವೇ ಧಾತುನಿಧಾನಂಕರಿಸ್ಸಾಮ. ತುಮ್ಹೇ ಸೇನಙ್ಗಂ ಗಹೇತ್ವಾ ಆಗಚ್ಛಥಾ’ತಿ. ಲೋಣನಗರೇ ¶ ಮಹಾನಾಗರಞ್ಞೋ ಚ ಸೇರು ನಗರೇ ಸಿವರಞ್ಞೋ ಚ ತಥೇವ ಸಾಸನಂ ಪೇಸೇತ್ವಾ ಸಯಮ್ಪಿ ಅತ್ತನೋ ವಿಜಿತೇ ಯೇನ ಮಯ್ಹಂ ಹತ್ಥತೋ ಅನ್ತಮಸೋ ಏಕಕರೀಸಮತ್ತಮ್ಪಿ ಲದ್ಧಂ ತದುಪಾದಾಯ ಸಬ್ಬೇಪಿ ತುಮ್ಹೇ ಸದ್ಧಿಂ ಪರಿವಾರೇನ ಆಗಚ್ಛಥಾ’ತಿ ಭೇರಿಂ ಚರಾಪೇಸಿ. ತಂ ಸುತ್ವಾ ಸೋಮನಸ್ಸಪ್ಪತ್ತಾ ಮಹಾಜನಾ ಅತ್ತನೋ ಅತ್ತನೋ ವಿಭವಾನುರೂಪೇನ ಅಲಙ್ಕತಪಟಿಯತ್ತಾ ಅಗಮಿಂಸು. ರಾಜಾ ಪಭಾತಾಯ ರತ್ತಿಯಾ ಸಬ್ಬೇ ಸೇನಿಯೋ ಗನ್ಧಮಾಲಾಧೂಪಧಜಾದಯೋ ಗಹೇತ್ವಾ ಧಾತುನಿಧಾನಂ ಆಗಚ್ಛನ್ತುತಿ ವತ್ವಾ ಭಿಕ್ಖುಸಙ್ಘಸ್ಸ ಮಹಾದಾನಂ ದತ್ವಾ ತಿವೀವರತ್ಥಾಯ ಮಹಗ್ಘವತ್ಥಾದೀನಿ ದತ್ವಾ ಸಯಮ್ಪಿ ಸಬ್ಬಾಲಙ್ಕಾರಪತಿಮಣ್ಡಿತೋ ನಾನಗ್ಗರಸಭೋಜನಂ ಭುಞ್ಜಿತ್ವಾ ಉಪೋಸಥಂ ಅಧಿಟ್ಠಾಯ ಮಣಿಕುಣ್ಡಲಮೇಖಲಾನೂಪುರ ವಲಯಾದಿವಿಚಿತ್ತಸಬ್ಬಾಲಙ್ಕಾರವಿಭೂಸಿತಾಹಿ ಕೋಸೇಯ್ಯಾದಿಸುಖುಮನಾನಾವಿಧವಿಚಿತ್ತವತ್ಥನಿವತ್ಥಾಹಿ ನಚ್ಚಗೀತವಾದಿತತುರಿಯಭಣ್ಡಗಹಿತ ಹತ್ಥಾಹಿ ದೇವಚ್ಛರಾಪಟಿಭಾಗನಾಟಕಿತ್ಥೀಹಿ ಪರಿವಾರಿತೋ ವುತ್ತಪ್ಪಕಾರೇಹಿ ಸದ್ಧಿಂ ಚೇತಿಯಟ್ಠಾನಂ ಗನ್ತ್ವಾ ಮಹಾಭಿಕ್ಖುಸಙ್ಘಂ ವನ್ದಿತ್ವಾ ಅಟ್ಠಾಸಿ.

ತತೋ ಸೋಮನಗರೇ ಗಿರಿಅಭಯರಾಜಾ’ಪಿ ಸಬ್ಬೇ ನಾಗರಾ ಅತ್ತನೋ ಅತ್ತನೋ ವಿಭವಾನುರೂಪೇನ ಧಾತುನಿಧಾನಟ್ಠಾನಂ ಆಗಚ್ಛನ್ತುತಿ ನಗರೇ ಭೇರಿಂ ಚರಾಪೇತ್ವಾ ಸಯಂ ಸಬ್ಬಾಲಙ್ಕಾರಪತಿಮಣ್ಡಿತೋ ಸುಸಜ್ಜಿತಅಮಚ್ಚಗಣಪರಿವಾರಿತೋ ನಿಕ್ಖಮಿ. ಸೋಮ ದೇವೀಪಿ ಸೀಸಂ ನಹಾತ್ವಾ ಅಹತವತ್ಥನಿವತ್ಥಾ ಸಬ್ಬಾಲಙ್ಕಾರಪತಿಮಣ್ಡಿತಾ ದೇವಚ್ಛರಾ ವಿಯ ಅತ್ತನೋ ಪರಿವಾರಾ ಪಞ್ಚಸತಕುಮಾರಿಯೋ ನೀಲವತ್ಥೇಹಿ ಪರಿದಹಾಪೇತ್ವಾ ತಥೇವ ಅಲಙ್ಕಾರೇತ್ವಾ ಪುಣ್ಣಘಟೇ ಗಾಹಾಪೇತ್ವಾ ತಾಸಂ ಅನನ್ತರಾ ಪಞ್ಚಸತಕುಮಾರಿಯೋ ಪೀತವತ್ಥೇಹಿ ಪರಿದಹಾಪೇತ್ವಾ ತಥೇವ ಅಲಙ್ಕಾರೇತ್ವಾ ಪೂಜಾಭಣ್ಡಾನಿ ಗಾಹಾಪೇತ್ವಾ, ತಾಸಂ ಅನನ್ತರಾ ಪಞ್ಚಸತ ಕುಮಾರಿಯೋ ರತ್ತವತ್ಥೇಹಿ ಪರಿದಹಾಪೇತ್ವಾ ತಥೇವ. ಅಲಙ್ಕಾರೇತ್ವಾ ವಿಚಿತ್ರಪುಪ್ಫಪೂರಿತಮಞ್ಜುಸಾಯೋ ಗಾಹಾಪೇತ್ವಾ ತಾಸಂ ಅನನ್ತರಾ ಪಞ್ಚಸತಕುಮಾರಿಯೋ ಸೇತವತ್ಥೇಹಿ ಪರಿದಹಾಪೇತ್ವಾ ತಥೇವ ಅಲಙ್ಕಾರೇತ್ವಾ ಧೂಮ ಕಟಚ್ಛುಕೇ ಗಾಹಾಪೇತ್ವಾ ಏವಂ ಪೂಜಾವಿಧಾನಂ ಸಂವಿದಹಿತ್ವಾ ಪರಿವಾರೇನ ¶ ಚೇತಿಙ್ಗಣಂ ಗನ್ತ್ವಾ ಮಹಾಭಿಕ್ಖುಸಙ್ಘಂ ಪಞ್ಚಪತಿಟ್ಠಿತೇನ ವನ್ದಿತ್ವಾ ಗನ್ಧಮಾಲಾದೀಹಿ ಪೂಜಂ ಕತ್ವಾ ಅತ್ತನೋ ಸಾಮಿನಾ ಗಿರಿಅಭಯರಾಜೇನ ಸದ್ಧಿಂ ಏಕಪಸ್ಸೇ ಠೀತಾ.

ಲೋಣನಗರೇ ಮಹಾನಾಗರಾಜಾ’ಪಿ ಸಬ್ಬಾಲಙ್ಕಾರೇಹಿ ಪತಿಮಣ್ಡಿತೋ ಸಬ್ಬಾಭರಣೇಹಿ ಸುಸಜ್ಜೀತಅಮಚ್ಚಮಣ್ಡಲಪರಿವುತೋ ನಚ್ಚಗೀತತುರೀಯಾನಿ ಪಗ್ಗಣ್ಹಾಪಯಮಾನೋ ಗನ್ಧಮಾಲಾ ಧೂಮಕಟಚ್ಛು ಗಾಹಾಪೇತ್ವಾ ಚೇತಿಯಟ್ಠಾನಂ ಆಗನ್ತ್ವಾ ಭಿಕ್ಖುಸಙ್ಘಂ ವನ್ದಿತ್ವಾ ಏಕಮನ್ತಂ ಅಟ್ಠಾಸಿ.

ಸೇರುನಗರೇ ಸಿವರಾಜಾ’ಪಿ ಅತ್ತಾನಂ ಸಬ್ಬಾಲಙ್ಕಾರೇಹಿ ಅಲಙ್ಕರಿತ್ವಾ ಮಹನ್ತೇನ ಪರಿವಾರೇನ ಪೂಜಾವಿಧಾನಂ ಗಾಹಾಪೇತ್ವಾ ಚೇತಿಯಟ್ಠಾನಂ ಆಗನ್ತ್ವಾ ಮಹಾಭಿಕ್ಖುಸಙ್ಘಂ ವನ್ದಿತ್ವಾ ಏಕಮನ್ತಂ ಅಟ್ಠಾಸಿ. ರಾಜಪರಿಸಾ ಅತ್ತನೋ ವಿಭವಾನುರೂಪೇನ ವತ್ಥಾಲಙ್ಕಾರೇಹಿ ಚನ್ದನ ಮಾಲಾದೀಹಿ ಚ ಸೋಭಮಾನಾ ನಲಾಟೇ ಮುತ್ತಾಕಲಾಪಮೋಲಮ್ಬಕ ವಿಚಿತ್ತಸುವಣ್ಣಪಟ್ಟಾನಿ ಬನ್ಧಿತ್ವಾ ಹತ್ಥಾಭರಣಾದಿ ಅನೇಕಾಭರಣೇಹಿ ದಿಬ್ಬಪರಿಸಾ ವಿಯ ಸುಮಣ್ಡಿತಪಸಾಧಿತಾ ವೇಸಾನುರೂಪಾನಿ ವಿವಿಧಾವುಧಾನಿ ಗಹೇತ್ವಾ ಏಕಪಸ್ಸೇ ಠೀತಾ. ಸೀಹವ್ಯಗ್ಘದೀಪಿಚಮ್ಮೇಹಿ ಪಸಾಧಿತಸುವಣ್ಣಾಲಙ್ಕಾರಸುವಣ್ಣಧಜಹೇಮಜಾಲಸಞ್ಛನ್ನೇ ರಥ ವರೇ ಚ ಸಬ್ಬಾಲಙ್ಕಾರವಿಭುಸಿತಾ ರಥಿಕಾ ಆರುಯ್ಹ ಏಕಪಸ್ಸೇ ಠೀತಾ. ಬ್ರಾಹ್ಮಣಪುತ್ತಾದಯೋ ಮಣ್ಡಿತಚಮ್ಮೇ ಪಾರುಪಿತ್ವಾ ಉಪಸೋಭಯಮಾನಾ ಏಕಪಸ್ಸೇ ಠೀತಾ. ಬಹು ಅಮಚ್ಚಾ ಅತ್ತನೋ ಅತ್ತನೋ ವೇಸಾನುರೂಪೇನ ಮಹಗ್ಘವತ್ಥಾಭರಣವಿಭೂಸಿತಾ ಸಪರಿವಾರಾ ಏಕಪಸ್ಸೇ ಠೀತಾ. ಗನ್ಧೋದಕ ಪೂರಿತ ದಕ್ಖಿಣಾವತ್ತ ಸಙ್ಖಂ ಗಹೇತ್ವಾ ಉಪವೀತಸುತ್ತಂ ಏಕಂಸಂ ಕರಿತ್ವಾ ಬ್ರಾಹ್ಮಣವೇಠನಂ ವೇಠೇತ್ವಾ ಪುರೋಹಿತಬ್ರಾಹ್ಮಣಾ ಮಹನ್ತೇನ ಪರಿವಾರೇನ ಪೂಜಾವಿಧಾನಂ ಗಾಹಾಪೇತ್ವಾ ಚೇತಿಯಟ್ಠಾನಂ ಆಗನ್ತ್ವಾ ಮಹಾಭಿಕ್ಖುಸಙ್ಘಂ ವನ್ದಿತ್ವಾ ಜಯಘೋಸಂ ಸಾವೇನ್ತಾ ಏವಮಾಹಂಸು?

ಖೇಮಂ ಸುಭಿಕ್ಖಂ ಭವತು ನಿಚ್ಚಂ ಜನಪದಂ ಸಿವಂ;

ಸಸ್ಸಾನಿ ಸಮುಪ್ಪಜ್ಜನ್ತು ರಞ್ಞೋ ಏವಂ ಜಯಾ ಸಿಯುಂ.

ಅವಸೇಸಾ ಮಹಾಜನಾ ಏವಮಾಹಂಸು? ಸಮುದ್ದಪರಿಯನ್ತಂ ¶ ಹಿ ಮಹಿಂ ಸಾಗರಕುಣ್ಡಲಂ ವಸುನ್ಧರಂ ಆವಸತು ಅಮಚ್ಚಪರಿವಾರಿತೋ. ಏವಂ ವತ್ವಾ? ಅಮ್ಹಾಕಂ ಅಯ್ಯೋ ಕಾಕವಣ್ಣತಿಸ್ಸೋ ಮಹಾ ರಾಜಾ ಸದೇವಕೇ ಲೋಕೇ ಏಕಪುಗ್ಗಲಸ್ಸ ಲೋಕನಾಥಸ್ಸನಲಾಟಧಾತುಂ ಪತಿಟ್ಠಾಪೇತೀ’ತಿ ಅತ್ತನೋ ಅತ್ತನೋ ವಿಭವಾನುರೂಪೇನ ಸುಮಣ್ಡಿತಪಸಾಧಿತಾ. ಖುಜ್ಜವಾಮನಕಾದಯೋ’ಪಿ ಸಬ್ಬೇ ಜನಾ ಪೂಜಾಭಣ್ಡಾನಿ ಗಹೇತ್ವಾ ಸಾಧುಕಾರಂ ದದಮಾನಾ ಅಟ್ಠಂಸು. ಇಮಸ್ಮಿಂ ಚೇತಿಯಟ್ಠಾನೇ ರಾಸೀಭೂತಾ ಪರಿಸಾ ಏವಂ ವೇದಿತಬ್ಬಾ? ಖತ್ತಿಯಾ ಬ್ರಾಹ್ಮಣಾ ವೇಸ್ಸಾ ನೇಗಮಾ ಚ ಸಮಾಗತಾ ಪುಪ್ಫಾದಿಗಹಿತಾ ಸಬ್ಬೇ ಅಲಙ್ಕಾರವಿಭೂಸಿತಾ.

ಗಣನಾ ವೀತಿವತ್ತಾ ತೇ ಅನೇಕೇ ಚ ಮಹಾಜನಾ;

ಸಮುದ್ದೋ ಪತ್ಥರನ್ತೋವ ಖತ್ತಿಯಾ ಸಮುಪಾಗತಾ.

ಅಲಙ್ಕತೋ ಮಹಾರಾಜಾ ಸರಾಜಪರಿವಾರಿತೋ;

ದೇವರಾಜಾ ಯಥಾ ಸಕ್ಕೋ ಅಟ್ಠಾಸಿ ಚೇತಿಯಙ್ಗಣೇ.

ಸಾಧುವಾದೇನ ಸತ್ತಾನಂ ಪಞ್ಚಙ್ಗತುರಿಯೇಹಿ ಚ;

ಹತ್ಥಸ್ಸರಥಸದ್ದೇನ ಸಮಾಕಿಣ್ಣಂ ಮಹೀತಲಂ.

ತತೋ ಚೂಳಪಿಣ್ಡಪಾತಿಯತಿಸ್ಸತ್ಥೇರೋ ಅತ್ತನೋ ಸದ್ಧಿವಿಹಾರೀಕೇ ಪಞ್ಚಸತ ಖೀಣಾಸವೇ ಪರಿವಾರೇತ್ವಾ ಚೇತಿಯಟ್ಠಾನಮೇವ ಆಗತೋ. ಮಹಾಸಾಗಲತ್ಥೇರೋ’ಪಿ ಪಞ್ಚಸತ ಖೀಣಾಸವೇ ಪರಿವಾರೇತ್ವಾ ಚೇತಿಯಟ್ಠಾನಮೇವ ಆಗತೋ. ಮಹಿನ್ದತ್ಥೇರೋ’ಪಿ ಅತ್ತನೋ ಸಾವಕೇ ಸಟ್ಠಿಮತ್ತೇ ಖಿಣಾಸವೇ ಗಹೇತ್ವಾ ಚೇತಿಯಟ್ಠಾನಮೇವ ಆಗತೋ. ಇತಿ ಇಮಿನಾ ನಿಯಾಮೇನೇವ ಏಕೋ ದ್ವೇ ತಯೋ ಚತ್ತಾರೋ ಪಞ್ಚ ಖೀಣಾಸವಾ ಆಗಚ್ಛನ್ತಾ ಸತ್ತ ಸಹಸ್ಸಮತ್ತಾ ಅಹೇಸುಂ. ತತೋ ಚೂಳಪಿಣ್ಡಪಾತಿಯತಿಸ್ಸತ್ಥೇರೋ ಏತ್ತಕೇ ಭಿಕ್ಖೂ ಪರಿವಾರೇತ್ವಾ ಚೇತಿಯಙ್ಗಣೇ ನಿಸೀದೀ. ತತೋ ರಾಜಾ ಆಗನ್ತ್ವಾ ಪಞ್ಚಪತಿಟ್ಠಿತೇನ ವನ್ದಿತ್ವಾ ಥೇರೇನ ಸದ್ಧಿಂ ಕಥೇಸಿ? ¶ ಕೇಸಧಾತು ಕುತೋ ಲಭಿಸ್ಸಾಮ ಅಯ್ಯಾ’ತಿ. ತಸ್ಮಿಂ ಖಣೇ ತಿಸ್ಸತ್ಥೇರೋ ಅತ್ತನೋ ಸದ್ಧಿವಿಹಾರಿಕಂ ಸಿವತ್ಥೇರಂ ಓಲೋಕೇಸಿ. ಸೋ ಓಲೋಕಿತಕ್ಖಣೇಯೇವ ನಿಸಿನ್ನಟ್ಠಾನತೋ ಉಟ್ಠಾಯ ಚೀವರಂ ಪಾರುಪಿತ್ವಾ ಮಹಾಭಿಕ್ಖುಸಙ್ಘಂ ವನ್ದಿತ್ವಾ ಛಳಭಿಞ್ಞೋ ಮಹಾಖೀಣಾಸವೋ ಚತುತ್ಥಜ್ಝಾನಂ ಸಮಾಪಜ್ಜಿತ್ವಾ ತತೋ ವುಟ್ಠಾಯ ಪಥವಿಯಂ ನಿಮುಜ್ಜಿತ್ವಾ ಭುಮಿನ್ಧರನಾಗವಿಮಾನೇ ಪಾತುರಹೋಸಿ.

(ಸುತ್ವಾಸ್ಸ ಸಿವಥೇರೋ ಚ ವಸಿಪ್ಪತ್ತೋ ವಿಸಾರದೋ;

ಪಾಕಟೋ ಅಭವಿ ನಾಗನಗರಂ ಪುರತೋ ಖಣೇ.)

ತಸ್ಮಿಂ ಖೋ ಪನ ಸಮಯೇ ಜಯಸೇನೋ ನಾಗರಾಜಾ ಅತ್ತನೋ ಭಾಗಿನೇಯ್ಯಂ ದ್ವಿಕೋಟಿಮತ್ತೇ ನಾಗೇ ಪರಿವಾರೇತ್ವಾ ಮಹಾ ಯಸಂ ಅನುಭವಮಾನಂ ನಿಸಿನ್ನಂ ಇಙ್ಗಿತಸಞ್ಞಂ ದತ್ವಾ ಥೇರಂ ದುರತೋವ ಆಗಚ್ಛನ್ತಂ ದಿಸ್ವಾ ಚಿನ್ತೇಸಿ? ಇಮಸ್ಮಿಂ ನಾಗಭವನೇ ಸಮಣೇಹಿ ಕತ್ತಬ್ಬಕಿಚ್ಚಂ ನತ್ಥೀ. ನಿಸ್ಸಂಸಯಂ ಕೇಸಧಾತುಂ ನಿಸ್ಸಾಯ ಆಗತೋ ಭವಿಸ್ಸತೀತಿ ಉಟ್ಠಾಯ ಧಾತುಘರಂ ಪವಿಸಿತ್ವಾ ಧಾತುಕರಣ್ಡಕಂ ಗಿಲಿತ್ವಾ ಕಿಞ್ಚಿ ಅಜಾನನ್ತೋ ವಿಯ ನಿಸೀದಿ. ತಸ್ಮಿಂ ಕಾಲೇ ಥೇರೋ ತಸ್ಸ ಸನ್ತಿಕಂ ಅಗಮಾಸಿ. ನಾಗರಾಜಾ ಪಚ್ಚುಗ್ಗನ್ತ್ವಾ ಪಟಿಸನ್ಥಾರಂ ಕರೋನ್ತೋ ಥೇರೇನ ಸದ್ಧಿಂ ಕಥೇಸಿ. ಕಸ್ಮಾ ಅಯ್ಯೋ ಆಗತೋ’ತಿ ವುತ್ತೇ ಏವಮಾಹ? ತಿಲೋಕನಾಥಸ್ಸ ಅಮ್ಹಾಕಂ ಸಮ್ಬುದ್ಧಸ್ಸ ಕೇಸಧಾತೂನಂ ಅತ್ಥಾಯ ಆಗತೋ, ತುಯ್ಹಂ ಸನ್ತಿಕೇ ಠಪಿತಕೇಸಧಾತುಯೋ ಪಪಞ್ಚಂ ಅಕತ್ವಾ ಮಯ್ಹಂ ದೇಹಿ, ತೇಯೇವ ಸನ್ಧಾಯ ಉಪಜ್ಝಾಯೇನ ಪೇಸಿತೋಮ್ಹೀ’ತಿ ವುತ್ತೇ ಅಮ್ಹಾಕಂ ಸಮ್ಮಾ ಸಮ್ಬುದ್ಧಸ್ಸ ಕೇಸಧಾತುಯೋ ಮಮ ಸನ್ತಿಕೇ ನತ್ಥೀ’ತಿ ಆಹ. ಥೇರೋ ಧಾತುಕರಣ್ಡಕಂ ಗಿಲಿತಭಾವಂ ಞತ್ವಾ ಗಣ್ಹಾಮಿ ಮಹಾರಾಜಾ ಕೇಸಧಾತುಯೋ’ತಿ ವುತ್ತೇ ಆಮ ಪಸ್ಸನ್ತೋ ಗಹೇತ್ವಾ ಗಚ್ಛಾಹೀತಿ ಆಹ. ಏವಂ ತಯೋ ವಾರೇ ಪಟಿಞ್ಞಂ ಗಹೇತ್ವಾ ತಥೇವ ಠೀತೋ?

ಇದ್ಧಿಯಾ ಮಾಪಯಿತ್ವಾನ ತತೋ ಸೋ ಸುಖುಮಂ ಕರಂ,

ಪವೇಸೇತ್ವಾ ಮುಖೇ ತಸ್ಸ ಗಣ್ಹೀ ಧಾತುಕರಣ್ಡಕಂ;

ನಾಗಾಲಯಾಭಿನಿಕ್ಖಮಿ ತಿಟ್ಠ ನಾಗಾ’ತಿ ಭಾಸಿಯ.

ತಸ್ಮಿಂ ¶ ಖಣೇ ಜಯಸೇನೋ ನಾಗರಾಜಾ ಸಮಣಂ ವಞ್ಚೇತ್ವಾ ಪೇಸಿತೋಮ್ಹೀ’ತಿ ವತ್ವಾ ತಸ್ಸ ಗತಕಾಲೇ ಧಾತುಕರಣ್ಡಕಂ ಓಲೋಕೇತ್ವಾ ಧಾತು ಅಪಸ್ಸಿತ್ವಾ ಸಮಣೇನ ನಾಸಿತೋಮ್ಹೀ’ತಿ ದ್ವೇ ಹತ್ಥೇ ಉಕ್ಖಿಪಿತ್ವಾ ಠಪೇತ್ವಾ ಅತ್ತನೋ ಸಕಲನಾಗಭವನಂ ಏಕ ಕೋಲಾಹಲಂ ಕತ್ವಾ ಮಹನ್ತೇನ ಸದ್ದೇನ ಪರಿದೇವನ್ತೋ? ಅಮ್ಹಾಕಂ ಚಕ್ಖುನಿ ಉಪ್ಪಾಟೇತ್ವಾ ಗತೋ ವಿಯ ಸದೇವಕಸ್ಸ ಲೋಕಸ್ಸ ಪತಿಟ್ಠಾನಭೂತಸ್ಸ ಸಮ್ಮಾಸಮ್ಬುದ್ಧಸ್ಸ ಕೇಸಧಾತುಯೋ ಅಪಾಯದುಕ್ಖತೋ ಅಮುಞ್ಚನ್ತಾನಂ ಅಮ್ಹಾಕಂ ಅಭಿಭವಿತ್ವಾ ಧಾತುಯೋ ಗಹೇತ್ವಾ ಗತಸಮಣಂ ಅನುಬನ್ಧಿತ್ವಾ ಗಣ್ಹಿಸ್ಸಾಮಾ’ತಿ ದ್ವೇಕೋಟಿಮತ್ತೇ ನಾಗೇ ಗಹೇತ್ವಾ ಅತ್ತನೋ ಭಾಗಿನೇಯ್ಯೇನ ಸದ್ಧಿಂ ತಸ್ಸ ಪಿಟ್ಠಿತೋ ಪಿಟ್ಠಿತೋ ಅನುಬನ್ಧಿತ್ವಾ ಆಕಾಸಂ ಉಗ್ಗಚ್ಛಿಂ (ಸು). ತಸ್ಮಿಂ ಖಣೇ ಪನ ಸಿವತ್ಥೇರೋ ಅಕಾಸತೋ ಓತರಿತ್ವಾ ಪಥವಿಯಂ ಪಾವಿಸಿ. ಪುನ ತೇಪಿ ಪಥವಿಯಂ ಪವಿಸಿಂಸು. ಏವಂ ಥೇರೋ ತೇಹಿ ಸದ್ಧಿಂ ಉಮ್ಮುಜ್ಜ ನಿಮುಜ್ಜಂ ಕರೋನ್ತೋ ಪಾಟಿಹಾರಿಯಂ ದಸ್ಸೇತ್ವಾ ಸೇರುನಗರಸ್ಸ ನಾತಿದೂರೇ ಪಿಟ್ಠಿಪಾಸಾಣೇ ಉಗ್ಗಞ್ಜಿ. ತತ್ಥೇವ ತೇ ಸಂವೇಜೇತ್ವಾ ಚೇತಿಯಙ್ಗಣೇ ಮಹಾಭಿಕ್ಖುಸಙ್ಘಸ್ಸ ಪುರತೋ ಪಾಕಟೋ ಅಹೋಸಿ. ನಾಗಾ ತಂ ಗಹೇತುಂ ಅಸಕ್ಕೋನ್ತಾ ಮಹನ್ತೇನ ಸದ್ದೇನ ರವಂ ಪತಿರವಂ ದತ್ವಾ. ಇತೋ ಪಟ್ಠಾಯ ನಟ್ಠಮ್ಹಾ’ತಿ ತಸ್ಮಿಂ ಪಿಟ್ಠಿ ಪಾಸಾಣೇ ಸಬ್ಬೇ ಸಮಾಗಮಂ ಕತ್ವಾ ಮಹಾಸದ್ದೇನ ಪರಿದೇವಿಂಸು? ನಟ್ಠಮ್ಭಾ ವತ ಭೋ’ತಿ. ತತೋ ಪಟ್ಠಾಯ ಸೋ ಪಿಟ್ಠಿಪಾಸಾಣೋ ನಾಗಾನಂ ರವಂ ಪತಿರವಂ ದತ್ವಾ ಪರಿದೇವಿತಹಾವೇನ ನಾಗಗಲ್ಲಂ ನಾಮ ಅಹೋಸಿ.

ನಾಗೋ ಥೇರಸ್ಸ ಪಿಟ್ಠಿತೋಯೇವ ಅನುಬನ್ಧಿತ್ವಾ ಚೇತಿಯಙ್ಗಣಂ ಗನ್ತ್ವಾ ರಾಜಾನಂ ಏವಮಾಹ? ದೇವ, ಏಸೋ ಭಿಕ್ಖು ಮಯಾ ಅದಿನ್ನಧಾತು ಗಹೇತ್ವಾ ಆಗತೋ’ತಿ. ತಂ ಸುತ್ವಾ ರಾಜಾ? ಸಚ್ಚಂ ಕಿರ ಅಯ್ಯ ನಾಗಸ್ಸ ವಚನನ್ತಿ ವುತ್ತೇ ನಹೇವ ಮಹಾರಾಜ, ಇಮಿನಾ ದಿನ್ನಂ ಏವ ಧಾತುಂ ಅಗ್ಗಹೇಸಿನ್ತಿ ವುತ್ತೇ? ನಾಗೋ ತವ ಸಕ್ಖಿಂ ದೇಹೀತಿ ಆಹ. ಥೇರೋ ತಸ್ಸ ಭಾಗಿನ್ಯೇಂ ಸಮಣುಪ್ಪಲ ನಾಗರಾಜಾನಂ ಸಕ್ಖಿಂ ಅಕಾಸಿ. ರಾಜಾ ತಸ್ಸ ಭಾಗಿನೇಯ್ಯಸ್ಸ ಸಬ್ಬವಚನಂ ಸುತ್ವಾ ಸದ್ದಹಿ. ತಸ್ಮಿಂ ಕಾಲೇ ದುಕ್ಖಾಭಿಭೂತೋ ನಾಗರಾಜಾ ಗನ್ತ್ವಾ ಬಹಿ ಠೀತೋ. ತತೋ ಪಟ್ಠಾಯ ಸೋ ನಾಗರಾಜಾ ¶ ಬಹಿ ಹುತ್ವಾ ನಿಸಿನ್ನತ್ತಾ ಬಹಿನಾಗರಾಜಾ ನಾಮ ಅಹೋಸಿ. ತಸ್ಸ ಪನ ಭಾಗಿನೇಯ್ಯಂ ಅನ್ತೋ ಚೇತಿಯಙ್ಗಣೇ ನಿಸೀದಾಪೇಸಿ. ಇಮಸ್ಸ ಪನ ಚೇತಿಯಸ್ಸ ಆರಕ್ಖಂ ಗಹಿತನಾಗಾ ಕಥೇತಬ್ಬಾ. ಸುಮನನಾಗರಞ್ಞೋ ಪರಿವಾರಾ ಛಕೋಟಿಮತ್ತಾ ನಾಗಾ, ಜಯಸೇನಸ್ಸ ಪರಿವಾರಾ ಕೋಟಿಸತಮತ್ತಾ ನಾಗಾ, ಸಮಣುಪ್ಪಲನಾಗರಞ್ಞೋ ಪರಿವಾರಾ ದ್ವಿಕೋಟಿಮತ್ತಾ ನಾಗಾ ಅಹೇಸುಂ. ಸಬ್ಬೇ ಧಾತುಯಾ ಆರಕ್ಖಂ ಗಣ್ಹಿಂಸು. ರಾಜಾ ಥೇರಸ್ಸ ಹತ್ಥತೋ ಕೇಸಧಾತುಂ ಗಹೇತ್ವಾ ರತನಚಙೇಗಾಟಕೇ ಠಪೇತ್ವಾ ಮಹಿನ್ದಸ್ಸ ನಾಮ ಅಮಚ್ಚಸ್ಸ ಅದಾಸಿ. ತಸ್ಮಿಂ ಸಮಾಗಮೇ ತಿಪಿಟಕಮಹಾಫುಸ್ಸದೇವತ್ಥೇರಸ್ಸ ಸದ್ಧಿವಿಹಾರಿಕಾ ಪಟಿಸಮ್ಭಿದಪ್ಪತ್ತಾ ಚತ್ತಾರೋ ಸಾಮಣೇರಾ ಅಹೇಸುಂ. ತೇಸು ಏಕೋ ಮಲಯ ರಾಜಪುತ್ತೋ ಸುಮನಸಾಮಣೇರೋ ನಾಮ, ಏಕೋ ಸೇರುನಗರೇ ಸಿವರಾಜಭಾಗಿನೇಯ್ಯಸ್ಸ ಪುತ್ತೋ ಉತ್ತರ ಸಾಮಣೇರೋ ನಾಮ. ಏಕೋ ಮಹಾಗಾಮೇ ಮಾಲಾಕಾರಪುತ್ತೋ ಚುನ್ದ ಸಾಮಣೇರೋ ನಾಮ ಏಕೋ ಮಹಾಗಾಮೇ ಏಕಸ್ಸ ಕುಟುಮ್ಬಿಕಸ್ಸ ಪುತ್ತೋ ಮಹಾಕಸ್ಸಪಸಾಮಣೇರೋ ನಾಮ, ಇಮೇ ಚತ್ತಾರೋ ಸಾಮಣೇರಾ ಅಜ್ಜ ಕಾಕವಣ್ಣತಿಸ್ಸಮಹಾರಾಜಾ ಮಹಾಚೇತಿಯೇ ಧಾತು ನಿಧಾನಂ ಕರಿಸ್ಸತಿ, ಮಯಂ ಹಿಮವನ್ತಂ ಗನ್ತ್ವಾ ಸುಕುಸುಮಾನಿ ಆಹರಿಸ್ಸಾಮಾತಿ ಥೇರಂ ವನ್ದಿತ್ವಾ ಆಕಾಸತೋ ಹಿಮವನ್ತಂ ಗನ್ತ್ವಾ ಚಮ್ಪಕನಾಗಸಲಲಾದಯೋ ಪೂಜನೀಯಮಾಲಂ ಗಹೇತ್ವಾ ತಾವತಿಂಸದೇವ ಲೋಕಂ ಗತಾ.

ತಸ್ಮಿಂ ಕಾಲೇ ಸಕ್ಕೋ ದೇವರಾಜಾ ಸಬ್ಬಾಭರಣಪತಿಮಣ್ಡಿತೋ ದ್ವಿಸು ದೇವಲೋಕೇಸು ದೇವತಾಯೋ ಗಹೇತ್ವಾ ಏರಾವಣಹತ್ಥೀಕ್ಖನ್ಧಮಾರುಯ್ಹ ಅಡ್ಢತೇಯ್ಯಕೋಟಿದೇವಚ್ಛರಾಪರಿವಾರಿತೋ ಸುದಸ್ಸನಮಹಾ ವೀಥಿಯಂ ವಿಚರನ್ತೋ ಸವಙ್ಗೋಟಕೇ ತೇ ಚತ್ತಾರೋ ಸಾಮಣೇರೇ ದುರತೋವ ಆಗಚ್ಛನ್ತೇ ದಿಸ್ವಾ ಹತ್ಥೀಕ್ಖನ್ಧತೋ ಓರುಯ್ಹ ಪಞ್ಚ ಪತಿಟ್ಠಿತೇನ ವನ್ದಿತ್ವಾ ತೇಸಂ ಹತ್ಥೇ ಮಾಲಾಚಙ್ಗೋಟಕೇ ದಿಸ್ವಾ? ಕಿಂ ಅಯ್ಯಾ ತುಮ್ಹಾಕಂ ಹತ್ಥೇ’ತಿ ಪುಚ್ಛಿ. ತಂ ಸುತ್ವಾ ಸಾಮಣೇರಾ ಮಹಾರಾಜ, ಕಿಂ ತ್ವಂ ನ ಜಾನಾಸಿ. ಲಙ್ಕಾಯಂ ಕಾಕವಣ್ಣತಿಸ್ಸ ಮಹಾರಾಜಾ ದಸಬಲಸ್ಸ ನಲಾಟಧಾತುಂ ಗಹೇತ್ವಾ ಮಹಾವಾಲುಕಗಙಗಾಯ ದಕ್ಖಿಣಪಸ್ಸೇ ಸೇರು ನಾಮ ದಹಸ್ಸ ಅನ್ತೇ ವರಾಹ ನಾಮ ಸೋಣ್ಡಿಮತ್ಥಕೇ ಚೇತಿಯಂ ಕಾರಾಪೇತುಂ ತುಮ್ಹಾಕಂ ನಿಯೋಗೇನ ವಿಸ್ಸಕಮ್ಮದೇವಪುತ್ತೇನ ನಿಮ್ಮಿತ್ैಟ್ಠಕಾನಿ ಗಹೇತ್ವಾ ಚೇತಿಯಂ ಕಾರಾಪೇತ್ವಾ ಅಜ್ಜ ಧಾತುನಿಧಾನಂ ಕರೋತಿ. ತತ್ಥ ಪೂಜನತ್ಥಾಯ ಹಿಮವನ್ತತೋ ಆನೀತಪುಪ್ಫಮಿದನ್ತಿ ವತ್ವಾ ಇತೋಪಿ ಕುಸುಮಂ ಗಹೇತುಂ ಆಗತಮ್ಹಾ’ತಿ ವದಿಂಸು. ಸಕ್ಕೋ ತೇಸಂ ವಚನಂ ಸುತ್ವಾ?

ಅಯ್ಯ ¶ ತುಮ್ಹಾಕಂ ಹತ್ಥೇ ಪುಪ್ಫಾನಿ ಚೂಳಾಮಣಿಚೇತಿಯೇ ಪುಜೇತ್ವಾ ಅಮ್ಹಾಕಂ ಉಯ್ಯಾನತೋ ಪುಪ್ಫಾನಿ ಗಹೇತ್ವಾ ಗಚ್ಛಥಾತಿ ವತ್ವಾ ತೇಹಿ ಸದ್ಧಿಂ ಗನ್ತ್ವಾ ತೇಸಂ ಪುಪ್ಫೇಹಿ ಚೂಳಾಮಣಿಚೇತಿಯಂ ಪೂಜೇಸಿ. ತತೋ ಪಪಞ್ಚಂ ನ ಭವಿತಬ್ಬನ್ತಿ ಸಕ್ಕಸ್ಸ ನಿವೇದೇಸುಂ. ತಂ ಸುತ್ವಾ ಸಕ್ಕೋ ಸಾಮಣೇರಾನಂ ಪಞ್ಚಮಹಾಉಯ್ಯಾನತೋ ಪಾರಿಚ್ಛತ್ತ-ಕೋವಿಳಾರಾದೀನಿ ಪುಪ್ಫಾನಿ ಚ ಚನ್ದನಚುಣ್ಣಞ್ಚ ಗಹೇತ್ವಾ ದಾಪೇಸಿ. ಸಾಮಣೇರಾ ಪುಪ್ಫಾನಿ ಗಹೇತ್ವಾ ದೇವಲೋಕತೋ ಓತರಿತ್ವಾ ಹಿಮವನ್ತಂ ಪವಿಸಿತ್ವಾ ಸುವಣ್ಣಮಣಿಪಬ್ಬತೇ ಸನ್ತಚ್ಛಾಯಾಯ ನಸೀದಿತ್ವಾ ದಿವಾವಿಹಾರಂ ಕತ್ವಾ ನಕ್ಖತ್ತವೇಲಾಯ ಸಮ್ಪತ್ತಾಯ ಮಣೀ ಗವೇಸಮಾನಾ ಚತ್ತಾರೋ ಮಣಯೋ ಅದ್ದಸಂಸು. ತೇಸಂ ಏಕೋ ಇನ್ದನೀಲಮಣೀ, ಏಕೋ ಪಹಸ್ಸರಜೋತಿರಙ್ಗ ಮಣೀ, ಏಕೋ ವೇಲುರಿಯಮಣಿ, ಏಕೋ ಮಸಾರಗಲ್ಲಮಣಿ, ಚತ್ತಾರೋ ಮಣಯೋ ಚ ದಿಬ್ಬಪುಪ್ಫಾನಿ ಚ ಗಹೇತ್ವಾ ಥೇರಾನಂ ದಸ್ಸೇಸುಂ. ಥೇರೋ? ಮಹಾರಾಜ, ಇಮೇ ಸಾಮಣೇರಾ ಪಾರಿಚ್ಛತ್ತಕಕೋವಿಳಾರಾದೀನಿ ಪುಪ್ಫಾನಿ ಚ ಚನ್ದನಚುಣ್ಣಞ್ಚ ಚತ್ತಾರೋ ಮಣಯೋ ಚ ಗಹೇತ್ವಾ ಆಗತಾ’ತಿ ರಞ್ಞೋ ಆರೋಚೇಸುಂ.

ರಾಜಾ ತಂ ಸುತ್ವಾ ಸೋಮನಸ್ಸಜಾತೋ ಸಾಮಣೇರೇ ಪಞ್ಚ ಪತಿಟ್ಠೀತೇನ ವನ್ದಿತ್ವಾ ತೇಸಮಾಹತಮಣಯೋ ಗಹೇತ್ವಾ ಮಹಾನನ್ದ ನಾಮ ಅಮಚ್ಚಸ್ಸ ದತ್ವಾ ಥೇರೇಹೀ ಸದ್ಧಿಂ ಮಹನ್ತೇನ ಪರಿವಾರೇನ ಚೇತಿಯಙ್ಗಣಂ ಗನ್ತ್ವಾ ಮಣಿಕರಣ್ಡಕೇನ ಧಾತುಂ ಗಹೇತ್ವಾ ಅತ್ತನೋ ಸೀಸೇ ಧಾತುಂ ಠಪೇತ್ವಾ ಉಪರಿ ಸೇತಚ್ಛತ್ತಂ ಕಾರಾಪೇತ್ವಾ ಚೇತಿಯಂ ತಿಕ್ಖತ್ತುಂ ಪದಕ್ಖಿಣಂ ಕತ್ವಾ ಪಾಚೀನದ್ವಾರೇ ಠೀತೋ? ಅಯಂ ದಸಬಲಸ್ಸ ನಲಾಟಧಾತು ಅಮ್ಹೇಹಿ ಕಾರಾಪಿತಾಯ ಬುದ್ಧಪಟಿಮಾಯ ನಲಾಟೇ ಉಣ್ಣಲೋಮಾಕಾರಂ ಹುತ್ವಾ ಪತಿಟ್ಠಹತೂತಿ ಅಧಿಟ್ಠಾಸಿ. ತಸ್ಸ ಚಿನ್ತಿತಕ್ಖಣೇಯೇವ ಧಾತು ಕರಣ್ಡತೋ ನಭಮುಗ್ಗನ್ತ್ವಾ ಆಕಾಸೇ ಸತ್ತತಾಲಪ್ಪಮಾಣೇ ಠತ್ವಾ ಛಬ್ಬಣ್ಣ ರಂಸಿಯೋ ವಿಸ್ಸಜ್ಜೇಸಿ. ತಾ ರಂಸಿಯೋ ಕುಟೇನ ಆಸಿಞ್ಚಮಾನವಿಲೀನ ಸುವಣ್ಣಂ ವಿಯ ಅನ್ತಲಿಕ್ಖತೋ ನಿಕ್ಖನ್ತಸುವಣ್ಣರಸಧಾರಾ ವಿಯ ಸಕಲಲಙ್ಕಾದೀಪಂ ¶ ರಂಸಿಜಾಲೇಹಿ ಏಕೋಭಾಸಂ ಕತ್ವಾ ಗಣ್ಹಿಂಸು. ತಸ್ಮಿಂ ಕಾಲೇ ಯಮಕಪಾಟಿಹಾರಿಯಸದಿಸಂ ಪಾಟಿಹಾರಿಯಂ ಅಹೋಸಿ. ಮಹಾಕಾರುಣಿಕಸ್ಸ ಭಗವತೋ ಅದಿಟ್ಠಪುಬ್ಬಂ ಪಾಟಿಹಾರಿಯಂ ದಿಸ್ವಾ ಮಹಾಜನಾ ತಥಾಗತಸ್ಸ ರೂಪಕಾಯಂ ಪಚ್ಚಕ್ಖಭುತಾ ವಿಯ ಅಹೇಸುಂ.

ಅದಿಟ್ಠಪುಬ್ಬಂ ಸತ್ಥುಸ್ಸ ಪಾಟಿಹೀರಂ ಮಹಾಜನಾ;

ದಿಸ್ವಾ ಪೀತಿಪರಾ ಜಾತಾ ಪಸಾದಮಜ್ಝಗುಂ ಜಿನೇ.

ಪೂಜೇಸುಂ ಗನ್ಧಮಾಲಞ್ಚ ಅಲಙ್ಕಾರಂ ಸಕಂ ಸಕಂ;

ಸಬ್ಬೇ ವನ್ದಿಂಸು ಸಿರಸಾ-ಚೇತಿಯಂ ಈದಿಸಂ ವರಂ.

ತಸ್ಮಿಂ ಸಮಾಗಮೇ ಏಕೋ ಪಣ್ಡಿತಪುರಿಸೋ ಜಿನಂ ಥೋಮೇನ್ತೋ ಏವಮಾಹ?

ನಿಬ್ಬುತಸ್ಸಾಪಿ ಬುದ್ಧಸ್ಸ ಯಸೋ ಭವತಿ ಈದಿಸೋ;

ಠೀತಸ್ಸ ಲೋಕನಾಥಸ್ಸ ಕೀದಿಸಾ ಆಸಿ ಸಮ್ಪದಾ.

ಅನುಭಾವಮಿದಂ ಸಬ್ಬಂ ಪುಞ್ಞೇನೇವ ಮಹೇಸಿನೋ;

ಕರೇಯ್ಯ ಞತ್ವಾ ಪುಞ್ಞಂ ತಂ ಪತ್ಥೇನ್ತೋ ಬೋಧಿಮುತ್ತಮಂ.

ತಸ್ಮಿಂ ಕಾಲೇ ನಾನಾರತನವಿಚಿತ್ತಂ ಅನೇಕಾಲಙ್ಕಾರಪತಿಮಣ್ಡಿತಂ ಮಹಾರಹಂ ಸಮುಸ್ಸಿತಧಜಪತಾಕಂ ನಾನಾವಿಧಕುಸುಮಸಮಾಕಿಣ್ಣಂ ಅನೇಕಪೂಜಾವಿಧಾನಂ ಗಹೇತ್ವಾ ಮನುಸ್ಸಾ ಛಣವೇಸಂ ಗಣ್ಹಿಂಸು. ಅನೇಕವಿಧತುರಿಯಸಙ್ಘುಟ್ಟಂ ಅಹೋಸಿ. ತಸ್ಮಿಂ ಖಣೇ ದೇವತಾಯೋ ಪುಪ್ಫವಸ್ಸಂ ವಸ್ಸಾಪೇನ್ತಿ. ಮಹಾನುಭಾವಸಮ್ಪನ್ನಾ ನಾಗಾ ಪೂಜಂ ಕರೋನ್ತಿ. ಏವಂ ಸಬ್ಬೇ ದೇವಾ ನಾಗಾ ಮನುಸ್ಸಾ ಸಾಧುಕಾರಂ ದೇನ್ತಿ, ಅಪ್ಫೋಟೇನ್ತಿ, ವೇಲುಕ್ಖೇಪಂ ಕರೋನ್ತಿ, ಹತ್ಥೀನೋ ಕುಞ್ಚನಾದಂ ನದನ್ತಿ. ಅಸ್ಸಾ ತುಟ್ಠಿರವಂ ರವನ್ತಿ, ಬಹಲಘನ ಮಹಾಪಥವೀ ಯಾವ ಉದಕಪರಿಯನ್ತಂ ಕಮ್ಪಿ. ದಿಸಾಸು ವಿಜ್ಜುಲ್ಲತಾ ನಿಚ್ಛರಿಂಸು. ಸಕಲಲಙ್ಕಾದೀಪೇ ಸುಮನಕೂಟಾದಯೋ ಮಹಾನಗಾ ಕುಸುಮಗಣಸಮಾಕಿಣ್ಣಾ ಅಹೇಸುಂ. ಸಬ್ಬೇ ಜಲಾಸಯಾ ಪಞ್ಚವಿಧ ಪದುಮಸಞ್ಛನ್ತಾ, ದೇವತಾನಮನ್ತರೇ ಮನುಸ್ಸಾ, ಮನುಸ್ಸಾನಂ ಅನ್ತರೇ ಯಕ್ಖನಾಗಸುಪಣ್ಣಾದಯೋ ಚ ಅಹೇಸುಂ. ಭಿಕ್ಖುಭಿಕ್ಖುನೀಉಪಾಸಕ ಉಪಾಸಿಕಾ ಅಪರಿಮಾಣಾ ಅಹೇಸುಂ. ಮಹನ್ತೇನ ಸಾಧುಕಾರೇನ ಮಹಾ ನಿಗ್ಘೋಸೇನ ಸಕಲಲಙ್ಕಾದೀಪೇ ತಿಬ್ಬವಾತಾಭಿಹತಸಮುದ್ದೋ ವಿಯ ಏಕನಿನ್ನಾದಂ ¶ ಏಕನಿಗ್ಘೋಸಂ ಅಹೋಸಿ. ಇಮಿನಾ ಪೂಜಾವಿಧಾನೇನ ಪಸಾದಕಭೂತಮಹಾಜನಕಾಯಮಜ್ಝೇ ಧಾತು ಪಾಟಿಹಾರಿಯಂ ದಸ್ಸೇತ್ವಾ ಆಕಾಸತೋ ಓತರಿತ್ವಾ ಬುದ್ಧಪಟಿಮಾಯ ನಲಾಟೇ ಪುಣ್ಣಚನ್ದಸಸ್ಸಿರೀಕಂ ಅಭಿಭವನ್ತಮಿವ ವಿರೋಚಮಾನಾ ಪತಿಟ್ಠಾಸಿ.

ರಾಜಾ ಮಹಾನನ್ದನಾಮಕಸ್ಸ ಅಮಚ್ಚಸ್ಸ ಹತ್ಥತೋ ಕೇಸಧಾತುಂ ಗಹೇತ್ವಾ ವಿಹಾರದೇವಿಯಾ ದತ್ವಾ ತ್ವಂ ಇಮಾ ಕೇಸಧಾತುಯೋ ದಸಬಲಸ್ಸ ಅನವಲೋಕಿತ ಮತ್ಥಕೇ ಪತಿಟ್ಠಾಪೇಹೀ’ತಿ ಆಹ. ಸಾ ಕೇಸಧಾತುಯೋ ಗಹೇತ್ವಾ ತತ್ಥೇವ ಪತಿಟ್ಠಹನ್ತು’ತಿ ಅಧಿಟ್ಠಾನಂ ಅಕಾಸಿ. ತಸ್ಮಿಂ ಖಣೇ ಕೇಸಧಾತುಯೋ ಕರಣ್ಡತೋ ನಭಂ ಉಗ್ಗನ್ತ್ವಾ ಮಯೂರಗೀವಸಂಕಾಸನೀಲರಂಸಿಯೋ ವಿಸ್ಸಜ್ಜೇನ್ತೀ ಆಕಾಸತೋ ಓತರಿತ್ವಾ ಬುದ್ಧಪಟಿಮಾಯ ಉತ್ತಮಙ್ಗೇ ಸಿರಸ್ಮಿಂ ಪತಿಟ್ಠಹಿಂಸು.

ತತೋ ರಾಜಾ ಥೇರೇನ ಸದ್ಧಿಂ ಧಾತುಗಬ್ಭಂ ಪವಿಸಿತ್ವಾ ದಿಬ್ಬಚನ್ದನಚುಣ್ಣಸಮಾಕಿಣ್ಣಂ ಪಾರಿಚ್ಛತ್ತಕಕೋವಿಳಾರಾದಿ ಸುಗನ್ಧಪುಪ್ಫಸನ್ಥರಂ ವಿಯೂಹಿತ್ವಾ ಪಭಾಸಮುದಯಸಮಾಕಿಣ್ಣೇ ಚತ್ತಾರೋ ಮಣಿ ಪಾಸಾಣೇ ಠಪೇಸಿ. ತೇಸಂ ಆಲೋಕಾಭಿಭೂತೋ ಧಾತುಗಬ್ಭೋ ಅತಿವಿಯ ವಿರೋಚಿತ್ಥ. ಸಬ್ಬನಾಟಕಿತ್ಥೀಯೋ ಅತ್ತನೋ ಅತ್ತನೋ ಆಭರಣಾನಿ ಓಮುಞ್ಚಿತ್ವಾ ಧಾತುಗಬ್ಭೇಯೇವ ಪೂಜೇಸುಂ. ತತೋ ರಾಜಾ ಧಾತುನಿಧಾನಂ ಕತ್ವಾ ಬುದ್ಧರೂಪಸ್ಸ ಪಾದತಲೇ ಸೀಸಂ ಠಪೇತ್ವಾ ನಿಪನ್ನೋ ಏವಂ ಪರಿದೇವಿ; ಮಯ್ಹಂ ಪಿತುಪಿತಾಮಹಪರಮ್ಪರಾಗತಾಧಾತು ಅಜ್ಜ ಆದಿಂ ಕತ್ವಾ ಇತೋ ಪಟ್ಠಾಯ ವಿಯೋಗಾ ಜಾತಾ ಅಹಂ ದಾನಿ ತುಮ್ಹಾಕಂ ಅತಿಚಿರಂ (ಠೀತಾ) ರಮಣೀಯಾ ರೋಹಣಜನಪದಾ ಆಹರಿತ್ವಾ ಇಮಸ್ಮಿಂ ಠಾನೇ ಪತಿಟ್ಠಾಪೇಸಿನ್ತಿ ವತ್ವಾ ಸಿನೇರು ಮುದ್ಧನಿ ¶ ಸಮುಜ್ಜಲಮಹಾಪದೀಪೋ ವಿಯ ತುಮ್ಹೇ ಇಧೇವ ಠೀತಾ. ಇದಾನಿ ನ ಗಮಿಸ್ಸಾಮ ಮಯಂ ಖಮಥ ಭಗವಾ’ತಿ ಪರಿದೇವಮಾನೋ ಧಾತು ಗಬ್ಭೇಯೇವ ಪತಿತ್ವಾ ಆಹ?

ಅಹೋ ವಿಯೋಗಂ ದುಕ್ಖಂ ಮೇ ಏತಾ ಬಾಧೇನ್ತಿ ಧಾತುಯೋ;

ವತ್ವಾ ಸೋ ಪರಿದೇವನ್ತೋ ಧಾತುಗಬ್ಭೇ ಸಯೀ ತದಾ.

ಮರಿಸ್ಸಾಮಿ ನೋ ಗಮಿಸ್ಸಂ ಅಯ್ಯಂ ಹಿತ್ವಾ ಇಧೇವ’ಹಂ;

ದುಲ್ಲಭಂ ದಸ್ಸನಂ ತಸ್ಸ ಸಂಸಾರೇ ಚರತೋ ಮಮಾ’ತಿ.

ವತ್ವಾ ಪರಿದೇವನ್ತೋ ನಿಪಜ್ಜಿ. ತಸ್ಸ ಪನ ಭಿಕ್ಖುಸಙ್ಘಸ್ಸ ಅನ್ತರೇ ಸಹದೇವೋ ನಾಮ ಥೇರೋ ರಾಜಾನಂ ಧಾತುಗಬ್ಭೇ ರೋದಮಾನಂ ನಿಪನ್ನಂ ದಿಸ್ವಾ ಕಿಮಜ್ಝಾಸಯೋ ಏತಸ್ಸಾ’ತಿ ಚೇತೋಪರಿಯಞಾಣೇನ ಸಮನ್ತಾಹರಿತ್ವಾ ಇಧ ನಿಪನ್ನೋ ಮರಿಸ್ಸಾಮೀ’ತಿ ನಿಪನ್ನಭಾವಂ ಜಾನಿತ್ವಾ ಇದ್ಧಿಯಾ ಸಂಸರಂ ಪಿಯರೂಪಂ ಮಾಪೇತ್ವಾ ಧಾತುಗಬ್ಭತೋ ತಂ ಬಹಿ ಅಕಾಸಿ.

(ಇದ್ಧಿಯಾ ಸೋ ವಸಿಪತ್ತೋ ಛಳಭಿಞ್ಞೋ ವಿಸಾರದೋ;

ತಂ ಖಣಞ್ಞೇವ ಸಪ್ಪಞ್ಞೋ ರಾಜಾನಂ ತಂ ಬಹಿಂ ಅಕಾ.)

ತತೋ ಪಠಮಾನೀತಜೋತಿರಙ್ಗ ಪಾಸಾಣಂ ಧಾತುಗಬ್ಭಸ್ಸ ಉಪರಿ ವಿತಾನಂ ವಿಯ ಠಪೇತ್ವಾ ಅರಹನ್ತಾ? ಧಾತುಗಬ್ಭೋ ಸಮನ್ತತೋ ಚತುರಸ್ಸಮಞ್ಚಂ ವಿಯ ಏಕಘನೋ ಹೋತು. ಧಾತು ಗಬ್ಭೇ ಗನ್ಧಾ ಮಾ ಸುಸ್ಸನ್ತು, ಪುಪ್ಫಾನಿ ಮಾ ಮಿಲಾಯನ್ತು, ರತನಾನಿ ಮಾ ವಿವಣ್ಣಾ ಹೋನ್ತು, ಪೂಜನೀಯಭಣ್ಡಾನಿ ಮಾ ನಸ್ಸನ್ತು, ಪಚ್ಚತ್ಥಿಕಪಚ್ಚಾಮಿತ್ತಾನಂ ಓಕಾಸೋ ವಾ ವಿವರೋ ವಾ ಮಾ ಹೋತು’ತಿ ಅಧಿಟ್ಠಹಿಂಸು. ತತೋ ರಾಜಾ ಧಾತುಯೋ ಮಹನ್ತಂ ಪೂಜಂ ಕತ್ವಾ ಮಙ್ಗಲಚೇತಿಯೇ ಚತುರಸ್ಸಕೋಟ್ಠಕಂ ಅತಿಮನೋರಮಂ ಛತ್ತಕಮ್ಮಞ್ಚ ಕೇಲಾಸಕೂಟಂ ವಿಯ ಸುಧಾಕಮ್ಮಞ್ಚ ವಾಲುಕಪಾದತೋ ಪಟ್ಠಾಯ ಸಬ್ಬಞ್ಚ ಕತ್ತಬ್ಬಂ ಕಮ್ಮಂ ನಿಟ್ಠಾಪೇಸಿ. ಸೋ ಪನ ಸೇತ ನಿಮ್ಮಲಚನ್ದರಂಸಿ ವಿಯ ಉದಕಬುಬ್ಬುಳಕೇಲಾಸಕೂಟಪಟಿಭಾಗೋ ಛತ್ತಧರೋ ¶ ಅಚಲಪ್ಪತಿಟ್ಠಿತೋ ಸುಜನಪ್ಪಸಾದಕೋ ಅಞ್ಞತಿತ್ಥೀಯ ಮದ್ದನಕರೋ ಮಙ್ಗಲಥೂಪೋ ವಿರೋಚಿತ್ಥ.

ವಿಲಾಸಮಾನೋ ಅಟ್ಠಾಸಿ ತೋಸಯನ್ತೋ ಮಹಾಜನೇ;

ಮಙ್ಗಲಕೇಲಾಸಥೂಪೋ ಅಚಲೋ ಸುಪ್ಪತಿಟ್ಠಿತೋ.

ಸುಜನಪ್ಪಸಾದನಕರೋ ತಿತ್ಥಿಯದಿಟ್ಠಿಮದ್ದನೋ;

ಭವಿ ಸದ್ಧಾಕರೋ ಸೇಟ್ಠೋ ಸಬ್ಬಜನಪಸಾದಕೋ.

ಚೇತಿಯೋ ಪವರೋ ಲೋಕೇ ಮಹಾಜನನಿಸೇವಿತೋ;

ಧಜಪುಪ್ಫಸಮಾಕಿಣ್ಣೋ ಸದಾ ಪೂಜಾರಹೋ ಭವಿ.

ಬಹೂ ಜನಾ ಸಮಾಗಮ್ಮ ನಾನಾ ದೇಸಾ ಸಮಾಗತಾ;

ಪೂಜೇಸುಂ ತಂ ಮಹಾಥೂಪಂ ಸಬ್ಬದಾಪಿ ಅತನ್ದಿತಾ.

ಈದಿಸೋ ಪತಿರೂಪವಾಸೋ ಸೋ ದೇಸೋ ದುಲ್ಲಭೋ ಭವೇ;

ಅಪ್ಪಮತ್ತಾ ಸದಾ ಸನ್ತಾ ವಿನಾಥ ಕುಸಲಂ ಬಹುನ್ತಿ.

ರಾಜಾ ಕಪ್ಪಾಸಿಕಸುಖುಮವತ್ಥೇನ ಮಹಾರಹಂ ಚೇತಿಯಂ ವೇಠೇತ್ವಾ, ಸಿರಿವಡ್ಢನಂ ನಾಮ ಮಹಾಬೋಧಿಂ ಪತಿಟ್ಠಪೇತ್ವಾ ತತ್ಥ ಬೋಧಿಘರಞ್ಚ ಕಾರಾಪೇತ್ವಾ ತಿಭೂಮಕಂ ಉಪೋಸಥಾಗಾರಂ ಕಾರಾಪೇತ್ವಾ ರತ್ತಿಟ್ಠಾನ ದಿವಾಟ್ಠಾನಾದೀನಿ ಕತ್ವಾ ಸಬ್ಬಂ ವಿಹಾರೇ ಕತ್ತಬ್ಬಂ ಕಾರೇಸಿ. ಏತ್ತಕಂ ಕಾರಾಪೇತ್ವಾ ವಿಹಾರಂ ದಕ್ಖಿಣೋದಕಂ ದಸ್ಸಾಮೀ’ತಿ ಚಿನ್ತೇತ್ವಾ ಅಸೀತಿಸಹಸ್ಸಮತ್ತಾನಂ ಭಿಕ್ಖೂನಂ ಸತ್ತದಿವಸಾನಿ ನಾನಾವಿಧ ಸೂಪವ್ಯಞ್ಜನೇಹಿ ಮಹಾದಾನಂ ದತ್ವಾ ಸತ್ತಮೇ ದಿವಸೇ ಮಹಾಭಿಕ್ಖು ಸಙ್ಘಸ್ಸ ತಿಚೀವರತ್ಥಾಯ ವತ್ಥಾನಿ ದಾಪೇತ್ವಾ ಪಾತೋವ ಪಾತರಾಸಭತ್ತಂ ಭುಞ್ಜಿತ್ವಾ ಥೇರಸ್ಸ ಸನ್ತಿಕಂ ಗನ್ತ್ವಾ ವನ್ದಿತ್ವಾ ಏಕಮನ್ತಂ ಠೀತೋ ಏವಮಾಹ? ಅಯ್ಯಾ, ಚಾತುದ್ದಸಿಕೇ ಮಹಾಭಿಕ್ಖುಸಙ್ಘಸ್ಸ ದಕ್ಖಿಣಂ ದಾತುಮಿಚ್ಛಾಮೀ’ತಿ. ಸೋ ಪನಾಯಸ್ಮಾ ಏವಮಾಹ; ಉಪಕಟ್ಠ ಪುಣ್ಣಮಾಯಂ ಉಪೋಸಥದಿವಸೇ ಅಸ್ಸಯುಜನಕ್ಖತ್ತೇನ ದಕ್ಖಿಣಂ ಧಾತುಂ ಭದ್ದಕನ್ತಿ. ಸೋ ಥೇರಸ್ಸ ವಚನಂ ಸುತ್ವಾ ಪಞ್ಚಪತಿಟ್ಠಿತೇನ ಥೇರಂ ವನ್ದಿತ್ವಾ ಸೋಮನಗರೇ ಅತ್ತನೋ ಭಗಿನಿಂ ದೇವಿಂ ಕಥೇಸಿ? ಭಗಿನಿ, ದಸಬಲಸ್ಸ ನಲಾಟಧಾತುಂ ನಿದಹಿತ್ವಾ ಮಙ್ಗಲಮಹಾಚೇತಿಯಾನುರೂಪಂ ¶ ಪಾಸಾದಂ ಅಲಙ್ಕತದ್ವಾರಟ್ಟಾಲಕತೋರಣಂ ಸೇತ ವತ್ಥ ಅನೇಕಧಜಸಮಾಕಿಣ್ಣಂ ವಿಹಾರಞ್ಚ ಕಾರಾಪೇತ್ವಾ ದಕ್ಖಿಣಂ ದಸ್ಸಾಮೀ’ತಿ ಅಯ್ಯಸ್ಸ ಕಥೇಸಿಂ. ಸೋ ಪನಾಯಸ್ಮಾ; ಉಪಕಟ್ಠ ಪುಣ್ಣಮಾಯ ಉಪೋಸಥದಿವಸೇ ದಾತುಂ ಯುತ್ತನ್ತಿ ಆಹಾ’ತಿ. ದೇವ, ಕಿಂ ಕಥೇಸಿ, ಅಯ್ಯಸ್ಸ ಕಥೀತನಿಯಾಮೇನೇವ ಉಪಕಟ್ಠ ಪುಣ್ಣಮಾಯ ಉಪೋಸಥದಿವಸೇ ದಕ್ಖಿಣಂ ದೇಹೀ’ತಿ ಆಹ. ಸೋ ತಸ್ಸಾ ಕಥಂ ಸುತ್ವಾ ಸೋಮನಸ್ಸಪತ್ತೋ ಸಾಧು ಭದ್ದೇ’ತಿ ಸಮ್ಪಟಿಚ್ಛಿತ್ವಾ ಸೋಮನಗರೇ ವಿಹರನ್ತೋ, ಉಪಕಟ್ಠ ಪುಣ್ಣಮಾಯ ಉಪೋಸಥೇ ಸಮ್ಪತ್ತೇಯೇವ ಅಜ್ಜುಪೋಸಥೋ’ತಿ ಞತ್ವಾ ಗಿರಿಅಭಯಂ ಪಕ್ಕೋಸಾಪೇತ್ವಾ, ತಾತ ಸ್ವೇ ದಕ್ಖಿಣಂ ದಾತಬ್ಬಂ ತ್ವಂ ಸೇನಙ್ಗಂ ಅಲಙ್ಕರಿತ್ವಾ ಸ್ವೇ ಅಮ್ಹೇಹಿ ಸದ್ಧಿಂ ಏಹೀ’ತಿ ವತ್ವಾ ಸೇರುನಗರೇ ಸಿವರಞ್ಞೋ ಲೋಣನಗರೇ ಮಹಾನಾಗರಞ್ಞೋ ಪಣ್ಣಂ ಪಹಿಣೀ. ಸ್ವೇ ತುಮ್ಹಾಕಂ ಹತ್ಥಿಅಸ್ಸರಥಪತ್ತಾದೀನಿ ಸುವಣ್ಣಾಲಙ್ಕಾರೇಹಿ ಅಲಙ್ಕರಿತ್ವಾ ಸ್ವೇ ಅಮ್ಹೇಹಿ ಸದ್ಧಿಂ ಛಣ ವೇಸಂ ಗಾಹಾಪೇತ್ವಾ ಅಯ್ಯಸ್ಸ ತಿಸ್ಸತ್ಥೇರಸ್ಸ ದಕ್ಖಿಣಂ ದೀಯಮಾನಂ ಸಮೋಸರನ್ತುತಿ. ತೇ ಪನ ರಾಜಾನೋ ಸಾಸನಂ ಸುತ್ವಾ ಅತ್ತನೋ ಅತ್ತನೋ ವಿಭವಾನುರೂಪೇನ ಹತ್ಥಿಅಸ್ಸರಥಪತ್ತಾದೀನಿ ಅಲಙ್ಕರಿತ್ವಾ ಗನ್ಧಪಞ್ಚಙ್ಗುಲಿಕಂ ದತ್ವಾ ಸುವಣ್ಣಮಾಲಾದೀನಿ ಪಿಲನ್ಧಾಪೇತ್ವಾ ಮಹಾ ಗೋಣೇಪಿ ತಥೇವ ಅಲಙ್ಕರಿತ್ವಾ ಸಿಙ್ಗೇಸು ಸುವಣ್ಣಕಞ್ಚುಕಂ (ಪಟಿ) ಮುಞ್ಚಾಪೇತ್ವಾ ಅಮಚ್ಚಗಹಪತಿ-ಬ್ರಾಹ್ಮಣಪುತ್ತ-ಅಜಗೋಪಕ-ಖುಜ್ಜವಾಮನಕ-ಸೇನಾಪತಿಆದಯೋ ಚ ವಿಚಿತ್ತವತ್ಥಾನಿ ನಿವಾಸೇತ್ವಾ ನಾನಾವಿಧವಿಲೇಪನಾನಿ ವಿಲಿಮ್ಪೇತ್ವಾ ಆಗನ್ತ್ವಾ ರಞ್ಞೋ ದಸ್ಸಯಿಂಸು. ರಾಜಾಪಿ ಚತುರಙ್ಗಿನಿಯಾ ಸೇನಾಯ ಪರಿವುತೋ ಅಲಙ್ಕತಹತ್ಥಿಕ್ಖನ್ಧಂ ಆರುಹಿ. ಸೇಸರಾಜಾನೋ ಚ ಅತ್ತನೋ ಅತ್ತನೋ ಸೇನಙ್ಗೇಹಿ ಪರಿವಾರೇತ್ವಾ ಹತ್ಥಿಕ್ಖನ್ಧೇ ನಿಸೀದಿತ್ವಾ ರಾಜಾನಂ ಮಜ್ಝೇ ಕತ್ವಾ ವಾಮದಕ್ಖಿಣಪಸ್ಸತೋ ನಮಸ್ಸಮಾನಾ ನಿಕ್ಖಮಿಂಸು. ತಸ್ಸ ಪನ ಗಮನಂ ಅಜಾತಸತ್ತುನೋ ತಥಾಗತಸ್ಸ ದಸ್ಸನತ್ಥಾಯ ಜೀವಕಮ್ಬವನಗಮನಂ ವಿಯ ತಿಂಸಯೋಜನಪ್ಪಮಾಣಂ ಏರಾವಣಹತ್ಥಿಕ್ಖನ್ಧಂ ಆರುಹಿತ್ವಾ ದ್ವೀಸು ದೇವಲೋಕೇಸು ದೇವೇಹಿ ಪರಿವಾರೇತ್ವಾ ಸಕ್ಕಸ್ಸ ದೇವಾನಮಿನ್ದಸ್ಸ ನನ್ದನವನಗಮನಕಾಲೋ ವಿಯ ಚ ಅಹೋಸಿ. ಸೋ ವಡ್ಢಮಾಸಕಚ್ಛಾಯಾಯ ¶ ಸಮ್ಪತ್ತಾಯ ಸೋಮನಗರತೋ ನಿಕ್ಖಮಿತ್ವಾ ಸೇರುದಹಸ್ಸ ಅನ್ತೇ ನಾನಾವಿಧ ಅಲಙ್ಕತಪಟಿಯತ್ತನಾಟಕಿತ್ಥೀನಂ ಪಞ್ಚಙ್ಗಿಕತುರಿಯಂ ಪಗ್ಗಣ್ಹಾಪಯಮಾನೋ ಅಟ್ಠಾಸಿ.

ಮಹಾಪಥವೀ ಭಿಜ್ಜಮಾನಾ ವಿಯ ಪಬ್ಬತಾ ಪರಿವತ್ತಮಾನಾ ವಿಯ ಮಹಾಸಮುದ್ದೋ (ಥಲಂ) ಅವತ್ಥರಿತ್ವಾ ಭಿಜ್ಜಮಾನಕಾಲೋ ವಿಯ ಚ ಅಹೋಸಿ. ಬ್ರಾಹ್ಮಣಾ ಜಯಮುಖಮಙ್ಗಲಿಕಾ ಸೋತ್ಥಿ ವಚನಂ ವದಿಂಸು. ಸಬ್ಬಾಲಙ್ಕಾರಪತಿಮಣ್ಡಿತಾ ನಾಟಕಿತ್ಥಿಯೋ ಪಞ್ಚಙ್ಗಿಕತುರಿಯಂ ಪವತ್ತಯಿಂಸು. ಮಹಾಜನೋ ವೇಲುಕ್ಖೇಪಸಹಸ್ಸಾನಿ ಪವತ್ತೇಸಿ. ತತೋ ರಾಜಾ ಬಹೂ ಗನ್ಧದೀಪಧೂಪಾದಯೋ ಗಾಹಾಪೇತ್ವಾ ಉಟ್ಠಾಯ ಸೇನಾಯ ಪರಿವುತೋ ಥೇರಸ್ಸ ವಸನಟ್ಠಾನಂ ಪವಿಸಿತ್ವಾ ಥೇರಂ ವನ್ದಿತ್ವಾ ನಿಸಿನ್ನೋ ಆಹ? ಅಯ್ಯ ರಾಜಾನೋ ಚ ಸಮ್ಪಿಣ್ಡಿತ್ವಾ ದಕ್ಖಿಣೋದಕಸ್ಸ ದೀಯಮಾನಸ್ಸ ಕಾಲೋ’ತಿ. ಥೇರೋ ತಸ್ಸ ಕಥಂ ಸುತ್ವಾ ಭದ್ದಕಂ ಮಹಾರಾಜಾ’ತಿ ಸಮ್ಪಟಿಚ್ಛಿ. ತಸ್ಮಿಂ ದಕ್ಖಿಣೋದಕಸ್ಸ ದಾನದಿವಸೇ ನಾನಾವಿಧವಿಚಿತ್ತಮಣಿದಣ್ಡಕೇಸು ನಾನಾವಿಧ ಧಜಪತಾಕಾದೀನಿ ಬನ್ಧಾಪೇತ್ವಾ ಸಮುಸ್ಸಿತಾನಿ ಅಹೇಸುಂ. ಪುರಿಮಾದೀ ದಿಸಾಸು ಮನುಞ್ಞವಾತಾ ವಾಯಿಂಸು. ತಥಾ ಮಹಾರಂಸಿಜಾಲಸಮುಜ್ಜಲಿತೋ ಸಹಸ್ಸರಂಸಿಭಾಕರೋ ಅತ್ಥಙ್ಗತೋ ಅಹೋಸಿ. ವಿಪ್ಫುರಿತಕಿರಣರಜಧೂಮರಾಹುಅಬ್ಭಾದೀಹಿ ಉಪರೋಧೇಹಿ ವಿರಹಿತೋ ತಾರಾಗಣಪರಿವುತೋ ಪುಣ್ಣಚನ್ದೋ ಸಮುಜ್ಜಲರಜತಮಯಂ ಆದಾಸಮಣ್ಡಲಂ ವಿಯ ಪಾಚೀನದಿಸತೋ ಸಮುಗ್ಗತೋ. ತಸ್ಮಿಂ ಖಣೇ ದಣ್ಡದೀಪಿಕಾದಯೋ ಸಮುಜ್ಜಲಾಪೇಸುಂ. ಮಹಾಮಙ್ಗಲಚೇತಿಯಂ ಪನ ಜಾತಿಸುಮನಮಾಲಾದಾಮೇನ ಪರಿಕ್ಖಿಪಿತ್ವಾ ಏಕಮಾಲಾಗುಣಂ ವಿಯ ಅಲಙ್ಕರಿ. ಯಥಾ ತಾರಾಗಣಪರಿವುತೋ ಪುಣ್ಣಚನ್ದೋ ತಥಾ ಪದೀಪಮಾಲಾಲಙ್ಕತೋ ಮಹಾಚೇತಿಯೋ ಅತಿವಿಯ ವಿರೋಚತಿ. ಸಕಲ ಲಙ್ಕಾದೀಪೇ ಪನ ಸಬ್ಬೇ ರುಕ್ಖಾಪಿ ವಿಚಿತ್ತಧಜೇನ ಅಲಙ್ಕತಾ ವಿಯ ಅಕಾಲಫಲಪಲ್ಲವೇಹಿ ವಿಚಿತ್ತಾ ಅಹೇಸುಂ. ಮಹಾಸಮುದ್ದಲೋಣಸಾಗರಾದಯೋ’ಪಿ ಪಞ್ಚವಿಧಪದುಮಸಞ್ಛನ್ನಾ ಅಹೇಸುಂ.

ವಿಚಿತ್ರವತ್ಥಾಭರಣೇಹಿ ಸಬ್ಬೇ,

ಅಲಙ್ಕತಾ ದೇವಸಮಾನವಣ್ಣಾ;

ಅನೇಕಸಙ್ಖ್ಯಾ ಸುಮನಾ ಪತೀತಾ,

ಜನಾ ಸಮನ್ತಾ ಪರಿವಾರಯಿಂಸು.

ಸಬ್ಬೇವ ¶ ಉಜ್ಜಲಾಪೇಸುಂ ದಣ್ಡದೀಪಂ ಮನೋರಮಂ;

ಸಕಲಮ್ಪಿ ಇದಂ ದೀಪಂ ಆಸಿ ಓಭಾಸಿತಂ ತದಾ.

ತಾರಾಗಣಸಮಾಕಿಣ್ಣೋ ಪುಣ್ಣಚನ್ದೋವ ಜೋತಯೀ;

ಸಾರದೇ ನಭಮಜ್ಝಮ್ಹಿ ಠಿತೋ ರುಚಿರರಂಸಿಯಾ.

ತಥಾ ಅಯಂ ಥೂಪವರೋ ಸುಪ್ಪಭಾಸೋ ಅಲಙ್ಕತೋ;

ಮಾಲಾಪದೀಪಮಜ್ಝಮ್ಹಿ ಭಾತಿ ಭುತಿಲಕುತ್ತಮೋ.

ಸಬ್ಬೇ’ಪಿ ಪಾದಪಾ ಅಸ್ಸ ಲಙ್ಕಾದೀಪಸ್ಸ ಸಬ್ಬಸೋ;

ಧಜೇಹಿ’ವ ಸಮಾಕಿಣ್ಣಾ ಆಸುಂ ಪುಪ್ಫಫಲನ್ದದಾ.

ಸಚೇತನಾ ಯಥಾ ಸಬ್ಬೇ ಅಕಾ ಪೂಜಂ ಅಕಾ ತದಾ;

ತಥಾ ಅಚೇತನಾ ಸಬ್ಬೇ ಅಕಾ ಪೂಜಂ ಅನಪ್ಪಕಂ.

ಯೇಭುಯ್ಯೇನ ಭುಮಟ್ಠೇ ದೇವೇ ಉಪಾದಾಯ ಯಾವ ಅಕಣಿಟ್ಠಕಾ ದೇವಾ ಬ್ರಹ್ಮಾ ದಿಬ್ಬಮಾಲಾಪಾರಿಚ್ಛತ್ತಕಕೋವಿಳಾರಚನ್ದನಚುಣ್ಣಂ ಗಹೇತ್ವಾ ಆಗತಾದೇವಾತಿ ವಾ ಮನುಸ್ಸಾತಿ ವಾ ಜಾನಿತುಂ ಅಸಕ್ಕೋನ್ತಿ. ಉಕ್ಕಟ್ಠಮಹಾಸಮಾಗಮೋ ಅಹೋಸಿ. ತಸ್ಮಿಮ್ಪಿ ದಿವಸೇ ಮಹಾಪಥವಿ ಆಕಾಸಯುಗನ್ಧರಚಕ್ಕವಾಳಪಬ್ಬತುತ್ತಮಾದಯೋ ಕಮ್ಪಿಂಸು. ತಂ ದಿಸ್ವಾ ರಾಜಾ ಅತಿವಿಯ ಸೋಮನಸ್ಸಪ್ಪತ್ತೋ ಥೇರೇ ಚ ಅವಸೇಸ ಮಹಾಮತ್ತಾದಯೋ ಸನ್ನಿಪಾತೇತ್ವಾ ನಾಟಕಾದಯೋ ಚ ಗಹೇತ್ವಾ, ಇದಾನೇವಾಹಂ ವಿಹಾರದಕ್ಖಿಣಂ ದಸ್ಸಾಮಿ’ತಿ ಚೇತಿಯಙ್ಗಣಂ ಅಗಮಾಸಿ. ಥೇರೋಪಿ ಭಿಕ್ಖುಸಙ್ಘಂ ಗಹೇತ್ವಾ ಚೇತಿಯಙ್ಗಣೇ ಅಲಙ್ಕತಮಣ್ಡಪೇ ನಿಸೀದಿ. ರಾಜಾ ವಾಸಿತಗನ್ಧೋದಕಸುವಣ್ಣಭಿಙ್ಕಾರಂ ಗಹೇತ್ವಾ ಉದಕಂ ಥೇರಸ್ಸ ಹತ್ಥೇ ಆಸಿಞ್ಚಿತ್ವಾ ದಕ್ಖಿಣಂ ಅದಾಸಿ. ದತ್ವಾ ಚ ಪನ ಏವಮಾಹ; ಅಯ್ಯಾ ಏಸಾ ಧಾತು ಮಯ್ಹಂ ಪಿತಾಮಹವಂಸೇನ ಆಗತಾ. ಇದಾನಿ ಅಮ್ಹಾಕಂ ಅತಿರುಚಿರರಮಣಿಯಾ ರೋಹಣಜನಪದಾ ಆಹರಿತ್ವಾ ಸುವಣ್ಣೇನ ಧಾತುಗಬ್ಭಂ, ಸತ್ತರತನೇನ ಧಾತುಮಣ್ಡಪಂ ಕಾರಾಪೇತ್ವಾ ತಸ್ಮಿಂ ಸುವಣ್ಣಮಯಂ ಬುದ್ಧಪಟಿಮಂ ನಿಸೀದಾಪೇತ್ವಾ ಅಮ್ಹಾಕಂ ದಸಬಲಸ್ಸ ನಲಾಟಧಾತುಂ ¶ ನಿದಹಿತ್ವಾ ಅಯ್ಯಸ್ಸ ಚೀವರಾದೀನಮತ್ಥಾಯ ಇದಾನಿ ಸೋಳಸಗಾಮವರಾನಿ ದಸ್ಸಾಮಿ’ತಿ ಗಾಮವರಾನಿ ದತ್ವಾ ಸಮನ್ತತೋ ತಿಗಾವುತಪ್ಪಮಾಣೇ ಸೇರುದಹೇ ಭೇರಿಂ ಚರಾಪೇತ್ವಾ ಆರಾಮಿಕಂ ಕತ್ವಾ ಆಹ? ಭನ್ತೇ, ತುಮ್ಹಾಕಂ ಮಯಾ ದಿನ್ನಸೋಳಸಗಾಮಂ ಅಜ್ಜೇವ ಗನ್ತಬ್ಬಂ. ಗನ್ತ್ವಾ ಚ ಪನ ಅಜ್ಜೇವ ಪರಿಗ್ಗಹಂ ಕರೋಥಾತಿ ವತ್ವಾ ತತ್ಥೇವ ವಾಸುಪಗತೋ ಪುನ ದಿವಸೇ ಸಮಾಗನ್ತ್ವಾ ಸತ್ತಾಹಂ ಮಹಾದಾನಂ ದತ್ವಾ ಸತ್ತಮೇ ದಿವಸೇ ಮಹಾಭಿಕ್ಖುಸಙ್ಘಸ್ಸ ತೀಚೀವರಪ್ಪಹೋನಕಸಾಟಕಂ ಪಣೀತಂ ಭೋಜನಂ ದತ್ವಾ ಥೇರಸ್ಸ ಸನ್ತಿಕಂ ಆಗತೋ, ಅಯ್ಯ ವಿಹಾರೇ ಕತ್ತಬ್ಬಂ ಅಪರಿಹಾಪೇತ್ವಾ ಮಯಾ ಕತಂ, ಗೇಹಂ ಗಮಿಸ್ಸಾಮೀತಿ (ನಿವೇದೇಸಿ). ಥೇರೋ ತಸ್ಸ ಕಥಂ ಸುತ್ವಾ ಸಾಧು ಮಹಾರಾಜಾತಿ ಸಮ್ಪಟಿಚ್ಛಿ.

ಸೋ ಪನ ಚೇತಿಯಸ್ಸ ಪೂಜನತ್ಥಾಯ ಪುಪ್ಫಾರಾಮಂ ಕಾರಾಪೇತ್ವಾ ಮಾಲಾಕಾರಾನಂ ಪರಿಬ್ಬಯಂ ದಾಪೇಸಿ. ತಥಾ ಭೇರಿವಾದಕನಾಟಕಾನಮ್ಪಿ ವಿಹಾರಸೀಮನ್ತೇ ಸುವಣ್ಣನಙ್ಗಲೇನ ಪರಿಚ್ಛಿನ್ದಿತ್ವಾ ಆರಾಮಿಕಾನಮ್ಪಿ ಗಾಮಂ ಕಾರಾಪೇಸಿ. ಭಿಕ್ಖುಸಙ್ಘಸ್ಸ ವೇಯ್ಯಾವಚ್ಚತ್ಥಾಯ ಅತ್ತನೋ ಸನ್ತಿಕೇ ಪಞ್ಚಸತಅಮಚ್ಚಧೀತರೋ ತತ್ತಕೇ ಅಮಚ್ಚಪುತ್ತೇ ದಾಸದಾಸಿಯೋ ಚ ದತ್ವಾ ಪರಿಬ್ಬಯತ್ಥಾಯ ತೇಸಂ ತೇಸಂ ಪಞ್ಚಸತಸಹಸ್ಸಕಹಾಪಣೇ ಚ ದಾಪೇಸಿ. ಭಿಕ್ಖುಸಙ್ಘಸ್ಸ ಚ ಧಾತುಪುಜನತ್ಥಾಯ ಸೋಳಸಸಹಸ್ಸಂ ಕಹಾಪಣಂ ದಾಪೇಸಿ.

ತತೋ ಗಿರಿಅಭಯಂ ಪಕ್ಕೋಸಾಪೇತ್ವಾ, ತಾತ ತುಮ್ಹೇ ಇಧೇವ ನಿಚ್ಚಂ ವಸಥ. ಅಮ್ಹಾಕಂ ವಿಹಾರೇ ಚ ಆರಾಮಿಕೇಸು ಚ ಅಯ್ಯೇಸು ಚ ಅಪ್ಪಮತ್ತೋ ಹೋಹೀತಿ ಓವದಿತ್ವಾ ಸಬ್ಬಂ ತಸ್ಸ ನಿಯ್ಯಾದೇಸಿ. ಥೇರೋ ತಸ್ಸ ಏವಮಾಹ? ಮಹಾರಾಜ ಸಮನ್ತತೋ ಮಹಾಸೀಮಂ ಬನ್ಧಿತಬ್ಬನ್ತಿ. ಬನ್ಧಥ ಭನ್ತೇತಿ ವುತ್ತೇ? ಮಹಾರಾಜ ಅಕಿತ್ತಿತೇನ ನಿಮಿತ್ತೇನ ಸೀಮಂ ಬನ್ಧಿತುಂ ನಸಕ್ಕಾ, ವಿಹಾರಸ್ಸ ಪಾಚೀನ ಪಚ್ಛಿಮುತ್ತರದಕ್ಖಿಣತೋ ಮಹಾಸೀಮಂ ಬನ್ಧನಾಯ ನಿಮಿತ್ತಂ ಸಲ್ಲಕ್ಖೇತ್ವಾ ದೇಹಿ, ಮಯಂ ಸೀಮಂ ಬನ್ಧಿಸ್ಸಾಮಾತಿ ಆಹ. ರಾಜಾ ತುಟ್ಠೋ ಸತ್ತ ಅಮಚ್ಚೇ ಸಬ್ಬಾಲಙ್ಕಾರೇನ ಅಲಙ್ಕರಿತ್ವಾ ಸೀಮಾನಿಮಿತ್ತಂ ಕಿತ್ತೇತ್ವಾ ಆಗಮನತ್ಥಂ ¶ ಪೇಸೇಸಿ. ತೇ ಪನ ಸತ್ತ ಅಮಚ್ಚಾ ಚತುಸು ದಿಸಾಸು ನಿಮಿತ್ತಂ ಸಲ್ಲಕ್ಖೇತ್ವಾ ಪಣ್ಣೇ ಲಿಖಿತ್ವಾ ಆಹರಿತ್ವಾ ರಞ್ಞೋ ಅದಂಸು. ರಾಜಾ ಏಕೇಕಂ ಸತಕಹಾಪಣಂ ದತ್ವಾ ಚತುಸು ದಿಸಾಸು ಆರಕ್ಖಂ ದಾಪೇತ್ವಾ ಸೀಮಂ ಬನ್ಧನ್ತೂತಿ ಮಹಾಭಿಕ್ಖುಸಙ್ಘಸ್ಸ ನಿವೇದೇಸಿ. ಅಥ ಥೇರೋ ಭಿಕ್ಖುಸಙ್ಘಪರಿವುತೋ ಚೇತಿಯಙ್ಗಣೇ ನಿಸೀದಿತ್ವಾ ವಪ್ಪಮಾಸಕಾಳಪಕ್ಖದ್ವಾದಸದಿವಸೇ ಸೀಮಂ ಬನ್ಧಿತ್ವಾ ನಿಟ್ಠಪೇಸಿ.

ತತ್ಥ ಸೀಮಾನಿಮಿತ್ತಂ ಏವಂ ಜಾನಿತಬ್ಬಂ; ಪುರಿಮಾಯ ದಿಸಾಯ ಸಿಗಾಲ ಪಾಸಾಣಂ ಗತೋ. ತತೋ ಮಚ್ಛಸೇಲಗಾಮಸ್ಸ ವಾಮ ಪಸ್ಸೇನ ಕೋಟಸೀಮಾ ನಾಮ ಗಾಮಕ್ಖೇತ್ತಂ ವಿಸ್ಸಜ್ಜೇತ್ವಾ ಗಣದ್ವಾರಗಾಮಂ ಗತೋ. ಚಿತ್ತವಾಪಿಯಾ ಉತ್ತರವಾನ ಕೋಟಿತೋ ವರಗಾಮಕ್ಖೇತ್ತೇ ಪಿಟ್ಠಿಪಾಸಾಣಂ ಗತೋ. ತತೋ ಸಾಲಿಕಂ ನಾಮ ಮಧುಕರುಕ್ಖೇ ಠೀತಪಾಸಾಣಥೂಪಸ್ಸ ಗತೋ. ತತೋ ವುತ್ತಿಕ ನಾಮ ವಾಪಿಯಾ ದಕ್ಖಿಣವಾನ ಕೋಟಿತೋ ಕಣಿಕಾರ ಸೇಲಸ್ಸ ಗತೋ. ತತೋ ಛನ್ನಜ್ಝಾಪಿತಸೇಲಸ್ಸ ಗತೋ. ತತೋ ಕುಕ್ಕುಟಸಿವ ನಾಮ ಉಪಾಸಕಸ್ಸ ಮಧುಕರುಕ್ಖೇ ಠೀತಂ ಥೂಪಂ ಗತೋ. ತತೋ ಸೋಣ್ಡಂ ನಾಮ ಸೇಲಂ ಗತೋ. ತತೋ ಸಬರಂ ನಾಮ ಪಾಸಾಣಂ ಗತೋ. ತತೋ ಏಲಾಲತಿತ್ಥಸ್ಸ ಗತೋ. ತತೋ ಸೋಬ್ಭ ಮಜ್ಝಿಮೇನ ಗನ್ತ್ವಾ ಅಸ್ಸಬನ್ಧನಂ ನಾಮ ಠಾನಂ ಗತೋ. ತತೋ ಪಾಸಾಣಸ್ಸ ಮತ್ಥಕೇ ಉದಕ ಕಾಕಂ ನಾಮ ನಿಗ್ರೋಧಂ ಗತೋ. ಸೋ ರುಕ್ಖೋ ಉದಕ ಕಾಕಾನಂ ವುಸಿತ ಭಾವೇನ ಏವಂ ನಾಮ ಜಾತೋ. ತತೋ ತಮ್ಬತಿತ್ಥಂ ನಾಮ ಗನ್ತಾ ಮಹಾಚಾರಿಕಸ್ಸನಾಮ ಥೂಪಮಗ್ಗಸ್ಸ ಗತೋ. ¶ ತತೋ ಅಸ್ಸಮಣ್ಡಲಪಿಟ್ಠಿಂ ಗತೋ. ತತೋ ಮಹಾ ಕದಮ್ಬ ಪಸ್ಸೇ ಠೀತಂ ಪಾಸಾಣಥೂಪಂ ಗತೋ. ತತೋ ಮಹಾ ರಾಜುವಾಪಿಯಾ ಉತ್ತರಕೋಟಿಯಾ ಠೀತಂ ಮಹಾನಿಗ್ರೋಧರುಕ್ಖಂ ಗತೋ. ತತೋ ಮಹಾವನಪಿಟ್ಠಿಂ ಗತೋ. ತತೋ ಲೋಣಸಾಗರಸ್ಸ ಅನ್ತೇ ರಜತಸೇಲಂ ಗತೋ. ಪುನ ಆವತ್ತಿತ್ವಾ ಸಿಗಾಲ ಪಾಸಾಣೇಯೇವ ಠೀತೋ. ಇಮಂ ಏತ್ತಕಂ ಪದೇಸಂ ಸಮನ್ತತೋ ಪರಿಚ್ಛಿನ್ದಾಪೇತ್ವಾ ರಾಜಾ ಅದಾಸಿ. ವಿಹಾರಸ್ಸ ಬಹೂ ಆರಾಮಿಕೇ ಚ (ತೇಸಂ) ವಿವಿಧಾನಿ ಉಪಕರಣಾನಿ (ಚ) ದಾಪೇತ್ವಾ ಸಬ್ಬೇ ಪಾಕಾರತೋರಣಾದಯೋ ಕಾರಾಪೇತ್ವಾ ವಿಹಾರಂ ನಿಟ್ಠಾಪೇತ್ವಾ ರೋಹಣಮೇವ ಗತೋ.

ರಾಜಾ ಪಸನ್ನಹದಯೋ ಮಹಾಪುಞ್ಞೋ ಮಹಾಬಲೋ;

ಕಾರೇತ್ವಾ ಉತ್ತಮಂ ಥೂಪಂ ಕಞ್ಚನಗ್ಘೀಕ ಸೋಭಿತಂ.

ಬನ್ಧಾಪೇತ್ವಾ ತತೋ ಸೀಮಂ ವಟ್ಟಗಾಮಞ್ಚ ಸೋಳಸ;

ದತ್ವಾ ಆರಾಮಿಕಾನಞ್ಚ ಸಬ್ಬುಪಕರಣಾನಿ ಚ.

ತತೋ ಸೋ ರೋಹಣಂ ಗನ್ತ್ವಾ ಮಹಾಸೇನಾಪುರಕ್ಖತೋ;

ವಿಹಾರದೇವಿಯಾ ಸದ್ಧಿಂ ಮೋದಮಾನೋ ವಸೀ ತಹಿಂ.

ಥೇರೋ ಪನ ತತ್ಥೇವ ವಿಹರನ್ತೋ ಯೋ ಇಮಸ್ಮಿಂ ವಿಹಾರೇ ವಸನ್ತೋ ತಥಾಗತಸ್ಸ ಏಕಗನ್ಧಕುಟಿಯಂ ವುತ್ಥೋ ವಿಯ ಭವಿಸ್ಸತೀತಿ ಖ್ಯಾಕರಿತ್ವಾ ತತೋ ಪಟ್ಠಾಯ ಸೀಲಾಚಾರಸಮಾಧಿಸಮಾಪತ್ತಿಪಟಿಲದ್ಧಜಳಭಿಞ್ಞಾಪಟಿಸಮ್ಭಿದಪ್ಪತ್ತೇಹಿ ಖೀಣಾಸವೇಹಿ ಪರಿವಾರೇತ್ವಾ ಸಬ್ಬ ಬುದ್ಧಗುಣಂ ಅನುಸ್ಸರನ್ತೋ ಚಿರಂ ವಸಿತ್ವಾ ತತ್ಥೇವ ಅನುಪಾದಿಸೇಸಾಯ ನಿಬ್ಬಾನಧಾತುಯಾ ಪರಿನಿಬ್ಬಾಯಿ.

ಅನೇಕಗುಣಸಮ್ಪನ್ನೋ ¶ ತಿಸ್ಸತ್ಥೇರೋ ಬಹುಸ್ಸುತೋ;

ಜನಾನಂ ಸಙ್ಗಹಂಕತ್ವಾ ನಿಬ್ಬುತೋ ಸೋ ಅನಾಸವೋ.

ಥೇರಾಪಿ ತೇ ಸೀಲಸಮಾಧಿಯುತ್ತಾ,

ಬಹುಸ್ಸುತಾ ಸಾಧುಗುಣಾಭಿರಾಮಾ;

ಪಞ್ಞಾಪಭಾವಾಯುಪ್ಪನ್ನಚಿತ್ತಾ,

ಗುಣಾಕರಾ ತಾನಯುತಾ ಜನಾನಂ.

ಪಹೀನಭವಸಂಸಾರಾ ಪಭಿನ್ನಪಟಿಸಮ್ಭಿದಾ;

ನಾಮರೂಪಂ ಸಮಾಸನ್ತೋ ಪೇಸಲಾ ಛಿನ್ನಬನ್ಧನಾ.

ಸತ್ತಾನಂ ಉತ್ತಮಂ ಸನ್ತಿಂ ಕತ್ವಾ ಚ ಜನಸಙ್ಗಹಂ;

ನಿಬ್ಬುತಾ ತೇ ಮಹಾಪಞ್ಞಾ ಪದೀಪೋಚ ಸುಮಾನಸಾ.

ಇತಿ ಅರಿಯಜನಪ್ಪಸಾದನತ್ಥಾಯ ಕತೇ ಧಾತುವಂಸೇ

ಧಾತುನಿಧಾನಾಧಿಕಾರೋ ನಾಮ

ಪಞ್ಚಮೋ ಪರಿಚ್ಛೇದೋ.

ಇಮಿನಾ ¶ ಕಾರಾಪಿತವಿಹಾರಾ ಕಥೇತಬ್ಬಾ; ವಿಹಾರದೇವೀಮಹಾವಿಹಾರಂ, ಛಾತಪಬ್ಬತ ವಿಹಾರಂ, ಸಮುದ್ದವಿಹಾರಂ, ಚಿತ್ತಲಪಬ್ಬತವಿಹಾರಂ, ಭದ್ದಪಾಸಾಣದ್ವಾರವಿಹಾರಂ, ಅಚ್ಛಗಲ್ಲ ವಿಹಾರಂ, ಕೋಳಮ್ಬತಿಸ್ಸಪಬ್ಬತವಿಹಾರಂ, ಗಣವಿಹಾರಂ, ಕಾಲಕವಿಹಾರಂ, ದುಕ್ಖಪಾಲಕ ವಿಹಾರಂ, ಉಚ್ಚಙ್ಗಣವಿಹಾರಂ, ಕೋಟಿತಿಸ್ಸವಿಹಾರಂ, ತಸ್ಸ ಪನ ಏಕನಾಮಂ ಕತ್ವಾ ಕಾರಾಪಿತೇ ಮಹಾಗಾಮೇ ತಿಸ್ಸಮಹಾವಿಹಾರಾದಿಂ ಕತ್ವಾ ಏಕಸತಅಟ್ಠವೀಸವಿಹಾರಾನಿ ಕತಾನಿ ಅಹೇಸುಂ.

ಅಟ್ಠವೀಸಏಕಸತವಿಹಾರಞ್ಚ ಮಹಾರಹಂ;

ವಿಹಾರದೇವಿಯಾ ಸದ್ಧಿಂ ಕಾರಾಪೇಸಿ ಮಹಾಯಸೋ.

ತತೋ ಪಟ್ಠಾಯ ರಾಜಾ ಮಹಾದಾನಂ ದತ್ವಾ ಪುಞ್ಞಾನಿ ಕತ್ವಾ ತತೋ ಚುತೋ ದೇವಲೋಕೇ ನಿಬ್ಬತ್ತಿ.

ಕತ್ವಾನಿ ಪುಞ್ಞಕಮ್ಮಾನಿ ಅನೇಕಾನಿ ಮಹಾಯಸೋ;

ಅತ್ಥಂ ಜನಸ್ಸ ಕತ್ವಾನ ಗನ್ತ್ವಾನ ತುಸಿತಂ ಪುರಂ.

ಸೋ ತತ್ಥ ದಿಬ್ಬಸಮ್ಪತ್ತಿಂ ಚೀರಂ ಭುಞ್ಜಿಯ ನನ್ದಿತೋ;

ಮಹಾವೀಭವಸಮ್ಪನ್ನೋ ದೇವತಾನಂ ಪುರಕ್ಖತೋ.

ತಮ್ಪಿ ಸಮ್ಪತ್ತಿಮೋಹಾಯ ಜೀವವಲೋಕೇ ಮನೋರಮೇ;

ಲೋಕುತ್ತರಂ ಸಿವಂ ಖೇಮಂ ಇಚ್ಛನ್ತೋ ಆಗಮಿಸ್ಸತಿ.

ಸೋ ತತೋ ಚುತೋ ಜಮ್ಬುದೀಪೇ ನಿಬ್ಬತ್ತಿತ್ವಾ ಮೇತ್ತೇಯ್ಯ ಭಗವತೋ ಪಿತಾ ಸುಬ್ರಹ್ಮಾ ನಾಮ ಭವಿಸ್ಸತಿ. ವಿಹಾರದೇವೀ ತಸ್ಸೇವ ಮಾತಾ ಬ್ರಹ್ಮವತೀ ನಾಮ ಬ್ರಾಹ್ಮಣೀ ಭವಿಸ್ಸತಿ. ಅಭಯಗಾಮಣೀಕುಮಾರೋ ತಸ್ಸೇವ ಮೇತ್ತೇಯ್ಯಸ್ಸ ಭಗವತೋ ಪಠಮಗ್ಗಸಾವಕೋ ಭವಿಸ್ಸತಿ. ಕನಿಟ್ಠೋ ಸದ್ಧಾತಿಸ್ಸೋ ದುತಿಯಗ್ಗಸಾವಕೋ ಭವಿಸ್ಸತಿ.

ಏತ್ತಾವತಾ ನಲಾಟಧಾತು ಸಂವಣ್ಣನಾ ಸಮತ್ತಾ.

ಧಾತುವಂಸೋ ಸಮತ್ತೋ.

ಅನೇನ ¶ ಪುಞ್ಞಕಮ್ಮೇನ ಸಂಸರನ್ತೋ ಭವಾಭವೇ;

ಸಬ್ಬತ್ಥ ಪಣ್ಡಿತೋ ಹೋಮೀ ಸಾರಿಪುತ್ತೋವ ಪಞ್ಞವಾ.

ಅರಿಮೇದಸ್ಸ ಬುದ್ಧಸ್ಸ ಪಬ್ಬಜಿತ್ವಾನ ಸಾಸನೇ;

ನಿಬ್ಬಾನಂ ಪಾಪುಣಿತ್ವಾನ ಮುಞ್ಚೇಮಿ ಭವಬನ್ಧನಾ.

ಅನೇನ ಮೇ ಸಬ್ಬಭವಾಭವೇ’ಹಂ,

ಭವೇಯ್ಯಮೇಕನ್ತಪರಾನುಕಮ್ಪೀ;

ಕುಲೀ ಬಲೀ ಚೇವ ಸತೀ ಮತೀ ಚ,

ಕವೀಹಿಸನ್ತೇಹಿ ಸದಾ ಸಮಙ್ಗೀ.

ಪಞ್ಞಾವನ್ತಾನಂ ಅಗ್ಗೋ ಭವತು.