ಮೂಲ > ಸುತ್ತಪಿಟಕ > ಅಙ್ಗುತ್ತರನಿಕಾಯ

೧. ಏವಂ ¶ ¶ ¶ ¶ ಮೇ ಸುತಂ – ಏಕಂ ಸಮಯಂ ಭಗವಾ ಸಾವತ್ಥಿಯಂ ವಿಹರತಿ ಜೇತವನೇ ಅನಾಥಪಿಣ್ಡಿಕಸ್ಸ ಆರಾಮೇ. ತತ್ರ ಖೋ ಭಗವಾ ಭಿಕ್ಖೂ ಆಮನ್ತೇಸಿ – ‘‘ಭಿಕ್ಖವೋ’’ತಿ. ‘‘ಭದನ್ತೇ’’ತಿ ತೇ ಭಿಕ್ಖೂ ಭಗವತೋ ಪಚ್ಚಸ್ಸೋಸುಂ. ಭಗವಾ ಏತದವೋಚ –

‘‘ನಾಹಂ, ಭಿಕ್ಖವೇ, ಅಞ್ಞಂ ಏಕರೂಪಮ್ಪಿ ಸಮನುಪಸ್ಸಾಮಿ ಯಂ ಏವಂ ಪುರಿಸಸ್ಸ ಚಿತ್ತಂ ಪರಿಯಾದಾಯ ತಿಟ್ಠತಿ ಯಥಯಿದಂ, ಭಿಕ್ಖವೇ, ಇತ್ಥಿರೂಪಂ. ಇತ್ಥಿರೂಪಂ, ಭಿಕ್ಖವೇ, ಪುರಿಸಸ್ಸ ಚಿತ್ತಂ ಪರಿಯಾದಾಯ ತಿಟ್ಠತೀ’’ತಿ. ಪಠಮಂ.

೨. ‘‘ನಾಹಂ, ಭಿಕ್ಖವೇ, ಅಞ್ಞಂ ಏಕಸದ್ದಮ್ಪಿ ಸಮನುಪಸ್ಸಾಮಿ ಯಂ ಏವಂ ಪುರಿಸಸ್ಸ ಚಿತ್ತಂ ಪರಿಯಾದಾಯ ¶ ತಿಟ್ಠತಿ ಯಥಯಿದಂ, ಭಿಕ್ಖವೇ, ಇತ್ಥಿಸದ್ದೋ. ಇತ್ಥಿಸದ್ದೋ, ಭಿಕ್ಖವೇ, ಪುರಿಸಸ್ಸ ಚಿತ್ತಂ ಪರಿಯಾದಾಯ ತಿಟ್ಠತೀ’’ತಿ. ದುತಿಯಂ.

೩. ‘‘ನಾಹಂ, ಭಿಕ್ಖವೇ, ಅಞ್ಞಂ ಏಕಗನ್ಧಮ್ಪಿ ಸಮನುಪಸ್ಸಾಮಿ ಯಂ ಏವಂ ಪುರಿಸಸ್ಸ ಚಿತ್ತಂ ಪರಿಯಾದಾಯ ತಿಟ್ಠತಿ ಯಥಯಿದಂ, ಭಿಕ್ಖವೇ, ಇತ್ಥಿಗನ್ಧೋ. ಇತ್ಥಿಗನ್ಧೋ, ಭಿಕ್ಖವೇ, ಪುರಿಸಸ್ಸ ಚಿತ್ತಂ ಪರಿಯಾದಾಯ ತಿಟ್ಠತೀ’’ತಿ. ತತಿಯಂ.

೪. ‘‘ನಾಹಂ ¶ ¶ , ಭಿಕ್ಖವೇ, ಅಞ್ಞಂ ಏಕರಸಮ್ಪಿ ಸಮನುಪಸ್ಸಾಮಿ ಯಂ ಏವಂ ಪುರಿಸಸ್ಸ ಚಿತ್ತಂ ಪರಿಯಾದಾಯ ತಿಟ್ಠತಿ ಯಥಯಿದಂ, ಭಿಕ್ಖವೇ, ಇತ್ಥಿರಸೋ. ಇತ್ಥಿರಸೋ, ಭಿಕ್ಖವೇ, ಪುರಿಸಸ್ಸ ಚಿತ್ತಂ ಪರಿಯಾದಾಯ ತಿಟ್ಠತೀ’’ತಿ. ಚತುತ್ಥಂ.

೫. ‘‘ನಾಹಂ ¶ , ಭಿಕ್ಖವೇ, ಅಞ್ಞಂ ಏಕಫೋಟ್ಠಬ್ಬಮ್ಪಿ ಸಮನುಪಸ್ಸಾಮಿ ಯಂ ಏವಂ ಪುರಿಸಸ್ಸ ಚಿತ್ತಂ ಪರಿಯಾದಾಯ ತಿಟ್ಠತಿ ಯಥಯಿದಂ, ಭಿಕ್ಖವೇ, ಇತ್ಥಿಫೋಟ್ಠಬ್ಬೋ. ಇತ್ಥಿಫೋಟ್ಠಬ್ಬೋ, ಭಿಕ್ಖವೇ, ಪುರಿಸಸ್ಸ ಚಿತ್ತಂ ಪರಿಯಾದಾಯ ತಿಟ್ಠತೀ’’ತಿ. ಪಞ್ಚಮಂ.

೬. ‘‘ನಾಹಂ, ಭಿಕ್ಖವೇ, ಅಞ್ಞಂ ಏಕರೂಪಮ್ಪಿ ಸಮನುಪಸ್ಸಾಮಿ ಯಂ ಏವಂ ಇತ್ಥಿಯಾ ಚಿತ್ತಂ ಪರಿಯಾದಾಯ ತಿಟ್ಠತಿ ಯಥಯಿದಂ, ಭಿಕ್ಖವೇ, ಪುರಿಸರೂಪಂ. ಪುರಿಸರೂಪಂ, ಭಿಕ್ಖವೇ, ಇತ್ಥಿಯಾ ಚಿತ್ತಂ ಪರಿಯಾದಾಯ ತಿಟ್ಠತೀ’’ತಿ. ಛಟ್ಠಂ.

೭. ‘‘ನಾಹಂ, ಭಿಕ್ಖವೇ, ಅಞ್ಞಂ ಏಕಸದ್ದಮ್ಪಿ ಸಮನುಪಸ್ಸಾಮಿ ಯಂ ಏವಂ ಇತ್ಥಿಯಾ ಚಿತ್ತಂ ಪರಿಯಾದಾಯ ತಿಟ್ಠತಿ ಯಥಯಿದಂ, ಭಿಕ್ಖವೇ, ಪುರಿಸಸದ್ದೋ. ಪುರಿಸಸದ್ದೋ, ಭಿಕ್ಖವೇ, ಇತ್ಥಿಯಾ ಚಿತ್ತಂ ಪರಿಯಾದಾಯ ತಿಟ್ಠತೀ’’ತಿ. ಸತ್ತಮಂ.

೮. ‘‘ನಾಹಂ, ಭಿಕ್ಖವೇ, ಅಞ್ಞಂ ಏಕಗನ್ಧಮ್ಪಿ ಸಮನುಪಸ್ಸಾಮಿ ಯಂ ಏವಂ ಇತ್ಥಿಯಾ ಚಿತ್ತಂ ಪರಿಯಾದಾಯ ತಿಟ್ಠತಿ ಯಥಯಿದಂ, ಭಿಕ್ಖವೇ, ಪುರಿಸಗನ್ಧೋ. ಪುರಿಸಗನ್ಧೋ, ಭಿಕ್ಖವೇ, ಇತ್ಥಿಯಾ ಚಿತ್ತಂ ಪರಿಯಾದಾಯ ತಿಟ್ಠತೀ’’ತಿ. ಅಟ್ಠಮಂ.

೯. ‘‘ನಾಹಂ, ಭಿಕ್ಖವೇ, ಅಞ್ಞಂ ಏಕರಸಮ್ಪಿ ಸಮನುಪಸ್ಸಾಮಿ ಯಂ ಏವಂ ಇತ್ಥಿಯಾ ಚಿತ್ತಂ ಪರಿಯಾದಾಯ ¶ ತಿಟ್ಠತಿ ಯಥಯಿದಂ, ಭಿಕ್ಖವೇ, ಪುರಿಸರಸೋ. ಪುರಿಸರಸೋ, ಭಿಕ್ಖವೇ, ಇತ್ಥಿಯಾ ಚಿತ್ತಂ ಪರಿಯಾದಾಯ ತಿಟ್ಠತೀ’’ತಿ. ನವಮಂ.

೧೦. ‘‘ನಾಹಂ, ಭಿಕ್ಖವೇ, ಅಞ್ಞಂ ಏಕಫೋಟ್ಠಬ್ಬಮ್ಪಿ ಸಮನುಪಸ್ಸಾಮಿ ಯಂ ಏವಂ ¶ ಇತ್ಥಿಯಾ ಚಿತ್ತಂ ಪರಿಯಾದಾಯ ತಿಟ್ಠತಿ ಯಥಯಿದಂ, ಭಿಕ್ಖವೇ, ಪುರಿಸಫೋಟ್ಠಬ್ಬೋ. ಪುರಿಸಫೋಟ್ಠಬ್ಬೋ, ಭಿಕ್ಖವೇ, ಇತ್ಥಿಯಾ ಚಿತ್ತಂ ಪರಿಯಾದಾಯ ತಿಟ್ಠತೀ’’ತಿ. ದಸಮಂ.

೧೧. ‘‘ನಾಹಂ ¶ ¶ , ಭಿಕ್ಖವೇ, ಅಞ್ಞಂ ಏಕಧಮ್ಮಮ್ಪಿ ಸಮನುಪಸ್ಸಾಮಿ ಯೇನ ಅನುಪ್ಪನ್ನೋ ವಾ ಕಾಮಚ್ಛನ್ದೋ ಉಪ್ಪಜ್ಜತಿ ಉಪ್ಪನ್ನೋ ವಾ ಕಾಮಚ್ಛನ್ದೋ ಭಿಯ್ಯೋಭಾವಾಯ ವೇಪುಲ್ಲಾಯ ಸಂವತ್ತತಿ ಯಥಯಿದಂ, ಭಿಕ್ಖವೇ, ಸುಭನಿಮಿತ್ತಂ. ಸುಭನಿಮಿತ್ತಂ, ಭಿಕ್ಖವೇ, ಅಯೋನಿಸೋ ಮನಸಿ ಕರೋತೋ ಅನುಪ್ಪನ್ನೋ ಚೇವ ಕಾಮಚ್ಛನ್ದೋ ಉಪ್ಪಜ್ಜತಿ ಉಪ್ಪನ್ನೋ ಚ ಕಾಮಚ್ಛನ್ದೋ ಭಿಯ್ಯೋಭಾವಾಯ ವೇಪುಲ್ಲಾಯ ಸಂವತ್ತತೀ’’ತಿ. ಪಠಮಂ.

೧೨. ‘‘ನಾಹಂ ¶ , ಭಿಕ್ಖವೇ, ಅಞ್ಞಂ ಏಕಧಮ್ಮಮ್ಪಿ ಸಮನುಪಸ್ಸಾಮಿ ಯೇನ ಅನುಪ್ಪನ್ನೋ ವಾ ಬ್ಯಾಪಾದೋ ಉಪ್ಪಜ್ಜತಿ ಉಪ್ಪನ್ನೋ ವಾ ಬ್ಯಾಪಾದೋ ಭಿಯ್ಯೋಭಾವಾಯ ವೇಪುಲ್ಲಾಯ ಸಂವತ್ತತಿ ಯಥಯಿದಂ, ಭಿಕ್ಖವೇ, ಪಟಿಘನಿಮಿತ್ತಂ. ಪಟಿಘನಿಮಿತ್ತಂ, ಭಿಕ್ಖವೇ, ಅಯೋನಿಸೋ ಮನಸಿ ಕರೋತೋ ಅನುಪ್ಪನ್ನೋ ಚೇವ ಬ್ಯಾಪಾದೋ ಉಪ್ಪಜ್ಜತಿ ಉಪ್ಪನ್ನೋ ಚ ಬ್ಯಾಪಾದೋ ಭಿಯ್ಯೋಭಾವಾಯ ವೇಪುಲ್ಲಾಯ ಸಂವತ್ತತೀ’’ತಿ. ದುತಿಯಂ.

೧೩. ‘‘ನಾಹಂ, ಭಿಕ್ಖವೇ, ಅಞ್ಞಂ ಏಕಧಮ್ಮಮ್ಪಿ ಸಮನುಪಸ್ಸಾಮಿ ಯೇನ ಅನುಪ್ಪನ್ನಂ ವಾ ಥಿನಮಿದ್ಧಂ [ಥೀನಮಿದ್ಧಂ (ಸೀ. ಸ್ಯಾ. ಕಂ. ಪೀ.)] ಉಪ್ಪಜ್ಜತಿ ಉಪ್ಪನ್ನಂ ವಾ ಥಿನಮಿದ್ಧಂ ಭಿಯ್ಯೋಭಾವಾಯ ವೇಪುಲ್ಲಾಯ ಸಂವತ್ತತಿ ಯಥಯಿದಂ, ಭಿಕ್ಖವೇ, ಅರತಿ ತನ್ದೀ [ತನ್ದಿ (ಕ.)] ವಿಜಮ್ಭಿತಾ [ವಿಜಮ್ಭಿಕಾ (ಸೀ. ಸ್ಯಾ. ಕಂ. ಪೀ.)] ಭತ್ತಸಮ್ಮದೋ ಚೇತಸೋ ಚ ಲೀನತ್ತಂ. ಲೀನಚಿತ್ತಸ್ಸ, ಭಿಕ್ಖವೇ, ಅನುಪ್ಪನ್ನಞ್ಚೇವ ಥಿನಮಿದ್ಧಂ ¶ ಉಪ್ಪಜ್ಜತಿ ಉಪ್ಪನ್ನಞ್ಚ ಥಿನಮಿದ್ಧಂ ಭಿಯ್ಯೋಭಾವಾಯ ವೇಪುಲ್ಲಾಯ ಸಂವತ್ತತೀ’’ತಿ. ತತಿಯಂ.

೧೪. ‘‘ನಾಹಂ, ಭಿಕ್ಖವೇ, ಅಞ್ಞಂ ಏಕಧಮ್ಮಮ್ಪಿ ಸಮನುಪಸ್ಸಾಮಿ ಯೇನ ಅನುಪ್ಪನ್ನಂ ವಾ ಉದ್ಧಚ್ಚಕುಕ್ಕುಚ್ಚಂ ಉಪ್ಪಜ್ಜತಿ ಉಪ್ಪನ್ನಂ ವಾ ಉದ್ಧಚ್ಚಕುಕ್ಕುಚ್ಚಂ ಭಿಯ್ಯೋಭಾವಾಯ ವೇಪುಲ್ಲಾಯ ಸಂವತ್ತತಿ ಯಥಯಿದಂ, ಭಿಕ್ಖವೇ, ಚೇತಸೋ ಅವೂಪಸಮೋ. ಅವೂಪಸನ್ತಚಿತ್ತಸ್ಸ, ಭಿಕ್ಖವೇ, ಅನುಪ್ಪನ್ನಞ್ಚೇವ ಉದ್ಧಚ್ಚಕುಕ್ಕುಚ್ಚಂ ಉಪ್ಪಜ್ಜತಿ ಉಪ್ಪನ್ನಞ್ಚ ಉದ್ಧಚ್ಚಕುಕ್ಕುಚ್ಚಂ ಭಿಯ್ಯೋಭಾವಾಯ ವೇಪುಲ್ಲಾಯ ಸಂವತ್ತತೀ’’ತಿ. ಚತುತ್ಥಂ.

೧೫. ‘‘ನಾಹಂ ¶ ¶ , ಭಿಕ್ಖವೇ, ಅಞ್ಞಂ ಏಕಧಮ್ಮಮ್ಪಿ ಸಮನುಪಸ್ಸಾಮಿ ಯೇನ ಅನುಪ್ಪನ್ನಾ ವಾ ವಿಚಿಕಿಚ್ಛಾ ಉಪ್ಪಜ್ಜತಿ ಉಪ್ಪನ್ನಾ ವಾ ವಿಚಿಕಿಚ್ಛಾ ಭಿಯ್ಯೋಭಾವಾಯ ವೇಪುಲ್ಲಾಯ ಸಂವತ್ತತಿ ಯಥಯಿದಂ, ಭಿಕ್ಖವೇ, ಅಯೋನಿಸೋಮನಸಿಕಾರೋ. ಅಯೋನಿಸೋ, ಭಿಕ್ಖವೇ, ಮನಸಿ ಕರೋತೋ ಅನುಪ್ಪನ್ನಾ ಚೇವ ವಿಚಿಕಿಚ್ಛಾ ಉಪ್ಪಜ್ಜತಿ ಉಪ್ಪನ್ನಾ ಚ ವಿಚಿಕಿಚ್ಛಾ ಭಿಯ್ಯೋಭಾವಾಯ ವೇಪುಲ್ಲಾಯ ಸಂವತ್ತತೀ’’ತಿ. ಪಞ್ಚಮಂ.

೧೬. ‘‘ನಾಹಂ, ಭಿಕ್ಖವೇ, ಅಞ್ಞಂ ಏಕಧಮ್ಮಮ್ಪಿ ಸಮನುಪಸ್ಸಾಮಿ ಯೇನ ಅನುಪ್ಪನ್ನೋ ವಾ ಕಾಮಚ್ಛನ್ದೋ ನುಪ್ಪಜ್ಜತಿ ಉಪ್ಪನ್ನೋ ವಾ ಕಾಮಚ್ಛನ್ದೋ ಪಹೀಯತಿ ಯಥಯಿದಂ, ಭಿಕ್ಖವೇ, ಅಸುಭನಿಮಿತ್ತಂ. ಅಸುಭನಿಮಿತ್ತಂ, ಭಿಕ್ಖವೇ, ಯೋನಿಸೋ ಮನಸಿ ಕರೋತೋ ಅನುಪ್ಪನ್ನೋ ಚೇವ ಕಾಮಚ್ಛನ್ದೋ ನುಪ್ಪಜ್ಜತಿ ಉಪ್ಪನ್ನೋ ಚ ಕಾಮಚ್ಛನ್ದೋ ಪಹೀಯತೀ’’ತಿ. ಛಟ್ಠಂ.

೧೭. ‘‘ನಾಹಂ, ಭಿಕ್ಖವೇ, ಅಞ್ಞಂ ಏಕಧಮ್ಮಮ್ಪಿ ಸಮನುಪಸ್ಸಾಮಿ ಯೇನ ಅನುಪ್ಪನ್ನೋ ವಾ ಬ್ಯಾಪಾದೋ ನುಪ್ಪಜ್ಜತಿ ಉಪ್ಪನ್ನೋ ವಾ ಬ್ಯಾಪಾದೋ ಪಹೀಯತಿ ¶ ಯಥಯಿದಂ, ಭಿಕ್ಖವೇ, ಮೇತ್ತಾ ¶ ಚೇತೋವಿಮುತ್ತಿ. ಮೇತ್ತಂ, ಭಿಕ್ಖವೇ, ಚೇತೋವಿಮುತ್ತಿಂ ಯೋನಿಸೋ ಮನಸಿ ಕರೋತೋ ಅನುಪ್ಪನ್ನೋ ಚೇವ ಬ್ಯಾಪಾದೋ ನುಪ್ಪಜ್ಜತಿ ಉಪ್ಪನ್ನೋ ಚ ಬ್ಯಾಪಾದೋ ಪಹೀಯತೀ’’ತಿ. ಸತ್ತಮಂ.

೧೮. ‘‘ನಾಹಂ, ಭಿಕ್ಖವೇ, ಅಞ್ಞಂ ಏಕಧಮ್ಮಮ್ಪಿ ಸಮನುಪಸ್ಸಾಮಿ ಯೇನ ಅನುಪ್ಪನ್ನಂ ವಾ ಥಿನಮಿದ್ಧಂ ನುಪ್ಪಜ್ಜತಿ ಉಪ್ಪನ್ನಂ ವಾ ಥಿನಮಿದ್ಧಂ ಪಹೀಯತಿ ಯಥಯಿದಂ, ಭಿಕ್ಖವೇ, ಆರಮ್ಭಧಾತು ನಿಕ್ಕಮಧಾತು ಪರಕ್ಕಮಧಾತು. ಆರದ್ಧವೀರಿಯಸ್ಸ, ಭಿಕ್ಖವೇ, ಅನುಪ್ಪನ್ನಞ್ಚೇವ ಥಿನಮಿದ್ಧಂ ನುಪ್ಪಜ್ಜತಿ ಉಪ್ಪನ್ನಞ್ಚ ಥಿನಮಿದ್ಧಂ ಪಹೀಯತೀ’’ತಿ. ಅಟ್ಠಮಂ.

೧೯. ‘‘ನಾಹಂ, ಭಿಕ್ಖವೇ, ಅಞ್ಞಂ ಏಕಧಮ್ಮಮ್ಪಿ ಸಮನುಪಸ್ಸಾಮಿ ಯೇನ ಅನುಪ್ಪನ್ನಂ ವಾ ಉದ್ಧಚ್ಚಕುಕ್ಕುಚ್ಚಂ ನುಪ್ಪಜ್ಜತಿ ಉಪ್ಪನ್ನಂ ವಾ ಉದ್ಧಚ್ಚಕುಕ್ಕುಚ್ಚಂ ಪಹೀಯತಿ ಯಥಯಿದಂ, ಭಿಕ್ಖವೇ, ಚೇತಸೋ ವೂಪಸಮೋ. ವೂಪಸನ್ತಚಿತ್ತಸ್ಸ, ಭಿಕ್ಖವೇ, ಅನುಪ್ಪನ್ನಞ್ಚೇವ ಉದ್ಧಚ್ಚಕುಕ್ಕುಚ್ಚಂ ನುಪ್ಪಜ್ಜತಿ ಉಪ್ಪನ್ನಞ್ಚ ಉದ್ಧಚ್ಚಕುಕ್ಕುಚ್ಚಂ ಪಹೀಯತೀ’’ತಿ. ನವಮಂ.

೨೦. ‘‘ನಾಹಂ, ಭಿಕ್ಖವೇ, ಅಞ್ಞಂ ಏಕಧಮ್ಮಮ್ಪಿ ಸಮನುಪಸ್ಸಾಮಿ ¶ ಯೇನ ಅನುಪ್ಪನ್ನಾ ವಾ ವಿಚಿಕಿಚ್ಛಾ ನುಪ್ಪಜ್ಜತಿ ಉಪ್ಪನ್ನಾ ವಾ ವಿಚಿಕಿಚ್ಛಾ ಪಹೀಯತಿ ಯಥಯಿದಂ, ಭಿಕ್ಖವೇ, ಯೋನಿಸೋಮನಸಿಕಾರೋ ¶ . ಯೋನಿಸೋ, ಭಿಕ್ಖವೇ, ಮನಸಿ ಕರೋತೋ ಅನುಪ್ಪನ್ನಾ ಚೇವ ವಿಚಿಕಿಚ್ಛಾ ನುಪ್ಪಜ್ಜತಿ ಉಪ್ಪನ್ನಾ ಚ ವಿಚಿಕಿಚ್ಛಾ ಪಹೀಯತೀ’’ತಿ. ದಸಮಂ.

೨೧. ‘‘ನಾಹಂ ¶ , ಭಿಕ್ಖವೇ, ಅಞ್ಞಂ ಏಕಧಮ್ಮಮ್ಪಿ ಸಮನುಪಸ್ಸಾಮಿ ಯಂ ಏವಂ ಅಭಾವಿತಂ ¶ ಅಕಮ್ಮನಿಯಂ ಹೋತಿ ಯಥಯಿದಂ, ಭಿಕ್ಖವೇ, ಚಿತ್ತಂ [ಯಥಯಿದಂ ಚಿತ್ತಂ (ಸೀ. ಪೀ.) ಏವಮುಪರಿಪಿ]. ಚಿತ್ತಂ, ಭಿಕ್ಖವೇ, ಅಭಾವಿತಂ ಅಕಮ್ಮನಿಯಂ ಹೋತೀ’’ತಿ. ಪಠಮಂ.

೨೨. ‘‘ನಾಹಂ, ಭಿಕ್ಖವೇ, ಅಞ್ಞಂ ಏಕಧಮ್ಮಮ್ಪಿ ಸಮನುಪಸ್ಸಾಮಿ ಯಂ ಏವಂ ಭಾವಿತಂ ಕಮ್ಮನಿಯಂ ಹೋತಿ ಯಥಯಿದಂ, ಭಿಕ್ಖವೇ, ಚಿತ್ತಂ. ಚಿತ್ತಂ, ಭಿಕ್ಖವೇ, ಭಾವಿತಂ ಕಮ್ಮನಿಯಂ ಹೋತೀ’’ತಿ. ದುತಿಯಂ.

೨೩. ‘‘ನಾಹಂ ¶ , ಭಿಕ್ಖವೇ, ಅಞ್ಞಂ ಏಕಧಮ್ಮಮ್ಪಿ ಸಮನುಪಸ್ಸಾಮಿ ಯಂ ಏವಂ ಅಭಾವಿತಂ ಮಹತೋ ಅನತ್ಥಾಯ ಸಂವತ್ತತಿ ಯಥಯಿದಂ, ಭಿಕ್ಖವೇ, ಚಿತ್ತಂ. ಚಿತ್ತಂ, ಭಿಕ್ಖವೇ, ಅಭಾವಿತಂ ಮಹತೋ ಅನತ್ಥಾಯ ಸಂವತ್ತತೀ’’ತಿ. ತತಿಯಂ.

೨೪. ‘‘ನಾಹಂ, ಭಿಕ್ಖವೇ, ಅಞ್ಞಂ ಏಕಧಮ್ಮಮ್ಪಿ ಸಮನುಪಸ್ಸಾಮಿ ಯಂ ಏವಂ ಭಾವಿತಂ ಮಹತೋ ಅತ್ಥಾಯ ಸಂವತ್ತತಿ ಯಥಯಿದಂ, ಭಿಕ್ಖವೇ, ಚಿತ್ತಂ. ಚಿತ್ತಂ, ಭಿಕ್ಖವೇ, ಭಾವಿತಂ ಮಹತೋ ಅತ್ಥಾಯ ಸಂವತ್ತತೀ’’ತಿ. ಚತುತ್ಥಂ.

೨೫. ‘‘ನಾಹಂ, ಭಿಕ್ಖವೇ, ಅಞ್ಞಂ ಏಕಧಮ್ಮಮ್ಪಿ ಸಮನುಪಸ್ಸಾಮಿ ಯಂ ಏವಂ ಅಭಾವಿತಂ ಅಪಾತುಭೂತಂ ಮಹತೋ ಅನತ್ಥಾಯ ಸಂವತ್ತತಿ ಯಥಯಿದಂ, ಭಿಕ್ಖವೇ, ಚಿತ್ತಂ. ಚಿತ್ತಂ, ಭಿಕ್ಖವೇ, ಅಭಾವಿತಂ ಅಪಾತುಭೂತಂ ಮಹತೋ ಅನತ್ಥಾಯ ಸಂವತ್ತತೀ’’ತಿ. ಪಞ್ಚಮಂ.

೨೬. ‘‘ನಾಹಂ, ಭಿಕ್ಖವೇ, ಅಞ್ಞಂ ಏಕಧಮ್ಮಮ್ಪಿ ಸಮನುಪಸ್ಸಾಮಿ ¶ ಯಂ ಏವಂ ಭಾವಿತಂ ಪಾತುಭೂತಂ ಮಹತೋ ಅತ್ಥಾಯ ಸಂವತ್ತತಿ ಯಥಯಿದಂ, ಭಿಕ್ಖವೇ, ಚಿತ್ತಂ. ಚಿತ್ತಂ, ಭಿಕ್ಖವೇ, ಭಾವಿತಂ ಪಾತುಭೂತಂ ಮಹತೋ ಅತ್ಥಾಯ ಸಂವತ್ತತೀ’’ತಿ. ಛಟ್ಠಂ.

೨೭. ‘‘ನಾಹಂ, ಭಿಕ್ಖವೇ, ಅಞ್ಞಂ ಏಕಧಮ್ಮಮ್ಪಿ ಸಮನುಪಸ್ಸಾಮಿ ಯಂ ಏವಂ ಅಭಾವಿತಂ ಅಬಹುಲೀಕತಂ ¶ ಮಹತೋ ಅನತ್ಥಾಯ ಸಂವತ್ತತಿ ಯಥಯಿದಂ, ಭಿಕ್ಖವೇ, ಚಿತ್ತಂ. ಚಿತ್ತಂ, ಭಿಕ್ಖವೇ, ಅಭಾವಿತಂ ಅಬಹುಲೀಕತಂ ಮಹತೋ ಅನತ್ಥಾಯ ಸಂವತ್ತತೀ’’ತಿ. ಸತ್ತಮಂ.

೨೮. ‘‘ನಾಹಂ ¶ , ಭಿಕ್ಖವೇ, ಅಞ್ಞಂ ಏಕಧಮ್ಮಮ್ಪಿ ಸಮನುಪಸ್ಸಾಮಿ ಯಂ ಏವಂ ಭಾವಿತಂ ಬಹುಲೀಕತಂ ಮಹತೋ ಅತ್ಥಾಯ ಸಂವತ್ತತಿ ಯಥಯಿದಂ, ಭಿಕ್ಖವೇ, ಚಿತ್ತಂ. ಚಿತ್ತಂ, ಭಿಕ್ಖವೇ, ಭಾವಿತಂ ಬಹುಲೀಕತಂ ಮಹತೋ ಅತ್ಥಾಯ ಸಂವತ್ತತೀ’’ತಿ. ಅಟ್ಠಮಂ.

೨೯. ‘‘ನಾಹಂ, ಭಿಕ್ಖವೇ, ಅಞ್ಞಂ ಏಕಧಮ್ಮಮ್ಪಿ ಸಮನುಪಸ್ಸಾಮಿ ಯಂ ಏವಂ ಅಭಾವಿತಂ ಅಬಹುಲೀಕತಂ ದುಕ್ಖಾಧಿವಹಂ ಹೋತಿ ಯಥಯಿದಂ, ಭಿಕ್ಖವೇ, ಚಿತ್ತಂ. ಚಿತ್ತಂ, ಭಿಕ್ಖವೇ, ಅಭಾವಿತಂ ಅಬಹುಲೀಕತಂ ದುಕ್ಖಾಧಿವಹಂ ಹೋತೀ’’ತಿ. ನವಮಂ.

೩೦. ‘‘ನಾಹಂ, ಭಿಕ್ಖವೇ, ಅಞ್ಞಂ ಏಕಧಮ್ಮಮ್ಪಿ ಸಮನುಪಸ್ಸಾಮಿ ಯಂ ಏವಂ ಭಾವಿತಂ ಬಹುಲೀಕತಂ ಸುಖಾಧಿವಹಂ ಹೋತಿ ಯಥಯಿದಂ, ಭಿಕ್ಖವೇ, ಚಿತ್ತಂ. ಚಿತ್ತಂ, ಭಿಕ್ಖವೇ, ಭಾವಿತಂ ಬಹುಲೀಕತಂ ಸುಖಾಧಿವಹಂ ಹೋತೀ’’ತಿ. ದಸಮಂ.

೩೧. ‘‘ನಾಹಂ ¶ ¶ , ಭಿಕ್ಖವೇ, ಅಞ್ಞಂ ಏಕಧಮ್ಮಮ್ಪಿ ಸಮನುಪಸ್ಸಾಮಿ ಯಂ ಏವಂ ಅದನ್ತಂ ಮಹತೋ ಅನತ್ಥಾಯ ಸಂವತ್ತತಿ ಯಥಯಿದಂ, ಭಿಕ್ಖವೇ, ಚಿತ್ತಂ. ಚಿತ್ತಂ, ಭಿಕ್ಖವೇ, ಅದನ್ತಂ ಮಹತೋ ಅನತ್ಥಾಯ ಸಂವತ್ತತೀ’’ತಿ. ಪಠಮಂ.

೩೨. ‘‘ನಾಹಂ, ಭಿಕ್ಖವೇ, ಅಞ್ಞಂ ಏಕಧಮ್ಮಮ್ಪಿ ಸಮನುಪಸ್ಸಾಮಿ ಯಂ ಏವಂ ದನ್ತಂ ಮಹತೋ ಅತ್ಥಾಯ ಸಂವತ್ತತಿ ಯಥಯಿದಂ, ಭಿಕ್ಖವೇ, ಚಿತ್ತಂ. ಚಿತ್ತಂ, ಭಿಕ್ಖವೇ, ದನ್ತಂ ಮಹತೋ ಅತ್ಥಾಯ ಸಂವತ್ತತೀ’’ತಿ. ದುತಿಯಂ.

೩೩. ‘‘ನಾಹಂ, ಭಿಕ್ಖವೇ, ಅಞ್ಞಂ ಏಕಧಮ್ಮಮ್ಪಿ ಸಮನುಪಸ್ಸಾಮಿ ¶ ಯಂ ಏವಂ ಅಗುತ್ತಂ ಮಹತೋ ಅನತ್ಥಾಯ ಸಂವತ್ತತಿ ಯಥಯಿದಂ, ಭಿಕ್ಖವೇ, ಚಿತ್ತಂ. ಚಿತ್ತಂ, ಭಿಕ್ಖವೇ, ಅಗುತ್ತಂ ಮಹತೋ ಅನತ್ಥಾಯ ಸಂವತ್ತತೀ’’ತಿ. ತತಿಯಂ.

೩೪. ‘‘ನಾಹಂ, ಭಿಕ್ಖವೇ, ಅಞ್ಞಂ ಏಕಧಮ್ಮಮ್ಪಿ ಸಮನುಪಸ್ಸಾಮಿ ಯಂ ಏವಂ ಗುತ್ತಂ ¶ ಮಹತೋ ಅತ್ಥಾಯ ಸಂವತ್ತತಿ ಯಥಯಿದಂ, ಭಿಕ್ಖವೇ, ಚಿತ್ತಂ. ಚಿತ್ತಂ, ಭಿಕ್ಖವೇ, ಗುತ್ತಂ ಮಹತೋ ಅತ್ಥಾಯ ಸಂವತ್ತತೀ’’ತಿ. ಚತುತ್ಥಂ.

೩೫. ‘‘ನಾಹಂ, ಭಿಕ್ಖವೇ, ಅಞ್ಞಂ ಏಕಧಮ್ಮಮ್ಪಿ ಸಮನುಪಸ್ಸಾಮಿ ಯಂ ಏವಂ ಅರಕ್ಖಿತಂ ಮಹತೋ ಅನತ್ಥಾಯ ಸಂವತ್ತತಿ ಯಥಯಿದಂ, ಭಿಕ್ಖವೇ, ಚಿತ್ತಂ. ಚಿತ್ತಂ, ಭಿಕ್ಖವೇ, ಅರಕ್ಖಿತಂ ಮಹತೋ ಅನತ್ಥಾಯ ಸಂವತ್ತತೀ’’ತಿ. ಪಞ್ಚಮಂ.

೩೬. ‘‘ನಾಹಂ, ಭಿಕ್ಖವೇ, ಅಞ್ಞಂ ಏಕಧಮ್ಮಮ್ಪಿ ಸಮನುಪಸ್ಸಾಮಿ ಯಂ ಏವಂ ರಕ್ಖಿತಂ ಮಹತೋ ಅತ್ಥಾಯ ಸಂವತ್ತತಿ ಯಥಯಿದಂ, ಭಿಕ್ಖವೇ, ಚಿತ್ತಂ. ಚಿತ್ತಂ, ಭಿಕ್ಖವೇ, ರಕ್ಖಿತಂ ಮಹತೋ ಅತ್ಥಾಯ ಸಂವತ್ತತೀ’’ತಿ. ಛಟ್ಠಂ.

೩೭. ‘‘ನಾಹಂ ¶ , ಭಿಕ್ಖವೇ, ಅಞ್ಞಂ ಏಕಧಮ್ಮಮ್ಪಿ ಸಮನುಪಸ್ಸಾಮಿ ಯಂ ಏವಂ ಅಸಂವುತಂ ಮಹತೋ ಅನತ್ಥಾಯ ಸಂವತ್ತತಿ ಯಥಯಿದಂ, ಭಿಕ್ಖವೇ, ಚಿತ್ತಂ. ಚಿತ್ತಂ, ಭಿಕ್ಖವೇ, ಅಸಂವುತಂ ಮಹತೋ ಅನತ್ಥಾಯ ಸಂವತ್ತತೀ’’ತಿ. ಸತ್ತಮಂ.

೩೮. ‘‘ನಾಹಂ, ಭಿಕ್ಖವೇ, ಅಞ್ಞಂ ಏಕಧಮ್ಮಮ್ಪಿ ಸಮನುಪಸ್ಸಾಮಿ ಯಂ ಏವಂ ಸಂವುತಂ ಮಹತೋ ಅತ್ಥಾಯ ಸಂವತ್ತತಿ ಯಥಯಿದಂ, ಭಿಕ್ಖವೇ, ಚಿತ್ತಂ. ಚಿತ್ತಂ, ಭಿಕ್ಖವೇ, ಸಂವುತಂ ಮಹತೋ ಅತ್ಥಾಯ ಸಂವತ್ತತೀ’’ತಿ. ಅಟ್ಠಮಂ.

೩೯. ‘‘ನಾಹಂ ¶ , ಭಿಕ್ಖವೇ, ಅಞ್ಞಂ ಏಕಧಮ್ಮಮ್ಪಿ ಸಮನುಪಸ್ಸಾಮಿ ಯಂ ಏವಂ ಅದನ್ತಂ ಅಗುತ್ತಂ ಅರಕ್ಖಿತಂ ಅಸಂವುತಂ ಮಹತೋ ಅನತ್ಥಾಯ ಸಂವತ್ತತಿ ಯಥಯಿದಂ, ಭಿಕ್ಖವೇ, ಚಿತ್ತಂ. ಚಿತ್ತಂ, ಭಿಕ್ಖವೇ, ಅದನ್ತಂ ಅಗುತ್ತಂ ಅರಕ್ಖಿತಂ ಅಸಂವುತಂ ಮಹತೋ ಅನತ್ಥಾಯ ಸಂವತ್ತತೀ’’ತಿ. ನವಮಂ.

೪೦. ‘‘ನಾಹಂ, ಭಿಕ್ಖವೇ, ಅಞ್ಞಂ ಏಕಧಮ್ಮಮ್ಪಿ ಸಮನುಪಸ್ಸಾಮಿ ಯಂ ಏವಂ ದನ್ತಂ ಗುತ್ತಂ ರಕ್ಖಿತಂ ಸಂವುತಂ ಮಹತೋ ಅತ್ಥಾಯ ಸಂವತ್ತತಿ ಯಥಯಿದಂ, ಭಿಕ್ಖವೇ, ಚಿತ್ತಂ ¶ . ಚಿತ್ತಂ, ಭಿಕ್ಖವೇ, ದನ್ತಂ ಗುತ್ತಂ ರಕ್ಖಿತಂ ಸಂವುತಂ ಮಹತೋ ಅತ್ಥಾಯ ಸಂವತ್ತತೀ’’ತಿ. ದಸಮಂ.

೪೧. ‘‘ಸೇಯ್ಯಥಾಪಿ ¶ ¶ , ಭಿಕ್ಖವೇ, ಸಾಲಿಸೂಕಂ ವಾ ಯವಸೂಕಂ ವಾ ಮಿಚ್ಛಾಪಣಿಹಿತಂ ಹತ್ಥೇನ ವಾ ಪಾದೇನ ವಾ ಅಕ್ಕನ್ತಂ ಹತ್ಥಂ ವಾ ಪಾದಂ ವಾ ಭೇಚ್ಛತಿ [ಭಿಜ್ಜಿಸ್ಸತಿ (ಸ್ಯಾ. ಕಂ. ಕ.), ಭೇಜ್ಜತಿ (ಸೀ.) ಮೋಗ್ಗಲ್ಲಾನಬ್ಯಾಕರಣಂ ಪಸ್ಸಿತಬ್ಬಂ] ಲೋಹಿತಂ ವಾ ಉಪ್ಪಾದೇಸ್ಸತೀತಿ ನೇತಂ ಠಾನಂ ವಿಜ್ಜತಿ. ತಂ ಕಿಸ್ಸ ಹೇತು? ಮಿಚ್ಛಾಪಣಿಹಿತತ್ತಾ, ಭಿಕ್ಖವೇ, ಸೂಕಸ್ಸ. ಏವಮೇವಂ ಖೋ, ಭಿಕ್ಖವೇ, ಸೋ ವತ ಭಿಕ್ಖು ಮಿಚ್ಛಾಪಣಿಹಿತೇನ ಚಿತ್ತೇನ ಅವಿಜ್ಜಂ ಭೇಚ್ಛತಿ, ವಿಜ್ಜಂ ಉಪ್ಪಾದೇಸ್ಸತಿ, ನಿಬ್ಬಾನಂ ಸಚ್ಛಿಕರಿಸ್ಸತೀತಿ ನೇತಂ ಠಾನಂ ವಿಜ್ಜತಿ. ತಂ ಕಿಸ್ಸ ಹೇತು? ಮಿಚ್ಛಾಪಣಿಹಿತತ್ತಾ, ಭಿಕ್ಖವೇ, ಚಿತ್ತಸ್ಸಾ’’ತಿ. ಪಠಮಂ.

೪೨. ‘‘ಸೇಯ್ಯಥಾಪಿ, ಭಿಕ್ಖವೇ, ಸಾಲಿಸೂಕಂ ವಾ ಯವಸೂಕಂ ವಾ ಸಮ್ಮಾಪಣಿಹಿತಂ ಹತ್ಥೇನ ವಾ ಪಾದೇನ ವಾ ಅಕ್ಕನ್ತಂ ಹತ್ಥಂ ವಾ ಪಾದಂ ವಾ ಭೇಚ್ಛತಿ ಲೋಹಿತಂ ವಾ ಉಪ್ಪಾದೇಸ್ಸತೀತಿ ಠಾನಮೇತಂ ವಿಜ್ಜತಿ. ತಂ ಕಿಸ್ಸ ಹೇತು? ಸಮ್ಮಾಪಣಿಹಿತತ್ತಾ, ಭಿಕ್ಖವೇ, ಸೂಕಸ್ಸ. ಏವಮೇವಂ ಖೋ, ಭಿಕ್ಖವೇ, ಸೋ ವತ ಭಿಕ್ಖು ಸಮ್ಮಾಪಣಿಹಿತೇನ ಚಿತ್ತೇನ ಅವಿಜ್ಜಂ ಭೇಚ್ಛತಿ, ವಿಜ್ಜಂ ಉಪ್ಪಾದೇಸ್ಸತಿ, ನಿಬ್ಬಾನಂ ಸಚ್ಛಿಕರಿಸ್ಸತೀತಿ ಠಾನಮೇತಂ ವಿಜ್ಜತಿ. ತಂ ಕಿಸ್ಸ ಹೇತು? ಸಮ್ಮಾಪಣಿಹಿತತ್ತಾ, ಭಿಕ್ಖವೇ, ಚಿತ್ತಸ್ಸಾ’’ತಿ. ದುತಿಯಂ.

೪೩. ‘‘ಇಧಾಹಂ ¶ [ಇದಾಹಂ (ಸೀ.)], ಭಿಕ್ಖವೇ, ಏಕಚ್ಚಂ ಪುಗ್ಗಲಂ ಪದುಟ್ಠಚಿತ್ತಂ ಏವಂ ಚೇತಸಾ ಚೇತೋ ಪರಿಚ್ಚ ಪಜಾನಾಮಿ – ‘ಇಮಮ್ಹಿ ಚೇ ಅಯಂ ಸಮಯೇ ಪುಗ್ಗಲೋ ಕಾಲಂ ಕರೇಯ್ಯ, ಯಥಾಭತಂ ನಿಕ್ಖಿತ್ತೋ ಏವಂ ನಿರಯೇ’. ತಂ ಕಿಸ್ಸ ಹೇತು? ಚಿತ್ತಂ ಹಿಸ್ಸ ¶ , ಭಿಕ್ಖವೇ, ಪದುಟ್ಠಂ. ‘‘ಚೇತೋಪದೋಸಹೇತು ಪನ, ಭಿಕ್ಖವೇ, ಏವಮಿಧೇಕಚ್ಚೇ ಸತ್ತಾ ಕಾಯಸ್ಸ ಭೇದಾ ಪರಂ ಮರಣಾ ಅಪಾಯಂ ದುಗ್ಗತಿಂ ವಿನಿಪಾತಂ ನಿರಯಂ ಉಪಪಜ್ಜನ್ತೀ’’ತಿ. ತತಿಯಂ.

೪೪. ‘‘ಇಧಾಹಂ, ಭಿಕ್ಖವೇ, ಏಕಚ್ಚಂ ಪುಗ್ಗಲಂ ಪಸನ್ನಚಿತ್ತಂ ಏವಂ ಚೇತಸಾ ಚೇತೋ ಪರಿಚ್ಚ ಪಜಾನಾಮಿ – ‘ಇಮಮ್ಹಿ ಚೇ ಅಯಂ ¶ ಸಮಯೇ ಪುಗ್ಗಲೋ ಕಾಲಂ ಕರೇಯ್ಯ, ಯಥಾಭತಂ ನಿಕ್ಖಿತ್ತೋ ಏವಂ ಸಗ್ಗೇ’. ತಂ ಕಿಸ್ಸ ಹೇತು? ಚಿತ್ತಂ ಹಿಸ್ಸ, ಭಿಕ್ಖವೇ, ಪಸನ್ನಂ. ‘‘ಚೇತೋಪಸಾದಹೇತು ಪನ, ಭಿಕ್ಖವೇ, ಏವಮಿಧೇಕಚ್ಚೇ ಸತ್ತಾ ಕಾಯಸ್ಸ ಭೇದಾ ಪರಂ ಮರಣಾ ಸುಗತಿಂ ಸಗ್ಗಂ ಲೋಕಂ ಉಪಪಜ್ಜನ್ತೀ’’ತಿ. ಚತುತ್ಥಂ.

೪೫. ‘‘ಸೇಯ್ಯಥಾಪಿ ¶ , ಭಿಕ್ಖವೇ, ಉದಕರಹದೋ ಆವಿಲೋ ಲುಳಿತೋ ಕಲಲೀಭೂತೋ ತತ್ಥ ಚಕ್ಖುಮಾ ಪುರಿಸೋ ತೀರೇ ಠಿತೋ ನ ಪಸ್ಸೇಯ್ಯ ಸಿಪ್ಪಿಸಮ್ಬುಕಮ್ಪಿ [ಸಿಪ್ಪಿಕಸಮ್ಬುಕಮ್ಪಿ (ಕ.)] ಸಕ್ಖರಕಠಲಮ್ಪಿ ಮಚ್ಛಗುಮ್ಬಮ್ಪಿ ಚರನ್ತಮ್ಪಿ ತಿಟ್ಠನ್ತಮ್ಪಿ. ತಂ ಕಿಸ್ಸ ಹೇತು? ಆವಿಲತ್ತಾ, ಭಿಕ್ಖವೇ, ಉದಕಸ್ಸ. ಏವಮೇವಂ ಖೋ, ಭಿಕ್ಖವೇ, ಸೋ ವತ ಭಿಕ್ಖು ಆವಿಲೇನ ಚಿತ್ತೇನ ಅತ್ತತ್ಥಂ ವಾ ಞಸ್ಸತಿ ಪರತ್ಥಂ ವಾ ಞಸ್ಸತಿ ಉಭಯತ್ಥಂ ವಾ ಞಸ್ಸತಿ ಉತ್ತರಿಂ ವಾ ಮನುಸ್ಸಧಮ್ಮಾ ಅಲಮರಿಯಞಾಣದಸ್ಸನವಿಸೇಸಂ ಸಚ್ಛಿಕರಿಸ್ಸತೀತಿ ನೇತಂ ಠಾನಂ ವಿಜ್ಜತಿ. ತಂ ಕಿಸ್ಸ ಹೇತು? ಆವಿಲತ್ತಾ, ಭಿಕ್ಖವೇ, ಚಿತ್ತಸ್ಸಾ’’ತಿ. ಪಞ್ಚಮಂ.

೪೬. ‘‘ಸೇಯ್ಯಥಾಪಿ, ಭಿಕ್ಖವೇ, ಉದಕರಹದೋ ಅಚ್ಛೋ ವಿಪ್ಪಸನ್ನೋ ಅನಾವಿಲೋ ತತ್ಥ ಚಕ್ಖುಮಾ ಪುರಿಸೋ ತೀರೇ ಠಿತೋ ಪಸ್ಸೇಯ್ಯ ಸಿಪ್ಪಿಸಮ್ಬುಕಮ್ಪಿ ಸಕ್ಖರಕಠಲಮ್ಪಿ ಮಚ್ಛಗುಮ್ಬಮ್ಪಿ ಚರನ್ತಮ್ಪಿ ತಿಟ್ಠನ್ತಮ್ಪಿ. ತಂ ಕಿಸ್ಸ ಹೇತು? ಅನಾವಿಲತ್ತಾ, ಭಿಕ್ಖವೇ, ಉದಕಸ್ಸ. ಏವಮೇವಂ ಖೋ, ಭಿಕ್ಖವೇ, ಸೋ ವತ ಭಿಕ್ಖು ಅನಾವಿಲೇನ ¶ ಚಿತ್ತೇನ ಅತ್ತತ್ಥಂ ವಾ ಞಸ್ಸತಿ ಪರತ್ಥಂ ವಾ ಞಸ್ಸತಿ ಉಭಯತ್ಥಂ ವಾ ಞಸ್ಸತಿ ಉತ್ತರಿಂ ವಾ ಮನುಸ್ಸಧಮ್ಮಾ ಅಲಮರಿಯಞಾಣದಸ್ಸನವಿಸೇಸಂ ಸಚ್ಛಿಕರಿಸ್ಸತೀತಿ ಠಾನಮೇತಂ ವಿಜ್ಜತಿ. ತಂ ಕಿಸ್ಸ ಹೇತು? ಅನಾವಿಲತ್ತಾ, ಭಿಕ್ಖವೇ, ಚಿತ್ತಸ್ಸಾ’’ತಿ. ಛಟ್ಠಂ.

೪೭. ‘‘ಸೇಯ್ಯಥಾಪಿ, ಭಿಕ್ಖವೇ, ಯಾನಿ ಕಾನಿಚಿ ರುಕ್ಖಜಾತಾನಂ ಫನ್ದನೋ ತೇಸಂ ಅಗ್ಗಮಕ್ಖಾಯತಿ ಯದಿದಂ ಮುದುತಾಯ ಚೇವ ಕಮ್ಮಞ್ಞತಾಯ ಚ. ಏವಮೇವಂ ಖೋ ಅಹಂ, ಭಿಕ್ಖವೇ ¶ , ನಾಞ್ಞಂ ಏಕಧಮ್ಮಮ್ಪಿ ಸಮನುಪಸ್ಸಾಮಿ ಯಂ ಏವಂ ಭಾವಿತಂ ಬಹುಲೀಕತಂ ಮುದು ಚ ಹೋತಿ ಕಮ್ಮಞ್ಞಞ್ಚ ಯಥಯಿದಂ ಚಿತ್ತಂ. ಚಿತ್ತಂ, ಭಿಕ್ಖವೇ, ಭಾವಿತಂ ಬಹುಲೀಕತಂ ಮುದು ಚ ಹೋತಿ ಕಮ್ಮಞ್ಞಞ್ಚ ಹೋತೀ’’ತಿ. ಸತ್ತಮಂ.

೪೮. ‘‘ನಾಹಂ ¶ , ಭಿಕ್ಖವೇ, ಅಞ್ಞಂ ಏಕಧಮ್ಮಮ್ಪಿ ಸಮನುಪಸ್ಸಾಮಿ ಯಂ ಏವಂ ಲಹುಪರಿವತ್ತಂ ಯಥಯಿದಂ ಚಿತ್ತಂ. ಯಾವಞ್ಚಿದಂ, ಭಿಕ್ಖವೇ, ಉಪಮಾಪಿ ನ ಸುಕರಾ ಯಾವ ಲಹುಪರಿವತ್ತಂ ಚಿತ್ತ’’ನ್ತಿ. ಅಟ್ಠಮಂ.

೪೯. ‘‘ಪಭಸ್ಸರಮಿದಂ, ಭಿಕ್ಖವೇ, ಚಿತ್ತಂ. ತಞ್ಚ ಖೋ ಆಗನ್ತುಕೇಹಿ ಉಪಕ್ಕಿಲೇಸೇಹಿ ಉಪಕ್ಕಿಲಿಟ್ಠ’’ನ್ತಿ. ನವಮಂ.

೫೦. ‘‘ಪಭಸ್ಸರಮಿದಂ, ಭಿಕ್ಖವೇ, ಚಿತ್ತಂ. ತಞ್ಚ ಖೋ ಆಗನ್ತುಕೇಹಿ ಉಪಕ್ಕಿಲೇಸೇಹಿ ವಿಪ್ಪಮುತ್ತ’’ನ್ತಿ. ದಸಮಂ.

೫೧. ‘‘ಪಭಸ್ಸರಮಿದಂ ¶ , ಭಿಕ್ಖವೇ, ಚಿತ್ತಂ. ತಞ್ಚ ಖೋ ಆಗನ್ತುಕೇಹಿ ಉಪಕ್ಕಿಲೇಸೇಹಿ ಉಪಕ್ಕಿಲಿಟ್ಠಂ. ತಂ ಅಸ್ಸುತವಾ ಪುಥುಜ್ಜನೋ ಯಥಾಭೂತಂ ನಪ್ಪಜಾನಾತಿ. ತಸ್ಮಾ ‘ಅಸ್ಸುತವತೋ ಪುಥುಜ್ಜನಸ್ಸ ಚಿತ್ತಭಾವನಾ ನತ್ಥೀ’ತಿ ವದಾಮೀ’’ತಿ. ಪಠಮಂ.

೫೨. ‘‘ಪಭಸ್ಸರಮಿದಂ ¶ , ಭಿಕ್ಖವೇ, ಚಿತ್ತಂ. ತಞ್ಚ ಖೋ ಆಗನ್ತುಕೇಹಿ ಉಪಕ್ಕಿಲೇಸೇಹಿ ವಿಪ್ಪಮುತ್ತಂ. ತಂ ಸುತವಾ ಅರಿಯಸಾವಕೋ ಯಥಾಭೂತಂ ಪಜಾನಾತಿ. ತಸ್ಮಾ ‘ಸುತವತೋ ಅರಿಯಸಾವಕಸ್ಸ ಚಿತ್ತಭಾವನಾ ಅತ್ಥೀ’ತಿ ವದಾಮೀ’’ತಿ. ದುತಿಯಂ.

೫೩. ‘‘ಅಚ್ಛರಾಸಙ್ಘಾತಮತ್ತಮ್ಪಿ ಚೇ, ಭಿಕ್ಖವೇ, ಭಿಕ್ಖು ಮೇತ್ತಾಚಿತ್ತಂ [ಮೇತ್ತಂ ಚಿತ್ತಂ (ಸೀ.), ಮೇತ್ತಚಿತ್ತಂ (ಸ್ಯಾ. ಕಂ. ಪೀ. ಕ.)] ಆಸೇವತಿ; ಅಯಂ ವುಚ್ಚತಿ, ಭಿಕ್ಖವೇ – ‘ಭಿಕ್ಖು ಅರಿತ್ತಜ್ಝಾನೋ ವಿಹರತಿ ಸತ್ಥುಸಾಸನಕರೋ ಓವಾದಪತಿಕರೋ, ಅಮೋಘಂ ರಟ್ಠಪಿಣ್ಡಂ ಭುಞ್ಜತಿ’. ಕೋ ಪನ ವಾದೋ ಯೇ ನಂ ಬಹುಲೀಕರೋನ್ತೀ’’ತಿ! ತತಿಯಂ.

೫೪. ‘‘ಅಚ್ಛರಾಸಙ್ಘಾತಮತ್ತಮ್ಪಿ ¶ ಚೇ, ಭಿಕ್ಖವೇ, ಭಿಕ್ಖು ಮೇತ್ತಾಚಿತ್ತಂ ಭಾವೇತಿ; ಅಯಂ ವುಚ್ಚತಿ, ಭಿಕ್ಖವೇ – ‘ಭಿಕ್ಖು ಅರಿತ್ತಜ್ಝಾನೋ ವಿಹರತಿ ಸತ್ಥುಸಾಸನಕರೋ ಓವಾದಪತಿಕರೋ, ಅಮೋಘಂ ರಟ್ಠಪಿಣ್ಡಂ ಭುಞ್ಜತಿ’. ಕೋ ಪನ ವಾದೋ ಯೇ ನಂ ಬಹುಲೀಕರೋನ್ತೀ’’ತಿ! ಚತುತ್ಥಂ.

೫೫. ‘‘ಅಚ್ಛರಾಸಙ್ಘಾತಮತ್ತಮ್ಪಿ ¶ ಚೇ, ಭಿಕ್ಖವೇ, ಭಿಕ್ಖು ಮೇತ್ತಾಚಿತ್ತಂ ಮನಸಿ ಕರೋತಿ; ಅಯಂ ವುಚ್ಚತಿ, ಭಿಕ್ಖವೇ – ‘ಭಿಕ್ಖು ಅರಿತ್ತಜ್ಝಾನೋ ವಿಹರತಿ ಸತ್ಥುಸಾಸನಕರೋ ಓವಾದಪತಿಕರೋ ಅಮೋಘಂ ರಟ್ಠಪಿಣ್ಡಂ ಭುಞ್ಜತಿ’. ಕೋ ಪನ ವಾದೋ ಯೇ ನಂ ಬಹುಲೀಕರೋನ್ತೀ’’ತಿ! ಪಞ್ಚಮಂ.

೫೬. ‘‘ಯೇ ಕೇಚಿ, ಭಿಕ್ಖವೇ, ಧಮ್ಮಾ ಅಕುಸಲಾ ಅಕುಸಲಭಾಗಿಯಾ ಅಕುಸಲಪಕ್ಖಿಕಾ, ಸಬ್ಬೇ ತೇ ಮನೋಪುಬ್ಬಙ್ಗಮಾ. ಮನೋ ತೇಸಂ ಧಮ್ಮಾನಂ ಪಠಮಂ ಉಪ್ಪಜ್ಜತಿ, ಅನ್ವದೇವ ಅಕುಸಲಾ ಧಮ್ಮಾ’’ತಿ. ಛಟ್ಠಂ.

೫೭. ‘‘ಯೇ ¶ ಕೇಚಿ, ಭಿಕ್ಖವೇ, ಧಮ್ಮಾ ಕುಸಲಾ ಕುಸಲಭಾಗಿಯಾ ಕುಸಲಪಕ್ಖಿಕಾ, ಸಬ್ಬೇ ತೇ ಮನೋಪುಬ್ಬಙ್ಗಮಾ. ಮನೋ ತೇಸಂ ಧಮ್ಮಾನಂ ಪಠಮಂ ಉಪ್ಪಜ್ಜತಿ, ಅನ್ವದೇವ ¶ ಕುಸಲಾ ಧಮ್ಮಾ’’ತಿ. ಸತ್ತಮಂ.

೫೮. ‘‘ನಾಹಂ, ಭಿಕ್ಖವೇ, ಅಞ್ಞಂ ಏಕಧಮ್ಮಮ್ಪಿ ಸಮನುಪಸ್ಸಾಮಿ ಯೇನ ಅನುಪ್ಪನ್ನಾ ವಾ ಅಕುಸಲಾ ಧಮ್ಮಾ ಉಪ್ಪಜ್ಜನ್ತಿ ಉಪ್ಪನ್ನಾ ವಾ ಕುಸಲಾ ಧಮ್ಮಾ ಪರಿಹಾಯನ್ತಿ ಯಥಯಿದಂ, ಭಿಕ್ಖವೇ, ಪಮಾದೋ. ಪಮತ್ತಸ್ಸ, ಭಿಕ್ಖವೇ, ಅನುಪ್ಪನ್ನಾ ಚೇವ ಅಕುಸಲಾ ಧಮ್ಮಾ ಉಪ್ಪಜ್ಜನ್ತಿ ಉಪ್ಪನ್ನಾ ಚ ಕುಸಲಾ ಧಮ್ಮಾ ಪರಿಹಾಯನ್ತೀ’’ತಿ. ಅಟ್ಠಮಂ.

೫೯. ‘‘ನಾಹಂ, ಭಿಕ್ಖವೇ, ಅಞ್ಞಂ ಏಕಧಮ್ಮಮ್ಪಿ ಸಮನುಪಸ್ಸಾಮಿ ಯೇನ ಅನುಪ್ಪನ್ನಾ ವಾ ಕುಸಲಾ ಧಮ್ಮಾ ಉಪ್ಪಜ್ಜನ್ತಿ ಉಪ್ಪನ್ನಾ ವಾ ಅಕುಸಲಾ ಧಮ್ಮಾ ಪರಿಹಾಯನ್ತಿ ಯಥಯಿದಂ, ಭಿಕ್ಖವೇ, ಅಪ್ಪಮಾದೋ. ಅಪ್ಪಮತ್ತಸ್ಸ, ಭಿಕ್ಖವೇ, ಅನುಪ್ಪನ್ನಾ ಚೇವ ಕುಸಲಾ ಧಮ್ಮಾ ಉಪ್ಪಜ್ಜನ್ತಿ ಉಪ್ಪನ್ನಾ ಚ ಅಕುಸಲಾ ಧಮ್ಮಾ ಪರಿಹಾಯನ್ತೀ’’ತಿ. ನವಮಂ.

೬೦. ‘‘ನಾಹಂ, ಭಿಕ್ಖವೇ, ಅಞ್ಞಂ ಏಕಧಮ್ಮಮ್ಪಿ ಸಮನುಪಸ್ಸಾಮಿ ಯೇನ ಅನುಪ್ಪನ್ನಾ ವಾ ಅಕುಸಲಾ ಧಮ್ಮಾ ಉಪ್ಪಜ್ಜನ್ತಿ ಉಪ್ಪನ್ನಾ ವಾ ಕುಸಲಾ ಧಮ್ಮಾ ಪರಿಹಾಯನ್ತಿ ಯಥಯಿದಂ, ಭಿಕ್ಖವೇ, ಕೋಸಜ್ಜಂ. ಕುಸೀತಸ್ಸ, ಭಿಕ್ಖವೇ, ಅನುಪ್ಪನ್ನಾ ಚೇವ ಅಕುಸಲಾ ಧಮ್ಮಾ ಉಪ್ಪಜ್ಜನ್ತಿ ಉಪ್ಪನ್ನಾ ಚ ಕುಸಲಾ ಧಮ್ಮಾ ಪರಿಹಾಯನ್ತೀ’’ತಿ. ದಸಮಂ.

೬೧. ‘‘ನಾಹಂ ¶ ¶ ¶ , ಭಿಕ್ಖವೇ, ಅಞ್ಞಂ ಏಕಧಮ್ಮಮ್ಪಿ ಸಮನುಪಸ್ಸಾಮಿ ಯೇನ ಅನುಪ್ಪನ್ನಾ ವಾ ಕುಸಲಾ ಧಮ್ಮಾ ಉಪ್ಪಜ್ಜನ್ತಿ ಉಪ್ಪನ್ನಾ ವಾ ಅಕುಸಲಾ ಧಮ್ಮಾ ಪರಿಹಾಯನ್ತಿ ಯಥಯಿದಂ, ಭಿಕ್ಖವೇ, ವೀರಿಯಾರಮ್ಭೋ [ವಿರಿಯಾರಮ್ಭೋ (ಸೀ. ಸ್ಯಾ. ಕಂ. ಪೀ.)]. ಆರದ್ಧವೀರಿಯಸ್ಸ, ಭಿಕ್ಖವೇ, ಅನುಪ್ಪನ್ನಾ ಚೇವ ಕುಸಲಾ ಧಮ್ಮಾ ಉಪ್ಪಜ್ಜನ್ತಿ ಉಪ್ಪನ್ನಾ ಚ ಅಕುಸಲಾ ¶ ಧಮ್ಮಾ ಪರಿಹಾಯನ್ತೀ’’ತಿ. ಪಠಮಂ.

೬೨. ‘‘ನಾಹಂ, ಭಿಕ್ಖವೇ, ಅಞ್ಞಂ ಏಕಧಮ್ಮಮ್ಪಿ ಸಮನುಪಸ್ಸಾಮಿ ಯೇನ ಅನುಪ್ಪನ್ನಾ ವಾ ಅಕುಸಲಾ ಧಮ್ಮಾ ಉಪ್ಪಜ್ಜನ್ತಿ ಉಪ್ಪನ್ನಾ ವಾ ಕುಸಲಾ ಧಮ್ಮಾ ಪರಿಹಾಯನ್ತಿ ಯಥಯಿದಂ, ಭಿಕ್ಖವೇ, ಮಹಿಚ್ಛತಾ. ಮಹಿಚ್ಛಸ್ಸ, ಭಿಕ್ಖವೇ, ಅನುಪ್ಪನ್ನಾ ಚೇವ ಅಕುಸಲಾ ಧಮ್ಮಾ ಉಪ್ಪಜ್ಜನ್ತಿ ಉಪ್ಪನ್ನಾ ಚ ಕುಸಲಾ ಧಮ್ಮಾ ಪರಿಹಾಯನ್ತೀ’’ತಿ. ದುತಿಯಂ.

೬೩. ‘‘ನಾಹಂ, ಭಿಕ್ಖವೇ, ಅಞ್ಞಂ ಏಕಧಮ್ಮಮ್ಪಿ ಸಮನುಪಸ್ಸಾಮಿ ಯೇನ ಅನುಪ್ಪನ್ನಾ ವಾ ಕುಸಲಾ ಧಮ್ಮಾ ಉಪ್ಪಜ್ಜನ್ತಿ ಉಪ್ಪನ್ನಾ ವಾ ಅಕುಸಲಾ ಧಮ್ಮಾ ಪರಿಹಾಯನ್ತಿ ಯಥಯಿದಂ, ಭಿಕ್ಖವೇ, ಅಪ್ಪಿಚ್ಛತಾ. ಅಪ್ಪಿಚ್ಛಸ್ಸ, ಭಿಕ್ಖವೇ, ಅನುಪ್ಪನ್ನಾ ಚೇವ ಕುಸಲಾ ಧಮ್ಮಾ ಉಪ್ಪಜ್ಜನ್ತಿ ಉಪ್ಪನ್ನಾ ಚ ಅಕುಸಲಾ ಧಮ್ಮಾ ಪರಿಹಾಯನ್ತೀ’’ತಿ. ತತಿಯಂ.

೬೪. ‘‘ನಾಹಂ, ಭಿಕ್ಖವೇ, ಅಞ್ಞಂ ಏಕಧಮ್ಮಮ್ಪಿ ಸಮನುಪಸ್ಸಾಮಿ ಯೇನ ಅನುಪ್ಪನ್ನಾ ವಾ ಅಕುಸಲಾ ಧಮ್ಮಾ ಉಪ್ಪಜ್ಜನ್ತಿ ಉಪ್ಪನ್ನಾ ವಾ ಕುಸಲಾ ಧಮ್ಮಾ ಪರಿಹಾಯನ್ತಿ ಯಥಯಿದಂ, ಭಿಕ್ಖವೇ, ಅಸನ್ತುಟ್ಠಿತಾ. ಅಸನ್ತುಟ್ಠಸ್ಸ, ಭಿಕ್ಖವೇ, ಅನುಪ್ಪನ್ನಾ ಚೇವ ಅಕುಸಲಾ ಧಮ್ಮಾ ಉಪ್ಪಜ್ಜನ್ತಿ ಉಪ್ಪನ್ನಾ ಚ ಕುಸಲಾ ಧಮ್ಮಾ ಪರಿಹಾಯನ್ತೀ’’ತಿ. ಚತುತ್ಥಂ.

೬೫. ‘‘ನಾಹಂ, ಭಿಕ್ಖವೇ, ಅಞ್ಞಂ ಏಕಧಮ್ಮಮ್ಪಿ ಸಮನುಪಸ್ಸಾಮಿ ಯೇನ ಅನುಪ್ಪನ್ನಾ ವಾ ಕುಸಲಾ ಧಮ್ಮಾ ಉಪ್ಪಜ್ಜನ್ತಿ ಉಪ್ಪನ್ನಾ ವಾ ಅಕುಸಲಾ ಧಮ್ಮಾ ಪರಿಹಾಯನ್ತಿ ಯಥಯಿದಂ, ಭಿಕ್ಖವೇ, ಸನ್ತುಟ್ಠಿತಾ. ಸನ್ತುಟ್ಠಸ್ಸ, ಭಿಕ್ಖವೇ, ಅನುಪ್ಪನ್ನಾ ಚೇವ ಕುಸಲಾ ಧಮ್ಮಾ ಉಪ್ಪಜ್ಜನ್ತಿ ಉಪ್ಪನ್ನಾ ಚ ಅಕುಸಲಾ ಧಮ್ಮಾ ¶ ಪರಿಹಾಯನ್ತೀ’’ತಿ. ಪಞ್ಚಮಂ.

೬೬. ‘‘ನಾಹಂ ¶ ¶ , ಭಿಕ್ಖವೇ, ಅಞ್ಞಂ ಏಕಧಮ್ಮಮ್ಪಿ ಸಮನುಪಸ್ಸಾಮಿ ಯೇನ ಅನುಪ್ಪನ್ನಾ ವಾ ಅಕುಸಲಾ ಧಮ್ಮಾ ಉಪ್ಪಜ್ಜನ್ತಿ ಉಪ್ಪನ್ನಾ ವಾ ಕುಸಲಾ ಧಮ್ಮಾ ಪರಿಹಾಯನ್ತಿ ಯಥಯಿದಂ, ಭಿಕ್ಖವೇ, ಅಯೋನಿಸೋಮನಸಿಕಾರೋ. ಅಯೋನಿಸೋ, ಭಿಕ್ಖವೇ, ಮನಸಿ ಕರೋತೋ ಅನುಪ್ಪನ್ನಾ ಚೇವ ಅಕುಸಲಾ ಧಮ್ಮಾ ಉಪ್ಪಜ್ಜನ್ತಿ ಉಪ್ಪನ್ನಾ ಚ ಕುಸಲಾ ಧಮ್ಮಾ ಪರಿಹಾಯನ್ತೀ’’ತಿ. ಛಟ್ಠಂ.

೬೭. ‘‘ನಾಹಂ ¶ , ಭಿಕ್ಖವೇ, ಅಞ್ಞಂ ಏಕಧಮ್ಮಮ್ಪಿ ಸಮನುಪಸ್ಸಾಮಿ ಯೇನ ಅನುಪ್ಪನ್ನಾ ವಾ ಕುಸಲಾ ಧಮ್ಮಾ ಉಪ್ಪಜ್ಜನ್ತಿ ಉಪ್ಪನ್ನಾ ವಾ ಅಕುಸಲಾ ಧಮ್ಮಾ ಪರಿಹಾಯನ್ತಿ ಯಥಯಿದಂ, ಭಿಕ್ಖವೇ, ಯೋನಿಸೋಮನಸಿಕಾರೋ. ಯೋನಿಸೋ, ಭಿಕ್ಖವೇ, ಮನಸಿ ಕರೋತೋ ಅನುಪ್ಪನ್ನಾ ಚೇವ ಕುಸಲಾ ಧಮ್ಮಾ ಉಪ್ಪಜ್ಜನ್ತಿ ಉಪ್ಪನ್ನಾ ಚ ಅಕುಸಲಾ ಧಮ್ಮಾ ಪರಿಹಾಯನ್ತೀ’’ತಿ. ಸತ್ತಮಂ.

೬೮. ‘‘ನಾಹಂ, ಭಿಕ್ಖವೇ, ಅಞ್ಞಂ ಏಕಧಮ್ಮಮ್ಪಿ ಸಮನುಪಸ್ಸಾಮಿ ಯೇನ ಅನುಪ್ಪನ್ನಾ ವಾ ಅಕುಸಲಾ ಧಮ್ಮಾ ಉಪ್ಪಜ್ಜನ್ತಿ ಉಪ್ಪನ್ನಾ ವಾ ಕುಸಲಾ ಧಮ್ಮಾ ಪರಿಹಾಯನ್ತಿ ಯಥಯಿದಂ, ಭಿಕ್ಖವೇ, ಅಸಮ್ಪಜಞ್ಞಂ. ಅಸಮ್ಪಜಾನಸ್ಸ, ಭಿಕ್ಖವೇ, ಅನುಪ್ಪನ್ನಾ ಚೇವ ಅಕುಸಲಾ ಧಮ್ಮಾ ಉಪ್ಪಜ್ಜನ್ತಿ ಉಪ್ಪನ್ನಾ ಚ ಕುಸಲಾ ಧಮ್ಮಾ ಪರಿಹಾಯನ್ತೀ’’ತಿ. ಅಟ್ಠಮಂ.

೬೯. ‘‘ನಾಹಂ, ಭಿಕ್ಖವೇ, ಅಞ್ಞಂ ಏಕಧಮ್ಮಮ್ಪಿ ಸಮನುಪಸ್ಸಾಮಿ ಯೇನ ಅನುಪ್ಪನ್ನಾ ವಾ ಕುಸಲಾ ಧಮ್ಮಾ ಉಪ್ಪಜ್ಜನ್ತಿ ಉಪ್ಪನ್ನಾ ವಾ ಅಕುಸಲಾ ಧಮ್ಮಾ ಪರಿಹಾಯನ್ತಿ ಯಥಯಿದಂ, ಭಿಕ್ಖವೇ, ಸಮ್ಪಜಞ್ಞಂ. ಸಮ್ಪಜಾನಸ್ಸ, ಭಿಕ್ಖವೇ, ಅನುಪ್ಪನ್ನಾ ಚೇವ ಕುಸಲಾ ಧಮ್ಮಾ ಉಪ್ಪಜ್ಜನ್ತಿ ಉಪ್ಪನ್ನಾ ಚ ಅಕುಸಲಾ ¶ ಧಮ್ಮಾ ಪರಿಹಾಯನ್ತೀ’’ತಿ. ನವಮಂ.

೭೦. ‘‘ನಾಹಂ, ಭಿಕ್ಖವೇ, ಅಞ್ಞಂ ಏಕಧಮ್ಮಮ್ಪಿ ಸಮನುಪಸ್ಸಾಮಿ ಯೇನ ಅನುಪ್ಪನ್ನಾ ವಾ ಅಕುಸಲಾ ಧಮ್ಮಾ ಉಪ್ಪಜ್ಜನ್ತಿ ಉಪ್ಪನ್ನಾ ವಾ ಕುಸಲಾ ಧಮ್ಮಾ ಪರಿಹಾಯನ್ತಿ ಯಥಯಿದಂ, ಭಿಕ್ಖವೇ, ಪಾಪಮಿತ್ತತಾ. ಪಾಪಮಿತ್ತಸ್ಸ, ಭಿಕ್ಖವೇ, ಅನುಪ್ಪನ್ನಾ ಚೇವ ಅಕುಸಲಾ ಧಮ್ಮಾ ಉಪ್ಪಜ್ಜನ್ತಿ ಉಪ್ಪನ್ನಾ ಚ ಕುಸಲಾ ಧಮ್ಮಾ ಪರಿಹಾಯನ್ತೀ’’ತಿ. ದಸಮಂ.

೭೧. ‘‘ನಾಹಂ ¶ ¶ , ಭಿಕ್ಖವೇ, ಅಞ್ಞಂ ಏಕಧಮ್ಮಮ್ಪಿ ಸಮನುಪಸ್ಸಾಮಿ ಯೇನ ಅನುಪ್ಪನ್ನಾ ವಾ ಕುಸಲಾ ಧಮ್ಮಾ ಉಪ್ಪಜ್ಜನ್ತಿ ಉಪ್ಪನ್ನಾ ವಾ ಅಕುಸಲಾ ಧಮ್ಮಾ ಪರಿಹಾಯನ್ತಿ ಯಥಯಿದಂ, ಭಿಕ್ಖವೇ, ಕಲ್ಯಾಣಮಿತ್ತತಾ. ಕಲ್ಯಾಣಮಿತ್ತಸ್ಸ, ಭಿಕ್ಖವೇ, ಅನುಪ್ಪನ್ನಾ ಚೇವ ಕುಸಲಾ ಧಮ್ಮಾ ಉಪ್ಪಜ್ಜನ್ತಿ ಉಪ್ಪನ್ನಾ ಚ ಅಕುಸಲಾ ಧಮ್ಮಾ ಪರಿಹಾಯನ್ತೀ’’ತಿ. ಪಠಮಂ.

೭೨. ‘‘ನಾಹಂ, ಭಿಕ್ಖವೇ, ಅಞ್ಞಂ ಏಕಧಮ್ಮಮ್ಪಿ ಸಮನುಪಸ್ಸಾಮಿ ಯೇನ ಅನುಪ್ಪನ್ನಾ ವಾ ಅಕುಸಲಾ ಧಮ್ಮಾ ಉಪ್ಪಜ್ಜನ್ತಿ ಉಪ್ಪನ್ನಾ ವಾ ಕುಸಲಾ ಧಮ್ಮಾ ಪರಿಹಾಯನ್ತಿ ಯಥಯಿದಂ, ಭಿಕ್ಖವೇ, ಅನುಯೋಗೋ ಅಕುಸಲಾನಂ ಧಮ್ಮಾನಂ, ಅನನುಯೋಗೋ ಕುಸಲಾನಂ ¶ ಧಮ್ಮಾನಂ. ಅನುಯೋಗಾ, ಭಿಕ್ಖವೇ, ಅಕುಸಲಾನಂ ಧಮ್ಮಾನಂ, ಅನನುಯೋಗಾ ಕುಸಲಾನಂ ಧಮ್ಮಾನಂ ಅನುಪ್ಪನ್ನಾ ಚೇವ ಅಕುಸಲಾ ಧಮ್ಮಾ ಉಪ್ಪಜ್ಜನ್ತಿ ಉಪ್ಪನ್ನಾ ಚ ಕುಸಲಾ ಧಮ್ಮಾ ಪರಿಹಾಯನ್ತೀ’’ತಿ. ದುತಿಯಂ.

೭೩. ‘‘ನಾಹಂ, ಭಿಕ್ಖವೇ, ಅಞ್ಞಂ ಏಕಧಮ್ಮಮ್ಪಿ ಸಮನುಪಸ್ಸಾಮಿ ಯೇನ ಅನುಪ್ಪನ್ನಾ ವಾ ಕುಸಲಾ ಧಮ್ಮಾ ಉಪ್ಪಜ್ಜನ್ತಿ ಉಪ್ಪನ್ನಾ ವಾ ಅಕುಸಲಾ ಧಮ್ಮಾ ¶ ಪರಿಹಾಯನ್ತಿ ಯಥಯಿದಂ, ಭಿಕ್ಖವೇ, ಅನುಯೋಗೋ ಕುಸಲಾನಂ ಧಮ್ಮಾನಂ, ಅನನುಯೋಗೋ ಅಕುಸಲಾನಂ ಧಮ್ಮಾನಂ. ಅನುಯೋಗಾ, ಭಿಕ್ಖವೇ, ಕುಸಲಾನಂ ಧಮ್ಮಾನಂ, ಅನನುಯೋಗಾ ಅಕುಸಲಾನಂ ಧಮ್ಮಾನಂ ಅನುಪ್ಪನ್ನಾ ಚೇವ ಕುಸಲಾ ಧಮ್ಮಾ ಉಪ್ಪಜ್ಜನ್ತಿ ಉಪ್ಪನ್ನಾ ಚ ಅಕುಸಲಾ ಧಮ್ಮಾ ಪರಿಹಾಯನ್ತೀ’’ತಿ. ತತಿಯಂ.

೭೪. ‘‘ನಾಹಂ, ಭಿಕ್ಖವೇ, ಅಞ್ಞಂ ಏಕಧಮ್ಮಮ್ಪಿ ಸಮನುಪಸ್ಸಾಮಿ ಯೇನ ಅನುಪ್ಪನ್ನಾ ವಾ ಬೋಜ್ಝಙ್ಗಾ ನುಪ್ಪಜ್ಜನ್ತಿ ಉಪ್ಪನ್ನಾ ವಾ ಬೋಜ್ಝಙ್ಗಾ ನ ಭಾವನಾಪಾರಿಪೂರಿಂ ಗಚ್ಛನ್ತಿ ಯಥಯಿದಂ, ಭಿಕ್ಖವೇ, ಅಯೋನಿಸೋಮನಸಿಕಾರೋ. ಅಯೋನಿಸೋ, ಭಿಕ್ಖವೇ, ಮನಸಿ ಕರೋತೋ ಅನುಪ್ಪನ್ನಾ ಚೇವ ಬೋಜ್ಝಙ್ಗಾ ನುಪ್ಪಜ್ಜನ್ತಿ ಉಪ್ಪನ್ನಾ ಚ ಬೋಜ್ಝಙ್ಗಾ ನ ಭಾವನಾಪಾರಿಪೂರಿಂ ಗಚ್ಛನ್ತೀ’’ತಿ. ಚತುತ್ಥಂ.

೭೫. ‘‘ನಾಹಂ, ಭಿಕ್ಖವೇ, ಅಞ್ಞಂ ಏಕಧಮ್ಮಮ್ಪಿ ಸಮನುಪಸ್ಸಾಮಿ ಯೇನ ಅನುಪ್ಪನ್ನಾ ವಾ ಬೋಜ್ಝಙ್ಗಾ ಉಪ್ಪಜ್ಜನ್ತಿ ಉಪ್ಪನ್ನಾ ವಾ ಬೋಜ್ಝಙ್ಗಾ ಭಾವನಾಪಾರಿಪೂರಿಂ ಗಚ್ಛನ್ತಿ ಯಥಯಿದಂ, ಭಿಕ್ಖವೇ, ಯೋನಿಸೋಮನಸಿಕಾರೋ ¶ . ಯೋನಿಸೋ ¶ , ಭಿಕ್ಖವೇ, ಮನಸಿ ಕರೋತೋ ಅನುಪ್ಪನ್ನಾ ಚೇವ ಬೋಜ್ಝಙ್ಗಾ ಉಪ್ಪಜ್ಜನ್ತಿ ಉಪ್ಪನ್ನಾ ಚ ಬೋಜ್ಝಙ್ಗಾ ಭಾವನಾಪಾರಿಪೂರಿಂ ಗಚ್ಛನ್ತೀ’’ತಿ. ಪಞ್ಚಮಂ.

೭೬. ‘‘ಅಪ್ಪಮತ್ತಿಕಾ ಏಸಾ, ಭಿಕ್ಖವೇ, ಪರಿಹಾನಿ ಯದಿದಂ ಞಾತಿಪರಿಹಾನಿ. ಏತಂ ಪತಿಕಿಟ್ಠಂ, ಭಿಕ್ಖವೇ, ಪರಿಹಾನೀನಂ ಯದಿದಂ ಪಞ್ಞಾಪರಿಹಾನೀ’’ತಿ. ಛಟ್ಠಂ.

೭೭. ‘‘ಅಪ್ಪಮತ್ತಿಕಾ ಏಸಾ, ಭಿಕ್ಖವೇ, ವುದ್ಧಿ ಯದಿದಂ ಞಾತಿವುದ್ಧಿ. ಏತದಗ್ಗಂ, ಭಿಕ್ಖವೇ, ವುದ್ಧೀನಂ ಯದಿದಂ ಪಞ್ಞಾವುದ್ಧಿ. ತಸ್ಮಾತಿಹ, ಭಿಕ್ಖವೇ, ಏವಂ ಸಿಕ್ಖಿತಬ್ಬಂ – ‘ಪಞ್ಞಾವುದ್ಧಿಯಾ ವದ್ಧಿಸ್ಸಾಮಾ’ತಿ. ಏವಞ್ಹಿ ವೋ, ಭಿಕ್ಖವೇ ¶ , ಸಿಕ್ಖಿತಬ್ಬ’’ನ್ತಿ. ಸತ್ತಮಂ.

೭೮. ‘‘ಅಪ್ಪಮತ್ತಿಕಾ ಏಸಾ, ಭಿಕ್ಖವೇ, ಪರಿಹಾನಿ ಯದಿದಂ ಭೋಗಪರಿಹಾನಿ. ಏತಂ ಪತಿಕಿಟ್ಠಂ, ಭಿಕ್ಖವೇ, ಪರಿಹಾನೀನಂ ಯದಿದಂ ಪಞ್ಞಾಪರಿಹಾನೀ’’ತಿ. ಅಟ್ಠಮಂ.

೭೯. ‘‘ಅಪ್ಪಮತ್ತಿಕಾ ¶ ಏಸಾ, ಭಿಕ್ಖವೇ, ವುದ್ಧಿ ಯದಿದಂ ಭೋಗವುದ್ಧಿ. ಏತದಗ್ಗಂ, ಭಿಕ್ಖವೇ, ವುದ್ಧೀನಂ ಯದಿದಂ ಪಞ್ಞಾವುದ್ಧಿ. ತಸ್ಮಾತಿಹ, ಭಿಕ್ಖವೇ, ಏವಂ ಸಿಕ್ಖಿತಬ್ಬಂ – ‘ಪಞ್ಞಾವುದ್ಧಿಯಾ ವದ್ಧಿಸ್ಸಾಮಾ’ತಿ. ಏವಞ್ಹಿ ವೋ, ಭಿಕ್ಖವೇ, ಸಿಕ್ಖಿತಬ್ಬ’’ನ್ತಿ. ನವಮಂ.

೮೦. ‘‘ಅಪ್ಪಮತ್ತಿಕಾ ಏಸಾ, ಭಿಕ್ಖವೇ, ಪರಿಹಾನಿ ಯದಿದಂ ಯಸೋಪರಿಹಾನಿ. ಏತಂ ಪತಿಕಿಟ್ಠಂ, ಭಿಕ್ಖವೇ, ಪರಿಹಾನೀನಂ ಯದಿದಂ ಪಞ್ಞಾಪರಿಹಾನೀ’’ತಿ. ದಸಮಂ.

೮೧. ‘‘ಅಪ್ಪಮತ್ತಿಕಾ ¶ ಏಸಾ, ಭಿಕ್ಖವೇ, ವುದ್ಧಿ ಯದಿದಂ ಯಸೋವುದ್ಧಿ. ಏತದಗ್ಗಂ, ಭಿಕ್ಖವೇ, ವುದ್ಧೀನಂ ಯದಿದಂ ಪಞ್ಞಾವುದ್ಧಿ. ತಸ್ಮಾತಿಹ, ಭಿಕ್ಖವೇ, ಏವಂ ಸಿಕ್ಖಿತಬ್ಬಂ – ‘ಪಞ್ಞಾವುದ್ಧಿಯಾ ವದ್ಧಿಸ್ಸಾಮಾ’ತಿ. ಏವಞ್ಹಿ ವೋ, ಭಿಕ್ಖವೇ, ಸಿಕ್ಖಿತಬ್ಬ’’ನ್ತಿ. ಪಠಮಂ.

೮೨. ‘‘ನಾಹಂ ¶ , ಭಿಕ್ಖವೇ, ಅಞ್ಞಂ ಏಕಧಮ್ಮಮ್ಪಿ ಸಮನುಪಸ್ಸಾಮಿ ಯೋ ಏವಂ ಮಹತೋ ಅನತ್ಥಾಯ ಸಂವತ್ತತಿ ಯಥಯಿದಂ, ಭಿಕ್ಖವೇ, ಪಮಾದೋ. ಪಮಾದೋ, ಭಿಕ್ಖವೇ, ಮಹತೋ ಅನತ್ಥಾಯ ಸಂವತ್ತತೀ’’ತಿ. ದುತಿಯಂ.

೮೩. ‘‘ನಾಹಂ, ಭಿಕ್ಖವೇ, ಅಞ್ಞಂ ಏಕಧಮ್ಮಮ್ಪಿ ಸಮನುಪಸ್ಸಾಮಿ ಯೋ ಏವಂ ಮಹತೋ ಅತ್ಥಾಯ ಸಂವತ್ತತಿ ಯಥಯಿದಂ, ಭಿಕ್ಖವೇ, ಅಪ್ಪಮಾದೋ. ಅಪ್ಪಮಾದೋ, ಭಿಕ್ಖವೇ, ಮಹತೋ ಅತ್ಥಾಯ ಸಂವತ್ತತೀ’’ತಿ. ತತಿಯಂ.

೮೪. ‘‘ನಾಹಂ ¶ , ಭಿಕ್ಖವೇ, ಅಞ್ಞಂ ಏಕಧಮ್ಮಮ್ಪಿ ಸಮನುಪಸ್ಸಾಮಿ ಯೋ ಏವಂ ಮಹತೋ ಅನತ್ಥಾಯ ಸಂವತ್ತತಿ ಯಥಯಿದಂ, ಭಿಕ್ಖವೇ, ಕೋಸಜ್ಜಂ. ಕೋಸಜ್ಜಂ, ಭಿಕ್ಖವೇ, ಮಹತೋ ಅನತ್ಥಾಯ ಸಂವತ್ತತೀ’’ತಿ. ಚತುತ್ಥಂ.

೮೫. ‘‘ನಾಹಂ, ಭಿಕ್ಖವೇ, ಅಞ್ಞಂ ಏಕಧಮ್ಮಮ್ಪಿ ಸಮನುಪಸ್ಸಾಮಿ ಯೋ ಏವಂ ಮಹತೋ ಅತ್ಥಾಯ ಸಂವತ್ತತಿ ಯಥಯಿದಂ, ಭಿಕ್ಖವೇ, ವೀರಿಯಾರಮ್ಭೋ. ವೀರಿಯಾರಮ್ಭೋ, ಭಿಕ್ಖವೇ, ಮಹತೋ ಅತ್ಥಾಯ ಸಂವತ್ತತೀ’’ತಿ. ಪಞ್ಚಮಂ.

೮೬. ‘‘ನಾಹಂ, ಭಿಕ್ಖವೇ, ಅಞ್ಞಂ ಏಕಧಮ್ಮಮ್ಪಿ ಸಮನುಪಸ್ಸಾಮಿ ಯೋ ಏವಂ ಮಹತೋ ಅನತ್ಥಾಯ ಸಂವತ್ತತಿ ಯಥಯಿದಂ, ಭಿಕ್ಖವೇ, ಮಹಿಚ್ಛತಾ. ಮಹಿಚ್ಛತಾ, ಭಿಕ್ಖವೇ, ಮಹತೋ ಅನತ್ಥಾಯ ಸಂವತ್ತತೀ’’ತಿ. ಛಟ್ಠಂ.

೮೭. ‘‘ನಾಹಂ ¶ ¶ , ಭಿಕ್ಖವೇ, ಅಞ್ಞಂ ಏಕಧಮ್ಮಮ್ಪಿ ಸಮನುಪಸ್ಸಾಮಿ ಯೋ ಏವಂ ಮಹತೋ ಅತ್ಥಾಯ ಸಂವತ್ತತಿ ಯಥಯಿದಂ, ಭಿಕ್ಖವೇ, ಅಪ್ಪಿಚ್ಛತಾ. ಅಪ್ಪಿಚ್ಛತಾ, ಭಿಕ್ಖವೇ, ಮಹತೋ ಅತ್ಥಾಯ ಸಂವತ್ತತೀ’’ತಿ. ಸತ್ತಮಂ.

೮೮. ‘‘ನಾಹಂ, ಭಿಕ್ಖವೇ, ಅಞ್ಞಂ ಏಕಧಮ್ಮಮ್ಪಿ ಸಮನುಪಸ್ಸಾಮಿ ಯೋ ಏವಂ ಮಹತೋ ಅನತ್ಥಾಯ ಸಂವತ್ತತಿ ಯಥಯಿದಂ, ಭಿಕ್ಖವೇ, ಅಸನ್ತುಟ್ಠಿತಾ. ಅಸನ್ತುಟ್ಠಿತಾ, ಭಿಕ್ಖವೇ, ಮಹತೋ ಅನತ್ಥಾಯ ಸಂವತ್ತತೀ’’ತಿ. ಅಟ್ಠಮಂ.

೮೯. ‘‘ನಾಹಂ, ಭಿಕ್ಖವೇ, ಅಞ್ಞಂ ಏಕಧಮ್ಮಮ್ಪಿ ಸಮನುಪಸ್ಸಾಮಿ ಯೋ ಏವಂ ಮಹತೋ ಅತ್ಥಾಯ ಸಂವತ್ತತಿ ಯಥಯಿದಂ, ಭಿಕ್ಖವೇ, ಸನ್ತುಟ್ಠಿತಾ. ಸನ್ತುಟ್ಠಿತಾ, ಭಿಕ್ಖವೇ, ಮಹತೋ ಅತ್ಥಾಯ ಸಂವತ್ತತೀ’’ತಿ. ನವಮಂ.

೯೦. ‘‘ನಾಹಂ, ಭಿಕ್ಖವೇ, ಅಞ್ಞಂ ಏಕಧಮ್ಮಮ್ಪಿ ಸಮನುಪಸ್ಸಾಮಿ ಯೋ ಏವಂ ಮಹತೋ ಅನತ್ಥಾಯ ಸಂವತ್ತತಿ ಯಥಯಿದಂ, ಭಿಕ್ಖವೇ, ಅಯೋನಿಸೋ ಮನಸಿಕಾರೋ. ಅಯೋನಿಸೋಮನಸಿಕಾರೋ ¶ , ಭಿಕ್ಖವೇ, ಮಹತೋ ಅನತ್ಥಾಯ ಸಂವತ್ತತೀ’’ತಿ. ದಸಮಂ.

೯೧. ‘‘ನಾಹಂ, ಭಿಕ್ಖವೇ, ಅಞ್ಞಂ ಏಕಧಮ್ಮಮ್ಪಿ ಸಮನುಪಸ್ಸಾಮಿ ಯೋ ಏವಂ ಮಹತೋ ಅತ್ಥಾಯ ಸಂವತ್ತತಿ ಯಥಯಿದಂ, ಭಿಕ್ಖವೇ, ಯೋನಿಸೋ ಮನಸಿಕಾರೋ. ಯೋನಿಸೋಮನಸಿಕಾರೋ, ಭಿಕ್ಖವೇ, ಮಹತೋ ಅತ್ಥಾಯ ಸಂವತ್ತತೀ’’ತಿ. ಏಕಾದಸಮಂ.

೯೨. ‘‘ನಾಹಂ, ಭಿಕ್ಖವೇ, ಅಞ್ಞಂ ಏಕಧಮ್ಮಮ್ಪಿ ಸಮನುಪಸ್ಸಾಮಿ ಯೋ ಏವಂ ಮಹತೋ ಅನತ್ಥಾಯ ಸಂವತ್ತತಿ ಯಥಯಿದಂ, ಭಿಕ್ಖವೇ, ಅಸಮ್ಪಜಞ್ಞಂ. ಅಸಮ್ಪಜಞ್ಞಂ, ಭಿಕ್ಖವೇ, ಮಹತೋ ಅನತ್ಥಾಯ ಸಂವತ್ತತೀ’’ತಿ. ದ್ವಾದಸಮಂ.

೯೩. ‘‘ನಾಹಂ, ಭಿಕ್ಖವೇ, ಅಞ್ಞಂ ಏಕಧಮ್ಮಮ್ಪಿ ಸಮನುಪಸ್ಸಾಮಿ ಯೋ ಏವಂ ಮಹತೋ ಅತ್ಥಾಯ ಸಂವತ್ತತಿ ಯಥಯಿದಂ, ಭಿಕ್ಖವೇ, ಸಮ್ಪಜಞ್ಞಂ. ಸಮ್ಪಜಞ್ಞಂ, ಭಿಕ್ಖವೇ, ಮಹತೋ ಅತ್ಥಾಯ ಸಂವತ್ತತೀ’’ತಿ. ತೇರಸಮಂ.

೯೪. ‘‘ನಾಹಂ, ಭಿಕ್ಖವೇ, ಅಞ್ಞಂ ಏಕಧಮ್ಮಮ್ಪಿ ಸಮನುಪಸ್ಸಾಮಿ ಯೋ ಏವಂ ಮಹತೋ ಅನತ್ಥಾಯ ಸಂವತ್ತತಿ ¶ ಯಥಯಿದಂ, ಭಿಕ್ಖವೇ, ಪಾಪಮಿತ್ತತಾ. ಪಾಪಮಿತ್ತತಾ, ಭಿಕ್ಖವೇ, ಮಹತೋ ಅನತ್ಥಾಯ ಸಂವತ್ತತೀ’’ತಿ. ಚುದ್ದಸಮಂ.

೯೫. ‘‘ನಾಹಂ ¶ , ಭಿಕ್ಖವೇ, ಅಞ್ಞಂ ಏಕಧಮ್ಮಮ್ಪಿ ಸಮನುಪಸ್ಸಾಮಿ ಯೋ ಏವಂ ಮಹತೋ ಅತ್ಥಾಯ ಸಂವತ್ತತಿ ಯಥಯಿದಂ, ಭಿಕ್ಖವೇ, ಕಲ್ಯಾಣಮಿತ್ತತಾ. ಕಲ್ಯಾಣಮಿತ್ತತಾ, ಭಿಕ್ಖವೇ, ಮಹತೋ ಅತ್ಥಾಯ ಸಂವತ್ತತೀ’’ತಿ. ಪನ್ನರಸಮಂ.

೯೬. ‘‘ನಾಹಂ, ಭಿಕ್ಖವೇ, ಅಞ್ಞಂ ಏಕಧಮ್ಮಮ್ಪಿ ಸಮನುಪಸ್ಸಾಮಿ ಯೋ ಏವಂ ಮಹತೋ ಅನತ್ಥಾಯ ಸಂವತ್ತತಿ ಯಥಯಿದಂ, ಭಿಕ್ಖವೇ, ಅನುಯೋಗೋ ಅಕುಸಲಾನಂ ಧಮ್ಮಾನಂ, ಅನನುಯೋಗೋ ಕುಸಲಾನಂ ಧಮ್ಮಾನಂ. ಅನುಯೋಗೋ, ಭಿಕ್ಖವೇ, ಅಕುಸಲಾನಂ ಧಮ್ಮಾನಂ, ಅನನುಯೋಗೋ ಕುಸಲಾನಂ ಧಮ್ಮಾನಂ ಮಹತೋ ಅನತ್ಥಾಯ ಸಂವತ್ತತೀ’’ತಿ. ಸೋಳಸಮಂ.

೯೭. ‘‘ನಾಹಂ ¶ , ಭಿಕ್ಖವೇ, ಅಞ್ಞಂ ಏಕಧಮ್ಮಮ್ಪಿ ಸಮನುಪಸ್ಸಾಮಿ ಯೋ ಏವಂ ಮಹತೋ ಅತ್ಥಾಯ ಸಂವತ್ತತಿ ಯಥಯಿದಂ, ಭಿಕ್ಖವೇ, ಅನುಯೋಗೋ ಕುಸಲಾನಂ ಧಮ್ಮಾನಂ, ಅನನುಯೋಗೋ ಅಕುಸಲಾನಂ ಧಮ್ಮಾನಂ. ಅನುಯೋಗೋ, ಭಿಕ್ಖವೇ, ಕುಸಲಾನಂ ಧಮ್ಮಾನಂ, ಅನನುಯೋಗೋ ಅಕುಸಲಾನಂ ಧಮ್ಮಾನಂ ಮಹತೋ ಅತ್ಥಾಯ ಸಂವತ್ತತೀ’’ತಿ. ಸತ್ತರಸಮಂ.

೯೮. ‘‘ಅಜ್ಝತ್ತಿಕಂ ¶ , ಭಿಕ್ಖವೇ, ಅಙ್ಗನ್ತಿ ಕರಿತ್ವಾ ನಾಞ್ಞಂ ಏಕಙ್ಗಮ್ಪಿ ಸಮನುಪಸ್ಸಾಮಿ ಯಂ ಏವಂ ಮಹತೋ ಅನತ್ಥಾಯ ಸಂವತ್ತತಿ ಯಥಯಿದಂ, ಭಿಕ್ಖವೇ, ಪಮಾದೋ. ಪಮಾದೋ, ಭಿಕ್ಖವೇ, ಮಹತೋ ಅನತ್ಥಾಯ ಸಂವತ್ತತೀ’’ತಿ. ಪಠಮಂ.

೯೯. ‘‘ಅಜ್ಝತ್ತಿಕಂ, ಭಿಕ್ಖವೇ, ಅಙ್ಗನ್ತಿ ಕರಿತ್ವಾ ನಾಞ್ಞಂ ಏಕಙ್ಗಮ್ಪಿ ಸಮನುಪಸ್ಸಾಮಿ ಯಂ ಏವಂ ಮಹತೋ ಅತ್ಥಾಯ ಸಂವತ್ತತಿ ಯಥಯಿದಂ, ಭಿಕ್ಖವೇ, ಅಪ್ಪಮಾದೋ. ಅಪ್ಪಮಾದೋ ¶ , ಭಿಕ್ಖವೇ, ಮಹತೋ ಅತ್ಥಾಯ ಸಂವತ್ತತೀ’’ತಿ. ದುತಿಯಂ.

೧೦೦. ‘‘ಅಜ್ಝತ್ತಿಕಂ, ಭಿಕ್ಖವೇ, ಅಙ್ಗನ್ತಿ ಕರಿತ್ವಾ ನಾಞ್ಞಂ ಏಕಙ್ಗಮ್ಪಿ ಸಮನುಪಸ್ಸಾಮಿ ಯಂ ಏವಂ ಮಹತೋ ಅನತ್ಥಾಯ ಸಂವತ್ತತಿ ಯಥಯಿದಂ, ಭಿಕ್ಖವೇ, ಕೋಸಜ್ಜಂ. ಕೋಸಜ್ಜಂ, ಭಿಕ್ಖವೇ, ಮಹತೋ ಅನತ್ಥಾಯ ಸಂವತ್ತತೀ’’ತಿ. ತತಿಯಂ.

೧೦೧. ‘‘ಅಜ್ಝತ್ತಿಕಂ, ಭಿಕ್ಖವೇ, ಅಙ್ಗನ್ತಿ ಕರಿತ್ವಾ ನಾಞ್ಞಂ ಏಕಙ್ಗಮ್ಪಿ ಸಮನುಪಸ್ಸಾಮಿ ಯಂ ಏವಂ ಮಹತೋ ಅತ್ಥಾಯ ಸಂವತ್ತತಿ ಯಥಯಿದಂ, ಭಿಕ್ಖವೇ, ವೀರಿಯಾರಮ್ಭೋ. ವೀರಿಯಾರಮ್ಭೋ, ಭಿಕ್ಖವೇ, ಮಹತೋ ಅತ್ಥಾಯ ಸಂವತ್ತತೀ’’ತಿ. ಚತುತ್ಥಂ.

೧೦೨-೧೦೯. ‘‘ಅಜ್ಝತ್ತಿಕಂ ¶ , ಭಿಕ್ಖವೇ, ಅಙ್ಗನ್ತಿ ಕರಿತ್ವಾ ನಾಞ್ಞಂ ಏಕಙ್ಗಮ್ಪಿ ಸಮನುಪಸ್ಸಾಮಿ ಯಂ ಏವಂ ಮಹತೋ ಅನತ್ಥಾಯ ಸಂವತ್ತತಿ ಯಥಯಿದಂ, ಭಿಕ್ಖವೇ, ಮಹಿಚ್ಛತಾ…ಪೇ… ¶ ಅಪ್ಪಿಚ್ಛತಾ… ಅಸನ್ತುಟ್ಠಿತಾ… ಸನ್ತುಟ್ಠಿತಾ… ಅಯೋನಿಸೋಮನಸಿಕಾರೋ… ಯೋನಿಸೋಮನಸಿಕಾರೋ… ಅಸಮ್ಪಜಞ್ಞಂ… ಸಮ್ಪಜಞ್ಞಂ… ದ್ವಾದಸಮಂ.

೧೧೦. ‘‘ಬಾಹಿರಂ ¶ , ಭಿಕ್ಖವೇ, ಅಙ್ಗನ್ತಿ ಕರಿತ್ವಾ ನಾಞ್ಞಂ ಏಕಙ್ಗಮ್ಪಿ ಸಮನುಪಸ್ಸಾಮಿ ಯಂ ಏವಂ ಮಹತೋ ಅನತ್ಥಾಯ ಸಂವತ್ತತಿ ಯಥಯಿದಂ, ಭಿಕ್ಖವೇ, ಪಾಪಮಿತ್ತತಾ. ಪಾಪಮಿತ್ತತಾ, ಭಿಕ್ಖವೇ, ಮಹತೋ ಅನತ್ಥಾಯ ಸಂವತ್ತತೀ’’ತಿ. ತೇರಸಮಂ.

೧೧೧. ‘‘ಬಾಹಿರಂ, ಭಿಕ್ಖವೇ, ಅಙ್ಗನ್ತಿ ಕರಿತ್ವಾ ನಾಞ್ಞಂ ಏಕಙ್ಗಮ್ಪಿ ಸಮನುಪಸ್ಸಾಮಿ ಯಂ ಏವಂ ಮಹತೋ ಅತ್ಥಾಯ ಸಂವತ್ತತಿ ಯಥಯಿದಂ, ಭಿಕ್ಖವೇ, ಕಲ್ಯಾಣಮಿತ್ತತಾ. ಕಲ್ಯಾಣಮಿತ್ತತಾ, ಭಿಕ್ಖವೇ, ಮಹತೋ ಅತ್ಥಾಯ ಸಂವತ್ತತೀ’’ತಿ. ಚುದ್ದಸಮಂ.

೧೧೨. ‘‘ಅಜ್ಝತ್ತಿಕಂ ¶ , ಭಿಕ್ಖವೇ, ಅಙ್ಗನ್ತಿ ಕರಿತ್ವಾ ನಾಞ್ಞಂ ಏಕಙ್ಗಮ್ಪಿ ಸಮನುಪಸ್ಸಾಮಿ ಯಂ ಏವಂ ಮಹತೋ ಅನತ್ಥಾಯ ಸಂವತ್ತತಿ ಯಥಯಿದಂ, ಭಿಕ್ಖವೇ, ಅನುಯೋಗೋ ಅಕುಸಲಾನಂ ಧಮ್ಮಾನಂ, ಅನನುಯೋಗೋ ಕುಸಲಾನಂ ಧಮ್ಮಾನಂ. ಅನುಯೋಗೋ, ಭಿಕ್ಖವೇ, ಅಕುಸಲಾನಂ ಧಮ್ಮಾನಂ, ಅನನುಯೋಗೋ ಕುಸಲಾನಂ ಧಮ್ಮಾನಂ ಮಹತೋ ಅನತ್ಥಾಯ ಸಂವತ್ತತೀ’’ತಿ. ಪನ್ನರಸಮಂ.

೧೧೩. ‘‘ಅಜ್ಝತ್ತಿಕಂ, ಭಿಕ್ಖವೇ, ಅಙ್ಗನ್ತಿ ಕರಿತ್ವಾ ನಾಞ್ಞಂ ಏಕಙ್ಗಮ್ಪಿ ಸಮನುಪಸ್ಸಾಮಿ ಯಂ ಏವಂ ಮಹತೋ ಅತ್ಥಾಯ ಸಂವತ್ತತಿ ಯಥಯಿದಂ, ಭಿಕ್ಖವೇ, ಅನುಯೋಗೋ ಕುಸಲಾನಂ ಧಮ್ಮಾನಂ, ಅನನುಯೋಗೋ ಅಕುಸಲಾನಂ ಧಮ್ಮಾನಂ. ಅನುಯೋಗೋ, ಭಿಕ್ಖವೇ, ಕುಸಲಾನಂ ಧಮ್ಮಾನಂ, ಅನನುಯೋಗೋ ಅಕುಸಲಾನಂ ಧಮ್ಮಾನಂ ಮಹತೋ ಅತ್ಥಾಯ ಸಂವತ್ತತೀ’’ತಿ. ಸೋಳಸಮಂ.

೧೧೪. ‘‘ನಾಹಂ, ಭಿಕ್ಖವೇ, ಅಞ್ಞಂ ಏಕಧಮ್ಮಮ್ಪಿ ಸಮನುಪಸ್ಸಾಮಿ ಯೋ ಏವಂ ಸದ್ಧಮ್ಮಸ್ಸ ಸಮ್ಮೋಸಾಯ ಅನ್ತರಧಾನಾಯ ಸಂವತ್ತತಿ ಯಥಯಿದಂ, ಭಿಕ್ಖವೇ, ಪಮಾದೋ. ಪಮಾದೋ, ಭಿಕ್ಖವೇ, ಸದ್ಧಮ್ಮಸ್ಸ ಸಮ್ಮೋಸಾಯ ಅನ್ತರಧಾನಾಯ ಸಂವತ್ತತೀ’’ತಿ. ಸತ್ತರಸಮಂ.

೧೧೫. ‘‘ನಾಹಂ, ಭಿಕ್ಖವೇ, ಅಞ್ಞಂ ಏಕಧಮ್ಮಮ್ಪಿ ಸಮನುಪಸ್ಸಾಮಿ ಯೋ ಏವಂ ಸದ್ಧಮ್ಮಸ್ಸ ಠಿತಿಯಾ ಅಸಮ್ಮೋಸಾಯ ಅನನ್ತರಧಾನಾಯ ಸಂವತ್ತತಿ ಯಥಯಿದಂ, ಭಿಕ್ಖವೇ, ಅಪ್ಪಮಾದೋ. ಅಪ್ಪಮಾದೋ ¶ , ಭಿಕ್ಖವೇ, ಸದ್ಧಮ್ಮಸ್ಸ ಠಿತಿಯಾ ಅಸಮ್ಮೋಸಾಯ ಅನನ್ತರಧಾನಾಯ ಸಂವತ್ತತೀ’’ತಿ. ಅಟ್ಠಾರಸಮಂ.

೧೧೬. ‘‘ನಾಹಂ ¶ , ಭಿಕ್ಖವೇ, ಅಞ್ಞಂ ಏಕಧಮ್ಮಮ್ಪಿ ಸಮನುಪಸ್ಸಾಮಿ ಯೋ ಏವಂ ¶ ಸದ್ಧಮ್ಮಸ್ಸ ಸಮ್ಮೋಸಾಯ ¶ ಅನ್ತರಧಾನಾಯ ಸಂವತ್ತತಿ ಯಥಯಿದಂ, ಭಿಕ್ಖವೇ, ಕೋಸಜ್ಜಂ. ಕೋಸಜ್ಜಂ, ಭಿಕ್ಖವೇ, ಸದ್ಧಮ್ಮಸ್ಸ ಸಮ್ಮೋಸಾಯ ಅನ್ತರಧಾನಾಯ ಸಂವತ್ತತೀ’’ತಿ. ಏಕೂನವೀಸತಿಮಂ.

೧೧೭. ‘‘ನಾಹಂ, ಭಿಕ್ಖವೇ, ಅಞ್ಞಂ ಏಕಧಮ್ಮಮ್ಪಿ ಸಮನುಪಸ್ಸಾಮಿ ಯೋ ಏವಂ ಸದ್ಧಮ್ಮಸ್ಸ ಠಿತಿಯಾ ಅಸಮ್ಮೋಸಾಯ ಅನನ್ತರಧಾನಾಯ ಸಂವತ್ತತಿ ಯಥಯಿದಂ, ಭಿಕ್ಖವೇ, ವೀರಿಯಾರಮ್ಭೋ. ವೀರಿಯಾರಮ್ಭೋ, ಭಿಕ್ಖವೇ, ಸದ್ಧಮ್ಮಸ್ಸ ಠಿತಿಯಾ ಅಸಮ್ಮೋಸಾಯ ಅನನ್ತರಧಾನಾಯ ಸಂವತ್ತತೀ’’ತಿ. ವೀಸತಿಮಂ.

೧೧೮-೧೨೮. ‘‘ನಾಹಂ, ಭಿಕ್ಖವೇ, ಅಞ್ಞಂ ಏಕಧಮ್ಮಮ್ಪಿ ಸಮನುಪಸ್ಸಾಮಿ ಯೋ ಏವಂ ಸದ್ಧಮ್ಮಸ್ಸ ಸಮ್ಮೋಸಾಯ ಅನ್ತರಧಾನಾಯ ಸಂವತ್ತತಿ ಯಥಯಿದಂ, ಭಿಕ್ಖವೇ, ಮಹಿಚ್ಛತಾ…ಪೇ… ಅಪ್ಪಿಚ್ಛತಾ… ಅಸನ್ತುಟ್ಠಿತಾ… ಸನ್ತುಟ್ಠಿತಾ… ಅಯೋನಿಸೋಮನಸಿಕಾರೋ… ಯೋನಿಸೋಮನಸಿಕಾರೋ… ಅಸಮ್ಪಜಞ್ಞಂ… ಸಮ್ಪಜಞ್ಞಂ ¶ … ಪಾಪಮಿತ್ತತಾ… ಕಲ್ಯಾಣಮಿತ್ತತಾ… ಅನುಯೋಗೋ ಅಕುಸಲಾನಂ ಧಮ್ಮಾನಂ, ಅನನುಯೋಗೋ ಕುಸಲಾನಂ ಧಮ್ಮಾನಂ. ಅನುಯೋಗೋ, ಭಿಕ್ಖವೇ, ಅಕುಸಲಾನಂ ಧಮ್ಮಾನಂ, ಅನನುಯೋಗೋ ಕುಸಲಾನಂ ಧಮ್ಮಾನಂ ಸದ್ಧಮ್ಮಸ್ಸ ಸಮ್ಮೋಸಾಯ ಅನ್ತರಧಾನಾಯ ಸಂವತ್ತತೀ’’ತಿ. ಏಕತ್ತಿಂಸತಿಮಂ.

೧೨೯. ‘‘ನಾಹಂ, ಭಿಕ್ಖವೇ, ಅಞ್ಞಂ ಏಕಧಮ್ಮಮ್ಪಿ ಸಮನುಪಸ್ಸಾಮಿ ಯೋ ಏವಂ ಸದ್ಧಮ್ಮಸ್ಸ ಠಿತಿಯಾ ಅಸಮ್ಮೋಸಾಯ ಅನನ್ತರಧಾನಾಯ ಸಂವತ್ತತಿ ಯಥಯಿದಂ, ಭಿಕ್ಖವೇ, ಅನುಯೋಗೋ ಕುಸಲಾನಂ ಧಮ್ಮಾನಂ, ಅನನುಯೋಗೋ ಅಕುಸಲಾನಂ ಧಮ್ಮಾನಂ. ಅನುಯೋಗೋ, ಭಿಕ್ಖವೇ, ಕುಸಲಾನಂ ಧಮ್ಮಾನಂ, ಅನನುಯೋಗೋ ಅಕುಸಲಾನಂ ಧಮ್ಮಾನಂ ಸದ್ಧಮ್ಮಸ್ಸ ಠಿತಿಯಾ ಅಸಮ್ಮೋಸಾಯ ಅನನ್ತರಧಾನಾಯ ಸಂವತ್ತತೀ’’ತಿ. ಚತುಕ್ಕೋಟಿಕಂ ನಿಟ್ಠಿತಂ. ಬಾತ್ತಿಂಸತಿಮಂ.

೧೩೦. ‘‘ಯೇ ತೇ, ಭಿಕ್ಖವೇ, ಭಿಕ್ಖೂ ಅಧಮ್ಮಂ ಧಮ್ಮೋತಿ ದೀಪೇನ್ತಿ ತೇ, ಭಿಕ್ಖವೇ, ಭಿಕ್ಖೂ ಬಹುಜನಅಹಿತಾಯ ಪಟಿಪನ್ನಾ ಬಹುಜನಅಸುಖಾಯ, ಬಹುನೋ ಜನಸ್ಸ ಅನತ್ಥಾಯ ಅಹಿತಾಯ ದುಕ್ಖಾಯ ದೇವಮನುಸ್ಸಾನಂ ¶ . ಬಹುಞ್ಚ ತೇ, ಭಿಕ್ಖವೇ, ಭಿಕ್ಖೂ ಅಪುಞ್ಞಂ ಪಸವನ್ತಿ, ತೇ ಚಿಮಂ [ತೇಪಿಮಂ (ಸೀ.)] ಸದ್ಧಮ್ಮಂ ಅನ್ತರಧಾಪೇನ್ತೀ’’ತಿ. ತೇತ್ತಿಂಸತಿಮಂ.

೧೩೧. ‘‘ಯೇ ತೇ, ಭಿಕ್ಖವೇ, ಭಿಕ್ಖೂ ಧಮ್ಮಂ ಅಧಮ್ಮೋತಿ ದೀಪೇನ್ತಿ ತೇ, ಭಿಕ್ಖವೇ, ಭಿಕ್ಖೂ ಬಹುಜನಅಹಿತಾಯ ಪಟಿಪನ್ನಾ ಬಹುಜನಅಸುಖಾಯ, ಬಹುನೋ ಜನಸ್ಸ ಅನತ್ಥಾಯ ¶ ಅಹಿತಾಯ ದುಕ್ಖಾಯ ದೇವಮನುಸ್ಸಾನಂ. ಬಹುಞ್ಚ ತೇ, ಭಿಕ್ಖವೇ, ಭಿಕ್ಖೂ ಅಪುಞ್ಞಂ ಪಸವನ್ತಿ, ತೇ ಚಿಮಂ ಸದ್ಧಮ್ಮಂ ಅನ್ತರಧಾಪೇನ್ತೀ’’ತಿ. ಚತುತ್ತಿಂಸತಿಮಂ.

೧೩೨-೧೩೯. ‘‘ಯೇ ತೇ, ಭಿಕ್ಖವೇ, ಭಿಕ್ಖೂ ಅವಿನಯಂ ¶ ವಿನಯೋತಿ ದೀಪೇನ್ತಿ…ಪೇ… ವಿನಯಂ ಅವಿನಯೋತಿ ದೀಪೇನ್ತಿ…ಪೇ… ಅಭಾಸಿತಂ ಅಲಪಿತಂ ತಥಾಗತೇನ ಭಾಸಿತಂ ¶ ಲಪಿತಂ ತಥಾಗತೇನಾತಿ ದೀಪೇನ್ತಿ…ಪೇ… ಭಾಸಿತಂ ಲಪಿತಂ ತಥಾಗತೇನ ಅಭಾಸಿತಂ ಅಲಪಿತಂ ತಥಾಗತೇನಾತಿ ದೀಪೇನ್ತಿ…ಪೇ… ಅನಾಚಿಣ್ಣಂ ತಥಾಗತೇನ ಆಚಿಣ್ಣಂ ತಥಾಗತೇನಾತಿ ದೀಪೇನ್ತಿ…ಪೇ… ಆಚಿಣ್ಣಂ ತಥಾಗತೇನ ಅನಾಚಿಣ್ಣಂ ತಥಾಗತೇನಾತಿ ದೀಪೇನ್ತಿ…ಪೇ… ಅಪಞ್ಞತ್ತಂ ತಥಾಗತೇನ ಪಞ್ಞತ್ತಂ ತಥಾಗತೇನಾತಿ ದೀಪೇನ್ತಿ…ಪೇ… ಪಞ್ಞತ್ತಂ ತಥಾಗತೇನ ಅಪಞ್ಞತ್ತಂ ತಥಾಗತೇನಾತಿ ದೀಪೇನ್ತಿ ತೇ, ಭಿಕ್ಖವೇ, ಭಿಕ್ಖೂ ಬಹುಜನಅಹಿತಾಯ ಪಟಿಪನ್ನಾ ಬಹುಜನಅಸುಖಾಯ, ಬಹುನೋ ಜನಸ್ಸ ಅನತ್ಥಾಯ ಅಹಿತಾಯ ದುಕ್ಖಾಯ ದೇವಮನುಸ್ಸಾನಂ. ಬಹುಞ್ಚ ತೇ, ಭಿಕ್ಖವೇ, ಭಿಕ್ಖೂ ಅಪುಞ್ಞಂ ಪಸವನ್ತಿ, ತೇ ಚಿಮಂ ಸದ್ಧಮ್ಮಂ ಅನ್ತರಧಾಪೇನ್ತೀ’’ತಿ. ದ್ವಾಚತ್ತಾಲೀಸತಿಮಂ.

೧೪೦. ‘‘ಯೇ ¶ ತೇ, ಭಿಕ್ಖವೇ, ಭಿಕ್ಖೂ ಅಧಮ್ಮಂ ಅಧಮ್ಮೋತಿ ದೀಪೇನ್ತಿ ತೇ, ಭಿಕ್ಖವೇ, ಭಿಕ್ಖೂ ಬಹುಜನಹಿತಾಯ ಪಟಿಪನ್ನಾ ಬಹುಜನಸುಖಾಯ, ಬಹುನೋ ಜನಸ್ಸ ಅತ್ಥಾಯ ಹಿತಾಯ ಸುಖಾಯ ದೇವಮನುಸ್ಸಾನಂ. ಬಹುಞ್ಚ ತೇ, ಭಿಕ್ಖವೇ, ಭಿಕ್ಖೂ ಪುಞ್ಞಂ ಪಸವನ್ತಿ, ತೇ ಚಿಮಂ ಸದ್ಧಮ್ಮಂ ಠಪೇನ್ತೀ’’ತಿ [ಥಪೇನ್ತೀತಿ (ಕ.)]. ಪಠಮಂ.

೧೪೧. ‘‘ಯೇ ತೇ, ಭಿಕ್ಖವೇ, ಭಿಕ್ಖೂ ಧಮ್ಮಂ ಧಮ್ಮೋತಿ ದೀಪೇನ್ತಿ ತೇ, ಭಿಕ್ಖವೇ, ಭಿಕ್ಖೂ ಬಹುಜನಹಿತಾಯ ಪಟಿಪನ್ನಾ ಬಹುಜನಸುಖಾಯ, ಬಹುನೋ ಜನಸ್ಸ ಅತ್ಥಾಯ ಹಿತಾಯ ಸುಖಾಯ ದೇವಮನುಸ್ಸಾನಂ. ಬಹುಞ್ಚ ತೇ, ಭಿಕ್ಖವೇ, ಭಿಕ್ಖೂ ಪುಞ್ಞಂ ಪಸವನ್ತಿ, ತೇ ಚಿಮಂ ಸದ್ಧಮ್ಮಂ ಠಪೇನ್ತೀ’’ತಿ. ದುತಿಯಂ.

೧೪೨-೧೪೯. ‘‘ಯೇ ತೇ, ಭಿಕ್ಖವೇ, ಭಿಕ್ಖೂ ಅವಿನಯಂ ಅವಿನಯೋತಿ ದೀಪೇನ್ತಿ…ಪೇ… ವಿನಯಂ ವಿನಯೋತಿ ದೀಪೇನ್ತಿ…ಪೇ… ಅಭಾಸಿತಂ ಅಲಪಿತಂ ತಥಾಗತೇನ ಅಭಾಸಿತಂ ಅಲಪಿತಂ ತಥಾಗತೇನಾತಿ ದೀಪೇನ್ತಿ…ಪೇ… ಭಾಸಿತಂ ¶ ಲಪಿತಂ ತಥಾಗತೇನ ಭಾಸಿತಂ ಲಪಿತಂ ತಥಾಗತೇನಾತಿ ದೀಪೇನ್ತಿ…ಪೇ… ಅನಾಚಿಣ್ಣಂ ¶ ತಥಾಗತೇನ ಅನಾಚಿಣ್ಣಂ ತಥಾಗತೇನಾತಿ ದೀಪೇನ್ತಿ…ಪೇ… ಆಚಿಣ್ಣಂ ತಥಾಗತೇನ ಆಚಿಣ್ಣಂ ತಥಾಗತೇನಾತಿ ದೀಪೇನ್ತಿ…ಪೇ… ¶ ಅಪಞ್ಞತ್ತಂ ತಥಾಗತೇನ ಅಪಞ್ಞತ್ತಂ ತಥಾಗತೇನಾತಿ ದೀಪೇನ್ತಿ…ಪೇ… ಪಞ್ಞತ್ತಂ ತಥಾಗತೇನ ಪಞ್ಞತ್ತಂ ತಥಾಗತೇನಾತಿ ದೀಪೇನ್ತಿ ತೇ, ಭಿಕ್ಖವೇ, ಭಿಕ್ಖೂ ಬಹುಜನಹಿತಾಯ ಪಟಿಪನ್ನಾ ಬಹುಜನಸುಖಾಯ, ಬಹುನೋ ಜನಸ್ಸ ಅತ್ಥಾಯ ಹಿತಾಯ ಸುಖಾಯ ದೇವಮನುಸ್ಸಾನಂ. ಬಹುಞ್ಚ ತೇ, ಭಿಕ್ಖವೇ, ಭಿಕ್ಖೂ ಪುಞ್ಞಂ ಪಸವನ್ತಿ, ತೇ ಚಿಮಂ ಸದ್ಧಮ್ಮಂ ಠಪೇನ್ತೀ’’ತಿ. ದಸಮಂ.

೧೫೦. ‘‘ಯೇ ¶ ತೇ, ಭಿಕ್ಖವೇ, ಭಿಕ್ಖೂ ಅನಾಪತ್ತಿಂ ಆಪತ್ತೀತಿ ದೀಪೇನ್ತಿ ತೇ, ಭಿಕ್ಖವೇ, ಭಿಕ್ಖೂ ಬಹುಜನಅಹಿತಾಯ ಪಟಿಪನ್ನಾ ಬಹುಜನಅಸುಖಾಯ, ಬಹುನೋ ಜನಸ್ಸ ಅನತ್ಥಾಯ ಅಹಿತಾಯ ದುಕ್ಖಾಯ ದೇವಮನುಸ್ಸಾನಂ. ಬಹುಞ್ಚ ತೇ, ಭಿಕ್ಖವೇ, ಭಿಕ್ಖೂ ಅಪುಞ್ಞಂ ಪಸವನ್ತಿ, ತೇ ಚಿಮಂ ಸದ್ಧಮ್ಮಂ ಅನ್ತರಧಾಪೇನ್ತೀ’’ತಿ. ಪಠಮಂ.

೧೫೧. ‘‘ಯೇ ತೇ, ಭಿಕ್ಖವೇ, ಭಿಕ್ಖೂ ಆಪತ್ತಿಂ ಅನಾಪತ್ತೀತಿ ದೀಪೇನ್ತಿ ತೇ, ಭಿಕ್ಖವೇ, ಭಿಕ್ಖೂ ಬಹುಜನಅಹಿತಾಯ ಪಟಿಪನ್ನಾ ಬಹುಜನಅಸುಖಾಯ, ಬಹುನೋ ಜನಸ್ಸ ಅನತ್ಥಾಯ ಅಹಿತಾಯ ದುಕ್ಖಾಯ ದೇವಮನುಸ್ಸಾನಂ. ಬಹುಞ್ಚ ತೇ, ಭಿಕ್ಖವೇ, ಭಿಕ್ಖೂ ಅಪುಞ್ಞಂ ಪಸವನ್ತಿ, ತೇ ಚಿಮಂ ಸದ್ಧಮ್ಮಂ ಅನ್ತರಧಾಪೇನ್ತೀ’’ತಿ. ದುತಿಯಂ.

೧೫೨-೧೫೯. ‘‘ಯೇ ತೇ, ಭಿಕ್ಖವೇ, ಭಿಕ್ಖೂ ಲಹುಕಂ ಆಪತ್ತಿಂ ಗರುಕಾ ಆಪತ್ತೀತಿ ದೀಪೇನ್ತಿ…ಪೇ… ಗರುಕಂ ಆಪತ್ತಿಂ ಲಹುಕಾ ಆಪತ್ತೀತಿ ದೀಪೇನ್ತಿ…ಪೇ… ದುಟ್ಠುಲ್ಲಂ ಆಪತ್ತಿಂ ಅದುಟ್ಠುಲ್ಲಾ ಆಪತ್ತೀತಿ ದೀಪೇನ್ತಿ…ಪೇ… ಅದುಟ್ಠುಲ್ಲಂ ಆಪತ್ತಿಂ ದುಟ್ಠುಲ್ಲಾ ಆಪತ್ತೀತಿ ದೀಪೇನ್ತಿ…ಪೇ… ಸಾವಸೇಸಂ ಆಪತ್ತಿಂ ಅನವಸೇಸಾ ಆಪತ್ತೀತಿ ದೀಪೇನ್ತಿ…ಪೇ… ಅನವಸೇಸಂ ¶ ಆಪತ್ತಿಂ ಸಾವಸೇಸಾ ಆಪತ್ತೀತಿ ದೀಪೇನ್ತಿ…ಪೇ… ಸಪ್ಪಟಿಕಮ್ಮಂ ಆಪತ್ತಿಂ ಅಪ್ಪಟಿಕಮ್ಮಾ ಆಪತ್ತೀತಿ ದೀಪೇನ್ತಿ…ಪೇ… ಅಪ್ಪಟಿಕಮ್ಮಂ ಆಪತ್ತಿಂ ಸಪ್ಪಟಿಕಮ್ಮಾ ಆಪತ್ತೀತಿ ದೀಪೇನ್ತಿ ತೇ, ಭಿಕ್ಖವೇ, ಭಿಕ್ಖೂ ಬಹುಜನಅಹಿತಾಯ ಪಟಿಪನ್ನಾ ಬಹುಜನಅಸುಖಾಯ, ಬಹುನೋ ಜನಸ್ಸ ಅನತ್ಥಾಯ ಅಹಿತಾಯ ದುಕ್ಖಾಯ ದೇವಮನುಸ್ಸಾನಂ. ಬಹುಞ್ಚ ¶ ತೇ, ಭಿಕ್ಖವೇ, ಭಿಕ್ಖೂ ಅಪುಞ್ಞಂ ಪಸವನ್ತಿ, ತೇ ಚಿಮಂ ಸದ್ಧಮ್ಮಂ ಅನ್ತರಧಾಪೇನ್ತೀ’’ತಿ. ದಸಮಂ.

೧೬೦. ‘‘ಯೇ ತೇ, ಭಿಕ್ಖವೇ, ಭಿಕ್ಖೂ ಅನಾಪತ್ತಿಂ ಅನಾಪತ್ತೀತಿ ದೀಪೇನ್ತಿ ತೇ, ಭಿಕ್ಖವೇ, ಭಿಕ್ಖೂ ಬಹುಜನಹಿತಾಯ ಪಟಿಪನ್ನಾ ಬಹುಜನಸುಖಾಯ, ಬಹುನೋ ಜನಸ್ಸ ಅತ್ಥಾಯ ¶ ಹಿತಾಯ ಸುಖಾಯ ದೇವಮನುಸ್ಸಾನಂ. ಬಹುಞ್ಚ ತೇ, ಭಿಕ್ಖವೇ, ಭಿಕ್ಖೂ ಪುಞ್ಞಂ ಪಸವನ್ತಿ, ತೇ ಚಿಮಂ ಸದ್ಧಮ್ಮಂ ಠಪೇನ್ತೀ’’ತಿ. ಏಕಾದಸಮಂ.

೧೬೧. ‘‘ಯೇ ¶ ತೇ, ಭಿಕ್ಖವೇ, ಭಿಕ್ಖೂ ಆಪತ್ತಿಂ ಆಪತ್ತೀತಿ ದೀಪೇನ್ತಿ ತೇ, ಭಿಕ್ಖವೇ, ಭಿಕ್ಖೂ ಬಹುಜನಹಿತಾಯ ಪಟಿಪನ್ನಾ ಬಹುಜನಸುಖಾಯ, ಬಹುನೋ ಜನಸ್ಸ ಅತ್ಥಾಯ ಹಿತಾಯ ಸುಖಾಯ ದೇವಮನುಸ್ಸಾನಂ. ಬಹುಞ್ಚ ತೇ, ಭಿಕ್ಖವೇ, ಭಿಕ್ಖೂ ಪುಞ್ಞಂ ಪಸವನ್ತಿ, ತೇ ಚಿಮಂ ಸದ್ಧಮ್ಮಂ ಠಪೇನ್ತೀ’’ತಿ. ದ್ವಾದಸಮಂ.

೧೬೨-೧೬೯. ‘‘ಯೇ ತೇ, ಭಿಕ್ಖವೇ, ಭಿಕ್ಖೂ ಲಹುಕಂ ಆಪತ್ತಿಂ ಲಹುಕಾ ಆಪತ್ತೀತಿ ದೀಪೇನ್ತಿ… ಗರುಕಂ ಆಪತ್ತಿಂ ಗರುಕಾ ಆಪತ್ತೀತಿ ದೀಪೇನ್ತಿ… ದುಟ್ಠುಲ್ಲಂ ಆಪತ್ತಿಂ ದುಟ್ಠುಲ್ಲಾ ಆಪತ್ತೀತಿ ದೀಪೇನ್ತಿ… ಅದುಟ್ಠುಲ್ಲಂ ಆಪತ್ತಿಂ ಅದುಟ್ಠುಲ್ಲಾ ಆಪತ್ತೀತಿ ದೀಪೇನ್ತಿ… ಸಾವಸೇಸಂ ಆಪತ್ತಿಂ ಸಾವಸೇಸಾ ಆಪತ್ತೀತಿ ದೀಪೇನ್ತಿ… ಅನವಸೇಸಂ ಆಪತ್ತಿಂ ಅನವಸೇಸಾ ಆಪತ್ತೀತಿ ದೀಪೇನ್ತಿ… ಸಪ್ಪಟಿಕಮ್ಮಂ ಆಪತ್ತಿಂ ಸಪ್ಪಟಿಕಮ್ಮಾ ಆಪತ್ತೀತಿ ದೀಪೇನ್ತಿ… ಅಪ್ಪಟಿಕಮ್ಮಂ ಆಪತ್ತಿಂ ಅಪ್ಪಟಿಕಮ್ಮಾ ಆಪತ್ತೀತಿ ದೀಪೇನ್ತಿ ತೇ, ಭಿಕ್ಖವೇ, ಭಿಕ್ಖೂ ಬಹುಜನಹಿತಾಯ ಪಟಿಪನ್ನಾ ಬಹುಜನಸುಖಾಯ, ಬಹುನೋ ಜನಸ್ಸ ಅತ್ಥಾಯ ಹಿತಾಯ ಸುಖಾಯ ದೇವಮನುಸ್ಸಾನಂ. ಬಹುಞ್ಚ ತೇ, ಭಿಕ್ಖವೇ, ಭಿಕ್ಖೂ ಪುಞ್ಞಂ ಪಸವನ್ತಿ, ತೇ ಚಿಮಂ ಸದ್ಧಮ್ಮಂ ಠಪೇನ್ತೀ’’ತಿ. ವೀಸತಿಮಂ.

೧೭೦. ‘‘ಏಕಪುಗ್ಗಲೋ ¶ ¶ , ಭಿಕ್ಖವೇ, ಲೋಕೇ ಉಪ್ಪಜ್ಜಮಾನೋ ಉಪ್ಪಜ್ಜತಿ ಬಹುಜನಹಿತಾಯ ಬಹುಜನಸುಖಾಯ ಲೋಕಾನುಕಮ್ಪಾಯ ಅತ್ಥಾಯ ಹಿತಾಯ ಸುಖಾಯ ದೇವಮನುಸ್ಸಾನಂ ¶ . ಕತಮೋ ಏಕಪುಗ್ಗಲೋ? ತಥಾಗತೋ ಅರಹಂ ಸಮ್ಮಾಸಮ್ಬುದ್ಧೋ. ಅಯಂ ಖೋ, ಭಿಕ್ಖವೇ, ಏಕಪುಗ್ಗಲೋ ಲೋಕೇ ಉಪ್ಪಜ್ಜಮಾನೋ ಉಪ್ಪಜ್ಜತಿ ಬಹುಜನಹಿತಾಯ ¶ ಬಹುಜನಸುಖಾಯ ಲೋಕಾನುಕಮ್ಪಾಯ ಅತ್ಥಾಯ ಹಿತಾಯ ಸುಖಾಯ ದೇವಮನುಸ್ಸಾನ’’ನ್ತಿ.

೧೭೧. ‘‘ಏಕಪುಗ್ಗಲಸ್ಸ, ಭಿಕ್ಖವೇ, ಪಾತುಭಾವೋ ದುಲ್ಲಭೋ ಲೋಕಸ್ಮಿಂ. ಕತಮಸ್ಸ ಏಕಪುಗ್ಗಲಸ್ಸ? ತಥಾಗತಸ್ಸ ಅರಹತೋ ಸಮ್ಮಾಸಮ್ಬುದ್ಧಸ್ಸ. ಇಮಸ್ಸ ಖೋ, ಭಿಕ್ಖವೇ, ಏಕಪುಗ್ಗಲಸ್ಸ ಪಾತುಭಾವೋ ದುಲ್ಲಭೋ ಲೋಕಸ್ಮಿ’’ನ್ತಿ.

೧೭೨. ‘‘ಏಕಪುಗ್ಗಲೋ, ಭಿಕ್ಖವೇ, ಲೋಕೇ ಉಪ್ಪಜ್ಜಮಾನೋ ಉಪ್ಪಜ್ಜತಿ ಅಚ್ಛರಿಯಮನುಸ್ಸೋ. ಕತಮೋ ಏಕಪುಗ್ಗಲೋ? ತಥಾಗತೋ ಅರಹಂ ಸಮ್ಮಾಸಮ್ಬುದ್ಧೋ. ಅಯಂ ಖೋ, ಭಿಕ್ಖವೇ, ಏಕಪುಗ್ಗಲೋ ಲೋಕೇ ಉಪ್ಪಜ್ಜಮಾನೋ ಉಪ್ಪಜ್ಜತಿ ಅಚ್ಛರಿಯಮನುಸ್ಸೋ’’ತಿ.

೧೭೩. ‘‘ಏಕಪುಗ್ಗಲಸ್ಸ, ಭಿಕ್ಖವೇ, ಕಾಲಕಿರಿಯಾ ಬಹುನೋ ಜನಸ್ಸ ಅನುತಪ್ಪಾ [ಆನುತಪ್ಪಾ (ಸೀ.)] ಹೋತಿ. ಕತಮಸ್ಸ ಏಕಪುಗ್ಗಲಸ್ಸ? ತಥಾಗತಸ್ಸ ಅರಹತೋ ಸಮ್ಮಾಸಮ್ಬುದ್ಧಸ್ಸ. ಇಮಸ್ಸ ಖೋ, ಭಿಕ್ಖವೇ, ಏಕಪುಗ್ಗಲಸ್ಸ ಕಾಲಕಿರಿಯಾ ಬಹುನೋ ಜನಸ್ಸ ಅನುತಪ್ಪಾ ಹೋತೀ’’ತಿ.

೧೭೪. ‘‘ಏಕಪುಗ್ಗಲೋ, ಭಿಕ್ಖವೇ, ಲೋಕೇ ಉಪ್ಪಜ್ಜಮಾನೋ ಉಪ್ಪಜ್ಜತಿ ಅದುತಿಯೋ ಅಸಹಾಯೋ ಅಪ್ಪಟಿಮೋ ಅಪ್ಪಟಿಸಮೋ ಅಪ್ಪಟಿಭಾಗೋ ಅಪ್ಪಟಿಪುಗ್ಗಲೋ ಅಸಮೋ ಅಸಮಸಮೋ ದ್ವಿಪದಾನಂ ಅಗ್ಗೋ. ಕತಮೋ ಏಕಪುಗ್ಗಲೋ? ತಥಾಗತೋ ಅರಹಂ ಸಮ್ಮಾಸಮ್ಬುದ್ಧೋ. ಅಯಂ ಖೋ, ಭಿಕ್ಖವೇ, ಏಕಪುಗ್ಗಲೋ ಲೋಕೇ ಉಪ್ಪಜ್ಜಮಾನೋ ಉಪ್ಪಜ್ಜತಿ ಅದುತಿಯೋ ಅಸಹಾಯೋ ಅಪ್ಪಟಿಮೋ ಅಪ್ಪಟಿಸಮೋ ಅಪ್ಪಟಿಭಾಗೋ ಅಪ್ಪಟಿಪುಗ್ಗಲೋ ಅಸಮೋ ಅಸಮಸಮೋ ದ್ವಿಪದಾನಂ ಅಗ್ಗೋ’’ತಿ.

೧೭೫-೧೮೬. ‘‘ಏಕಪುಗ್ಗಲಸ್ಸ ¶ ¶ , ಭಿಕ್ಖವೇ, ಪಾತುಭಾವಾ ಮಹತೋ ಚಕ್ಖುಸ್ಸ ಪಾತುಭಾವೋ ಹೋತಿ, ಮಹತೋ ಆಲೋಕಸ್ಸ ಪಾತುಭಾವೋ ಹೋತಿ, ಮಹತೋ ಓಭಾಸಸ್ಸ ಪಾತುಭಾವೋ ಹೋತಿ, ಛನ್ನಂ ಅನುತ್ತರಿಯಾನಂ ಪಾತುಭಾವೋ ಹೋತಿ, ಚತುನ್ನಂ ಪಟಿಸಮ್ಭಿದಾನಂ ಸಚ್ಛಿಕಿರಿಯಾ ಹೋತಿ, ಅನೇಕಧಾತುಪಟಿವೇಧೋ ಹೋತಿ, ನಾನಾಧಾತುಪಟಿವೇಧೋ ಹೋತಿ, ವಿಜ್ಜಾವಿಮುತ್ತಿಫಲಸಚ್ಛಿಕಿರಿಯಾ ¶ ಹೋತಿ, ಸೋತಾಪತ್ತಿಫಲಸಚ್ಛಿಕಿರಿಯಾ ಹೋತಿ, ಸಕದಾಗಾಮಿಫಲಸಚ್ಛಿಕಿರಿಯಾ ಹೋತಿ, ಅನಾಗಾಮಿಫಲಸಚ್ಛಿಕಿರಿಯಾ ಹೋತಿ, ಅರಹತ್ತಫಲಸಚ್ಛಿಕಿರಿಯಾ ¶ ಹೋತಿ. ಕತಮಸ್ಸ ಏಕಪುಗ್ಗಲಸ್ಸ? ತಥಾಗತಸ್ಸ ಅರಹತೋ ಸಮ್ಮಾಸಮ್ಬುದ್ಧಸ್ಸ. ಇಮಸ್ಸ ಖೋ, ಭಿಕ್ಖವೇ, ಏಕಪುಗ್ಗಲಸ್ಸ ಪಾತುಭಾವಾ ಮಹತೋ ಚಕ್ಖುಸ್ಸ ಪಾತುಭಾವೋ ಹೋತಿ, ಮಹತೋ ಆಲೋಕಸ್ಸ ಪಾತುಭಾವೋ ಹೋತಿ, ಮಹತೋ ಓಭಾಸಸ್ಸ ಪಾತುಭಾವೋ ಹೋತಿ, ಛನ್ನಂ ಅನುತ್ತರಿಯಾನಂ ಪಾತುಭಾವೋ ಹೋತಿ, ಚತುನ್ನಂ ಪಟಿಸಮ್ಭಿದಾನಂ ಸಚ್ಛಿಕಿರಿಯಾ ಹೋತಿ, ಅನೇಕಧಾತುಪಟಿವೇಧೋ ಹೋತಿ, ನಾನಾಧಾತುಪಟಿವೇಧೋ ಹೋತಿ, ವಿಜ್ಜಾವಿಮುತ್ತಿಫಲಸಚ್ಛಿಕಿರಿಯಾ ಹೋತಿ, ಸೋತಾಪತ್ತಿಫಲಸಚ್ಛಿಕಿರಿಯಾ ಹೋತಿ, ಸಕದಾಗಾಮಿಫಲಸಚ್ಛಿಕಿರಿಯಾ ಹೋತಿ, ಅನಾಗಾಮಿಫಲಸಚ್ಛಿಕಿರಿಯಾ ಹೋತಿ, ಅರಹತ್ತಫಲಸಚ್ಛಿಕಿರಿಯಾ ಹೋತೀ’’ತಿ.

೧೮೭. ‘‘ನಾಹಂ ಭಿಕ್ಖವೇ, ಅಞ್ಞಂ ಏಕಪುಗ್ಗಲಮ್ಪಿ ಸಮನುಪಸ್ಸಾಮಿ ಯೋ ಏವಂ ತಥಾಗತೇನ ಅನುತ್ತರಂ ಧಮ್ಮಚಕ್ಕಂ ಪವತ್ತಿತಂ ಸಮ್ಮದೇವ ಅನುಪ್ಪವತ್ತೇತಿ ಯಥಯಿದಂ, ಭಿಕ್ಖವೇ, ಸಾರಿಪುತ್ತೋ. ಸಾರಿಪುತ್ತೋ, ಭಿಕ್ಖವೇ, ತಥಾಗತೇನ ಅನುತ್ತರಂ ಧಮ್ಮಚಕ್ಕಂ ಪವತ್ತಿತಂ ಸಮ್ಮದೇವ ಅನುಪ್ಪವತ್ತೇತೀ’’ತಿ.

೧೮೮. ‘‘ಏತದಗ್ಗಂ ¶ ¶ , ಭಿಕ್ಖವೇ, ಮಮ ಸಾವಕಾನಂ ಭಿಕ್ಖೂನಂ ರತ್ತಞ್ಞೂನಂ ಯದಿದಂ ಅಞ್ಞಾಸಿಕೋಣ್ಡಞ್ಞೋ’’ [ಅಞ್ಞಾತಕೋಣ್ಡಞ್ಞೋತಿ (ಕ.), ಅಞ್ಞಾಕೋಣ್ಡಞ್ಞೋ (ಸೀ. ಸ್ಯಾ. ಕಂ. ಪೀ.)].

೧೮೯. … ಮಹಾಪಞ್ಞಾನಂ ಯದಿದಂ ಸಾರಿಪುತ್ತೋ.

೧೯೦. … ಇದ್ಧಿಮನ್ತಾನಂ ಯದಿದಂ ಮಹಾಮೋಗ್ಗಲ್ಲಾನೋ.

೧೯೧. … ಧುತವಾದಾನಂ [ಧುತಙ್ಗಧರಾನಂ (ಕತ್ಥಚಿ)] ಯದಿದಂ ಮಹಾಕಸ್ಸಪೋ.

೧೯೨. … ದಿಬ್ಬಚಕ್ಖುಕಾನಂ ಯದಿದಂ ಅನುರುದ್ಧೋ.

೧೯೩. … ಉಚ್ಚಾಕುಲಿಕಾನಂ ಯದಿದಂ ಭದ್ದಿಯೋ ಕಾಳಿಗೋಧಾಯಪುತ್ತೋ.

೧೯೪. … ಮಞ್ಜುಸ್ಸರಾನಂ ಯದಿದಂ ಲಕುಣ್ಡಕ [ಲಕುಣ್ಟಕ (ಸ್ಯಾ. ಕಂ.)] ಭದ್ದಿಯೋ.

೧೯೫. … ಸೀಹನಾದಿಕಾನಂ ¶ ಯದಿದಂ ಪಿಣ್ಡೋಲಭಾರದ್ವಾಜೋ.

೧೯೬. … ಧಮ್ಮಕಥಿಕಾನಂ ಯದಿದಂ ಪುಣ್ಣೋ ಮನ್ತಾಣಿಪುತ್ತೋ.

೧೯೭. … ಸಂಖಿತ್ತೇನ ಭಾಸಿತಸ್ಸ ವಿತ್ಥಾರೇನ ಅತ್ಥಂ ವಿಭಜನ್ತಾನಂ ಯದಿದಂ ಮಹಾಕಚ್ಚಾನೋತಿ.

೧೯೮. ‘‘ಏತದಗ್ಗಂ ¶ ¶ , ಭಿಕ್ಖವೇ, ಮಮ ಸಾವಕಾನಂ ಭಿಕ್ಖೂನಂ ಮನೋಮಯಂ ಕಾಯಂ ಅಭಿನಿಮ್ಮಿನನ್ತಾನಂ ಯದಿದಂ ಚೂಳಪನ್ಥಕೋ’’ [ಚುಲ್ಲಪನ್ಥಕೋ (ಸೀ. ಸ್ಯಾ. ಕಂ. ಪೀ.)].

೧೯೯. … ಚೇತೋವಿವಟ್ಟಕುಸಲಾನಂ ಯದಿದಂ ಚೂಳಪನ್ಥಕೋ.

೨೦೦. … ಸಞ್ಞಾವಿವಟ್ಟಕುಸಲಾನಂ ಯದಿದಂ ಮಹಾಪನ್ಥಕೋ.

೨೦೧. … ಅರಣವಿಹಾರೀನಂ ಯದಿದಂ ಸುಭೂತಿ.

೨೦೨. … ದಕ್ಖಿಣೇಯ್ಯಾನಂ ಯದಿದಂ ಸುಭೂತಿ.

೨೦೩. … ಆರಞ್ಞಕಾನಂ ಯದಿದಂ ರೇವತೋ ಖದಿರವನಿಯೋ.

೨೦೪. … ಝಾಯೀನಂ ಯದಿದಂ ಕಙ್ಖಾರೇವತೋ.

೨೦೫. … ಆರದ್ಧವೀರಿಯಾನಂ ಯದಿದಂ ಸೋಣೋ ಕೋಳಿವಿಸೋ.

೨೦೬. … ಕಲ್ಯಾಣವಾಕ್ಕರಣಾನಂ ಯದಿದಂ ಸೋಣೋ ಕುಟಿಕಣ್ಣೋ.

೨೦೮. … ಸದ್ಧಾಧಿಮುತ್ತಾನಂ ಯದಿದಂ ವಕ್ಕಲೀತಿ.

೨೦೯. ‘‘ಏತದಗ್ಗಂ ¶ , ಭಿಕ್ಖವೇ, ಮಮ ಸಾವಕಾನಂ ಭಿಕ್ಖೂನಂ ಸಿಕ್ಖಾಕಾಮಾನಂ ಯದಿದಂ ¶ ರಾಹುಲೋ’’.

೨೧೦. … ಸದ್ಧಾಪಬ್ಬಜಿತಾನಂ ¶ ಯದಿದಂ ರಟ್ಠಪಾಲೋ.

೨೧೧. … ಪಠಮಂ ಸಲಾಕಂ ಗಣ್ಹನ್ತಾನಂ ಯದಿದಂ ಕುಣ್ಡಧಾನೋ.

೨೧೨. … ಪಟಿಭಾನವನ್ತಾನಂ ಯದಿದಂ ವಙ್ಗೀಸೋ.

೨೧೩. … ಸಮನ್ತಪಾಸಾದಿಕಾನಂ ಯದಿದಂ ಉಪಸೇನೋ ವಙ್ಗನ್ತಪುತ್ತೋ.

೨೧೪. … ಸೇನಾಸನಪಞ್ಞಾಪಕಾನಂ ಯದಿದಂ ದಬ್ಬೋ ಮಲ್ಲಪುತ್ತೋ.

೨೧೫. … ದೇವತಾನಂ ಪಿಯಮನಾಪಾನಂ ಯದಿದಂ ಪಿಲಿನ್ದವಚ್ಛೋ.

೨೧೬. … ಖಿಪ್ಪಾಭಿಞ್ಞಾನಂ ಯದಿದಂ ಬಾಹಿಯೋ ದಾರುಚೀರಿಯೋ.

೨೧೭. … ಚಿತ್ತಕಥಿಕಾನಂ ಯದಿದಂ ಕುಮಾರಕಸ್ಸಪೋ.

೨೧೮. … ಪಟಿಸಮ್ಭಿದಾಪತ್ತಾನಂ ಯದಿದಂ ಮಹಾಕೋಟ್ಠಿತೋತಿ [ಮಹಾಕೋಟ್ಠಿಕೋತಿ (ಅಞ್ಞೇಸು ಸುತ್ತೇಸು ಮರಮ್ಮಪೋತ್ಥಕೇ)].

೨೧೯. ‘‘ಏತದಗ್ಗಂ, ಭಿಕ್ಖವೇ, ಮಮ ಸಾವಕಾನಂ ಭಿಕ್ಖೂನಂ ಬಹುಸ್ಸುತಾನಂ ಯದಿದಂ ಆನನ್ದೋ’’.

೨೨೦. … ಸತಿಮನ್ತಾನಂ ¶ ಯದಿದಂ ಆನನ್ದೋ.

೨೨೧. … ಗತಿಮನ್ತಾನಂ ¶ ಯದಿದಂ ಆನನ್ದೋ.

೨೨೨. … ಧಿತಿಮನ್ತಾನಂ ಯದಿದಂ ಆನನ್ದೋ.

೨೨೩. … ಉಪಟ್ಠಾಕಾನಂ ಯದಿದಂ ಆನನ್ದೋ.

೨೨೪. … ಮಹಾಪರಿಸಾನಂ ಯದಿದಂ ಉರುವೇಲಕಸ್ಸಪೋ.

೨೨೫. … ಕುಲಪ್ಪಸಾದಕಾನಂ ಯದಿದಂ ಕಾಳುದಾಯೀ.

೨೨೬. … ಅಪ್ಪಾಬಾಧಾನಂ ಯದಿದಂ ಬಾಕುಲೋ [ಬಕ್ಕುಲೋ (ಸೀ. ಸ್ಯಾ. ಕಂ. ಪೀ.)].

೨೨೭. … ಪುಬ್ಬೇನಿವಾಸಂ ಅನುಸ್ಸರನ್ತಾನಂ ಯದಿದಂ ಸೋಭಿತೋ.

೨೨೯. … ಭಿಕ್ಖುನೋವಾದಕಾನಂ ¶ ಯದಿದಂ ನನ್ದಕೋ.

೨೩೦. … ಇನ್ದ್ರಿಯೇಸು ಗುತ್ತದ್ವಾರಾನಂ ಯದಿದಂ ನನ್ದೋ.

೨೩೧. … ಭಿಕ್ಖುಓವಾದಕಾನಂ ಯದಿದಂ ಮಹಾಕಪ್ಪಿನೋ.

೨೩೨. … ತೇಜೋಧಾತುಕುಸಲಾನಂ ಯದಿದಂ ಸಾಗತೋ.

೨೩೩. … ಪಟಿಭಾನೇಯ್ಯಕಾನಂ ಯದಿದಂ ರಾಧೋ.

೨೩೪. … ಲೂಖಚೀವರಧರಾನಂ ¶ ಯದಿದಂ ಮೋಘರಾಜಾತಿ.

೨೩೫. ‘‘ಏತದಗ್ಗಂ ¶ , ಭಿಕ್ಖವೇ, ಮಮ ಸಾವಿಕಾನಂ ಭಿಕ್ಖುನೀನಂ ರತ್ತಞ್ಞೂನಂ ಯದಿದಂ ಮಹಾಪಜಾಪತಿಗೋತಮೀ’’.

೨೩೭. … ಇದ್ಧಿಮನ್ತೀನಂ ಯದಿದಂ ಉಪ್ಪಲವಣ್ಣಾ.

೨೩೮. … ವಿನಯಧರಾನಂ ಯದಿದಂ ಪಟಾಚಾರಾ.

೨೩೯. … ಧಮ್ಮಕಥಿಕಾನಂ ಯದಿದಂ ಧಮ್ಮದಿನ್ನಾ.

೨೪೧. … ಆರದ್ಧವೀರಿಯಾನಂ ಯದಿದಂ ಸೋಣಾ.

೨೪೨. … ದಿಬ್ಬಚಕ್ಖುಕಾನಂ ಯದಿದಂ ಬಕುಲಾ [ಸಕುಲಾ (ಸೀ. ಸ್ಯಾ. ಕಂ. ಪೀ.)].

೨೪೩. … ಖಿಪ್ಪಾಭಿಞ್ಞಾನಂ ಯದಿದಂ ಭದ್ದಾ ಕುಣ್ಡಲಕೇಸಾ.

೨೪೪. … ಪುಬ್ಬೇನಿವಾಸಂ ಅನುಸ್ಸರನ್ತೀನಂ ಯದಿದಂ ಭದ್ದಾ ಕಾಪಿಲಾನೀ.

೨೪೫. … ಮಹಾಭಿಞ್ಞಪ್ಪತ್ತಾನಂ ಯದಿದಂ ಭದ್ದಕಚ್ಚಾನಾ.

೨೪೬. … ಲೂಖಚೀವರಧರಾನಂ ಯದಿದಂ ಕಿಸಾಗೋತಮೀ.

೨೪೭. … ಸದ್ಧಾಧಿಮುತ್ತಾನಂ ¶ ಯದಿದಂ ಸಿಙ್ಗಾಲಕಮಾತಾತಿ [ಸಿಗಾಲಮಾತಾತಿ (ಸೀ. ಸ್ಯಾ. ಕಂ. ಪೀ.)].

೨೪೮. ‘‘ಏತದಗ್ಗಂ ¶ , ಭಿಕ್ಖವೇ, ಮಮ ಸಾವಕಾನಂ ಉಪಾಸಕಾನಂ ಪಠಮಂ ಸರಣಂ ಗಚ್ಛನ್ತಾನಂ ಯದಿದಂ ¶ ತಪುಸ್ಸಭಲ್ಲಿಕಾ [ತಪಸ್ಸುಭಲ್ಲಿಕಾ (ಸೀ. ಪೀ.)] ವಾಣಿಜಾ’’.

೨೪೯. … ದಾಯಕಾನಂ ಯದಿದಂ ಸುದತ್ತೋ ಗಹಪತಿ ಅನಾಥಪಿಣ್ಡಿಕೋ.

೨೫೦. … ಧಮ್ಮಕಥಿಕಾನಂ ಯದಿದಂ ಚಿತ್ತೋ ಗಹಪತಿ ಮಚ್ಛಿಕಾಸಣ್ಡಿಕೋ.

೨೫೧. … ಚತೂಹಿ ಸಙ್ಗಹವತ್ಥೂಹಿ ಪರಿಸಂ ಸಙ್ಗಣ್ಹನ್ತಾನಂ ಯದಿದಂ ಹತ್ಥಕೋ ಆಳವಕೋ.

೨೫೨. … ಪಣೀತದಾಯಕಾನಂ ಯದಿದಂ ಮಹಾನಾಮೋ ಸಕ್ಕೋ.

೨೫೩. … ಮನಾಪದಾಯಕಾನಂ ಯದಿದಂ ಉಗ್ಗೋ ಗಹಪತಿ ವೇಸಾಲಿಕೋ.

೨೫೪. … ಸಙ್ಘುಪಟ್ಠಾಕಾನಂ ಯದಿದಂ ಹತ್ಥಿಗಾಮಕೋ ಉಗ್ಗತೋ ಗಹಪತಿ.

೨೫೫. … ಅವೇಚ್ಚಪ್ಪಸನ್ನಾನಂ ಯದಿದಂ ಸೂರಮ್ಬಟ್ಠೋ [ಸೂರೋ ಅಮ್ಬಟ್ಠೋ (ಸೀ. ಸ್ಯಾ. ಕಂ. ಪೀ.) ಸುರೇಬನ್ಧೋ (ಕ.)].

೨೫೬. … ಪುಗ್ಗಲಪ್ಪಸನ್ನಾನಂ ಯದಿದಂ ಜೀವಕೋ ಕೋಮಾರಭಚ್ಚೋ.

೨೫೭. … ವಿಸ್ಸಾಸಕಾನಂ ¶ ಯದಿದಂ ನಕುಲಪಿತಾ ಗಹಪತೀತಿ.

೨೫೮. ‘‘ಏತದಗ್ಗಂ ¶ , ಭಿಕ್ಖವೇ, ಮಮ ಸಾವಿಕಾನಂ ಉಪಾಸಿಕಾನಂ ಪಠಮಂ ಸರಣಂ ಗಚ್ಛನ್ತೀನಂ ಯದಿದಂ ಸುಜಾತಾ ಸೇನಿಯಧೀತಾ’’ [ಸೇನಾನೀ ಧೀತಾ (ಸೀ. ಸ್ಯಾ. ಕಂ. ಪೀ.)].

೨೫೯. … ದಾಯಿಕಾನಂ ಯದಿದಂ ವಿಸಾಖಾ ಮಿಗಾರಮಾತಾ.

೨೬೦. … ಬಹುಸ್ಸುತಾನಂ ಯದಿದಂ ಖುಜ್ಜುತ್ತರಾ.

೨೬೧. … ಮೇತ್ತಾವಿಹಾರೀನಂ ಯದಿದಂ ಸಾಮಾವತೀ.

೨೬೨. … ಝಾಯೀನಂ ಯದಿದಂ ಉತ್ತರಾನನ್ದಮಾತಾ.

೨೬೩. … ಪಣೀತದಾಯಿಕಾನಂ ಯದಿದಂ ಸುಪ್ಪವಾಸಾ ಕೋಲಿಯಧೀತಾ.

೨೬೪. … ಗಿಲಾನುಪಟ್ಠಾಕೀನಂ ¶ ಯದಿದಂ ಸುಪ್ಪಿಯಾ ಉಪಾಸಿಕಾ.

೨೬೫. … ಅವೇಚ್ಚಪ್ಪಸನ್ನಾನಂ ಯದಿದಂ ಕಾತಿಯಾನೀ.

೨೬೬. … ವಿಸ್ಸಾಸಿಕಾನಂ ಯದಿದಂ ನಕುಲಮಾತಾ ಗಹಪತಾನೀ.

೨೬೭. … ಅನುಸ್ಸವಪ್ಪಸನ್ನಾನಂ ಯದಿದಂ ಕಾಳೀ ಉಪಾಸಿಕಾ ಕುಲಘರಿಕಾ [ಕುಲಘರಿಕಾ (ಕ.)] ತಿ.

೨೬೮. ‘‘ಅಟ್ಠಾನಮೇತಂ ¶ , ಭಿಕ್ಖವೇ, ಅನವಕಾಸೋ ಯಂ ದಿಟ್ಠಿಸಮ್ಪನ್ನೋ ಪುಗ್ಗಲೋ ಕಞ್ಚಿ [ಕಿಞ್ಚಿ (ಕ.)] ಸಙ್ಖಾರಂ ನಿಚ್ಚತೋ ಉಪಗಚ್ಛೇಯ್ಯ. ನೇತಂ ಠಾನಂ ವಿಜ್ಜತಿ. ಠಾನಞ್ಚ ಖೋ ಏತಂ, ಭಿಕ್ಖವೇ, ವಿಜ್ಜತಿ ¶ ಯಂ ಪುಥುಜ್ಜನೋ ಕಞ್ಚಿ ಸಙ್ಖಾರಂ ನಿಚ್ಚತೋ ಉಪಗಚ್ಛೇಯ್ಯ. ಠಾನಮೇತಂ ವಿಜ್ಜತೀ’’ತಿ.

೨೬೯. ‘‘ಅಟ್ಠಾನಮೇತಂ, ಭಿಕ್ಖವೇ, ಅನವಕಾಸೋ ಯಂ ದಿಟ್ಠಿಸಮ್ಪನ್ನೋ ಪುಗ್ಗಲೋ ಕಞ್ಚಿ ಸಙ್ಖಾರಂ ಸುಖತೋ ಉಪಗಚ್ಛೇಯ್ಯ. ನೇತಂ ಠಾನಂ ವಿಜ್ಜತಿ. ಠಾನಞ್ಚ ಖೋ ಏತಂ, ಭಿಕ್ಖವೇ, ವಿಜ್ಜತಿ ಯಂ ಪುಥುಜ್ಜನೋ ಕಞ್ಚಿ ಸಙ್ಖಾರಂ ಸುಖತೋ ಉಪಗಚ್ಛೇಯ್ಯ. ಠಾನಮೇತಂ ವಿಜ್ಜತೀ’’ತಿ.

೨೭೦. ‘‘ಅಟ್ಠಾನಮೇತಂ, ಭಿಕ್ಖವೇ, ಅನವಕಾಸೋ ಯಂ ದಿಟ್ಠಿಸಮ್ಪನ್ನೋ ಪುಗ್ಗಲೋ ¶ ಕಞ್ಚಿ ಧಮ್ಮಂ ಅತ್ತತೋ ಉಪಗಚ್ಛೇಯ್ಯ. ನೇತಂ ಠಾನಂ ವಿಜ್ಜತಿ. ಠಾನಞ್ಚ ಖೋ ಏತಂ, ಭಿಕ್ಖವೇ, ವಿಜ್ಜತಿ ಯಂ ಪುಥುಜ್ಜನೋ ಕಞ್ಚಿ ಧಮ್ಮಂ ಅತ್ತತೋ ಉಪಗಚ್ಛೇಯ್ಯ. ಠಾನಮೇತಂ ವಿಜ್ಜತೀ’’ತಿ.

೨೭೧. ‘‘ಅಟ್ಠಾನಮೇತಂ, ಭಿಕ್ಖವೇ, ಅನವಕಾಸೋ ಯಂ ದಿಟ್ಠಿಸಮ್ಪನ್ನೋ ಪುಗ್ಗಲೋ ಮಾತರಂ ಜೀವಿತಾ ವೋರೋಪೇಯ್ಯ. ನೇತಂ ಠಾನಂ ವಿಜ್ಜತಿ. ಠಾನಞ್ಚ ಖೋ, ಭಿಕ್ಖವೇ, ವಿಜ್ಜತಿ ಯಂ ಪುಥುಜ್ಜನೋ ಮಾತರಂ ಜೀವಿತಾ ವೋರೋಪೇಯ್ಯ. ಠಾನಮೇತಂ ವಿಜ್ಜತೀ’’ತಿ.

೨೭೨. ‘‘ಅಟ್ಠಾನಮೇತಂ ¶ , ಭಿಕ್ಖವೇ, ಅನವಕಾಸೋ ಯಂ ದಿಟ್ಠಿಸಮ್ಪನ್ನೋ ಪುಗ್ಗಲೋ ಪಿತರಂ ಜೀವಿತಾ ವೋರೋಪೇಯ್ಯ. ನೇತಂ ಠಾನಂ ವಿಜ್ಜತಿ. ಠಾನಞ್ಚ ಖೋ ಏತಂ, ಭಿಕ್ಖವೇ, ವಿಜ್ಜತಿ ಯಂ ಪುಥುಜ್ಜನೋ ಪಿತರಂ ಜೀವಿತಾ ವೋರೋಪೇಯ್ಯ. ಠಾನಮೇತಂ ವಿಜ್ಜತೀ’’ತಿ.

೨೭೩. ‘‘ಅಟ್ಠಾನಮೇತಂ ¶ , ಭಿಕ್ಖವೇ, ಅನವಕಾಸೋ ಯಂ ದಿಟ್ಠಿಸಮ್ಪನ್ನೋ ಪುಗ್ಗಲೋ ಅರಹನ್ತಂ ಜೀವಿತಾ ವೋರೋಪೇಯ್ಯ. ನೇತಂ ಠಾನಂ ವಿಜ್ಜತಿ. ಠಾನಞ್ಚ ಖೋ ಏತಂ, ಭಿಕ್ಖವೇ, ವಿಜ್ಜತಿ ಯಂ ಪುಥುಜ್ಜನೋ ಅರಹನ್ತಂ ಜೀವಿತಾ ವೋರೋಪೇಯ್ಯ. ಠಾನಮೇತಂ ವಿಜ್ಜತೀ’’ತಿ.

೨೭೪. ‘‘ಅಟ್ಠಾನಮೇತಂ, ಭಿಕ್ಖವೇ, ಅನವಕಾಸೋ ಯಂ ದಿಟ್ಠಿಸಮ್ಪನ್ನೋ ಪುಗ್ಗಲೋ ತಥಾಗತಸ್ಸ ಪದುಟ್ಠಚಿತ್ತೋ ಲೋಹಿತಂ ಉಪ್ಪಾದೇಯ್ಯ. ನೇತಂ ಠಾನಂ ವಿಜ್ಜತಿ. ಠಾನಞ್ಚ ಖೋ ಏತಂ, ಭಿಕ್ಖವೇ, ವಿಜ್ಜತಿ ಯಂ ಪುಥುಜ್ಜನೋ ತಥಾಗತಸ್ಸ ಪದುಟ್ಠಚಿತ್ತೋ ಲೋಹಿತಂ ಉಪ್ಪಾದೇಯ್ಯ. ಠಾನಮೇತಂ ವಿಜ್ಜತೀ’’ತಿ.

೨೭೫. ‘‘ಅಟ್ಠಾನಮೇತಂ ¶ , ಭಿಕ್ಖವೇ, ಅನವಕಾಸೋ ಯಂ ದಿಟ್ಠಿಸಮ್ಪನ್ನೋ ಪುಗ್ಗಲೋ ಸಙ್ಘಂ ಭಿನ್ದೇಯ್ಯ. ನೇತಂ ಠಾನಂ ವಿಜ್ಜತಿ. ಠಾನಞ್ಚ ಖೋ ಏತಂ, ಭಿಕ್ಖವೇ, ವಿಜ್ಜತಿ ಯಂ ಪುಥುಜ್ಜನೋ ಸಙ್ಘಂ ಭಿನ್ದೇಯ್ಯ. ಠಾನಮೇತಂ ವಿಜ್ಜತೀ’’ತಿ.

೨೭೬. ‘‘ಅಟ್ಠಾನಮೇತಂ, ಭಿಕ್ಖವೇ, ಅನವಕಾಸೋ ಯಂ ದಿಟ್ಠಿಸಮ್ಪನ್ನೋ ಪುಗ್ಗಲೋ ಅಞ್ಞಂ ಸತ್ಥಾರಂ ಉದ್ದಿಸೇಯ್ಯ. ನೇತಂ ಠಾನಂ ವಿಜ್ಜತಿ. ಠಾನಞ್ಚ ಖೋ ಏತಂ, ಭಿಕ್ಖವೇ, ವಿಜ್ಜತಿ ಯಂ ಪುಥುಜ್ಜನೋ ಅಞ್ಞಂ ಸತ್ಥಾರಂ ಉದ್ದಿಸೇಯ್ಯ. ಠಾನಮೇತಂ ವಿಜ್ಜತೀ’’ತಿ.

೨೭೭. ‘‘ಅಟ್ಠಾನಮೇತಂ, ಭಿಕ್ಖವೇ, ಅನವಕಾಸೋ ಯಂ ಏಕಿಸ್ಸಾ ಲೋಕಧಾತುಯಾ ದ್ವೇ ಅರಹನ್ತೋ ಸಮ್ಮಾಸಮ್ಬುದ್ಧಾ ಅಪುಬ್ಬಂ ಅಚರಿಮಂ ¶ ಉಪ್ಪಜ್ಜೇಯ್ಯುಂ. ನೇತಂ ಠಾನಂ ವಿಜ್ಜತಿ. ಠಾನಞ್ಚ ಖೋ ಏತಂ, ಭಿಕ್ಖವೇ, ವಿಜ್ಜತಿ ಯಂ ಏಕಿಸ್ಸಾ ಲೋಕಧಾತುಯಾ ಏಕೋವ ಅರಹಂ ಸಮ್ಮಾಸಮ್ಬುದ್ಧೋ ಉಪ್ಪಜ್ಜೇಯ್ಯ. ಠಾನಮೇತಂ ವಿಜ್ಜತೀ’’ತಿ.

೨೭೮. ‘‘ಅಟ್ಠಾನಮೇತಂ ¶ , ಭಿಕ್ಖವೇ, ಅನವಕಾಸೋ ಯಂ ಏಕಿಸ್ಸಾ ಲೋಕಧಾತುಯಾ ದ್ವೇ ರಾಜಾನೋ ಚಕ್ಕವತ್ತೀ ಅಪುಬ್ಬಂ ಅಚರಿಮಂ ಉಪ್ಪಜ್ಜೇಯ್ಯುಂ. ನೇತಂ ಠಾನಂ ವಿಜ್ಜತಿ ¶ . ಠಾನಞ್ಚ ಖೋ ಏತಂ, ಭಿಕ್ಖವೇ, ವಿಜ್ಜತಿ ಯಂ ಏಕಿಸ್ಸಾ ಲೋಕಧಾತುಯಾ ಏಕೋ ರಾಜಾ ಚಕ್ಕವತ್ತೀ ಉಪ್ಪಜ್ಜೇಯ್ಯ. ಠಾನಮೇತಂ ವಿಜ್ಜತೀ’’ತಿ.

೨೭೯. ‘‘ಅಟ್ಠಾನಮೇತಂ, ಭಿಕ್ಖವೇ, ಅನವಕಾಸೋ ಯಂ ಇತ್ಥೀ ಅರಹಂ ಅಸ್ಸ ಸಮ್ಮಾಸಮ್ಬುದ್ಧೋ. ನೇತಂ ಠಾನಂ ವಿಜ್ಜತಿ. ಠಾನಞ್ಚ ಖೋ, ಏತಂ, ಭಿಕ್ಖವೇ, ವಿಜ್ಜತಿ ಯಂ ಪುರಿಸೋ ಅರಹಂ ಅಸ್ಸ ಸಮ್ಮಾಸಮ್ಬುದ್ಧೋ. ಠಾನಮೇತಂ ವಿಜ್ಜತೀ’’ತಿ.

೨೮೦. ‘‘ಅಟ್ಠಾನಮೇತಂ ¶ , ಭಿಕ್ಖವೇ, ಅನವಕಾಸೋ ಯಂ ಇತ್ಥೀ ರಾಜಾ ಅಸ್ಸ ಚಕ್ಕವತ್ತೀ. ನೇತಂ ಠಾನಂ ವಿಜ್ಜತಿ. ಠಾನಞ್ಚ ಖೋ ಏತಂ, ಭಿಕ್ಖವೇ, ವಿಜ್ಜತಿ ಯಂ ಪುರಿಸೋ ರಾಜಾ ಅಸ್ಸ ಚಕ್ಕವತ್ತೀ. ಠಾನಮೇತಂ ವಿಜ್ಜತೀ’’ತಿ.

೨೮೧-೨೮೩. ‘‘ಅಟ್ಠಾನಮೇತಂ, ಭಿಕ್ಖವೇ, ಅನವಕಾಸೋ ಯಂ ಇತ್ಥೀ ಸಕ್ಕತ್ತಂ ಕಾರೇಯ್ಯ…ಪೇ… ಮಾರತ್ತಂ ಕಾರೇಯ್ಯ…ಪೇ… ಬ್ರಹ್ಮತ್ತಂ ಕಾರೇಯ್ಯ. ನೇತಂ ಠಾನಂ ವಿಜ್ಜತಿ. ಠಾನಞ್ಚ ಖೋ ಏತಂ, ಭಿಕ್ಖವೇ, ವಿಜ್ಜತಿ ಯಂ ಪುರಿಸೋ ಸಕ್ಕತ್ತಂ ಕಾರೇಯ್ಯ…ಪೇ… ಮಾರತ್ತಂ ಕಾರೇಯ್ಯ…ಪೇ… ಬ್ರಹ್ಮತ್ತಂ ಕಾರೇಯ್ಯ. ಠಾನಮೇತಂ ವಿಜ್ಜತೀ’’ತಿ.

೨೮೪. ‘‘ಅಟ್ಠಾನಮೇತಂ, ಭಿಕ್ಖವೇ, ಅನವಕಾಸೋ ಯಂ ಕಾಯದುಚ್ಚರಿತಸ್ಸ ಇಟ್ಠೋ ಕನ್ತೋ ಮನಾಪೋ ವಿಪಾಕೋ ನಿಬ್ಬತ್ತೇಯ್ಯ. ನೇತಂ ಠಾನಂ ವಿಜ್ಜತಿ. ಠಾನಞ್ಚ ಖೋ ಏತಂ, ಭಿಕ್ಖವೇ, ವಿಜ್ಜತಿ ಯಂ ಕಾಯದುಚ್ಚರಿತಸ್ಸ ಅನಿಟ್ಠೋ ಅಕನ್ತೋ ಅಮನಾಪೋ ವಿಪಾಕೋ ನಿಬ್ಬತ್ತೇಯ್ಯ. ಠಾನಮೇತಂ ವಿಜ್ಜತೀ’’ತಿ.

೨೮೫-೨೮೬. ‘‘ಅಟ್ಠಾನಮೇತಂ, ಭಿಕ್ಖವೇ, ಅನವಕಾಸೋ ಯಂ ವಚೀದುಚ್ಚರಿತಸ್ಸ…ಪೇ… ಯಂ ಮನೋದುಚ್ಚರಿತಸ್ಸ ಇಟ್ಠೋ ಕನ್ತೋ ಮನಾಪೋ ವಿಪಾಕೋ ನಿಬ್ಬತ್ತೇಯ್ಯ. ನೇತಂ ಠಾನಂ ವಿಜ್ಜತಿ. ಠಾನಞ್ಚ ಖೋ ಏತಂ, ಭಿಕ್ಖವೇ, ವಿಜ್ಜತಿ ಯಂ ಮನೋದುಚ್ಚರಿತಸ್ಸ ಅನಿಟ್ಠೋ ಅಕನ್ತೋ ಅಮನಾಪೋ ವಿಪಾಕೋ ನಿಬ್ಬತ್ತೇಯ್ಯ. ಠಾನಮೇತಂ ವಿಜ್ಜತೀ’’ತಿ.

೨೮೭. ‘‘ಅಟ್ಠಾನಮೇತಂ ¶ , ಭಿಕ್ಖವೇ, ಅನವಕಾಸೋ ಯಂ ಕಾಯಸುಚರಿತಸ್ಸ ಅನಿಟ್ಠೋ ಅಕನ್ತೋ ಅಮನಾಪೋ ವಿಪಾಕೋ ನಿಬ್ಬತ್ತೇಯ್ಯ. ನೇತಂ ಠಾನಂ ವಿಜ್ಜತಿ. ಠಾನಞ್ಚ ¶ ¶ ಖೋ ಏತಂ, ಭಿಕ್ಖವೇ, ವಿಜ್ಜತಿ ಯಂ ಕಾಯಸುಚರಿತಸ್ಸ ಇಟ್ಠೋ ಕನ್ತೋ ಮನಾಪೋ ವಿಪಾಕೋ ನಿಬ್ಬತ್ತೇಯ್ಯ. ಠಾನಮೇತಂ ವಿಜ್ಜತೀ’’ತಿ.

೨೮೮-೨೮೯. ‘‘ಅಟ್ಠಾನಮೇತಂ ¶ , ಭಿಕ್ಖವೇ, ಅನವಕಾಸೋ ಯಂ ವಚೀಸುಚರಿತಸ್ಸ…ಪೇ… ಮನೋಸುಚರಿತಸ್ಸ ಅನಿಟ್ಠೋ ಅಕನ್ತೋ ಅಮನಾಪೋ ವಿಪಾಕೋ ನಿಬ್ಬತ್ತೇಯ್ಯ. ನೇತಂ ಠಾನಂ ವಿಜ್ಜತಿ. ಠಾನಞ್ಚ ಖೋ ಏತಂ, ಭಿಕ್ಖವೇ, ವಿಜ್ಜತಿ ಯಂ ಮನೋಸುಚರಿತಸ್ಸ ಇಟ್ಠೋ ಕನ್ತೋ ಮನಾಪೋ ವಿಪಾಕೋ ನಿಬ್ಬತ್ತೇಯ್ಯ. ಠಾನಮೇತಂ ವಿಜ್ಜತೀ’’ತಿ.

೨೯೦. ‘‘ಅಟ್ಠಾನಮೇತಂ, ಭಿಕ್ಖವೇ, ಅನವಕಾಸೋ ಯಂ ಕಾಯದುಚ್ಚರಿತಸಮಙ್ಗೀ ತನ್ನಿದಾನಾ ತಪ್ಪಚ್ಚಯಾ ಕಾಯಸ್ಸ ಭೇದಾ ಪರಂ ಮರಣಾ ಸುಗತಿಂ ಸಗ್ಗಂ ಲೋಕಂ ಉಪಪಜ್ಜೇಯ್ಯ. ನೇತಂ ಠಾನಂ ವಿಜ್ಜತಿ. ಠಾನಞ್ಚ ಖೋ ಏತಂ, ಭಿಕ್ಖವೇ, ವಿಜ್ಜತಿ ಯಂ ಕಾಯದುಚ್ಚರಿತಸಮಙ್ಗೀ ತನ್ನಿದಾನಾ ತಪ್ಪಚ್ಚಯಾ ಕಾಯಸ್ಸ ಭೇದಾ ಪರಂ ಮರಣಾ ಅಪಾಯಂ ದುಗ್ಗತಿಂ ವಿನಿಪಾತಂ ನಿರಯಂ ಉಪಪಜ್ಜೇಯ್ಯ. ಠಾನಮೇತಂ ವಿಜ್ಜತೀ’’ತಿ.

೨೯೧-೨೯೨. ‘‘ಅಟ್ಠಾನಮೇತಂ, ಭಿಕ್ಖವೇ, ಅನವಕಾಸೋ ಯಂ ವಚೀದುಚ್ಚರಿತಸಮಙ್ಗೀ…ಪೇ… ಯಂ ಮನೋದುಚ್ಚರಿತಸಮಙ್ಗೀ ತನ್ನಿದಾನಾ ತಪ್ಪಚ್ಚಯಾ ಕಾಯಸ್ಸ ಭೇದಾ ಪರಂ ಮರಣಾ ಸುಗತಿಂ ಸಗ್ಗಂ ಲೋಕಂ ಉಪಪಜ್ಜೇಯ್ಯ. ನೇತಂ ಠಾನಂ ವಿಜ್ಜತಿ. ಠಾನಞ್ಚ ಖೋ ಏತಂ, ಭಿಕ್ಖವೇ, ವಿಜ್ಜತಿ ಯಂ ಮನೋದುಚ್ಚರಿತಸಮಙ್ಗೀ ತನ್ನಿದಾನಾ ತಪ್ಪಚ್ಚಯಾ ಕಾಯಸ್ಸ ಭೇದಾ ಪರಂ ಮರಣಾ ಅಪಾಯಂ ದುಗ್ಗತಿಂ ವಿನಿಪಾತಂ ನಿರಯಂ ಉಪಪಜ್ಜೇಯ್ಯ. ಠಾನಮೇತಂ ವಿಜ್ಜತೀ’’ತಿ ¶ .

೨೯೩. ‘‘ಅಟ್ಠಾನಮೇತಂ, ಭಿಕ್ಖವೇ, ಅನವಕಾಸೋ ಯಂ ಕಾಯಸುಚರಿತಸಮಙ್ಗೀ ತನ್ನಿದಾನಾ ತಪ್ಪಚ್ಚಯಾ ಕಾಯಸ್ಸ ಭೇದಾ ಪರಂ ಮರಣಾ ಅಪಾಯಂ ದುಗ್ಗತಿಂ ವಿನಿಪಾತಂ ನಿರಯಂ ಉಪಪಜ್ಜೇಯ್ಯ. ನೇತಂ ಠಾನಂ ವಿಜ್ಜತಿ. ಠಾನಞ್ಚ ಖೋ ಏತಂ, ಭಿಕ್ಖವೇ, ವಿಜ್ಜತಿ ಯಂ ಕಾಯಸುಚರಿತಸಮಙ್ಗೀ ತನ್ನಿದಾನಾ ತಪ್ಪಚ್ಚಯಾ ¶ ಕಾಯಸ್ಸ ಭೇದಾ ಪರಂ ಮರಣಾ ಸುಗತಿಂ ಸಗ್ಗಂ ಲೋಕಂ ಉಪಪಜ್ಜೇಯ್ಯ. ಠಾನಮೇತಂ ವಿಜ್ಜತೀ’’ತಿ.

೨೯೪-೨೯೫. ‘‘ಅಟ್ಠಾನಮೇತಂ, ಭಿಕ್ಖವೇ, ಅನವಕಾಸೋ ಯಂ ವಚೀಸುಚರಿತಸಮಙ್ಗೀ…ಪೇ… ಯಂ ಮನೋಸುಚರಿತಸಮಙ್ಗೀ ತನ್ನಿದಾನಾ ತಪ್ಪಚ್ಚಯಾ ಕಾಯಸ್ಸ ಭೇದಾ ಪರಂ ಮರಣಾ ಅಪಾಯಂ ದುಗ್ಗತಿಂ ವಿನಿಪಾತಂ ನಿರಯಂ ಉಪಪಜ್ಜೇಯ್ಯ. ನೇತಂ ಠಾನಂ ವಿಜ್ಜತಿ. ಠಾನಞ್ಚ ಖೋ ಏತಂ, ಭಿಕ್ಖವೇ, ವಿಜ್ಜತಿ ಯಂ ¶ ಮನೋಸುಚರಿತಸಮಙ್ಗೀ ತನ್ನಿದಾನಾ ತಪ್ಪಚ್ಚಯಾ ಕಾಯಸ್ಸ ಭೇದಾ ಪರಂ ಮರಣಾ ಸುಗತಿಂ ಸಗ್ಗಂ ಲೋಕಂ ಉಪಪಜ್ಜೇಯ್ಯ. ಠಾನಮೇತಂ ವಿಜ್ಜತೀ’’ತಿ.

೨೯೬. ‘‘ಏಕಧಮ್ಮೋ ¶ ¶ , ಭಿಕ್ಖವೇ, ಭಾವಿತೋ ಬಹುಲೀಕತೋ ಏಕನ್ತನಿಬ್ಬಿದಾಯ ವಿರಾಗಾಯ ನಿರೋಧಾಯ ಉಪಸಮಾಯ ಅಭಿಞ್ಞಾಯ ಸಮ್ಬೋಧಾಯ ನಿಬ್ಬಾನಾಯ ಸಂವತ್ತತಿ. ಕತಮೋ ಏಕಧಮ್ಮೋ? ಬುದ್ಧಾನುಸ್ಸತಿ. ಅಯಂ ಖೋ, ಭಿಕ್ಖವೇ, ಏಕಧಮ್ಮೋ ಭಾವಿತೋ ಬಹುಲೀಕತೋ ಏಕನ್ತನಿಬ್ಬಿದಾಯ ವಿರಾಗಾಯ ನಿರೋಧಾಯ ಉಪಸಮಾಯ ಅಭಿಞ್ಞಾಯ ಸಮ್ಬೋಧಾಯ ¶ ನಿಬ್ಬಾನಾಯ ಸಂವತ್ತತೀ’’ತಿ.

೨೯೭. ‘‘ಏಕಧಮ್ಮೋ, ಭಿಕ್ಖವೇ, ಭಾವಿತೋ ಬಹುಲೀಕತೋ ಏಕನ್ತನಿಬ್ಬಿದಾಯ ವಿರಾಗಾಯ ನಿರೋಧಾಯ ಉಪಸಮಾಯ ಅಭಿಞ್ಞಾಯ ಸಮ್ಬೋಧಾಯ ನಿಬ್ಬಾನಾಯ ಸಂವತ್ತತಿ. ಕತಮೋ ಏಕಧಮ್ಮೋ? ಧಮ್ಮಾನುಸ್ಸತಿ…ಪೇ… ಸಙ್ಘಾನುಸ್ಸತಿ… ಸೀಲಾನುಸ್ಸತಿ… ಚಾಗಾನುಸ್ಸತಿ… ದೇವತಾನುಸ್ಸತಿ… ಆನಾಪಾನಸ್ಸತಿ… ಮರಣಸ್ಸತಿ… ಕಾಯಗತಾಸತಿ… ಉಪಸಮಾನುಸ್ಸತಿ. ಅಯಂ ಖೋ, ಭಿಕ್ಖವೇ, ಏಕಧಮ್ಮೋ ಭಾವಿತೋ ಬಹುಲೀಕತೋ ಏಕನ್ತನಿಬ್ಬಿದಾಯ ವಿರಾಗಾಯ ನಿರೋಧಾಯ ಉಪಸಮಾಯ ಅಭಿಞ್ಞಾಯ ಸಮ್ಬೋಧಾಯ ನಿಬ್ಬಾನಾಯ ಸಂವತ್ತತೀ’’ತಿ.

೨೯೮. ‘‘ನಾಹಂ, ಭಿಕ್ಖವೇ, ಅಞ್ಞಂ ಏಕಧಮ್ಮಮ್ಪಿ ಸಮನುಪಸ್ಸಾಮಿ ಯೇನ ಅನುಪ್ಪನ್ನಾ ವಾ ಅಕುಸಲಾ ಧಮ್ಮಾ ಉಪ್ಪಜ್ಜನ್ತಿ ಉಪ್ಪನ್ನಾ ವಾ ಅಕುಸಲಾ ಧಮ್ಮಾ ಭಿಯ್ಯೋಭಾವಾಯ ವೇಪುಲ್ಲಾಯ ಸಂವತ್ತನ್ತಿ ಯಥಯಿದಂ, ಭಿಕ್ಖವೇ, ಮಿಚ್ಛಾದಿಟ್ಠಿ. ಮಿಚ್ಛಾದಿಟ್ಠಿಕಸ್ಸ, ಭಿಕ್ಖವೇ, ಅನುಪ್ಪನ್ನಾ ಚೇವ ಅಕುಸಲಾ ಧಮ್ಮಾ ಉಪ್ಪಜ್ಜನ್ತಿ ಉಪ್ಪನ್ನಾ ಚ ಅಕುಸಲಾ ಧಮ್ಮಾ ಭಿಯ್ಯೋಭಾವಾಯ ವೇಪುಲ್ಲಾಯ ಸಂವತ್ತನ್ತೀ’’ತಿ.

೨೯೯. ‘‘ನಾಹಂ, ಭಿಕ್ಖವೇ, ಅಞ್ಞಂ ಏಕಧಮ್ಮಮ್ಪಿ ಸಮನುಪಸ್ಸಾಮಿ ಯೇನ ಅನುಪ್ಪನ್ನಾ ವಾ ಕುಸಲಾ ಧಮ್ಮಾ ಉಪ್ಪಜ್ಜನ್ತಿ ಉಪ್ಪನ್ನಾ ವಾ ಕುಸಲಾ ಧಮ್ಮಾ ಭಿಯ್ಯೋಭಾವಾಯ ವೇಪುಲ್ಲಾಯ ಸಂವತ್ತನ್ತಿ ಯಥಯಿದಂ ¶ , ಭಿಕ್ಖವೇ, ಸಮ್ಮಾದಿಟ್ಠಿ. ಸಮ್ಮಾದಿಟ್ಠಿಕಸ್ಸ ¶ , ಭಿಕ್ಖವೇ, ಅನುಪ್ಪನ್ನಾ ಚೇವ ಕುಸಲಾ ಧಮ್ಮಾ ಉಪ್ಪಜ್ಜನ್ತಿ ಉಪ್ಪನ್ನಾ ಚ ಕುಸಲಾ ಧಮ್ಮಾ ಭಿಯ್ಯೋಭಾವಾಯ ವೇಪುಲ್ಲಾಯ ಸಂವತ್ತನ್ತೀ’’ತಿ.

೩೦೦. ‘‘ನಾಹಂ ¶ , ಭಿಕ್ಖವೇ, ಅಞ್ಞಂ ಏಕಧಮ್ಮಮ್ಪಿ ಸಮನುಪಸ್ಸಾಮಿ ಯೇನ ಅನುಪ್ಪನ್ನಾ ವಾ ಕುಸಲಾ ಧಮ್ಮಾ ನುಪ್ಪಜ್ಜನ್ತಿ ಉಪ್ಪನ್ನಾ ವಾ ಕುಸಲಾ ಧಮ್ಮಾ ಪರಿಹಾಯನ್ತಿ ಯಥಯಿದಂ ¶ , ಭಿಕ್ಖವೇ, ಮಿಚ್ಛಾದಿಟ್ಠಿ. ಮಿಚ್ಛಾದಿಟ್ಠಿಕಸ್ಸ, ಭಿಕ್ಖವೇ, ಅನುಪ್ಪನ್ನಾ ಚೇವ ಕುಸಲಾ ಧಮ್ಮಾ ನುಪ್ಪಜ್ಜನ್ತಿ ಉಪ್ಪನ್ನಾ ಚ ಕುಸಲಾ ಧಮ್ಮಾ ಪರಿಹಾಯನ್ತೀ’’ತಿ.

೩೦೧. ‘‘ನಾಹಂ, ಭಿಕ್ಖವೇ, ಅಞ್ಞಂ ಏಕಧಮ್ಮಮ್ಪಿ ಸಮನುಪಸ್ಸಾಮಿ ಯೇನ ಅನುಪ್ಪನ್ನಾ ವಾ ಅಕುಸಲಾ ಧಮ್ಮಾ ನುಪ್ಪಜ್ಜನ್ತಿ ಉಪ್ಪನ್ನಾ ವಾ ಅಕುಸಲಾ ಧಮ್ಮಾ ಪರಿಹಾಯನ್ತಿ ಯಥಯಿದಂ, ಭಿಕ್ಖವೇ, ಸಮ್ಮಾದಿಟ್ಠಿ. ಸಮ್ಮಾದಿಟ್ಠಿಕಸ್ಸ, ಭಿಕ್ಖವೇ, ಅನುಪ್ಪನ್ನಾ ಚೇವ ಅಕುಸಲಾ ಧಮ್ಮಾ ನುಪ್ಪಜ್ಜನ್ತಿ ಉಪ್ಪನ್ನಾ ಚ ಅಕುಸಲಾ ಧಮ್ಮಾ ಪರಿಹಾಯನ್ತೀ’’ತಿ.

೩೦೨. ‘‘ನಾಹಂ, ಭಿಕ್ಖವೇ, ಅಞ್ಞಂ ಏಕಧಮ್ಮಮ್ಪಿ ಸಮನುಪಸ್ಸಾಮಿ ಯೇನ ಅನುಪ್ಪನ್ನಾ ವಾ ಮಿಚ್ಛಾದಿಟ್ಠಿ ಉಪ್ಪಜ್ಜತಿ ಉಪ್ಪನ್ನಾ ವಾ ಮಿಚ್ಛಾದಿಟ್ಠಿ ಪವಡ್ಢತಿ ಯಥಯಿದಂ, ಭಿಕ್ಖವೇ, ಅಯೋನಿಸೋಮನಸಿಕಾರೋ. ಅಯೋನಿಸೋ, ಭಿಕ್ಖವೇ, ಮನಸಿ ಕರೋತೋ ಅನುಪ್ಪನ್ನಾ ಚೇವ ಮಿಚ್ಛಾದಿಟ್ಠಿ ಉಪ್ಪಜ್ಜತಿ ಉಪ್ಪನ್ನಾ ಚ ಮಿಚ್ಛಾದಿಟ್ಠಿ ಪವಡ್ಢತೀ’’ತಿ.

೩೦೩. ‘‘ನಾಹಂ, ಭಿಕ್ಖವೇ, ಅಞ್ಞಂ ಏಕಧಮ್ಮಮ್ಪಿ ಸಮನುಪಸ್ಸಾಮಿ ಯೇನ ಅನುಪ್ಪನ್ನಾ ವಾ ಸಮ್ಮಾದಿಟ್ಠಿ ಉಪ್ಪಜ್ಜತಿ ಉಪ್ಪನ್ನಾ ವಾ ಸಮ್ಮಾದಿಟ್ಠಿ ಪವಡ್ಢತಿ ಯಥಯಿದಂ, ಭಿಕ್ಖವೇ, ಯೋನಿಸೋಮನಸಿಕಾರೋ. ಯೋನಿಸೋ, ಭಿಕ್ಖವೇ, ಮನಸಿ ಕರೋತೋ ಅನುಪ್ಪನ್ನಾ ಚೇವ ಸಮ್ಮಾದಿಟ್ಠಿ ಉಪ್ಪಜ್ಜತಿ ಉಪ್ಪನ್ನಾ ಚ ಸಮ್ಮಾದಿಟ್ಠಿ ಪವಡ್ಢತೀ’’ತಿ.

೩೦೪. ‘‘ನಾಹಂ ¶ , ಭಿಕ್ಖವೇ, ಅಞ್ಞಂ ಏಕಧಮ್ಮಮ್ಪಿ ಸಮನುಪಸ್ಸಾಮಿ ಯೇನ [ಯೇನೇವಂ (ಸೀ. ಸ್ಯಾ. ಕಂ. ಪೀ.)] ಸತ್ತಾ ಕಾಯಸ್ಸ ಭೇದಾ ಪರಂ ಮರಣಾ ಅಪಾಯಂ ದುಗ್ಗತಿಂ ವಿನಿಪಾತಂ ನಿರಯಂ ಉಪಪಜ್ಜನ್ತಿ ಯಥಯಿದಂ, ಭಿಕ್ಖವೇ, ಮಿಚ್ಛಾದಿಟ್ಠಿ. ಮಿಚ್ಛಾದಿಟ್ಠಿಯಾ, ಭಿಕ್ಖವೇ, ಸಮನ್ನಾಗತಾ ಸತ್ತಾ ಕಾಯಸ್ಸ ಭೇದಾ ಪರಂ ಮರಣಾ ಅಪಾಯಂ ದುಗ್ಗತಿಂ ವಿನಿಪಾತಂ ನಿರಯಂ ಉಪಪಜ್ಜನ್ತೀ’’ತಿ.

೩೦೫. ‘‘ನಾಹಂ ¶ , ಭಿಕ್ಖವೇ, ಅಞ್ಞಂ ಏಕಧಮ್ಮಮ್ಪಿ ಸಮನುಪಸ್ಸಾಮಿ ¶ ಯೇನ ಸತ್ತಾ ಕಾಯಸ್ಸ ಭೇದಾ ಪರಂ ಮರಣಾ ಸುಗತಿಂ ಸಗ್ಗಂ ಲೋಕಂ ಉಪಪಜ್ಜನ್ತಿ ಯಥಯಿದಂ, ಭಿಕ್ಖವೇ, ಸಮ್ಮಾದಿಟ್ಠಿ. ಸಮ್ಮಾದಿಟ್ಠಿಯಾ, ಭಿಕ್ಖವೇ, ಸಮನ್ನಾಗತಾ ಸತ್ತಾ ಕಾಯಸ್ಸ ಭೇದಾ ಪರಂ ಮರಣಾ ಸುಗತಿಂ ಸಗ್ಗಂ ಲೋಕಂ ಉಪಪಜ್ಜನ್ತೀ’’ತಿ.

೩೦೬. ‘‘ಮಿಚ್ಛಾದಿಟ್ಠಿಕಸ್ಸ, ಭಿಕ್ಖವೇ, ಪುರಿಸಪುಗ್ಗಲಸ್ಸ ಯಞ್ಚೇವ ಕಾಯಕಮ್ಮಂ ಯಥಾದಿಟ್ಠಿ ಸಮತ್ತಂ ಸಮಾದಿನ್ನಂ ಯಞ್ಚ ವಚೀಕಮ್ಮಂ…ಪೇ… ಯಞ್ಚ ಮನೋಕಮ್ಮಂ ಯಥಾದಿಟ್ಠಿ ಸಮತ್ತಂ ಸಮಾದಿನ್ನಂ ಯಾ ಚ ಚೇತನಾ ಯಾ ಚ ಪತ್ಥನಾ ಯೋ ಚ ಪಣಿಧಿ ಯೇ ಚ ಸಙ್ಖಾರಾ ಸಬ್ಬೇ ತೇ ಧಮ್ಮಾ ಅನಿಟ್ಠಾಯ ಅಕನ್ತಾಯ ಅಮನಾಪಾಯ ಅಹಿತಾಯ ದುಕ್ಖಾಯ ಸಂವತ್ತನ್ತಿ. ತಂ ಕಿಸ್ಸ ಹೇತು? ದಿಟ್ಠಿ ಹಿಸ್ಸ [ದಿಟ್ಠಿ ಹಿ (ಸೀ. ಸ್ಯಾ. ಕಂ. ಪೀ.)], ಭಿಕ್ಖವೇ, ಪಾಪಿಕಾ. ಸೇಯ್ಯಥಾಪಿ, ಭಿಕ್ಖವೇ ¶ , ನಿಮ್ಬಬೀಜಂ ವಾ ಕೋಸಾತಕಿಬೀಜಂ ವಾ ತಿತ್ತಕಲಾಬುಬೀಜಂ ವಾ ಅಲ್ಲಾಯ ಪಥವಿಯಾ [ಪಠವಿಯಾ (ಸೀ. ಸ್ಯಾ. ಕಂ. ಪೀ.)] ನಿಕ್ಖಿತ್ತಂ ಯಞ್ಚೇವ ಪಥವಿರಸಂ ಉಪಾದಿಯತಿ ಯಞ್ಚ ಆಪೋರಸಂ ಉಪಾದಿಯತಿ ಸಬ್ಬಂ ತಂ ತಿತ್ತಕತ್ತಾಯ ಕಟುಕತ್ತಾಯ ಅಸಾತತ್ತಾಯ ಸಂವತ್ತತಿ. ತಂ ಕಿಸ್ಸ ಹೇತು? ಬೀಜಂ ಹಿಸ್ಸ [ವೀಜಂ (ಸೀ. ಸ್ಯಾ. ಕಂ. ಪೀ.)], ಭಿಕ್ಖವೇ, ಪಾಪಕಂ. ಏವಮೇವಂ ಖೋ, ಭಿಕ್ಖವೇ, ಮಿಚ್ಛಾದಿಟ್ಠಿಕಸ್ಸ ಪುರಿಸಪುಗ್ಗಲಸ್ಸ ಯಞ್ಚೇವ ಕಾಯಕಮ್ಮಂ ಯಥಾದಿಟ್ಠಿ ಸಮತ್ತಂ ಸಮಾದಿನ್ನಂ ಯಞ್ಚ ವಚೀಕಮ್ಮಂ…ಪೇ… ¶ ಯಞ್ಚ ಮನೋಕಮ್ಮಂ ಯಥಾದಿಟ್ಠಿ ಸಮತ್ತಂ ಸಮಾದಿನ್ನಂ ಯಾ ಚ ಚೇತನಾ ಯಾ ಚ ಪತ್ಥನಾ ಯೋ ಚ ಪಣಿಧಿ ಯೇ ಚ ಸಙ್ಖಾರಾ ಸಬ್ಬೇ ತೇ ಧಮ್ಮಾ ಅನಿಟ್ಠಾಯ ಅಕನ್ತಾಯ ಅಮನಾಪಾಯ ಅಹಿತಾಯ ದುಕ್ಖಾಯ ಸಂವತ್ತನ್ತಿ. ತಂ ಕಿಸ್ಸ ಹೇತು? ದಿಟ್ಠಿ ಹಿಸ್ಸ, ಭಿಕ್ಖವೇ, ಪಾಪಿಕಾ’’ತಿ.

೩೦೭. ‘‘ಸಮ್ಮಾದಿಟ್ಠಿಕಸ್ಸ, ಭಿಕ್ಖವೇ, ಪುರಿಸಪುಗ್ಗಲಸ್ಸ ಯಞ್ಚೇವ ಕಾಯಕಮ್ಮಂ ಯಥಾದಿಟ್ಠಿ ಸಮತ್ತಂ ಸಮಾದಿನ್ನಂ ಯಞ್ಚ ವಚೀಕಮ್ಮಂ…ಪೇ… ಯಞ್ಚ ಮನೋಕಮ್ಮಂ ಯಥಾದಿಟ್ಠಿ ಸಮತ್ತಂ ಸಮಾದಿನ್ನಂ ಯಾ ಚ ಚೇತನಾ ಯಾ ಚ ಪತ್ಥನಾ ಯೋ ಚ ಪಣಿಧಿ ಯೇ ಚ ಸಙ್ಖಾರಾ ಸಬ್ಬೇ ತೇ ಧಮ್ಮಾ ಇಟ್ಠಾಯ ಕನ್ತಾಯ ಮನಾಪಾಯ ಹಿತಾಯ ಸುಖಾಯ ಸಂವತ್ತನ್ತಿ. ತಂ ಕಿಸ್ಸ ಹೇತು? ದಿಟ್ಠಿ ಹಿಸ್ಸ, ಭಿಕ್ಖವೇ, ಭದ್ದಿಕಾ. ಸೇಯ್ಯಥಾಪಿ, ಭಿಕ್ಖವೇ, ಉಚ್ಛುಬೀಜಂ ವಾ ಸಾಲಿಬೀಜಂ ವಾ ಮುದ್ದಿಕಾಬೀಜಂ ವಾ ಅಲ್ಲಾಯ ಪಥವಿಯಾ ನಿಕ್ಖಿತ್ತಂ ಯಞ್ಚೇವ ಪಥವಿರಸಂ ಉಪಾದಿಯತಿ ಯಞ್ಚ ಆಪೋರಸಂ ಉಪಾದಿಯತಿ ಸಬ್ಬಂ ತಂ ಮಧುರತ್ತಾಯ ಸಾತತ್ತಾಯ ಅಸೇಚನಕತ್ತಾಯ ಸಂವತ್ತತಿ. ತಂ ಕಿಸ್ಸ ಹೇತು? ಬೀಜಂ ಹಿಸ್ಸ, ಭಿಕ್ಖವೇ, ಭದ್ದಕಂ. ಏವಮೇವಂ ಖೋ, ಭಿಕ್ಖವೇ, ಸಮ್ಮಾದಿಟ್ಠಿಕಸ್ಸ ಪುರಿಸಪುಗ್ಗಲಸ್ಸ ಯಞ್ಚೇವ ಕಾಯಕಮ್ಮಂ ಯಥಾದಿಟ್ಠಿ ಸಮತ್ತಂ ಸಮಾದಿನ್ನಂ ಯಞ್ಚ ವಚೀಕಮ್ಮಂ…ಪೇ… ಯಞ್ಚ ಮನೋಕಮ್ಮಂ ಯಥಾದಿಟ್ಠಿ ಸಮತ್ತಂ ಸಮಾದಿನ್ನಂ ಯಾ ಚ ಚೇತನಾ ಯಾ ಚ ಪತ್ಥನಾ ಯೋ ಚ ಪಣಿಧಿ ಯೇ ಚ ಸಙ್ಖಾರಾ ಸಬ್ಬೇ ತೇ ಧಮ್ಮಾ ಇಟ್ಠಾಯ ಕನ್ತಾಯ ಮನಾಪಾಯ ¶ ಹಿತಾಯ ಸುಖಾಯ ಸಂವತ್ತನ್ತಿ. ತಂ ಕಿಸ್ಸ ಹೇತು? ದಿಟ್ಠಿ ಹಿಸ್ಸ, ಭಿಕ್ಖವೇ, ಭದ್ದಿಕಾ’’ತಿ.

೩೦೮. ‘‘ಏಕಪುಗ್ಗಲೋ ¶ ¶ , ಭಿಕ್ಖವೇ, ಲೋಕೇ ಉಪ್ಪಜ್ಜಮಾನೋ ಉಪ್ಪಜ್ಜತಿ ಬಹುಜನಅಹಿತಾಯ ಬಹುಜನಅಸುಖಾಯ, ಬಹುನೋ ಜನಸ್ಸ ಅನತ್ಥಾಯ ಅಹಿತಾಯ ದುಕ್ಖಾಯ ¶ ದೇವಮನುಸ್ಸಾನಂ. ಕತಮೋ ಏಕಪುಗ್ಗಲೋ? ಮಿಚ್ಛಾದಿಟ್ಠಿಕೋ ಹೋತಿ ವಿಪರೀತದಸ್ಸನೋ. ಸೋ ಬಹುಜನಂ ಸದ್ಧಮ್ಮಾ ವುಟ್ಠಾಪೇತ್ವಾ ಅಸದ್ಧಮ್ಮೇ ಪತಿಟ್ಠಾಪೇತಿ. ಅಯಂ ಖೋ, ಭಿಕ್ಖವೇ, ಏಕಪುಗ್ಗಲೋ ಲೋಕೇ ಉಪ್ಪಜ್ಜಮಾನೋ ಉಪ್ಪಜ್ಜತಿ ಬಹುಜನಅಹಿತಾಯ ಬಹುಜನಅಸುಖಾಯ, ಬಹುನೋ ಜನಸ್ಸ ಅನತ್ಥಾಯ ಅಹಿತಾಯ ದುಕ್ಖಾಯ ದೇವಮನುಸ್ಸಾನ’’ನ್ತಿ.

೩೦೯. ‘‘ಏಕಪುಗ್ಗಲೋ, ಭಿಕ್ಖವೇ, ಲೋಕೇ ಉಪ್ಪಜ್ಜಮಾನೋ ಉಪ್ಪಜ್ಜತಿ ಬಹುಜನಹಿತಾಯ ಬಹುಜನಸುಖಾಯ, ಬಹುನೋ ಜನಸ್ಸ ಅತ್ಥಾಯ ಹಿತಾಯ ಸುಖಾಯ ದೇವಮನುಸ್ಸಾನಂ. ಕತಮೋ ಏಕಪುಗ್ಗಲೋ? ಸಮ್ಮಾದಿಟ್ಠಿಕೋ ಹೋತಿ ಅವಿಪರೀತದಸ್ಸನೋ. ಸೋ ಬಹುಜನಂ ಅಸದ್ಧಮ್ಮಾ ವುಟ್ಠಾಪೇತ್ವಾ ಸದ್ಧಮ್ಮೇ ಪತಿಟ್ಠಾಪೇತಿ. ಅಯಂ ಖೋ, ಭಿಕ್ಖವೇ, ಏಕಪುಗ್ಗಲೋ ಲೋಕೇ ಉಪಪಜ್ಜಮಾನೋ ಉಪ್ಪಜ್ಜತಿ ಬಹುಜನಹಿತಾಯ ಬಹುಜನಸುಖಾಯ, ಬಹುನೋ ಜನಸ್ಸ ಅತ್ಥಾಯ ಹಿತಾಯ ಸುಖಾಯ ದೇವಮನುಸ್ಸಾನ’’ನ್ತಿ.

೩೧೦. ‘‘ನಾಹಂ, ಭಿಕ್ಖವೇ, ಅಞ್ಞಂ ಏಕಧಮ್ಮಮ್ಪಿ ಸಮನುಪಸ್ಸಾಮಿ ಯಂ ಏವಂ ಮಹಾಸಾವಜ್ಜಂ ಯಥಯಿದಂ, ಭಿಕ್ಖವೇ, ಮಿಚ್ಛಾದಿಟ್ಠಿ. ಮಿಚ್ಛಾದಿಟ್ಠಿಪರಮಾನಿ, ಭಿಕ್ಖವೇ, ಮಹಾಸಾವಜ್ಜಾನೀ’’ತಿ [ವಜ್ಜಾನೀತಿ (ಸೀ. ಸ್ಯಾ. ಕಂ.)].

೩೧೧. ‘‘ನಾಹಂ, ಭಿಕ್ಖವೇ, ಅಞ್ಞಂ ಏಕಪುಗ್ಗಲಮ್ಪಿ ಸಮನುಪಸ್ಸಾಮಿ ಯೋ ಏವಂ ಬಹುಜನಅಹಿತಾಯ ಪಟಿಪನ್ನೋ ಬಹುಜನಅಸುಖಾಯ, ಬಹುನೋ ಜನಸ್ಸ ಅನತ್ಥಾಯ ಅಹಿತಾಯ ದುಕ್ಖಾಯ ದೇವಮನುಸ್ಸಾನಂ ಯಥಯಿದಂ, ಭಿಕ್ಖವೇ, ಮಕ್ಖಲಿ ಮೋಘಪುರಿಸೋ. ಸೇಯ್ಯಥಾಪಿ, ಭಿಕ್ಖವೇ, ನದೀಮುಖೇ ಖಿಪ್ಪಂ [ಖಿಪಂ (ಸೀ. ಸ್ಯಾ. ಕಂ. ಪೀ.)] ಉಡ್ಡೇಯ್ಯ [ಓಡ್ಡೇಯ್ಯ (ಸೀ.), ಉಜ್ಝೇಯ್ಯ (ಕ.)] ಬಹೂನಂ ಮಚ್ಛಾನಂ ಅಹಿತಾಯ ದುಕ್ಖಾಯ ಅನಯಾಯ ಬ್ಯಸನಾಯ; ಏವಮೇವಂ ಖೋ, ಭಿಕ್ಖವೇ ¶ , ಮಕ್ಖಲಿ ಮೋಘಪುರಿಸೋ ಮನುಸ್ಸಖಿಪ್ಪಂ ¶ ಮಞ್ಞೇ ಲೋಕೇ ಉಪ್ಪನ್ನೋ ಬಹೂನಂ ಸತ್ತಾನಂ ಅಹಿತಾಯ ದುಕ್ಖಾಯ ಅನಯಾಯ ಬ್ಯಸನಾಯಾ’’ತಿ.

೩೧೨. ‘‘ದುರಕ್ಖಾತೇ ¶ , ಭಿಕ್ಖವೇ, ಧಮ್ಮವಿನಯೇ ಯೋ ಚ ಸಮಾದಪೇತಿ [ಸಮಾದಾಪೇತಿ (?)] ಯಞ್ಚ ಸಮಾದಪೇತಿ ಯೋ ಚ ಸಮಾದಪಿತೋ ತಥತ್ತಾಯ ಪಟಿಪಜ್ಜತಿ ಸಬ್ಬೇ ತೇ ಬಹುಂ ಅಪುಞ್ಞಂ ಪಸವನ್ತಿ. ತಂ ಕಿಸ್ಸ ಹೇತು? ದುರಕ್ಖಾತತ್ತಾ, ಭಿಕ್ಖವೇ, ಧಮ್ಮಸ್ಸಾ’’ತಿ.

೩೧೩. ‘‘ಸ್ವಾಕ್ಖಾತೇ ¶ , ಭಿಕ್ಖವೇ, ಧಮ್ಮವಿನಯೇ ಯೋ ಚ ಸಮಾದಪೇತಿ ಯಞ್ಚ ಸಮಾದಪೇತಿ ಯೋ ಚ ಸಮಾದಪಿತೋ ತಥತ್ತಾಯ ಪಟಿಪಜ್ಜತಿ ಸಬ್ಬೇ ತೇ ಬಹುಂ ಪುಞ್ಞಂ ಪಸವನ್ತಿ. ತಂ ಕಿಸ್ಸ ಹೇತು? ಸ್ವಾಕ್ಖಾತತ್ತಾ, ಭಿಕ್ಖವೇ, ಧಮ್ಮಸ್ಸಾ’’ತಿ.

೩೧೪. ‘‘ದುರಕ್ಖಾತೇ, ಭಿಕ್ಖವೇ, ಧಮ್ಮವಿನಯೇ ದಾಯಕೇನ ಮತ್ತಾ ಜಾನಿತಬ್ಬಾ, ನೋ ಪಟಿಗ್ಗಾಹಕೇನ. ತಂ ಕಿಸ್ಸ ಹೇತು? ದುರಕ್ಖಾತತ್ತಾ, ಭಿಕ್ಖವೇ, ಧಮ್ಮಸ್ಸಾ’’ತಿ.

೩೧೫. ‘‘ಸ್ವಾಕ್ಖಾತೇ, ಭಿಕ್ಖವೇ, ಧಮ್ಮವಿನಯೇ ಪಟಿಗ್ಗಾಹಕೇನ ಮತ್ತಾ ಜಾನಿತಬ್ಬಾ, ನೋ ದಾಯಕೇನ. ತಂ ಕಿಸ್ಸ ಹೇತು? ಸ್ವಾಕ್ಖಾತತ್ತಾ, ಭಿಕ್ಖವೇ, ಧಮ್ಮಸ್ಸಾ’’ತಿ.

೩೧೬. ‘‘ದುರಕ್ಖಾತೇ, ಭಿಕ್ಖವೇ, ಧಮ್ಮವಿನಯೇ ಯೋ ಆರದ್ಧವೀರಿಯೋ ಸೋ ದುಕ್ಖಂ ವಿಹರತಿ. ತಂ ಕಿಸ್ಸ ಹೇತು? ದುರಕ್ಖಾತತ್ತಾ, ಭಿಕ್ಖವೇ, ಧಮ್ಮಸ್ಸಾ’’ತಿ.

೩೧೭. ‘‘ಸ್ವಾಕ್ಖಾತೇ, ಭಿಕ್ಖವೇ, ಧಮ್ಮವಿನಯೇ ಯೋ ಕುಸೀತೋ ಸೋ ದುಕ್ಖಂ ವಿಹರತಿ. ತಂ ಕಿಸ್ಸ ಹೇತು? ಸ್ವಾಕ್ಖಾತತ್ತಾ, ಭಿಕ್ಖವೇ, ಧಮ್ಮಸ್ಸಾ’’ತಿ.

೩೧೮. ‘‘ದುರಕ್ಖಾತೇ, ಭಿಕ್ಖವೇ, ಧಮ್ಮವಿನಯೇ ಯೋ ಕುಸೀತೋ ಸೋ ಸುಖಂ ವಿಹರತಿ ¶ . ತಂ ಕಿಸ್ಸ ಹೇತು? ದುರಕ್ಖಾತತ್ತಾ, ಭಿಕ್ಖವೇ, ಧಮ್ಮಸ್ಸಾ’’ತಿ.

೩೧೯. ‘‘ಸ್ವಾಕ್ಖಾತೇ, ಭಿಕ್ಖವೇ, ಧಮ್ಮವಿನಯೇ ಯೋ ಆರದ್ಧವೀರಿಯೋ ಸೋ ಸುಖಂ ವಿಹರತಿ. ತಂ ಕಿಸ್ಸ ಹೇತು? ಸ್ವಾಕ್ಖಾತತ್ತಾ, ಭಿಕ್ಖವೇ, ಧಮ್ಮಸ್ಸಾ’’ತಿ.

೩೨೦. ‘‘ಸೇಯ್ಯಥಾಪಿ ¶ , ಭಿಕ್ಖವೇ, ಅಪ್ಪಮತ್ತಕೋಪಿ ಗೂಥೋ ದುಗ್ಗನ್ಧೋ ಹೋತಿ; ಏವಮೇವಂ ಖೋ ಅಹಂ, ಭಿಕ್ಖವೇ, ಅಪ್ಪಮತ್ತಕಮ್ಪಿ ಭವಂ ನ ವಣ್ಣೇಮಿ, ಅನ್ತಮಸೋ ಅಚ್ಛರಾಸಙ್ಘಾತಮತ್ತಮ್ಪಿ’’.

೩೨೧. ‘‘ಸೇಯ್ಯಥಾಪಿ, ಭಿಕ್ಖವೇ, ಅಪ್ಪಮತ್ತಕಮ್ಪಿ ಮುತ್ತಂ ದುಗ್ಗನ್ಧಂ ಹೋತಿ… ಅಪ್ಪಮತ್ತಕೋಪಿ ಖೇಳೋ ದುಗ್ಗನ್ಧೋ ಹೋತಿ… ಅಪ್ಪಮತ್ತಕೋಪಿ ಪುಬ್ಬೋ ದುಗ್ಗನ್ಧೋ ಹೋತಿ… ಅಪ್ಪಮತ್ತಕಮ್ಪಿ ¶ ಲೋಹಿತಂ ದುಗ್ಗನ್ಧಂ ಹೋತಿ; ಏವಮೇವಂ ಖೋ ಅಹಂ, ಭಿಕ್ಖವೇ, ಅಪ್ಪಮತ್ತಕಮ್ಪಿ ಭವಂ ನ ವಣ್ಣೇಮಿ, ಅನ್ತಮಸೋ ಅಚ್ಛರಾಸಙ್ಘಾತಮತ್ತಮ್ಪಿ’’.

೩೨೨. ‘‘ಸೇಯ್ಯಥಾಪಿ ¶ , ಭಿಕ್ಖವೇ, ಅಪ್ಪಮತ್ತಕಂ ಇಮಸ್ಮಿಂ ಜಮ್ಬುದೀಪೇ ಆರಾಮರಾಮಣೇಯ್ಯಕಂ ವನರಾಮಣೇಯ್ಯಕಂ ಭೂಮಿರಾಮಣೇಯ್ಯಕಂ ಪೋಕ್ಖರಣಿರಾಮಣೇಯ್ಯಕಂ; ಅಥ ಖೋ ಏತದೇವ ಬಹುತರಂ ಯದಿದಂ ಉಕ್ಕೂಲವಿಕೂಲಂ ನದೀವಿದುಗ್ಗಂ ಖಾಣುಕಣ್ಟಕಟ್ಠಾನಂ [ಖಾಣುಕಣ್ಡಕಧಾನಂ (ಸೀ. ಪೀ.)] ಪಬ್ಬತವಿಸಮಂ; ಏವಮೇವಂ ಖೋ, ಭಿಕ್ಖವೇ, ಅಪ್ಪಕಾ ತೇ ಸತ್ತಾ ಯೇ ಥಲಜಾ, ಅಥ ಖೋ ಏತೇವ ಸತ್ತಾ ಬಹುತರಾ ಯೇ ಓದಕಾ’’.

೩೨೩. … ಏವಮೇವಂ ಖೋ, ಭಿಕ್ಖವೇ, ಅಪ್ಪಕಾ ತೇ ಸತ್ತಾ ಯೇ ಮನುಸ್ಸೇಸು ಪಚ್ಚಾಜಾಯನ್ತಿ; ಅಥ ಖೋ ಏತೇವ ಸತ್ತಾ ಬಹುತರಾ ಯೇ ಅಞ್ಞತ್ರ ಮನುಸ್ಸೇಹಿ ಪಚ್ಚಾಜಾಯನ್ತಿ.

… ಏವಮೇವಂ ಖೋ, ಭಿಕ್ಖವೇ, ಅಪ್ಪಕಾ ತೇ ಸತ್ತಾ ಯೇ ಮಜ್ಝಿಮೇಸು ಜನಪದೇಸು ಪಚ್ಚಾಜಾಯನ್ತಿ; ಅಥ ¶ ಖೋ ಏತೇವ ಸತ್ತಾ ಬಹುತರಾ ಯೇ ಪಚ್ಚನ್ತಿಮೇಸು ಜನಪದೇಸು ಪಚ್ಚಾಜಾಯನ್ತಿ ಅವಿಞ್ಞಾತಾರೇಸು ಮಿಲಕ್ಖೇಸು [ಮಿಲಕ್ಖೂಸು (ಕ.)].

೩೨೪. … ಏವಮೇವಂ ಖೋ, ಭಿಕ್ಖವೇ, ಅಪ್ಪಕಾ ತೇ ಸತ್ತಾ ಯೇ ಪಞ್ಞವನ್ತೋ ಅಜಳಾ ಅನೇಳಮೂಗಾ ಪಟಿಬಲಾ ಸುಭಾಸಿತದುಬ್ಭಾಸಿತಸ್ಸ ಅತ್ಥಮಞ್ಞಾತುಂ; ಅಥ ಖೋ ಏತೇವ ಸತ್ತಾ ಬಹುತರಾ ಯೇ ದುಪ್ಪಞ್ಞಾ ಜಳಾ ಏಳಮೂಗಾ ನ ಪಟಿಬಲಾ ಸುಭಾಸಿತದುಬ್ಭಾಸಿತಸ್ಸ ಅತ್ಥಮಞ್ಞಾತುಂ.

೩೨೫. … ಏವಮೇವಂ ¶ ಖೋ, ಭಿಕ್ಖವೇ, ಅಪ್ಪಕಾ ತೇ ಸತ್ತಾ ಯೇ ಅರಿಯೇನ ಪಞ್ಞಾಚಕ್ಖುನಾ ಸಮನ್ನಾಗತಾ; ಅಥ ಖೋ ಏತೇವ ಸತ್ತಾ ಬಹುತರಾ ಯೇ ಅವಿಜ್ಜಾಗತಾ ಸಮ್ಮೂಳ್ಹಾ.

೩೨೬. … ಏವಮೇವಂ ಖೋ, ಭಿಕ್ಖವೇ, ಅಪ್ಪಕಾ ತೇ ಸತ್ತಾ ಯೇ ಲಭನ್ತಿ ತಥಾಗತಂ ದಸ್ಸನಾಯ; ಅಥ ಖೋ ಏತೇವ ಸತ್ತಾ ಬಹುತರಾ ಯೇ ನ ಲಭನ್ತಿ ತಥಾಗತಂ ದಸ್ಸನಾಯ.

೩೨೭. … ಏವಮೇವಂ ಖೋ, ಭಿಕ್ಖವೇ, ಅಪ್ಪಕಾ ತೇ ಸತ್ತಾ ಯೇ ಲಭನ್ತಿ ತಥಾಗತಪ್ಪವೇದಿತಂ ಧಮ್ಮವಿನಯಂ ಸವನಾಯ; ಅಥ ಖೋ ಏತೇವ ¶ ಸತ್ತಾ ಬಹುತರಾ ಯೇ ನ ಲಭನ್ತಿ ತಥಾಗತಪ್ಪವೇದಿತಂ ಧಮ್ಮವಿನಯಂ ಸವನಾಯ.

೩೨೮. … ಏವಮೇವಂ ¶ ಖೋ, ಭಿಕ್ಖವೇ, ಅಪ್ಪಕಾ ತೇ ಸತ್ತಾ ಯೇ ಸುತ್ವಾ ಧಮ್ಮಂ ಧಾರೇನ್ತಿ; ಅಥ ಖೋ ಏತೇವ ಸತ್ತಾ ಬಹುತರಾ ಯೇ ಸುತ್ವಾ ಧಮ್ಮಂ ನ ಧಾರೇನ್ತಿ.

೩೨೯. … ಏವಮೇವಂ ಖೋ, ಭಿಕ್ಖವೇ, ಅಪ್ಪಕಾ ತೇ ಸತ್ತಾ ಯೇ ಧಾತಾನಂ [ಧತಾನಂ (ಸೀ. ಸ್ಯಾ. ಕಂ. ಪೀ.)] ಧಮ್ಮಾನಂ ಅತ್ಥಂ ಉಪಪರಿಕ್ಖನ್ತಿ; ಅಥ ಖೋ ಏತೇವ ಸತ್ತಾ ಬಹುತರಾ ಯೇ ಧಾತಾನಂ ಧಮ್ಮಾನಂ ಅತ್ಥಂ ನ ಉಪಪರಿಕ್ಖನ್ತಿ.

೩೩೦. … ಏವಮೇವಂ ಖೋ, ಭಿಕ್ಖವೇ, ಅಪ್ಪಕಾ ತೇ ಸತ್ತಾ ಯೇ ಅತ್ಥಮಞ್ಞಾಯ ಧಮ್ಮಮಞ್ಞಾಯ ಧಮ್ಮಾನುಧಮ್ಮಂ ಪಟಿಪಜ್ಜನ್ತಿ; ಅಥ ಖೋ ಏತೇವ ಸತ್ತಾ ಬಹುತರಾ ಯೇ ಅತ್ಥಮಞ್ಞಾಯ ಧಮ್ಮಮಞ್ಞಾಯ ಧಮ್ಮಾನುಧಮ್ಮಂ ನ ಪಟಿಪಜ್ಜನ್ತಿ.

೩೩೧. … ಏವಮೇವಂ ಖೋ, ಭಿಕ್ಖವೇ, ಅಪ್ಪಕಾ ತೇ ಸತ್ತಾ ಯೇ ಸಂವೇಜನಿಯೇಸು ಠಾನೇಸು ಸಂವಿಜ್ಜನ್ತಿ; ಅಥ ಖೋ ಏತೇವ ಸತ್ತಾ ¶ ಬಹುತರಾ ಯೇ ಸಂವೇಜನಿಯೇಸು ಠಾನೇಸು ನ ಸಂವಿಜ್ಜನ್ತಿ.

೩೩೨. … ಏವಮೇವಂ ಖೋ, ಭಿಕ್ಖವೇ, ಅಪ್ಪಕಾ ತೇ ಸತ್ತಾ ಯೇ ಸಂವಿಗ್ಗಾ ¶ ಯೋನಿಸೋ ಪದಹನ್ತಿ; ಅಥ ಖೋ ಏತೇವ ಸತ್ತಾ ಬಹುತರಾ ಯೇ ಸಂವಿಗ್ಗಾ ಯೋನಿಸೋ ನ ಪದಹನ್ತಿ.

೩೩೩. … ಏವಮೇವಂ ಖೋ, ಭಿಕ್ಖವೇ, ಅಪ್ಪಕಾ ತೇ ಸತ್ತಾ ಯೇ ವವಸ್ಸಗ್ಗಾರಮ್ಮಣಂ ಕರಿತ್ವಾ ಲಭನ್ತಿ ಸಮಾಧಿಂ [ಚಿತ್ತಸ್ಸ ಸಮಾಧಿಂ (ಸೀ.)] ಲಭನ್ತಿ ಚಿತ್ತಸ್ಸೇಕಗ್ಗತಂ [ಚಿತ್ತಸ್ಸೇಕಗ್ಗಂ (ಸೀ.)]; ಅಥ ಖೋ ಏತೇವ ಸತ್ತಾ ಬಹುತರಾ ಯೇ ವವಸ್ಸಗ್ಗಾರಮ್ಮಣಂ ಕರಿತ್ವಾ ನ ಲಭನ್ತಿ ಸಮಾಧಿಂ ನ ಲಭನ್ತಿ ಚಿತ್ತಸ್ಸೇಕಗ್ಗತಂ.

೩೩೪. … ಏವಮೇವಂ ಖೋ, ಭಿಕ್ಖವೇ, ಅಪ್ಪಕಾ ತೇ ಸತ್ತಾ ಯೇ ಅನ್ನಗ್ಗರಸಗ್ಗಾನಂ ಲಾಭಿನೋ; ಅಥ ಖೋ ಏತೇವ ಸತ್ತಾ ಬಹುತರಾ ಯೇ ಅನ್ನಗ್ಗರಸಗ್ಗಾನಂ ನ ಲಾಭಿನೋ, ಉಞ್ಛೇನ ಕಪಾಲಾಭತೇನ ಯಾಪೇನ್ತಿ.

೩೩೫. … ಏವಮೇವಂ ಖೋ, ಭಿಕ್ಖವೇ, ಅಪ್ಪಕಾ ತೇ ಸತ್ತಾ ಯೇ ಅತ್ಥರಸಸ್ಸ ಧಮ್ಮರಸಸ್ಸ ವಿಮುತ್ತಿರಸಸ್ಸ ಲಾಭಿನೋ; ಅಥ ಖೋ ಏತೇವ ಸತ್ತಾ ಬಹುತರಾ ಯೇ ಅತ್ಥರಸಸ್ಸ ಧಮ್ಮರಸಸ್ಸ ವಿಮುತ್ತಿರಸಸ್ಸ ನ ಲಾಭಿನೋ. ತಸ್ಮಾತಿಹ, ಭಿಕ್ಖವೇ ¶ , ಏವಂ ಸಿಕ್ಖಿತಬ್ಬಂ – ಅತ್ಥರಸಸ್ಸ ಧಮ್ಮರಸಸ್ಸ ವಿಮುತ್ತಿರಸಸ್ಸ ಲಾಭಿನೋ ಭವಿಸ್ಸಾಮಾತಿ. ಏವಞ್ಹಿ ವೋ, ಭಿಕ್ಖವೇ, ಸಿಕ್ಖಿತಬ್ಬನ್ತಿ.

೩೩೬-೩೩೮. ‘‘ಸೇಯ್ಯಥಾಪಿ ¶ , ಭಿಕ್ಖವೇ, ಅಪ್ಪಮತ್ತಕಂ ಇಮಸ್ಮಿಂ ಜಮ್ಬುದೀಪೇ ಆರಾಮರಾಮಣೇಯ್ಯಕಂ ವನರಾಮಣೇಯ್ಯಕಂ ಭೂಮಿರಾಮಣೇಯ್ಯಕಂ ಪೋಕ್ಖರಣಿರಾಮಣೇಯ್ಯಕಂ; ಅಥ ಖೋ ಏತದೇವ ಬಹುತರಂ ಯದಿದಂ ಉಕ್ಕೂಲವಿಕೂಲಂ ನದೀವಿದುಗ್ಗಂ ಖಾಣುಕಣ್ಟಕಟ್ಠಾನಂ ಪಬ್ಬತವಿಸಮಂ. ಏವಮೇವಂ ಖೋ, ಭಿಕ್ಖವೇ, ಅಪ್ಪಕಾ ತೇ ಸತ್ತಾ ಯೇ ಮನುಸ್ಸಾ ಚುತಾ ಮನುಸ್ಸೇಸು ಪಚ್ಚಾಜಾಯನ್ತಿ, ಅಥ ಖೋ ಏತೇವ ಸತ್ತಾ ಬಹುತರಾ ಯೇ ಮನುಸ್ಸಾ ಚುತಾ ನಿರಯೇ ಪಚ್ಚಾಜಾಯನ್ತಿ…ಪೇ… ತಿರಚ್ಛಾನಯೋನಿಯಾ ಪಚ್ಚಾಜಾಯನ್ತಿ…ಪೇ… ಪೇತ್ತಿವಿಸಯೇ ಪಚ್ಚಾಜಾಯನ್ತಿ’’.

೩೩೯-೩೪೧. … ಏವಮೇವಂ ಖೋ, ಭಿಕ್ಖವೇ, ಅಪ್ಪಕಾ ತೇ ಸತ್ತಾ ಯೇ ¶ ಮನುಸ್ಸಾ ಚುತಾ ದೇವೇಸು ಪಚ್ಚಾಜಾಯನ್ತಿ; ಅಥ ಖೋ ಏತೇವ ಸತ್ತಾ ಬಹುತರಾ ಯೇ ಮನುಸ್ಸಾ ಚುತಾ ನಿರಯೇ ಪಚ್ಚಾಜಾಯನ್ತಿ… ತಿರಚ್ಛಾನಯೋನಿಯಾ ಪಚ್ಚಾಜಾಯನ್ತಿ… ಪೇತ್ತಿವಿಸಯೇ ಪಚ್ಚಾಜಾಯನ್ತಿ.

೩೪೨-೩೪೪. … ಏವಮೇವಂ ಖೋ, ಭಿಕ್ಖವೇ, ಅಪ್ಪಕಾ ತೇ ಸತ್ತಾ ಯೇ ದೇವಾ ¶ ಚುತಾ ದೇವೇಸು ಪಚ್ಚಾಜಾಯನ್ತಿ; ಅಥ ಖೋ ಏತೇವ ಸತ್ತಾ ಬಹುತರಾ ಯೇ ದೇವಾ ಚುತಾ ನಿರಯೇ ಪಚ್ಚಾಜಾಯನ್ತಿ… ತಿರಚ್ಛಾನಯೋನಿಯಾ ಪಚ್ಚಾಜಾಯನ್ತಿ… ಪೇತ್ತಿವಿಸಯೇ ಪಚ್ಚಾಜಾಯನ್ತಿ.

೩೪೫-೩೪೭. … ಏವಮೇವಂ ಖೋ, ಭಿಕ್ಖವೇ, ಅಪ್ಪಕಾ ತೇ ಸತ್ತಾ ಯೇ ದೇವಾ ಚುತಾ ಮನುಸ್ಸೇಸು ಪಚ್ಚಾಜಾಯನ್ತಿ; ಅಥ ಖೋ ಏತೇವ ಸತ್ತಾ ಬಹುತರಾ ಯೇ ದೇವಾ ಚುತಾ ನಿರಯೇ ಪಚ್ಚಾಜಾಯನ್ತಿ… ತಿರಚ್ಛಾನಯೋನಿಯಾ ಪಚ್ಚಾಜಾಯನ್ತಿ… ಪೇತ್ತಿವಿಸಯೇ ಪಚ್ಚಾಜಾಯನ್ತಿ.

೩೪೮-೩೫೦. … ಏವಮೇವಂ ಖೋ, ಭಿಕ್ಖವೇ, ಅಪ್ಪಕಾ ತೇ ಸತ್ತಾ ಯೇ ನಿರಯಾ ಚುತಾ ಮನುಸ್ಸೇಸು ಪಚ್ಚಾಜಾಯನ್ತಿ; ಅಥ ಖೋ ಏತೇವ ಸತ್ತಾ ಬಹುತರಾ ಯೇ ನಿರಯಾ ಚುತಾ ನಿರಯೇ ಪಚ್ಚಾಜಾಯನ್ತಿ… ತಿರಚ್ಛಾನಯೋನಿಯಾ ಪಚ್ಚಾಜಾಯನ್ತಿ… ಪೇತ್ತಿವಿಸಯೇ ಪಚ್ಚಾಜಾಯನ್ತಿ.

೩೫೧-೩೫೩. … ಏವಮೇವಂ ಖೋ, ಭಿಕ್ಖವೇ, ಅಪ್ಪಕಾ ತೇ ಸತ್ತಾ ಯೇ ನಿರಯಾ ಚುತಾ ದೇವೇಸು ಪಚ್ಚಾಜಾಯನ್ತಿ; ಅಥ ಖೋ ಏತೇವ ಸತ್ತಾ ಬಹುತರಾ ಯೇ ನಿರಯಾ ಚುತಾ ನಿರಯೇ ಪಚ್ಚಾಜಾಯನ್ತಿ… ತಿರಚ್ಛಾನಯೋನಿಯಾ ಪಚ್ಚಾಜಾಯನ್ತಿ… ಪೇತ್ತಿವಿಸಯೇ ಪಚ್ಚಾಜಾಯನ್ತಿ.

೩೫೪-೩೫೬. … ಏವಮೇವಂ ¶ ಖೋ, ಭಿಕ್ಖವೇ, ಅಪ್ಪಕಾ ತೇ ಸತ್ತಾ ಯೇ ತಿರಚ್ಛಾನಯೋನಿಯಾ ಚುತಾ ಮನುಸ್ಸೇಸು ಪಚ್ಚಾಜಾಯನ್ತಿ; ಅಥ ಖೋ ಏತೇವ ಸತ್ತಾ ಬಹುತರಾ ಯೇ ತಿರಚ್ಛಾನಯೋನಿಯಾ ಚುತಾ ನಿರಯೇ ಪಚ್ಚಾಜಾಯನ್ತಿ… ತಿರಚ್ಛಾನಯೋನಿಯಾ ಪಚ್ಚಾಜಾಯನ್ತಿ… ಪೇತ್ತಿವಿಸಯೇ ಪಚ್ಚಾಜಾಯನ್ತಿ.

೩೫೭-೩೫೯. … ಏವಮೇವಂ ಖೋ, ಭಿಕ್ಖವೇ, ಅಪ್ಪಕಾ ತೇ ಸತ್ತಾ ಯೇ ತಿರಚ್ಛಾನಯೋನಿಯಾ ಚುತಾ ದೇವೇಸು ಪಚ್ಚಾಜಾಯನ್ತಿ; ಅಥ ಖೋ ಏತೇವ ಸತ್ತಾ ಬಹುತರಾ ಯೇ ¶ ತಿರಚ್ಛಾನಯೋನಿಯಾ ಚುತಾ ನಿರಯೇ ಪಚ್ಚಾಜಾಯನ್ತಿ… ತಿರಚ್ಛಾನಯೋನಿಯಾ ಪಚ್ಚಾಜಾಯನ್ತಿ… ಪೇತ್ತಿವಿಸಯೇ ಪಚ್ಚಾಜಾಯನ್ತಿ.

೩೬೦-೩೬೨. … ಏವಮೇವಂ ಖೋ, ಭಿಕ್ಖವೇ, ಅಪ್ಪಕಾ ತೇ ಸತ್ತಾ ಯೇ ಪೇತ್ತಿವಿಸಯಾ ಚುತಾ ಮನುಸ್ಸೇಸು ಪಚ್ಚಾಜಾಯನ್ತಿ; ಅಥ ಖೋ ಏತೇವ ಸತ್ತಾ ಬಹುತರಾ ಯೇ ಪೇತ್ತಿವಿಸಯಾ ಚುತಾ ನಿರಯೇ ಪಚ್ಚಾಜಾಯನ್ತಿ… ತಿರಚ್ಛಾನಯೋನಿಯಾ ಪಚ್ಚಾಜಾಯನ್ತಿ… ಪೇತ್ತಿವಿಸಯೇ ಪಚ್ಚಾಜಾಯನ್ತಿ.

೩೬೩-೩೬೫. … ಏವಮೇವಂ ¶ ಖೋ, ಭಿಕ್ಖವೇ, ಅಪ್ಪಕಾ ತೇ ಸತ್ತಾ ಯೇ ಪೇತ್ತಿವಿಸಯಾ ಚುತಾ ದೇವೇಸು ಪಚ್ಚಾಜಾಯನ್ತಿ ¶ ; ಅಥ ಖೋ ಏತೇವ ಸತ್ತಾ ಬಹುತರಾ ಯೇ ಪೇತ್ತಿವಿಸಯಾ ಚುತಾ ನಿರಯೇ ಪಚ್ಚಾಜಾಯನ್ತಿ… ತಿರಚ್ಛಾನಯೋನಿಯಾ ಪಚ್ಚಾಜಾಯನ್ತಿ… ಪೇತ್ತಿವಿಸಯೇ ಪಚ್ಚಾಜಾಯನ್ತಿ.

೩೬೬-೩೮೧. ‘‘ಅದ್ಧಮಿದಂ ¶ , ಭಿಕ್ಖವೇ, ಲಾಭಾನಂ ಯದಿದಂ ಆರಞ್ಞಿಕತ್ತಂ [ಅರಞ್ಞಕತ್ತಂ (ಸಬ್ಬತ್ಥ)] …ಪೇ… ಪಿಣ್ಡಪಾತಿಕತ್ತಂ… ಪಂಸುಕೂಲಿಕತ್ತಂ… ತೇಚೀವರಿಕತ್ತಂ… ಧಮ್ಮಕಥಿಕತ್ತಂ… ವಿನಯಧರತ್ತಂ [ವಿನಯಧರಕತ್ತಂ (ಸ್ಯಾ. ಕಂ. ಪೀ. ಕ.)] … ಬಾಹುಸಚ್ಚಂ… ಥಾವರೇಯ್ಯಂ… ಆಕಪ್ಪಸಮ್ಪದಾ… ಪರಿವಾರಸಮ್ಪದಾ… ಮಹಾಪರಿವಾರತಾ… ಕೋಲಪುತ್ತಿ… ವಣ್ಣಪೋಕ್ಖರತಾ… ಕಲ್ಯಾಣವಾಕ್ಕರಣತಾ… ಅಪ್ಪಿಚ್ಛತಾ… ಅಪ್ಪಾಬಾಧತಾ’’ತಿ.

೩೮೨. ‘‘ಅಚ್ಛರಾಸಙ್ಘಾತಮತ್ತಮ್ಪಿ ¶ ¶ ಚೇ, ಭಿಕ್ಖವೇ, ಭಿಕ್ಖು ಪಠಮಂ ಝಾನಂ ಭಾವೇತಿ, ಅಯಂ ವುಚ್ಚತಿ, ಭಿಕ್ಖವೇ – ‘ಭಿಕ್ಖು ಅರಿತ್ತಜ್ಝಾನೋ ವಿಹರತಿ, ಸತ್ಥುಸಾಸನಕರೋ ಓವಾದಪತಿಕರೋ, ಅಮೋಘಂ ರಟ್ಠಪಿಣ್ಡಂ ಭುಞ್ಜತಿ’. ಕೋ ಪನ ವಾದೋ ಯೇ ನಂ ಬಹುಲೀಕರೋನ್ತೀ’’ತಿ!

೩೮೩-೩೮೯. ‘‘ಅಚ್ಛರಾಸಙ್ಘಾತಮತ್ತಮ್ಪಿ ಚೇ, ಭಿಕ್ಖವೇ, ಭಿಕ್ಖು ದುತಿಯಂ ಝಾನಂ ಭಾವೇತಿ…ಪೇ… ¶ ತತಿಯಂ ಝಾನಂ ಭಾವೇತಿ…ಪೇ… ಚತುತ್ಥಂ ಝಾನಂ ಭಾವೇತಿ…ಪೇ… ಮೇತ್ತಂ ಚೇತೋವಿಮುತ್ತಿಂ ಭಾವೇತಿ…ಪೇ… ಕರುಣಂ ಚೇತೋವಿಮುತ್ತಿಂ ಭಾವೇತಿ…ಪೇ… ಮುದಿತಂ ¶ ಚೇತೋವಿಮುತ್ತಿಂ ಭಾವೇತಿ…ಪೇ… ಉಪೇಕ್ಖಂ ಚೇತೋವಿಮುತ್ತಿಂ ಭಾವೇತಿ…ಪೇ….

೩೯೦-೩೯೩. ಕಾಯೇ ಕಾಯಾನುಪಸ್ಸೀ ವಿಹರತಿ ಆತಾಪೀ ಸಮ್ಪಜಾನೋ ಸತಿಮಾ ವಿನೇಯ್ಯ ಲೋಕೇ ಅಭಿಜ್ಝಾದೋಮನಸ್ಸಂ; ವೇದನಾಸು ವೇದನಾನುಪಸ್ಸೀ ವಿಹರತಿ…ಪೇ… ಚಿತ್ತೇ ಚಿತ್ತಾನುಪಸ್ಸೀ ವಿಹರತಿ…ಪೇ… ಧಮ್ಮೇಸು ಧಮ್ಮಾನುಪಸ್ಸೀ ವಿಹರತಿ ಆತಾಪೀ ಸಮ್ಪಜಾನೋ ಸತಿಮಾ ವಿನೇಯ್ಯ ಲೋಕೇ ಅಭಿಜ್ಝಾದೋಮನಸ್ಸಂ.

೩೯೪-೩೯೭. ಅನುಪ್ಪನ್ನಾನಂ ಪಾಪಕಾನಂ ಅಕುಸಲಾನಂ ಧಮ್ಮಾನಂ ಅನುಪ್ಪಾದಾಯ ಛನ್ದಂ ಜನೇತಿ ವಾಯಮತಿ ವೀರಿಯಂ [ವಿರಿಯಂ (ಸೀ. ಸ್ಯಾ. ಕಂ. ಪೀ.)] ಆರಭತಿ ಚಿತ್ತಂ ಪಗ್ಗಣ್ಹಾತಿ ಪದಹತಿ; ಉಪ್ಪನ್ನಾನಂ ಪಾಪಕಾನಂ ಅಕುಸಲಾನಂ ಧಮ್ಮಾನಂ ಪಹಾನಾಯ ಛನ್ದಂ ಜನೇತಿ ವಾಯಮತಿ ವೀರಿಯಂ ಆರಭತಿ ಚಿತ್ತಂ ಪಗ್ಗಣ್ಹಾತಿ ಪದಹತಿ. ಅನುಪ್ಪನ್ನಾನಂ ಕುಸಲಾನಂ ಧಮ್ಮಾನಂ ಉಪ್ಪಾದಾಯ ಛನ್ದಂ ಜನೇತಿ ವಾಯಮತಿ ವೀರಿಯಂ ಆರಭತಿ ಚಿತ್ತಂ ಪಗ್ಗಣ್ಹಾತಿ ಪದಹತಿ; ಉಪ್ಪನ್ನಾನಂ ಕುಸಲಾನಂ ಧಮ್ಮಾನಂ ಠಿತಿಯಾ ಅಸಮ್ಮೋಸಾಯ ಭಿಯ್ಯೋಭಾವಾಯ ವೇಪುಲ್ಲಾಯ ಭಾವನಾಯ ಪಾರಿಪೂರಿಯಾ ಛನ್ದಂ ಜನೇತಿ ವಾಯಮತಿ ವೀರಿಯಂ ಆರಭತಿ ಚಿತ್ತಂ ಪಗ್ಗಣ್ಹಾತಿ ಪದಹತಿ.

೩೯೮-೪೦೧. ಛನ್ದಸಮಾಧಿಪಧಾನಸಙ್ಖಾರಸಮನ್ನಾಗತಂ ಇದ್ಧಿಪಾದಂ ಭಾವೇತಿ… ವೀರಿಯಸಮಾಧಿಪಧಾನಸಙ್ಖಾರಸಮನ್ನಾಗತಂ ¶ ಇದ್ಧಿಪಾದಂ ಭಾವೇತಿ… ಚಿತ್ತಸಮಾಧಿಪಧಾನಸಙ್ಖಾರಸಮನ್ನಾಗತಂ ಇದ್ಧಿಪಾದಂ ಭಾವೇತಿ… ವೀಮಂಸಾಸಮಾಧಿಪಧಾನಸಙ್ಖಾರಸಮನ್ನಾಗತಂ ಇದ್ಧಿಪಾದಂ ಭಾವೇತಿ….

೪೦೨-೪೦೬. ಸದ್ಧಿನ್ದ್ರಿಯಂ ಭಾವೇತಿ… ವೀರಿಯಿನ್ದ್ರಿಯಂ ಭಾವೇತಿ… ಸತಿನ್ದ್ರಿಯಂ ಭಾವೇತಿ… ಸಮಾಧಿನ್ದ್ರಿಯಂ ಭಾವೇತಿ… ಪಞ್ಞಿನ್ದ್ರಿಯಂ ಭಾವೇತಿ….

೪೦೭-೪೧೧. ಸದ್ಧಾಬಲಂ ¶ ಭಾವೇತಿ… ವೀರಿಯಬಲಂ ಭಾವೇತಿ… ಸತಿಬಲಂ ¶ ಭಾವೇತಿ… ಸಮಾಧಿಬಲಂ ಭಾವೇತಿ… ಪಞ್ಞಾಬಲಂ ಭಾವೇತಿ….

೪೧೨-೪೧೮. ಸತಿಸಮ್ಬೋಜ್ಝಙ್ಗಂ ಭಾವೇತಿ… ಧಮ್ಮವಿಚಯಸಮ್ಬೋಜ್ಝಙ್ಗಂ ಭಾವೇತಿ… ವೀರಿಯಸಮ್ಬೋಜ್ಝಙ್ಗಂ ¶ ಭಾವೇತಿ… ಪೀತಿಸಮ್ಬೋಜ್ಝಙ್ಗಂ ಭಾವೇತಿ… ಪಸ್ಸದ್ಧಿಸಮ್ಬೋಜ್ಝಙ್ಗಂ ಭಾವೇತಿ… ಸಮಾಧಿಸಮ್ಬೋಜ್ಝಙ್ಗಂ ಭಾವೇತಿ… ಉಪೇಕ್ಖಾಸಮ್ಬೋಜ್ಝಙ್ಗಂ ಭಾವೇತಿ….

೪೧೯-೪೨೬. ಸಮ್ಮಾದಿಟ್ಠಿಂ ಭಾವೇತಿ… ಸಮ್ಮಾಸಙ್ಕಪ್ಪಂ ಭಾವೇತಿ… ಸಮ್ಮಾವಾಚಂ ಭಾವೇತಿ… ಸಮ್ಮಾಕಮ್ಮನ್ತಂ ಭಾವೇತಿ… ಸಮ್ಮಾಆಜೀವಂ ಭಾವೇತಿ… ಸಮ್ಮಾವಾಯಾಮಂ ಭಾವೇತಿ… ಸಮ್ಮಾಸತಿಂ ಭಾವೇತಿ… ಸಮ್ಮಾಸಮಾಧಿಂ ಭಾವೇತಿ….

೪೨೭-೪೩೪. [ದೀ. ನಿ. ೨.೧೭೩; ಮ. ನಿ. ೨.೨೪೯; ಅ. ನಿ. ೮.೬೫] ಅಜ್ಝತ್ತಂ ರೂಪಸಞ್ಞೀ ಬಹಿದ್ಧಾ ರೂಪಾನಿ ಪಸ್ಸತಿ ಪರಿತ್ತಾನಿ ಸುವಣ್ಣದುಬ್ಬಣ್ಣಾನಿ. ‘ತಾನಿ ಅಭಿಭುಯ್ಯ ಜಾನಾಮಿ ಪಸ್ಸಾಮೀ’ತಿ – ಏವಂಸಞ್ಞೀ ಹೋತಿ… ಅಜ್ಝತ್ತಂ ರೂಪಸಞ್ಞೀ ಬಹಿದ್ಧಾ ರೂಪಾನಿ ಪಸ್ಸತಿ ಅಪ್ಪಮಾಣಾನಿ ಸುವಣ್ಣದುಬ್ಬಣ್ಣಾನಿ. ‘ತಾನಿ ಅಭಿಭುಯ್ಯ ಜಾನಾಮಿ ಪಸ್ಸಾಮೀ’ತಿ – ಏವಂಸಞ್ಞೀ ಹೋತಿ… ಅಜ್ಝತ್ತಂ ಅರೂಪಸಞ್ಞೀ ಬಹಿದ್ಧಾ ರೂಪಾನಿ ಪಸ್ಸತಿ ಪರಿತ್ತಾನಿ ಸುವಣ್ಣದುಬ್ಬಣ್ಣಾನಿ. ‘ತಾನಿ ಅಭಿಭುಯ್ಯ ಜಾನಾಮಿ ಪಸ್ಸಾಮೀ’ತಿ – ಏವಂಸಞ್ಞೀ ಹೋತಿ… ಅಜ್ಝತ್ತಂ ಅರೂಪಸಞ್ಞೀ ಬಹಿದ್ಧಾ ರೂಪಾನಿ ಪಸ್ಸತಿ ಅಪ್ಪಮಾಣಾನಿ ಸುವಣ್ಣದುಬ್ಬಣ್ಣಾನಿ. ‘ತಾನಿ ಅಭಿಭುಯ್ಯ ಜಾನಾಮಿ ಪಸ್ಸಾಮೀ’ತಿ – ಏವಂಸಞ್ಞೀ ಹೋತಿ… ಅಜ್ಝತ್ತಂ ¶ ಅರೂಪಸಞ್ಞೀ ಬಹಿದ್ಧಾ ರೂಪಾನಿ ಪಸ್ಸತಿ ನೀಲಾನಿ ನೀಲವಣ್ಣಾನಿ ನೀಲನಿದಸ್ಸನಾನಿ ನೀಲನಿಭಾಸಾನಿ. ‘ತಾನಿ ಅಭಿಭುಯ್ಯ ಜಾನಾಮಿ ಪಸ್ಸಾಮೀ’ತಿ – ಏವಂಸಞ್ಞೀ ಹೋತಿ… ಅಜ್ಝತ್ತಂ ಅರೂಪಸಞ್ಞೀ ಬಹಿದ್ಧಾ ರೂಪಾನಿ ಪಸ್ಸತಿ ಪೀತಾನಿ ಪೀತವಣ್ಣಾನಿ ಪೀತನಿದಸ್ಸನಾನಿ ಪೀತನಿಭಾಸಾನಿ. ‘ತಾನಿ ಅಭಿಭುಯ್ಯ ಜಾನಾಮಿ ಪಸ್ಸಾಮೀ’ತಿ – ಏವಂಸಞ್ಞೀ ಹೋತಿ… ಅಜ್ಝತ್ತಂ ಅರೂಪಸಞ್ಞೀ ಬಹಿದ್ಧಾ ರೂಪಾನಿ ಪಸ್ಸತಿ ಲೋಹಿತಕಾನಿ ಲೋಹಿತಕವಣ್ಣಾನಿ ¶ ಲೋಹಿತಕನಿದಸ್ಸನಾನಿ ಲೋಹಿತಕನಿಭಾಸಾನಿ. ‘ತಾನಿ ಅಭಿಭುಯ್ಯ ಜಾನಾಮಿ ಪಸ್ಸಾಮೀ’ತಿ ಏವಂಸಞ್ಞೀ ಹೋತಿ… ಅಜ್ಝತ್ತಂ ಅರೂಪಸಞ್ಞೀ ಬಹಿದ್ಧಾ ರೂಪಾನಿ ಪಸ್ಸತಿ ಓದಾತಾನಿ ಓದಾತವಣ್ಣಾನಿ ಓದಾತನಿದಸ್ಸನಾನಿ ಓದಾತನಿಭಾಸಾನಿ. ‘ತಾನಿ ಅಭಿಭುಯ್ಯ ಜಾನಾಮಿ ಪಸ್ಸಾಮೀ’ತಿ – ಏವಂಸಞ್ಞೀ ಹೋತಿ….

೪೩೫-೪೪೨. ರೂಪೀ ರೂಪಾನಿ ಪಸ್ಸತಿ… ಅಜ್ಝತ್ತಂ ¶ ಅರೂಪಸಞ್ಞೀ ಬಹಿದ್ಧಾ ರೂಪಾನಿ ಪಸ್ಸತಿ ಸುಭನ್ತೇವ ಅಧಿಮುತ್ತೋ ಹೋತಿ… ಸಬ್ಬಸೋ ರೂಪಸಞ್ಞಾನಂ ಸಮತಿಕ್ಕಮಾ ಪಟಿಘಸಞ್ಞಾನಂ ಅತ್ಥಙ್ಗಮಾ ನಾನತ್ತಸಞ್ಞಾನಂ ಅಮನಸಿಕಾರಾ ಅನನ್ತೋ ¶ ಆಕಾಸೋತಿ ಆಕಾಸಾನಞ್ಚಾಯತನಂ ಉಪಸಮ್ಪಜ್ಜ ವಿಹರತಿ… ಸಬ್ಬಸೋ ಆಕಾಸಾನಞ್ಚಾಯತನಂ ಸಮತಿಕ್ಕಮ್ಮ ಅನನ್ತಂ ವಿಞ್ಞಾಣನ್ತಿ ವಿಞ್ಞಾಣಞ್ಚಾಯತನಂ ಉಪಸಮ್ಪಜ್ಜ ವಿಹರತಿ… ಸಬ್ಬಸೋ ವಿಞ್ಞಾಣಞ್ಚಾಯತನಂ ಸಮತಿಕ್ಕಮ್ಮ ನತ್ಥಿ ಕಿಞ್ಚೀತಿ ಆಕಿಞ್ಚಞ್ಞಾಯತನಂ ¶ ಉಪಸಮ್ಪಜ್ಜ ವಿಹರತಿ… ಸಬ್ಬಸೋ ಆಕಿಞ್ಚಞ್ಞಾಯತನಂ ಸಮತಿಕ್ಕಮ್ಮ ನೇವಸಞ್ಞಾನಾಸಞ್ಞಾಯತನಂ ಉಪಸಮ್ಪಜ್ಜ ವಿಹರತಿ… ಸಬ್ಬಸೋ ನೇವಸಞ್ಞಾನಾಸಞ್ಞಾಯತನಂ ಸಮತಿಕ್ಕಮ್ಮ ಸಞ್ಞಾವೇದಯಿತನಿರೋಧಂ ಉಪಸಮ್ಪಜ್ಜ ವಿಹರತಿ….

೪೪೩-೪೫೨. ಪಥವೀಕಸಿಣಂ ಭಾವೇತಿ… ಆಪೋಕಸಿಣಂ ಭಾವೇತಿ… ತೇಜೋಕಸಿಣಂ ಭಾವೇತಿ… ವಾಯೋಕಸಿಣಂ ಭಾವೇತಿ… ನೀಲಕಸಿಣಂ ಭಾವೇತಿ… ಪೀತಕಸಿಣಂ ಭಾವೇತಿ… ಲೋಹಿತಕಸಿಣಂ ಭಾವೇತಿ… ಓದಾತಕಸಿಣಂ ಭಾವೇತಿ… ಆಕಾಸಕಸಿಣಂ ಭಾವೇತಿ… ವಿಞ್ಞಾಣಕಸಿಣಂ ಭಾವೇತಿ….

೪೫೩-೪೬೨. ಅಸುಭಸಞ್ಞಂ ಭಾವೇತಿ… ಮರಣಸಞ್ಞಂ ಭಾವೇತಿ… ಆಹಾರೇ ಪಟಿಕೂಲಸಞ್ಞಂ ಭಾವೇತಿ… ಸಬ್ಬಲೋಕೇ ಅನಭಿರತಿಸಞ್ಞಂ [ಅನಭಿರತಸಞ್ಞಂ (ಸೀ. ಸ್ಯಾ. ಕಂ. ಪೀ.)] ಭಾವೇತಿ… ಅನಿಚ್ಚಸಞ್ಞಂ ಭಾವೇತಿ… ಅನಿಚ್ಚೇ ದುಕ್ಖಸಞ್ಞಂ ಭಾವೇತಿ… ದುಕ್ಖೇ ಅನತ್ತಸಞ್ಞಂ ಭಾವೇತಿ… ಪಹಾನಸಞ್ಞಂ ಭಾವೇತಿ… ವಿರಾಗಸಞ್ಞಂ ಭಾವೇತಿ… ನಿರೋಧಸಞ್ಞಂ ಭಾವೇತಿ….

೪೬೩-೪೭೨. ಅನಿಚ್ಚಸಞ್ಞಂ ಭಾವೇತಿ… ಅನತ್ತಸಞ್ಞಂ ಭಾವೇತಿ… ಮರಣಸಞ್ಞಂ ¶ ಭಾವೇತಿ… ಆಹಾರೇ ಪಟಿಕೂಲಸಞ್ಞಂ ಭಾವೇತಿ… ಸಬ್ಬಲೋಕೇ ಅನಭಿರತಿಸಞ್ಞಂ ಭಾವೇತಿ… ಅಟ್ಠಿಕಸಞ್ಞಂ ಭಾವೇತಿ… ಪುಳವಕಸಞ್ಞಂ [ಪುಳುವಕಸಞ್ಞಂ (ಕ.)] ಭಾವೇತಿ… ವಿನೀಲಕಸಞ್ಞಂ ಭಾವೇತಿ… ವಿಚ್ಛಿದ್ದಕಸಞ್ಞಂ ಭಾವೇತಿ… ಉದ್ಧುಮಾತಕಸಞ್ಞಂ ಭಾವೇತಿ….

೪೭೩-೪೮೨. ಬುದ್ಧಾನುಸ್ಸತಿಂ ¶ ಭಾವೇತಿ… ಧಮ್ಮಾನುಸ್ಸತಿಂ ಭಾವೇತಿ… ಸಙ್ಘಾನುಸ್ಸತಿಂ ಭಾವೇತಿ… ಸೀಲಾನುಸ್ಸತಿಂ ಭಾವೇತಿ… ಚಾಗಾನುಸ್ಸತಿಂ ಭಾವೇತಿ… ದೇವತಾನುಸ್ಸತಿಂ ¶ ಭಾವೇತಿ… ಆನಾಪಾನಸ್ಸತಿಂ ಭಾವೇತಿ… ಮರಣಸ್ಸತಿಂ ಭಾವೇತಿ… ಕಾಯಗತಾಸತಿಂ ಭಾವೇತಿ… ಉಪಸಮಾನುಸ್ಸತಿಂ ಭಾವೇತಿ….

೪೮೩-೪೯೨. ಪಠಮಜ್ಝಾನಸಹಗತಂ ¶ ಸದ್ಧಿನ್ದ್ರಿಯಂ ಭಾವೇತಿ… ವೀರಿಯಿನ್ದ್ರಿಯಂ ಭಾವೇತಿ… ಸತಿನ್ದ್ರಿಯಂ ಭಾವೇತಿ… ಸಮಾಧಿನ್ದ್ರಿಯಂ ಭಾವೇತಿ… ಪಞ್ಞಿನ್ದ್ರಿಯಂ ಭಾವೇತಿ… ಸದ್ಧಾಬಲಂ ಭಾವೇತಿ… ವೀರಿಯಬಲಂ ಭಾವೇತಿ… ಸತಿಬಲಂ ಭಾವೇತಿ… ಸಮಾಧಿಬಲಂ ಭಾವೇತಿ… ಪಞ್ಞಾಬಲಂ ಭಾವೇತಿ….

೪೯೩-೫೬೨. ‘‘ದುತಿಯಜ್ಝಾನಸಹಗತಂ…ಪೇ… ತತಿಯಜ್ಝಾನಸಹಗತಂ…ಪೇ… ಚತುತ್ಥಜ್ಝಾನಸಹಗತಂ…ಪೇ… ಮೇತ್ತಾಸಹಗತಂ…ಪೇ… ಕರುಣಾಸಹಗತಂ…ಪೇ… ಮುದಿತಾಸಹಗತಂ…ಪೇ… ಉಪೇಕ್ಖಾಸಹಗತಂ ಸದ್ಧಿನ್ದ್ರಿಯಂ ಭಾವೇತಿ… ವೀರಿಯಿನ್ದ್ರಿಯಂ ಭಾವೇತಿ… ಸತಿನ್ದ್ರಿಯಂ ¶ ಭಾವೇತಿ… ಸಮಾಧಿನ್ದ್ರಿಯಂ ಭಾವೇತಿ… ಪಞ್ಞಿನ್ದ್ರಿಯಂ ಭಾವೇತಿ… ಸದ್ಧಾಬಲಂ ಭಾವೇತಿ… ವೀರಿಯಬಲಂ ಭಾವೇತಿ… ಸತಿಬಲಂ ಭಾವೇತಿ… ಸಮಾಧಿಬಲಂ ಭಾವೇತಿ… ಪಞ್ಞಾಬಲಂ ಭಾವೇತಿ. ಅಯಂ ವುಚ್ಚತಿ, ಭಿಕ್ಖವೇ – ‘ಭಿಕ್ಖು ಅರಿತ್ತಜ್ಝಾನೋ ವಿಹರತಿ ಸತ್ಥುಸಾಸನಕರೋ ಓವಾದಪತಿಕರೋ, ಅಮೋಘಂ ರಟ್ಠಪಿಣ್ಡಂ ಭುಞ್ಜತಿ’. ಕೋ ಪನ ವಾದೋ ಯೇ ನಂ ಬಹುಲೀಕರೋನ್ತೀ’’ತಿ!

ಅಪರಅಚ್ಛರಾಸಙ್ಘಾತವಗ್ಗೋ ಅಟ್ಠಾರಸಮೋ.

೫೬೩. ‘‘ಯಸ್ಸ ¶ ಕಸ್ಸಚಿ, ಭಿಕ್ಖವೇ, ಮಹಾಸಮುದ್ದೋ ಚೇತಸಾ ಫುಟೋ ಅನ್ತೋಗಧಾ ತಸ್ಸ ಕುನ್ನದಿಯೋ ಯಾ ಕಾಚಿ ಸಮುದ್ದಙ್ಗಮಾ; ಏವಮೇವಂ, ಭಿಕ್ಖವೇ, ಯಸ್ಸ ಕಸ್ಸಚಿ ಕಾಯಗತಾ ಸತಿ ಭಾವಿತಾ ಬಹುಲೀಕತಾ ಅನ್ತೋಗಧಾ ತಸ್ಸ ಕುಸಲಾ ಧಮ್ಮಾ ಯೇ ಕೇಚಿ ವಿಜ್ಜಾಭಾಗಿಯಾ’’ತಿ.

೫೬೪-೫೭೦. ‘‘ಏಕಧಮ್ಮೋ, ಭಿಕ್ಖವೇ, ಭಾವಿತೋ ಬಹುಲೀಕತೋ ಮಹತೋ ಸಂವೇಗಾಯ ಸಂವತ್ತತಿ… ಮಹತೋ ಅತ್ಥಾಯ ಸಂವತ್ತತಿ… ಮಹತೋ ಯೋಗಕ್ಖೇಮಾಯ ಸಂವತ್ತತಿ… ಸತಿಸಮ್ಪಜಞ್ಞಾಯ ¶ ಸಂವತ್ತತಿ… ಞಾಣದಸ್ಸನಪ್ಪಟಿಲಾಭಾಯ ಸಂವತ್ತತಿ… ದಿಟ್ಠಧಮ್ಮಸುಖವಿಹಾರಾಯ ಸಂವತ್ತತಿ… ವಿಜ್ಜಾವಿಮುತ್ತಿಫಲಸಚ್ಛಿಕಿರಿಯಾಯ ಸಂವತ್ತತಿ. ಕತಮೋ ಏಕಧಮ್ಮೋ? ಕಾಯಗತಾ ಸತಿ. ಅಯಂ ಖೋ, ಭಿಕ್ಖವೇ, ಏಕಧಮ್ಮೋ ಭಾವಿತೋ ಬಹುಲೀಕತೋ ಮಹತೋ ಸಂವೇಗಾಯ ಸಂವತ್ತತಿ… ಮಹತೋ ಅತ್ಥಾಯ ಸಂವತ್ತತಿ… ಮಹತೋ ಯೋಗಕ್ಖೇಮಾಯ ಸಂವತ್ತತಿ… ಸತಿಸಮ್ಪಜಞ್ಞಾಯ ಸಂವತ್ತತಿ… ಞಾಣದಸ್ಸನಪ್ಪಟಿಲಾಭಾಯ ಸಂವತ್ತತಿ… ದಿಟ್ಠಧಮ್ಮಸುಖವಿಹಾರಾಯ ಸಂವತ್ತತಿ… ವಿಜ್ಜಾವಿಮುತ್ತಿಫಲಸಚ್ಛಿಕಿರಿಯಾಯ ಸಂವತ್ತತೀ’’ತಿ.

೫೭೧. ‘‘ಏಕಧಮ್ಮೇ ¶ , ಭಿಕ್ಖವೇ, ಭಾವಿತೇ ಬಹುಲೀಕತೇ ಕಾಯೋಪಿ ಪಸ್ಸಮ್ಭತಿ, ಚಿತ್ತಮ್ಪಿ ಪಸ್ಸಮ್ಭತಿ, ವಿತಕ್ಕವಿಚಾರಾಪಿ ವೂಪಸಮ್ಮನ್ತಿ, ಕೇವಲಾಪಿ ವಿಜ್ಜಾಭಾಗಿಯಾ ಧಮ್ಮಾ ಭಾವನಾಪಾರಿಪೂರಿಂ ಗಚ್ಛನ್ತಿ. ಕತಮಸ್ಮಿಂ ಏಕಧಮ್ಮೇ? ಕಾಯಗತಾಯ ಸತಿಯಾ. ಇಮಸ್ಮಿಂ ¶ ಖೋ, ಭಿಕ್ಖವೇ, ಏಕಧಮ್ಮೇ ಭಾವಿತೇ ಬಹುಲೀಕತೇ ಕಾಯೋಪಿ ಪಸ್ಸಮ್ಭತಿ, ಚಿತ್ತಮ್ಪಿ ಪಸ್ಸಮ್ಭತಿ, ವಿತಕ್ಕವಿಚಾರಾಪಿ ವೂಪಸಮ್ಮನ್ತಿ, ಕೇವಲಾಪಿ ವಿಜ್ಜಾಭಾಗಿಯಾ ಧಮ್ಮಾ ಭಾವನಾಪಾರಿಪೂರಿಂ ಗಚ್ಛನ್ತೀ’’ತಿ.

೫೭೨. ‘‘ಏಕಧಮ್ಮೇ, ಭಿಕ್ಖವೇ, ಭಾವಿತೇ ಬಹುಲೀಕತೇ ಅನುಪ್ಪನ್ನಾ ಚೇವ ಅಕುಸಲಾ ಧಮ್ಮಾ ನುಪ್ಪಜ್ಜನ್ತಿ, ಉಪ್ಪನ್ನಾ ಚ ಅಕುಸಲಾ ಧಮ್ಮಾ ಪಹೀಯನ್ತಿ. ಕತಮಸ್ಮಿಂ ಏಕಧಮ್ಮೇ? ಕಾಯಗತಾಯ ಸತಿಯಾ. ಇಮಸ್ಮಿಂ ಖೋ, ಭಿಕ್ಖವೇ, ಏಕಧಮ್ಮೇ ಭಾವಿತೇ ಬಹುಲೀಕತೇ ಅನುಪ್ಪನ್ನಾ ಚೇವ ಅಕುಸಲಾ ಧಮ್ಮಾ ನುಪ್ಪಜ್ಜನ್ತಿ, ಉಪ್ಪನ್ನಾ ಚ ಅಕುಸಲಾ ಧಮ್ಮಾ ಪಹೀಯನ್ತೀ’’ತಿ.

೫೭೩. ‘‘ಏಕಧಮ್ಮೇ ¶ , ಭಿಕ್ಖವೇ, ಭಾವಿತೇ ಬಹುಲೀಕತೇ ಅನುಪ್ಪನ್ನಾ ಚೇವ ಕುಸಲಾ ಧಮ್ಮಾ ಉಪ್ಪಜ್ಜನ್ತಿ, ಉಪ್ಪನ್ನಾ ಚ ಕುಸಲಾ ಧಮ್ಮಾ ಭಿಯ್ಯೋಭಾವಾಯ ವೇಪುಲ್ಲಾಯ ¶ ಸಂವತ್ತನ್ತಿ. ಕತಮಸ್ಮಿಂ ಏಕಧಮ್ಮೇ? ಕಾಯಗತಾಯ ಸತಿಯಾ. ಇಮಸ್ಮಿಂ ಖೋ, ಭಿಕ್ಖವೇ, ಏಕಧಮ್ಮೇ ಭಾವಿತೇ ಬಹುಲೀಕತೇ ಅನುಪ್ಪನ್ನಾ ಚೇವ ಕುಸಲಾ ಧಮ್ಮಾ ಉಪ್ಪಜ್ಜನ್ತಿ, ಉಪ್ಪನ್ನಾ ಚ ಕುಸಲಾ ಧಮ್ಮಾ ಭಿಯ್ಯೋಭಾವಾಯ ವೇಪುಲ್ಲಾಯ ಸಂವತ್ತನ್ತೀ’’ತಿ.

೫೭೪. ‘‘ಏಕಧಮ್ಮೇ, ಭಿಕ್ಖವೇ, ಭಾವಿತೇ ಬಹುಲೀಕತೇ ಅವಿಜ್ಜಾ ಪಹೀಯತಿ, ವಿಜ್ಜಾ ಉಪ್ಪಜ್ಜತಿ, ಅಸ್ಮಿಮಾನೋ ಪಹೀಯತಿ, ಅನುಸಯಾ ಸಮುಗ್ಘಾತಂ ಗಚ್ಛನ್ತಿ, ಸಂಯೋಜನಾ ಪಹೀಯನ್ತಿ. ಕತಮಸ್ಮಿಂ ಏಕಧಮ್ಮೇ? ಕಾಯಗತಾಯ ಸತಿಯಾ. ಇಮಸ್ಮಿಂ ಖೋ, ಭಿಕ್ಖವೇ, ಏಕಧಮ್ಮೇ ಭಾವಿತೇ ಬಹುಲೀಕತೇ ಅವಿಜ್ಜಾ ಪಹೀಯತಿ, ವಿಜ್ಜಾ ಉಪ್ಪಜ್ಜತಿ, ಅಸ್ಮಿಮಾನೋ ಪಹೀಯತಿ, ಅನುಸಯಾ ಸಮುಗ್ಘಾತಂ ಗಚ್ಛನ್ತಿ, ಸಂಯೋಜನಾ ಪಹೀಯನ್ತೀ’’ತಿ.

೫೭೫-೫೭೬. ‘‘ಏಕಧಮ್ಮೋ, ಭಿಕ್ಖವೇ, ಭಾವಿತೋ ಬಹುಲೀಕತೋ ಪಞ್ಞಾಪಭೇದಾಯ ಸಂವತ್ತತಿ… ಅನುಪಾದಾಪರಿನಿಬ್ಬಾನಾಯ ಸಂವತ್ತತಿ. ಕತಮೋ ಏಕಧಮ್ಮೋ? ಕಾಯಗತಾ ಸತಿ. ಅಯಂ ಖೋ, ಭಿಕ್ಖವೇ, ಏಕಧಮ್ಮೋ ಭಾವಿತೋ ಬಹುಲೀಕತೋ ಪಞ್ಞಾಪಭೇದಾಯ ಸಂವತ್ತತಿ… ಅನುಪಾದಾಪರಿನಿಬ್ಬಾನಾಯ ಸಂವತ್ತತೀ’’ತಿ.

೫೭೭-೫೭೯. ‘‘ಏಕಧಮ್ಮೇ ¶ , ಭಿಕ್ಖವೇ, ಭಾವಿತೇ ಬಹುಲೀಕತೇ ಅನೇಕಧಾತುಪಟಿವೇಧೋ ಹೋತಿ… ನಾನಾಧಾತುಪಟಿವೇಧೋ ಹೋತಿ… ಅನೇಕಧಾತುಪಟಿಸಮ್ಭಿದಾ ಹೋತಿ. ಕತಮಸ್ಮಿಂ ಏಕಧಮ್ಮೇ? ಕಾಯಗತಾಯ ಸತಿಯಾ. ಇಮಸ್ಮಿಂ ಖೋ, ಭಿಕ್ಖವೇ, ಏಕಧಮ್ಮೇ ಭಾವಿತೇ ಬಹುಲೀಕತೇ ಅನೇಕಧಾತುಪಟಿವೇಧೋ ಹೋತಿ… ನಾನಾಧಾತುಪಟಿವೇಧೋ ಹೋತಿ… ಅನೇಕಧಾತುಪಟಿಸಮ್ಭಿದಾ ಹೋತೀ’’ತಿ.

೫೮೦-೫೮೩. ‘‘ಏಕಧಮ್ಮೋ, ಭಿಕ್ಖವೇ, ಭಾವಿತೋ ಬಹುಲೀಕತೋ ಸೋತಾಪತ್ತಿಫಲಸಚ್ಛಿಕಿರಿಯಾಯ ¶ ಸಂವತ್ತತಿ… ಸಕದಾಗಾಮಿಫಲಸಚ್ಛಿಕಿರಿಯಾಯ ಸಂವತ್ತತಿ… ಅನಾಗಾಮಿಫಲಸಚ್ಛಿಕಿರಿಯಾಯ ಸಂವತ್ತತಿ… ಅರಹತ್ತಫಲಸಚ್ಛಿಕಿರಿಯಾಯ ¶ ಸಂವತ್ತತಿ. ಕತಮೋ ಏಕಧಮ್ಮೋ? ಕಾಯಗತಾ ಸತಿ. ಅಯಂ ಖೋ, ಭಿಕ್ಖವೇ, ಏಕಧಮ್ಮೋ ಭಾವಿತೋ ಬಹುಲೀಕತೋ ಸೋತಾಪತ್ತಿಫಲಸಚ್ಛಿಕಿರಿಯಾಯ ಸಂವತ್ತತಿ… ಸಕದಾಗಾಮಿಫಲಸಚ್ಛಿಕಿರಿಯಾಯ ಸಂವತ್ತತಿ… ಅನಾಗಾಮಿಫಲಸಚ್ಛಿಕಿರಿಯಾಯ ಸಂವತ್ತತಿ… ಅರಹತ್ತಫಲಸಚ್ಛಿಕಿರಿಯಾಯ ಸಂವತ್ತತೀ’’ತಿ.

೫೮೪-೫೯೯. ‘‘ಏಕಧಮ್ಮೋ ¶ , ಭಿಕ್ಖವೇ, ಭಾವಿತೋ ಬಹುಲೀಕತೋ ಪಞ್ಞಾಪಟಿಲಾಭಾಯ ಸಂವತ್ತತಿ… ಪಞ್ಞಾವುದ್ಧಿಯಾ ಸಂವತ್ತತಿ… ಪಞ್ಞಾವೇಪುಲ್ಲಾಯ ಸಂವತ್ತತಿ… ಮಹಾಪಞ್ಞತಾಯ ಸಂವತ್ತತಿ… ಪುಥುಪಞ್ಞತಾಯ ಸಂವತ್ತತಿ… ವಿಪುಲಪಞ್ಞತಾಯ ಸಂವತ್ತತಿ… ಗಮ್ಭೀರಪಞ್ಞತಾಯ ಸಂವತ್ತತಿ… ಅಸಾಮನ್ತಪಞ್ಞತಾಯ [ಅಸಮತ್ಥಪಞ್ಞತಾಯ (ಸ್ಯಾ. ಕಂ.), ಅಸಮತ್ತಪಞ್ಞತಾಯ (ಕ.), ಅಸಮನ್ತಪಞ್ಞತಾಯ (ಟೀಕಾ) ಪಟಿ. ಮ. ಅಟ್ಠ. ೨.೩.೧ ಪಸ್ಸಿತಬ್ಬಂ] ಸಂವತ್ತತಿ… ಭೂರಿಪಞ್ಞತಾಯ ಸಂವತ್ತತಿ… ಪಞ್ಞಾಬಾಹುಲ್ಲಾಯ ಸಂವತ್ತತಿ… ಸೀಘಪಞ್ಞತಾಯ ಸಂವತ್ತತಿ… ಲಹುಪಞ್ಞತಾಯ ಸಂವತ್ತತಿ… ಹಾಸಪಞ್ಞತಾಯ [ಹಾಸುಪಞ್ಞತಾಯ (ಸೀ. ಪೀ.)] ಸಂವತ್ತತಿ… ಜವನಪಞ್ಞತಾಯ ಸಂವತ್ತತಿ… ತಿಕ್ಖಪಞ್ಞತಾಯ ಸಂವತ್ತತಿ… ನಿಬ್ಬೇಧಿಕಪಞ್ಞತಾಯ ಸಂವತ್ತತಿ. ಕತಮೋ ಏಕಧಮ್ಮೋ? ಕಾಯಗತಾ ಸತಿ. ಅಯಂ ಖೋ, ಭಿಕ್ಖವೇ, ಏಕಧಮ್ಮೋ ಭಾವಿತೋ ಬಹುಲೀಕತೋ ಪಞ್ಞಾಪಟಿಲಾಭಾಯ ಸಂವತ್ತತಿ… ಪಞ್ಞಾವುದ್ಧಿಯಾ ಸಂವತ್ತತಿ… ಪಞ್ಞಾವೇಪುಲ್ಲಾಯ ಸಂವತ್ತತಿ… ಮಹಾಪಞ್ಞತಾಯ ಸಂವತ್ತತಿ… ಪುಥುಪಞ್ಞತಾಯ ಸಂವತ್ತತಿ… ವಿಪುಲಪಞ್ಞತಾಯ ಸಂವತ್ತತಿ… ಗಮ್ಭೀರಪಞ್ಞತಾಯ ಸಂವತ್ತತಿ… ಅಸಾಮನ್ತಪಞ್ಞತಾಯ ಸಂವತ್ತತಿ… ಭೂರಿಪಞ್ಞತಾಯ ಸಂವತ್ತತಿ… ಪಞ್ಞಾಬಾಹುಲ್ಲಾಯ ಸಂವತ್ತತಿ… ಸೀಘಪಞ್ಞತಾಯ ಸಂವತ್ತತಿ… ಲಹುಪಞ್ಞತಾಯ ಸಂವತ್ತತಿ… ಹಾಸಪಞ್ಞತಾಯ ಸಂವತ್ತತಿ… ಜವನಪಞ್ಞತಾಯ ಸಂವತ್ತತಿ… ತಿಕ್ಖಪಞ್ಞತಾಯ ಸಂವತ್ತತಿ… ನಿಬ್ಬೇಧಿಕಪಞ್ಞತಾಯ ಸಂವತ್ತತೀ’’ತಿ.

೬೦೦. ‘‘ಅಮತಂ ¶ ¶ ¶ ತೇ, ಭಿಕ್ಖವೇ, ನ ಪರಿಭುಞ್ಜನ್ತಿ ಯೇ ಕಾಯಗತಾಸತಿಂ ನ ಪರಿಭುಞ್ಜನ್ತಿ. ಅಮತಂ ತೇ, ಭಿಕ್ಖವೇ, ಪರಿಭುಞ್ಜನ್ತಿ ಯೇ ಕಾಯಗತಾಸತಿಂ ಪರಿಭುಞ್ಜನ್ತೀ’’ತಿ.

೬೦೧. ‘‘ಅಮತಂ ತೇಸಂ, ಭಿಕ್ಖವೇ, ಅಪರಿಭುತ್ತಂ ಯೇಸಂ ಕಾಯಗತಾಸತಿ ಅಪರಿಭುತ್ತಾ. ಅಮತಂ ತೇಸಂ, ಭಿಕ್ಖವೇ, ಪರಿಭುತ್ತಂ ಯೇಸಂ ಕಾಯಗತಾಸತಿ ಪರಿಭುತ್ತಾ’’ತಿ.

೬೦೨. ‘‘ಅಮತಂ ತೇಸಂ, ಭಿಕ್ಖವೇ, ಪರಿಹೀನಂ ಯೇಸಂ ಕಾಯಗತಾಸತಿ ಪರಿಹೀನಾ. ಅಮತಂ ತೇಸಂ, ಭಿಕ್ಖವೇ, ಅಪರಿಹೀನಂ ಯೇಸಂ ಕಾಯಗತಾಸತಿ ಅಪರಿಹೀನಾ’’ತಿ.

೬೦೩. ‘‘ಅಮತಂ ತೇಸಂ, ಭಿಕ್ಖವೇ, ವಿರದ್ಧಂ ಯೇಸಂ ಕಾಯಗತಾಸತಿ ¶ ವಿರದ್ಧಾ. ಅಮತಂ ತೇಸಂ, ಭಿಕ್ಖವೇ, ಆರದ್ಧಂ [ಅವಿರದ್ಧಂ (ಕ.)] ಯೇಸಂ ಕಾಯಗತಾಸತಿ ಆರದ್ಧಾ’’ತಿ.

೬೦೪. ‘‘ಅಮತಂ ತೇ, ಭಿಕ್ಖವೇ, ಪಮಾದಿಂಸು ಯೇ ಕಾಯಗತಾಸತಿಂ ಪಮಾದಿಂಸು. ಅಮತಂ ತೇ, ಭಿಕ್ಖವೇ, ನ ಪಮಾದಿಂಸು ಯೇ ಕಾಯಗತಾಸತಿಂ ನ ಪಮಾದಿಂಸು’’.

೬೦೫. ‘‘ಅಮತಂ ತೇಸಂ, ಭಿಕ್ಖವೇ, ಪಮುಟ್ಠಂ ಯೇಸಂ ಕಾಯಗತಾಸತಿ ಪಮುಟ್ಠಾ. ಅಮತಂ ತೇಸಂ, ಭಿಕ್ಖವೇ, ಅಪ್ಪಮುಟ್ಠಂ ಯೇಸಂ ಕಾಯಗತಾಸತಿ ಅಪ್ಪಮುಟ್ಠಾ’’ತಿ.

೬೦೬. ‘‘ಅಮತಂ ತೇಸಂ, ಭಿಕ್ಖವೇ, ಅನಾಸೇವಿತಂ ಯೇಸಂ ಕಾಯಗತಾಸತಿ ಅನಾಸೇವಿತಾ. ಅಮತಂ ತೇಸಂ, ಭಿಕ್ಖವೇ, ಆಸೇವಿತಂ ಯೇಸಂ ಕಾಯಗತಾಸತಿ ಆಸೇವಿತಾ’’ತಿ.

೬೦೭. ‘‘ಅಮತಂ ತೇಸಂ, ಭಿಕ್ಖವೇ, ಅಭಾವಿತಂ ಯೇಸಂ ಕಾಯಗತಾಸತಿ ಅಭಾವಿತಾ. ಅಮತಂ ತೇಸಂ, ಭಿಕ್ಖವೇ, ಭಾವಿತಂ ಯೇಸಂ ಕಾಯಗತಾಸತಿ ಭಾವಿತಾ’’ತಿ.

೬೦೮. ‘‘ಅಮತಂ ¶ ¶ ತೇಸಂ, ಭಿಕ್ಖವೇ, ಅಬಹುಲೀಕತಂ ಯೇಸಂ ಕಾಯಗತಾಸತಿ ಅಬಹುಲೀಕತಾ ¶ . ಅಮತಂ ತೇಸಂ, ಭಿಕ್ಖವೇ, ಬಹುಲೀಕತಂ ಯೇಸಂ ಕಾಯಗತಾಸತಿ ಬಹುಲೀಕತಾ’’ತಿ.

೬೦೯. ‘‘ಅಮತಂ ತೇಸಂ, ಭಿಕ್ಖವೇ, ಅನಭಿಞ್ಞಾತಂ ಯೇಸಂ ಕಾಯಗತಾಸತಿ ಅನಭಿಞ್ಞಾತಾ. ಅಮತಂ ತೇಸಂ, ಭಿಕ್ಖವೇ, ಅಭಿಞ್ಞಾತಂ ಯೇಸಂ ಕಾಯಗತಾಸತಿ ಅಭಿಞ್ಞಾತಾ’’ತಿ.

೬೧೦. ‘‘ಅಮತಂ ತೇಸಂ, ಭಿಕ್ಖವೇ, ಅಪರಿಞ್ಞಾತಂ ಯೇಸಂ ಕಾಯಗತಾಸತಿ ಅಪರಿಞ್ಞಾತಾ. ಅಮತಂ ತೇಸಂ, ಭಿಕ್ಖವೇ, ಪರಿಞ್ಞಾತಂ ಯೇಸಂ ಕಾಯಗತಾಸತಿ ಪರಿಞ್ಞಾತಾ’’ತಿ.

೬೧೧. ‘‘ಅಮತಂ ತೇಸಂ, ಭಿಕ್ಖವೇ, ಅಸಚ್ಛಿಕತಂ ಯೇಸಂ ಕಾಯಗತಾಸತಿ ಅಸಚ್ಛಿಕತಾ. ಅಮತಂ ತೇಸಂ, ಭಿಕ್ಖವೇ, ಸಚ್ಛಿಕತಂ ಯೇಸಂ ಕಾಯಗತಾಸತಿ ಸಚ್ಛಿಕತಾ’’ತಿ. (….) [(ಏಕಕನಿಪಾತಸ್ಸ ಸುತ್ತಸಹಸ್ಸಂ ಸಮತ್ತಂ.) (ಸೀ. ಸ್ಯಾ. ಕಂ. ಪೀ.)]

(ಇದಮವೋಚ ಭಗವಾ. ಅತ್ತಮನಾ ತೇ ಭಿಕ್ಖೂ ಭಗವತೋ ಭಾಸಿತಂ ಅಭಿನನ್ದುನ್ತಿ.) [( ) ಏತ್ಥನ್ತರೇ ಪಾಠೋ ಸೀ. ಸ್ಯಾ. ಕಂ. ಪೀ. ಪೋತ್ಥಕೇಸು ನತ್ಥಿ]