📜

ನಮೋ ತಸ್ಸ ಭಗವತೋ ಅರಹತೋ ಸಮ್ಮಾಸಮ್ಬುದ್ಧಸ್ಸ

ಖುದ್ದಕನಿಕಾಯೇ

ಥೇರಗಾಥಾಪಾಳಿ

ನಿದಾನಗಾಥಾ

ಸೀಹಾನಂವ ¶ ¶ ¶ ¶ ನದನ್ತಾನಂ, ದಾಠೀನಂ ಗಿರಿಗಬ್ಭರೇ;

ಸುಣಾಥ ಭಾವಿತತ್ತಾನಂ, ಗಾಥಾ ಅತ್ಥೂಪನಾಯಿಕಾ [ಅತ್ತೂಪನಾಯಿಕಾ (ಸೀ. ಕ.)].

ಯಥಾನಾಮಾ ಯಥಾಗೋತ್ತಾ, ಯಥಾಧಮ್ಮವಿಹಾರಿನೋ;

ಯಥಾಧಿಮುತ್ತಾ ಸಪ್ಪಞ್ಞಾ, ವಿಹರಿಂಸು ಅತನ್ದಿತಾ.

ತತ್ಥ ತತ್ಥ ವಿಪಸ್ಸಿತ್ವಾ, ಫುಸಿತ್ವಾ ಅಚ್ಚುತಂ ಪದಂ;

ಕತನ್ತಂ ಪಚ್ಚವೇಕ್ಖನ್ತಾ, ಇಮಮತ್ಥಮಭಾಸಿಸುಂ.

೧. ಏಕಕನಿಪಾತೋ

೧. ಪಠಮವಗ್ಗೋ

೧. ಸುಭೂತಿತ್ಥೇರಗಾಥಾ

೧.

‘‘ಛನ್ನಾ ¶ ಮೇ ಕುಟಿಕಾ ಸುಖಾ ನಿವಾತಾ, ವಸ್ಸ ದೇವ ಯಥಾಸುಖಂ;

ಚಿತ್ತಂ ಮೇ ಸುಸಮಾಹಿತಂ ವಿಮುತ್ತಂ, ಆತಾಪೀ ವಿಹರಾಮಿ ವಸ್ಸ ದೇವಾ’’ತಿ.

ಇತ್ಥಂ ಸುದಂ [ಇತ್ಥಂ ಸುಮಂ (ಕ. ಅಟ್ಠ.)] ಆಯಸ್ಮಾ ಸುಭೂತಿತ್ಥೇರೋ ಗಾಥಂ ಅಭಾಸಿತ್ಥಾತಿ.

೨. ಮಹಾಕೋಟ್ಠಿಕತ್ಥೇರಗಾಥಾ

೨.

‘‘ಉಪಸನ್ತೋ ¶ ಉಪರತೋ, ಮನ್ತಭಾಣೀ ಅನುದ್ಧತೋ;

ಧುನಾತಿ ಪಾಪಕೇ ಧಮ್ಮೇ, ದುಮಪತ್ತಂವ ಮಾಲುತೋ’’ತಿ.

ಇತ್ಥಂ ಸುದಂ ಆಯಸ್ಮಾ ಮಹಾಕೋಟ್ಠಿಕೋ [ಮಹಾಕೋಟ್ಠಿತೋ (ಸೀ. ಸ್ಯಾ.)] ಥೇರೋ ಗಾಥಂ ಅಭಾಸಿತ್ಥಾತಿ.

೩. ಕಙ್ಖಾರೇವತತ್ಥೇರಗಾಥಾ

೩.

‘‘ಪಞ್ಞಂ ¶ ¶ ಇಮಂ ಪಸ್ಸ ತಥಾಗತಾನಂ, ಅಗ್ಗಿ ಯಥಾ ಪಜ್ಜಲಿತೋ ನಿಸೀಥೇ;

ಆಲೋಕದಾ ಚಕ್ಖುದದಾ ಭವನ್ತಿ, ಯೇ ಆಗತಾನಂ ವಿನಯನ್ತಿ ಕಙ್ಖ’’ನ್ತಿ.

ಇತ್ಥಂ ಸುದಂ ಆಯಸ್ಮಾ ಕಙ್ಖಾರೇವತೋ ಥೇರೋ ಗಾಥಂ ಅಭಾಸಿತ್ಥಾತಿ.

೪. ಪುಣ್ಣತ್ಥೇರಗಾಥಾ

೪.

‘‘ಸಮ್ಭಿರೇವ ಸಮಾಸೇಥ, ಪಣ್ಡಿತೇಹತ್ಥದಸ್ಸಿಭಿ;

ಅತ್ಥಂ ಮಹನ್ತಂ ಗಮ್ಭೀರಂ, ದುದ್ದಸಂ ನಿಪುಣಂ ಅಣುಂ;

ಧೀರಾ ಸಮಧಿಗಚ್ಛನ್ತಿ, ಅಪ್ಪಮತ್ತಾ ವಿಚಕ್ಖಣಾ’’ತಿ.

ಇತ್ಥಂ ಸುದಂ ಆಯಸ್ಮಾ ಪುಣ್ಣೋ ಮನ್ತಾಣಿಪುತ್ತೋ [ಮನ್ತಾನಿಪುತ್ತೋ (ಸ್ಯಾ. ಕ.)] ಥೇರೋ ಗಾಥಂ ಅಭಾಸಿತ್ಥಾತಿ.

೫. ದಬ್ಬತ್ಥೇರಗಾಥಾ

೫.

‘‘ಯೋ ¶ ದುದ್ದಮಿಯೋ ದಮೇನ ದನ್ತೋ, ದಬ್ಬೋ ಸನ್ತುಸಿತೋ ವಿತಿಣ್ಣಕಙ್ಖೋ;

ವಿಜಿತಾವೀ ಅಪೇತಭೇರವೋ ಹಿ, ದಬ್ಬೋ ಸೋ ಪರಿನಿಬ್ಬುತೋ ಠಿತತ್ತೋ’’ತಿ.

ಇತ್ಥಂ ಸುದಂ ಆಯಸ್ಮಾ ದಬ್ಬೋ ಥೇರೋ ಗಾಥಂ ಅಭಾಸಿತ್ಥಾತಿ.

೬. ಸೀತವನಿಯತ್ಥೇರಗಾಥಾ

೬.

‘‘ಯೋ ¶ ಸೀತವನಂ ಉಪಗಾ ಭಿಕ್ಖು, ಏಕೋ ಸನ್ತುಸಿತೋ ಸಮಾಹಿತತ್ತೋ;

ವಿಜಿತಾವೀ ಅಪೇತಲೋಮಹಂಸೋ, ರಕ್ಖಂ ಕಾಯಗತಾಸತಿಂ ಧಿತಿಮಾ’’ತಿ.

ಇತ್ಥಂ ಸುದಂ ಆಯಸ್ಮಾ ಸೀತವನಿಯೋ ಥೇರೋ ಗಾಥಂ ಅಭಾಸಿತ್ಥಾತಿ.

೭. ಭಲ್ಲಿಯತ್ಥೇರಗಾಥಾ

೭.

‘‘ಯೋಪಾನುದೀ ¶ ಮಚ್ಚುರಾಜಸ್ಸ ಸೇನಂ, ನಳಸೇತುಂವ ಸುದುಬ್ಬಲಂ ಮಹೋಘೋ;

ವಿಜಿತಾವೀ ಅಪೇತಭೇರವೋ ಹಿ, ದನ್ತೋ ಸೋ ಪರಿನಿಬ್ಬುತೋ ಠಿತತ್ತೋ’’ತಿ.

ಇತ್ಥಂ ಸುದಂ ಆಯಸ್ಮಾ ಭಲ್ಲಿಯೋ ಥೇರೋ ಗಾಥಂ ಅಭಾಸಿತ್ಥಾತಿ.

೮. ವೀರತ್ಥೇರಗಾಥಾ

೮.

‘‘ಯೋ ದುದ್ದಮಿಯೋ ದಮೇನ ದನ್ತೋ, ವೀರೋ ಸನ್ತುಸಿತೋ ವಿತಿಣ್ಣಕಙ್ಖೋ;

ವಿಜಿತಾವೀ ಅಪೇತಲೋಮಹಂಸೋ, ವೀರೋ ಸೋ ಪರಿನಿಬ್ಬುತೋ ಠಿತತ್ತೋ’’ತಿ.

ಇತ್ಥಂ ಸುದಂ ಆಯಸ್ಮಾ ವೀರೋ ಥೇರೋ ಗಾಥಂ ಅಭಾಸಿತ್ಥಾತಿ.

೯. ಪಿಲಿನ್ದವಚ್ಛತ್ಥೇರಗಾಥಾ

೯.

‘‘ಸ್ವಾಗತಂ ನ ದುರಾಗತಂ [ನಾಪಗತಂ (ಸೀ. ಸ್ಯಾ.)], ನಯಿದಂ ದುಮನ್ತಿತಂ ಮಮ;

ಸಂವಿಭತ್ತೇಸು ಧಮ್ಮೇಸು, ಯಂ ಸೇಟ್ಠಂ ತದುಪಾಗಮಿ’’ನ್ತಿ.

ಇತ್ಥಂ ಸುದಂ ಆಯಸ್ಮಾ ಪಿಲಿನ್ದವಚ್ಛೋ [ಪಿಲಿನ್ದಿವಚ್ಛೋ (ಸೀ.)] ಥೇರೋ ಗಾಥಂ ಅಭಾಸಿತ್ಥಾತಿ.

೧೦. ಪುಣ್ಣಮಾಸತ್ಥೇರಗಾಥಾ

೧೦.

‘‘ವಿಹರಿ ¶ ¶ ¶ ಅಪೇಕ್ಖಂ ಇಧ ವಾ ಹುರಂ ವಾ, ಯೋ ವೇದಗೂ ಸಮಿತೋ ಯತತ್ತೋ;

ಸಬ್ಬೇಸು ಧಮ್ಮೇಸು ಅನೂಪಲಿತ್ತೋ, ಲೋಕಸ್ಸ ಜಞ್ಞಾ ಉದಯಬ್ಬಯಞ್ಚಾ’’ತಿ.

ಇತ್ಥಂ ಸುದಂ ಆಯಸ್ಮಾ ಪುಣ್ಣಮಾಸೋ ಥೇರೋ ಗಾಥಂ ಅಭಾಸಿತ್ಥಾತಿ.

ವಗ್ಗೋ ಪಠಮೋ ನಿಟ್ಠಿತೋ.

ತಸ್ಸುದ್ದಾನಂ –

ಸುಭೂತಿ ¶ ಕೋಟ್ಠಿಕೋ ಥೇರೋ, ಕಙ್ಖಾರೇವತಸಮ್ಮತೋ;

ಮನ್ತಾಣಿಪುತ್ತೋ ದಬ್ಬೋ ಚ, ಸೀತವನಿಯೋ ಚ ಭಲ್ಲಿಯೋ;

ವೀರೋ ಪಿಲಿನ್ದವಚ್ಛೋ ಚ, ಪುಣ್ಣಮಾಸೋ ತಮೋನುದೋತಿ.

೨. ದುತಿಯವಗ್ಗೋ

೧. ಚೂಳವಚ್ಛತ್ಥೇರಗಾಥಾ

೧೧.

‘‘ಪಾಮೋಜ್ಜಬಹುಲೋ ಭಿಕ್ಖು, ಧಮ್ಮೇ ಬುದ್ಧಪ್ಪವೇದಿತೇ;

ಅಧಿಗಚ್ಛೇ ಪದಂ ಸನ್ತಂ, ಸಙ್ಖಾರೂಪಸಮಂ ಸುಖ’’ನ್ತಿ.

… ಚೂಳವಚ್ಛೋ [ಚೂಲಗವಚ್ಛೋ (ಸೀ.)] ಥೇರೋ….

೨. ಮಹಾವಚ್ಛತ್ಥೇರಗಾಥಾ

೧೨.

‘‘ಪಞ್ಞಾಬಲೀ ಸೀಲವತೂಪಪನ್ನೋ, ಸಮಾಹಿತೋ ಝಾನರತೋ ಸತೀಮಾ;

ಯದತ್ಥಿಯಂ ಭೋಜನಂ ಭುಞ್ಜಮಾನೋ, ಕಙ್ಖೇಥ ಕಾಲಂ ಇಧ ವೀತರಾಗೋ’’ತಿ.

… ಮಹಾವಚ್ಛೋ [ಮಹಾಗವಚ್ಛೋ (ಸೀ.)] ಥೇರೋ….

೩. ವನವಚ್ಛತ್ಥೇರಗಾಥಾ

೧೩.

‘‘ನೀಲಬ್ಭವಣ್ಣಾ ¶ ರುಚಿರಾ, ಸೀತವಾರೀ ಸುಚಿನ್ಧರಾ;

ಇನ್ದಗೋಪಕಸಞ್ಛನ್ನಾ, ತೇ ಸೇಲಾ ರಮಯನ್ತಿ ಮ’’ನ್ತಿ.

… ವನವಚ್ಛೋ ಥೇರೋ….

೪. ಸಿವಕಸಾಮಣೇರಗಾಥಾ

೧೪.

‘‘ಉಪಜ್ಝಾಯೋ ¶ ಮಂ ಅವಚ, ಇತೋ ಗಚ್ಛಾಮ ಸೀವಕ;

ಗಾಮೇ ¶ ಮೇ ವಸತಿ ಕಾಯೋ, ಅರಞ್ಞಂ ಮೇ ಗತೋ ಮನೋ;

ಸೇಮಾನಕೋಪಿ ಗಚ್ಛಾಮಿ, ನತ್ಥಿ ಸಙ್ಗೋ ವಿಜಾನತ’’ನ್ತಿ.

… ಸಿವಕೋ ಸಾಮಣೇರೋ….

೫. ಕುಣ್ಡಧಾನತ್ಥೇರಗಾಥಾ

೧೫.

‘‘ಪಞ್ಚ ಛಿನ್ದೇ ಪಞ್ಚ ಜಹೇ, ಪಞ್ಚ ಚುತ್ತರಿ ಭಾವಯೇ;

ಪಞ್ಚಸಙ್ಗಾತಿಗೋ ಭಿಕ್ಖು, ಓಘತಿಣ್ಣೋತಿ ವುಚ್ಚತೀ’’ತಿ.

… ಕುಣ್ಡಧಾನೋ ಥೇರೋ….

೬. ಬೇಲಟ್ಠಸೀಸತ್ಥೇರಗಾಥಾ

೧೬.

‘‘ಯಥಾಪಿ ಭದ್ದೋ ಆಜಞ್ಞೋ, ನಙ್ಗಲಾವತ್ತನೀ ಸಿಖೀ;

ಗಚ್ಛತಿ ಅಪ್ಪಕಸಿರೇನ, ಏವಂ ರತ್ತಿನ್ದಿವಾ ಮಮ;

ಗಚ್ಛನ್ತಿ ಅಪ್ಪಕಸಿರೇನ, ಸುಖೇ ಲದ್ಧೇ ನಿರಾಮಿಸೇ’’ತಿ.

… ಬೇಲಟ್ಠಸೀಸೋ ಥೇರೋ….

೭. ದಾಸಕತ್ಥೇರಗಾಥಾ

೧೭.

‘‘ಮಿದ್ಧೀ ¶ ಯದಾ ಹೋತಿ ಮಹಗ್ಘಸೋ ಚ, ನಿದ್ದಾಯಿತಾ ಸಮ್ಪರಿವತ್ತಸಾಯೀ;

ಮಹಾವರಾಹೋವ ನಿವಾಪಪುಟ್ಠೋ, ಪುನಪ್ಪುನಂ ಗಬ್ಭಮುಪೇತಿ ಮನ್ದೋ’’ತಿ.

… ದಾಸಕೋ ಥೇರೋ….

೮. ಸಿಙ್ಗಾಲಪಿತುತ್ಥೇರಗಾಥಾ

೧೮.

‘‘ಅಹು ¶ ಬುದ್ಧಸ್ಸ ದಾಯಾದೋ, ಭಿಕ್ಖು ಭೇಸಕಳಾವನೇ;

ಕೇವಲಂ ಅಟ್ಠಿಸಞ್ಞಾಯ, ಅಫರೀ ಪಥವಿಂ [ಪಠವಿಂ (ಸೀ. ಸ್ಯಾ.)] ಇಮಂ;

ಮಞ್ಞೇಹಂ ಕಾಮರಾಗಂ ಸೋ, ಖಿಪ್ಪಮೇವ ಪಹಿಸ್ಸತೀ’’ತಿ [ಪಹೀಯಭಿ (ಸಬ್ಬತ್ಥ ಪಾಳಿಯಂ)].

… ಸಿಙ್ಗಾಲಪಿತಾ [ಸೀಗಾಲಪಿತಾ (ಸೀ.)] ಥೇರೋ….

೯. ಕುಲತ್ಥೇರಗಾಥಾ

೧೯.

[ಧ. ಪ. ೮೦, ೧೪೫ ಧಮ್ಮಪದೇಪಿ] ‘‘ಉದಕಂ ¶ ಹಿ ನಯನ್ತಿ ನೇತ್ತಿಕಾ, ಉಸುಕಾರಾ ನಮಯನ್ತಿ [ದಮಯನ್ತಿ (ಕ.)] ತೇಜನಂ;

ದಾರುಂ ¶ ನಮಯನ್ತಿ ತಚ್ಛಕಾ, ಅತ್ತಾನಂ ದಮಯನ್ತಿ ಸುಬ್ಬತಾ’’ತಿ.

… ಕುಲೋ [ಕುಣ್ಡಲೋ (ಸೀ.), ಕುಳೋ (ಸ್ಯಾ. ಕ.)] ಥೇರೋ….

೧೦. ಅಜಿತತ್ಥೇರಗಾಥಾ

೨೦.

‘‘ಮರಣೇ ಮೇ ಭಯಂ ನತ್ಥಿ, ನಿಕನ್ತಿ ನತ್ಥಿ ಜೀವಿತೇ;

ಸನ್ದೇಹಂ ನಿಕ್ಖಿಪಿಸ್ಸಾಮಿ, ಸಮ್ಪಜಾನೋ ಪಟಿಸ್ಸತೋ’’ತಿ [ಪತಿಸ್ಸತೋತಿ (ಸೀ. ಸ್ಯಾ.)].

… ಅಜಿತೋ ಥೇರೋ ….

ವಗ್ಗೋ ದುತಿಯೋ ನಿಟ್ಠಿತೋ.

ತಸ್ಸುದ್ದಾನಂ –

ಚೂಳವಚ್ಛೋ ಮಹಾವಚ್ಛೋ, ವನವಚ್ಛೋ ಚ ಸೀವಕೋ;

ಕುಣ್ಡಧಾನೋ ಚ ಬೇಲಟ್ಠಿ, ದಾಸಕೋ ಚ ತತೋಪರಿ;

ಸಿಙ್ಗಾಲಪಿತಿಕೋ ಥೇರೋ, ಕುಲೋ ಚ ಅಜಿತೋ ದಸಾತಿ.

೩. ತತಿಯವಗ್ಗೋ

೧. ನಿಗ್ರೋಧತ್ಥೇರಗಾಥಾ

೨೧.

‘‘ನಾಹಂ ಭಯಸ್ಸ ಭಾಯಾಮಿ, ಸತ್ಥಾ ನೋ ಅಮತಸ್ಸ ಕೋವಿದೋ;

ಯತ್ಥ ಭಯಂ ನಾವತಿಟ್ಠತಿ, ತೇನ ಮಗ್ಗೇನ ವಜನ್ತಿ ಭಿಕ್ಖವೋ’’ತಿ.

… ನಿಗ್ರೋಧೋ ಥೇರೋ….

೨. ಚಿತ್ತಕತ್ಥೇರಗಾಥಾ

೨೨.

‘‘ನೀಲಾ ¶ ಸುಗೀವಾ ಸಿಖಿನೋ, ಮೋರಾ ಕಾರಮ್ಭಿಯಂ [ಕಾರಂವಿಯಂ (ಸೀ.), ಕಾರವಿಯಂ (ಸ್ಯಾ.)] ಅಭಿನದನ್ತಿ;

ತೇ ಸೀತವಾತಕೀಳಿತಾ [ಸೀತವಾತಕದ್ದಿತಕಲಿತಾ (ಸೀ.), ಸೀತವಾತಕಲಿತಾ (ಸ್ಯಾ.)], ಸುತ್ತಂ ಝಾಯಂ [ಝಾನಂ (ಸ್ಯಾ.), ಝಾಯಿಂ (?)] ನಿಬೋಧೇನ್ತೀ’’ತಿ.

… ಚಿತ್ತಕೋ ಥೇರೋ….

೩. ಗೋಸಾಲತ್ಥೇರಗಾಥಾ

೨೩.

‘‘ಅಹಂ ¶ ¶ ¶ ಖೋ ವೇಳುಗುಮ್ಬಸ್ಮಿಂ, ಭುತ್ವಾನ ಮಧುಪಾಯಸಂ;

ಪದಕ್ಖಿಣಂ ಸಮ್ಮಸನ್ತೋ, ಖನ್ಧಾನಂ ಉದಯಬ್ಬಯಂ;

ಸಾನುಂ ಪಟಿಗಮಿಸ್ಸಾಮಿ, ವಿವೇಕಮನುಬ್ರೂಹಯ’’ನ್ತಿ.

… ಗೋಸಾಲೋ ಥೇರೋ….

೪. ಸುಗನ್ಧತ್ಥೇರಗಾಥಾ

೨೪.

‘‘ಅನುವಸ್ಸಿಕೋ ಪಬ್ಬಜಿತೋ, ಪಸ್ಸ ಧಮ್ಮಸುಧಮ್ಮತಂ;

ತಿಸ್ಸೋ ವಿಜ್ಜಾ ಅನುಪ್ಪತ್ತಾ, ಕತಂ ಬುದ್ಧಸ್ಸ ಸಾಸನ’’ನ್ತಿ.

… ಸುಗನ್ಧೋ ಥೇರೋ….

೫. ನನ್ದಿಯತ್ಥೇರಗಾಥಾ

೨೫.

‘‘ಓಭಾಸಜಾತಂ ಫಲಗಂ, ಚಿತ್ತಂ ಯಸ್ಸ ಅಭಿಣ್ಹಸೋ;

ತಾದಿಸಂ ಭಿಕ್ಖುಮಾಸಜ್ಜ, ಕಣ್ಹ ದುಕ್ಖಂ ನಿಗಚ್ಛಸೀ’’ತಿ.

… ನನ್ದಿಯೋ ಥೇರೋ….

೬. ಅಭಯತ್ಥೇರಗಾಥಾ

೨೬.

‘‘ಸುತ್ವಾ ಸುಭಾಸಿತಂ ವಾಚಂ, ಬುದ್ಧಸ್ಸಾದಿಚ್ಚಬನ್ಧುನೋ;

ಪಚ್ಚಬ್ಯಧಿಂ ಹಿ ನಿಪುಣಂ, ವಾಲಗ್ಗಂ ಉಸುನಾ ಯಥಾ’’ತಿ.

… ಅಭಯೋ ಥೇರೋ….

೭. ಲೋಮಸಕಙ್ಗಿಯತ್ಥೇರಗಾಥಾ

೨೭.

‘‘ದಬ್ಬಂ ¶ ಕುಸಂ ಪೋಟಕಿಲಂ, ಉಸೀರಂ ಮುಞ್ಜಪಬ್ಬಜಂ;

ಉರಸಾ ಪನುದಿಸ್ಸಾಮಿ, ವಿವೇಕಮನುಬ್ರೂಹಯ’’ನ್ತಿ.

… ಲೋಮಸಕಙ್ಗಿಯೋ ಥೇರೋ….

೮. ಜಮ್ಬುಗಾಮಿಕಪುತ್ತತ್ಥೇರಗಾಥಾ

೨೮.

‘‘ಕಚ್ಚಿ ¶ ನೋ ವತ್ಥಪಸುತೋ, ಕಚ್ಚಿ ನೋ ಭೂಸನಾರತೋ;

ಕಚ್ಚಿ ಸೀಲಮಯಂ ಗನ್ಧಂ, ಕಿಂ ತ್ವಂ ವಾಯಸಿ [ಕಚ್ಚಿ ಸೀಲಮಯಂ ಗನ್ಧಂ, ತ್ವಂ ವಾಸಿ (ಸ್ಯಾ.)] ನೇತರಾ ಪಜಾ’’ತಿ.

… ಜಮ್ಬುಗಾಮಿಕಪುತ್ತೋ ಥೇರೋ….

೯. ಹಾರಿತತ್ಥೇರಗಾಥಾ

೨೯.

‘‘ಸಮುನ್ನಮಯಮತ್ತಾನಂ, ಉಸುಕಾರೋವ ತೇಜನಂ;

ಚಿತ್ತಂ ¶ ಉಜುಂ ಕರಿತ್ವಾನ, ಅವಿಜ್ಜಂ ಭಿನ್ದ ಹಾರಿತಾ’’ತಿ.

… ಹಾರಿತೋ ಥೇರೋ….

೧೦. ಉತ್ತಿಯತ್ಥೇರಗಾಥಾ

೩೦.

‘‘ಆಬಾಧೇ ಮೇ ಸಮುಪ್ಪನ್ನೇ, ಸತಿ ಮೇ ಉದಪಜ್ಜಥ;

ಆಬಾಧೋ ಮೇ ಸಮುಪ್ಪನ್ನೋ, ಕಾಲೋ ಮೇ ನಪ್ಪಮಜ್ಜಿತು’’ನ್ತಿ.

… ಉತ್ತಿಯೋ ಥೇರೋ….

ವಗ್ಗೋ ತತಿಯೋ ನಿಟ್ಠಿತೋ.

ತಸ್ಸುದ್ದಾನಂ –

ನಿಗ್ರೋಧೋ ಚಿತ್ತಕೋ ಥೇರೋ, ಗೋಸಾಲಥೇರೋ ಸುಗನ್ಧೋ;

ನನ್ದಿಯೋ ಅಭಯೋ ಥೇರೋ, ಥೇರೋ ಲೋಮಸಕಙ್ಗಿಯೋ;

ಜಮ್ಬುಗಾಮಿಕಪುತ್ತೋ ಚ, ಹಾರಿತೋ ಉತ್ತಿಯೋ ಇಸೀತಿ.

೪. ಚತುತ್ಥವಗ್ಗೋ

೧. ಗಹ್ವರತೀರಿಯತ್ಥೇರಗಾಥಾ

೩೧.

‘‘ಫುಟ್ಠೋ ¶ ¶ ಡಂಸೇಹಿ ಮಕಸೇಹಿ, ಅರಞ್ಞಸ್ಮಿಂ ಬ್ರಹಾವನೇ;

ನಾಗೋ ಸಂಗಾಮಸೀಸೇವ, ಸತೋ ತತ್ರಾಧಿವಾಸಯೇ’’ತಿ.

… ಗಹ್ವರತೀರಿಯೋ ಥೇರೋ….

೨. ಸುಪ್ಪಿಯತ್ಥೇರಗಾಥಾ

೩೨.

‘‘ಅಜರಂ ¶ ಜೀರಮಾನೇನ, ತಪ್ಪಮಾನೇನ ನಿಬ್ಬುತಿಂ;

ನಿಮಿಯಂ [ನಿಮ್ಮಿಸ್ಸಂ (ಸೀ.), ನಿರಾಮಿಸಂ (ಸ್ಯಾ.), ನಿಮಿನೇಯ್ಯಂ (?)] ಪರಮಂ ಸನ್ತಿಂ, ಯೋಗಕ್ಖೇಮಂ ಅನುತ್ತರ’’ನ್ತಿ.

… ಸುಪ್ಪಿಯೋ ಥೇರೋ….

೩. ಸೋಪಾಕತ್ಥೇರಗಾಥಾ

೩೩.

‘‘ಯಥಾಪಿ ¶ ಏಕಪುತ್ತಸ್ಮಿಂ, ಪಿಯಸ್ಮಿಂ ಕುಸಲೀ ಸಿಯಾ;

ಏವಂ ಸಬ್ಬೇಸು ಪಾಣೇಸು, ಸಬ್ಬತ್ಥ ಕುಸಲೋ ಸಿಯಾ’’ತಿ.

… ಸೋಪಾಕೋ ಥೇರೋ….

೪. ಪೋಸಿಯತ್ಥೇರಗಾಥಾ

೩೪.

‘‘ಅನಾಸನ್ನವರಾ ಏತಾ, ನಿಚ್ಚಮೇವ ವಿಜಾನತಾ;

ಗಾಮಾ ಅರಞ್ಞಮಾಗಮ್ಮ, ತತೋ ಗೇಹಂ ಉಪಾವಿಸಿ [ಉಪಾವಿಸಿಂ (ಸೀ.)];

ತತೋ ಉಟ್ಠಾಯ ಪಕ್ಕಾಮಿ, ಅನಾಮನ್ತೇತ್ವಾ [ಅನಾಮನ್ತಿಯ (ಸೀ.)] ಪೋಸಿಯೋ’’ತಿ.

… ಪೋಸಿಯೋ ಥೇರೋ….

೫. ಸಾಮಞ್ಞಕಾನಿತ್ಥೇರಗಾಥಾ

೩೫.

‘‘ಸುಖಂ ಸುಖತ್ಥೋ ಲಭತೇ ತದಾಚರಂ, ಕಿತ್ತಿಞ್ಚ ಪಪ್ಪೋತಿ ಯಸಸ್ಸ ವಡ್ಢತಿ;

ಯೋ ಅರಿಯಮಟ್ಠಙ್ಗಿಕಮಞ್ಜಸಂ ಉಜುಂ, ಭಾವೇತಿ ಮಗ್ಗಂ ಅಮತಸ್ಸ ಪತ್ತಿಯಾ’’ತಿ.

… ಸಾಮಞ್ಞಕಾನಿತ್ಥೇರೋ….

೬. ಕುಮಾಪುತ್ತತ್ಥೇರಗಾಥಾ

೩೬.

‘‘ಸಾಧು ¶ ಸುತಂ ಸಾಧು ಚರಿತಕಂ, ಸಾಧು ಸದಾ ಅನಿಕೇತವಿಹಾರೋ;

ಅತ್ಥಪುಚ್ಛನಂ ಪದಕ್ಖಿಣಕಮ್ಮಂ, ಏತಂ ಸಾಮಞ್ಞಮಕಿಞ್ಚನಸ್ಸಾ’’ತಿ.

… ಕುಮಾಪುತ್ತೋ ಥೇರೋ….

೭. ಕುಮಾಪುತ್ತಸಹಾಯಕತ್ಥೇರಗಾಥಾ

೩೭.

‘‘ನಾನಾಜನಪದಂ ಯನ್ತಿ, ವಿಚರನ್ತಾ ಅಸಞ್ಞತಾ;

ಸಮಾಧಿಞ್ಚ ವಿರಾಧೇನ್ತಿ, ಕಿಂಸು ರಟ್ಠಚರಿಯಾ ಕರಿಸ್ಸತಿ;

ತಸ್ಮಾ ವಿನೇಯ್ಯ ಸಾರಮ್ಭಂ, ಝಾಯೇಯ್ಯ ಅಪುರಕ್ಖತೋ’’ತಿ.

… ಕುಮಾಪುತ್ತತ್ಥೇರಸ್ಸ ಸಹಾಯಕೋ ಥೇರೋ….

೮. ಗವಮ್ಪತಿತ್ಥೇರಗಾಥಾ

೩೮.

‘‘ಯೋ ¶ ¶ ಇದ್ಧಿಯಾ ಸರಭುಂ ಅಟ್ಠಪೇಸಿ, ಸೋ ಗವಮ್ಪತಿ ಅಸಿತೋ ಅನೇಜೋ;

ತಂ ಸಬ್ಬಸಙ್ಗಾತಿಗತಂ ಮಹಾಮುನಿಂ, ದೇವಾ ನಮಸ್ಸನ್ತಿ ಭವಸ್ಸ ಪಾರಗು’’ನ್ತಿ.

… ಗವಮ್ಪತಿತ್ಥೇರೋ….

೯. ತಿಸ್ಸತ್ಥೇರಗಾಥಾ

೩೯.

[ಸಂ. ನಿ. ೧.೨೧, ೯೭]‘‘ಸತ್ತಿಯಾ ವಿಯ ಓಮಟ್ಠೋ, ಡಯ್ಹಮಾನೋವ [ಡಯ್ಹಮಾನೇವ (ಸಬ್ಬತ್ಥ)] ಮತ್ಥಕೇ;

ಕಾಮರಾಗಪ್ಪಹಾನಾಯ, ಸತೋ ಭಿಕ್ಖು ಪರಿಬ್ಬಜೇ’’ತಿ.

… ತಿಸ್ಸೋ ಥೇರೋ….

೧೦. ವಡ್ಢಮಾನತ್ಥೇರಗಾಥಾ

೪೦.

‘‘ಸತ್ತಿಯಾ ¶ ವಿಯ ಓಮಟ್ಠೋ, ಡಯ್ಹಮಾನೋವ ಮತ್ಥಕೇ;

ಭವರಾಗಪ್ಪಹಾನಾಯ, ಸತೋ ಭಿಕ್ಖು ಪರಿಬ್ಬಜೇ’’ತಿ.

… ವಡ್ಢಮಾನೋ ಥೇರೋ….

ವಗ್ಗೋ ಚತುತ್ಥೋ ನಿಟ್ಠಿತೋ.

ತಸ್ಸುದ್ದಾನಂ –

ಗಹ್ವರತೀರಿಯೋ ¶ ಸುಪ್ಪಿಯೋ, ಸೋಪಾಕೋ ಚೇವ ಪೋಸಿಯೋ;

ಸಾಮಞ್ಞಕಾನಿ ಕುಮಾಪುತ್ತೋ, ಕುಮಾಪುತ್ತಸಹಾಯಕೋ;

ಗವಮ್ಪತಿ ತಿಸ್ಸತ್ಥೇರೋ, ವಡ್ಢಮಾನೋ ಮಹಾಯಸೋತಿ.

೫. ಪಞ್ಚಮವಗ್ಗೋ

೧. ಸಿರಿವಡ್ಢತ್ಥೇರಗಾಥಾ

೪೧.

‘‘ವಿವರಮನುಪತನ್ತಿ ¶ ವಿಜ್ಜುತಾ, ವೇಭಾರಸ್ಸ ಚ ಪಣ್ಡವಸ್ಸ ಚ;

ನಗವಿವರಗತೋ ಚ ಝಾಯತಿ, ಪುತ್ತೋ ಅಪ್ಪಟಿಮಸ್ಸ ತಾದಿನೋ’’ತಿ.

… ಸಿರಿವಡ್ಢೋ ಥೇರೋ….

೨. ಖದಿರವನಿಯತ್ಥೇರಗಾಥಾ

೪೨.

‘‘ಚಾಲೇ ¶ ಉಪಚಾಲೇ ಸೀಸೂಪಚಾಲೇ ( ) [(ಚಾಲಾ ಉಪಚಾಲಾ, ಸೀಸೂಪಚಾಲಾ) (ಕ.)] ಪತಿಸ್ಸತಾ [ಪಟಿಸ್ಸತಿಕಾ (ಸ್ಯಾ. ಕ.)] ನು ಖೋ ವಿಹರಥ;

ಆಗತೋ ವೋ ವಾಲಂ ವಿಯ ವೇಧೀ’’ತಿ.

… ಖದಿರವನಿಯೋ ಥೇರೋ….

೩. ಸುಮಙ್ಗಲತ್ಥೇರಗಾಥಾ

೪೩.

‘‘ಸುಮುತ್ತಿಕೋ ಸುಮುತ್ತಿಕೋ ಸಾಹು, ಸುಮುತ್ತಿಕೋಮ್ಹಿ ತೀಹಿ ಖುಜ್ಜಕೇಹಿ;

ಅಸಿತಾಸು ಮಯಾ ನಙ್ಗಲಾಸು, ಮಯಾ ಖುದ್ದಕುದ್ದಾಲಾಸು ಮಯಾ.

ಯದಿಪಿ ಇಧಮೇವ ಇಧಮೇವ, ಅಥ ವಾಪಿ ಅಲಮೇವ ಅಲಮೇವ;

ಝಾಯ ಸುಮಙ್ಗಲ ಝಾಯ ಸುಮಙ್ಗಲ, ಅಪ್ಪಮತ್ತೋ ವಿಹರ ಸುಮಙ್ಗಲಾ’’ತಿ.

… ಸುಮಙ್ಗಲೋ ಥೇರೋ….

೪. ಸಾನುತ್ಥೇರಗಾಥಾ

೪೪.

[ಸಂ. ನಿ. ೧.೨೩೯] ‘‘ಮತಂ ವಾ ಅಮ್ಮ ರೋದನ್ತಿ, ಯೋ ವಾ ಜೀವಂ ನ ದಿಸ್ಸತಿ;

ಜೀವನ್ತಂ ಮಂ ಅಮ್ಮ ಪಸ್ಸನ್ತೀ, ಕಸ್ಮಾ ಮಂ ಅಮ್ಮ ರೋದಸೀ’’ತಿ.

… ಸಾನುತ್ಥೇರೋ….

೫. ರಮಣೀಯವಿಹಾರಿತ್ಥೇರಗಾಥಾ

೪೫.

‘‘ಯಥಾಪಿ ¶ ಭದ್ದೋ ಆಜಞ್ಞೋ, ಖಲಿತ್ವಾ ಪತಿತಿಟ್ಠತಿ;

ಏವಂ ¶ ದಸ್ಸನಸಮ್ಪನ್ನಂ, ಸಮ್ಮಾಸಮ್ಬುದ್ಧಸಾವಕ’’ನ್ತಿ.

… ರಮಣೀಯವಿಹಾರಿತ್ಥೇರೋ….

೬. ಸಮಿದ್ಧಿತ್ಥೇರಗಾಥಾ

೪೬.

‘‘ಸದ್ಧಾಯಾಹಂ ಪಬ್ಬಜಿತೋ, ಅಗಾರಸ್ಮಾನಗಾರಿಯಂ;

ಸತಿ ಪಞ್ಞಾ ಚ ಮೇ ವುಡ್ಢಾ, ಚಿತ್ತಞ್ಚ ಸುಸಮಾಹಿತಂ;

ಕಾಮಂ ಕರಸ್ಸು ರೂಪಾನಿ, ನೇವ ಮಂ ಬ್ಯಾಧಯಿಸ್ಸಸೀ’’ತಿ [ಬಾಧಯಿಸ್ಸಸೀತಿ (ಸೀ.), ಬ್ಯಾಥಯಿಸ್ಸಸೀತಿ (?)].

… ಸಮಿದ್ಧಿತ್ಥೇರೋ….

೭. ಉಜ್ಜಯತ್ಥೇರಗಾಥಾ

೪೭.

‘‘ನಮೋ ¶ ¶ ತೇ ಬುದ್ಧ ವೀರತ್ಥು, ವಿಪ್ಪಮುತ್ತೋಸಿ ಸಬ್ಬಧಿ;

ತುಯ್ಹಾಪದಾನೇ ವಿಹರಂ, ವಿಹರಾಮಿ ಅನಾಸವೋ’’ತಿ.

… ಉಜ್ಜಯೋ ಥೇರೋ….

೮. ಸಞ್ಜಯತ್ಥೇರಗಾಥಾ

೪೮.

‘‘ಯತೋ ಅಹಂ ಪಬ್ಬಜಿತೋ, ಅಗಾರಸ್ಮಾನಗಾರಿಯಂ;

ನಾಭಿಜಾನಾಮಿ ಸಙ್ಕಪ್ಪಂ, ಅನರಿಯಂ ದೋಸಸಂಹಿತ’’ನ್ತಿ.

… ಸಞ್ಜಯೋ ಥೇರೋ….

೯. ರಾಮಣೇಯ್ಯಕತ್ಥೇರಗಾಥಾ

೪೯.

‘‘ಚಿಹಚಿಹಾಭಿನದಿತೇ [ವಿಹವಿಹಾಭಿನದಿತೇ (ಸೀ. ಸ್ಯಾ.)], ಸಿಪ್ಪಿಕಾಭಿರುತೇಹಿ ಚ;

ನ ಮೇ ತಂ ಫನ್ದತಿ ಚಿತ್ತಂ, ಏಕತ್ತನಿರತಂ ಹಿ ಮೇ’’ತಿ.

… ರಾಮಣೇಯ್ಯಕೋ ಥೇರೋ….

೧೦. ವಿಮಲತ್ಥೇರಗಾಥಾ

೫೦.

‘‘ಧರಣೀ ¶ ಚ ಸಿಞ್ಚತಿ ವಾತಿ, ಮಾಲುತೋ ವಿಜ್ಜುತಾ ಚರತಿ ನಭೇ;

ಉಪಸಮನ್ತಿ ವಿತಕ್ಕಾ, ಚಿತ್ತಂ ಸುಸಮಾಹಿತಂ ಮಮಾ’’ತಿ.

… ವಿಮಲೋ ಥೇರೋ….

ವಗ್ಗೋ ಪಞ್ಚಮೋ ನಿಟ್ಠಿತೋ.

ತಸ್ಸುದ್ದಾನಂ –

ಸಿರೀವಡ್ಢೋ ರೇವತೋ ಥೇರೋ, ಸುಮಙ್ಗಲೋ ಸಾನುಸವ್ಹಯೋ ¶ ;

ರಮಣೀಯವಿಹಾರೀ ಚ, ಸಮಿದ್ಧಿಉಜ್ಜಯಸಞ್ಜಯಾ;

ರಾಮಣೇಯ್ಯೋ ಚ ಸೋ ಥೇರೋ, ವಿಮಲೋ ಚ ರಣಞ್ಜಹೋತಿ.

೬. ಛಟ್ಠವಗ್ಗೋ

೧. ಗೋಧಿಕತ್ಥೇರಗಾಥಾ

೫೧.

‘‘ವಸ್ಸತಿ ¶ ದೇವೋ ಯಥಾ ಸುಗೀತಂ, ಛನ್ನಾ ಮೇ ಕುಟಿಕಾ ಸುಖಾ ನಿವಾತಾ;

ಚಿತ್ತಂ ಸುಸಮಾಹಿತಞ್ಚ ಮಯ್ಹಂ, ಅಥ ಚೇ ಪತ್ಥಯಸಿ ಪವಸ್ಸ ದೇವಾ’’ತಿ.

… ಗೋಧಿಕೋ ಥೇರೋ….

೨. ಸುಬಾಹುತ್ಥೇರಗಾಥಾ

೫೨.

‘‘ವಸ್ಸತಿ ದೇವೋ ಯಥಾ ಸುಗೀತಂ, ಛನ್ನಾ ಮೇ ಕುಟಿಕಾ ಸುಖಾ ನಿವಾತಾ;

ಚಿತ್ತಂ ಸುಸಮಾಹಿತಞ್ಚ ಕಾಯೇ, ಅಥ ಚೇ ಪತ್ಥಯಸಿ ಪವಸ್ಸ ದೇವಾ’’ತಿ.

… ಸುಬಾಹುತ್ಥೇರೋ….

೩. ವಲ್ಲಿಯತ್ಥೇರಗಾಥಾ

೫೩.

‘‘ವಸ್ಸತಿ ದೇವೋ ಯಥಾ ಸುಗೀತಂ, ಛನ್ನಾ ಮೇ ಕುಟಿಕಾ ಸುಖಾ ನಿವಾತಾ;

ತಸ್ಸಂ ವಿಹರಾಮಿ ಅಪ್ಪಮತ್ತೋ, ಅಥ ಚೇ ಪತ್ಥಯಸಿ ಪವಸ್ಸ ದೇವಾ’’ತಿ.

… ವಲ್ಲಿಯೋ ಥೇರೋ….

೪. ಉತ್ತಿಯತ್ಥೇರಗಾಥಾ

೫೪.

‘‘ವಸ್ಸತಿ ¶ ¶ ದೇವೋ ಯಥಾ ಸುಗೀತಂ, ಛನ್ನಾ ಮೇ ಕುಟಿಕಾ ಸುಖಾ ನಿವಾತಾ;

ತಸ್ಸಂ ವಿಹರಾಮಿ ಅದುತಿಯೋ, ಅಥ ಚೇ ಪತ್ಥಯಸಿ ಪವಸ್ಸ ದೇವಾ’’ತಿ.

… ಉತ್ತಿಯೋ ಥೇರೋ….

೫. ಅಞ್ಜನವನಿಯತ್ಥೇರಗಾಥಾ

೫೫.

‘‘ಆಸನ್ದಿಂ ¶ ಕುಟಿಕಂ ಕತ್ವಾ, ಓಗಯ್ಹ ಅಞ್ಜನಂ ವನಂ;

ತಿಸ್ಸೋ ವಿಜ್ಜಾ ಅನುಪ್ಪತ್ತಾ, ಕತಂ ಬುದ್ಧಸ್ಸ ಸಾಸನ’’ನ್ತಿ.

… ಅಞ್ಜನವನಿಯೋ ಥೇರೋ….

೬. ಕುಟಿವಿಹಾರಿತ್ಥೇರಗಾಥಾ

೫೬.

‘‘ಕೋ ¶ ಕುಟಿಕಾಯಂ ಭಿಕ್ಖು ಕುಟಿಕಾಯಂ, ವೀತರಾಗೋ ಸುಸಮಾಹಿತಚಿತ್ತೋ;

ಏವಂ ಜಾನಾಹಿ ಆವುಸೋ, ಅಮೋಘಾ ತೇ ಕುಟಿಕಾ ಕತಾ’’ತಿ.

… ಕುಟಿವಿಹಾರಿತ್ಥೇರೋ….

೭. ದುತಿಯಕುಟಿವಿಹಾರಿತ್ಥೇರಗಾಥಾ

೫೭.

‘‘ಅಯಮಾಹು ಪುರಾಣಿಯಾ ಕುಟಿ, ಅಞ್ಞಂ ಪತ್ಥಯಸೇ ನವಂ ಕುಟಿಂ;

ಆಸಂ ಕುಟಿಯಾ ವಿರಾಜಯ, ದುಕ್ಖಾ ಭಿಕ್ಖು ಪುನ ನವಾ ಕುಟೀ’’ತಿ.

… ದುತಿಯಕುಟಿವಿಹಾರಿತ್ಥೇರೋ….

೮. ರಮಣೀಯಕುಟಿಕತ್ಥೇರಗಾಥಾ

೫೮.

‘‘ರಮಣೀಯಾ ಮೇ ಕುಟಿಕಾ, ಸದ್ಧಾದೇಯ್ಯಾ ಮನೋರಮಾ;

ನ ಮೇ ಅತ್ಥೋ ಕುಮಾರೀಹಿ, ಯೇಸಂ ಅತ್ಥೋ ತಹಿಂ ಗಚ್ಛಥ ನಾರಿಯೋ’’ತಿ.

… ರಮಣೀಯಕುಟಿಕೋ ಥೇರೋ….

೯. ಕೋಸಲವಿಹಾರಿತ್ಥೇರಗಾಥಾ

೫೯.

‘‘ಸದ್ಧಾಯಾಹಂ ¶ ಪಬ್ಬಜಿತೋ, ಅರಞ್ಞೇ ಮೇ ಕುಟಿಕಾ ಕತಾ;

ಅಪ್ಪಮತ್ತೋ ಚ ಆತಾಪೀ, ಸಮ್ಪಜಾನೋ ಪತಿಸ್ಸತೋ’’ತಿ [ಪಟಿಸ್ಸತೋತಿ (ಕ.)].

… ಕೋಸಲವಿಹಾರಿತ್ಥೇರೋ….

೧೦. ಸೀವಲಿತ್ಥೇರಗಾಥಾ

೬೦.

‘‘ತೇ ಮೇ ಇಜ್ಝಿಂಸು ಸಙ್ಕಪ್ಪಾ, ಯದತ್ಥೋ ಪಾವಿಸಿಂ ಕುಟಿಂ;

ವಿಜ್ಜಾವಿಮುತ್ತಿಂ ಪಚ್ಚೇಸಂ, ಮಾನಾನುಸಯಮುಜ್ಜಹ’’ನ್ತಿ.

… ಸೀವಲಿತ್ಥೇರೋ….

ವಗ್ಗೋ ಛಟ್ಠೋ ನಿಟ್ಠಿತೋ.

ತಸ್ಸುದ್ದಾನಂ –

ಗೋಧಿಕೋ ¶ ಚ ಸುಬಾಹು ಚ, ವಲ್ಲಿಯೋ ಉತ್ತಿಯೋ ಇಸಿ;

ಅಞ್ಜನವನಿಯೋ ಥೇರೋ, ದುವೇ ಕುಟಿವಿಹಾರಿನೋ;

ರಮಣೀಯಕುಟಿಕೋ ಚ, ಕೋಸಲವ್ಹಯಸೀವಲೀತಿ.

೭. ಸತ್ತಮವಗ್ಗೋ

೧. ವಪ್ಪತ್ಥೇರಗಾಥಾ

೬೧.

‘‘ಪಸ್ಸತಿ ¶ ಪಸ್ಸೋ ಪಸ್ಸನ್ತಂ, ಅಪಸ್ಸನ್ತಞ್ಚ ಪಸ್ಸತಿ;

ಅಪಸ್ಸನ್ತೋ ಅಪಸ್ಸನ್ತಂ, ಪಸ್ಸನ್ತಞ್ಚ ನ ಪಸ್ಸತೀ’’ತಿ.

… ವಪ್ಪೋ ಥೇರೋ….

೨. ವಜ್ಜಿಪುತ್ತತ್ಥೇರಗಾಥಾ

೬೨.

‘‘ಏಕಕಾ ¶ ಮಯಂ ಅರಞ್ಞೇ ವಿಹರಾಮ, ಅಪವಿದ್ಧಂವ ವನಸ್ಮಿಂ ದಾರುಕಂ;

ತಸ್ಸ ಮೇ ಬಹುಕಾ ಪಿಹಯನ್ತಿ, ನೇರಯಿಕಾ ವಿಯ ಸಗ್ಗಗಾಮಿನ’’ನ್ತಿ.

… ವಜ್ಜಿಪುತ್ತೋ ಥೇರೋ….

೩. ಪಕ್ಖತ್ಥೇರಗಾಥಾ

೬೩.

‘‘ಚುತಾ ¶ ಪತನ್ತಿ ಪತಿತಾ, ಗಿದ್ಧಾ ಚ ಪುನರಾಗತಾ;

ಕತಂ ಕಿಚ್ಚಂ ರತಂ ರಮ್ಮಂ, ಸುಖೇನನ್ವಾಗತಂ ಸುಖ’’ನ್ತಿ.

… ಪಕ್ಖೋ ಥೇರೋ….

೪. ವಿಮಲಕೋಣ್ಡಞ್ಞತ್ಥೇರಗಾಥಾ

೬೪.

‘‘ದುಮವ್ಹಯಾಯ ಉಪ್ಪನ್ನೋ, ಜಾತೋ ಪಣ್ಡರಕೇತುನಾ;

ಕೇತುಹಾ ¶ ಕೇತುನಾಯೇವ, ಮಹಾಕೇತುಂ ಪಧಂಸಯೀ’’ತಿ.

… ವಿಮಲಕೋಣ್ಡಞ್ಞೋ ಥೇರೋ….

೫. ಉಕ್ಖೇಪಕತವಚ್ಛತ್ಥೇರಗಾಥಾ

೬೫.

‘‘ಉಕ್ಖೇಪಕತವಚ್ಛಸ್ಸ, ಸಙ್ಕಲಿತಂ ಬಹೂಹಿ ವಸ್ಸೇಹಿ;

ತಂ ಭಾಸತಿ ಗಹಟ್ಠಾನಂ, ಸುನಿಸಿನ್ನೋ ಉಳಾರಪಾಮೋಜ್ಜೋ’’ತಿ.

… ಉಕ್ಖೇಪಕತವಚ್ಛೋ ಥೇರೋ….

೬. ಮೇಘಿಯತ್ಥೇರಗಾಥಾ

೬೬.

‘‘ಅನುಸಾಸಿ ¶ ಮಹಾವೀರೋ, ಸಬ್ಬಧಮ್ಮಾನ ಪಾರಗೂ;

ತಸ್ಸಾಹಂ ಧಮ್ಮಂ ಸುತ್ವಾನ, ವಿಹಾಸಿಂ ಸನ್ತಿಕೇ ಸತೋ;

ತಿಸ್ಸೋ ವಿಜ್ಜಾ ಅನುಪ್ಪತ್ತಾ, ಕತಂ ಬುದ್ಧಸ್ಸ ಸಾಸನ’’ನ್ತಿ.

… ಮೇಘಿಯೋ ಥೇರೋ….

೭. ಏಕಧಮ್ಮಸವನೀಯತ್ಥೇರಗಾಥಾ

೬೭.

‘‘ಕಿಲೇಸಾ ಝಾಪಿತಾ ಮಯ್ಹಂ, ಭವಾ ಸಬ್ಬೇ ಸಮೂಹತಾ;

ವಿಕ್ಖೀಣೋ ಜಾತಿಸಂಸಾರೋ, ನತ್ಥಿ ದಾನಿ ಪುನಬ್ಭವೋ’’ತಿ.

… ಏಕಧಮ್ಮಸವನೀಯೋ ಥೇರೋ….

೮. ಏಕುದಾನಿಯತ್ಥೇರಗಾಥಾ

೬೮.

[ಉದಾ. ೩೭; ಪಾಚಿ. ೧೫೩] ‘‘ಅಧಿಚೇತಸೋ ಅಪ್ಪಮಜ್ಜತೋ, ಮುನಿನೋ ಮೋನಪಥೇಸು ಸಿಕ್ಖತೋ;

ಸೋಕಾ ನ ಭವನ್ತಿ ತಾದಿನೋ, ಉಪಸನ್ತಸ್ಸ ಸದಾ ಸತೀಮತೋ’’ತಿ.

… ಏಕುದಾನಿಯೋ ಥೇರೋ….

೯. ಛನ್ನತ್ಥೇರಗಾಥಾ

೬೯.

‘‘ಸುತ್ವಾನ ¶ ಧಮ್ಮಂ ಮಹತೋ ಮಹಾರಸಂ, ಸಬ್ಬಞ್ಞುತಞ್ಞಾಣವರೇನ ದೇಸಿತಂ;

ಮಗ್ಗಂ ಪಪಜ್ಜಿಂ [ಪಪಜ್ಜಂ (ಕ.)] ಅಮತಸ್ಸ ಪತ್ತಿಯಾ, ಸೋ ಯೋಗಕ್ಖೇಮಸ್ಸ ಪಥಸ್ಸ ಕೋವಿದೋ’’ತಿ.

… ಛನ್ನೋ ಥೇರೋ….

೧೦. ಪುಣ್ಣತ್ಥೇರಗಾಥಾ

೭೦.

‘‘ಸೀಲಮೇವ ¶ ¶ ಇಧ ಅಗ್ಗಂ, ಪಞ್ಞವಾ ಪನ ಉತ್ತಮೋ;

ಮನುಸ್ಸೇಸು ಚ ದೇವೇಸು, ಸೀಲಪಞ್ಞಾಣತೋ ಜಯ’’ನ್ತಿ.

… ಪುಣ್ಣೋ ಥೇರೋ….

ವಗ್ಗೋ ಸತ್ತಮೋ ನಿಟ್ಠಿತೋ.

ತಸ್ಸುದ್ದಾನಂ ¶ –

ವಪ್ಪೋ ಚ ವಜ್ಜಿಪುತ್ತೋ ಚ, ಪಕ್ಖೋ ವಿಮಲಕೋಣ್ಡಞ್ಞೋ;

ಉಕ್ಖೇಪಕತವಚ್ಛೋ ಚ, ಮೇಘಿಯೋ ಏಕಧಮ್ಮಿಕೋ;

ಏಕುದಾನಿಯಛನ್ನಾ ಚ, ಪುಣ್ಣತ್ಥೇರೋ ಮಹಬ್ಬಲೋತಿ.

೮. ಅಟ್ಠಮವಗ್ಗೋ

೧. ವಚ್ಛಪಾಲತ್ಥೇರಗಾಥಾ

೭೧.

‘‘ಸುಸುಖುಮನಿಪುಣತ್ಥದಸ್ಸಿನಾ, ಮತಿಕುಸಲೇನ ನಿವಾತವುತ್ತಿನಾ;

ಸಂಸೇವಿತವುದ್ಧಸೀಲಿನಾ [ಸಂಸೇವಿತಬುದ್ಧಸೀಲಿನಾ (ಕ.)], ನಿಬ್ಬಾನಂ ನ ಹಿ ತೇನ ದುಲ್ಲಭ’’ನ್ತಿ.

… ವಚ್ಛಪಾಲೋ ಥೇರೋ….

೨. ಆತುಮತ್ಥೇರಗಾಥಾ

೭೨.

‘‘ಯಥಾ ¶ ಕಳೀರೋ ಸುಸು ವಡ್ಢಿತಗ್ಗೋ, ದುನ್ನಿಕ್ಖಮೋ ಹೋತಿ ಪಸಾಖಜಾತೋ;

ಏವಂ ಅಹಂ ಭರಿಯಾಯಾನಿತಾಯ, ಅನುಮಞ್ಞಂ ¶ ಮಂ ಪಬ್ಬಜಿತೋಮ್ಹಿ ದಾನೀ’’ತಿ.

… ಆತುಮೋ ಥೇರೋ….

೩. ಮಾಣವತ್ಥೇರಗಾಥಾ

೭೩.

‘‘ಜಿಣ್ಣಞ್ಚ ದಿಸ್ವಾ ದುಖಿತಞ್ಚ ಬ್ಯಾಧಿತಂ, ಮತಞ್ಚ ದಿಸ್ವಾ ಗತಮಾಯುಸಙ್ಖಯಂ;

ತತೋ ಅಹಂ ನಿಕ್ಖಮಿತೂನ ಪಬ್ಬಜಿಂ, ಪಹಾಯ ಕಾಮಾನಿ ಮನೋರಮಾನೀ’’ತಿ.

… ಮಾಣವೋ ಥೇರೋ….

೪. ಸುಯಾಮನತ್ಥೇರಗಾಥಾ

೭೪.

‘‘ಕಾಮಚ್ಛನ್ದೋ ಚ ಬ್ಯಾಪಾದೋ, ಥಿನಮಿದ್ಧಞ್ಚ [ಥೀನಮಿದ್ಧಞ್ಚ (ಸೀ. ಸ್ಯಾ.)] ಭಿಕ್ಖುನೋ;

ಉದ್ಧಚ್ಚಂ ವಿಚಿಕಿಚ್ಛಾ ಚ, ಸಬ್ಬಸೋವ ನ ವಿಜ್ಜತೀ’’ತಿ.

… ಸುಯಾಮನೋ ಥೇರೋ….

೫. ಸುಸಾರದತ್ಥೇರಗಾಥಾ

೭೫.

‘‘ಸಾಧು ಸುವಿಹಿತಾನ ದಸ್ಸನಂ, ಕಙ್ಖಾ ಛಿಜ್ಜತಿ ಬುದ್ಧಿ ವಡ್ಢತಿ;

ಬಾಲಮ್ಪಿ ಕರೋನ್ತಿ ಪಣ್ಡಿತಂ, ತಸ್ಮಾ ಸಾಧು ಸತಂ ಸಮಾಗಮೋ’’ತಿ.

… ಸುಸಾರದೋ ಥೇರೋ….

೬. ಪಿಯಞ್ಜಹತ್ಥೇರಗಾಥಾ

೭೬.

‘‘ಉಪ್ಪತನ್ತೇಸು ¶ ನಿಪತೇ, ನಿಪತನ್ತೇಸು ಉಪ್ಪತೇ;

ವಸೇ ಅವಸಮಾನೇಸು, ರಮಮಾನೇಸು ನೋ ರಮೇ’’ತಿ.

… ಪಿಯಞ್ಜಹೋ ಥೇರೋ….

೭. ಹತ್ಥಾರೋಹಪುತ್ತತ್ಥೇರಗಾಥಾ

೭೭.

‘‘ಇದಂ ¶ ¶ ಪುರೇ ಚಿತ್ತಮಚಾರಿ ಚಾರಿಕಂ, ಯೇನಿಚ್ಛಕಂ ಯತ್ಥಕಾಮಂ ಯಥಾಸುಖಂ;

ತದಜ್ಜಹಂ ನಿಗ್ಗಹೇಸ್ಸಾಮಿ ಯೋನಿಸೋ, ಹತ್ಥಿಪ್ಪಭಿನ್ನಂ ವಿಯ ಅಙ್ಕುಸಗ್ಗಹೋ’’ತಿ.

… ಹತ್ಥಾರೋಹಪುತ್ತೋ ಥೇರೋ….

೮. ಮೇಣ್ಡಸಿರತ್ಥೇರಗಾಥಾ

೭೮.

‘‘ಅನೇಕಜಾತಿಸಂಸಾರಂ ¶ , ಸನ್ಧಾವಿಸ್ಸಂ ಅನಿಬ್ಬಿಸಂ;

ತಸ್ಸ ಮೇ ದುಕ್ಖಜಾತಸ್ಸ, ದುಕ್ಖಕ್ಖನ್ಧೋ ಅಪರದ್ಧೋ’’ತಿ.

… ಮೇಣ್ಡಸಿರೋ ಥೇರೋ….

೯. ರಕ್ಖಿತತ್ಥೇರಗಾಥಾ

೭೯.

‘‘ಸಬ್ಬೋ ರಾಗೋ ಪಹೀನೋ ಮೇ, ಸಬ್ಬೋ ದೋಸೋ ಸಮೂಹತೋ;

ಸಬ್ಬೋ ಮೇ ವಿಗತೋ ಮೋಹೋ, ಸೀತಿಭೂತೋಸ್ಮಿ ನಿಬ್ಬುತೋ’’ತಿ.

… ರಕ್ಖಿತೋ ಥೇರೋ….

೧೦. ಉಗ್ಗತ್ಥೇರಗಾಥಾ

೮೦.

‘‘ಯಂ ¶ ಮಯಾ ಪಕತಂ ಕಮ್ಮಂ, ಅಪ್ಪಂ ವಾ ಯದಿ ವಾ ಬಹುಂ;

ಸಬ್ಬಮೇತಂ ಪರಿಕ್ಖೀಣಂ, ನತ್ಥಿ ದಾನಿ ಪುನಬ್ಭವೋ’’ತಿ.

… ಉಗ್ಗೋ ಥೇರೋ….

ವಗ್ಗೋ ಅಟ್ಠಮೋ ನಿಟ್ಠಿತೋ.

ತಸ್ಸುದ್ದಾನಂ –

ವಚ್ಛಪಾಲೋ ಚ ಯೋ ಥೇರೋ, ಆತುಮೋ ಮಾಣವೋ ಇಸಿ;

ಸುಯಾಮನೋ ಸುಸಾರದೋ, ಥೇರೋ ಯೋ ಚ ಪಿಯಞ್ಜಹೋ;

ಆರೋಹಪುತ್ತೋ ಮೇಣ್ಡಸಿರೋ, ರಕ್ಖಿತೋ ಉಗ್ಗಸವ್ಹಯೋತಿ.

೯. ನವಮವಗ್ಗೋ

೧. ಸಮಿತಿಗುತ್ತತ್ಥೇರಗಾಥಾ

೮೧.

‘‘ಯಂ ¶ ಮಯಾ ಪಕತಂ ಪಾಪಂ, ಪುಬ್ಬೇ ಅಞ್ಞಾಸು ಜಾತಿಸು;

ಇಧೇವ ತಂ ವೇದನೀಯಂ, ವತ್ಥು ಅಞ್ಞಂ ನ ವಿಜ್ಜತೀ’’ತಿ.

… ಸಮಿತಿಗುತ್ತೋ ಥೇರೋ….

೨. ಕಸ್ಸಪತ್ಥೇರಗಾಥಾ

೮೨.

‘‘ಯೇನ ¶ ಯೇನ ಸುಭಿಕ್ಖಾನಿ, ಸಿವಾನಿ ಅಭಯಾನಿ ಚ;

ತೇನ ಪುತ್ತಕ ಗಚ್ಛಸ್ಸು, ಮಾ ಸೋಕಾಪಹತೋ ಭವಾ’’ತಿ.

… ಕಸ್ಸಪೋ ಥೇರೋ….

೩. ಸೀಹತ್ಥೇರಗಾಥಾ

೮೩.

‘‘ಸೀಹಪ್ಪಮತ್ತೋ ವಿಹರ, ರತ್ತಿನ್ದಿವಮತನ್ದಿತೋ;

ಭಾವೇಹಿ ಕುಸಲಂ ಧಮ್ಮಂ, ಜಹ ಸೀಘಂ ಸಮುಸ್ಸಯ’’ನ್ತಿ.

… ಸೀಹೋ ಥೇರೋ….

೪. ನೀತತ್ಥೇರಗಾಥಾ

೮೪.

‘‘ಸಬ್ಬರತ್ತಿಂ ¶ ಸುಪಿತ್ವಾನ, ದಿವಾ ಸಙ್ಗಣಿಕೇ ರತೋ;

ಕುದಾಸ್ಸು ನಾಮ ದುಮ್ಮೇಧೋ, ದುಕ್ಖಸ್ಸನ್ತಂ ಕರಿಸ್ಸತೀ’’ತಿ.

… ನೀತೋ ಥೇರೋ….

೫. ಸುನಾಗತ್ಥೇರಗಾಥಾ

೮೫.

‘‘ಚಿತ್ತನಿಮಿತ್ತಸ್ಸ ಕೋವಿದೋ, ಪವಿವೇಕರಸಂ ವಿಜಾನಿಯ;

ಝಾಯಂ ನಿಪಕೋ ಪತಿಸ್ಸತೋ, ಅಧಿಗಚ್ಛೇಯ್ಯ ಸುಖಂ ನಿರಾಮಿಸ’’ನ್ತಿ.

… ಸುನಾಗೋ ಥೇರೋ….

೬. ನಾಗಿತತ್ಥೇರಗಾಥಾ

೮೬.

‘‘ಇತೋ ¶ ಬಹಿದ್ಧಾ ಪುಥು ಅಞ್ಞವಾದಿನಂ, ಮಗ್ಗೋ ನ ನಿಬ್ಬಾನಗಮೋ ಯಥಾ ಅಯಂ;

ಇತಿಸ್ಸು ಸಙ್ಘಂ ಭಗವಾನುಸಾಸತಿ, ಸತ್ಥಾ ಸಯಂ ಪಾಣಿತಲೇವ ದಸ್ಸಯ’’ನ್ತಿ.

… ನಾಗಿತೋ ಥೇರೋ….

೭. ಪವಿಟ್ಠತ್ಥೇರಗಾಥಾ

೮೭.

‘‘ಖನ್ಧಾ ¶ ದಿಟ್ಠಾ ಯಥಾಭೂತಂ, ಭವಾ ಸಬ್ಬೇ ಪದಾಲಿತಾ;

ವಿಕ್ಖೀಣೋ ಜಾತಿಸಂಸಾರೋ, ನತ್ಥಿ ದಾನಿ ಪುನಬ್ಭವೋ’’ತಿ.

… ಪವಿಟ್ಠೋ ಥೇರೋ….

೮. ಅಜ್ಜುನತ್ಥೇರಗಾಥಾ

೮೮.

‘‘ಅಸಕ್ಖಿಂ ¶ ವತ ಅತ್ತಾನಂ, ಉದ್ಧಾತುಂ ಉದಕಾ ಥಲಂ;

ವುಯ್ಹಮಾನೋ ಮಹೋಘೇವ, ಸಚ್ಚಾನಿ ಪಟಿವಿಜ್ಝಹ’’ನ್ತಿ.

… ಅಜ್ಜುನೋ ಥೇರೋ….

೯. (ಪಠಮ)-ದೇವಸಭತ್ಥೇರಗಾಥಾ

೮೯.

‘‘ಉತ್ತಿಣ್ಣಾ ಪಙ್ಕಪಲಿಪಾ, ಪಾತಾಲಾ ಪರಿವಜ್ಜಿತಾ;

ಮುತ್ತೋ ಓಘಾ ಚ ಗನ್ಥಾ ಚ, ಸಬ್ಬೇ ಮಾನಾ ವಿಸಂಹತಾ’’ತಿ.

… ದೇವಸಭೋ ಥೇರೋ….

೧೦. ಸಾಮಿದತ್ತತ್ಥೇರಗಾಥಾ

೯೦.

‘‘ಪಞ್ಚಕ್ಖನ್ಧಾ ಪರಿಞ್ಞಾತಾ, ತಿಟ್ಠನ್ತಿ ಛಿನ್ನಮೂಲಕಾ;

ವಿಕ್ಖೀಣೋ ಜಾತಿಸಂಸಾರೋ, ನತ್ಥಿ ದಾನಿ ಪುನಬ್ಭವೋ’’ತಿ.

… ಸಾಮಿದತ್ತೋ ಥೇರೋ….

ವಗ್ಗೋ ನವಮೋ ನಿಟ್ಠಿತೋ.

ತಸ್ಸುದ್ದಾನಂ –

ಥೇರೋ ಸಮಿತಿಗುತ್ತೋ ಚ, ಕಸ್ಸಪೋ ಸೀಹಸವ್ಹಯೋ;

ನೀತೋ ಸುನಾಗೋ ನಾಗಿತೋ, ಪವಿಟ್ಠೋ ಅಜ್ಜುನೋ ಇಸಿ;

ದೇವಸಭೋ ಚ ಯೋ ಥೇರೋ, ಸಾಮಿದತ್ತೋ ಮಹಬ್ಬಲೋತಿ.

೧೦. ದಸಮವಗ್ಗೋ

೧. ಪರಿಪುಣ್ಣಕತ್ಥೇರಗಾಥಾ

೯೧.

‘‘ನ ¶ ತಥಾ ಮತಂ ಸತರಸಂ, ಸುಧನ್ನಂ ಯಂ ಮಯಜ್ಜ ಪರಿಭುತ್ತಂ;

ಅಪರಿಮಿತದಸ್ಸಿನಾ ಗೋತಮೇನ, ಬುದ್ಧೇನ ದೇಸಿತೋ ಧಮ್ಮೋ’’ತಿ.

… ಪರಿಪುಣ್ಣಕೋ ಥೇರೋ….

೨. ವಿಜಯತ್ಥೇರಗಾಥಾ

೯೨.

‘‘ಯಸ್ಸಾಸವಾ ¶ ¶ ¶ ಪರಿಕ್ಖೀಣಾ, ಆಹಾರೇ ಚ ಅನಿಸ್ಸಿತೋ;

ಸುಞ್ಞತಾ ಅನಿಮಿತ್ತೋ ಚ, ವಿಮೋಕ್ಖೋ ಯಸ್ಸ ಗೋಚರೋ;

ಆಕಾಸೇವ ಸಕುನ್ತಾನಂ, ಪದಂ ತಸ್ಸ ದುರನ್ನಯ’’ನ್ತಿ.

… ವಿಜಯೋ ಥೇರೋ….

೩. ಏರಕತ್ಥೇರಗಾಥಾ

೯೩.

‘‘ದುಕ್ಖಾ ಕಾಮಾ ಏರಕ, ನ ಸುಖಾ ಕಾಮಾ ಏರಕ;

ಯೋ ಕಾಮೇ ಕಾಮಯತಿ, ದುಕ್ಖಂ ಸೋ ಕಾಮಯತಿ ಏರಕ;

ಯೋ ಕಾಮೇ ನ ಕಾಮಯತಿ, ದುಕ್ಖಂ ಸೋ ನ ಕಾಮಯತಿ ಏರಕಾ’’ತಿ.

… ಏರಕೋ ಥೇರೋ….

೪. ಮೇತ್ತಜಿತ್ಥೇರಗಾಥಾ

೯೪.

‘‘ನಮೋ ಹಿ ತಸ್ಸ ಭಗವತೋ, ಸಕ್ಯಪುತ್ತಸ್ಸ ಸಿರೀಮತೋ;

ತೇನಾಯಂ ಅಗ್ಗಪ್ಪತ್ತೇನ, ಅಗ್ಗಧಮ್ಮೋ [ಅಗ್ಗೋ ಧಮ್ಮೋ (ಸೀ.)] ಸುದೇಸಿತೋ’’ತಿ.

… ಮೇತ್ತಜಿ ಥೇರೋ….

೫. ಚಕ್ಖುಪಾಲತ್ಥೇರಗಾಥಾ

೯೫.

‘‘ಅನ್ಧೋಹಂ ಹತನೇತ್ತೋಸ್ಮಿ, ಕನ್ತಾರದ್ಧಾನಪಕ್ಖನ್ದೋ [ಪಕ್ಖನ್ನೋ (ಸೀ.), ಪಕ್ಕನ್ತೋ (ಸ್ಯಾ. ಸೀ. ಅಟ್ಠ.)];

ಸಯಮಾನೋಪಿ ಗಚ್ಛಿಸ್ಸಂ, ನ ಸಹಾಯೇನ ಪಾಪೇನಾ’’ತಿ.

… ಚಕ್ಖುಪಾಲೋ ಥೇರೋ….

೬. ಖಣ್ಡಸುಮನತ್ಥೇರಗಾಥಾ

೯೬.

‘‘ಏಕಪುಪ್ಫಂ ¶ ಚಜಿತ್ವಾನ, ಅಸೀತಿ [ಅಸೀತಿಂ (ಸೀ.)] ವಸ್ಸಕೋಟಿಯೋ;

ಸಗ್ಗೇಸು ಪರಿಚಾರೇತ್ವಾ, ಸೇಸಕೇನಮ್ಹಿ ನಿಬ್ಬುತೋ’’ತಿ.

… ಖಣ್ಡಸುಮನೋ ಥೇರೋ….

೭. ತಿಸ್ಸತ್ಥೇರಗಾಥಾ

೯೭.

‘‘ಹಿತ್ವಾ ಸತಪಲಂ ಕಂಸಂ, ಸೋವಣ್ಣಂ ಸತರಾಜಿಕಂ;

ಅಗ್ಗಹಿಂ ಮತ್ತಿಕಾಪತ್ತಂ, ಇದಂ ದುತಿಯಾಭಿಸೇಚನ’’ನ್ತಿ.

… ತಿಸ್ಸೋ ಥೇರೋ….

೮. ಅಭಯತ್ಥೇರಗಾಥಾ

೯೮.

‘‘ರೂಪಂ ¶ ¶ ದಿಸ್ವಾ ಸತಿ ಮುಟ್ಠಾ, ಪಿಯಂ ನಿಮಿತ್ತಂ ಮನಸಿಕರೋತೋ;

ಸಾರತ್ತಚಿತ್ತೋ ವೇದೇತಿ, ತಞ್ಚ ಅಜ್ಝೋಸ ತಿಟ್ಠತಿ;

ತಸ್ಸ ವಡ್ಢನ್ತಿ ಆಸವಾ, ಭವಮೂಲೋಪಗಾಮಿನೋ’’ತಿ [ಭವಮೂಲಾ ಭವಗಾಮಿನೋತಿ (ಸೀ. ಕ.)].

… ಅಭಯೋ ಥೇರೋ….

೯. ಉತ್ತಿಯತ್ಥೇರಗಾಥಾ

೯೯.

‘‘ಸದ್ದಂ ಸುತ್ವಾ ಸತಿ ಮುಟ್ಠಾ, ಪಿಯಂ ನಿಮಿತ್ತಂ ಮನಸಿಕರೋತೋ;

ಸಾರತ್ತಚಿತ್ತೋ ವೇದೇತಿ, ತಞ್ಚ ಅಜ್ಝೋಸ ತಿಟ್ಠತಿ;

ತಸ್ಸ ವಡ್ಢನ್ತಿ ಆಸವಾ, ಸಂಸಾರಂ ಉಪಗಾಮಿನೋ’’ತಿ.

… ಉತ್ತಿಯೋ ಥೇರೋ….

೧೦. (ದುತಿಯ)-ದೇವಸಭತ್ಥೇರಗಾಥಾ

೧೦೦.

‘‘ಸಮ್ಮಪ್ಪಧಾನಸಮ್ಪನ್ನೋ, ಸತಿಪಟ್ಠಾನಗೋಚರೋ;

ವಿಮುತ್ತಿಕುಸುಮಸಞ್ಛನ್ನೋ, ಪರಿನಿಬ್ಬಿಸ್ಸತ್ಯನಾಸವೋ’’ತಿ.

… ದೇವಸಭೋ ಥೇರೋ….

ವಗ್ಗೋ ದಸಮೋ ನಿಟ್ಠಿತೋ.

ತಸ್ಸುದ್ದಾನಂ –

ಪರಿಪುಣ್ಣಕೋ ಚ ವಿಜಯೋ, ಏರಕೋ ಮೇತ್ತಜೀ ಮುನಿ;

ಚಕ್ಖುಪಾಲೋ ಖಣ್ಡಸುಮನೋ, ತಿಸ್ಸೋ ಚ ಅಭಯೋ ತಥಾ;

ಉತ್ತಿಯೋ ಚ ಮಹಾಪಞ್ಞೋ, ಥೇರೋ ದೇವಸಭೋಪಿ ಚಾತಿ.

೧೧. ಏಕಾದಸಮವಗ್ಗೋ

೧. ಬೇಲಟ್ಠಾನಿಕತ್ಥೇರಗಾಥಾ

೧೦೧.

‘‘ಹಿತ್ವಾ ¶ ¶ ಗಿಹಿತ್ತಂ ಅನವೋಸಿತತ್ತೋ, ಮುಖನಙ್ಗಲೀ ಓದರಿಕೋ ಕುಸೀತೋ;

ಮಹಾವರಾಹೋವ ¶ ನಿವಾಪಪುಟ್ಠೋ, ಪುನಪ್ಪುನಂ ಗಬ್ಭಮುಪೇತಿ ಮನ್ದೋ’’ತಿ.

… ಬೇಲಟ್ಠಾನಿಕೋ ಥೇರೋ….

೨. ಸೇತುಚ್ಛತ್ಥೇರಗಾಥಾ

೧೦೨.

‘‘ಮಾನೇನ ¶ ವಞ್ಚಿತಾಸೇ, ಸಙ್ಖಾರೇಸು ಸಂಕಿಲಿಸ್ಸಮಾನಾಸೇ;

ಲಾಭಾಲಾಭೇನ ಮಥಿತಾ, ಸಮಾಧಿಂ ನಾಧಿಗಚ್ಛನ್ತೀ’’ತಿ.

… ಸೇತುಚ್ಛೋ ಥೇರೋ….

೩. ಬನ್ಧುರತ್ಥೇರಗಾಥಾ

೧೦೩.

‘‘ನಾಹಂ ಏತೇನ ಅತ್ಥಿಕೋ, ಸುಖಿತೋ ಧಮ್ಮರಸೇನ ತಪ್ಪಿತೋ;

ಪಿತ್ವಾ [ಪೀತ್ವಾನ (ಸೀ. ಸ್ಯಾ.)] ರಸಗ್ಗಮುತ್ತಮಂ, ನ ಚ ಕಾಹಾಮಿ ವಿಸೇನ ಸನ್ಥವ’’ನ್ತಿ.

… ಬನ್ಧುರೋ [ಬನ್ಧನೋ (ಕ.)] ಥೇರೋ….

೪. ಖಿತಕತ್ಥೇರಗಾಥಾ

೧೦೪.

‘‘ಲಹುಕೋ ವತ ಮೇ ಕಾಯೋ, ಫುಟ್ಠೋ ಚ ಪೀತಿಸುಖೇನ ವಿಪುಲೇನ;

ತೂಲಮಿವ ಏರಿತಂ ಮಾಲುತೇನ, ಪಿಲವತೀವ ಮೇ ಕಾಯೋ’’ತಿ.

… ಖಿತಕೋ ಥೇರೋ….

೫. ಮಲಿತವಮ್ಭತ್ಥೇರಗಾಥಾ

೧೦೫.

‘‘ಉಕ್ಕಣ್ಠಿತೋಪಿ ನ ವಸೇ, ರಮಮಾನೋಪಿ ಪಕ್ಕಮೇ;

ನ ತ್ವೇವಾನತ್ಥಸಂಹಿತಂ, ವಸೇ ವಾಸಂ ವಿಚಕ್ಖಣೋ’’ತಿ.

… ಮಲಿತವಮ್ಭೋ ಥೇರೋ….

೬. ಸುಹೇಮನ್ತತ್ಥೇರಗಾಥಾ

೧೦೬.

‘‘ಸತಲಿಙ್ಗಸ್ಸ ¶ ಅತ್ಥಸ್ಸ, ಸತಲಕ್ಖಣಧಾರಿನೋ;

ಏಕಙ್ಗದಸ್ಸೀ ದುಮ್ಮೇಧೋ, ಸತದಸ್ಸೀ ಚ ಪಣ್ಡಿತೋ’’ತಿ.

… ಸುಹೇಮನ್ತೋ ಥೇರೋ….

೭. ಧಮ್ಮಸವತ್ಥೇರಗಾಥಾ

೧೦೭.

‘‘ಪಬ್ಬಜಿಂ ¶ ತುಲಯಿತ್ವಾನ, ಅಗಾರಸ್ಮಾನಗಾರಿಯಂ;

ತಿಸ್ಸೋ ¶ ವಿಜ್ಜಾ ಅನುಪ್ಪತ್ತಾ, ಕತಂ ಬುದ್ಧಸ್ಸ ಸಾಸನ’’ನ್ತಿ.

… ಧಮ್ಮಸವೋ ಥೇರೋ….

೮. ಧಮ್ಮಸವಪಿತುತ್ಥೇರಗಾಥಾ

೧೦೮.

‘‘ಸ ವೀಸವಸ್ಸಸತಿಕೋ, ಪಬ್ಬಜಿಂ ಅನಗಾರಿಯಂ;

ತಿಸ್ಸೋ ವಿಜ್ಜಾ ಅನುಪ್ಪತ್ತಾ, ಕತಂ ಬುದ್ಧಸ್ಸ ಸಾಸನ’’ನ್ತಿ.

… ಧಮ್ಮಸವಪಿತು ಥೇರೋ….

೯. ಸಙ್ಘರಕ್ಖಿತತ್ಥೇರಗಾಥಾ

೧೦೯.

‘‘ನ ¶ ನೂನಾಯಂ ಪರಮಹಿತಾನುಕಮ್ಪಿನೋ, ರಹೋಗತೋ ಅನುವಿಗಣೇತಿ ಸಾಸನಂ;

ತಥಾಹಯಂ ವಿಹರತಿ ಪಾಕತಿನ್ದ್ರಿಯೋ, ಮಿಗೀ ಯಥಾ ತರುಣಜಾತಿಕಾ ವನೇ’’ತಿ.

… ಸಙ್ಘರಕ್ಖಿತೋ ಥೇರೋ….

೧೦. ಉಸಭತ್ಥೇರಗಾಥಾ

೧೧೦.

‘‘ನಗಾ ನಗಗ್ಗೇಸು ಸುಸಂವಿರೂಳ್ಹಾ, ಉದಗ್ಗಮೇಘೇನ ನವೇನ ಸಿತ್ತಾ;

ವಿವೇಕಕಾಮಸ್ಸ ಅರಞ್ಞಸಞ್ಞಿನೋ, ಜನೇತಿ ಭಿಯ್ಯೋ ಉಸಭಸ್ಸ ಕಲ್ಯತ’’ನ್ತಿ.

… ಉಸಭೋ ಥೇರೋ….

ವಗ್ಗೋ ಏಕಾದಸಮೋ ನಿಟ್ಠಿತೋ.

ತಸ್ಸುದ್ದಾನಂ –

ಬೇಲಟ್ಠಾನಿಕೋ ಸೇತುಚ್ಛೋ, ಬನ್ಧುರೋ ಖಿತಕೋ ಇಸಿ;

ಮಲಿತವಮ್ಭೋ ಸುಹೇಮನ್ತೋ, ಧಮ್ಮಸವೋ ಧಮ್ಮಸವಪಿತಾ;

ಸಙ್ಘರಕ್ಖಿತತ್ಥೇರೋ ¶ ಚ, ಉಸಭೋ ಚ ಮಹಾಮುನೀತಿ.

೧೨. ದ್ವಾದಸಮವಗ್ಗೋ

೧. ಜೇನ್ತತ್ಥೇರಗಾಥಾ

೧೧೧.

‘‘ದುಪ್ಪಬ್ಬಜ್ಜಂ ¶ ¶ ವೇ ದುರಧಿವಾಸಾ ಗೇಹಾ, ಧಮ್ಮೋ ಗಮ್ಭೀರೋ ದುರಧಿಗಮಾ ಭೋಗಾ;

ಕಿಚ್ಛಾ ವುತ್ತಿ ನೋ ಇತರೀತರೇನೇವ, ಯುತ್ತಂ ಚಿನ್ತೇತುಂ ಸತತಮನಿಚ್ಚತ’’ನ್ತಿ.

… ಜೇನ್ತೋ ಥೇರೋ….

೨. ವಚ್ಛಗೋತ್ತತ್ಥೇರಗಾಥಾ

೧೧೨.

‘‘ತೇವಿಜ್ಜೋಹಂ ಮಹಾಝಾಯೀ, ಚೇತೋಸಮಥಕೋವಿದೋ;

ಸದತ್ಥೋ ಮೇ ಅನುಪ್ಪತ್ತೋ, ಕತಂ ಬುದ್ಧಸ್ಸ ಸಾಸನ’’ನ್ತಿ.

… ವಚ್ಛಗೋತ್ತೋ ಥೇರೋ….

೩. ವನವಚ್ಛತ್ಥೇರಗಾಥಾ

೧೧೩.

‘‘ಅಚ್ಛೋದಿಕಾ ಪುಥುಸಿಲಾ,ಗೋನಙ್ಗುಲಮಿಗಾಯುತಾ;

ಅಮ್ಬುಸೇವಾಲಸಞ್ಛನ್ನಾ, ತೇ ಸೇಲಾ ರಮಯನ್ತಿ ಮ’’ನ್ತಿ.

… ವನವಚ್ಛೋ ಥೇರೋ….

೪. ಅಧಿಮುತ್ತತ್ಥೇರಗಾಥಾ

೧೧೪.

‘‘ಕಾಯದುಟ್ಠುಲ್ಲಗರುನೋ, ಹಿಯ್ಯಮಾನಮ್ಹಿ [ಹೀಯಮಾನಮ್ಹಿ (ಸೀ.)] ಜೀವಿತೇ;

ಸರೀರಸುಖಗಿದ್ಧಸ್ಸ, ಕುತೋ ಸಮಣಸಾಧುತಾ’’ತಿ.

… ಅಧಿಮುತ್ತೋ ಥೇರೋ….

೫. ಮಹಾನಾಮತ್ಥೇರಗಾಥಾ

೧೧೫.

‘‘ಏಸಾವಹಿಯ್ಯಸೇ ಪಬ್ಬತೇನ, ಬಹುಕುಟಜಸಲ್ಲಕಿಕೇನ [ಸಲ್ಲಕಿತೇನ (ಸೀ.), ಸಲ್ಲರಿಕೇನ (ಸ್ಯಾ.)];

ನೇಸಾದಕೇನ ¶ ಗಿರಿನಾ, ಯಸಸ್ಸಿನಾ ಪರಿಚ್ಛದೇನಾ’’ತಿ.

… ಮಹಾನಾಮೋ ಥೇರೋ….

೬. ಪಾರಾಪರಿಯತ್ಥೇರಗಾಥಾ

೧೧೬.

‘‘ಛಫಸ್ಸಾಯತನೇ ¶ ¶ ¶ ಹಿತ್ವಾ, ಗುತ್ತದ್ವಾರೋ ಸುಸಂವುತೋ;

ಅಘಮೂಲಂ ವಮಿತ್ವಾನ, ಪತ್ತೋ ಮೇ ಆಸವಕ್ಖಯೋ’’ತಿ.

… ಪಾರಾಪರಿಯೋ [ಪಾರಾಸರಿಯೋ (ಸೀ.), ಪಾರಂಪರಿಯೋ (ಕ.)] ಥೇರೋ ….

೭. ಯಸತ್ಥೇರಗಾಥಾ

೧೧೭.

‘‘ಸುವಿಲಿತ್ತೋ ಸುವಸನೋ,ಸಬ್ಬಾಭರಣಭೂಸಿತೋ;

ತಿಸ್ಸೋ ವಿಜ್ಜಾ ಅಜ್ಝಗಮಿಂ, ಕತಂ ಬುದ್ಧಸ್ಸ ಸಾಸನ’’ನ್ತಿ.

… ಯಸೋ ಥೇರೋ….

೮. ಕಿಮಿಲತ್ಥೇರಗಾಥಾ

೧೧೮.

‘‘ಅಭಿಸತ್ತೋವ ನಿಪತತಿ, ವಯೋ ರೂಪಂ ಅಞ್ಞಮಿವ ತಥೇವ ಸನ್ತಂ;

ತಸ್ಸೇವ ಸತೋ ಅವಿಪ್ಪವಸತೋ, ಅಞ್ಞಸ್ಸೇವ ಸರಾಮಿ ಅತ್ತಾನ’’ನ್ತಿ.

… ಕಿಮಿಲೋ [ಕಿಮ್ಬಿಲೋ (ಸೀ. ಸ್ಯಾ.)] ಥೇರೋ….

೯. ವಜ್ಜಿಪುತ್ತತ್ಥೇರಗಾಥಾ

೧೧೯.

‘‘ರುಕ್ಖಮೂಲಗಹನಂ ಪಸಕ್ಕಿಯ, ನಿಬ್ಬಾನಂ ಹದಯಸ್ಮಿಂ ಓಪಿಯ;

ಝಾಯ ಗೋತಮ ಮಾ ಚ ಪಮಾದೋ, ಕಿಂ ತೇ ಬಿಳಿಬಿಳಿಕಾ ಕರಿಸ್ಸತೀ’’ತಿ.

… ವಜ್ಜಿಪುತ್ತೋ ಥೇರೋ….

೧೦. ಇಸಿದತ್ತತ್ಥೇರಗಾಥಾ

೧೨೦.

‘‘ಪಞ್ಚಕ್ಖನ್ಧಾ ಪರಿಞ್ಞಾತಾ, ತಿಟ್ಠನ್ತಿ ಛಿನ್ನಮೂಲಕಾ;

ದುಕ್ಖಕ್ಖಯೋ ¶ ಅನುಪ್ಪತ್ತೋ,ಪತ್ತೋ ಮೇ ಆಸವಕ್ಖಯೋ’’ತಿ.

… ಇಸಿದತ್ತೋ ಥೇರೋ….

ವಗ್ಗೋ ದ್ವಾದಸಮೋ ನಿಟ್ಠಿತೋ.

ತಸ್ಸುದ್ದಾನಂ ¶ –

ಜೇನ್ತೋ ¶ ಚ ವಚ್ಛಗೋತ್ತೋ ಚ, ವಚ್ಛೋ ಚ ವನಸವ್ಹಯೋ;

ಅಧಿಮುತ್ತೋ ಮಹಾನಾಮೋ, ಪಾರಾಪರಿಯೋ ಯಸೋಪಿ ಚ;

ಕಿಮಿಲೋ ವಜ್ಜಿಪುತ್ತೋ ಚ, ಇಸಿದತ್ತೋ ಮಹಾಯಸೋತಿ.

ಏಕಕನಿಪಾತೋ ನಿಟ್ಠಿತೋ.

ತತ್ರುದ್ದಾನಂ –

ವೀಸುತ್ತರಸತಂ ಥೇರಾ, ಕತಕಿಚ್ಚಾ ಅನಾಸವಾ;

ಏಕಕೇವ ನಿಪಾತಮ್ಹಿ, ಸುಸಙ್ಗೀತಾ ಮಹೇಸಿಭೀತಿ.

೨. ದುಕನಿಪಾತೋ

೧. ಪಠಮವಗ್ಗೋ

೧. ಉತ್ತರತ್ಥೇರಗಾಥಾ

೧೨೧.

‘‘ನತ್ಥಿ ¶ ¶ ¶ ಕೋಚಿ ಭವೋ ನಿಚ್ಚೋ, ಸಙ್ಖಾರಾ ವಾಪಿ ಸಸ್ಸತಾ;

ಉಪ್ಪಜ್ಜನ್ತಿ ಚ ತೇ ಖನ್ಧಾ, ಚವನ್ತಿ ಅಪರಾಪರಂ.

೧೨೨.

‘‘ಏತಮಾದೀನಂ ಞತ್ವಾ, ಭವೇನಮ್ಹಿ ಅನತ್ಥಿಕೋ;

ನಿಸ್ಸಟೋ ಸಬ್ಬಕಾಮೇಹಿ, ಪತ್ತೋ ಮೇ ಆಸವಕ್ಖಯೋ’’ತಿ.

ಇತ್ಥಂ ಸುದಂ ಆಯಸ್ಮಾ ಉತ್ತರೋ ಥೇರೋ ಗಾಥಾಯೋ ಅಭಾಸಿತ್ಥಾತಿ.

೨. ಪಿಣ್ಡೋಲಭಾರದ್ವಾಜತ್ಥೇರಗಾಥಾ

೧೨೩.

‘‘ನಯಿದಂ ¶ ಅನಯೇನ ಜೀವಿತಂ, ನಾಹಾರೋ ಹದಯಸ್ಸ ಸನ್ತಿಕೋ;

ಆಹಾರಟ್ಠಿತಿಕೋ ಸಮುಸ್ಸಯೋ, ಇತಿ ದಿಸ್ವಾನ ಚರಾಮಿ ಏಸನಂ.

೧೨೪.

‘‘ಪಙ್ಕೋತಿ ಹಿ ನಂ ಪವೇದಯುಂ, ಯಾಯಂ ವನ್ದನಪೂಜನಾ ಕುಲೇಸು;

ಸುಖುಮಂ ಸಲ್ಲಂ ದುರುಬ್ಬಹಂ, ಸಕ್ಕಾರೋ ಕಾಪುರಿಸೇನ ದುಜ್ಜಹೋ’’ತಿ.

ಇತ್ಥಂ ಸುದಂ ಆಯಸ್ಮಾ ಪಿಣ್ಡೋಲಭಾರದ್ವಾಜೋ ಥೇರೋ ಗಾಥಾಯೋ ಅಭಾಸಿತ್ಥಾತಿ.

೩. ವಲ್ಲಿಯತ್ಥೇರಗಾಥಾ

೧೨೫.

‘‘ಮಕ್ಕಟೋ ಪಞ್ಚದ್ವಾರಾಯಂ, ಕುಟಿಕಾಯಂ ಪಸಕ್ಕಿಯ;

ದ್ವಾರೇನ ಅನುಪರಿಯೇತಿ, ಘಟ್ಟಯನ್ತೋ ಮುಹುಂ ಮುಹುಂ.

೧೨೬.

‘‘ತಿಟ್ಠ ಮಕ್ಕಟ ಮಾ ಧಾವಿ, ನ ಹಿ ತೇ ತಂ ಯಥಾ ಪುರೇ;

ನಿಗ್ಗಹೀತೋಸಿ ಪಞ್ಞಾಯ, ನೇವ ದೂರಂ ಗಮಿಸ್ಸತೀ’’ತಿ.

… ವಲ್ಲಿಯೋ ಥೇರೋ….

೪. ಗಙ್ಗಾತೀರಿಯತ್ಥೇರಗಾಥಾ

೧೨೭.

‘‘ತಿಣ್ಣಂ ¶ ¶ ಮೇ ತಾಲಪತ್ತಾನಂ, ಗಙ್ಗಾತೀರೇ ಕುಟೀ ಕತಾ;

ಛವಸಿತ್ತೋವ ಮೇ ಪತ್ತೋ, ಪಂಸುಕೂಲಞ್ಚ ಚೀವರಂ.

೧೨೮.

‘‘ದ್ವಿನ್ನಂ ಅನ್ತರವಸ್ಸಾನಂ, ಏಕಾ ವಾಚಾ ಮೇ ಭಾಸಿತಾ;

ತತಿಯೇ ಅನ್ತರವಸ್ಸಮ್ಹಿ, ತಮೋಖನ್ಧೋ [ತಮೋಕ್ಖನ್ಧೋ (ಸೀ. ಸ್ಯಾ.)] ಪದಾಲಿತೋ’’ತಿ.

… ಗಙ್ಗಾತೀರಿಯೋ ಥೇರೋ….

೫. ಅಜಿನತ್ಥೇರಗಾಥಾ

೧೨೯.

‘‘ಅಪಿ ಚೇ ಹೋತಿ ತೇವಿಜ್ಜೋ, ಮಚ್ಚುಹಾಯೀ ಅನಾಸವೋ;

ಅಪ್ಪಞ್ಞಾತೋತಿ ನಂ ಬಾಲಾ, ಅವಜಾನನ್ತಿ ಅಜಾನತಾ.

೧೩೦.

‘‘ಯೋ ¶ ಚ ಖೋ ಅನ್ನಪಾನಸ್ಸ, ಲಾಭೀ ಹೋತೀಧ ಪುಗ್ಗಲೋ;

ಪಾಪಧಮ್ಮೋಪಿ ಚೇ ಹೋತಿ, ಸೋ ನೇಸಂ ಹೋತಿ ಸಕ್ಕತೋ’’ತಿ.

… ಅಜಿನೋ ಥೇರೋ….

೬. ಮೇಳಜಿನತ್ಥೇರಗಾಥಾ

೧೩೧.

‘‘ಯದಾಹಂ ¶ ಧಮ್ಮಮಸ್ಸೋಸಿಂ, ಭಾಸಮಾನಸ್ಸ ಸತ್ಥುನೋ;

ನ ಕಙ್ಖಮಭಿಜಾನಾಮಿ, ಸಬ್ಬಞ್ಞೂಅಪರಾಜಿತೇ.

೧೩೨.

‘‘ಸತ್ಥವಾಹೇ ಮಹಾವೀರೇ, ಸಾರಥೀನಂ ವರುತ್ತಮೇ;

ಮಗ್ಗೇ ಪಟಿಪದಾಯಂ ವಾ, ಕಙ್ಖಾ ಮಯ್ಹಂ ನ ವಿಜ್ಜತೀ’’ತಿ.

… ಮೇಳಜಿನೋ ಥೇರೋ….

೭. ರಾಧತ್ಥೇರಗಾಥಾ

೧೩೩.

[ಧ. ಪ. ೧೩ ಧಮ್ಮಪದೇ] ‘‘ಯಥಾ ಅಗಾರಂ ದುಚ್ಛನ್ನಂ, ವುಟ್ಠೀ ಸಮತಿವಿಜ್ಝತಿ;

ಏವಂ ಅಭಾವಿತಂ ಚಿತ್ತಂ, ರಾಗೋ ಸಮತಿವಿಜ್ಝತಿ.

೧೩೪.

[ಧ. ಪ. ೧೪ ಧಮ್ಮಪದೇ] ‘‘ಯಥಾ ಅಗಾರಂ ಸುಚ್ಛನ್ನಂ, ವುಡ್ಢೀ ನ ಸಮತಿವಿಜ್ಝತಿ;

ಏವಂ ಸುಭಾವಿತಂ ಚಿತ್ತಂ, ರಾಗೋ ನ ಸಮತಿವಿಜ್ಝತೀ’’ತಿ.

… ರಾಧೋ ಥೇರೋ….

೮. ಸುರಾಧತ್ಥೇರಗಾಥಾ

೧೩೫.

‘‘ಖೀಣಾ ¶ ¶ ಹಿ ಮಯ್ಹಂ ಜಾತಿ, ವುಸಿತಂ ಜಿನಸಾಸನಂ;

ಪಹೀನೋ ಜಾಲಸಙ್ಖಾತೋ, ಭವನೇತ್ತಿ ಸಮೂಹತಾ.

೧೩೬.

‘‘ಯಸ್ಸತ್ಥಾಯ ಪಬ್ಬಜಿತೋ, ಅಗಾರಸ್ಮಾನಗಾರಿಯಂ;

ಸೋ ಮೇ ಅತ್ಥೋ ಅನುಪ್ಪತ್ತೋ, ಸಬ್ಬಸಂಯೋಜನಕ್ಖಯೋ’’ತಿ.

… ಸುರಾಧೋ ಥೇರೋ….

೯. ಗೋತಮತ್ಥೇರಗಾಥಾ

೧೩೭.

‘‘ಸುಖಂ ಸುಪನ್ತಿ ಮುನಯೋ, ಯೇ ಇತ್ಥೀಸು ನ ಬಜ್ಝರೇ;

ಸದಾ ವೇ ರಕ್ಖಿತಬ್ಬಾಸು, ಯಾಸು ಸಚ್ಚಂ ಸುದುಲ್ಲಭಂ.

೧೩೮.

‘‘ವಧಂ ಚರಿಮ್ಹ ತೇ ಕಾಮ, ಅನಣಾ ದಾನಿ ತೇ ಮಯಂ;

ಗಚ್ಛಾಮ ದಾನಿ ನಿಬ್ಬಾನಂ, ಯತ್ಥ ಗನ್ತ್ವಾ ನ ಸೋಚತೀ’’ತಿ.

… ಗೋತಮೋ ಥೇರೋ….

೧೦. ವಸಭತ್ಥೇರಗಾಥಾ

೧೩೯.

‘‘ಪುಬ್ಬೇ ¶ ಹನತಿ ಅತ್ತಾನಂ, ಪಚ್ಛಾ ಹನತಿ ಸೋ ಪರೇ;

ಸುಹತಂ ಹನ್ತಿ ಅತ್ತಾನಂ, ವೀತಂಸೇನೇವ ಪಕ್ಖಿಮಾ.

೧೪೦.

‘‘ನ ಬ್ರಾಹ್ಮಣೋ ಬಹಿವಣ್ಣೋ, ಅನ್ತೋ ವಣ್ಣೋ ಹಿ ಬ್ರಾಹ್ಮಣೋ;

ಯಸ್ಮಿಂ ಪಾಪಾನಿ ಕಮ್ಮಾನಿ, ಸ ವೇ ಕಣ್ಹೋ ಸುಜಮ್ಪತೀ’’ತಿ.

… ವಸಭೋ ಥೇರೋ….

ವಗ್ಗೋ ಪಠಮೋ ನಿಟ್ಠಿತೋ.

ತಸ್ಸುದ್ದಾನಂ –

ಉತ್ತರೋ ಚೇವ ಪಿಣ್ಡೋಲೋ, ವಲ್ಲಿಯೋ ತೀರಿಯೋ ಇಸಿ;

ಅಜಿನೋ ಚ ಮೇಳಜಿನೋ, ರಾಧೋ ಸುರಾಧೋ ಗೋತಮೋ;

ವಸಭೇನ ಇಮೇ ಹೋನ್ತಿ, ದಸ ಥೇರಾ ಮಹಿದ್ಧಿಕಾತಿ.

೨. ದುತಿಯವಗ್ಗೋ

೧. ಮಹಾಚುನ್ದತ್ಥೇರಗಾಥಾ

೧೪೧.

‘‘ಸುಸ್ಸೂಸಾ ¶ ¶ ¶ ಸುತವದ್ಧನೀ, ಸುತಂ ಪಞ್ಞಾಯ ವದ್ಧನಂ;

ಪಞ್ಞಾಯ ಅತ್ಥಂ ಜಾನಾತಿ, ಞಾತೋ ಅತ್ಥೋ ಸುಖಾವಹೋ.

೧೪೨.

‘‘ಸೇವೇಥ ಪನ್ತಾನಿ ಸೇನಾಸನಾನಿ, ಚರೇಯ್ಯ ಸಂಯೋಜನವಿಪ್ಪಮೋಕ್ಖಂ;

ಸಚೇ ರತಿಂ ನಾಧಿಗಚ್ಛೇಯ್ಯ ತತ್ಥ, ಸಙ್ಘೇ ವಸೇ ರಕ್ಖಿತತ್ತೋ ಸತಿಮಾ’’ತಿ.

… ಮಹಾಚುನ್ದೋ ಥೇರೋ….

೨. ಜೋತಿದಾಸತ್ಥೇರಗಾಥಾ

೧೪೩.

‘‘ಯೇ ಖೋ ತೇ ವೇಠಮಿಸ್ಸೇನ [ವೇಘಮಿಸ್ಸೇನ (ಸೀ. ಸ್ಯಾ.), ವೇ ಗಮಿಸ್ಸೇನ, ವೇಖಮಿಸ್ಸೇನ (ಕ.)], ನಾನತ್ತೇನ ಚ ಕಮ್ಮುನಾ;

ಮನುಸ್ಸೇ ಉಪರುನ್ಧನ್ತಿ, ಫರುಸೂಪಕ್ಕಮಾ ಜನಾ;

ತೇಪಿ ¶ ತತ್ಥೇವ ಕೀರನ್ತಿ, ನ ಹಿ ಕಮ್ಮಂ ಪನಸ್ಸತಿ.

೧೪೪.

‘‘ಯಂ ಕರೋತಿ ನರೋ ಕಮ್ಮಂ, ಕಲ್ಯಾಣಂ ಯದಿ ಪಾಪಕಂ;

ತಸ್ಸ ತಸ್ಸೇವ ದಾಯಾದೋ, ಯಂ ಯಂ ಕಮ್ಮಂ ಪಕುಬ್ಬತೀ’’ತಿ.

… ಜೋತಿದಾಸೋ ಥೇರೋ….

೩. ಹೇರಞ್ಞಕಾನಿತ್ಥೇರಗಾಥಾ

೧೪೫.

‘‘ಅಚ್ಚಯನ್ತಿ ಅಹೋರತ್ತಾ, ಜೀವಿತಂ ಉಪರುಜ್ಝತಿ;

ಆಯು ಖೀಯತಿ ಮಚ್ಚಾನಂ, ಕುನ್ನದೀನಂವ ಓದಕಂ.

೧೪೬.

‘‘ಅಥ ಪಾಪಾನಿ ಕಮ್ಮಾನಿ, ಕರಂ ಬಾಲೋ ನ ಬುಜ್ಝತಿ;

ಪಚ್ಛಾಸ್ಸ ಕಟುಕಂ ಹೋತಿ, ವಿಪಾಕೋ ಹಿಸ್ಸ ಪಾಪಕೋ’’ತಿ.

… ಹೇರಞ್ಞಕಾನಿತ್ಥೇರೋ….

೪. ಸೋಮಮಿತ್ತತ್ಥೇರಗಾಥಾ

೧೪೭.

‘‘ಪರಿತ್ತಂ ದಾರುಮಾರುಯ್ಹ, ಯಥಾ ಸೀದೇ ಮಹಣ್ಣವೇ;

ಏವಂ ಕುಸೀತಮಾಗಮ್ಮ, ಸಾಧುಜೀವೀಪಿ ಸೀದತಿ;

ತಸ್ಮಾ ತಂ ಪರಿವಜ್ಜೇಯ್ಯ, ಕುಸೀತಂ ಹೀನವೀರಿಯಂ.

೧೪೮.

‘‘ಪವಿವಿತ್ತೇಹಿ ¶ ¶ ಅರಿಯೇಹಿ, ಪಹಿತತ್ತೇಹಿ ಝಾಯಿಭಿ;

ನಿಚ್ಚಂ ಆರದ್ಧವೀರಿಯೇಹಿ, ಪಣ್ಡಿತೇಹಿ ಸಹಾವಸೇ’’ತಿ.

… ಸೋಮಮಿತ್ತೋ ಥೇರೋ….

೫. ಸಬ್ಬಮಿತ್ತತ್ಥೇರಗಾಥಾ

೧೪೯.

‘‘ಜನೋ ಜನಮ್ಹಿ ಸಮ್ಬದ್ಧೋ [ಸಮ್ಬದ್ಧೋ (ಸ್ಯಾ. ಕ.)], ಜನಮೇವಸ್ಸಿತೋ ಜನೋ;

ಜನೋ ಜನೇನ ಹೇಠೀಯತಿ, ಹೇಠೇತಿ ಚ [ಬೋಧಿಯತಿ, ಬಾಧೇತಿ ಚ (ಕ.)] ಜನೋ ಜನಂ.

೧೫೦.

‘‘ಕೋ ¶ ಹಿ ತಸ್ಸ ಜನೇನತ್ಥೋ, ಜನೇನ ಜನಿತೇನ ವಾ;

ಜನಂ ಓಹಾಯ ಗಚ್ಛಂ ತಂ, ಹೇಠಯಿತ್ವಾ [ಬಾಧಯಿತ್ವಾ (ಕ.)] ಬಹುಂ ಜನ’’ನ್ತಿ.

… ಸಬ್ಬಮಿತ್ತೋ ಥೇರೋ….

೬. ಮಹಾಕಾಳತ್ಥೇರಗಾಥಾ

೧೫೧.

‘‘ಕಾಳೀ ¶ ಇತ್ಥೀ ಬ್ರಹತೀ ಧಙ್ಕರೂಪಾ, ಸತ್ಥಿಞ್ಚ ಭೇತ್ವಾ ಅಪರಞ್ಚ ಸತ್ಥಿಂ;

ಬಾಹಞ್ಚ ಭೇತ್ವಾ ಅಪರಞ್ಚ ಬಾಹಂ, ಸೀಸಞ್ಚ ಭೇತ್ವಾ ದಧಿಥಾಲಕಂವ;

ಏಸಾ ನಿಸಿನ್ನಾ ಅಭಿಸನ್ದಹಿತ್ವಾ.

೧೫೨.

‘‘ಯೋ ವೇ ಅವಿದ್ವಾ ಉಪಧಿಂ ಕರೋತಿ, ಪುನಪ್ಪುನಂ ದುಕ್ಖಮುಪೇತಿ ಮನ್ದೋ;

ತಸ್ಮಾ ಪಜಾನಂ ಉಪಧಿಂ ನ ಕಯಿರಾ, ಮಾಹಂ ಪುನ ಭಿನ್ನಸಿರೋ ಸಯಿಸ್ಸ’’ನ್ತಿ [ಪಸ್ಸಿಸ್ಸನ್ತಿ (ಕ.)].

… ಮಹಾಕಾಳೋ ಥೇರೋ….

೭. ತಿಸ್ಸತ್ಥೇರಗಾಥಾ

೧೫೩.

‘‘ಬಹೂ ಸಪತ್ತೇ ಲಭತಿ, ಮುಣ್ಡೋ ಸಙ್ಘಾಟಿಪಾರುತೋ;

ಲಾಭೀ ಅನ್ನಸ್ಸ ಪಾನಸ್ಸ, ವತ್ಥಸ್ಸ ಸಯನಸ್ಸ ಚ.

೧೫೪.

‘‘ಏತಮಾದೀನವಂ ಞತ್ವಾ, ಸಕ್ಕಾರೇಸು ಮಹಬ್ಭಯಂ;

ಅಪ್ಪಲಾಭೋ ಅನವಸ್ಸುತೋ, ಸತೋ ಭಿಕ್ಖು ಪರಿಬ್ಬಜೇ’’ತಿ.

… ತಿಸ್ಸೋ ಥೇರೋ….

೮. ಕಿಮಿಲತ್ಥೇರಗಾಥಾ

೧೫೫.

‘‘ಪಾಚೀನವಂಸದಾಯಮ್ಹಿ ¶ , ಸಕ್ಯಪುತ್ತಾ ಸಹಾಯಕಾ;

ಪಹಾಯಾನಪ್ಪಕೇ ಭೋಗೇ, ಉಞ್ಛಾಪತ್ತಾಗತೇ ರತಾ.

೧೫೬.

‘‘ಆರದ್ಧವೀರಿಯಾ ¶ ಪಹಿತತ್ತಾ, ನಿಚ್ಚಂ ದಳ್ಹಪರಕ್ಕಮಾ;

ರಮನ್ತಿ ಧಮ್ಮರತಿಯಾ, ಹಿತ್ವಾನ ಲೋಕಿಯಂ ರತಿ’’ನ್ತಿ.

… ಕಿಮಿಲೋ [ಕಿಮ್ಬಿಲೋ (ಸೀ. ಸ್ಯಾ. ಪೀ.)] ಥೇರೋ….

೯. ನನ್ದತ್ಥೇರಗಾಥಾ

೧೫೭.

‘‘ಅಯೋನಿಸೋ ¶ ಮನಸಿಕಾರಾ, ಮಣ್ಡನಂ ಅನುಯುಞ್ಜಿಸಂ;

ಉದ್ಧತೋ ಚಪಲೋ ಚಾಸಿಂ, ಕಾಮರಾಗೇನ ಅಟ್ಟಿತೋ.

೧೫೮.

‘‘ಉಪಾಯಕುಸಲೇನಾಹಂ, ಬುದ್ಧೇನಾದಿಚ್ಚಬನ್ಧುನಾ;

ಯೋನಿಸೋ ಪಟಿಪಜ್ಜಿತ್ವಾ, ಭವೇ ಚಿತ್ತಂ ಉದಬ್ಬಹಿ’’ನ್ತಿ.

… ನನ್ದೋ ಥೇರೋ….

೧೦. ಸಿರಿಮತ್ಥೇರಗಾಥಾ

೧೫೯.

‘‘ಪರೇ ಚ ನಂ ಪಸಂಸನ್ತಿ, ಅತ್ತಾ ಚೇ ಅಸಮಾಹಿತೋ;

ಮೋಘಂ ಪರೇ ಪಸಂಸನ್ತಿ, ಅತ್ತಾ ಹಿ ಅಸಮಾಹಿತೋ.

೧೬೦.

‘‘ಪರೇ ಚ ನಂ ಗರಹನ್ತಿ, ಅತ್ತಾ ಚೇ ಸುಸಮಾಹಿತೋ;

ಮೋಘಂ ಪರೇ ಗರಹನ್ತಿ, ಅತ್ತಾ ಹಿ ಸುಸಮಾಹಿತೋ’’ತಿ.

… ಸಿರಿಮಾ ಥೇರೋ….

ವಗ್ಗೋ ದುತಿಯೋ ನಿಟ್ಠಿತೋ.

ತಸ್ಸುದ್ದಾನಂ –

ಚುನ್ದೋ ¶ ಚ ಜೋತಿದಾಸೋ ಚ, ಥೇರೋ ಹೇರಞ್ಞಕಾನಿ ಚ;

ಸೋಮಮಿತ್ತೋ ಸಬ್ಬಮಿತ್ತೋ, ಕಾಲೋ ತಿಸ್ಸೋ ಚ ಕಿಮಿಲೋ [ಕಿಮ್ಬಿಲೋ (ಸೀ. ಸ್ಯಾ. ಪೀ.), ಛನ್ದಲಕ್ಖಣಾನುಲೋಮಂ];

ನನ್ದೋ ಚ ಸಿರಿಮಾ ಚೇವ, ದಸ ಥೇರಾ ಮಹಿದ್ಧಿಕಾತಿ.

೩. ತತಿಯವಗ್ಗೋ

೧. ಉತ್ತರತ್ಥೇರಗಾಥಾ

೧೬೧.

‘‘ಖನ್ಧಾ ¶ ¶ ಮಯಾ ಪರಿಞ್ಞಾತಾ, ತಣ್ಹಾ ಮೇ ಸುಸಮೂಹತಾ;

ಭಾವಿತಾ ಮಮ ಬೋಜ್ಝಙ್ಗಾ, ಪತ್ತೋ ಮೇ ಆಸವಕ್ಖಯೋ.

೧೬೨.

‘‘ಸೋಹಂ ¶ ಖನ್ಧೇ ಪರಿಞ್ಞಾಯ, ಅಬ್ಬಹಿತ್ವಾನ [ಅಬ್ಬುಹಿತ್ವಾನ (ಕ.)] ಜಾಲಿನಿಂ;

ಭಾವಯಿತ್ವಾನ ಬೋಜ್ಝಙ್ಗೇ, ನಿಬ್ಬಾಯಿಸ್ಸಂ ಅನಾಸವೋ’’ತಿ.

… ಉತ್ತರೋ ಥೇರೋ….

೨. ಭದ್ದಜಿತ್ಥೇರಗಾಥಾ

೧೬೩.

‘‘ಪನಾದೋ ನಾಮ ಸೋ ರಾಜಾ, ಯಸ್ಸ ಯೂಪೋ ಸುವಣ್ಣಯೋ;

ತಿರಿಯಂ ಸೋಳಸುಬ್ಬೇಧೋ [ಸೋಳಸಪಬ್ಬೇಧೋ (ಸೀ. ಅಟ್ಠ.), ಸೋಳಸಬ್ಬಾಣೋ (?)], ಉಬ್ಭಮಾಹು [ಉದ್ಧಮಾಹು (ಸೀ.), ಉಚ್ಚಮಾಹು (ಸ್ಯಾ.)] ಸಹಸ್ಸಧಾ.

೧೬೪.

‘‘ಸಹಸ್ಸಕಣ್ಡೋ ಸತಗೇಣ್ಡು, ಧಜಾಲು ಹರಿತಾಮಯೋ;

ಅನಚ್ಚುಂ ತತ್ಥ ಗನ್ಧಬ್ಬಾ, ಛಸಹಸ್ಸಾನಿ ಸತ್ತಧಾ’’ತಿ.

… ಭದ್ದಜಿತ್ಥೇರೋ….

೩. ಸೋಭಿತತ್ಥೇರಗಾಥಾ

೧೬೫.

‘‘ಸತಿಮಾ ಪಞ್ಞವಾ ಭಿಕ್ಖು, ಆರದ್ಧಬಲವೀರಿಯೋ;

ಪಞ್ಚ ಕಪ್ಪಸತಾನಾಹಂ, ಏಕರತ್ತಿಂ ಅನುಸ್ಸರಿಂ.

೧೬೬.

‘‘ಚತ್ತಾರೋ ಸತಿಪಟ್ಠಾನೇ, ಸತ್ತ ಅಟ್ಠ ಚ ಭಾವಯಂ;

ಪಞ್ಚ ಕಪ್ಪಸತಾನಾಹಂ, ಏಕರತ್ತಿಂ ಅನುಸ್ಸರಿ’’ನ್ತಿ.

… ಸೋಭಿತೋ ಥೇರೋ….

೪. ವಲ್ಲಿಯತ್ಥೇರಗಾಥಾ

೧೬೭.

‘‘ಯಂ ಕಿಚ್ಚಂ ದಳ್ಹವೀರಿಯೇನ, ಯಂ ಕಿಚ್ಚಂ ಬೋದ್ಧುಮಿಚ್ಛತಾ;

ಕರಿಸ್ಸಂ ನಾವರಜ್ಝಿಸ್ಸಂ [ನಾವರುಜ್ಝಿಸ್ಸಂ (ಕ. ಸೀ. ಕ.)], ಪಸ್ಸ ವೀರಿಯಂ ಪರಕ್ಕಮ.

೧೬೮.

‘‘ತ್ವಞ್ಚ ಮೇ ಮಗ್ಗಮಕ್ಖಾಹಿ, ಅಞ್ಜಸಂ ಅಮತೋಗಧಂ;

ಅಹಂ ಮೋನೇನ ಮೋನಿಸ್ಸಂ, ಗಙ್ಗಾಸೋತೋವ ಸಾಗರ’’ನ್ತಿ.

… ವಲ್ಲಿಯೋ ಥೇರೋ….

೫. ವೀತಸೋಕತ್ಥೇರಗಾಥಾ

೧೬೯.

‘‘ಕೇಸೇ ¶ ¶ ಮೇ ಓಲಿಖಿಸ್ಸನ್ತಿ, ಕಪ್ಪಕೋ ಉಪಸಙ್ಕಮಿ;

ತತೋ ¶ ಆದಾಸಮಾದಾಯ, ಸರೀರಂ ಪಚ್ಚವೇಕ್ಖಿಸಂ.

೧೭೦.

‘‘ತುಚ್ಛೋ ¶ ಕಾಯೋ ಅದಿಸ್ಸಿತ್ಥ, ಅನ್ಧಕಾರೋ ತಮೋ ಬ್ಯಗಾ;

ಸಬ್ಬೇ ಚೋಳಾ ಸಮುಚ್ಛಿನ್ನಾ, ನತ್ಥಿ ದಾನಿ ಪುನಬ್ಭವೋ’’ತಿ.

… ವೀತಸೋಕೋ ಥೇರೋ….

೬. ಪುಣ್ಣಮಾಸತ್ಥೇರಗಾಥಾ

೧೭೧.

‘‘ಪಞ್ಚ ನೀವರಣೇ ಹಿತ್ವಾ, ಯೋಗಕ್ಖೇಮಸ್ಸ ಪತ್ತಿಯಾ;

ಧಮ್ಮಾದಾಸಂ ಗಹೇತ್ವಾನ, ಞಾಣದಸ್ಸನಮತ್ತನೋ.

೧೭೨.

‘‘ಪಚ್ಚವೇಕ್ಖಿಂ ಇಮಂ ಕಾಯಂ, ಸಬ್ಬಂ ಸನ್ತರಬಾಹಿರಂ;

ಅಜ್ಝತ್ತಞ್ಚ ಬಹಿದ್ಧಾ ಚ, ತುಚ್ಛೋ ಕಾಯೋ ಅದಿಸ್ಸಥಾ’’ತಿ.

… ಪುಣ್ಣಮಾಸೋ ಥೇರೋ….

೭. ನನ್ದಕತ್ಥೇರಗಾಥಾ

೧೭೩.

‘‘ಯಥಾಪಿ ಭದ್ದೋ ಆಜಞ್ಞೋ, ಖಲಿತ್ವಾ ಪತಿತಿಟ್ಠತಿ;

ಭಿಯ್ಯೋ ಲದ್ದಾನ ಸಂವೇಗಂ, ಅದೀನೋ ವಹತೇ ಧುರಂ.

೧೭೪.

‘‘ಏವಂ ದಸ್ಸನಸಮ್ಪನ್ನಂ, ಸಮ್ಮಾಸಮ್ಬುದ್ಧಸಾವಕಂ;

ಆಜಾನೀಯಂ ಮಂ ಧಾರೇಥ, ಪುತ್ತಂ ಬುದ್ಧಸ್ಸ ಓರಸ’’ನ್ತಿ.

… ನನ್ದಕೋ ಥೇರೋ….

೮. ಭರತತ್ಥೇರಗಾಥಾ

೧೭೫.

‘‘ಏಹಿ ನನ್ದಕ ಗಚ್ಛಾಮ, ಉಪಜ್ಝಾಯಸ್ಸ ಸನ್ತಿಕಂ;

ಸೀಹನಾದಂ ನದಿಸ್ಸಾಮ, ಬುದ್ಧಸೇಟ್ಠಸ್ಸ ಸಮ್ಮುಖಾ.

೧೭೬.

‘‘ಯಾಯ ನೋ ಅನುಕಮ್ಪಾಯ, ಅಮ್ಹೇ ಪಬ್ಬಾಜಯೀ ಮುನಿ;

ಸೋ ನೋ ಅತ್ಥೋ ಅನುಪ್ಪತ್ತೋ, ಸಬ್ಬಸಂಯೋಜನಕ್ಖಯೋ’’ತಿ.

… ಭರತೋ ಥೇರೋ….

೯. ಭಾರದ್ವಾಜತ್ಥೇರಗಾಥಾ

೧೭೭.

‘‘ನದನ್ತಿ ¶ ¶ ¶ ಏವಂ ಸಪ್ಪಞ್ಞಾ, ಸೀಹಾವ ಗಿರಿಗಬ್ಭರೇ;

ವೀರಾ ವಿಜಿತಸಙ್ಗಾಮಾ, ಜೇತ್ವಾ ಮಾರಂ ಸವಾಹನಿಂ [ಸವಾಹನಂ (ಬಹೂಸು)].

೧೭೮.

‘‘ಸತ್ಥಾ ಚ ಪರಿಚಿಣ್ಣೋ ಮೇ, ಧಮ್ಮೋ ಸಙ್ಘೋ ಚ ಪೂಜಿತೋ;

ಅಹಞ್ಚ ವಿತ್ತೋ ಸುಮನೋ, ಪುತ್ತಂ ದಿಸ್ವಾ ಅನಾಸವ’’ನ್ತಿ.

… ಭಾರದ್ವಾಜೋ ಥೇರೋ….

೧೦. ಕಣ್ಹದಿನ್ನತ್ಥೇರಗಾಥಾ

೧೭೯.

‘‘ಉಪಾಸಿತಾ ಸಪ್ಪುರಿಸಾ, ಸುತಾ ಧಮ್ಮಾ ಅಭಿಣ್ಹಸೋ;

ಸುತ್ವಾನ ಪಟಿಪಜ್ಜಿಸ್ಸಂ, ಅಞ್ಜಸಂ ಅಮತೋಗಧಂ.

೧೮೦.

‘‘ಭವರಾಗಹತಸ್ಸ ಮೇ ಸತೋ, ಭವರಾಗೋ ಪುನ ಮೇ ನ ವಿಜ್ಜತಿ;

ನ ಚಾಹು ನ ಚ ಮೇ ಭವಿಸ್ಸತಿ, ನ ಚ ಮೇ ಏತರಹಿ ವಿಜ್ಜತೀ’’ತಿ.

… ಕಣ್ಹದಿನ್ನೋ ಥೇರೋ….

ವಗ್ಗೋ ತತಿಯೋ ನಿಟ್ಠಿತೋ.

ತಸ್ಸುದ್ದಾನಂ –

ಉತ್ತರೋ ಭದ್ದಜಿತ್ಥೇರೋ, ಸೋಭಿತೋ ವಲ್ಲಿಯೋ ಇಸಿ;

ವೀತಸೋಕೋ ಚ ಯೋ ಥೇರೋ, ಪುಣ್ಣಮಾಸೋ ಚ ನನ್ದಕೋ;

ಭರತೋ ಭಾರದ್ವಾಜೋ ಚ, ಕಣ್ಹದಿನ್ನೋ ಮಹಾಮುನೀತಿ.

೪. ಚತುತ್ಥವಗ್ಗೋ

೧. ಮಿಗಸಿರತ್ಥೇರಗಾಥಾ

೧೮೧.

‘‘ಯತೋ ¶ ಅಹಂ ಪಬ್ಬಜಿತೋ, ಸಮ್ಮಾಸಮ್ಬುದ್ಧಸಾಸನೇ;

ವಿಮುಚ್ಚಮಾನೋ ಉಗ್ಗಚ್ಛಿಂ, ಕಾಮಧಾತುಂ ಉಪಚ್ಚಗಂ.

೧೮೨.

‘‘ಬ್ರಹ್ಮುನೋ ¶ ¶ ಪೇಕ್ಖಮಾನಸ್ಸ, ತತೋ ಚಿತ್ತಂ ವಿಮುಚ್ಚಿ ಮೇ;

ಅಕುಪ್ಪಾ ಮೇ ವಿಮುತ್ತೀತಿ, ಸಬ್ಬಸಂಯೋಜನಕ್ಖಯಾ’’ತಿ.

… ಮಿಗಸಿರೋ ಥೇರೋ….

೨. ಸಿವಕತ್ಥೇರಗಾಥಾ

೧೮೩.

‘‘ಅನಿಚ್ಚಾನಿ ¶ ಗಹಕಾನಿ, ತತ್ಥ ತತ್ಥ ಪುನಪ್ಪುನಂ;

ಗಹಕಾರಂ [ಗಹಕಾರಕಂ (ಸೀ. ಪೀ.)] ಗವೇಸನ್ತೋ, ದುಕ್ಖಾ ಜಾತಿ ಪುನಪ್ಪುನಂ.

೧೮೪.

‘‘ಗಹಕಾರಕ ದಿಟ್ಠೋಸಿ, ಪುನ ಗೇಹಂ ನ ಕಾಹಸಿ;

ಸಬ್ಬಾ ತೇ ಫಾಸುಕಾ ಭಗ್ಗಾ, ಥೂಣಿಕಾ [ಥೂಣಿರಾ (ಪೀ. ಕ.), ಧುಣಿರಾ (ಸ್ಯಾ.)] ಚ ವಿದಾಲಿತಾ [ಪದಾಲಿತಾ (ಸೀ. ಸ್ಯಾ.)];

ವಿಮರಿಯಾದಿಕತಂ ಚಿತ್ತಂ, ಇಧೇವ ವಿಧಮಿಸ್ಸತೀ’’ತಿ.

… ಸಿವಕೋ [ಸೀವಕೋ (ಸೀ.)] ಥೇರೋ….

೩. ಉಪವಾಣತ್ಥೇರಗಾಥಾ

೧೮೫.

‘‘ಅರಹಂ ಸುಗತೋ ಲೋಕೇ, ವಾತೇಹಾಬಾಧಿತೋ [… ಬಾಧಿತೋ (ಕ.)] ಮುನಿ;

ಸಚೇ ಉಣ್ಹೋದಕಂ ಅತ್ಥಿ, ಮುನಿನೋ ದೇಹಿ ಬ್ರಾಹ್ಮಣ.

೧೮೬.

‘‘ಪೂಜಿತೋ ಪೂಜನೇಯ್ಯಾನಂ [ಪೂಜನೀಯಾನಂ (ಸೀ.)], ಸಕ್ಕರೇಯ್ಯಾನ ಸಕ್ಕತೋ;

ಅಪಚಿತೋಪಚೇಯ್ಯಾನಂ [ಅಪಚನೀಯಾನಂ (ಸೀ.), ಅಪಚಿನೇಯ್ಯಾನಂ (ಸ್ಯಾ.)], ತಸ್ಸ ಇಚ್ಛಾಮಿ ಹಾತವೇ’’ತಿ.

… ಉಪವಾಣೋ ಥೇರೋ….

೪. ಇಸಿದಿನ್ನತ್ಥೇರಗಾಥಾ

೧೮೭.

‘‘ದಿಟ್ಠಾ ಮಯಾ ಧಮ್ಮಧರಾ ಉಪಾಸಕಾ, ಕಾಮಾ ಅನಿಚ್ಚಾ ಇತಿ ಭಾಸಮಾನಾ;

ಸಾರತ್ತರತ್ತಾ ಮಣಿಕುಣ್ಡಲೇಸು, ಪುತ್ತೇಸು ದಾರೇಸು ಚ ತೇ ಅಪೇಕ್ಖಾ.

೧೮೮.

‘‘ಅದ್ಧಾ ನ ಜಾನನ್ತಿ ಯತೋಧ ಧಮ್ಮಂ, ಕಾಮಾ ¶ ಅನಿಚ್ಚಾ ಇತಿ ಚಾಪಿ ಆಹು;

ರಾಗಞ್ಚ ತೇಸಂ ನ ಬಲತ್ಥಿ ಛೇತ್ತುಂ, ತಸ್ಮಾ ಸಿತಾ ಪುತ್ತದಾರಂ ಧನಞ್ಚಾ’’ತಿ.

… ಇಸಿದಿನ್ನೋ ಥೇರೋ….

೫. ಸಮ್ಬುಲಕಚ್ಚಾನತ್ಥೇರಗಾಥಾ

೧೮೯.

‘‘ದೇವೋ ¶ ಚ ವಸ್ಸತಿ ದೇವೋ ಚ ಗಳಗಳಾಯತಿ,

ಏಕಕೋ ಚಾಹಂ ಭೇರವೇ ಬಿಲೇ ವಿಹರಾಮಿ;

ತಸ್ಸ ಮಯ್ಹಂ ಏಕಕಸ್ಸ ಭೇರವೇ ಬಿಲೇ ವಿಹರತೋ,

ನತ್ಥಿ ಭಯಂ ವಾ ಛಮ್ಭಿತತ್ತಂ ವಾ ಲೋಮಹಂಸೋ ವಾ.

೧೯೦.

‘‘ಧಮ್ಮತಾ ¶ ಮಮಸಾ ಯಸ್ಸ ಮೇ, ಏಕಕಸ್ಸ ಭೇರವೇ ಬಿಲೇ;

ವಿಹರತೋ ನತ್ಥಿ ಭಯಂ ವಾ, ಛಮ್ಭಿತತ್ತಂ ವಾ ಲೋಮಹಂಸೋ ವಾ’’ತಿ.

… ಸಮ್ಬುಲಕಚ್ಚಾನೋ [ಸಮ್ಬಹುಲಕಚ್ಚಾನೋ (ಕ.)] ಥೇರೋ….

೬. ನಿತಕತ್ಥೇರಗಾಥಾ

೧೯೧.

[ಉದಾ. ೩೪ ಉದಾನೇಪಿ] ‘‘ಕಸ್ಸ ¶ ಸೇಲೂಪಮಂ ಚಿತ್ತಂ, ಠಿತಂ ನಾನುಪಕಮ್ಪತಿ;

ವಿರತ್ತಂ ರಜನೀಯೇಸು, ಕುಪ್ಪನೀಯೇ ನ ಕುಪ್ಪತಿ;

ಯಸ್ಸೇವಂ ಭಾವಿತಂ ಚಿತ್ತಂ, ಕುತೋ ತಂ ದುಕ್ಖಮೇಸ್ಸತಿ.

೧೯೨.

‘‘ಮಮ ಸೇಲೂಪಮಂ ಚಿತ್ತಂ, ಠಿತಂ ನಾನುಪಕಮ್ಪತಿ;

ವಿರತ್ತಂ ರಜನೀಯೇಸು, ಕುಪ್ಪನೀಯೇ ನ ಕುಪ್ಪತಿ;

ಮಮೇವಂ ಭಾವಿತಂ ಚಿತ್ತಂ, ಕುತೋ ಮಂ ದುಕ್ಖಮೇಸ್ಸತೀ’’ತಿ.

… ನಿತಕೋ [ಖಿತಕೋ (ಸೀ. ಸ್ಯಾ.)] ಥೇರೋ….

೭. ಸೋಣಪೋಟಿರಿಯತ್ಥೇರಗಾಥಾ

೧೯೩.

‘‘ನ ತಾವ ಸುಪಿತುಂ ಹೋತಿ, ರತ್ತಿ ನಕ್ಖತ್ತಮಾಲಿನೀ;

ಪಟಿಜಗ್ಗಿತುಮೇವೇಸಾ, ರತ್ತಿ ಹೋತಿ ವಿಜಾನತಾ.

೧೯೪.

‘‘ಹತ್ಥಿಕ್ಖನ್ಧಾವಪತಿತಂ ¶ , ಕುಞ್ಜರೋ ಚೇ ಅನುಕ್ಕಮೇ;

ಸಙ್ಗಾಮೇ ಮೇ ಮತಂ ಸೇಯ್ಯೋ, ಯಞ್ಚೇ ಜೀವೇ ಪರಾಜಿತೋ’’ತಿ.

… ಸೋಣೋ ಪೋಟಿರಿಯೋ [ಸೇಲಿಸ್ಸರಿಯೋ (ಸೀ.), ಪೋಟ್ಟಿರಿಯಪುತ್ತೋ (ಸ್ಯಾ.)] ಥೇರೋ ….

೮. ನಿಸಭತ್ಥೇರಗಾಥಾ

೧೯೫.

‘‘ಪಞ್ಚ ¶ ಕಾಮಗುಣೇ ಹಿತ್ವಾ, ಪಿಯರೂಪೇ ಮನೋರಮೇ;

ಸದ್ಧಾಯ ಘರಾ ನಿಕ್ಖಮ್ಮ, ದುಕ್ಖಸ್ಸನ್ತಕರೋ ಭವೇ.

೧೯೬.

‘‘ನಾಭಿನನ್ದಾಮಿ ಮರಣಂ, ನಾಭಿನನ್ದಾಮಿ ಜೀವಿತಂ;

ಕಾಲಞ್ಚ ಪಟಿಕಙ್ಖಾಮಿ, ಸಮ್ಪಜಾನೋ ಪತಿಸ್ಸತೋ’’ತಿ.

… ನಿಸಭೋ ಥೇರೋ….

೯. ಉಸಭತ್ಥೇರಗಾಥಾ

೧೯೭.

‘‘ಅಮ್ಬಪಲ್ಲವಸಙ್ಕಾಸಂ, ಅಂಸೇ ಕತ್ವಾನ ಚೀವರಂ;

ನಿಸಿನ್ನೋ ಹತ್ಥಿಗೀವಾಯಂ, ಗಾಮಂ ಪಿಣ್ಡಾಯ ಪಾವಿಸಿಂ.

೧೯೮.

‘‘ಹತ್ಥಿಕ್ಖನ್ಧತೋ ¶ ಓರುಯ್ಹ, ಸಂವೇಗಂ ಅಲಭಿಂ ತದಾ;

ಸೋಹಂ ದಿತ್ತೋ ತದಾ ಸನ್ತೋ, ಪತ್ತೋ ಮೇ ಆಸವಕ್ಖಯೋ’’ತಿ.

… ಉಸಭೋ ಥೇರೋ….

೧೦. ಕಪ್ಪಟಕುರತ್ಥೇರಗಾಥಾ

೧೯೯.

‘‘ಅಯಮಿತಿ ಕಪ್ಪಟೋ ಕಪ್ಪಟಕುರೋ, ಅಚ್ಛಾಯ ಅತಿಭರಿತಾಯ [ಅತಿಭರಿಯಾಯ (ಸೀ. ಕ.), ಅಚ್ಚಂ ಭರಾಯ (ಸ್ಯಾ.)];

ಅಮತಘಟಿಕಾಯಂ ಧಮ್ಮಕಟಮತ್ತೋ [ಧಮ್ಮಕಟಪತ್ತೋ (ಸ್ಯಾ. ಕ. ಅಟ್ಠ.), ಧಮ್ಮಕಟಮಗ್ಗೋ (ಸೀ. ಅಟ್ಠ.)], ಕತಪದಂ ಝಾನಾನಿ ಓಚೇತುಂ.

೨೦೦.

‘‘ಮಾ ¶ ಖೋ ತ್ವಂ ಕಪ್ಪಟ ಪಚಾಲೇಸಿ, ಮಾ ತ್ವಂ ಉಪಕಣ್ಣಮ್ಹಿ ತಾಳೇಸ್ಸಂ;

ನ ¶ ಹಿ [ನ ವಾ (ಕ.)] ತ್ವಂ ಕಪ್ಪಟ ಮತ್ತಮಞ್ಞಾಸಿ, ಸಙ್ಘಮಜ್ಝಮ್ಹಿ ಪಚಲಾಯಮಾನೋತಿ.

… ಕಪ್ಪಟಕುರೋ ಥೇರೋ….

ವಗ್ಗೋ ಚತುತ್ಥೋ ನಿಟ್ಠಿತೋ.

ತಸ್ಸುದ್ದಾನಂ –

ಮಿಗಸಿರೋ ¶ ಸಿವಕೋ ಚ, ಉಪವಾನೋ ಚ ಪಣ್ಡಿತೋ;

ಇಸಿದಿನ್ನೋ ಚ ಕಚ್ಚಾನೋ, ನಿತಕೋ ಚ ಮಹಾವಸೀ;

ಪೋಟಿರಿಯಪುತ್ತೋ ನಿಸಭೋ, ಉಸಭೋ ಕಪ್ಪಟಕುರೋತಿ.

೫. ಪಞ್ಚಮವಗ್ಗೋ

೧. ಕುಮಾರಕಸ್ಸಪತ್ಥೇರಗಾಥಾ

೨೦೧.

‘‘ಅಹೋ ಬುದ್ಧಾ ಅಹೋ ಧಮ್ಮಾ, ಅಹೋ ನೋ ಸತ್ಥು ಸಮ್ಪದಾ;

ಯತ್ಥ ಏತಾದಿಸಂ ಧಮ್ಮಂ, ಸಾವಕೋ ಸಚ್ಛಿಕಾಹಿ’’ತಿ.

೨೦೨.

‘‘ಅಸಙ್ಖೇಯ್ಯೇಸು ಕಪ್ಪೇಸು, ಸಕ್ಕಾಯಾಧಿಗತಾ ಅಹೂ;

ತೇಸಮಯಂ ಪಚ್ಛಿಮಕೋ, ಚರಿಮೋಯಂ ಸಮುಸ್ಸಯೋ;

ಜಾತಿಮರಣಸಂಸಾರೋ, ನತ್ಥಿ ದಾನಿ ಪುನಬ್ಭವೋ’’ತಿ.

… ಕುಮಾರಕಸ್ಸಪೋ ಥೇರೋ….

೨. ಧಮ್ಮಪಾಲತ್ಥೇರಗಾಥಾ

೨೦೩.

‘‘ಯೋ ¶ ಹವೇ ದಹರೋ ಭಿಕ್ಖು, ಯುಞ್ಜತಿ ಬುದ್ಧಸಾಸನೇ;

ಜಾಗರೋ ಸ ಹಿ ಸುತ್ತೇಸು [ಪತಿಸುತ್ತೇಸು (ಸೀ. ಕ.)], ಅಮೋಘಂ ತಸ್ಸ ಜೀವಿತಂ.

೨೦೪.

‘‘ತಸ್ಮಾ ¶ ಸದ್ಧಞ್ಚ ಸೀಲಞ್ಚ, ಪಸಾದಂ ಧಮ್ಮದಸ್ಸನಂ;

ಅನುಯುಞ್ಜೇಥ ಮೇಧಾವೀ, ಸರಂ ಬುದ್ಧಾನ ಸಾಸನ’’ನ್ತಿ.

… ಧಮ್ಮಪಾಲೋ ಥೇರೋ….

೩. ಬ್ರಹ್ಮಾಲಿತ್ಥೇರಗಾಥಾ

೨೦೫.

‘‘ಕಸ್ಸಿನ್ದ್ರಿಯಾನಿ ಸಮಥಙ್ಗತಾನಿ, ಅಸ್ಸಾ ಯಥಾ ಸಾರಥಿನಾ ಸುದನ್ತಾ;

ಪಹೀನಮಾನಸ್ಸ ಅನಾಸವಸ್ಸ, ದೇವಾಪಿ ಕಸ್ಸ [ತಸ್ಸ (ಬಹೂಸು)] ಪಿಹಯನ್ತಿ ತಾದಿನೋ’’ತಿ.

೨೦೬.

[ಧ. ಪ. ೯೪ ಧಮ್ಮಪದೇಪಿ] ‘‘ಮಯ್ಹಿನ್ದ್ರಿಯಾನಿ ¶ ಸಮಥಙ್ಗತಾನಿ, ಅಸ್ಸಾ ಯಥಾ ಸಾರಥಿನಾ ಸುದನ್ತಾ;

ಪಹೀನಮಾನಸ್ಸ ಅನಾಸವಸ್ಸ, ದೇವಾಪಿ ಮಯ್ಹಂ ಪಿಹಯನ್ತಿ ತಾದಿನೋ’’ತಿ.

… ಬ್ರಹ್ಮಾಲಿ ಥೇರೋ….

೪. ಮೋಘರಾಜತ್ಥೇರಗಾಥಾ

೨೦೭.

‘‘ಛವಿಪಾಪಕ ¶ ಚಿತ್ತಭದ್ದಕ, ಮೋಘರಾಜ ಸತತಂ ಸಮಾಹಿತೋ;

ಹೇಮನ್ತಿಕಸೀತಕಾಲರತ್ತಿಯೋ [ಹೇಮನ್ತಿಕಕಾಲರತ್ತಿಯೋ (ಕ.)], ಭಿಕ್ಖು ತ್ವಂಸಿ ಕಥಂ ಕರಿಸ್ಸಸಿ’’.

೨೦೮.

‘‘ಸಮ್ಪನ್ನಸಸ್ಸಾ ಮಗಧಾ, ಕೇವಲಾ ಇತಿ ಮೇ ಸುತಂ;

ಪಲಾಲಚ್ಛನ್ನಕೋ ಸೇಯ್ಯಂ, ಯಥಞ್ಞೇ ಸುಖಜೀವಿನೋ’’ತಿ.

… ಮೋಘರಾಜಾ ಥೇರೋ….

೫. ವಿಸಾಖಪಞ್ಚಾಲಪುತ್ತತ್ಥೇರಗಾಥಾ

೨೦೯.

‘‘ನ ಉಕ್ಖಿಪೇ ನೋ ಚ ಪರಿಕ್ಖಿಪೇ ಪರೇ, ಓಕ್ಖಿಪೇ ಪಾರಗತಂ ನ ಏರಯೇ;

ನ ¶ ಚತ್ತವಣ್ಣಂ ಪರಿಸಾಸು ಬ್ಯಾಹರೇ, ಅನುದ್ಧತೋ ಸಮ್ಮಿತಭಾಣಿ ಸುಬ್ಬತೋ.

೨೧೦.

‘‘ಸುಸುಖುಮನಿಪುಣತ್ಥದಸ್ಸಿನಾ, ಮತಿಕುಸಲೇನ ನಿವಾತವುತ್ತಿನಾ;

ಸಂಸೇವಿತವುದ್ಧಸೀಲಿನಾ, ನಿಬ್ಬಾನಂ ನ ಹಿ ತೇನ ದುಲ್ಲಭ’’ನ್ತಿ.

… ವಿಸಾಖೋ ಪಞ್ಚಾಲಪುತ್ತೋ ಥೇರೋ ….

೬. ಚೂಳಕತ್ಥೇರಗಾಥಾ

೨೧೧.

‘‘ನದನ್ತಿ ¶ ಮೋರಾ ಸುಸಿಖಾ ಸುಪೇಖುಣಾ, ಸುನೀಲಗೀವಾ ಸುಮುಖಾ ಸುಗಜ್ಜಿನೋ;

ಸುಸದ್ದಲಾ ಚಾಪಿ ಮಹಾಮಹೀ ಅಯಂ, ಸುಬ್ಯಾಪಿತಮ್ಬು ಸುವಲಾಹಕಂ ನಭಂ.

೨೧೨.

‘‘ಸುಕಲ್ಲರೂಪೋ ¶ ಸುಮನಸ್ಸ ಝಾಯತಂ [ಝಾಯಿತಂ (ಸ್ಯಾ. ಕ.)], ಸುನಿಕ್ಕಮೋ ಸಾಧು ಸುಬುದ್ಧಸಾಸನೇ;

ಸುಸುಕ್ಕಸುಕ್ಕಂ ನಿಪುಣಂ ಸುದುದ್ದಸಂ, ಫುಸಾಹಿ ತಂ ಉತ್ತಮಮಚ್ಚುತಂ ಪದ’’ನ್ತಿ.

… ಚೂಳಕೋ [ಚೂಲಕೋ (ಸೀ. ಅಟ್ಠ.)] ಥೇರೋ….

೭. ಅನೂಪಮತ್ಥೇರಗಾಥಾ

೨೧೩.

‘‘ನನ್ದಮಾನಾಗತಂ ಚಿತ್ತಂ, ಸೂಲಮಾರೋಪಮಾನಕಂ;

ತೇನ ತೇನೇವ ವಜಸಿ, ಯೇನ ಸೂಲಂ ಕಲಿಙ್ಗರಂ.

೨೧೪.

‘‘ತಾಹಂ ಚಿತ್ತಕಲಿಂ ಬ್ರೂಮಿ, ತಂ ಬ್ರೂಮಿ ಚಿತ್ತದುಬ್ಭಕಂ;

ಸತ್ಥಾ ತೇ ದುಲ್ಲಭೋ ಲದ್ಧೋ, ಮಾನತ್ಥೇ ಮಂ ನಿಯೋಜಯೀ’’ತಿ.

… ಅನೂಪಮೋ ಥೇರೋ….

೮. ವಜ್ಜಿತತ್ಥೇರಗಾಥಾ

೨೧೫.

‘‘ಸಂಸರಂ ¶ ದೀಘಮದ್ಧಾನಂ, ಗತೀಸು ಪರಿವತ್ತಿಸಂ;

ಅಪಸ್ಸಂ ಅರಿಯಸಚ್ಚಾನಿ, ಅನ್ಧಭೂತೋ [ಅನ್ಧೀಭೂತೋ (ಕ.)] ಪುಥುಜ್ಜನೋ.

೨೧೬.

‘‘ತಸ್ಸ ¶ ಮೇ ಅಪ್ಪಮತ್ತಸ್ಸ, ಸಂಸಾರಾ ವಿನಳೀಕತಾ;

ಸಬ್ಬಾ ಗತೀ ಸಮುಚ್ಛಿನ್ನಾ, ನತ್ಥಿ ದಾನಿ ಪುನಬ್ಭವೋ’’ತಿ.

… ವಜ್ಜಿತೋ ಥೇರೋ….

೯. ಸನ್ಧಿತತ್ಥೇರಗಾಥಾ

೨೧೭.

‘‘ಅಸ್ಸತ್ಥೇ ಹರಿತೋಭಾಸೇ, ಸಂವಿರೂಳ್ಹಮ್ಹಿ ಪಾದಪೇ;

ಏಕಂ ಬುದ್ಧಗತಂ ಸಞ್ಞಂ, ಅಲಭಿತ್ಥಂ [ಅಲಭಿಂ ಹಂ (ಕ.)] ಪತಿಸ್ಸತೋ.

೨೧೮.

‘‘ಏಕತಿಂಸೇ ಇತೋ ಕಪ್ಪೇ, ಯಂ ಸಞ್ಞಮಲಭಿಂ ತದಾ;

ತಸ್ಸಾ ಸಞ್ಞಾಯ ವಾಹಸಾ, ಪತ್ತೋ ಮೇ ಆಸವಕ್ಖಯೋ’’ತಿ.

… ಸನ್ಧಿತೋ ಥೇರೋ….

ವಗ್ಗೋ ಪಞ್ಚಮೋ ನಿಟ್ಠಿತೋ.

ತಸ್ಸುದ್ದಾನಂ ¶ –

ಕುಮಾರಕಸ್ಸಪೋ ¶ ಥೇರೋ, ಧಮ್ಮಪಾಲೋ ಚ ಬ್ರಹ್ಮಾಲಿ;

ಮೋಘರಾಜಾ ವಿಸಾಖೋ ಚ, ಚೂಳಕೋ ಚ ಅನೂಪಮೋ;

ವಜ್ಜಿತೋ ಸನ್ಧಿತೋ ಥೇರೋ, ಕಿಲೇಸರಜವಾಹನೋತಿ.

ದುಕನಿಪಾತೋ ನಿಟ್ಠಿತೋ.

ತತ್ರುದ್ದಾನಂ –

ಗಾಥಾದುಕನಿಪಾತಮ್ಹಿ, ನವುತಿ ಚೇವ ಅಟ್ಠ ಚ;

ಥೇರಾ ಏಕೂನಪಞ್ಞಾಸಂ, ಭಾಸಿತಾ ನಯಕೋವಿದಾತಿ.

೩. ತಿಕನಿಪಾತೋ

೧. ಅಙ್ಗಣಿಕಭಾರದ್ವಾಜತ್ಥೇರಗಾಥಾ

೨೧೯.

‘‘ಅಯೋನಿ ¶ ¶ ¶ ¶ ಸುದ್ಧಿಮನ್ವೇಸಂ, ಅಗ್ಗಿಂ ಪರಿಚರಿಂ ವನೇ;

ಸುದ್ಧಿಮಗ್ಗಂ ಅಜಾನನ್ತೋ, ಅಕಾಸಿಂ ಅಮರಂ ತಪಂ [ಅಕಾಸಿಂ ಅಪರಂ ತಪಂ (ಸ್ಯಾ.), ಅಕಾಸಿಂ ಅಮತಂ ತಪಂ (ಕ.)].

೨೨೦.

‘‘ತಂ ಸುಖೇನ ಸುಖಂ ಲದ್ಧಂ, ಪಸ್ಸ ಧಮ್ಮಸುಧಮ್ಮತಂ;

ತಿಸ್ಸೋ ವಿಜ್ಜಾ ಅನುಪ್ಪತ್ತಾ, ಕತಂ ಬುದ್ಧಸ್ಸ ಸಾಸನಂ.

೨೨೧.

‘‘ಬ್ರಹ್ಮಬನ್ಧು ಪುರೇ ಆಸಿಂ, ಇದಾನಿ ಖೋಮ್ಹಿ ಬ್ರಾಹ್ಮಣೋ;

ತೇವಿಜ್ಜೋ ನ್ಹಾತಕೋ [ನಹಾತಕೋ (ಸೀ. ಅಟ್ಠ.)] ಚಮ್ಹಿ, ಸೋತ್ತಿಯೋ ಚಮ್ಹಿ ವೇದಗೂ’’ತಿ.

… ಅಙ್ಗಣಿಕಭಾರದ್ವಾಜೋ ಥೇರೋ….

೨. ಪಚ್ಚಯತ್ಥೇರಗಾಥಾ

೨೨೨.

‘‘ಪಞ್ಚಾಹಾಹಂ ಪಬ್ಬಜಿತೋ, ಸೇಖೋ ಅಪ್ಪತ್ತಮಾನಸೋ,

ವಿಹಾರಂ ಮೇ ಪವಿಟ್ಠಸ್ಸ, ಚೇತಸೋ ಪಣಿಧೀ ಅಹು.

೨೨೩.

‘‘ನಾಸಿಸ್ಸಂ ನ ಪಿವಿಸ್ಸಾಮಿ, ವಿಹಾರತೋ ನ ನಿಕ್ಖಮೇ;

ನಪಿ ಪಸ್ಸಂ ನಿಪಾತೇಸ್ಸಂ, ತಣ್ಹಾಸಲ್ಲೇ ಅನೂಹತೇ.

೨೨೪.

‘‘ತಸ್ಸ ಮೇವಂ ವಿಹರತೋ, ಪಸ್ಸ ವೀರಿಯಪರಕ್ಕಮಂ;

ತಿಸ್ಸೋ ವಿಜ್ಜಾ ಅನುಪ್ಪತ್ತಾ, ಕತಂ ಬುದ್ಧಸ್ಸ ಸಾಸನ’’ನ್ತಿ.

… ಪಚ್ಚಯೋ ಥೇರೋ….

೩. ಬಾಕುಲತ್ಥೇರಗಾಥಾ

೨೨೫.

‘‘ಯೋ ಪುಬ್ಬೇ ಕರಣೀಯಾನಿ, ಪಚ್ಛಾ ಸೋ ಕಾತುಮಿಚ್ಛತಿ;

ಸುಖಾ ಸೋ ಧಂಸತೇ ಠಾನಾ, ಪಚ್ಛಾ ಚ ಮನುತಪ್ಪತಿ.

೨೨೬.

‘‘ಯಞ್ಹಿ ಕಯಿರಾ ತಞ್ಹಿ ವದೇ, ಯಂ ನ ಕಯಿರಾ ನ ತಂ ವದೇ;

ಅಕರೋನ್ತಂ ¶ ಭಾಸಮಾನಂ, ಪರಿಜಾನನ್ತಿ ಪಣ್ಡಿತಾ.

೨೨೭.

‘‘ಸುಸುಖಂ ¶ ¶ ವತ ನಿಬ್ಬಾನಂ, ಸಮ್ಮಾಸಮ್ಬುದ್ಧದೇಸಿತಂ;

ಅಸೋಕಂ ವಿರಜಂ ಖೇಮಂ, ಯತ್ಥ ದುಕ್ಖಂ ನಿರುಜ್ಝತೀ’’ತಿ.

… ಬಾಕುಲೋ [ಬಾಕ್ಕುಲೋ (ಸೀ.)] ಥೇರೋ….

೪. ಧನಿಯತ್ಥೇರಗಾಥಾ

೨೨೮.

‘‘ಸುಖಂ ಚೇ ಜೀವಿತುಂ ಇಚ್ಛೇ, ಸಾಮಞ್ಞಸ್ಮಿಂ ಅಪೇಕ್ಖವಾ;

ಸಙ್ಘಿಕಂ ನಾತಿಮಞ್ಞೇಯ್ಯ, ಚೀವರಂ ಪಾನಭೋಜನಂ.

೨೨೯.

‘‘ಸುಖಂ ಚೇ ಜೀವಿತುಂ ಇಚ್ಛೇ, ಸಾಮಞ್ಞಸ್ಮಿಂ ಅಪೇಕ್ಖವಾ;

ಅಹಿ ಮೂಸಿಕಸೋಬ್ಭಂವ, ಸೇವೇಥ ಸಯನಾಸನಂ.

೨೩೦.

‘‘ಸುಖಂ ಚೇ ¶ ಜೀವಿತುಂ ಇಚ್ಛೇ, ಸಾಮಞ್ಞಸ್ಮಿಂ ಅಪೇಕ್ಖವಾ;

ಇತರೀತರೇನ ತುಸ್ಸೇಯ್ಯ, ಏಕಧಮ್ಮಞ್ಚ ಭಾವಯೇ’’ತಿ.

… ಧನಿಯೋ ಥೇರೋ….

೫. ಮಾತಙ್ಗಪುತ್ತತ್ಥೇರಗಾಥಾ

೨೩೧.

‘‘ಅತಿಸೀತಂ ಅತಿಉಣ್ಹಂ, ಅತಿಸಾಯಮಿದಂ ಅಹು;

ಇತಿ ವಿಸ್ಸಟ್ಠಕಮ್ಮನ್ತೇ, ಖಣಾ ಅಚ್ಚೇನ್ತಿ ಮಾಣವೇ.

೨೩೨.

‘‘ಯೋ ಚ ಸೀತಞ್ಚ ಉಣ್ಹಞ್ಚ, ತಿಣಾ ಭಿಯ್ಯೋ ನ ಮಞ್ಞತಿ;

ಕರಂ ಪುರಿಸಕಿಚ್ಚಾನಿ, ಸೋ ಸುಖಾ ನ ವಿಹಾಯತಿ.

೨೩೩.

‘‘ದಬ್ಬಂ ಕುಸಂ ಪೋಟಕಿಲಂ, ಉಸೀರಂ ಮುಞ್ಜಪಬ್ಬಜಂ;

ಉರಸಾ ಪನುದಿಸ್ಸಾಮಿ, ವಿವೇಕಮನುಬ್ರೂಹಯ’’ನ್ತಿ.

… ಮಾತಙ್ಗಪುತ್ತೋ ಥೇರೋ….

೬. ಖುಜ್ಜಸೋಭಿತತ್ಥೇರಗಾಥಾ

೨೩೪.

‘‘ಯೇ ಚಿತ್ತಕಥೀ ಬಹುಸ್ಸುತಾ, ಸಮಣಾ ಪಾಟಲಿಪುತ್ತವಾಸಿನೋ;

ತೇಸಞ್ಞತರೋಯಮಾಯುವಾ, ದ್ವಾರೇ ತಿಟ್ಠತಿ ಖುಜ್ಜಸೋಭಿತೋ.

೨೩೫.

‘‘ಯೇ ¶ ¶ ಚಿತ್ತಕಥೀ ಬಹುಸ್ಸುತಾ, ಸಮಣಾ ಪಾಟಲಿಪುತ್ತವಾಸಿನೋ;

ತೇಸಞ್ಞತರೋಯಮಾಯುವಾ, ದ್ವಾರೇ ತಿಟ್ಠತಿ ಮಾಲುತೇರಿತೋ.

೨೩೬.

‘‘ಸುಯುದ್ಧೇನ ಸುಯಿಟ್ಠೇನ, ಸಙ್ಗಾಮವಿಜಯೇನ ಚ;

ಬ್ರಹ್ಮಚರಿಯಾನುಚಿಣ್ಣೇನ, ಏವಾಯಂ ಸುಖಮೇಧತೀ’’ತಿ.

… ಖುಜ್ಜಸೋಭಿತೋ ಥೇರೋ….

೭. ವಾರಣತ್ಥೇರಗಾಥಾ

೨೩೭.

‘‘ಯೋಧ ¶ ಕೋಚಿ ಮನುಸ್ಸೇಸು, ಪರಪಾಣಾನಿ ಹಿಂಸತಿ;

ಅಸ್ಮಾ ಲೋಕಾ ಪರಮ್ಹಾ ಚ, ಉಭಯಾ ಧಂಸತೇ ನರೋ.

೨೩೮.

‘‘ಯೋ ಚ ಮೇತ್ತೇನ ಚಿತ್ತೇನ, ಸಬ್ಬಪಾಣಾನುಕಮ್ಪತಿ;

ಬಹುಞ್ಹಿ ಸೋ ಪಸವತಿ, ಪುಞ್ಞಂ ತಾದಿಸಕೋ ನರೋ.

೨೩೯.

‘‘ಸುಭಾಸಿತಸ್ಸ ಸಿಕ್ಖೇಥ, ಸಮಣೂಪಾಸನಸ್ಸ ಚ;

ಏಕಾಸನಸ್ಸ ಚ ರಹೋ, ಚಿತ್ತವೂಪಸಮಸ್ಸ ಚಾ’’ತಿ.

… ವಾರಣೋ ಥೇರೋ….

೮. ವಸ್ಸಿಕತ್ಥೇರಗಾಥಾ

೨೪೦.

‘‘ಏಕೋಪಿ ಸದ್ಧೋ ಮೇಧಾವೀ, ಅಸ್ಸದ್ಧಾನೀಧ ಞಾತಿನಂ;

ಧಮ್ಮಟ್ಠೋ ಸೀಲಸಮ್ಪನ್ನೋ, ಹೋತಿ ಅತ್ಥಾಯ ಬನ್ಧುನಂ.

೨೪೧.

‘‘ನಿಗ್ಗಯ್ಹ ಅನುಕಮ್ಪಾಯ, ಚೋದಿತಾ ಞಾತಯೋ ಮಯಾ;

ಞಾತಿಬನ್ಧವಪೇಮೇನ, ಕಾರಂ ಕತ್ವಾನ ಭಿಕ್ಖುಸು.

೨೪೨.

‘‘ತೇ ಅಬ್ಭತೀತಾ ಕಾಲಙ್ಕತಾ, ಪತ್ತಾ ತೇ ತಿದಿವಂ ಸುಖಂ;

ಭಾತರೋ ಮಯ್ಹಂ ಮಾತಾ ಚ, ಮೋದನ್ತಿ ಕಾಮಕಾಮಿನೋ’’ತಿ.

… ವಸ್ಸಿಕೋ [ಪಸ್ಸಿಕೋ (ಸೀ. ಸ್ಯಾ. ಪೀ.)] ಥೇರೋ….

೯. ಯಸೋಜತ್ಥೇರಗಾಥಾ

೨೪೩.

‘‘ಕಾಲಪಬ್ಬಙ್ಗಸಙ್ಕಾಸೋ, ಕಿಸೋ ಧಮನಿಸನ್ಥತೋ;

ಮತ್ತಞ್ಞೂ ¶ ಅನ್ನಪಾನಮ್ಹಿ, ಅದೀನಮನಸೋ ನರೋ’’.

೨೪೪.

‘‘ಫುಟ್ಠೋ ¶ ¶ ಡಂಸೇಹಿ ಮಕಸೇಹಿ, ಅರಞ್ಞಸ್ಮಿಂ ಬ್ರಹಾವನೇ;

ನಾಗೋ ಸಙ್ಗಾಮಸೀಸೇವ, ಸತೋ ತತ್ರಾಧಿವಾಸಯೇ.

೨೪೫.

‘‘ಯಥಾ ಬ್ರಹ್ಮಾ ತಥಾ ಏಕೋ, ಯಥಾ ದೇವೋ ತಥಾ ದುವೇ;

ಯಥಾ ಗಾಮೋ ತಥಾ ತಯೋ, ಕೋಲಾಹಲಂ ತತುತ್ತರಿ’’ನ್ತಿ.

… ಯಸೋಜೋ ಥೇರೋ….

೧೦. ಸಾಟಿಮತ್ತಿಯತ್ಥೇರಗಾಥಾ

೨೪೬.

‘‘ಅಹು ¶ ತುಯ್ಹಂ ಪುರೇ ಸದ್ಧಾ, ಸಾ ತೇ ಅಜ್ಜ ನ ವಿಜ್ಜತಿ;

ಯಂ ತುಯ್ಹಂ ತುಯ್ಹಮೇವೇತಂ, ನತ್ಥಿ ದುಚ್ಚರಿತಂ ಮಮ.

೨೪೭.

‘‘ಅನಿಚ್ಚಾ ಹಿ ಚಲಾ ಸದ್ದಾ, ಏವಂ ದಿಟ್ಠಾ ಹಿ ಸಾ ಮಯಾ;

ರಜ್ಜನ್ತಿಪಿ ವಿರಜ್ಜನ್ತಿ, ತತ್ಥ ಕಿಂ ಜಿಯ್ಯತೇ ಮುನಿ.

೨೪೮.

‘‘ಪಚ್ಚತಿ ಮುನಿನೋ ಭತ್ತಂ, ಥೋಕಂ ಥೋಕಂ ಕುಲೇ ಕುಲೇ;

ಪಿಣ್ಡಿಕಾಯ ಚರಿಸ್ಸಾಮಿ, ಅತ್ಥಿ ಜಙ್ಘಬಲಂ [ಜಙ್ಘಾಬಲಂ (ಸೀ.)] ಮಮಾ’’ತಿ.

… ಸಾಟಿಮತ್ತಿಯೋ ಥೇರೋ….

೧೧. ಉಪಾಲಿತ್ಥೇರಗಾಥಾ

೨೪೯.

‘‘ಸದ್ಧಾಯ ಅಭಿನಿಕ್ಖಮ್ಮ, ನವಪಬ್ಬಜಿತೋ ನವೋ;

ಮಿತ್ತೇ ಭಜೇಯ್ಯ ಕಲ್ಯಾಣೇ, ಸುದ್ಧಾಜೀವೇ ಅತನ್ದಿತೇ.

೨೫೦.

‘‘ಸದ್ಧಾಯ ಅಭಿನಿಕ್ಖಮ್ಮ, ನವಪಬ್ಬಜಿತೋ ನವೋ;

ಸಙ್ಘಸ್ಮಿಂ ವಿಹರಂ ಭಿಕ್ಖು, ಸಿಕ್ಖೇಥ ವಿನಯಂ ಬುಧೋ.

೨೫೧.

‘‘ಸದ್ಧಾಯ ಅಭಿನಿಕ್ಖಮ್ಮ, ನವಪಬ್ಬಜಿತೋ ನವೋ;

ಕಪ್ಪಾಕಪ್ಪೇಸು ಕುಸಲೋ, ಚರೇಯ್ಯ ಅಪುರಕ್ಖತೋ’’ತಿ.

… ಉಪಾಲಿತ್ಥೇರೋ….

೧೨. ಉತ್ತರಪಾಲತ್ಥೇರಗಾಥಾ

೨೫೨.

‘‘ಪಣ್ಡಿತಂ ¶ ವತ ಮಂ ಸನ್ತಂ, ಅಲಮತ್ಥವಿಚಿನ್ತಕಂ;

ಪಞ್ಚ ಕಾಮಗುಣಾ ಲೋಕೇ, ಸಮ್ಮೋಹಾ ಪಾತಯಿಂಸು ಮಂ.

೨೫೩.

‘‘ಪಕ್ಖನ್ದೋ ಮಾರವಿಸಯೇ, ದಳ್ಹಸಲ್ಲಸಮಪ್ಪಿತೋ;

ಅಸಕ್ಖಿಂ ಮಚ್ಚುರಾಜಸ್ಸ, ಅಹಂ ಪಾಸಾ ಪಮುಚ್ಚಿತುಂ.

೨೫೪.

‘‘ಸಬ್ಬೇ ¶ ಕಾಮಾ ಪಹೀನಾ ಮೇ, ಭವಾ ಸಬ್ಬೇ ಪದಾಲಿತಾ [ವಿದಾಲಿತಾ (ಸೀ. ಪೀ. ಅಟ್ಠ.)];

ವಿಕ್ಖೀಣೋ ಜಾತಿಸಂಸಾರೋ, ನತ್ಥಿ ದಾನಿ ಪುನಬ್ಭವೋ’’ತಿ.

… ಉತ್ತರಪಾಲೋ ಥೇರೋ….

೧೩. ಅಭಿಭೂತತ್ಥೇರಗಾಥಾ

೨೫೫.

‘‘ಸುಣಾಥ ಞಾತಯೋ ಸಬ್ಬೇ, ಯಾವನ್ತೇತ್ಥ ಸಮಾಗತಾ;

ಧಮ್ಮಂ ವೋ ದೇಸಯಿಸ್ಸಾಮಿ, ದುಕ್ಖಾ ಜಾತಿ ಪುನಪ್ಪುನಂ.

೨೫೬.

[ಸಂ. ನಿ. ೧.೧೮೫] ‘‘ಆರಮ್ಭಥ [ಆರಭಥ (ಸೀ. ಸ್ಯಾ.), ಆರಬ್ಭಥ (ಕ.)] ನಿಕ್ಕಮಥ, ಯುಞ್ಜಥ ಬುದ್ಧಸಾಸನೇ;

ಧುನಾಥ ಮಚ್ಚುನೋ ಸೇನಂ, ನಳಾಗಾರಂವ ಕುಞ್ಜರೋ.

೨೫೭.

‘‘ಯೋ ¶ ಇಮಸ್ಮಿಂ ಧಮ್ಮವಿನಯೇ, ಅಪ್ಪಮತ್ತೋ ವಿಹಸ್ಸತಿ [ವಿಹೇಸ್ಸತಿ (ಸ್ಯಾ. ಪೀ.)];

ಪಹಾಯ ಜಾತಿಸಂಸಾರಂ, ದುಕ್ಖಸ್ಸನ್ತಂ ಕರಿಸ್ಸತೀ’’ತಿ.

… ಅಭಿಭೂತೋ ಥೇರೋ….

೧೪. ಗೋತಮತ್ಥೇರಗಾಥಾ

೨೫೮.

‘‘ಸಂಸರಂ ¶ ಹಿ ನಿರಯಂ ಅಗಚ್ಛಿಸ್ಸಂ, ಪೇತಲೋಕಮಗಮಂ ಪುನಪ್ಪುನಂ;

ದುಕ್ಖಮಮ್ಹಿಪಿ ತಿರಚ್ಛಾನಯೋನಿಯಂ, ನೇಕಧಾ ಹಿ ವುಸಿತಂ ಚಿರಂ ಮಯಾ.

೨೫೯.

‘‘ಮಾನುಸೋಪಿ ಚ ಭವೋಭಿರಾಧಿತೋ, ಸಗ್ಗಕಾಯಮಗಮಂ ಸಕಿಂ ಸಕಿಂ;

ರೂಪಧಾತುಸು ¶ ಅರೂಪಧಾತುಸು, ನೇವಸಞ್ಞಿಸು ಅಸಞ್ಞಿಸುಟ್ಠಿತಂ.

೨೬೦.

‘‘ಸಮ್ಭವಾ ಸುವಿದಿತಾ ಅಸಾರಕಾ, ಸಙ್ಖತಾ ಪಚಲಿತಾ ಸದೇರಿತಾ;

ತಂ ವಿದಿತ್ವಾ ಮಹಮತ್ತಸಮ್ಭವಂ, ಸನ್ತಿಮೇವ ಸತಿಮಾ ಸಮಜ್ಝಗ’’ನ್ತಿ.

… ಗೋತಮೋ ಥೇರೋ….

೧೫. ಹಾರಿತತ್ಥೇರಗಾಥಾ

೨೬೧.

‘‘ಯೋ ಪುಬ್ಬೇ ಕರಣೀಯಾನಿ, ಪಚ್ಛಾ ಸೋ ಕಾತುಮಿಚ್ಛತಿ;

ಸುಖಾ ಸೋ ಧಂಸತೇ ಠಾನಾ, ಪಚ್ಛಾ ಚ ಮನುತಪ್ಪತಿ.

೨೬೨.

‘‘ಯಞ್ಹಿ ¶ ಕಯಿರಾ ತಞ್ಹಿ ವದೇ, ಯಂ ನ ಕಯಿರಾ ನ ತಂ ವದೇ;

ಅಕರೋನ್ತಂ ಭಾಸಮಾನಂ, ಪರಿಜಾನನ್ತಿ ಪಣ್ಡಿತಾ.

೨೬೩.

‘‘ಸುಸುಖಂ ವತ ನಿಬ್ಬಾನಂ, ಸಮ್ಮಾಸಮ್ಬುದ್ಧದೇಸಿತಂ;

ಅಸೋಕಂ ವಿರಜಂ ಖೇಮಂ, ಯತ್ಥ ದುಕ್ಖಂ ನಿರುಜ್ಝತೀ’’ತಿ.

… ಹಾರಿತೋ ಥೇರೋ….

೧೬. ವಿಮಲತ್ಥೇರಗಾಥಾ

೨೬೪.

‘‘ಪಾಪಮಿತ್ತೇ ವಿವಜ್ಜೇತ್ವಾ, ಭಜೇಯ್ಯುತ್ತಮಪುಗ್ಗಲಂ;

ಓವಾದೇ ಚಸ್ಸ ತಿಟ್ಠೇಯ್ಯ, ಪತ್ಥೇನ್ತೋ ಅಚಲಂ ಸುಖಂ.

೨೬೫.

‘‘ಪರಿತ್ತಂ ದಾರುಮಾರುಯ್ಹ, ಯಥಾ ಸೀದೇ ಮಹಣ್ಣವೇ;

ಏವಂ ಕುಸೀತಮಾಗಮ್ಮ, ಸಾಧುಜೀವೀಪಿ ಸೀದತಿ;

ತಸ್ಮಾ ತಂ ಪರಿವಜ್ಜೇಯ್ಯ, ಕುಸೀತಂ ಹೀನವೀರಿಯಂ.

೨೬೬.

‘‘ಪವಿವಿತ್ತೇಹಿ ¶ ಅರಿಯೇಹಿ, ಪಹಿತತ್ತೇಹಿ ಝಾಯಿಭಿ;

ನಿಚ್ಚಂ ¶ ಆರದ್ಧವೀರಿಯೇಹಿ, ಪಣ್ಡಿತೇಹಿ ಸಹಾವಸೇ’’ತಿ.

… ವಿಮಲೋ ಥೇರೋ….

ತಿಕನಿಪಾತೋ ನಿಟ್ಠಿತೋ.

ತತ್ರುದ್ದಾನಂ –

ಅಙ್ಗಣಿಕೋ ಭಾರದ್ವಾಜೋ, ಪಚ್ಚಯೋ ಬಾಕುಲೋ ಇಸಿ;

ಧನಿಯೋ ಮಾತಙ್ಗಪುತ್ತೋ, ಸೋಭಿತೋ ವಾರಣೋ ಇಸಿ.

ವಸ್ಸಿಕೋ ಚ ಯಸೋಜೋ ಚ, ಸಾಟಿಮತ್ತಿಯುಪಾಲಿ ಚ;

ಉತ್ತರಪಾಲೋ ಅಭಿಭೂತೋ, ಗೋತಮೋ ಹಾರಿತೋಪಿ ಚ.

ಥೇರೋ ತಿಕನಿಪಾತಮ್ಹಿ, ನಿಬ್ಬಾನೇ ವಿಮಲೋ ಕತೋ;

ಅಟ್ಠತಾಲೀಸ ಗಾಥಾಯೋ, ಥೇರಾ ಸೋಳಸ ಕಿತ್ತಿತಾತಿ.

೪. ಚತುಕನಿಪಾತೋ

೧. ನಾಗಸಮಾಲತ್ಥೇರಗಾಥಾ

೨೬೭.

‘‘ಅಲಙ್ಕತಾ ¶ ¶ ¶ ಸುವಸನಾ, ಮಾಲಿನೀ ಚನ್ದನುಸ್ಸದಾ;

ಮಜ್ಝೇ ಮಹಾಪಥೇ ನಾರೀ, ತುರಿಯೇ ನಚ್ಚತಿ ನಟ್ಟಕೀ.

೨೬೮.

‘‘ಪಿಣ್ಡಿಕಾಯ ಪವಿಟ್ಠೋಹಂ, ಗಚ್ಛನ್ತೋ ನಂ ಉದಿಕ್ಖಿಸಂ;

ಅಲಙ್ಕತಂ ಸುವಸನಂ, ಮಚ್ಚುಪಾಸಂವ ಓಡ್ಡಿತಂ.

೨೬೯.

‘‘ತತೋ ಮೇ ಮನಸೀಕಾರೋ, ಯೋನಿಸೋ ಉದಪಜ್ಜಥ;

ಆದೀನವೋ ಪಾತುರಹು, ನಿಬ್ಬಿದಾ ಸಮತಿಟ್ಠಥ [ಸಮ್ಪತಿಟ್ಠಥ (ಕ.)].

೨೭೦.

‘‘ತತೋ ಚಿತ್ತಂ ವಿಮುಚ್ಚಿ ಮೇ, ಪಸ್ಸ ಧಮ್ಮಸುಧಮ್ಮತಂ;

ತಿಸ್ಸೋ ¶ ವಿಜ್ಜಾ ಅನುಪ್ಪತ್ತಾ, ಕತಂ ಬುದ್ಧಸ್ಸ ಸಾಸನ’’ನ್ತಿ.

… ನಾಗಸಮಾಲೋ ಥೇರೋ….

೨. ಭಗುತ್ಥೇರಗಾಥಾ

೨೭೧.

‘‘ಅಹಂ ಮಿದ್ಧೇನ ಪಕತೋ, ವಿಹಾರಾ ಉಪನಿಕ್ಖಮಿಂ;

ಚಙ್ಕಮಂ ಅಭಿರುಹನ್ತೋ, ತತ್ಥೇವ ಪಪತಿಂ ಛಮಾ.

೨೭೨.

‘‘ಗತ್ತಾನಿ ಪರಿಮಜ್ಜಿತ್ವಾ, ಪುನಪಾರುಯ್ಹ ಚಙ್ಕಮಂ;

ಚಙ್ಕಮೇ ಚಙ್ಕಮಿಂ ಸೋಹಂ, ಅಜ್ಝತ್ತಂ ಸುಸಮಾಹಿತೋ.

೨೭೩.

‘‘ತತೋ ಮೇ ಮನಸೀಕಾರೋ, ಯೋನಿಸೋ ಉದಪಜ್ಜಥ;

ಆದೀನವೋ ಪಾತುರಹು, ನಿಬ್ಬಿದಾ ಸಮತಿಟ್ಠಥ.

೨೭೪.

‘‘ತತೋ ಚಿತ್ತಂ ವಿಮುಚ್ಚಿ ಮೇ, ಪಸ್ಸ ಧಮ್ಮಸುಧಮ್ಮತಂ;

ತಿಸ್ಸೋ ವಿಜ್ಜಾ ಅನುಪ್ಪತ್ತಾ, ಕತಂ ಬುದ್ಧಸ್ಸ ಸಾಸನ’’ನ್ತಿ.

… ಭಗುತ್ಥೇರೋ….

೩. ಸಭಿಯತ್ಥೇರಗಾಥಾ

೨೭೫.

[ಧ. ಪ. ೬ ಧಮ್ಮಪದೇಪಿ] ‘‘ಪರೇ ಚ ನ ವಿಜಾನನ್ತಿ, ಮಯಮೇತ್ಥ ಯಮಾಮಸೇ;

ಯೇ ಚ ತತ್ಥ ವಿಜಾನನ್ತಿ, ತತೋ ಸಮ್ಮನ್ತಿ ಮೇಧಗಾ.

೨೭೬.

‘‘ಯದಾ ¶ ಚ ಅವಿಜಾನನ್ತಾ, ಇರಿಯನ್ತ್ಯಮರಾ ವಿಯ;

ವಿಜಾನನ್ತಿ ಚ ಯೇ ಧಮ್ಮಂ, ಆತುರೇಸು ಅನಾತುರಾ.

೨೭೭.

‘‘ಯಂ ¶ ಕಿಞ್ಚಿ ಸಿಥಿಲಂ ಕಮ್ಮಂ, ಸಂಕಿಲಿಟ್ಠಞ್ಚ ಯಂ ವತಂ;

ಸಙ್ಕಸ್ಸರಂ ಬ್ರಹ್ಮಚರಿಯಂ, ನ ತಂ ಹೋತಿ ಮಹಪ್ಫಲಂ.

೨೭೮.

‘‘ಯಸ್ಸ ಸಬ್ರಹ್ಮಚಾರೀಸು, ಗಾರವೋ ನೂಪಲಬ್ಭತಿ;

ಆರಕಾ ಹೋತಿ ಸದ್ಧಮ್ಮಾ, ನಭಂ ಪುಥವಿಯಾ ಯಥಾ’’ತಿ.

… ಸಭಿಯೋ ಥೇರೋ….

೪. ನನ್ದಕತ್ಥೇರಗಾಥಾ

೨೭೯.

‘‘ಧಿರತ್ಥು ¶ ಪೂರೇ ದುಗ್ಗನ್ಧೇ, ಮಾರಪಕ್ಖೇ ಅವಸ್ಸುತೇ;

ನವಸೋತಾನಿ ತೇ ಕಾಯೇ, ಯಾನಿ ಸನ್ದನ್ತಿ ಸಬ್ಬದಾ.

೨೮೦.

‘‘ಮಾ ¶ ಪುರಾಣಂ ಅಮಞ್ಞಿತ್ಥೋ, ಮಾಸಾದೇಸಿ ತಥಾಗತೇ;

ಸಗ್ಗೇಪಿ ತೇ ನ ರಜ್ಜನ್ತಿ, ಕಿಮಙ್ಗಂ ಪನ [ಕಿಮಙ್ಗ ಪನ (ಸೀ.)] ಮಾನುಸೇ.

೨೮೧.

‘‘ಯೇ ಚ ಖೋ ಬಾಲಾ ದುಮ್ಮೇಧಾ, ದುಮ್ಮನ್ತೀ ಮೋಹಪಾರುತಾ;

ತಾದಿಸಾ ತತ್ಥ ರಜ್ಜನ್ತಿ, ಮಾರಖಿತ್ತಮ್ಹಿ ಬನ್ಧನೇ.

೨೮೨.

‘‘ಯೇಸಂ ರಾಗೋ ಚ ದೋಸೋ ಚ, ಅವಿಜ್ಜಾ ಚ ವಿರಾಜಿತಾ;

ತಾದೀ ತತ್ಥ ನ ರಜ್ಜನ್ತಿ, ಛಿನ್ನಸುತ್ತಾ ಅಬನ್ಧನಾ’’ತಿ.

… ನನ್ದಕೋ ಥೇರೋ….

೫. ಜಮ್ಬುಕತ್ಥೇರಗಾಥಾ

೨೮೩.

‘‘ಪಞ್ಚಪಞ್ಞಾಸವಸ್ಸಾನಿ, ರಜೋಜಲ್ಲಮಧಾರಯಿಂ;

ಭುಞ್ಜನ್ತೋ ಮಾಸಿಕಂ ಭತ್ತಂ, ಕೇಸಮಸ್ಸುಂ ಅಲೋಚಯಿಂ.

೨೮೪.

‘‘ಏಕಪಾದೇನ ಅಟ್ಠಾಸಿಂ, ಆಸನಂ ಪರಿವಜ್ಜಯಿಂ;

ಸುಕ್ಖಗೂಥಾನಿ ಚ ಖಾದಿಂ, ಉದ್ದೇಸಞ್ಚ ನ ಸಾದಿಯಿಂ.

೨೮೫.

‘‘ಏತಾದಿಸಂ ಕರಿತ್ವಾನ, ಬಹುಂ ದುಗ್ಗತಿಗಾಮಿನಂ;

ವುಯ್ಹಮಾನೋ ಮಹೋಘೇನ, ಬುದ್ಧಂ ಸರಣಮಾಗಮಂ.

೨೮೬.

‘‘ಸರಣಗಮನಂ ಪಸ್ಸ, ಪಸ್ಸ ಧಮ್ಮಸುಧಮ್ಮತಂ;

ತಿಸ್ಸೋ ವಿಜ್ಜಾ ಅನುಪ್ಪತ್ತಾ, ಕತಂ ಬುದ್ಧಸ್ಸ ಸಾಸನ’’ನ್ತಿ.

… ಜಮ್ಬುಕೋ ಥೇರೋ….

೬. ಸೇನಕತ್ಥೇರಗಾಥಾ

೨೮೭.

‘‘ಸ್ವಾಗತಂ ¶ ¶ ವತ ಮೇ ಆಸಿ, ಗಯಾಯಂ ಗಯಫಗ್ಗುಯಾ;

ಯಂ ಅದ್ದಸಾಸಿಂ ಸಮ್ಬುದ್ಧಂ, ದೇಸೇನ್ತಂ ಧಮ್ಮಮುತ್ತಮಂ.

೨೮೮.

‘‘ಮಹಪ್ಪಭಂ ¶ ಗಣಾಚರಿಯಂ, ಅಗ್ಗಪತ್ತಂ ವಿನಾಯಕಂ;

ಸದೇವಕಸ್ಸ ಲೋಕಸ್ಸ, ಜಿನಂ ಅತುಲದಸ್ಸನಂ.

೨೮೯.

‘‘ಮಹಾನಾಗಂ ಮಹಾವೀರಂ, ಮಹಾಜುತಿಮನಾಸವಂ;

ಸಬ್ಬಾಸವಪರಿಕ್ಖೀಣಂ, ಸತ್ಥಾರಮಕುತೋಭಯಂ.

೨೯೦.

‘‘ಚಿರಸಂಕಿಲಿಟ್ಠಂ ವತ ಮಂ, ದಿಟ್ಠಿಸನ್ದಾನಬನ್ಧಿತಂ [ಸನ್ಧಿತಂ (ಸೀ. ಸ್ಯಾ.), ಸನ್ದಿತಂ (ಪೀ. ಸೀ. ಅಟ್ಠ.)];

ವಿಮೋಚಯಿ ಸೋ ಭಗವಾ, ಸಬ್ಬಗನ್ಥೇಹಿ ಸೇನಕ’’ನ್ತಿ.

… ಸೇನಕೋ ಥೇರೋ….

೭. ಸಮ್ಭೂತತ್ಥೇರಗಾಥಾ

೨೯೧.

‘‘ಯೋ ದನ್ಧಕಾಲೇ ತರತಿ, ತರಣೀಯೇ ಚ ದನ್ಧಯೇ;

ಅಯೋನಿ [ಅಯೋನಿಸೋ (ಸ್ಯಾ.)] ಸಂವಿಧಾನೇನ, ಬಾಲೋ ದುಕ್ಖಂ ನಿಗಚ್ಛತಿ.

೨೯೨.

‘‘ತಸ್ಸತ್ಥಾ ಪರಿಹಾಯನ್ತಿ, ಕಾಳಪಕ್ಖೇವ ಚನ್ದಿಮಾ;

ಆಯಸಕ್ಯಞ್ಚ [ಆಯಸಸ್ಯಞ್ಚ (ಸೀ.)] ಪಪ್ಪೋತಿ, ಮಿತ್ತೇಹಿ ಚ ವಿರುಜ್ಝತಿ.

೨೯೩.

‘‘ಯೋ ದನ್ಧಕಾಲೇ ದನ್ಧೇತಿ, ತರಣೀಯೇ ಚ ತಾರಯೇ;

ಯೋನಿಸೋ ಸಂವಿಧಾನೇನ, ಸುಖಂ ಪಪ್ಪೋತಿ ಪಣ್ಡಿತೋ.

೨೯೪.

‘‘ತಸ್ಸತ್ಥಾ ಪರಿಪೂರೇನ್ತಿ, ಸುಕ್ಕಪಕ್ಖೇವ ಚನ್ದಿಮಾ;

ಯಸೋ ಕಿತ್ತಿಞ್ಚ ಪಪ್ಪೋತಿ, ಮಿತ್ತೇಹಿ ನ ವಿರುಜ್ಝತೀ’’ತಿ.

… ಸಮ್ಭೂತೋ ಥೇರೋ….

೮. ರಾಹುಲತ್ಥೇರಗಾಥಾ

೨೯೫.

‘‘ಉಭಯೇನೇವ ¶ ಸಮ್ಪನ್ನೋ, ರಾಹುಲಭದ್ದೋತಿ ಮಂ ವಿದೂ;

ಯಞ್ಚಮ್ಹಿ ಪುತ್ತೋ ಬುದ್ಧಸ್ಸ, ಯಞ್ಚ ಧಮ್ಮೇಸು ಚಕ್ಖುಮಾ.

೨೯೬.

‘‘ಯಞ್ಚ ಮೇ ಆಸವಾ ಖೀಣಾ, ಯಞ್ಚ ನತ್ಥಿ ಪುನಬ್ಭವೋ;

ಅರಹಾ ¶ ದಕ್ಖಿಣೇಯ್ಯೋಮ್ಹಿ, ತೇವಿಜ್ಜೋ ಅಮತದ್ದಸೋ.

೨೯೭.

‘‘ಕಾಮನ್ಧಾ ¶ ಜಾಲಪಚ್ಛನ್ನಾ, ತಣ್ಹಾಛಾದನಛಾದಿತಾ;

ಪಮತ್ತಬನ್ಧುನಾ ಬದ್ಧಾ, ಮಚ್ಛಾವ ಕುಮಿನಾಮುಖೇ.

೨೯೮.

‘‘ತಂ ¶ ಕಾಮಂ ಅಹಮುಜ್ಝಿತ್ವಾ, ಛೇತ್ವಾ ಮಾರಸ್ಸ ಬನ್ಧನಂ;

ಸಮೂಲಂ ತಣ್ಹಮಬ್ಬುಯ್ಹ, ಸೀತಿಭೂತೋಸ್ಮಿ ನಿಬ್ಬುತೋ’’ತಿ.

… ರಾಹುಲೋ ಥೇರೋ….

೯. ಚನ್ದನತ್ಥೇರಗಾಥಾ

೨೯೯.

‘‘ಜಾತರೂಪೇನ ಸಞ್ಛನ್ನಾ [ಪಚ್ಛನ್ನಾ (ಸೀ.)], ದಾಸೀಗಣಪುರಕ್ಖತಾ;

ಅಙ್ಕೇನ ಪುತ್ತಮಾದಾಯ, ಭರಿಯಾ ಮಂ ಉಪಾಗಮಿ.

೩೦೦.

‘‘ತಞ್ಚ ದಿಸ್ವಾನ ಆಯನ್ತಿಂ, ಸಕಪುತ್ತಸ್ಸ ಮಾತರಂ;

ಅಲಙ್ಕತಂ ಸುವಸನಂ, ಮಚ್ಚುಪಾಸಂವ ಓಡ್ಡಿತಂ.

೩೦೧.

‘‘ತತೋ ಮೇ ಮನಸೀಕಾರೋ, ಯೋನಿಸೋ ಉದಪಜ್ಜಥ;

ಆದೀನವೋ ಪಾತುರಹು, ನಿಬ್ಬಿದಾ ಸಮತಿಟ್ಠಥ.

೩೦೨.

‘‘ತತೋ ಚಿತ್ತಂ ವಿಮುಚ್ಚಿ ಮೇ, ಪಸ್ಸ ಧಮ್ಮಸುಧಮ್ಮತಂ;

ತಿಸ್ಸೋ ವಿಜ್ಜಾ ಅನುಪ್ಪತ್ತಾ, ಕತಂ ಬುದ್ಧಸ್ಸ ಸಾಸನ’’ನ್ತಿ.

… ಚನ್ದನೋ ಥೇರೋ….

೧೦. ಧಮ್ಮಿಕತ್ಥೇರಗಾಥಾ

೩೦೩.

[ಜಾ. ೧.೧೦.೧೦೨ ಜಾತಕೇಪಿ] ‘‘ಧಮ್ಮೋ ಹವೇ ರಕ್ಖತಿ ಧಮ್ಮಚಾರಿಂ, ಧಮ್ಮೋ ಸುಚಿಣ್ಣೋ ಸುಖಮಾವಹತಿ;

ಏಸಾನಿಸಂಸೋ ಧಮ್ಮೇ ಸುಚಿಣ್ಣೇ, ನ ದುಗ್ಗತಿಂ ಗಚ್ಛತಿ ಧಮ್ಮಚಾರೀ.

೩೦೪.

[ಜಾ. ೧.೧೫.೩೮೫] ‘‘ನಹಿ ಧಮ್ಮೋ ಅಧಮ್ಮೋ ಚ, ಉಭೋ ಸಮವಿಪಾಕಿನೋ;

ಅಧಮ್ಮೋ ¶ ನಿರಯಂ ನೇತಿ, ಧಮ್ಮೋ ಪಾಪೇತಿ ಸುಗ್ಗತಿಂ.

೩೦೫.

‘‘ತಸ್ಮಾ ಹಿ ಧಮ್ಮೇಸು ಕರೇಯ್ಯ ಛನ್ದಂ, ಇತಿ ಮೋದಮಾನೋ ಸುಗತೇನ ತಾದಿನಾ;

ಧಮ್ಮೇ ಠಿತಾ ಸುಗತವರಸ್ಸ ಸಾವಕಾ, ನೀಯನ್ತಿ ಧೀರಾ ಸರಣವರಗ್ಗಗಾಮಿನೋ.

೩೦೬.

‘‘ವಿಪ್ಫೋಟಿತೋ ¶ ಗಣ್ಡಮೂಲೋ, ತಣ್ಹಾಜಾಲೋ ಸಮೂಹತೋ;

ಸೋ ಖೀಣಸಂಸಾರೋ ನ ಚತ್ಥಿ ಕಿಞ್ಚನಂ,

ಚನ್ದೋ ಯಥಾ ದೋಸಿನಾ ಪುಣ್ಣಮಾಸಿಯ’’ನ್ತಿ.

… ಧಮ್ಮಿಕೋ ಥೇರೋ….

೧೧. ಸಪ್ಪಕತ್ಥೇರಗಾಥಾ

೩೦೭.

‘‘ಯದಾ ಬಲಾಕಾ ಸುಚಿಪಣ್ಡರಚ್ಛದಾ, ಕಾಳಸ್ಸ ಮೇಘಸ್ಸ ಭಯೇನ ತಜ್ಜಿತಾ;

ಪಲೇಹಿತಿ ಆಲಯಮಾಲಯೇಸಿನೀ, ತದಾ ನದೀ ಅಜಕರಣೀ ರಮೇತಿ ಮಂ.

೩೦೮.

‘‘ಯದಾ ¶ ¶ ಬಲಾಕಾ ಸುವಿಸುದ್ಧಪಣ್ಡರಾ, ಕಾಳಸ್ಸ ಮೇಘಸ್ಸ ಭಯೇನ ತಜ್ಜಿತಾ;

ಪರಿಯೇಸತಿ ಲೇಣಮಲೇಣದಸ್ಸಿನೀ, ತದಾ ನದೀ ಅಜಕರಣೀ ರಮೇತಿ ಮಂ.

೩೦೯.

‘‘ಕಂ ನು ತತ್ಥ ನ ರಮೇನ್ತಿ, ಜಮ್ಬುಯೋ ಉಭತೋ ತಹಿಂ;

ಸೋಭೇನ್ತಿ ಆಪಗಾಕೂಲಂ, ಮಮ ಲೇಣಸ್ಸ [ಮಹಾಲೇಣಸ್ಸ (ಸ್ಯಾ. ಕ.)] ಪಚ್ಛತೋ.

೩೧೦.

‘‘ತಾ ಮತಮದಸಙ್ಘಸುಪ್ಪಹೀನಾ,

ಭೇಕಾ ¶ ಮನ್ದವತೀ ಪನಾದಯನ್ತಿ;

‘ನಾಜ್ಜ ಗಿರಿನದೀಹಿ ವಿಪ್ಪವಾಸಸಮಯೋ,

ಖೇಮಾ ಅಜಕರಣೀ ಸಿವಾ ಸುರಮ್ಮಾ’’’ತಿ.

… ಸಪ್ಪಕೋ ಥೇರೋ….

೧೨. ಮುದಿತತ್ಥೇರಗಾಥಾ

೩೧೧.

‘‘ಪಬ್ಬಜಿಂ ಜೀವಿಕತ್ಥೋಹಂ, ಲದ್ಧಾನ ಉಪಸಮ್ಪದಂ;

ತತೋ ಸದ್ಧಂ ಪಟಿಲಭಿಂ, ದಳ್ಹವೀರಿಯೋ ಪರಕ್ಕಮಿಂ.

೩೧೨.

‘‘ಕಾಮಂ ಭಿಜ್ಜತುಯಂ ಕಾಯೋ, ಮಂಸಪೇಸೀ ವಿಸೀಯರುಂ [ವಿಸಿಯನ್ತು (ಕ.)];

ಉಭೋ ಜಣ್ಣುಕಸನ್ಧೀಹಿ, ಜಙ್ಘಾಯೋ ಪಪತನ್ತು ಮೇ.

೩೧೩.

‘‘ನಾಸಿಸ್ಸಂ ¶ ನ ಪಿವಿಸ್ಸಾಮಿ, ವಿಹಾರಾ ಚ ನ ನಿಕ್ಖಮೇ;

ನಪಿ ಪಸ್ಸಂ ನಿಪಾತೇಸ್ಸಂ, ತಣ್ಹಾಸಲ್ಲೇ ಅನೂಹತೇ.

೩೧೪.

‘‘ತಸ್ಸ ಮೇವಂ ವಿಹರತೋ, ಪಸ್ಸ ವೀರಿಯಪರಕ್ಕಮಂ;

ತಿಸ್ಸೋ ವಿಜ್ಜಾ ಅನುಪ್ಪತ್ತಾ, ಕತಂ ಬುದ್ಧಸ್ಸ ಸಾಸನ’’ನ್ತಿ.

… ಮುದಿತೋ ಥೇರೋ….

ಚತುಕ್ಕನಿಪಾತೋ ನಿಟ್ಠಿತೋ.

ತತ್ರುದ್ದಾನಂ –

ನಾಗಸಮಾಲೋ ಭಗು ಚ, ಸಭಿಯೋ ನನ್ದಕೋಪಿ ಚ;

ಜಮ್ಬುಕೋ ಸೇನಕೋ ಥೇರೋ, ಸಮ್ಭೂತೋ ರಾಹುಲೋಪಿ ಚ.

ಭವತಿ ಚನ್ದನೋ ಥೇರೋ, ದಸೇತೇ [ಇದಾನಿ ನವೇವ ಥೇರಾ ದಿಸ್ಸನ್ತಿ] ಬುದ್ಧಸಾವಕಾ;

ಧಮ್ಮಿಕೋ ಸಪ್ಪಕೋ ಥೇರೋ, ಮುದಿತೋ ಚಾಪಿ ತೇ ತಯೋ;

ಗಾಥಾಯೋ ದ್ವೇ ಚ ಪಞ್ಞಾಸ, ಥೇರಾ ಸಬ್ಬೇಪಿ ತೇರಸಾತಿ [ಇದಾನಿ ದ್ವಾದಸೇವ ಥೇರಾ ದಿಸ್ಸನ್ತಿ].

೫. ಪಞ್ಚಕನಿಪಾತೋ

೧. ರಾಜದತ್ತತ್ಥೇರಗಾಥಾ

೩೧೫.

‘‘ಭಿಕ್ಖು ¶ ¶ ¶ ¶ ಸಿವಥಿಕಂ [ಸೀವಥಿಕಂ (ಸೀ. ಸ್ಯಾ. ಪೀ.)] ಗನ್ತ್ವಾ, ಅದ್ದಸ ಇತ್ಥಿಮುಜ್ಝಿತಂ;

ಅಪವಿದ್ಧಂ ಸುಸಾನಸ್ಮಿಂ, ಖಜ್ಜನ್ತಿಂ ಕಿಮಿಹೀ ಫುಟಂ.

೩೧೬.

‘‘ಯಞ್ಹಿ ಏಕೇ ಜಿಗುಚ್ಛನ್ತಿ, ಮತಂ ದಿಸ್ವಾನ ಪಾಪಕಂ;

ಕಾಮರಾಗೋ ಪಾತುರಹು, ಅನ್ಧೋವ ಸವತೀ [ವಸತೀ (ಸೀ.)] ಅಹುಂ.

೩೧೭.

‘‘ಓರಂ ಓದನಪಾಕಮ್ಹಾ, ತಮ್ಹಾ ಠಾನಾ ಅಪಕ್ಕಮಿಂ;

ಸತಿಮಾ ಸಮ್ಪಜಾನೋಹಂ, ಏಕಮನ್ತಂ ಉಪಾವಿಸಿಂ.

೩೧೮.

‘‘ತತೋ ಮೇ ಮನಸೀಕಾರೋ, ಯೋನಿಸೋ ಉದಪಜ್ಜಥ;

ಆದೀನವೋ ಪಾತುರಹು, ನಿಬ್ಬಿದಾ ಸಮತಿಟ್ಠಥ.

೩೧೯.

‘‘ತತೋ ಚಿತ್ತಂ ವಿಮುಚ್ಚಿ ಮೇ, ಪಸ್ಸ ಧಮ್ಮಸುಧಮ್ಮತಂ;

ತಿಸ್ಸೋ ವಿಜ್ಜಾ ಅನುಪ್ಪತ್ತಾ, ಕತಂ ಬುದ್ಧಸ್ಸ ಸಾಸನ’’ನ್ತಿ.

… ರಾಜದತ್ತೋ ಥೇರೋ….

೨. ಸುಭೂತತ್ಥೇರಗಾಥಾ

೩೨೦.

‘‘ಅಯೋಗೇ ಯುಞ್ಜಮತ್ತಾನಂ, ಪುರಿಸೋ ಕಿಚ್ಚಮಿಚ್ಛಕೋ [ಕಿಚ್ಚಮಿಚ್ಛತೋ (ಸೀ.), ಕಿಚ್ಚಮಿಚ್ಛಯಂ (ಕತ್ಥಚಿ)];

ಚರಂ ಚೇ ನಾಧಿಗಚ್ಛೇಯ್ಯ, ‘ತಂ ಮೇ ದುಬ್ಭಗಲಕ್ಖಣಂ’.

೩೨೧.

‘‘ಅಬ್ಬೂಳ್ಹಂ ಅಘಗತಂ ವಿಜಿತಂ, ಏಕಞ್ಚೇ ಓಸ್ಸಜೇಯ್ಯ ಕಲೀವ ಸಿಯಾ;

ಸಬ್ಬಾನಿಪಿ ಚೇ ಓಸ್ಸಜೇಯ್ಯ ಅನ್ಧೋವ ಸಿಯಾ, ಸಮವಿಸಮಸ್ಸ ಅದಸ್ಸನತೋ.

೩೨೨.

‘‘ಯಞ್ಹಿ ¶ ಕಯಿರಾ ತಞ್ಹಿ ವದೇ, ಯಂ ನ ಕಯಿರಾ ನ ತಂ ವದೇ;

ಅಕರೋನ್ತಂ ಭಾಸಮಾನಂ, ಪರಿಜಾನನ್ತಿ ಪಣ್ಡಿತಾ.

೩೨೩.

[ಧ. ಪ. ೫೧ ಧಮ್ಮಪದೇಪಿ] ‘‘ಯಥಾಪಿ ರುಚಿರಂ ಪುಪ್ಫಂ, ವಣ್ಣವನ್ತಂ ಅಗನ್ಧಕಂ;

ಏವಂ ಸುಭಾಸಿತಾ ವಾಚಾ, ಅಫಲಾ ಹೋತಿ ಅಕುಬ್ಬತೋ.

೩೨೪.

[ಧ. ಪ. ೫೨] ‘‘ಯಥಾಪಿ ¶ ರುಚಿರಂ ಪುಪ್ಫಂ, ವಣ್ಣವನ್ತಂ ಸುಗನ್ಧಕಂ [ಸಗನ್ಧಕಂ (ಸೀ. ಸ್ಯಾ. ಪೀ.)];

ಏವಂ ಸುಭಾಸಿತಾ ವಾಚಾ, ಸಫಲಾ ಹೋತಿ ಕುಬ್ಬತೋ’’ತಿ [ಸಕುಬ್ಬತೋ (ಸೀ. ಪೀ.), ಸುಕುಬ್ಬತೋ (ಸ್ಯಾ.)].

… ಸುಭೂತೋ ಥೇರೋ….

೩. ಗಿರಿಮಾನನ್ದತ್ಥೇರಗಾಥಾ

೩೨೫.

‘‘ವಸ್ಸತಿ ¶ ¶ ದೇವೋ ಯಥಾ ಸುಗೀತಂ, ಛನ್ನಾ ಮೇ ಕುಟಿಕಾ ಸುಖಾ ನಿವಾತಾ;

ತಸ್ಸಂ ವಿಹರಾಮಿ ವೂಪಸನ್ತೋ, ಅಥ ಚೇ ಪತ್ಥಯಸೀ ಪವಸ್ಸ ದೇವ.

೩೨೬.

‘‘ವಸ್ಸತಿ ದೇವೋ ಯಥಾ ಸುಗೀತಂ, ಛನ್ನಾ ಮೇ ಕುಟಿಕಾ ಸುಖಾ ನಿವಾತಾ;

ತಸ್ಸಂ ವಿಹರಾಮಿ ಸನ್ತಚಿತ್ತೋ, ಅಥ ಚೇ ಪತ್ಥಯಸೀ ಪವಸ್ಸ ದೇವ.

೩೨೭.

‘‘ವಸ್ಸತಿ ದೇವೋ…ಪೇ… ತಸ್ಸಂ ವಿಹರಾಮಿ ವೀತರಾಗೋ…ಪೇ….

೩೨೮.

‘‘ವಸ್ಸತಿ ದೇವೋ…ಪೇ… ತಸ್ಸಂ ವಿಹರಾಮಿ ವೀತದೋಸೋ…ಪೇ….

೩೨೯.

‘‘ವಸ್ಸತಿ ದೇವೋ…ಪೇ… ತಸ್ಸಂ ¶ ವಿಹರಾಮಿ ವೀತಮೋಹೋ;

ಅಥ ಚೇ ಪತ್ಥಯಸೀ ಪವಸ್ಸ ದೇವಾ’’ತಿ.

… ಗಿರಿಮಾನನ್ದೋ ಥೇರೋ….

೪. ಸುಮನತ್ಥೇರಗಾಥಾ

೩೩೦.

‘‘ಯಂ ಪತ್ಥಯಾನೋ ಧಮ್ಮೇಸು, ಉಪಜ್ಝಾಯೋ ಅನುಗ್ಗಹಿ;

ಅಮತಂ ಅಭಿಕಙ್ಖನ್ತಂ, ಕತಂ ಕತ್ತಬ್ಬಕಂ ಮಯಾ.

೩೩೧.

‘‘ಅನುಪ್ಪತ್ತೋ ಸಚ್ಛಿಕತೋ, ಸಯಂ ಧಮ್ಮೋ ಅನೀತಿಹೋ;

ವಿಸುದ್ಧಿಞಾಣೋ ನಿಕ್ಕಙ್ಖೋ, ಬ್ಯಾಕರೋಮಿ ತವನ್ತಿಕೇ.

೩೩೨.

‘‘ಪುಬ್ಬೇನಿವಾಸಂ ಜಾನಾಮಿ, ದಿಬ್ಬಚಕ್ಖು ವಿಸೋಧಿತಂ;

ಸದತ್ಥೋ ಮೇ ಅನುಪ್ಪತ್ತೋ, ಕತಂ ಬುದ್ಧಸ್ಸ ಸಾಸನಂ.

೩೩೩.

‘‘ಅಪ್ಪಮತ್ತಸ್ಸ ಮೇ ಸಿಕ್ಖಾ, ಸುಸ್ಸುತಾ ತವ ಸಾಸನೇ;

ಸಬ್ಬೇ ಮೇ ಆಸವಾ ಖೀಣಾ, ನತ್ಥಿ ದಾನಿ ಪುನಬ್ಭವೋ.

೩೩೪.

‘‘ಅನುಸಾಸಿ ¶ ಮಂ ಅರಿಯವತಾ, ಅನುಕಮ್ಪಿ ಅನುಗ್ಗಹಿ;

ಅಮೋಘೋ ತುಯ್ಹಮೋವಾದೋ, ಅನ್ತೇವಾಸಿಮ್ಹಿ ಸಿಕ್ಖಿತೋ’’ತಿ.

… ಸುಮನೋ ಥೇರೋ….

೫. ವಡ್ಢತ್ಥೇರಗಾಥಾ

೩೩೫.

‘‘ಸಾಧೂ ಹಿ ಕಿರ ಮೇ ಮಾತಾ, ಪತೋದಂ ಉಪದಂಸಯಿ;

ಯಸ್ಸಾಹಂ ವಚನಂ ಸುತ್ವಾ, ಅನುಸಿಟ್ಠೋ ಜನೇತ್ತಿಯಾ;

ಆರದ್ಧವೀರಿಯೋ ಪಹಿತತ್ತೋ, ಪತ್ತೋ ಸಮ್ಬೋಧಿಮುತ್ತಮಂ.

೩೩೬.

‘‘ಅರಹಾ ¶ ದಕ್ಖಿಣೇಯ್ಯೋಮ್ಹಿ, ತೇವಿಜ್ಜೋ ಅಮತದ್ದಸೋ;

ಜೇತ್ವಾ ನಮುಚಿನೋ ಸೇನಂ, ವಿಹರಾಮಿ ಅನಾಸವೋ.

೩೩೭.

‘‘ಅಜ್ಝತ್ತಞ್ಚ ¶ ಬಹಿದ್ಧಾ ಚ, ಯೇ ಮೇ ವಿಜ್ಜಿಂಸು ಆಸವಾ;

ಸಬ್ಬೇ ಅಸೇಸಾ ಉಚ್ಛಿನ್ನಾ, ನ ಚ ಉಪ್ಪಜ್ಜರೇ ಪುನ.

೩೩೮.

‘‘ವಿಸಾರದಾ ಖೋ ಭಗಿನೀ, ಏತಮತ್ಥಂ ಅಭಾಸಯಿ;

‘ಅಪಿಹಾ ನೂನ ಮಯಿಪಿ, ವನಥೋ ತೇ ನ ವಿಜ್ಜತಿ’.

೩೩೯.

‘‘ಪರಿಯನ್ತಕತಂ ದುಕ್ಖಂ, ಅನ್ತಿಮೋಯಂ ಸಮುಸ್ಸಯೋ;

ಜಾತಿಮರಣಸಂಸಾರೋ, ನತ್ಥಿ ದಾನಿ ಪುನಬ್ಭವೋ’’ತಿ.

… ವಡ್ಢೋ ಥೇರೋ….

೬. ನದೀಕಸ್ಸಪತ್ಥೇರಗಾಥಾ

೩೪೦.

‘‘ಅತ್ಥಾಯ ವತ ಮೇ ಬುದ್ಧೋ, ನದಿಂ ನೇರಞ್ಜರಂ ಅಗಾ;

ಯಸ್ಸಾಹಂ ಧಮ್ಮಂ ಸುತ್ವಾನ, ಮಿಚ್ಛಾದಿಟ್ಠಿಂ ವಿವಜ್ಜಯಿಂ.

೩೪೧.

‘‘ಯಜಿಂ ¶ ಉಚ್ಚಾವಚೇ ಯಞ್ಞೇ, ಅಗ್ಗಿಹುತ್ತಂ ಜುಹಿಂ ಅಹಂ;

‘ಏಸಾ ಸುದ್ಧೀ’ತಿ ಮಞ್ಞನ್ತೋ, ಅನ್ಧಭೂತೋ [ಅನ್ಧೀಭೂತೋ (ಕ.)] ಪುಥುಜ್ಜನೋ.

೩೪೨.

‘‘ದಿಟ್ಠಿಗಹನಪಕ್ಖನ್ದೋ [ಪಕ್ಖನ್ತೋ (ಸೀ.), ಪಕ್ಖನ್ನೋ (ಸ್ಯಾ. ಪೀ.)], ಪರಾಮಾಸೇನ ಮೋಹಿತೋ;

ಅಸುದ್ಧಿಂ ಮಞ್ಞಿಸಂ ಸುದ್ಧಿಂ, ಅನ್ಧಭೂತೋ ಅವಿದ್ದಸು.

೩೪೩.

‘‘ಮಿಚ್ಛಾದಿಟ್ಠಿ ಪಹೀನಾ ಮೇ, ಭವಾ ಸಬ್ಬೇ ಪದಾಲಿತಾ [ವಿದಾಲಿತಾ (ಕ.)];

ಜುಹಾಮಿ ದಕ್ಖಿಣೇಯ್ಯಗ್ಗಿಂ, ನಮಸ್ಸಾಮಿ ತಥಾಗತಂ.

೩೪೪.

‘‘ಮೋಹಾ ¶ ಸಬ್ಬೇ ಪಹೀನಾ ಮೇ, ಭವತಣ್ಹಾ ಪದಾಲಿತಾ;

ವಿಕ್ಖೀಣೋ ಜಾತಿಸಂಸಾರೋ, ನತ್ಥಿ ದಾನಿ ಪುನಬ್ಭವೋ’’ತಿ.

… ನದೀಕಸ್ಸಪೋ ಥೇರೋ….

೭. ಗಯಾಕಸ್ಸಪತ್ಥೇರಗಾಥಾ

೩೪೫.

‘‘ಪಾತೋ ಮಜ್ಝನ್ಹಿಕಂ ಸಾಯಂ, ತಿಕ್ಖತ್ತುಂ ದಿವಸಸ್ಸಹಂ;

ಓತರಿಂ ಉದಕಂ ಸೋಹಂ, ಗಯಾಯ ಗಯಫಗ್ಗುಯಾ.

೩೪೬.

‘‘‘ಯಂ ¶ ಮಯಾ ಪಕತಂ ಪಾಪಂ, ಪುಬ್ಬೇ ಅಞ್ಞಾಸು ಜಾತಿಸು;

ತಂ ದಾನೀಧ ಪವಾಹೇಮಿ’, ಏವಂದಿಟ್ಠಿ ಪುರೇ ಅಹುಂ.

೩೪೭.

‘‘ಸುತ್ವಾ ¶ ಸುಭಾಸಿತಂ ವಾಚಂ, ಧಮ್ಮತ್ಥಸಹಿತಂ ಪದಂ;

ತಥಂ ಯಾಥಾವಕಂ ಅತ್ಥಂ, ಯೋನಿಸೋ ಪಚ್ಚವೇಕ್ಖಿಸಂ;

೩೪೮.

‘‘ನಿನ್ಹಾತಸಬ್ಬಪಾಪೋಮ್ಹಿ, ನಿಮ್ಮಲೋ ಪಯತೋ ಸುಚಿ;

ಸುದ್ಧೋ ಸುದ್ಧಸ್ಸ ದಾಯಾದೋ, ಪುತ್ತೋ ಬುದ್ಧಸ್ಸ ಓರಸೋ.

೩೪೯.

‘‘ಓಗಯ್ಹಟ್ಠಙ್ಗಿಕಂ ಸೋತಂ, ಸಬ್ಬಪಾಪಂ ಪವಾಹಯಿಂ;

ತಿಸ್ಸೋ ವಿಜ್ಜಾ ಅಜ್ಝಗಮಿಂ, ಕತಂ ಬುದ್ಧಸ್ಸ ಸಾಸನ’’ನ್ತಿ.

… ಗಯಾಕಸ್ಸಪೋ ಥೇರೋ….

೮. ವಕ್ಕಲಿತ್ಥೇರಗಾಥಾ

೩೫೦.

‘‘ವಾತರೋಗಾಭಿನೀತೋ ತ್ವಂ, ವಿಹರಂ ಕಾನನೇ ವನೇ;

ಪವಿಟ್ಠಗೋಚರೇ ಲೂಖೇ, ಕಥಂ ಭಿಕ್ಖು ಕರಿಸ್ಸಸಿ.

೩೫೧.

‘‘ಪೀತಿಸುಖೇನ ವಿಪುಲೇನ, ಫರಮಾನೋ ಸಮುಸ್ಸಯಂ;

ಲೂಖಮ್ಪಿ ಅಭಿಸಮ್ಭೋನ್ತೋ, ವಿಹರಿಸ್ಸಾಮಿ ಕಾನನೇ.

೩೫೨.

‘‘ಭಾವೇನ್ತೋ ಸತಿಪಟ್ಠಾನೇ, ಇನ್ದ್ರಿಯಾನಿ ಬಲಾನಿ ಚ;

ಬೋಜ್ಝಙ್ಗಾನಿ ಚ ಭಾವೇನ್ತೋ, ವಿಹರಿಸ್ಸಾಮಿ ಕಾನನೇ.

೩೫೩.

‘‘ಆರದ್ಧವೀರಿಯೇ ಪಹಿತತ್ತೇ, ನಿಚ್ಚಂ ದಳ್ಹಪರಕ್ಕಮೇ [ಆರದ್ಧವೀರಿಯೋ ಪಹಿತತ್ತೋ, ನಿಚ್ಚಂ ದಳ್ಹಪರಕ್ಕಮೋ (ಸೀ.)];

ಸಮಗ್ಗೇ ಸಹಿತೇ ದಿಸ್ವಾ, ವಿಹರಿಸ್ಸಾಮಿ ಕಾನನೇ.

೩೫೪.

‘‘ಅನುಸ್ಸರನ್ತೋ ಸಮ್ಬುದ್ಧಂ, ಅಗ್ಗಂ ದನ್ತಂ ಸಮಾಹಿತಂ;

ಅತನ್ದಿತೋ ¶ ರತ್ತಿನ್ದಿವಂ, ವಿಹರಿಸ್ಸಾಮಿ ಕಾನನೇ’’ತಿ.

… ವಕ್ಕಲಿತ್ಥೇರೋ….

೯. ವಿಜಿತಸೇನತ್ಥೇರಗಾಥಾ

೩೫೫.

‘‘ಓಲಗ್ಗೇಸ್ಸಾಮಿ ¶ ತೇ ಚಿತ್ತ, ಆಣಿದ್ವಾರೇವ ಹತ್ಥಿನಂ;

ನ ತಂ ಪಾಪೇ ನಿಯೋಜೇಸ್ಸಂ, ಕಾಮಜಾಲ [ಕಾಮಜಾಲಂ (ಸ್ಯಾ.)] ಸರೀರಜ [ಸರೀರಜಂ (ಸ್ಯಾ. ಕ.)].

೩೫೬.

‘‘ತ್ವಂ ¶ ಓಲಗ್ಗೋ ನ ಗಚ್ಛಸಿ [ನ ಗಞ್ಛಿಸಿ (ಪೀ)], ದ್ವಾರವಿವರಂ ಗಜೋವ ಅಲಭನ್ತೋ;

ನ ಚ ಚಿತ್ತಕಲಿ ಪುನಪ್ಪುನಂ, ಪಸಕ್ಕ [ಪಸಹಂ (ಸೀ. ಸ್ಯಾ. ಪೀ.)] ಪಾಪರತೋ ಚರಿಸ್ಸಸಿ.

೩೫೭.

‘‘ಯಥಾ ಕುಞ್ಜರಂ ಅದನ್ತಂ, ನವಗ್ಗಹಮಙ್ಕುಸಗ್ಗಹೋ;

ಬಲವಾ ಆವತ್ತೇತಿ ಅಕಾಮಂ, ಏವಂ ಆವತ್ತಯಿಸ್ಸಂ ತಂ.

೩೫೮.

‘‘ಯಥಾ ವರಹಯದಮಕುಸಲೋ, ಸಾರಥಿ ಪವರೋ ದಮೇತಿ ಆಜಞ್ಞಂ;

ಏವಂ ದಮಯಿಸ್ಸಂ ತಂ, ಪತಿಟ್ಠಿತೋ ಪಞ್ಚಸು ಬಲೇಸು.

೩೫೯.

‘‘ಸತಿಯಾ ¶ ತಂ ನಿಬನ್ಧಿಸ್ಸಂ, ಪಯುತ್ತೋ ತೇ ದಮೇಸ್ಸಾಮಿ [ಪಯತತ್ತೋ ವೋದಪೇಸ್ಸಾಮಿ (ಸೀ.)];

ವೀರಿಯಧುರನಿಗ್ಗಹಿತೋ, ನ ಯಿತೋ ದೂರಂ ¶ ಗಮಿಸ್ಸಸೇ ಚಿತ್ತಾ’’ತಿ.

… ವಿಜಿತಸೇನೋ ಥೇರೋ….

೧೦. ಯಸದತ್ತತ್ಥೇರಗಾಥಾ

೩೬೦.

‘‘ಉಪಾರಮ್ಭಚಿತ್ತೋ ದುಮ್ಮೇಧೋ, ಸುಣಾತಿ ಜಿನಸಾಸನಂ;

ಆರಕಾ ಹೋತಿ ಸದ್ಧಮ್ಮಾ, ನಭಸೋ ಪಥವೀ ಯಥಾ.

೩೬೧.

‘‘ಉಪಾರಮ್ಭಚಿತ್ತೋ ದುಮ್ಮೇಧೋ, ಸುಣಾತಿ ಜಿನಸಾಸನಂ;

ಪರಿಹಾಯತಿ ಸದ್ಧಮ್ಮಾ, ಕಾಳಪಕ್ಖೇವ ಚನ್ದಿಮಾ.

೩೬೨.

‘‘ಉಪಾರಮ್ಭಚಿತ್ತೋ ದುಮ್ಮೇಧೋ, ಸುಣಾತಿ ಜಿನಸಾಸನಂ;

ಪರಿಸುಸ್ಸತಿ ಸದ್ಧಮ್ಮೇ, ಮಚ್ಛೋ ಅಪ್ಪೋದಕೇ ಯಥಾ.

೩೬೩.

‘‘ಉಪಾರಮ್ಭಚಿತ್ತೋ ದುಮ್ಮೇಧೋ, ಸುಣಾತಿ ಜಿನಸಾಸನಂ;

ನ ವಿರೂಹತಿ ಸದ್ಧಮ್ಮೇ, ಖೇತ್ತೇ ಬೀಜಂವ ಪೂತಿಕಂ.

೩೬೪.

‘‘ಯೋ ಚ ತುಟ್ಠೇನ ಚಿತ್ತೇನ, ಸುಣಾತಿ ಜಿನಸಾಸನಂ;

ಖೇಪೇತ್ವಾ ಆಸವೇ ಸಬ್ಬೇ, ಸಚ್ಛಿಕತ್ವಾ ಅಕುಪ್ಪತಂ;

ಪಪ್ಪುಯ್ಯ ಪರಮಂ ಸನ್ತಿಂ, ಪರಿನಿಬ್ಬಾತಿನಾಸವೋ’’ತಿ.

… ಯಸದತ್ತೋ ಥೇರೋ….

೧೧. ಸೋಣಕುಟಿಕಣ್ಣತ್ಥೇರಗಾಥಾ

೩೬೫.

‘‘ಉಪಸಮ್ಪದಾ ¶ ಚ ಮೇ ಲದ್ಧಾ, ವಿಮುತ್ತೋ ಚಮ್ಹಿ ಅನಾಸವೋ;

ಸೋ ಚ ಮೇ ಭಗವಾ ದಿಟ್ಠೋ, ವಿಹಾರೇ ಚ ಸಹಾವಸಿಂ.

೩೬೬.

‘‘ಬಹುದೇವ ರತ್ತಿಂ ಭಗವಾ, ಅಬ್ಭೋಕಾಸೇತಿನಾಮಯಿ;

ವಿಹಾರಕುಸಲೋ ಸತ್ಥಾ, ವಿಹಾರಂ ಪಾವಿಸೀ ತದಾ.

೩೬೭.

‘‘ಸನ್ಥರಿತ್ವಾನ ಸಙ್ಘಾಟಿಂ, ಸೇಯ್ಯಂ ಕಪ್ಪೇಸಿ ಗೋತಮೋ;

ಸೀಹೋ ¶ ಸೇಲಗುಹಾಯಂವ, ಪಹೀನಭಯಭೇರವೋ.

೩೬೮.

‘‘ತತೋ ಕಲ್ಯಾಣವಾಕ್ಕರಣೋ, ಸಮ್ಮಾಸಮ್ಬುದ್ಧಸಾವಕೋ;

ಸೋಣೋ ಅಭಾಸಿ ಸದ್ಧಮ್ಮಂ, ಬುದ್ಧಸೇಟ್ಠಸ್ಸ ಸಮ್ಮುಖಾ.

೩೬೯.

‘‘ಪಞ್ಚಕ್ಖನ್ಧೇ ಪರಿಞ್ಞಾಯ, ಭಾವಯಿತ್ವಾನ ಅಞ್ಜಸಂ;

ಪಪ್ಪುಯ್ಯ ಪರಮಂ ಸನ್ತಿಂ, ಪರಿನಿಬ್ಬಿಸ್ಸತ್ಯನಾಸವೋ’’ತಿ.

… ಸೋಣೋ ಕುಟಿಕಣ್ಣಥೇರೋ….

೧೨. ಕೋಸಿಯತ್ಥೇರಗಾಥಾ

೩೭೦.

‘‘ಯೋ ¶ ¶ ವೇ ಗರೂನಂ ವಚನಞ್ಞು ಧೀರೋ, ವಸೇ ಚ ತಮ್ಹಿ ಜನಯೇಥ ಪೇಮಂ;

ಸೋ ಭತ್ತಿಮಾ ನಾಮ ಚ ಹೋತಿ ಪಣ್ಡಿತೋ, ಞತ್ವಾ ಚ ಧಮ್ಮೇಸು ವಿಸೇಸಿ ಅಸ್ಸ.

೩೭೧.

‘‘ಯಂ ಆಪದಾ ಉಪ್ಪತಿತಾ ಉಳಾರಾ, ನಕ್ಖಮ್ಭಯನ್ತೇ ಪಟಿಸಙ್ಖಯನ್ತಂ;

ಸೋ ಥಾಮವಾ ನಾಮ ಚ ಹೋತಿ ಪಣ್ಡಿತೋ, ಞತ್ವಾ ಚ ಧಮ್ಮೇಸು ವಿಸೇಸಿ ಅಸ್ಸ.

೩೭೨.

‘‘ಯೋ ವೇ ಸಮುದ್ದೋವ ಠಿತೋ ಅನೇಜೋ, ಗಮ್ಭೀರಪಞ್ಞೋ ನಿಪುಣತ್ಥದಸ್ಸೀ;

ಅಸಂಹಾರಿಯೋ ನಾಮ ಚ ಹೋತಿ ಪಣ್ಡಿತೋ, ಞತ್ವಾ ಚ ಧಮ್ಮೇಸು ವಿಸೇಸಿ ಅಸ್ಸ.

೩೭೩.

‘‘ಬಹುಸ್ಸುತೋ ಧಮ್ಮಧರೋ ಚ ಹೋತಿ, ಧಮ್ಮಸ್ಸ ¶ ಹೋತಿ ಅನುಧಮ್ಮಚಾರೀ;

ಸೋ ತಾದಿಸೋ ನಾಮ ಚ ಹೋತಿ ಪಣ್ಡಿತೋ, ಞತ್ವಾ ಚ ಧಮ್ಮೇಸು ವಿಸೇಸಿ ಅಸ್ಸ.

೩೭೪.

‘‘ಅತ್ಥಞ್ಚ ¶ ಯೋ ಜಾನಾತಿ ಭಾಸಿತಸ್ಸ, ಅತ್ಥಞ್ಚ ಞತ್ವಾನ ತಥಾ ಕರೋತಿ;

ಅತ್ಥನ್ತರೋ ನಾಮ ಸ ಹೋತಿ ಪಣ್ಡಿತೋ, ಞತ್ವಾ ಚ ಧಮ್ಮೇಸು ವಿಸೇಸಿ ಅಸ್ಸಾ’’ತಿ.

… ಕೋಸಿಯೋ ಥೇರೋ….

ಪಞ್ಚಕನಿಪಾತೋ ನಿಟ್ಠಿತೋ.

ತತ್ರುದ್ದಾನಂ –

ರಾಜದತ್ತೋ ಸುಭೂತೋ ಚ, ಗಿರಿಮಾನನ್ದಸುಮನಾ;

ವಡ್ಢೋ ಚ ಕಸ್ಸಪೋ ಥೇರೋ, ಗಯಾಕಸ್ಸಪವಕ್ಕಲೀ.

ವಿಜಿತೋ ಯಸದತ್ತೋ ಚ, ಸೋಣೋ ಕೋಸಿಯಸವ್ಹಯೋ;

ಸಟ್ಠಿ ಚ ಪಞ್ಚ ಗಾಥಾಯೋ, ಥೇರಾ ಚ ಏತ್ಥ ದ್ವಾದಸಾತಿ.

೬. ಛಕ್ಕನಿಪಾತೋ

೧. ಉರುವೇಳಕಸ್ಸಪತ್ಥೇರಗಾಥಾ

೩೭೫.

‘‘ದಿಸ್ವಾನ ¶ ¶ ¶ ಪಾಟಿಹೀರಾನಿ, ಗೋತಮಸ್ಸ ಯಸಸ್ಸಿನೋ;

ನ ತಾವಾಹಂ ಪಣಿಪತಿಂ, ಇಸ್ಸಾಮಾನೇನ ವಞ್ಚಿತೋ.

೩೭೬.

‘‘ಮಮ ಸಙ್ಕಪ್ಪಮಞ್ಞಾಯ, ಚೋದೇಸಿ ನರಸಾರಥಿ;

ತತೋ ¶ ಮೇ ಆಸಿ ಸಂವೇಗೋ, ಅಬ್ಭುತೋ ಲೋಮಹಂಸನೋ.

೩೭೭.

‘‘ಪುಬ್ಬೇ ಜಟಿಲಭೂತಸ್ಸ, ಯಾ ಮೇ ಸಿದ್ಧಿ ಪರಿತ್ತಿಕಾ;

ತಾಹಂ ತದಾ ನಿರಾಕತ್ವಾ [ನಿರಂಕತ್ವಾ (ಸ್ಯಾ. ಕ.)], ಪಬ್ಬಜಿಂ ಜಿನಸಾಸನೇ.

೩೭೮.

‘‘ಪುಬ್ಬೇ ಯಞ್ಞೇನ ಸನ್ತುಟ್ಠೋ, ಕಾಮಧಾತುಪುರಕ್ಖತೋ;

ಪಚ್ಛಾ ರಾಗಞ್ಚ ದೋಸಞ್ಚ, ಮೋಹಞ್ಚಾಪಿ ಸಮೂಹನಿಂ.

೩೭೯.

‘‘ಪುಬ್ಬೇನಿವಾಸಂ ಜಾನಾಮಿ, ದಿಬ್ಬಚಕ್ಖು ವಿಸೋಧಿತಂ;

ಇದ್ಧಿಮಾ ಪರಚಿತ್ತಞ್ಞೂ, ದಿಬ್ಬಸೋತಞ್ಚ ಪಾಪುಣಿಂ.

೩೮೦.

‘‘ಯಸ್ಸ ಚತ್ಥಾಯ ಪಬ್ಬಜಿತೋ, ಅಗಾರಸ್ಮಾನಗಾರಿಯಂ;

ಸೋ ಮೇ ಅತ್ಥೋ ಅನುಪ್ಪತ್ತೋ, ಸಬ್ಬಸಂಯೋಜನಕ್ಖಯೋ’’ತಿ.

… ಉರುವೇಳಕಸ್ಸಪೋ ಥೇರೋ….

೨. ತೇಕಿಚ್ಛಕಾರಿತ್ಥೇರಗಾಥಾ

೩೮೧.

‘‘ಅತಿಹಿತಾ ವೀಹಿ, ಖಲಗತಾ ಸಾಲೀ;

ನ ಚ ಲಭೇ ಪಿಣ್ಡಂ, ಕಥಮಹಂ ಕಸ್ಸಂ.

೩೮೨.

‘‘ಬುದ್ಧಮಪ್ಪಮೇಯ್ಯಂ ಅನುಸ್ಸರ ಪಸನ್ನೋ;

ಪೀತಿಯಾ ಫುಟಸರೀರೋ ಹೋಹಿಸಿ ಸತತಮುದಗ್ಗೋ.

೩೮೩.

‘‘ಧಮ್ಮಮಪ್ಪಮೇಯ್ಯಂ ಅನುಸ್ಸರ ಪಸನ್ನೋ;

ಪೀತಿಯಾ ಫುಟಸರೀರೋ ಹೋಹಿಸಿ ಸತತಮುದಗ್ಗೋ.

೩೮೪.

‘‘ಸಙ್ಘಮಪ್ಪಮೇಯ್ಯಂ ಅನುಸ್ಸರ ಪಸನ್ನೋ;

ಪೀತಿಯಾ ಫುಟಸರೀರೋ ಹೋಹಿಸಿ ಸತತಮುದಗ್ಗೋ.

೩೮೫.

‘‘ಅಬ್ಭೋಕಾಸೇ ¶ ¶ ವಿಹರಸಿ, ಸೀತಾ ಹೇಮನ್ತಿಕಾ ಇಮಾ ರತ್ಯೋ;

ಮಾ ಸೀತೇನ ಪರೇತೋ ವಿಹಞ್ಞಿತ್ಥೋ, ಪವಿಸ ¶ ತ್ವಂ ವಿಹಾರಂ ಫುಸಿತಗ್ಗಳಂ.

೩೮೬.

‘‘ಫುಸಿಸ್ಸಂ ಚತಸ್ಸೋ ಅಪ್ಪಮಞ್ಞಾಯೋ, ತಾಹಿ ಚ ಸುಖಿತೋ ವಿಹರಿಸ್ಸಂ;

ನಾಹಂ ಸೀತೇನ ವಿಹಞ್ಞಿಸ್ಸಂ, ಅನಿಞ್ಜಿತೋ ವಿಹರನ್ತೋ’’ತಿ.

… ತೇಕಿಚ್ಛಕಾರೀ [ತೇಕಿಚ್ಛಕಾನಿ (ಸೀ. ಸ್ಯಾ. ಪೀ.)] ಥೇರೋ….

೩. ಮಹಾನಾಗತ್ಥೇರಗಾಥಾ

೩೮೭.

‘‘ಯಸ್ಸ ¶ ಸಬ್ರಹ್ಮಚಾರೀಸು, ಗಾರವೋ ನೂಪಲಬ್ಭತಿ;

ಪರಿಹಾಯತಿ ಸದ್ಧಮ್ಮಾ, ಮಚ್ಛೋ ಅಪ್ಪೋದಕೇ ಯಥಾ.

೩೮೮.

‘‘ಯಸ್ಸ ಸಬ್ರಹ್ಮಚಾರೀಸು, ಗಾರವೋ ನೂಪಲಬ್ಭತಿ;

ನ ವಿರೂಹತಿ ಸದ್ಧಮ್ಮೇ, ಖೇತ್ತೇ ಬೀಜಂವ ಪೂತಿಕಂ.

೩೮೯.

‘‘ಯಸ್ಸ ಸಬ್ರಹ್ಮಚಾರೀಸು, ಗಾರವೋ ನೂಪಲಬ್ಭತಿ;

ಆರಕಾ ಹೋತಿ ನಿಬ್ಬಾನಾ [ನಿಬ್ಬಾಣಾ (ಸೀ.)], ಧಮ್ಮರಾಜಸ್ಸ ಸಾಸನೇ.

೩೯೦.

‘‘ಯಸ್ಸ ಸಬ್ರಹ್ಮಚಾರೀಸು, ಗಾರವೋ ಉಪಲಬ್ಭತಿ;

ನ ವಿಹಾಯತಿ ಸದ್ಧಮ್ಮಾ, ಮಚ್ಛೋ ಬವ್ಹೋದಕೇ [ಬಹ್ವೋದಕೇ (ಸೀ.), ಬಹೋದಕೇ (ಸ್ಯಾ.)] ಯಥಾ.

೩೯೧.

‘‘ಯಸ್ಸ ಸಬ್ರಹ್ಮಚಾರೀಸು, ಗಾರವೋ ಉಪಲಬ್ಭತಿ;

ಸೋ ವಿರೂಹತಿ ಸದ್ಧಮ್ಮೇ, ಖೇತ್ತೇ ಬೀಜಂವ ಭದ್ದಕಂ.

೩೯೨.

‘‘ಯಸ್ಸ ಸಬ್ರಹ್ಮಚಾರೀಸು, ಗಾರವೋ ಉಪಲಬ್ಭತಿ;

ಸನ್ತಿಕೇ ಹೋತಿ ನಿಬ್ಬಾನಂ [ನಿಬ್ಬಾಣಂ (ಸೀ.)], ಧಮ್ಮರಾಜಸ್ಸ ಸಾಸನೇ’’ತಿ.

… ಮಹಾನಾಗೋ ಥೇರೋ….

೪. ಕುಲ್ಲತ್ಥೇರಗಾಥಾ

೩೯೩.

‘‘ಕುಲ್ಲೋ ಸಿವಥಿಕಂ ಗನ್ತ್ವಾ, ಅದ್ದಸ ಇತ್ಥಿಮುಜ್ಝಿತಂ;

ಅಪವಿದ್ಧಂ ¶ ಸುಸಾನಸ್ಮಿಂ, ಖಜ್ಜನ್ತಿಂ ಕಿಮಿಹೀ ಫುಟಂ.

೩೯೪.

‘‘ಆತುರಂ ¶ ಅಸುಚಿಂ ಪೂತಿಂ, ಪಸ್ಸ ಕುಲ್ಲ ಸಮುಸ್ಸಯಂ;

ಉಗ್ಘರನ್ತಂ ಪಗ್ಘರನ್ತಂ, ಬಾಲಾನಂ ಅಭಿನನ್ದಿತಂ.

೩೯೫.

‘‘ಧಮ್ಮಾದಾಸಂ ಗಹೇತ್ವಾನ, ಞಾಣದಸ್ಸನಪತ್ತಿಯಾ;

ಪಚ್ಚವೇಕ್ಖಿಂ ಇಮಂ ಕಾಯಂ, ತುಚ್ಛಂ ಸನ್ತರಬಾಹಿರಂ.

೩೯೬.

‘‘ಯಥಾ ಇದಂ ತಥಾ ಏತಂ, ಯಥಾ ಏತಂ ತಥಾ ಇದಂ;

ಯಥಾ ಅಧೋ ತಥಾ ಉದ್ಧಂ, ಯಥಾ ಉದ್ಧಂ ತಥಾ ಅಧೋ.

೩೯೭.

‘‘ಯಥಾ ¶ ದಿವಾ ತಥಾ ರತ್ತಿಂ, ಯಥಾ ರತ್ತಿಂ ತಥಾ ದಿವಾ;

ಯಥಾ ಪುರೇ ತಥಾ ಪಚ್ಛಾ, ಯಥಾ ಪಚ್ಛಾ ತಥಾ ಪುರೇ.

೩೯೮.

‘‘ಪಞ್ಚಙ್ಗಿಕೇನ ತುರಿಯೇನ, ನ ರತೀ ಹೋತಿ ತಾದಿಸೀ;

ಯಥಾ ಏಕಗ್ಗಚಿತ್ತಸ್ಸ, ಸಮ್ಮಾ ಧಮ್ಮಂ ವಿಪಸ್ಸತೋ’’ತಿ.

… ಕುಲ್ಲೋ ಥೇರೋ….

೫. ಮಾಲುಕ್ಯಪುತ್ತತ್ಥೇರಗಾಥಾ

೩೯೯.

‘‘ಮನುಜಸ್ಸ ಪಮತ್ತಚಾರಿನೋ, ತಣ್ಹಾ ವಡ್ಢತಿ ಮಾಲುವಾ ವಿಯ;

ಸೋ ಪ್ಲವತೀ [ಪ್ಲವತಿ (ಸೀ. ಪೀ. ಕ.), ಪರಿಪ್ಲವತಿ (ಸ್ಯಾ.)] ಹುರಾ ಹುರಂ, ಫಲಮಿಚ್ಛಂವ ವನಸ್ಮಿ ವಾನರೋ.

೪೦೦.

‘‘ಯಂ ಏಸಾ ಸಹತೇ [ಸಹತಿ (ಪೀ. ಕ.)] ಜಮ್ಮೀ, ತಣ್ಹಾ ಲೋಕೇ ವಿಸತ್ತಿಕಾ;

ಸೋಕಾ ತಸ್ಸ ಪವಡ್ಢನ್ತಿ, ಅಭಿವಟ್ಠಂವ [ಅಭಿವುಟ್ಠಂವ (ಸ್ಯಾ.), ಅಭಿವಡ್ಢಂವ (ಕ.)] ಬೀರಣಂ.

೪೦೧.

‘‘ಯೋ ಚೇತಂ ಸಹತೇ [ಸಹತಿ (ಪೀ. ಕ.)] ಜಮ್ಮಿಂ, ತಣ್ಹಂ ಲೋಕೇ ದುರಚ್ಚಯಂ;

ಸೋಕಾ ತಮ್ಹಾ ಪಪತನ್ತಿ, ಉದಬಿನ್ದೂವ ಪೋಕ್ಖರಾ.

೪೦೨.

‘‘ತಂ ¶ ವೋ ವದಾಮಿ ಭದ್ದಂ ವೋ, ಯಾವನ್ತೇತ್ಥ ಸಮಾಗತಾ;

ತಣ್ಹಾಯ ¶ ಮೂಲಂ ಖಣಥ, ಉಸೀರತ್ಥೋವ ಬೀರಣಂ;

ಮಾ ವೋ ನಳಂವ ಸೋತೋವ, ಮಾರೋ ಭಞ್ಜಿ ಪುನಪ್ಪುನಂ.

೪೦೩.

‘‘ಕರೋಥ ಬುದ್ಧವಚನಂ, ಖಣೋ ವೋ ಮಾ ಉಪಚ್ಚಗಾ;

ಖಣಾತೀತಾ ಹಿ ಸೋಚನ್ತಿ, ನಿರಯಮ್ಹಿ ಸಮಪ್ಪಿತಾ.

೪೦೪.

‘‘ಪಮಾದೋ ರಜೋ ಪಮಾದೋ [ಸಬ್ಬದಾ (ಸೀ. ಕ.), ಸುತ್ತನಿಪಾತಟ್ಠಕಥಾಯಂ ಉಟ್ಠಾನಸುತ್ತವಣ್ಣನಾ ಓಲೋಕೇತಬ್ಬಾ], ಪಮಾದಾನುಪತಿತೋ ರಜೋ;

ಅಪ್ಪಮಾದೇನ ವಿಜ್ಜಾಯ, ಅಬ್ಬಹೇ ಸಲ್ಲಮತ್ತನೋ’’ತಿ.

… ಮಾಲುಕ್ಯಪುತ್ತೋ [ಮಾಲುಙ್ಕ್ಯಪುತ್ತೋ (ಸೀ. ಸ್ಯಾ. ಪೀ.)] ಥೇರೋ….

೬. ಸಪ್ಪದಾಸತ್ಥೇರಗಾಥಾ

೪೦೫.

‘‘ಪಣ್ಣವೀಸತಿವಸ್ಸಾನಿ ¶ , ಯತೋ ಪಬ್ಬಜಿತೋ ಅಹಂ;

ಅಚ್ಛರಾಸಙ್ಘಾತಮತ್ತಮ್ಪಿ, ಚೇತೋಸನ್ತಿಮನಜ್ಝಗಂ.

೪೦೬.

‘‘ಅಲದ್ಧಾ ಚಿತ್ತಸ್ಸೇಕಗ್ಗಂ, ಕಾಮರಾಗೇನ ಅಟ್ಟಿತೋ [ಅದ್ದಿತೋ (ಸ್ಯಾ. ಸೀ. ಅಟ್ಠ.), ಅಡ್ಡಿತೋ (ಕ.)];

ಬಾಹಾ ಪಗ್ಗಯ್ಹ ಕನ್ದನ್ತೋ, ವಿಹಾರಾ ಉಪನಿಕ್ಖಮಿಂ [ನೂಪನಿಕ್ಖಮಿಂ (ಸಬ್ಬತ್ಥ), ದುಪನಿಕ್ಖಮಿಂ (?)].

೪೦೭.

‘‘ಸತ್ಥಂ ವಾ ಆಹರಿಸ್ಸಾಮಿ, ಕೋ ಅತ್ಥೋ ಜೀವಿತೇನ ಮೇ;

ಕಥಂ ಹಿ ಸಿಕ್ಖಂ ಪಚ್ಚಕ್ಖಂ, ಕಾಲಂ ಕುಬ್ಬೇಥ ಮಾದಿಸೋ.

೪೦೮.

‘‘ತದಾಹಂ ¶ ಖುರಮಾದಾಯ, ಮಞ್ಚಕಮ್ಹಿ ಉಪಾವಿಸಿಂ;

ಪರಿನೀತೋ ಖುರೋ ಆಸಿ, ಧಮನಿಂ ಛೇತ್ತುಮತ್ತನೋ.

೪೦೯.

‘‘ತತೋ ಮೇ ಮನಸೀಕಾರೋ, ಯೋನಿಸೋ ಉದಪಜ್ಜಥ;

ಆದೀನವೋ ಪಾತುರಹು, ನಿಬ್ಬಿದಾ ಸಮತಿಟ್ಠಥ.

೪೧೦.

‘‘ತತೋ ಚಿತ್ತಂ ವಿಮುಚ್ಚಿ ಮೇ, ಪಸ್ಸ ಧಮ್ಮಸುಧಮ್ಮತಂ;

ತಿಸ್ಸೋ ¶ ವಿಜ್ಜಾ ಅನುಪ್ಪತ್ತಾ, ಕತಂ ಬುದ್ಧಸ್ಸ ಸಾಸನ’’ನ್ತಿ.

… ಸಪ್ಪದಾಸೋ ಥೇರೋ….

೭.ಕಾತಿಯಾನತ್ಥೇರಗಾಥಾ

೪೧೧.

‘‘ಉಟ್ಠೇಹಿ ನಿಸೀದ ಕಾತಿಯಾನ, ಮಾ ನಿದ್ದಾಬಹುಲೋ ಅಹು ಜಾಗರಸ್ಸು;

ಮಾ ತಂ ಅಲಸಂ ಪಮತ್ತಬನ್ಧು, ಕೂಟೇನೇವ ಜಿನಾತು ಮಚ್ಚುರಾಜಾ.

೪೧೨.

‘‘ಸೇಯ್ಯಥಾಪಿ [ಸಯಥಾಪಿ (ಸೀ. ಪೀ.)] ಮಹಾಸಮುದ್ದವೇಗೋ, ಏವಂ ಜಾತಿಜರಾತಿವತ್ತತೇ ತಂ;

ಸೋ ಕರೋಹಿ ಸುದೀಪಮತ್ತನೋ ತ್ವಂ, ನ ಹಿ ತಾಣಂ ತವ ವಿಜ್ಜತೇವ ಅಞ್ಞಂ.

೪೧೩.

‘‘ಸತ್ಥಾ ಹಿ ವಿಜೇಸಿ ಮಗ್ಗಮೇತಂ, ಸಙ್ಗಾ ಜಾತಿಜರಾಭಯಾ ಅತೀತಂ;

ಪುಬ್ಬಾಪರರತ್ತಮಪ್ಪಮತ್ತೋ, ಅನುಯುಞ್ಜಸ್ಸು ದಳ್ಹಂ ಕರೋಹಿ ಯೋಗಂ.

೪೧೪.

‘‘ಪುರಿಮಾನಿ ¶ ಪಮುಞ್ಚ ಬನ್ಧನಾನಿ, ಸಙ್ಘಾಟಿಖುರಮುಣ್ಡಭಿಕ್ಖಭೋಜೀ;

ಮಾ ಖಿಡ್ಡಾರತಿಞ್ಚ ಮಾ ನಿದ್ದಂ, ಅನುಯುಞ್ಜಿತ್ಥ ಝಾಯ ಕಾತಿಯಾನ.

೪೧೫.

‘‘ಝಾಯಾಹಿ ¶ ಜಿನಾಹಿ ಕಾತಿಯಾನ, ಯೋಗಕ್ಖೇಮಪಥೇಸು ¶ ಕೋವಿದೋಸಿ;

ಪಪ್ಪುಯ್ಯ ಅನುತ್ತರಂ ವಿಸುದ್ಧಿಂ, ಪರಿನಿಬ್ಬಾಹಿಸಿ ವಾರಿನಾವ ಜೋತಿ.

೪೧೬.

‘‘ಪಜ್ಜೋತಕರೋ ಪರಿತ್ತರಂಸೋ, ವಾತೇನ ವಿನಮ್ಯತೇ ಲತಾವ;

ಏವಮ್ಪಿ ತುವಂ ಅನಾದಿಯಾನೋ, ಮಾರಂ ಇನ್ದಸಗೋತ್ತ ನಿದ್ಧುನಾಹಿ;

ಸೋ ವೇದಯಿತಾಸು ವೀತರಾಗೋ, ಕಾಲಂ ಕಙ್ಖ ಇಧೇವ ಸೀತಿಭೂತೋ’’ತಿ.

… ಕಾತಿಯಾನೋ ಥೇರೋ….

೮. ಮಿಗಜಾಲತ್ಥೇರಗಾಥಾ

೪೧೭.

‘‘ಸುದೇಸಿತೋ ಚಕ್ಖುಮತಾ, ಬುದ್ಧೇನಾದಿಚ್ಚಬನ್ಧುನಾ;

ಸಬ್ಬಸಂಯೋಜನಾತೀತೋ, ಸಬ್ಬವಟ್ಟವಿನಾಸನೋ.

೪೧೮.

‘‘ನಿಯ್ಯಾನಿಕೋ ಉತ್ತರಣೋ, ತಣ್ಹಾಮೂಲವಿಸೋಸನೋ;

ವಿಸಮೂಲಂ ಆಘಾತನಂ, ಛೇತ್ವಾ ಪಾಪೇತಿ ನಿಬ್ಬುತಿಂ.

೪೧೯.

‘‘ಅಞ್ಞಾಣಮೂಲಭೇದಾಯ ¶ , ಕಮ್ಮಯನ್ತವಿಘಾಟನೋ;

ವಿಞ್ಞಾಣಾನಂ ಪರಿಗ್ಗಹೇ, ಞಾಣವಜಿರನಿಪಾತನೋ.

೪೨೦.

‘‘ವೇದನಾನಂ ವಿಞ್ಞಾಪನೋ, ಉಪಾದಾನಪ್ಪಮೋಚನೋ;

ಭವಂ ಅಙ್ಗಾರಕಾಸುಂವ, ಞಾಣೇನ ಅನುಪಸ್ಸನೋ [ಅನುಪಸ್ಸಕೋ (ಸೀ. ಪೀ.)].

೪೨೧.

‘‘ಮಹಾರಸೋ ಸುಗಮ್ಭೀರೋ, ಜರಾಮಚ್ಚುನಿವಾರಣೋ;

ಅರಿಯೋ ¶ ಅಟ್ಠಙ್ಗಿಕೋ ಮಗ್ಗೋ, ದುಕ್ಖೂಪಸಮನೋ ಸಿವೋ.

೪೨೨.

‘‘ಕಮ್ಮಂ ಕಮ್ಮನ್ತಿ ಞತ್ವಾನ, ವಿಪಾಕಞ್ಚ ವಿಪಾಕತೋ;

ಪಟಿಚ್ಚುಪ್ಪನ್ನಧಮ್ಮಾನಂ, ಯಥಾವಾಲೋಕದಸ್ಸನೋ;

ಮಹಾಖೇಮಙ್ಗಮೋ ಸನ್ತೋ, ಪರಿಯೋಸಾನಭದ್ದಕೋ’’ತಿ.

… ಮಿಗಜಾಲೋ ಥೇರೋ….

೯. ಪುರೋಹಿತಪುತ್ತಜೇನ್ತತ್ಥೇರಗಾಥಾ

೪೨೩.

‘‘ಜಾತಿಮದೇನ ¶ ಮತ್ತೋಹಂ, ಭೋಗಇಸ್ಸರಿಯೇನ ಚ;

ಸಣ್ಠಾನವಣ್ಣರೂಪೇನ, ಮದಮತ್ತೋ ಅಚಾರಿಹಂ.

೪೨೪.

‘‘ನಾತ್ತನೋ ಸಮಕಂ ಕಞ್ಚಿ, ಅತಿರೇಕಂ ಚ ಮಞ್ಞಿಸಂ;

ಅತಿಮಾನಹತೋ ಬಾಲೋ, ಪತ್ಥದ್ಧೋ ಉಸ್ಸಿತದ್ಧಜೋ.

೪೨೫.

‘‘ಮಾತರಂ ಪಿತರಞ್ಚಾಪಿ, ಅಞ್ಞೇಪಿ ಗರುಸಮ್ಮತೇ;

ನ ಕಞ್ಚಿ ಅಭಿವಾದೇಸಿಂ, ಮಾನತ್ಥದ್ಧೋ ಅನಾದರೋ.

೪೨೬.

‘‘ದಿಸ್ವಾ ವಿನಾಯಕಂ ಅಗ್ಗಂ, ಸಾರಥೀನಂ ವರುತ್ತಮಂ;

ತಪನ್ತಮಿವ ಆದಿಚ್ಚಂ, ಭಿಕ್ಖುಸಙ್ಘಪುರಕ್ಖತಂ.

೪೨೭.

‘‘ಮಾನಂ ಮದಞ್ಚ ಛಡ್ಡೇತ್ವಾ, ವಿಪ್ಪಸನ್ನೇನ ಚೇತಸಾ;

ಸಿರಸಾ ಅಭಿವಾದೇಸಿಂ, ಸಬ್ಬಸತ್ತಾನಮುತ್ತಮಂ.

೪೨೮.

‘‘ಅತಿಮಾನೋ ¶ ಚ ಓಮಾನೋ, ಪಹೀನಾ ಸುಸಮೂಹತಾ;

ಅಸ್ಮಿಮಾನೋ ಸಮುಚ್ಛಿನ್ನೋ, ಸಬ್ಬೇ ಮಾನವಿಧಾ ಹತಾ’’ತಿ.

… ಜೇನ್ತೋ ಪುರೋಹಿತಪುತ್ತೋ ಥೇರೋ….

೧೦. ಸುಮನತ್ಥೇರಗಾಥಾ

೪೨೯.

‘‘ಯದಾ ¶ ನವೋ ಪಬ್ಬಜಿತೋ, ಜಾತಿಯಾ ಸತ್ತವಸ್ಸಿಕೋ;

ಇದ್ಧಿಯಾ ಅಭಿಭೋತ್ವಾನ, ಪನ್ನಗಿನ್ದಂ ಮಹಿದ್ಧಿಕಂ.

೪೩೦.

‘‘ಉಪಜ್ಝಾಯಸ್ಸ ¶ ಉದಕಂ, ಅನೋತತ್ತಾ ಮಹಾಸರಾ;

ಆಹರಾಮಿ ತತೋ ದಿಸ್ವಾ, ಮಂ ಸತ್ಥಾ ಏತದಬ್ರವಿ’’.

೪೩೧.

‘‘ಸಾರಿಪುತ್ತ ಇಮಂ ಪಸ್ಸ, ಆಗಚ್ಛನ್ತಂ ಕುಮಾರಕಂ;

ಉದಕಕುಮ್ಭಮಾದಾಯ, ಅಜ್ಝತ್ತಂ ಸುಸಮಾಹಿತಂ.

೪೩೨.

‘‘ಪಾಸಾದಿಕೇನ ವತ್ತೇನ, ಕಲ್ಯಾಣಇರಿಯಾಪಥೋ;

ಸಾಮಣೇರೋನುರುದ್ಧಸ್ಸ, ಇದ್ಧಿಯಾ ಚ ವಿಸಾರದೋ.

೪೩೩.

‘‘ಆಜಾನೀಯೇನ ಆಜಞ್ಞೋ, ಸಾಧುನಾ ಸಾಧುಕಾರಿತೋ;

ವಿನೀತೋ ಅನುರುದ್ಧೇನ, ಕತಕಿಚ್ಚೇನ ಸಿಕ್ಖಿತೋ.

೪೩೪.

‘‘ಸೋ ಪತ್ವಾ ಪರಮಂ ಸನ್ತಿಂ, ಸಚ್ಛಿಕತ್ವಾ ಅಕುಪ್ಪತಂ;

ಸಾಮಣೇರೋ ಸ ಸುಮನೋ, ಮಾ ಮಂ ಜಞ್ಞಾತಿ ಇಚ್ಛತೀ’’ತಿ.

… ಸುಮನೋ ಥೇರೋ….

೧೧. ನ್ಹಾತಕಮುನಿತ್ಥೇರಗಾಥಾ

೪೩೫.

‘‘ವಾತರೋಗಾಭಿನೀತೋ ¶ ತ್ವಂ, ವಿಹರಂ ಕಾನನೇ ವನೇ;

ಪವಿದ್ಧಗೋಚರೇ ಲೂಖೇ, ಕಥಂ ಭಿಕ್ಖು ಕರಿಸ್ಸಸಿ’’.

೪೩೬.

‘‘ಪೀತಿಸುಖೇನ ವಿಪುಲೇನ, ಫರಿತ್ವಾನ ಸಮುಸ್ಸಯಂ;

ಲೂಖಮ್ಪಿ ಅಭಿಸಮ್ಭೋನ್ತೋ, ವಿಹರಿಸ್ಸಾಮಿ ಕಾನನೇ.

೪೩೭.

‘‘ಭಾವೇನ್ತೋ ಸತ್ತ ಬೋಜ್ಝಙ್ಗೇ, ಇನ್ದ್ರಿಯಾನಿ ಬಲಾನಿ ಚ;

ಝಾನಸೋಖುಮ್ಮಸಮ್ಪನ್ನೋ [ಝಾನಸುಖುಮಸಮ್ಪನ್ನೋ (ಸ್ಯಾ. ಕ.)], ವಿಹರಿಸ್ಸಂ ಅನಾಸವೋ.

೪೩೮.

‘‘ವಿಪ್ಪಮುತ್ತಂ ¶ ಕಿಲೇಸೇಹಿ, ಸುದ್ಧಚಿತ್ತಂ ಅನಾವಿಲಂ;

ಅಭಿಣ್ಹಂ ಪಚ್ಚವೇಕ್ಖನ್ತೋ, ವಿಹರಿಸ್ಸಂ ಅನಾಸವೋ.

೪೩೯.

‘‘ಅಜ್ಝತ್ತಞ್ಚ ಬಹಿದ್ಧಾ ಚ, ಯೇ ಮೇ ವಿಜ್ಜಿಂಸು ಆಸವಾ;

ಸಬ್ಬೇ ಅಸೇಸಾ ಉಚ್ಛಿನ್ನಾ, ನ ಚ ಉಪ್ಪಜ್ಜರೇ ಪುನ.

೪೪೦.

‘‘ಪಞ್ಚಕ್ಖನ್ಧಾ ಪರಿಞ್ಞಾತಾ, ತಿಟ್ಠನ್ತಿ ಛಿನ್ನಮೂಲಕಾ;

ದುಕ್ಖಕ್ಖಯೋ ಅನುಪ್ಪತ್ತೋ, ನತ್ಥಿ ದಾನಿ ಪುನಬ್ಭವೋ’’ತಿ.

… ನ್ಹಾತಕಮುನಿತ್ಥೇರೋ….

೧೨. ಬ್ರಹ್ಮದತ್ತತ್ಥೇರಗಾಥಾ

೪೪೧.

‘‘ಅಕ್ಕೋಧಸ್ಸ ಕುತೋ ಕೋಧೋ, ದನ್ತಸ್ಸ ಸಮಜೀವಿನೋ;

ಸಮ್ಮದಞ್ಞಾ ವಿಮುತ್ತಸ್ಸ, ಉಪಸನ್ತಸ್ಸ ತಾದಿನೋ.

೪೪೨.

‘‘ತಸ್ಸೇವ ¶ ¶ ತೇನ ಪಾಪಿಯೋ, ಯೋ ಕುದ್ಧಂ ಪಟಿಕುಜ್ಝತಿ;

ಕುದ್ಧಂ ಅಪ್ಪಟಿಕುಜ್ಝನ್ತೋ, ಸಙ್ಗಾಮಂ ಜೇತಿ ದುಜ್ಜಯಂ.

೪೪೩.

[ಸಂ. ನಿ. ೧.೧೮೮, ೨೫೦] ‘‘ಉಭಿನ್ನಮತ್ಥಂ ಚರತಿ, ಅತ್ತನೋ ಚ ಪರಸ್ಸ ಚ;

ಪರಂ ಸಙ್ಕುಪಿತಂ ಞತ್ವಾ, ಯೋ ಸತೋ ಉಪಸಮ್ಮತಿ.

೪೪೪.

[ಸಂ. ನಿ. ೧.೧೮೮, ೨೫೦] ‘‘ಉಭಿನ್ನಂ ತಿಕಿಚ್ಛನ್ತಂ ತಂ, ಅತ್ತನೋ ಚ ಪರಸ್ಸ ಚ;

ಜನಾ ಮಞ್ಞನ್ತಿ ಬಾಲೋತಿ, ಯೇ ಧಮ್ಮಸ್ಸ ಅಕೋವಿದಾ.

೪೪೫.

‘‘ಉಪ್ಪಜ್ಜೇ ತೇ ಸಚೇ ಕೋಧೋ, ಆವಜ್ಜ ಕಕಚೂಪಮಂ;

ಉಪ್ಪಜ್ಜೇ ಚೇ ರಸೇ ತಣ್ಹಾ, ಪುತ್ತಮಂಸೂಪಮಂ ಸರ.

೪೪೬.

‘‘ಸಚೇ ಧಾವತಿ ಚಿತ್ತಂ ತೇ, ಕಾಮೇಸು ಚ ಭವೇಸು ಚ;

ಖಿಪ್ಪಂ ¶ ನಿಗ್ಗಣ್ಹ ಸತಿಯಾ, ಕಿಟ್ಠಾದಂ ವಿಯ ದುಪ್ಪಸು’’ನ್ತಿ;

… ಬ್ರಹ್ಮದತ್ತೋ ಥೇರೋ….

೧೩. ಸಿರಿಮಣ್ಡತ್ಥೇರಗಾಥಾ

೪೪೭.

[ಉದಾ. ೪೫; ಚೂಳವ. ೩೮೫; ಪರಿ. ೩೩೯] ‘‘ಛನ್ನಮತಿವಸ್ಸತಿ ¶ , ವಿವಟಂ ನಾತಿವಸ್ಸತಿ;

ತಸ್ಮಾ ಛನ್ನಂ ವಿವರೇಥ, ಏವಂ ತಂ ನಾತಿವಸ್ಸತಿ.

೪೪೮.

[ಸಂ. ನಿ. ೧.೬೬; ನೇತ್ತಿ. ೧೮] ‘‘ಮಚ್ಚುನಾಬ್ಭಹತೋ ಲೋಕೋ, ಜರಾಯ ಪರಿವಾರಿತೋ;

ತಣ್ಹಾಸಲ್ಲೇನ ಓತಿಣ್ಣೋ, ಇಚ್ಛಾಧೂಪಾಯಿತೋ ಸದಾ.

೪೪೯.

‘‘ಮಚ್ಚುನಾಬ್ಭಹತೋ ಲೋಕೋ, ಪರಿಕ್ಖಿತ್ತೋ ಜರಾಯ ಚ;

ಹಞ್ಞತಿ ನಿಚ್ಚಮತ್ತಾಣೋ, ಪತ್ತದಣ್ಡೋವ ತಕ್ಕರೋ.

೪೫೦.

‘‘ಆಗಚ್ಛನ್ತಗ್ಗಿಖನ್ಧಾವ, ಮಚ್ಚು ಬ್ಯಾಧಿ ಜರಾ ತಯೋ;

ಪಚ್ಚುಗ್ಗನ್ತುಂ ಬಲಂ ನತ್ಥಿ, ಜವೋ ನತ್ಥಿ ಪಲಾಯಿತುಂ.

೪೫೧.

‘‘ಅಮೋಘಂ ದಿವಸಂ ಕಯಿರಾ, ಅಪ್ಪೇನ ಬಹುಕೇನ ವಾ;

ಯಂ ಯಂ ವಿಜಹತೇ [ವಿರಹತೇ (ಸೀ. ಪೀ.), ವಿವಹತೇ (ಸ್ಯಾ.)] ರತ್ತಿಂ, ತದೂನಂ ತಸ್ಸ ಜೀವಿತಂ.

೪೫೨.

‘‘ಚರತೋ ತಿಟ್ಠತೋ ವಾಪಿ, ಆಸೀನಸಯನಸ್ಸ ವಾ;

ಉಪೇತಿ ಚರಿಮಾ ರತ್ತಿ, ನ ತೇ ಕಾಲೋ ಪಮಜ್ಜಿತು’’ನ್ತಿ.

… ಸಿರಿಮಣ್ಡೋ [ಸಿರಿಮನ್ದೋ (ಸೀ.)] ಥೇರೋ….

೧೪. ಸಬ್ಬಕಾಮಿತ್ಥೇರಗಾಥಾ

೪೫೩.

‘‘ದ್ವಿಪಾದಕೋಯಂ ಅಸುಚಿ, ದುಗ್ಗನ್ಧೋ ಪರಿಹೀರತಿ [ಪರಿಹರತಿ (ಕ.)];

ನಾನಾಕುಣಪಪರಿಪೂರೋ, ವಿಸ್ಸವನ್ತೋ ತತೋ ತತೋ.

೪೫೪.

‘‘ಮಿಗಂ ¶ ನಿಲೀನಂ ಕೂಟೇನ, ಬಳಿಸೇನೇವ ಅಮ್ಬುಜಂ;

ವಾನರಂ ವಿಯ ಲೇಪೇನ, ಬಾಧಯನ್ತಿ ಪುಥುಜ್ಜನಂ.

೪೫೫.

‘‘ರೂಪಾ ¶ ಸದ್ದಾ ರಸಾ ಗನ್ಧಾ, ಫೋಟ್ಠಬ್ಬಾ ಚ ಮನೋರಮಾ;

ಪಞ್ಚ ಕಾಮಗುಣಾ ಏತೇ, ಇತ್ಥಿರೂಪಸ್ಮಿ ದಿಸ್ಸರೇ.

೪೫೬.

‘‘ಯೇ ¶ ಏತಾ ಉಪಸೇವನ್ತಿ, ರತ್ತಚಿತ್ತಾ ಪುಥುಜ್ಜನಾ;

ವಡ್ಢೇನ್ತಿ ಕಟಸಿಂ ಘೋರಂ, ಆಚಿನನ್ತಿ ಪುನಬ್ಭವಂ.

೪೫೭.

‘‘ಯೋ ಚೇತಾ ಪರಿವಜ್ಜೇತಿ, ಸಪ್ಪಸ್ಸೇವ ಪದಾ ಸಿರೋ;

ಸೋಮಂ ವಿಸತ್ತಿಕಂ ಲೋಕೇ, ಸತೋ ಸಮತಿವತ್ತತಿ.

೪೫೮.

‘‘ಕಾಮೇಸ್ವಾದೀನವಂ ¶ ದಿಸ್ವಾ, ನೇಕ್ಖಮ್ಮಂ ದಟ್ಠು ಖೇಮತೋ;

ನಿಸ್ಸಟೋ ಸಬ್ಬಕಾಮೇಹಿ, ಪತ್ತೋ ಮೇ ಆಸವಕ್ಖಯೋ’’ತಿ.

… ಸಬ್ಬಕಾಮಿತ್ಥೇರೋ….

ಛಕ್ಕನಿಪಾತೋ ನಿಟ್ಠಿತೋ.

ತತ್ರುದ್ದಾನಂ –

ಉರುವೇಳಕಸ್ಸಪೋ ಚ, ಥೇರೋ ತೇಕಿಚ್ಛಕಾರಿ ಚ;

ಮಹಾನಾಗೋ ಚ ಕುಲ್ಲೋ ಚ, ಮಾಲುಕ್ಯೋ [ಮಾಲುತೋ (ಸೀ. ಕ.), ಮಾಲುಙ್ಕ್ಯೋ (ಸ್ಯಾ.)] ಸಪ್ಪದಾಸಕೋ.

ಕಾತಿಯಾನೋ ಮಿಗಜಾಲೋ, ಜೇನ್ತೋ ಸುಮನಸವ್ಹಯೋ;

ನ್ಹಾತಮುನಿ ಬ್ರಹ್ಮದತ್ತೋ, ಸಿರಿಮಣ್ಡೋ ಸಬ್ಬಕಾಮೀ ಚ;

ಗಾಥಾಯೋ ಚತುರಾಸೀತಿ, ಥೇರಾ ಚೇತ್ಥ ಚತುದ್ದಸಾತಿ.

೭. ಸತ್ತಕನಿಪಾತೋ

೧. ಸುನ್ದರಸಮುದ್ದತ್ಥೇರಗಾಥಾ

೪೫೯.

‘‘ಅಲಙ್ಕತಾ ¶ ¶ ¶ ¶ ಸುವಸನಾ, ಮಾಲಧಾರೀ [ಮಾಲಾಭಾರೀ (ಸೀ.), ಮಾಲಭಾರೀ (ಸ್ಯಾ.)] ವಿಭೂಸಿತಾ;

ಅಲತ್ತಕಕತಾಪಾದಾ, ಪಾದುಕಾರುಯ್ಹ ವೇಸಿಕಾ.

೪೬೦.

‘‘ಪಾದುಕಾ ಓರುಹಿತ್ವಾನ, ಪುರತೋ ಪಞ್ಜಲೀಕತಾ;

ಸಾ ಮಂ ಸಣ್ಹೇನ ಮುದುನಾ, ಮ್ಹಿತಪುಬ್ಬಂ [ಮಿಹಿತಪುಬ್ಬಂ (ಸೀ.)] ಅಭಾಸಥ’’.

೪೬೧.

‘‘ಯುವಾಸಿ ತ್ವಂ ಪಬ್ಬಜಿತೋ, ತಿಟ್ಠಾಹಿ ಮಮ ಸಾಸನೇ;

ಭುಞ್ಜ ಮಾನುಸಕೇ ಕಾಮೇ, ಅಹಂ ವಿತ್ತಂ ದದಾಮಿ ತೇ;

ಸಚ್ಚಂ ತೇ ಪಟಿಜಾನಾಮಿ, ಅಗ್ಗಿಂ ವಾ ತೇ ಹರಾಮಹಂ.

೪೬೨.

‘‘ಯದಾ ಜಿಣ್ಣಾ ಭವಿಸ್ಸಾಮ, ಉಭೋ ದಣ್ಡಪರಾಯನಾ;

ಉಭೋಪಿ ಪಬ್ಬಜಿಸ್ಸಾಮ, ಉಭಯತ್ಥ ಕಟಗ್ಗಹೋ’’.

೪೬೩.

‘‘ತಞ್ಚ ದಿಸ್ವಾನ ಯಾಚನ್ತಿಂ, ವೇಸಿಕಂ ಪಞ್ಜಲೀಕತಂ;

ಅಲಙ್ಕತಂ ಸುವಸನಂ, ಮಚ್ಚುಪಾಸಂವ ಓಡ್ಡಿತಂ.

೪೬೪.

‘‘ತತೋ ಮೇ ಮನಸೀಕಾರೋ…ಪೇ… ನಿಬ್ಬಿದಾ ಸಮತಿಟ್ಠಥ.

೪೬೫.

‘‘ತತೋ ಚಿತ್ತಂ ವಿಮುಚ್ಚಿ ಮೇ…ಪೇ… ಕತಂ ಬುದ್ಧಸ್ಸ ಸಾಸನ’’ನ್ತಿ.

… ಸುನ್ದರಸಮುದ್ದೋ ಥೇರೋ….

೨. ಲಕುಣ್ಡಕಭದ್ದಿಯತ್ಥೇರಗಾಥಾ

೪೬೬.

ಪರೇ ಅಮ್ಬಾಟಕಾರಾಮೇ, ವನಸಣ್ಡಮ್ಹಿ ಭದ್ದಿಯೋ;

ಸಮೂಲಂ ತಣ್ಹಮಬ್ಬುಯ್ಹ, ತತ್ಥ ಭದ್ದೋವ ಝಾಯತಿ [ಭದ್ದೋ’ಧಿಝಾಯಾಯತಿ (ಸೀ.), ಭದ್ದೋ ಝಿಯಾಯತಿ (ಸ್ಯಾ. ಸೀ. ಅಟ್ಠ.)].

೪೬೭.

‘‘ರಮನ್ತೇಕೇ ಮುದಿಙ್ಗೇಹಿ [ಮುತಿಙ್ಗೇಹಿ (ಸೀ. ಅಟ್ಠ.)], ವೀಣಾಹಿ ಪಣವೇಹಿ ಚ;

ಅಹಞ್ಚ ¶ ರುಕ್ಖಮೂಲಸ್ಮಿಂ, ರತೋ ಬುದ್ಧಸ್ಸ ಸಾಸನೇ.

೪೬೮.

‘‘ಬುದ್ಧೋ ಚೇ [ಬುದ್ಧೋ ಚ (ಸಬ್ಬತ್ಥ)] ಮೇ ವರಂ ದಜ್ಜಾ, ಸೋ ಚ ಲಬ್ಭೇಥ ಮೇ ವರೋ;

ಗಣ್ಹೇಹಂ ಸಬ್ಬಲೋಕಸ್ಸ, ನಿಚ್ಚಂ ಕಾಯಗತಂ ಸತಿಂ.

೪೬೯.

‘‘ಯೇ ¶ ಮಂ ರೂಪೇನ ಪಾಮಿಂಸು, ಯೇ ಚ ಘೋಸೇನ ಅನ್ವಗೂ;

ಛನ್ದರಾಗವಸೂಪೇತಾ, ನ ಮಂ ಜಾನನ್ತಿ ತೇ ಜನಾ.

೪೭೦.

‘‘ಅಜ್ಝತ್ತಞ್ಚ ¶ ನ ಜಾನಾತಿ, ಬಹಿದ್ಧಾ ಚ ನ ಪಸ್ಸತಿ;

ಸಮನ್ತಾವರಣೋ ಬಾಲೋ, ಸ ವೇ ಘೋಸೇನ ವುಯ್ಹತಿ.

೪೭೧.

‘‘ಅಜ್ಝತ್ತಞ್ಚ ನ ಜಾನಾತಿ, ಬಹಿದ್ಧಾ ಚ ವಿಪಸ್ಸತಿ;

ಬಹಿದ್ಧಾ ಫಲದಸ್ಸಾವೀ, ಸೋಪಿ ಘೋಸೇನ ವುಯ್ಹತಿ.

೪೭೨.

‘‘ಅಜ್ಝತ್ತಞ್ಚ ಪಜಾನಾತಿ, ಬಹಿದ್ಧಾ ಚ ವಿಪಸ್ಸತಿ;

ಅನಾವರಣದಸ್ಸಾವೀ, ನ ಸೋ ಘೋಸೇನ ವುಯ್ಹತೀ’’ತಿ.

… ಲಕುಣ್ಡಕಭದ್ದಿಯೋ ಥೇರೋ….

೩. ಭದ್ದತ್ಥೇರಗಾಥಾ

೪೭೩.

‘‘ಏಕಪುತ್ತೋ ¶ ಅಹಂ ಆಸಿಂ, ಪಿಯೋ ಮಾತು ಪಿಯೋ ಪಿತು;

ಬಹೂಹಿ ವತಚರಿಯಾಹಿ, ಲದ್ಧೋ ಆಯಾಚನಾಹಿ ಚ.

೪೭೪.

‘‘ತೇ ಚ ಮಂ ಅನುಕಮ್ಪಾಯ, ಅತ್ಥಕಾಮಾ ಹಿತೇಸಿನೋ;

ಉಭೋ ಪಿತಾ ಚ ಮಾತಾ ಚ, ಬುದ್ಧಸ್ಸ ಉಪನಾಮಯುಂ’’.

೪೭೫.

‘‘ಕಿಚ್ಛಾ ಲದ್ಧೋ ಅಯಂ ಪುತ್ತೋ, ಸುಖುಮಾಲೋ ಸುಖೇಧಿತೋ;

ಇಮಂ ದದಾಮ ತೇ ನಾಥ, ಜಿನಸ್ಸ ಪರಿಚಾರಕಂ’’.

೪೭೬.

‘‘ಸತ್ಥಾ ಚ ಮಂ ಪಟಿಗ್ಗಯ್ಹ, ಆನನ್ದಂ ಏತದಬ್ರವಿ;

‘ಪಬ್ಬಾಜೇಹಿ ಇಮಂ ಖಿಪ್ಪಂ, ಹೇಸ್ಸತ್ಯಾಜಾನಿಯೋ ಅಯಂ.

೪೭೭.

‘‘ಪಬ್ಬಾಜೇತ್ವಾನ ¶ ಮಂ ಸತ್ಥಾ, ವಿಹಾರಂ ಪಾವಿಸೀ ಜಿನೋ;

ಅನೋಗ್ಗತಸ್ಮಿಂ ಸೂರಿಯಸ್ಮಿಂ, ತತೋ ಚಿತ್ತಂ ವಿಮುಚ್ಚಿ ಮೇ.

೪೭೮.

‘‘ತತೋ ಸತ್ಥಾ ನಿರಾಕತ್ವಾ, ಪಟಿಸಲ್ಲಾನವುಟ್ಠಿತೋ;

‘ಏಹಿ ಭದ್ದಾ’ತಿ ಮಂ ಆಹ, ಸಾ ಮೇ ಆಸೂಪಸಮ್ಪದಾ.

೪೭೯.

‘‘ಜಾತಿಯಾ ಸತ್ತವಸ್ಸೇನ, ಲದ್ಧಾ ಮೇ ಉಪಸಮ್ಪದಾ;

ತಿಸ್ಸೋ ವಿಜ್ಜಾ ಅನುಪ್ಪತ್ತಾ, ಅಹೋ ಧಮ್ಮಸುಧಮ್ಮತಾ’’ತಿ.

… ಭದ್ದೋ ಥೇರೋ….

೪. ಸೋಪಾಕತ್ಥೇರಗಾಥಾ

೪೮೦.

‘‘ದಿಸ್ವಾ ¶ ಪಾಸಾದಛಾಯಾಯಂ, ಚಙ್ಕಮನ್ತಂ ನರುತ್ತಮಂ;

ತತ್ಥ ನಂ ಉಪಸಙ್ಕಮ್ಮ, ವನ್ದಿಸ್ಸಂ [ವನ್ದಿಸಂ (ಸೀ. ಪೀ.)] ಪುರಿಸುತ್ತಮಂ.

೪೮೧.

‘‘ಏಕಂಸಂ ¶ ಚೀವರಂ ಕತ್ವಾ, ಸಂಹರಿತ್ವಾನ ಪಾಣಯೋ;

ಅನುಚಙ್ಕಮಿಸ್ಸಂ ವಿರಜಂ, ಸಬ್ಬಸತ್ತಾನಮುತ್ತಮಂ.

೪೮೨.

‘‘ತತೋ ಪಞ್ಹೇ ಅಪುಚ್ಛಿ ಮಂ, ಪಞ್ಹಾನಂ ಕೋವಿದೋ ವಿದೂ;

ಅಚ್ಛಮ್ಭೀ ಚ ಅಭೀತೋ ಚ, ಬ್ಯಾಕಾಸಿಂ ಸತ್ಥುನೋ ಅಹಂ.

೪೮೩.

‘‘ವಿಸ್ಸಜ್ಜಿತೇಸು ಪಞ್ಹೇಸು, ಅನುಮೋದಿ ತಥಾಗತೋ;

ಭಿಕ್ಖುಸಙ್ಘಂ ವಿಲೋಕೇತ್ವಾ, ಇಮಮತ್ಥಂ ಅಭಾಸಥ’’.

೪೮೪.

‘‘ಲಾಭಾ ಅಙ್ಗಾನಂ ಮಗಧಾನಂ, ಯೇಸಾಯಂ ಪರಿಭುಞ್ಜತಿ;

ಚೀವರಂ ಪಿಣ್ಡಪಾತಞ್ಚ, ಪಚ್ಚಯಂ ಸಯನಾಸನಂ;

ಪಚ್ಚುಟ್ಠಾನಞ್ಚ ಸಾಮೀಚಿಂ, ತೇಸಂ ಲಾಭಾ’’ತಿ ಚಾಬ್ರವಿ.

೪೮೫.

‘‘ಅಜ್ಜತಗ್ಗೇ ಮಂ ಸೋಪಾಕ, ದಸ್ಸನಾಯೋಪಸಙ್ಕಮ;

ಏಸಾ ¶ ಚೇವ ತೇ ಸೋಪಾಕ, ಭವತು ಉಪಸಮ್ಪದಾ’’.

೪೮೬.

‘‘ಜಾತಿಯಾ ಸತ್ತವಸ್ಸೋಹಂ, ಲದ್ಧಾನ ಉಪಸಮ್ಪದಂ;

ಧಾರೇಮಿ ಅನ್ತಿಮಂ ದೇಹಂ, ಅಹೋ ಧಮ್ಮಸುಧಮ್ಮತಾ’’ತಿ.

… ಸೋಪಾಕೋ ಥೇರೋ….

೫. ಸರಭಙ್ಗತ್ಥೇರಗಾಥಾ

೪೮೭.

‘‘ಸರೇ ಹತ್ಥೇಹಿ ಭಞ್ಜಿತ್ವಾ, ಕತ್ವಾನ ಕುಟಿಮಚ್ಛಿಸಂ;

ತೇನ ಮೇ ಸರಭಙ್ಗೋತಿ, ನಾಮಂ ಸಮ್ಮುತಿಯಾ ಅಹು.

೪೮೮.

‘‘ನ ¶ ಮಯ್ಹಂ ಕಪ್ಪತೇ ಅಜ್ಜ, ಸರೇ ಹತ್ಥೇಹಿ ಭಞ್ಜಿತುಂ;

ಸಿಕ್ಖಾಪದಾ ನೋ ಪಞ್ಞತ್ತಾ, ಗೋತಮೇನ ಯಸಸ್ಸಿನಾ.

೪೮೯.

‘‘ಸಕಲಂ ಸಮತ್ತಂ ರೋಗಂ, ಸರಭಙ್ಗೋ ನಾದ್ದಸಂ ಪುಬ್ಬೇ;

ಸೋಯಂ ರೋಗೋ ದಿಟ್ಠೋ, ವಚನಕರೇನಾತಿದೇವಸ್ಸ.

೪೯೦.

‘‘ಯೇನೇವ ಮಗ್ಗೇನ ಗತೋ ವಿಪಸ್ಸೀ, ಯೇನೇವ ಮಗ್ಗೇನ ಸಿಖೀ ಚ ವೇಸ್ಸಭೂ;

ಕಕುಸನ್ಧಕೋಣಾಗಮನೋ ಚ ಕಸ್ಸಪೋ, ತೇನಞ್ಜಸೇನ ಅಗಮಾಸಿ ಗೋತಮೋ.

೪೯೧.

‘‘ವೀತತಣ್ಹಾ ¶ ಅನಾದಾನಾ, ಸತ್ತ ಬುದ್ಧಾ ಖಯೋಗಧಾ;

ಯೇಹಾಯಂ ದೇಸಿತೋ ಧಮ್ಮೋ, ಧಮ್ಮಭೂತೇಹಿ ತಾದಿಭಿ.

೪೯೨.

‘‘ಚತ್ತಾರಿ ಅರಿಯಸಚ್ಚಾನಿ, ಅನುಕಮ್ಪಾಯ ಪಾಣಿನಂ;

ದುಕ್ಖಂ ಸಮುದಯೋ ಮಗ್ಗೋ, ನಿರೋಧೋ ದುಕ್ಖಸಙ್ಖಯೋ.

೪೯೩.

‘‘ಯಸ್ಮಿಂ ¶ ನಿವತ್ತತೇ [ಯಸ್ಮಿಂ ನ ನಿಬ್ಬತ್ತತೇ (ಕ.)] ದುಕ್ಖಂ, ಸಂಸಾರಸ್ಮಿಂ ಅನನ್ತಕಂ;

ಭೇದಾ ¶ ಇಮಸ್ಸ ಕಾಯಸ್ಸ, ಜೀವಿತಸ್ಸ ಚ ಸಙ್ಖಯಾ;

ಅಞ್ಞೋ ಪುನಬ್ಭವೋ ನತ್ಥಿ, ಸುವಿಮುತ್ತೋಮ್ಹಿ ಸಬ್ಬಧೀ’’ತಿ.

… ಸರಭಙ್ಗೋ ಥೇರೋ….

ಸತ್ತಕನಿಪಾತೋ ನಿಟ್ಠಿತೋ.

ತತ್ರುದ್ದಾನಂ –

ಸುನ್ದರಸಮುದ್ದೋ ಥೇರೋ, ಥೇರೋ ಲಕುಣ್ಡಭದ್ದಿಯೋ;

ಭದ್ದೋ ಥೇರೋ ಚ ಸೋಪಾಕೋ, ಸರಭಙ್ಗೋ ಮಹಾಇಸಿ;

ಸತ್ತಕೇ ಪಞ್ಚಕಾ ಥೇರಾ, ಗಾಥಾಯೋ ಪಞ್ಚತಿಂಸತೀತಿ.

೮. ಅಟ್ಠಕನಿಪಾತೋ

೧. ಮಹಾಕಚ್ಚಾಯನತ್ಥೇರಗಾಥಾ

೪೯೪.

‘‘ಕಮ್ಮಂ ¶ ¶ ¶ ಬಹುಕಂ ನ ಕಾರಯೇ, ಪರಿವಜ್ಜೇಯ್ಯ ಜನಂ ನ ಉಯ್ಯಮೇ;

ಸೋ ಉಸ್ಸುಕ್ಕೋ ರಸಾನುಗಿದ್ಧೋ, ಅತ್ಥಂ ರಿಞ್ಚತಿ ಯೋ ಸುಖಾಧಿವಾಹೋ.

೪೯೫.

‘‘ಪಙ್ಕೋತಿ ಹಿ ನಂ ಅವೇದಯುಂ, ಯಾಯಂ ವನ್ದನಪೂಜನಾ ಕುಲೇಸು;

ಸುಖುಮಂ ಸಲ್ಲಂ ದುರುಬ್ಬಹಂ, ಸಕ್ಕಾರೋ ಕಾಪುರಿಸೇನ ದುಜ್ಜಹೋ.

೪೯೬.

‘‘ನ ಪರಸ್ಸುಪನಿಧಾಯ, ಕಮ್ಮಂ ಮಚ್ಚಸ್ಸ ಪಾಪಕಂ;

ಅತ್ತನಾ ತಂ ನ ಸೇವೇಯ್ಯ, ಕಮ್ಮಬನ್ಧೂಹಿ ಮಾತಿಯಾ.

೪೯೭.

‘‘ನ ಪರೇ ವಚನಾ ಚೋರೋ, ನ ಪರೇ ವಚನಾ ಮುನಿ;

ಅತ್ತಾ ಚ ನಂ ಯಥಾವೇದಿ [ಯಥಾ ವೇತ್ತಿ (ಸೀ.)], ದೇವಾಪಿ ನಂ ತಥಾ ವಿದೂ.

೪೯೮.

‘‘ಪರೇ ಚ ನ ವಿಜಾನನ್ತಿ, ಮಯಮೇತ್ಥ ಯಮಾಮಸೇ;

ಯೇ ¶ ಚ ತತ್ಥ ವಿಜಾನನ್ತಿ, ತತೋ ಸಮ್ಮನ್ತಿ ಮೇಧಗಾ.

೪೯೯.

‘‘ಜೀವತೇ ವಾಪಿ ಸಪ್ಪಞ್ಞೋ, ಅಪಿ ವಿತ್ತಪರಿಕ್ಖಯೋ;

ಪಞ್ಞಾಯ ಚ ಅಲಾಭೇನ [ಅಭಾವೇನ (ಸೀ. ಅಟ್ಠ.)], ವಿತ್ತವಾಪಿ ನ ಜೀವತಿ.

೫೦೦.

‘‘ಸಬ್ಬಂ ಸುಣಾತಿ ಸೋತೇನ, ಸಬ್ಬಂ ಪಸ್ಸತಿ ಚಕ್ಖುನಾ;

ನ ಚ ದಿಟ್ಠಂ ಸುತಂ ಧೀರೋ, ಸಬ್ಬಂ ಉಜ್ಝಿತುಮರಹತಿ.

೫೦೧.

‘‘ಚಕ್ಖುಮಾಸ್ಸ ಯಥಾ ಅನ್ಧೋ, ಸೋತವಾ ಬಧಿರೋ ಯಥಾ;

ಪಞ್ಞವಾಸ್ಸ ಯಥಾ ಮೂಗೋ, ಬಲವಾ ದುಬ್ಬಲೋರಿವ;

ಅಥ ಅತ್ಥೇ ಸಮುಪ್ಪನ್ನೇ, ಸಯೇಥ [ಪಸ್ಸೇಥ (ಕ.)] ಮತಸಾಯಿಕ’’ನ್ತಿ.

… ಮಹಾಕಚ್ಚಾಯನೋ ಥೇರೋ….

೨. ಸಿರಿಮಿತ್ತತ್ಥೇರಗಾಥಾ

೫೦೨.

‘‘ಅಕ್ಕೋಧನೋನುಪನಾಹೀ, ಅಮಾಯೋ ರಿತ್ತಪೇಸುಣೋ;

ಸ ವೇ ತಾದಿಸಕೋ ಭಿಕ್ಖು, ಏವಂ ಪೇಚ್ಚ ನ ಸೋಚತಿ.

೫೦೩.

‘‘ಅಕ್ಕೋಧನೋನುಪನಾಹೀ, ಅಮಾಯೋ ರಿತ್ತಪೇಸುಣೋ;

ಗುತ್ತದ್ವಾರೋ ಸದಾ ಭಿಕ್ಖು, ಏವಂ ಪೇಚ್ಚ ನ ಸೋಚತಿ.

೫೦೪.

‘‘ಅಕ್ಕೋಧನೋನುಪನಾಹೀ ¶ ¶ , ಅಮಾಯೋ ರಿತ್ತಪೇಸುಣೋ;

ಕಲ್ಯಾಣಸೀಲೋ ಸೋ [ಯೋ (ಸ್ಯಾ.)] ಭಿಕ್ಖು, ಏವಂ ಪೇಚ್ಚ ನ ಸೋಚತಿ.

೫೦೫.

‘‘ಅಕ್ಕೋಧನೋನುಪನಾಹೀ, ಅಮಾಯೋ ರಿತ್ತಪೇಸುಣೋ;

ಕಲ್ಯಾಣಮಿತ್ತೋ ಸೋ ಭಿಕ್ಖು, ಏವಂ ಪೇಚ್ಚ ನ ಸೋಚತಿ.

೫೦೬.

‘‘ಅಕ್ಕೋಧನೋನುಪನಾಹೀ ¶ , ಅಮಾಯೋ ರಿತ್ತಪೇಸುಣೋ;

ಕಲ್ಯಾಣಪಞ್ಞೋ ಸೋ ಭಿಕ್ಖು, ಏವಂ ಪೇಚ್ಚ ನ ಸೋಚತಿ.

೫೦೭.

‘‘ಯಸ್ಸ ಸದ್ಧಾ ತಥಾಗತೇ, ಅಚಲಾ ಸುಪ್ಪತಿಟ್ಠಿತಾ;

ಸೀಲಞ್ಚ ¶ ಯಸ್ಸ ಕಲ್ಯಾಣಂ, ಅರಿಯಕನ್ತಂ ಪಸಂಸಿತಂ.

೫೦೮.

‘‘ಸಙ್ಘೇ ಪಸಾದೋ ಯಸ್ಸತ್ಥಿ, ಉಜುಭೂತಞ್ಚ ದಸ್ಸನಂ;

‘ಅದಲಿದ್ದೋ’ತಿ ತಂ ಆಹು, ಅಮೋಘಂ ತಸ್ಸ ಜೀವಿತಂ.

೫೦೯.

‘‘ತಸ್ಮಾ ಸದ್ಧಞ್ಚ ಸೀಲಞ್ಚ, ಪಸಾದಂ ಧಮ್ಮದಸ್ಸನಂ;

ಅನುಯುಞ್ಜೇಥ ಮೇಧಾವೀ, ಸರಂ ಬುದ್ಧಾನ ಸಾಸನ’’ನ್ತಿ.

… ಸಿರಿಮಿತ್ತೋ ಥೇರೋ….

೩. ಮಹಾಪನ್ಥಕತ್ಥೇರಗಾಥಾ

೫೧೦.

‘‘ಯದಾ ಪಠಮಮದ್ದಕ್ಖಿಂ, ಸತ್ಥಾರಮಕುತೋಭಯಂ;

ತತೋ ಮೇ ಅಹು ಸಂವೇಗೋ, ಪಸ್ಸಿತ್ವಾ ಪುರಿಸುತ್ತಮಂ.

೫೧೧.

‘‘ಸಿರಿಂ ಹತ್ಥೇಹಿ ಪಾದೇಹಿ, ಯೋ ಪಣಾಮೇಯ್ಯ ಆಗತಂ;

ಏತಾದಿಸಂ ಸೋ ಸತ್ಥಾರಂ, ಆರಾಧೇತ್ವಾ ವಿರಾಧಯೇ.

೫೧೨.

‘‘ತದಾಹಂ ಪುತ್ತದಾರಞ್ಚ, ಧನಧಞ್ಞಞ್ಚ ಛಡ್ಡಯಿಂ;

ಕೇಸಮಸ್ಸೂನಿ ಛೇದೇತ್ವಾ, ಪಬ್ಬಜಿಂ ಅನಗಾರಿಯಂ.

೫೧೩.

‘‘ಸಿಕ್ಖಾಸಾಜೀವಸಮ್ಪನ್ನೋ, ಇನ್ದ್ರಿಯೇಸು ಸುಸಂವುತೋ;

ನಮಸ್ಸಮಾನೋ ಸಮ್ಬುದ್ಧಂ, ವಿಹಾಸಿಂ ಅಪರಾಜಿತೋ.

೫೧೪.

‘‘ತತೋ ಮೇ ಪಣಿಧೀ ಆಸಿ, ಚೇತಸೋ ಅಭಿಪತ್ಥಿತೋ;

ನ ನಿಸೀದೇ ಮುಹುತ್ತಮ್ಪಿ, ತಣ್ಹಾಸಲ್ಲೇ ಅನೂಹತೇ.

೫೧೫.

‘‘ತಸ್ಸ ಮೇವಂ ವಿಹರತೋ, ಪಸ್ಸ ವೀರಿಯಪರಕ್ಕಮಂ;

ತಿಸ್ಸೋ ವಿಜ್ಜಾ ಅನುಪ್ಪತ್ತಾ, ಕತಂ ಬುದ್ಧಸ್ಸ ಸಾಸನಂ.

೫೧೬.

‘‘ಪುಬ್ಬೇನಿವಾಸಂ ¶ ಜಾನಾಮಿ, ದಿಬ್ಬಚಕ್ಖು ವಿಸೋಧಿತಂ;

ಅರಹಾ ದಕ್ಖಿಣೇಯ್ಯೋಮ್ಹಿ, ವಿಪ್ಪಮುತ್ತೋ ನಿರೂಪಧಿ.

೫೧೭.

‘‘ತತೋ ¶ ¶ ರತ್ಯಾ ವಿವಸಾನೇ [ವಿವಸನೇ (ಸೀ. ಸ್ಯಾ.)], ಸೂರಿಯಸ್ಸುಗ್ಗಮನಂ ಪತಿ;

ಸಬ್ಬಂ ತಣ್ಹಂ ವಿಸೋಸೇತ್ವಾ, ಪಲ್ಲಙ್ಕೇನ ಉಪಾವಿಸಿ’’ನ್ತಿ.

… ಮಹಾಪನ್ಥಕೋ ಥೇರೋ….

ಅಟ್ಠಕನಿಪಾತೋ ನಿಟ್ಠಿತೋ.

ತತ್ರುದ್ದಾನಂ –

ಮಹಾಕಚ್ಚಾಯನೋ ಥೇರೋ, ಸಿರಿಮಿತ್ತೋ ಮಹಾಪನ್ಥಕೋ;

ಏತೇ ಅಟ್ಠನಿಪಾತಮ್ಹಿ, ಗಾಥಾಯೋ ಚತುವೀಸತೀತಿ.

೯. ನವಕನಿಪಾತೋ

೧. ಭೂತತ್ಥೇರಗಾಥಾ

೫೧೮.

‘‘ಯದಾ ¶ ¶ ¶ ದುಕ್ಖಂ ಜರಾಮರಣನ್ತಿ ಪಣ್ಡಿತೋ, ಅವಿದ್ದಸೂ ಯತ್ಥ ಸಿತಾ ಪುಥುಜ್ಜನಾ;

ದುಕ್ಖಂ ಪರಿಞ್ಞಾಯ ಸತೋವ ಝಾಯತಿ, ತತೋ ರತಿಂ ಪರಮತರಂ ನ ವಿನ್ದತಿ.

೫೧೯.

‘‘ಯದಾ ದುಕ್ಖಸ್ಸಾವಹನಿಂ ವಿಸತ್ತಿಕಂ, ಪಪಞ್ಚಸಙ್ಘಾತದುಖಾಧಿವಾಹಿನಿಂ;

ತಣ್ಹಂ ಪಹನ್ತ್ವಾನ ಸತೋವ ಝಾಯತಿ, ತತೋ ರತಿಂ ಪರಮತರಂ ನ ವಿನ್ದತಿ.

೫೨೦.

‘‘ಯದಾ ಸಿವಂ ದ್ವೇಚತುರಙ್ಗಗಾಮಿನಂ, ಮಗ್ಗುತ್ತಮಂ ¶ ಸಬ್ಬಕಿಲೇಸಸೋಧನಂ;

ಪಞ್ಞಾಯ ಪಸ್ಸಿತ್ವ ಸತೋವ ಝಾಯತಿ, ತತೋ ರತಿಂ ಪರಮತರಂ ನ ವಿನ್ದತಿ.

೫೨೧.

‘‘ಯದಾ ಅಸೋಕಂ ವಿರಜಂ ಅಸಙ್ಖತಂ, ಸನ್ತಂ ಪದಂ ಸಬ್ಬಕಿಲೇಸಸೋಧನಂ;

ಭಾವೇತಿ ಸಞ್ಞೋಜನಬನ್ಧನಚ್ಛಿದಂ, ತತೋ ರತಿಂ ಪರಮತರಂ ನ ವಿನ್ದತಿ.

೫೨೨.

‘‘ಯದಾ ನಭೇ ಗಜ್ಜತಿ ಮೇಘದುನ್ದುಭಿ, ಧಾರಾಕುಲಾ ವಿಹಗಪಥೇ ಸಮನ್ತತೋ;

ಭಿಕ್ಖೂ ಚ ಪಬ್ಭಾರಗತೋವ ಝಾಯತಿ, ತತೋ ರತಿಂ ಪರಮತರಂ ನ ವಿನ್ದತಿ.

೫೨೩.

‘‘ಯದಾ ನದೀನಂ ಕುಸುಮಾಕುಲಾನಂ, ವಿಚಿತ್ತ-ವಾನೇಯ್ಯ-ವಟಂಸಕಾನಂ;

ತೀರೇ ನಿಸಿನ್ನೋ ಸುಮನೋವ ಝಾಯತಿ, ತತೋ ರತಿಂ ಪರಮತರಂ ನ ವಿನ್ದತಿ.

೫೨೪.

‘‘ಯದಾ ¶ ನಿಸೀಥೇ ರಹಿತಮ್ಹಿ ಕಾನನೇ, ದೇವೇ ಗಳನ್ತಮ್ಹಿ ನದನ್ತಿ ದಾಠಿನೋ;

ಭಿಕ್ಖೂ ಚ ಪಬ್ಭಾರಗತೋವ ಝಾಯತಿ, ತತೋ ರತಿಂ ಪರಮತರಂ ನ ವಿನ್ದತಿ.

೫೨೫.

‘‘ಯದಾ ¶ ವಿತಕ್ಕೇ ಉಪರುನ್ಧಿಯತ್ತನೋ, ನಗನ್ತರೇ ನಗವಿವರಂ ಸಮಸ್ಸಿತೋ;

ವೀತದ್ದರೋ ವೀತಖಿಲೋವ ಝಾಯತಿ, ತತೋ ರತಿಂ ಪರಮತರಂ ನ ವಿನ್ದತಿ.

೫೨೬.

‘‘ಯದಾ ¶ ಸುಖೀ ಮಲಖಿಲಸೋಕನಾಸನೋ, ನಿರಗ್ಗಳೋ ನಿಬ್ಬನಥೋ ವಿಸಲ್ಲೋ;

ಸಬ್ಬಾಸವೇ ಬ್ಯನ್ತಿಕತೋವ ಝಾಯತಿ, ತತೋ ರತಿಂ ಪರಮತರಂ ನ ವಿನ್ದತೀ’’ತಿ.

… ಭೂತೋ ಥೇರೋ….

ನವಕನಿಪಾತೋ ನಿಟ್ಠಿತೋ.

ತತ್ರುದ್ದಾನಂ –

ಭೂತೋ ತಥದ್ದಸೋ ಥೇರೋ, ಏಕೋ ಖಗ್ಗವಿಸಾಣವಾ;

ನವಕಮ್ಹಿ ನಿಪಾತಮ್ಹಿ, ಗಾಥಾಯೋಪಿ ಇಮಾ ನವಾತಿ.

೧೦. ದಸಕನಿಪಾತೋ

೧. ಕಾಳುದಾಯಿತ್ಥೇರಗಾಥಾ

೫೨೭.

‘‘ಅಙ್ಗಾರಿನೋ ¶ ¶ ¶ ದಾನಿ ದುಮಾ ಭದನ್ತೇ, ಫಲೇಸಿನೋ ಛದನಂ ವಿಪ್ಪಹಾಯ;

ತೇ ಅಚ್ಚಿಮನ್ತೋವ ಪಭಾಸಯನ್ತಿ, ಸಮಯೋ ಮಹಾವೀರ ಭಾಗೀ ರಸಾನಂ.

೫೨೮.

‘‘ದುಮಾನಿ ¶ ಫುಲ್ಲಾನಿ ಮನೋರಮಾನಿ, ಸಮನ್ತತೋ ಸಬ್ಬದಿಸಾ ಪವನ್ತಿ;

ಪತ್ತಂ ಪಹಾಯ ಫಲಮಾಸಸಾನಾ [ಫಲಮಾಸಮಾನೋ (ಕ.)], ಕಾಲೋ ಇತೋ ಪಕ್ಕಮನಾಯ ವೀರ.

೫೨೯.

‘‘ನೇವಾತಿಸೀತಂ ನ ಪನಾತಿಉಣ್ಹಂ, ಸುಖಾ ಉತು ಅದ್ಧನಿಯಾ ಭದನ್ತೇ;

ಪಸ್ಸನ್ತು ತಂ ಸಾಕಿಯಾ ಕೋಳಿಯಾ ಚ, ಪಚ್ಛಾಮುಖಂ ರೋಹಿನಿಯಂ ತರನ್ತಂ.

೫೩೦.

‘‘ಆಸಾಯ ಕಸತೇ ಖೇತ್ತಂ, ಬೀಜಂ ಆಸಾಯ ವಪ್ಪತಿ;

ಆಸಾಯ ವಾಣಿಜಾ ಯನ್ತಿ, ಸಮುದ್ದಂ ಧನಹಾರಕಾ;

ಯಾಯ ಆಸಾಯ ತಿಟ್ಠಾಮಿ, ಸಾ ಮೇ ಆಸಾ ಸಮಿಜ್ಝತು.

೫೩೧.

[ಸಂ. ನಿ. ೧.೧೯೮] ‘‘ಪುನಪ್ಪುನಂ ಚೇವ ವಪನ್ತಿ ಬೀಜಂ, ಪುನಪ್ಪುನಂ ವಸ್ಸತಿ ದೇವರಾಜಾ;

ಪುನಪ್ಪುನಂ ಖೇತ್ತಂ ಕಸನ್ತಿ ಕಸ್ಸಕಾ, ಪುನಪ್ಪುನಂ ಧಞ್ಞಮುಪೇತಿ ರಟ್ಠಂ.

೫೩೨.

[ಸಂ. ನಿ. ೧.೧೯೮] ‘‘ಪುನಪ್ಪುನಂ ಯಾಚನಕಾ ಚರನ್ತಿ, ಪುನಪ್ಪುನಂ ದಾನಪತೀ ದದನ್ತಿ;

ಪುನಪ್ಪುನಂ ದಾನಪತೀ ದದಿತ್ವಾ, ಪುನಪ್ಪುನಂ ಸಗ್ಗಮುಪೇನ್ತಿ ಠಾನಂ.

೫೩೩.

‘‘ವೀರೋ ¶ ¶ ಹವೇ ಸತ್ತಯುಗಂ ಪುನೇತಿ, ಯಸ್ಮಿಂ ಕುಲೇ ಜಾಯತಿ ಭೂರಿಪಞ್ಞೋ;

ಮಞ್ಞಾಮಹಂ ಸಕ್ಕತಿ ದೇವದೇವೋ, ತಯಾ ಹಿ ಜಾತೋ [ತಯಾಭಿಜಾತೋ (ಸೀ.)] ಮುನಿ ಸಚ್ಚನಾಮೋ.

೫೩೪.

‘‘ಸುದ್ಧೋದನೋ ¶ ನಾಮ ಪಿತಾ ಮಹೇಸಿನೋ, ಬುದ್ಧಸ್ಸ ಮಾತಾ ಪನ ಮಾಯನಾಮಾ;

ಯಾ ಬೋಧಿಸತ್ತಂ ಪರಿಹರಿಯ ಕುಚ್ಛಿನಾ, ಕಾಯಸ್ಸ ಭೇದಾ ತಿದಿವಮ್ಹಿ ಮೋದತಿ.

೫೩೫.

‘‘ಸಾ ಗೋತಮೀ ಕಾಲಕತಾ ಇತೋ ಚುತಾ, ದಿಬ್ಬೇಹಿ ಕಾಮೇಹಿ ಸಮಙ್ಗಿಭೂತಾ;

ಸಾ ಮೋದತಿ ಕಾಮಗುಣೇಹಿ ಪಞ್ಚಹಿ, ಪರಿವಾರಿತಾ ದೇವಗಣೇಹಿ ತೇಹಿ.

೫೩೬.

‘‘ಬುದ್ಧಸ್ಸ ಪುತ್ತೋಮ್ಹಿ ಅಸಯ್ಹಸಾಹಿನೋ, ಅಙ್ಗೀರಸಸ್ಸಪ್ಪಟಿಮಸ್ಸ ತಾದಿನೋ;

ಪಿತುಪಿತಾ ಮಯ್ಹಂ ತುವಂಸಿ ಸಕ್ಕ, ಧಮ್ಮೇನ ಮೇ ಗೋತಮ ಅಯ್ಯಕೋಸೀ’’ತಿ.

… ಕಾಳುದಾಯೀ ಥೇರೋ….

೨. ಏಕವಿಹಾರಿಯತ್ಥೇರಗಾಥಾ

೫೩೭.

‘‘ಪುರತೋ ¶ ಪಚ್ಛತೋ ವಾಪಿ, ಅಪರೋ ಚೇ ನ ವಿಜ್ಜತಿ;

ಅತೀವ ಫಾಸು ಭವತಿ, ಏಕಸ್ಸ ವಸತೋ ವನೇ.

೫೩೮.

‘‘ಹನ್ದ ¶ ಏಕೋ ಗಮಿಸ್ಸಾಮಿ, ಅರಞ್ಞಂ ಬುದ್ಧವಣ್ಣಿತಂ;

ಫಾಸು [ಫಾಸುಂ (ಸ್ಯಾ. ಪೀ.)] ಏಕವಿಹಾರಿಸ್ಸ, ಪಹಿತತ್ತಸ್ಸ ಭಿಕ್ಖುನೋ.

೫೩೯.

‘‘ಯೋಗೀ-ಪೀತಿಕರಂ ರಮ್ಮಂ, ಮತ್ತಕುಞ್ಜರಸೇವಿತಂ;

ಏಕೋ ಅತ್ತವಸೀ ಖಿಪ್ಪಂ, ಪವಿಸಿಸ್ಸಾಮಿ ಕಾನನಂ.

೫೪೦.

‘‘ಸುಪುಪ್ಫಿತೇ ಸೀತವನೇ, ಸೀತಲೇ ಗಿರಿಕನ್ದರೇ;

ಗತ್ತಾನಿ ಪರಿಸಿಞ್ಚಿತ್ವಾ, ಚಙ್ಕಮಿಸ್ಸಾಮಿ ಏಕಕೋ.

೫೪೧.

‘‘ಏಕಾಕಿಯೋ ಅದುತಿಯೋ, ರಮಣೀಯೇ ಮಹಾವನೇ;

ಕದಾಹಂ ವಿಹರಿಸ್ಸಾಮಿ, ಕತಕಿಚ್ಚೋ ಅನಾಸವೋ.

೫೪೨.

‘‘ಏವಂ ಮೇ ಕತ್ತುಕಾಮಸ್ಸ, ಅಧಿಪ್ಪಾಯೋ ಸಮಿಜ್ಝತು;

ಸಾಧಿಯಿಸ್ಸಾಮಹಂಯೇವ, ನಾಞ್ಞೋ ಅಞ್ಞಸ್ಸ ಕಾರಕೋ.

೫೪೩.

‘‘ಏಸ ¶ ಬನ್ಧಾಮಿ ಸನ್ನಾಹಂ, ಪವಿಸಿಸ್ಸಾಮಿ ಕಾನನಂ;

ನ ತತೋ ನಿಕ್ಖಮಿಸ್ಸಾಮಿ, ಅಪ್ಪತ್ತೋ ಆಸವಕ್ಖಯಂ.

೫೪೪.

‘‘ಮಾಲುತೇ ಉಪವಾಯನ್ತೇ, ಸೀತೇ ಸುರಭಿಗನ್ಧಿಕೇ [ಗನ್ಧಕೇ (ಸ್ಯಾ. ಪೀ. ಕ.)];

ಅವಿಜ್ಜಂ ದಾಲಯಿಸ್ಸಾಮಿ, ನಿಸಿನ್ನೋ ನಗಮುದ್ಧನಿ.

೫೪೫.

‘‘ವನೇ ಕುಸುಮಸಞ್ಛನ್ನೇ, ಪಬ್ಭಾರೇ ನೂನ ಸೀತಲೇ;

ವಿಮುತ್ತಿಸುಖೇನ ಸುಖಿತೋ, ರಮಿಸ್ಸಾಮಿ ಗಿರಿಬ್ಬಜೇ.

೫೪೬.

‘‘ಸೋಹಂ ¶ ಪರಿಪುಣ್ಣಸಙ್ಕಪ್ಪೋ, ಚನ್ದೋ ಪನ್ನರಸೋ ಯಥಾ;

ಸಬ್ಬಾಸವಪರಿಕ್ಖೀಣೋ, ನತ್ಥಿ ದಾನಿ ಪುನಬ್ಭವೋ’’ತಿ.

… ಏಕವಿಹಾರಿಯೋ ಥೇರೋ….

೩. ಮಹಾಕಪ್ಪಿನತ್ಥೇರಗಾಥಾ

೫೪೭.

‘‘ಅನಾಗತಂ ¶ ಯೋ ಪಟಿಕಚ್ಚ [ಪಟಿಗಚ್ಚ (ಸೀ.)] ಪಸ್ಸತಿ, ಹಿತಞ್ಚ ಅತ್ಥಂ ಅಹಿತಞ್ಚ ತಂ ದ್ವಯಂ;

ವಿದ್ದೇಸಿನೋ ತಸ್ಸ ಹಿತೇಸಿನೋ ವಾ, ರನ್ಧಂ ನ ಪಸ್ಸನ್ತಿ ಸಮೇಕ್ಖಮಾನಾ.

೫೪೮.

[ಪಟಿ. ಮ. ೧.೧೬೦ ಪಟಿಸಮ್ಭಿದಾಮಗ್ಗೇ] ‘‘ಆನಾಪಾನಸತೀ ಯಸ್ಸ, ಪರಿಪುಣ್ಣಾ ಸುಭಾವಿತಾ;

ಅನುಪುಬ್ಬಂ ಪರಿಚಿತಾ, ಯಥಾ ಬುದ್ಧೇನ ದೇಸಿತಾ;

ಸೋಮಂ ಲೋಕಂ ಪಭಾಸೇತಿ, ಅಬ್ಭಾ ಮುತ್ತೋವ ಚನ್ದಿಮಾ.

೫೪೯.

‘‘ಓದಾತಂ ¶ ವತ ಮೇ ಚಿತ್ತಂ, ಅಪ್ಪಮಾಣಂ ಸುಭಾವಿತಂ;

ನಿಬ್ಬಿದ್ಧಂ ಪಗ್ಗಹೀತಞ್ಚ, ಸಬ್ಬಾ ಓಭಾಸತೇ ದಿಸಾ.

೫೫೦.

‘‘ಜೀವತೇ ವಾಪಿ ಸಪ್ಪಞ್ಞೋ, ಅಪಿ ವಿತ್ತಪರಿಕ್ಖಯೋ;

ಪಞ್ಞಾಯ ಚ ಅಲಾಭೇನ, ವಿತ್ತವಾಪಿ ನ ಜೀವತಿ.

೫೫೧.

‘‘ಪಞ್ಞಾ ಸುತವಿನಿಚ್ಛಿನೀ, ಪಞ್ಞಾ ಕಿತ್ತಿಸಿಲೋಕವದ್ಧನೀ;

ಪಞ್ಞಾಸಹಿತೋ ನರೋ ಇಧ, ಅಪಿ ದುಕ್ಖೇಸು ಸುಖಾನಿ ವಿನ್ದತಿ.

೫೫೨.

‘‘ನಾಯಂ ಅಜ್ಜತನೋ ಧಮ್ಮೋ, ನಚ್ಛೇರೋ ನಪಿ ಅಬ್ಭುತೋ;

ಯತ್ಥ ಜಾಯೇಥ ಮೀಯೇಥ, ತತ್ಥ ಕಿಂ ವಿಯ ಅಬ್ಭುತಂ.

೫೫೩.

‘‘ಅನನ್ತರಂ ಹಿ ಜಾತಸ್ಸ, ಜೀವಿತಾ ಮರಣಂ ಧುವಂ;

ಜಾತಾ ಜಾತಾ ಮರನ್ತೀಧ, ಏವಂಧಮ್ಮಾ ಹಿ ಪಾಣಿನೋ.

೫೫೪.

‘‘ನ ¶ ಹೇತದತ್ಥಾಯ ಮತಸ್ಸ ಹೋತಿ, ಯಂ ಜೀವಿತತ್ಥಂ ಪರಪೋರಿಸಾನಂ;

ಮತಮ್ಹಿ ರುಣ್ಣಂ ನ ಯಸೋ ನ ಲೋಕ್ಯಂ, ನ ¶ ವಣ್ಣಿತಂ ಸಮಣಬ್ರಾಹ್ಮಣೇಹಿ.

೫೫೫.

‘‘ಚಕ್ಖುಂ ಸರೀರಂ ಉಪಹನ್ತಿ ತೇನ [ಉಪಹನ್ತಿ ರುಣ್ಣಂ (ಸೀ.), ಉಪಹನ್ತಿ ರೋಣ್ಣಂ (ಸ್ಯಾ. ಪೀ.)], ನಿಹೀಯತಿ ವಣ್ಣಬಲಂ ಮತೀ ಚ;

ಆನನ್ದಿನೋ ತಸ್ಸ ದಿಸಾ ಭವನ್ತಿ, ಹಿತೇಸಿನೋ ನಾಸ್ಸ ಸುಖೀ ಭವನ್ತಿ.

೫೫೬.

‘‘ತಸ್ಮಾ ಹಿ ಇಚ್ಛೇಯ್ಯ ಕುಲೇ ವಸನ್ತೇ, ಮೇಧಾವಿನೋ ಚೇವ ಬಹುಸ್ಸುತೇ ಚ;

ಯೇಸಂ ¶ ಹಿ ಪಞ್ಞಾವಿಭವೇನ ಕಿಚ್ಚಂ, ತರನ್ತಿ ನಾವಾಯ ನದಿಂವ ಪುಣ್ಣ’’ನ್ತಿ.

… ಮಹಾಕಪ್ಪಿನೋ ಥೇರೋ….

೪. ಚೂಳಪನ್ಥಕತ್ಥೇರಗಾಥಾ

೫೫೭.

‘‘ದನ್ಧಾ ಮಯ್ಹಂ ಗತೀ ಆಸಿ, ಪರಿಭೂತೋ ಪುರೇ ಅಹಂ;

ಭಾತಾ ಚ ಮಂ ಪಣಾಮೇಸಿ, ‘ಗಚ್ಛ ದಾನಿ ತುವಂ ಘರಂ’.

೫೫೮.

‘‘ಸೋಹಂ ಪಣಾಮಿತೋ ಸನ್ತೋ [ಭಾತಾ (ಅಟ್ಠ.)], ಸಙ್ಘಾರಾಮಸ್ಸ ಕೋಟ್ಠಕೇ;

ದುಮ್ಮನೋ ತತ್ಥ ಅಟ್ಠಾಸಿಂ, ಸಾಸನಸ್ಮಿಂ ಅಪೇಕ್ಖವಾ.

೫೫೯.

‘‘ಭಗವಾ ತತ್ಥ ಆಗಚ್ಛಿ [ಆಗಞ್ಛಿ (ಸೀ. ಪೀ.)], ಸೀಸಂ ಮಯ್ಹಂ ಪರಾಮಸಿ;

ಬಾಹಾಯ ಮಂ ಗಹೇತ್ವಾನ, ಸಙ್ಘಾರಾಮಂ ಪವೇಸಯಿ.

೫೬೦.

‘‘ಅನುಕಮ್ಪಾಯ ಮೇ ಸತ್ಥಾ, ಪಾದಾಸಿ ಪಾದಪುಞ್ಛನಿಂ;

‘ಏತಂ ಸುದ್ಧಂ ಅಧಿಟ್ಠೇಹಿ, ಏಕಮನ್ತಂ ಸ್ವಧಿಟ್ಠಿತಂ’.

೫೬೧.

‘‘ತಸ್ಸಾಹಂ ವಚನಂ ಸುತ್ವಾ, ವಿಹಾಸಿಂ ಸಾಸನೇ ರತೋ;

ಸಮಾಧಿಂ ¶ ಪಟಿಪಾದೇಸಿಂ, ಉತ್ತಮತ್ಥಸ್ಸ ಪತ್ತಿಯಾ.

೫೬೨.

‘‘ಪುಬ್ಬೇನಿವಾಸಂ ¶ ಜಾನಾಮಿ, ದಿಬ್ಬಚಕ್ಖು ವಿಸೋಧಿತಂ;

ತಿಸ್ಸೋ ವಿಜ್ಜಾ ಅನುಪ್ಪತ್ತಾ, ಕತಂ ಬುದ್ಧಸ್ಸ ಸಾಸನಂ.

೫೬೩.

‘‘ಸಹಸ್ಸಕ್ಖತ್ತುಮತ್ತಾನಂ ¶ , ನಿಮ್ಮಿನಿತ್ವಾನ ಪನ್ಥಕೋ;

ನಿಸೀದಮ್ಬವನೇ ರಮ್ಮೇ, ಯಾವ ಕಾಲಪ್ಪವೇದನಾ.

೫೬೪.

‘‘ತತೋ ಮೇ ಸತ್ಥಾ ಪಾಹೇಸಿ, ದೂತಂ ಕಾಲಪ್ಪವೇದಕಂ;

ಪವೇದಿತಮ್ಹಿ ಕಾಲಮ್ಹಿ, ವೇಹಾಸಾದುಪಸಙ್ಕಮಿಂ [ವೇಹಾಸಾನುಪಸಙ್ಕಮಿಂ (ಸ್ಯಾ. ಕ.)].

೫೬೫.

‘‘ವನ್ದಿತ್ವಾ ಸತ್ಥುನೋ ಪಾದೇ, ಏಕಮನ್ತಂ ನಿಸೀದಹಂ;

ನಿಸಿನ್ನಂ ಮಂ ವಿದಿತ್ವಾನ, ಅಥ ಸತ್ಥಾ ಪಟಿಗ್ಗಹಿ.

೫೬೬.

‘‘ಆಯಾಗೋ ಸಬ್ಬಲೋಕಸ್ಸ, ಆಹುತೀನಂ ಪಟಿಗ್ಗಹೋ;

ಪುಞ್ಞಕ್ಖೇತ್ತಂ ಮನುಸ್ಸಾನಂ, ಪಟಿಗಣ್ಹಿತ್ಥ ದಕ್ಖಿಣ’’ನ್ತಿ.

… ಚೂಳಪನ್ಥಕೋ ಥೇರೋ….

೫. ಕಪ್ಪತ್ಥೇರಗಾಥಾ

೫೬೭.

‘‘ನಾನಾಕುಲಮಲಸಮ್ಪುಣ್ಣೋ, ಮಹಾಉಕ್ಕಾರಸಮ್ಭವೋ;

ಚನ್ದನಿಕಂವ ಪರಿಪಕ್ಕಂ, ಮಹಾಗಣ್ಡೋ ಮಹಾವಣೋ.

೫೬೮.

‘‘ಪುಬ್ಬರುಹಿರಸಮ್ಪುಣ್ಣೋ, ಗೂಥಕೂಪೇನ ಗಾಳ್ಹಿತೋ [ಗೂಥಕೂಪೇ ನಿಗಾಳ್ಹಿತೋ (ಸ್ಯಾ. ಪೀ. ಕ.)];

ಆಪೋಪಗ್ಘರಣೋ ಕಾಯೋ, ಸದಾ ಸನ್ದತಿ ಪೂತಿಕಂ.

೫೬೯.

‘‘ಸಟ್ಠಿಕಣ್ಡರಸಮ್ಬನ್ಧೋ ¶ , ಮಂಸಲೇಪನಲೇಪಿತೋ;

ಚಮ್ಮಕಞ್ಚುಕಸನ್ನದ್ಧೋ, ಪೂತಿಕಾಯೋ ನಿರತ್ಥಕೋ.

೫೭೦.

‘‘ಅಟ್ಠಿಸಙ್ಘಾತಘಟಿತೋ, ನ್ಹಾರುಸುತ್ತನಿಬನ್ಧನೋ;

ನೇಕೇಸಂ ಸಂಗತೀಭಾವಾ, ಕಪ್ಪೇತಿ ಇರಿಯಾಪಥಂ.

೫೭೧.

‘‘ಧುವಪ್ಪಯಾತೋ ¶ ಮರಣಾಯ, ಮಚ್ಚುರಾಜಸ್ಸ ಸನ್ತಿಕೇ;

ಇಧೇವ ಛಡ್ಡಯಿತ್ವಾನ, ಯೇನಕಾಮಙ್ಗಮೋ ನರೋ.

೫೭೨.

‘‘ಅವಿಜ್ಜಾಯ ನಿವುತೋ ಕಾಯೋ, ಚತುಗನ್ಥೇನ ಗನ್ಥಿತೋ;

ಓಘಸಂಸೀದನೋ ಕಾಯೋ, ಅನುಸಯಜಾಲಮೋತ್ಥತೋ.

೫೭೩.

‘‘ಪಞ್ಚನೀವರಣೇ ಯುತ್ತೋ, ವಿತಕ್ಕೇನ ಸಮಪ್ಪಿತೋ;

ತಣ್ಹಾಮೂಲೇನಾನುಗತೋ, ಮೋಹಚ್ಛಾದನಛಾದಿತೋ.

೫೭೪.

‘‘ಏವಾಯಂ ವತ್ತತೇ ಕಾಯೋ, ಕಮ್ಮಯನ್ತೇನ ಯನ್ತಿತೋ;

ಸಮ್ಪತ್ತಿ ಚ ವಿಪತ್ಯನ್ತಾ, ನಾನಾಭಾವೋ ವಿಪಜ್ಜತಿ.

೫೭೫.

‘‘ಯೇಮಂ ¶ ¶ ಕಾಯಂ ಮಮಾಯನ್ತಿ, ಅನ್ಧಬಾಲಾ ಪುಥುಜ್ಜನಾ;

ವಡ್ಢೇನ್ತಿ ಕಟಸಿಂ ಘೋರಂ, ಆದಿಯನ್ತಿ ಪುನಬ್ಭವಂ.

೫೭೬.

‘‘ಯೇಮಂ ಕಾಯಂ ವಿವಜ್ಜೇನ್ತಿ, ಗೂಥಲಿತ್ತಂವ ಪನ್ನಗಂ;

ಭವಮೂಲಂ ವಮಿತ್ವಾನ, ಪರಿನಿಬ್ಬಿಸ್ಸನ್ತಿನಾಸವಾ’’ತಿ [ಪರಿನಿಬ್ಬನ್ತುನಾಸವಾ (ಸೀ.)].

… ಕಪ್ಪೋ ಥೇರೋ….

೬. ವಙ್ಗನ್ತಪುತ್ತಉಪಸೇನತ್ಥೇರಗಾಥಾ

೫೭೭.

‘‘ವಿವಿತ್ತಂ ಅಪ್ಪನಿಗ್ಘೋಸಂ, ವಾಳಮಿಗನಿಸೇವಿತಂ;

ಸೇವೇ ಸೇನಾಸನಂ ಭಿಕ್ಖು, ಪಟಿಸಲ್ಲಾನಕಾರಣಾ.

೫೭೮.

‘‘ಸಙ್ಕಾರಪುಞ್ಜಾ ಆಹತ್ವಾ [ಆಹಿತ್ವಾ (ಕ.)], ಸುಸಾನಾ ರಥಿಯಾಹಿ ಚ;

ತತೋ ಸಙ್ಘಾಟಿಕಂ ಕತ್ವಾ, ಲೂಖಂ ಧಾರೇಯ್ಯ ಚೀವರಂ.

೫೭೯.

‘‘ನೀಚಂ ಮನಂ ಕರಿತ್ವಾನ, ಸಪದಾನಂ ಕುಲಾ ಕುಲಂ;

ಪಿಣ್ಡಿಕಾಯ ಚರೇ ಭಿಕ್ಖು, ಗುತ್ತದ್ವಾರೋ ಸುಸಂವುತೋ.

೫೮೦.

‘‘ಲೂಖೇನಪಿ ವಾ [ಲೂಖೇನಪಿ ಚ (ಬಹೂಸು)] ಸನ್ತುಸ್ಸೇ, ನಾಞ್ಞಂ ಪತ್ಥೇ ರಸಂ ಬಹುಂ;

ರಸೇಸು ¶ ಅನುಗಿದ್ಧಸ್ಸ, ಝಾನೇ ನ ರಮತೀ ಮನೋ.

೫೮೧.

‘‘ಅಪ್ಪಿಚ್ಛೋ ಚೇವ ಸನ್ತುಟ್ಠೋ, ಪವಿವಿತ್ತೋ ವಸೇ ಮುನಿ;

ಅಸಂಸಟ್ಠೋ ಗಹಟ್ಠೇಹಿ, ಅನಾಗಾರೇಹಿ ಚೂಭಯಂ.

೫೮೨.

‘‘ಯಥಾ ಜಳೋ ವ ಮೂಗೋ ವ, ಅತ್ತಾನಂ ದಸ್ಸಯೇ ತಥಾ;

ನಾತಿವೇಲಂ ಸಮ್ಭಾಸೇಯ್ಯ, ಸಙ್ಘಮಜ್ಝಮ್ಹಿ ಪಣ್ಡಿತೋ.

೫೮೩.

‘‘ನ ಸೋ ಉಪವದೇ ಕಞ್ಚಿ, ಉಪಘಾತಂ ವಿವಜ್ಜಯೇ;

ಸಂವುತೋ ಪಾತಿಮೋಕ್ಖಸ್ಮಿಂ, ಮತ್ತಞ್ಞೂ ಚಸ್ಸ ಭೋಜನೇ.

೫೮೪.

‘‘ಸುಗ್ಗಹೀತನಿಮಿತ್ತಸ್ಸ, ಚಿತ್ತಸ್ಸುಪ್ಪಾದಕೋವಿದೋ;

ಸಮಂ ಅನುಯುಞ್ಜೇಯ್ಯ, ಕಾಲೇನ ಚ ವಿಪಸ್ಸನಂ.

೫೮೫.

‘‘ವೀರಿಯಸಾತಚ್ಚಸಮ್ಪನ್ನೋ ¶ , ಯುತ್ತಯೋಗೋ ಸದಾ ಸಿಯಾ;

ನ ಚ ಅಪ್ಪತ್ವಾ ದುಕ್ಖನ್ತಂ, ವಿಸ್ಸಾಸಂ ಏಯ್ಯ ಪಣ್ಡಿತೋ.

೫೮೬.

‘‘ಏವಂ ವಿಹರಮಾನಸ್ಸ, ಸುದ್ಧಿಕಾಮಸ್ಸ ಭಿಕ್ಖುನೋ;

ಖೀಯನ್ತಿ ಆಸವಾ ಸಬ್ಬೇ, ನಿಬ್ಬುತಿಞ್ಚಾಧಿಗಚ್ಛತೀ’’ತಿ.

… ಉಪಸೇನೋ ವಙ್ಗನ್ತಪುತ್ತೋ ಥೇರೋ….

೭. (ಅಪರ)-ಗೋತಮತ್ಥೇರಗಾಥಾ

೫೮೭.

‘‘ವಿಜಾನೇಯ್ಯ ¶ ¶ ಸಕಂ ಅತ್ಥಂ, ಅವಲೋಕೇಯ್ಯಾಥ ಪಾವಚನಂ;

ಯಞ್ಚೇತ್ಥ ಅಸ್ಸ ಪತಿರೂಪಂ, ಸಾಮಞ್ಞಂ ಅಜ್ಝುಪಗತಸ್ಸ.

೫೮೮.

‘‘ಮಿತ್ತಂ ಇಧ ಚ ಕಲ್ಯಾಣಂ, ಸಿಕ್ಖಾ ವಿಪುಲಂ ಸಮಾದಾನಂ;

ಸುಸ್ಸೂಸಾ ಚ ಗರೂನಂ, ಏತಂ ಸಮಣಸ್ಸ ಪತಿರೂಪಂ.

೫೮೯.

‘‘ಬುದ್ಧೇಸು ಸಗಾರವತಾ, ಧಮ್ಮೇ ಅಪಚಿತಿ ಯಥಾಭೂತಂ;

ಸಙ್ಘೇ ¶ ಚ ಚಿತ್ತಿಕಾರೋ, ಏತಂ ಸಮಣಸ್ಸ ಪತಿರೂಪಂ.

೫೯೦.

‘‘ಆಚಾರಗೋಚರೇ ಯುತ್ತೋ, ಆಜೀವೋ ಸೋಧಿತೋ ಅಗಾರಯ್ಹೋ;

ಚಿತ್ತಸ್ಸ ಚ ಸಣ್ಠಪನಂ, ಏತಂ ಸಮಣಸ್ಸ ಪತಿರೂಪಂ.

೫೯೧.

‘‘ಚಾರಿತ್ತಂ ಅಥ ವಾರಿತ್ತಂ, ಇರಿಯಾಪಥಿಯಂ ಪಸಾದನಿಯಂ;

ಅಧಿಚಿತ್ತೇ ಚ ಆಯೋಗೋ, ಏತಂ ಸಮಣಸ್ಸ ಪತಿರೂಪಂ.

೫೯೨.

‘‘ಆರಞ್ಞಕಾನಿ ಸೇನಾಸನಾನಿ, ಪನ್ತಾನಿ ಅಪ್ಪಸದ್ದಾನಿ;

ಭಜಿತಬ್ಬಾನಿ ಮುನಿನಾ, ಏತಂ ಸಮಣಸ್ಸ ಪತಿರೂಪಂ.

೫೯೩.

‘‘ಸೀಲಞ್ಚ ಬಾಹುಸಚ್ಚಞ್ಚ, ಧಮ್ಮಾನಂ ಪವಿಚಯೋ ಯಥಾಭೂತಂ;

ಸಚ್ಚಾನಂ ಅಭಿಸಮಯೋ, ಏತಂ ಸಮಣಸ್ಸ ಪತಿರೂಪಂ.

೫೯೪.

‘‘ಭಾವೇಯ್ಯ ಚ ಅನಿಚ್ಚನ್ತಿ, ಅನತ್ತಸಞ್ಞಂ ಅಸುಭಸಞ್ಞಞ್ಚ;

ಲೋಕಮ್ಹಿ ಚ ಅನಭಿರತಿಂ, ಏತಂ ಸಮಣಸ್ಸ ಪತಿರೂಪಂ.

೫೯೫.

‘‘ಭಾವೇಯ್ಯ ಚ ಬೋಜ್ಝಙ್ಗೇ, ಇದ್ಧಿಪಾದಾನಿ ಇನ್ದ್ರಿಯಾನಿ ಬಲಾನಿ;

ಅಟ್ಠಙ್ಗಮಗ್ಗಮರಿಯಂ, ಏತಂ ಸಮಣಸ್ಸ ಪತಿರೂಪಂ.

೫೯೬.

‘‘ತಣ್ಹಂ ಪಜಹೇಯ್ಯ ಮುನಿ, ಸಮೂಲಕೇ ಆಸವೇ ಪದಾಲೇಯ್ಯ;

ವಿಹರೇಯ್ಯ ವಿಪ್ಪಮುತ್ತೋ, ಏತಂ ಸಮಣಸ್ಸ ಪತಿರೂಪ’’ನ್ತಿ.

… ಗೋತಮೋ ಥೇರೋ….

ದಸಕನಿಪಾತೋ ನಿಟ್ಠಿತೋ.

ತತ್ರುದ್ದಾನಂ –

ಕಾಳುದಾಯೀ ಚ ಸೋ ಥೇರೋ, ಏಕವಿಹಾರೀ ಚ ಕಪ್ಪಿನೋ;

ಚೂಳಪನ್ಥಕೋ ಕಪ್ಪೋ ಚ, ಉಪಸೇನೋ ಚ ಗೋತಮೋ;

ಸತ್ತಿಮೇ ದಸಕೇ ಥೇರಾ, ಗಾಥಾಯೋ ಚೇತ್ಥ ಸತ್ತತೀತಿ.

೧೧. ಏಕಾದಸನಿಪಾತೋ

೧. ಸಂಕಿಚ್ಚತ್ಥೇರಗಾಥಾ

೫೯೭.

‘‘ಕಿಂ ¶ ¶ ¶ ¶ ತವತ್ಥೋ ವನೇ ತಾತ, ಉಜ್ಜುಹಾನೋವ ಪಾವುಸೇ;

ವೇರಮ್ಭಾ ರಮಣೀಯಾ ತೇ, ಪವಿವೇಕೋ ಹಿ ಝಾಯಿನಂ.

೫೯೮.

‘‘ಯಥಾ ಅಬ್ಭಾನಿ ವೇರಮ್ಭೋ, ವಾತೋ ನುದತಿ ಪಾವುಸೇ;

ಸಞ್ಞಾ ಮೇ ಅಭಿಕಿರನ್ತಿ, ವಿವೇಕಪಟಿಸಞ್ಞುತಾ.

೫೯೯.

‘‘ಅಪಣ್ಡರೋ ಅಣ್ಡಸಮ್ಭವೋ, ಸೀವಥಿಕಾಯ ನಿಕೇತಚಾರಿಕೋ;

ಉಪ್ಪಾದಯತೇವ ಮೇ ಸತಿಂ, ಸನ್ದೇಹಸ್ಮಿಂ ವಿರಾಗನಿಸ್ಸಿತಂ.

೬೦೦.

‘‘ಯಞ್ಚ ಅಞ್ಞೇ ನ ರಕ್ಖನ್ತಿ, ಯೋ ಚ ಅಞ್ಞೇ ನ ರಕ್ಖತಿ;

ಸ ವೇ ಭಿಕ್ಖು ಸುಖಂ ಸೇತಿ, ಕಾಮೇಸು ಅನಪೇಕ್ಖವಾ.

೬೦೧.

‘‘ಅಚ್ಛೋದಿಕಾ ಪುಥುಸಿಲಾ, ಗೋನಙ್ಗುಲಮಿಗಾಯುತಾ;

ಅಮ್ಬುಸೇವಾಲಸಞ್ಛನ್ನಾ, ತೇ ಸೇಲಾ ರಮಯನ್ತಿ ಮಂ.

೬೦೨.

‘‘ವಸಿತಂ ಮೇ ಅರಞ್ಞೇಸು, ಕನ್ದರಾಸು ಗುಹಾಸು ಚ;

ಸೇನಾಸನೇಸು ಪನ್ತೇಸು, ವಾಳಮಿಗನಿಸೇವಿತೇ.

೬೦೩.

‘‘‘ಇಮೇ ಹಞ್ಞನ್ತು ವಜ್ಝನ್ತು, ದುಕ್ಖಂ ಪಪ್ಪೋನ್ತು ಪಾಣಿನೋ’;

ಸಙ್ಕಪ್ಪಂ ನಾಭಿಜಾನಾಮಿ, ಅನರಿಯಂ ದೋಸಸಂಹಿತಂ.

೬೦೪.

‘‘ಪರಿಚಿಣ್ಣೋ ಮಯಾ ಸತ್ಥಾ, ಕತಂ ಬುದ್ಧಸ್ಸ ಸಾಸನಂ;

ಓಹಿತೋ ಗರುಕೋ ಭಾರೋ, ಭವನೇತ್ತಿ ಸಮೂಹತಾ.

೬೦೫.

‘‘ಯಸ್ಸ ಚತ್ಥಾಯ [ಯಸ್ಸತ್ಥಾಯ (ಸೀ.)] ಪಬ್ಬಜಿತೋ, ಅಗಾರಸ್ಮಾನಗಾರಿಯಂ;

ಸೋ ಮೇ ಅತ್ಥೋ ಅನುಪ್ಪತ್ತೋ, ಸಬ್ಬಸಂಯೋಜನಕ್ಖಯೋ.

೬೦೬.

‘‘ನಾಭಿನನ್ದಾಮಿ ¶ ಮರಣಂ, ನಾಭಿನನ್ದಾಮಿ ಜೀವಿತಂ;

ಕಾಲಞ್ಚ ಪಟಿಕಙ್ಖಾಮಿ, ನಿಬ್ಬಿಸಂ ಭತಕೋ ಯಥಾ.

೬೦೭.

‘‘ನಾಭಿನನ್ದಾಮಿ ¶ ¶ ಮರಣಂ, ನಾಭಿನನ್ದಾಮಿ ಜೀವಿತಂ;

ಕಾಲಞ್ಚ ಪಟಿಕಙ್ಖಾಮಿ, ಸಮ್ಪಜಾನೋ ಪತಿಸ್ಸತೋ’’ತಿ.

… ಸಂಕಿಚ್ಚೋ ಥೇರೋ….

ಏಕಾದಸನಿಪಾತೋ ನಿಟ್ಠಿತೋ.

ತತ್ರುದ್ದಾನಂ –

ಸಂಕಿಚ್ಚಥೇರೋ ಏಕೋವ, ಕತಕಿಚ್ಚೋ ಅನಾಸವೋ;

ಏಕಾದಸನಿಪಾತಮ್ಹಿ, ಗಾಥಾ ಏಕಾದಸೇವ ಚಾತಿ.

೧೨. ದ್ವಾದಸಕನಿಪಾತೋ

೧. ಸೀಲವತ್ಥೇರಗಾಥಾ

೬೦೮.

‘‘ಸೀಲಮೇವಿಧ ¶ ¶ ¶ ಸಿಕ್ಖೇಥ, ಅಸ್ಮಿಂ ಲೋಕೇ ಸುಸಿಕ್ಖಿತಂ;

ಸೀಲಂ ಹಿ ಸಬ್ಬಸಮ್ಪತ್ತಿಂ, ಉಪನಾಮೇತಿ ಸೇವಿತಂ.

೬೦೯.

‘‘ಸೀಲಂ ರಕ್ಖೇಯ್ಯ ಮೇಧಾವೀ, ಪತ್ಥಯಾನೋ ತಯೋ ಸುಖೇ;

ಪಸಂಸಂ ವಿತ್ತಿಲಾಭಞ್ಚ, ಪೇಚ್ಚ ಸಗ್ಗೇ ಪಮೋದನಂ [ಪೇಚ್ಚ ಸಗ್ಗೇ ಚ ಮೋದನಂ (ಸೀ. ಪೀ.)].

೬೧೦.

‘‘ಸೀಲವಾ ಹಿ ಬಹೂ ಮಿತ್ತೇ, ಸಞ್ಞಮೇನಾಧಿಗಚ್ಛತಿ;

ದುಸ್ಸೀಲೋ ಪನ ಮಿತ್ತೇಹಿ, ಧಂಸತೇ ಪಾಪಮಾಚರಂ.

೬೧೧.

‘‘ಅವಣ್ಣಞ್ಚ ಅಕಿತ್ತಿಞ್ಚ, ದುಸ್ಸೀಲೋ ಲಭತೇ ನರೋ;

ವಣ್ಣಂ ಕಿತ್ತಿಂ ಪಸಂಸಞ್ಚ, ಸದಾ ಲಭತಿ ಸೀಲವಾ.

೬೧೨.

‘‘ಆದಿ ¶ ಸೀಲಂ ಪತಿಟ್ಠಾ ಚ, ಕಲ್ಯಾಣಾನಞ್ಚ ಮಾತುಕಂ;

ಪಮುಖಂ ಸಬ್ಬಧಮ್ಮಾನಂ, ತಸ್ಮಾ ಸೀಲಂ ವಿಸೋಧಯೇ.

೬೧೩.

‘‘ವೇಲಾ ಚ ಸಂವರಂ ಸೀಲಂ [ಸಂವರೋ ಸೀಲಂ (ಸೀ.), ಸಂವರಸೀಲಂ (ಸೀ. ಅಟ್ಠ.)], ಚಿತ್ತಸ್ಸ ಅಭಿಹಾಸನಂ;

ತಿತ್ಥಞ್ಚ ಸಬ್ಬಬುದ್ಧಾನಂ, ತಸ್ಮಾ ಸೀಲಂ ವಿಸೋಧಯೇ.

೬೧೪.

‘‘ಸೀಲಂ ಬಲಂ ಅಪ್ಪಟಿಮಂ, ಸೀಲಂ ಆವುಧಮುತ್ತಮಂ;

ಸೀಲಮಾಭರಣಂ ಸೇಟ್ಠಂ, ಸೀಲಂ ಕವಚಮಬ್ಭುತಂ.

೬೧೫.

‘‘ಸೀಲಂ ಸೇತು ಮಹೇಸಕ್ಖೋ, ಸೀಲಂ ಗನ್ಧೋ ಅನುತ್ತರೋ;

ಸೀಲಂ ವಿಲೇಪನಂ ಸೇಟ್ಠಂ, ಯೇನ ವಾತಿ ದಿಸೋದಿಸಂ.

೬೧೬.

‘‘ಸೀಲಂ ಸಮ್ಬಲಮೇವಗ್ಗಂ, ಸೀಲಂ ಪಾಥೇಯ್ಯಮುತ್ತಮಂ;

ಸೀಲಂ ಸೇಟ್ಠೋ ಅತಿವಾಹೋ, ಯೇನ ಯಾತಿ ದಿಸೋದಿಸಂ.

೬೧೭.

‘‘ಇಧೇವ ನಿನ್ದಂ ಲಭತಿ, ಪೇಚ್ಚಾಪಾಯೇ ಚ ದುಮ್ಮನೋ;

ಸಬ್ಬತ್ಥ ದುಮ್ಮನೋ ಬಾಲೋ, ಸೀಲೇಸು ಅಸಮಾಹಿತೋ.

೬೧೮.

‘‘ಇಧೇವ ಕಿತ್ತಿಂ ಲಭತಿ, ಪೇಚ್ಚ ಸಗ್ಗೇ ಚ ಸುಮ್ಮನೋ;

ಸಬ್ಬತ್ಥ ಸುಮನೋ ಧೀರೋ, ಸೀಲೇಸು ಸುಸಮಾಹಿತೋ.

೬೧೯.

‘‘ಸೀಲಮೇವ ¶ ಇಧ ಅಗ್ಗಂ, ಪಞ್ಞವಾ ಪನ ಉತ್ತಮೋ;

ಮನುಸ್ಸೇಸು ಚ ದೇವೇಸು, ಸೀಲಪಞ್ಞಾಣತೋ ಜಯ’’ನ್ತಿ.

… ಸೀಲವೋ ಥೇರೋ….

೨. ಸುನೀತತ್ಥೇರಗಾಥಾ

೬೨೦.

‘‘ನೀಚೇ ¶ ಕುಲಮ್ಹಿ ಜಾತೋಹಂ, ದಲಿದ್ದೋ ಅಪ್ಪಭೋಜನೋ;

ಹೀನಕಮ್ಮಂ [ಹೀನಂ ಕಮ್ಮಂ (ಸ್ಯಾ.)] ಮಮಂ ಆಸಿ, ಅಹೋಸಿಂ ಪುಪ್ಫಛಡ್ಡಕೋ.

೬೨೧.

‘‘ಜಿಗುಚ್ಛಿತೋ ¶ ಮನುಸ್ಸಾನಂ, ಪರಿಭೂತೋ ಚ ವಮ್ಭಿತೋ;

ನೀಚಂ ಮನಂ ಕರಿತ್ವಾನ, ವನ್ದಿಸ್ಸಂ ಬಹುಕಂ ಜನಂ.

೬೨೨.

‘‘ಅಥದ್ದಸಾಸಿಂ ¶ ಸಮ್ಬುದ್ಧಂ, ಭಿಕ್ಖುಸಙ್ಘಪುರಕ್ಖತಂ;

ಪವಿಸನ್ತಂ ಮಹಾವೀರಂ, ಮಗಧಾನಂ ಪುರುತ್ತಮಂ.

೬೨೩.

‘‘ನಿಕ್ಖಿಪಿತ್ವಾನ ಬ್ಯಾಭಙ್ಗಿಂ, ವನ್ದಿತುಂ ಉಪಸಙ್ಕಮಿಂ;

ಮಮೇವ ಅನುಕಮ್ಪಾಯ, ಅಟ್ಠಾಸಿ ಪುರಿಸುತ್ತಮೋ.

೬೨೪.

‘‘ವನ್ದಿತ್ವಾ ಸತ್ಥುನೋ ಪಾದೇ, ಏಕಮನ್ತಂ ಠಿತೋ ತದಾ;

ಪಬ್ಬಜ್ಜಂ ಅಹಮಾಯಾಚಿಂ, ಸಬ್ಬಸತ್ತಾನಮುತ್ತಮಂ.

೬೨೫.

‘‘ತತೋ ಕಾರುಣಿಕೋ ಸತ್ಥಾ, ಸಬ್ಬಲೋಕಾನುಕಮ್ಪಕೋ;

‘ಏಹಿ ಭಿಕ್ಖೂ’ತಿ ಮಂ ಆಹ, ಸಾ ಮೇ ಆಸೂಪಸಮ್ಪದಾ.

೬೨೬.

‘‘ಸೋಹಂ ಏಕೋ ಅರಞ್ಞಸ್ಮಿಂ, ವಿಹರನ್ತೋ ಅತನ್ದಿತೋ;

ಅಕಾಸಿಂ ಸತ್ಥುವಚನಂ, ಯಥಾ ಮಂ ಓವದೀ ಜಿನೋ.

೬೨೭.

‘‘ರತ್ತಿಯಾ ಪಠಮಂ ಯಾಮಂ, ಪುಬ್ಬಜಾತಿಮನುಸ್ಸರಿಂ;

ರತ್ತಿಯಾ ಮಜ್ಝಿಮಂ ಯಾಮಂ, ದಿಬ್ಬಚಕ್ಖುಂ ವಿಸೋಧಯಿಂ [ದಿಬ್ಬಚಕ್ಖು ವಿಸೋಧಿತಂ (ಕ.)];

ರತ್ತಿಯಾ ಪಚ್ಛಿಮೇ ಯಾಮೇ, ತಮೋಖನ್ಧಂ ಪದಾಲಯಿಂ.

೬೨೮.

‘‘ತತೋ ರತ್ಯಾ ವಿವಸಾನೇ, ಸೂರಿಯಸ್ಸುಗ್ಗಮನಂ ಪತಿ;

ಇನ್ದೋ ಬ್ರಹ್ಮಾ ಚ ಆಗನ್ತ್ವಾ, ಮಂ ನಮಸ್ಸಿಂಸು ಪಞ್ಜಲೀ.

೬೨೯.

‘‘‘ನಮೋ ತೇ ಪುರಿಸಾಜಞ್ಞ, ನಮೋ ತೇ ಪುರಿಸುತ್ತಮ;

ಯಸ್ಸ ತೇ ಆಸವಾ ಖೀಣಾ, ದಕ್ಖಿಣೇಯ್ಯೋಸಿ ಮಾರಿಸ’.

೬೩೦.

‘‘ತತೋ ¶ ದಿಸ್ವಾನ ಮಂ ಸತ್ಥಾ, ದೇವಸಙ್ಘಪುರಕ್ಖತಂ;

ಸಿತಂ ಪಾತುಕರಿತ್ವಾನ, ಇಮಮತ್ಥಂ ಅಭಾಸಥ.

೬೩೧.

[ಸು. ನಿ. ೬೬೦ ಸುತ್ತನಿಪಾತೇಪಿ] ‘‘‘ತಪೇನ ¶ ¶ ಬ್ರಹ್ಮಚರಿಯೇನ, ಸಂಯಮೇನ ದಮೇನ ಚ;

ಏತೇನ ಬ್ರಾಹ್ಮಣೋ ಹೋತಿ, ಏತಂ ಬ್ರಾಹ್ಮಣಮುತ್ತಮ’’’ನ್ತಿ.

… ಸುನೀತೋ ಥೇರೋ….

ದ್ವಾದಸಕನಿಪಾತೋ ನಿಟ್ಠಿತೋ.

ತತ್ರುದ್ದಾನಂ –

ಸೀಲವಾ ಚ ಸುನೀತೋ ಚ, ಥೇರಾ ದ್ವೇ ತೇ ಮಹಿದ್ಧಿಕಾ;

ದ್ವಾದಸಮ್ಹಿ ನಿಪಾತಮ್ಹಿ, ಗಾಥಾಯೋ ಚತುವೀಸತೀತಿ.

೧೩. ತೇರಸನಿಪಾತೋ

೧. ಸೋಣಕೋಳಿವಿಸತ್ಥೇರಗಾಥಾ

೬೩೨.

‘‘ಯಾಹು ¶ ¶ ¶ ರಟ್ಠೇ ಸಮುಕ್ಕಟ್ಠೋ, ರಞ್ಞೋ ಅಙ್ಗಸ್ಸ ಪದ್ಧಗೂ [ಪತ್ಥಗೂ (ಸ್ಯಾ.), ಪಟ್ಠಗೂ (ಕ.)];

ಸ್ವಾಜ್ಜ ಧಮ್ಮೇಸು ಉಕ್ಕಟ್ಠೋ, ಸೋಣೋ ದುಕ್ಖಸ್ಸ ಪಾರಗೂ.

೬೩೩.

‘‘ಪಞ್ಚ ಛಿನ್ದೇ ಪಞ್ಚ ಜಹೇ, ಪಞ್ಚ ಚುತ್ತರಿ ಭಾವಯೇ;

ಪಞ್ಚಸಙ್ಗಾತಿಗೋ ಭಿಕ್ಖು, ಓಘತಿಣ್ಣೋತಿ ವುಚ್ಚತಿ.

೬೩೪.

‘‘ಉನ್ನಳಸ್ಸ ಪಮತ್ತಸ್ಸ, ಬಾಹಿರಾಸಸ್ಸ [ಬಾಹಿರಾಸಯಸ್ಸ (ಕ.)] ಭಿಕ್ಖುನೋ;

ಸೀಲಂ ಸಮಾಧಿ ಪಞ್ಞಾ ಚ, ಪಾರಿಪೂರಿಂ ನ ಗಚ್ಛತಿ.

೬೩೫.

‘‘ಯಞ್ಹಿ ಕಿಚ್ಚಂ ಅಪವಿದ್ಧಂ [ತದಪವಿದ್ಧಂ (ಸೀ. ಸ್ಯಾ.)], ಅಕಿಚ್ಚಂ ಪನ ಕರೀಯತಿ;

ಉನ್ನಳಾನಂ ¶ ಪಮತ್ತಾನಂ, ತೇಸಂ ವಡ್ಢನ್ತಿ ಆಸವಾ.

೬೩೬.

‘‘ಯೇಸಞ್ಚ ಸುಸಮಾರದ್ಧಾ, ನಿಚ್ಚಂ ಕಾಯಗತಾ ಸತಿ;

ಅಕಿಚ್ಚಂ ತೇ ನ ಸೇವನ್ತಿ, ಕಿಚ್ಚೇ ಸಾತಚ್ಚಕಾರಿನೋ;

ಸತಾನಂ ಸಮ್ಪಜಾನಾನಂ, ಅತ್ಥಂ ಗಚ್ಛನ್ತಿ ಆಸವಾ.

೬೩೭.

‘‘ಉಜುಮಗ್ಗಮ್ಹಿ ಅಕ್ಖಾತೇ, ಗಚ್ಛಥ ಮಾ ನಿವತ್ತಥ;

ಅತ್ತನಾ ಚೋದಯತ್ತಾನಂ, ನಿಬ್ಬಾನಮಭಿಹಾರಯೇ.

೬೩೮.

‘‘ಅಚ್ಚಾರದ್ಧಮ್ಹಿ ವೀರಿಯಮ್ಹಿ, ಸತ್ಥಾ ಲೋಕೇ ಅನುತ್ತರೋ;

ವೀಣೋಪಮಂ ಕರಿತ್ವಾ ಮೇ, ಧಮ್ಮಂ ದೇಸೇಸಿ ಚಕ್ಖುಮಾ;

ತಸ್ಸಾಹಂ ವಚನಂ ಸುತ್ವಾ, ವಿಹಾಸಿಂ ಸಾಸನೇ ರತೋ.

೬೩೯.

‘‘ಸಮಥಂ ಪಟಿಪಾದೇಸಿಂ, ಉತ್ತಮತ್ಥಸ್ಸ ಪತ್ತಿಯಾ;

ತಿಸ್ಸೋ ವಿಜ್ಜಾ ಅನುಪ್ಪತ್ತಾ, ಕತಂ ಬುದ್ಧಸ್ಸ ಸಾಸನಂ.

೬೪೦.

‘‘ನೇಕ್ಖಮ್ಮೇ [ನಿಕ್ಖಮೇ (ಕ.), ನೇಕ್ಖಮ್ಮಂ (ಮಹಾವ. ೨೪೪; ಅ. ನಿ. ೬.೫೫)] ಅಧಿಮುತ್ತಸ್ಸ, ಪವಿವೇಕಞ್ಚ ಚೇತಸೋ;

ಅಬ್ಯಾಪಜ್ಝಾಧಿಮುತ್ತಸ್ಸ [ಅಬ್ಯಾಪಜ್ಝಾಧಿಮ್ಹತ್ತಸ್ಸ (ಕ.)], ಉಪಾದಾನಕ್ಖಯಸ್ಸ ಚ.

೬೪೧.

‘‘ತಣ್ಹಕ್ಖಯಾಧಿಮುತ್ತಸ್ಸ, ಅಸಮ್ಮೋಹಞ್ಚ ಚೇತಸೋ;

ದಿಸ್ವಾ ಆಯತನುಪ್ಪಾದಂ, ಸಮ್ಮಾ ಚಿತ್ತಂ ವಿಮುಚ್ಚತಿ.

೬೪೨.

‘‘ತಸ್ಸ ¶ ಸಮ್ಮಾ ವಿಮುತ್ತಸ್ಸ, ಸನ್ತಚಿತ್ತಸ್ಸ ಭಿಕ್ಖುನೋ;

ಕತಸ್ಸ ಪಟಿಚಯೋ ನತ್ಥಿ, ಕರಣೀಯಂ ನ ವಿಜ್ಜತಿ.

೬೪೩.

‘‘ಸೇಲೋ ¶ ¶ ಯಥಾ ಏಕಘನೋ [ಏಕಘನೋ (ಕ.)], ವಾತೇನ ನ ಸಮೀರತಿ;

ಏವಂ ರೂಪಾ ರಸಾ ಸದ್ದಾ, ಗನ್ಧಾ ಫಸ್ಸಾ ಚ ಕೇವಲಾ.

೬೪೪.

‘‘ಇಟ್ಠಾ ¶ ಧಮ್ಮಾ ಅನಿಟ್ಠಾ ಚ, ನಪ್ಪವೇಧೇನ್ತಿ ತಾದಿನೋ;

ಠಿತಂ ಚಿತ್ತಂ ವಿಸಞ್ಞುತ್ತಂ, ವಯಞ್ಚಸ್ಸಾನುಪಸ್ಸತೀ’’ತಿ.

… ಸೋಣೋ ಕೋಳಿವಿಸೋ ಥೇರೋ….

ತೇರಸನಿಪಾತೋ ನಿಟ್ಠಿತೋ.

ತತ್ರುದ್ದಾನಂ –

ಸೋಣೋ ಕೋಳಿವಿಸೋ ಥೇರೋ, ಏಕೋಯೇವ ಮಹಿದ್ಧಿಕೋ;

ತೇರಸಮ್ಹಿ ನಿಪಾತಮ್ಹಿ, ಗಾಥಾಯೋ ಚೇತ್ಥ ತೇರಸಾತಿ.

೧೪. ಚುದ್ದಸಕನಿಪಾತೋ

೧. ಖದಿರವನಿಯರೇವತತ್ಥೇರಗಾಥಾ

೬೪೫.

‘‘ಯದಾ ¶ ¶ ¶ ಅಹಂ ಪಬ್ಬಜಿತೋ, ಅಗಾರಸ್ಮಾನಗಾರಿಯಂ;

ನಾಭಿಜಾನಾಮಿ ಸಙ್ಕಪ್ಪಂ, ಅನರಿಯಂ ದೋಸಸಂಹಿತಂ.

೬೪೬.

‘‘‘ಇಮೇ ಹಞ್ಞನ್ತು ವಜ್ಝನ್ತು, ದುಕ್ಖಂ ಪಪ್ಪೋನ್ತು ಪಾಣಿನೋ’;

ಸಙ್ಕಪ್ಪಂ ನಾಭಿಜಾನಾಮಿ, ಇಮಸ್ಮಿಂ ದೀಘಮನ್ತರೇ.

೬೪೭.

‘‘ಮೇತ್ತಞ್ಚ ಅಭಿಜಾನಾಮಿ, ಅಪ್ಪಮಾಣಂ ಸುಭಾವಿತಂ;

ಅನುಪುಬ್ಬಂ ಪರಿಚಿತಂ, ಯಥಾ ಬುದ್ಧೇನ ದೇಸಿತಂ.

೬೪೮.

‘‘ಸಬ್ಬಮಿತ್ತೋ ಸಬ್ಬಸಖೋ, ಸಬ್ಬಭೂತಾನುಕಮ್ಪಕೋ;

ಮೇತ್ತಚಿತ್ತಞ್ಚ [ಮೇತ್ತಂ ಚಿತ್ತಂ (ಸೀ. ಸ್ಯಾ.)] ಭಾವೇಮಿ, ಅಬ್ಯಾಪಜ್ಜರತೋ [ಅಬ್ಯಾಪಜ್ಝರತೋ (ಸೀ. ಸ್ಯಾ.)] ಸದಾ.

೬೪೯.

‘‘ಅಸಂಹೀರಂ ಅಸಂಕುಪ್ಪಂ, ಚಿತ್ತಂ ಆಮೋದಯಾಮಹಂ;

ಬ್ರಹ್ಮವಿಹಾರಂ ಭಾವೇಮಿ, ಅಕಾಪುರಿಸಸೇವಿತಂ.

೬೫೦.

‘‘ಅವಿತಕ್ಕಂ ¶ ಸಮಾಪನ್ನೋ, ಸಮ್ಮಾಸಮ್ಬುದ್ಧಸಾವಕೋ;

ಅರಿಯೇನ ತುಣ್ಹೀಭಾವೇನ, ಉಪೇತೋ ಹೋತಿ ತಾವದೇ.

೬೫೧.

‘‘ಯಥಾಪಿ ಪಬ್ಬತೋ ಸೇಲೋ, ಅಚಲೋ ಸುಪ್ಪತಿಟ್ಠಿತೋ;

ಏವಂ ಮೋಹಕ್ಖಯಾ ಭಿಕ್ಖು, ಪಬ್ಬತೋವ ನ ವೇಧತಿ.

೬೫೨.

‘‘ಅನಙ್ಗಣಸ್ಸ ಪೋಸಸ್ಸ, ನಿಚ್ಚಂ ಸುಚಿಗವೇಸಿನೋ;

ವಾಲಗ್ಗಮತ್ತಂ ಪಾಪಸ್ಸ, ಅಬ್ಭಮತ್ತಂವ ಖಾಯತಿ.

೬೫೩.

‘‘ನಗರಂ ಯಥಾ ಪಚ್ಚನ್ತಂ, ಗುತ್ತಂ ಸನ್ತರಬಾಹಿರಂ;

ಏವಂ ಗೋಪೇಥ ಅತ್ತಾನಂ, ಖಣೋ ವೋ ಮಾ ಉಪಚ್ಚಗಾ.

೬೫೪.

‘‘ನಾಭಿನನ್ದಾಮಿ ಮರಣಂ, ನಾಭಿನನ್ದಾಮಿ ಜೀವಿತಂ;

ಕಾಲಞ್ಚ ಪಟಿಕಙ್ಖಾಮಿ, ನಿಬ್ಬಿಸಂ ಭತಕೋ ಯಥಾ.

೬೫೫.

‘‘ನಾಭಿನನ್ದಾಮಿ ಮರಣಂ…ಪೇ… ಸಮ್ಪಜಾನೋ ಪತಿಸ್ಸತೋ.

೬೫೬.

‘‘ಪರಿಚಿಣ್ಣೋ ಮಯಾ ಸತ್ಥಾ, ಕತಂ ಬುದ್ಧಸ್ಸ ಸಾಸನಂ;

ಓಹಿತೋ ಗರುಕೋ ಭಾರೋ, ಭವನೇತ್ತಿ ಸಮೂಹತಾ.

೬೫೭.

‘‘ಯಸ್ಸ ¶ ¶ ಚತ್ಥಾಯ ಪಬ್ಬಜಿತೋ, ಅಗಾರಸ್ಮಾನಗಾರಿಯಂ;

ಸೋ ಮೇ ಅತ್ಥೋ ಅನುಪ್ಪತ್ತೋ, ಸಬ್ಬಸಂಯೋಜನಕ್ಖಯೋ.

೬೫೮.

‘‘ಸಮ್ಪಾದೇಥಪ್ಪಮಾದೇನ, ಏಸಾ ಮೇ ಅನುಸಾಸನೀ;

ಹನ್ದಾಹಂ ಪರಿನಿಬ್ಬಿಸ್ಸಂ, ವಿಪ್ಪಮುತ್ತೋಮ್ಹಿ ಸಬ್ಬಧೀ’’ತಿ.

… ಖದಿರವನಿಯರೇವತೋ ಥೇರೋ….

೨. ಗೋದತ್ತತ್ಥೇರಗಾಥಾ

೬೫೯.

‘‘ಯಥಾಪಿ ಭದ್ದೋ ಆಜಞ್ಞೋ, ಧುರೇ ಯುತ್ತೋ ಧುರಸ್ಸಹೋ [ಧುರಾಸಹೋ (ಅಟ್ಠ.)];

ಮಥಿತೋ ¶ ಅತಿಭಾರೇನ, ಸಂಯುಗಂ ನಾತಿವತ್ತತಿ.

೬೬೦.

‘‘ಏವಂ ಪಞ್ಞಾಯ ಯೇ ತಿತ್ತಾ, ಸಮುದ್ದೋ ವಾರಿನಾ ಯಥಾ;

ನ ಪರೇ ಅತಿಮಞ್ಞನ್ತಿ, ಅರಿಯಧಮ್ಮೋವ ಪಾಣಿನಂ.

೬೬೧.

‘‘ಕಾಲೇ ¶ ಕಾಲವಸಂ ಪತ್ತಾ, ಭವಾಭವವಸಂ ಗತಾ;

ನರಾ ದುಕ್ಖಂ ನಿಗಚ್ಛನ್ತಿ, ತೇಧ ಸೋಚನ್ತಿ ಮಾಣವಾ [ಮಾನವಾ (ಸೀ.)].

೬೬೨.

‘‘ಉನ್ನತಾ ಸುಖಧಮ್ಮೇನ, ದುಕ್ಖಧಮ್ಮೇನ ಚೋನತಾ;

ದ್ವಯೇನ ಬಾಲಾ ಹಞ್ಞನ್ತಿ, ಯಥಾಭೂತಂ ಅದಸ್ಸಿನೋ.

೬೬೩.

‘‘ಯೇ ಚ ದುಕ್ಖೇ ಸುಖಸ್ಮಿಞ್ಚ, ಮಜ್ಝೇ ಸಿಬ್ಬಿನಿಮಚ್ಚಗೂ;

ಠಿತಾ ತೇ ಇನ್ದಖೀಲೋವ, ನ ತೇ ಉನ್ನತಓನತಾ.

೬೬೪.

‘‘ನ ಹೇವ ಲಾಭೇ ನಾಲಾಭೇ, ನ ಯಸೇ ನ ಚ ಕಿತ್ತಿಯಾ;

ನ ನಿನ್ದಾಯಂ ಪಸಂಸಾಯ, ನ ತೇ ದುಕ್ಖೇ ಸುಖಮ್ಹಿ.

೬೬೫.

‘‘ಸಬ್ಬತ್ಥ ತೇ ನ ಲಿಮ್ಪನ್ತಿ, ಉದಬಿನ್ದುವ ಪೋಕ್ಖರೇ;

ಸಬ್ಬತ್ಥ ಸುಖಿತಾ ಧೀರಾ, ಸಬ್ಬತ್ಥ ಅಪರಾಜಿತಾ.

೬೬೬.

‘‘ಧಮ್ಮೇನ ಚ ಅಲಾಭೋ ಯೋ, ಯೋ ಚ ಲಾಭೋ ಅಧಮ್ಮಿಕೋ;

ಅಲಾಭೋ ಧಮ್ಮಿಕೋ ಸೇಯ್ಯೋ, ಯಂ ಚೇ ಲಾಭೋ ಅಧಮ್ಮಿಕೋ.

೬೬೭.

‘‘ಯಸೋ ಚ ಅಪ್ಪಬುದ್ಧೀನಂ, ವಿಞ್ಞೂನಂ ಅಯಸೋ ಚ ಯೋ;

ಅಯಸೋವ ಸೇಯ್ಯೋ ವಿಞ್ಞೂನಂ, ನ ಯಸೋ ಅಪ್ಪಬುದ್ಧಿನಂ.

೬೬೮.

‘‘ದುಮ್ಮೇಧೇಹಿ ¶ ಪಸಂಸಾ ಚ, ವಿಞ್ಞೂಹಿ ಗರಹಾ ಚ ಯಾ;

ಗರಹಾವ ಸೇಯ್ಯೋ ವಿಞ್ಞೂಹಿ, ಯಂ ಚೇ ಬಾಲಪ್ಪಸಂಸನಾ.

೬೬೯.

‘‘ಸುಖಞ್ಚ ¶ ¶ ಕಾಮಮಯಿಕಂ, ದುಕ್ಖಞ್ಚ ಪವಿವೇಕಿಯಂ;

ಪವಿವೇಕದುಕ್ಖಂ ಸೇಯ್ಯೋ, ಯಂ ಚೇ ಕಾಮಮಯಂ ಸುಖಂ.

೬೭೦.

‘‘ಜೀವಿತಞ್ಚ ಅಧಮ್ಮೇನ, ಧಮ್ಮೇನ ಮರಣಞ್ಚ ಯಂ;

ಮರಣಂ ಧಮ್ಮಿಕಂ ಸೇಯ್ಯೋ, ಯಂ ಚೇ ಜೀವೇ ಅಧಮ್ಮಿಕಂ.

೬೭೧.

‘‘ಕಾಮಕೋಪಪ್ಪಹೀನಾ ಯೇ, ಸನ್ತಚಿತ್ತಾ ಭವಾಭವೇ;

ಚರನ್ತಿ ಲೋಕೇ ಅಸಿತಾ, ನತ್ಥಿ ತೇಸಂ ಪಿಯಾಪಿಯಂ.

೬೭೨.

‘‘ಭಾವಯಿತ್ವಾನ ಬೋಜ್ಝಙ್ಗೇ, ಇನ್ದ್ರಿಯಾನಿ ಬಲಾನಿ ಚ;

ಪಪ್ಪುಯ್ಯ ಪರಮಂ ಸನ್ತಿಂ, ಪರಿನಿಬ್ಬನ್ತಿನಾಸವಾ’’ತಿ.

… ಗೋದತ್ತೋ ಥೇರೋ….

ಚುದ್ದಸಕನಿಪಾತೋ ನಿಟ್ಠಿತೋ.

ತತ್ರುದ್ದಾನಂ –

ರೇವತೋ ಚೇವ ಗೋದತ್ತೋ, ಥೇರಾ ದ್ವೇ ತೇ ಮಹಿದ್ಧಿಕಾ;

ಚುದ್ದಸಮ್ಹಿ ನಿಪಾತಮ್ಹಿ, ಗಾಥಾಯೋ ಅಟ್ಠವೀಸತೀತಿ.

೧೫. ಸೋಳಸಕನಿಪಾತೋ

೧. ಅಞ್ಞಾಸಿಕೋಣ್ಡಞ್ಞತ್ಥೇರಗಾಥಾ

೬೭೩.

‘‘ಏಸ ¶ ¶ ¶ ಭಿಯ್ಯೋ ಪಸೀದಾಮಿ, ಸುತ್ವಾ ಧಮ್ಮಂ ಮಹಾರಸಂ;

ವಿರಾಗೋ ದೇಸಿತೋ ಧಮ್ಮೋ, ಅನುಪಾದಾಯ ಸಬ್ಬಸೋ.

೬೭೪.

‘‘ಬಹೂನಿ ಲೋಕೇ ಚಿತ್ರಾನಿ, ಅಸ್ಮಿಂ ಪಥವಿಮಣ್ಡಲೇ;

ಮಥೇನ್ತಿ ¶ ಮಞ್ಞೇ ಸಙ್ಕಪ್ಪಂ, ಸುಭಂ ರಾಗೂಪಸಂಹಿತಂ.

೬೭೫.

‘‘ರಜಮುಹತಞ್ಚ ವಾತೇನ, ಯಥಾ ಮೇಘೋಪಸಮ್ಮಯೇ;

ಏವಂ ಸಮ್ಮನ್ತಿ ಸಙ್ಕಪ್ಪಾ, ಯದಾ ಪಞ್ಞಾಯ ಪಸ್ಸತಿ.

೬೭೬.

[ಧ. ಪ. ೨೭೭ ಧಮ್ಮಪದೇ] ‘‘ಸಬ್ಬೇ ಸಙ್ಖಾರಾ ಅನಿಚ್ಚಾತಿ, ಯದಾ ಪಞ್ಞಾಯ ಪಸ್ಸತಿ;

ಅಥ ನಿಬ್ಬಿನ್ದತಿ ದುಕ್ಖೇ, ಏಸ ಮಗ್ಗೋ ವಿಸುದ್ಧಿಯಾ.

೬೭೭ .

[ಧ. ಪ. ೨೭೮ ಧಮ್ಮಪದೇ] ‘‘ಸಬ್ಬೇ ಸಙ್ಖಾರಾ ದುಕ್ಖಾತಿ, ಯದಾ ಪಞ್ಞಾಯ ಪಸ್ಸತಿ

ಅಥ ನಿಬ್ಬಿನ್ದತಿ ದುಕ್ಖೇ, ಏಸ ಮಗ್ಗೋ ವಿಸುದ್ಧಿಯಾ.

೬೭೮.

[ಧ. ಪ. ೨೭೯ ಧಮ್ಮಪದೇ] ‘‘ಸಬ್ಬೇ ಧಮ್ಮಾ ಅನತ್ತಾತಿ, ಯದಾ ಪಞ್ಞಾಯ ಪಸ್ಸತಿ;

ಅಥ ನಿಬ್ಬಿನ್ದತಿ ದುಕ್ಖೇ, ಏಸ ಮಗ್ಗೋ ವಿಸುದ್ಧಿಯಾ.

೬೭೯.

‘‘ಬುದ್ಧಾನುಬುದ್ಧೋ ಯೋ ಥೇರೋ, ಕೋಣ್ಡಞ್ಞೋ ತಿಬ್ಬನಿಕ್ಕಮೋ;

ಪಹೀನಜಾತಿಮರಣೋ, ಬ್ರಹ್ಮಚರಿಯಸ್ಸ ಕೇವಲೀ.

೬೮೦.

‘‘ಓಘಪಾಸೋ ದಳ್ಹಖಿಲೋ [ದಳ್ಹೋ ಖಿಲೋ (ಸ್ಯಾ. ಕ.)], ಪಬ್ಬತೋ ದುಪ್ಪದಾಲಯೋ;

ಛೇತ್ವಾ ಖಿಲಞ್ಚ ಪಾಸಞ್ಚ, ಸೇಲಂ ಭೇತ್ವಾನ [ಛೇತ್ವಾನ (ಕ.)] ದುಬ್ಭಿದಂ;

ತಿಣ್ಣೋ ಪಾರಙ್ಗತೋ ಝಾಯೀ, ಮುತ್ತೋ ಸೋ ಮಾರಬನ್ಧನಾ.

೬೮೧.

‘‘ಉದ್ಧತೋ ಚಪಲೋ ಭಿಕ್ಖು, ಮಿತ್ತೇ ಆಗಮ್ಮ ಪಾಪಕೇ;

ಸಂಸೀದತಿ ಮಹೋಘಸ್ಮಿಂ, ಊಮಿಯಾ ಪಟಿಕುಜ್ಜಿತೋ.

೬೮೨.

‘‘ಅನುದ್ಧತೋ ಅಚಪಲೋ, ನಿಪಕೋ ಸಂವುತಿನ್ದ್ರಿಯೋ;

ಕಲ್ಯಾಣಮಿತ್ತೋ ಮೇಧಾವೀ, ದುಕ್ಖಸ್ಸನ್ತಕರೋ ಸಿಯಾ.

೬೮೩.

‘‘ಕಾಲಪಬ್ಬಙ್ಗಸಙ್ಕಾಸೋ, ಕಿಸೋ ಧಮನಿಸನ್ಥತೋ;

ಮತ್ತಞ್ಞೂ ¶ ಅನ್ನಪಾನಸ್ಮಿಂ, ಅದೀನಮನಸೋ ನರೋ.

೬೮೪.

‘‘ಫುಟ್ಠೋ ¶ ಡಂಸೇಹಿ ಮಕಸೇಹಿ, ಅರಞ್ಞಸ್ಮಿಂ ಬ್ರಹಾವನೇ;

ನಾಗೋ ಸಙ್ಗಾಮಸೀಸೇವ, ಸತೋ ತತ್ರಾಧಿವಾಸಯೇ.

೬೮೫.

‘‘ನಾಭಿನನ್ದಾಮಿ ¶ ಮರಣಂ…ಪೇ… ನಿಬ್ಬಿಸಂ ಭತಕೋ ಯಥಾ.

೬೮೬.

‘‘ನಾಭಿನನ್ದಾಮಿ ಮರಣಂ…ಪೇ… ಸಮ್ಪಜಾನೋ ಪತಿಸ್ಸತೋ.

೬೮೭.

‘‘ಪರಿಚಿಣ್ಣೋ ಮಯಾ ಸತ್ಥಾ…ಪೇ… ಭವನೇತ್ತಿ ಸಮೂಹತಾ.

೬೮೮.

‘‘ಯಸ್ಸ ಚತ್ಥಾಯ ಪಬ್ಬಜಿತೋ, ಅಗಾರಸ್ಮಾನಗಾರಿಯಂ;

ಸೋ ಮೇ ಅತ್ಥೋ ಅನುಪ್ಪತ್ತೋ, ಕಿಂ ಮೇ ಸದ್ಧಿವಿಹಾರಿನಾ’’ತಿ.

… ಅಞ್ಞಾಸಿಕೋಣ್ಡಞ್ಞೋ [ಅಞ್ಞಾಕೋಣ್ಡಞ್ಞೋ (ಸೀ. ಸ್ಯಾ.)] ಥೇರೋ….

೨. ಉದಾಯಿತ್ಥೇರಗಾಥಾ

೬೮೯.

[ಅ. ನಿ. ೬.೪೩] ‘‘ಮನುಸ್ಸಭೂತಂ ಸಮ್ಬುದ್ಧಂ, ಅತ್ತದನ್ತಂ ಸಮಾಹಿತಂ;

ಇರಿಯಮಾನಂ ಬ್ರಹ್ಮಪಥೇ, ಚಿತ್ತಸ್ಸೂಪಸಮೇ ರತಂ.

೬೯೦.

‘‘ಯಂ ಮನುಸ್ಸಾ ನಮಸ್ಸನ್ತಿ, ಸಬ್ಬಧಮ್ಮಾನ ಪಾರಗುಂ;

ದೇವಾಪಿ ತಂ ನಮಸ್ಸನ್ತಿ, ಇತಿ ಮೇ ಅರಹತೋ ಸುತಂ.

೬೯೧.

‘‘ಸಬ್ಬಸಂಯೋಜನಾತೀತಂ ¶ , ವನಾ ನಿಬ್ಬನಮಾಗತಂ;

ಕಾಮೇಹಿ ನೇಕ್ಖಮ್ಮರತಂ [ನಿಕ್ಖಮ್ಮರತಂ (ಕ.)], ಮುತ್ತಂ ಸೇಲಾವ ಕಞ್ಚನಂ.

೬೯೨.

‘‘ಸ ವೇ ಅಚ್ಚರುಚಿ ನಾಗೋ, ಹಿಮವಾವಞ್ಞೇ ಸಿಲುಚ್ಚಯೇ;

ಸಬ್ಬೇಸಂ ¶ ನಾಗನಾಮಾನಂ, ಸಚ್ಚನಾಮೋ ಅನುತ್ತರೋ.

೬೯೩.

‘‘ನಾಗಂ ವೋ ಕಿತ್ತಯಿಸ್ಸಾಮಿ, ನ ಹಿ ಆಗುಂ ಕರೋತಿ ಸೋ;

ಸೋರಚ್ಚಂ ಅವಿಹಿಂಸಾ ಚ, ಪಾದಾ ನಾಗಸ್ಸ ತೇ ದುವೇ.

೬೯೪.

‘‘ಸತಿ ಚ ಸಮ್ಪಜಞ್ಞಞ್ಚ, ಚರಣಾ ನಾಗಸ್ಸ ತೇಪರೇ;

ಸದ್ಧಾಹತ್ಥೋ ಮಹಾನಾಗೋ, ಉಪೇಕ್ಖಾಸೇತದನ್ತವಾ.

೬೯೫.

‘‘ಸತಿ ಗೀವಾ ಸಿರೋ ಪಞ್ಞಾ, ವೀಮಂಸಾ ಧಮ್ಮಚಿನ್ತನಾ;

ಧಮ್ಮಕುಚ್ಛಿಸಮಾವಾಸೋ, ವಿವೇಕೋ ತಸ್ಸ ವಾಲಧಿ.

೬೯೬.

‘‘ಸೋ ಝಾಯೀ ಅಸ್ಸಾಸರತೋ, ಅಜ್ಝತ್ತಂ ಸುಸಮಾಹಿತೋ;

ಗಚ್ಛಂ ಸಮಾಹಿತೋ ನಾಗೋ, ಠಿತೋ ನಾಗೋ ಸಮಾಹಿತೋ.

೬೯೭.

‘‘ಸಯಂ ಸಮಾಹಿತೋ ನಾಗೋ, ನಿಸಿನ್ನೋಪಿ ಸಮಾಹಿತೋ;

ಸಬ್ಬತ್ಥ ಸಂವುತೋ ನಾಗೋ, ಏಸಾ ನಾಗಸ್ಸ ಸಮ್ಪದಾ.

೬೯೮.

‘‘ಭುಞ್ಜತಿ ¶ ಅನವಜ್ಜಾನಿ, ಸಾವಜ್ಜಾನಿ ನ ಭುಞ್ಜತಿ;

ಘಾಸಮಚ್ಛಾದನಂ ಲದ್ಧಾ, ಸನ್ನಿಧಿಂ ಪರಿವಜ್ಜಯಂ.

೬೯೯.

‘‘ಸಂಯೋಜನಂ ¶ ಅಣುಂ ಥೂಲಂ, ಸಬ್ಬಂ ಛೇತ್ವಾನ ಬನ್ಧನಂ;

ಯೇನ ಯೇನೇವ ಗಚ್ಛತಿ, ಅನಪಕ್ಖೋವ ಗಚ್ಛತಿ.

೭೦೦.

‘‘ಯಥಾಪಿ ಉದಕೇ ಜಾತಂ, ಪುಣ್ಡರೀಕಂ ಪವಡ್ಢತಿ;

ನೋಪಲಿಪ್ಪತಿ ತೋಯೇನ, ಸುಚಿಗನ್ಧಂ ಮನೋರಮಂ.

೭೦೧.

‘‘ತಥೇವ ಚ ಲೋಕೇ ಜಾತೋ, ಬುದ್ಧೋ ಲೋಕೇ ವಿಹರತಿ;

ನೋಪಲಿಪ್ಪತಿ ಲೋಕೇನ, ತೋಯೇನ ಪದುಮಂ ಯಥಾ.

೭೦೨.

‘‘ಮಹಾಗಿನಿ ಪಜ್ಜಲಿತೋ, ಅನಾಹಾರೋಪಸಮ್ಮತಿ;

ಅಙ್ಗಾರೇಸು ¶ ಚ ಸನ್ತೇಸು, ನಿಬ್ಬುತೋತಿ ಪವುಚ್ಚತಿ.

೭೦೩.

‘‘ಅತ್ಥಸ್ಸಾಯಂ ವಿಞ್ಞಾಪನೀ, ಉಪಮಾ ವಿಞ್ಞೂಹಿ ದೇಸಿತಾ;

ವಿಞ್ಞಿಸ್ಸನ್ತಿ ಮಹಾನಾಗಾ, ನಾಗಂ ನಾಗೇನ ದೇಸಿತಂ.

೭೦೪.

‘‘ವೀತರಾಗೋ ವೀತದೋಸೋ, ವೀತಮೋಹೋ ಅನಾಸವೋ;

ಸರೀರಂ ವಿಜಹಂ ನಾಗೋ, ಪರಿನಿಬ್ಬಿಸ್ಸತ್ಯನಾಸವೋ’’ತಿ.

… ಉದಾಯೀ ಥೇರೋ….

ಸೋಳಸಕನಿಪಾತೋ ನಿಟ್ಠಿತೋ.

ತತ್ರುದ್ದಾನಂ –

ಕೋಣ್ಡಞ್ಞೋ ಚ ಉದಾಯೀ ಚ, ಥೇರಾ ದ್ವೇ ತೇ ಮಹಿದ್ಧಿಕಾ;

ಸೋಳಸಮ್ಹಿ ನಿಪಾತಮ್ಹಿ, ಗಾಥಾಯೋ ದ್ವೇ ಚ ತಿಂಸ ಚಾತಿ.

೧೬. ವೀಸತಿನಿಪಾತೋ

೧. ಅಧಿಮುತ್ತತ್ಥೇರಗಾಥಾ

೭೦೫.

‘‘ಯಞ್ಞತ್ಥಂ ¶ ¶ ¶ ವಾ ಧನತ್ಥಂ ವಾ, ಯೇ ಹನಾಮ ಮಯಂ ಪುರೇ;

ಅವಸೇಸಂ [ಅವಸೇ ತಂ (ಸೀ. ಅಟ್ಠ. ಮೂಲಪಾಠೋ), ಅವಸೇಸಾನಂ (ಅಟ್ಠ.?)] ಭಯಂ ಹೋತಿ, ವೇಧನ್ತಿ ವಿಲಪನ್ತಿ ಚ.

೭೦೬.

‘‘ತಸ್ಸ ತೇ ನತ್ಥಿ ಭೀತತ್ತಂ, ಭಿಯ್ಯೋ ವಣ್ಣೋ ಪಸೀದತಿ;

ಕಸ್ಮಾ ನ ಪರಿದೇವೇಸಿ, ಏವರೂಪೇ ಮಹಬ್ಭಯೇ.

೭೦೭.

‘‘ನತ್ಥಿ ಚೇತಸಿಕಂ ದುಕ್ಖಂ, ಅನಪೇಕ್ಖಸ್ಸ ಗಾಮಣಿ;

ಅತಿಕ್ಕನ್ತಾ ಭಯಾ ಸಬ್ಬೇ, ಖೀಣಸಂಯೋಜನಸ್ಸ ವೇ.

೭೦೮.

‘‘ಖೀಣಾಯ ಭವನೇತ್ತಿಯಾ, ದಿಟ್ಠೇ ಧಮ್ಮೇ ಯಥಾತಥೇ;

ನ ¶ ಭಯಂ ಮರಣೇ ಹೋತಿ, ಭಾರನಿಕ್ಖೇಪನೇ ಯಥಾ.

೭೦೯.

‘‘ಸುಚಿಣ್ಣಂ ಬ್ರಹ್ಮಚರಿಯಂ ಮೇ, ಮಗ್ಗೋ ಚಾಪಿ ಸುಭಾವಿತೋ;

ಮರಣೇ ಮೇ ಭಯಂ ನತ್ಥಿ, ರೋಗಾನಮಿವ ಸಙ್ಖಯೇ.

೭೧೦.

‘‘ಸುಚಿಣ್ಣಂ ಬ್ರಹ್ಮಚರಿಯಂ ಮೇ, ಮಗ್ಗೋ ಚಾಪಿ ಸುಭಾವಿತೋ;

ನಿರಸ್ಸಾದಾ ಭವಾ ದಿಟ್ಠಾ, ವಿಸಂ ಪಿತ್ವಾವ [ಪೀತ್ವಾವ (ಸೀ.)] ಛಡ್ಡಿತಂ.

೭೧೧.

‘‘ಪಾರಗೂ ಅನುಪಾದಾನೋ, ಕತಕಿಚ್ಚೋ ಅನಾಸವೋ;

ತುಟ್ಠೋ ಆಯುಕ್ಖಯಾ ಹೋತಿ, ಮುತ್ತೋ ಆಘಾತನಾ ಯಥಾ.

೭೧೨.

‘‘ಉತ್ತಮಂ ಧಮ್ಮತಂ ಪತ್ತೋ, ಸಬ್ಬಲೋಕೇ ಅನತ್ಥಿಕೋ;

ಆದಿತ್ತಾವ ಘರಾ ಮುತ್ತೋ, ಮರಣಸ್ಮಿಂ ನ ಸೋಚತಿ.

೭೧೩.

‘‘ಯದತ್ಥಿ ಸಙ್ಗತಂ ಕಿಞ್ಚಿ, ಭವೋ ವಾ ಯತ್ಥ ಲಬ್ಭತಿ;

ಸಬ್ಬಂ ಅನಿಸ್ಸರಂ ಏತಂ, ಇತಿ ವುತ್ತಂ ಮಹೇಸಿನಾ.

೭೧೪.

‘‘ಯೋ ತಂ ತಥಾ ಪಜಾನಾತಿ, ಯಥಾ ಬುದ್ಧೇನ ದೇಸಿತಂ;

ನ ಗಣ್ಹಾತಿ ಭವಂ ಕಿಞ್ಚಿ, ಸುತತ್ತಂವ ಅಯೋಗುಳಂ.

೭೧೫.

‘‘ನ ಮೇ ಹೋತಿ ‘ಅಹೋಸಿ’ನ್ತಿ, ‘ಭವಿಸ್ಸ’ನ್ತಿ ನ ಹೋತಿ ಮೇ;

ಸಙ್ಖಾರಾ ವಿಗಮಿಸ್ಸನ್ತಿ, ತತ್ಥ ಕಾ ಪರಿದೇವನಾ.

೭೧೬.

‘‘ಸುದ್ಧಂ ಧಮ್ಮಸಮುಪ್ಪಾದಂ, ಸುದ್ಧಂ ಸಙ್ಖಾರಸನ್ತತಿಂ;

ಪಸ್ಸನ್ತಸ್ಸ ಯಥಾಭೂತಂ, ನ ಭಯಂ ಹೋತಿ ಗಾಮಣಿ.

೭೧೭.

‘‘ತಿಣಕಟ್ಠಸಮಂ ¶ ¶ ಲೋಕಂ, ಯದಾ ಪಞ್ಞಾಯ ಪಸ್ಸತಿ;

ಮಮತ್ತಂ ಸೋ ಅಸಂವಿನ್ದಂ, ‘ನತ್ಥಿ ಮೇ’ತಿ ನ ಸೋಚತಿ.

೭೧೮.

‘‘ಉಕ್ಕಣ್ಠಾಮಿ ¶ ಸರೀರೇನ, ಭವೇನಮ್ಹಿ ಅನತ್ಥಿಕೋ;

ಸೋಯಂ ¶ ಭಿಜ್ಜಿಸ್ಸತಿ ಕಾಯೋ, ಅಞ್ಞೋ ಚ ನ ಭವಿಸ್ಸತಿ.

೭೧೯.

‘‘ಯಂ ವೋ ಕಿಚ್ಚಂ ಸರೀರೇನ, ತಂ ಕರೋಥ ಯದಿಚ್ಛಥ;

ನ ಮೇ ತಪ್ಪಚ್ಚಯಾ ತತ್ಥ, ದೋಸೋ ಪೇಮಞ್ಚ ಹೇಹಿತಿ’’.

೭೨೦.

ತಸ್ಸ ತಂ ವಚನಂ ಸುತ್ವಾ, ಅಬ್ಭುತಂ ಲೋಮಹಂಸನಂ;

ಸತ್ಥಾನಿ ನಿಕ್ಖಿಪಿತ್ವಾನ, ಮಾಣವಾ ಏತದಬ್ರವುಂ.

೭೨೧.

‘‘ಕಿಂ ಭದನ್ತೇ ಕರಿತ್ವಾನ, ಕೋ ವಾ ಆಚರಿಯೋ ತವ;

ಕಸ್ಸ ಸಾಸನಮಾಗಮ್ಮ, ಲಬ್ಭತೇ ತಂ ಅಸೋಕತಾ’’.

೭೨೨.

‘‘ಸಬ್ಬಞ್ಞೂ ಸಬ್ಬದಸ್ಸಾವೀ, ಜಿನೋ ಆಚರಿಯೋ ಮಮ;

ಮಹಾಕಾರುಣಿಕೋ ಸತ್ಥಾ, ಸಬ್ಬಲೋಕತಿಕಿಚ್ಛಕೋ.

೭೨೩.

‘‘ತೇನಾಯಂ ದೇಸಿತೋ ಧಮ್ಮೋ, ಖಯಗಾಮೀ ಅನುತ್ತರೋ;

ತಸ್ಸ ಸಾಸನಮಾಗಮ್ಮ, ಲಬ್ಭತೇ ತಂ ಅಸೋಕತಾ’’.

೭೨೪.

ಸುತ್ವಾನ ಚೋರಾ ಇಸಿನೋ ಸುಭಾಸಿತಂ, ನಿಕ್ಖಿಪ್ಪ ಸತ್ಥಾನಿ ಚ ಆವುಧಾನಿ ಚ;

ತಮ್ಹಾ ಚ ಕಮ್ಮಾ ವಿರಮಿಂಸು ಏಕೇ, ಏಕೇ ಚ ಪಬ್ಬಜ್ಜಮರೋಚಯಿಂಸು.

೭೨೫.

ತೇ ಪಬ್ಬಜಿತ್ವಾ ಸುಗತಸ್ಸ ಸಾಸನೇ, ಭಾವೇತ್ವ ಬೋಜ್ಝಙ್ಗಬಲಾನಿ ಪಣ್ಡಿತಾ;

ಉದಗ್ಗಚಿತ್ತಾ ಸುಮನಾ ಕತಿನ್ದ್ರಿಯಾ, ಫುಸಿಂಸು ನಿಬ್ಬಾನಪದಂ ಅಸಙ್ಖತನ್ತಿ.

…ಅಧಿಮುತ್ತೋ ಥೇರೋ….

೨. ಪಾರಾಪರಿಯತ್ಥೇರಗಾಥಾ

೭೨೬.

‘‘ಸಮಣಸ್ಸ ¶ ಅಹು ಚಿನ್ತಾ, ಪಾರಾಪರಿಯಸ್ಸ ಭಿಕ್ಖುನೋ;

ಏಕಕಸ್ಸ ನಿಸಿನ್ನಸ್ಸ, ಪವಿವಿತ್ತಸ್ಸ ಝಾಯಿನೋ.

೭೨೭.

‘‘ಕಿಮಾನುಪುಬ್ಬಂ ಪುರಿಸೋ, ಕಿಂ ವತಂ ಕಿಂ ಸಮಾಚಾರಂ;

ಅತ್ತನೋ ಕಿಚ್ಚಕಾರೀಸ್ಸ, ನ ಚ ಕಞ್ಚಿ ವಿಹೇಠಯೇ.

೭೨೮.

‘‘ಇನ್ದ್ರಿಯಾನಿ ¶ ಮನುಸ್ಸಾನಂ, ಹಿತಾಯ ಅಹಿತಾಯ ಚ;

ಅರಕ್ಖಿತಾನಿ ಅಹಿತಾಯ, ರಕ್ಖಿತಾನಿ ಹಿತಾಯ ಚ.

೭೨೯.

‘‘ಇನ್ದ್ರಿಯಾನೇವ ಸಾರಕ್ಖಂ, ಇನ್ದ್ರಿಯಾನಿ ಚ ಗೋಪಯಂ;

ಅತ್ತನೋ ಕಿಚ್ಚಕಾರೀಸ್ಸ, ನ ಚ ಕಞ್ಚಿ ವಿಹೇಠಯೇ.

೭೩೦.

‘‘ಚಕ್ಖುನ್ದ್ರಿಯಂ ¶ ಚೇ ರೂಪೇಸು, ಗಚ್ಛನ್ತಂ ಅನಿವಾರಯಂ;

ಅನಾದೀನವದಸ್ಸಾವೀ, ಸೋ ದುಕ್ಖಾ ನ ಹಿ ಮುಚ್ಚತಿ.

೭೩೧.

‘‘ಸೋತಿನ್ದ್ರಿಯಂ ಚೇ ಸದ್ದೇಸು, ಗಚ್ಛನ್ತಂ ಅನಿವಾರಯಂ;

ಅನಾದೀನವದಸ್ಸಾವೀ, ಸೋ ದುಕ್ಖಾ ನ ಹಿ ಮುಚ್ಚತಿ.

೭೩೨.

‘‘ಅನಿಸ್ಸರಣದಸ್ಸಾವೀ ¶ , ಗನ್ಧೇ ಚೇ ಪಟಿಸೇವತಿ;

ನ ಸೋ ಮುಚ್ಚತಿ ದುಕ್ಖಮ್ಹಾ, ಗನ್ಧೇಸು ಅಧಿಮುಚ್ಛಿತೋ.

೭೩೩.

‘‘ಅಮ್ಬಿಲಂ ಮಧುರಗ್ಗಞ್ಚ, ತಿತ್ತಕಗ್ಗಮನುಸ್ಸರಂ;

ರಸತಣ್ಹಾಯ ಗಧಿತೋ, ಹದಯಂ ನಾವಬುಜ್ಝತಿ.

೭೩೪.

‘‘ಸುಭಾನ್ಯಪ್ಪಟಿಕೂಲಾನಿ, ಫೋಟ್ಠಬ್ಬಾನಿ ಅನುಸ್ಸರಂ;

ರತ್ತೋ ರಾಗಾಧಿಕರಣಂ, ವಿವಿಧಂ ವಿನ್ದತೇ ದುಖಂ.

೭೩೫.

‘‘ಮನಂ ಚೇತೇಹಿ ಧಮ್ಮೇಹಿ, ಯೋ ನ ಸಕ್ಕೋತಿ ರಕ್ಖಿತುಂ;

ತತೋ ¶ ನಂ ದುಕ್ಖಮನ್ವೇತಿ, ಸಬ್ಬೇಹೇತೇಹಿ ಪಞ್ಚಹಿ.

೭೩೬.

‘‘ಪುಬ್ಬಲೋಹಿತಸಮ್ಪುಣ್ಣಂ, ಬಹುಸ್ಸ ಕುಣಪಸ್ಸ ಚ;

ನರವೀರಕತಂ ವಗ್ಗುಂ, ಸಮುಗ್ಗಮಿವ ಚಿತ್ತಿತಂ.

೭೩೭.

‘‘ಕಟುಕಂ ಮಧುರಸ್ಸಾದಂ, ಪಿಯನಿಬನ್ಧನಂ ದುಖಂ;

ಖುರಂವ ಮಧುನಾ ಲಿತ್ತಂ, ಉಲ್ಲಿಹಂ ನಾವಬುಜ್ಝತಿ.

೭೩೮.

‘‘ಇತ್ಥಿರೂಪೇ ಇತ್ಥಿಸರೇ, ಫೋಟ್ಠಬ್ಬೇಪಿ ಚ ಇತ್ಥಿಯಾ;

ಇತ್ಥಿಗನ್ಧೇಸು ಸಾರತ್ತೋ, ವಿವಿಧಂ ವಿನ್ದತೇ ದುಖಂ.

೭೩೯.

‘‘ಇತ್ಥಿಸೋತಾನಿ ಸಬ್ಬಾನಿ, ಸನ್ದನ್ತಿ ಪಞ್ಚ ಪಞ್ಚಸು;

ತೇಸಮಾವರಣಂ ಕಾತುಂ, ಯೋ ಸಕ್ಕೋತಿ ವೀರಿಯವಾ.

೭೪೦.

‘‘ಸೋ ಅತ್ಥವಾ ಸೋ ಧಮ್ಮಟ್ಠೋ, ಸೋ ದಕ್ಖೋ ಸೋ ವಿಚಕ್ಖಣೋ;

ಕರೇಯ್ಯ ರಮಮಾನೋಪಿ, ಕಿಚ್ಚಂ ಧಮ್ಮತ್ಥಸಂಹಿತಂ.

೭೪೧.

‘‘ಅಥೋ ¶ ಸೀದತಿ ಸಞ್ಞುತ್ತಂ, ವಜ್ಜೇ ಕಿಚ್ಚಂ ನಿರತ್ಥಕಂ;

‘ನ ತಂ ಕಿಚ್ಚ’ನ್ತಿ ಮಞ್ಞಿತ್ವಾ, ಅಪ್ಪಮತ್ತೋ ವಿಚಕ್ಖಣೋ.

೭೪೨.

‘‘ಯಞ್ಚ ಅತ್ಥೇನ ಸಞ್ಞುತ್ತಂ, ಯಾ ಚ ಧಮ್ಮಗತಾ ರತಿ;

ತಂ ಸಮಾದಾಯ ವತ್ತೇಥ, ಸಾ ಹಿ ವೇ ಉತ್ತಮಾ ರತಿ.

೭೪೩.

‘‘ಉಚ್ಚಾವಚೇಹುಪಾಯೇಹಿ, ಪರೇಸಮಭಿಜಿಗೀಸತಿ;

ಹನ್ತ್ವಾ ವಧಿತ್ವಾ ಅಥ ಸೋಚಯಿತ್ವಾ, ಆಲೋಪತಿ ಸಾಹಸಾ ಯೋ ಪರೇಸಂ.

೭೪೪.

‘‘ತಚ್ಛನ್ತೋ ಆಣಿಯಾ ಆಣಿಂ, ನಿಹನ್ತಿ ಬಲವಾ ಯಥಾ;

ಇನ್ದ್ರಿಯಾನಿನ್ದ್ರಿಯೇಹೇವ ¶ , ನಿಹನ್ತಿ ಕುಸಲೋ ತಥಾ.

೭೪೫.

‘‘ಸದ್ಧಂ ¶ ವೀರಿಯಂ ಸಮಾಧಿಞ್ಚ, ಸತಿಪಞ್ಞಞ್ಚ ಭಾವಯಂ;

ಪಞ್ಚ ಪಞ್ಚಹಿ ಹನ್ತ್ವಾನ, ಅನೀಘೋ ಯಾತಿ ಬ್ರಾಹ್ಮಣೋ.

೭೪೬.

‘‘ಸೋ ಅತ್ಥವಾ ಸೋ ಧಮ್ಮಟ್ಠೋ, ಕತ್ವಾ ವಾಕ್ಯಾನುಸಾಸನಿಂ;

ಸಬ್ಬೇನ ಸಬ್ಬಂ ಬುದ್ಧಸ್ಸ, ಸೋ ನರೋ ಸುಖಮೇಧತೀ’’ತಿ.

…ಪಾರಾಪರಿಯೋ ಥೇರೋ….

೩. ತೇಲಕಾನಿತ್ಥೇರಗಾಥಾ

೭೪೭.

‘‘ಚಿರರತ್ತಂ ವತಾತಾಪೀ, ಧಮ್ಮಂ ಅನುವಿಚಿನ್ತಯಂ;

ಸಮಂ ಚಿತ್ತಸ್ಸ ನಾಲತ್ಥಂ, ಪುಚ್ಛಂ ಸಮಣಬ್ರಾಹ್ಮಣೇ.

೭೪೮.

‘‘‘ಕೋ ¶ ಸೋ ಪಾರಙ್ಗತೋ ಲೋಕೇ, ಕೋ ಪತ್ತೋ ಅಮತೋಗಧಂ;

ಕಸ್ಸ ಧಮ್ಮಂ ಪಟಿಚ್ಛಾಮಿ, ಪರಮತ್ಥವಿಜಾನನಂ’.

೭೪೯.

‘‘ಅನ್ತೋವಙ್ಕಗತೋ ಆಸಿ, ಮಚ್ಛೋವ ಘಸಮಾಮಿಸಂ;

ಬದ್ಧೋ ಮಹಿನ್ದಪಾಸೇನ, ವೇಪಚಿತ್ಯಸುರೋ ಯಥಾ.

೭೫೦.

‘‘ಅಞ್ಛಾಮಿ ನಂ ನ ಮುಞ್ಚಾಮಿ, ಅಸ್ಮಾ ಸೋಕಪರಿದ್ದವಾ;

ಕೋ ಮೇ ಬನ್ಧಂ ಮುಞ್ಚಂ ಲೋಕೇ, ಸಮ್ಬೋಧಿಂ ವೇದಯಿಸ್ಸತಿ.

೭೫೧.

‘‘ಸಮಣಂ ಬ್ರಾಹ್ಮಣಂ ವಾ ಕಂ, ಆದಿಸನ್ತಂ ಪಭಙ್ಗುನಂ.

ಕಸ್ಸ ಧಮ್ಮಂ ಪಟಿಚ್ಛಾಮಿ, ಜರಾಮಚ್ಚುಪವಾಹನಂ.

೭೫೨.

‘‘ವಿಚಿಕಿಚ್ಛಾಕಙ್ಖಾಗನ್ಥಿತಂ, ಸಾರಮ್ಭಬಲಸಞ್ಞುತಂ;

ಕೋಧಪ್ಪತ್ತಮನತ್ಥದ್ಧಂ, ಅಭಿಜಪ್ಪಪ್ಪದಾರಣಂ.

೭೫೩.

‘‘ತಣ್ಹಾಧನುಸಮುಟ್ಠಾನಂ ¶ , ದ್ವೇ ಚ ಪನ್ನರಸಾಯುತಂ [ದ್ವೇಧಾಪನ್ನರಸಾಯುತಂ (?)];

ಪಸ್ಸ ¶ ಓರಸಿಕಂ ಬಾಳ್ಹಂ, ಭೇತ್ವಾನ ಯದಿ [ಯದ (ಸೀ. ಅಟ್ಠ.) ಹದಿ (?) ‘‘ಹದಯೇ’’ತಿ ತಂಸಂವಣ್ಣನಾ] ತಿಟ್ಠತಿ.

೭೫೪.

‘‘ಅನುದಿಟ್ಠೀನಂ ಅಪ್ಪಹಾನಂ, ಸಙ್ಕಪ್ಪಪರತೇಜಿತಂ;

ತೇನ ವಿದ್ಧೋ ಪವೇಧಾಮಿ, ಪತ್ತಂವ ಮಾಲುತೇರಿತಂ.

೭೫೫.

‘‘ಅಜ್ಝತ್ತಂ ಮೇ ಸಮುಟ್ಠಾಯ, ಖಿಪ್ಪಂ ಪಚ್ಚತಿ ಮಾಮಕಂ;

ಛಫಸ್ಸಾಯತನೀ ಕಾಯೋ, ಯತ್ಥ ಸರತಿ ಸಬ್ಬದಾ.

೭೫೬.

‘‘ತಂ ನ ಪಸ್ಸಾಮಿ ತೇಕಿಚ್ಛಂ, ಯೋ ಮೇತಂ ಸಲ್ಲಮುದ್ಧರೇ;

ನಾನಾರಜ್ಜೇನ ಸತ್ಥೇನ [ನಾರಗ್ಗೇನ ನ ಸತ್ಥೇನ (?)], ನಾಞ್ಞೇನ ವಿಚಿಕಿಚ್ಛಿತಂ.

೭೫೭.

‘‘ಕೋ ಮೇ ಅಸತ್ಥೋ ಅವಣೋ, ಸಲ್ಲಮಬ್ಭನ್ತರಪಸ್ಸಯಂ;

ಅಹಿಂಸಂ ಸಬ್ಬಗತ್ತಾನಿ, ಸಲ್ಲಂ ಮೇ ಉದ್ಧರಿಸ್ಸತಿ.

೭೫೮.

‘‘ಧಮ್ಮಪ್ಪತಿ ¶ ಹಿ ಸೋ ಸೇಟ್ಠೋ, ವಿಸದೋಸಪ್ಪವಾಹಕೋ;

ಗಮ್ಭೀರೇ ಪತಿತಸ್ಸ ಮೇ, ಥಲಂ ಪಾಣಿಞ್ಚ ದಸ್ಸಯೇ.

೭೫೯.

‘‘ರಹದೇಹಮಸ್ಮಿ ಓಗಾಳ್ಹೋ, ಅಹಾರಿಯರಜಮತ್ತಿಕೇ;

ಮಾಯಾಉಸೂಯಸಾರಮ್ಭ, ಥಿನಮಿದ್ಧಮಪತ್ಥಟೇ.

೭೬೦.

‘‘ಉದ್ಧಚ್ಚಮೇಘಥನಿತಂ, ಸಂಯೋಜನವಲಾಹಕಂ;

ವಾಹಾ ವಹನ್ತಿ ಕುದ್ದಿಟ್ಠಿಂ [ದುದ್ದಿಟ್ಠಿಂ (ಸೀ. ಧ. ಪ. ೩೩೯)], ಸಙ್ಕಪ್ಪಾ ರಾಗನಿಸ್ಸಿತಾ.

೭೬೧.

‘‘ಸವನ್ತಿ ಸಬ್ಬಧಿ ಸೋತಾ, ಲತಾ ಉಬ್ಭಿಜ್ಜ ತಿಟ್ಠತಿ;

ತೇ ಸೋತೇ ಕೋ ನಿವಾರೇಯ್ಯ, ತಂ ಲತಂ ಕೋ ಹಿ ಛೇಚ್ಛತಿ.

೭೬೨.

‘‘ವೇಲಂ ¶ ಕರೋಥ ಭದ್ದನ್ತೇ, ಸೋತಾನಂ ಸನ್ನಿವಾರಣಂ;

ಮಾ ತೇ ಮನೋಮಯೋ ಸೋತೋ, ರುಕ್ಖಂವ ಸಹಸಾ ಲುವೇ.

೭೬೩.

‘‘ಏವಂ ¶ ಮೇ ಭಯಜಾತಸ್ಸ, ಅಪಾರಾ ಪಾರಮೇಸತೋ;

ತಾಣೋ ಪಞ್ಞಾವುಧೋ ಸತ್ಥಾ, ಇಸಿಸಙ್ಘನಿಸೇವಿತೋ.

೭೬೪.

‘‘ಸೋಪಾಣಂ ಸುಗತಂ ಸುದ್ಧಂ, ಧಮ್ಮಸಾರಮಯಂ ದಳ್ಹಂ;

ಪಾದಾಸಿ ವುಯ್ಹಮಾನಸ್ಸ, ‘ಮಾ ಭಾಯೀ’ತಿ ಚ ಮಬ್ರವಿ.

೭೬೫.

‘‘ಸತಿಪಟ್ಠಾನಪಾಸಾದಂ, ಆರುಯ್ಹ ಪಚ್ಚವೇಕ್ಖಿಸಂ;

ಯಂ ತಂ ಪುಬ್ಬೇ ಅಮಞ್ಞಿಸ್ಸಂ, ಸಕ್ಕಾಯಾಭಿರತಂ ಪಜಂ.

೭೬೬.

‘‘ಯದಾ ¶ ಚ ಮಗ್ಗಮದ್ದಕ್ಖಿಂ, ನಾವಾಯ ಅಭಿರೂಹನಂ;

ಅನಧಿಟ್ಠಾಯ ಅತ್ತಾನಂ, ತಿತ್ಥಮದ್ದಕ್ಖಿಮುತ್ತಮಂ.

೭೬೭.

‘‘ಸಲ್ಲಂ ಅತ್ತಸಮುಟ್ಠಾನಂ, ಭವನೇತ್ತಿಪ್ಪಭಾವಿತಂ;

ಏತೇಸಂ ಅಪ್ಪವತ್ತಾಯ [ಅಪ್ಪವತ್ತಿಯಾ (?)], ದೇಸೇಸಿ ಮಗ್ಗಮುತ್ತಮಂ.

೭೬೮.

‘‘ದೀಘರತ್ತಾನುಸಯಿತಂ, ಚಿರರತ್ತಮಧಿಟ್ಠಿತಂ;

ಬುದ್ಧೋ ಮೇಪಾನುದೀ ಗನ್ಥಂ, ವಿಸದೋಸಪ್ಪವಾಹನೋ’’ತಿ.

…ತೇಲಕಾನಿ ಥೇರೋ….

೪. ರಟ್ಠಪಾಲತ್ಥೇರಗಾಥಾ

೭೬೯.

[ಮ. ನಿ. ೨.೩೦೨] ‘‘ಪಸ್ಸ ಚಿತ್ತಕತಂ ಬಿಮ್ಬಂ, ಅರುಕಾಯಂ ಸಮುಸ್ಸಿತಂ;

ಆತುರಂ ಬಹುಸಙ್ಕಪ್ಪಂ, ಯಸ್ಸ ನತ್ಥಿ ಧುವಂ ಠಿತಿ.

೭೭೦.

‘‘ಪಸ್ಸ ಚಿತ್ತಕತಂ ರೂಪಂ, ಮಣಿನಾ ಕುಣ್ಡಲೇನ ಚ;

ಅಟ್ಠಿಂ ತಚೇನ ಓನದ್ಧಂ, ಸಹ ವತ್ಥೇಹಿ ಸೋಭತಿ.

೭೭೧.

‘‘ಅಲತ್ತಕಕತಾ ¶ ಪಾದಾ, ಮುಖಂ ಚುಣ್ಣಕಮಕ್ಖಿತಂ;

ಅಲಂ ಬಾಲಸ್ಸ ಮೋಹಾಯ, ನೋ ಚ ಪಾರಗವೇಸಿನೋ.

೭೭೨.

‘‘ಅಟ್ಠಪದಕತಾ ¶ ಕೇಸಾ, ನೇತ್ತಾ ಅಞ್ಜನಮಕ್ಖಿತಾ;

ಅಲಂ ಬಾಲಸ್ಸ ಮೋಹಾಯ, ನೋ ಚ ಪಾರಗವೇಸಿನೋ.

೭೭೩.

‘‘ಅಞ್ಜನೀವ ನವಾ ಚಿತ್ತಾ, ಪೂತಿಕಾಯೋ ಅಲಙ್ಕತೋ;

ಅಲಂ ಬಾಲಸ್ಸ ಮೋಹಾಯ, ನೋ ಚ ಪಾರಗವೇಸಿನೋ.

೭೭೪.

‘‘ಓದಹಿ ಮಿಗವೋ ಪಾಸಂ, ನಾಸದಾ ವಾಗುರಂ ಮಿಗೋ;

ಭುತ್ವಾ ನಿವಾಪಂ ಗಚ್ಛಾಮ, ಕನ್ದನ್ತೇ ಮಿಗಬನ್ಧಕೇ.

೭೭೫.

‘‘ಛಿನ್ನೋ ಪಾಸೋ ಮಿಗವಸ್ಸ, ನಾಸದಾ ವಾಗುರಂ ಮಿಗೋ;

ಭುತ್ವಾ ನಿವಾಪಂ ಗಚ್ಛಾಮ, ಸೋಚನ್ತೇ ಮಿಗಲುದ್ದಕೇ.

೭೭೬.

‘‘ಪಸ್ಸಾಮಿ ಲೋಕೇ ಸಧನೇ ಮನುಸ್ಸೇ, ಲದ್ಧಾನ ವಿತ್ತಂ ನ ದದನ್ತಿ ಮೋಹಾ;

ಲುದ್ಧಾ ¶ ಧನಂ ಸನ್ನಿಚಯಂ ಕರೋನ್ತಿ, ಭಿಯ್ಯೋವ ಕಾಮೇ ಅಭಿಪತ್ಥಯನ್ತಿ.

೭೭೭.

‘‘ರಾಜಾ ¶ ಪಸಯ್ಹಪ್ಪಥವಿಂ ವಿಜೇತ್ವಾ, ಸಸಾಗರನ್ತಂ ಮಹಿಮಾವಸನ್ತೋ;

ಓರಂ ಸಮುದ್ದಸ್ಸ ಅತಿತ್ತರೂಪೋ, ಪಾರಂ ಸಮುದ್ದಸ್ಸಪಿ ಪತ್ಥಯೇಥ.

೭೭೮.

‘‘ರಾಜಾ ಚ ಅಞ್ಞೇ ಚ ಬಹೂ ಮನುಸ್ಸಾ, ಅವೀತತಣ್ಹಾ ಮರಣಂ ಉಪೇನ್ತಿ;

ಊನಾವ ಹುತ್ವಾನ ಜಹನ್ತಿ ದೇಹಂ, ಕಾಮೇಹಿ ಲೋಕಮ್ಹಿ ನ ಹತ್ಥಿ ತಿತ್ತಿ.

೭೭೯.

‘‘ಕನ್ದನ್ತಿ ¶ ನಂ ಞಾತೀ ಪಕಿರಿಯ ಕೇಸೇ, ಅಹೋ ವತಾ ನೋ ಅಮರಾತಿ ಚಾಹು;

ವತ್ಥೇನ ನಂ ಪಾರುತಂ ನೀಹರಿತ್ವಾ, ಚಿತಂ ಸಮೋಧಾಯ ತತೋ ಡಹನ್ತಿ.

೭೮೦.

‘‘ಸೋ ಡಯ್ಹತಿ ಸೂಲೇಹಿ ತುಜ್ಜಮಾನೋ, ಏಕೇನ ವತ್ಥೇನ [ಏತೇನ ಗತ್ಥೇನ (ಕ.)] ಪಹಾಯ ಭೋಗೇ;

ನ ಮೀಯಮಾನಸ್ಸ ಭವನ್ತಿ ತಾಣಾ, ಞಾತೀ ಚ ಮಿತ್ತಾ ಅಥ ವಾ ಸಹಾಯಾ.

೭೮೧.

‘‘ದಾಯಾದಕಾ ತಸ್ಸ ಧನಂ ಹರನ್ತಿ, ಸತ್ತೋ ಪನ ಗಚ್ಛತಿ ಯೇನ ಕಮ್ಮಂ;

ನ ಮೀಯಮಾನಂ ಧನಮನ್ವೇತಿ [ಮನ್ವಿತಿ (ಕ.)] ಕಿಞ್ಚಿ, ಪುತ್ತಾ ಚ ದಾರಾ ಚ ಧನಞ್ಚ ರಟ್ಠಂ.

೭೮೨.

‘‘ನ ದೀಘಮಾಯುಂ ಲಭತೇ ಧನೇನ, ನ ಚಾಪಿ ವಿತ್ತೇನ ಜರಂ ವಿಹನ್ತಿ;

ಅಪ್ಪಪ್ಪಂ ಹಿದಂ ಜೀವಿತಮಾಹು ಧೀರಾ, ಅಸಸ್ಸತಂ ವಿಪ್ಪರಿಣಾಮಧಮ್ಮಂ.

೭೮೩.

‘‘ಅಡ್ಢಾ ದಲಿದ್ದಾ ಚ ಫುಸನ್ತಿ ಫಸ್ಸಂ, ಬಾಲೋ ಚ ಧೀರೋ ಚ ತಥೇವ ಫುಟ್ಠೋ;

ಬಾಲೋ ಹಿ ಬಾಲ್ಯಾ ವಧಿತೋವ ಸೇತಿ, ಧೀರೋ ¶ ಚ ನೋ ವೇಧತಿ ಫಸ್ಸಫುಟ್ಠೋ.

೭೮೪.

‘‘ತಸ್ಮಾ ¶ ಹಿ ಪಞ್ಞಾವ ಧನೇನ ಸೇಯ್ಯಾ, ಯಾಯ ವೋಸಾನಮಿಧಾಧಿಗಚ್ಛತಿ;

ಅಬ್ಯೋಸಿತತ್ತಾ ಹಿ ಭವಾಭವೇಸು, ಪಾಪಾನಿ ಕಮ್ಮಾನಿ ಕರೋತಿ ಮೋಹಾ.

೭೮೫.

‘‘ಉಪೇತಿ ¶ ಗಬ್ಭಞ್ಚ ಪರಞ್ಚ ಲೋಕಂ, ಸಂಸಾರಮಾಪಜ್ಜ ಪರಮ್ಪರಾಯ;

ತಸ್ಸಪ್ಪಪಞ್ಞೋ ಅಭಿಸದ್ದಹನ್ತೋ, ಉಪೇತಿ ಗಬ್ಭಞ್ಚ ಪರಞ್ಚ ಲೋಕಂ.

೭೮೬.

‘‘ಚೋರೋ ¶ ಯಥಾ ಸನ್ಧಿಮುಖೇ ಗಹೀತೋ, ಸಕಮ್ಮುನಾ ಹಞ್ಞತಿ ಪಾಪಧಮ್ಮೋ;

ಏವಂ ಪಜಾ ಪೇಚ್ಚ ಪರಮ್ಹಿ ಲೋಕೇ, ಸಕಮ್ಮುನಾ ಹಞ್ಞತಿ ಪಾಪಧಮ್ಮೋ.

೭೮೭.

‘‘ಕಾಮಾ ಹಿ ಚಿತ್ರಾ ಮಧುರಾ ಮನೋರಮಾ, ವಿರೂಪರೂಪೇನ ಮಥೇನ್ತಿ ಚಿತ್ತಂ;

ಆದೀನವಂ ಕಾಮಗುಣೇಸು ದಿಸ್ವಾ, ತಸ್ಮಾ ಅಹಂ ಪಬ್ಬಜಿತೋಮ್ಹಿ ರಾಜ.

೭೮೮.

‘‘ದುಮಪ್ಫಲಾನೀವ ಪತನ್ತಿ ಮಾಣವಾ, ದಹರಾ ಚ ವುಡ್ಢಾ ಚ ಸರೀರಭೇದಾ;

ಏತಮ್ಪಿ ¶ ದಿಸ್ವಾ ಪಬ್ಬಜಿತೋಮ್ಹಿ ರಾಜ, ಅಪಣ್ಣಕಂ ಸಾಮಞ್ಞಮೇವ ಸೇಯ್ಯೋ.

೭೮೯.

‘‘ಸದ್ಧಾಯಾಹಂ ಪಬ್ಬಜಿತೋ, ಉಪೇತೋ ಜಿನಸಾಸನೇ;

ಅವಜ್ಝಾ ಮಯ್ಹಂ ಪಬ್ಬಜ್ಜಾ, ಅನಣೋ ಭುಞ್ಜಾಮಿ ಭೋಜನಂ.

೭೯೦.

‘‘ಕಾಮೇ ಆದಿತ್ತತೋ ದಿಸ್ವಾ, ಜಾತರೂಪಾನಿ ಸತ್ಥತೋ;

ಗಬ್ಭವೋಕ್ಕನ್ತಿತೋ ದುಕ್ಖಂ, ನಿರಯೇಸು ಮಹಬ್ಭಯಂ.

೭೯೧.

‘‘ಏತಮಾದೀನವಂ ಞತ್ವಾ, ಸಂವೇಗಂ ಅಲಭಿಂ ತದಾ;

ಸೋಹಂ ವಿದ್ಧೋ ತದಾ ಸನ್ತೋ, ಸಮ್ಪತ್ತೋ ಆಸವಕ್ಖಯಂ.

೭೯೨.

‘‘ಪರಿಚಿಣ್ಣೋ ಮಯಾ ಸತ್ಥಾ, ಕತಂ ಬುದ್ಧಸ್ಸ ಸಾಸನಂ;

ಓಹಿತೋ ಗರುಕೋ ಭಾರೋ, ಭವನೇತ್ತಿ ಸಮೂಹತಾ.

೭೯೩.

‘‘ಯಸ್ಸತ್ಥಾಯ ಪಬ್ಬಜಿತೋ, ಅಗಾರಸ್ಮಾನಗಾರಿಯಂ;

ಸೋ ಮೇ ಅತ್ಥೋ ಅನುಪ್ಪತ್ತೋ, ಸಬ್ಬಸಂಯೋಜನಕ್ಖಯೋ’’ತಿ.

… ರಟ್ಠಪಾಲೋ ಥೇರೋ….

೫. ಮಾಲುಕ್ಯಪುತ್ತತ್ಥೇರಗಾಥಾ

೭೯೪.

[ಸಂ. ನಿ. ೪.೯೫] ‘‘ರೂಪಂ ¶ ದಿಸ್ವಾ ಸತಿ ಮುಟ್ಠಾ, ಪಿಯಂ ನಿಮಿತ್ತಂ ಮನಸಿ ಕರೋತೋ;

ಸಾರತ್ತಚಿತ್ತೋ ವೇದೇತಿ, ತಞ್ಚ ಅಜ್ಝೋಸ್ಸ ತಿಟ್ಠತಿ.

೭೯೫.

‘‘ತಸ್ಸ ¶ ವಡ್ಢನ್ತಿ ವೇದನಾ, ಅನೇಕಾ ರೂಪಸಮ್ಭವಾ;

ಅಭಿಜ್ಝಾ ಚ ವಿಹೇಸಾ ಚ, ಚಿತ್ತಮಸ್ಸೂಪಹಞ್ಞತಿ;

ಏವಮಾಚಿನತೋ ದುಕ್ಖಂ, ಆರಾ ನಿಬ್ಬಾನ [ನಿಬ್ಬಾನಂ (ಸೀ.)] ವುಚ್ಚತಿ.

೭೯೬.

‘‘ಸದ್ದಂ ಸುತ್ವಾ ಸತಿ ಮುಟ್ಠಾ, ಪಿಯಂ ನಿಮಿತ್ತಂ ಮನಸಿ ಕರೋತೋ;

ಸಾರತ್ತಚಿತ್ತೋ ವೇದೇತಿ, ತಞ್ಚ ಅಜ್ಝೋಸ್ಸ ತಿಟ್ಠತಿ.

೭೯೭.

‘‘ತಸ್ಸ ವಡ್ಢನ್ತಿ ವೇದನಾ, ಅನೇಕಾ ಸದ್ದಸಮ್ಭವಾ;

ಅಭಿಜ್ಝಾ ಚ ವಿಹೇಸಾ ಚ, ಚಿತ್ತಮಸ್ಸೂಪಹಞ್ಞತಿ;

ಏವಮಾಚಿನತೋ ದುಕ್ಖಂ, ಆರಾ ನಿಬ್ಬಾನ ವುಚ್ಚತಿ.

೭೯೮.

‘‘ಗನ್ಧಂ ಘತ್ವಾ ಸತಿ ಮುಟ್ಠಾ, ಪಿಯಂ ನಿಮಿತ್ತಂ ಮನಸಿ ಕರೋತೋ;

ಸಾರತ್ತಚಿತ್ತೋ ವೇದೇತಿ, ತಞ್ಚ ಅಜ್ಝೋಸ್ಸ ತಿಟ್ಠತಿ.

೭೯೯.

‘‘ತಸ್ಸ ¶ ವಡ್ಢನ್ತಿ ವೇದನಾ, ಅನೇಕಾ ಗನ್ಧಸಮ್ಭವಾ;

ಅಭಿಜ್ಝಾ ಚ ವಿಹೇಸಾ ಚ, ಚಿತ್ತಮಸ್ಸೂಪಹಞ್ಞತಿ;

ಏವಮಾಚಿನತೋ ದುಕ್ಖಂ, ಆರಾ ನಿಬ್ಬಾನ ವುಚ್ಚತಿ.

೮೦೦.

‘‘ರಸಂ ಭೋತ್ವಾ ಸತಿ ಮುಟ್ಠಾ, ಪಿಯಂ ನಿಮಿತ್ತಂ ಮನಸಿ ಕರೋತೋ;

ಸಾರತ್ತಚಿತ್ತೋ ವೇದೇತಿ, ತಞ್ಚ ಅಜ್ಝೋಸ್ಸ ತಿಟ್ಠತಿ.

೮೦೧.

‘‘ತಸ್ಸ ¶ ವಡ್ಢನ್ತಿ ವೇದನಾ, ಅನೇಕಾ ರಸಸಮ್ಭವಾ;

ಅಭಿಜ್ಝಾ ಚ ವಿಹೇಸಾ ಚ, ಚಿತ್ತಮಸ್ಸೂಪಹಞ್ಞತಿ;

ಏವಮಾಚಿನತೋ ದುಕ್ಖಂ, ಆರಾ ನಿಬ್ಬಾನ ವುಚ್ಚತಿ.

೮೦೨.

‘‘ಫಸ್ಸಂ ¶ ಫುಸ್ಸ ಸತಿ ಮುಟ್ಠಾ, ಪಿಯಂ ನಿಮಿತ್ತಂ ಮನಸಿ ಕರೋತೋ;

ಸಾರತ್ತಚಿತ್ತೋ ವೇದೇತಿ, ತಞ್ಚ ಅಜ್ಝೋಸ್ಸ ತಿಟ್ಠತಿ.

೮೦೩.

‘‘ತಸ್ಸ ವಡ್ಢನ್ತಿ ವೇದನಾ, ಅನೇಕಾ ಫಸ್ಸಸಮ್ಭವಾ;

ಅಭಿಜ್ಝಾ ಚ ವಿಹೇಸಾ ಚ, ಚಿತ್ತಮಸ್ಸೂಪಹಞ್ಞತಿ;

ಏವಮಾಚಿನತೋ ದುಕ್ಖಂ, ಆರಾ ನಿಬ್ಬಾನ ವುಚ್ಚತಿ.

೮೦೪.

‘‘ಧಮ್ಮಂ ಞತ್ವಾ ಸತಿ ಮುಟ್ಠಾ, ಪಿಯಂ ನಿಮಿತ್ತಂ ಮನಸಿ ಕರೋತೋ;

ಸಾರತ್ತಚಿತ್ತೋ ವೇದೇತಿ, ತಞ್ಚ ಅಜ್ಝೋಸ್ಸ ತಿಟ್ಠತಿ.

೮೦೫.

‘‘ತಸ್ಸ ¶ ವಡ್ಢನ್ತಿ ವೇದನಾ, ಅನೇಕಾ ಧಮ್ಮಸಮ್ಭವಾ;

ಅಭಿಜ್ಝಾ ಚ ವಿಹೇಸಾ ಚ, ಚಿತ್ತಮಸ್ಸೂಪಹಞ್ಞತಿ;

ಏವಮಾಚಿನತೋ ದುಕ್ಖಂ, ಆರಾ ನಿಬ್ಬಾನ ವುಚ್ಚತಿ.

೮೦೬.

‘‘ನ ಸೋ ರಜ್ಜತಿ ರೂಪೇಸು, ರೂಪಂ ದಿಸ್ವಾ ಪತಿಸ್ಸತೋ;

ವಿರತ್ತಚಿತ್ತೋ ವೇದೇತಿ, ತಞ್ಚ ನಾಜ್ಝೋಸ್ಸ ತಿಟ್ಠತಿ.

೮೦೭.

‘‘ಯಥಾಸ್ಸ ಪಸ್ಸತೋ ರೂಪಂ, ಸೇವತೋ ಚಾಪಿ ವೇದನಂ;

ಖೀಯತಿ ನೋಪಚೀಯತಿ, ಏವಂ ಸೋ ಚರತೀ ಸತೋ;

ಏವಂ ಅಪಚಿನತೋ ದುಕ್ಖಂ, ಸನ್ತಿಕೇ ನಿಬ್ಬಾನ ವುಚ್ಚತಿ.

೮೦೮.

‘‘ನ ಸೋ ರಜ್ಜತಿ ಸದ್ದೇಸು, ಸದ್ದಂ ಸುತ್ವಾ ಪತಿಸ್ಸತೋ;

ವಿರತ್ತಚಿತ್ತೋ ವೇದೇತಿ, ತಞ್ಚ ನಾಜ್ಝೋಸ್ಸ ತಿಟ್ಠತಿ.

೮೦೯.

‘‘ಯಥಾಸ್ಸ ಸುಣತೋ ಸದ್ದಂ, ಸೇವತೋ ಚಾಪಿ ವೇದನಂ;

ಖೀಯತಿ ನೋಪಚೀಯತಿ, ಏವಂ ಸೋ ಚರತೀ ಸತೋ;

ಏವಂ ಅಪಚಿನತೋ ದುಕ್ಖಂ, ಸನ್ತಿಕೇ ನಿಬ್ಬಾನ ವುಚ್ಚತಿ.

೮೧೦.

‘‘ನ ಸೋ ರಜ್ಜತಿ ಗನ್ಧೇಸು, ಗನ್ಧಂ ಘತ್ವಾ ಪತಿಸ್ಸತೋ;

ವಿರತ್ತಚಿತ್ತೋ ವೇದೇತಿ, ತಞ್ಚ ನಾಜ್ಝೋಸ್ಸ ತಿಟ್ಠತಿ.

೮೧೧.

‘‘ಯಥಾಸ್ಸ ¶ ಘಾಯತೋ ಗನ್ಧಂ, ಸೇವತೋ ಚಾಪಿ ವೇದನಂ;

ಖೀಯತಿ ನೋಪಚೀಯತಿ, ಏವಂ ಸೋ ಚರತೀ ಸತೋ;

ಏವಂ ಅಪಚಿನತೋ ದುಕ್ಖಂ, ಸನ್ತಿಕೇ ನಿಬ್ಬಾನ ವುಚ್ಚತಿ.

೮೧೨.

‘‘ನ ¶ ಸೋ ರಜ್ಜತಿ ರಸೇಸು, ರಸಂ ಭೋತ್ವಾ ಪತಿಸ್ಸತೋ;

ವಿರತ್ತಚಿತ್ತೋ ವೇದೇತಿ, ತಞ್ಚ ನಾಜ್ಝೋಸ್ಸ ತಿಟ್ಠತಿ.

೮೧೩.

‘‘ಯಥಾಸ್ಸ ಸಾಯರತೋ ರಸಂ, ಸೇವತೋ ಚಾಪಿ ವೇದನಂ;

ಖೀಯತಿ ನೋಪಚೀಯತಿ, ಏವಂ ಸೋ ಚರತೀ ಸತೋ;

ಏವಂ ಅಪಚಿನತೋ ದುಕ್ಖಂ, ಸನ್ತಿಕೇ ನಿಬ್ಬಾನ ವುಚ್ಚತಿ.

೮೧೪.

‘‘ನ ಸೋ ರಜ್ಜತಿ ಫಸ್ಸೇಸು, ಫಸ್ಸಂ ಫುಸ್ಸ ಪತಿಸ್ಸತೋ;

ವಿರತ್ತಚಿತ್ತೋ ವೇದೇತಿ, ತಞ್ಚ ನಾಜ್ಝೋಸ್ಸ ತಿಟ್ಠತಿ.

೮೧೫.

‘‘ಯಥಾಸ್ಸ ಫುಸತೋ ಫಸ್ಸಂ, ಸೇವತೋ ಚಾಪಿ ವೇದನಂ;

ಖೀಯತಿ ನೋಪಚೀಯತಿ, ಏವಂ ಸೋ ಚರತೀ ಸತೋ;

ಏವಂ ಅಪಚಿನತೋ ದುಕ್ಖಂ, ಸನ್ತಿಕೇ ನಿಬ್ಬಾನ ವುಚ್ಚತಿ.

೮೧೬.

‘‘ನ ಸೋ ರಜ್ಜತಿ ಧಮ್ಮೇಸು, ಧಮ್ಮಂ ಞತ್ವಾ ಪತಿಸ್ಸತೋ;

ವಿರತ್ತಚಿತ್ತೋ ವೇದೇತಿ, ತಞ್ಚ ನಾಜ್ಝೋಸ್ಸ ತಿಟ್ಠತಿ.

೮೧೭.

‘‘ಯಥಾಸ್ಸ ¶ ವಿಜಾನತೋ ಧಮ್ಮಂ, ಸೇವತೋ ಚಾಪಿ ವೇದನಂ;

ಖೀಯತಿ ನೋಪಚೀಯತಿ, ಏವಂ ಸೋ ಚರತೀ ಸತೋ;

ಏವಂ ಅಪಚಿನತೋ ದುಕ್ಖಂ, ಸನ್ತಿಕೇ ನಿಬ್ಬಾನ ವುಚ್ಚತಿ’’.

… ಮಾಲುಕ್ಯಪುತ್ತೋ ಥೇರೋ….

೬. ಸೇಲತ್ಥೇರಗಾಥಾ

೮೧೮.

‘‘ಪರಿಪುಣ್ಣಕಾಯೋ ಸುರುಚಿ, ಸುಜಾತೋ ಚಾರುದಸ್ಸನೋ;

ಸುವಣ್ಣವಣ್ಣೋಸಿ ಭಗವಾ, ಸುಸುಕ್ಕದಾಠೋಸಿ ವೀರಿಯವಾ [ಸುಸುಕ್ಕದಾಠೋ ವಿರೀಯವಾ (ಸೀ.)].

೮೧೯.

‘‘ನರಸ್ಸ ಹಿ ಸುಜಾತಸ್ಸ, ಯೇ ಭವನ್ತಿ ವಿಯಞ್ಜನಾ;

ಸಬ್ಬೇ ¶ ತೇ ತವ ಕಾಯಸ್ಮಿಂ, ಮಹಾಪುರಿಸಲಕ್ಖಣಾ.

೮೨೦.

‘‘ಪಸನ್ನನೇತ್ತೋ ಸುಮುಖೋ, ಬ್ರಹಾ ಉಜು ಪತಾಪವಾ;

ಮಜ್ಝೇ ಸಮಣಸಙ್ಘಸ್ಸ, ಆದಿಚ್ಚೋವ ವಿರೋಚಸಿ.

೮೨೧.

‘‘ಕಲ್ಯಾಣದಸ್ಸನೋ ಭಿಕ್ಖು, ಕಞ್ಚನಸನ್ನಿಭತ್ತಚೋ;

ಕಿಂ ತೇ ಸಮಣಭಾವೇನ, ಏವಂ ಉತ್ತಮವಣ್ಣಿನೋ.

೮೨೨.

‘‘ರಾಜಾ ¶ ಅರಹಸಿ ಭವಿತುಂ, ಚಕ್ಕವತ್ತೀ ರಥೇಸಭೋ;

ಚಾತುರನ್ತೋ ವಿಜಿತಾವೀ, ಜಮ್ಬುಸಣ್ಡಸ್ಸ [ಜಮ್ಬುಮಣ್ಡಸ್ಸ (ಕ.)] ಇಸ್ಸರೋ.

೮೨೩.

‘‘ಖತ್ತಿಯಾ ಭೋಗೀ ರಾಜಾನೋ [ಭೋಗಾ ರಾಜಾನೋ (ಸೀ. ಕ.), ಭೋಜರಾಜಾನೋ (ಸ್ಯಾ.)], ಅನುಯನ್ತಾ ಭವನ್ತಿ ತೇ;

ರಾಜಾಭಿರಾಜಾ [ರಾಜಾಧಿರಾಜಾ (ಸೀ. ಕ.)] ಮನುಜಿನ್ದೋ, ರಜ್ಜಂ ಕಾರೇಹಿ ಗೋತಮ’’.

೮೨೪.

‘‘ರಾಜಾಹಮಸ್ಮಿ ¶ ಸೇಲ, (ಸೇಲಾತಿ ಭಗವಾ) ಧಮ್ಮರಾಜಾ ಅನುತ್ತರೋ;

ಧಮ್ಮೇನ ಚಕ್ಕಂ ವತ್ತೇಮಿ, ಚಕ್ಕಂ ಅಪ್ಪಟಿವತ್ತಿಯಂ’’.

೮೨೫.

‘‘ಸಮ್ಬುದ್ಧೋ ಪಟಿಜಾನಾಸಿ, (ಇತಿ ಸೇಲೋ ಬ್ರಾಹ್ಮಣೋ) ಧಮ್ಮರಾಜಾ ಅನುತ್ತರೋ;

‘ಧಮ್ಮೇನ ಚಕ್ಕಂ ವತ್ತೇಮಿ’, ಇತಿ ಭಾಸಥ ಗೋತಮ.

೮೨೬.

‘‘ಕೋ ನು ಸೇನಾಪತಿ ಭೋತೋ, ಸಾವಕೋ ಸತ್ಥುರನ್ವಯೋ [ಅನ್ವಯೋ (ಸೀ.)];

ಕೋ ತೇತಮನುವತ್ತೇತಿ, ಧಮ್ಮಚಕ್ಕಂ ಪವತ್ತಿತಂ’’.

೮೨೭.

‘‘ಮಯಾ ¶ ಪವತ್ತಿತಂ ಚಕ್ಕಂ, (ಸೇಲಾತಿ ಭಗವಾ) ಧಮ್ಮಚಕ್ಕಂ ಅನುತ್ತರಂ;

ಸಾರಿಪುತ್ತೋ ಅನುವತ್ತೇತಿ, ಅನುಜಾತೋ ತಥಾಗತಂ.

೮೨೮.

‘‘ಅಭಿಞ್ಞೇಯ್ಯಂ ಅಭಿಞ್ಞಾತಂ, ಭಾವೇತಬ್ಬಞ್ಚ ಭಾವಿತಂ;

ಪಹಾತಬ್ಬಂ ಪಹೀನಂ ಮೇ, ತಸ್ಮಾ ಬುದ್ಧೋಸ್ಮಿ ಬ್ರಾಹ್ಮಣ.

೮೨೯.

‘‘ವಿನಯಸ್ಸು ¶ ಮಯಿ ಕಙ್ಖಂ, ಅಧಿಮುಞ್ಚಸ್ಸು ಬ್ರಾಹ್ಮಣ;

ದುಲ್ಲಭಂ ದಸ್ಸನಂ ಹೋತಿ, ಸಮ್ಬುದ್ಧಾನಂ ಅಭಿಣ್ಹಸೋ.

೮೩೦.

‘‘ಯೇಸಂ ವೇ ದುಲ್ಲಭೋ ಲೋಕೇ, ಪಾತುಭಾವೋ ಅಭಿಣ್ಹಸೋ;

ಸೋಹಂ ಬ್ರಾಹ್ಮಣ ಬುದ್ಧೋಸ್ಮಿ, ಸಲ್ಲಕತ್ತೋ [ಸಲ್ಲಕನ್ತೋ (ಸೀ.)] ಅನುತ್ತರೋ.

೮೩೧.

‘‘ಬ್ರಹ್ಮಭೂತೋ ಅತಿತುಲೋ, ಮಾರಸೇನಪ್ಪಮದ್ದನೋ;

ಸಬ್ಬಾಮಿತ್ತೇ ವಸೇ [ವಸೀ (ಸ್ಯಾ. ಕ., ಮ. ನಿ. ೨.೩೯೯; ಸು. ನಿ. ೯೬೬)] ಕತ್ವಾ, ಮೋದಾಮಿ ಅಕುತೋಭಯೋ’’.

೮೩೨.

‘‘ಇದಂ ಭೋನ್ತೋ ನಿಸಾಮೇಥ, ಯಥಾ ಭಾಸತಿ ಚಕ್ಖುಮಾ;

ಸಲ್ಲಕತ್ತೋ ಮಹಾವೀರೋ, ಸೀಹೋವ ನದತೀ ವನೇ.

೮೩೩.

‘‘ಬ್ರಹ್ಮಭೂತಂ ಅತಿತುಲಂ, ಮಾರಸೇನಪ್ಪಮದ್ದನಂ;

ಕೋ ದಿಸ್ವಾ ನಪ್ಪಸೀದೇಯ್ಯ, ಅಪಿ ಕಣ್ಹಾಭಿಜಾತಿಕೋ.

೮೩೪.

‘‘ಯೋ ಮಂ ಇಚ್ಛತಿ ಅನ್ವೇತು, ಯೋ ವಾ ನಿಚ್ಛತಿ ಗಚ್ಛತು;

ಇಧಾಹಂ ಪಬ್ಬಜಿಸ್ಸಾಮಿ, ವರಪಞ್ಞಸ್ಸ ಸನ್ತಿಕೇ’’.

೮೩೫.

‘‘ಏತಂ ಚೇ ರುಚ್ಚತಿ ಭೋತೋ, ಸಮ್ಮಾಸಮ್ಬುದ್ಧಸಾಸನಂ;

ಮಯಮ್ಪಿ ಪಬ್ಬಜಿಸ್ಸಾಮ, ವರಪಞ್ಞಸ್ಸ ಸನ್ತಿಕೇ.

೮೩೬.

‘‘ಬ್ರಾಹ್ಮಣಾ ತಿಸತಾ ಇಮೇ, ಯಾಚನ್ತಿ ಪಞ್ಜಲೀಕತಾ;

‘ಬ್ರಹ್ಮಚರಿಯಂ ಚರಿಸ್ಸಾಮ, ಭಗವಾ ತವ ಸನ್ತಿಕೇ’’’.

೮೩೭.

‘‘ಸ್ವಾಖಾತಂ ¶ ಬ್ರಹ್ಮಚರಿಯಂ, (ಸೇಲಾತಿ ಭಗವಾ) ಸನ್ದಿಟ್ಠಿಕಮಕಾಲಿಕಂ;

ಯತ್ಥ ಅಮೋಘಾ ಪಬ್ಬಜ್ಜಾ, ಅಪ್ಪಮತ್ತಸ್ಸ ಸಿಕ್ಖತೋ’’.

೮೩೮.

‘‘ಯಂ ¶ ತಂ ಸರಣಮಾಗಮ್ಹ [ಸರಣಮಾಗಮ್ಮ (ಸಬ್ಬತ್ಥ)], ಇತೋ ಅಟ್ಠಮೇ [ಅಟ್ಠಮಿ (ಸ್ಯಾ. ಕ.)] ಚಕ್ಖುಮ;

ಸತ್ತರತ್ತೇನ ಭಗವಾ, ದನ್ತಾಮ್ಹ ತವ ಸಾಸನೇ.

೮೩೯.

‘‘ತುವಂ ¶ ¶ ಬುದ್ಧೋ ತುವಂ ಸತ್ಥಾ, ತುವಂ ಮಾರಾಭಿಭೂ ಮುನಿ;

ತುವಂ ಅನುಸಯೇ ಛೇತ್ವಾ, ತಿಣ್ಣೋ ತಾರೇಸಿಮಂ ಪಜಂ.

೮೪೦.

‘‘ಉಪಧೀ ತೇ ಸಮತಿಕ್ಕನ್ತಾ, ಆಸವಾ ತೇ ಪದಾಲಿತಾ;

ಸೀಹೋವ ಅನುಪಾದಾನೋ, ಪಹೀನಭಯಭೇರವೋ.

೮೪೧.

‘‘ಭಿಕ್ಖವೋ ತಿಸತಾ ಇಮೇ, ತಿಟ್ಠನ್ತಿ ಪಞ್ಜಲೀಕತಾ;

ಪಾದೇ ವೀರ ಪಸಾರೇಹಿ, ನಾಗಾ ವನ್ದನ್ತು ಸತ್ಥುನೋ’’ತಿ.

… ಸೇಲೋ ಥೇರೋ….

೭. ಕಾಳಿಗೋಧಾಪುತ್ತಭದ್ದಿಯತ್ಥೇರಗಾಥಾ

೮೪೨.

‘‘ಯಾತಂ ಮೇ ಹತ್ಥಿಗೀವಾಯ, ಸುಖುಮಾ ವತ್ಥಾ ಪಧಾರಿತಾ;

ಸಾಲೀನಂ ಓದನೋ ಭುತ್ತೋ, ಸುಚಿಮಂಸೂಪಸೇಚನೋ.

೮೪೩.

‘‘ಸೋಜ್ಜ ಭದ್ದೋ ಸಾತತಿಕೋ, ಉಞ್ಛಾಪತ್ತಾಗತೇ ರತೋ;

ಝಾಯತಿ ಅನುಪಾದಾನೋ, ಪುತ್ತೋ ಗೋಧಾಯ ಭದ್ದಿಯೋ.

೮೪೪.

‘‘ಪಂಸುಕೂಲೀ ಸಾತತಿಕೋ, ಉಞ್ಛಾಪತ್ತಾಗತೇ ರತೋ;

ಝಾಯತಿ ಅನುಪಾದಾನೋ, ಪುತ್ತೋ ಗೋಧಾಯ ಭದ್ದಿಯೋ.

೮೪೫.

‘‘ಪಿಣ್ಡಪಾತೀ ಸಾತತಿಕೋ…ಪೇ….

೮೪೬.

‘‘ತೇಚೀವರೀ ಸಾತತಿಕೋ…ಪೇ….

೮೪೭.

‘‘ಸಪದಾನಚಾರೀ ಸಾತತಿಕೋ…ಪೇ….

೮೪೮.

‘‘ಏಕಾಸನೀ ಸಾತತಿಕೋ…ಪೇ….

೮೪೯.

‘‘ಪತ್ತಪಿಣ್ಡೀ ಸಾತತಿಕೋ…ಪೇ….

೮೫೦.

‘‘ಖಲುಪಚ್ಛಾಭತ್ತೀ ಸಾತತಿಕೋ…ಪೇ….

೮೫೧.

‘‘ಆರಞ್ಞಿಕೋ ಸಾತತಿಕೋ…ಪೇ….

೮೫೨.

‘‘ರುಕ್ಖಮೂಲಿಕೋ ¶ ಸಾತತಿಕೋ…ಪೇ….

೮೫೩.

‘‘ಅಬ್ಭೋಕಾಸೀ ಸಾತತಿಕೋ…ಪೇ….

೮೫೪.

‘‘ಸೋಸಾನಿಕೋ ಸಾತತಿಕೋ…ಪೇ….

೮೫೫.

‘‘ಯಥಾಸನ್ಥತಿಕೋ ಸಾತತಿಕೋ…ಪೇ….

೮೫೬.

‘‘ನೇಸಜ್ಜಿಕೋ ¶ ¶ ಸಾತತಿಕೋ…ಪೇ….

೮೫೭.

‘‘ಅಪ್ಪಿಚ್ಛೋ ಸಾತತಿಕೋ…ಪೇ….

೮೫೮.

‘‘ಸನ್ತುಟ್ಠೋ ಸಾತತಿಕೋ…ಪೇ….

೮೫೯.

‘‘ಪವಿವಿತ್ತೋ ಸಾತತಿಕೋ…ಪೇ….

೮೬೦.

‘‘ಅಸಂಸಟ್ಠೋ ಸಾತತಿಕೋ…ಪೇ….

೮೬೧.

‘‘ಆರದ್ಧವೀರಿಯೋ ಸಾತತಿಕೋ…ಪೇ….

೮೬೨.

‘‘ಹಿತ್ವಾ ಸತಪಲಂ ಕಂಸಂ, ಸೋವಣ್ಣಂ ಸತರಾಜಿಕಂ;

ಅಗ್ಗಹಿಂ ಮತ್ತಿಕಾಪತ್ತಂ, ಇದಂ ದುತಿಯಾಭಿಸೇಚನಂ.

೮೬೩.

‘‘ಉಚ್ಚೇ ಮಣ್ಡಲಿಪಾಕಾರೇ, ದಳ್ಹಮಟ್ಟಾಲಕೋಟ್ಠಕೇ;

ರಕ್ಖಿತೋ ಖಗ್ಗಹತ್ಥೇಹಿ, ಉತ್ತಸಂ ವಿಹರಿಂ ಪುರೇ.

೮೬೪.

‘‘ಸೋಜ್ಜ ಭದ್ದೋ ಅನುತ್ರಾಸೀ, ಪಹೀನಭಯಭೇರವೋ;

ಝಾಯತಿ ವನಮೋಗಯ್ಹ, ಪುತ್ತೋ ಗೋಧಾಯ ಭದ್ದಿಯೋ.

೮೬೫.

‘‘ಸೀಲಕ್ಖನ್ಧೇ ಪತಿಟ್ಠಾಯ, ಸತಿಂ ಪಞ್ಞಞ್ಚ ಭಾವಯಂ;

ಪಾಪುಣಿಂ ಅನುಪುಬ್ಬೇನ, ಸಬ್ಬಸಂಯೋಜನಕ್ಖಯ’’ನ್ತಿ.

… ಭದ್ದಿಯೋ ಕಾಳಿಗೋಧಾಯ ಪುತ್ತೋ ಥೇರೋ….

೮. ಅಙ್ಗುಲಿಮಾಲತ್ಥೇರಗಾಥಾ

೮೬೬.

‘‘ಗಚ್ಛಂ ¶ ವದೇಸಿ ಸಮಣ ‘ಟ್ಠಿತೋಮ್ಹಿ’, ಮಮಞ್ಚ ಬ್ರೂಸಿ ಠಿತಮಟ್ಠಿತೋತಿ;

ಪುಚ್ಛಾಮಿ ¶ ತಂ ಸಮಣ ಏತಮತ್ಥಂ, ‘ಕಥಂ ಠಿತೋ ತ್ವಂ ಅಹಮಟ್ಠಿತೋಮ್ಹಿ’’’.

೮೬೭.

‘‘ಠಿತೋ ಅಹಂ ಅಙ್ಗುಲಿಮಾಲ ಸಬ್ಬದಾ, ಸಬ್ಬೇಸು ಭೂತೇಸು ನಿಧಾಯ ದಣ್ಡಂ;

ತುವಞ್ಚ ಪಾಣೇಸು ಅಸಞ್ಞತೋಸಿ, ತಸ್ಮಾ ಠಿತೋಹಂ ತುವಮಟ್ಠಿತೋಸಿ’’.

೮೬೮.

‘‘ಚಿರಸ್ಸಂ ವತ ಮೇ ಮಹಿತೋ ಮಹೇಸೀ, ಮಹಾವನಂ ಸಮಣೋ ಪಚ್ಚಪಾದಿ [ಪಚ್ಚುಪಾದಿ (ಸಬ್ಬತ್ಥ)];

ಸೋಹಂ ಚಜಿಸ್ಸಾಮಿ ಸಹಸ್ಸಪಾಪಂ, ಸುತ್ವಾನ ಗಾಥಂ ತವ ಧಮ್ಮಯುತ್ತಂ’’.

೮೬೯.

ಇಚ್ಚೇವ ¶ ಚೋರೋ ಅಸಿಮಾವುಧಞ್ಚ, ಸೋಬ್ಭೇ ಪಪಾತೇ ನರಕೇ ಅನ್ವಕಾಸಿ [ಅಕಿರಿ (ಮ. ನಿ. ೨.೩೪೯)];

ಅವನ್ದಿ ಚೋರೋ ಸುಗತಸ್ಸ ಪಾದೇ, ತತ್ಥೇವ ಪಬ್ಬಜ್ಜಮಯಾಚಿ ಬುದ್ಧಂ.

೮೭೦.

ಬುದ್ಧೋ ಚ ಖೋ ಕಾರುಣಿಕೋ ಮಹೇಸಿ, ಯೋ ಸತ್ಥಾ ಲೋಕಸ್ಸ ಸದೇವಕಸ್ಸ;

‘ತಮೇಹಿ ಭಿಕ್ಖೂ’ತಿ ತದಾ ಅವೋಚ, ಏಸೇವ ತಸ್ಸ ಅಹು ಭಿಕ್ಖುಭಾವೋ.

೮೭೧.

‘‘ಯೋ ¶ ಚ ಪುಬ್ಬೇ ಪಮಜ್ಜಿತ್ವಾ, ಪಚ್ಛಾ ಸೋ ನಪ್ಪಮಜ್ಜತಿ;

ಸೋಮಂ ಲೋಕಂ ಪಭಾಸೇತಿ, ಅಬ್ಭಾ ಮುತ್ತೋವ ಚನ್ದಿಮಾ.

೮೭೨.

‘‘ಯಸ್ಸ ¶ ಪಾಪಂ ಕತಂ ಕಮ್ಮಂ, ಕುಸಲೇನ ಪಿಧೀಯತಿ [ಪಿಥೀಯತಿ (ಸೀ. ಸ್ಯಾ.)];

ಸೋಮಂ ಲೋಕಂ ಪಭಾಸೇತಿ, ಅಬ್ಭಾ ಮುತ್ತೋವ ಚನ್ದಿಮಾ.

೮೭೩.

‘‘ಯೋ ಹವೇ ದಹರೋ ಭಿಕ್ಖು, ಯುಞ್ಜತಿ ಬುದ್ಧಸಾಸನೇ;

ಸೋಮಂ ಲೋಕಂ ಪಭಾಸೇತಿ, ಅಬ್ಭಾ ಮುತ್ತೋವ ಚನ್ದಿಮಾ.

೮೭೪.

[ದಿಸಾ ಹಿ (ಸ್ಯಾ. ಕ., ಮ. ನಿ. ೨.೩೫೨)] ‘‘ದಿಸಾಪಿ ಮೇ ಧಮ್ಮಕಥಂ ಸುಣನ್ತು, ದಿಸಾಪಿ ಮೇ ಯುಞ್ಜನ್ತು ಬುದ್ಧಸಾಸನೇ;

ದಿಸಾಪಿ ಮೇ ತೇ ಮನುಜೇ ಭಜನ್ತು, ಯೇ ಧಮ್ಮಮೇವಾದಪಯನ್ತಿ ಸನ್ತೋ.

೮೭೫.

‘‘ದಿಸಾ ಹಿ ಮೇ ಖನ್ತಿವಾದಾನಂ, ಅವಿರೋಧಪ್ಪಸಂಸಿನಂ;

ಸುಣನ್ತು ಧಮ್ಮಂ ಕಾಲೇನ, ತಞ್ಚ ಅನುವಿಧೀಯನ್ತು.

೮೭೬.

‘‘ನ ಹಿ ಜಾತು ಸೋ ಮಮಂ ಹಿಂಸೇ, ಅಞ್ಞಂ ವಾ ಪನ ಕಿಞ್ಚನಂ [ಕಞ್ಚಿನಂ (ಸೀ. ಸ್ಯಾ.), ಕಞ್ಚನಂ (?)];

ಪಪ್ಪುಯ್ಯ ಪರಮಂ ಸನ್ತಿಂ, ರಕ್ಖೇಯ್ಯ ತಸಥಾವರೇ.

೮೭೭.

[ಥೇರಗಾ. ೧೯] ‘‘ಉದಕಞ್ಹಿ ¶ ನಯನ್ತಿ ನೇತ್ತಿಕಾ, ಉಸುಕಾರಾ ನಮಯನ್ತಿ [ದಮಯನ್ತಿ (ಕ.)] ತೇಜನಂ;

ದಾರುಂ ನಮಯನ್ತಿ [ದಮಯನ್ತಿ (ಕ.)] ತಚ್ಛಕಾ, ಅತ್ತಾನಂ ದಮಯನ್ತಿ ಪಣ್ಡಿತಾ.

೮೭೮.

‘‘ದಣ್ಡೇನೇಕೇ ¶ ದಮಯನ್ತಿ, ಅಙ್ಕುಸೇಭಿ ಕಸಾಹಿ ಚ;

ಅದಣ್ಡೇನ ಅಸತ್ಥೇನ, ಅಹಂ ದನ್ತೋಮ್ಹಿ ತಾದಿನಾ.

೮೭೯.

‘‘‘ಅಹಿಂಸಕೋ’ತಿ ¶ ಮೇ ನಾಮಂ, ಹಿಂಸಕಸ್ಸ ಪುರೇ ಸತೋ;

ಅಜ್ಜಾಹಂ ಸಚ್ಚನಾಮೋಮ್ಹಿ, ನ ನಂ ಹಿಂಸಾಮಿ ಕಿಞ್ಚನಂ [ಕಞ್ಚಿನಂ (ಸೀ. ಸ್ಯಾ.), ಕಞ್ಚನಂ (?)].

೮೮೦.

‘‘ಚೋರೋ ಅಹಂ ಪುರೇ ಆಸಿಂ, ಅಙ್ಗುಲಿಮಾಲೋತಿ ವಿಸ್ಸುತೋ;

ವುಯ್ಹಮಾನೋ ಮಹೋಘೇನ, ಬುದ್ಧಂ ಸರಣಮಾಗಮಂ.

೮೮೧.

‘‘ಲೋಹಿತಪಾಣಿ ಪುರೇ ಆಸಿಂ, ಅಙ್ಗುಲಿಮಾಲೋತಿ ವಿಸ್ಸುತೋ;

ಸರಣಗಮನಂ ಪಸ್ಸ, ಭವನೇತ್ತಿ ಸಮೂಹತಾ.

೮೮೨.

‘‘ತಾದಿಸಂ ಕಮ್ಮಂ ಕತ್ವಾನ, ಬಹುಂ ದುಗ್ಗತಿಗಾಮಿನಂ;

ಫುಟ್ಠೋ ಕಮ್ಮವಿಪಾಕೇನ, ಅನಣೋ ಭುಞ್ಜಾಮಿ ಭೋಜನಂ.

೮೮೩.

‘‘ಪಮಾದಮನುಯುಞ್ಜನ್ತಿ, ಬಾಲಾ ದುಮ್ಮೇಧಿನೋ ಜನಾ;

ಅಪ್ಪಮಾದಞ್ಚ ಮೇಧಾವೀ, ಧನಂ ಸೇಟ್ಠಂವ ರಕ್ಖತಿ.

೮೮೪.

‘‘ಮಾ ಪಮಾದಮನುಯುಞ್ಜೇಥ, ಮಾ ಕಾಮರತಿಸನ್ಥವಂ [ಸನ್ಧವಂ (ಕ.)];

ಅಪ್ಪಮತ್ತೋ ಹಿ ಝಾಯನ್ತೋ, ಪಪ್ಪೋತಿ ಪರಮಂ ಸುಖಂ.

೮೮೫.

‘‘ಸ್ವಾಗತಂ ನಾಪಗತಂ, ನೇತಂ ದುಮ್ಮನ್ತಿತಂ ಮಮ;

ಸವಿಭತ್ತೇಸು ಧಮ್ಮೇಸು, ಯಂ ಸೇಟ್ಠಂ ತದುಪಾಗಮಂ.

೮೮೬.

‘‘ಸ್ವಾಗತಂ ನಾಪಗತಂ, ನೇತಂ ದುಮ್ಮನ್ತಿತಂ ಮಮ;

ತಿಸ್ಸೋ ವಿಜ್ಜಾ ಅನುಪ್ಪತ್ತಾ, ಕತಂ ಬುದ್ಧಸ್ಸ ಸಾಸನಂ.

೮೮೭.

‘‘ಅರಞ್ಞೇ ¶ ರುಕ್ಖಮೂಲೇ ವಾ, ಪಬ್ಬತೇಸು ಗುಹಾಸು ವಾ;

ತತ್ಥ ತತ್ಥೇವ ಅಟ್ಠಾಸಿಂ, ಉಬ್ಬಿಗ್ಗಮನಸೋ ತದಾ.

೮೮೮.

‘‘ಸುಖಂ ಸಯಾಮಿ ಠಾಯಾಮಿ, ಸುಖಂ ಕಪ್ಪೇಮಿ ಜೀವಿತಂ;

ಅಹತ್ಥಪಾಸೋ ಮಾರಸ್ಸ, ಅಹೋ ಸತ್ಥಾನುಕಮ್ಪಿತೋ.

೮೮೯.

‘‘ಬ್ರಹ್ಮಜಚ್ಚೋ ¶ ಪುರೇ ಆಸಿಂ, ಉದಿಚ್ಚೋ ಉಭತೋ ಅಹು;

ಸೋಜ್ಜ ಪುತ್ತೋ ಸುಗತಸ್ಸ, ಧಮ್ಮರಾಜಸ್ಸ ಸತ್ಥುನೋ.

೮೯೦.

‘‘ವೀತತಣ್ಹೋ ಅನಾದಾನೋ, ಗುತ್ತದ್ವಾರೋ ಸುಸಂವುತೋ;

ಅಘಮೂಲಂ ವಧಿತ್ವಾನ, ಪತ್ತೋ ಮೇ ಆಸವಕ್ಖಯೋ.

೮೯೧.

‘‘ಪರಿಚಿಣ್ಣೋ ¶ ಮಯಾ ಸತ್ಥಾ, ಕತಂ ಬುದ್ಧಸ್ಸ ಸಾಸನಂ;

ಓಹಿತೋ ಗರುಕೋ ಭಾರೋ, ಭವನೇತ್ತಿ ಸಮೂಹತಾ’’ತಿ.

… ಅಙ್ಗುಲಿಮಾಲೋ ಥೇರೋ….

೯. ಅನುರುದ್ಧತ್ಥೇರಗಾಥಾ

೮೯೨.

‘‘ಪಹಾಯ ¶ ಮಾತಾಪಿತರೋ, ಭಗಿನೀ ಞಾತಿಭಾತರೋ;

ಪಞ್ಚ ಕಾಮಗುಣೇ ಹಿತ್ವಾ, ಅನುರುದ್ಧೋವ ಝಾಯತು.

೮೯೩.

‘‘ಸಮೇತೋ ನಚ್ಚಗೀತೇಹಿ, ಸಮ್ಮತಾಳಪ್ಪಬೋಧನೋ;

ನ ತೇನ ಸುದ್ಧಿಮಜ್ಝಗಂ [ಸುದ್ಧಮಜ್ಝಗಾ (ಸೀ. ಕ.), ಸುದ್ಧಿಮಜ್ಝಗಮಾ (ಸ್ಯಾ.)], ಮಾರಸ್ಸ ವಿಸಯೇ ರತೋ.

೮೯೪.

‘‘ಏತಞ್ಚ ಸಮತಿಕ್ಕಮ್ಮ, ರತೋ ಬುದ್ಧಸ್ಸ ಸಾಸನೇ;

ಸಬ್ಬೋಘಂ ಸಮತಿಕ್ಕಮ್ಮ, ಅನುರುದ್ಧೋವ ಝಾಯತಿ.

೮೯೫.

‘‘ರೂಪಾ ಸದ್ದಾ ರಸಾ ಗನ್ಧಾ, ಫೋಟ್ಠಬ್ಬಾ ಚ ಮನೋರಮಾ;

ಏತೇ ಚ ಸಮತಿಕ್ಕಮ್ಮ, ಅನುರುದ್ಧೋವ ಝಾಯತಿ.

೮೯೬.

‘‘ಪಿಣ್ಡಪಾತಪಟಿಕ್ಕನ್ತೋ, ಏಕೋ ಅದುತಿಯೋ ಮುನಿ;

ಏಸತಿ ಪಂಸುಕೂಲಾನಿ, ಅನುರುದ್ಧೋ ಅನಾಸವೋ.

೮೯೭.

‘‘ವಿಚಿನೀ ಅಗ್ಗಹೀ ಧೋವಿ, ರಜಯೀ ಧಾರಯೀ ಮುನಿ;

ಪಂಸುಕೂಲಾನಿ ಮತಿಮಾ, ಅನುರುದ್ಧೋ ಅನಾಸವೋ.

೮೯೮.

‘‘ಮಹಿಚ್ಛೋ ¶ ಚ ಅಸನ್ತುಟ್ಠೋ, ಸಂಸಟ್ಠೋ ಯೋ ಚ ಉದ್ಧತೋ;

ತಸ್ಸ ಧಮ್ಮಾ ಇಮೇ ಹೋನ್ತಿ, ಪಾಪಕಾ ಸಂಕಿಲೇಸಿಕಾ.

೮೯೯.

‘‘ಸತೋ ಚ ಹೋತಿ ಅಪ್ಪಿಚ್ಛೋ, ಸನ್ತುಟ್ಠೋ ಅವಿಘಾತವಾ;

ಪವಿವೇಕರತೋ ವಿತ್ತೋ, ನಿಚ್ಚಮಾರದ್ಧವೀರಿಯೋ.

೯೦೦.

‘‘ತಸ್ಸ ¶ ಧಮ್ಮಾ ಇಮೇ ಹೋನ್ತಿ, ಕುಸಲಾ ಬೋಧಿಪಕ್ಖಿಕಾ;

ಅನಾಸವೋ ಚ ಸೋ ಹೋತಿ, ಇತಿ ವುತ್ತಂ ಮಹೇಸಿನಾ.

೯೦೧.

‘‘ಮಮ ಸಙ್ಕಪ್ಪಮಞ್ಞಾಯ, ಸತ್ಥಾ ಲೋಕೇ ಅನುತ್ತರೋ;

ಮನೋಮಯೇನ ಕಾಯೇನ, ಇದ್ಧಿಯಾ ಉಪಸಙ್ಕಮಿ.

೯೦೨.

‘‘ಯದಾ ಮೇ ಅಹು ಸಙ್ಕಪ್ಪೋ, ತತೋ ಉತ್ತರಿ ದೇಸಯಿ;

ನಿಪ್ಪಪಞ್ಚರತೋ ಬುದ್ಧೋ, ನಿಪ್ಪಪಞ್ಚಮದೇಸಯಿ.

೯೦೩.

‘‘ತಸ್ಸಾಹಂ ಧಮ್ಮಮಞ್ಞಾಯ, ವಿಹಾಸಿಂ ಸಾಸನೇ ರತೋ;

ತಿಸ್ಸೋ ವಿಜ್ಜಾ ಅನುಪ್ಪತ್ತಾ, ಕತಂ ಬುದ್ಧಸ್ಸ ಸಾಸನಂ.

೯೦೪.

‘‘ಪಞ್ಚಪಞ್ಞಾಸವಸ್ಸಾನಿ ¶ , ಯತೋ ನೇಸಜ್ಜಿಕೋ ಅಹಂ;

ಪಞ್ಚವೀಸತಿವಸ್ಸಾನಿ, ಯತೋ ಮಿದ್ಧಂ ಸಮೂಹತಂ.

೯೦೫.

[ದೀ. ನಿ. ೨.೨೨೨] ‘‘ನಾಹು ಅಸ್ಸಾಸಪಸ್ಸಾಸಾ, ಠಿತಚಿತ್ತಸ್ಸ ತಾದಿನೋ;

ಅನೇಜೋ ಸನ್ತಿಮಾರಬ್ಭ, ಚಕ್ಖುಮಾ ಪರಿನಿಬ್ಬುತೋ.

೯೦೬.

[ದೀ. ನಿ. ೨.೨೨೨] ‘‘ಅಸಲ್ಲೀನೇನ ಚಿತ್ತೇನ, ವೇದನಂ ಅಜ್ಝವಾಸಯಿ;

ಪಜ್ಜೋತಸ್ಸೇವ ನಿಬ್ಬಾನಂ, ವಿಮೋಕ್ಖೋ ಚೇತಸೋ ಅಹು.

೯೦೭.

‘‘ಏತೇ ಪಚ್ಛಿಮಕಾ ದಾನಿ, ಮುನಿನೋ ಫಸ್ಸಪಞ್ಚಮಾ;

ನಾಞ್ಞೇ ¶ ಧಮ್ಮಾ ಭವಿಸ್ಸನ್ತಿ, ಸಮ್ಬುದ್ಧೇ ಪರಿನಿಬ್ಬುತೇ.

೯೦೮.

‘‘ನತ್ಥಿ ದಾನಿ ಪುನಾವಾಸೋ, ದೇವಕಾಯಸ್ಮಿ ಜಾಲಿನಿ;

ವಿಕ್ಖೀಣೋ ಜಾತಿಸಂಸಾರೋ, ನತ್ಥಿ ದಾನಿ ಪುನಬ್ಭವೋ.

೯೦೯.

‘‘ಯಸ್ಸ ¶ ಮುಹುತ್ತೇನ ಸಹಸ್ಸಧಾ, ಲೋಕೋ ಸಂವಿದಿತೋ ಸಬ್ರಹ್ಮಕಪ್ಪೋ;

ವಸೀ ಇದ್ಧಿಗುಣೇ ಚುತೂಪಪಾತೇ, ಕಾಲೇ ಪಸ್ಸತಿ ದೇವತಾ ಸ ಭಿಕ್ಖು [ಸಭಿಕ್ಖುನೋ (ಸೀ. ಕ.)].

೯೧೦.

‘‘ಅನ್ನಭಾರೋ [ಅನ್ನಹಾರೋ (ಸೀ.)] ಪುರೇ ಆಸಿಂ, ದಲಿದ್ದೋ ಘಾಸಹಾರಕೋ;

ಸಮಣಂ ಪಟಿಪಾದೇಸಿಂ, ಉಪರಿಟ್ಠಂ ಯಸಸ್ಸಿನಂ.

೯೧೧.

‘‘ಸೋಮ್ಹಿ ಸಕ್ಯಕುಲೇ ಜಾತೋ, ಅನುರುದ್ಧೋತಿ ಮಂ ವಿದೂ;

ಉಪೇತೋ ನಚ್ಚಗೀತೇಹಿ, ಸಮ್ಮತಾಳಪ್ಪಬೋಧನೋ.

೯೧೨.

‘‘ಅಥದ್ದಸಾಸಿಂ ಸಮ್ಬುದ್ಧಂ, ಸತ್ಥಾರಂ ಅಕುತೋಭಯಂ;

ತಸ್ಮಿಂ ಚಿತ್ತಂ ಪಸಾದೇತ್ವಾ, ಪಬ್ಬಜಿಂ ಅನಗಾರಿಯಂ.

೯೧೩.

‘‘ಪುಬ್ಬೇನಿವಾಸಂ ಜಾನಾಮಿ, ಯತ್ಥ ಮೇ ವುಸಿತಂ ಪುರೇ;

ತಾವತಿಂಸೇಸು ದೇವೇಸು, ಅಟ್ಠಾಸಿಂ ಸಕ್ಕಜಾತಿಯಾ [ಸತಜಾತಿಯಾ (ಸೀ.)].

೯೧೪.

‘‘ಸತ್ತಕ್ಖತ್ತುಂ ¶ ಮನುಸ್ಸಿನ್ದೋ, ಅಹಂ ರಜ್ಜಮಕಾರಯಿಂ;

ಚಾತುರನ್ತೋ ವಿಜಿತಾವೀ, ಜಮ್ಬುಸಣ್ಡಸ್ಸ ಇಸ್ಸರೋ;

ಅದಣ್ಡೇನ ಅಸತ್ಥೇನ, ಧಮ್ಮೇನ ಅನುಸಾಸಯಿಂ.

೯೧೫.

‘‘ಇತೋ ಸತ್ತ ತತೋ ಸತ್ತ, ಸಂಸಾರಾನಿ ಚತುದ್ದಸ;

ನಿವಾಸಮಭಿಜಾನಿಸ್ಸಂ, ದೇವಲೋಕೇ ಠಿತಾ ತದಾ.

೯೧೬.

‘‘ಪಞ್ಚಙ್ಗಿಕೇ ¶ ¶ ಸಮಾಧಿಮ್ಹಿ, ಸನ್ತೇ ಏಕೋದಿಭಾವಿತೇ;

ಪಟಿಪ್ಪಸ್ಸದ್ಧಿಲದ್ಧಮ್ಹಿ, ದಿಬ್ಬಚಕ್ಖು ವಿಸುಜ್ಝಿ ಮೇ.

೯೧೭.

‘‘ಚುತೂಪಪಾತಂ ಜಾನಾಮಿ, ಸತ್ತಾನಂ ಆಗತಿಂ ಗತಿಂ;

ಇತ್ಥಭಾವಞ್ಞಥಾಭಾವಂ, ಝಾನೇ ಪಞ್ಚಙ್ಗಿಕೇ ಠಿತೋ.

೯೧೮.

‘‘ಪರಿಚಿಣ್ಣೋ ಮಯಾ ಸತ್ಥಾ…ಪೇ… ಭವನೇತ್ತಿ ಸಮೂಹತಾ.

೯೧೯.

‘‘ವಜ್ಜೀನಂ ವೇಳುವಗಾಮೇ, ಅಹಂ ಜೀವಿತಸಙ್ಖಯಾ;

ಹೇಟ್ಠತೋ ವೇಳುಗುಮ್ಬಸ್ಮಿಂ, ನಿಬ್ಬಾಯಿಸ್ಸಂ ಅನಾಸವೋ’’ತಿ.

… ಅನುರುದ್ಧೋ ಥೇರೋ….

೧೦. ಪಾರಾಪರಿಯತ್ಥೇರಗಾಥಾ

೯೨೦.

ಸಮಣಸ್ಸ ಅಹು ಚಿನ್ತಾ, ಪುಪ್ಫಿತಮ್ಹಿ ಮಹಾವನೇ;

ಏಕಗ್ಗಸ್ಸ ನಿಸಿನ್ನಸ್ಸ, ಪವಿವಿತ್ತಸ್ಸ ಝಾಯಿನೋ.

೯೨೧.

‘‘ಅಞ್ಞಥಾ ಲೋಕನಾಥಮ್ಹಿ, ತಿಟ್ಠನ್ತೇ ಪುರಿಸುತ್ತಮೇ;

ಇರಿಯಂ ಆಸಿ ಭಿಕ್ಖೂನಂ, ಅಞ್ಞಥಾ ದಾನಿ ದಿಸ್ಸತಿ.

೯೨೨.

‘‘ಸೀತವಾತಪರಿತ್ತಾನಂ, ಹಿರಿಕೋಪೀನಛಾದನಂ;

ಮತ್ತಟ್ಠಿಯಂ ಅಭುಞ್ಜಿಂಸು, ಸನ್ತುಟ್ಠಾ ಇತರೀತರೇ.

೯೨೩.

‘‘ಪಣೀತಂ ಯದಿ ವಾ ಲೂಖಂ, ಅಪ್ಪಂ ವಾ ಯದಿ ವಾ ಬಹುಂ;

ಯಾಪನತ್ಥಂ ಅಭುಞ್ಜಿಂಸು, ಅಗಿದ್ಧಾ ನಾಧಿಮುಚ್ಛಿತಾ.

೯೨೪.

‘‘ಜೀವಿತಾನಂ ¶ ಪರಿಕ್ಖಾರೇ, ಭೇಸಜ್ಜೇ ಅಥ ಪಚ್ಚಯೇ;

ನ ಬಾಳ್ಹಂ ಉಸ್ಸುಕಾ ಆಸುಂ, ಯಥಾ ತೇ ಆಸವಕ್ಖಯೇ.

೯೨೫.

‘‘ಅರಞ್ಞೇ ರುಕ್ಖಮೂಲೇಸು, ಕನ್ದರಾಸು ಗುಹಾಸು ಚ;

ವಿವೇಕಮನುಬ್ರೂಹನ್ತಾ, ವಿಹಂಸು ತಪ್ಪರಾಯನಾ.

೯೨೬.

‘‘ನೀಚಾ ¶ ನಿವಿಟ್ಠಾ ಸುಭರಾ, ಮುದೂ ಅತ್ಥದ್ಧಮಾನಸಾ;

ಅಬ್ಯಾಸೇಕಾ ಅಮುಖರಾ, ಅತ್ಥಚಿನ್ತಾ ವಸಾನುಗಾ.

೯೨೭.

‘‘ತತೋ ¶ ಪಾಸಾದಿಕಂ ಆಸಿ, ಗತಂ ಭುತ್ತಂ ನಿಸೇವಿತಂ;

ಸಿನಿದ್ಧಾ ತೇಲಧಾರಾವ, ಅಹೋಸಿ ಇರಿಯಾಪಥೋ.

೯೨೮.

‘‘ಸಬ್ಬಾಸವಪರಿಕ್ಖೀಣಾ, ಮಹಾಝಾಯೀ ಮಹಾಹಿತಾ;

ನಿಬ್ಬುತಾ ದಾನಿ ತೇ ಥೇರಾ, ಪರಿತ್ತಾ ದಾನಿ ತಾದಿಸಾ.

೯೨೯.

‘‘ಕುಸಲಾನಞ್ಚ ¶ ಧಮ್ಮಾನಂ, ಪಞ್ಞಾಯ ಚ ಪರಿಕ್ಖಯಾ;

ಸಬ್ಬಾಕಾರವರೂಪೇತಂ, ಲುಜ್ಜತೇ ಜಿನಸಾಸನಂ.

೯೩೦.

‘‘ಪಾಪಕಾನಞ್ಚ ಧಮ್ಮಾನಂ, ಕಿಲೇಸಾನಞ್ಚ ಯೋ ಉತು;

ಉಪಟ್ಠಿತಾ ವಿವೇಕಾಯ, ಯೇ ಚ ಸದ್ಧಮ್ಮಸೇಸಕಾ.

೯೩೧.

‘‘ತೇ ಕಿಲೇಸಾ ಪವಡ್ಢನ್ತಾ, ಆವಿಸನ್ತಿ ಬಹುಂ ಜನಂ;

ಕೀಳನ್ತಿ ಮಞ್ಞೇ ಬಾಲೇಹಿ, ಉಮ್ಮತ್ತೇಹಿವ ರಕ್ಖಸಾ.

೯೩೨.

‘‘ಕಿಲೇಸೇಹಾಭಿಭೂತಾ ತೇ, ತೇನ ತೇನ ವಿಧಾವಿತಾ;

ನರಾ ಕಿಲೇಸವತ್ಥೂಸು, ಸಸಙ್ಗಾಮೇವ ಘೋಸಿತೇ.

೯೩೩.

‘‘ಪರಿಚ್ಚಜಿತ್ವಾ ಸದ್ಧಮ್ಮಂ, ಅಞ್ಞಮಞ್ಞೇಹಿ ಭಣ್ಡರೇ;

ದಿಟ್ಠಿಗತಾನಿ ಅನ್ವೇನ್ತಾ, ಇದಂ ಸೇಯ್ಯೋತಿ ಮಞ್ಞರೇ.

೯೩೪.

‘‘ಧನಞ್ಚ ಪುತ್ತಂ ಭರಿಯಞ್ಚ, ಛಡ್ಡಯಿತ್ವಾನ ನಿಗ್ಗತಾ;

ಕಟಚ್ಛುಭಿಕ್ಖಹೇತೂಪಿ, ಅಕಿಚ್ಛಾನಿ ನಿಸೇವರೇ.

೯೩೫.

‘‘ಉದರಾವದೇಹಕಂ ಭುತ್ವಾ, ಸಯನ್ತುತ್ತಾನಸೇಯ್ಯಕಾ;

ಕಥಂ ವತ್ತೇನ್ತಿ [ಕಥಾ ವಡ್ಢೇನ್ತಿ (ಸೀ. ಕ.)] ಪಟಿಬುದ್ಧಾ, ಯಾ ಕಥಾ ಸತ್ಥುಗರಹಿತಾ.

೯೩೬.

‘‘ಸಬ್ಬಕಾರುಕಸಿಪ್ಪಾನಿ ¶ , ಚಿತ್ತಿಂ ಕತ್ವಾನ [ಚಿತ್ತೀಕತ್ವಾನ (ಸೀ.), ಚಿತ್ತಂ ಕತ್ವಾನ (ಸ್ಯಾ.)] ಸಿಕ್ಖರೇ;

ಅವೂಪಸನ್ತಾ ಅಜ್ಝತ್ತಂ, ಸಾಮಞ್ಞತ್ಥೋತಿ ಅಚ್ಛತಿ [ತಿರಿಞ್ಚತಿ (?)].

೯೩೭.

‘‘ಮತ್ತಿಕಂ ತೇಲಚುಣ್ಣಞ್ಚ, ಉದಕಾಸನಭೋಜನಂ;

ಗಿಹೀನಂ ಉಪನಾಮೇನ್ತಿ, ಆಕಙ್ಖನ್ತಾ ಬಹುತ್ತರಂ.

೯೩೮.

‘‘ದನ್ತಪೋನಂ ಕಪಿತ್ಥಞ್ಚ, ಪುಪ್ಫಂ ಖಾದನಿಯಾನಿ ಚ;

ಪಿಣ್ಡಪಾತೇ ಚ ಸಮ್ಪನ್ನೇ, ಅಮ್ಬೇ ಆಮಲಕಾನಿ ಚ.

೯೩೯.

‘‘ಭೇಸಜ್ಜೇಸು ಯಥಾ ವೇಜ್ಜಾ, ಕಿಚ್ಚಾಕಿಚ್ಚೇ ಯಥಾ ಗಿಹೀ;

ಗಣಿಕಾವ ವಿಭೂಸಾಯಂ, ಇಸ್ಸರೇ ಖತ್ತಿಯಾ ಯಥಾ.

೯೪೦.

‘‘ನೇಕತಿಕಾ ¶ ವಞ್ಚನಿಕಾ, ಕೂಟಸಕ್ಖೀ ಅಪಾಟುಕಾ;

ಬಹೂಹಿ ಪರಿಕಪ್ಪೇಹಿ, ಆಮಿಸಂ ಪರಿಭುಞ್ಜರೇ.

೯೪೧.

‘‘ಲೇಸಕಪ್ಪೇ ಪರಿಯಾಯೇ, ಪರಿಕಪ್ಪೇನುಧಾವಿತಾ;

ಜೀವಿಕತ್ಥಾ ಉಪಾಯೇನ, ಸಙ್ಕಡ್ಢನ್ತಿ ಬಹುಂ ಧನಂ.

೯೪೨.

‘‘ಉಪಟ್ಠಾಪೇನ್ತಿ ¶ ¶ ಪರಿಸಂ, ಕಮ್ಮತೋ ನೋ ಚ ಧಮ್ಮತೋ;

ಧಮ್ಮಂ ಪರೇಸಂ ದೇಸೇನ್ತಿ, ಲಾಭತೋ ನೋ ಚ ಅತ್ಥತೋ.

೯೪೩.

‘‘ಸಙ್ಘಲಾಭಸ್ಸ ಭಣ್ಡನ್ತಿ, ಸಙ್ಘತೋ ಪರಿಬಾಹಿರಾ;

ಪರಲಾಭೋಪಜೀವನ್ತಾ, ಅಹಿರೀಕಾ ನ ಲಜ್ಜರೇ.

೯೪೪.

‘‘ನಾನುಯುತ್ತಾ ತಥಾ ಏಕೇ, ಮುಣ್ಡಾ ಸಙ್ಘಾಟಿಪಾರುತಾ;

ಸಮ್ಭಾವನಂಯೇವಿಚ್ಛನ್ತಿ, ಲಾಭಸಕ್ಕಾರಮುಚ್ಛಿತಾ.

೯೪೫.

‘‘ಏವಂ ನಾನಪ್ಪಯಾತಮ್ಹಿ, ನ ದಾನಿ ಸುಕರಂ ತಥಾ;

ಅಫುಸಿತಂ ¶ ವಾ ಫುಸಿತುಂ, ಫುಸಿತಂ ವಾನುರಕ್ಖಿತುಂ.

೯೪೬.

‘‘ಯಥಾ ಕಣ್ಟಕಟ್ಠಾನಮ್ಹಿ, ಚರೇಯ್ಯ ಅನುಪಾಹನೋ;

ಸತಿಂ ಉಪಟ್ಠಪೇತ್ವಾನ, ಏವಂ ಗಾಮೇ ಮುನೀ ಚರೇ.

೯೪೭.

‘‘ಸರಿತ್ವಾ ಪುಬ್ಬಕೇ ಯೋಗೀ, ತೇಸಂ ವತ್ತಮನುಸ್ಸರಂ;

ಕಿಞ್ಚಾಪಿ ಪಚ್ಛಿಮೋ ಕಾಲೋ, ಫುಸೇಯ್ಯ ಅಮತಂ ಪದಂ.

೯೪೮.

‘‘ಇದಂ ವತ್ವಾ ಸಾಲವನೇ, ಸಮಣೋ ಭಾವಿತಿನ್ದ್ರಿಯೋ;

ಬ್ರಾಹ್ಮಣೋ ಪರಿನಿಬ್ಬಾಯೀ, ಇಸಿ ಖೀಣಪುನಬ್ಭವೋ’’ತಿ.

… ಪಾರಾಪರಿಯೋ [ಪಾರಾಸರಿಯೋ (ಸ್ಯಾ.)] ಥೇರೋ….

ವೀಸತಿನಿಪಾತೋ ನಿಟ್ಠಿತೋ.

ತತ್ರುದ್ದಾನಂ –

ಅಧಿಮುತ್ತೋ ಪಾರಾಪರಿಯೋ, ತೇಲಕಾನಿ ರಟ್ಠಪಾಲೋ;

ಮಾಲುಕ್ಯಸೇಲೋ ಭದ್ದಿಯೋ, ಅಙ್ಗುಲಿ ದಿಬ್ಬಚಕ್ಖುಕೋ.

ಪಾರಾಪರಿಯೋ ದಸೇತೇ, ವೀಸಮ್ಹಿ ಪರಿಕಿತ್ತಿತಾ;

ಗಾಥಾಯೋ ದ್ವೇ ಸತಾ ಹೋನ್ತಿ, ಪಞ್ಚತಾಲೀಸ [೨೪೪ ಗಾಥಾಯೋಯೇವ ದಿಸ್ಸನ್ತಿ] ಉತ್ತರಿನ್ತಿ.

೧೭. ತಿಂಸನಿಪಾತೋ

೧. ಫುಸ್ಸತ್ಥೇರಗಾಥಾ

೯೪೯.

ಪಾಸಾದಿಕೇ ¶ ¶ ¶ ಬಹೂ ದಿಸ್ವಾ, ಭಾವಿತತ್ತೇ ಸುಸಂವುತೇ;

ಇಸಿ ಪಣ್ಡರಸಗೋತ್ತೋ [ಪಣ್ಡರಸ್ಸ ಗೋತ್ತೋ (ಸೀ.)], ಅಪುಚ್ಛಿ ಫುಸ್ಸಸವ್ಹಯಂ.

೯೫೦.

‘‘ಕಿಂಛನ್ದಾ ¶ ಕಿಮಧಿಪ್ಪಾಯಾ, ಕಿಮಾಕಪ್ಪಾ ಭವಿಸ್ಸರೇ;

ಅನಾಗತಮ್ಹಿ ಕಾಲಮ್ಹಿ, ತಂ ಮೇ ಅಕ್ಖಾಹಿ ಪುಚ್ಛಿತೋ’’.

೯೫೧.

‘‘ಸುಣೋಹಿ ವಚನಂ ಮಯ್ಹಂ, ಇಸಿಪಣ್ಡರಸವ್ಹಯ;

ಸಕ್ಕಚ್ಚಂ ಉಪಧಾರೇಹಿ, ಆಚಿಕ್ಖಿಸ್ಸಾಮ್ಯನಾಗತಂ.

೯೫೨.

‘‘ಕೋಧನಾ ಉಪನಾಹೀ ಚ, ಮಕ್ಖೀ ಥಮ್ಭೀ ಸಠಾ ಬಹೂ;

ಉಸ್ಸುಕೀ ನಾನಾವಾದಾ ಚ, ಭವಿಸ್ಸನ್ತಿ ಅನಾಗತೇ.

೯೫೩.

‘‘ಅಞ್ಞಾತಮಾನಿನೋ ಧಮ್ಮೇ, ಗಮ್ಭೀರೇ ತೀರಗೋಚರಾ;

ಲಹುಕಾ ಅಗರು ಧಮ್ಮೇ, ಅಞ್ಞಮಞ್ಞಮಗಾರವಾ.

೯೫೪.

‘‘ಬಹೂ ಆದೀನವಾ ಲೋಕೇ, ಉಪ್ಪಜ್ಜಿಸ್ಸನ್ತ್ಯನಾಗತೇ;

ಸುದೇಸಿತಂ ಇಮಂ ಧಮ್ಮಂ, ಕಿಲೇಸೇಸ್ಸನ್ತಿ [ಕಿಲೇಸಿಸ್ಸನ್ತಿ (ಸೀ.), ಕಿಲಿಸಿಸ್ಸನ್ತಿ (ಸ್ಯಾ. ಕ.)] ದುಮ್ಮತೀ.

೯೫೫.

‘‘ಗುಣಹೀನಾಪಿ ಸಙ್ಘಮ್ಹಿ, ವೋಹರನ್ತಾ ವಿಸಾರದಾ;

ಬಲವನ್ತೋ ಭವಿಸ್ಸನ್ತಿ, ಮುಖರಾ ಅಸ್ಸುತಾವಿನೋ.

೯೫೬.

‘‘ಗುಣವನ್ತೋಪಿ ಸಙ್ಘಮ್ಹಿ, ವೋಹರನ್ತಾ ಯಥಾತ್ಥತೋ;

ದುಬ್ಬಲಾ ತೇ ಭವಿಸ್ಸನ್ತಿ, ಹಿರೀಮನಾ ಅನತ್ಥಿಕಾ.

೯೫೭.

‘‘ರಜತಂ ಜಾತರೂಪಞ್ಚ, ಖೇತ್ತಂ ವತ್ಥುಮಜೇಳಕಂ;

ದಾಸಿದಾಸಞ್ಚ ದುಮ್ಮೇಧಾ, ಸಾದಿಯಿಸ್ಸನ್ತ್ಯನಾಗತೇ.

೯೫೮.

‘‘ಉಜ್ಝಾನಸಞ್ಞಿನೋ ಬಾಲಾ, ಸೀಲೇಸು ಅಸಮಾಹಿತಾ;

ಉನ್ನಳಾ ವಿಚರಿಸ್ಸನ್ತಿ, ಕಲಹಾಭಿರತಾ ಮಗಾ.

೯೫೯.

‘‘ಉದ್ಧತಾ ಚ ಭವಿಸ್ಸನ್ತಿ, ನೀಲಚೀವರಪಾರುತಾ;

ಕುಹಾ ¶ ಥದ್ಧಾ ಲಪಾ ಸಿಙ್ಗೀ, ಚರಿಸ್ಸನ್ತ್ಯರಿಯಾ ವಿಯ.

೯೬೦.

‘‘ತೇಲಸಣ್ಠೇಹಿ ಕೇಸೇಹಿ, ಚಪಲಾ ಅಞ್ಜನಕ್ಖಿಕಾ;

ರಥಿಯಾಯ ಗಮಿಸ್ಸನ್ತಿ, ದನ್ತವಣ್ಣಿಕಪಾರುತಾ.

೯೬೧.

‘‘ಅಜೇಗುಚ್ಛಂ ¶ ¶ ವಿಮುತ್ತೇಹಿ, ಸುರತ್ತಂ ಅರಹದ್ಧಜಂ;

ಜಿಗುಚ್ಛಿಸ್ಸನ್ತಿ ಕಾಸಾವಂ, ಓದಾತೇಸು ಸಮುಚ್ಛಿತಾ [ಓದಾತೇ ಸುಸಮುಚ್ಛಿತಾ (ಸೀ.)].

೯೬೨.

‘‘ಲಾಭಕಾಮಾ ಭವಿಸ್ಸನ್ತಿ, ಕುಸೀತಾ ಹೀನವೀರಿಯಾ;

ಕಿಚ್ಛನ್ತಾ ವನಪತ್ಥಾನಿ, ಗಾಮನ್ತೇಸು ವಸಿಸ್ಸರೇ.

೯೬೩.

‘‘ಯೇ ¶ ಯೇ ಲಾಭಂ ಲಭಿಸ್ಸನ್ತಿ, ಮಿಚ್ಛಾಜೀವರತಾ ಸದಾ;

ತೇ ತೇವ ಅನುಸಿಕ್ಖನ್ತಾ, ಭಜಿಸ್ಸನ್ತಿ ಅಸಂಯತಾ.

೯೬೪.

‘‘ಯೇ ಯೇ ಅಲಾಭಿನೋ ಲಾಭಂ, ನ ತೇ ಪುಜ್ಜಾ ಭವಿಸ್ಸರೇ;

ಸುಪೇಸಲೇಪಿ ತೇ ಧೀರೇ, ಸೇವಿಸ್ಸನ್ತಿ ನ ತೇ ತದಾ.

೯೬೫.

‘‘ಮಿಲಕ್ಖುರಜನಂ ರತ್ತಂ [ಪಿಲಕ್ಖರಜನಂ ರತ್ತಂ (?)], ಗರಹನ್ತಾ ಸಕಂ ಧಜಂ;

ತಿತ್ಥಿಯಾನಂ ಧಜಂ ಕೇಚಿ, ಧಾರಿಸ್ಸನ್ತ್ಯವದಾತಕಂ.

೯೬೬.

‘‘ಅಗಾರವೋ ಚ ಕಾಸಾವೇ, ತದಾ ತೇಸಂ ಭವಿಸ್ಸತಿ;

ಪಟಿಸಙ್ಖಾ ಚ ಕಾಸಾವೇ, ಭಿಕ್ಖೂನಂ ನ ಭವಿಸ್ಸತಿ.

೯೬೭.

‘‘ಅಭಿಭೂತಸ್ಸ ದುಕ್ಖೇನ, ಸಲ್ಲವಿದ್ಧಸ್ಸ ರುಪ್ಪತೋ;

ಪಟಿಸಙ್ಖಾ ಮಹಾಘೋರಾ, ನಾಗಸ್ಸಾಸಿ ಅಚಿನ್ತಿಯಾ.

೯೬೮.

‘‘ಛದ್ದನ್ತೋ ಹಿ ತದಾ ದಿಸ್ವಾ, ಸುರತ್ತಂ ಅರಹದ್ಧಜಂ;

ತಾವದೇವ ಭಣೀ ಗಾಥಾ, ಗಜೋ ಅತ್ಥೋಪಸಂಹಿತಾ’’.

೯೬೯.

[ಧ. ಪ. ೯; ಜಾ. ೧.೨.೧೪೧; ೧.೧೬.೧೨೨] ‘‘ಅನಿಕ್ಕಸಾವೋ ¶ ಕಾಸಾವಂ, ಯೋ ವತ್ಥಂ ಪರಿಧಸ್ಸತಿ [ಪರಿದಹಿಸ್ಸತಿ (ಸೀ. ಸ್ಯಾ.)];

ಅಪೇತೋ ದಮಸಚ್ಚೇನ, ನ ಸೋ ಕಾಸಾವಮರಹತಿ.

೯೭೦.

‘‘ಯೋ ಚ ವನ್ತಕಾಸಾವಸ್ಸ, ಸೀಲೇಸು ಸುಸಮಾಹಿತೋ;

ಉಪೇತೋ ದಮಸಚ್ಚೇನ, ಸ ವೇ ಕಾಸಾವಮರಹತಿ.

೯೭೧.

‘‘ವಿಪನ್ನಸೀಲೋ ದುಮ್ಮೇಧೋ, ಪಾಕಟೋ ಕಾಮಕಾರಿಯೋ;

ವಿಬ್ಭನ್ತಚಿತ್ತೋ ನಿಸ್ಸುಕ್ಕೋ, ನ ಸೋ ಕಾಸಾವಮರಹತಿ.

೯೭೨.

‘‘ಯೋ ಚ ಸೀಲೇನ ಸಮ್ಪನ್ನೋ, ವೀತರಾಗೋ ಸಮಾಹಿತೋ;

ಓದಾತಮನಸಙ್ಕಪ್ಪೋ, ಸ ವೇ ಕಾಸಾವಮರಹತಿ.

೯೭೩.

‘‘ಉದ್ಧತೋ ಉನ್ನಳೋ ಬಾಲೋ, ಸೀಲಂ ಯಸ್ಸ ನ ವಿಜ್ಜತಿ;

ಓದಾತಕಂ ಅರಹತಿ, ಕಾಸಾವಂ ಕಿಂ ಕರಿಸ್ಸತಿ.

೯೭೪.

‘‘ಭಿಕ್ಖೂ ¶ ಚ ಭಿಕ್ಖುನಿಯೋ ಚ, ದುಟ್ಠಚಿತ್ತಾ ಅನಾದರಾ;

ತಾದೀನಂ ಮೇತ್ತಚಿತ್ತಾನಂ, ನಿಗ್ಗಣ್ಹಿಸ್ಸನ್ತ್ಯನಾಗತೇ.

೯೭೫.

‘‘ಸಿಕ್ಖಾಪೇನ್ತಾಪಿ ಥೇರೇಹಿ, ಬಾಲಾ ಚೀವರಧಾರಣಂ;

ನ ಸುಣಿಸ್ಸನ್ತಿ ದುಮ್ಮೇಧಾ, ಪಾಕಟಾ ಕಾಮಕಾರಿಯಾ.

೯೭೬.

‘‘ತೇ ¶ ತಥಾ ಸಿಕ್ಖಿತಾ ಬಾಲಾ, ಅಞ್ಞಮಞ್ಞಂ ಅಗಾರವಾ;

ನಾದಿಯಿಸ್ಸನ್ತುಪಜ್ಝಾಯೇ, ಖಳುಙ್ಕೋ ವಿಯ ಸಾರಥಿಂ.

೯೭೭.

‘‘ಏವಂ ಅನಾಗತದ್ಧಾನಂ, ಪಟಿಪತ್ತಿ ಭವಿಸ್ಸತಿ;

ಭಿಕ್ಖೂನಂ ಭಿಕ್ಖುನೀನಞ್ಚ, ಪತ್ತೇ ಕಾಲಮ್ಹಿ ಪಚ್ಛಿಮೇ.

೯೭೮.

‘‘ಪುರಾ ಆಗಚ್ಛತೇ ಏತಂ, ಅನಾಗತಂ ಮಹಬ್ಭಯಂ;

ಸುಬ್ಬಚಾ ಹೋಥ ಸಖಿಲಾ, ಅಞ್ಞಮಞ್ಞಂ ಸಗಾರವಾ.

೯೭೯.

‘‘ಮೇತ್ತಚಿತ್ತಾ ¶ ಕಾರುಣಿಕಾ, ಹೋಥ ಸೀಲೇಸು ಸಂವುತಾ;

ಆರದ್ಧವೀರಿಯಾ ಪಹಿತತ್ತಾ, ನಿಚ್ಚಂ ದಳ್ಹಪರಕ್ಕಮಾ.

೯೮೦.

‘‘ಪಮಾದಂ ¶ ಭಯತೋ ದಿಸ್ವಾ, ಅಪ್ಪಮಾದಞ್ಚ ಖೇಮತೋ;

ಭಾವೇಥಟ್ಠಙ್ಗಿಕಂ ಮಗ್ಗಂ, ಫುಸನ್ತಾ ಅಮತಂ ಪದ’’ನ್ತಿ.

… ಫುಸ್ಸೋ ಥೇರೋ….

೨. ಸಾರಿಪುತ್ತತ್ಥೇರಗಾಥಾ

೯೮೧.

‘‘ಯಥಾಚಾರೀ ಯಥಾಸತೋ ಸತೀಮಾ, ಯತಸಙ್ಕಪ್ಪಜ್ಝಾಯಿ ಅಪ್ಪಮತ್ತೋ;

ಅಜ್ಝತ್ತರತೋ ಸಮಾಹಿತತ್ತೋ, ಏಕೋ ಸನ್ತುಸಿತೋ ತಮಾಹು ಭಿಕ್ಖುಂ.

೯೮೨.

‘‘ಅಲ್ಲಂ ಸುಕ್ಖಂ ವಾ ಭುಞ್ಜನ್ತೋ, ನ ಬಾಳ್ಹಂ ಸುಹಿತೋ ಸಿಯಾ;

ಊನೂದರೋ ಮಿತಾಹಾರೋ, ಸತೋ ಭಿಕ್ಖು ಪರಿಬ್ಬಜೇ.

೯೮೩.

‘‘ಚತ್ತಾರೋ ಪಞ್ಚ ಆಲೋಪೇ, ಅಭುತ್ವಾ ಉದಕಂ ಪಿವೇ;

ಅಲಂ ಫಾಸುವಿಹಾರಾಯ, ಪಹಿತತ್ತಸ್ಸ ಭಿಕ್ಖುನೋ.

೯೮೪.

‘‘ಕಪ್ಪಿಯಂ ತಂ ಚೇ ಛಾದೇತಿ, ಚೀವರಂ ಇದಮತ್ಥಿಕಂ [ಇದಮತ್ಥಿತಂ (ಸೀ.)];

ಅಲಂ ಫಾಸುವಿಹಾರಾಯ, ಪಹಿತತ್ತಸ್ಸ ಭಿಕ್ಖುನೋ.

೯೮೫.

‘‘ಪಲ್ಲಙ್ಕೇನ ¶ ನಿಸಿನ್ನಸ್ಸ, ಜಣ್ಣುಕೇ ನಾಭಿವಸ್ಸತಿ;

ಅಲಂ ಫಾಸುವಿಹಾರಾಯ, ಪಹಿತತ್ತಸ್ಸ ಭಿಕ್ಖುನೋ.

೯೮೬.

[ಸಂ. ನಿ. ೪.೨೫೩; ಇತಿವು. ೫೩] ‘‘ಯೋ ಸುಖಂ ದುಕ್ಖತೋ ಅದ್ದ, ದುಕ್ಖಮದ್ದಕ್ಖಿ ಸಲ್ಲತೋ;

ಉಭಯನ್ತರೇನ ¶ [ಉಭಯಮನ್ತರೇ (ಸೀ.)] ನಾಹೋಸಿ, ಕೇನ ಲೋಕಸ್ಮಿ ಕಿಂ ಸಿಯಾ.

೯೮೭.

‘‘ಮಾ ಮೇ ಕದಾಚಿ ಪಾಪಿಚ್ಛೋ, ಕುಸೀತೋ ಹೀನವೀರಿಯೋ;

ಅಪ್ಪಸ್ಸುತೋ ಅನಾದರೋ, ಕೇನ ಲೋಕಸ್ಮಿ ಕಿಂ ಸಿಯಾ.

೯೮೮.

‘‘ಬಹುಸ್ಸುತೋ ¶ ಚ ಮೇಧಾವೀ, ಸೀಲೇಸು ಸುಸಮಾಹಿತೋ;

ಚೇತೋಸಮಥಮನುಯುತ್ತೋ, ಅಪಿ ಮುದ್ಧನಿ ತಿಟ್ಠತು.

೯೮೯.

‘‘ಯೋ ಪಪಞ್ಚಮನುಯುತ್ತೋ, ಪಪಞ್ಚಾಭಿರತೋ ಮಗೋ;

ವಿರಾಧಯೀ ಸೋ ನಿಬ್ಬಾನಂ, ಯೋಗಕ್ಖೇಮಂ ಅನುತ್ತರಂ.

೯೯೦.

‘‘ಯೋ ಚ ಪಪಞ್ಚಂ ಹಿತ್ವಾನ, ನಿಪ್ಪಪಞ್ಚಪಥೇ ರತೋ;

ಆರಾಧಯೀ ಸೋ ನಿಬ್ಬಾನಂ, ಯೋಗಕ್ಖೇಮಂ ಅನುತ್ತರಂ.

೯೯೧.

[ಧ. ಪ. ೯೮] ‘‘ಗಾಮೇ ವಾ ಯದಿ ವಾರಞ್ಞೇ, ನಿನ್ನೇ ವಾ ಯದಿ ವಾ ಥಲೇ;

ಯತ್ಥ ಅರಹನ್ತೋ ವಿಹರನ್ತಿ, ತಂ ಭೂಮಿರಾಮಣೇಯ್ಯಕಂ.

೯೯೨.

‘‘ರಮಣೀಯಾನಿ ಅರಞ್ಞಾನಿ, ಯತ್ಥ ನ ರಮತೀ ಜನೋ;

ವೀತರಾಗಾ ರಮಿಸ್ಸನ್ತಿ, ನ ತೇ ಕಾಮಗವೇಸಿನೋ.

೯೯೩.

[ಧ. ಪ. ೭೬] ‘‘ನಿಧೀನಂವ ಪವತ್ತಾರಂ, ಯಂ ಪಸ್ಸೇ ವಜ್ಜದಸ್ಸಿನಂ;

ನಿಗ್ಗಯ್ಹವಾದಿಂ ¶ ಮೇಧಾವಿಂ, ತಾದಿಸಂ ಪಣ್ಡಿತಂ ಭಜೇ;

ತಾದಿಸಂ ಭಜಮಾನಸ್ಸ, ಸೇಯ್ಯೋ ಹೋತಿ ನ ಪಾಪಿಯೋ.

೯೯೪.

[ಧ. ಪ. ೭೭] ‘‘ಓವದೇಯ್ಯಾನುಸಾಸೇಯ್ಯ, ಅಸಬ್ಭಾ ಚ ನಿವಾರಯೇ;

ಸತಞ್ಹಿ ಸೋ ಪಿಯೋ ಹೋತಿ, ಅಸತಂ ಹೋತಿ ಅಪ್ಪಿಯೋ.

೯೯೫.

‘‘ಅಞ್ಞಸ್ಸ ಭಗವಾ ಬುದ್ಧೋ, ಧಮ್ಮಂ ದೇಸೇಸಿ ಚಕ್ಖುಮಾ;

ಧಮ್ಮೇ ¶ ದೇಸಿಯಮಾನಮ್ಹಿ, ಸೋತಮೋಧೇಸಿಮತ್ಥಿಕೋ;

ತಂ ಮೇ ಅಮೋಘಂ ಸವನಂ, ವಿಮುತ್ತೋಮ್ಹಿ ಅನಾಸವೋ.

೯೯೬.

‘‘ನೇವ ಪುಬ್ಬೇನಿವಾಸಾಯ, ನಪಿ ದಿಬ್ಬಸ್ಸ ಚಕ್ಖುನೋ;

ಚೇತೋಪರಿಯಾಯ ಇದ್ಧಿಯಾ, ಚುತಿಯಾ ಉಪಪತ್ತಿಯಾ;

ಸೋತಧಾತುವಿಸುದ್ಧಿಯಾ, ಪಣಿಧೀ ಮೇ ನ ವಿಜ್ಜತಿ [ಕಥಾ. ೩೭೮].

೯೯೭.

‘‘ರುಕ್ಖಮೂಲಂವ ¶ ನಿಸ್ಸಾಯ, ಮುಣ್ಡೋ ಸಙ್ಘಾಟಿಪಾರುತೋ;

ಪಞ್ಞಾಯ ಉತ್ತಮೋ ಥೇರೋ, ಉಪತಿಸ್ಸೋವ [ಉಪತಿಸ್ಸೋ ಚ (ಸೀ. ಕ.)] ಝಾಯತಿ.

೯೯೮.

‘‘ಅವಿತಕ್ಕಂ ಸಮಾಪನ್ನೋ, ಸಮ್ಮಾಸಮ್ಬುದ್ಧಸಾವಕೋ;

ಅರಿಯೇನ ತುಣ್ಹೀಭಾವೇನ, ಉಪೇತೋ ಹೋತಿ ತಾವದೇ.

೯೯೯.

[ಉದಾ. ೨೪] ‘‘ಯಥಾಪಿ ಪಬ್ಬತೋ ಸೇಲೋ, ಅಚಲೋ ಸುಪ್ಪತಿಟ್ಠಿತೋ;

ಏವಂ ಮೋಹಕ್ಖಯಾ ಭಿಕ್ಖು, ಪಬ್ಬತೋವ ನ ವೇಧತಿ.

೧೦೦೦.

‘‘ಅನಙ್ಗಣಸ್ಸ ಪೋಸಸ್ಸ, ನಿಚ್ಚಂ ಸುಚಿಗವೇಸಿನೋ;

ವಾಲಗ್ಗಮತ್ತಂ ಪಾಪಸ್ಸ, ಅಬ್ಭಮತ್ತಂವ ಖಾಯತಿ.

೧೦೦೧.

‘‘ನಾಭಿನನ್ದಾಮಿ ¶ ಮರಣಂ, ನಾಭಿನನ್ದಾಮಿ ಜೀವಿತಂ;

ನಿಕ್ಖಿಪಿಸ್ಸಂ ಇಮಂ ಕಾಯಂ, ಸಮ್ಪಜಾನೋ ಪತಿಸ್ಸತೋ.

೧೦೦೨.

‘‘ನಾಭಿನನ್ದಾಮಿ ಮರಣಂ, ನಾಭಿನನ್ದಾಮಿ ಜೀವಿತಂ;

ಕಾಲಞ್ಚ ಪಟಿಕಙ್ಖಾಮಿ, ನಿಬ್ಬಿಸಂ ಭತಕೋ ಯಥಾ.

೧೦೦೩.

‘‘ಉಭಯೇನ ಮಿದಂ ಮರಣಮೇವ, ನಾಮರಣಂ ಪಚ್ಛಾ ವಾ ಪುರೇ ವಾ;

ಪಟಿಪಜ್ಜಥ ಮಾ ವಿನಸ್ಸಥ, ಖಣೋ ವೋ ಮಾ ಉಪಚ್ಚಗಾ.

೧೦೦೪.

‘‘ನಗರಂ ಯಥಾ ಪಚ್ಚನ್ತಂ, ಗುತ್ತಂ ಸನ್ತರಬಾಹಿರಂ;

ಏವಂ ಗೋಪೇಥ ಅತ್ತಾನಂ, ಖಣೋ ವೋ ಮಾ ಉಪಚ್ಚಗಾ;

ಖಣಾತೀತಾ ¶ ಹಿ ಸೋಚನ್ತಿ, ನಿರಯಮ್ಹಿ ಸಮಪ್ಪಿತಾ.

೧೦೦೫.

‘‘ಉಪಸನ್ತೋ ಉಪರತೋ, ಮನ್ತಭಾಣೀ [ಮತ್ತಭಾಣೀ (ಸೀ.)] ಅನುದ್ಧತೋ;

ಧುನಾತಿ ಪಾಪಕೇ ಧಮ್ಮೇ, ದುಮಪತ್ತಂವ ಮಾಲುತೋ.

೧೦೦೬.

‘‘ಉಪಸನ್ತೋ ಉಪರತೋ, ಮನ್ತಭಾಣೀ ಅನುದ್ಧತೋ;

ಅಪ್ಪಾಸಿ [ಅಬ್ಬಹಿ (ಸ್ಯಾ.), ಅಭಾಸಿ (?)] ಪಾಪಕೇ ಧಮ್ಮೇ, ದುಮಪತ್ತಂವ ಮಾಲುತೋ.

೧೦೦೭.

‘‘ಉಪಸನ್ತೋ ¶ ಅನಾಯಾಸೋ, ವಿಪ್ಪಸನ್ನೋ ಅನಾವಿಲೋ;

ಕಲ್ಯಾಣಸೀಲೋ ಮೇಧಾವೀ, ದುಕ್ಖಸ್ಸನ್ತಕರೋ ಸಿಯಾ.

೧೦೦೮.

‘‘ನ ವಿಸ್ಸಸೇ ಏಕತಿಯೇಸು ಏವಂ, ಅಗಾರಿಸು ಪಬ್ಬಜಿತೇಸು ಚಾಪಿ;

ಸಾಧೂಪಿ ಹುತ್ವಾ ನ ಅಸಾಧು ಹೋನ್ತಿ, ಅಸಾಧು ಹುತ್ವಾ ಪುನ ಸಾಧು ಹೋನ್ತಿ.

೧೦೦೯.

‘‘ಕಾಮಚ್ಛನ್ದೋ ¶ ಚ ಬ್ಯಾಪಾದೋ, ಥಿನಮಿದ್ಧಞ್ಚ ಭಿಕ್ಖುನೋ;

ಉದ್ಧಚ್ಚಂ ವಿಚಿಕಿಚ್ಛಾ ಚ, ಪಞ್ಚೇತೇ ಚಿತ್ತಕೇಲಿಸಾ.

೧೦೧೦.

‘‘ಯಸ್ಸ ಸಕ್ಕರಿಯಮಾನಸ್ಸ, ಅಸಕ್ಕಾರೇನ ಚೂಭಯಂ;

ಸಮಾಧಿ ನ ವಿಕಮ್ಪತಿ, ಅಪ್ಪಮಾದವಿಹಾರಿನೋ.

೧೦೧೧.

‘‘ತಂ ಝಾಯಿನಂ ಸಾತತಿಕಂ, ಸುಖುಮದಿಟ್ಠಿವಿಪಸ್ಸಕಂ;

ಉಪಾದಾನಕ್ಖಯಾರಾಮಂ, ಆಹು ಸಪ್ಪುರಿಸೋ ಇತಿ.

೧೦೧೨.

‘‘ಮಹಾಸಮುದ್ದೋ ಪಥವೀ, ಪಬ್ಬತೋ ಅನಿಲೋಪಿ ಚ;

ಉಪಮಾಯ ನ ಯುಜ್ಜನ್ತಿ, ಸತ್ಥು ವರವಿಮುತ್ತಿಯಾ.

೧೦೧೩.

‘‘ಚಕ್ಕಾನುವತ್ತಕೋ ¶ ಥೇರೋ, ಮಹಾಞಾಣೀ ಸಮಾಹಿತೋ;

ಪಥವಾಪಗ್ಗಿಸಮಾನೋ, ನ ರಜ್ಜತಿ ನ ದುಸ್ಸತಿ.

೧೦೧೪.

‘‘ಪಞ್ಞಾಪಾರಮಿತಂ ಪತ್ತೋ, ಮಹಾಬುದ್ಧಿ ಮಹಾಮತಿ;

ಅಜಳೋ ಜಳಸಮಾನೋ, ಸದಾ ಚರತಿ ನಿಬ್ಬುತೋ.

೧೦೧೫.

‘‘ಪರಿಚಿಣ್ಣೋ ಮಯಾ ಸತ್ಥಾ…ಪೇ… ಭವನೇತ್ತಿ ಸಮೂಹತಾ.

೧೦೧೬.

‘‘ಸಮ್ಪಾದೇಥಪ್ಪಮಾದೇನ ¶ , ಏಸಾ ಮೇ ಅನುಸಾಸನೀ;

ಹನ್ದಾಹಂ ಪರಿನಿಬ್ಬಿಸ್ಸಂ, ವಿಪ್ಪಮುತ್ತೋಮ್ಹಿ ಸಬ್ಬಧೀ’’ತಿ.

… ಸಾರಿಪುತ್ತೋ ಥೇರೋ….

೩. ಆನನ್ದತ್ಥೇರಗಾಥಾ

೧೦೧೭.

‘‘ಪಿಸುಣೇನ ಚ ಕೋಧನೇನ ಚ, ಮಚ್ಛರಿನಾ ಚ ವಿಭೂತನನ್ದಿನಾ;

ಸಖಿತಂ ನ ಕರೇಯ್ಯ ಪಣ್ಡಿತೋ, ಪಾಪೋ ಕಾಪುರಿಸೇನ ಸಙ್ಗಮೋ.

೧೦೧೮.

‘‘ಸದ್ಧೇನ ಚ ಪೇಸಲೇನ ಚ, ಪಞ್ಞವತಾ ಬಹುಸ್ಸುತೇನ ಚ;

ಸಖಿತಂ ಕರೇಯ್ಯ ಪಣ್ಡಿತೋ, ಭದ್ದೋ ಸಪ್ಪುರಿಸೇನ ಸಙ್ಗಮೋ.

೧೦೧೯.

‘‘ಪಸ್ಸ ಚಿತ್ತಕತಂ ಬಿಮ್ಬಂ…ಪೇ… ಯಸ್ಸ ನತ್ಥಿ ಧುವಂ ಠಿತಿ.

೧೦೨೦.

‘‘ಪಸ್ಸ ಚಿತ್ತಕತಂ ಬಿಮ್ಬಂ…ಪೇ… ವತ್ಥೇಹಿ ಸೋಭತಿ.

೧೦೨೧.

‘‘ಅಲತ್ತಕಕತಾ ¶ …ಪೇ… ನೋ ಚ ಪಾರಗವೇಸಿನೋ.

೧೦೨೨.

‘‘ಅಟ್ಠಪದಕತಾ…ಪೇ… ನೋ ಚ ಪಾರಗವೇಸಿನೋ.

೧೦೨೩.

‘‘ಅಞ್ಜನೀವ ನವಾ…ಪೇ… ನೋ ಚ ಪಾರಗವೇಸಿನೋ.

೧೦೨೪.

‘‘ಬಹುಸ್ಸುತೋ ಚಿತ್ತಕಥೀ, ಬುದ್ಧಸ್ಸ ಪರಿಚಾರಕೋ;

ಪನ್ನಭಾರೋ ವಿಸಞ್ಞುತ್ತೋ, ಸೇಯ್ಯಂ ಕಪ್ಪೇತಿ ಗೋತಮೋ.

೧೦೨೫.

‘‘ಖೀಣಾಸವೋ ವಿಸಞ್ಞುತ್ತೋ, ಸಙ್ಗಾತೀತೋ ಸುನಿಬ್ಬುತೋ;

ಧಾರೇತಿ ಅನ್ತಿಮಂ ದೇಹಂ, ಜಾತಿಮರಣಪಾರಗೂ.

೧೦೨೬.

‘‘ಯಸ್ಮಿಂ ¶ ಪತಿಟ್ಠಿತಾ ಧಮ್ಮಾ, ಬುದ್ಧಸ್ಸಾದಿಚ್ಚಬನ್ಧುನೋ;

ನಿಬ್ಬಾನಗಮನೇ ಮಗ್ಗೇ, ಸೋಯಂ ತಿಟ್ಠತಿ ಗೋತಮೋ.

೧೦೨೭.

‘‘ದ್ವಾಸೀತಿ ¶ ಬುದ್ಧತೋ ಗಣ್ಹಿಂ, ದ್ವೇ ಸಹಸ್ಸಾನಿ ಭಿಕ್ಖುತೋ;

ಚತುರಾಸೀತಿಸಹಸ್ಸಾನಿ, ಯೇ ಮೇ ಧಮ್ಮಾ ಪವತ್ತಿನೋ.

೧೦೨೮.

‘‘ಅಪ್ಪಸ್ಸುತಾಯಂ ಪುರಿಸೋ, ಬಲಿಬದ್ದೋವ ಜೀರತಿ;

ಮಂಸಾನಿ ತಸ್ಸ ವಡ್ಢನ್ತಿ, ಪಞ್ಞಾ ತಸ್ಸ ನ ವಡ್ಢತಿ.

೧೦೨೯.

‘‘ಬಹುಸ್ಸುತೋ ಅಪ್ಪಸ್ಸುತಂ, ಯೋ ಸುತೇನಾತಿಮಞ್ಞತಿ;

ಅನ್ಧೋ ಪದೀಪಧಾರೋವ, ತಥೇವ ಪಟಿಭಾತಿ ಮಂ.

೧೦೩೦.

‘‘ಬಹುಸ್ಸುತಂ ಉಪಾಸೇಯ್ಯ, ಸುತಞ್ಚ ನ ವಿನಾಸಯೇ;

ತಂ ಮೂಲಂ ಬ್ರಹ್ಮಚರಿಯಸ್ಸ, ತಸ್ಮಾ ಧಮ್ಮಧರೋ ಸಿಯಾ.

೧೦೩೧.

‘‘ಪುಬ್ಬಾಪರಞ್ಞೂ ಅತ್ಥಞ್ಞೂ, ನಿರುತ್ತಿಪದಕೋವಿದೋ;

ಸುಗ್ಗಹೀತಞ್ಚ ಗಣ್ಹಾತಿ, ಅತ್ಥಞ್ಚೋಪಪರಿಕ್ಖತಿ.

೧೦೩೨.

‘‘ಖನ್ತ್ಯಾ ¶ ಛನ್ದಿಕತೋ [ಖನ್ತಿಯಾ ಛನ್ದಿತೋ (?)] ಹೋತಿ, ಉಸ್ಸಹಿತ್ವಾ ತುಲೇತಿ ತಂ;

ಸಮಯೇ ಸೋ ಪದಹತಿ, ಅಜ್ಝತ್ತಂ ಸುಸಮಾಹಿತೋ.

೧೦೩೩.

‘‘ಬಹುಸ್ಸುತಂ ಧಮ್ಮಧರಂ, ಸಪ್ಪಞ್ಞಂ ಬುದ್ಧಸಾವಕಂ;

ಧಮ್ಮವಿಞ್ಞಾಣಮಾಕಙ್ಖಂ, ತಂ ಭಜೇಥ ತಥಾವಿಧಂ.

೧೦೩೪.

‘‘ಬಹುಸ್ಸುತೋ ಧಮ್ಮಧರೋ, ಕೋಸಾರಕ್ಖೋ ಮಹೇಸಿನೋ;

ಚಕ್ಖು ಸಬ್ಬಸ್ಸ ಲೋಕಸ್ಸ, ಪೂಜನೀಯೋ ಬಹುಸ್ಸುತೋ.

೧೦೩೫.

‘‘ಧಮ್ಮಾರಾಮೋ ಧಮ್ಮರತೋ, ಧಮ್ಮಂ ಅನುವಿಚಿನ್ತಯಂ;

ಧಮ್ಮಂ ಅನುಸ್ಸರಂ ಭಿಕ್ಖು, ಸದ್ಧಮ್ಮಾ ನ ಪರಿಹಾಯತಿ.

೧೦೩೬.

‘‘ಕಾಯಮಚ್ಛೇರಗರುನೋ ¶ [ಗರುಕೋ (ಸೀ.)], ಹಿಯ್ಯಮಾನೇ [ಹಿಯ್ಯಮಾನೋ (ಸೀ.)] ಅನುಟ್ಠಹೇ;

ಸರೀರಸುಖಗಿದ್ಧಸ್ಸ, ಕುತೋ ಸಮಣಫಾಸುತಾ.

೧೦೩೭.

‘‘ನ ¶ ಪಕ್ಖನ್ತಿ ದಿಸಾ ಸಬ್ಬಾ, ಧಮ್ಮಾ ನ ಪಟಿಭನ್ತಿ ಮಂ;

ಗತೇ ಕಲ್ಯಾಣಮಿತ್ತಮ್ಹಿ, ಅನ್ಧಕಾರಂವ ಖಾಯತಿ.

೧೦೩೮.

‘‘ಅಬ್ಭತೀತಸಹಾಯಸ್ಸ, ಅತೀತಗತಸತ್ಥುನೋ;

ನತ್ಥಿ ಏತಾದಿಸಂ ಮಿತ್ತಂ, ಯಥಾ ಕಾಯಗತಾ ಸತಿ.

೧೦೩೯.

‘‘ಯೇ ಪುರಾಣಾ ಅತೀತಾ ತೇ, ನವೇಹಿ ನ ಸಮೇತಿ ಮೇ;

ಸ್ವಜ್ಜ ಏಕೋವ ಝಾಯಾಮಿ, ವಸ್ಸುಪೇತೋವ ಪಕ್ಖಿಮಾ.

೧೦೪೦.

‘‘ದಸ್ಸನಾಯ ಅಭಿಕ್ಕನ್ತೇ, ನಾನಾವೇರಜ್ಜಕೇ ಬಹೂ;

ಮಾ ವಾರಯಿತ್ಥ ಸೋತಾರೋ, ಪಸ್ಸನ್ತು ಸಮಯೋ ಮಮಂ.

೧೦೪೧.

‘‘ದಸ್ಸನಾಯ ¶ ಅಭಿಕ್ಕನ್ತೇ, ನಾನಾವೇರಜ್ಜಕೇ ಪುಥು;

ಕರೋತಿ ಸತ್ಥಾ ಓಕಾಸಂ, ನ ನಿವಾರೇತಿ ಚಕ್ಖುಮಾ.

೧೦೪೨.

‘‘ಪಣ್ಣವೀಸತಿವಸ್ಸಾನಿ, ಸೇಖಭೂತಸ್ಸ ಮೇ ಸತೋ;

ನ ಕಾಮಸಞ್ಞಾ ಉಪ್ಪಜ್ಜಿ, ಪಸ್ಸ ಧಮ್ಮಸುಧಮ್ಮತಂ.

೧೦೪೩.

‘‘ಪಣ್ಣವೀಸತಿವಸ್ಸಾನಿ, ಸೇಖಭೂತಸ್ಸ ಮೇ ಸತೋ;

ನ ದೋಸಸಞ್ಞಾ ಉಪ್ಪಜ್ಜಿ, ಪಸ್ಸ ಧಮ್ಮಸುಧಮ್ಮತಂ.

೧೦೪೪.

‘‘ಪಣ್ಣವೀಸತಿವಸ್ಸಾನಿ, ಭಗವನ್ತಂ ಉಪಟ್ಠಹಿಂ;

ಮೇತ್ತೇನ ಕಾಯಕಮ್ಮೇನ, ಛಾಯಾವ ಅನಪಾಯಿನೀ [ಅನುಪಾಯಿನೀ (ಸ್ಯಾ. ಕ.)].

೧೦೪೫.

‘‘ಪಣ್ಣವೀಸತಿವಸ್ಸಾನಿ, ಭಗವನ್ತಂ ಉಪಟ್ಠಹಿಂ;

ಮೇತ್ತೇನ ವಚೀಕಮ್ಮೇನ, ಛಾಯಾವ ಅನಪಾಯಿನೀ.

೧೦೪೬.

‘‘ಪಣ್ಣವೀಸತಿವಸ್ಸಾನಿ, ಭಗವನ್ತಂ ಉಪಟ್ಠಹಿಂ;

ಮೇತ್ತೇನ ಮನೋಕಮ್ಮೇನ, ಛಾಯಾವ ಅನಪಾಯಿನೀ.

೧೦೪೭.

‘‘ಬುದ್ಧಸ್ಸ ¶ ¶ ಚಙ್ಕಮನ್ತಸ್ಸ, ಪಿಟ್ಠಿತೋ ಅನುಚಙ್ಕಮಿಂ;

ಧಮ್ಮೇ ದೇಸಿಯಮಾನಮ್ಹಿ, ಞಾಣಂ ಮೇ ಉದಪಜ್ಜಥ.

೧೦೪೮.

‘‘ಅಹಂ ಸಕರಣೀಯೋಮ್ಹಿ, ಸೇಖೋ ಅಪ್ಪತ್ತಮಾನಸೋ;

ಸತ್ಥು ಚ ಪರಿನಿಬ್ಬಾನಂ, ಯೋ ಅಮ್ಹಂ ಅನುಕಮ್ಪಕೋ.

೧೦೪೯.

‘‘ತದಾಸಿ ¶ ಯಂ ಭಿಂಸನಕಂ, ತದಾಸಿ ಲೋಮಹಂಸನಂ;

ಸಬ್ಬಾಕಾರವರೂಪೇತೇ, ಸಮ್ಬುದ್ಧೇ ಪರಿನಿಬ್ಬುತೇ.

೧೦೫೦.

‘‘ಬಹುಸ್ಸುತೋ ಧಮ್ಮಧರೋ, ಕೋಸಾರಕ್ಖೋ ಮಹೇಸಿನೋ;

ಚಕ್ಖು ಸಬ್ಬಸ್ಸ ಲೋಕಸ್ಸ, ಆನನ್ದೋ ಪರಿನಿಬ್ಬುತೋ.

೧೦೫೧.

‘‘ಬಹುಸ್ಸುತೋ ಧಮ್ಮಧರೋ, ಕೋಸಾರಕ್ಖೋ ಮಹೇಸಿನೋ;

ಚಕ್ಖು ಸಬ್ಬಸ್ಸ ಲೋಕಸ್ಸ, ಅನ್ಧಕಾರೇ ತಮೋನುದೋ.

೧೦೫೨.

‘‘ಗತಿಮನ್ತೋ ಸತಿಮನ್ತೋ, ಧಿತಿಮನ್ತೋ ಚ ಯೋ ಇಸಿ;

ಸದ್ಧಮ್ಮಧಾರಕೋ ಥೇರೋ, ಆನನ್ದೋ ರತನಾಕರೋ.

೧೦೫೩.

‘‘ಪರಿಚಿಣ್ಣೋ ಮಯಾ ಸತ್ಥಾ, ಕತಂ ಬುದ್ಧಸ್ಸ ಸಾಸನಂ;

ಓಹಿತೋ ಗರುಕೋ ಭಾರೋ, ನತ್ಥಿ ದಾನಿ ಪುನಬ್ಭವೋ’’ತಿ.

… ಆನನ್ದೋ ಥೇರೋ….

ತಿಂಸನಿಪಾತೋ ನಿಟ್ಠಿತೋ.

ತತ್ರುದ್ದಾನಂ –

ಫುಸ್ಸೋಪತಿಸ್ಸೋ ಆನನ್ದೋ, ತಯೋತಿಮೇ ಪಕಿತ್ತಿತಾ;

ಗಾಥಾಯೋ ತತ್ಥ ಸಙ್ಖಾತಾ, ಸತಂ ಪಞ್ಚ ಚ ಉತ್ತರೀತಿ;

೧೮. ಚತ್ತಾಲೀಸನಿಪಾತೋ

೧. ಮಹಾಕಸ್ಸಪತ್ಥೇರಗಾಥಾ

೧೦೫೪.

‘‘ನ ¶ ¶ ¶ ¶ ಗಣೇನ ಪುರಕ್ಖತೋ ಚರೇ, ವಿಮನೋ ಹೋತಿ ಸಮಾಧಿ ದುಲ್ಲಭೋ;

ನಾನಾಜನಸಙ್ಗಹೋ ದುಖೋ, ಇತಿ ದಿಸ್ವಾನ ಗಣಂ ನ ರೋಚಯೇ.

೧೦೫೫.

‘‘ನ ಕುಲಾನಿ ಉಪಬ್ಬಜೇ ಮುನಿ, ವಿಮನೋ ಹೋತಿ ಸಮಾಧಿ ದುಲ್ಲಭೋ;

ಸೋ ಉಸ್ಸುಕ್ಕೋ ರಸಾನುಗಿದ್ಧೋ, ಅತ್ಥಂ ರಿಞ್ಚತಿ ಯೋ ಸುಖಾವಹೋ.

೧೦೫೬.

‘‘ಪಙ್ಕೋತಿ ಹಿ ನಂ ಅವೇದಯುಂ, ಯಾಯಂ ವನ್ದನಪೂಜನಾ ಕುಲೇಸು;

ಸುಖುಮಂ ಸಲ್ಲ ದುರುಬ್ಬಹಂ, ಸಕ್ಕಾರೋ ಕಾಪುರಿಸೇನ ದುಜ್ಜಹೋ.

೧೦೫೭.

‘‘ಸೇನಾಸನಮ್ಹಾ ಓರುಯ್ಹ, ನಗರಂ ಪಿಣ್ಡಾಯ ಪಾವಿಸಿಂ;

ಭುಞ್ಜನ್ತಂ ಪುರಿಸಂ ಕುಟ್ಠಿಂ, ಸಕ್ಕಚ್ಚಂ ತಂ ಉಪಟ್ಠಹಿಂ.

೧೦೫೮.

‘‘ಸೋ ಮೇ [ತಂ (ಸೀ. ಕ.)] ಪಕ್ಕೇನ ಹತ್ಥೇನ, ಆಲೋಪಂ ಉಪನಾಮಯಿ;

ಆಲೋಪಂ ಪಕ್ಖಿಪನ್ತಸ್ಸ, ಅಙ್ಗುಲಿ ಚೇತ್ಥ [ಪೇತ್ಥ (ಸೀ. ಕ.)] ಛಿಜ್ಜಥ.

೧೦೫೯.

‘‘ಕುಟ್ಟಮೂಲಞ್ಚ [ಕುಡ್ಡಮೂಲಞ್ಚ (ಸೀ. ಸ್ಯಾ.)] ನಿಸ್ಸಾಯ, ಆಲೋಪಂ ತಂ ಅಭುಞ್ಜಿಸಂ;

ಭುಞ್ಜಮಾನೇ ವಾ ಭುತ್ತೇ ವಾ, ಜೇಗುಚ್ಛಂ ಮೇ ನ ವಿಜ್ಜತಿ.

೧೦೬೦.

‘‘ಉತ್ತಿಟ್ಠಪಿಣ್ಡೋ ಆಹಾರೋ, ಪೂತಿಮುತ್ತಞ್ಚ ಓಸಧಂ;

ಸೇನಾಸನಂ ರುಕ್ಖಮೂಲಂ, ಪಂಸುಕೂಲಞ್ಚ ಚೀವರಂ;

ಯಸ್ಸೇತೇ ಅಭಿಸಮ್ಭುತ್ವಾ [ಅಭಿಭುಞ್ಜತಿ (?)], ಸ ವೇ ಚಾತುದ್ದಿಸೋ ನರೋ.

೧೦೬೧.

‘‘ಯತ್ಥ ಏಕೇ ವಿಹಞ್ಞನ್ತಿ, ಆರುಹನ್ತಾ ಸಿಲುಚ್ಚಯಂ;

ತಸ್ಸ ಬುದ್ಧಸ್ಸ ದಾಯಾದೋ, ಸಮ್ಪಜಾನೋ ಪತಿಸ್ಸತೋ;

ಇದ್ಧಿಬಲೇನುಪತ್ಥದ್ಧೋ ¶ , ಕಸ್ಸಪೋ ಅಭಿರೂಹತಿ.

೧೦೬೨.

‘‘ಪಿಣ್ಡಪಾತಪಟಿಕ್ಕನ್ತೋ ¶ , ಸೇಲಮಾರುಯ್ಹ ಕಸ್ಸಪೋ;

ಝಾಯತಿ ಅನುಪಾದಾನೋ, ಪಹೀನಭಯಭೇರವೋ.

೧೦೬೩.

‘‘ಪಿಣ್ಡಪಾತಪಟಿಕ್ಕನ್ತೋ, ಸೇಲಮಾರುಯ್ಹ ಕಸ್ಸಪೋ;

ಝಾಯತಿ ಅನುಪಾದಾನೋ, ಡಯ್ಹಮಾನೇಸು ನಿಬ್ಬುತೋ.

೧೦೬೪.

‘‘ಪಿಣ್ಡಪಾತಪಟಿಕ್ಕನ್ತೋ, ಸೇಲಮಾರುಯ್ಹ ಕಸ್ಸಪೋ;

ಝಾಯತಿ ಅನುಪಾದಾನೋ, ಕತಕಿಚ್ಚೋ ಅನಾಸವೋ.

೧೦೬೫.

‘‘ಕರೇರಿಮಾಲಾವಿತತಾ ¶ ¶ , ಭೂಮಿಭಾಗಾ ಮನೋರಮಾ;

ಕುಞ್ಜರಾಭಿರುದಾ ರಮ್ಮಾ, ತೇ ಸೇಲಾ ರಮಯನ್ತಿ ಮಂ.

೧೦೬೬.

‘‘ನೀಲಬ್ಭವಣ್ಣಾ ರುಚಿರಾ, ವಾರಿಸೀತಾ ಸುಚಿನ್ಧರಾ;

ಇನ್ದಗೋಪಕಸಞ್ಛನ್ನಾ, ತೇ ಸೇಲಾ ರಮಯನ್ತಿ ಮಂ.

೧೦೬೭.

‘‘ನೀಲಬ್ಭಕೂಟಸದಿಸಾ, ಕೂಟಾಗಾರವರೂಪಮಾ;

ವಾರಣಾಭಿರುದಾ ರಮ್ಮಾ, ತೇ ಸೇಲಾ ರಮಯನ್ತಿ ಮಂ.

೧೦೬೮.

‘‘ಅಭಿವುಟ್ಠಾ ರಮ್ಮತಲಾ, ನಗಾ ಇಸಿಭಿ ಸೇವಿತಾ;

ಅಬ್ಭುನ್ನದಿತಾ ಸಿಖೀಹಿ, ತೇ ಸೇಲಾ ರಮಯನ್ತಿ ಮಂ.

೧೦೬೯.

‘‘ಅಲಂ ಝಾಯಿತುಕಾಮಸ್ಸ, ಪಹಿತತ್ತಸ್ಸ ಮೇ ಸತೋ;

ಅಲಂ ಮೇ ಅತ್ಥಕಾಮಸ್ಸ [ಅತ್ತಕಾಮಸ್ಸ (?)], ಪಹಿತತ್ತಸ್ಸ ಭಿಕ್ಖುನೋ.

೧೦೭೦.

‘‘ಅಲಂ ಮೇ ಫಾಸುಕಾಮಸ್ಸ, ಪಹಿತತ್ತಸ್ಸ ಭಿಕ್ಖುನೋ;

ಅಲಂ ಮೇ ಯೋಗಕಾಮಸ್ಸ, ಪಹಿತತ್ತಸ್ಸ ತಾದಿನೋ.

೧೦೭೧.

‘‘ಉಮಾಪುಪ್ಫೇನ ಸಮಾನಾ, ಗಗನಾವಬ್ಭಛಾದಿತಾ;

ನಾನಾದಿಜಗಣಾಕಿಣ್ಣಾ ¶ , ತೇ ಸೇಲಾ ರಮಯನ್ತಿ ಮಂ.

೧೦೭೨.

‘‘ಅನಾಕಿಣ್ಣಾ ಗಹಟ್ಠೇಹಿ, ಮಿಗಸಙ್ಘನಿಸೇವಿತಾ;

ನಾನಾದಿಜಗಣಾಕಿಣ್ಣಾ, ತೇ ಸೇಲಾ ರಮಯನ್ತಿ ಮಂ.

೧೦೭೩.

‘‘ಅಚ್ಛೋದಿಕಾ ಪುಥುಸಿಲಾ, ಗೋನಙ್ಗುಲಮಿಗಾಯುತಾ;

ಅಮ್ಬುಸೇವಾಲಸಞ್ಛನ್ನಾ, ತೇ ಸೇಲಾ ರಮಯನ್ತಿ ಮಂ.

೧೦೭೪.

‘‘ನ ಪಞ್ಚಙ್ಗಿಕೇನ ತುರಿಯೇನ, ರತಿ ಮೇ ಹೋತಿ ತಾದಿಸೀ;

ಯಥಾ ಏಕಗ್ಗಚಿತ್ತಸ್ಸ, ಸಮ್ಮಾ ಧಮ್ಮಂ ವಿಪಸ್ಸತೋ.

೧೦೭೫.

‘‘ಕಮ್ಮಂ ¶ ಬಹುಕಂ ನ ಕಾರಯೇ, ಪರಿವಜ್ಜೇಯ್ಯ ಜನಂ ನ ಉಯ್ಯಮೇ;

ಉಸ್ಸುಕ್ಕೋ ಸೋ ರಸಾನುಗಿದ್ಧೋ, ಅತ್ಥಂ ರಿಞ್ಚತಿ ಯೋ ಸುಖಾವಹೋ.

೧೦೭೬.

‘‘ಕಮ್ಮಂ ಬಹುಕಂ ನ ಕಾರಯೇ, ಪರಿವಜ್ಜೇಯ್ಯ ಅನತ್ತನೇಯ್ಯಮೇತಂ;

ಕಿಚ್ಛತಿ ಕಾಯೋ ಕಿಲಮತಿ, ದುಕ್ಖಿತೋ ಸೋ ಸಮಥಂ ನ ವಿನ್ದತಿ.

೧೦೭೭.

‘‘ಓಟ್ಠಪ್ಪಹತಮತ್ತೇನ, ಅತ್ತಾನಮ್ಪಿ ನ ಪಸ್ಸತಿ;

ಪತ್ಥದ್ಧಗೀವೋ ಚರತಿ, ಅಹಂ ಸೇಯ್ಯೋತಿ ಮಞ್ಞತಿ.

೧೦೭೮.

‘‘ಅಸೇಯ್ಯೋ ಸೇಯ್ಯಸಮಾನಂ, ಬಾಲೋ ಮಞ್ಞತಿ ಅತ್ತಾನಂ;

ನ ತಂ ವಿಞ್ಞೂ ಪಸಂಸನ್ತಿ, ಪತ್ಥದ್ಧಮಾನಸಂ ನರಂ.

೧೦೭೯.

‘‘ಯೋ ¶ ಚ ಸೇಯ್ಯೋಹಮಸ್ಮೀತಿ, ನಾಹಂ ಸೇಯ್ಯೋತಿ ವಾ ಪನ;

ಹೀನೋ ತಂಸದಿಸೋ [ತೀನೋಹಂ ಸದಿಸೋ (ಸ್ಯಾ.)] ವಾತಿ, ವಿಧಾಸು ನ ವಿಕಮ್ಪತಿ.

೧೦೮೦.

‘‘ಪಞ್ಞವನ್ತಂ ¶ ತಥಾ ತಾದಿಂ, ಸೀಲೇಸು ಸುಸಮಾಹಿತಂ;

ಚೇತೋಸಮಥಮನುತ್ತಂ, ತಞ್ಚೇ ವಿಞ್ಞೂ ಪಸಂಸರೇ.

೧೦೮೧.

‘‘ಯಸ್ಸ ¶ ಸಬ್ರಹ್ಮಚಾರೀಸು, ಗಾರವೋ ನೂಪಲಬ್ಭತಿ;

ಆರಕಾ ಹೋತಿ ಸದ್ಧಮ್ಮಾ, ನಭತೋ ಪುಥವೀ ಯಥಾ.

೧೦೮೨.

‘‘ಯೇಸಞ್ಚ ಹಿರಿ ಓತ್ತಪ್ಪಂ, ಸದಾ ಸಮ್ಮಾ ಉಪಟ್ಠಿತಂ;

ವಿರೂಳ್ಹಬ್ರಹ್ಮಚರಿಯಾ ತೇ, ತೇಸಂ ಖೀಣಾ ಪುನಬ್ಭವಾ.

೧೦೮೩.

‘‘ಉದ್ಧತೋ ಚಪಲೋ ಭಿಕ್ಖು, ಪಂಸುಕೂಲೇನ ಪಾರುತೋ;

ಕಪೀವ ಸೀಹಚಮ್ಮೇನ, ನ ಸೋ ತೇನುಪಸೋಭತಿ.

೧೦೮೪.

‘‘ಅನುದ್ಧತೋ ಅಚಪಲೋ, ನಿಪಕೋ ಸಂವುತಿನ್ದ್ರಿಯೋ;

ಸೋಭತಿ ಪಂಸುಕೂಲೇನ, ಸೀಹೋವ ಗಿರಿಗಬ್ಭರೇ.

೧೦೮೫.

‘‘ಏತೇ ಸಮ್ಬಹುಲಾ ದೇವಾ, ಇದ್ಧಿಮನ್ತೋ ಯಸಸ್ಸಿನೋ;

ದಸದೇವಸಹಸ್ಸಾನಿ, ಸಬ್ಬೇ ತೇ ಬ್ರಹ್ಮಕಾಯಿಕಾ.

೧೦೮೬.

‘‘ಧಮ್ಮಸೇನಾಪತಿಂ ವೀರಂ, ಮಹಾಝಾಯಿಂ ಸಮಾಹಿತಂ;

ಸಾರಿಪುತ್ತಂ ನಮಸ್ಸನ್ತಾ, ತಿಟ್ಠನ್ತಿ ಪಞ್ಜಲೀಕತಾ.

೧೦೮೭.

‘‘‘ನಮೋ ¶ ತೇ ಪುರಿಸಾಜಞ್ಞ, ನಮೋ ತೇ ಪುರಿಸುತ್ತಮ;

ಯಸ್ಸ ತೇ ನಾಭಿಜಾನಾಮ, ಯಮ್ಪಿ ನಿಸ್ಸಾಯ ಝಾಯತಿ [ಝಾಯಸಿ (ಕ. ಅಟ್ಠ.)].

೧೦೮೮.

‘‘‘ಅಚ್ಛೇರಂ ವತ ಬುದ್ಧಾನಂ, ಗಮ್ಭೀರೋ ಗೋಚರೋ ಸಕೋ;

ಯೇ ಮಯಂ ನಾಭಿಜಾನಾಮ, ವಾಲವೇಧಿಸಮಾಗತಾ’.

೧೦೮೯.

‘‘ತಂ ತಥಾ ದೇವಕಾಯೇಹಿ, ಪೂಜಿತಂ ಪೂಜನಾರಹಂ;

ಸಾರಿಪುತ್ತಂ ತದಾ ದಿಸ್ವಾ, ಕಪ್ಪಿನಸ್ಸ ಸಿತಂ ಅಹು.

೧೦೯೦.

‘‘ಯಾವತಾ ಬುದ್ಧಖೇತ್ತಮ್ಹಿ, ಠಪಯಿತ್ವಾ ಮಹಾಮುನಿಂ;

ಧುತಗುಣೇ ವಿಸಿಟ್ಠೋಹಂ, ಸದಿಸೋ ಮೇ ನ ವಿಜ್ಜತಿ.

೧೦೯೧.

‘‘ಪರಿಚಿಣ್ಣೋ ¶ ಮಯಾ ಸತ್ಥಾ, ಕತಂ ಬುದ್ಧಸ್ಸ ಸಾಸನಂ;

ಓಹಿತೋ ಗರುಕೋ ಭಾರೋ, ನತ್ಥಿ ದಾನಿ ಪುನಬ್ಭವೋ.

೧೦೯೨.

‘‘ನ ¶ ಚೀವರೇ ನ ಸಯನೇ, ಭೋಜನೇ ನುಪಲಿಮ್ಪತಿ;

ಗೋತಮೋ ಅನಪ್ಪಮೇಯ್ಯೋ, ಮುಳಾಲಪುಪ್ಫಂ ವಿಮಲಂವ;

ಅಮ್ಬುನಾ ನೇಕ್ಖಮ್ಮನಿನ್ನೋ, ತಿಭವಾಭಿನಿಸ್ಸಟೋ.

೧೦೯೩.

‘‘ಸತಿಪಟ್ಠಾನಗೀವೋ ಸೋ, ಸದ್ಧಾಹತ್ಥೋ ಮಹಾಮುನಿ;

ಪಞ್ಞಾಸೀಸೋ ಮಹಾಞಾಣೀ, ಸದಾ ಚರತಿ ನಿಬ್ಬುತೋ’’ತಿ.

… ಮಹಾಕಸ್ಸಪೋ ಥೇರೋ….

ಚತ್ತಾಲೀಸನಿಪಾತೋ ನಿಟ್ಠಿತೋ.

ತತ್ರುದ್ದಾನಂ –

ಚತ್ತಾಲೀಸನಿಪಾತಮ್ಹಿ, ಮಹಾಕಸ್ಸಪಸವ್ಹಯೋ;

ಏಕೋವ ಥೇರೋ ಗಾಥಾಯೋ, ಚತ್ತಾಸೀಲ ದುವೇಪಿ ಚಾತಿ.

೧೯. ಪಞ್ಞಾಸನಿಪಾತೋ

೧. ತಾಲಪುಟತ್ಥೇರಗಾಥಾ

೧೦೯೪.

‘‘ಕದಾ ¶ ¶ ¶ ನುಹಂ ಪಬ್ಬತಕನ್ದರಾಸು, ಏಕಾಕಿಯೋ ಅದ್ದುತಿಯೋ ವಿಹಸ್ಸಂ;

ಅನಿಚ್ಚತೋ ಸಬ್ಬಭವಂ ವಿಪಸ್ಸಂ, ತಂ ಮೇ ಇದಂ ತಂ ನು ಕದಾ ಭವಿಸ್ಸತಿ.

೧೦೯೫.

‘‘ಕದಾ ನುಹಂ ಭಿನ್ನಪಟನ್ಧರೋ ಮುನಿ, ಕಾಸಾವವತ್ಥೋ ¶ ಅಮಮೋ ನಿರಾಸೋ;

ರಾಗಞ್ಚ ದೋಸಞ್ಚ ತಥೇವ ಮೋಹಂ, ಹನ್ತ್ವಾ ಸುಖೀ ಪವನಗತೋ ವಿಹಸ್ಸಂ.

೧೦೯೬.

‘‘ಕದಾ ಅನಿಚ್ಚಂ ವಧರೋಗನೀಳಂ, ಕಾಯಂ ಇಮಂ ಮಚ್ಚುಜರಾಯುಪದ್ದುತಂ;