📜
ನಮೋ ತಸ್ಸ ಭಗವತೋ ಅರಹತೋ ಸಮ್ಮಾಸಮ್ಬುದ್ಧಸ್ಸ
ಖುದ್ದಕನಿಕಾಯೇ
ಥೇರಾಪದಾನಪಾಳಿ
(ಪಠಮೋ ಭಾಗೋ)
೧. ಬುದ್ಧವಗ್ಗೋ
೧. ಬುದ್ಧಅಪದಾನಂ
ತಥಾಗತಂ ¶ ¶ ¶ ಜೇತವನೇ ವಸನ್ತಂ, ಅಪುಚ್ಛಿ ವೇದೇಹಮುನೀ ನತಙ್ಗೋ;
‘‘ಸಬ್ಬಞ್ಞುಬುದ್ಧಾ ಕಿರ ನಾಮ ಹೋನ್ತಿ, ಭವನ್ತಿ ತೇ ಹೇತುಭಿ ಕೇಹಿ ವೀರ’’.
ತದಾಹ ಸಬ್ಬಞ್ಞುವರೋ ಮಹೇಸೀ, ಆನನ್ದಭದ್ದಂ ಮಧುರಸ್ಸರೇನ;
‘‘ಯೇ ಪುಬ್ಬಬುದ್ಧೇಸು [ಸಬ್ಬಬುದ್ಧೇಸು (ಸ್ಯಾ.)] ಕತಾಧಿಕಾರಾ, ಅಲದ್ಧಮೋಕ್ಖಾ ಜಿನಸಾಸನೇಸು.
‘‘ತೇನೇವ ಸಮ್ಬೋಧಿಮುಖೇನ ಧೀರಾ, ಅಜ್ಝಾಸಯೇನಾಪಿ ಮಹಾಬಲೇನ;
ಪಞ್ಞಾಯ ತೇಜೇನ ಸುತಿಕ್ಖಪಞ್ಞಾ, ಸಬ್ಬಞ್ಞುಭಾವಂ ಅನುಪಾಪುಣನ್ತಿ.
‘‘ಅಹಮ್ಪಿ ¶ ¶ ಪುಬ್ಬಬುದ್ಧೇಸು, ಬುದ್ಧತ್ತಮಭಿಪತ್ಥಯಿಂ,
ಮನಸಾಯೇವ ಹುತ್ವಾನ, ಧಮ್ಮರಾಜಾ ಅಸಙ್ಖಿಯಾ.
‘‘ಅಥ ¶ ¶ ಬುದ್ಧಾಪದಾನಾನಿ, ಸುಣಾಥ ಸುದ್ಧಮಾನಸಾ;
ತಿಂಸಪಾರಮಿಸಮ್ಪುಣ್ಣಾ, ಧಮ್ಮರಾಜಾ ಅಸಙ್ಖಿಯಾ.
‘‘ಸಮ್ಬೋಧಿಂ ಬುದ್ಧಸೇಟ್ಠಾನಂ, ಸಸಙ್ಘೇ ಲೋಕನಾಯಕೇ;
ದಸಙ್ಗುಲೀ ನಮಸ್ಸಿತ್ವಾ, ಸಿರಸಾ ಅಭಿವಾದಯಿಂ [ಅಭಿವಾದಯೇ (ಸ್ಯಾ.)].
‘‘ಯಾವತಾ ಬುದ್ಧಖೇತ್ತೇಸು, ರತನಾ ವಿಜ್ಜನ್ತಿಸಙ್ಖಿಯಾ;
ಆಕಾಸಟ್ಠಾ ಚ ಭೂಮಟ್ಠಾ [ಭುಮ್ಮಟ್ಠಾ (ಸೀ. ಸ್ಯಾ.)], ಮನಸಾ ಸಬ್ಬಮಾಹರಿಂ.
‘‘ತತ್ಥ ರೂಪಿಯಭೂಮಿಯಂ, ಪಾಸಾದಂ ಮಾಪಯಿಂ ಅಹಂ;
ನೇಕಭುಮ್ಮಂ ರತನಮಯಂ, ಉಬ್ಬಿದ್ಧಂ ನಭಮುಗ್ಗತಂ.
‘‘ವಿಚಿತ್ತಥಮ್ಭಂ ಸುಕತಂ, ಸುವಿಭತ್ತಂ ಮಹಾರಹಂ;
ಕನಕಮಯಸಙ್ಘಾಟಂ, ಕೋನ್ತಚ್ಛತ್ತೇಹಿ ಮಣ್ಡಿತಂ.
‘‘ಪಠಮಾ ವೇಳುರಿಯಾ ಭೂಮಿ, ವಿಮಲಬ್ಭಸಮಾ ಸುಭಾ;
ನಳಿನಜಲಜಾಕಿಣ್ಣಾ, ವರಕಞ್ಚನಭೂಮಿಯಾ.
‘‘ಪವಾಳಂಸಾ ಪವಾಳವಣ್ಣಾ, ಕಾಚಿ ಲೋಹಿತಕಾ ಸುಭಾ;
ಇನ್ದಗೋಪಕವಣ್ಣಾಭಾ, ಭೂಮಿ ಓಭಾಸತೀ ದಿಸಾ.
‘‘ಸುವಿಭತ್ತಾ ಘರಮುಖಾ, ನಿಯ್ಯೂಹಾ ಸೀಹಪಞ್ಜರಾ;
ಚತುರೋ ವೇದಿಕಾ ಜಾಲಾ, ಗನ್ಧಾವೇಳಾ ಮನೋರಮಾ.
‘‘ನೀಲಾ ಪೀತಾ ಲೋಹಿತಕಾ, ಓದಾತಾ ಸುದ್ಧಕಾಳಕಾ;
ಕೂಟಾಗಾರವರೂಪೇತಾ, ಸತ್ತರತನಭೂಸಿತಾ.
‘‘ಓಲೋಕಮಯಾ ¶ ಪದುಮಾ, ವಾಳವಿಹಙ್ಗಸೋಭಿತಾ;
ನಕ್ಖತ್ತತಾರಕಾಕಿಣ್ಣಾ, ಚನ್ದಸೂರೇಹಿ [ಚನ್ದಸುರಿಯೇಹಿ (ಸೀ. ಸ್ಯಾ.)] ಮಣ್ಡಿತಾ.
‘‘ಹೇಮಜಾಲೇನ ¶ ಸಞ್ಛನ್ನಾ, ಸೋಣ್ಣಕಿಙ್ಕಿಣಿಕಾಯುತಾ;
ವಾತವೇಗೇನ ಕೂಜನ್ತಿ, ಸೋಣ್ಣಮಾಲಾ ಮನೋರಮಾ.
‘‘ಮಞ್ಜೇಟ್ಠಕಂ ಲೋಹಿತಕಂ, ಪೀತಕಂ ಹರಿಪಿಞ್ಜರಂ;
ನಾನಾರಙ್ಗೇಹಿ ಸಮ್ಪೀತಂ [ಸಂಚಿತ್ತಂ (ಸ್ಯಾ.)], ಉಸ್ಸಿತದ್ಧಜಮಾಲಿನೀ [ಮಾಲಿನಿಂ (ಸೀ.)].
‘‘ನ ನಂ [ನಾನಾ (ಸೀ. ಸ್ಯಾ.)] ಬಹೂನೇಕಸತಾ, ಫಲಿಕಾ ರಜತಾಮಯಾ;
ಮಣಿಮಯಾ ಲೋಹಿತಙ್ಗಾ, ಮಸಾರಗಲ್ಲಮಯಾ ತಥಾ;
ನಾನಾಸಯನವಿಚಿತ್ತಾ, ಸಣ್ಹಕಾಸಿಕಸನ್ಥತಾ.
‘‘ಕಮ್ಪಲಾ ¶ ¶ ದುಕೂಲಾ ಚೀನಾ, ಪಟ್ಟುಣ್ಣಾ ಪಣ್ಡುಪಾವುರಾ;
ವಿವಿಧತ್ಥರಣಂ ಸಬ್ಬಂ, ಮನಸಾ ಪಞ್ಞಪೇಸಹಂ.
‘‘ತಾಸು ತಾಸ್ವೇವ ಭೂಮೀಸು, ರತನಕೂಟಲಙ್ಕತಂ;
ಮಣಿವೇರೋಚನಾ ಉಕ್ಕಾ, ಧಾರಯನ್ತಾ ಸುತಿಟ್ಠರೇ.
‘‘ಸೋಭನ್ತಿ ಏಸಿಕಾ ಥಮ್ಭಾ, ಸುಭಾ ಕಞ್ಚನತೋರಣಾ;
ಜಮ್ಬೋನದಾ ಸಾರಮಯಾ, ಅಥೋ ರಜತಮಯಾಪಿ ಚ.
‘‘ನೇಕಾ ಸನ್ಧೀ ಸುವಿಭತ್ತಾ, ಕವಾಟಗ್ಗಳಚಿತ್ತಿತಾ;
ಉಭತೋ ಪುಣ್ಣಘಟಾನೇಕಾ, ಪದುಮುಪ್ಪಲಸಂಯುತಾ.
‘‘ಅತೀತೇ ಸಬ್ಬಬುದ್ಧೇ ಚ, ಸಸಙ್ಘೇ ಲೋಕನಾಯಕೇ;
ಪಕತಿವಣ್ಣರೂಪೇನ, ನಿಮ್ಮಿನಿತ್ವಾ ಸಸಾವಕೇ.
‘‘ತೇನ ದ್ವಾರೇನ ಪವಿಸಿತ್ವಾ, ಸಬ್ಬೇ ಬುದ್ಧಾ ಸಸಾವಕಾ;
ಸಬ್ಬಸೋಣ್ಣಮಯೇ ಪೀಠೇ, ನಿಸಿನ್ನಾ ಅರಿಯಮಣ್ಡಲಾ.
‘‘ಯೇ ಚ ಏತರಹಿ ಅತ್ಥಿ, ಬುದ್ಧಾ ಲೋಕೇ ಅನುತ್ತರಾ;
ಅತೀತೇ ¶ ವತ್ತಮಾನಾ ಚ, ಭವನಂ ಸಬ್ಬೇ ಸಮಾಹರಿಂ.
‘‘ಪಚ್ಚೇಕಬುದ್ಧೇನೇಕಸತೇ, ಸಯಮ್ಭೂ ಅಪರಾಜಿತೇ;
ಅತೀತೇ ವತ್ತಮಾನೇ ಚ, ಭವನಂ ಸಬ್ಬೇ ಸಮಾಹರಿಂ.
‘‘ಕಪ್ಪರುಕ್ಖಾ ಬಹೂ ಅತ್ಥಿ, ಯೇ ದಿಬ್ಬಾ ಯೇ ಚ ಮಾನುಸಾ;
ಸಬ್ಬಂ ದುಸ್ಸಂ ಸಮಾಹನ್ತಾ, ಅಚ್ಛಾದೇಮಿ ತಿಚೀವರಂ.
‘‘ಖಜ್ಜಂ ಭೋಜ್ಜಂ ಸಾಯನೀಯಂ, ಸಮ್ಪನ್ನಂ ಪಾನಭೋಜನಂ;
ಮಣಿಮಯೇ ಸುಭೇ ಪತ್ತೇ, ಸಂಪೂರೇತ್ವಾ ಅದಾಸಹಂ.
‘‘ದಿಬ್ಬವತ್ಥಸಮಾ ಹುತ್ವಾ, ಮಟ್ಠಾ [ಮಟ್ಟಾ (ಸೀ.)] ಚೀವರಸಂಯುತಾ;
ಮಧುರಾ ಸಕ್ಖರಾ ಚೇವ, ತೇಲಾ ಚ ಮಧುಫಾಣಿತಾ.
‘‘ತಪ್ಪಿತಾ ಪರಮನ್ನೇನ, ಸಬ್ಬೇ ತೇ ಅರಿಯಮಣ್ಡಲಾ;
ರತನಗಬ್ಭಂ ¶ ಪವಿಸಿತ್ವಾ, ಕೇಸರೀವ ಗುಹಾಸಯಾ.
‘‘ಮಹಾರಹಮ್ಹಿ ಸಯನೇ, ಸೀಹಸೇಯ್ಯಮಕಪ್ಪಯುಂ;
ಸಮ್ಪಜಾನಾ ಸಮುಟ್ಠಾಯ, ಸಯನೇ [ಸೇಯ್ಯೇ (ಸ್ಯಾ.)] ಪಲ್ಲಙ್ಕಮಾಭುಜುಂ.
‘‘ಗೋಚರಂ ¶ ಸಬ್ಬಬುದ್ಧಾನಂ, ಝಾನರತಿಸಮಪ್ಪಿತಾ;
ಅಞ್ಞೇ ಧಮ್ಮಾನಿ ದೇಸೇನ್ತಿ, ಅಞ್ಞೇ ಕೀಳನ್ತಿ ಇದ್ಧಿಯಾ.
‘‘ಅಞ್ಞೇ ¶ ಅಭಿಞ್ಞಾ ಅಪ್ಪೇನ್ತಿ, ಅಭಿಞ್ಞಾ ವಸಿಭಾವಿತಾ;
ವಿಕುಬ್ಬನಾ ವಿಕುಬ್ಬನ್ತಿ, ಅಞ್ಞೇನೇಕಸಹಸ್ಸಿಯೋ.
‘‘ಬುದ್ಧಾಪಿ ಬುದ್ಧೇ ಪುಚ್ಛನ್ತಿ, ವಿಸಯಂ ಸಬ್ಬಞ್ಞುಮಾಲಯಂ;
ಗಮ್ಭೀರಂ ನಿಪುಣಂ ಠಾನಂ, ಪಞ್ಞಾಯ ವಿನಿಬುಜ್ಝರೇ.
‘‘ಸಾವಕಾ ಬುದ್ಧೇ ಪುಚ್ಛನ್ತಿ, ಬುದ್ಧಾ ಪುಚ್ಛನ್ತಿ ಸಾವಕೇ;
ಅಞ್ಞಮಞ್ಞಞ್ಚ ¶ ಪುಚ್ಛಿತ್ವಾ [ಪುಚ್ಛನ್ತಿ (ಸೀ. ಸ್ಯಾ.)], ಅಞ್ಞೋಞ್ಞಂ ಬ್ಯಾಕರೋನ್ತಿ ತೇ.
‘‘ಬುದ್ಧಾ ಪಚ್ಚೇಕಬುದ್ಧಾ ಚ, ಸಾವಕಾ ಪರಿಚಾರಕಾ;
ಏವಂ ಸಕಾಯ ರತಿಯಾ, ಪಾಸಾದೇಭಿರಮನ್ತಿ ತೇ.
‘‘ಛತ್ತಾ ತಿಟ್ಠನ್ತು ರತನಾ, ಕಞ್ಚನಾವೇಳಪನ್ತಿಕಾ;
ಮುತ್ತಾಜಾಲಪರಿಕ್ಖಿತ್ತಾ, ಸಬ್ಬೇ ಧಾರೇನ್ತು [ಧಾರೇನ್ತಿ (ಕ.)] ಮತ್ಥಕೇ.
‘‘ಭವನ್ತು ಚೇಳವಿತಾನಾ, ಸೋಣ್ಣತಾರಕಚಿತ್ತಿತಾ;
ವಿಚಿತ್ತಮಲ್ಯವಿತತಾ, ಸಬ್ಬೇ ಧಾರೇನ್ತು ಮತ್ಥಕೇ.
‘‘ವಿತತಾ ಮಲ್ಯದಾಮೇಹಿ, ಗನ್ಧದಾಮೇಹಿ ಸೋಭಿತಾ;
ದುಸ್ಸದಾಮಪರಿಕಿಣ್ಣಾ, ರತನದಾಮಭೂಸಿತಾ.
‘‘ಪುಪ್ಫಾಭಿಕಿಣ್ಣಾ ಸುಚಿತ್ತಾ, ಸುರಭಿಗನ್ಧಭೂಸಿತಾ;
ಗನ್ಧಪಞ್ಚಙ್ಗುಲಿಕತಾ [ಗನ್ಧಪಞ್ಚಙ್ಗುಲಂ ಕತಾ (ಅಟ್ಠ.)], ಹೇಮಚ್ಛದನಛಾದಿತಾ.
‘‘ಚತುದ್ದಿಸಾ ಪೋಕ್ಖರಞ್ಞೋ, ಪದುಮುಪ್ಪಲಸನ್ಥತಾ;
ಸೋವಣ್ಣರೂಪಾ ಖಾಯನ್ತು, ಪದ್ಮಂರೇಣುರಜುಗ್ಗತಾ.
‘‘ಪುಪ್ಫನ್ತು ಪಾದಪಾ ಸಬ್ಬೇ, ಪಾಸಾದಸ್ಸ ಸಮನ್ತತೋ;
ಸಯಞ್ಚ ಪುಪ್ಫಾ ಮುಞ್ಚಿತ್ವಾ, ಗನ್ತ್ವಾ ಭವನಮೋಕಿರುಂ.
‘‘ಸಿಖಿನೋ ತತ್ಥ ನಚ್ಚನ್ತು, ದಿಬ್ಬಹಂಸಾ ಪಕೂಜರೇ;
ಕರವೀಕಾ ಚ ಗಾಯನ್ತು, ದಿಜಸಙ್ಘಾ ಸಮನ್ತತೋ.
‘‘ಭೇರಿಯೋ ಸಬ್ಬಾ ವಜ್ಜನ್ತು, ವೀಣಾ ಸಬ್ಬಾ ರಸನ್ತು [ರವನ್ತು (ಸೀ. ಸ್ಯಾ.)] ತಾ;
ಸಬ್ಬಾ ಸಙ್ಗೀತಿ ವತ್ತನ್ತು, ಪಾಸಾದಸ್ಸ ಸಮನ್ತತೋ.
‘‘ಯಾವತಾ ¶ ¶ ¶ ಬುದ್ಧಖೇತ್ತಮ್ಹಿ, ಚಕ್ಕವಾಳೇ ತತೋ ಪರೇ;
ಮಹನ್ತಾ ಜೋತಿಸಮ್ಪನ್ನಾ, ಅಚ್ಛಿನ್ನಾ ರತನಾಮಯಾ.
‘‘ತಿಟ್ಠನ್ತು ಸೋಣ್ಣಪಲ್ಲಙ್ಕಾ, ದೀಪರುಕ್ಖಾ ಜಲನ್ತು ತೇ;
ಭವನ್ತು ಏಕಪಜ್ಜೋತಾ, ದಸಸಹಸ್ಸಿಪರಮ್ಪರಾ.
‘‘ಗಣಿಕಾ ಲಾಸಿಕಾ ಚೇವ, ನಚ್ಚನ್ತು ಅಚ್ಛರಾಗಣಾ;
ನಾನಾರಙ್ಗಾ ಪದಿಸ್ಸನ್ತು, ಪಾಸಾದಸ್ಸ ಸಮನ್ತತೋ.
‘‘ದುಮಗ್ಗೇ ¶ ಪಬ್ಬತಗ್ಗೇ ವಾ, ಸಿನೇರುಗಿರಿಮುದ್ಧನಿ;
ಉಸ್ಸಾಪೇಮಿ ಧಜಂ ಸಬ್ಬಂ, ವಿಚಿತ್ತಂ ಪಞ್ಚವಣ್ಣಿಕಂ.
‘‘ನರಾ ನಾಗಾ ಚ ಗನ್ಧಬ್ಬಾ, ಸಬ್ಬೇ ದೇವಾ ಉಪೇನ್ತು ತೇ;
ನಮಸ್ಸನ್ತಾ ಪಞ್ಜಲಿಕಾ, ಪಾಸಾದಂ ಪರಿವಾರಯುಂ.
‘‘ಯಂ ಕಿಞ್ಚಿ ಕುಸಲಂ ಕಮ್ಮಂ, ಕತ್ತಬ್ಬಂ ಕಿರಿಯಂ ಮಮ;
ಕಾಯೇನ ವಾಚಾ ಮನಸಾ, ತಿದಸೇ ಸುಕತಂ ಕತಂ.
‘‘ಯೇ ಸತ್ತಾ ಸಞ್ಞಿನೋ ಅತ್ಥಿ, ಯೇ ಚ ಸತ್ತಾ ಅಸಞ್ಞಿನೋ;
ಕತಂ ಪುಞ್ಞಫಲಂ ಮಯ್ಹಂ, ಸಬ್ಬೇ ಭಾಗೀ ಭವನ್ತು ತೇ.
‘‘ಯೇಸಂ ಕತಂ ಸುವಿದಿತಂ, ದಿನ್ನಂ ಪುಞ್ಞಫಲಂ ಮಯಾ;
ಯೇ ಚ ತತ್ಥ [ತಸ್ಮಿಂ (ಸೀ. ಕ.)] ನ ಜಾನನ್ತಿ, ದೇವಾ ಗನ್ತ್ವಾ ನಿವೇದಯುಂ.
‘‘ಸಬ್ಬಲೋಕಮ್ಹಿ [ಸಬ್ಬೇ ಲೋಕಮ್ಹಿ (ಸ್ಯಾ. ಕ.)] ಯೇ ಸತ್ತಾ, ಜೀವನ್ತಾಹಾರಹೇತುಕಾ;
ಮನುಞ್ಞಂ ಭೋಜನಂ ಸಬ್ಬಂ [ಸಬ್ಬೇ (ಸ್ಯಾ.)], ಲಭನ್ತು ಮಮ ಚೇತಸಾ.
‘‘ಮನಸಾ ದಾನಂ ಮಯಾ ದಿನ್ನಂ, ಮನಸಾ ಪಸಾದಮಾವಹಿಂ;
ಪೂಜಿತಾ ಸಬ್ಬಸಮ್ಬುದ್ಧಾ, ಪಚ್ಚೇಕಾ ಜಿನಸಾವಕಾ.
‘‘ತೇನ ¶ ಕಮ್ಮೇನ ಸುಕತೇನ, ಚೇತನಾಪಣಿಧೀಹಿ ಚ;
ಜಹಿತ್ವಾ ಮಾನುಸಂ ದೇಹಂ, ತಾವತಿಂಸಮಗಚ್ಛಹಂ.
‘‘ದುವೇ ಭವೇ ಪಜಾನಾಮಿ, ದೇವತ್ತೇ ಅಥ ಮಾನುಸೇ;
ಅಞ್ಞಂ ಗತಿಂ ನ ಜಾನಾಮಿ, ಮನಸಾ ಪತ್ಥನಾಫಲಂ.
‘‘ದೇವಾನಂ ಅಧಿಕೋ ಹೋಮಿ, ಭವಾಮಿ ಮನುಜಾಧಿಪೋ;
ರೂಪಲಕ್ಖಣಸಮ್ಪನ್ನೋ, ಪಞ್ಞಾಯ ಅಸಮೋ ಭವೇ.
‘‘ಭೋಜನಂ ವಿವಿಧಂ ಸೇಟ್ಠಂ, ರತನಞ್ಚ ಅನಪ್ಪಕಂ;
ವಿವಿಧಾನಿ ಚ ವತ್ಥಾನಿ, ನಭಾ [ನಭಸಾ (ಸ್ಯಾ.)] ಖಿಪ್ಪಂ ಉಪೇನ್ತಿ ಮಂ.
‘‘ಪಥಬ್ಯಾ ¶ ಪಬ್ಬತೇ ಚೇವ, ಆಕಾಸೇ ಉದಕೇ ವನೇ;
ಯಂ ಯಂ ಹತ್ಥಂ ಪಸಾರೇಮಿ, ದಿಬ್ಬಾ ಭಕ್ಖಾ ಉಪೇನ್ತಿ ಮಂ.
‘‘ಪಥಬ್ಯಾ ¶ ಪಬ್ಬತೇ ಚೇವ, ಆಕಾಸೇ ಉದಕೇ ವನೇ;
ಯಂ ಯಂ ಹತ್ಥಂ ಪಸಾರೇಮಿ, ರತನಾ ಸಬ್ಬೇ ಉಪೇನ್ತಿ ಮಂ.
‘‘ಪಥಬ್ಯಾ ¶ ಪಬ್ಬತೇ ಚೇವ, ಆಕಾಸೇ ಉದಕೇ ವನೇ;
ಯಂ ಯಂ ಹತ್ಥಂ ಪಸಾರೇಮಿ, ಸಬ್ಬೇ ಗನ್ಧಾ ಉಪೇನ್ತಿ ಮಂ.
‘‘ಪಥಬ್ಯಾ ಪಬ್ಬತೇ ಚೇವ, ಆಕಾಸೇ ಉದಕೇ ವನೇ;
ಯಂ ಯಂ [ಯತ್ಥ (ಸ್ಯಾ.), ಯಞ್ಞಂ (ಕ.)] ಹತ್ಥಂ ಪಸಾರೇಮಿ, ಸಬ್ಬೇ ಯಾನಾ ಉಪೇನ್ತಿ ಮಂ.
‘‘ಪಥಬ್ಯಾ ಪಬ್ಬತೇ ಚೇವ, ಆಕಾಸೇ ಉದಕೇ ವನೇ;
ಯಂ ಯಂ ಹತ್ಥಂ ಪಸಾರೇಮಿ, ಸಬ್ಬೇ ಮಾಲಾ ಉಪೇನ್ತಿ ಮಂ.
‘‘ಪಥಬ್ಯಾ ಪಬ್ಬತೇ ಚೇವ, ಆಕಾಸೇ ಉದಕೇ ವನೇ;
ಯಂ ಯಂ ಹತ್ಥಂ ಪಸಾರೇಮಿ, ಅಲಙ್ಕಾರಾ ಉಪೇನ್ತಿ ಮಂ.
‘‘ಪಥಬ್ಯಾ ¶ ಪಬ್ಬತೇ ಚೇವ, ಆಕಾಸೇ ಉದಕೇ ವನೇ;
ಯಂ ಯಂ ಹತ್ಥಂ ಪಸಾರೇಮಿ, ಸಬ್ಬಾ ಕಞ್ಞಾ ಉಪೇನ್ತಿ ಮಂ.
‘‘ಪಥಬ್ಯಾ ಪಬ್ಬತೇ ಚೇವ, ಆಕಾಸೇ ಉದಕೇ ವನೇ;
ಯಂ ಯಂ ಹತ್ಥಂ ಪಸಾರೇಮಿ, ಮಧುಸಕ್ಖರಾ ಉಪೇನ್ತಿ ಮಂ.
‘‘ಪಥಬ್ಯಾ ಪಬ್ಬತೇ ಚೇವ, ಆಕಾಸೇ ಉದಕೇ ವನೇ;
ಯಂ ಯಂ ಹತ್ಥಂ ಪಸಾರೇಮಿ, ಸಬ್ಬೇ ಖಜ್ಜಾ ಉಪೇನ್ತಿ ಮಂ.
‘‘ಅಧನೇ ಅದ್ಧಿಕ [ಅದ್ಧಿಕೇ (ಸ್ಯಾ.)] ಜನೇ, ಯಾಚಕೇ ಚ ಪಥಾವಿನೋ;
ದದಾಮಿಹಂ [ದದಾಮಿಹ (ಸೀ.) ದದಾಮಿ ತಂ (ಸ್ಯಾ.)] ದಾನವರಂ, ಸಮ್ಬೋಧಿವರಪತ್ತಿಯಾ.
‘‘ನಾದೇನ್ತೋ ಪಬ್ಬತಂ ಸೇಲಂ, ಗಜ್ಜೇನ್ತೋ ಬಹಲಂ ಗಿರಿಂ;
ಸದೇವಕಂ ಹಾಸಯನ್ತೋ, ಬುದ್ಧೋ ಲೋಕೇ ಭವಾಮಹಂ.
‘‘ದಿಸಾ ದಸವಿಧಾ ಲೋಕೇ, ಯಾಯತೋ ನತ್ಥಿ ಅನ್ತಕಂ;
ತಸ್ಮಿಞ್ಚ ದಿಸಾಭಾಗಮ್ಹಿ, ಬುದ್ಧಖೇತ್ತಾ ಅಸಙ್ಖಿಯಾ.
‘‘ಪಭಾ ಪಕಿತ್ತಿತಾ ಮಯ್ಹಂ, ಯಮಕಾ ರಂಸಿವಾಹನಾ;
ಏತ್ಥನ್ತರೇ ರಂಸಿಜಾಲಂ, ಆಲೋಕೋ ವಿಪುಲೋ ಭವೇ.
‘‘ಏತ್ತಕೇ ¶ ಲೋಕಧಾತುಮ್ಹಿ, ಸಬ್ಬೇ ಪಸ್ಸನ್ತು ಮಂ ಜನಾ;
ಸಬ್ಬೇ ಮಂ ಅನುವತ್ತನ್ತು, ಯಾವ ಬ್ರಹ್ಮನಿವೇಸನಂ [ಸಬ್ಬೇವ ಸುಮನಾ ಹೋನ್ತು, ಸಬ್ಬೇ ಮಂ ಅನುವತ್ತರೇ (ಸೀ. ಸ್ಯಾ.)].
‘‘ವಿಸಿಟ್ಠಮಧುನಾದೇನ, ಅಮತಭೇರಿಮಾಹನಿಂ;
ಏತ್ಥನ್ತರೇ ಜನಾ ಸಬ್ಬೇ, ಸುಣನ್ತು ಮಧುರಂ ಗಿರಂ.
‘‘ಧಮ್ಮಮೇಘೇನ ವಸ್ಸನ್ತೇ, ಸಬ್ಬೇ ಹೋನ್ತು ಅನಾಸವಾ;
ಯೇತ್ಥ ಪಚ್ಛಿಮಕಾ ಸತ್ತಾ, ಸೋತಾಪನ್ನಾ ಭವನ್ತು ತೇ.
‘‘ದತ್ವಾ ¶ ¶ ದಾತಬ್ಬಕಂ ದಾನಂ, ಸೀಲಂ ಪೂರೇತ್ವಾ ಅಸೇಸತೋ;
ನೇಕ್ಖಮ್ಮಪಾರಮಿಂ ಗನ್ತ್ವಾ, ಪತ್ತೋ ಸಮ್ಬೋಧಿಮುತ್ತಮಂ.
‘‘ಪಣ್ಡಿತೇ ¶ ಪರಿಪುಚ್ಛಿತ್ವಾ, ಕತ್ವಾ ವೀರಿಯಮುತ್ತಮಂ;
ಖನ್ತಿಯಾ ಪಾರಮಿಂ ಗನ್ತ್ವಾ, ಪತ್ತೋ ಸಮ್ಬೋಧಿಮುತ್ತಮಂ.
‘‘ಕತ್ವಾ ದಳ್ಹಮಧಿಟ್ಠಾನಂ, ಸಚ್ಚಪಾರಮಿ ಪೂರಿಯ;
ಮೇತ್ತಾಯ ಪಾರಮಿಂ ಗನ್ತ್ವಾ, ಪತ್ತೋ ಸಮ್ಬೋಧಿಮುತ್ತಮಂ.
‘‘ಲಾಭಾಲಾಭೇ ಸುಖೇ ದುಕ್ಖೇ, ಸಮ್ಮಾನೇ ಚಾವಮಾನನೇ [ಸಮ್ಮಾನೇ ಚ ವಿಮಾನನೇ (ಕ.) ಸಮ್ಮಾನನೇ ವಿಮಾನನೇ (ಸ್ಯಾ.)];
ಸಬ್ಬತ್ಥ ಸಮಕೋ ಹುತ್ವಾ, ಪತ್ತೋ ಸಮ್ಬೋಧಿಮುತ್ತಮಂ.
‘‘ಕೋಸಜ್ಜಂ ಭಯತೋ ದಿಸ್ವಾ, ವೀರಿಯಂ ಚಾಪಿ ಖೇಮತೋ;
ಆರದ್ಧವೀರಿಯಾ ಹೋಥ, ಏಸಾ ಬುದ್ಧಾನುಸಾಸನೀ.
‘‘ವಿವಾದಂ ಭಯತೋ ದಿಸ್ವಾ, ಅವಿವಾದಞ್ಚ ಖೇಮತೋ;
ಸಮಗ್ಗಾ ಸಖಿಲಾ ಹೋಥ, ಏಸಾ ಬುದ್ಧಾನುಸಾಸನೀ.
‘‘ಪಮಾದಂ ಭಯತೋ ದಿಸ್ವಾ, ಅಪ್ಪಮಾದಞ್ಚ ಖೇಮತೋ;
ಭಾವೇಥಟ್ಠಙ್ಗಿಕಂ ಮಗ್ಗಂ, ಏಸಾ ಬುದ್ಧಾನುಸಾಸನೀ.
‘‘ಸಮಾಗತಾ ಬಹೂ ಬುದ್ಧಾ, ಅರಹನ್ತಾ [ಅರಹನ್ತೋ (ಸ್ಯಾ.)] ಚ ಸಬ್ಬಸೋ;
ಸಮ್ಬುದ್ಧೇ ಅರಹನ್ತೇ ಚ, ವನ್ದಮಾನಾ ನಮಸ್ಸಥ.
‘‘ಏವಂ ಅಚಿನ್ತಿಯಾ ಬುದ್ಧಾ, ಬುದ್ಧಧಮ್ಮಾ ಅಚಿನ್ತಿಯಾ;
ಅಚಿನ್ತಿಯೇ ಪಸನ್ನಾನಂ, ವಿಪಾಕೋ ಹೋತಿ ಅಚಿನ್ತಿಯೋ’’’.
ಇತ್ಥಂ ಸುದಂ ಭಗವಾ ಅತ್ತನೋ ಬುದ್ಧಚರಿಯಂ ಸಮ್ಭಾವಯಮಾನೋ ಬುದ್ಧಾಪದಾನಿಯಂ [ಬುದ್ಧಚರಿಯಂ (ಸೀ.) ಬುದ್ಧಚರಿತಂ (ಸ್ಯಾ.)] ನಾಮ ಧಮ್ಮಪರಿಯಾಯಂ ಅಭಾಸಿತ್ಥಾತಿ.
ಬುದ್ಧಾಪದಾನಂ ಸಮತ್ತಂ.
೨. ಪಚ್ಚೇಕಬುದ್ಧಅಪದಾನಂ
ಅಥ ¶ ¶ ಪಚ್ಚೇಕಬುದ್ಧಾಪದಾನಂ ಸುಣಾಥ –
‘‘ತಥಾಗತಂ ¶ ಜೇತವನೇ ವಸನ್ತಂ, ಅಪುಚ್ಛಿ ವೇದೇಹಮುನೀ ನತಙ್ಗೋ;
‘ಪಚ್ಚೇಕಬುದ್ಧಾ ಕಿರ ನಾಮ ಹೋನ್ತಿ, ಭವನ್ತಿ ತೇ ಹೇತುಭಿ ಕೇಹಿ ವೀರ’ [ಧೀರ (ಸೀ.) ಧೀರಾ (ಸ್ಯಾ.)].
‘‘ತದಾಹ ¶ ಸಬ್ಬಞ್ಞುವರೋ ಮಹೇಸೀ, ಆನನ್ದಭದ್ದಂ ಮಧುರಸ್ಸರೇನ;
‘ಯೇ ಪುಬ್ಬಬುದ್ಧೇಸು [ಸಬ್ಬಬುದ್ಧೇಸು (ಸ್ಯಾ. ಕ.)] ಕತಾಧಿಕಾರಾ, ಅಲದ್ಧಮೋಕ್ಖಾ ಜಿನಸಾಸನೇಸು.
‘‘‘ತೇನೇವ ಸಂವೇಗಮುಖೇನ ಧೀರಾ, ವಿನಾಪಿ ಬುದ್ಧೇಹಿ ಸುತಿಕ್ಖಪಞ್ಞಾ;
ಆರಮ್ಮಣೇನಾಪಿ ಪರಿತ್ತಕೇನ, ಪಚ್ಚೇಕಬೋಧಿಂ ಅನುಪಾಪುಣನ್ತಿ.
‘‘‘ಸಬ್ಬಮ್ಹಿ ಲೋಕಮ್ಹಿ ಮಮಂ ಠಪೇತ್ವಾ, ಪಚ್ಚೇಕಬುದ್ಧೇಹಿ ಸಮೋವ ನತ್ಥಿ;
ತೇಸಂ ಇಮಂ ವಣ್ಣಪದೇಸಮತ್ತಂ, ವಕ್ಖಾಮಹಂ ಸಾಧು ಮಹಾಮುನೀನಂ.
‘‘‘ಸಯಮೇವ ¶ ಬುದ್ಧಾನಂ ಮಹಾಇಸೀನಂ, ಸಾಧೂನಿ ವಾಕ್ಯಾನಿ ಮಧೂವ [ಮಧುಂವ (ಸೀ.)] ಖುದ್ದಂ;
ಅನುತ್ತರಂ ಭೇಸಜಂ ಪತ್ಥಯನ್ತಾ, ಸುಣಾಥ ಸಬ್ಬೇಸು ಪಸನ್ನಚಿತ್ತಾ.
‘‘‘ಪಚ್ಚೇಕಬುದ್ಧಾನಂ ಸಮಾಗತಾನಂ, ಪರಮ್ಪರಂ ಬ್ಯಾಕರಣಾನಿ ಯಾನಿ;
ಆದೀನವೋ ಯಞ್ಚ ವಿರಾಗವತ್ಥುಂ, ಯಥಾ ಚ ಬೋಧಿಂ ಅನುಪಾಪುಣಿಂಸು.
‘‘‘ಸರಾಗವತ್ಥೂಸು ¶ ¶ ವಿರಾಗಸಞ್ಞೀ, ರತ್ತಮ್ಹಿ ಲೋಕಮ್ಹಿ ವಿರತ್ತಚಿತ್ತಾ;
ಹಿತ್ವಾ ಪಪಞ್ಚೇ ಜಿತಫನ್ದಿತಾನಿ [ವಿದಿಯ ಫನ್ದಿತಾನಿ (ಸೀ.) ಜಿತಬನ್ಧಿತಾನಿ (ಕ.)], ತಥೇವ ಬೋಧಿಂ ಅನುಪಾಪುಣಿಂಸು.
‘‘‘ಸಬ್ಬೇಸು ಭೂತೇಸು ನಿಧಾಯ ದಣ್ಡಂ, ಅವಿಹೇಠಯಂ ಅಞ್ಞತರಮ್ಪಿ ತೇಸಂ;
ಮೇತ್ತೇನ ಚಿತ್ತೇನ ಹಿತಾನುಕಮ್ಪೀ, ಏಕೋ ಚರೇ ಖಗ್ಗವಿಸಾಣಕಪ್ಪೋ.
‘‘‘ಸಬ್ಬೇಸು ಭೂತೇಸು ನಿಧಾಯ ದಣ್ಡಂ, ಅವಿಹೇಠಯಂ ಅಞ್ಞತರಮ್ಪಿ ತೇಸಂ;
ನ ಪುತ್ತಮಿಚ್ಛೇಯ್ಯ ಕುತೋ ಸಹಾಯಂ, ಏಕೋ ಚರೇ ಖಗ್ಗವಿಸಾಣಕಪ್ಪೋ.
‘‘‘ಸಂಸಗ್ಗಜಾತಸ್ಸ ¶ ಭವನ್ತಿ ಸ್ನೇಹಾ, ಸ್ನೇಹನ್ವಯಂ ದುಕ್ಖಮಿದಂ ಪಹೋತಿ;
ಆದೀನವಂ ಸ್ನೇಹಜಂ ಪೇಕ್ಖಮಾನೋ, ಏಕೋ ಚರೇ ಖಗ್ಗವಿಸಾಣಕಪ್ಪೋ.
‘‘‘ಮಿತ್ತೇ ಸುಹಜ್ಜೇ ಅನುಕಮ್ಪಮಾನೋ, ಹಾಪೇತಿ ಅತ್ಥಂ ಪಟಿಬದ್ಧಚಿತ್ತೋ;
ಏತಂ ಭಯಂ ಸನ್ಥವೇ ಪೇಕ್ಖಮಾನೋ, ಏಕೋ ಚರೇ ಖಗ್ಗವಿಸಾಣಕಪ್ಪೋ.
‘‘‘ವಂಸೋ ವಿಸಾಲೋವ ಯಥಾ ವಿಸತ್ತೋ, ಪುತ್ತೇಸು ದಾರೇಸು ಚ ಯಾ ಅಪೇಕ್ಖಾ;
ವಂಸೇ ಕಳೀರೋವ ಅಸಜ್ಜಮಾನೋ, ಏಕೋ ಚರೇ ಖಗ್ಗವಿಸಾಣಕಪ್ಪೋ.
‘‘‘ಮಿಗೋ ಅರಞ್ಞಮ್ಹಿ ಯಥಾ ಅಬದ್ಧೋ, ಯೇನಿಚ್ಛಕಂ ಗಚ್ಛತಿ ಗೋಚರಾಯ;
ವಿಞ್ಞೂ ನರೋ ಸೇರಿತಂ ಪೇಕ್ಖಮಾನೋ, ಏಕೋ ಚರೇ ಖಗ್ಗವಿಸಾಣಕಪ್ಪೋ.
‘‘‘ಆಮನ್ತನಾ ¶ ಹೋತಿ ಸಹಾಯಮಜ್ಝೇ, ವಾಸೇ ಚ [ವಾಸೇ (ಸೀ. ಸ್ಯಾ.) ಸುತ್ತನಿಪಾತೇಪಿ ‘‘ಚ‘‘ಕಾರೋ ನತ್ಥಿ] ಠಾನೇ ಗಮನೇ ಚಾರಿಕಾಯ;
ಅನಭಿಜ್ಝಿತಂ ಸೇರಿತಂ ಪೇಕ್ಖಮಾನೋ, ಏಕೋ ಚರೇ ಖಗ್ಗವಿಸಾಣಕಪ್ಪೋ.
‘‘‘ಖಿಡ್ಡಾ ¶ ರತೀ ಹೋತಿ ಸಹಾಯಮಜ್ಝೇ, ಪುತ್ತೇಸು ಪೇಮಂ ವಿಪುಲಞ್ಚ ಹೋತಿ;
ಪಿಯವಿಪ್ಪಯೋಗಂ ¶ ವಿಜಿಗುಚ್ಛಮಾನೋ, ಏಕೋ ಚರೇ ಖಗ್ಗವಿಸಾಣಕಪ್ಪೋ.
‘‘‘ಚಾತುದ್ದಿಸೋ ¶ ಅಪ್ಪಟಿಘೋ ಚ ಹೋತಿ, ಸನ್ತುಸ್ಸಮಾನೋ ಇತರೀತರೇನ;
ಪರಿಸ್ಸಯಾನಂ ಸಹಿತಾ ಅಛಮ್ಭೀ, ಏಕೋ ಚರೇ ಖಗ್ಗವಿಸಾಣಕಪ್ಪೋ.
‘‘‘ದುಸ್ಸಙ್ಗಹಾ ಪಬ್ಬಜಿತಾಪಿ ಏಕೇ, ಅಥೋ ಗಹಟ್ಠಾ ಘರಮಾವಸನ್ತಾ;
ಅಪ್ಪೋಸ್ಸುಕ್ಕೋ ಪರಪುತ್ತೇಸು ಹುತ್ವಾ, ಏಕೋ ಚರೇ ಖಗ್ಗವಿಸಾಣಕಪ್ಪೋ.
‘‘‘ಓರೋಪಯಿತ್ವಾ ಗಿಹಿಬ್ಯಞ್ಜನಾನಿ, ಸಞ್ಛಿನ್ನಪತ್ತೋ ಯಥಾ ಕೋವಿಳಾರೋ;
ಛೇತ್ವಾನ ವೀರೋ ಗಿಹಿಬನ್ಧನಾನಿ, ಏಕೋ ಚರೇ ಖಗ್ಗವಿಸಾಣಕಪ್ಪೋ.
‘‘‘ಸಚೇ ಲಭೇಥ ನಿಪಕಂ ಸಹಾಯಂ, ಸದ್ಧಿಂ ಚರಂ ಸಾಧುವಿಹಾರಿಧೀರಂ;
ಅಭಿಭುಯ್ಯ ಸಬ್ಬಾನಿ ಪರಿಸ್ಸಯಾನಿ, ಚರೇಯ್ಯ ತೇನತ್ತಮನೋ ಸತೀಮಾ.
‘‘‘ನೋ ¶ ಚೇ ಲಭೇಥ ನಿಪಕಂ ಸಹಾಯಂ, ಸದ್ಧಿಂ ಚರಂ ಸಾಧುವಿಹಾರಿಧೀರಂ;
ರಾಜಾವ ರಟ್ಠಂ ವಿಜಿತಂ ಪಹಾಯ, ಏಕೋ ಚರೇ ಮಾತಙ್ಗರಞ್ಞೇವ ನಾಗೋ.
‘‘‘ಅದ್ಧಾ ¶ ಪಸಂಸಾಮ ಸಹಾಯಸಮ್ಪದಂ, ಸೇಟ್ಠಾ ಸಮಾ ಸೇವಿತಬ್ಬಾ ಸಹಾಯಾ;
ಏತೇ ಅಲದ್ಧಾ ಅನವಜ್ಜಭೋಜೀ, ಏಕೋ ಚರೇ ಖಗ್ಗವಿಸಾಣಕಪ್ಪೋ.
‘‘‘ದಿಸ್ವಾ ಸುವಣ್ಣಸ್ಸ ಪಭಸ್ಸರಾನಿ, ಕಮ್ಮಾರಪುತ್ತೇನ ಸುನಿಟ್ಠಿತಾನಿ;
ಸಙ್ಘಟ್ಟಮಾನಾನಿ ದುವೇ ಭುಜಸ್ಮಿಂ, ಏಕೋ ಚರೇ ಖಗ್ಗವಿಸಾಣಕಪ್ಪೋ.
‘‘‘ಏವಂ ದುತೀಯೇನ ಸಹಾ ಮಮಸ್ಸ, ವಾಚಾಭಿಲಾಪೋ ಅಭಿಸಜ್ಜನಾ ವಾ;
ಏತಂ ಭಯಂ ಆಯತಿಂ ಪೇಕ್ಖಮಾನೋ, ಏಕೋ ಚರೇ ಖಗ್ಗವಿಸಾಣಕಪ್ಪೋ.
‘‘‘ಕಾಮಾ ¶ ಹಿ ಚಿತ್ರಾ ಮಧುರಾ ಮನೋರಮಾ, ವಿರೂಪರೂಪೇನ ಮಥೇನ್ತಿ ಚಿತ್ತಂ;
ಆದೀನವಂ ಕಾಮಗುಣೇಸು ದಿಸ್ವಾ, ಏಕೋ ಚರೇ ಖಗ್ಗವಿಸಾಣಕಪ್ಪೋ.
‘‘‘ಈತೀ ¶ ಚ ಗಣ್ಡೋ ಚ ಉಪದ್ದವೋ ಚ, ರೋಗೋ ಚ ಸಲ್ಲಞ್ಚ ಭಯಞ್ಚ ಮೇತಂ;
ಏತಂ ಭಯಂ ಕಾಮಗುಣೇಸು ದಿಸ್ವಾ, ಏಕೋ ಚರೇ ಖಗ್ಗವಿಸಾಣಕಪ್ಪೋ.
‘‘‘ಸೀತಞ್ಚ ಉಣ್ಹಞ್ಚ ಖುದಂ ಪಿಪಾಸಂ, ವಾತಾತಪೇ ಡಂಸಸರೀಸಪೇ [ಡಂಸಸಿರಿಂಸಪೇ (ಸೀ. ಸ್ಯಾ.)] ಚ;
ಸಬ್ಬಾನಿಪೇತಾನಿ ಅಭಿಬ್ಭವಿತ್ವಾ [ಅಭಿಸಂಭವಿತ್ವಾ (ಸುತ್ತನಿಪಾತೇ)], ಏಕೋ ಚರೇ ಖಗ್ಗವಿಸಾಣಕಪ್ಪೋ.
‘‘‘ನಾಗೋವ ಯೂಥಾನಿ ವಿವಜ್ಜಯಿತ್ವಾ, ಸಞ್ಜಾತಖನ್ಧೋ ಪದುಮೀ ಉಳಾರೋ;
ಯಥಾಭಿರನ್ತಂ ವಿಹರಂ ಅರಞ್ಞೇ, ಏಕೋ ಚರೇ ಖಗ್ಗವಿಸಾಣಕಪ್ಪೋ.
‘‘‘ಅಟ್ಠಾನತಂ ¶ ಸಙ್ಗಣಿಕಾರತಸ್ಸ, ಯಂ ಫಸ್ಸಯೇ [ಫುಸ್ಸಯೇ (ಸ್ಯಾ.)] ಸಾಮಯಿಕಂ ವಿಮುತ್ತಿಂ;
ಆದಿಚ್ಚಬನ್ಧುಸ್ಸ ವಚೋ ನಿಸಮ್ಮ, ಏಕೋ ಚರೇ ಖಗ್ಗವಿಸಾಣಕಪ್ಪೋ.
‘‘‘ದಿಟ್ಠೀವಿಸೂಕಾನಿ ಉಪಾತಿವತ್ತೋ, ಪತ್ತೋ ನಿಯಾಮಂ ಪಟಿಲದ್ಧಮಗ್ಗೋ;
ಉಪ್ಪನ್ನಞಾಣೋಮ್ಹಿ ಅನಞ್ಞನೇಯ್ಯೋ, ಏಕೋ ಚರೇ ಖಗ್ಗವಿಸಾಣಕಪ್ಪೋ.
‘‘‘ನಿಲ್ಲೋಲುಪೋ ¶ ¶ ನಿಕ್ಕುಹೋ ನಿಪ್ಪಿಪಾಸೋ, ನಿಮ್ಮಕ್ಖ [ನಿಮ್ಮಕ್ಖೋ (ಸ್ಯಾ.)] ನಿದ್ಧನ್ತಕಸಾವಮೋಹೋ;
ನಿರಾಸಯೋ [ನಿರಾಸಾಸೋ (ಕ.)] ಸಬ್ಬಲೋಕೇ ಭವಿತ್ವಾ, ಏಕೋ ಚರೇ ಖಗ್ಗವಿಸಾಣಕಪ್ಪೋ.
‘‘‘ಪಾಪಂ ಸಹಾಯಂ ಪರಿವಜ್ಜಯೇಥ, ಅನತ್ಥದಸ್ಸಿಂ ವಿಸಮೇ ನಿವಿಟ್ಠಂ;
ಸಯಂ ನ ಸೇವೇ ಪಸುತಂ ಪಮತ್ತಂ, ಏಕೋ ಚರೇ ಖಗ್ಗವಿಸಾಣಕಪ್ಪೋ.
‘‘‘ಬಹುಸ್ಸುತಂ ಧಮ್ಮಧರಂ ಭಜೇಥ, ಮಿತ್ತಂ ಉಳಾರಂ ಪಟಿಭಾನವನ್ತಂ;
ಅಞ್ಞಾಯ ¶ ಅತ್ಥಾನಿ ವಿನೇಯ್ಯ ಕಙ್ಖಂ, ಏಕೋ ಚರೇ ಖಗ್ಗವಿಸಾಣಕಪ್ಪೋ.
‘‘‘ಖಿಡ್ಡಂ ರತಿಂ ಕಾಮಸುಖಞ್ಚ ಲೋಕೇ, ಅನಲಙ್ಕರಿತ್ವಾ ಅನಪೇಕ್ಖಮಾನೋ;
ವಿಭೂಸಟ್ಠಾನಾ ವಿರತೋ ಸಚ್ಚವಾದೀ, ಏಕೋ ಚರೇ ಖಗ್ಗವಿಸಾಣಕಪ್ಪೋ.
‘‘‘ಪುತ್ತಞ್ಚ ದಾರಂ ಪಿತರಞ್ಚ ಮಾತರಂ, ಧನಾನಿ ಧಞ್ಞಾನಿ ಚ ಬನ್ಧವಾನಿ;
ಹಿತ್ವಾನ ಕಾಮಾನಿ ಯಥೋಧಿಕಾನಿ, ಏಕೋ ಚರೇ ಖಗ್ಗವಿಸಾಣಕಪ್ಪೋ.
‘‘‘ಸಙ್ಗೋ ¶ ¶ ಏಸೋ ಪರಿತ್ತಮೇತ್ಥ ಸೋಖ್ಯಂ, ಅಪ್ಪಸ್ಸಾದೋ ದುಕ್ಖಮೇವೇತ್ಥ ಭಿಯ್ಯೋ;
ಗಳೋ [ಗಾಹೋ (ಸೀ.) ಕಣ್ಡೋ (ಸ್ಯಾ.) ಗಾಳ್ಹೋ (ಕ.)] ಏಸೋ ಇತಿ ಞತ್ವಾ ಮತಿಮಾ, ಏಕೋ ಚರೇ ಖಗ್ಗವಿಸಾಣಕಪ್ಪೋ.
‘‘‘ಸನ್ದಾಲಯಿತ್ವಾನ ಸಂಯೋಜನಾನಿ, ಜಾಲಂವ ಭೇತ್ವಾ ಸಲಿಲಮ್ಬುಚಾರೀ;
ಅಗ್ಗೀವ ದಡ್ಢಂ ಅನಿವತ್ತಮಾನೋ, ಏಕೋ ಚರೇ ಖಗ್ಗವಿಸಾಣಕಪ್ಪೋ.
‘‘‘ಓಕ್ಖಿತ್ತಚಕ್ಖೂ ನ ಚ ಪಾದಲೋಲೋ, ಗುತ್ತಿನ್ದ್ರಿಯೋ ರಕ್ಖಿತಮಾನಸಾನೋ;
ಅನವಸ್ಸುತೋ ಅಪರಿಡಯ್ಹಮಾನೋ, ಏಕೋ ಚರೇ ಖಗ್ಗವಿಸಾಣಕಪ್ಪೋ.
‘‘‘ಓಹಾರಯಿತ್ವಾ ಗಿಹಿಬ್ಯಞ್ಜನಾನಿ, ಸಞ್ಛನ್ನಪತ್ತೋ ಯಥಾ ಪಾರಿಛತ್ತೋ;
ಕಾಸಾಯವತ್ಥೋ ಅಭಿನಿಕ್ಖಮಿತ್ವಾ, ಏಕೋ ಚರೇ ಖಗ್ಗವಿಸಾಣಕಪ್ಪೋ.
‘‘‘ರಸೇಸು ಗೇಧಂ ಅಕರಂ ಅಲೋಲೋ, ಅನಞ್ಞಪೋಸೀ ಸಪದಾನಚಾರೀ;
ಕುಲೇ ಕುಲೇ ಅಪ್ಪಟಿಬದ್ಧಚಿತ್ತೋ, ಏಕೋ ಚರೇ ಖಗ್ಗವಿಸಾಣಕಪ್ಪೋ.
‘‘‘ಪಹಾಯ ¶ ಪಞ್ಚಾವರಣಾನಿ ಚೇತಸೋ, ಉಪಕ್ಕಿಲೇಸೇ ಬ್ಯಪನುಜ್ಜ ಸಬ್ಬೇ;
ಅನಿಸ್ಸಿತೋ ಛೇಜ್ಜ ಸಿನೇಹದೋಸಂ, ಏಕೋ ಚರೇ ಖಗ್ಗವಿಸಾಣಕಪ್ಪೋ.
‘‘‘ವಿಪಿಟ್ಠಿಕತ್ವಾನ ¶ ಸುಖಞ್ಚ ದುಕ್ಖಂ, ಪುಬ್ಬೇವ ಸೋಮನಸ್ಸದೋಮನಸ್ಸಂ;
ಲದ್ಧಾನುಪೇಕ್ಖಂ ಸಮಥಂ ವಿಸುದ್ಧಂ, ಏಕೋ ಚರೇ ಖಗ್ಗವಿಸಾಣಕಪ್ಪೋ.
‘‘‘ಆರದ್ಧವೀರಿಯೋ ¶ ಪರಮತ್ಥಪತ್ತಿಯಾ, ಅಲೀನಚಿತ್ತೋ ಅಕುಸೀತವುತ್ತಿ;
ದಳ್ಹನಿಕ್ಕಮೋ ಥಾಮಬಲೂಪಪನ್ನೋ, ಏಕೋ ಚರೇ ಖಗ್ಗವಿಸಾಣಕಪ್ಪೋ.
‘‘‘ಪಟಿಸಲ್ಲಾನಂ ಝಾನಮರಿಞ್ಚಮಾನೋ, ಧಮ್ಮೇಸು ನಿಚ್ಚಂ ಅನುಧಮ್ಮಚಾರೀ;
ಆದೀನವಂ ಸಮ್ಮಸಿತಾ ಭವೇಸು, ಏಕೋ ಚರೇ ಖಗ್ಗವಿಸಾಣಕಪ್ಪೋ.
‘‘‘ತಣ್ಹಕ್ಖಯಂ ¶ ಪತ್ಥಯಮಪ್ಪಮತ್ತೋ, ಅನೇಳಮೂಗೋ ಸುತವಾ ಸತೀಮಾ;
ಸಙ್ಖಾತಧಮ್ಮೋ ನಿಯತೋ ಪಧಾನವಾ, ಏಕೋ ಚರೇ ಖಗ್ಗವಿಸಾಣಕಪ್ಪೋ.
‘‘‘ಸೀಹೋವ ¶ ಸದ್ದೇಸು ಅಸನ್ತಸನ್ತೋ, ವಾತೋವ ಜಾಲಮ್ಹಿ ಅಸಜ್ಜಮಾನೋ;
ಪದುಮಂವ ತೋಯೇನ ಅಲಿಮ್ಪಮಾನೋ, ಏಕೋ ಚರೇ ಖಗ್ಗವಿಸಾಣಕಪ್ಪೋ.
‘‘‘ಸೀಹೋ ಯಥಾ ದಾಠಬಲೀ ಪಸಯ್ಹ, ರಾಜಾ ಮಿಗಾನಂ ಅಭಿಭುಯ್ಯ ಚಾರೀ;
ಸೇವೇಥ ಪನ್ತಾನಿ ಸೇನಾಸನಾನಿ, ಏಕೋ ಚರೇ ಖಗ್ಗವಿಸಾಣಕಪ್ಪೋ.
‘‘‘ಮೇತ್ತಂ ಉಪೇಕ್ಖಂ ಕರುಣಂ ವಿಮುತ್ತಿಂ, ಆಸೇವಮಾನೋ ಮುದಿತಞ್ಚ ಕಾಲೇ;
ಸಬ್ಬೇನ ಲೋಕೇನ ಅವಿರುಜ್ಝಮಾನೋ, ಏಕೋ ಚರೇ ಖಗ್ಗವಿಸಾಣಕಪ್ಪೋ.
‘‘‘ರಾಗಞ್ಚ ದೋಸಞ್ಚ ಪಹಾಯ ಮೋಹಂ, ಸನ್ದಾಲಯಿತ್ವಾನ ಸಂಯೋಜನಾನಿ;
ಅಸನ್ತಸಂ ಜೀವಿತಸಙ್ಖಯಮ್ಹಿ, ಏಕೋ ಚರೇ ಖಗ್ಗವಿಸಾಣಕಪ್ಪೋ.
‘‘‘ಭಜನ್ತಿ ¶ ¶ ಸೇವನ್ತಿ ಚ ಕಾರಣತ್ಥಾ, ನಿಕ್ಕಾರಣಾ ದುಲ್ಲಭಾ ಅಜ್ಜ ಮಿತ್ತಾ;
ಅತ್ತತ್ಥಪಞ್ಞಾ ಅಸುಚೀಮನುಸ್ಸಾ, ಏಕೋ ಚರೇ ಖಗ್ಗವಿಸಾಣಕಪ್ಪೋ.
‘‘‘ವಿಸುದ್ಧಸೀಲಾ ¶ ಸುವಿಸುದ್ಧಪಞ್ಞಾ, ಸಮಾಹಿತಾ ಜಾಗರಿಯಾನುಯುತ್ತಾ;
ವಿಪಸ್ಸಕಾ ಧಮ್ಮವಿಸೇಸದಸ್ಸೀ, ಮಗ್ಗಙ್ಗಬೋಜ್ಝಙ್ಗಗತೇ ವಿಜಞ್ಞಾ.
‘‘‘ಸುಞ್ಞಪ್ಪಣಿಧಿಞ್ಚ ತಥಾನಿಮಿತ್ತಂ [ಸುಞ್ಞತಪ್ಪಣೀಹಿತಞ್ಚಾನಿಮಿತ್ತಂ (ಸೀ.)], ಆಸೇವಯಿತ್ವಾ ಜಿನಸಾಸನಮ್ಹಿ;
ಯೇ ಸಾವಕತ್ತಂ ನ ವಜನ್ತಿ ಧೀರಾ, ಭವನ್ತಿ ಪಚ್ಚೇಕಜಿನಾ ಸಯಮ್ಭೂ.
‘‘‘ಮಹನ್ತಧಮ್ಮಾ ಬಹುಧಮ್ಮಕಾಯಾ, ಚಿತ್ತಿಸ್ಸರಾ ಸಬ್ಬದುಕ್ಖೋಘತಿಣ್ಣಾ;
ಉದಗ್ಗಚಿತ್ತಾ ಪರಮತ್ಥದಸ್ಸೀ, ಸೀಹೋಪಮಾ ಖಗ್ಗವಿಸಾಣಕಪ್ಪಾ.
‘‘‘ಸನ್ತಿನ್ದ್ರಿಯಾ ಸನ್ತಮನಾ ಸಮಾಧೀ, ಪಚ್ಚನ್ತಸತ್ತೇಸು ಪತಿಪ್ಪಚಾರಾ [ಪಚ್ಚತ್ತಗಮ್ಭೀರಮತಪ್ಪಚಾರಾ (ಸೀ.)];
ದೀಪಾ ಪರತ್ಥ ಇಧ ವಿಜ್ಜಲನ್ತಾ, ಪಚ್ಚೇಕಬುದ್ಧಾ ಸತತಂ ಹಿತಾಮೇ.
‘‘‘ಪಹೀನಸಬ್ಬಾವರಣಾ ಜನಿನ್ದಾ, ಲೋಕಪ್ಪದೀಪಾ ಘನಕಞ್ಚನಾಭಾ;
ನಿಸ್ಸಂಸಯಂ ಲೋಕಸುದಕ್ಖಿಣೇಯ್ಯಾ, ಪಚ್ಚೇಕಬುದ್ಧಾ ಸತತಪ್ಪಿತಾಮೇ.
‘‘‘ಪಚ್ಚೇಕಬುದ್ಧಾನಂ ¶ ಸುಭಾಸಿತಾನಿ, ಚರನ್ತಿ ಲೋಕಮ್ಹಿ ಸದೇವಕಮ್ಹಿ;
ಸುತ್ವಾ ತಥಾ ಯೇ ನ ಕರೋನ್ತಿ ಬಾಲಾ, ಚರನ್ತಿ ದುಕ್ಖೇಸು ಪುನಪ್ಪುನಂ ತೇ.
‘‘‘ಪಚ್ಚೇಕಬುದ್ಧಾನಂ ¶ ಸುಭಾಸಿತಾನಿ, ಮಧುಂ ಯಥಾ ಖುದ್ದಮವಸ್ಸವನ್ತಂ;
ಸುತ್ವಾ ತಥಾ ಯೇ ಪಟಿಪತ್ತಿಯುತ್ತಾ, ಭವನ್ತಿ ತೇ ಸಚ್ಚದಸಾ ಸಪಞ್ಞಾ’.
‘‘ಪಚ್ಚೇಕಬುದ್ಧೇಹಿ ¶ ಜಿನೇಹಿ ಭಾಸಿತಾ, ಕಥಾ [ಗಾಥಾ (ಸೀ. ಸ್ಯಾ.)] ಉಳಾರಾ ಅಭಿನಿಕ್ಖಮಿತ್ವಾ;
ತಾ ಸಕ್ಯಸೀಹೇನ ನರುತ್ತಮೇನ, ಪಕಾಸಿತಾ ಧಮ್ಮವಿಜಾನನತ್ಥಂ.
‘‘ಲೋಕಾನುಕಮ್ಪಾಯ ¶ ಇಮಾನಿ ತೇಸಂ, ಪಚ್ಚೇಕಬುದ್ಧಾನ ವಿಕುಬ್ಬಿತಾನಿ;
ಸಂವೇಗಸಙ್ಗಮತಿವಡ್ಢನತ್ಥಂ, ಸಯಮ್ಭುಸೀಹೇನ ಪಕಾಸಿತಾನೀ’’ತಿ.
ಪಚ್ಚೇಕಬುದ್ಧಾಪದಾನಂ ಸಮತ್ತಂ.
೩-೧. ಸಾರಿಪುತ್ತತ್ಥೇರಅಪದಾನಂ
ಅಥ ಥೇರಾಪದಾನಂ ಸುಣಾಥ –
‘‘ಹಿಮವನ್ತಸ್ಸ ¶ ¶ ಅವಿದೂರೇ, ಲಮ್ಬಕೋ ನಾಮ ಪಬ್ಬತೋ;
ಅಸ್ಸಮೋ ಸುಕತೋ ಮಯ್ಹಂ, ಪಣ್ಣಸಾಲಾ ಸುಮಾಪಿತಾ.
‘‘ಉತ್ತಾನಕೂಲಾ ನದಿಕಾ, ಸುಪತಿತ್ಥಾ ಮನೋರಮಾ;
ಸುಸುದ್ಧಪುಳಿನಾಕಿಣ್ಣಾ, ಅವಿದೂರೇ ಮಮಸ್ಸಮಂ.
‘‘ಅಸಕ್ಖರಾ ಅಪಬ್ಭಾರಾ, ಸಾದು ಅಪ್ಪಟಿಗನ್ಧಿಕಾ;
ಸನ್ದತೀ ನದಿಕಾ ತತ್ಥ, ಸೋಭಯನ್ತಾ ಮಮಸ್ಸಮಂ.
‘‘ಕುಮ್ಭೀಲಾ ಮಕರಾ ಚೇತ್ಥ, ಸುಸುಮಾರಾ [ಸುಂಸುಮಾರಾ (ಸೀ. ಸ್ಯಾ. )] ಚ ಕಚ್ಛಪಾ;
ಚರನ್ತಿ ನದಿಯಾ ತತ್ಥ, ಸೋಭಯನ್ತಾ ಮಮಸ್ಸಮಂ.
‘‘ಪಾಠೀನಾ ಪಾವುಸಾ ಮಚ್ಛಾ, ಬಲಜಾ [ವಜಲಾ (ಸೀ. ಸ್ಯಾ.) ಜಲಜಾ (ಪೀ.)] ಮುಞ್ಜರೋಹಿತಾ;
ವಗ್ಗಳಾ [ವಗ್ಗುಲಾ (ಸೀ.) ವಗ್ಗುಳಾ (ಸ್ಯಾ.) ಮಗ್ಗುರಾ (ಥೇರಗಾಥಾ)] ಪಪತಾಯನ್ತಾ, ಸೋಭಯನ್ತಿ [ಪಪತಾಯನ್ತಿ, ಸೋಭಯನ್ತಾ (ಕ.)] ಮಮಸ್ಸಮಂ.
‘‘ಉಭೋ ¶ ಕೂಲೇಸು ನದಿಯಾ, ಪುಪ್ಫಿನೋ ಫಲಿನೋ ದುಮಾ;
ಉಭತೋ ಅಭಿಲಮ್ಬನ್ತಾ, ಸೋಭಯನ್ತಿ [ಅಭಿಲಮ್ಬನ್ತಿ ಸೋಭಯನ್ತಾ (ಕ.)] ಮಮಸ್ಸಮಂ.
‘‘ಅಮ್ಬಾ ಸಾಲಾ ಚ ತಿಲಕಾ, ಪಾಟಲೀ ಸಿನ್ದುವಾರಕಾ [ಸಿನ್ದುವಾರಿಕಾ (ಬಹೂಸು)];
ದಿಬ್ಬಗನ್ಧಾ ಸಮ್ಪವನ್ತಿ, ಪುಪ್ಫಿತಾ ಮಮ ಅಸ್ಸಮೇ.
‘‘ಚಮ್ಪಕಾ ಸಳಲಾ ನೀಪಾ [ನಿಮ್ಬಾ (ಕ.)], ನಾಗಪುನ್ನಾಗಕೇತಕಾ;
ದಿಬ್ಬಗನ್ಧಾ ಸಮ್ಪವನ್ತಿ, ಪುಪ್ಫಿತಾ ಮಮ ಅಸ್ಸಮೇ.
‘‘ಅತಿಮುತ್ತಾ ¶ ಅಸೋಕಾ ಚ, ಭಗಿನೀಮಾಲಾ ಚ ಪುಪ್ಫಿತಾ;
ಅಙ್ಕೋಲಾ ಬಿಮ್ಬಿಜಾಲಾ [ಬಿಮ್ಬಜಾಲಾ (ಕ.)] ಚ, ಪುಪ್ಫಿತಾ ಮಮ ಅಸ್ಸಮೇ.
‘‘ಕೇತಕಾ ¶ ಕನ್ದಲಿ [ಕದಲೀ (ಸ್ಯಾ.)] ಚೇವ, ಗೋಧುಕಾ ತಿಣಸೂಲಿಕಾ;
ದಿಬ್ಬಗನ್ಧಂ ಸಮ್ಪವನ್ತಾ, ಸೋಭಯನ್ತಿ ಮಮಸ್ಸಮಂ.
‘‘ಕಣಿಕಾರಾ ¶ ಕಣ್ಣಿಕಾ ಚ, ಅಸನಾ ಅಜ್ಜುನಾ ಬಹೂ;
ದಿಬ್ಬಗನ್ಧಂ ಸಮ್ಪವನ್ತಾ, ಸೋಭಯನ್ತಿ ಮಮಸ್ಸಮಂ.
‘‘ಪುನ್ನಾಗಾ ಗಿರಿಪುನ್ನಾಗಾ, ಕೋವಿಳಾರಾ ಚ ಪುಪ್ಫಿತಾ;
ದಿಬ್ಬಗನ್ಧಂ ಸಮ್ಪವನ್ತಾ, ಸೋಭಯನ್ತಿ ಮಮಸ್ಸಮಂ.
‘‘ಉದ್ಧಾಲಕಾ ಚ ಕುಟಜಾ, ಕದಮ್ಬಾ ವಕುಲಾ ಬಹೂ;
ದಿಬ್ಬಗನ್ಧಂ ಸಮ್ಪವನ್ತಾ, ಸೋಭಯನ್ತಿ ಮಮಸ್ಸಮಂ.
‘‘ಆಳಕಾ ಇಸಿಮುಗ್ಗಾ ಚ, ಕದಲಿಮಾತುಲುಙ್ಗಿಯೋ;
ಗನ್ಧೋದಕೇನ ಸಂವಡ್ಢಾ, ಫಲಾನಿ ಧಾರಯನ್ತಿ ತೇ.
‘‘ಅಞ್ಞೇ ಪುಪ್ಫನ್ತಿ ಪದುಮಾ, ಅಞ್ಞೇ ಜಾಯನ್ತಿ ಕೇಸರೀ;
ಅಞ್ಞೇ ಓಪುಪ್ಫಾ ಪದುಮಾ, ಪುಪ್ಫಿತಾ ತಳಾಕೇ ತದಾ.
‘‘ಗಬ್ಭಂ ಗಣ್ಹನ್ತಿ ಪದುಮಾ, ನಿದ್ಧಾವನ್ತಿ ಮುಲಾಳಿಯೋ;
ಸಿಂಘಾಟಿಪತ್ತಮಾಕಿಣ್ಣಾ, ಸೋಭನ್ತಿ ತಳಾಕೇ ತದಾ.
‘‘ನಯಿತಾ ಅಮ್ಬಗನ್ಧೀ ಚ, ಉತ್ತಲೀ ಬನ್ಧುಜೀವಕಾ;
ದಿಬ್ಬಗನ್ಧಾ ಸಮ್ಪವನ್ತಿ, ಪುಪ್ಫಿತಾ ತಳಾಕೇ ತದಾ.
‘‘ಪಾಠೀನಾ ಪಾವುಸಾ ಮಚ್ಛಾ, ಬಲಜಾ ಮುಞ್ಜರೋಹಿತಾ;
ಸಂಗುಲಾ ಮಗ್ಗುರಾ [ಮಙ್ಗುರಾ (ಸೀ. ಕ.)] ಚೇವ, ವಸನ್ತಿ ತಳಾಕೇ ತದಾ.
‘‘ಕುಮ್ಭೀಲಾ ¶ ¶ ಸುಸುಮಾರಾ ಚ, ತನ್ತಿಗಾಹಾ ಚ ರಕ್ಖಸಾ;
ಓಗುಹಾ [ಓಗಾಹಾ (ಸ್ಯಾ.)] ಅಜಗರಾ ಚ, ವಸನ್ತಿ ತಳಾಕೇ ತದಾ.
‘‘ಪಾರೇವತಾ ರವಿಹಂಸಾ, ಚಕ್ಕವಾಕಾ ನದೀಚರಾ;
ಕೋಕಿಲಾ ಸುಕಸಾಳಿಕಾ, ಉಪಜೀವನ್ತಿ ತಂ ಸರಂ.
‘‘ಕುಕ್ಕುತ್ಥಕಾ ಕುಳೀರಕಾ, ವನೇ ಪೋಕ್ಖರಸಾತಕಾ;
ದಿನ್ದಿಭಾ ಸುವಪೋತಾ ಚ, ಉಪಜೀವನ್ತಿ ತಂ ಸರಂ.
‘‘ಹಂಸಾ ¶ ಕೋಞ್ಚಾ ಮಯೂರಾ ಚ, ಕೋಕಿಲಾ ತಮ್ಬಚೂಳಕಾ [ತಮ್ಬಚೂಳಿಕಾ (ಸೀ.)];
ಪಮ್ಪಕಾ ಜೀವಂಜೀವಾ ಚ, ಉಪಜೀವನ್ತಿ ತಂ ಸರಂ.
‘‘ಕೋಸಿಕಾ ಪೋಟ್ಠಸೀಸಾ ಚ, ಕುರರಾ ಸೇನಕಾ ಬಹೂ;
ಮಹಾಕಾಳಾ ಚ ಸಕುಣಾ, ಉಪಜೀವನ್ತಿ ತಂ ಸರಂ.
‘‘ಪಸದಾ ಚ ವರಾಹಾ ಚ, ಚಮರಾ ಗಣ್ಡಕಾ ಬಹೂ [ವಕಾ ಭೇರಣ್ಡಕಾ ಬಹೂ (ಸೀ. ಸ್ಯಾ.)];
ರೋಹಿಚ್ಚಾ ಸುಕಪೋತಾ [ಸುತ್ತಪೋತಾ (ಸ್ಯಾ.)] ಚ, ಉಪಜೀವನ್ತಿ ತಂ ಸರಂ.
‘‘ಸೀಹಬ್ಯಗ್ಘಾ ¶ ಚ ದೀಪೀ ಚ, ಅಚ್ಛಕೋಕತರಚ್ಛಕಾ;
ತಿಧಾ ಪಭಿನ್ನಮಾತಙ್ಗಾ, ಉಪಜೀವನ್ತಿ ತಂ ಸರಂ.
‘‘ಕಿನ್ನರಾ ವಾನರಾ ಚೇವ, ಅಥೋಪಿ ವನಕಮ್ಮಿಕಾ;
ಚೇತಾ ಚ ಲುದ್ದಕಾ ಚೇವ, ಉಪಜೀವನ್ತಿ ತಂ ಸರಂ.
‘‘ತಿನ್ದುಕಾನಿ ಪಿಯಾಲಾನಿ, ಮಧುಕಾ ಕಾಸುಮಾರಯೋ [ಕಾಸಮಾರಿಯೋ (ಸ್ಯಾ.)];
ಧುವಂ ಫಲಾನಿ ಧಾರೇನ್ತಿ, ಅವಿದೂರೇ ಮಮಸ್ಸಮಂ.
‘‘ಕೋಸಮ್ಬಾ [ಕೋಸುಮ್ಭಾ (ಸೀ. ಸ್ಯಾ.)] ಸಳಲಾ ನಿಮ್ಬಾ [ಸಳಲಾ ನೀಪಾ (ಸೀ. ಸ್ಯಾ.) ಪನಸಾ ಅಮ್ಬಾ (?)], ಸಾದುಫಲಸಮಾಯುತಾ;
ಧುವಂ ಫಲಾನಿ ಧಾರೇನ್ತಿ, ಅವಿದೂರೇ ಮಮಸ್ಸಮಂ.
‘‘ಹರೀತಕಾ ¶ ಆಮಲಕಾ, ಅಮ್ಬಜಮ್ಬುವಿಭೀತಕಾ;
ಕೋಲಾ ಭಲ್ಲಾತಕಾ ಬಿಲ್ಲಾ, ಫಲಾನಿ ಧಾರಯನ್ತಿ ತೇ.
‘‘ಆಲುವಾ ಚ ಕಳಮ್ಬಾ ಚ, ಬಿಳಾಲೀತಕ್ಕಳಾನಿ ಚ;
ಜೀವಕಾ ಸುತಕಾ ಚೇವ, ಬಹುಕಾ ಮಮ ಅಸ್ಸಮೇ.
‘‘ಅಸ್ಸಮಸ್ಸಾವಿದೂರಮ್ಹಿ, ತಳಾಕಾಸುಂ ಸುನಿಮ್ಮಿತಾ;
ಅಚ್ಛೋದಕಾ ಸೀತಜಲಾ, ಸುಪತಿತ್ಥಾ ಮನೋರಮಾ.
‘‘ಪದುಮುಪ್ಪಲಸಞ್ಛನ್ನಾ ¶ , ಪುಣ್ಡರೀಕಸಮಾಯುತಾ;
ಮನ್ದಾಲಕೇಹಿ ಸಞ್ಛನ್ನಾ, ದಿಬ್ಬಗನ್ಧೋ ಪವಾಯತಿ.
‘‘ಏವಂ ಸಬ್ಬಙ್ಗಸಮ್ಪನ್ನೇ, ಪುಪ್ಫಿತೇ ಫಲಿತೇ ವನೇ;
ಸುಕತೇ ಅಸ್ಸಮೇ ರಮ್ಮೇ, ವಿಹರಾಮಿ ಅಹಂ ತದಾ.
‘‘ಸೀಲವಾ ವತಸಮ್ಪನ್ನೋ [ವತ್ತಸಮ್ಪನ್ನೋ (ಸ್ಯಾ.)], ಝಾಯೀ ಝಾನರತೋ ಸದಾ;
ಪಞ್ಚಾಭಿಞ್ಞಾಬಲಪ್ಪತ್ತೋ, ಸುರುಚಿ ನಾಮ ತಾಪಸೋ.
‘‘ಚತುವೀಸಸಹಸ್ಸಾನಿ, ಸಿಸ್ಸಾ ಮಯ್ಹಂ ಉಪಟ್ಠಹು;
ಸಬ್ಬೇವ ಬ್ರಾಹ್ಮಣಾ ಏತೇ, ಜಾತಿಮನ್ತೋ ಯಸಸ್ಸಿನೋ.
‘‘ಲಕ್ಖಣೇ ಇತಿಹಾಸೇ ಚ, ಸನಿಘಣ್ಟುಸಕೇಟುಭೇ;
ಪದಕಾ ವೇಯ್ಯಾಕರಣಾ, ಸಧಮ್ಮೇ ಪಾರಮಿಂ ಗತಾ.
‘‘ಉಪ್ಪಾತೇಸು ¶ ನಿಮಿತ್ತೇಸು, ಲಕ್ಖಣೇಸು ಚ ಕೋವಿದಾ;
ಪಥಬ್ಯಾ ಭೂಮನ್ತಲಿಕ್ಖೇ, ಮಮ ಸಿಸ್ಸಾ ಸುಸಿಕ್ಖಿತಾ.
‘‘ಅಪ್ಪಿಚ್ಛಾ ನಿಪಕಾ ಏತೇ, ಅಪ್ಪಾಹಾರಾ ಅಲೋಲುಪಾ;
ಲಾಭಾಲಾಭೇನ ಸನ್ತುಟ್ಠಾ, ಪರಿವಾರೇನ್ತಿ ಮಂ ಸದಾ.
‘‘ಝಾಯೀ ¶ ¶ ಝಾನರತಾ ಧೀರಾ, ಸನ್ತಚಿತ್ತಾ ಸಮಾಹಿತಾ;
ಆಕಿಞ್ಚಞ್ಞಂ ಪತ್ಥಯನ್ತಾ, ಪರಿವಾರೇನ್ತಿ ಮಂ ಸದಾ.
‘‘ಅಭಿಞ್ಞಾಪಾರಮಿಪ್ಪತ್ತಾ, ಪೇತ್ತಿಕೇ ಗೋಚರೇ ರತಾ;
ಅನ್ತಲಿಕ್ಖಚರಾ ಧೀರಾ, ಪರಿವಾರೇನ್ತಿ ಮಂ ಸದಾ.
‘‘ಸಂವುತಾ ಛಸು ದ್ವಾರೇಸು, ಅನೇಜಾ ರಕ್ಖಿತಿನ್ದ್ರಿಯಾ;
ಅಸಂಸಟ್ಠಾ ಚ ತೇ ಧೀರಾ, ಮಮ ಸಿಸ್ಸಾ ದುರಾಸದಾ.
‘‘ಪಲ್ಲಙ್ಕೇನ ನಿಸಜ್ಜಾಯ, ಠಾನಚಙ್ಕಮನೇನ ಚ;
ವೀತಿನಾಮೇನ್ತಿ ತೇ ರತ್ತಿಂ, ಮಮ ಸಿಸ್ಸಾ ದುರಾಸದಾ.
‘‘ರಜನೀಯೇ ನ ರಜ್ಜನ್ತಿ, ದುಸ್ಸನೀಯೇ ನ ದುಸ್ಸರೇ;
ಮೋಹನೀಯೇ ನ ಮುಯ್ಹನ್ತಿ, ಮಮ ಸಿಸ್ಸಾ ದುರಾಸದಾ.
‘‘ಇದ್ಧಿಂ ವೀಮಂಸಮಾನಾ ತೇ, ವತ್ತನ್ತಿ ನಿಚ್ಚಕಾಲಿಕಂ;
ಪಥವಿಂ [ಪಠವಿಂ (ಸೀ. ಸ್ಯಾ.)] ತೇ ಪಕಮ್ಪೇನ್ತಿ, ಸಾರಮ್ಭೇನ ದುರಾಸದಾ.
‘‘ಕೀಳಮಾನಾ ಚ ತೇ ಸಿಸ್ಸಾ, ಕೀಳನ್ತಿ ಝಾನಕೀಳಿತಂ;
ಜಮ್ಬುತೋ ಫಲಮಾನೇನ್ತಿ, ಮಮ ಸಿಸ್ಸಾ ದುರಾಸದಾ.
‘‘ಅಞ್ಞೇ ¶ ಗಚ್ಛನ್ತಿ ಗೋಯಾನಂ, ಅಞ್ಞೇ ಪುಬ್ಬವಿದೇಹಕಂ [ಪುಬ್ಬವಿದೇಹನಂ (ಸ್ಯಾ. ಕ.)];
ಅಞ್ಞೇ ಚ ಉತ್ತರಕುರುಂ, ಏಸನಾಯ ದುರಾಸದಾ.
‘‘ಪುರತೋ ಪೇಸೇನ್ತಿ ಖಾರಿಂ, ಪಚ್ಛತೋ ಚ ವಜನ್ತಿ ತೇ;
ಚತುವೀಸಸಹಸ್ಸೇಹಿ, ಛಾದಿತಂ ಹೋತಿ ಅಮ್ಬರಂ.
‘‘ಅಗ್ಗಿಪಾಕೀ ಅನಗ್ಗೀ ಚ, ದನ್ತೋದುಕ್ಖಲಿಕಾಪಿ ಚ;
ಅಸ್ಮೇನ ಕೋಟ್ಟಿತಾ ಕೇಚಿ, ಪವತ್ತಫಲಭೋಜನಾ.
‘‘ಉದಕೋರೋಹಣಾ ¶ ಕೇಚಿ, ಸಾಯಂ ಪಾತೋ ಸುಚೀರತಾ;
ತೋಯಾಭಿಸೇಚನಕರಾ, ಮಮ ಸಿಸ್ಸಾ ದುರಾಸದಾ.
‘‘ಪರೂಳ್ಹಕಚ್ಛನಖಲೋಮಾ, ಪಙ್ಕದನ್ತಾ ರಜಸ್ಸಿರಾ;
ಗನ್ಧಿತಾ ಸೀಲಗನ್ಧೇನ, ಮಮ ಸಿಸ್ಸಾ ದುರಾಸದಾ.
‘‘ಪಾತೋವ ¶ ಸನ್ನಿಪತಿತ್ವಾ, ಜಟಿಲಾ ಉಗ್ಗತಾಪನಾ;
ಲಾಭಾಲಾಭಂ ಪಕಿತ್ತೇತ್ವಾ, ಗಚ್ಛನ್ತಿ ಅಮ್ಬರೇ ತದಾ.
‘‘ಏತೇಸಂ ಪಕ್ಕಮನ್ತಾನಂ, ಮಹಾಸದ್ದೋ ಪವತ್ತತಿ;
ಅಜಿನಚಮ್ಮಸದ್ದೇನ, ಮುದಿತಾ ಹೋನ್ತಿ ದೇವತಾ.
‘‘ದಿಸೋದಿಸಂ ¶ ಪಕ್ಕಮನ್ತಿ, ಅನ್ತಲಿಕ್ಖಚರಾ ಇಸೀ;
ಸಕೇ ಬಲೇನುಪತ್ಥದ್ಧಾ, ತೇ ಗಚ್ಛನ್ತಿ ಯದಿಚ್ಛಕಂ.
‘‘ಪಥವೀಕಮ್ಪಕಾ ಏತೇ, ಸಬ್ಬೇವ ನಭಚಾರಿನೋ;
ಉಗ್ಗತೇಜಾ ದುಪ್ಪಸಹಾ, ಸಾಗರೋವ ಅಖೋಭಿಯಾ.
‘‘ಠಾನಚಙ್ಕಮಿನೋ ಕೇಚಿ, ಕೇಚಿ ನೇಸಜ್ಜಿಕಾ ಇಸೀ;
ಪವತ್ತಭೋಜನಾ ಕೇಚಿ, ಮಮ ಸಿಸ್ಸಾ ದುರಾಸದಾ.
‘‘ಮೇತ್ತಾವಿಹಾರಿನೋ ಏತೇ, ಹಿತೇಸೀ ಸಬ್ಬಪಾಣಿನಂ;
ಅನತ್ತುಕ್ಕಂಸಕಾ ಸಬ್ಬೇ, ನ ತೇ ವಮ್ಭೇನ್ತಿ ಕಸ್ಸಚಿ.
‘‘ಸೀಹರಾಜಾವಸಮ್ಭೀತಾ, ಗಜರಾಜಾವ ಥಾಮವಾ;
ದುರಾಸದಾ ಬ್ಯಗ್ಘಾರಿವ, ಆಗಚ್ಛನ್ತಿ ಮಮನ್ತಿಕೇ.
‘‘ವಿಜ್ಜಾಧರಾ ದೇವತಾ ಚ, ನಾಗಗನ್ಧಬ್ಬರಕ್ಖಸಾ;
ಕುಮ್ಭಣ್ಡಾ ದಾನವಾ ಗರುಳಾ, ಉಪಜೀವನ್ತಿ ತಂ ಸರಂ.
‘‘ತೇ ¶ ¶ ಜಟಾಖಾರಿಭರಿತಾ, ಅಜಿನುತ್ತರವಾಸನಾ;
ಅನ್ತಲಿಕ್ಖಚರಾ ಸಬ್ಬೇ, ಉಪಜೀವನ್ತಿ ತಂ ಸರಂ.
‘‘ಸದಾನುಚ್ಛವಿಕಾ [ತದಾನುಚ್ಛವಿಕಾ (ಸ್ಯಾ. ಕ.)] ಏತೇ, ಅಞ್ಞಮಞ್ಞಂ ಸಗಾರವಾ;
ಚತುಬ್ಬೀಸಸಹಸ್ಸಾನಂ, ಖಿಪಿತಸದ್ದೋ ನ ವಿಜ್ಜತಿ.
‘‘ಪಾದೇ ಪಾದಂ ನಿಕ್ಖಿಪನ್ತಾ, ಅಪ್ಪಸದ್ದಾ ಸುಸಂವುತಾ;
ಉಪಸಙ್ಕಮ್ಮ ಸಬ್ಬೇವ [ಸಬ್ಬೇ ತೇ (ಸ್ಯಾ.)], ಸಿರಸಾ ವನ್ದರೇ ಮಮಂ.
‘‘ತೇಹಿ ಸಿಸ್ಸೇಹಿ ಪರಿವುತೋ, ಸನ್ತೇಹಿ ಚ ತಪಸ್ಸಿಭಿ;
ವಸಾಮಿ ಅಸ್ಸಮೇ ತತ್ಥ, ಝಾಯೀ ಝಾನರತೋ ಅಹಂ.
‘‘ಇಸೀನಂ ಸೀಲಗನ್ಧೇನ, ಪುಪ್ಫಗನ್ಧೇನ ಚೂಭಯಂ;
ಫಲೀನಂ ಫಲಗನ್ಧೇನ, ಗನ್ಧಿತೋ ಹೋತಿ ಅಸ್ಸಮೋ.
‘‘ರತ್ತಿನ್ದಿವಂ ನ ಜಾನಾಮಿ, ಅರತಿ ಮೇ ನ ವಿಜ್ಜತಿ;
ಸಕೇ ಸಿಸ್ಸೇ ಓವದನ್ತೋ, ಭಿಯ್ಯೋ ಹಾಸಂ ಲಭಾಮಹಂ.
‘‘ಪುಪ್ಫಾನಂ ಪುಪ್ಫಮಾನಾನಂ, ಫಲಾನಞ್ಚ ವಿಪಚ್ಚತಂ;
ದಿಬ್ಬಗನ್ಧಾ ಪವಾಯನ್ತಿ, ಸೋಭಯನ್ತಾ ಮಮಸ್ಸಮಂ.
‘‘ಸಮಾಧಿಮ್ಹಾ ¶ ವುಟ್ಠಹಿತ್ವಾ, ಆತಾಪೀ ನಿಪಕೋ ಅಹಂ;
ಖಾರಿಭಾರಂ ಗಹೇತ್ವಾನ, ವನಂ ಅಜ್ಝೋಗಹಿಂ ಅಹಂ.
‘‘ಉಪ್ಪಾತೇ ¶ ಸುಪಿನೇ ಚಾಪಿ, ಲಕ್ಖಣೇಸು ಸುಸಿಕ್ಖಿತೋ;
ಪವತ್ತಮಾನಂ [ವತ್ತಮಾನಂ (ಕ.)] ಮನ್ತಪದಂ, ಧಾರಯಾಮಿ ಅಹಂ ತದಾ.
‘‘ಅನೋಮದಸ್ಸೀ ಭಗವಾ, ಲೋಕಜೇಟ್ಠೋ ನರಾಸಭೋ;
ವಿವೇಕಕಾಮೋ ಸಮ್ಬುದ್ಧೋ, ಹಿಮವನ್ತಮುಪಾಗಮಿ.
‘‘ಅಜ್ಝೋಗಾಹೇತ್ವಾ ¶ ಹಿಮವನ್ತಂ, ಅಗ್ಗೋ ಕಾರುಣಿಕೋ ಮುನಿ;
ಪಲ್ಲಙ್ಕಂ ಆಭುಜಿತ್ವಾನ, ನಿಸೀದಿ ಪುರಿಸುತ್ತಮೋ.
‘‘ತಮದ್ದಸಾಹಂ ಸಮ್ಬುದ್ಧಂ, ಸಪ್ಪಭಾಸಂ ಮನೋರಮಂ;
ಇನ್ದೀವರಂವ ಜಲಿತಂ, ಆದಿತ್ತಂವ ಹುತಾಸನಂ.
‘‘ಜಲನ್ತಂ ದೀಪರುಕ್ಖಂವ, ವಿಜ್ಜುತಂ ಗಗಣೇ ಯಥಾ;
ಸುಫುಲ್ಲಂ ಸಾಲರಾಜಂವ, ಅದ್ದಸಂ ಲೋಕನಾಯಕಂ.
‘‘ಅಯಂ ¶ ನಾಗೋ ಮಹಾವೀರೋ, ದುಕ್ಖಸ್ಸನ್ತಕರೋ ಮುನಿ;
ಇಮಂ ದಸ್ಸನಮಾಗಮ್ಮ, ಸಬ್ಬದುಕ್ಖಾ ಪಮುಚ್ಚರೇ.
‘‘ದಿಸ್ವಾನಾಹಂ ದೇವದೇವಂ, ಲಕ್ಖಣಂ ಉಪಧಾರಯಿಂ;
ಬುದ್ಧೋ ನು ಖೋ ನ ವಾ ಬುದ್ಧೋ, ಹನ್ದ ಪಸ್ಸಾಮಿ ಚಕ್ಖುಮಂ.
‘‘ಸಹಸ್ಸಾರಾನಿ ಚಕ್ಕಾನಿ, ದಿಸ್ಸನ್ತಿ ಚರಣುತ್ತಮೇ;
ಲಕ್ಖಣಾನಿಸ್ಸ ದಿಸ್ವಾನ, ನಿಟ್ಠಂ ಗಚ್ಛಿಂ ತಥಾಗತೇ.
‘‘ಸಮ್ಮಜ್ಜನಿಂ ಗಹೇತ್ವಾನ, ಸಮ್ಮಜ್ಜಿತ್ವಾನಹಂ ತದಾ;
ಅಥ ಪುಪ್ಫೇ ಸಮಾನೇತ್ವಾ, ಬುದ್ಧಸೇಟ್ಠಂ ಅಪೂಜಯಿಂ.
‘‘ಪೂಜಯಿತ್ವಾನ ತಂ ಬುದ್ಧಂ, ಓಘತಿಣ್ಣಮನಾಸವಂ;
ಏಕಂಸಂ ಅಜಿನಂ ಕತ್ವಾ, ನಮಸ್ಸಿಂ ಲೋಕನಾಯಕಂ.
‘‘ಯೇನ ಞಾಣೇನ ಸಮ್ಬುದ್ಧೋ, ವಿಹರತಿ [ವಿಹರಿತ್ಥ (ಸೀ.), ವಿಹರೇತಿ (ಕ.)] ಅನಾಸವೋ;
ತಂ ಞಾಣಂ ಕಿತ್ತಯಿಸ್ಸಾಮಿ, ಸುಣಾಥ ಮಮ ಭಾಸತೋ.
‘‘‘ಸಮುದ್ಧರಸಿಮಂ [ಸಮುದ್ಧರಯಿಮಂ (ಸ್ಯಾ.)] ಲೋಕಂ, ಸಯಮ್ಭೂ ಅಮಿತೋದಯ;
ತವ ದಸ್ಸನಮಾಗಮ್ಮ, ಕಙ್ಖಾಸೋತಂ ತರನ್ತಿ ತೇ.
‘‘‘ತುವಂ ¶ ಸತ್ಥಾ ಚ ಕೇತು ಚ, ಧಜೋ ಯೂಪೋ ಚ ಪಾಣಿನಂ;
ಪರಾಯಣೋ [ಪರಾಯನೋ (ಸ್ಯಾ. ಕ.)] ಪತಿಟ್ಠಾ ಚ, ದೀಪೋ ಚ ದ್ವಿಪದುತ್ತಮೋ.
‘‘‘ಸಕ್ಕಾ ಸಮುದ್ದೇ ಉದಕಂ, ಪಮೇತುಂ ಆಳ್ಹಕೇನ ವಾ;
ನ ತ್ವೇವ ತವ ಸಬ್ಬಞ್ಞು, ಞಾಣಂ ಸಕ್ಕಾ ಪಮೇತವೇ.
‘‘‘ಧಾರೇತುಂ ¶ ಪಥವಿಂ ಸಕ್ಕಾ, ಠಪೇತ್ವಾ ತುಲಮಣ್ಡಲೇ;
ನ ತ್ವೇವ ತವ ಸಬ್ಬಞ್ಞು, ಞಾಣಂ ಸಕ್ಕಾ ಧರೇತವೇ.
‘‘‘ಆಕಾಸೋ ¶ ಮಿನಿತುಂ ಸಕ್ಕಾ, ರಜ್ಜುಯಾ ಅಙ್ಗುಲೇನ ವಾ;
ನ ತ್ವೇವ ತವ ಸಬ್ಬಞ್ಞು, ಞಾಣಂ ಸಕ್ಕಾ ಪಮೇತವೇ.
‘‘‘ಮಹಾಸಮುದ್ದೇ ಉದಕಂ, ಪಥವೀ ಚಾಖಿಲಾ ಜಟಂ [ಪಥವಿಂ ಚಾಖಿಲಞ್ಜಹೇ (ಸ್ಯಾ.)];
ಬುದ್ಧಞಾಣಂ ಉಪಾದಾಯ, ಉಪಮಾತೋ ನ ಯುಜ್ಜರೇ.
‘‘‘ಸದೇವಕಸ್ಸ ಲೋಕಸ್ಸ, ಚಿತ್ತಂ ಯೇಸಂ ಪವತ್ತತಿ;
ಅನ್ತೋಜಾಲೀಕತಾ [ಅನ್ತೋಜಾಲಗತಾ (ಪೀ.)] ಏತೇ, ತವ ಞಾಣಮ್ಹಿ ಚಕ್ಖುಮ.
‘‘‘ಯೇನ ¶ ಞಾಣೇನ ಪತ್ತೋಸಿ, ಕೇವಲಂ ಬೋಧಿಮುತ್ತಮಂ;
ತೇನ ಞಾಣೇನ ಸಬ್ಬಞ್ಞು, ಮದ್ದಸೀ ಪರತಿತ್ಥಿಯೇ’.
‘‘ಇಮಾ ಗಾಥಾ ಥವಿತ್ವಾನ, ಸುರುಚಿ ನಾಮ ತಾಪಸೋ;
ಅಜಿನಂ ಪತ್ಥರಿತ್ವಾನ, ಪಥವಿಯಂ ನಿಸೀದಿ ಸೋ.
‘‘ಚುಲ್ಲಾಸೀತಿಸಹಸ್ಸಾನಿ, ಅಜ್ಝೋಗಾಳ್ಹೋ ಮಹಣ್ಣವೇ;
ಅಚ್ಚುಗತೋ ತಾವದೇವ, ಗಿರಿರಾಜಾ ಪವುಚ್ಚತಿ.
‘‘ತಾವ ಅಚ್ಚುಗ್ಗತೋ ನೇರು, ಆಯತೋ ವಿತ್ಥತೋ ಚ ಸೋ;
ಚುಣ್ಣಿತೋ ಅಣುಭೇದೇನ, ಕೋಟಿಸತಸಹಸ್ಸಸೋ [ಸಹಸ್ಸಿಯೋ (ಸ್ಯಾ. ಕ.)].
‘‘ಲಕ್ಖೇ ¶ ಠಪಿಯಮಾನಮ್ಹಿ, ಪರಿಕ್ಖಯಮಗಚ್ಛಥ;
ನ ತ್ವೇವ ತವ ಸಬ್ಬಞ್ಞು, ಞಾಣಂ ಸಕ್ಕಾ ಪಮೇತವೇ.
‘‘ಸುಖುಮಚ್ಛಿಕೇನ ಜಾಲೇನ, ಉದಕಂ ಯೋ ಪರಿಕ್ಖಿಪೇ;
ಯೇ ಕೇಚಿ ಉದಕೇ ಪಾಣಾ, ಅನ್ತೋಜಾಲೀಕತಾ ಸಿಯುಂ.
‘‘ತಥೇವ ಹಿ ಮಹಾವೀರ, ಯೇ ಕೇಚಿ ಪುಥುತಿತ್ಥಿಯಾ;
ದಿಟ್ಠಿಗಹನಪಕ್ಖನ್ದಾ [ಪಕ್ಖನ್ತಾ (ಸೀ. ಸ್ಯಾ.)], ಪರಾಮಾಸೇನ ಮೋಹಿತಾ.
‘‘ತವ ಸುದ್ಧೇನ ಞಾಣೇನ, ಅನಾವರಣದಸ್ಸಿನಾ;
ಅನ್ತೋಜಾಲೀಕತಾ ಏತೇ, ಞಾಣಂ ತೇ ನಾತಿವತ್ತರೇ.
‘‘ಭಗವಾ ತಮ್ಹಿ ಸಮಯೇ, ಅನೋಮದಸ್ಸೀ ಮಹಾಯಸೋ;
ವುಟ್ಠಹಿತ್ವಾ ಸಮಾಧಿಮ್ಹಾ, ದಿಸಂ ಓಲೋಕಯೀ ಜಿನೋ.
‘‘ಅನೋಮದಸ್ಸಿಮುನಿನೋ, ನಿಸಭೋ ನಾಮ ಸಾವಕೋ;
ಪರಿವುತೋ ಸತಸಹಸ್ಸೇಹಿ, ಸನ್ತಚಿತ್ತೇಹಿ ತಾದಿಭಿ.
‘‘ಖೀಣಾಸವೇಹಿ ¶ ಸುದ್ಧೇಹಿ, ಛಳಭಿಞ್ಞೇಹಿ ಝಾಯಿಭಿ;
ಚಿತ್ತಮಞ್ಞಾಯ ಬುದ್ಧಸ್ಸ, ಉಪೇಸಿ ಲೋಕನಾಯಕಂ.
‘‘ಅನ್ತಲಿಕ್ಖೇ ಠಿತಾ ತತ್ಥ, ಪದಕ್ಖಿಣಮಕಂಸು ತೇ;
ನಮಸ್ಸನ್ತಾ ಪಞ್ಜಲಿಕಾ, ಓತರುಂ [ಓರುಹುಂ (ಸ್ಯಾ.)] ಬುದ್ಧಸನ್ತಿಕೇ.
‘‘ಅನೋಮದಸ್ಸೀ ಭಗವಾ, ಲೋಕಜೇಟ್ಠೋ ನರಾಸಭೋ;
ಭಿಕ್ಖುಸಙ್ಘೇ ನಿಸಿದಿತ್ವಾ, ಸಿತಂ ಪಾತುಕರೀ ಜಿನೋ.
‘‘ವರುಣೋ ¶ ನಾಮುಪಟ್ಠಾಕೋ, ಅನೋಮದಸ್ಸಿಸ್ಸ ಸತ್ಥುನೋ;
ಏಕಂಸಂ ಚೀವರಂ ಕತ್ವಾ, ಅಪುಚ್ಛಿ ಲೋಕನಾಯಕಂ.
‘‘‘ಕೋ ¶ ¶ ನು ಖೋ ಭಗವಾ ಹೇತು, ಸಿತಕಮ್ಮಸ್ಸ ಸತ್ಥುನೋ;
ನ ಹಿ ಬುದ್ಧಾ ಅಹೇತೂಹಿ, ಸಿತಂ ಪಾತುಕರೋನ್ತಿ ತೇ’.
‘‘ಅನೋಮದಸ್ಸೀ ಭಗವಾ, ಲೋಕಜೇಟ್ಠೋ ನರಾಸಭೋ;
ಭಿಕ್ಖುಮಜ್ಝೇ ನಿಸೀದಿತ್ವಾ, ಇಮಂ ಗಾಥಂ ಅಭಾಸಥ.
‘‘‘ಯೋ ಮಂ ಪುಪ್ಫೇನ ಪೂಜೇಸಿ, ಞಾಣಞ್ಚಾಪಿ ಅನುತ್ಥವಿ;
ತಮಹಂ ಕಿತ್ತಯಿಸ್ಸಾಮಿ, ಸುಣೋಥ ಮಮ ಭಾಸತೋ.
‘‘‘ಬುದ್ಧಸ್ಸ ಗಿರಮಞ್ಞಾಯ, ಸಬ್ಬೇ ದೇವಾ ಸಮಾಗತಾ;
ಸದ್ಧಮ್ಮಂ ಸೋತುಕಾಮಾ ತೇ, ಸಮ್ಬುದ್ಧಮುಪಸಙ್ಕಮುಂ.
‘‘‘ದಸಸು ಲೋಕಧಾತೂಸು, ದೇವಕಾಯಾ ಮಹಿದ್ಧಿಕಾ;
ಸದ್ಧಮ್ಮಂ ಸೋತುಕಾಮಾ ತೇ, ಸಮ್ಬುದ್ಧಮುಪಸಙ್ಕಮುಂ.
‘‘‘ಹತ್ಥೀ ಅಸ್ಸಾ ರಥಾ ಪತ್ತೀ, ಸೇನಾ ಚ ಚತುರಙ್ಗಿನೀ;
ಪರಿವಾರೇಸ್ಸನ್ತಿಮಂ ನಿಚ್ಚಂ, ಬುದ್ಧಪೂಜಾಯಿದಂ ಫಲಂ.
‘‘‘ಸಟ್ಠಿತೂರಿಯಸಹಸ್ಸಾನಿ, ಭೇರಿಯೋ ಸಮಲಙ್ಕತಾ;
ಉಪಟ್ಠಿಸ್ಸನ್ತಿಮಂ ನಿಚ್ಚಂ, ಬುದ್ಧಪೂಜಾಯಿದಂ ಫಲಂ.
‘‘‘ಸೋಳಸಿತ್ಥಿಸಹಸ್ಸಾನಿ, ನಾರಿಯೋ ಸಮಲಙ್ಕತಾ;
ವಿಚಿತ್ತವತ್ಥಾಭರಣಾ, ಆಮುತ್ತಮಣಿಕುಣ್ಡಲಾ.
‘‘‘ಅಳಾರಪಮ್ಹಾ ಹಸುಲಾ, ಸುಸಞ್ಞಾ ತನುಮಜ್ಝಿಮಾ;
ಪರಿವಾರೇಸ್ಸನ್ತಿಮಂ ನಿಚ್ಚಂ, ಬುದ್ಧಪೂಜಾಯಿದಂ ಫಲಂ.
‘‘‘ಕಪ್ಪಸತಸಹಸ್ಸಾನಿ, ದೇವಲೋಕೇ ರಮಿಸ್ಸತಿ;
ಸಹಸ್ಸಕ್ಖತ್ತುಂ ಚಕ್ಕವತ್ತೀ, ರಾಜಾ ರಟ್ಠೇ ಭವಿಸ್ಸತಿ.
‘‘‘ಸಹಸ್ಸಕ್ಖತ್ತುಂ ¶ ¶ ದೇವಿನ್ದೋ, ದೇವರಜ್ಜಂ ಕರಿಸ್ಸತಿ;
ಪದೇಸರಜ್ಜಂ ವಿಪುಲಂ, ಗಣನಾತೋ ಅಸಙ್ಖಿಯಂ [ಅಸಙ್ಖಯಂ (ಸ್ಯಾ. ಕ.) ಏವಮುಪರಿಪಿ].
‘‘‘ಪಚ್ಛಿಮೇ ಭವಸಮ್ಪತ್ತೇ [ಪಚ್ಛಿಮಭವೇ ಸಮ್ಪತ್ತೇ (ಸೀ.)], ಮನುಸ್ಸತ್ತಂ ಗಮಿಸ್ಸತಿ;
ಬ್ರಾಹ್ಮಣೀ ಸಾರಿಯಾ ನಾಮ, ಧಾರಯಿಸ್ಸತಿ ಕುಚ್ಛಿನಾ.
‘‘‘ಮಾತುಯಾ ¶ ನಾಮಗೋತ್ತೇನ, ಪಞ್ಞಾಯಿಸ್ಸತಿಯಂ ನರೋ;
ಸಾರಿಪುತ್ತೋತಿ ನಾಮೇನ, ತಿಕ್ಖಪಞ್ಞೋ ಭವಿಸ್ಸತಿ.
‘‘‘ಅಸೀತಿಕೋಟೀ ಛಡ್ಡೇತ್ವಾ, ಪಬ್ಬಜಿಸ್ಸತಿಕಿಞ್ಚನೋ;
ಗವೇಸನ್ತೋ ಸನ್ತಿಪದಂ, ಚರಿಸ್ಸತಿ ಮಹಿಂ ಇಮಂ.
‘‘‘ಅಪ್ಪರಿಮೇಯ್ಯೇ ಇತೋ ಕಪ್ಪೇ, ಓಕ್ಕಾಕಕುಲಸಮ್ಭವೋ;
ಗೋತಮೋ ನಾಮ ಗೋತ್ತೇನ, ಸತ್ಥಾ ಲೋಕೇ ಭವಿಸ್ಸತಿ.
‘‘‘ತಸ್ಸ ಧಮ್ಮೇಸು ದಾಯಾದೋ, ಓರಸೋ ಧಮ್ಮನಿಮ್ಮಿತೋ;
ಸಾರಿಪುತ್ತೋತಿ ನಾಮೇನ, ಹೇಸ್ಸತಿ ಅಗ್ಗಸಾವಕೋ.
‘‘‘ಅಯಂ ¶ ಭಾಗೀರಥೀ [ಭಾಗೀರಸೀ (ಸ್ಯಾ. ಕ.)] ಗಙ್ಗಾ, ಹಿಮವನ್ತಾ ಪಭಾವಿತಾ;
ಮಹಾಸಮುದ್ದಮಪ್ಪೇತಿ, ತಪ್ಪಯನ್ತೀ ಮಹೋದಧಿಂ [ಮಹೋದಧೀ (?) ಗಙ್ಗಾದಿಮಹಾನದಿಯೋತಿ ಅತ್ಥೋ].
‘‘‘ತಥೇವಾಯಂ ಸಾರಿಪುತ್ತೋ, ಸಕೇ ತೀಸು ವಿಸಾರದೋ;
ಪಞ್ಞಾಯ ಪಾರಮಿಂ ಗನ್ತ್ವಾ, ತಪ್ಪಯಿಸ್ಸತಿ ಪಾಣಿನೇ [ಪಾಣಿನೋ (ಸೀ. ಸ್ಯಾ.)].
‘‘‘ಹಿಮವನ್ತಮುಪಾದಾಯ, ಸಾಗರಞ್ಚ ಮಹೋದಧಿಂ;
ಏತ್ಥನ್ತರೇ ಯಂ ಪುಲಿನಂ, ಗಣನಾತೋ ಅಸಙ್ಖಿಯಂ.
‘‘‘ತಮ್ಪಿ ಸಕ್ಕಾ ಅಸೇಸೇನ, ಸಙ್ಖಾತುಂ ಗಣನಾ ಯಥಾ;
ನ ತ್ವೇವ ಸಾರಿಪುತ್ತಸ್ಸ, ಪಞ್ಞಾಯನ್ತೋ ಭವಿಸ್ಸತಿ.
‘‘‘ಲಕ್ಖೇ ¶ ಠಪಿಯಮಾನಮ್ಹಿ, ಖೀಯೇ ಗಙ್ಗಾಯ ವಾಲುಕಾ;
ನ ತ್ವೇವ ಸಾರಿಪುತ್ತಸ್ಸ, ಪಞ್ಞಾಯನ್ತೋ ಭವಿಸ್ಸತಿ.
‘‘‘ಮಹಾಸಮುದ್ದೇ ಊಮಿಯೋ, ಗಣನಾತೋ ಅಸಙ್ಖಿಯಾ;
ತಥೇವ ಸಾರಿಪುತ್ತಸ್ಸ, ಪಞ್ಞಾಯನ್ತೋ ನ ಹೇಸ್ಸತಿ.
‘‘‘ಆರಾಧಯಿತ್ವಾ ಸಮ್ಬುದ್ಧಂ, ಗೋತಮಂ ಸಕ್ಯಪುಙ್ಗವಂ;
ಪಞ್ಞಾಯ ಪಾರಮಿಂ ಗನ್ತ್ವಾ, ಹೇಸ್ಸತಿ ಅಗ್ಗಸಾವಕೋ.
‘‘‘ಪವತ್ತಿತಂ ಧಮ್ಮಚಕ್ಕಂ, ಸಕ್ಯಪುತ್ತೇನ ತಾದಿನಾ;
ಅನುವತ್ತೇಸ್ಸತಿ ಸಮ್ಮಾ, ವಸ್ಸೇನ್ತೋ ಧಮ್ಮವುಟ್ಠಿಯೋ.
‘‘‘ಸಬ್ಬಮೇತಂ ¶ ಅಭಿಞ್ಞಾಯ, ಗೋತಮೋ ಸಕ್ಯಪುಙ್ಗವೋ;
ಭಿಕ್ಖುಸಙ್ಘೇ ನಿಸೀದಿತ್ವಾ, ಅಗ್ಗಟ್ಠಾನೇ ಠಪೇಸ್ಸತಿ’.
‘‘ಅಹೋ ¶ ಮೇ ಸುಕತಂ ಕಮ್ಮಂ, ಅನೋಮದಸ್ಸಿಸ್ಸ ಸತ್ಥುನೋ;
ಯಸ್ಸಾಹಂ ಕಾರಂ [ಯಸ್ಸಾಧಿಕಾರಂ (ಸ್ಯಾ.)] ಕತ್ವಾನ, ಸಬ್ಬತ್ಥ ಪಾರಮಿಂ ಗತೋ.
‘‘ಅಪರಿಮೇಯ್ಯೇ ಕತಂ ಕಮ್ಮಂ, ಫಲಂ ದಸ್ಸೇಸಿ ಮೇ ಇಧ;
ಸುಮುತ್ತೋ ಸರವೇಗೋವ, ಕಿಲೇಸೇ ಝಾಪಯಿಂ ಅಹಂ.
‘‘ಅಸಙ್ಖತಂ ಗವೇಸನ್ತೋ, ನಿಬ್ಬಾನಂ ಅಚಲಂ ಪದಂ;
ವಿಚಿನಂ ತಿತ್ಥಿಯೇ ಸಬ್ಬೇ, ಏಸಾಹಂ ಸಂಸರಿಂ ಭವೇ.
‘‘ಯಥಾಪಿ ಬ್ಯಾಧಿತೋ ಪೋಸೋ, ಪರಿಯೇಸೇಯ್ಯ ಓಸಧಂ;
ವಿಚಿನೇಯ್ಯ ವನಂ [ಧನಂ (ಸ್ಯಾ. ಕ.)] ಸಬ್ಬಂ, ಬ್ಯಾಧಿತೋ ಪರಿಮುತ್ತಿಯಾ.
‘‘ಅಸಙ್ಖತಂ ಗವೇಸನ್ತೋ, ನಿಬ್ಬಾನಂ ಅಮತಂ ಪದಂ;
ಅಬ್ಬೋಕಿಣ್ಣಂ [ಅಬ್ಬೋಚ್ಛಿನ್ನಂ (ಅಟ್ಠ.)] ಪಞ್ಚಸತಂ, ಪಬ್ಬಜಿಂ ಇಸಿಪಬ್ಬಜಂ.
‘‘ಜಟಾಭಾರೇನ ¶ ಭರಿತೋ, ಅಜಿನುತ್ತರನಿವಾಸನೋ;
ಅಭಿಞ್ಞಾಪಾರಮಿಂ ಗನ್ತ್ವಾ, ಬ್ರಹ್ಮಲೋಕಂ ಅಗಚ್ಛಿಹಂ.
‘‘ನತ್ಥಿ ¶ ಬಾಹಿರಕೇ ಸುದ್ಧಿ, ಠಪೇತ್ವಾ ಜಿನಸಾಸನಂ;
ಯೇ ಕೇಚಿ ಬುದ್ಧಿಮಾ ಸತ್ತಾ, ಸುಜ್ಝನ್ತಿ ಜಿನಸಾಸನೇ.
‘‘ಅತ್ತಕಾರಮಯಂ [ಅತ್ಥಕಾರಮಯಂ (ಕ.)] ಏತಂ, ನಯಿದಂ ಇತಿಹೀತಿಹಂ;
ಅಸಙ್ಖತಂ ಗವೇಸನ್ತೋ, ಕುತಿತ್ಥೇ [ಕುತಿತ್ಥಂ (ಸೀ. ಸ್ಯಾ.)] ಸಞ್ಚರಿಂ ಅಹಂ.
‘‘ಯಥಾ ಸಾರತ್ಥಿಕೋ ಪೋಸೋ, ಕದಲಿಂ ಛೇತ್ವಾನ ಫಾಲಯೇ;
ನ ತತ್ಥ ಸಾರಂ ವಿನ್ದೇಯ್ಯ, ಸಾರೇನ ರಿತ್ತಕೋ ಹಿ ಸೋ.
‘‘ತಥೇವ ತಿತ್ಥಿಯಾ ಲೋಕೇ, ನಾನಾದಿಟ್ಠೀ ಬಹುಜ್ಜನಾ;
ಅಸಙ್ಖತೇನ ರಿತ್ತಾಸೇ, ಸಾರೇನ ಕದಲೀ ಯಥಾ.
‘‘ಪಚ್ಛಿಮೇ ಭವಸಮ್ಪತ್ತೇ, ಬ್ರಹ್ಮಬನ್ಧು ಅಹೋಸಹಂ;
ಮಹಾಭೋಗಂ ಛಡ್ಡೇತ್ವಾನ, ಪಬ್ಬಜಿಂ ಅನಗಾರಿಯಂ.
ಪಠಮಭಾಣವಾರಂ.
‘‘ಅಜ್ಝಾಯಕೋ ಮನ್ತಧರೋ, ತಿಣ್ಣಂ ವೇದಾನ ಪಾರಗೂ;
ಬ್ರಾಹ್ಮಣೋ ಸಞ್ಚಯೋ [ಸಞ್ಜಯೋ (ಸೀ. ಸ್ಯಾ. ಪೀ.)] ನಾಮ, ತಸ್ಸ ಮೂಲೇ ವಸಾಮಹಂ.
‘‘ಸಾವಕೋ ¶ ತೇ ಮಹಾವೀರ, ಅಸ್ಸಜಿ ನಾಮ ಬ್ರಾಹ್ಮಣೋ;
ದುರಾಸದೋ ಉಗ್ಗತೇಜೋ, ಪಿಣ್ಡಾಯ ಚರತೀ ತದಾ.
‘‘ತಮದ್ದಸಾಸಿಂ ¶ ಸಪ್ಪಞ್ಞಂ, ಮುನಿಂ ಮೋನೇ ಸಮಾಹಿತಂ;
ಸನ್ತಚಿತ್ತಂ ಮಹಾನಾಗಂ, ಸುಫುಲ್ಲಂ ಪದುಮಂ ಯಥಾ.
‘‘ದಿಸ್ವಾ ¶ ಮೇ ಚಿತ್ತಮುಪ್ಪಜ್ಜಿ, ಸುದನ್ತಂ ಸುದ್ಧಮಾನಸಂ;
ಉಸಭಂ ಪವರಂ ವೀರಂ, ಅರಹಾಯಂ ಭವಿಸ್ಸತಿ.
‘‘ಪಾಸಾದಿಕೋ ಇರಿಯತಿ, ಅಭಿರೂಪೋ ಸುಸಂವುತೋ;
ಉತ್ತಮೇ ದಮಥೇ ದನ್ತೋ, ಅಮತದಸ್ಸೀ ಭವಿಸ್ಸತಿ.
‘‘ಯಂನೂನಾಹಂ ಉತ್ತಮತ್ಥಂ, ಪುಚ್ಛೇಯ್ಯಂ ತುಟ್ಠಮಾನಸಂ;
ಸೋ ಮೇ ಪುಟ್ಠೋ ಕಥೇಸ್ಸತಿ, ಪಟಿಪುಚ್ಛಾಮಹಂ ತದಾ.
‘‘ಪಿಣ್ಡಪಾತಂ [ಪಿಣ್ಡಚಾರಂ (ಸ್ಯಾ.)] ಚರನ್ತಸ್ಸ, ಪಚ್ಛತೋ ಅಗಮಾಸಹಂ;
ಓಕಾಸಂ ಪಟಿಮಾನೇನ್ತೋ, ಪುಚ್ಛಿತುಂ ಅಮತಂ ಪದಂ.
‘‘ವೀಥಿನ್ತರೇ ಅನುಪ್ಪತ್ತಂ, ಉಪಗನ್ತ್ವಾನ ಪುಚ್ಛಹಂ;
‘ಕಥಂ ಗೋತ್ತೋಸಿ ತ್ವಂ ವೀರ, ಕಸ್ಸ ಸಿಸ್ಸೋಸಿ ಮಾರಿಸ’.
‘‘ಸೋ ಮೇ ಪುಟ್ಠೋ ವಿಯಾಕಾಸಿ, ಅಸಮ್ಭೀತೋವ ಕೇಸರೀ;
‘ಬುದ್ಧೋ ಲೋಕೇ ಸಮುಪ್ಪನ್ನೋ, ತಸ್ಸ ಸಿಸ್ಸೋಮ್ಹಿ ಆವುಸೋ’.
‘‘‘ಕೀದಿಸಂ ¶ ತೇ ಮಹಾವೀರ, ಅನುಜಾತ ಮಹಾಯಸ;
ಬುದ್ಧಸ್ಸ ಸಾಸನಂ ಧಮ್ಮಂ, ಸಾಧು ಮೇ ಕಥಯಸ್ಸು ಭೋ’.
‘‘ಸೋ ಮೇ ಪುಟ್ಠೋ ಕಥೀ ಸಬ್ಬಂ, ಗಮ್ಭೀರಂ ನಿಪುಣಂ ಪದಂ;
ತಣ್ಹಾಸಲ್ಲಸ್ಸ ಹನ್ತಾರಂ, ಸಬ್ಬದುಕ್ಖಾಪನೂದನಂ.
‘‘‘ಯೇ ಧಮ್ಮಾ ಹೇತುಪ್ಪಭವಾ, ತೇಸಂ ಹೇತುಂ ತಥಾಗತೋ ಆಹ;
ತೇಸಞ್ಚ ಯೋ ನಿರೋಧೋ, ಏವಂ ವಾದೀ ಮಹಾಸಮಣೋ’.
‘‘ಸೋಹಂ ವಿಸ್ಸಜ್ಜಿತೇ ಪಞ್ಹೇ, ಪಠಮಂ ಫಲಮಜ್ಝಗಂ;
ವಿರಜೋ ವಿಮಲೋ ಆಸಿಂ, ಸುತ್ವಾನ ಜಿನಸಾಸನಂ.
‘‘ಸುತ್ವಾನ ¶ ಮುನಿನೋ ವಾಕ್ಯಂ, ಪಸ್ಸಿತ್ವಾ ಧಮ್ಮಮುತ್ತಮಂ;
ಪರಿಯೋಗಾಳ್ಹಸದ್ಧಮ್ಮೋ, ಇಮಂ ಗಾಥಮಭಾಸಹಂ.
‘‘‘ಏಸೇವ ¶ ಧಮ್ಮೋ ಯದಿ ತಾವದೇವ, ಪಚ್ಚಬ್ಯಥಪದಮಸೋಕಂ;
ಅದಿಟ್ಠಂ ಅಬ್ಭತೀತಂ, ಬಹುಕೇಹಿ ಕಪ್ಪನಹುತೇಹಿ’.
‘‘ಸ್ವಾಹಂ ಧಮ್ಮಂ ಗವೇಸನ್ತೋ, ಕುತಿತ್ಥೇ ಸಞ್ಚರಿಂ ಅಹಂ;
ಸೋ ಮೇ ಅತ್ಥೋ ಅನುಪ್ಪತ್ತೋ, ಕಾಲೋ ಮೇ ನಪ್ಪಮಜ್ಜಿತುಂ.
‘‘ತೋಸಿತೋಹಂ ¶ ಅಸ್ಸಜಿನಾ, ಪತ್ವಾನ ಅಚಲಂ ಪದಂ;
ಸಹಾಯಕಂ ಗವೇಸನ್ತೋ, ಅಸ್ಸಮಂ ಅಗಮಾಸಹಂ.
‘‘ದೂರತೋವ ಮಮಂ ದಿಸ್ವಾ, ಸಹಾಯೋ ಮೇ ಸುಸಿಕ್ಖಿತೋ;
ಇರಿಯಾಪಥಸಮ್ಪನ್ನೋ [ಇರಿಯಾಪಥಂ ಮಮಂ ದಿಸ್ವಾ (ಕ.)], ಇದಂ ವಚನಮಬ್ರವಿ.
‘‘‘ಪಸನ್ನಮುಖನೇತ್ತೋಸಿ, ಮುನಿಭಾವೋವ ದಿಸ್ಸತಿ;
ಅಮತಾಧಿಗತೋ ಕಚ್ಚಿ, ನಿಬ್ಬಾನಮಚ್ಚುತಂ ಪದಂ.
‘‘‘ಸುಭಾನುರೂಪೋ ಆಯಾಸಿ, ಆನೇಞ್ಜಕಾರಿತೋ ವಿಯ;
ದನ್ತೋವ ದನ್ತದಮಥೋ [ದನ್ತೋವುತ್ತಮದಮಥೋ (ಸೀ.) ದನ್ತೋವ ದನ್ತ ದಮಥೇ (ಸ್ಯಾ.)], ಉಪಸನ್ತೋಸಿ ಬ್ರಾಹ್ಮಣ.
‘‘‘ಅಮತಂ ಮಯಾಧಿಗತಂ, ಸೋಕಸಲ್ಲಾಪನೂದನಂ;
ತ್ವಮ್ಪಿ ತಂ ಅಧಿಗಚ್ಛೇಸಿ [ಅಧಿಗಚ್ಛಾಹಿ (ಸೀ.), ಅಧಿಗಚ್ಛೇಹಿ (ಸ್ಯಾ.), ಅಧಿಗತೋಸಿ (?)], ಗಚ್ಛಾಮ ಬುದ್ಧಸನ್ತಿಕಂ’.
‘‘ಸಾಧೂತಿ ಸೋ ಪಟಿಸ್ಸುತ್ವಾ, ಸಹಾಯೋ ಮೇ ಸುಸಿಕ್ಖಿತೋ;
ಹತ್ಥೇನ ಹತ್ಥಂ ಗಣ್ಹಿತ್ವಾ, ಉಪಗಮ್ಮ [ಉಪಾಗಮಿ (ಸೀ.), ಉಪಾಗಮ್ಮ (ಸ್ಯಾ.)] ತವನ್ತಿಕಂ.
‘‘ಉಭೋಪಿ ಪಬ್ಬಜಿಸ್ಸಾಮ, ಸಕ್ಯಪುತ್ತ ತವನ್ತಿಕೇ;
ತವ ಸಾಸನಮಾಗಮ್ಮ, ವಿಹರಾಮ ಅನಾಸವಾ.
‘‘ಕೋಲಿತೋ ¶ ಇದ್ಧಿಯಾ ಸೇಟ್ಠೋ, ಅಹಂ ಪಞ್ಞಾಯ ಪಾರಗೋ;
ಉಭೋವ ಏಕತೋ ಹುತ್ವಾ, ಸಾಸನಂ ಸೋಭಯಾಮಸೇ.
‘‘ಅಪರಿಯೋಸಿತಸಙ್ಕಪ್ಪೋ ¶ , ಕುತಿತ್ಥೇ ಸಞ್ಚರಿಂ ಅಹಂ;
ತವ ದಸ್ಸನಮಾಗಮ್ಮ, ಸಙ್ಕಪ್ಪೋ ಪೂರಿತೋ ಮಮ.
‘‘ಪಥವಿಯಂ ಪತಿಟ್ಠಾಯ, ಪುಪ್ಫನ್ತಿ ಸಮಯೇ ದುಮಾ;
ದಿಬ್ಬಗನ್ಧಾ ಸಮ್ಪವನ್ತಿ, ತೋಸೇನ್ತಿ ಸಬ್ಬಪಾಣಿನಂ.
‘‘ತಥೇವಾಹಂ ಮಹಾವೀರ, ಸಕ್ಯಪುತ್ತ ಮಹಾಯಸ;
ಸಾಸನೇ ತೇ ಪತಿಟ್ಠಾಯ, ಸಮಯೇಸಾಮಿ ಪುಪ್ಫಿತುಂ.
‘‘ವಿಮುತ್ತಿಪುಪ್ಫಂ ¶ ಏಸನ್ತೋ, ಭವಸಂಸಾರಮೋಚನಂ;
ವಿಮುತ್ತಿಪುಪ್ಫಲಾಭೇನ, ತೋಸೇಮಿ ಸಬ್ಬಪಾಣಿನಂ.
‘‘ಯಾವತಾ ಬುದ್ಧಖೇತ್ತಮ್ಹಿ, ಠಪೇತ್ವಾನ ಮಹಾಮುನಿಂ;
ಪಞ್ಞಾಯ ಸದಿಸೋ ನತ್ಥಿ, ತವ ಪುತ್ತಸ್ಸ ಚಕ್ಖುಮ.
‘‘ಸುವಿನೀತಾ ಚ ತೇ ಸಿಸ್ಸಾ, ಪರಿಸಾ ಚ ಸುಸಿಕ್ಖಿತಾ;
ಉತ್ತಮೇ ದಮಥೇ ದನ್ತಾ, ಪರಿವಾರೇನ್ತಿ ತಂ ಸದಾ.
‘‘ಝಾಯೀ ¶ ಝಾನರತಾ ಧೀರಾ, ಸನ್ತಚಿತ್ತಾ ಸಮಾಹಿತಾ;
ಮುನೀ ಮೋನೇಯ್ಯಸಮ್ಪನ್ನಾ, ಪರಿವಾರೇನ್ತಿ ತಂ ಸದಾ.
‘‘ಅಪ್ಪಿಚ್ಛಾ ನಿಪಕಾ ಧೀರಾ, ಅಪ್ಪಾಹಾರಾ ಅಲೋಲುಪಾ;
ಲಾಭಾಲಾಭೇನ ಸನ್ತುಟ್ಠಾ, ಪರಿವಾರೇನ್ತಿ ತಂ ಸದಾ.
‘‘ಆರಞ್ಞಿಕಾ ಧುತರತಾ, ಝಾಯಿನೋ ಲೂಖಚೀವರಾ;
ವಿವೇಕಾಭಿರತಾ ಧೀರಾ, ಪರಿವಾರೇನ್ತಿ ತಂ ಸದಾ.
‘‘ಪಟಿಪನ್ನಾ ¶ ಫಲಟ್ಠಾ ಚ, ಸೇಖಾ ಫಲಸಮಙ್ಗಿನೋ;
ಆಸೀಸಕಾ [ಆಸಿಂಸಕಾ (ಸೀ. ಸ್ಯಾ.)] ಉತ್ತಮತ್ಥಂ, ಪರಿವಾರೇನ್ತಿ ತಂ ಸದಾ.
‘‘ಸೋತಾಪನ್ನಾ ಚ ವಿಮಲಾ, ಸಕದಾಗಾಮಿನೋ ಚ ಯೇ;
ಅನಾಗಾಮೀ ಚ ಅರಹಾ, ಪರಿವಾರೇನ್ತಿ ತಂ ಸದಾ.
‘‘ಸತಿಪಟ್ಠಾನಕುಸಲಾ, ಬೋಜ್ಝಙ್ಗಭಾವನಾರತಾ;
ಸಾವಕಾ ತೇ ಬಹೂ ಸಬ್ಬೇ, ಪರಿವಾರೇನ್ತಿ ತಂ ಸದಾ.
‘‘ಇದ್ಧಿಪಾದೇಸು ಕುಸಲಾ, ಸಮಾಧಿಭಾವನಾರತಾ;
ಸಮ್ಮಪ್ಪಧಾನಾನುಯುತ್ತಾ, ಪರಿವಾರೇನ್ತಿ ತಂ ಸದಾ.
‘‘ತೇವಿಜ್ಜಾ ಛಳಭಿಞ್ಞಾ ಚ, ಇದ್ಧಿಯಾ ಪಾರಮಿಂ ಗತಾ;
ಪಞ್ಞಾಯ ಪಾರಮಿಂ ಪತ್ತಾ, ಪರಿವಾರೇನ್ತಿ ತಂ ಸದಾ.
‘‘ಏದಿಸಾ ತೇ ಮಹಾವೀರ, ತವ ಸಿಸ್ಸಾ ಸುಸಿಕ್ಖಿತಾ;
ದುರಾಸದಾ ಉಗ್ಗತೇಜಾ, ಪರಿವಾರೇನ್ತಿ ತಂ ಸದಾ.
‘‘ತೇಹಿ ಸಿಸ್ಸೇಹಿ ಪರಿವುತೋ, ಸಞ್ಞತೇಹಿ ತಪಸ್ಸಿಭಿ;
ಮಿಗರಾಜಾವಸಮ್ಭೀತೋ, ಉಳುರಾಜಾವ ಸೋಭಸಿ.
‘‘ಪಥವಿಯಂ ಪತಿಟ್ಠಾಯ, ರುಹನ್ತಿ ಧರಣೀರುಹಾ;
ವೇಪುಲ್ಲತಂ ಪಾಪುಣನ್ತಿ, ಫಲಞ್ಚ ದಸ್ಸಯನ್ತಿ ತೇ.
‘‘ಪಥವೀಸದಿಸೋ ¶ ¶ ತ್ವಂಸಿ, ಸಕ್ಯಪುತ್ತ ಮಹಾಯಸ;
ಸಾಸನೇ ತೇ ಪತಿಟ್ಠಾಯ, ಲಭನ್ತಿ ಅಮತಂ ಫಲಂ.
‘‘ಸಿನ್ಧು ಸರಸ್ಸತೀ ಚೇವ, ನದಿಯೋ ಚನ್ದಭಾಗಿಕಾ;
ಗಙ್ಗಾ ಚ ಯಮುನಾ ಚೇವ, ಸರಭೂ ಚ ಅಥೋ ಮಹೀ.
‘‘ಏತಾಸಂ ¶ ಸನ್ದಮಾನಾನಂ, ಸಾಗರೋ ಸಮ್ಪಟಿಚ್ಛತಿ;
ಜಹನ್ತಿ ಪುರಿಮಂ ನಾಮಂ, ಸಾಗರೋತೇವ ಞಾಯತಿ.
‘‘ತಥೇವಿಮೇ ¶ ಚತುಬ್ಬಣ್ಣಾ, ಪಬ್ಬಜಿತ್ವಾ ತವನ್ತಿಕೇ;
ಜಹನ್ತಿ ಪುರಿಮಂ ನಾಮಂ, ಬುದ್ಧಪುತ್ತಾತಿ ಞಾಯರೇ.
‘‘ಯಥಾಪಿ ಚನ್ದೋ ವಿಮಲೋ, ಗಚ್ಛಂ ಆಕಾಸಧಾತುಯಾ;
ಸಬ್ಬೇ ತಾರಗಣೇ ಲೋಕೇ, ಆಭಾಯ ಅತಿರೋಚತಿ.
‘‘ತಥೇವ ತ್ವಂ ಮಹಾವೀರ, ಪರಿವುತೋ ದೇವಮಾನುಸೇ;
ಏತೇ ಸಬ್ಬೇ ಅತಿಕ್ಕಮ್ಮ, ಜಲಸಿ ಸಬ್ಬದಾ ತುವಂ.
‘‘ಗಮ್ಭೀರೇ ಉಟ್ಠಿತಾ ಊಮೀ, ನ ವೇಲಮತಿವತ್ತರೇ;
ಸಬ್ಬಾ ವೇಲಂವ ಫುಸನ್ತಿ [ಸಬ್ಬಾವ ವೇಲಂ ಫುಸನ್ತಿ (ಸೀ.), ಸಬ್ಬಾ ವೇಲಂ ಪಫುಸ್ಸನ್ತಿ (ಸ್ಯಾ.)], ಸಞ್ಚುಣ್ಣಾ ವಿಕಿರನ್ತಿ ತಾ.
‘‘ತಥೇವ ತಿತ್ಥಿಯಾ ಲೋಕೇ, ನಾನಾದಿಟ್ಠೀ ಬಹುಜ್ಜನಾ;
ಧಮ್ಮಂ ವಾದಿತುಕಾಮಾ ತೇ, ನಾತಿವತ್ತನ್ತಿ ತಂ ಮುನಿಂ.
‘‘ಸಚೇ ಚ ತಂ ಪಾಪುಣನ್ತಿ, ಪಟಿವಾದೇಹಿ ಚಕ್ಖುಮ;
ತವನ್ತಿಕಂ ಉಪಾಗನ್ತ್ವಾ, ಸಞ್ಚುಣ್ಣಾವ ಭವನ್ತಿ ತೇ.
‘‘ಯಥಾಪಿ ಉದಕೇ ಜಾತಾ, ಕುಮುದಾ ಮನ್ದಾಲಕಾ ಬಹೂ;
ಉಪಲಿಮ್ಪನ್ತಿ [ಉಪಲಿಪ್ಪನ್ತಿ (?)] ತೋಯೇನ, ಕದ್ದಮಕಲಲೇನ ಚ.
‘‘ತಥೇವ ಬಹುಕಾ ಸತ್ತಾ, ಲೋಕೇ ಜಾತಾ ವಿರೂಹರೇ;
ಅಟ್ಟಿತಾ ರಾಗದೋಸೇನ, ಕದ್ದಮೇ ಕುಮುದಂ ಯಥಾ.
‘‘ಯಥಾಪಿ ಪದುಮಂ ಜಲಜಂ, ಜಲಮಜ್ಝೇ ವಿರೂಹತಿ;
ನ ಸೋ ಲಿಮ್ಪತಿ ತೋಯೇನ, ಪರಿಸುದ್ಧೋ ಹಿ ಕೇಸರೀ.
‘‘ತಥೇವ ¶ ತ್ವಂ ಮಹಾವೀರ, ಲೋಕೇ ಜಾತೋ ಮಹಾಮುನಿ;
ನೋಪಲಿಮ್ಪಸಿ ಲೋಕೇನ, ತೋಯೇನ ಪದುಮಂ ಯಥಾ.
‘‘ಯಥಾಪಿ ರಮ್ಮಕೇ ಮಾಸೇ, ಬಹೂ ಪುಪ್ಫನ್ತಿ ವಾರಿಜಾ;
ನಾತಿಕ್ಕಮನ್ತಿ ತಂ ಮಾಸಂ, ಸಮಯೋ ಪುಪ್ಫನಾಯ ಸೋ.
‘‘ತಥೇವ ¶ ¶ ¶ ತ್ವಂ ಮಹಾವೀರ, ಪುಪ್ಫಿತೋ ತೇ ವಿಮುತ್ತಿಯಾ;
ಸಾಸನಂ ನಾತಿವತ್ತನ್ತಿ, ಪದುಮಂ ವಾರಿಜಂ ಯಥಾ.
‘‘ಸುಪುಪ್ಫಿತೋ ಸಾಲರಾಜಾ, ದಿಬ್ಬಗನ್ಧಂ ಪವಾಯತಿ;
ಅಞ್ಞಸಾಲೇಹಿ ಪರಿವುತೋ, ಸಾಲರಾಜಾವ ಸೋಭತಿ.
‘‘ತಥೇವ ತ್ವಂ ಮಹಾವೀರ, ಬುದ್ಧಞಾಣೇನ ಪುಪ್ಫಿತೋ;
ಭಿಕ್ಖುಸಙ್ಘಪರಿವುತೋ, ಸಾಲರಾಜಾವ ಸೋಭಸಿ.
‘‘ಯಥಾಪಿ ಸೇಲೋ ಹಿಮವಾ, ಓಸಧೋ ಸಬ್ಬಪಾಣಿನಂ;
ನಾಗಾನಂ ಅಸುರಾನಞ್ಚ, ದೇವತಾನಞ್ಚ ಆಲಯೋ.
‘‘ತಥೇವ ತ್ವಂ ಮಹಾವೀರ, ಓಸಧೋ ವಿಯ ಪಾಣಿನಂ;
ತೇವಿಜ್ಜಾ ಛಳಭಿಞ್ಞಾ ಚ, ಇದ್ಧಿಯಾ ಪಾರಮಿಂ ಗತಾ.
‘‘ಅನುಸಿಟ್ಠಾ ಮಹಾವೀರ, ತಯಾ ಕಾರುಣಿಕೇನ ತೇ;
ರಮನ್ತಿ ಧಮ್ಮರತಿಯಾ, ವಸನ್ತಿ ತವ ಸಾಸನೇ.
‘‘ಮಿಗರಾಜಾ ಯಥಾ ಸೀಹೋ, ಅಭಿನಿಕ್ಖಮ್ಮ ಆಸಯಾ;
ಚತುದ್ದಿಸಾನುವಿಲೋಕೇತ್ವಾ [ವಿಲೋಕೇತ್ವಾ (ಸೀ. ಸ್ಯಾ.), ನುಲೋಕೇತ್ವಾ (ಕ.)],
ತಿಕ್ಖತ್ತುಂ ಅಭಿನಾದತಿ.
‘‘ಸಬ್ಬೇ ಮಿಗಾ ಉತ್ತಸನ್ತಿ, ಮಿಗರಾಜಸ್ಸ ಗಜ್ಜತೋ;
ತಥಾ ಹಿ ಜಾತಿಮಾ ಏಸೋ, ಪಸೂ ತಾಸೇತಿ ಸಬ್ಬದಾ.
‘‘ಗಜ್ಜತೋ ¶ ತೇ ಮಹಾವೀರ, ವಸುಧಾ ಸಮ್ಪಕಮ್ಪತಿ;
ಬೋಧನೇಯ್ಯಾವಬುಜ್ಝನ್ತಿ, ತಸನ್ತಿ ಮಾರಕಾಯಿಕಾ.
‘‘ತಸನ್ತಿ ತಿತ್ಥಿಯಾ ಸಬ್ಬೇ, ನದತೋ ತೇ ಮಹಾಮುನಿ;
ಕಾಕಾ ಸೇನಾವ ವಿಬ್ಭನ್ತಾ, ಮಿಗರಞ್ಞಾ ಯಥಾ ಮಿಗಾ.
‘‘ಯೇ ಕೇಚಿ ಗಣಿನೋ ಲೋಕೇ, ಸತ್ಥಾರೋತಿ ಪವುಚ್ಚರೇ;
ಪರಮ್ಪರಾಗತಂ ಧಮ್ಮಂ, ದೇಸೇನ್ತಿ ಪರಿಸಾಯ ತೇ.
‘‘ನ ಹೇವಂ ತ್ವಂ ಮಹಾವೀರ, ಧಮ್ಮಂ ದೇಸೇಸಿ ಪಾಣಿನಂ;
ಸಾಮಂ ಸಚ್ಚಾನಿ ಬುಜ್ಝಿತ್ವಾ, ಕೇವಲಂ ಬೋಧಿಪಕ್ಖಿಯಂ.
‘‘ಆಸಯಾನುಸಯಂ ಞತ್ವಾ, ಇನ್ದ್ರಿಯಾನಂ ಬಲಾಬಲಂ;
ಭಬ್ಬಾಭಬ್ಬೇ ವಿದಿತ್ವಾನ, ಮಹಾಮೇಘೋವ ಗಜ್ಜಸಿ.
‘‘ಚಕ್ಕವಾಳಪರಿಯನ್ತಾ ¶ , ನಿಸಿನ್ನಾ ಪರಿಸಾ ಭವೇ;
ನಾನಾದಿಟ್ಠೀ ವಿಚಿನನ್ತಾ [ವಿಚಿನ್ತೇನ್ತಿ (ಸ್ಯಾ.), ವಿಚಿನನ್ತಂ (ಕ.)], ವಿಮತಿಚ್ಛೇದನಾಯ ತಂ.
‘‘ಸಬ್ಬೇಸಂ ¶ ಚಿತ್ತಮಞ್ಞಾಯ, ಓಪಮ್ಮಕುಸಲೋ ಮುನಿ;
ಏಕಂ ಪಞ್ಹಂ ಕಥೇನ್ತೋವ, ವಿಮತಿಂ ಛಿನ್ದಸಿ [ಛಿನ್ದಿ (ಸ್ಯಾ. ಕ.)] ಪಾಣಿನಂ.
‘‘ಉಪತಿಸ್ಸಸದಿಸೇಹೇವ, ವಸುಧಾ ಪೂರಿತಾ ಭವೇ;
ಸಬ್ಬೇವ ತೇ ಪಞ್ಜಲಿಕಾ, ಕಿತ್ತಯುಂ ಲೋಕನಾಯಕಂ.
‘‘ಕಪ್ಪಂ ವಾ ತೇ ಕಿತ್ತಯನ್ತಾ, ನಾನಾವಣ್ಣೇಹಿ ಕಿತ್ತಯುಂ;
ಪರಿಮೇತುಂ ನ ಸಕ್ಕೇಯ್ಯುಂ [ನ ಕಪ್ಪೇಯ್ಯುಂ (ಸ್ಯಾ.), ನ ಪಪ್ಪೇಯ್ಯುಂ (ಕ.)], ಅಪ್ಪಮೇಯ್ಯೋ ತಥಾಗತೋ.
‘‘ಯಥಾಸಕೇನ ¶ ಥಾಮೇನ, ಕಿತ್ತಿತೋ ಹಿ ಮಯಾ ಜಿನೋ;
ಕಪ್ಪಕೋಟೀಪಿ ಕಿತ್ತೇನ್ತಾ, ಏವಮೇವ ಪಕಿತ್ತಯುಂ.
‘‘ಸಚೇ ¶ ಹಿ ಕೋಚಿ ದೇವೋ ವಾ, ಮನುಸ್ಸೋ ವಾ ಸುಸಿಕ್ಖಿತೋ;
ಪಮೇತುಂ ಪರಿಕಪ್ಪೇಯ್ಯ, ವಿಘಾತಂವ ಲಭೇಯ್ಯ ಸೋ.
‘‘ಸಾಸನೇ ತೇ ಪತಿಟ್ಠಾಯ, ಸಕ್ಯಪುತ್ತ ಮಹಾಯಸ;
ಪಞ್ಞಾಯ ಪಾರಮಿಂ ಗನ್ತ್ವಾ, ವಿಹರಾಮಿ ಅನಾಸವೋ.
‘‘ತಿತ್ಥಿಯೇ ಸಮ್ಪಮದ್ದಾಮಿ, ವತ್ತೇಮಿ ಜಿನಸಾಸನಂ;
ಧಮ್ಮಸೇನಾಪತಿ ಅಜ್ಜ, ಸಕ್ಯಪುತ್ತಸ್ಸ ಸಾಸನೇ.
‘‘ಅಪರಿಮೇಯ್ಯೇ ಕತಂ ಕಮ್ಮಂ, ಫಲಂ ದಸ್ಸೇಸಿ ಮೇ ಇಧ;
ಸುಖಿತ್ತೋ ಸರವೇಗೋವ, ಕಿಲೇಸೇ ಝಾಪಯೀ ಮಮ [ಝಾಪಯಿಂ ಮಮ (ಸ್ಯಾ.), ಝಾಪಯಿಂ ಅಹಂ (ಕ.)].
‘‘ಯೋ ಕೋಚಿ ಮನುಜೋ ಭಾರಂ, ಧಾರೇಯ್ಯ ಮತ್ಥಕೇ ಸದಾ;
ಭಾರೇನ ದುಕ್ಖಿತೋ ಅಸ್ಸ, ಭಾರೇಹಿ ಭರಿತೋ ತಥಾ.
‘‘ಡಯ್ಹಮಾನೋ ತೀಹಗ್ಗೀಹಿ, ಭವೇಸು ಸಂಸರಿಂ ಅಹಂ;
ಭರಿತೋ ಭವಭಾರೇನ, ಗಿರಿಂ ಉಚ್ಚಾರಿತೋ ಯಥಾ.
‘‘ಓರೋಪಿತೋ ಚ ಮೇ ಭಾರೋ, ಭವಾ ಉಗ್ಘಾಟಿತಾ ಮಯಾ;
ಕರಣೀಯಂ ಕತಂ ಸಬ್ಬಂ, ಸಕ್ಯಪುತ್ತಸ್ಸ ಸಾಸನೇ.
‘‘ಯಾವತಾ ಬುದ್ಧಖೇತ್ತಮ್ಹಿ, ಠಪೇತ್ವಾ ಸಕ್ಯಪುಙ್ಗವಂ;
ಅಹಂ ಅಗ್ಗೋಮ್ಹಿ ಪಞ್ಞಾಯ, ಸದಿಸೋ ಮೇ ನ ವಿಜ್ಜತಿ.
‘‘ಸಮಾಧಿಮ್ಹಿ ¶ ಸುಕುಸಲೋ, ಇದ್ಧಿಯಾ ಪಾರಮಿಂ ಗತೋ;
ಇಚ್ಛಮಾನೋ ಚಹಂ ಅಜ್ಜ, ಸಹಸ್ಸಂ ಅಭಿನಿಮ್ಮಿನೇ.
‘‘ಅನುಪುಬ್ಬವಿಹಾರಸ್ಸ ¶ , ವಸೀಭೂತೋ ಮಹಾಮುನಿ;
ಕಥೇಸಿ ಸಾಸನಂ ಮಯ್ಹಂ, ನಿರೋಧೋ ಸಯನಂ ಮಮ.
‘‘ದಿಬ್ಬಚಕ್ಖು ¶ ವಿಸುದ್ಧಂ ಮೇ, ಸಮಾಧಿಕುಸಲೋ ಅಹಂ;
ಸಮ್ಮಪ್ಪಧಾನಾನುಯುತ್ತೋ, ಬೋಜ್ಝಙ್ಗಭಾವನಾರತೋ.
‘‘ಸಾವಕೇನ ಹಿ ಪತ್ತಬ್ಬಂ, ಸಬ್ಬಮೇವ ಕತಂ ಮಯಾ;
ಲೋಕನಾಥಂ ಠಪೇತ್ವಾನ, ಸದಿಸೋ ಮೇ ನ ವಿಜ್ಜತಿ.
‘‘ಸಮಾಪತ್ತೀನಂ ಕುಸಲೋ [ಸಮಾಪತ್ತಿನಯಕುಸಲೋ (ಸೀ.)], ಝಾನವಿಮೋಕ್ಖಾನ ಖಿಪ್ಪಪಟಿಲಾಭೀ;
ಬೋಜ್ಝಙ್ಗಭಾವನಾರತೋ, ಸಾವಕಗುಣಪಾರಮಿಗತೋಸ್ಮಿ.
‘‘ಸಾವಕಗುಣೇನಪಿ ¶ ಫುಸ್ಸೇನ [ಸಾವಕಗುಣಫುಸ್ಸೇನ (ಸ್ಯಾ.)], ಬುದ್ಧಿಯಾ ಪರಿಸುತ್ತಮಭಾರವಾ [ಪುರಿಸುತ್ತಮಗಾರವಾ (ಸ್ಯಾ.), ಪುರಿಸುತ್ತಮಭಾರವಾ (ಕ.)];
ಯಂ ಸದ್ಧಾಸಙ್ಗಹಿತಂ [ಸದ್ಧಾಯ ಸಙ್ಗಹಿತಂ (ಸೀ.), ಸದ್ದಾಸಙ್ಗಹಿತಂ (ಸ್ಯಾ.)] ಚಿತ್ತಂ, ಸದಾ ಸಬ್ರಹ್ಮಚಾರೀಸು.
‘‘ಉದ್ಧತವಿಸೋವ ಸಪ್ಪೋ, ಛಿನ್ನವಿಸಾಣೋವ ಉಸಭೋ;
ನಿಕ್ಖಿತ್ತಮಾನದಪ್ಪೋವ [ದಬ್ಬೋವ (ಕ.)], ಉಪೇಮಿ ಗರುಗಾರವೇನ ಗಣಂ.
‘‘ಯದಿ ರೂಪಿನೀ ಭವೇಯ್ಯ, ಪಞ್ಞಾ ಮೇ ವಸುಮತೀಪಿ [ವಸುಮತೀ (ಸೀ. ಕ.) ವಸುಪತೀನಂ (ಸ್ಯಾ.)] ನ ಸಮೇಯ್ಯ;
ಅನೋಮದಸ್ಸಿಸ್ಸ [ಅನೋಮದಸ್ಸಿ (?)] ಭಗವತೋ, ಫಲಮೇತಂ ಞಾಣಥವನಾಯ.
‘‘ಪವತ್ತಿತಂ ಧಮ್ಮಚಕ್ಕಂ, ಸಕ್ಯಪುತ್ತೇನ ತಾದಿನಾ;
ಅನುವತ್ತೇಮಹಂ ಸಮ್ಮಾ, ಞಾಣಥವನಾಯಿದಂ ಫಲಂ.
‘‘ಮಾ ಮೇ ಕದಾಚಿ ಪಾಪಿಚ್ಛೋ, ಕುಸೀತೋ ಹೀನವೀರಿಯೋ;
ಅಪ್ಪಸ್ಸುತೋ ಅನಾದರೋ [ಅನಾಚಾರೋ (ಸಬ್ಬತ್ಥ) ಥೇರಗಾ. ೯೮೭ ಪಸ್ಸಿತಬ್ಬಾ], ಸಮೇತೋ ಅಹು ಕತ್ಥಚಿ.
‘‘ಬಹುಸ್ಸುತೋ ಚ ಮೇಧಾವೀ, ಸೀಲೇಸು ಸುಸಮಾಹಿತೋ;
ಚೇತೋಸಮಥಾನುಯುತ್ತೋ, ಅಪಿ ಮುದ್ಧನಿ ತಿಟ್ಠತು.
‘‘ತಂ ವೋ ವದಾಮಿ ಭದ್ದನ್ತೇ, ಯಾವನ್ತೇತ್ಥ ಸಮಾಗತಾ;
ಅಪ್ಪಿಚ್ಛಾ ಹೋಥ ಸನ್ತುಟ್ಠಾ, ಝಾಯೀ ಝಾನರತಾ ಸದಾ.
‘‘ಯಮಹಂ ¶ ¶ ¶ ಪಠಮಂ ದಿಸ್ವಾ, ವಿರಜೋ ವಿಮಲೋ ಅಹುಂ;
ಸೋ ಮೇ ಆಚರಿಯೋ ಧೀರೋ, ಅಸ್ಸಜಿ ನಾಮ ಸಾವಕೋ.
‘‘ತಸ್ಸಾಹಂ ವಾಹಸಾ ಅಜ್ಜ, ಧಮ್ಮಸೇನಾಪತೀ ಅಹುಂ;
ಸಬ್ಬತ್ಥ ಪಾರಮಿಂ ಪತ್ವಾ, ವಿಹರಾಮಿ ಅನಾಸವೋ.
‘‘ಯೋ ಮೇ ಆಚರಿಯೋ ಆಸಿ, ಅಸ್ಸಜಿ ನಾಮ ಸಾವಕೋ;
ಯಸ್ಸಂ ದಿಸಾಯಂ ವಸತಿ, ಉಸ್ಸೀಸಮ್ಹಿ ಕರೋಮಹಂ.
‘‘ಮಮ ಕಮ್ಮಂ ಸರಿತ್ವಾನ, ಗೋತಮೋ ಸಕ್ಯಪುಙ್ಗವೋ;
ಭಿಕ್ಖುಸಙ್ಘೇ ನಿಸೀದಿತ್ವಾ, ಅಗ್ಗಟ್ಠಾನೇ ಠಪೇಸಿ ಮಂ.
[ಇಮಾ ದ್ವೇ ಗಾಥಾಯೋ ಸ್ಯಾಮಪೋತ್ಥಕೇ ನ ಸನ್ತಿ]
ಕಿಲೇಸಾ ಝಾಪಿತಾ ಮಯ್ಹಂ, ಭವಾ ಸಬ್ಬೇ ಸಮೂಹತಾ.
ನಾಗೋವ ಬನ್ಧನಂ ಛೇತ್ವಾ, ವಿಹರಾಮಿ ಅನಾಸವೋ.
‘‘ಸ್ವಾಗತಂ ವತ ಮೇ ಆಸಿ, ಬುದ್ಧಸೇಟ್ಠಸ್ಸ ಸನ್ತಿಕೇ;
ತಿಸ್ಸೋ ವಿಜ್ಜಾ ಅನುಪ್ಪತ್ತಾ, ಕತಂ ಬುದ್ಧಸ್ಸ ಸಾಸನಂ [ಇಮಾ ದ್ವೇ ಗಾಥಾರೋ ಸ್ಯಾಮಪೋತ್ಥಕೇ ನ ಸನ್ತಿ].
‘‘ಪಟಿಸಮ್ಭಿದಾ ¶ ಚತಸ್ಸೋ [ಚತಸ್ಸೋ ಚ (ಸೀ.)], ವಿಮೋಕ್ಖಾಪಿ ಚ ಅಟ್ಠಿಮೇ;
ಛಳಭಿಞ್ಞಾ ಸಚ್ಛಿಕತಾ, ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಸಾರಿಪುತ್ತೋ ಥೇರೋ ಇಮಾ ಗಾಥಾಯೋ
ಅಭಾಸಿತ್ಥಾತಿ.
ಸಾರಿಪುತ್ತತ್ಥೇರಸ್ಸಾಪದಾನಂ ಪಠಮಂ.
೩-೨. ಮಹಾಮೋಗ್ಗಲ್ಲಾನತ್ಥೇರಅಪದಾನಂ
‘‘ಅನೋಮದಸ್ಸೀ ಭಗವಾ, ಲೋಕಜೇಟ್ಠೋ ನರಾಸಭೋ;
ವಿಹಾಸಿ ಹಿಮವನ್ತಮ್ಹಿ, ದೇವಸಙ್ಘಪುರಕ್ಖತೋ.
‘‘ವರುಣೋ ನಾಮ ನಾಮೇನ, ನಾಗರಾಜಾ ಅಹಂ ತದಾ;
ಕಾಮರೂಪೀ ವಿಕುಬ್ಬಾಮಿ, ಮಹೋದಧಿನಿವಾಸಹಂ.
‘‘ಸಙ್ಗಣಿಯಂ ¶ ಗಣಂ ಹಿತ್ವಾ, ತೂರಿಯಂ ಪಟ್ಠಪೇಸಹಂ;
ಸಮ್ಬುದ್ಧಂ ಪರಿವಾರೇತ್ವಾ, ವಾದೇಸುಂ ಅಚ್ಛರಾ ತದಾ.
‘‘ವಜ್ಜಮಾನೇಸು ¶ ತೂರೇಸು, ದೇವಾ ತೂರಾನಿ [ತುರಿಯೇಸು, ದೇವಾ ತುರಿಯಾನಿ (ಸೀ. ಸ್ಯಾ.)] ವಜ್ಜಯುಂ;
ಉಭಿನ್ನಂ ಸದ್ದಂ ಸುತ್ವಾನ, ಬುದ್ಧೋಪಿ ಸಮ್ಪಬುಜ್ಝಥ.
‘‘ನಿಮನ್ತೇತ್ವಾನ ಸಮ್ಬುದ್ಧಂ, ಸಕಂ ಭವನುಪಾಗಮಿಂ;
ಆಸನಂ ಪಞ್ಞಪೇತ್ವಾನ, ಕಾಲಮಾರೋಚಯಿಂ ಅಹಂ.
‘‘ಖೀಣಾಸವಸಹಸ್ಸೇಹಿ, ಪರಿವುತೋ ಲೋಕನಾಯಕೋ;
ಓಭಾಸೇನ್ತೋ ದಿಸಾ ಸಬ್ಬಾ, ಭವನಂ ಮೇ ಉಪಾಗಮಿ.
‘‘ಉಪವಿಟ್ಠಂ ¶ ಮಹಾವೀರಂ, ದೇವದೇವಂ ನರಾಸಭಂ;
ಸಭಿಕ್ಖುಸಙ್ಘಂ ತಪ್ಪೇಸಿಂ [ಸನ್ತಪ್ಪೇಸಿಂ (ಸ್ಯಾ.), ತಪ್ಪೇಮಿ (ಕ.)], ಅನ್ನಪಾನೇನಹಂ ತದಾ.
‘‘ಅನುಮೋದಿ ಮಹಾವೀರೋ, ಸಯಮ್ಭೂ ಅಗ್ಗಪುಗ್ಗಲೋ;
ಭಿಕ್ಖುಸಙ್ಘೇ ನಿಸೀದಿತ್ವಾ, ಇಮಾ ಗಾಥಾ ಅಭಾಸಥ.
‘‘‘ಯೋ ಸೋ [ಯಂ ಸೋ (ಕ.)] ಸಙ್ಘಂ ಅಪೂಜೇಸಿ, ಬುದ್ಧಞ್ಚ ಲೋಕನಾಯಕಂ;
ತೇನ ಚಿತ್ತಪ್ಪಸಾದೇನ, ದೇವಲೋಕಂ ಗಮಿಸ್ಸತಿ.
‘‘‘ಸತ್ತಸತ್ತತಿಕ್ಖತ್ತುಞ್ಚ, ದೇವರಜ್ಜಂ ಕರಿಸ್ಸತಿ;
ಪಥಬ್ಯಾ ರಜ್ಜಂ ಅಟ್ಠಸತಂ, ವಸುಧಂ ಆವಸಿಸ್ಸತಿ.
‘‘‘ಪಞ್ಚಪಞ್ಞಾಸಕ್ಖತ್ತುಞ್ಚ, ಚಕ್ಕವತ್ತೀ ಭವಿಸ್ಸತಿ;
ಭೋಗಾ ಅಸಙ್ಖಿಯಾ ತಸ್ಸ, ಉಪ್ಪಜ್ಜಿಸ್ಸನ್ತಿ ತಾವದೇ.
‘‘‘ಅಪರಿಮೇಯ್ಯೇ ¶ ಇತೋ ಕಪ್ಪೇ, ಓಕ್ಕಾಕಕುಲಸಮ್ಭವೋ;
ಗೋತಮೋ ನಾಮ ಗೋತ್ತೇನ [ನಾಮೇನ (ಸೀ.)], ಸತ್ಥಾ ಲೋಕೇ ಭವಿಸ್ಸತಿ.
‘‘‘ನಿರಯಾ ¶ ಸೋ ಚವಿತ್ವಾನ, ಮನುಸ್ಸತಂ ಗಮಿಸ್ಸತಿ;
ಕೋಲಿತೋ ನಾಮ ನಾಮೇನ, ಬ್ರಹ್ಮಬನ್ಧು ಭವಿಸ್ಸತಿ.
‘‘‘ಸೋ ಪಚ್ಛಾ ಪಬ್ಬಜಿತ್ವಾನ, ಕುಸಲಮೂಲೇನ ಚೋದಿತೋ;
ಗೋತಮಸ್ಸ ಭಗವತೋ, ದುತಿಯೋ ಹೇಸ್ಸತಿ ಸಾವಕೋ.
‘‘‘ಆರದ್ಧವೀರಿಯೋ ಪಹಿತತ್ತೋ, ಇದ್ಧಿಯಾ ಪಾರಮಿಂ ಗತೋ;
ಸಬ್ಬಾಸವೇ ಪರಿಞ್ಞಾಯ, ನಿಬ್ಬಾಯಿಸ್ಸತಿನಾಸವೋ’.
‘‘ಪಾಪಮಿತ್ತೋಪನಿಸ್ಸಾಯ, ಕಾಮರಾಗವಸಂ ಗತೋ;
ಮಾತರಂ ಪಿತರಞ್ಚಾಪಿ, ಘಾತಯಿಂ ದುಟ್ಠಮಾನಸೋ.
‘‘ಯಂ ¶ ಯಂ ಯೋನುಪಪಜ್ಜಾಮಿ, ನಿರಯಂ ಅಥ ಮಾನುಸಂ;
ಪಾಪಕಮ್ಮಸಮಙ್ಗಿತಾ, ಭಿನ್ನಸೀಸೋ ಮರಾಮಹಂ.
‘‘ಇದಂ ಪಚ್ಛಿಮಕಂ ಮಯ್ಹಂ, ಚರಿಮೋ ವತ್ತತೇ ಭವೋ;
ಇಧಾಪಿ ಏದಿಸೋ ಮಯ್ಹಂ, ಮರಣಕಾಲೇ ಭವಿಸ್ಸತಿ.
‘‘ಪವಿವೇಕಮನುಯುತ್ತೋ, ಸಮಾಧಿಭಾವನಾರತೋ;
ಸಬ್ಬಾಸವೇ ಪರಿಞ್ಞಾಯ, ವಿಹರಾಮಿ ಅನಾಸವೋ.
‘‘ಧರಣಿಮ್ಪಿ ಸುಗಮ್ಭೀರಂ, ಬಹಲಂ ದುಪ್ಪಧಂಸಿಯಂ;
ವಾಮಙ್ಗುಟ್ಠೇನ ಖೋಭೇಯ್ಯಂ, ಇದ್ಧಿಯಾ ಪಾರಮಿಂ ಗತೋ.
‘‘ಅಸ್ಮಿಮಾನಂ ನ ಪಸ್ಸಾಮಿ, ಮಾನೋ ಮಯ್ಹಂ ನ ವಿಜ್ಜತಿ;
ಸಾಮಣೇರೇ ಉಪಾದಾಯ, ಗರುಚಿತ್ತಂ ಕರೋಮಹಂ.
‘‘ಅಪರಿಮೇಯ್ಯೇ ಇತೋ ಕಪ್ಪೇ, ಯಂ ಕಮ್ಮಮಭಿನೀಹರಿಂ;
ತಾಹಂ ಭೂಮಿಮನುಪ್ಪತ್ತೋ, ಪತ್ತೋಮ್ಹಿ ಆಸವಕ್ಖಯಂ.
‘‘ಪಟಿಸಮ್ಭಿದಾ ¶ ¶ ಚತಸ್ಸೋ, ವಿಮೋಕ್ಖಾಪಿ ಚ ಅಟ್ಠಿಮೇ;
ಛಳಭಿಞ್ಞಾ ಸಚ್ಛಿಕತಾ, ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಮಹಾಮೋಗ್ಗಲ್ಲಾನೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಮಹಾಮೋಗ್ಗಲ್ಲಾನತ್ಥೇರಸ್ಸಾಪದಾನಂ ದುತಿಯಂ.
೩-೩. ಮಹಾಕಸ್ಸಪತ್ಥೇರಅಪದಾನಂ
‘‘ಪದುಮುತ್ತರಸ್ಸ ¶ ಭಗವತೋ, ಲೋಕಜೇಟ್ಠಸ್ಸ ತಾದಿನೋ;
ನಿಬ್ಬುತೇ ಲೋಕನಾಥಮ್ಹಿ, ಪೂಜಂ ಕುಬ್ಬನ್ತಿ ಸತ್ಥುನೋ.
‘‘ಉದಗ್ಗಚಿತ್ತಾ ಜನತಾ, ಆಮೋದಿತಪಮೋದಿತಾ;
ತೇಸು ಸಂವೇಗಜಾತೇಸು, ಪೀತಿ ಮೇ ಉದಪಜ್ಜಥ.
‘‘ಞಾತಿಮಿತ್ತೇ ಸಮಾನೇತ್ವಾ, ಇದಂ ವಚನಮಬ್ರವಿಂ;
ಪರಿನಿಬ್ಬುತೋ ಮಹಾವೀರೋ, ಹನ್ದ ಪೂಜಂ ಕರೋಮಸೇ.
‘‘ಸಾಧೂತಿ ತೇ ಪಟಿಸ್ಸುತ್ವಾ, ಭಿಯ್ಯೋ ಹಾಸಂ ಜನಿಂಸು ಮೇ;
ಬುದ್ಧಸ್ಮಿಂ ಲೋಕನಾಥಮ್ಹಿ, ಕಾಹಾಮ ಪುಞ್ಞಸಞ್ಚಯಂ.
‘‘ಅಗ್ಘಿಯಂ ¶ ಸುಕತಂ ಕತ್ವಾ, ಸತಹತ್ಥಸಮುಗ್ಗತಂ;
ದಿಯಡ್ಢಹತ್ಥಪತ್ಥಟಂ, ವಿಮಾನಂ ನಭಮುಗ್ಗತಂ.
‘‘ಕತ್ವಾನ ಹಮ್ಮಿಯಂ ತತ್ಥ, ತಾಲಪನ್ತೀಹಿ ಚಿತ್ತಿತಂ;
ಸಕಂ ಚಿತ್ತಂ ಪಸಾದೇತ್ವಾ, ಚೇತಿಯಂ ಪೂಜಯುತ್ತಮಂ.
‘‘ಅಗ್ಗಿಕ್ಖನ್ಧೋವ ¶ ಜಲಿತೋ, ಕಿಂಸುಕೋ ಇವ [ಸಾಲರಾಜಾವ (ಸೀ.)] ಫುಲ್ಲಿತೋ;
ಇನ್ದಲಟ್ಠೀವ ಆಕಾಸೇ, ಓಭಾಸೇತಿ ಚತುದ್ದಿಸಾ.
‘‘ತತ್ಥ ಚಿತ್ತಂ ಪಸಾದೇತ್ವಾ, ಕತ್ವಾನ ಕುಸಲಂ ಬಹುಂ;
ಪುಬ್ಬಕಮ್ಮಂ ಸರಿತ್ವಾನ, ತಿದಸಂ ಉಪಪಜ್ಜಹಂ.
‘‘ಸಹಸ್ಸಯುತ್ತಂ ¶ ಹಯವಾಹಿಂ, ದಿಬ್ಬಯಾನಮಧಿಟ್ಠಿತೋ;
ಉಬ್ಬಿದ್ಧಂ ಭವನಂ ಮಯ್ಹಂ, ಸತ್ತಭೂಮಂ ಸಮುಗ್ಗತಂ.
‘‘ಕೂಟಾಗಾರಸಹಸ್ಸಾನಿ, ಸಬ್ಬಸೋಣ್ಣಮಯಾ ಅಹುಂ;
ಜಲನ್ತಿ ಸಕತೇಜೇನ, ದಿಸಾ ಸಬ್ಬಾ ಪಭಾಸಯಂ.
‘‘ಸನ್ತಿ ಅಞ್ಞೇಪಿ ನಿಯ್ಯೂಹಾ, ಲೋಹಿತಙ್ಗಮಯಾ ತದಾ;
ತೇಪಿ ಜೋತನ್ತಿ ಆಭಾಯ, ಸಮನ್ತಾ ಚತುರೋ ದಿಸಾ.
‘‘ಪುಞ್ಞಕಮ್ಮಾಭಿನಿಬ್ಬತ್ತಾ, ಕೂಟಾಗಾರಾ ಸುನಿಮ್ಮಿತಾ;
ಮಣಿಮಯಾಪಿ ಜೋತನ್ತಿ, ದಿಸಾ ದಸ [ದಿಸೋದಿಸಂ (ಸ್ಯಾ.)] ಸಮನ್ತತೋ.
‘‘ತೇಸಂ ಉಜ್ಜೋತಮಾನಾನಂ, ಓಭಾಸೋ ವಿಪುಲೋ ಅಹು;
ಸಬ್ಬೇ ದೇವೇ ಅಭಿಭೋಮಿ, ಪುಞ್ಞಕಮ್ಮಸ್ಸಿದಂ ಫಲಂ.
‘‘ಸಟ್ಠಿಕಪ್ಪಸಹಸ್ಸಮ್ಹಿ ¶ , ಉಬ್ಬಿದ್ಧೋ ನಾಮ ಖತ್ತಿಯೋ;
ಚಾತುರನ್ತೋ ವಿಜಿತಾವೀ, ಪಥವಿಂ ಆವಸಿಂ ಅಹಂ.
‘‘ತಥೇವ ಭದ್ದಕೇ ಕಪ್ಪೇ, ತಿಂಸಕ್ಖತ್ತುಂ ಅಹೋಸಹಂ;
ಸಕಕಮ್ಮಾಭಿರದ್ಧೋಮ್ಹಿ, ಚಕ್ಕವತ್ತೀ ಮಹಬ್ಬಲೋ.
‘‘ಸತ್ತರತನಸಮ್ಪನ್ನೋ, ಚತುದೀಪಮ್ಹಿ ಇಸ್ಸರೋ;
ತತ್ಥಾಪಿ ಭವನಂ ಮಯ್ಹಂ, ಇನ್ದಲಟ್ಠೀವ ಉಗ್ಗತಂ.
‘‘ಆಯಾಮತೋ ¶ ¶ ಚತುಬ್ಬೀಸಂ, ವಿತ್ಥಾರೇನ ಚ ದ್ವಾದಸ;
ರಮ್ಮಣಂ [ರಮ್ಮಕಂ (ಸೀ. ಸ್ಯಾ.)] ನಾಮ ನಗರಂ, ದಳ್ಹಪಾಕಾರತೋರಣಂ.
‘‘ಆಯಾಮತೋ ಪಞ್ಚಸತಂ, ವಿತ್ಥಾರೇನ ತದಡ್ಢಕಂ;
ಆಕಿಣ್ಣಂ ಜನಕಾಯೇಹಿ, ತಿದಸಾನಂ ಪುರಂ ವಿಯ.
‘‘ಯಥಾ ಸೂಚಿಘರೇ ಸೂಚೀ, ಪಕ್ಖಿತ್ತಾ ಪಣ್ಣವೀಸತಿ;
ಅಞ್ಞಮಞ್ಞಂ ಪಘಟ್ಟೇನ್ತಿ, ಆಕಿಣ್ಣಂ ಹೋತಿ ಲಙ್ಕತಂ [ತಂ ತದಾ (ಸೀ.), ಸತತಾ (ಸ್ಯಾ.), ಸಙ್ಕರಂ (?)].
‘‘ಏವಮ್ಪಿ ನಗರಂ ಮಯ್ಹಂ, ಹತ್ಥಿಸ್ಸರಥಸಂಕುಲಂ;
ಮನುಸ್ಸೇಹಿ ಸದಾಕಿಣ್ಣಂ, ರಮ್ಮಣಂ ನಗರುತ್ತಮಂ.
‘‘ತತ್ಥ ಭುತ್ವಾ ಪಿವಿತ್ವಾ ಚ, ಪುನ ದೇವತ್ತನಂ ಗತೋ [ಪುನಪಿ ದೇವತಙ್ಗತೋ (ಕ.)].
ಭವೇ ಪಚ್ಛಿಮಕೇ ಮಯ್ಹಂ, ಅಹೋಸಿ ಕುಲಸಮ್ಪದಾ.
‘‘ಬ್ರಾಹ್ಮಞ್ಞಕುಲಸಮ್ಭೂತೋ ¶ , ಮಹಾರತನಸಞ್ಚಯೋ;
ಅಸೀತಿಕೋಟಿಯೋ ಹಿತ್ವಾ, ಹಿರಞ್ಞಸ್ಸಾಪಿ ಪಬ್ಬಜಿಂ.
‘‘ಪಟಿಸಮ್ಭಿದಾ ಚತಸ್ಸೋ, ವಿಮೋಕ್ಖಾಪಿ ಚ ಅಟ್ಠಿಮೇ;
ಛಳಭಿಞ್ಞಾ ಸಚ್ಛಿಕತಾ, ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಮಹಾಕಸ್ಸಪೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಮಹಾಕಸ್ಸಪತ್ಥೇರಸ್ಸಾಪದಾನಂ ತತಿಯಂ.
೩-೪. ಅನುರುದ್ಧತ್ಥೇರಅಪದಾನಂ
‘‘ಸುಮೇಧಂ ¶ ಭಗವನ್ತಾಹಂ, ಲೋಕಜೇಟ್ಠಂ ನರಾಸಭಂ;
ವೂಪಕಟ್ಠಂ ವಿಹರನ್ತಂ, ಅದ್ದಸಂ ಲೋಕನಾಯಕಂ.
‘‘ಉಪಗನ್ತ್ವಾನ ಸಮ್ಬುದ್ಧಂ, ಸುಮೇಧಂ ಲೋಕನಾಯಕಂ;
ಅಞ್ಜಲಿಂ ಪಗ್ಗಹೇತ್ವಾನ, ಬುದ್ಧಸೇಟ್ಠಮಯಾಚಹಂ.
‘‘ಅನುಕಮ್ಪ ¶ ಮಹಾವೀರ, ಲೋಕಜೇಟ್ಠ ನರಾಸಭ;
ಪದೀಪಂ ತೇ ಪದಸ್ಸಾಮಿ, ರುಕ್ಖಮೂಲಮ್ಹಿ ಝಾಯತೋ.
‘‘ಅಧಿವಾಸೇಸಿ ಸೋ ಧೀರೋ, ಸಯಮ್ಭೂ ವದತಂ ವರೋ;
ದುಮೇಸು ವಿನಿವಿಜ್ಝಿತ್ವಾ, ಯನ್ತಂ ಯೋಜಿಯಹಂ ತದಾ.
‘‘ಸಹಸ್ಸವಟ್ಟಿಂ ¶ ಪಾದಾಸಿಂ, ಬುದ್ಧಸ್ಸ ಲೋಕಬನ್ಧುನೋ;
ಸತ್ತಾಹಂ ಪಜ್ಜಲಿತ್ವಾನ, ದೀಪಾ ವೂಪಸಮಿಂಸು ಮೇ.
‘‘ತೇನ ಚಿತ್ತಪ್ಪಸಾದೇನ, ಚೇತನಾಪಣಿಧೀಹಿ ಚ;
ಜಹಿತ್ವಾ ಮಾನುಸಂ ದೇಹಂ, ವಿಮಾನಮುಪಪಜ್ಜಹಂ.
‘‘ಉಪಪನ್ನಸ್ಸ ದೇವತ್ತಂ, ಬ್ಯಮ್ಹಂ ಆಸಿ ಸುನಿಮ್ಮಿತಂ;
ಸಮನ್ತತೋ ಪಜ್ಜಲತಿ, ದೀಪದಾನಸ್ಸಿದಂ ಫಲಂ.
‘‘ಸಮನ್ತಾ ¶ ಯೋಜನಸತಂ, ವಿರೋಚೇಸಿಮಹಂ ತದಾ;
ಸಬ್ಬೇ ದೇವೇ ಅಭಿಭೋಮಿ, ದೀಪದಾನಸ್ಸಿದಂ ಫಲಂ.
‘‘ತಿಂಸಕಪ್ಪಾನಿ ¶ ದೇವಿನ್ದೋ, ದೇವರಜ್ಜಮಕಾರಯಿಂ;
ನ ಮಂ ಕೇಚೀತಿಮಞ್ಞನ್ತಿ, ದೀಪದಾನಸ್ಸಿದಂ ಫಲಂ.
‘‘ಅಟ್ಠವೀಸತಿಕ್ಖತ್ತುಞ್ಚ, ಚಕ್ಕವತ್ತೀ ಅಹೋಸಹಂ;
ದಿವಾ ರತ್ತಿಞ್ಚ ಪಸ್ಸಾಮಿ, ಸಮನ್ತಾ ಯೋಜನಂ ತದಾ.
‘‘ಸಹಸ್ಸಲೋಕಂ ಞಾಣೇನ, ಪಸ್ಸಾಮಿ ಸತ್ಥು ಸಾಸನೇ;
ದಿಬ್ಬಚಕ್ಖುಮನುಪ್ಪತ್ತೋ, ದೀಪದಾನಸ್ಸಿದಂ ಫಲಂ.
‘‘ಸುಮೇಧೋ ನಾಮ ಸಮ್ಬುದ್ಧೋ, ತಿಂಸಕಪ್ಪಸಹಸ್ಸಿತೋ;
ತಸ್ಸ ದೀಪೋ ಮಯಾ ದಿನ್ನೋ, ವಿಪ್ಪಸನ್ನೇನ ಚೇತಸಾ.
‘‘ಪಟಿಸಮ್ಭಿದಾ ಚತಸ್ಸೋ, ವಿಮೋಕ್ಖಾಪಿ ಚ ಅಟ್ಠಿಮೇ;
ಛಳಭಿಞ್ಞಾ ಸಚ್ಛಿಕತಾ, ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಅನುರುದ್ಧೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಅನುರುದ್ಧತ್ಥೇರಸ್ಸಾಪದಾನಂ ಚತುತ್ಥಂ.
೩-೫. ಪುಣ್ಣಮನ್ತಾಣಿಪುತ್ತತ್ಥೇರಅಪದಾನಂ
‘‘ಅಜ್ಝಾಯಕೋ ಮನ್ತಧರೋ, ತಿಣ್ಣಂ ವೇದಾನ ಪಾರಗೂ;
ಪುರಕ್ಖತೋಮ್ಹಿ ಸಿಸ್ಸೇಹಿ, ಉಪಗಚ್ಛಿಂ ನರುತ್ತಮಂ.
‘‘ಪದುಮುತ್ತರೋ ¶ ಲೋಕವಿದೂ, ಆಹುತೀನಂ ಪಟಿಗ್ಗಹೋ;
ಮಮ ಕಮ್ಮಂ ಪಕಿತ್ತೇಸಿ, ಸಙ್ಖಿತ್ತೇನ ಮಹಾಮುನಿ.
‘‘ತಾಹಂ ¶ ಧಮ್ಮಂ ಸುಣಿತ್ವಾನ, ಅಭಿವಾದೇತ್ವಾನ ಸತ್ಥುನೋ;
ಅಞ್ಜಲಿಂ ಪಗ್ಗಹೇತ್ವಾನ, ಪಕ್ಕಮಿಂ [ಪಕ್ಕಾಮಿಂ (ಸೀ. ಸ್ಯಾ.)] ದಕ್ಖಿಣಾಮುಖೋ.
‘‘ಸಙ್ಖಿತ್ತೇನ ¶ ಸುಣಿತ್ವಾನ, ವಿತ್ಥಾರೇನ ಅಭಾಸಯಿಂ [ಅದೇಸಯಿಂ (ಸೀ. ಸ್ಯಾ.)];
ಸಬ್ಬೇ ಸಿಸ್ಸಾ ಅತ್ತಮನಾ, ಸುತ್ವಾನ ಮಮ ಭಾಸತೋ;
ಸಕಂ ದಿಟ್ಠಿಂ ವಿನೋದೇತ್ವಾ, ಬುದ್ಧೇ ಚಿತ್ತಂ ಪಸಾದಯುಂ.
‘‘ಸಙ್ಖಿತ್ತೇನಪಿ ದೇಸೇಮಿ, ವಿತ್ಥಾರೇನ ತಥೇವಹಂ [ದೇಸೇಸಿಂ ವಿತ್ಥಾರೇನಪಿ ಭಾಸಯಿಂ (ಕ.)];
ಅಭಿಧಮ್ಮನಯಞ್ಞೂಹಂ ¶ , ಕಥಾವತ್ಥುವಿಸುದ್ಧಿಯಾ;
ಸಬ್ಬೇಸಂ ವಿಞ್ಞಾಪೇತ್ವಾನ, ವಿಹರಾಮಿ ಅನಾಸವೋ.
‘‘ಇತೋ ಪಞ್ಚಸತೇ ಕಪ್ಪೇ, ಚತುರೋ ಸುಪ್ಪಕಾಸಕಾ;
ಸತ್ತರತನಸಮ್ಪನ್ನಾ, ಚತುದೀಪಮ್ಹಿ ಇಸ್ಸರಾ.
‘‘ಪಟಿಸಮ್ಭಿದಾ ಚತಸ್ಸೋ, ವಿಮೋಕ್ಖಾಪಿ ಚ ಅಟ್ಠಿಮೇ;
ಛಳಭಿಞ್ಞಾ ಸಚ್ಛಿಕತಾ, ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಪುಣ್ಣೋ ಮನ್ತಾಣಿಪುತ್ತೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಪುಣ್ಣಮನ್ತಾಣಿಪುತ್ತತ್ಥೇರಸ್ಸಾಪದಾನಂ ಪಞ್ಚಮಂ.
೩-೬. ಉಪಾಲಿತ್ಥೇರಅಪದಾನಂ
‘‘ನಗರೇ ಹಂಸವತಿಯಾ, ಸುಜಾತೋ ನಾಮ ಬ್ರಾಹ್ಮಣೋ;
ಅಸೀತಿಕೋಟಿನಿಚಯೋ, ಪಹೂತಧನಧಞ್ಞವಾ.
‘‘ಅಜ್ಝಾಯಕೋ ಮನ್ತಧರೋ, ತಿಣ್ಣಂ ವೇದಾನ ಪಾರಗೂ;
ಲಕ್ಖಣೇ ಇತಿಹಾಸೇ ಚ, ಸಧಮ್ಮೇ ಪಾರಮಿಂ ಗತೋ.
‘‘ಪರಿಬ್ಬಾಜಾ ¶ ಏಕಸಿಖಾ [ಏಕಭಿಕ್ಖಾ (ಕ.)], ಗೋತಮಾ
ಬುದ್ಧಸಾವಕಾ [ಸಬ್ಬತ್ಥಪಿ ಏವಮೇವ ದಿಸ್ಸತಿ].
ಚರಕಾ ತಾಪಸಾ ಚೇವ, ಚರನ್ತಿ ಮಹಿಯಾ ತದಾ.
‘‘ತೇಪಿ ಮಂ ಪರಿವಾರೇನ್ತಿ, ಬ್ರಾಹ್ಮಣೋ ವಿಸ್ಸುತೋ ಇತಿ;
ಬಹುಜ್ಜನೋ ಮಂ ಪೂಜೇತಿ, ನಾಹಂ ಪೂಜೇಮಿ ಕಿಞ್ಚನಂ.
‘‘ಪೂಜಾರಹಂ ¶ ನ ಪಸ್ಸಾಮಿ, ಮಾನತ್ಥದ್ಧೋ ಅಹಂ ತದಾ;
ಬುದ್ಧೋತಿ ವಚನಂ ನತ್ಥಿ, ತಾವ ನುಪ್ಪಜ್ಜತೇ ಜಿನೋ.
‘‘ಅಚ್ಚಯೇನ ¶ ಅಹೋರತ್ತಂ, ಪದುಮುತ್ತರನಾಮಕೋ [ನಾಯಕೋ (ಸೀ. ಸ್ಯಾ.)];
ಸಬ್ಬಂ ತಮಂ ವಿನೋದೇತ್ವಾ, ಲೋಕೇ ಉಪ್ಪಜ್ಜಿ ಚಕ್ಖುಮಾ.
‘‘ವಿತ್ಥಾರಿಕೇ ಬಾಹುಜಞ್ಞೇ, ಪುಥುಭೂತೇ ಚ ಸಾಸನೇ;
ಉಪಾಗಮಿ ತದಾ ಬುದ್ಧೋ, ನಗರಂ ಹಂಸಸವ್ಹಯಂ.
‘‘ಪಿತು ಅತ್ಥಾಯ ¶ ಸೋ ಬುದ್ಧೋ, ಧಮ್ಮಂ ದೇಸೇಸಿ ಚಕ್ಖುಮಾ;
ತೇನ ಕಾಲೇನ ಪರಿಸಾ, ಸಮನ್ತಾ ಯೋಜನಂ ತದಾ.
‘‘ಸಮ್ಮತೋ ಮನುಜಾನಂ ಸೋ, ಸುನನ್ದೋ ನಾಮ ತಾಪಸೋ;
ಯಾವತಾ ಬುದ್ಧಪರಿಸಾ, ಪುಪ್ಫೇಹಚ್ಛಾದಯೀ ತದಾ.
‘‘ಚತುಸಚ್ಚಂ ಪಕಾಸೇನ್ತೇ, ಸೇಟ್ಠೇ ಚ [ಹೇಟ್ಠಾ ಚ (ಕ.)] ಪುಪ್ಫಮಣ್ಡಪೇ;
ಕೋಟಿಸತಸಹಸ್ಸಾನಂ, ಧಮ್ಮಾಭಿಸಮಯೋ ಅಹು.
‘‘ಸತ್ತರತ್ತಿನ್ದಿವಂ ಬುದ್ಧೋ, ವಸ್ಸೇತ್ವಾ ಧಮ್ಮವುಟ್ಠಿಯೋ;
ಅಟ್ಠಮೇ ದಿವಸೇ ಪತ್ತೇ, ಸುನನ್ದಂ ಕಿತ್ತಯೀ ಜಿನೋ.
‘‘ದೇವಲೋಕೇ ಮನುಸ್ಸೇ ವಾ, ಸಂಸರನ್ತೋ ಅಯಂ ಭವೇ;
ಸಬ್ಬೇಸಂ ಪವರೋ ಹುತ್ವಾ, ಭವೇಸು ಸಂಸರಿಸ್ಸತಿ.
‘‘ಕಪ್ಪಸತಸಹಸ್ಸಮ್ಹಿ ¶ , ಓಕ್ಕಾಕಕುಲಸಮ್ಭವೋ;
ಗೋತಮೋ ನಾಮ ಗೋತ್ತೇನ, ಸತ್ಥಾ ಲೋಕೇ ಭವಿಸ್ಸತಿ.
‘‘ತಸ್ಸ ಧಮ್ಮೇಸು ದಾಯಾದೋ, ಓರಸೋ ಧಮ್ಮನಿಮ್ಮಿತೋ;
ಮನ್ತಾಣಿಪುತ್ತೋ ಪುಣ್ಣೋತಿ, ಹೇಸ್ಸತಿ ಸತ್ಥು ಸಾವಕೋ.
‘‘ಏವಂ ಕಿತ್ತಯಿ ಸಮ್ಬುದ್ಧೋ, ಸುನನ್ದಂ ತಾಪಸಂ ತದಾ;
ಹಾಸಯನ್ತೋ ಜನಂ ಸಬ್ಬಂ, ದಸ್ಸಯನ್ತೋ ಸಕಂ ಬಲಂ.
‘‘ಕತಞ್ಜಲೀ ನಮಸ್ಸನ್ತಿ, ಸುನನ್ದಂ ತಾಪಸಂ ಜನಾ;
ಬುದ್ಧೇ ಕಾರಂ ಕರಿತ್ವಾನ, ಸೋಧೇಸಿ ಗತಿಮತ್ತನೋ.
‘‘ತತ್ಥ ಮೇ ಅಹು ಸಙ್ಕಪ್ಪೋ, ಸುತ್ವಾನ ಮುನಿನೋ ವಚಂ;
ಅಹಮ್ಪಿ ಕಾರಂ ಕಸ್ಸಾಮಿ, ಯಥಾ ಪಸ್ಸಾಮಿ ಗೋತಮಂ.
‘‘ಏವಾಹಂ ¶ ಚಿನ್ತಯಿತ್ವಾನ, ಕಿರಿಯಂ ಚಿನ್ತಯಿಂ ಮಮ;
ಕ್ಯಾಹಂ ಕಮ್ಮಂ ಆಚರಾಮಿ, ಪುಞ್ಞಕ್ಖೇತ್ತೇ ಅನುತ್ತರೇ.
‘‘ಅಯಞ್ಚ ಪಾಠಿಕೋ ಭಿಕ್ಖು, ಸಬ್ಬಪಾಠಿಸ್ಸ ಸಾಸನೇ;
ವಿನಯೇ ಅಗ್ಗನಿಕ್ಖಿತ್ತೋ, ತಂ ಠಾನಂ ಪತ್ಥಯೇ ಅಹಂ.
‘‘ಇದಂ ¶ ಮೇ ಅಮಿತಂ ಭೋಗಂ, ಅಕ್ಖೋಭಂ ಸಾಗರೂಪಮಂ;
ತೇನ ಭೋಗೇನ ಬುದ್ಧಸ್ಸ, ಆರಾಮಂ ಮಾಪಯೇ ಅಹಂ.
‘‘ಸೋಭನಂ ನಾಮ ಆರಾಮಂ, ನಗರಸ್ಸ ಪುರತ್ಥತೋ;
ಕಿಣಿತ್ವಾ [ಕೀತ್ವಾ (ಸೀ.), ಕಿತ್ವಾ (ಕ.)] ಸತಸಹಸ್ಸೇನ, ಸಙ್ಘಾರಾಮಂ ಅಮಾಪಯಿಂ.
‘‘ಕೂಟಾಗಾರೇ ¶ ಚ ಪಾಸಾದೇ, ಮಣ್ಡಪೇ ಹಮ್ಮಿಯೇ ಗುಹಾ;
ಚಙ್ಕಮೇ ಸುಕತೇ ಕತ್ವಾ, ಸಙ್ಘಾರಾಮಂ ಅಮಾಪಯಿಂ.
‘‘ಜನ್ತಾಘರಂ ¶ ಅಗ್ಗಿಸಾಲಂ, ಅಥೋ ಉದಕಮಾಳಕಂ;
ನ್ಹಾನಘರಂ ಮಾಪಯಿತ್ವಾ, ಭಿಕ್ಖುಸಙ್ಘಸ್ಸದಾಸಹಂ.
‘‘ಆಸನ್ದಿಯೋ ಪೀಠಕೇ ಚ, ಪರಿಭೋಗೇ ಚ ಭಾಜನೇ;
ಆರಾಮಿಕಞ್ಚ ಭೇಸಜ್ಜಂ, ಸಬ್ಬಮೇತಂ ಅದಾಸಹಂ.
‘‘ಆರಕ್ಖಂ ಪಟ್ಠಪೇತ್ವಾನ, ಪಾಕಾರಂ ಕಾರಯಿಂ ದಳ್ಹಂ;
ಮಾ ನಂ ಕೋಚಿ ವಿಹೇಠೇಸಿ, ಸನ್ತಚಿತ್ತಾನ ತಾದಿನಂ.
‘‘ಸತಸಹಸ್ಸೇನಾವಾಸಂ [ಆವಾಸಂ ಸತಸಹಸ್ಸೇನ (ಸೀ.), ಆವಾಸೇ ಸತಸಹಸ್ಸೇ (ಸ್ಯಾ.)], ಸಙ್ಘಾರಾಮೇ ಅಮಾಪಯಿಂ;
ವೇಪುಲ್ಲಂ ತಂ ಮಾಪಯಿತ್ವಾ [ವೇಪುಲ್ಲತಂ ಪಾಪಯಿತ್ವಾ (ಸೀ.)], ಸಮ್ಬುದ್ಧಂ ಉಪನಾಮಯಿಂ.
‘‘ನಿಟ್ಠಾಪಿತೋ ಮಯಾರಾಮೋ, ಸಮ್ಪಟಿಚ್ಛ ತುವಂ ಮುನಿ;
ನಿಯ್ಯಾದೇಸ್ಸಾಮಿ ತಂ ವೀರ [ತೇ ವೀರ (ಸೀ.), ತಂ ಧೀರ (ಸ್ಯಾ.)], ಅಧಿವಾಸೇಹಿ ಚಕ್ಖುಮ.
‘‘ಪದುಮುತ್ತರೋ ಲೋಕವಿದೂ, ಆಹುತೀನಂ ಪಟಿಗ್ಗಹೋ;
ಮಮ ಸಙ್ಕಪ್ಪಮಞ್ಞಾಯ, ಅಧಿವಾಸೇಸಿ ನಾಯಕೋ.
‘‘ಅಧಿವಾಸನಮಞ್ಞಾಯ, ಸಬ್ಬಞ್ಞುಸ್ಸ ಮಹೇಸಿನೋ;
ಭೋಜನಂ ಪಟಿಯಾದೇತ್ವಾ, ಕಾಲಮಾರೋಚಯಿಂ ಅಹಂ.
‘‘ಆರೋಚಿತಮ್ಹಿ ಕಾಲಮ್ಹಿ, ಪದುಮುತ್ತರನಾಯಕೋ;
ಖೀಣಾಸವಸಹಸ್ಸೇಹಿ, ಆರಾಮಂ ಮೇ ಉಪಾಗಮಿ.
‘‘ನಿಸಿನ್ನಂ ¶ ಕಾಲಮಞ್ಞಾಯ, ಅನ್ನಪಾನೇನ ತಪ್ಪಯಿಂ;
ಭುತ್ತಾವಿಂ ಕಾಲಮಞ್ಞಾಯ, ಇದಂ ವಚನಮಬ್ರವಿಂ.
‘‘ಕೀತೋ ಸತಸಹಸ್ಸೇನ, ತತ್ತಕೇನೇವ ಕಾರಿತೋ;
ಸೋಭನೋ ನಾಮ ಆರಾಮೋ, ಸಮ್ಪಟಿಚ್ಛ ತುವಂ ಮುನಿ.
‘‘ಇಮಿನಾರಾಮದಾನೇನ ¶ , ಚೇತನಾಪಣಿಧೀಹಿ ಚ;
ಭವೇ ನಿಬ್ಬತ್ತಮಾನೋಹಂ, ಲಭಾಮಿ ಮಮ ಪತ್ಥಿತಂ.
‘‘ಪಟಿಗ್ಗಹೇತ್ವಾ ¶ ಸಮ್ಬುದ್ಧೋ, ಸಙ್ಘಾರಾಮಂ ಸುಮಾಪಿತಂ;
ಭಿಕ್ಖುಸಙ್ಘೇ ನಿಸೀದಿತ್ವಾ, ಇದಂ ವಚನಮಬ್ರವಿ.
‘‘ಯೋ ಸೋ ಬುದ್ಧಸ್ಸ ಪಾದಾಸಿ, ಸಙ್ಘಾರಾಮಂ ಸುಮಾಪಿತಂ;
ತಮಹಂ ಕಿತ್ತಯಿಸ್ಸಾಮಿ, ಸುಣಾಥ ಮಮ ಭಾಸತೋ.
‘‘ಹತ್ಥೀ ¶ ಅಸ್ಸಾ ರಥಾ ಪತ್ತೀ, ಸೇನಾ ಚ ಚತುರಙ್ಗಿನೀ;
ಪರಿವಾರೇಸ್ಸನ್ತಿಮಂ ನಿಚ್ಚಂ, ಸಙ್ಘಾರಾಮಸ್ಸಿದಂ ಫಲಂ.
‘‘ಸಟ್ಠಿ ತೂರಸಹಸ್ಸಾನಿ [ತುರಿಯಸಹಸ್ಸಾನಿ (ಸೀ. ಸ್ಯಾ.)], ಭೇರಿಯೋ ಸಮಲಙ್ಕತಾ;
ಪರಿವಾರೇಸ್ಸನ್ತಿಮಂ ನಿಚ್ಚಂ, ಸಙ್ಘಾರಾಮಸ್ಸಿದಂ ಫಲಂ.
‘‘ಛಳಸೀತಿಸಹಸ್ಸಾನಿ, ನಾರಿಯೋ ಸಮಲಙ್ಕತಾ;
ವಿಚಿತ್ತವತ್ಥಾಭರಣಾ, ಆಮುತ್ತಮಣಿಕುಣ್ಡಲಾ.
‘‘ಅಳಾರಪಮ್ಹಾ ಹಸುಲಾ, ಸುಸಞ್ಞಾ ತನುಮಜ್ಝಿಮಾ;
ಪರಿವಾರೇಸ್ಸನ್ತಿಮಂ ನಿಚ್ಚಂ, ಸಙ್ಘಾರಾಮಸ್ಸಿದಂ ಫಲಂ.
‘‘ತಿಂಸಕಪ್ಪಸಹಸ್ಸಾನಿ, ದೇವಲೋಕೇ ರಮಿಸ್ಸತಿ;
ಸಹಸ್ಸಕ್ಖತ್ತುಂ ದೇವಿನ್ದೋ, ದೇವರಜ್ಜಂ ಕರಿಸ್ಸತಿ.
‘‘ದೇವರಾಜೇನ ಪತ್ತಬ್ಬಂ, ಸಬ್ಬಂ ಪಟಿಲಭಿಸ್ಸತಿ;
ಅನೂನಭೋಗೋ ಹುತ್ವಾನ, ದೇವರಜ್ಜಂ ಕರಿಸ್ಸತಿ.
‘‘ಸಹಸ್ಸಕ್ಖತ್ತುಂ ಚಕ್ಕವತ್ತೀ, ರಾಜಾ ರಟ್ಠೇ ಭವಿಸ್ಸತಿ;
ಪಥಬ್ಯಾ ರಜ್ಜಂ ವಿಪುಲಂ, ಗಣನಾತೋ ಅಸಙ್ಖಿಯಂ.
‘‘ಕಪ್ಪಸತಸಹಸ್ಸಮ್ಹಿ ¶ , ಓಕ್ಕಾಕಕುಲಸಮ್ಭವೋ;
ಗೋತಮೋ ನಾಮ ಗೋತ್ತೇನ, ಸತ್ಥಾ ಲೋಕೇ ಭವಿಸ್ಸತಿ.
‘‘ತಸ್ಸ ¶ ಧಮ್ಮೇಸು ದಾಯಾದೋ, ಓರಸೋ ಧಮ್ಮನಿಮ್ಮಿತೋ;
ಉಪಾಲಿ ನಾಮ ನಾಮೇನ, ಹೇಸ್ಸತಿ ಸತ್ಥು ಸಾವಕೋ.
‘‘ವಿನಯೇ ಪಾರಮಿಂ ಪತ್ವಾ, ಠಾನಾಠಾನೇ ಚ ಕೋವಿದೋ;
ಜಿನಸಾಸನಂ ಧಾರೇನ್ತೋ, ವಿಹರಿಸ್ಸತಿನಾಸವೋ.
‘‘ಸಬ್ಬಮೇತಂ ಅಭಿಞ್ಞಾಯ, ಗೋತಮೋ ಸಕ್ಯಪುಙ್ಗವೋ;
ಭಿಕ್ಖುಸಙ್ಘೇ ನಿಸೀದಿತ್ವಾ, ಏತದಗ್ಗೇ ಠಪೇಸ್ಸತಿ.
‘‘ಅಪರಿಮೇಯ್ಯುಪಾದಾಯ, ಪತ್ಥೇಮಿ ತವ ಸಾಸನಂ;
ಸೋ ಮೇ ಅತ್ಥೋ ಅನುಪ್ಪತ್ತೋ, ಸಬ್ಬಸಂಯೋಜನಕ್ಖಯೋ.
‘‘ಯಥಾ ¶ ಸೂಲಾವುತೋ ಪೋಸೋ, ರಾಜದಣ್ಡೇನ ತಜ್ಜಿತೋ;
ಸೂಲೇ ಸಾತಂ ಅವಿನ್ದನ್ತೋ, ಪರಿಮುತ್ತಿಂವ ಇಚ್ಛತಿ.
‘‘ತಥೇವಾಹಂ ¶ ಮಹಾವೀರ, ಭವದಣ್ಡೇನ ತಜ್ಜಿತೋ;
ಕಮ್ಮಸೂಲಾವುತೋ ಸನ್ತೋ, ಪಿಪಾಸಾವೇದನಟ್ಟಿತೋ.
‘‘ಭವೇ ಸಾತಂ ನ ವಿನ್ದಾಮಿ, ಡಯ್ಹನ್ತೋ ತೀಹಿ ಅಗ್ಗಿಭಿ;
ಪರಿಮುತ್ತಿಂ ಗವೇಸಾಮಿ, ಯಥಾಪಿ ರಾಜದಣ್ಡಿತೋ.
‘‘ಯಥಾ ¶ ವಿಸಾದೋ ಪುರಿಸೋ, ವಿಸೇನ ಪರಿಪೀಳಿತೋ;
ಅಗದಂ ಸೋ ಗವೇಸೇಯ್ಯ, ವಿಸಘಾತಾಯುಪಾಲನಂ [ವಿಸಘಾತಾಯುಪಾಯನಂ (ಸ್ಯಾ. ಕ.)].
‘‘ಗವೇಸಮಾನೋ ಪಸ್ಸೇಯ್ಯ, ಅಗದಂ ವಿಸಘಾತಕಂ;
ತಂ ಪಿವಿತ್ವಾ ಸುಖೀ ಅಸ್ಸ, ವಿಸಮ್ಹಾ ಪರಿಮುತ್ತಿಯಾ.
‘‘ತಥೇವಾಹಂ ಮಹಾವೀರ, ಯಥಾ ವಿಸಹತೋ ನರೋ;
ಸಮ್ಪೀಳಿತೋ ಅವಿಜ್ಜಾಯ, ಸದ್ಧಮ್ಮಾಗದಮೇಸಹಂ.
‘‘ಧಮ್ಮಾಗದಂ ಗವೇಸನ್ತೋ, ಅದ್ದಕ್ಖಿಂ ಸಕ್ಯಸಾಸನಂ;
ಅಗ್ಗಂ ಸಬ್ಬೋಸಧಾನಂ ತಂ, ಸಬ್ಬಸಲ್ಲವಿನೋದನಂ.
‘‘ಧಮ್ಮೋಸಧಂ ಪಿವಿತ್ವಾನ, ವಿಸಂ ಸಬ್ಬಂ ಸಮೂಹನಿಂ;
ಅಜರಾಮರಂ ಸೀತಿಭಾವಂ, ನಿಬ್ಬಾನಂ ಫಸ್ಸಯಿಂ ಅಹಂ.
‘‘ಯಥಾ ಭೂತಟ್ಟಿತೋ ಪೋಸೋ, ಭೂತಗ್ಗಾಹೇನ ಪೀಳಿತೋ;
ಭೂತವೇಜ್ಜಂ ಗವೇಸೇಯ್ಯ, ಭೂತಸ್ಮಾ ಪರಿಮುತ್ತಿಯಾ.
‘‘ಗವೇಸಮಾನೋ ¶ ಪಸ್ಸೇಯ್ಯ, ಭೂತವಿಜ್ಜಾಸು ಕೋವಿದಂ;
ತಸ್ಸ ಸೋ ವಿಹನೇ ಭೂತಂ, ಸಮೂಲಞ್ಚ ವಿನಾಸಯೇ.
‘‘ತಥೇವಾಹಂ ¶ ಮಹಾವೀರ, ತಮಗ್ಗಾಹೇನ ಪೀಳಿತೋ;
ಞಾಣಾಲೋಕಂ ಗವೇಸಾಮಿ, ತಮತೋ ಪರಿಮುತ್ತಿಯಾ.
‘‘ಅಥದ್ದಸಂ ಸಕ್ಯಮುನಿಂ, ಕಿಲೇಸತಮಸೋಧನಂ;
ಸೋ ಮೇ ತಮಂ ವಿನೋದೇಸಿ, ಭೂತವೇಜ್ಜೋವ ಭೂತಕಂ.
‘‘ಸಂಸಾರಸೋತಂ ಸಞ್ಛಿನ್ದಿಂ, ತಣ್ಹಾಸೋತಂ ನಿವಾರಯಿಂ;
ಭವಂ ಉಗ್ಘಾಟಯಿಂ ಸಬ್ಬಂ, ಭೂತವೇಜ್ಜೋವ ಮೂಲತೋ.
‘‘ಗರುಳೋ ಯಥಾ ಓಪತತಿ, ಪನ್ನಗಂ ಭಕ್ಖಮತ್ತನೋ;
ಸಮನ್ತಾ ಯೋಜನಸತಂ, ವಿಕ್ಖೋಭೇತಿ ಮಹಾಸರಂ.
‘‘ಪನ್ನಗಂ ¶ ಸೋ ಗಹೇತ್ವಾನ, ಅಧೋಸೀಸಂ ವಿಹೇಠಯಂ;
ಆದಾಯ ಸೋ ಪಕ್ಕಮತಿ, ಯೇನಕಾಮಂ ವಿಹಙ್ಗಮೋ.
‘‘ತಥೇವಾಹಂ ಮಹಾವೀರ, ಯಥಾಪಿ ಗರುಳೋ ಬಲೀ;
ಅಸಙ್ಖತಂ ಗವೇಸನ್ತೋ, ದೋಸೇ ವಿಕ್ಖಾಲಯಿಂ ಅಹಂ.
‘‘ದಿಟ್ಠೋ ಅಹಂ ಧಮ್ಮವರಂ, ಸನ್ತಿಪದಮನುತ್ತರಂ;
ಆದಾಯ ವಿಹರಾಮೇತಂ, ಗರುಳೋ ಪನ್ನಗಂ ಯಥಾ.
‘‘ಆಸಾವತೀ ನಾಮ ಲತಾ, ಜಾತಾ ಚಿತ್ತಲತಾವನೇ;
ತಸ್ಸಾ ವಸ್ಸಸಹಸ್ಸೇನ, ಏಕಂ ನಿಬ್ಬತ್ತತೇ ಫಲಂ.
‘‘ತಂ ¶ ದೇವಾ ಪಯಿರುಪಾಸನ್ತಿ, ತಾವದೂರಫಲೇ ಸತಿ;
ದೇವಾನಂ ಸಾ ಪಿಯಾ ಏವಂ, ಆಸಾವತೀ ಲತುತ್ತಮಾ.
‘‘ಸತಸಹಸ್ಸುಪಾದಾಯ, ತಾಹಂ ಪರಿಚರೇ ಮುನಿ;
ಸಾಯಂ ಪಾತಂ ನಮಸ್ಸಾಮಿ, ದೇವಾ ಆಸಾವತಿಂ ಯಥಾ.
‘‘ಅವಞ್ಝಾ ಪಾರಿಚರಿಯಾ, ಅಮೋಘಾ ಚ ನಮಸ್ಸನಾ;
ದೂರಾಗತಮ್ಪಿ ಮಂ ಸನ್ತಂ, ಖಣೋಯಂ ನ ವಿರಾಧಯಿ.
‘‘ಪಟಿಸನ್ಧಿಂ ನ ಪಸ್ಸಾಮಿ, ವಿಚಿನನ್ತೋ ಭವೇ ಅಹಂ;
ನಿರೂಪಧಿ ವಿಪ್ಪಮುತ್ತೋ [ವಿಪ್ಪಯುತ್ತೋ (ಕ.)], ಉಪಸನ್ತೋ ಚರಾಮಹಂ.
‘‘ಯಥಾಪಿ ¶ ಪದುಮಂ ನಾಮ, ಸೂರಿಯರಂಸೇನ ಪುಪ್ಫತಿ;
ತಥೇವಾಹಂ ಮಹಾವೀರ, ಬುದ್ಧರಂಸೇನ ಪುಪ್ಫಿತೋ.
‘‘ಯಥಾ ಬಲಾಕಯೋನಿಮ್ಹಿ, ನ ವಿಜ್ಜತಿ ಪುಮೋ [ಪುಮಾ (ಸೀ. ಸ್ಯಾ.)] ಸದಾ;
ಮೇಘೇಸು ಗಜ್ಜಮಾನೇಸು, ಗಬ್ಭಂ ಗಣ್ಹನ್ತಿ ತಾ ಸದಾ.
‘‘ಚಿರಮ್ಪಿ ಗಬ್ಭಂ ಧಾರೇನ್ತಿ, ಯಾವ ಮೇಘೋ ನ ಗಜ್ಜತಿ;
ಭಾರತೋ ಪರಿಮುಚ್ಚನ್ತಿ, ಯದಾ ಮೇಘೋ ಪವಸ್ಸತಿ.
‘‘ಪದುಮುತ್ತರಬುದ್ಧಸ್ಸ ¶ , ಧಮ್ಮಮೇಘೇನ ಗಜ್ಜತೋ;
ಸದ್ದೇನ ಧಮ್ಮಮೇಘಸ್ಸ, ಧಮ್ಮಗಬ್ಭಂ ಅಗಣ್ಹಹಂ.
ಸತಸಹಸ್ಸುಪಾದಾಯ, ಪುಞ್ಞಗಬ್ಭಂ ಧರೇಮಹಂ;
ನಪ್ಪಮುಚ್ಚಾಮಿ ಭಾರತೋ, ಧಮ್ಮಮೇಘೋ ನ ಗಜ್ಜತಿ.
‘‘ಯದಾ ತುವಂ ಸಕ್ಯಮುನಿ, ರಮ್ಮೇ ಕಪಿಲವತ್ಥವೇ;
ಗಜ್ಜಸಿ ಧಮ್ಮಮೇಘೇನ, ಭಾರತೋ ಪರಿಮುಚ್ಚಹಂ.
‘‘ಸುಞ್ಞತಂ ¶ ಅನಿಮಿತ್ತಞ್ಚ, ತಥಾಪ್ಪಣಿಹಿತಮ್ಪಿ ಚ;
ಚತುರೋ ಚ ಫಲೇ ಸಬ್ಬೇ, ಧಮ್ಮೇವಂ ವಿಜನಯಿಂ [ವಿಜಟಯಿಂ (ಕ.) ಬಲಾಕಾನಂ ವಿಜಾಯನೂಪಮಾಯ ಸಂಸನ್ದೇತ್ವಾ ಅತ್ಥೋ ವೇದಿತಬ್ಬೋ] ಅಹಂ.
ದುತಿಯಭಾಣವಾರಂ.
‘‘ಅಪರಿಮೇಯ್ಯುಪಾದಾಯ, ಪತ್ಥೇಮಿ ತವ ಸಾಸನಂ;
ಸೋ ಮೇ ಅತ್ಥೋ ಅನುಪ್ಪತ್ತೋ, ಸನ್ತಿಪದಮನುತ್ತರಂ.
‘‘ವಿನಯೇ ¶ ಪಾರಮಿಂ ಪತ್ತೋ, ಯಥಾಪಿ ಪಾಠಿಕೋ ಇಸಿ;
ನ ಮೇ ಸಮಸಮೋ ಅತ್ಥಿ, ಧಾರೇಮಿ ಸಾಸನಂ ಅಹಂ.
‘‘ವಿನಯೇ ಖನ್ಧಕೇ ಚಾಪಿ, ತಿಕಚ್ಛೇದೇ ಚ ಪಞ್ಚಕೇ [ಪಞ್ಚಮೇ (ಸೀ.)];
ಏತ್ಥ ಮೇ ವಿಮತಿ ನತ್ಥಿ, ಅಕ್ಖರೇ ಬ್ಯಞ್ಜನೇಪಿ ವಾ.
‘‘ನಿಗ್ಗಹೇ ಪಟಿಕಮ್ಮೇ ಚ, ಠಾನಾಠಾನೇ ಚ ಕೋವಿದೋ;
ಓಸಾರಣೇ ವುಟ್ಠಾಪನೇ, ಸಬ್ಬತ್ಥ ಪಾರಮಿಂ ಗತೋ.
‘‘ವಿನಯೇ ಖನ್ಧಕೇ ವಾಪಿ, ನಿಕ್ಖಿಪಿತ್ವಾ ಪದಂ ಅಹಂ;
ಉಭತೋ ವಿನಿವೇಠೇತ್ವಾ, ರಸತೋ ಓಸರೇಯ್ಯಹಂ.
‘‘ನಿರುತ್ತಿಯಾ ¶ ¶ ಸುಕುಸಲೋ, ಅತ್ಥಾನತ್ಥೇ ಚ ಕೋವಿದೋ;
ಅನಞ್ಞಾತಂ ಮಯಾ ನತ್ಥಿ, ಏಕಗ್ಗೋ ಸತ್ಥು ಸಾಸನೇ.
‘‘ರೂಪದಕ್ಖೋ [ರೂಪರಕ್ಖೋ (?) ಮಿಲಿನ್ದಪಞ್ಹೋ ಧಮ್ಮನಗರಾಧಿಕಾರೇ ಪಸ್ಸಿತಬ್ಬಂ] ಅಹಂ ಅಜ್ಜ, ಸಕ್ಯಪುತ್ತಸ್ಸ ಸಾಸನೇ;
ಕಙ್ಖಂ ಸಬ್ಬಂ ವಿನೋದೇಮಿ, ಛಿನ್ದಾಮಿ ಸಬ್ಬಸಂಸಯಂ.
‘‘ಪದಂ ಅನುಪದಞ್ಚಾಪಿ, ಅಕ್ಖರಞ್ಚಾಪಿ ಬ್ಯಞ್ಜನಂ;
ನಿದಾನೇ ಪರಿಯೋಸಾನೇ, ಸಬ್ಬತ್ಥ ಕೋವಿದೋ ಅಹಂ.
‘‘ಯಥಾಪಿ ರಾಜಾ ಬಲವಾ, ನಿಗ್ಗಣ್ಹಿತ್ವಾ ಪರನ್ತಪೇ;
ವಿಜಿನಿತ್ವಾನ ಸಙ್ಗಾಮಂ, ನಗರಂ ತತ್ಥ ಮಾಪಯೇ.
‘‘ಪಾಕಾರಂ ಪರಿಖಞ್ಚಾಪಿ, ಏಸಿಕಂ ದ್ವಾರಕೋಟ್ಠಕಂ;
ಅಟ್ಟಾಲಕೇ ಚ ವಿವಿಧೇ, ಕಾರಯೇ ನಗರೇ ಬಹೂ.
‘‘ಸಿಙ್ಘಾಟಕಂ ಚಚ್ಚರಞ್ಚ, ಸುವಿಭತ್ತನ್ತರಾಪಣಂ;
ಕಾರಯೇಯ್ಯ ಸಭಂ ತತ್ಥ, ಅತ್ಥಾನತ್ಥವಿನಿಚ್ಛಯಂ.
‘‘ನಿಗ್ಘಾತತ್ಥಂ ಅಮಿತ್ತಾನಂ, ಛಿದ್ದಾಛಿದ್ದಞ್ಚ ಜಾನಿತುಂ;
ಬಲಕಾಯಸ್ಸ ರಕ್ಖಾಯ, ಸೇನಾಪಚ್ಚಂ ಠಪೇತಿ [ಥಪೇಸಿ (ಕ.)] ಸೋ.
‘‘ಆರಕ್ಖತ್ಥಾಯ ¶ ಭಣ್ಡಸ್ಸ, ನಿಧಾನಕುಸಲಂ ನರಂ;
ಮಾ ಮೇ ಭಣ್ಡಂ ವಿನಸ್ಸೀತಿ, ಭಣ್ಡರಕ್ಖಂ ಠಪೇತಿ ಸೋ.
‘‘ಮಮತ್ತೋ [ಮಾಮಕೋ (ಸೀ.), ಸಮಗ್ಗೋ (ಸ್ಯಾ.)]
ಹೋತಿ ಯೋ ರಞ್ಞೋ, ವುದ್ಧಿಂ ಯಸ್ಸ ಚ ಇಚ್ಛತಿ.
ತಸ್ಸಾಧಿಕರಣಂ ದೇತಿ, ಮಿತ್ತಸ್ಸ ಪಟಿಪಜ್ಜಿತುಂ.
‘‘ಉಪ್ಪಾತೇಸು ನಿಮಿತ್ತೇಸು, ಲಕ್ಖಣೇಸು ಚ ಕೋವಿದಂ;
ಅಜ್ಝಾಯಕಂ ಮನ್ತಧರಂ, ಪೋರೋಹಿಚ್ಚೇ ಠಪೇತಿ ಸೋ.
‘‘ಏತೇಹಙ್ಗೇಹಿ ¶ ¶ ಸಮ್ಪನ್ನೋ, ಖತ್ತಿಯೋತಿ ಪವುಚ್ಚತಿ;
ಸದಾ ರಕ್ಖನ್ತಿ ರಾಜಾನಂ, ಚಕ್ಕವಾಕೋವ ದುಕ್ಖಿತಂ.
‘‘ತಥೇವ ತ್ವಂ ಮಹಾವೀರ, ಹತಾಮಿತ್ತೋವ ಖತ್ತಿಯೋ;
ಸದೇವಕಸ್ಸ ಲೋಕಸ್ಸ, ಧಮ್ಮರಾಜಾತಿ ವುಚ್ಚತಿ.
‘‘ತಿತ್ಥಿಯೇ ನಿಹನಿತ್ವಾನ [ನೀಹರಿತ್ವಾನ (ಸ್ಯಾ. ಕ.)], ಮಾರಞ್ಚಾಪಿ ಸಸೇನಕಂ;
ತಮನ್ಧಕಾರಂ ವಿಧಮಿತ್ವಾ, ಧಮ್ಮನಗರಂ ಅಮಾಪಯಿ.
‘‘ಸೀಲಂ ¶ ಪಾಕಾರಕಂ ತತ್ಥ, ಞಾಣಂ ತೇ ದ್ವಾರಕೋಟ್ಠಕಂ;
ಸದ್ಧಾ ತೇ ಏಸಿಕಾ ವೀರ, ದ್ವಾರಪಾಲೋ ಚ ಸಂವರೋ.
‘‘ಸತಿಪಟ್ಠಾನಮಟ್ಟಾಲಂ, ಪಞ್ಞಾ ತೇ ಚಚ್ಚರಂ ಮುನೇ;
ಇದ್ಧಿಪಾದಞ್ಚ ಸಿಙ್ಘಾಟಂ, ಧಮ್ಮವೀಥಿ ಸುಮಾಪಿತಾ.
‘‘ಸುತ್ತನ್ತಂ ಅಭಿಧಮ್ಮಞ್ಚ, ವಿನಯಞ್ಚಾಪಿ ಕೇವಲಂ;
ನವಙ್ಗಂ ಬುದ್ಧವಚನಂ, ಏಸಾ ಧಮ್ಮಸಭಾ ತವ.
‘‘ಸುಞ್ಞತಂ ಅನಿಮಿತ್ತಞ್ಚ, ವಿಹಾರಞ್ಚಪ್ಪಣೀಹಿತಂ;
ಆನೇಞ್ಜಞ್ಚ ನಿರೋಧೋ ಚ, ಏಸಾ ಧಮ್ಮಕುಟೀ ತವ.
‘‘ಪಞ್ಞಾಯ ಅಗ್ಗೋ ನಿಕ್ಖಿತ್ತೋ [ಅಗ್ಗನಿಕ್ಖಿತ್ತೋ (ಸೀ.)], ಪಟಿಭಾನೇ ಚ ಕೋವಿದೋ;
ಸಾರಿಪುತ್ತೋತಿ ನಾಮೇನ, ಧಮ್ಮಸೇನಾಪತೀ ತವ.
‘‘ಚುತೂಪಪಾತಕುಸಲೋ, ಇದ್ಧಿಯಾ ಪಾರಮಿಂ ಗತೋ;
ಕೋಲಿತೋ ನಾಮ ನಾಮೇನ, ಪೋರೋಹಿಚ್ಚೋ ತವಂ ಮುನೇ.
‘‘ಪೋರಾಣಕವಂಸಧರೋ, ಉಗ್ಗತೇಜೋ ದುರಾಸದೋ;
ಧುತವಾದೀಗುಣೇನಗ್ಗೋ, ಅಕ್ಖದಸ್ಸೋ ತವಂ ಮುನೇ.
‘‘ಬಹುಸ್ಸುತೋ ¶ ಧಮ್ಮಧರೋ, ಸಬ್ಬಪಾಠೀ ಚ ಸಾಸನೇ;
ಆನನ್ದೋ ನಾಮ ನಾಮೇನ, ಧಮ್ಮಾರಕ್ಖೋ [ಧಮ್ಮರಕ್ಖೋ (ಸ್ಯಾ.)] ತವಂ ಮುನೇ.
‘‘ಏತೇ ¶ ಸಬ್ಬೇ ಅತಿಕ್ಕಮ್ಮ, ಪಮೇಸಿ ಭಗವಾ ಮಮಂ;
ವಿನಿಚ್ಛಯಂ ಮೇ ಪಾದಾಸಿ, ವಿನಯೇ ವಿಞ್ಞುದೇಸಿತಂ.
‘‘ಯೋ ಕೋಚಿ ವಿನಯೇ ಪಞ್ಹಂ, ಪುಚ್ಛತಿ ಬುದ್ಧಸಾವಕೋ;
ತತ್ಥ ಮೇ ಚಿನ್ತನಾ ನತ್ಥಿ, ತಞ್ಞೇವತ್ಥಂ ಕಥೇಮಹಂ.
‘‘ಯಾವತಾ ಬುದ್ಧಖೇತ್ತಮ್ಹಿ, ಠಪೇತ್ವಾ ತಂ ಮಹಾಮುನಿ;
ವಿನಯೇ ಮಾದಿಸೋ ನತ್ಥಿ, ಕುತೋ ಭಿಯ್ಯೋ ಭವಿಸ್ಸತಿ.
‘‘ಭಿಕ್ಖುಸಙ್ಘೇ ¶ ನಿಸೀದಿತ್ವಾ, ಏವಂ ಗಜ್ಜತಿ ಗೋತಮೋ;
ಉಪಾಲಿಸ್ಸ ಸಮೋ ನತ್ಥಿ, ವಿನಯೇ ಖನ್ಧಕೇಸು ಚ.
‘‘ಯಾವತಾ ಬುದ್ಧಭಣಿತಂ, ನವಙ್ಗಂ ಸತ್ಥುಸಾಸನಂ;
ವಿನಯೋಗಧಂ ತಂ [ವಿನಯೋಗಧಿತಂ (ಸೀ. ಅಟ್ಠ.), ವಿನಯೇ ಕಥಿತಂ (ಸ್ಯಾ.)] ಸಬ್ಬಂ,
ವಿನಯಮೂಲಪಸ್ಸಿನೋ [ವಿನಯಂ ಮೂಲನ್ತಿ ಪಸ್ಸತೋ (ಸೀ.)].
‘‘ಮಮ ¶ ಕಮ್ಮಂ ಸರಿತ್ವಾನ, ಗೋತಮೋ ಸಕ್ಯಪುಙ್ಗವೋ;
ಭಿಕ್ಖುಸಙ್ಘೇ ನಿಸೀದಿತ್ವಾ, ಏತದಗ್ಗೇ ಠಪೇಸಿ ಮಂ.
‘‘ಸತಸಹಸ್ಸುಪಾದಾಯ, ಇಮಂ ಠಾನಂ ಅಪತ್ಥಯಿಂ;
ಸೋ ಮೇ ಅತ್ಥೋ ಅನುಪ್ಪತ್ತೋ, ವಿನಯೇ ಪಾರಮಿಂ ಗತೋ.
‘‘ಸಕ್ಯಾನಂ ನನ್ದಿಜನನೋ, ಕಪ್ಪಕೋ ಆಸಹಂ ಪುರೇ;
ವಿಜಹಿತ್ವಾನ ತಂ ಜಾತಿಂ, ಪುತ್ತೋ ಜಾತೋ ಮಹೇಸಿನೋ.
‘‘ಇತೋ ದುತಿಯಕೇ ಕಪ್ಪೇ, ಅಞ್ಜಸೋ ನಾಮ ಖತ್ತಿಯೋ;
ಅನನ್ತತೇಜೋ ಅಮಿತಯಸೋ, ಭೂಮಿಪಾಲೋ ಮಹದ್ಧನೋ.
‘‘ತಸ್ಸ ¶ ರಞ್ಞೋ ಅಹಂ ಪುತ್ತೋ, ಚನ್ದನೋ ನಾಮ ಖತ್ತಿಯೋ;
ಜಾತಿಮದೇನುಪತ್ಥದ್ಧೋ, ಯಸಭೋಗಮದೇನ ಚ.
‘‘ನಾಗಸತಸಹಸ್ಸಾನಿ, ಸಬ್ಬಾಲಙ್ಕಾರಭೂಸಿತಾ;
ತಿಧಾಪಭಿನ್ನಾ ಮಾತಙ್ಗಾ, ಪರಿವಾರೇನ್ತಿ ಮಂ ಸದಾ.
‘‘ಸಬಲೇಹಿ ಪರೇತೋಹಂ, ಉಯ್ಯಾನಂ ಗನ್ತುಕಾಮಕೋ;
ಆರುಯ್ಹ ಸಿರಿಕಂ ನಾಗಂ, ನಗರಾ ನಿಕ್ಖಮಿಂ ತದಾ.
‘‘ಚರಣೇನ ಚ ಸಮ್ಪನ್ನೋ, ಗುತ್ತದ್ವಾರೋ ಸುಸಂವುತೋ;
ದೇವಲೋ ನಾಮ ಸಮ್ಬುದ್ಧೋ, ಆಗಚ್ಛಿ ಪುರತೋ ಮಮ.
‘‘ಪೇಸೇತ್ವಾ ಸಿರಿಕಂ ನಾಗಂ, ಬುದ್ಧಂ ಆಸಾದಯಿಂ ತದಾ;
ತತೋ ಸಞ್ಜಾತಕೋಪೋ ಸೋ [ಜಾತಕೋಪೋವ (ಸ್ಯಾ.)], ನಾಗೋ ನುದ್ಧರತೇ ಪದಂ.
‘‘ನಾಗಂ ¶ ರುಣ್ಣಮನಂ [ರುಟ್ಠಮನಂ (ಪೀ. ಅಟ್ಠ.), ದುಟ್ಠಮನಂ (ಸೀ. ಅಟ್ಠ.), ರುದ್ಧಪದಂ (?)] ದಿಸ್ವಾ, ಬುದ್ಧೇ ಕೋಧಂ ಅಕಾಸಹಂ;
ವಿಹೇಸಯಿತ್ವಾ ಸಮ್ಬುದ್ಧಂ, ಉಯ್ಯಾನಂ ಅಗಮಾಸಹಂ.
‘‘ಸಾತಂ ತತ್ಥ ನ ವಿನ್ದಾಮಿ, ಸಿರೋ ಪಜ್ಜಲಿತೋ ಯಥಾ;
ಪರಿಳಾಹೇನ ಡಯ್ಹಾಮಿ, ಮಚ್ಛೋವ ಬಳಿಸಾದಕೋ.
‘‘ಸಸಾಗರನ್ತಾ ¶ ಪಥವೀ, ಆದಿತ್ತಾ ವಿಯ ಹೋತಿ ಮೇ;
ಪಿತು ಸನ್ತಿಕುಪಾಗಮ್ಮ, ಇದಂ ವಚನಮಬ್ರವಿಂ.
‘‘ಆಸೀವಿಸಂವ ಕುಪಿತಂ, ಅಗ್ಗಿಕ್ಖನ್ಧಂವ ಆಗತಂ;
ಮತ್ತಂವ ಕುಞ್ಜರಂ ದನ್ತಿಂ, ಯಂ ಸಯಮ್ಭುಮಸಾದಯಿಂ.
‘‘ಆಸಾದಿತೋ ¶ ಮಯಾ ಬುದ್ಧೋ, ಘೋರೋ ಉಗ್ಗತಪೋ ಜಿನೋ;
ಪುರಾ ಸಬ್ಬೇ ವಿನಸ್ಸಾಮ, ಖಮಾಪೇಸ್ಸಾಮ ತಂ ಮುನಿಂ.
‘‘ನೋ ¶ ಚೇ ತಂ ನಿಜ್ಝಾಪೇಸ್ಸಾಮ, ಅತ್ತದನ್ತಂ ಸಮಾಹಿತಂ;
ಓರೇನ ಸತ್ತದಿವಸಾ, ರಟ್ಠಂ ಮೇ ವಿಧಮಿಸ್ಸತಿ.
‘‘ಸುಮೇಖಲೋ ಕೋಸಿಯೋ ಚ, ಸಿಗ್ಗವೋ ಚಾಪಿ ಸತ್ತಕೋ [ಸತ್ತುಕೋ (ಸೀ.)];
ಆಸಾದಯಿತ್ವಾ ಇಸಯೋ, ದುಗ್ಗತಾ ತೇ ಸರಟ್ಠಕಾ.
‘‘ಯದಾ ಕುಪ್ಪನ್ತಿ ಇಸಯೋ, ಸಞ್ಞತಾ ಬ್ರಹ್ಮಚಾರಿನೋ;
ಸದೇವಕಂ ವಿನಾಸೇನ್ತಿ, ಸಸಾಗರಂ ಸಪಬ್ಬತಂ.
‘‘ತಿಯೋಜನಸಹಸ್ಸಮ್ಹಿ, ಪುರಿಸೇ ಸನ್ನಿಪಾತಯಿಂ;
ಅಚ್ಚಯಂ ದೇಸನತ್ಥಾಯ, ಸಯಮ್ಭುಂ ಉಪಸಙ್ಕಮಿಂ.
‘‘ಅಲ್ಲವತ್ಥಾ ಅಲ್ಲಸಿರಾ, ಸಬ್ಬೇವ ಪಞ್ಜಲೀಕತಾ;
ಬುದ್ಧಸ್ಸ ಪಾದೇ ನಿಪತಿತ್ವಾ, ಇದಂ ವಚನಮಬ್ರವುಂ [ಮಬ್ರವಿಂ (ಕ.)].
‘‘ಖಮಸ್ಸು ತ್ವಂ ಮಹಾವೀರ, ಅಭಿಯಾಚತಿ ತಂ ಜನೋ;
ಪರಿಳಾಹಂ ವಿನೋದೇಹಿ, ಮಾ ನೋ ರಟ್ಠಂ ವಿನಾಸಯ.
‘‘ಸದೇವಮಾನುಸಾ ಸಬ್ಬೇ, ಸದಾನವಾ ಸರಕ್ಖಸಾ;
ಅಯೋಮಯೇನ ಕುಟೇನ, ಸಿರಂ ಭಿನ್ದೇಯ್ಯು ಮೇ ಸದಾ.
‘‘ದಕೇ [ಉದಕೇ (ಸೀ. ಸ್ಯಾ.)] ಅಗ್ಗಿ ನ ಸಣ್ಠಾತಿ, ಬೀಜಂ ಸೇಲೇ ನ ರೂಹತಿ;
ಅಗದೇ ಕಿಮಿ ನ ಸಣ್ಠಾತಿ, ಕೋಪೋ ಬುದ್ಧೇ ನ ಜಾಯತಿ.
‘‘ಯಥಾ ಚ ಭೂಮಿ ಅಚಲಾ, ಅಪ್ಪಮೇಯ್ಯೋ ಚ ಸಾಗರೋ;
ಅನನ್ತಕೋ ಚ ಆಕಾಸೋ, ಏವಂ ಬುದ್ಧಾ ಅಖೋಭಿಯಾ.
‘‘ಸದಾ ¶ ಖನ್ತಾ ಮಹಾವೀರಾ, ಖಮಿತಾ ಚ ತಪಸ್ಸಿನೋ;
ಖನ್ತಾನಂ ಖಮಿತಾನಞ್ಚ, ಗಮನಂ ತಂ [ವೋ (ಸ್ಯಾ.)] ನ ವಿಜ್ಜತಿ.
‘‘ಇದಂ ¶ ವತ್ವಾನ ಸಮ್ಬುದ್ಧೋ, ಪರಿಳಾಹಂ ವಿನೋದಯಂ;
ಮಹಾಜನಸ್ಸ ಪುರತೋ, ನಭಂ ಅಬ್ಭುಗ್ಗಮಿ ತದಾ.
‘‘ತೇನ ¶ ಕಮ್ಮೇನಹಂ ವೀರ, ಹೀನತ್ತಂ ಅಜ್ಝುಪಾಗತೋ;
ಸಮತಿಕ್ಕಮ್ಮ ತಂ ಜಾತಿಂ, ಪಾವಿಸಿಂ ಅಭಯಂ ಪುರಂ.
‘‘ತದಾಪಿ ¶ ಮಂ ಮಹಾವೀರ, ಡಯ್ಹಮಾನಂ ಸುಸಣ್ಠಿತಂ;
ಪರಿಳಾಹಂ ವಿನೋದೇಸಿ, ಸಯಮ್ಭುಞ್ಚ ಖಮಾಪಯಿಂ.
‘‘ಅಜ್ಜಾಪಿ ಮಂ ಮಹಾವೀರ, ಡಯ್ಹಮಾನಂ ತಿಹಗ್ಗಿಭಿ;
ನಿಬ್ಬಾಪೇಸಿ ತಯೋ ಅಗ್ಗೀ, ಸೀತಿಭಾವಞ್ಚ ಪಾಪಯಿಂ [ಪಾಪಯೀ (ಸೀ.)].
ಯೇಸಂ ಸೋತಾವಧಾನತ್ಥಿ, ಸುಣಾಥ ಮಮ ಭಾಸತೋ;
ಅತ್ಥಂ ತುಮ್ಹಂ ಪವಕ್ಖಾಮಿ, ಯಥಾ ದಿಟ್ಠಂ ಪದಂ ಮಮ.
‘‘ಸಯಮ್ಭುಂ ತಂ ವಿಮಾನೇತ್ವಾ, ಸನ್ತಚಿತ್ತಂ ಸಮಾಹಿತಂ;
ತೇನ ಕಮ್ಮೇನಹಂ ಅಜ್ಜ, ಜಾತೋಮ್ಹಿ ನೀಚಯೋನಿಯಂ.
‘‘ಮಾ ವೋ ಖಣಂ ವಿರಾಧೇಥ, ಖಣಾತೀತಾ ಹಿ ಸೋಚರೇ;
ಸದತ್ಥೇ ವಾಯಮೇಯ್ಯಾಥ, ಖಣೋ ವೋ ಪಟಿಪಾದಿತೋ.
‘‘ಏಕಚ್ಚಾನಞ್ಚ ವಮನಂ, ಏಕಚ್ಚಾನಂ ವಿರೇಚನಂ;
ವಿಸಂ ಹಲಾಹಲಂ ಏಕೇ, ಏಕಚ್ಚಾನಞ್ಚ ಓಸಧಂ.
‘‘ವಮನಂ ಪಟಿಪನ್ನಾನಂ, ಫಲಟ್ಠಾನಂ ವಿರೇಚನಂ;
ಓಸಧಂ ಫಲಲಾಭೀನಂ, ಪುಞ್ಞಕ್ಖೇತ್ತಂ ಗವೇಸಿನಂ.
‘‘ಸಾಸನೇನ ವಿರುದ್ಧಾನಂ, ವಿಸಂ ಹಲಾಹಲಂ ಯಥಾ;
ಆಸೀವಿಸೋ ದಿಟ್ಠವಿಸೋ [ದಟ್ಠವಿಸೋ (ಸ್ಯಾ. ಅಟ್ಠ.)], ಏವಂ ಝಾಪೇತಿ ತಂ ನರಂ.
‘‘ಸಕಿಂ ¶ ಪೀತಂ ಹಲಾಹಲಂ, ಉಪರುನ್ಧತಿ ಜೀವಿತಂ;
ಸಾಸನೇನ ವಿರುಜ್ಝಿತ್ವಾ, ಕಪ್ಪಕೋಟಿಮ್ಹಿ ಡಯ್ಹತಿ.
‘‘ಖನ್ತಿಯಾ ಅವಿಹಿಂಸಾಯ, ಮೇತ್ತಚಿತ್ತವತಾಯ ಚ;
ಸದೇವಕಂ ಸೋ ತಾರತಿ, ತಸ್ಮಾ ತೇ ಅವಿರಾಧಿಯಾ [ಅವಿರೋಧಿಯೋ (ಸೀ.), ತೇ ಅವಿರೋಧಿಯಾ (ಸ್ಯಾ.)].
‘‘ಲಾಭಾಲಾಭೇ ನ ಸಜ್ಜನ್ತಿ, ಸಮ್ಮಾನನವಿಮಾನನೇ;
ಪಥವೀಸದಿಸಾ ಬುದ್ಧಾ, ತಸ್ಮಾ ತೇ ನ ವಿರಾಧಿಯಾ [ತೇ ನ ವಿರೋಧಿಯಾ (ಸೀ. ಸ್ಯಾ.)].
‘‘ದೇವದತ್ತೇ ¶ ಚ ವಧಕೇ, ಚೋರೇ ಅಙ್ಗುಲಿಮಾಲಕೇ;
ರಾಹುಲೇ ಧನಪಾಲೇ ಚ, ಸಬ್ಬೇಸಂ ಸಮಕೋ ಮುನಿ.
‘‘ಏತೇಸಂ ¶ ಪಟಿಘೋ ನತ್ಥಿ, ರಾಗೋಮೇಸಂ ನ ವಿಜ್ಜತಿ;
ಸಬ್ಬೇಸಂ ಸಮಕೋ ಬುದ್ಧೋ, ವಧಕಸ್ಸೋರಸಸ್ಸ ಚ.
‘‘ಪನ್ಥೇ ¶ ದಿಸ್ವಾನ ಕಾಸಾವಂ, ಛಡ್ಡಿತಂ ಮೀಳ್ಹಮಕ್ಖಿತಂ;
ಸಿರಸ್ಮಿಂ ಅಞ್ಜಲಿಂ ಕತ್ವಾ, ವನ್ದಿತಬ್ಬಂ ಇಸಿದ್ಧಜಂ.
‘‘ಅಬ್ಭತೀತಾ ಚ ಯೇ ಬುದ್ಧಾ, ವತ್ತಮಾನಾ ಅನಾಗತಾ;
ಧಜೇನಾನೇನ ಸುಜ್ಝನ್ತಿ, ತಸ್ಮಾ ಏತೇ ನಮಸ್ಸಿಯಾ.
‘‘ಸತ್ಥುಕಪ್ಪಂ ಸುವಿನಯಂ, ಧಾರೇಮಿ ಹದಯೇನಹಂ;
ನಮಸ್ಸಮಾನೋ ವಿನಯಂ, ವಿಹರಿಸ್ಸಾಮಿ ಸಬ್ಬದಾ.
‘‘ವಿನಯೋ ಆಸಯೋ ಮಯ್ಹಂ, ವಿನಯೋ ಠಾನಚಙ್ಕಮಂ;
ಕಪ್ಪೇಮಿ ವಿನಯೇ ವಾಸಂ, ವಿನಯೋ ಮಮ ಗೋಚರೋ.
‘‘ವಿನಯೇ ಪಾರಮಿಪ್ಪತ್ತೋ, ಸಮಥೇ ಚಾಪಿ ಕೋವಿದೋ;
ಉಪಾಲಿ ತಂ ಮಹಾವೀರ, ಪಾದೇ ವನ್ದತಿ ಸತ್ಥುನೋ.
‘‘ಸೋ ¶ ಅಹಂ ವಿಚರಿಸ್ಸಾಮಿ, ಗಾಮಾ ಗಾಮಂ ಪುರಾ ಪುರಂ;
ನಮಸ್ಸಮಾನೋ ಸಮ್ಬುದ್ಧಂ, ಧಮ್ಮಸ್ಸ ಚ ಸುಧಮ್ಮತಂ.
‘‘ಕಿಲೇಸಾ ಝಾಪಿತಾ ಮಯ್ಹಂ, ಭವಾ ಸಬ್ಬೇ ಸಮೂಹತಾ;
ಸಬ್ಬಾಸವಾ ಪರಿಕ್ಖೀಣಾ, ನತ್ಥಿ ದಾನಿ ಪುನಬ್ಭವೋ.
‘‘ಸ್ವಾಗತಂ ವತ ಮೇ ಆಸಿ, ಬುದ್ಧಸೇಟ್ಠಸ್ಸ ಸನ್ತಿಕೇ;
ತಿಸ್ಸೋ ವಿಜ್ಜಾ ಅನುಪ್ಪತ್ತಾ, ಕತಂ ಬುದ್ಧಸ್ಸ ಸಾಸನಂ.
‘‘ಪಟಿಸಮ್ಭಿದಾ ಚತಸ್ಸೋ, ವಿಮೋಕ್ಖಾಪಿ ಚ ಅಟ್ಠಿಮೇ;
ಛಳಭಿಞ್ಞಾ ಸಚ್ಛಿಕತಾ, ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಉಪಾಲಿ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಉಪಾಲಿತ್ಥೇರಸ್ಸಾಪದಾನಂ ಛಟ್ಠಂ.
೩-೭. ಅಞ್ಞಾಸಿಕೋಣ್ಡಞ್ಞತ್ಥೇರಅಪದಾನಂ
‘‘ಪದುಮುತ್ತರಸಮ್ಬುದ್ಧಂ, ಲೋಕಜೇಟ್ಠಂ ವಿನಾಯಕಂ;
ಬುದ್ಧಭೂಮಿಮನುಪ್ಪತ್ತಂ, ಪಠಮಂ ಅದ್ದಸಂ ಅಹಂ.
‘‘ಯಾವತಾ ¶ ಬೋಧಿಯಾ ಮೂಲೇ, ಯಕ್ಖಾ ಸಬ್ಬೇ ಸಮಾಗತಾ;
ಸಮ್ಬುದ್ಧಂ ಪರಿವಾರೇತ್ವಾ, ವನ್ದನ್ತಿ ಪಞ್ಜಲೀಕತಾ.
‘‘ಸಬ್ಬೇ ¶ ¶ ದೇವಾ ತುಟ್ಠಮನಾ, ಆಕಾಸೇ ಸಞ್ಚರನ್ತಿ ತೇ;
ಬುದ್ಧೋ ಅಯಂ ಅನುಪ್ಪತ್ತೋ, ಅನ್ಧಕಾರತಮೋನುದೋ.
‘‘ತೇಸಂ ¶ ಹಾಸಪರೇತಾನಂ, ಮಹಾನಾದೋ ಅವತ್ತಥ;
ಕಿಲೇಸೇ ಝಾಪಯಿಸ್ಸಾಮ, ಸಮ್ಮಾಸಮ್ಬುದ್ಧಸಾಸನೇ.
‘‘ದೇವಾನಂ ಗಿರಮಞ್ಞಾಯ, ವಾಚಾಸಭಿಮುದೀರಿಹಂ;
ಹಟ್ಠೋ ಹಟ್ಠೇನ ಚಿತ್ತೇನ, ಆದಿಭಿಕ್ಖಮದಾಸಹಂ.
‘‘ಮಮ ಸಙ್ಕಪ್ಪಮಞ್ಞಾಯ, ಸತ್ಥಾ ಲೋಕೇ ಅನುತ್ತರೋ;
ದೇವಸಙ್ಘೇ ನಿಸೀದಿತ್ವಾ, ಇಮಾ ಗಾಥಾ ಅಭಾಸಥ.
‘‘‘ಸತ್ತಾಹಂ ಅಭಿನಿಕ್ಖಮ್ಮ, ಬೋಧಿಂ ಅಜ್ಝಗಮಂ ಅಹಂ;
ಇದಂ ಮೇ ಪಠಮಂ ಭತ್ತಂ, ಬ್ರಹ್ಮಚಾರಿಸ್ಸ ಯಾಪನಂ.
‘‘‘ತುಸಿತಾ ಹಿ ಇಧಾಗನ್ತ್ವಾ, ಯೋ ಮೇ ಭಿಕ್ಖಂ ಉಪಾನಯಿ;
ತಮಹಂ ಕಿತ್ತಯಿಸ್ಸಾಮಿ, ಸುಣೋಥ ಮಮ ಭಾಸತೋ.
‘‘‘ತಿಂಸಕಪ್ಪಸಹಸ್ಸಾನಿ [ತಿಂಸಮತ್ತೇ ಕಪ್ಪಸಗಸ್ಸೇ (ಸ್ಯಾ. ಕ.)], ದೇವರಜ್ಜಂ ಕರಿಸ್ಸತಿ;
ಸಬ್ಬೇ ದೇವೇ ಅಭಿಭೋತ್ವಾ, ತಿದಿವಂ ಆವಸಿಸ್ಸತಿ.
‘‘‘ದೇವಲೋಕಾ ಚವಿತ್ವಾನ, ಮನುಸ್ಸತ್ತಂ ಗಮಿಸ್ಸತಿ;
ಸಹಸ್ಸಧಾ ಚಕ್ಕವತ್ತೀ, ತತ್ಥ ರಜ್ಜಂ ಕರಿಸ್ಸತಿ.
‘‘‘ಕಪ್ಪಸತಸಹಸ್ಸಮ್ಹಿ, ಓಕ್ಕಾಕಕುಲಸಮ್ಭವೋ;
ಗೋತಮೋ ನಾಮ ಗೋತ್ತೇನ, ಸತ್ಥಾ ಲೋಕೇ ಭವಿಸ್ಸತಿ.
‘‘‘ತಿದಸಾ ಸೋ ಚವಿತ್ವಾನ, ಮನುಸ್ಸತ್ತಂ ಗಮಿಸ್ಸತಿ;
ಅಗಾರಾ ಪಬ್ಬಜಿತ್ವಾನ, ಛಬ್ಬಸ್ಸಾನಿ ವಸಿಸ್ಸತಿ.
‘‘‘ತತೋ ಸತ್ತಮಕೇ ವಸ್ಸೇ, ಬುದ್ಧೋ ಸಚ್ಚಂ ಕಥೇಸ್ಸತಿ;
ಕೋಣ್ಡಞ್ಞೋ ನಾಮ ನಾಮೇನ, ಪಠಮಂ ಸಚ್ಛಿಕಾಹಿತಿ’.
‘‘ನಿಕ್ಖನ್ತೇನಾನುಪಬ್ಬಜಿಂ ¶ , ಪಧಾನಂ ಸುಕತಂ ಮಯಾ;
ಕಿಲೇಸೇ ಝಾಪನತ್ಥಾಯ, ಪಬ್ಬಜಿಂ ಅನಗಾರಿಯಂ.
‘‘ಅಭಿಗನ್ತ್ವಾನ ಸಬ್ಬಞ್ಞೂ, ಬುದ್ಧೋ ಲೋಕೇ ಸದೇವಕೇ;
ಇಸಿನಾಮೇ ಮಿಗಾರಞ್ಞೇ [ಇಮಿನಾ ಮೇ ಮಹಾರಞ್ಞಂ (ಸ್ಯಾ.), ಇಮಿನಾ ಮೇ ಮಿಗಾರಞ್ಞಂ (ಕ.)], ಅಮತಭೇರಿಮಾಹನಿ.
‘‘ಸೋ ¶ ¶ ದಾನಿ ಪತ್ತೋ ಅಮತಂ, ಸನ್ತಿಪದಮನುತ್ತರಂ;
ಸಬ್ಬಾಸವೇ ಪರಿಞ್ಞಾಯ, ವಿಹರಾಮಿ ಅನಾಸವೋ.
‘‘ಪಟಿಸಮ್ಭಿದಾ ¶ ಚತಸ್ಸೋ, ವಿಮೋಕ್ಖಾಪಿ ಚ ಅಟ್ಠಿಮೇ;
ಛಳಭಿಞ್ಞಾ ಸಚ್ಛಿಕತಾ, ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಅಞ್ಞಾಸಿಕೋಣ್ಡಞ್ಞೋ [ಅಞ್ಞಾತಕೋಣ್ಡಞ್ಞೋ (ಸೀ.), ಅಞ್ಞಾ ಕೋಣ್ಡಞ್ಞೋ (ಸ್ಯಾ.)] ಥೇರೋ ಇಮಾ
ಗಾಥಾಯೋ ಅಭಾಸಿತ್ಥಾತಿ.
ಅಞ್ಞಾಸಿಕೋಣ್ಡಞ್ಞತ್ಥೇರಸ್ಸಾಪದಾನಂ ಸತ್ತಮಂ.
೩-೮. ಪಿಣ್ಡೋಲಭಾರದ್ವಾಜತ್ಥೇರಅಪದಾನಂ
‘‘ಪದುಮುತ್ತರೋ ನಾಮ ಜಿನೋ, ಸಯಮ್ಭೂ ಅಗ್ಗಪುಗ್ಗಲೋ;
ಪುರತೋ ಹಿಮವನ್ತಸ್ಸ, ಚಿತ್ತಕೂಟೇ ವಸೀ ತದಾ.
‘‘ಅಭೀತರೂಪೋ ತತ್ಥಾಸಿಂ, ಮಿಗರಾಜಾ ಚತುಕ್ಕಮೋ;
ತಸ್ಸ ಸದ್ದಂ ಸುಣಿತ್ವಾನ, ವಿಕ್ಖಮ್ಭನ್ತಿ ಬಹುಜ್ಜನಾ.
‘‘ಸುಫುಲ್ಲಂ ಪದುಮಂ ಗಯ್ಹ, ಉಪಗಚ್ಛಿಂ ನರಾಸಭಂ;
ವುಟ್ಠಿತಸ್ಸ ಸಮಾಧಿಮ್ಹಾ, ಬುದ್ಧಸ್ಸ ಅಭಿರೋಪಯಿಂ.
‘‘ಚಾತುದ್ದಿಸಂ ¶ ನಮಸ್ಸಿತ್ವಾ, ಬುದ್ಧಸೇಟ್ಠಂ ನರುತ್ತಮಂ;
ಸಕಂ ಚಿತ್ತಂ ಪಸಾದೇತ್ವಾ, ಸೀಹನಾದಂ ನದಿಂ ಅಹಂ [ತದಾ (ಸ್ಯಾ.)].
‘‘ಪದುಮುತ್ತರೋ ಲೋಕವಿದೂ, ಆಹುತೀನಂ ಪಟಿಗ್ಗಹೋ;
ಸಕಾಸನೇ ನಿಸೀದಿತ್ವಾ, ಇಮಾ ಗಾಥಾ ಅಭಾಸಥ.
‘‘‘ಬುದ್ಧಸ್ಸ ಗಿರಮಞ್ಞಾಯ, ಸಬ್ಬೇ ದೇವಾ ಸಮಾಗತಾ;
ಆಗತೋ ವದತಂ ಸೇಟ್ಠೋ, ಧಮ್ಮಂ ಸೋಸ್ಸಾಮ ತಂ ಮಯಂ.
‘‘‘ತೇಸಂ ಹಾಸಪರೇತಾನಂ, ಪುರತೋ ಲೋಕನಾಯಕೋ;
ಮಮ ಸದ್ದಂ [ಕಮ್ಮಂ (?)] ಪಕಿತ್ತೇಸಿ, ದೀಘದಸ್ಸೀ ಮಹಾಮುನಿ’.
‘‘ಯೇನಿದಂ ಪದುಮಂ ದಿನ್ನಂ, ಸೀಹನಾದೋ ಚ ನಾದಿತೋ;
ತಮಹಂ ಕಿತ್ತಯಿಸ್ಸಾಮಿ, ಸುಣಾಥ ಮಮ ಭಾಸತೋ.
‘‘‘ಇತೋ ¶ ಅಟ್ಠಮಕೇ ಕಪ್ಪೇ, ಚಕ್ಕವತ್ತೀ ಭವಿಸ್ಸತಿ;
ಸತ್ತರತನಸಮ್ಪನ್ನೋ ಚತುದೀಪಮ್ಹಿ ಇಸ್ಸರೋ.
‘‘‘ಕಾರಯಿಸ್ಸತಿ ಇಸ್ಸರಿಯಂ [ಇಸ್ಸರಂ (ಸ್ಯಾ. ಕ.)], ಮಹಿಯಾ ಚತುಸಟ್ಠಿಯಾ;
ಪದುಮೋ ನಾಮ ನಾಮೇನ, ಚಕ್ಕವತ್ತೀ ಮಹಬ್ಬಲೋ.
‘‘ಕಪ್ಪಸತಸಹಸ್ಸಮ್ಹಿ ¶ ¶ , ಓಕ್ಕಾಕಕುಲಸಮ್ಭವೋ;
ಗೋತಮೋ ನಾಮ ಗೋತ್ತೇನ, ಸತ್ಥಾ ಲೋಕೇ ಭವಿಸ್ಸತಿ.
‘ಪಕಾಸಿತೇ ಪಾವಚನೇ, ಬ್ರಹ್ಮಬನ್ಧು ಭವಿಸ್ಸತಿ;
ಬ್ರಹ್ಮಞ್ಞಾ ಅಭಿನಿಕ್ಖಮ್ಮ, ಪಬ್ಬಜಿಸ್ಸತಿ ತಾವದೇ’.
‘‘ಪಧಾನಪಹಿತತ್ತೋ ಸೋ, ಉಪಸನ್ತೋ ನಿರೂಪಧಿ;
ಸಬ್ಬಾಸವೇ ಪರಿಞ್ಞಾಯ, ನಿಬ್ಬಾಯಿಸ್ಸತಿನಾಸವೋ.
‘‘ವಿಜನೇ ¶ ಪನ್ತಸೇಯ್ಯಮ್ಹಿ, ವಾಳಮಿಗಸಮಾಕುಲೇ;
ಸಬ್ಬಾಸವೇ ಪರಿಞ್ಞಾಯ, ನಿಬ್ಬಾಯಿಸ್ಸತಿನಾಸವೋ.
‘‘ಪಟಿಸಮ್ಭಿದಾ ಚತಸ್ಸೋ, ವಿಮೋಕ್ಖಾಪಿ ಚ ಅಟ್ಠಿಮೇ;
ಛಳಭಿಞ್ಞಾ ಸಚ್ಛಿಕತಾ, ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಪಿಣ್ಡೋಲಭಾರದ್ವಾಜೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಪಿಣ್ಡೋಲಭಾರದ್ವಾಜತ್ಥೇರಸ್ಸಾಪದಾನಂ ಅಟ್ಠಮಂ.
೩-೯. ಖದಿರವನಿಯರೇವತತ್ಥೇರಅಪದಾನಂ
‘‘ಗಙ್ಗಾ ಭಾಗೀರಥೀ ನಾಮ, ಹಿಮವನ್ತಾ ಪಭಾವಿತಾ;
ಕುತಿತ್ಥೇ ನಾವಿಕೋ ಆಸಿಂ, ಓರಿಮೇ ಚ ತರಿಂ [ಓರಿಮಂ ಚ ತರೇ (ಸ್ಯಾ.)] ಅಹಂ.
‘‘ಪದುಮುತ್ತರೋ ನಾಯಕೋ, ಸಮ್ಬುದ್ಧೋ ದ್ವಿಪದುತ್ತಮೋ;
ವಸೀ ಸತಸಹಸ್ಸೇಹಿ, ಗಙ್ಗಾತೀರಮುಪಾಗತೋ [ಪುಬ್ಬೇ ಮಯ್ಹಂ ಸುತಂ ಆಸಿ,§‘‘ಪದುಮುತ್ತರನಾಯಕೋ; ವಸೀಸತಸಹಸ್ಸೇಹಿ, ಗಙ್ಗಾಸೋತಂ ತರಿಸ್ಸತಿ‘‘; (ಸೀ.)].
‘‘ಬಹೂ ನಾವಾ ಸಮಾನೇತ್ವಾ, ವಡ್ಢಕೀಹಿ [ಚಮ್ಮಕೇಹಿ (ಕ.)] ಸುಸಙ್ಖತಂ;
ನಾವಾಯ [ನಾವಾನಂ (ಕ.)] ಛದನಂ ಕತ್ವಾ, ಪಟಿಮಾನಿಂ ನರಾಸಭಂ.
‘‘ಆಗನ್ತ್ವಾನ ¶ ಚ ಸಮ್ಬುದ್ಧೋ, ಆರೂಹಿ ತಞ್ಚ ನಾವಕಂ;
ವಾರಿಮಜ್ಝೇ ಠಿತೋ ಸತ್ಥಾ, ಇಮಾ ಗಾಥಾ ಅಭಾಸಥ.
‘‘‘ಯೋ ಸೋ ತಾರೇಸಿ ಸಮ್ಬುದ್ಧಂ, ಸಙ್ಘಞ್ಚಾಪಿ ಅನಾಸವಂ;
ತೇನ ಚಿತ್ತಪ್ಪಸಾದೇನ, ದೇವಲೋಕೇ ರಮಿಸ್ಸತಿ.
‘‘‘ನಿಬ್ಬತ್ತಿಸ್ಸತಿ ತೇ ಬ್ಯಮ್ಹಂ, ಸುಕತಂ ನಾವಸಣ್ಠಿತಂ;
ಆಕಾಸೇ ಪುಪ್ಫಛದನಂ, ಧಾರಯಿಸ್ಸತಿ ಸಬ್ಬದಾ.
‘‘‘ಅಟ್ಠಪಞ್ಞಾಸಕಪ್ಪಮ್ಹಿ ¶ , ತಾರಕೋ [ತಾರಣೋ (ಸ್ಯಾ.)] ನಾಮ ಖತ್ತಿಯೋ;
ಚಾತುರನ್ತೋ ವಿಜಿತಾವೀ, ಚಕ್ಕವತ್ತೀ ಭವಿಸ್ಸತಿ.
‘‘‘ಸತ್ತಪಞ್ಞಾಸಕಪ್ಪಮ್ಹಿ ¶ ¶ , ಚಮ್ಮಕೋ [ಚಮ್ಪಕೋ (ಸೀ.), ಚಮ್ಬಕೋ (ಸ್ಯಾ.)] ನಾಮ ಖತ್ತಿಯೋ;
ಉಗ್ಗಚ್ಛನ್ತೋವ ಸೂರಿಯೋ, ಜೋತಿಸ್ಸತಿ ಮಹಬ್ಬಲೋ.
‘‘‘ಕಪ್ಪಸತಸಹಸ್ಸಮ್ಹಿ, ಓಕ್ಕಾಕಕುಲಸಮ್ಭವೋ;
ಗೋತಮೋ ನಾಮ ಗೋತ್ತೇನ, ಸತ್ಥಾ ಲೋಕೇ ಭವಿಸ್ಸತಿ.
‘‘‘ತಿದಸಾ ಸೋ ಚವಿತ್ವಾನ, ಮನುಸ್ಸತ್ತಂ ಗಮಿಸ್ಸತಿ;
ರೇವತೋ ನಾಮ ನಾಮೇನ, ಬ್ರಹ್ಮಬನ್ಧು ಭವಿಸ್ಸತಿ.
‘‘‘ಅಗಾರಾ ನಿಕ್ಖಮಿತ್ವಾನ, ಸುಕ್ಕಮೂಲೇನ ಚೋದಿತೋ;
ಗೋತಮಸ್ಸ ಭಗವತೋ, ಸಾಸನೇ ಪಬ್ಬಜಿಸ್ಸತಿ.
‘‘‘ಸೋ ಪಚ್ಛಾ ಪಬ್ಬಜಿತ್ವಾನ, ಯುತ್ತಯೋಗೋ ವಿಪಸ್ಸಕೋ;
ಸಬ್ಬಾಸವೇ ಪರಿಞ್ಞಾಯ, ನಿಬ್ಬಾಯಿಸ್ಸತಿನಾಸವೋ’.
‘‘ವೀರಿಯಂ [ವಿರಿಯಂ (ಸೀ. ಸ್ಯಾ.)] ಮೇ ಧುರಧೋರಯ್ಹಂ, ಯೋಗಕ್ಖೇಮಾಧಿವಾಹನಂ;
ಧಾರೇಮಿ ಅನ್ತಿಮಂ ದೇಹಂ, ಸಮ್ಮಾಸಮ್ಬುದ್ಧಸಾಸನೇ.
‘‘ಸತಸಹಸ್ಸೇ ಕತಂ ಕಮ್ಮಂ, ಫಲಂ ದಸ್ಸೇಸಿ ಮೇ ಇಧ;
ಸುಮುತ್ತೋ ಸರವೇಗೋವ, ಕಿಲೇಸೇ ಝಾಪಯೀ ಮಮ.
‘‘ತತೋ ಮಂ ವನನಿರತಂ, ದಿಸ್ವಾ ಲೋಕನ್ತಗೂ ಮುನಿ;
ವನವಾಸಿಭಿಕ್ಖೂನಗ್ಗಂ, ಪಞ್ಞಪೇಸಿ ಮಹಾಮತಿ.
‘‘ಪಟಿಸಮ್ಭಿದಾ ಚತಸ್ಸೋ, ವಿಮೋಕ್ಖಾಪಿ ಚ ಅಟ್ಠಿಮೇ;
ಛಳಭಿಞ್ಞಾ ಸಚ್ಛಿಕತಾ, ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ¶ ಸುದಂ ಆಯಸ್ಮಾ ಖದಿರವನಿಯೋ ರೇವತೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಖದಿರವನಿಯರೇವತತ್ಥೇರಸ್ಸಾಪದಾನಂ ನವಮಂ.
೩-೧೦. ಆನನ್ದತ್ಥೇರಅಪದಾನಂ
‘‘ಆರಾಮದ್ವಾರಾ ¶ ನಿಕ್ಖಮ್ಮ, ಪದುಮುತ್ತರೋ ಮಹಾಮುನಿ;
ವಸ್ಸೇನ್ತೋ ಅಮತಂ ವುಟ್ಠಿಂ, ನಿಬ್ಬಾಪೇಸಿ ಮಹಾಜನಂ.
‘‘ಸತಸಹಸ್ಸಂ ತೇ ಧೀರಾ, ಛಳಭಿಞ್ಞಾ ಮಹಿದ್ಧಿಕಾ;
ಪರಿವಾರೇನ್ತಿ ಸಮ್ಬುದ್ಧಂ, ಛಾಯಾವ ಅನಪಾಯಿನೀ [ಅನುಪಾಯಿನೀ (ಸ್ಯಾ. ಕ.)].
‘‘ಹತ್ಥಿಕ್ಖನ್ಧಗತೋ ಆಸಿಂ, ಸೇತಚ್ಛತ್ತಂ ವರುತ್ತಮಂ;
ಸುಚಾರುರೂಪಂ ದಿಸ್ವಾನ, ವಿತ್ತಿ ಮೇ ಉದಪಜ್ಜಥ.
‘‘ಓರುಯ್ಹ ¶ ಹತ್ಥಿಖನ್ಧಮ್ಹಾ, ಉಪಗಚ್ಛಿಂ ನರಾಸಭಂ;
ರತನಾಮಯಛತ್ತಂ ಮೇ, ಬುದ್ಧಸೇಟ್ಠಸ್ಸ ಧಾರಯಿಂ.
‘‘ಮಮ ¶ ಸಙ್ಕಪ್ಪಮಞ್ಞಾಯ, ಪದುಮುತ್ತರೋ ಮಹಾಇಸಿ;
ತಂ ಕಥಂ ಠಪಯಿತ್ವಾನ, ಇಮಾ ಗಾಥಾ ಅಭಾಸಥ.
‘‘‘ಯೋ ಸೋ ಛತ್ತಮಧಾರೇಸಿ, ಸೋಣ್ಣಾಲಙ್ಕಾರಭೂಸಿತಂ;
ತಮಹಂ ಕಿತ್ತಯಿಸ್ಸಾಮಿ, ಸುಣೋಥ ಮಮ ಭಾಸತೋ.
‘‘‘ಇತೋ ಗನ್ತ್ವಾ ಅಯಂ ಪೋಸೋ, ತುಸಿತಂ ಆವಸಿಸ್ಸತಿ;
ಅನುಭೋಸ್ಸತಿ ಸಮ್ಪತ್ತಿಂ, ಅಚ್ಛರಾಹಿ ಪುರಕ್ಖತೋ.
‘‘‘ಚತುತ್ತಿಂಸತಿಕ್ಖತ್ತುಞ್ಚ, ದೇವರಜ್ಜಂ ಕರಿಸ್ಸತಿ;
ಬಲಾಧಿಪೋ ಅಟ್ಠಸತಂ, ವಸುಧಂ ಆವಸಿಸ್ಸತಿ.
‘‘‘ಅಟ್ಠಪಞ್ಞಾಸಕ್ಖತ್ತುಞ್ಚ, ಚಕ್ಕವತ್ತೀ ಭವಿಸ್ಸತಿ;
ಪದೇಸರಜ್ಜಂ ವಿಪುಲಂ, ಮಹಿಯಾ ಕಾರಯಿಸ್ಸತಿ.
‘‘‘ಕಪ್ಪಸತಸಹಸ್ಸಮ್ಹಿ ¶ , ಓಕ್ಕಾಕಕುಲಸಮ್ಭವೋ;
ಗೋತಮೋ ನಾಮ ಗೋತ್ತೇನ, ಸತ್ಥಾ ಲೋಕೇ ಭವಿಸ್ಸತಿ.
‘‘‘ಸಕ್ಯಾನಂ ¶ ಕುಲಕೇತುಸ್ಸ, ಞಾತಿಬನ್ಧು ಭವಿಸ್ಸತಿ;
ಆನನ್ದೋ ನಾಮ ನಾಮೇನ, ಉಪಟ್ಠಾಕೋ ಮಹೇಸಿನೋ.
‘‘‘ಆತಾಪೀ ನಿಪಕೋ ಚಾಪಿ, ಬಾಹುಸಚ್ಚೇ ಸುಕೋವಿದೋ;
ನಿವಾತವುತ್ತಿ ಅತ್ಥದ್ಧೋ, ಸಬ್ಬಪಾಠೀ ಭವಿಸ್ಸತಿ.
‘‘‘ಪಧಾನಪಹಿತತ್ತೋ ಸೋ, ಉಪಸನ್ತೋ ನಿರೂಪಧಿ;
ಸಬ್ಬಾಸವೇ ಪರಿಞ್ಞಾಯ, ನಿಬ್ಬಾಯಿಸ್ಸತಿನಾಸವೋ.
‘‘‘ಸನ್ತಿ ಆರಞ್ಞಕಾ ನಾಗಾ, ಕುಞ್ಜರಾ ಸಟ್ಠಿಹಾಯನಾ;
ತಿಧಾಪಭಿನ್ನಾ ಮಾತಙ್ಗಾ, ಈಸಾದನ್ತಾ ಉರೂಳ್ಹವಾ.
‘‘‘ಅನೇಕಸತಸಹಸ್ಸಾ, ಪಣ್ಡಿತಾಪಿ ಮಹಿದ್ಧಿಕಾ;
ಸಬ್ಬೇ ತೇ ಬುದ್ಧನಾಗಸ್ಸ, ನ ಹೋನ್ತು ಪಣಿಧಿಮ್ಹಿ ತೇ’ [ನ ಹೋನ್ತಿ ಪರಿವಿಮ್ಭಿತಾ (ಸ್ಯಾ.), ನ ಹೋನ್ತಿ ಪಣಿಧಿಮ್ಹಿ ತೇ (ಕ.)].
‘‘ಆದಿಯಾಮೇ ನಮಸ್ಸಾಮಿ, ಮಜ್ಝಿಮೇ ಅಥ ಪಚ್ಛಿಮೇ;
ಪಸನ್ನಚಿತ್ತೋ ಸುಮನೋ, ಬುದ್ಧಸೇಟ್ಠಂ ಉಪಟ್ಠಹಿಂ.
‘‘ಆತಾಪೀ ನಿಪಕೋ ಚಾಪಿ, ಸಮ್ಪಜಾನೋ ಪತಿಸ್ಸತೋ;
ಸೋತಾಪತ್ತಿಫಲಂ ಪತ್ತೋ, ಸೇಖಭೂಮೀಸು ಕೋವಿದೋ.
‘‘ಸತಸಹಸ್ಸಿತೋ ¶ ಕಪ್ಪೇ, ಯಂ ಕಮ್ಮಮಭಿನೀಹರಿಂ;
ತಾಹಂ ಭೂಮಿಮನುಪ್ಪತ್ತೋ, ಠಿತಾ ಸದ್ಧಮ್ಮಮಾಚಲಾ [ಠಿತೋ ಸದ್ಧಮ್ಮಮಾಚಲೋ (ಸೀ.), ಠಿತಾ ಸದ್ಧಾ ಮಹಪ್ಫಲಾ (ಸ್ಯಾ.)].
‘‘ಸ್ವಾಗತಂ ¶ ವತ ಮೇ ಆಸಿ, ಬುದ್ಧಸೇಟ್ಠಸ್ಸ ಸನ್ತಿಕೇ;
ತಿಸ್ಸೋ ವಿಜ್ಜಾ ಅನುಪ್ಪತ್ತಾ, ಕತಂ ಬುದ್ಧಸ್ಸ ಸಾಸನಂ.
‘‘ಪಟಿಸಮ್ಭಿದಾ ¶ ಚತಸ್ಸೋ, ವಿಮೋಕ್ಖಾಪಿ ಚ ಅಟ್ಠಿಮೇ;
ಛಳಭಿಞ್ಞಾ ಸಚ್ಛಿಕತಾ, ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಆನನ್ದೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಆನನ್ದತ್ಥೇರಸ್ಸಾಪದಾನಂ ದಸಮಂ.
ತಸ್ಸುದ್ದಾನಂ –
ಬುದ್ಧೋ ¶ ಪಚ್ಚೇಕಬುದ್ಧೋ ಚ, ಸಾರಿಪುತ್ತೋ ಚ ಕೋಲಿತೋ;
ಕಸ್ಸಪೋ ಅನುರುದ್ಧೋ ಚ, ಪುಣ್ಣತ್ಥೇರೋ ಉಪಾಲಿ ಚ.
ಅಞ್ಞಾಸಿಕೋಣ್ಡಞ್ಞೋ ಪಿಣ್ಡೋಲೋ, ರೇವತಾನನ್ದಪಣ್ಡಿತೋ;
ಛಸತಾನಿ ಚ ಪಞ್ಞಾಸ, ಗಾಥಾಯೋ ಸಬ್ಬಪಿಣ್ಡಿತಾ.
ಅಪದಾನೇ ಬುದ್ಧವಗ್ಗೋ ಪಠಮೋ.
೨. ಸೀಹಾಸನಿಯವಗ್ಗೋ
೧. ಸೀಹಾಸನದಾಯಕತ್ಥೇರಅಪದಾನಂ
‘‘ನಿಬ್ಬುತೇ ¶ ¶ ¶ ಲೋಕನಾಥಮ್ಹಿ, ಸಿದ್ಧತ್ಥೇ ದ್ವಿಪದುತ್ತಮೇ [ದಿಪದುತ್ತಮೇ (ಸೀ. ಸ್ಯಾ.)];
ವಿತ್ಥಾರಿಕೇ ಪಾವಚನೇ, ಬಾಹುಜಞ್ಞಮ್ಹಿ ಸಾಸನೇ.
‘‘ಪಸನ್ನಚಿತ್ತೋ ಸುಮನೋ, ಸೀಹಾಸನಮಕಾಸಹಂ;
ಸೀಹಾಸನಂ ಕರಿತ್ವಾನ, ಪಾದಪೀಠಮಕಾಸಹಂ.
‘‘ಸೀಹಾಸನೇ ಚ ವಸ್ಸನ್ತೇ, ಘರಂ ತತ್ಥ ಅಕಾಸಹಂ;
ತೇನ ಚಿತ್ತಪ್ಪಸಾದೇನ, ತುಸಿತಂ ಉಪಪಜ್ಜಹಂ.
‘‘ಆಯಾಮೇನ ¶ ಚತುಬ್ಬೀಸ, ಯೋಜನಂ ಆಸಿ [ಯೋಜನಾಸಿಂಸು (ಸ್ಯಾ. ಕ.)] ತಾವದೇ;
ವಿಮಾನಂ ಸುಕತಂ ಮಯ್ಹಂ, ವಿತ್ಥಾರೇನ ಚತುದ್ದಸ.
‘‘ಸತಂ [ಸತ್ತ (ಸ್ಯಾ.)] ಕಞ್ಞಾಸಹಸ್ಸಾನಿ, ಪರಿವಾರೇನ್ತಿ ಮಂ ಸದಾ;
ಸೋಣ್ಣಮಯಞ್ಚ ಪಲ್ಲಙ್ಕಂ, ಬ್ಯಮ್ಹೇ ಆಸಿ ಸುನಿಮ್ಮಿತಂ.
‘‘ಹತ್ಥಿಯಾನಂ ಅಸ್ಸಯಾನಂ, ದಿಬ್ಬಯಾನಂ ಉಪಟ್ಠಿತಂ;
ಪಾಸಾದಾ ಸಿವಿಕಾ ಚೇವ, ನಿಬ್ಬತ್ತನ್ತಿ ಯದಿಚ್ಛಕಂ.
‘‘ಮಣಿಮಯಾ ಚ ಪಲ್ಲಙ್ಕಾ, ಅಞ್ಞೇ ಸಾರಮಯಾ ಬಹೂ;
ನಿಬ್ಬತ್ತನ್ತಿ ಮಮಂ ಸಬ್ಬೇ, ಸೀಹಾಸನಸ್ಸಿದಂ ಫಲಂ.
‘‘ಸೋಣ್ಣಮಯಾ ರೂಪಿಮಯಾ, ಫಲಿಕಾವೇಳುರಿಯಾಮಯಾ;
ಪಾದುಕಾ ಅಭಿರೂಹಾಮಿ, ಪಾದಪೀಠಸ್ಸಿದಂ ಫಲಂ.
‘‘ಚತುನ್ನವುತಿತೋ [ಚತುನವುತೇ ಇತೋ (ಸೀ. ಸ್ಯಾ.)] ಕಪ್ಪೇ, ಯಂ ಕಮ್ಮಮಕರಿಂ ತದಾ;
ದುಗ್ಗತಿಂ ನಾಭಿಜಾನಾಮಿ, ಪುಞ್ಞಕಮ್ಮಸ್ಸಿದಂ ಫಲಂ.
‘‘ತೇಸತ್ತತಿಮ್ಹಿತೋ ಕಪ್ಪೇ, ಇನ್ದನಾಮಾ ತಯೋ ಜನಾ;
ದ್ವೇಸತ್ತತಿಮ್ಹಿತೋ ಕಪ್ಪೇ, ತಯೋ ಸುಮನನಾಮಕಾ.
‘‘ಸಮಸತ್ತತಿತೋ ಕಪ್ಪೇ, ತಯೋ ವರುಣನಾಮಕಾ;
ಸತ್ತರತನಸಮ್ಪನ್ನಾ, ಚತುದೀಪಮ್ಹಿ ಇಸ್ಸರಾ.
‘‘ಪಟಿಸಮ್ಭಿದಾ ¶ ¶ ಚತಸ್ಸೋ, ವಿಮೋಕ್ಖಾಪಿ ಚ ಅಟ್ಠಿಮೇ;
ಛಳಭಿಞ್ಞಾ ಸಚ್ಛಿಕತಾ, ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಸೀಹಾಸನದಾಯಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಸೀಹಾಸನದಾಯಕತ್ಥೇರಸ್ಸಾಪದಾನಂ ಪಠಮಂ.
೨. ಏಕತ್ಥಮ್ಭಿಕತ್ಥೇರಅಪದಾನಂ
‘‘ಸಿದ್ಧತ್ಥಸ್ಸ ¶ ¶ ಭಗವತೋ, ಮಹಾಪೂಗಗಣೋ ಅಹು;
ಸರಣಂ ಗತಾ ಚ ತೇ ಬುದ್ಧಂ, ಸದ್ದಹನ್ತಿ ತಥಾಗತಂ.
‘‘ಸಬ್ಬೇ ಸಙ್ಗಮ್ಮ ಮನ್ತೇತ್ವಾ, ಮಾಳಂ ಕುಬ್ಬನ್ತಿ ಸತ್ಥುನೋ;
ಏಕತ್ಥಮ್ಭಂ ಅಲಭನ್ತಾ, ವಿಚಿನನ್ತಿ ಬ್ರಹಾವನೇ.
‘‘ತೇಹಂ ಅರಞ್ಞೇ ದಿಸ್ವಾನ, ಉಪಗಮ್ಮ ಗಣಂ ತದಾ;
ಅಞ್ಜಲಿಂ ಪಗ್ಗಹೇತ್ವಾನ, ಪರಿಪುಚ್ಛಿಂ ಗಣಂ ಅಹಂ.
‘‘ತೇ ಮೇ ಪುಟ್ಠಾ ವಿಯಾಕಂಸು, ಸೀಲವನ್ತೋ ಉಪಾಸಕಾ;
ಮಾಳಂ ಮಯಂ ಕತ್ತುಕಾಮಾ, ಏಕತ್ಥಮ್ಭೋ ನ ಲಬ್ಭತಿ.
‘‘ಏಕತ್ಥಮ್ಭಂ ಮಮಂ ದೇಥ, ಅಹಂ ದಸ್ಸಾಮಿ ಸತ್ಥುನೋ;
ಆಹರಿಸ್ಸಾಮಹಂ ಥಮ್ಭಂ, ಅಪ್ಪೋಸ್ಸುಕ್ಕಾ ಭವನ್ತು ತೇ [ಭವನ್ತು ವೋ (ಸೀ.), ಭವಾಥ ವೋ (?)].
‘‘ತೇ ಮೇ ಥಮ್ಭಂ ಪವೇಚ್ಛಿಂಸು, ಪಸನ್ನಾ ತುಟ್ಠಮಾನಸಾ;
ತತೋ ಪಟಿನಿವತ್ತಿತ್ವಾ, ಅಗಮಂಸು ಸಕಂ ಘರಂ.
‘‘ಅಚಿರಂ ಗತೇ ಪೂಗಗಣೇ, ಥಮ್ಭಂ ಅಹಾಸಹಂ ತದಾ;
ಹಟ್ಠೋ ಹಟ್ಠೇನ ಚಿತ್ತೇನ, ಪಠಮಂ ಉಸ್ಸಪೇಸಹಂ.
‘‘ತೇನ ಚಿತ್ತಪ್ಪಸಾದೇನ, ವಿಮಾನಂ ಉಪಪಜ್ಜಹಂ;
ಉಬ್ಬಿದ್ಧಂ ಭವನಂ ಮಯ್ಹಂ, ಸತ್ತಭೂಮಂ [ಸತಭೂಮಂ (ಸೀ. ಕ.)] ಸಮುಗ್ಗತಂ.
‘‘ವಜ್ಜಮಾನಾಸು ಭೇರೀಸು, ಪರಿಚಾರೇಮಹಂ ಸದಾ;
ಪಞ್ಚಪಞ್ಞಾಸಕಪ್ಪಮ್ಹಿ, ರಾಜಾ ಆಸಿಂ ಯಸೋಧರೋ.
‘‘ತತ್ಥಾಪಿ ¶ ¶ ಭವನಂ ಮಯ್ಹಂ, ಸತ್ತಭೂಮಂ ಸಮುಗ್ಗತಂ;
ಕೂಟಾಗಾರವರೂಪೇತಂ, ಏಕತ್ಥಮ್ಭಂ ಮನೋರಮಂ.
‘‘ಏಕವೀಸತಿಕಪ್ಪಮ್ಹಿ, ಉದೇನೋ ನಾಮ ಖತ್ತಿಯೋ;
ತತ್ರಾಪಿ ಭವನಂ ಮಯ್ಹಂ, ಸತ್ತಭೂಮಂ ಸಮುಗ್ಗತಂ.
‘‘ಯಂ ¶ ಯಂ ಯೋನುಪಪಜ್ಜಾಮಿ, ದೇವತ್ತಂ ಅಥ ಮಾನುಸಂ;
ಅನುಭೋಮಿ ಸುಖಂ ಸಬ್ಬಂ [ಸಬ್ಬಮೇತಂ (ಸ್ಯಾ.)], ಏಕತ್ಥಮ್ಭಸ್ಸಿದಂ ಫಲಂ.
‘‘ಚತುನ್ನವುತಿತೋ ¶ ಕಪ್ಪೇ, ಯಂ ಥಮ್ಭಮದದಂ ತದಾ;
ದುಗ್ಗತಿಂ ನಾಭಿಜಾನಾಮಿ, ಏಕತ್ಥಮ್ಭಸ್ಸಿದಂ ಫಲಂ.
‘‘ಪಟಿಸಮ್ಭಿದಾ ಚತಸ್ಸೋ, ವಿಮೋಕ್ಖಾಪಿ ಚ ಅಟ್ಠಿಮೇ;
ಛಳಭಿಞ್ಞಾ ಸಚ್ಛಿಕತಾ, ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಏಕತ್ಥಮ್ಭಿಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಏಕತ್ಥಮ್ಭಿಕತ್ಥೇರಸ್ಸಾಪದಾನಂ ದುತಿಯಂ.
೩. ನನ್ದತ್ಥೇರಅಪದಾನಂ
‘‘ಪದುಮುತ್ತರಸ್ಸ ಭಗವತೋ, ಲೋಕಜೇಟ್ಠಸ್ಸ ತಾದಿನೋ;
ವತ್ಥಂ ಖೋಮಂ ಮಯಾ ದಿನ್ನಂ, ಸಯಮ್ಭುಸ್ಸ ಮಹೇಸಿನೋ.
‘‘ತಂ ಮೇ ಬುದ್ಧೋ ವಿಯಾಕಾಸಿ, ಜಲಜುತ್ತರನಾಮಕೋ;
‘ಇಮಿನಾ ವತ್ಥದಾನೇನ, ಹೇಮವಣ್ಣೋ ಭವಿಸ್ಸಸಿ.
‘‘‘ದ್ವೇ ¶ ಸಮ್ಪತ್ತೀ ಅನುಭೋತ್ವಾ, ಕುಸಲಮೂಲೇಹಿ ಚೋದಿತೋ;
ಗೋತಮಸ್ಸ ಭಗವತೋ, ಕನಿಟ್ಠೋ ತ್ವಂ ಭವಿಸ್ಸಸಿ.
‘‘‘ರಾಗರತ್ತೋ ಸುಖಸೀಲೋ, ಕಾಮೇಸು ಗೇಧಮಾಯುತೋ;
ಬುದ್ಧೇನ ಚೋದಿತೋ ಸನ್ತೋ, ತದಾ [ತತೋ (ಸ್ಯಾ.)] ತ್ವಂ ಪಬ್ಬಜಿಸ್ಸಸಿ.
‘‘‘ಪಬ್ಬಜಿತ್ವಾನ ತ್ವಂ ತತ್ಥ, ಕುಸಲಮೂಲೇನ ಚೋದಿತೋ;
ಸಬ್ಬಾಸವೇ ಪರಿಞ್ಞಾಯ, ನಿಬ್ಬಾಯಿಸ್ಸಸಿನಾಸವೋ’.
‘‘ಸತ್ತ ¶ [ಸತ (ಸ್ಯಾ.)] ಕಪ್ಪಸಹಸ್ಸಮ್ಹಿ, ಚತುರೋ ಚೇಳನಾಮಕಾ;
ಸಟ್ಠಿ ಕಪ್ಪಸಹಸ್ಸಮ್ಹಿ, ಉಪಚೇಲಾ ಚತುಜ್ಜನಾ.
‘‘ಪಞ್ಚ ಕಪ್ಪಸಹಸ್ಸಮ್ಹಿ, ಚೇಳಾವ ಚತುರೋ ಜನಾ;
ಸತ್ತರತನಸಮ್ಪನ್ನಾ, ಚತುದೀಪಮ್ಹಿ ಇಸ್ಸರಾ.
‘‘ಪಟಿಸಮ್ಭಿದಾ ಚತಸ್ಸೋ, ವಿಮೋಕ್ಖಾಪಿ ಚ ಅಟ್ಠಿಮೇ;
ಛಳಭಿಞ್ಞಾ ಸಚ್ಛಿಕತಾ, ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ನನ್ದೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ನನ್ದತ್ಥೇರಸ್ಸಾಪದಾನಂ ತತಿಯಂ.
೪. ಚೂಳಪನ್ಥಕತ್ಥೇರಅಪದಾನಂ
‘‘ಪದುಮುತ್ತರೋ ¶ ¶ ನಾಮ ಜಿನೋ, ಆಹುತೀನಂ ಪಟಿಗ್ಗಹೋ;
ಗಣಮ್ಹಾ ವೂಪಕಟ್ಠೋ ಸೋ, ಹಿಮವನ್ತೇ ವಸೀ ತದಾ.
‘‘ಅಹಮ್ಪಿ ¶ ಹಿಮವನ್ತಮ್ಹಿ, ವಸಾಮಿ ಅಸ್ಸಮೇ ತದಾ;
ಅಚಿರಾಗತಂ ಮಹಾವೀರಂ, ಉಪೇಸಿಂ ಲೋಕನಾಯಕಂ.
‘‘ಪುಪ್ಫಚ್ಛತ್ತಂ ಗಹೇತ್ವಾನ, ಉಪಗಚ್ಛಿಂ ನರಾಸಭಂ;
ಸಮಾಧಿಂ ಸಮಾಪಜ್ಜನ್ತಂ, ಅನ್ತರಾಯಮಕಾಸಹಂ.
‘‘ಉಭೋ ಹತ್ಥೇಹಿ ಪಗ್ಗಯ್ಹ, ಪುಪ್ಫಚ್ಛತ್ತಂ ಅದಾಸಹಂ;
ಪಟಿಗ್ಗಹೇಸಿ ಭಗವಾ, ಪದುಮುತ್ತರೋ ಮಹಾಮುನಿ.
‘‘ಸಬ್ಬೇ ದೇವಾ ಅತ್ತಮನಾ, ಹಿಮವನ್ತಂ ಉಪೇನ್ತಿ ತೇ;
ಸಾಧುಕಾರಂ ಪವತ್ತೇಸುಂ, ಅನುಮೋದಿಸ್ಸತಿ ಚಕ್ಖುಮಾ.
‘‘ಇದಂ ವತ್ವಾನ ತೇ ದೇವಾ, ಉಪಗಚ್ಛುಂ ನರುತ್ತಮಂ;
ಆಕಾಸೇ ಧಾರಯನ್ತಸ್ಸ [ಧಾರಯನ್ತಂ ಮೇ (ಕ), ಧಾರಯತೋ ಮೇ (?)], ಪದುಮಚ್ಛತ್ತಮುತ್ತಮಂ.
‘‘ಸತಪತ್ತಛತ್ತಂ ಪಗ್ಗಯ್ಹ, ಅದಾಸಿ ತಾಪಸೋ ಮಮ;
‘ತಮಹಂ ಕಿತ್ತಯಿಸ್ಸಾಮಿ, ಸುಣಾಥ ಮಮ ಭಾಸತೋ.
‘‘‘ಪಞ್ಚವೀಸತಿಕಪ್ಪಾನಿ, ದೇವರಜ್ಜಂ ಕರಿಸ್ಸತಿ;
ಚತುತ್ತಿಂಸತಿಕ್ಖತ್ತುಞ್ಚ, ಚಕ್ಕವತ್ತೀ ಭವಿಸ್ಸತಿ.
‘‘‘ಯಂ ¶ ಯಂ ಯೋನಿಂ ಸಂಸರತಿ, ದೇವತ್ತಂ ಅಥ ಮಾನುಸಂ;
ಅಬ್ಭೋಕಾಸೇ ಪತಿಟ್ಠನ್ತಂ, ಪದುಮಂ ಧಾರಯಿಸ್ಸತಿ’.
‘‘ಕಪ್ಪಸತಸಹಸ್ಸಮ್ಹಿ, ಓಕ್ಕಾಕಕುಲಸಮ್ಭವೋ;
ಗೋತಮೋ ನಾಮ ಗೋತ್ತೇನ [ನಾಮೇನ (ಸೀ. ಕ.)], ಸತ್ಥಾ ಲೋಕೇ ಭವಿಸ್ಸತಿ.
‘‘‘ಪಕಾಸಿತೇ ಪಾವಚನೇ, ಮನುಸ್ಸತ್ತಂ ಲಭಿಸ್ಸತಿ;
ಮನೋಮಯಮ್ಹಿ ಕಾಯಮ್ಹಿ, ಉತ್ತಮೋ ಸೋ ಭವಿಸ್ಸತಿ.
‘‘‘ದ್ವೇ ¶ ಭಾತರೋ ಭವಿಸ್ಸನ್ತಿ, ಉಭೋಪಿ ಪನ್ಥಕವ್ಹಯಾ;
ಅನುಭೋತ್ವಾ ಉತ್ತಮತ್ಥಂ, ಜೋತಯಿಸ್ಸನ್ತಿ ಸಾಸನಂ’.
‘‘ಸೋಹಂ ¶ ಅಟ್ಠಾರಸವಸ್ಸೋ [ಸೋ ಅಟ್ಠಾರಸವಸ್ಸೋಹಂ (ಸ್ಯಾ.)], ಪಬ್ಬಜಿಂ ಅನಗಾರಿಯಂ;
ವಿಸೇಸಾಹಂ ನ ವಿನ್ದಾಮಿ, ಸಕ್ಯಪುತ್ತಸ್ಸ ಸಾಸನೇ.
‘‘ದನ್ಧಾ ಮಯ್ಹಂ ಗತೀ ಆಸಿ, ಪರಿಭೂತೋ ಪುರೇ ಅಹುಂ [ಅಹಂ (ಸ್ಯಾ.)];
ಭಾತಾ ಚ ಮಂ ಪಣಾಮೇಸಿ, ಗಚ್ಛ ದಾನಿ ಸಕಂ ಘರಂ.
‘‘ಸೋಹಂ ಪಣಾಮಿತೋ ಸನ್ತೋ, ಸಙ್ಘಾರಾಮಸ್ಸ ಕೋಟ್ಠಕೇ;
ದುಮ್ಮನೋ ತತ್ಥ ಅಟ್ಠಾಸಿಂ, ಸಾಮಞ್ಞಸ್ಮಿಂ ಅಪೇಕ್ಖವಾ.
‘‘ಭಗವಾ ¶ ತತ್ಥ [ಅಥೇತ್ಥ ಸತ್ಥಾ (ಸೀ. ಸ್ಯಾ.)] ಆಗಚ್ಛಿ, ಸೀಸಂ ಮಯ್ಹಂ ಪರಾಮಸಿ;
ಬಾಹಾಯ ಮಂ ಗಹೇತ್ವಾನ, ಸಙ್ಘಾರಾಮಂ ಪವೇಸಯಿ.
‘‘ಅನುಕಮ್ಪಾಯ ಮೇ ಸತ್ಥಾ, ಅದಾಸಿ ಪಾದಪುಞ್ಛನಿಂ;
ಏವಂ ಸುದ್ಧಂ ಅಧಿಟ್ಠೇಹಿ, ಏಕಮನ್ತಮಧಿಟ್ಠಹಂ.
‘‘ಹತ್ಥೇಹಿ ತಮಹಂ ಗಯ್ಹ, ಸರಿಂ ಕೋಕನದಂ ಅಹಂ;
ತತ್ಥ ಚಿತ್ತಂ ವಿಮುಚ್ಚಿ ಮೇ, ಅರಹತ್ತಂ ಅಪಾಪುಣಿಂ.
‘‘ಮನೋಮಯೇಸು ಕಾಯೇಸು, ಸಬ್ಬತ್ಥ ಪಾರಮಿಂ ಗತೋ;
ಸಬ್ಬಾಸವೇ ಪರಿಞ್ಞಾಯ, ವಿಹರಾಮಿ ಅನಾಸವೋ.
‘‘ಪಟಿಸಮ್ಭಿದಾ ಚತಸ್ಸೋ, ವಿಮೋಕ್ಖಾಪಿ ಚ ಅಟ್ಠಿಮೇ;
ಛಳಭಿಞ್ಞಾ ಸಚ್ಛಿಕತಾ, ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಚೂಳಪನ್ಥಕೋ [ಚುಲ್ಲಪನ್ಥಕೋ (ಸೀ. ಸ್ಯಾ.)] ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಚೂಳಪನ್ಥಕತ್ಥೇರಸ್ಸಾಪದಾನಂ ಚತುತ್ಥಂ.
೫. ಪಿಲಿನ್ದವಚ್ಛತ್ಥೇರಅಪದಾನಂ
‘‘ನಿಬ್ಬುತೇ ¶ ¶ ಲೋಕನಾಥಮ್ಹಿ, ಸುಮೇಧೇ ಅಗ್ಗಪುಗ್ಗಲೇ;
ಪಸನ್ನಚಿತ್ತೋ ಸುಮನೋ, ಥೂಪಪೂಜಂ ಅಕಾಸಹಂ.
‘‘ಯೇ ಚ ಖೀಣಾಸವಾ ತತ್ಥ, ಛಳಭಿಞ್ಞಾ ಮಹಿದ್ಧಿಕಾ;
ತೇಹಂ ತತ್ಥ ಸಮಾನೇತ್ವಾ, ಸಙ್ಘಭತ್ತಂ ಅಕಾಸಹಂ.
‘‘ಸುಮೇಧಸ್ಸ ಭಗವತೋ, ಉಪಟ್ಠಾಕೋ ತದಾ ಅಹು;
ಸುಮೇಧೋ ನಾಮ ನಾಮೇನ, ಅನುಮೋದಿತ್ಥ ಸೋ ತದಾ.
‘‘ತೇನ ಚಿತ್ತಪ್ಪಸಾದೇನ, ವಿಮಾನಂ ಉಪಪಜ್ಜಹಂ;
ಛಳಾಸೀತಿಸಹಸ್ಸಾನಿ, ಅಚ್ಛರಾಯೋ ರಮಿಂಸು ಮೇ.
‘‘ಮಮೇವ ¶ ಅನುವತ್ತನ್ತಿ, ಸಬ್ಬಕಾಮೇಹಿ ತಾ ಸದಾ;
ಅಞ್ಞೇ ದೇವೇ ಅಭಿಭೋಮಿ, ಪುಞ್ಞಕಮ್ಮಸ್ಸಿದಂ ಫಲಂ.
‘‘ಪಞ್ಚವೀಸತಿಕಪ್ಪಮ್ಹಿ, ವರುಣೋ ನಾಮ ಖತ್ತಿಯೋ;
ವಿಸುದ್ಧಭೋಜನೋ [ಸುಸುದ್ಧಭೋಜನೋ (ಸೀ.)] ಆಸಿಂ, ಚಕ್ಕವತ್ತೀ ಅಹಂ ತದಾ.
‘‘ನ ತೇ ಬೀಜಂ ಪವಪನ್ತಿ, ನಪಿ ನೀಯನ್ತಿ ನಙ್ಗಲಾ;
ಅಕಟ್ಠಪಾಕಿಮಂ ಸಾಲಿಂ, ಪರಿಭುಞ್ಜನ್ತಿ ಮಾನುಸಾ.
‘‘ತತ್ಥ ¶ ರಜ್ಜಂ ಕರಿತ್ವಾನ, ದೇವತ್ತಂ ಪುನ ಗಚ್ಛಹಂ;
ತದಾಪಿ ಏದಿಸಾ ಮಯ್ಹಂ, ನಿಬ್ಬತ್ತಾ ಭೋಗಸಮ್ಪದಾ.
‘‘ನ ಮಂ ಮಿತ್ತಾ ಅಮಿತ್ತಾ ವಾ, ಹಿಂಸನ್ತಿ ಸಬ್ಬಪಾಣಿನೋ;
ಸಬ್ಬೇಸಮ್ಪಿ ಪಿಯೋ ಹೋಮಿ, ಪುಞ್ಞಕಮ್ಮಸ್ಸಿದಂ ಫಲಂ.
‘‘ತಿಂಸಕಪ್ಪಸಹಸ್ಸಮ್ಹಿ ¶ , ಯಂ ದಾನಮದದಿಂ ತದಾ;
ದುಗ್ಗತಿಂ ನಾಭಿಜಾನಾಮಿ, ಗನ್ಧಾಲೇಪಸ್ಸಿದಂ ಫಲಂ.
‘‘ಇಮಸ್ಮಿಂ ಭದ್ದಕೇ ಕಪ್ಪೇ, ಏಕೋ ಆಸಿಂ ಜನಾಧಿಪೋ;
ಮಹಾನುಭಾವೋ ರಾಜಾಹಂ [ರಾಜೀಸಿ (ಸ್ಯಾ. ಕ.)], ಚಕ್ಕವತ್ತೀ ಮಹಬ್ಬಲೋ.
‘‘ಸೋಹಂ ಪಞ್ಚಸು ಸೀಲೇಸು, ಠಪೇತ್ವಾ ಜನತಂ ಬಹುಂ;
ಪಾಪೇತ್ವಾ ಸುಗತಿಂಯೇವ, ದೇವತಾನಂ ಪಿಯೋ ಅಹುಂ.
‘‘ಪಟಿಸಮ್ಭಿದಾ ¶ ಚತಸ್ಸೋ, ವಿಮೋಕ್ಖಾಪಿ ಚ ಅಟ್ಠಿಮೇ;
ಛಳಭಿಞ್ಞಾ ಸಚ್ಛಿಕತಾ, ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಪಿಲಿನ್ದವಚ್ಛೋ [ಪಿಲಿನ್ದಿವಚ್ಛೋ (ಸೀ.)] ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಪಿಲಿನ್ದವಚ್ಛತ್ಥೇರಸ್ಸಾಪದಾನಂ ಪಞ್ಚಮಂ.
೬. ರಾಹುಲತ್ಥೇರಅಪದಾನಂ
‘‘ಪದುಮುತ್ತರಸ್ಸ ಭಗವತೋ, ಲೋಕಜೇಟ್ಠಸ್ಸ ತಾದಿನೋ;
ಸತ್ತಭೂಮಮ್ಹಿ ಪಾಸಾದೇ, ಆದಾಸಂ ಸನ್ಥರಿಂ ಅಹಂ.
‘‘ಖೀಣಾಸವಸಹಸ್ಸೇಹಿ, ಪರಿಕಿಣ್ಣೋ ಮಹಾಮುನಿ;
ಉಪಾಗಮಿ ಗನ್ಧಕುಟಿಂ, ದ್ವಿಪದಿನ್ದೋ [ದಿಪದಿನ್ದೋ (ಸೀ. ಸ್ಯಾ.)] ನರಾಸಭೋ.
‘‘ವಿರೋಚೇನ್ತೋ [ವಿರೋಚಯಂ (ಸ್ಯಾ.)] ಗನ್ಧಕುಟಿಂ, ದೇವದೇವೋ ನರಾಸಭೋ;
ಭಿಕ್ಖುಸಙ್ಘೇ ಠಿತೋ ಸತ್ಥಾ, ಇಮಾ ಗಾಥಾ ಅಭಾಸಥ.
‘‘‘ಯೇನಾಯಂ ¶ ¶ ಜೋತಿತಾ ಸೇಯ್ಯಾ, ಆದಾಸೋವ ಸುಸನ್ಥತೋ;
ತಮಹಂ ಕಿತ್ತಯಿಸ್ಸಾಮಿ, ಸುಣಾಥ ಮಮ ಭಾಸತೋ.
‘‘‘ಸೋಣ್ಣಮಯಾ ರೂಪಿಮಯಾ, ಅಥೋ ವೇಳುರಿಯಾಮಯಾ;
ನಿಬ್ಬತ್ತಿಸ್ಸನ್ತಿ ಪಾಸಾದಾ, ಯೇ ಕೇಚಿ ಮನಸೋ ಪಿಯಾ.
‘‘‘ಚತುಸಟ್ಠಿಕ್ಖತ್ತುಂ ¶ ದೇವಿನ್ದೋ, ದೇವರಜ್ಜಂ ಕರಿಸ್ಸತಿ;
ಸಹಸ್ಸಕ್ಖತ್ತುಂ ಚಕ್ಕವತ್ತೀ, ಭವಿಸ್ಸತಿ ಅನನ್ತರಾ.
‘‘‘ಏಕವೀಸತಿಕಪ್ಪಮ್ಹಿ, ವಿಮಲೋ ನಾಮ ಖತ್ತಿಯೋ;
ಚಾತುರನ್ತೋ ವಿಜಿತಾವೀ, ಚಕ್ಕವತ್ತೀ ಭವಿಸ್ಸತಿ.
‘‘‘ನಗರಂ ರೇಣುವತೀ ನಾಮ, ಇಟ್ಠಕಾಹಿ ಸುಮಾಪಿತಂ;
ಆಯಾಮತೋ ತೀಣಿ ಸತಂ, ಚತುರಸ್ಸಸಮಾಯುತಂ.
‘‘‘ಸುದಸ್ಸನೋ ನಾಮ ಪಾಸಾದೋ, ವಿಸ್ಸಕಮ್ಮೇನ ಮಾಪಿತೋ [ವಿಸುಕಮ್ಮೇನ§ಮಾಪಿತೋ (ಕ.), ವಿಸ್ಸಕಮ್ಮೇನ ನಿಮ್ಮಿತೋ (ಸೀ.)];
ಕೂಟಾಗಾರವರೂಪೇತೋ, ಸತ್ತರತನಭೂಸಿತೋ.
‘‘‘ದಸಸದ್ದಾವಿವಿತ್ತಂ ¶ ತಂ [ಅವಿವಿತ್ತಂ (ಸೀ.)], ವಿಜ್ಜಾಧರಸಮಾಕುಲಂ;
ಸುದಸ್ಸನಂವ ನಗರಂ, ದೇವತಾನಂ ಭವಿಸ್ಸತಿ.
‘‘‘ಪಭಾ ನಿಗ್ಗಚ್ಛತೇ ತಸ್ಸ, ಉಗ್ಗಚ್ಛನ್ತೇವ ಸೂರಿಯೇ;
ವಿರೋಚೇಸ್ಸತಿ ತಂ ನಿಚ್ಚಂ, ಸಮನ್ತಾ ಅಟ್ಠಯೋಜನಂ.
‘‘‘ಕಪ್ಪಸತಸಹಸ್ಸಮ್ಹಿ, ಓಕ್ಕಾಕಕುಲಸಮ್ಭವೋ;
ಗೋತಮೋ ನಾಮ ಗೋತ್ತೇನ, ಸತ್ಥಾ ಲೋಕೇ ಭವಿಸ್ಸತಿ.
‘‘‘ತುಸಿತಾ ಸೋ ಚವಿತ್ವಾನ, ಸುಕ್ಕಮೂಲೇನ ಚೋದಿತೋ;
ಗೋತಮಸ್ಸ ಭಗವತೋ, ಅತ್ರಜೋ ಸೋ ಭವಿಸ್ಸತಿ.
‘‘‘ಸಚೇ ¶ ವಸೇಯ್ಯ [ಸಚಾ’ವಸೇಯ್ಯ (?)] ಅಗಾರಂ, ಚಕ್ಕವತ್ತೀ ಭವೇಯ್ಯ ಸೋ;
ಅಟ್ಠಾನಮೇತಂ ಯಂ ತಾದೀ, ಅಗಾರೇ ರತಿಮಜ್ಝಗಾ.
‘‘‘ನಿಕ್ಖಮಿತ್ವಾ ಅಗಾರಮ್ಹಾ, ಪಬ್ಬಜಿಸ್ಸತಿ ಸುಬ್ಬತೋ;
ರಾಹುಲೋ ನಾಮ ನಾಮೇನ, ಅರಹಾ ಸೋ ಭವಿಸ್ಸತಿ’.
‘‘ಕಿಕೀವ ಅಣ್ಡಂ ರಕ್ಖೇಯ್ಯ, ಚಾಮರೀ ವಿಯ ವಾಲಧಿಂ;
ನಿಪಕೋ ಸೀಲಸಮ್ಪನ್ನೋ, ಮಮಂ ರಕ್ಖಿ ಮಹಾಮುನಿ [ಏವಂ ರಕ್ಖಿಂ ಮಹಾಮುನಿ (ಸೀ. ಕ.), ಮಮಂ ದಕ್ಖಿ ಮಹಾಮುನಿ (ಸ್ಯಾ.)].
‘‘ತಸ್ಸಾಹಂ ಧಮ್ಮಮಞ್ಞಾಯ, ವಿಹಾಸಿಂ ಸಾಸನೇ ರತೋ;
ಸಬ್ಬಾಸವೇ ಪರಿಞ್ಞಾಯ, ವಿಹರಾಮಿ ಅನಾಸವೋ.
‘‘ಪಟಿಸಮ್ಭಿದಾ ¶ ಚತಸ್ಸೋ, ವಿಮೋಕ್ಖಾಪಿ ಚ ಅಟ್ಠಿಮೇ;
ಛಳಭಿಞ್ಞಾ ಸಚ್ಛಿಕತಾ, ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ರಾಹುಲೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ರಾಹುಲತ್ಥೇರಸ್ಸಾಪದಾನಂ ಛಟ್ಠಂ.
೭. ಉಪಸೇನವಙ್ಗನ್ತಪುತ್ತತ್ಥೇರಅಪದಾನಂ
‘‘ಪದುಮುತ್ತರಂ ¶ ಭಗವನ್ತಂ, ಲೋಕಜೇಟ್ಠಂ ನರಾಸಭಂ;
ಪಬ್ಭಾರಮ್ಹಿ ನಿಸೀದನ್ತಂ, ಉಪಗಚ್ಛಿಂ ನರುತ್ತಮಂ.
‘‘ಕಣಿಕಾರಪುಪ್ಫಂ ¶ [ಕಣಿಕಾರಂ ಪುಪ್ಫಿತಂ (ಸೀ. ಸ್ಯಾ.)] ದಿಸ್ವಾ, ವಣ್ಟೇ ಛೇತ್ವಾನಹಂ ತದಾ;
ಅಲಙ್ಕರಿತ್ವಾ ಛತ್ತಮ್ಹಿ, ಬುದ್ಧಸ್ಸ ಅಭಿರೋಪಯಿಂ.
‘‘ಪಿಣ್ಡಪಾತಞ್ಚ ¶ ಪಾದಾಸಿಂ, ಪರಮನ್ನಂ ಸುಭೋಜನಂ;
ಬುದ್ಧೇನ ನವಮೇ ತತ್ಥ, ಸಮಣೇ ಅಟ್ಠ ಭೋಜಯಿಂ.
‘‘ಅನುಮೋದಿ ಮಹಾವೀರೋ, ಸಯಮ್ಭೂ ಅಗ್ಗಪುಗ್ಗಲೋ;
ಇಮಿನಾ ಛತ್ತದಾನೇನ, ಪರಮನ್ನಪವೇಚ್ಛನಾ.
‘‘ತೇನ ಚಿತ್ತಪ್ಪಸಾದೇನ, ಸಮ್ಪತ್ತಿಮನುಭೋಸ್ಸಸಿ;
ಛತ್ತಿಂಸಕ್ಖತ್ತುಂ ದೇವಿನ್ದೋ, ದೇವರಜ್ಜಂ ಕರಿಸ್ಸತಿ.
‘‘ಏಕವೀಸತಿಕ್ಖತ್ತುಞ್ಚ, ಚಕ್ಕವತ್ತೀ ಭವಿಸ್ಸತಿ;
ಪದೇಸರಜ್ಜಂ ವಿಪುಲಂ, ಗಣನಾತೋ ಅಸಙ್ಖಿಯಂ.
‘‘ಸತಸಹಸ್ಸಿತೋ ಕಪ್ಪೇ, ಓಕ್ಕಾಕಕುಲಸಮ್ಭವೋ;
ಗೋತಮೋ ನಾಮ ಗೋತ್ತೇನ, ಸತ್ಥಾ ಲೋಕೇ ಭವಿಸ್ಸತಿ [ಯಂ ವದನ್ತಿ ಸುಮೇಧೋತಿ, ಭೂರಿಪಞ್ಞಂ ಸುಮೇಧಸಂ; ಕಪ್ಪೇತೋ ಸತಸಹಸ್ಸೇ, ಏಸ ಬುದ್ಧೋ ಭವಿಸ್ಸತಿ; (ಕ.)].
‘‘ಸಾಸನೇ ದಿಬ್ಬಮಾನಮ್ಹಿ, ಮನುಸ್ಸತ್ತಂ ಗಮಿಸ್ಸತಿ;
ತಸ್ಸ ಧಮ್ಮೇಸು ದಾಯಾದೋ, ಓರಸೋ ಧಮ್ಮನಿಮ್ಮಿತೋ.
‘‘ಉಪಸೇನೋತಿ ನಾಮೇನ, ಹೇಸ್ಸತಿ ಸತ್ಥು ಸಾವಕೋ;
[ಇದಂ ಪಾದದ್ವಯಂ ಥೇರಗಾಥಾಅಟ್ಠಕಥಾಯಮೇವ ದಿಸ್ಸತಿ] ಸಮನ್ತಪಾಸಾದಿಕತ್ತಾ, ಅಗ್ಗಟ್ಠಾನೇ ಠಪೇಸ್ಸತಿ
[ಇದಂ ಪಾದದ್ವಯಂ ಥೇರಗಾಥಾಅಟ್ಠಕಥಾಯಮೇವ ದಿಸ್ಸತಿ].
‘‘ಚರಿಮಂ ವತ್ತತೇ ಮಯ್ಹಂ, ಭವಾ ಸಬ್ಬೇ ಸಮೂಹತಾ;
ಧಾರೇಮಿ ಅನ್ತಿಮಂ ದೇಹಂ, ಜೇತ್ವಾ ಮಾರಂ ಸವಾಹನಂ [ಸವಾಹಿನಿಂ (?)].
‘‘ಪಟಿಸಮ್ಭಿದಾ ಚತಸ್ಸೋ, ವಿಮೋಕ್ಖಾಪಿ ಚ ಅಟ್ಠಿಮೇ;
ಛಳಭಿಞ್ಞಾ ಸಚ್ಛಿಕತಾ, ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ¶ ಸುದಂ ಆಯಸ್ಮಾ ಉಪಸೇನೋ ವಙ್ಗನ್ತಪುತ್ತೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಉಪಸೇನವಙ್ಗನ್ತಪುತ್ತತ್ಥೇರಸ್ಸಾಪದಾನಂ ಸತ್ತಮಂ.
ತತಿಯಭಾಣವಾರಂ.
೮. ರಟ್ಠಪಾಲತ್ಥೇರಅಪದಾನಂ
‘‘ಪದುಮುತ್ತರಸ್ಸ ¶ ¶ ¶ ಭಗವತೋ, ಲೋಕಜೇಟ್ಠಸ್ಸ ತಾದಿನೋ;
ವರನಾಗೋ ಮಯಾ ದಿನ್ನೋ, ಈಸಾದನ್ತೋ ಉರೂಳ್ಹವಾ.
‘‘ಸೇತಚ್ಛತ್ತೋ ಪಸೋಭಿತೋ, ಸಕಪ್ಪನೋ ಸಹತ್ಥಿಪೋ;
ಅಗ್ಘಾಪೇತ್ವಾನ ತಂ ಸಬ್ಬಂ, ಸಙ್ಘಾರಾಮಂ ಅಕಾರಯಿಂ.
‘‘ಚತುಪಞ್ಞಾಸಸಹಸ್ಸಾನಿ, ಪಾಸಾದೇ ಕಾರಯಿಂ ಅಹಂ;
ಮಹೋಘದಾನಂ [ಮಹಾಭತ್ತಂ (ಸೀ.), ಮಹೋಘಞ್ಚ (ಕ.), ಮಹಾದಾನಂ (?)] ಕರಿತ್ವಾನ, ನಿಯ್ಯಾದೇಸಿಂ ಮಹೇಸಿನೋ.
‘‘ಅನುಮೋದಿ ಮಹಾವೀರೋ, ಸಯಮ್ಭೂ ಅಗ್ಗಪುಗ್ಗಲೋ;
ಸಬ್ಬೇ ಜನೇ ಹಾಸಯನ್ತೋ, ದೇಸೇಸಿ ಅಮತಂ ಪದಂ.
‘‘ತಂ ಮೇ ಬುದ್ಧೋ ವಿಯಾಕಾಸಿ, ಜಲಜುತ್ತರನಾಮಕೋ;
ಭಿಕ್ಖುಸಙ್ಘೇ ನಿಸೀದಿತ್ವಾ, ಇಮಾ ಗಾಥಾ ಅಭಾಸಥ.
‘‘‘ಚತುಪಞ್ಞಾಸಸಹಸ್ಸಾನಿ, ಪಾಸಾದೇ ಕಾರಯೀ ಅಯಂ;
ಕಥಯಿಸ್ಸಾಮಿ ವಿಪಾಕಂ, ಸುಣೋಥ ಮಮ ಭಾಸತೋ.
‘‘‘ಅಟ್ಠಾರಸಸಹಸ್ಸಾನಿ, ಕೂಟಾಗಾರಾ ಭವಿಸ್ಸರೇ;
ಬ್ಯಮ್ಹುತ್ತಮಮ್ಹಿ ನಿಬ್ಬತ್ತಾ, ಸಬ್ಬಸೋಣ್ಣಮಯಾ ಚ ತೇ.
‘‘‘ಪಞ್ಞಾಸಕ್ಖತ್ತುಂ ದೇವಿನ್ದೋ, ದೇವರಜ್ಜಂ ಕರಿಸ್ಸತಿ;
ಅಟ್ಠಪಞ್ಞಾಸಕ್ಖತ್ತುಞ್ಚ, ಚಕ್ಕವತ್ತೀ ಭವಿಸ್ಸತಿ.
‘‘‘ಕಪ್ಪಸತಸಹಸ್ಸಮ್ಹಿ, ಓಕ್ಕಾಕಕುಲಸಮ್ಭವೋ;
ಗೋತಮೋ ನಾಮ ಗೋತ್ತೇನ, ಸತ್ಥಾ ಲೋಕೇ ಭವಿಸ್ಸತಿ.
‘‘‘ದೇವಲೋಕಾ ¶ ಚವಿತ್ವಾನ, ಸುಕ್ಕಮೂಲೇನ ಚೋದಿತೋ;
ಅಡ್ಢೇ ಕುಲೇ ಮಹಾಭೋಗೇ, ನಿಬ್ಬತ್ತಿಸ್ಸತಿ ತಾವದೇ.
‘‘‘ಸೋ ಪಚ್ಛಾ ಪಬ್ಬಜಿತ್ವಾನ, ಸುಕ್ಕಮೂಲೇನ ಚೋದಿತೋ;
ರಟ್ಠಪಾಲೋತಿ ನಾಮೇನ, ಹೇಸ್ಸತಿ ಸತ್ಥು ಸಾವಕೋ.
‘‘‘ಪಧಾನಪಹಿತತ್ತೋ ¶ ಸೋ, ಉಪಸನ್ತೋ ನಿರೂಪಧಿ;
ಸಬ್ಬಾಸವೇ ಪರಿಞ್ಞಾಯ, ನಿಬ್ಬಾಯಿಸ್ಸತಿನಾಸವೋ’.
‘‘ಉಟ್ಠಾಯ ಅಭಿನಿಕ್ಖಮ್ಮ, ಜಹಿತಾ ಭೋಗಸಮ್ಪದಾ;
ಖೇಳಪಿಣ್ಡೇವ ಭೋಗಮ್ಹಿ, ಪೇಮಂ ಮಯ್ಹಂ ನ ವಿಜ್ಜತಿ.
‘‘ವೀರಿಯಂ ¶ ¶ ಮೇ ಧುರಧೋರಯ್ಹಂ, ಯೋಗಕ್ಖೇಮಾಧಿವಾಹನಂ;
ಧಾರೇಮಿ ಅನ್ತಿಮಂ ದೇಹಂ, ಸಮ್ಮಾಸಮ್ಬುದ್ಧಸಾಸನೇ.
‘‘ಪಟಿಸಮ್ಭಿದಾ ಚತಸ್ಸೋ, ವಿಮೋಕ್ಖಾಪಿ ಚ ಅಟ್ಠಿಮೇ;
ಛಳಭಿಞ್ಞಾ ಸಚ್ಛಿಕತಾ, ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ರಟ್ಠಪಾಲೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ರಟ್ಠಪಾಲತ್ಥೇರಸ್ಸಾಪದಾನಂ ಅಟ್ಠಮಂ.
೯. ಸೋಪಾಕತ್ಥೇರಅಪದಾನಂ
‘‘ಪಬ್ಭಾರಂ ಸೋಧಯನ್ತಸ್ಸ [ಸೇವಯನ್ತಸ್ಸ (ಸೀ. ಕ.)], ವಿಪಿನೇ ಪಬ್ಬತುತ್ತಮೇ;
ಸಿದ್ಧತ್ಥೋ ನಾಮ ಭಗವಾ, ಆಗಚ್ಛಿ ಮಮ ಸನ್ತಿಕಂ.
‘‘ಬುದ್ಧಂ ¶ ಉಪಗತಂ ದಿಸ್ವಾ, ಲೋಕಜೇಟ್ಠಸ್ಸ ತಾದಿನೋ;
ಸನ್ಥರಂ ಸನ್ಥರಿತ್ವಾನ [ಪಞ್ಞಪೇತ್ವಾನ (ಸ್ಯಾ. ಅಟ್ಠ)], ಪುಪ್ಫಾಸನಮದಾಸಹಂ.
‘‘ಪುಪ್ಫಾಸನೇ ನಿಸೀದಿತ್ವಾ, ಸಿದ್ಧತ್ಥೋ ಲೋಕನಾಯಕೋ;
ಮಮಞ್ಚ ಗತಿಮಞ್ಞಾಯ, ಅನಿಚ್ಚತಮುದಾಹರಿ.
‘‘‘ಅನಿಚ್ಚಾ ವತ ಸಙ್ಖಾರಾ, ಉಪ್ಪಾದವಯಧಮ್ಮಿನೋ;
ಉಪ್ಪಜ್ಜಿತ್ವಾ ನಿರುಜ್ಝನ್ತಿ, ತೇಸಂ ವೂಪಸಮೋ ಸುಖೋ’.
‘‘ಇದಂ ವತ್ವಾನ ಸಬ್ಬಞ್ಞೂ, ಲೋಕಜೇಟ್ಠೋ ನರಾಸಭೋ;
ನಭಂ ಅಬ್ಭುಗ್ಗಮಿ ವೀರೋ, ಹಂಸರಾಜಾವ ಅಮ್ಬರೇ.
‘‘ಸಕಂ ದಿಟ್ಠಿಂ ಜಹಿತ್ವಾನ, ಭಾವಯಾನಿಚ್ಚಸಞ್ಞಹಂ;
ಏಕಾಹಂ ಭಾವಯಿತ್ವಾನ, ತತ್ಥ ಕಾಲಂ ಕತೋ ಅಹಂ.
‘‘ದ್ವೇ ಸಮ್ಪತ್ತೀ ಅನುಭೋತ್ವಾ, ಸುಕ್ಕಮೂಲೇನ ಚೋದಿತೋ;
ಪಚ್ಛಿಮೇ ಭವೇ ಸಮ್ಪತ್ತೇ, ಸಪಾಕಯೋನುಪಾಗಮಿಂ.
‘‘ಅಗಾರಾ ಅಭಿನಿಕ್ಖಮ್ಮ, ಪಬ್ಬಜಿಂ ಅನಗಾರಿಯಂ;
ಜಾತಿಯಾ ಸತ್ತವಸ್ಸೋಹಂ, ಅರಹತ್ತಮಪಾಪುಣಿಂ.
‘‘ಆರದ್ಧವೀರಿಯೋ ¶ ¶ ಪಹಿತತ್ತೋ, ಸೀಲೇಸು ಸುಸಮಾಹಿತೋ;
ತೋಸೇತ್ವಾನ ಮಹಾನಾಗಂ, ಅಲತ್ಥಂ ಉಪಸಮ್ಪದಂ.
‘‘ಚತುನ್ನವುತಿತೋ ¶ ಕಪ್ಪೇ, ಯಂ ಕಮ್ಮಮಕರಿಂ ತದಾ;
ದುಗ್ಗತಿಂ ನಾಭಿಜಾನಾಮಿ, ಪುಪ್ಫದಾನಸ್ಸಿದಂ ಫಲಂ.
‘‘ಚತುನ್ನವುತಿತೋ ಕಪ್ಪೇ, ಯಂ ಸಞ್ಞಂ ಭಾವಯಿಂ ತದಾ;
ತಂ ಸಞ್ಞಂ ಭಾವಯನ್ತಸ್ಸ, ಪತ್ತೋ ಮೇ ಆಸವಕ್ಖಯೋ.
‘‘ಪಟಿಸಮ್ಭಿದಾ ¶ ಚತಸ್ಸೋ, ವಿಮೋಕ್ಖಾಪಿ ಚ ಅಟ್ಠಿಮೇ;
ಛಳಭಿಞ್ಞಾ ಸಚ್ಛಿಕತಾ, ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಸೋಪಾಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಸೋಪಾಕತ್ಥೇರಸ್ಸಾಪದಾನಂ ನವಮಂ.
೧೦. ಸುಮಙ್ಗಲತ್ಥೇರಅಪದಾನಂ
‘‘ಆಹುತಿಂ ಯಿಟ್ಠುಕಾಮೋಹಂ, ಪಟಿಯಾದೇತ್ವಾನ ಭೋಜನಂ;
ಬ್ರಾಹ್ಮಣೇ ಪಟಿಮಾನೇನ್ತೋ, ವಿಸಾಲೇ ಮಾಳಕೇ ಠಿತೋ.
‘‘ಅಥದ್ದಸಾಸಿಂ ಸಮ್ಬುದ್ಧಂ, ಪಿಯದಸ್ಸಿಂ ಮಹಾಯಸಂ;
ಸಬ್ಬಲೋಕವಿನೇತಾರಂ, ಸಯಮ್ಭುಂ ಅಗ್ಗಪುಗ್ಗಲಂ.
‘‘ಭಗವನ್ತಂ ಜುತಿಮನ್ತಂ, ಸಾವಕೇಹಿ ಪುರಕ್ಖತಂ;
ಆದಿಚ್ಚಮಿವ ರೋಚನ್ತಂ, ರಥಿಯಂ ಪಟಿಪನ್ನಕಂ.
‘‘ಅಞ್ಜಲಿಂ ಪಗ್ಗಹೇತ್ವಾನ, ಸಕಂ ಚಿತ್ತಂ ಪಸಾದಯಿಂ;
ಮನಸಾವ ನಿಮನ್ತೇಸಿಂ, ‘ಆಗಚ್ಛತು ಮಹಾಮುನಿ’.
‘‘ಮಮ ಸಙ್ಕಪ್ಪಮಞ್ಞಾಯ, ಸತ್ಥಾ ಲೋಕೇ ಅನುತ್ತರೋ;
ಖೀಣಾಸವಸಹಸ್ಸೇಹಿ, ಮಮ ದ್ವಾರಂ ಉಪಾಗಮಿ.
‘‘ನಮೋ ತೇ ಪುರಿಸಾಜಞ್ಞ, ನಮೋ ತೇ ಪುರಿಸುತ್ತಮ;
ಪಾಸಾದಂ ಅಭಿರೂಹಿತ್ವಾ, ಸೀಹಾಸನೇ ನಿಸೀದತಂ [ನಿಸೀದ ತ್ವಂ (ಸೀ.)].
‘‘ದನ್ತೋ ¶ ¶ ದನ್ತಪರಿವಾರೋ, ತಿಣ್ಣೋ ತಾರಯತಂ ವರೋ;
ಪಾಸಾದಂ ಅಭಿರೂಹಿತ್ವಾ, ನಿಸೀದಿ ಪವರಾಸನೇ.
‘‘ಯಂ ಮೇ ಅತ್ಥಿ ಸಕೇ ಗೇಹೇ, ಆಮಿಸಂ ಪಚ್ಚುಪಟ್ಠಿತಂ;
ತಾಹಂ ಬುದ್ಧಸ್ಸ ಪಾದಾಸಿಂ, ಪಸನ್ನೋ ಸೇಹಿ ಪಾಣಿಭಿ.
‘‘ಪಸನ್ನಚಿತ್ತೋ ¶ ಸುಮನೋ, ವೇದಜಾತೋ ಕತಞ್ಜಲೀ;
ಬುದ್ಧಸೇಟ್ಠಂ ನಮಸ್ಸಾಮಿ, ಅಹೋ ಬುದ್ಧಸ್ಸುಳಾರತಾ.
‘‘ಅಟ್ಠನ್ನಂ ¶ ಪಯಿರೂಪಾಸತಂ, ಭುಞ್ಜಂ ಖೀಣಾಸವಾ ಬಹೂ;
ತುಯ್ಹೇವೇಸೋ ಆನುಭಾವೋ, ಸರಣಂ ತಂ ಉಪೇಮಹಂ.
‘‘ಪಿಯದಸ್ಸೀ ಚ ಭಗವಾ, ಲೋಕಜೇಟ್ಠೋ ನರಾಸಭೋ;
ಭಿಕ್ಖುಸಙ್ಘೇ ನಿಸೀದಿತ್ವಾ, ಇಮಾ ಗಾಥಾ ಅಭಾಸಥ.
‘‘‘ಯೋ ಸೋ ಸಙ್ಘಂ ಅಭೋಜೇಸಿ, ಉಜುಭೂತಂ ಸಮಾಹಿತಂ;
ತಥಾಗತಞ್ಚ ಸಮ್ಬುದ್ಧಂ, ಸುಣಾಥ ಮಮ ಭಾಸತೋ.
‘‘‘ಸತ್ತವೀಸತಿಕ್ಖತ್ತುಂ ಸೋ, ದೇವರಜ್ಜಂ ಕರಿಸ್ಸತಿ;
ಸಕಕಮ್ಮಾಭಿರದ್ಧೋ ಸೋ, ದೇವಲೋಕೇ ರಮಿಸ್ಸತಿ.
‘‘‘ದಸ ಅಟ್ಠ ಚಕ್ಖತ್ತುಂ [ದಸಞ್ಚಟ್ಠಕ್ಖತ್ಥುಂ (ಸೀ.), ದಸ ಚಟ್ಠಕ್ಖತ್ತುಂ (ಸ್ಯಾ.)] ಸೋ, ಚಕ್ಕವತ್ತೀ ಭವಿಸ್ಸತಿ;
ಪಥಬ್ಯಾ ರಜ್ಜಂ ಪಞ್ಚಸತಂ, ವಸುಧಂ ಆವಸಿಸ್ಸತಿ’.
‘‘ಅರಞ್ಞವನಮೋಗ್ಗಯ್ಹ, ಕಾನನಂ ಬ್ಯಗ್ಘಸೇವಿತಂ;
ಪಧಾನಂ ಪದಹಿತ್ವಾನ, ಕಿಲೇಸಾ ಝಾಪಿತಾ ಮಯಾ.
‘‘ಅಟ್ಠಾರಸೇ ಕಪ್ಪಸತೇ, ಯಂ ದಾನಮದದಿಂ ತದಾ;
ದುಗ್ಗತಿಂ ನಾಭಿಜಾನಾಮಿ, ಭತ್ತದಾನಸ್ಸಿದಂ ಫಲಂ.
‘‘ಪಟಿಸಮ್ಭಿದಾ ¶ ಚತಸ್ಸೋ, ವಿಮೋಕ್ಖಾಪಿ ಚ ಅಟ್ಠಿಮೇ;
ಛಳಭಿಞ್ಞಾ ಸಚ್ಛಿಕತಾ, ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಸುಮಙ್ಗಲೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಸುಮಙ್ಗಲತ್ಥೇರಸ್ಸಾಪದಾನಂ ದಸಮಂ.
ತಸ್ಸುದ್ದಾನಂ –
ಸೀಹಾಸನೀ ¶ ಏಕಥಮ್ಭೀ, ನನ್ದೋ ಚ ಚೂಳಪನ್ಥಕೋ;
ಪಿಲಿನ್ದರಾಹುಲೋ ಚೇವ, ವಙ್ಗನ್ತೋ ರಟ್ಠಪಾಲಕೋ.
ಸೋಪಾಕೋ ಮಙ್ಗಲೋ ಚೇವ, ದಸೇವ ದುತಿಯೇ ವಗ್ಗೇ;
ಸತಞ್ಚ ಅಟ್ಠತಿಂಸ ಚ, ಗಾಥಾ ಚೇತ್ಥ ಪಕಾಸಿತಾ.
ಸೀಹಾಸನಿಯವಗ್ಗೋ ದುತಿಯೋ.
೩. ಸುಭೂತಿವಗ್ಗೋ
೧. ಸುಭೂತಿತ್ಥೇರಅಪದಾನಂ
‘‘ಹಿಮವನ್ತಸ್ಸಾವಿದೂರೇ ¶ ¶ ¶ , ನಿಸಭೋ ನಾಮ ಪಬ್ಬತೋ;
ಅಸ್ಸಮೋ ಸುಕತೋ ಮಯ್ಹಂ, ಪಣ್ಣಸಾಲಾ ಸುಮಾಪಿತಾ.
‘‘ಕೋಸಿಯೋ ನಾಮ ನಾಮೇನ, ಜಟಿಲೋ ಉಗ್ಗತಾಪನೋ;
ಏಕಾಕಿಯೋ [ಏಕಾಕಿಕೋ (ಕ.)] ಅದುತಿಯೋ, ವಸಾಮಿ ನಿಸಭೇ ತದಾ.
‘‘ಫಲಂ ಮೂಲಞ್ಚ ಪಣ್ಣಞ್ಚ, ನ ಭುಞ್ಜಾಮಿ ಅಹಂ ತದಾ;
ಪವತ್ತಂವ ಸುಪಾತಾಹಂ [ಪವತ್ತಪಣ್ಡುಪತ್ತಾನಿ (ಸೀ.)], ಉಪಜೀವಾಮಿ ತಾವದೇ.
‘‘ನಾಹಂ ¶ ಕೋಪೇಮಿ ಆಜೀವಂ, ಚಜಮಾನೋಪಿ ಜೀವಿತಂ;
ಆರಾಧೇಮಿ ಸಕಂ ಚಿತ್ತಂ, ವಿವಜ್ಜೇಮಿ ಅನೇಸನಂ.
‘‘ರಾಗೂಪಸಂಹಿತಂ ಚಿತ್ತಂ, ಯದಾ ಉಪ್ಪಜ್ಜತೇ ಮಮ;
ಸಯಂವ ಪಚ್ಚವೇಕ್ಖಾಮಿ, ಏಕಗ್ಗೋ ತಂ ದಮೇಮಹಂ.
‘‘‘ರಜ್ಜಸೇ ರಜ್ಜನೀಯೇ ಚ, ದುಸ್ಸನೀಯೇ ಚ ದುಸ್ಸಸೇ;
ಮುಯ್ಹಸೇ ಮೋಹನೀಯೇ ಚ, ನಿಕ್ಖಮಸ್ಸು ವನಾ ತುವಂ.
‘‘‘ವಿಸುದ್ಧಾನಂ ಅಯಂ ವಾಸೋ, ನಿಮ್ಮಲಾನಂ ತಪಸ್ಸಿನಂ;
ಮಾ ಖೋ ವಿಸುದ್ಧಂ ದೂಸೇಸಿ, ನಿಕ್ಖಮಸ್ಸು ವನಾ ತುವಂ.
‘‘‘ಅಗಾರಿಕೋ ಭವಿತ್ವಾನ, ಯದಾ ಪುತ್ತಂ [ಸದಾಯುತ್ತಂ (ಸೀ.), ಯದಾಯುತ್ತಂ (ಸ್ಯಾ.)], ಲಭಿಸ್ಸಸಿ;
ಉಭೋಪಿ ಮಾ ವಿರಾಧೇಸಿ, ನಿಕ್ಖಮಸ್ಸು ವನಾ ತುವಂ.
‘‘‘ಛವಾಲಾತಂ ಯಥಾ ಕಟ್ಠಂ, ನ ಕ್ವಚಿ ಕಿಚ್ಚಕಾರಕಂ;
ನೇವ ಗಾಮೇ ಅರಞ್ಞೇ ವಾ, ನ ಹಿ ತಂ ಕಟ್ಠಸಮ್ಮತಂ.
‘‘‘ಛವಾಲಾತೂಪಮೋ ತ್ವಂಸಿ, ನ ಗಿಹೀ ನಾಪಿ ಸಞ್ಞತೋ;
ಉಭತೋ ಮುತ್ತಕೋ ಅಜ್ಜ, ನಿಕ್ಖಮಸ್ಸು ವನಾ ತುವಂ.
‘‘‘ಸಿಯಾ ನು ಖೋ ತವ ಏತಂ, ಕೋ ಪಜಾನಾತಿ ತೇ ಇದಂ;
ಸದ್ಧಾಧುರಂ ವಹಿಸಿ [ಸದ್ಧಾಧುರಂ ಜಹಸಿ (ಸೀ.), ಸೀಘಂ ಧುರಂ ವಹಿಸಿ (ಸ್ಯಾ.)] ಮೇ, ಕೋಸಜ್ಜಬಹುಲಾಯ ಚ.
‘‘‘ಜಿಗುಚ್ಛಿಸ್ಸನ್ತಿ ¶ ¶ ತಂ ವಿಞ್ಞೂ, ಅಸುಚಿಂ ನಾಗರಿಕೋ ಯಥಾ;
ಆಕಡ್ಢಿತ್ವಾನ ಇಸಯೋ, ಚೋದಯಿಸ್ಸನ್ತಿ ತಂ ಸದಾ.
‘‘‘ತಂ ವಿಞ್ಞೂ ಪವದಿಸ್ಸನ್ತಿ, ಸಮತಿಕ್ಕನ್ತಸಾಸನಂ;
ಸಂವಾಸಂ ಅಲಭನ್ತೋ ಹಿ, ಕಥಂ ಜೀವಿಹಿಸಿ [ಜೀವಿಸ್ಸಸಿ (ಸೀ.)] ತುವಂ.
‘‘‘ತಿಧಾಪಭಿನ್ನಂ ¶ ¶ ಮಾತಙ್ಗಂ, ಕುಞ್ಜರಂ ಸಟ್ಠಿಹಾಯನಂ;
ಬಲೀ ನಾಗೋ ಉಪಗನ್ತ್ವಾ, ಯೂಥಾ ನೀಹರತೇ ಗಜಂ.
‘‘‘ಯೂಥಾ ವಿನಿಸ್ಸಟೋ ಸನ್ತೋ, ಸುಖಂ ಸಾತಂ ನ ವಿನ್ದತಿ;
ದುಕ್ಖಿತೋ ವಿಮನೋ ಹೋತಿ, ಪಜ್ಝಾಯನ್ತೋ ಪವೇಧತಿ.
‘‘‘ತಥೇವ ಜಟಿಲಾ ತಮ್ಪಿ, ನೀಹರಿಸ್ಸನ್ತಿ ದುಮ್ಮತಿಂ;
ತೇಹಿ ತ್ವಂ ನಿಸ್ಸಟೋ ಸನ್ತೋ, ಸುಖಂ ಸಾತಂ ನ ಲಚ್ಛಸಿ.
‘‘‘ದಿವಾ ವಾ ಯದಿ ವಾ ರತ್ತಿಂ, ಸೋಕಸಲ್ಲಸಮಪ್ಪಿತೋ;
ಡಯ್ಹಸಿ ಪರಿಳಾಹೇನ, ಗಜೋ ಯೂಥಾವ ನಿಸ್ಸಟೋ.
‘‘‘ಜಾತರೂಪಂ ಯಥಾ ಕೂಟಂ, ನೇವ ಝಾಯತಿ [ಯಾಯತಿ (ಸ್ಯಾ.)] ಕತ್ಥಚಿ;
ತಥಾ ಸೀಲವಿಹೀನೋ ತ್ವಂ, ನ ಝಾಯಿಸ್ಸಸಿ [ಯಾರಿಸ್ಸತಿ (ಸ್ಯಾ.)] ಕತ್ಥಚಿ.
‘‘‘ಅಗಾರಂ ವಸಮಾನೋಪಿ, ಕಥಂ ಜೀವಿಹಿಸಿ ತುವಂ;
ಮತ್ತಿಕಂ ಪೇತ್ತಿಕಞ್ಚಾಪಿ, ನತ್ಥಿ ತೇ ನಿಹಿತಂ ಧನಂ.
‘‘‘ಸಯಂ ಕಮ್ಮಂ ಕರಿತ್ವಾನ, ಗತ್ತೇ ಸೇದಂ ಪಮೋಚಯಂ;
ಏವಂ ಜೀವಿಹಿಸಿ ಗೇಹೇ, ಸಾಧು ತೇ ತಂ ನ ರುಚ್ಚತಿ.
‘‘‘ಏವಾಹಂ ತತ್ಥ ವಾರೇಮಿ, ಸಂಕಿಲೇಸಗತಂ ಮನಂ;
ನಾನಾಧಮ್ಮಕಥಂ ಕತ್ವಾ, ಪಾಪಾ ಚಿತ್ತಂ ನಿವಾರಯಿಂ’.
‘‘ಏವಂ ಮೇ ವಿಹರನ್ತಸ್ಸ, ಅಪ್ಪಮಾದವಿಹಾರಿನೋ;
ತಿಂಸವಸ್ಸಸಹಸ್ಸಾನಿ, ವಿಪಿನೇ ಮೇ ಅತಿಕ್ಕಮುಂ.
‘‘ಅಪ್ಪಮಾದರತಂ ದಿಸ್ವಾ, ಉತ್ತಮತ್ಥಂ ಗವೇಸಕಂ;
ಪದುಮುತ್ತರಸಮ್ಬುದ್ಧೋ, ಆಗಚ್ಛಿ ಮಮ ಸನ್ತಿಕಂ.
‘‘ತಿಮ್ಬರೂಸಕವಣ್ಣಾಭೋ ¶ , ಅಪ್ಪಮೇಯ್ಯೋ ಅನೂಪಮೋ;
ರೂಪೇನಾಸದಿಸೋ ಬುದ್ಧೋ, ಆಕಾಸೇ ಚಙ್ಕಮೀ ತದಾ.
‘‘ಸುಫುಲ್ಲೋ ¶ ಸಾಲರಾಜಾವ, ವಿಜ್ಜೂವಬ್ಭಘನನ್ತರೇ;
ಞಾಣೇನಾಸದಿಸೋ ಬುದ್ಧೋ, ಆಕಾಸೇ ಚಙ್ಕಮೀ ತದಾ.
‘‘ಸೀಹರಾಜಾ ¶ ವಸಮ್ಭೀತೋ [ಛಮ್ಭಿತೋ (ಕ.)],
ಗಜರಾಜಾವ ದಪ್ಪಿತೋ [ದಮ್ಮಿತೋ (ಕ.)].
ಲಾಸಿತೋ [ಅಭೀತೋ (ಸ್ಯಾ.)] ಬ್ಯಗ್ಘರಾಜಾವ, ಆಕಾಸೇ ಚಙ್ಕಮೀ ತದಾ.
‘‘ಸಿಙ್ಗೀನಿಕ್ಖಸವಣ್ಣಾಭೋ, ಖದಿರಙ್ಗಾರಸನ್ನಿಭೋ;
ಮಣಿ ಯಥಾ ಜೋತಿರಸೋ, ಆಕಾಸೇ ಚಙ್ಕಮೀ ತದಾ.
‘‘ವಿಸುದ್ಧಕೇಲಾಸನಿಭೋ ¶ , ಪುಣ್ಣಮಾಯೇವ ಚನ್ದಿಮಾ;
ಮಜ್ಝನ್ಹಿಕೇವ [ಮಜ್ಝನ್ತಿಕೇವ (ಸಬ್ಬತ್ಥ)] ಸೂರಿಯೋ, ಆಕಾಸೇ ಚಙ್ಕಮೀ ತದಾ.
‘‘ದಿಸ್ವಾ ನಭೇ ಚಙ್ಕಮನ್ತಂ, ಏವಂ ಚಿನ್ತೇಸಹಂ ತದಾ;
‘ದೇವೋ ನು ಖೋ ಅಯಂ ಸತ್ತೋ, ಉದಾಹು ಮನುಜೋ ಅಯಂ.
‘‘‘ನ ಮೇ ಸುತೋ ವಾ ದಿಟ್ಠೋ ವಾ, ಮಹಿಯಾ ಏದಿಸೋ ನರೋ;
ಅಪಿ ಮನ್ತಪದಂ ಅತ್ಥಿ, ಅಯಂ ಸತ್ಥಾ ಭವಿಸ್ಸತಿ’.
‘‘ಏವಾಹಂ ಚಿನ್ತಯಿತ್ವಾನ, ಸಕಂ ಚಿತ್ತಂ ಪಸಾದಯಿಂ;
ನಾನಾಪುಪ್ಫಞ್ಚ ಗನ್ಧಞ್ಚ, ಸನ್ನಿಪಾತೇಸಹಂ [ಸನ್ನಿಪಾತೇತ್ವಾಹಂ (ಸೀ.)] ತದಾ.
‘‘ಪುಪ್ಫಾಸನಂ ಪಞ್ಞಪೇತ್ವಾ, ಸಾಧುಚಿತ್ತಂ ಮನೋರಮಂ;
ನರಸಾರಥಿನಂ ಅಗ್ಗಂ, ಇದಂ ವಚನಮಬ್ರವಿಂ.
‘‘‘ಇದಂ ಮೇ ಆಸನಂ ವೀರ, ಪಞ್ಞತ್ತಂ ತವನುಚ್ಛವಂ;
ಹಾಸಯನ್ತೋ ಮಮಂ ಚಿತ್ತಂ, ನಿಸೀದ ಕುಸುಮಾಸನೇ’.
‘‘ನಿಸೀದಿ ¶ ತತ್ಥ ಭಗವಾ, ಅಸಮ್ಭೀತೋವ [ಅಛಮ್ಭಿತೋವ (ಕ.)] ಕೇಸರೀ;
ಸತ್ತರತ್ತಿನ್ದಿವಂ ಬುದ್ಧೋ, ಪವರೇ ಕುಸುಮಾಸನೇ.
‘‘ನಮಸ್ಸಮಾನೋ ಅಟ್ಠಾಸಿಂ, ಸತ್ತರತ್ತಿನ್ದಿವಂ ಅಹಂ;
ವುಟ್ಠಹಿತ್ವಾ ಸಮಾಧಿಮ್ಹಾ, ಸತ್ಥಾ ಲೋಕೇ ಅನುತ್ತರೋ;
ಮಮ ಕಮ್ಮಂ ಪಕಿತ್ತೇನ್ತೋ, ಇದಂ ವಚನಮಬ್ರವಿ.
‘‘‘ಭಾವೇಹಿ ಬುದ್ಧಾನುಸ್ಸತಿಂ, ಭಾವನಾನಮನುತ್ತರಂ;
ಇಮಂ ಸತಿಂ ಭಾವಯಿತ್ವಾ, ಪೂರಯಿಸ್ಸಸಿ ಮಾನಸಂ.
‘‘‘ತಿಂಸಕಪ್ಪಸಹಸ್ಸಾನಿ, ದೇವಲೋಕೇ ರಮಿಸ್ಸಸಿ;
ಅಸೀತಿಕ್ಖತ್ತುಂ ದೇವಿನ್ದೋ, ದೇವರಜ್ಜಂ ಕರಿಸ್ಸಸಿ;
ಸಹಸ್ಸಕ್ಖತ್ತುಂ ಚಕ್ಕವತ್ತೀ, ರಾಜಾ ರಟ್ಠೇ ಭವಿಸ್ಸಸಿ.
‘‘‘ಪದೇಸರಜ್ಜಂ ¶ ವಿಪುಲಂ, ಗಣನಾತೋ ಅಸಙ್ಖಿಯಂ;
ಅನುಭೋಸ್ಸಸಿ ತಂ ಸಬ್ಬಂ, ಬುದ್ಧಾನುಸ್ಸತಿಯಾ ಫಲಂ.
‘‘‘ಭವಾಭವೇ ¶ ಸಂಸರನ್ತೋ, ಮಹಾಭೋಗಂ ಲಭಿಸ್ಸಸಿ;
ಭೋಗೇ ತೇ ಊನತಾ ನತ್ಥಿ, ಬುದ್ಧಾನುಸ್ಸತಿಯಾ ಫಲಂ.
‘‘‘ಕಪ್ಪಸತಸಹಸ್ಸಮ್ಹಿ, ಓಕ್ಕಾಕಕುಲಸಮ್ಭವೋ;
ಗೋತಮೋ ನಾಮ ಗೋತ್ತೇನ, ಸತ್ಥಾ ಲೋಕೇ ಭವಿಸ್ಸತಿ.
‘‘‘ಅಸೀತಿಕೋಟಿಂ ಛಡ್ಡೇತ್ವಾ, ದಾಸೇ ಕಮ್ಮಕರೇ ಬಹೂ;
ಗೋತಮಸ್ಸ ಭಗವತೋ, ಸಾಸನೇ ಪಬ್ಬಜಿಸ್ಸಸಿ.
‘‘‘ಆರಾಧಯಿತ್ವಾ ಸಮ್ಬುದ್ಧಂ, ಗೋತಮಂ ಸಕ್ಯಪುಙ್ಗವಂ;
ಸುಭೂತಿ ನಾಮ ನಾಮೇನ, ಹೇಸ್ಸತಿ ಸತ್ಥು ಸಾವಕೋ.
‘‘‘ಭಿಕ್ಖುಸಙ್ಘೇ ¶ ¶ ನಿಸೀದಿತ್ವಾ, ದಕ್ಖಿಣೇಯ್ಯಗುಣಮ್ಹಿ ತಂ;
ತಥಾರಣವಿಹಾರೇ ಚ, ದ್ವೀಸು ಅಗ್ಗೇ ಠಪೇಸ್ಸತಿ’.
‘‘ಇದಂ ವತ್ವಾನ ಸಮ್ಬುದ್ಧೋ, ಜಲಜುತ್ತಮನಾಮಕೋ;
ನಭಂ ಅಬ್ಭುಗ್ಗಮೀ ವೀರೋ, ಹಂಸರಾಜಾವ ಅಮ್ಬರೇ.
‘‘ಸಾಸಿತೋ ಲೋಕನಾಥೇನ, ನಮಸ್ಸಿತ್ವಾ ತಥಾಗತಂ;
ಸದಾ ಭಾವೇಮಿ ಮುದಿತೋ, ಬುದ್ಧಾನುಸ್ಸತಿಮುತ್ತಮಂ.
‘‘ತೇನ ಕಮ್ಮೇನ ಸುಕತೇನ, ಚೇತನಾಪಣಿಧೀಹಿ ಚ;
ಜಹಿತ್ವಾ ಮಾನುಸಂ ದೇಹಂ, ತಾವತಿಂಸಂ ಅಗಚ್ಛಹಂ.
‘‘ಅಸೀತಿಕ್ಖತ್ತುಂ ದೇವಿನ್ದೋ, ದೇವರಜ್ಜಮಕಾರಯಿಂ;
ಸಹಸ್ಸಕ್ಖತ್ತುಂ ರಾಜಾ ಚ, ಚಕ್ಕವತ್ತೀ ಅಹೋಸಹಂ.
‘‘ಪದೇಸರಜ್ಜಂ ವಿಪುಲಂ, ಗಣನಾತೋ ಅಸಙ್ಖಿಯಂ;
ಅನುಭೋಮಿ ಸುಸಮ್ಪತ್ತಿಂ, ಬುದ್ಧಾನುಸ್ಸತಿಯಾ ಫಲಂ.
‘‘ಭವಾಭವೇ ಸಂಸರನ್ತೋ, ಮಹಾಭೋಗಂ ಲಭಾಮಹಂ;
ಭೋಗೇ ಮೇ ಊನತಾ ನತ್ಥಿ, ಬುದ್ಧಾನುಸ್ಸತಿಯಾ ಫಲಂ.
‘‘ಸತಸಹಸ್ಸಿತೋ ಕಪ್ಪೇ, ಯಂ ಕಮ್ಮಮಕರಿಂ ತದಾ;
ದುಗ್ಗತಿಂ ನಾಭಿಜಾನಾಮಿ, ಬುದ್ಧಾನುಸ್ಸತಿಯಾ ಫಲಂ.
‘‘ಪಟಿಸಮ್ಭಿದಾ ¶ ಚತಸ್ಸೋ, ವಿಮೋಕ್ಖಾಪಿ ಚ ಅಟ್ಠಿಮೇ;
ಛಳಭಿಞ್ಞಾ ಸಚ್ಛಿಕತಾ, ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಸುಭೂತಿ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಸುಭೂತಿತ್ಥೇರಸ್ಸಾಪದಾನಂ ಪಠಮಂ.
೨. ಉಪವಾನತ್ಥೇರಅಪದಾನಂ
‘‘ಪದುಮುತ್ತರೋ ¶ ¶ ನಾಮ ಜಿನೋ, ಸಬ್ಬಧಮ್ಮಾನ ಪಾರಗೂ;
ಜಲಿತ್ವಾ ಅಗ್ಗಿಕ್ಖನ್ಧೋವ, ಸಮ್ಬುದ್ಧೋ ಪರಿನಿಬ್ಬುತೋ.
‘‘ಮಹಾಜನಾ ಸಮಾಗಮ್ಮ, ಪೂಜಯಿತ್ವಾ ತಥಾಗತಂ;
ಚಿತಂ ಕತ್ವಾನ ಸುಕತಂ, ಸರೀರಂ ಅಭಿರೋಪಯುಂ.
‘‘ಸರೀರಕಿಚ್ಚಂ ಕತ್ವಾನ, ಧಾತುಂ ತತ್ಥ ಸಮಾನಯುಂ;
ಸದೇವಮಾನುಸಾ ಸಬ್ಬೇ, ಬುದ್ಧಥೂಪಂ ಅಕಂಸು ತೇ.
‘‘ಪಠಮಾ ¶ ಕಞ್ಚನಮಯಾ, ದುತಿಯಾಸಿ ಮಣೀಮಯಾ;
ತತಿಯಾ ರೂಪಿಯಮಯಾ, ಚತುತ್ಥೀ ಫಲಿಕಾಮಯಾ.
‘‘ತಥಾ [ತತ್ಥ (ಸ್ಯಾ. ಕ.)] ಪಞ್ಚಮಿಯಾ ಭೂಮಿ [ನೇಮಿ (ಸೀ.)], ಲೋಹಿತಙ್ಗಮಯಾ ಅಹು;
ಛಟ್ಠಾ ಮಸಾರಗಲ್ಲಸ್ಸ, ಸಬ್ಬರತನಮಯೂಪರಿ.
‘‘ಜಙ್ಘಾ ಮಣಿಮಯಾ ಆಸಿ, ವೇದಿಕಾ ರತನಮಯಾ;
ಸಬ್ಬಸೋಣ್ಣಮಯೋ ಥೂಪೋ, ಉದ್ಧಂ ಯೋಜನಮುಗ್ಗತೋ.
‘‘ದೇವಾ ತತ್ಥ ಸಮಾಗನ್ತ್ವಾ, ಏಕತೋ ಮನ್ತಯುಂ ತದಾ;
ಮಯಮ್ಪಿ ಥೂಪಂ ಕಸ್ಸಾಮ, ಲೋಕನಾಥಸ್ಸ ತಾದಿನೋ.
‘‘ಧಾತು ಆವೇಣಿಕಾ ನತ್ಥಿ, ಸರೀರಂ ಏಕಪಿಣ್ಡಿತಂ;
ಇಮಮ್ಹಿ ಬುದ್ಧಥೂಪಮ್ಹಿ, ಕಸ್ಸಾಮ ಕಞ್ಚುಕಂ ಮಯಂ.
‘‘ದೇವಾ ಸತ್ತಹಿ ರತ್ನೇಹಿ [ಸತ್ತರತನೇಹಿ (ಸೀ.)], ಅಞ್ಞಂ ವಡ್ಢೇಸು ಯೋಜನಂ;
ಥೂಪೋ ದ್ವಿಯೋಜನುಬ್ಬೇಧೋ, ತಿಮಿರಂ ಬ್ಯಪಹನ್ತಿ ಸೋ.
‘‘ನಾಗಾ ¶ ತತ್ಥ ಸಮಾಗನ್ತ್ವಾ, ಏಕತೋ ಮನ್ತಯುಂ ತದಾ;
ಮನುಸ್ಸಾ ಚೇವ ದೇವಾ ಚ, ಬುದ್ಧಥೂಪಂ ಅಕಂಸು ತೇ.
‘‘ಮಾ ¶ ನೋ ಪಮತ್ತಾ ಅಸ್ಸುಮ್ಹ [ಅಸ್ಸುಮ್ಹಾ (ಸೀ. ಸ್ಯಾ.), ಆಸಿಮ್ಹಾ (?)], ಅಪ್ಪಮತ್ತಾ ಸದೇವಕಾ;
ಮಯಮ್ಪಿ ಥೂಪಂ ಕಸ್ಸಾಮ, ಲೋಕನಾಥಸ್ಸ ತಾದಿನೋ.
‘‘ಇನ್ದನೀಲಂ ಮಹಾನೀಲಂ, ಅಥೋ ಜೋತಿರಸಂ ಮಣಿಂ;
ಏಕತೋ ಸನ್ನಿಪಾತೇತ್ವಾ, ಬುದ್ಧಥೂಪಂ ಅಛಾದಯುಂ.
‘‘ಸಬ್ಬಂ ಮಣಿಮಯಂ ಆಸಿ, ತಾವತಾ ಬುದ್ಧಚೇತಿಯಂ;
ತಿಯೋಜನಸಮುಬ್ಬಿದ್ಧಂ [ತೀಣಿ ಯೋಜನಮುಬ್ಬಿದ್ಧಂ (ಸೀ. ಕ.)], ಆಲೋಕಕರಣಂ ತದಾ.
‘‘ಗರುಳಾ ¶ ಚ ಸಮಾಗನ್ತ್ವಾ, ಏಕತೋ ಮನ್ತಯುಂ ತದಾ;
ಮನುಸ್ಸಾ ದೇವಾ ನಾಗಾ ಚ, ಬುದ್ಧಥೂಪಂ ಅಕಂಸು ತೇ.
‘‘‘ಮಾ ನೋ ಪಮತ್ತಾ ಅಸ್ಸುಮ್ಹ, ಅಪ್ಪಮತ್ತಾ ಸದೇವಕಾ;
ಮಯಮ್ಪಿ ಥೂಪಂ ಕಸ್ಸಾಮ, ಲೋಕನಾಥಸ್ಸ ತಾದಿನೋ’.
‘‘ಸಬ್ಬಂ ಮಣಿಮಯಂ ಥೂಪಂ, ಅಕರುಂ ತೇ ಚ ಕಞ್ಚುಕಂ [ಸಬ್ಬಮಣಿಮಯಂ ಥೂಪೇ, ಅಕರುತ್ತರಕಞ್ಚುಕಂ (ಸೀ.)];
ಯೋಜನಂ ತೇಪಿ ವಡ್ಢೇಸುಂ, ಆಯತಂ ಬುದ್ಧಚೇತಿಯಂ.
‘‘ಚತುಯೋಜನಮುಬ್ಬಿದ್ಧೋ, ಬುದ್ಧಥೂಪೋ ವಿರೋಚತಿ;
ಓಭಾಸೇತಿ ದಿಸಾ ಸಬ್ಬಾ, ಸತರಂಸೀವ ಉಗ್ಗತೋ.
‘‘ಕುಮ್ಭಣ್ಡಾ ಚ ಸಮಾಗನ್ತ್ವಾ, ಏಕತೋ ಮನ್ತಯುಂ ತದಾ;
ಮನುಸ್ಸಾ ಚೇವ ದೇವಾ ಚ, ನಾಗಾ ಚ ಗರುಳಾ ತಥಾ.
ಪಚ್ಚೇಕಂ ಬುದ್ಧಸೇಟ್ಠಸ್ಸ, ಅಕಂಸು ಥೂಪಮುತ್ತಮಂ.
‘‘‘ಮಾ ನೋ ಪಮತ್ತಾ ಅಸ್ಸುಮ್ಹ, ಅಪ್ಪಮತ್ತಾ ಸದೇವಕಾ;
ಮಯಮ್ಪಿ ಥೂಪಂ ಕಸ್ಸಾಮ, ಲೋಕನಾಥಸ್ಸ ತಾದಿನೋ;
ರತನೇಹಿ ಛಾದೇಸ್ಸಾಮ, ಆಯತಂ ಬುದ್ಧಚೇತಿಯಂ’.
‘‘ಯೋಜನಂ ತೇಪಿ ವಡ್ಢೇಸುಂ, ಆಯತಂ ಬುದ್ಧಚೇತಿಯಂ;
ಪಞ್ಚಯೋಜನಮುಬ್ಬಿದ್ಧೋ, ಥೂಪೋ ಓಭಾಸತೇ ತದಾ.
‘‘ಯಕ್ಖಾ ¶ ತತ್ಥ ಸಮಾಗನ್ತ್ವಾ, ಏಕತೋ ಮನ್ತಯುಂ ತದಾ;
ಮನುಸ್ಸಾ ದೇವಾ ನಾಗಾ ಚ, ಗರುಳಾ ಕುಮ್ಭಅಣ್ಡಕಾ.
‘‘ಪಚ್ಚೇಕಂ ಬುದ್ಧಸೇಟ್ಠಸ್ಸ, ಅಕಂಸು ಥೂಪಮುತ್ತಮಂ;
‘ಮಾ ನೋ ಪಮತ್ತಾ ಅಸ್ಸುಮ್ಹ, ಅಪ್ಪಮತ್ತಾ ಸದೇವಕಾ.
‘‘‘ಮಯಮ್ಪಿ ¶ ¶ ಥೂಪಂ ಕಸ್ಸಾಮ, ಲೋಕನಾಥಸ್ಸ ತಾದಿನೋ;
ಫಲಿಕಾಹಿ ಛಾದೇಸ್ಸಾಮ, ಆಯತಂ ಬುದ್ಧಚೇತಿಯಂ’.
‘‘ಯೋಜನಂ ತೇಪಿ ವಡ್ಢೇಸುಂ, ಆಯತಂ ಬುದ್ಧಚೇತಿಯಂ;
ಛ ಯೋಜನಾನಿ ಉಬ್ಬಿದ್ಧೋ, ಥೂಪೋ ಓಭಾಸತೇ ತದಾ.
‘‘ಗನ್ಧಬ್ಬಾ ಚ ಸಮಾಗನ್ತ್ವಾ, ಏಕತೋ ಮನ್ತಯುಂ ತದಾ;
‘ಮನುಜಾ ದೇವತಾ ನಾಗಾ, ಗರುಳಾ ಕುಮ್ಭಯಕ್ಖಕಾ.
‘‘‘ಸಬ್ಬೇಕಂಸು ಬುದ್ಧಥೂಪಂ, ಮಯಮೇತ್ಥ ಅಕಾರಕಾ;
ಮಯಮ್ಪಿ ಥೂಪಂ ಕಸ್ಸಾಮ, ಲೋಕನಾಥಸ್ಸ ತಾದಿನೋ’.
‘‘ವೇದಿಯೋ ¶ ಸತ್ತ ಕತ್ವಾನ, ಛತ್ತಮಾರೋಪಯಿಂಸು ತೇ;
ಸಬ್ಬಸೋಣ್ಣಮಯಂ ಥೂಪಂ, ಗನ್ಧಬ್ಬಾ ಕಾರಯುಂ ತದಾ.
‘‘ಸತ್ತಯೋಜನಮುಬ್ಬಿದ್ಧೋ, ಥೂಪೋ ಓಭಾಸತೇ ತದಾ;
ರತ್ತಿನ್ದಿವಾ ನ ಞಾಯನ್ತಿ, ಆಲೋಕೋ ಹೋತಿ [ಆಲೋಕಾ ಹೋನ್ತಿ (ಸ್ಯಾ. ಕ.)] ಸಬ್ಬದಾ.
‘‘ಅಭಿಭೋನ್ತಿ ¶ ನ ತಸ್ಸಾಭಾ, ಚನ್ದಸೂರಾ ಸತಾರಕಾ;
ಸಮನ್ತಾ ಯೋಜನಸತೇ, ಪದೀಪೋಪಿ ನ ಪಜ್ಜಲಿ.
‘‘ತೇನ ಕಾಲೇನ ಯೇ ಕೇಚಿ, ಥೂಪಂ ಪೂಜೇನ್ತಿ ಮಾನುಸಾ;
ನ ತೇ ಥೂಪಮಾರುಹನ್ತಿ, ಅಮ್ಬರೇ ಉಕ್ಖಿಪನ್ತಿ ತೇ.
‘‘ದೇವೇಹಿ ಠಪಿತೋ ಯಕ್ಖೋ, ಅಭಿಸಮ್ಮತನಾಮಕೋ;
ಧಜಂ ವಾ ಪುಪ್ಫದಾಮಂ ವಾ, ಅಭಿರೋಪೇತಿ ಉತ್ತರಿ.
‘‘ನ ತೇ ಪಸ್ಸನ್ತಿ ತಂ ಯಕ್ಖಂ, ದಾಮಂ ಪಸ್ಸನ್ತಿ ಗಚ್ಛತೋ;
ಏವಂ ಪಸ್ಸಿತ್ವಾ ಗಚ್ಛನ್ತಾ, ಸಬ್ಬೇ ಗಚ್ಛನ್ತಿ ಸುಗ್ಗತಿಂ.
‘‘ವಿರುದ್ಧಾ [ವಿಸದ್ಧಾ (ಸೀ.)] ಯೇ ಪಾವಚನೇ, ಪಸನ್ನಾ ಯೇ ಚ ಸಾಸನೇ;
ಪಾಟಿಹೇರಂ ದಟ್ಠುಕಾಮಾ, ಥೂಪಂ ಪೂಜೇನ್ತಿ ಮಾನುಸಾ.
‘‘ನಗರೇ ಹಂಸವತಿಯಾ, ಅಹೋಸಿಂ ಭತಕೋ [ವರಕೋ (ಸ್ಯಾ. ಕ.)] ತದಾ;
ಆಮೋದಿತಂ ಜನಂ ದಿಸ್ವಾ, ಏವಂ ಚಿನ್ತೇಸಹಂ ತದಾ.
‘‘‘ಉಳಾರೋ ಭಗವಾ ಹೇಸೋ, ಯಸ್ಸ ಧಾತುಧರೇದಿಸಂ;
ಇಮಾ ಚ ಜನತಾ ತುಟ್ಠಾ, ಕಾರಂ ಕುಬ್ಬಂ ನ ತಪ್ಪರೇ [ಕುಬ್ಬನ್ತನಪ್ಪಕಂ (ಸೀ.)].
‘‘‘ಅಹಮ್ಪಿ ¶ ಕಾರಂ ಕಸ್ಸಾಮಿ, ಲೋಕನಾಥಸ್ಸ ತಾದಿನೋ;
ತಸ್ಸ ಧಮ್ಮೇಸು ದಾಯಾದೋ, ಭವಿಸ್ಸಾಮಿ ಅನಾಗತೇ’.
‘‘ಸುಧೋತಂ ¶ ರಜಕೇನಾಹಂ, ಉತ್ತರೇಯ್ಯಪಟಂ ಮಮ;
ವೇಳಗ್ಗೇ ಆಲಗೇತ್ವಾನ, ಧಜಂ ಉಕ್ಖಿಪಿಮಮ್ಬರೇ.
‘‘ಅಭಿಸಮ್ಮತಕೋ ಗಯ್ಹ, ಅಮ್ಬರೇಹಾಸಿ ಮೇ ಧಜಂ;
ವಾತೇರಿತಂ ಧಜಂ ದಿಸ್ವಾ, ಭಿಯ್ಯೋ ಹಾಸಂ ಜನೇಸಹಂ.
‘‘ತತ್ಥ ¶ ಚಿತ್ತಂ ಪಸಾದೇತ್ವಾ, ಸಮಣಂ ಉಪಸಙ್ಕಮಿಂ;
ತಂ ಭಿಕ್ಖುಂ ಅಭಿವಾದೇತ್ವಾ, ವಿಪಾಕಂ ಪುಚ್ಛಹಂ ಧಜೇ.
‘‘ಸೋ ಮೇ ಕಥೇಸಿ ಆನನ್ದ, ಪೀತಿಸಞ್ಜನನಂ ಮಮ;
‘ತಸ್ಸ ಧಜಸ್ಸ ವಿಪಾಕಂ, ಅನುಭೋಸ್ಸಸಿ ಸಬ್ಬದಾ.
‘‘‘ಹತ್ಥೀ ¶ ಅಸ್ಸಾ ರಥಾ ಪತ್ತೀ, ಸೇನಾ ಚ ಚತುರಙ್ಗಿನೀ;
ಪರಿವಾರೇಸ್ಸನ್ತಿ ತಂ ನಿಚ್ಚಂ, ಧಜದಾನಸ್ಸಿದಂ ಫಲಂ.
‘‘‘ಸಟ್ಠಿತೂರಿಯಸಹಸ್ಸಾನಿ, ಭೇರಿಯೋ ಸಮಲಙ್ಕತಾ;
ಪರಿವಾರೇಸ್ಸನ್ತಿ ತಂ ನಿಚ್ಚಂ, ಧಜದಾನಸ್ಸಿದಂ ಫಲಂ.
‘‘‘ಛಳಾಸೀತಿಸಹಸ್ಸಾನಿ, ನಾರಿಯೋ ಸಮಲಙ್ಕತಾ;
ವಿಚಿತ್ತವತ್ಥಾಭರಣಾ, ಆಮುತ್ತಮಣಿಕುಣ್ಡಲಾ.
‘‘‘ಅಳಾರಪಮ್ಹಾ ಹಸುಲಾ, ಸುಸಞ್ಞಾ ತನುಮಜ್ಝಿಮಾ;
ಪರಿವಾರೇಸ್ಸನ್ತಿ ತಂ ನಿಚ್ಚಂ, ಧಜದಾನಸ್ಸಿದಂ ಫಲಂ.
‘‘‘ತಿಂಸಕಪ್ಪಸಹಸ್ಸಾನಿ, ದೇವಲೋಕೇ ರಮಿಸ್ಸಸಿ;
ಅಸೀತಿಕ್ಖತ್ತುಂ ದೇವಿನ್ದೋ, ದೇವರಜ್ಜಂ ಕರಿಸ್ಸಸಿ.
‘‘‘ಸಹಸ್ಸಕ್ಖತ್ತುಂ ರಾಜಾ ಚ, ಚಕ್ಕವತ್ತೀ ಭವಿಸ್ಸಸಿ;
ಪದೇಸರಜ್ಜಂ ವಿಪುಲಂ, ಗಣನಾತೋ ಅಸಙ್ಖಿಯಂ.
‘‘‘ಕಪ್ಪಸತಸಹಸ್ಸಮ್ಹಿ, ಓಕ್ಕಾಕಕುಲಸಮ್ಭವೋ;
ಗೋತಮೋ ನಾಮ ಗೋತ್ತೇನ, ಸತ್ಥಾ ಲೋಕೇ ಭವಿಸ್ಸತಿ.
‘‘‘ದೇವಲೋಕಾ ಚವಿತ್ವಾನ, ಸುಕ್ಕಮೂಲೇನ ಚೋದಿತೋ;
ಪುಞ್ಞಕಮ್ಮೇನ ಸಂಯುತ್ತೋ, ಬ್ರಹ್ಮಬನ್ಧು ಭವಿಸ್ಸಸಿ.
‘‘‘ಅಸೀತಿಕೋಟಿಂ ¶ ಛಡ್ಡೇತ್ವಾ, ದಾಸೇ ಕಮ್ಮಕರೇ ಬಹೂ;
ಗೋತಮಸ್ಸ ಭಗವತೋ, ಸಾಸನೇ ಪಬ್ಬಜಿಸ್ಸಸಿ.
‘‘‘ಆರಾಧಯಿತ್ವಾ ¶ ಸಮ್ಬುದ್ಧಂ, ಗೋತಮಂ ಸಕ್ಯಪುಙ್ಗವಂ;
ಉಪವಾನೋತಿ ನಾಮೇನ, ಹೇಸ್ಸಸಿ ಸತ್ಥು ಸಾವಕೋ’.
‘‘ಸತಸಹಸ್ಸೇ ಕತಂ ಕಮ್ಮಂ, ಫಲಂ ದಸ್ಸೇಸಿ ಮೇ ಇಧ;
ಸುಮುತ್ತೋ ಸರವೇಗೋವ ಕಿಲೇಸೇ ಝಾಪಯೀ ಮಮ.
‘‘ಚಕ್ಕವತ್ತಿಸ್ಸ ಸನ್ತಸ್ಸ, ಚತುದೀಪಿಸ್ಸರಸ್ಸ ಮೇ;
ತಿಯೋಜನಾನಿ ಸಮನ್ತಾ, ಉಸ್ಸೀಸನ್ತಿ ಧಜಾ ಸದಾ.
‘‘ಸತಸಹಸ್ಸಿತೋ ¶ ಕಪ್ಪೇ, ಯಂ ಕಮ್ಮಮಕರಿಂ ತದಾ;
ದುಗ್ಗತಿಂ ನಾಭಿಜಾನಾಮಿ, ಧಜದಾನಸ್ಸಿದಂ ಫಲಂ.
‘‘ಪಟಿಸಮ್ಭಿದಾ ಚತಸ್ಸೋ, ವಿಮೋಕ್ಖಾಪಿ ಚ ಅಟ್ಠಿಮೇ;
ಛಳಭಿಞ್ಞಾ ಸಚ್ಛಿಕತಾ, ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ¶ ಸುದಂ ಆಯಸ್ಮಾ ಉಪವಾನೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಉಪವಾನತ್ಥೇರಸ್ಸಾಪದಾನಂ ದುತಿಯಂ.
೩. ತಿಸರಣಗಮನಿಯತ್ಥೇರಅಪದಾನಂ
‘‘ನಗರೇ ಚನ್ದವತಿಯಾ [ಬನ್ಧುಮತಿಯಾ (ಅಟ್ಠ.)], ಮಾತುಉಪಟ್ಠಾಕೋ [ಮಾತುಪಟ್ಠಾಯಕೋ (ಸೀ.), ಮಾತುಪಟ್ಠಾನಕೋ (ಸ್ಯಾ.)] ಅಹುಂ;
ಅನ್ಧಾ ಮಾತಾ ಪಿತಾ ಮಯ್ಹಂ, ತೇ ಪೋಸೇಮಿ ಅಹಂ ತದಾ.
‘‘ರಹೋಗತೋ ¶ ನಿಸೀದಿತ್ವಾ, ಏವಂ ಚಿನ್ತೇಸಹಂ ತದಾ;
ಪೋಸೇನ್ತೋ ಮಾತಾಪಿತರೋ, ಪಬ್ಬಜ್ಜಂ ನ ಲಭಾಮಹಂ.
‘‘ಮಹನ್ಧಕಾರಪಿಹಿತಾ [ತಮನ್ಧಕಾರಪಿಹಿತಾ (ಸ್ಯಾ.)], ತಿವಿಧಗ್ಗೀಹಿ ಡಯ್ಹರೇ;
ಏತಾದಿಸೇ ಭವೇ [ಭಯೇ (ಸೀ.)] ಜಾತೇ, ನತ್ಥಿ ಕೋಚಿ ವಿನಾಯಕೋ.
‘‘ಬುದ್ಧೋ ಲೋಕೇ ಸಮುಪ್ಪನ್ನೋ, ದಿಪ್ಪತಿ [ದಿಬ್ಬತಿ (ಕ.)] [ಜಿನಸಾಸನಂ (ಸೀ.)] ದಾನಿ ಸಾಸನಂ;
ಸಕ್ಕಾ ಉದ್ಧರಿತುಂ ಅತ್ತಾ, ಪುಞ್ಞಕಾಮೇನ ಜನ್ತುನಾ.
‘‘ಉಗ್ಗಯ್ಹ ತೀಣಿ ಸರಣೇ, ಪರಿಪುಣ್ಣಾನಿ ಗೋಪಯಿಂ;
ತೇನ ಕಮ್ಮೇನ ಸುಕತೇನ, ಪಟಿಮೋಕ್ಖಾಮಿ ದುಗ್ಗತಿಂ.
‘‘ನಿಸಭೋ ¶ ನಾಮ ಸಮಣೋ, ಬುದ್ಧಸ್ಸ ಅಗ್ಗಸಾವಕೋ;
ತಮಹಂ ಉಪಗನ್ತ್ವಾನ, ಸರಣಗಮನಂ ಗಹಿಂ.
‘‘ವಸ್ಸಸತಸಹಸ್ಸಾನಿ, ಆಯು ವಿಜ್ಜತಿ ತಾವದೇ;
ತಾವತಾ ಸರಣಗಮನಂ, ಪರಿಪುಣ್ಣಂ ಅಗೋಪಯಿಂ.
‘‘ಚರಿಮೇ ವತ್ತಮಾನಮ್ಹಿ, ಸರಣಂ ತಂ ಅನುಸ್ಸರಿಂ;
ತೇನ ಕಮ್ಮೇನ ಸುಕತೇನ, ತಾವತಿಂಸಂ ಅಗಚ್ಛಹಂ.
‘‘ದೇವಲೋಕಗತೋ ಸನ್ತೋ, ಪುಞ್ಞಕಮ್ಮಸಮಾಹಿತೋ;
ಯಂ ದೇಸಂ [ಯಂ ಯಂ ದೇಸಂ (ಸ್ಯಾ.)] ಉಪಪಜ್ಜಾಮಿ [ಉಪಗಚ್ಛಾಮಿ (ಸೀ.)], ಅಟ್ಠ ಹೇತೂ ಲಭಾಮಹಂ.
‘‘ದಿಸಾಸು ¶ ಪೂಜಿತೋ ಹೋಮಿ, ತಿಕ್ಖಪಞ್ಞೋ ಭವಾಮಹಂ;
ಸಬ್ಬೇ ದೇವಾನುವತ್ತನ್ತಿ, ಅಮಿತಭೋಗಂ ಲಭಾಮಹಂ.
‘‘ಸುವಣ್ಣವಣ್ಣೋ ಸಬ್ಬತ್ಥ, ಪಟಿಕನ್ತೋ ಭವಾಮಹಂ;
ಮಿತ್ತಾನಂ ಅಚಲೋ ಹೋಮಿ, ಯಸೋ ಅಬ್ಭುಗ್ಗತೋ ಮಮಂ.
‘‘ಅಸೀತಿಕ್ಖತ್ತು ¶ ದೇವಿನ್ದೋ, ದೇವರಜ್ಜಮಕಾರಯಿಂ;
ದಿಬ್ಬಸುಖಂ ಅನುಭವಿಂ, ಅಚ್ಛರಾಹಿ ಪುರಕ್ಖತೋ.
‘‘ಪಞ್ಚಸತ್ತತಿಕ್ಖತ್ತುಞ್ಚ ¶ , ಚಕ್ಕವತ್ತೀ ಅಹೋಸಹಂ;
ಪದೇಸರಜ್ಜಂ ವಿಪುಲಂ, ಗಣನಾತೋ ಅಸಙ್ಖಿಯಂ.
‘‘ಪಚ್ಛಿಮೇ ಭವೇ ಸಮ್ಪತ್ತೇ, ಪುಞ್ಞಕಮ್ಮಸಮಾಹಿತೋ;
ಪುರೇ ಸಾವತ್ಥಿಯಂ ಜಾತೋ, ಮಹಾಸಾಲೇ ಸುಅಡ್ಢಕೇ.
‘‘ನಗರಾ ನಿಕ್ಖಮಿತ್ವಾನ, ದಾರಕೇಹಿ ಪುರಕ್ಖತೋ;
ಹಸಖಿಡ್ಡಸಮಙ್ಗೀಹಂ [ಸಾಹಂ ಖಿಡ್ಡಸಮಙ್ಗೀ (ಸ್ಯಾ.)], ಸಙ್ಘಾರಾಮಂ ಉಪಾಗಮಿಂ.
‘‘ತತ್ಥದ್ದಸಾಸಿಂ [ತತ್ಥದ್ದಸಾಹಂ (ಕ.)] ಸಮಣಂ, ವಿಪ್ಪಮುತ್ತಂ ನಿರೂಪಧಿಂ;
ಸೋ ಮೇ ಧಮ್ಮಮದೇಸೇಸಿ, ಸರಣಞ್ಚ ಅದಾಸಿ ಮೇ.
‘‘ಸೋಹಂ ಸುತ್ವಾನ ಸರಣಂ, ಸರಣಂ ಮೇ ಅನುಸ್ಸರಿಂ;
ಏಕಾಸನೇ ನಿಸೀದಿತ್ವಾ, ಅರಹತ್ತಮಪಾಪುಣಿಂ.
‘‘ಜಾತಿಯಾ ಸತ್ತಮೇ ವಸ್ಸೇ, ಅರಹತ್ತಮಪಾಪುಣಿಂ;
ಉಪಸಮ್ಪಾದಯಿ ಬುದ್ಧೋ, ಗುಣಮಞ್ಞಾಯ ಚಕ್ಖುಮಾ.
‘‘ಅಪರಿಮೇಯ್ಯೇ ¶ ಇತೋ ಕಪ್ಪೇ, ಸರಣಾನಿ ಅಗಚ್ಛಹಂ;
ತತೋ ಮೇ ಸುಕತಂ ಕಮ್ಮಂ, ಫಲಂ ದಸ್ಸೇಸಿ ಮೇ ಇಧ.
‘‘ಸುಗೋಪಿತಂ ಮೇ ಸರಣಂ, ಮಾನಸಂ ಸುಪ್ಪಣೀಹಿತಂ;
ಅನುಭೋತ್ವಾ ಯಸಂ ಸಬ್ಬಂ, ಪತ್ತೋಮ್ಹಿ ಅಚಲಂ ಪದಂ.
‘‘ಯೇಸಂ ಸೋತಾವಧಾನತ್ಥಿ, ಸುಣೋಥ ಮಮ ಭಾಸತೋ;
ಅಹಂ [ಅತ್ಥಂ (ಸ್ಯಾ.)] ವೋ ಕಥಯಿಸ್ಸಾಮಿ, ಸಾಮಂ ದಿಟ್ಠಂ ಪದಂ ಮಮ.
‘‘‘ಬುದ್ಧೋ ¶ ಲೋಕೇ ಸಮುಪ್ಪನ್ನೋ, ವತ್ತತೇ ಜಿನಸಾಸನಂ;
ಅಮತಾ ವಾದಿತಾ ಭೇರೀ, ಸೋಕಸಲ್ಲವಿನೋದನಾ.
‘‘‘ಯಥಾಸಕೇನ ಥಾಮೇನ, ಪುಞ್ಞಕ್ಖೇತ್ತೇ ಅನುತ್ತರೇ;
ಅಧಿಕಾರಂ ಕರೇಯ್ಯಾಥ, ಪಸ್ಸಯಿಸ್ಸಥ ನಿಬ್ಬುತಿಂ.
‘‘‘ಪಗ್ಗಯ್ಹ ತೀಣಿ ಸರಣೇ, ಪಞ್ಚಸೀಲಾನಿ ಗೋಪಿಯ;
ಬುದ್ಧೇ ಚಿತ್ತಂ ಪಸಾದೇತ್ವಾ, ದುಕ್ಖಸ್ಸನ್ತಂ ಕರಿಸ್ಸಥ.
‘‘‘ಸಮ್ಮಾ ಧಮ್ಮಂ ಭಾವೇತ್ವಾನ [ಮಮೋಪಮಂ ಕರಿತ್ವಾನ (ಸೀ. ಸ್ಯಾ.)], ಸೀಲಾನಿ ¶ ಪರಿಗೋಪಿಯ;
ಅಚಿರಂ ಅರಹತ್ತಂ ವೋ, ಸಬ್ಬೇಪಿ ಪಾಪುಣಿಸ್ಸಥ.
‘‘‘ತೇವಿಜ್ಜೋ ಇದ್ಧಿಪತ್ತೋಮ್ಹಿ, ಚೇತೋಪರಿಯಕೋವಿದೋ;
ಸಾವಕೋ ತೇ ಮಹಾವೀರ, ಸರಣೋ [ಚರಣೇ (ಸೀ. ಸ್ಯಾ.)] ವನ್ದತಿ ಸತ್ಥುನೋ’.
‘‘ಅಪರಿಮೇಯ್ಯೇ ¶ ಇತೋ ಕಪ್ಪೇ, ಸರಣಂ ಬುದ್ಧಸ್ಸ ಗಚ್ಛಹಂ;
ದುಗ್ಗತಿಂ ನಾಭಿಜಾನಾಮಿ, ಸರಣಂ ಗಮನೇ ಫಲಂ.
‘‘ಪಟಿಸಮ್ಭಿದಾ ಚತಸ್ಸೋ, ವಿಮೋಕ್ಖಾಪಿ ಚ ಅಟ್ಠಿಮೇ;
ಛಳಭಿಞ್ಞಾ ಸಚ್ಛಿಕತಾ, ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ತಿಸರಣಗಮನಿಯೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ತಿಸರಣಗಮನಿಯತ್ಥೇರಸ್ಸಾಪದಾನಂ ತತಿಯಂ.
೪. ಪಞ್ಚಸೀಲಸಮಾದಾನಿಯತ್ಥೇರಅಪದಾನಂ
‘‘ನಗರೇ ಚನ್ದವತಿಯಾ, ಭತಕೋ ಆಸಹಂ ತದಾ;
ಪರಕಮ್ಮಾಯನೇ ಯುತ್ತೋ, ಪಬ್ಬಜ್ಜಂ ನ ಲಭಾಮಹಂ.
‘‘ಮಹನ್ಧಕಾರಪಿಹಿತಾ ¶ ¶ , ತಿವಿಧಗ್ಗೀಹಿ ಡಯ್ಹರೇ;
ಕೇನ ನು ಖೋ ಉಪಾಯೇನ, ವಿಸಂಯುತ್ತೋ ಭವೇ ಅಹಂ.
‘‘ದೇಯ್ಯಧಮ್ಮೋ ಚ ಮೇ ನತ್ಥಿ, ವರಾಕೋ ಭತಕೋ ಅಹಂ;
ಯಂನೂನಾಹಂ ಪಞ್ಚಸೀಲಂ, ರಕ್ಖೇಯ್ಯಂ ಪರಿಪೂರಯಂ.
‘‘ಅನೋಮದಸ್ಸಿಸ್ಸ ಮುನಿನೋ, ನಿಸಭೋ ನಾಮ ಸಾವಕೋ;
ತಮಹಂ ಉಪಸಙ್ಕಮ್ಮ, ಪಞ್ಚಸಿಕ್ಖಾಪದಗ್ಗಹಿಂ.
‘‘ವಸ್ಸಸತಸಹಸ್ಸಾನಿ, ಆಯು ವಿಜ್ಜತಿ ತಾವದೇ;
ತಾವತಾ ಪಞ್ಚಸೀಲಾನಿ, ಪರಿಪುಣ್ಣಾನಿ ಗೋಪಯಿಂ.
‘‘ಮಚ್ಚುಕಾಲೇ ಚ ಸಮ್ಪತ್ತೇ, ದೇವಾ ಅಸ್ಸಾಸಯನ್ತಿ ಮಂ;
‘ರಥೋ ಸಹಸ್ಸಯುತ್ತೋ ತೇ, ಮಾರಿಸಾಯಂ [ಮಾರಿಸಸ್ಸ (ಕ.)] ಉಪಟ್ಠಿತೋ’.
‘‘ವತ್ತನ್ತೇ ಚರಿಮೇ ಚಿತ್ತೇ, ಮಮ ಸೀಲಂ ಅನುಸ್ಸರಿಂ;
ತೇನ ಕಮ್ಮೇನ ಸುಕತೇನ, ತಾವತಿಂಸಂ ಅಗಚ್ಛಹಂ.
‘‘ತಿಂಸಕ್ಖತ್ತುಞ್ಚ ¶ ದೇವಿನ್ದೋ, ದೇವರಜ್ಜಮಕಾರಯಿಂ;
ದಿಬ್ಬಸುಖಂ [ದಿಬ್ಬಂ ಸುಖಂ (ಸೀ.)] ಅನುಭವಿಂ, ಅಚ್ಛರಾಹಿ ಪುರಕ್ಖತೋ.
‘‘ಪಞ್ಚಸತ್ತತಿಕ್ಖತ್ತುಞ್ಚ, ಚಕ್ಕವತ್ತೀ ಅಹೋಸಹಂ;
ಪದೇಸರಜ್ಜಂ ವಿಪುಲಂ, ಗಣನಾತೋ ಅಸಙ್ಖಿಯಂ.
‘‘ದೇವಲೋಕಾ ಚವಿತ್ವಾನ, ಸುಕ್ಕಮೂಲೇನ ಚೋದಿತೋ;
ಪುರೇ ವೇಸಾಲಿಯಂ ಜಾತೋ, ಮಹಾಸಾಲೇ ಸುಅಡ್ಢಕೇ.
‘‘ವಸ್ಸೂಪನಾಯಿಕೇ ¶ ಕಾಲೇ, ದಿಪ್ಪನ್ತೇ [ದಿಬ್ಬನ್ತಿ (ಕ.)] ಜಿನಸಾಸನೇ;
ಮಾತಾ ಚ ಮೇ ಪಿತಾ ಚೇವ, ಪಞ್ಚಸಿಕ್ಖಾಪದಗ್ಗಹುಂ.
‘‘ಸಹ ¶ ಸುತ್ವಾನಹಂ ಸೀಲಂ, ಮಮ ಸೀಲಂ ಅನುಸ್ಸರಿಂ;
ಏಕಾಸನೇ ನಿಸೀದಿತ್ವಾ, ಅರಹತ್ತಮಪಾಪುಣಿಂ.
‘‘ಜಾತಿಯಾ ಪಞ್ಚವಸ್ಸೇನ, ಅರಹತ್ತಮಪಾಪುಣಿಂ;
ಉಪಸಮ್ಪಾದಯಿ ಬುದ್ಧೋ, ಗುಣಮಞ್ಞಾಯ ಚಕ್ಖುಮಾ.
‘‘ಪರಿಪುಣ್ಣಾನಿ ಗೋಪೇತ್ವಾ, ಪಞ್ಚಸಿಕ್ಖಾಪದಾನಹಂ;
ಅಪರಿಮೇಯ್ಯೇ ಇತೋ ಕಪ್ಪೇ, ವಿನಿಪಾತಂ ನ ಗಚ್ಛಹಂ.
‘‘ಸ್ವಾಹಂ ¶ ಯಸಮನುಭವಿಂ, ತೇಸಂ ಸೀಲಾನ ವಾಹಸಾ;
ಕಪ್ಪಕೋಟಿಮ್ಪಿ ಕಿತ್ತೇನ್ತೋ, ಕಿತ್ತಯೇ ಏಕದೇಸಕಂ.
‘‘ಪಞ್ಚಸೀಲಾನಿ ಗೋಪೇತ್ವಾ, ತಯೋ ಹೇತೂ ಲಭಾಮಹಂ;
ದೀಘಾಯುಕೋ ಮಹಾಭೋಗೋ, ತಿಕ್ಖಪಞ್ಞೋ ಭವಾಮಹಂ.
‘‘ಸಂಕಿತ್ತೇನ್ತೋ ಚ [ಪಕಿತ್ತೇನ್ತೋವ (ಸೀ.), ಪಕಿತ್ತೇನ್ತೇ ಚ (ಸ್ಯಾ.)] ಸಬ್ಬೇಸಂ, ಅಭಿಮತ್ತಞ್ಚ ಪೋರಿಸಂ;
ಭವಾಭವೇ ಸಂಸರಿತ್ವಾ, ಏತೇ ಠಾನೇ ಲಭಾಮಹಂ.
‘‘ಅಪರಿಮೇಯ್ಯಸೀಲೇಸು, ವತ್ತನ್ತಾ ಜಿನಸಾವಕಾ;
ಭವೇಸು ಯದಿ ರಜ್ಜೇಯ್ಯುಂ, ವಿಪಾಕೋ ಕೀದಿಸೋ ಭವೇ.
‘‘ಸುಚಿಣ್ಣಂ ಮೇ ಪಞ್ಚಸೀಲಂ, ಭತಕೇನ ತಪಸ್ಸಿನಾ [ವಿಪಸ್ಸಿನಾ (ಸೀ.)];
ತೇನ ಸೀಲೇನಹಂ ಅಜ್ಜ, ಮೋಚಯಿಂ ಸಬ್ಬಬನ್ಧನಾ.
‘‘ಅಪರಿಮೇಯ್ಯೇ ಇತೋ ಕಪ್ಪೇ, ಪಞ್ಚಸೀಲಾನಿ ಗೋಪಯಿಂ;
ದುಗ್ಗತಿಂ ನಾಭಿಜಾನಾಮಿ, ಪಞ್ಚಸೀಲಾನಿದಂ ಫಲಂ.
‘‘ಪಟಿಸಮ್ಭಿದಾ ಚತಸ್ಸೋ, ವಿಮೋಕ್ಖಾಪಿ ಚ ಅಟ್ಠಿಮೇ;
ಛಳಭಿಞ್ಞಾ ಸಚ್ಛಿಕತಾ, ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ¶ ಸುದಂ ಆಯಸ್ಮಾ ಪಞ್ಚಸೀಲಸಮಾದಾನಿಯೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಪಞ್ಚಸೀಲಸಮಾದಾನಿಯತ್ಥೇರಸ್ಸಾಪದಾನಂ ಚತುತ್ಥಂ.
೫. ಅನ್ನಸಂಸಾವಕತ್ಥೇರಅಪದಾನಂ
‘‘ಸುವಣ್ಣವಣ್ಣಂ ¶ ಸಮ್ಬುದ್ಧಂ, ಗಚ್ಛನ್ತಂ ಅನ್ತರಾಪಣೇ;
ಕಞ್ಚನಗ್ಘಿಯಸಂಕಾಸಂ, ಬಾತ್ತಿಂಸವರಲಕ್ಖಣಂ.
‘‘ಸಿದ್ಧತ್ಥಂ ¶ ಲೋಕಪಜ್ಜೋತಂ, ಅಪ್ಪಮೇಯ್ಯಂ ಅನೋಪಮಂ;
ಅಲತ್ಥಂ ಪರಮಂ ಪೀತಿಂ, ದಿಸ್ವಾ ದನ್ತಂ ಜುತಿನ್ಧರಂ.
‘‘ಸಮ್ಬುದ್ಧಂ ಅಭಿನಾಮೇತ್ವಾ, ಭೋಜಯಿಂ ತಂ ಮಹಾಮುನಿಂ;
ಮಹಾಕಾರುಣಿಕೋ ಲೋಕೇ [ನಾಥೋ (ಸೀ.)], ಅನುಮೋದಿ ಮಮಂ ತದಾ.
‘‘ತಸ್ಮಿಂ ¶ ಮಹಾಕಾರುಣಿಕೇ, ಪರಮಸ್ಸಾಸಕಾರಕೇ;
ಬುದ್ಧೇ ಚಿತ್ತಂ ಪಸಾದೇತ್ವಾ, ಕಪ್ಪಂ ಸಗ್ಗಮ್ಹಿ ಮೋದಹಂ.
‘‘ಚತುನ್ನವುತಿತೋ ಕಪ್ಪೇ, ಯಂ ದಾನಮದದಿಂ ತದಾ;
ದುಗ್ಗತಿಂ ನಾಭಿಜಾನಾಮಿ, ಭಿಕ್ಖಾದಾನಸ್ಸಿದಂ ಫಲಂ.
‘‘ಪಟಿಸಮ್ಭಿದಾ ಚತಸ್ಸೋ, ವಿಮೋಕ್ಖಾಪಿ ಚ ಅಟ್ಠಿಮೇ;
ಛಳಭಿಞ್ಞಾ ಸಚ್ಛಿಕತಾ, ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಅನ್ನಸಂಸಾವಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಅನ್ನಸಂಸಾವಕತ್ಥೇರಸ್ಸಾಪದಾನಂ ಪಞ್ಚಮಂ.
೬. ಧೂಪದಾಯಕತ್ಥೇರಅಪದಾನಂ
‘‘ಸಿದ್ಧತ್ಥಸ್ಸ ¶ ಭಗವತೋ, ಲೋಕಜೇಟ್ಠಸ್ಸ ತಾದಿನೋ;
ಕುಟಿಧೂಪಂ ಮಯಾ ದಿನ್ನಂ, ವಿಪ್ಪಸನ್ನೇನ ಚೇತಸಾ.
ಯಂ ಯಂ ಯೋನುಪಪಜ್ಜಾಮಿ, ದೇವತ್ತಂ ಅಥ ಮಾನುಸಂ;
ಸಬ್ಬೇಸಮ್ಪಿ ಪಿಯೋ ಹೋಮಿ, ಧೂಪದಾನಸ್ಸಿದಂ ಫಲಂ.
‘‘ಚತುನ್ನವುತಿತೋ ಕಪ್ಪೇ, ಯಂ ಧೂಪಮದದಿಂ ತದಾ [ಯಂ ಧೂಪನಮದಾಸಹಂ (ಕ.)];
ದುಗ್ಗತಿಂ ನಾಭಿಜಾನಾಮಿ, ಧೂಪದಾನಸ್ಸಿದಂ ಫಲಂ.
‘‘ಪಟಿಸಮ್ಭಿದಾ ಚತಸ್ಸೋ, ವಿಮೋಕ್ಖಾಪಿ ಚ ಅಟ್ಠಿಮೇ;
ಛಳಭಿಞ್ಞಾ ಸಚ್ಛಿಕತಾ, ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಧೂಪದಾಯಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಧೂಪದಾಯಕತ್ಥೇರಸ್ಸಾಪದಾನಂ ಛಟ್ಠಂ.
೭. ಪುಲಿನಪೂಜಕತ್ಥೇರಅಪದಾನಂ
‘‘ವಿಪಸ್ಸಿಸ್ಸ ¶ ¶ ಭಗವತೋ, ಬೋಧಿಯಾ ಪಾದಪುತ್ತಮೇ;
ಪುರಾಣಪುಲಿನಂ ಹಿತ್ವಾ [ಛಡ್ಡೇತ್ವಾ (ಸೀ. ಸ್ಯಾ.)], ಸುದ್ಧಪುಲಿನಮಾಕಿರಿಂ.
‘‘ಏಕನವುತಿತೋ ¶ ಕಪ್ಪೇ, ಯಂ ಪುಲಿನಮದಾಸಹಂ;
ದುಗ್ಗತಿಂ ನಾಭಿಜಾನಾಮಿ, ಪುಲಿನದಾನಸ್ಸಿದಂ ಫಲಂ.
‘‘ತಿಂಸತಿಮೇ ¶ [ತಿಪಞ್ಞಾಸೇ (ಸೀ. ಸ್ಯಾ.)] ಇತೋ ಕಪ್ಪೇ, ರಾಜಾ ಆಸಿಂ ಜನಾಧಿಭೂ;
ಮಹಾಪುಲಿನನಾಮೇನ, ಚಕ್ಕವತ್ತೀ ಮಹಬ್ಬಲೋ.
‘‘ಪಟಿಸಮ್ಭಿದಾ ಚತಸ್ಸೋ, ವಿಮೋಕ್ಖಾಪಿ ಚ ಅಟ್ಠಿಮೇ;
ಛಳಭಿಞ್ಞಾ ಸಚ್ಛಿಕತಾ, ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಪುಲಿನಪೂಜಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಪುಲಿನಪೂಜಕತ್ಥೇರಸ್ಸಾಪದಾನಂ ಸತ್ತಮಂ.
೮. ಉತ್ತಿಯತ್ಥೇರಅಪದಾನಂ
‘‘ಚನ್ದಭಾಗಾನದೀತೀರೇ, ಸುಸುಮಾರೋ ಅಹಂ ತದಾ;
ಸಗೋಚರಪ್ಪಸುತೋಹಂ [ಸಭೋಜನಪಸುತಾಹಂ (ಸ್ಯಾ. ಕ.)], ನದೀತಿತ್ಥಂ ಅಗಚ್ಛಹಂ.
‘‘ಸಿದ್ಧತ್ಥೋ ತಮ್ಹಿ ಸಮಯೇ, ಸಯಮ್ಭೂ ಅಗ್ಗಪುಗ್ಗಲೋ;
ನದಿಂ ತರಿತುಕಾಮೋ ಸೋ, ನದೀತಿತ್ಥಂ ಉಪಾಗಮಿ.
‘‘ಉಪಾಗತೇ ಚ [ಉಪಾಗತಮ್ಹಿ (ಸ್ಯಾ. ಕ.)] ಸಮ್ಬುದ್ಧೇ, ಅಹಮ್ಪಿ ತತ್ಥುಪಾಗಮಿಂ;
ಉಪಗನ್ತ್ವಾನ ಸಮ್ಬುದ್ಧಂ, ಇಮಂ ವಾಚಂ ಉದೀರಯಿಂ.
‘‘‘ಅಭಿರೂಹ ಮಹಾವೀರ, ತಾರೇಸ್ಸಾಮಿ ಅಹಂ ತುವಂ;
ಪೇತ್ತಿಕಂ ವಿಸಯಂ ಮಯ್ಹಂ, ಅನುಕಮ್ಪ ಮಹಾಮುನಿ’.
‘‘ಮಮ ಉಗ್ಗಜ್ಜನಂ ಸುತ್ವಾ, ಅಭಿರೂಹಿ ಮಹಾಮುನಿ;
ಹಟ್ಠೋ ಹಟ್ಠೇನ ಚಿತ್ತೇನ, ತಾರೇಸಿಂ ಲೋಕನಾಯಕಂ.
‘‘ನದಿಯಾ ¶ ಪಾರಿಮೇ ತೀರೇ, ಸಿದ್ಧತ್ಥೋ ಲೋಕನಾಯಕೋ;
ಅಸ್ಸಾಸೇಸಿ ಮಮಂ ತತ್ಥ, ಅಮತಂ ಪಾಪುಣಿಸ್ಸಸಿ.
‘‘ತಮ್ಹಾ ¶ ಕಾಯಾ ಚವಿತ್ವಾನ, ದೇವಲೋಕಂ ಆಗಚ್ಛಹಂ;
ದಿಬ್ಬಸುಖಂ ಅನುಭವಿಂ, ಅಚ್ಛರಾಹಿ ಪುರಕ್ಖತೋ.
‘‘ಸತ್ತಕ್ಖತ್ತುಞ್ಚ ¶ ದೇವಿನ್ದೋ, ದೇವರಜ್ಜಮಕಾಸಹಂ;
ತೀಣಿಕ್ಖತ್ತುಂ ಚಕ್ಕವತ್ತೀ, ಮಹಿಯಾ ಇಸ್ಸರೋ ಅಹುಂ.
‘‘ವಿವೇಕಮನುಯುತ್ತೋಹಂ ¶ , ನಿಪಕೋ ಚ ಸುಸಂವುತೋ;
ಧಾರೇಮಿ ಅನ್ತಿಮಂ ದೇಹಂ, ಸಮ್ಮಾಸಮ್ಬುದ್ಧಸಾಸನೇ.
‘‘ಚತುನ್ನವುತಿತೋ ಕಪ್ಪೇ, ತಾರೇಸಿಂ ಯಂ ನರಾಸಭಂ;
ದುಗ್ಗತಿಂ ನಾಭಿಜಾನಾಮಿ, ತರಣಾಯ ಇದಂ ಫಲಂ.
‘‘ಪಟಿಸಮ್ಭಿದಾ ಚತಸ್ಸೋ, ವಿಮೋಕ್ಖಾಪಿ ಚ ಅಟ್ಠಿಮೇ;
ಛಳಭಿಞ್ಞಾ ಸಚ್ಛಿಕತಾ, ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಉತ್ತಿಯೋ [ಉತ್ತಿರಿಯೋ (ಸೀ.)] ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಉತ್ತಿಯತ್ಥೇರಸ್ಸಾಪದಾನಂ ಅಟ್ಠಮಂ.
೯. ಏಕಞ್ಜಲಿಕತ್ಥೇರಅಪದಾನಂ
‘‘ಸುವಣ್ಣವಣ್ಣಂ ಸಮ್ಬುದ್ಧಂ, ಗಚ್ಛನ್ತಂ ಅನ್ತರಾಪಣೇ;
ವಿಪಸ್ಸಿಂ ಸತ್ಥವಾಹಗ್ಗಂ, ನರವರಂ ವಿನಾಯಕಂ.
‘‘ಅದನ್ತದಮನಂ ¶ ತಾದಿಂ, ಮಹಾವಾದಿಂ ಮಹಾಮತಿಂ;
ದಿಸ್ವಾ ಪಸನ್ನೋ ಸುಮನೋ, ಏಕಞ್ಜಲಿಮಕಾಸಹಂ.
‘‘ಏಕನವುತಿತೋ ಕಪ್ಪೇ, ಯಮಞ್ಜಲಿಂ ಕರಿಂ [ಯಂ ಅಞ್ಜಲಿಮಕರಿಂ (ಸ್ಯಾ.), ಅಞ್ಜಲಿಮಕರಿಂ (ಕ.)] ತದಾ;
ದುಗ್ಗತಿಂ ನಾಭಿಜಾನಾಮಿ, ಅಞ್ಜಲಿಸ್ಸ ಇದಂ ಫಲಂ.
‘‘ಪಟಿಸಮ್ಭಿದಾ ಚತಸ್ಸೋ, ವಿಮೋಕ್ಖಾಪಿ ಚ ಅಟ್ಠಿಮೇ;
ಛಳಭಿಞ್ಞಾ ಸಚ್ಛಿಕತಾ, ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಏಕಞ್ಜಲಿಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಏಕಞ್ಜಲಿಕತ್ಥೇರಸ್ಸಾಪದಾನಂ ನವಮಂ.
೧೦. ಖೋಮದಾಯಕತ್ಥೇರಅಪದಾನಂ
‘‘ನಗರೇ ¶ ¶ ಬನ್ಧುಮತಿಯಾ, ಅಹೋಸಿಂ ವಾಣಿಜೋ ತದಾ;
ತೇನೇವ ದಾರಂ ಪೋಸೇಮಿ, ರೋಪೇಮಿ ಬೀಜಸಮ್ಪದಂ.
‘‘ರಥಿಯಂ ಪಟಿಪನ್ನಸ್ಸ, ವಿಪಸ್ಸಿಸ್ಸ ಮಹೇಸಿನೋ;
ಏಕಂ ಖೋಮಂ ಮಯಾ ದಿನ್ನಂ, ಕುಸಲತ್ಥಾಯ ಸತ್ಥುನೋ.
‘‘ಏಕನವುತಿತೋ ¶ ಕಪ್ಪೇ, ಯಂ ಖೋಮಮದದಿಂ ತದಾ;
ದುಗ್ಗತಿಂ ನಾಭಿಜಾನಾಮಿ, ಖೋಮದಾನಸ್ಸಿದಂ ಫಲಂ.
‘‘ಸತ್ತರಸೇ [ಸತ್ತವೀಸೇ (ಸೀ. ಸ್ಯಾ.)] ಇತೋ ಕಪ್ಪೇ, ಏಕೋ ಸಿನ್ಧವಸನ್ಧನೋ;
ಸತ್ತರತನಸಮ್ಪನ್ನೋ, ಚತುದೀಪಮ್ಹಿ ಇಸ್ಸರೋ.
‘‘ಪಟಿಸಮ್ಭಿದಾ ¶ ಚತಸ್ಸೋ, ವಿಮೋಕ್ಖಾಪಿ ಚ ಅಟ್ಠಿಮೇ;
ಛಳಭಿಞ್ಞಾ ಸಚ್ಛಿಕತಾ, ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಖೋಮದಾಯಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಖೋಮದಾಯಕತ್ಥೇರಸ್ಸಾಪದಾನಂ ದಸಮಂ.
ತಸ್ಸುದ್ದಾನಂ –
ಸುಸೂತಿ ಉಪವಾನೋ ಚ, ಸರಣೋ ಸೀಲಗಾಹಕೋ;
ಅನ್ನಸಂಸಾವಕೋ ಖೋಮದಾಯೀ ಚ, ದಸೇವ ತತಿಯೇ ಗಣೇ;
ಅಞ್ಜಲೀ ಖೋಮದಾಯೀ ಚ, ದಸೇವ ತತಿಯೇ ಗಣೇ;
ಪಞ್ಚಾಲೀಸೀತಿಸತಂ ವುತ್ತಾ, ಗಾಥಾಯೋ ಸಬ್ಬಪಿಣ್ಡಿತಾ.
ಸುಭೂತಿವಗ್ಗೋ ತತಿಯೋ.
ಚತುತ್ಥಭಾಣವಾರಂ.
೪. ಕುಣ್ಡಧಾನವಗ್ಗೋ
೧. ಕುಣ್ಡಧಾನತ್ಥೇರಅಪದಾನಂ
‘‘ಸತ್ತಾಹಂ ¶ ¶ ಪಟಿಸಲ್ಲೀನಂ, ಸಯಮ್ಭುಂ ಅಗ್ಗಪುಗ್ಗಲಂ;
ಪಸನ್ನಚಿತ್ತೋ ಸುಮನೋ, ಬುದ್ಧಸೇಟ್ಠಂ ಉಪಟ್ಠಹಿಂ.
‘‘ವುಟ್ಠಿತಂ ಕಾಲಮಞ್ಞಾಯ, ಪದುಮುತ್ತರಂ ಮಹಾಮುನಿಂ;
ಮಹನ್ತಿಂ ಕದಲೀಕಣ್ಣಿಂ, ಗಹೇತ್ವಾ ಉಪಗಚ್ಛಹಂ.
‘‘ಪಟಿಗ್ಗಹೇತ್ವಾ ¶ [ಪಟಿಗ್ಗಹೇಸಿ (ಸ್ಯಾ. ಕ.)] ಭಗವಾ, ಸಬ್ಬಞ್ಞೂ [ತಂ ಫಲಂ (ಸೀ.)] ಲೋಕನಾಯಕೋ;
ಮಮ ಚಿತ್ತಂ ಪಸಾದೇನ್ತೋ, ಪರಿಭುಞ್ಜಿ ಮಹಾಮುನಿ.
‘‘ಪರಿಭುಞ್ಜಿತ್ವಾ ಸಮ್ಬುದ್ಧೋ, ಸತ್ಥವಾಹೋ ಅನುತ್ತರೋ;
ಸಕಾಸನೇ ನಿಸೀದಿತ್ವಾ, ಇಮಾ ಗಾಥಾ ಅಭಾಸಥ.
‘‘‘ಯೇ ¶ ಚ ಸನ್ತಿ ಸಮಿತಾರೋ [ಯೇ ವಸನ್ತಿ ಸಮೇತಾರೋ (ಸೀ.)], ಯಕ್ಖಾ ಇಮಮ್ಹಿ ಪಬ್ಬತೇ;
ಅರಞ್ಞೇ ಭೂತಭಬ್ಯಾನಿ [ಭೂತಗಣಾ ಸಬ್ಬೇ (ಸ್ಯಾ.)], ಸುಣನ್ತು ವಚನಂ ಮಮ’.
‘‘ಯೋ ಸೋ ಬುದ್ಧಂ ಉಪಟ್ಠಾಸಿ, ಮಿಗರಾಜಂವ ಕೇಸರಿಂ [ಮಿಗರಾಜಾವ ಕೇಸರೀ (ಸೀ.)];
ತಮಹಂ ಕಿತ್ತಯಿಸ್ಸಾಮಿ, ಸುಣಾಥ ಮಮ ಭಾಸತೋ.
‘‘‘ಏಕಾದಸಞ್ಚಕ್ಖತ್ತುಂ, ಸೋ [ಸೋಯಮೇಕಾದಸಕ್ಖತ್ತುಂ (ಸೀ.)] ದೇವರಾಜಾ ಭವಿಸ್ಸತಿ;
ಚತುತಿಂಸತಿಕ್ಖತ್ತುಞ್ಚ, ಚಕ್ಕವತ್ತೀ ಭವಿಸ್ಸತಿ.
‘‘‘ಕಪ್ಪಸತಸಹಸ್ಸಮ್ಹಿ, ಓಕ್ಕಾಕಕುಲಸಮ್ಭವೋ;
ಗೋತಮೋ ನಾಮ ಗೋತ್ತೇನ, ಸತ್ಥಾ ಲೋಕೇ ಭವಿಸ್ಸತಿ.
‘‘‘ಅಕ್ಕೋಸಿತ್ವಾನ ಸಮಣೇ, ಸೀಲವನ್ತೇ ಅನಾಸವೇ;
ಪಾಪಕಮ್ಮವಿಪಾಕೇನ, ನಾಮಧೇಯ್ಯಂ ಲಭಿಸ್ಸತಿ [ಭವಿಸ್ಸತಿ (ಕ.)].
‘‘‘ತಸ್ಸ ಧಮ್ಮೇಸು ದಾಯಾದೋ, ಓರಸೋ ಧಮ್ಮನಿಮ್ಮಿತೋ;
ಕುಣ್ಡಧಾನೋತಿ ನಾಮೇನ, ಸಾವಕೋ ಸೋ ಭವಿಸ್ಸತಿ’.
‘‘ಪವಿವೇಕಮನುಯುತ್ತೋ, ಝಾಯೀ ಝಾನರತೋ ಅಹಂ;
ತೋಸಯಿತ್ವಾನ ಸತ್ಥಾರಂ, ವಿಹರಾಮಿ ಅನಾಸವೋ.
‘‘ಸಾವಕೇಹಿ ¶ ¶ [ಸಾವಕಗ್ಗೇಹಿ (ಸೀ.)] ಪರಿವುತೋ, ಭಿಕ್ಖುಸಙ್ಘಪುರಕ್ಖತೋ;
ಭಿಕ್ಖುಸಙ್ಘೇ ನಿಸೀದಿತ್ವಾ, ಸಲಾಕಂ ಗಾಹಯೀ ಜಿನೋ.
‘‘ಏಕಂಸಂ ¶ ಚೀವರಂ ಕತ್ವಾ, ವನ್ದಿತ್ವಾ ಲೋಕನಾಯಕಂ;
ವದತಂ ವರಸ್ಸ ಪುರತೋ, ಪಠಮಂ ಅಗ್ಗಹೇಸಹಂ.
‘‘ತೇನ ಕಮ್ಮೇನ ಭಗವಾ, ದಸಸಹಸ್ಸೀಕಮ್ಪಕೋ;
ಭಿಕ್ಖುಸಙ್ಘೇ ನಿಸೀದಿತ್ವಾ, ಅಗ್ಗಟ್ಠಾನೇ ಠಪೇಸಿ ಮಂ.
‘‘ವೀರಿಯಂ ಮೇ ಧುರಧೋರಯ್ಹಂ, ಯೋಗಕ್ಖೇಮಾಧಿವಾಹನಂ;
ಧಾರೇಮಿ ಅನ್ತಿಮಂ ದೇಹಂ, ಸಮ್ಮಾಸಮ್ಬುದ್ಧಸಾಸನೇ.
‘‘ಪಟಿಸಮ್ಭಿದಾ ಚತಸ್ಸೋ, ವಿಮೋಕ್ಖಾಪಿ ಚ ಅಟ್ಠಿಮೇ;
ಛಳಭಿಞ್ಞಾ ಸಚ್ಛಿಕತಾ, ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಕುಣ್ಡಧಾನೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಕುಣ್ಡಧಾನತ್ಥೇರಸ್ಸಾಪದಾನಂ ಪಠಮಂ.
೨. ಸಾಗತತ್ಥೇರಅಪದಾನಂ
‘‘ಸೋಭಿತೋ ¶ ನಾಮ ನಾಮೇನ, ಅಹೋಸಿಂ ಬ್ರಾಹ್ಮಣೋ ತದಾ;
ಪುರಕ್ಖತೋ ಸಸಿಸ್ಸೇಹಿ, ಆರಾಮಂ ಅಗಮಾಸಹಂ.
‘‘ಭಗವಾ ತಮ್ಹಿ ಸಮಯೇ, ಭಿಕ್ಖುಸಙ್ಘಪುರಕ್ಖತೋ;
ಆರಾಮದ್ವಾರಾ ನಿಕ್ಖಮ್ಮ, ಅಟ್ಠಾಸಿ ಪುರಿಸುತ್ತಮೋ.
‘‘ತಮದ್ದಸಾಸಿಂ ಸಮ್ಬುದ್ಧಂ, ದನ್ತಂ ದನ್ತಪುರಕ್ಖತಂ;
ಸಕಂ ಚಿತ್ತಂ ಪಸಾದೇತ್ವಾ, ಸನ್ಥವಿಂ ಲೋಕನಾಯಕಂ.
‘‘ಯೇ ಕೇಚಿ ಪಾದಪಾ ಸಬ್ಬೇ, ಮಹಿಯಾ ತೇ ವಿರೂಹರೇ;
ಬುದ್ಧಿಮನ್ತೋ ¶ ತಥಾ ಸತ್ತಾ, ರುಹನ್ತಿ ಜಿನಸಾಸನೇ.
‘‘ಸತ್ಥವಾಹೋಸಿ ಸಪ್ಪಞ್ಞೋ, ಮಹೇಸಿ ಬಹುಕೇ ಜನೇ;
ವಿಪಥಾ ಉದ್ಧರಿತ್ವಾನ, ಪಥಂ ಆಚಿಕ್ಖಸೇ ತುವಂ.
‘‘ದನ್ತೋ ¶ ದನ್ತಪರಿಕಿಣ್ಣೋ [ಪುರಕ್ಖತೋ (ಸ್ಯಾ.)], ಝಾಯೀ ಝಾನರತೇಹಿ ಚ;
ಆತಾಪೀ ಪಹಿತತ್ತೇಹಿ, ಉಪಸನ್ತೇಹಿ ತಾದಿಭಿ.
‘‘ಅಲಙ್ಕತೋ ಪರಿಸಾಹಿ, ಪುಞ್ಞಞಾಣೇಹಿ ಸೋಭತಿ;
ಪಭಾ ನಿದ್ಧಾವತೇ ತುಯ್ಹಂ, ಸೂರಿಯೋದಯನೇ ಯಥಾ.
‘‘ಪಸನ್ನಚಿತ್ತಂ ¶ ದಿಸ್ವಾನ, ಮಹೇಸೀ ಪದುಮುತ್ತರೋ;
ಭಿಕ್ಖುಸಙ್ಘೇ ಠಿತೋ ಸತ್ಥಾ, ಇಮಾ ಗಾಥಾ ಅಭಾಸಥ.
‘‘‘ಯೋ ಸೋ ಹಾಸಂ ಜನೇತ್ವಾನ, ಮಮಂ ಕಿತ್ತೇಸಿ ಬ್ರಾಹ್ಮಣೋ;
ಕಪ್ಪಾನಂ ಸತಸಹಸ್ಸಂ, ದೇವಲೋಕೇ ರಮಿಸ್ಸತಿ.
‘‘‘ತುಸಿತಾ ಹಿ ಚವಿತ್ವಾನ, ಸುಕ್ಕಮೂಲೇನ ಚೋದಿತೋ;
ಗೋತಮಸ್ಸ ಭಗವತೋ, ಸಾಸನೇ ಪಬ್ಬಜಿಸ್ಸತಿ.
‘‘‘ತೇನ ಕಮ್ಮೇನ ಸುಕತೇನ, ಅರಹತ್ತಂ [ತುಟ್ಠಹಟ್ಠಂ (ಸ್ಯಾ. ಕ.)] ಲಭಿಸ್ಸತಿ;
ಸಾಗತೋ ನಾಮ ನಾಮೇನ, ಹೇಸ್ಸತಿ ಸತ್ಥು ಸಾವಕೋ’.
‘‘ಪಬ್ಬಜಿತ್ವಾನ ಕಾಯೇನ, ಪಾಪಕಮ್ಮಂ ವಿವಜ್ಜಯಿಂ;
ವಚೀದುಚ್ಚರಿತಂ ಹಿತ್ವಾ, ಆಜೀವಂ ಪರಿಸೋಧಯಿಂ.
‘‘ಏವಂ ¶ ವಿಹರಮಾನೋಹಂ, ತೇಜೋಧಾತೂಸು ಕೋವಿದೋ;
ಸಬ್ಬಾಸವೇ ಪರಿಞ್ಞಾಯ, ವಿಹರಾಮಿ ಅನಾಸವೋ.
‘‘ಪಟಿಸಮ್ಭಿದಾ ¶ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಸಾಗತೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಸಾಗತತ್ಥೇರಸ್ಸಾಪದಾನಂ ದುತಿಯಂ.
೩. ಮಹಾಕಚ್ಚಾನತ್ಥೇರಅಪದಾನಂ
‘‘ಪದುಮುತ್ತರನಾಥಸ್ಸ, ಪದುಮಂ ನಾಮ ಚೇತಿಯಂ;
ಸಿಲಾಸನಂ [ಸೀಹಾಸನಂ (ಕ.)] ಕಾರಯಿತ್ವಾ, ಸುವಣ್ಣೇನಾಭಿಲೇಪಯಿಂ.
‘‘ರತನಾಮಯಛತ್ತಞ್ಚ, ಪಗ್ಗಯ್ಹ ವಾಳಬೀಜನಿಂ [ವಾಳಬೀಜನೀ (ಸೀ. ಸ್ಯಾ.)];
ಬುದ್ಧಸ್ಸ ಅಭಿರೋಪೇಸಿಂ, ಲೋಕಬನ್ಧುಸ್ಸ ತಾದಿನೋ.
‘‘ಯಾವತಾ ¶ ದೇವತಾ ಭುಮ್ಮಾ [ಭೂಮಾ (ಕ.)], ಸಬ್ಬೇ ಸನ್ನಿಪತುಂ ತದಾ;
ರತನಾಮಯಛತ್ತಾನಂ, ವಿಪಾಕಂ ಕಥಯಿಸ್ಸತಿ.
‘‘ತಞ್ಚ ಸಬ್ಬಂ ಸುಣಿಸ್ಸಾಮ, ಕಥಯನ್ತಸ್ಸ ಸತ್ಥುನೋ;
ಭಿಯ್ಯೋ ಹಾಸಂ ಜನೇಯ್ಯಾಮ, ಸಮ್ಮಾಸಮ್ಬುದ್ಧಸಾಸನೇ.
‘‘ಹೇಮಾಸನೇ ನಿಸೀದಿತ್ವಾ, ಸಯಮ್ಭೂ ಅಗ್ಗಪುಗ್ಗಲೋ;
ಭಿಕ್ಖುಸಙ್ಘಪರಿಬ್ಯೂಳ್ಹೋ [ಪರಿಬ್ಬೂಳ್ಹೋ (ಸೀ.)], ಇಮಾ ಗಾಥಾ ಅಭಾಸಥ.
‘‘‘ಯೇನಿದಂ ¶ ಆಸನಂ ದಿನ್ನಂ, ಸೋವಣ್ಣಂ ರತನಾಮಯಂ;
ತಮಹಂ ಕಿತ್ತಯಿಸ್ಸಾಮಿ, ಸುಣಾಥ ಮಮ ಭಾಸತೋ.
‘‘‘ತಿಂಸಕಪ್ಪಾನಿ ¶ ದೇವಿನ್ದೋ, ದೇವರಜ್ಜಂ ಕರಿಸ್ಸತಿ;
ಸಮನ್ತಾ ಯೋಜನಸತಂ, ಆಭಾಯಾಭಿಭವಿಸ್ಸತಿ.
‘‘‘ಮನುಸ್ಸಲೋಕಮಾಗನ್ತ್ವಾ, ಚಕ್ಕವತ್ತೀ ಭವಿಸ್ಸತಿ;
ಪಭಸ್ಸರೋತಿ ನಾಮೇನ, ಉಗ್ಗತೇಜೋ ಭವಿಸ್ಸತಿ.
‘‘‘ದಿವಾ ವಾ ಯದಿ ವಾ ರತ್ತಿಂ, ಸತರಂಸೀವ ಉಗ್ಗತೋ;
ಸಮನ್ತಾ ಅಟ್ಠರತನಂ, ಉಜ್ಜೋತಿಸ್ಸತಿ ಖತ್ತಿಯೋ.
‘‘‘ಕಪ್ಪಸತಸಹಸ್ಸಮ್ಹಿ, ಓಕ್ಕಾಕಕುಲಸಮ್ಭವೋ;
ಗೋತಮೋ ನಾಮ ಗೋತ್ತೇನ, ಸತ್ಥಾ ಲೋಕೇ ಭವಿಸ್ಸತಿ.
‘‘‘ತುಸಿತಾ ¶ ಹಿ ಚವಿತ್ವಾನ, ಸುಕ್ಕಮೂಲೇನ ಚೋದಿತೋ;
ಕಚ್ಚಾನೋ ನಾಮ ನಾಮೇನ, ಬ್ರಹ್ಮಬನ್ಧು ಭವಿಸ್ಸತಿ.
‘‘‘ಸೋ ಪಚ್ಛಾ ಪಬ್ಬಜಿತ್ವಾನ, ಅರಹಾ ಹೇಸ್ಸತಿನಾಸವೋ;
ಗೋತಮೋ ಲೋಕಪಜ್ಜೋತೋ, ಅಗ್ಗಟ್ಠಾನೇ ಠಪೇಸ್ಸತಿ.
‘‘‘ಸಂಖಿತ್ತಪುಚ್ಛಿತಂ [ಸಂಖಿತ್ತಂ ಪುಚ್ಛಿತಂ (ಸ್ಯಾ. ಕ.)] ಪಞ್ಹಂ, ವಿತ್ಥಾರೇನ ಕಥೇಸ್ಸತಿ;
ಕಥಯನ್ತೋ ಚ ತಂ ಪಞ್ಹಂ, ಅಜ್ಝಾಸಯಂ [ಅಜ್ಝಾಸಂ (ಸೀ.), ಅಬ್ಭಾಸಂ (ಕ.)] ಪೂರಯಿಸ್ಸತಿ’.
‘‘ಅಡ್ಢೇ ಕುಲೇ ಅಭಿಜಾತೋ, ಬ್ರಾಹ್ಮಣೋ ಮನ್ತಪಾರಗೂ;
ಓಹಾಯ ಧನಧಞ್ಞಾನಿ, ಪಬ್ಬಜಿಂ ಅನಗಾರಿಯಂ.
‘‘ಸಂಖಿತ್ತೇನಪಿ ಪುಚ್ಛನ್ತೇ, ವಿತ್ಥಾರೇನ ಕಥೇಮಹಂ;
ಅಜ್ಝಾಸಯಂ ತೇಸಂ ಪೂರೇಮಿ, ತೋಸೇಮಿ ದ್ವಿಪದುತ್ತಮಂ.
‘‘ತೋಸಿತೋ ¶ ಮೇ ಮಹಾವೀರೋ, ಸಯಮ್ಭೂ ಅಗ್ಗಪುಗ್ಗಲೋ;
ಭಿಕ್ಖುಸಙ್ಘೇ ನಿಸೀದಿತ್ವಾ, ಏತದಗ್ಗೇ ಠಪೇಸಿ ಮಂ.
‘‘ಪಟಿಸಮ್ಭಿದಾ ¶ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಮಹಾಕಚ್ಚಾನೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಮಹಾಕಚ್ಚಾನತ್ಥೇರಸ್ಸಾಪದಾನಂ ತತಿಯಂ.
೪. ಕಾಳುದಾಯಿತ್ಥೇರಅಪದಾನಂ
‘‘ಪದುಮುತ್ತರಬುದ್ಧಸ್ಸ ¶ , ಲೋಕಜೇಟ್ಠಸ್ಸ ತಾದಿನೋ;
ಅದ್ಧಾನಂ ಪಟಿಪನ್ನಸ್ಸ, ಚರತೋ ಚಾರಿಕಂ ತದಾ.
‘‘ಸುಫುಲ್ಲಂ ಪದುಮಂ ಗಯ್ಹ, ಉಪ್ಪಲಂ ಮಲ್ಲಿಕಞ್ಚಹಂ;
ಪರಮನ್ನಂ ಗಹೇತ್ವಾನ, ಅದಾಸಿಂ ಸತ್ಥುನೋ ಅಹಂ.
‘‘ಪರಿಭುಞ್ಜಿ ಮಹಾವೀರೋ, ಪರಮನ್ನಂ ಸುಭೋಜನಂ;
ತಞ್ಚ ಪುಪ್ಫಂ ಗಹೇತ್ವಾನ, ಜನಸ್ಸ ಸಮ್ಪದಸ್ಸಯಿ.
‘‘ಇಟ್ಠಂ ಕನ್ತಂ [ಕನ್ತಯಿದಂ (ಸ್ಯಾ.)], ಪಿಯಂ ಲೋಕೇ, ಜಲಜಂ ಪುಪ್ಫಮುತ್ತಮಂ;
ಸುದುಕ್ಕರಂ ಕತಂ ತೇನ, ಯೋ ಮೇ ಪುಪ್ಫಂ ಅದಾಸಿದಂ.
‘‘ಯೋ ¶ ಪುಪ್ಫಮಭಿರೋಪೇಸಿ, ಪರಮನ್ನಞ್ಚದಾಸಿ ಮೇ;
ತಮಹಂ ಕಿತ್ತಯಿಸ್ಸಾಮಿ, ಸುಣಾಥ ಮಮ ಭಾಸತೋ.
‘‘‘ದಸ ಅಟ್ಠ ಚಕ್ಖತ್ತುಂ [ದಸ ಚಟ್ಠಕ್ಖತ್ತುಂ (ಸೀ.), ದಸಮಟ್ಠಕ್ಖತ್ತುಂ (ಸ್ಯಾ.)] ಸೋ, ದೇವರಜ್ಜಂ ಕರಿಸ್ಸತಿ;
ಉಪ್ಪಲಂ ಪದುಮಞ್ಚಾಪಿ, ಮಲ್ಲಿಕಞ್ಚ ತದುತ್ತರಿ.
‘‘‘ಅಸ್ಸ ¶ ಪುಞ್ಞವಿಪಾಕೇನ, ದಿಬ್ಬಗನ್ಧಸಮಾಯುತಂ;
ಆಕಾಸೇ ಛದನಂ ಕತ್ವಾ, ಧಾರಯಿಸ್ಸತಿ ತಾವದೇ.
‘‘‘ಪಞ್ಚವೀಸತಿಕ್ಖತ್ತುಞ್ಚ, ಚಕ್ಕವತ್ತೀ ಭವಿಸ್ಸತಿ;
ಪಥಬ್ಯಾ ರಜ್ಜಂ ಪಞ್ಚಸತಂ, ವಸುಧಂ ಆವಸಿಸ್ಸತಿ.
‘‘‘ಕಪ್ಪಸತಸಹಸ್ಸಮ್ಹಿ, ಓಕ್ಕಾಕಕುಲಸಮ್ಭವೋ;
ಗೋತಮೋ ನಾಮ ಗೋತ್ತೇನ [ನಾಮೇನ (ಸೀ. ಸ್ಯಾ. ಕ.)], ಸತ್ಥಾ ಲೋಕೇ ಭವಿಸ್ಸತಿ.
‘‘‘ಸಕಕಮ್ಮಾಭಿರದ್ಧೋ ¶ ಸೋ, ಸುಕ್ಕಮೂಲೇನ ಚೋದಿತೋ;
ಸಕ್ಯಾನಂ ನನ್ದಿಜನನೋ, ಞಾತಿಬನ್ಧು ಭವಿಸ್ಸತಿ.
‘‘‘ಸೋ ಪಚ್ಛಾ ಪಬ್ಬಜಿತ್ವಾನ, ಸುಕ್ಕಮೂಲೇನ ಚೋದಿತೋ;
ಸಬ್ಬಾಸವೇ ಪರಿಞ್ಞಾಯ, ನಿಬ್ಬಾಯಿಸ್ಸತಿನಾಸವೋ.
‘‘‘ಪಟಿಸಮ್ಭಿದಮನುಪ್ಪತ್ತಂ, ಕತಕಿಚ್ಚಮನಾಸವಂ;
ಗೋತಮೋ ಲೋಕಬನ್ಧು ತಂ [ಸೋ (ಸೀ.)], ಏತದಗ್ಗೇ ಠಪೇಸ್ಸತಿ.
‘‘‘ಪಧಾನಪಹಿತತ್ತೋ ಸೋ, ಉಪಸನ್ತೋ ನಿರೂಪಧಿ;
ಉದಾಯೀ ನಾಮ ನಾಮೇನ, ಹೇಸ್ಸತಿ ಸತ್ಥು ಸಾವಕೋ’.
‘‘ರಾಗೋ ¶ ದೋಸೋ ಚ ಮೋಹೋ ಚ, ಮಾನೋ ಮಕ್ಖೋ ಚ ಧಂಸಿತೋ;
ಸಬ್ಬಾಸವೇ ಪರಿಞ್ಞಾಯ, ವಿಹರಾಮಿ ಅನಾಸವೋ.
‘‘ತೋಸಯಿಞ್ಚಾಪಿ ಸಮ್ಬುದ್ಧಂ, ಆತಾಪೀ ನಿಪಕೋ ಅಹಂ;
ಪಸಾದಿತೋ [ಪಮೋದಿತೋ (ಸೀ.)] ಚ ಸಮ್ಬುದ್ಧೋ, ಏತದಗ್ಗೇ ಠಪೇಸಿ ಮಂ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ¶ ಸುದಂ ಆಯಸ್ಮಾ ಕಾಳುದಾಯೀ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ;
ಕಾಳುದಾಯೀಥೇರಸ್ಸಾಪದಾನಂ ಚತುತ್ಥಂ.
೫. ಮೋಘರಾಜತ್ಥೇರಅಪದಾನಂ
‘‘ಅತ್ಥದಸ್ಸೀ ¶ ತು ಭಗವಾ, ಸಯಮ್ಭೂ ಅಪರಾಜಿತೋ;
ಭಿಕ್ಖುಸಙ್ಘಪರಿಬ್ಯೂಳ್ಹೋ, ರಥಿಯಂ ಪಟಿಪಜ್ಜಥ.
‘‘ಸಿಸ್ಸೇಹಿ ಸಮ್ಪರಿವುತೋ, ಘರಮ್ಹಾ ಅಭಿನಿಕ್ಖಮಿಂ;
ನಿಕ್ಖಮಿತ್ವಾನಹಂ ತತ್ಥ, ಅದ್ದಸಂ ಲೋಕನಾಯಕಂ.
‘‘ಅಭಿವಾದಿಯ ಸಮ್ಬುದ್ಧಂ, ಸಿರೇ ಕತ್ವಾನ ಅಞ್ಜಲಿಂ;
ಸಕಂ ಚಿತ್ತಂ ಪಸಾದೇತ್ವಾ, ಸನ್ಥವಿಂ ಲೋಕನಾಯಕಂ.
‘‘ಯಾವತಾ ರೂಪಿನೋ ಸತ್ತಾ, ಅರೂಪೀ ವಾ ಅಸಞ್ಞಿನೋ;
ಸಬ್ಬೇ ತೇ ತವ ಞಾಣಮ್ಹಿ, ಅನ್ತೋ ಹೋನ್ತಿ ಸಮೋಗಧಾ.
‘‘ಸುಖುಮಚ್ಛಿಕಜಾಲೇನ ¶ , ಉದಕಂ ಯೋ ಪರಿಕ್ಖಿಪೇ;
ಯೇ ಕೇಚಿ ಉದಕೇ ಪಾಣಾ, ಅನ್ತೋಜಾಲೇ ಭವನ್ತಿ ತೇ.
‘‘ಯೇಸಞ್ಚ ಚೇತನಾ ಅತ್ಥಿ, ರೂಪಿನೋ ಚ ಅರೂಪಿನೋ;
ಸಬ್ಬೇ ತೇ ತವ ಞಾಣಮ್ಹಿ, ಅನ್ತೋ ಹೋನ್ತಿ ಸಮೋಗಧಾ.
‘‘ಸಮುದ್ಧರಸಿಮಂ ಲೋಕಂ, ಅನ್ಧಕಾರಸಮಾಕುಲಂ;
ತವ ಧಮ್ಮಂ ಸುಣಿತ್ವಾನ, ಕಙ್ಖಾಸೋತಂ ತರನ್ತಿ ತೇ.
‘‘ಅವಿಜ್ಜಾನಿವುತೇ ಲೋಕೇ, ಅನ್ಧಕಾರೇನ ಓತ್ಥಟೇ;
ತವ ¶ ಞಾಣಮ್ಹಿ ಜೋತನ್ತೇ, ಅನ್ಧಕಾರಾ ಪಧಂಸಿತಾ.
‘‘ತುವಂ ಚಕ್ಖೂಸಿ ಸಬ್ಬೇಸಂ, ಮಹಾತಮಪನೂದನೋ;
ತವ ಧಮ್ಮಂ ಸುಣಿತ್ವಾನ, ನಿಬ್ಬಾಯತಿ ಬಹುಜ್ಜನೋ.
‘‘ಪುಟಕಂ ¶ ಪೂರಯಿತ್ವಾನ [ಪೀಠರಂ (ಸೀ.), ಪುತರಂ (ಸ್ಯಾ.)], ಮಧುಖುದ್ದಮನೇಳಕಂ;
ಉಭೋ ಹತ್ಥೇಹಿ ಪಗ್ಗಯ್ಹ, ಉಪನೇಸಿಂ ಮಹೇಸಿನೋ.
‘‘ಪಟಿಗ್ಗಣ್ಹಿ ಮಹಾವೀರೋ, ಸಹತ್ಥೇನ ಮಹಾ ಇಸೀ;
ಭುಞ್ಜಿತ್ವಾ ತಞ್ಚ ಸಬ್ಬಞ್ಞೂ, ವೇಹಾಸಂ ನಭಮುಗ್ಗಮಿ.
‘‘ಅನ್ತಲಿಕ್ಖೇ ಠಿತೋ ಸತ್ಥಾ, ಅತ್ಥದಸ್ಸೀ ನರಾಸಭೋ;
ಮಮ ಚಿತ್ತಂ ಪಸಾದೇನ್ತೋ, ಇಮಾ ಗಾಥಾ ಅಭಾಸಥ.
‘‘‘ಯೇನಿದಂ ಥವಿತಂ ಞಾಣಂ, ಬುದ್ಧಸೇಟ್ಠೋ ಚ ಥೋಮಿತೋ;
ತೇನ ಚಿತ್ತಪ್ಪಸಾದೇನ, ದುಗ್ಗತಿಂ ಸೋ ನ ಗಚ್ಛತಿ.
‘‘‘ಚತುದ್ದಸಞ್ಚಕ್ಖತ್ತುಂ [ಚತುಸಟ್ಠಿಞ್ಚ (ಸ್ಯಾ.)] ಸೋ, ದೇವರಜ್ಜಂ ಕರಿಸ್ಸತಿ;
ಪಥಬ್ಯಾ ರಜ್ಜಂ ಅಟ್ಠಸತಂ, ವಸುಧಂ ಆವಸಿಸ್ಸತಿ.
‘‘‘ಪಞ್ಚೇವ ¶ ಸತಕ್ಖತ್ತುಞ್ಚ [ಅಥ ಪಞ್ಚಸತಕ್ಖತ್ತುಂ (ಸೀ.)], ಚಕ್ಕವತ್ತೀ ಭವಿಸ್ಸತಿ;
ಪದೇಸರಜ್ಜಂ ಅಸಙ್ಖೇಯ್ಯಂ, ಮಹಿಯಾ ಕಾರಯಿಸ್ಸತಿ.
‘‘‘ಅಜ್ಝಾಯಕೋ ಮನ್ತಧರೋ, ತಿಣ್ಣಂ ವೇದಾನ ಪಾರಗೂ;
ಗೋತಮಸ್ಸ ಭಗವತೋ, ಸಾಸನೇ ಪಬ್ಬಜಿಸ್ಸತಿ.
‘‘‘ಗಮ್ಭೀರಂ ನಿಪುಣಂ ಅತ್ಥಂ, ಞಾಣೇನ ವಿಚಿನಿಸ್ಸತಿ;
ಮೋಘರಾಜಾತಿ ನಾಮೇನ, ಹೇಸ್ಸತಿ ಸತ್ಥು ಸಾವಕೋ.
‘‘‘ತೀಹಿ ¶ ವಿಜ್ಜಾಹಿ ಸಮ್ಪನ್ನಂ, ಕತಕಿಚ್ಚಮನಾಸವಂ;
ಗೋತಮೋ ¶ ಸತ್ಥವಾಹಗ್ಗೋ, ಏತದಗ್ಗೇ ಠಪೇಸ್ಸತಿ’.
‘‘ಹಿತ್ವಾ ಮಾನುಸಕಂ ಯೋಗಂ, ಛೇತ್ವಾನ ಭವಬನ್ಧನಂ;
ಸಬ್ಬಾಸವೇ ಪರಿಞ್ಞಾಯ, ವಿಹರಾಮಿ ಅನಾಸವೋ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ¶ ಸುದಂ ಆಯಸ್ಮಾ ಮೋಘರಾಜೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ;
ಮೋಘರಾಜತ್ಥೇರಸ್ಸಾಪದಾನಂ ಪಞ್ಚಮಂ.
೬. ಅಧಿಮುತ್ತತ್ಥೇರಅಪದಾನಂ
‘‘ನಿಬ್ಬುತೇ ಲೋಕನಾಥಮ್ಹಿ, ಅತ್ಥದಸ್ಸೀನರುತ್ತಮೇ;
ಉಪಟ್ಠಹಿಂ ಭಿಕ್ಖುಸಙ್ಘಂ, ವಿಪ್ಪಸನ್ನೇನ ಚೇತಸಾ.
‘‘ನಿಮನ್ತೇತ್ವಾ ¶ ಭಿಕ್ಖುಸಙ್ಘಂ [ಸಂಘರತನಂ (ಸೀ. ಸ್ಯಾ.)], ಉಜುಭೂತಂ ಸಮಾಹಿತಂ;
ಉಚ್ಛುನಾ ಮಣ್ಡಪಂ ಕತ್ವಾ, ಭೋಜೇಸಿಂ ಸಙ್ಘಮುತ್ತಮಂ.
‘‘ಯಂ ಯಂ ಯೋನುಪಪಜ್ಜಾಮಿ, ದೇವತ್ತಂ ಅಥ ಮಾನುಸಂ;
ಸಬ್ಬೇ ಸತ್ತೇ ಅಭಿಭೋಮಿ [ಅತಿಭೋಮಿ (ಸೀ. ಕ.)], ಪುಞ್ಞಕಮ್ಮಸ್ಸಿದಂ ಫಲಂ.
‘‘ಅಟ್ಠಾರಸೇ ಕಪ್ಪಸತೇ, ಯಂ ದಾನಮದದಿಂ ತದಾ;
ದುಗ್ಗತಿಂ ನಾಭಿಜಾನಾಮಿ, ಉಚ್ಛುದಾನಸ್ಸಿದಂ ಫಲಂ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಅಧಿಮುತ್ತೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ;
ಅಧಿಮುತ್ತತ್ಥೇರಸ್ಸಾಪದಾನಂ ಛಟ್ಠಂ.
೭. ಲಸುಣದಾಯಕತ್ಥೇರಅಪದಾನಂ
‘‘ಹಿಮವನ್ತಸ್ಸಾವಿದೂರೇ ¶ , ತಾಪಸೋ ಆಸಹಂ ತದಾ;
ಲಸುಣಂ ಉಪಜೀವಾಮಿ, ಲಸುಣಂ ಮಯ್ಹಭೋಜನಂ.
‘‘ಖಾರಿಯೋ ¶ ಪೂರಯಿತ್ವಾನ, ಸಙ್ಘಾರಾಮಮಗಚ್ಛಹಂ;
ಹಟ್ಠೋ ಹಟ್ಠೇನ ಚಿತ್ತೇನ, ಸಙ್ಘಸ್ಸ ಲಸುಣಂ ಅದಂ.
‘‘ವಿಪಸ್ಸಿಸ್ಸ ನರಗ್ಗಸ್ಸ, ಸಾಸನೇ ನಿರತಸ್ಸಹಂ;
ಸಙ್ಘಸ್ಸ ಲಸುಣಂ ದತ್ವಾ, ಕಪ್ಪಂ ಸಗ್ಗಮ್ಹಿ ಮೋದಹಂ.
‘‘ಏಕನವುತಿತೋ ಕಪ್ಪೇ, ಲಸುಣಂ ಯಮದಂ ತದಾ;
ದುಗ್ಗತಿಂ ನಾಭಿಜಾನಾಮಿ, ಲಸುಣಸ್ಸ ಇದಂ ಫಲಂ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಲಸುಣದಾಯಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ;
ಲಸುಣದಾಯಕತ್ಥೇರಸ್ಸಾಪದಾನಂ ಸತ್ತಮಂ.
೮. ಆಯಾಗದಾಯಕತ್ಥೇರಅಪದಾನಂ
‘‘ನಿಬ್ಬುತೇ ¶ ಲೋಕನಾಥಮ್ಹಿ, ಸಿಖಿಮ್ಹಿ ವದತಂ ವರೇ;
ಹಟ್ಠೋ ಹಟ್ಠೇನ ಚಿತ್ತೇನ, ಅವನ್ದಿಂ ಥೂಪಮುತ್ತಮಂ.
‘‘ವಡ್ಢಕೀಹಿ ¶ ಕಥಾಪೇತ್ವಾ, ಮೂಲಂ ದತ್ವಾನಹಂ ತದಾ;
ಹಟ್ಠೋ ಹಟ್ಠೇನ ಚಿತ್ತೇನ, ಆಯಾಗಂ ಕಾರಪೇಸಹಂ.
‘‘ಅಟ್ಠ ಕಪ್ಪಾನಿ ದೇವೇಸು, ಅಬ್ಬೋಕಿಣ್ಣಂ [ಅಬ್ಬೋಚ್ಛಿನ್ನಂ (ಸೀ.)] ವಸಿಂ ಅಹಂ;
ಅವಸೇಸೇಸು ಕಪ್ಪೇಸು, ವೋಕಿಣ್ಣಂ ಸಂಸರಿಂ ಅಹಂ.
‘‘ಕಾಯೇ ವಿಸಂ ನ ಕಮತಿ, ಸತ್ಥಾನಿ ನ ಚ ಹನ್ತಿ ಮೇ;
ಉದಕೇಹಂ ನ ಮಿಯ್ಯಾಮಿ, ಆಯಾಗಸ್ಸ ಇದಂ ಫಲಂ.
‘‘ಯದಿಚ್ಛಾಮಿ ಅಹಂ ವಸ್ಸಂ, ಮಹಾಮೇಘೋ ಪವಸ್ಸತಿ;
ದೇವಾಪಿ ಮೇ ವಸಂ ಏನ್ತಿ, ಪುಞ್ಞಕಮ್ಮಸ್ಸಿದಂ ಫಲಂ.
‘‘ಸತ್ತರತನಸಮ್ಪನ್ನೋ, ತಿಸಕ್ಖತ್ತುಂ ಅಹೋಸಹಂ;
ನ ಮಂ ಕೇಚಾವಜಾನನ್ತಿ, ಪುಞ್ಞಕಮ್ಮಸ್ಸಿದಂ ಫಲಂ.
‘‘ಏಕತ್ತಿಂಸೇ ¶ ಇತೋ ಕಪ್ಪೇ, ಆಯಾಗಂ ಯಮಕಾರಯಿಂ;
ದುಗ್ಗತಿಂ ನಾಭಿಜಾನಾಮಿ, ಆಯಾಗಸ್ಸ ಇದಂ ಫಲಂ.
‘‘ಪಟಿಸಮ್ಭಿದಾ ¶ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಆಯಾಗದಾಯಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಆಯಾಗದಾಯಕತ್ಥೇರಸ್ಸಾಪದಾನಂ ಅಟ್ಠಮಂ.
೯. ಧಮ್ಮಚಕ್ಕಿಕತ್ಥೇರಅಪದಾನಂ
‘‘ಸಿದ್ಧತ್ಥಸ್ಸ ¶ ಭಗವತೋ, ಸೀಹಾಸನಸ್ಸ ಸಮ್ಮುಖಾ;
ಧಮ್ಮಚಕ್ಕಂ ಮೇ ಠಪಿತಂ, ಸುಕತಂ ವಿಞ್ಞುವಣ್ಣಿತಂ.
‘‘ಚಾರುವಣ್ಣೋವ ಸೋಭಾಮಿ, ಸಯೋಗ್ಗಬಲವಾಹನೋ;
ಪರಿವಾರೇನ್ತಿ ಮಂ ನಿಚ್ಚಂ, ಅನುಯನ್ತಾ ಬಹುಜ್ಜನಾ.
‘‘ಸಟ್ಠಿತೂರಿಯಸಹಸ್ಸೇಹಿ, ಪರಿಚಾರೇಮಹಂ ಸದಾ;
ಪರಿವಾರೇನ ಸೋಭಾಮಿ, ಪುಞ್ಞಕಮ್ಮಸ್ಸಿದಂ ಫಲಂ.
‘‘ಚತುನ್ನವುತಿತೋ ಕಪ್ಪೇ, ಯಂ ಚಕ್ಕಂ ಠಪಯಿಂ ಅಹಂ;
ದುಗ್ಗತಿಂ ನಾಭಿಜಾನಾಮಿ, ಧಮ್ಮಚಕ್ಕಸ್ಸಿದಂ ಫಲಂ.
‘‘ಇತೋ ಏಕಾದಸೇ ಕಪ್ಪೇ, ಅಟ್ಠಾಸಿಂಸು ಜನಾಧಿಪಾ;
ಸಹಸ್ಸರಾಜನಾಮೇನ, ಚಕ್ಕವತ್ತೀ ಮಹಬ್ಬಲಾ.
‘‘ಪಟಿಸಮ್ಭಿದಾ ¶ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಧಮ್ಮಚಕ್ಕಿಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಧಮ್ಮಚಕ್ಕಿಕತ್ಥೇರಸ್ಸಾಪದಾನಂ ನವಮಂ.
೧೦. ಕಪ್ಪರುಕ್ಖಿಯತ್ಥೇರಅಪದಾನಂ
‘‘ಸಿದ್ಧತ್ಥಸ್ಸ ಭಗವತೋ, ಥೂಪಸೇಟ್ಠಸ್ಸ ಸಮ್ಮುಖಾ;
ವಿಚಿತ್ತದುಸ್ಸೇ ಲಗೇತ್ವಾ [ಲಗ್ಗೇತ್ವಾ (ಸೀ. ಸ್ಯಾ.)], ಕಪ್ಪರುಕ್ಖಂ ಠಪೇಸಹಂ.
‘‘ಯಂ ¶ ¶ ಯಂ ಯೋನುಪಪಜ್ಜಾಮಿ, ದೇವತ್ತಂ ಅಥ ಮಾನುಸಂ;
ಸೋಭಯನ್ತೋ ಮಮ ದ್ವಾರಂ, ಕಪ್ಪರುಕ್ಖೋ ಪತಿಟ್ಠತಿ.
‘‘ಅಹಞ್ಚ ¶ ಪರಿಸಾ ಚೇವ, ಯೇ ಕೇಚಿ ಮಮ ವಸ್ಸಿತಾ [ನಿಸ್ಸಿತಾ (ಸೀ.)];
ತಮ್ಹಾ ದುಸ್ಸಂ ಗಹೇತ್ವಾನ, ನಿವಾಸೇಮ ಮಯಂ ಸದಾ [ತದಾ (ಸ್ಯಾ.)].
‘‘ಚತುನ್ನವುತಿತೋ ಕಪ್ಪೇ, ಯಂ ರುಕ್ಖಂ ಠಪಯಿಂ ಅಹಂ;
ದುಗ್ಗತಿಂ ನಾಭಿಜಾನಾಮಿ, ಕಪ್ಪರುಕ್ಖಸ್ಸಿದಂ ಫಲಂ.
‘‘ಇತೋ ಚ ಸತ್ತಮೇ ಕಪ್ಪೇ, ಸುಚೇಳಾ ಅಟ್ಠ ಖತ್ತಿಯಾ;
ಸತ್ತರತನಸಮ್ಪನ್ನಾ, ಚಕ್ಕವತ್ತೀ ಮಹಬ್ಬಲಾ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಕಪ್ಪರುಕ್ಖಿಯೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಕಪ್ಪರುಕ್ಖಿಯತ್ಥೇರಸ್ಸಾಪದಾನಂ ದಸಮಂ.
ಕುಣ್ಡಧಾನವಗ್ಗೋ ಚತುತ್ಥೋ.
ತಸ್ಸುದ್ದಾನಂ –
ಕುಣ್ಡಸಾಗತಕಚ್ಚಾನಾ, ಉದಾಯೀ ಮೋಘರಾಜಕೋ;
ಅಧಿಮುತ್ತೋ ಲಸುಣದೋ, ಆಯಾಗೀ ಧಮ್ಮಚಕ್ಕಿಕೋ;
ಕಪ್ಪರುಕ್ಖೀ ಚ ದಸಮೋ, ಗಾಥಾ ದ್ವಯದಸಸತಂ [ಗಾಥಾಯೋ ದ್ವಾದಸಸತಂ (ಸೀ.)].
೫. ಉಪಾಲಿವಗ್ಗೋ
೧. ಭಾಗಿನೇಯ್ಯುಪಾಲಿತ್ಥೇರಅಪದಾನಂ
‘‘ಖೀಣಾಸವಸಹಸ್ಸೇಹಿ ¶ ¶ , ಪರಿವುತೋ [ಪರೇತೋ (ಕ. ಅಟ್ಠ)] ಲೋಕನಾಯಕೋ;
ವಿವೇಕಮನುಯುತ್ತೋ ಸೋ, ಗಚ್ಛತೇ ಪಟಿಸಲ್ಲಿತುಂ.
‘‘ಅಜಿನೇನ ನಿವತ್ಥೋಹಂ, ತಿದಣ್ಡಪರಿಧಾರಕೋ;
ಭಿಕ್ಖುಸಙ್ಘಪರಿಬ್ಯೂಳ್ಹಂ, ಅದ್ದಸಂ ಲೋಕನಾಯಕಂ.
‘‘ಏಕಂಸಂ ¶ ಅಜಿನಂ ಕತ್ವಾ, ಸಿರೇ ಕತ್ವಾನ ಅಞ್ಜಲಿಂ;
ಸಮ್ಬುದ್ಧಂ ಅಭಿವಾದೇತ್ವಾ, ಸನ್ಥವಿಂ ಲೋಕನಾಯಕಂ.
‘‘ಯಥಾಣ್ಡಜಾ ಚ ಸಂಸೇದಾ, ಓಪಪಾತೀ ಜಲಾಬುಜಾ;
ಕಾಕಾದಿಪಕ್ಖಿನೋ ಸಬ್ಬೇ, ಅನ್ತಲಿಕ್ಖಚರಾ ಸದಾ.
‘‘ಯೇ ಕೇಚಿ ಪಾಣಭೂತತ್ಥಿ, ಸಞ್ಞಿನೋ ವಾ ಅಸಞ್ಞಿನೋ;
ಸಬ್ಬೇ ತೇ ತವ ಞಾಣಮ್ಹಿ, ಅನ್ತೋ ಹೋನ್ತಿ ಸಮೋಗಧಾ.
‘‘ಗನ್ಧಾ ಚ ಪಬ್ಬತೇಯ್ಯಾ ಯೇ, ಹಿಮವನ್ತನಗುತ್ತಮೇ;
ಸಬ್ಬೇ ತೇ ತವ ಸೀಲಮ್ಹಿ, ಕಲಾಯಪಿ ನ ಯುಜ್ಜರೇ.
‘‘ಮೋಹನ್ಧಕಾರಪಕ್ಖನ್ದೋ, ಅಯಂ ಲೋಕೋ ಸದೇವಕೋ;
ತವ ಞಾಣಮ್ಹಿ ಜೋತನ್ತೇ, ಅನ್ಧಕಾರಾ ವಿಧಂಸಿತಾ.
‘‘ಯಥಾ ಅತ್ಥಙ್ಗತೇ ಸೂರಿಯೇ, ಹೋನ್ತಿ ಸತ್ತಾ ತಮೋಗತಾ;
ಏವಂ ಬುದ್ಧೇ ಅನುಪ್ಪನ್ನೇ, ಹೋತಿ ಲೋಕೋ ತಮೋಗತೋ.
‘‘ಯಥೋದಯನ್ತೋ ಆದಿಚ್ಚೋ, ವಿನೋದೇತಿ ತಮಂ ಸದಾ;
ತಥೇವ ತ್ವಂ ಬುದ್ಧಸೇಟ್ಠ, ವಿದ್ಧಂಸೇಸಿ ತಮಂ ಸದಾ.
‘‘ಪಧಾನಪಹಿತತ್ತೋಸಿ ¶ , ಬುದ್ಧೋ ಲೋಕೇ ಸದೇವಕೇ;
ತವ ಕಮ್ಮಾಭಿರದ್ಧೇನ, ತೋಸೇಸಿ ಜನತಂ ಬಹುಂ.
‘‘ತಂ ಸಬ್ಬಂ ಅನುಮೋದಿತ್ವಾ, ಪದುಮುತ್ತರೋ ಮಹಾಮುನಿ;
ನಭಂ ಅಬ್ಭುಗ್ಗಮೀ ಧೀರೋ, ಹಂಸರಾಜಾವ ಅಮ್ಬರೇ.
‘‘ಅಬ್ಭುಗ್ಗನ್ತ್ವಾನ ¶ ಸಮ್ಬುದ್ಧೋ, ಮಹೇಸಿ ಪದುಮುತ್ತರೋ;
ಅನ್ತಲಿಕ್ಖೇ ಠಿತೋ ಸತ್ಥಾ, ಇಮಾ ಗಾಥಾ ಅಭಾಸಥ.
‘‘ಯೇನಿದಂ ¶ ಥವಿತಂ ಞಾಣಂ, ಓಪಮ್ಮೇಹಿ ಸಮಾಯುತಂ;
ತಮಹಂ ಕಿತ್ತಯಿಸ್ಸಾಮಿ, ಸುಣಾಥ ಮಮ ಭಾಸತೋ.
‘‘‘ಅಟ್ಠಾರಸಞ್ಚ ಖತ್ತುಂ ಸೋ, ದೇವರಾಜಾ ಭವಿಸ್ಸತಿ;
ಪಥಬ್ಯಾ ರಜ್ಜಂ ತಿಸತಂ, ವಸುಧಂ ಆವಸಿಸ್ಸತಿ.
‘‘‘ಪಞ್ಚವೀಸತಿಕ್ಖತ್ತುಞ್ಚ, ಚಕ್ಕವತ್ತೀ ಭವಿಸ್ಸತಿ;
ಪದೇಸರಜ್ಜಂ ವಿಪುಲಂ, ಗಣನಾತೋ ಅಸಙ್ಖಿಯಂ.
‘‘‘ಕಪ್ಪಸತಸಹಸ್ಸಮ್ಹಿ, ಓಕ್ಕಾಕಕುಲಸಮ್ಭವೋ;
ಗೋತಮೋ ನಾಮ ಗೋತ್ತೇನ, ಸತ್ಥಾ ಲೋಕೇ ಭವಿಸ್ಸತಿ.
‘‘‘ತುಸಿತಾ ಹಿ ಚವಿತ್ವಾನ, ಸುಕ್ಕಮೂಲೇನ ಚೋದಿತೋ;
ಹೀನೋವ ಜಾತಿಯಾ ಸನ್ತೋ, ಉಪಾಲಿ ನಾಮ ಹೇಸ್ಸತಿ.
‘‘‘ಸೋ ¶ ಪಚ್ಛಾ ಪಬ್ಬಜಿತ್ವಾನ, ವಿರಾಜೇತ್ವಾನ ಪಾಪಕಂ;
ಸಬ್ಬಾಸವೇ ಪರಿಞ್ಞಾಯ, ನಿಬ್ಬಾಯಿಸ್ಸತಿನಾಸವೋ.
‘‘‘ತುಟ್ಠೋ ಚ ಗೋತಮೋ ಬುದ್ಧೋ, ಸಕ್ಯಪುತ್ತೋ ಮಹಾಯಸೋ;
ವಿನಯಾಧಿಗತಂ ತಸ್ಸ, ಏತದಗ್ಗೇ ಠಪೇಸ್ಸತಿ’.
‘‘ಸದ್ಧಾಯಾಹಂ ¶ ಪಬ್ಬಜಿತೋ, ಕತಕಿಚ್ಚೋ ಅನಾಸವೋ;
ಸಬ್ಬಾಸವೇ ಪರಿಞ್ಞಾಯ, ವಿಹರಾಮಿ ಅನಾಸವೋ.
‘‘ಭಗವಾ ಚಾನುಕಮ್ಪೀ ಮಂ, ವಿನಯೇಹಂ ವಿಸಾರದೋ;
ಸಕಕಮ್ಮಾಭಿರದ್ಧೋ ಚ, ವಿಹರಾಮಿ ಅನಾಸವೋ.
‘‘ಸಂವುತೋ ಪಾತಿಮೋಕ್ಖಮ್ಹಿ, ಇನ್ದ್ರಿಯೇಸು ಚ ಪಞ್ಚಸು;
ಧಾರೇಮಿ ವಿನಯಂ ಸಬ್ಬಂ, ಕೇವಲಂ ರತನಾಕರಂ [ರತನಗ್ಘರಂ (ಕ.)].
‘‘ಮಮಞ್ಚ ಗುಣಮಞ್ಞಾಯ, ಸತ್ಥಾ ಲೋಕೇ ಅನುತ್ತರೋ;
ಭಿಕ್ಖುಸಙ್ಘೇ ನಿಸೀದಿತ್ವಾ, ಏತದಗ್ಗೇ ಠಪೇಸಿ ಮಂ.
‘‘ಪಟಿಸಮ್ಭಿದಾ ಚತಸ್ಸೋ, ವಿಮೋಕ್ಖಾಪಿ ಚ ಅಟ್ಠಿಮೇ;
ಛಳಭಿಞ್ಞಾ ಸಚ್ಛಿಕತಾ, ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಉಪಾಲಿಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಭಾಗಿನೇಯ್ಯುಪಾಲಿತ್ಥೇರಸ್ಸಾಪದಾನಂ ಪಠಮಂ.
೨. ಸೋಣಕೋಳಿವಿಸತ್ಥೇರಅಪದಾನಂ
‘‘ಅನೋಮದಸ್ಸಿಸ್ಸ ¶ ¶ ಮುನಿನೋ, ಲೋಕಜೇಟ್ಠಸ್ಸ ತಾದಿನೋ;
ಸುಧಾಯ ಲೇಪನಂ ಕತ್ವಾ, ಚಙ್ಕಮಂ ಕಾರಯಿಂ ಅಹಂ.
‘‘ನಾನಾವಣೇಹಿ ಪುಪ್ಫೇಹಿ, ಚಙ್ಕಮಂ ಸನ್ಥರಿಂ ಅಹಂ;
ಆಕಾಸೇ ವಿತಾನಂ ಕತ್ವಾ, ಭೋಜಯಿಂ ಬುದ್ಧಮುತ್ತಮಂ.
‘‘ಅಞ್ಜಲಿಂ ¶ ಪಗ್ಗಹೇತ್ವಾನ, ಅಭಿವಾದೇತ್ವಾನ ಸುಬ್ಬತಂ [ಪುಪ್ಫಕಂ (ಕ.)];
ದೀಘಸಾಲಂ ಭಗವತೋ, ನಿಯ್ಯಾದೇಸಿಮಹಂ ತದಾ.
‘‘ಮಮ ಸಙ್ಕಪ್ಪಮಞ್ಞಾಯ, ಸತ್ಥಾ ಲೋಕೇ ಅನುತ್ತರೋ;
ಪಟಿಗ್ಗಹೇಸಿ ಭಗವಾ, ಅನುಕಮ್ಪಾಯ ಚಕ್ಖುಮಾ.
‘‘ಪಟಿಗ್ಗಹೇತ್ವಾನ ಸಮ್ಬುದ್ಧೋ, ದಕ್ಖಿಣೇಯ್ಯೋ ಸದೇವಕೇ;
ಭಿಕ್ಖುಸಙ್ಘೇ ನಿಸೀದಿತ್ವಾ, ಇಮಾ ಗಾಥಾ ಅಭಾಸಥ.
‘‘‘ಯೋ ಸೋ ಹಟ್ಠೇನ ಚಿತ್ತೇನ, ದೀಘಸಾಲಂ ಅದಾಸಿ [ಅಕಾಸಿ (ಸೀ.)] ಮೇ;
ತಮಹಂ ಕಿತ್ತಯಿಸ್ಸಾಮಿ, ಸುಣಾಥ ಮಮ ಭಾಸತೋ.
‘‘‘ಇಮಸ್ಸ ¶ ಮಚ್ಚುಕಾಲಮ್ಹಿ, ಪುಞ್ಞಕಮ್ಮಸಮಙ್ಗಿನೋ;
ಸಹಸ್ಸಯುತ್ತಸ್ಸರಥೋ, ಉಪಟ್ಠಿಸ್ಸತಿ ತಾವದೇ.
‘‘‘ತೇನ ಯಾನೇನಯಂ ಪೋಸೋ, ದೇವಲೋಕಂ ಗಮಿಸ್ಸತಿ;
ಅನುಮೋದಿಸ್ಸರೇ ದೇವಾ, ಸಮ್ಪತ್ತೇ ಕುಸಲಬ್ಭವೇ [ಕುಸಲೇ ಭವೇ (ಸೀ. ಸ್ಯಾ.)].
‘‘‘ಮಹಾರಹಂ ಬ್ಯಮ್ಹಂ ಸೇಟ್ಠಂ, ರತನಮತ್ತಿಕಲೇಪನಂ;
ಕೂಟಾಗಾರವರೂಪೇತಂ, ಬ್ಯಮ್ಹಂ ಅಜ್ಝಾವಸಿಸ್ಸತಿ.
‘‘‘ತಿಂಸಕಪ್ಪಸಹಸ್ಸಾನಿ, ದೇವಲೋಕೇ ರಮಿಸ್ಸತಿ;
ಪಞ್ಚವೀಸತಿ ಕಪ್ಪಾನಿ, ದೇವರಾಜಾ ಭವಿಸ್ಸತಿ.
‘‘‘ಸತ್ತಸತ್ತತಿಕ್ಖತ್ತುಞ್ಚ, ಚಕ್ಕವತ್ತೀ ಭವಿಸ್ಸತಿ;
ಯಸೋಧರಸನಾಮಾ [ಯಸೇಧರಾ ಸಮಾನಾ (ಸೀ.)] ತೇ, ಸಬ್ಬೇಪಿ ಏಕನಾಮಕಾ.
‘‘‘ದ್ವೇ ಸಮ್ಪತ್ತೀ ಅನುಭೋತ್ವಾ, ವಡ್ಢೇತ್ವಾ [ಚಿನಿತ್ವಾ (ಸ್ಯಾ.)] ಪುಞ್ಞಸಞ್ಚಯಂ;
ಅಟ್ಠವೀಸತಿಕಪ್ಪಮ್ಹಿ, ಚಕ್ಕವತ್ತೀ ಭವಿಸ್ಸತಿ.
‘‘‘ತತ್ರಾಪಿ ¶ ¶ ಬ್ಯಮ್ಹಂ ಪವರಂ, ವಿಸ್ಸಕಮ್ಮೇನ ಮಾಪಿತಂ;
ದಸಸದ್ದಾವಿವಿತ್ತಂ ತಂ, ಪುರಮಜ್ಝಾವಸಿಸ್ಸತಿ.
‘‘‘ಅಪರಿಮೇಯ್ಯೇ ¶ ಇತೋ ಕಪ್ಪೇ, ಭೂಮಿಪಾಲೋ ಮಹಿದ್ಧಿಕೋ;
ಓಕ್ಕಾಕೋ ನಾಮ ನಾಮೇನ, ರಾಜಾ ರಟ್ಠೇ ಭವಿಸ್ಸತಿ.
‘‘‘ಸೋಳಸಿತ್ಥಿಸಹಸ್ಸಾನಂ, ಸಬ್ಬಾಸಂ ಪವರಾ ಚ ಸಾ [ಪವರಾವ ಯಾ (ಸ್ಯಾ.), ಪವರಾ ಪಿಯಾ (?)];
ಅಭಿಜಾತಾ ಖತ್ತಿಯಾನೀ, ನವ ಪುತ್ತೇ ಜನೇಸ್ಸತಿ.
‘‘‘ನವ ಪುತ್ತೇ ಜನೇತ್ವಾನ, ಖತ್ತಿಯಾನೀ ಮರಿಸ್ಸತಿ;
ತರುಣೀ ಚ ಪಿಯಾ ಕಞ್ಞಾ, ಮಹೇಸಿತ್ತಂ ಕರಿಸ್ಸತಿ.
‘‘‘ಓಕ್ಕಾಕಂ ತೋಸಯಿತ್ವಾನ, ವರಂ ಕಞ್ಞಾ ಲಭಿಸ್ಸತಿ;
ವರಂ ಲದ್ಧಾನ ಸಾ ಕಞ್ಞಾ, ಪುತ್ತೇ ಪಬ್ಬಾಜಯಿಸ್ಸತಿ.
‘‘‘ಪಬ್ಬಾಜಿತಾ ಚ ತೇ ಸಬ್ಬೇ, ಗಮಿಸ್ಸನ್ತಿ ನಗುತ್ತಮಂ;
ಜಾತಿಭೇದಭಯಾ ಸಬ್ಬೇ, ಭಗಿನೀಹಿ ವಸಿಸ್ಸರೇ [ಸಂವಸಿಸ್ಸರೇ (ಸೀ.)].
‘‘‘ಏಕಾ ಚ ಕಞ್ಞಾ ಬ್ಯಾಧೀಹಿ, ಭವಿಸ್ಸತಿ ಪರಿಕ್ಖತಾ [ಪುರಕ್ಖತಾ (ಸ್ಯಾ. ಕ.)];
ಮಾ ನೋ ಜಾತಿ ಪಭಿಜ್ಜೀತಿ, ನಿಖಣಿಸ್ಸನ್ತಿ ಖತ್ತಿಯಾ.
‘‘‘ಖತ್ತಿಯೋ ನೀಹರಿತ್ವಾನ, ತಾಯ ಸದ್ಧಿಂ ವಸಿಸ್ಸತಿ;
ಭವಿಸ್ಸತಿ ತದಾ ಭೇದೋ, ಓಕ್ಕಾಕಕುಲಸಮ್ಭವೋ.
‘‘‘ತೇಸಂ ¶ ಪಜಾ ಭವಿಸ್ಸನ್ತಿ, ಕೋಳಿಯಾ ನಾಮ ಜಾತಿಯಾ;
ತತ್ಥ ಮಾನುಸಕಂ ಭೋಗಂ, ಅನುಭೋಸ್ಸತಿನಪ್ಪಕಂ.
‘‘‘ತಮ್ಹಾ ಕಾಯಾ ಚವಿತ್ವಾನ, ದೇವಲೋಕಂ ಗಮಿಸ್ಸತಿ;
ತತ್ರಾಪಿ ಪವರಂ ಬ್ಯಮ್ಹಂ, ಲಭಿಸ್ಸತಿ ಮನೋರಮಂ.
‘‘‘ದೇವಲೋಕಾ ¶ ಚವಿತ್ವಾನ, ಸುಕ್ಕಮೂಲೇನ ಚೋದಿತೋ;
ಆಗನ್ತ್ವಾನ ಮನುಸ್ಸತ್ತಂ, ಸೋಣೋ ನಾಮ ಭವಿಸ್ಸತಿ.
‘‘‘ಆರದ್ಧವೀರಿಯೋ ಪಹಿತತ್ತೋ, ಪದಹಂ ಸತ್ಥು ಸಾಸನೇ;
ಸಬ್ಬಾಸವೇ ಪರಿಞ್ಞಾಯ, ನಿಬ್ಬಾಯಿಸ್ಸತಿನಾಸವೋ.
‘‘‘ಅನನ್ತದಸ್ಸೀ ಭಗವಾ, ಗೋತಮೋ ಸಕ್ಯಪುಙ್ಗವೋ;
ವಿಸೇಸಞ್ಞೂ ಮಹಾವೀರೋ, ಅಗ್ಗಟ್ಠಾನೇ ಠಪೇಸ್ಸತಿ’.
‘‘ವುಟ್ಠಮ್ಹಿ ¶ ದೇವೇ ಚತುರಙ್ಗುಲಮ್ಹಿ, ತಿಣೇ ಅನಿಲೇರಿತಅಙ್ಗಣಮ್ಹಿ;
ಠತ್ವಾನ ಯೋಗಸ್ಸ ಪಯುತ್ತತಾದಿನೋ, ತತೋತ್ತರಿಂ ಪಾರಮತಾ ನ ವಿಜ್ಜತಿ.
‘‘ಉತ್ತಮೇ ದಮಥೇ ದನ್ತೋ, ಚಿತ್ತಂ ಮೇ ಸುಪಣೀಹಿತಂ;
ಭಾರೋ ಮೇ ಓಹಿತೋ ಸಬ್ಬೋ, ನಿಬ್ಬುತೋಮ್ಹಿ ಅನಾಸವೋ.
‘‘ಅಙ್ಗೀರಸೋ ¶ ಮಹಾನಾಗೋ, ಅಭಿಜಾತೋವ ಕೇಸರೀ;
ಭಿಕ್ಖುಸಙ್ಘೇ ನಿಸೀದಿತ್ವಾ, ಏತದಗ್ಗೇ ಠಪೇಸಿ ಮಂ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಸೋಣೋ ಕೋಳಿವಿಸೋ [ಕೋಳಿಯವೇಸ್ಸೋ (ಸೀ. ಸ್ಯಾ.), ಕೋಟಿಕಣ್ಣೋ (ಕ.)] ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಸೋಣಕೋಳಿವಿಸತ್ಥೇರಸ್ಸಾಪದಾನಂ ದುತಿಯಂ.
೩. ಕಾಳಿಗೋಧಾಪುತ್ತಭದ್ದಿಯತ್ಥೇರಅಪದಾನಂ
‘‘ಪದುಮುತ್ತರಸಮ್ಬುದ್ಧಂ ¶ , ಮೇತ್ತಚಿತ್ತಂ ಮಹಾಮುನಿಂ;
ಉಪೇತಿ ಜನತಾ ಸಬ್ಬಾ, ಸಬ್ಬಲೋಕಗ್ಗನಾಯಕಂ.
‘‘ಸತ್ತುಕಞ್ಚ ಬದ್ಧಕಞ್ಚ [ವತ್ಥಂ ಸೇನಾಸನಞ್ಚೇವ (ಸೀ.), ಸತ್ತುಕಞ್ಚ ಪದಕಞ್ಚ (ಸೀ. ಅಟ್ಠ.), ಸತ್ತುಕಞ್ಚ ಪವಾಕಞ್ಚ (ಸ್ಯಾ.)], ಆಮಿಸಂ ಪಾನಭೋಜನಂ;
ದದನ್ತಿ ಸತ್ಥುನೋ ಸಬ್ಬೇ, ಪುಞ್ಞಕ್ಖೇತ್ತೇ ಅನುತ್ತರೇ.
‘‘ಅಹಮ್ಪಿ ¶ ದಾನಂ ದಸ್ಸಾಮಿ, ದೇವದೇವಸ್ಸ ತಾದಿನೋ;
ಬುದ್ಧಸೇಟ್ಠಂ ನಿಮನ್ತೇತ್ವಾ, ಸಙ್ಘಮ್ಪಿ ಚ ಅನುತ್ತರಂ.
‘‘ಉಯ್ಯೋಜಿತಾ ಮಯಾ ಚೇತೇ, ನಿಮನ್ತೇಸುಂ ತಥಾಗತಂ;
ಕೇವಲಂ ಭಿಕ್ಖುಸಙ್ಘಞ್ಚ, ಪುಞ್ಞಕ್ಖೇತ್ತಂ ಅನುತ್ತರಂ.
‘‘ಸತಸಹಸ್ಸಪಲ್ಲಙ್ಕಂ, ಸೋವಣ್ಣಂ ಗೋನಕತ್ಥತಂ;
ತೂಲಿಕಾಪಟಲಿಕಾಯ, ಖೋಮಕಪ್ಪಾಸಿಕೇಹಿ ಚ;
ಮಹಾರಹಂ ಪಞ್ಞಾಪಯಿಂ, ಆಸನಂ ಬುದ್ಧಯುತ್ತಕಂ.
‘‘ಪದುಮುತ್ತರೋ ¶ ಲೋಕವಿದೂ, ದೇವದೇವೋ ನರಾಸಭೋ;
ಭಿಕ್ಖುಸಙ್ಘಪರಿಬ್ಯೂಳ್ಹೋ, ಮಮ ದ್ವಾರಮುಪಾಗಮಿ.
‘‘ಪಚ್ಚುಗ್ಗನ್ತ್ವಾನ ಸಮ್ಬುದ್ಧಂ, ಲೋಕನಾಥಂ ಯಸಸ್ಸಿನಂ;
ಪಸನ್ನಚಿತ್ತೋ ಸುಮನೋ, ಅಭಿನಾಮಯಿಂ ಸಙ್ಘರಂ [ಸಕಂ ಘರಂ (ಸೀ.)].
‘‘ಭಿಕ್ಖೂನಂ ಸತಸಹಸ್ಸಂ, ಬುದ್ಧಞ್ಚ ಲೋಕನಾಯಕಂ;
ಪಸನ್ನಚಿತ್ತೋ ಸುಮನೋ, ಪರಮನ್ನೇನ ತಪ್ಪಯಿಂ.
‘‘ಪದುಮುತ್ತರೋ ಲೋಕವಿದೂ, ಆಹುತೀನಂ ಪಟಿಗ್ಗಹೋ;
ಭಿಕ್ಖುಸಙ್ಘೇ ¶ ನಿಸೀದಿತ್ವಾ, ಇಮಾ ಗಾಥಾ ಅಭಾಸಥ.
‘‘‘ಯೇನಿದಂ ಆಸನಂ ದಿನ್ನಂ, ಸೋವಣ್ಣಂ ಗೋನಕತ್ಥತಂ;
ತಮಹಂ ಕಿತ್ತಯಿಸ್ಸಾಮಿ, ಸುಣಾಥ ಮಮ ಭಾಸತೋ.
‘‘‘ಚತುಸತ್ತತಿಕ್ಖತ್ತುಂ ¶ ಸೋ, ದೇವರಜ್ಜಂ ಕರಿಸ್ಸತಿ;
ಅನುಭೋಸ್ಸತಿ ಸಮ್ಪತ್ತಿಂ, ಅಚ್ಛರಾಹಿ ಪುರಕ್ಖತೋ.
‘‘‘ಪದೇಸರಜ್ಜಂ ಸಹಸ್ಸಂ, ವಸುಧಂ ಆವಸಿಸ್ಸತಿ;
ಏಕಪಞ್ಞಾಸಕ್ಖತ್ತುಞ್ಚ, ಚಕ್ಕವತ್ತೀ ಭವಿಸ್ಸತಿ.
‘‘‘ಸಬ್ಬಾಸು ಭವಯೋನೀಸು, ಉಚ್ಚಾಕುಲೀ [ಉಚ್ಚಾಕುಲೇ (ಕ.)] ಭವಿಸ್ಸತಿ;
ಸೋ ಚ ಪಚ್ಛಾ ಪಬ್ಬಜಿತ್ವಾ, ಸುಕ್ಕಮೂಲೇನ ಚೋದಿತೋ;
ಭದ್ದಿಯೋ ನಾಮ ನಾಮೇನ, ಹೇಸ್ಸತಿ ಸತ್ಥು ಸಾವಕೋ.
‘‘‘ವಿವೇಕಮನುಯುತ್ತೋಮ್ಹಿ, ಪನ್ತಸೇನನಿವಾಸಹಂ;
ಫಲಞ್ಚಾಧಿಗತಂ ಸಬ್ಬಂ, ಚತ್ತಕ್ಲೇಸೋಮ್ಹಿ ಅಜ್ಜಹಂ.
‘‘‘ಮಮ ಸಬ್ಬಂ [ಕಮ್ಮಂ (?)] ಅಭಿಞ್ಞಾಯ, ಸಬ್ಬಞ್ಞೂ ಲೋಕನಾಯಕೋ;
ಭಿಕ್ಖುಸಙ್ಘೇ ನಿಸೀದಿತ್ವಾ, ಏತದಗ್ಗೇ ಠಪೇಸಿ ಮಂ’.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ¶ ಸುದಂ ಆಯಸ್ಮಾ ಭದ್ದಿಯೋ ಕಾಳಿಗೋಧಾಯ ಪುತ್ತೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಭದ್ದಿಯಸ್ಸ ಕಾಳಿಗೋಧಾಯ ಪುತ್ತತ್ಥೇರಸ್ಸಾಪದಾನಂ ತತಿಯಂ.
೪. ಸನ್ನಿಟ್ಠಾಪಕತ್ಥೇರಅಪದಾನಂ
‘‘ಅರಞ್ಞೇ ¶ ¶ ಕುಟಿಕಂ ಕತ್ವಾ, ವಸಾಮಿ ಪಬ್ಬತನ್ತರೇ;
ಲಾಭಾಲಾಭೇನ ಸನ್ತುಟ್ಠೋ, ಯಸೇನ ಅಯಸೇನ ಚ.
‘‘ಪದುಮುತ್ತರೋ ಲೋಕವಿದೂ, ಆಹುತೀನಂ ಪಟಿಗ್ಗಹೋ;
ವಸೀಸತಸಹಸ್ಸೇಹಿ [ಭಿಕ್ಖುಸತಸಹಸ್ಸೇಹಿ (ಸ್ಯಾ.)], ಆಗಚ್ಛಿ ಮಮ ಸನ್ತಿಕಂ.
‘‘ಉಪಾಗತಂ ಮಹಾನಾಗಂ [ಮಹಾವೀರಂ (ಸೀ.)], ಜಲಜುತ್ತಮನಾಮಕಂ;
ತಿಣಸನ್ಥರಂ [ತಿಣತ್ಥರಂ (ಕ.)] ಪಞ್ಞಾಪೇತ್ವಾ, ಅದಾಸಿಂ ಸತ್ಥುನೋ ಅಹಂ.
‘‘ಪಸನ್ನಚಿತ್ತೋ ಸುಮನೋ, ಆಮಣ್ಡಂ ಪಾನೀಯಞ್ಚಹಂ;
ಅದಾಸಿಂ ಉಜುಭೂತಸ್ಸ, ವಿಪ್ಪಸನ್ನೇನ ಚೇತಸಾ.
‘‘ಸತಸಹಸ್ಸಿತೋ ಕಪ್ಪೇ [ಸತಸಹಸ್ಸೇ ಇತೋ ಕಪ್ಪೇ (ಸೀ.)], ಯಂ ದಾನಮದದಿಂ ತದಾ;
ದುಗ್ಗತಿಂ ನಾಭಿಜಾನಾಮಿ, ಆಮಣ್ಡಸ್ಸ ಇದಂ ಫಲಂ.
‘‘ಏಕತಾಲೀಸಕಪ್ಪಮ್ಹಿ, ಏಕೋ ಆಸಿಂ ಅರಿನ್ದಮೋ;
ಸತ್ತರತನಸಮ್ಪನ್ನೋ, ಚಕ್ಕವತ್ತೀ ಮಹಬ್ಬಲೋ.
‘‘ಪಟಿಸಮ್ಭಿದಾ ¶ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಸನ್ನಿಟ್ಠಾಪಕೋ [ಸನ್ನಿಧಾಪಕೋ (ಸೀ.)] ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಸನ್ನಿಟ್ಠಾಪಕತ್ಥೇರಸ್ಸಾಪದಾನಂ ಚತುತ್ಥಂ.
೫. ಪಞ್ಚಹತ್ಥಿಯತ್ಥೇರಅಪದಾನಂ
‘‘ಸುಮೇಧೋ ¶ ನಾಮ ಸಮ್ಬುದ್ಧೋ, ಗಚ್ಛತೇ ಅನ್ತರಾಪಣೇ;
ಓಕ್ಖಿತ್ತಚಕ್ಖು [ಖಿತ್ತಚಕ್ಖು (ಕ. ಸೀ. ಕ.)] ಮಿತಭಾಣೀ, ಸತಿಮಾ ಸಂವುತಿನ್ದ್ರಿಯೋ.
‘‘ಪಞ್ಚ ಉಪ್ಪಲಹತ್ಥಾನಿ, ಆವೇಳತ್ಥಂ ಅಹಂಸು ಮೇ;
ತೇನ ಬುದ್ಧಂ ಅಪೂಜೇಸಿಂ, ಪಸನ್ನೋ ಸೇಹಿ ಪಾಣಿಭಿ.
‘‘ಆರೋಪಿತಾ ¶ ಚ ತೇ ಪುಪ್ಫಾ, ಛದನಂ ಅಸ್ಸು ಸತ್ಥುನೋ;
ಸಮಾಧಿಂಸು [ಸಂಸಾವಿಂಸು (ಸೀ.)] ಮಹಾನಾಗಂ, ಸಿಸ್ಸಾ ಆಚರಿಯಂ ಯಥಾ.
‘‘ತಿಂಸಕಪ್ಪಸಹಸ್ಸಮ್ಹಿ ¶ , ಯಂ ಪುಪ್ಫಮಭಿರೋಪಯಿಂ;
ದುಗ್ಗತಿಂ ನಾಭಿಜಾನಾಮಿ, ಬುದ್ಧಪೂಜಾಯಿದಂ ಫಲಂ.
‘‘ಇತೋ ವೀಸಕಪ್ಪಸತೇ, ಅಹೇಸುಂ ಪಞ್ಚ ಖತ್ತಿಯಾ;
ಹತ್ಥಿಯಾ ನಾಮ ನಾಮೇನ, ಚಕ್ಕವತ್ತೀ ಮಹಬ್ಬಲಾ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಪಞ್ಚಹತ್ಥಿಯೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಪಞ್ಚಹತ್ಥಿಯತ್ಥೇರಸ್ಸಾಪದಾನಂ ಪಞ್ಚಮಂ.
೬. ಪದುಮಚ್ಛದನಿಯತ್ಥೇರಅಪದಾನಂ
‘‘ನಿಬ್ಬುತೇ ಲೋಕನಾಥಮ್ಹಿ, ವಿಪಸ್ಸಿಮ್ಹಗ್ಗಪುಗ್ಗಲೇ;
ಸುಫುಲ್ಲಪದುಮಂ ಗಯ್ಹ, ಚಿತಮಾರೋಪಯಿಂ ಅಹಂ.
‘‘ಆರೋಪಿತೇ ¶ ಚ ಚಿತಕೇ, ವೇಹಾಸಂ ನಭಮುಗ್ಗಮಿ;
ಆಕಾಸೇ ಛದನಂ [ಆಕಾಸಚ್ಛದನಂ (ಸೀ.)] ಕತ್ವಾ, ಚಿತಕಮ್ಹಿ ಅಧಾರಯಿ.
‘‘ಏಕನವುತಿತೋ ಕಪ್ಪೇ, ಯಂ ಪುಪ್ಫಮಭಿರೋಪಯಿಂ;
ದುಗ್ಗತಿಂ ನಾಭಿಜಾನಾಮಿ, ಬುದ್ಧಪೂಜಾಯಿದಂ ಫಲಂ.
‘‘ಸತ್ತತಾಲೀಸಿತೋ ¶ ಕಪ್ಪೇ, ಪದುಮಿಸ್ಸರನಾಮಕೋ;
ಚಾತುರನ್ತೋ ವಿಜಿತಾವೀ, ಚಕ್ಕವತ್ತೀ ಮಹಬ್ಬಲೋ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಪದುಮಚ್ಛದನಿಯೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ;
ಪದುಮಚ್ಛದನಿಯತ್ಥೇರಸ್ಸಾಪದಾನಂ ಛಟ್ಠಂ.
೭. ಸಯನದಾಯಕತ್ಥೇರಅಪದಾನಂ
‘‘ಸಿದ್ಧತ್ಥಸ್ಸ ಭಗವತೋ, ಮೇತ್ತಚಿತ್ತಸ್ಸ ತಾದಿನೋ;
ಸಯನಗ್ಗಂ ಮಯಾ ದಿನ್ನಂ, ದುಸ್ಸಭಣ್ಡೇಹಿ [ದುಸ್ಸಭಣ್ಡೇನ (ಸ್ಯಾ.)] ಅತ್ಥತಂ.
‘‘ಪಟಿಗ್ಗಹೇಸಿ ¶ ಭಗವಾ, ಕಪ್ಪಿಯಂ ಸಯನಾಸನಂ;
ಉಟ್ಠಾಯ ಸಯನಾ [ಆಸನಾ (ಸೀ.)] ತಮ್ಹಾ, ವೇಹಾಸಂ ಉಗ್ಗಮೀ ಜಿನೋ.
‘‘ಚತುನ್ನವುತಿತೋ ¶ ಕಪ್ಪೇ, ಯಂ ಸಯನಮದಾಸಹಂ;
ದುಗ್ಗತಿಂ ನಾಭಿಜಾನಾಮಿ, ಸಯನಸ್ಸ ಇದಂ ಫಲಂ.
‘‘ಏಕಪಞ್ಞಾಸಿತೋ ¶ ಕಪ್ಪೇ, ವರಕೋ [ವರುಣೋ (ಸೀ. ಸ್ಯಾ.)] ದೇವಸವ್ಹಯೋ;
ಸತ್ತರತನಸಮ್ಪನ್ನೋ, ಚಕ್ಕವತ್ತೀ ಮಹಬ್ಬಲೋ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಸಯನದಾಯಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಸಯನದಾಯಕತ್ಥೇರಸ್ಸಾಪದಾನಂ ಸತ್ತಮಂ.
೮. ಚಙ್ಕಮನದಾಯಕತ್ಥೇರಅಪದಾನಂ
‘‘ಅತ್ಥದಸ್ಸಿಸ್ಸ ಮುನಿನೋ, ಲೋಕಜೇಟ್ಠಸ್ಸ ತಾದಿನೋ;
ಇಟ್ಠಕಾಹಿ ಚಿನಿತ್ವಾನ, ಚಙ್ಕಮಂ ಕಾರಯಿಂ ಅಹಂ.
‘‘ಉಚ್ಚತೋ ಪಞ್ಚರತನಂ, ಚಙ್ಕಮಂ ಸಾಧುಮಾಪಿತಂ;
ಆಯಾಮತೋ ಹತ್ಥಸತಂ, ಭಾವನೀಯ್ಯಂ ಮನೋರಮಂ.
‘‘ಪಟಿಗ್ಗಹೇಸಿ ಭಗವಾ, ಅತ್ಥದಸ್ಸೀ ನರುತ್ತಮೋ;
ಹತ್ಥೇನ ಪುಲಿನಂ ಗಯ್ಹ, ಇಮಾ ಗಾಥಾ ಅಭಾಸಥ.
‘‘‘ಇಮಿನಾ ¶ ಪುಲಿನದಾನೇನ, ಚಙ್ಕಮಂ ಸುಕತೇನ ಚ;
ಸತ್ತರತನಸಮ್ಪನ್ನಂ, ಪುಲಿನಂ ಅನುಭೋಸ್ಸತಿ.
‘‘‘ತೀಣಿ ಕಪ್ಪಾನಿ ದೇವೇಸು, ದೇವರಜ್ಜಂ ಕರಿಸ್ಸತಿ;
ಅನುಭೋಸ್ಸತಿ ಸಮ್ಪತ್ತಿಂ, ಅಚ್ಛರಾಹಿ ಪುರಕ್ಖತೋ.
‘‘‘ಮನುಸ್ಸಲೋಕಮಾಗನ್ತ್ವಾ ¶ , ರಾಜಾ ರಟ್ಠೇ ಭವಿಸ್ಸತಿ;
ತಿಕ್ಖತ್ತುಂ ಚಕ್ಕವತ್ತೀ ಚ, ಮಹಿಯಾ ಸೋ ಭವಿಸ್ಸತಿ’.
‘‘ಅಟ್ಠಾರಸೇ ಕಪ್ಪಸತೇ, ಯಂ ಕಮ್ಮಮಕರಿಂ ತದಾ;
ದುಗ್ಗತಿಂ ನಾಭಿಜಾನಾಮಿ, ಚಙ್ಕಮಸ್ಸ ಇದಂ ಫಲಂ.
‘‘ಪಟಿಸಮ್ಭಿದಾ ¶ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಚಙ್ಕಮನದಾಯಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಚಙ್ಕಮನದಾಯಕತ್ಥೇರಸ್ಸಾಪದಾನಂ ಅಟ್ಠಮಂ.
೯. ಸುಭದ್ದತ್ಥೇರಅಪದಾನಂ
‘‘ಪದುಮುತ್ತರೋ ¶ ಲೋಕವಿದೂ, ಆಹುತೀನಂ ಪಟಿಗ್ಗಹೋ;
ಜನತಂ ಉದ್ಧರಿತ್ವಾನ, ನಿಬ್ಬಾಯತಿ ಮಹಾಯಸೋ.
‘‘ನಿಬ್ಬಾಯನ್ತೇ ಚ ಸಮ್ಬುದ್ಧೇ, ದಸಸಹಸ್ಸಿ ಕಮ್ಪಥ;
ಜನಕಾಯೋ ಮಹಾ ಆಸಿ, ದೇವಾ ಸನ್ನಿಪತುಂ ತದಾ.
‘‘ಚನ್ದನಂ ಪೂರಯಿತ್ವಾನ, ತಗರಾಮಲ್ಲಿಕಾಹಿ ಚ;
ಹಟ್ಠೋ ಹಟ್ಠೇನ ಚಿತ್ತೇನ, ಆರೋಪಯಿಂ [ಆಲೇಪೇಸಿಂ (ಸೀ.), ಆರೋಪೇಸಿಂ (ಸ್ಯಾ.)] ನರುತ್ತಮಂ.
‘‘ಮಮ ಸಙ್ಕಪ್ಪಮಞ್ಞಾಯ, ಸತ್ಥಾ ಲೋಕೇ ಅನುತ್ತರೋ;
ನಿಪನ್ನಕೋವ ಸಮ್ಬುದ್ಧೋ, ಇಮಾ ಗಾಥಾ ಅಭಾಸಥ.
‘‘‘ಯೋ ¶ ಮೇ ಪಚ್ಛಿಮಕೇ ಕಾಲೇ, ಗನ್ಧಮಾಲೇನ [ಗನ್ಧಮಲ್ಲೇನ (ಸ್ಯಾ. ಕ.) ನಪುಂಸಕೇಕತ್ತಂ ಮನಸಿಕಾತಬ್ಬಂ] ಛಾದಯಿ;
ತಮಹಂ ಕಿತ್ತಯಿಸ್ಸಾಮಿ, ಸುಣಾಥ ಮಮ ಭಾಸತೋ.
‘‘‘ಇತೋ ಚುತೋ ಅಯಂ ಪೋಸೋ, ತುಸಿತಕಾಯಂ ಗಮಿಸ್ಸತಿ;
ತತ್ಥ ರಜ್ಜಂ ಕರಿತ್ವಾನ, ನಿಮ್ಮಾನಂ ಸೋ ಗಮಿಸ್ಸತಿ.
‘‘‘ಏತೇನೇವ ಉಪಾಯೇನ, ದತ್ವಾ ಮಾಲಂ [ಮಲ್ಯಂ (ಸೀ.), ಮಲ್ಲಂ (ಸ್ಯಾ. ಕ.)] ವರುತ್ತಮಂ;
ಸಕಕಮ್ಮಾಭಿರದ್ಧೋ ಸೋ, ಸಮ್ಪತ್ತಿಂ ಅನುಭೋಸ್ಸತಿ.
‘‘‘ಪುನಾಪಿ ¶ ತುಸಿತೇ ಕಾಯೇ, ನಿಬ್ಬತ್ತಿಸ್ಸತಿಯಂ ನರೋ;
ತಮ್ಹಾ ಕಾಯಾ ಚವಿತ್ವಾನ, ಮನುಸ್ಸತ್ತಂ ಗಮಿಸ್ಸತಿ.
‘‘‘ಸಕ್ಯಪುತ್ತೋ ಮಹಾನಾಗೋ, ಅಗ್ಗೋ ಲೋಕೇ ಸದೇವಕೇ;
ಬೋಧಯಿತ್ವಾ ಬಹೂ ಸತ್ತೇ, ನಿಬ್ಬಾಯಿಸ್ಸತಿ ಚಕ್ಖುಮಾ.
‘‘‘ತದಾ ¶ ಸೋಪಗತೋ ಸನ್ತೋ, ಸುಕ್ಕಮೂಲೇನ ಚೋದಿತೋ;
ಉಪಸಙ್ಕಮ್ಮ ಸಮ್ಬುದ್ಧಂ, ಪಞ್ಹಂ ಪುಚ್ಛಿಸ್ಸತಿ ತದಾ.
‘‘‘ಹಾಸಯಿತ್ವಾನ ಸಮ್ಬುದ್ಧೋ, ಸಬ್ಬಞ್ಞೂ ಲೋಕನಾಯಕೋ;
ಪುಞ್ಞಕಮ್ಮಂ ಪರಿಞ್ಞಾಯ, ಸಚ್ಚಾನಿ ವಿವರಿಸ್ಸತಿ.
‘‘‘ಆರದ್ಧೋ ಚ ಅಯಂ ಪಞ್ಹೋ, ತುಟ್ಠೋ ಏಕಗ್ಗಮಾನಸೋ;
ಸತ್ಥಾರಂ ಅಭಿವಾದೇತ್ವಾ, ಪಬ್ಬಜ್ಜಂ ಯಾಚಯಿಸ್ಸತಿ.
‘‘‘ಪಸನ್ನಮಾನಸಂ ದಿಸ್ವಾ, ಸಕಕಮ್ಮೇನ ತೋಸಿತಂ;
ಪಬ್ಬಾಜೇಸ್ಸತಿ ಸೋ ಬುದ್ಧೋ, ಅಗ್ಗಮಗ್ಗಸ್ಸ ಕೋವಿದೋ.
‘‘‘ವಾಯಮಿತ್ವಾನಯಂ ಪೋಸೋ, ಸಮ್ಮಾಸಮ್ಬುದ್ಧಸಾಸನೇ;
ಸಬ್ಬಾಸವೇ ಪರಿಞ್ಞಾಯ, ನಿಬ್ಬಾಯಿಸ್ಸತಿನಾಸವೋ’.
ಪಞ್ಚಮಭಾಣವಾರಂ.
‘‘ಪುಬ್ಬಕಮ್ಮೇನ ¶ ¶ ಸಂಯುತ್ತೋ, ಏಕಗ್ಗೋ ಸುಸಮಾಹಿತೋ;
ಬುದ್ಧಸ್ಸ ಓರಸೋ ಪುತ್ತೋ, ಧಮ್ಮಜೋಮ್ಹಿ ಸುನಿಮ್ಮಿತೋ.
‘‘ಧಮ್ಮರಾಜಂ ಉಪಗಮ್ಮ, ಅಪುಚ್ಛಿಂ ಪಞ್ಹಮುತ್ತಮಂ;
ಕಥಯನ್ತೋ ಚ ಮೇ ಪಞ್ಹಂ, ಧಮ್ಮಸೋತಂ ಉಪಾನಯಿ.
‘‘ತಸ್ಸಾಹಂ ಧಮ್ಮಮಞ್ಞಾಯ, ವಿಹಾಸಿಂ ಸಾಸನೇ ರತೋ;
ಸಬ್ಬಾಸವೇ ಪರಿಞ್ಞಾಯ, ವಿಹರಾಮಿ ಅನಾಸವೋ.
‘‘ಸತಸಹಸ್ಸಿತೋ ಕಪ್ಪೇ, ಜಲಜುತ್ತಮನಾಯಕೋ;
ನಿಬ್ಬಾಯಿ ಅನುಪಾದಾನೋ, ದೀಪೋವ ತೇಲಸಙ್ಖಯಾ.
‘‘ಸತ್ತಯೋಜನಿಕಂ ಆಸಿ, ಥೂಪಞ್ಚ ರತನಾಮಯಂ;
ಧಜಂ ತತ್ಥ ಅಪೂಜೇಸಿಂ, ಸಬ್ಬಭದ್ದಂ ಮನೋರಮಂ.
‘‘ಕಸ್ಸಪಸ್ಸ ಚ ಬುದ್ಧಸ್ಸ, ತಿಸ್ಸೋ ನಾಮಗ್ಗಸಾವಕೋ;
ಪುತ್ತೋ ಮೇ ಓರಸೋ ಆಸಿ, ದಾಯಾದೋ ಜಿನಸಾಸನೇ.
‘‘ತಸ್ಸ ಹೀನೇನ ಮನಸಾ, ವಾಚಂ ಭಾಸಿಂ ಅಭದ್ದಕಂ;
ತೇನ ಕಮ್ಮವಿಪಾಕೇನ, ಪಚ್ಛಾ ಮೇ ಆಸಿ ಭದ್ದಕಂ [ಪಚ್ಛಿಮೇ ಅದ್ದಸಂ ಜಿನಂ (ಸೀ.)].
‘‘ಉಪವತ್ತನೇ ¶ ಸಾಲವನೇ, ಪಚ್ಛಿಮೇ ಸಯನೇ ಮುನಿ;
ಪಬ್ಬಾಜೇಸಿ ಮಹಾವೀರೋ, ಹಿತೋ ಕಾರುಣಿಕೋ ಜಿನೋ.
‘‘ಅಜ್ಜೇವ ¶ ದಾನಿ ಪಬ್ಬಜ್ಜಾ, ಅಜ್ಜೇವ ಉಪಸಮ್ಪದಾ;
ಅಜ್ಜೇವ ಪರಿನಿಬ್ಬಾನಂ, ಸಮ್ಮುಖಾ ದ್ವಿಪದುತ್ತಮೇ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ¶ ಸುದಂ ಆಯಸ್ಮಾ ಸುಭದ್ದೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಸುಭದ್ದತ್ಥೇರಸ್ಸಾಪದಾನಂ ನವಮಂ.
೧೦. ಚುನ್ದತ್ಥೇರಅಪದಾನಂ
‘‘ಸಿದ್ಧತ್ಥಸ್ಸ ಭಗವತೋ, ಲೋಕಜೇಟ್ಠಸ್ಸ ತಾದಿನೋ;
ಅಗ್ಘಿಯಂ ಕಾರಯಿತ್ವಾನ, ಜಾತಿಪುಪ್ಫೇಹಿ ಛಾದಯಿಂ.
‘‘ನಿಟ್ಠಾಪೇತ್ವಾನ ತಂ ಪುಪ್ಫಂ, ಬುದ್ಧಸ್ಸ ಉಪನಾಮಯಿಂ;
ಪುಪ್ಫಾವಸೇಸಂ ಪಗ್ಗಯ್ಹ, ಬುದ್ಧಸ್ಸ ಅಭಿರೋಪಯಿಂ.
‘‘ಕಞ್ಚನಗ್ಘಿಯಸಙ್ಕಾಸಂ ¶ , ಬುದ್ಧಂ ಲೋಕಗ್ಗನಾಯಕಂ;
ಪಸನ್ನಚಿತ್ತೋ ಸುಮನೋ, ಪುಪ್ಫಗ್ಘಿಯಮುಪಾನಯಿಂ.
‘‘ವಿತಿಣ್ಣಕಙ್ಖೋ ಸಮ್ಬುದ್ಧೋ, ತಿಣ್ಣೋಘೇಹಿ ಪುರಕ್ಖತೋ;
ಭಿಕ್ಖುಸಙ್ಘೇ ನಿಸೀದಿತ್ವಾ, ಇಮಾ ಗಾಥಾ ಅಭಾಸಥ.
‘‘‘ದಿಬ್ಬಗನ್ಧಂ ಪವಾಯನ್ತಂ, ಯೋ ಮೇ ಪುಪ್ಫಗ್ಘಿಯಂ ಅದಾ;
ತಮಹಂ ಕಿತ್ತಯಿಸ್ಸಾಮಿ, ಸುಣಾಥ ಮಮ ಭಾಸತೋ.
‘‘‘ಇತೋ ಚುತೋ ಅಯಂ ಪೋಸೋ, ದೇವಸಙ್ಘಪುರಕ್ಖತೋ;
ಜಾತಿಪುಪ್ಫೇಹಿ ಪರಿಕಿಣ್ಣೋ, ದೇವಲೋಕಂ ಗಮಿಸ್ಸತಿ.
‘‘‘ಉಬ್ಬಿದ್ಧಂ ಭವನಂ ತಸ್ಸ, ಸೋವಣ್ಣಞ್ಚ ಮಣೀಮಯಂ;
ಬ್ಯಮ್ಹಂ ಪಾತುಭವಿಸ್ಸತಿ, ಪುಞ್ಞಕಮ್ಮಪ್ಪಭಾವಿತಂ.
‘‘‘ಚತುಸತ್ತತಿಕ್ಖತ್ತುಂ ¶ ಸೋ, ದೇವರಜ್ಜಂ ಕರಿಸ್ಸತಿ;
ಅನುಭೋಸ್ಸತಿ ಸಮ್ಪತ್ತಿಂ, ಅಚ್ಛರಾಹಿ ಪುರಕ್ಖತೋ.
‘‘‘ಪಥಬ್ಯಾ ರಜ್ಜಂ ತಿಸತಂ, ವಸುಧಂ ಆವಸಿಸ್ಸತಿ;
ಪಞ್ಚಸತ್ತತಿಕ್ಖತ್ತುಞ್ಚ, ಚಕ್ಕವತ್ತೀ ಭವಿಸ್ಸತಿ.
‘‘‘ದುಜ್ಜಯೋ ¶ ನಾಮ ನಾಮೇನ, ಹೇಸ್ಸತಿ ಮನುಜಾಧಿಪೋ;
ಅನುಭೋತ್ವಾನ ತಂ ಪುಞ್ಞಂ, ಸಕಕಮ್ಮಂ ಅಪಸ್ಸಿತೋ [ಸಕಕಮ್ಮೂಪಸಂಹಿತೋ (ಸ್ಯಾ.)].
‘‘‘ವಿನಿಪಾತಂ ¶ ಅಗನ್ತ್ವಾನ, ಮನುಸ್ಸತ್ತಂ ಗಮಿಸ್ಸತಿ;
ಹಿರಞ್ಞಂ ತಸ್ಸ [ಹಿರಞ್ಞಸ್ಸ ಚ (ಸೀ. ಕ.)] ನಿಚಿತಂ, ಕೋಟಿಸತಮನಪ್ಪಕಂ.
‘‘‘ನಿಬ್ಬತ್ತಿಸ್ಸತಿ ಯೋನಿಮ್ಹಿ, ಬ್ರಾಹ್ಮಣೇ ಸೋ ಭವಿಸ್ಸತಿ;
ವಙ್ಗನ್ತಸ್ಸ ಸುತೋ ಧೀಮಾ, ಸಾರಿಯಾ ಓರಸೋ ಪಿಯೋ.
‘‘‘ಸೋ ಚ ಪಚ್ಛಾ ಪಬ್ಬಜಿತ್ವಾ, ಅಙ್ಗೀರಸಸ್ಸ ಸಾಸನೇ;
ಚೂಳಚುನ್ದೋತಿ [ಚೂಲಚುನ್ದೋತಿ (ಸೀ.)] ನಾಮೇನ, ಹೇಸ್ಸತಿ ಸತ್ಥು ಸಾವಕೋ.
‘‘‘ಸಾಮಣೇರೋವ ಸೋ ಸನ್ತೋ, ಖೀಣಾಸವೋ ಭವಿಸ್ಸತಿ;
ಸಬ್ಬಾಸವೇ ಪರಿಞ್ಞಾಯ, ನಿಬ್ಬಾಯಿಸ್ಸತಿನಾಸವೋ’.
‘‘ಉಪಟ್ಠಹಿಂ ಮಹಾವೀರಂ, ಅಞ್ಞೇ ಚ ಪೇಸಲೇ ಬಹೂ;
ಭಾತರಂ ಮೇ ಚುಪಟ್ಠಾಸಿಂ, ಉತ್ತಮತ್ಥಸ್ಸ ಪತ್ತಿಯಾ.
‘‘ಭಾತರಂ ಮೇ ಉಪಟ್ಠಿತ್ವಾ, ಧಾತುಂ ಪತ್ತಮ್ಹಿ ಓಹಿಯ [ಓಪಿಯ (ಸೀ.), ಓಚಿಯ (ಸ್ಯಾ.)];
ಸಮ್ಬುದ್ಧಂ ಉಪನಾಮೇಸಿಂ, ಲೋಕಜೇಟ್ಠಂ ನರಾಸಭಂ.
‘‘ಉಭೋ ¶ ಹತ್ಥೇಹಿ ಪಗ್ಗಯ್ಹ, ಬುದ್ಧೋ ಲೋಕೇ ಸದೇವಕೇ;
ಸನ್ದಸ್ಸಯನ್ತೋ ತಂ ಧಾತುಂ, ಕಿತ್ತಯಿ ಅಗ್ಗಸಾವಕಂ.
‘‘ಚಿತ್ತಞ್ಚ ¶ ಸುವಿಮುತ್ತಂ ಮೇ, ಸದ್ಧಾ ಮಯ್ಹಂ ಪತಿಟ್ಠಿತಾ;
ಸಬ್ಬಾಸವೇ ಪರಿಞ್ಞಾಯ, ವಿಹರಾಮಿ ಅನಾಸವೋ.
‘‘ಪಟಿಸಮ್ಭಿದಾನುಪ್ಪತ್ತಾ, ವಿಮೋಕ್ಖಾಪಿ ಚ ಫಸ್ಸಿತಾ [ಪಟಿಸಮ್ಭಿದಾ ಚತಸ್ಸೋ, ವಿಮೋಕ್ಖಾಪಿ ಚ ಅಟ್ಠಿಮೇ (ಸ್ಯಾ.)];
ಛಳಭಿಞ್ಞಾ ಸಚ್ಛಿಕತಾ, ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಚುನ್ದೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಚುನ್ದತ್ಥೇರಸ್ಸಾಪದಾನಂ ದಸಮಂ.
ಉಪಾಲಿವಗ್ಗೋ ಪಞ್ಚಮೋ.
ತಸ್ಸುದ್ದಾನಂ –
ಉಪಾಲಿ ಸೋಣೋ ಭದ್ದಿಯೋ, ಸನ್ನಿಟ್ಠಾಪಕಹತ್ಥಿಯೋ;
ಛದನಂ ಸೇಯ್ಯಚಙ್ಕಮಂ, ಸುಭದ್ದೋ ಚುನ್ದಸವ್ಹಯೋ;
ಗಾಥಾಸತಂ ಸತಾಲೀಸಂ [ಚ ತಾಲೀಸಂ (ಸೀ. ಸ್ಯಾ.)], ಚತಸ್ಸೋ ಚ ತದುತ್ತರಿ.
೬. ಬೀಜನಿವಗ್ಗೋ
೧. ವಿಧೂಪನದಾಯಕತ್ಥೇರಅಪದಾನಂ
‘‘ಪದುಮುತ್ತರಬುದ್ಧಸ್ಸ ¶ ¶ , ಲೋಕಜೇಟ್ಠಸ್ಸ ತಾದಿನೋ;
ಬೀಜನಿಕಾ [ವೀಜನಿಕಾ (ಸೀ. ಸ್ಯಾ.)] ಮಯಾ ದಿನ್ನಾ, ದ್ವಿಪದಿನ್ದಸ್ಸ ತಾದಿನೋ.
‘‘ಸಕಂ ಚಿತ್ತಂ ಪಸಾದೇತ್ವಾ, ಪಗ್ಗಹೇತ್ವಾನ ಅಞ್ಜಲಿಂ;
ಸಮ್ಬುದ್ಧಮಭಿವಾದೇತ್ವಾ, ಪಕ್ಕಮಿಂ ಉತ್ತರಾಮುಖೋ.
‘‘ಬೀಜನಿಂ ¶ ಪಗ್ಗಹೇತ್ವಾನ, ಸತ್ಥಾ ಲೋಕಗ್ಗನಾಯಕೋ [ಲೋಕೇ ಅನುತ್ತರೋ (ಸೀ.)];
ಭಿಕ್ಖುಸಙ್ಘೇ ಠಿತೋ ಸನ್ತೋ, ಇಮಾ ಗಾಥಾ ಅಭಾಸಥ.
‘‘‘ಇಮಿನಾ ಬೀಜನಿದಾನೇನ, ಚಿತ್ತಸ್ಸ ಪಣಿಧೀಹಿ [ಚೇತನಾಪಣಿಧೀಹಿ (ಅಞ್ಞತ್ಥ)] ಚ;
ಕಪ್ಪಾನಂ ಸತಸಹಸ್ಸಂ, ವಿನಿಪಾತಂ ನ ಗಚ್ಛತಿ’.
‘‘ಆರದ್ಧವೀರಿಯೋ ಪಹಿತತ್ತೋ, ಚೇತೋಗುಣಸಮಾಹಿತೋ;
ಜಾತಿಯಾ ಸತ್ತವಸ್ಸೋಹಂ, ಅರಹತ್ತಂ ಅಪಾಪುಣಿಂ.
‘‘ಸಟ್ಠಿಕಪ್ಪಸಹಸ್ಸಮ್ಹಿ, ಬೀಜಮಾನಸನಾಮಕಾ;
ಸೋಳಸಾಸಿಂಸು ರಾಜಾನೋ, ಚಕ್ಕವತ್ತೀ ಮಹಬ್ಬಲಾ.
‘‘ಪಟಿಸಮ್ಭಿದಾ ¶ ಚತಸ್ಸೋ, ವಿಮೋಕ್ಖಾಪಿ ಚ ಅಟ್ಠಿಮೇ;
ಛಳಭಿಞ್ಞಾ ಸಚ್ಛಿಕತಾ, ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ವಿಧೂಪನದಾಯಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ವಿಧೂಪನದಾಯಕತ್ಥೇರಸ್ಸಾಪದಾನಂ ಪಠಮಂ.
೨. ಸತರಂಸಿತ್ಥೇರಅಪದಾನಂ
‘‘ಉಬ್ಬಿದ್ಧಂ ಸೇಲಮಾರುಯ್ಹ, ನಿಸೀದಿ ಪುರಿಸುತ್ತಮೋ;
ಪಬ್ಬತಸ್ಸಾವಿದೂರಮ್ಹಿ, ಬ್ರಾಹ್ಮಣೋ ಮನ್ತಪಾರಗೂ.
‘‘ಉಪವಿಟ್ಠಂ ¶ ಮಹಾವೀರಂ, ದೇವದೇವಂ ನರಾಸಭಂ;
ಅಞ್ಜಲಿಂ ಪಗ್ಗಹೇತ್ವಾನ, ಸನ್ಥವಿಂ ಲೋಕನಾಯಕಂ.
‘‘‘ಏಸ ¶ ¶ ಬುದ್ಧೋ ಮಹಾವೀರೋ, ವರಧಮ್ಮಪ್ಪಕಾಸಕೋ;
ಜಲತಿ ಅಗ್ಗಿಖನ್ಧೋವ, ಭಿಕ್ಖುಸಙ್ಘಪುರಕ್ಖತೋ.
‘‘‘ಮಹಾಸಮುದ್ದೋವ‘ಕ್ಖುಬ್ಭೋ [’ಕ್ಖೋಭೋ (ಸೀ. ಸ್ಯಾ.)], ಅಣ್ಣವೋವ ದುರುತ್ತರೋ;
ಮಿಗರಾಜಾವಸಮ್ಭೀತೋ [ಛಮ್ಭಿತೋ (ಕ.)], ಧಮ್ಮಂ ದೇಸೇತಿ ಚಕ್ಖುಮಾ’.
‘‘ಮಮ ಸಙ್ಕಪ್ಪಮಞ್ಞಾಯ, ಪದುಮುತ್ತರನಾಯಕೋ;
ಭಿಕ್ಖುಸಙ್ಘೇ ಠಿತೋ ಸತ್ಥಾ, ಇಮಾ ಗಾಥಾ ಅಭಾಸಥ.
‘‘‘ಯೇನಾಯಂ [ಯೇನಾಹಂ (ಕ.)] ಅಞ್ಜಲೀ ದಿನ್ನೋ, ಬುದ್ಧಸೇಟ್ಠೋ ಚ ಥೋಮಿತೋ;
ತಿಂಸಕಪ್ಪಸಹಸ್ಸಾನಿ, ದೇವರಜ್ಜಂ ಕರಿಸ್ಸತಿ.
‘‘‘ಕಪ್ಪಸತಸಹಸ್ಸಮ್ಹಿ, ಅಙ್ಗೀರಸಸನಾಮಕೋ;
ವಿವಟ್ಟಚ್ಛದೋ [ವಿವತ್ಥಚ್ಛದ್ದೋ (ಸೀ.)] ಸಮ್ಬುದ್ಧೋ, ಉಪ್ಪಜ್ಜಿಸ್ಸತಿ ತಾವದೇ.
‘‘‘ತಸ್ಸ ಧಮ್ಮೇಸು ದಾಯಾದೋ, ಓರಸೋ ಧಮ್ಮನಿಮ್ಮಿತೋ;
ಸತರಂಸೀತಿ ನಾಮೇನ, ಅರಹಾ ಸೋ ಭವಿಸ್ಸತಿ’.
‘‘ಜಾತಿಯಾ ಸತ್ತವಸ್ಸೋಹಂ, ಪಬ್ಬಜಿಂ ಅನಗಾರಿಯಂ;
ಸತರಂಸಿಮ್ಹಿ ನಾಮೇನ, ಪಭಾ ನಿದ್ಧಾವತೇ ಮಮ.
‘‘ಮಣ್ಡಪೇ ರುಕ್ಖಮೂಲೇ ವಾ, ಝಾಯೀ ಝಾನರತೋ ಅಹಂ;
ಧಾರೇಮಿ ಅನ್ತಿಮಂ ದೇಹಂ, ಸಮ್ಮಾಸಮ್ಬುದ್ಧಸಾಸನೇ.
‘‘ಸಟ್ಠಿಕಪ್ಪಸಹಸ್ಸಮ್ಹಿ, ಚತುರೋ ರಾಮನಾಮಕಾ;
ಸತ್ತರತನಸಮ್ಪನ್ನಾ, ಚಕ್ಕವತ್ತೀ ಮಹಬ್ಬಲಾ.
‘‘ಪಟಿಸಮ್ಭಿದಾ ¶ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ¶ ಸುದಂ ಆಯಸ್ಮಾ ಸತರಂಸಿ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಸತರಂಸಿತ್ಥೇರಸ್ಸಾಪದಾನಂ ದುತಿಯಂ.
೩. ಸಯನದಾಯಕತ್ಥೇರಅಪದಾನಂ
‘‘ಪದುಮುತ್ತರಬುದ್ಧಸ್ಸ, ಸಬ್ಬಲೋಕಾನುಕಮ್ಪಿನೋ;
ಸಯನಂ ತಸ್ಸ ಪಾದಾಸಿಂ, ವಿಪ್ಪಸನ್ನೇನ ಚೇತಸಾ.
‘‘ತೇನ ¶ ¶ ಸಯನದಾನೇನ, ಸುಖೇತ್ತೇ ಬೀಜಸಮ್ಪದಾ;
ಭೋಗಾ ನಿಬ್ಬತ್ತರೇ ತಸ್ಸ, ಸಯನಸ್ಸ ಇದಂ ಫಲಂ.
‘‘ಆಕಾಸೇ ಸೇಯ್ಯಂ ಕಪ್ಪೇಮಿ, ಧಾರೇಮಿ ಪಥವಿಂ ಇಮಂ;
ಪಾಣೇಸು ಮೇ ಇಸ್ಸರಿಯಂ, ಸಯನಸ್ಸ ಇದಂ ಫಲಂ.
‘‘ಪಞ್ಚಕಪ್ಪಸಹಸ್ಸಮ್ಹಿ, ಅಟ್ಠ ಆಸುಂ ಮಹಾತೇಜಾ [ಮಹಾವರಾ (ಸೀ.), ಮಹಾವೀರಾ (ಸ್ಯಾ.)];
ಚತುತ್ತಿಂಸೇ ಕಪ್ಪಸತೇ, ಚತುರೋ ಚ ಮಹಬ್ಬಲಾ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಸಯನದಾಯಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಸಯನದಾಯಕತ್ಥೇರಸ್ಸಾಪದಾನಂ ತತಿಯಂ.
೪. ಗನ್ಧೋದಕಿಯತ್ಥೇರಅಪದಾನಂ
‘‘ಪದುಮುತ್ತರಬುದ್ಧಸ್ಸ ¶ , ಮಹಾಬೋಧಿಮಹೋ ಅಹು;
ವಿಚಿತ್ತಂ ಘಟಮಾದಾಯ, ಗನ್ಧೋದಕಮದಾಸಹಂ.
‘‘ನ್ಹಾನಕಾಲೇ ಚ ಬೋಧಿಯಾ, ಮಹಾಮೇಘೋ ಪವಸ್ಸಥ;
ನಿನ್ನಾದೋ ಚ ಮಹಾ ಆಸಿ, ಅಸನಿಯಾ ಫಲನ್ತಿಯಾ.
‘‘ತೇನೇವಾಸನಿವೇಗೇನ, ತತ್ಥ ಕಾಲಙ್ಕತೋ [ಕಾಲಕತೋ (ಸೀ. ಸ್ಯಾ.)] ಅಹಂ [ಅಹುಂ (ಸೀ.)];
ದೇವಲೋಕೇ ಠಿತೋ ಸನ್ತೋ, ಇಮಾ ಗಾಥಾ ಅಭಾಸಹಂ.
‘‘‘ಅಹೋ ¶ ಬುದ್ಧೋ ಅಹೋ ಧಮ್ಮೋ, ಅಹೋ ನೋ ಸತ್ಥುಸಮ್ಪದಾ;
ಕಳೇವರಂ [ಕಲೇಬರಂ (ಸೀ.)] ಮೇ ಪತಿತಂ, ದೇವಲೋಕೇ ರಮಾಮಹಂ.
‘‘‘ಉಬ್ಬಿದ್ಧಂ ಭವನಂ ಮಯ್ಹಂ, ಸತಭೂಮಂ ಸಮುಗ್ಗತಂ;
ಕಞ್ಞಾಸತಸಹಸ್ಸಾನಿ, ಪರಿವಾರೇನ್ತಿ ಮಂ ಸದಾ.
‘‘‘ಆಬಾಧಾ ಮೇ ನ ವಿಜ್ಜನ್ತಿ, ಸೋಕೋ ಮಯ್ಹಂ ನ ವಿಜ್ಜತಿ;
ಪರಿಳಾಹಂ ನ ಪಸ್ಸಾಮಿ, ಪುಞ್ಞಕಮ್ಮಸ್ಸಿದಂ ಫಲಂ.
‘‘‘ಅಟ್ಠವೀಸೇ ಕಪ್ಪಸತೇ, ರಾಜಾ ಸಂವಸಿತೋ ಅಹುಂ;
ಸತ್ತರತನಸಮ್ಪನ್ನೋ, ಚಕ್ಕವತ್ತೀ ಮಹಬ್ಬಲೋ’.
‘‘ಪಟಿಸಮ್ಭಿದಾ ¶ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಗನ್ಧೋದಕಿಯೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಗನ್ಧೋದಕಿಯತ್ಥೇರಸ್ಸಾಪದಾನಂ ಚತುತ್ಥಂ.
೫. ಓಪವಯ್ಹತ್ಥೇರಅಪದಾನಂ
‘‘ಪದುಮುತ್ತರಬುದ್ಧಸ್ಸ ¶ ¶ , ಆಜಾನೀಯಮದಾಸಹಂ;
ನಿಯ್ಯಾದೇತ್ವಾನ ಸಮ್ಬುದ್ಧೇ [ಸಮ್ಬುದ್ಧಂ (ಸೀ. ಕ.)], ಅಗಮಾಸಿಂ ಸಕಂ ಘರಂ.
‘‘ದೇವಲೋ ನಾಮ ನಾಮೇನ, ಸತ್ಥುನೋ ಅಗ್ಗಸಾವಕೋ;
ವರಧಮ್ಮಸ್ಸ ದಾಯಾದೋ, ಆಗಚ್ಛಿ ಮಮ ಸನ್ತಿಕಂ.
‘‘ಸಪತ್ತಭಾರೋ ಭಗವಾ, ಆಜಾನೇಯ್ಯೋ ನ ಕಪ್ಪತಿ;
ತವ ಸಙ್ಕಪ್ಪಮಞ್ಞಾಯ, ಅಧಿವಾಸೇಸಿ ಚಕ್ಖುಮಾ.
‘‘ಅಗ್ಘಾಪೇತ್ವಾ ವಾತಜವಂ, ಸಿನ್ಧವಂ ಸೀಘವಾಹನಂ;
ಪದುಮುತ್ತರಬುದ್ಧಸ್ಸ, ಖಮನೀಯಮದಾಸಹಂ.
‘‘ಯಂ ಯಂ ಯೋನುಪಪಜ್ಜಾಮಿ, ದೇವತ್ತಂ ಅಥ ಮಾನುಸಂ [ದೇವೇ ಚ ಮಾನುಸೇ ಭವೇ (ಸೀ. ಕ.)];
ಖಮನೀಯಂ ವಾತಜವಂ, ಚಿತ್ತಂ ನಿಬ್ಬತ್ತತೇ [ಆಜಾನೀಯಾ ವಾತಜವಾ, ವಿತ್ತಿ ನಿಬ್ಬತ್ತರೇ (ಸ್ಯಾ.), ಖಮನೀಯಾ ವಾತಜವಾ, ಚಿತ್ತಾ ನಿಬ್ಬತ್ತರೇ (ಸೀ.)] ಮಮ.
‘‘ಲಾಭಂ ¶ ತೇಸಂ ಸುಲದ್ಧಂವ, ಯೇ ಲಭನ್ತುಪಸಮ್ಪದಂ;
ಪುನಪಿ ಪಯಿರುಪಾಸೇಯ್ಯಂ, ಬುದ್ಧೋ ಲೋಕೇ ಸಚೇ ಭವೇ.
‘‘ಅಟ್ಠವೀಸತಿಕ್ಖತ್ತುಂಹಂ, ರಾಜಾ ಆಸಿಂ ಮಹಬ್ಬಲೋ;
ಚಾತುರನ್ತೋ ವಿಜಿತಾವೀ, ಜಮ್ಬುಸಣ್ಡಸ್ಸ [ಜಮ್ಬುದೀಪಸ್ಸ (ಸ್ಯಾ.), ಜಮ್ಬುಮಣ್ಡಸ್ಸ (ಕ.)] ಜಮ್ಬುಇಸ್ಸರೋ.
‘‘ಇದಂ ಪಚ್ಛಿಮಕಂ ಮಯ್ಹಂ, ಚರಿಮೋ ವತ್ತತೇ ಭವೋ;
ಪತ್ತೋಸ್ಮಿ ಅಚಲಂ ಠಾನಂ, ಹಿತ್ವಾ ಜಯಪರಾಜಯಂ.
‘‘ಚತುತಿಂಸಸಹಸ್ಸಮ್ಹಿ, ಮಹಾತೇಜೋಸಿ ಖತ್ತಿಯೋ;
ಸತರತನಸಮ್ಪನ್ನೋ, ಚಕ್ಕವತ್ತೀ ಮಹಬ್ಬಲೋ.
‘‘ಪಟಿಸಮ್ಭಿದಾ ¶ ¶ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಓಪವಯ್ಹೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಓಪವಯ್ಹತ್ಥೇರಸ್ಸಾಪದಾನಂ ಪಞ್ಚಮಂ.
೬. ಸಪರಿವಾರಾಸನತ್ಥೇರಅಪದಾನಂ
‘‘ಪದುಮುತ್ತರಬುದ್ಧಸ್ಸ, ಪಿಣ್ಡಪಾತಂ ಅದಾಸಹಂ;
ಗನ್ತ್ವಾ ಕಿಲಿಟ್ಠಕಂ ಠಾನಂ [ತಂ ಭೋಜನಟ್ಠಾನಂ (ಸೀ.)], ಮಲ್ಲಿಕಾಹಿ ಪರಿಕ್ಖಿತಂ [ಪರಿಕ್ಖಿಪಿಂ (ಸೀ.)].
‘‘ತಮ್ಹಾಸನಮ್ಹಿ ¶ ಆಸೀನೋ, ಬುದ್ಧೋ ಲೋಕಗ್ಗನಾಯಕೋ;
ಅಕಿತ್ತಯಿ ಪಿಣ್ಡಪಾತಂ, ಉಜುಭೂತೋ ಸಮಾಹಿತೋ.
‘‘ಯಥಾಪಿ ಭದ್ದಕೇ ಖೇತ್ತೇ, ಬೀಜಂ ಅಪ್ಪಮ್ಪಿ ರೋಪಿತಂ;
ಸಮ್ಮಾ ಧಾರಂ ಪವೇಚ್ಛನ್ತೇ, ಫಲಂ ತೋಸೇತಿ ಕಸ್ಸಕಂ.
‘‘ತಥೇವಾಯಂ ಪಿಣ್ಡಪಾತೋ, ಸುಖೇತ್ತೇ ರೋಪಿತೋ ತಯಾ;
ಭವೇ ನಿಬ್ಬತ್ತಮಾನಮ್ಹಿ, ಫಲಂ ತೇ [ನಿಬ್ಬತ್ತಮಾನಂ ಹಿ, ಫಲತೋ (ಸೀ.)] ತೋಸಯಿಸ್ಸತಿ [ತಪ್ಪಯಿಸ್ಸತಿ (ಕ.)].
‘‘ಇದಂ ವತ್ವಾನ ಸಮ್ಬುದ್ಧೋ, ಜಲಜುತ್ತಮನಾಮಕೋ;
ಪಿಣ್ಡಪಾತಂ ಗಹೇತ್ವಾನ, ಪಕ್ಕಾಮಿ ಉತ್ತರಾಮುಖೋ.
‘‘ಸಂವುತೋ ಪಾತಿಮೋಕ್ಖಸ್ಮಿಂ, ಇನ್ದ್ರಿಯೇಸು ಚ ಪಞ್ಚಸು;
ಪವಿವೇಕಮನುಯುತ್ತೋ, ವಿಹರಾಮಿ ಅನಾಸವೋ.
‘‘ಪಟಿಸಮ್ಭಿದಾ ¶ ¶ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಸಪರಿವಾರಾಸನೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಸಪರಿವಾರಾಸನತ್ಥೇರಸ್ಸಾಪದಾನಂ ಛಟ್ಠಂ.
೭. ಪಞ್ಚದೀಪಕತ್ಥೇರಅಪದಾನಂ
‘‘ಪದುಮುತ್ತರಬುದ್ಧಸ್ಸ, ಸಬ್ಬಭೂತಾನುಕಮ್ಪಿನೋ;
ಸದ್ದಹಿತ್ವಾನ [ಸುಸಣ್ಠಹಿತ್ವಾ (ಸೀ.)] ಸದ್ಧಮ್ಮೇ, ಉಜುದಿಟ್ಠಿ ಅಹೋಸಹಂ.
‘‘ಪದೀಪದಾನಂ ¶ ಪಾದಾಸಿಂ, ಪರಿವಾರೇತ್ವಾನ ಬೋಧಿಯಂ;
ಸದ್ದಹನ್ತೋ ಪದೀಪಾನಿ, ಅಕರಿಂ ತಾವದೇ ಅಹಂ.
‘‘ಯಂ ಯಂ ಯೋನುಪಪಜ್ಜಾಮಿ, ದೇವತ್ತಂ ಅಥ ಮಾನುಸಂ;
ಆಕಾಸೇ ಉಕ್ಕಂ ಧಾರೇನ್ತಿ, ದೀಪದಾನಸ್ಸಿದಂ ಫಲಂ.
‘‘ತಿರೋಕುಟ್ಟಂ ತಿರೋಸೇಲಂ, ಸಮತಿಗ್ಗಯ್ಹ ಪಬ್ಬತಂ;
ಸಮನ್ತಾ ಯೋಜನಸತಂ, ದಸ್ಸನಂ ಅನುಭೋಮಹಂ.
‘‘ತೇನ ಕಮ್ಮಾವಸೇಸೇನ, ಪತ್ತೋಮ್ಹಿ ಆಸವಕ್ಖಯಂ;
ಧಾರೇಮಿ ಅನ್ತಿಮಂ ದೇಹಂ, ದ್ವಿಪದಿನ್ದಸ್ಸ ಸಾಸನೇ.
‘‘ಚತುತ್ತಿಂಸೇ ಕಪ್ಪಸತೇ, ಸತಚಕ್ಖುಸನಾಮಕಾ;
ರಾಜಾಹೇಸುಂ ಮಹಾತೇಜಾ, ಚಕ್ಕವತ್ತೀ ಮಹಬ್ಬಲಾ.
‘‘ಪಟಿಸಮ್ಭಿದಾ ¶ ¶ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಪಞ್ಚದೀಪಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಪಞ್ಚದೀಪಕತ್ಥೇರಸ್ಸಾಪದಾನಂ ಸತ್ತಮಂ.
೮. ಧಜದಾಯಕತ್ಥೇರಅಪದಾನಂ
‘‘ಪದುಮುತ್ತರಬುದ್ಧಸ್ಸ, ಬೋಧಿಯಾ ಪಾದಪುತ್ತಮೇ;
ಹಟ್ಠೋ ಹಟ್ಠೇನ ಚಿತ್ತೇನ, ಧಜಮಾರೋಪಯಿಂ ಅಹಂ.
‘‘ಪತಿತಪತ್ತಾನಿ ಗಣ್ಹಿತ್ವಾ, ಬಹಿದ್ಧಾ ಛಡ್ಡಯಿಂ ಅಹಂ;
ಅನ್ತೋಸುದ್ಧಂ ಬಹಿಸುದ್ಧಂ, ಅಧಿಮುತ್ತಮನಾಸವಂ.
‘‘ಸಮ್ಮುಖಾ ವಿಯ ಸಮ್ಬುದ್ಧಂ, ಅವನ್ದಿಂ ಬೋಧಿಮುತ್ತಮಂ;
ಪದುಮುತ್ತರೋ ¶ ಲೋಕವಿದೂ, ಆಹುತೀನಂ ಪಟಿಗ್ಗಹೋ.
‘‘ಭಿಕ್ಖುಸಙ್ಘೇ ಠಿತೋ ಸತ್ಥಾ, ಇಮಾ ಗಾಥಾ ಅಭಾಸಥ;
‘‘‘ಇಮಿನಾ ಧಜದಾನೇನ, ಉಪಟ್ಠಾನೇನ ಚೂಭಯಂ.
‘‘‘ಕಪ್ಪಾನಂ ಸತಸಹಸ್ಸಂ, ದುಗ್ಗತಿಂ ಸೋ ನ ಗಚ್ಛತಿ;
ದೇವೇಸು ದೇವಸೋಭಗ್ಯಂ, ಅನುಭೋಸ್ಸತಿನಪ್ಪಕಂ.
‘‘‘ಅನೇಕಸತಕ್ಖತ್ತುಞ್ಚ ¶ , ರಾಜಾ ರಟ್ಠೇ ಭವಿಸ್ಸತಿ;
ಉಗ್ಗತೋ ನಾಮ ನಾಮೇನ, ಚಕ್ಕವತ್ತೀ ಭವಿಸ್ಸತಿ.
‘‘‘ಸಮ್ಪತ್ತಿಂ ¶ ಅನುಭೋತ್ವಾನ, ಸುಕ್ಕಮೂಲೇನ ಚೋದಿತೋ;
ಗೋತಮಸ್ಸ ಭಗವತೋ, ಸಾಸನೇಭಿರಮಿಸ್ಸತಿ’.
‘‘ಪಧಾನಪಹಿತತ್ತೋಮ್ಹಿ, ಉಪಸನ್ತೋ ನಿರೂಪಧಿ;
ಧಾರೇಮಿ ಅನ್ತಿಮಂ ದೇಹಂ, ಸಮ್ಮಾಸಮ್ಬುದ್ಧಸಾಸನೇ.
‘‘ಏಕಪಞ್ಞಾಸಸಹಸ್ಸೇ, ಕಪ್ಪೇ ಉಗ್ಗತಸವ್ಹಯೋ [ಸವ್ಹಯಾ (ಸ್ಯಾ.)];
ಪಞ್ಞಾಸಸತಸಹಸ್ಸೇ, ಖತ್ತಿಯೋ ಮೇಘಸವ್ಹಯೋ [ಖತ್ತಿಯಾ ಖೇಮಸವ್ಹಯಾ (ಸ್ಯಾ.)].
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಧಜದಾಯಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಧಜದಾಯಕತ್ಥೇರಸ್ಸಾಪದಾನಂ ಅಟ್ಠಮಂ.
೯. ಪದುಮತ್ಥೇರಅಪದಾನಂ
‘‘ಚತುಸಚ್ಚಂ ¶ ಪಕಾಸೇನ್ತೋ, ವರಧಮ್ಮಪ್ಪವತ್ತಕೋ;
ವಸ್ಸತೇ [ವಸ್ಸೇತಿ (?)] ಅಮತಂ ವುಟ್ಠಿಂ, ನಿಬ್ಬಾಪೇನ್ತೋ ಮಹಾಜನಂ.
‘‘ಸಧಜಂ [ಸದಣ್ಡಂ (ಸೀ.)] ಪದುಮಂ ಗಯ್ಹ, ಅಡ್ಢಕೋಸೇ ಠಿತೋ ಅಹಂ;
ಪದುಮುತ್ತರಮುನಿಸ್ಸ, ಪಹಟ್ಠೋ ಉಕ್ಖಿಪಿಮಮ್ಬರೇ.
‘‘ಆಗಚ್ಛನ್ತೇ ಚ ಪದುಮೇ, ಅಬ್ಭುತೋ ಆಸಿ ತಾವದೇ;
ಮಮ ಸಙ್ಕಪ್ಪಮಞ್ಞಾಯ, ಪಗ್ಗಣ್ಹಿ ವದತಂ ವರೋ.
‘‘ಕರಸೇಟ್ಠೇನ ¶ ಪಗ್ಗಯ್ಹ, ಜಲಜಂ ಪುಪ್ಫಮುತ್ತಮಂ;
ಭಿಕ್ಖುಸಙ್ಘೇ ಠಿತೋ ಸತ್ಥಾ, ಇಮಾ ಗಾಥಾ ಅಭಾಸಥ.
‘‘‘ಯೇನಿದಂ ಪದುಮಂ ಖಿತ್ತಂ, ಸಬ್ಬಞ್ಞುಮ್ಹಿ ವಿನಾಯಕೇ [ಸಬ್ಬಞ್ಞುತಮನಾಯಕೇ (ಸ್ಯಾ. ಕ.)];
ತಮಹಂ ಕಿತ್ತಯಿಸ್ಸಾಮಿ, ಸುಣಾಥ ಮಮ ಭಾಸತೋ.
‘‘‘ತಿಂಸಕಪ್ಪಾನಿ ¶ ¶ ದೇವಿನ್ದೋ, ದೇವರಜ್ಜಂ ಕರಿಸ್ಸತಿ;
ಪಥಬ್ಯಾ ರಜ್ಜಂ ಸತ್ತಸತಂ, ವಸುಧಂ ಆವಸಿಸ್ಸತಿ.
‘‘‘ತತ್ಥ ಪತ್ತಂ ಗಣೇತ್ವಾನ, ಚಕ್ಕವತ್ತೀ ಭವಿಸ್ಸತಿ;
ಆಕಾಸತೋ ಪುಪ್ಫವುಟ್ಠಿ, ಅಭಿವಸ್ಸಿಸ್ಸತೀ ತದಾ.
‘‘‘ಕಪ್ಪಸತಸಹಸ್ಸಮ್ಹಿ, ಓಕ್ಕಾಕಕುಲಸಮ್ಭವೋ;
ಗೋತಮೋ ನಾಮ ನಾಮೇನ, ಸತ್ಥಾ ಲೋಕೇ ಭವಿಸ್ಸತಿ.
‘‘‘ತಸ್ಸ ಧಮ್ಮೇಸು ದಾಯಾದೋ, ಓರಸೋ ಧಮ್ಮನಿಮ್ಮಿತೋ;
ಸಬ್ಬಾಸವೇ ಪರಿಞ್ಞಾಯ, ನಿಬ್ಬಾಯಿಸ್ಸತಿನಾಸವೋ’.
‘‘ನಿಕ್ಖಮಿತ್ವಾನ ಕುಚ್ಛಿಮ್ಹಾ, ಸಮ್ಪಜಾನೋ ಪತಿಸ್ಸತೋ;
ಜಾತಿಯಾ ಪಞ್ಚವಸ್ಸೋಹಂ, ಅರಹತ್ತಂ ಅಪಾಪುಣಿಂ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಪದುಮೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಪದುಮತ್ಥೇರಸ್ಸಾಪದಾನಂ ನವಮಂ.
೧೦. ಅಸನಬೋಧಿಯತ್ಥೇರಅಪದಾನಂ
‘‘ಜಾತಿಯಾ ¶ ¶ ಸತ್ತವಸ್ಸೋಹಂ, ಅದ್ದಸಂ ಲೋಕನಾಯಕಂ;
ಪಸನ್ನಚಿತ್ತೋ ಸುಮನೋ, ಉಪಗಚ್ಛಿಂ ನರುತ್ತಮಂ.
‘‘ತಿಸ್ಸಸ್ಸಾಹಂ ಭಗವತೋ, ಲೋಕಜೇಟ್ಠಸ್ಸ ತಾದಿನೋ;
ಹಟ್ಠೋ ಹಟ್ಠೇನ ಚಿತ್ತೇನ, ರೋಪಯಿಂ ಬೋಧಿಮುತ್ತಮಂ.
‘‘ಅಸನೋ ನಾಮಧೇಯ್ಯೇನ, ಧರಣೀರುಹಪಾದಪೋ;
ಪಞ್ಚವಸ್ಸೇ ಪರಿಚರಿಂ, ಅಸನಂ ಬೋಧಿಮುತ್ತಮಂ.
‘‘ಪುಪ್ಫಿತಂ ಪಾದಪಂ ದಿಸ್ವಾ, ಅಬ್ಭುತಂ ಲೋಮಹಂಸನಂ;
ಸಕಂ ಕಮ್ಮಂ ಪಕಿತ್ತೇನ್ತೋ, ಬುದ್ಧಸೇಟ್ಠಂ ಉಪಾಗಮಿಂ.
‘‘ತಿಸ್ಸೋ ತದಾ ಸೋ ಸಮ್ಬುದ್ಧೋ, ಸಯಮ್ಭೂ ಅಗ್ಗಪುಗ್ಗಲೋ;
ಭಿಕ್ಖುಸಙ್ಘೇ ನಿಸೀದಿತ್ವಾ, ಇಮಾ ಗಾಥಾ ಅಭಾಸಥ.
‘‘‘ಯೇನಾಯಂ ¶ ರೋಪಿತಾ ಬೋಧಿ, ಬುದ್ಧಪೂಜಾ ಚ ಸಕ್ಕತಾ;
ತಮಹಂ ಕಿತ್ತಯಿಸ್ಸಾಮಿ, ಸುಣಾಥ ಮಮ ಭಾಸತೋ.
‘‘‘ತಿಂಸಕಪ್ಪಾನಿ ದೇವೇಸು, ದೇವರಜ್ಜಂ ಕರಿಸ್ಸತಿ;
ಚತುಸಟ್ಠಿ ಚಕ್ಖತ್ತುಂ ಸೋ, ಚಕ್ಕವತ್ತೀ ಭವಿಸ್ಸತಿ.
‘‘‘ತುಸಿತಾ ¶ ಹಿ ಚವಿತ್ವಾನ, ಸುಕ್ಕಮೂಲೇನ ಚೋದಿತೋ;
ದ್ವೇ ಸಮ್ಪತ್ತೀ ಅನುಭೋತ್ವಾ, ಮನುಸ್ಸತ್ತೇ ರಮಿಸ್ಸತಿ.
‘‘‘ಪಧಾನಪಹಿತತ್ತೋ ಸೋ, ಉಪಸನ್ತೋ ನಿರೂಪಧಿ;
ಸಬ್ಬಾಸವೇ ಪರಿಞ್ಞಾಯ, ನಿಬ್ಬಾಯಿಸ್ಸತಿನಾಸವೋ’.
‘‘ವಿವೇಕಮನುಯುತ್ತೋಹಂ ¶ , ಉಪಸನ್ತೋ ನಿರೂಪಧಿ;
ನಾಗೋವ ಬನ್ಧನಂ ಛೇತ್ವಾ, ವಿಹರಾಮಿ ಅನಾಸವೋ.
‘‘ದ್ವೇನವುತೇ ಇತೋ ಕಪ್ಪೇ, ಬೋಧಿಂ ರೋಪೇಸಹಂ ತದಾ;
ದುಗ್ಗತಿಂ ನಾಭಿಜಾನಾಮಿ, ಬೋಧಿರೋಪಸ್ಸಿದಂ ಫಲಂ.
‘‘ಚತುಸತ್ತತಿತೋ ಕಪ್ಪೇ, ದಣ್ಡಸೇನೋತಿ ವಿಸ್ಸುತೋ;
ಸತ್ತರತನಸಮ್ಪನ್ನೋ, ಚಕ್ಕವತ್ತೀ ತದಾ ಅಹುಂ.
‘‘ತೇಸತ್ತತಿಮ್ಹಿತೋ ಕಪ್ಪೇ, ಸತ್ತಾಹೇಸುಂ ಮಹೀಪತೀ;
ಸಮನ್ತನೇಮಿನಾಮೇನ, ರಾಜಾನೋ ಚಕ್ಕವತ್ತಿನೋ.
‘‘ಪಣ್ಣವೀಸತಿತೋ ¶ ಕಪ್ಪೇ, ಪುಣ್ಣಕೋ ನಾಮ ಖತ್ತಿಯೋ;
ಸತ್ತರತನಸಮ್ಪನ್ನೋ, ಚಕ್ಕವತ್ತೀ ಮಹಬ್ಬಲೋ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಅಸನಬೋಧಿಯೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಅಸನಬೋಧಿಯತ್ಥೇರಸ್ಸಾಪದಾನಂ ದಸಮಂ.
ಬೀಜನಿವಗ್ಗೋ ಛಟ್ಠೋ.
ತಸ್ಸುದ್ದಾನಂ –
ಬೀಜನೀ ಸತರಂಸೀ ಚ, ಸಯನೋದಕಿವಾಹಿಯೋ;
ಪರಿವಾರೋ ಪದೀಪಞ್ಚ, ಧಜೋ ಪದುಮಪೂಜಕೋ;
ಬೋಧಿ ಚ ದಸಮೋ ವುತ್ತೋ, ಗಾಥಾ ದ್ವೇನವುತಿ ತಥಾ.
೭. ಸಕಚಿನ್ತನಿಯವಗ್ಗೋ
೧. ಸಕಚಿನ್ತನಿಯತ್ಥೇರಅಪದಾನಂ
‘‘ಪವನಂ ¶ ¶ ¶ ಕಾನನಂ ದಿಸ್ವಾ, ಅಪ್ಪಸದ್ದಮನ್ನಾವಿಲಂ;
ಇಸೀನಂ ಅನುಚಿಣ್ಣಂವ, ಆಹುತೀನಂ ಪಟಿಗ್ಗಹಂ.
‘‘ಥೂಪಂ ಕತ್ವಾನ ಪುಲಿನಂ [ವೇಳುನಾ (ಅಟ್ಠ.), ವೇಳಿನಂ (ಸ್ಯಾ.)], ನಾನಾಪುಪ್ಫಂ ಸಮೋಕಿರಿಂ;
ಸಮ್ಮುಖಾ ವಿಯ ಸಮ್ಬುದ್ಧಂ, ನಿಮ್ಮಿತಂ ಅಭಿವನ್ದಹಂ.
‘‘ಸತ್ತರತನಸಮ್ಪನ್ನೋ ¶ , ರಾಜಾ ರಟ್ಠಮ್ಹಿ ಇಸ್ಸರೋ;
ಸಕಕಮ್ಮಾಭಿರದ್ಧೋಹಂ, ಪುಪ್ಫಪೂಜಾಯಿದಂ [ಥೂಪಪೂಜಾಯಿದಂ (ಸೀ.)] ಫಲಂ.
‘‘ಏಕನವುತಿತೋ ಕಪ್ಪೇ, ಯಂ ಪುಪ್ಫಮಭಿರೋಪಯಿಂ;
ದುಗ್ಗತಿಂ ನಾಭಿಜಾನಾಮಿ, ಪುಪ್ಫಪೂಜಾಯಿದಂ [ಥೂಪಪೂಜಾಯಿದಂ (ಸೀ.)] ಫಲಂ.
‘‘ಅಸೀತಿಕಪ್ಪೇನನ್ತಯಸೋ, ಚಕ್ಕವತ್ತೀ ಅಹೋಸಹಂ;
ಸತ್ತರತನಸಮ್ಪನ್ನೋ, ಚತುದೀಪಮ್ಹಿ ಇಸ್ಸರೋ.
‘‘ಪಟಿಸಮ್ಭಿದಾ ಚತಸ್ಸೋ, ವಿಮೋಕ್ಖಾಪಿ ಚ ಅಟ್ಠಿಮೇ;
ಛಳಭಿಞ್ಞಾ ಸಚ್ಛಿಕತಾ, ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಸಕಚಿನ್ತನಿಯೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಸಕಚಿನ್ತನಿಯತ್ಥೇರಸ್ಸಾಪದಾನಂ ಪಠಮಂ.
೨. ಅವೋಪುಪ್ಫಿಯತ್ಥೇರಅಪದಾನಂ
‘‘ವಿಹಾರಾ ಅಭಿನಿಕ್ಖಮ್ಮ, ಅಬ್ಭುಟ್ಠಹಿಯ [ಅಬ್ಭುಟ್ಠಾಸಿ ಚ (ಸ್ಯಾ. ಕ.)] ಚಙ್ಕಮೇ;
ಚತುಸಚ್ಚಂ ಪಕಾಸನ್ತೋ, ದೇಸೇತಿ [ದೇಸೇನ್ತೋ (ಸ್ಯಾ. ಕ.)] ಅಮತಂ ಪದಂ.
‘‘ಸಿಖಿಸ್ಸ ¶ ಗಿರಮಞ್ಞಾಯ, ಬುದ್ಧಸೇಟ್ಠಸ್ಸ ತಾದಿನೋ;
ನಾನಾಪುಪ್ಫಂ ಗಹೇತ್ವಾನ, ಆಕಾಸಮ್ಹಿ ಸಮೋಕಿರಿಂ.
‘‘ತೇನ ¶ ಕಮ್ಮೇನ ದ್ವಿಪದಿನ್ದ, ಲೋಕಜೇಟ್ಠ ನರಾಸಭ;
ಪತ್ತೋಮ್ಹಿ ಅಚಲಂ ಠಾನಂ, ಹಿತ್ವಾ ಜಯಪರಾಜಯಂ.
‘‘ಏಕತ್ತಿಂಸೇ ¶ ಇತೋ ಕಪ್ಪೇ, ಯಂ ಪುಪ್ಫಮಭಿರೋಪಯಿಂ;
ದುಗ್ಗತಿಂ ನಾಭಿಜಾನಾಮಿ, ಪುಪ್ಫಪೂಜಾಯಿದಂ ಫಲಂ.
‘‘ಇತೋ ವೀಸತಿಕಪ್ಪಮ್ಹಿ, ಸುಮೇಧೋ ನಾಮ ಖತ್ತಿಯೋ;
ಸತ್ತರತನಸಮ್ಪನ್ನೋ, ಚಕ್ಕವತ್ತೀ ಮಹಬ್ಬಲೋ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಅವೋಪುಪ್ಫಿಯೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಅವೋಪುಪ್ಫಿಯತ್ಥೇರಸ್ಸಾಪದಾನಂ ದುತಿಯಂ.
೩. ಪಚ್ಚಾಗಮನಿಯತ್ಥೇರಅಪದಾನಂ
‘‘ಸಿನ್ಧುಯಾ ¶ ನದಿಯಾ ತೀರೇ, ಚಕ್ಕವಾಕೋ ಅಹಂ ತದಾ;
ಸುದ್ಧಸೇವಾಲಭಕ್ಖೋಹಂ, ಪಾಪೇಸು ಚ ಸುಸಞ್ಞತೋ.
‘‘ಅದ್ದಸಂ ವಿರಜಂ ಬುದ್ಧಂ, ಗಚ್ಛನ್ತಂ ಅನಿಲಞ್ಜಸೇ;
ತುಣ್ಡೇನ ಸಾಲಂ ಪಗ್ಗಯ್ಹ, ವಿಪಸ್ಸಿಸ್ಸಾಭಿರೋಪಯಿಂ.
‘‘ಯಸ್ಸ ¶ ಸದ್ಧಾ ತಥಾಗತೇ, ಅಚಲಾ ಸುಪತಿಟ್ಠಿತಾ;
ತೇನ ಚಿತ್ತಪ್ಪಸಾದೇನ, ದುಗ್ಗತಿಂ ಸೋ ನ ಗಚ್ಛತಿ.
‘‘ಸ್ವಾಗತಂ ವತ ಮೇ ಆಸಿ, ಬುದ್ಧಸೇಟ್ಠಸ್ಸ ಸನ್ತಿಕೇ;
ವಿಹಙ್ಗಮೇನ ಸನ್ತೇನ, ಸುಬೀಜಂ ರೋಪಿತಂ ಮಯಾ.
‘‘ಏಕನವುತಿತೋ ಕಪ್ಪೇ, ಯಂ ಪುಪ್ಫಮಭಿರೋಪಯಿಂ;
ದುಗ್ಗತಿಂ ನಾಭಿಜಾನಾಮಿ, ಬುದ್ಧಪೂಜಾಯಿದಂ [ಪುಪ್ಫಪೂಜಾಯಿದಂ (ಸೀ.)] ಫಲಂ.
‘‘ಸುಚಾರುದಸ್ಸನಾ ನಾಮ, ಅಟ್ಠೇತೇ ಏಕನಾಮಕಾ;
ಕಪ್ಪೇ ಸತ್ತರಸೇ ಆಸುಂ, ಚಕ್ಕವತ್ತೀ ಮಹಬ್ಬಲಾ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಪಚ್ಚಾಗಮನಿಯೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಪಚ್ಚಾಗಮನಿಯತ್ಥೇರಸ್ಸಾಪದಾನಂ ತತಿಯಂ.
೪. ಪರಪ್ಪಸಾದಕತ್ಥೇರಅಪದಾನಂ
‘‘ಉಸಭಂ ¶ ¶ ಪವರಂ ವೀರಂ, ಮಹೇಸಿಂ ವಿಜಿತಾವಿನಂ;
ಸುವಣ್ಣವಣ್ಣಂ ಸಮ್ಬುದ್ಧಂ, ಕೋ ದಿಸ್ವಾ ನಪ್ಪಸೀದತಿ.
‘‘ಹಿಮವಾವಾಪರಿಮೇಯ್ಯೋ, ಸಾಗರೋವ ದುರುತ್ತರೋ;
ತಥೇವ ಝಾನಂ ಬುದ್ಧಸ್ಸ, ಕೋ ದಿಸ್ವಾ ನಪ್ಪಸೀದತಿ.
‘‘ವಸುಧಾ ಯಥಾಪ್ಪಮೇಯ್ಯಾ, ಚಿತ್ತಾ ವನವಟಂಸಕಾ;
ತಥೇವ ¶ ಸೀಲಂ ಬುದ್ಧಸ್ಸ, ಕೋ ದಿಸ್ವಾ ನಪ್ಪಸೀದತಿ.
‘‘ಅನಿಲಞ್ಜಸಾಸಙ್ಖುಬ್ಭೋ [ಅನಿಲಜೋವ ಅಸಙ್ಖೋಭೋ (ಸೀ.)], ಯಥಾಕಾಸೋ ಅಸಙ್ಖಿಯೋ;
ತಥೇವ ಞಾಣಂ ಬುದ್ಧಸ್ಸ, ಕೋ ದಿಸ್ವಾ ನಪ್ಪಸೀದತಿ.
‘‘ಇಮಾಹಿ ¶ ಚತುಗಾಥಾಹಿ, ಬ್ರಾಹ್ಮಣೋ ಸೇನಸವ್ಹಯೋ;
ಬುದ್ಧಸೇಟ್ಠಂ ಥವಿತ್ವಾನ, ಸಿದ್ಧತ್ಥಂ ಅಪರಾಜಿತಂ.
‘‘ಚತುನ್ನವುತಿಕಪ್ಪಾನಿ, ದುಗ್ಗತಿಂ ನುಪಪಜ್ಜಥ;
ಸುಗತಿಂ ಸುಖಸಮ್ಪತ್ತಿಂ [ಸುಗತೀಸು ಸುಸುಮ್ಪತ್ತಿಂ (ಸೀ. ಸ್ಯಾ.)], ಅನುಭೋಸಿಮನಪ್ಪಕಂ.
‘‘ಚತುನ್ನವುತಿತೋ ಕಪ್ಪೇ, ಥವಿತ್ವಾ ಲೋಕನಾಯಕಂ;
ದುಗ್ಗತಿಂ ನಾಭಿಜಾನಾಮಿ, ಥೋಮನಾಯ [ಥೋಮನಸ್ಸ (ಸ್ಯಾ.)] ಇದಂ ಫಲಂ.
‘‘ಚಾತುದ್ದಸಮ್ಹಿ ಕಪ್ಪಮ್ಹಿ, ಚತುರೋ ಆಸುಮುಗ್ಗತಾ;
ಸತ್ತರತನಸಮ್ಪನ್ನಾ, ಚಕ್ಕವತ್ತೀ ಮಹಬ್ಬಲಾ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಪರಪ್ಪಸಾದಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಪರಪ್ಪಸಾದಕತ್ಥೇರಸ್ಸಾಪದಾನಂ ಚತುತ್ಥಂ.
೫. ಭಿಸದಾಯಕತ್ಥೇರಅಪದಾನಂ
‘‘ವೇಸ್ಸಭೂ ನಾಮ ನಾಮೇನ, ಇಸೀನಂ ತತಿಯೋ ಅಹು;
ಕಾನನಂ ವನಮೋಗಯ್ಹ, ವಿಹಾಸಿ ಪುರಿಸುತ್ತಮೋ.
‘‘ಭಿಸಮುಳಾಲಂ ¶ ¶ ¶ ಗಣ್ಹಿತ್ವಾ, ಅಗಮಂ ಬುದ್ಧಸನ್ತಿಕಂ;
ತಞ್ಚ ಬುದ್ಧಸ್ಸ ಪಾದಾಸಿಂ, ಪಸನ್ನೋ ಸೇಹಿ ಪಾಣಿಭಿ.
‘‘ಕರೇನ ಚ ಪರಾಮಟ್ಠೋ, ವೇಸ್ಸಭೂವರಬುದ್ಧಿನಾ;
ಸುಖಾಹಂ ನಾಭಿಜಾನಾಮಿ, ಸಮಂ ತೇನ ಕುತೋತ್ತರಿಂ.
‘‘ಚರಿಮೋ ವತ್ತತೇ ಮಯ್ಹಂ, ಭವಾ ಸಬ್ಬೇ ಸಮೂಹತಾ;
ಹತ್ಥಿನಾಗೇನ ಸನ್ತೇನ, ಕುಸಲಂ ರೋಪಿತಂ ಮಯಾ [ನಾಗೋವ ಬನ್ಧನಂ ಛೇತ್ವಾ, ವಿಹರಾಮಿ ಅನಾಸವೋ (ಸ್ಯಾ.)].
‘‘ಏಕತ್ತಿಂಸೇ ಇತೋ ಕಪ್ಪೇ, ಯಂ ಕಮ್ಮಮಕರಿಂ ತದಾ;
ದುಗ್ಗತಿಂ ನಾಭಿಜಾನಾಮಿ, ಭಿಸದಾನಸ್ಸಿದಂ ಫಲಂ.
‘‘ಸಮೋಧಾನಾ ಚ ರಾಜಾನೋ, ಸೋಳಸ ಮನುಜಾಧಿಪಾ;
ಕಪ್ಪಮ್ಹಿ ಚುದ್ದಸೇ [ತೇರಸೇ (ಸೀ. ಸ್ಯಾ.)] ಆಸುಂ, ಚಕ್ಕವತ್ತೀ ಮಹಬ್ಬಲಾ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಭಿಸದಾಯಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಭಿಸದಾಯಕತ್ಥೇರಸ್ಸಾಪದಾನಂ ಪಞ್ಚಮಂ.
೬. ಸುಚಿನ್ತಿತತ್ಥೇರಅಪದಾನಂ
‘‘ಗಿರಿದುಗ್ಗಚರೋ ¶ ಆಸಿಂ, ಅಭಿಜಾತೋವ ಕೇಸರೀ;
ಮಿಗಸಙ್ಘಂ ವಧಿತ್ವಾನ, ಜೀವಾಮಿ ಪಬ್ಬತನ್ತರೇ.
‘‘ಅತ್ಥದಸ್ಸೀ ¶ ತು ಭಗವಾ, ಸಬ್ಬಞ್ಞೂ ವದತಂ ವರೋ;
ಮಮುದ್ಧರಿತುಕಾಮೋ ಸೋ, ಆಗಚ್ಛಿ ಪಬ್ಬತುತ್ತಮಂ.
‘‘ಪಸದಞ್ಚ ಮಿಗಂ ಹನ್ತ್ವಾ, ಭಕ್ಖಿತುಂ ಸಮುಪಾಗಮಿಂ;
ಭಗವಾ ತಮ್ಹಿ ಸಮಯೇ, ಭಿಕ್ಖಮಾನೋ [ಸಿಕ್ಖಾಚಾರೋ (ಸ್ಯಾ.)] ಉಪಾಗಮಿ.
‘‘ವರಮಂಸಾನಿ ಪಗ್ಗಯ್ಹ, ಅದಾಸಿಂ ತಸ್ಸ ಸತ್ಥುನೋ;
ಅನುಮೋದಿ ಮಹಾವೀರೋ, ನಿಬ್ಬಾಪೇನ್ತೋ ಮಮಂ ತದಾ.
‘‘ತೇನ ¶ ಚಿತ್ತಪ್ಪಸಾದೇನ, ಗಿರಿದುಗ್ಗಂ ಪವಿಸಿಂ ಅಹಂ;
ಪೀತಿಂ ಉಪ್ಪಾದಯಿತ್ವಾನ, ತತ್ಥ ಕಾಲಙ್ಕತೋ ಅಹಂ.
‘‘ಏತೇನ ¶ ಮಂಸದಾನೇನ, ಚಿತ್ತಸ್ಸ ಪಣಿಧೀಹಿ ಚ;
ಪನ್ನರಸೇ ಕಪ್ಪಸತೇ, ದೇವಲೋಕೇ ರಮಿಂ ಅಹಂ.
‘‘ಅವಸೇಸೇಸು ಕಪ್ಪೇಸು, ಕುಸಲಂ ಚಿನ್ತಿತಂ [ನಿಚಿತಂ (ಸೀ.), ಕರಿತಂ (ಸ್ಯಾ.)] ಮಯಾ;
ತೇನೇವ ಮಂಸದಾನೇನ, ಬುದ್ಧಾನುಸ್ಸರಣೇನ ಚ.
‘‘ಅಟ್ಠತ್ತಿಂಸಮ್ಹಿ ಕಪ್ಪಮ್ಹಿ, ಅಟ್ಠ ದೀಘಾಯುನಾಮಕಾ;
ಸಟ್ಠಿಮ್ಹಿತೋ ಕಪ್ಪಸತೇ, ದುವೇ ವರುಣನಾಮಕಾ [ಸರಣನಾಮಕಾ (ಸ್ಯಾ.)].
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಸುಚಿನ್ತಿತೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಸುಚಿನ್ತಿತತ್ಥೇರಸ್ಸಾಪದಾನಂ ಛಟ್ಠಂ.
೭. ವತ್ಥದಾಯಕತ್ಥೇರಅಪದಾನಂ
‘‘ಪಕ್ಖಿಜಾತೋ ¶ ¶ ತದಾ ಆಸಿಂ, ಸುಪಣ್ಣೋ ಗರುಳಾಧಿಪೋ;
ಅದ್ದಸಂ ವಿರಜಂ ಬುದ್ಧಂ, ಗಚ್ಛನ್ತಂ ಗನ್ಧಮಾದನಂ.
‘‘ಜಹಿತ್ವಾ ಗರುಳವಣ್ಣಂ, ಮಾಣವಕಂ ಅಧಾರಯಿಂ;
ಏಕಂ ವತ್ಥಂ ಮಯಾ ದಿನ್ನಂ, ದ್ವಿಪದಿನ್ದಸ್ಸ ತಾದಿನೋ.
‘‘ತಞ್ಚ ದುಸ್ಸಂ ಪಟಿಗ್ಗಯ್ಹ, ಬುದ್ಧೋ ಲೋಕಗ್ಗನಾಯಕೋ;
ಅನ್ತಲಿಕ್ಖೇ ಠಿತೋ ಸತ್ಥಾ, ಇಮಾ ಗಾಥಾ ಅಭಾಸಥ.
‘‘‘ಇಮಿನಾ ವತ್ಥದಾನೇನ, ಚಿತ್ತಸ್ಸ ಪಣಿಧೀಹಿ ಚ;
ಪಹಾಯ ಗರುಳಂ ಯೋನಿಂ, ದೇವಲೋಕೇ ರಮಿಸ್ಸತಿ’.
‘‘ಅತ್ಥದಸ್ಸೀ ತು ಭಗವಾ, ಲೋಕಜೇಟ್ಠೋ ನರಾಸಭೋ;
ವತ್ಥದಾನಂ ಪಸಂಸಿತ್ವಾ, ಪಕ್ಕಾಮಿ ಉತ್ತರಾಮುಖೋ.
‘‘ಭವೇ ನಿಬ್ಬತ್ತಮಾನಮ್ಹಿ, ಹೋನ್ತಿ ಮೇ ವತ್ಥಸಮ್ಪದಾ;
ಆಕಾಸೇ ಛದನಂ ಹೋತಿ, ವತ್ಥದಾನಸ್ಸಿದಂ ಫಲಂ.
‘‘ಅರುಣವಾ ¶ [ಅರುಣಕಾ (ಸೀ.), ಅರುಣಸಾ (ಸ್ಯಾ.)] ಸತ್ತ ಜನಾ, ಚಕ್ಕವತ್ತೀ ಮಹಬ್ಬಲಾ;
ಛತ್ತಿಂಸತಿಮ್ಹಿ ಆಸಿಂಸು, ಕಪ್ಪಮ್ಹಿ ಮನುಜಾಧಿಪಾ.
‘‘ಪಟಿಸಮ್ಭಿದಾ ¶ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ವತ್ಥದಾಯಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ವತ್ಥದಾಯಕತ್ಥೇರಸ್ಸಾಪದಾನಂ ಸತ್ತಮಂ.
೮. ಅಮ್ಬದಾಯಕತ್ಥೇರಅಪದಾನಂ
‘‘ಅನೋಮದಸ್ಸೀ ¶ ಭಗವಾ, ನಿಸಿನ್ನೋ ಪಬ್ಬತನ್ತರೇ;
ಮೇತ್ತಾಯ ಅಫರಿ ಲೋಕೇ, ಅಪ್ಪಮಾಣೇ ನಿರೂಪಧಿ.
‘‘ಕಪಿ ಅಹಂ ತದಾ ಆಸಿಂ, ಹಿಮವನ್ತೇ ನಗುತ್ತಮೇ;
ದಿಸ್ವಾ ಅನೋಮದಸ್ಸಿಂ ತಂ [ಅನೋಮಂ ಅಮಿತಂ (ಸೀ.), ಅನೋಮಮಧಿತಂ (ಸ್ಯಾ.)], ಬುದ್ಧೇ ಚಿತ್ತಂ ಪಸಾದಯಿಂ.
‘‘ಅವಿದೂರೇ ಹಿಮವನ್ತಸ್ಸ, ಅಮ್ಬಾಸುಂ ಫಲಿನೋ ತದಾ;
ತತೋ ಪಕ್ಕಂ ಗಹೇತ್ವಾನ, ಅಮ್ಬಂ ಸಮಧುಕಂ ಅದಂ.
‘‘ತಂ ¶ ಮೇ ಬುದ್ಧೋ ವಿಯಾಕಾಸಿ, ಅನೋಮದಸ್ಸೀ ಮಹಾಮುನಿ;
ಇಮಿನಾ ಮಧುದಾನೇನ, ಅಮ್ಬದಾನೇನ ಚೂಭಯಂ.
‘‘ಸತ್ತಪಞ್ಞಾಸಕಪ್ಪಮ್ಹಿ, ದೇವಲೋಕೇ ರಮಿಸ್ಸತಿ;
ಅವಸೇಸೇಸು ಕಪ್ಪೇಸು, ವೋಕಿಣ್ಣಂ ಸಂಸರಿಸ್ಸತಿ.
‘‘ಖೇಪೇತ್ವಾ ಪಾಪಕಂ ಕಮ್ಮಂ, ಪರಿಪಕ್ಕಾಯ ಬುದ್ಧಿಯಾ;
ವಿನಿಪಾತಮಗನ್ತ್ವಾನ, ಕಿಲೇಸೇ ಝಾಪಯಿಸ್ಸತಿ.
‘‘ದಮೇನ ಉತ್ತಮೇನಾಹಂ, ದಮಿತೋಮ್ಹಿ ಮಹೇಸಿನಾ;
ಪತ್ತೋಮ್ಹಿ ಅಚಲಂ ಠಾನಂ, ಹಿತ್ವಾ ಜಯಪರಾಜಯಂ.
‘‘ಸತ್ತಸತ್ತತಿಕಪ್ಪಸತೇ, ಅಮ್ಬಟ್ಠಜಸನಾಮಕಾ;
ಚತುದ್ದಸ ತೇ ರಾಜಾನೋ, ಚಕ್ಕವತ್ತೀ ಮಹಬ್ಬಲಾ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ¶ ಸುದಂ ಆಯಸ್ಮಾ ಅಮ್ಬದಾಯಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಅಮ್ಬದಾಯಕತ್ಥೇರಸ್ಸಾಪದಾನಂ ಅಟ್ಠಮಂ.
೯. ಸುಮನತ್ಥೇರಅಪದಾನಂ
‘‘ಸುಮನೋ ¶ ¶ ನಾಮ ನಾಮೇನ, ಮಾಲಾಕಾರೋ ಅಹಂ ತದಾ;
ಅದ್ದಸಂ ವಿರಜಂ ಬುದ್ಧಂ, ಲೋಕಾಹುತಿಪಟಿಗ್ಗಹಂ.
‘‘ಉಭೋ ಹತ್ಥೇಹಿ ಪಗ್ಗಯ್ಹ, ಸುಮನಂ ಪುಪ್ಫಮುತ್ತಮಂ;
ಬುದ್ಧಸ್ಸ ಅಭಿರೋಪೇಸಿಂ, ಸಿಖಿನೋ ಲೋಕಬನ್ಧುನೋ.
‘‘ಇಮಾಯ ಪುಪ್ಫಪೂಜಾಯ, ಚೇತನಾಪಣಿಧೀಹಿ ಚ;
ದುಗ್ಗತಿಂ ನಾಭಿಜಾನಾಮಿ, ಬುದ್ಧಪೂಜಾಯಿದಂ ಫಲಂ.
‘‘ಏಕತ್ತಿಂಸೇ ಇತೋ ಕಪ್ಪೇ, ಯಂ ಪುಪ್ಫಮಭಿರೋಪಯಿಂ;
ದುಗ್ಗತಿಂ ನಾಭಿಜಾನಾಮಿ, ಬುದ್ಧಪೂಜಾಯಿದಂ [ಪುಪ್ಫಪೂಜಾಯಿದಂ (ಸೀ.)] ಫಲಂ.
‘‘ಛಬ್ಬೀಸತಿಮ್ಹಿ ಕಪ್ಪಮ್ಹಿ, ಚತ್ತಾರೋಸುಂ ಮಹಾಯಸಾ;
ಸತ್ತರತನಸಮ್ಪನ್ನಾ, ರಾಜಾನೋ ಚಕ್ಕವತ್ತಿನೋ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಸುಮನೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಸುಮನತ್ಥೇರಸ್ಸಾಪದಾನಂ ನವಮಂ.
೧೦. ಪುಪ್ಫಚಙ್ಕೋಟಿಯತ್ಥೇರಅಪದಾನಂ
‘‘ಅಭೀತರೂಪಂ ¶ ¶ ಸೀಹಂವ, ಗರುಳಗ್ಗಂವ ಪಕ್ಖಿನಂ;
ಬ್ಯಗ್ಘೂಸಭಂವ ಪವರಂ, ಅಭಿಜಾತಂವ ಕೇಸರಿಂ.
‘‘ಸಿಖಿಂ ತಿಲೋಕಸರಣಂ, ಅನೇಜಂ ಅಪರಾಜಿತಂ;
ನಿಸಿನ್ನಂ ಸಮಣಾನಗ್ಗಂ, ಭಿಕ್ಖುಸಙ್ಘಪುರಕ್ಖತಂ.
‘‘ಚಙ್ಕೋಟಕೇ [ಚಙ್ಗೋಟಕೇ (ಸೀ.)] ಠಪೇತ್ವಾನ, ಅನೋಜಂ ಪುಪ್ಫಮುತ್ತಮಂ;
ಸಹ ಚಙ್ಕೋಟಕೇನೇವ, ಬುದ್ಧಸೇಟ್ಠಂ ಸಮೋಕಿರಿಂ.
‘‘ತೇನ ಚಿತ್ತಪ್ಪಸಾದೇನ, ದ್ವಿಪದಿನ್ದ ನರಾಸಭ;
ಪತ್ತೋಮ್ಹಿ ಅಚಲಂ ಠಾನಂ, ಹಿತ್ವಾ ಜಯಪರಾಜಯಂ.
‘‘ಏಕತ್ತಿಂಸೇ ಇತೋ ಕಪ್ಪೇ, ಯಂ ಕಮ್ಮಮಕರಿಂ ತದಾ;
ದುಗ್ಗತಿಂ ನಾಭಿಜಾನಾಮಿ, ಬುದ್ಧಪೂಜಾಯಿದಂ ಫಲಂ.
‘‘ಸಮ್ಪುಣ್ಣೇ ¶ ¶ ತಿಂಸಕಪ್ಪಮ್ಹಿ, ದೇವಭೂತಿಸನಾಮಕಾ;
ಸತ್ತರತನಸಮ್ಪನ್ನಾ, ಪಞ್ಚಾಸುಂ ಚಕ್ಕವತ್ತಿನೋ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಪುಪ್ಫಚಙ್ಕೋಟಿಯೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಪುಪ್ಫಚಙ್ಕೋಟಿಯತ್ಥೇರಸ್ಸಾಪದಾನಂ ದಸಮಂ.
ಸಕಚಿನ್ತನಿಯವಗ್ಗೋ ಸತ್ತಮೋ.
ತಸ್ಸುದ್ದಾನಂ –
ಸಕಚಿನ್ತೀ ¶ ಅವೋಪುಪ್ಫೀ, ಸಪಚ್ಚಾಗಮನೇನ ಚ;
ಪರಪ್ಪಸಾದೀ ಭಿಸದೋ, ಸುಚಿನ್ತಿ ವತ್ಥದಾಯಕೋ.
ಅಮ್ಬದಾಯೀ ಚ ಸುಮನೋ, ಪುಪ್ಫಚಙ್ಕೋಟಕೀಪಿ ಚ;
ಗಾಥೇಕಸತ್ತತಿ ವುತ್ತಾ, ಗಣಿತಾ ಅತ್ಥದಸ್ಸಿಭಿ.
೮. ನಾಗಸಮಾಲವಗ್ಗೋ
೧. ನಾಗಸಮಾಲತ್ಥೇರಅಪದಾನಂ
‘‘ಅಪಾಟಲಿಂ ¶ ¶ ¶ ಅಹಂ ಪುಪ್ಫಂ, ಉಜ್ಝಿತಂ ಸುಮಹಾಪಥೇ;
ಥೂಪಮ್ಹಿ ಅಭಿರೋಪೇಸಿಂ, ಸಿಖಿನೋ ಲೋಕಬನ್ಧುನೋ.
‘‘ಏಕತ್ತಿಂಸೇ ಇತೋ ಕಪ್ಪೇ, ಯಂ ಕಮ್ಮಮಕರಿಂ ತದಾ;
ದುಗ್ಗತಿಂ ನಾಭಿಜಾನಾಮಿ, ಥೂಪಪೂಜಾಯಿದಂ ಫಲಂ.
‘‘ಇತೋ ಪನ್ನರಸೇ ಕಪ್ಪೇ, ಭೂಮಿಯೋ [ಪುಪ್ಫಿಯೋ (ಸ್ಯಾ.)] ನಾಮ ಖತ್ತಿಯೋ;
ಸತ್ತರತನಸಮ್ಪನ್ನೋ, ಚಕ್ಕವತ್ತೀ ಮಹಬ್ಬಲೋ.
‘‘ಪಟಿಸಮ್ಭಿದಾ ಚತಸ್ಸೋ, ವಿಮೋಕ್ಖಾಪಿ ಚ ಅಟ್ಠಿಮೇ;
ಛಳಭಿಞ್ಞಾ ಸಚ್ಛಿಕತಾ, ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ನಾಗಸಮಾಲೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ನಾಗಸಮಾಲತ್ಥೇರಸ್ಸಾಪದಾನಂ ಪಠಮಂ.
೨. ಪದಸಞ್ಞಕತ್ಥೇರಅಪದಾನಂ
‘‘ಅಕ್ಕನ್ತಞ್ಚ ¶ ಪದಂ ದಿಸ್ವಾ, ತಿಸ್ಸಸ್ಸಾದಿಚ್ಚಬನ್ಧುನೋ;
ಹಟ್ಠೋ ಹಟ್ಠೇನ ಚಿತ್ತೇನ, ಪದೇ ಚಿತ್ತಂ ಪಸಾದಯಿಂ.
‘‘ದ್ವೇನವುತೇ ಇತೋ ಕಪ್ಪೇ, ಯಂ ಸಞ್ಞಮಲಭಿಂ ತದಾ;
ದುಗ್ಗತಿಂ ನಾಭಿಜಾನಾಮಿ, ಪದಸಞ್ಞಾಯಿದಂ ಫಲಂ.
‘‘ಇತೋ ಸತ್ತಮಕೇ ಕಪ್ಪೇ, ಸುಮೇಧೋ ನಾಮ ಖತ್ತಿಯೋ;
ಸತ್ತರತನಸಮ್ಪನ್ನೋ, ಚಕ್ಕವತೀ ಮಹಬ್ಬಲೋ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಪದಸಞ್ಞಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಪದಸಞ್ಞಕತ್ಥೇರಸ್ಸಾಪದಾನಂ ದುತಿಯಂ.
೩. ಬುದ್ಧಸಞ್ಞಕತ್ಥೇರಅಪದಾನಂ
‘‘ದುಮಗ್ಗೇ ¶ ¶ ¶ ಪಂಸುಕೂಲಿಕಂ, ಲಗ್ಗಂ ದಿಸ್ವಾನ ಸತ್ಥುನೋ;
ತತೋ ತಮಞ್ಜಲಿಂ ಕತ್ವಾ, ಪಂಸುಕೂಲಂ ಅವನ್ದಹಂ.
‘‘ದ್ವೇನವುತೇ ಇತೋ ಕಪ್ಪೇ, ಯಂ ಕಮ್ಮಮಕರಿಂ ತದಾ;
ದುಗ್ಗತಿಂ ನಾಭಿಜಾನಾಮಿ, ಬುದ್ಧಸಞ್ಞಾಯಿದಂ ಫಲಂ.
‘‘ಇತೋ ¶ ಚತುತ್ಥಕೇ ಕಪ್ಪೇ, ದುಮಸಾರೋಸಿ ಖತ್ತಿಯೋ;
ಚಾತುರನ್ತೋ ವಿಜಿತಾವೀ, ಚಕ್ಕವತ್ತೀ ಮಹಬ್ಬಲೋ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಬುದ್ಧಸಞ್ಞಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಬುದ್ಧಸಞ್ಞಕತ್ಥೇರಸ್ಸಾಪದಾನಂ ತತಿಯಂ.
೪. ಭಿಸಾಲುವದಾಯಕತ್ಥೇರಅಪದಾನಂ
‘‘ಕಾನನಂ ವನಮೋಗಯ್ಹ, ವಸಾಮಿ ವಿಪಿನೇ ಅಹಂ;
ವಿಪಸ್ಸಿಂ ಅದ್ದಸಂ ಬುದ್ಧಂ, ಆಹುತೀನಂ ಪಟಿಗ್ಗಹಂ.
‘‘ಭಿಸಾಲುವಞ್ಚ ಪಾದಾಸಿಂ, ಉದಕಂ ಹತ್ಥಧೋವನಂ;
ವನ್ದಿತ್ವಾ ಸಿರಸಾ ಪಾದೇ, ಪಕ್ಕಾಮಿ ಉತ್ತರಾಮುಖೋ.
‘‘ಏಕನವುತಿತೋ ಕಪ್ಪೇ, ಭಿಸಾಲುವಮದಂ ತದಾ;
ದುಗ್ಗತಿಂ ನಾಭಿಜಾನಾಮಿ, ಪುಞ್ಞಕಮ್ಮಸ್ಸಿದಂ ಫಲಂ.
‘‘ಇತೋ ತತಿಯಕೇ ಕಪ್ಪೇ, ಭಿಸಸಮ್ಮತಖತ್ತಿಯೋ;
ಸತ್ತರತನಸಮ್ಪನ್ನೋ, ಚಕ್ಕವತ್ತೀ ಮಹಬ್ಬಲೋ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ¶ ಸುದಂ ಆಯಸ್ಮಾ ಭಿಸಾಲುವದಾಯಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಭಿಸಾಲುವದಾಯಕತ್ಥೇರಸ್ಸಾಪದಾನಂ ಚತುತ್ಥಂ.
ಛಟ್ಠಭಾಣವಾರಂ.
೫. ಏಕಸಞ್ಞಕತ್ಥೇರಅಪದಾನಂ
‘‘ಖಣ್ಡೋ ¶ ¶ ¶ ನಾಮಾಸಿ ನಾಮೇನ, ವಿಪಸ್ಸಿಸ್ಸಗ್ಗಸಾವಕೋ;
ಏಕಾ ಭಿಕ್ಖಾ ಮಯಾ ದಿನ್ನಾ, ಲೋಕಾಹುತಿಪಟಿಗ್ಗಹೇ.
‘‘ತೇನ ಚಿತ್ತಪ್ಪಸಾದೇನ, ದ್ವಿಪದಿನ್ದ ನರಾಸಭ;
ದುಗ್ಗತಿಂ ನಾಭಿಜಾನಾಮಿ, ಏಕಭಿಕ್ಖಾಯಿದಂ ಫಲಂ.
‘‘ಚತ್ತಾಲೀಸಮ್ಹಿತೋ ಕಪ್ಪೇ, ವರುಣೋ ನಾಮ ಖತ್ತಿಯೋ;
ಸತ್ತರತನಸಮ್ಪನ್ನೋ, ಚಕ್ಕವತ್ತೀ ಮಹಬ್ಬಲೋ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಏಕಸಞ್ಞಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಏಕಸಞ್ಞಕತ್ಥೇರಸ್ಸಾಪದಾನಂ ಪಞ್ಚಮಂ.
೬. ತಿಣಸನ್ಥರದಾಯಕತ್ಥೇರಅಪದಾನಂ
‘‘ಹಿಮವನ್ತಸ್ಸಾವಿದೂರೇ, ಮಹಾಜಾತಸ್ಸರೋ ಅಹು;
ಸತಪತ್ತೇಹಿ ಸಞ್ಛನ್ನೋ, ನಾನಾಸಕುಣಮಾಲಯೋ.
‘‘ತಮ್ಹಿ ¶ ನ್ಹತ್ವಾ ಚ ಪಿತ್ವಾ [ಪೀತ್ವಾ (ಸೀ. ಸ್ಯಾ.)] ಚ, ಅವಿದೂರೇ ವಸಾಮಹಂ;
ಅದ್ದಸಂ ಸಮಣಾನಗ್ಗಂ, ಗಚ್ಛನ್ತಂ ಅನಿಲಞ್ಜಸೇ.
‘‘ಮಮ ಸಙ್ಕಪ್ಪಮಞ್ಞಾಯ, ಸತ್ಥಾ ಲೋಕೇ ಅನುತ್ತರೋ;
ಅಬ್ಭತೋ ಓರುಹಿತ್ವಾನ, ಭೂಮಿಯಂಠಾಸಿ ತಾವದೇ.
‘‘ವಿಸಾಣೇನ [ಲಾಯನೇನ (ಸ್ಯಾ.)] ತಿಣಂ ಗಯ್ಹ, ನಿಸೀದನಮದಾಸಹಂ;
ನಿಸೀದಿ ಭಗವಾ ತತ್ಥ, ತಿಸ್ಸೋ ಲೋಕಗ್ಗನಾಯಕೋ.
‘‘ಸಕಂ ಚಿತ್ತಂ ಪಸಾದೇತ್ವಾ, ಅವನ್ದಿ ಲೋಕನಾಯಕಂ;
ಪಟಿಕುಟಿಕೋ [ಉಕ್ಕುಟಿಕೋ (ಸ್ಯಾ. ಕ.)] ಅಪಸಕ್ಕಿಂ, ನಿಜ್ಝಾಯನ್ತೋ ಮಹಾಮುನಿಂ.
‘‘ತೇನ ಚಿತ್ತಪ್ಪಸಾದೇನ, ನಿಮ್ಮಾನಂ ಉಪಪಜ್ಜಹಂ;
ದುಗ್ಗತಿಂ ನಾಭಿಜಾನಾಮಿ, ಸನ್ಥರಸ್ಸ ಇದಂ ಫಲಂ.
‘‘ಇತೋ ¶ ¶ ದುತಿಯಕೇ ಕಪ್ಪೇ, ಮಿಗ [ಮಿತ್ತ (ಸ್ಯಾ.)] ಸಮ್ಮತಖತ್ತಿಯೋ;
ಸತ್ತರತನಸಮ್ಪನ್ನೋ, ಚಕ್ಕವತ್ತೀ ಮಹಬ್ಬಲೋ.
‘‘ಪಟಿಸಮ್ಭಿದಾ ¶ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ತಿಣಸನ್ಥರದಾಯಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ತಿಣಸನ್ಥರದಾಯಕತ್ಥೇರಸ್ಸಾಪದಾನಂ ಛಟ್ಠಂ.
೭. ಸೂಚಿದಾಯಕತ್ಥೇರಅಪದಾನಂ
‘‘ತಿಂಸಕಪ್ಪಸಹಸ್ಸಮ್ಹಿ, ಸಮ್ಬುದ್ಧೋ ಲೋಕನಾಯಕೋ;
ಸುಮೇಧೋ ನಾಮ ನಾಮೇನ, ಬಾತ್ತಿಂಸವರಲಕ್ಖಣೋ.
‘‘ತಸ್ಸ ¶ ಕಞ್ಚನವಣ್ಣಸ್ಸ, ದ್ವಿಪದಿನ್ದಸ್ಸ ತಾದಿನೋ;
ಪಞ್ಚ ಸೂಚೀ ಮಯಾ ದಿನ್ನಾ, ಸಿಬ್ಬನತ್ಥಾಯ ಚೀವರಂ.
‘‘ತೇನೇವ ಸೂಚಿದಾನೇನ, ನಿಪುಣತ್ಥವಿಪಸ್ಸಕಂ;
ತಿಕ್ಖಂ ಲಹುಞ್ಚ ಫಾಸುಞ್ಚ, ಞಾಣಂ ಮೇ ಉದಪಜ್ಜಥ.
‘‘ಕಿಲೇಸಾ ಝಾಪಿತಾ ಮಯ್ಹಂ, ಭವಾ ಸಬ್ಬೇ ಸಮೂಹತಾ;
ಧಾರೇಮಿ ಅನ್ತಿಮಂ ದೇಹಂ, ಸಮ್ಮಾಸಮ್ಬುದ್ಧಸಾಸನೇ.
‘‘ದ್ವಿಪದಾಧಿಪತೀ ನಾಮ, ರಾಜಾನೋ ಚತುರೋ ಅಹುಂ;
ಸತ್ತರತನಸಮ್ಪನ್ನಾ, ಚಕ್ಕವತ್ತೀ ಮಹಬ್ಬಲಾ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಸೂಚಿದಾಯಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಸೂಚಿದಾಯಕತ್ಥೇರಸ್ಸಾಪದಾನಂ ಸತ್ತಮಂ.
೮. ಪಾಟಲಿಪುಪ್ಫಿಯತ್ಥೇರಅಪದಾನಂ
‘‘ಸುವಣ್ಣವಣ್ಣಂ ಸಮ್ಬುದ್ಧಂ, ಗಚ್ಛನ್ತಂ ಅನ್ತರಾಪಣೇ;
ಕಞ್ಚನಗ್ಘಿಯಸಙ್ಕಾಸಂ, ಬಾತ್ತಿಂಸವರಲಕ್ಖಣಂ.
‘‘ಸೇಟ್ಠಿಪುತ್ತೋ ¶ ತದಾ ಆಸಿಂ, ಸುಖುಮಾಲೋ ಸುಖೇಧಿತೋ;
ಉಚ್ಛಙ್ಗೇ ಪಾಟಲಿಪುಪ್ಫಂ, ಕತ್ವಾನ [ಕತ್ವಾ ತಂ (ಸೀ. ಸ್ಯಾ.)] ಅಭಿಸಂಹರಿಂ.
‘‘ಹಟ್ಠೋ ¶ ¶ ಹಟ್ಠೇನ ಚಿತ್ತೇನ, ಪುಪ್ಫೇಹಿ ಅಭಿಪೂಜಯಿಂ;
ತಿಸ್ಸಂ ಲೋಕವಿದುಂ ನಾಥಂ, ನರದೇವಂ ನಮಸ್ಸಹಂ.
‘‘ದ್ವೇನವುತೇ ¶ ಇತೋ ಕಪ್ಪೇ, ಯಂ ಕಮ್ಮಮಕರಿಂ ತದಾ;
ದುಗ್ಗತಿಂ ನಾಭಿಜಾನಾಮಿ, ಪುಪ್ಫಪೂಜಾಯಿದಂ ಫಲಂ.
‘‘ಇತೋ ತೇಸಟ್ಠಿಕಪ್ಪಮ್ಹಿ, ಅಭಿಸಮ್ಮತನಾಮಕೋ;
ಸತ್ತರತನಸಮ್ಪನ್ನೋ, ಚಕ್ಕವತ್ತೀ ಮಹಬ್ಬಲೋ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಪಾಟಲಿಪುಪ್ಫಿಯೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಪಾಟಲಿಪುಪ್ಫಿಯತ್ಥೇರಸ್ಸಾಪದಾನಂ ಅಟ್ಠಮಂ.
೯. ಠಿತಞ್ಜಲಿಯತ್ಥೇರಅಪದಾನಂ
‘‘ಮಿಗಲುದ್ದೋ ಪುರೇ ಆಸಿಂ, ಅರಞ್ಞೇ ಕಾನನೇ ಅಹಂ;
ತತ್ಥ ಅದ್ದಸಂ [ತತ್ಥದ್ದಸಾಸಿಂ (ಸೀ. ಸ್ಯಾ.)] ಸಮ್ಬುದ್ಧಂ, ಬಾತ್ತಿಂಸವರಲಕ್ಖಣಂ.
‘‘ತತ್ಥಾಹಂ ಅಞ್ಜಲಿಂ ಕತ್ವಾ, ಪಕ್ಕಾಮಿಂ ಪಾಚಿನಾಮುಖೋ;
ಅವಿದೂರೇ ನಿಸಿನ್ನಸ್ಸ, ನಿಯಕೇ ಪಣ್ಣಸನ್ಥರೇ.
‘‘ತತೋ ಮೇ ಅಸನೀಪಾತೋ, ಮತ್ಥಕೇ ನಿಪತೀ ತದಾ;
ಸೋಹಂ ಮರಣಕಾಲಮ್ಹಿ, ಅಕಾಸಿಂ ಪುನರಞ್ಜಲಿಂ.
‘‘ದ್ವೇನವುತೇ ¶ ಇತೋ ಕಪ್ಪೇ, ಅಞ್ಜಲಿಂ ಅಕರಿಂ ತದಾ;
ದುಗ್ಗತಿಂ ನಾಭಿಜಾನಾಮಿ, ಅಞ್ಜಲಿಸ್ಸ ಇದಂ ಫಲಂ.
‘‘ಚತುಪಣ್ಣಾಸಕಪ್ಪಮ್ಹಿ, ಮಿಗಕೇತುಸನಾಮಕೋ;
ಸತ್ತರತನಸಮ್ಪನ್ನೋ, ಚಕ್ಕವತ್ತೀ ಮಹಬ್ಬಲೋ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಠಿತಞ್ಜಲಿಯೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಠಿತಞ್ಜಲಿಯತ್ಥೇರಸ್ಸಾಪದಾನಂ ನವಮಂ.
೧೦. ತಿಪದುಮಿಯತ್ಥೇರಅಪದಾನಂ
‘‘ಪದುಮುತ್ತರೋ ¶ ¶ ನಾಮ ಜಿನೋ, ಸಬ್ಬಧಮ್ಮಾನ ಪಾರಗೂ;
ದನ್ತೋ ದನ್ತಪರಿವುತೋ, ನಗರಾ ನಿಕ್ಖಮೀ ತದಾ.
‘‘ನಗರೇ ¶ ಹಂಸವತಿಯಂ, ಅಹೋಸಿಂ ಮಾಲಿಕೋ ತದಾ;
ಯಂ ತತ್ಥ ಉತ್ತಮಂ ತೋಣಿ, ಪದ್ಮಪುಪ್ಫಾನಿ [ಉತ್ತಮಂ ಪುಪ್ಫಂ, ತೀಣಿ ಪುಪ್ಫಾನಿ (ಸೀ.)] ಅಗ್ಗಹಿಂ.
‘‘ಅದ್ದಸಂ ವಿರಜಂ ಬುದ್ಧಂ, ಪಟಿಮಗ್ಗನ್ತರಾಪಣೇ;
ಸಹ [ಸೋಹಂ (ಸೀ.)] ದಿಸ್ವಾನ ಸಮ್ಬುದ್ಧಂ, ಏವಂ ಚಿನ್ತೇಸಹಂ ತದಾ.
‘‘ಕಿಂ ಮೇ ಇಮೇಹಿ ಪುಪ್ಫೇಹಿ, ರಞ್ಞೋ ಉಪನಿತೇಹಿ ಮೇ;
ಗಾಮಂ ವಾ ಗಾಮಖೇತ್ತಂ ವಾ, ಸಹಸ್ಸಂ ವಾ ಲಭೇಯ್ಯಹಂ.
‘‘ಅದನ್ತದಮನಂ ¶ ವೀರಂ, ಸಬ್ಬಸತ್ತಸುಖಾವಹಂ;
ಲೋಕನಾಥಂ ಪೂಜಯಿತ್ವಾ, ಲಚ್ಛಾಮಿ ಅಮತಂ ಧನಂ.
‘‘ಏವಾಹಂ ಚಿನ್ತಯಿತ್ವಾನ, ಸಕಂ ಚಿತ್ತಂ ಪಸಾದಯಿಂ;
ತೀಣಿ ಲೋಹಿತಕೇ ಗಯ್ಹ, ಆಕಾಸೇ ಉಕ್ಖಿಪಿಂ ತದಾ.
‘‘ಮಯಾ ಉಕ್ಖಿತ್ತಮತ್ತಮ್ಹಿ, ಆಕಾಸೇ ಪತ್ಥರಿಂಸು ತೇ;
ಧಾರಿಂಸು ಮತ್ಥಕೇ ತತ್ಥ, ಉದ್ಧಂವಣ್ಟಾ ಅಧೋಮುಖಾ.
‘‘ಯೇ ಕೇಚಿ ಮನುಜಾ ದಿಸ್ವಾ, ಉಕ್ಕುಟ್ಠಿಂ ಸಮ್ಪವತ್ತಯುಂ;
ದೇವತಾ ಅನ್ತಲಿಕ್ಖಮ್ಹಿ, ಸಾಧುಕಾರಂ ಪವತ್ತಯುಂ.
‘‘ಅಚ್ಛೇರಂ ಲೋಕೇ ಉಪ್ಪನ್ನಂ, ಬುದ್ಧಸೇಟ್ಠಸ್ಸ ವಾಹಸಾ;
ಸಬ್ಬೇ ಧಮ್ಮಂ ಸುಣಿಸ್ಸಾಮ, ಪುಪ್ಫಾನಂ ವಾಹಸಾ ಮಯಂ.
‘‘ಪದುಮುತ್ತರೋ ಲೋಕವಿದೂ, ಆಹುತೀನಂ ಪಟಿಗ್ಗಹೋ;
ವೀಥಿಯಞ್ಹಿ ಠಿತೋ ಸನ್ತೋ, ಇಮಾ ಗಾಥಾ ಅಭಾಸಥ.
‘‘‘ಯೋ ಸೋ ಬುದ್ಧಂ ಅಪೂಜೇಸಿ, ರತ್ತಪದ್ಮೇಹಿ [ರತ್ತಪದುಮೇಹಿ (ಸೀ. ಸ್ಯಾ.)] ಮಾಣವೋ;
ತಮಹಂ ಕಿತ್ತಯಿಸ್ಸಾಮಿ, ಸುಣಾಥ ಮಮ ಭಾಸತೋ.
‘‘‘ತಿಂಸಕಪ್ಪಸಹಸ್ಸಾನಿ, ದೇವಲೋಕೇ ರಮಿಸ್ಸತಿ;
ತಿಂಸಕಪ್ಪಾನಿ [ತಿಂಸಕ್ಖತ್ತುಞ್ಚ (ಸ್ಯಾ.)] ದೇವಿನ್ದೋ, ದೇವರಜ್ಜಂ ಕರಿಸ್ಸತಿ.
‘‘‘ಮಹಾವಿತ್ಥಾರಿಕಂ ¶ ನಾಮ, ಬ್ಯಮ್ಹಂ ಹೇಸ್ಸತಿ ತಾವದೇ;
ತಿಯೋಜನಸತುಬ್ಬಿದ್ಧಂ, ದಿಯಡ್ಢಸತವಿತ್ಥತಂ.
‘‘‘ಚತ್ತಾರಿಸತಸಹಸ್ಸಾನಿ ¶ , ನಿಯ್ಯೂಹಾ ಚ ಸುಮಾಪಿತಾ;
ಕೂಟಾಗಾರವರೂಪೇತಾ, ಮಹಾಸಯನಮಣ್ಡಿತಾ.
‘‘‘ಕೋಟಿಸತಸಹಸ್ಸಿಯೋ ¶ ¶ , ಪರಿವಾರೇಸ್ಸನ್ತಿ ಅಚ್ಛರಾ;
ಕುಸಲಾ ನಚ್ಚಗೀತಸ್ಸ, ವಾದಿತೇಪಿ ಪದಕ್ಖಿಣಾ.
‘‘‘ಏತಾದಿಸೇ ಬ್ಯಮ್ಹವರೇ, ನಾರೀಗಣಸಮಾಕುಲೇ;
ವಸ್ಸಿಸ್ಸತಿ ಪುಪ್ಫವಸ್ಸೋ, ದಿಬ್ಬೋ [ಪದ (ಕ.)] ಲೋಹಿತಕೋ ಸದಾ.
‘‘‘ಭಿತ್ತಿಖೀಲೇ ನಾಗದನ್ತೇ, ದ್ವಾರಬಾಹಾಯ ತೋರಣೇ;
ಚಕ್ಕಮತ್ತಾ ಲೋಹಿತಕಾ, ಓಲಮ್ಬಿಸ್ಸನ್ತಿ ತಾವದೇ.
‘‘‘ಪತ್ತೇನ ಪತ್ತಸಞ್ಛನ್ನೇ, ಅನ್ತೋಬ್ಯಮ್ಹವರೇ ಇಮಂ;
ಅತ್ಥರಿತ್ವಾ ಪಾರುಪಿತ್ವಾ, ತುವಟ್ಟಿಸ್ಸನ್ತಿ ತಾವದೇ.
‘‘‘ಭವನಂ ಪರಿವಾರೇತ್ವಾ, ಸಮನ್ತಾ ಸತಯೋಜನೇ;
ತೇಪಿ ಪದ್ಮಾ [ತೇ ವಿಸುದ್ಧಾ (ಸೀ. ಸ್ಯಾ.)] ಲೋಹಿತಕಾ, ದಿಬ್ಬಗನ್ಧಂ ಪವಾಯರೇ.
‘‘‘ಪಞ್ಚಸತ್ತತಿಕ್ಖತ್ತುಞ್ಚ, ಚಕ್ಕವತ್ತೀ ಭವಿಸ್ಸತಿ;
ಪದೇಸರಜ್ಜಂ ವಿಪುಲಂ, ಗಣನಾತೋ ಅಸಙ್ಖಿಯಂ.
‘‘‘ಸಮ್ಪತ್ತಿಯೋ ದುವೇ ಭುತ್ವಾ, ಅನೀತಿ ಅನುಪದ್ದವೋ;
ಸಮ್ಪತ್ತೇ ಪರಿಯೋಸಾನೇ, ನಿಬ್ಬಾನಂ ಪಾಪುಣಿಸ್ಸತಿ’ [ಫಸ್ಸಯಿಸ್ಸತಿ (ಸೀ.), ಪಸ್ಸಯಿಸ್ಸತಿ (ಕ.)].
‘‘ಸುದಿಟ್ಠೋ ವತ ಮೇ ಬುದ್ಧೋ, ವಾಣಿಜ್ಜಂ ಸುಪಯೋಜಿತಂ;
ಪದ್ಮಾನಿ ತೀಣಿ ಪೂಜೇತ್ವಾ, ಅನುಭೋಸಿಂ ತಿಸಮ್ಪದಾ [ಅನುಭೂಯನ್ತಿ ಸಮ್ಪದಾ (ಕ.)].
‘‘ಅಜ್ಜ ಮೇ ಧಮ್ಮಪ್ಪತ್ತಸ್ಸ, ವಿಪ್ಪಮುತ್ತಸ್ಸ ಸಬ್ಬಸೋ;
ಸುಪುಪ್ಫಿತಂ ಲೋಹಿತಕಂ, ಧಾರಯಿಸ್ಸತಿ ಮತ್ಥಕೇ.
‘‘ಮಮ ಕಮ್ಮಂ ಕಥೇನ್ತಸ್ಸ, ಪದುಮುತ್ತರಸತ್ಥುನೋ;
ಸತಪಾಣಸಹಸ್ಸಾನಂ, ಧಮ್ಮಾಭಿಸಮಯೋ ಅಹು.
‘‘ಸತಸಹಸ್ಸಿತೋ ¶ ಕಪ್ಪೇ, ಯಂ ಬುದ್ಧಮಭಿಪೂಜಯಿಂ;
ದುಗ್ಗತಿಂ ನಾಭಿಜಾನಾಮಿ, ತಿಪದುಮಾನಿದಂ ಫಲಂ.
‘‘ಕಿಲೇಸಾ ¶ ಝಾಪಿತಾ ಮಯ್ಹಂ, ಭವಾ ಸಬ್ಬೇ ಸಮೂಹತಾ;
ಸಬ್ಬಾಸವಾ ಪರಿಕ್ಖೀಣಾ, ನತ್ಥಿ ದಾನಿ ಪುನಬ್ಭವೋ.
‘‘ಪಟಿಸಮ್ಭಿದಾ ¶ ¶ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ತಿಪದುಮಿಯೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ತಿಪದುಮಿಯತ್ಥೇರಸ್ಸಾಪದಾನಂ ದಸಮಂ.
ನಾಗಸಮಾಲವಗ್ಗೋ ಅಟ್ಠಮೋ.
ತಸ್ಸುದ್ದಾನಂ –
ನಾಗಸಮಾಲೋ ಪದಸಞ್ಞೀ, ಸಞ್ಞಕಾಲುವದಾಯಕೋ;
ಏಕಸಞ್ಞೀ ತಿಣಸನ್ಥಾರೋ, ಸೂಚಿಪಾಟಲಿಪುಪ್ಫಿಯೋ;
ಠಿತಞ್ಜಲೀ ತಿಪದುಮೀ, ಗಾಥಾಯೋ ಪಞ್ಚಸತ್ತತಿ.
೯. ತಿಮಿರವಗ್ಗೋ
೧. ತಿಮಿರಪುಪ್ಫಿಯತ್ಥೇರಅಪದಾನಂ
‘‘ಚನ್ದಭಾಗಾನದೀತೀರೇ ¶ ¶ ¶ , ಅನುಸೋತಂ ವಜಾಮಹಂ;
ನಿಸಿನ್ನಂ ಸಮಣಂ ದಿಸ್ವಾ, ವಿಪ್ಪಸನ್ನಮನಾವಿಲಂ.
‘‘ತತ್ಥ ಚಿತ್ತಂ ಪಸಾದೇತ್ವಾ [ಪಸಾದೇಸಿಂ (ಸ್ಯಾ.)], ಏವಂ ಚಿನ್ತೇಸಹಂ ತದಾ;
ತಾರಯಿಸ್ಸತಿ ತಿಣ್ಣೋಯಂ, ದನ್ತೋಯಂ ದಮಯಿಸ್ಸತಿ.
‘‘ಅಸ್ಸಾಸಿಸ್ಸತಿ ಅಸ್ಸತ್ಥೋ, ಸನ್ತೋ ಚ ಸಮಯಿಸ್ಸತಿ;
ಮೋಚಯಿಸ್ಸತಿ ಮುತ್ತೋ ಚ, ನಿಬ್ಬಾಪೇಸ್ಸತಿ ನಿಬ್ಬುತೋ.
‘‘ಏವಾಹಂ ಚಿನ್ತಯಿತ್ವಾನ, ಸಿದ್ಧತ್ಥಸ್ಸ ಮಹೇಸಿನೋ;
ಗಹೇತ್ವಾ ತಿಮಿರಪುಪ್ಫಂ, ಮತ್ಥಕೇ ಓಕಿರಿಂ ಅಹಂ [ತದಾ (ಸ್ಯಾ.)].
‘‘ಅಞ್ಜಲಿಂ ಪಗ್ಗಹೇತ್ವಾನ, ಕತ್ವಾ ಚ ನಂ ಪದಕ್ಖಿಣಂ;
ವನ್ದಿತ್ವಾ ಸತ್ಥುನೋ ಪಾದೇ, ಪಕ್ಕಾಮಿಂ ಅಪರಂ ದಿಸಂ.
‘‘ಅಚಿರಂ ಗತಮತ್ತಂ ಮಂ, ಮಿಗರಾಜಾ ವಿಹೇಠಯಿ;
ಪಪಾತಮನುಗಚ್ಛನ್ತೋ, ತತ್ಥೇವ ಪಪತಿಂ ಅಹಂ.
‘‘ಚತುನ್ನವುತಿತೋ ಕಪ್ಪೇ, ಯಂ ಪುಪ್ಫಮಭಿರೋಪಯಿಂ;
ದುಗ್ಗತಿಂ ನಾಭಿಜಾನಾಮಿ, ಪುಪ್ಫಪೂಜಾಯಿದಂ [ಬುದ್ಧಪೂಜಾಯಿದಂ (ಸೀ. ಸ್ಯಾ.)] ಫಲಂ.
‘‘ಛಪ್ಪಞ್ಞಾಸಮ್ಹಿ ¶ ಕಪ್ಪಮ್ಹಿ, ಸತ್ತೇವಾಸುಂ ಮಹಾಯಸಾ [ಮಹಾರಹಾ (ಸ್ಯಾ. ಕ.)];
ಸತ್ತರತನಸಮ್ಪನ್ನಾ, ಚಕ್ಕವತ್ತೀ ಮಹಬ್ಬಲಾ.
‘‘ಪಟಿಸಮ್ಭಿದಾ ಚತಸ್ಸೋ, ವಿಮೋಕ್ಖಾಪಿ ಚ ಅಟ್ಠಿಮೇ;
ಛಳಭಿಞ್ಞಾ ¶ ಸಚ್ಛಿಕತಾ, ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ತಿಮಿರಪುಪ್ಫಿಯೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ತಿಮಿರಪುಪ್ಫಿಯತ್ಥೇರಸ್ಸಾಪದಾನಂ ಪಠಮಂ.
೨. ಗತಸಞ್ಞಕತ್ಥೇರಅಪದಾನಂ
‘‘ಜಾತಿಯಾ ¶ ¶ ಸತ್ತವಸ್ಸೋಹಂ, ಪಬ್ಬಜಿಂ ಅನಗಾರಿಯಂ;
ಅವನ್ದಿಂ ಸತ್ಥುನೋ ಪಾದೇ, ವಿಪ್ಪಸನ್ನೇನ ಚೇತಸಾ.
‘‘ಸತ್ತನಙ್ಗಲಕೀಪುಪ್ಫೇ, ಆಕಾಸೇ ಉಕ್ಖಿಪಿಂ ಅಹಂ;
ತಿಸ್ಸಂ ಬುದ್ಧಂ ಸಮುದ್ದಿಸ್ಸ, ಅನನ್ತಗುಣಸಾಗರಂ.
‘‘ಸುಗತಾನುಗತಂ ಮಗ್ಗಂ, ಪೂಜೇತ್ವಾ ಹಟ್ಠಮಾನಸೋ;
ಅಞ್ಜಲಿಞ್ಚ [ಅಞ್ಜಲಿಸ್ಸ (ಕ.)] ತದಾಕಾಸಿಂ, ಪಸನ್ನೋ ಸೇಹಿ ಪಾಣಿಭಿ.
‘‘ದ್ವೇನವುತೇ ಇತೋ ಕಪ್ಪೇ, ಯಂ ಕಮ್ಮಮಕರಿಂ ತದಾ;
ದುಗ್ಗತಿಂ ನಾಭಿಜಾನಾಮಿ, ಬುದ್ಧಪೂಜಾಯಿದಂ ಫಲಂ.
‘‘ಇತೋ ಅಟ್ಠಮಕೇ ಕಪ್ಪೇ, ತಯೋ ಅಗ್ಗಿಸಿಖಾ ಅಹು;
ಸತ್ತರತನಸಮ್ಪನ್ನಾ, ಚಕ್ಕವತ್ತೀ ಮಹಬ್ಬಲಾ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಗತಸಞ್ಞಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಗತಸಞ್ಞಕತ್ಥೇರಸ್ಸಾಪದಾನಂ ದುತಿಯಂ.
೩. ನಿಪನ್ನಞ್ಜಲಿಕತ್ಥೇರಅಪದಾನಂ
‘‘ರುಕ್ಖಮೂಲೇ ¶ ¶ ನಿಸಿನ್ನೋಹಂ, ಬ್ಯಾಧಿತೋ ಪರಮೇನ ಚ;
ಪರಮಕಾರುಞ್ಞಪತ್ತೋಮ್ಹಿ, ಅರಞ್ಞೇ ಕಾನನೇ ಅಹಂ.
‘‘ಅನುಕಮ್ಪಂ ಉಪಾದಾಯ, ತಿಸ್ಸೋ ಸತ್ಥಾ ಉಪೇಸಿ ಮಂ;
ಸೋಹಂ ನಿಪನ್ನಕೋ ಸನ್ತೋ, ಸಿರೇ ಕತ್ವಾನ ಅಞ್ಜಲಿಂ.
‘‘ಪಸನ್ನಚಿತ್ತೋ ಸುಮನೋ, ಸಬ್ಬಸತ್ತಾನಮುತ್ತಮಂ;
ಸಮ್ಬುದ್ಧಂ ಅಭಿವಾದೇತ್ವಾ, ತತ್ಥ ಕಾಲಙ್ಕತೋ ಅಹಂ.
‘‘ದ್ವೇನವುತೇ ಇತೋ ಕಪ್ಪೇ, ಯಂ ವನ್ದಿಂ ಪುರಿಸುತ್ತಮಂ;
ದುಗ್ಗತಿಂ ನಾಭಿಜಾನಾಮಿ, ವನ್ದನಾಯ ಇದಂ ಫಲಂ.
‘‘ಇತೋ ¶ ಪಞ್ಚಮಕೇ ಕಪ್ಪೇ, ಪಞ್ಚೇವಾಸುಂ ಮಹಾಸಿಖಾ;
ಸತ್ತರತನಸಮ್ಪನ್ನಾ, ಚಕ್ಕವತ್ತೀ ಮಹಬ್ಬಲಾ.
‘‘ಪಟಿಸಮ್ಭಿದಾ ¶ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ನಿಪನ್ನಞ್ಜಲಿಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ನಿಪನ್ನಞ್ಜಲಿಕತ್ಥೇರಸ್ಸಾಪದಾನಂ ತತಿಯಂ.
೪. ಅಧೋಪುಪ್ಫಿಯತ್ಥೇರಅಪದಾನಂ
‘‘ಅಭಿಭೂ ನಾಮ ಸೋ ಭಿಕ್ಖು, ಸಿಖಿನೋ ಅಗ್ಗಸಾವಕೋ;
ಮಹಾನುಭಾವೋ ತೇವಿಜ್ಜೋ, ಹಿಮವನ್ತಂ ಉಪಾಗಮಿ.
‘‘ಅಹಮ್ಪಿ ¶ ಹಿಮವನ್ತಮ್ಹಿ, ರಮಣೀಯಸ್ಸಮೇ ಇಸಿ;
ವಸಾಮಿ ಅಪ್ಪಮಞ್ಞಾಸು, ಇದ್ಧೀಸು ಚ ತದಾ ವಸೀ.
‘‘ಪಕ್ಖಿಜಾತೋ ವಿಯಾಕಾಸೇ, ಪಬ್ಬತಂ ಅಧಿವತ್ತಯಿಂ [ಅಭಿಪತ್ಥಯಿಂ (ಸ್ಯಾ.), ಅಭಿಮತ್ಥಯಿಂ (ಕ.), ಅಧಿವತ್ಥಯಿನ್ತಿ ಪಬ್ಬತಸ್ಸ ಉಪರಿ ಗಚ್ಛಿನ್ತಿಅತ್ಥೋ];
ಅಧೋಪುಪ್ಫಂ ಗಹೇತ್ವಾನ, ಆಗಚ್ಛಿಂ [ಅಗಚ್ಛಿಂ (ಕ.)] ಪಬ್ಬತಂ ಅಹಂ.
‘‘ಸತ್ತ ಪುಪ್ಫಾನಿ ಗಣ್ಹಿತ್ವಾ, ಮತ್ಥಕೇ ಓಕಿರಿಂ ಅಹಂ;
ಆಲೋಕಿತೇ [ಆಲೋಕಿತೋ (ಸ್ಯಾ.)] ಚ ವೀರೇನ, ಪಕ್ಕಾಮಿಂ ಪಾಚಿನಾಮುಖೋ.
‘‘ಆವಾಸಂ ¶ ಅಭಿಸಮ್ಭೋಸಿಂ, ಪತ್ವಾನ ಅಸ್ಸಮಂ ಅಹಂ;
ಖಾರಿಭಾರಂ ಗಹೇತ್ವಾನ, ಪಾಯಾಸಿಂ [ಪಾವಿಸಿಂ (ಸೀ.)] ಪಬ್ಬತನ್ತರಂ.
‘‘ಅಜಗರೋ ಮಂ ಪೀಳೇಸಿ, ಘೋರರೂಪೋ ಮಹಬ್ಬಲೋ;
ಪುಬ್ಬಕಮ್ಮಂ ಸರಿತ್ವಾನ, ತತ್ಥ ಕಾಲಙ್ಕತೋ ಅಹಂ.
‘‘ಏಕತ್ತಿಂಸೇ ಇತೋ ಕಪ್ಪೇ, ಯಂ ಪುಪ್ಫಮಭಿರೋಪಯಿಂ;
ದುಗ್ಗತಿಂ ನಾಭಿಜಾನಾಮಿ, ಪುಪ್ಫಪೂಜಾಯಿದಂ ಫಲಂ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಅಧೋಪುಪ್ಫಿಯೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಅಧೋಪುಪ್ಫಿಯತ್ಥೇರಸ್ಸಾಪದಾನಂ ಚತುತ್ಥಂ.
೫. ರಂಸಿಸಞ್ಞಕತ್ಥೇರಅಪದಾನಂ
‘‘ಪಬ್ಬತೇ ¶ ¶ ಹಿಮವನ್ತಮ್ಹಿ, ವಾಸಂ ಕಪ್ಪೇಸಹಂ ಪುರೇ;
ಅಜಿನುತ್ತರವಾಸೋಹಂ, ವಸಾಮಿ ಪಬ್ಬತನ್ತರೇ.
‘‘ಸುವಣ್ಣವಣ್ಣಂ ¶ ¶ ಸಮ್ಬುದ್ಧಂ, ಸತರಂಸಿಂವ ಭಾಣುಮಂ;
ವನನ್ತರಗತಂ ದಿಸ್ವಾ, ಸಾಲರಾಜಂವ ಪುಪ್ಫಿತಂ.
‘‘ರಂಸ್ಯಾ [ರಂಸೇ (ಸ್ಯಾ. ಕ.)] ಚಿತ್ತಂ ಪಸಾದೇತ್ವಾ, ವಿಪಸ್ಸಿಸ್ಸ ಮಹೇಸಿನೋ;
ಪಗ್ಗಯ್ಹ ಅಞ್ಜಲಿಂ ವನ್ದಿಂ, ಸಿರಸಾ ಉಕ್ಕುಟೀ [ಸಿರಸಾ ಉಕ್ಕುಟಿಕೋ (ಸ್ಯಾ.), ಸಿರಸುಕ್ಕುಟಿಕೋ (ಕ.)] ಅಹಂ.
‘‘ಏಕನವುತಿತೋ ಕಪ್ಪೇ, ಯಂ ಕಮ್ಮಮಕರಿಂ ತದಾ;
ದುಗ್ಗತಿಂ ನಾಭಿಜಾನಾಮಿ, ರಂಸಿಸಞ್ಞಾಯಿದಂ ಫಲಂ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ರಂಸಿಸಞ್ಞಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ರಂಸಿಸಞ್ಞಕತ್ಥೇರಸ್ಸಾಪದಾನಂ ಪಞ್ಚಮಂ.
೬. ದುತಿಯರಂಸಿಸಞ್ಞಕತ್ಥೇರಅಪದಾನಂ
‘‘ಪಬ್ಬತೇ ಹಿಮವನ್ತಮ್ಹಿ, ವಾಕಚೀರಧರೋ ಅಹಂ;
ಚಙ್ಕಮಞ್ಚ ಸಮಾರೂಳ್ಹೋ, ನಿಸೀದಿಂ ಪಾಚಿನಾಮುಖೋ.
‘‘ಪಬ್ಬತೇ ಸುಗತಂ ದಿಸ್ವಾ, ಫುಸ್ಸಂ ಝಾನರತಂ ತದಾ;
ಅಞ್ಜಲಿಂ ಪಗ್ಗಹೇತ್ವಾನ, ರಂಸ್ಯಾ ಚಿತ್ತಂ ಪಸಾದಯಿಂ.
‘‘ದ್ವೇನವುತೇ ಇತೋ ಕಪ್ಪೇ, ಯಂ ಸಞ್ಞಮಲಭಿಂ ತದಾ;
ದುಗ್ಗತಿಂ ನಾಭಿಜಾನಾಮಿ, ರಂಸಿಸಞ್ಞಾಯಿದಂ ಫಲಂ.
‘‘ಪಟಿಸಮ್ಭಿದಾ ¶ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ರಂಸಿಸಞ್ಞಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ದುತಿಯರಂಸಿಸಞ್ಞಕತ್ಥೇರಸ್ಸಾಪದಾನಂ ಛಟ್ಠಂ.
೭. ಫಲದಾಯಕತ್ಥೇರಅಪದಾನಂ
‘‘ಪಬ್ಬತೇ ¶ ಹಿಮವನ್ತಮ್ಹಿ, ಖರಾಜಿನಧರೋ ಅಹಂ;
ಫುಸ್ಸಂ ಜಿನವರಂ ದಿಸ್ವಾ, ಫಲಹತ್ಥೋ ಫಲಂ ಅದಂ.
‘‘ಯಮಹಂ ಫಲಮದಾಸಿಂ, ವಿಪ್ಪಸನ್ನೇನ ಚೇತಸಾ;
ಭವೇ ನಿಬ್ಬತ್ತಮಾನಮ್ಹಿ, ಫಲಂ ನಿಬ್ಬತ್ತತೇ ಮಮ.
‘‘ದ್ವೇನವುತೇ ಇತೋ ಕಪ್ಪೇ, ಯಂ ಫಲಂ ಅದದಿಂ ಅಹಂ;
ದುಗ್ಗತಿಂ ನಾಭಿಜಾನಾಮಿ, ಫಲದಾನಸ್ಸಿದಂ ಫಲಂ.
‘‘ಪಟಿಸಮ್ಭಿದಾ ¶ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಫಲದಾಯಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಫಲದಾಯಕತ್ಥೇರಸ್ಸಾಪದಾನಂ ಸತ್ತಮಂ.
೮. ಸದ್ದಸಞ್ಞಕತ್ಥೇರಅಪದಾನಂ
‘‘ಪಬ್ಬತೇ ¶ ¶ ಹಿಮವನ್ತಮ್ಹಿ, ವಸಾಮಿ ಪಣ್ಣಸನ್ಥರೇ;
ಫುಸ್ಸಸ್ಸ ಧಮ್ಮಂ ಭಣತೋ, ಸದ್ದೇ ಚಿತ್ತಂ ಪಸಾದಯಿಂ.
‘‘ದ್ವೇನವುತೇ ಇತೋ ಕಪ್ಪೇ, ಯಂ ಕಮ್ಮಮಕರಿಂ ತದಾ;
ದುಗ್ಗತಿಂ ನಾಭಿಜಾನಾಮಿ, ಪುಞ್ಞಕಮ್ಮಸ್ಸಿದಂ ಫಲಂ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಸದ್ದಸಞ್ಞಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಸದ್ದಸಞ್ಞಕತ್ಥೇರಸ್ಸಾಪದಾನಂ ಅಟ್ಠಮಂ.
೯. ಬೋಧಿಸಿಞ್ಚಕತ್ಥೇರಅಪದಾನಂ
‘‘ವಿಪಸ್ಸಿಸ್ಸ ಭಗವತೋ, ಮಹಾಬೋಧಿಮಹೋ ಅಹು;
ಪಬ್ಬಜ್ಜುಪಗತೋ ಸನ್ತೋ, ಉಪಗಚ್ಛಿಂ ಅಹಂ ತದಾ.
‘‘ಕುಸುಮೋದಕಮಾದಾಯ ¶ , ಬೋಧಿಯಾ ಓಕಿರಿಂ ಅಹಂ;
ಮೋಚಯಿಸ್ಸತಿ ನೋ ಮುತ್ತೋ, ನಿಬ್ಬಾಪೇಸ್ಸತಿ ನಿಬ್ಬುತೋ.
‘‘ಏಕನವುತಿತೋ ಕಪ್ಪೇ, ಯಂ ಬೋಧಿಮಭಿಸಿಞ್ಚಯಿಂ;
ದುಗ್ಗತಿಂ ನಾಭಿಜಾನಾಮಿ, ಬೋಧಿಸಿಞ್ಚಾಯಿದಂ ಫಲಂ.
‘‘ತೇತ್ತಿಂಸೇ ¶ ವತ್ತಮಾನಮ್ಹಿ, ಕಪ್ಪೇ ಆಸುಂ ಜನಾಧಿಪಾ;
ಉದಕಸೇಚನಾ ನಾಮ, ಅಟ್ಠೇತೇ ಚಕ್ಕವತ್ತಿನೋ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಬೋಧಿಸಿಞ್ಚಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಬೋಧಿಸಿಞ್ಚಕತ್ಥೇರಸ್ಸಾಪದಾನಂ ನವಮಂ.
೧೦. ಪದುಮಪುಪ್ಫಿಯತ್ಥೇರಅಪದಾನಂ
‘‘ಪೋಕ್ಖರವನಂ ¶ ¶ ಪವಿಟ್ಠೋ, ಭಞ್ಜನ್ತೋ ಪದುಮಾನಿಹಂ;
ತತ್ಥದ್ದಸಂ ಫುಸ್ಸಂ ಬುದ್ಧಂ [ಅದ್ದಸಂ ಫುಸ್ಸಸಮ್ಬುದ್ಧಂ (ಸೀ. ಸ್ಯಾ.)], ಬಾತ್ತಿಂಸವರಲಕ್ಖಣಂ.
‘‘ಪದುಮಪುಪ್ಫಂ ಗಹೇತ್ವಾನ, ಆಕಾಸೇ ಉಕ್ಖಿಪಿಂ ಅಹಂ;
ಪಾಪಕಮ್ಮಂ ಸರಿತ್ವಾನ, ಪಬ್ಬಜಿಂ ಅನಗಾರಿಯಂ.
‘‘ಪಬ್ಬಜಿತ್ವಾನ ಕಾಯೇನ, ಮನಸಾ ಸಂವುತೇನ ಚ;
ವಚೀದುಚ್ಚರಿತಂ ಹಿತ್ವಾ, ಆಜೀವಂ ಪರಿಸೋಧಯಿಂ.
‘‘ದ್ವೇನವುತೇ ಇತೋ ಕಪ್ಪೇ, ಯಂ ಪುಪ್ಫಮಭಿರೋಪಯಿಂ;
ದುಗ್ಗತಿಂ ನಾಭಿಜಾನಾಮಿ, ಬುದ್ಧಪೂಜಾಯಿದಂ ಫಲಂ.
‘‘ಪದುಮಾಭಾಸನಾಮಾ ಚ, ಅಟ್ಠಾರಸ ಮಹೀಪತೀ;
ಅಟ್ಠಾರಸೇಸು ಕಪ್ಪೇಸು, ಅಟ್ಠತಾಲೀಸಮಾಸಿಸುಂ.
‘‘ಪಟಿಸಮ್ಭಿದಾ ¶ ¶ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಪದುಮಪುಪ್ಫಿಯೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ;
ಪದುಮಪುಪ್ಫಿಯತ್ಥೇರಸ್ಸಾಪದಾನಂ ದಸಮಂ.
ತಿಮಿರವಗ್ಗೋ ನವಮೋ.
ತಸ್ಸುದ್ದಾನಂ –
ತಿಮಿರನಙ್ಗಲೀಪುಪ್ಫ, ನಿಪ್ಪನ್ನಞ್ಜಲಿಕೋ ಅಧೋ;
ದ್ವೇ ರಂಸಿಸಞ್ಞೀ ಫಲದೋ, ಸದ್ದಸಞ್ಞೀ ಚ ಸೇಚಕೋ;
ಪದ್ಮಪುಪ್ಫೀ ಚ ಗಾಥಾಯೋ, ಛಪ್ಪಞ್ಞಾಸ ಪಕಿತ್ತಿತಾ.
೧೦. ಸುಧಾವಗ್ಗೋ
೧. ಸುಧಾಪಿಣ್ಡಿಯತ್ಥೇರಅಪದಾನಂ
‘‘ಪೂಜಾರಹೇ ¶ ¶ ¶ ಪೂಜಯತೋ, ಬುದ್ಧೇ ಯದಿ ವ ಸಾವಕೇ;
ಪಪಞ್ಚಸಮತಿಕ್ಕನ್ತೇ, ತಿಣ್ಣಸೋಕಪರಿದ್ದವೇ.
‘‘ತೇ ತಾದಿಸೇ ಪೂಜಯತೋ, ನಿಬ್ಬುತೇ ಅಕುತೋಭಯೇ;
ನ ಸಕ್ಕಾ ಪುಞ್ಞಂ ಸಙ್ಖಾತುಂ, ಇಮೇತ್ತಮಪಿ [ಇದಮ್ಮತ್ತನ್ತಿ (ಸೀ.), ಇಮೇತ್ಥಮಪಿ (ಕ.)] ಕೇನಚಿ.
‘‘ಚತುನ್ನಮಪಿ ದೀಪಾನಂ, ಇಸ್ಸರಂ ಯೋಧ ಕಾರಯೇ;
ಏಕಿಸ್ಸಾ ಪೂಜನಾಯೇತಂ, ಕಲಂ ನಾಗ್ಘತಿ ಸೋಳಸಿಂ.
‘‘ಸಿದ್ಧತ್ಥಸ್ಸ ¶ ನರಗ್ಗಸ್ಸ, ಚೇತಿಯೇ ಫಲಿತನ್ತರೇ;
ಸುಧಾಪಿಣ್ಡೋ ಮಯಾ ದಿನ್ನೋ, ವಿಪ್ಪಸನ್ನೇನ ಚೇತಸಾ.
‘‘ಚತುನ್ನವುತಿತೋ ಕಪ್ಪೇ, ಯಂ ಕಮ್ಮಮಕರಿಂ ತದಾ;
ದುಗ್ಗತಿಂ ನಾಭಿಜಾನಾಮಿ, ಪಟಿಸಙ್ಖಾರಸ್ಸಿದಂ ಫಲಂ.
‘‘ಇತೋ ತಿಂಸತಿಕಪ್ಪಮ್ಹಿ, ಪಟಿಸಙ್ಖಾರಸವ್ಹಯಾ;
ಸತ್ತರತನಸಮ್ಪನ್ನಾ, ತೇರಸ ಚಕ್ಕವತ್ತಿನೋ.
‘‘ಪಟಿಸಮ್ಭಿದಾ ಚತಸ್ಸೋ, ವಿಮೋಕ್ಖಾಪಿ ಚ ಅಟ್ಠಿಮೇ;
ಛಳಭಿಞ್ಞಾ ಸಚ್ಛಿಕತಾ, ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಸುಧಾಪಿಣ್ಡಿಯೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಸುಧಾಪಿಣ್ಡಿಯತ್ಥೇರಸ್ಸಾಪದಾನಂ ಪಠಮಂ.
೨. ಸುಚಿನ್ತಿಕತ್ಥೇರಅಪದಾನಂ
‘‘ತಿಸ್ಸಸ್ಸ ಲೋಕನಾಥಸ್ಸ, ಸುದ್ಧಪೀಠಮದಾಸಹಂ;
ಹಟ್ಠೋ ಹಟ್ಠೇನ ಚಿತ್ತೇನ, ಬುದ್ಧಸ್ಸಾದಿಚ್ಚಬನ್ಧುನೋ.
‘‘ಅಟ್ಠಾರಸೇ ¶ [ಅಟ್ಠತಿಂಸೇ (ಸೀ. ಸ್ಯಾ.)] ಇತೋ ಕಪ್ಪೇ, ರಾಜಾ ಆಸಿಂ ಮಹಾರುಚಿ;
ಭೋಗೋ ಚ ವಿಪುಲೋ ಆಸಿ, ಸಯನಞ್ಚ ಅನಪ್ಪಕಂ.
‘‘ಪೀಠಂ ¶ ಬುದ್ಧಸ್ಸ ದತ್ವಾನ, ವಿಪ್ಪಸನ್ನೇನ ಚೇತಸಾ;
ಅನುಭೋಮಿ ಸಕಂ ಕಮ್ಮಂ, ಪುಬ್ಬೇ ಸುಕತಮತ್ತನೋ.
‘‘ದ್ವೇನವುತೇ ¶ ಇತೋ ಕಪ್ಪೇ, ಯಂ ಪೀಠಮದದಿಂ ತದಾ;
ದುಗ್ಗತಿಂ ನಾಭಿಜಾನಾಮಿ, ಪೀಠದಾನಸ್ಸಿದಂ ಫಲಂ.
‘‘ಅಟ್ಠತಿಂಸೇ ಇತೋ ಕಪ್ಪೇ, ತಯೋ ತೇ ಚಕ್ಕವತ್ತಿನೋ;
ರುಚಿ ಉಪರುಚಿ ಚೇವ, ಮಹಾರುಚಿ ತತಿಯಕೋ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಸುಚಿನ್ತಿಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಸುಚಿನ್ತಿಕತ್ಥೇರಸ್ಸಾಪದಾನಂ ದುತಿಯಂ.
೩. ಅಡ್ಢಚೇಳಕತ್ಥೇರಅಪದಾನಂ
‘‘ತಿಸ್ಸಸ್ಸಾಹಂ ಭಗವತೋ, ಉಪಡ್ಢದುಸ್ಸಮದಾಸಹಂ;
ಪರಮಕಾಪಞ್ಞಪತ್ತೋಮ್ಹಿ [ಪರಮಕಾರುಞ್ಞಪತ್ತೋಮ್ಹಿ (ಸ್ಯಾ. ಕ.)], ದುಗ್ಗತೇನ [ದುಗ್ಗನ್ಧೇನ (ಸೀ.)] ಸಮಪ್ಪಿತೋ.
‘‘ಉಪಡ್ಢದುಸ್ಸಂ ದತ್ವಾನ, ಕಪ್ಪಂ ಸಗ್ಗಮ್ಹಿ ಮೋದಹಂ;
ಅವಸೇಸೇಸು ಕಪ್ಪೇಸು, ಕುಸಲಂ ಕಾರಿತಂ ಮಯಾ.
‘‘ದ್ವೇನವುತೇ ¶ ಇತೋ ಕಪ್ಪೇ, ಯಂ ದುಸ್ಸಮದದಿಂ ತದಾ;
ದುಗ್ಗತಿಂ ನಾಭಿಜಾನಾಮಿ, ದುಸ್ಸದಾನಸ್ಸಿದಂ ಫಲಂ.
‘‘ಏಕೂನಪಞ್ಞಾಸಕಪ್ಪಮ್ಹಿ [ಏಕಪಞ್ಞಾಸಕಪ್ಪಮ್ಹಿ (ಸ್ಯಾ.)], ರಾಜಾನೋ ಚಕ್ಕವತ್ತಿನೋ;
ಸಮನ್ತಚ್ಛದನಾ ನಾಮ, ಬಾತ್ತಿಂಸಾಸುಂ [ಖತ್ತಿಯಾಸುಂ (ಸ್ಯಾ. ಕ.)] ಜನಾಧಿಪಾ.
‘‘ಪಟಿಸಮ್ಭಿದಾ ¶ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಅಡ್ಢಚೇಳಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಅಡ್ಢಚೇಳಕತ್ಥೇರಸ್ಸಾಪದಾನಂ ತತಿಯಂ.
೪. ಸೂಚಿದಾಯಕತ್ಥೇರಅಪದಾನಂ
‘‘ಕಮ್ಮಾರೋಹಂ ¶ ¶ ಪುರೇ ಆಸಿಂ, ಬನ್ಧುಮಾಯಂ ಪುರುತ್ತಮೇ;
ಸೂಚಿದಾನಂ ಮಯಾ ದಿನ್ನಂ, ವಿಪಸ್ಸಿಸ್ಸ ಮಹೇಸಿನೋ.
‘‘ವಜಿರಗ್ಗಸಮಂ ಞಾಣಂ, ಹೋತಿ ಕಮ್ಮೇನ ತಾದಿಸಂ;
ವಿರಾಗೋಮ್ಹಿ ವಿಮುತ್ತೋಮ್ಹಿ [ವಿಭವೋಮ್ಹಿ ವಿಭತ್ತೋಮ್ಹಿ (ಕ.)], ಪತ್ತೋಮ್ಹಿ ಆಸವಕ್ಖಯಂ.
‘‘ಅತೀತೇ ¶ ಚ ಭವೇ ಸಬ್ಬೇ, ವತ್ತಮಾನೇ ಚನಾಗತೇ [ಅತೀತಾ ಚ ಭವಾ ಸಬ್ಬೇ, ವತ್ತಮಾನಾ ಚ’ನಾಗತಾ (ಸ್ಯಾ. ಕ.)];
ಞಾಣೇನ ವಿಚಿನಿಂ ಸಬ್ಬಂ, ಸೂಚಿದಾನಸ್ಸಿದಂ ಫಲಂ.
‘‘ಏಕನವುತಿತೋ ಕಪ್ಪೇ, ಸತ್ತಾಸುಂ ವಜಿರವ್ಹಯಾ;
ಸತ್ತರತನಸಮ್ಪನ್ನಾ, ಚಕ್ಕವತ್ತೀ ಮಹಬ್ಬಲಾ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಸೂಚಿದಾಯಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಸೂಚಿದಾಯಕತ್ಥೇರಸ್ಸಾಪದಾನಂ ಚತುತ್ಥಂ.
೫. ಗನ್ಧಮಾಲಿಯತ್ಥೇರಅಪದಾನಂ
‘‘ಸಿದ್ಧತ್ಥಸ್ಸ ¶ ಭಗವತೋ, ಗನ್ಧಥೂಪಂ ಅಕಾಸಹಂ;
ಸುಮನೇಹಿ ಪಟಿಚ್ಛನ್ನಂ, ಬುದ್ಧಾನುಚ್ಛವಿಕಂ ಕತಂ.
‘‘ಕಞ್ಚನಗ್ಘಿಯಸಙ್ಕಾಸಂ, ಬುದ್ಧಂ ಲೋಕಗ್ಗನಾಯಕಂ;
ಇನ್ದೀವರಂವ ಜಲಿತಂ, ಆದಿತ್ತಂವ ಹುತಾಸನಂ.
‘‘ಬ್ಯಗ್ಘೂಸಭಂವ ಪವರಂ, ಅಭಿಜಾತಂವ ಕೇಸರಿಂ;
ನಿಸಿನ್ನಂ ಸಮಣಾನಗ್ಗಂ, ಭಿಕ್ಖುಸಙ್ಘಪುರಕ್ಖತಂ.
‘‘ವನ್ದಿತ್ವಾ ಸತ್ಥುನೋ ಪಾದೇ, ಪಕ್ಕಾಮಿಂ ಉತ್ತರಾಮುಖೋ;
ಚತುನ್ನವುತಿತೋ ಕಪ್ಪೇ, ಗನ್ಧಮಾಲಂ ಯತೋ ಅದಂ.
‘‘ಬುದ್ಧೇ ಕತಸ್ಸ ಕಾರಸ್ಸ, ಫಲೇನಾಹಂ ವಿಸೇಸತೋ;
ದುಗ್ಗತಿಂ ನಾಭಿಜಾನಾಮಿ, ಬುದ್ಧಪೂಜಾಯಿದಂ ಫಲಂ.
‘‘ಚತ್ತಾರೀಸಮ್ಹಿ ಏಕೂನೇ, ಕಪ್ಪೇ ಆಸಿಂಸು ಸೋಳಸ;
ದೇವಗನ್ಧಸನಾಮಾ ತೇ, ರಾಜಾನೋ ಚಕ್ಕವತ್ತಿನೋ.
‘‘ಪಟಿಸಮ್ಭಿದಾ ¶ ¶ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಗನ್ಧಮಾಲಿಯೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಗನ್ಧಮಾಲಿಯತ್ಥೇರಸ್ಸಾಪದಾನಂ ಪಞ್ಚಮಂ.
೬. ತಿಪುಪ್ಫಿಯತ್ಥೇರಅಪದಾನಂ
‘‘ಮಿಗಲುದ್ದೋ ¶ ¶ ಪುರೇ ಆಸಿಂ, ಅರಞ್ಞೇ ಕಾನನೇ ಅಹಂ [ಬ್ರಹಾ (ಸ್ಯಾ.)];
ಪಾಟಲಿಂ ಹರಿತಂ ದಿಸ್ವಾ, ತೀಣಿ ಪುಪ್ಫಾನಿ ಓಕಿರಿಂ.
‘‘ಪತಿತಪತ್ತಾನಿ [ಸತ್ತಪತ್ತಾನಿ (ಸೀ.), ಸತಪತ್ತಾನಿ (ಕ.), ಸುಕ್ಖಪಣ್ಣಾನಿ (ಸ್ಯಾ.)] ಗಣ್ಹಿತ್ವಾ, ಬಹಿ ಛಡ್ಡೇಸಹಂ ತದಾ;
ಅನ್ತೋಸುದ್ಧಂ ಬಹಿಸುದ್ಧಂ, ಸುವಿಮುತ್ತಂ ಅನಾಸವಂ.
‘‘ಸಮ್ಮುಖಾ ವಿಯ ಸಮ್ಬುದ್ಧಂ, ವಿಪಸ್ಸಿಂ ಲೋಕನಾಯಕಂ;
ಪಾಟಲಿಂ ಅಭಿವಾದೇತ್ವಾ, ತತ್ಥ ಕಾಲಙ್ಕತೋ ಅಹಂ.
‘‘ಏಕನವುತಿತೋ ಕಪ್ಪೇ, ಯಂ ಬೋಧಿಮಭಿಪೂಜಯಿಂ;
ದುಗ್ಗತಿಂ ನಾಭಿಜಾನಾಮಿ, ಬೋಧಿಪೂಜಾಯಿದಂ ಫಲಂ.
‘‘ಸಮನ್ತಪಾಸಾದಿಕಾ ನಾಮ, ತೇರಸಾಸಿಂಸು ರಾಜಿನೋ;
ಇತೋ ತೇತ್ತಿಂಸಕಪ್ಪಮ್ಹಿ [ತಿಂಸತಿಕಪ್ಪಮ್ಹಿ (ಸ್ಯಾ.)], ಚಕ್ಕವತ್ತೀ ಮಹಬ್ಬಲಾ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ತಿಪುಪ್ಫಿಯೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ತಿಪುಪ್ಫಿಯತ್ಥೇರಸ್ಸಾಪದಾನಂ ಛಟ್ಠಂ.
೭. ಮಧುಪಿಣ್ಡಿಕತ್ಥೇರಅಪದಾನಂ
‘‘ವಿಪಿನೇ ¶ [ವಿವನೇ (ಸ್ಯಾ. ಅಟ್ಠ.)] ಕಾನನೇ ದಿಸ್ವಾ, ಅಪ್ಪಸದ್ದೇ ನಿರಾಕುಲೇ;
ಸಿದ್ಧತ್ಥಂ ಇಸಿನಂ ಸೇಟ್ಠಂ, ಆಹುತೀನಂ ಪಟಿಗ್ಗಹಂ.
‘‘ನಿಬ್ಬುತತ್ತಂ ¶ [ನಿಬ್ಬುತಗ್ಗಂ (ಕ.), ನಿಬ್ಬೂತಿಕಂ (ಸ್ಯಾ.)] ಮಹಾನಾಗಂ, ನಿಸಭಾಜಾನಿಯಂ ಯಥಾ;
ಓಸಧಿಂವ ವಿರೋಚನ್ತಂ, ದೇವಸಙ್ಘನಮಸ್ಸಿತಂ.
‘‘ವಿತ್ತಿ ಮಮಾಹು ತಾವದೇ [ವಿತ್ತಿ ಮೇ ಪಾಹುನಾ ತಾವ (ಸೀ. ಸ್ಯಾ.)], ಞಾಣಂ ಉಪ್ಪಜ್ಜಿ ತಾವದೇ;
ವುಟ್ಠಿತಸ್ಸ ಸಮಾಧಿಮ್ಹಾ, ಮಧುಂ ದತ್ವಾನ ಸತ್ಥುನೋ.
‘‘ವನ್ದಿತ್ವಾ ¶ ಸತ್ಥುನೋ ಪಾದೇ, ಪಕ್ಕಾಮಿಂ ಪಾಚಿನಾಮುಖೋ;
ಚತುತ್ತಿಂಸಮ್ಹಿ ಕಪ್ಪಮ್ಹಿ, ರಾಜಾ ಆಸಿಂ ಸುದಸ್ಸನೋ.
‘‘ಮಧು ಭಿಸೇಹಿ ಸವತಿ, ಭೋಜನಮ್ಹಿ ಚ ತಾವದೇ;
ಮಧುವಸ್ಸಂ ಪವಸ್ಸಿತ್ಥ, ಪುಬ್ಬಕಮ್ಮಸ್ಸಿದಂ ಫಲಂ.
‘‘ಚತುನ್ನವುತಿತೋ ¶ ಕಪ್ಪೇ, ಯಂ ಮಧುಂ ಅದದಿಂ ತದಾ;
ದುಗ್ಗತಿಂ ನಾಭಿಜಾನಾಮಿ, ಮಧುದಾನಸ್ಸಿದಂ ಫಲಂ.
‘‘ಚತುತ್ತಿಂಸೇ ಇತೋ ಕಪ್ಪೇ, ಚತ್ತಾರೋ ತೇ ಸುದಸ್ಸನಾ;
ಸತ್ತರತನಸಮ್ಪನ್ನಾ, ಚಕ್ಕವತ್ತೀ ಮಹಬ್ಬಲಾ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ¶ ಸುದಂ ಆಯಸ್ಮಾ ಮಧುಪಿಣ್ಡಿಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಮಧುಪಿಣ್ಡಿಕತ್ಥೇರಸ್ಸಾಪದಾನಂ ಸತ್ತಮಂ.
೮. ಸೇನಾಸನದಾಯಕತ್ಥೇರಅಪದಾನಂ
‘‘ಸಿದ್ಧತ್ಥಸ್ಸ ಭಗವತೋ, ಅದಾಸಿಂ ಪಣ್ಣಸನ್ಥರಂ;
ಸಮನ್ತಾ ಉಪಹಾರಞ್ಚ, ಕುಸುಮಂ ಓಕಿರಿಂ ಅಹಂ.
‘‘ಪಾಸಾದೇವಂ ಗುಣಂ ರಮ್ಮಂ [ಪಾಸಾದೇ ಚ ಗುಹಂ ರಮ್ಮಂ (ಸ್ಯಾ.)], ಅನುಭೋಮಿ ಮಹಾರಹಂ;
ಮಹಗ್ಘಾನಿ ಚ ಪುಪ್ಫಾನಿ, ಸಯನೇಭಿಸವನ್ತಿ ಮೇ.
‘‘ಸಯನೇಹಂ ತುವಟ್ಟಾಮಿ, ವಿಚಿತ್ತೇ ಪುಪ್ಫಸನ್ಥತೇ;
ಪುಪ್ಫವುಟ್ಠಿ ಚ ಸಯನೇ, ಅಭಿವಸ್ಸತಿ ತಾವದೇ.
‘‘ಚತುನ್ನವುತಿತೋ ¶ ಕಪ್ಪೇ, ಅದಾಸಿಂ ಪಣ್ಣಸನ್ಥರಂ;
ದುಗ್ಗತಿಂ ನಾಭಿಜಾನಾಮಿ, ಸನ್ಥರಸ್ಸ ಇದಂ ಫಲಂ.
‘‘ತಿಣಸನ್ಥರಕಾ ನಾಮ, ಸತ್ತೇತೇ ಚಕ್ಕವತ್ತಿನೋ;
ಇತೋ ತೇ ಪಞ್ಚಮೇ ಕಪ್ಪೇ, ಉಪ್ಪಜ್ಜಿಂಸು ಜನಾಧಿಪಾ.
‘‘ಪಟಿಸಮ್ಭಿದಾ ¶ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಸೇನಾಸನದಾಯಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಸೇನಾಸನದಾಯಕತ್ಥೇರಸ್ಸಾಪದಾನಂ ಅಟ್ಠಮಂ.
೯. ವೇಯ್ಯಾವಚ್ಚಕತ್ಥೇರಅಪದಾನಂ
‘‘ವಿಪಸ್ಸಿಸ್ಸ ¶ ¶ ಭಗವತೋ, ಮಹಾಪೂಗಗಣೋ ಅಹು;
ವೇಯ್ಯಾವಚ್ಚಕರೋ ಆಸಿಂ, ಸಬ್ಬಕಿಚ್ಚೇಸು ವಾವಟೋ [ಬ್ಯಾವಟೋ (ಸೀ. ಸ್ಯಾ.)].
‘‘ದೇಯ್ಯಧಮ್ಮೋ ಚ ಮೇ ನತ್ಥಿ, ಸುಗತಸ್ಸ ಮಹೇಸಿನೋ;
ಅವನ್ದಿಂ ಸತ್ಥುನೋ ಪಾದೇ, ವಿಪ್ಪಸನ್ನೇನ ಚೇತಸಾ.
‘‘ಏಕನವುತಿತೋ ಕಪ್ಪೇ, ವೇಯ್ಯಾವಚ್ಚಂ ಅಕಾಸಹಂ;
ದುಗ್ಗತಿಂ ನಾಭಿಜಾನಾಮಿ, ವೇಯ್ಯಾವಚ್ಚಸ್ಸಿದಂ ಫಲಂ.
‘‘ಇತೋ ಚ ಅಟ್ಠಮೇ ಕಪ್ಪೇ, ರಾಜಾ ಆಸಿಂ ಸುಚಿನ್ತಿತೋ;
ಸತ್ತರತನಸಮ್ಪನ್ನೋ, ಚಕ್ಕವತ್ತೀ ಮಹಬ್ಬಲೋ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ವೇಯ್ಯಾವಚ್ಚಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ವೇಯ್ಯಾವಚ್ಚಕತ್ಥೇರಸ್ಸಾಪದಾನಂ ನವಮಂ.
೧೦. ಬುದ್ಧುಪಟ್ಠಾಕತ್ಥೇರಅಪದಾನಂ
‘‘ವಿಪಸ್ಸಿಸ್ಸ ಭಗವತೋ, ಅಹೋಸಿಂ ಸಙ್ಖಧಮ್ಮಕೋ;
ನಿಚ್ಚುಪಟ್ಠಾನಯುತ್ತೋಮ್ಹಿ, ಸುಗತಸ್ಸ ಮಹೇಸಿನೋ.
‘‘ಉಪಟ್ಠಾನಫಲಂ ¶ ¶ ಪಸ್ಸ, ಲೋಕನಾಥಸ್ಸ ತಾದಿನೋ;
ಸಟ್ಠಿತೂರಿಯಸಹಸ್ಸಾನಿ, ಪರಿವಾರೇನ್ತಿ ಮಂ ಸದಾ.
‘‘ಏಕನವುತಿತೋ ¶ ಕಪ್ಪೇ, ಉಪಟ್ಠಹಿಂ ಮಹಾಇಸಿಂ;
ದುಗ್ಗತಿಂ ನಾಭಿಜಾನಾಮಿ, ಉಪಟ್ಠಾನಸ್ಸಿದಂ ಫಲಂ.
‘‘ಚತುವೀಸೇ [ಚತುನವುತೇ (ಸ್ಯಾ.)] ಇತೋ ಕಪ್ಪೇ, ಮಹಾನಿಗ್ಘೋಸನಾಮಕಾ;
ಸೋಳಸಾಸಿಂಸು ರಾಜಾನೋ, ಚಕ್ಕವತ್ತೀ ಮಹಬ್ಬಲಾ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಬುದ್ಧುಪಟ್ಠಾಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಬುದ್ಧುಪಟ್ಠಾಕತ್ಥೇರಸ್ಸಾಪದಾನಂ ದಸಮಂ.
ಸುಧಾವಗ್ಗೋ ದಸಮೋ.
ತಸ್ಸುದ್ದಾನಂ –
ಸುಧಾ ¶ ಸುಚಿನ್ತಿ ಚೇಳಞ್ಚ, ಸೂಚೀ ಚ ಗನ್ಧಮಾಲಿಯೋ;
ತಿಪುಪ್ಫಿಯೋ ಮಧುಸೇನಾ, ವೇಯ್ಯಾವಚ್ಚೋ ಚುಪಟ್ಠಕೋ;
ಸಮಸಟ್ಠಿ ಚ ಗಾಥಾಯೋ, ಅಸ್ಮಿಂ ವಗ್ಗೇ ಪಕಿತ್ತಿತಾ.
ಅಥ ವಗ್ಗುದ್ದಾನಂ –
ಬುದ್ಧವಗ್ಗೋ ಹಿ ಪಠಮೋ, ಸೀಹಾಸನಿ ಸುಭೂತಿ ಚ;
ಕುಣ್ಡಧಾನೋ ಉಪಾಲಿ ಚ, ಬೀಜನಿಸಕಚಿನ್ತಿ ಚ.
ನಾಗಸಮಾಲೋ ¶ ತಿಮಿರೋ, ಸುಧಾವಗ್ಗೇನ ತೇ ದಸ;
ಚತುದ್ದಸಸತಾ ಗಾಥಾ, ಪಞ್ಚಪಞ್ಞಾಸಮೇವ ಚ.
ಬುದ್ಧವಗ್ಗದಸಕಂ.
ಪಠಮಸತಕಂ ಸಮತ್ತಂ.
೧೧. ಭಿಕ್ಖದಾಯಿವಗ್ಗೋ
೧. ಭಿಕ್ಖದಾಯಕತ್ಥೇರಅಪದಾನಂ
‘‘ಸುವಣ್ಣವಣ್ಣಂ ¶ ¶ ¶ ಸಮ್ಬುದ್ಧಂ, ಆಹುತೀನಂ ಪಟಿಗ್ಗಹಂ;
ಪವರಾ [ಪವನಾ (ಸ್ಯಾ.)] ಅಭಿನಿಕ್ಖನ್ತಂ, ವನಾ ನಿಬ್ಬನಮಾಗತಂ [ವಾನಾ ನಿಬ್ಬಾನಮಾಗತಂ (ಸ್ಯಾ.)].
‘‘ಕಟಚ್ಛುಭಿಕ್ಖಂ ಪಾದಾಸಿಂ, ಸಿದ್ಧತ್ಥಸ್ಸ ಮಹೇಸಿನೋ;
ಪಞ್ಞಾಯ ಉಪಸನ್ತಸ್ಸ, ಮಹಾವೀರಸ್ಸ ತಾದಿನೋ.
‘‘ಪದೇನಾನುಪದಾಯನ್ತಂ [ಪದೇನಾನುಪದಾಯನ್ತೋ (ಸೀ. ಸ್ಯಾ.)], ನಿಬ್ಬಾಪೇನ್ತೇ ಮಹಾಜನಂ;
ಉಳಾರಾ ವಿತ್ತಿ ಮೇ ಜಾತಾ, ಬುದ್ಧೇ ಆದಿಚ್ಚಬನ್ಧುನೇ [ವಿತ್ತಿ ಮೇ ಪಾಹುನಾ ತಾವ, ಬುದ್ಧಸ್ಸಾದಿಚ್ಚಬನ್ಧುನೋ (ಸ್ಯಾ.)].
‘‘ಚತುನ್ನವುತಿತೋ ಕಪ್ಪೇ, ಯಂ ದಾನಮದದಿಂ ತದಾ;
ದುಗ್ಗತಿಂ ನಾಭಿಜಾನಾಮಿ, ಭಿಕ್ಖಾದಾನಸ್ಸಿದಂ ಫಲಂ.
‘‘ಸತ್ತಾಸೀತಿಮ್ಹಿತೋ ಕಪ್ಪೇ, ಮಹಾರೇಣು ಸನಾಮಕಾ;
ಸತ್ತರತನಸಮ್ಪನ್ನಾ, ಸತ್ತೇತೇ ಚಕ್ಕವತ್ತಿನೋ.
‘‘ಪಟಿಸಮ್ಭಿದಾ ಚತಸ್ಸೋ, ವಿಮೋಕ್ಖಾಪಿ ಚ ಅಟ್ಠಿಮೇ;
ಛಳಭಿಞ್ಞಾ ಸಚ್ಛಿಕತಾ, ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ¶ ಸುದಂ ಆಯಸ್ಮಾ ಭಿಕ್ಖದಾಯಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಭಿಕ್ಖದಾಯಕತ್ಥೇರಸ್ಸಾಪದಾನಂ ಪಠಮಂ.
೨. ಞಾಣಸಞ್ಞಿಕತ್ಥೇರಅಪದಾನಂ
‘‘ಸುವಣ್ಣವಣ್ಣಂ ಸಮ್ಬುದ್ಧಂ, ನಿಸಭಾಜಾನಿಯಂ ಯಥಾ;
ತಿಧಾಪಭಿನ್ನಂ ಮಾತಙ್ಗಂ, ಕುಞ್ಜರಂವ ಮಹೇಸಿನಂ.
‘‘ಓಭಾಸೇನ್ತಂ ದಿಸಾ ಸಬ್ಬಾ, ಉಳುರಾಜಂವ ಪೂರಿತಂ;
ರಥಿಯಂ ಪಟಿಪಜ್ಜನ್ತಂ, ಲೋಕಜೇಟ್ಠಂ ಅಪಸ್ಸಹಂ.
‘‘ಞಾಣೇ ¶ ¶ ಚಿತ್ತಂ ಪಸಾದೇತ್ವಾ, ಪಗ್ಗಹೇತ್ವಾನ ಅಞ್ಜಲಿಂ;
ಪಸನ್ನಚಿತ್ತೋ ಸುಮನೋ, ಸಿದ್ಧತ್ಥಮಭಿವಾದಯಿಂ.
‘‘ಚತುನ್ನವುತಿತೋ ಕಪ್ಪೇ, ಯಂ ಕಮ್ಮಮಕರಿಂ ತದಾ;
ದುಗ್ಗತಿಂ ನಾಭಿಜಾನಾಮಿ, ಞಾಣಸಞ್ಞಾಯಿದಂ ಫಲಂ.
‘‘ತೇಸತ್ತತಿಮ್ಹಿತೋ ಕಪ್ಪೇ, ಸೋಳಸಾಸುಂ ನರುತ್ತಮಾ;
ಸತ್ತರತನಸಮ್ಪನ್ನಾ, ಚಕ್ಕವತ್ತೀ ಮಹಬ್ಬಲಾ.
‘‘ಪಟಿಸಮ್ಭಿದಾ ¶ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಞಾಣಸಞ್ಞಿಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಞಾಣಸಞ್ಞಿಕತ್ಥೇರಸ್ಸಾಪದಾನಂ ದುತಿಯಂ.
೩. ಉಪ್ಪಲಹತ್ಥಿಯತ್ಥೇರಅಪದಾನಂ
‘‘ತಿವರಾಯಂ ¶ ನಿವಾಸೀಹಂ, ಅಹೋಸಿಂ ಮಾಲಿಕೋ ತದಾ;
ಅದ್ದಸಂ ವಿರಜಂ ಬುದ್ಧಂ, ಸಿದ್ಧತ್ಥಂ ಲೋಕಪೂಜಿತಂ [ಲೋಕನಾಯಕಂ (ಸೀ.)].
‘‘ಪಸನ್ನಚಿತ್ತೋ ಸುಮನೋ, ಪುಪ್ಫಹತ್ಥಮದಾಸಹಂ;
ಯತ್ಥ ಯತ್ಥುಪಪಜ್ಜಾಮಿ, ತಸ್ಸ ಕಮ್ಮಸ್ಸ ವಾಹಸಾ.
‘‘ಅನುಭೋಮಿ ಫಲಂ ಇಟ್ಠಂ, ಪುಬ್ಬೇ ಸುಕತಮತ್ತನೋ;
ಪರಿಕ್ಖಿತ್ತೋ ಸುಮಲ್ಲೇಹಿ, ಪುಪ್ಫದಾನಸ್ಸಿದಂ ಫಲಂ.
‘‘ಚತುನ್ನವುತಿತೋ ಕಪ್ಪೇ, ಯಂ ಪುಪ್ಫಮಭಿರೋಪಯಿಂ;
ದುಗ್ಗತಿಂ ನಾಭಿಜಾನಾಮಿ, ಪುಪ್ಫಪೂಜಾಯಿದಂ [ಬುದ್ಧಪೂಜಾಯಿದಂ (ಸೀ.)] ಫಲಂ.
‘‘ಚತುನ್ನವುತುಪಾದಾಯ, ಠಪೇತ್ವಾ ವತ್ತಮಾನಕಂ;
ಪಞ್ಚರಾಜಸತಾ ತತ್ಥ, ನಜ್ಜಸಮಸನಾಮಕಾ [ನಜ್ಜುಪಮಸನಾಮಕಾ (ಸೀ. ಸ್ಯಾ.)].
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಉಪ್ಪಲಹತ್ಥಿಯೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಉಪ್ಪಲಹತ್ಥಿಯತ್ಥೇರಸ್ಸಾಪದಾನಂ ತತಿಯಂ.
೪. ಪದಪೂಜಕತ್ಥೇರಅಪದಾನಂ
‘‘ಸಿದ್ಧತ್ಥಸ್ಸ ¶ ¶ ಭಗವತೋ, ಜಾತಿಪುಪ್ಫಮದಾಸಹಂ;
ಪಾದೇಸು ಸತ್ತ ಪುಪ್ಫಾನಿ, ಹಾಸೇನೋಕಿರಿತಾನಿ ಮೇ.
‘‘ತೇನ ¶ ಕಮ್ಮೇನಹಂ ಅಜ್ಜ, ಅಭಿಭೋಮಿ ನರಾಮರೇ;
ಧಾರೇಮಿ ಅನ್ತಿಮಂ ದೇಹಂ, ಸಮ್ಮಾಸಮ್ಬುದ್ಧಸಾಸನೇ.
‘‘ಚತುನ್ನವುತಿತೋ ¶ ಕಪ್ಪೇ, ಯಂ ಪುಪ್ಫಮಭಿರೋಪಯಿಂ;
ದುಗ್ಗತಿಂ ನಾಭಿಜಾನಾಮಿ, ಪುಪ್ಫಪೂಜಾಯಿದಂ ಫಲಂ.
‘‘ಸಮನ್ತಗನ್ಧನಾಮಾಸುಂ, ತೇರಸ ಚಕ್ಕವತ್ತಿನೋ;
ಇತೋ ಪಞ್ಚಮಕೇ ಕಪ್ಪೇ, ಚಾತುರನ್ತಾ ಜನಾಧಿಪಾ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಪದಪೂಜಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಪದಪೂಜಕತ್ಥೇರಸ್ಸಾಪದಾನಂ ಚತುತ್ಥಂ.
೫. ಮುಟ್ಠಿಪುಪ್ಫಿಯತ್ಥೇರಅಪದಾನಂ
‘‘ಸುದಸ್ಸನೋತಿ ನಾಮೇನ, ಮಾಲಾಕಾರೋ ಅಹಂ ತದಾ;
ಅದ್ದಸಂ ವಿರಜಂ ಬುದ್ಧಂ, ಲೋಕಜೇಟ್ಠಂ ನರಾಸಭಂ.
‘‘ಜಾತಿಪುಪ್ಫಂ ಗಹೇತ್ವಾನ, ಪೂಜಯಿಂ ಪದುಮುತ್ತರಂ;
ವಿಸುದ್ಧಚಕ್ಖು ಸುಮನೋ, ದಿಬ್ಬಚಕ್ಖುಂ ಸಮಜ್ಝಗಂ.
‘‘ಏತಿಸ್ಸಾ ಪುಪ್ಫಪೂಜಾಯ, ಚಿತ್ತಸ್ಸ ಪಣಿಧೀಹಿ ಚ;
ಕಪ್ಪಾನಂ ಸತಸಹಸ್ಸಂ, ದುಗ್ಗತಿಂ ನುಪಪಜ್ಜಹಂ.
‘‘ಸೋಳಸಾಸಿಂಸು ¶ ರಾಜಾನೋ, ದೇವುತ್ತರಸನಾಮಕಾ;
ಛತ್ತಿಂಸಮ್ಹಿ ಇತೋ ಕಪ್ಪೇ, ಚಕ್ಕವತ್ತೀ ಮಹಬ್ಬಲಾ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಮುಟ್ಠಿಪುಪ್ಫಿಯೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಮುಟ್ಠಿಪುಪ್ಫಿಯತ್ಥೇರಸ್ಸಾಪದಾನಂ ಪಞ್ಚಮಂ.
೬. ಉದಕಪೂಜಕತ್ಥೇರಅಪದಾನಂ
‘‘ಸುವಣ್ಣವಣ್ಣಂ ¶ ¶ ಸಮ್ಬುದ್ಧಂ, ಗಚ್ಛನ್ತಂ ಅನಿಲಞ್ಜಸೇ;
ಘತಾಸನಂವ ಜಲಿತಂ, ಆದಿತ್ತಂವ ಹುತಾಸನಂ.
‘‘ಪಾಣಿನಾ ಉದಕಂ ಗಯ್ಹ, ಆಕಾಸೇ ಉಕ್ಖಿಪಿಂ ಅಹಂ;
ಸಮ್ಪಟಿಚ್ಛಿ ಮಹಾವೀರೋ, ಬುದ್ಧೋ ಕಾರುಣಿಕೋ ಇಸಿ [ಮಯಿ (ಸ್ಯಾ.)].
‘‘ಅನ್ತಲಿಕ್ಖೇ ¶ ಠಿತೋ ಸತ್ಥಾ, ಪದುಮುತ್ತರನಾಮಕೋ;
ಮಮ ಸಙ್ಕಪ್ಪಮಞ್ಞಾಯ, ಇಮಂ ಗಾಥಂ ಅಭಾಸಥ.
‘‘‘ಇಮಿನಾ ದಕದಾನೇನ, ಪೀತಿಉಪ್ಪಾದನೇನ ಚ;
ಕಪ್ಪಸತಸಹಸ್ಸಮ್ಪಿ, ದುಗ್ಗತಿಂ ನುಪಪಜ್ಜತಿ’ [ನುಪಪಜ್ಜಸಿ (ಕ.)].
‘‘ತೇನ ಕಮ್ಮೇನ ದ್ವಿಪದಿನ್ದ, ಲೋಕಜೇಟ್ಠ ನರಾಸಭ;
ಪತ್ತೋಮ್ಹಿ ಅಚಲಂ ಠಾನಂ, ಹಿತ್ವಾ ಜಯಪರಾಜಯಂ.
‘‘ಸಹಸ್ಸರಾಜನಾಮೇನ ¶ , ತಯೋ ತೇ ಚಕ್ಕವತ್ತಿನೋ;
ಪಞ್ಚಸಟ್ಠಿಕಪ್ಪಸತೇ, ಚಾತುರನ್ತಾ ಜನಾಧಿಪಾ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಉದಕಪೂಜಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಉದಕಪೂಜಕತ್ಥೇರಸ್ಸಾಪದಾನಂ ಛಟ್ಠಂ.
೭. ನಳಮಾಲಿಯತ್ಥೇರಅಪದಾನಂ
‘‘ಪದುಮುತ್ತರಬುದ್ಧಸ್ಸ, ಲೋಕಜೇಟ್ಠಸ್ಸ ತಾದಿನೋ;
ತಿಣತ್ಥರೇ ನಿಸಿನ್ನಸ್ಸ, ಉಪಸನ್ತಸ್ಸ ತಾದಿನೋ.
‘‘ನಳಮಾಲಂ ಗಹೇತ್ವಾನ, ಬನ್ಧಿತ್ವಾ [ಬೀಜಿತ್ವಾ (ಕ.)] ಬೀಜನಿಂ ಅಹಂ;
ಬುದ್ಧಸ್ಸ ಉಪನಾಮೇಸಿಂ, ದ್ವಿಪದಿನ್ದಸ್ಸ ತಾದಿನೋ.
‘‘ಪಟಿಗ್ಗಹೇತ್ವಾ ಸಬ್ಬಞ್ಞೂ, ಬೀಜನಿಂ ಲೋಕನಾಯಕೋ;
ಮಮ ಸಙ್ಕಪ್ಪಮಞ್ಞಾಯ, ಇಮಂ ಗಾಥಂ ಅಭಾಸಥ.
‘‘‘ಯಥಾ ¶ ಮೇ ಕಾಯೋ ನಿಬ್ಬಾತಿ, ಪರಿಳಾಹೋ ನ ವಿಜ್ಜತಿ;
ತಥೇವ ತಿವಿಧಗ್ಗೀಹಿ, ಚಿತ್ತಂ ತವ ವಿಮುಚ್ಚತು’.
‘‘ಸಬ್ಬೇ ¶ ದೇವಾ ಸಮಾಗಚ್ಛುಂ, ಯೇ ಕೇಚಿ ವನನಿಸ್ಸಿತಾ;
ಸೋಸ್ಸಾಮ ಬುದ್ಧವಚನಂ, ಹಾಸಯನ್ತಞ್ಚ ದಾಯಕಂ.
‘‘ನಿಸಿನ್ನೋ ¶ ಭಗವಾ ತತ್ಥ, ದೇವಸಙ್ಘಪುರಕ್ಖತೋ;
ದಾಯಕಂ ಸಮ್ಪಹಂಸೇನ್ತೋ, ಇಮಾ ಗಾಥಾ ಅಭಾಸಥ.
‘‘‘ಇಮಿನಾ ಬೀಜನಿದಾನೇನ, ಚಿತ್ತಸ್ಸ ಪಣಿಧೀಹಿ ಚ;
ಸುಬ್ಬತೋ ನಾಮ ನಾಮೇನ, ಚಕ್ಕವತ್ತೀ ಭವಿಸ್ಸತಿ.
‘‘‘ತೇನ ¶ ಕಮ್ಮಾವಸೇಸೇನ, ಸುಕ್ಕಮೂಲೇನ ಚೋದಿತೋ;
ಮಾಲುತೋ ನಾಮ ನಾಮೇನ, ಚಕ್ಕವತ್ತೀ ಭವಿಸ್ಸತಿ’.
‘‘‘ಇಮಿನಾ ಬೀಜನಿದಾನೇನ, ಸಮ್ಮಾನವಿಪುಲೇನ ಚ;
ಕಪ್ಪಸತಸಹಸ್ಸಮ್ಪಿ, ದುಗ್ಗತಿಂ ನುಪಪಜ್ಜತಿ.
‘‘ತಿಂಸಕಪ್ಪಸಹಸ್ಸಮ್ಹಿ, ಸುಬ್ಬತಾ ಅಟ್ಠತಿಂಸ ತೇ;
ಏಕೂನತಿಂಸಸಹಸ್ಸೇ, ಅಟ್ಠ ಮಾಲುತನಾಮಕಾ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ನಳಮಾಲಿಯೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ನಳಮಾಲಿಯತ್ಥೇರಸ್ಸಾಪದಾನಂ ಸತ್ತಮಂ.
ಸತ್ತಮಭಾಣವಾರಂ.
೮. ಆಸನುಪಟ್ಠಾಹಕತ್ಥೇರಅಪದಾನಂ
‘‘ಕಾನನಂ ವನಮೋಗಯ್ಹ, ಅಪ್ಪಸದ್ದಂ ನಿರಾಕುಲಂ;
ಸೀಹಾಸನಂ ಮಯಾ ದಿನ್ನಂ, ಅತ್ಥದಸ್ಸಿಸ್ಸ ತಾದಿನೋ.
‘‘ಮಾಲಾಹತ್ಥಂ ¶ ಗಹೇತ್ವಾನ, ಕತ್ವಾ ಚ ನಂ ಪದಕ್ಖಿಣಂ;
ಸತ್ಥಾರಂ ಪಯಿರುಪಾಸಿತ್ವಾ, ಪಕ್ಕಾಮಿಂ ಉತ್ತರಾಮುಖೋ.
‘‘ತೇನ ¶ ಕಮ್ಮೇನ ದ್ವಿಪದಿನ್ದ, ಲೋಕಜೇಟ್ಠ ನರಾಸಭ;
ಸನ್ನಿಬ್ಬಾಪೇಮಿ [ಸನ್ದಿಟ್ಠಾಪೇಮಿ (ಕ.)] ಅತ್ತಾನಂ, ಭವಾ ಸಬ್ಬೇ ಸಮೂಹತಾ.
‘‘ಅಟ್ಠಾರಸಕಪ್ಪಸತೇ, ಯಂ ದಾನಮದದಿಂ ತದಾ;
ದುಗ್ಗತಿಂ ನಾಭಿಜಾನಾಮಿ, ಸೀಹಾಸನಸ್ಸಿದಂ ಫಲಂ.
‘‘ಇತೋ ¶ ಸತ್ತಕಪ್ಪಸತೇ, ಸನ್ನಿಬ್ಬಾಪಕ [ಸನ್ನಿಟ್ಠೋ ನಾಮ (ಕ.)] ಖತ್ತಿಯೋ;
ಸತ್ತರತನಸಮ್ಪನ್ನೋ, ಚಕ್ಕವತ್ತೀ ಮಹಬ್ಬಲೋ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಆಸನುಪಟ್ಠಾಹಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಆಸನುಪಟ್ಠಾಹಕತ್ಥೇರಸ್ಸಾಪದಾನಂ ಅಟ್ಠಮಂ.
೯. ಬಿಳಾಲಿದಾಯಕತ್ಥೇರಅಪದಾನಂ
‘‘ಹಿಮವನ್ತಸ್ಸಾವಿದೂರೇ ¶ , ವಸಾಮಿ ಪಣ್ಣಸನ್ಥರೇ;
ಘಾಸೇಸು ಗೇಧಮಾಪನ್ನೋ, ಸೇಯ್ಯಸೀಲೋ ಚಹಂ [ಸೇಯಸೀಲೋವಹಂ (ಸ್ಯಾ. ಕ.)] ತದಾ.
‘‘ಖಣನ್ತಾಲು [ಖಣಮಾಲು (ಸ್ಯಾ.)] ಕಲಮ್ಬಾನಿ, ಬಿಳಾಲಿತಕ್ಕಲಾನಿ ಚ;
ಕೋಲಂ ಭಲ್ಲಾತಕಂ ಬಿಲ್ಲಂ, ಆಹತ್ವಾ ಪಟಿಯಾದಿತಂ.
‘‘ಪದುಮುತ್ತರೋ ¶ ಲೋಕವಿದೂ, ಆಹುತೀನಂ ಪಟಿಗ್ಗಹೋ;
ಮಮ ಸಙ್ಕಪ್ಪಮಞ್ಞಾಯ, ಆಗಚ್ಛಿ ಮಮ ಸನ್ತಿಕಂ.
‘‘ಉಪಾಗತಂ ಮಹಾನಾಗಂ, ದೇವದೇವಂ ನರಾಸಭಂ;
ಬಿಳಾಲಿಂ ಪಗ್ಗಹೇತ್ವಾನ, ಪತ್ತಮ್ಹಿ ಓಕಿರಿಂ ಅಹಂ.
‘‘ಪರಿಭುಞ್ಜಿ ಮಹಾವೀರೋ, ತೋಸಯನ್ತೋ ಮಮಂ ತದಾ;
ಪರಿಭುಞ್ಜಿತ್ವಾನ ಸಬ್ಬಞ್ಞೂ, ಇಮಂ ಗಾಥಂ ಅಭಾಸಥ.
‘‘‘ಸಕಂ ಚಿತ್ತಂ ಪಸಾದೇತ್ವಾ, ಬಿಳಾಲಿಂ ಮೇ ಅದಾ ತುವಂ;
ಕಪ್ಪಾನಂ ಸತಸಹಸ್ಸಂ, ದುಗ್ಗತಿಂ ನುಪಪಜ್ಜಸಿ’.
‘‘ಚರಿಮಂ ¶ ವತ್ತತೇ ಮಯ್ಹಂ, ಭವಾ ಸಬ್ಬೇ ಸಮೂಹತಾ;
ಧಾರೇಮಿ ಅನ್ತಿಮಂ ದೇಹಂ, ಸಮ್ಮಾಸಮ್ಬುದ್ಧಸಾಸನೇ.
‘‘ಚತುಪಞ್ಞಾಸಿತೋ ಕಪ್ಪೇ, ಸುಮೇಖಲಿಯಸವ್ಹಯೋ;
ಸತ್ತರತನಸಮ್ಪನ್ನೋ, ಚಕ್ಕವತ್ತೀ ಮಹಬ್ಬಲೋ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಬಿಳಾಲಿದಾಯಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಬಿಳಾಲಿದಾಯಕತ್ಥೇರಸ್ಸಾಪದಾನಂ ನವಮಂ.
೧೦. ರೇಣುಪೂಜಕತ್ಥೇರಅಪದಾನಂ
‘‘ಸುವಣ್ಣವಣ್ಣಂ ¶ ¶ ¶ ಸಮ್ಬುದ್ಧಂ, ಸತರಂಸಿಂವ ಭಾಣುಮಂ;
ಓಭಾಸೇನ್ತಂ ದಿಸಾ ಸಬ್ಬಾ, ಉಳುರಾಜಂವ ಪೂರಿತಂ.
‘‘ಪುರಕ್ಖತಂ ಸಾವಕೇಹಿ, ಸಾಗರೇಹೇವ ಮೇದನಿಂ;
ನಾಗಂ ಪಗ್ಗಯ್ಹ ರೇಣೂಹಿ, ವಿಪಸ್ಸಿಸ್ಸಾಭಿರೋಪಯಿಂ.
‘‘ಏಕನವುತಿತೋ ಕಪ್ಪೇ, ಯಂ ರೇಣುಮಭಿರೋಪಯಿಂ;
ದುಗ್ಗತಿಂ ನಾಭಿಜಾನಾಮಿ, ಬುದ್ಧಪೂಜಾಯಿದಂ ಫಲಂ.
‘‘ಪಣ್ಣತಾಲೀಸಿತೋ ಕಪ್ಪೇ, ರೇಣು ನಾಮಾಸಿ ಖತ್ತಿಯೋ;
ಸತ್ತರತನಸಮ್ಪನ್ನೋ, ಚಕ್ಕವತ್ತೀ ಮಹಬ್ಬಲೋ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ರೇಣುಪೂಜಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ರೇಣುಪೂಜಕತ್ಥೇರಸ್ಸಾಪದಾನಂ ದಸಮಂ.
ಭಿಕ್ಖದಾಯಿವಗ್ಗೋ ಏಕಾದಸಮೋ.
ತಸ್ಸುದ್ದಾನಂ –
ಭಿಕ್ಖದಾಯೀ ಞಾಣಸಞ್ಞೀ, ಹತ್ಥಿಯೋ ಪದಪೂಜಕೋ;
ಮುಟ್ಠಿಪುಪ್ಫೀ ಉದಕದೋ, ನಳಮಾಲಿ ಉಪಟ್ಠಕೋ;
ಬಿಳಾಲಿದಾಯೀ ರೇಣು ಚ, ಗಾಥಾಯೋ ಛ ಚ ಸಟ್ಠಿ ಚ.
೧೨. ಮಹಾಪರಿವಾರವಗ್ಗೋ
೧. ಮಹಾಪರಿವಾರಕತ್ಥೇರಅಪದಾನಂ
‘‘ವಿಪಸ್ಸೀ ¶ ¶ ¶ ನಾಮ ಭಗವಾ, ಲೋಕಜೇಟ್ಠೋ ನರಾಸಭೋ;
ಅಟ್ಠಸಟ್ಠಿಸಹಸ್ಸೇಹಿ, ಪಾವಿಸಿ ಬನ್ಧುಮಂ ತದಾ.
‘‘ನಗರಾ ಅಭಿನಿಕ್ಖಮ್ಮ, ಅಗಮಂ ದೀಪಚೇತಿಯಂ;
ಅದ್ದಸಂ ವಿರಜಂ ಬುದ್ಧಂ, ಆಹುತೀನಂ ಪಟಿಗ್ಗಹಂ.
‘‘ಚುಲ್ಲಾಸೀತಿಸಹಸ್ಸಾನಿ, ಯಕ್ಖಾ ಮಯ್ಹಂ ಉಪನ್ತಿಕೇ;
ಉಪಟ್ಠಹನ್ತಿ ಸಕ್ಕಚ್ಚಂ [ಮಂ ನಿಚ್ಚಂ (ಕ.)], ಇನ್ದಂವ ತಿದಸಾ ಗಣಾ.
‘‘ಭವನಾ ¶ ಅಭಿನಿಕ್ಖಮ್ಮ, ದುಸ್ಸಂ ಪಗ್ಗಯ್ಹಹಂ ತದಾ;
ಸಿರಸಾ ಅಭಿವಾದೇಸಿಂ, ತಞ್ಚಾದಾಸಿಂ ಮಹೇಸಿನೋ.
‘‘ಅಹೋ ಬುದ್ಧೋ ಅಹೋ ಧಮ್ಮೋ, ಅಹೋ ನೋ ಸತ್ಥು ಸಮ್ಪದಾ;
ಬುದ್ಧಸ್ಸ ಆನುಭಾವೇನ, ವಸುಧಾಯಂ ಪಕಮ್ಪಥ.
‘‘ತಞ್ಚ ಅಚ್ಛರಿಯಂ ದಿಸ್ವಾ, ಅಬ್ಭುತಂ ಲೋಮಹಂಸನಂ;
ಬುದ್ಧೇ ಚಿತ್ತಂ ಪಸಾದೇಮಿ, ದ್ವಿಪದಿನ್ದಮ್ಹಿ ತಾದಿನೇ.
‘‘ಸೋಹಂ ಚಿತ್ತಂ ಪಸಾದೇತ್ವಾ, ದುಸ್ಸಂ ದತ್ವಾನ ಸತ್ಥುನೋ;
ಸರಣಞ್ಚ ಉಪಾಗಚ್ಛಿಂ, ಸಾಮಚ್ಚೋ ಸಪರಿಜ್ಜನೋ.
‘‘ಏಕನವುತಿತೋ ಕಪ್ಪೇ, ಯಂ ಕಮ್ಮಮಕರಿಂ ತದಾ;
ದುಗ್ಗತಿಂ ನಾಭಿಜಾನಾಮಿ, ಬುದ್ಧಪೂಜಾಯಿದಂ ಫಲಂ.
‘‘ಇತೋ ಪನ್ನರಸೇ ಕಪ್ಪೇ, ಸೋಳಸಾಸುಂ ಸುವಾಹನಾ [ಸೋಳಸಾಸಿಂಸು ವಾಹನೋ (ಸ್ಯಾ.)];
ಸತ್ತರತನಸಮ್ಪನ್ನಾ, ಚಕ್ಕವತ್ತೀ ಮಹಬ್ಬಲಾ.
‘‘ಪಟಿಸಮ್ಭಿದಾ ¶ ಚತಸ್ಸೋ, ವಿಮೋಕ್ಖಾಪಿ ಚ ಅಟ್ಠಿಮೇ;
ಛಳಭಿಞ್ಞಾ ಸಚ್ಛಿಕತಾ, ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಮಹಾಪರಿವಾರಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಮಹಾಪರಿವಾರಕತ್ಥೇರಸ್ಸಾಪದಾನಂ ಪಠಮಂ.
೨. ಸುಮಙ್ಗಲತ್ಥೇರಅಪದಾನಂ
‘‘ಅತ್ಥದಸ್ಸೀ ¶ ¶ ಜಿನವರೋ, ಲೋಕಜೇಟ್ಠೋ ನರಾಸಭೋ;
ವಿಹಾರಾ ಅಭಿನಿಕ್ಖಮ್ಮ, ತಳಾಕಂ ಉಪಸಙ್ಕಮಿ.
‘‘ನ್ಹತ್ವಾ ಪಿತ್ವಾ ಚ ಸಮ್ಬುದ್ಧೋ, ಉತ್ತರಿತ್ವೇಕಚೀವರೋ;
ಅಟ್ಠಾಸಿ ಭಗವಾ ತತ್ಥ, ವಿಲೋಕೇನ್ತೋ ದಿಸೋದಿಸಂ.
‘‘ಭವನೇ ಉಪವಿಟ್ಠೋಹಂ, ಅದ್ದಸಂ ಲೋಕನಾಯಕಂ;
ಹಟ್ಠೋ ಹಟ್ಠೇನ ಚಿತ್ತೇನ, ಅಪ್ಫೋಟೇಸಿಂ ಅಹಂ ತದಾ.
‘‘ಸತರಂಸಿಂವ ಜೋತನ್ತಂ, ಪಭಾಸನ್ತಂವ ಕಞ್ಚನಂ [ಇಮಿನಾ ಪಾದದ್ವಯೇನ ಪುರಿಮಪಾದದ್ವಯಸ್ಸ ಪುರತೋ ಭವಿತಬ್ಬಂ];
ನಚ್ಚಗೀತೇ ಪಯುತ್ತೋಹಂ, ಪಞ್ಚಙ್ಗತೂರಿಯಮ್ಹಿ ಚ.
‘‘ಯಂ ಯಂ ಯೋನುಪಪಜ್ಜಾಮಿ, ದೇವತ್ತಂ ಅಥ ಮಾನುಸಂ;
ಸಬ್ಬೇ ಸತ್ತೇ ಅಭಿಭೋಮಿ, ವಿಪುಲೋ ಹೋತಿ ಮೇ ಯಸೋ [ಅಯಞ್ಚ ಗಾಥಾ ಪರಿಗ್ಗಹೇತಿಗಾಥಾಯ ಅನನ್ತರಮೇವ ಠಾತುಂ ಯುತ್ತಾ].
‘‘ನಮೋ ¶ ತೇ ಪುರಿಸಾಜಞ್ಞ, ನಮೋ ತೇ ಪುರಿಸುತ್ತಮ;
ಅತ್ತಾನಂ ತೋಸಯಿತ್ವಾನ, ಪರೇ ತೋಸೇಸಿ ತ್ವಂ ಮುನಿ.
‘‘ಪರಿಗ್ಗಹೇ ¶ [ಪರಿಗ್ಗಯ್ಹ (ಸೀ.), ಪರಿಗ್ಗಹಿತ್ವಾ (ಸ್ಯಾ.), ಪರಿಗ್ಗಹೇನ (ಕ.)] ನಿಸೀದಿತ್ವಾ, ಹಾಸಂ ಕತ್ವಾನ ಸುಬ್ಬತೇ;
ಉಪಟ್ಠಹಿತ್ವಾ ಸಮ್ಬುದ್ಧಂ, ತುಸಿತಂ ಉಪಪಜ್ಜಹಂ.
‘‘ಸೋಳಸೇತೋ ಕಪ್ಪಸತೇ, ದ್ವಿನವಏಕಚಿನ್ತಿತಾ;
ಸತ್ತರತನಸಮ್ಪನ್ನಾ, ಚಕ್ಕವತ್ತೀ ಮಹಬ್ಬಲಾ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಸುಮಙ್ಗಲೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಸುಮಙ್ಗಲತ್ಥೇರಸ್ಸಾಪದಾನಂ ದುತಿಯಂ.
೩. ಸರಣಗಮನಿಯತ್ಥೇರಅಪದಾನಂ
‘‘ಉಭಿನ್ನಂ ದೇವರಾಜೂನಂ, ಸಙ್ಗಾಮೋ ಸಮುಪಟ್ಠಿತೋ;
ಅಹೋಸಿ ಸಮುಪಬ್ಯೂಳ್ಹೋ [ಸಮುಪಬ್ಬೂಳ್ಹೋ (ಸೀ.)], ಮಹಾಘೋಸೋ ಅವತ್ತಥ [ಪವತ್ತಥ (ಸೀ.)].
‘‘ಪದುಮುತ್ತರೋ ¶ ಲೋಕವಿದೂ, ಆಹುತೀನಂ ಪಟಿಗ್ಗಹೋ;
ಅನ್ತಲಿಕ್ಖೇ ಠಿತೋ ಸತ್ಥಾ, ಸಂವೇಜೇಸಿ ಮಹಾಜನಂ.
‘‘ಸಬ್ಬೇ ¶ ದೇವಾ ಅತ್ತಮನಾ, ನಿಕ್ಖಿತ್ತಕವಚಾವುಧಾ;
ಸಮ್ಬುದ್ಧಂ ಅಭಿವಾದೇತ್ವಾ, ಏಕಗ್ಗಾಸಿಂಸು ತಾವದೇ.
‘‘ಮಯ್ಹಂ [ಅಮ್ಹಂ (ಸೀ.)] ಸಙ್ಕಪ್ಪಮಞ್ಞಾಯ, ವಾಚಾಸಭಿಮುದೀರಯಿ;
ಅನುಕಮ್ಪಕೋ ಲೋಕವಿದೂ, ನಿಬ್ಬಾಪೇಸಿ ಮಹಾಜನಂ.
‘‘ಪದುಟ್ಠಚಿತ್ತೋ ¶ ಮನುಜೋ, ಏಕಪಾಣಂ ವಿಹೇಠಯಂ;
ತೇನ ಚಿತ್ತಪ್ಪದೋಸೇನ, ಅಪಾಯಂ ಉಪಪಜ್ಜತಿ.
‘‘ಸಙ್ಗಾಮಸೀಸೇ ನಾಗೋವ, ಬಹೂ ಪಾಣೇ ವಿಹೇಠಯಂ;
ನಿಬ್ಬಾಪೇಥ ಸಕಂ ಚಿತ್ತಂ, ಮಾ ಹಞ್ಞಿತ್ಥೋ ಪುನಪ್ಪುನಂ.
‘‘ದ್ವಿನ್ನಮ್ಪಿ ಯಕ್ಖರಾಜೂನಂ, ಸೇನಾ ಸಾ ವಿಮ್ಹಿತಾ ಅಹು [ಸೇನಾಯೋ ವಿಮ್ಹಿತಾ ಅಹೂ (ಸೀ.), ಸೇನಾಪಿ ಸಮಿತಾ ಅಹು (ಸ್ಯಾ.)];
ಸರಣಞ್ಚ ಉಪಾಗಚ್ಛುಂ, ಲೋಕಜೇಟ್ಠಂ ಸುತಾದಿನಂ.
‘‘ಸಞ್ಞಾಪೇತ್ವಾನ ¶ ಜನತಂ, ಪದಮುದ್ಧರಿ [ಉದ್ಧರಿ ಪನ (ಸೀ. ಸ್ಯಾ.)] ಚಕ್ಖುಮಾ;
ಪೇಕ್ಖಮಾನೋವ ದೇವೇಹಿ, ಪಕ್ಕಾಮಿ ಉತ್ತರಾಮುಖೋ.
‘‘ಪಠಮಂ ಸರಣಂ ಗಚ್ಛಿಂ, ದ್ವಿಪದಿನ್ದಸ್ಸ ತಾದಿನೋ;
ಕಪ್ಪಾನಂ ಸತಸಹಸ್ಸಂ, ದುಗ್ಗತಿಂ ನುಪಪಜ್ಜಹಂ.
‘‘ಮಹಾದುನ್ದುಭಿನಾಮಾ ಚ, ಸೋಳಸಾಸುಂ ರಥೇಸಭಾ;
ತಿಂಸಕಪ್ಪಸಹಸ್ಸಮ್ಹಿ, ರಾಜಾನೋ ಚಕ್ಕವತ್ತಿನೋ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಸರಣಗಮನಿಯೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಸರಣಗಮನಿಯತ್ಥೇರಸ್ಸಾಪದಾನಂ ತತಿಯಂ.
೪. ಏಕಾಸನಿಯತ್ಥೇರಅಪದಾನಂ
‘‘ವರುಣೋ ನಾಮ ನಾಮೇನ, ದೇವರಾಜಾ ಅಹಂ ತದಾ;
ಉಪಟ್ಠಹೇಸಿಂ ಸಮ್ಬುದ್ಧಂ, ಸಯೋಗ್ಗಬಲವಾಹನೋ.
‘‘ನಿಬ್ಬುತೇ ¶ ¶ ಲೋಕನಾಥಮ್ಹಿ, ಅತ್ಥದಸ್ಸೀನರುತ್ತಮೇ;
ತೂರಿಯಂ ಸಬ್ಬಮಾದಾಯ, ಅಗಮಂ ಬೋಧಿಮುತ್ತಮಂ.
‘‘ವಾದಿತೇನ ಚ ನಚ್ಚೇನ, ಸಮ್ಮತಾಳಸಮಾಹಿತೋ;
ಸಮ್ಮುಖಾ ವಿಯ ಸಮ್ಬುದ್ಧಂ, ಉಪಟ್ಠಿಂ ಬೋಧಿಮುತ್ತಮಂ.
‘‘ಉಪಟ್ಠಹಿತ್ವಾ ¶ ತಂ ಬೋಧಿಂ, ಧರಣೀರುಹಪಾದಪಂ;
ಪಲ್ಲಙ್ಕಂ ಆಭುಜಿತ್ವಾನ, ತತ್ಥ ಕಾಲಙ್ಕತೋ ಅಹಂ.
‘‘ಸಕಕಮ್ಮಾಭಿರದ್ಧೋಹಂ, ಪಸನ್ನೋ ಬೋಧಿಮುತ್ತಮೇ;
ತೇನ ಚಿತ್ತಪ್ಪಸಾದೇನ, ನಿಮ್ಮಾನಂ ಉಪಪಜ್ಜಹಂ.
‘‘ಸಟ್ಠಿತೂರಿಯಸಹಸ್ಸಾನಿ, ಪರಿವಾರೇನ್ತಿ ಮಂ ಸದಾ;
ಮನುಸ್ಸೇಸು ಚ ದೇವೇಸು, ವತ್ತಮಾನಂ ಭವಾಭವೇ.
‘‘ತಿವಿಧಗ್ಗೀ ನಿಬ್ಬುತಾ ಮಯ್ಹಂ, ಭವಾ ಸಬ್ಬೇ ಸಮೂಹತಾ;
ಧಾರೇಮಿ ಅನ್ತಿಮಂ ದೇಹಂ, ಸಮ್ಮಾಸಮ್ಬುದ್ಧಸಾಸನೇ [ಅಯಞ್ಚ ಗಾಥಾ ಪಟಿಸಮ್ಭಿದಾ ಚತಸ್ಸೇತಿಗಾಥಾಯ ಏಕಸಮ್ಬನ್ಧಾ ಭವಿತಂ ಯುತ್ತಾ].
‘‘ಸುಬಾಹೂ ¶ ನಾಮ ನಾಮೇನ, ಚತುತ್ತಿಂಸಾಸು ಖತ್ತಿಯಾ;
ಸತ್ತರತನಸಮ್ಪನ್ನಾ, ಪಞ್ಚಕಪ್ಪಸತೇ ಇತೋ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಏಕಾಸನಿಯೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಏಕಾಸನಿಯತ್ಥೇರಸ್ಸಾಪದಾನಂ ಚತುತ್ಥಂ.
೫. ಸುವಣ್ಣಪುಪ್ಫಿಯತ್ಥೇರಅಪದಾನಂ
‘‘ವಿಪಸ್ಸೀ ¶ ನಾಮ ಭಗವಾ, ಲೋಕಜೇಟ್ಠೋ ನರಾಸಭೋ;
ನಿಸಿನ್ನೋ ಜನಕಾಯಸ್ಸ, ದೇಸೇಸಿ ಅಮತಂ ಪದಂ.
‘‘ತಸ್ಸಾಹಂ ಧಮ್ಮಂ ಸುತ್ವಾನ, ದ್ವಿಪದಿನ್ದಸ್ಸ ತಾದಿನೋ;
ಸೋಣ್ಣಪುಪ್ಫಾನಿ ಚತ್ತಾರಿ, ಬುದ್ಧಸ್ಸ ಅಭಿರೋಪಯಿಂ.
‘‘ಸುವಣ್ಣಚ್ಛದನಂ ಆಸಿ, ಯಾವತಾ ಪರಿಸಾ ತದಾ;
ಬುದ್ಧಾಭಾ ಚ ಸುವಣ್ಣಾಭಾ, ಆಲೋಕೋ ವಿಪುಲೋ ಅಹು.
‘‘ಉದಗ್ಗಚಿತ್ತೋ ¶ ಸುಮನೋ, ವೇದಜಾತೋ ಕತಞ್ಜಲೀ;
ವಿತ್ತಿಸಞ್ಜನನೋ ತೇಸಂ, ದಿಟ್ಠಧಮ್ಮಸುಖಾವಹೋ.
‘‘ಆಯಾಚಿತ್ವಾನ ಸಮ್ಬುದ್ಧಂ, ವನ್ದಿತ್ವಾನ ಚ ಸುಬ್ಬತಂ;
ಪಾಮೋಜ್ಜಂ ಜನಯಿತ್ವಾನ, ಸಕಂ ಭವನುಪಾಗಮಿಂ.
‘‘ಭವನೇ ಉಪವಿಟ್ಠೋಹಂ, ಬುದ್ಧಸೇಟ್ಠಂ ಅನುಸ್ಸರಿಂ;
ತೇನ ಚಿತ್ತಪ್ಪಸಾದೇನ, ತುಸಿತಂ ಉಪಪಜ್ಜಹಂ.
‘‘ಏಕನವುತಿತೋ ¶ ಕಪ್ಪೇ, ಯಂ ಪುಪ್ಫಮಭಿರೋಪಯಿಂ;
ದುಗ್ಗತಿಂ ನಾಭಿಜಾನಾಮಿ, ಬುದ್ಧಪೂಜಾಯಿದಂ ಫಲಂ.
‘‘ಸೋಳಸಾಸಿಂಸು ರಾಜಾನೋ, ನೇಮಿಸಮ್ಮತನಾಮಕಾ;
ತೇತಾಲೀಸೇ ಇತೋ ಕಪ್ಪೇ, ಚಕ್ಕವತ್ತೀ ಮಹಬ್ಬಲಾ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ¶ ಸುದಂ ಆಯಸ್ಮಾ ಸುವಣ್ಣಪುಪ್ಫಿಯೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಸುವಣ್ಣಪುಪ್ಫಿಯತ್ಥೇರಸ್ಸಾಪದಾನಂ ಪಞ್ಚಮಂ.
೬. ಚಿತಕಪೂಜಕತ್ಥೇರಅಪದಾನಂ
‘‘ವಸಾಮಿ ¶ ರಾಜಾಯತನೇ, ಸಾಮಚ್ಚೋ ಸಪರಿಜ್ಜನೋ;
ಪರಿನಿಬ್ಬುತೇ ಭಗವತಿ, ಸಿಖಿನೋ ಲೋಕಬನ್ಧುನೋ.
‘‘ಪಸನ್ನಚಿತ್ತೋ ಸುಮನೋ, ಚಿತಕಂ ಅಗಮಾಸಹಂ;
ತೂರಿಯಂ ತತ್ಥ ವಾದೇತ್ವಾ, ಗನ್ಧಮಾಲಂ ಸಮೋಕಿರಿಂ.
‘‘ಚಿತಮ್ಹಿ ಪೂಜಂ ಕತ್ವಾನ, ವನ್ದಿತ್ವಾ ಚಿತಕಂ ಅಹಂ;
ಪಸನ್ನಚಿತ್ತೋ ಸುಮನೋ, ಸಕಂ ಭವನುಪಾಗಮಿಂ.
‘‘ಭವನೇ ಉಪವಿಟ್ಠೋಹಂ, ಚಿತಪೂಜಂ ಅನುಸ್ಸರಿಂ;
ತೇನ ಕಮ್ಮೇನ ದ್ವಿಪದಿನ್ದ, ಲೋಕಜೇಟ್ಠ ನರಾಸಭ.
‘‘ಅನುಭೋತ್ವಾನ ಸಮ್ಪತ್ತಿಂ, ದೇವೇಸು ಮಾನುಸೇಸು ಚ;
ಪತ್ತೋಮ್ಹಿ ಅಚಲಂ ಠಾನಂ, ಹಿತ್ವಾ ಜಯಪರಾಜಯಂ.
‘‘ಏಕತ್ತಿಂಸೇ ¶ ಇತೋ ಕಪ್ಪೇ, ಯಂ ಪುಪ್ಫಮಭಿರೋಪಯಿಂ;
ದುಗ್ಗತಿಂ ನಾಭಿಜಾನಾಮಿ, ಚಿತಪೂಜಾಯಿದಂ ಫಲಂ.
‘‘ಏಕೂನತಿಂಸಕಪ್ಪಮ್ಹಿ, ಇತೋ ಸೋಳಸ ರಾಜಾನೋ;
ಉಗ್ಗತಾ ನಾಮ ನಾಮೇನ, ಚಕ್ಕವತ್ತೀ ಮಹಬ್ಬಲಾ.
‘‘ಪಟಿಸಮ್ಭಿದಾ ¶ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಚಿತಕಪೂಜಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಚಿತಕಪೂಜಕತ್ಥೇರಸ್ಸಾಪದಾನಂ ಛಟ್ಠಂ.
೭. ಬುದ್ಧಸಞ್ಞಕತ್ಥೇರಅಪದಾನಂ
‘‘ಯದಾ ¶ ವಿಪಸ್ಸೀ ಲೋಕಗ್ಗೋ, ಆಯುಸಙ್ಖಾರಮೋಸ್ಸಜಿ;
ಪಥವೀ ಸಮ್ಪಕಮ್ಪಿತ್ಥ, ಮೇದನೀ ಜಲಮೇಖಲಾ.
‘‘ಓತತಂ ವಿತ್ಥತಂ [ಓತತಂ ವಿತತಂ (ಸ್ಯಾ.)] ಮಯ್ಹಂ, ಸುವಿಚಿತ್ತವಟಂಸಕಂ [ಸುಚಿಚಿತ್ತಂ ಪಪಞ್ಚಕಂ (ಸ್ಯಾ.)];
ಭವನಮ್ಪಿ ಪಕಮ್ಪಿತ್ಥ, ಬುದ್ಧಸ್ಸ ಆಯುಸಙ್ಖಯೇ.
‘‘ತಾಸೋ ¶ ಮಯ್ಹಂ ಸಮುಪ್ಪನ್ನೋ, ಭವನೇ ಸಮ್ಪಕಮ್ಪಿತೇ;
ಉಪ್ಪಾದೋ [ಉಪ್ಪಾತೋ (?)] ನು ಕಿಮತ್ಥಾಯ, ಆಲೋಕೋ ವಿಪುಲೋ ಅಹು.
‘‘ವೇಸ್ಸವಣೋ ಇಧಾಗಮ್ಮ, ನಿಬ್ಬಾಪೇಸಿ ಮಹಾಜನಂ;
ಪಾಣಭೂತೇ [ಪಾಣಭುತಂ (ಸ್ಯಾ.), ಪಾಣಭೂನಂ (ಸೀ. ಕ.)] ಭಯಂ ನತ್ಥಿ, ಏಕಗ್ಗಾ ಹೋಥ ಸಂವುತಾ [ಸಗಾರವಾ (ಸ್ಯಾ.)].
‘‘ಅಹೋ ಬುದ್ಧೋ ಅಹೋ ಧಮ್ಮೋ, ಅಹೋ ನೋ ಸತ್ಥು ಸಮ್ಪದಾ;
ಯಸ್ಮಿಂ ಉಪ್ಪಜ್ಜಮಾನಮ್ಹಿ, ಪಥವೀ [ಪಠವೀ (ಸೀ. ಸ್ಯಾ.)] ಸಮ್ಪಕಮ್ಪತಿ.
‘‘ಬುದ್ಧಾನುಭಾವಂ ಕಿತ್ತೇತ್ವಾ, ಕಪ್ಪಂ ಸಗ್ಗಮ್ಹಿ ಮೋದಹಂ;
ಅವಸೇಸೇಸು ಕಪ್ಪೇಸು, ಕುಸಲಂ ಚರಿತಂ [ಕರಿತಂ (ಸೀ. ಸ್ಯಾ.), ಕಾರಿತಂ (ಕ.)] ಮಯಾ.
‘‘ಏಕನವುತಿತೋ ¶ ಕಪ್ಪೇ, ಯಂ ಸಞ್ಞಮಲಭಿಂ ತದಾ;
ದುಗ್ಗತಿಂ ನಾಭಿಜಾನಾಮಿ, ಬುದ್ಧಸಞ್ಞಾಯಿದಂ ಫಲಂ.
‘‘ಇತೋ ¶ ಚುದ್ದಸಕಪ್ಪಮ್ಹಿ, ರಾಜಾ ಆಸಿಂ ಪತಾಪವಾ;
ಸಮಿತೋ ನಾಮ ನಾಮೇನ, ಚಕ್ಕವತ್ತೀ ಮಹಬ್ಬಲೋ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಬುದ್ಧಸಞ್ಞಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಬುದ್ಧಸಞ್ಞಕತ್ಥೇರಸ್ಸಾಪದಾನಂ ಸತ್ತಮಂ.
೮. ಮಗ್ಗಸಞ್ಞಕತ್ಥೇರಅಪದಾನಂ
‘‘ಪದುಮುತ್ತರಬುದ್ಧಸ್ಸ, ಸಾವಕಾ ವನಚಾರಿನೋ;
ವಿಪ್ಪನಟ್ಠಾ ಬ್ರಹಾರಞ್ಞೇ, ಅನ್ಧಾವ ಅನುಸುಯ್ಯರೇ [ಅನುಸುಯರೇ (ಸೀ.)].
‘‘ಅನುಸ್ಸರಿತ್ವಾ ¶ ಸಮ್ಬುದ್ಧಂ, ಪದುಮುತ್ತರನಾಯಕಂ;
ತಸ್ಸ ತೇ ಮುನಿನೋ ಪುತ್ತಾ, ವಿಪ್ಪನಟ್ಠಾ ಮಹಾವನೇ.
‘‘ಭವನಾ ಓರುಹಿತ್ವಾನ, ಅಗಮಿಂ ಭಿಕ್ಖುಸನ್ತಿಕಂ;
ತೇಸಂ ಮಗ್ಗಞ್ಚ ಆಚಿಕ್ಖಿಂ, ಭೋಜನಞ್ಚ ಅದಾಸಹಂ.
‘‘ತೇನ ಕಮ್ಮೇನ ದ್ವಿಪದಿನ್ದ, ಲೋಕಜೇಟ್ಠ ನರಾಸಭ;
ಜಾತಿಯಾ ಸತ್ತವಸ್ಸೋಹಂ, ಅರಹತ್ತಮಪಾಪುಣಿಂ.
‘‘ಸಚಕ್ಖೂ ¶ ನಾಮ ನಾಮೇನ, ದ್ವಾದಸ ಚಕ್ಕವತ್ತಿನೋ;
ಸತ್ತರತನಸಮ್ಪನ್ನಾ, ಪಞ್ಚಕಪ್ಪಸತೇ ಇತೋ.
‘‘ಪಟಿಸಮ್ಭಿದಾ ¶ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಮಗ್ಗಸಞ್ಞಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಮಗ್ಗಸಞ್ಞಕತ್ಥೇರಸ್ಸಾಪದಾನಂ ಅಟ್ಠಮಂ.
೯. ಪಚ್ಚುಪಟ್ಠಾನಸಞ್ಞಕತ್ಥೇರಅಪದಾನಂ
‘‘ಅತ್ಥದಸ್ಸಿಮ್ಹಿ ಸುಗತೇ, ನಿಬ್ಬುತೇ ಸಮನನ್ತರಾ;
ಯಕ್ಖಯೋನಿಂ ಉಪಪಜ್ಜಿಂ, ಯಸಂ ಪತ್ತೋ ಚಹಂ ತದಾ.
‘‘ದುಲ್ಲದ್ಧಂ ¶ ವತ ಮೇ ಆಸಿ, ದುಪ್ಪಭಾತಂ ದುರುಟ್ಠಿತಂ;
ಯಂ ಮೇ ಭೋಗೇ ವಿಜ್ಜಮಾನೇ, ಪರಿನಿಬ್ಬಾಯಿ ಚಕ್ಖುಮಾ.
‘‘ಮಮ ಸಙ್ಕಪ್ಪಮಞ್ಞಾಯ, ಸಾಗರೋ ನಾಮ ಸಾವಕೋ;
ಮಮುದ್ಧರಿತುಕಾಮೋ ಸೋ, ಆಗಚ್ಛಿ ಮಮ ಸನ್ತಿಕಂ.
‘‘ಕಿಂ ನು ಸೋಚಸಿ ಮಾ ಭಾಯಿ, ಚರ ಧಮ್ಮಂ ಸುಮೇಧಸ;
ಅನುಪ್ಪದಿನ್ನಾ ಬುದ್ಧೇನ, ಸಬ್ಬೇಸಂ ಬೀಜಸಮ್ಪದಾ.
‘‘ಸೋ ಚೇ ಪೂಜೇಯ್ಯ ಸಮ್ಬುದ್ಧಂ, ತಿಟ್ಠನ್ತಂ ಲೋಕನಾಯಕಂ;
ಧಾತುಂ ಸಾಸಪಮತ್ತಮ್ಪಿ, ನಿಬ್ಬುತಸ್ಸಾಪಿ ಪೂಜಯೇ.
‘‘ಸಮೇ ¶ ಚಿತ್ತಪ್ಪಸಾದಮ್ಹಿ, ಸಮಂ ಪುಞ್ಞಂ ಮಹಗ್ಗತಂ;
ತಸ್ಮಾ ಥೂಪಂ ಕರಿತ್ವಾನ, ಪೂಜೇಹಿ ಜಿನಧಾತುಯೋ.
‘‘ಸಾಗರಸ್ಸ ವಚೋ ಸುತ್ವಾ, ಬುದ್ಧಥೂಪಂ ಅಕಾಸಹಂ;
ಪಞ್ಚವಸ್ಸೇ ಪರಿಚರಿಂ, ಮುನಿನೋ ಥೂಪಮುತ್ತಮಂ.
‘‘ತೇನ ¶ ಕಮ್ಮೇನ ದ್ವಿಪದಿನ್ದ, ಲೋಕಜೇಟ್ಠ ನರಾಸಭ;
ಸಮ್ಪತ್ತಿಂ ಅನುಭೋತ್ವಾನ, ಅರಹತ್ತಮಪಾಪುಣಿಂ.
‘‘ಭೂರಿಪಞ್ಞಾ ಚ ಚತ್ತಾರೋ, ಸತ್ತಕಪ್ಪಸತೇ ಇತೋ;
ಸತ್ತರತನಸಮ್ಪನ್ನಾ, ಚಕ್ಕವತ್ತೀ ಮಹಬ್ಬಲಾ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಪಚ್ಚುಪಟ್ಠಾನಸಞ್ಞಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಪಚ್ಚುಪಟ್ಠಾನಸಞ್ಞಕತ್ಥೇರಸ್ಸಾಪದಾನಂ ನವಮಂ.
೧೦. ಜಾತಿಪೂಜಕತ್ಥೇರಅಪದಾನಂ
‘‘ಜಾಯನ್ತಸ್ಸ ¶ ವಿಪಸ್ಸಿಸ್ಸ, ಆಲೋಕೋ ವಿಪುಲೋ ಅಹು;
ಪಥವೀ ಚ ಪಕಮ್ಪಿತ್ಥ, ಸಸಾಗರಾ ಸಪಬ್ಬತಾ.
‘‘ನೇಮಿತ್ತಾ ಚ ವಿಯಾಕಂಸು, ಬುದ್ಧೋ ಲೋಕೇ ಭವಿಸ್ಸತಿ;
ಅಗ್ಗೋ ಚ ಸಬ್ಬಸತ್ತಾನಂ, ಜನತಂ ಉದ್ಧರಿಸ್ಸತಿ.
‘‘ನೇಮಿತ್ತಾನಂ ¶ ¶ ಸುಣಿತ್ವಾನ, ಜಾತಿಪೂಜಮಕಾಸಹಂ;
ಏದಿಸಾ ಪೂಜನಾ ನತ್ಥಿ, ಯಾದಿಸಾ ಜಾತಿಪೂಜನಾ.
‘‘ಸಙ್ಖರಿತ್ವಾನ [ಸಂಹರಿತ್ವಾನ (ಸೀ. ಸ್ಯಾ.), ಸಙ್ಕರಿತ್ವಾನ (ಕ.)]
ಕುಸಲಂ, ಸಕಂ ಚಿತ್ತಂ ಪಸಾದಯಿಂ.
ಜಾತಿಪೂಜಂ ಕರಿತ್ವಾನ, ತತ್ಥ ಕಾಲಙ್ಕತೋ ಅಹಂ.
‘‘ಯಂ ಯಂ ಯೋನುಪಪಜ್ಜಾಮಿ, ದೇವತ್ತಂ ಅಥ ಮಾನುಸಂ;
ಸಬ್ಬೇ ಸತ್ತೇ ಅಭಿಭೋಮಿ, ಜಾತಿಪೂಜಾಯಿದಂ ಫಲಂ.
‘‘ಧಾತಿಯೋ ಮಂ ಉಪಟ್ಠನ್ತಿ, ಮಮ ಚಿತ್ತವಸಾನುಗಾ;
ನ ತಾ ಸಕ್ಕೋನ್ತಿ ಕೋಪೇತುಂ, ಜಾತಿಪೂಜಾಯಿದಂ ಫಲಂ.
‘‘ಏಕನವುತಿತೋ ಕಪ್ಪೇ, ಯಂ ಪೂಜಮಕರಿಂ ತದಾ;
ದುಗ್ಗತಿಂ ನಾಭಿಜಾನಾಮಿ, ಜಾತಿಪೂಜಾಯಿದಂ ಫಲಂ.
‘‘ಸುಪಾರಿಚರಿಯಾ ನಾಮ, ಚತುತ್ತಿಂಸ ಜನಾಧಿಪಾ;
ಇತೋ ತತಿಯಕಪ್ಪಮ್ಹಿ, ಚಕ್ಕವತ್ತೀ ಮಹಬ್ಬಲಾ.
‘‘ಪಟಿಸಮ್ಭಿದಾ ¶ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಜಾತಿಪೂಜಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಜಾತಿಪೂಜಕತ್ಥೇರಸ್ಸಾಪದಾನಂ ದಸಮಂ.
ಮಹಾಪರಿವಾರವಗ್ಗೋ ದ್ವಾದಸಮೋ.
ತಸ್ಸುದ್ದಾನಂ –
ಪರಿವಾರಸುಮಙ್ಗಲಾ, ಸರಣಾಸನಪುಪ್ಫಿಯಾ;
ಚಿತಪೂಜೀ ಬುದ್ಧಸಞ್ಞೀ, ಮಗ್ಗುಪಟ್ಠಾನಜಾತಿನಾ;
ಗಾಥಾಯೋ ¶ ನವುತಿ ವುತ್ತಾ, ಗಣಿತಾಯೋ ವಿಭಾವಿಹಿ.
೧೩. ಸೇರೇಯ್ಯವಗ್ಗೋ
೧. ಸೇರೇಯ್ಯಕತ್ಥೇರಅಪದಾನಂ
‘‘ಅಜ್ಝಾಯಕೋ ¶ ¶ ¶ ಮನ್ತಧರೋ, ತಿಣ್ಣಂ ವೇದಾನ ಪಾರಗೂ;
ಅಬ್ಭೋಕಾಸೇ ಠಿತೋ ಸನ್ತೋ, ಅದ್ದಸಂ ಲೋಕನಾಯಕಂ.
‘‘ಸೀಹಂ ಯಥಾ ವನಚರಂ, ಬ್ಯಗ್ಘರಾಜಂವ ನಿತ್ತಸಂ;
ತಿಧಾಪಭಿನ್ನಮಾತಙ್ಗಂ, ಕುಞ್ಜರಂವ ಮಹೇಸಿನಂ.
‘‘ಸೇರೇಯ್ಯಕಂ ಗಹೇತ್ವಾನ, ಆಕಾಸೇ ಉಕ್ಖಿಪಿಂ [ನಿಕ್ಖಿಪಿಂ (ಕ.)] ಅಹಂ;
ಬುದ್ಧಸ್ಸ ಆನುಭಾವೇನ, ಪರಿವಾರೇನ್ತಿ ಸಬ್ಬಸೋ [ಸಬ್ಬತೋ (ಸೀ.)].
‘‘ಅಧಿಟ್ಠಹಿ ಮಹಾವೀರೋ, ಸಬ್ಬಞ್ಞೂ ಲೋಕನಾಯಕೋ;
ಸಮನ್ತಾ ಪುಪ್ಫಚ್ಛದನಾ, ಓಕಿರಿಂಸು ನರಾಸಭಂ.
‘‘ತತೋ ಸಾ ಪುಪ್ಫಕಞ್ಚುಕಾ, ಅನ್ತೋವಣ್ಟಾ ಬಹಿಮುಖಾ;
ಸತ್ತಾಹಂ ಛದನಂ ಕತ್ವಾ, ತತೋ ಅನ್ತರಧಾಯಥ.
‘‘ತಞ್ಚ ಅಚ್ಛರಿಯಂ ದಿಸ್ವಾ, ಅಬ್ಭುತಂ ಲೋಮಹಂಸನಂ;
ಬುದ್ಧೇ ಚಿತ್ತಂ ಪಸಾದೇಸಿಂ, ಸುಗತೇ ಲೋಕನಾಯಕೇ.
‘‘ತೇನ ಚಿತ್ತಪ್ಪಸಾದೇನ, ಸುಕ್ಕಮೂಲೇನ ಚೋದಿತೋ;
ಕಪ್ಪಾನಂ ಸತಸಹಸ್ಸಂ, ದುಗ್ಗತಿಂ ನುಪಪಜ್ಜಹಂ.
‘‘ಪನ್ನರಸಸಹಸ್ಸಮ್ಹಿ ¶ , ಕಪ್ಪಾನಂ ಪಞ್ಚವೀಸತಿ;
ವೀತಮಲಾ [ಚಿತ್ತಮಾಲಾ (ಸೀ.), ವಿಲಾಮಾಲಾ (ಸ್ಯಾ.)] ಸಮಾನಾ ಚ, ಚಕ್ಕವತ್ತೀ ಮಹಬ್ಬಲಾ.
‘‘ಪಟಿಸಮ್ಭಿದಾ ಚತಸ್ಸೋ, ವಿಮೋಕ್ಖಾಪಿ ಚ ಅಟ್ಠಿಮೇ;
ಛಳಭಿಞ್ಞಾ ಸಚ್ಛಿಕತಾ, ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಸೇರೇಯ್ಯಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಸೇರೇಯ್ಯಕತ್ಥೇರಸ್ಸಾಪದಾನಂ ಪಠಮಂ.
೨. ಪುಪ್ಫಥೂಪಿಯತ್ಥೇರಅಪದಾನಂ
‘‘ಹಿಮವನ್ತಸ್ಸಾವಿದೂರೇ ¶ ¶ , ಕುಕ್ಕುರೋ ನಾಮ [ಕುಕ್ಕುಟೋ ನಾಮ (ಸೀ.)] ಪಬ್ಬತೋ;
ವೇಮಜ್ಝೇ ತಸ್ಸ ವಸತಿ, ಬ್ರಾಹ್ಮಣೋ ಮನ್ತಪಾರಗೂ.
‘‘ಪಞ್ಚ ಸಿಸ್ಸಸಹಸ್ಸಾನಿ, ಪರಿವಾರೇನ್ತಿ ಮಂ ಸದಾ;
ಪುಬ್ಬುಟ್ಠಾಯೀ ಚ ತೇ ಆಸುಂ, ಮನ್ತೇಸು ಚ ವಿಸಾರದಾ.
‘‘ಬುದ್ಧೋ ¶ ಲೋಕೇ ಸಮುಪ್ಪನ್ನೋ, ತಂ ವಿಜಾನಾಥ ನೋ ಭವಂ;
ಅಸೀತಿಬ್ಯಞ್ಜನಾನಸ್ಸ, ಬಾತ್ತಿಂಸವರಲಕ್ಖಣಾ.
‘‘ಬ್ಯಾಮಪ್ಪಭೋ ಜಿನವರೋ, ಆದಿಚ್ಚೋವ ವಿರೋಚತಿ;
ಸಿಸ್ಸಾನಂ ವಚನಂ ಸುತ್ವಾ, ಬ್ರಾಹ್ಮಣೋ ಮನ್ತಪಾರಗೂ.
‘‘ಅಸ್ಸಮಾ ಅಭಿನಿಕ್ಖಮ್ಮ, ದಿಸಂ ಪುಚ್ಛತಿ ಸಿಸ್ಸಕೇ [ಬ್ರಾಹ್ಮಣೋ (ಸ್ಯಾ.)];
ಯಮ್ಹಿ ದೇಸೇ ಮಹಾವೀರೋ, ವಸತಿ ಲೋಕನಾಯಕೋ.
‘‘ತಾಹಂ ದಿಸಂ ನಮಸ್ಸಿಸ್ಸಂ, ಜಿನಂ ಅಪ್ಪಟಿಪುಗ್ಗಲಂ;
ಉದಗ್ಗಚಿತ್ತೋ ಸುಮನೋ, ಪೂಜೇಸಿಂ ತಂ ತಥಾಗತಂ.
‘‘ಏಥ ¶ ಸಿಸ್ಸಾ ಗಮಿಸ್ಸಾಮ, ದಕ್ಖಿಸ್ಸಾಮ ತಥಾಗತಂ;
ವನ್ದಿತ್ವಾ ಸತ್ಥುನೋ ಪಾದೇ, ಸೋಸ್ಸಾಮ ಜಿನಸಾಸನಂ.
‘‘ಏಕಾಹಂ ಅಭಿನಿಕ್ಖಮ್ಮ, ಬ್ಯಾಧಿಂ ಪಟಿಲಭಿಂ ಅಹಂ;
ಬ್ಯಾಧಿನಾ ಪೀಳಿತೋ ಸನ್ತೋ, ಸಾಲಂ ವಾಸಯಿತುಂ ಗಮಿಂ.
‘‘ಸಬ್ಬೇ ಸಿಸ್ಸೇ ಸಮಾನೇತ್ವಾ, ಅಪುಚ್ಛಿಂ ತೇ ತಥಾಗತಂ;
ಕೀದಿಸಂ ಲೋಕನಾಥಸ್ಸ, ಗುಣಂ ಪರಮಬುದ್ಧಿನೋ.
‘‘ತೇ ಮೇ ಪುಟ್ಠಾ ವಿಯಾಕಂಸು, ಯಥಾ ದಸ್ಸಾವಿನೋ ತಥಾ;
ಸಕ್ಕಚ್ಚಂ ಬುದ್ಧಸೇಟ್ಠಂ ತಂ, ದೇಸೇಸುಂ [ದಸ್ಸೇಸುಂ (ಸೀ. ಸ್ಯಾ.)] ಮಮ ಸಮ್ಮುಖಾ.
‘‘ತೇಸಾಹಂ ವಚನಂ ಸುತ್ವಾ, ಸಕಂ ಚಿತ್ತಂ ಪಸಾದಯಿಂ;
ಪುಪ್ಫೇಹಿ ಥೂಪಂ ಕತ್ವಾನ, ತತ್ಥ ಕಾಲಙ್ಕತೋ ಅಹಂ.
‘‘ತೇ ಮೇ ಸರೀರಂ ಝಾಪೇತ್ವಾ, ಅಗಮುಂ ಬುದ್ಧಸನ್ತಿಕಂ;
ಅಞ್ಜಲಿಂ ಪಗ್ಗಹೇತ್ವಾನ, ಸತ್ಥಾರಮಭಿವಾದಯುಂ.
‘‘ಪುಪ್ಫೇಹಿ ಥೂಪಂ ಕತ್ವಾನ, ಸುಗತಸ್ಸ ಮಹೇಸಿನೋ;
ಕಪ್ಪಾನಂ ಸತಸಹಸ್ಸಂ, ದುಗ್ಗತಿಂ ನುಪಪಜ್ಜಹಂ.
‘‘ಚತ್ತಾಲೀಸಸಹಸ್ಸಮ್ಹಿ ¶ ¶ , ಕಪ್ಪೇ ಸೋಳಸ ಖತ್ತಿಯಾ;
ನಾಮೇನಗ್ಗಿಸಮಾ ನಾಮ, ಚಕ್ಕವತ್ತೀ ಮಹಬ್ಬಲಾ.
‘‘ವೀಸಕಪ್ಪಸಹಸ್ಸಮ್ಹಿ, ರಾಜಾನೋ ಚಕ್ಕವತ್ತಿನೋ;
ಘತಾಸನಸನಾಮಾವ, ಅಟ್ಠತ್ತಿಂಸ ಮಹೀಪತೀ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ¶ ಸುದಂ ಆಯಸ್ಮಾ ಪುಪ್ಫಥೂಪಿಯೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಪುಪ್ಫಥೂಪಿಯತ್ಥೇರಸ್ಸಾಪದಾನಂ ದುತಿಯಂ.
೩. ಪಾಯಸದಾಯಕತ್ಥೇರಅಪದಾನಂ
‘‘ಸುವಣ್ಣವಣ್ಣೋ ¶ ಸಮ್ಬುದ್ಧೋ, ಬಾತ್ತಿಂಸವರಲಕ್ಖಣೋ;
ಪವನಾ [ಪಧಾನೋ (ಕ.)] ಅಭಿನಿಕ್ಖನ್ತೋ, ಭಿಕ್ಖುಸಙ್ಘಪುರಕ್ಖತೋ [ಸುವಣ್ಣವಣ್ಣಂ …ಪೇ… ಪುರಕ್ಖತಂ-ಏವಂ ದುತಿಯನ್ತವಸೇನ ಸೀ. ಸ್ಯಾ. ಪೋತ್ಥಕೇಸು ದಿಸ್ಸತಿ].
‘‘ಮಹಚ್ಚಾ [ಸಹತ್ಥಾ (ಸ್ಯಾ. ಕ.)] ಕಂಸಪಾತಿಯಾ, ವಡ್ಢೇತ್ವಾ ಪಾಯಸಂ [ಪಾಯಾಸಂ (ಸ್ಯಾ. ಕ.)] ಅಹಂ;
ಆಹುತಿಂ ಯಿಟ್ಠುಕಾಮೋ ಸೋ, ಉಪನೇಸಿಂ ಬಲಿಂ ಅಹಂ.
‘‘ಭಗವಾ ತಮ್ಹಿ ಸಮಯೇ, ಲೋಕಜೇಟ್ಠೋ ನರಾಸಭೋ;
ಚಙ್ಕಮಂ ಸುಸಮಾರೂಳ್ಹೋ, ಅಮ್ಬರೇ ಅನಿಲಾಯನೇ.
‘‘ತಞ್ಚ ಅಚ್ಛರಿಯಂ ದಿಸ್ವಾ, ಅಬ್ಭುತಂ ಲೋಮಹಂಸನಂ;
ಠಪಯಿತ್ವಾ ಕಂಸಪಾತಿಂ, ವಿಪಸ್ಸಿಂ ಅಭಿವಾದಯಿಂ.
‘‘ತುವಂ ದೇವೋಸಿ [ಬುದ್ಧೋಸಿ (ಸ್ಯಾ.)] ಸಬ್ಬಞ್ಞೂ, ಸದೇವೇ ಸಹಮಾನುಸೇ;
ಅನುಕಮ್ಪಂ ಉಪಾದಾಯ, ಪಟಿಗಣ್ಹ ಮಹಾಮುನಿ.
‘‘ಪಟಿಗ್ಗಹೇಸಿ ಭಗವಾ, ಸಬ್ಬಞ್ಞೂ ಲೋಕನಾಯಕೋ;
ಮಮ ಸಙ್ಕಪ್ಪಮಞ್ಞಾಯ, ಸತ್ಥಾ ಲೋಕೇ ಮಹಾಮುನಿ [ಅನುತ್ತರೋ (ಸ್ಯಾ.)].
‘‘ಏಕನವುತಿತೋ ಕಪ್ಪೇ, ಯಂ ದಾನಮದದಿಂ ತದಾ;
ದುಗ್ಗತಿಂ ನಾಭಿಜಾನಾಮಿ, ಪಾಯಸಸ್ಸ [ಪಾಯಾಸಸ್ಸ (ಸ್ಯಾ. ಕ.)] ಇದಂ ಫಲಂ.
‘‘ಏಕತಾಲೀಸಿತೋ ¶ ಕಪ್ಪೇ, ಬುದ್ಧೋ ನಾಮಾಸಿ ಖತ್ತಿಯೋ;
ಸತ್ತರತನಸಮ್ಪನ್ನೋ, ಚಕ್ಕವತ್ತೀ ಮಹಬ್ಬಲೋ.
‘‘ಪಟಿಸಮ್ಭಿದಾ ¶ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಪಾಯಸದಾಯಕೋ [ಪಾಯಾಸದಾಯಕೋ (ಸ್ಯಾ. ಕ.)] ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಪಾಯಸದಾಯಕತ್ಥೇರಸ್ಸಾಪದಾನಂ ತತಿಯಂ.
೪. ಗನ್ಧೋದಕಿಯತ್ಥೇರಅಪದಾನಂ
‘‘ನಿಸಜ್ಜ ¶ ಪಾಸಾದವರೇ, ವಿಪಸ್ಸಿಂ ಅದ್ದಸಂ ಜಿನಂ;
ಕಕುಧಂ ವಿಲಸನ್ತಂವ, ಸಬ್ಬಞ್ಞುಂ ತಮನಾಸಕಂ [ಸಬ್ಬಞ್ಞುತ್ತಮನಾಯಕಂ (ಸ್ಯಾ.), ಸಬ್ಬಞ್ಞುತಮನಾಸವಂ (ಕ.)].
‘‘ಪಾಸಾದಸ್ಸಾವಿದೂರೇ ಚ, ಗಚ್ಛತಿ ಲೋಕನಾಯಕೋ;
ಪಭಾ ನಿದ್ಧಾವತೇ ತಸ್ಸ, ಯಥಾ ಚ ಸತರಂಸಿನೋ.
‘‘ಗನ್ಧೋದಕಞ್ಚ ¶ ಪಗ್ಗಯ್ಹ, ಬುದ್ಧಸೇಟ್ಠಂ ಸಮೋಕಿರಿಂ;
ತೇನ ಚಿತ್ತಪ್ಪಸಾದೇನ, ತತ್ಥ ಕಾಲಙ್ಕತೋ ಅಹಂ.
‘‘ಏಕನವುತಿತೋ ಕಪ್ಪೇ, ಯಂ ಗನ್ಧೋದಕಮಾಕಿರಿಂ;
ದುಗ್ಗತಿಂ ನಾಭಿಜಾನಾಮಿ, ಬುದ್ಧಪೂಜಾಯಿದಂ ಫಲಂ.
‘‘ಏಕತ್ತಿಂಸೇ ಇತೋ ಕಪ್ಪೇ, ಸುಗನ್ಧೋ ನಾಮ ಖತ್ತಿಯೋ;
ಸತ್ತರತನಸಮ್ಪನ್ನೋ, ಚಕ್ಕವತ್ತೀ ಮಹಬ್ಬಲೋ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ¶ ಸುದಂ ಆಯಸ್ಮಾ ಗನ್ಧೋದಕಿಯೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಗನ್ಧೋದಕಿಯತ್ಥೇರಸ್ಸಾಪದಾನಂ ಚತುತ್ಥಂ.
೫. ಸಮ್ಮುಖಾಥವಿಕತ್ಥೇರಅಪದಾನಂ
‘‘ಜಾಯಮಾನೇ ವಿಪಸ್ಸಿಮ್ಹಿ, ನಿಮಿತ್ತಂ ಬ್ಯಾಕರಿಂ ಅಹಂ;
‘ನಿಬ್ಬಾಪಯಿಞ್ಚ [ನಿಬ್ಬಾಪಯಂ ಚ (ಸೀ. ಸ್ಯಾ.), ನಿಬ್ಬಾಪಯನ್ತೋ (?)] ಜನತಂ, ಬುದ್ಧೋ ಲೋಕೇ ಭವಿಸ್ಸತಿ.
‘‘‘ಯಸ್ಮಿಞ್ಚ ¶ ಜಾಯಮಾನಸ್ಮಿಂ, ದಸಸಹಸ್ಸಿ ಕಮ್ಪತಿ;
ಸೋ ದಾನಿ ಭಗವಾ ಸತ್ಥಾ, ಧಮ್ಮಂ ದೇಸೇತಿ ಚಕ್ಖುಮಾ.
‘‘‘ಯಸ್ಮಿಞ್ಚ ಜಾಯಮಾನಸ್ಮಿಂ, ಆಲೋಕೋ ವಿಪುಲೋ ಅಹು;
ಸೋ ದಾನಿ ಭಗವಾ ಸತ್ಥಾ, ಧಮ್ಮಂ ದೇಸೇತಿ ಚಕ್ಖುಮಾ.
‘‘‘ಯಸ್ಮಿಞ್ಚ ಜಾಯಮಾನಸ್ಮಿಂ, ಸರಿತಾಯೋ ನ ಸನ್ದಯುಂ [ಸನ್ದಿಸುಂ (ಸೀ. ಸ್ಯಾ.)];
ಸೋ ದಾನಿ ಭಗವಾ ಸತ್ಥಾ, ಧಮ್ಮಂ ದೇಸೇತಿ ಚಕ್ಖುಮಾ.
‘‘‘ಯಸ್ಮಿಞ್ಚ ಜಾಯಮಾನಸ್ಮಿಂ, ಅವೀಚಗ್ಗಿ ನ ಪಜ್ಜಲಿ;
ಸೋ ದಾನಿ ಭಗವಾ ಸತ್ಥಾ, ಧಮ್ಮಂ ದೇಸೇತಿ ಚಕ್ಖುಮಾ.
‘‘‘ಯಸ್ಮಿಞ್ಚ ¶ ಜಾಯಮಾನಸ್ಮಿಂ, ಪಕ್ಖಿಸಙ್ಘೋ ನ ಸಂಚರಿ;
ಸೋ ದಾನಿ ಭಗವಾ ಸತ್ಥಾ, ಧಮ್ಮಂ ದೇಸೇತಿ ಚಕ್ಖುಮಾ.
‘‘‘ಯಸ್ಮಿಞ್ಚ ಜಾಯಮಾನಸ್ಮಿಂ, ವಾತಕ್ಖನ್ಧೋ ನ ವಾಯತಿ;
ಸೋ ದಾನಿ ಭಗವಾ ಸತ್ಥಾ, ಧಮ್ಮಂ ದೇಸೇತಿ ಚಕ್ಖುಮಾ.
‘‘‘ಯಸ್ಮಿಞ್ಚ ¶ ಜಾಯಮಾನಸ್ಮಿಂ, ಸಬ್ಬರತನಾನಿ ಜೋತಯುಂ [ಜೋತಿಸುಂ (ಸೀ. ಸ್ಯಾ.)];
ಸೋ ದಾನಿ ಭಗವಾ ಸತ್ಥಾ, ಧಮ್ಮಂ ದೇಸೇತಿ ಚಕ್ಖುಮಾ.
‘‘‘ಯಸ್ಮಿಞ್ಚ ಜಾಯಮಾನಸ್ಮಿಂ, ಸತ್ತಾಸುಂ ಪದವಿಕ್ಕಮಾ;
ಸೋ ದಾನಿ ಭಗವಾ ಸತ್ಥಾ, ಧಮ್ಮಂ ದೇಸೇತಿ ಚಕ್ಖುಮಾ.
‘‘‘ಜಾತಮತ್ತೋ ¶ ಚ ಸಮ್ಬುದ್ಧೋ, ದಿಸಾ ಸಬ್ಬಾ ವಿಲೋಕಯಿ;
ವಾಚಾಸಭಿಮುದೀರೇಸಿ, ಏಸಾ ಬುದ್ಧಾನ ಧಮ್ಮತಾ’.
‘‘ಸಂವೇಜಯಿತ್ವಾ ಜನತಂ, ಥವಿತ್ವಾ ಲೋಕನಾಯಕಂ;
ಸಮ್ಬುದ್ಧಂ ಅಭಿವಾದೇತ್ವಾ, ಪಕ್ಕಾಮಿಂ ಪಾಚಿನಾಮುಖೋ.
‘‘ಏಕನವುತಿತೋ ಕಪ್ಪೇ, ಯಂ ಬುದ್ಧಮಭಿಥೋಮಯಿಂ;
ದುಗ್ಗತಿಂ ನಾಭಿಜಾನಾಮಿ, ಥೋಮನಾಯ ಇದಂ ಫಲಂ.
‘‘ಇತೋ ನವುತಿಕಪ್ಪಮ್ಹಿ, ಸಮ್ಮುಖಾಥವಿಕವ್ಹಯೋ;
ಸತ್ತರತನಸಮ್ಪನ್ನೋ, ಚಕ್ಕವತ್ತೀ ಮಹಬ್ಬಲೋ.
‘‘ಪಥವೀದುನ್ದುಭಿ ನಾಮ [ದುದ್ದಸಿ ನಾಮ (ಕ.)], ಏಕೂನನವುತಿಮ್ಹಿತೋ;
ಸತ್ತರತನಸಮ್ಪನ್ನೋ, ಚಕ್ಕವತ್ತೀ ಮಹಬ್ಬಲೋ.
‘‘ಅಟ್ಠಾಸೀತಿಮ್ಹಿತೋ ¶ ಕಪ್ಪೇ, ಓಭಾಸೋ ನಾಮ ಖತ್ತಿಯೋ;
ಸತ್ತರತನಸಮ್ಪನ್ನೋ, ಚಕ್ಕವತ್ತೀ ಮಹಬ್ಬಲೋ.
‘‘ಸತ್ತಾಸೀತಿಮ್ಹಿತೋ ಕಪ್ಪೇ, ಸರಿತಚ್ಛೇದನವ್ಹಯೋ;
ಸತ್ತರತನಸಮ್ಪನ್ನೋ, ಚಕ್ಕವತ್ತೀ ಮಹಬ್ಬಲೋ.
‘‘ಅಗ್ಗಿನಿಬ್ಬಾಪನೋ ನಾಮ, ಕಪ್ಪಾನಂ ಛಳಸೀತಿಯಾ;
ಸತ್ತರತನಸಮ್ಪನ್ನೋ, ಚಕ್ಕವತ್ತೀ ಮಹಬ್ಬಲೋ.
‘‘ಗತಿಪಚ್ಛೇದನೋ ನಾಮ, ಕಪ್ಪಾನಂ ಪಞ್ಚಸೀತಿಯಾ;
ಸತ್ತರತನಸಮ್ಪನ್ನೋ, ಚಕ್ಕವತ್ತೀ ಮಹಬ್ಬಲೋ.
‘‘ರಾಜಾ ¶ ವಾತಸಮೋ ನಾಮ, ಕಪ್ಪಾನಂ ಚುಲ್ಲಸೀತಿಯಾ;
ಸತ್ತರತನಸಮ್ಪನ್ನೋ, ಚಕ್ಕವತ್ತೀ ಮಹಬ್ಬಲೋ.
‘‘ರತನಪಜ್ಜಲೋ ¶ ನಾಮ, ಕಪ್ಪಾನಂ ತೇಅಸೀತಿಯಾ;
ಸತ್ತರತನಸಮ್ಪನ್ನೋ, ಚಕ್ಕವತ್ತೀ ಮಹಬ್ಬಲೋ.
‘‘ಪದವಿಕ್ಕಮನೋ ನಾಮ, ಕಪ್ಪಾನಂ ದ್ವೇಅಸೀತಿಯಾ;
ಸತ್ತರತನಸಮ್ಪನ್ನೋ, ಚಕ್ಕವತ್ತೀ ಮಹಬ್ಬಲೋ.
‘‘ರಾಜಾ ವಿಲೋಕನೋ ನಾಮ, ಕಪ್ಪಾನಂ ಏಕಸೀತಿಯಾ;
ಸತ್ತರತನಸಮ್ಪನ್ನೋ, ಚಕ್ಕವತ್ತೀ ಮಹಬ್ಬಲೋ.
‘‘ಗಿರಸಾರೋತಿ ನಾಮೇನ, ಕಪ್ಪೇಸೀತಿಮ್ಹಿ ಖತ್ತಿಯೋ;
ಸತ್ತರತನಸಮ್ಪನ್ನೋ, ಚಕ್ಕವತ್ತೀ ಮಹಬ್ಬಲೋ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಸಮ್ಮುಖಾಥವಿಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಸಮ್ಮುಖಾಥವಿಕತ್ಥೇರಸ್ಸಾಪದಾನಂ ಪಞ್ಚಮಂ.
೬. ಕುಸುಮಾಸನಿಯತ್ಥೇರಅಪದಾನಂ
‘‘ನಗರೇ ¶ ¶ ಧಞ್ಞವತಿಯಾ, ಅಹೋಸಿಂ ಬ್ರಾಹ್ಮಣೋ ತದಾ;
ಲಕ್ಖಣೇ ಇತಿಹಾಸೇ ಚ, ಸನಿಘಣ್ಡುಸಕೇಟುಭೇ.
‘‘ಪದಕೋ ¶ ವೇಯ್ಯಾಕರಣೋ, ನಿಮಿತ್ತಕೋವಿದೋ ಅಹಂ;
ಮನ್ತೇ ಚ ಸಿಸ್ಸೇ ವಾಚೇಸಿಂ, ತಿಣ್ಣಂ ವೇದಾನ ಪಾರಗೂ.
‘‘ಪಞ್ಚ ಉಪ್ಪಲಹತ್ಥಾನಿ, ಪಿಟ್ಠಿಯಂ ಠಪಿತಾನಿ ಮೇ;
ಆಹುತಿಂ ಯಿಟ್ಠುಕಾಮೋಹಂ, ಪಿತುಮಾತುಸಮಾಗಮೇ.
‘‘ತದಾ ವಿಪಸ್ಸೀ ಭಗವಾ, ಭಿಕ್ಖುಸಙ್ಘಪುರಕ್ಖತೋ;
ಓಭಾಸೇನ್ತೋ ದಿಸಾ ಸಬ್ಬಾ, ಆಗಚ್ಛತಿ ನರಾಸಭೋ.
‘‘ಆಸನಂ ಪಞ್ಞಪೇತ್ವಾನ, ನಿಮನ್ತೇತ್ವಾ ಮಹಾಮುನಿಂ;
ಸನ್ಥರಿತ್ವಾನ ತಂ ಪುಪ್ಫಂ, ಅಭಿನೇಸಿಂ ಸಕಂ ಘರಂ.
‘‘ಯಂ ಮೇ ಅತ್ಥಿ ಸಕೇ ಗೇಹೇ, ಆಮಿಸಂ ಪಚ್ಚುಪಟ್ಠಿತಂ;
ತಾಹಂ ಬುದ್ಧಸ್ಸ ಪಾದಾಸಿಂ, ಪಸನ್ನೋ ಸೇಹಿ ಪಾಣಿಭಿ.
‘‘ಭುತ್ತಾವಿಂ ಕಾಲಮಞ್ಞಾಯ, ಪುಪ್ಫಹತ್ಥಮದಾಸಹಂ;
ಅನುಮೋದಿತ್ವಾನ ಸಬ್ಬಞ್ಞೂ, ಪಕ್ಕಾಮಿ ಉತ್ತರಾಮುಖೋ.
‘‘ಏಕನವುತಿತೋ ¶ ಕಪ್ಪೇ, ಯಂ ಪುಪ್ಫಮದದಿಂ ತದಾ;
ದುಗ್ಗತಿಂ ನಾಭಿಜಾನಾಮಿ, ಪುಪ್ಫದಾನಸ್ಸಿದಂ ಫಲಂ.
‘‘ಅನನ್ತರಂ ಇತೋ ಕಪ್ಪೇ, ರಾಜಾಹುಂ ವರದಸ್ಸನೋ;
ಸತ್ತರತನಸಮ್ಪನ್ನೋ, ಚಕ್ಕವತ್ತೀ ಮಹಬ್ಬಲೋ.
‘‘ಪಟಿಸಮ್ಭಿದಾ ¶ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಕುಸುಮಾಸನಿಯೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಕುಸುಮಾಸನಿಯತ್ಥೇರಸ್ಸಾಪದಾನಂ ಛಟ್ಠಂ.
೭. ಫಲದಾಯಕತ್ಥೇರಅಪದಾನಂ
‘‘ಅಜ್ಝಾಯಕೋ ಮನ್ತಧರೋ, ತಿಣ್ಣಂ ವೇದಾನ ಪಾರಗೂ;
ಹಿಮವನ್ತಸ್ಸಾವಿದೂರೇ, ವಸಾಮಿ ಅಸ್ಸಮೇ ಅಹಂ.
‘‘ಅಗ್ಗಿಹುತ್ತಞ್ಚ ಮೇ ಅತ್ಥಿ, ಪುಣ್ಡರೀಕಫಲಾನಿ ಚ;
ಪುಟಕೇ ನಿಕ್ಖಿಪಿತ್ವಾನ, ದುಮಗ್ಗೇ ಲಗ್ಗಿತಂ ಮಯಾ.
‘‘ಪದುಮುತ್ತರೋ ¶ ¶ ಲೋಕವಿದೂ, ಆಹುತೀನಂ ಪಟಿಗ್ಗಹೋ;
ಮಮುದ್ಧರಿತುಕಾಮೋ ಸೋ, ಭಿಕ್ಖನ್ತೋ ಮಮುಪಾಗಮಿ.
‘‘ಪಸನ್ನಚಿತ್ತೋ ಸುಮನೋ, ಫಲಂ ಬುದ್ಧಸ್ಸದಾಸಹಂ;
ವಿತ್ತಿಸಞ್ಜನನೋ ಮಯ್ಹಂ, ದಿಟ್ಠಧಮ್ಮಸುಖಾವಹೋ.
‘‘ಸುವಣ್ಣವಣ್ಣೋ ಸಮ್ಬುದ್ಧೋ, ಆಹುತೀನಂ ಪಟಿಗ್ಗಹೋ;
ಅನ್ತಲಿಕ್ಖೇ ಠಿತೋ ಸತ್ಥಾ, ಇಮಂ ಗಾಥಂ ಅಭಾಸಥ.
‘‘‘ಇಮಿನಾ ಫಲದಾನೇನ, ಚೇತನಾಪಣಿಧೀಹಿ ಚ;
ಕಪ್ಪಾನಂ ಸತಸಹಸ್ಸಂ, ದುಗ್ಗತಿಂ ನುಪಪಜ್ಜಸಿ’.
‘‘ತೇನೇವ ¶ ಸುಕ್ಕಮೂಲೇನ, ಅನುಭೋತ್ವಾನ ಸಮ್ಪದಾ;
ಪತ್ತೋಮ್ಹಿ ಅಚಲಂ ಠಾನಂ, ಹಿತ್ವಾ ಜಯಪರಾಜಯಂ.
‘‘ಇತೋ ಸತ್ತಸತೇ ಕಪ್ಪೇ, ರಾಜಾ ಆಸಿಂ ಸುಮಙ್ಗಲೋ;
ಸತ್ತರತನಸಮ್ಪನ್ನೋ ಚಕ್ಕವತ್ತೀ ಮಹಬ್ಬಲೋ.
‘‘ಪಟಿಸಮ್ಭಿದಾ ¶ ¶ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಫಲದಾಯಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಫಲದಾಯಕತ್ಥೇರಸ್ಸಾಪದಾನಂ ಸತ್ತಮಂ.
೮. ಞಾಣಸಞ್ಞಿಕತ್ಥೇರಅಪದಾನಂ
‘‘ಪಬ್ಬತೇ ಹಿಮವನ್ತಮ್ಹಿ, ವಸಾಮಿ ಪಬ್ಬತನ್ತರೇ;
ಪುಲಿನಂ ಸೋಭನಂ ದಿಸ್ವಾ, ಬುದ್ಧಸೇಟ್ಠಂ ಅನುಸ್ಸರಿಂ.
‘‘ಞಾಣೇ ಉಪನಿಧಾ ನತ್ಥಿ, ಸಙ್ಖಾರಂ [ಸಙ್ಗಾಮಂ (ಸೀ. ಸ್ಯಾ.), ಸಙ್ಖಾತಂ (ಥೇರಗಾಥಾ ಅಟ್ಠ.)] ನತ್ಥಿ ಸತ್ಥುನೋ;
ಸಬ್ಬಧಮ್ಮಂ ಅಭಿಞ್ಞಾಯ, ಞಾಣೇನ ಅಧಿಮುಚ್ಚತಿ.
‘‘ನಮೋ ತೇ ಪುರಿಸಾಜಞ್ಞ, ನಮೋ ತೇ ಪುರಿಸುತ್ತಮ;
ಞಾಣೇನ ತೇ ಸಮೋ ನತ್ಥಿ, ಯಾವತಾ ಞಾಣಮುತ್ತಮಂ.
‘‘ಞಾಣೇ ಚಿತ್ತಂ ಪಸಾದೇತ್ವಾ, ಕಪ್ಪಂ ಸಗ್ಗಮ್ಹಿ ಮೋದಹಂ;
ಅವಸೇಸೇಸು ಕಪ್ಪೇಸು, ಕುಸಲಂ ಚರಿತಂ [ಕರಿತಂ (ಸೀ. ಸ್ಯಾ.), ಕಿರಿಯಂ (ಕ.)] ಮಯಾ.
‘‘ಏಕನವುತಿತೋ ¶ ¶ ಕಪ್ಪೇ, ಯಂ ಸಞ್ಞಮಲಭಿಂ ತದಾ;
ದುಗ್ಗತಿಂ ನಾಭಿಜಾನಾಮಿ, ಞಾಣಸಞ್ಞಾಯಿದಂ ಫಲಂ.
‘‘ಇತೋ ಸತ್ತತಿಕಪ್ಪಮ್ಹಿ [ತೇಸತ್ತತಿಕಪ್ಪೇ (ಸೀ. ಸ್ಯಾ.)], ಏಕೋ ಪುಲಿನಪುಪ್ಫಿಯೋ;
ಸತ್ತರತನಸಮ್ಪನ್ನೋ, ಚಕ್ಕವತ್ತೀ ಮಹಬ್ಬಲೋ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಞಾಣಸಞ್ಞಿಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಞಾಣಸಞ್ಞಿಕತ್ಥೇರಸ್ಸಾಪದಾನಂ ಅಟ್ಠಮಂ.
೯. ಗಣ್ಠಿಪುಪ್ಫಿಯತ್ಥೇರಅಪದಾನಂ
‘‘ಸುವಣ್ಣವಣ್ಣೋ ಸಮ್ಬುದ್ಧೋ, ವಿಪಸ್ಸೀ ದಕ್ಖಿಣಾರಹೋ;
ಪುರಕ್ಖತೋ ಸಾವಕೇಹಿ, ಆರಾಮಾ ಅಭಿನಿಕ್ಖಮಿ.
‘‘ದಿಸ್ವಾನಹಂ ಬುದ್ಧಸೇಟ್ಠಂ, ಸಬ್ಬಞ್ಞುಂ ತಮನಾಸಕಂ;
ಪಸನ್ನಚಿತ್ತೋ ಸುಮನೋ, ಗಣ್ಠಿಪುಪ್ಫಂ [ಗತಮಗ್ಗಂ (ಸ್ಯಾ. ಕ.)] ಅಪೂಜಯಿಂ.
‘‘ತೇನ ¶ ಚಿತ್ತಪ್ಪಸಾದೇನ, ದ್ವಿಪದಿನ್ದಸ್ಸ ತಾದಿನೋ;
ಹಟ್ಠೋ ಹಟ್ಠೇನ ಚಿತ್ತೇನ, ಪುನ ವನ್ದಿಂ ತಥಾಗತಂ.
‘‘ಏಕನವುತಿತೋ ಕಪ್ಪೇ, ಯಂ ಪುಪ್ಫಮಭಿರೋಪಯಿಂ;
ದುಗ್ಗತಿಂ ನಾಭಿಜಾನಾಮಿ, ಬುದ್ಧಪೂಜಾಯಿದಂ ಫಲಂ.
‘‘ಏಕತಾಲೀಸಿತೋ ¶ ಕಪ್ಪೇ, ಚರಣೋ ನಾಮ ಖತ್ತಿಯೋ;
ಸತ್ತರತನಸಮ್ಪನ್ನೋ, ಚಕ್ಕವತ್ತೀ ಮಹಬ್ಬಲೋ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಗಣ್ಠಿಪುಪ್ಫಿಯೋ [ಗನ್ಧಪುಪ್ಫಿಯೋ (ಸ್ಯಾ. ಕ.)] ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಗಣ್ಠಿಪುಪ್ಫಿಯತ್ಥೇರಸ್ಸಾಪದಾನಂ ನವಮಂ.
೧೦. ಪದುಮಪೂಜಕತ್ಥೇರಅಪದಾನಂ
‘‘ಹಿಮವನ್ತಸ್ಸಾವಿದೂರೇ ¶ , ಗೋತಮೋ ನಾಮ ಪಬ್ಬತೋ;
ನಾನಾರುಕ್ಖೇಹಿ ಸಞ್ಛನ್ನೋ, ಮಹಾಭೂತಗಣಾಲಯೋ.
‘‘ವೇಮಜ್ಝಮ್ಹಿ ಚ ತಸ್ಸಾಸಿ, ಅಸ್ಸಮೋ ಅಭಿನಿಮ್ಮಿತೋ;
ಪುರಕ್ಖತೋ ಸಸಿಸ್ಸೇಹಿ, ವಸಾಮಿ ಅಸ್ಸಮೇ ಅಹಂ.
‘‘ಆಯನ್ತು ¶ ಮೇ ಸಿಸ್ಸಗಣಾ, ಪದುಮಂ ಆಹರನ್ತು ಮೇ;
ಬುದ್ಧಪೂಜಂ ಕರಿಸ್ಸಾಮಿ, ದ್ವಿಪದಿನ್ದಸ್ಸ ತಾದಿನೋ.
‘‘ಏವನ್ತಿ ತೇ ಪಟಿಸ್ಸುತ್ವಾ, ಪದುಮಂ ಆಹರಿಂಸು ಮೇ;
ತಥಾ ನಿಮಿತ್ತಂ ಕತ್ವಾಹಂ, ಬುದ್ಧಸ್ಸ ಅಭಿರೋಪಯಿಂ.
‘‘ಸಿಸ್ಸೇ ತದಾ ಸಮಾನೇತ್ವಾ, ಸಾಧುಕಂ ಅನುಸಾಸಹಂ;
ಮಾ ಖೋ ತುಮ್ಹೇ ಪಮಜ್ಜಿತ್ಥ, ಅಪ್ಪಮಾದೋ ಸುಖಾವಹೋ.
‘‘ಏವಂ ¶ ಸಮನುಸಾಸಿತ್ವಾ, ತೇ ಸಿಸ್ಸೇ ವಚನಕ್ಖಮೇ;
ಅಪ್ಪಮಾದಗುಣೇ ಯುತ್ತೋ, ತದಾ ಕಾಲಙ್ಕತೋ ಅಹಂ.
‘‘ಏಕನವುತಿತೋ ಕಪ್ಪೇ, ಯಂ ಪುಪ್ಫಮಭಿರೋಪಯಿಂ;
ದುಗ್ಗತಿಂ ನಾಭಿಜಾನಾಮಿ, ಬುದ್ಧಪೂಜಾಯಿದಂ ಫಲಂ.
‘‘ಏಕಪಞ್ಞಾಸಕಪ್ಪಮ್ಹಿ, ರಾಜಾ ಆಸಿಂ ಜಲುತ್ತಮೋ;
ಸತ್ತರತನಸಮ್ಪನ್ನೋ, ಚಕ್ಕವತ್ತೀ ಮಹಬ್ಬಲೋ.
‘‘ಪಟಿಸಮ್ಭಿದಾ ¶ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಪದುಮಪೂಜಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ;
ಪದುಮಪೂಜಕತ್ಥೇರಸ್ಸಾಪದಾನಂ ದಸಮಂ.
ಸೇರೇಯ್ಯವಗ್ಗೋ ತೇರಸಮೋ.
ತಸ್ಸುದ್ದಾನಂ –
ಸೇರೇಯ್ಯಕೋ ಪುಪ್ಫಥೂಪಿ, ಪಾಯಸೋ ಗನ್ಧಥೋಮಕೋ;
ಆಸನಿ ಫಲಸಞ್ಞೀ ಚ, ಗಣ್ಠಿಪದುಮಪುಪ್ಫಿಯೋ;
ಪಞ್ಚುತ್ತರಸತಾ ಗಾಥಾ, ಗಣಿತಾ ಅತ್ಥದಸ್ಸಿಭಿ.
೧೪. ಸೋಭಿತವಗ್ಗೋ
೧. ಸೋಭಿತತ್ಥೇರಅಪದಾನಂ
‘‘ಪದುಮುತ್ತರೋ ¶ ¶ ¶ ನಾಮ ಜಿನೋ, ಲೋಕಜೇಟ್ಠೋ ನರಾಸಭೋ;
ಮಹತೋ ಜನಕಾಯಸ್ಸ, ದೇಸೇತಿ ಅಮತಂ ಪದಂ.
‘‘ತಸ್ಸಾಹಂ ವಚನಂ ಸುತ್ವಾ, ವಾಚಾಸಭಿಮುದೀರಿತಂ [ವಾಚಾಸಭಿಮುದೀರಯಿಂ (?)];
ಅಞ್ಜಲಿಂ ಪಗ್ಗಹೇತ್ವಾನ, ಏಕಗ್ಗೋ ಆಸಹಂ ತದಾ.
‘‘ಯಥಾ ¶ ಸಮುದ್ದೋ ಉದಧೀನಮಗ್ಗೋ, ನೇರೂ ನಗಾನಂ ಪವರೋ ಸಿಲುಚ್ಚಯೋ;
ತಥೇವ ಯೇ ಚಿತ್ತವಸೇನ ವತ್ತರೇ, ನ ಬುದ್ಧಞಾಣಸ್ಸ ಕಲಂ ಉಪೇನ್ತಿ ತೇ.
‘‘ಧಮ್ಮವಿಧಿಂ [ಧಮ್ಮೇ ವಿಧಿಂ (ಸೀ.)] ಠಪೇತ್ವಾನ, ಬುದ್ಧೋ ಕಾರುಣಿಕೋ ಇಸಿ;
ಭಿಕ್ಖುಸಙ್ಘೇ ನಿಸೀದಿತ್ವಾ, ಇಮಾ ಗಾಥಾ ಅಭಾಸಥ.
‘‘‘ಯೋ ಸೋ ಞಾಣಂ ಪಕಿತ್ತೇಸಿ, ಬುದ್ಧಮ್ಹಿ ಲೋಕನಾಯಕೇ;
ಕಪ್ಪಾನಂ ಸತಸಹಸ್ಸಂ, ದುಗ್ಗತಿಂ ನ ಗಮಿಸ್ಸತಿ.
‘‘‘ಕಿಲೇಸೇ ಝಾಪಯಿತ್ವಾನ, ಏಕಗ್ಗೋ ಸುಸಮಾಹಿತೋ;
ಸೋಭಿತೋ ನಾಮ ನಾಮೇನ, ಹೇಸ್ಸತಿ ಸತ್ಥು ಸಾವಕೋ’.
‘‘ಪಞ್ಞಾಸೇ ¶ ಕಪ್ಪಸಹಸ್ಸೇ, ಸತ್ತೇವಾಸುಂ ಯಸುಗ್ಗತಾ [ಸಮುಗ್ಗತಾ (ಸ್ಯಾ.)];
ಸತ್ತರತನಸಮ್ಪನ್ನಾ, ಚಕ್ಕವತ್ತೀ ಮಹಬ್ಬಲಾ.
‘‘ಕಿಲೇಸಾ ಝಾಪಿತಾ ಮಯ್ಹಂ, ಭವಾ ಸಬ್ಬೇ ಸಮೂಹತಾ;
ತಿಸ್ಸೋ ವಿಜ್ಜಾ ಅನುಪ್ಪತ್ತಾ, ಕತಂ ಬುದ್ಧಸ್ಸ ಸಾಸನಂ.
‘‘ಪಟಿಸಮ್ಭಿದಾ ಚತಸ್ಸೋ, ವಿಮೋಕ್ಖಾಪಿ ಚ ಅಟ್ಠಿಮೇ;
ಛಳಭಿಞ್ಞಾ ಸಚ್ಛಿಕತಾ, ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಸೋಭಿತೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಸೋಭಿತತ್ಥೇರಸ್ಸಾಪದಾನಂ ಪಠಮಂ.
೨. ಸುದಸ್ಸನತ್ಥೇರಅಪದಾನಂ
‘‘ವಿನತಾ ¶ ¶ ನದಿಯಾ [ವಿತ್ಥತಾಯ ನದಿಯಾ (ಸ್ಯಾ.)] ತೀರೇ, ಪಿಲಕ್ಖು [ಪಿಲಕ್ಖೋ (ಸೀ. ಥೇರಗಾಥಾ ಅಟ್ಠ.)] ಫಲಿತೋ ಅಹು;
ತಾಹಂ ರುಕ್ಖಂ ಗವೇಸನ್ತೋ, ಅದ್ದಸಂ ಲೋಕನಾಯಕಂ.
‘‘ಕೇತಕಂ ಪುಪ್ಫಿತಂ ದಿಸ್ವಾ, ವಣ್ಟೇ ಛೇತ್ವಾನಹಂ ತದಾ;
ಬುದ್ಧಸ್ಸ ಅಭಿರೋಪೇಸಿಂ, ಸಿಖಿನೋ ಲೋಕಬನ್ಧುನೋ.
‘‘ಯೇನ ಞಾಣೇನ ಪತ್ತೋಸಿ, ಅಚ್ಚುತಂ ಅಮತಂ ಪದಂ;
ತಂ ಞಾಣಂ ಅಭಿಪೂಜೇಮಿ, ಬುದ್ಧಸೇಟ್ಠ ಮಹಾಮುನಿ.
‘‘ಞಾಣಮ್ಹಿ ಪೂಜಂ ಕತ್ವಾನ, ಪಿಲಕ್ಖುಮದ್ದಸಂ ಅಹಂ;
ಪಟಿಲದ್ಧೋಮ್ಹಿ ತಂ ಪಞ್ಞಂ [ತಂ ಸಞ್ಞಂ (ಸ್ಯಾ.), ತಂ ಪುಞ್ಞಂ (ಕ.)], ಞಾಣಪೂಜಾಯಿದಂ ಫಲಂ.
‘‘ಏಕತ್ತಿಂಸೇ ¶ ಇತೋ ಕಪ್ಪೇ, ಯಂ ಪುಪ್ಫಮಭಿರೋಪಯಿಂ;
ದುಗ್ಗತಿಂ ನಾಭಿಜಾನಾಮಿ, ಞಾಣಪೂಜಾಯಿದಂ ಫಲಂ.
‘‘ಇತೋ ¶ ತೇರಸಕಪ್ಪಮ್ಹಿ, ದ್ವಾದಸಾಸುಂ ಫಲುಗ್ಗತಾ;
ಸತ್ತರತನಸಮ್ಪನ್ನಾ, ಚಕ್ಕವತ್ತೀ ಮಹಪ್ಫಲಾ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಸುದಸ್ಸನೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಸುದಸ್ಸನತ್ಥೇರಸ್ಸಾಪದಾನಂ ದುತಿಯಂ.
೩. ಚನ್ದನಪೂಜನಕತ್ಥೇರಅಪದಾನಂ
‘‘ಚನ್ದಭಾಗಾನದೀತೀರೇ, ಅಹೋಸಿಂ ಕಿನ್ನರೋ ತದಾ;
ಪುಪ್ಫಭಕ್ಖೋ ಚಹಂ ಆಸಿಂ, ಪುಪ್ಫಾನಿವಸನೋ ತಥಾ [ಪುಪ್ಫಾನಂ ವಸನೋ ಅಹಂ (ಸ್ಯಾ.)].
‘‘ಅತ್ಥದಸ್ಸೀ ತು ಭಗವಾ, ಲೋಕಜೇಟ್ಠೋ ನರಾಸಭೋ;
ವಿಪಿನಗ್ಗೇನ ನಿಯ್ಯಾಸಿ, ಹಂಸರಾಜಾವ ಅಮ್ಬರೇ.
‘‘ನಮೋ ತೇ ಪುರಿಸಾಜಞ್ಞ, ಚಿತ್ತಂ ತೇ ಸುವಿಸೋಧಿತಂ;
ಪಸನ್ನಮುಖವಣ್ಣೋಸಿ, ವಿಪ್ಪಸನ್ನಮುಖಿನ್ದ್ರಿಯೋ.
‘‘ಓರೋಹಿತ್ವಾನ ¶ ಆಕಾಸಾ, ಭೂರಿಪಞ್ಞೋ ಸುಮೇಧಸೋ;
ಸಙ್ಘಾಟಿಂ ಪತ್ಥರಿತ್ವಾನ, ಪಲ್ಲಙ್ಕೇನ ಉಪಾವಿಸಿ.
‘‘ವಿಲೀನಂ ¶ ಚನ್ದನಾದಾಯ, ಅಗಮಾಸಿಂ ಜಿನನ್ತಿಕಂ;
ಪಸನ್ನಚಿತ್ತೋ ಸುಮನೋ, ಬುದ್ಧಸ್ಸ ಅಭಿರೋಪಯಿಂ.
‘‘ಅಭಿವಾದೇತ್ವಾನ ¶ ಸಮ್ಬುದ್ಧಂ, ಲೋಕಜೇಟ್ಠಂ ನರಾಸಭಂ;
ಪಾಮೋಜ್ಜಂ ಜನಯಿತ್ವಾನ, ಪಕ್ಕಾಮಿಂ ಉತ್ತರಾಮುಖೋ.
‘‘ಅಟ್ಠಾರಸೇ ಕಪ್ಪಸತೇ, ಚನ್ದನಂ ಯಂ ಅಪೂಜಯಿಂ;
ದುಗ್ಗತಿಂ ನಾಭಿಜಾನಾಮಿ, ಬುದ್ಧಪೂಜಾಯಿದಂ ಫಲಂ.
‘‘ಚತುದ್ದಸೇ ಕಪ್ಪಸತೇ, ಇತೋ ಆಸಿಂಸು ತೇ ತಯೋ;
ರೋಹಣೀ ನಾಮ [ರೋಹಿತಾ ನಾಮ (ಸೀ.), ರೋಹಿಣೀ ನಾಮ (ಸ್ಯಾ.)] ನಾಮೇನ, ಚಕ್ಕವತ್ತೀ ಮಹಬ್ಬಲಾ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಚನ್ದನಪೂಜನಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ;
ಚನ್ದನಪೂಜನಕತ್ಥೇರಸ್ಸಾಪದಾನಂ ತತಿಯಂ.
ಅಟ್ಠಮಭಾಣವಾರಂ.
೪. ಪುಪ್ಫಚ್ಛದನಿಯತ್ಥೇರಅಪದಾನಂ
‘‘ಸುನನ್ದೋ ¶ ನಾಮ ನಾಮೇನ, ಬ್ರಾಹ್ಮಣೋ ಮನ್ತಪಾರಗೂ;
ಅಜ್ಝಾಯಕೋ ಯಾಚಯೋಗೋ, ವಾಜಪೇಯ್ಯಂ ಅಯಾಜಯಿ.
‘‘ಪದುಮುತ್ತರೋ ಲೋಕವಿದೂ, ಅಗ್ಗೋ ಕಾರುಣಿಕೋ ಇಸಿ;
ಜನತಂ ಅನುಕಮ್ಪನ್ತೋ, ಅಮ್ಬರೇ ಚಙ್ಕಮೀ ತದಾ.
‘‘ಚಙ್ಕಮಿತ್ವಾನ ಸಮ್ಬುದ್ಧೋ, ಸಬ್ಬಞ್ಞೂ ಲೋಕನಾಯಕೋ;
ಮೇತ್ತಾಯ ಅಫರಿ ಸತ್ತೇ, ಅಪ್ಪಮಾಣೇ [ಅಪ್ಪಮಾಣಂ (ಸೀ. ಸ್ಯಾ.)] ನಿರೂಪಧಿ.
‘‘ವಣ್ಟೇ ¶ ಛೇತ್ವಾನ ಪುಪ್ಫಾನಿ, ಬ್ರಾಹ್ಮಣೋ ಮನ್ತಪಾರಗೂ;
ಸಬ್ಬೇ ಸಿಸ್ಸೇ ಸಮಾನೇತ್ವಾ, ಆಕಾಸೇ ಉಕ್ಖಿಪಾಪಯಿ.
‘‘ಯಾವತಾ ¶ ನಗರಂ ಆಸಿ, ಪುಪ್ಫಾನಂ ಛದನಂ ತದಾ;
ಬುದ್ಧಸ್ಸ ಆನುಭಾವೇನ, ಸತ್ತಾಹಂ ನ ವಿಗಚ್ಛಥ.
‘‘ತೇನೇವ ಸುಕ್ಕಮೂಲೇನ, ಅನುಭೋತ್ವಾನ ಸಮ್ಪದಾ;
ಸಬ್ಬಾಸವೇ ಪರಿಞ್ಞಾಯ, ತಿಣ್ಣೋ ಲೋಕೇ ವಿಸತ್ತಿಕಂ.
‘‘ಏಕಾರಸೇ ¶ ಕಪ್ಪಸತೇ, ಪಞ್ಚತಿಂಸಾಸು ಖತ್ತಿಯಾ;
ಅಮ್ಬರಂಸಸನಾಮಾ ತೇ, ಚಕ್ಕವತ್ತೀ ಮಹಬ್ಬಲಾ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಪುಪ್ಫಚ್ಛದನಿಯೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಪುಪ್ಫಚ್ಛದನಿಯತ್ಥೇರಸ್ಸಾಪದಾನಂ ಚತುತ್ಥಂ.
೫. ರಹೋಸಞ್ಞಕತ್ಥೇರಅಪದಾನಂ
‘‘ಹಿಮವನ್ತಸ್ಸಾವಿದೂರೇ, ವಸಭೋ ನಾಮ ಪಬ್ಬತೋ;
ತಸ್ಮಿಂ ಪಬ್ಬತಪಾದಮ್ಹಿ, ಅಸ್ಸಮೋ ಆಸಿ ಮಾಪಿತೋ.
‘‘ತೀಣಿ ಸಿಸ್ಸಸಹಸ್ಸಾನಿ, ವಾಚೇಸಿಂ ಬ್ರಾಹ್ಮಣೋ [ಬ್ರಾಹ್ಮಣೇ (ಸೀ.)] ತದಾ;
ಸಂಹರಿತ್ವಾನ [ಸಂಸಾವಿತ್ವಾನ (ಸ್ಯಾ.)] ತೇ ಸಿಸ್ಸೇ, ಏಕಮನ್ತಂ ಉಪಾವಿಸಿಂ.
‘‘ಏಕಮನ್ತಂ ¶ ¶ ನಿಸೀದಿತ್ವಾ, ಬ್ರಾಹ್ಮಣೋ ಮನ್ತಪಾರಗೂ;
ಬುದ್ಧವೇದಂ ಗವೇಸನ್ತೋ [ಪವೇಸನ್ತೋ (ಕ.)], ಞಾಣೇ ಚಿತ್ತಂ ಪಸಾದಯಿಂ.
‘‘ತತ್ಥ ಚಿತ್ತಂ ಪಸಾದೇತ್ವಾ, ನಿಸೀದಿಂ ಪಣ್ಣಸನ್ಥರೇ;
ಪಲ್ಲಙ್ಕಂ ಆಭುಜಿತ್ವಾನ, ತತ್ಥ ಕಾಲಙ್ಕತೋ ಅಹಂ.
‘‘ಏಕತ್ತಿಂಸೇ ಇತೋ ಕಪ್ಪೇ, ಯಂ ಸಞ್ಞಮಲಭಿಂ ತದಾ;
ದುಗ್ಗತಿಂ ನಾಭಿಜಾನಾಮಿ, ಞಾಣಸಞ್ಞಾಯಿದಂ ಫಲಂ.
‘‘ಸತ್ತವೀಸತಿಕಪ್ಪಮ್ಹಿ, ರಾಜಾ ಸಿರಿಧರೋ ಅಹು;
ಸತ್ತರತನಸಮ್ಪನ್ನೋ, ಚಕ್ಕವತ್ತೀ ಮಹಬ್ಬಲೋ.
‘‘ಪಟಿಸಮ್ಭಿದಾ ¶ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ರಹೋಸಞ್ಞಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ರಹೋಸಞ್ಞಕತ್ಥೇರಸ್ಸಾಪದಾನಂ ಪಞ್ಚಮಂ.
೬. ಚಮ್ಪಕಪುಪ್ಫಿಯತ್ಥೇರಅಪದಾನಂ
‘‘ಕಣಿಕಾರಂವ ಜೋತನ್ತಂ, ನಿಸಿನ್ನಂ ಪಬ್ಬತನ್ತರೇ;
ಓಭಾಸೇನ್ತಂ ದಿಸಾ ಸಬ್ಬಾ, ಓಸಧಿಂ ವಿಯ ತಾರಕಂ [ಓಸಧೀ ವಿಯ ತಾರಕಾ (ಕ.)].
‘‘ತಯೋ ¶ ಮಾಣವಕಾ ಆಸುಂ, ಸಕೇ ಸಿಪ್ಪೇ ಸುಸಿಕ್ಖಿತಾ;
ಖಾರಿಭಾರಂ ಗಹೇತ್ವಾನ, ಅನ್ವೇನ್ತಿ ಮಮ ಪಚ್ಛತೋ.
‘‘ಪುಟಕೇ ¶ ಸತ್ತ ಪುಪ್ಫಾನಿ, ನಿಕ್ಖಿತ್ತಾನಿ ತಪಸ್ಸಿನಾ;
ಗಹೇತ್ವಾ ತಾನಿ ಞಾಣಮ್ಹಿ, ವೇಸ್ಸಭುಸ್ಸಾಭಿರೋಪಯಿಂ.
‘‘ಏಕತ್ತಿಂಸೇ ಇತೋ ಕಪ್ಪೇ, ಯಂ ಪುಪ್ಫಮಭಿರೋಪಯಿಂ;
ದುಗ್ಗತಿಂ ನಾಭಿಜಾನಾಮಿ, ಞಾಣಪೂಜಾಯಿದಂ ಫಲಂ.
‘‘ಏಕೂನತಿಂಸಕಪ್ಪಮ್ಹಿ, ವಿಪುಲಾಭ [ವಿಹತಾಭಾ (ಸ್ಯಾ.)] ಸನಾಮಕೋ;
ಸತ್ತರತನಸಮ್ಪನ್ನೋ, ಚಕ್ಕವತ್ತೀ [ರಾಜಾ ಹೋಸಿ (ಕ.)] ಮಹಬ್ಬಲೋ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಚಮ್ಪಕಪುಪ್ಫಿಯೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ;
ಚಮ್ಪಕಪುಪ್ಫಿಯತ್ಥೇರಸ್ಸಾಪದಾನಂ ಛಟ್ಠಂ.
೭. ಅತ್ಥಸನ್ದಸ್ಸಕತ್ಥೇರಅಪದಾನಂ
‘‘ವಿಸಾಲಮಾಳೇ ¶ ಆಸೀನೋ, ಅದ್ದಸಂ ಲೋಕನಾಯಕಂ;
ಖೀಣಾಸವಂ ಬಲಪ್ಪತ್ತಂ, ಭಿಕ್ಖುಸಙ್ಘಪುರಕ್ಖತಂ.
‘‘ಸತಸಹಸ್ಸಾ ¶ ತೇವಿಜ್ಜಾ, ಛಳಭಿಞ್ಞಾ ಮಹಿದ್ಧಿಕಾ;
ಪರಿವಾರೇನ್ತಿ ಸಮ್ಬುದ್ಧಂ, ಕೋ ದಿಸ್ವಾ ನಪ್ಪಸೀದತಿ.
‘‘ಞಾಣೇ ಉಪನಿಧಾ ಯಸ್ಸ, ನ ವಿಜ್ಜತಿ ಸದೇವಕೇ;
ಅನನ್ತಞಾಣಂ ಸಮ್ಬುದ್ಧಂ, ಕೋ ದಿಸ್ವಾ ನಪ್ಪಸೀದತಿ.
‘‘ಧಮ್ಮಕಾಯಞ್ಚ ¶ ದೀಪೇನ್ತಂ, ಕೇವಲಂ ರತನಾಕರಂ;
ವಿಕಪ್ಪೇತುಂ [ವಿಕೋಪೇತುಂ (ಸೀ. ಸ್ಯಾ.)] ನ ಸಕ್ಕೋನ್ತಿ, ಕೋ ದಿಸ್ವಾ ನಪ್ಪಸೀದತಿ.
‘‘ಇಮಾಹಿ ತೀಹಿ ಗಾಥಾಹಿ, ನಾರದೋವ್ಹಯವಚ್ಛಲೋ [ಸರಗಚ್ಛಿಯೋ (ಸೀ.), ಪುರಗಚ್ಛಿಯೋ (ಸ್ಯಾ.)];
ಪದುಮುತ್ತರಂ ಥವಿತ್ವಾನ, ಸಮ್ಬುದ್ಧಂ ಅಪರಾಜಿತಂ.
‘‘ತೇನ ಚಿತ್ತಪ್ಪಸಾದೇನ, ಬುದ್ಧಸನ್ಥವನೇನ ಚ;
ಕಪ್ಪಾನಂ ಸತಸಹಸ್ಸಂ, ದುಗ್ಗತಿಂ, ನುಪಪಜ್ಜಹಂ.
‘‘ಇತೋ ತಿಂಸಕಪ್ಪಸತೇ, ಸುಮಿತ್ತೋ ನಾಮ ಖತ್ತಿಯೋ;
ಸತ್ತರತನಸಮ್ಪನ್ನೋ, ಚಕ್ಕವತ್ತೀ ಮಹಬ್ಬಲೋ.
‘‘ಪಟಿಸಮ್ಭಿದಾ ¶ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಅತ್ಥಸನ್ದಸ್ಸಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಅತ್ಥಸನ್ದಸ್ಸಕತ್ಥೇರಸ್ಸಾಪದಾನಂ ಸತ್ತಮಂ.
೮. ಏಕಪಸಾದನಿಯತ್ಥೇರಅಪದಾನಂ
‘‘ನಾರದೋ ಇತಿ ಮೇ ನಾಮಂ [ನಾರದೋ ಇತಿ ನಾಮೇನ (ಸ್ಯಾ. ಕ.) ಉಪರಿ ತೇವೀಸತಿಮವಗ್ಗೇ ಪನ ಛಟ್ಠಾಪದಾನೇ ‘‘ಮೇ ನಾಮಂ‘‘ಇಚ್ಚೇವ ದಿಸ್ಸತಿ], ಕೇಸವೋ ಇತಿ ಮಂ ವಿದೂ;
ಕುಸಲಾಕುಸಲಂ ಏಸಂ, ಅಗಮಂ ಬುದ್ಧಸನ್ತಿಕಂ.
‘‘ಮೇತ್ತಚಿತ್ತೋ ಕಾರುಣಿಕೋ, ಅತ್ಥದಸ್ಸೀ ಮಹಾಮುನಿ;
ಅಸ್ಸಾಸಯನ್ತೋ ಸತ್ತೇ ಸೋ, ಧಮ್ಮಂ ದೇಸೇತಿ ಚಕ್ಖುಮಾ.
‘‘ಸಕಂ ¶ ಚಿತ್ತಂ ಪಸಾದೇತ್ವಾ, ಸಿರೇ ಕತ್ವಾನ ಅಞ್ಜಲಿಂ;
ಸತ್ಥಾರಂ ಅಭಿವಾದೇತ್ವಾ, ಪಕ್ಕಾಮಿಂ ಪಾಚಿನಾಮುಖೋ.
‘‘ಸತ್ತರಸೇ ¶ ¶ ಕಪ್ಪಸತೇ, ರಾಜಾ ಆಸಿ ಮಹೀಪತಿ;
ಅಮಿತ್ತತಾಪನೋ ನಾಮ, ಚಕ್ಕವತ್ತೀ ಮಹಬ್ಬಲೋ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಏಕಪಸಾದನಿಯೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಏಕಪಸಾದನಿಯತ್ಥೇರಸ್ಸಾಪದಾನಂ ಅಟ್ಠಮಂ.
೯. ಸಾಲಪುಪ್ಫದಾಯಕತ್ಥೇರಅಪದಾನಂ
‘‘ಮಿಗರಾಜಾ ತದಾ ಆಸಿಂ, ಅಭಿಜಾತೋ ಸುಕೇಸರೀ;
ಗಿರಿದುಗ್ಗಂ ಗವೇಸನ್ತೋ, ಅದ್ದಸಂ ಲೋಕನಾಯಕಂ.
‘‘ಅಯಂ ನು ಖೋ ಮಹಾವೀರೋ, ನಿಬ್ಬಾಪೇತಿ ಮಹಾಜನಂ;
ಯಂನೂನಾಹಂ ಉಪಾಸೇಯ್ಯಂ, ದೇವದೇವಂ ನರಾಸಭಂ.
‘‘ಸಾಖಂ ಸಾಲಸ್ಸ ಭಞ್ಜಿತ್ವಾ, ಸಕೋಸಂ ಪುಪ್ಫಮಾಹರಿಂ;
ಉಪಗನ್ತ್ವಾನ ಸಮ್ಬುದ್ಧಂ, ಅದಾಸಿಂ ಪುಪ್ಫಮುತ್ತಮಂ.
‘‘ಏಕನವುತಿತೋ ಕಪ್ಪೇ, ಯಂ ಪುಪ್ಫಮಭಿರೋಪಯಿಂ;
ದುಗ್ಗತಿಂ ನಾಭಿಜಾನಾಮಿ, ಪುಪ್ಫದಾನಸ್ಸಿದಂ ಫಲಂ.
‘‘ಇತೋ ¶ ¶ ಚ ನವಮೇ ಕಪ್ಪೇ, ವಿರೋಚನಸನಾಮಕಾ;
ತಯೋ ಆಸಿಂಸು ರಾಜಾನೋ, ಚಕ್ಕವತ್ತೀ ಮಹಬ್ಬಲಾ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಸಾಲಪುಪ್ಫದಾಯಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಸಾಲಪುಪ್ಫದಾಯಕತ್ಥೇರಸ್ಸಾಪದಾನಂ ನವಮಂ.
೧೦. ಪಿಯಾಲಫಲದಾಯಕತ್ಥೇರಅಪದಾನಂ
‘‘ಪಾರಾವತೋ ¶ [ಪರೋಧಕೋ (ಸ್ಯಾ.)] ತದಾ ಆಸಿಂ, ಪರಂ ಅನುಪರೋಧಕೋ;
ಪಬ್ಭಾರೇ ಸೇಯ್ಯಂ ಕಪ್ಪೇಮಿ, ಅವಿದೂರೇ ಸಿಖಿಸತ್ಥುನೋ.
‘‘ಸಾಯಂ ಪಾತಞ್ಚ ಪಸ್ಸಾಮಿ, ಬುದ್ಧಂ ಲೋಕಗ್ಗನಾಯಕಂ;
ದೇಯ್ಯಧಮ್ಮೋ ಚ ಮೇ ನತ್ಥಿ, ದ್ವಿಪದಿನ್ದಸ್ಸ ತಾದಿನೋ.
‘‘ಪಿಯಾಲಫಲಮಾದಾಯ ¶ , ಅಗಮಂ ಬುದ್ಧಸನ್ತಿಕಂ;
ಪಟಿಗ್ಗಹೇಸಿ ಭಗವಾ, ಲೋಕಜೇಟ್ಠೋ ನರಾಸಭೋ.
‘‘ತತೋ ಪರಂ ಉಪಾದಾಯ, ಪರಿಚಾರಿಂ ವಿನಾಯಕಂ;
ತೇನ ಚಿತ್ತಪ್ಪಸಾದೇನ, ತತ್ಥ ಕಾಲಙ್ಕತೋ ಅಹಂ.
‘‘ಏಕತ್ತಿಂಸೇ ಇತೋ ಕಪ್ಪೇ, ಯಂ ಫಲಂ ಅದದಿಂ ಅಹಂ;
ದುಗ್ಗತಿಂ ನಾಭಿಜಾನಾಮಿ, ಫಲದಾನಸ್ಸಿದಂ ಫಲಂ.
‘‘ಇತೋ ¶ ಪನ್ನರಸೇ ಕಪ್ಪೇ, ತಯೋ ಆಸುಂ ಪಿಯಾಲಿನೋ;
ಸತ್ತರತನಸಮ್ಪನ್ನಾ, ಚಕ್ಕವತ್ತೀ ಮಹಬ್ಬಲಾ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಪಿಯಾಲಫಲದಾಯಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಪಿಯಾಲಫಲದಾಯಕತ್ಥೇರಸ್ಸಾಪದಾನಂ ದಸಮಂ.
ಸೋಭಿತವಗ್ಗೋ ಚುದ್ದಸಮೋ.
ತಸ್ಸುದ್ದಾನಂ –
ಸೋಭಿತಸುದಸ್ಸನೋ ಚ, ಚನ್ದನೋ ಪುಪ್ಫಛದನೋ;
ರಹೋ ಚಮ್ಪಕಪುಪ್ಫೀ ಚ, ಅತ್ಥಸನ್ದಸ್ಸಕೇನ ಚ.
ಏಕಪಸಾದೀ [ಏಕರಂಸಿ (ಸ್ಯಾ.)] ಸಾಲದದೋ, ದಸಮೋ ಫಲದಾಯಕೋ;
ಗಾಥಾಯೋ ಸತ್ತತಿ ದ್ವೇ ಚ, ಗಣಿತಾಯೋ ವಿಭಾವಿಭಿ.
೧೫. ಛತ್ತವಗ್ಗೋ
೧. ಅತಿಛತ್ತಿಯತ್ಥೇರಅಪದಾನಂ
‘‘ಪರಿನಿಬ್ಬುತೇ ¶ ¶ ¶ ಭಗವತಿ, ಅತ್ಥದಸ್ಸೀನರುತ್ತಮೇ;
ಛತ್ತಾತಿಛತ್ತಂ [ಛತ್ತಾಧಿಛತ್ತಂ (ಸೀ.)] ಕಾರೇತ್ವಾ, ಥೂಪಮ್ಹಿ ಅಭಿರೋಪಯಿಂ.
‘‘ಕಾಲೇನ ಕಾಲಮಾಗನ್ತ್ವಾ, ನಮಸ್ಸಿಂ ಲೋಕನಾಯಕಂ [ಸತ್ಥು ಚೇತಿಯಂ (ಸೀ.)];
ಪುಪ್ಫಚ್ಛದನಂ ಕತ್ವಾನ, ಛತ್ತಮ್ಹಿ ಅಭಿರೋಪಯಿಂ.
‘‘ಸತ್ತರಸೇ ಕಪ್ಪಸತೇ, ದೇವರಜ್ಜಮಕಾರಯಿಂ;
ಮನುಸ್ಸತ್ತಂ ನ ಗಚ್ಛಾಮಿ, ಥೂಪಪೂಜಾಯಿದಂ ಫಲಂ.
‘‘ಪಟಿಸಮ್ಭಿದಾ ಚತಸ್ಸೋ, ವಿಮೋಕ್ಖಾಪಿ ಚ ಅಟ್ಠಿಮೇ;
ಛಳಭಿಞ್ಞಾ ಸಚ್ಛಿಕತಾ, ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಅತಿಛತ್ತಿಯೋ [ಅಧಿಛತ್ತಿಯೋ (ಸೀ. ಸ್ಯಾ.)] ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಅತಿಛತ್ತಿಯತ್ಥೇರಸ್ಸಾಪದಾನಂ ಪಠಮಂ.
೨. ಥಮ್ಭಾರೋಪಕತ್ಥೇರಅಪದಾನಂ
‘‘ನಿಬ್ಬುತೇ ¶ ಲೋಕನಾಥಮ್ಹಿ, ಧಮ್ಮದಸ್ಸೀನರಾಸಭೇ;
ಆರೋಪೇಸಿಂ ಧಜತ್ಥಮ್ಭಂ, ಬುದ್ಧಸೇಟ್ಠಸ್ಸ ಚೇತಿಯೇ.
‘‘ನಿಸ್ಸೇಣಿಂ ಮಾಪಯಿತ್ವಾನ, ಥೂಪಸೇಟ್ಠಂ ಸಮಾರುಹಿಂ;
ಜಾತಿಪುಪ್ಫಂ ಗಹೇತ್ವಾನ, ಥೂಪಮ್ಹಿ ಅಭಿರೋಪಯಿಂ.
‘‘ಅಹೋ ¶ ಬುದ್ಧೋ ಅಹೋ ಧಮ್ಮೋ, ಅಹೋ ನೋ ಸತ್ಥು ಸಮ್ಪದಾ;
ದುಗ್ಗತಿಂ ನಾಭಿಜಾನಾಮಿ, ಥೂಪಪೂಜಾಯಿದಂ ಫಲಂ.
‘‘ಚತುನ್ನವುತಿತೋ ಕಪ್ಪೇ, ಥೂಪಸೀಖಸನಾಮಕಾ;
ಸೋಳಸಾಸಿಂಸು ರಾಜಾನೋ, ಚಕ್ಕವತ್ತೀ ಮಹಬ್ಬಲಾ.
‘‘ಪಟಿಸಮ್ಭಿದಾ ¶ ¶ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಥಮ್ಭಾರೋಪಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಥಮ್ಭಾರೋಪಕತ್ಥೇರಸ್ಸಾಪದಾನಂ ದುತಿಯಂ.
೩. ವೇದಿಕಾರಕತ್ಥೇರಅಪದಾನಂ
‘‘ನಿಬ್ಬುತೇ ಲೋಕನಾಥಮ್ಹಿ, ಪಿಯದಸ್ಸೀನರುತ್ತಮೇ;
ಪಸನ್ನಚಿತ್ತೋ ಸುಮನೋ, ಮುತ್ತಾವೇದಿಮಕಾಸಹಂ.
‘‘ಮಣೀಹಿ ಪರಿವಾರೇತ್ವಾ, ಅಕಾಸಿಂ ವೇದಿಮುತ್ತಮಂ;
ವೇದಿಕಾಯ ಮಹಂ ಕತ್ವಾ, ತತ್ಥ ಕಾಲಙ್ಕತೋ ಅಹಂ.
‘‘ಯಂ ಯಂ ಯೋನುಪಪಜ್ಜಾಮಿ, ದೇವತ್ತಂ ಅಥ ಮಾನುಸಂ;
ಮಣೀ ಧಾರೇನ್ತಿ ಆಕಾಸೇ, ಪುಞ್ಞಕಮ್ಮಸ್ಸಿದಂ ಫಲಂ.
‘‘ಸೋಳಸಿತೋ ಕಪ್ಪಸತೇ, ಮಣಿಪ್ಪಭಾಸನಾಮಕಾ;
ಛತ್ತಿಂಸಾಸಿಂಸು [ಬಾತ್ತಿಂಸಾಸಿಂಸು (ಸೀ. ಸ್ಯಾ.)] ರಾಜಾನೋ, ಚಕ್ಕವತ್ತೀ ಮಹಬ್ಬಲಾ.
‘‘ಪಟಿಸಮ್ಭಿದಾ ¶ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ವೇದಿಕಾರಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ವೇದಿಕಾರಕತ್ಥೇರಸ್ಸಾಪದಾನಂ ತತಿಯಂ.
೪. ಸಪರಿವಾರಿಯತ್ಥೇರಅಪದಾನಂ
‘‘ಪದುಮುತ್ತರೋ ¶ ನಾಮ ಜಿನೋ, ಲೋಕಜೇಟ್ಠೋ ನರಾಸಭೋ;
ಜಲಿತ್ವಾ ಅಗ್ಗಿಕ್ಖನ್ಧೋವ, ಸಮ್ಬುದ್ಧೋ ಪರಿನಿಬ್ಬುತೋ.
‘‘ನಿಬ್ಬುತೇ ಚ ಮಹಾವೀರೇ, ಥೂಪೋ ವಿತ್ಥಾರಿಕೋ ಅಹು;
ದೂರತೋವ [ಅಹೋರತ್ತಂ (ಸೀ.), ಥೂಪದತ್ತಂ (ಸ್ಯಾ.)] ಉಪಟ್ಠೇನ್ತಿ, ಧಾತುಗೇಹವರುತ್ತಮೇ.
‘‘ಪಸನ್ನಚಿತ್ತೋ ಸುಮನೋ, ಅಕಂ ಚನ್ದನವೇದಿಕಂ;
ದಿಸ್ಸತಿ ಥೂಪಖನ್ಧೋ ಚ [ದೀಯತಿ ಧೂಮಕ್ಖನ್ಧೋ ಚ (ಸೀ.), ದೀಯತಿ ಧೂಪಗನ್ಧೋ ಚ (ಸ್ಯಾ.)], ಥೂಪಾನುಚ್ಛವಿಕೋ ತದಾ.
‘‘ಭವೇ ¶ ನಿಬ್ಬತ್ತಮಾನಮ್ಹಿ, ದೇವತ್ತೇ ಅಥ ಮಾನುಸೇ;
ಓಮತ್ತಂ ಮೇ ನ ಪಸ್ಸಾಮಿ, ಪುಬ್ಬಕಮ್ಮಸ್ಸಿದಂ ಫಲಂ.
‘‘ಪಞ್ಚದಸಕಪ್ಪಸತೇ ¶ , ಇತೋ ಅಟ್ಠ ಜನಾ ಅಹುಂ;
ಸಬ್ಬೇ ಸಮತ್ತನಾಮಾ ತೇ, ಚಕ್ಕವತ್ತೀ ಮಹಬ್ಬಲಾ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ¶ ಸುದಂ ಆಯಸ್ಮಾ ಸಪರಿವಾರಿಯೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಸಪರಿವಾರಿಯತ್ಥೇರಸ್ಸಾಪದಾನಂ ಚತುತ್ಥಂ.
೫. ಉಮಾಪುಪ್ಫಿಯತ್ಥೇರಅಪದಾನಂ
‘‘ನಿಬ್ಬುತೇ ಲೋಕಮಹಿತೇ [ಲೋಕನಾಥಮ್ಹಿ (ಸೀ.)], ಆಹುತೀನಂ ಪಟಿಗ್ಗಹೇ;
ಸಿದ್ಧತ್ಥಮ್ಹಿ ಭಗವತಿ, ಮಹಾಥೂಪಮಹೋ ಅಹು.
‘‘ಮಹೇ ಪವತ್ತಮಾನಮ್ಹಿ, ಸಿದ್ಧತ್ಥಸ್ಸ ಮಹೇಸಿನೋ;
ಉಮಾಪುಪ್ಫಂ [ಉಮ್ಮಾಪುಪ್ಫಂ (ಸಬ್ಬತ್ಥ)] ಗಹೇತ್ವಾನ, ಥೂಪಮ್ಹಿ ಅಭಿರೋಪಯಿಂ.
‘‘ಚತುನ್ನವುತಿತೋ ಕಪ್ಪೇ, ಯಂ ಪುಪ್ಫಮಭಿರೋಪಯಿಂ;
ದುಗ್ಗತಿಂ ನಾಭಿಜಾನಾಮಿ, ಥೂಪಪೂಜಾಯಿದಂ [ಪುಪ್ಫಪೂಜಾಯಿದಂ (ಸ್ಯಾ.), ಬುದ್ಧಪೂಜಾಯಿದಂ (ಕ.)] ಫಲಂ.
‘‘ಇತೋ ಚ ನವಮೇ ಕಪ್ಪೇ, ಸೋಮದೇವಸನಾಮಕಾ;
ಪಞ್ಚಾಸೀತಿಸು ರಾಜಾನೋ, ಚಕ್ಕವತ್ತೀ ಮಹಬ್ಬಲಾ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಉಮಾಪುಪ್ಫಿಯೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಉಮಾಪುಪ್ಫಿಯತ್ಥೇರಸ್ಸಾಪದಾನಂ ಪಞ್ಚಮಂ.
೬. ಅನುಲೇಪದಾಯಕತ್ಥೇರಅಪದಾನಂ
‘‘ಅನೋಮದಸ್ಸೀಮುನಿನೋ ¶ ¶ , ಬೋಧಿವೇದಿಮಕಾಸಹಂ;
ಸುಧಾಯ ಪಿಣ್ಡಂ ದತ್ವಾನ, ಪಾಣಿಕಮ್ಮಂ ಅಕಾಸಹಂ.
‘‘ದಿಸ್ವಾ ¶ ತಂ ಸುಕತಂ ಕಮ್ಮಂ, ಅನೋಮದಸ್ಸೀ ನರುತ್ತಮೋ;
ಭಿಕ್ಖುಸಙ್ಘೇ ಠಿತೋ ಸತ್ಥಾ, ಇಮಂ ಗಾಥಂ ಅಭಾಸಥ.
‘‘‘ಇಮಿನಾ ಸುಧಕಮ್ಮೇನ, ಚೇತನಾಪಣಿಧೀಹಿ ಚ;
ಸಮ್ಪತ್ತಿಂ ಅನುಭೋತ್ವಾನ, ದುಕ್ಖಸ್ಸನ್ತಂ ಕರಿಸ್ಸತಿ’.
‘‘ಪಸನ್ನಮುಖವಣ್ಣೋಮ್ಹಿ ¶ , ಏಕಗ್ಗೋ ಸುಸಮಾಹಿತೋ;
ಧಾರೇಮಿ ಅನ್ತಿಮಂ ದೇಹಂ, ಸಮ್ಮಾಸಮ್ಬುದ್ಧಸಾಸನೇ.
‘‘ಇತೋ ಕಪ್ಪಸತೇ ಆಸಿಂ, ಪರಿಪುಣ್ಣೇ ಅನೂನಕೇ [ಪರಿಪುಣ್ಣೋ ಅನೂನಕೋ (ಸ್ಯಾ.)];
ರಾಜಾ ಸಬ್ಬಘನೋ ನಾಮ, ಚಕ್ಕವತ್ತೀ ಮಹಬ್ಬಲೋ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಅನುಲೇಪದಾಯಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಅನುಲೇಪದಾಯಕತ್ಥೇರಸ್ಸಾಪದಾನಂ ಛಟ್ಠಂ.
೭. ಮಗ್ಗದಾಯಕತ್ಥೇರಅಪದಾನಂ
‘‘ಉತ್ತರಿತ್ವಾನ ¶ ನದಿಕಂ, ವನಂ ಗಚ್ಛತಿ ಚಕ್ಖುಮಾ;
ತಮದ್ದಸಾಸಿಂ ಸಮ್ಬುದ್ಧಂ, ಸಿದ್ಧತ್ಥಂ ವರಲಕ್ಖಣಂ.
‘‘ಕುದಾಲ [ಕುದ್ದಾಲ (ಸೀ. ಸ್ಯಾ.)] ಪಿಟಕಮಾದಾಯ, ಸಮಂ ಕತ್ವಾನ ತಂ ಪಥಂ;
ಸತ್ಥಾರಂ ಅಭಿವಾದೇತ್ವಾ, ಸಕಂ ಚಿತ್ತಂ ಪಸಾದಯಿಂ.
‘‘ಚತುನ್ನವುತಿತೋ ಕಪ್ಪೇ, ಯಂ ಕಮ್ಮಮಕರಿಂ ತದಾ;
ದುಗ್ಗತಿಂ ನಾಭಿಜಾನಾಮಿ, ಮಗ್ಗದಾನಸ್ಸಿದಂ ಫಲಂ.
‘‘ಸತ್ತಪಞ್ಞಾಸಕಪ್ಪಮ್ಹಿ, ಏಕೋ ಆಸಿಂ ಜನಾಧಿಪೋ;
ನಾಮೇನ ಸುಪ್ಪಬುದ್ಧೋತಿ, ನಾಯಕೋ ಸೋ ನರಿಸ್ಸರೋ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಮಗ್ಗದಾಯಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಮಗ್ಗದಾಯಕತ್ಥೇರಸ್ಸಾಪದಾನಂ ಸತ್ತಮಂ.
೮. ಫಲಕದಾಯಕತ್ಥೇರಅಪದಾನಂ
‘‘ಯಾನಕಾರೋ ¶ ¶ ಪುರೇ ಆಸಿಂ, ದಾರುಕಮ್ಮೇ ಸುಸಿಕ್ಖಿತೋ;
ಚನ್ದನಂ ಫಲಕಂ ಕತ್ವಾ, ಅದಾಸಿಂ ಲೋಕಬನ್ಧುನೋ.
‘‘ಪಭಾಸತಿ ¶ ಇದಂ ಬ್ಯಮ್ಹಂ, ಸುವಣ್ಣಸ್ಸ ಸುನಿಮ್ಮಿತಂ;
ಹತ್ಥಿಯಾನಂ ಅಸ್ಸಯಾನಂ, ದಿಬ್ಬಯಾನಂ ಉಪಟ್ಠಿತಂ.
‘‘ಪಾಸಾದಾ ¶ ಸಿವಿಕಾ ಚೇವ, ನಿಬ್ಬತ್ತನ್ತಿ ಯದಿಚ್ಛಕಂ;
ಅಕ್ಖುಬ್ಭಂ [ಅಕ್ಖೋಭಂ (ಸೀ.)] ರತನಂ ಮಯ್ಹಂ, ಫಲಕಸ್ಸ ಇದಂ ಫಲಂ.
‘‘ಏಕನವುತಿತೋ ಕಪ್ಪೇ, ಫಲಕಂ ಯಮಹಂ ದದಿಂ;
ದುಗ್ಗತಿಂ ನಾಭಿಜಾನಾಮಿ, ಫಲಕಸ್ಸ ಇದಂ ಫಲಂ.
‘‘ಸತ್ತಪಞ್ಞಾಸಕಪ್ಪಮ್ಹಿ, ಚತುರೋ ನಿಮ್ಮಿತಾವ್ಹಯಾ;
ಸತ್ತರತನಸಮ್ಪನ್ನಾ, ಚಕ್ಕವತ್ತೀ ಮಹಬ್ಬಲಾ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಫಲಕದಾಯಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಫಲಕದಾಯಕತ್ಥೇರಸ್ಸಾಪದಾನಂ ಅಟ್ಠಮಂ.
೯. ವಟಂಸಕಿಯತ್ಥೇರಅಪದಾನಂ
‘‘ಸುಮೇಧೋ ನಾಮ ನಾಮೇನ, ಸಯಮ್ಭೂ ಅಪರಾಜಿತೋ;
ವಿವೇಕಮನುಬ್ರೂಹನ್ತೋ, ಅಜ್ಝೋಗಹಿ ಮಹಾವನಂ.
‘‘ಸಳಲಂ ಪುಪ್ಫಿತಂ ದಿಸ್ವಾ, ಗನ್ಥಿತ್ವಾನ [ಬನ್ಧಿತ್ವಾನ (ಸೀ.)] ವಟಂಸಕಂ;
ಬುದ್ಧಸ್ಸ ಅಭಿರೋಪೇಸಿಂ, ಸಮ್ಮುಖಾ ಲೋಕನಾಯಕಂ.
‘‘ತಿಂಸಕಪ್ಪಸಹಸ್ಸಮ್ಹಿ ¶ , ಯಂ ಪುಪ್ಫಮಭಿರೋಪಯಿಂ;
ದುಗ್ಗತಿಂ ನಾಭಿಜಾನಾಮಿ, ಬುದ್ಧಪೂಜಾಯಿದಂ ಫಲಂ.
‘‘ಊನವೀಸೇ ಕಪ್ಪಸತೇ, ಸೋಳಸಾಸುಂ ಸುನಿಮ್ಮಿತಾ;
ಸತ್ತರತನಸಮ್ಪನ್ನಾ, ಚಕ್ಕವತ್ತೀ ಮಹಬ್ಬಲಾ.
‘‘ಪಟಿಸಮ್ಭಿದಾ ¶ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ವಟಂಸಕಿಯೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ವಟಂಸಕಿಯತ್ಥೇರಸ್ಸಾಪದಾನಂ ನವಮಂ.
೧೦. ಪಲ್ಲಙ್ಕದಾಯಕತ್ಥೇರಅಪದಾನಂ
‘‘ಸುಮೇಧಸ್ಸ ¶ ಭಗವತೋ, ಲೋಕಜೇಟ್ಠಸ್ಸ ತಾದಿನೋ;
ಪಲ್ಲಙ್ಕೋ ಹಿ ಮಯಾ ದಿನ್ನೋ, ಸಉತ್ತರಸಪಚ್ಛದೋ.
‘‘ಸತ್ತರತನಸಮ್ಪನ್ನೋ ¶ , ಪಲ್ಲಙ್ಕೋ ಆಸಿ ಸೋ ತದಾ;
ಮಮ ಸಙ್ಕಪ್ಪಮಞ್ಞಾಯ, ನಿಬ್ಬತ್ತತಿ ಸದಾ ಮಮ.
‘‘ತಿಂಸಕಪ್ಪಸಹಸ್ಸಮ್ಹಿ, ಪಲ್ಲಙ್ಕಮದದಿಂ ತದಾ;
ದುಗ್ಗತಿಂ ನಾಭಿಜಾನಾಮಿ, ಪಲ್ಲಙ್ಕಸ್ಸ ಇದಂ ಫಲಂ.
‘‘ವೀಸಕಪ್ಪಸಹಸ್ಸಮ್ಹಿ, ಸುವಣ್ಣಾಭಾ ತಯೋ ಜನಾ;
ಸತ್ತರತನಸಮ್ಪನ್ನಾ, ಚಕ್ಕವತ್ತೀ ಮಹಬ್ಬಲಾ.
‘‘ಪಟಿಸಮ್ಭಿದಾ ¶ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಪಲ್ಲಙ್ಕದಾಯಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಪಲ್ಲಙ್ಕದಾಯಕತ್ಥೇರಸ್ಸಾಪದಾನಂ ದಸಮಂ.
ಛತ್ತವಗ್ಗೋ ಪನ್ನರಸಮೋ.
ತಸ್ಸುದ್ದಾನಂ –
ಛತ್ತಂ ಥಮ್ಭೋ ಚ ವೇದಿ ಚ, ಪರಿವಾರುಮಪುಪ್ಫಿಯೋ;
ಅನುಲೇಪೋ ಚ ಮಗ್ಗೋ ಚ, ಫಲಕೋ ಚ ವಟಂಸಕೋ;
ಪಲ್ಲಙ್ಕದಾಯೀ ಚ ಗಾಥಾಯೋ, ಛಪ್ಪಞ್ಞಾಸ ಪಕಿತ್ತಿತಾತಿ.
೧೬. ಬನ್ಧುಜೀವಕವಗ್ಗೋ
೧. ಬನ್ಧುಜೀವಕತ್ಥೇರಅಪದಾನಂ
‘‘ಚನ್ದಂವ ¶ ¶ ¶ ವಿಮಲಂ ಸುದ್ಧಂ, ವಿಪ್ಪಸನ್ನಮನಾವಿಲಂ;
ನನ್ದೀಭವಪರಿಕ್ಖೀಣಂ, ತಿಣ್ಣಂ ಲೋಕೇ ವಿಸತ್ತಿಕಂ.
‘‘ನಿಬ್ಬಾಪಯನ್ತಂ ಜನತಂ, ತಿಣ್ಣಂ [ದಿಸ್ವಾ (?)] ತಾರಯತಂ ವರಂ [ತಾರಯತಂ ಮುನಿಂ (ಸ್ಯಾ.)];
ಮುನಿಂ ವನಮ್ಹಿ ಝಾಯನ್ತಂ [ವನಸ್ಮಿಂ ಝಾಯಮಾನಂ ತಂ (ಸೀ. ಸ್ಯಾ.)], ಏಕಗ್ಗಂ ಸುಸಮಾಹಿತಂ.
‘‘ಬನ್ಧುಜೀವಕಪುಪ್ಫಾನಿ, ಲಗೇತ್ವಾ ಸುತ್ತಕೇನಹಂ;
ಬುದ್ಧಸ್ಸ ಅಭಿರೋಪಯಿಂ, ಸಿಖಿನೋ ಲೋಕಬನ್ಧುನೋ.
‘‘ಏಕತ್ತಿಂಸೇ ¶ ಇತೋ ಕಪ್ಪೇ, ಯಂ ಕಮ್ಮಮಕರಿಂ ತದಾ;
ದುಗ್ಗತಿಂ ನಾಭಿಜಾನಾಮಿ, ಬುದ್ಧಪೂಜಾಯಿದಂ ಫಲಂ.
‘‘ಇತೋ ಸತ್ತಮಕೇ ಕಪ್ಪೇ, ಮನುಜಿನ್ದೋ ಮಹಾಯಸೋ;
ಸಮನ್ತಚಕ್ಖು ನಾಮಾಸಿ, ಚಕ್ಕವತ್ತೀ ಮಹಬ್ಬಲೋ.
‘‘ಪಟಿಸಮ್ಭಿದಾ ಚತಸ್ಸೋ, ವಿಮೋಕ್ಖಾಪಿ ಚ ಅಟ್ಠಿಮೇ;
ಛಳಭಿಞ್ಞಾ ಸಚ್ಛಿಕತಾ, ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಬನ್ಧುಜೀವಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಬನ್ಧುಜೀವಕತ್ಥೇರಸ್ಸಾಪದಾನಂ ಪಠಮಂ.
೨. ತಮ್ಬಪುಪ್ಫಿಯತ್ಥೇರಅಪದಾನಂ
‘‘ಪರಕಮ್ಮಾಯನೇ ¶ ಯುತ್ತೋ, ಅಪರಾಧಂ ಅಕಾಸಹಂ;
ವನನ್ತಂ ಅಭಿಧಾವಿಸ್ಸಂ, ಭಯವೇರಸಮಪ್ಪಿತೋ.
‘‘ಪುಪ್ಫಿತಂ ಪಾದಪಂ ದಿಸ್ವಾ, ಪಿಣ್ಡಿಬನ್ಧಂ ಸುನಿಮ್ಮಿತಂ;
ತಮ್ಬಪುಪ್ಫಂ ಗಹೇತ್ವಾನ, ಬೋಧಿಯಂ ಓಕಿರಿಂ ಅಹಂ.
‘‘ಸಮ್ಮಜ್ಜಿತ್ವಾನ ¶ ತಂ ಬೋಧಿಂ, ಪಾಟಲಿಂ ಪಾದಪುತ್ತಮಂ;
ಪಲ್ಲಙ್ಕಂ ಆಭುಜಿತ್ವಾನ, ಬೋಧಿಮೂಲೇ ಉಪಾವಿಸಿಂ.
‘‘ಗತಮಗ್ಗಂ ¶ ಗವೇಸನ್ತಾ, ಆಗಚ್ಛುಂ ಮಮ ಸನ್ತಿಕಂ;
ತೇ ಚ ದಿಸ್ವಾನಹಂ ತತ್ಥ, ಆವಜ್ಜಿಂ ಬೋಧಿಮುತ್ತಮಂ.
‘‘ವನ್ದಿತ್ವಾನ ಅಹಂ ಬೋಧಿಂ, ವಿಪ್ಪಸನ್ನೇನ ಚೇತಸಾ;
ಅನೇಕತಾಲೇ ಪಪತಿಂ, ಗಿರಿದುಗ್ಗೇ ಭಯಾನಕೇ.
‘‘ಏಕನವುತಿತೋ ಕಪ್ಪೇ, ಯಂ ಪುಪ್ಫಮಭಿರೋಪಯಿಂ;
ದುಗ್ಗತಿಂ ನಾಭಿಜಾನಾಮಿ, ಬೋಧಿಪೂಜಾಯಿದಂ ಫಲಂ.
‘‘ಇತೋ ಚ ತತಿಯೇ ಕಪ್ಪೇ, ರಾಜಾ ಸುಸಞ್ಞತೋ ಅಹಂ [ಸಂಥುಸಿತೋ ಅಹುಂ (ಸೀ.)];
ಸತ್ತರತನಸಮ್ಪನ್ನೋ, ಚಕ್ಕವತ್ತೀ ಮಹಬ್ಬಲೋ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ತಮ್ಬಪುಪ್ಫಿಯೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ತಮ್ಬಪುಪ್ಫಿಯತ್ಥೇರಸ್ಸಾಪದಾನಂ ದುತಿಯಂ.
೩. ವೀಥಿಸಮ್ಮಜ್ಜಕತ್ಥೇರಅಪದಾನಂ
‘‘ಉದೇನ್ತಂ ¶ ¶ ಸತರಂಸಿಂವ, ಪೀತರಂಸಿಂವ [ಸಿತರಂಸಿಂವ (ಸೀ. ಸ್ಯಾ.)] ಭಾಣುಮಂ;
ಪನ್ನರಸೇ ಯಥಾ ಚನ್ದಂ, ನಿಯ್ಯನ್ತಂ ಲೋಕನಾಯಕಂ.
‘‘ಅಟ್ಠಸಟ್ಠಿಸಹಸ್ಸಾನಿ, ಸಬ್ಬೇ ಖೀಣಾಸವಾ ಅಹುಂ;
ಪರಿವಾರಿಂಸು ಸಮ್ಬುದ್ಧಂ, ದ್ವಿಪದಿನ್ದಂ ನರಾಸಭಂ.
‘‘ಸಮ್ಮಜ್ಜಿತ್ವಾನ ತಂ ವೀಥಿಂ, ನಿಯ್ಯನ್ತೇ ಲೋಕನಾಯಕೇ;
ಉಸ್ಸಾಪೇಸಿಂ ಧಜಂ ತತ್ಥ, ವಿಪ್ಪಸನ್ನೇನ ಚೇತಸಾ.
‘‘ಏಕನವುತಿತೋ ಕಪ್ಪೇ, ಯಂ ಧಜಂ ಅಭಿರೋಪಯಿಂ;
ದುಗ್ಗತಿಂ ನಾಭಿಜಾನಾಮಿ, ಧಜದಾನಸ್ಸಿದಂ ಫಲಂ.
‘‘ಇತೋ ಚತುತ್ಥಕೇ ಕಪ್ಪೇ, ರಾಜಾಹೋಸಿಂ ಮಹಬ್ಬಲೋ;
ಸಬ್ಬಾಕಾರೇನ ಸಮ್ಪನ್ನೋ, ಸುಧಜೋ ಇತಿ ವಿಸ್ಸುತೋ.
‘‘ಪಟಿಸಮ್ಭಿದಾ ¶ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ವೀಥಿಸಮ್ಮಜ್ಜಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ವೀಥಿಸಮ್ಮಜ್ಜಕತ್ಥೇರಸ್ಸಾಪದಾನಂ ತತಿಯಂ.
೪. ಕಕ್ಕಾರುಪುಪ್ಫಪೂಜಕತ್ಥೇರಅಪದಾನಂ
‘‘ದೇವಪುತ್ತೋ ¶ ಅಹಂ ಸನ್ತೋ, ಪೂಜಯಿಂ ಸಿಖಿನಾಯಕಂ;
ಕಕ್ಕಾರುಪುಪ್ಫಂ ಪಗ್ಗಯ್ಹ, ಬುದ್ಧಸ್ಸ ಅಭಿರೋಪಯಿಂ.
‘‘ಏಕತ್ತಿಂಸೇ ¶ ಇತೋ ಕಪ್ಪೇ, ಯಂ ಪುಪ್ಫಮಭಿರೋಪಯಿಂ;
ದುಗ್ಗತಿಂ ನಾಭಿಜಾನಾಮಿ, ಬುದ್ಧಪೂಜಾಯಿದಂ ಫಲಂ.
‘‘ಇತೋ ಚ ನವಮೇ ಕಪ್ಪೇ, ರಾಜಾ ಸತ್ತುತ್ತಮೋ ಅಹುಂ;
ಸತ್ತರತನಸಮ್ಪನ್ನೋ, ಚಕ್ಕವತ್ತೀ ಮಹಬ್ಬಲೋ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಕಕ್ಕಾರುಪುಪ್ಫಪೂಜಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಕಕ್ಕಾರುಪುಪ್ಫಪೂಜಕತ್ಥೇರಸ್ಸಾಪದಾನಂ ಚತುತ್ಥಂ.
೫. ಮನ್ದಾರವಪುಪ್ಫಪೂಜಕತ್ಥೇರಅಪದಾನಂ
‘‘ದೇವಪುತ್ತೋ ¶ ಅಹಂ ಸನ್ತೋ, ಪೂಜಯಿಂ ಸಿಖಿನಾಯಕಂ;
ಮನ್ದಾರವೇನ ಪುಪ್ಫೇನ, ಬುದ್ಧಸ್ಸ ಅಭಿರೋಪಯಿಂ.
‘‘ಸತ್ತಾಹಂ ಛದನಂ ಆಸಿ, ದಿಬ್ಬಂ ಮಾಲಂ ತಥಾಗತೇ;
ಸಬ್ಬೇ ಜನಾ ಸಮಾಗನ್ತ್ವಾ, ನಮಸ್ಸಿಂಸು ತಥಾಗತಂ.
‘‘ಏಕತ್ತಿಂಸೇ ಇತೋ ಕಪ್ಪೇ, ಯಂ ಪುಪ್ಫಮಭಿಪೂಜಯಿಂ;
ದುಗ್ಗತಿಂ ನಾಭಿಜಾನಾಮಿ, ಬುದ್ಧಪೂಜಾಯಿದಂ ಫಲಂ.
‘‘ಇತೋ ಚ ದಸಮೇ ಕಪ್ಪೇ, ರಾಜಾಹೋಸಿಂ ಜುತಿನ್ಧರೋ;
ಸತ್ತರತನಸಮ್ಪನ್ನೋ, ಚಕ್ಕವತ್ತೀ ಮಹಬ್ಬಲೋ.
‘‘ಪಟಿಸಮ್ಭಿದಾ ¶ ¶ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಮನ್ದಾರವಪುಪ್ಫಪೂಜಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಮನ್ದಾರವಪುಪ್ಫಪೂಜಕತ್ಥೇರಸ್ಸಾಪದಾನಂ ಪಞ್ಚಮಂ.
೬. ಕದಮ್ಬಪುಪ್ಫಿಯತ್ಥೇರಅಪದಾನಂ
‘‘ಹಿಮವನ್ತಸ್ಸಾವಿದೂರೇ ¶ , ಕುಕ್ಕುಟೋ ನಾಮ ಪಬ್ಬತೋ;
ತಮ್ಹಿ ಪಬ್ಬತಪಾದಮ್ಹಿ, ಸತ್ತ ಬುದ್ಧಾ ವಸನ್ತಿ ತೇ.
‘‘ಕದಮ್ಬಂ ಪುಪ್ಫಿತಂ ದಿಸ್ವಾ, ದೀಪರಾಜಂವ ಉಗ್ಗತಂ;
ಉಭೋ ಹತ್ಥೇಹಿ ಪಗ್ಗಯ್ಹ, ಸತ್ತ ಬುದ್ಧೇ ಸಮೋಕಿರಿಂ.
‘‘ಚತುನ್ನವುತಿತೋ ಕಪ್ಪೇ, ಯಂ ಪುಪ್ಫಮಭಿರೋಪಯಿಂ;
ದುಗ್ಗತಿಂ ನಾಭಿಜಾನಾಮಿ, ಬುದ್ಧಪೂಜಾಯಿದಂ ಫಲಂ.
‘‘ದ್ವೇನವುತೇ ಇತೋ ಕಪ್ಪೇ, ಸತ್ತಾಸುಂ ಪುಪ್ಫನಾಮಕಾ;
ಸತ್ತರತನಸಮ್ಪನ್ನಾ, ಚಕ್ಕವತ್ತೀ ಮಹಬ್ಬಲಾ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಕದಮ್ಬಪುಪ್ಫಿಯೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ;
ಕದಮ್ಬಪುಪ್ಫಿಯತ್ಥೇರಸ್ಸಾಪದಾನಂ ಛಟ್ಠಂ.
೭. ತಿಣಸೂಲಕತ್ಥೇರಅಪದಾನಂ
‘‘ಹಿಮವನ್ತಸ್ಸಾವಿದೂರೇ ¶ ¶ , ಭೂತಗಣೋ ನಾಮ ಪಬ್ಬತೋ;
ವಸತೇಕೋ ಜಿನೋ ತತ್ಥ, ಸಯಮ್ಭೂ ಲೋಕನಿಸ್ಸಟೋ.
‘‘ತಿಣಸೂಲಂ ಗಹೇತ್ವಾನ, ಬುದ್ಧಸ್ಸ ಅಭಿರೋಪಯಿಂ;
ಏಕೂನಸತಸಹಸ್ಸಂ, ಕಪ್ಪಂ ನ ವಿನಿಪಾತಿಕೋ.
‘‘ಇತೋ ಏಕಾದಸೇ ಕಪ್ಪೇ, ಏಕೋಸಿಂ ಧರಣೀರುಹೋ;
ಸತ್ತರತನಸಮ್ಪನ್ನೋ, ಚಕ್ಕವತ್ತೀ ಮಹಬ್ಬಲೋ.
‘‘ಪಟಿಸಮ್ಭಿದಾ ¶ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ತಿಣಸೂಲಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ತಿಣಸೂಲಕತ್ಥೇರಸ್ಸಾಪದಾನಂ ಸತ್ತಮಂ.
೮. ನಾಗಪುಪ್ಫಿಯತ್ಥೇರಅಪದಾನಂ
‘‘ಸುವಚ್ಛೋ ¶ ನಾಮ ನಾಮೇನ, ಬ್ರಾಹ್ಮಣೋ ಮನ್ತಪಾರಗೂ;
ಪುರಕ್ಖತೋ ಸಸಿಸ್ಸೇಹಿ, ವಸತೇ ಪಬ್ಬತನ್ತರೇ.
‘‘ಪದುಮುತ್ತರೋ ನಾಮ ಜಿನೋ, ಆಹುತೀನಂ ಪಟಿಗ್ಗಹೋ;
ಮಮುದ್ಧರಿತುಕಾಮೋ ಸೋ, ಆಗಚ್ಛಿ ಮಮ ಸನ್ತಿಕಂ.
‘‘ವೇಹಾಸಮ್ಹಿ ¶ ಚಙ್ಕಮತಿ, ಧೂಪಾಯತಿ ಜಲತೇ ತಥಾ;
ಹಾಸಂ ಮಮಂ ವಿದಿತ್ವಾನ, ಪಕ್ಕಾಮಿ ಪಾಚಿನಾಮುಖೋ.
‘‘ತಞ್ಚ ಅಚ್ಛರಿಯಂ ದಿಸ್ವಾ, ಅಬ್ಭುತಂ ಲೋಮಹಂಸನಂ;
ನಾಗಪುಪ್ಫಂ ಗಹೇತ್ವಾನ, ಗತಮಗ್ಗಮ್ಹಿ ಓಕಿರಿಂ.
‘‘ಸತಸಹಸ್ಸಿತೋ ಕಪ್ಪೇ, ಯಂ ಪುಪ್ಫಂ ಓಕಿರಿಂ ಅಹಂ;
ತೇನ ಚಿತ್ತಪ್ಪಸಾದೇನ, ದುಗ್ಗತಿಂ ನುಪಪಜ್ಜಹಂ.
‘‘ಏಕತ್ತಿಂಸೇ ಕಪ್ಪಸತೇ [ಏಕತಿಂಸೇ ಇತೋ ಕಮ್ಮೇ (ಸ್ಯಾ.)], ರಾಜಾ ಆಸಿ ಮಹಾರಹೋ;
ಸತ್ತರತನಸಮ್ಪನ್ನೋ, ಚಕ್ಕವತ್ತೀ ಮಹಬ್ಬಲೋ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ನಾಗಪುಪ್ಫಿಯೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ನಾಗಪುಪ್ಫಿಯತ್ಥೇರಸ್ಸಾಪದಾನಂ ಅಟ್ಠಮಂ.
೯. ಪುನ್ನಾಗಪುಪ್ಫಿಯತ್ಥೇರಅಪದಾನಂ
‘‘ಕಾನನಂ ¶ ವನಮೋಗಯ್ಹ, ವಸಾಮಿ ಲುದ್ದಕೋ ಅಹಂ;
ಪುನ್ನಾಗಂ ಪುಪ್ಫಿತಂ ದಿಸ್ವಾ, ಬುದ್ಧಸೇಟ್ಠಂ ಅನುಸ್ಸರಿಂ.
‘‘ತಂ ¶ ಪುಪ್ಫಂ ಓಚಿನಿತ್ವಾನ, ಸುಗನ್ಧಂ ಗನ್ಧಿತಂ ಸುಭಂ;
ಥೂಪಂ ಕರಿತ್ವಾ ಪುಲಿನೇ, ಬುದ್ಧಸ್ಸ ಅಭಿರೋಪಯಿಂ.
‘‘ದ್ವೇನವುತೇ ¶ ಇತೋ ಕಪ್ಪೇ, ಯಂ ಪುಪ್ಫಮಭಿಪೂಜಯಿಂ;
ದುಗ್ಗತಿಂ ನಾಭಿಜಾನಾಮಿ, ಬುದ್ಧಪೂಜಾಯಿದಂ ಫಲಂ.
‘‘ಏಕಮ್ಹಿ ನವುತೇ ಕಪ್ಪೇ, ಏಕೋ ಆಸಿಂ ತಮೋನುದೋ;
ಸತ್ತರತನಸಮ್ಪನ್ನೋ, ಚಕ್ಕವತ್ತೀ ಮಹಬ್ಬಲೋ.
‘‘ಪಟಿಸಮ್ಭಿದಾ ¶ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಪುನ್ನಾಗಪುಪ್ಫಿಯೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಪುನ್ನಾಗಪುಪ್ಫಿಯತ್ಥೇರಸ್ಸಾಪದಾನಂ ನವಮಂ.
೧೦. ಕುಮುದದಾಯಕತ್ಥೇರಅಪದಾನಂ
‘‘ಹಿಮವನ್ತಸ್ಸಾವಿದೂರೇ, ಮಹಾಜಾತಸ್ಸರೋ ಅಹು;
ಪದುಮುಪ್ಪಲಸಞ್ಛನ್ನೋ, ಪುಣ್ಡರೀಕಸಮೋತ್ಥಟೋ.
‘‘ಕುಕುತ್ಥೋ ನಾಮ ನಾಮೇನ, ತತ್ಥಾಸಿಂ ಸಕುಣೋ ತದಾ;
ಸೀಲವಾ ಬುದ್ಧಿಸಮ್ಪನ್ನೋ, ಪುಞ್ಞಾಪುಞ್ಞೇಸು ಕೋವಿದೋ.
‘‘ಪದುಮುತ್ತರೋ ಲೋಕವಿದೂ, ಆಹುತೀನಂ ಪಟಿಗ್ಗಹೋ;
ಜಾತಸ್ಸರಸ್ಸಾವಿದೂರೇ, ಸಞ್ಚರಿತ್ಥ ಮಹಾಮುನಿ.
‘‘ಜಲಜಂ ಕುಮುದಂ ಛೇತ್ವಾ, ಉಪನೇಸಿಂ ಮಹೇಸಿನೋ;
ಮಮ ಸಙ್ಕಪ್ಪಮಞ್ಞಾಯ, ಪಟಿಗ್ಗಹಿ ಮಹಾಮುನಿ.
‘‘ತಞ್ಚ ¶ ದಾನಂ ದದಿತ್ವಾನ, ಸುಕ್ಕಮೂಲೇನ ಚೋದಿತೋ;
ಕಪ್ಪಾನಂ ಸತಸಹಸ್ಸಂ, ದುಗ್ಗತಿಂ ನುಪಪಜ್ಜಹಂ.
‘‘ಸೋಳಸೇತೋ ಕಪ್ಪಸತೇ, ಆಸುಂ ವರುಣನಾಮಕಾ;
ಅಟ್ಠ ಏತೇ ಜನಾಧಿಪಾ, ಚಕ್ಕವತ್ತೀ ಮಹಬ್ಬಲಾ.
‘‘ಪಟಿಸಮ್ಭಿದಾ ¶ ¶ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಕುಮುದದಾಯಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಕುಮುದದಾಯಕತ್ಥೇರಸ್ಸಾಪದಾನಂ ದಸಮಂ.
ಬನ್ಧುಜೀವಕವಗ್ಗೋ ಸೋಳಸಮೋ.
ತಸ್ಸುದ್ದಾನಂ –
ಬನ್ಧುಜೀವೋ ತಮ್ಬಪುಪ್ಫೀ, ವೀಥಿಕಕ್ಕಾರುಪುಪ್ಫಿಯೋ;
ಮನ್ದಾರವೋ ಕದಮ್ಬೀ ಚ, ಸೂಲಕೋ ನಾಗಪುಪ್ಫಿಯೋ;
ಪುನ್ನಾಗೋ ಕೋಮುದೀ ಗಾಥಾ, ಛಪ್ಪಞ್ಞಾಸ ಪಕಿತ್ತಿತಾತಿ.
೧೭. ಸುಪಾರಿಚರಿಯವಗ್ಗೋ
೧. ಸುಪಾರಿಚರಿಯತ್ಥೇರಅಪದಾನಂ
‘‘ಪದುಮೋ ¶ ¶ ¶ ನಾಮ ನಾಮೇನ, ದ್ವಿಪದಿನ್ದೋ ನರಾಸಭೋ;
ಪವನಾ ಅಭಿನಿಕ್ಖಮ್ಮ, ಧಮ್ಮಂ ದೇಸೇತಿ ಚಕ್ಖುಮಾ.
‘‘ಯಕ್ಖಾನಂ ಸಮಯೋ ಆಸಿ, ಅವಿದೂರೇ ಮಹೇಸಿನೋ;
ಯೇನ ಕಿಚ್ಚೇನ ಸಮ್ಪತ್ತಾ, ಅಜ್ಝಾಪೇಕ್ಖಿಂಸು ತಾವದೇ.
‘‘ಬುದ್ಧಸ್ಸ ಗಿರಮಞ್ಞಾಯ, ಅಮತಸ್ಸ ಚ ದೇಸನಂ;
ಪಸನ್ನಚಿತ್ತೋ ಸುಮನೋ, ಅಪ್ಫೋಟೇತ್ವಾ ಉಪಟ್ಠಹಿಂ.
‘‘ಸುಚಿಣ್ಣಸ್ಸ ಫಲಂ ಪಸ್ಸ, ಉಪಟ್ಠಾನಸ್ಸ ಸತ್ಥುನೋ;
ತಿಂಸಕಪ್ಪಸಹಸ್ಸೇಸು, ದುಗ್ಗತಿಂ ನುಪಪಜ್ಜಹಂ.
‘‘ಊನತಿಂಸೇ ಕಪ್ಪಸತೇ, ಸಮಲಙ್ಕತನಾಮಕೋ;
ಸತ್ತರತನಸಮ್ಪನ್ನೋ, ಚಕ್ಕವತ್ತೀ ಮಹಬ್ಬಲೋ.
‘‘ಪಟಿಸಮ್ಭಿದಾ ಚತಸ್ಸೋ, ವಿಮೋಕ್ಖಾಪಿ ಚ ಅಟ್ಠಿಮೇ;
ಛಳಭಿಞ್ಞಾ ಸಚ್ಛಿಕತಾ, ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಸುಪಾರಿಚರಿಯೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಸುಪಾರಿಚರಿಯತ್ಥೇರಸ್ಸಾಪದಾನಂ ಪಠಮಂ.
೨. ಕಣವೇರಪುಪ್ಫಿಯತ್ಥೇರಅಪದಾನಂ
‘‘ಸಿದ್ಧತ್ಥೋ ¶ ¶ ನಾಮ ಭಗವಾ, ಲೋಕಜೇಟ್ಠೋ ನರಾಸಭೋ;
ಪುರಕ್ಖತೋ ಸಾವಕೇಹಿ, ನಗರಂ ಪಟಿಪಜ್ಜಥ.
‘‘ರಞ್ಞೋ ಅನ್ತೇಪುರೇ ಆಸಿಂ, ಗೋಪಕೋ ಅಭಿಸಮ್ಮತೋ;
ಪಾಸಾದೇ ಉಪವಿಟ್ಠೋಹಂ, ಅದ್ದಸಂ ಲೋಕನಾಯಕಂ.
‘‘ಕಣವೇರಂ ¶ [ಕರವೀರಂ (ಸಕ್ಕತಾನುಲೋಮಂ), ಕಣವೀರಂ (ಪಾಕತ)] ಗಹೇತ್ವಾನ, ಭಿಕ್ಖುಸಙ್ಘೇ ಸಮೋಕಿರಿಂ;
ಬುದ್ಧಸ್ಸ ವಿಸುಂ ಕತ್ವಾನ, ತತೋ ಭಿಯ್ಯೋ ಸಮೋಕಿರಿಂ.
‘‘ಚತುನ್ನವುತಿತೋ ¶ ಕಪ್ಪೇ, ಯಂ ಪುಪ್ಫಮಭಿಪೂಜಯಿಂ [ರೋಪಯಿಂ (ಸ್ಯಾ.)];
ದುಗ್ಗತಿಂ ನಾಭಿಜಾನಾಮಿ, ಬುದ್ಧಪೂಜಾಯಿದಂ ಫಲಂ.
‘‘ಸತ್ತಾಸೀತಿಮ್ಹಿತೋ ಕಪ್ಪೇ, ಚತುರಾಸುಂ ಮಹಿದ್ಧಿಕಾ;
ಸತ್ತರತನಸಮ್ಪನ್ನಾ, ಚಕ್ಕವತ್ತೀ ಮಹಬ್ಬಲಾ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಕಣವೇರಪುಪ್ಫಿಯೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಕಣವೇರಪುಪ್ಫಿಯತ್ಥೇರಸ್ಸಾಪದಾನಂ ದುತಿಯಂ.
೩. ಖಜ್ಜಕದಾಯಕತ್ಥೇರಅಪದಾನಂ
‘‘ತಿಸ್ಸಸ್ಸ ಖೋ ಭಗವತೋ, ಪುಬ್ಬೇ ಫಲಮದಾಸಹಂ;
ನಾಳಿಕೇರಞ್ಚ ಪಾದಾಸಿಂ, ಖಜ್ಜಕಂ ಅಭಿಸಮ್ಮತಂ.
‘‘ಬುದ್ಧಸ್ಸ ¶ ತಮಹಂ ದತ್ವಾ, ತಿಸ್ಸಸ್ಸ ತು ಮಹೇಸಿನೋ;
ಮೋದಾಮಹಂ ಕಾಮಕಾಮೀ, ಉಪಪಜ್ಜಿಂ [ಕಾಮಕಾರೀ, ಉಪಪಜ್ಜಂ (ಸೀ.)] ಯಮಿಚ್ಛಕಂ [ಸಬ್ಬತ್ಥಪಿ ಏವಮೇವ ದಿಸ್ಸತಿ].
‘‘ದ್ವೇನವುತೇ ಇತೋ ಕಪ್ಪೇ, ಯಂ ದಾನಮದದಿಂ ತದಾ;
ದುಗ್ಗತಿಂ ನಾಭಿಜಾನಾಮಿ, ಫಲದಾನಸ್ಸಿದಂ ಫಲಂ.
‘‘ಇತೋ ತೇರಸಕಪ್ಪಮ್ಹಿ, ರಾಜಾ ಇನ್ದಸಮೋ ಅಹು;
ಸತ್ತರತನಸಮ್ಪನ್ನೋ, ಚಕ್ಕವತ್ತೀ ಮಹಬ್ಬಲೋ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಖಜ್ಜಕದಾಯಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಖಜ್ಜಕದಾಯಕತ್ಥೇರಸ್ಸಾಪದಾನಂ ತತಿಯಂ.
೪. ದೇಸಪೂಜಕತ್ಥೇರಅಪದಾನಂ
‘‘ಅತ್ಥದಸ್ಸೀ ¶ ತು ಭಗವಾ, ಲೋಕಜೇಟ್ಠೋ ನರಾಸಭೋ;
ಅಬ್ಭುಗ್ಗನ್ತ್ವಾನ ವೇಹಾಸಂ, ಗಚ್ಛತೇ ಅನಿಲಞ್ಜಸೇ.
‘‘ಯಮ್ಹಿ ¶ ¶ ದೇಸೇ ಠಿತೋ ಸತ್ಥಾ, ಅಬ್ಭುಗ್ಗಚ್ಛಿ ಮಹಾಮುನಿ;
ತಾಹಂ ದೇಸಂ ಅಪೂಜೇಸಿಂ, ಪಸನ್ನೋ ಸೇಹಿ ಪಾಣಿಭಿ.
‘‘ಅಟ್ಠಾರಸೇ ಕಪ್ಪಸತೇ, ಅದ್ದಸಂ ಯಂ ಮಹಾಮುನಿಂ;
ದುಗ್ಗತಿಂ ನಾಭಿಜಾನಾಮಿ, ದೇಸಪೂಜಾಯಿದಂ ಫಲಂ.
‘‘ಏಕಾದಸೇ ¶ ಕಪ್ಪಸತೇ, ಗೋಸುಜಾತಸನಾಮಕೋ;
ಸತ್ತರತನಸಮ್ಪನ್ನೋ, ಚಕ್ಕವತ್ತೀ ಮಹಬ್ಬಲೋ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ದೇಸಪೂಜಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ದೇಸಪೂಜಕತ್ಥೇರಸ್ಸಾಪದಾನಂ ಚತುತ್ಥಂ.
೫. ಕಣಿಕಾರಛತ್ತಿಯತ್ಥೇರಅಪದಾನಂ
‘‘ವೇಸ್ಸಭೂ ನಾಮ ಸಮ್ಬುದ್ಧೋ, ಲೋಕಜೇಟ್ಠೋ ನರಾಸಭೋ;
ದಿವಾವಿಹಾರಾಯ ಮುನಿ, ಓಗಾಹಯಿ ಮಹಾವನಂ.
‘‘ಕಣಿಕಾರಂ ಓಚಿನಿತ್ವಾ, ಛತ್ತಂ ಕತ್ವಾನಹಂ ತದಾ;
ಪುಪ್ಫಚ್ಛದನಂ ಕತ್ವಾನ, ಬುದ್ಧಸ್ಸ ಅಭಿರೋಪಯಿಂ.
‘‘ಏಕತ್ತಿಂಸೇ ಇತೋ ಕಪ್ಪೇ, ಯಂ ಪುಪ್ಫಮಭಿರೋಪಯಿಂ;
ದುಗ್ಗತಿಂ ನಾಭಿಜಾನಾಮಿ, ಬುದ್ಧಪೂಜಾಯಿದಂ ಫಲಂ.
‘‘ಇತೋ ವೀಸತಿಕಪ್ಪಮ್ಹಿ, ಸೋಣ್ಣಾಭಾ ಅಟ್ಠ ಖತ್ತಿಯಾ;
ಸತ್ತರತನಸಮ್ಪನ್ನಾ, ಚಕ್ಕವತ್ತೀ ಮಹಬ್ಬಲಾ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ¶ ಸುದಂ ಆಯಸ್ಮಾ ಕಣಿಕಾರಛತ್ತಿಯೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಕಣಿಕಾರಛತ್ತಿಯತ್ಥೇರಸ್ಸಾಪದಾನಂ ಪಞ್ಚಮಂ.
೬. ಸಪ್ಪಿದಾಯಕತ್ಥೇರಅಪದಾನಂ
‘‘ಫುಸ್ಸೋ ¶ ¶ ನಾಮಾಸಿ [ನಾಮಾಥ (ಸೀ.)] ಭಗವಾ, ಆಹುತೀನಂ ಪಟಿಗ್ಗಹೋ;
ಗಚ್ಛತೇ ವೀಥಿಯಂ ವೀರೋ, ನಿಬ್ಬಾಪೇನ್ತೋ ಮಹಾಜನಂ.
‘‘ಅನುಪುಬ್ಬೇನ ¶ ಭಗವಾ, ಆಗಚ್ಛಿ ಮಮ ಸನ್ತಿಕಂ;
ತತೋ ತಂ [ತತೋಹಂ (ಸೀ. ಸ್ಯಾ.)] ಪತ್ತಂ ಪಗ್ಗಯ್ಹ, ಸಪ್ಪಿತೇಲಮದಾಸಹಂ.
‘‘ದ್ವೇನವುತೇ ಇತೋ ಕಪ್ಪೇ, ಯಂ ಸಪ್ಪಿಮದದಿಂ ತದಾ;
ದುಗ್ಗತಿಂ ನಾಭಿಜಾನಾಮಿ, ಸಪ್ಪಿದಾನಸ್ಸಿದಂ ಫಲಂ.
‘‘ಛಪ್ಪಞ್ಞಾಸೇ ಇತೋ ಕಪ್ಪೇ, ಏಕೋ ಆಸಿ ಸಮೋದಕೋ;
ಸತ್ತರತನಸಮ್ಪನ್ನೋ, ಚಕ್ಕವತ್ತೀ ಮಹಬ್ಬಲೋ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಸಪ್ಪಿದಾಯಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಸಪ್ಪಿದಾಯಕತ್ಥೇರಸ್ಸಾಪದಾನಂ ಛಟ್ಠಂ.
೭. ಯೂಥಿಕಪುಪ್ಫಿಯತ್ಥೇರಅಪದಾನಂ
‘‘ಚನ್ದಭಾಗಾನದೀತೀರೇ ¶ , ಅನುಸೋತಂ ವಜಾಮಹಂ;
ಸಯಮ್ಭುಂ ಅದ್ದಸಂ ತತ್ಥ, ಸಾಲರಾಜಂವ ಫುಲ್ಲಿತಂ.
‘‘ಪುಪ್ಫಂ ಯೂಥಿಕಮಾದಾಯ, ಉಪಗಚ್ಛಿಂ ಮಹಾಮುನಿಂ;
ಪಸನ್ನಚಿತ್ತೋ ಸುಮನೋ, ಬುದ್ಧಸ್ಸ ಅಭಿರೋಪಯಿಂ.
‘‘ಚತುನ್ನವುತಿತೋ ಕಪ್ಪೇ, ಯಂ ಪುಪ್ಫಮಭಿರೋಪಯಿಂ;
ದುಗ್ಗತಿಂ ನಾಭಿಜಾನಾಮಿ, ಬುದ್ಧಪೂಜಾಯಿದಂ ಫಲಂ.
‘‘ಸತ್ತಸಟ್ಠಿಮ್ಹಿತೋ ಕಪ್ಪೇ, ಏಕೋ ಸಾಮುದ್ಧರೋ ಅಹು;
ಸತ್ತರತನಸಮ್ಪನ್ನೋ, ಚಕ್ಕವತ್ತೀ ಮಹಬ್ಬಲೋ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಯೂಥಿಕಪುಪ್ಫಿಯೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಯೂಥಿಕಪುಪ್ಫಿಯತ್ಥೇರಸ್ಸಾಪದಾನಂ ಸತ್ತಮಂ.
೮. ದುಸ್ಸದಾಯಕತ್ಥೇರಅಪದಾನಂ
‘‘ತಿವರಾಯಂ ¶ ¶ ಪುರೇ ರಮ್ಮೇ, ರಾಜಪುತ್ತೋಸಹಂ [ರಾಜಪುತ್ತೋ ಅಹಂ (ಸೀ. ಸ್ಯಾ.)] ತದಾ;
ಪಣ್ಣಾಕಾರಂ ಲಭಿತ್ವಾನ, ಉಪಸನ್ತಸ್ಸದಾಸಹಂ.
‘‘ಅಧಿವಾಸೇಸಿ ¶ ¶ ಭಗವಾ, ವತ್ಥಂ [ನವಂ (ಕ.)] ಹತ್ಥೇನ ಆಮಸಿ;
ಸಿದ್ಧತ್ಥೋ ಅಧಿವಾಸೇತ್ವಾ, ವೇಹಾಸಂ ನಭಮುಗ್ಗಮಿ.
‘‘ಬುದ್ಧಸ್ಸ ಗಚ್ಛಮಾನಸ್ಸ, ದುಸ್ಸಾ ಧಾವನ್ತಿ ಪಚ್ಛತೋ;
ತತ್ಥ ಚಿತ್ತಂ ಪಸಾದೇಸಿಂ, ಬುದ್ಧೋ ನೋ ಅಗ್ಗಪುಗ್ಗಲೋ.
‘‘ಚತುನ್ನವುತಿತೋ ಕಪ್ಪೇ, ಯಂ ದುಸ್ಸಮದದಿಂ ತದಾ;
ದುಗ್ಗತಿಂ ನಾಭಿಜಾನಾಮಿ, ದುಸ್ಸದಾನಸ್ಸಿದಂ ಫಲಂ.
‘‘ಸತ್ತಸಟ್ಠಿಮ್ಹಿತೋ ಕಪ್ಪೇ, ಚಕ್ಕವತ್ತೀ ತದಾ ಅಹು;
ಪರಿಸುದ್ಧೋತಿ ನಾಮೇನ, ಮನುಜಿನ್ದೋ ಮಹಬ್ಬಲೋ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ದುಸ್ಸದಾಯಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ದುಸ್ಸದಾಯಕತ್ಥೇರಸ್ಸಾಪದಾನಂ ಅಟ್ಠಮಂ.
೯. ಸಮಾದಪಕತ್ಥೇರಅಪದಾನಂ
‘‘ನಗರೇ ಬನ್ಧುಮತಿಯಾ, ಮಹಾಪೂಗಗಣೋ ಅಹು;
ತೇಸಾಹಂ ಪವರೋ ಆಸಿಂ, ಮಮ ಬದ್ಧಚರಾ [ಪಟ್ಠಚರಾ (ಸ್ಯಾ.)] ಚ ತೇ.
‘‘ಸಬ್ಬೇ ತೇ ಸನ್ನಿಪಾತೇತ್ವಾ, ಪುಞ್ಞಕಮ್ಮೇ ಸಮಾದಯಿಂ;
ಮಾಳಂ ಕಸ್ಸಾಮ ಸಙ್ಘಸ್ಸ, ಪುಞ್ಞಕ್ಖೇತ್ತಂ ಅನುತ್ತರಂ.
‘‘ಸಾಧೂತಿ ¶ ತೇ ಪಟಿಸ್ಸುತ್ವಾ, ಮಮ ಛನ್ದವಸಾನುಗಾ;
ನಿಟ್ಠಾಪೇತ್ವಾ ಚ ತಂ ಮಾಳಂ, ವಿಪಸ್ಸಿಸ್ಸ ಅದಮ್ಹಸೇ.
‘‘ಏಕನವುತಿತೋ ಕಪ್ಪೇ, ಯಂ ಮಾಳಮದದಿಂ ತದಾ;
ದುಗ್ಗತಿಂ ನಾಭಿಜಾನಾಮಿ, ಮಾಳದಾನಸ್ಸಿದಂ ಫಲಂ.
‘‘ಏಕೂನಸತ್ತತಿಕಪ್ಪೇ ¶ [ಏಕೂನಸಟ್ಠಿಕಪ್ಪಮ್ಹಿ (ಸೀ. ಸ್ಯಾ.)],
ಏಕೋ ಆಸಿ ಜನಾಧಿಪೋ.
ಆದೇಯ್ಯೋ ನಾಮ ನಾಮೇನ, ಚಕ್ಕವತ್ತೀ ಮಹಬ್ಬಲೋ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಸಮಾದಪಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಸಮಾದಪಕತ್ಥೇರಸ್ಸಾಪದಾನಂ ನವಮಂ.
೧೦. ಪಞ್ಚಙ್ಗುಲಿಯತ್ಥೇರಅಪದಾನಂ
‘‘ತಿಸ್ಸೋ ¶ ¶ ನಾಮಾಸಿ ಭಗವಾ, ಲೋಕಜೇಟ್ಠೋ ನರಾಸಭೋ;
ಪವಿಸತಿ ಗನ್ಧಕುಟಿಂ, ವಿಹಾರಕುಸಲೋ ಮುನಿ.
‘‘ಸುಗನ್ಧಮಾಲಮಾದಾಯ, ಅಗಮಾಸಿಂ ಜಿನನ್ತಿಕಂ;
ಅಪಸದ್ದೋ ಚ ಸಮ್ಬುದ್ಧೇ, ಪಞ್ಚಙ್ಗುಲಿಮದಾಸಹಂ.
‘‘ದ್ವೇನವುತೇ ಇತೋ ಕಪ್ಪೇ, ಯಂ ಗನ್ಧಮಭಿರೋಪಯಿಂ;
ದುಗ್ಗತಿಂ ನಾಭಿಜಾನಾಮಿ, ಪಞ್ಚಙ್ಗುಲಿಸ್ಸಿದಂ [ಪಞ್ಚಙ್ಗುಲಿಯಿದಂ (ಸೀ.)] ಫಲಂ.
‘‘ದ್ವೇಸತ್ತತಿಮ್ಹಿತೋ ¶ ಕಪ್ಪೇ, ರಾಜಾ ಆಸಿಂ ಸಯಮ್ಪಭೋ;
ಸತ್ತರತನಸಮ್ಪನ್ನೋ, ಚಕ್ಕವತ್ತೀ ಮಹಬ್ಬಲೋ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಪಞ್ಚಙ್ಗುಲಿಯೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ;
ಪಞ್ಚಙ್ಗುಲಿಯತ್ಥೇರಸ್ಸಾಪದಾನಂ ದಸಮಂ.
ಸುಪಾರಿಚರಿಯವಗ್ಗೋ ಸತ್ತರಸಮೋ.
ತಸ್ಸುದ್ದಾನಂ –
ಸುಪಾರಿಚರಿ ಕಣವೇರೀ, ಖಜ್ಜಕೋ ದೇಸಪೂಜಕೋ;
ಕಣಿಕಾರೋ ಸಪ್ಪಿದದೋ, ಯೂಥಿಕೋ ದುಸ್ಸದಾಯಕೋ;
ಮಾಳೋ ಚ ಪಞ್ಚಙ್ಗುಲಿಕೋ, ಚತುಪಞ್ಞಾಸ ಗಾಥಕಾತಿ.
೧೮. ಕುಮುದವಗ್ಗೋ
೧. ಕುಮುದಮಾಲಿಯತ್ಥೇರಅಪದಾನಂ
‘‘ಪಬ್ಬತೇ ¶ ¶ ¶ ಹಿಮವನ್ತಮ್ಹಿ, ಮಹಾಜಾತಸ್ಸರೋ ಅಹು;
ತತ್ಥಜೋ ರಕ್ಖಸೋ ಆಸಿಂ, ಘೋರರೂಪೋ ಮಹಬ್ಬಲೋ.
‘‘ಕುಮುದಂ ಪುಪ್ಫತೇ ತತ್ಥ, ಚಕ್ಕಮತ್ತಾನಿ ಜಾಯರೇ;
ಓಚಿನಾಮಿ ಚ ತಂ ಪುಪ್ಫಂ, ಬಲಿನೋ ಸಮಿತಿಂ ತದಾ.
‘‘ಅತ್ಥದಸ್ಸೀ ¶ ತು ಭಗವಾ, ದ್ವಿಪದಿನ್ದೋ ನರಾಸಭೋ;
ಪುಪ್ಫಸಙ್ಕೋಚಿತಂ [ಪುಪ್ಫಂ ಸಙ್ಕೋಚಿತಂ (ಸೀ. ಸ್ಯಾ.), ಪುಪ್ಫಂ ಸಮೋಚಿತಂ (?)] ದಿಸ್ವಾ, ಆಗಚ್ಛಿ ಮಮ ಸನ್ತಿಕಂ.
‘‘ಉಪಾಗತಞ್ಚ ಸಮ್ಬುದ್ಧಂ, ದೇವದೇವಂ ನರಾಸಭಂ;
ಸಬ್ಬಞ್ಚ ಪುಪ್ಫಂ ಪಗ್ಗಯ್ಹ, ಬುದ್ಧಸ್ಸ ಅಭಿರೋಪಯಿಂ.
‘‘ಯಾವತಾ ಹಿಮವನ್ತನ್ತಾ, ಪರಿಸಾ ಸಾ [ಹಿಮವನ್ತಸ್ಮಿಂ, ಯಾವ ಮಾಲಾ (ಸ್ಯಾ.)] ತದಾ ಅಹು;
ತಾವಚ್ಛದನಸಮ್ಪನ್ನೋ, ಅಗಮಾಸಿ ತಥಾಗತೋ.
‘‘ಅಟ್ಠಾರಸೇ ಕಪ್ಪಸತೇ, ಯಂ ಪುಪ್ಫಮಭಿರೋಪಯಿಂ;
ದುಗ್ಗತಿಂ ನಾಭಿಜಾನಾಮಿ, ಬುದ್ಧಪೂಜಾಯಿದಂ ಫಲಂ.
‘‘ಇತೋ ಪನ್ನರಸೇ ಕಪ್ಪೇ, ಸತ್ತಾಹೇಸುಂ ಜನಾಧಿಪಾ;
ಸಹಸ್ಸರಥನಾಮಾ ತೇ, ಚಕ್ಕವತ್ತೀ ಮಹಬ್ಬಲಾ.
‘‘ಪಟಿಸಮ್ಭಿದಾ ಚತಸ್ಸೋ, ವಿಮೋಕ್ಖಾಪಿ ಚ ಅಟ್ಠಿಮೇ;
ಛಳಭಿಞ್ಞಾ ಸಚ್ಛಿಕತಾ, ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ¶ ಸುದಂ ಆಯಸ್ಮಾ ಕುಮುದಮಾಲಿಯೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಕುಮುದಮಾಲಿಯತ್ಥೇರಸ್ಸಾಪದಾನಂ ಪಠಮಂ.
೨. ನಿಸ್ಸೇಣಿದಾಯಕತ್ಥೇರಅಪದಾನಂ
‘‘ಕೋಣ್ಡಞ್ಞಸ್ಸ ¶ ಭಗವತೋ, ಲೋಕಜೇಟ್ಠಸ್ಸ ತಾದಿನೋ;
ಆರೋಹತ್ಥಾಯ ಪಾಸಾದಂ, ನಿಸ್ಸೇಣೀ ಕಾರಿತಾ ಮಯಾ.
‘‘ತೇನ ¶ ಚಿತ್ತಪ್ಪಸಾದೇನ, ಅನುಭೋತ್ವಾನ ಸಮ್ಪದಾ;
ಧಾರೇಮಿ ಅನ್ತಿಮಂ ದೇಹಂ, ಸಮ್ಮಾಸಮ್ಬುದ್ಧಸಾಸನೇ.
‘‘ಏಕತ್ತಿಂಸಮ್ಹಿ ಕಪ್ಪಾನಂ, ಸಹಸ್ಸಮ್ಹಿ ತಯೋ ಅಹುಂ [ಮಹಾ (ಸೀ. ಸ್ಯಾ.)];
ಸಮ್ಬಹುಲಾ ನಾಮ ರಾಜಾನೋ, ಚಕ್ಕವತ್ತೀ ಮಹಬ್ಬಲಾ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ನಿಸ್ಸೇಣಿದಾಯಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ನಿಸ್ಸೇಣಿದಾಯಕತ್ಥೇರಸ್ಸಾಪದಾನಂ ದುತಿಯಂ.
೩. ರತ್ತಿಪುಪ್ಫಿಯತ್ಥೇರಅಪದಾನಂ
‘‘ಮಿಗಲುದ್ದೋ ¶ ಪುರೇ ಆಸಿಂ, ಅರಞ್ಞೇ ಕಾನನೇ ಅಹಂ;
ವಿಪಸ್ಸಿಂ ಅದ್ದಸಂ ಬುದ್ಧಂ, ದೇವದೇವಂ ನರಾಸಭಂ.
‘‘ರತ್ತಿಕಂ ¶ ಪುಪ್ಫಿತಂ ದಿಸ್ವಾ, ಕುಟಜಂ ಧರಣೀರುಹಂ;
ಸಮೂಲಂ ಪಗ್ಗಹೇತ್ವಾನ, ಉಪನೇಸಿಂ ಮಹೇಸಿನೋ.
‘‘ಏಕನವುತಿತೋ ಕಪ್ಪೇ, ಯಂ ಪುಪ್ಫಮಭಿರೋಪಯಿಂ;
ದುಗ್ಗತಿಂ ನಾಭಿಜಾನಾಮಿ, ಪುಪ್ಫದಾನಸ್ಸಿದಂ ಫಲಂ.
‘‘ಇತೋ ಚ ಅಟ್ಠಮೇ ಕಪ್ಪೇ, ಸುಪ್ಪಸನ್ನಸನಾಮಕೋ;
ಸತ್ತರತನಸಮ್ಪನ್ನೋ, ರಾಜಾಹೋಸಿಂ ಮಹಬ್ಬಲೋ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ರತ್ತಿಪುಪ್ಫಿಯೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ರತ್ತಿಪುಪ್ಫಿಯತ್ಥೇರಸ್ಸಾಪದಾನಂ ತತಿಯಂ.
೪. ಉದಪಾನದಾಯಕತ್ಥೇರಅಪದಾನಂ
‘‘ವಿಪಸ್ಸಿನೋ ¶ ಭಗವತೋ, ಉದಪಾನೋ ಕತೋ ಮಯಾ;
ಪಿಣ್ಡಪಾತಞ್ಚ ದತ್ವಾನ [ಗಹೇತ್ವಾನ (ಸ್ಯಾ.)], ನಿಯ್ಯಾದೇಸಿಮಹಂ ತದಾ.
‘‘ಏಕನವುತಿತೋ ¶ ಕಪ್ಪೇ, ಯಂ ಕಮ್ಮಮಕರಿಂ ತದಾ;
ದುಗ್ಗತಿಂ ನಾಭಿಜಾನಾಮಿ, ಉದಪಾನಸ್ಸಿದಂ ಫಲಂ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ¶ ಸುದಂ ಆಯಸ್ಮಾ ಉದಪಾನದಾಯಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಉದಪಾನದಾಯಕತ್ಥೇರಸ್ಸಾಪದಾನಂ ಚತುತ್ಥಂ.
೫. ಸೀಹಾಸನದಾಯಕತ್ಥೇರಅಪದಾನಂ
‘‘ನಿಬ್ಬುತೇ ಲೋಕನಾಥಮ್ಹಿ, ಪದುಮುತ್ತರನಾಯಕೇ;
ಪಸನ್ನಚಿತ್ತೋ ಸುಮನೋ, ಸೀಹಾಸನಮದಾಸಹಂ.
‘‘ಬಹೂಹಿ ಗನ್ಧಮಾಲೇಹಿ, ದಿಟ್ಠಧಮ್ಮಸುಖಾವಹೇ;
ತತ್ಥ ಪೂಜಞ್ಚ ಕತ್ವಾನ, ನಿಬ್ಬಾಯತಿ ಬಹುಜ್ಜನೋ.
‘‘ಪಸನ್ನಚಿತ್ತೋ ¶ ಸುಮನೋ, ವನ್ದಿತ್ವಾ ಬೋಧಿಮುತ್ತಮಂ;
ಕಪ್ಪಾನಂ ಸತಸಹಸ್ಸಂ, ದುಗ್ಗತಿಂ ನುಪಪಜ್ಜಹಂ.
‘‘ಪನ್ನರಸಸಹಸ್ಸಮ್ಹಿ, ಕಪ್ಪಾನಂ ಅಟ್ಠ ಆಸು ತೇ [ಅಟ್ಠ ಆಸಯುಂ (ಕ.)];
ಸಿಲುಚ್ಚಯಸನಾಮಾ ಚ, ರಾಜಾನೋ ಚಕ್ಕವತ್ತಿನೋ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಸೀಹಾಸನದಾಯಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ;
ಸೀಹಾಸನದಾಯಕತ್ಥೇರಸ್ಸಾಪದಾನಂ ಪಞ್ಚಮಂ.
೬. ಮಗ್ಗದತ್ತಿಕತ್ಥೇರಅಪದಾನಂ
‘‘ಅನೋಮದಸ್ಸೀ ¶ ಭಗವಾ, ದ್ವಿಪದಿನ್ದೋ ನರಾಸಭೋ;
ದಿಟ್ಠಧಮ್ಮಸುಖತ್ಥಾಯ, ಅಬ್ಭೋಕಾಸಮ್ಹಿ ಚಙ್ಕಮಿ.
‘‘ಉದ್ಧತೇ ¶ ¶ ಪಾದೇ ಪುಪ್ಫಾನಿ, ಸೋಭಂ ಮುದ್ಧನಿ ತಿಟ್ಠರೇ;
ಪಸನ್ನಚಿತ್ತೋ ಸುಮನೋ, ವನ್ದಿತ್ವಾ ಪುಪ್ಫಮೋಕಿರಿಂ.
‘‘ವೀಸಕಪ್ಪಸಹಸ್ಸಮ್ಹಿ, ಇತೋ ಪಞ್ಚ ಜನಾ ಅಹುಂ;
ಪುಪ್ಫಚ್ಛದನಿಯಾ ನಾಮ, ಚಕ್ಕವತ್ತೀ ಮಹಬ್ಬಲಾ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಮಗ್ಗದತ್ತಿಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಮಗ್ಗದತ್ತಿಕತ್ಥೇರಸ್ಸಾಪದಾನಂ ಛಟ್ಠಂ.
೭. ಏಕದೀಪಿಯತ್ಥೇರಅಪದಾನಂ
‘‘ಪದುಮುತ್ತರಸ್ಸ ಮುನಿನೋ, ಸಳಲೇ ಬೋಧಿಮುತ್ತಮೇ;
ಪಸನ್ನಚಿತ್ತೋ ಸುಮನೋ, ಏಕದೀಪಂ ಅದಾಸಹಂ.
‘‘ಭವೇ ನಿಬ್ಬತ್ತಮಾನಮ್ಹಿ, ನಿಬ್ಬತ್ತೇ ಪುಞ್ಞಸಞ್ಚಯೇ;
ದುಗ್ಗತಿಂ ನಾಭಿಜಾನಾಮಿ, ದೀಪದಾನಸ್ಸಿದಂ ಫಲಂ.
‘‘ಸೋಳಸೇ ¶ ಕಪ್ಪಸಹಸ್ಸೇ, ಇತೋ ತೇ ಚತುರೋ ಜನಾ;
ಚನ್ದಾಭಾ ನಾಮ ನಾಮೇನ, ಚಕ್ಕವತ್ತೀ ಮಹಬ್ಬಲಾ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಏಕದೀಪಿಯೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಏಕದೀಪಿಯತ್ಥೇರಸ್ಸಾಪದಾನಂ ಸತ್ತಮಂ.
ನವಮಂ ಭಾಣವಾರಂ.
೮. ಮಣಿಪೂಜಕತ್ಥೇರಅಪದಾನಂ
‘‘ಓರೇನ ¶ ಹಿಮವನ್ತಸ್ಸ, ನದಿಕಾ ಸಮ್ಪವತ್ತಥ;
ತಸ್ಸಾ ಚಾನುಪಖೇತ್ತಮ್ಹಿ, ಸಯಮ್ಭೂ ವಸತೇ ತದಾ.
‘‘ಮಣಿಂ ¶ ಪಗ್ಗಯ್ಹ ಪಲ್ಲಙ್ಕಂ, ಸಾಧುಚಿತ್ತಂ ಮನೋರಮಂ;
ಪಸನ್ನಚಿತ್ತೋ ಸುಮನೋ, ಬುದ್ಧಸ್ಸ ಅಭಿರೋಪಯಿಂ.
‘‘ಚತುನ್ನವುತಿತೋ ¶ ಕಪ್ಪೇ, ಯಂ ಮಣಿಂ ಅಭಿರೋಪಯಿಂ;
ದುಗ್ಗತಿಂ ನಾಭಿಜಾನಾಮಿ, ಬುದ್ಧಪೂಜಾಯಿದಂ ಫಲಂ.
‘‘ಇತೋ ಚ ದ್ವಾದಸೇ ಕಪ್ಪೇ, ಸತರಂಸೀಸನಾಮಕಾ;
ಅಟ್ಠ ತೇ ಆಸುಂ ರಾಜಾನೋ, ಚಕ್ಕವತ್ತೀ ಮಹಬ್ಬಲಾ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ¶ ಸುದಂ ಆಯಸ್ಮಾ ಮಣಿಪೂಜಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಮಣಿಪೂಜಕತ್ಥೇರಸ್ಸಾಪದಾನಂ ಅಟ್ಠಮಂ.
೯. ತಿಕಿಚ್ಛಕತ್ಥೇರಅಪದಾನಂ
‘‘ನಗರೇ ಬನ್ಧುಮತಿಯಾ, ವೇಜ್ಜೋ ಆಸಿಂ ಸುಸಿಕ್ಖಿತೋ;
ಆತುರಾನಂ ಸದುಕ್ಖಾನಂ, ಮಹಾಜನಸುಖಾವಹೋ.
‘‘ಬ್ಯಾಧಿತಂ ಸಮಣಂ ದಿಸ್ವಾ, ಸೀಲವನ್ತಂ ಮಹಾಜುತಿಂ;
ಪಸನ್ನಚಿತ್ತೋ ಸುಮನೋ, ಭೇಸಜ್ಜಮದದಿಂ ತದಾ.
‘‘ಅರೋಗೋ ಆಸಿ ತೇನೇವ, ಸಮಣೋ ಸಂವುತಿನ್ದ್ರಿಯೋ;
ಅಸೋಕೋ ನಾಮ ನಾಮೇನ, ಉಪಟ್ಠಾಕೋ ವಿಪಸ್ಸಿನೋ.
‘‘ಏಕನವುತಿತೋ ಕಪ್ಪೇ, ಯಂ ಓಸಧಮದಾಸಹಂ;
ದುಗ್ಗತಿಂ ನಾಭಿಜಾನಾಮಿ, ಭೇಸಜ್ಜಸ್ಸ ಇದಂ ಫಲಂ.
‘‘ಇತೋ ಚ ಅಟ್ಠಮೇ ಕಪ್ಪೇ, ಸಬ್ಬೋಸಧಸನಾಮಕೋ;
ಸತ್ತರತನಸಮ್ಪನ್ನೋ, ಚಕ್ಕವತ್ತೀ ಮಹಬ್ಬಲೋ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ತಿಕಿಚ್ಛಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ತಿಕಿಚ್ಛಕತ್ಥೇರಸ್ಸಾಪದಾನಂ ನವಮಂ.
೧೦. ಸಙ್ಘುಪಟ್ಠಾಕತ್ಥೇರಅಪದಾನಂ
‘‘ವೇಸ್ಸಭುಮ್ಹಿ ¶ ¶ ¶ ಭಗವತಿ, ಅಹೋಸಾರಾಮಿಕೋ ಅಹಂ;
ಪಸನ್ನಚಿತ್ತೋ ಸುಮನೋ, ಉಪಟ್ಠಿಂ ಸಙ್ಘಮುತ್ತಮಂ.
‘‘ಏಕತ್ತಿಂಸೇ ¶ ಇತೋ ಕಪ್ಪೇ, ಯಂ ಕಮ್ಮಮಕರಿಂ ತದಾ;
ದುಗ್ಗತಿಂ ನಾಭಿಜಾನಾಮಿ, ಉಪಟ್ಠಾನಸ್ಸಿದಂ ಫಲಂ.
‘‘ಇತೋ ತೇ ಸತ್ತಮೇ ಕಪ್ಪೇ, ಸತ್ತೇವಾಸುಂ ಸಮೋದಕಾ;
ಸತ್ತರತನಸಮ್ಪನ್ನಾ, ಚಕ್ಕವತ್ತೀ ಮಹಬ್ಬಲಾ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಸಙ್ಘುಪಟ್ಠಾಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಸಙ್ಘುಪಟ್ಠಾಕತ್ಥೇರಸ್ಸಾಪದಾನಂ ದಸಮಂ.
ಕುಮುದವಗ್ಗೋ ಅಟ್ಠಾರಸಮೋ.
ತಸ್ಸುದ್ದಾನಂ –
ಕುಮುದೋ ಅಥ ನಿಸ್ಸೇಣೀ, ರತ್ತಿಕೋ ಉದಪಾನದೋ;
ಸೀಹಾಸನೀ ಮಗ್ಗದದೋ, ಏಕದೀಪೀ ಮಣಿಪ್ಪದೋ;
ತಿಕಿಚ್ಛಕೋ ಉಪಟ್ಠಾಕೋ, ಏಕಪಞ್ಞಾಸ ಗಾಥಕಾತಿ.
೧೯. ಕುಟಜಪುಪ್ಫಿಯವಗ್ಗೋ
೧. ಕುಟಜಪುಪ್ಫಿಯತ್ಥೇರಅಪದಾನಂ
‘‘ಸುವಣ್ಣವಣ್ಣಂ ¶ ¶ ¶ ಸಮ್ಬುದ್ಧಂ, ಸತರಂಸಿಂವ ಉಗ್ಗತಂ;
ದಿಸಂ ಅನುವಿಲೋಕೇನ್ತಂ, ಗಚ್ಛನ್ತಂ ಅನಿಲಞ್ಜಸೇ.
‘‘ಕುಟಜಂ ಪುಪ್ಫಿತಂ ದಿಸ್ವಾ, ಸಂವಿತ್ಥತಸಮೋತ್ಥತಂ;
ರುಕ್ಖತೋ ಓಚಿನಿತ್ವಾನ, ಫುಸ್ಸಸ್ಸ ಅಭಿರೋಪಯಿಂ.
‘‘ದ್ವೇನವುತೇ ಇತೋ ಕಪ್ಪೇ, ಯಂ ಪುಪ್ಫಮಭಿರೋಪಯಿಂ;
ದುಗ್ಗತಿಂ ನಾಭಿಜಾನಾಮಿ, ಬುದ್ಧಪೂಜಾಯಿದಂ ಫಲಂ.
‘‘ಇತೋ ಸತ್ತರಸೇ ಕಪ್ಪೇ, ತಯೋ ಆಸುಂ ಸುಪುಪ್ಫಿತಾ;
ಸತ್ತರತನಸಮ್ಪನ್ನಾ, ಚಕ್ಕವತ್ತೀ ಮಹಬ್ಬಲಾ.
‘‘ಪಟಿಸಮ್ಭಿದಾ ಚತಸ್ಸೋ, ವಿಮೋಕ್ಖಾಪಿ ಚ ಅಟ್ಠಿಮೇ;
ಛಳಭಿಞ್ಞಾ ಸಚ್ಛಿಕತಾ, ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಕುಟಜಪುಪ್ಫಿಯೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಕುಟಜಪುಪ್ಫಿಯತ್ಥೇರಸ್ಸಾಪದಾನಂ ಪಠಮಂ.
೨. ಬನ್ಧುಜೀವಕತ್ಥೇರಅಪದಾನಂ
‘‘ಸಿದ್ಧತ್ಥೋ ¶ ನಾಮ ಸಮ್ಬುದ್ಧೋ, ಸಯಮ್ಭೂ ಸಬ್ಭಿ ವಣ್ಣಿತೋ;
ಸಮಾಧಿಂ ಸೋ ಸಮಾಪನ್ನೋ, ನಿಸೀದಿ ಪಬ್ಬತನ್ತರೇ.
‘‘ಜಾತಸ್ಸರೇ ¶ ಗವೇಸನ್ತೋ, ದಕಜಂ ಪುಪ್ಫಮುತ್ತಮಂ;
ಬನ್ಧುಜೀವಕಪುಪ್ಫಾನಿ, ಅದ್ದಸಂ ಸಮನನ್ತರಂ.
‘‘ಉಭೋ ಹತ್ಥೇಹಿ ಪಗ್ಗಯ್ಹ, ಉಪಾಗಚ್ಛಿಂ ಮಹಾಮುನಿಂ;
ಪಸನ್ನಚಿತ್ತೋ ಸುಮನೋ, ಸಿದ್ಧತ್ಥಸ್ಸಾಭಿರೋಪಯಿಂ.
‘‘ಚತುನ್ನವುತಿತೋ ¶ ಕಪ್ಪೇ, ಯಂ ಪುಪ್ಫಮಭಿರೋಪಯಿಂ;
ದುಗ್ಗತಿಂ ನಾಭಿಜಾನಾಮಿ, ಬುದ್ಧಪೂಜಾಯಿದಂ ಫಲಂ.
‘‘ಇತೋ ¶ ಚಾತುದ್ದಸೇ ಕಪ್ಪೇ, ಏಕೋ ಆಸಿಂ ಜನಾಧಿಪೋ;
ಸಮುದ್ದಕಪ್ಪೋ ನಾಮೇನ, ಚಕ್ಕವತ್ತೀ ಮಹಬ್ಬಲೋ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಬನ್ಧುಜೀವಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಬನ್ಧುಜೀವಕತ್ಥೇರಸ್ಸಾಪದಾನಂ ದುತಿಯಂ.
೩. ಕೋಟುಮ್ಬರಿಯತ್ಥೇರಅಪದಾನಂ
‘‘ಕಣಿಕಾರಂವ ಜೋತನ್ತಂ, ನಿಸಿನ್ನಂ ಪಬ್ಬತನ್ತರೇ;
ಅಪ್ಪಮೇಯ್ಯಂವ ಉದಧಿಂ, ವಿತ್ಥತಂ ಧರಣಿಂ ಯಥಾ.
‘‘ಪೂಜಿತಂ [ಪರೇತಂ (ಸೀ.)] ದೇವಸಙ್ಘೇನ, ನಿಸಭಾಜಾನಿಯಂ ಯಥಾ;
ಹಟ್ಠೋ ಹಟ್ಠೇನ ಚಿತ್ತೇನ, ಉಪಾಗಚ್ಛಿಂ ನರುತ್ತಮಂ.
‘‘ಸತ್ತಪುಪ್ಫಾನಿ ¶ ಪಗ್ಗಯ್ಹ, ಕೋಟುಮ್ಬರಸಮಾಕುಲಂ;
ಬುದ್ಧಸ್ಸ ಅಭಿರೋಪೇಸಿಂ, ಸಿಖಿನೋ ಲೋಕಬನ್ಧುನೋ.
‘‘ಏಕತ್ತಿಂಸೇ ಇತೋ ಕಪ್ಪೇ, ಯಂ ಪುಪ್ಫಮಭಿರೋಪಯಿಂ;
ದುಗ್ಗತಿಂ ನಾಭಿಜಾನಾಮಿ, ಬುದ್ಧಪೂಜಾಯಿದಂ ಫಲಂ.
‘‘ಇತೋ ವೀಸತಿಕಪ್ಪಮ್ಹಿ, ಮಹಾನೇಲಸನಾಮಕೋ;
ಏಕೋ ಆಸಿ ಮಹಾತೇಜೋ, ಚಕ್ಕವತ್ತೀ ಮಹಬ್ಬಲೋ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಕೋಟುಮ್ಬರಿಯೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಕೋಟುಮ್ಬರಿಯತ್ಥೇರಸ್ಸಾಪದಾನಂ ತತಿಯಂ.
೪. ಪಞ್ಚಹತ್ಥಿಯತ್ಥೇರಅಪದಾನಂ
‘‘ತಿಸ್ಸೋ ¶ ನಾಮಾಸಿ ಭಗವಾ, ಲೋಕಜೇಟ್ಠೋ ನರಾಸಭೋ;
ಪುರಕ್ಖತೋ ಸಾವಕೇಹಿ, ರಥಿಯಂ ಪಟಿಪಜ್ಜಥ.
‘‘ಪಞ್ಚ ¶ ¶ ಉಪ್ಪಲಹತ್ಥಾ ಚ, ಚಾತುರಾ ಠಪಿತಾ ಮಯಾ;
ಆಹುತಿಂ ದಾತುಕಾಮೋಹಂ, ಪಗ್ಗಣ್ಹಿಂ ವತಸಿದ್ಧಿಯಾ [ಪುತ್ತೋಮ್ಹಿ ಹಿತಸಿದ್ಧಿಯಾ (ಸ್ಯಾ.)].
‘‘ಸುವಣ್ಣವಣ್ಣಂ ಸಮ್ಬುದ್ಧಂ, ಗಚ್ಛನ್ತಂ ಅನ್ತರಾಪಣೇ;
ಬುದ್ಧರಂಸೀಹಿ ಫುಟ್ಠೋಸ್ಮಿ [ಬುದ್ಧರಂಸ್ಯಾಭಿಫುಟ್ಠೋಮ್ಹಿ (ಸೀ.), ಬುದ್ಧರಂಸಾಭಿಘುಟ್ಠೋಸ್ಮಿ (ಕ.)], ಪೂಜೇಸಿಂ ದ್ವಿಪದುತ್ತಮಂ.
‘‘ದ್ವೇನವುತೇ ¶ ಇತೋ ಕಪ್ಪೇ, ಯಂ ಪುಪ್ಫಮಭಿಪೂಜಯಿಂ;
ದುಗ್ಗತಿಂ ನಾಭಿಜಾನಾಮಿ, ಬುದ್ಧಪೂಜಾಯಿದಂ ಫಲಂ.
‘‘ಇತೋ ತೇರಸಕಪ್ಪಮ್ಹಿ, ಪಞ್ಚ ಸುಸಭಸಮ್ಮತಾ;
ಸತ್ತರತನಸಮ್ಪನ್ನಾ, ಚಕ್ಕವತ್ತೀ ಮಹಬ್ಬಲಾ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಪಞ್ಚಹತ್ಥಿಯೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಪಞ್ಚಹತ್ಥಿಯತ್ಥೇರಸ್ಸಾಪದಾನಂ ಚತುತ್ಥಂ.
೫. ಇಸಿಮುಗ್ಗದಾಯಕತ್ಥೇರಅಪದಾನಂ
‘‘ಉದೇನ್ತಂ ಸತರಂಸಿಂವ, ಪೀತರಂಸಿಂವ [ಸಿತರಂಸಿಂವ (ಸೀ.)] ಭಾಣುಮಂ;
ಕಕುಧಂ ವಿಲಸನ್ತಂವ, ಪದುಮುತ್ತರನಾಯಕಂ.
‘‘ಇಸಿಮುಗ್ಗಾನಿ ಪಿಸಿತ್ವಾ [ಇಸಿಸುಗ್ಗಾನಿ ಪಿಂಸೇತ್ವಾ (ಸೀ.), ಇಸಿಮುಗ್ಗಂ ನಿಮನ್ತೇತ್ವಾ (ಸ್ಯಾ.)], ಮಧುಖುದ್ದೇ ಅನೀಳಕೇ;
ಪಾಸಾದೇವ ಠಿತೋ ಸನ್ತೋ, ಅದಾಸಿಂ ಲೋಕಬನ್ಧುನೋ.
‘‘ಅಟ್ಠಸತಸಹಸ್ಸಾನಿ, ಅಹೇಸುಂ ಬುದ್ಧಸಾವಕಾ;
ಸಬ್ಬೇಸಂ ಪತ್ತಪೂರೇನ್ತಂ [ಪತ್ತಪೂರಂ ತಂ (ಸೀ.)], ತತೋ ಚಾಪಿ ಬಹುತ್ತರಂ.
‘‘ತೇನ ಚಿತ್ತಪ್ಪಸಾದೇನ, ಸುಕ್ಕಮೂಲೇನ ಚೋದಿತೋ;
ಕಪ್ಪಾನಂ ಸತಸಹಸ್ಸಂ, ದುಗ್ಗತಿಂ ನುಪಪಜ್ಜಹಂ.
‘‘ಚತ್ತಾಲೀಸಮ್ಹಿ ¶ ¶ ಸಹಸ್ಸೇ, ಕಪ್ಪಾನಂ ಅಟ್ಠತಿಂಸ ತೇ;
ಇಸಿಮುಗ್ಗಸನಾಮಾ [ಮಹಿಸಮನ್ತನಾಮಾ (ಸ್ಯಾ.)] ತೇ, ಚಕ್ಕವತ್ತೀ ಮಹಬ್ಬಲಾ.
‘‘ಪಟಿಸಮ್ಭಿದಾ ¶ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಇಸಿಮುಗ್ಗದಾಯಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಇಸಿಮುಗ್ಗದಾಯಕತ್ಥೇರಸ್ಸಾಪದಾನಂ ಪಞ್ಚಮಂ.
೬. ಬೋಧಿಉಪಟ್ಠಾಕತ್ಥೇರಅಪದಾನಂ
‘‘ನಗರೇ ¶ ರಮ್ಮವತಿಯಾ, ಆಸಿಂ ಮುರಜವಾದಕೋ;
ನಿಚ್ಚುಪಟ್ಠಾನಯುತ್ತೋಮ್ಹಿ, ಗತೋಹಂ ಬೋಧಿಮುತ್ತಮಂ.
‘‘ಸಾಯಂ ಪಾತಂ ಉಪಟ್ಠಿತ್ವಾ, ಸುಕ್ಕಮೂಲೇನ ಚೋದಿತೋ;
ಅಟ್ಠಾರಸಕಪ್ಪಸತೇ, ದುಗ್ಗತಿಂ ನುಪಪಜ್ಜಹಂ.
‘‘ಪನ್ನರಸೇ ಕಪ್ಪಸತೇ, ಇತೋ ಆಸಿಂ ಜನಾಧಿಪೋ;
ಮುರಜೋ [ದಮಥೋ (ಸ್ಯಾ.)] ನಾಮ ನಾಮೇನ, ಚಕ್ಕವತ್ತೀ ಮಹಬ್ಬಲೋ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಬೋಧಿಉಪಟ್ಠಾಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಬೋಧಿಉಪಟ್ಠಾಕತ್ಥೇರಸ್ಸಾಪದಾನಂ ಛಟ್ಠಂ.
೭. ಏಕಚಿನ್ತಿಕತ್ಥೇರಅಪದಾನಂ
‘‘ಯದಾ ¶ ದೇವೋ [ದೇವಾ (ಕ.)] ದೇವಕಾಯಾ, ಚವತೇ [ಚವನ್ತಿ (ಕ.)] ಆಯುಸಙ್ಖಯಾ;
ತಯೋ ಸದ್ದಾ ನಿಚ್ಛರನ್ತಿ, ದೇವಾನಂ ಅನುಮೋದತಂ.
‘ಇತೋ ಭೋ ಸುಗತಿಂ ಗಚ್ಛ, ಮನುಸ್ಸಾನಂ ಸಹಬ್ಯತಂ;
ಮನುಸ್ಸಭೂತೋ ಸದ್ಧಮ್ಮೇ, ಲಭ ಸದ್ಧಂ ಅನುತ್ತರಂ.
‘‘‘ಸಾ ತೇ ಸದ್ಧಾ ನಿವಿಟ್ಠಾಸ್ಸ, ಮೂಲಜಾತಾ ಪತಿಟ್ಠಿತಾ;
ಯಾವಜೀವಂ ಅಸಂಹೀರಾ, ಸದ್ಧಮ್ಮೇ ಸುಪ್ಪವೇದಿತೇ.
‘‘‘ಕಾಯೇನ ¶ ¶ ಕುಸಲಂ ಕತ್ವಾ, ವಾಚಾಯ ಕುಸಲಂ ಬಹುಂ;
ಮನಸಾ ಕುಸಲಂ ಕತ್ವಾ, ಅಬ್ಯಾಪಜ್ಜಂ [ಅಬ್ಯಾಪಜ್ಝಂ (ಸ್ಯಾ.), ಅಪ್ಪಮಾಣಂ (ಇತಿವುತ್ತಕೇ ೮೩)] ನಿರೂಪಧಿಂ.
‘‘‘ತತೋ ಓಪಧಿಕಂ ಪುಞ್ಞಂ, ಕತ್ವಾ ದಾನೇನ ತಂ ಬಹುಂ;
ಅಞ್ಞೇಪಿ ಮಚ್ಚೇ ಸದ್ಧಮ್ಮೇ, ಬ್ರಹ್ಮಚರಿಯೇ ನಿವೇಸಯ’.
‘‘ಇಮಾಯ ಅನುಕಮ್ಪಾಯ, ದೇವಾ ದೇವಂ ಯದಾ ವಿದೂ;
ಚವನ್ತಂ ಅನುಮೋದನ್ತಿ, ಏಹಿ ದೇವ ಪುನಪ್ಪುನಂ [ದೇವಪುರಂ ಪುನ (ಸ್ಯಾ.)].
‘‘ಸಂವೇಗೋ ಮೇ [ಸಂವಿಗ್ಗೋಹಂ (ಸ್ಯಾ.)] ತದಾ ಆಸಿ, ದೇವಸಙ್ಘೇ ಸಮಾಗತೇ;
ಕಂಸು ನಾಮ ಅಹಂ ಯೋನಿಂ, ಗಮಿಸ್ಸಾಮಿ ಇತೋ ಚುತೋ.
‘‘ಮಮ ¶ ಸಂವೇಗಮಞ್ಞಾಯ, ಸಮಣೋ ಭಾವಿತಿನ್ದ್ರಿಯೋ;
ಮಮುದ್ಧರಿತುಕಾಮೋ ಸೋ, ಆಗಚ್ಛಿ ಮಮ ಸನ್ತಿಕಂ.
‘‘ಸುಮನೋ ನಾಮ ನಾಮೇನ, ಪದುಮುತ್ತರಸಾವಕೋ;
ಅತ್ಥಧಮ್ಮಾನುಸಾಸಿತ್ವಾ, ಸಂವೇಜೇಸಿ ಮಮಂ ತದಾ.
‘‘ತಸ್ಸಾಹಂ ¶ ವಚನಂ ಸುತ್ವಾ, ಬುದ್ಧೇ ಚಿತ್ತಂ ಪಸಾದಯಿಂ;
ತಂ ಧೀರಂ ಅಭಿವಾದೇತ್ವಾ, ತತ್ಥ ಕಾಲಂಕತೋ ಅಹಂ.
‘‘ಉಪಪಜ್ಜಿಂ ಸ [ಉಪಪಜ್ಜಿಸ್ಸಂ (ಸೀ.)] ತತ್ಥೇವ, ಸುಕ್ಕಮೂಲೇನ ಚೋದಿತೋ;
ಕಪ್ಪಾನಂ ಸತಸಹಸ್ಸಂ, ದುಗ್ಗತಿಂ ನುಪಪಜ್ಜಹಂ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಏಕಚಿನ್ತಿಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಏಕಚಿನ್ತಿಕತ್ಥೇರಸ್ಸಾಪದಾನಂ ಸತ್ತಮಂ.
೮. ತಿಕಣ್ಣಿಪುಪ್ಫಿಯತ್ಥೇರಅಪದಾನಂ
‘‘ದೇವಭೂತೋ ಅಹಂ ಸನ್ತೋ, ಅಚ್ಛರಾಹಿ ಪುರಕ್ಖತೋ;
ಪುಬ್ಬಕಮ್ಮಂ ಸರಿತ್ವಾನ, ಬುದ್ಧಸೇಟ್ಠಂ ಅನುಸ್ಸರಿಂ.
‘‘ತಿಕಣ್ಣಿಪುಪ್ಫಂ [ಕಿಂಕಣಿಪುಪ್ಫಂ (ಕ.)] ಪಗ್ಗಯ್ಹ, ಸಕಂ ಚಿತ್ತಂ ಪಸಾದಯಿಂ;
ಬುದ್ಧಮ್ಹಿ ಅಭಿರೋಪೇಸಿಂ, ವಿಪಸ್ಸಿಮ್ಹಿ ನರಾಸಭೇ.
‘‘ಏಕನವುತಿತೋ ¶ ಕಪ್ಪೇ, ಯಂ ಪುಪ್ಫಮಭಿಪೂಜಯಿಂ;
ದುಗ್ಗತಿಂ ನಾಭಿಜಾನಾಮಿ, ಬುದ್ಧಪೂಜಾಯಿದಂ ಫಲಂ.
‘‘ತೇಸತ್ತತಿಮ್ಹಿತೋ ಕಪ್ಪೇ, ಚತುರಾಸುಂ ರಮುತ್ತಮಾ;
ಸತ್ತರತನಸಮ್ಪನ್ನಾ, ಚಕ್ಕವತ್ತೀ ಮಹಬ್ಬಲಾ.
‘‘ಪಟಿಸಮ್ಭಿದಾ ¶ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ತಿಕಣ್ಣಿಪುಪ್ಫಿಯೋ [ಕಿಂಕಣಿಕಪುಪ್ಫಿಯೋ (ಕ.)] ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ತಿಕಣ್ಣಿಪುಪ್ಫಿಯತ್ಥೇರಸ್ಸಾಪದಾನಂ ಅಟ್ಠಮಂ.
೯. ಏಕಚಾರಿಯತ್ಥೇರಅಪದಾನಂ
‘‘ತಾವತಿಂಸೇಸು ¶ ¶ ದೇವೇಸು, ಮಹಾಘೋಸೋ ತದಾ ಅಹು;
ಬುದ್ಧೋ ಚ ಲೋಕೇ ನಿಬ್ಬಾತಿ, ಮಯಞ್ಚಮ್ಹ ಸರಾಗಿನೋ.
‘‘ತೇಸಂ ಸಂವೇಗಜಾತಾನಂ, ಸೋಕಸಲ್ಲಸಮಙ್ಗಿನಂ;
ಸಬಲೇನ ಉಪತ್ಥದ್ಧೋ, ಅಗಮಂ ಬುದ್ಧಸನ್ತಿಕಂ.
‘‘ಮನ್ದಾರವಂ ಗಹೇತ್ವಾನ, ಸಙ್ಗೀತಿ [ಸಣ್ಹಿತಂ (ಸೀ.), ಸಙ್ಗಿತಂ (ಸ್ಯಾ.)] ಅಭಿನಿಮ್ಮಿತಂ;
ಪರಿನಿಬ್ಬುತಕಾಲಮ್ಹಿ, ಬುದ್ಧಸ್ಸ ಅಭಿರೋಪಯಿಂ.
‘‘ಸಬ್ಬೇ ದೇವಾನುಮೋದಿಂಸು, ಅಚ್ಛರಾಯೋ ಚ ಮೇ ತದಾ;
ಕಪ್ಪಾನಂ ಸತಸಹಸ್ಸಂ, ದುಗ್ಗತಿಂ ನುಪಪಜ್ಜಹಂ.
‘‘ಸಟ್ಠಿಕಪ್ಪಸಹಸ್ಸಮ್ಹಿ, ಇತೋ ಸೋಳಸ ತೇ ಜನಾ;
ಮಹಾಮಲ್ಲಜನಾ ನಾಮ, ಚಕ್ಕವತ್ತೀ ಮಹಬ್ಬಲಾ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ¶ ಸುದಂ ಆಯಸ್ಮಾ ಏಕಚಾರಿಯೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಏಕಚಾರಿಯತ್ಥೇರಸ್ಸಾಪದಾನಂ ನವಮಂ.
೧೦. ತಿವಣ್ಟಿಪುಪ್ಫಿಯತ್ಥೇರಅಪದಾನಂ
‘‘ಅಭಿಭೂತಂ ¶ ಪನಿಜ್ಝನ್ತಿ [ಅಭಿಭೂತೋಪನಿಜ್ಝನ್ತಿ (ಸೀ.)], ಸಬ್ಬೇ ಸಙ್ಗಮ್ಮ ತೇ ಮಮಂ [ಅಭಿಭುಂ ಥೇರಂ ಪನಿಜ್ಝಾಮ, ಸಬ್ಬೇ ಸಙ್ಗಮ್ಮ ತೇ ಮಯಂ (ಸ್ಯಾ.)];
ತೇಸಂ ನಿಜ್ಝಾಯಮಾನಾನಂ, ಪರಿಳಾಹೋ ಅಜಾಯಥ.
‘‘ಸುನನ್ದೋ ನಾಮ ನಾಮೇನ, ಬುದ್ಧಸ್ಸ ಸಾವಕೋ ತದಾ;
ಧಮ್ಮದಸ್ಸಿಸ್ಸ ಮುನಿನೋ, ಆಗಚ್ಛಿ ಮಮ ಸನ್ತಿಕಂ.
‘‘ಯೇ ಮೇ ಬದ್ಧಚರಾ ಆಸುಂ, ತೇ ಮೇ ಪುಪ್ಫಂ ಅದುಂ ತದಾ;
ತಾಹಂ ಪುಪ್ಫಂ ಗಹೇತ್ವಾನ, ಸಾವಕೇ ಅಭಿರೋಪಯಿಂ.
‘‘ಸೋಹಂ ಕಾಲಂಕತೋ ತತ್ಥ, ಪುನಾಪಿ ಉಪಪಜ್ಜಹಂ;
ಅಟ್ಠಾರಸೇ ಕಪ್ಪಸತೇ, ವಿನಿಪಾತಂ ನ ಗಚ್ಛಹಂ.
‘‘ತೇರಸೇತೋ ¶ ಕಪ್ಪಸತೇ, ಅಟ್ಠಾಸುಂ ಧೂಮಕೇತುನೋ;
ಸತ್ತರತನಸಮ್ಪನ್ನಾ, ಚಕ್ಕವತ್ತೀ ಮಹಬ್ಬಲಾ.
‘‘ಪಟಿಸಮ್ಭಿದಾ ¶ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ತಿವಣ್ಟಿಪುಪ್ಫಿಯೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ;
ತಿವಣ್ಟಿಪುಪ್ಫಿಯತ್ಥೇರಸ್ಸಾಪದಾನಂ ದಸಮಂ.
ಕುಟಜಪುಪ್ಫಿಯವಗ್ಗೋ ಏಕೂನವೀಸತಿಮೋ.
ತಸ್ಸುದ್ದಾನಂ –
ಕುಟಜೋ ¶ ಬನ್ಧುಜೀವೀ ಚ, ಕೋಟುಮ್ಬರಿಕಹತ್ಥಿಯೋ;
ಇಸಿಮುಗ್ಗೋ ಚ ಬೋಧಿ ಚ, ಏಕಚಿನ್ತೀ ತಿಕಣ್ಣಿಕೋ;
ಏಕಚಾರೀ ತಿವಣ್ಟಿ ಚ, ಗಾಥಾ ದ್ವಾಸಟ್ಠಿ ಕಿತ್ತಿತಾತಿ.
೨೦. ತಮಾಲಪುಪ್ಫಿಯವಗ್ಗೋ
೧. ತಮಾಲಪುಪ್ಫಿಯತ್ಥೇರಅಪದಾನಂ
‘‘ಚುಲ್ಲಾಸೀತಿಸಹಸ್ಸಾನಿ ¶ ¶ , ಥಮ್ಭಾ ಸೋವಣ್ಣಯಾ ಅಹೂ;
ದೇವಲಟ್ಠಿಪಟಿಭಾಗಂ, ವಿಮಾನಂ ಮೇ ಸುನಿಮ್ಮಿತಂ.
‘‘ತಮಾಲಪುಪ್ಫಂ ಪಗ್ಗಯ್ಹ, ವಿಪ್ಪಸನ್ನೇನ ಚೇತಸಾ;
ಬುದ್ಧಸ್ಸ ಅಭಿರೋಪಯಿಂ, ಸಿಖಿನೋ ಲೋಕಬನ್ಧುನೋ.
‘‘ಏಕತ್ತಿಂಸೇ ಇತೋ ಕಪ್ಪೇ, ಯಂ ಕಮ್ಮಮಕರಿಂ ತದಾ;
ದುಗ್ಗತಿಂ ನಾಭಿಜಾನಾಮಿ, ಬುದ್ಧಪೂಜಾಯಿದಂ ಫಲಂ.
‘‘ಇತೋ ವೀಸತಿಮೇ ಕಪ್ಪೇ, ಚನ್ದತಿತ್ತೋತಿ ಏಕಕೋ;
ಸತ್ತರತನಸಮ್ಪನ್ನೋ, ಚಕ್ಕವತ್ತೀ ಮಹಬ್ಬಲೋ.
‘‘ಪಟಿಸಮ್ಭಿದಾ ಚತಸ್ಸೋ, ವಿಮೋಕ್ಖಾಪಿ ಚ ಅಟ್ಠಿಮೇ;
ಛಳಭಿಞ್ಞಾ ಸಚ್ಛಿಕತಾ, ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ¶ ಸುದಂ ಆಯಸ್ಮಾ ತಮಾಲಪುಪ್ಫಿಯೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ತಮಾಲಪುಪ್ಫಿಯತ್ಥೇರಸ್ಸಾಪದಾನಂ ಪಠಮಂ.
೨. ತಿಣಸನ್ಥಾರಕತ್ಥೇರಅಪದಾನಂ
‘‘ಯದಾ ¶ ವನವಾಸೀ [ಯಂ ದಾಯವಾಸಿಕೋ (ಸೀ.)] ಇಸಿ, ತಿಣಂ ಲಾಯತಿ ಸತ್ಥುನೋ;
ಸಬ್ಬೇ ಪದಕ್ಖಿಣಾವಟ್ಟಾ [ಪದಕ್ಖಿಣಾವತ್ತಾ (ಸೀ. ಸ್ಯಾ.)], ಪಥಬ್ಯಾ [ಪುಥವ್ಯಾ (ಸೀ.)] ನಿಪತಿಂಸು ತೇ.
‘‘ತಮಹಂ ತಿಣಮಾದಾಯ, ಸನ್ಥರಿಂ ಧರಣುತ್ತಮೇ;
ತೀಣೇವ ತಾಲಪತ್ತಾನಿ, ಆಹರಿತ್ವಾನಹಂ ತದಾ.
‘‘ತಿಣೇನ ¶ ಛದನಂ ಕತ್ವಾ, ಸಿದ್ಧತ್ಥಸ್ಸ ಅದಾಸಹಂ;
ಸತ್ತಾಹಂ ಧಾರಯುಂ ತಸ್ಸ [ತತ್ಥ (ಸ್ಯಾ.)], ದೇವಮಾನುಸಸತ್ಥುನೋ.
‘‘ಚತುನ್ನವುತಿತೋ ಕಪ್ಪೇ, ಯಂ ತಿಣಂ ಅದದಿಂ ತದಾ;
ದುಗ್ಗತಿಂ ನಾಭಿಜಾನಾಮಿ, ತಿಣದಾನಸ್ಸಿದಂ ಫಲಂ.
‘‘ಪಞ್ಚಸಟ್ಠಿಮ್ಹಿತೋ ¶ ಕಪ್ಪೇ, ಚತ್ತಾರೋಸುಂ ಮಹದ್ಧನಾ;
ಸತ್ತರತನಸಮ್ಪನ್ನಾ, ಚಕ್ಕವತ್ತೀ ಮಹಬ್ಬಲಾ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ತಿಣಸನ್ಥಾರಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ತಿಣಸನ್ಥಾರಕತ್ಥೇರಸ್ಸಾಪದಾನಂ ದುತಿಯಂ.
೩. ಖಣ್ಡಪುಲ್ಲಿಯತ್ಥೇರಅಪದಾನಂ
‘‘ಫುಸ್ಸಸ್ಸ ¶ ಖೋ ಭಗವತೋ, ಥೂಪೋ ಆಸಿ ಮಹಾವನೇ;
ಕುಞ್ಜರೇಹಿ ತದಾ ಭಿನ್ನೋ, ಪರೂಳ್ಹೋ ಪಾದಪೋ [ಪರೂಳ್ಹಪಾದಪೋ (ಸೀ.), ಸಂರೂಳ್ಹೋ ಪಾದಪೋ (ಸ್ಯಾ.)] ತಹಿಂ.
‘‘ವಿಸಮಞ್ಚ ಸಮಂ ಕತ್ವಾ, ಸುಧಾಪಿಣ್ಡಂ ಅದಾಸಹಂ;
ತಿಲೋಕಗರುನೋ ತಸ್ಸ, ಗುಣೇಹಿ ಪರಿತೋಸಿತೋ [ಪರಿತೋ ಸುತೋ (ಕ.)].
‘‘ದ್ವೇನವುತೇ ಇತೋ ಕಪ್ಪೇ, ಯಂ ಕಮ್ಮಮಕರಿಂ ತದಾ;
ದುಗ್ಗತಿಂ ನಾಭಿಜಾನಾಮಿ, ಸುಧಾಪಿಣ್ಡಸ್ಸಿದಂ ಫಲಂ.
‘‘ಸತ್ತಸತ್ತತಿಕಪ್ಪಮ್ಹಿ, ಜಿತಸೇನಾಸುಂ ಸೋಳಸ;
ಸತ್ತರತನಸಮ್ಪನ್ನಾ, ಚಕ್ಕವತ್ತೀ ಮಹಬ್ಬಲಾ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಖಣ್ಡಫುಲ್ಲಿಯೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಖಣ್ಡಪುಲ್ಲಿಯತ್ಥೇರಸ್ಸಾಪದಾನಂ ತತಿಯಂ.
೪. ಅಸೋಕಪೂಜಕತ್ಥೇರಅಪದಾನಂ
‘‘ತಿವರಾಯಂ ¶ [ತಿಪುರಾಯಂ (ಸ್ಯಾ.)] ಪುರೇ ರಮ್ಮೇ, ರಾಜುಯ್ಯಾನಂ ಅಹು ತದಾ;
ಉಯ್ಯಾನಪಾಲೋ ತತ್ಥಾಸಿಂ, ರಞ್ಞೋ ಬದ್ಧಚರೋ ಅಹಂ.
‘‘ಪದುಮೋ ¶ ¶ ¶ ನಾಮ ನಾಮೇನ, ಸಯಮ್ಭೂ ಸಪ್ಪಭೋ ಅಹು;
ನಿಸಿನ್ನಂ [ನಿಸಿನ್ನೋ (ಕ.)] ಪುಣ್ಡರೀಕಮ್ಹಿ, ಛಾಯಾ ನ ಜಹಿ ತಂ ಮುನಿಂ.
‘‘ಅಸೋಕಂ ಪುಪ್ಫಿತಂ ದಿಸ್ವಾ, ಪಿಣ್ಡಿಭಾರಂ ಸುದಸ್ಸನಂ;
ಬುದ್ಧಸ್ಸ ಅಭಿರೋಪೇಸಿಂ, ಜಲಜುತ್ತಮನಾಮಿನೋ.
‘‘ಚತುನ್ನವುತಿತೋ ಕಪ್ಪೇ, ಯಂ ಪುಪ್ಫಮಭಿರೋಪಯಿಂ;
ದುಗ್ಗತಿಂ ನಾಭಿಜಾನಾಮಿ, ಬುದ್ಧಪೂಜಾಯಿದಂ ಫಲಂ.
‘‘ಸತ್ತತಿಂಸಮ್ಹಿತೋ ಕಪ್ಪೇ, ಸೋಳಸ ಅರಣಞ್ಜಹಾ [ಅರುಣಞ್ಜಹಾ (ಸೀ.)];
ಸತ್ತರತನಸಮ್ಪನ್ನಾ, ಚಕ್ಕವತ್ತೀ ಮಹಬ್ಬಲಾ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಅಸೋಕಪೂಜಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಅಸೋಕಪೂಜಕತ್ಥೇರಸ್ಸಾಪದಾನಂ ಚತುತ್ಥಂ.
೫. ಅಙ್ಕೋಲಕತ್ಥೇರಅಪದಾನಂ
‘‘ಅಙ್ಕೋಲಂ ಪುಪ್ಫಿತಂ ದಿಸ್ವಾ, ಮಾಲಾವರಂ ಸಕೋಸಕಂ [ಸಮೋಗಧಂ (ಸ್ಯಾ.)];
ಓಚಿನಿತ್ವಾನ ತಂ ಪುಪ್ಫಂ, ಅಗಮಂ ಬುದ್ಧಸನ್ತಿಕಂ.
‘‘ಸಿದ್ಧತ್ಥೋ ತಮ್ಹಿ ಸಮಯೇ, ಪತಿಲೀನೋ ಮಹಾಮುನಿ;
ಮುಹುತ್ತಂ ಪಟಿಮಾನೇತ್ವಾ, ಗುಹಾಯಂ ಪುಪ್ಫಮೋಕಿರಿಂ.
‘‘ಚತುನ್ನವುತಿತೋ ¶ ಕಪ್ಪೇ, ಯಂ ಪುಪ್ಫಮಭಿಪೂಜಯಿಂ;
ದುಗ್ಗತಿಂ ನಾಭಿಜಾನಾಮಿ, ಪುಪ್ಫದಾನಸ್ಸಿದಂ [ಬುದ್ಧಪೂಜಾಯಿದಂ (ಸೀ. ಸ್ಯಾ.)] ಫಲಂ.
‘‘ಛತ್ತಿಂಸಮ್ಹಿ ಇತೋ ಕಪ್ಪೇ, ಆಸೇಕೋ ದೇವಗಜ್ಜಿತೋ;
ಸತ್ತರತನಸಮ್ಪನ್ನೋ, ಚಕ್ಕವತ್ತೀ ಮಹಬ್ಬಲೋ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಅಙ್ಕೋಲಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಅಙ್ಕೋಲಕತ್ಥೇರಸ್ಸಾಪದಾನಂ ಪಞ್ಚಮಂ.
೬. ಕಿಸಲಯಪೂಜಕತ್ಥೇರಅಪದಾನಂ
‘‘ನಗರೇ ¶ ¶ ¶ ದ್ವಾರವತಿಯಾ, ಮಾಲಾವಚ್ಛೋ ಮಮಂ ಅಹು;
ಉದಪಾನೋ ಚ ತತ್ಥೇವ, ಪಾದಪಾನಂ ವಿರೋಹನೋ.
‘‘ಸಬಲೇನ ಉಪತ್ಥದ್ಧೋ, ಸಿದ್ಧತ್ಥೋ ಅಪರಾಜಿತೋ;
ಮಮಾನುಕಮ್ಪಮಾನೋ ಸೋ, ಗಚ್ಛತೇ ಅನಿಲಞ್ಜಸೇ.
‘‘ಅಞ್ಞಂ ಕಿಞ್ಚಿ ನ ಪಸ್ಸಾಮಿ, ಪೂಜಾಯೋಗ್ಗಂ ಮಹೇಸಿನೋ;
ಅಸೋಕಂ ಪಲ್ಲವಂ ದಿಸ್ವಾ, ಆಕಾಸೇ ಉಕ್ಖಿಪಿಂ ಅಹಂ.
‘‘ಬುದ್ಧಸ್ಸ ತೇ ಕಿಸಲಯಾ, ಗಚ್ಛತೋ ಯನ್ತಿ ಪಚ್ಛತೋ;
ತಾಹಂ ದಿಸ್ವಾನ ಸಂವಿಜಿಂ [ಸೋಹಂ ದಿಸ್ವಾನ ತಂ ಇದ್ಧಿಂ (ಸೀ. ಸ್ಯಾ.)], ಅಹೋ ಬುದ್ಧಸ್ಸುಳಾರತಾ.
‘‘ಚತುನ್ನವುತಿತೋ ¶ ಕಪ್ಪೇ, ಪಲ್ಲವಂ ಅಭಿರೋಪಯಿಂ;
ದುಗ್ಗತಿಂ ನಾಭಿಜಾನಾಮಿ, ಬುದ್ಧಪೂಜಾಯಿದಂ ಫಲಂ.
‘‘ಸತ್ತತಿಂಸೇ [ಸತ್ತವೀಸೇ (ಸೀ. ಸ್ಯಾ.)] ಇತೋ ಕಪ್ಪೇ, ಏಕೋ ಏಕಿಸ್ಸರೋ ಅಹು;
ಸತ್ತರತನಸಮ್ಪನ್ನೋ, ಚಕ್ಕವತ್ತೀ ಮಹಬ್ಬಲೋ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಕಿಸಲಯಪೂಜಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಕಿಸಲಯಪೂಜಕತ್ಥೇರಸ್ಸಾಪದಾನಂ ಛಟ್ಠಂ.
೭. ತಿನ್ದುಕದಾಯಕತ್ಥೇರಅಪದಾನಂ
‘‘ಗಿರಿದುಗ್ಗಚರೋ ಆಸಿಂ, ಮಕ್ಕಟೋ ಥಾಮವೇಗಿಕೋ;
ಫಲಿನಂ ತಿನ್ದುಕಂ ದಿಸ್ವಾ, ಬುದ್ಧಸೇಟ್ಠಂ ಅನುಸ್ಸರಿಂ.
‘‘ನಿಕ್ಖಮಿತ್ವಾ ಕತಿಪಾಹಂ, ವಿಚಿನಿಂ ಲೋಕನಾಯಕಂ;
ಪಸನ್ನಚಿತ್ತೋ ಸುಮನೋ, ಸಿದ್ಧತ್ಥಂ ತಿಭವನ್ತಗುಂ.
‘‘ಮಮ ಸಙ್ಕಪ್ಪಮಞ್ಞಾಯ, ಸತ್ಥಾ ಲೋಕೇ ಅನುತ್ತರೋ;
ಖೀಣಾಸವಸಹಸ್ಸೇಹಿ, ಆಗಚ್ಛಿ ಮಮ ಸನ್ತಿಕಂ.
‘‘ಪಾಮೋಜ್ಜಂ ¶ ಜನಯಿತ್ವಾನ, ಫಲಹತ್ಥೋ ಉಪಾಗಮಿಂ;
ಪಟಿಗ್ಗಹೇಸಿ ಭಗವಾ, ಸಬ್ಬಞ್ಞೂ ವದತಂ ವರೋ.
‘‘ಚತುನ್ನವುತಿತೋ ¶ ¶ ¶ ಕಪ್ಪೇ, ಯಂ ಫಲಂ ಅದದಿಂ ತದಾ;
ದುಗ್ಗತಿಂ ನಾಭಿಜಾನಾಮಿ, ಫಲದಾನಸ್ಸಿದಂ ಫಲಂ.
‘‘ಸತ್ತಪಞ್ಞಾಸಕಪ್ಪಮ್ಹಿ, ಉಪನನ್ದಸನಾಮಕೋ;
ಸತ್ತರತನಸಮ್ಪನ್ನೋ, ಚಕ್ಕವತ್ತೀ ಮಹಬ್ಬಲೋ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ತಿನ್ದುಕದಾಯಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ತಿನ್ದುಕದಾಯಕತ್ಥೇರಸ್ಸಾಪದಾನಂ ಸತ್ತಮಂ.
೮. ಮುಟ್ಠಿಪೂಜಕತ್ಥೇರಅಪದಾನಂ
‘‘ಸುಮೇಧೋ ನಾಮ ಭಗವಾ, ಲೋಕಜೇಟ್ಠೋ ನರಾಸಭೋ;
ಪಚ್ಛಿಮೇ ಅನುಕಮ್ಪಾಯ, ಪಧಾನಂ ಪದಹೀ ಜಿನೋ.
‘‘ತಸ್ಸ ಚಙ್ಕಮಮಾನಸ್ಸ, ದ್ವಿಪದಿನ್ದಸ್ಸ ತಾದಿನೋ;
ಗಿರಿನೇಲಸ್ಸ ಪುಪ್ಫಾನಂ, ಮುಟ್ಠಿಂ ಬುದ್ಧಸ್ಸ ರೋಪಯಿಂ.
‘‘ತೇನ ಚಿತ್ತಪ್ಪಸಾದೇನ, ಸುಕ್ಕಮೂಲೇನ ಚೋದಿತೋ;
ತಿಂಸಕಪ್ಪಸಹಸ್ಸಾನಿ, ದುಗ್ಗತಿಂ ನುಪಪಜ್ಜಹಂ.
‘‘ತೇವೀಸತಿಕಪ್ಪಸತೇ, ಸುನೇಲೋ ನಾಮ ಖತ್ತಿಯೋ;
ಸತ್ತರತನಸಮ್ಪನ್ನೋ, ಏಕೋ ಆಸಿಂ ಮಹಬ್ಬಲೋ.
‘‘ಪಟಿಸಮ್ಭಿದಾ ¶ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಮುಟ್ಠಿಪೂಜಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಮುಟ್ಠಿಪೂಜಕತ್ಥೇರಸ್ಸಾಪದಾನಂ ಅಟ್ಠಮಂ.
೯. ಕಿಂಕಣಿಕಪುಪ್ಫಿಯತ್ಥೇರಅಪದಾನಂ
‘‘ಸುಮಙ್ಗಲೋತಿ ನಾಮೇನ, ಸಯಮ್ಭೂ ಅಪರಾಜಿತೋ;
ಪವನಾ ನಿಕ್ಖಮಿತ್ವಾನ, ನಗರಂ ಪಾವಿಸೀ ಜಿನೋ.
‘‘ಪಿಣ್ಡಚಾರಂ ¶ ಚರಿತ್ವಾನ, ನಿಕ್ಖಮ್ಮ ನಗರಾ ಮುನಿ;
ಕತಕಿಚ್ಚೋವ ಸಮ್ಬುದ್ಧೋ, ಸೋ ವಸೀ ವನಮನ್ತರೇ.
‘‘ಕಿಂಕಣಿಪುಪ್ಫಂ ¶ ¶ ಪಗ್ಗಯ್ಹ, ಬುದ್ಧಸ್ಸ ಅಭಿರೋಪಯಿಂ;
ಪಸನ್ನಚಿತ್ತೋ ಸುಮನೋ, ಸಯಮ್ಭುಸ್ಸ ಮಹೇಸಿನೋ.
‘‘ಚತುನ್ನವುತಿತೋ ಕಪ್ಪೇ, ಯಂ ಪುಪ್ಫಮಭಿರೋಪಯಿಂ;
ದುಗ್ಗತಿಂ ನಾಭಿಜಾನಾಮಿ, ಬುದ್ಧಪೂಜಾಯಿದಂ ಫಲಂ.
‘‘ಛಳಾಸೀತಿಮ್ಹಿತೋ ಕಪ್ಪೇ, ಅಪಿಲಾಸಿಸನಾಮಕೋ;
ಸತ್ತರತನಸಮ್ಪನ್ನೋ, ಚಕ್ಕವತ್ತೀ ಮಹಬ್ಬಲೋ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ¶ ಸುದಂ ಆಯಸ್ಮಾ ಕಿಂಕಣಿಕಪುಪ್ಫಿಯೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಕಿಂಕಣಿಕಪುಪ್ಫಿಯತ್ಥೇರಸ್ಸಾಪದಾನಂ ನವಮಂ.
೧೦. ಯೂಥಿಕಪುಪ್ಫಿಯತ್ಥೇರಅಪದಾನಂ
‘‘ಪದುಮುತ್ತರೋ ನಾಮ ಜಿನೋ, ಆಹುತೀನಂ ಪಟಿಗ್ಗಹೋ;
ಪವನಾ ನಿಕ್ಖಮಿತ್ವಾನ, ವಿಹಾರಂ ಯಾತಿ ಚಕ್ಖುಮಾ.
‘‘ಉಭೋ ಹತ್ಥೇಹಿ ಪಗ್ಗಯ್ಹ, ಯೂಥಿಕಂ ಪುಪ್ಫಮುತ್ತಮಂ;
ಬುದ್ಧಸ್ಸ ಅಭಿರೋಪಯಿಂ, ಮೇತ್ತಚಿತ್ತಸ್ಸ ತಾದಿನೋ.
‘‘ತೇನ ಚಿತ್ತಪ್ಪಸಾದೇನ, ಅನುಭೋತ್ವಾನ ಸಮ್ಪದಾ;
ಕಪ್ಪಾನಂ ಸತಸಹಸ್ಸಂ, ದುಗ್ಗತಿಂ ನುಪಪಜ್ಜಹಂ.
‘‘ಇತೋ ಪಞ್ಞಾಸಕಪ್ಪೇಸು, ಏಕೋ ಆಸಿಂ ಜನಾಧಿಪೋ;
ಸಮಿತ್ತನನ್ದನೋ ನಾಮ, ಚಕ್ಕವತ್ತೀ ಮಹಬ್ಬಲೋ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಯೂಥಿಕಪುಪ್ಫಿಯೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ;
ಯೂಥಿಕಪುಪ್ಫಿಯತ್ಥೇರಸ್ಸಾಪದಾನಂ ದಸಮಂ.
ತಮಾಲಪುಪ್ಫಿಯವಗ್ಗೋ ವೀಸತಿಮೋ.
ತಸ್ಸುದ್ದಾನಂ ¶ –
ತಮಾಲತಿಣಸನ್ಥಾರೋ ¶ , ಖಣ್ಡಫುಲ್ಲಿ ಅಸೋಕಿಯೋ;
ಅಙ್ಕೋಲಕೀ ಕಿಸಲಯೋ, ತಿನ್ದುಕೋ ನೇಲಪುಪ್ಫಿಯೋ;
ಕಿಂಕಣಿಕೋ ಯೂಥಿಕೋ ಚ, ಗಾಥಾ ಪಞ್ಞಾಸ ಅಟ್ಠ ಚಾತಿ.
ಅಥ ¶ ವಗ್ಗುದ್ದಾನಂ –
ಭಿಕ್ಖಾದಾಯೀ ¶ ಪರಿವಾರೋ, ಸೇರೇಯ್ಯೋ ಸೋಭಿತೋ ತಥಾ;
ಛತ್ತಞ್ಚ ಬನ್ಧುಜೀವೀ ಚ, ಸುಪಾರಿಚರಿಯೋಪಿ ಚ.
ಕುಮುದೋ ಕುಟಜೋ ಚೇವ, ತಮಾಲಿ ದಸಮೋ ಕತೋ;
ಛಸತಾನಿ ಚ ಗಾಥಾನಿ, ಛಸಟ್ಠಿ ಚ ತತುತ್ತರಿ.
ಭಿಕ್ಖಾವಗ್ಗದಸಕಂ.
ದುತಿಯಸತಕಂ ಸಮತ್ತಂ.
೨೧. ಕಣಿಕಾರಪುಪ್ಫಿಯವಗ್ಗೋ
೧. ಕಣಿಕಾರಪುಪ್ಫಿಯತ್ಥೇರಅಪದಾನಂ
‘‘ಕಣಿಕಾರಂ ¶ ¶ ¶ ಪುಪ್ಫಿತಂ ದಿಸ್ವಾ, ಓಚಿನಿತ್ವಾನಹಂ ತದಾ;
ತಿಸ್ಸಸ್ಸ ಅಭಿರೋಪೇಸಿಂ, ಓಘತಿಣ್ಣಸ್ಸ ತಾದಿನೋ.
‘‘ದ್ವೇನವುತೇ ಇತೋ ಕಪ್ಪೇ, ಯಂ ಪುಪ್ಫಮಭಿರೋಪಯಿಂ;
ದುಗ್ಗತಿಂ ನಾಭಿಜಾನಾಮಿ, ಬುದ್ಧಪೂಜಾಯಿದಂ ಫಲಂ.
‘‘ಪಞ್ಚತ್ತಿಂಸೇ ಇತೋ ಕಪ್ಪೇ, ಅರುಣಪಾಣೀತಿ ವಿಸ್ಸುತೋ;
ಸತ್ತರತನಸಮ್ಪನ್ನೋ, ಚಕ್ಕವತ್ತೀ ಮಹಬ್ಬಲೋ.
‘‘ಪಟಿಸಮ್ಭಿದಾ ಚತಸ್ಸೋ, ವಿಮೋಕ್ಖಾಪಿ ಚ ಅಟ್ಠಿಮೇ;
ಛಳಭಿಞ್ಞಾ ಸಚ್ಛಿಕತಾ, ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಕಣಿಕಾರಪುಪ್ಫಿಯೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಕಣಿಕಾರಪುಪ್ಫಿಯತ್ಥೇರಸ್ಸಾಪದಾನಂ ಪಠಮಂ.
೨. ಮಿನೇಲಪುಪ್ಫಿಯತ್ಥೇರಅಪದಾನಂ
‘‘ಸುವಣ್ಣವಣ್ಣೋ ಭಗವಾ, ಸತರಂಸೀ ಪತಾಪವಾ;
ಚಙ್ಕಮನಂ ಸಮಾರೂಳ್ಹೋ, ಮೇತ್ತಚಿತ್ತೋ ಸಿಖೀಸಭೋ.
‘‘ಪಸನ್ನಚಿತ್ತೋ ಸುಮನೋ, ವನ್ದಿತ್ವಾ [ಥೋಮೇತ್ವಾ (ಸ್ಯಾ.)] ಞಾಣಮುತ್ತಮಂ;
ಮಿನೇಲಪುಪ್ಫಂ ಪಗ್ಗಯ್ಹ, ಬುದ್ಧಸ್ಸ ಅಭಿರೋಪಯಿಂ.
‘‘ಏಕತ್ತಿಂಸೇ ¶ ¶ ಇತೋ ಕಪ್ಪೇ, ಯಂ ಪುಪ್ಫಮಭಿಪೂಜಯಿಂ;
ದುಗ್ಗತಿಂ ನಾಭಿಜಾನಾಮಿ, ಬುದ್ಧಪೂಜಾಯಿದಂ ಫಲಂ.
‘‘ಏಕೂನತಿಂಸಕಪ್ಪಮ್ಹಿ, ಸುಮೇಘಘನನಾಮಕೋ;
ಸತ್ತರತನಸಮ್ಪನ್ನೋ, ಚಕ್ಕವತ್ತೀ ಮಹಬ್ಬಲೋ.
‘‘ಪಟಿಸಮ್ಭಿದಾ ¶ ¶ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಮಿನೇಲಪುಪ್ಫಿಯೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಮಿನೇಲಪುಪ್ಫಿಯತ್ಥೇರಸ್ಸಾಪದಾನಂ ದುತಿಯಂ.
೩. ಕಿಙ್ಕಣಿಪುಪ್ಫಿಯತ್ಥೇರಅಪದಾನಂ
‘‘ಕಞ್ಚನಗ್ಘಿಯಸಙ್ಕಾಸೋ, ಸಬ್ಬಞ್ಞೂ ಲೋಕನಾಯಕೋ;
ಓದಕಂ ದಹಮೋಗ್ಗಯ್ಹ, ಸಿನಾಯಿ ಲೋಕನಾಯಕೋ.
‘‘ಪಗ್ಗಯ್ಹ ಕಿಙ್ಕಣಿಂ [ಕಿಙ್ಕಿಣಿಂ (ಸೀ.)] ಪುಪ್ಫಂ, ವಿಪಸ್ಸಿಸ್ಸಾಭಿರೋಪಯಿಂ;
ಉದಗ್ಗಚಿತ್ತೋ ಸುಮನೋ, ದ್ವಿಪದಿನ್ದಸ್ಸ ತಾದಿನೋ.
‘‘ಏಕನವುತಿತೋ ಕಪ್ಪೇ, ಯಂ ಪುಪ್ಫಮಭಿರೋಪಯಿಂ;
ದುಗ್ಗತಿಂ ನಾಭಿಜಾನಾಮಿ, ಬುದ್ಧಪೂಜಾಯಿದಂ ಫಲಂ.
‘‘ಸತ್ತವೀಸತಿಕಪ್ಪಮ್ಹಿ, ರಾಜಾ ಭೀಮರಥೋ ಅಹು;
ಸತ್ತರತನಸಮ್ಪನ್ನೋ, ಚಕ್ಕವತ್ತೀ ಮಹಬ್ಬಲೋ.
‘‘ಪಟಿಸಮ್ಭಿದಾ ¶ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಕಿಙ್ಕಣಿಪುಪ್ಫಿಯೋ [ಕಿಙ್ಕಿಣಿಕಪುಪ್ಫಿಯೋ (ಸೀ.)] ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಕಿಙ್ಕಣಿಪುಪ್ಫಿಯತ್ಥೇರಸ್ಸಾಪದಾನಂ ತತಿಯಂ.
೪. ತರಣಿಯತ್ಥೇರಅಪದಾನಂ
‘‘ಅತ್ಥದಸ್ಸೀ ತು ಭಗವಾ, ದ್ವಿಪದಿನ್ದೋ ನರಾಸಭೋ;
ಪುರಕ್ಖತೋ ಸಾವಕೇಹಿ, ಗಙ್ಗಾತೀರಮುಪಾಗಮಿ.
‘‘ಸಮತಿತ್ತಿ ಕಾಕಪೇಯ್ಯಾ, ಗಙ್ಗಾ ಆಸಿ ದುರುತ್ತರಾ;
ಉತ್ತಾರಯಿಂ ಭಿಕ್ಖುಸಙ್ಘಂ, ಬುದ್ಧಞ್ಚ ದ್ವಿಪದುತ್ತಮಂ.
‘‘ಅಟ್ಠಾರಸೇ ¶ ಕಪ್ಪಸತೇ, ಯಂ ಕಮ್ಮಮಕರಿಂ ತದಾ;
ದುಗ್ಗತಿಂ ನಾಭಿಜಾನಾಮಿ, ತರಣಾಯ ಇದಂ ಫಲಂ.
‘‘ತೇರಸೇತೋ ¶ ಕಪ್ಪಸತೇ, ಪಞ್ಚ ಸಬ್ಬೋಭವಾ [ಸಬ್ಭೋಗವಾ (ಸೀ.)] ಅಹುಂ;
ಸತ್ತರತನಸಮ್ಪನ್ನಾ, ಚಕ್ಕವತ್ತೀ ಮಹಬ್ಬಲಾ.
‘‘ಪಚ್ಛಿಮೇ ¶ ಚ ಭವೇ ಅಸ್ಮಿಂ, ಜಾತೋಹಂ ಬ್ರಾಹ್ಮಣೇ ಕುಲೇ;
ಸದ್ಧಿಂ ತೀಹಿ ಸಹಾಯೇಹಿ, ಪಬ್ಬಜಿಂ ಸತ್ಥು ಸಾಸನೇ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ತರಣಿಯೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ;
ತರಣಿಯತ್ಥೇರಸ್ಸಾಪದಾನಂ ಚತುತ್ಥಂ.
೫. ನಿಗ್ಗುಣ್ಡಿಪುಪ್ಫಿಯತ್ಥೇರಅಪದಾನಂ
‘‘ವಿಪಸ್ಸಿಸ್ಸ ¶ ಭಗವತೋ, ಆಸಿಮಾರಾಮಿಕೋ ಅಹಂ;
ನಿಗ್ಗುಣ್ಡಿಪುಪ್ಫಂ ಪಗ್ಗಯ್ಹ, ಬುದ್ಧಸ್ಸ ಅಭಿರೋಪಯಿಂ.
‘‘ಏಕನವುತಿತೋ ಕಪ್ಪೇ, ಯಂ ಪುಪ್ಫಮಭಿಪೂಜಯಿಂ;
ದುಗ್ಗತಿಂ ನಾಭಿಜಾನಾಮಿ, ಬುದ್ಧಪೂಜಾಯಿದಂ ಫಲಂ.
‘‘ಪಞ್ಚವೀಸೇ [ಪಞ್ಚತಿಂಸೇ (ಸೀ. ಸ್ಯಾ.)] ಇತೋ ಕಪ್ಪೇ, ಏಕೋ ಆಸಿಂ ಜನಾಧಿಪೋ;
ಮಹಾಪತಾಪನಾಮೇನ, ಚಕ್ಕವತ್ತೀ ಮಹಬ್ಬಲೋ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ನಿಗ್ಗುಣ್ಡಿಪುಪ್ಫಿಯೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ನಿಗ್ಗುಣ್ಡಿಪುಪ್ಫಿಯತ್ಥೇರಸ್ಸಾಪದಾನಂ ಪಞ್ಚಮಂ.
೬. ಉದಕದಾಯಕತ್ಥೇರಅಪದಾನಂ
‘‘ಭುಞ್ಜನ್ತಂ ಸಮಣಂ ದಿಸ್ವಾ, ವಿಪ್ಪಸನ್ನಮನಾವಿಲಂ;
ಘಟೇನೋದಕಮಾದಾಯ, ಸಿದ್ಧತ್ಥಸ್ಸ ಅದಾಸಹಂ.
‘‘ನಿಮ್ಮಲೋ ¶ ಹೋಮಹಂ ಅಜ್ಜ, ವಿಮಲೋ ಖೀಣಸಂಸಯೋ;
ಭವೇ ನಿಬ್ಬತ್ತಮಾನಮ್ಹಿ, ಫಲಂ ನಿಬ್ಬತ್ತತೇ ಮಮ [ಸುಭಂ (ಸೀ.)].
‘‘ಚತುನ್ನವುತಿತೋ ¶ ಕಪ್ಪೇ, ಉದಕಂ ಯಮದಾಸಹಂ [ಯಂ ತದಾ ಅದಂ (ಸೀ.), ಅದದಿಂ ತದಾ (ಸ್ಯಾ.)];
ದುಗ್ಗತಿಂ ನಾಭಿಜಾನಾಮಿ, ದಕದಾನಸ್ಸಿದಂ ಫಲಂ.
‘‘ಏಕಸಟ್ಠಿಮ್ಹಿತೋ ಕಪ್ಪೇ, ಏಕೋವ ವಿಮಲೋ ಅಹು;
ಸತ್ತರತನಸಮ್ಪನ್ನೋ, ಚಕ್ಕವತ್ತೀ ಮಹಬ್ಬಲೋ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಉದಕದಾಯಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಉದಕದಾಯಕತ್ಥೇರಸ್ಸಾಪದಾನಂ ಛಟ್ಠಂ.
೭. ಸಲಲಮಾಲಿಯತ್ಥೇರಅಪದಾನಂ
‘‘ಕಣಿಕಾರಂವ ¶ ¶ ಜೋತನ್ತಂ, ನಿಸಿನ್ನಂ ಪಬ್ಬತನ್ತರೇ;
ಓಭಾಸೇನ್ತಂ ದಿಸಾ ಸಬ್ಬಾ, ಸಿದ್ಧತ್ಥಂ ನರಸಾರಥಿಂ.
‘‘ಧನುಂ ಅದ್ವೇಜ್ಝಂ ಕತ್ವಾನ, ಉಸುಂ ಸನ್ನಯ್ಹಹಂ ತದಾ;
ಪುಪ್ಫಂ ಸವಣ್ಟಂ ಛೇತ್ವಾನ, ಬುದ್ಧಸ್ಸ ಅಭಿರೋಪಯಿಂ.
‘‘ಚತುನ್ನವುತಿತೋ ಕಪ್ಪೇ, ಯಂ ಪುಪ್ಫಮಭಿರೋಪಯಿಂ;
ದುಗ್ಗತಿಂ ನಾಭಿಜಾನಾಮಿ, ಬುದ್ಧಪೂಜಾಯಿದಂ ಫಲಂ.
‘‘ಏಕಪಞ್ಞಾಸಿತೋ ಕಪ್ಪೇ, ಏಕೋ ಆಸಿಂ ಜುತಿನ್ಧರೋ;
ಸತ್ತರತನಸಮ್ಪನ್ನೋ, ಚಕ್ಕವತ್ತೀ ಮಹಬ್ಬಲೋ.
‘‘ಪಟಿಸಮ್ಭಿದಾ ¶ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಸಲಲಮಾಲಿಯೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಸಲಲಮಾಲಿಯತ್ಥೇರಸ್ಸಾಪದಾನಂ ಸತ್ತಮಂ.
೮. ಕೋರಣ್ಡಪುಪ್ಫಿಯತ್ಥೇರಅಪದಾನಂ
‘‘ಅಕ್ಕನ್ತಞ್ಚ ¶ ಪದಂ ದಿಸ್ವಾ, ಚಕ್ಕಾಲಙ್ಕಾರಭೂಸಿತಂ;
ಪದೇನಾನುಪದಂ ಯನ್ತೋ, ವಿಪಸ್ಸಿಸ್ಸ ಮಹೇಸಿನೋ.
‘‘ಕೋರಣ್ಡಂ ಪುಪ್ಫಿತಂ ದಿಸ್ವಾ, ಸಮೂಲಂ ಪೂಜಿತಂ ಮಯಾ;
ಹಟ್ಠೋ ಹಟ್ಠೇನ ಚಿತ್ತೇನ, ಅವನ್ದಿಂ ಪದಮುತ್ತಮಂ.
‘‘ಏಕನವುತಿತೋ ಕಪ್ಪೇ, ಯಂ ಪುಪ್ಫಮಭಿಪೂಜಯಿಂ;
ದುಗ್ಗತಿಂ ನಾಭಿಜಾನಾಮಿ, ಬುದ್ಧಪೂಜಾಯಿದಂ ಫಲಂ.
‘‘ಸತ್ತಪಞ್ಞಾಸಕಪ್ಪಮ್ಹಿ, ಏಕೋ ವೀತಮಲೋ ಅಹುಂ;
ಸತ್ತರತನಸಮ್ಪನ್ನೋ, ಚಕ್ಕವತ್ತೀ ಮಹಬ್ಬಲೋ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ¶ ಸುದಂ ಆಯಸ್ಮಾ ಕೋರಣ್ಡಪುಪ್ಫಿಯೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಕೋರಣ್ಡಪುಪ್ಫಿಯತ್ಥೇರಸ್ಸಾಪದಾನಂ ಅಟ್ಠಮಂ.
೯. ಆಧಾರದಾಯಕತ್ಥೇರಅಪದಾನಂ
‘‘ಆಧಾರಕಂ ¶ ¶ ಮಯಾ ದಿನ್ನಂ, ಸಿಖಿನೋ ಲೋಕಬನ್ಧುನೋ;
ಧಾರೇಮಿ ಪಥವಿಂ ಸಬ್ಬಂ, ಕೇವಲಂ ವಸುಧಂ ಇಮಂ.
‘‘ಕಿಲೇಸಾ ಝಾಪಿತಾ ಮಯ್ಹಂ, ಭವಾ ಸಬ್ಬೇ ಸಮೂಹತಾ;
ಧಾರೇಮಿ ಅನ್ತಿಮಂ ದೇಹಂ, ಸಮ್ಮಾಸಮ್ಬುದ್ಧಸಾಸನೇ.
‘‘ಸತ್ತವೀಸೇ ಇತೋ ಕಪ್ಪೇ, ಅಹೇಸುಂ ಚತುರೋ ಜನಾ;
ಸಮನ್ತವರಣಾ ನಾಮ, ಚಕ್ಕವತ್ತೀ ಮಹಬ್ಬಲಾ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಆಧಾರದಾಯಕೋ [ಪರಿಯಾದಾನಿಯೋ (ಕ.)] ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಆಧಾರದಾಯಕತ್ಥೇರಸ್ಸಾಪದಾನಂ ನವಮಂ.
೧೦. ಪಾಪನಿವಾರಿಯತ್ಥೇರಅಪದಾನಂ
‘‘ತಿಸ್ಸಸ್ಸ ¶ ತು ಭಗವತೋ, ದೇವದೇವಸ್ಸ ತಾದಿನೋ;
ಏಕಚ್ಛತ್ತಂ ಮಯಾ ದಿನ್ನಂ, ವಿಪ್ಪಸನ್ನೇನ ಚೇತಸಾ.
‘‘ನಿವುತಂ ಹೋತಿ ಮೇ ಪಾಪಂ, ಕುಸಲಸ್ಸುಪಸಮ್ಪದಾ;
ಆಕಾಸೇ ಛತ್ತಂ ಧಾರೇನ್ತಿ, ಪುಬ್ಬಕಮ್ಮಸ್ಸಿದಂ ಫಲಂ.
‘‘ಚರಿಮಂ ¶ ವತ್ತತೇ ಮಯ್ಹಂ, ಭವಾ ಸಬ್ಬೇ ಸಮೂಹತಾ;
ಧಾರೇಮಿ ಅನ್ತಿಮಂ ದೇಹಂ, ಸಮ್ಮಾಸಮ್ಬುದ್ಧಸಾಸನೇ.
‘‘ದ್ವೇನವುತೇ ಇತೋ ಕಪ್ಪೇ, ಯಂ ಛತ್ತಮದದಿಂ ತದಾ;
ದುಗ್ಗತಿಂ ನಾಭಿಜಾನಾಮಿ, ಛತ್ತದಾನಸ್ಸಿದಂ ಫಲಂ.
‘‘ದ್ವೇಸತ್ತತಿಮ್ಹಿತೋ ಕಪ್ಪೇ, ಅಟ್ಠಾಸಿಂಸು ಜನಾಧಿಪಾ;
ಮಹಾನಿದಾನನಾಮೇನ, ರಾಜಾನೋ ಚಕ್ಕವತ್ತಿನೋ.
‘‘ಪಟಿಸಮ್ಭಿದಾ ¶ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಪಾಪನಿವಾರಿಯೋ [ವಾತಾತಪನಿವಾರಿಯೋ (ಸೀ.)] ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ;
ಪಾಪನಿವಾರಿಯತ್ಥೇರಸ್ಸಾಪದಾನಂ ದಸಮಂ.
ಕಣಿಕಾರಪುಪ್ಫಿಯವಗ್ಗೋ ಏಕವೀಸತಿಮೋ.
ತಸ್ಸುದ್ದಾನಂ ¶ –
ಕಣಿಕಾರೋ ಮಿನೇಲಞ್ಚ, ಕಿಙ್ಕಣಿ ತರಣೇನ ಚ;
ನಿಗ್ಗುಣ್ಡಿಪುಪ್ಫೀ ದಕದೋ, ಸಲಲೋ ಚ ಕುರಣ್ಡಕೋ;
ಆಧಾರಕೋ ಪಾಪವಾರೀ, ಅಟ್ಠತಾಲೀಸ ಗಾಥಕಾತಿ.
೨೨. ಹತ್ಥಿವಗ್ಗೋ
೧. ಹತ್ಥಿದಾಯಕತ್ಥೇರಅಪದಾನಂ
‘‘ಸಿದ್ಧತ್ಥಸ್ಸ ¶ ¶ ¶ ಭಗವತೋ, ದ್ವಿಪದಿನ್ದಸ್ಸ ತಾದಿನೋ;
ನಾಗಸೇಟ್ಠೋ ಮಯಾ ದಿನ್ನೋ, ಈಸಾದನ್ತೋ ಉರೂಳ್ಹವಾ.
‘‘ಉತ್ತಮತ್ಥಂ ಅನುಭೋಮಿ, ಸನ್ತಿಪದಮನುತ್ತರಂ;
ನಾಗದಾನಂ [ಅಗ್ಗದಾನಂ (ಸೀ. ಕ.)] ಮಯಾ ದಿನ್ನಂ, ಸಬ್ಬಲೋಕಹಿತೇಸಿನೋ.
‘‘ಚತುನ್ನವುತಿತೋ ಕಪ್ಪೇ, ಯಂ ನಾಗ [ದಾನ (ಸೀ. ಕ.)] ಮದದಿಂ ತದಾ;
ದುಗ್ಗತಿಂ ನಾಭಿಜಾನಾಮಿ, ನಾಗದಾನಸ್ಸಿದಂ ಫಲಂ.
‘‘ಅಟ್ಠಸತ್ತತಿಕಪ್ಪಮ್ಹಿ, ಸೋಳಸಾಸಿಂಸು ಖತ್ತಿಯಾ;
ಸಮನ್ತಪಾಸಾದಿಕಾ ನಾಮ, ಚಕ್ಕವತ್ತೀ ಮಹಬ್ಬಲಾ.
‘‘ಪಟಿಸಮ್ಭಿದಾ ಚತಸ್ಸೋ, ವಿಮೋಕ್ಖಾಪಿ ಚ ಅಟ್ಠಿಮೇ;
ಛಳಭಿಞ್ಞಾ ಸಚ್ಛಿಕತಾ, ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಹತ್ಥಿದಾಯಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಹತ್ಥಿದಾಯಕತ್ಥೇರಸ್ಸಾಪದಾನಂ ಪಠಮಂ.
೨. ಪಾನಧಿದಾಯಕತ್ಥೇರಅಪದಾನಂ
‘‘ಆರಞ್ಞಿಕಸ್ಸ ಇಸಿನೋ, ಚಿರರತ್ತತಪಸ್ಸಿನೋ [ಝಾಯಿನೋ, ಮೇತ್ತಚಿತ್ತತಪಸ್ಸಿನೋ (ಸ್ಯಾ.)];
ಬುದ್ಧಸ್ಸ [ಧಮ್ಮಸ್ಸ (ಸ್ಯಾ. ಕ.)] ಭಾವಿತತ್ತಸ್ಸ, ಅದಾಸಿಂ ಪಾನಧಿಂ ಅಹಂ.
‘‘ತೇನ ¶ ಕಮ್ಮೇನ ದ್ವಿಪದಿನ್ದ, ಲೋಕಜೇಟ್ಠ ನರಾಸಭ;
ದಿಬ್ಬಯಾನಂ [ಸಬ್ಬಂ ಯಾನಂ (ಸೀ.)] ಅನುಭೋಮಿ, ಪುಬ್ಬಕಮ್ಮಸ್ಸಿದಂ ಫಲಂ.
‘‘ಚತುನ್ನವುತೇ ¶ ಇತೋ ಕಪ್ಪೇ, ಯಂ ಕಮ್ಮಮಕರಿಂ ತದಾ;
ದುಗ್ಗತಿಂ ನಾಭಿಜಾನಾಮಿ, ಪಾನಧಿಸ್ಸ ಇದಂ ಫಲಂ.
‘‘ಸತ್ತಸತ್ತತಿತೋ ¶ ¶ ಕಪ್ಪೇ, ಅಟ್ಠ ಆಸಿಂಸು ಖತ್ತಿಯಾ;
ಸುಯಾನಾ ನಾಮ ನಾಮೇನ, ಚಕ್ಕವತ್ತೀ ಮಹಬ್ಬಲಾ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಪಾನಧಿದಾಯಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಪಾನಧಿದಾಯಕತ್ಥೇರಸ್ಸಾಪದಾನಂ ದುತಿಯಂ.
೩. ಸಚ್ಚಸಞ್ಞಕತ್ಥೇರಅಪದಾನಂ
‘‘ವೇಸ್ಸಭೂ ತಮ್ಹಿ ಸಮಯೇ, ಭಿಕ್ಖುಸಙ್ಘಪುರಕ್ಖತೋ;
ದೇಸೇತಿ ಅರಿಯಸಚ್ಚಾನಿ, ನಿಬ್ಬಾಪೇನ್ತೋ ಮಹಾಜನಂ.
‘‘ಪರಮಕಾರುಞ್ಞಪತ್ತೋಮ್ಹಿ, ಸಮಿತಿಂ ಅಗಮಾಸಹಂ;
ಸೋಹಂ ನಿಸಿನ್ನಕೋ ಸನ್ತೋ, ಧಮ್ಮಮಸ್ಸೋಸಿ ಸತ್ಥುನೋ.
‘‘ತಸ್ಸಾಹಂ ಧಮ್ಮಂ ಸುತ್ವಾನ, ದೇವಲೋಕಂ ಅಗಚ್ಛಹಂ;
ತಿಂಸಕಪ್ಪಾನಿ ದೇವೇಸು, ಅವಸಿಂ ತತ್ಥಹಂ ಪುರೇ.
‘‘ಏಕತ್ತಿಂಸೇ ¶ ಇತೋ ಕಪ್ಪೇ, ಯಂ ಸಞ್ಞಮಲಭಿಂ ತದಾ;
ದುಗ್ಗತಿಂ ನಾಭಿಜಾನಾಮಿ, ಸಚ್ಚಸಞ್ಞಾಯಿದಂ ಫಲಂ.
‘‘ಛಬ್ಬೀಸಮ್ಹಿ ಇತೋ ಕಪ್ಪೇ, ಏಕೋ ಆಸಿಂ ಜನಾಧಿಪೋ;
ಏಕಫುಸಿತನಾಮೇನ, ಚಕ್ಕವತ್ತೀ ಮಹಬ್ಬಲೋ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಸಚ್ಚಸಞ್ಞಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಸಚ್ಚಸಞ್ಞಕತ್ಥೇರಸ್ಸಾಪದಾನಂ ತತಿಯಂ.
೪. ಏಕಸಞ್ಞಕತ್ಥೇರಅಪದಾನಂ
‘‘ದುಮಗ್ಗೇ ಪಂಸುಕೂಲಿಕಂ [ಪಂಸುಕೂಲಕಂ (?)], ಲಗ್ಗಂ ದಿಸ್ವಾನ ಸತ್ಥುನೋ;
ಅಞ್ಜಲಿಂ ಪಗ್ಗಹೇತ್ವಾನ, ಪಂಸುಕೂಲಂ ಅವನ್ದಹಂ.
‘‘ಏಕತ್ತಿಂಸೇ ಇತೋ ಕಪ್ಪೇ, ಯಂ ಸಞ್ಞಮಲಭಿಂ ತದಾ;
ದುಗ್ಗತಿಂ ನಾಭಿಜಾನಾಮಿ, ಬುದ್ಧಪೂಜಾಯಿದಂ ಫಲಂ.
‘‘ಪಞ್ಚವೀಸೇ ¶ ¶ ¶ ಇತೋ ಕಪ್ಪೇ, ಏಕೋ ಆಸಿಂ ಜನಾಧಿಪೋ;
ಅಮಿತಾಭೋತಿ ನಾಮೇನ, ಚಕ್ಕವತ್ತೀ ಮಹಬ್ಬಲೋ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ¶ ಸುದಂ ಆಯಸ್ಮಾ ಏಕಸಞ್ಞಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಏಕಸಞ್ಞಕತ್ಥೇರಸ್ಸಾಪದಾನಂ ಚತುತ್ಥಂ.
೫. ರಂಸಿಸಞ್ಞಕತ್ಥೇರಅಪದಾನಂ
‘‘ಉದೇನ್ತಂ ಸತರಂಸಿಂವ, ಪೀತರಂಸಿಂವ [ಸಿತರಂಸಿಂ ವ (ಸೀ. ಸ್ಯಾ.)] ಭಾಣುಮಂ;
ಬ್ಯಗ್ಘೂಸಭಂವ ಪವರಂ, ಸುಜಾತಂ ಪಬ್ಬತನ್ತರೇ.
‘‘ಬುದ್ಧಸ್ಸ ಆನುಭಾವೋ ಸೋ, ಜಲತೇ ಪಬ್ಬತನ್ತರೇ;
ರಂಸೇ [ರಂಸ್ಯಾ (?)] ಚಿತ್ತಂ ಪಸಾದೇತ್ವಾ, ಕಪ್ಪಂ ಸಗ್ಗಮ್ಹಿ ಮೋದಹಂ.
‘‘ಅವಸೇಸೇಸು ಕಪ್ಪೇಸು, ಕುಸಲಂ ಚರಿತಂ ಮಯಾ;
ತೇನ ಚಿತ್ತಪ್ಪಸಾದೇನ, ಬುದ್ಧಾನುಸ್ಸತಿಯಾಪಿ ಚ.
‘‘ತಿಂಸಕಪ್ಪಸಹಸ್ಸೇತೋ, ಯಂ ಸಞ್ಞಮಲಭಿಂ ತದಾ;
ದುಗ್ಗತಿಂ ನಾಭಿಜಾನಾಮಿ, ಬುದ್ಧಸಞ್ಞಾಯಿದಂ ಫಲಂ.
‘‘ಸತ್ತಪಞ್ಞಾಸಕಪ್ಪಮ್ಹಿ, ಏಕೋ ಆಸಿಂ ಜನಾಧಿಪೋ;
ಸುಜಾತೋ ನಾಮ ನಾಮೇನ, ಚಕ್ಕವತ್ತೀ ಮಹಬ್ಬಲೋ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ರಂಸಿಸಞ್ಞಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ರಂಸಿಸಞ್ಞಕತ್ಥೇರಸ್ಸಾಪದಾನಂ ಪಞ್ಚಮಂ.
೬. ಸನ್ಧಿತತ್ಥೇರಅಪದಾನಂ
‘‘ಅಸ್ಸತ್ಥೇ ¶ ಹರಿತೋಭಾಸೇ, ಸಂವಿರೂಳ್ಹಮ್ಹಿ ಪಾದಪೇ;
ಏಕಂ ಬುದ್ಧಗತಂ ಸಞ್ಞಂ, ಅಲಭಿಂಹಂ [ಅಲಭಿಸ್ಸಂ (ಸೀ.)] ಪತಿಸ್ಸತೋ.
‘‘ಏಕತ್ತಿಂಸೇ ¶ ಇತೋ ಕಪ್ಪೇ, ಯಂ ಸಞ್ಞಮಲಭಿಂ ತದಾ;
ತಸ್ಸಾ ಸಞ್ಞಾಯ ವಾಹಸಾ, ಪತ್ತೋ ಮೇ ಆಸವಕ್ಖಯೋ.
‘‘ಇತೋ ¶ ತೇರಸಕಪ್ಪಮ್ಹಿ, ಧನಿಟ್ಠೋ ನಾಮ ಖತ್ತಿಯೋ;
ಸತ್ತರತನಸಮ್ಪನ್ನೋ, ಚಕ್ಕವತ್ತೀ ಮಹಬ್ಬಲೋ.
‘‘ಪಟಿಸಮ್ಭಿದಾ ¶ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಸನ್ಧಿತೋ [ಸಣ್ಠಿತೋ (ಸೀ.)] ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಸನ್ಧಿತತ್ಥೇರಸ್ಸಾಪದಾನಂ ಛಟ್ಠಂ.
೭. ತಾಲವಣ್ಟದಾಯಕತ್ಥೇರಅಪದಾನಂ
‘‘ತಾಲವಣ್ಟಂ ಮಯಾ ದಿನ್ನಂ, ತಿಸ್ಸಸ್ಸಾದಿಚ್ಚಬನ್ಧುನೋ;
ಗಿಮ್ಹನಿಬ್ಬಾಪನತ್ಥಾಯ, ಪರಿಳಾಹೋಪಸನ್ತಿಯಾ.
‘‘ಸನ್ನಿಬ್ಬಾಪೇಮಿ ರಾಗಗ್ಗಿಂ, ದೋಸಗ್ಗಿಞ್ಚ ತದುತ್ತರಿಂ;
ನಿಬ್ಬಾಪೇಮಿ ಚ ಮೋಹಗ್ಗಿಂ, ತಾಲವಣ್ಟಸ್ಸಿದಂ ಫಲಂ.
‘‘ಕಿಲೇಸಾ ¶ ಝಾಪಿತಾ ಮಯ್ಹಂ, ಭವಾ ಸಬ್ಬೇ ಸಮೂಹತಾ;
ಧಾರೇಮಿ ಅನ್ತಿಮಂ ದೇಹಂ, ಸಮ್ಮಾಸಮ್ಬುದ್ಧಸಾಸನೇ.
‘‘ದ್ವೇನವುತೇ ಇತೋ ಕಪ್ಪೇ, ಯಂ ಕಮ್ಮಮಕರಿಂ ತದಾ;
ದುಗ್ಗತಿಂ ನಾಭಿಜಾನಾಮಿ, ತಾಲವಣ್ಟಸ್ಸಿದಂ ಫಲಂ.
‘‘ತೇಸಟ್ಠಿಮ್ಹಿ ಇತೋ ಕಪ್ಪೇ, ಮಹಾನಾಮಸನಾಮಕೋ;
ಸತ್ತರತನಸಮ್ಪನ್ನೋ, ಚಕ್ಕವತ್ತೀ ಮಹಬ್ಬಲೋ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ತಾಲವಣ್ಟದಾಯಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ತಾಲವಣ್ಟದಾಯಕತ್ಥೇರಸ್ಸಾಪದಾನಂ ಸತ್ತಮಂ.
೮. ಅಕ್ಕನ್ತಸಞ್ಞಕತ್ಥೇರಅಪದಾನಂ
‘‘ಕುಸಾಟಕಂ ¶ ಗಹೇತ್ವಾನ, ಉಪಜ್ಝಾಯಸ್ಸಹಂ ಪುರೇ;
ಮನ್ತಞ್ಚ ಅನುಸಿಕ್ಖಾಮಿ, ಗನ್ಥಾದೋಸಸ್ಸ [ಕಣ್ಡಭೇದಸ್ಸ (ಸೀ.), ಗಣ್ಡಭೇದಸ್ಸ (ಸ್ಯಾ.)] ಪತ್ತಿಯಾ.
‘‘ಅದ್ದಸಂ ವಿರಜಂ ಬುದ್ಧಂ, ಆಹುತೀನಂ ಪಟಿಗ್ಗಹಂ;
ಉಸಭಂ ಪವರಂ ಅಗ್ಗಂ, ತಿಸ್ಸಂ ಬುದ್ಧಂ ಗಣುತ್ತಮಂ [ಗಜುತ್ತಮಂ (ಸ್ಯಾ.)].
‘‘ಕುಸಾಟಕಂ ¶ ಪತ್ಥರಿತಂ, ಅಕ್ಕಮನ್ತಂ ನರುತ್ತಮಂ;
ಸಮುಗ್ಗತಂ ಮಹಾವೀರಂ, ಲೋಕಜೇಟ್ಠಂ ನರಾಸಭಂ.
‘‘ದಿಸ್ವಾ ¶ ¶ ತಂ ಲೋಕಪಜ್ಜೋತಂ, ವಿಮಲಂ ಚನ್ದಸನ್ನಿಭಂ;
ಅವನ್ದಿಂ ಸತ್ಥುನೋ ಪಾದೇ, ವಿಪ್ಪಸನ್ನೇನ ಚೇತಸಾ.
‘‘ಚತುನ್ನವುತಿತೋ ಕಪ್ಪೇ, ಯಂ ಅದಾಸಿಂ ಕುಸಾಟಕಂ;
ದುಗ್ಗತಿಂ ನಾಭಿಜಾನಾಮಿ, ಕುಸಾಟಕಸ್ಸಿದಂ ಫಲಂ.
‘‘ಸತ್ತತಿಂಸೇ ಇತೋ ಕಪ್ಪೇ, ಏಕೋ ಆಸಿಂ ಜನಾಧಿಪೋ;
ಸುನನ್ದೋ ನಾಮ ನಾಮೇನ, ಚಕ್ಕವತ್ತೀ ಮಹಬ್ಬಲೋ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಅಕ್ಕನ್ತಸಞ್ಞಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ;
ಅಕ್ಕನ್ತಸಞ್ಞಕತ್ಥೇರಸ್ಸಾಪದಾನಂ ಅಟ್ಠಮಂ.
೯. ಸಪ್ಪಿದಾಯಕತ್ಥೇರಅಪದಾನಂ
‘‘ನಿಸಿನ್ನೋ ಪಾಸಾದವರೇ, ನಾರೀಗಣಪುರಕ್ಖತೋ;
ಬ್ಯಾಧಿತಂ ಸಮಣಂ ದಿಸ್ವಾ, ಅಭಿನಾಮೇಸಹಂ ಘರಂ.
‘‘ಉಪವಿಟ್ಠಂ ಮಹಾವೀರಂ, ದೇವದೇವಂ ನರಾಸಭಂ;
ಸಪ್ಪಿತೇಲಂ ಮಯಾ ದಿನ್ನಂ, ಸಿದ್ಧತ್ಥಸ್ಸ ಮಹೇಸಿನೋ.
‘‘ಪಸ್ಸದ್ಧದರಥಂ ದಿಸ್ವಾ, ವಿಪ್ಪಸನ್ನಮುಖಿನ್ದ್ರಿಯಂ;
ವನ್ದಿತ್ವಾ ಸತ್ಥುನೋ ಪಾದೇ, ಅನುಸಂಸಾವಯಿಂ ಪುರೇ.
‘‘ದಿಸ್ವಾ ¶ ¶ ಮಂ ಸುಪ್ಪಸನ್ನತ್ತಂ [ಸುಪ್ಪಸನ್ನನ್ತಂ (ಸ್ಯಾ. ಕ.) ಸುಪ್ಪಸನ್ನಚಿತ್ತನ್ತಿ ಅತ್ಥೋ], ಇದ್ಧಿಯಾ ಪಾರಮಿಙ್ಗತೋ;
ನಭಂ ಅಬ್ಭುಗ್ಗಮೀ ಧೀರೋ, ಹಂಸರಾಜಾವ ಅಮ್ಬರೇ.
‘‘ಚತುನ್ನವುತಿತೋ ಕಪ್ಪೇ, ಯಂ ದಾನಮದದಿಂ ತದಾ;
ದುಗ್ಗತಿಂ ನಾಭಿಜಾನಾಮಿ, ಸಪ್ಪಿತೇಲಸ್ಸಿದಂ ಫಲಂ.
‘‘ಇತೋ ಸತ್ತರಸೇ ಕಪ್ಪೇ, ಜುತಿದೇವ [ದುತಿದೇವ (ಸ್ಯಾ.), ತುತಿದೇವ (ಕ.)] ಸನಾಮಕೋ;
ಸತ್ತರತನಸಮ್ಪನ್ನೋ, ಚಕ್ಕವತ್ತೀ ಮಹಬ್ಬಲೋ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಸಪ್ಪಿದಾಯಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಸಪ್ಪಿದಾಯಕತ್ಥೇರಸ್ಸಾಪದಾನಂ ನವಮಂ.
೧೦. ಪಾಪನಿವಾರಿಯತ್ಥೇರಅಪದಾನಂ
‘‘ಪಿಯದಸ್ಸಿಸ್ಸ ¶ ಭಗವತೋ, ಚಙ್ಕಮಂ ಸೋಧಿತಂ ಮಯಾ;
ನಳಕೇಹಿ ಪಟಿಚ್ಛನ್ನಂ, ವಾತಾತಪನಿವಾರಣಂ.
‘‘ಪಾಪಂ ವಿವಜ್ಜನತ್ಥಾಯ, ಕುಸಲಸ್ಸುಪಸಮ್ಪದಾ;
ಕಿಲೇಸಾನಂ ಪಹಾನಾಯ, ಪದಹಿಂ ಸತ್ಥು ಸಾಸನೇ.
‘‘ಇತೋ ¶ ಏಕಾದಸೇ ಕಪ್ಪೇ, ಅಗ್ಗಿದೇವೋತಿ ವಿಸ್ಸುತೋ;
ಸತ್ತರತನಸಮ್ಪನ್ನೋ, ಚಕ್ಕವತ್ತೀ ಮಹಬ್ಬಲೋ.
‘‘ಪಟಿಸಮ್ಭಿದಾ ¶ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಪಾಪನಿವಾರಿಯೋ [ವಾತಾತಪನಿವಾರಿಯೋ (?)] ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಪಾಪನಿವಾರಿಯತ್ಥೇರಸ್ಸಾಪದಾನಂ ದಸಮಂ.
ಹತ್ಥಿವಗ್ಗೋ ಬಾವೀಸತಿಮೋ.
ತಸ್ಸುದ್ದಾನಂ –
ಹತ್ಥಿ ಪಾನಧಿ ಸಚ್ಚಞ್ಚ, ಏಕಸಞ್ಞಿ ಚ ರಂಸಿಕೋ;
ಸನ್ಧಿತೋ ತಾಲವಣ್ಟಞ್ಚ, ತಥಾ ಅಕ್ಕನ್ತಸಞ್ಞಕೋ;
ಸಪ್ಪಿ ಪಾಪನಿವಾರೀ ಚ, ಚತುಪ್ಪಞ್ಞಾಸ ಗಾಥಕಾತಿ.
೨೩. ಆಲಮ್ಬಣದಾಯಕವಗ್ಗೋ
೧. ಆಲಮ್ಬಣದಾಯಕತ್ಥೇರಅಪದಾನಂ
‘‘ಅತ್ಥದಸ್ಸಿಸ್ಸ ¶ ¶ ¶ ಭಗವತೋ, ಲೋಕಜೇಟ್ಠಸ್ಸ ತಾದಿನೋ;
ಆಲಮ್ಬಣಂ ಮಯಾ ದಿನ್ನಂ, ದ್ವಿಪದಿನ್ದಸ್ಸ ತಾದಿನೋ.
‘‘ಧರಣಿಂ ಪಟಿಪಜ್ಜಾಮಿ, ವಿಪುಲಂ ಸಾಗರಪ್ಪರಂ;
ಪಾಣೇಸು ಚ ಇಸ್ಸರಿಯಂ, ವತ್ತೇಮಿ ವಸುಧಾಯ ಚ.
‘‘ಕಿಲೇಸಾ ಝಾಪಿತಾ ಮಯ್ಹಂ, ಭವಾ ಸಬ್ಬೇ ಸಮೂಹತಾ;
ತಿಸ್ಸೋ ವಿಜ್ಜಾ ಅನುಪ್ಪತ್ತಾ, ಕತಂ ಬುದ್ಧಸ್ಸ ಸಾಸನಂ.
‘‘ಇತೋ ದ್ವೇಸಟ್ಠಿಕಪ್ಪಮ್ಹಿ, ತಯೋ ಆಸಿಂಸು ಖತ್ತಿಯಾ;
ಏಕಾಪಸ್ಸಿತನಾಮಾ ತೇ, ಚಕ್ಕವತ್ತೀ ಮಹಬ್ಬಲಾ.
‘‘ಪಟಿಸಮ್ಭಿದಾ ಚತಸ್ಸೋ, ವಿಮೋಕ್ಖಾಪಿ ಚ ಅಟ್ಠಿಮೇ;
ಛಳಭಿಞ್ಞಾ ಸಚ್ಛಿಕತಾ, ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಆಲಮ್ಬಣದಾಯಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಆಲಮ್ಬಣದಾಯಕತ್ಥೇರಸ್ಸಾಪದಾನಂ ಪಠಮಂ.
೨. ಅಜಿನದಾಯಕತ್ಥೇರಅಪದಾನಂ
‘‘ಏಕತ್ತಿಂಸೇ ಇತೋ ಕಪ್ಪೇ, ಗಣಸತ್ಥಾರಕೋ ಅಹಂ;
ಅದ್ದಸಂ ವಿರಜಂ ಬುದ್ಧಂ, ಆಹುತೀನಂ ಪಟಿಗ್ಗಹಂ.
‘‘ಚಮ್ಮಖಣ್ಡಂ ¶ ಮಯಾ ದಿನ್ನಂ, ಸಿಖಿನೋ ಲೋಕಬನ್ಧುನೋ;
ತೇನ ಕಮ್ಮೇನ ದ್ವಿಪದಿನ್ದ, ಲೋಕಜೇಟ್ಠ ನರಾಸಭ.
‘‘ಸಮ್ಪತ್ತಿಂ ¶ ಅನುಭೋತ್ವಾನ, ಕಿಲೇಸೇ ಝಾಪಯಿಂ ಅಹಂ;
ಧಾರೇಮಿ ಅನ್ತಿಮಂ ದೇಹಂ, ಸಮ್ಮಾಸಮ್ಬುದ್ಧಸಾಸನೇ.
‘‘ಏಕತ್ತಿಂಸೇ ¶ ಇತೋ ಕಪ್ಪೇ, ಅಜಿನಂ ಯಂ ಅದಾಸಹಂ;
ದುಗ್ಗತಿಂ ನಾಭಿಜಾನಾಮಿ, ಅಜಿನಸ್ಸ ಇದಂ ಫಲಂ.
‘‘ಇತೋ ಪಞ್ಚಮಕೇ ಕಪ್ಪೇ, ರಾಜಾ ಆಸಿಂ ಸುದಾಯಕೋ;
ಸತ್ತರತನಸಮ್ಪನ್ನೋ, ಚಕ್ಕವತ್ತೀ ಮಹಬ್ಬಲೋ.
‘‘ಪಟಿಸಮ್ಭಿದಾ ¶ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಅಜಿನದಾಯಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಅಜಿನದಾಯಕತ್ಥೇರಸ್ಸಾಪದಾನಂ ದುತಿಯಂ.
೩. ದ್ವೇರತನಿಯತ್ಥೇರಅಪದಾನಂ
‘‘ಮಿಗಲುದ್ದೋ ಪುರೇ ಆಸಿಂ, ಅರಞ್ಞೇ ಕಾನನೇ ಅಹಂ;
ಅದ್ದಸಂ ವಿರಜಂ ಬುದ್ಧಂ, ಆಹುತೀನಂ ಪಟಿಗ್ಗಹಂ.
‘‘ಮಂಸಪೇಸಿ ಮಯಾ ದಿನ್ನಾ, ವಿಪಸ್ಸಿಸ್ಸ ಮಹೇಸಿನೋ;
ಸದೇವಕಸ್ಮಿಂ ಲೋಕಸ್ಮಿಂ, ಇಸ್ಸರಂ ಕಾರಯಾಮಹಂ.
‘‘ಇಮಿನಾ ¶ ಮಂಸದಾನೇನ, ರತನಂ ನಿಬ್ಬತ್ತತೇ ಮಮ;
ದುವೇಮೇ ರತನಾ ಲೋಕೇ, ದಿಟ್ಠಧಮ್ಮಸ್ಸ ಪತ್ತಿಯಾ.
‘‘ತೇಹಂ ಸಬ್ಬೇ ಅನುಭೋಮಿ, ಮಂಸದಾನಸ್ಸ ಸತ್ತಿಯಾ;
ಗತ್ತಞ್ಚ ಮುದುಕಂ ಮಯ್ಹಂ, ಪಞ್ಞಾ ನಿಪುಣವೇದನೀ.
‘‘ಏಕನವುತಿತೋ ಕಪ್ಪೇ, ಯಂ ಮಂಸಮದದಿಂ ತದಾ;
ದುಗ್ಗತಿಂ ನಾಭಿಜಾನಾಮಿ, ಮಂಸದಾನಸ್ಸಿದಂ ಫಲಂ.
‘‘ಇತೋ ಚತುತ್ಥಕೇ ಕಪ್ಪೇ, ಏಕೋ ಆಸಿಂ ಜನಾಧಿಪೋ;
ಮಹಾರೋಹಿತನಾಮೋ ಸೋ, ಚಕ್ಕವತ್ತೀ ಮಹಬ್ಬಲೋ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ದ್ವೇರತನಿಯೋ [ದ್ವಿರತನಿಯೋ (ಸೀ.)] ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ದ್ವೇರತನಿಯತ್ಥೇರಸ್ಸಾಪದಾನಂ ತತಿಯಂ.
ದಸಮಂ ಭಾಣವಾರಂ.
೪. ಆರಕ್ಖದಾಯಕತ್ಥೇರಅಪದಾನಂ
‘‘ಸಿದ್ಧತ್ಥಸ್ಸ ¶ ಭಗವತೋ, ವೇದಿ ಕಾರಾಪಿತಾ [ವೇದಿಕಾ ಕಾರಿತಾ (ಸ್ಯಾ.)] ಮಯಾ;
ಆರಕ್ಖೋ ಚ ಮಯಾ ದಿನ್ನೋ, ಸುಗತಸ್ಸ ಮಹೇಸಿನೋ.
‘‘ತೇನ ¶ ಕಮ್ಮವಿಸೇಸೇನ, ನ ಪಸ್ಸಿಂ ಭಯಭೇರವಂ;
ಕುಹಿಞ್ಚಿ ಉಪಪನ್ನಸ್ಸ, ತಾಸೋ ಮಯ್ಹಂ ನ ವಿಜ್ಜತಿ.
‘‘ಚತುನ್ನವುತಿತೋ ¶ ¶ ಕಪ್ಪೇ, ಯಂ ವೇದಿಂ ಕಾರಯಿಂ ಪುರೇ;
ದುಗ್ಗತಿಂ ನಾಭಿಜಾನಾಮಿ, ವೇದಿಕಾಯ ಇದಂ ಫಲಂ.
‘‘ಇತೋ ಛಟ್ಠಮ್ಹಿ ಕಪ್ಪಮ್ಹಿ, ಅಪಸ್ಸೇನಸನಾಮಕೋ;
ಸತ್ತರತನಸಮ್ಪನ್ನೋ, ಚಕ್ಕವತ್ತೀ ಮಹಬ್ಬಲೋ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಆರಕ್ಖದಾಯಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಆರಕ್ಖದಾಯಕತ್ಥೇರಸ್ಸಾಪದಾನಂ ಚತುತ್ಥಂ.
೫. ಅಬ್ಯಾಧಿಕತ್ಥೇರಅಪದಾನಂ
‘‘ವಿಪಸ್ಸಿಸ್ಸ ಭಗವತೋ, ಅಗ್ಗಿಸಾಲಂ ಅದಾಸಹಂ;
ಬ್ಯಾಧಿಕಾನಞ್ಚ ಆವಾಸಂ, ಉಣ್ಹೋದಕಪಟಿಗ್ಗಹಂ.
‘‘ತೇನ ಕಮ್ಮೇನಯಂ ಮಯ್ಹಂ, ಅತ್ತಭಾವೋ ಸುನಿಮ್ಮಿತೋ;
ಬ್ಯಾಧಾಹಂ ನಾಭಿಜಾನಾಮಿ, ಪುಞ್ಞಕಮ್ಮಸ್ಸಿದಂ ಫಲಂ.
‘‘ಏಕನವುತಿತೋ ಕಪ್ಪೇ, ಯಂ ಸಾಲಮದದಿಂ ತದಾ;
ದುಗ್ಗತಿಂ ನಾಭಿಜಾನಾಮಿ, ಅಗ್ಗಿಸಾಲಾಯಿದಂ ಫಲಂ.
‘‘ಇತೋ ಚ ಸತ್ತಮೇ ಕಪ್ಪೇ, ಏಕೋಸಿಂ ಅಪರಾಜಿತೋ [ಏಕೋ ಆಸಿಂ ನರಾಧಿಪೋ (ಸ್ಯಾ.)];
ಸತ್ತರತನಸಮ್ಪನ್ನೋ, ಚಕ್ಕವತ್ತೀ ಮಹಬ್ಬಲೋ.
‘‘ಪಟಿಸಮ್ಭಿದಾ ¶ ¶ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಅಬ್ಯಾಧಿಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಅಬ್ಯಾಧಿಕತ್ಥೇರಸ್ಸಾಪದಾನಂ ಪಞ್ಚಮಂ.
೬. ಅಙ್ಕೋಲಪುಪ್ಫಿಯತ್ಥೇರಅಪದಾನಂ
‘‘ನಾರದೋ ¶ ¶ [ವರದೋ (ಕ.)] ಇತಿ ಮೇ ನಾಮಂ, ಕಸ್ಸಪೋ ಇತಿ ಮಂ ವಿದೂ;
ಅದ್ದಸಂ ಸಮಣಾನಗ್ಗಂ, ವಿಪಸ್ಸಿಂ ದೇವಸಕ್ಕತಂ.
‘‘ಅನುಬ್ಯಞ್ಜನಧರಂ ಬುದ್ಧಂ, ಆಹುತೀನಂ ಪಟಿಗ್ಗಹಂ;
ಅಙ್ಕೋಲಪುಪ್ಫಂ [ವಕುಲಪುಪ್ಫಂ (ಸ್ಯಾ.), ಬಕೋಲಪುಪ್ಫಂ (ಕ.)] ಪಗ್ಗಯ್ಹ, ಬುದ್ಧಸ್ಸ ಅಭಿರೋಪಯಿಂ.
‘‘ಏಕನವುತಿತೋ ಕಪ್ಪೇ, ಯಂ ಪುಪ್ಫಮಭಿಪೂಜಯಿಂ;
ದುಗ್ಗತಿಂ ನಾಭಿಜಾನಾಮಿ, ಬುದ್ಧಪೂಜಾಯಿದಂ ಫಲಂ.
‘‘ಚತುಸತ್ತತಿತೋ ಕಪ್ಪೇ, ರೋಮಸೋ ನಾಮ ಖತ್ತಿಯೋ;
ಆಮುಕ್ಕಮಾಲಾಭರಣೋ, ಸಯೋಗ್ಗಬಲವಾಹನೋ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಅಙ್ಕೋಲಪುಪ್ಫಿಯೋ [ವಕುಲಪುಪ್ಫಿಯೋ (ಸ್ಯಾ.), ಬಕೋಲಪುಪ್ಫಿಯೋ (ಕ.)] ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಅಙ್ಕೋಲಪುಪ್ಫಿಯತ್ಥೇರಸ್ಸಾಪದಾನಂ ಛಟ್ಠಂ.
೭. ಸೋವಣ್ಣವಟಂಸಕಿಯತ್ಥೇರಅಪದಾನಂ
‘‘ಉಯ್ಯಾನಭೂಮಿಂ ¶ ನಿಯ್ಯನ್ತೋ, ಅದ್ದಸಂ ಲೋಕನಾಯಕಂ;
ವಟಂಸಕಂ ಗಹೇತ್ವಾನ, ಸೋವಣ್ಣಂ ಸಾಧುನಿಮ್ಮಿತಂ.
‘‘ಸೀಘಂ ತತೋ ಸಮಾರುಯ್ಹ, ಹತ್ಥಿಕ್ಖನ್ಧಗತೋ ಅಹಂ;
ಬುದ್ಧಸ್ಸ ಅಭಿರೋಪೇಸಿಂ, ಸಿಖಿನೋ ಲೋಕಬನ್ಧುನೋ.
‘‘ಏಕತ್ತಿಂಸೇ ಇತೋ ಕಪ್ಪೇ, ಯಂ ಪುಪ್ಫಮಭಿರೋಪಯಿಂ;
ದುಗ್ಗತಿಂ ನಾಭಿಜಾನಾಮಿ, ಪುಪ್ಫಪೂಜಾಯಿದಂ ಫಲಂ.
‘‘ಸತ್ತವೀಸೇ ಇತೋ ಕಪ್ಪೇ, ಏಕೋ ಆಸಿಂ ಜನಾಧಿಪೋ;
ಮಹಾಪತಾಪನಾಮೇನ, ಚಕ್ಕವತ್ತೀ ಮಹಬ್ಬಲೋ.
‘‘ಪಟಿಸಮ್ಭಿದಾ ¶ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಸೋವಣ್ಣವಟಂಸಕಿಯೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಸೋವಣ್ಣವಟಂಸಕಿಯತ್ಥೇರಸ್ಸಾಪದಾನಂ ಸತ್ತಮಂ.
೮. ಮಿಞ್ಜವಟಂಸಕಿಯತ್ಥೇರಅಪದಾನಂ
‘‘ನಿಬ್ಬುತೇ ¶ ಲೋಕನಾಥಮ್ಹಿ, ಸಿಖಿಮ್ಹಿ ವದತಂ ವರೇ;
ವಟಂಸಕೇಹಿ ಆಕಿಣ್ಣಂ, ಬೋಧಿಪೂಜಂ ಅಕಾಸಹಂ.
‘‘ಏಕತ್ತಿಂಸೇ ¶ ಇತೋ ಕಪ್ಪೇ, ಯಂ ಪೂಜಮಕರಿಂ ತದಾ;
ದುಗ್ಗತಿಂ ನಾಭಿಜಾನಾಮಿ, ಬೋಧಿಪೂಜಾಯಿದಂ ಫಲಂ.
‘‘ಇತೋ ಛಬ್ಬೀಸತಿಕಪ್ಪೇ, ಅಹುಂ ಮೇಘಬ್ಭನಾಮಕೋ;
ಸತ್ತರತನಸಮ್ಪನ್ನೋ, ಚಕ್ಕವತ್ತೀ ಮಹಬ್ಬಲೋ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಮಿಞ್ಜವಟಂಸಕಿಯೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಮಿಞ್ಜವಟಂಸಕಿಯತ್ಥೇರಸ್ಸಾಪದಾನಂ ಅಟ್ಠಮಂ.
೯. ಸುಕತಾವೇಳಿಯತ್ಥೇರಅಪದಾನಂ
‘‘ಅಸಿತೋ ¶ ನಾಮ ನಾಮೇನ, ಮಾಲಾಕಾರೋ ಅಹಂ [ಅಹುಂ (?)] ತದಾ;
ಆವೇಳಂ ಪಗ್ಗಹೇತ್ವಾನ, ರಞ್ಞೋ ದಾತುಂ ವಜಾಮಹಂ.
‘‘ಅಸಮ್ಪತ್ತೋಮ್ಹಿ [ಅಸಮ್ಪತ್ತಮ್ಹಿ (ಸೀ.), ಅಸಮ್ಪತ್ತೋವ (?)] ರಾಜಾನಂ, ಅದ್ದಸಂ ಸಿಖಿನಾಯಕಂ;
ಹಟ್ಠೋ ಹಟ್ಠೇನ ಚಿತ್ತೇನ, ಬುದ್ಧಸ್ಸ ಅಭಿರೋಪಯಿಂ.
‘‘ಏಕತ್ತಿಂಸೇ ಇತೋ ಕಪ್ಪೇ, ಯಂ ಪುಪ್ಫಮಭಿಪೂಜಯಿಂ;
ದುಗ್ಗತಿಂ ನಾಭಿಜಾನಾಮಿ, ಬುದ್ಧಪೂಜಾಯಿದಂ ಫಲಂ.
‘‘ಪಞ್ಚವೀಸೇ ¶ ಇತೋ ಕಪ್ಪೇ, ರಾಜಾಹೋಸಿಂ ಮಹಬ್ಬಲೋ;
ವೇಭಾರೋ ನಾಮ ನಾಮೇನ, ಚಕ್ಕವತ್ತೀ ಮಹಬ್ಬಲೋ.
‘‘ಪಟಿಸಮ್ಭಿದಾ ¶ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಸುಕತಾವೇಳಿಯೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಸುಕತಾವೇಳಿಯತ್ಥೇರಸ್ಸಾಪದಾನಂ ನವಮಂ.
೧೦. ಏಕವನ್ದನಿಯತ್ಥೇರಅಪದಾನಂ
‘‘ಉಸಭಂ ¶ ಪವರಂ ವೀರಂ, ವೇಸ್ಸಭುಂ ವಿಜಿತಾವಿನಂ;
ಪಸನ್ನಚಿತ್ತೋ ಸುಮನೋ, ಬುದ್ಧಸೇಟ್ಠಮವನ್ದಹಂ.
‘‘ಏಕತ್ತಿಂಸೇ ಇತೋ ಕಪ್ಪೇ, ಯಂ ಕಮ್ಮಮಕರಿಂ ತದಾ;
ದುಗ್ಗತಿಂ ನಾಭಿಜಾನಾಮಿ, ವನ್ದನಾಯ ಇದಂ ಫಲಂ.
‘‘ಚತುವೀಸತಿಕಪ್ಪಮ್ಹಿ, ವಿಕತಾನನ್ದನಾಮಕೋ;
ಸತ್ತರತನಸಮ್ಪನ್ನೋ, ಚಕ್ಕವತ್ತೀ ಮಹಬ್ಬಲೋ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಏಕವನ್ದನಿಯೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಏಕವನ್ದನಿಯತ್ಥೇರಸ್ಸಾಪದಾನಂ ದಸಮಂ.
ಆಲಮ್ಬಣದಾಯಕವಗ್ಗೋ ತೇವೀಸತಿಮೋ.
ತಸ್ಸುದ್ದಾನಂ –
ಆಲಮ್ಬಣಞ್ಚ ¶ ಅಜಿನಂ, ಮಂಸದಾರಕ್ಖದಾಯಕೋ;
ಅಬ್ಯಾಧಿ ಅಙ್ಕೋಲಂ [ವಕುಲಂ (ಸ್ಯಾ.), ಬಕುಳಂ (ಕ.)] ಸೋಣ್ಣಂ, ಮಿಞ್ಜಆವೇಳವನ್ದನಂ;
ಪಞ್ಚಪಞ್ಞಾಸ ಗಾಥಾಯೋ, ಗಣಿತಾ ಅತ್ಥದಸ್ಸಿಭಿ.
೨೪. ಉದಕಾಸನವಗ್ಗೋ
೧. ಉದಕಾಸನದಾಯಕತ್ಥೇರಅಪದಾನಂ
‘‘ಆರಾಮದ್ವಾರಾ ¶ ¶ ¶ ನಿಕ್ಖಮ್ಮ, ಫಲಕಂ ಸನ್ಥರಿಂ ಅಹಂ;
ಉದಕಞ್ಚ ಉಪಟ್ಠಾಸಿಂ, ಉತ್ತಮತ್ಥಸ್ಸ ಪತ್ತಿಯಾ.
‘‘ಏಕತ್ತಿಂಸೇ ಇತೋ ಕಪ್ಪೇ, ಯಂ ಕಮ್ಮಮಕರಿಂ ತದಾ;
ದುಗ್ಗತಿಂ ನಾಭಿಜಾನಾಮಿ, ಆಸನೇ ಚೋದಕೇ ಫಲಂ.
‘‘ಇತೋ ಪನ್ನರಸೇ ಕಪ್ಪೇ, ಅಭಿಸಾಮಸಮವ್ಹಯೋ;
ಸತ್ತರತನಸಮ್ಪನ್ನೋ, ಚಕ್ಕವತ್ತೀ ಮಹಬ್ಬಲೋ.
‘‘ಪಟಿಸಮ್ಭಿದಾ ಚತಸ್ಸೋ, ವಿಮೋಕ್ಖಾಪಿ ಚ ಅಟ್ಠಿಮೇ;
ಛಳಭಿಞ್ಞಾ ಸಚ್ಛಿಕತಾ, ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಉದಕಾಸನದಾಯಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಉದಕಾಸನದಾಯಕತ್ಥೇರಸ್ಸಾಪದಾನಂ ಪಠಮಂ.
೨. ಭಾಜನಪಾಲಕತ್ಥೇರಅಪದಾನಂ
‘‘ನಗರೇ ¶ ಬನ್ಧುಮತಿಯಾ, ಕುಮ್ಭಕಾರೋ ಅಹಂ ತದಾ;
ಭಾಜನಂ ಅನುಪಾಲೇಸಿಂ, ಭಿಕ್ಖುಸಙ್ಘಸ್ಸ ತಾವದೇ.
‘‘ಏಕನವುತಿತೋ ಕಪ್ಪೇ, ಭಾಜನಂ ಅನುಪಾಲಯಿಂ;
ದುಗ್ಗತಿಂ ನಾಭಿಜಾನಾಮಿ, ಭಾಜನಸ್ಸ ಇದಂ ಫಲಂ.
‘‘ತೇಪಞ್ಞಾಸೇ ಇತೋ ಕಪ್ಪೇ, ಅನನ್ತಜಾಲಿನಾಮಕೋ;
ಸತ್ತರತನಸಮ್ಪನ್ನೋ, ಚಕ್ಕವತ್ತೀ ಮಹಬ್ಬಲೋ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಭಾಜನಪಾಲಕೋ [ಭಾಜನದಾಯಕೋ (ಸೀ. ಸ್ಯಾ.)] ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಭಾಜನಪಾಲಕತ್ಥೇರಸ್ಸಾಪದಾನಂ ದುತಿಯಂ.
೩. ಸಾಲಪುಪ್ಫಿಯತ್ಥೇರಅಪದಾನಂ
‘‘ಅರುಣವತಿಯಾ ¶ ¶ ನಗರೇ, ಅಹೋಸಿಂ ಪೂಪಿಕೋ ತದಾ;
ಮಮ ದ್ವಾರೇನ ಗಚ್ಛನ್ತಂ, ಸಿಖಿನಂ ಅದ್ದಸಂ ಜಿನಂ.
‘‘ಬುದ್ಧಸ್ಸ ಪತ್ತಂ ಪಗ್ಗಯ್ಹ, ಸಾಲಪುಪ್ಫಂ ಅದಾಸಹಂ;
ಸಮ್ಮಗ್ಗತಸ್ಸ ಬುದ್ಧಸ್ಸ, ವಿಪ್ಪಸನ್ನೇನ ಚೇತಸಾ.
‘‘ಏಕತ್ತಿಂಸೇ ¶ ¶ ಇತೋ ಕಪ್ಪೇ, ಯಂ ಪುಪ್ಫಮಭಿದಾಸಹಂ [ಯಂ ಖಜ್ಜಕಮದಾಸಹಂ (ಸೀ.), ಯಂ ಖಜ್ಜಮಭಿದಾಸಹಂ (ಕ.) ಸಾಲಪುಪ್ಫನಾಮಕಂ ಖಜ್ಜಕಂ ವಾ ಭವೇಯ್ಯ];
ದುಗ್ಗತಿಂ ನಾಭಿಜಾನಾಮಿ, ಸಾಲಪುಪ್ಫಸ್ಸಿದಂ ಫಲಂ.
‘‘ಇತೋ ಚುದ್ದಸಕಪ್ಪಮ್ಹಿ, ಅಹೋಸಿಂ ಅಮಿತಞ್ಜಲೋ;
ಸತ್ತರತನಸಮ್ಪನ್ನೋ, ಚಕ್ಕವತ್ತೀ ಮಹಬ್ಬಲೋ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಸಾಲಪುಪ್ಫಿಯೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಸಾಲಪುಪ್ಫಿಯತ್ಥೇರಸ್ಸಾಪದಾನಂ ತತಿಯಂ.
೪. ಕಿಲಞ್ಜದಾಯಕತ್ಥೇರಅಪದಾನಂ
‘‘ತಿವರಾಯಂ ಪುರೇ ರಮ್ಮೇ, ನಳಕಾರೋ ಅಹಂ ತದಾ;
ಸಿದ್ಧತ್ಥೇ ಲೋಕಪಜ್ಜೋತೇ, ಪಸನ್ನಾ ಜನತಾ ತಹಿಂ.
‘‘ಪೂಜತ್ಥಂ ಲೋಕನಾಥಸ್ಸ, ಕಿಲಞ್ಜಂ ಪರಿಯೇಸತಿ;
ಬುದ್ಧಪೂಜಂ ಕರೋನ್ತಾನಂ, ಕಿಲಞ್ಜಂ ಅದದಿಂ ಅಹಂ.
‘‘ಚತುನ್ನವುತಿತೋ ಕಪ್ಪೇ, ಯಂ ಕಮ್ಮಮಕರಿಂ ತದಾ;
ದುಗ್ಗತಿಂ ನಾಭಿಜಾನಾಮಿ, ಕಿಲಞ್ಜಸ್ಸ ಇದಂ ಫಲಂ.
‘‘ಸತ್ತಸತ್ತತಿಕಪ್ಪಮ್ಹಿ, ರಾಜಾ ಆಸಿಂ ಜಲದ್ಧರೋ [ಜುತಿನ್ಧರೋ (ಸೀ.)];
ಸತ್ತರತನಸಮ್ಪನ್ನೋ, ಚಕ್ಕವತ್ತೀ ಮಹಬ್ಬಲೋ.
‘‘ಪಟಿಸಮ್ಭಿದಾ ¶ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಕಿಲಞ್ಜದಾಯಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಕಿಲಞ್ಜದಾಯಕತ್ಥೇರಸ್ಸಾಪದಾನಂ ಚತುತ್ಥಂ.
೫. ವೇದಿಕಾರಕತ್ಥೇರಅಪದಾನಂ
‘‘ವಿಪಸ್ಸಿನೋ ¶ ¶ ಭಗವತೋ, ಬೋಧಿಯಾ ಪಾದಪುತ್ತಮೇ;
ಪಸನ್ನಚಿತ್ತೋ ಸುಮನೋ, ಕಾರೇಸಿಂ ವೇದಿಕಂ ಅಹಂ.
‘‘ಏಕನವುತಿತೋ ಕಪ್ಪೇ, ಕಾರೇಸಿಂ ವೇದಿಕಂ ಅಹಂ;
ದುಗ್ಗತಿಂ ನಾಭಿಜಾನಾಮಿ, ವೇದಿಕಾಯ ಇದಂ ಫಲಂ.
‘‘ಇತೋ ¶ ಏಕಾದಸೇ ಕಪ್ಪೇ, ಅಹೋಸಿಂ ಸೂರಿಯಸ್ಸಮೋ;
ಸತ್ತರತ್ತನಸಮ್ಪನ್ನೋ, ಚಕ್ಕವತ್ತೀ ಮಹಬ್ಬಲೋ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ವೇದಿಕಾರಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ವೇದಿಕಾರಕತ್ಥೇರಸ್ಸಾಪದಾನಂ ಪಞ್ಚಮಂ.
೬. ವಣ್ಣಕಾರತ್ಥೇರಅಪದಾನಂ
‘‘ನಗರೇ ¶ ಅರುಣವತಿಯಾ, ವಣ್ಣಕಾರೋ ಅಹಂ ತದಾ;
ಚೇತಿಯೇ ದುಸ್ಸಭಣ್ಡಾನಿ, ನಾನಾವಣ್ಣಂ ರಜೇಸಹಂ [ರಜಿಂ ಅಹಂ (ಕ.), ರಜೇಮಹಂ (ಸ್ಯಾ.)].
‘‘ಏಕತ್ತಿಂಸೇ ಇತೋ ಕಪ್ಪೇ, ಯಂ ವಣ್ಣಂ ರಜಯಿಂ ತದಾ;
ದುಗ್ಗತಿಂ ನಾಭಿಜಾನಾಮಿ, ವಣ್ಣದಾನಸ್ಸಿದಂ ಫಲಂ.
‘‘ಇತೋ ತೇವೀಸತಿಕಪ್ಪೇ, ವಣ್ಣಸಮ [ಚನ್ದುಪಮ (ಸೀ.), ಚನ್ದಸಮ (ಸ್ಯಾ.)] ಸನಾಮಕೋ;
ಸತ್ತರತನಸಮ್ಪನ್ನೋ, ಚಕ್ಕವತ್ತೀ ಮಹಬ್ಬಲೋ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ವಣ್ಣಕಾರೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ವಣ್ಣಕಾರತ್ಥೇರಸ್ಸಾಪದಾನಂ ಛಟ್ಠಂ.
೭. ಪಿಯಾಲಪುಪ್ಫಿಯತ್ಥೇರಅಪದಾನಂ
‘‘ಮಿಗಲುದ್ದೋ ¶ ಪುರೇ ಆಸಿಂ, ಅರಞ್ಞೇ ಕಾನನೇ ಅಹಂ;
ಪಿಯಾಲಂ ಪುಪ್ಫಿತಂ ದಿಸ್ವಾ, ಗತಮಗ್ಗೇ ಖಿಪಿಂ ಅಹಂ.
‘‘ಏಕನವುತಿತೋ ¶ ¶ ಕಪ್ಪೇ, ಯಂ ಪುಪ್ಫಮಭಿಪೂಜಯಿಂ;
ದುಗ್ಗತಿಂ ನಾಭಿಜಾನಾಮಿ, ಬುದ್ಧಪೂಜಾಯಿದಂ ಫಲಂ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಪಿಯಾಲಪುಪ್ಫಿಯೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಪಿಯಾಲಪುಪ್ಫಿಯತ್ಥೇರಸ್ಸಾಪದಾನಂ ಸತ್ತಮಂ.
೮. ಅಮ್ಬಯಾಗದಾಯಕತ್ಥೇರಅಪದಾನಂ
‘‘ಸಕೇ ¶ ಸಿಪ್ಪೇ ಅಪತ್ಥದ್ಧೋ, ಅಗಮಂ ಕಾನನಂ ಅಹಂ;
ಸಮ್ಬುದ್ಧಂ ಯನ್ತಂ ದಿಸ್ವಾನ, ಅಮ್ಬಯಾಗಂ ಅದಾಸಹಂ.
‘‘ಏಕನವುತಿತೋ ಕಪ್ಪೇ, ಯಂ ದಾನಮದದಿಂ ತದಾ;
ದುಗ್ಗತಿಂ ನಾಭಿಜಾನಾಮಿ, ಅಮ್ಬಯಾಗಸ್ಸಿದಂ ಫಲಂ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಅಮ್ಬಯಾಗದಾಯಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಅಮ್ಬಯಾಗದಾಯಕತ್ಥೇರಸ್ಸಾಪದಾನಂ ಅಟ್ಠಮಂ.
೯. ಜಗತಿಕಾರಕತ್ಥೇರಅಪದಾನಂ
‘‘ನಿಬ್ಬುತೇ ¶ ಲೋಕನಾಥಮ್ಹಿ, ಅತ್ಥದಸ್ಸಿ ನರುತ್ತಮೇ;
ಜಗತೀ ಕಾರಿತಾ ಮಯ್ಹಂ, ಬುದ್ಧಸ್ಸ ಥೂಪಮುತ್ತಮೇ.
‘‘ಅಟ್ಠಾರಸೇ ಕಪ್ಪಸತೇ, ಯಂ ಕಮ್ಮಮಕರಿಂ ತದಾ;
ದುಗ್ಗತಿಂ ನಾಭಿಜಾನಾಮಿ, ಜಗತಿಯಾ ಇದಂ ಫಲಂ.
‘‘ಪಟಿಸಮ್ಭಿದಾ ¶ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಜಗತಿಕಾರಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಜಗತಿಕಾರಕತ್ಥೇರಸ್ಸಾಪದಾನಂ ನವಮಂ.
೧೦. ವಾಸಿದಾಯಕತ್ಥೇರಅಪದಾನಂ
‘‘ಕಮ್ಮಾರೋಹಂ ¶ ಪುರೇ ಆಸಿಂ, ತಿವರಾಯಂ ಪುರುತ್ತಮೇ;
ಏಕಾ ವಾಸಿ ಮಯಾ ದಿನ್ನಾ, ಸಯಮ್ಭುಂ ಅಪರಾಜಿತಂ [ಸಯಮ್ಭುಮ್ಹಿಪರಾಜಿತೇ (?)].
‘‘ಚತುನ್ನವುತಿತೋ ಕಪ್ಪೇ, ಯಂ ವಾಸಿಮದದಿಂ ತದಾ;
ದುಗ್ಗತಿಂ ನಾಭಿಜಾನಾಮಿ, ವಾಸಿದಾನಸ್ಸಿದಂ ಫಲಂ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ¶ ಸುದಂ ಆಯಸ್ಮಾ ವಾಸಿದಾಯಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ವಾಸಿದಾಯಕತ್ಥೇರಸ್ಸಾಪದಾನಂ ದಸಮಂ.
ಉದಕಾಸನವಗ್ಗೋ ಚತುವೀಸತಿಮೋ.
ತಸ್ಸುದ್ದಾನಂ ¶ –
ಉದಕಾಸನಭಾಜನಂ, ಸಾಲಪುಪ್ಫೀ ಕಿಲಞ್ಜಕೋ;
ವೇದಿಕಾ ವಣ್ಣಕಾರೋ ಚ, ಪಿಯಾಲಅಮ್ಬಯಾಗದೋ;
ಜಗತೀ ವಾಸಿದಾತಾ ಚ, ಗಾಥಾ ತಿಂಸ ಚ ಅಟ್ಠ ಚ.
೨೫. ತುವರದಾಯಕವಗ್ಗೋ
೧. ತುವರದಾಯಕತ್ಥೇರಅಪದಾನಂ
‘‘ಮಿಗಲುದ್ದೋ ¶ ¶ ¶ ಪುರೇ ಆಸಿಂ, ಅರಞ್ಞೇ ಕಾನನೇ ಅಹಂ;
ಭರಿತ್ವಾ ತುವರಮಾದಾಯ [ಭರಿತ್ವಾ ತುರವಮಾದಾಯ (ಕ.), ಭಜ್ಜಿತಂ ತುವರಮಾದಾಯ (?) ಏತ್ಥ ತುವರನ್ತಿ ಮುಗ್ಗಕಲಾಯಸದಿಸಂ ತುವರಟ್ಠಿನ್ತಿ ತದಟ್ಠಕಥಾ; ತುವರೋ ಧಞ್ಞಭೇದೇತಿ ಸಕ್ಕತಾಭಿಧಾನೇ], ಸಙ್ಘಸ್ಸ ಅದದಿಂ ಅಹಂ.
‘‘ಏಕನವುತಿತೋ ಕಪ್ಪೇ, ಯಂ ದಾನಮದದಿಂ ತದಾ;
ದುಗ್ಗತಿಂ ನಾಭಿಜಾನಾಮಿ, ತುವರಸ್ಸ ಇದಂ ಫಲಂ.
‘‘ಪಟಿಸಮ್ಭಿದಾ ಚತಸ್ಸೋ, ವಿಮೋಕ್ಖಾಪಿ ಚ ಅಟ್ಠಿಮೇ;
ಛಳಭಿಞ್ಞಾ ಸಚ್ಛಿಕತಾ, ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ತುವರದಾಯಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ತುವರದಾಯಕತ್ಥೇರಸ್ಸಾಪದಾನಂ ಪಠಮಂ.
೨. ನಾಗಕೇಸರಿಯತ್ಥೇರಅಪದಾನಂ
‘‘ಧನುಂ ಅದ್ವೇಜ್ಝಂ ಕತ್ವಾನ, ವನಮಜ್ಝೋಗಹಿಂ ಅಹಂ;
ಕೇಸರಂ ಓಗತಂ [ಓಸರಂ (ಸ್ಯಾ.), ಓಸಟಂ (ಸೀ.)] ದಿಸ್ವಾ, ಪತಪತ್ತಂ ಸಮುಟ್ಠಿತಂ.
‘‘ಉಭೋ ಹತ್ಥೇಹಿ ಪಗ್ಗಯ್ಹ, ಸಿರೇ ಕತ್ವಾನ ಅಞ್ಜಲಿಂ;
ಬುದ್ಧಸ್ಸ ಅಭಿರೋಪೇಸಿಂ, ತಿಸ್ಸಸ್ಸ ಲೋಕಬನ್ಧುನೋ.
‘‘ದ್ವೇನವುತೇ ಇತೋ ಕಪ್ಪೇ, ಯಂ ಪುಪ್ಫಮಭಿಪೂಜಯಿಂ;
ದುಗ್ಗತಿಂ ನಾಭಿಜಾನಾಮಿ, ಬುದ್ಧಪೂಜಾಯಿದಂ ಫಲಂ.
‘‘ತೇಸತ್ತತಿಮ್ಹಿ ¶ ಕಪ್ಪಮ್ಹಿ [ಸತ್ತಸತ್ತತಿಮೇ ಕಪ್ಪೇ (ಸ್ಯಾ.)], ಸತ್ತ ಕೇಸರನಾಮಕಾ;
ಸತ್ತರತನಸಮ್ಪನ್ನಾ, ಚಕ್ಕವತ್ತೀ ಮಹಬ್ಬಲಾ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ನಾಗಕೇಸರಿಯೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ನಾಗಕೇಸರಿಯತ್ಥೇರಸ್ಸಾಪದಾನಂ ದುತಿಯಂ.
೩. ನಳಿನಕೇಸರಿಯತ್ಥೇರಅಪದಾನಂ
‘‘ಜಾತಸ್ಸರಸ್ಸ ¶ ¶ ¶ ವೇಮಜ್ಝೇ, ವಸಾಮಿ ಜಲಕುಕ್ಕುಟೋ;
ಅದ್ದಸಾಹಂ [ಅಥದ್ದಸಂ (ಸೀ. ಸ್ಯಾ.)] ದೇವದೇವಂ, ಗಚ್ಛನ್ತಂ ಅನಿಲಞ್ಜಸೇ.
‘‘ತುಣ್ಡೇನ ಕೇಸರಿಂ [ಕೇಸರಂ (ಸ್ಯಾ.)] ಗಯ್ಹ, ವಿಪ್ಪಸನ್ನೇನ ಚೇತಸಾ;
ಬುದ್ಧಸ್ಸ ಅಭಿರೋಪೇಸಿಂ, ತಿಸ್ಸಸ್ಸ ಲೋಕಬನ್ಧುನೋ.
‘‘ದ್ವೇನವುತೇ ಇತೋ ಕಪ್ಪೇ, ಯಂ ಪುಪ್ಫಮಭಿಪೂಜಯಿಂ;
ದುಗ್ಗತಿಂ ನಾಭಿಜಾನಾಮಿ, ಬುದ್ಧಪೂಜಾಯಿದಂ ಫಲಂ.
‘‘ತೇಸತ್ತತಿಮ್ಹಿ ಕಪ್ಪಮ್ಹಿ, ಸತ್ತ ಕೇಸರನಾಮಕಾ [ಸತಪತ್ತಸನಾಮಕೋ (ಸೀ. ಸ್ಯಾ.)];
ಸತ್ತರತನಸಮ್ಪನ್ನಾ, ಚಕ್ಕವತ್ತೀ ಮಹಬ್ಬಲಾ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ¶ ಸುದಂ ಆಯಸ್ಮಾ ನಳಿನಕೇಸರಿಯೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ನಳಿನಕೇಸರಿಯತ್ಥೇರಸ್ಸಾಪದಾನಂ ತತಿಯಂ.
೪. ವಿರವಪುಪ್ಫಿಯತ್ಥೇರಅಪದಾನಂ
‘‘ಖೀಣಾಸವಸಹಸ್ಸೇಹಿ, ನಿಯ್ಯಾತಿ ಲೋಕನಾಯಕೋ;
ವಿರವಪುಪ್ಫಮಾದಾಯ [ವಿರವಿಪುಪ್ಫಂ ಪಗ್ಗಯ್ಹ (ಸೀ.)], ಬುದ್ಧಸ್ಸ ಅಭಿರೋಪಯಿಂ.
‘‘ಏಕನವುತಿತೋ ಕಪ್ಪೇ, ಯಂ ಪುಪ್ಫಮಭಿಪೂಜಯಿಂ;
ದುಗ್ಗತಿಂ ನಾಭಿಜಾನಾಮಿ, ಬುದ್ಧಪೂಜಾಯಿದಂ ಫಲಂ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ವಿರವಪುಪ್ಫಿಯೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ವಿರವಪುಪ್ಫಿಯತ್ಥೇರಸ್ಸಾಪದಾನಂ ಚತುತ್ಥಂ.
೫. ಕುಟಿಧೂಪಕತ್ಥೇರಅಪದಾನಂ
‘‘ಸಿದ್ಧತ್ಥಸ್ಸ ¶ ಭಗವತೋ, ಅಹೋಸಿಂ ಕುಟಿಗೋಪಕೋ;
ಕಾಲೇನ ಕಾಲಂ ಧೂಪೇಸಿಂ, ಪಸನ್ನೋ ಸೇಹಿ ಪಾಣಿಭಿ.
‘‘ಚತುನ್ನವುತಿತೋ ¶ ಕಪ್ಪೇ, ಯಂ ಕಮ್ಮಮಕರಿಂ ತದಾ;
ದುಗ್ಗತಿಂ ನಾಭಿಜಾನಾಮಿ, ಧೂಪದಾನಸ್ಸಿದಂ [ಬುದ್ಧಪೂಜಾಯಿದಂ (ಸೀ.)] ಫಲಂ.
‘‘ಪಟಿಸಮ್ಭಿದಾ ¶ ¶ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಕುಟಿಧೂಪಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಕುಟಿಧೂಪಕತ್ಥೇರಸ್ಸಾಪದಾನಂ ಪಞ್ಚಮಂ.
೬. ಪತ್ತದಾಯಕತ್ಥೇರಅಪದಾನಂ
‘‘ಪರಮೇನ ದಮಥೇನ, ಸಿದ್ಧತ್ಥಸ್ಸ ಮಹೇಸಿನೋ;
ಪತ್ತದಾನಂ ಮಯಾ ದಿನ್ನಂ, ಉಜುಭೂತಸ್ಸ ತಾದಿನೋ.
‘‘ಚತುನ್ನವುತಿತೋ ಕಪ್ಪೇ, ಯಂ ದಾನಮದದಿಂ ತದಾ;
ದುಗ್ಗತಿಂ ನಾಭಿಜಾನಾಮಿ, ಪತ್ತದಾನಸ್ಸಿದಂ ಫಲಂ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಪತ್ತದಾಯಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಪತ್ತದಾಯಕತ್ಥೇರಸ್ಸಾಪದಾನಂ ಛಟ್ಠಂ.
೭. ಧಾತುಪೂಜಕತ್ಥೇರಅಪದಾನಂ
‘‘ನಿಬ್ಬುತೇ ಲೋಕನಾಥಮ್ಹಿ, ಸಿದ್ಧತ್ಥಮ್ಹಿ ನರುತ್ತಮೇ;
ಏಕಾ ಧಾತು ಮಯಾ ಲದ್ಧಾ, ದ್ವಿಪದಿನ್ದಸ್ಸ ತಾದಿನೋ.
‘‘ತಾಹಂ ¶ ಧಾತುಂ ಗಹೇತ್ವಾನ, ಬುದ್ಧಸ್ಸಾದಿಚ್ಚಬನ್ಧುನೋ;
ಪಞ್ಚವಸ್ಸೇ ಪರಿಚರಿಂ, ತಿಟ್ಠನ್ತಂವ ನರುತ್ತಮಂ.
‘‘ಚತುನ್ನವುತಿತೋ ¶ ಕಪ್ಪೇ, ಯಂ ಧಾತುಂ ಪೂಜಯಿಂ ತದಾ;
ದುಗ್ಗತಿಂ ನಾಭಿಜಾನಾಮಿ, ಧಾತುಪಟ್ಠಹನೇ ಫಲಂ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಧಾತುಪೂಜಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಧಾತುಪೂಜಕತ್ಥೇರಸ್ಸಾಪದಾನಂ ಸತ್ತಮಂ.
೮. ಸತ್ತಲಿಪುಪ್ಫಪೂಜಕತ್ಥೇರಅಪದಾನಂ
‘‘ಸತ್ತ ¶ ಸತ್ತಲಿಪುಪ್ಫಾನಿ, ಸೀಸೇ ಕತ್ವಾನಹಂ ತದಾ;
ಬುದ್ಧಸ್ಸ ಅಭಿರೋಪೇಸಿಂ, ವೇಸ್ಸಭುಮ್ಹಿ ನರುತ್ತಮೇ [ವಿಭತ್ತಿವಿಪಲ್ಲಾಸೋ ಚಿನ್ತೇತಬ್ಬೋ].
‘‘ಏಕತ್ತಿಂಸೇ ಇತೋ ಕಪ್ಪೇ, ಯಂ ಪುಪ್ಫಮಭಿಪೂಜಯಿಂ;
ದುಗ್ಗತಿಂ ನಾಭಿಜಾನಾಮಿ, ಬುದ್ಧಪೂಜಾಯಿದಂ ಫಲಂ.
‘‘ಪಟಿಸಮ್ಭಿದಾ ¶ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಸತ್ತಲಿಪುಪ್ಫಪೂಜಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಸತ್ತಲಿಪುಪ್ಫಪೂಜಕತ್ಥೇರಸ್ಸಾಪದಾನಂ ಅಟ್ಠಮಂ.
೯. ಬಿಮ್ಬಿಜಾಲಿಯತ್ಥೇರಅಪದಾನಂ
‘‘ಪದುಮುತ್ತರೋ ¶ ನಾಮ ಜಿನೋ, ಸಯಮ್ಭೂ ಅಗ್ಗಪುಗ್ಗಲೋ;
ಚತುಸಚ್ಚಂ ಪಕಾಸೇತಿ, ದೀಪೇತಿ ಅಮತಂ ಪದಂ.
‘‘ಬಿಮ್ಬಿಜಾಲಕಪುಪ್ಫಾನಿ [ಬಿಮ್ಬಜಾಲಕಪುಪ್ಫಾನಿ (ಕ.)], ಪುಥು ಕತ್ವಾನಹಂ ತದಾ;
ಬುದ್ಧಸ್ಸ ಅಭಿರೋಪೇಸಿಂ, ದ್ವಿಪದಿನ್ದಸ್ಸ ತಾದಿನೋ.
‘‘ಅಟ್ಠಸಟ್ಠಿಮ್ಹಿತೋ ಕಪ್ಪೇ, ಚತುರೋ ಕಿಞ್ಜಕೇಸರಾ;
ಸತ್ತರತನಸಮ್ಪನ್ನಾ, ಚಕ್ಕವತ್ತೀ ಮಹಬ್ಬಲಾ.
‘‘ಪಟಿಸಮ್ಭಿದಾ ¶ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಬಿಮ್ಬಿಜಾಲಿಯೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಬಿಮ್ಬಿಜಾಲಿಯತ್ಥೇರಸ್ಸಾಪದಾನಂ ನವಮಂ.
೧೦. ಉದ್ದಾಲಕದಾಯಕತ್ಥೇರಅಪದಾನಂ
‘‘ಕಕುಧೋ ನಾಮ ನಾಮೇನ, ಸಯಮ್ಭೂ ಅಪರಾಜಿತೋ;
ಪವನಾ ನಿಕ್ಖಮಿತ್ವಾನ, ಅನುಪ್ಪತ್ತೋ ಮಹಾನದಿಂ.
‘‘ಉದ್ದಾಲಕಂ ¶ ಗಹೇತ್ವಾನ, ಸಯಮ್ಭುಸ್ಸ ಅದಾಸಹಂ;
ಸಂಯತಸ್ಸುಜುಭೂತಸ್ಸ, ಪಸನ್ನಮಾನಸೋ ಅಹಂ.
‘‘ಏಕತ್ತಿಂಸೇ ¶ ಇತೋ ಕಪ್ಪೇ, ಯಂ ಪುಪ್ಫಮಭಿಪೂಜಯಿಂ;
ದುಗ್ಗತಿಂ ನಾಭಿಜಾನಾಮಿ, ಪುಪ್ಫದಾನಸ್ಸಿದಂ ಫಲಂ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಉದ್ದಾಲಕದಾಯಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಉದ್ದಾಲಕದಾಯಕತ್ಥೇರಸ್ಸಾಪದಾನಂ ದಸಮಂ.
ತುವರದಾಯಕವಗ್ಗೋ ಪಞ್ಚವೀಸತಿಮೋ.
ತಸ್ಸುದ್ದಾನಂ ¶ –
ತುವರನಾಗನಳಿನಾ, ವಿರವೀ ಕುಟಿಧೂಪಕೋ;
ಪತ್ತೋ ಧಾತುಸತ್ತಲಿಯೋ, ಬಿಮ್ಬಿ ಉದ್ದಾಲಕೇನ ಚ;
ಸತ್ತತಿಂಸತಿ ಗಾಥಾಯೋ, ಗಣಿತಾಯೋ ವಿಭಾವಿಭಿ.
೨೬. ಥೋಮಕವಗ್ಗೋ
೧. ಥೋಮಕತ್ಥೇರಅಪದಾನಂ
‘‘ದೇವಲೋಕೇ ¶ ¶ ¶ ಠಿತೋ ಸನ್ತೋ, ವಿಪಸ್ಸಿಸ್ಸ ಮಹೇಸಿನೋ;
ಧಮ್ಮಂ ಸುಣಿತ್ವಾ ಮುದಿತೋ, ಇಮಂ ವಾಚಂ ಅಭಾಸಹಂ.
‘‘‘ನಮೋ ತೇ ಪುರಿಸಾಜಞ್ಞ, ನಮೋ ತೇ ಪುರಿಸುತ್ತಮ;
ಬಹುಜ್ಜನಂ [ಬಹುಂ ಜನಂ (ಸೀ.)] ತಾರಯಸಿ, ದೇಸೇನ್ತೋ ಅಮತಂ ಪದಂ’.
‘‘ಏಕನವುತಿತೋ ಕಪ್ಪೇ, ಯಂ ವಾಚಮಭಣಿಂ ತದಾ;
ದುಗ್ಗತಿಂ ನಾಭಿಜಾನಾಮಿ, ಥೋಮನಾಯ ಇದಂ ಫಲಂ.
‘‘ಪಟಿಸಮ್ಭಿದಾ ಚತಸ್ಸೋ, ವಿಮೋಕ್ಖಾಪಿ ಚ ಅಟ್ಠಿಮೇ;
ಛಳಭಿಞ್ಞಾ ಸಚ್ಛಿಕತಾ, ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಥೋಮಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಥೋಮಕತ್ಥೇರಸ್ಸಾಪದಾನಂ ಪಠಮಂ.
೨. ಏಕಾಸನದಾಯಕತ್ಥೇರಅಪದಾನಂ
‘‘ವಿಜಹಿತ್ವಾ ದೇವವಣ್ಣಂ, ಸಭರಿಯೋ ಇಧಾಗಮಿಂ;
ಅಧಿಕಾರಂ ಕತ್ತುಕಾಮೋ, ಬುದ್ಧಸೇಟ್ಠಸ್ಸ ಸಾಸನೇ.
‘‘ದೇವಲೋ ನಾಮ ನಾಮೇನ, ಪದುಮುತ್ತರಸಾವಕೋ;
ತಸ್ಸ ಭಿಕ್ಖಾ ಮಯಾ ದಿನ್ನಾ, ವಿಪ್ಪಸನ್ನೇನ ಚೇತಸಾ.
‘‘ಸತಸಹಸ್ಸಿತೋ ¶ ಕಪ್ಪೇ, ಯಂ ಕಮ್ಮಮಕರಿಂ ತದಾ;
ದುಗ್ಗತಿಂ ನಾಭಿಜಾನಾಮಿ, ಪಿಣ್ಡಪಾತಸ್ಸಿದಂ ಫಲಂ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಏಕಾಸನದಾಯಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಏಕಾಸನದಾಯಕತ್ಥೇರಸ್ಸಾಪದಾನಂ ದುತಿಯಂ.
೩. ಚಿತಕಪೂಜಕತ್ಥೇರಅಪದಾನಂ
‘‘ಆನನ್ದೋ ¶ ¶ ¶ ನಾಮ ಸಮ್ಬುದ್ಧೋ, ಸಯಮ್ಭೂ ಅಪರಾಜಿತೋ;
ಅರಞ್ಞೇ ಪರಿನಿಬ್ಬಾಯಿ, ಅಮನುಸ್ಸಮ್ಹಿ ಕಾನನೇ.
‘‘ದೇವಲೋಕಾ ಇಧಾಗನ್ತ್ವಾ, ಚಿತಂ ಕತ್ವಾನಹಂ ತದಾ;
ಸರೀರಂ ತತ್ಥ ಝಾಪೇಸಿಂ, ಸಕ್ಕಾರಞ್ಚ ಅಕಾಸಹಂ.
‘‘ಏಕನವುತಿತೋ ಕಪ್ಪೇ, ಯಂ ಕಮ್ಮಮಕರಿಂ ತದಾ;
ದುಗ್ಗತಿಂ ನಾಭಿಜಾನಾಮಿ, ಬುದ್ಧಪೂಜಾಯಿದಂ ಫಲಂ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಚಿತಕಪೂಜಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಚಿತಕಪೂಜಕತ್ಥೇರಸ್ಸಾಪದಾನಂ ತತಿಯಂ.
೪. ತಿಚಮ್ಪಕಪುಪ್ಫಿಯತ್ಥೇರಅಪದಾನಂ
‘‘ಹಿಮವನ್ತಸ್ಸಾವಿದೂರೇ ¶ , ವಿಕತೋ [ವಿಕನೋ (ಸೀ. ಸ್ಯಾ.)] ನಾಮ ಪಬ್ಬತೋ;
ತಸ್ಸ ವೇಮಜ್ಝೇ ವಸತಿ, ಸಮಣೋ ಭಾವಿತಿನ್ದ್ರಿಯೋ.
‘‘ದಿಸ್ವಾನ ತಸ್ಸೋಪಸಮಂ, ವಿಪ್ಪಸನ್ನೇನ ಚೇತಸಾ;
ತೀಣಿ ಚಮ್ಪಕಪುಪ್ಫಾನಿ, ಗಹೇತ್ವಾನ ಸಮೋಕಿರಿಂ.
‘‘ಏಕನವುತಿತೋ ಕಪ್ಪೇ, ಯಂ ಪುಪ್ಫಮಭಿಪೂಜಯಿಂ;
ದುಗ್ಗತಿಂ ನಾಭಿಜಾನಾಮಿ, ಬುದ್ಧಪೂಜಾಯಿದಂ ಫಲಂ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ತಿಚಮ್ಪಕಪುಪ್ಫಿಯೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ತಿಚಮ್ಪಕಪುಪ್ಫಿಯತ್ಥೇರಸ್ಸಾಪದಾನಂ ಚತುತ್ಥಂ.
೫. ಸತ್ತಪಾಟಲಿಯತ್ಥೇರಅಪದಾನಂ
‘‘ಕಣಿಕಾರಂವ ಜೋತನ್ತಂ, ನಿಸಿನ್ನಂ ಪಬ್ಬತನ್ತರೇ;
ಸತ್ತ ಪಾಟಲಿಪುಪ್ಫಾನಿ, ಬುದ್ಧಸ್ಸ ಅಭಿರೋಪಯಿಂ.
‘‘ಚತುನ್ನವುತಿತೋ ¶ ¶ ಕಪ್ಪೇ, ಯಂ ಪುಪ್ಫಮಭಿರೋಪಯಿಂ;
ದುಗ್ಗತಿಂ ನಾಭಿಜಾನಾಮಿ, ಬುದ್ಧಪೂಜಾಯಿದಂ ಫಲಂ.
‘‘ಪಟಿಸಮ್ಭಿದಾ ¶ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಸತ್ತಪಾಟಲಿಯೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಸತ್ತಪಾಟಲಿಯತ್ಥೇರಸ್ಸಾಪದಾನಂ ಪಞ್ಚಮಂ.
೬. ಉಪಾಹನದಾಯಕತ್ಥೇರಅಪದಾನಂ
‘‘ಅಹೋಸಿಂ ¶ ಚನ್ದನೋ ನಾಮ, ಸಮ್ಬುದ್ಧಸ್ಸತ್ರಜೋ ತದಾ;
ಏಕೋಪಾಹನೋ ಮಯಾ ದಿನ್ನೋ, ಬೋಧಿಂ ಸಮ್ಪಜ್ಜ ಮೇ ತುವಂ.
‘‘ಏಕನವುತಿತೋ ಕಪ್ಪೇ, ಯಂ ಪಾನಧಿಂ [ಯಮುಪಾಹನಂ (ಸೀ.), ಯಂ ಪಾದುಂ (ಸ್ಯಾ.)] ದದಿಂ ತದಾ;
ದುಗ್ಗತಿಂ ನಾಭಿಜಾನಾಮಿ, ಉಪಾಹನಸ್ಸಿದಂ ಫಲಂ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಉಪಾಹನದಾಯಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಉಪಾಹನದಾಯಕತ್ಥೇರಸ್ಸಾಪದಾನಂ ಛಟ್ಠಂ.
೭. ಮಞ್ಜರಿಪೂಜಕತ್ಥೇರಅಪದಾನಂ
‘‘ಮಞ್ಜರಿಕಂ ಕರಿತ್ವಾನ, ರಥಿಯಂ ಪಟಿಪಜ್ಜಹಂ;
ಅದ್ದಸಂ ಸಮಣಾನಗ್ಗಂ, ಭಿಕ್ಖುಸಙ್ಘಪುರಕ್ಖತಂ.
‘‘ಪಸನ್ನಚಿತ್ತೋ ¶ ಸುಮನೋ, ಪರಮಾಯ ಚ ಪೀತಿಯಾ;
ಉಭೋ ಹತ್ಥೇಹಿ ಪಗ್ಗಯ್ಹ, ಬುದ್ಧಸ್ಸ ಅಭಿರೋಪಯಿಂ.
‘‘ದ್ವೇನವುತೇ ಇತೋ ಕಪ್ಪೇ, ಯಂ ಪುಪ್ಫಮಭಿಪೂಜಯಿಂ;
ದುಗ್ಗತಿಂ ನಾಭಿಜಾನಾಮಿ, ಪುಪ್ಫಪೂಜಾಯಿದಂ ಫಲಂ.
‘‘ಇತೋ ¶ ತೇಸತ್ತತಿಕಪ್ಪೇ, ಏಕೋ ಆಸಿಂ ಮಹೀಪತಿ;
ಜೋತಿಯೋ ನಾಮ ನಾಮೇನ, ಚಕ್ಕವತ್ತೀ ಮಹಬ್ಬಲೋ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಮಞ್ಜರಿಪೂಜಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಮಞ್ಜರಿಪೂಜಕತ್ಥೇರಸ್ಸಾಪದಾನಂ ಸತ್ತಮಂ.
೮. ಪಣ್ಣದಾಯಕತ್ಥೇರಅಪದಾನಂ
‘‘ಪಬ್ಬತೇ ¶ ಹಿಮವನ್ತಮ್ಹಿ, ವಾಕಚೀರಧರೋ ಅಹಂ;
ಅಲೋಣಪಣ್ಣಭಕ್ಖೋಮ್ಹಿ, ನಿಯಮೇಸು ಚ ಸಂವುತೋ.
‘‘ಪಾತರಾಸೇ ಅನುಪ್ಪತ್ತೇ, ಸಿದ್ಧತ್ಥೋ ಉಪಗಚ್ಛಿ ಮಂ;
ತಾಹಂ ಬುದ್ಧಸ್ಸ ಪಾದಾಸಿಂ, ಪಸನ್ನೋ ಸೇಹಿ ಪಾಣಿಭಿ.
‘‘ಚತುನ್ನವುತಿತೋ ¶ ಕಪ್ಪೇ, ಯಂ ಪಣ್ಣಮದದಿಂ ತದಾ;
ದುಗ್ಗತಿಂ ನಾಭಿಜಾನಾಮಿ, ಪಣ್ಣದಾನಸ್ಸಿದಂ ಫಲಂ.
‘‘ಸತ್ತವೀಸತಿಕಪ್ಪಮ್ಹಿ ¶ , ರಾಜಾ ಆಸಿಂ ಸದತ್ಥಿಯೋ [ಯದತ್ಥಿಯೋ (ಸೀ. ಸ್ಯಾ.)];
ಸತ್ತರತನಸಮ್ಪನ್ನೋ, ಚಕ್ಕವತ್ತೀ ಮಹಬ್ಬಲೋ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಪಣ್ಣದಾಯಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಪಣ್ಣದಾಯಕತ್ಥೇರಸ್ಸಾಪದಾನಂ ಅಟ್ಠಮಂ.
೯. ಕುಟಿದಾಯಕತ್ಥೇರಅಪದಾನಂ
‘‘ವಿಪಿನಚಾರೀ ಸಮ್ಬುದ್ಧೋ, ರುಕ್ಖಮೂಲೇ ವಸೀ ತದಾ;
ಪಣ್ಣಸಾಲಂ ಕರಿತ್ವಾನ, ಅದಾಸಿಂ ಅಪರಾಜಿತೇ.
‘‘ಏಕನವುತಿತೋ ಕಪ್ಪೇ, ಯಂ ಪಣ್ಣಕುಟಿಕಂ ಅದಂ;
ದುಗ್ಗತಿಂ ನಾಭಿಜಾನಾಮಿ, ಕುಟಿದಾನಸ್ಸಿದಂ ಫಲಂ.
‘‘ಅಟ್ಠವೀಸೇ ¶ [ಅಟ್ಠತಿಂಸೇ (ಸ್ಯಾ.)] ಇತೋ ಕಪ್ಪೇ, ಸೋಳಸಾಸಿಂಸು ರಾಜಾನೋ;
ಸಬ್ಬತ್ಥ ಅಭಿವಸ್ಸೀತಿ, ವುಚ್ಚರೇ ಚಕ್ಕವತ್ತಿನೋ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಕುಟಿದಾಯಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಕುಟಿದಾಯಕತ್ಥೇರಸ್ಸಾಪದಾನಂ ನವಮಂ.
೧೦. ಅಗ್ಗಪುಪ್ಫಿಯತ್ಥೇರಅಪದಾನಂ
‘‘ಸುವಣ್ಣವಣ್ಣಂ ¶ ¶ ಸಮ್ಬುದ್ಧಂ, ನಿಸಿನ್ನಂ ಪಬ್ಬತನ್ತರೇ;
ಓಭಾಸಯನ್ತಂ ರಂಸೇನ [ರಂಸಿಯಾ (ಸ್ಯಾ.)], ಸಿಖಿನಂ ಸಿಖಿನಂ ಯಥಾ.
‘‘ಅಗ್ಗಜಂ ಪುಪ್ಫಮಾದಾಯ, ಉಪಾಗಚ್ಛಿಂ ನರುತ್ತಮಂ;
ಪಸನ್ನಚಿತ್ತೋ ಸುಮನೋ, ಬುದ್ಧಸ್ಸ ಅಭಿರೋಪಯಿಂ.
‘‘ಏಕತ್ತಿಂಸೇ ಇತೋ ಕಪ್ಪೇ, ಯಂ ಪುಪ್ಫಮಭಿಪೂಜಯಿಂ;
ದುಗ್ಗತಿಂ ನಾಭಿಜಾನಾಮಿ, ಬುದ್ಧಪೂಜಾಯಿದಂ ಫಲಂ.
‘‘ಪಞ್ಚವೀಸತಿಕಪ್ಪಮ್ಹಿ, ಅಹೋಸಿ ಅಮಿತೋಗತೋ [ಅಮಿತವ್ಹಯೋ (ಸೀ.)];
ಸತ್ತರತನಸಮ್ಪನ್ನೋ, ಚಕ್ಕವತ್ತೀ ಮಹಬ್ಬಲೋ.
‘‘ಪಟಿಸಮ್ಭಿದಾ ¶ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಅಗ್ಗಪುಪ್ಫಿಯೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಅಗ್ಗಪುಪ್ಫಿಯತ್ಥೇರಸ್ಸಾಪದಾನಂ ದಸಮಂ.
ಥೋಮಕವಗ್ಗೋ ಛಬ್ಬೀಸತಿಮೋ.
ತಸ್ಸುದ್ದಾನಂ –
ಥೋಮಕೇಕಾಸನಚಿತಕಂ, ಚಮ್ಪಕೋ ಸತ್ತಪಾಟಲಿ;
ಪಾನಧಿ ¶ [ಪಾಹನೋ (ಸೀ.), ಪಾದು (ಸ್ಯಾ.)] ಮಞ್ಜರೀ ಪಣ್ಣಂ, ಕುಟಿದೋ ಅಗ್ಗಪುಪ್ಫಿಯೋ;
ಗಾಥಾಯೋ ಗಣಿತಾ ಚೇತ್ಥ, ಏಕತಾಲೀಸಮೇವ ಚಾತಿ.
೨೭. ಪದುಮುಕ್ಖಿಪವಗ್ಗೋ
೧. ಆಕಾಸುಕ್ಖಿಪಿಯತ್ಥೇರಅಪದಾನಂ
‘‘ಸುವಣ್ಣವಣ್ಣಂ ¶ ¶ ಸಿದ್ಧತ್ಥಂ, ಗಚ್ಛನ್ತಂ ಅನ್ತರಾಪಣೇ;
ಜಲಜಗ್ಗೇ ದುವೇ ಗಯ್ಹ, ಉಪಾಗಚ್ಛಿಂ ನರಾಸಭಂ.
‘‘ಏಕಞ್ಚ ಪುಪ್ಫಂ ಪಾದೇಸು, ಬುದ್ಧಸೇಟ್ಠಸ್ಸ ನಿಕ್ಖಿಪಿಂ;
ಏಕಞ್ಚ ಪುಪ್ಫಂ ಪಗ್ಗಯ್ಹ, ಆಕಾಸೇ ಉಕ್ಖಿಪಿಂ ಅಹಂ.
‘‘ಚತುನ್ನವುತಿತೋ ಕಪ್ಪೇ, ಯಂ ಪುಪ್ಫಮಭಿರೋಪಯಿಂ;
ದುಗ್ಗತಿಂ ನಾಭಿಜಾನಾಮಿ, ಪುಪ್ಫದಾನಸ್ಸಿದಂ ಫಲಂ.
‘‘ಇತೋ ಛತ್ತಿಂಸಕಪ್ಪಮ್ಹಿ, ಏಕೋ ಆಸಿಂ ಮಹೀಪತಿ;
ಅನ್ತಲಿಕ್ಖಕರೋ ನಾಮ, ಚಕ್ಕವತ್ತೀ ಮಹಬ್ಬಲೋ.
‘‘ಪಟಿಸಮ್ಭಿದಾ ಚತಸ್ಸೋ, ವಿಮೋಕ್ಖಾಪಿ ಚ ಅಟ್ಠಿಮೇ;
ಛಳಭಿಞ್ಞಾ ಸಚ್ಛಿಕತಾ, ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಆಕಾಸುಕ್ಖಿಪಿಯೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಆಕಾಸುಕ್ಖಿಪಿಯತ್ಥೇರಸ್ಸಾಪದಾನಂ ಪಠಮಂ.
೨. ತೇಲಮಕ್ಖಿಯತ್ಥೇರಅಪದಾನಂ
‘‘ಸಿದ್ಧತ್ಥಮ್ಹಿ ¶ ಭಗವತಿ, ನಿಬ್ಬುತಮ್ಹಿ ನರಾಸಭೇ;
ಬೋಧಿಯಾ ವೇದಿಕಾಯಾಹಂ, ತೇಲಂ ಮಕ್ಖೇಸಿ ತಾವದೇ.
‘‘ಚತುನ್ನವುತಿತೋ ¶ ಕಪ್ಪೇ, ಯಂ ತೇಲಂ ಮಕ್ಖಯಿಂ ತದಾ;
ದುಗ್ಗತಿಂ ನಾಭಿಜಾನಾಮಿ, ಮಕ್ಖನಾಯ ಇದಂ ಫಲಂ.
‘‘ಚತುವೀಸೇ ಇತೋ ಕಪ್ಪೇ, ಸುಚ್ಛವಿ ನಾಮ ಖತ್ತಿಯೋ;
ಸತ್ತರತನಸಮ್ಪನ್ನೋ, ಚಕ್ಕವತ್ತೀ ಮಹಬ್ಬಲೋ.
‘‘ಪಟಿಸಮ್ಭಿದಾ ¶ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ತೇಲಮಕ್ಖಿಯೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ತೇಲಮಕ್ಖಿಯತ್ಥೇರಸ್ಸಾಪದಾನಂ ದುತಿಯಂ.
೩. ಅಡ್ಢಚನ್ದಿಯತ್ಥೇರಅಪದಾನಂ
‘‘ತಿಸ್ಸಸ್ಸ ¶ ಖೋ ಭಗವತೋ, ಬೋಧಿಯಾ ಪಾದಪುತ್ತಮೇ;
ಅಡ್ಢಚನ್ದಂ ಮಯಾ ದಿನ್ನಂ, ಧರಣೀರುಹಪಾದಪೇ.
‘‘ದ್ವೇನವುತೇ ಇತೋ ಕಪ್ಪೇ, ಯಂ ಚನ್ದ [ಯಂ ಪುಪ್ಫ (ಕ.)] ಮಭಿರೋಪಯಿಂ;
ದುಗ್ಗತಿಂ ನಾಭಿಜಾನಾಮಿ, ಬೋಧಿಪೂಜಾಯಿದಂ ಫಲಂ.
‘‘ಪಞ್ಚವೀಸೇ ¶ ಇತೋ ಕಪ್ಪೇ, ದೇವಲೋ ನಾಮ ಖತ್ತಿಯೋ;
ಸತ್ತರತನಸಮ್ಪನ್ನೋ, ಚಕ್ಕವತ್ತೀ ಮಹಬ್ಬಲೋ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಅಡ್ಢಚನ್ದಿಯೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಅಡ್ಢಚನ್ದಿಯತ್ಥೇರಸ್ಸಾಪದಾನಂ ತತಿಯಂ.
೪. ಪದೀಪದಾಯಕತ್ಥೇರಅಪದಾನಂ
‘‘ದೇವಭೂತೋ ಅಹಂ ಸನ್ತೋ, ಓರುಯ್ಹ ಪಥವಿಂ ತದಾ;
ಪದೀಪೇ ಪಞ್ಚ ಪಾದಾಸಿಂ, ಪಸನ್ನೋ ಸೇಹಿ ಪಾಣಿಭಿ.
‘‘ಚತುನ್ನವುತಿತೋ ಕಪ್ಪೇ, ಯಂ ಪದೀಪಮದಂ ತದಾ;
ದುಗ್ಗತಿಂ ನಾಭಿಜಾನಾಮಿ, ದೀಪದಾನಸ್ಸಿದಂ ಫಲಂ.
‘‘ಪಞ್ಚಪಞ್ಞಾಸಕೇ ಕಪ್ಪೇ, ಏಕೋ ಆಸಿಂ ಮಹೀಪತಿ;
ಸಮನ್ತಚಕ್ಖುನಾಮೇನ, ಚಕ್ಕವತ್ತೀ ಮಹಬ್ಬಲೋ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಪದೀಪದಾಯಕೋ [ಅಪಣ್ಣದೀಪಿಯೋ (ಸೀ. ಕ.)] ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಪದೀಪದಾಯಕತ್ಥೇರಸ್ಸಾಪದಾನಂ ಚತುತ್ಥಂ.
೫. ಬಿಳಾಲಿದಾಯಕತ್ಥೇರಅಪದಾನಂ
‘‘ಹಿಮವನ್ತಸ್ಸಾವಿದೂರೇ ¶ ¶ ¶ , ರೋಮಸೋ ನಾಮ ಪಬ್ಬತೋ;
ತಮ್ಹಿ ಪಬ್ಬತಪಾದಮ್ಹಿ, ಸಮಣೋ ಭಾವಿತಿನ್ದ್ರಿಯೋ.
‘‘ಬಿಳಾಲಿಯೋ ¶ ಗಹೇತ್ವಾನ, ಸಮಣಸ್ಸ ಅದಾಸಹಂ;
ಅನುಮೋದಿ ಮಹಾವೀರೋ, ಸಯಮ್ಭೂ ಅಪರಾಜಿತೋ.
‘‘ಬಿಳಾಲೀ ತೇ ಮಮ ದಿನ್ನಾ, ವಿಪ್ಪಸನ್ನೇನ ಚೇತಸಾ;
ಭವೇ ನಿಬ್ಬತ್ತಮಾನಮ್ಹಿ, ಫಲಂ ನಿಬ್ಬತ್ತತಂ ತವ.
‘‘ಚತುನ್ನವುತಿತೋ ಕಪ್ಪೇ, ಯಂ ಬಿಳಾಲಿಮದಾಸಹಂ;
ದುಗ್ಗತಿಂ ನಾಭಿಜಾನಾಮಿ, ಬಿಳಾಲಿಯಾ ಇದಂ ಫಲಂ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಬಿಳಾಲಿದಾಯಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಬಿಳಾಲಿದಾಯಕತ್ಥೇರಸ್ಸಾಪದಾನಂ ಪಞ್ಚಮಂ.
೬. ಮಚ್ಛದಾಯಕತ್ಥೇರಅಪದಾನಂ
‘‘ಚನ್ದಭಾಗಾನದೀತೀರೇ, ಉಕ್ಕುಸೋ ಆಸಹಂ ತದಾ;
ಮಹನ್ತಂ ಮಚ್ಛಂ ಪಗ್ಗಯ್ಹ, ಸಿದ್ಧತ್ಥಮುನಿನೋ ಅದಂ.
‘‘ಚತುನ್ನವುತಿತೋ ¶ ಕಪ್ಪೇ, ಯಂ ಮಚ್ಛಮದದಿಂ ತದಾ;
ದುಗ್ಗತಿಂ ನಾಭಿಜಾನಾಮಿ, ಮಚ್ಛದಾನಸ್ಸಿದಂ ಫಲಂ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಮಚ್ಛದಾಯಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಮಚ್ಛದಾಯಕತ್ಥೇರಸ್ಸಾಪದಾನಂ ಛಟ್ಠಂ.
೭. ಜವಹಂಸಕತ್ಥೇರಅಪದಾನಂ
‘‘ಚನ್ದಭಾಗಾನದೀತೀರೇ, ಆಸಿಂ ವನಚರೋ ತದಾ;
ಸಿದ್ಧತ್ಥಂ ಅದ್ದಸಂ ಬುದ್ಧಂ, ಗಚ್ಛನ್ತಂ ಅನಿಲಞ್ಜಸೇ.
‘‘ಅಞ್ಜಲಿಂ ¶ ಪಗ್ಗಹೇತ್ವಾನ, ಉಲ್ಲೋಕೇನ್ತೋ ಮಹಾಮುನಿಂ;
ಸಕಂ ಚಿತ್ತಂ ಪಸಾದೇತ್ವಾ, ಅವನ್ದಿಂ ನಾಯಕಂ ಅಹಂ.
‘‘ಚತುನ್ನವುತಿತೋ ¶ ¶ ಕಪ್ಪೇ, ಯಮವನ್ದಿಂ ನರಾಸಭಂ;
ದುಗ್ಗತಿಂ ನಾಭಿಜಾನಾಮಿ, ವನ್ದನಾಯ ಇದಂ ಫಲಂ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಜವಹಂಸಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಜವಹಂಸಕತ್ಥೇರಸ್ಸಾಪದಾನಂ ಸತ್ತಮಂ.
೮. ಸಳಲಪುಪ್ಫಿಯತ್ಥೇರಅಪದಾನಂ
‘‘ಚನ್ದಭಾಗಾನದೀತೀರೇ ¶ , ಅಹೋಸಿಂ ಕಿನ್ನರೋ ತದಾ;
ವಿಪಸ್ಸಿಂ ಅದ್ದಸಂ ಬುದ್ಧಂ, ರಂಸಿಜಾಲಸಮಾಕುಲಂ.
‘‘ಪಸನ್ನಚಿತ್ತೋ ಸುಮನೋ, ಪರಮಾಯ ಚ ಪೀತಿಯಾ;
ಪಗ್ಗಯ್ಹ ಸಳಲಂ ಪುಪ್ಫಂ, ವಿಪಸ್ಸಿಂ ಓಕಿರಿಂ ಅಹಂ.
‘‘ಏಕನವುತಿತೋ ಕಪ್ಪೇ, ಯಂ ಪುಪ್ಫಮಭಿಪೂಜಯಿಂ;
ದುಗ್ಗತಿಂ ನಾಭಿಜಾನಾಮಿ, ಬುದ್ಧಪೂಜಾಯಿದಂ ಫಲಂ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಸಳಲಪುಪ್ಫಿಯೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಸಳಲಪುಪ್ಫಿಯತ್ಥೇರಸ್ಸಾಪದಾನಂ ಅಟ್ಠಮಂ.
೯. ಉಪಾಗತಾಸಯತ್ಥೇರಅಪದಾನಂ
‘‘ಹಿಮವನ್ತಸ್ಸ ವೇಮಜ್ಝೇ, ಸರೋ ಆಸಿ ಸುನಿಮ್ಮಿತೋ;
ತತ್ಥಾಹಂ ರಕ್ಖಸೋ ಆಸಿಂ, ಹೇಠಸೀಲೋ ಭಯಾನಕೋ.
‘‘ಅನುಕಮ್ಪಕೋ ಕಾರುಣಿಕೋ, ವಿಪಸ್ಸೀ ಲೋಕನಾಯಕೋ;
ಮಮುದ್ಧರಿತುಕಾಮೋ ಸೋ, ಆಗಚ್ಛಿ ಮಮ ಸನ್ತಿಕಂ.
‘‘ಉಪಾಗತಂ ¶ ಮಹಾವೀರಂ, ದೇವದೇವಂ ನರಾಸಭಂ;
ಆಸಯಾ ಅಭಿನಿಕ್ಖಮ್ಮ, ಅವನ್ದಿಂ ಸತ್ಥುನೋ ಅಹಂ.
‘‘ಏಕನವುತಿತೋ ¶ ¶ ಕಪ್ಪೇ, ಯಂ ವನ್ದಿಂ ಪುರಿಸುತ್ತಮಂ;
ದುಗ್ಗತಿಂ ನಾಭಿಜಾನಾಮಿ, ವನ್ದನಾಯ ಇದಂ ಫಲಂ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಉಪಾಗತಾಸಯೋ [ಉಪಾಗತಹಾಸನಿಯೋ (ಸ್ಯಾ.), ಉಪಾಗತಾಹಾಸನಿಯೋ (ಕ.)] ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಉಪಾಗತಾಸಯತ್ಥೇರಸ್ಸಾಪದಾನಂ ನವಮಂ.
೧೦. ತರಣಿಯತ್ಥೇರಅಪದಾನಂ
‘‘ಸುವಣ್ಣವಣ್ಣೋ ¶ ಸಮ್ಬುದ್ಧೋ, ವಿಪಸ್ಸೀ ದಕ್ಖಿಣಾರಹೋ;
ನದೀತೀರೇ ಠಿತೋ ಸತ್ಥಾ, ಭಿಕ್ಖುಸಙ್ಘಪುರಕ್ಖತೋ.
‘‘ನಾವಾ ನ ವಿಜ್ಜತೇ ತತ್ಥ, ಸನ್ತಾರಣೀ ಮಹಣ್ಣವೇ;
ನದಿಯಾ ಅಭಿನಿಕ್ಖಮ್ಮ, ತಾರೇಸಿಂ ಲೋಕನಾಯಕಂ.
‘‘ಏಕನವುತಿತೋ ಕಪ್ಪೇ, ಯಂ ತಾರೇಸಿಂ ನರುತ್ತಮಂ;
ದುಗ್ಗತಿಂ ನಾಭಿಜಾನಾಮಿ, ತರಣಾಯ ಇದಂ ಫಲಂ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ¶ ಸುದಂ ಆಯಸ್ಮಾ ತರಣಿಯೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ತರಣಿಯತ್ಥೇರಸ್ಸಾಪದಾನಂ ದಸಮಂ.
ಪದುಮುಕ್ಖಿಪವಗ್ಗೋ ಸತ್ತವೀಸತಿಮೋ.
ತಸ್ಸುದ್ದಾನಂ –
ಉಕ್ಖಿಪೀ ತೇಲಚನ್ದೀ ಚ, ದೀಪದೋ ಚ ಬಿಳಾಲಿದೋ;
ಮಚ್ಛೋ ಜವೋ ಸಳಲದೋ, ರಕ್ಖಸೋ ತರಣೋ ದಸ;
ಗಾಥಾಯೋ ಚೇತ್ಥ ಸಙ್ಖಾತಾ, ತಾಲೀಸಂ ಚೇಕಮೇವ ಚಾತಿ.
೨೮. ಸುವಣ್ಣಬಿಬ್ಬೋಹನವಗ್ಗೋ
೧. ಸುವಣ್ಣಬಿಬ್ಬೋಹನಿಯತ್ಥೇರಅಪದಾನಂ
‘‘ಏಕಾಸನಂ ¶ ¶ ¶ ಅಹಮದಂ, ಪಸನ್ನೋ ಸೇಹಿ ಪಾಣಿಭಿ;
ಬಿಬ್ಬೋಹನಞ್ಚ [ಬಿಮ್ಬೋಹನಞ್ಚ (ಸೀ. ಪೀ.)] ಪಾದಾಸಿಂ, ಉತ್ತಮತ್ಥಸ್ಸ ಪತ್ತಿಯಾ.
‘‘ಏಕನವುತಿತೋ ಕಪ್ಪೇ, ಬಿಬ್ಬೋಹನಮದಾಸಹಂ;
ದುಗ್ಗತಿಂ ನಾಭಿಜಾನಾಮಿ, ಬಿಬ್ಬೋಹನಸ್ಸಿದಂ ಫಲಂ.
‘‘ಇತೋ ತೇಸಟ್ಠಿಮೇ ಕಪ್ಪೇ, ಅಸಮೋ ನಾಮ ಖತ್ತಿಯೋ;
ಸತ್ತರತನಸಮ್ಪನ್ನೋ, ಚಕ್ಕವತ್ತೀ ಮಹಬ್ಬಲೋ.
‘‘ಪಟಿಸಮ್ಭಿದಾ ಚತಸ್ಸೋ, ವಿಮೋಕ್ಖಾಪಿ ಚ ಅಟ್ಠಿಮೇ;
ಛಳಭಿಞ್ಞಾ ಸಚ್ಛಿಕತಾ, ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಸುವಣ್ಣಬಿಬ್ಬೋಹನಿಯೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಸುವಣ್ಣಬಿಬ್ಬೋಹನಿಯತ್ಥೇರಸ್ಸಾಪದಾನಂ ಪಠಮಂ.
೨. ತಿಲಮುಟ್ಠಿದಾಯಕತ್ಥೇರಅಪದಾನಂ
‘‘ಮಮ ¶ ಸಙ್ಕಪ್ಪಮಞ್ಞಾಯ, ಸತ್ಥಾ ಲೋಕಗ್ಗನಾಯಕೋ;
ಮನೋಮಯೇನ ಕಾಯೇನ, ಇದ್ಧಿಯಾ ಉಪಸಙ್ಕಮಿ.
‘‘ಸತ್ಥಾರಂ ಉಪಸಙ್ಕನ್ತಂ, ವನ್ದಿತ್ವಾ ಪುರಿಸುತ್ತಮಂ;
ಪಸನ್ನಚಿತ್ತೋ ಸುಮನೋ, ತಿಲಮುಟ್ಠಿಮದಾಸಹಂ.
‘‘ಏಕನವುತಿತೋ ¶ ಕಪ್ಪೇ, ಯಂ ದಾನಮದದಿಂ ತದಾ;
ದುಗ್ಗತಿಂ ನಾಭಿಜಾನಾಮಿ, ತಿಲಮುಟ್ಠಿಯಿದಂ ಫಲಂ.
‘‘ಇತೋ ಸೋಳಸಕಪ್ಪಮ್ಹಿ, ತನ್ತಿಸೋ [ಖನ್ತಿಯೋ (ಸ್ಯಾ.)] ನಾಮ ಖತ್ತಿಯೋ;
ಸತ್ತರತನಸಮ್ಪನ್ನೋ, ಚಕ್ಕವತ್ತೀ ಮಹಬ್ಬಲೋ.
‘‘ಪಟಿಸಮ್ಭಿದಾ ¶ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ತಿಲಮುಟ್ಠಿದಾಯಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ತಿಲಮುಟ್ಠಿದಾಯಕತ್ಥೇರಸ್ಸಾಪದಾನಂ ದುತಿಯಂ.
೩. ಚಙ್ಕೋಟಕಿಯತ್ಥೇರಅಪದಾನಂ
‘‘ಮಹಾಸಮುದ್ದಂ ¶ ನಿಸ್ಸಾಯ, ವಸತೀ ಪಬ್ಬತನ್ತರೇ;
ಪಚ್ಚುಗ್ಗನ್ತ್ವಾನ ಕತ್ವಾನ [ಪಚ್ಚುಗ್ಗನ್ತ್ವಾನ’ಕಾಸಹಂ (ಅಟ್ಠ.), ಪಚ್ಚುಗ್ಗಮನಂ ಕತ್ವಾನ (?)], ಚಙ್ಕೋಟಕ [ಚಙ್ಗೋಟಕ (ಸೀ.)] ಮದಾಸಹಂ.
‘‘ಸಿದ್ಧತ್ಥಸ್ಸ ಮಹೇಸಿನೋ, ಸಬ್ಬಸತ್ತಾನುಕಮ್ಪಿನೋ [ಸಯಮ್ಭುಸ್ಸಾನುಕಮ್ಪಿನೋ (ಸ್ಯಾ.)];
ಪುಪ್ಫಚಙ್ಕೋಟಕಂ ದತ್ವಾ, ಕಪ್ಪಂ ಸಗ್ಗಮ್ಹಿ ಮೋದಹಂ.
‘‘ಚತುನ್ನವುತಿತೋ ಕಪ್ಪೇ, ಚಙ್ಕೋಟಕಮದಂ ತದಾ;
ದುಗ್ಗತಿಂ ನಾಭಿಜಾನಾಮಿ, ಚಙ್ಕೋಟಕಸ್ಸಿದಂ ಫಲಂ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ¶ ಸುದಂ ಆಯಸ್ಮಾ ಚಙ್ಕೋಟಕಿಯೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಚಙ್ಕೋಟಕಿಯತ್ಥೇರಸ್ಸಾಪದಾನಂ ತತಿಯಂ.
೪. ಅಬ್ಭಞ್ಜನದಾಯಕತ್ಥೇರಅಪದಾನಂ
‘‘ಕೋಣ್ಡಞ್ಞಸ್ಸ ¶ ಭಗವತೋ, ವೀತರಾಗಸ್ಸ ತಾದಿನೋ;
ಆಕಾಸಸಮಚಿತ್ತಸ್ಸ [ಅಕಕ್ಕಸಚಿತ್ತಸ್ಸಾಥ (ಅಟ್ಠ.)], ನಿಪ್ಪಪಞ್ಚಸ್ಸ ಝಾಯಿನೋ.
‘‘ಸಬ್ಬಮೋಹಾತಿವತ್ತಸ್ಸ, ಸಬ್ಬಲೋಕಹಿತೇಸಿನೋ;
ಅಬ್ಭಞ್ಜನಂ ಮಯಾ ದಿನ್ನಂ, ದ್ವಿಪದಿನ್ದಸ್ಸ ತಾದಿನೋ.
‘‘ಅಪರಿಮೇಯ್ಯೇ ಇತೋ ಕಪ್ಪೇ, ಅಬ್ಭಞ್ಜನಮದಂ ತದಾ [ಅಮ್ಭಞ್ಜನಮದಾಸಹಂ (ಸ್ಯಾ.)];
ದುಗ್ಗತಿಂ ನಾಭಿಜಾನಾಮಿ, ಅಬ್ಭಞ್ಜನಸ್ಸಿದಂ ಫಲಂ.
‘‘ಇತೋ ಪನ್ನರಸೇ ಕಪ್ಪೇ, ಚಿರಪ್ಪೋ ನಾಮ ಖತ್ತಿಯೋ;
ಸತ್ತರತನಸಮ್ಪನ್ನೋ, ಚಕ್ಕವತ್ತೀ ಮಹಬ್ಬಲೋ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಅಬ್ಭಞ್ಜನದಾಯಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಅಬ್ಭಞ್ಜನದಾಯಕತ್ಥೇರಸ್ಸಾಪದಾನಂ ಚತುತ್ಥಂ.
೫. ಏಕಞ್ಜಲಿಕತ್ಥೇರಅಪದಾನಂ
‘‘ಉದುಮ್ಬರೇ ¶ ¶ ¶ ವಸನ್ತಸ್ಸ, ನಿಯತೇ ಪಣ್ಣಸನ್ಥರೇ;
ವುತ್ಥೋಕಾಸೋ ಮಯಾ ದಿನ್ನೋ, ಸಮಣಸ್ಸ ಮಹೇಸಿನೋ.
‘‘ತಿಸ್ಸಸ್ಸ ದ್ವಿಪದಿನ್ದಸ್ಸ, ಲೋಕನಾಥಸ್ಸ ತಾದಿನೋ;
ಅಞ್ಜಲಿಂ ಪಗ್ಗಹೇತ್ವಾನ, ಸನ್ಥರಿಂ ಪುಪ್ಫಸನ್ಥರಂ.
‘‘ದ್ವೇನವುತೇ ಇತೋ ಕಪ್ಪೇ, ಯಂ ಕರಿಂ ಪುಪ್ಫಸನ್ಥರಂ;
ದುಗ್ಗತಿಂ ನಾಭಿಜಾನಾಮಿ, ಸನ್ಥರಸ್ಸ ಇದಂ ಫಲಂ.
‘‘ಇತೋ ಚುದ್ದಸಕಪ್ಪಮ್ಹಿ, ಅಹೋಸಿಂ ಮನುಜಾಧಿಪೋ;
ಏಕಅಞ್ಜಲಿಕೋ ನಾಮ, ಚಕ್ಕವತ್ತೀ ಮಹಬ್ಬಲೋ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಏಕಞ್ಜಲಿಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಏಕಞ್ಜಲಿಕತ್ಥೇರಸ್ಸಾಪದಾನಂ ಪಞ್ಚಮಂ.
೬. ಪೋತ್ಥಕದಾಯಕತ್ಥೇರಅಪದಾನಂ
‘‘ಸತ್ಥಾರಂ ¶ ಧಮ್ಮಮಾರಬ್ಭ, ಸಙ್ಘಞ್ಚಾಪಿ ಮಹೇಸಿನಂ;
ಪೋತ್ಥದಾನಂ ಮಯಾ ದಿನ್ನಂ, ದಕ್ಖಿಣೇಯ್ಯೇ ಅನುತ್ತರೇ.
‘‘ಏಕನವುತಿತೋ ¶ ಕಪ್ಪೇ, ಯಂ ಕಮ್ಮಮಕರಿಂ ತದಾ;
ದುಗ್ಗತಿಂ ನಾಭಿಜಾನಾಮಿ, ಪೋತ್ಥದಾನಸ್ಸಿದಂ ಫಲಂ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಪೋತ್ಥಕದಾಯಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಪೋತ್ಥಕದಾಯಕತ್ಥೇರಸ್ಸಾಪದಾನಂ ಛಟ್ಠಂ.
೭. ಚಿತಕಪೂಜಕತ್ಥೇರಅಪದಾನಂ
‘‘ಚನ್ದಭಾಗಾನದೀತೀರೇ, ಅನುಸೋತಂ ವಜಾಮಹಂ;
ಸತ್ತ ಮಾಲುವಪುಪ್ಫಾನಿ, ಚಿತಮಾರೋಪಯಿಂ ಅಹಂ.
‘‘ಚತುನ್ನವುತಿತೋ ¶ ¶ ಕಪ್ಪೇ, ಚಿತಕಂ ಯಮಪೂಜಯಿಂ;
ದುಗ್ಗತಿಂ ನಾಭಿಜಾನಾಮಿ, ಚಿತಪೂಜಾಯಿದಂ ಫಲಂ.
‘‘ಸತ್ತಸಟ್ಠಿಮ್ಹಿತೋ ಕಪ್ಪೇ, ಪಟಿಜಗ್ಗಸನಾಮಕಾ;
ಸತ್ತರತನಸಮ್ಪನ್ನಾ, ಸತ್ತಾಸುಂ ಚಕ್ಕವತ್ತಿನೋ [ಪಟಿಜಗ್ಗಸನಾಮಕೋ; ಸತ್ತರತನಸಮ್ಪನ್ನೋ, ಚಕ್ಕವತ್ತೀ ಮಹಬ್ಬಲೋ (ಸ್ಯಾ.)].
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಚಿತಕಪೂಜಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಚಿತಕಪೂಜಕತ್ಥೇರಸ್ಸಾಪದಾನಂ ಸತ್ತಮಂ.
೮. ಆಲುವದಾಯಕತ್ಥೇರಅಪದಾನಂ
‘‘ಪಬ್ಬತೇ ¶ ಹಿಮವನ್ತಮ್ಹಿ, ಮಹಾಸಿನ್ಧು ಸುದಸ್ಸನಾ;
ತತ್ಥದ್ದಸಂ ವೀತರಾಗಂ, ಸುಪ್ಪಭಾಸಂ ಸುದಸ್ಸನಂ.
‘‘ಪರಮೋಪಸಮೇ ಯುತ್ತಂ, ದಿಸ್ವಾ ವಿಮ್ಹಿತಮಾನಸೋ;
ಆಲುವಂ ತಸ್ಸ ಪಾದಾಸಿಂ, ಪಸನ್ನೋ ಸೇಹಿ ಪಾಣಿಭಿ.
‘‘ಏಕತ್ತಿಂಸೇ ಇತೋ ಕಪ್ಪೇ, ಯಂ ಫಲಮದದಿಂ ತದಾ;
ದುಗ್ಗತಿಂ ನಾಭಿಜಾನಾಮಿ, ಆಲುವಸ್ಸ ಇದಂ ಫಲಂ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ¶ ಸುದಂ ಆಯಸ್ಮಾ ಆಲುವದಾಯಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಆಲುವದಾಯಕತ್ಥೇರಸ್ಸಾಪದಾನಂ ಅಟ್ಠಮಂ.
೯. ಏಕಪುಣ್ಡರೀಕತ್ಥೇರಅಪದಾನಂ
‘‘ರೋಮಸೋ ¶ ನಾಮ ನಾಮೇನ, ಸಯಮ್ಭೂ ಸುಬ್ಬತೋ [ಸಪ್ಪಭೋ (ಸ್ಯಾ.)] ತದಾ;
ಪುಣ್ಡರೀಕಂ ಮಯಾ ದಿನ್ನಂ, ವಿಪ್ಪಸನ್ನೇನ ಚೇತಸಾ.
‘‘ಚತುನ್ನವುತಿತೋ ಕಪ್ಪೇ, ಪುಣ್ಡರೀಕಮದಂ ತದಾ;
ದುಗ್ಗತಿಂ ನಾಭಿಜಾನಾಮಿ, ಪುಣ್ಡರೀಕಸ್ಸಿದಂ ಫಲಂ.
‘‘ಪಟಿಸಮ್ಭಿದಾ ¶ ¶ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಏಕಪುಣ್ಡರೀಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಏಕಪುಣ್ಡರೀಕತ್ಥೇರಸ್ಸಾಪದಾನಂ ನವಮಂ.
೧೦. ತರಣೀಯತ್ಥೇರಅಪದಾನಂ
‘‘ಮಹಾಪಥಮ್ಹಿ ವಿಸಮೇ, ಸೇತು ಕಾರಾಪಿತೋ ಮಯಾ;
ತರಣತ್ಥಾಯ ಲೋಕಸ್ಸ, ಪಸನ್ನೋ ಸೇಹಿ ಪಾಣಿಭಿ.
‘‘ಏಕನವುತಿತೋ ಕಪ್ಪೇ, ಯೋ ಸೇತು ಕಾರಿತೋ ಮಯಾ;
ದುಗ್ಗತಿಂ ನಾಭಿಜಾನಾಮಿ, ಸೇತುದಾನಸ್ಸಿದಂ ಫಲಂ.
‘‘ಪಞ್ಚಪಞ್ಞಾಸಿತೋ ಕಪ್ಪೇ, ಏಕೋ ಆಸಿಂ ಸಮೋಗಧೋ;
ಸತ್ತರತನಸಮ್ಪನ್ನೋ, ಚಕ್ಕವತ್ತೀ ಮಹಬ್ಬಲೋ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ತರಣೀಯೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ತರಣೀಯತ್ಥೇರಸ್ಸಾಪದಾನಂ ದಸಮಂ.
ಸುವಣ್ಣಬಿಬ್ಬೋಹನವಗ್ಗೋ ಅಟ್ಠವೀಸತಿಮೋ.
ತಸ್ಸುದ್ದಾನಂ –
ಸುವಣ್ಣಂ ¶ ತಿಲಮುಟ್ಠಿ ಚ, ಚಙ್ಕೋಟಬ್ಭಞ್ಜನಞ್ಜಲೀ;
ಪೋತ್ಥಕೋ ಚಿತಮಾಲುವಾ, ಏಕಪುಣ್ಡರೀ ಸೇತುನಾ;
ದ್ವೇಚತ್ತಾಲೀಸ ಗಾಥಾಯೋ, ಗಣಿತಾಯೋ ವಿಭಾವಿಭೀತಿ.
ಏಕಾದಸಮಂ ಭಾಣವಾರಂ.
೨೯. ಪಣ್ಣದಾಯಕವಗ್ಗೋ
೧. ಪಣ್ಣದಾಯಕತ್ಥೇರಅಪದಾನಂ
‘‘ಪಣ್ಣಸಾಲೇ ¶ ¶ ¶ ನಿಸಿನ್ನೋಮ್ಹಿ, ಪಣ್ಣಭೋಜನಭೋಜನೋ;
ಉಪವಿಟ್ಠಞ್ಚ ಮಂ ಸನ್ತಂ, ಉಪಾಗಚ್ಛಿ ಮಹಾಇಸಿ [ಮಹಾಮುನಿ (ಸೀ.)].
‘‘ಸಿದ್ಧತ್ಥೋ ಲೋಕಪಜ್ಜೋತೋ, ಸಬ್ಬಲೋಕತಿಕಿಚ್ಛಕೋ;
ತಸ್ಸ ಪಣ್ಣಂ ಮಯಾ ದಿನ್ನಂ, ನಿಸಿನ್ನಂ [ನಿಸಿನ್ನಸ್ಸ (ಸ್ಯಾ. ಅಟ್ಠ.)] ಪಣ್ಣಸನ್ಥರೇ.
‘‘ಚತುನ್ನವುತಿತೋ ಕಪ್ಪೇ, ಯಂ ಪಣ್ಣಮದದಿಂ ತದಾ;
ದುಗ್ಗತಿಂ ನಾಭಿಜಾನಾಮಿ, ಪಣ್ಣದಾನಸ್ಸಿದಂ ಫಲಂ.
‘‘ಪಟಿಸಮ್ಭಿದಾ ಚತಸ್ಸೋ, ವಿಮೋಕ್ಖಾಪಿ ಚ ಅಟ್ಠಿಮೇ;
ಛಳಭಿಞ್ಞಾ ಸಚ್ಛಿಕತಾ, ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಪಣ್ಣದಾಯಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಪಣ್ಣದಾಯಕತ್ಥೇರಸ್ಸಾಪದಾನಂ ಪಠಮಂ.
೨. ಫಲದಾಯಕತ್ಥೇರಅಪದಾನಂ
‘‘ಸಿನೇರುಸಮಸನ್ತೋಸೋ ¶ , ಧರಣೀಸಮ [ಧರಣೀಧರ (ಸೀ. ಸ್ಯಾ.)] ಸಾದಿಸೋ;
ವುಟ್ಠಹಿತ್ವಾ ಸಮಾಧಿಮ್ಹಾ, ಭಿಕ್ಖಾಯ ಮಮುಪಟ್ಠಿತೋ.
‘‘ಹರೀತಕಂ [ಹರೀತಕಿಂ (ಸ್ಯಾ.)] ಆಮಲಕಂ, ಅಮ್ಬಜಮ್ಬುವಿಭೀತಕಂ;
ಕೋಲಂ ಭಲ್ಲಾತಕಂ ಬಿಲ್ಲಂ, ಫಾರುಸಕಫಲಾನಿ ಚ.
‘‘ಸಿದ್ಧತ್ಥಸ್ಸ ಮಹೇಸಿಸ್ಸ, ಸಬ್ಬಲೋಕಾನುಕಮ್ಪಿನೋ;
ತಞ್ಚ ಸಬ್ಬಂ ಮಯಾ ದಿನ್ನಂ, ವಿಪ್ಪಸನ್ನೇನ ಚೇತಸಾ.
‘‘ಚತುನ್ನವುತಿತೋ ಕಪ್ಪೇ, ಯಂ ಫಲಂ ಅದದಿಂ ತದಾ;
ದುಗ್ಗತಿಂ ನಾಭಿಜಾನಾಮಿ, ಫಲದಾನಸ್ಸಿದಂ ಫಲಂ.
‘‘ಸತ್ತಪಞ್ಞಾಸಿತೋ ¶ ಕಪ್ಪೇ, ಏಕಜ್ಝೋ ನಾಮ ಖತ್ತಿಯೋ;
ಸತ್ತರತನಸಮ್ಪನ್ನೋ, ಚಕ್ಕವತ್ತೀ ಮಹಬ್ಬಲೋ.
‘‘ಪಟಿಸಮ್ಭಿದಾ ¶ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಫಲದಾಯಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಫಲದಾಯಕತ್ಥೇರಸ್ಸಾಪದಾನಂ ದುತಿಯಂ.
೩. ಪಚ್ಚುಗ್ಗಮನಿಯತ್ಥೇರಅಪದಾನಂ
‘‘ಸೀಹಂ ¶ ಯಥಾ ವನಚರಂ, ನಿಸಭಾಜಾನಿಯಂ ಯಥಾ;
ಕಕುಧಂ ವಿಲಸನ್ತಂವ, ಆಗಚ್ಛನ್ತಂ ನರಾಸಭಂ.
‘‘ಸಿದ್ಧತ್ಥಂ ¶ ಲೋಕಪಜ್ಜೋತಂ, ಸಬ್ಬಲೋಕತಿಕಿಚ್ಛಕಂ;
ಅಕಾಸಿಂ ಪಚ್ಚುಗ್ಗಮನಂ, ವಿಪ್ಪಸನ್ನೇನ ಚೇತಸಾ.
‘‘ಚತುನ್ನವುತಿತೋ ಕಪ್ಪೇ, ಪಚ್ಚುಗ್ಗಚ್ಛಿಂ ನರಾಸಭಂ;
ದುಗ್ಗತಿಂ ನಾಭಿಜಾನಾಮಿ, ಪಚ್ಚುಗ್ಗಮನೇ ಇದಂ ಫಲಂ.
‘‘ಸತ್ತತಿಂಸೇ [ಸತ್ತವೀಸೇ (ಸೀ. ಸ್ಯಾ.)] ಇತೋ ಕಪ್ಪೇ, ಏಕೋ ಆಸಿಂ ಜನಾಧಿಪೋ;
ಸಪರಿವಾರೋತಿ ನಾಮೇನ, ಚಕ್ಕವತ್ತೀ ಮಹಬ್ಬಲೋ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಪಚ್ಚುಗ್ಗಮನಿಯೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಪಚ್ಚುಗ್ಗಮನಿಯತ್ಥೇರಸ್ಸಾಪದಾನಂ ತತಿಯಂ.
೪. ಏಕಪುಪ್ಫಿಯತ್ಥೇರಅಪದಾನಂ
‘‘ದಕ್ಖಿಣಮ್ಹಿ ದುವಾರಮ್ಹಿ, ಪಿಸಾಚೋ ಆಸಹಂ ತದಾ;
ಅದ್ದಸಂ ವಿರಜಂ ಬುದ್ಧಂ, ಪೀತರಂಸಿಂವ ಭಾಣುಮಂ.
‘‘ವಿಪಸ್ಸಿಸ್ಸ ನರಗ್ಗಸ್ಸ, ಸಬ್ಬಲೋಕಹಿತೇಸಿನೋ;
ಏಕಪುಪ್ಫಂ ಮಯಾ ದಿನ್ನಂ, ದ್ವಿಪದಿನ್ದಸ್ಸ ತಾದಿನೋ.
‘‘ಏಕನವುತಿತೋ ಕಪ್ಪೇ, ಯಂ ಪುಪ್ಫಮದದಿಂ ತದಾ;
ದುಗ್ಗತಿಂ ನಾಭಿಜಾನಾಮಿ, ಬುದ್ಧಪೂಜಾಯಿದಂ ಫಲಂ.
‘‘ಪಟಿಸಮ್ಭಿದಾ ¶ ¶ ¶ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಏಕಪುಪ್ಫಿಯೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಏಕಪುಪ್ಫಿಯತ್ಥೇರಸ್ಸಾಪದಾನಂ ಚತುತ್ಥಂ.
೫. ಮಘವಪುಪ್ಫಿಯತ್ಥೇರಅಪದಾನಂ
‘‘ನಮ್ಮದಾನದಿಯಾ ತೀರೇ, ಸಯಮ್ಭೂ ಅಪರಾಜಿತೋ;
ಸಮಾಧಿಂ ಸೋ ಸಮಾಪನ್ನೋ, ವಿಪ್ಪಸನ್ನೋ ಅನಾವಿಲೋ.
‘‘ದಿಸ್ವಾ ಪಸನ್ನಸುಮನೋ, ಸಮ್ಬುದ್ಧಂ ಅಪರಾಜಿತಂ;
ತಾಹಂ ಮಘವಪುಪ್ಫೇನ, ಸಯಮ್ಭುಂ ಪೂಜಯಿಂ ತದಾ.
‘‘ಏಕನವುತಿತೋ ¶ ಕಪ್ಪೇ, ಯಂ ಪುಪ್ಫಮಭಿಪೂಜಯಿಂ;
ದುಗ್ಗತಿಂ ನಾಭಿಜಾನಾಮಿ, ಬುದ್ಧಪೂಜಾಯಿದಂ ಫಲಂ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಮಘವಪುಪ್ಫಿಯೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಮಘವಪುಪ್ಫಿಯತ್ಥೇರಸ್ಸಾಪದಾನಂ ಪಞ್ಚಮಂ.
೬. ಉಪಟ್ಠಾಕದಾಯಕತ್ಥೇರಅಪದಾನಂ
‘‘ರಥಿಯಂ ¶ ಪಟಿಪಜ್ಜನ್ತಂ, ಆಹುತೀನಂ ಪಟಿಗ್ಗಹಂ;
ದ್ವಿಪದಿನ್ದಂ ಮಹಾನಾಗಂ, ಲೋಕಜೇಟ್ಠಂ ನರಾಸಭಂ.
‘‘ಪಕ್ಕೋಸಾಪಿಯ ತಸ್ಸಾಹಂ, ಸಬ್ಬಲೋಕಹಿತೇಸಿನೋ;
ಉಪಟ್ಠಾಕೋ ಮಯಾ ದಿನ್ನೋ, ಸಿದ್ಧತ್ಥಸ್ಸ ಮಹೇಸಿನೋ.
‘‘ಪಟಿಗ್ಗಹೇತ್ವಾ [ಪಟಿಗ್ಗಹೇಸಿ (ಕ.)] ಸಮ್ಬುದ್ಧೋ, ನಿಯ್ಯಾದೇಸಿ ಮಹಾಮುನಿ [ಮಹಾಇಸಿ (ಕ.)];
ಉಟ್ಠಾಯ ಆಸನಾ ತಮ್ಹಾ, ಪಕ್ಕಾಮಿ ಪಾಚಿನಾಮುಖೋ.
‘‘ಚತುನ್ನವುತಿತೋ ¶ ಕಪ್ಪೇ, ಉಪಟ್ಠಾಕಮದಂ ತದಾ;
ದುಗ್ಗತಿಂ ನಾಭಿಜಾನಾಮಿ, ಉಪಟ್ಠಾನಸ್ಸಿದಂ ಫಲಂ.
‘‘ಸತ್ತಪಞ್ಞಾಸಿತೋ ಕಪ್ಪೇ, ಬಲಸೇನಸನಾಮಕೋ;
ಸತ್ತರತನಸಮ್ಪನ್ನೋ, ಚಕ್ಕವತ್ತೀ ಮಹಬ್ಬಲೋ.
‘‘ಪಟಿಸಮ್ಭಿದಾ ¶ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಉಪಟ್ಠಾಕದಾಯಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಉಪಟ್ಠಾಕದಾಯಕತ್ಥೇರಸ್ಸಾಪದಾನಂ ಛಟ್ಠಂ.
೭. ಅಪದಾನಿಯತ್ಥೇರಅಪದಾನಂ
‘‘ಅಪದಾನಂ ಸುಗತಾನಂ, ಕಿತ್ತಯಿಂಹಂ ಮಹೇಸಿನಂ;
ಪಾದೇ ಚ ಸಿರಸಾ ವನ್ದಿಂ, ಪಸನ್ನೋ ಸೇಹಿ ಪಾಣಿಭಿ.
‘‘ದ್ವೇನವುತೇ ¶ ಇತೋ ಕಪ್ಪೇ, ಅಪದಾನಂ ಪಕಿತ್ತಯಿಂ;
ದುಗ್ಗತಿಂ ನಾಭಿಜಾನಾಮಿ, ಕಿತ್ತನಾಯ ಇದಂ ಫಲಂ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಅಪದಾನಿಯೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಅಪದಾನಿಯತ್ಥೇರಸ್ಸಾಪದಾನಂ ಸತ್ತಮಂ.
೮. ಸತ್ತಾಹಪಬ್ಬಜಿತತ್ಥೇರಅಪದಾನಂ
‘‘ವಿಪಸ್ಸಿಸ್ಸ ¶ ಭಗವತೋ, ಸಙ್ಘೋ ಸಕ್ಕತಮಾನಿತೋ;
ಬ್ಯಸನಂ ಮೇ ಅನುಪ್ಪತ್ತಂ, ಞಾತಿಭೇದೋ ಪುರೇ ಅಹು.
‘‘ಪಬ್ಬಜ್ಜಂ ಉಪಗನ್ತ್ವಾನ, ಬ್ಯಸನುಪಸಮಾಯಹಂ;
ಸತ್ತಾಹಾಭಿರತೋ ತತ್ಥ, ಸತ್ಥುಸಾಸನಕಮ್ಯತಾ.
‘‘ಏಕನವುತಿತೋ ಕಪ್ಪೇ, ಯಮಹಂ ಪಬ್ಬಜಿಂ ತದಾ;
ದುಗ್ಗತಿಂ ನಾಭಿಜಾನಾಮಿ, ಪಬ್ಬಜ್ಜಾಯ ಇದಂ ಫಲಂ.
‘‘ಸತ್ತಸಟ್ಠಿಮ್ಹಿತೋ ¶ ಕಪ್ಪೇ, ಸತ್ತ ಆಸುಂ ಮಹೀಪತೀ;
ಸುನಿಕ್ಖಮಾತಿ ಞಾಯನ್ತಿ, ಚಕ್ಕವತ್ತೀ ಮಹಬ್ಬಲಾ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ¶ ಸುದಂ ಆಯಸ್ಮಾ ಸತ್ತಾಹಪಬ್ಬಜಿತೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಸತ್ತಾಹಪಬ್ಬಜಿತತ್ಥೇರಸ್ಸಾಪದಾನಂ ಅಟ್ಠಮಂ.
೯. ಬುದ್ಧುಪಟ್ಠಾಯಿಕತ್ಥೇರಅಪದಾನಂ
‘‘ವೇಟಮ್ಭಿನೀತಿ ¶ [ವೇಟಮ್ಬರೀತಿ (ಸೀ.), ವೇಧಮ್ಭಿನೀತಿ (ಸ್ಯಾ.)] ಮೇ ನಾಮಂ, ಪಿತುಸನ್ತಂ [ಪಿತಾ’ಸನ್ತಂ (?)] ಮಮಂ ತದಾ;
ಮಮ ಹತ್ಥಂ ಗಹೇತ್ವಾನ, ಉಪಾನಯಿ ಮಹಾಮುನಿಂ.
‘‘ಇಮೇಮಂ ಉದ್ದಿಸಿಸ್ಸನ್ತಿ, ಬುದ್ಧಾ ಲೋಕಗ್ಗನಾಯಕಾ;
ತೇಹಂ ಉಪಟ್ಠಿಂ ಸಕ್ಕಚ್ಚಂ, ಪಸನ್ನೋ ಸೇಹಿ ಪಾಣಿಭಿ.
‘‘ಏಕತ್ತಿಂಸೇ ಇತೋ ಕಪ್ಪೇ, ಬುದ್ಧೇ ಉಪಟ್ಠಹಿಂ [ಪರಿಚರಿಂ (ಸೀ. ಸ್ಯಾ.)] ತದಾ;
ದುಗ್ಗತಿಂ ನಾಭಿಜಾನಾಮಿ, ಉಪಟ್ಠಾನಸ್ಸಿದಂ ಫಲಂ.
‘‘ತೇವೀಸಮ್ಹಿ ಇತೋ ಕಪ್ಪೇ, ಚತುರೋ ಆಸು ಖತ್ತಿಯಾ;
ಸಮಣುಪಟ್ಠಾಕಾ ನಾಮ, ಚಕ್ಕವತ್ತೀ ಮಹಬ್ಬಲಾ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಬುದ್ಧುಪಟ್ಠಾಯಿಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಬುದ್ಧುಪಟ್ಠಾಯಿಕತ್ಥೇರಸ್ಸಾಪದಾನಂ ನವಮಂ.
೧೦. ಪುಬ್ಬಙ್ಗಮಿಯತ್ಥೇರಅಪದಾನಂ
‘‘ಚುಲ್ಲಾಸೀತಿಸಹಸ್ಸಾನಿ ¶ ¶ , ಪಬ್ಬಜಿಮ್ಹ ಅಕಿಞ್ಚನಾ;
ತೇಸಂ ಪುಬ್ಬಙ್ಗಮೋ ಆಸಿಂ, ಉತ್ತಮತ್ಥಸ್ಸ ಪತ್ತಿಯಾ.
‘‘ಸರಾಗಾ ¶ ಸಭವಾ [ಸಮೋಹಾ (ಸ್ಯಾ.)] ಚೇತೇ, ವಿಪ್ಪಸನ್ನಮನಾವಿಲಾ;
ಉಪಟ್ಠಹಿಂಸು ಸಕ್ಕಚ್ಚಂ, ಪಸನ್ನಾ ಸೇಹಿ ಪಾಣಿಭಿ.
‘‘ಖೀಣಾಸವಾ ವನ್ತದೋಸಾ, ಕತಕಿಚ್ಚಾ ಅನಾಸವಾ;
ಫರಿಂಸು ಮೇತ್ತಚಿತ್ತೇನ, ಸಯಮ್ಭೂ ಅಪರಾಜಿತಾ.
‘‘ತೇಸಂ ಉಪಟ್ಠಹಿತ್ವಾನ, ಸಮ್ಬುದ್ಧಾನಂ ಪತಿಸ್ಸತೋ;
ಮರಣಞ್ಚ ಅನುಪ್ಪತ್ತೋ, ದೇವತ್ತಞ್ಚ ಅಗಮ್ಹಸೇ.
‘‘ಚತುನ್ನವುತಿತೋ ಕಪ್ಪೇ, ಯಂ ಸೀಲಮನುಪಾಲಯಿಂ;
ದುಗ್ಗತಿಂ ನಾಭಿಜಾನಾಮಿ, ಸಞ್ಞಮಸ್ಸ ಇದಂ ಫಲಂ.
‘‘ಪಟಿಸಮ್ಭಿದಾ ¶ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಪುಬ್ಬಙ್ಗಮಿಯೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಪುಬ್ಬಙ್ಗಮಿಯತ್ಥೇರಸ್ಸಾಪದಾನಂ ದಸಮಂ.
ಪಣ್ಣದಾಯಕವಗ್ಗೋ ಏಕೂನತಿಂಸತಿಮೋ.
ತಸ್ಸುದ್ದಾನಂ –
ಪಣ್ಣಂ ಫಲಂ ಪಚ್ಚುಗ್ಗಮಂ, ಏಕಪುಪ್ಫಿ ಚ ಮಘವಾ;
ಉಪಟ್ಠಾಕಾಪದಾನಞ್ಚ ¶ , ಪಬ್ಬಜ್ಜಾ ಬುದ್ಧುಪಟ್ಠಾಕೋ;
ಪುಬ್ಬಙ್ಗಮೋ ಚ ಗಾಥಾಯೋ, ಅಟ್ಠತಾಲೀಸ ಕಿತ್ತಿತಾ.
೩೦. ಚಿತಕಪೂಜಕವಗ್ಗೋ
೧. ಚಿತಕಪೂಜಕತ್ಥೇರಅಪದಾನಂ
‘‘ಅಜಿತೋ ¶ ¶ ನಾಮ ನಾಮೇನ, ಅಹೋಸಿಂ ಬ್ರಾಹ್ಮಣೋ ತದಾ;
ಆಹುತಿಂ ಯಿಟ್ಠುಕಾಮೋಹಂ, ನಾನಾಪುಪ್ಫಂ ಸಮಾನಯಿಂ.
‘‘ಜಲನ್ತಂ ಚಿತಕಂ ದಿಸ್ವಾ, ಸಿಖಿನೋ ಲೋಕಬನ್ಧುನೋ;
ತಞ್ಚ ಪುಪ್ಫಂ ಸಮಾನೇತ್ವಾ, ಚಿತಕೇ ಓಕಿರಿಂ ಅಹಂ.
‘‘ಏಕತ್ತಿಂಸೇ ¶ ಇತೋ ಕಪ್ಪೇ, ಯಂ ಪುಪ್ಫಮಭಿಪೂಜಯಿಂ;
ದುಗ್ಗತಿಂ ನಾಭಿಜಾನಾಮಿ, ಬುದ್ಧಪೂಜಾಯಿದಂ ಫಲಂ.
‘‘ಸತ್ತವೀಸೇ [ಸತ್ತತಿಂಸೇ (ಕ.)] ಇತೋ ಕಪ್ಪೇ, ಸತ್ತಾಸುಂ ಮನುಜಾಧಿಪಾ;
ಸುಪಜ್ಜಲಿತನಾಮಾ ತೇ, ಚಕ್ಕವತ್ತೀ ಮಹಬ್ಬಲಾ.
‘‘ಪಟಿಸಮ್ಭಿದಾ ಚತಸ್ಸೋ, ವಿಮೋಕ್ಖಾಪಿ ಚ ಅಟ್ಠಿಮೇ;
ಛಳಭಿಞ್ಞಾ ಸಚ್ಛಿಕತಾ, ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಚಿತಕಪೂಜಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಚಿತಕಪೂಜಕತ್ಥೇರಸ್ಸಾಪದಾನಂ ಪಠಮಂ.
೨. ಪುಪ್ಫಧಾರಕತ್ಥೇರಅಪದಾನಂ
‘‘ವಾಕಚೀರಧರೋ ¶ ಆಸಿಂ, ಅಜಿನುತ್ತರವಾಸನೋ;
ಅಭಿಞ್ಞಾ ಪಞ್ಚ ನಿಬ್ಬತ್ತಾ, ಚನ್ದಸ್ಸ ಪರಿಮಜ್ಜಕೋ.
‘‘ವಿಪಸ್ಸಿಂ ಲೋಕಪಜ್ಜೋತಂ, ದಿಸ್ವಾ ಅಭಿಗತಂ ಮಮಂ;
ಪಾರಿಚ್ಛತ್ತಕಪುಪ್ಫಾನಿ, ಧಾರೇಸಿಂ ಸತ್ಥುನೋ ಅಹಂ.
‘‘ಏಕನವುತಿತೋ ಕಪ್ಪೇ, ಯಂ ಪುಪ್ಫಮಭಿಪೂಜಯಿಂ;
ದುಗ್ಗತಿಂ ನಾಭಿಜಾನಾಮಿ, ಧಾರಣಾಯ ಇದಂ ಫಲಂ.
‘‘ಸತ್ತಾಸೀತಿಮ್ಹಿತೋ ¶ ಕಪ್ಪೇ, ಏಕೋ ಆಸಿಂ ಮಹೀಪತಿ;
ಸಮನ್ತಧಾರಣೋ ನಾಮ, ಚಕ್ಕವತ್ತೀ ಮಹಬ್ಬಲೋ.
‘‘ಪಟಿಸಮ್ಭಿದಾ ¶ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಪುಪ್ಫಧಾರಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಪುಪ್ಫಧಾರಕತ್ಥೇರಸ್ಸಾಪದಾನಂ ದುತಿಯಂ.
೩. ಛತ್ತದಾಯಕತ್ಥೇರಅಪದಾನಂ
‘‘ಪುತ್ತೋ ಮಮ ಪಬ್ಬಜಿತೋ, ಕಾಸಾಯವಸನೋ ತದಾ;
ಸೋ ಚ ಬುದ್ಧತ್ತಂ ಸಮ್ಪತ್ತೋ, ನಿಬ್ಬುತೋ ಲೋಕಪೂಜಿತೋ.
‘‘ವಿಚಿನನ್ತೋ ¶ ಸಕಂ ಪುತ್ತಂ, ಅಗಮಂ ಪಚ್ಛತೋ ಅಹಂ;
ನಿಬ್ಬುತಸ್ಸ ಮಹನ್ತಸ್ಸ, ಚಿತಕಂ ಅಗಮಾಸಹಂ.
‘‘ಪಗ್ಗಯ್ಹ ಅಞ್ಜಲಿಂ ತತ್ಥ, ವನ್ದಿತ್ವಾ ಚಿತಕಂ ಅಹಂ;
ಸೇತಚ್ಛತ್ತಞ್ಚ ಪಗ್ಗಯ್ಹ, ಆರೋಪೇಸಿಂ ಅಹಂ ತದಾ.
‘‘ಚತುನ್ನವುತಿತೋ ಕಪ್ಪೇ, ಯಂ ಛತ್ತಮಭಿರೋಪಯಿಂ;
ದುಗ್ಗತಿಂ ನಾಭಿಜಾನಾಮಿ, ಛತ್ತದಾನಸ್ಸಿದಂ ಫಲಂ.
‘‘ಪಞ್ಚವೀಸೇ ¶ ಇತೋ ಕಪ್ಪೇ, ಸತ್ತ ಆಸುಂ ಜನಾಧಿಪಾ;
ಮಹಾರಹಸನಾಮಾ ತೇ, ಚಕ್ಕವತ್ತೀ ಮಹಬ್ಬಲಾ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಛತ್ತದಾಯಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಛತ್ತದಾಯಕತ್ಥೇರಸ್ಸಾಪದಾನಂ ತತಿಯಂ.
೪. ಸದ್ದಸಞ್ಞಕತ್ಥೇರಅಪದಾನಂ
‘‘ಅನುಗ್ಗತಮ್ಹಿ ಆದಿಚ್ಚೇ, ಪನಾದೋ [ಪಸಾದೋ (ಸ್ಯಾ. ಅಟ್ಠ.)] ವಿಪುಲೋ ಅಹು;
ಬುದ್ಧಸೇಟ್ಠಸ್ಸ ಲೋಕಮ್ಹಿ, ಪಾತುಭಾವೋ ಮಹೇಸಿನೋ.
‘‘ಘೋಸ [ಸದ್ದ (ಸೀ. ಸ್ಯಾ.)] ಮಸ್ಸೋಸಹಂ ¶ ತತ್ಥ, ನ ಚ ಪಸ್ಸಾಮಿ ತಂ ಜಿನಂ;
ಮರಣಞ್ಚ ಅನುಪ್ಪತ್ತೋ, ಬುದ್ಧಸಞ್ಞಮನುಸ್ಸರಿಂ.
‘‘ಚತುನ್ನವುತಿತೋ ¶ ¶ ಕಪ್ಪೇ, ಯಂ ಸಞ್ಞಮಲಭಿಂ ತದಾ;
ದುಗ್ಗತಿಂ ನಾಭಿಜಾನಾಮಿ, ಬುದ್ಧಪೂಜಾಯಿದಂ ಫಲಂ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಸದ್ದಸಞ್ಞಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಸದ್ದಸಞ್ಞಕತ್ಥೇರಸ್ಸಾಪದಾನಂ ಚತುತ್ಥಂ.
೫. ಗೋಸೀಸನಿಕ್ಖೇಪಕತ್ಥೇರಅಪದಾನಂ
‘‘ಆರಾಮದ್ವಾರಾ ನಿಕ್ಖಮ್ಮ, ಗೋಸೀಸಂ ಸನ್ಥತಂ ಮಯಾ;
ಅನುಭೋಮಿ ಸಕಂ ಕಮ್ಮಂ, ಪುಬ್ಬಕಮ್ಮಸ್ಸಿದಂ ಫಲಂ.
‘‘ಆಜಾನಿಯಾ ವಾತಜವಾ, ಸಿನ್ಧವಾ ಸೀಘವಾಹನಾ;
ಅನುಭೋಮಿ ಸಬ್ಬಮೇತಂ, ಗೋಸೀಸಸ್ಸ ಇದಂ ಫಲಂ.
‘‘ಅಹೋ ಕಾರಂ ಪರಮಕಾರಂ, ಸುಖತ್ತೇ ಸುಕತಂ ಮಯಾ;
ಸಙ್ಘೇ ಕತಸ್ಸ ಕಾರಸ್ಸ, ನ ಅಞ್ಞಂ ಕಲಮಗ್ಘತಿ.
‘‘ಚತುನ್ನವುತಿತೋ ಕಪ್ಪೇ, ಯಂ ಸೀಸಂ ಸನ್ಥರಿಂ ಅಹಂ;
ದುಗ್ಗತಿಂ ನಾಭಿಜಾನಾಮಿ, ಸನ್ಥರಸ್ಸ ಇದಂ ಫಲಂ.
‘‘ಪಞ್ಚಸತ್ತತಿಕಪ್ಪಮ್ಹಿ, ಸುಪ್ಪತಿಟ್ಠಿತನಾಮಕೋ;
ಏಕೋ ಆಸಿಂ ಮಹಾತೇಜೋ, ಚಕ್ಕವತ್ತೀ ಮಹಬ್ಬಲೋ.
‘‘ಪಟಿಸಮ್ಭಿದಾ ¶ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಗೋಸೀಸನಿಕ್ಖೇಪಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಗೋಸೀಸನಿಕ್ಖೇಪಕತ್ಥೇರಸ್ಸಾಪದಾನಂ ಪಞ್ಚಮಂ.
೬. ಪಾದಪೂಜಕತ್ಥೇರಅಪದಾನಂ
‘‘ಪಬ್ಬತೇ ¶ ¶ ಹಿಮವನ್ತಮ್ಹಿ, ಅಹೋಸಿಂ ಕಿನ್ನರೋ ತದಾ;
ಅದ್ದಸಂ ವಿರಜಂ ಬುದ್ಧಂ, ಪೀತರಂಸಿಂವ ಭಾಣುಮಂ.
‘‘ಉಪೇತಂ ತಮಹಂ [ಉಪೇತೋಪಿ ತದಾ (ಸ್ಯಾ.), ಉಪೇಸಿಂ ತಮಹಂ (?)] ಬುದ್ಧಂ, ವಿಪಸ್ಸಿಂ ಲೋಕನಾಯಕಂ;
ಚನ್ದನಂ ತಗರಞ್ಚಾಪಿ, ಪಾದೇ ಓಸಿಞ್ಚಹಂ ತದಾ.
‘‘ಏಕನವುತಿತೋ ¶ ಕಪ್ಪೇ, ಯಂ ಪಾದಂ ಅಭಿಪೂಜಯಿಂ;
ದುಗ್ಗತಿಂ ನಾಭಿಜಾನಾಮಿ, ಪಾದಪೂಜಾಯಿದಂ ಫಲಂ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಪಾದಪೂಜಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಪಾದಪೂಜಕತ್ಥೇರಸ್ಸಾಪದಾನಂ ಛಟ್ಠಂ.
೭. ದೇಸಕಿತ್ತಕತ್ಥೇರಅಪದಾನಂ
‘‘ಉಪಸಾಲಕನಾಮೋಹಂ ¶ , ಅಹೋಸಿಂ ಬ್ರಾಹ್ಮಣೋ ತದಾ;
ಕಾನನಂ ವನಮೋಗಾಳ್ಹಂ, ಲೋಕಜೇಟ್ಠಂ ನರಾಸಭಂ.
‘‘ದಿಸ್ವಾನ ವನ್ದಿಂ ಪಾದೇಸು, ಲೋಕಾಹುತಿಪಟಿಗ್ಗಹಂ;
ಪಸನ್ನಚಿತ್ತಂ ಮಂ ಞತ್ವಾ, ಬುದ್ಧೋ ಅನ್ತರಧಾಯಥ.
‘‘ಕಾನನಾ ಅಭಿನಿಕ್ಖಮ್ಮ, ಬುದ್ಧಸೇಟ್ಠಮನುಸ್ಸರಿಂ;
ತಂ ದೇಸಂ ಕಿತ್ತಯಿತ್ವಾನ, ಕಪ್ಪಂ ಸಗ್ಗಮ್ಹಿ ಮೋದಹಂ.
‘‘ದ್ವೇನವುತೇ ಇತೋ ಕಪ್ಪೇ, ಯಂ ದೇಸಮಭಿಕಿತ್ತಯಿಂ;
ದುಗ್ಗತಿಂ ನಾಭಿಜಾನಾಮಿ, ಕಿತ್ತನಾಯ ಇದಂ ಫಲಂ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ದೇಸಕಿತ್ತಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ದೇಸಕಿತ್ತಕತ್ಥೇರಸ್ಸಾಪದಾನಂ ಸತ್ತಮಂ.
೮. ಸರಣಗಮನಿಯತ್ಥೇರಅಪದಾನಂ
‘‘ಪಬ್ಬತೇ ¶ ಹಿಮವನ್ತಮ್ಹಿ, ಅಹೋಸಿಂ ಲುದ್ದಕೋ ತದಾ;
ವಿಪಸ್ಸಿಂ ಅದ್ದಸಂ ಬುದ್ಧಂ, ಲೋಕಜೇಟ್ಠಂ ನರಾಸಭಂ.
‘‘ಉಪಾಸಿತ್ವಾನ ¶ ಸಮ್ಬುದ್ಧಂ, ವೇಯ್ಯಾವಚ್ಚಮಕಾಸಹಂ;
ಸರಣಞ್ಚ ಉಪಾಗಚ್ಛಿಂ, ದ್ವಿಪದಿನ್ದಸ್ಸ ತಾದಿನೋ.
‘‘ಏಕನವುತಿತೋ ¶ ಕಪ್ಪೇ, ಸರಣಂ ಉಪಗಚ್ಛಹಂ;
ದುಗ್ಗತಿಂ ನಾಭಿಜಾನಾಮಿ, ಸರಣಾಗಮನಪ್ಫಲಂ.
‘‘ಪಟಿಸಮ್ಭಿದಾ ¶ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಸರಣಗಮನಿಯೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಸರಣಗಮನಿಯತ್ಥೇರಸ್ಸಾಪದಾನಂ ಅಟ್ಠಮಂ.
೯. ಅಮ್ಬಪಿಣ್ಡಿಯತ್ಥೇರಅಪದಾನಂ
‘‘ರೋಮಸೋ ನಾಮ ನಾಮೇನ, ದಾನವೋ ಇತಿ ವಿಸ್ಸುತೋ;
ಅಮ್ಬಪಿಣ್ಡೀ ಮಯಾ ದಿನ್ನಾ [ಅಮ್ಬಪಿಣ್ಡೋ ಮಯಾ ದಿನ್ನೋ (ಸ್ಯಾ.)], ವಿಪಸ್ಸಿಸ್ಸ ಮಹೇಸಿನೋ.
‘‘ಏಕನವುತಿತೋ ಕಪ್ಪೇ, ಯಮಮ್ಬಮದದಿಂ ತದಾ;
ದುಗ್ಗತಿಂ ನಾಭಿಜಾನಾಮಿ, ಅಮ್ಬದಾನಸ್ಸಿದಂ ಫಲಂ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಅಮ್ಬಪಿಣ್ಡಿಯೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಅಮ್ಬಪಿಣ್ಡಿಯತ್ಥೇರಸ್ಸಾಪದಾನಂ ನವಮಂ.
೧೦. ಅನುಸಂಸಾವಕತ್ಥೇರಅಪದಾನಂ
‘‘ಪಿಣ್ಡಾಯ ¶ ಚರಮಾನಾಹಂ, ವಿಪಸ್ಸಿಮದ್ದಸಂ ಜಿನಂ;
ಉಳುಙ್ಗಭಿಕ್ಖಂ ಪಾದಾಸಿಂ, ದ್ವಿಪದಿನ್ದಸ್ಸ ತಾದಿನೋ.
‘‘ಪಸನ್ನಚಿತ್ತೋ ¶ ಸುಮನೋ, ಅಭಿವಾದೇಸಹಂ ತದಾ;
ಅನುಸಂಸಾವಯಿಂ ಬುದ್ಧಂ, ಉತ್ತಮತ್ಥಸ್ಸ ಪತ್ತಿಯಾ.
‘‘ಏಕನವುತಿತೋ ಕಪ್ಪೇ, ಅನುಸಂಸಾವಯಿಂ ಅಹಂ;
ದುಗ್ಗತಿಂ ನಾಭಿಜಾನಾಮಿ, ಅನುಸಂಸಾವನಾ ಫಲಂ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಅನುಸಂಸಾವಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಅನುಸಂಸಾವಕತ್ಥೇರಸ್ಸಾಪದಾನಂ ದಸಮಂ.
ಚಿತಕಪೂಜಕವಗ್ಗೋ ತಿಂಸತಿಮೋ.
ತಸ್ಸುದ್ದಾನಂ –
ಚಿತಕಂ ¶ ಪಾರಿಛತ್ತೋ ಚ, ಸದ್ದಗೋಸೀಸಸನ್ಥರಂ;
ಪಾದೋ ಪದೇಸಂ ಸರಣಂ, ಅಮ್ಬೋ ಸಂಸಾವಕೋಪಿ ಚ;
ಅಟ್ಠತಾಲೀಸ ಗಾಥಾಯೋ, ಗಣಿತಾಯೋ ವಿಭಾವಿಭಿ.
ಅಥ ¶ ವಗ್ಗುದ್ದಾನಂ –
ಕಣಿಕಾರೋ ¶ ಹತ್ಥಿದದೋ, ಆಲಮ್ಬಣುದಕಾಸನಂ;
ತುವರಂ ಥೋಮಕೋ ಚೇವ, ಉಕ್ಖೇಪಂ ಸೀಸುಪಧಾನಂ.
ಪಣ್ಣದೋ ಚಿತಪೂಜೀ ಚ, ಗಾಥಾಯೋ ಚೇವ ಸಬ್ಬಸೋ;
ಚತ್ತಾರಿ ಚ ಸತಾನೀಹ, ಏಕಪಞ್ಞಾಸಮೇವ ಚ.
ಪಞ್ಚವೀಸಸತಾ ಸಬ್ಬಾ, ದ್ವಾಸತ್ತತಿ ತದುತ್ತರಿ;
ತಿಸತಂ ಅಪದಾನಾನಂ, ಗಣಿತಾ ಅತ್ಥದಸ್ಸಿಭಿ.
ಕಣಿಕಾರವಗ್ಗದಸಕಂ.
ತತಿಯಸತಕಂ ಸಮತ್ತಂ.
೩೧. ಪದುಮಕೇಸರವಗ್ಗೋ
೧. ಪದುಮಕೇಸರಿಯತ್ಥೇರಅಪದಾನಂ
‘‘ಇಸಿಸಙ್ಘೇ ¶ ¶ ಅಹಂ ಪುಬ್ಬೇ, ಆಸಿಂ ಮಾತಙ್ಗವಾರಣೋ;
ಮಹೇಸೀನಂ ಪಸಾದೇನ, ಪದ್ಮಕೇಸರಮೋಕಿರಿಂ.
‘‘ಪಚ್ಚೇಕಜಿನಸೇಟ್ಠೇಸು, ಧುತರಾಗೇಸು ತಾದಿಸು;
ತೇಸು ಚಿತ್ತಂ ಪಸಾದೇತ್ವಾ, ಕಪ್ಪಂ ಸಗ್ಗಮ್ಹಿ ಮೋದಹಂ.
‘‘ಏಕನವುತಿತೋ ಕಪ್ಪೇ, ಕೇಸರಂ ಓಕಿರಿಂ ತದಾ;
ದುಗ್ಗತಿಂ ನಾಭಿಜಾನಾಮಿ, ಬುದ್ಧಪೂಜಾಯಿದಂ ಫಲಂ.
‘‘ಪಟಿಸಮ್ಭಿದಾ ಚತಸ್ಸೋ, ವಿಮೋಕ್ಖಾಪಿ ಚ ಅಟ್ಠಿಮೇ;
ಛಳಭಿಞ್ಞಾ ಸಚ್ಛಿಕತಾ, ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ¶ ಸುದಂ ಆಯಸ್ಮಾ ಪದುಮಕೇಸರಿಯೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಪದುಮಕೇಸರಿಯತ್ಥೇರಸ್ಸಾಪದಾನಂ ಪಠಮಂ.
೨. ಸಬ್ಬಗನ್ಧಿಯತ್ಥೇರಅಪದಾನಂ
‘‘ಗನ್ಧಮಾಲಂ ಮಯಾ ದಿನ್ನಂ, ವಿಪಸ್ಸಿಸ್ಸ ಮಹೇಸಿನೋ;
ಅದಾಸಿಂ ಉಜುಭೂತಸ್ಸ, ಕೋಸೇಯ್ಯವತ್ಥಮುತ್ತಮಂ.
‘‘ಏಕನವುತಿತೋ ಕಪ್ಪೇ, ಯಂ ವತ್ಥಮದದಿಂ [ಗನ್ಧಮದದಿಂ (ಸ್ಯಾ.)] ಪುರೇ;
ದುಗ್ಗತಿಂ ನಾಭಿಜಾನಾಮಿ, ಗನ್ಧದಾನಸ್ಸಿದಂ ಫಲಂ.
‘‘ಇತೋ ¶ ಪನ್ನರಸೇ ಕಪ್ಪೇ, ಸುಚೇಳೋ ನಾಮ ಖತ್ತಿಯೋ;
ಸತ್ತರತನಸಮ್ಪನ್ನೋ, ಚಕ್ಕವತ್ತೀ ಮಹಬ್ಬಲೋ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಸಬ್ಬಗನ್ಧಿಯೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಸಬ್ಬಗನ್ಧಿಯತ್ಥೇರಸ್ಸಾಪದಾನಂ ದುತಿಯಂ.
೩. ಪರಮನ್ನದಾಯಕತ್ಥೇರಅಪದಾನಂ
‘‘ಕಣಿಕಾರಂವ ¶ ¶ ಜೋತನ್ತಂ, ಉದಯನ್ತಂವ ಭಾಣುಮಂ;
ವಿಪಸ್ಸಿಂ ಅದ್ದಸಂ ಬುದ್ಧಂ, ಲೋಕಜೇಟ್ಠಂ ನರಾಸಭಂ.
‘‘ಅಞ್ಜಲಿಂ ¶ ಪಗ್ಗಹೇತ್ವಾನ, ಅಭಿನೇಸಿಂ ಸಕಂ ಘರಂ;
ಅಭಿನೇತ್ವಾನ ಸಮ್ಬುದ್ಧಂ, ಪರಮನ್ನಮದಾಸಹಂ.
‘‘ಏಕನವುತಿತೋ ಕಪ್ಪೇ, ಪರಮನ್ನಮದಿಂ [ಪರಮನ್ನಂ ದದಿಂ (ಸೀ.), ಪರಮನ್ನಮದಂ (ಸ್ಯಾ.)] ತದಾ;
ದುಗ್ಗತಿಂ ನಾಭಿಜಾನಾಮಿ, ಪರಮನ್ನಸ್ಸಿದಂ ಫಲಂ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಪರಮನ್ನದಾಯಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಪರಮನ್ನದಾಯಕತ್ಥೇರಸ್ಸಾಪದಾನಂ ತತಿಯಂ.
೪. ಧಮ್ಮಸಞ್ಞಕತ್ಥೇರಅಪದಾನಂ
‘‘ವಿಪಸ್ಸಿನೋ ಭಗವತೋ, ಮಹಾಬೋಧಿಮಹೋ ಅಹು;
ರುಕ್ಖಟ್ಠಸ್ಸೇವ ಸಮ್ಬುದ್ಧೋ, [ರುಕ್ಖಟ್ಠೇಯೇವ ಸಮ್ಬುದ್ಧೇ (ಸೀ.), ರುಕ್ಖಟ್ಠೋ ಇವ ಸಮ್ಬುದ್ಧೋ (ಅಟ್ಠ.) ಏತ್ಥ ರುಕ್ಖಟ್ಠಸ್ಸೇವ ಬೋಧಿಮಹಕಾರಜನಸ್ಸ ಸಮ್ಬುದ್ಧೋ ಚತುಸಚ್ಚಂ ಪಕಾಸೇತೀತಿ ಅತ್ಥೋಪಿ ಸಕ್ಕಾ ಞಾತುಂ] ಲೋಕಜೇಟ್ಠೋ ನರಾಸಭೋ [ಲೋಕಜೇಟ್ಠೇ ನರಾಸಭೇ (ಸೀ.)].
‘‘ಭಗವಾ ತಮ್ಹಿ ಸಮಯೇ, ಭಿಕ್ಖುಸಙ್ಘಪುರಕ್ಖತೋ;
ಚತುಸಚ್ಚಂ ಪಕಾಸೇತಿ, ವಾಚಾಸಭಿಮುದೀರಯಂ.
‘‘ಸಙ್ಖಿತ್ತೇನ ಚ ದೇಸೇನ್ತೋ, ವಿತ್ಥಾರೇನ ಚ ದೇಸಯಂ [ದೇಸಯಿ (ಸ್ಯಾ.), ಭಾಸತಿ (ಕ.)];
ವಿವಟ್ಟಚ್ಛದೋ ಸಮ್ಬುದ್ಧೋ, ನಿಬ್ಬಾಪೇಸಿ ಮಹಾಜನಂ.
‘‘ತಸ್ಸಾಹಂ ಧಮ್ಮಂ ಸುತ್ವಾನ, ಲೋಕಜೇಟ್ಠಸ್ಸ ತಾದಿನೋ;
ವನ್ದಿತ್ವಾ ಸತ್ಥುನೋ ಪಾದೇ, ಪಕ್ಕಾಮಿಂ ಉತ್ತರಾಮುಖೋ.
‘‘ಏಕನವುತಿತೋ ¶ ಕಪ್ಪೇ, ಯಂ ಧಮ್ಮಮಸುಣಿಂ ತದಾ;
ದುಗ್ಗತಿಂ ನಾಭಿಜಾನಾಮಿ, ಧಮ್ಮಸವಸ್ಸಿದಂ ಫಲಂ.
‘‘ತೇತ್ತಿಂಸಮ್ಹಿ ¶ ಇತೋ ಕಪ್ಪೇ, ಏಕೋ ಆಸಿಂ ಮಹೀಪತಿ;
ಸುತವಾ ನಾಮ ನಾಮೇನ, ಚಕ್ಕವತ್ತೀ ಮಹಬ್ಬಲೋ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಧಮ್ಮಸಞ್ಞಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಧಮ್ಮಸಞ್ಞಕತ್ಥೇರಸ್ಸಾಪದಾನಂ ಚತುತ್ಥಂ.
೫. ಫಲದಾಯಕತ್ಥೇರಅಪದಾನಂ
‘‘ಭಾಗೀರಥೀನದೀತೀರೇ ¶ ¶ , ಅಹೋಸಿ ಅಸ್ಸಮೋ ತದಾ;
ತಮಹಂ ಅಸ್ಸಮಂ ಗಚ್ಛಿಂ, ಫಲಹತ್ಥೋ ಅಪೇಕ್ಖವಾ.
‘‘ವಿಪಸ್ಸಿಂ ತತ್ಥ ಅದ್ದಕ್ಖಿಂ, ಪೀತರಂಸಿಂವ ಭಾಣುಮಂ;
ಯಂ ಮೇ ಅತ್ಥಿ ಫಲಂ ಸಬ್ಬಂ, ಅದಾಸಿಂ ಸತ್ಥುನೋ ಅಹಂ.
‘‘ಏಕನವುತಿತೋ ಕಪ್ಪೇ, ಯಂ ಫಲಂ ಅದದಿಂ ತದಾ;
ದುಗ್ಗತಿಂ ನಾಭಿಜಾನಾಮಿ, ಫಲದಾನಸ್ಸಿದಂ ಫಲಂ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ¶ ಸುದಂ ಆಯಸ್ಮಾ ಫಲದಾಯಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಫಲದಾಯಕತ್ಥೇರಸ್ಸಾಪದಾನಂ ಪಞ್ಚಮಂ.
೬. ಸಮ್ಪಸಾದಕತ್ಥೇರಅಪದಾನಂ
‘‘‘ನಮೋ ತೇ ಬುದ್ಧ ವೀರತ್ಥು, ವಿಪ್ಪಮುತ್ತೋಸಿ ಸಬ್ಬಧಿ;
ಬ್ಯಸನಮ್ಹಿ [ಬ್ಯಸನಂ ಹಿ (ಸೀ.)] ಅನುಪ್ಪತ್ತೋ, ತಸ್ಸ ಮೇ ಸರಣಂ ಭವ’.
‘‘ಸಿದ್ಧತ್ಥೋ ತಸ್ಸ ಬ್ಯಾಕಾಸಿ, ಲೋಕೇ ಅಪ್ಪಟಿಪುಗ್ಗಲೋ;
‘ಮಹೋದಧಿಸಮೋ ಸಙ್ಘೋ, ಅಪ್ಪಮೇಯ್ಯೋ ಅನುತ್ತರೋ.
‘‘‘ತತ್ಥ ತ್ವಂ ವಿರಜೇ ಖೇತ್ತೇ, ಅನನ್ತಫಲದಾಯಕೇ;
ಸಙ್ಘೇ ಚಿತ್ತಂ ಪಸಾದೇತ್ವಾ, ಸುಬೀಜಂ ವಾಪ [ಚಾಪಿ (ಸೀ.), ವಾಪಿ (ಸ್ಯಾ.)] ರೋಪಯ.
‘‘ಇದಂ ¶ ವತ್ವಾನ ಸಬ್ಬಞ್ಞೂ, ಲೋಕಜೇಟ್ಠೋ ನರಾಸಭೋ;
ಮಮೇವ ಅನುಸಾಸಿತ್ವಾ, ವೇಹಾಸಂ ನಭಮುಗ್ಗಮಿ.
‘‘ಅಚಿರಂ ಗತಮತ್ತಮ್ಹಿ, ಸಬ್ಬಞ್ಞುಮ್ಹಿ ನರಾಸಭೇ;
ಮರಣಂ ಸಮನುಪ್ಪತ್ತೋ, ತುಸಿತಂ ಉಪಪಜ್ಜಹಂ.
‘‘ತದಾಹಂ ವಿರಜೇ ಖೇತ್ತೇ, ಅನನ್ತಫಲದಾಯಕೇ;
ಸಙ್ಘೇ ಚಿತ್ತಂ ಪಸಾದೇತ್ವಾ, ಕಪ್ಪಂ ಸಗ್ಗಮ್ಹಿ ಮೋದಹಂ.
‘‘ಚತುನ್ನವುತಿತೋ ಕಪ್ಪೇ, ಪಸಾದಮಲಭಿಂ ತದಾ;
ದುಗ್ಗತಿಂ ನಾಭಿಜಾನಾಮಿ, ಪಸಾದಸ್ಸ ಇದಂ ಫಲಂ.
‘‘ಪಟಿಸಮ್ಭಿದಾ ¶ ¶ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಸಮ್ಪಸಾದಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಸಮ್ಪಸಾದಕತ್ಥೇರಸ್ಸಾಪದಾನಂ ಛಟ್ಠಂ.
೭. ಆರಾಮದಾಯಕತ್ಥೇರಅಪದಾನಂ
‘‘ಸಿದ್ಧತ್ಥಸ್ಸ ¶ ಭಗವತೋ, ಆರಾಮೋ ರೋಪಿತೋ ಮಯಾ;
ಸನ್ದಚ್ಛಾಯೇಸು [ಸೀತಛಾಯೇಸು (ಸ್ಯಾ.), ಸನ್ತಚ್ಛಾಯೇಸು (ಕ.)] ರುಕ್ಖೇಸು, ಉಪಾಸನ್ತೇಸು ಪಕ್ಖಿಸು.
‘‘ಅದ್ದಸಂ ವಿರಜಂ ಬುದ್ಧಂ, ಆಹುತೀನಂ ಪಟಿಗ್ಗಹಂ;
ಆರಾಮಂ ಅಭಿನಾಮೇಸಿಂ, ಲೋಕಜೇಟ್ಠಂ ನರಾಸಭಂ.
‘‘ಹಟ್ಠೋ ಹಟ್ಠೇನ ಚಿತ್ತೇನ, ಫಲಂ ಪುಪ್ಫಮದಾಸಹಂ;
ತತೋ ಜಾತಪ್ಪಸಾದೋವ, ತಂ ವನಂ ಪರಿಣಾಮಯಿಂ.
‘‘ಬುದ್ಧಸ್ಸ ಯಮಿದಂ ದಾಸಿಂ, ವಿಪ್ಪಸನ್ನೇನ ಚೇತಸಾ;
ಭವೇ ನಿಬ್ಬತ್ತಮಾನಮ್ಹಿ, ನಿಬ್ಬತ್ತತಿ ಫಲಂ ಮಮ.
‘‘ಚತುನ್ನವುತಿತೋ ಕಪ್ಪೇ, ಯಂ ಆರಾಮಮದಂ ತದಾ;
ದುಗ್ಗತಿಂ ನಾಭಿಜಾನಾಮಿ, ಆರಾಮಸ್ಸ ಇದಂ ಫಲಂ.
‘‘ಸತ್ತತಿಂಸೇ ಇತೋ ಕಪ್ಪೇ, ಸತ್ತಾಸುಂ ಮುದುಸೀತಲಾ;
ಸತ್ತರತನಸಮ್ಪನ್ನಾ, ಚಕ್ಕವತ್ತೀ ಮಹಬ್ಬಲಾ.
‘‘ಪಟಿಸಮ್ಭಿದಾ ¶ ¶ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಆರಾಮದಾಯಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಆರಾಮದಾಯಕತ್ಥೇರಸ್ಸಾಪದಾನಂ ಸತ್ತಮಂ.
೮. ಅನುಲೇಪದಾಯಕತ್ಥೇರಅಪದಾನಂ
‘‘ಅತ್ಥದಸ್ಸಿಸ್ಸ ಮುನಿನೋ, ಅದ್ದಸಂ ಸಾವಕಂ ಅಹಂ;
ನವಕಮ್ಮಂ ಕರೋನ್ತಸ್ಸ, ಸೀಮಾಯ ಉಪಗಚ್ಛಹಂ.
‘‘ನಿಟ್ಠಿತೇ ನವಕಮ್ಮೇ ಚ, ಅನುಲೇಪಮದಾಸಹಂ;
ಪಸನ್ನಚಿತ್ತೋ ಸುಮನೋ, ಪುಞ್ಞಕ್ಖೇತ್ತೇ ಅನುತ್ತರೇ.
‘‘ಅಟ್ಠಾರಸೇ ¶ ಕಪ್ಪಸತೇ, ಯಂ ಕಮ್ಮಮಕರಿಂ ತದಾ;
ದುಗ್ಗತಿಂ ನಾಭಿಜಾನಾಮಿ, ಅನುಲೇಪಸ್ಸಿದಂ ಫಲಂ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಅನುಲೇಪದಾಯಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಅನುಲೇಪದಾಯಕತ್ಥೇರಸ್ಸಾಪದಾನಂ ಅಟ್ಠಮಂ.
೯. ಬುದ್ಧಸಞ್ಞಕತ್ಥೇರಅಪದಾನಂ
‘‘ಉದೇನ್ತಂ ¶ ¶ ಸತರಂಸಿಂವ, ಪೀತರಂಸಿಂವ ಭಾಣುಮಂ;
ವನನ್ತರಗತಂ ಸನ್ತಂ, ಲೋಕಜೇಟ್ಠಂ ನರಾಸಭಂ.
‘‘ಅದ್ದಸಂ ಸುಪಿನನ್ತೇನ, ಸಿದ್ಧತ್ಥಂ ಲೋಕನಾಯಕಂ;
ತತ್ಥ ಚಿತ್ತಂ ಪಸಾದೇತ್ವಾ, ಸುಗತಿಂ ಉಪಪಜ್ಜಹಂ.
‘‘ಚತುನ್ನವುತಿತೋ ಕಪ್ಪೇ, ಯಂ ಸಞ್ಞಮಲಭಿಂ ತದಾ;
ದುಗ್ಗತಿಂ ನಾಭಿಜಾನಾಮಿ, ಬುದ್ಧಸಞ್ಞಾಯಿದಂ ಫಲಂ.
‘‘ಪಟಿಸಮ್ಭಿದಾ ¶ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಬುದ್ಧಸಞ್ಞಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಬುದ್ಧಸಞ್ಞಕತ್ಥೇರಸ್ಸಾಪದಾನಂ ನವಮಂ.
೧೦. ಪಬ್ಭಾರದಾಯಕತ್ಥೇರಅಪದಾನಂ
‘‘ಪಿಯದಸ್ಸಿನೋ ಭಗವತೋ, ಪಬ್ಭಾರೋ ಸೋಧಿತೋ ಮಯಾ;
ಘಟಕಞ್ಚ ಉಪಟ್ಠಾಸಿಂ, ಪರಿಭೋಗಾಯ ತಾದಿನೋ.
‘‘ತಂ ಮೇ ಬುದ್ಧೋ ವಿಯಾಕಾಸಿ, ಪಿಯದಸ್ಸೀ ಮಹಾಮುನಿ;
ಸಹಸ್ಸಕಣ್ಡೋ ಸತಭೇಣ್ಡು [ಸತಗೇಣ್ಡು (ಸ್ಯಾ. ಕ.)], ಧಜಾಲು ಹರಿತಾಮಯೋ.
‘‘ನಿಬ್ಬತ್ತಿಸ್ಸತಿ ¶ ಸೋ ಯೂಪೋ, ರತನಞ್ಚ ಅನಪ್ಪಕಂ;
ಪಬ್ಭಾರದಾನಂ ದತ್ವಾನ, ಕಪ್ಪಂ ಸಗ್ಗಮ್ಹಿ ಮೋದಹಂ.
‘‘ಇತೋ ಬಾತ್ತಿಂಸಕಪ್ಪಮ್ಹಿ, ಸುಸುದ್ಧೋ ನಾಮ ಖತ್ತಿಯೋ;
ಸತ್ತರತನಸಮ್ಪನ್ನೋ, ಚಕ್ಕವತ್ತೀ ಮಹಬ್ಬಲೋ.
‘‘ಪಟಿಸಮ್ಭಿದಾ ¶ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಪಬ್ಭಾರದಾಯಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಪಬ್ಭಾರದಾಯಕತ್ಥೇರಸ್ಸಾಪದಾನಂ ದಸಮಂ.
ಪದುಮಕೇಸರವಗ್ಗೋ ಏಕತಿಂಸತಿಮೋ.
ತಸ್ಸುದ್ದಾನಂ –
ಕೇಸರಂ ಗನ್ಧಮನ್ನಞ್ಚ, ಧಮ್ಮಸಞ್ಞೀ ಫಲೇನ ಚ;
ಪಸಾದಾರಾಮದಾಯೀ ಚ, ಲೇಪಕೋ ಬುದ್ಧಸಞ್ಞಕೋ;
ಪಬ್ಭಾರದೋ ಚ ಗಾಥಾಯೋ, ಏಕಪಞ್ಞಾಸ ಕಿತ್ತಿತಾ.
೩೨. ಆರಕ್ಖದಾಯಕವಗ್ಗೋ
೧. ಆರಕ್ಖದಾಯಕತ್ಥೇರಅಪದಾನಂ
‘‘ಧಮ್ಮದಸ್ಸಿಸ್ಸ ¶ ¶ ¶ ¶ ಮುನಿನೋ, ವತಿ ಕಾರಾಪಿತಾ ಮಯಾ;
ಆರಕ್ಖೋ ಚ ಮಯಾ ದಿನ್ನೋ, ದ್ವಿಪದಿನ್ದಸ್ಸ ತಾದಿನೋ.
‘‘ಅಟ್ಠಾರಸೇ ಕಪ್ಪಸತೇ, ಯಂ ಕಮ್ಮಮಕರಿಂ ತದಾ;
ತೇನ ಕಮ್ಮವಿಸೇಸೇನ, ಪತ್ತೋ ಮೇ ಆಸವಕ್ಖಯೋ.
‘‘ಪಟಿಸಮ್ಭಿದಾ ಚತಸ್ಸೋ, ವಿಮೋಕ್ಖಾಪಿ ಚ ಅಟ್ಠಿಮೇ;
ಛಳಭಿಞ್ಞಾ ಸಚ್ಛಿಕತಾ, ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಆರಕ್ಖದಾಯಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಆರಕ್ಖದಾಯಕತ್ಥೇರಸ್ಸಾಪದಾನಂ ಪಠಮಂ.
೨. ಭೋಜನದಾಯಕತ್ಥೇರಅಪದಾನಂ
‘‘ಸುಜಾತೋ ಸಾಲಲಟ್ಠೀವ, ಸೋಭಞ್ಜನಮಿವುಗ್ಗತೋ;
ಇನ್ದಲಟ್ಠಿರಿವಾಕಾಸೇ, ವಿರೋಚತಿ ಸದಾ ಜಿನೋ.
‘‘ತಸ್ಸ ದೇವಾತಿದೇವಸ್ಸ, ವೇಸ್ಸಭುಸ್ಸ ಮಹೇಸಿನೋ;
ಅದಾಸಿ ಭೋಜನಮಹಂ, ವಿಪ್ಪಸನ್ನೇನ ಚೇತಸಾ.
‘‘ತಂ ಮೇ ಬುದ್ಧೋ ಅನುಮೋದಿ, ಸಯಮ್ಭೂ ಅಪರಾಜಿತೋ;
ಭವೇ ನಿಬ್ಬತ್ತಮಾನಮ್ಹಿ, ಫಲಂ ನಿಬ್ಬತ್ತತೂ ತವ.
‘‘ಏಕತ್ತಿಂಸೇ ¶ ಇತೋ ಕಪ್ಪೇ, ಯಂ ದಾನಮದದಿಂ ತದಾ;
ದುಗ್ಗತಿಂ ನಾಭಿಜಾನಾಮಿ, ಭೋಜನಸ್ಸ ಇದಂ ಫಲಂ.
‘‘ಪಞ್ಚವೀಸೇ ಇತೋ ಕಪ್ಪೇ, ಏಕೋ ಆಸಿಂ ಅಮಿತ್ತಕೋ;
ಸತ್ತರತನಸಮ್ಪನ್ನೋ, ಚಕ್ಕವತ್ತೀ ಮಹಬ್ಬಲೋ.
‘‘ಪಟಿಸಮ್ಭಿದಾ ¶ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಭೋಜನದಾಯಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಭೋಜನದಾಯಕತ್ಥೇರಸ್ಸಾಪದಾನಂ ದುತಿಯಂ.
೩. ಗತಸಞ್ಞಕತ್ಥೇರಅಪದಾನಂ
‘‘ಆಕಾಸೇವ ¶ ಪದಂ ನತ್ಥಿ, ಅಮ್ಬರೇ ಅನಿಲಞ್ಜಸೇ;
ಸಿದ್ಧತ್ಥಂ ಜಿನಮದ್ದಕ್ಖಿಂ, ಗಚ್ಛನ್ತಂ ತಿದಿವಙ್ಗಣೇ [ತಿದಿವಙ್ಗಣಂ (ಸ್ಯಾ. ಕ.)].
‘‘ಅನಿಲೇನೇರಿತಂ ದಿಸ್ವಾ, ಸಮ್ಮಾಸಮ್ಬುದ್ಧಚೀವರಂ;
ವಿತ್ತಿ ಮಮಾಹು ತಾವದೇ [ವಿತ್ತಿ ಮೇ ಪಾಹುಣಾ ತಾವ (ಸ್ಯಾ.), ವಿತ್ತಿ ಮೇ ತಾವದೇ ಜಾತಾ (ಸೀ.)], ದಿಸ್ವಾನ ಗಮನಂ ಮುನಿಂ [ಮುನೇ (ಸೀ.)].
‘‘ಚತುನ್ನವುತಿತೋ ¶ ಕಪ್ಪೇ, ಯಂ ಸಞ್ಞಮಲಭಿಂ ತದಾ;
ದುಗ್ಗತಿಂ ನಾಭಿಜಾನಾಮಿ, ಬುದ್ಧಸಞ್ಞಾಯಿದಂ ಫಲಂ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ¶ ಸುದಂ ಆಯಸ್ಮಾ ಗತಸಞ್ಞಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಗತಸಞ್ಞಕತ್ಥೇರಸ್ಸಾಪದಾನಂ ತತಿಯಂ.
೪. ಸತ್ತಪದುಮಿಯತ್ಥೇರಅಪದಾನಂ
‘‘ನದೀಕೂಲೇ ವಸಾಮಹಂ, ನೇಸಾದೋ ನಾಮ ಬ್ರಾಹ್ಮಣೋ;
ಸತಪತ್ತೇಹಿ ಪುಪ್ಫೇಹಿ, ಸಮ್ಮಜ್ಜಿತ್ವಾನ ಅಸ್ಸಮಂ.
‘‘ಸುವಣ್ಣವಣ್ಣಂ ಸಮ್ಬುದ್ಧಂ, ಸಿದ್ಧತ್ಥಂ ಲೋಕನಾಯಕಂ;
ದಿಸ್ವಾ ನಭೇನ [ವನೇನ (ಸ್ಯಾ. ಕ.)] ಗಚ್ಛನ್ತಂ, ಹಾಸೋ ಮೇ ಉದಪಜ್ಜಥ.
‘‘ಪಚ್ಚುಗ್ಗನ್ತ್ವಾನ ಸಮ್ಬುದ್ಧಂ, ಲೋಕಜೇಟ್ಠಂ ನರಾಸಭಂ;
ಅಸ್ಸಮಂ ಅತಿನಾಮೇತ್ವಾ, ಜಲಜಗ್ಗೇಹಿ ಓಕಿರಿಂ.
‘‘ಚತುನ್ನವುತಿತೋ ಕಪ್ಪೇ, ಯಂ ಪುಪ್ಫಮಭಿರೋಪಯಿಂ;
ದುಗ್ಗತಿಂ ನಾಭಿಜಾನಾಮಿ, ಬುದ್ಧಪೂಜಾಯಿದಂ ಫಲಂ.
‘‘ಇತೋ ತೇ ಸತ್ತಮೇ ಕಪ್ಪೇ, ಚತುರೋ ಪಾದಪಾವರಾ;
ಸತ್ತರತನಸಮ್ಪನ್ನಾ, ಚಕ್ಕವತ್ತೀ ಮಹಬ್ಬಲಾ.
‘‘ಪಟಿಸಮ್ಭಿದಾ ¶ ¶ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಸತ್ತಪದುಮಿಯೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಸತ್ತಪದುಮಿಯತ್ಥೇರಸ್ಸಾಪದಾನಂ ಚತುತ್ಥಂ.
೫. ಪುಪ್ಫಾಸನದಾಯಕತ್ಥೇರಅಪದಾನಂ
‘‘ಸುವಣ್ಣವಣ್ಣಂ ¶ ಸಮ್ಬುದ್ಧಂ, ಪೀತರಂಸಿಂವ [ಸತರಂಸಿಂವ (ಸೀ. ಸ್ಯಾ.)] ಭಾಣುಮಂ;
ಅವಿದೂರೇನ ಗಚ್ಛನ್ತಂ, ಸಿದ್ಧತ್ಥಂ ಅಪರಾಜಿತಂ.
‘‘ತಸ್ಸ ಪಚ್ಚುಗ್ಗಮಿತ್ವಾನ, ಪವೇಸೇತ್ವಾನ ಅಸ್ಸಮಂ;
ಪುಪ್ಫಾಸನಂ ಮಯಾ ದಿನ್ನಂ, ವಿಪ್ಪಸನ್ನೇನ ಚೇತಸಾ.
‘‘ಅಞ್ಜಲಿಂ ಪಗ್ಗಹೇತ್ವಾನ, ವೇದಜಾತೋ ತದಾ ಅಹಂ;
ಬುದ್ಧೇ ಚಿತ್ತಂ ಪಸಾದೇತ್ವಾ, ತಂ ಕಮ್ಮಂ ಪರಿಣಾಮಯಿಂ.
‘‘ಯಂ ¶ ಮೇ ಅತ್ಥಿ ಕತಂ ಪುಞ್ಞಂ, ಸಯಮ್ಭುಮ್ಹಪರಾಜಿತೇ;
ಸಬ್ಬೇನ ತೇನ ಕುಸಲೇನ, ವಿಮಲೋ ಹೋಮಿ ಸಾಸನೇ.
‘‘ಚತುನ್ನವುತಿತೋ ಕಪ್ಪೇ, ಪುಪ್ಫಾಸನಮದಂ ತದಾ;
ದುಗ್ಗತಿಂ ನಾಭಿಜಾನಾಮಿ, ಪುಪ್ಫಾಸನಸ್ಸಿದಂ ಫಲಂ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಪುಪ್ಫಾಸನದಾಯಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಪುಪ್ಫಾಸನದಾಯಕತ್ಥೇರಸ್ಸಾಪದಾನಂ ಪಞ್ಚಮಂ.
೬. ಆಸನಸನ್ಥವಿಕತ್ಥೇರಅಪದಾನಂ
‘‘ಚೇತಿಯಂ ಉತ್ತಮಂ ನಾಮ, ಸಿಖಿನೋ ಲೋಕಬನ್ಧುನೋ;
ಅರಞ್ಞೇ ಇರೀಣೇ ವನೇ, ಅನ್ಧಾಹಿಣ್ಡಾಮಹಂ ತದಾ.
‘‘ಪವನಾ ¶ ನಿಕ್ಖಮನ್ತೇನ, ದಿಟ್ಠಂ ಸೀಹಾಸನಂ ಮಯಾ;
ಏಕಂಸಂ ಅಞ್ಜಲಿಂ ಕತ್ವಾ, ಸನ್ಥವಿಂ [ಥವಿಸ್ಸಂ (ಸೀ.)] ಲೋಕನಾಯಕಂ.
‘‘ದಿವಸಭಾಗಂ ¶ ಥವಿತ್ವಾನ, ಬುದ್ಧಂ ಲೋಕಗ್ಗನಾಯಕಂ;
ಹಟ್ಠೋ ಹಟ್ಠೇನ ಚಿತ್ತೇನ, ಇಮಂ ವಾಚಂ ಉದೀರಯಿಂ.
‘‘‘ನಮೋ ¶ ತೇ ಪುರಿಸಾಜಞ್ಞ, ನಮೋ ತೇ ಪುರಿಸುತ್ತಮ;
ಸಬ್ಬಞ್ಞೂಸಿ ಮಹಾವೀರ, ಲೋಕಜೇಟ್ಠ ನರಾಸಭ’.
‘‘ಅಭಿತ್ಥವಿತ್ವಾ ಸಿಖಿನಂ, ನಿಮಿತ್ತಕರಣೇನಹಂ;
ಆಸನಂ ಅಭಿವಾದೇತ್ವಾ, ಪಕ್ಕಾಮಿಂ ಉತ್ತರಾಮುಖೋ.
‘‘ಏಕತ್ತಿಂಸೇ ಇತೋ ಕಪ್ಪೇ, ಯಂ ಥವಿಂ ವದತಂ ವರಂ;
ದುಗ್ಗತಿಂ ನಾಭಿಜಾನಾಮಿ, ಥೋಮನಾಯ ಇದಂ ಫಲಂ.
‘‘ಸತ್ತವೀಸೇ ಇತೋ ಕಪ್ಪೇ, ಅತುಲಾ ಸತ್ತ ಆಸು ತೇ;
ಸತ್ತರತನಸಮ್ಪನ್ನಾ, ಚಕ್ಕವತ್ತೀ ಮಹಬ್ಬಲಾ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಆಸನಸನ್ಥವಿಕೋ [ಆಸನಸನ್ಥವಕೋ (?), ಆಸನಥವಿಕೋ (ಕ.), ಆಸನತ್ಥವಿಕೋ (ಸೀ. ಸ್ಯಾ.)] ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಆಸನಸನ್ಥವಿಕತ್ಥೇರಸ್ಸಾಪದಾನಂ ಛಟ್ಠಂ.
೭. ಸದ್ದಸಞ್ಞಕತ್ಥೇರಅಪದಾನಂ
‘‘ಸುದಸ್ಸನೋ ¶ ಮಹಾವೀರೋ, ದೇಸೇತಿ ಅಮತಂ ಪದಂ;
ಪರಿವುತೋ ಸಾವಕೇಹಿ, ವಸತಿ ಘರಮುತ್ತಮೇ.
‘‘ತಾಯ ¶ ವಾಚಾಯ ಮಧುರಾಯ, ಸಙ್ಗಣ್ಹಾತಿ [ಸಙ್ಗಣ್ಹನ್ತೇ (ಸೀ.)] ಮಹಾಜನಂ;
ಘೋಸೋ ಚ ವಿಪುಲೋ ಆಸಿ, ಆಸೀಸೋ [ಆಸಂಸೋ (ಸೀ.)] ದೇವಮಾನುಸೇ.
‘‘ನಿಗ್ಘೋಸಸದ್ದಂ ಸುತ್ವಾನ, ಸಿದ್ಧತ್ಥಸ್ಸ ಮಹೇಸಿನೋ;
ಸದ್ದೇ ಚಿತ್ತಂ ಪಸಾದೇತ್ವಾ, ಅವನ್ದಿಂ ಲೋಕನಾಯಕಂ.
‘‘ಚತುನ್ನವುತಿತೋ ಕಪ್ಪೇ, ಯಂ ಸಞ್ಞಮಲಭಿಂ ತದಾ;
ದುಗ್ಗತಿಂ ನಾಭಿಜಾನಾಮಿ, ಬುದ್ಧಸಞ್ಞಾಯಿದಂ ಫಲಂ.
‘‘ಪಟಿಸಮ್ಭಿದಾ ¶ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಸದ್ದಸಞ್ಞಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಸದ್ದಸಞ್ಞಕತ್ಥೇರಸ್ಸಾಪದಾನಂ ಸತ್ತಮಂ.
೮. ತಿರಂಸಿಯತ್ಥೇರಅಪದಾನಂ
‘‘ಕೇಸರಿಂ ¶ ಅಭಿಜಾತಂವ, ಅಗ್ಗಿಕ್ಖನ್ಧಂವ ಪಬ್ಬತೇ;
ಓಭಾಸೇನ್ತಂ ದಿಸಾ ಸಬ್ಬಾ [ನಿವಾಸೇನ್ತಂ (ಕ.), ದಿಸಾಸಿನ್ನಂ (ಸ್ಯಾ.)], ಸಿದ್ಧತ್ಥಂ ಪಬ್ಬತನ್ತರೇ.
‘‘ಸೂರಿಯಸ್ಸ ಚ ಆಲೋಕಂ, ಚನ್ದಾಲೋಕಂ ತಥೇವ ಚ;
ಬುದ್ಧಾಲೋಕಞ್ಚ ದಿಸ್ವಾನ, ವಿತ್ತಿ ಮೇ ಉದಪಜ್ಜಥ.
‘‘ತಯೋ ಆಲೋಕೇ ದಿಸ್ವಾನ, ಸಮ್ಬುದ್ಧಂ [ಬುದ್ಧಞ್ಚ (ಸೀ.)] ಸಾವಕುತ್ತಮಂ;
ಏಕಂಸಂ ಅಜಿನಂ ಕತ್ವಾ, ಸನ್ಥವಿಂ ಲೋಕನಾಯಕಂ.
‘‘ತಯೋ ¶ ಹಿ ಆಲೋಕಕರಾ, ಲೋಕೇ ಲೋಕತಮೋನುದಾ;
ಚನ್ದೋ ಚ ಸೂರಿಯೋ ಚಾಪಿ, ಬುದ್ಧೋ ಚ ಲೋಕನಾಯಕೋ.
‘‘ಓಪಮ್ಮಂ ಉಪದಸ್ಸೇತ್ವಾ, ಕಿತ್ತಿತೋ ಮೇ ಮಹಾಮುನಿ;
ಬುದ್ಧಸ್ಸ ವಣ್ಣಂ ಕಿತ್ತೇತ್ವಾ, ಕಪ್ಪಂ ಸಗ್ಗಮ್ಹಿ ಮೋದಹಂ.
‘‘ಚತುನ್ನವುತಿತೋ ಕಪ್ಪೇ, ಯಂ ಬುದ್ಧಮಭಿಕಿತ್ತಯಿಂ;
ದುಗ್ಗತಿಂ ನಾಭಿಜಾನಾಮಿ, ಕಿತ್ತನಾಯ ಇದಂ ಫಲಂ.
‘‘ಏಕಸಟ್ಠಿಮ್ಹಿತೋ ¶ ಕಪ್ಪೇ, ಏಕೋ ಞಾಣಧರೋ ಅಹು;
ಸತ್ತರತನಸಮ್ಪನ್ನೋ, ಚಕ್ಕವತ್ತೀ ಮಹಬ್ಬಲೋ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ತಿರಂಸಿಯೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ತಿರಂಸಿಯತ್ಥೇರಸ್ಸಾಪದಾನಂ ಅಟ್ಠಮಂ.
೯. ಕನ್ದಲಿಪುಪ್ಫಿಯತ್ಥೇರಅಪದಾನಂ
‘‘ಸಿನ್ಧುಯಾ ¶ ನದಿಯಾ ತೀರೇ, ಅಹೋಸಿಂ ಕಸ್ಸಕೋ ತದಾ;
ಪರಕಮ್ಮಾಯನೇ ಯುತ್ತೋ, ಪರಭತ್ತಂ ಅಪಸ್ಸಿತೋ.
‘‘ಸಿನ್ಧುಂ ಅನುಚರನ್ತೋಹಂ, ಸಿದ್ಧತ್ಥಂ ಜಿನಮದ್ದಸಂ;
ಸಮಾಧಿನಾ ನಿಸಿನ್ನಂವ, ಸತಪತ್ತಂವ ಪುಪ್ಫಿತಂ.
‘‘ಸತ್ತ ¶ ಕನ್ದಲಿಪುಪ್ಫಾನಿ, ವಣ್ಟೇ ಛೇತ್ವಾನಹಂ ತದಾ;
ಮತ್ಥಕೇ ಅಭಿರೋಪೇಸಿಂ, ಬುದ್ಧಸ್ಸಾದಿಚ್ಚಬನ್ಧುನೋ.
‘‘ಸುವಣ್ಣವಣ್ಣಂ ¶ ಸಮ್ಬುದ್ಧಂ, ಅನುಕೂಲೇ ಸಮಾಹಿತಂ;
ತಿಧಾಪಭಿನ್ನಮಾತಙ್ಗಂ, ಕುಞ್ಜರಂವ ದುರಾಸದಂ.
‘‘ತಮಹಂ ಉಪಗನ್ತ್ವಾನ, ನಿಪಕಂ ಭಾವಿತಿನ್ದ್ರಿಯಂ;
ಅಞ್ಜಲಿಂ ಪಗ್ಗಹೇತ್ವಾನ, ಅವನ್ದಿಂ ಸತ್ಥುನೋ ಅಹಂ.
‘‘ಚತುನ್ನವುತಿತೋ ಕಪ್ಪೇ, ಯಂ ಪುಪ್ಫಮಭಿರೋಪಯಿಂ;
ದುಗ್ಗತಿಂ ನಾಭಿಜಾನಾಮಿ, ಬುದ್ಧಪೂಜಾಯಿದಂ ಫಲಂ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಕನ್ದಲಿಪುಪ್ಫಿಯೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಕನ್ದಲಿಪುಪ್ಫಿಯತ್ಥೇರಸ್ಸಾಪದಾನಂ ನವಮಂ.
೧೦. ಕುಮುದಮಾಲಿಯತ್ಥೇರಅಪದಾನಂ
‘‘ಉಸಭಂ ಪವರಂ ವೀರಂ, ಮಹೇಸಿಂ ವಿಜಿತಾವಿನಂ;
ವಿಪಸ್ಸಿನಂ ಮಹಾವೀರಂ, ಅಭಿಜಾತಂವ ಕೇಸರಿಂ.
‘‘ರಥಿಯಂ ಪಟಿಪಜ್ಜನ್ತಂ, ಆಹುತೀನಂ ಪಟಿಗ್ಗಹಂ;
ಗಹೇತ್ವಾ ಕುಮುದಂ ಮಾಲಂ, ಬುದ್ಧಸೇಟ್ಠಂ ಸಮೋಕಿರಿಂ.
‘‘ಏಕನವುತಿತೋ ¶ ¶ ಕಪ್ಪೇ, ಯಂ ಪುಪ್ಫಮಭಿಪೂಜಯಿಂ;
ದುಗ್ಗತಿಂ ನಾಭಿಜಾನಾಮಿ, ಬುದ್ಧಪೂಜಾಯಿದಂ ಫಲಂ.
‘‘ಪಟಿಸಮ್ಭಿದಾ ¶ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಕುಮುದಮಾಲಿಯೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಕುಮುದಮಾಲಿಯತ್ಥೇರಸ್ಸಾಪದಾನಂ ದಸಮಂ.
ಆರಕ್ಖದಾಯಕವಗ್ಗೋ ಬಾತ್ತಿಂಸತಿಮೋ [ಬತ್ತಿಂಸತಿಮೋ (ಸೀ. ಸ್ಯಾ.)].
ತಸ್ಸುದ್ದಾನಂ –
ಆರಕ್ಖದೋ ಭೋಜನದೋ, ಗತಸಞ್ಞೀ ಪದುಮಿಯೋ;
ಪುಪ್ಫಾಸನೀ ಸನ್ಥವಿಕೋ, ಸದ್ದಸಞ್ಞೀ ತಿರಂಸಿಯೋ;
ಕನ್ದಲಿಕೋ ಕುಮುದೀ ಚ, ಸತ್ತಪಞ್ಞಾಸ ಗಾಥಕಾತಿ.
೩೩. ಉಮಾಪುಪ್ಫಿಯವಗ್ಗೋ
೧. ಉಮಾಪುಪ್ಫಿಯತ್ಥೇರಅಪದಾನಂ
‘‘ಸಮಾಹಿತಂ ¶ ¶ ¶ ಸಮಾಪನ್ನಂ, ಸಿದ್ಧತ್ಥಮಪರಾಜಿತಂ;
ಸಮಾಧಿನಾ ಉಪವಿಟ್ಠಂ, ಅದ್ದಸಾಹಂ ನರುತ್ತಮಂ.
‘‘ಉಮಾಪುಪ್ಫಂ ಗಹೇತ್ವಾನ, ಬುದ್ಧಸ್ಸ ಅಭಿರೋಪಯಿಂ;
ಸಬ್ಬಪುಪ್ಫಾ ಏಕಸೀಸಾ, ಉದ್ಧಂವಣ್ಟಾ ಅಧೋಮುಖಾ.
‘‘ಸುಚಿತ್ತಾ ವಿಯ ತಿಟ್ಠನ್ತೇ, ಆಕಾಸೇ ಪುಪ್ಫಸನ್ಥರಾ;
ತೇನ ಚಿತ್ತಪ್ಪಸಾದೇನ, ತುಸಿತಂ ಉಪಪಜ್ಜಹಂ.
‘‘ಚತುನ್ನವುತಿತೋ ಕಪ್ಪೇ, ಯಂ ಪುಪ್ಫಮಭಿಪೂಜಯಿಂ;
ದುಗ್ಗತಿಂ ನಾಭಿಜಾನಾಮಿ, ಬುದ್ಧಪೂಜಾಯಿದಂ ಫಲಂ.
‘‘ಪಞ್ಚಪಞ್ಞಾಸಿತೋ ಕಪ್ಪೇ, ಏಕೋ ಆಸಿಂ ಮಹೀಪತಿ;
ಸಮನ್ತಛದನೋ ನಾಮ, ಚಕ್ಕವತ್ತೀ ಮಹಬ್ಬಲೋ.
‘‘ಪಟಿಸಮ್ಭಿದಾ ಚತಸ್ಸೋ, ವಿಮೋಕ್ಖಾಪಿ ಚ ಅಟ್ಠಿಮೇ;
ಛಳಭಿಞ್ಞಾ ಸಚ್ಛಿಕತಾ, ಕತಂ ಬುದ್ಧಸ್ಸ ಸಾಸನಂ.
ಇತ್ಥಂ ಸುದಂ ಆಯಸ್ಮಾ ಉಮಾಪುಪ್ಫಿಯೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಉಮಾಪುಪ್ಫಿಯತ್ಥೇರಸ್ಸಾಪದಾನಂ ಪಠಮಂ.
೨. ಪುಲಿನಪೂಜಕತ್ಥೇರಅಪದಾನಂ
‘‘ಕಕುಧಂ ¶ ¶ ವಿಲಸನ್ತಂವ, ನಿಸಭಾಜಾನಿಯಂ ಯಥಾ;
ಓಸಧಿಂವ ವಿರೋಚನ್ತಂ, ಓಭಾಸನ್ತಂ ನರಾಸಭಂ.
‘‘ಅಞ್ಜಲಿಂ ಪಗ್ಗಹೇತ್ವಾನ, ಅವನ್ದಿಂ ಸತ್ಥುನೋ ಅಹಂ;
ಸತ್ಥಾರಂ ಪರಿವಣ್ಣೇಸಿಂ, ಸಕಕಮ್ಮೇನ ತೋಸಯಿಂ [ತೋಸಿತೋ (ಸೀ.)].
‘‘ಸುಸುದ್ಧಂ ¶ ಪುಲಿನಂ ಗಯ್ಹ, ಗತಮಗ್ಗೇ ಸಮೋಕಿರಿಂ;
ಉಚ್ಛಙ್ಗೇನ ಗಹೇತ್ವಾನ, ವಿಪಸ್ಸಿಸ್ಸ ಮಹೇಸಿನೋ.
‘‘ತತೋ ¶ ಉಪಡ್ಢಪುಲಿನಂ, ವಿಪ್ಪಸನ್ನೇನ ಚೇತಸಾ;
ದಿವಾವಿಹಾರೇ ಓಸಿಞ್ಚಿಂ, ದ್ವಿಪದಿನ್ದಸ್ಸ ತಾದಿನೋ.
‘‘ಏಕನವುತಿತೋ ಕಪ್ಪೇ, ಪುಲಿನಂ ಯಮಸಿಞ್ಚಹಂ;
ದುಗ್ಗತಿಂ ನಾಭಿಜಾನಾಮಿ, ಪುಲಿನಸ್ಸ ಇದಂ ಫಲಂ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಪುಲಿನಪೂಜಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಪುಲಿನಪೂಜಕತ್ಥೇರಸ್ಸಾಪದಾನಂ ದುತಿಯಂ.
೩. ಹಾಸಜನಕತ್ಥೇರಅಪದಾನಂ
‘‘ದುಮಗ್ಗೇ ಪಂಸುಕೂಲಕಂ [ಪಂಸುಕೂಲಿಕಂ (ಸ್ಯಾ. ಕ.)], ಲಗ್ಗಂ ದಿಸ್ವಾನ ಸತ್ಥುನೋ;
ಅಞ್ಜಲಿಂ ಪಗ್ಗಹೇತ್ವಾನ, ಭಿಯ್ಯೋ ಉಚ್ಚಾರಿತಂ ಮಯಾ.
‘‘ದೂರತೋ ¶ ಪನ ದಿಸ್ವಾನ [ಪತಿದಿಸ್ವಾನ (ಸೀ. ಸ್ಯಾ.)], ಹಾಸೋ ಮೇ ಉದಪಜ್ಜಥ;
ಅಞ್ಜಲಿಂ ಪಗ್ಗಹೇತ್ವಾನ, ಭಿಯ್ಯೋ ಚಿತ್ತಂ ಪಸಾದಯಿಂ.
‘‘ಏಕನವುತಿತೋ ಕಪ್ಪೇ, ಯಂ ಸಞ್ಞಮಲಭಿಂ ತದಾ;
ದುಗ್ಗತಿಂ ನಾಭಿಜಾನಾಮಿ, ಬುದ್ಧಸಞ್ಞಾಯಿದಂ ಫಲಂ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಹಾಸಜನಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಹಾಸಜನಕತ್ಥೇರಸ್ಸಾಪದಾನಂ ತತಿಯಂ.
೪. ಯಞ್ಞಸಾಮಿಕತ್ಥೇರಅಪದಾನಂ
‘‘ಜಾತಿಯಾ ¶ ಸತ್ತವಸ್ಸೋಹಂ, ಅಹೋಸಿಂ ಮನ್ತಪಾರಗೂ;
ಕುಲವತ್ತಂ [ಕುಲವಂಸಂ (ಸೀ. ಸ್ಯಾ.)] ಅಧಾರೇಸಿಂ, ಯಞ್ಞೋ ಉಸ್ಸಾಹಿತೋ ಮಯಾ.
‘‘ಚುಲ್ಲಾಸೀತಿಸಹಸ್ಸಾನಿ ¶ , ಪಸೂ ಹಞ್ಞನ್ತಿ ಮೇ ತದಾ;
ಸಾರಥಮ್ಭುಪನೀತಾನಿ [ತಾರಸ್ಮೀಹಿ ಉಪನೀತಾನಿ (ಕ.), ಸಾರಸ್ಮಿಂಹಿ ಉಪನೀತಾನಿ (ಸ್ಯಾ.)], ಯಞ್ಞತ್ಥಾಯ ಉಪಟ್ಠಿತಾ.
‘‘ಉಕ್ಕಾಮುಖಪಹಟ್ಠೋವ ¶ , ಖದಿರಙ್ಗಾರಸನ್ನಿಭೋ;
ಉದಯನ್ತೋವ ಸೂರಿಯೋ, ಪುಣ್ಣಮಾಯೇವ [ಪುಣ್ಣಮಾಸೇವ (ಸೀ.)] ಚನ್ದಿಮಾ.
‘‘ಸಿದ್ಧತ್ಥೋ ಸಬ್ಬಸಿದ್ಧತ್ಥೋ, ತಿಲೋಕಮಹಿತೋ ಹಿತೋ;
ಉಪಗನ್ತ್ವಾನ ಸಮ್ಬುದ್ಧೋ, ಇದಂ ವಚನಮಬ್ರವಿ.
‘‘‘ಅಹಿಂಸಾ ¶ ಸಬ್ಬಪಾಣೀನಂ, ಕುಮಾರ ಮಮ ರುಚ್ಚತಿ;
ಥೇಯ್ಯಾ ಚ ಅತಿಚಾರಾ ಚ, ಮಜ್ಜಪಾನಾ ಚ ಆರತಿ.
‘‘‘ರತಿ ಚ ಸಮಚರಿಯಾಯ, ಬಾಹುಸಚ್ಚಂ ಕತಞ್ಞುತಾ;
ದಿಟ್ಠೇ ಧಮ್ಮೇ ಪರತ್ಥ ಚ, ಧಮ್ಮಾ ಏತೇ ಪಸಂಸಿಯಾ.
‘‘‘ಏತೇ ಧಮ್ಮೇ ಭಾವಯಿತ್ವಾ, ಸಬ್ಬಸತ್ತಹಿತೇ ರತೋ [ಹಿತೇಸಿತೋ (ಕ.)];
ಬುದ್ಧೇ ಚಿತ್ತಂ ಪಸಾದೇತ್ವಾ, ಭಾವೇಹಿ ಮಗ್ಗಮುತ್ತಮಂ’.
‘‘ಇದಂ ವತ್ವಾನ ಸಬ್ಬಞ್ಞೂ, ಲೋಕಜೇಟ್ಠೋ ನರಾಸಭೋ;
ಮಮೇವಂ ಅನುಸಾಸಿತ್ವಾ, ವೇಹಾಸಂ ಉಗ್ಗತೋ ಗತೋ.
‘‘ಪುಬ್ಬೇ ಚಿತ್ತಂ ವಿಸೋಧೇತ್ವಾ, ಪಚ್ಛಾ ಚಿತ್ತಂ ಪಸಾದಯಿಂ;
ತೇನ ಚಿತ್ತಪ್ಪಸಾದೇನ, ತುಸಿತಂ ಉಪಪಜ್ಜಹಂ.
‘‘ಚತುನ್ನವುತಿತೋ ಕಪ್ಪೇ, ಯದಾ ಚಿತ್ತಂ ಪಸಾದಯಿಂ;
ದುಗ್ಗತಿಂ ನಾಭಿಜಾನಾಮಿ, ಬುದ್ಧಸಞ್ಞಾಯಿದಂ ಫಲಂ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಯಞ್ಞಸಾಮಿಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಯಞ್ಞಸಾಮಿಕತ್ಥೇರಸ್ಸಾಪದಾನಂ ಚತುತ್ಥಂ.
೫. ನಿಮಿತ್ತಸಞ್ಞಕತ್ಥೇರಅಪದಾನಂ
‘‘ಚನ್ದಭಾಗಾನದೀತೀರೇ ¶ , ವಸಾಮಿ ಅಸ್ಸಮೇ ಅಹಂ;
ಸುವಣ್ಣಮಿಗಮದ್ದಕ್ಖಿಂ, ಚರನ್ತಂ ವಿಪಿನೇ ಅಹಂ.
‘‘ಮಿಗೇ ¶ ¶ ಚಿತ್ತಂ ಪಸಾದೇತ್ವಾ, ಲೋಕಜೇಟ್ಠಂ ಅನುಸ್ಸರಿಂ;
ತೇನ ಚಿತ್ತಪ್ಪಸಾದೇನ, ಅಞ್ಞೇ ಬುದ್ಧೇ ಅನುಸ್ಸರಿಂ.
‘‘ಅಬ್ಭತೀತಾ ಚ ಯೇ ಬುದ್ಧಾ, ವತ್ತಮಾನಾ ಅನಾಗತಾ;
ಏವಮೇವಂ ವಿರೋಚನ್ತಿ, ಮಿಗರಾಜಾವ ತೇ ತಯೋ.
‘‘ಚತುನ್ನವುತಿತೋ ¶ ಕಪ್ಪೇ, ಯಂ ಸಞ್ಞಮಲಭಿಂ ತದಾ;
ದುಗ್ಗತಿಂ ನಾಭಿಜಾನಾಮಿ, ಬುದ್ಧಸಞ್ಞಾಯಿದಂ ಫಲಂ.
‘‘ಸತ್ತವೀಸೇ ಇತೋ ಕಪ್ಪೇ, ಏಕೋ ಆಸಿಂ ಮಹೀಪತಿ;
ಅರಞ್ಞಸತ್ಥೋ ನಾಮೇನ, ಚಕ್ಕವತ್ತೀ ಮಹಬ್ಬಲೋ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ನಿಮಿತ್ತಸಞ್ಞಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ನಿಮಿತ್ತಸಞ್ಞಕತ್ಥೇರಸ್ಸಾಪದಾನಂ ಪಞ್ಚಮಂ.
೬. ಅನ್ನಸಂಸಾವಕತ್ಥೇರಅಪದಾನಂ
‘‘ಸುವಣ್ಣವಣ್ಣಂ ಸಮ್ಬುದ್ಧಂ, ಗಚ್ಛನ್ತಂ ಅನ್ತರಾಪಣೇ;
ಕಞ್ಚನಗ್ಘಿಯಸಙ್ಕಾಸಂ, ಬಾತ್ತಿಂಸವರಲಕ್ಖಣಂ.
‘‘ಸಿದ್ಧತ್ಥಂ ಸಬ್ಬಸಿದ್ಧತ್ಥಂ, ಅನೇಜಂ ಅಪರಾಜಿತಂ;
ಸಮ್ಬುದ್ಧಂ ಅತಿನಾಮೇತ್ವಾ, ಭೋಜಯಿಂ ತಂ ಮಹಾಮುನಿಂ.
‘‘ಮುನಿ ¶ ಕಾರುಣಿಕೋ ಲೋಕೇ, ಓಭಾಸಯಿ ಮಮಂ ತದಾ;
ಬುದ್ಧೇ ಚಿತ್ತಂ ಪಸಾದೇತ್ವಾ, ಕಪ್ಪಂ ಸಗ್ಗಮ್ಹಿ ಮೋದಹಂ.
‘‘ಚತುನ್ನವುತಿತೋ ಕಪ್ಪೇ, ಯಂ ದಾನಮದದಿಂ ತದಾ;
ದುಗ್ಗತಿಂ ನಾಭಿಜಾನಾಮಿ, ಭಿಕ್ಖಾದಾನಸ್ಸಿದಂ ಫಲಂ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಅನ್ನಸಂಸಾವಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ;
ಅನ್ನಸಂಸಾವಕತ್ಥೇರಸ್ಸಾಪದಾನಂ ಛಟ್ಠಂ.
೭. ನಿಗ್ಗುಣ್ಡಿಪುಪ್ಫಿಯತ್ಥೇರಅಪದಾನಂ
‘‘ಯದಾ ¶ ¶ ದೇವೋ ದೇವಕಾಯಾ, ಚವತೇ ಆಯುಸಙ್ಖಯಾ;
ತಯೋ ಸದ್ದಾ ನಿಚ್ಛರನ್ತಿ, ದೇವಾನಂ ಅನುಮೋದತಂ.
‘‘‘ಇತೋ ಭೋ ಸುಗತಿಂ ಗಚ್ಛ, ಮನುಸ್ಸಾನಂ ಸಹಬ್ಯತಂ;
ಮನುಸ್ಸಭೂತೋ ಸದ್ಧಮ್ಮೇ, ಲಭ ಸದ್ಧಂ ಅನುತ್ತರಂ.
‘‘‘ಸಾ ¶ ತೇ ಸದ್ಧಾ ನಿವಿಟ್ಠಾಸ್ಸ, ಮೂಲಜಾತಾ ಪತಿಟ್ಠಿತಾ;
ಯಾವಜೀವಂ ಅಸಂಹೀರಾ, ಸದ್ಧಮ್ಮೇ ಸುಪ್ಪವೇದಿತೇ.
‘‘‘ಕಾಯೇನ ಕುಸಲಂ ಕತ್ವಾ, ವಾಚಾಯ ಕುಸಲಂ ಬಹುಂ;
ಮನಸಾ ಕುಸಲಂ ಕತ್ವಾ, ಅಬ್ಯಾಪಜ್ಜಂ ನಿರೂಪಧಿಂ.
‘‘‘ತತೋ ¶ ಓಪಧಿಕಂ ಪುಞ್ಞಂ, ಕತ್ವಾ ದಾನೇನ ತಂ ಬಹುಂ;
ಅಞ್ಞೇಪಿ ಮಚ್ಚೇ ಸದ್ಧಮ್ಮೇ, ಬ್ರಹ್ಮಚರಿಯೇ ನಿವೇಸಯ’.
‘‘ಇಮಾಯ ಅನುಕಮ್ಪಾಯ, ದೇವಾದೇವಂ ಯದಾ ವಿದೂ;
ಚವನ್ತಂ ಅನುಮೋದನ್ತಿ, ಏಹಿ ದೇವ ಪುನಪ್ಪುನಂ [ದೇವಪುರಂ ಪುನ (ಸೀ.)].
‘‘ಸಂವೇಗೋ ಮೇ [ಸಂವಿಗ್ಗೋಹಂ (ಸ್ಯಾ.)] ತದಾ ಆಸಿ, ದೇವಸಙ್ಘೇ ಸಮಾಗತೇ;
ಕಂಸು ನಾಮ ಅಹಂ ಯೋನಿಂ, ಗಮಿಸ್ಸಾಮಿ ಇತೋ ಚುತೋ.
‘‘ಮಮ ಸಂವೇಗಮಞ್ಞಾಯ, ಸಮಣೋ ಭಾವಿತಿನ್ದ್ರಿಯೋ;
ಮಮುದ್ಧರಿತುಕಾಮೋ ಸೋ, ಆಗಚ್ಛಿ ಮಮ ಸನ್ತಿಕಂ.
‘‘ಸುಮನೋ ನಾಮ ನಾಮೇನ, ಪದುಮುತ್ತರಸಾವಕೋ;
ಅತ್ಥಧಮ್ಮಾನುಸಾಸಿತ್ವಾ, ಸಂವೇಜೇಸಿ ಮಮಂ ತದಾ.
ದ್ವಾದಸಮಂ ಭಾಣವಾರಂ.
‘‘ತಸ್ಸಾಹಂ ವಚನಂ ಸುತ್ವಾ, ಬುದ್ಧೇ ಚಿತ್ತಂ ಪಸಾದಯಿಂ;
ತಂ ಧೀರಂ ಅಭಿವಾದೇತ್ವಾ, ತತ್ಥ ಕಾಲಂಕತೋ ಅಹಂ.
‘‘ಉಪಪಜ್ಜಿಂ ಸ [ಉಪಪಜ್ಜಿಸ್ಸಂ (ಸೀ.)] ತತ್ಥೇವ, ಸುಕ್ಕಮೂಲೇನ ಚೋದಿತೋ;
ವಸನ್ತೋ ಮಾತುಕುಚ್ಛಿಮ್ಹಿ, ಪುನ ಧಾರೇತಿ ಮಾತುಯಾ.
‘‘ತಮ್ಹಾ ಕಾಯಾ ಚವಿತ್ವಾನ, ತಿದಸೇ ಉಪಪಜ್ಜಹಂ;
ಏತ್ಥನ್ತರೇ ನ ಪಸ್ಸಾಮಿ, ದೋಮನಸ್ಸಮಹಂ ತದಾ.
‘‘ತಾವತಿಂಸಾ ¶ ¶ ಚವಿತ್ವಾನ, ಮಾತುಕುಚ್ಛಿಂ ಸಮೋಕ್ಕಮಿಂ;
ನಿಕ್ಖಮಿತ್ವಾನ ಕುಚ್ಛಿಮ್ಹಾ, ಕಣ್ಹಸುಕ್ಕಂ ಅಜಾನಹಂ.
‘‘ಜಾತಿಯಾ ¶ ಸತ್ತವಸ್ಸೋವ [ಜಾತಿಯಾ ಸತ್ತವಸ್ಸೇನ (ಸ್ಯಾ.)], ಆರಾಮಂ ಪಾವಿಸಿಂ ಅಹಂ;
ಗೋತಮಸ್ಸ ಭಗವತೋ, ಸಕ್ಯಪುತ್ತಸ್ಸ ತಾದಿನೋ.
‘‘ವಿತ್ಥಾರಿಕೇ [ವಿತ್ಥಾರಿತೇ (ಸೀ. ಕ.)] ಪಾವಚನೇ, ಬಾಹುಜಞ್ಞಮ್ಹಿ ಸಾಸನೇ;
ಅದ್ದಸಂ ಸಾಸನಕರೇ, ಭಿಕ್ಖವೋ ತತ್ಥ ಸತ್ಥುನೋ.
‘‘ಸಾವತ್ಥಿ ¶ ನಾಮ ನಗರಂ, ರಾಜಾ ತತ್ಥಾಸಿ ಕೋಸಲೋ;
ರಥೇನ ನಾಗಯುತ್ತೇನ, ಉಪೇಸಿ ಬೋಧಿಮುತ್ತಮಂ.
‘‘ತಸ್ಸಾಹಂ ನಾಗಂ ದಿಸ್ವಾನ, ಪುಬ್ಬಕಮ್ಮಂ ಅನುಸ್ಸರಿಂ;
ಅಞ್ಜಲಿಂ ಪಗ್ಗಹೇತ್ವಾನ, ಸಮಯಂ ಅಗಮಾಸಹಂ.
‘‘ಜಾತಿಯಾ ಸತ್ತವಸ್ಸೋವ, ಪಬ್ಬಜಿಂ ಅನಗಾರಿಯಂ;
ಯೋ ಸೋ ಬುದ್ಧಂ ಉಪಟ್ಠಾಸಿ, ಆನನ್ದೋ ನಾಮ ಸಾವಕೋ.
‘‘ಗತಿಮಾ ಧಿತಿಮಾ ಚೇವ, ಸತಿಮಾ ಚ ಬಹುಸ್ಸುತೋ;
ರಞ್ಞೋ ಚಿತ್ತಂ ಪಸಾದೇನ್ತೋ, ನಿಯ್ಯಾದೇಸಿ ಮಹಾಜುತಿ.
‘‘ತಸ್ಸಾಹಂ ಧಮ್ಮಂ ಸುತ್ವಾನ, ಪುಬ್ಬಕಮ್ಮಂ ಅನುಸ್ಸರಿಂ;
ತತ್ಥೇವ ಠಿತಕೋ ಸನ್ತೋ, ಅರಹತ್ತಮಪಾಪುಣಿಂ.
‘‘ಏಕಂಸಂ ಚೀವರಂ ಕತ್ವಾ, ಸಿರೇ ಕತ್ವಾನ ಅಞ್ಜಲಿಂ;
ಸಮ್ಬುದ್ಧಂ ಅಭಿವಾದೇತ್ವಾ, ಇಮಂ ವಾಚಂ ಉದೀರಯಿಂ.
‘‘‘ಪದುಮುತ್ತರಬುದ್ಧಸ್ಸ, ದ್ವಿಪದಿನ್ದಸ್ಸ ಸತ್ಥುನೋ;
ನಿಗ್ಗುಣ್ಡಿಪುಪ್ಫಂ ಪಗ್ಗಯ್ಹ, ಸೀಹಾಸನೇ ಠಪೇಸಹಂ.
‘‘‘ತೇನ ಕಮ್ಮೇನ ದ್ವಿಪದಿನ್ದ, ಲೋಕಜೇಟ್ಠ ನರಾಸಭ;
ಪತ್ತೋಮ್ಹಿ ಅಚಲಂ ಠಾನಂ, ಹಿತ್ವಾ ಜಯಪರಾಜಯಂ’.
‘‘ಪಞ್ಚವೀಸಸಹಸ್ಸಮ್ಹಿ ¶ , ಕಪ್ಪಾನಂ ಮನುಜಾಧಿಪಾ;
ಅಬ್ಬುದನಿರಬ್ಬುದಾನಿ, ಅಟ್ಠಟ್ಠಾಸಿಂಸು ಖತ್ತಿಯಾ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ನಿಗ್ಗುಣ್ಡಿಪುಪ್ಫಿಯೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ನಿಗ್ಗುಣ್ಡಿಪುಪ್ಫಿಯತ್ಥೇರಸ್ಸಾಪದಾನಂ ಸತ್ತಮಂ.
೮. ಸುಮನಾವೇಳಿಯತ್ಥೇರಅಪದಾನಂ
‘‘ವೇಸ್ಸಭುಸ್ಸ ¶ ¶ ಭಗವತೋ, ಲೋಕಜೇಟ್ಠಸ್ಸ ತಾದಿನೋ;
ಸಬ್ಬೇ ಜನಾ ಸಮಾಗಮ್ಮ, ಮಹಾಪೂಜಂ ಕರೋನ್ತಿ ತೇ.
‘‘ಸುಧಾಯ ಪಿಣ್ಡಂ ಕತ್ವಾನ, ಆವೇಳಂ ಸುಮನಾಯಹಂ;
ಸೀಹಾಸನಸ್ಸ ಪುರತೋ, ಅಭಿರೋಪೇಸಹಂ ತದಾ.
‘‘ಸಬ್ಬೇ ¶ ಜನಾ ಸಮಾಗಮ್ಮ, ಪೇಕ್ಖನ್ತಿ ಪುಪ್ಫಮುತ್ತಮಂ;
ಕೇನಿದಂ ಪೂಜಿತಂ ಪುಪ್ಫಂ, ಬುದ್ಧಸೇಟ್ಠಸ್ಸ ತಾದಿನೋ.
‘‘ತೇನ ಚಿತ್ತಪ್ಪಸಾದೇನ, ನಿಮ್ಮಾನಂ ಉಪಪಜ್ಜಹಂ;
ಅನುಭೋಮಿ [ಅನುಭೋಸಿಂ (ಸೀ.)] ಸಕಂ ಕಮ್ಮಂ, ಪುಬ್ಬೇ ಸುಕತಮತ್ತನೋ.
‘‘ಯಂ ಯಂ ಯೋನುಪಪಜ್ಜಾಮಿ, ದೇವತ್ತಂ ಅಥ ಮಾನುಸಂ;
ಸಬ್ಬೇಸಾನಂ ಪಿಯೋ ಹೋಮಿ, ಪುಪ್ಫಪೂಜಾಯಿದಂ ಫಲಂ.
‘‘ನಾಭಿಜಾನಾಮಿ ¶ ಕಾಯೇನ, ವಾಚಾಯ ಉದ ಚೇತಸಾ;
ಸಂಯತಾನಂ ತಪಸ್ಸೀನಂ, ಕತಂ ಅಕ್ಕೋಸಿತಂ ಮಯಾ.
‘‘ತೇನ ಸುಚರಿತೇನಾಹಂ, ಚಿತ್ತಸ್ಸ ಪಣಿಧೀಹಿ ಚ;
ಸಬ್ಬೇಸಂ ಪೂಜಿತೋ ಹೋಮಿ, ಅನಕ್ಕೋಸಸ್ಸಿದಂ ಫಲಂ.
‘‘ಇತೋ ಏಕಾದಸೇ ಕಪ್ಪೇ, ಸಹಸ್ಸಾರೋಸಿ ಖತ್ತಿಯೋ;
ಸತ್ತರತನಸಮ್ಪನ್ನೋ, ಚಕ್ಕವತ್ತೀ ಮಹಬ್ಬಲೋ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಸುಮನಾವೇಳಿಯೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಸುಮನಾವೇಳಿಯತ್ಥೇರಸ್ಸಾಪದಾನಂ ಅಟ್ಠಮಂ.
೯. ಪುಪ್ಫಚ್ಛತ್ತಿಯತ್ಥೇರಅಪದಾನಂ
‘‘ಸಿದ್ಧತ್ಥಸ್ಸ ಭಗವತೋ, ಲೋಕಜೇಟ್ಠಸ್ಸ ತಾದಿನೋ;
ಸಚ್ಚಂ ಪಕಾಸಯನ್ತಸ್ಸ, ನಿಬ್ಬಾಪೇನ್ತಸ್ಸ ಪಾಣಿನೋ.
‘‘ಜಲಜಂ ¶ ಆಹರಿತ್ವಾನ, ಸತಪತ್ತಂ ಮನೋರಮಂ;
ಪುಪ್ಫಸ್ಸ ಛತ್ತಂ ಕತ್ವಾನ, ಬುದ್ಧಸ್ಸ ಅಭಿರೋಪಯಿಂ.
‘‘ಸಿದ್ಧತ್ಥೋ ¶ ¶ ಚ ಲೋಕವಿದೂ, ಆಹುತೀನಂ ಪಟಿಗ್ಗಹೋ;
ಭಿಕ್ಖುಸಙ್ಘೇ ಠಿತೋ ಸತ್ಥಾ, ಇಮಂ ಗಾಥಂ ಅಭಾಸಥ.
‘‘‘ಯೋ ಮೇ ಚಿತ್ತಂ ಪಸಾದೇತ್ವಾ, ಪುಪ್ಫಚ್ಛತ್ತಂ ಅಧಾರಯಿಂ;
ತೇನ ಚಿತ್ತಪ್ಪಸಾದೇನ, ದುಗ್ಗತಿಂ ಸೋ ನ ಗಚ್ಛತಿ’.
‘‘ಇದಂ ವತ್ವಾನ ಸಮ್ಬುದ್ಧೋ, ಸಿದ್ಧತ್ಥೋ ಲೋಕನಾಯಕೋ;
ಉಯ್ಯೋಜೇತ್ವಾನ ಪರಿಸಂ, ವೇಹಾಸಂ ನಭಮುಗ್ಗಮಿ.
‘‘ವುಟ್ಠಿತೇ ¶ ನರದೇವಮ್ಹಿ, ಸೇತಚ್ಛತ್ತಮ್ಪಿ ವುಟ್ಠಹಿ;
ಪುರತೋ ಬುದ್ಧಸೇಟ್ಠಸ್ಸ, ಗಚ್ಛತಿ ಛತ್ತಮುತ್ತಮಂ.
‘‘ಚತುನ್ನವುತಿತೋ ಕಪ್ಪೇ, ಯಂ ಛತ್ತಂ ಅಭಿರೋಪಯಿಂ;
ದುಗ್ಗತಿಂ ನಾಭಿಜಾನಾಮಿ, ಪುಪ್ಫಚ್ಛತ್ತಸ್ಸಿದಂ ಫಲಂ.
‘‘ಚತುಸತ್ತತಿಕಪ್ಪಮ್ಹಿ, ಅಟ್ಠ ಜಲಸಿಖಾ ಅಹೂ;
ಸತ್ತರತನಸಮ್ಪನ್ನಾ, ಚಕ್ಕವತ್ತೀ ಮಹಬ್ಬಲಾ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಪುಪ್ಫಚ್ಛತ್ತಿಯೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಪುಪ್ಫಚ್ಛತ್ತಿಯತ್ಥೇರಸ್ಸಾಪದಾನಂ ನವಮಂ.
೧೦. ಸಪರಿವಾರಛತ್ತದಾಯಕತ್ಥೇರಅಪದಾನಂ
‘‘ಪದುಮುತ್ತರೋ ಲೋಕವಿದೂ, ಆಹುತೀನಂ ಪಟಿಗ್ಗಹೋ;
ಆಕಾಸೇ ಜಲವುಟ್ಠೀವ ವಸ್ಸತೇ [ವಸ್ಸತಿ (ಸೀ. ಸ್ಯಾ.), ವಸ್ಸೇತಿ (?)] ಧಮ್ಮವುಟ್ಠಿಯಾ.
‘‘ತಮದ್ದಸಾಸಿಂ ¶ ಸಮ್ಬುದ್ಧಂ, ದೇಸೇನ್ತಂ ಅಮತಂ ಪದಂ;
ಸಕಂ ಚಿತ್ತಂ ಪಸಾದೇತ್ವಾ, ಅಗಮಾಸಿಂ ಸಕಂ ಘರಂ.
‘‘ಛತ್ತಂ ಅಲಙ್ಕತಂ ಗಯ್ಹ, ಉಪಗಚ್ಛಿಂ ನರುತ್ತಮಂ;
ಹಟ್ಠೋ ಹಟ್ಠೇನ ಚಿತ್ತೇನ, ಆಕಾಸೇ ಉಕ್ಖಿಪಿಂ ಅಹಂ.
‘‘ಸುಸಙ್ಗಹಿತಯಾನಂವ ¶ , ದನ್ತೋವ ಸಾವಕುತ್ತಮೋ;
ಉಪಗನ್ತ್ವಾನ ಸಮ್ಬುದ್ಧಂ, ಮತ್ಥಕೇ ಸಮ್ಪತಿಟ್ಠಹಿ.
‘‘ಅನುಕಮ್ಪಕೋ ಕಾರುಣಿಕೋ, ಬುದ್ಧೋ ಲೋಕಗ್ಗನಾಯಕೋ;
ಭಿಕ್ಖುಸಙ್ಘೇ ನಿಸೀದಿತ್ವಾ, ಇಮಾ ಗಾಥಾ ಅಭಾಸಥ.
‘‘‘ಯೇನ ಛತ್ತಮಿದಂ ದಿನ್ನಂ, ಅಲಙ್ಕತಂ ಮನೋರಮಂ;
ತೇನ ಚಿತ್ತಪ್ಪಸಾದೇನ, ದುಗ್ಗತಿಂ ಸೋ ನ ಗಚ್ಛತಿ.
‘‘‘ಸತ್ತಕ್ಖತ್ತುಞ್ಚ ¶ ದೇವೇಸು, ದೇವರಜ್ಜಂ ಕರಿಸ್ಸತಿ;
ಬಾತ್ತಿಂಸಕ್ಖತ್ತುಞ್ಚ ರಾಜಾ, ಚಕ್ಕವತ್ತೀ ಭವಿಸ್ಸತಿ.
‘‘‘ಕಪ್ಪಸತಸಹಸ್ಸಮ್ಹಿ, ಓಕ್ಕಾಕಕುಲಸಮ್ಭವೋ;
ಗೋತಮೋ ನಾಮ ಗೋತ್ತೇನ, ಸತ್ಥಾ ಲೋಕೇ ಭವಿಸ್ಸತಿ.
‘‘‘ತಸ್ಸ ¶ ಧಮ್ಮೇಸು ದಾಯಾದೋ, ಓರಸೋ ಧಮ್ಮನಿಮ್ಮಿತೋ;
ಸಬ್ಬಾಸವೇ ಪರಿಞ್ಞಾಯ, ನಿಬ್ಬಾಯಿಸ್ಸತಿನಾಸವೋ’.
‘‘ಬುದ್ಧಸ್ಸ ಗಿರಮಞ್ಞಾಯ, ವಾಚಾಸಭಿಮುದೀರಿತಂ;
ಪಸನ್ನಚಿತ್ತೋ ಸುಮನೋ, ಭಿಯ್ಯೋ ಹಾಸಂ ಜನೇಸಹಂ.
‘‘ಜಹಿತ್ವಾ ಮಾನುಸಂ ಯೋನಿಂ, ದಿಬ್ಬಂ ಯೋನಿಂ [ದೇವಯೋನಿಂ (ಸೀ.), ದಿಬ್ಬಯೋನಿಂ (ಸ್ಯಾ.)] ಮಜ್ಝಗಂ;
ವಿಮಾನಮುತ್ತಮಂ ಮಯ್ಹಂ, ಅಬ್ಭುಗ್ಗತಂ ಮನೋರಮಂ.
‘‘ವಿಮಾನಾ ¶ ನಿಕ್ಖಮನ್ತಸ್ಸ, ಸೇತಚ್ಛತ್ತಂ ಧರೀಯತಿ;
ತದಾ ಸಞ್ಞಂ ಪಟಿಲಭಿಂ, ಪುಬ್ಬಕಮ್ಮಸ್ಸಿದಂ ಫಲಂ.
‘‘ದೇವಲೋಕಾ ಚವಿತ್ವಾನ, ಮನುಸ್ಸತ್ತಞ್ಚ ಆಗಮಿಂ;
ಛತ್ತಿಂಸಕ್ಖತ್ತುಂ ಚಕ್ಕವತ್ತೀ, ಸತ್ತಕಪ್ಪಸತಮ್ಹಿತೋ.
‘‘ತಮ್ಹಾ ಕಾಯಾ ಚವಿತ್ವಾನ, ಆಗಚ್ಛಿಂ [ಅಗಞ್ಛಿಂ (?)] ತಿದಸಂ ಪುರಂ;
ಸಂಸರಿತ್ವಾನುಪುಬ್ಬೇನ, ಮಾನುಸಂ ಪುನರಾಗಮಿಂ.
‘‘ಓಕ್ಕನ್ತಂ ಮಾತುಕುಚ್ಛಿಂ ಮಂ, ಸೇತ್ತಚ್ಛತ್ತಂ ಅಧಾರಯುಂ;
ಜಾತಿಯಾ ಸತ್ತವಸ್ಸೋಹಂ, ಪಬ್ಬಜಿಂ ಅನಗಾರಿಯಂ.
‘‘ಸುನನ್ದೋ ನಾಮ ನಾಮೇನ, ಬ್ರಾಹ್ಮಣೋ ಮನ್ತಪಾರಗೂ;
ಫಲಿಕಂ ಛತ್ತಮಾದಾಯ, ಸಾವಕಗ್ಗಸ್ಸ ಸೋ ತದಾ.
‘‘ಅನುಮೋದಿ ¶ ಮಹಾವೀರೋ, ಸಾರಿಪುತ್ತೋ ಮಹಾಕಥೀ;
ಸುತ್ವಾನುಮೋದನಂ ತಸ್ಸ, ಪುಬ್ಬಕಮ್ಮಮನುಸ್ಸರಿಂ.
‘‘ಅಞ್ಜಲಿಂ ಪಗ್ಗಹೇತ್ವಾನ, ಸಕಂ ಚಿತ್ತಂ ಪಸಾದಯಿಂ;
ಸರಿತ್ವಾ ಪುರಿಮಂ ಕಮ್ಮಂ, ಅರಹತ್ತಮಪಾಪುಣಿಂ.
‘‘ಉಟ್ಠಾಯ ಆಸನಾ ತಮ್ಹಾ, ಸಿರೇ ಕತ್ವಾನ ಅಞ್ಜಲಿಂ;
ಸಮ್ಬುದ್ಧಂ ಅಭಿವಾದೇತ್ವಾ, ಇಮಂ ವಾಚಂ ಉದೀರಿಯಿಂ.
‘‘ಸತಸಹಸ್ಸಿತೋ ಕಪ್ಪೇ, ಬುದ್ಧೋ ಲೋಕೇ ಅನುತ್ತರೋ;
ಪದುಮುತ್ತರೋ ಲೋಕವಿದೂ, ಆಹುತೀನಂ ಪಟಿಗ್ಗಹೋ.
‘‘ತಸ್ಸ ಛತ್ತಂ ಮಯಾ ದಿನ್ನಂ, ವಿಚಿತ್ತಂ ಸಮಲಙ್ಕತಂ;
ಉಭೋ ಹತ್ಥೇಹಿ ಪಗ್ಗಣ್ಹಿ, ಸಯಮ್ಭೂ ಅಗ್ಗಪುಗ್ಗಲೋ.
‘‘ಅಹೋ ¶ ¶ ಬುದ್ಧೋ ಅಹೋ ಧಮ್ಮೋ, ಅಹೋ ನೋ ಸತ್ಥುಸಮ್ಪದಾ;
ಏಕಚ್ಛತ್ತಸ್ಸ ದಾನೇನ, ದುಗ್ಗತಿಂ ನುಪಪಜ್ಜಹಂ.
‘‘ಕಿಲೇಸಾ ¶ ಝಾಪಿತಾ ಮಯ್ಹಂ, ಭವಾ ಸಬ್ಬೇ ಸಮೂಹತಾ;
ಸಬ್ಬಾಸವೇ ಪರಿಞ್ಞಾಯ, ವಿಹರಾಮಿ ಅನಾಸವೋ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಸಪರಿವಾರಛತ್ತದಾಯಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಸಪರಿವಾರಛತ್ತದಾಯಕತ್ಥೇರಸ್ಸಾಪದಾನಂ ದಸಮಂ.
ಉಮಾಪುಪ್ಫಿಯವಗ್ಗೋ ತೇತ್ತಿಂಸತಿಮೋ.
ತಸ್ಸುದ್ದಾನಂ –
ಉಮಾಪುಪ್ಫಞ್ಚ ಪುಲಿನಂ, ಹಾಸೋ ಯಞ್ಞೋ ನಿಮಿತ್ತಕೋ;
ಸಂಸಾವಕೋ ನಿಗ್ಗುಣ್ಡೀ ಚ, ಸುಮನಂ ಪುಪ್ಫಛತ್ತಕೋ;
ಸಪರಿವಾರಛತ್ತೋ ಚ, ಗಾಥಾ ಸತ್ತಸತುತ್ತರಾತಿ.
೩೪. ಗನ್ಧೋದಕವಗ್ಗೋ
೧. ಗನ್ಧಧೂಪಿಯತ್ಥೇರಅಪದಾನಂ
‘‘ಸಿದ್ಧತ್ಥಸ್ಸ ¶ ¶ ¶ ಭಗವತೋ, ಗನ್ಧಧೂಪಂ ಅದಾಸಹಂ;
ಸುಮನೇಹಿ ಪಟಿಚ್ಛನ್ನಂ, ಬುದ್ಧಾನುಚ್ಛವಿಕಞ್ಚ ತಂ.
‘‘ಕಞ್ಚನಗ್ಘಿಯಸಙ್ಕಾಸಂ, ಬುದ್ಧಂ ಲೋಕಗ್ಗನಾಯಕಂ;
ಇನ್ದೀವರಂವ ಜಲಿತಂ, ಆದಿತ್ತಂವ ಹುತಾಸನಂ.
‘‘ಬ್ಯಗ್ಘುಸಭಂವ ಪವರಂ, ಅಭಿಜಾತಂವ ಕೇಸರಿಂ;
ನಿಸಿನ್ನಂ ಸಮಣಾನಗ್ಗಂ, ಭಿಕ್ಖುಸಙ್ಘಪುರಕ್ಖತಂ.
‘‘ದಿಸ್ವಾ ಚಿತ್ತಂ ಪಸಾದೇತ್ವಾ, ಪಗ್ಗಹೇತ್ವಾನ ಅಞ್ಜಲಿಂ;
ವನ್ದಿತ್ವಾ ಸತ್ಥುನೋ ಪಾದೇ, ಪಕ್ಕಾಮಿಂ ಉತ್ತರಾಮುಖೋ.
‘‘ಚತುನ್ನವುತಿತೋ ಕಪ್ಪೇ, ಯಂ ಗನ್ಧಮದದಿಂ ತದಾ;
ದುಗ್ಗತಿಂ ನಾಭಿಜಾನಾಮಿ, ಗನ್ಧಪೂಜಾಯಿದಂ ಫಲಂ.
‘‘ಪಟಿಸಮ್ಭಿದಾ ಚತಸ್ಸೋ, ವಿಮೋಕ್ಖಾಪಿ ಚ ಅಟ್ಠಿಮೇ;
ಛಳಭಿಞ್ಞಾ ಸಚ್ಛಿಕತಾ, ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಗನ್ಧಧೂಪಿಯೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಗನ್ಧಧೂಪಿಯತ್ಥೇರಸ್ಸಾಪದಾನಂ ಪಠಮಂ.
೨. ಉದಕಪೂಜಕತ್ಥೇರಅಪದಾನಂ
‘‘ಸುವಣ್ಣವಣ್ಣಂ ¶ ಸಮ್ಬುದ್ಧಂ, ಗಚ್ಛನ್ತಂ ಅನಿಲಞ್ಜಸೇ;
ಘತಾಸನಂವ ಜಲಿತಂ, ಆದಿತ್ತಂವ ಹುತಾಸನಂ.
‘‘ಪಾಣಿನಾ ಉದಕಂ ಗಯ್ಹ, ಆಕಾಸೇ ಉಕ್ಖಿಪಿಂ ಅಹಂ;
ಸಮ್ಪಟಿಚ್ಛಿ ಮಹಾವೀರೋ, ಬುದ್ಧೋ ಕಾರುಣಿಕೋ ಇಸಿ.
‘‘ಅನ್ತಲಿಕ್ಖೇ ಠಿತೋ ಸತ್ಥಾ, ಪದುಮುತ್ತರನಾಮಕೋ;
ಮಮ ಸಙ್ಕಪ್ಪಮಞ್ಞಾಯ, ಇಮಂ ಗಾಥಮಭಾಸಥ.
‘‘‘ಇಮಿನಾ ¶ ದಕದಾನೇನ, ಪೀತಿಉಪ್ಪಾದನೇನ ಚ;
ಕಪ್ಪಸತಸಹಸ್ಸಮ್ಪಿ, ದುಗ್ಗತಿಂ ನುಪಪಜ್ಜಸಿ’.
‘‘ತೇನ ¶ ಕಮ್ಮೇನ ದ್ವಿಪದಿನ್ದ, ಲೋಕಜೇಟ್ಠ ನರಾಸಭ;
ಪತ್ತೋಮ್ಹಿ ಅಚಲಂ ಠಾನಂ, ಹಿತ್ವಾ ಜಯಪರಾಜಯಂ.
‘‘ಸಹಸ್ಸರಾಜನಾಮೇನ, ತಯೋ ಚ ಚಕ್ಕವತ್ತಿನೋ;
ಪಞ್ಚಸಟ್ಠಿಕಪ್ಪಸತೇ, ಚಾತುರನ್ತಾ ಜನಾಧಿಪಾ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಉದಕಪೂಜಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಉದಕಪೂಜಕತ್ಥೇರಸ್ಸಾಪದಾನಂ ದುತಿಯಂ.
೩. ಪುನ್ನಾಗಪುಪ್ಫಿಯತ್ಥೇರಅಪದಾನಂ
‘‘ಕಾನನಂ ¶ ವನಮೋಗಯ್ಹ, ವಸಾಮಿ ಲುದ್ದಕೋ ಅಹಂ;
ಪುನ್ನಾಗಂ ಪುಪ್ಫಿತಂ ದಿಸ್ವಾ, ಬುದ್ಧಸೇಟ್ಠಂ ಅನುಸ್ಸರಿಂ.
‘‘ತಂ ಪುಪ್ಫಂ ಓಚಿನಿತ್ವಾನ, ಸುಗನ್ಧಂ ಗನ್ಧಿತಂ ಸುಭಂ;
ಥೂಪಂ ಕತ್ವಾನ ಪುಲಿನೇ, ಬುದ್ಧಸ್ಸ ಅಭಿರೋಪಯಿಂ.
‘‘ದ್ವೇನವುತೇ ಇತೋ ಕಪ್ಪೇ, ಯಂ ಪುಪ್ಫಮಭಿಪೂಜಯಿಂ;
ದುಗ್ಗತಿಂ ನಾಭಿಜಾನಾಮಿ, ಬುದ್ಧಪೂಜಾಯಿದಂ ಫಲಂ.
‘‘ಏಕಮ್ಹಿ ನವುತೇ ಕಪ್ಪೇ, ಏಕೋ ಆಸಿಂ ತಮೋನುದೋ;
ಸತ್ತರತನಸಮ್ಪನ್ನೋ, ಚಕ್ಕವತ್ತೀ ಮಹಬ್ಬಲೋ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಪುನ್ನಾಗಪುಪ್ಫಿಯೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಪುನ್ನಾಗಪುಪ್ಫಿಯತ್ಥೇರಸ್ಸಾಪದಾನಂ ತತಿಯಂ.
೪. ಏಕದುಸ್ಸದಾಯಕತ್ಥೇರಅಪದಾನಂ
‘‘ನಗರೇ ಹಂಸವತಿಯಾ, ಅಹೋಸಿಂ ತಿಣಹಾರಕೋ;
ತಿಣಹಾರೇನ ಜೀವಾಮಿ, ತೇನ ಪೋಸೇಮಿ ದಾರಕೇ.
‘‘ಪದುಮುತ್ತರೋ ¶ ¶ ನಾಮ ಜಿನೋ, ಸಬ್ಬಧಮ್ಮಾನ ಪಾರಗೂ;
ತಮನ್ಧಕಾರಂ ನಾಸೇತ್ವಾ, ಉಪ್ಪಜ್ಜಿ ಲೋಕನಾಯಕೋ.
‘‘ಸಕೇ ¶ ಘರೇ ನಿಸೀದಿತ್ವಾ, ಏವಂ ಚಿನ್ತೇಸಹಂ ತದಾ;
‘ಬುದ್ಧೋ ಲೋಕೇ ಸಮುಪ್ಪನ್ನೋ, ದೇಯ್ಯಧಮ್ಮೋ ಚ ನತ್ಥಿ ಮೇ.
‘‘‘ಇದಂ ಮೇ ಸಾಟಕಂ ಏಕಂ, ನತ್ಥಿ ಮೇ ಕೋಚಿ ದಾಯಕೋ;
ದುಕ್ಖೋ ನಿರಯಸಮ್ಫಸ್ಸೋ, ರೋಪಯಿಸ್ಸಾಮಿ ದಕ್ಖಿಣಂ’.
‘‘ಏವಾಹಂ ಚಿನ್ತಯಿತ್ವಾನ, ಸಕಂ ಚಿತ್ತಂ ಪಸಾದಯಿಂ;
ಏಕಂ ದುಸ್ಸಂ ಗಹೇತ್ವಾನ, ಬುದ್ಧಸೇಟ್ಠಸ್ಸದಾಸಹಂ.
‘‘ಏಕಂ ದುಸ್ಸಂ ದದಿತ್ವಾನ, ಉಕ್ಕುಟ್ಠಿಂ ಸಮ್ಪವತ್ತಯಿಂ;
ಯದಿ ಬುದ್ಧೋ ತುವಂ ವೀರ, ತಾರೇಹಿ ಮಂ ಮಹಾಮುನಿ.
‘‘ಪದುಮುತ್ತರೋ ಲೋಕವಿದೂ, ಆಹುತೀನಂ ಪಟಿಗ್ಗಹೋ;
ಮಮ ದಾನಂ ಪಕಿತ್ತೇನ್ತೋ, ಅಕಾ ಮೇ ಅನುಮೋದನಂ.
‘‘‘ಇಮಿನಾ ಏಕದುಸ್ಸೇನ, ಚೇತನಾಪಣಿಧೀಹಿ ಚ;
ಕಪ್ಪಸತಸಹಸ್ಸಾನಿ, ವಿನಿಪಾತಂ ನ ಗಚ್ಛತಿ.
‘‘‘ಛತ್ತಿಂಸಕ್ಖತ್ತುಂ ದೇವಿನ್ದೋ, ದೇವರಜ್ಜಂ ಕರಿಸ್ಸತಿ;
ತೇತ್ತಿಂಸಕ್ಖತ್ತುಂ ರಾಜಾ ಚ, ಚಕ್ಕವತ್ತೀ ಭವಿಸ್ಸತಿ;
ಪದೇಸರಜ್ಜಂ ವಿಪುಲಂ, ಗಣನಾತೋ ಅಸಙ್ಖಿಯಂ.
‘‘‘ದೇವಲೋಕೇ ಮನುಸ್ಸೇ ವಾ, ಸಂಸರನ್ತೋ ತುವಂ ಭವೇ;
ರೂಪವಾ ಗುಣಸಮ್ಪನ್ನೋ, ಅನವಕ್ಕನ್ತದೇಹವಾ;
ಅಕ್ಖೋಭಂ ಅಮಿತಂ ದುಸ್ಸಂ, ಲಭಿಸ್ಸಸಿ ಯದಿಚ್ಛಕಂ’.
‘‘ಇದಂ ¶ ವತ್ವಾನ ಸಮ್ಬುದ್ಧೋ, ಜಲಜುತ್ತಮನಾಮಕೋ;
ನಭಂ ಅಬ್ಭುಗ್ಗಮೀ ಧೀರೋ, ಹಂಸರಾಜಾವ ಅಮ್ಬರೇ.
‘‘ಯಂ ಯಂ ಯೋನುಪಪಜ್ಜಾಮಿ, ದೇವತ್ತಂ ಅಥ ಮಾನುಸಂ;
ಭೋಗೇ ಮೇ ಊನತಾ ನತ್ಥಿ, ಏಕದುಸ್ಸಸ್ಸಿದಂ ಫಲಂ.
‘‘ಪದುದ್ಧಾರೇ ಪದುದ್ಧಾರೇ, ದುಸ್ಸಂ ನಿಬ್ಬತ್ತತೇ ಮಮಂ;
ಹೇಟ್ಠಾ ದುಸ್ಸಮ್ಹಿ ತಿಟ್ಠಾಮಿ, ಉಪರಿ ಛದನಂ ಮಮ.
‘‘ಚಕ್ಕವಾಳಮುಪಾದಾಯ, ಸಕಾನನಂ ಸಪಬ್ಬತಂ;
ಇಚ್ಛಮಾನೋ ಚಹಂ ಅಜ್ಜ, ದುಸ್ಸೇಹಿ ಛಾದಯೇಯ್ಯಹಂ.
‘‘ತೇನೇವ ¶ ಏಕದುಸ್ಸೇನ, ಸಂಸರನ್ತೋ ಭವಾಭವೇ;
ಸುವಣ್ಣವಣ್ಣೋ ಹುತ್ವಾನ, ಸಂಸರಾಮಿ ಭವಾಭವೇ.
‘‘ವಿಪಾಕಂ ಏಕದುಸ್ಸಸ್ಸ, ನಜ್ಝಗಂ ಕತ್ಥಚಿಕ್ಖಯಂ;
ಅಯಂ ಮೇ ಅನ್ತಿಮಾ ಜಾತಿ, ವಿಪಚ್ಚತಿ ಇಧಾಪಿ ಮೇ.
‘‘ಸತಸಹಸ್ಸಿತೋ ¶ ಕಪ್ಪೇ, ಯಂ ದುಸ್ಸಮದದಿಂ ತದಾ;
ದುಗ್ಗತಿಂ ನಾಭಿಜಾನಾಮಿ, ಏಕದುಸ್ಸಸ್ಸಿದಂ ಫಲಂ.
‘‘ಕಿಲೇಸಾ ಝಾಪಿತಾ ಮಯ್ಹಂ, ಭವಾ ಸಬ್ಬೇ ಸಮೂಹತಾ;
ನಾಗೋವ ಬನ್ಧನಂ ಛೇತ್ವಾ, ವಿಹರಾಮಿ ಅನಾಸವೋ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಏಕದುಸ್ಸದಾಯಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಏಕದುಸ್ಸದಾಯಕತ್ಥೇರಸ್ಸಾಪದಾನಂ ಚತುತ್ಥಂ.
೫. ಫುಸಿತಕಮ್ಪಿಯತ್ಥೇರಅಪದಾನಂ
‘‘ವಿಪಸ್ಸೀ ¶ ¶ ನಾಮ [ಸಬ್ಬತ್ಥಪಿ ಏವಮೇವ ದಿಸ್ಸತಿ]
ಸಮ್ಬುದ್ಧೋ, ಲೋಕಜೇಟ್ಠೋ ನರಾಸಭೋ.
ಖೀಣಾಸವೇಹಿ ಸಹಿತೋ, ಸಙ್ಘಾರಾಮೇ ವಸೀ ತದಾ.
‘‘ಆರಾಮದ್ವಾರಾ ನಿಕ್ಖಮ್ಮ, ವಿಪಸ್ಸೀ [ಸಬ್ಬತ್ಥಪಿ ಏವಮೇವ ದಿಸ್ಸತಿ] ಲೋಕನಾಯಕೋ;
ಸಹ ಸತಸಹಸ್ಸೇಹಿ, ಅಟ್ಠ [ಸಹಸ್ಸಸತಸಿಸ್ಸೇಹಿ, ಅಟ್ಠ (ಕ.), ಅಟ್ಠ ಸತಸಹಸ್ಸೇಹಿ, ಸಹ (?)] ಖೀಣಾಸವೇಹಿ ಸೋ.
‘‘ಅಜಿನೇನ ನಿವತ್ಥೋಹಂ, ವಾಕಚೀರಧರೋಪಿ ಚ;
ಕುಸುಮೋದಕಮಾದಾಯ [ಕುಸುಮ್ಭೋದಕ… (ಸೀ. ಸ್ಯಾ.)], ಸಮ್ಬುದ್ಧಂ ಉಪಸಙ್ಕಮಿಂ.
‘‘ಸಕಂ ಚಿತ್ತಂ ಪಸಾದೇತ್ವಾ, ವೇದಜಾತೋ ಕತಞ್ಜಲೀ;
ಕುಸುಮೋದಕಮಾದಾಯ, ಬುದ್ಧಮಬ್ಭುಕ್ಕಿರಿಂ ಅಹಂ.
‘‘ತೇನ ಕಮ್ಮೇನ ಸಮ್ಬುದ್ಧೋ, ಜಲಜುತ್ತಮನಾಮಕೋ [ಸಬ್ಬತ್ಥಪಿ ಏವಮೇವ ದಿಸ್ಸತಿ];
ಮಮ ಕಮ್ಮಂ ಪಕಿತ್ತೇತ್ವಾ, ಅಗಮಾ ಯೇನ ಪತ್ಥಿತಂ.
‘‘ಫುಸಿತಾ ¶ ಪಞ್ಚಸಹಸ್ಸಾ, ಯೇಹಿ ಪೂಜೇಸಹಂ ಜಿನಂ;
ಅಡ್ಢತೇಯ್ಯಸಹಸ್ಸೇಹಿ, ದೇವರಜ್ಜಂ ಅಕಾರಯಿಂ.
‘‘ಅಡ್ಢತೇಯ್ಯಸಹಸ್ಸೇಹಿ, ಚಕ್ಕವತ್ತೀ ಅಹೋಸಹಂ;
ಅವಸೇಸೇನ ಕಮ್ಮೇನ, ಅರಹತ್ತಮಪಾಪುಣಿಂ.
‘‘ದೇವರಾಜಾ ಯದಾ ಹೋಮಿ [ಅಹೋಸಿಂ (ಸ್ಯಾ. ಕ.)], ಮನುಜಾಧಿಪತೀ ಯದಾ [ತದಾ (ಸ್ಯಾ. ಕ.)];
ತಮೇವ ನಾಮಧೇಯ್ಯಂ ಮೇ, ಫುಸಿತೋ ನಾಮ ಹೋಮಹಂ.
‘‘ದೇವಭೂತಸ್ಸ ಸನ್ತಸ್ಸ, ಅಥಾಪಿ ಮಾನುಸಸ್ಸ ವಾ;
ಸಮನ್ತಾ ಬ್ಯಾಮತೋ ಮಯ್ಹಂ, ಫುಸಿತಂವ ಪವಸ್ಸತಿ.
‘‘ಭವಾ ¶ ¶ ಉಗ್ಘಾಟಿತಾ ಮಯ್ಹಂ, ಕಿಲೇಸಾ ಝಾಪಿತಾ ಮಮ;
ಸಬ್ಬಾಸವಪರಿಕ್ಖೀಣೋ, ಫುಸಿತಸ್ಸ ಇದಂ ಫಲಂ.
‘‘ಚನ್ದನಸ್ಸೇವ ಮೇ ಕಾಯಾ, ತಥಾ ಗನ್ಧೋ ಪವಾಯತಿ;
ಸರೀರತೋ ಮಮ ಗನ್ಧೋ, ಅಡ್ಢಕೋಸೇ ಪವಾಯತಿ.
‘‘ದಿಬ್ಬಗನ್ಧಂ ಸಮ್ಪವನ್ತಂ, ಪುಞ್ಞಕಮ್ಮಸಮಙ್ಗಿನಂ;
ಗನ್ಧಂ ಘತ್ವಾನ ಜಾನನ್ತಿ, ಫುಸಿತೋ ಆಗತೋ ಇಧ.
‘‘ಸಾಖಾಪಲಾಸಕಟ್ಠಾನಿ ¶ , ತಿಣಾನಿಪಿ ಚ ಸಬ್ಬಸೋ;
ಮಮ ಸಙ್ಕಪ್ಪಮಞ್ಞಾಯ, ಗನ್ಧೋ ಸಮ್ಪಜ್ಜತೇ ಖಣೇ.
‘‘ಸತಸಹಸ್ಸಿತೋ [ಸಬ್ಬತ್ಥಪಿ ಏವಮೇವ ದಿಸ್ಸತಿ] ಕಪ್ಪೇ, ಚನ್ದನಂ ಅಭಿಪೂಜಯಿಂ;
ದುಗ್ಗತಿಂ ನಾಭಿಜಾನಾಮಿ, ಫುಸಿತಸ್ಸ ಇದಂ ಫಲಂ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಫುಸಿತಕಮ್ಪಿಯೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಫುಸಿತಕಮ್ಪಿಯತ್ಥೇರಸ್ಸಾಪದಾನಂ ಪಞ್ಚಮಂ.
೬. ಪಭಙ್ಕರತ್ಥೇರಅಪದಾನಂ
‘‘ಪದುಮುತ್ತರಭಗವತೋ, ಲೋಕಜೇಟ್ಠಸ್ಸ ತಾದಿನೋ;
ವಿಪಿನೇ ಚೇತಿಯಂ ಆಸಿ, ವಾಳಮಿಗಸಮಾಕುಲೇ.
‘‘ನ ¶ ¶ ಕೋಚಿ ವಿಸಹಿ ಗನ್ತುಂ, ಚೇತಿಯಂ ಅಭಿವನ್ದಿತುಂ;
ತಿಣಕಟ್ಠಲತೋನದ್ಧಂ, ಪಲುಗ್ಗಂ ಆಸಿ ಚೇತಿಯಂ.
‘‘ವನಕಮ್ಮಿಕೋ ತದಾ ಆಸಿಂ, ಪಿತುಮಾತುಮತೇನಹಂ [ಪಿತುಪೇತಾಮಹೇನಹಂ (ಸೀ.), ಪಿತಾಪೇತಾಮಹೇನಹಂ (ಸ್ಯಾ.)];
ಅದ್ದಸಂ ವಿಪಿನೇ ಥೂಪಂ, ಲುಗ್ಗಂ ತಿಣಲತಾಕುಲಂ.
‘‘ದಿಸ್ವಾನಾಹಂ ಬುದ್ಧಥೂಪಂ, ಗರುಚಿತ್ತಂ ಉಪಟ್ಠಹಿಂ;
ಬುದ್ಧಸೇಟ್ಠಸ್ಸ ಥೂಪೋಯಂ, ಪಲುಗ್ಗೋ ಅಚ್ಛತೀ ವನೇ.
‘‘ನಚ್ಛನ್ನಂ ನಪ್ಪತಿರೂಪಂ, ಜಾನನ್ತಸ್ಸ ಗುಣಾಗುಣಂ;
ಬುದ್ಧಥೂಪಂ ಅಸೋಧೇತ್ವಾ, ಅಞ್ಞಂ ಕಮ್ಮಂ ಪಯೋಜಯೇ.
‘‘ತಿಣಕಟ್ಠಞ್ಚ ವಲ್ಲಿಞ್ಚ, ಸೋಧಯಿತ್ವಾನ ಚೇತಿಯೇ;
ವನ್ದಿತ್ವಾ ಅಟ್ಠ ವಾರಾನಿ [ಅಟ್ಠ ಠಾನಾನಿ (ಕ.)], ಪಟಿಕುಟಿಕೋ ಅಗಚ್ಛಹಂ.
‘‘ತೇನ ¶ ಕಮ್ಮೇನ ಸುಕತೇನ, ಚೇತನಾಪಣಿಧೀಹಿ ಚ;
ಜಹಿತ್ವಾ ಮಾನುಸಂ ದೇಹಂ, ತಾವತಿಂಸಮಗಚ್ಛಹಂ.
‘‘ತತ್ಥ ಮೇ ಸುಕತಂ ಬ್ಯಮ್ಹಂ, ಸೋವಣ್ಣಂ ಸಪಭಸ್ಸರಂ;
ಸಟ್ಠಿಯೋಜನಮುಬ್ಬಿದ್ಧಂ, ತಿಂಸಯೋಜನವಿತ್ಥತಂ.
‘‘ತಿಸತಾನಿ ಚ ವಾರಾನಿ, ದೇವರಜ್ಜಮಕಾರಯಿಂ;
ಪಞ್ಚವೀಸತಿಕ್ಖತ್ತುಞ್ಚ, ಚಕ್ಕವತ್ತೀ ಅಹೋಸಹಂ.
‘‘ಭವಾಭವೇ ಸಂಸರನ್ತೋ, ಮಹಾಭೋಗಂ ಲಭಾಮಹಂ;
ಭೋಗೇ ಮೇ ಊನತಾ ನತ್ಥಿ, ಸೋಧನಾಯ ಇದಂ ಫಲಂ.
‘‘ಸಿವಿಕಾ ¶ ಹತ್ಥಿಖನ್ಧೇನ, ವಿಪಿನೇ ಗಚ್ಛತೋ ಮಮ;
ಯಂ ಯಂ ದಿಸಾಹಂ ಗಚ್ಛಾಮಿ, ಸರಣಂ ಸಮ್ಪತೇ [ಸಿಜ್ಝತೇ (ಕ.)] ವನಂ.
‘‘ಖಾಣುಂ ¶ ವಾ ಕಣ್ಟಕಂ ವಾಪಿ, ನಾಹಂ ಪಸ್ಸಾಮಿ ಚಕ್ಖುನಾ;
ಪುಞ್ಞಕಮ್ಮೇನ ಸಂಯುತ್ತೋ, ಸಯಮೇವಾಪನೀಯರೇ.
‘‘ಕುಟ್ಠಂ ಗಣ್ಡೋ ಕಿಲಾಸೋ ಚ, ಅಪಮಾರೋ ವಿತಚ್ಛಿಕಾ;
ದದ್ದು ಕಚ್ಛು [ಕಣ್ಡು (ಸ್ಯಾ.)] ಚ ಮೇ ನತ್ಥಿ, ಸೋಧನಾಯ ಇದಂ ಫಲಂ.
‘‘ಅಞ್ಞಮ್ಪಿ ¶ ಮೇ ಅಚ್ಛರಿಯಂ, ಬುದ್ಧಥೂಪಸ್ಸ ಸೋಧನೇ [ಬುದ್ಧಥೂಪಮ್ಹಿ ಸೋಧಿತೇ (ಸ್ಯಾ.)];
ನಾಭಿಜಾನಾಮಿ ಮೇ ಕಾಯೇ, ಜಾತಂ ಪಿಳಕಬಿನ್ದುಕಂ.
‘‘ಅಞ್ಞಮ್ಪಿ ಮೇ ಅಚ್ಛರಿಯಂ, ಬುದ್ಧಥೂಪಮ್ಹಿ ಸೋಧಿತೇ [ಸಬ್ಬತ್ಥಪಿ ಏವಮೇವ ದಿಸ್ಸತಿ, ತಥಾ ಉಪರಿಪಿ];
ದುವೇ ಭವೇ ಸಂಸರಾಮಿ, ದೇವತ್ತೇ ಅಥ ಮಾನುಸೇ.
‘‘ಅಞ್ಞಮ್ಪಿ ಮೇ ಅಚ್ಛರಿಯಂ, ಬುದ್ಧಥೂಪಮ್ಹಿ ಸೋಧಿತೇ;
ಸುವಣ್ಣವಣ್ಣೋ ಸಬ್ಬತ್ಥ, ಸಪ್ಪಭಾಸೋ ಭವಾಮಹಂ.
‘‘ಅಞ್ಞಮ್ಪಿ ಮೇ ಅಚ್ಛರಿಯಂ, ಬುದ್ಧಥೂಪಮ್ಹಿ ಸೋಧಿತೇ;
ಅಮನಾಪಂ ವಿವಜ್ಜತಿ, ಮನಾಪಂ ಉಪತಿಟ್ಠತಿ.
‘‘ಅಞ್ಞಮ್ಪಿ ಮೇ ಅಚ್ಛರಿಯಂ, ಬುದ್ಧಥೂಪಮ್ಹಿ ಸೋಧಿತೇ;
ವಿಸುದ್ಧಂ ಹೋತಿ ಮೇ ಚಿತ್ತಂ, ಏಕಗ್ಗಂ ಸುಸಮಾಹಿತಂ.
‘‘ಅಞ್ಞಮ್ಪಿ ಮೇ ಅಚ್ಛರಿಯಂ, ಬುದ್ಧಥೂಪಮ್ಹಿ ಸೋಧಿತೇ;
ಏಕಾಸನೇ ನಿಸೀದಿತ್ವಾ, ಅರಹತ್ತಮಪಾಪುಣಿಂ.
‘‘ಸತಸಹಸ್ಸಿತೋ ಕಪ್ಪೇ, ಯಂ ಕಮ್ಮಮಕರಿಂ ತದಾ;
ದುಗ್ಗತಿಂ ನಾಭಿಜಾನಾಮಿ, ಸೋಧನಾಯ ಇದಂ ಫಲಂ.
‘‘ಪಟಿಸಮ್ಭಿದಾ ¶ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ¶ ಸುದಂ ಆಯಸ್ಮಾ ಪಭಙ್ಕರೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಪಭಙ್ಕರತ್ಥೇರಸ್ಸಾಪದಾನಂ ಛಟ್ಠಂ.
೭. ತಿಣಕುಟಿದಾಯಕತ್ಥೇರಅಪದಾನಂ
‘‘ನಗರೇ ಬನ್ಧುಮತಿಯಾ, ಅಹೋಸಿಂ ಪರಕಮ್ಮಿಕೋ;
ಪರಕಮ್ಮಾಯನೇ ಯುತ್ತೋ, ಪರಭತ್ತಂ ಅಪಸ್ಸಿತೋ.
‘‘ರಹೋಗತೋ ನಿಸೀದಿತ್ವಾ, ಏವಂ ಚಿನ್ತೇಸಹಂ ತದಾ;
ಬುದ್ಧೋ ಲೋಕೇ ಸಮುಪ್ಪನ್ನೋ, ಅಧಿಕಾರೋ ಚ ನತ್ಥಿ ಮೇ.
‘‘ಕಾಲೋ ¶ ಮೇ ಗತಿಂ [ಕಾಲೋ ಗತಿಂ ಮೇ (ಸೀ. ಸ್ಯಾ.)] ಸೋಧೇತುಂ, ಖಣೋ ಮೇ ಪಟಿಪಾದಿತೋ;
ದುಕ್ಖೋ ನಿರಯಸಮ್ಫಸ್ಸೋ, ಅಪುಞ್ಞಾನಞ್ಹಿ ಪಾಣಿನಂ.
‘‘ಏವಾಹಂ ಚಿನ್ತಯಿತ್ವಾನ, ಕಮ್ಮಸಾಮಿಂ ಉಪಾಗಮಿಂ;
ಏಕಾಹಂ ಕಮ್ಮಂ ಯಾಚಿತ್ವಾ, ವಿಪಿನಂ ಪಾವಿಸಿಂ ಅಹಂ.
‘‘ತಿಣಕಟ್ಠಞ್ಚ ¶ ವಲ್ಲಿಞ್ಚ, ಆಹರಿತ್ವಾನಹಂ ತದಾ;
ತಿದಣ್ಡಕೇ ಠಪೇತ್ವಾನ, ಅಕಂ ತಿಣಕುಟಿಂ ಅಹಂ.
‘‘ಸಙ್ಘಸ್ಸತ್ಥಾಯ ಕುಟಿಕಂ, ನಿಯ್ಯಾದೇತ್ವಾನ [ನಿಯ್ಯಾತೇತ್ವಾನ (ಸೀ.)] ತಂ ಅಹಂ;
ತದಹೇಯೇವ ಆಗನ್ತ್ವಾ, ಕಮ್ಮಸಾಮಿಂ ಉಪಾಗಮಿಂ.
‘‘ತೇನ ಕಮ್ಮೇನ ಸುಕತೇನ, ತಾವತಿಂಸಮಗಚ್ಛಹಂ;
ತತ್ಥ ಮೇ ಸುಕತಂ ಬ್ಯಮ್ಹಂ, ಕುಟಿಕಾಯ ಸುನಿಮ್ಮಿತಂ [ತಿಣಕುಟಿಕಾಯ ನಿಮ್ಮಿತಂ (ಸೀ.)].
‘‘ಸಹಸ್ಸಕಣ್ಡಂ ¶ ಸತಭೇಣ್ಡು, ಧಜಾಲು ಹರಿತಾಮಯಂ;
ಸತಸಹಸ್ಸನಿಯ್ಯೂಹಾ, ಬ್ಯಮ್ಹೇ ಪಾತುಭವಿಂಸು ಮೇ.
‘‘ಯಂ ಯಂ ಯೋನುಪಪಜ್ಜಾಮಿ, ದೇವತ್ತಂ ಅಥ ಮಾನುಸಂ;
ಮಮ ಸಙ್ಕಪ್ಪಮಞ್ಞಾಯ, ಪಾಸಾದೋ ಉಪತಿಟ್ಠತಿ.
‘‘ಭಯಂ ವಾ ಛಮ್ಭಿತತ್ತಂ ವಾ, ಲೋಮಹಂಸೋ ನ ವಿಜ್ಜತಿ;
ತಾಸಂ ಮಮ ನ ಜಾನಾಮಿ, ತಿಣಕುಟಿಕಾಯಿದಂ [ತಿಣಕುಟಿಯಿದಂ (ಕ.)] ಫಲಂ.
‘‘ಸೀಹಬ್ಯಗ್ಘಾ ಚ ದೀಪೀ ಚ, ಅಚ್ಛಕೋಕತರಚ್ಛಕಾ [ತರಚ್ಛಯೋ (ಸ್ಯಾ. ಕ.)];
ಸಬ್ಬೇ ಮಂ ಪರಿವಜ್ಜೇನ್ತಿ, ತಿಣಕುಟಿಕಾಯಿದಂ ಫಲಂ.
‘‘ಸರೀಸಪಾ ¶ [ಸಿರಿಂಸಪಾ (ಸೀ. ಸ್ಯಾ.), ಸರಿಂಸಪಾ (ಕ.)] ಚ ಭೂತಾ ಚ, ಅಹೀ ಕುಮ್ಭಣ್ಡರಕ್ಖಸಾ;
ತೇಪಿ ಮಂ ಪರಿವಜ್ಜೇನ್ತಿ, ತಿಣಕುಟಿಕಾಯಿದಂ ಫಲಂ.
‘‘ನ ಪಾಪಸುಪಿನಸ್ಸಾಪಿ, ಸರಾಮಿ ದಸ್ಸನಂ ಮಮ;
ಉಪಟ್ಠಿತಾ ಸತಿ ಮಯ್ಹಂ, ತಿಣಕುಟಿಕಾಯಿದಂ ಫಲಂ.
‘‘ತಾಯೇವ ತಿಣಕುಟಿಕಾಯ, ಅನುಭೋತ್ವಾನ ಸಮ್ಪದಾ;
ಗೋತಮಸ್ಸ ಭಗವತೋ, ಧಮ್ಮಂ ಸಚ್ಛಿಕರಿಂ ಅಹಂ.
‘‘ಏಕನವುತಿತೋ ಕಪ್ಪೇ, ಯಂ ಕಮ್ಮಮಕರಿಂ ತದಾ;
ದುಗ್ಗತಿಂ ನಾಭಿಜಾನಾಮಿ, ತಿಣಕುಟಿಕಾಯಿದಂ ಫಲಂ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ¶ ಸುದಂ ಆಯಸ್ಮಾ ತಿಣಕುಟಿದಾಯಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ತಿಣಕುಟಿದಾಯಕತ್ಥೇರಸ್ಸಾಪದಾನಂ ಸತ್ತಮಂ.
೮. ಉತ್ತರೇಯ್ಯದಾಯಕತ್ಥೇರಅಪದಾನಂ
‘‘ನಗರೇ ¶ ¶ ಹಂಸವತಿಯಾ, ಅಹೋಸಿಂ ಬ್ರಾಹ್ಮಣೋ ತದಾ;
ಅಜ್ಝಾಯಕೋ ಮನ್ತಧರೋ, ತಿಣ್ಣಂ ವೇದಾನ ಪಾರಗೂ.
‘‘ಪುರಕ್ಖತೋ ಸಸಿಸ್ಸೇಹಿ, ಜಾತಿಮಾ ಚ ಸುಸಿಕ್ಖಿತೋ;
ತೋಯಾಭಿಸೇಚನತ್ಥಾಯ, ನಗರಾ ನಿಕ್ಖಮಿಂ ತದಾ.
‘‘ಪದುಮುತ್ತರೋ ನಾಮ ಜಿನೋ, ಸಬ್ಬಧಮ್ಮಾನ ಪಾರಗೂ;
ಖೀಣಾಸವಸಹಸ್ಸೇಹಿ, ಪಾವಿಸೀ ನಗರಂ ಜಿನೋ.
‘‘ಸುಚಾರುರೂಪಂ ದಿಸ್ವಾನ, ಆನೇಞ್ಜಕಾರಿತಂ ವಿಯ;
ಪರಿವುತಂ ಅರಹನ್ತೇಹಿ, ದಿಸ್ವಾ ಚಿತ್ತಂ ಪಸಾದಯಿಂ.
‘‘ಸಿರಸ್ಮಿಂ ಅಞ್ಜಲಿಂ ಕತ್ವಾ, ನಮಸ್ಸಿತ್ವಾನ ಸುಬ್ಬತಂ;
ಪಸನ್ನಚಿತ್ತೋ ಸುಮನೋ, ಉತ್ತರೀಯಮದಾಸಹಂ.
‘‘ಉಭೋ ಹತ್ಥೇಹಿ ಪಗ್ಗಯ್ಹ, ಸಾಟಕಂ ಉಕ್ಖಿಪಿಂ ಅಹಂ;
ಯಾವತಾ ಬುದ್ಧಪರಿಸಾ, ತಾವ ಛಾದೇಸಿ ಸಾಟಕೋ.
‘‘ಪಿಣ್ಡಚಾರಂ ಚರನ್ತಸ್ಸ, ಮಹಾಭಿಕ್ಖುಗಣಾದಿನೋ;
ಛದಂ ಕರೋನ್ತೋ ಅಟ್ಠಾಸಿ, ಹಾಸಯನ್ತೋ ಮಮಂ ತದಾ.
‘‘ಘರತೋ ¶ ¶ ನಿಕ್ಖಮನ್ತಸ್ಸ, ಸಯಮ್ಭೂ ಅಗ್ಗಪುಗ್ಗಲೋ;
ವೀಥಿಯಂವ ಠಿತೋ ಸತ್ಥಾ, ಅಕಾ ಮೇ [ಅಕಾಸಿ (ಸ್ಯಾ.)] ಅನುಮೋದನಂ.
‘‘ಪಸನ್ನಚಿತ್ತೋ ಸುಮನೋ, ಯೋ ಮೇ ಅದಾಸಿ ಸಾಟಕಂ;
ತಮಹಂ ಕಿತ್ತಯಿಸ್ಸಾಮಿ, ಸುಣೋಥ ಮಮ ಭಾಸತೋ.
‘‘‘ತಿಂಸಕಪ್ಪಸಹಸ್ಸಾನಿ, ದೇವಲೋಕೇ ರಮಿಸ್ಸತಿ;
ಪಞ್ಞಾಸಕ್ಖತ್ತುಂ ದೇವಿನ್ದೋ, ದೇವರಜ್ಜಂ ಕರಿಸ್ಸತಿ.
‘‘‘ದೇವಲೋಕೇ ವಸನ್ತಸ್ಸ, ಪುಞ್ಞಕಮ್ಮಸಮಙ್ಗಿನೋ;
ಸಮನ್ತಾ ಯೋಜನಸತಂ, ದುಸ್ಸಚ್ಛನ್ನಂ ಭವಿಸ್ಸತಿ.
‘‘‘ಛತ್ತಿಂಸಕ್ಖತ್ತುಂ ರಾಜಾ ಚ, ಚಕ್ಕವತ್ತೀ ಭವಿಸ್ಸತಿ;
ಪದೇಸರಜ್ಜಂ ವಿಪುಲಂ, ಗಣನಾತೋ ಅಸಙ್ಖಿಯಂ.
‘‘‘ಭವೇ ಸಂಸರಮಾನಸ್ಸ, ಪುಞ್ಞಕಮ್ಮಸಮಙ್ಗಿನೋ;
ಮನಸಾ ಪತ್ಥಿತಂ ಸಬ್ಬಂ, ನಿಬ್ಬತ್ತಿಸ್ಸತಿ ತಾವದೇ.
‘‘‘ಕೋಸೇಯ್ಯಕಮ್ಬಲಿಯಾನಿ ¶ [ಕೋಸೇಯ್ಯಕಮ್ಬಲೀಯಾನಿ (ಸೀ.)], ಖೋಮಕಪ್ಪಾಸಿಕಾನಿ ಚ;
ಮಹಗ್ಘಾನಿ ಚ ದುಸ್ಸಾನಿ, ಪಟಿಲಚ್ಛತಿಯಂ ನರೋ.
‘‘‘ಮನಸಾ ¶ ಪತ್ಥಿತಂ ಸಬ್ಬಂ, ಪಟಿಲಚ್ಛತಿಯಂ ನರೋ;
ಏಕದುಸ್ಸಸ್ಸ ವಿಪಾಕಂ, ಅನುಭೋಸ್ಸತಿ ಸಬ್ಬದಾ.
‘‘‘ಸೋ ಪಚ್ಛಾ ಪಬ್ಬಜಿತ್ವಾನ, ಸುಕ್ಕಮೂಲೇನ ಚೋದಿತೋ;
ಗೋತಮಸ್ಸ ಭಗವತೋ, ಧಮ್ಮಂ ಸಚ್ಛಿಕರಿಸ್ಸತಿ’.
‘‘ಅಹೋ ಮೇ ಸುಕತಂ ಕಮ್ಮಂ, ಸಬ್ಬಞ್ಞುಸ್ಸ ಮಹೇಸಿನೋ;
ಏಕಾಹಂ ಸಾಟಕಂ ದತ್ವಾ, ಪತ್ತೋಮ್ಹಿ ಅಮತಂ ಪದಂ.
‘‘ಮಣ್ಡಪೇ ¶ ರುಕ್ಖಮೂಲೇ ವಾ, ವಸತೋ ಸುಞ್ಞಕೇ ಘರೇ;
ಧಾರೇತಿ ದುಸ್ಸಛದನಂ, ಸಮನ್ತಾ ಬ್ಯಾಮತೋ ಮಮ.
‘‘ಅವಿಞ್ಞತ್ತಂ ನಿವಾಸೇಮಿ [ಅವಿಞ್ಞತ್ತಾನಿ ಸೇವಾಮಿ (?)], ಚೀವರಂ ಪಚ್ಚಯಞ್ಚಹಂ;
ಲಾಭೀ [ಲಾಭಿಮ್ಹಿ (ಸ್ಯಾ.)] ಅನ್ನಸ್ಸ ಪಾನಸ್ಸ, ಉತ್ತರೇಯ್ಯಸ್ಸಿದಂ ಫಲಂ.
‘‘ಸತಸಹಸ್ಸಿತೋ ಕಪ್ಪೇ, ಯಂ ಕಮ್ಮಮಕರಿಂ ತದಾ;
ದುಗ್ಗತಿಂ ನಾಭಿಜಾನಾಮಿ, ವತ್ಥದಾನಸ್ಸಿದಂ ಫಲಂ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಉತ್ತರೇಯ್ಯದಾಯಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಉತ್ತರೇಯ್ಯದಾಯಕತ್ಥೇರಸ್ಸಾಪದಾನಂ ಅಟ್ಠಮಂ.
೯. ಧಮ್ಮಸವನಿಯತ್ಥೇರಅಪದಾನಂ
‘‘ಪದುಮುತ್ತರೋ ¶ ನಾಮ ಜಿನೋ, ಸಬ್ಬಧಮ್ಮಾನ ಪಾರಗೂ;
ಚತುಸಚ್ಚಂ ಪಕಾಸೇನ್ತೋ, ಸನ್ತಾರೇಸಿ ಬಹುಂ ಜನಂ.
‘‘ಅಹಂ ತೇನ ಸಮಯೇನ, ಜಟಿಲೋ ಉಗ್ಗತಾಪನೋ;
ಧುನನ್ತೋ ವಾಕಚೀರಾನಿ, ಗಚ್ಛಾಮಿ ಅಮ್ಬರೇ ತದಾ.
‘‘ಬುದ್ಧಸೇಟ್ಠಸ್ಸ ಉಪರಿ, ಗನ್ತುಂ ನ ವಿಸಹಾಮಹಂ;
ಪಕ್ಖೀವ ಸೇಲಮಾಸಜ್ಜ [ಸೇಲಮಾಪಜ್ಜ (ಸ್ಯಾ.)], ಗಮನಂ ನ ಲಭಾಮಹಂ.
‘‘ನ ¶ ¶ ಮೇ ಇದಂ ಭೂತಪುಬ್ಬಂ, ಇರಿಯಸ್ಸ ವಿಕೋಪನಂ;
ದಕೇ ಯಥಾ ಉಮ್ಮುಜ್ಜಿತ್ವಾ, ಏವಂ ಗಚ್ಛಾಮಿ ಅಮ್ಬರೇ.
‘‘ಉಳಾರಭೂತೋ ¶ ಮನುಜೋ, ಹೇಟ್ಠಾಸೀನೋ [ಹೇಟ್ಠಾಪಿ ನೋ (ಕ.)] ಭವಿಸ್ಸತಿ;
ಹನ್ದ ಮೇನಂ ಗವೇಸಿಸ್ಸಂ, ಅಪಿ ಅತ್ಥಂ ಲಭೇಯ್ಯಹಂ.
‘‘ಓರೋಹನ್ತೋ ಅನ್ತಲಿಕ್ಖಾ, ಸದ್ದಮಸ್ಸೋಸಿ ಸತ್ಥುನೋ;
ಅನಿಚ್ಚತಂ ಕಥೇನ್ತಸ್ಸ, ತಮಹಂ ಉಗ್ಗಹಿಂ ತದಾ.
‘‘ಅನಿಚ್ಚಸಞ್ಞಮುಗ್ಗಯ್ಹ, ಅಗಮಾಸಿಂ ಮಮಸ್ಸಮಂ;
ಯಾವತಾಯುಂ ವಸಿತ್ವಾನ, ತತ್ಥ ಕಾಲಙ್ಕತೋ ಅಹಂ.
‘‘ಚರಿಮೇ ವತ್ತಮಾನಮ್ಹಿ, ತಂ ಧಮ್ಮಸವನಂ [ಧಮ್ಮಸವಣಂ (ಸೀ.)] ಸರಿಂ;
ತೇನ ಕಮ್ಮೇನ ಸುಕತೇನ, ತಾವತಿಂಸಮಗಚ್ಛಹಂ.
‘‘ತಿಂಸಕಪ್ಪಸಹಸ್ಸಾನಿ, ದೇವಲೋಕೇ ರಮಿಂ ಅಹಂ;
ಏಕಪಞ್ಞಾಸಕ್ಖತ್ತುಞ್ಚ, ದೇವರಜ್ಜಮಕಾರಯಿಂ.
‘‘ಏಕಸತ್ತತಿಕ್ಖತ್ತುಞ್ಚ, ಚಕ್ಕವತ್ತೀ ಅಹೋಸಹಂ;
ಪದೇಸರಜ್ಜಂ ವಿಪುಲಂ, ಗಣನಾತೋ ಅಸಙ್ಖಿಯಂ.
‘‘ಪಿತುಗೇಹೇ ನಿಸೀದಿತ್ವಾ, ಸಮಣೋ ಭಾವಿತಿನ್ದ್ರಿಯೋ;
ಗಾಥಾಯ ಪರಿದೀಪೇನ್ತೋ, ಅನಿಚ್ಚತಮುದಾಹರಿ [ಅನಿಚ್ಚವತ್ಥುದಾಹರಿ (ಸ್ಯಾ. ಕ.)].
‘‘ಅನುಸ್ಸರಾಮಿ ತಂ ಸಞ್ಞಂ, ಸಂಸರನ್ತೋ ಭವಾಭವೇ;
ನ ಕೋಟಿಂ ಪಟಿವಿಜ್ಝಾಮಿ [ನ ಕೋಚಿ ಪಟಿವಜ್ಜಾಮಿ (ಕ.)], ನಿಬ್ಬಾನಂ ಅಚ್ಚುತಂ ಪದಂ [ಅಯಂ ಗಾಥಾ ಉಪರಿ ೪೩ ವಗ್ಗೇ ಸತ್ತಮಾಪದಾನೇ ಪುರಿಮಗಾಥಾಯ ಪುರೇತರಂ ದಿಸ್ಸತಿ].
‘‘ಅನಿಚ್ಚಾ ವತ ಸಙ್ಖಾರಾ, ಉಪ್ಪಾದವಯಧಮ್ಮಿನೋ;
ಉಪ್ಪಜ್ಜಿತ್ವಾ ನಿರುಜ್ಝನ್ತಿ, ತೇಸಂ ವೂಪಸಮೋ ಸುಖೋ.
‘‘ಸಹ ¶ ¶ ಗಾಥಂ ಸುಣಿತ್ವಾನ, ಪುಬ್ಬಕಮ್ಮಂ ಅನುಸ್ಸರಿಂ;
ಏಕಾಸನೇ ನಿಸೀದಿತ್ವಾ, ಅರಹತ್ತಮಪಾಪುಣಿಂ.
‘‘ಜಾತಿಯಾ ಸತ್ತವಸ್ಸೋಹಂ, ಅರಹತ್ತಮಪಾಪುಣಿಂ;
ಉಪಸಮ್ಪಾದಯಿ ಬುದ್ಧೋ, ಗುಣಮಞ್ಞಾಯ ಚಕ್ಖುಮಾ.
‘‘ದಾರಕೋವ ¶ ಅಹಂ ಸನ್ತೋ, ಕರಣೀಯಂ ಸಮಾಪಯಿಂ;
ಕಿಂ ಮೇ ಕರಣೀಯಂ ಅಜ್ಜ, ಸಕ್ಯಪುತ್ತಸ್ಸ ಸಾಸನೇ.
‘‘ಸತಸಹಸ್ಸಿತೋ ಕಪ್ಪೇ, ಯಂ ಕಮ್ಮಮಕರಿಂ ತದಾ;
ದುಗ್ಗತಿಂ ನಾಭಿಜಾನಾಮಿ, ಸದ್ಧಮ್ಮಸವನೇ ಫಲಂ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಧಮ್ಮಸವನಿಯೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಧಮ್ಮಸವನಿಯತ್ಥೇರಸ್ಸಾಪದಾನಂ ನವಮಂ.
೧೦. ಉಕ್ಖಿತ್ತಪದುಮಿಯತ್ಥೇರಅಪದಾನಂ
‘‘ನಗರೇ ¶ ಹಂಸವತಿಯಾ, ಅಹೋಸಿಂ ಮಾಲಿಕೋ ತದಾ;
ಓಗಾಹೇತ್ವಾ ಪದುಮಸರಂ, ಸತಪತ್ತಂ ಓಚಿನಾಮಹಂ.
‘‘ಪದುಮುತ್ತರೋ ನಾಮ ಜಿನೋ, ಸಬ್ಬಧಮ್ಮಾನ ಪಾರಗೂ;
ಸಹ ಸತಸಹಸ್ಸೇಹಿ [ಸತಸಹಸ್ಸಸಿಸ್ಸೇಹಿ (ಕ.)], ಸನ್ತಚಿತ್ತೇಹಿ ತಾದಿಭಿ.
‘‘ಖೀಣಾಸವೇಹಿ ¶ ಸುದ್ಧೇಹಿ, ಛಳಭಿಞ್ಞೇಹಿ ಝಾಯಿಭಿ [ಸೋ ತದಾ (ಸೀ.), ಸೋ ಸಹ (ಕ.)];
ಮಮ ವುದ್ಧಿಂ ಸಮನ್ವೇಸಂ, ಆಗಚ್ಛಿ ಮಮ ಸನ್ತಿಕಂ [ಮಮ ಸನ್ತಿಕೇ (ಸೀ.), ಪುರಿಸುತ್ತಮೋ (ಸ್ಯಾ. ಕ.)].
‘‘ದಿಸ್ವಾನಹಂ ದೇವದೇವಂ, ಸಯಮ್ಭುಂ ಲೋಕನಾಯಕಂ;
ವಣ್ಟೇ ಛೇತ್ವಾ ಸತಪತ್ತಂ, ಉಕ್ಖಿಪಿಮಮ್ಬರೇ ತದಾ.
‘‘ಯದಿ ಬುದ್ಧೋ ತುವಂ ವೀರ, ಲೋಕಜೇಟ್ಠೋ ನರಾಸಭೋ;
ಸಯಂ ಗನ್ತ್ವಾ ಸತಪತ್ತಾ, ಮತ್ಥಕೇ ಧಾರಯನ್ತು ತೇ.
‘‘ಅಧಿಟ್ಠಹಿ ಮಹಾವೀರೋ, ಲೋಕಜೇಟ್ಠೋ ನರಾಸಭೋ;
ಬುದ್ಧಸ್ಸ ಆನುಭಾವೇನ, ಮತ್ಥಕೇ ಧಾರಯಿಂಸು ತೇ.
‘‘ತೇನ ಕಮ್ಮೇನ ಸುಕತೇನ, ಚೇತನಾಪಣಿಧೀಹಿ ಚ;
ಜಹಿತ್ವಾ ಮಾನುಸಂ ದೇಹಂ, ತಾವತಿಂಸಮಗಚ್ಛಹಂ.
‘‘ತತ್ಥ ¶ ¶ ಮೇ ಸುಕತಂ ಬ್ಯಮ್ಹಂ, ಸತಪತ್ತನ್ತಿ ವುಚ್ಚತಿ;
ಸಟ್ಠಿಯೋಜನಮುಬ್ಬಿದ್ಧಂ, ತಿಂಸಯೋಜನವಿತ್ಥತಂ.
‘‘ಸಹಸ್ಸಕ್ಖತ್ತುಂ ದೇವಿನ್ದೋ, ದೇವರಜ್ಜಮಕಾರಯಿಂ;
ಪಞ್ಚಸತ್ತತಿಕ್ಖತ್ತುಞ್ಚ, ಚಕ್ಕವತ್ತೀ ಅಹೋಸಹಂ.
‘‘ಪದೇಸರಜ್ಜಂ ವಿಪುಲಂ, ಗಣನಾತೋ ಅಸಙ್ಖಿಯಂ;
ಅನುಭೋಮಿ ಸಕಂ ಕಮ್ಮಂ, ಪುಬ್ಬೇ ಸುಕತಮತ್ತನೋ.
‘‘ತೇನೇವೇಕಪದುಮೇನ, ಅನುಭೋತ್ವಾನ ಸಮ್ಪದಾ;
ಗೋತಮಸ್ಸ ಭಗವತೋ, ಧಮ್ಮಂ ಸಚ್ಛಿಕರಿಂ ಅಹಂ.
‘‘ಕಿಲೇಸಾ ಝಾಪಿತಾ ಮಯ್ಹಂ, ಭವಾ ಸಬ್ಬೇ ಸಮೂಹತಾ;
ನಾಗೋವ ಬನ್ಧನಂ ಛೇತ್ವಾ, ವಿಹರಾಮಿ ಅನಾಸವೋ.
‘‘ಸತಸಹಸ್ಸಿತೋ ¶ ಕಪ್ಪೇ, ಯಂ ಪುಪ್ಫಮಭಿಪೂಜಯಿಂ;
ದುಗ್ಗತಿಂ ನಾಭಿಜಾನಾಮಿ, ಏಕಪದುಮಸ್ಸಿದಂ ಫಲಂ.
‘‘ಪಟಿಸಮ್ಭಿದಾ ¶ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಉಕ್ಖಿತ್ತಪದುಮಿಯೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಉಕ್ಖಿತ್ತಪದುಮಿಯತ್ಥೇರಸ್ಸಾಪದಾನಂ ದಸಮಂ.
ಗನ್ಧೋದಕವಗ್ಗೋ ಚತುತಿಂಸತಿಮೋ.
ತಸ್ಸುದ್ದಾನಂ –
ಗನ್ಧಧೂಪೋ ಉದಕಞ್ಚ, ಪುನ್ನಾಗ ಏಕದುಸ್ಸಕಾ;
ಫುಸಿತೋ ಚ ಪಭಙ್ಕರೋ, ಕುಟಿದೋ ಉತ್ತರೀಯಕೋ.
ಸವನೀ ಏಕಪದುಮೀ, ಗಾಥಾಯೋ ಸಬ್ಬಪಿಣ್ಡಿತಾ;
ಏಕಂ ಗಾಥಾಸತಞ್ಚೇವ, ಚತುತಾಲೀಸಮೇವ ಚ.
೩೫. ಏಕಪದುಮಿಯವಗ್ಗೋ
೧. ಏಕಪದುಮಿಯತ್ಥೇರಅಪದಾನಂ
‘‘ಪದುಮುತ್ತರೋ ¶ ¶ ¶ ನಾಮ ಜಿನೋ, ಸಬ್ಬಧಮ್ಮಾನ ಪಾರಗೂ;
ಭವಾಭವೇ ವಿಭಾವೇನ್ತೋ, ತಾರೇಸಿ ಜನತಂ ಬಹುಂ.
‘‘ಹಂಸರಾಜಾ ತದಾ ಹೋಮಿ, ದಿಜಾನಂ ಪವರೋ ಅಹಂ;
ಜಾತಸ್ಸರಂ ಸಮೋಗಯ್ಹ, ಕೀಳಾಮಿ ಹಂಸಕೀಳಿತಂ.
‘‘ಪದುಮುತ್ತರೋ ಲೋಕವಿದೂ, ಆಹುತೀನಂ ಪಟಿಗ್ಗಹೋ;
ಜಾತಸ್ಸರಸ್ಸ ಉಪರಿ, ಆಗಚ್ಛಿ ತಾವದೇ ಜಿನೋ.
‘‘ದಿಸ್ವಾನಹಂ ದೇವದೇವಂ, ಸಯಮ್ಭುಂ ಲೋಕನಾಯಕಂ;
ವಣ್ಟೇ ಛೇತ್ವಾನ ಪದುಮಂ, ಸತಪತ್ತಂ ಮನೋರಮಂ.
‘‘ಮುಖತುಣ್ಡೇನ ಪಗ್ಗಯ್ಹ, ಪಸನ್ನೋ ಲೋಕನಾಯಕೇ [ವಿಪ್ಪಸನ್ನೇನ ಚೇತಸಾ (ಸ್ಯಾ.)];
ಉಕ್ಖಿಪಿತ್ವಾನ ಗಗಣೇ [ಉಕ್ಖಿಪಿತ್ವಾ ನಲಾಟೇನ (ಕ.)], ಬುದ್ಧಸೇಟ್ಠಂ ಅಪೂಜಯಿಂ.
‘‘ಪದುಮುತ್ತರೋ ಲೋಕವಿದೂ, ಆಹುತೀನಂ ಪಟಿಗ್ಗಹೋ;
ಅನ್ತಲಿಕ್ಖೇ ಠಿತೋ ಸತ್ಥಾ, ಅಕಾ ಮೇ ಅನುಮೋದನಂ.
‘‘‘ಇಮಿನಾ ಏಕಪದುಮೇನ, ಚೇತನಾಪಣಿಧೀಹಿ ಚ;
ಕಪ್ಪಾನಂ ಸತಸಹಸ್ಸಂ, ವಿನಿಪಾತಂ ನ ಗಚ್ಛಸಿ’.
‘‘ಇದಂ ವತ್ವಾನ ಸಮ್ಬುದ್ಧೋ, ಜಲಜುತ್ತಮನಾಮಕೋ;
ಮಮ ಕಮ್ಮಂ ಪಕಿತ್ತೇತ್ವಾ, ಅಗಮಾ ಯೇನ ಪತ್ಥಿತಂ.
‘‘ಸತಸಹಸ್ಸಿತೋ ¶ ¶ ಕಪ್ಪೇ, ಯಂ ಕಮ್ಮಮಕರಿಂ ತದಾ;
ದುಗ್ಗತಿಂ ನಾಭಿಜಾನಾಮಿ, ಬುದ್ಧಪೂಜಾಯಿದಂ ಫಲಂ.
‘‘ಪಟಿಸಮ್ಭಿದಾ ಚತಸ್ಸೋ, ವಿಮೋಕ್ಖಾಪಿ ಚ ಅಟ್ಠಿಮೇ;
ಛಳಭಿಞ್ಞಾ ಸಚ್ಛಿಕತಾ, ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಏಕಪದುಮಿಯೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಏಕಪದುಮಿಯತ್ಥೇರಸ್ಸಾಪದಾನಂ ಪಠಮಂ.
೨. ತೀಣುಪ್ಪಲಮಾಲಿಯತ್ಥೇರಅಪದಾನಂ
‘‘ಚನ್ದಭಾಗಾನದೀತೀರೇ ¶ ¶ , ಅಹೋಸಿಂ ವಾನರೋ ತದಾ;
ಅದ್ದಸಂ ವಿರಜಂ ಬುದ್ಧಂ, ನಿಸಿನ್ನಂ ಪಬ್ಬತನ್ತರೇ.
‘‘ಓಭಾಸೇನ್ತಂ ದಿಸಾ ಸಬ್ಬಾ, ಸಾಲರಾಜಂವ ಫುಲ್ಲಿತಂ;
ಲಕ್ಖಣಬ್ಯಞ್ಜನೂಪೇತಂ, ದಿಸ್ವಾ ಅತ್ತಮನೋ ಅಹುಂ.
‘‘ಉದಗ್ಗಚಿತ್ತೋ ಸುಮನೋ, ಪೀತಿಯಾ ಹಟ್ಠಮಾನಸೋ;
ತೀಣಿ ಉಪ್ಪಲಪುಪ್ಫಾನಿ, ಮತ್ಥಕೇ ಅಭಿರೋಪಯಿಂ.
‘‘ಪುಪ್ಫಾನಿ ಅಭಿರೋಪೇತ್ವಾ, ವಿಪಸ್ಸಿಸ್ಸ ಮಹೇಸಿನೋ;
ಸಗಾರವೋ ಭವಿತ್ವಾನ [ಗಮಿತ್ವಾನ (ಸೀ.), ನಮಿತ್ವಾನ (ಕ.)], ಪಕ್ಕಾಮಿಂ ಉತ್ತರಾಮುಖೋ.
‘‘ಗಚ್ಛನ್ತೋ ಪಟಿಕುಟಿಕೋ, ವಿಪ್ಪಸನ್ನೇನ ಚೇತಸಾ;
ಸೇಲನ್ತರೇ ಪತಿತ್ವಾನ [ಪಪತಿತ್ವಾ (ಸ್ಯಾ. ಕ.)], ಪಾಪುಣಿಂ ಜೀವಿತಕ್ಖಯಂ.
‘‘ತೇನ ¶ ಕಮ್ಮೇನ ಸುಕತೇನ, ಚೇತನಾಪಣಿಧೀಹಿ ಚ;
ಜಹಿತ್ವಾ ಮಾನುಸಂ ದೇಹಂ [ಪುರಿಮಂ ಜಾತಿಂ (?) ಉಪರಿ ೩೮ ವಗ್ಗೇ ತತಿಯಾಪದಾನೇ ಏವಮೇವ ದಿಸ್ಸತಿ], ತಾವತಿಂಸಮಗಚ್ಛಹಂ.
‘‘ಸತಾನಂ ¶ ತೀಣಿಕ್ಖತ್ತುಞ್ಚ, ದೇವರಜ್ಜಂ ಅಕಾರಯಿಂ;
ಸತಾನಂ ಪಞ್ಚಕ್ಖತ್ತುಞ್ಚ, ಚಕ್ಕವತ್ತೀ ಅಹೋಸಹಂ.
‘‘ಏಕನವುತಿತೋ ಕಪ್ಪೇ, ಯಂ ಪುಪ್ಫಮಭಿಪೂಜಯಿಂ;
ದುಗ್ಗತಿಂ ನಾಭಿಜಾನಾಮಿ, ಬುದ್ಧಪೂಜಾಯಿದಂ ಫಲಂ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ತೀಣುಪ್ಪಲಮಾಲಿಯೋ [ತಿಉಪ್ಪಲಮಾಲಿಯೋ (ಸೀ.)] ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ತೀಣುಪ್ಪಲಮಾಲಿಯತ್ಥೇರಸ್ಸಾಪದಾನಂ ದುತಿಯಂ.
೩. ಧಜದಾಯಕತ್ಥೇರಅಪದಾನಂ
‘‘ತಿಸ್ಸೋ ನಾಮ ಅಹು ಸತ್ಥಾ, ಲೋಕಜೇಟ್ಠೋ ನರಾಸಭೋ;
ತಯೋಪಧಿಕ್ಖಯೇ [ತಸ್ಸೋಪಧಿಕ್ಖಯೇ (ಸೀ.)] ದಿಸ್ವಾ, ಧಜಂ ಆರೋಪಿತಂ ಮಯಾ.
‘‘ತೇನ ¶ ಕಮ್ಮೇನ ಸುಕತೇನ, ಚೇತನಾಪಣಿಧೀಹಿ ಚ;
ಜಹಿತ್ವಾ ಮಾನುಸಂ ದೇಹಂ, ತಾವತಿಂಸಮಗಚ್ಛಹಂ.
‘‘ಸತಾನಂ ¶ ತೀಣಿಕ್ಖತ್ತುಞ್ಚ, ದೇವರಜ್ಜಂ ಅಕಾರಯಿಂ;
ಸತಾನಂ ಪಞ್ಚಕ್ಖತ್ತುಞ್ಚ, ಚಕ್ಕವತ್ತೀ ಅಹೋಸಹಂ.
‘‘ಪದೇಸರಜ್ಜಂ ¶ ವಿಪುಲಂ, ಗಣನಾತೋ ಅಸಙ್ಖಿಯಂ;
ಅನುಭೋಮಿ ಸಕಂ ಕಮ್ಮಂ, ಪುಬ್ಬೇ ಸುಕತಮತ್ತನೋ.
‘‘ದ್ವೇನವುತೇ ಇತೋ ಕಪ್ಪೇ, ಯಂ ಕಮ್ಮಮಕರಿಂ ತದಾ;
ದುಗ್ಗತಿಂ ನಾಭಿಜಾನಾಮಿ, ಧಜದಾನಸ್ಸಿದಂ ಫಲಂ.
‘‘ಇಚ್ಛಮಾನೋ ಚಹಂ ಅಜ್ಜ, ಸಕಾನನಂ ಸಪಬ್ಬತಂ;
ಖೋಮದುಸ್ಸೇನ ಛಾದೇಯ್ಯಂ, ತದಾ ಮಯ್ಹಂ ಕತೇ ಫಲಂ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಧಜದಾಯಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಧಜದಾಯಕತ್ಥೇರಸ್ಸಾಪದಾನಂ ತತಿಯಂ.
೪. ತಿಕಿಙ್ಕಣಿಪೂಜಕತ್ಥೇರಅಪದಾನಂ
‘‘ಹಿಮವನ್ತಸ್ಸಾವಿದೂರೇ, ಭೂತಗಣೋ ನಾಮ ಪಬ್ಬತೋ;
ತತ್ಥದ್ದಸಂ ಪಂಸುಕೂಲಂ, ದುಮಗ್ಗಮ್ಹಿ ವಿಲಗ್ಗಿತಂ.
‘‘ತೀಣಿ ಕಿಙ್ಕಣಿಪುಪ್ಫಾನಿ, ಓಚಿನಿತ್ವಾನಹಂ ತದಾ;
ಹಟ್ಠೋ ಹಟ್ಠೇನ ಚಿತ್ತೇನ, ಪಂಸುಕೂಲಂ ಅಪೂಜಯಿಂ.
‘‘ಏಕತ್ತಿಂಸೇ ಇತೋ ಕಪ್ಪೇ, ಯಂ ಕಮ್ಮಮಕರಿಂ ತದಾ;
ದುಗ್ಗತಿಂ ನಾಭಿಜಾನಾಮಿ, ತಿಣ್ಣಂ ಪುಪ್ಫಾನಿದಂ ಫಲಂ.
‘‘ಪಟಿಸಮ್ಭಿದಾ ¶ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ತಿಕಿಙ್ಕಣಿಪೂಜಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ತಿಕಿಙ್ಕಣಿಪೂಜಕತ್ಥೇರಸ್ಸಾಪದಾನಂ ಚತುತ್ಥಂ.
೫. ನಳಾಗಾರಿಕತ್ಥೇರಅಪದಾನಂ
‘‘ಹಿಮವನ್ತಸ್ಸಾವಿದೂರೇ ¶ , ಹಾರಿತೋ ನಾಮ ಪಬ್ಬತೋ;
ಸಯಮ್ಭೂ ನಾರದೋ ನಾಮ, ರುಕ್ಖಮೂಲೇ ವಸೀ ತದಾ.
‘‘ನಳಾಗಾರಂ ಕರಿತ್ವಾನ, ತಿಣೇನ ಛಾದಯಿಂ ಅಹಂ;
ಚಙ್ಕಮಂ ಸೋಧಯಿತ್ವಾನ, ಸಯಮ್ಭುಸ್ಸ ಅದಾಸಹಂ.
‘‘ಚತುದ್ದಸಸು ¶ ಕಪ್ಪೇಸು, ದೇವಲೋಕೇ ರಮಿಂ ಅಹಂ;
ಚತುಸತ್ತತಿಕ್ಖತ್ತುಞ್ಚ, ದೇವರಜ್ಜಂ ಅಕಾರಯಿಂ.
‘‘ಚತುಸತ್ತತಿ [ಸತ್ತಸತ್ತತಿ (ಸೀ.)] ಕ್ಖತ್ತುಞ್ಚ ¶ , ಚಕ್ಕವತ್ತೀ ಅಹೋಸಹಂ;
ಪದೇಸರಜ್ಜಂ ವಿಪುಲಂ, ಗಣನಾತೋ ಅಸಙ್ಖಿಯಂ.
‘‘ಉಬ್ಬಿದ್ಧಂ ಭವನಂ ಮಯ್ಹಂ, ಇನ್ದಲಟ್ಠೀವ ಉಗ್ಗತಂ;
ಸಹಸ್ಸಥಮ್ಭಂ ಅತುಲಂ, ವಿಮಾನಂ ಸಪಭಸ್ಸರಂ.
‘‘ದ್ವೇ ಸಮ್ಪತ್ತೀ ಅನುಭೋತ್ವಾ, ಸುಕ್ಕಮೂಲೇನ ಚೋದಿತೋ;
ಗೋತಮಸ್ಸ ಭಗವತೋ, ಸಾಸನೇ ಪಬ್ಬಜಿಂ ಅಹಂ.
‘‘ಪಧಾನಪಹಿತತ್ತೋಮ್ಹಿ ¶ , ಉಪಸನ್ತೋ ನಿರೂಪಧಿ;
ನಾಗೋವ ಬನ್ಧನಂ ಛೇತ್ವಾ, ವಿಹರಾಮಿ ಅನಾಸವೋ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ನಳಾಗಾರಿಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ನಳಾಗಾರಿಕತ್ಥೇರಸ್ಸಾಪದಾನಂ ಪಞ್ಚಮಂ.
೬. ಚಮ್ಪಕಪುಪ್ಫಿಯತ್ಥೇರಅಪದಾನಂ
‘‘ಹಿಮವನ್ತಸ್ಸಾವಿದೂರೇ, ಜಾಪಲೋ [ಚಾಪಲೋ (ಸೀ.), ಛಾಪಲೋ (ಸ್ಯಾ.)] ನಾಮ ಪಬ್ಬತೋ;
ಬುದ್ಧೋ ಸುದಸ್ಸನೋ ನಾಮ, ವಿಹಾಸಿ ಪಬ್ಬತನ್ತರೇ.
‘‘ಪುಪ್ಫಂ ಹೇಮವನ್ತಂ [ಹೇಮವತಂ (ಸೀ.), ಹೇಮವಣ್ಣಂ (ಸ್ಯಾ.)] ಗಯ್ಹ, ಗಚ್ಛಂ ವೇಹಾಯಸೇನಹಂ;
ಅದ್ದಸಂ ವಿರಜಂ ಬುದ್ಧಂ, ಓಘತಿಣ್ಣಮನಾಸವಂ.
‘‘ಸತ್ತ ¶ ಚಮ್ಪಕಪುಪ್ಫಾನಿ, ಸೀಸೇ ಕತ್ವಾನಹಂ ತದಾ;
ಬುದ್ಧಸ್ಸ ಅಭಿರೋಪೇಸಿಂ, ಸಯಮ್ಭುಸ್ಸ ಮಹೇಸಿನೋ.
‘‘ಏಕತ್ತಿಂಸೇ ಇತೋ ಕಪ್ಪೇ, ಯಂ ಪುಪ್ಫಮಭಿರೋಪಯಿಂ;
ದುಗ್ಗತಿಂ ನಾಭಿಜಾನಾಮಿ, ಬುದ್ಧಪೂಜಾಯಿದಂ ಫಲಂ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ¶ ಸುದಂ ಆಯಸ್ಮಾ ಚಮ್ಪಕಪುಪ್ಫಿಯೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಚಮ್ಪಕಪುಪ್ಫಿಯತ್ಥೇರಸ್ಸಾಪದಾನಂ ಛಟ್ಠಂ.
೭. ಪದುಮಪೂಜಕತ್ಥೇರಅಪದಾನಂ
‘‘ಹಿಮವನ್ತಸ್ಸಾವಿದೂರೇ ¶ , ರೋಮಸೋ ನಾಮ ಪಬ್ಬತೋ;
ಬುದ್ಧೋಪಿ ಸಮ್ಭವೋ ನಾಮ, ಅಬ್ಭೋಕಾಸೇ ವಸೀ ತದಾ.
‘‘ಭವನಾ ನಿಕ್ಖಮಿತ್ವಾನ, ಪದುಮಂ ಧಾರಯಿಂ ಅಹಂ;
ಏಕಾಹಂ ಧಾರಯಿತ್ವಾನ, ಪುನ ಭವನುಪಾಗಮಿಂ.
‘‘ಏಕನವುತಿತೋ ¶ ಕಪ್ಪೇ, ಯಂ ಪುಪ್ಫಮಭಿರೋಪಯಿಂ;
ದುಗ್ಗತಿಂ ನಾಭಿಜಾನಾಮಿ, ಬುದ್ಧಪೂಜಾಯಿದಂ ಫಲಂ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಪದುಮಪೂಜಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಪದುಮಪೂಜಕತ್ಥೇರಸ್ಸಾಪದಾನಂ ಸತ್ತಮಂ.
ತೇರಸಮಂ ಭಾಣವಾರಂ.
೮. ತಿಣಮುಟ್ಠಿದಾಯಕತ್ಥೇರಅಪದಾನಂ
‘‘ಹಿಮವನ್ತಸ್ಸಾವಿದೂರೇ, ಲಮ್ಬಕೋ ನಾಮ ಪಬ್ಬತೋ;
ಉಪತಿಸ್ಸೋ ನಾಮ ಸಮ್ಬುದ್ಧೋ, ಅಬ್ಭೋಕಾಸಮ್ಹಿ ಚಙ್ಕಮಿ.
‘‘ಮಿಗಲುದ್ದೋ ¶ ¶ ತದಾ ಆಸಿಂ, ಅರಞ್ಞೇ ಕಾನನೇ ಅಹಂ;
ದಿಸ್ವಾನ ತಂ ದೇವದೇವಂ, ಸಯಮ್ಭುಂ ಅಪರಾಜಿತಂ.
‘‘ವಿಪ್ಪಸನ್ನೇನ ಚಿತ್ತೇನ, ತದಾ ತಸ್ಸ ಮಹೇಸಿನೋ;
ನಿಸೀದನತ್ಥಂ ಬುದ್ಧಸ್ಸ, ತಿಣಮುಟ್ಠಿಮದಾಸಹಂ.
‘‘ದತ್ವಾನ ದೇವದೇವಸ್ಸ, ಭಿಯ್ಯೋ ಚಿತ್ತಂ ಪಸಾದಯಿಂ;
ಸಮ್ಬುದ್ಧಂ ಅಭಿವಾದೇತ್ವಾ, ಪಕ್ಕಾಮಿಂ ಉತ್ತರಾಮುಖೋ.
‘‘ಅಚಿರಂ ಗತಮತ್ತಂ ಮಂ, ಮಿಗರಾಜಾ ಅಪೋಥಯಿ [ಅಹೇಠಯಿ (ಸೀ. ಸ್ಯಾ.)];
ಸೀಹೇನ ಪೋಥಿತೋ [ಪಾತಿತೋ (ಸೀ. ಸ್ಯಾ.)] ಸನ್ತೋ, ತತ್ಥ ಕಾಲಙ್ಕತೋ ಅಹಂ.
‘‘ಆಸನ್ನೇ ಮೇ ಕತಂ ಕಮ್ಮಂ, ಬುದ್ಧಸೇಟ್ಠೇ ಅನಾಸವೇ;
ಸುಮುತ್ತೋ ಸರವೇಗೋವ, ದೇವಲೋಕಂ ಅಗಞ್ಛಹಂ.
‘‘ಯೂಪೋ ¶ ತತ್ಥ ಸುಭೋ ಆಸಿ, ಪುಞ್ಞಕಮ್ಮಾಭಿನಿಮ್ಮಿತೋ;
ಸಹಸ್ಸಕಣ್ಡೋ ಸತಭೇಣ್ಡು, ಧಜಾಲು ಹರಿತಾಮಯೋ.
‘‘ಪಭಾ ನಿದ್ಧಾವತೇ ತಸ್ಸ, ಸತರಂಸೀವ ಉಗ್ಗತೋ;
ಆಕಿಣ್ಣೋ ದೇವಕಞ್ಞಾಹಿ, ಆಮೋದಿಂ ಕಾಮಕಾಮಹಂ.
‘‘ದೇವಲೋಕಾ ಚವಿತ್ವಾನ, ಸುಕ್ಕಮೂಲೇನ ಚೋದಿತೋ;
ಆಗನ್ತ್ವಾನ ಮನುಸ್ಸತ್ತಂ, ಪತ್ತೋಮ್ಹಿ ಆಸವಕ್ಖಯಂ.
‘‘ಚತುನ್ನವುತಿತೋ ಕಪ್ಪೇ, ನಿಸೀದನಮದಾಸಹಂ;
ದುಗ್ಗತಿಂ ನಾಭಿಜಾನಾಮಿ, ತಿಣಮುಟ್ಠಿಯಿದಂ ಫಲಂ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ¶ ಸುದಂ ಆಯಸ್ಮಾ ತಿಣಮುಟ್ಠಿದಾಯಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ತಿಣಮುಟ್ಠಿದಾಯಕತ್ಥೇರಸ್ಸಾಪದಾನಂ ಅಟ್ಠಮಂ.
೯. ತಿನ್ದುಕಫಲದಾಯಕತ್ಥೇರಅಪದಾನಂ
‘‘ಕಣಿಕಾರಂವ ¶ ಜೋತನ್ತಂ, ನಿಸಿನ್ನಂ ಪಬ್ಬತನ್ತರೇ;
ಅದ್ದಸಂ ವಿರಜಂ ಬುದ್ಧಂ, ಓಘತಿಣ್ಣಮನಾಸವಂ.
‘‘ತಿನ್ದುಕಂ ¶ ಸಫಲಂ ದಿಸ್ವಾ, ಭಿನ್ದಿತ್ವಾನ ಸಕೋಸಕಂ [ಸಕೋಟಕಂ (ಸೀ.), ಸಕೋಟಿಕಂ (ಸ್ಯಾ.)];
ಪಸನ್ನಚಿತ್ತೋ ಸುಮನೋ, ಸಯಮ್ಭುಸ್ಸ ಮದಾಸಹಂ [ವೇಸ್ಸಭುಸ್ಸ ಅದಾಸಹಂ (ಸೀ.)].
‘‘ಏಕನವುತಿತೋ ಕಪ್ಪೇ, ಯಂ ಫಲಮದದಿಂ ತದಾ;
ದುಗ್ಗತಿಂ ನಾಭಿಜಾನಾಮಿ, ಫಲದಾನಸ್ಸಿದಂ ಫಲಂ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ತಿನ್ದುಕಫಲದಾಯಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ತಿನ್ದುಕಫಲದಾಯಕತ್ಥೇರಸ್ಸಾಪದಾನಂ ನವಮಂ.
೧೦. ಏಕಞ್ಜಲಿಯತ್ಥೇರಅಪದಾನಂ
‘‘ರೋಮಸೋ [ರೇವತೋ (ಸೀ.)] ನಾಮ ಸಮ್ಬುದ್ಧೋ, ನದೀಕೂಲೇ ವಸೀ ತದಾ;
ಅದ್ದಸಂ ವಿರಜಂ ಬುದ್ಧಂ, ಪೀತರಂಸಿಂವ ಭಾಣುಮಂ.
‘‘ಉಕ್ಕಾಮುಖಪಹಟ್ಠಂವ ¶ ¶ , ಖದಿರಙ್ಗಾರಸನ್ನಿಭಂ;
ಓಸಧಿಂವ ವಿರೋಚನ್ತಂ, ಏಕಞ್ಜಲಿಮಕಾಸಹಂ.
‘‘ಚತುನ್ನವುತಿತೋ ಕಪ್ಪೇ, ಯಂ ಅಞ್ಜಲಿಮಕಾಸಹಂ;
ದುಗ್ಗತಿಂ ನಾಭಿಜಾನಾಮಿ, ಅಞ್ಜಲಿಯಾ ಇದಂ ಫಲಂ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಏಕಞ್ಜಲಿಯೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಏಕಞ್ಜಲಿಯತ್ಥೇರಸ್ಸಾಪದಾನಂ ದಸಮಂ.
ಏಕಪದುಮಿಯವಗ್ಗೋ ಪಞ್ಚತಿಂಸತಿಮೋ.
ತಸ್ಸುದ್ದಾನಂ –
ಪದುಮೀ ಉಪ್ಪಲಮಾಲೀ, ಧಜೋ ಕಿಙ್ಕಣಿಕಂ ನಳಂ [ಕಿಙ್ಕಣಿಕೋ ನಳೋ (ಸೀ.)];
ಚಮ್ಪಕೋ ಪದುಮೋ ಮುಟ್ಠಿ, ತಿನ್ದುಕೇಕಞ್ಜಲೀ ತಥಾ;
ಛ ಚ ಸಟ್ಠಿ ಚ ಗಾಥಾಯೋ, ಗಣಿತಾಯೋ ವಿಭಾವಿಭಿ.
೩೬. ಸದ್ದಸಞ್ಞಕವಗ್ಗೋ
೧. ಸದ್ದಸಞ್ಞಕತ್ಥೇರಅಪದಾನಂ
‘‘ಮಿಗಲುದ್ದೋ ¶ ¶ ¶ ¶ ಪುರೇ ಆಸಿಂ, ಅರಞ್ಞೇ ಕಾನನೇ ಅಹಂ;
ತತ್ಥದ್ದಸಾಸಿಂ ಸಮ್ಬುದ್ಧಂ, ದೇವಸಙ್ಘಪುರಕ್ಖತಂ.
‘‘ಚತುಸಚ್ಚಂ ಪಕಾಸೇನ್ತಂ, ಉದ್ಧರನ್ತಂ ಮಹಾಜನಂ;
ಅಸ್ಸೋಸಿಂ ಮಧುರಂ ವಾಚಂ, ಕರವೀಕರುದೋಪಮಂ [ರುತೋಪಮಂ (?)].
‘‘ಬ್ರಹ್ಮಸರಸ್ಸ ಮುನಿನೋ, ಸಿಖಿನೋ ಲೋಕಬನ್ಧುನೋ;
ಘೋಸೇ ಚಿತ್ತಂ ಪಸಾದೇತ್ವಾ, ಪತ್ತೋಮ್ಹಿ ಆಸವಕ್ಖಯಂ.
‘‘ಏಕತ್ತಿಂಸೇ ಇತೋ ಕಪ್ಪೇ, ಯಂ ಕಮ್ಮಮಕರಿಂ ತದಾ;
ದುಗ್ಗತಿಂ ನಾಭಿಜಾನಾಮಿ, ಪಸಾದಸ್ಸ ಇದಂ ಫಲಂ.
‘‘ಪಟಿಸಮ್ಭಿದಾ ಚತಸ್ಸೋ, ವಿಮೋಕ್ಖಾಪಿ ಚ ಅಟ್ಠಿಮೇ;
ಛಳಭಿಞ್ಞಾ ಸಚ್ಛಿಕತಾ, ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಸದ್ದಸಞ್ಞಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಸದ್ದಸಞ್ಞಕತ್ಥೇರಸ್ಸಾಪದಾನಂ ಪಠಮಂ.
೨. ಯವಕಲಾಪಿಯತ್ಥೇರಅಪದಾನಂ
‘‘ನಗರೇ ಅರುಣವತಿಯಾ, ಆಸಿಂ ಯವಸಿಕೋ ತದಾ;
ಪನ್ಥೇ ದಿಸ್ವಾನ ಸಮ್ಬುದ್ಧಂ, ಯವಕಲಾಪಂ ಸನ್ಥರಿಂ [ಯವಕಲಾಪಮವತ್ಥರಿಂ (ಸೀ.)].
‘‘ಅನುಕಮ್ಪಕೋ ¶ ಕಾರುಣಿಕೋ, ಸಿಖೀ ಲೋಕಗ್ಗನಾಯಕೋ;
ಮಮ ಸಙ್ಕಪ್ಪಮಞ್ಞಾಯ, ನಿಸೀದಿ ಯವಸನ್ಥರೇ.
‘‘ದಿಸ್ವಾ ನಿಸಿನ್ನಂ ವಿಮಲಂ, ಮಹಾಝಾಯಿಂ ವಿನಾಯಕಂ;
ಪಾಮೋಜ್ಜಂ ಜನಯಿತ್ವಾನ, ತತ್ಥ ಕಾಲಙ್ಕತೋ ಅಹಂ.
‘‘ಏಕತ್ತಿಂಸೇ ¶ ಇತೋ ಕಪ್ಪೇ, ಯಂ ಕಮ್ಮಮಕರಿಂ ತದಾ;
ದುಗ್ಗತಿಂ ನಾಭಿಜಾನಾಮಿ, ಯವತ್ಥರೇ ಇದಂ ಫಲಂ.
‘‘ಪಟಿಸಮ್ಭಿದಾ ¶ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಯವಕಲಾಪಿಯೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಯವಕಲಾಪಿಯತ್ಥೇರಸ್ಸಾಪದಾನಂ ದುತಿಯಂ.
೩. ಕಿಂಸುಕಪೂಜಕತ್ಥೇರಅಪದಾನಂ
‘‘ಕಿಂಸುಕಂ ¶ ಪುಪ್ಫಿತಂ ದಿಸ್ವಾ, ಪಗ್ಗಹೇತ್ವಾನ ಅಞ್ಜಲಿಂ;
ಬುದ್ಧಂ ಸರಿತ್ವಾ ಸಿದ್ಧತ್ಥಂ, ಆಕಾಸೇ ಅಭಿಪೂಜಯಿಂ.
‘‘ಚತುನ್ನವುತಿತೋ ಕಪ್ಪೇ, ಯಂ ಪುಪ್ಫಮಭಿಪೂಜಯಿಂ;
ದುಗ್ಗತಿಂ ನಾಭಿಜಾನಾಮಿ, ಬುದ್ಧಪೂಜಾಯಿದಂ ಫಲಂ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ¶ ಸುದಂ ಆಯಸ್ಮಾ ಕಿಂಸುಕಪೂಜಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಕಿಂಸುಕಪೂಜಕತ್ಥೇರಸ್ಸಾಪದಾನಂ ತತಿಯಂ.
೪. ಸಕೋಸಕಕೋರಣ್ಡದಾಯಕತ್ಥೇರಅಪದಾನಂ
‘‘ಅಕ್ಕನ್ತಞ್ಚ ಪದಂ ದಿಸ್ವಾ, ಸಿಖಿನೋ ಲೋಕಬನ್ಧುನೋ;
ಏಕಂಸಂ ಅಜಿನಂ ಕತ್ವಾ, ಪದಸೇಟ್ಠಂ ಅವನ್ದಹಂ.
‘‘ಕೋರಣ್ಡಂ ಪುಪ್ಫಿತಂ ದಿಸ್ವಾ, ಪಾದಪಂ ಧರಣೀರುಹಂ;
ಸಕೋಸಕಂ [ಸಕೋಟಕಂ (ಸೀ. ಸ್ಯಾ.)] ಗಹೇತ್ವಾನ, ಪದಚಕ್ಕಂ ಅಪೂಜಯಿಂ.
‘‘ಏಕತ್ತಿಂಸೇ ಇತೋ ಕಪ್ಪೇ, ಯಂ ಕಮ್ಮಮಕರಿಂ ತದಾ;
ದುಗ್ಗತಿಂ ನಾಭಿಜಾನಾಮಿ, ಪದಪೂಜಾಯಿದಂ ಫಲಂ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಸಕೋಸಕ [ಸಕೋಟಕ (ಸೀ. ಸ್ಯಾ.)] ಕೋರಣ್ಡದಾಯಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಸಕೋಸಕಕೋರಣ್ಡದಾಯಕತ್ಥೇರಸ್ಸಾಪದಾನಂ ಚತುತ್ಥಂ.
೫. ದಣ್ಡದಾಯಕತ್ಥೇರಅಪದಾನಂ
‘‘ಕಾನನಂ ¶ ¶ ವನಮೋಗಯ್ಹ, ವೇಳುಂ ಛೇತ್ವಾನಹಂ ತದಾ;
ಆಲಮ್ಬನಂ ಕರಿತ್ವಾನ, ಸಙ್ಘಸ್ಸ ಅದದಂ ಅಹಂ.
‘‘ತೇನ ¶ ಚಿತ್ತಪ್ಪಸಾದೇನ, ಸುಬ್ಬತೇ ಅಭಿವಾದಿಯ;
ಆಲಮ್ಬನಮ್ಪಿ ದತ್ವಾನ, ಪಕ್ಕಾಮಿಂ ಉತ್ತರಾಮುಖೋ.
‘‘ಚತುನ್ನವುತಿತೋ ಕಪ್ಪೇ, ಯಂ ದಣ್ಡಮದದಿಂ ತದಾ;
ದುಗ್ಗತಿಂ ನಾಭಿಜಾನಾಮಿ, ದಣ್ಡದಾನಸ್ಸಿದಂ ಫಲಂ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ದಣ್ಡದಾಯಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ದಣ್ಡದಾಯಕತ್ಥೇರಸ್ಸಾಪದಾನಂ ಪಞ್ಚಮಂ.
೬. ಅಮ್ಬಯಾಗುದಾಯಕತ್ಥೇರಅಪದಾನಂ
‘‘ಸತರಂಸೀ ¶ ನಾಮ ಸಮ್ಬುದ್ಧೋ, ಸಯಮ್ಭೂ ಅಪರಾಜಿತೋ;
ವುಟ್ಠಹಿತ್ವಾ ಸಮಾಧಿಮ್ಹಾ, ಭಿಕ್ಖಾಯ ಮಮುಪಾಗಮಿ.
‘‘ಪಚ್ಚೇಕಬುದ್ಧಂ ದಿಸ್ವಾನ, ಅಮ್ಬಯಾಗುಂ ಅದಾಸಹಂ;
ವಿಪ್ಪಸನ್ನಮನಂ ತಸ್ಸ, ವಿಪ್ಪಸನ್ನೇನ ಚೇತಸಾ.
‘‘ಚತುನ್ನವುತಿತೋ ಕಪ್ಪೇ, ಯಂ ಕಮ್ಮಮಕರಿಂ ತದಾ;
ದುಗ್ಗತಿಂ ನಾಭಿಜಾನಾಮಿ, ಅಮ್ಬಯಾಗುಯಿದಂ ಫಲಂ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ¶ ಸುದಂ ಆಯಸ್ಮಾ ಅಮ್ಬಯಾಗುದಾಯಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಅಮ್ಬಯಾಗುದಾಯಕತ್ಥೇರಸ್ಸಾಪದಾನಂ ಛಟ್ಠಂ.
೭. ಸುಪುಟಕಪೂಜಕತ್ಥೇರಅಪದಾನಂ
‘‘ದಿವಾವಿಹಾರಾ ನಿಕ್ಖನ್ತೋ, ವಿಪಸ್ಸೀ ಲೋಕನಾಯಕೋ;
ಭಿಕ್ಖಾಯ ವಿಚರನ್ತೋ ಸೋ, ಮಮ ಸನ್ತಿಕುಪಾಗಮಿ.
‘‘ತತೋ ¶ ¶ ಪತೀತೋ ಸುಮನೋ, ಬುದ್ಧಸೇಟ್ಠಸ್ಸ ತಾದಿನೋ;
ಲೋಣಸುಪುಟಕಂ ದತ್ವಾ, ಕಪ್ಪಂ ಸಗ್ಗಮ್ಹಿ ಮೋದಹಂ.
‘‘ಏಕನವುತಿತೋ ಕಪ್ಪೇ, ಯಂ ಪುಟಕಮದಾಸಹಂ;
ದುಗ್ಗತಿಂ ನಾಭಿಜಾನಾಮಿ, ಪುಟಕಸ್ಸ ಇದಂ ಫಲಂ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಸುಪುಟಕಪೂಜಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಸುಪುಟಕಪೂಜಕತ್ಥೇರಸ್ಸಾಪದಾನಂ ಸತ್ತಮಂ.
೮. ಮಞ್ಚದಾಯಕತ್ಥೇರಅಪದಾನಂ
‘‘ವಿಪಸ್ಸಿನೋ ಭಗವತೋ, ಲೋಕಜೇಟ್ಠಸ್ಸ ತಾದಿನೋ;
ಏಕಂ ಮಞ್ಚಂ ಮಯಾ ದಿನ್ನಂ, ಪಸನ್ನೇನ ಸಪಾಣಿನಾ.
‘‘ಹತ್ಥಿಯಾನಂ ¶ ಅಸ್ಸಯಾನಂ, ದಿಬ್ಬಯಾನಂ ಸಮಜ್ಝಗಂ;
ತೇನ ಮಞ್ಚಕದಾನೇನ, ಪತ್ತೋಮ್ಹಿ ಆಸವಕ್ಖಯಂ.
‘‘ಏಕನವುತಿತೋ ¶ ಕಪ್ಪೇ, ಯಂ ಮಞ್ಚಮದದಿಂ ತದಾ;
ದುಗ್ಗತಿಂ ನಾಭಿಜಾನಾಮಿ, ಮಞ್ಚದಾನಸ್ಸಿದಂ ಫಲಂ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಮಞ್ಚದಾಯಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಮಞ್ಚದಾಯಕತ್ಥೇರಸ್ಸಾಪದಾನಂ ಅಟ್ಠಮಂ.
೯. ಸರಣಗಮನಿಯತ್ಥೇರಅಪದಾನಂ
‘‘ಆರುಹಿಮ್ಹ ತದಾ ನಾವಂ, ಭಿಕ್ಖು ಚಾಜೀವಕೋ ಚಹಂ;
ನಾವಾಯ ಭಿಜ್ಜಮಾನಾಯ, ಭಿಕ್ಖು ಮೇ ಸರಣಂ ಅದಾ.
‘‘ಏಕತ್ತಿಂಸೇ ಇತೋ ಕಪ್ಪೇ, ಯಞ್ಚ ಮೇ ಸರಣಂ ಅದಾ;
ದುಗ್ಗತಿಂ ನಾಭಿಜಾನಾಮಿ, ಸರಣಾಗಮನೇ ಫಲಂ.
‘‘ಪಟಿಸಮ್ಭಿದಾ ¶ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಸರಣಗಮನಿಯೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಸರಣಗಮನಿಯತ್ಥೇರಸ್ಸಾಪದಾನಂ ನವಮಂ.
೧೦. ಪಿಣ್ಡಪಾತಿಕತ್ಥೇರಅಪದಾನಂ
‘‘ತಿಸ್ಸೋ ¶ ¶ ನಾಮಾಸಿ ಸಮ್ಬುದ್ಧೋ, ವಿಹಾಸಿ ವಿಪಿನೇ ತದಾ;
ತುಸಿತಾ ಹಿ ಇಧಾಗನ್ತ್ವಾ, ಪಿಣ್ಡಪಾತಂ ಅದಾಸಹಂ.
‘‘ಸಮ್ಬುದ್ಧಮಭಿವಾದೇತ್ವಾ, ತಿಸ್ಸಂ ನಾಮ ಮಹಾಯಸಂ;
ಸಕಂ ಚಿತ್ತಂ ಪಸಾದೇತ್ವಾ, ತುಸಿತಂ ಅಗಮಾಸಹಂ.
‘‘ದ್ವೇನವುತೇ ಇತೋ ಕಪ್ಪೇ, ಯಂ ದಾನಮದದಿಂ ತದಾ;
ದುಗ್ಗತಿಂ ನಾಭಿಜಾನಾಮಿ, ಪಿಣ್ಡಪಾತಸ್ಸಿದಂ ಫಲಂ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಪಿಣ್ಡಪಾತಿಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಪಿಣ್ಡಪಾತಿಕತ್ಥೇರಸ್ಸಾಪದಾನಂ ದಸಮಂ.
ಸದ್ದಸಞ್ಞಕವಗ್ಗೋ ಛತ್ತಿಂಸತಿಮೋ.
ತಸ್ಸುದ್ದಾನಂ –
ಸದ್ದಸಞ್ಞೀ ಯವಸಿಕೋ, ಕಿಂಸುಕೋರಣ್ಡಪುಪ್ಫಿಯೋ;
ಆಲಮ್ಬನೋ ಅಮ್ಬಯಾಗು, ಸುಪುಟೀ ಮಞ್ಚದಾಯಕೋ;
ಸರಣಂ ಪಿಣ್ಡಪಾತೋ ಚ, ಗಾಥಾ ತಾಲೀಸಮೇವ ಚ.
೩೭. ಮನ್ದಾರವಪುಪ್ಫಿಯವಗ್ಗೋ
೧. ಮನ್ದಾರವಪುಪ್ಫಿಯತ್ಥೇರಅಪದಾನಂ
‘‘ತಾವತಿಂಸಾ ¶ ¶ ¶ ¶ ಇಧಾಗನ್ತ್ವಾ, ಮಙ್ಗಲೋ ನಾಮ ಮಾಣವೋ;
ಮನ್ದಾರವಂ ಗಹೇತ್ವಾನ, ವಿಪಸ್ಸಿಸ್ಸ ಮಹೇಸಿನೋ.
‘‘ಸಮಾಧಿನಾ ನಿಸಿನ್ನಸ್ಸ, ಮತ್ಥಕೇ ಧಾರಯಿಂ ಅಹಂ;
ಸತ್ತಾಹಂ ಧಾರಯಿತ್ವಾನ, ದೇವಲೋಕಂ ಪುನಾಗಮಿಂ.
‘‘ಏಕನವುತಿತೋ ಕಪ್ಪೇ, ಯಂ ಪುಪ್ಫಮಭಿಪೂಜಯಿಂ;
ದುಗ್ಗತಿಂ ನಾಭಿಜಾನಾಮಿ, ಬುದ್ಧಪೂಜಾಯಿದಂ ಫಲಂ.
‘‘ಪಟಿಸಮ್ಭಿದಾ ಚತಸ್ಸೋ, ವಿಮೋಕ್ಖಾಪಿ ಚ ಅಟ್ಠಿಮೇ;
ಛಳಭಿಞ್ಞಾ ಸಚ್ಛಿಕತಾ, ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಮನ್ದಾರವಪುಪ್ಫಿಯೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಮನ್ದಾರವಪುಪ್ಫಿಯತ್ಥೇರಸ್ಸಾಪದಾನಂ ಪಠಮಂ.
೨. ಕಕ್ಕಾರುಪುಪ್ಫಿಯತ್ಥೇರಅಪದಾನಂ
‘‘ಯಾಮಾ ದೇವಾ ಇಧಾಗನ್ತ್ವಾ, ಗೋತಮಂ ಸಿರಿವಚ್ಛಸಂ;
ಕಕ್ಕಾರುಮಾಲಂ [ಗೋಕ್ಖನುಮಾಲಂ (ಸೀ.)] ಪಗ್ಗಯ್ಹ, ಬುದ್ಧಸ್ಸ ಅಭಿರೋಪಯಿಂ.
‘‘ದ್ವೇನವುತೇ ಇತೋ ಕಪ್ಪೇ, ಯಂ ಬುದ್ಧಮಭಿಪೂಜಯಿಂ;
ದುಗ್ಗತಿಂ ನಾಭಿಜಾನಾಮಿ, ಬುದ್ಧಪೂಜಾಯಿದಂ ಫಲಂ.
‘‘ಪಟಿಸಮ್ಭಿದಾ ¶ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಕಕ್ಕಾರುಪುಪ್ಫಿಯೋ [ಗೋಕ್ಖನುಪುಪ್ಫಿಯೋ (ಕ.)] ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಕಕ್ಕಾರುಪುಪ್ಫಿಯತ್ಥೇರಸ್ಸಾಪದಾನಂ ದುತಿಯಂ.
೩. ಭಿಸಮುಳಾಲದಾಯಕತ್ಥೇರಅಪದಾನಂ
‘‘ಫುಸ್ಸೋ ¶ ¶ ನಾಮಾಸಿ ಸಮ್ಬುದ್ಧೋ, ಸಬ್ಬಧಮ್ಮಾನ ಪಾರಗೂ;
ವಿವೇಕಕಾಮೋ ಸಬ್ಬಞ್ಞೂ [ಸಪ್ಪಞ್ಞೋ (ಸೀ. ಸ್ಯಾ.)], ಆಗಞ್ಛಿ ಮಮ ಸನ್ತಿಕೇ.
‘‘ತಸ್ಮಿಂ ಚಿತ್ತಂ ಪಸಾದೇತ್ವಾ, ಮಹಾಕಾರುಣಿಕೇ ಜಿನೇ;
ಭಿಸಮುಳಾಲಂ ಪಗ್ಗಯ್ಹ, ಬುದ್ಧಸೇಟ್ಠಸ್ಸದಾಸಹಂ.
‘‘ದ್ವೇನವುತೇ ¶ ಇತೋ ಕಪ್ಪೇ, ಯಂ ಭಿಸಮದದಿಂ ತದಾ;
ದುಗ್ಗತಿಂ ನಾಭಿಜಾನಾಮಿ, ಭಿಸದಾನಸ್ಸಿದಂ ಫಲಂ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಭಿಸಮುಳಾಲದಾಯಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಭಿಸಮುಳಾಲದಾಯಕತ್ಥೇರಸ್ಸಾಪದಾನಂ ತತಿಯಂ.
೪. ಕೇಸರಪುಪ್ಫಿಯತ್ಥೇರಅಪದಾನಂ
‘‘ವಿಜ್ಜಾಧರೋ ¶ ತದಾ ಆಸಿಂ, ಹಿಮವನ್ತಮ್ಹಿ ಪಬ್ಬತೇ;
ಅದ್ದಸಂ ವಿರಜಂ ಬುದ್ಧಂ, ಚಙ್ಕಮನ್ತಂ ಮಹಾಯಸಂ.
‘‘ತೀಣಿ ಕೇಸರಪುಪ್ಫಾನಿ [ಕೇಸರಿಪುಪ್ಫಾನಿ (ಸೀ.)], ಸೀಸೇ ಕತ್ವಾನಹಂ ತದಾ;
ಉಪಸಙ್ಕಮ್ಮ ಸಮ್ಬುದ್ಧಂ, ವೇಸ್ಸಭುಂ ಅಭಿಪೂಜಯಿಂ.
‘‘ಏಕತ್ತಿಂಸೇ ಇತೋ ಕಪ್ಪೇ, ಯಂ ಕಮ್ಮಮಕರಿಂ ತದಾ;
ದುಗ್ಗತಿಂ ನಾಭಿಜಾನಾಮಿ, ಬುದ್ಧಪೂಜಾಯಿದಂ ಫಲಂ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಕೇಸರಪುಪ್ಫಿಯೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಕೇಸರಪುಪ್ಫಿಯತ್ಥೇರಸ್ಸಾಪದಾನಂ ಚತುತ್ಥಂ.
೫. ಅಙ್ಕೋಲಪುಪ್ಫಿಯತ್ಥೇರಅಪದಾನಂ
‘‘ಪದುಮೋ ನಾಮ ಸಮ್ಬುದ್ಧೋ, ಚಿತ್ತಕೂಟೇ ವಸೀ ತದಾ;
ದಿಸ್ವಾನ ತಂ ಅಹಂ ಬುದ್ಧಂ, ಸಯಮ್ಭುಂ ಅಪರಾಜಿತಂ [ಉಪಗಚ್ಛಿಹಂ (ಸೀ. ಸ್ಯಾ.)].
‘‘ಅಙ್ಕೋಲಂ ¶ ¶ ಪುಪ್ಫಿತಂ ದಿಸ್ವಾ, ಓಚಿನಿತ್ವಾನಹಂ ತದಾ;
ಉಪಗನ್ತ್ವಾನ ಸಮ್ಬುದ್ಧಂ, ಪೂಜಯಿಂ ಪದುಮಂ ಜಿನಂ.
‘‘ಏಕತ್ತಿಂಸೇ ಇತೋ ಕಪ್ಪೇ, ಯಂ ಪುಪ್ಫಮಭಿಪೂಜಯಿಂ;
ದುಗ್ಗತಿಂ ನಾಭಿಜಾನಾಮಿ, ಬುದ್ಧಪೂಜಾಯಿದಂ ಫಲಂ.
‘‘ಪಟಿಸಮ್ಭಿದಾ ¶ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಅಙ್ಕೋಲಪುಪ್ಫಿಯೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಅಙ್ಕೋಲಪುಪ್ಫಿಯತ್ಥೇರಸ್ಸಾಪದಾನಂ ಪಞ್ಚಮಂ.
೬. ಕದಮ್ಬಪುಪ್ಫಿಯತ್ಥೇರಅಪದಾನಂ
‘‘ಸುವಣ್ಣವಣ್ಣಂ ಸಮ್ಬುದ್ಧಂ, ಗಚ್ಛನ್ತಂ ಅನ್ತರಾಪಣೇ;
ಕಞ್ಚನಗ್ಘಿಯಸಙ್ಕಾಸಂ, ಬಾತ್ತಿಂಸವರಲಕ್ಖಣಂ.
‘‘ನಿಸಜ್ಜ ಪಾಸಾದವರೇ, ಅದ್ದಸಂ ಲೋಕನಾಯಕಂ;
ಕದಮ್ಬಪುಪ್ಫಂ ಪಗ್ಗಯ್ಹ, ವಿಪಸ್ಸಿಂ ಅಭಿಪೂಜಯಿಂ.
‘‘ಏಕನವುತಿತೋ ¶ ಕಪ್ಪೇ, ಯಂ ಬುದ್ಧಮಭಿಪೂಜಯಿಂ;
ದುಗ್ಗತಿಂ ನಾಭಿಜಾನಾಮಿ, ಬುದ್ಧಪೂಜಾಯಿದಂ ಫಲಂ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಕದಮ್ಬಪುಪ್ಫಿಯೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಕದಮ್ಬಪುಪ್ಫಿಯತ್ಥೇರಸ್ಸಾಪದಾನಂ ಛಟ್ಠಂ.
೭. ಉದ್ದಾಲಕಪುಪ್ಫಿಯತ್ಥೇರಅಪದಾನಂ
‘‘ಅನೋಮೋ ¶ [ಸುಜಾತೋ (ಸ್ಯಾ.), ಅನುಮೋ (ಕ.)] ನಾಮ ಸಮ್ಬುದ್ಧೋ, ಗಙ್ಗಾಕೂಲೇ ವಸೀ ತದಾ;
ಉದ್ದಾಲಕಂ ಗಹೇತ್ವಾನ, ಪೂಜಯಿಂ ಅಪರಾಜಿತಂ.
‘‘ಏಕತ್ತಿಂಸೇ ¶ ಇತೋ ಕಪ್ಪೇ, ಯಂ ಪುಪ್ಫಮಭಿಪೂಜಯಿಂ;
ದುಗ್ಗತಿಂ ನಾಭಿಜಾನಾಮಿ, ಬುದ್ಧಪೂಜಾಯಿದಂ ಫಲಂ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಉದ್ದಾಲಕಪುಪ್ಫಿಯೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಉದ್ದಾಲಕಪುಪ್ಫಿಯತ್ಥೇರಸ್ಸಾಪದಾನಂ ಸತ್ತಮಂ.
೮. ಏಕಚಮ್ಪಕಪುಪ್ಫಿಯತ್ಥೇರಅಪದಾನಂ
‘‘ಉಪಸನ್ತೋ ¶ ಚ ಸಮ್ಬುದ್ಧೋ, ವಸತೀ ಪಬ್ಬತನ್ತರೇ;
ಏಕಚಮ್ಪಕಮಾದಾಯ, ಉಪಗಚ್ಛಿಂ ನರುತ್ತಮಂ.
‘‘ಪಸನ್ನಚಿತ್ತೋ ಸುಮನೋ, ಪಚ್ಚೇಕಮುನಿಮುತ್ತಮಂ;
ಉಭೋಹತ್ಥೇಹಿ ಪಗ್ಗಯ್ಹ, ಪೂಜಯಿಂ ಅಪರಾಜಿತಂ.
‘‘ಪಞ್ಚಸಟ್ಠಿಮ್ಹಿತೋ ಕಪ್ಪೇ, ಯಂ ಪುಪ್ಫಮಭಿಪೂಜಯಿಂ;
ದುಗ್ಗತಿಂ ನಾಭಿಜಾನಾಮಿ, ಬುದ್ಧಪೂಜಾಯಿದಂ ಫಲಂ.
‘‘ಪಟಿಸಮ್ಭಿದಾ ¶ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಏಕಚಮ್ಪಕಪುಪ್ಫಿಯೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಏಕಚಮ್ಪಕಪುಪ್ಫಿಯತ್ಥೇರಸ್ಸಾಪದಾನಂ ಅಟ್ಠಮಂ.
೯. ತಿಮಿರಪುಪ್ಫಿಯತ್ಥೇರಅಪದಾನಂ
‘‘ಚನ್ದಭಾಗಾನದೀತೀರೇ, ಅನುಸೋತಂ ವಜಾಮಹಂ;
ಅದ್ದಸಂ ವಿರಜಂ ಬುದ್ಧಂ, ಸಾಲರಾಜಂವ ಫುಲ್ಲಿತಂ.
‘‘ಪಸನ್ನಚಿತ್ತೋ ¶ ಸುಮನೋ, ಪಚ್ಚೇಕಮುನಿಮುತ್ತಮಂ;
ಗಹೇತ್ವಾ ತಿಮಿರಂ ಪುಪ್ಫಂ, ಮತ್ಥಕೇ ಓಕಿರಿಂ ಅಹಂ.
‘‘ಏಕನವುತಿತೋ ಕಪ್ಪೇ, ಯಂ ಪುಪ್ಫಮಭಿಪೂಜಯಿಂ;
ದುಗ್ಗತಿಂ ನಾಭಿಜಾನಾಮಿ, ಬುದ್ಧಪೂಜಾಯಿದಂ ಫಲಂ.
‘‘ಪಟಿಸಮ್ಭಿದಾ ¶ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ತಿಮಿರಪುಪ್ಫಿಯೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ತಿಮಿರಪುಪ್ಫಿಯತ್ಥೇರಸ್ಸಾಪದಾನಂ ನವಮಂ.
೧೦. ಸಳಲಪುಪ್ಫಿಯತ್ಥೇರಅಪದಾನಂ
‘‘ಚನ್ದಭಾಗಾನದೀತೀರೇ ¶ , ಅಹೋಸಿಂ ಕಿನ್ನರೋ ತದಾ;
ತತ್ಥದ್ದಸಂ ದೇವದೇವಂ, ಚಙ್ಕಮನ್ತಂ ನರಾಸಭಂ.
‘‘ಓಚಿನಿತ್ವಾನ ¶ ಸಳಲಂ, ಪುಪ್ಫಂ ಬುದ್ಧಸ್ಸದಾಸಹಂ;
ಉಪಸಿಙ್ಘಿ ಮಹಾವೀರೋ, ಸಳಲಂ ದೇವಗನ್ಧಿಕಂ.
‘‘ಪಟಿಗ್ಗಹೇತ್ವಾ ಸಮ್ಬುದ್ಧೋ, ವಿಪಸ್ಸೀ ಲೋಕನಾಯಕೋ;
ಉಪಸಿಙ್ಘಿ ಮಹಾವೀರೋ, ಪೇಕ್ಖಮಾನಸ್ಸ ಮೇ ಸತೋ.
‘‘ಪಸನ್ನಚಿತ್ತೋ ಸುಮನೋ, ವನ್ದಿತ್ವಾ ದ್ವಿಪದುತ್ತಮಂ;
ಅಞ್ಜಲಿಂ ಪಗ್ಗಹೇತ್ವಾನ, ಪುನ ಪಬ್ಬತಮಾರುಹಿಂ.
‘‘ಏಕನವುತಿತೋ ಕಪ್ಪೇ, ಯಂ ಪುಪ್ಫಮಭಿಪೂಜಯಿಂ;
ದುಗ್ಗತಿಂ ನಾಭಿಜಾನಾಮಿ, ಬುದ್ಧಪೂಜಾಯಿದಂ ಫಲಂ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಸಳಲಪುಪ್ಫಿಯೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಸಳಲಪುಪ್ಫಿಯತ್ಥೇರಸ್ಸಾಪದಾನಂ ದಸಮಂ.
ಮನ್ದಾರವಪುಪ್ಫಿಯವಗ್ಗೋ ಸತ್ತತಿಂಸತಿಮೋ.
ತಸ್ಸುದ್ದಾನಂ –
ಮನ್ದಾರವಞ್ಚ ಕಕ್ಕಾರು, ಭಿಸಕೇಸರಪುಪ್ಫಿಯೋ;
ಅಙ್ಕೋಲಕೋ ¶ ಕದಮ್ಬೀ ಚ, ಉದ್ದಾಲೀ ಏಕಚಮ್ಪಕೋ;
ತಿಮಿರಂ ಸಳಲಞ್ಚೇವ, ಗಾಥಾ ತಾಲೀಸಮೇವ ಚ.
೩೮. ಬೋಧಿವನ್ದನವಗ್ಗೋ
೧. ಬೋಧಿವನ್ದಕತ್ಥೇರಅಪದಾನಂ
‘‘ಪಾಟಲಿಂ ¶ ¶ ¶ ಹರಿತಂ ದಿಸ್ವಾ, ಪಾದಪಂ ಧರಣೀರುಹಂ;
ಏಕಂಸಂ ಅಞ್ಜಲಿಂ ಕತ್ವಾ, ಅವನ್ದಿಂ ಪಾಟಲಿಂ ಅಹಂ.
‘‘ಅಞ್ಜಲಿಂ ಪಗ್ಗಹೇತ್ವಾನ, ಗರುಂ ಕತ್ವಾನ ಮಾನಸಂ;
ಅನ್ತೋಸುದ್ಧಂ ಬಹಿಸುದ್ಧಂ, ಸುವಿಮುತ್ತಮನಾಸವಂ.
‘‘ವಿಪಸ್ಸಿಂ ಲೋಕಮಹಿತಂ, ಕರುಣಾಞಾಣಸಾಗರಂ;
ಸಮ್ಮುಖಾ ವಿಯ ಸಮ್ಬುದ್ಧಂ, ಅವನ್ದಿಂ ಪಾಟಲಿಂ ಅಹಂ.
‘‘ಏಕನವುತಿತೋ ಕಪ್ಪೇ, ಯಂ ಬೋಧಿಮಭಿವನ್ದಹಂ;
ದುಗ್ಗತಿಂ ನಾಭಿಜಾನಾಮಿ, ವನ್ದನಾಯ ಇದಂ ಫಲಂ.
‘‘ಪಟಿಸಮ್ಭಿದಾ ಚತಸ್ಸೋ, ವಿಮೋಕ್ಖಾಪಿ ಚ ಅಟ್ಠಿಮೇ;
ಛಳಭಿಞ್ಞಾ ಸಚ್ಛಿಕತಾ, ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಬೋಧಿವನ್ದಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಬೋಧಿವನ್ದಕತ್ಥೇರಸ್ಸಾಪದಾನಂ ಪಠಮಂ.
೨. ಪಾಟಲಿಪುಪ್ಫಿಯತ್ಥೇರಅಪದಾನಂ
‘‘ವಿಪಸ್ಸೀ ¶ ನಾಮ ಭಗವಾ, ಸಯಮ್ಭೂ ಅಗ್ಗಪುಗ್ಗಲೋ;
ಪುರಕ್ಖತೋ ಸಸಿಸ್ಸೇಹಿ, ಪಾವಿಸಿ ಬನ್ಧುಮಂ ಜಿನೋ.
‘‘ತೀಣಿ ಪಾಟಲಿಪುಪ್ಫಾನಿ, ಉಚ್ಛಙ್ಗೇ ಠಪಿತಾನಿ ಮೇ;
ಸೀಸಂ ನ್ಹಾಯಿತುಕಾಮೋವ, ನದೀತಿತ್ಥಂ ಅಗಚ್ಛಹಂ.
‘‘ನಿಕ್ಖಮ್ಮ ಬನ್ಧುಮತಿಯಾ, ಅದ್ದಸಂ ಲೋಕನಾಯಕಂ;
ಇನ್ದೀವರಂವ ಜಲಿತಂ, ಆದಿತ್ತಂವ ಹುತಾಸನಂ.
‘‘ಬ್ಯಗ್ಘೂಸಭಂವ ¶ ಪವರಂ, ಅಭಿಜಾತಂವ ಕೇಸರಿಂ;
ಗಚ್ಛನ್ತಂ ಸಮಣಾನಗ್ಗಂ, ಭಿಕ್ಖುಸಙ್ಘಪುರಕ್ಖತಂ.
‘‘ತಸ್ಮಿಂ ¶ ಪಸನ್ನೋ [ಸಮಣೇ (ಕ.)] ಸುಗತೇ, ಕಿಲೇಸಮಲಧೋವನೇ;
ಗಹೇತ್ವಾ ತೀಣಿ ಪುಪ್ಫಾನಿ, ಬುದ್ಧಸೇಟ್ಠಂ ಅಪೂಜಯಿಂ.
‘‘ಏಕನವುತಿತೋ ಕಪ್ಪೇ, ಯಂ ಪುಪ್ಫಮಭಿಪೂಜಯಿಂ;
ದುಗ್ಗತಿಂ ನಾಭಿಜಾನಾಮಿ, ಬುದ್ಧಪೂಜಾಯಿದಂ ಫಲಂ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಪಾಟಲಿಪುಪ್ಫಿಯೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಪಾಟಲಿಪುಪ್ಫಿಯತ್ಥೇರಸ್ಸಾಪದಾನಂ ದುತಿಯಂ.
೩. ತೀಣುಪ್ಪಲಮಾಲಿಯತ್ಥೇರಅಪದಾನಂ
‘‘ಚನ್ದಭಾಗಾನದೀತೀರೇ ¶ ¶ , ಅಹೋಸಿಂ ವಾನರೋ ತದಾ;
ಅದ್ದಸಂ ವಿರಜಂ ಬುದ್ಧಂ, ನಿಸಿನ್ನಂ ಪಬ್ಬತನ್ತರೇ.
‘‘ಓಭಾಸೇನ್ತಂ ದಿಸಾ ಸಬ್ಬಾ, ಸಾಲರಾಜಂವ ಫುಲ್ಲಿತಂ;
ಲಕ್ಖಣಬ್ಯಞ್ಜನೂಪೇತಂ, ದಿಸ್ವಾನತ್ತಮನೋ ಅಹಂ.
‘‘ಉದಗ್ಗಚಿತ್ತೋ ಸುಮನೋ, ಪೀತಿಯಾ ಹಟ್ಠಮಾನಸೋ;
ತೀಣಿ ಉಪ್ಪಲಪುಪ್ಫಾನಿ, ಮತ್ಥಕೇ ಅಭಿರೋಪಯಿಂ.
‘‘ಪೂಜಯಿತ್ವಾನ ಪುಪ್ಫಾನಿ, ಫುಸ್ಸಸ್ಸಾಹಂ ಮಹೇಸಿನೋ;
ಸಗಾರವೋ ಭವಿತ್ವಾನ, ಪಕ್ಕಾಮಿಂ ಉತ್ತರಾಮುಖೋ.
‘‘ಗಚ್ಛನ್ತೋ ಪಟಿಕುಟಿಕೋ, ವಿಪ್ಪಸನ್ನೇನ ಚೇತಸಾ;
ಸೇಲನ್ತರೇ ಪತಿತ್ವಾನ, ಪಾಪುಣಿಂ ಜೀವಿತಕ್ಖಯಂ.
‘‘ತೇನ ಕಮ್ಮೇನ ಸುಕತೇನ, ಚೇತನಾಪಣಿಧೀಹಿ ಚ;
ಜಹಿತ್ವಾ ಪುರಿಮಂ ಜಾತಿಂ, ತಾವತಿಂಸಮಗಚ್ಛಹಂ.
‘‘ಸತಾನಂ ತೀಣಿಕ್ಖತ್ತುಞ್ಚ, ದೇವರಜ್ಜಮಕಾರಯಿಂ;
ಸತಾನಂ ಪಞ್ಚಕ್ಖತ್ತುಞ್ಚ, ಚಕ್ಕವತ್ತೀ ಅಹೋಸಹಂ.
‘‘ದ್ವೇನವುತೇ ಇತೋ ಕಪ್ಪೇ, ಯಂ ಪುಪ್ಫಮಭಿಪೂಜಯಿಂ;
ದುಗ್ಗತಿಂ ನಾಭಿಜಾನಾಮಿ, ಬುದ್ಧಪೂಜಾಯಿದಂ ಫಲಂ.
‘‘ಪಟಿಸಮ್ಭಿದಾ ¶ ¶ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ¶ ಸುದಂ ಆಯಸ್ಮಾ ತೀಣುಪ್ಪಲಮಾಲಿಯೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ತೀಣುಪ್ಪಲಮಾಲಿಯತ್ಥೇರಸ್ಸಾಪದಾನಂ ತತಿಯಂ.
೪. ಪಟ್ಟಿಪುಪ್ಫಿಯತ್ಥೇರಅಪದಾನಂ
‘‘ಯದಾ ನಿಬ್ಬಾಯಿ ಸಮ್ಬುದ್ಧೋ, ಮಹೇಸೀ ಪದುಮುತ್ತರೋ;
ಸಮಾಗಮ್ಮ ಜನಾ ಸಬ್ಬೇ, ಸರೀರಂ ನೀಹರನ್ತಿ ತೇ.
‘‘ನೀಹರನ್ತೇ ಸರೀರಮ್ಹಿ, ವಜ್ಜಮಾನಾಸು ಭೇರಿಸು;
ಪಸನ್ನಚಿತ್ತೋ ಸುಮನೋ, ಪಟ್ಟಿಪುಪ್ಫಂ ಅಪೂಜಯಿಂ.
‘‘ಸತಸಹಸ್ಸಿತೋ ಕಪ್ಪೇ, ಯಂ ಪುಪ್ಫಮಭಿಪೂಜಯಿಂ;
ದುಗ್ಗತಿಂ ನಾಭಿಜಾನಾಮಿ, ಸರೀರಪೂಜಿತೇ ಫಲಂ.
‘‘ಕಿಲೇಸಾ ಝಾಪಿತಾ ಮಯ್ಹಂ, ಭವಾ ಸಬ್ಬೇ ಸಮೂಹತಾ;
ನಾಗೋವ ಬನ್ಧನಂ ಛೇತ್ವಾ, ವಿಹರಾಮಿ ಅನಾಸವೋ.
‘‘ಸ್ವಾಗತಂ ವತ ಮೇ ಆಸಿ, ಮಮ ಬುದ್ಧಸ್ಸ [ಬುದ್ಧಸೇಟ್ಠಸ್ಸ (ಸೀ.)] ಸನ್ತಿಕೇ;
ತಿಸ್ಸೋ ವಿಜ್ಜಾ ಅನುಪ್ಪತ್ತಾ, ಕತಂ ಬುದ್ಧಸ್ಸ ಸಾಸನಂ.
‘‘ಪಟಿಸಮ್ಭಿದಾ ¶ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಪಟ್ಟಿಪುಪ್ಫಿಯೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಪಟ್ಟಿಪುಪ್ಫಿಯತ್ಥೇರಸ್ಸಾಪದಾನಂ ಚತುತ್ಥಂ.
೫. ಸತ್ತಪಣ್ಣಿಯತ್ಥೇರಅಪದಾನಂ
‘‘ಸುಮನೋ ¶ ನಾಮ ಸಮ್ಬುದ್ಧೋ, ಉಪ್ಪಜ್ಜಿ ಲೋಕನಾಯಕೋ;
ಪಸನ್ನಚಿತ್ತೋ ಸುಮನೋ, ಸತ್ತಪಣ್ಣಿಮಪೂಜಯಿಂ.
‘‘ಸತಸಹಸ್ಸಿತೋ ಕಪ್ಪೇ, ಸತ್ತಪಣ್ಣಿಮಪೂಜಯಿಂ;
ದುಗ್ಗತಿಂ ನಾಭಿಜಾನಾಮಿ, ಸತ್ತಪಣ್ಣಿಪೂಜಾಯಿದಂ [ಸತ್ತಪಣ್ಣಿಸ್ಸಿದಂ (ಸೀ.)] ಫಲಂ.
‘‘ಕಿಲೇಸಾ ¶ ¶ ಝಾಪಿತಾ ಮಯ್ಹಂ…ಪೇ… ವಿಹರಾಮಿ ಅನಾಸವೋ.
‘‘ಸ್ವಾಗತಂ ವತ ಮೇ ಆಸಿ…ಪೇ… ಕತಂ ಬುದ್ಧಸ್ಸ ಸಾಸನಂ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಸತ್ತಪಣ್ಣಿಯೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಸತ್ತಪಣ್ಣಿಯತ್ಥೇರಸ್ಸಾಪದಾನಂ ಪಞ್ಚಮಂ.
೬. ಗನ್ಧಮುಟ್ಠಿಯತ್ಥೇರಅಪದಾನಂ
[ಇಧ ಗಾಥಾದ್ಧಂ ಊನಂ ವಿಯ ದಿಸ್ಸತಿ] ‘‘ಚಿತಕೇ ಕರೀಯಮಾನೇ, ನಾನಾಗನ್ಧೇ ಸಮಾಹತೇ;
ಪಸನ್ನಚಿತ್ತೋ ಸುಮನೋ, ಗನ್ಧಮುಟ್ಠಿಮಪೂಜಯಿಂ.
‘‘ಸತಸಹಸ್ಸಿತೋ ¶ ಕಪ್ಪೇ, ಚಿತಕಂ ಯಂ ಅಪೂಜಯಿಂ;
ದುಗ್ಗತಿಂ ನಾಭಿಜಾನಾಮಿ, ಚಿತಪೂಜಾಯಿದಂ ಫಲಂ.
‘‘ಕಿಲೇಸಾ ಝಾಪಿತಾ ಮಯ್ಹಂ…ಪೇ… ವಿಹರಾಮಿ ಅನಾಸವೋ.
‘‘ಸ್ವಾಗತಂ ವತ ಮೇ ಆಸಿ…ಪೇ… ಕತಂ ಬುದ್ಧಸ್ಸ ಸಾಸನಂ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಗನ್ಧಮುಟ್ಠಿಯೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಗನ್ಧಮುಟ್ಠಿಯತ್ಥೇರಸ್ಸಾಪದಾನಂ ಛಟ್ಠಂ.
೭. ಚಿತಕಪೂಜಕತ್ಥೇರಅಪದಾನಂ
‘‘ಪರಿನಿಬ್ಬುತೇ ಭಗವತಿ, ಜಲಜುತ್ತಮನಾಮಕೇ;
ಆರೋಪಿತಮ್ಹಿ ಚಿತಕೇ, ಸಾಲಪುಪ್ಫಮಪೂಜಯಿಂ.
‘‘ಸತಸಹಸ್ಸಿತೋ ಕಪ್ಪೇ, ಯಂ ಪುಪ್ಫಮಭಿಪೂಜಯಿಂ;
ದುಗ್ಗತಿಂ ನಾಭಿಜಾನಾಮಿ, ಚಿತಪೂಜಾಯಿದಂ ಫಲಂ.
‘‘ಕಿಲೇಸಾ ¶ ¶ ¶ ಝಾಪಿತಾ ಮಯ್ಹಂ…ಪೇ… ವಿಹರಾಮಿ ಅನಾಸವೋ.
‘‘ಸ್ವಾಗತಂ ವತ ಮೇ ಆಸಿ…ಪೇ… ಕತಂ ಬುದ್ಧಸ್ಸ ಸಾಸನಂ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಚಿತಕಪೂಜಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಚಿತಕಪೂಜಕತ್ಥೇರಸ್ಸಾಪದಾನಂ ಸತ್ತಮಂ.
೮. ಸುಮನತಾಲವಣ್ಟಿಯತ್ಥೇರಅಪದಾನಂ
‘‘ಸಿದ್ಧತ್ಥಸ್ಸ ¶ ಭಗವತೋ, ತಾಲವಣ್ಟಮದಾಸಹಂ;
ಸುಮನೇಹಿ ಪಟಿಚ್ಛನ್ನಂ, ಧಾರಯಾಮಿ ಮಹಾರಹಂ.
‘‘ಚತುನ್ನವುತಿತೋ ಕಪ್ಪೇ, ತಾಲವಣ್ಟಮದಾಸಹಂ;
ದುಗ್ಗತಿಂ ನಾಭಿಜಾನಾಮಿ, ತಾಲವಣ್ಟಸ್ಸಿದಂ ಫಲಂ.
‘‘ಕಿಲೇಸಾ ಝಾಪಿತಾ ಮಯ್ಹಂ…ಪೇ… ವಿಹರಾಮಿ ಅನಾಸವೋ.
‘‘ಸ್ವಾಗತಂ ವತ ಮೇ ಆಸಿ…ಪೇ… ಕತಂ ಬುದ್ಧಸ್ಸ ಸಾಸನಂ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ¶ ಸುದಂ ಆಯಸ್ಮಾ ಸುಮನತಾಲವಣ್ಟಿಯೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಸುಮನತಾಲವಣ್ಟಿಯತ್ಥೇರಸ್ಸಾಪದಾನಂ ಅಟ್ಠಮಂ.
೯. ಸುಮನದಾಮಿಯತ್ಥೇರಅಪದಾನಂ
‘‘ಸಿದ್ಧತ್ಥಸ್ಸ ಭಗವತೋ, ನ್ಹಾತಕಸ್ಸ ತಪಸ್ಸಿನೋ;
ಕತ್ವಾನ ಸುಮನದಾಮಂ, ಧಾರಯಿಂ ಪುರತೋ ಠಿತೋ.
‘‘ಚತುನ್ನವುತಿತೋ ಕಪ್ಪೇ, ಯಂ ದಾಮಂ ಧಾರಯಿಂ ತದಾ;
ದುಗ್ಗತಿಂ ನಾಭಿಜಾನಾಮಿ, ಸುಮನಧಾರಣೇ ಫಲಂ.
‘‘ಕಿಲೇಸಾ ಝಾಪಿತಾ ಮಯ್ಹಂ…ಪೇ… ವಿಹರಾಮಿ ಅನಾಸವೋ.
‘‘ಸ್ವಾಗತಂ ¶ ವತ ಮೇ ಆಸಿ…ಪೇ… ಕತಂ ಬುದ್ಧಸ್ಸ ಸಾಸನಂ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಸುಮನದಾಮಿಯೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಸುಮನದಾಮಿಯತ್ಥೇರಸ್ಸಾಪದಾನಂ ನವಮಂ.
೧೦. ಕಾಸುಮಾರಿಫಲದಾಯಕತ್ಥೇರಅಪದಾನಂ
‘‘ಕಣಿಕಾರಂವ ¶ ¶ ಜೋತನ್ತಂ, ನಿಸಿನ್ನಂ ಪಬ್ಬತನ್ತರೇ;
ಅದ್ದಸಂ ವಿರಜಂ ಬುದ್ಧಂ, ಲೋಕಜೇಟ್ಠಂ ನರಾಸಭಂ.
‘‘ಪಸನ್ನಚಿತ್ತೋ ¶ ಸುಮನೋ, ಸಿರೇ ಕತ್ವಾನ ಅಞ್ಜಲಿಂ;
ಕಾಸುಮಾರಿಫಲಂ ಗಯ್ಹ, ಬುದ್ಧಸೇಟ್ಠಸ್ಸದಾಸಹಂ.
‘‘ಏಕತ್ತಿಂಸೇ ಇತೋ ಕಪ್ಪೇ, ಯಂ ಫಲಮದದಿಂ ಅಹಂ;
ದುಗ್ಗತಿಂ ನಾಭಿಜಾನಾಮಿ, ಫಲದಾನಸ್ಸಿದಂ ಫಲಂ.
‘‘ಕಿಲೇಸಾ ಝಾಪಿತಾ ಮಯ್ಹಂ…ಪೇ… ವಿಹರಾಮಿ ಅನಾಸವೋ.
‘‘ಸ್ವಾಗತಂ ವತ ಮೇ ಆಸಿ…ಪೇ… ಕತಂ ಬುದ್ಧಸ್ಸ ಸಾಸನಂ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಕಾಸುಮಾರಿಫಲದಾಯಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಕಾಸುಮಾರಿಫಲದಾಯಕತ್ಥೇರಸ್ಸಾಪದಾನಂ ದಸಮಂ.
ಬೋಧಿವನ್ದನವಗ್ಗೋ ಅಟ್ಠತಿಂಸತಿಮೋ.
ತಸ್ಸುದ್ದಾನಂ –
ಬೋಧಿ ಪಾಟಲಿ ಉಪ್ಪಲೀ, ಪಟ್ಟಿ ಚ ಸತ್ತಪಣ್ಣಿಯೋ;
ಗನ್ಧಮುಟ್ಠಿ ¶ ಚ ಚಿತಕೋ, ತಾಲಂ ಸುಮನದಾಮಕೋ;
ಕಾಸುಮಾರಿಫಲೀ ಚೇವ, ಗಾಥಾ ಏಕೂನಸಟ್ಠಿಕಾ.
೩೯. ಅವಟಫಲವಗ್ಗೋ
೧. ಅವಟಫಲದಾಯಕತ್ಥೇರಅಪದಾನಂ
‘‘ಸತರಂಸಿ ¶ ¶ ನಾಮ ಭಗವಾ, ಸಯಮ್ಭೂ ಅಪರಾಜಿತೋ;
ವಿವೇಕಕಾಮೋ ಸಮ್ಬುದ್ಧೋ, ಗೋಚರಾಯಾಭಿನಿಕ್ಖಮಿ.
‘‘ಫಲಹತ್ಥೋ ಅಹಂ ದಿಸ್ವಾ, ಉಪಗಚ್ಛಿಂ ನರಾಸಭಂ;
ಪಸನ್ನಚಿತ್ತೋ ಸುಮನೋ, ಅವಟಂ [ಅವಣ್ಟಂ (ಸೀ.), ಅಮ್ಬಟಂ (ಸ್ಯಾ.)] ಅದದಿಂ ಫಲಂ.
‘‘ಚತುನ್ನವುತಿತೋ ಕಪ್ಪೇ, ಯಂ ಫಲಮದದಿಂ ಅಹಂ;
ದುಗ್ಗತಿಂ ನಾಭಿಜಾನಾಮಿ, ಫಲದಾನಸ್ಸಿದಂ ಫಲಂ.
‘‘ಕಿಲೇಸಾ ಝಾಪಿತಾ ಮಯ್ಹಂ, ಭವಾ ಸಬ್ಬೇ ಸಮೂಹತಾ;
ನಾಗೋವ ಬನ್ಧನಂ ಛೇತ್ವಾ, ವಿಹರಾಮಿ ಅನಾಸವೋ.
‘‘ಸ್ವಾಗತಂ ವತ ಮೇ ಆಸಿ, ಮಮ ಬುದ್ಧಸ್ಸ ಸನ್ತಿಕೇ;
ತಿಸ್ಸೋ ವಿಜ್ಜಾ ಅನುಪ್ಪತ್ತಾ, ಕತಂ ಬುದ್ಧಸ್ಸ ಸಾಸನಂ.
‘‘ಪಟಿಸಮ್ಭಿದಾ ¶ ಚತಸ್ಸೋ, ವಿಮೋಕ್ಖಾಪಿ ಚ ಅಟ್ಠಿಮೇ;
ಛಳಭಿಞ್ಞಾ ಸಚ್ಛಿಕತಾ, ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ¶ ಸುದಂ ಆಯಸ್ಮಾ ಅವಟಫಲದಾಯಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಅವಟಫಲದಾಯಕತ್ಥೇರಸ್ಸಾಪದಾನಂ ಪಠಮಂ.
೨. ಲಬುಜದಾಯಕತ್ಥೇರಅಪದಾನಂ
‘‘ನಗರೇ ಬನ್ಧುಮತಿಯಾ, ಆಸಿಂ ಆರಾಮಿಕೋ ತದಾ;
ಅದ್ದಸಂ ವಿರಜಂ ಬುದ್ಧಂ, ಗಚ್ಛನ್ತಂ ಅನಿಲಞ್ಜಸೇ.
‘‘ಲಬುಜಸ್ಸ ಫಲಂ ಗಯ್ಹ, ಬುದ್ಧಸೇಟ್ಠಸ್ಸದಾಸಹಂ;
ಆಕಾಸೇ ಠಿತಕೋ ಸನ್ತೋ, ಪಟಿಗಣ್ಹಿ ಮಹಾಯಸೋ.
‘‘ವಿತ್ತಿಸಞ್ಜನನಂ ¶ ಮಯ್ಹಂ, ದಿಟ್ಠಧಮ್ಮಸುಖಾವಹಂ;
ಫಲಂ ಬುದ್ಧಸ್ಸ ದತ್ವಾನ, ವಿಪ್ಪಸನ್ನೇನ ಚೇತಸಾ.
‘‘ಅಧಿಗಚ್ಛಿಂ ¶ ತದಾ ಪೀತಿಂ, ವಿಪುಲಞ್ಚ ಸುಖುತ್ತಮಂ;
ಉಪ್ಪಜ್ಜತೇವ ರತನಂ, ನಿಬ್ಬತ್ತಸ್ಸ ತಹಿಂ ತಹಿಂ.
‘‘ಏಕನವುತಿತೋ ಕಪ್ಪೇ, ಯಂ ಫಲಮದದಿಂ ತದಾ;
ದುಗ್ಗತಿಂ ನಾಭಿಜಾನಾಮಿ, ಫಲದಾನಸ್ಸಿದಂ ಫಲಂ.
‘‘ಕಿಲೇಸಾ ಝಾಪಿತಾ ಮಯ್ಹಂ…ಪೇ… ವಿಹರಾಮಿ ಅನಾಸವೋ.
‘‘ಸ್ವಾಗತಂ ವತ ಮೇ ಆಸಿ…ಪೇ… ಕತಂ ಬುದ್ಧಸ್ಸ ಸಾಸನಂ.
‘‘ಪಟಿಸಮ್ಭಿದಾ ¶ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಲಬುಜದಾಯಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಲಬುಜದಾಯಕತ್ಥೇರಸ್ಸಾಪದಾನಂ ದುತಿಯಂ.
೩. ಉದುಮ್ಬರಫಲದಾಯಕತ್ಥೇರಅಪದಾನಂ
‘‘ವಿನತಾನದಿಯಾ ತೀರೇ, ವಿಹಾಸಿ ಪುರಿಸುತ್ತಮೋ;
ಅದ್ದಸಂ ವಿರಜಂ ಬುದ್ಧಂ, ಏಕಗ್ಗಂ ಸುಸಮಾಹಿತಂ.
‘‘ತಸ್ಮಿಂ ಪಸನ್ನಮಾನಸೋ, ಕಿಲೇಸಮಲಧೋವನೇ;
ಉದುಮ್ಬರಫಲಂ ಗಯ್ಹ, ಬುದ್ಧಸೇಟ್ಠಸ್ಸದಾಸಹಂ.
‘‘ಏಕನವುತಿತೋ ಕಪ್ಪೇ, ಯಂ ಫಲಮದದಿಂ ತದಾ;
ದುಗ್ಗತಿಂ ನಾಭಿಜಾನಾಮಿ, ಫಲದಾನಸ್ಸಿದಂ ಫಲಂ.
‘‘ಕಿಲೇಸಾ ಝಾಪಿತಾ ಮಯ್ಹಂ…ಪೇ… ವಿಹರಾಮಿ ಅನಾಸವೋ.
‘‘ಸ್ವಾಗತಂ ವತ ಮೇ ಆಸಿ…ಪೇ… ಕತಂ ಬುದ್ಧಸ್ಸ ಸಾಸನಂ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ¶ ಸುದಂ ಆಯಸ್ಮಾ ಉದುಮ್ಬರಫಲದಾಯಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಉದುಮ್ಬರಫಲದಾಯಕತ್ಥೇರಸ್ಸಾಪದಾನಂ ತತಿಯಂ.
೪. ಪಿಲಕ್ಖಫಲದಾಯಕತ್ಥೇರಅಪದಾನಂ
‘‘ವನನ್ತರೇ ¶ ¶ ¶ ಬುದ್ಧಂ ದಿಸ್ವಾ, ಅತ್ಥದಸ್ಸಿಂ ಮಹಾಯಸಂ;
ಪಸನ್ನಚಿತ್ತೋ ಸುಮನೋ, ಪಿಲಕ್ಖಸ್ಸಾದದಿಂ ಫಲಂ [ಪಿಲಕ್ಖಸ್ಸ ಫಲಂ ಅದಂ (ಸೀ.), ಪಿಲಕ್ಖುಸ್ಸ ಫಲಂ ಅದಂ (ಸ್ಯಾ.)].
‘‘ಅಟ್ಠಾರಸೇ ಕಪ್ಪಸತೇ, ಯಂ ಫಲಮದದಿಂ ತದಾ;
ದುಗ್ಗತಿಂ ನಾಭಿಜಾನಾಮಿ, ಫಲದಾನಸ್ಸಿದಂ ಫಲಂ.
‘‘ಕಿಲೇಸಾ ಝಾಪಿತಾ ಮಯ್ಹಂ…ಪೇ… ವಿಹರಾಮಿ ಅನಾಸವೋ.
‘‘ಸ್ವಾಗತಂ ವತ ಮೇ ಆಸಿ…ಪೇ… ಕತಂ ಬುದ್ಧಸ್ಸ ಸಾಸನಂ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಪಿಲಕ್ಖಫಲದಾಯಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಪಿಲಕ್ಖಫಲದಾಯಕತ್ಥೇರಸ್ಸಾಪದಾನಂ ಚತುತ್ಥಂ.
೫. ಫಾರುಸಫಲದಾಯಕತ್ಥೇರಅಪದಾನಂ
‘‘ಸುವಣ್ಣವಣ್ಣಂ ¶ ಸಮ್ಬುದ್ಧಂ, ಆಹುತೀನಂ ಪಟಿಗ್ಗಹಂ;
ರಥಿಯಂ ಪಟಿಪಜ್ಜನ್ತಂ, ಫಾರುಸಫಲಮದಾಸಹಂ.
‘‘ಏಕನವುತಿತೋ ಕಪ್ಪೇ, ಯಂ ಫಲಮದದಿಂ ಅಹಂ;
ದುಗ್ಗತಿಂ ನಾಭಿಜಾನಾಮಿ, ಫಲದಾನಸ್ಸಿದಂ ಫಲಂ.
‘‘ಕಿಲೇಸಾ ಝಾಪಿತಾ ಮಯ್ಹಂ…ಪೇ… ವಿಹರಾಮಿ ಅನಾಸವೋ.
‘‘ಸ್ವಾಗತಂ ವತ ಮೇ ಆಸಿ…ಪೇ… ಕತಂ ಬುದ್ಧಸ್ಸ ಸಾಸನಂ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಫಾರುಸಫಲದಾಯಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಫಾರುಸಫಲದಾಯಕತ್ಥೇರಸ್ಸಾಪದಾನಂ ಪಞ್ಚಮಂ.
೬. ವಲ್ಲಿಫಲದಾಯಕತ್ಥೇರಅಪದಾನಂ
‘‘ಸಬ್ಬೇ ¶ ಜನಾ ಸಮಾಗಮ್ಮ, ಅಗಮಿಂಸು ವನಂ ತದಾ;
ಫಲಮನ್ವೇಸಮಾನಾ ತೇ, ಅಲಭಿಂಸು ಫಲಂ ತದಾ.
‘‘ತತ್ಥದ್ದಸಾಸಿಂ ¶ ¶ ಸಮ್ಬುದ್ಧಂ, ಸಯಮ್ಭುಂ ಅಪರಾಜಿತಂ;
ಪಸನ್ನಚಿತ್ತೋ ಸುಮನೋ, ವಲ್ಲಿಫಲಮದಾಸಹಂ.
‘‘ಏಕತ್ತಿಂಸೇ ಇತೋ ಕಪ್ಪೇ, ಯಂ ಫಲಮದದಿಂ ತದಾ;
ದುಗ್ಗತಿಂ ನಾಭಿಜಾನಾಮಿ, ಫಲದಾನಸ್ಸಿದಂ ಫಲಂ.
‘‘ಕಿಲೇಸಾ ಝಾಪಿತಾ ಮಯ್ಹಂ…ಪೇ… ವಿಹರಾಮಿ ಅನಾಸವೋ.
‘‘ಸ್ವಾಗತಂ ವತ ಮೇ ಆಸಿ…ಪೇ… ಕತಂ ಬುದ್ಧಸ್ಸ ಸಾಸನಂ.
‘‘ಪಟಿಸಮ್ಭಿದಾ ¶ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ವಲ್ಲಿಫಲದಾಯಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ವಲ್ಲಿಫಲದಾಯಕತ್ಥೇರಸ್ಸಾಪದಾನಂ ಛಟ್ಠಂ.
೭. ಕದಲಿಫಲದಾಯಕತ್ಥೇರಅಪದಾನಂ
‘‘ಕಣಿಕಾರಂವ ಜಲಿತಂ, ಪುಣ್ಣಮಾಯೇವ [ಪುಣ್ಣಮಾಸೇವ (ಸೀ. ಕ.)] ಚನ್ದಿಮಂ;
ಜಲನ್ತಂ ದೀಪರುಕ್ಖಂವ, ಅದ್ದಸಂ ಲೋಕನಾಯಕಂ.
‘‘ಕದಲಿಫಲಂ ಪಗ್ಗಯ್ಹ, ಅದಾಸಿಂ ಸತ್ಥುನೋ ಅಹಂ;
ಪಸನ್ನಚಿತ್ತೋ ಸುಮನೋ, ವನ್ದಿತ್ವಾನ ಅಪಕ್ಕಮಿಂ.
‘‘ಏಕತ್ತಿಂಸೇ ¶ ಇತೋ ಕಪ್ಪೇ, ಯಂ ಫಲಮದದಿಂ ತದಾ;
ದುಗ್ಗತಿಂ ನಾಭಿಜಾನಾಮಿ, ಫಲದಾನಸ್ಸಿದಂ ಫಲಂ.
‘‘ಕಿಲೇಸಾ ಝಾಪಿತಾ ಮಯ್ಹಂ…ಪೇ… ವಿಹರಾಮಿ ಅನಾಸವೋ.
‘‘ಸ್ವಾಗತಂ ವತ ಮೇ ಆಸಿ…ಪೇ… ಕತಂ ಬುದ್ಧಸ್ಸ ಸಾಸನಂ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಕದಲಿಫಲದಾಯಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಕದಲಿಫಲದಾಯಕತ್ಥೇರಸ್ಸಾಪದಾನಂ ಸತ್ತಮಂ.
೮. ಪನಸಫಲದಾಯಕತ್ಥೇರಅಪದಾನಂ
‘‘ಅಜ್ಜುನೋ ¶ ನಾಮ ಸಮ್ಬುದ್ಧೋ, ಹಿಮವನ್ತೇ ವಸೀ ತದಾ;
ಚರಣೇನ ಚ ಸಮ್ಪನ್ನೋ, ಸಮಾಧಿಕುಸಲೋ ಮುನಿ.
‘‘ಕುಮ್ಭಮತ್ತಂ ¶ ಗಹೇತ್ವಾನ, ಪನಸಂ ಜೀವಜೀವಕಂ [ದೇವಗನ್ಧಿಕಂ (೪೧ ವಗ್ಗೇ, ೫ ಅಪದಾನೇ)];
ಛತ್ತಪಣ್ಣೇ ಠಪೇತ್ವಾನ, ಅದಾಸಿಂ ಸತ್ಥುನೋ ಅಹಂ.
‘‘ಏಕತ್ತಿಂಸೇ ಇತೋ ಕಪ್ಪೇ, ಯಂ ಫಲಮದದಿಂ ತದಾ;
ದುಗ್ಗತಿಂ ನಾಭಿಜಾನಾಮಿ, ಫಲದಾನಸ್ಸಿದಂ ಫಲಂ.
‘‘ಕಿಲೇಸಾ ಝಾಪಿತಾ ಮಯ್ಹಂ…ಪೇ… ವಿಹರಾಮಿ ಅನಾಸವೋ.
‘‘ಸ್ವಾಗತಂ ¶ ವತ ಮೇ ಆಸಿ…ಪೇ… ಕತಂ ಬುದ್ಧಸ್ಸ ಸಾಸನಂ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಪನಸಫಲದಾಯಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಪನಸಫಲದಾಯಕತ್ಥೇರಸ್ಸಾಪದಾನಂ ಅಟ್ಠಮಂ.
೯. ಸೋಣಕೋಟಿವೀಸತ್ಥೇರಅಪದಾನಂ
‘‘ವಿಪಸ್ಸಿನೋ ¶ ಪಾವಚನೇ, ಏಕಂ ಲೇಣಂ ಮಯಾ ಕತಂ;
ಚಾತುದ್ದಿಸಸ್ಸ ಸಙ್ಘಸ್ಸ, ಬನ್ಧುಮಾರಾಜಧಾನಿಯಾ.
‘‘ದುಸ್ಸೇಹಿ ಭೂಮಿಂ ಲೇಣಸ್ಸ, ಸನ್ಥರಿತ್ವಾ ಪರಿಚ್ಚಜಿಂ;
ಉದಗ್ಗಚಿತ್ತೋ ಸುಮನೋ, ಅಕಾಸಿಂ ಪಣಿಧಿಂ ತದಾ.
‘‘ಆರಾಧಯೇಯ್ಯಂ ಸಮ್ಬುದ್ಧಂ, ಪಬ್ಬಜ್ಜಞ್ಚ ಲಭೇಯ್ಯಹಂ;
ಅನುತ್ತರಞ್ಚ ನಿಬ್ಬಾನಂ, ಫುಸೇಯ್ಯಂ ಸನ್ತಿಮುತ್ತಮಂ.
‘‘ತೇನೇವ ಸುಕ್ಕಮೂಲೇನ, ಕಪ್ಪೇ [ಕಪ್ಪಂ (ಸೀ.), ಕಪ್ಪ (ಕ.)] ನವುತಿ ಸಂಸರಿಂ;
ದೇವಭೂತೋ ಮನುಸ್ಸೋ ಚ, ಕತಪುಞ್ಞೋ ವಿರೋಚಹಂ.
‘‘ತತೋ ¶ ಕಮ್ಮಾವಸೇಸೇನ, ಇಧ ಪಚ್ಛಿಮಕೇ ಭವೇ;
ಚಮ್ಪಾಯಂ ಅಗ್ಗಸೇಟ್ಠಿಸ್ಸ, ಜಾತೋಮ್ಹಿ ಏಕಪುತ್ತಕೋ.
‘‘ಜಾತಮತ್ತಸ್ಸ ¶ ಮೇ ಸುತ್ವಾ, ಪಿತು ಛನ್ದೋ ಅಯಂ ಅಹು;
ದದಾಮಹಂ ಕುಮಾರಸ್ಸ, ವೀಸಕೋಟೀ ಅನೂನಕಾ.
‘‘ಚತುರಙ್ಗುಲಾ ಚ ಮೇ ಲೋಮಾ, ಜಾತಾ ಪಾದತಲೇ ಉಭೋ;
ಸುಖುಮಾ ಮುದುಸಮ್ಫಸ್ಸಾ, ತೂಲಾಪಿಚುಸಮಾ ಸುಭಾ.
‘‘ಅತೀತಾ ನವುತಿ ಕಪ್ಪಾ, ಅಯಂ ಏಕೋ ಚ ಉತ್ತರಿ;
ನಾಭಿಜಾನಾಮಿ ನಿಕ್ಖಿತ್ತೇ, ಪಾದೇ ಭೂಮ್ಯಾ ಅಸನ್ಥತೇ.
‘‘ಆರಾಧಿತೋ ¶ ಮೇ ಸಮ್ಬುದ್ಧೋ, ಪಬ್ಬಜಿಂ ಅನಗಾರಿಯಂ;
ಅರಹತ್ತಞ್ಚ ಮೇ ಪತ್ತಂ, ಸೀತಿಭೂತೋಮ್ಹಿ ನಿಬ್ಬುತೋ.
‘‘ಅಗ್ಗೋ ಆರದ್ಧವೀರಿಯಾನಂ, ನಿದ್ದಿಟ್ಠೋ ಸಬ್ಬದಸ್ಸಿನಾ;
ಖೀಣಾಸವೋಮ್ಹಿ ಅರಹಾ, ಛಳಭಿಞ್ಞೋ ಮಹಿದ್ಧಿಕೋ.
‘‘ಏಕನವುತಿತೋ ಕಪ್ಪೇ, ಯಂ ದಾನಮದದಿಂ ತದಾ;
ದುಗ್ಗತಿಂ ನಾಭಿಜಾನಾಮಿ, ಲೇಣದಾನಸ್ಸಿದಂ ಫಲಂ.
‘‘ಕಿಲೇಸಾ ಝಾಪಿತಾ ಮಯ್ಹಂ…ಪೇ… ವಿಹರಾಮಿ ಅನಾಸವೋ.
‘‘ಸ್ವಾಗತಂ ವತ ಮೇ ಆಸಿ…ಪೇ… ಕತಂ ಬುದ್ಧಸ್ಸ ಸಾಸನಂ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
‘‘ಥೇರೋ ¶ ಕೋಟಿವೀಸೋ [ಕೋಟಿವಿಸೋ (ಸ್ಯಾ. ಕ.), ಕೋಳಿವಿಸೋ (ಅಞ್ಞಟ್ಠಾನೇಸು)] ಸೋಣೋ, ಭಿಕ್ಖುಸಙ್ಘಸ್ಸ ಅಗ್ಗತೋ;
ಪಞ್ಹಂ ಪುಟ್ಠೋ ವಿಯಾಕಾಸಿ, ಅನೋತತ್ತೇ ಮಹಾಸರೇ’’ತಿ.
ಇತ್ಥಂ ಸುದಂ ಆಯಸ್ಮಾ ಸೋಣೋ ಕೋಟಿವೀಸೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಸೋಣಕೋಟಿವೀಸತ್ಥೇರಸ್ಸಾಪದಾನಂ ನವಮಂ.
೧೦. ಪುಬ್ಬಕಮ್ಮಪಿಲೋತಿಕಬುದ್ಧಅಪದಾನಂ
‘‘ಅನೋತತ್ತಸರಾಸನ್ನೇ ¶ , ರಮಣೀಯೇ ಸಿಲಾತಲೇ;
ನಾನಾರತನಪಜ್ಜೋತೇ, ನಾನಾಗನ್ಧವನನ್ತರೇ.
‘‘ಮಹತಾ ಭಿಕ್ಖುಸಙ್ಘೇನ, ಪರೇತೋ [ಉಪೇತೋ (ಉದಾನಟ್ಠಕಥಾಯಂ ೪ ವಗ್ಗೇ, ೮ ಸುತ್ತೇ)] ಲೋಕನಾಯಕೋ;
ಆಸೀನೋ ಬ್ಯಾಕರೀ ತತ್ಥ, ಪುಬ್ಬಕಮ್ಮಾನಿ ಅತ್ತನೋ.
[ಸುಣಾಥ ಭಿಕ್ಖವೇ ಮಯ್ಹಂ, ಯಂ ಕಮ್ಮಂ ಪಕತಂ ಮಯಾ; ಏಕಂ ಅರಞ್ಞಿಕಂ ಭಿಕ್ಖುಂ, ದಿಸ್ವಾ ದಿನ್ನಂ ಪಿಲೋತಿಕಂ; ಪತ್ಥಿತಂ ಪಠಮಂ ಬುದ್ಧಂ, ಬುದ್ಧತ್ತಾಯ ಮಯಾ ತದಾ; ಪಿಲೋತಿಯಸ್ಸ ಕಮ್ಮಸ್ಸ, ಬುದ್ಧತ್ತೇಪಿ ವಿಪಚ್ಚತಿ; ಗೋಪಾಲಕೋ ಪುರೇ ಆಸಿಂ, ಗಾವಿಂ ಪಾಜೇತಿ ಗೋಚರಂ; ಪಿವನ್ತಿಂ ಉದಕಂ ಆವಿಲಂ, ಗಾವಿಂ ದಿಸ್ವಾ ನಿವಾರಯಿಂ; ತೇನ ಕಮ್ಮವಿಪಾಕೇನ, ಇಧ ಪಚ್ಛಿಮಕೇ ಭವೇ; ವಿಪಾಸಿತೋ ಯದಿಚ್ಛಕಂ, ನ ಹಿ ಪಾತುಂ ಲಭಾಮಹಂ (ಸ್ಯಾ.)] ‘‘ಸುಣಾಥ ¶ ಭಿಕ್ಖವೋ ಮಯ್ಹಂ, ಯಂ ಕಮ್ಮಂ ಪಕತಂ ಮಯಾ;
ಪಿಲೋತಿಕಸ್ಸ ಕಮ್ಮಸ್ಸ, ಬುದ್ಧತ್ತೇಪಿ ವಿಪಚ್ಚತಿ [ಸುಣಾಥ ಭಿಕ್ಖವೇ ಮಯ್ಹಂ, ಯಂ ಕಮ್ಮಂ ಪಕತಂ ಮಯಾ; ಏಕಂ ಅರಞ್ಞಿಕಂ ಭಿಕ್ಖುಂ, ದಿಸ್ವಾ ದಿನ್ನಂ ಪಿಲೋತಿಕಂ; ಪತ್ಥಿತಂ ಪಠಮಂ ಬುದ್ಧಂ, ಬುದ್ಧತ್ತಾಯ ಮಯಾ ತದಾ; ಪಿಲೋತಿಯಸ್ಸ ಕಮ್ಮಸ್ಸ, ಬುದ್ಧತ್ತೇಪಿ ವಿಪಚ್ಚತಿ; ಗೋಪಾಲಕೋ ಪುರೇ ಆಸಿಂ, ಗಾವಿಂ ಪಾಜೇತಿ ಗೋಚರಂ; ಪಿವನ್ತಿಂ ಉದಕಂ ಆವಿಲಂ, ಗಾವಿಂ ದಿಸ್ವಾ ನಿವಾರಯಿಂ; ತೇನ ಕಮ್ಮವಿಪಾಕೇನ, ಇಧ ಪಚ್ಛಿಮಕೇ ಭವೇ; ವಿಪಾಸಿತೋ ಯದಿಚ್ಛಕಂ, ನ ಹಿ ಪಾತುಂ ಲಭಾಮಹಂ (ಸ್ಯಾ.)].
[೧]
‘‘ಮುನಾಳಿ ¶ ನಾಮಹಂ ಧುತ್ತೋ, ಪುಬ್ಬೇ ಅಞ್ಞಾಸು ಜಾತಿಸು [ಅಞ್ಞಾಯ ಜಾತಿಯಾ (ಉದಾನ ಅಟ್ಠ.)];
ಪಚ್ಚೇಕಬುದ್ಧಂ ಸುರಭಿಂ [ಸರಭುಂ (ಸೀ.)], ಅಬ್ಭಾಚಿಕ್ಖಿಂ ಅದೂಸಕಂ.
‘‘ತೇನ ಕಮ್ಮವಿಪಾಕೇನ, ನಿರಯೇ ಸಂಸರಿಂ ಚಿರಂ;
ಬಹೂವಸ್ಸಸಹಸ್ಸಾನಿ, ದುಕ್ಖಂ ವೇದೇಸಿ ವೇದನಂ.
‘‘ತೇನ ಕಮ್ಮಾವಸೇಸೇನ, ಇಧ ಪಚ್ಛಿಮಕೇ ಭವೇ;
ಅಬ್ಭಕ್ಖಾನಂ ಮಯಾ ಲದ್ಧಂ, ಸುನ್ದರಿಕಾಯ ಕಾರಣಾ.
[೨]
‘‘ಸಬ್ಬಾಭಿಭುಸ್ಸ ¶ ಬುದ್ಧಸ್ಸ, ನನ್ದೋ ನಾಮಾಸಿ ಸಾವಕೋ;
ತಂ ಅಬ್ಭಕ್ಖಾಯ ನಿರಯೇ, ಚಿರಂ ಸಂಸರಿತಂ ಮಯಾ.
‘‘ದಸವಸ್ಸಸಹಸ್ಸಾನಿ, ನಿರಯೇ ಸಂಸರಿಂ ಚಿರಂ;
ಮನುಸ್ಸಭಾವಂ ಲದ್ಧಾಹಂ, ಅಬ್ಭಕ್ಖಾನಂ ಬಹುಂ ಲಭಿಂ.
‘‘ತೇನ ಕಮ್ಮಾವಸೇಸೇನ, ಚಿಞ್ಚಮಾನವಿಕಾ ಮಮಂ;
ಅಬ್ಭಾಚಿಕ್ಖಿ ಅಭೂತೇನ, ಜನಕಾಯಸ್ಸ ಅಗ್ಗತೋ.
[೩]
‘‘ಬ್ರಾಹ್ಮಣೋ ಸುತವಾ ಆಸಿಂ, ಅಹಂ ಸಕ್ಕತಪೂಜಿತೋ;
ಮಹಾವನೇ ಪಞ್ಚಸತೇ, ಮನ್ತೇ ವಾಚೇಮಿ ಮಾಣವೇ.
‘‘ತತ್ಥಾಗತೋ ¶ [ತಮಾಗತೋ (ಕ.)] ಇಸಿ ಭೀಮೋ, ಪಞ್ಚಾಭಿಞ್ಞೋ ಮಹಿದ್ಧಿಕೋ;
ತಂ ಚಾಹಂ ಆಗತಂ ದಿಸ್ವಾ, ಅಬ್ಭಾಚಿಕ್ಖಿಂ ಅದೂಸಕಂ.
‘‘ತತೋಹಂ ಅವಚಂ ಸಿಸ್ಸೇ, ಕಾಮಭೋಗೀ ಅಯಂ ಇಸಿ;
ಮಯ್ಹಮ್ಪಿ ಭಾಸಮಾನಸ್ಸ, ಅನುಮೋದಿಂಸು ಮಾಣವಾ.
‘‘ತತೋ ಮಾಣವಕಾ ಸಬ್ಬೇ, ಭಿಕ್ಖಮಾನಂ ಕುಲೇ ಕುಲೇ;
ಮಹಾಜನಸ್ಸ ಆಹಂಸು, ಕಾಮಭೋಗೀ ಅಯಂ ಇಸಿ.
‘‘ತೇನ ¶ ¶ ಕಮ್ಮವಿಪಾಕೇನ, ಪಞ್ಚ ಭಿಕ್ಖುಸತಾ ಇಮೇ;
ಅಬ್ಭಕ್ಖಾನಂ ಲಭುಂ ಸಬ್ಬೇ, ಸುನ್ದರಿಕಾಯ ಕಾರಣಾ.
[೪]
‘‘ವೇಮಾತುಭಾತರಂ ಪುಬ್ಬೇ, ಧನಹೇತು ಹನಿಂ ಅಹಂ;
ಪಕ್ಖಿಪಿಂ ಗಿರಿದುಗ್ಗಸ್ಮಿಂ, ಸಿಲಾಯ ಚ ಅಪಿಂಸಯಿಂ.
‘‘ತೇನ ಕಮ್ಮವಿಪಾಕೇನ, ದೇವದತ್ತೋ ಸಿಲಂ ಖಿಪಿ;
ಅಙ್ಗುಟ್ಠಂ ಪಿಂಸಯೀ ಪಾದೇ, ಮಮ ಪಾಸಾಣಸಕ್ಖರಾ.
[೫]
‘‘ಪುರೇಹಂ ದಾರಕೋ ಹುತ್ವಾ, ಕೀಳಮಾನೋ ಮಹಾಪಥೇ;
ಪಚ್ಚೇಕಬುದ್ಧಂ ದಿಸ್ವಾನ, ಮಗ್ಗೇ ಸಕಲಿಕಂ [ಸಕ್ಖಲಿಕಂ (ಕ.)] ಖಿಪಿಂ [ದಹಿಂ (ಸ್ಯಾ.)].
‘‘ತೇನ ಕಮ್ಮವಿಪಾಕೇನ, ಇಧ ಪಚ್ಛಿಮಕೇ ಭವೇ;
ವಧತ್ಥಂ ಮಂ ದೇವದತ್ತೋ, ಅಭಿಮಾರೇ ಪಯೋಜಯಿ.
[೬]
‘‘ಹತ್ಥಾರೋಹೋ ¶ ಪುರೇ ಆಸಿಂ, ಪಚ್ಚೇಕಮುನಿಮುತ್ತಮಂ;
ಪಿಣ್ಡಾಯ ವಿಚರನ್ತಂ ತಂ, ಆಸಾದೇಸಿಂ ಗಜೇನಹಂ.
‘‘ತೇನ ಕಮ್ಮವಿಪಾಕೇನ, ಭನ್ತೋ [ದನ್ತೋ (ಕ.)] ನಾಳಾಗಿರೀ ಗಜೋ;
ಗಿರಿಬ್ಬಜೇ ಪುರವರೇ, ದಾರುಣೋ ಸಮುಪಾಗಮಿ [ಮಂ ಉಪಾಗಮಿ (ಸೀ.)].
[೭]
‘‘ರಾಜಾಹಂ ¶ ಪತ್ಥಿವೋ [ಪತ್ತಿಕೋ (ಸ್ಯಾ. ಕ.), ಖತ್ತಿಯೋ (ಉದಾನ ಅಟ್ಠ.)] ಆಸಿಂ, ಸತ್ತಿಯಾ ಪುರಿಸಂ ಹನಿಂ;
ತೇನ ಕಮ್ಮವಿಪಾಕೇನ, ನಿರಯೇ ಪಚ್ಚಿಸಂ ಭುಸಂ.
‘‘ಕಮ್ಮುನೋ ತಸ್ಸ ಸೇಸೇನ, ಇದಾನಿ ಸಕಲಂ ಮಮ;
ಪಾದೇ ಛವಿಂ ಪಕಪ್ಪೇಸಿ [ಪಕೋಪೇಸಿ (ಸೀ.)], ನ ಹಿ ಕಮ್ಮಂ ವಿನಸ್ಸತಿ.
[೮]
‘‘ಅಹಂ ಕೇವಟ್ಟಗಾಮಸ್ಮಿಂ, ಅಹುಂ ಕೇವಟ್ಟದಾರಕೋ;
ಮಚ್ಛಕೇ ಘಾತಿತೇ ದಿಸ್ವಾ, ಜನಯಿಂ ಸೋಮನಸ್ಸಕಂ [ಸೋಮನಸ್ಸಹಂ (ಉದಾನ ಅಟ್ಠ.)].
‘‘ತೇನ ¶ ಕಮ್ಮವಿಪಾಕೇನ, ಸೀಸದುಕ್ಖಂ ಅಹೂ ಮಮ;
ಸಬ್ಬೇ ಸಕ್ಕಾ ಚ ಹಞ್ಞಿಂಸು, ಯದಾ ಹನಿ ವಿಟಟೂಭೋ [ವಿಟಟುಭೋ (ಸ್ಯಾ. ಕ.)].
[೯]
‘‘ಫುಸ್ಸಸ್ಸಾಹಂ ಪಾವಚನೇ, ಸಾವಕೇ ಪರಿಭಾಸಯಿಂ;
ಯವಂ ಖಾದಥ ಭುಞ್ಜಥ, ಮಾ ಚ ಭುಞ್ಜಥ ಸಾಲಯೋ.
‘‘ತೇನ ಕಮ್ಮವಿಪಾಕೇನ, ತೇಮಾಸಂ ಖಾದಿತಂ ಯವಂ;
ನಿಮನ್ತಿತೋ ಬ್ರಾಹ್ಮಣೇನ, ವೇರಞ್ಜಾಯಂ ವಸಿಂ ತದಾ.
[೧೦]
‘‘ನಿಬ್ಬುದ್ಧೇ ವತ್ತಮಾನಮ್ಹಿ, ಮಲ್ಲಪುತ್ತಂ ನಿಹೇಠಯಿಂ [ನಿಸೇಧಯಿಂ (ಸ್ಯಾ. ಕ.)];
ತೇನ ಕಮ್ಮವಿಪಾಕೇನ, ಪಿಟ್ಠಿದುಕ್ಖಂ ಅಹೂ ಮಮ.
[೧೧]
‘‘ತಿಕಿಚ್ಛಕೋ ಅಹಂ ಆಸಿಂ, ಸೇಟ್ಠಿಪುತ್ತಂ ವಿರೇಚಯಿಂ;
ತೇನ ಕಮ್ಮವಿಪಾಕೇನ, ಹೋತಿ ಪಕ್ಖನ್ದಿಕಾ ಮಮ.
[೧೨]
‘‘ಅವಚಾಹಂ ಜೋತಿಪಾಲೋ, ಸುಗತಂ ಕಸ್ಸಪಂ ತದಾ;
ಕುತೋ ನು ಬೋಧಿ ಮುಣ್ಡಸ್ಸ, ಬೋಧಿ ಪರಮದುಲ್ಲಭಾ.
‘‘ತೇನ ¶ ¶ ¶ ಕಮ್ಮವಿಪಾಕೇನ, ಅಚರಿಂ ದುಕ್ಕರಂ ಬಹುಂ;
ಛಬ್ಬಸ್ಸಾನುರುವೇಳಾಯಂ, ತತೋ ಬೋಧಿಮಪಾಪುಣಿಂ.
‘‘ನಾಹಂ ಏತೇನ ಮಗ್ಗೇನ, ಪಾಪುಣಿಂ ಬೋಧಿಮುತ್ತಮಂ;
ಕುಮ್ಮಗ್ಗೇನ ಗವೇಸಿಸ್ಸಂ, ಪುಬ್ಬಕಮ್ಮೇನ ವಾರಿತೋ.
‘‘ಪುಞ್ಞಪಾಪಪರಿಕ್ಖೀಣೋ, ಸಬ್ಬಸನ್ತಾಪವಜ್ಜಿತೋ;
ಅಸೋಕೋ ಅನುಪಾಯಾಸೋ, ನಿಬ್ಬಾಯಿಸ್ಸಮನಾಸವೋ.
‘‘ಏವಂ ಜಿನೋ ವಿಯಾಕಾಸಿ, ಭಿಕ್ಖುಸಙ್ಘಸ್ಸ ಅಗ್ಗತೋ;
ಸಬ್ಬಾಭಿಞ್ಞಾಬಲಪ್ಪತ್ತೋ, ಅನೋತತ್ತೇ ಮಹಾಸರೇ’’ತಿ.
ಇತ್ಥಂ ¶ ಸುದಂ ಭಗವಾ ಅತ್ತನೋ ಪುಬ್ಬಚರಿತಂ ಕಮ್ಮಪಿಲೋತಿಕಂ ನಾಮ ಬುದ್ಧಾಪದಾನಧಮ್ಮಪರಿಯಾಯಂ ಅಭಾಸಿತ್ಥಾತಿ.
ಪುಬ್ಬಕಮ್ಮಪಿಲೋತಿಕಂ ನಾಮ ಬುದ್ಧಾಪದಾನಂ ದಸಮಂ.
ಅವಟಫಲವಗ್ಗೋ ಏಕೂನಚತ್ತಾಲೀಸಮೋ.
ತಸ್ಸುದ್ದಾನಂ –
ಅವಟಂ ಲಬುಜಞ್ಚೇವ, ಉದುಮ್ಬರಪಿಲಕ್ಖು ಚ;
ಫಾರು ವಲ್ಲೀ ಚ ಕದಲೀ, ಪನಸೋ ಕೋಟಿವೀಸಕೋ.
ಪುಬ್ಬಕಮ್ಮಪಿಲೋತಿ ಚ, ಅಪದಾನಂ ಮಹೇಸಿನೋ;
ಗಾಥಾಯೋ ಏಕನವುತಿ, ಗಣಿತಾಯೋ ವಿಭಾವಿಭಿ.
ಚುದ್ದಸಮಂ ಭಾಣವಾರಂ.
೪೦. ಪಿಲಿನ್ದವಚ್ಛವಗ್ಗೋ
೧. ಪಿಲಿನ್ದವಚ್ಛತ್ಥೇರಅಪದಾನಂ
‘‘ನಗರೇ ¶ ¶ ¶ ¶ ಹಂಸವತಿಯಾ, ಆಸಿಂ ದೋವಾರಿಕೋ ಅಹಂ;
ಅಕ್ಖೋಭಂ ಅಮಿತಂ ಭೋಗಂ, ಘರೇ ಸನ್ನಿಚಿತಂ ಮಮ.
‘‘ರಹೋಗತೋ ನಿಸೀದಿತ್ವಾ, ಪಹಂಸಿತ್ವಾನ ಮಾನಸಂ [ಸಮ್ಪಹಂಸಿತ್ವ ಮಾನಸಂ (ಸೀ.)];
ನಿಸಜ್ಜ ಪಾಸಾದವರೇ, ಏವಂ ಚಿನ್ತೇಸಹಂ ತದಾ.
(ಚಿನ್ತನಾಕಾರೋ)
‘‘‘ಬಹೂ ಮೇಧಿಗತಾ ಭೋಗಾ, ಫೀತಂ ಅನ್ತೇಪುರಂ ಮಮ;
ರಾಜಾಪಿ [ರಾಜಿಸಿ (ಕ.)] ಸನ್ನಿಮನ್ತೇಸಿ, ಆನನ್ದೋ ಪಥವಿಸ್ಸರೋ.
‘‘‘ಅಯಞ್ಚ ಬುದ್ಧೋ ಉಪ್ಪನ್ನೋ, ಅಧಿಚ್ಚುಪ್ಪತ್ತಿಕೋ ಮುನಿ;
ಸಂವಿಜ್ಜನ್ತಿ ಚ ಮೇ ಭೋಗಾ, ದಾನಂ ದಸ್ಸಾಮಿ ಸತ್ಥುನೋ.
‘‘‘ಪದುಮೇನ ರಾಜಪುತ್ತೇನ, ದಿನ್ನಂ ದಾನವರಂ ಜಿನೇ;
ಹತ್ಥಿನಾಗೇ ಚ ಪಲ್ಲಙ್ಕೇ, ಅಪಸ್ಸೇನಞ್ಚನಪ್ಪಕಂ.
‘‘‘ಅಹಮ್ಪಿ ದಾನಂ ದಸ್ಸಾಮಿ, ಸಙ್ಘೇ ಗಣವರುತ್ತಮೇ;
ಅದಿನ್ನಪುಬ್ಬಮಞ್ಞೇಸಂ, ಭವಿಸ್ಸಂ ಆದಿಕಮ್ಮಿಕೋ.
‘‘‘ಚಿನ್ತೇತ್ವಾಹಂ ಬಹುವಿಧಂ, ಯಾಗೇ ಯಸ್ಸ ಸುಖಂಫಲಂ;
ಪರಿಕ್ಖಾರದಾನಮದ್ದಕ್ಖಿಂ, ಮಮ ಸಙ್ಕಪ್ಪಪೂರಣಂ.
‘‘‘ಪರಿಕ್ಖಾರಾನಿ ದಸ್ಸಾಮಿ, ಸಙ್ಘೇ ಗಣವರುತ್ತಮೇ;
ಅದಿನ್ನಪುಬ್ಬಮಞ್ಞೇಸಂ, ಭವಿಸ್ಸಂ ಆದಿಕಮ್ಮಿಕೋ’.
(ದಾನವತ್ಥುಸಮ್ಪಾದನಂ)
‘‘ನಳಕಾರೇ ¶ ಉಪಾಗಮ್ಮ, ಛತ್ತಂ ಕಾರೇಸಿ ತಾವದೇ;
ಛತ್ತಸತಸಹಸ್ಸಾನಿ, ಏಕತೋ ಸನ್ನಿಪಾತಯಿಂ.
‘‘ದುಸ್ಸಸತಸಹಸ್ಸಾನಿ, ಏಕತೋ ಸನ್ನಿಪಾತಯಿಂ;
ಪತ್ತಸತಸಹಸ್ಸಾನಿ, ಏಕತೋ ಸನ್ನಿಪಾತಯಿಂ.
‘‘ವಾಸಿಯೋ ¶ ¶ ಸತ್ಥಕೇ ಚಾಪಿ, ಸೂಚಿಯೋ ನಖಛೇದನೇ;
ಹೇಟ್ಠಾಛತ್ತೇ ಠಪಾಪೇಸಿಂ, ಕಾರೇತ್ವಾ ತದನುಚ್ಛವೇ.
‘‘ವಿಧೂಪನೇ ತಾಲವಣ್ಟೇ, ಮೋರಹತ್ಥೇ ಚ ಚಾಮರೇ;
ಪರಿಸ್ಸಾವನೇ ತೇಲಧಾರೇ [ತೇಲಧರೇ (ಸೀ.)], ಕಾರಯಿಂ ತದನುಚ್ಛವೇ.
‘‘ಸೂಚಿಘರೇ ಅಂಸಬದ್ಧೇ, ಅಥೋಪಿ ಕಾಯಬನ್ಧನೇ;
ಆಧಾರಕೇ ಚ ಸುಕತೇ, ಕಾರಯಿಂ ತದನುಚ್ಛವೇ.
‘‘ಪರಿಭೋಗಭಾಜನೇ ಚ, ಅಥೋಪಿ ಲೋಹಥಾಲಕೇ;
ಭೇಸಜ್ಜೇ ¶ ಪೂರಯಿತ್ವಾನ, ಹೇಟ್ಠಾಛತ್ತೇ ಠಪೇಸಹಂ.
‘‘ವಚಂ ಉಸೀರಂ ಲಟ್ಠಿಮಧುಂ, ಪಿಪ್ಫಲೀ ಮರಿಚಾನಿ ಚ;
ಹರೀತಕಿಂ ಸಿಙ್ಗೀವೇರಂ, ಸಬ್ಬಂ ಪೂರೇಸಿ ಭಾಜನೇ.
‘‘ಉಪಾಹನಾ ಪಾದುಕಾಯೋ, ಅಥೋ ಉದಕಪುಞ್ಛನೇ;
ಕತ್ತರದಣ್ಡೇ ಸುಕತೇ, ಕಾರಯಿಂ ತದನುಚ್ಛವೇ.
‘‘ಓಸಧಞ್ಜನನಾಳೀ ಚ [ಓಸಧಂ ಅಞ್ಜನಾಪಿಚ (ಸ್ಯಾ.)], ಸಲಾಕಾ ಧಮ್ಮಕುತ್ತರಾ;
ಕುಞ್ಚಿಕಾ ಪಞ್ಚವಣ್ಣೇಹಿ, ಸಿಬ್ಬಿತೇ ಕುಞ್ಚಿಕಾಘರೇ.
‘‘ಆಯೋಗೇ ಧೂಮನೇತ್ತೇ ಚ, ಅಥೋಪಿ ದೀಪಧಾರಕೇ;
ತುಮ್ಬಕೇ ಚ ಕರಣ್ಡೇ ಚ, ಕಾರಯಿಂ ತದನುಚ್ಛವೇ.
‘‘ಸಣ್ಡಾಸೇ ¶ ಪಿಪ್ಫಲೇ ಚೇವ, ಅಥೋಪಿ ಮಲಹಾರಕೇ;
ಭೇಸಜ್ಜಥವಿಕೇ ಚೇವ, ಕಾರಯಿಂ ತದನುಚ್ಛವೇ.
‘‘ಆಸನ್ದಿಯೋ ಪೀಠಕೇ ಚ, ಪಲ್ಲಙ್ಕೇ ಚತುರೋಮಯೇ;
ತದನುಚ್ಛವೇ ಕಾರಯಿತ್ವಾ, ಹೇಟ್ಠಾಛತ್ತೇ ಠಪೇಸಹಂ.
‘‘ಉಣ್ಣಾಭಿಸೀ ತೂಲಭಿಸೀ, ಅಥೋಪಿ ಪೀಠಿಕಾಭಿಸೀ [ಪೀಠಕಾಭಿಸೀ (ಸ್ಯಾ. ಕ.)];
ಬಿಮ್ಬೋಹನೇ [ಬಿಬ್ಬೋಹನೇ (ಸ್ಯಾ. ಕ.)] ಚ ಸುಕತೇ, ಕಾರಯಿಂ ತದನುಚ್ಛವೇ.
‘‘ಕುರುವಿನ್ದೇ ಮಧುಸಿತ್ಥೇ, ತೇಲಂ ಹತ್ಥಪ್ಪತಾಪಕಂ;
ಸಿಪಾಟಿಫಲಕೇ ಸುಚೀ, ಮಞ್ಚಂ ಅತ್ಥರಣೇನ ಚ.
‘‘ಸೇನಾಸನೇ ಪಾದಪುಞ್ಛೇ, ಸಯನಾಸನದಣ್ಡಕೇ;
ದನ್ತಪೋಣೇ ಚ ಆಟಲೀ [ಕಥಲಿಂ (ಸ್ಯಾ.)], ಸೀಸಾಲೇಪನಗನ್ಧಕೇ.
‘‘ಅರಣೀ ¶ ಫಲಪೀಠೇ [ಪಲಾಲಪೀಠೇ (ಸೀ.)] ಚ, ಪತ್ತಪಿಧಾನಥಾಲಕೇ;
ಉದಕಸ್ಸ ಕಟಚ್ಛೂ ಚ, ಚುಣ್ಣಕಂ ರಜನಮ್ಬಣಂ [ರಜನಮ್ಮಣಂ (ಸೀ.)].
‘‘ಸಮ್ಮಜ್ಜನಂ ¶ [ಸಮ್ಮುಞ್ಜನಂ (ಸ್ಯಾ.), ಸಮ್ಮಜ್ಜನಿಂ, ಸಮ್ಮುಞ್ಜನಿಂ (?)] ಉದಪತ್ತಂ, ತಥಾ ವಸ್ಸಿಕಸಾಟಿಕಂ;
ನಿಸೀದನಂ ಕಣ್ಡುಚ್ಛಾದಿ, ಅಥ ಅನ್ತರವಾಸಕಂ.
‘‘ಉತ್ತರಾಸಙ್ಗಸಙ್ಘಾಟೀ, ನತ್ಥುಕಂ ಮುಖಸೋಧನಂ;
ಬಿಳಙ್ಗಲೋಣಂ ಪಹೂತಞ್ಚ [ಲೋಣಭೂತಞ್ಚ (ಕ.)], ಮಧುಞ್ಚ ದಧಿಪಾನಕಂ.
‘‘ಧೂಪಂ [ಧೂಮಂ (ಕ.)] ಸಿತ್ಥಂ ಪಿಲೋತಿಞ್ಚ, ಮುಖಪುಞ್ಛನಸುತ್ತಕಂ;
ದಾತಬ್ಬಂ ನಾಮ ಯಂ ಅತ್ಥಿ, ಯಞ್ಚ ಕಪ್ಪತಿ ಸತ್ಥುನೋ.
‘‘ಸಬ್ಬಮೇತಂ ಸಮಾನೇತ್ವಾ, ಆನನ್ದಂ ಉಪಸಙ್ಕಮಿಂ;
ಉಪಸಙ್ಕಮ್ಮ ¶ ರಾಜಾನಂ, ಜನೇತಾರಂ ಮಹೇಸಿನೋ [ಮಹೇಸಿನಂ (ಸೀ.), ಮಹಾಯಸಂ (ಸ್ಯಾ.), ಮಹಿಸ್ಸರಂ (ಕ.)];
ಸಿರಸಾ ¶ ಅಭಿವಾದೇತ್ವಾ, ಇದಂ ವಚನಮಬ್ರವಿಂ.
(ದಾನೋಕಾಸಯಾಚನಾ)
‘‘‘ಏಕತೋ ಜಾತಸಂವದ್ಧಾ, ಉಭಿನ್ನಂ ಏಕತೋ ಮನಂ [ಯಸೋ (ಸ್ಯಾ.), ಮನೋ (?)];
ಸಾಧಾರಣಾ ಸುಖದುಕ್ಖೇ, ಉಭೋ ಚ ಅನುವತ್ತಕಾ.
‘‘‘ಅತ್ಥಿ ಚೇತಸಿಕಂ ದುಕ್ಖಂ, ತವಾಧೇಯ್ಯಂ ಅರಿನ್ದಮ;
ಯದಿ ಸಕ್ಕೋಸಿ ತಂ ದುಕ್ಖಂ, ವಿನೋದೇಯ್ಯಾಸಿ ಖತ್ತಿಯ.
‘‘‘ತವ ದುಕ್ಖಂ ಮಮ ದುಕ್ಖಂ, ಉಭಿನ್ನಂ ಏಕತೋ ಮನೋ [ಮನಂ (ಸೀ. ಸ್ಯಾ.)];
ನಿಟ್ಠಿತನ್ತಿ ವಿಜಾನಾಹಿ, ಮಮಾಧೇಯ್ಯಂ ಸಚೇ ತುವಂ.
‘‘‘ಜಾನಾಹಿ ಖೋ ಮಹಾರಾಜ, ದುಕ್ಖಂ ಮೇ ದುಬ್ಬಿನೋದಯಂ;
ಪಹು ಸಮಾನೋ ಗಜ್ಜಸು, ಏಕಂ ತೇ ದುಚ್ಚಜಂ ವರಂ.
‘‘‘ಯಾವತಾ ವಿಜಿತೇ ಅತ್ಥಿ, ಯಾವತಾ ಮಮ ಜೀವಿತಂ;
ಏತೇಹಿ ಯದಿ ತೇ ಅತ್ಥೋ, ದಸ್ಸಾಮಿ ಅವಿಕಮ್ಪಿತೋ.
‘‘‘ಗಜ್ಜಿತಂ ಖೋ ತಯಾ ದೇವ, ಮಿಚ್ಛಾ ತಂ ಬಹು ಗಜ್ಜಿತಂ;
ಜಾನಿಸ್ಸಾಮಿ ತುವಂ ಅಜ್ಜ, ಸಬ್ಬಧಮ್ಮೇ [ಸಚ್ಚಧಮ್ಮೇ (?)] ಪತಿಟ್ಠಿತಂ.
‘‘‘ಅತಿಬಾಳ್ಹಂ ¶ ನಿಪೀಳೇಸಿ, ದದಮಾನಸ್ಸ ಮೇ ಸತೋ;
ಕಿಂ ತೇ ಮೇ ಪೀಳಿತೇನತ್ಥೋ, ಪತ್ಥಿತಂ ತೇ ಕಥೇಹಿ ಮೇ.
‘‘‘ಇಚ್ಛಾಮಹಂ ಮಹಾರಾಜ, ಬುದ್ಧಸೇಟ್ಠಂ ಅನುತ್ತರಂ;
ಭೋಜಯಿಸ್ಸಾಮಿ ಸಮ್ಬುದ್ಧಂ, ವಜ್ಜಂ [ವಞ್ಚುಂ (?)] ಮೇ ಮಾಹು ಜೀವಿತಂ.
‘‘‘ಅಞ್ಞಂ ತೇಹಂ ವರಂ ದಮ್ಮಿ, ಮಾ ಯಾಚಿತ್ಥೋ ತಥಾಗತಂ [ಅಯಾಚಿತೋ ತಥಾಗತೋ (ಸ್ಯಾ. ಕ.)];
ಅದೇಯ್ಯೋ ಕಸ್ಸಚಿ ಬುದ್ಧೋ, ಮಣಿ ಜೋತಿರಸೋ ಯಥಾ.
‘‘‘ನನು ¶ ತೇ ಗಜ್ಜಿತಂ ದೇವ, ಯಾವ ಜೀವಿತಮತ್ತನೋ [ವಿಜಿತಮತ್ಥಿತಂ (ಕ.), ಜೀವಿತಮತ್ಥಿಕಂ (ಸ್ಯಾ.)];
ಜೀವಿತಂ ¶ [ವಿಜಿತಂ (ಕ.)] ದದಮಾನೇನ, ಯುತ್ತಂ ದಾತುಂ ತಥಾಗತಂ.
‘‘‘ಠಪನೀಯೋ ಮಹಾವೀರೋ, ಅದೇಯ್ಯೋ ಕಸ್ಸಚಿ ಜಿನೋ;
ನ ಮೇ ಪಟಿಸ್ಸುತೋ ಬುದ್ಧೋ, ವರಸ್ಸು ಅಮಿತಂ ಧನಂ.
‘‘‘ವಿನಿಚ್ಛಯಂ ಪಾಪುಣಾಮ, ಪುಚ್ಛಿಸ್ಸಾಮ ವಿನಿಚ್ಛಯೇ;
ಯಥಾಸಣ್ಠಂ [ಯಥಾಸನ್ತಂ (ಸೀ.)] ಕಥೇಸ್ಸನ್ತಿ, ಪಟಿಪುಚ್ಛಾಮ ತಂ ತಥಾ.
‘‘‘ರಞ್ಞೋ ಹತ್ಥೇ ಗಹೇತ್ವಾನ, ಅಗಮಾಸಿಂ ವಿನಿಚ್ಛಯಂ;
ಪುರತೋ ಅಕ್ಖದಸ್ಸಾನಂ, ಇದಂ ವಚನಮಬ್ರವಿಂ.
‘‘‘ಸುಣನ್ತು ¶ ಮೇ ಅಕ್ಖದಸ್ಸಾ, ರಾಜಾ ವರಮದಾಸಿ ಮೇ;
ನ ಕಿಞ್ಚಿ ಠಪಯಿತ್ವಾನ, ಜೀವಿತಮ್ಪಿ [ವಿಜಿತಂಪಿ (ಕ.)] ಪವಾರಯಿ.
‘‘‘ತಸ್ಸ ಮೇ ವರದಿನ್ನಸ್ಸ, ಬುದ್ಧಸೇಟ್ಠಂ ವರಿಂ ಅಹಂ;
ಸುದಿನ್ನೋ ಹೋತಿ ಮೇ ಬುದ್ಧೋ, ಛಿನ್ದಥ ಸಂಸಯಂ ಮಮ.
‘‘‘ಸೋಸ್ಸಾಮ ತವ ವಚನಂ, ಭೂಮಿಪಾಲಸ್ಸ ರಾಜಿನೋ;
ಉಭಿನ್ನಂ ವಚನಂ ಸುತ್ವಾ, ಛಿನ್ದಿಸ್ಸಾಮೇತ್ಥ ಸಂಸಯಂ.
‘‘‘ಸಬ್ಬಂ ದೇವ ತಯಾ ದಿನ್ನಂ, ಇಮಸ್ಸ ಸಬ್ಬಗಾಹಿಕಂ [ಸಬ್ಬಗಾಹಿತಂ (ಸ್ಯಾ. ಕ.)];
ನ ಕಿಞ್ಚಿ ಠಪಯಿತ್ವಾನ, ಜೀವಿತಮ್ಪಿ ಪವಾರಯಿ.
‘‘‘ಕಿಚ್ಛಪ್ಪತ್ತೋವ ಹುತ್ವಾನ, ಯಾಚೀ ವರಮನುತ್ತರಂ [ಯಾವಜೀವಮನುತ್ತರಂ (ಸ್ಯಾ. ಕ.)];
ಇಮಂ ಸುದುಕ್ಖಿತಂ ಞತ್ವಾ, ಅದಾಸಿಂ ಸಬ್ಬಗಾಹಿಕಂ.
‘‘‘ಪರಾಜಯೋ ¶ ತುವಂ [ತವಂ (ಸೀ.)] ದೇವ, ಅಸ್ಸ ದೇಯ್ಯೋ ತಥಾಗತೋ;
ಉಭಿನ್ನಂ ಸಂಸಯೋ ಛಿನ್ನೋ, ಯಥಾಸಣ್ಠಮ್ಹಿ [ಯಥಾಸನ್ತಮ್ಹಿ (ಸೀ.)] ತಿಟ್ಠಥ.
‘‘‘ರಾಜಾ ತತ್ಥೇವ ಠತ್ವಾನ, ಅಕ್ಖದಸ್ಸೇತದಬ್ರವಿ;
ಸಮ್ಮಾ ¶ ಮಯ್ಹಮ್ಪಿ ದೇಯ್ಯಾಥ, ಪುನ ಬುದ್ಧಂ ಲಭಾಮಹಂ.
‘‘‘ಪೂರೇತ್ವಾ ತವ ಸಙ್ಕಪ್ಪಂ, ಭೋಜಯಿತ್ವಾ ತಥಾಗತಂ;
ಪುನ ದೇಯ್ಯಾಸಿ [ದೇಯ್ಯಾಥ (ಕ.)] ಸಮ್ಬುದ್ಧಂ, ಆನನ್ದಸ್ಸ ಯಸಸ್ಸಿನೋ’.
(ನಿಮನ್ತನಕಥಾ)
‘‘ಅಕ್ಖದಸ್ಸೇಭಿವಾದೇತ್ವಾ, ಆನನ್ದಞ್ಚಾಪಿ ಖತ್ತಿಯಂ;
ತುಟ್ಠೋ ಪಮುದಿತೋ ಹುತ್ವಾ, ಸಮ್ಬುದ್ಧಮುಪಸಙ್ಕಮಿಂ.
‘‘ಉಪಸಙ್ಕಮ್ಮ ಸಮ್ಬುದ್ಧಂ, ಓಘತಿಣ್ಣಮನಾಸವಂ;
ಸಿರಸಾ ಅಭಿವಾದೇತ್ವಾ, ಇದಂ ವಚನಮಬ್ರವಿಂ.
‘ವಸೀಸತಸಹಸ್ಸೇಹಿ ¶ , ಅಧಿವಾಸೇಹಿ ಚಕ್ಖುಮ;
ಹಾಸಯನ್ತೋ ಮಮ ಚಿತ್ತಂ, ನಿವೇಸನಮುಪೇಹಿ ಮೇ’.
‘‘ಪದುಮುತ್ತರೋ ಲೋಕವಿದೂ, ಆಹುತೀನಂ ಪಟಿಗ್ಗಹೋ;
ಮಮ ಸಙ್ಕಪ್ಪಮಞ್ಞಾಯ, ಅಧಿವಾಸೇಸಿ ಚಕ್ಖುಮಾ.
‘‘ಅಧಿವಾಸನಮಞ್ಞಾಯ, ಅಭಿವಾದಿಯ ಸತ್ಥುನೋ;
ಹಟ್ಠೋ ಉದಗ್ಗಚಿತ್ತೋಹಂ, ನಿವೇಸನಮುಪಾಗಮಿಂ.
(ದಾನಪಟಿಯಾದನಂ)
‘‘ಮಿತ್ತಾಮಚ್ಚೇ ಸಮಾನೇತ್ವಾ, ಇದಂ ವಚನಮಬ್ರವಿಂ;
‘ಸುದುಲ್ಲಭೋ ಮಯಾ ಲದ್ಧೋ, ಮಣಿ ಜೋತಿರಸೋ ಯಥಾ.
‘‘‘ಕೇನ ತಂ ಪೂಜಯಿಸ್ಸಾಮ, ಅಪ್ಪಮೇಯ್ಯೋ ಅನೂಪಮೋ;
ಅತುಲೋ ಅಸಮೋ ಧೀರೋ, ಜಿನೋ ಅಪ್ಪಟಿಪುಗ್ಗಲೋ.
‘‘‘ತಥಾಸಮಸಮೋ ಚೇವ, ಅದುತಿಯೋ ನರಾಸಭೋ;
ದುಕ್ಕರಂ ಅಧಿಕಾರಞ್ಹಿ, ಬುದ್ಧಾನುಚ್ಛವಿಕಂ ಮಯಾ.
‘‘‘ನಾನಾಪುಪ್ಫೇ ¶ ಸಮಾನೇತ್ವಾ, ಕರೋಮ ಪುಪ್ಫಮಣ್ಡಪಂ;
ಬುದ್ಧಾನುಚ್ಛವಿಕಂ ¶ ಏತಂ, ಸಬ್ಬಪೂಜಾ ಭವಿಸ್ಸತಿ’.
‘‘ಉಪ್ಪಲಂ ¶ ಪದುಮಂ ವಾಪಿ, ವಸ್ಸಿಕಂ ಅಧಿಮುತ್ತಕಂ [ಅತಿಮುತ್ತಕಂ (?)];
ಚಮ್ಪಕಂ [ಚನ್ದನಂ (ಕ.)] ನಾಗಪುಪ್ಫಞ್ಚ, ಮಣ್ಡಪಂ ಕಾರಯಿಂ ಅಹಂ.
‘‘ಸತಾಸನಸಹಸ್ಸಾನಿ, ಛತ್ತಚ್ಛಾಯಾಯ ಪಞ್ಞಪಿಂ;
ಪಚ್ಛಿಮಂ ಆಸನಂ ಮಯ್ಹಂ, ಅಧಿಕಂ ಸತಮಗ್ಘತಿ.
‘‘ಸತಾಸನಸಹಸ್ಸಾನಿ, ಛತ್ತಚ್ಛಾಯಾಯ ಪಞ್ಞಪಿಂ;
ಪಟಿಯಾದೇತ್ವಾ ಅನ್ನಪಾನಂ, ಕಾಲಂ ಆರೋಚಯಿಂ ಅಹಂ.
‘‘ಆರೋಚಿತಮ್ಹಿ ಕಾಲಮ್ಹಿ, ಪದುಮುತ್ತರೋ ಮಹಾಮುನಿ;
ವಸೀಸತಸಹಸ್ಸೇಹಿ, ನಿವೇಸನಮುಪೇಸಿ ಮೇ.
‘‘ಧಾರೇನ್ತಂ ಉಪರಿಚ್ಛತ್ತಂ [ಧಾರೇನ್ತಮುಪರಿಚ್ಛತ್ತೇ (ಸೀ.)], ಸುಫುಲ್ಲಪುಪ್ಫಮಣ್ಡಪೇ;
ವಸೀಸತಸಹಸ್ಸೇಹಿ, ನಿಸೀದಿ ಪುರಿಸುತ್ತಮೋ.
‘‘‘ಛತ್ತಸತಸಹಸ್ಸಾನಿ, ಸತಸಹಸ್ಸಮಾಸನಂ;
ಕಪ್ಪಿಯಂ ಅನವಜ್ಜಞ್ಚ, ಪಟಿಗಣ್ಹಾಹಿ ಚಕ್ಖುಮ’.
‘‘ಪದುಮುತ್ತರೋ ಲೋಕವಿದೂ, ಆಹುತೀನಂ ಪಟಿಗ್ಗಹೋ;
ಮಮಂ ತಾರೇತುಕಾಮೋ ಸೋ, ಸಮ್ಪಟಿಚ್ಛಿ ಮಹಾಮುನಿ.
(ದಾನಕಥಾ)
‘‘ಭಿಕ್ಖುನೋ ¶ ಏಕಮೇಕಸ್ಸ, ಪಚ್ಚೇಕಂ ಪತ್ತಮದಾಸಹಂ;
ಜಹಿಂಸು ಸುಮ್ಭಕಂ [ಪುಬ್ಬಕಂ (ಸೀ.), ಸಮ್ಭತಂ (ಸ್ಯಾ.), ಮತ್ತಿಕಂ (?)] ಪತ್ತಂ, ಲೋಹಪತ್ತಂ ಅಧಾರಯುಂ.
‘‘ಸತ್ತರತ್ತಿನ್ದಿವಂ ಬುದ್ಧೋ, ನಿಸೀದಿ ಪುಪ್ಫಮಣ್ಡಪೇ;
ಬೋಧಯನ್ತೋ ಬಹೂ ಸತ್ತೇ, ಧಮ್ಮಚಕ್ಕಂ ಪವತ್ತಯಿ.
‘‘ಧಮ್ಮಚಕ್ಕಂ ಪವತ್ತೇನ್ತೋ, ಹೇಟ್ಠತೋ ಪುಪ್ಫಮಣ್ಡಪೇ;
ಚುಲ್ಲಾಸೀತಿಸಹಸ್ಸಾನಂ ¶ , ಧಮ್ಮಾಭಿಸಮಯೋ ಅಹು.
‘‘ಸತ್ತಮೇ ದಿವಸೇ ಪತ್ತೇ, ಪದುಮುತ್ತರೋ ಮಹಾಮುನಿ;
ಛತ್ತಚ್ಛಾಯಾಯಮಾಸೀನೋ, ಇಮಾ ಗಾಥಾ ಅಭಾಸಥ.
(ಬ್ಯಾಕರಣಂ)
‘‘‘ಅನೂನಕಂ ದಾನವರಂ, ಯೋ ಮೇ ಪಾದಾಸಿ ಮಾಣವೋ;
ತಮಹಂ ಕಿತ್ತಯಿಸ್ಸಾಮಿ, ಸುಣಾಥ ಮಮ ಭಾಸತೋ.
‘‘‘ಹತ್ಥೀ ¶ ಅಸ್ಸಾ ರಥಾ ಪತ್ತೀ, ಸೇನಾ ಚ ಚತುರಙ್ಗಿನೀ;
ಪರಿವಾರೇಸ್ಸನ್ತಿಮಂ [ತಂ (ಸ್ಯಾ.)] ನಿಚ್ಚಂ, ಸಬ್ಬದಾನಸ್ಸಿದಂ ಫಲಂ.
‘‘‘ಹತ್ಥಿಯಾನಂ ಅಸ್ಸಯಾನಂ, ಸಿವಿಕಾ ಸನ್ದಮಾನಿಕಾ;
ಉಪಟ್ಠಿಸ್ಸನ್ತಿಮಂ ನಿಚ್ಚಂ, ಸಬ್ಬದಾನಸ್ಸಿದಂ ಫಲಂ.
‘‘‘ಸಟ್ಠಿ ರಥಸಹಸ್ಸಾನಿ, ಸಬ್ಬಾಲಙ್ಕಾರಭೂಸಿತಾ;
ಪರಿವಾರೇಸ್ಸನ್ತಿಮಂ ನಿಚ್ಚಂ, ಸಬ್ಬದಾನಸ್ಸಿದಂ ಫಲಂ.
‘‘‘ಸಟ್ಠಿ ¶ ತೂರಿಯಸಹಸ್ಸಾನಿ, ಭೇರಿಯೋ ಸಮಲಙ್ಕತಾ;
ವಜ್ಜಯಿಸ್ಸನ್ತಿಮಂ ನಿಚ್ಚಂ, ಸಬ್ಬದಾನಸ್ಸಿದಂ ಫಲಂ.
‘‘‘ಛಳಾಸೀತಿಸಹಸ್ಸಾನಿ, ನಾರಿಯೋ ಸಮಲಙ್ಕತಾ;
ವಿಚಿತ್ತವತ್ಥಾಭರಣಾ, ಆಮುಕ್ಕಮಣಿಕುಣ್ಡಲಾ [ಆಮುತ್ತಮಣಿಕುಣ್ಡಲಾ (ಸೀ. ಸ್ಯಾ.)].
‘‘‘ಅಳಾರಪಮ್ಹಾ ಹಸುಲಾ, ಸುಸಞ್ಞಾ ತನುಮಜ್ಝಿಮಾ;
ಪರಿವಾರೇಸ್ಸನ್ತಿಮಂ ನಿಚ್ಚಂ, ಸಬ್ಬದಾನಸ್ಸಿದಂ ಫಲಂ.
‘‘‘ತಿಂಸಕಪ್ಪಸಹಸ್ಸಾನಿ, ದೇವಲೋಕೇ ರಮಿಸ್ಸತಿ;
ಸಹಸ್ಸಕ್ಖತ್ತುಂ ದೇವಿನ್ದೋ, ದೇವರಜ್ಜಂ ಕರಿಸ್ಸತಿ.
‘‘‘ಸಹಸ್ಸಕ್ಖತ್ತುಂ ರಾಜಾ ಚ, ಚಕ್ಕವತ್ತೀ ಭವಿಸ್ಸತಿ;
ಪದೇಸರಜ್ಜಂ ¶ ವಿಪುಲಂ, ಗಣನಾತೋ ಅಸಙ್ಖಿಯಂ.
‘‘‘ದೇವಲೋಕೇ ¶ ವಸನ್ತಸ್ಸ, ಪುಞ್ಞಕಮ್ಮಸಮಙ್ಗಿನೋ;
ದೇವಲೋಕಪರಿಯನ್ತಂ, ರತನಛತ್ತಂ ಧರಿಸ್ಸತಿ.
‘‘‘ಇಚ್ಛಿಸ್ಸತಿ ಯದಾ ಛಾಯಂ [ಯದಾ ವಾಯಂ (ಸ್ಯಾ. ಕ.)], ಛದನಂ ದುಸ್ಸಪುಪ್ಫಜಂ;
ಇಮಸ್ಸ ಚಿತ್ತಮಞ್ಞಾಯ, ನಿಬದ್ಧಂ ಛಾದಯಿಸ್ಸತಿ.
‘‘‘ದೇವಲೋಕಾ ಚವಿತ್ವಾನ, ಸುಕ್ಕಮೂಲೇನ ಚೋದಿತೋ;
ಪುಞ್ಞಕಮ್ಮೇನ ಸಂಯುತ್ತೋ, ಬ್ರಹ್ಮಬನ್ಧು ಭವಿಸ್ಸತಿ.
‘‘‘ಕಪ್ಪಸತಸಹಸ್ಸಮ್ಹಿ, ಓಕ್ಕಾಕಕುಲಸಮ್ಭವೋ;
ಗೋತಮೋ ನಾಮ ಗೋತ್ತೇನ [ನಾಮೇನ (ಸಬ್ಬತ್ಥ) ಏವಮುಪರಿಪಿ; ಅಟ್ಠಥಾಯಂ ಪನ ಪುಬ್ಬೇ ಗೋತ್ತೇನಾತಿಪದಂ ವಣ್ಣಿತಂ], ಸತ್ಥಾ ಲೋಕೇ ಭವಿಸ್ಸತಿ.
‘‘‘ಸಬ್ಬಮೇತಂ ಅಭಿಞ್ಞಾಯ, ಗೋತಮೋ ಸಕ್ಯಪುಙ್ಗವೋ;
ಭಿಕ್ಖುಸಙ್ಘೇ ನಿಸೀದಿತ್ವಾ, ಏತದಗ್ಗೇ ಠಪೇಸ್ಸತಿ.
‘‘‘ಪಿಲಿನ್ದವಚ್ಛನಾಮೇನ ¶ [ಪಿಲಿನ್ದಿವಚ್ಛನಾಮೇನ (ಸೀ.)], ಹೇಸ್ಸತಿ ಸತ್ಥುಸಾವಕೋ;
ದೇವಾನಂ ಅಸುರಾನಞ್ಚ, ಗನ್ಧಬ್ಬಾನಞ್ಚ ಸಕ್ಕತೋ.
‘‘‘ಭಿಕ್ಖೂನಂ ಭಿಕ್ಖುನೀನಞ್ಚ, ಗಿಹೀನಞ್ಚ ತಥೇವ ಸೋ;
ಪಿಯೋ ಹುತ್ವಾನ ಸಬ್ಬೇಸಂ, ವಿಹರಿಸ್ಸತಿನಾಸವೋ’.
(ದಾನಾನಿಸಂಸಕಥಾ)
‘‘ಸತಸಹಸ್ಸೇ ಕತಂ ಕಮ್ಮಂ, ಫಲಂ ದಸ್ಸೇಸಿ ಮೇ ಇಧ;
ಸುಮುತ್ತೋ ಸರವೇಗೋವ, ಕಿಲೇಸೇ ಝಾಪಯೀ ಮಮ [ಝಾಪಯಿಸ್ಸತಿ (ಸೀ. ಕ.), ಝಾಪಯಿಂ ಅಹಂ (ಸ್ಯಾ.)].
‘‘ಅಹೋ ಮೇ ಸುಕತಂ ಕಮ್ಮಂ, ಪುಞ್ಞಕ್ಖೇತ್ತೇ ಅನುತ್ತರೇ;
ಯತ್ಥ ಕಾರಂ ಕರಿತ್ವಾನ, ಪತ್ತೋಮ್ಹಿ ಅಚಲಂ ಪದಂ.
‘‘ಅನೂನಕಂ ದಾನವರಂ, ಅದಾಸಿ ಯೋ [ಸೋ (ಕ.)] ಹಿ ಮಾಣವೋ;
ಆದಿಪುಬ್ಬಙ್ಗಮೋ ¶ ಆಸಿ, ತಸ್ಸ ದಾನಸ್ಸಿದಂ ಫಲಂ.
(೧. ಛತ್ತಾನಿಸಂಸೋ)
‘‘ಛತ್ತೇ ಚ ಸುಗತೇ ದತ್ವಾ [ಛತ್ತೇ ಸುಗತೇ ದತ್ವಾನ (ಸೀ. ಸ್ಯಾ.)], ಸಙ್ಘೇ ಗಣವರುತ್ತಮೇ;
ಅಟ್ಠಾನಿಸಂಸೇ ಅನುಭೋಮಿ, ಕಮ್ಮಾನುಚ್ಛವಿಕೇ ಮಮ.
‘‘ಸೀತಂ ¶ ಉಣ್ಹಂ ನ ಜಾನಾಮಿ, ರಜೋಜಲ್ಲಂ ನ ಲಿಮ್ಪತಿ;
ಅನುಪದ್ದವೋ ಅನೀತಿ ಚ, ಹೋಮಿ ಅಪಚಿತೋ ಸದಾ.
‘‘ಸುಖುಮಚ್ಛವಿಕೋ ಹೋಮಿ, ವಿಸದಂ ಹೋತಿ ಮಾನಸಂ;
ಛತ್ತಸತಸಹಸ್ಸಾನಿ, ಭವೇ ಸಂಸರತೋ ಮಮ.
‘‘ಸಬ್ಬಾಲಙ್ಕಾರಯುತ್ತಾನಿ ¶ , ತಸ್ಸ ಕಮ್ಮಸ್ಸ ವಾಹಸಾ;
ಇಮಂ ಜಾತಿಂ ಠಪೇತ್ವಾನ, ಮತ್ಥಕೇ ಧಾರಯನ್ತಿ ಮೇ.
‘‘ಕಸ್ಮಾ [ತಸ್ಮಾ (ಸ್ಯಾ. ಕ.)] ಇಮಾಯ ಜಾತಿಯಾ, ನತ್ಥಿ ಮೇ ಛತ್ತಧಾರಣಾ;
ಮಮ ಸಬ್ಬಂ ಕತಂ ಕಮ್ಮಂ, ವಿಮುತ್ತಿಛತ್ತಪತ್ತಿಯಾ.
(೨. ದುಸ್ಸಾನಿಸಂಸೋ)
‘‘ದುಸ್ಸಾನಿ ಸುಗತೇ ದತ್ವಾ, ಸಙ್ಘೇ ಗಣವರುತ್ತಮೇ;
ಅಟ್ಠಾನಿಸಂಸೇ ಅನುಭೋಮಿ, ಕಮ್ಮಾನುಚ್ಛವಿಕೇ ಮಮ.
‘‘ಸುವಣ್ಣವಣ್ಣೋ ¶ ವಿರಜೋ, ಸಪ್ಪಭಾಸೋ ಪತಾಪವಾ;
ಸಿನಿದ್ಧಂ ಹೋತಿ ಮೇ ಗತ್ತಂ, ಭವೇ ಸಂಸರತೋ ಮಮ.
‘‘ದುಸ್ಸಸತಸಹಸ್ಸಾನಿ, ಸೇತಾ ಪೀತಾ ಚ ಲೋಹಿತಾ;
ಧಾರೇನ್ತಿ ಮತ್ಥಕೇ ಮಯ್ಹಂ, ದುಸ್ಸದಾನಸ್ಸಿದಂ ಫಲಂ.
‘‘ಕೋಸೇಯ್ಯಕಮ್ಬಲಿಯಾನಿ, ಖೋಮಕಪ್ಪಾಸಿಕಾನಿ ಚ;
ಸಬ್ಬತ್ಥ ಪಟಿಲಭಾಮಿ, ತೇಸಂ ನಿಸ್ಸನ್ದತೋ ಅಹಂ.
(೩. ಪತ್ತಾನಿಸಂಸೋ)
‘‘ಪತ್ತೇ ಸುಗತೇ ದತ್ವಾನ, ಸಙ್ಘೇ ಗಣವರುತ್ತಮೇ;
ದಸಾನಿಸಂಸೇ ¶ ಅನುಭೋಮಿ, ಕಮ್ಮಾನುಚ್ಛವಿಕೇ ಮಮ.
‘‘ಸುವಣ್ಣಥಾಲೇ ಮಣಿಥಾಲೇ, ರಜತೇಪಿ ಚ ಥಾಲಕೇ;
ಲೋಹಿತಙ್ಗಮಯೇ ಥಾಲೇ, ಪರಿಭುಞ್ಜಾಮಿ ಸಬ್ಬದಾ.
‘‘ಅನುಪದ್ದವೋ ಅನೀತಿ ಚ, ಹೋಮಿ ಅಪಚಿತೋ ಸದಾ;
ಲಾಭೀ ಅನ್ನಸ್ಸ ಪಾನಸ್ಸ, ವತ್ಥಸ್ಸ ಸಯನಸ್ಸ ಚ.
‘‘ನ ವಿನಸ್ಸನ್ತಿ ಮೇ ಭೋಗಾ, ಠಿತಚಿತ್ತೋ ಭವಾಮಹಂ;
ಧಮ್ಮಕಾಮೋ ಸದಾ ಹೋಮಿ, ಅಪ್ಪಕ್ಲೇಸೋ ಅನಾಸವೋ.
‘‘ದೇವಲೋಕೇ ಮನುಸ್ಸೇ ವಾ, ಅನುಬನ್ಧಾ ಇಮೇ ಗುಣಾ;
ಛಾಯಾ ಯಥಾಪಿ ರುಕ್ಖಸ್ಸ, ಸಬ್ಬತ್ಥ ನ ಜಹನ್ತಿ ಮಂ.
(೪. ವಾಸಿಆನಿಸಂಸೋ)
‘‘ಚಿತ್ತಬನ್ಧನಸಮ್ಬದ್ಧಾ [ಚಿತ್ತಬನ್ಧನಸಮ್ಪನ್ನಾ (ಕ.)], ಸುಕತಾ ವಾಸಿಯೋ ಬಹೂ;
ದತ್ವಾನ ಬುದ್ಧಸೇಟ್ಠಸ್ಸ, ಸಙ್ಘಸ್ಸ ಚ ತಥೇವಹಂ.
‘‘ಅಟ್ಠಾನಿಸಂಸೇ ಅನುಭೋಮಿ, ಕಮ್ಮಾನುಚ್ಛವಿಕೇ ಮಮ;
ಸೂರೋ ¶ ಹೋಮವಿಸಾರೀ ಚ, ವೇಸಾರಜ್ಜೇಸು ಪಾರಮೀ.
‘‘ಧಿತಿವೀರಿಯವಾ ¶ ಹೋಮಿ, ಪಗ್ಗಹೀತಮನೋ ಸದಾ;
ಕಿಲೇಸಚ್ಛೇದನಂ ಞಾಣಂ, ಸುಖುಮಂ ಅತುಲಂ ಸುಚಿಂ;
ಸಬ್ಬತ್ಥ ಪಟಿಲಭಾಮಿ, ತಸ್ಸ ನಿಸ್ಸನ್ದತೋ ಅಹಂ.
(೫. ಸತ್ಥಕಾನಿಸಂಸೋ)
‘‘ಅಕಕ್ಕಸೇ ¶ ಅಫರುಸೇ, ಸುಧೋತೇ ಸತ್ಥಕೇ ಬಹೂ;
ಪಸನ್ನಚಿತ್ತೋ ದತ್ವಾನ, ಬುದ್ಧೇ ಸಙ್ಘೇ ತಥೇವ ಚ.
‘‘ಪಞ್ಚಾನಿಸಂಸೇ ಅನುಭೋಮಿ, ಕಮ್ಮಾನುಚ್ಛವಿಕೇ ಮಮ;
ಕಲ್ಯಾಣಮಿತ್ತಂ [ಕಲ್ಯಾಣಚಿತ್ತಂ (ಸೀ.)] ವೀರಿಯಂ, ಖನ್ತಿಞ್ಚ ಮೇತ್ತಸತ್ಥಕಂ.
‘‘ತಣ್ಹಾಸಲ್ಲಸ್ಸ ¶ ಛಿನ್ನತ್ತಾ, ಪಞ್ಞಾಸತ್ಥಂ ಅನುತ್ತರಂ;
ವಜಿರೇನ ಸಮಂ ಞಾಣಂ, ತೇಸಂ ನಿಸ್ಸನ್ದತೋ ಲಭೇ.
(೬. ಸೂಚಿಆನಿಸಂಸೋ)
‘‘ಸೂಚಿಯೋ ಸುಗತೇ ದತ್ವಾ, ಸಙ್ಘೇ ಗಣವರುತ್ತಮೇ;
ಪಞ್ಚಾನಿಸಂಸೇ ಅನುಭೋಮಿ, ಕಮ್ಮಾನುಚ್ಛವಿಕೇ ಮಮ.
‘‘ನ ಸಂಸಯೋ ಕಙ್ಖಚ್ಛೇದೋ, ಅಭಿರೂಪೋ ಚ ಭೋಗವಾ;
ತಿಕ್ಖಪಞ್ಞೋ ಸದಾ ಹೋಮಿ, ಸಂಸರನ್ತೋ ಭವಾಭವೇ.
‘‘ಗಮ್ಭೀರಂ ನಿಪುಣಂ ಠಾನಂ, ಅತ್ಥಂ ಞಾಣೇನ ಪಸ್ಸಯಿಂ;
ವಜಿರಗ್ಗಸಮಂ ಞಾಣಂ, ಹೋತಿ ಮೇ ತಮಘಾತನಂ.
(೭. ನಖಚ್ಛೇದನಾನಿಸಂಸೋ)
‘‘ನಖಚ್ಛೇದನೇ ಸುಗತೇ, ದತ್ವಾ ಸಙ್ಘೇ ಗಣುತ್ತಮೇ;
ಪಞ್ಚಾನಿಸಂಸೇ ಅನುಭೋಮಿ, ಕಮ್ಮಾನುಚ್ಛವಿಕೇ ಮಮ.
‘‘ದಾಸಿದಾಸೇ [ದಾಸಿದಾಸ (ಕ.)] ಗವಸ್ಸೇ ಚ, ಭತಕೇ ನಾಟಕೇ [ಆರಕ್ಖಕೇ (ಸೀ.)] ಬಹೂ;
ನ್ಹಾಪಿತೇ ಭತ್ತಕೇ ಸೂದೇ, ಸಬ್ಬತ್ಥೇವ ಲಭಾಮಹಂ.
(೮. ವಿಧೂಪನತಾಲವಣ್ಟಾನಿಸಂಸೋ)
‘‘ವಿಧೂಪನೇ ಸುಗತೇ ದತ್ವಾ, ತಾಲವಣ್ಟೇ ಚ ಸೋಭಣೇ;
ಅಟ್ಠಾನಿಸಂಸೇ ಅನುಭೋಮಿ, ಕಮ್ಮಾನುಚ್ಛವಿಕೇ ಮಮ.
‘‘ಸೀತಂ ಉಣ್ಹಂ ನ ಜಾನಾಮಿ, ಪರಿಳಾಹೋ ನ ವಿಜ್ಜತಿ;
ದರಥಂ ನಾಭಿಜಾನಾಮಿ, ಚಿತ್ತಸನ್ತಾಪನಂ ಮಮ.
‘‘ರಾಗಗ್ಗಿ ¶ ದೋಸಮೋಹಗ್ಗಿ, ಮಾನಗ್ಗಿ ದಿಟ್ಠಿಅಗ್ಗಿ ಚ;
ಸಬ್ಬಗ್ಗೀ ನಿಬ್ಬುತಾ ಮಯ್ಹಂ, ತಸ್ಸ ನಿಸ್ಸನ್ದತೋ ಮಮ.
(೯. ಮೋರಹತ್ಥ-ಚಾಮರಂ)
‘‘ಮೋರಹತ್ಥೇ ¶ ಚಾಮರಿಯೋ, ದತ್ವಾ ಸಙ್ಘೇ ಗಣುತ್ತಮೇ;
ಉಪಸನ್ತಕಿಲೇಸೋಹಂ, ವಿಹರಾಮಿ ಅನಙ್ಗಣೋ.
(೧೦. ಪರಿಸ್ಸಾವನ-ಧಮ್ಮಕರಂ)
‘‘ಪರಿಸ್ಸಾವನೇ ¶ ¶ ಸುಗತೇ, ದತ್ವಾ ಧಮ್ಮಕರುತ್ತಮೇ [ದತ್ವಾ ಸುಕತೇ ಧಮ್ಮಕುತ್ತರೇ (ಸ್ಯಾ. ಕ.)];
ಪಞ್ಚಾನಿಸಂಸೇ ಅನುಭೋಮಿ, ಕಮ್ಮಾನುಚ್ಛವಿಕೇ ಮಮ.
‘‘ಸಬ್ಬೇಸಂ ಸಮತಿಕ್ಕಮ್ಮ, ದಿಬ್ಬಂ ಆಯುಂ ಲಭಾಮಹಂ;
ಅಪ್ಪಸಯ್ಹೋ ಸದಾ ಹೋಮಿ, ಚೋರಪಚ್ಚತ್ಥಿಕೇಹಿ ವಾ.
‘‘ಸತ್ಥೇನ ವಾ ವಿಸೇನ ವಾ, ವಿಹೇಸಮ್ಪಿ ನ ಕುಬ್ಬತೇ;
ಅನ್ತರಾಮರಣಂ ನತ್ಥಿ, ತೇಸಂ ನಿಸ್ಸನ್ದತೋ ಮಮ.
(೧೧. ತೇಲಧಾರಾನಿಸಂಸೋ)
‘‘ತೇಲಧಾರೇ ಸುಗತೇ ದತ್ವಾ, ಸಙ್ಘೇ ಗಣವರುತ್ತಮೇ;
ಪಞ್ಚಾನಿಸಂಸೇ ಅನುಭೋಮಿ, ಕಮ್ಮಾನುಚ್ಛವಿಕೇ ಮಮ.
‘‘ಸುಚಾರುರೂಪೋ ಸುಭದ್ದೋ [ಸುಗದೋ (ಸೀ.), ಸುವಾಚೋ (?)], ಸುಸಮುಗ್ಗತಮಾನಸೋ;
ಅವಿಕ್ಖಿತ್ತಮನೋ ಹೋಮಿ, ಸಬ್ಬಾರಕ್ಖೇಹಿ ರಕ್ಖಿತೋ.
(೧೨. ಸೂಚಿಘರಾನಿಸಂಸೋ)
‘‘ಸೂಚಿಘರೇ ಸುಗತೇ ದತ್ವಾ, ಸಙ್ಘೇ ಗಣವರುತ್ತಮೇ;
ತೀಣಾನಿಸಂಸೇ ಅನುಭೋಮಿ, ಕಮ್ಮಾನುಚ್ಛವಿಕೇ ಮಮ.
‘‘ಚೇತೋಸುಖಂ ಕಾಯಸುಖಂ, ಇರಿಯಾಪಥಜಂ ಸುಖಂ;
ಇಮೇ ಗುಣೇ ಪಟಿಲಭೇ, ತಸ್ಸ ನಿಸ್ಸನ್ದತೋ ಅಹಂ.
(೧೩. ಅಂಸಬದ್ಧಾನಿಸಂಸೋ)
‘‘ಅಂಸಬದ್ಧೇ ಜಿನೇ ದತ್ವಾ, ಸಙ್ಘೇ ಗಣವರುತ್ತಮೇ;
ತೀಣಾನಿಸಂಸೇ ಅನುಭೋಮಿ, ಕಮ್ಮಾನುಚ್ಛವಿಕೇ ಮಮ.
‘‘ಸದ್ಧಮ್ಮೇ ¶ ಗಾಧಂ [ಚೇತೋಞಾಣಂ ಚ (ಸೀ.)] ವಿನ್ದಾಮಿ, ಸರಾಮಿ ದುತಿಯಂ ಭವಂ;
ಸಬ್ಬತ್ಥ ಸುಚ್ಛವೀ ಹೋಮಿ, ತಸ್ಸ ನಿಸ್ಸನ್ದತೋ ಅಹಂ.
(೧೪. ಕಾಯಬನ್ಧನಾನಿಸಂಸೋ)
‘‘ಕಾಯಬನ್ಧೇ ಜಿನೇ ದತ್ವಾ, ಸಙ್ಘೇ ಗಣವರುತ್ತಮೇ;
ಛಾನಿಸಂಸೇ ಅನುಭೋಮಿ, ಕಮ್ಮಾನುಚ್ಛವಿಕೇ ಮಮ.
‘‘ಸಮಾಧೀಸು ¶ ¶ ನ ಕಮ್ಪಾಮಿ, ವಸೀ ಹೋಮಿ ಸಮಾಧಿಸು;
ಅಭೇಜ್ಜಪರಿಸೋ ಹೋಮಿ, ಆದೇಯ್ಯವಚನೋ ಸದಾ.
‘‘ಉಪಟ್ಠಿತಸತಿ ಹೋಮಿ, ತಾಸೋ ಮಯ್ಹಂ ನ ವಿಜ್ಜತಿ;
ದೇವಲೋಕೇ ಮನುಸ್ಸೇ ವಾ, ಅನುಬನ್ಧಾ ಇಮೇ ಗುಣಾ.
(೧೫. ಆಧಾರಕಾನಿಸಂಸೋ)
‘‘ಆಧಾರಕೇ ಜಿನೇ ದತ್ವಾ, ಸಙ್ಘೇ ಗಣವರುತ್ತಮೇ;
ಪಞ್ಚವಣ್ಣೇಹಿ ದಾಯಾದೋ [ಪಞ್ಚವಣ್ಣೇ ಭಯಾಭಾವೋ (ಸ್ಯಾ.)], ಅಚಲೋ ಹೋಮಿ ಕೇನಚಿ.
‘‘ಯೇ ¶ ಕೇಚಿ ಮೇ ಸುತಾ ಧಮ್ಮಾ, ಸತಿಞಾಣಪ್ಪಬೋಧನಾ;
ಧತಾ [ಠಿತಾ (ಕ.)] ಮೇ ನ ವಿನಸ್ಸನ್ತಿ, ಭವನ್ತಿ ಸುವಿನಿಚ್ಛಿತಾ.
(೧೬. ಭಾಜನಾನಿಸಂಸೋ)
‘‘ಭಾಜನೇ ಪರಿಭೋಗೇ ಚ, ದತ್ವಾ ಬುದ್ಧೇ ಗಣುತ್ತಮೇ;
ತೀಣಾನಿಸಂಸೇ ಅನುಭೋಮಿ, ಕಮ್ಮಾನುಚ್ಛವಿಕೇ ಮಮ.
‘‘ಸೋಣ್ಣಮಯೇ ಮಣಿಮಯೇ, ಅಥೋಪಿ ಫಲಿಕಾಮಯೇ;
ಲೋಹಿತಙ್ಗಮಯೇ ಚೇವ, ಲಭಾಮಿ ಭಾಜನೇ ಅಹಂ.
‘‘ಭರಿಯಾ ದಾಸದಾಸೀ [ಸಬ್ಬತ್ಥಪಿ ಏವಮೇವ ದಿಸ್ಸತಿ] ಚ, ಹತ್ಥಿಸ್ಸರಥಪತ್ತಿಕೇ;
ಇತ್ಥೀ ಪತಿಬ್ಬತಾ ಚೇವ, ಪರಿಭೋಗಾನಿ ಸಬ್ಬದಾ.
‘‘ವಿಜ್ಜಾ ಮನ್ತಪದೇ ಚೇವ, ವಿವಿಧೇ ಆಗಮೇ ಬಹೂ;
ಸಬ್ಬಂ ಸಿಪ್ಪಂ ನಿಸಾಮೇಮಿ, ಪರಿಭೋಗಾನಿ ಸಬ್ಬದಾ.
(೧೭. ಥಾಲಕಾನಿಸಂಸೋ)
‘‘ಥಾಲಕೇ ಸುಗತೇ ದತ್ವಾ, ಸಙ್ಘೇ ಗಣವರುತ್ತಮೇ;
ತೀಣಾನಿಸಂಸೇ ಅನುಭೋಮಿ, ಕಮ್ಮಾನುಚ್ಛವಿಕೇ ಮಮ.
‘‘ಸೋಣ್ಣಮಯೇ ¶ ಮಣಿಮಯೇ, ಅಥೋಪಿ ಫಲಿಕಾಮಯೇ;
ಲೋಹಿತಙ್ಗಮಯೇ ಚೇವ, ಲಭಾಮಿ ಥಾಲಕೇ ಅಹಂ.
‘‘ಅಸತ್ಥಕೇ ¶ [ಅಸತ್ಥಕೇ (ಸೀ.), ಅಸ್ಸಟ್ಠಕೇ (ಸ್ಯಾ.)] ಫಲಮಯೇ, ಅಥೋ ಪೋಕ್ಖರಪತ್ತಕೇ;
ಮಧುಪಾನಕಸಙ್ಖೇ ಚ, ಲಭಾಮಿ ಥಾಲಕೇ ಅಹಂ.
‘‘ವತ್ತೇ ಗುಣೇ ಪಟಿಪತ್ತಿ, ಆಚಾರಕಿರಿಯಾಸು ಚ;
ಇಮೇ ಗುಣೇ ಪಟಿಲಭೇ, ತಸ್ಸ ನಿಸ್ಸನ್ದತೋ ಅಹಂ.
(೧೮. ಭೇಸಜ್ಜಾನಿಸಂಸೋ)
‘‘ಭೇಸಜ್ಜಂ ¶ ಸುಗತೇ ದತ್ವಾ, ಸಙ್ಘೇ ಗಣವರುತ್ತಮೇ;
ದಸಾನಿಸಂಸೇ ಅನುಭೋಮಿ, ಕಮ್ಮಾನುಚ್ಛವಿಕೇ ಮಮ.
‘‘ಆಯುವಾ ಬಲವಾ ಧೀರೋ, ವಣ್ಣವಾ ಯಸವಾ ಸುಖೀ;
ಅನುಪದ್ದವೋ ಅನೀತಿ ಚ, ಹೋಮಿ ಅಪಚಿತೋ ಸದಾ;
ನ ಮೇ ಪಿಯವಿಯೋಗತ್ಥಿ, ತಸ್ಸ ನಿಸ್ಸನ್ದತೋ ಮಮ.
(೧೯. ಉಪಾಹನಾನಿಸಂಸೋ)
‘‘ಉಪಾಹನೇ ಜಿನೇ ದತ್ವಾ, ಸಙ್ಘೇ ಗಣವರುತ್ತಮೇ;
ತೀಣಾನಿಸಂಸೇ ಅನುಭೋಮಿ, ಕಮ್ಮಾನುಚ್ಛವಿಕೇ ಮಮ.
‘‘ಹತ್ಥಿಯಾನಂ ಅಸ್ಸಯಾನಂ, ಸಿವಿಕಾ ಸನ್ದಮಾನಿಕಾ;
ಸಟ್ಠಿಸತಸಹಸ್ಸಾನಿ, ಪರಿವಾರೇನ್ತಿ ಮಂ ಸದಾ.
‘‘ಮಣಿಮಯಾ ತಮ್ಬಮಯಾ [ಕಮ್ಬಲಿಕಾ (ಸೀ. ಕ.)], ಸೋಣ್ಣರಜತಪಾದುಕಾ;
ನಿಬ್ಬತ್ತನ್ತಿ ಪದುದ್ಧಾರೇ, ಭವೇ ಸಂಸರತೋ ಮಮ.
‘‘ನಿಯಾಮಂ ¶ ಸತಿ ಧಾವನ್ತಿ [ನಿಯಮಂ ಪಟಿಧಾವನ್ತೀ (ಸೀ.), ನಿಯಾಮಂ ಪಟಿಧಾವನ್ತಿ (ಸ್ಯಾ.)], ಆಗುಆಚಾರಸೋಧನಂ [ಆಚಾರಗುಣಸೋಧನಂ (ಸೀ. ಸ್ಯಾ.)];
ಇಮೇ ಗುಣೇ ಪಟಿಲಭೇ, ತಸ್ಸ ನಿಸ್ಸನ್ದತೋ ಅಹಂ.
(೨೦. ಪಾದುಕಾನಿಸಂಸೋ)
‘‘ಪಾದುಕೇ ಸುಗತೇ ದತ್ವಾ, ಸಙ್ಘೇ ಗಣವರುತ್ತಮೇ;
ಇದ್ಧಿಪಾದುಕಮಾರುಯ್ಹ, ವಿಹರಾಮಿ ಯದಿಚ್ಛಕಂ.
(೨೧. ಉದಕಪುಞ್ಛನಾನಿಸಂಸೋ)
‘‘ಉದಕಪುಚ್ಛನಚೋಳೇ ¶ , ದತ್ವಾ ಬುದ್ಧೇ ಗಣುತ್ತಮೇ;
ಪಞ್ಚಾನಿಸಂಸೇ ¶ ಅನುಭೋಮಿ, ಕಮ್ಮಾನುಚ್ಛವಿಕೇ ಮಮ.
‘‘ಸುವಣ್ಣವಣ್ಣೋ ವಿರಜೋ, ಸಪ್ಪಭಾಸೋ ಪತಾಪವಾ;
ಸಿನಿದ್ಧಂ ಹೋತಿ ಮೇ ಗತ್ತಂ, ರಜೋಜಲ್ಲಂ ನ ಲಿಮ್ಪತಿ;
ಇಮೇ ಗುಣೇ ಪಟಿಲಭೇ, ತಸ್ಸ ನಿಸ್ಸನ್ದತೋ ಅಹಂ.
(೨೨. ಕತ್ತರದಣ್ಡಾನಿಸಂಸೋ)
‘‘ಕತ್ತರದಣ್ಡೇ ಸುಗತೇ, ದತ್ವಾ ಸಙ್ಘೇ ಗಣುತ್ತಮೇ;
ಛಾನಿಸಂಸೇ ಅನುಭೋಮಿ, ಕಮ್ಮಾನುಚ್ಛವಿಕೇ ಮಮ.
‘‘ಪುತ್ತಾ ¶ ಮಯ್ಹಂ ಬಹೂ ಹೋನ್ತಿ, ತಾಸೋ ಮಯ್ಹಂ ನ ವಿಜ್ಜತಿ;
ಅಪ್ಪಸಯ್ಹೋ ಸದಾ ಹೋಮಿ, ಸಬ್ಬಾರಕ್ಖೇಹಿ ರಕ್ಖಿತೋ;
ಖಲಿತಮ್ಪಿ [ಖಲಿತಂ ಮಂ (ಸೀ. ಕ.)] ನ ಜಾನಾಮಿ, ಅಭನ್ತಂ ಮಾನಸಂ ಮಮ.
(೨೩. ಓಸಧಞ್ಜನಾನಿಸಂಸೋ)
‘‘ಓಸಧಂ ಅಞ್ಜನಂ ದತ್ವಾ, ಬುದ್ಧೇ ಸಙ್ಘೇ ಗಣುತ್ತಮೇ;
ಅಟ್ಠಾನಿಸಂಸೇ ಅನುಭೋಮಿ, ಕಮ್ಮಾನುಚ್ಛವಿಕೇ ಮಮ.
‘‘ವಿಸಾಲನಯನೋ ಹೋಮಿ, ಸೇತಪೀತೋ ಚ ಲೋಹಿತೋ;
ಅನಾವಿಲಪಸನ್ನಕ್ಖೋ, ಸಬ್ಬರೋಗವಿವಜ್ಜಿತೋ.
‘‘ಲಭಾಮಿ ದಿಬ್ಬನಯನಂ, ಪಞ್ಞಾಚಕ್ಖುಂ ಅನುತ್ತರಂ;
ಇಮೇ ಗುಣೇ ಪಟಿಲಭೇ, ತಸ್ಸ ನಿಸ್ಸನ್ದತೋ ಅಹಂ.
(೨೪. ಕುಞ್ಚಿಕಾನಿಸಂಸೋ)
‘‘ಕುಞ್ಚಿಕೇ ಸುಗತೇ ದತ್ವಾ, ಸಙ್ಘೇ ಗಣವರುತ್ತಮೇ;
ಧಮ್ಮದ್ವಾರವಿವರಣಂ, ಲಭಾಮಿ ಞಾಣಕುಞ್ಚಿಕಂ.
(೨೫. ಕುಞ್ಚಿಕಾಘರಾನಿಸಂಸೋ)
‘‘ಕುಞ್ಚಿಕಾನಂ ಘರೇ ದತ್ವಾ, ಬುದ್ಧೇ ಸಙ್ಘೇ ಗಣುತ್ತಮೇ;
ದ್ವಾನಿಸಂಸೇ ಅನುಭೋಮಿ, ಕಮ್ಮಾನುಚ್ಛವಿಕೇ ಮಮ;
ಅಪ್ಪಕೋಧೋ ¶ ಅನಾಯಾಸೋ, ಸಂಸರನ್ತೋ ಭವೇ ಅಹಂ.
(೨೬. ಆಯೋಗಾನಿಸಂಸೋ)
‘‘ಆಯೋಗೇ ¶ ಸುಗತೇ ದತ್ವಾ, ಸಙ್ಘೇ ಗಣವರುತ್ತಮೇ;
ಪಞ್ಚಾನಿಸಂಸೇ ಅನುಭೋಮಿ, ಕಮ್ಮಾನುಚ್ಛವಿಕೇ ಮಮ.
‘‘ಸಮಾಧೀಸು ನ ಕಮ್ಪಾಮಿ, ವಸೀ ಹೋಮಿ ಸಮಾಧಿಸು;
ಅಭೇಜ್ಜಪರಿಸೋ ಹೋಮಿ, ಆದೇಯ್ಯವಚನೋ ಸದಾ;
ಜಾಯತಿ ಭೋಗಸಮ್ಪತ್ತಿ, ಭವೇ ಸಂಸರತೋ ಮಮ.
(೨೭. ಧೂಮನೇತ್ತಾನಿಸಂಸೋ)
‘‘ಧೂಮನೇತ್ತೇ ಜಿನೇ ದತ್ವಾ, ಸಙ್ಘೇ ಗಣವರುತ್ತಮೇ;
ತೀಣಾನಿಸಂಸೇ ಅನುಭೋಮಿ, ಕಮ್ಮಾನುಚ್ಛವಿಕೇ ಮಮ.
‘‘ಸತಿ ¶ ಮೇ ಉಜುಕಾ ಹೋತಿ, ಸುಸಮ್ಬನ್ಧಾ ಚ ನ್ಹಾರವೋ;
ಲಭಾಮಿ ದಿಬ್ಬನಯನಂ [ದಿಬ್ಬಸಯನಂ (ಸ್ಯಾ.)], ತಸ್ಸ ನಿಸ್ಸನ್ದತೋ ಅಹಂ.
(೨೮. ದೀಪಧಾರಾನಿಸಂಸೋ)
‘‘ದೀಪಧಾರೇ ¶ [ದೀಪಟ್ಠಾನೇ (ಸೀ.), ದೀಪದಾನೇ (ಸ್ಯಾ.), ದೀಪಟ್ಠಾಪೇ (ಕ.)] ಜಿನೇ ದತ್ವಾ, ಸಙ್ಘೇ ಗಣವರುತ್ತಮೇ;
ತೀಣಾನಿಸಂಸೇ ಅನುಭೋಮಿ, ಕಮ್ಮಾನುಚ್ಛವಿಕೇ ಮಮ.
‘‘ಜಾತಿಮಾ ಅಙ್ಗಸಮ್ಪನ್ನೋ, ಪಞ್ಞವಾ ಬುದ್ಧಸಮ್ಮತೋ [ಬುದ್ಧಿಸಮ್ಮತೋ (ಸೀ. ಕ.)];
ಇಮೇ ಗುಣೇ ಪಟಿಲಭೇ, ತಸ್ಸ ನಿಸ್ಸನ್ದತೋ ಅಹಂ.
(೨೯. ತುಮ್ಬಕ-ಕರಣ್ಡೋ)
‘‘ತುಮ್ಬಕೇ ಚ ಕರಣ್ಡೇ ಚ, ದತ್ವಾ ಬುದ್ಧೇ ಗಣುತ್ತಮೇ;
ದಸಾನಿಸಂಸೇ ಅನುಭೋಮಿ, ಕಮ್ಮಾನುಚ್ಛವಿಕೇ ಮಮ.
‘‘ಸುಗುತ್ತೋ [ಸದಾಗುತ್ತೋ (ಸೀ. ಸ್ಯಾ.) ಸಂಗುತ್ತೋ (ಕ.)] ಸುಖಸಮಙ್ಗೀ, ಮಹಾಯಸೋ ತಥಾಗತಿ;
ವಿಪತ್ತಿವಿಗತೋ [ವಿಭತ್ತಿಗತ್ತೋ (ಸ್ಯಾ.)] ಸುಖುಮಾಲೋ, ಸಬ್ಬೀತಿಪರಿವಜ್ಜಿತೋ.
‘‘ವಿಪುಲೇ ಚ ಗುಣೇ ಲಾಭೀ, ಸಮಾವ ಚಲನಾ ಮಮ;
ಸುವಿವಜ್ಜಿತಉಬ್ಬೇಗೋ, ತುಮ್ಬಕೇ ಚ ಕರಣ್ಡಕೇ.
‘‘ಲಭಾಮಿ ¶ ಚತುರೋ ವಣ್ಣೇ, ಹತ್ಥಿಸ್ಸರತನಾನಿ ಚ;
ತಾನಿ ಮೇ ನ ವಿನಸ್ಸನ್ತಿ, ತುಮ್ಬದಾನೇ ಇದಂ ಫಲಂ.
(೩೦. ಮಲಹರಣಾನಿಸಂಸೋ)
‘‘ಮಲಹರಣಿಯೋ ¶ [ಅಞ್ಜನನಾಳಿಯೋ (ಸೀ.), ಹತ್ಥಲಿಲಙ್ಗಕೇ (ಸ್ಯಾ. ಪೀ.), ಹತ್ಥಲಿಲಙ್ಗತೇ (ಕ.)] ದತ್ವಾ, ಬುದ್ಧೇ ಸಙ್ಘೇ ಗಣುತ್ತಮೇ;
ಪಞ್ಚಾನಿಸಂಸೇ ಅನುಭೋಮಿ, ಕಮ್ಮಾನುಚ್ಛವಿಕೇ ಮಮ.
‘‘ಸಬ್ಬಲಕ್ಖಣಸಮ್ಪನ್ನೋ, ಆಯುಪಞ್ಞಾಸಮಾಹಿತೋ;
ಸಬ್ಬಾಯಾಸವಿನಿಮುತ್ತೋ, ಕಾಯೋ ಮೇ ಹೋತಿ ಸಬ್ಬದಾ.
(೩೧. ಪಿಪ್ಫಲಾನಿಸಂಸೋ)
‘‘ತಣುಧಾರೇ ಸುನಿಸಿತೇ, ಸಙ್ಘೇ ದತ್ವಾನ ಪಿಪ್ಫಲೇ;
ಕಿಲೇಸಕನ್ತನಂ ಞಾಣಂ, ಲಭಾಮಿ ಅತುಲಂ ಸುಚಿಂ.
(೩೨. ಭಣ್ಡಾಸಾನಿಸಂಸೋ)
‘‘ಸಣ್ಡಾಸೇ ಸುಗತೇ ದತ್ವಾ, ಸಙ್ಘೇ ಗಣವರುತ್ತಮೇ;
ಕಿಲೇಸಭಞ್ಜನಂ [ಕಿಲೇಸಲುಞ್ಚನಂ (ಸೀ. ಸ್ಯಾ. ಪೀ.)] ಞಾಣಂ, ಲಭಾಮಿ ಅತುಲಂ ಸುಚಿಂ.
(೩೩. ನತ್ಥುಕಾನಿಸಂಸೋ)
‘‘ನತ್ಥುಕೇ [ಥವಿಕೇ (?) ಭೇಸಜ್ಜಥವಿಕೇತಿ ಹಿ ಪುಬ್ಬೇ ವುತ್ತಂ] ಸುಗತೇ ದತ್ವಾ, ಸಙ್ಘೇ ಗಣವರುತ್ತಮೇ;
ಅಟ್ಠಾನಿಸಂಸೇ ಅನುಭೋಮಿ, ಕಮ್ಮಾನುಚ್ಛವಿಕೇ ಮಮ.
‘‘ಸದ್ಧಂ ¶ ಸೀಲಂ ಹಿರಿಞ್ಚಾಪಿ, ಅಥ ಓತ್ತಪ್ಪಿಯಂ ಗುಣಂ;
ಸುತಂ ಚಾಗಞ್ಚ ಖನ್ತಿಞ್ಚ, ಪಞ್ಞಂ ಮೇ ಅಟ್ಠಮಂ ಗುಣಂ.
(೩೪. ಪೀಠಕಾನಿಸಂಸೋ)
‘‘ಪೀಠಕೇ ¶ ಸುಗತೇ ದತ್ವಾ, ಸಙ್ಘೇ ಗಣವರುತ್ತಮೇ;
ಪಞ್ಚಾನಿಸಂಸೇ ಅನುಭೋಮಿ, ಕಮ್ಮಾನುಚ್ಛವಿಕೇ ಮಮ.
‘‘ಉಚ್ಚೇ ಕುಲೇ ಪಜಾಯಾಮಿ, ಮಹಾಭೋಗೋ ಭವಾಮಹಂ;
ಸಬ್ಬೇ ಮಂ ಅಪಚಾಯನ್ತಿ, ಕಿತ್ತಿ ಅಬ್ಭುಗ್ಗತಾ ಮಮ.
‘‘ಕಪ್ಪಸತಸಹಸ್ಸಾನಿ, ಪಲ್ಲಙ್ಕಾ ಚತುರಸ್ಸಕಾ;
ಪರಿವಾರೇನ್ತಿ ಮಂ ನಿಚ್ಚಂ, ಸಂವಿಭಾಗರತೋ ಅಹಂ.
(೩೫. ಭಿಸಿಆನಿಸಂಸೋ)
‘‘ಭಿಸಿಯೋ ¶ ¶ ಸುಗತೇ ದತ್ವಾ, ಸಙ್ಘೇ ಗಣವರುತ್ತಮೇ;
ಛಾನಿಸಂಸೇ ಅನುಭೋಮಿ, ಕಮ್ಮಾನುಚ್ಛವಿಕೇ ಮಮ.
‘‘ಸಮಸುಗತ್ತೋಪಚಿತೋ, ಮುದುಕೋ ಚಾರುದಸ್ಸನೋ;
ಲಭಾಮಿ ಞಾಣಪರಿವಾರಂ, ಭಿಸಿದಾನಸ್ಸಿದಂ ಫಲಂ.
‘‘ತೂಲಿಕಾ ವಿಕತಿಕಾಯೋ, ಕಟ್ಟಿಸ್ಸಾ [ಕಟ್ಠಿಸ್ಸಾ (ಸೀ.), ಕುಟ್ಟಕಾ (ಕ.)] ಚಿತ್ತಕಾ ಬಹೂ;
ವರಪೋತ್ಥಕೇ ಕಮ್ಬಲೇ ಚ, ಲಭಾಮಿ ವಿವಿಧೇ ಅಹಂ.
‘‘ಪಾವಾರಿಕೇ ಚ ಮುದುಕೇ, ಮುದುಕಾಜಿನವೇಣಿಯೋ;
ಲಭಾಮಿ ವಿವಿಧತ್ಥಾರೇ [ವಿವಿಧಟ್ಠಾನೇ (ಸ್ಯಾ. ಕ.)], ಭಿಸಿದಾನಸ್ಸಿದಂ ಫಲಂ.
‘‘ಯತೋ ಸರಾಮಿ ಅತ್ತಾನಂ, ಯತೋ ಪತ್ತೋಸ್ಮಿ ವಿಞ್ಞುತಂ;
ಅತುಚ್ಛೋ ಝಾನಮಞ್ಚೋಮ್ಹಿ, ಭಿಸಿದಾನಸ್ಸಿದಂ ಫಲಂ.
(೩೬. ಬಿಬ್ಬೋಹನಾನಿಸಂಸೋ)
‘‘ಬಿಬ್ಬೋಹನೇ ಜಿನೇ ದತ್ವಾ, ಸಙ್ಘೇ ಗಣವರುತ್ತಮೇ;
ಛಾನಿಸಂಸೇ ಅನುಭೋಮಿ, ಕಮ್ಮಾನುಚ್ಛವಿಕೇ ಮಮ.
‘‘ಉಣ್ಣಿಕೇ ಪದುಮಕೇ ಚ, ಅಥೋ ಲೋಹಿತಚನ್ದನೇ;
ಬಿಬ್ಬೋಹನೇ ಉಪಾಧೇಮಿ, ಉತ್ತಮಙ್ಗಂ ಸದಾ ಮಮ.
‘‘ಅಟ್ಠಙ್ಗಿಕೇ ಮಗ್ಗವರೇ, ಸಾಮಞ್ಞೇ ಚತುರೋ ಫಲೇ;
ತೇಸು ಞಾಣಂ ಉಪ್ಪಾದೇತ್ವಾ [ಉಪನೇತ್ವಾ (ಸೀ.)], ವಿಹರೇ ನಿಚ್ಚಕಾಲಿಕಂ.
‘‘ದಾನೇ ¶ ದಮೇ ಸಂಯಮೇ ಚ, ಅಪ್ಪಮಞ್ಞಾಸು ರೂಪಿಸು;
ತೇಸು ಞಾಣಂ ಉಪ್ಪಾದೇತ್ವಾ [ಉಪನೇತ್ವಾ (ಸೀ.)], ವಿಹರೇ ಸಬ್ಬಕಾಲಿಕಂ.
‘‘ವತ್ತೇ ಗುಣೇ ಪಟಿಪತ್ತಿ, ಆಚಾರಕಿರಿಯಾಸು ಚ;
ತೇಸು ಞಾಣಂ ಉಪ್ಪಾದೇತ್ವಾ [ಞಾಣಂ ಉಪದಹಿತ್ವಾನ (ಸೀ.)], ವಿಹರೇ ಸಬ್ಬದಾ ಅಹಂ.
‘‘ಚಙ್ಕಮೇ ¶ ವಾ ಪಧಾನೇ ವಾ, ವೀರಿಯೇ ಬೋಧಿಪಕ್ಖಿಯೇ;
ತೇಸು ಞಾಣಂ ಉಪ್ಪಾದೇತ್ವಾ, ವಿಹರಾಮಿ ಯದಿಚ್ಛಕಂ.
‘‘ಸೀಲಂ ¶ ¶ ಸಮಾಧಿ ಪಞ್ಞಾ ಚ, ವಿಮುತ್ತಿ ಚ ಅನುತ್ತರಾ;
ತೇಸು ಞಾಣಂ ಉಪ್ಪಾದೇತ್ವಾ [ಞಾಣಂ ಉಪದಹಿತ್ವಾನ (ಸೀ.)], ವಿಹರಾಮಿ ಸುಖಂ ಅಹಂ.
(೩೭. ಫಲಪೀಠಾನಿಸಂಸೋ)
‘‘ಫಲಪೀಠೇ [ಪಲಾಲಪೀಟ್ಠೇ (ಸೀ.)] ಜಿನೇ ದತ್ವಾ, ಸಙ್ಘೇ ಗಣವರುತ್ತಮೇ;
ದ್ವಾನಿಸಂಸೇ ಅನುಭೋಮಿ, ಕಮ್ಮಾನುಚ್ಛವಿಕೇ ಮಮ.
‘‘ಸೋಣ್ಣಮಯೇ ಮಣಿಮಯೇ, ದನ್ತಸಾರಮಯೇ ಬಹೂ;
ಪಲ್ಲಙ್ಕಸೇಟ್ಠೇ ವಿನ್ದಾಮಿ, ಫಲಪೀಠಸ್ಸಿದಂ ಫಲಂ.
(೩೮. ಪಾದಪೀಠಾನಿಸಂಸೋ)
‘‘ಪಾದಪೀಠೇ ಜಿನೇ ದತ್ವಾ, ಸಙ್ಘೇ ಗಣವರುತ್ತಮೇ;
ದ್ವಾನಿಸಂಸೇ ಅನುಭೋಮಿ, ಕಮ್ಮಾನುಚ್ಛವಿಕೇ ಮಮ;
ಲಭಾಮಿ ಬಹುಕೇ ಯಾನೇ, ಪಾದಪೀಠಸ್ಸಿದಂ ಫಲಂ.
‘‘ದಾಸೀ ದಾಸಾ ಚ ಭರಿಯಾ, ಯೇ ಚಞ್ಞೇ ಅನುಜೀವಿನೋ;
ಸಮ್ಮಾ ಪರಿಚರನ್ತೇ ಮಂ, ಪಾದಪೀಠಸ್ಸಿದಂ ಫಲಂ.
(೩೯. ತೇಲಬ್ಭಞ್ಜನಾನಿಸಂಸೋ)
‘‘ತೇಲಅಬ್ಭಞ್ಜನೇ [ತೇಲಾನಬ್ಭಞ್ಜನೇ (ಸೀ.)] ದತ್ವಾ, ಸಙ್ಘೇ ಗಣವರುತ್ತಮೇ;
ಪಞ್ಚಾನಿಸಂಸೇ ಅನುಭೋಮಿ, ಕಮ್ಮಾನುಚ್ಛವಿಕೇ ಮಮ.
‘‘ಅಬ್ಯಾಧಿತಾ ರೂಪವತಾ, ಖಿಪ್ಪಂ ಧಮ್ಮನಿಸನ್ತಿತಾ;
ಲಾಭಿತಾ ಅನ್ನಪಾನಸ್ಸ, ಆಯುಪಞ್ಚಮಕಂ ಮಮ.
(೪೦. ಸಪ್ಪಿತೇಲಾನಿಸಂಸೋ)
‘‘ಸಪ್ಪಿತೇಲಞ್ಚ ದತ್ವಾನ, ಸಙ್ಘೇ ಗಣವರುತ್ತಮೇ;
ಪಞ್ಚಾನಿಸಂಸೇ ಅನುಭೋಮಿ, ಕಮ್ಮಾನುಚ್ಛವಿಕೇ ಮಮ.
‘‘ಥಾಮವಾ ರೂಪಸಮ್ಪನ್ನೋ, ಪಹಟ್ಠತನುಜೋ ಸದಾ;
ಅಬ್ಯಾಧಿ ¶ ವಿಸದೋ ಹೋಮಿ, ಸಪ್ಪಿತೇಲಸ್ಸಿದಂ ಫಲಂ.
(೪೧. ಮುಖಸೋಧನಕಾನಿಸಂಸೋ)
‘‘ಮುಖಸೋಧನಕಂ ¶ ¶ ದತ್ವಾ, ಬುದ್ಧೇ ಸಙ್ಘೇ ಗಣುತ್ತಮೇ;
ಪಞ್ಚಾನಿಸಂಸೇ ಅನುಭೋಮಿ, ಕಮ್ಮಾನುಚ್ಛವಿಕೇ ಮಮ.
‘‘ವಿಸುದ್ಧಕಣ್ಠೋ ಮಧುರಸ್ಸರೋ, ಕಾಸಸಾಸವಿವಜ್ಜಿತೋ;
ಉಪ್ಪಲಗನ್ಧೋ ಮುಖತೋ, ಉಪವಾಯತಿ ಮೇ ಸದಾ.
(೪೨. ದಧಿಆನಿಸಂಸೋ)
‘‘ದಧಿಂ ದತ್ವಾನ ಸಮ್ಪನ್ನಂ, ಬುದ್ಧೇ ಸಙ್ಘೇ ಗಣುತ್ತಮೇ;
ಭುಞ್ಜಾಮಿ ಅಮತಂ ಭತ್ತಂ [ವಿತ್ತಂ (ಸೀ. ಕ.)], ವರಂ ಕಾಯಗತಾಸತಿಂ.
(೪೩. ಮಧುಆನಿಸಂಸೋ)
‘‘ವಣ್ಣಗನ್ಧರಸೋಪೇತಂ, ಮಧುಂ ದತ್ವಾ ಜಿನೇ ಗಣೇ;
ಅನೂಪಮಂ ಅತುಲಿಯಂ, ಪಿವೇ ಮುತ್ತಿರಸಂ ಅಹಂ.
(೪೪.ರಸಾನಿಸಂಸೋ)
‘‘ಯಥಾಭೂತಂ ¶ ರಸಂ ದತ್ವಾ, ಬುದ್ಧೇ ಸಙ್ಘೇ ಗಣುತ್ತಮೇ;
ಚತುರೋ ಫಲೇ ಅನುಭೋಮಿ, ಕಮ್ಮಾನುಚ್ಛವಿಕೇ ಮಮ.
(೪೫. ಅನ್ನಪಾನಾನಿಸಂಸೋ)
‘‘ಅನ್ನಂ ಪಾನಞ್ಚ ದತ್ವಾನ, ಬುದ್ಧೇ ಸಙ್ಘೇ ಗಣುತ್ತಮೇ;
ದಸಾನಿಸಂಸೇ ಅನುಭೋಮಿ, ಕಮ್ಮಾನುಚ್ಛವಿಕೇ ಮಮ.
‘‘ಆಯುವಾ ಬಲವಾ ಧೀರೋ, ವಣ್ಣವಾ ಯಸವಾ ಸುಖೀ;
ಲಾಭೀ ಅನ್ನಸ್ಸ ಪಾನಸ್ಸ, ಸೂರೋ ಪಞ್ಞಾಣವಾ ಸದಾ;
ಇಮೇ ಗುಣೇ ಪಟಿಲಭೇ, ಸಂಸರನ್ತೋ ಭವೇ ಅಹಂ.
(೪೬. ಧೂಪಾನಿಸಂಸೋ)
‘‘ಧೂಪಂ [ಧೂಮಂ (ಸೀ. ಕ.)] ದತ್ವಾನ ಸುಗತೇ, ಸಙ್ಘೇ ಗಣವರುತ್ತಮೇ;
ದಸಾನಿಸಂಸೇ ಅನುಭೋಮಿ, ಕಮ್ಮಾನುಚ್ಛವಿಕೇ ಮಮ.
‘‘ಸುಗನ್ಧದೇಹೋ ಯಸವಾ, ಸೀಘಪಞ್ಞೋ ಚ ಕಿತ್ತಿಮಾ;
ತಿಕ್ಖಪಞ್ಞೋ ಭೂರಿಪಞ್ಞೋ, ಹಾಸಗಮ್ಭೀರಪಞ್ಞವಾ.
‘‘ವೇಪುಲ್ಲಜವನಪಞ್ಞೋ ¶ ¶ , ಸಂಸರನ್ತೋ ಭವಾಭವೇ;
ತಸ್ಸೇವ ವಾಹಸಾ ದಾನಿ, ಪತ್ತೋ ಸನ್ತಿಸುಖಂ ಸಿವಂ.
(ಸಾಧಾರಣಾನಿಸಂಸೋ)
‘‘ಕಿಲೇಸಾ ¶ ಝಾಪಿತಾ ಮಯ್ಹಂ, ಭವಾ ಸಬ್ಬೇ ಸಮೂಹತಾ;
ನಾಗೋವ ಬನ್ಧನಂ ಛೇತ್ವಾ, ವಿಹರಾಮಿ ಅನಾಸವೋ.
‘‘ಸ್ವಾಗತಂ ವತ ಮೇ ಆಸಿ, ಮಮ ಬುದ್ಧಸ್ಸ ಸನ್ತಿಕೇ [ಬುದ್ಧಸೇಟ್ಠಸ್ಸ ಸನ್ತಿಕೇ (?) ಏವಮುಪರಿಪಿ; ಏತದೇವ ಹಿ ಉಪಾಲಿತ್ಥೇರಾಪದಾನಟ್ಠಕಥಾಯಂ ವಣ್ಣಿತಂ];
ತಿಸ್ಸೋ ವಿಜ್ಜಾ ಅನುಪ್ಪತ್ತಾ, ಕತಂ ಬುದ್ಧಸ್ಸ ಸಾಸನಂ.
‘‘ಪಟಿಸಮ್ಭಿದಾ ಚತಸ್ಸೋ, ವಿಮೋಕ್ಖಾಪಿ ಚ ಅಟ್ಠಿಮೇ;
ಛಳಭಿಞ್ಞಾ ಸಚ್ಛಿಕತಾ, ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಪಿಲಿನ್ದವಚ್ಛೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಪಿಲಿನ್ದವಚ್ಛತ್ಥೇರಸ್ಸಾಪದಾನಂ ಪಠಮಂ.
೨. ಸೇಲತ್ಥೇರಅಪದಾನಂ
‘‘ನಗರೇ ಹಂಸವತಿಯಾ, ವೀಥಿಸಾಮೀ ಅಹೋಸಹಂ;
ಮಮ ಞಾತೀ ಸಮಾನೇತ್ವಾ, ಇದಂ ವಚನಮಬ್ರವಿಂ.
‘‘‘ಬುದ್ಧೋ ಲೋಕೇ ಸಮುಪ್ಪನ್ನೋ, ಪುಞ್ಞಕ್ಖೇತ್ತೋ ಅನುತ್ತರೋ [ಪುಞ್ಞಕ್ಖೇತ್ತಂ ಅನುತ್ತರಂ (ಸೀ.)];
ಆಸಿ ಸೋ [ಆಸೀಸೋ (ಸೀ.), ಆಧಾರೋ (ಪೀ.)] ಸಬ್ಬಲೋಕಸ್ಸ, ಆಹುತೀನಂ ಪಟಿಗ್ಗಹೋ.
‘‘‘ಖತ್ತಿಯಾ ನೇಗಮಾ ಚೇವ, ಮಹಾಸಾಲಾ ಚ ಬ್ರಾಹ್ಮಣಾ;
ಪಸನ್ನಚಿತ್ತಾ ಸುಮನಾ, ಪೂಗಧಮ್ಮಂ ಅಕಂಸು ತೇ.
‘‘‘ಹತ್ಥಾರೋಹಾ ¶ ಅನೀಕಟ್ಠಾ, ರಥಿಕಾ ಪತ್ತಿಕಾರಕಾ;
ಪಸನ್ನಚಿತ್ತಾ ಸುಮನಾ, ಪೂಗಧಮ್ಮಂ ಅಕಂಸು ತೇ.
‘‘‘ಉಗ್ಗಾ ¶ ಚ ರಾಜಪುತ್ತಾ ಚ, ವೇಸಿಯಾನಾ ಚ ಬ್ರಾಹ್ಮಣಾ;
ಪಸನ್ನಚಿತ್ತಾ ಸುಮನಾ, ಪೂಗಧಮ್ಮಂ ಅಕಂಸು ತೇ.
‘‘‘ಆಳಾರಿಕಾ ¶ ಕಪ್ಪಕಾ [ಆಳಾರಿಕಾ ಚ ಸೂದಾ (ಸ್ಯಾ.)] ಚ, ನ್ಹಾಪಕಾ ಮಾಲಕಾರಕಾ;
ಪಸನ್ನಚಿತ್ತಾ ಸುಮನಾ, ಪೂಗಧಮ್ಮಂ ಅಕಂಸು ತೇ.
‘‘‘ರಜಕಾ ಪೇಸಕಾರಾ ಚ, ಚಮ್ಮಕಾರಾ ಚ ನ್ಹಾಪಿತಾ;
ಪಸನ್ನಚಿತ್ತಾ ಸುಮನಾ, ಪೂಗಧಮ್ಮಂ ಅಕಂಸು ತೇ.
‘‘‘ಉಸುಕಾರಾ ಭಮಕಾರಾ, ಚಮ್ಮಕಾರಾ ಚ ತಚ್ಛಕಾ;
ಪಸನ್ನಚಿತ್ತಾ ಸುಮನಾ, ಪೂಗಧಮ್ಮಂ ಅಕಂಸು ತೇ.
‘‘‘ಕಮ್ಮಾರಾ ¶ ಸೋಣ್ಣಕಾರಾ ಚ, ತಿಪುಲೋಹಕರಾ ತಥಾ;
ಪಸನ್ನಚಿತ್ತಾ ಸುಮನಾ, ಪೂಗಧಮ್ಮಂ ಅಕಂಸು ತೇ.
‘‘‘ಭತಕಾ ಚೇಟಕಾ ಚೇವ, ದಾಸಕಮ್ಮಕರಾ ಬಹೂ;
ಯಥಾಸಕೇನ ಥಾಮೇನ, ಪೂಗಧಮ್ಮಂ ಅಕಂಸು ತೇ.
‘‘‘ಉದಹಾರಾ ಕಟ್ಠಹಾರಾ, ಕಸ್ಸಕಾ ತಿಣಹಾರಕಾ;
ಯಥಾಸಕೇನ ಥಾಮೇನ, ಪೂಗಧಮ್ಮಂ ಅಕಂಸು ತೇ.
‘‘‘ಪುಪ್ಫಿಕಾ ಮಾಲಿಕಾ ಚೇವ, ಪಣ್ಣಿಕಾ ಫಲಹಾರಕಾ;
ಯಥಾಸಕೇನ ಥಾಮೇನ, ಪೂಗಧಮ್ಮಂ ಅಕಂಸು ತೇ.
‘‘‘ಗಣಿಕಾ ಕುಮ್ಭದಾಸೀ ಚ, ಪೂವಿಕಾ [ಸೂಪಿಕಾ (ಕ.)] ಮಚ್ಛಿಕಾಪಿ ಚ;
ಯಥಾಸಕೇನ ಥಾಮೇನ, ಪೂಗಧಮ್ಮಂ ಅಕಂಸು ತೇ.
‘‘‘ಏಥ ¶ ಸಬ್ಬೇ ಸಮಾಗನ್ತ್ವಾ, ಗಣಂ ಬನ್ಧಾಮ ಏಕತೋ;
ಅಧಿಕಾರಂ ಕರಿಸ್ಸಾಮ, ಪುಞ್ಞಕ್ಖೇತ್ತೇ ಅನುತ್ತರೇ’.
‘‘ತೇ ಮೇ ಸುತ್ವಾನ ವಚನಂ, ಗಣಂ ಬನ್ಧಿಂಸು ತಾವದೇ;
ಉಪಟ್ಠಾನಸಾಲಂ ಸುಕತಂ, ಭಿಕ್ಖುಸಙ್ಘಸ್ಸ ಕಾರಯುಂ.
‘‘ನಿಟ್ಠಾಪೇತ್ವಾನ ತಂ ಸಾಲಂ, ಉದಗ್ಗೋ ತುಟ್ಠಮಾನಸೋ;
ಪರೇತೋ ತೇಹಿ ಸಬ್ಬೇಹಿ, ಸಮ್ಬುದ್ಧಮುಪಸಙ್ಕಮಿಂ.
‘‘ಉಪಸಙ್ಕಮ್ಮ ಸಮ್ಬುದ್ಧಂ, ಲೋಕನಾಥಂ ನರಾಸಭಂ;
ವನ್ದಿತ್ವಾ ಸತ್ಥುನೋ ಪಾದೇ, ಇದಂ ವಚನಮಬ್ರವಿಂ.
‘‘‘ಇಮೇ ತೀಣಿ ಸತಾ ವೀರ, ಪುರಿಸಾ ಏಕತೋ ಗಣಾ;
ಉಪಟ್ಠಾನಸಾಲಂ ಸುಕತಂ, ನಿಯ್ಯಾದೇನ್ತಿ [ನಿಯ್ಯಾತೇನ್ತಿ (ಸೀ.)] ತುವಂ [ತವಂ (ಸೀ.), ತವ (ಸ್ಯಾ.)] ಮುನಿ’.
‘‘ಭಿಕ್ಖುಸಙ್ಘಸ್ಸ ¶ ಪುರತೋ, ಸಮ್ಪಟಿಚ್ಛತ್ವ ಚಕ್ಖುಮಾ;
ತಿಣ್ಣಂ ಸತಾನಂ ಪುರತೋ, ಇಮಾ ಗಾಥಾ ಅಭಾಸಥ.
‘‘‘ತಿಸತಾಪಿ ಚ ಜೇಟ್ಠೋ ಚ, ಅನುವತ್ತಿಂಸು ಏಕತೋ;
ಸಮ್ಪತ್ತಿಞ್ಹಿ [ಸಮ್ಪತ್ತೀಹಿ (ಸ್ಯಾ. ಕ.)] ಕರಿತ್ವಾನ, ಸಬ್ಬೇ ಅನುಭವಿಸ್ಸಥ.
‘‘‘ಪಚ್ಛಿಮೇ ¶ ಭವೇ ಸಮ್ಪತ್ತೇ, ಸೀತಿಭಾವಮನುತ್ತರಂ;
ಅಜರಂ ಅಮತಂ ಸನ್ತಂ, ನಿಬ್ಬಾನಂ ಫಸ್ಸಯಿಸ್ಸಥ’.
‘‘ಏವಂ ಬುದ್ಧೋ ವಿಯಾಕಾಸಿ, ಸಬ್ಬಞ್ಞೂ ಸಮಣುತ್ತರೋ;
ಬುದ್ಧಸ್ಸ ವಚನಂ ಸುತ್ವಾ, ಸೋಮನಸ್ಸಂ ಪವೇದಯಿಂ.
‘‘ತಿಂಸ ¶ ಕಪ್ಪಸಹಸ್ಸಾನಿ, ದೇವಲೋಕೇ ರಮಿಂ ಅಹಂ;
ದೇವಾಧಿಪೋ ಪಞ್ಚಸತಂ, ದೇವರಜ್ಜಮಕಾರಯಿಂ.
‘‘ಸಹಸ್ಸಕ್ಖತ್ತುಂ ¶ ರಾಜಾ ಚ, ಚಕ್ಕವತ್ತೀ ಅಹೋಸಹಂ;
ದೇವರಜ್ಜಂ ಕರೋನ್ತಸ್ಸ, ಮಹಾದೇವಾ ಅವನ್ದಿಸುಂ.
‘‘ಇಧ ಮಾನುಸಕೇ ರಜ್ಜಂ [ರಜ್ಜೇ (ಸೀ.)], ಪರಿಸಾ ಹೋನ್ತಿ ಬನ್ಧವಾ;
ಪಚ್ಛಿಮೇ ಭವೇ ಸಮ್ಪತ್ತೇ, ವಾಸೇಟ್ಠೋ ನಾಮ ಬ್ರಾಹ್ಮಣೋ.
‘‘ಅಸೀತಿಕೋಟಿ ನಿಚಯೋ, ತಸ್ಸ ಪುತ್ತೋ ಅಹೋಸಹಂ;
ಸೇಲೋ ಇತಿ ಮಮ ನಾಮಂ, ಛಳಙ್ಗೇ ಪಾರಮಿಂ ಗತೋ.
‘‘ಜಙ್ಘಾವಿಹಾರಂ ವಿಚರಂ, ಸಸಿಸ್ಸೇಹಿ ಪುರಕ್ಖತೋ;
ಜಟಾಭಾರಿಕಭರಿತಂ, ಕೇಣಿಯಂ ನಾಮ ತಾಪಸಂ.
‘‘ಪಟಿಯತ್ತಾಹುತಿಂ ದಿಸ್ವಾ, ಇದಂ ವಚನಮಬ್ರವಿಂ;
‘ಆವಾಹೋ ವಾ ವಿವಾಹೋ ವಾ, ರಾಜಾ ವಾ ತೇ ನಿಮನ್ತಿತೋ’.
‘‘ಆಹುತಿಂ [ನಾಹುತಿಂ (?)] ಯಿಟ್ಠುಕಾಮೋಹಂ, ಬ್ರಾಹ್ಮಣೇ ದೇವಸಮ್ಮತೇ;
ನ ನಿಮನ್ತೇಮಿ ರಾಜಾನಂ, ಆಹುತೀ ಮೇ ನ ವಿಜ್ಜತಿ.
‘‘ನ ಚತ್ಥಿ ಮಯ್ಹಮಾವಾಹೋ, ವಿವಾಹೋ ಮೇ ನ ವಿಜ್ಜತಿ;
ಸಕ್ಯಾನಂ ನನ್ದಿಜನನೋ, ಸೇಟ್ಠೋ ಲೋಕೇ ಸದೇವಕೇ.
‘‘ಸಬ್ಬಲೋಕಹಿತತ್ಥಾಯ, ಸಬ್ಬಸತ್ತಸುಖಾವಹೋ;
ಸೋ ಮೇ ನಿಮನ್ತಿತೋ ಅಜ್ಜ, ತಸ್ಸೇತಂ ಪಟಿಯಾದನಂ.
‘‘ತಿಮ್ಬರೂಸಕವಣ್ಣಾಭೋ ¶ , ಅಪ್ಪಮೇಯ್ಯೋ ಅನೂಪಮೋ;
ರೂಪೇನಾಸದಿಸೋ ಬುದ್ಧೋ, ಸ್ವಾತನಾಯ ನಿಮನ್ತಿತೋ.
‘‘ಉಕ್ಕಾಮುಖಪಹಟ್ಠೋವ, ಖದಿರಙ್ಗಾರಸನ್ನಿಭೋ;
ವಿಜ್ಜೂಪಮೋ ಮಹಾವೀರೋ, ಸೋ ಮೇ ಬುದ್ಧೋ ನಿಮನ್ತಿತೋ.
‘‘ಪಬ್ಬತಗ್ಗೇ ¶ ಯಥಾ ಅಚ್ಚಿ, ಪುಣ್ಣಮಾಯೇವ ಚನ್ದಿಮಾ;
ನಳಗ್ಗಿವಣ್ಣಸಙ್ಕಾಸೋ, ಸೋ ಮೇ ಬುದ್ಧೋ ನಿಮನ್ತಿತೋ.
‘‘ಅಸಮ್ಭೀತೋ ಭಯಾತೀತೋ, ಭವನ್ತಕರಣೋ ಮುನಿ;
ಸೀಹೂಪಮೋ ಮಹಾವೀರೋ, ಸೋ ಮೇ ಬುದ್ಧೋ ನಿಮನ್ತಿತೋ.
‘‘ಕುಸಲೋ ¶ ಬುದ್ಧಧಮ್ಮೇಹಿ, ಅಪಸಯ್ಹೋ ಪರೇಹಿ ಸೋ;
ನಾಗೂಪಮೋ ಮಹಾವೀರೋ, ಸೋ ಮೇ ಬುದ್ಧೋ ನಿಮನ್ತಿತೋ.
‘‘ಸದ್ಧಮ್ಮಾಚಾರಕುಸಲೋ ¶ , ಬುದ್ಧನಾಗೋ ಅಸಾದಿಸೋ;
ಉಸಭೂಪಮೋ ಮಹಾವೀರೋ, ಸೋ ಮೇ ಬುದ್ಧೋ ನಿಮನ್ತಿತೋ.
‘‘ಅನನ್ತವಣ್ಣೋ ಅಮಿತಯಸೋ, ವಿಚಿತ್ತಸಬ್ಬಲಕ್ಖಣೋ;
ಸಕ್ಕೂಪಮೋ ಮಹಾವೀರೋ, ಸೋ ಮೇ ಬುದ್ಧೋ ನಿಮನ್ತಿತೋ.
‘‘ವಸೀ ಗಣೀ ಪತಾಪೀ ಚ, ತೇಜಸ್ಸೀ ಚ ದುರಾಸದೋ;
ಬ್ರಹ್ಮೂಪಮೋ ಮಹಾವೀರೋ, ಸೋ ಮೇ ಬುದ್ಧೋ ನಿಮನ್ತಿತೋ.
‘‘ಪತ್ತಧಮ್ಮೋ ದಸಬಲೋ, ಬಲಾತಿಬಲಪಾರಗೋ;
ಧರಣೂಪಮೋ ಮಹಾವೀರೋ, ಸೋ ಮೇ ಬುದ್ಧೋ ನಿಮನ್ತಿತೋ.
‘‘ಸೀಲವೀಚಿಸಮಾಕಿಣ್ಣೋ, ಧಮ್ಮವಿಞ್ಞಾಣಖೋಭಿತೋ;
ಉದಧೂಪಮೋ ಮಹಾವೀರೋ, ಸೋ ಮೇ ಬುದ್ಧೋ ನಿಮನ್ತಿತೋ.
‘‘ದುರಾಸದೋ ದುಪ್ಪಸಹೋ, ಅಚಲೋ ಉಗ್ಗತೋ ಬ್ರಹಾ;
ನೇರೂಪಮೋ ಮಹಾವೀರೋ, ಸೋ ಮೇ ಬುದ್ಧೋ ನಿಮನ್ತಿತೋ.
‘‘ಅನನ್ತಞಾಣೋ ಅಸಮಸಮೋ, ಅತುಲೋ ಅಗ್ಗತಂ ಗತೋ;
ಗಗನೂಪಮೋ ಮಹಾವೀರೋ, ಸೋ ಮೇ ಬುದ್ಧೋ ನಿಮನ್ತಿತೋ.
ಪನ್ನರಸಮಂ ಭಾಣವಾರಂ.
‘‘ಪತಿಟ್ಠಾ ¶ ಭಯಭೀತಾನಂ, ತಾಣೋ ಸರಣಗಾಮಿನಂ;
ಅಸ್ಸಾಸಕೋ ಮಹಾವೀರೋ, ಸೋ ಮೇ ಬುದ್ಧೋ ನಿಮನ್ತಿತೋ.
‘‘ಆಸಯೋ ¶ ಬುದ್ಧಿಮನ್ತಾನಂ, ಪುಞ್ಞಕ್ಖೇತ್ತಂ ಸುಖೇಸಿನಂ;
ರತನಾಕರೋ ಮಹಾವೀರೋ, ಸೋ ಮೇ ಬುದ್ಧೋ ನಿಮನ್ತಿತೋ.
‘‘ಅಸ್ಸಾಸಕೋ ವೇದಕರೋ, ಸಾಮಞ್ಞಫಲದಾಯಕೋ;
ಮೇಘೂಪಮೋ ಮಹಾವೀರೋ, ಸೋ ಮೇ ಬುದ್ಧೋ ನಿಮನ್ತಿತೋ.
‘‘ಲೋಕಚಕ್ಖು ಮಹಾತೇಜೋ, ಸಬ್ಬತಮವಿನೋದನೋ;
ಸೂರಿಯೂಪಮೋ ಮಹಾವೀರೋ, ಸೋ ಮೇ ಬುದ್ಧೋ ನಿಮನ್ತಿತೋ.
‘‘ಆರಮ್ಮಣವಿಮುತ್ತೀಸು, ಸಭಾವದಸ್ಸನೋ ಮುನಿ;
ಚನ್ದೂಪಮೋ ಮಹಾವೀರೋ, ಸೋ ಮೇ ಬುದ್ಧೋ ನಿಮನ್ತಿತೋ.
‘‘ಬುದ್ಧೋ ಸಮುಸ್ಸಿತೋ ಲೋಕೇ, ಲಕ್ಖಣೇಹಿ ಅಲಙ್ಕತೋ;
ಅಪ್ಪಮೇಯ್ಯೋ ಮಹಾವೀರೋ, ಸೋ ಮೇ ಬುದ್ಧೋ ನಿಮನ್ತಿತೋ.
‘‘ಯಸ್ಸ ಞಾಣಂ ಅಪ್ಪಮೇಯ್ಯಂ, ಸೀಲಂ ಯಸ್ಸ ಅನೂಪಮಂ;
ವಿಮುತ್ತಿ ಅಸದಿಸಾ ಯಸ್ಸ, ಸೋ ಮೇ ಬುದ್ಧೋ ನಿಮನ್ತಿತೋ.
‘‘ಯಸ್ಸ ಧೀತಿ ಅಸದಿಸಾ, ಥಾಮೋ ಯಸ್ಸ ಅಚಿನ್ತಿಯೋ;
ಯಸ್ಸ ಪರಕ್ಕಮೋ ಜೇಟ್ಠೋ, ಸೋ ಮೇ ಬುದ್ಧೋ ನಿಮನ್ತಿತೋ.
‘‘ರಾಗೋ ¶ ದೋಸೋ ಚ ಮೋಹೋ ಚ, ವಿಸಾ ಸಬ್ಬೇ ಸಮೂಹತಾ;
ಅಗದೂಪಮೋ ಮಹಾವೀರೋ, ಸೋ ಮೇ ಬುದ್ಧೋ ನಿಮನ್ತಿತೋ.
‘‘ಕ್ಲೇಸಬ್ಯಾಧಿಬಹುದುಕ್ಖ ¶ ಸಬ್ಬತಮವಿನೋದನೋ [ವಿನೋದಕೋ (ಸೀ. ಸ್ಯಾ.)];
ವೇಜ್ಜೂಪಮೋ ಮಹಾವೀರೋ, ಸೋ ಮೇ ಬುದ್ಧೋ ನಿಮನ್ತಿತೋ.
‘‘ಬುದ್ಧೋತಿ ¶ ಭೋ ಯಂ ವದೇಸಿ, ಘೋಸೋಪೇಸೋ ಸುದುಲ್ಲಭೋ;
ಬುದ್ಧೋ ಬುದ್ಧೋತಿ ಸುತ್ವಾನ, ಪೀತಿ ಮೇ ಉದಪಜ್ಜಥ.
‘‘ಅಬ್ಭನ್ತರಂ ಅಗಣ್ಹನ್ತಂ, ಪೀತಿ ಮೇ ಬಹಿ ನಿಚ್ಛರೇ;
ಸೋಹಂ ಪೀತಿಮನೋ ಸನ್ತೋ, ಇದಂ ವಚನಮಬ್ರವಿಂ.
‘‘‘ಕಹಂ ನು ಖೋ ಸೋ ಭಗವಾ, ಲೋಕಜೇಟ್ಠೋ ನರಾಸಭೋ;
ತತ್ಥ ಗನ್ತ್ವಾ ನಮಸ್ಸಿಸ್ಸಂ, ಸಾಮಞ್ಞಫಲದಾಯಕಂ’.
‘‘‘ಪಗ್ಗಯ್ಹ ದಕ್ಖಿಣಂ ಬಾಹುಂ, ವೇದಜಾತೋ ಕತಞ್ಜಲೀ;
ಆಚಿಕ್ಖಿ ಮೇ ಧಮ್ಮರಾಜಂ, ಸೋಕಸಲ್ಲವಿನೋದನಂ.
‘‘‘ಉದೇನ್ತಂವ ¶ ಮಹಾಮೇಘಂ, ನೀಲಂ ಅಞ್ಜನಸನ್ನಿಭಂ;
ಸಾಗರಂ ವಿಯ ದಿಸ್ಸನ್ತಂ, ಪಸ್ಸಸೇತಂ ಮಹಾವನಂ.
‘‘‘ಏತ್ಥ ಸೋ ವಸತೇ ಬುದ್ಧೋ, ಅದನ್ತದಮಕೋ ಮುನಿ;
ವಿನಯನ್ತೋ ಚ ವೇನೇಯ್ಯೇ, ಬೋಧೇನ್ತೋ ಬೋಧಿಪಕ್ಖಿಯೇ.
‘‘‘ಪಿಪಾಸಿತೋವ ಉದಕಂ, ಭೋಜನಂವ ಜಿಘಚ್ಛಿತೋ;
ಗಾವೀ ಯಥಾ ವಚ್ಛಗಿದ್ಧಾ, ಏವಾಹಂ ವಿಚಿನಿಂ ಜಿನಂ.
‘‘‘ಆಚಾರಉಪಚಾರಞ್ಞೂ, ಧಮ್ಮಾನುಚ್ಛವಿಸಂವರಂ;
ಸಿಕ್ಖಾಪೇಮಿ ಸಕೇ ಸಿಸ್ಸೇ, ಗಚ್ಛನ್ತೇ ಜಿನಸನ್ತಿಕಂ.
‘‘‘ದುರಾಸದಾ ಭಗವನ್ತೋ, ಸೀಹಾವ ಏಕಚಾರಿನೋ;
ಪದೇ ಪದಂ ನಿಕ್ಖಿಪನ್ತಾ, ಆಗಚ್ಛೇಯ್ಯಾಥ ಮಾಣವಾ.
‘‘‘ಆಸೀವಿಸೋ ಯಥಾ ಘೋರೋ, ಮಿಗರಾಜಾವ ಕೇಸರೀ;
ಮತ್ತೋವ ಕುಞ್ಜರೋ ದನ್ತೀ, ಏವಂ ಬುದ್ಧಾ ದುರಾಸದಾ.
‘‘‘ಉಕ್ಕಾಸಿತಞ್ಚ ¶ ಖಿಪಿತಂ, ಅಜ್ಝುಪೇಕ್ಖಿಯ ಮಾಣವಾ;
ಪದೇ ಪದಂ ನಿಕ್ಖಿಪನ್ತಾ, ಉಪೇಥ ಬುದ್ಧಸನ್ತಿಕಂ.
‘‘‘ಪಟಿಸಲ್ಲಾನಗರುಕಾ, ಅಪ್ಪಸದ್ದಾ ದುರಾಸದಾ;
ದುರೂಪಸಙ್ಕಮಾ ಬುದ್ಧಾ, ಗರೂ ಹೋನ್ತಿ ಸದೇವಕೇ.
‘‘‘ಯದಾಹಂ ¶ ಪಞ್ಹಂ ಪುಚ್ಛಾಮಿ, ಪಟಿಸಮ್ಮೋದಯಾಮಿ ವಾ;
ಅಪ್ಪಸದ್ದಾ ತದಾ ಹೋಥ, ಮುನಿಭೂತಾವ ತಿಟ್ಠಥ.
‘‘‘ಯಂ ¶ ಸೋ ದೇಸೇತಿ ಸಮ್ಬುದ್ಧೋ [ಸದ್ಧಮ್ಮಂ (ಸೀ. ಸ್ಯಾ.)], ಖೇಮಂ ನಿಬ್ಬಾನಪತ್ತಿಯಾ;
ತಮೇವತ್ಥಂ ನಿಸಾಮೇಥ, ಸದ್ಧಮ್ಮಸವನಂ ಸುಖಂ’.
‘‘ಉಪಸಙ್ಕಮ್ಮ ಸಮ್ಬುದ್ಧಂ, ಸಮ್ಮೋದಿಂ ಮುನಿನಾ ಅಹಂ;
ತಂ ಕಥಂ ವೀತಿಸಾರೇತ್ವಾ, ಲಕ್ಖಣೇ ಉಪಧಾರಯಿಂ.
‘‘ಲಕ್ಖಣೇ ದ್ವೇ ಚ ಕಙ್ಖಾಮಿ, ಪಸ್ಸಾಮಿ ತಿಂಸಲಕ್ಖಣೇ;
ಕೋಸೋಹಿತವತ್ಥಗುಯ್ಹಂ, ಇದ್ಧಿಯಾ ದಸ್ಸಯೀ ಮುನಿ.
‘‘ಜಿವ್ಹಂ ನಿನ್ನಾಮಯಿತ್ವಾನ, ಕಣ್ಣಸೋತೇ ಚ ನಾಸಿಕೇ;
ಪಟಿಮಸಿ ನಲಾಟನ್ತಂ, ಕೇವಲಂ ಛಾದಯೀ ಜಿನೋ.
‘‘ತಸ್ಸಾಹಂ ¶ ಲಕ್ಖಣೇ ದಿಸ್ವಾ, ಪರಿಪುಣ್ಣೇ ಸಬ್ಯಞ್ಜನೇ;
ಬುದ್ಧೋತಿ ನಿಟ್ಠಂ ಗನ್ತ್ವಾನ, ಸಹ ಸಿಸ್ಸೇಹಿ ಪಬ್ಬಜಿಂ.
‘‘ಸತೇಹಿ ತೀಹಿ ಸಹಿತೋ, ಪಬ್ಬಜಿಂ ಅನಗಾರಿಯಂ;
ಅದ್ಧಮಾಸೇ ಅಸಮ್ಪತ್ತೇ, ಸಬ್ಬೇ ಪತ್ತಾಮ್ಹ ನಿಬ್ಬುತಿಂ.
‘‘ಏಕತೋ ಕಮ್ಮಂ ಕತ್ವಾನ, ಪುಞ್ಞಕ್ಖೇತ್ತೇ ಅನುತ್ತರೇ;
ಏಕತೋ ಸಂಸರಿತ್ವಾನ, ಏಕತೋ ವಿನಿವತ್ತಯುಂ.
‘‘ಗೋಪಾನಸಿಯೋ ¶ ದತ್ವಾನ, ಪೂಗಧಮ್ಮೇ ವಸಿಂ ಅಹಂ;
ತೇನ ಕಮ್ಮೇನ ಸುಕತೇನ, ಅಟ್ಠ ಹೇತೂ ಲಭಾಮಹಂ.
‘‘ದಿಸಾಸು ಪೂಜಿತೋ ಹೋಮಿ, ಭೋಗಾ ಚ ಅಮಿತಾ ಮಮ;
ಪತಿಟ್ಠಾ ಹೋಮಿ ಸಬ್ಬೇಸಂ, ತಾಸೋ ಮಮ ನ ವಿಜ್ಜತಿ.
‘‘ಬ್ಯಾಧಯೋ ಮೇ ನ ವಿಜ್ಜನ್ತಿ, ದೀಘಾಯುಂ ಪಾಲಯಾಮಿ ಚ;
ಸುಖುಮಚ್ಛವಿಕೋ ಹೋಮಿ, ಆವಾಸೇ ಪತ್ಥಿತೇ ವಸೇ [ಆವಾಸೇ ಪತ್ತೇ ವಸ್ಸೇ (ಸ್ಯಾ.), ಆವಾಸೇವ ಠಿತೇ ವಸೇ (ಕ.)].
‘‘ಅಟ್ಠ ಗೋಪಾನಸೀ ದತ್ವಾ, ಪೂಗಧಮ್ಮೇ ವಸಿಂ ಅಹಂ;
ಪಟಿಸಮ್ಭಿದಾರಹತ್ತಞ್ಚ, ಏತಂ ಮೇ ಅಪರಟ್ಠಮಂ.
‘‘ಸಬ್ಬವೋಸಿತವೋಸಾನೋ, ಕತಕಿಚ್ಚೋ ಅನಾಸವೋ;
ಅಟ್ಠಗೋಪಾನಸೀ ನಾಮ, ತವ ಪುತ್ತೋ ಮಹಾಮುನಿ.
‘‘ಪಞ್ಚ ಥಮ್ಭಾನಿ ದತ್ವಾನ, ಪೂಗಧಮ್ಮೇ ವಸಿಂ ಅಹಂ;
ತೇನ ಕಮ್ಮೇನ ಸುಕತೇನ, ಪಞ್ಚ ಹೇತೂ ಲಭಾಮಹಂ.
‘‘ಅಚಲೋ ¶ ಹೋಮಿ ಮೇತ್ತಾಯ, ಅನೂನಙ್ಗೋ ಭವಾಮಹಂ;
ಆದೇಯ್ಯವಚನೋ ಹೋಮಿ, ನ ಧಂಸೇಮಿ ಯಥಾ ಅಹಂ.
‘‘ಅಭನ್ತಂ ಹೋತಿ ಮೇ ಚಿತ್ತಂ, ಅಖಿಲೋ ಹೋಮಿ ಕಸ್ಸಚಿ;
ತೇನ ಕಮ್ಮೇನ ಸುಕತೇನ, ವಿಮಲೋ ಹೋಮಿ ಸಾಸನೇ.
‘‘ಸಗಾರವೋ ¶ ಸಪ್ಪತಿಸ್ಸೋ, ಕತಕಿಚ್ಚೋ ಅನಾಸವೋ;
ಸಾವಕೋ ತೇ ಮಹಾವೀರ, ಭಿಕ್ಖು ತಂ ವನ್ದತೇ ಮುನಿ.
‘‘ಕತ್ವಾ ಸುಕತಪಲ್ಲಙ್ಕಂ, ಸಾಲಾಯಂ ಪಞ್ಞಪೇಸಹಂ;
ತೇನ ಕಮ್ಮೇನ ಸುಕತೇನ, ಪಞ್ಚ ಹೇತೂ ಲಭಾಮಹಂ.
‘‘ಉಚ್ಚೇ ¶ ¶ ಕುಲೇ ಪಜಾಯಿತ್ವಾ, ಮಹಾಭೋಗೋ ಭವಾಮಹಂ;
ಸಬ್ಬಸಮ್ಪತ್ತಿಕೋ ಹೋಮಿ, ಮಚ್ಛೇರಂ ಮೇ ನ ವಿಜ್ಜತಿ.
‘‘ಗಮನೇ ಪತ್ಥಿತೇ ಮಯ್ಹಂ, ಪಲ್ಲಙ್ಕೋ ಉಪತಿಟ್ಠತಿ;
ಸಹ ಪಲ್ಲಙ್ಕಸೇಟ್ಠೇನ, ಗಚ್ಛಾಮಿ ಮಮ ಪತ್ಥಿತಂ.
‘‘ತೇನ ಪಲ್ಲಙ್ಕದಾನೇನ, ತಮಂ ಸಬ್ಬಂ ವಿನೋದಯಿಂ;
ಸಬ್ಬಾಭಿಞ್ಞಾಬಲಪ್ಪತ್ತೋ, ಥೇರೋ [ಸೇಲೋ (?)] ವನ್ದತಿ ತಂ ಮುನಿ.
‘‘ಪರಕಿಚ್ಚತ್ತಕಿಚ್ಚಾನಿ, ಸಬ್ಬಕಿಚ್ಚಾನಿ ಸಾಧಯಿಂ;
ತೇನ ಕಮ್ಮೇನ ಸುಕತೇನ, ಪಾವಿಸಿಂ ಅಭಯಂ ಪುರಂ.
‘‘ಪರಿನಿಟ್ಠಿತಸಾಲಮ್ಹಿ, ಪರಿಭೋಗಮದಾಸಹಂ;
ತೇನ ಕಮ್ಮೇನ ಸುಕತೇನ, ಸೇಟ್ಠತ್ತಂ ಅಜ್ಝುಪಾಗತೋ.
‘‘ಯೇ ಕೇಚಿ ದಮಕಾ ಲೋಕೇ, ಹತ್ಥಿಅಸ್ಸೇ ದಮೇನ್ತಿ ಯೇ;
ಕರಿತ್ವಾ ಕಾರಣಾ ನಾನಾ, ದಾರುಣೇನ ದಮೇನ್ತಿ ತೇ.
‘‘ನ ಹೇವಂ ತ್ವಂ ಮಹಾವೀರ, ದಮೇಸಿ ನರನಾರಿಯೋ;
ಅದಣ್ಡೇನ ಅಸತ್ಥೇನ, ದಮೇಸಿ ಉತ್ತಮೇ ದಮೇ.
‘‘ದಾನಸ್ಸ ವಣ್ಣೇ ಕಿತ್ತೇನ್ತೋ, ದೇಸನಾಕುಸಲೋ ಮುನಿ;
ಏಕಪಞ್ಹಂ ಕಥೇನ್ತೋವ, ಬೋಧೇಸಿ ತಿಸತೇ ಮುನಿ.
‘‘ದನ್ತಾ ಮಯಂ ಸಾರಥಿನಾ, ಸುವಿಮುತ್ತಾ ಅನಾಸವಾ;
ಸಬ್ಬಾಭಿಞ್ಞಾಬಲಪತ್ತಾ, ನಿಬ್ಬುತಾ ಉಪಧಿಕ್ಖಯೇ.
‘‘ಸತಸಹಸ್ಸಿತೋ ಕಪ್ಪೇ, ಯಂ ದಾನಮದದಿಂ ತದಾ;
ಅತಿಕ್ಕನ್ತಾ ಭಯಾ ಸಬ್ಬೇ, ಸಾಲಾದಾನಸ್ಸಿದಂ ಫಲಂ.
‘‘ಕಿಲೇಸಾ ¶ ಝಾಪಿತಾ ಮಯ್ಹಂ…ಪೇ… ವಿಹರಾಮಿ ಅನಾಸವೋ.
‘‘ಸ್ವಾಗತಂ ¶ ವತ ಮೇ ಆಸಿ…ಪೇ… ಕತಂ ಬುದ್ಧಸ್ಸ ಸಾಸನಂ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಸೇಲೋ ಸಪರಿಸೋ ಭಗವತೋ ಸನ್ತಿಕೇ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಸೇಲತ್ಥೇರಸ್ಸಾಪದಾನಂ ದುತಿಯಂ.
೩. ಸಬ್ಬಕಿತ್ತಿಕತ್ಥೇರಅಪದಾನಂ
‘‘ಕಣಿಕಾರಂವ ¶ ¶ ಜಲಿತಂ [ಜೋತನ್ತಂ (ಸೀ.)], ದೀಪರುಕ್ಖಂವ ಉಜ್ಜಲಂ [ಜೋತಿತಂ (ಸ್ಯಾ.)];
ಓಸಧಿಂವ ವಿರೋಚನ್ತಂ, ವಿಜ್ಜುತಂ ಗಗನೇ ಯಥಾ.
‘‘ಅಸಮ್ಭೀತಂ ಅನುತ್ತಾಸಿಂ, ಮಿಗರಾಜಂವ ಕೇಸರಿಂ;
ಞಾಣಾಲೋಕಂ ಪಕಾಸೇನ್ತಂ, ಮದ್ದನ್ತಂ ತಿತ್ಥಿಯೇ ಗಣೇ.
‘‘ಉದ್ಧರನ್ತಂ ಇಮಂ ಲೋಕಂ, ಛಿದ್ದನ್ತಂ ಸಬ್ಬಸಂಸಯಂ;
ಗಜ್ಜನ್ತಂ [ಅಸಮ್ಭೀತಂ (ಸ್ಯಾ.), ಗಚ್ಛನ್ತಂ (ಕ.)] ಮಿಗರಾಜಂವ, ಅದ್ದಸಂ ಲೋಕನಾಯಕಂ.
‘‘ಜಟಾಜಿನಧರೋ ಆಸಿಂ, ಬ್ರಹಾ ಉಜು ಪತಾಪವಾ;
ವಾಕಚೀರಂ ಗಹೇತ್ವಾನ, ಪಾದಮೂಲೇ ಅಪತ್ಥರಿಂ.
‘‘ಕಾಳಾನುಸಾರಿಯಂ ಗಯ್ಹ, ಅನುಲಿಮ್ಪಿಂ ತಥಾಗತಂ;
ಸಮ್ಬುದ್ಧಮನುಲಿಮ್ಪೇತ್ವಾ, ಸನ್ಥವಿಂ ಲೋಕನಾಯಕಂ.
‘‘ಸಮುದ್ಧರಸಿಮಂ ¶ ಲೋಕಂ, ಓಘತಿಣ್ಣ [ಓಘತಿಣ್ಣೋ (ಸ್ಯಾ. ಕ.)] ಮಹಾಮುನಿ;
ಞಾಣಾಲೋಕೇನ ಜೋತೇಸಿ, ನಾವಟಂ [ಪವರಂ (ಸ್ಯಾ.), ವಜಿರ (ಪೀ.)] ಞಾಣಮುತ್ತಮಂ.
‘‘ಧಮ್ಮಚಕ್ಕಂ [ತುವಂ ಚಕ್ಕಂ (ಕ.)] ಪವತ್ತೇಸಿ, ಮದ್ದಸೇ ಪರತಿತ್ಥಿಯೇ;
ಉಸಭೋ ಜಿತಸಙ್ಗಾಮೋ, ಸಮ್ಪಕಮ್ಪೇಸಿ ಮೇದನಿಂ.
‘‘ಮಹಾಸಮುದ್ದೇ ಊಮಿಯೋ, ವೇಲನ್ತಮ್ಹಿ ಪಭಿಜ್ಜರೇ;
ತಥೇವ ತವ ಞಾಣಮ್ಹಿ, ಸಬ್ಬದಿಟ್ಠೀ ಪಭಿಜ್ಜರೇ.
‘‘ಸುಖುಮಚ್ಛಿಕಜಾಲೇನ, ಸರಮ್ಹಿ ಸಮ್ಪತಾನಿತೇ;
ಅನ್ತೋಜಾಲಿಕತಾ [ಜಾಲಗತಾ (ಸೀ.)] ಪಾಣಾ, ಪೀಳಿತಾ ಹೋನ್ತಿ ತಾವದೇ.
‘‘ತಥೇವ ತಿತ್ಥಿಯಾ ಲೋಕೇ, ಪುಥುಪಾಸಣ್ಡನಿಸ್ಸಿತಾ [ಮೂಳ್ಹಾ ಸಚ್ಚವಿನಿಸ್ಸಟಾ (ಸ್ಯಾ.), ಮುಟ್ಠಸಚ್ಚವಿನಿಸ್ಸಟಾ (ಕ.)];
ಅನ್ತೋಞಾಣವರೇ ತುಯ್ಹಂ, ಪರಿವತ್ತನ್ತಿ ಮಾರಿಸ.
‘‘ಪತಿಟ್ಠಾ ¶ ವುಯ್ಹತಂ ಓಘೇ, ತ್ವಞ್ಹಿ ನಾಥೋ ಅಬನ್ಧುನಂ;
ಭಯಟ್ಟಿತಾನಂ ಸರಣಂ, ಮುತ್ತಿತ್ಥೀನಂ ಪರಾಯಣಂ.
‘‘ಏಕವೀರೋ ¶ ಅಸದಿಸೋ, ಮೇತ್ತಾಕರುಣಸಞ್ಚಯೋ [ಸಞ್ಞುತೋ (ಸ್ಯಾ.)];
ಅಸಮೋ ಸುಸಮೋ ಸನ್ತೋ [ಸುಸೀಲೋ ಅಸಮೋ ಸನ್ತೋ (ಸೀ.), ಪಞ್ಞವಾ ಯುತ್ತಚಾಗೋ ಚ (ಸ್ಯಾ.)], ವಸೀ ತಾದೀ ಜಿತಞ್ಜಯೋ.
‘‘ಧೀರೋ ¶ ವಿಗತಸಮ್ಮೋಹೋ, ಅನೇಜೋ ಅಕಥಂಕಥೀ;
ತುಸಿತೋ [ವುಸಿತೋ (ಸೀ.)] ವನ್ತದೋಸೋಸಿ, ನಿಮ್ಮಲೋ ಸಂಯತೋ ಸುಚಿ.
‘‘ಸಙ್ಗಾತಿಗೋ ಹತಮದೋ [ಗತಮದೋ (ಸ್ಯಾ.), ತಮನುದೋ (ಕ.)], ತೇವಿಜ್ಜೋ ತಿಭವನ್ತಗೋ;
ಸೀಮಾತಿಗೋ ಧಮ್ಮಗರು, ಗತತ್ಥೋ ಹಿತವಬ್ಭುತೋ [ಹಿತವಪ್ಪಥೋ (ಸೀ. ಸ್ಯಾ.)].
‘‘ತಾರಕೋ ¶ ತ್ವಂ ಯಥಾ ನಾವಾ, ನಿಧೀವಸ್ಸಾಸಕಾರಕೋ;
ಅಸಮ್ಭೀತೋ ಯಥಾ ಸೀಹೋ, ಗಜರಾಜಾವ ದಪ್ಪಿತೋ.
‘‘ಥೋಮೇತ್ವಾ ದಸಗಾಥಾಹಿ, ಪದುಮುತ್ತರಂ ಮಹಾಯಸಂ;
ವನ್ದಿತ್ವಾ ಸತ್ಥುನೋ ಪಾದೇ, ತುಣ್ಹೀ ಅಟ್ಠಾಸಹಂ ತದಾ.
‘‘ಪದುಮುತ್ತರೋ ಲೋಕವಿದೂ, ಆಹುತೀನಂ ಪಟಿಗ್ಗಹೋ;
ಭಿಕ್ಖುಸಙ್ಘೇ ಠಿತೋ ಸತ್ಥಾ, ಇಮಾ ಗಾಥಾ ಅಭಾಸಥ.
‘‘‘ಯೋ ಮೇ ಸೀಲಞ್ಚ ಞಾಣಞ್ಚ, ಸದ್ಧಮ್ಮಞ್ಚಾಪಿ ವಣ್ಣಯಿ [ಧಮ್ಮಞ್ಚಾಪಿ ಪಕಿತ್ತಯಿ (ಸೀ. ಸ್ಯಾ.)];
ತಮಹಂ ಕಿತ್ತಯಿಸ್ಸಾಮಿ, ಸುಣಾಥ ಮಮ ಭಾಸತೋ.
‘‘‘ಸಟ್ಠಿ ಕಪ್ಪಸಹಸ್ಸಾನಿ, ದೇವಲೋಕೇ ರಮಿಸ್ಸತಿ;
ಅಞ್ಞೇ ದೇವೇಭಿಭವಿತ್ವಾ, ಇಸ್ಸರಂ ಕಾರಯಿಸ್ಸತಿ.
‘‘‘ಸೋ ಪಚ್ಛಾ ಪಬ್ಬಜಿತ್ವಾನ, ಸುಕ್ಕಮೂಲೇನ ಚೋದಿತೋ;
ಗೋತಮಸ್ಸ ಭಗವತೋ, ಸಾಸನೇ ಪಬ್ಬಜಿಸ್ಸತಿ.
‘‘‘ಪಬ್ಬಜಿತ್ವಾನ ಕಾಯೇನ, ಪಾಪಕಮ್ಮಂ ವಿವಜ್ಜಿಯ;
ಸಬ್ಬಾಸವೇ ಪರಿಞ್ಞಾಯ, ನಿಬ್ಬಾಯಿಸ್ಸತಿನಾಸವೋ’.
‘‘ಯಥಾಪಿ ಮೇಘೋ ಥನಯಂ, ತಪ್ಪೇತಿ ಮೇದಿನಿಂ ಇಮಂ;
ತಥೇವ ತ್ವಂ ಮಹಾವೀರ, ಧಮ್ಮೇನ ತಪ್ಪಯೀ ಮಮಂ.
‘‘ಸೀಲಂ ಪಞ್ಞಞ್ಚ ಧಮ್ಮಞ್ಚ, ಥವಿತ್ವಾ ಲೋಕನಾಯಕಂ;
ಪತ್ತೋಮ್ಹಿ ಪರಮಂ ಸನ್ತಿಂ, ನಿಬ್ಬಾನಂ ಪದಮಚ್ಚುತಂ.
‘‘ಅಹೋ ¶ ನೂನ ಸ ಭಗವಾ, ಚಿರಂ ತಿಟ್ಠೇಯ್ಯ ಚಕ್ಖುಮಾ;
ಅಞ್ಞಾತಞ್ಚ ವಿಜಾನೇಯ್ಯುಂ, ಫುಸೇಯ್ಯುಂ [ಅಞ್ಞಾತಞ್ಚಾಪಿ ಜಾನೇಯ್ಯ, ಪಸ್ಸೇಯ್ಯ (ಕ.)] ಅಮತಂ ಪದಂ.
‘‘ಅಯಂ ¶ ¶ ಮೇ ಪಚ್ಛಿಮಾ ಜಾತಿ, ಭವಾ ಸಬ್ಬೇ ಸಮೂಹತಾ;
ಸಬ್ಬಾಸವೇ ಪರಿಞ್ಞಾಯ, ವಿಹರಾಮಿ ಅನಾಸವೋ.
‘‘ಸತಸಹಸ್ಸಿತೋ ಕಪ್ಪೇ, ಯಂ ಬುದ್ಧಮಭಿಥೋಮಯಿಂ
ದುಗ್ಗತಿಂ ನಾಭಿಜಾನಾಮಿ, ಕಿತ್ತನಾಯ ಇದಂ ಫಲಂ.
‘‘ಕಿಲೇಸಾ ¶ ಝಾಪಿತಾ ಮಯ್ಹಂ, ಭವಾ ಸಬ್ಬೇ ಸಮೂಹತಾ;
ಸಬ್ಬಾಸವಾ ಪರಿಕ್ಖೀಣಾ, ನತ್ಥಿ ದಾನಿ ಪುನಬ್ಭವೋ.
‘‘ಸ್ವಾಗತಂ ವತ ಮೇ ಆಸಿ…ಪೇ… ಕತಂ ಬುದ್ಧಸ್ಸ ಸಾಸನಂ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಸಬ್ಬಕಿತ್ತಿಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಸಬ್ಬಕಿತ್ತಿಕತ್ಥೇರಸ್ಸಾಪದಾನಂ ತತಿಯಂ.
೪. ಮಧುದಾಯಕತ್ಥೇರಅಪದಾನಂ
‘‘ಸಿನ್ಧುಯಾ ನದಿಯಾ ತೀರೇ, ಸುಕತೋ ಅಸ್ಸಮೋ ಮಮ;
ತತ್ಥ ವಾಚೇಮಹಂ ಸಿಸ್ಸೇ, ಇತಿಹಾಸಂ ಸಲಕ್ಖಣಂ.
‘‘ಧಮ್ಮಕಾಮಾ ವಿನೀತಾ ತೇ, ಸೋತುಕಾಮಾ ಸುಸಾಸನಂ;
ಛಳಙ್ಗೇ ಪಾರಮಿಪ್ಪತ್ತಾ, ಸಿನ್ಧುಕೂಲೇ ವಸನ್ತಿ ತೇ.
‘‘ಉಪ್ಪಾತಗಮನೇ ¶ ಚೇವ, ಲಕ್ಖಣೇಸು ಚ ಕೋವಿದಾ;
ಉತ್ತಮತ್ಥಂ ಗವೇಸನ್ತಾ, ವಸನ್ತಿ ವಿಪಿನೇ ತದಾ.
‘‘ಸುಮೇಧೋ ನಾಮ ಸಮ್ಬುದ್ಧೋ, ಲೋಕೇ ಉಪ್ಪಜ್ಜಿ ತಾವದೇ;
ಅಮ್ಹಾಕಂ ಅನುಕಮ್ಪನ್ತೋ, ಉಪಾಗಚ್ಛಿ ವಿನಾಯಕೋ.
‘‘ಉಪಾಗತಂ ಮಹಾವೀರಂ, ಸುಮೇಧಂ ಲೋಕನಾಯಕಂ;
ತಿಣಸನ್ಥಾರಕಂ ಕತ್ವಾ, ಲೋಕಜೇಟ್ಠಸ್ಸದಾಸಹಂ.
‘‘ವಿಪಿನಾತೋ ¶ ಮಧುಂ ಗಯ್ಹ, ಬುದ್ಧಸೇಟ್ಠಸ್ಸದಾಸಹಂ;
ಸಮ್ಬುದ್ಧೋ ಪರಿಭುಞ್ಜಿತ್ವಾ, ಇದಂ ವಚನಮಬ್ರವಿ.
‘‘‘ಯೋ ತಂ ಅದಾಸಿ ಮಧುಂ ಮೇ, ಪಸನ್ನೋ ಸೇಹಿ ಪಾಣಿಭಿ;
ತಮಹಂ ಕಿತ್ತಯಿಸ್ಸಾಮಿ, ಸುಣಾಥ ಮಮ ಭಾಸತೋ.
‘‘‘ಇಮಿನಾ ಮಧುದಾನೇನ, ತಿಣಸನ್ಥಾರಕೇನ ಚ;
ತಿಂಸ ಕಪ್ಪಸಹಸ್ಸಾನಿ, ದೇವಲೋಕೇ ರಮಿಸ್ಸತಿ.
‘‘‘ತಿಂಸ ¶ ಕಪ್ಪಸಹಸ್ಸಮ್ಹಿ, ಓಕ್ಕಾಕಕುಲಸಮ್ಭವೋ;
ಗೋತಮೋ ನಾಮ ಗೋತ್ತೇನ, ಸತ್ಥಾ ಲೋಕೇ ಭವಿಸ್ಸತಿ.
‘‘‘ತಸ್ಸ ಧಮ್ಮೇಸು ದಾಯಾದೋ, ಓರಸೋ ಧಮ್ಮನಿಮ್ಮಿತೋ;
ಸಬ್ಬಾಸವೇ ಪರಿಞ್ಞಾಯ, ನಿಬ್ಬಾಯಿಸ್ಸತಿನಾಸವೋ.
‘‘‘ದೇವಲೋಕಾ ಇಧಾಗನ್ತ್ವಾ, ಮಾತುಕುಚ್ಛಿಂ ಉಪಾಗತೇ;
ಮಧುವಸ್ಸಂ ಪವಸ್ಸಿತ್ಥ, ಛಾದಯಂ ಮಧುನಾ ಮಹಿಂ’.
‘‘ಮಯಿ ನಿಕ್ಖನ್ತಮತ್ತಮ್ಹಿ, ಕುಚ್ಛಿಯಾ ಚ ಸುದುತ್ತರಾ;
ತತ್ರಾಪಿ ಮಧುವಸ್ಸಂ ಮೇ, ವಸ್ಸತೇ ನಿಚ್ಚಕಾಲಿಕಂ.
‘‘ಅಗಾರಾ ¶ ¶ ಅಭಿನಿಕ್ಖಮ್ಮ, ಪಬ್ಬಜಿಂ ಅನಗಾರಿಯಂ;
ಲಾಭೀ ಅನ್ನಸ್ಸ ಪಾನಸ್ಸ, ಮಧುದಾನಸ್ಸಿದಂ ಫಲಂ.
‘‘ಸಬ್ಬಕಾಮಸಮಿದ್ಧೋಹಂ, ಭವಿತ್ವಾ ದೇವಮಾನುಸೇ;
ತೇನೇವ ಮಧುದಾನೇನ, ಪತ್ತೋಮ್ಹಿ ಆಸವಕ್ಖಯಂ.
‘‘ವುಟ್ಠಮ್ಹಿ ದೇವೇ ಚತುರಙ್ಗುಲೇ ತಿಣೇ, ಸಮ್ಪುಪ್ಫಿತೇ [ಸುಪುಪ್ಫಿತೇ (ಸ್ಯಾ.)] ಧರಣೀರುಹೇ ಸಞ್ಛನ್ನೇ [ವಪ್ಪದೇಸೇ (ಸ್ಯಾ.)];
ಸುಞ್ಞೇ ಘರೇ ಮಣ್ಡಪರುಕ್ಖಮೂಲಕೇ, ವಸಾಮಿ ನಿಚ್ಚಂ ಸುಖಿತೋ ಅನಾಸವೋ.
‘‘ಮಜ್ಝೇ ಮಹನ್ತೇ ಹೀನೇ ಚ [ಮಜ್ಝೇ ಮಯ್ಹಂ ಭವಾ ಅಸ್ಸು (ಸ್ಯಾ. ಪೀ. ಕ.)], ಭವೇ ಸಬ್ಬೇ ಅತಿಕ್ಕಮಿಂ [ಯೇ ಭವೇ ಸಮತಿಕ್ಕಮಿಂ (ಸ್ಯಾ. ಕ.), ಯೋ ಭವೇಸು ಪಕಿತ್ತಯಿ (ಕ.)];
ಅಜ್ಜ ಮೇ ಆಸವಾ ಖೀಣಾ, ನತ್ಥಿ ದಾನಿ ಪುನಬ್ಭವೋ.
‘‘ತಿಂಸಕಪ್ಪಸಹಸ್ಸಮ್ಹಿ, ಯಂ ದಾನಮದದಿಂ ತದಾ;
ದುಗ್ಗತಿಂ ನಾಭಿಜಾನಾಮಿ, ಮಧುದಾನಸ್ಸಿದಂ ಫಲಂ.
‘‘ಕಿಲೇಸಾ ¶ ಝಾಪಿತಾ ಮಯ್ಹಂ, ಭವಾ ಸಬ್ಬೇ ಸಮೂಹತಾ;
ಸಬ್ಬಾಸವಾ ಪರಿಕ್ಖೀಣಾ, ನತ್ಥಿ ದಾನಿ ಪುನಬ್ಭವೋ.
‘‘ಸ್ವಾಗತಂ ವತ ಮೇ ಆಸಿ…ಪೇ… ಕತಂ ಬುದ್ಧಸ್ಸ ಸಾಸನಂ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಮಧುದಾಯಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಮಧುದಾಯಕತ್ಥೇರಸ್ಸಾಪದಾನಂ ಚತುತ್ಥಂ.
೫. ಪದುಮಕೂಟಾಗಾರಿಯತ್ಥೇರಅಪದಾನಂ
‘‘ಪಿಯದಸ್ಸೀ ¶ ನಾಮ ಭಗವಾ, ಸಯಮ್ಭೂ ಲೋಕನಾಯಕೋ;
ವಿವೇಕಕಾಮೋ ಸಮ್ಬುದ್ಧೋ, ಸಮಾಧಿಕುಸಲೋ ಮುನಿ.
‘‘ವನಸಣ್ಡಂ ¶ ಸಮೋಗಯ್ಹ, ಪಿಯದಸ್ಸೀ ಮಹಾಮುನಿ;
ಪಂಸುಕೂಲಂ ಪತ್ಥರಿತ್ವಾ, ನಿಸೀದಿ ಪುರಿಸುತ್ತಮೋ.
‘‘ಮಿಗಲುದ್ದೋ ಪುರೇ ಆಸಿಂ, ಅರಞ್ಞೇ [ವಿಪಿನೇ (ಸೀ.), ಇರಿನೇ (ಸ್ಯಾ. ಕ.)] ಕಾನನೇ ಅಹಂ;
ಪಸದಂ ಮಿಗಮೇಸನ್ತೋ, ಆಹಿಣ್ಡಾಮಿ ಅಹಂ ತದಾ.
‘‘ತತ್ಥದ್ದಸಾಸಿಂ ಸಮ್ಬುದ್ಧಂ, ಓಘತಿಣ್ಣಮನಾಸವಂ;
ಪುಪ್ಫಿತಂ ಸಾಲರಾಜಂವ, ಸತರಂಸಿಂವ ಉಗ್ಗತಂ.
‘‘ದಿಸ್ವಾನಹಂ ದೇವದೇವಂ, ಪಿಯದಸ್ಸಿಂ ಮಹಾಯಸಂ;
ಜಾತಸ್ಸರಂ ಸಮೋಗಯ್ಹ, ಪದುಮಂ ಆಹರಿಂ ತದಾ.
‘‘ಆಹರಿತ್ವಾನ ಪದುಮಂ, ಸತಪತ್ತಂ ಮನೋರಮಂ;
ಕೂಟಾಗಾರಂ ಕರಿತ್ವಾನ, ಛಾದಯಿಂ ಪದುಮೇನಹಂ.
‘‘ಅನುಕಮ್ಪಕೋ ¶ ಕಾರುಣಿಕೋ, ಪಿಯದಸ್ಸೀ ಮಹಾಮುನಿ;
ಸತ್ತರತ್ತಿನ್ದಿವಂ ಬುದ್ಧೋ, ಕೂಟಾಗಾರೇ ವಸೀ ಜಿನೋ.
‘‘ಪುರಾಣಂ ಛಡ್ಡಯಿತ್ವಾನ, ನವೇನ ಛಾದಯಿಂ ಅಹಂ;
ಅಞ್ಜಲಿಂ ಪಗ್ಗಹೇತ್ವಾನ, ಅಟ್ಠಾಸಿಂ ತಾವದೇ ಅಹಂ.
‘‘ವುಟ್ಠಹಿತ್ವಾ ¶ ಸಮಾಧಿಮ್ಹಾ, ಪಿಯದಸ್ಸೀ ಮಹಾಮುನಿ;
ದಿಸಂ ಅನುವಿಲೋಕೇನ್ತೋ, ನಿಸೀದಿ ಲೋಕನಾಯಕೋ.
‘‘ತದಾ ¶ ಸುದಸ್ಸನೋ ನಾಮ, ಉಪಟ್ಠಾಕೋ ಮಹಿದ್ಧಿಕೋ;
ಚಿತ್ತಮಞ್ಞಾಯ ಬುದ್ಧಸ್ಸ, ಪಿಯದಸ್ಸಿಸ್ಸ ಸತ್ಥುನೋ.
‘‘ಅಸೀತಿಯಾ ಸಹಸ್ಸೇಹಿ, ಭಿಕ್ಖೂಹಿ ಪರಿವಾರಿತೋ;
ವನನ್ತೇ ಸುಖಮಾಸೀನಂ, ಉಪೇಸಿ ಲೋಕನಾಯಕಂ.
‘‘ಯಾವತಾ ವನಸಣ್ಡಮ್ಹಿ, ಅಧಿವತ್ಥಾ ಚ ದೇವತಾ;
ಬುದ್ಧಸ್ಸ ಚಿತ್ತಮಞ್ಞಾಯ, ಸಬ್ಬೇ ಸನ್ನಿಪತುಂ ತದಾ.
‘‘ಸಮಾಗತೇಸು ಯಕ್ಖೇಸು, ಕುಮ್ಭಣ್ಡೇ ಸಹರಕ್ಖಸೇ;
ಭಿಕ್ಖುಸಙ್ಘೇ ಚ ಸಮ್ಪತ್ತೇ, ಗಾಥಾ ಪಬ್ಯಾಹರೀ [ಸಬ್ಯಾಹರೀ (ಸ್ಯಾ.), ಮಾಬ್ಯಾಹರೀ (ಸೀ.)] ಜಿನೋ.
‘‘‘ಯೋ ಮಂ ಸತ್ತಾಹಂ ಪೂಜೇಸಿ, ಆವಾಸಞ್ಚ ಅಕಾಸಿ ಮೇ;
ತಮಹಂ ಕಿತ್ತಯಿಸ್ಸಾಮಿ, ಸುಣಾಥ ಮಮ ಭಾಸತೋ.
‘‘‘ಸುದುದ್ದಸಂ ಸುನಿಪುಣಂ, ಗಮ್ಭೀರಂ ಸುಪ್ಪಕಾಸಿತಂ;
ಞಾಣೇನ ಕಿತ್ತಯಿಸ್ಸಾಮಿ, ಸುಣಾಥ ಮಮ ಭಾಸತೋ.
‘‘‘ಚತುದ್ದಸಾನಿ ¶ ಕಪ್ಪಾನಿ, ದೇವರಜ್ಜಂ ಕರಿಸ್ಸತಿ;
ಕೂಟಾಗಾರಂ ಮಹನ್ತಸ್ಸ [ಬ್ರಹಂ ತಸ್ಸ (ಸೀ. ಸ್ಯಾ.)], ಪದ್ಮಪುಪ್ಫೇಹಿ ಛಾದಿತಂ.
‘‘‘ಆಕಾಸೇ ಧಾರಯಿಸ್ಸತಿ, ಪುಪ್ಫಕಮ್ಮಸ್ಸಿದಂ [ಪುಬ್ಬಕಮ್ಮಸ್ಸಿದಂ (ಸ್ಯಾ.)] ಫಲಂ;
ಚತುಬ್ಬೀಸೇ [ಚತುದ್ದಸೇ (ಸ್ಯಾ.)] ಕಪ್ಪಸತೇ, ವೋಕಿಣ್ಣಂ ಸಂಸರಿಸ್ಸತಿ.
‘‘‘ತತ್ಥ ಪುಪ್ಫಮಯಂ ಬ್ಯಮ್ಹಂ, ಆಕಾಸೇ ಧಾರಯಿಸ್ಸತಿ;
ಯಥಾ ಪದುಮಪತ್ತಮ್ಹಿ, ತೋಯಂ ನ ಉಪಲಿಮ್ಪತಿ.
‘‘‘ತಥೇವೀಮಸ್ಸ ಞಾಣಮ್ಹಿ, ಕಿಲೇಸಾ ನೋಪಲಿಮ್ಪರೇ;
ಮನಸಾ ವಿನಿವಟ್ಟೇತ್ವಾ, ಪಞ್ಚ ನೀವರಣೇ ಅಯಂ.
‘‘‘ಚಿತ್ತಂ ¶ ಜನೇತ್ವಾ ನೇಕ್ಖಮ್ಮೇ, ಅಗಾರಾ ಪಬ್ಬಜಿಸ್ಸತಿ;
ತತೋ ಪುಪ್ಫಮಯೇ ಬ್ಯಮ್ಹೇ, ಧಾರೇನ್ತೇ [ಪುಪ್ಫಮಯಂ ಬ್ಯಮ್ಹಂ, ಧಾರೇನ್ತಂ (ಸ್ಯಾ. ಕ.)] ನಿಕ್ಖಮಿಸ್ಸತಿ.
‘‘‘ರುಕ್ಖಮೂಲೇ ವಸನ್ತಸ್ಸ, ನಿಪಕಸ್ಸ ಸತೀಮತೋ;
ತತ್ಥ ಪುಪ್ಫಮಯಂ ಬ್ಯಮ್ಹಂ, ಮತ್ಥಕೇ ಧಾರಯಿಸ್ಸತಿ.
‘‘‘ಚೀವರಂ ¶ ¶ ಪಿಣ್ಡಪಾತಞ್ಚ, ಪಚ್ಚಯಂ ಸಯನಾಸನಂ;
ದತ್ವಾನ ಭಿಕ್ಖುಸಙ್ಘಸ್ಸ, ನಿಬ್ಬಾಯಿಸ್ಸತಿನಾಸವೋ’.
‘‘ಕೂಟಾಗಾರೇನ ಚರತಾ [ಚರಣಾ (ಸೀ. ಪೀ. ಕ.), ಚರಿತೇ (ಸ್ಯಾ.)], ಪಬ್ಬಜ್ಜಂ ಅಭಿನಿಕ್ಖಮಿಂ;
ರುಕ್ಖಮೂಲೇ ವಸನ್ತಮ್ಪಿ [ವಸನ್ತಮ್ಹಿ (ಸೀ.), ವಸತೋಪಿ (?)], ಕೂಟಾಗಾರಂ ಧರೀಯತಿ.
‘‘ಚೀವರೇ ಪಿಣ್ಡಪಾತೇ ಚ, ಚೇತನಾ ಮೇ ನ ವಿಜ್ಜತಿ;
ಪುಞ್ಞಕಮ್ಮೇನ ಸಂಯುತ್ತೋ, ಲಭಾಮಿ ಪರಿನಿಟ್ಠಿತಂ.
‘‘ಗಣನಾತೋ ಅಸಙ್ಖೇಯ್ಯಾ, ಕಪ್ಪಕೋಟೀ ಬಹೂ ಮಮ;
ರಿತ್ತಕಾ ತೇ ಅತಿಕ್ಕನ್ತಾ, ಪಮುತ್ತಾ ಲೋಕನಾಯಕಾ.
‘‘ಅಟ್ಠಾರಸೇ ಕಪ್ಪಸತೇ, ಪಿಯದಸ್ಸೀ ವಿನಾಯಕೋ;
ತಮಹಂ ಪಯಿರುಪಾಸಿತ್ವಾ, ಇಮಂ ಯೋನಿಂ ಉಪಾಗತೋ.
‘‘ಇಧ ಪಸ್ಸಾಮಿ [ಇಧದ್ದಸಾಸಿಂ (ಸೀ.)] ಸಮ್ಬುದ್ಧಂ, ಅನೋಮಂ ನಾಮ ಚಕ್ಖುಮಂ;
ತಮಹಂ ಉಪಗನ್ತ್ವಾನ, ಪಬ್ಬಜಿಂ ಅನಗಾರಿಯಂ.
‘‘ದುಕ್ಖಸ್ಸನ್ತಕರೋ ಬುದ್ಧೋ, ಮಗ್ಗಂ ಮೇ ದೇಸಯೀ ಜಿನೋ;
ತಸ್ಸ ಧಮ್ಮಂ ಸುಣಿತ್ವಾನ, ಪತ್ತೋಮ್ಹಿ ಅಚಲಂ ಪದಂ.
‘‘ತೋಸಯಿತ್ವಾನ ಸಮ್ಬುದ್ಧಂ, ಗೋತಮಂ ಸಕ್ಯಪುಙ್ಗವಂ;
ಸಬ್ಬಾಸವೇ ಪರಿಞ್ಞಾಯ, ವಿಹರಾಮಿ ಅನಾಸವೋ.
‘‘ಅಟ್ಠಾರಸೇ ¶ ¶ ಕಪ್ಪಸತೇ, ಯಂ ಬುದ್ಧಮಭಿಪೂಜಯಿಂ;
ದುಗ್ಗತಿಂ ನಾಭಿಜಾನಾಮಿ, ಬುದ್ಧಪೂಜಾಯಿದಂ ಫಲಂ.
‘‘ಕಿಲೇಸಾ ಝಾಪಿತಾ ಮಯ್ಹಂ, ಭವಾ ಸಬ್ಬೇ ಸಮೂಹತಾ;
ಸಬ್ಬಾಸವಾ ಪರಿಕ್ಖೀಣಾ, ನತ್ಥಿ ದಾನಿ ಪುನಬ್ಭವೋ.
‘‘ಸ್ವಾಗತಂ ವತ ಮೇ ಆಸಿ…ಪೇ… ಕತಂ ಬುದ್ಧಸ್ಸ ಸಾಸನಂ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಪದುಮಕೂಟಾಗಾರಿಯೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಪದುಮಕೂಟಾಗಾರಿಯತ್ಥೇರಸ್ಸಾಪದಾನಂ ಪಞ್ಚಮಂ.
೬. ಬಾಕುಲತ್ಥೇರಅಪದಾನಂ
‘‘ಹಿಮವನ್ತಸ್ಸಾವಿದೂರೇ ¶ , ಸೋಭಿತೋ ನಾಮ ಪಬ್ಬತೋ;
ಅಸ್ಸಮೋ ಸುಕತೋ ಮಯ್ಹಂ, ಸಕಸಿಸ್ಸೇಹಿ ಮಾಪಿತೋ.
‘‘ಮಣ್ಡಪಾ ಚ ಬಹೂ ತತ್ಥ, ಪುಪ್ಫಿತಾ ಸಿನ್ದುವಾರಕಾ;
ಕಪಿತ್ಥಾ ಚ ಬಹೂ ತತ್ಥ, ಪುಪ್ಫಿತಾ ಜೀವಜೀವಕಾ [ಚಮ್ಪಕಾ ನಾಗಕೇತಕಾ (ಸ್ಯಾ.)].
‘‘ನಿಗ್ಗುಣ್ಡಿಯೋ ಬಹೂ ತತ್ಥ, ಬದರಾಮಲಕಾನಿ ಚ;
ಫಾರುಸಕಾ ಅಲಾಬೂ ಚ, ಪುಣ್ಡರೀಕಾ ಚ ಪುಪ್ಫಿತಾ.
‘‘ಆಳಕಾ ¶ [ಅಳಕ್ಕಾ (ಸ್ಯಾ.)] ಬೇಲುವಾ ತತ್ಥ, ಕದಲೀ ಮಾತುಲುಙ್ಗಕಾ;
ಮಹಾನಾಮಾ ಬಹೂ ತತ್ಥ, ಅಜ್ಜುನಾ ಚ ಪಿಯಙ್ಗುಕಾ.
‘‘ಕೋಸಮ್ಬಾ ¶ ಸಳಲಾ ನಿಮ್ಬಾ [ನೀಪಾ (ಸೀ.)], ನಿಗ್ರೋಧಾ ಚ ಕಪಿತ್ಥನಾ;
ಏದಿಸೋ ಅಸ್ಸಮೋ ಮಯ್ಹಂ, ಸಸಿಸ್ಸೋಹಂ ತಹಿಂ ವಸಿಂ.
‘‘ಅನೋಮದಸ್ಸೀ ಭಗವಾ, ಸಯಮ್ಭೂ ಲೋಕನಾಯಕೋ;
ಗವೇಸಂ ಪಟಿಸಲ್ಲಾನಂ, ಮಮಸ್ಸಮಮುಪಾಗಮಿ.
‘‘ಉಪೇತಮ್ಹಿ ಮಹಾವೀರೇ, ಅನೋಮದಸ್ಸಿಮಹಾಯಸೇ;
ಖಣೇನ ಲೋಕನಾಥಸ್ಸ, ವಾತಾಬಾಧೋ ಸಮುಟ್ಠಹಿ.
‘‘ವಿಚರನ್ತೋ ಅರಞ್ಞಮ್ಹಿ, ಅದ್ದಸಂ ಲೋಕನಾಯಕಂ;
ಉಪಗನ್ತ್ವಾನ ಸಮ್ಬುದ್ಧಂ, ಚಕ್ಖುಮನ್ತಂ ಮಹಾಯಸಂ.
‘‘ಇರಿಯಞ್ಚಾಪಿ ದಿಸ್ವಾನ, ಉಪಲಕ್ಖೇಸಹಂ ತದಾ;
ಅಸಂಸಯಞ್ಹಿ ಬುದ್ಧಸ್ಸ, ಬ್ಯಾಧಿ ನೋ ಉದಪಜ್ಜಥ.
‘‘ಖಿಪ್ಪಂ ¶ ಅಸ್ಸಮಮಾಗಞ್ಛಿಂ, ಮಮ ಸಿಸ್ಸಾನ ಸನ್ತಿಕೇ;
ಭೇಸಜ್ಜಂ ಕತ್ತುಕಾಮೋಹಂ, ಸಿಸ್ಸೇ ಆಮನ್ತಯಿಂ ತದಾ.
‘‘ಪಟಿಸ್ಸುಣಿತ್ವಾನ ಮೇ ವಾಕ್ಯಂ, ಸಿಸ್ಸಾ ಸಬ್ಬೇ ಸಗಾರವಾ;
ಏಕಜ್ಝಂ ಸನ್ನಿಪತಿಂಸು, ಸತ್ಥುಗಾರವತಾ ಮಮ.
‘‘ಖಿಪ್ಪಂ ಪಬ್ಬತಮಾರುಯ್ಹ, ಸಬ್ಬೋಸಧಮಹಾಸಹಂ [ಮಕಾಸಹಂ (ಸ್ಯಾ. ಕ.)];
ಪಾನೀಯಯೋಗಂ [ಪಾನೀಯಯೋಗ್ಗಂ (ಸೀ.)] ಕತ್ವಾನ, ಬುದ್ಧಸೇಟ್ಠಸ್ಸದಾಸಹಂ.
‘‘ಪರಿಭುತ್ತೇ ¶ ಮಹಾವೀರೇ, ಸಬ್ಬಞ್ಞುಲೋಕನಾಯಕೇ;
ಖಿಪ್ಪಂ ವಾತೋ ವೂಪಸಮಿ, ಸುಗತಸ್ಸ ಮಹೇಸಿನೋ.
‘‘ಪಸ್ಸದ್ಧಂ ¶ ದರಥಂ ದಿಸ್ವಾ, ಅನೋಮದಸ್ಸೀ ಮಹಾಯಸೋ;
ಸಕಾಸನೇ ನಿಸೀದಿತ್ವಾ, ಇಮಾ ಗಾಥಾ ಅಭಾಸಥ.
‘‘‘ಯೋ ಮೇ ಪಾದಾಸಿ ಭೇಸಜ್ಜಂ, ಬ್ಯಾಧಿಞ್ಚ ಸಮಯೀ ಮಮ;
ತಮಹಂ ಕಿತ್ತಯಿಸ್ಸಾಮಿ, ಸುಣಾಥ ಮಮ ಭಾಸತೋ.
‘‘‘ಕಪ್ಪಸತಸಹಸ್ಸಾನಿ, ದೇವಲೋಕೇ ರಮಿಸ್ಸತಿ;
ವಾದಿತೇ ತೂರಿಯೇ ತತ್ಥ, ಮೋದಿಸ್ಸತಿ ಸದಾ ಅಯಂ.
‘‘‘ಮನುಸ್ಸಲೋಕಮಾಗನ್ತ್ವಾ, ಸುಕ್ಕಮೂಲೇನ ಚೋದಿತೋ;
ಸಹಸ್ಸಕ್ಖತ್ತುಂ ರಾಜಾ ಚ, ಚಕ್ಕವತ್ತೀ ಭವಿಸ್ಸತಿ.
‘‘‘ಪಞ್ಚಪಞ್ಞಾಸಕಪ್ಪಮ್ಹಿ, ಅನೋಮೋ ನಾಮ ಖತ್ತಿಯೋ;
ಚಾತುರನ್ತೋ ವಿಜಿತಾವೀ, ಜಮ್ಬುಮಣ್ಡಸ್ಸ [ಜಮ್ಬುದೀಪಸ್ಸ (ಸ್ಯಾ.)] ಇಸ್ಸರೋ.
‘‘‘ಸತ್ತರತನಸಮ್ಪನ್ನೋ, ಚಕ್ಕವತ್ತೀ ಮಹಬ್ಬಲೋ;
ತಾವತಿಂಸೇಪಿ ಖೋಭೇತ್ವಾ, ಇಸ್ಸರಂ ಕಾರಯಿಸ್ಸತಿ.
‘‘‘ದೇವಭೂತೋ ¶ ಮನುಸ್ಸೋ ವಾ, ಅಪ್ಪಾಬಾಧೋ ಭವಿಸ್ಸತಿ;
ಪರಿಗ್ಗಹಂ ವಿವಜ್ಜೇತ್ವಾ, ಬ್ಯಾಧಿಂ ಲೋಕೇ ತರಿಸ್ಸತಿ.
‘‘‘ಅಪ್ಪರಿಮೇಯ್ಯೇ ಇತೋ ಕಪ್ಪೇ, ಓಕ್ಕಾಕಕುಲಸಮ್ಭವೋ;
ಗೋತಮೋ ನಾಮ ಗೋತ್ತೇನ, ಸತ್ಥಾ ಲೋಕೇ ಭವಿಸ್ಸತಿ.
‘‘‘ತಸ್ಸ ಧಮ್ಮೇಸು ದಾಯಾದೋ, ಓರಸೋ ಧಮ್ಮನಿಮ್ಮಿತೋ;
ಸಬ್ಬಾಸವೇ ಪರಿಞ್ಞಾಯ, ನಿಬ್ಬಾಯಿಸ್ಸತಿನಾಸವೋ.
‘‘‘ಕಿಲೇಸೇ ಝಾಪಯಿತ್ವಾನ, ತಣ್ಹಾಸೋತಂ ತರಿಸ್ಸತಿ;
ಬಾಕುಲೋ [ಬಕ್ಕುಲೋ (ಸೀ. ಸ್ಯಾ.)] ನಾಮ ನಾಮೇನ, ಹೇಸ್ಸತಿ ಸತ್ಥು ಸಾವಕೋ.
‘‘‘ಇದಂ ¶ ¶ ಸಬ್ಬಂ ಅಭಿಞ್ಞಾಯ, ಗೋತಮೋ ಸಕ್ಯಪುಙ್ಗವೋ;
ಭಿಕ್ಖುಸಙ್ಘೇ ನಿಸೀದಿತ್ವಾ, ಏತದಗ್ಗೇ ಠಪೇಸ್ಸತಿ’.
‘‘ಅನೋಮದಸ್ಸೀ ಭಗವಾ, ಸಯಮ್ಭೂ ಲೋಕನಾಯಕೋ;
ವಿವೇಕಾನುವಿಲೋಕೇನ್ತೋ, ಮಮಸ್ಸಮಮುಪಾಗಮಿ.
‘‘ಉಪಾಗತಂ ¶ ಮಹಾವೀರಂ, ಸಬ್ಬಞ್ಞುಂ ಲೋಕನಾಯಕಂ;
ಸಬ್ಬೋಸಧೇನ ತಪ್ಪೇಸಿಂ, ಪಸನ್ನೋ ಸೇಹಿ ಪಾಣಿಭಿ.
‘‘ತಸ್ಸ ಮೇ ಸುಕತಂ ಕಮ್ಮಂ, ಸುಖೇತ್ತೇ ಬೀಜಸಮ್ಪದಾ;
ಖೇಪೇತುಂ ನೇವ ಸಕ್ಕೋಮಿ, ತದಾ ಹಿ ಸುಕತಂ ಮಮ.
‘‘ಲಾಭಾ ಮಮ ಸುಲದ್ಧಂ ಮೇ, ಯೋಹಂ ಅದ್ದಕ್ಖಿ ನಾಯಕಂ;
ತೇನ ಕಮ್ಮಾವಸೇಸೇನ, ಪತ್ತೋಮ್ಹಿ ಅಚಲಂ ಪದಂ.
‘‘ಸಬ್ಬಮೇತಂ ಅಭಿಞ್ಞಾಯ, ಗೋತಮೋ ಸಕ್ಯಪುಙ್ಗವೋ;
ಭಿಕ್ಖುಸಙ್ಘೇ ನಿಸೀದಿತ್ವಾ, ಏತದಗ್ಗೇ ಠಪೇಸಿ ಮಂ.
‘‘ಅಪರಿಮೇಯ್ಯೇ ಇತೋ ಕಪ್ಪೇ, ಯಂ ಕಮ್ಮಮಕರಿಂ ತದಾ;
ದುಗ್ಗತಿಂ ನಾಭಿಜಾನಾಮಿ, ಭೇಸಜ್ಜಸ್ಸ ಇದಂ ಫಲಂ.
‘‘ಕಿಲೇಸಾ ಝಾಪಿತಾ ಮಯ್ಹಂ, ಭವಾ ಸಬ್ಬೇ ಸಮೂಹತಾ;
ಸಬ್ಬಾಸವಾ ಪರಿಕ್ಖೀಣಾ, ನತ್ಥಿ ದಾನಿ ಪುನಬ್ಭವೋ.
‘‘ಸ್ವಾಗತಂ ವತ ಮೇ ಆಸಿ…ಪೇ… ಕತಂ ಬುದ್ಧಸ್ಸ ಸಾಸನಂ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ¶ ಸುದಂ ಆಯಸ್ಮಾ ಬಾಕುಲೋ [ಬಕ್ಕುಲೋ (ಸೀ. ಸ್ಯಾ.)] ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ;
ಬಾಕುಲತ್ಥೇರಸ್ಸಾಪದಾನಂ ಛಟ್ಠಂ.
೭. ಗಿರಿಮಾನನ್ದತ್ಥೇರಅಪದಾನಂ
‘‘ಭರಿಯಾ ಮೇ ಕಾಲಙ್ಕತಾ, ಪುತ್ತೋ ಸೀವಥಿಕಂ ಗತೋ;
ಮಾತಾ ಪಿತಾ ಮತಾ ಭಾತಾ, ಏಕಚಿತಮ್ಹಿ [ಮಾತಾ ಪಿತಾ ಚ ಭಾತಾ ಚ, ಏಕಚಿತಕಮ್ಹಿ (ಸೀ. ಸ್ಯಾ.)] ಡಯ್ಹರೇ.
‘‘ತೇನ ಸೋಕೇನ ಸನ್ತತ್ತೋ, ಕಿಸೋ ಪಣ್ಡು ಅಹೋಸಹಂ;
ಚಿತ್ತಕ್ಖೇಪೋ ಚ ಮೇ ಆಸಿ, ತೇನ ಸೋಕೇನ ಅಟ್ಟಿತೋ.
‘‘ಸೋಕಸಲ್ಲಪರೇತೋಹಂ ¶ , ವನನ್ತಮುಪಸಙ್ಕಮಿಂ;
ಪವತ್ತಫಲಂ ಭುಞ್ಜಿತ್ವಾ, ರುಕ್ಖಮೂಲೇ ವಸಾಮಹಂ.
‘‘ಸುಮೇಧೋ ¶ ¶ ನಾಮ ಸಮ್ಬುದ್ಧೋ, ದುಕ್ಖಸ್ಸನ್ತಕರೋ ಜಿನೋ;
ಮಮುದ್ಧರಿತುಕಾಮೋ ಸೋ, ಆಗಞ್ಛಿ ಮಮ ಸನ್ತಿಕಂ.
‘‘ಪದಸದ್ದಂ ಸುಣಿತ್ವಾನ, ಸುಮೇಧಸ್ಸ ಮಹೇಸಿನೋ;
ಪಗ್ಗಹೇತ್ವಾನಹಂ ಸೀಸಂ, ಉಲ್ಲೋಕೇಸಿಂ ಮಹಾಮುನಿಂ.
‘‘ಉಪಾಗತೇ ಮಹಾವೀರೇ, ಪೀತಿ ಮೇ ಉದಪಜ್ಜಥ;
ತದಾಸಿಮೇಕಗ್ಗಮನೋ, ದಿಸ್ವಾ ತಂ ಲೋಕನಾಯಕಂ.
‘‘ಸತಿಂ ಪಟಿಲಭಿತ್ವಾನ, ಪಣ್ಣಮುಟ್ಠಿಮದಾಸಹಂ;
ನಿಸೀದಿ ಭಗವಾ ತತ್ಥ, ಅನುಕಮ್ಪಾಯ ಚಕ್ಖುಮಾ.
‘‘ನಿಸಜ್ಜ ¶ ತತ್ಥ ಭಗವಾ, ಸುಮೇಧೋ ಲೋಕನಾಯಕೋ;
ಧಮ್ಮಂ ಮೇ ಕಥಯೀ ಬುದ್ಧೋ, ಸೋಕಸಲ್ಲವಿನೋದನಂ.
‘‘‘ಅನವ್ಹಿತಾ ತತೋ ಆಗುಂ, ಅನನುಞ್ಞಾತಾ ಇತೋ ಗತಾ;
ಯಥಾಗತಾ ತಥಾ ಗತಾ, ತತ್ಥ ಕಾ ಪರಿದೇವನಾ.
‘‘‘ಯಥಾಪಿ ಪಥಿಕಾ ಸತ್ತಾ, ವಸ್ಸಮಾನಾಯ ವುಟ್ಠಿಯಾ;
ಸಭಣ್ಡಾ ಉಪಗಚ್ಛನ್ತಿ, ವಸ್ಸಸ್ಸಾಪತನಾಯ ತೇ.
‘‘‘ವಸ್ಸೇ ಚ ತೇ ಓರಮಿತೇ, ಸಮ್ಪಯನ್ತಿ ಯದಿಚ್ಛಕಂ;
ಏವಂ ಮಾತಾ ಪಿತಾ ತುಯ್ಹಂ, ತತ್ಥ ಕಾ ಪರಿದೇವನಾ.
‘‘‘ಆಗನ್ತುಕಾ ಪಾಹುನಕಾ, ಚಲಿತೇರಿತಕಮ್ಪಿತಾ;
ಏವಂ ಮಾತಾ ಪಿತಾ ತುಯ್ಹಂ, ತತ್ಥ ಕಾ ಪರಿದೇವನಾ.
‘‘‘ಯಥಾಪಿ ಉರಗೋ ಜಿಣ್ಣಂ, ಹಿತ್ವಾ ಗಚ್ಛತಿ ಸಂ ತಚಂ [ಸಂತನುಂ (ಸ್ಯಾ. ಕ.)];
ಏವಂ ಮಾತಾ ಪಿತಾ ತುಯ್ಹಂ, ಸಂ ತನುಂ ಇಧ ಹೀಯರೇ’.
‘‘ಬುದ್ಧಸ್ಸ ಗಿರಮಞ್ಞಾಯ, ಸೋಕಸಲ್ಲಂ ವಿವಜ್ಜಯಿಂ;
ಪಾಮೋಜ್ಜಂ ಜನಯಿತ್ವಾನ, ಬುದ್ಧಸೇಟ್ಠಂ ಅವನ್ದಹಂ.
‘‘ವನ್ದಿತ್ವಾನ ಮಹಾನಾಗಂ, ಪೂಜಯಿಂ ಗಿರಿಮಞ್ಜರಿಂ [ಗಿರಿಮಞ್ಜರಿಮಪೂಜಯಿಂ (ಸೀ. ಸ್ಯಾ.)];
ದಿಬ್ಬಗನ್ಧಂ ಸಮ್ಪವನ್ತಂ [ದಿಬ್ಬಗನ್ಧೇನ ಸಮ್ಪನ್ನಂ (ಸೀ. ಸ್ಯಾ.)], ಸುಮೇಧಂ ಲೋಕನಾಯಕಂ.
‘‘ಪೂಜಯಿತ್ವಾನ ಸಮ್ಬುದ್ಧಂ, ಸಿರೇ ಕತ್ವಾನ ಅಞ್ಜಲಿಂ;
ಅನುಸ್ಸರಂ ಗುಣಗ್ಗಾನಿ, ಸನ್ಥವಿಂ ಲೋಕನಾಯಕಂ.
‘‘ನಿತ್ತಿಣ್ಣೋಸಿ ¶ ¶ [ನಿತ್ತಣ್ಹೋಸಿ (ಸೀ.), ವಿತಿಣ್ಣೋಸಿ (ಸ್ಯಾ.)] ಮಹಾವೀರ, ಸಬ್ಬಞ್ಞು ಲೋಕನಾಯಕ;
ಸಬ್ಬೇ ಸತ್ತೇ ಉದ್ಧರಸಿ, ಞಾಣೇನ ತ್ವಂ ಮಹಾಮುನೇ.
‘‘ವಿಮತಿಂ ¶ ¶ ದ್ವೇಳ್ಹಕಂ ವಾಪಿ, ಸಞ್ಛಿನ್ದಸಿ ಮಹಾಮುನೇ;
ಪಟಿಪಾದೇಸಿ ಮೇ ಮಗ್ಗಂ, ತವ ಞಾಣೇನ ಚಕ್ಖುಮ.
‘‘ಅರಹಾ ವಸಿಪತ್ತಾ [ಸಿದ್ಧಿಪತ್ತಾ (ಸೀ. ಸ್ಯಾ.)] ಚ, ಛಳಭಿಞ್ಞಾ ಮಹಿದ್ಧಿಕಾ;
ಅನ್ತಲಿಕ್ಖಚರಾ ಧೀರಾ, ಪರಿವಾರೇನ್ತಿ ತಾವದೇ.
‘‘ಪಟಿಪನ್ನಾ ಚ ಸೇಖಾ ಚ, ಫಲಟ್ಠಾ ಸನ್ತಿ ಸಾವಕಾ;
ಸೂರೋದಯೇವ ಪದುಮಾ, ಪುಪ್ಫನ್ತಿ ತವ ಸಾವಕಾ.
‘‘ಮಹಾಸಮುದ್ದೋವಕ್ಖೋಭೋ, ಅತುಲೋಪಿ [ಯಥಾ ಸಮುದ್ದೋ ಅಕ್ಖೋಭೋ, ಅತುಲೋ ಚ (ಸೀ.)] ದುರುತ್ತರೋ;
ಏವಂ ಞಾಣೇನ ಸಮ್ಪನ್ನೋ, ಅಪ್ಪಮೇಯ್ಯೋಸಿ ಚಕ್ಖುಮ.
‘‘ವನ್ದಿತ್ವಾಹಂ ಲೋಕಜಿನಂ, ಚಕ್ಖುಮನ್ತಂ ಮಹಾಯಸಂ;
ಪುಥು ದಿಸಾ ನಮಸ್ಸನ್ತೋ, ಪಟಿಕುಟಿಕೋ ಅಗಞ್ಛಹಂ.
‘‘ದೇವಲೋಕಾ ಚವಿತ್ವಾನ, ಸಮ್ಪಜಾನೋ ಪತಿಸ್ಸತೋ;
ಓಕ್ಕಮಿಂ ಮಾತುಯಾ ಕುಚ್ಛಿಂ, ಸನ್ಧಾವನ್ತೋ ಭವಾಭವೇ.
‘‘ಅಗಾರಾ ಅಭಿನಿಕ್ಖಮ್ಮ, ಪಬ್ಬಜಿಂ ಅನಗಾರಿಯಂ;
ಆತಾಪೀ ನಿಪಕೋ ಝಾಯೀ, ಪಟಿಸಲ್ಲಾನಗೋಚರೋ.
‘‘ಪಧಾನಂ ಪದಹಿತ್ವಾನ, ತೋಸಯಿತ್ವಾ ಮಹಾಮುನಿಂ;
ಚನ್ದೋವಬ್ಭಘನಾ ಮುತ್ತೋ, ವಿಚರಾಮಿ ಅಹಂ ಸದಾ.
‘‘ವಿವೇಕಮನುಯುತ್ತೋಮ್ಹಿ, ಉಪಸನ್ತೋ ನಿರೂಪಧಿ;
ಸಬ್ಬಾಸವೇ ಪರಿಞ್ಞಾಯ, ವಿಹರಾಮಿ ಅನಾಸವೋ.
‘‘ತಿಂಸಕಪ್ಪಸಹಸ್ಸಮ್ಹಿ, ಯಂ ಬುದ್ಧಮಭಿಪೂಜಯಿಂ;
ದುಗ್ಗತಿಂ ನಾಭಿಜಾನಾಮಿ, ಬುದ್ಧಪೂಜಾಯಿದಂ ಫಲಂ.
‘‘ಕಿಲೇಸಾ ¶ ಝಾಪಿತಾ ಮಯ್ಹಂ, ಭವಾ ಸಬ್ಬೇ ಸಮೂಹತಾ;
ಸಬ್ಬಾಸವಾ ಪರಿಕ್ಖೀಣಾ, ನತ್ಥಿ ದಾನಿ ಪುನಬ್ಭವೋ.
‘‘ಸ್ವಾಗತಂ ವತ ಮೇ ಆಸಿ…ಪೇ… ಕತಂ ಬುದ್ಧಸ್ಸ ಸಾಸನಂ.
‘‘ಪಟಿಸಮ್ಭಿದಾ ¶ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಗಿರಿಮಾನನ್ದೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಗಿರಿಮಾನನ್ದತ್ಥೇರಸ್ಸಾಪದಾನಂ ಸತ್ತಮಂ.
೮. ಸಳಲಮಣ್ಡಪಿಯತ್ಥೇರಅಪದಾನಂ
‘‘ನಿಬ್ಬುತೇ ¶ ¶ ಕಕುಸನ್ಧಮ್ಹಿ, ಬ್ರಾಹ್ಮಣಮ್ಹಿ ವುಸೀಮತಿ;
ಗಹೇತ್ವಾ ಸಳಲಂ ಮಾಲಂ, ಮಣ್ಡಪಂ ಕಾರಯಿಂ ಅಹಂ.
‘‘ತಾವತಿಂಸಗತೋ ಸನ್ತೋ, ಲಭಾಮಿ ಬ್ಯಮ್ಹಮುತ್ತಮಂ;
ಅಞ್ಞೇ ದೇವೇತಿರೋಚಾಮಿ, ಪುಞ್ಞಕಮ್ಮಸ್ಸಿದಂ ಫಲಂ.
‘‘ದಿವಾ ವಾ ಯದಿ ವಾ ರತ್ತಿಂ, ಚಙ್ಕಮನ್ತೋ ಠಿತೋ ಚಹಂ;
ಛನ್ನೋ ಸಳಲಪುಪ್ಫೇಹಿ, ಪುಞ್ಞಕಮ್ಮಸ್ಸಿದಂ ಫಲಂ.
‘‘ಇಮಸ್ಮಿಂಯೇವ ಕಪ್ಪಮ್ಹಿ, ಯಂ ಬುದ್ಧಮಭಿಪೂಜಯಿಂ;
ದುಗ್ಗತಿಂ ನಾಭಿಜಾನಾಮಿ, ಬುದ್ಧಪೂಜಾಯಿದಂ ಫಲಂ.
‘‘ಕಿಲೇಸಾ ¶ ಝಾಪಿತಾ ಮಯ್ಹಂ…ಪೇ… ವಿಹರಾಮಿ ಅನಾಸವೋ.
‘‘ಸ್ವಾಗತಂ ವತ ಮೇ ಆಸಿ…ಪೇ… ಕತಂ ಬುದ್ಧಸ್ಸ ಸಾಸನಂ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಸಳಲಮಣ್ಡಪಿಯೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಸಳಲಮಣ್ಡಪಿಯತ್ಥೇರಸ್ಸಾಪದಾನಂ ಅಟ್ಠಮಂ.
೯. ಸಬ್ಬದಾಯಕತ್ಥೇರಅಪದಾನಂ
‘‘ಮಹಾಸಮುದ್ದಂ ಓಗಯ್ಹ, ಭವನಂ ಮೇ ಸುನಿಮ್ಮಿತಂ;
ಸುನಿಮ್ಮಿತಾ ಪೋಕ್ಖರಣೀ, ಚಕ್ಕವಾಕಪಕೂಜಿತಾ.
‘‘ಮನ್ದಾಲಕೇಹಿ ಸಞ್ಛನ್ನಾ, ಪದುಮುಪ್ಪಲಕೇಹಿ ಚ;
ನದೀ ಚ ಸನ್ದತೇ ತತ್ಥ, ಸುಪತಿತ್ಥಾ ಮನೋರಮಾ.
‘‘ಮಚ್ಛಕಚ್ಛಪಸಞ್ಛನ್ನಾ ¶ , ನಾನಾದಿಜಸಮೋತ್ಥತಾ;
ಮಯೂರಕೋಞ್ಚಾಭಿರುದಾ, ಕೋಕಿಲಾದೀಹಿ ವಗ್ಗುಹಿ.
‘‘ಪಾರೇವತಾ ರವಿಹಂಸಾ ಚ, ಚಕ್ಕವಾಕಾ ನದೀಚರಾ;
ದಿನ್ದಿಭಾ ಸಾಳಿಕಾ ಚೇತ್ಥ, ಪಮ್ಮಕಾ [ಪಮ್ಪಕಾ (ಸೀ.), ಚಪ್ಪಕಾ (ಸ್ಯಾ.)] ಜೀವಜೀವಕಾ.
‘‘ಹಂಸಾ ¶ ಕೋಞ್ಚಾಪಿ ನದಿತಾ [ಕೋಞ್ಚಾಭಿನದಿತಾ (ಸೀ. ಸ್ಯಾ.)], ಕೋಸಿಯಾ ಪಿಙ್ಗಲಾ ಬಹೂ;
ಸತ್ತರತನಸಮ್ಪನ್ನಾ, ಮಣಿಮುತ್ತಿಕವಾಲುಕಾ.
‘‘ಸಬ್ಬಸೋಣ್ಣಮಯಾ ¶ ರುಕ್ಖಾ, ನಾನಾಗನ್ಧಸಮೇರಿತಾ;
ಉಜ್ಜೋತೇನ್ತಿ ದಿವಾರತ್ತಿಂ, ಭವನಂ ಸಬ್ಬಕಾಲಿಕಂ.
‘‘ಸಟ್ಠಿ ¶ ತೂರಿಯಸಹಸ್ಸಾನಿ, ಸಾಯಂ ಪಾತೋ ಪವಜ್ಜರೇ;
ಸೋಳಸಿತ್ಥಿಸಹಸ್ಸಾನಿ, ಪರಿವಾರೇನ್ತಿ ಮಂ ಸದಾ.
‘‘ಅಭಿನಿಕ್ಖಮ್ಮ ಭವನಾ, ಸುಮೇಧಂ ಲೋಕನಾಯಕಂ;
ಪಸನ್ನಚಿತ್ತೋ ಸುಮನೋ, ವನ್ದಯಿಂ ತಂ ಮಹಾಯಸಂ.
‘‘ಸಮ್ಬುದ್ಧಂ ಅಭಿವಾದೇತ್ವಾ, ಸಸಙ್ಘಂ ತಂ ನಿಮನ್ತಯಿಂ;
ಅಧಿವಾಸೇಸಿ ಸೋ ಧೀರೋ, ಸುಮೇಧೋ ಲೋಕನಾಯಕೋ.
‘‘ಮಮ ಧಮ್ಮಕಥಂ ಕತ್ವಾ, ಉಯ್ಯೋಜೇಸಿ ಮಹಾಮುನಿ;
ಸಮ್ಬುದ್ಧಂ ಅಭಿವಾದೇತ್ವಾ, ಭವನಂ ಮೇ ಉಪಾಗಮಿಂ.
‘‘ಆಮನ್ತಯಿಂ ಪರಿಜನಂ, ಸಬ್ಬೇ ಸನ್ನಿಪತಾಥ [ಸನ್ನಿಪತತ್ಥ (ಕ.)] ವೋ;
ಪುಬ್ಬಣ್ಹಸಮಯಂ ಬುದ್ಧೋ, ಭವನಂ ಆಗಮಿಸ್ಸತಿ.
‘‘ಲಾಭಾ ಅಮ್ಹಂ ಸುಲದ್ಧಂ ನೋ, ಯೇ ವಸಾಮ ತವನ್ತಿಕೇ;
ಮಯಮ್ಪಿ ಬುದ್ಧಸೇಟ್ಠಸ್ಸ, ಪೂಜಂ ಕಸ್ಸಾಮ ಸತ್ಥುನೋ.
‘‘ಅನ್ನಪನಂ ಪಟ್ಠಪೇತ್ವಾ, ಕಾಲಂ ಆರೋಚಯಿಂ ಅಹಂ;
ವಸೀಸತಸಹಸ್ಸೇಹಿ, ಉಪೇಸಿ ಲೋಕನಾಯಕೋ.
‘‘ಪಞ್ಚಙ್ಗಿಕೇಹಿ ತೂರಿಯೇಹಿ, ಪಚ್ಚುಗ್ಗಮನಮಕಾಸಹಂ;
ಸಬ್ಬಸೋಣ್ಣಮಯೇ ಪೀಠೇ, ನಿಸೀದಿ ಪುರಿಸುತ್ತಮೋ.
‘‘ಉಪರಿಚ್ಛದನಂ ¶ ಆಸಿ, ಸಬ್ಬಸೋಣ್ಣಮಯಂ ತದಾ;
ಬೀಜನಿಯೋ ಪವಾಯನ್ತಿ, ಭಿಕ್ಖುಸಙ್ಘಸ್ಸ ಅನ್ತರೇ.
‘‘ಪಹೂತೇನನ್ನಪಾನೇನ ¶ , ಭಿಕ್ಖುಸಙ್ಘಮತಪ್ಪಯಿಂ;
ಪಚ್ಚೇಕದುಸ್ಸಯುಗಳೇ, ಭಿಕ್ಖುಸಙ್ಘಸ್ಸದಾಸಹಂ.
‘‘ಯಂ ವದನ್ತಿ ಸುಮೇಧೋತಿ, ಲೋಕಾಹುತಿಪಟಿಗ್ಗಹಂ;
ಭಿಕ್ಖುಸಙ್ಘೇ ನಿಸೀದಿತ್ವಾ, ಇಮಾ ಗಾಥಾ ಅಭಾಸಥ.
‘‘ಯೋ ಮೇ ಅನ್ನೇನ ಪಾನೇನ, ಸಬ್ಬೇ ಇಮೇ ಚ ತಪ್ಪಯಿಂ;
ತಮಹಂ ಕಿತ್ತಯಿಸ್ಸಾಮಿ, ಸುಣಾಥ ಮಮ ಭಾಸತೋ.
‘‘ಅಟ್ಠಾರಸೇ ಕಪ್ಪಸತೇ, ದೇವಲೋಕೇ ರಮಿಸ್ಸತಿ;
ಸಹಸ್ಸಕ್ಖತ್ತುಂ ರಾಜಾ ಚ, ಚಕ್ಕವತ್ತೀ ಭವಿಸ್ಸತಿ.
‘‘ಉಪ್ಪಜ್ಜತಿ ¶ [ಉಪಗಚ್ಛತಿ (ಸೀ.)] ಯಂ ಯೋನಿಂ, ದೇವತ್ತಂ ಅಥ ಮಾನುಸಂ;
ಸಬ್ಬದಾ ಸಬ್ಬಸೋವಣ್ಣಂ, ಛದನಂ ಧಾರಯಿಸ್ಸತಿ.
‘‘ತಿಂಸಕಪ್ಪಸಹಸ್ಸಮ್ಹಿ, ಓಕ್ಕಾಕಕುಸಲಸಮ್ಭವೋ;
ಗೋತಮೋ ನಾಮ ಗೋತ್ತೇನ, ಸತ್ಥಾ ಲೋಕೇ ಭವಿಸ್ಸತಿ.
‘‘ತಸ್ಸ ¶ ಧಮ್ಮೇಸು ದಾಯಾದೋ, ಓರಸೋ ಧಮ್ಮನಿಮ್ಮಿತೋ;
ಸಬ್ಬಾಸವೇ ಪರಿಞ್ಞಾಯ, ನಿಬ್ಬಾಯಿಸ್ಸತಿನಾಸವೋ.
‘‘‘ಭಿಕ್ಖುಸಙ್ಘೇ ನಿಸೀದಿತ್ವಾ, ಸೀಹನಾದಂ ನದಿಸ್ಸತಿ;
ಚಿತಕೇ ಛತ್ತಂ ಧಾರೇನ್ತಿ, ಹೇಟ್ಠಾ ಛತ್ತಮ್ಹಿ ಡಯ್ಹಥ’.
‘‘ಸಾಮಞ್ಞಂ ಮೇ ಅನುಪ್ಪತ್ತಂ, ಕಿಲೇಸಾ ಝಾಪಿತಾ ಮಯಾ;
ಮಣ್ಡಪೇ ರುಕ್ಖಮೂಲೇ ವಾ, ಸನ್ತಾಪೋ ಮೇ ನ ವಿಜ್ಜತಿ.
‘‘ತಿಂಸಕಪ್ಪಸಹಸ್ಸಮ್ಹಿ ¶ , ಯಂ ದಾನಮದದಿಂ ತದಾ;
ದುಗ್ಗತಿಂ ನಾಭಿಜಾನಾಮಿ, ಸಬ್ಬದಾನಸ್ಸಿದಂ ಫಲಂ.
‘‘ಕಿಲೇಸಾ ಝಾಪಿತಾ ಮಯ್ಹಂ…ಪೇ… ವಿಹರಾಮಿ ಅನಾಸವೋ.
‘‘ಸ್ವಾಗತಂ ವತ ಮೇ ಆಸಿ…ಪೇ… ಕತಂ ಬುದ್ಧಸ್ಸ ಸಾಸನಂ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಸಬ್ಬದಾಯಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಸಬ್ಬದಾಯಕತ್ಥೇರಸ್ಸಾಪದಾನಂ ನವಮಂ.
೧೦. ಅಜಿತತ್ಥೇರಅಪದಾನಂ
‘‘ಪದುಮುತ್ತರೋ ¶ ನಾಮ ಜಿನೋ, ಸಬ್ಬಧಮ್ಮಾನ ಪಾರಗೂ;
ಅಜ್ಝೋಗಾಹೇತ್ವಾ ಹಿಮವನ್ತಂ, ನಿಸೀದಿ ಲೋಕನಾಯಕೋ.
‘‘ನಾಹಂ ಅದ್ದಕ್ಖಿಂ [ಪಸ್ಸಾಮಿ (?)] ಸಮ್ಬುದ್ಧಂ, ನಪಿ ಸದ್ದಂ ಸುಣೋಮಹಂ;
ಮಮ ಭಕ್ಖಂ ಗವೇಸನ್ತೋ, ಆಹಿಣ್ಡಾಮಿ ವನೇ ಅಹಂ [ತದಾ (ಸೀ.)].
‘‘ತತ್ಥದ್ದಸ್ಸಾಸಿಂ ಸಮ್ಬುದ್ಧಂ, ದ್ವತ್ತಿಂಸವರಲಕ್ಖಣಂ;
ದಿಸ್ವಾನ ವಿತ್ತಿಮಾಪಜ್ಜಿಂ [ಚಿತ್ತಮಾಪಜ್ಜಿ (ಸೀ.), ಚಿತ್ತಮಾಪಜ್ಜಿಂ (ಸ್ಯಾ.)], ಸತ್ತೋ ಕೋ ನಾಮಯಂ ಭವೇ.
‘‘ಲಕ್ಖಣಾನಿ ¶ ವಿಲೋಕೇತ್ವಾ, ಮಮ ವಿಜ್ಜಂ ಅನುಸ್ಸರಿಂ;
ಸುತಞ್ಹಿ ಮೇತಂ ವುಡ್ಢಾನಂ, ಪಣ್ಡಿತಾನಂ ಸುಭಾಸಿತಂ.
‘‘ತೇಸಂ ¶ ಯಥಾ ತಂ ವಚನಂ, ಅಯಂ ಬುದ್ಧೋ ಭವಿಸ್ಸತಿ;
ಯಂನೂನಾಹಂ ಸಕ್ಕರೇಯ್ಯಂ, ಗತಿಂ ಮೇ ಸೋಧಯಿಸ್ಸತಿ.
‘‘ಖಿಪ್ಪಂ ಅಸ್ಸಮಮಾಗನ್ತ್ವಾ, ಮಧುತೇಲಂ ಗಹಿಂ ಅಹಂ;
ಕೋಲಮ್ಬಕಂ ಗಹೇತ್ವಾನ, ಉಪಗಚ್ಛಿಂ ವಿನಾಯಕಂ [ನರಾಸಭಂ (ಸೀ.)].
‘‘ತಿದಣ್ಡಕೇ ಗಹೇತ್ವಾನ, ಅಬ್ಭೋಕಾಸೇ ಠಪೇಸಹಂ;
ಪದೀಪಂ ಪಜ್ಜಲಿತ್ವಾನ, ಅಟ್ಠಕ್ಖತ್ತುಂ ಅವನ್ದಹಂ.
‘‘ಸತ್ತರತ್ತಿನ್ದಿವಂ ¶ ಬುದ್ಧೋ, ನಿಸೀದಿ ಪುರಿಸುತ್ತಮೋ;
ತತೋ ರತ್ಯಾ ವಿವಸಾನೇ, ವುಟ್ಠಾಸಿ ಲೋಕನಾಯಕೋ.
‘‘ಪಸನ್ನಚಿತ್ತೋ ಸುಮನೋ, ಸಬ್ಬರತ್ತಿನ್ದಿವಂ ಅಹಂ;
ದೀಪಂ ಬುದ್ಧಸ್ಸ ಪಾದಾಸಿಂ, ಪಸನ್ನೋ ಸೇಹಿ ಪಾಣಿಭಿ.
‘‘ಸಬ್ಬೇ ವನಾ ಗನ್ಧಮಯಾ, ಪಬ್ಬತೇ ಗನ್ಧಮಾದನೇ;
ಬುದ್ಧಸ್ಸ ಆನುಭಾವೇನ, ಆಗಚ್ಛುಂ ಬುದ್ಧಸನ್ತಿಕಂ [ಉಪಗಚ್ಛುಂ ತದಾ ಜಿನಂ (ಸೀ.)].
‘‘ಯೇ ಕೇಚಿ ಪುಪ್ಫಗನ್ಧಾಸೇ, ಪುಪ್ಫಿತಾ ಧರಣೀರುಹಾ;
ಬುದ್ಧಸ್ಸ ಆನುಭಾವೇನ, ಸಬ್ಬೇ ಸನ್ನಿಪತುಂ ತದಾ.
‘‘ಯಾವತಾ ಹಿಮವನ್ತಮ್ಹಿ, ನಾಗಾ ಚ ಗರುಳಾ ಉಭೋ;
ಧಮ್ಮಞ್ಚ ಸೋತುಕಾಮಾ ತೇ, ಆಗಚ್ಛುಂ ಬುದ್ಧಸನ್ತಿಕಂ.
‘‘ದೇವಲೋ ¶ ನಾಮ ಸಮಣೋ, ಬುದ್ಧಸ್ಸ ಅಗ್ಗಸಾವಕೋ;
ವಸೀಸತಸಹಸ್ಸೇಹಿ, ಬುದ್ಧಸನ್ತಿಕುಪಾಗಮಿ.
‘‘ಪದುಮುತ್ತರೋ ¶ ಲೋಕವಿದೂ, ಆಹುತೀನಂ ಪಟಿಗ್ಗಹೋ;
ಭಿಕ್ಖುಸಙ್ಘೇ ನಿಸೀದಿತ್ವಾ, ಇಮಾ ಗಾಥಾ ಅಭಾಸಥ.
‘‘‘ಯೋ ಮೇ ದೀಪಂ ಪದೀಪೇಸಿ, ಪಸನ್ನೋ ಸೇಹಿ ಪಾಣಿಭಿ;
ತಮಹಂ ಕಿತ್ತಯಿಸ್ಸಾಮಿ, ಸುಣಾಥ ಮಮ ಭಾಸತೋ.
‘‘‘ಸಟ್ಠಿ ಕಪ್ಪಸಹಸ್ಸಾನಿ, ದೇವಲೋಕೇ ರಮಿಸ್ಸತಿ;
ಸಹಸ್ಸಕ್ಖತ್ತುಂ ರಾಜಾ ಚ, ಚಕ್ಕವತ್ತೀ ಭವಿಸ್ಸತಿ.
ಸೋಳಸಮಂ ಭಾಣವಾರಂ.
‘‘‘ಛತ್ತಿಸಕ್ಖತ್ತುಂ ದೇವಿನ್ದೋ, ದೇವರಜ್ಜಂ ಕರಿಸ್ಸತಿ;
ಪಥವಿಯಂ ಸತ್ತಸತಂ, ವಿಪುಲಂ ರಜ್ಜಂ ಕರಿಸ್ಸತಿ.
‘‘‘ಪದೇಸರಜ್ಜಂ ¶ ವಿಪುಲಂ, ಗಣನಾತೋ ಅಸಙ್ಖಿಯಂ;
ಇಮಿನಾ ದೀಪದಾನೇನ, ದಿಬ್ಬಚಕ್ಖು ಭವಿಸ್ಸತಿ.
‘‘‘ಸಮನ್ತತೋ ಅಟ್ಠಕೋಸಂ [ಅಡ್ಢಕೋಸಂ (ಸೀ. ಸ್ಯಾ.)], ಪಸ್ಸಿಸ್ಸತಿ ಅಯಂ ಸದಾ;
ದೇವಲೋಕಾ ಚವನ್ತಸ್ಸ, ನಿಬ್ಬತ್ತನ್ತಸ್ಸ ಜನ್ತುನೋ.
‘‘‘ದಿವಾ ವಾ ಯದಿ ವಾ ರತ್ತಿಂ, ಪದೀಪಂ ಧಾರಯಿಸ್ಸತಿ;
ಜಾಯಮಾನಸ್ಸ ಸತ್ತಸ್ಸ, ಪುಞ್ಞಕಮ್ಮಸಮಙ್ಗಿನೋ.
‘‘‘ಯಾವತಾ ನಗರಂ ಆಸಿ, ತಾವತಾ ಜೋತಯಿಸ್ಸತಿ;
ಉಪಪಜ್ಜತಿ ಯಂ ಯೋನಿಂ, ದೇವತ್ತಂ ಅಥ ಮಾನುಸಂ.
‘‘‘ಅಸ್ಸೇವ ದೀಪದಾನಸ್ಸ, [ಅಟ್ಠದೀಪಫಲೇನ ಹಿ; ಉಪಟ್ಠಿಸ್ಸನ್ತಿಮಂ ಜನ್ತುಂ (ಸ್ಯಾ.), ಅಟ್ಠ ದೀಪಾ ಫಲೇನ ಹಿ; ನ ಜಹಿಸ್ಸನ್ತಿ’ಮಂ ಜನ್ತುಂ (?)] ಅಟ್ಠದೀಪಫಲೇನ ಹಿ;
ನ ಜಯಿಸ್ಸನ್ತಿಮಂ ಜನ್ತೂ [ಅಟ್ಠದೀಪಫಲೇನ ಹಿ; ಉಪಟ್ಠಿಸ್ಸನ್ತಿಮಂ ಜನ್ತುಂ (ಸ್ಯಾ.), ಅಟ್ಠ ದೀಪಾ ಫಲೇನ ಹಿ; ನ ಜಹಿಸ್ಸನ್ತಿ’ಮಂ ಜನ್ತುಂ (?)], ದೀಪದಾನಸ್ಸಿದಂ ಫಲಂ.
‘‘‘ಕಪ್ಪಸತಸಹಸ್ಸಮ್ಹಿ ¶ ¶ , ಓಕ್ಕಾಕಕುಲಸಮ್ಭವೋ;
ಗೋತಮೋ ನಾಮ ಗೋತ್ತೇನ, ಸತ್ಥಾ ಲೋಕೇ ಭವಿಸ್ಸತಿ.
‘‘‘ತಸ್ಸ ಧಮ್ಮೇಸು ದಾಯಾದೋ, ಓರಸೋ ಧಮ್ಮನಿಮ್ಮಿತೋ;
ಸಬ್ಬಾಸವೇ ಪರಿಞ್ಞಾಯ, ನಿಬ್ಬಾಯಿಸ್ಸತಿನಾಸವೋ.
‘‘‘ತೋಸಯಿತ್ವಾನ ¶ ಸಮ್ಬುದ್ಧಂ, ಗೋತಮಂ ಸಕ್ಯಪುಙ್ಗವಂ;
ಅಜಿತೋ ನಾಮ ನಾಮೇನ, ಹೇಸ್ಸತಿ ಸತ್ಥು ಸಾವಕೋ’.
‘‘ಸಟ್ಠಿ ಕಪ್ಪಸಹಸ್ಸಾನಿ, ದೇವಲೋಕೇ ರಮಿಂ ಅಹಂ;
ತತ್ರಾಪಿ ಮೇ ದೀಪಸತಂ, ಜೋತತೇ ನಿಚ್ಚಕಾಲಿಕಂ [ಸಬ್ಬಕಾಲಿಕಂ (ಸೀ.)].
‘‘ದೇವಲೋಕೇ ಮನುಸ್ಸೇ ವಾ, ನಿದ್ಧಾವನ್ತಿ ಪಭಾ ಮಮ;
ಬುದ್ಧಸೇಟ್ಠಂ ಸರಿತ್ವಾನ, ಭಿಯ್ಯೋ ಹಾಸಂ ಜನೇಸಹಂ.
‘‘ತುಸಿತಾಹಂ ಚವಿತ್ವಾನ, ಓಕ್ಕಮಿಂ ಮಾತುಕುಚ್ಛಿಯಂ;
ಜಾಯಮಾನಸ್ಸ ಸನ್ತಸ್ಸ, ಆಲೋಕೋ ವಿಪುಲೋ ಅಹು.
‘‘ಅಗಾರಾ ಅಭಿನಿಕ್ಖಮ್ಮ, ಪಬ್ಬಜಿಂ ಅನಗಾರಿಯಂ;
ಬಾವರಿಂ ಉಪಸಙ್ಕಮ್ಮ, ಸಿಸ್ಸತ್ತಂ ಅಜ್ಝುಪಾಗಮಿಂ.
‘‘ಹಿಮವನ್ತೇ ವಸನ್ತೋಹಂ, ಅಸ್ಸೋಸಿಂ ಲೋಕನಾಯಕಂ;
ಉತ್ತಮತ್ಥಂ ಗವೇಸನ್ತೋ, ಉಪಗಚ್ಛಿಂ ವಿನಾಯಕಂ.
‘‘ದನ್ತೋ ಬುದ್ಧೋ ದಮೇತಾವೀ, ಓಘತಿಣ್ಣೋ ನಿರೂಪಧಿ;
ನಿಬ್ಬಾನಂ ಕಥಯೀ ಬುದ್ಧೋ, ಸಬ್ಬದುಕ್ಖಪ್ಪಮೋಚನಂ.
‘‘ತಂ ¶ ಮೇ ಆಗಮನಂ ಸಿದ್ಧಂ, ತೋಸಿತೋಹಂ ಮಹಾಮುನಿಂ;
ತಿಸ್ಸೋ ವಿಜ್ಜಾ ಅನುಪ್ಪತ್ತಾ, ಕತಂ ಬುದ್ಧಸ್ಸ ಸಾಸನಂ.
‘‘ಸತಸಹಸ್ಸಿತೋ ¶ ಕಪ್ಪೇ, ಯಂ ದೀಪಮದದಿಂ ತದಾ;
ದುಗ್ಗತಿಂ ನಾಭಿಜಾನಾಮಿ, ದೀಪದಾನಸ್ಸಿದಂ ಫಲಂ.
‘‘ಕಿಲೇಸಾ ಝಾಪಿತಾ ಮಯ್ಹಂ…ಪೇ… ವಿಹರಾಮಿ ಅನಾಸವೋ.
‘‘ಸ್ವಾಗತಂ ವತ ಮೇ ಆಸಿ…ಪೇ… ಕತಂ ಬುದ್ಧಸ್ಸ ಸಾಸನಂ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಅಜಿತೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಅಜಿತತ್ಥೇರಸ್ಸಾಪದಾನಂ ದಸಮಂ.
ಪಿಲಿನ್ದವಚ್ಛವಗ್ಗೋ ಚತ್ತಾಲೀಸಮೋ.
ತಸ್ಸುದ್ದಾನಂ ¶ –
ಪಿಲಿನ್ದವಚ್ಛೋ ಸೇಲೋ ಚ, ಸಬ್ಬಕಿತ್ತೀ ಮಧುಂದದೋ;
ಕೂಟಾಗಾರೀ ಬಾಕುಲೋ ಚ, ಗಿರಿ ಸಳಲಸವ್ಹಯೋ.
ಸಬ್ಬದೋ ¶ ಅಜಿತೋ ಚೇವ, ಗಾಥಾಯೋ ಗಣಿತಾ ಇಹ;
ಸತಾನಿ ಪಞ್ಚ ಗಾಥಾನಂ, ವೀಸತಿ ಚ ತದುತ್ತರೀತಿ.
ಅಥ ವಗ್ಗುದ್ದಾನಂ –
ಪದುಮಾರಕ್ಖದೋ ¶ ಚೇವ, ಉಮಾ ಗನ್ಧೋದಕೇನ ಚ;
ಏಕಪದ್ಮ ಸದ್ದಸಞ್ಞೀ, ಮನ್ದಾರಂ ಬೋಧಿವನ್ದಕೋ.
ಅವಟಞ್ಚ ಪಿಲಿನ್ದಿ [ಏವಮೇವ ದಿಸ್ಸತಿ] ಚ, ಗಾಥಾಯೋ ಗಣಿತಾ ಇಹ;
ಚತುಸತ್ತತಿ ಗಾಥಾಯೋ, ಏಕಾದಸ ಸತಾನಿ ಚ.
ಪದುಮವಗ್ಗದಸಕಂ.
ಚತುತ್ಥಸತಕಂ ಸಮತ್ತಂ.
೪೧. ಮೇತ್ತೇಯ್ಯವಗ್ಗೋ
೧. ತಿಸ್ಸಮೇತ್ತೇಯ್ಯತ್ಥೇರಅಪದಾನಂ
‘‘ಪಬ್ಭಾರಕೂಟಂ ¶ ¶ ¶ ¶ ನಿಸ್ಸಾಯ, ಸೋಭಿತೋ ನಾಮ ತಾಪಸೋ;
ಪವತ್ತಫಲಂ ಭುಞ್ಜಿತ್ವಾ, ವಸತಿ ಪಬ್ಬತನ್ತರೇ.
‘‘ಅಗ್ಗಿಂ ದಾರುಂ ಆಹರಿತ್ವಾ, ಉಜ್ಜಾಲೇಸಿಂ ಅಹಂ ತದಾ;
ಉತ್ತಮತ್ಥಂ ಗವೇಸನ್ತೋ, ಬ್ರಹ್ಮಲೋಕೂಪಪತ್ತಿಯಾ.
‘‘ಪದುಮುತ್ತರೋ ಲೋಕವಿದೂ, ಆಹುತೀನಂ ಪಟಿಗ್ಗಹೋ;
ಮಮುದ್ಧರಿತುಕಾಮೋ ಸೋ, ಆಗಚ್ಛಿ ಮಮ ಸನ್ತಿಕೇ.
‘‘ಕಿಂ ಕರೋಸಿ ಮಹಾಪುಞ್ಞ, ದೇಹಿ ಮೇ ಅಗ್ಗಿದಾರುಕಂ;
ಅಹಮಗ್ಗಿಂ ಪರಿಚರೇ, ತತೋ ಮೇ ಸುದ್ಧಿ ಹೋಹಿತಿ [ಹೇಹಿತಿ (ಸೀ.)].
‘‘ಸುಭದ್ದಕೋ ತ್ವಂ ಮನುಜೇ, ದೇವತೇ ತ್ವಂ ಪಜಾನಸಿ;
ತುವಂ ಅಗ್ಗಿಂ ಪರಿಚರ, ಹನ್ದ ತೇ ಅಗ್ಗಿದಾರುಕಂ.
‘‘ತತೋ ಕಟ್ಠಂ ಗಹೇತ್ವಾನ, ಅಗ್ಗಿಂ ಉಜ್ಜಾಲಯೀ ಜಿನೋ;
ನ ತತ್ಥ ಕಟ್ಠಂ ಪಜ್ಝಾಯಿ, ಪಾಟಿಹೇರಂ ಮಹೇಸಿನೋ.
‘‘ನ ತೇ ಅಗ್ಗಿ ಪಜ್ಜಲತಿ, ಆಹುತೀ ತೇ ನ ವಿಜ್ಜತಿ;
ನಿರತ್ಥಕಂ ವತಂ ತುಯ್ಹಂ, ಅಗ್ಗಿಂ ಪರಿಚರಸ್ಸು ಮೇ.
‘‘ಕೀದಿಸೋ ಸೋ [ತೇ (ಸ್ಯಾ. ಕ.)] ಮಹಾವೀರ, ಅಗ್ಗಿ ತವ ಪವುಚ್ಚತಿ;
ಮಯ್ಹಮ್ಪಿ ಕಥಯಸ್ಸೇತಂ, ಉಭೋ ಪರಿಚರಾಮಸೇ.
‘‘ಹೇತುಧಮ್ಮನಿರೋಧಾಯ ¶ , ಕಿಲೇಸಸಮಣಾಯ ಚ;
ಇಸ್ಸಾಮಚ್ಛರಿಯಂ ಹಿತ್ವಾ, ತಯೋ ಏತೇ ಮಮಾಹುತೀ.
‘‘ಕೀದಿಸೋ ತ್ವಂ ಮಹಾವೀರ, ಕಥಂ ಗೋತ್ತೋಸಿ ಮಾರಿಸ;
ಆಚಾರಪಟಿಪತ್ತಿ ತೇ, ಬಾಳ್ಹಂ ಖೋ ಮಮ ರುಚ್ಚತಿ.
‘‘ಖತ್ತಿಯಮ್ಹಿ ¶ ಕುಲೇ ಜಾತೋ, ಅಭಿಞ್ಞಾಪಾರಮಿಂ ಗತೋ;
ಸಬ್ಬಾಸವಪರಿಕ್ಖೀಣೋ, ನತ್ಥಿ ದಾನಿ ಪುನಬ್ಭವೋ.
‘‘ಯದಿ ¶ ¶ ಬುದ್ಧೋಸಿ ಸಬ್ಬಞ್ಞೂ, ಪಭಙ್ಕರ ತಮೋನುದ;
ನಮಸ್ಸಿಸ್ಸಾಮಿ ತಂ ದೇವ, ದುಕ್ಖಸ್ಸನ್ತಕರೋ ತುವಂ.
‘‘ಪತ್ಥರಿತ್ವಾಜಿನಚಮ್ಮಂ, ನಿಸೀದನಮದಾಸಹಂ;
ನಿಸೀದ ನಾಥ ಸಬ್ಬಞ್ಞು, ಉಪಟ್ಠಿಸ್ಸಾಮಹಂ ತುವಂ.
‘‘ನಿಸೀದಿ ಭಗವಾ ತತ್ಥ, ಅಜಿನಮ್ಹಿ ಸುವಿತ್ಥತೇ;
ನಿಮನ್ತಯಿತ್ವಾ ಸಮ್ಬುದ್ಧಂ, ಪಬ್ಬತಂ ಅಗಮಾಸಹಂ.
‘‘ಖಾರಿಭಾರಞ್ಚ ಪೂರೇತ್ವಾ, ತಿನ್ದುಕಫಲಮಾಹರಿಂ;
ಮಧುನಾ ಯೋಜಯಿತ್ವಾನ, ಫಲಂ ಬುದ್ಧಸ್ಸದಾಸಹಂ.
‘‘ಮಮ ನಿಜ್ಝಾಯಮಾನಸ್ಸ, ಪರಿಭುಞ್ಜಿ ತದಾ ಜಿನೋ;
ತತ್ಥ ಚಿತ್ತಂ ಪಸಾದೇಸಿಂ, ಪೇಕ್ಖನ್ತೋ ಲೋಕನಾಯಕಂ.
‘‘ಪದುಮುತ್ತರೋ ಲೋಕವಿದೂ, ಆಹುತೀನಂ ಪಟಿಗ್ಗಹೋ;
ಮಮಸ್ಸಮೇ ನಿಸೀದಿತ್ವಾ, ಇಮಾ ಗಾಥಾ ಅಭಾಸಥ.
‘‘‘ಯೋ ಮಂ ಫಲೇನ ತಪ್ಪೇಸಿ, ಪಸನ್ನೋ ಸೇಹಿ ಪಾಣಿಭಿ;
ತಮಹಂ ಕಿತ್ತಯಿಸ್ಸಾಮಿ, ಸುಣಾಥ ಮಮ ಭಾಸತೋ.
‘‘‘ಪಞ್ಚವೀಸತಿಕ್ಖತ್ತುಂ ¶ ಸೋ, ದೇವರಜ್ಜಂ ಕರಿಸ್ಸತಿ;
ಸಹಸ್ಸಕ್ಖತ್ತುಂ ರಾಜಾ ಚ, ಚಕ್ಕವತ್ತೀ ಭವಿಸ್ಸತಿ.
‘‘‘ತಸ್ಸ ಸಙ್ಕಪ್ಪಮಞ್ಞಾಯ, ಪುಬ್ಬಕಮ್ಮಸಮಙ್ಗಿನೋ;
ಅನ್ನಂ ಪಾನಞ್ಚ ವತ್ಥಞ್ಚ, ಸಯನಞ್ಚ ಮಹಾರಹಂ.
‘‘‘ಪುಞ್ಞಕಮ್ಮೇನ ಸಂಯುತ್ತಾ, ನಿಬ್ಬತ್ತಿಸ್ಸನ್ತಿ ತಾವದೇ;
ಸದಾ ಪಮುದಿತೋ ಚಾಯಂ, ಭವಿಸ್ಸತಿ ಅನಾಮಯೋ.
‘‘‘ಉಪಪಜ್ಜತಿ ಯಂ ಯೋನಿಂ, ದೇವತ್ತಂ ಅಥ ಮಾನುಸಂ;
ಸಬ್ಬತ್ಥ ಸುಖಿತೋ ಹುತ್ವಾ, ಮನುಸ್ಸತ್ತಂ ಗಮಿಸ್ಸತಿ.
‘‘‘ಅಜ್ಝಾಯಕೋ ಮನ್ತಧರೋ, ತಿಣ್ಣಂ ವೇದಾನ ಪಾರಗೂ;
ಸಮ್ಬುದ್ಧಂ ಉಪಗನ್ತ್ವಾನ, ಅರಹಾ ಸೋ ಭವಿಸ್ಸತಿ’.
‘‘ಯತೋ ಸರಾಮಿ ಅತ್ತಾನಂ, ಯತೋ ಪತ್ತೋಸ್ಮಿ ವಿಞ್ಞುತಂ;
ಭೋಗೇ ಮೇ ಊನತಾ ನತ್ಥಿ, ಫಲದಾನಸ್ಸಿದಂ ಫಲಂ.
‘‘ವರಧಮ್ಮಮನುಪ್ಪತ್ತೋ, ರಾಗದೋಸೇ ಸಮೂಹನಿಂ;
ಸಬ್ಬಾಸವಪರಿಕ್ಖೀಣೋ, ನತ್ಥಿ ದಾನಿ ಪುನಬ್ಭವೋ.
‘‘ಕಿಲೇಸಾ ¶ ಝಾಪಿತಾ ಮಯ್ಹಂ, ಭವಾ ಸಬ್ಬೇ ಸಮೂಹತಾ;
ನಾಗೋವ ಬನ್ಧನಂ ಛೇತ್ವಾ, ವಿಹರಾಮಿ ಅನಾಸವೋ.
‘‘ಸ್ವಾಗತಂ ವತ ಮೇ ಆಸಿ, ಮಮ ಬುದ್ಧಸ್ಸ ಸನ್ತಿಕೇ;
ತಿಸ್ಸೋ ವಿಜ್ಜಾ ಅನುಪ್ಪತ್ತಾ, ಕತಂ ಬುದ್ಧಸ್ಸ ಸಾಸನಂ.
‘‘ಪಟಿಸಮ್ಭಿದಾ ¶ ಚತಸ್ಸೋ, ವಿಮೋಕ್ಖಾಪಿ ಚ ಅಟ್ಠಿಮೇ;
ಛಳಭಿಞ್ಞಾ ಸಚ್ಛಿಕತಾ, ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ¶ ಸುದಂ ಆಯಸ್ಮಾ ತಿಸ್ಸಮೇತ್ತೇಯ್ಯೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ತಿಸ್ಸಮೇತ್ತೇಯ್ಯತ್ಥೇರಸ್ಸಾಪದಾನಂ ಪಠಮಂ.
೨. ಪುಣ್ಣಕತ್ಥೇರಅಪದಾನಂ
‘‘ಪಬ್ಭಾರಕೂಟಂ ¶ ನಿಸ್ಸಾಯ, ಸಯಮ್ಭೂ ಅಪರಾಜಿತೋ;
ಆಬಾಧಿಕೋ ಚ ಸೋ [ಆಬಾಧಿಕೋ ಗರು (ಸೀ.)] ಬುದ್ಧೋ, ವಸತಿ ಪಬ್ಬತನ್ತರೇ.
‘‘ಮಮ ಅಸ್ಸಮಸಾಮನ್ತಾ, ಪನಾದೋ ಆಸಿ ತಾವದೇ;
ಬುದ್ಧೇ ನಿಬ್ಬಾಯಮಾನಮ್ಹಿ, ಆಲೋಕೋ ಉದಪಜ್ಜಥ [ಆಸಿ ತಾವದೇ (ಸ್ಯಾ. ಕ.)].
‘‘ಯಾವತಾ ವನಸಣ್ಡಸ್ಮಿಂ, ಅಚ್ಛಕೋಕತರಚ್ಛಕಾ;
ವಾಳಾ ಚ [ಬ್ಯಗ್ಘಾ (ಸೀ.)] ಕೇಸರೀ ಸಬ್ಬೇ, ಅಭಿಗಜ್ಜಿಂಸು ತಾವದೇ.
‘‘ಉಪ್ಪಾತಂ ತಮಹಂ ದಿಸ್ವಾ, ಪಬ್ಭಾರಂ ಅಗಮಾಸಹಂ;
ತತ್ಥದ್ದಸ್ಸಾಸಿಂ ಸಮ್ಬುದ್ಧಂ, ನಿಬ್ಬುತಂ ಅಪರಾಜಿತಂ.
‘‘ಸುಫುಲ್ಲಂ ಸಾಲರಾಜಂವ, ಸತರಂಸಿಂವ ಉಗ್ಗತಂ;
ವೀತಚ್ಚಿಕಂವ ಅಙ್ಗಾರಂ, ನಿಬ್ಬುತಂ ಅಪರಾಜಿತಂ.
‘‘ತಿಣಂ ಕಟ್ಠಞ್ಚ ಪೂರೇತ್ವಾ, ಚಿತಕಂ ತತ್ಥಕಾಸಹಂ;
ಚಿತಕಂ ಸುಕತಂ ಕತ್ವಾ, ಸರೀರಂ ಝಾಪಯಿಂ ಅಹಂ.
‘‘ಸರೀರಂ ಝಾಪಯಿತ್ವಾನ, ಗನ್ಧತೋಯಂ ಸಮೋಕಿರಿಂ;
ಅನ್ತಲಿಕ್ಖೇ ಠಿತೋ ಯಕ್ಖೋ, ನಾಮಮಗ್ಗಹಿ ತಾವದೇ.
‘‘ಯಂ ¶ ¶ ಪೂರಿತಂ [ತಂ ಪೂರಿತಂ (ಸ್ಯಾ.), ಸಪ್ಪುರಿಸ (ಕ.)] ತಯಾ ಕಿಚ್ಚಂ, ಸಯಮ್ಭುಸ್ಸ ಮಹೇಸಿನೋ;
ಪುಣ್ಣಕೋ ನಾಮ ನಾಮೇನ, ಸದಾ ಹೋಹಿ ತುವಂ [ಯದಾ ಹೋಸಿ ತುವಂ (ಸ್ಯಾ.), ಸದಾ ಹೋಹಿತಿ ತ್ವಂ (ಕ.)] ಮುನೇ.
‘‘ತಮ್ಹಾ ಕಾಯಾ ಚವಿತ್ವಾನ, ದೇವಲೋಕಂ ಅಗಚ್ಛಹಂ;
ತತ್ಥ ದಿಬ್ಬಮಯೋ ಗನ್ಧೋ, ಅನ್ತಲಿಕ್ಖಾ ಪವಸ್ಸತಿ [ಅನ್ತಲಿಕ್ಖೇ ಪವಾಯತಿ (ಸೀ.)].
‘‘ತತ್ರಾಪಿ ನಾಮಧೇಯ್ಯಂ ಮೇ, ಪುಣ್ಣಕೋತಿ ಅಹೂ ತದಾ;
ದೇವಭೂತೋ ಮನುಸ್ಸೋ ವಾ, ಸಙ್ಕಪ್ಪಂ ಪೂರಯಾಮಹಂ.
‘‘ಇದಂ ಪಚ್ಛಿಮಕಂ ಮಯ್ಹಂ, ಚರಿಮೋ ವತ್ತತೇ ಭವೋ;
ಇಧಾಪಿ ಪುಣ್ಣಕೋ ನಾಮ, ನಾಮಧೇಯ್ಯಂ ಪಕಾಸತಿ.
‘‘ತೋಸಯಿತ್ವಾನ ¶ ಸಮ್ಬುದ್ಧಂ, ಗೋತಮಂ ಸಕ್ಯಪುಙ್ಗವಂ;
ಸಬ್ಬಾಸವೇ ಪರಿಞ್ಞಾಯ, ವಿಹರಾಮಿ ಅನಾಸವೋ.
‘‘ಏಕನವುತಿತೋ ಕಪ್ಪೇ, ಯಂ ಕಮ್ಮಮಕರಿಂ ತದಾ;
ದುಗ್ಗತಿಂ ನಾಭಿಜಾನಾಮಿ, ತನುಕಿಚ್ಚಸ್ಸಿದಂ ಫಲಂ.
‘‘ಕಿಲೇಸಾ ಝಾಪಿತಾ ಮಯ್ಹಂ…ಪೇ… ವಿಹರಾಮಿ ಅನಾಸವೋ.
‘‘ಸ್ವಾಗತಂ ವತ ಮೇ ಆಸಿ…ಪೇ… ಕತಂ ಬುದ್ಧಸ್ಸ ಸಾಸನಂ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಪುಣ್ಣಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಪುಣ್ಣಕತ್ಥೇರಸ್ಸಾಪದಾನಂ ದುತಿಯಂ.
೩. ಮೇತ್ತಗುತ್ಥೇರಅಪದಾನಂ
‘‘ಹಿಮವನ್ತಸ್ಸಾವಿದೂರೇ ¶ ¶ , ಅಸೋಕೋ ನಾಮ ಪಬ್ಬತೋ;
ತತ್ಥಾಸಿ ಅಸ್ಸಮೋ ಮಯ್ಹಂ, ವಿಸ್ಸಕಮ್ಮೇನ [ವಿಸುಕಮ್ಮೇನ (ಸೀ. ಸ್ಯಾ. ಕ.)] ಮಾಪಿತೋ.
‘‘ಸುಮೇಧೋ ನಾಮ ಸಮ್ಬುದ್ಧೋ, ಅಗ್ಗೋ ಕಾರುಣಿಕೋ ಮುನಿ;
ನಿವಾಸಯಿತ್ವಾ ಪುಬ್ಬಣ್ಹೇ, ಪಿಣ್ಡಾಯ ಮೇ [ಮಂ (ಸೀ.)] ಉಪಾಗಮಿ.
‘‘ಉಪಾಗತಂ ¶ ಮಹಾವೀರಂ, ಸುಮೇಧಂ ಲೋಕನಾಯಕಂ;
ಪಗ್ಗಯ್ಹ ಸುಗತಪತ್ತಂ [ಸುಗತಂ ಪತ್ತಂ (ಸೀ.), ಸುಭಕಂ ಪತ್ತಂ (ಪೀ.)], ಸಪ್ಪಿತೇಲಂ ಅಪೂರಯಿಂ [ಸಪ್ಪಿತೇಲೇನ ಪೂರಯಿಂ (ಸೀ.), ಸಪ್ಪಿತೇಲಸ್ಸ’ಪೂರಯಿಂ (?)].
‘‘ದತ್ವಾನಹಂ ಬುದ್ಧಸೇಟ್ಠೇ, ಸುಮೇಧೇ ಲೋಕನಾಯಕೇ;
ಅಞ್ಜಲಿಂ ಪಗ್ಗಹೇತ್ವಾನ, ಭಿಯ್ಯೋ [ಭೀಯೋ (ಸೀ.), ಭೀಯ್ಯೋ (ಪೀ.)] ಹಾಸಂ ಜನೇಸಹಂ.
‘‘ಇಮಿನಾ ಸಪ್ಪಿದಾನೇನ, ಚೇತನಾಪಣಿಧೀಹಿ ಚ;
ದೇವಭೂತೋ ಮನುಸ್ಸೋ ವಾ, ಲಭಾಮಿ ವಿಪುಲಂ ಸುಖಂ.
‘‘ವಿನಿಪಾತಂ ವಿವಜ್ಜೇತ್ವಾ, ಸಂಸರಾಮಿ ಭವಾಭವೇ;
ತತ್ಥ ಚಿತ್ತಂ ಪಣಿಧಿತ್ವಾ, ಲಭಾಮಿ ಅಚಲಂ ಪದಂ.
‘‘ಲಾಭಾ ತುಯ್ಹಂ ಸುಲದ್ಧಂ ತೇ, ಯಂ ಮಂ ಅದ್ದಕ್ಖಿ ಬ್ರಾಹ್ಮಣ;
ಮಮ ದಸ್ಸನಮಾಗಮ್ಮ, ಅರಹತ್ತಂ ಭವಿಸ್ಸತಿ [ಅರಹಾ ತ್ವಂ ಭವಿಸ್ಸಸಿ (ಸೀ. ಪೀ.), ಅರಹತ್ತಂ ಗಮಿಸ್ಸಸಿ (ಸ್ಯಾ.)].
‘‘ವಿಸ್ಸತ್ಥೋ [ವಿಸ್ಸಟ್ಠೋ (ಸ್ಯಾ. ಪೀ.), ವಿಸಟ್ಠೋ (ಕ.)] ಹೋಹಿ ಮಾ ಭಾಯಿ, ಅಧಿಗನ್ತ್ವಾ ಮಹಾಯಸಂ;
ಮಮಞ್ಹಿ ಸಪ್ಪಿಂ ದತ್ವಾನ, ಪರಿಮೋಕ್ಖಸಿ ಜಾತಿಯಾ.
‘‘ಇಮಿನಾ ¶ ಸಪ್ಪಿದಾನೇನ, ಚೇತನಾಪಣಿಧೀಹಿ ಚ;
ದೇವಭೂತೋ ಮನುಸ್ಸೋ ವಾ, ಲಭಸೇ ವಿಪುಲಂ ಸುಖಂ.
‘‘ಇಮಿನಾ ¶ ಸಪ್ಪಿದಾನೇನ, ಮೇತ್ತಚಿತ್ತವತಾಯ ಚ;
ಅಟ್ಠಾರಸೇ ಕಪ್ಪಸತೇ, ದೇವಲೋಕೇ ರಮಿಸ್ಸಸಿ.
‘‘ಅಟ್ಠತಿಂಸತಿಕ್ಖತ್ತುಞ್ಚ, ದೇವರಾಜಾ ಭವಿಸ್ಸಸಿ;
ಪದೇಸರಜ್ಜಂ ವಿಪುಲಂ, ಗಣನಾತೋ ಅಸಙ್ಖಿಯಂ.
‘‘ಏಕಪಞ್ಞಾಸಕ್ಖತ್ತುಞ್ಚ, ಚಕ್ಕವತ್ತೀ ಭವಿಸ್ಸಸಿ;
ಚಾತುರನ್ತೋ ವಿಜಿತಾವೀ, ಜಮ್ಬುಮಣ್ಡಸ್ಸ [ಜಮ್ಬುಸಣ್ಡಸ್ಸ (ಸೀ. ಪೀ.)] ಇಸ್ಸರೋ.
‘‘ಮಹಾಸಮುದ್ದೋವಕ್ಖೋಭೋ, ದುದ್ಧರೋ ಪಥವೀ ಯಥಾ;
ಏವಮೇವ ಚ ತೇ ಭೋಗಾ, ಅಪ್ಪಮೇಯ್ಯಾ ಭವಿಸ್ಸರೇ.
‘‘ಸಟ್ಠಿಕೋಟೀ ಹಿರಞ್ಞಸ್ಸ, ಚಜಿತ್ವಾ [ಚತ್ವಾನ (ಸೀ. ಕ.), ದತ್ವಾನ (ಸ್ಯಾ. ಪೀ.)] ಪಬ್ಬಜಿಂ ಅಹಂ;
ಕಿಂ ಕುಸಲಂ ಗವೇಸನ್ತೋ, ಬಾವರಿಂ ಉಪಸಙ್ಕಮಿಂ.
‘‘ತತ್ಥ ¶ ¶ ಮನ್ತೇ ಅಧೀಯಾಮಿ, ಛಳಙ್ಗಂ ನಾಮ ಲಕ್ಖಣಂ;
ತಮನ್ಧಕಾರಂ ವಿಧಮಂ, ಉಪ್ಪಜ್ಜಿ ತ್ವಂ ಮಹಾಮುನಿ.
‘‘ತವ ದಸ್ಸನಕಾಮೋಹಂ, ಆಗತೋಮ್ಹಿ ಮಹಾಮುನಿ;
ತವ ಧಮ್ಮಂ ಸುಣಿತ್ವಾನ, ಪತ್ತೋಮ್ಹಿ ಅಚಲಂ ಪದಂ.
‘‘ತಿಂಸಕಪ್ಪಸಹಸ್ಸಮ್ಹಿ, ಸಪ್ಪಿಂ ಬುದ್ಧಸ್ಸದಾಸಹಂ;
ಏತ್ಥನ್ತರೇ ನಾಭಿಜಾನೇ, ಸಪ್ಪಿಂ ವಿಞ್ಞಾಪಿತಂ [ವಿಞ್ಞಾಪಿತಾ (?)] ಮಯಾ.
‘‘ಮಮ ಸಙ್ಕಪ್ಪಮಞ್ಞಾಯ, ಉಪ್ಪಜ್ಜತಿ ಯದಿಚ್ಛಕಂ;
ಚಿತ್ತಮಞ್ಞಾಯ ನಿಬ್ಬತ್ತಂ, ಸಬ್ಬೇ ಸನ್ತಪ್ಪಯಾಮಹಂ.
‘‘ಅಹೋ ಬುದ್ಧಾ ಅಹೋ ಧಮ್ಮಾ [ಅಹೋ ಬುದ್ಧೋ ಅಹೋ ಧಮ್ಮೋ (ಸೀ.) ಥೇರಗಾ. ೨೦೧ ಥೇರಗಾಥಾಯ ತದಟ್ಠಕಥಾಯ ಚ ಸಂಸನ್ದೇತಬ್ಬಂ], ಅಹೋ ನೋ ಸತ್ಥು ಸಮ್ಪದಾ;
ಥೋಕಞ್ಹಿ ಸಪ್ಪಿಂ ದತ್ವಾನ, ಅಪ್ಪಮೇಯ್ಯಂ ಲಭಾಮಹಂ.
‘‘ಮಹಾಸಮುದ್ದೇ ¶ ಉದಕಂ, ಯಾವತಾ ನೇರುಪಸ್ಸತೋ;
ಮಮ ಸಪ್ಪಿಂ ಉಪಾದಾಯ, ಕಲಭಾಗಂ ನ ಹೇಸ್ಸತಿ [ಹಿಸ್ಸತಿ (ಸ್ಯಾ. ಕ.), ಏಸ್ಸತಿ (ಸೀ.)].
‘‘ಯಾವತಾ ಚಕ್ಕವಾಳಸ್ಸ, ಕರಿಯನ್ತಸ್ಸ [ಕಾರಯನ್ತಸ್ಸ (ಸ್ಯಾ.), ಕಯಿರನ್ತಸ್ಸ (ಪೀ.), ಆಹರನ್ತಸ್ಸ (ಕ.)] ರಾಸಿತೋ;
ಮಮ ನಿಬ್ಬತ್ತವತ್ಥಾನಂ [ಮಯಾ ನಿವತ್ಥವತ್ಥಾನಂ (ಪೀ.)], ಓಕಾಸೋ ಸೋ ನ ಸಮ್ಮತಿ.
‘‘ಪಬ್ಬತರಾಜಾ ಹಿಮವಾ, ಪವರೋಪಿ ಸಿಲುಚ್ಚಯೋ;
ಮಮಾನುಲಿತ್ತಗನ್ಧಸ್ಸ, ಉಪನಿಧಿಂ [ಉಪನಿಧಂ (ಸೀ. ಸ್ಯಾ. ಕ.), ಉಪನೀಯಂ (ಪೀ.)] ನ ಹೇಸ್ಸತಿ.
‘‘ವತ್ಥಂ ¶ ಗನ್ಧಞ್ಚ ಸಪ್ಪಿಞ್ಚ, ಅಞ್ಞಞ್ಚ ದಿಟ್ಠಧಮ್ಮಿಕಂ;
ಅಸಙ್ಖತಞ್ಚ ನಿಬ್ಬಾನಂ, ಸಪ್ಪಿದಾನಸ್ಸಿದಂ ಫಲಂ.
‘‘ಸತಿಪಟ್ಠಾನಸಯನೋ, ಸಮಾಧಿಝಾನಗೋಚರೋ;
ಬೋಜ್ಝಙ್ಗಭೋಜನೋ [… ಜನನೋ (ಸ್ಯಾ. ಕ.)] ಅಜ್ಜ, ಸಪ್ಪಿದಾನಸ್ಸಿದಂ ಫಲಂ.
‘‘ಕಿಲೇಸಾ ಝಾಪಿತಾ ಮಯ್ಹಂ…ಪೇ… ವಿಹರಾಮಿ ಅನಾಸವೋ.
‘‘ಸ್ವಾಗತಂ ವತ ಮೇ ಆಸಿ…ಪೇ… ಕತಂ ಬುದ್ಧಸ್ಸ ಸಾಸನಂ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಮೇತ್ತಗೂ ಥೇರೋ ಇಮಾ ಗಾಥಾಯೋ
ಅಭಾಸಿತ್ಥಾತಿ.
ಮೇತ್ತಗುತ್ಥೇರಸ್ಸಾಪದಾನಂ ತತಿಯಂ.
೪. ಧೋತಕತ್ಥೇರಅಪದಾನಂ
‘‘ಗಙ್ಗಾ ¶ ¶ ಭಾಗೀರಥೀ ನಾಮ, ಹಿಮವನ್ತಾ ಪಭಾವಿತಾ [ಹಿಮವನ್ತಪ್ಪಭಾವಿತಾ (ಸೀ.)];
ಹಂಸವತಿಯಾ ದ್ವಾರೇನ, ಅನುಸನ್ದತಿ ತಾವದೇ.
‘‘ಸೋಭಿತೋ ನಾಮ ಆರಾಮೋ, ಗಙ್ಗಾಕೂಲೇ ಸುಮಾಪಿತೋ;
ತತ್ಥ ಪದುಮುತ್ತರೋ ಬುದ್ಧೋ, ವಸತೇ ಲೋಕನಾಯಕೋ.
‘‘ತಿದಸೇಹಿ ¶ ಯಥಾ ಇನ್ದೋ, ಮನುಜೇಹಿ ಪುರಕ್ಖತೋ;
ನಿಸೀದಿ ತತ್ಥ ಭಗವಾ, ಅಸಮ್ಭೀತೋವ ಕೇಸರೀ.
‘‘ನಗರೇ ಹಂಸವತಿಯಾ, ವಸಾಮಿ [ಅಹೋಸಿಂ (ಸ್ಯಾ.)] ಬ್ರಾಹ್ಮಣೋ ಅಹಂ;
ಛಳಙ್ಗೋ ನಾಮ ನಾಮೇನ, ಏವಂನಾಮೋ ಮಹಾಮುನಿ.
‘‘ಅಟ್ಠಾರಸ ಸಿಸ್ಸಸತಾ, ಪರಿವಾರೇನ್ತಿ ಮಂ ತದಾ;
ತೇಹಿ ಸಿಸ್ಸೇಹಿ ಸಮಿತೋ, ಗಙ್ಗಾತೀರಂ ಉಪಾಗಮಿಂ.
‘‘ತತ್ಥದ್ದಸಾಸಿಂ ಸಮಣೇ, ನಿಕ್ಕುಹೇ ಧೋತಪಾಪಕೇ;
ಭಾಗೀರಥಿಂ ತರನ್ತೇಹಂ [ತರನ್ತೋಹಂ (ಸ್ಯಾ. ಪೀ.)], ಏವಂ ಚಿನ್ತೇಸಿ ತಾವದೇ.
‘‘ಸಾಯಂ ಪಾತಂ [ಸಾಯಪಾತಂ (ಪೀ.)] ತರನ್ತಾಮೇ, ಬುದ್ಧಪುತ್ತಾ ಮಹಾಯಸಾ;
ವಿಹೇಸಯನ್ತಿ ಅತ್ತಾನಂ, ತೇಸಂ ಅತ್ತಾ ವಿಹಞ್ಞತಿ.
‘‘ಸದೇವಕಸ್ಸ ಲೋಕಸ್ಸ, ಬುದ್ಧೋ ಅಗ್ಗೋ ಪವುಚ್ಚತಿ;
ನತ್ಥಿ ಮೇ ದಕ್ಖಿಣೇ ಕಾರಂ, ಗತಿಮಗ್ಗವಿಸೋಧನಂ.
‘‘ಯಂನೂನ ¶ ಬುದ್ಧಸೇಟ್ಠಸ್ಸ, ಸೇತುಂ ಗಙ್ಗಾಯ ಕಾರಯೇ;
ಕಾರಾಪೇತ್ವಾ ಇಮಂ ಕಮ್ಮಂ [ಸೇತುಂ (ಸ್ಯಾ.)], ಸನ್ತರಾಮಿ ಇಮಂ ಭವಂ.
‘‘ಸತಸಹಸ್ಸಂ ¶ ದತ್ವಾನ, ಸೇತುಂ ಕಾರಾಪಯಿಂ ಅಹಂ;
ಸದ್ದಹನ್ತೋ ಕತಂ ಕಾರಂ, ವಿಪುಲಂ ಮೇ ಭವಿಸ್ಸತಿ.
‘‘ಕಾರಾಪೇತ್ವಾನ ತಂ ಸೇತುಂ, ಉಪೇಸಿಂ ಲೋಕನಾಯಕಂ;
ಸಿರಸಿ ಅಞ್ಜಲಿಂ ಕತ್ವಾ, ಇಮಂ ವಚನಮಬ್ರವಿಂ.
‘‘‘ಸತಸಹಸ್ಸಸ್ಸ ವಯಂ [ವಯಂ ಸತಸಹಸ್ಸಂವ (ಕ.)], ದತ್ವಾ [ಕತ್ವಾ (ಸೀ. ಪೀ.)] ಕಾರಾಪಿತೋ ಮಯಾ;
ತವತ್ಥಾಯ ಮಹಾಸೇತು, ಪಟಿಗ್ಗಣ್ಹ ಮಹಾಮುನೇ.
‘‘‘ಪದುಮುತ್ತರೋ ¶ ಲೋಕವಿದೂ, ಆಹುತೀನಂ ಪಟಿಗ್ಗಹೋ;
ಭಿಕ್ಖುಸಙ್ಘೇ ನಿಸೀದಿತ್ವಾ, ಇಮಾ ಗಾಥಾ ಅಭಾಸಥ.
‘‘‘ಯೋ ಮೇ ಸೇತುಂ ಅಕಾರೇಸಿ, ಪಸನ್ನೋ ಸೇಹಿ ಪಾಣಿಭಿ;
ತಮಹಂ ಕಿತ್ತಯಿಸ್ಸಾಮಿ, ಸುಣಾಥ ಮಮ ಭಾಸತೋ.
(ಸೇತುದಾನಆನಿಸಂಸೋ)
‘‘‘ದರಿತೋ ಪಬ್ಬತತೋ ವಾ, ರುಕ್ಖತೋ ಪತಿತೋಪಿಯಂ;
ಚುತೋಪಿ ಲಚ್ಛತೀ ಠಾನಂ, ಸೇತುದಾನಸ್ಸಿದಂ ಫಲಂ.
‘‘‘ವಿರೂಳ್ಹಮೂಲಸನ್ತಾನಂ, ನಿಗ್ರೋಧಮಿವ ಮಾಲುತೋ;
ಅಮಿತ್ತಾ ನಪ್ಪಸಹನ್ತಿ, ಸೇತುದಾನಸ್ಸಿದಂ ಫಲಂ.
‘‘‘ನಾಸ್ಸ ಚೋರಾ ಪಸಹನ್ತಿ, ನಾತಿಮಞ್ಞನ್ತಿ ಖತ್ತಿಯಾ;
ಸಬ್ಬೇ ತರಿಸ್ಸತಾಮಿತ್ತೇ, ಸೇತುದಾನಸ್ಸಿದಂ ಫಲಂ.
‘‘‘ಅಬ್ಭೋಕಾಸಗತಂ ¶ ಸನ್ತಂ, ಕಠಿನಾತಪತಾಪಿತಂ;
ಪುಞ್ಞಕಮ್ಮೇನ ಸಂಯುತ್ತಂ, ನ ಭವಿಸ್ಸತಿ ವೇದನಾ [ತಾವದೇ (ಕ.)].
‘‘‘ದೇವಲೋಕೇ ಮನುಸ್ಸೇ ವಾ, ಹತ್ಥಿಯಾನಂ ಸುನಿಮ್ಮಿತಂ;
ತಸ್ಸ ಸಙ್ಕಪ್ಪಮಞ್ಞಾಯ, ನಿಬ್ಬತ್ತಿಸ್ಸತಿ ತಾವದೇ.
‘‘‘ಸಹಸ್ಸಸ್ಸಾ ¶ ವಾತಜವಾ, ಸಿನ್ಧವಾ ಸೀಘವಾಹನಾ;
ಸಾಯಂ ಪಾತಂ ಉಪೇಸ್ಸನ್ತಿ, ಸೇತುದಾನಸ್ಸಿದಂ ಫಲಂ.
‘‘‘ಆಗನ್ತ್ವಾನ ಮನುಸ್ಸತ್ತಂ, ಸುಖಿತೋಯಂ ಭವಿಸ್ಸತಿ;
ವೇಹಾಸಂ [ಇಹಾಪಿ (ಸೀ. ಸ್ಯಾ. ಪೀ.)] ಮನುಜಸ್ಸೇವ, ಹತ್ಥಿಯಾನಂ ಭವಿಸ್ಸತಿ.
‘‘‘ಕಪ್ಪಸತಸಹಸ್ಸಮ್ಹಿ, ಓಕ್ಕಾಕಕುಲಸಮ್ಭವೋ;
ಗೋತಮೋ ನಾಮ ಗೋತ್ತೇನ, ಸತ್ಥಾ ಲೋಕೇ ಭವಿಸ್ಸತಿ.
‘‘‘ತಸ್ಸ ¶ ಧಮ್ಮೇಸು ದಾಯಾದೋ, ಓರಸೋ ಧಮ್ಮನಿಮ್ಮಿತೋ;
ಸಬ್ಬಾಸವೇ ಪರಿಞ್ಞಾಯ, ನಿಬ್ಬಾಯಿಸ್ಸತಿನಾಸವೋ’.
‘‘ಅಹೋ ಮೇ ಸುಕತಂ ಕಮ್ಮಂ, ಜಲಜುತ್ತಮನಾಮಕೇ;
ತತ್ಥ ಕಾರಂ ಕರಿತ್ವಾನ, ಪತ್ತೋಹಂ ಆಸವಕ್ಖಯಂ.
‘‘ಪಧಾನಂ ಪಹಿತತ್ತೋಮ್ಹಿ, ಉಪಸನ್ತೋ ನಿರೂಪಧಿ;
ನಾಗೋವ ಬನ್ಧನಂ ಛೇತ್ವಾ, ವಿಹರಾಮಿ ಅನಾಸವೋ.
‘‘ಕಿಲೇಸಾ ¶ ಝಾಪಿತಾ ಮಯ್ಹಂ…ಪೇ… ವಿಹರಾಮಿ ಅನಾಸವೋ.
‘‘ಸ್ವಾಗತಂ ವತ ಮೇ ಆಸಿ…ಪೇ… ಕತಂ ಬುದ್ಧಸ್ಸ ಸಾಸನಂ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಧೋತಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಧೋತಕತ್ಥೇರಸ್ಸಾಪದಾನಂ ಚತುತ್ಥಂ.
೫. ಉಪಸೀವತ್ಥೇರಅಪದಾನಂ
‘‘ಹಿಮವನ್ತಸ್ಸಾವಿದೂರೇ ¶ , ಅನೋಮೋ ನಾಮ ಪಬ್ಬತೋ;
ಅಸ್ಸಮೋ ಸುಕತೋ ಮಯ್ಹಂ, ಪಣ್ಣಸಾಲಾ ಸುಮಾಪಿತಾ.
‘‘ನದೀ ಚ ಸನ್ದತೀ ತತ್ಥ, ಸುಪತಿತ್ಥಾ ಮನೋರಮಾ;
ಅನೂಪತಿತ್ಥೇ ಜಾಯನ್ತಿ, ಪದುಮುಪ್ಪಲಕಾ ಬಹೂ.
‘‘ಪಾಠೀನಾ ಪಾವುಸಾ ಮಚ್ಛಾ, ಬಲಜಾ ಮುಞ್ಜರೋಹಿತಾ;
ಮಚ್ಛಕಚ್ಛಪಸಞ್ಛನ್ನಾ [ಮಚ್ಛಕಚ್ಛಪಸಮ್ಪನ್ನಾ (?)], ನದಿಕಾ ಸನ್ದತೇ ತದಾ.
‘‘ತಿಮಿರಾ ಪುಪ್ಫಿತಾ ತತ್ಥ, ಅಸೋಕಾ ಖುದ್ದಮಾಲಕಾ;
ಪುನ್ನಾಗಾ ಗಿರಿಪುನ್ನಾಗಾ, ಸಮ್ಪವನ್ತಿ ಮಮಸ್ಸಮಂ.
‘‘ಕುಟಜಾ ¶ ಪುಪ್ಫಿತಾ ತತ್ಥ, ತಿಣಸೂಲವನಾನಿ ಚ;
ಸಾಲಾ ಚ ಸಳಲಾ ತತ್ಥ, ಚಮ್ಪಕಾ ಪುಪ್ಫಿತಾ ಬಹೂ.
‘‘ಅಜ್ಜುನಾ ಅತಿಮುತ್ತಾ ಚ, ಮಹಾನಾಮಾ ಚ ಪುಪ್ಫಿತಾ;
ಅಸನಾ ಮಧುಗನ್ಧೀ ಚ, ಪುಪ್ಫಿತಾ ತೇ ಮಮಸ್ಸಮೇ.
‘‘ಉದ್ದಾಲಕಾ ಪಾಟಲಿಕಾ, ಯೂಥಿಕಾ ಚ ಪಿಯಙ್ಗುಕಾ;
ಬಿಮ್ಬಿಜಾಲಕಸಞ್ಛನ್ನಾ, ಸಮನ್ತಾ ಅಡ್ಢಯೋಜನಂ.
‘‘ಮಾತಗ್ಗಾರಾ ¶ [ಮಾತಙ್ಗವಾ (ಸೀ.), ಮಾತಕರಾ (ಸ್ಯಾ.), ಮಾತಙ್ಗಾ ವಾ (ಪೀ.)] ಸತ್ತಲಿಯೋ, ಪಾಟಲೀ ಸಿನ್ದುವಾರಕಾ;
ಅಙ್ಕೋಲಕಾ ಬಹೂ ತತ್ಥ, ತಾಲಕುಟ್ಠಿ [ತಾಲಕೂಟಾ (ಸೀ. ಸ್ಯಾ.), ತಾಲಕುಟ್ಠಾ (ಪೀ.)] ಚ ಪುಪ್ಫಿತಾ;
ಸೇಲೇಯ್ಯಕಾ ಬಹೂ ತತ್ಥ, ಪುಪ್ಫಿತಾ ಮಮ ಅಸ್ಸಮೇ.
‘‘ಏತೇಸು ¶ ಪುಪ್ಫಜಾತೇಸು [ಪುಪ್ಫಮಾನೇಸು (ಸೀ. ಪೀ.)], ಸೋಭನ್ತಿ ಪಾದಪಾ ಬಹೂ;
ಸಮನ್ತಾ ¶ ತೇನ ಗನ್ಧೇನ, ವಾಯತೇ ಮಮ ಅಸ್ಸಮೋ.
‘‘ಹರೀತಕಾ ಆಮಲಕಾ, ಅಮ್ಬಜಮ್ಬುವಿಭೀತಕಾ [ವಿಭಿಟಕಾ (ಸೀ.)];
ಕೋಲಾ ಭಲ್ಲಾತಕಾ ಬಿಲ್ಲಾ, ಫಾರುಸಕಫಲಾನಿ ಚ.
‘‘ತಿನ್ದುಕಾ ಚ ಪಿಯಾಲಾ ಚ, ಮಧುಕಾ ಕಾಸುಮಾರಯೋ;
ಲಬುಜಾ ಪನಸಾ ತತ್ಥ, ಕದಲೀ ಬದರೀಫಲಾ [ಮನ್ದರಿಫಲಾ (ಕ.), ಚನ್ದರೀಫಲಾ (ಸ್ಯಾ. ಪೀ.)].
‘‘ಅಮ್ಬಾಟಕಾ ಬಹೂ ತತ್ಥ, ವಲ್ಲಿಕಾರಫಲಾನಿ ಚ;
ಬೀಜಪೂರಸಪಾರಿಯೋ [ಚಿರಸಂರಸಪಾಕಾ ಚ (ಸ್ಯಾ.), ವಿಟಪಾ ಚ ಸಪಾಕಾ ಚ (ಪೀ), ವಿದಪರಪದಾದಯೋ (ಕ.)], ಫಲಿತಾ ಮಮ ಅಸ್ಸಮೇ.
‘‘ಆಳಕಾ ಇಸಿಮುಗ್ಗಾ ಚ, ತತೋ ಮೋದಫಲಾ ಬಹೂ;
ಅವಟಾ ಪಕ್ಕಭರಿತಾ [ಸಕ್ಕರಾರಿತಾ (ಕ.)], ಪಿಲಕ್ಖುದುಮ್ಬರಾನಿ ಚ.
‘‘ಪಿಪ್ಫಿಲೀ ಮರೀಚಾ ತತ್ಥ, ನಿಗ್ರೋಧಾ ಚ ಕಪಿತ್ಥನಾ;
ಉದುಮ್ಬರಕಾ ಬಹವೋ, ಕಣ್ಡುಪಣ್ಣಾ ಚ ಹರಿಯೋ [ಕಣ್ಡಪಕ್ಕಾ ಚ ಪಾರಿಯೋ (ಸೀ. ಸ್ಯಾ. ಪೀ.)].
‘‘ಏತೇ ಚಞ್ಞೇ ಚ ಬಹವೋ, ಫಲಿತಾ ಅಸ್ಸಮೇ ಮಮ;
ಪುಪ್ಫರುಕ್ಖಾಪಿ ಬಹವೋ, ಪುಪ್ಫಿತಾ ಮಮ ಅಸ್ಸಮೇ.
‘‘ಆಲುವಾ ಚ ಕಳಮ್ಬಾ ಚ, ಬಿಳಾಲೀ ತಕ್ಕಲಾನಿ ಚ;
ಆಲಕಾ ತಾಲಕಾ ಚೇವ, ವಿಜ್ಜನ್ತಿ ಅಸ್ಸಮೇ ಮಮ.
‘‘ಅಸ್ಸಮಸ್ಸಾವಿದೂರೇ ಮೇ, ಮಹಾಜಾತಸ್ಸರೋ ಅಹು;
ಅಚ್ಛೋದಕೋ ಸೀತಜಲೋ, ಸುಪತಿತ್ಥೋ ಮನೋರಮೋ.
‘‘ಪದುಮುಪ್ಪಲಾ ಬಹೂ ತತ್ಥ, ಪುಣ್ಡರೀಕಸಮಾಯುತಾ;
ಮನ್ದಾಲಕೇಹಿ ¶ ಸಞ್ಛನ್ನಾ, ನಾನಾಗನ್ಧಸಮೇರಿತಾ.
‘‘ಗಬ್ಭಂ ಗಣ್ಹನ್ತಿ ಪದುಮಾ, ಅಞ್ಞೇ ಪುಪ್ಫನ್ತಿ ಕೇಸರೀ;
ಓಪುಪ್ಫಪತ್ತಾ ¶ ತಿಟ್ಠನ್ತಿ, ಪದುಮಾಕಣ್ಣಿಕಾ ಬಹೂ.
‘‘ಮಧು ಭಿಸಮ್ಹಾ ಸವತಿ, ಖೀರಂ ಸಪ್ಪಿ ಮುಲಾಳಿಭಿ;
ಸಮನ್ತಾ ತೇನ ಗನ್ಧೇನ, ನಾನಾಗನ್ಧಸಮೇರಿತಾ.
‘‘ಕುಮುದಾ ¶ ಅಮ್ಬಗನ್ಧಿ ಚ, ನಯಿತಾ ದಿಸ್ಸರೇ ಬಹೂ;
ಜಾತಸ್ಸರಸ್ಸಾನುಕೂಲಂ, ಕೇತಕಾ ಪುಪ್ಫಿತಾ ಬಹೂ.
‘‘ಸುಫುಲ್ಲಾ ¶ ಬನ್ಧುಜೀವಾ ಚ, ಸೇತವಾರೀ ಸುಗನ್ಧಿಕಾ;
ಕುಮ್ಭಿಲಾ ಸುಸುಮಾರಾ ಚ, ಗಹಕಾ ತತ್ಥ ಜಾಯರೇ.
‘‘ಉಗ್ಗಾಹಕಾ ಅಜಗರಾ, ತತ್ಥ ಜಾತಸ್ಸರೇ ಬಹೂ;
ಪಾಠೀನಾ ಪಾವುಸಾ ಮಚ್ಛಾ, ಬಲಜಾ ಮುಞ್ಜರೋಹಿತಾ.
‘‘ಮಚ್ಛಕಚ್ಛಪಸಞ್ಛನ್ನಾ, ಅಥೋ ಪಪಟಕಾಹಿ [ಪಮ್ಪಟಕೇಹಿ (ಸೀ.), ಸಪಟಕೇಹಿ (ಸ್ಯಾ.), ಪಪ್ಪಟಕೇಹಿ (ಪೀ)] ಚ;
ಪಾರೇವತಾ ರವಿಹಂಸಾ, ಕುಕುತ್ಥಾ [ಕುಕ್ಕುತ್ಥಾ (ಸ್ಯಾ. ಕ.), ಕುತ್ಥಕಾ (ಪೀ.)] ಚ ನದೀಚರಾ.
‘‘ದಿನ್ದಿಭಾ [ಟಿಟ್ಟಿಭಾ (ಪೀ.)] ಚಕ್ಕವಾಕಾ ಚ, ಪಮ್ಪಕಾ ಜೀವಜೀವಕಾ;
ಕಲನ್ದಕಾ ಉಕ್ಕುಸಾ ಚ, ಸೇನಕಾ ಉದ್ಧರಾ ಬಹೂ.
‘‘ಕೋಟ್ಠಕಾ ಸುಕಪೋತಾ ಚ, ತುಲಿಯಾ ಚಮರಾ ಬಹೂ;
ಕಾರೇನಿಯೋ [ಕಾಸೇನಿಯಾ (ಸ್ಯಾ.)] ಚ ತಿಲಕಾ [ಕಿಲಕಾ (ಕ.)], ಉಪಜೀವನ್ತಿ ತಂ ಸರಂ.
‘‘ಸೀಹಾ ಬ್ಯಗ್ಘಾ ಚ ದೀಪೀ ಚ, ಅಚ್ಛಕೋಕತರಚ್ಛಕಾ;
ವಾನರಾ ಕಿನ್ನರಾ ಚೇವ, ದಿಸ್ಸನ್ತಿ ಮಮ ಅಸ್ಸಮೇ.
‘‘ತಾನಿ ಗನ್ಧಾನಿ ಘಾಯನ್ತೋ, ಭಕ್ಖಯನ್ತೋ ಫಲಾನಹಂ;
ಗನ್ಧೋದಕಂ ಪಿವನ್ತೋ ಚ, ವಸಾಮಿ ಮಮ ಅಸ್ಸಮೇ.
‘‘ಏಣೀಮಿಗಾ ವರಾಹಾ ಚ, ಪಸದಾ ಖುದ್ದರೂಪಕಾ;
ಅಗ್ಗಿಕಾ ¶ ಜೋತಿಕಾ ಚೇವ, ವಸನ್ತಿ ಮಮ ಅಸ್ಸಮೇ.
‘‘ಹಂಸಾ ಕೋಞ್ಚಾ ಮಯೂರಾ ಚ, ಸಾಲಿಕಾಪಿ ಚ ಕೋಕಿಲಾ;
ಮಜ್ಜಾರಿಕಾ [ಮಞ್ಜರಿಕಾ (ಸೀ. ಸ್ಯಾ. ಪೀ.)] ಬಹೂ ತತ್ಥ, ಕೋಸಿಕಾ ಪೋಟ್ಠಸೀಸಕಾ.
‘‘ಪಿಸಾಚಾ ದಾನವಾ ಚೇವ, ಕುಮ್ಭಣ್ಡಾ ರಕ್ಖಸಾ ಬಹೂ;
ಗರುಳಾ ಪನ್ನಗಾ ಚೇವ, ವಸನ್ತಿ ಮಮ ಅಸ್ಸಮೇ.
‘‘ಮಹಾನುಭಾವಾ ಇಸಯೋ, ಸನ್ತಚಿತ್ತಾ ಸಮಾಹಿತಾ;
ಕಮಣ್ಡಲುಧರಾ ¶ ಸಬ್ಬೇ, ಅಜಿನುತ್ತರವಾಸನಾ;
ಜಟಾಭಾರಭರಿತಾವ [ತೇ ಜಟಾಭಾರಭರಿತಾ (ಸೀ. ಪೀ.), ಜಟಾಭಾರಭರಿತಾ ಚ (ಸ್ಯಾ.)], ವಸನ್ತಿ ಮಮ ಅಸ್ಸಮೇ.
‘‘ಯುಗಮತ್ತಞ್ಚ ¶ ಪೇಕ್ಖನ್ತಾ, ನಿಪಕಾ ಸನ್ತವುತ್ತಿನೋ;
ಲಾಭಾಲಾಭೇನ ಸನ್ತುಟ್ಠಾ, ವಸನ್ತಿ ಮಮ ಅಸ್ಸಮೇ.
‘‘ವಾಕಚೀರಂ ಧುನನ್ತಾ ತೇ, ಫೋಟೇನ್ತಾಜಿನಚಮ್ಮಕಂ;
ಸಬಲೇಹಿ ಉಪತ್ಥದ್ಧಾ, ಗಚ್ಛನ್ತಿ ಅಮ್ಬರೇ ತದಾ.
‘‘ನ ತೇ ದಕಂ ಆಹರನ್ತಿ, ಕಟ್ಠಂ ವಾ ಅಗ್ಗಿದಾರುಕಂ;
ಸಯಞ್ಚ ಉಪಸಮ್ಪನ್ನಾ, ಪಾಟಿಹೀರಸ್ಸಿದಂ ಫಲಂ.
‘‘ಲೋಹದೋಣಿಂ ¶ ಗಹೇತ್ವಾನ, ವನಮಜ್ಝೇ ವಸನ್ತಿ ತೇ;
ಕುಞ್ಜರಾವ ಮಹಾನಾಗಾ, ಅಸಮ್ಭೀತಾವ ಕೇಸರೀ.
‘‘ಅಞ್ಞೇ ಗಚ್ಛನ್ತಿ ಗೋಯಾನಂ, ಅಞ್ಞೇ ಪುಬ್ಬವಿದೇಹಕಂ [ಪುಬ್ಬವಿದೇಹನಂ (ಸ್ಯಾ. ಪೀ. ಕ.)];
ಅಞ್ಞೇ ಚ ಉತ್ತರಕುರುಂ, ಸಕಂ ಬಲಮವಸ್ಸಿತಾ [ಬಲಮಪಸ್ಸಿತಾ (ಸ್ಯಾ. ಪೀ. ಕ.)].
‘‘ತತೋ ಪಿಣ್ಡಂ ಆಹರಿತ್ವಾ, ಪರಿಭುಞ್ಜನ್ತಿ ಏಕತೋ;
ಸಬ್ಬೇಸಂ ಪಕ್ಕಮನ್ತಾನಂ, ಉಗ್ಗತೇಜಾನ ತಾದಿನಂ.
‘‘ಅಜಿನಚಮ್ಮಸದ್ದೇನ ¶ , ವನಂ ಸದ್ದಾಯತೇ ತದಾ;
ಏದಿಸಾ ತೇ ಮಹಾವೀರ, ಸಿಸ್ಸಾ ಉಗ್ಗತಪಾ ಮಮ.
‘‘ಪರಿವುತೋ ಅಹಂ ತೇಹಿ, ವಸಾಮಿ ಮಮ ಅಸ್ಸಮೇ;
ತೋಸಿತಾ ಸಕಕಮ್ಮೇನ, ವಿನೀತಾಪಿ ಸಮಾಗತಾ.
‘‘ಆರಾಧಯಿಂಸು ಮಂ ಏತೇ, ಸಕಕಮ್ಮಾಭಿಲಾಸಿನೋ;
ಸೀಲವನ್ತೋ ಚ ನಿಪಕಾ, ಅಪ್ಪಮಞ್ಞಾಸು ಕೋವಿದಾ.
‘‘ಪದುಮುತ್ತರೋ ಲೋಕವಿದೂ, ಆಹುತೀನಂ ಪಟಿಗ್ಗಹೋ;
ಸಮಯಂ ಸಂವಿದಿತ್ವಾನ, ಉಪಗಚ್ಛಿ ವಿನಾಯಕೋ.
‘‘ಉಪಗನ್ತ್ವಾನ ಸಮ್ಬುದ್ಧೋ, ಆತಾಪೀ ನಿಪಕೋ ಮುನಿ;
ಪತ್ತಂ ಪಗ್ಗಯ್ಹ ಸಮ್ಬುದ್ಧೋ, ಭಿಕ್ಖಾಯ ಮಮುಪಾಗಮಿ.
‘‘ಉಪಾಗತಂ ಮಹಾವೀರಂ, ಜಲಜುತ್ತಮನಾಯಕಂ;
ತಿಣಸನ್ಥರಂ [ತಿಣತ್ಥರಂ (ಸ್ಯಾ.), ತಿಣತ್ಥತಂ (ಕ.)] ಪಞ್ಞಾಪೇತ್ವಾ, ಸಾಲಪುಪ್ಫೇಹಿ ಓಕಿರಿಂ.
‘‘ನಿಸಾದೇತ್ವಾನ ¶ [ನಿಸೀದೇತ್ವಾನ (ಸೀ.), ನಿಸೀದಿತ್ವಾನ (ಸ್ಯಾ. ಪೀ.)] ಸಮ್ಬುದ್ಧಂ, ಹಟ್ಠೋ ಸಂವಿಗ್ಗಮಾನಸೋ;
ಖಿಪ್ಪಂ ಪಬ್ಬತಮಾರುಯ್ಹ, ಅಗಳುಂ [ಅಗರುಂ (ಸೀ.)] ಅಗ್ಗಹಿಂ ಅಹಂ.
‘‘ಕುಮ್ಭಮತ್ತಂ ಗಹೇತ್ವಾನ, ಪನಸಂ ದೇವಗನ್ಧಿಕಂ;
ಖನ್ಧೇ ಆರೋಪಯಿತ್ವಾನ, ಉಪಗಚ್ಛಿಂ ವಿನಾಯಕಂ.
‘‘ಫಲಂ ¶ ಬುದ್ಧಸ್ಸ ದತ್ವಾನ, ಅಗಳುಂ ಅನುಲಿಮ್ಪಹಂ;
ಪಸನ್ನಚಿತ್ತೋ ಸುಮನೋ, ಬುದ್ಧಸೇಟ್ಠಂ ಅವನ್ದಿಹಂ.
‘‘ಪದುಮುತ್ತರೋ ಲೋಕವಿದೂ, ಆಹುತೀನಂ ಪಟಿಗ್ಗಹೋ;
ಇಸಿಮಜ್ಝೇ ¶ ನಿಸೀದಿತ್ವಾ, ಇಮಾ ಗಾಥಾ ಅಭಾಸಥ.
‘‘‘ಯೋ ಮೇ ಫಲಞ್ಚ ಅಗಳುಂ, ಆಸನಞ್ಚ ಅದಾಸಿ ಮೇ;
ತಮಹಂ ಕಿತ್ತಯಿಸ್ಸಾಮಿ, ಸುಣಾಥ ಮಮ ಭಾಸತೋ.
‘‘‘ಗಾಮೇ ¶ ವಾ ಯದಿ ವಾರಞ್ಞೇ, ಪಬ್ಭಾರೇಸು ಗುಹಾಸು ವಾ;
ಇಮಸ್ಸ ಚಿತ್ತಮಞ್ಞಾಯ, ನಿಬ್ಬತ್ತಿಸ್ಸತಿ ಭೋಜನಂ.
‘‘‘ದೇವಲೋಕೇ ಮನುಸ್ಸೇ ವಾ, ಉಪಪನ್ನೋ ಅಯಂ ನರೋ;
ಭೋಜನೇಹಿ ಚ ವತ್ಥೇಹಿ, ಪರಿಸಂ ತಪ್ಪಯಿಸ್ಸತಿ.
‘‘‘ಉಪಪಜ್ಜತಿ ಯಂ ಯೋನಿಂ, ದೇವತ್ತಂ ಅಥ ಮಾನುಸಂ;
ಅಕ್ಖೋಭಭೋಗೋ ಹುತ್ವಾನ, ಸಂಸರಿಸ್ಸತಿಯಂ ನರೋ.
‘‘‘ತಿಂಸಕಪ್ಪಸಹಸ್ಸಾನಿ, ದೇವಲೋಕೇ ರಮಿಸ್ಸತಿ;
ಸಹಸ್ಸಕ್ಖತ್ತುಂ ರಾಜಾ ಚ, ಚಕ್ಕವತ್ತೀ ಭವಿಸ್ಸತಿ.
‘‘‘ಏಕಸತ್ತತಿಕ್ಖತ್ತುಞ್ಚ, ದೇವರಜ್ಜಂ ಕರಿಸ್ಸತಿ;
ಪದೇಸರಜ್ಜಂ ವಿಪುಲಂ, ಗಣನಾತೋ ಅಸಙ್ಖಿಯಂ.
‘‘‘ಕಪ್ಪಸತಸಹಸ್ಸಮ್ಹಿ, ಓಕ್ಕಾಕಕುಲಸಮ್ಭವೋ;
ಗೋತಮೋ ನಾಮ ಗೋತ್ತೇನ, ಸತ್ಥಾ ಲೋಕೇ ಭವಿಸ್ಸತಿ.
‘‘‘ತಸ್ಸ ಧಮ್ಮೇಸು ದಾಯಾದೋ, ಓರಸೋ ಧಮ್ಮನಿಮ್ಮಿತೋ [(ಉಪಸೀವೋ ನಾಮ ನಾಮೇನ, ಹೇಸ್ಸತಿ ಸತ್ಥು ಸಾವಕೋ) (ಸ್ಯಾ.)];
ಸಬ್ಬಾಸವೇ ಪರಿಞ್ಞಾಯ, ವಿಹರಿಸ್ಸತಿನಾಸವೋ’.
‘‘ಸುಲದ್ಧಲಾಭೋ ಲದ್ಧೋ ಮೇ, ಯೋಹಂ ಅದ್ದಕ್ಖಿಂ ನಾಯಕಂ;
ತಿಸ್ಸೋ ವಿಜ್ಜಾ ಅನುಪ್ಪತ್ತಾ, ಕತಂ ಬುದ್ಧಸ್ಸ ಸಾಸನಂ.
‘‘ಗಾಮೇ ¶ ¶ ವಾ ಯದಿ ವಾರಞ್ಞೇ, ಪಬ್ಭಾರೇಸು ಗುಹಾಸು ವಾ;
ಮಮ ಸಙ್ಕಪ್ಪಮಞ್ಞಾಯ, ಭೋಜನಂ ಹೋತಿ ಮೇ ಸದಾ.
‘‘ಕಿಲೇಸಾ ಝಾಪಿತಾ ಮಯ್ಹಂ…ಪೇ… ವಿಹರಾಮಿ ಅನಾಸವೋ.
‘‘ಸ್ವಾಗತಂ ವತ ಮೇ ಆಸಿ…ಪೇ… ಕತಂ ಬುದ್ಧಸ್ಸ ಸಾಸನಂ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಉಪಸೀವೋ [ಉಪಸಿವೋ (ಕ.)] ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಉಪಸೀವತ್ಥೇರಸ್ಸಾಪದಾನಂ ಪಞ್ಚಮಂ.
೬. ನನ್ದಕತ್ಥೇರಅಪದಾನಂ
‘‘ಮಿಗಲುದ್ದೋ ¶ ಪುರೇ ಆಸಿಂ, ಅರಞ್ಞೇ ಕಾನನೇ ಅಹಂ;
ಪಸದಂ ಮಿಗಮೇಸನ್ತೋ, ಸಯಮ್ಭುಂ ಅದ್ದಸಂ ಅಹಂ [ಜಿನಂ (ಸೀ.)].
‘‘ಅನುರುದ್ಧೋ ¶ ನಾಮ ಸಮ್ಬುದ್ಧೋ, ಸಯಮ್ಭೂ ಅಪರಾಜಿತೋ;
ವಿವೇಕಕಾಮೋ ಸೋ ಧೀರೋ, ವನಮಜ್ಝೋಗಹೀ ತದಾ.
‘‘ಚತುದಣ್ಡೇ ಗಹೇತ್ವಾನ, ಚತುಟ್ಠಾನೇ ಠಪೇಸಹಂ;
ಮಣ್ಡಪಂ ಸುಕತಂ ಕತ್ವಾ, ಪದ್ಮಪುಪ್ಫೇಹಿ ಛಾದಯಿಂ.
‘‘ಮಣ್ಡಪಂ ¶ ಛಾದಯಿತ್ವಾನ, ಸಯಮ್ಭುಂ ಅಭಿವಾದಯಿಂ;
ಧನುಂ ತತ್ಥೇವ ನಿಕ್ಖಿಪ್ಪ, ಪಬ್ಬಜಿಂ ಅನಗಾರಿಯಂ.
‘‘ನಚಿರಂ ಪಬ್ಬಜಿತಸ್ಸ [ಪಬ್ಬಜಿತಸ್ಸ ಅಚಿರಂ (ಸೀ.)], ಬ್ಯಾಧಿ ಮೇ ಉದಪಜ್ಜಥ;
ಪುಬ್ಬಕಮ್ಮಂ ಸರಿತ್ವಾನ, ತತ್ಥ ಕಾಲಙ್ಕತೋ ಅಹಂ.
‘‘ಪುಬ್ಬಕಮ್ಮೇನ ಸಂಯುತ್ತೋ, ತುಸಿತಂ ಅಗಮಾಸಹಂ;
ತತ್ಥ ಸೋಣ್ಣಮಯಂ ಬ್ಯಮ್ಹಂ, ನಿಬ್ಬತ್ತತಿ ಯದಿಚ್ಛಕಂ.
‘‘ಸಹಸ್ಸಯುತ್ತಂ ಹಯವಾಹಿಂ, ದಿಬ್ಬಯಾನಮಧಿಟ್ಠಿತೋ;
ಆರುಹಿತ್ವಾನ ತಂ ಯಾನಂ, ಗಚ್ಛಾಮಹಂ ಯದಿಚ್ಛಕಂ.
‘‘ತತೋ ¶ ಮೇ ನಿಯ್ಯಮಾನಸ್ಸ, ದೇವಭೂತಸ್ಸ ಮೇ ಸತೋ;
ಸಮನ್ತಾ ಯೋಜನಸತಂ, ಮಣ್ಡಪೋ ಮೇ ಧರೀಯತಿ.
‘‘ಸಯನೇಹಂ ತುವಟ್ಟಾಮಿ, ಅಚ್ಛನ್ನೇ [ಅಚ್ಚನ್ತಂ (ಸೀ.), ಅಚ್ಚನ್ತ (ಪೀ.)] ಪುಪ್ಫಸನ್ಥತೇ;
ಅನ್ತಲಿಕ್ಖಾ ಚ ಪದುಮಾ, ವಸ್ಸನ್ತೇ ನಿಚ್ಚಕಾಲಿಕಂ.
‘‘ಮರೀಚಿಕೇ ಫನ್ದಮಾನೇ, ತಪ್ಪಮಾನೇ ಚ ಆತಪೇ;
ನ ಮಂ ತಾಪೇತಿ ಆತಾಪೋ, ಮಣ್ಡಪಸ್ಸ ಇದಂ ಫಲಂ.
‘‘ದುಗ್ಗತಿಂ ಸಮತಿಕ್ಕನ್ತೋ, ಅಪಾಯಾ ಪಿಹಿತಾ ಮಮ;
ಮಣ್ಡಪೇ ರುಕ್ಖಮೂಲೇ ವಾ, ಸನ್ತಾಪೋ ಮೇ ನ ವಿಜ್ಜತಿ.
‘‘ಮಹೀಸಞ್ಞಂ ಅಧಿಟ್ಠಾಯ, ಲೋಣತೋಯಂ ತರಾಮಹಂ;
ತಸ್ಸ ಮೇ ಸುಕತಂ ಕಮ್ಮಂ, ಬುದ್ಧಪೂಜಾಯಿದಂ ಫಲಂ.
‘‘ಅಪಥಮ್ಪಿ [ಅಬ್ಭಮ್ಹಿ (ಸ್ಯಾ. ಕ.)] ಪಥಂ ಕತ್ವಾ, ಗಚ್ಛಾಮಿ ಅನಿಲಞ್ಜಸೇ;
ಅಹೋ ಮೇ ಸುಕತಂ ಕಮ್ಮಂ, ಬುದ್ಧಪೂಜಾಯಿದಂ ಫಲಂ.
‘‘ಪುಬ್ಬೇನಿವಾಸಂ ¶ ¶ ಜಾನಾಮಿ, ದಿಬ್ಬಚಕ್ಖು ವಿಸೋಧಿತಂ;
ಆಸವಾ ಮೇ ಪರಿಕ್ಖೀಣಾ, ಬುದ್ಧಪೂಜಾಯಿದಂ ಫಲಂ.
‘‘ಜಹಿತಾ ಪುರಿಮಾ ಜಾತಿ, ಬುದ್ಧಸ್ಸ ಓರಸೋ ಅಹಂ;
ದಾಯಾದೋಮ್ಹಿ ಚ ಸದ್ಧಮ್ಮೇ, ಬುದ್ಧಪೂಜಾಯಿದಂ ಫಲಂ.
‘‘ಆರಾಧಿತೋಮ್ಹಿ ¶ ಸುಗತಂ, ಗೋತಮಂ ಸಕ್ಯಪುಙ್ಗವಂ;
ಧಮ್ಮಧಜೋ ಧಮ್ಮದಾಯಾದೋ [ಧಮ್ಮಾದಾಸೋ (ಕ.)], ಬುದ್ಧಪೂಜಾಯಿದಂ ಫಲಂ.
‘‘ಉಪಟ್ಠಿತ್ವಾನ ಸಮ್ಬುದ್ಧಂ, ಗೋತಮಂ ಸಕ್ಯಪುಙ್ಗವಂ;
ಪಾರಙ್ಗಮನಿಯಂ ಮಗ್ಗಂ, ಅಪುಚ್ಛಿಂ ಲೋಕನಾಯಕಂ.
‘‘ಅಜ್ಝಿಟ್ಠೋ ಕಥಯೀ ಬುದ್ಧೋ, ಗಮ್ಭೀರಂ ನಿಪುಣಂ ಪದಂ;
ತಸ್ಸಾಹಂ ಧಮ್ಮಂ ಸುತ್ವಾನ, ಪತ್ತೋಮ್ಹಿ ಆಸವಕ್ಖಯಂ.
‘‘ಅಹೋ ಮೇ ಸುಕತಂ ಕಮ್ಮಂ, ಪರಿಮುತ್ತೋಮ್ಹಿ ಜಾತಿಯಾ;
ಸಬ್ಬಾಸವಪರಿಕ್ಖೀಣೋ, ನತ್ಥಿ ದಾನಿ ಪುನಬ್ಭವೋ.
‘‘ಕಿಲೇಸಾ ಝಾಪಿತಾ ಮಯ್ಹಂ…ಪೇ… ವಿಹರಾಮಿ ಅನಾಸವೋ.
‘‘ಸ್ವಾಗತಂ ವತ ಮೇ ಆಸಿ…ಪೇ… ಕತಂ ಬುದ್ಧಸ್ಸ ಸಾಸನಂ.
‘‘ಪಟಿಸಮ್ಭಿದಾ ¶ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ನನ್ದಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ನನ್ದಕತ್ಥೇರಸ್ಸಾಪದಾನಂ ಛಟ್ಠಂ.
೭. ಹೇಮಕತ್ಥೇರಅಪದಾನಂ
‘‘ಪಬ್ಭಾರಕೂಟಂ ¶ ನಿಸ್ಸಾಯ, ಅನೋಮೋ ನಾಮ ತಾಪಸೋ;
ಅಸ್ಸಮಂ ಸುಕತಂ ಕತ್ವಾ, ಪಣ್ಣಸಾಲೇ ವಸೀ ತದಾ.
‘‘ಸಿದ್ಧಂ ತಸ್ಸ ತಪೋ ಕಮ್ಮಂ, ಸಿದ್ಧಿಪತ್ತೋ ಸಕೇ ಬಲೇ;
ಸಕಸಾಮಞ್ಞವಿಕ್ಕನ್ತೋ, ಆತಾಪೀ ನಿಪಕೋ ಮುನಿ.
‘‘ವಿಸಾರದೋ ಸಸಮಯೇ, ಪರವಾದೇ ಚ ಕೋವಿದೋ;
ಪಟ್ಠೋ ಭೂಮನ್ತಲಿಕ್ಖಮ್ಹಿ, ಉಪ್ಪಾತಮ್ಹಿ ಚ ಕೋವಿದೋ.
‘‘ವೀತಸೋಕೋ ನಿರಾರಮ್ಭೋ, ಅಪ್ಪಾಹಾರೋ ಅಲೋಲುಪೋ;
ಲಾಭಾಲಾಭೇನ ಸನ್ತುಟ್ಠೋ, ಝಾಯೀ ಝಾನರತೋ ಮುನಿ.
‘‘ಪಿಯದಸ್ಸೀ ನಾಮ ಸಮ್ಬುದ್ಧೋ, ಅಗ್ಗೋ ಕಾರುಣಿಕೋ ಮುನಿ;
ಸತ್ತೇ ತಾರೇತುಕಾಮೋ ಸೋ, ಕರುಣಾಯ ಫರೀ ತದಾ.
‘‘ಬೋಧನೇಯ್ಯಂ ¶ ಜನಂ ದಿಸ್ವಾ, ಪಿಯದಸ್ಸೀ ಮಹಾಮುನಿ;
ಚಕ್ಕವಾಳಸಹಸ್ಸಮ್ಪಿ, ಗನ್ತ್ವಾ ಓವದತೇ ಮುನಿ.
‘‘ಮಮುದ್ಧರಿತುಕಾಮೋ ¶ ಸೋ, ಮಮಸ್ಸಮಮುಪಾಗಮಿ;
ನ ದಿಟ್ಠೋ ಮೇ ಜಿನೋ ಪುಬ್ಬೇ, ನ ಸುತೋಪಿ ಚ ಕಸ್ಸಚಿ.
‘‘ಉಪ್ಪಾತಾ ಸುಪಿನಾ ಮಯ್ಹಂ, ಲಕ್ಖಣಾ ಸುಪ್ಪಕಾಸಿತಾ;
ಪಟ್ಠೋ ಭೂಮನ್ತಲಿಕ್ಖಮ್ಹಿ, ನಕ್ಖತ್ತಪದಕೋವಿದೋ.
‘‘ಸೋಹಂ ಬುದ್ಧಸ್ಸ ಸುತ್ವಾನ, ತತ್ಥ ಚಿತ್ತಂ ಪಸಾದಯಿಂ;
ತಿಟ್ಠನ್ತೋ [ಭುಞ್ಜನ್ತೋ (ಸೀ. ಪೀ. ಕ.)] ವಾ ನಿಸಿನ್ನೋ ವಾ, ಸರಾಮಿ ನಿಚ್ಚಕಾಲಿಕಂ.
‘‘ಮಯಿ ¶ ಏವಂ ಸರನ್ತಮ್ಹಿ, ಭಗವಾಪಿ ಅನುಸ್ಸರಿ;
ಬುದ್ಧಂ ಅನುಸ್ಸರನ್ತಸ್ಸ, ಪೀತಿ ಮೇ ಹೋತಿ ತಾವದೇ.
‘‘ಕಾಲಞ್ಚ ¶ ಪುನರಾಗಮ್ಮ, ಉಪೇಸಿ ಮಂ ಮಹಾಮುನಿ;
ಸಮ್ಪತ್ತೇಪಿ ನ ಜಾನಾಮಿ, ಅಯಂ ಬುದ್ಧೋ ಮಹಾಮುನಿ.
‘‘ಅನುಕಮ್ಪಕೋ ಕಾರುಣಿಕೋ, ಪಿಯದಸ್ಸೀ ಮಹಾಮುನಿ;
ಸಞ್ಜಾನಾಪೇಸಿ ಅತ್ತಾನಂ, ‘ಅಹಂ ಬುದ್ಧೋ ಸದೇವಕೇ’.
‘‘ಸಞ್ಜಾನಿತ್ವಾನ ಸಮ್ಬುದ್ಧಂ, ಪಿಯದಸ್ಸಿಂ ಮಹಾಮುನಿಂ;
ಸಕಂ ಚಿತ್ತಂ ಪಸಾದೇತ್ವಾ, ಇದಂ ವಚನಮಬ್ರವಿಂ.
‘‘‘ಅಞ್ಞೇ [ಸಬ್ಬೇ (ಸ್ಯಾ.)] ಪೀಠೇ ಚ ಪಲ್ಲಙ್ಕೇ, ಆಸನ್ದೀಸು ನಿಸೀದರೇ;
ತುವಮ್ಪಿ ಸಬ್ಬದಸ್ಸಾವೀ, ನಿಸೀದ ರತನಾಸನೇ’.
‘‘ಸಬ್ಬರತನಮಯಂ ಪೀಠಂ, ನಿಮ್ಮಿನಿತ್ವಾನ ತಾವದೇ;
ಪಿಯದಸ್ಸಿಸ್ಸ ಮುನಿನೋ, ಅದಾಸಿಂ ಇದ್ಧಿನಿಮ್ಮಿತಂ.
‘‘ರತನೇ ಚ ನಿಸಿನ್ನಸ್ಸ, ಪೀಠಕೇ ಇದ್ಧಿನಿಮ್ಮಿತೇ;
ಕುಮ್ಭಮತ್ತಂ ಜಮ್ಬುಫಲಂ, ಅದಾಸಿಂ ತಾವದೇ ಅಹಂ.
‘‘ಮಮ ಹಾಸಂ ಜನೇತ್ವಾನ, ಪರಿಭುಞ್ಜಿ ಮಹಾಮುನಿ;
ತದಾ ಚಿತ್ತಂ ಪಸಾದೇತ್ವಾ, ಸತ್ಥಾರಂ ಅಭಿವಾದಯಿಂ.
‘‘ಪಿಯದಸ್ಸೀ ತು ಭಗವಾ, ಲೋಕಜೇಟ್ಠೋ ನರಾಸಭೋ;
ರತನಾಸನಮಾಸೀನೋ, ಇಮಾ ಗಾಥಾ ಅಭಾಸಥ.
‘‘‘ಯೋ ಮೇ ರತನಮಯಂ ಪೀಠಂ, ಅಮತಞ್ಚ ಫಲಂ ಅದಾ;
ತಮಹಂ ಕಿತ್ತಯಿಸ್ಸಾಮಿ, ಸುಣಾಥ ಮಮ ಭಾಸತೋ.
‘‘‘ಸತ್ತಸತ್ತತಿ ¶ ಕಪ್ಪಾನಿ, ದೇವಲೋಕೇ ರಮಿಸ್ಸತಿ;
ಪಞ್ಚಸತ್ತತಿಕ್ಖತ್ತುಞ್ಚ, ಚಕ್ಕವತ್ತೀ ಭವಿಸ್ಸತಿ.
‘‘‘ದ್ವತ್ತಿಂಸಕ್ಖತ್ತುಂ ¶ ದೇವಿನ್ದೋ, ದೇವರಜ್ಜಂ ಕರಿಸ್ಸತಿ;
ಪದೇಸರಜ್ಜಂ ವಿಪುಲಂ, ಗಣನಾತೋ ಅಸಙ್ಖಿಯಂ.
‘‘‘ಸೋಣ್ಣಮಯಂ ¶ ರೂಪಿಮಯಂ, ಪಲ್ಲಙ್ಕಂ ಸುಕತಂ ಬಹುಂ;
ಲೋಹಿತಙ್ಗಮಯಞ್ಚೇವ, ಲಚ್ಛತಿ ರತನಾಮಯಂ.
‘‘‘ಚಙ್ಕಮನ್ತಮ್ಪಿ ಮನುಜಂ, ಪುಞ್ಞಕಮ್ಮಸಮಙ್ಗಿನಂ;
ಪಲ್ಲಙ್ಕಾನಿ ಅನೇಕಾನಿ, ಪರಿವಾರೇಸ್ಸರೇ ತದಾ.
‘‘‘ಕೂಟಾಗಾರಾ ¶ ಚ ಪಾಸಾದಾ, ಸಯನಞ್ಚ ಮಹಾರಹಂ;
ಇಮಸ್ಸ ಚಿತ್ತಮಞ್ಞಾಯ, ನಿಬ್ಬತ್ತಿಸ್ಸನ್ತಿ ತಾವದೇ.
‘‘‘ಸಟ್ಠಿ ನಾಗಸಹಸ್ಸಾನಿ, ಸಬ್ಬಾಲಙ್ಕಾರಭೂಸಿತಾ;
ಸುವಣ್ಣಕಚ್ಛಾ ಮಾತಙ್ಗಾ, ಹೇಮಕಪ್ಪನವಾಸಸಾ [ಹೇಮಕಪ್ಪನಿವಾಸನಾ (ಸೀ. ಸ್ಯಾ.), ಹೇಮಕಪ್ಪನಿವಾಸಸಾ (ಕ.)].
‘‘‘ಆರೂಳ್ಹಾ ಗಾಮಣೀಯೇಹಿ, ತೋಮರಙ್ಕುಸಪಾಣಿಭಿ;
ಇಮಂ ಪರಿಚರಿಸ್ಸನ್ತಿ, ರತ್ನಪೀಠಸ್ಸಿದಂ ಫಲಂ.
‘‘‘ಸಟ್ಠಿ ಅಸ್ಸಸಹಸ್ಸಾನಿ, ಸಬ್ಬಾಲಙ್ಕಾರಭೂಸಿತಾ;
ಆಜಾನೀಯಾವ ಜಾತಿಯಾ, ಸಿನ್ಧವಾ ಸೀಘವಾಹಿನೋ.
‘‘‘ಆರೂಳ್ಹಾ ಗಾಮಣೀಯೇಹಿ, ಇಲ್ಲಿಯಾಚಾಪಧಾರಿಭಿ;
ತೇಪಿಮಂ ಪರಿಚರಿಸ್ಸನ್ತಿ, ರತ್ನಪೀಠಸ್ಸಿದಂ ಫಲಂ.
‘‘‘ಸಟ್ಠಿ ರಥಸಹಸ್ಸಾನಿ, ಸಬ್ಬಾಲಙ್ಕಾರಭೂಸಿತಾ;
ದೀಪಾ ಅಥೋಪಿ ವೇಯಗ್ಘಾ, ಸನ್ನದ್ಧಾ ಉಸ್ಸಿತದ್ಧಜಾ.
‘‘‘ಆರೂಳ್ಹಾ ¶ ಗಾಮಣೀಯೇಹಿ, ಚಾಪಹತ್ಥೇಹಿ ವಮ್ಮಿಭಿ;
ಪರಿವಾರೇಸ್ಸನ್ತಿಮಂ ನಿಚ್ಚಂ, ರತ್ನಪೀಠಸ್ಸಿದಂ ಫಲಂ.
‘‘‘ಸಟ್ಠಿ ಧೇನುಸಹಸ್ಸಾನಿ, ದೋಹಞ್ಞಾ ಪುಙ್ಗವೂಸಭೇ;
ವಚ್ಛಕೇ ಜನಯಿಸ್ಸನ್ತಿ, ರತ್ನಪೀಠಸ್ಸಿದಂ ಫಲಂ.
‘‘‘ಸೋಳಸಿತ್ಥಿಸಹಸ್ಸಾನಿ, ಸಬ್ಬಾಲಙ್ಕಾರಭೂಸಿತಾ;
ವಿಚಿತ್ತವತ್ಥಾಭರಣಾ, ಆಮುಕ್ಕಮಣಿಕುಣ್ಡಲಾ.
‘‘‘ಅಳಾರಪಮ್ಹಾ ಹಸುಲಾ, ಸುಸಞ್ಞಾ ತನುಮಜ್ಝಿಮಾ;
ಪರಿವಾರೇಸ್ಸನ್ತಿಮಂ ನಿಚ್ಚಂ, ರತ್ನಪೀಠಸ್ಸಿದಂ ಫಲಂ.
‘‘‘ಅಟ್ಠಾರಸೇ ಕಪ್ಪಸತೇ, ಗೋತಮೋ ನಾಮ ಚಕ್ಖುಮಾ;
ತಮನ್ಧಕಾರಂ ವಿಧಮಿತ್ವಾ, ಬುದ್ಧೋ ಲೋಕೇ ಭವಿಸ್ಸತಿ.
‘‘‘ತಸ್ಸ ¶ ದಸ್ಸನಮಾಗಮ್ಮ, ಪಬ್ಬಜಿಸ್ಸತಿಕಿಞ್ಚನೋ;
ತೋಸಯಿತ್ವಾನ ಸತ್ಥಾರಂ, ಸಾಸನೇಭಿರಮಿಸ್ಸತಿ.
‘‘‘ತಸ್ಸ ¶ ಧಮ್ಮಂ ಸುಣಿತ್ವಾನ, ಕಿಲೇಸೇ ಘಾತಯಿಸ್ಸತಿ;
ಸಬ್ಬಾಸವೇ ಪರಿಞ್ಞಾಯ, ನಿಬ್ಬಾಯಿಸ್ಸತಿನಾಸವೋ’.
‘‘ವೀರಿಯಂ ¶ ಮೇ ಧುರಧೋರಯ್ಹಂ, ಯೋಗಕ್ಖೇಮಾಧಿವಾಹನಂ;
ಉತ್ತಮತ್ಥಂ ಪತ್ಥಯನ್ತೋ, ಸಾಸನೇ ವಿಹರಾಮಹಂ.
‘‘ಇದಂ ಪಚ್ಛಿಮಕಂ ಮಯ್ಹಂ, ಚರಿಮೋ ವತ್ತತೇ ಭವೋ;
ಸಬ್ಬಾಸವಾ ಪರಿಕ್ಖೀಣಾ, ನತ್ಥಿ ದಾನಿ ಪುನಬ್ಭವೋ.
‘‘ಕಿಲೇಸಾ ಝಾಪಿತಾ ಮಯ್ಹಂ…ಪೇ… ವಿಹರಾಮಿ ಅನಾಸವೋ.
‘‘ಸ್ವಾಗತಂ ¶ ವತ ಮೇ ಆಸಿ…ಪೇ… ಕತಂ ಬುದ್ಧಸ್ಸ ಸಾಸನಂ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಹೇಮಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ;
ಹೇಮಕತ್ಥೇರಸ್ಸಾಪದಾನಂ ಸತ್ತಮಂ.
ಸತ್ತರಸಮಂ ಭಾಣವಾರಂ.
೮. ತೋದೇಯ್ಯತ್ಥೇರಅಪದಾನಂ
‘‘ರಾಜಾ ಅಜಿತಞ್ಜಯೋ [ರಾಜಾಸಿ ವಿಜಯೋ (ಸೀ. ಅಟ್ಠ.), ರಾಜಾ ವಿಜಿತಜಯೋ (ಸ್ಯಾ.)] ನಾಮ, ಕೇತುಮತೀಪುರುತ್ತಮೇ;
ಸೂರೋ ವಿಕ್ಕಮಸಮ್ಪನ್ನೋ, ಪುರಮಜ್ಝಾವಸೀ ತದಾ.
‘‘ತಸ್ಸ ರಞ್ಞೋ ಪಮತ್ತಸ್ಸ, ಅಟವಿಯೋ ಸಮುಟ್ಠಹುಂ;
ಓತಾರಾ [ಉತ್ತರಾ (ಸ್ಯಾ.), ಓಚರಾ (ಪೀ.)] ತುಣ್ಡಿಕಾ ಚೇವ, ರಟ್ಠಂ ವಿದ್ಧಂಸಯುಂ ತದಾ.
‘‘ಪಚ್ಚನ್ತೇ ಕುಪಿತೇ ಖಿಪ್ಪಂ, ಸನ್ನಿಪಾತೇಸಿರಿನ್ದಮೋ;
ಭಟೇ ಚೇವ ಬಲತ್ಥೇ ಚ, ಅರಿಂ ನಿಗ್ಗಾಹಯಿ ತದಾ.
‘‘ಹತ್ಥಾರೋಹಾ ಅನೀಕಟ್ಠಾ, ಸೂರಾ ಚ ಚಮ್ಮಯೋಧಿನೋ;
ಧನುಗ್ಗಹಾ ಚ ಉಗ್ಗಾ ಚ, ಸಬ್ಬೇ ಸನ್ನಿಪತುಂ ತದಾ.
‘‘ಆಳಾರಿಕಾ ಚ ಕಪ್ಪಕಾ, ನ್ಹಾಪಕಾ ಮಾಲಕಾರಕಾ;
ಸೂರಾ ವಿಜಿತಸಙ್ಗಾಮಾ, ಸಬ್ಬೇ ಸನ್ನಿಪತುಂ ತದಾ.
‘‘ಖಗ್ಗಹತ್ಥಾ ¶ ಚ ಪುರಿಸಾ, ಚಾಪಹತ್ಥಾ ಚ ವಮ್ಮಿನೋ;
ಲುದ್ದಾ ವಿಜಿತಸಙ್ಗಾಮಾ, ಸಬ್ಬೇ ಸನ್ನಿಪತುಂ ತದಾ.
‘‘ತಿಧಾಪಭಿನ್ನಾ ¶ ¶ ಮಾತಙ್ಗಾ, ಕುಞ್ಜರಾ ಸಟ್ಠಿಹಾಯನಾ;
ಸುವಣ್ಣಕಚ್ಛಾಲಙ್ಕಾರಾ, ಸಬ್ಬೇ ಸನ್ನಿಪತುಂ ತದಾ.
‘‘ಖಮಾ ಸೀತಸ್ಸ ಉಣ್ಹಸ್ಸ, ಉಕ್ಕಾರುಹರಣಸ್ಸ ಚ;
ಯೋಧಾಜೀವಾ ಕತಕಮ್ಮಾ, ಸಬ್ಬೇ ಸನ್ನಿಪತುಂ ತದಾ.
‘‘ಸಙ್ಖಸದ್ದಂ ¶ ಭೇರಿಸದ್ದಂ, ಅಥೋ ಉತುಜ [ಉದ್ಧವ (ಸೀ.), ಉದ್ದಟ (ಸ್ಯಾ.)] ಸದ್ದಕಂ;
ಏತೇಹಿ ತೇ ಹಾಸಯನ್ತಾ, ಸಬ್ಬೇ ಸನ್ನಿಪತುಂ ತದಾ.
‘‘ತಿಸೂಲಕೋನ್ತಿಮನ್ತೇಹಿ [ತಿಸೂಲಕೋನ್ತಮನ್ತೇಹಿ (ಸೀ.), ಕವಚೇಹಿ ತೋಮರೇಹಿ (ಸೀ.), ಧನೂಹಿ ತೋಮರೇಹಿ (ಸ್ಯಾ.)] ಚ;
ಕೋಟ್ಟೇನ್ತಾನಂ ನಿಪಾತೇನ್ತಾ [ಕೋಟ್ಟಯನ್ತಾ ನಿವತ್ತೇನ್ತಾ (ಸ್ಯಾ.)], ಸಬ್ಬೇ ಸನ್ನಿಪತುಂ ತದಾ.
‘‘ಕಿಮೇವಾತಿನಿಸಾಮೇತ್ವಾ [ಕವಚಾನಿವಾಸೇತ್ವಾ (ಸ್ಯಾ.)], ಸರಾಜಾ ಅಜಿತಞ್ಜಯೋ [ಅಜಿನಂ ಜಿನೋ (ಸೀ.), ಅಜಿತಞ್ಜಿನೋ (ಸ್ಯಾ.)];
ಸಟ್ಠಿ ಪಾಣಸಹಸ್ಸಾನಿ, ಸೂಲೇ ಉತ್ತಾಸಯಿಂ ತದಾ.
‘‘ಸದ್ದಂ ಮಾನುಸಕಾಕಂಸು, ಅಹೋ ರಾಜಾ ಅಧಮ್ಮಿಕೋ;
ನಿರಯೇ ಪಚ್ಚಮಾನಸ್ಸ, ಕದಾ ಅನ್ತೋ ಭವಿಸ್ಸತಿ.
‘‘ಸಯನೇಹಂ ತುವಟ್ಟೇನ್ತೋ, ಪಸ್ಸಾಮಿ ನಿರಯೇ ತದಾ;
ನ ಸುಪಾಮಿ ದಿವಾರತ್ತಿಂ, ಸೂಲೇನ ತಜ್ಜಯನ್ತಿ ಮಂ.
‘‘ಕಿಂ ಪಮಾದೇನ ರಜ್ಜೇನ, ವಾಹನೇನ ಬಲೇನ ಚ;
ನ ತೇ ಪಹೋನ್ತಿ ಧಾರೇತುಂ, ತಾಪಯನ್ತಿ [ತಾಸಯನ್ತಿ (ಸೀ. ಸ್ಯಾ.)] ಮಮಂ ಸದಾ.
‘‘ಕಿಂ ಮೇ ಪುತ್ತೇಹಿ ದಾರೇಹಿ, ರಜ್ಜೇನ ಸಕಲೇನ ಚ;
ಯಂನೂನ ಪಬ್ಬಜೇಯ್ಯಾಹಂ, ಗತಿಮಗ್ಗಂ ವಿಸೋಧಯೇ.
‘‘ಸಟ್ಠಿ ¶ ನಾಗಸಹಸ್ಸಾನಿ, ಸಬ್ಬಾಲಙ್ಕಾರಭೂಸಿತೇ;
ಸುವಣ್ಣಕಚ್ಛೇ ಮಾತಙ್ಗೇ, ಹೇಮಕಪ್ಪನವಾಸಸೇ.
‘‘ಆರೂಳ್ಹೇ ಗಾಮಣೀಯೇಹಿ, ತೋಮರಙ್ಕುಸಪಾಣಿಭಿ;
ಸಙ್ಗಾಮಾವಚರೇ ಠಾನೇ, ಅನಪೇಕ್ಖೋ ವಿಹಾಯಹಂ;
ಸಕಕಮ್ಮೇನ ಸನ್ತತ್ತೋ, ನಿಕ್ಖಮಿಂ ಅನಗಾರಿಯಂ.
‘‘ಸಟ್ಠಿ ¶ ಅಸ್ಸಸಹಸ್ಸಾನಿ, ಸಬ್ಬಾಲಙ್ಕಾರಭೂಸಿತೇ;
ಆಜಾನೀಯೇವ ಜಾತಿಯಾ, ಸಿನ್ಧವೇ ಸೀಘವಾಹನೇ.
‘‘ಆರೂಳ್ಹೇ ಗಾಮಣೀಯೇಹಿ, ಚಾಪಹತ್ಥೇಹಿ ವಮ್ಮಿಭಿ;
ಪಹಾರೇತ್ವಾನ [ಪಹಾಯಿತ್ವಾನ (ಸೀ. ಪೀ.), ಛಡ್ಡಯಿತ್ವಾನ (ಸ್ಯಾ.)] ತೇ ಸಬ್ಬೇ, ನಿಕ್ಖಮಿಂ ಅನಗಾರಿಯಂ.
‘‘ಸಟ್ಠಿ ¶ ರಥಸಹಸ್ಸಾನಿ, ಸಬ್ಬಾಲಙ್ಕಾರಭೂಸಿತೇ;
ದೀಪೇ ಅಥೋಪಿ ವೇಯಗ್ಘೇ, ಸನ್ನದ್ಧೇ ಉಸ್ಸಿತದ್ಧಜೇ;
ತೇ ಸಬ್ಬೇ ಪರಿಹಾರೇತ್ವಾ [ಪರಿವಜ್ಜೇತ್ವಾ (ಸ್ಯಾ.), ಪರಿಹಾಯಿತ್ವಾ (ಪೀ.)], ಪಬ್ಬಜಿಂ ಅನಗಾರಿಯಂ.
‘‘ಸಟ್ಠಿ ¶ ಧೇನುಸಹಸ್ಸಾನಿ, ಸಬ್ಬಾ ಕಂಸೂಪಧಾರಣಾ;
ತಾಯೋಪಿ [ಗಾವಿಯೋ (ಸ್ಯಾ.), ಧೇನುಯೋ (ಕ.)] ಛಡ್ಡಯಿತ್ವಾನ, ಪಬ್ಬಜಿಂ ಅನಗಾರಿಯಂ.
‘‘ಸಟ್ಠಿ ಇತ್ಥಿಸಹಸ್ಸಾನಿ, ಸಬ್ಬಾಲಙ್ಕಾರಭೂಸಿತಾ;
ವಿಚಿತ್ತವತ್ಥಾಭರಣಾ, ಆಮುಕ್ಕಮಣಿಕುಣ್ಡಲಾ.
‘‘ಅಳಾರಪಮ್ಹಾ ಹಸುಲಾ, ಸುಸಞ್ಞಾ ತನುಮಜ್ಝಿಮಾ;
ತಾ ಹಿತ್ವಾ ಕನ್ದಮಾನಾಯೋ, ಪಬ್ಬಜಿಂ ಅನಗಾರಿಯಂ.
‘‘ಸಟ್ಠಿ ಗಾಮಸಹಸ್ಸಾನಿ, ಪರಿಪುಣ್ಣಾನಿ ಸಬ್ಬಸೋ;
ಛಡ್ಡಯಿತ್ವಾನ ತಂ ರಜ್ಜಂ, ಪಬ್ಬಜಿಂ ಅನಗಾರಿಯಂ.
‘‘ನಗರಾ ¶ ನಿಕ್ಖಮಿತ್ವಾನ, ಹಿಮವನ್ತಮುಪಾಗಮಿಂ;
ಭಾಗೀರಥೀನದೀತೀರೇ, ಅಸ್ಸಮಂ ಮಾಪಯಿಂ ಅಹಂ.
‘‘ಪಣ್ಣಸಾಲಂ ಕರಿತ್ವಾನ, ಅಗ್ಯಾಗಾರಂ ಅಕಾಸಹಂ;
ಆರದ್ಧವೀರಿಯೋ ಪಹಿತತ್ತೋ, ವಸಾಮಿ ಅಸ್ಸಮೇ ಅಹಂ.
‘‘ಮಣ್ಡಪೇ ರುಕ್ಖಮೂಲೇ ವಾ, ಸುಞ್ಞಾಗಾರೇ ಚ ಝಾಯತೋ;
ನ ತು ವಿಜ್ಜತಿ ತಾಸೋ ಮೇ, ನ ಪಸ್ಸೇ ಭಯಭೇರವಂ.
‘‘ಸುಮೇಧೋ ನಾಮ ಸಮ್ಬುದ್ಧೋ, ಅಗ್ಗೋ ಕಾರುಣಿಕೋ ಮುನಿ;
ಞಾಣಾಲೋಕೇನ ಜೋತನ್ತೋ, ಲೋಕೇ ಉಪ್ಪಜ್ಜಿ ತಾವದೇ.
‘‘ಮಮ ಅಸ್ಸಮಸಾಮನ್ತಾ, ಯಕ್ಖೋ ಆಸಿ ಮಹಿದ್ಧಿಕೋ;
ಬುದ್ಧಸೇಟ್ಠಮ್ಹಿ ಉಪ್ಪನ್ನೇ, ಆರೋಚೇಸಿ ಮಮಂ ತದಾ.
‘‘ಬುದ್ಧೋ ¶ ಲೋಕೇ ಸಮುಪ್ಪನ್ನೋ, ಸುಮೇಧೋ ನಾಮ ಚಕ್ಖುಮಾ;
ತಾರೇತಿ ಜನತಂ ಸಬ್ಬಂ, ತಮ್ಪಿ ಸೋ ತಾರಯಿಸ್ಸತಿ.
‘‘ಯಕ್ಖಸ್ಸ ವಚನಂ ಸುತ್ವಾ, ಸಂವಿಗ್ಗೋ ಆಸಿ ತಾವದೇ;
ಬುದ್ಧೋ ಬುದ್ಧೋತಿ ಚಿನ್ತೇನ್ತೋ, ಅಸ್ಸಮಂ ಪಟಿಸಾಮಯಿಂ.
‘‘ಅಗ್ಗಿದಾರುಞ್ಚ ಛಡ್ಡೇತ್ವಾ, ಸಂಸಾಮೇತ್ವಾನ ಸನ್ಥತಂ;
ಅಸ್ಸಮಂ ಅಭಿವನ್ದಿತ್ವಾ, ನಿಕ್ಖಮಿಂ ವಿಪಿನಾ ಅಹಂ.
‘‘ತತೋ ಚನ್ದನಮಾದಾಯ, ಗಾಮಾ ಗಾಮಂ ಪುರಾ ಪುರಂ;
ದೇವದೇವಂ ಗವೇಸನ್ತೋ, ಉಪಗಚ್ಛಿಂ ವಿನಾಯಕಂ.
‘‘ಭಗವಾ ¶ ತಮ್ಹಿ ಸಮಯೇ, ಸುಮೇಧೋ ಲೋಕನಾಯಕೋ;
ಚತುಸಚ್ಚಂ ಪಕಾಸೇನ್ತೋ, ಬೋಧೇತಿ ಜನತಂ ಬಹುಂ.
‘‘ಅಞ್ಜಲಿಂ ¶ ಪಗ್ಗಹೇತ್ವಾನ, ಸೀಸೇ ಕತ್ವಾನ ಚನ್ದನಂ;
ಸಮ್ಬುದ್ಧಂ ಅಭಿವಾದೇತ್ವಾ, ಇಮಾ ಗಾಥಾ ಅಭಾಸಹಂ.
‘‘‘ವಸ್ಸಿಕೇ ಪುಪ್ಫಮಾನಮ್ಹಿ, ಸನ್ತಿಕೇ ಉಪವಾಯತಿ;
ತ್ವಂ ವೀರ ಗುಣಗನ್ಧೇನ, ದಿಸಾ ಸಬ್ಬಾ ಪವಾಯಸಿ.
‘‘‘ಚಮ್ಪಕೇ ನಾಗವನಿಕೇ, ಅತಿಮುತ್ತಕಕೇತಕೇ;
ಸಾಲೇಸು ಪುಪ್ಫಮಾನೇಸು, ಅನುವಾತಂ ಪವಾಯತಿ.
‘‘‘ತವ ¶ ಗನ್ಧಂ ಸುಣಿತ್ವಾನ, ಹಿಮವನ್ತಾ ಇಧಾಗಮಿಂ;
ಪೂಜೇಮಿ ತಂ ಮಹಾವೀರ, ಲೋಕಜೇಟ್ಠ ಮಹಾಯಸ’.
‘‘ವರಚನ್ದನೇನಾನುಲಿಮ್ಪಿಂ, ಸುಮೇಧಂ ಲೋಕನಾಯಕಂ;
ಸಕಂ ಚಿತ್ತಂ ಪಸಾದೇತ್ವಾ, ತುಣ್ಹೀ ಅಟ್ಠಾಸಿ ತಾವದೇ.
‘‘ಸುಮೇಧೋ ನಾಮ ಭಗವಾ, ಲೋಕಜೇಟ್ಠೋ ನರಾಸಭೋ;
ಭಿಕ್ಖುಸಙ್ಘೇ ನಿಸೀದಿತ್ವಾ, ಇಮಾ ಗಾಥಾ ಅಭಾಸಥ.
‘‘‘ಯೋ ಮೇ ಗುಣೇ ಪಕಿತ್ತೇಸಿ, ಚನ್ದನಞ್ಚ ಅಪೂಜಯಿ;
ತಮಹಂ ಕಿತ್ತಯಿಸ್ಸಾಮಿ, ಸುಣಾಥ ಮಮ ಭಾಸತೋ.
‘‘‘ಆದೇಯ್ಯವಾಕ್ಯವಚನೋ, ಬ್ರಹ್ಮಾ ಉಜು ಪತಾಪವಾ;
ಪಞ್ಚವೀಸತಿಕಪ್ಪಾನಿ, ಸಪ್ಪಭಾಸೋ ಭವಿಸ್ಸತಿ.
‘‘‘ಛಬ್ಬೀಸತಿಕಪ್ಪಸತೇ, ದೇವಲೋಕೇ ರಮಿಸ್ಸತಿ;
ಸಹಸ್ಸಕ್ಖತ್ತುಂ ರಾಜಾ ಚ, ಚಕ್ಕವತ್ತೀ ಭವಿಸ್ಸತಿ.
‘‘‘ತೇತ್ತಿಂಸಕ್ಖತ್ತುಂ ¶ ದೇವಿನ್ದೋ, ದೇವರಜ್ಜಂ ಕರಿಸ್ಸತಿ;
ಪದೇಸರಜ್ಜಂ ವಿಪುಲಂ, ಗಣನಾತೋ ಅಸಙ್ಖಿಯಂ.
‘‘‘ತತೋ ¶ ಚುತೋಯಂ ಮನುಜೋ, ಮನುಸ್ಸತ್ತಂ ಗಮಿಸ್ಸತಿ;
ಪುಞ್ಞಕಮ್ಮೇನ ಸಂಯುತ್ತೋ, ಬ್ರಹ್ಮಬನ್ಧು ಭವಿಸ್ಸತಿ.
‘‘‘ಅಜ್ಝಾಯಕೋ ಮನ್ತಧರೋ, ತಿಣ್ಣಂ ವೇದಾನ ಪಾರಗೂ;
ತಿಲಕ್ಖಣೇನ ಸಮ್ಪನ್ನೋ, ಬಾವರೀ ನಾಮ ಬ್ರಾಹ್ಮಣೋ.
‘‘‘ತಸ್ಸ ಸಿಸ್ಸೋ ಭವಿತ್ವಾನ, ಹೇಸ್ಸತಿ ಮನ್ತಪಾರಗೂ;
ಉಪಗನ್ತ್ವಾನ ಸಮ್ಬುದ್ಧಂ, ಗೋತಮಂ ಸಕ್ಯಪುಙ್ಗವಂ.
‘‘‘ಪುಚ್ಛಿತ್ವಾ ¶ ನಿಪುಣೇ ಪಞ್ಹೇ, ಭಾವಯಿತ್ವಾನ ಅಞ್ಜಸಂ [ಹಾಸಯಿತ್ವಾನ ಮಾನಸಂ (ಸ್ಯಾ.), ಭಾವಯಿತ್ವಾನ ಸಞ್ಚಯಂ (ಕ.)];
ಸಬ್ಬಾಸವೇ ಪರಿಞ್ಞಾಯ, ವಿಹರಿಸ್ಸತಿನಾಸವೋ’.
‘‘ತಿವಿಧಗ್ಗಿ ನಿಬ್ಬುತಾ ಮಯ್ಹಂ, ಭವಾ ಸಬ್ಬೇ ಸಮೂಹತಾ;
ಸಬ್ಬಾಸವೇ ಪರಿಞ್ಞಾಯ, ವಿಹರಾಮಿ ಅನಾಸವೋ.
‘‘ಕಿಲೇಸಾ ಝಾಪಿತಾ ಮಯ್ಹಂ…ಪೇ… ವಿಹರಾಮಿ ಅನಾಸವೋ.
‘‘ಸ್ವಾಗತಂ ವತ ಮೇ ಆಸಿ…ಪೇ… ಕತಂ ಬುದ್ಧಸ್ಸ ಸಾಸನಂ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ತೋದೇಯ್ಯೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ತೋದೇಯ್ಯತ್ಥೇರಸ್ಸಾಪದಾನಂ ಅಟ್ಠಮಂ.
೯. ಜತುಕಣ್ಣಿತ್ಥೇರಅಪದಾನಂ
‘‘ನಗರೇ ¶ ಹಂಸವತಿಯಾ, ಸೇಟ್ಠಿಪುತ್ತೋ ಅಹೋಸಹಂ;
ಸಮಪ್ಪಿತೋ ಕಾಮಗುಣೇ, ಪರಿಚಾರೇಮಹಂ ತದಾ.
‘‘ತತೋ ¶ [ತಯೋ (ಸೀ.)] ಪಾಸಾದಮಾರುಯ್ಹ, ಮಹಾಭೋಗೇ ವಲಞ್ಜಕೋ [ಉಬ್ಬಿದ್ಧಾ ಗೇಹಲುಞ್ಜಕಾ (ಕ.), ಉಬ್ಬಿದ್ಧಾಗೇಹಲಞ್ಛಕಾ (ಸೀ.)];
ತತ್ಥ ನಚ್ಚೇಹಿ ಗೀತೇಹಿ, ಪರಿಚಾರೇಮಹಂ ತದಾ.
‘‘ತೂರಿಯಾ ¶ ಆಹತಾ ಮಯ್ಹಂ, ಸಮ್ಮತಾಳಸಮಾಹಿತಾ;
ನಚ್ಚನ್ತಾ [ರಞ್ಜನ್ತೀ (ಸ್ಯಾ.), ರಜ್ಜನ್ತಾ (ಕ.)] ಇತ್ಥಿಯೋ ಸಬ್ಬಾ, ಹರನ್ತಿಯೇವ ಮೇ ಮನೋ.
‘‘ಚೇಲಾಪಿಕಾ [ಚೇಲಾವಕಾ (ಸ್ಯಾ.), ವೇಲಾಮಿಕಾ (ಪೀ.)] ಲಾಮಣಿಕಾ [ವಾಮನಿಕಾ (ಸ್ಯಾ. ಪೀ.)], ಕುಞ್ಜವಾಸೀ ತಿಮಜ್ಝಿಕಾ [ಕುಞ್ಜವಾ ಸೀಹಿಮಜ್ಝಿತಾ (ಸ್ಯಾ.), ಕುಜ್ಜಾ ವಾ ಸೀಹಿಮಜ್ಝಿಕಾ (ಪೀ.)];
ಲಙ್ಘಿಕಾ ಸೋಕಜ್ಝಾಯೀ ಚ, ಪರಿವಾರೇನ್ತಿ ಮಂ ಸದಾ.
‘‘ವೇತಾಳಿನೋ ಕುಮ್ಭಥೂನೀ, ನಟಾ ಚ ನಚ್ಚಕಾ ಬಹೂ;
ನಟಕಾ ನಾಟಕಾ ಚೇವ, ಪರಿವಾರೇನ್ತಿ ಮಂ ಸದಾ.
‘‘ಕಪ್ಪಕಾ ನ್ಹಾಪಕಾ ಸೂದಾ, ಮಾಲಾಕಾರಾ ಸುಪಾಸಕಾ [ಸುಮಾಪಕಾ (ಸೀ. ಸ್ಯಾ.)];
ಜಲ್ಲಾ ಮಲ್ಲಾ ಚ ತೇ ಸಬ್ಬೇ, ಪರಿವಾರೇನ್ತಿ ಮಂ ಸದಾ.
‘‘ಏತೇಸು ಕೀಳಮಾನೇಸು, ಸಿಕ್ಖಿತೇ ಕತುಪಾಸನೇ;
ರತ್ತಿನ್ದಿವಂ ನ ಜಾನಾಮಿ, ಇನ್ದೋವ ತಿದಸಙ್ಗಣೇ.
‘‘ಅದ್ಧಿಕಾ ಪಥಿಕಾ ಸಬ್ಬೇ, ಯಾಚಕಾ ವರಕಾ ಬಹೂ;
ಉಪಗಚ್ಛನ್ತಿ ತೇ ನಿಚ್ಚಂ, ಭಿಕ್ಖಯನ್ತಾ ಮಮಂ ಘರಂ.
‘‘ಸಮಣಾ ¶ ಬ್ರಾಹ್ಮಣಾ ಚೇವ, ಪುಞ್ಞಕ್ಖೇತ್ತಾ ಅನುತ್ತರಾ;
ವಡ್ಢಯನ್ತಾ ಮಮಂ ಪುಞ್ಞಂ, ಆಗಚ್ಛನ್ತಿ ಮಮಂ ಘರಂ.
‘‘ಪಟಗಾ [ಪಟಕಾ (ಸೀ. ಸ್ಯಾ.), ಪದಕಾ (ಪೀ.)] ಲಟುಕಾ [ಲಟಕಾ (ಸೀ.)] ಸಬ್ಬೇ, ನಿಗಣ್ಠಾ ಪುಪ್ಫಸಾಟಕಾ;
ತೇದಣ್ಡಿಕಾ ¶ ಏಕಸಿಖಾ, ಆಗಚ್ಛನ್ತಿ ಮಮಂ ಘರಂ.
‘‘ಆಜೀವಕಾ ವಿಲುತ್ತಾವೀ, ಗೋಧಮ್ಮಾ ದೇವಧಮ್ಮಿಕಾ;
ರಜೋಜಲ್ಲಧರಾ ಏತೇ, ಆಗಚ್ಛನ್ತಿ ಮಮಂ ಘರಂ.
‘‘ಪರಿತ್ತಕಾ ಸನ್ತಿಪತ್ತಾ [ಪರಿವತ್ತಕಾ ಸಿದ್ಧಿಪತ್ತಾ (ಸೀ. ಸ್ಯಾ. ಪೀ.)], ಕೋಧಪುಗ್ಗನಿಕಾ [ಕೋಣ್ಡಪುಗ್ಗಣಿಕಾ (ಸೀ.), ಕೋಣ್ಡಪುಗ್ಗಲಿಕಾ (ಪೀ.)] ಬಹೂ;
ತಪಸ್ಸೀ ವನಚಾರೀ ಚ, ಆಗಚ್ಛನ್ತಿ ಮಮಂ ಘರಂ.
‘‘ಓಡ್ಡಕಾ ದಮಿಳಾ ಚೇವ, ಸಾಕುಳಾ ಮಲವಾಳಕಾ [ಮಲಯಾಲಕಾ (ಸೀ. ಸ್ಯಾ. ಪೀ.)];
ಸವರಾ ಯೋನಕಾ ಚೇವ, ಆಗಚ್ಛನ್ತಿ ಮಮಂ ಘರಂ.
‘‘ಅನ್ಧಕಾ ¶ ¶ ಮುಣ್ಡಕಾ ಸಬ್ಬೇ, ಕೋಟಲಾ ಹನುವಿನ್ದಕಾ [ಕೋಲಕಾ ಸಾನುವಿನ್ದಕಾ (ಸೀ. ಪೀ.)];
ಆರಾವಚೀನರಟ್ಠಾ ಚ, ಆಗಚ್ಛನ್ತಿ ಮಮಂ ಘರಂ.
‘‘ಅಲಸನ್ದಕಾ [ಅಲಸನ್ತಾ (ಕ.)] ಪಲ್ಲವಕಾ, ಧಮ್ಮರಾ ನಿಗ್ಗಮಾನುಸಾ [ಬಬ್ಬರಾ ಭಗ್ಗಕಾರುಸಾ (ಸೀ.)];
ಗೇಹಿಕಾ [ರೋಹಿತಾ (ಸೀ.), ಬಾಹಿಕಾ (ಪೀ.)] ಚೇತಪುತ್ತಾ ಚ, ಆಗಚ್ಛನ್ತಿ ಮಮಂ ಘರಂ.
‘‘ಮಾಧುರಕಾ ಕೋಸಲಕಾ, ಕಲಿಙ್ಗಾ [ಕಾಸಿಕಾ (ಸೀ.)] ಹತ್ಥಿಪೋರಿಕಾ;
ಇಸಿಣ್ಡಾ ಮಕ್ಕಲಾ ಚೇವ, ಆಗಚ್ಛನ್ತಿ ಮಮಂ ಘರಂ.
‘‘ಚೇಲಾವಕಾ ಆರಬ್ಭಾ [ಅರಮ್ಮಾ (ಸೀ. ಪೀ.)] ಚ, ಓಘುಳ್ಹಾ [ಓಕ್ಕಲಾ (ಸೀ.)] ಮೇಘಲಾ ಬಹೂ;
ಖುದ್ದಕಾ ಸುದ್ದಕಾ ಚೇವ, ಆಗಚ್ಛನ್ತಿ ಮಮಂ ಘರಂ.
‘‘ರೋಹಣಾ ಸಿನ್ಧವಾ ಚೇವ, ಚಿತಕಾ ಏಕಕಣ್ಣಿಕಾ;
ಸುರಟ್ಠಾ ಅಪರನ್ತಾ ಚ, ಆಗಚ್ಛನ್ತಿ ಮಮಂ ಘರಂ.
‘‘ಸುಪ್ಪಾರಕಾ ಕುಮಾರಾ [ಕಿಕುಮಾರಾ (ಸೀ. ಪೀ.)] ಚ, ಮಲ್ಲಸೋವಣ್ಣಭೂಮಿಕಾ [ಮಲಯಾ ಸೋಣ್ಣಭೂಮಿಕಾ (ಸೀ. ಸ್ಯಾ. ಪೀ.)];
ವಜ್ಜೀತಙ್ಗಾ [ವಜ್ಜೀ ತಾರಾ (ಸೀ.), ವಜ್ಜೀಹಾರಾ (ಸ್ಯಾ. ಪೀ.)] ಚ ತೇ ಸಬ್ಬೇ, ಆಗಚ್ಛನ್ತಿ ಮಮಂ ಘರಂ.
‘‘ನಳಕಾರಾ ¶ ಪೇಸಕಾರಾ, ಚಮ್ಮಕಾರಾ ಚ ತಚ್ಛಕಾ;
ಕಮ್ಮಾರಾ ಕುಮ್ಭಕಾರಾ ಚ, ಆಗಚ್ಛನ್ತಿ ಮಮಂ ಘರಂ.
‘‘ಮಣಿಕಾರಾ ಲೋಹಕಾರಾ, ಸೋಣ್ಣಕಾರಾ ಚ ದುಸ್ಸಿಕಾ;
ತಿಪುಕಾರಾ ಚ ತೇ ಸಬ್ಬೇ, ಆಗಚ್ಛನ್ತಿ ಮಮಂ ಘರಂ.
‘‘ಉಸುಕಾರಾ ಭಮಕಾರಾ, ಪೇಸಕಾರಾ ಚ ಗನ್ಧಿಕಾ;
ರಜಕಾ ತುನ್ನವಾಯಾ ಚ, ಆಗಚ್ಛನ್ತಿ ಮಮಂ ಘರಂ.
‘‘ತೇಲಿಕಾ ¶ ಕಟ್ಠಹಾರಾ ಚ, ಉದಹಾರಾ ಚ ಪೇಸ್ಸಿಕಾ;
ಸೂಪಿಕಾ ಸೂಪರಕ್ಖಾ ಚ, ಆಗಚ್ಛನ್ತಿ ಮಮಂ ಘರಂ.
‘‘ದೋವಾರಿಕಾ ¶ ಅನೀಕಟ್ಠಾ, ಬನ್ಧಿಕಾ [ವನ್ದಿಕಾ (ಸೀ.), ಗನ್ಥಿಕಾ (ಸ್ಯಾ.), ಸನ್ದಿಕಾ (ಪೀ.)] ಪುಪ್ಫಛಡ್ಡಕಾ;
ಹತ್ಥಾರುಹಾ ಹತ್ಥಿಪಾಲಾ, ಆಗಚ್ಛನ್ತಿ ಮಮಂ ಘರಂ.
‘‘ಆನನ್ದಸ್ಸ ¶ ಮಹಾರಞ್ಞೋ [ಆನನ್ದಸ್ಸ ನಾಮ ರಞ್ಞೋ (ಸ್ಯಾ.), ಅರಿನ್ದಮನಾಮ ರಞ್ಞೋ (ಪೀ.)], ಮಮತ್ಥಸ್ಸ [ಪಮತ್ತಸ್ಸ (ಸೀ. ಪೀ.), ಸಮಗ್ಗಸ್ಸ (ಸ್ಯಾ.)] ಅದಾಸಹಂ;
ಸತ್ತವಣ್ಣೇನ ರತನೇನ, ಊನತ್ಥಂ [ಊನತ್ತಂ (ಸೀ. ಸ್ಯಾ. ಪೀ.)] ಪೂರಯಾಮಹಂ.
‘‘ಯೇ ಮಯಾ ಕಿತ್ತಿತಾ ಸಬ್ಬೇ, ನಾನಾವಣ್ಣಾ ಬಹೂ ಜನಾ;
ತೇಸಾಹಂ ಚಿತ್ತಮಞ್ಞಾಯ, ತಪ್ಪಯಿಂ ರತನೇನಹಂ.
‘‘ವಗ್ಗೂಸು ಭಾಸಮಾನಾಸು, ವಜ್ಜಮಾನಾಸು ಭೇರಿಸು;
ಸಙ್ಖೇಸು ಧಮಯನ್ತೇಸು, ಸಕಗೇಹೇ ರಮಾಮಹಂ.
‘‘ಭಗವಾ ತಮ್ಹಿ ಸಮಯೇ, ಪದುಮುತ್ತರನಾಯಕೋ;
ವಸೀಸತಸಹಸ್ಸೇಹಿ, ಪರಿಕ್ಖೀಣಾಸವೇಹಿ ಸೋ.
‘‘ಭಿಕ್ಖೂಹಿ ಸಹಿತೋ ವೀಥಿಂ, ಪಟಿಪಜ್ಜಿತ್ಥ ಚಕ್ಖುಮಾ;
ಓಭಾಸೇನ್ತೋ ದಿಸಾ ಸಬ್ಬಾ, ದೀಪರುಕ್ಖೋವ ಜೋತತಿ.
‘‘ವಜ್ಜನ್ತಿ ¶ ಭೇರಿಯೋ ಸಬ್ಬಾ, ಗಚ್ಛನ್ತೇ ಲೋಕನಾಯಕೇ;
ಪಭಾ ನಿದ್ಧಾವತೇ ತಸ್ಸ, ಸತರಂಸೀವ ಉಗ್ಗತೋ.
‘‘ಕವಾಟನ್ತರಿಕಾಯಾಪಿ, ಪವಿಟ್ಠೇನ ಚ ರಸ್ಮಿನಾ;
ಅನ್ತೋಘರೇಸು ವಿಪುಲೋ, ಆಲೋಕೋ ಆಸಿ ತಾವದೇ.
‘‘ಪಭಂ ದಿಸ್ವಾನ ಬುದ್ಧಸ್ಸ, ಪಾರಿಸಜ್ಜೇ ಅವೋಚಹಂ;
ನಿಸ್ಸಂಸಯಂ ಬುದ್ಧಸೇಟ್ಠೋ, ಇಮಂ ವೀಥಿಮುಪಾಗತೋ.
‘‘ಖಿಪ್ಪಂ ಓರುಯ್ಹ ಪಾಸಾದಾ, ಅಗಮಿಂ ಅನ್ತರಾಪಣಂ;
ಸಮ್ಬುದ್ಧಂ ಅಭಿವಾದೇತ್ವಾ, ಇದಂ ವಚನಮಬ್ರವಿಂ.
‘‘‘ಅನುಕಮ್ಪತು ಮೇ ಬುದ್ಧೋ, ಜಲಜುತ್ತಮನಾಯಕೋ;
ವಸೀಸತಸಹಸ್ಸೇಹಿ, ಅಧಿವಾಸೇಸಿ ಸೋ ಮುನಿ’.
‘‘ನಿಮನ್ತೇತ್ವಾನ ಸಮ್ಬುದ್ಧಂ, ಅಭಿನೇಸಿಂ ಸಕಂ ಘರಂ;
ತತ್ಥ ಅನ್ನೇನ ಪಾನೇನ, ಸನ್ತಪ್ಪೇಸಿಂ ಮಹಾಮುನಿಂ.
‘‘ಭುತ್ತಾವಿಂ ಕಾಲಮಞ್ಞಾಯ, ಬುದ್ಧಸೇಟ್ಠಸ್ಸ ತಾದಿನೋ;
ಸತಙ್ಗಿಕೇನ ತೂರಿಯೇನ, ಬುದ್ಧಸೇಟ್ಠಂ ಉಪಟ್ಠಹಿಂ.
‘‘ಪದುಮುತ್ತರೋ ಲೋಕವಿದೂ, ಆಹುತೀನಂ ಪಟಿಗ್ಗಹೋ;
ಅನ್ತೋಘರೇ ನಿಸೀದಿತ್ವಾ, ಇಮಾ ಗಾಥಾ ಅಭಾಸಥ.
‘‘‘ಯೋ ¶ ¶ ¶ ಮಂ ತೂರಿಯೇಹುಪಟ್ಠಾಸಿ, ಅನ್ನಪಾನಞ್ಚದಾಸಿ ಮೇ;
ತಮಹಂ ಕಿತ್ತಯಿಸ್ಸಾಮಿ, ಸುಣಾಥ ಮಮ ಭಾಸತೋ.
‘‘‘ಪಹೂತಭಕ್ಖೋ ಹುತ್ವಾನ, ಸಹಿರಞ್ಞೋ ಸಭೋಜನೋ;
ಚತುದೀಪೇ ಏಕರಜ್ಜಂ, ಕಾರಯಿಸ್ಸತಿಯಂ ನರೋ.
‘‘‘ಪಞ್ಚಸೀಲೇ ¶ ಸಮಾದಾಯ, ದಸಕಮ್ಮಪಥೇ ತತೋ;
ಸಮಾದಾಯ ಪವತ್ತೇನ್ತೋ, ಪರಿಸಂ ಸಿಕ್ಖಾಪಯಿಸ್ಸತಿ.
‘‘‘ತೂರಿಯಸತಸಹಸ್ಸಾನಿ, ಭೇರಿಯೋ ಸಮಲಙ್ಕತಾ;
ವಜ್ಜಯಿಸ್ಸನ್ತಿಮಂ ನಿಚ್ಚಂ, ಉಪಟ್ಠಾನಸ್ಸಿದಂ ಫಲಂ.
‘‘‘ತಿಂಸಕಪ್ಪಸಹಸ್ಸಾನಿ, ದೇವಲೋಕೇ ರಮಿಸ್ಸತಿ;
ಚತುಸಟ್ಠಿಕ್ಖತ್ತುಂ ದೇವಿನ್ದೋ, ದೇವರಜ್ಜಂ ಕರಿಸ್ಸತಿ.
‘‘‘ಚತುಸಟ್ಠಿಕ್ಖತ್ತುಂ ರಾಜಾ, ಚಕ್ಕವತ್ತೀ ಭವಿಸ್ಸತಿ;
ಪದೇಸರಜ್ಜಂ ವಿಪುಲಂ, ಗಣನಾತೋ ಅಸಙ್ಖಿಯಂ.
‘‘‘ಕಪ್ಪಸತಸಹಸ್ಸಮ್ಹಿ, ಓಕ್ಕಾಕಕುಲಸಮ್ಭವೋ;
ಗೋತಮೋ ನಾಮ ಗೋತ್ತೇನ, ಸತ್ಥಾ ಲೋಕೇ ಭವಿಸ್ಸತಿ.
‘‘‘ಉಪಪಜ್ಜತಿ ಯಂ ಯೋನಿಂ, ದೇವತ್ತಂ ಅಥ ಮಾನುಸಂ;
ಅನೂನಭೋಗೋ ಹುತ್ವಾನ, ಮನುಸ್ಸತ್ತಂ ಗಮಿಸ್ಸತಿ.
‘‘‘ಅಜ್ಝಾಯಕೋ ಭವಿತ್ವಾನ, ತಿಣ್ಣಂ ವೇದಾನ ಪಾರಗೂ;
ಉತ್ತಮತ್ಥಂ ಗವೇಸನ್ತೋ, ಚರಿಸ್ಸತಿ ಮಹಿಂ ಇಮಂ.
‘‘‘ಸೋ ಪಚ್ಛಾ ಪಬ್ಬಜಿತ್ವಾನ, ಸುಕ್ಕಮೂಲೇನ ಚೋದಿತೋ;
ಗೋತಮಸ್ಸ ಭಗವತೋ, ಸಾಸನೇಭಿರಮಿಸ್ಸತಿ.
‘‘‘ಆರಾಧಯಿತ್ವಾನ ಸಮ್ಬುದ್ಧಂ, ಗೋತಮಂ ಸಕ್ಯಪುಙ್ಗವಂ;
ಕಿಲೇಸೇ ಝಾಪಯಿತ್ವಾನ, ಅರಹಾಯಂ ಭವಿಸ್ಸತಿ’.
‘‘ವಿಪಿನೇ ಬ್ಯಗ್ಘರಾಜಾವ, ಮಿಗರಾಜಾವ ಕೇಸರೀ;
ಅಭೀತೋ ವಿಹರಾಮಜ್ಜ, ಸಕ್ಯಪುತ್ತಸ್ಸ ಸಾಸನೇ.
‘‘ದೇವಲೋಕೇ ¶ ಮನುಸ್ಸೇ ವಾ, ದಲಿದ್ದೇ ದುಗ್ಗತಿಮ್ಹಿ ವಾ;
ನಿಬ್ಬತ್ತಿಂ ಮೇ ನ ಪಸ್ಸಾಮಿ, ಉಪಟ್ಠಾನಸ್ಸಿದಂ ಫಲಂ.
‘‘ವಿವೇಕಮನುಯುತ್ತೋಮ್ಹಿ ¶ , ಉಪಸನ್ತೋ ನಿರೂಪಧಿ;
ನಾಗೋವ ಬನ್ಧನಂ ಛೇತ್ವಾ, ವಿಹರಾಮಿ ಅನಾಸವೋ.
‘‘ಕಿಲೇಸಾ ¶ ಝಾಪಿತಾ ಮಯ್ಹಂ…ಪೇ… ವಿಹರಾಮಿ ಅನಾಸವೋ.
‘‘ಸ್ವಾಗತಂ ವತ ಮೇ ಆಸಿ…ಪೇ… ಕತಂ ಬುದ್ಧಸ್ಸ ಸಾಸನಂ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಜತುಕಣ್ಣಿತ್ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಜತುಕಣ್ಣಿತ್ಥೇರಸ್ಸಾಪದಾನಂ ನವಮಂ.
೧೦. ಉದೇನತ್ಥೇರಅಪದಾನಂ
‘‘ಹಿಮವನ್ತಸ್ಸಾವಿದೂರೇ ¶ , ಪದುಮೋ ನಾಮ ಪಬ್ಬತೋ;
ಅಸ್ಸಮೋ ಸುಕತೋ ಮಯ್ಹಂ, ಪಣ್ಣಸಾಲಾ ಸುಮಾಪಿತಾ.
‘‘ನದಿಯೋ ಸನ್ದರೇ ತತ್ಥ, ಸುಪತಿತ್ಥಾ ಮನೋರಮಾ;
ಅಚ್ಛೋದಕಾ ಸೀತಜಲಾ, ಸನ್ದರೇ ನದಿಯೋ ಸದಾ.
‘‘ಪಾಠೀನಾ ¶ ಪಾವುಸಾ ಮಚ್ಛಾ, ಬಲಜಾ ಮುಞ್ಜರೋಹಿತಾ;
ಸೋಭೇನ್ತಾ ನದಿಯೋ ಏತೇ, ವಸನ್ತಿ ನದಿಯಾ ಸದಾ.
‘‘ಅಮ್ಬಜಮ್ಬೂಹಿ ಸಞ್ಛನ್ನಾ, ಕರೇರಿತಿಲಕಾ ತಥಾ;
ಉದ್ದಾಲಕಾ ಪಾಟಲಿಯೋ, ಸೋಭೇನ್ತಿ ಮಮ ಅಸ್ಸಮಂ.
‘‘ಅಙ್ಕೋಲಕಾ ಬಿಮ್ಬಿಜಾಲಾ, ಮಾಯಾಕಾರೀ ಚ ಪುಪ್ಫಿತಾ;
ಗನ್ಧೇನ ಉಪವಾಯನ್ತಾ, ಸೋಭೇನ್ತಿ ಮಮ ಅಸ್ಸಮಂ.
‘‘ಅತಿಮುತ್ತಾ ಸತ್ತಲಿಕಾ, ನಾಗಾ ಸಾಲಾ ಚ ಪುಪ್ಫಿತಾ;
ದಿಬ್ಬಗನ್ಧಂ ಸಮ್ಪವನ್ತಾ, ಸೋಭೇನ್ತಿ ಮಮ ಅಸ್ಸಮಂ.
‘‘ಕೋಸಮ್ಬಾ ಸಳಲಾ ನೀಪಾ, ಅಟ್ಠಙ್ಗಾಪಿ ಚ ಪುಪ್ಫಿತಾ [ಅಟ್ಠಙ್ಗಾ ಚ ಸುಪುಪ್ಫಿತಾ (ಸೀ.), ಕಟ್ಠಙ್ಗಾ ಚ ಸುಪುಪ್ಫಿತಾ (ಪೀ.)];
ದಿಬ್ಬಗನ್ಧಂ ಸಮ್ಪವನ್ತಾ, ಸೋಭೇನ್ತಿ ಮಮ ಅಸ್ಸಮಂ.
‘‘ಹರೀತಕಾ ಆಮಲಕಾ, ಅಮ್ಬಜಮ್ಬುವಿಭೀತಕಾ;
ಕೋಲಾ ಭಲ್ಲಾತಕಾ ಬಿಲ್ಲಾ, ಫಲಾನಿ ಬಹು ಅಸ್ಸಮೇ.
‘‘ಕಲಮ್ಬಾ ¶ ಕನ್ದಲೀ ತತ್ಥ, ಪುಪ್ಫನ್ತಿ ಮಮ ಅಸ್ಸಮೇ;
ದಿಬ್ಬಗನ್ಧಂ [ದಿಬ್ಬಗನ್ಧಾ (ಸೀ. ಸ್ಯಾ. ಪೀ.) ಏವಂ ಪರತ್ಥಪಿ] ಸಮ್ಪವನ್ತಾ, ಸೋಭೇನ್ತಿ ಮಮ ಅಸ್ಸಮಂ.
‘‘ಅಸೋಕಪಿಣ್ಡಿವಾರೀ ¶ ಚ [ಅಸೋಕಪಿಣ್ಡೀ ಚ ವರೀ (ಸೀ. ಸ್ಯಾ.), ಅಸೋಕಪಿಣ್ಡೀ ಚ ವಾರೀ (ಪೀ.)], ನಿಮ್ಬರುಕ್ಖಾ ಚ ಪುಪ್ಫಿತಾ;
ದಿಬ್ಬಗನ್ಧಂ ಸಮ್ಪವನ್ತಾ, ಸೋಭೇನ್ತಿ ಮಮ ಅಸ್ಸಮಂ.
‘‘ಪುನ್ನಾಗಾ ಗಿರಿಪುನ್ನಾಗಾ, ತಿಮಿರಾ ತತ್ಥ ಪುಪ್ಫಿತಾ;
ದಿಬ್ಬಗನ್ಧಂ ಸಮ್ಪವನ್ತಾ, ಸೋಭೇನ್ತಿ ಮಮ ಅಸ್ಸಮಂ.
‘‘ನಿಗ್ಗುಣ್ಡೀ ಸಿರಿನಿಗ್ಗುಣ್ಡೀ, ಚಮ್ಪರುಕ್ಖೇತ್ಥ ಪುಪ್ಫಿತಾ;
ದಿಬ್ಬಗನ್ಧಂ ಸಮ್ಪವನ್ತಾ, ಸೋಭೇನ್ತಿ ಮಮ ಅಸ್ಸಮಂ.
‘‘ಅವಿದೂರೇ ¶ ಪೋಕ್ಖರಣೀ, ಚಕ್ಕವಾಕೂಪಕೂಜಿತಾ;
ಮನ್ದಾಲಕೇಹಿ ಸಞ್ಛನ್ನಾ, ಪದುಮುಪ್ಪಲಕೇಹಿ ಚ.
‘‘ಅಚ್ಛೋದಕಾ ¶ ಸೀತಜಲಾ, ಸುಪತಿತ್ಥಾ ಮನೋರಮಾ;
ಅಚ್ಛಾ ಫಲಿಕಸಮಾನಾ, ಸೋಭೇನ್ತಿ ಮಮ ಅಸ್ಸಮಂ.
‘‘ಪದುಮಾ ಪುಪ್ಫರೇ ತತ್ಥ, ಪುಣ್ಡರೀಕಾ ಚ ಉಪ್ಪಲಾ;
ಮನ್ದಾಲಕೇಹಿ ಸಞ್ಛನ್ನಾ, ಸೋಭೇನ್ತಿ ಮಮ ಅಸ್ಸಮಂ.
‘‘ಪಾಠೀನಾ ಪಾವುಸಾ ಮಚ್ಛಾ, ಬಲಜಾ ಮುಞ್ಜರೋಹಿತಾ;
ವಿಚರನ್ತಾವ ತೇ ತತ್ಥ, ಸೋಭೇನ್ತಿ ಮಮ ಅಸ್ಸಮಂ.
‘‘ಕುಮ್ಭೀಲಾ ಸುಸುಮಾರಾ ಚ, ಕಚ್ಛಪಾ ಚ ಗಹಾ ಬಹೂ;
ಓಗಹಾ ಅಜಗರಾ ಚ, ಸೋಭೇನ್ತಿ ಮಮ ಅಸ್ಸಮಂ.
‘‘ಪಾರೇವತಾ ರವಿಹಂಸಾ, ಚಕ್ಕವಾಕಾ ನದೀಚರಾ;
ದಿನ್ದಿಭಾ ಸಾಳಿಕಾ ಚೇತ್ಥ, ಸೋಭೇನ್ತಿ ಮಮ ಅಸ್ಸಮಂ.
‘‘ನಯಿತಾ ಅಮ್ಬಗನ್ಧೀ ಚ, ಕೇತಕಾ ತತ್ಥ ಪುಪ್ಫಿತಾ;
ದಿಬ್ಬಗನ್ಧಂ ಸಮ್ಪವನ್ತಾ, ಸೋಭೇನ್ತಿ ಮಮ ಅಸ್ಸಮಂ.
‘‘ಸೀಹಾ ಬ್ಯಗ್ಘಾ ಚ ದೀಪೀ ಚ, ಅಚ್ಛಕೋಕತರಚ್ಛಕಾ;
ಅನುಸಞ್ಚರನ್ತಾ ಪವನೇ, ಸೋಭೇನ್ತಿ ಮಮ ಅಸ್ಸಮಂ.
‘‘ಜಟಾಭಾರೇನ ಭರಿತಾ, ಅಜಿನುತ್ತರವಾಸನಾ;
ಅನುಸಞ್ಚರನ್ತಾ ಪವನೇ, ಸೋಭೇನ್ತಿ ಮಮ ಅಸ್ಸಮಂ.
‘‘ಅಜಿನಾನಿಧರಾ ¶ ಏತೇ, ನಿಪಕಾ ಸನ್ತವುತ್ತಿನೋ;
ಅಪ್ಪಾಹಾರಾವ ತೇ ಸಬ್ಬೇ, ಸೋಭೇನ್ತಿ ಮಮ ಅಸ್ಸಮಂ.
‘‘ಖಾರಿಭಾರಂ ¶ ಗಹೇತ್ವಾನ, ಅಜ್ಝೋಗಯ್ಹ ವನಂ ತದಾ;
ಮೂಲಫಲಾನಿ ಭುಞ್ಜನ್ತಾ, ವಸನ್ತಿ ಅಸ್ಸಮೇ ತದಾ.
‘‘ನ ¶ ತೇ ದಾರುಂ ಆಹರನ್ತಿ, ಉದಕಂ ಪಾದಧೋವನಂ;
ಸಬ್ಬೇಸಂ ಆನುಭಾವೇನ, ಸಯಮೇವಾಹರೀಯತಿ.
‘‘ಚುಲ್ಲಾಸೀತಿಸಹಸ್ಸಾನಿ, ಇಸಯೇತ್ಥ ಸಮಾಗತಾ;
ಸಬ್ಬೇವ ಝಾಯಿನೋ ಏತೇ, ಉತ್ತಮತ್ಥಗವೇಸಕಾ.
‘‘ತಪಸ್ಸಿನೋ ಬ್ರಹ್ಮಚಾರೀ, ಚೋದೇನ್ತಾ ಅಪ್ಪನಾವ ತೇ;
ಅಮ್ಬರಾವಚರಾ ಸಬ್ಬೇ, ವಸನ್ತಿ ಅಸ್ಸಮೇ ತದಾ.
‘‘ಪಞ್ಚಾಹಂ ಸನ್ನಿಪತನ್ತಿ, ಏಕಗ್ಗಾ ಸನ್ತವುತ್ತಿನೋ;
ಅಞ್ಞೋಞ್ಞಂ ಅಭಿವಾದೇತ್ವಾ, ಪಕ್ಕಮನ್ತಿ ದಿಸಾಮುಖಾ.
‘‘ಪದುಮುತ್ತರೋ ನಾಮ ಜಿನೋ, ಸಬ್ಬಧಮ್ಮಾನ ಪಾರಗೂ;
ತಮನ್ಧಕಾರಂ ವಿಧಮಂ, ಉಪ್ಪಜ್ಜಿ ತಾವದೇ ಜಿನೋ.
‘‘ಮಮ ¶ ಅಸ್ಸಮಸಾಮನ್ತಾ, ಯಕ್ಖೋ ಆಸಿ ಮಹಿದ್ಧಿಕೋ;
ಸೋ ಮೇ ಸಂಸಿತ್ಥ ಸಮ್ಬುದ್ಧಂ, ಜಲಜುತ್ತಮನಾಯಕಂ.
‘‘ಏಸ ಬುದ್ಧೋ ಸಮುಪ್ಪನ್ನೋ, ಪದುಮುತ್ತರೋ ಮಹಾಮುನಿ;
ಖಿಪ್ಪಂ ಗನ್ತ್ವಾನ ಸಮ್ಬುದ್ಧಂ, ಪಯಿರೂಪಾಸ ಮಾರಿಸ.
‘‘ಯಕ್ಖಸ್ಸ ವಚನಂ ಸುತ್ವಾ, ವಿಪ್ಪಸನ್ನೇನ ಚೇತಸಾ;
ಅಸ್ಸಮಂ ಸಂಸಾಮೇತ್ವಾನ, ನಿಕ್ಖಮಿಂ ವಿಪಿನಾ ತದಾ.
‘‘ಚೇಳೇವ ಡಯ್ಹಮಾನಮ್ಹಿ, ನಿಕ್ಖಮಿತ್ವಾನ ಅಸ್ಸಮಾ;
ಏಕರತ್ತಿಂ ನಿವಾಸೇತ್ವಾ [ನಿವಸಿತ್ವಾ (ಸೀ.), ನಿವಾಸೇನ (?)], ಉಪಗಚ್ಛಿಂ ವಿನಾಯಕಂ.
‘‘ಪದುಮುತ್ತರೋ ¶ ಲೋಕವಿದೂ, ಆಹುತೀನಂ ಪಟಿಗ್ಗಹೋ;
ಚತುಸಚ್ಚಂ ಪಕಾಸೇನ್ತೋ, ದೇಸೇಸಿ ಅಮತಂ ಪದಂ.
‘‘ಸುಫುಲ್ಲಂ ಪದುಮಂ ಗಯ್ಹ, ಉಪಗನ್ತ್ವಾ ಮಹೇಸಿನೋ;
ಪಸನ್ನಚಿತ್ತೋ ಸುಮನೋ, ಬುದ್ಧಸ್ಸ ಅಭಿರೋಪಯಿಂ.
‘‘ಪೂಜಯಿತ್ವಾನ ¶ ಸಮ್ಬುದ್ಧಂ, ಜಲಜುತ್ತಮನಾಯಕಂ;
ಏಕಂಸಂ ಅಜಿನಂ ಕತ್ವಾ, ಸನ್ಥವಿಂ ಲೋಕನಾಯಕಂ.
‘‘ಯೇನ ಞಾಣೇನ ಸಮ್ಬುದ್ಧೋ, ವಸತೀಹ ಅನಾಸವೋ;
ತಂ ಞಾಣಂ ಕಿತ್ತಯಿಸ್ಸಾಮಿ, ಸುಣಾಥ ಮಮ ಭಾಸತೋ.
‘‘‘ಸಂಸಾರಸೋತಂ ಛಿನ್ದಿತ್ವಾ, ತಾರೇಸಿ ಸಬ್ಬಪಾಣಿನಂ;
ತವ ಧಮ್ಮಂ ಸುಣಿತ್ವಾನ, ತಣ್ಹಾಸೋತಂ ತರನ್ತಿ ತೇ.
‘‘‘ತುವಂ ¶ ಸತ್ಥಾ ಚ ಕೇತು ಚ, ಧಜೋ ಯೂಪೋ ಚ ಪಾಣಿನಂ;
ಪರಾಯಣೋ ಪತಿಟ್ಠಾ ಚ, ದೀಪೋ ಚ ದ್ವಿಪದುತ್ತಮ [ದಿಪದುತ್ತಮ (ಸೀ. ಸ್ಯಾ. ಪೀ.)].
‘‘‘ಯಾವತಾ ಗಣಿನೋ ಲೋಕೇ, ಸತ್ಥವಾಹಾ ಪವುಚ್ಚರೇ;
ತುವಂ ಅಗ್ಗೋಸಿ ಸಬ್ಬಞ್ಞು, ತವ ಅನ್ತೋಗಧಾವ ತೇ.
‘‘‘ತವ ಞಾಣೇನ ಸಬ್ಬಞ್ಞು, ತಾರೇಸಿ ಜನತಂ ಬಹುಂ;
ತವ ದಸ್ಸನಮಾಗಮ್ಮ, ದುಕ್ಖಸ್ಸನ್ತಂ ಕರಿಸ್ಸರೇ.
‘‘‘ಯೇ ಕೇಚಿಮೇ ಗನ್ಧಜಾತಾ, ಲೋಕೇ ವಾಯನ್ತಿ ಚಕ್ಖುಮ;
ತವ ಗನ್ಧಸಮೋ ನತ್ಥಿ, ಪುಞ್ಞಕ್ಖೇತ್ತೇ ಮಹಾಮುನೇ’.
‘‘‘ತಿರಚ್ಛಾನಯೋನಿಂ ನಿರಯಂ, ಪರಿಮೋಚೇಸಿ [ಪರಿಮೋಚೇಹಿ (ಸ್ಯಾ. ಕ.)] ಚಕ್ಖುಮ;
ಅಸಙ್ಖತಂ ಪದಂ ಸನ್ತಂ, ದೇಸೇಸಿ [ದೇಸೇಹಿ (ಸ್ಯಾ. ಕ.)] ತ್ವಂ ಮಹಾಮುನೇ’.
‘‘ಪದುಮುತ್ತರೋ ¶ ಲೋಕವಿದೂ, ಆಹುತೀನಂ ಪಟಿಗ್ಗಹೋ;
ಭಿಕ್ಖುಸಙ್ಘೇ ನಿಸೀದಿತ್ವಾ, ಇಮಾ ಗಾಥಾ ಅಭಾಸಥ.
‘‘‘ಯೋ ¶ ಮೇ ಞಾಣಂ ಅಪೂಜೇಸಿ, ಪಸನ್ನೋ ಸೇಹಿ ಪಾಣಿಭಿ;
ತಮಹಂ ಕಿತ್ತಯಿಸ್ಸಾಮಿ, ಸುಣಾಥ ಮಮ ಭಾಸತೋ.
‘‘‘ತಿಂಸಕಪ್ಪಸಹಸ್ಸಾನಿ, ದೇವಲೋಕೇ ರಮಿಸ್ಸತಿ;
ಸಹಸ್ಸಕ್ಖತ್ತುಂ ರಾಜಾ ಚ, ಚಕ್ಕವತ್ತೀ ಭವಿಸ್ಸತಿ’.
‘‘ಸುಲದ್ಧಲಾಭಂ ಲದ್ಧೋಮ್ಹಿ, ತೋಸಯಿತ್ವಾನ ಸುಬ್ಬತಂ;
ಸಬ್ಬಾಸವೇ ಪರಿಞ್ಞಾಯ, ವಿಹರಾಮಿ ಅನಾಸವೋ.
‘‘ಕಿಲೇಸಾ ಝಾಪಿತಾ ಮಯ್ಹಂ…ಪೇ… ವಿಹರಾಮಿ ಅನಾಸವೋ.
‘‘ಸ್ವಾಗತಂ ವತ ಮೇ ಆಸಿ…ಪೇ… ಕತಂ ಬುದ್ಧಸ್ಸ ಸಾಸನಂ.
‘‘ಪಟಿಸಮ್ಭಿದಾ ¶ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಉದೇನೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಉದೇನತ್ಥೇರಸ್ಸಾಪದಾನಂ ದಸಮಂ.
ಮೇತ್ತೇಯ್ಯವಗ್ಗೋ ಏಕಚತ್ತಾಲೀಸಮೋ.
ತಸ್ಸುದ್ದಾನಂ –
ಮೇತ್ತೇಯ್ಯೋ ಪುಣ್ಣಕೋ ಥೇರೋ, ಮೇತ್ತಗೂ ಧೋತಕೋಪಿ ಚ;
ಉಪಸಿವೋ ¶ ಚ ನನ್ದೋ ಚ, ಹೇಮಕೋ ಸತ್ತಮೋ ತಹಿಂ.
ತೋದೇಯ್ಯೋ ಜತುಕಣ್ಣೀ ಚ, ಉದೇನೋ ಚ ಮಹಾಯಸೋ;
ತೀಣಿ ಗಾಥಾಸತಾನೇತ್ಥ, ಅಸೀತಿ ತೀಣಿ ಚುತ್ತರಿಂ.
೪೨. ಭದ್ದಾಲಿವಗ್ಗೋ
೧. ಭದ್ದಾಲಿತ್ಥೇರಅಪದಾನಂ
‘‘ಸುಮೇಧೋ ¶ ¶ ¶ ನಾಮ ಸಮ್ಬುದ್ಧೋ, ಅಗ್ಗೋ ಕಾರುಣಿಕೋ ಮುನಿ;
ವಿವೇಕಕಾಮೋ ಲೋಕಗ್ಗೋ, ಹಿಮವನ್ತಮುಪಾಗಮಿ.
‘‘ಅಜ್ಝೋಗಾಹೇತ್ವಾ ಹಿಮವಂ, ಸುಮೇಧೋ ಲೋಕನಾಯಕೋ;
ಪಲ್ಲಙ್ಕಂ ಆಭುಜಿತ್ವಾನ, ನಿಸೀದಿ ಪುರಿಸುತ್ತಮೋ.
‘‘ಸಮಾಧಿಂ ಸೋ ಸಮಾಪನ್ನೋ, ಸುಮೇಧೋ ಲೋಕನಾಯಕೋ;
ಸತ್ತರತ್ತಿನ್ದಿವಂ ಬುದ್ಧೋ, ನಿಸೀದಿ ಪುರಿಸುತ್ತಮೋ.
‘‘ಖಾರಿಭಾರಂ [ಖಾರಿಕಾಜಂ (ಸೀ.)] ಗಹೇತ್ವಾನ, ವನಮಜ್ಝೋಗಹಿಂ ಅಹಂ;
ತತ್ಥದ್ದಸಾಸಿಂ ಸಮ್ಬುದ್ಧಂ, ಓಘತಿಣ್ಣಮನಾಸವಂ.
‘‘ಸಮ್ಮಜ್ಜನಿಂ ಗಹೇತ್ವಾನ, ಸಮ್ಮಜ್ಜಿತ್ವಾನ ಅಸ್ಸಮಂ;
ಚತುದಣ್ಡೇ ಠಪೇತ್ವಾನ, ಅಕಾಸಿಂ ಮಣ್ಡಪಂ ತದಾ.
‘‘ಸಾಲಪುಪ್ಫಂ ¶ ಆಹರಿತ್ವಾ, ಮಣ್ಡಪಂ ಛಾದಯಿಂ ಅಹಂ;
ಪಸನ್ನಚಿತ್ತೋ ಸುಮನೋ, ಅಭಿವನ್ದಿಂ ತಥಾಗತಂ.
‘‘ಯಂ ¶ ವದನ್ತಿ ಸುಮೇಧೋತಿ, ಭೂರಿಪಞ್ಞಂ ಸುಮೇಧಸಂ;
ಭಿಕ್ಖುಸಙ್ಘೇ ನಿಸೀದಿತ್ವಾ, ಇಮಾ ಗಾಥಾ ಅಭಾಸಥ.
‘‘‘ಬುದ್ಧಸ್ಸ ಗಿರಮಞ್ಞಾಯ, ಸಬ್ಬೇ ದೇವಾ ಸಮಾಗಮುಂ;
ಅಸಂಸಯಂ ಬುದ್ಧಸೇಟ್ಠೋ, ಧಮ್ಮಂ ದೇಸೇತಿ ಚಕ್ಖುಮಾ.
‘‘‘ಸುಮೇಧೋ ನಾಮ ಸಮ್ಬುದ್ಧೋ, ಆಹುತೀನಂ ಪಟಿಗ್ಗಹೋ;
ದೇವಸಙ್ಘೇ ನಿಸೀದಿತ್ವಾ, ಇಮಾ ಗಾಥಾ ಅಭಾಸಥ.
‘‘‘ಯೋ ಮೇ ಸತ್ತಾಹಂ ಮಣ್ಡಪಂ, ಧಾರಯೀ ಸಾಲಛಾದಿತಂ;
ತಮಹಂ ಕಿತ್ತಯಿಸ್ಸಾಮಿ, ಸುಣಾಥ ಮಮ ಭಾಸತೋ.
‘‘‘ದೇವಭೂತೋ ಮನುಸ್ಸೋ ವಾ, ಹೇಮವಣ್ಣೋ ಭವಿಸ್ಸತಿ;
ಪಹೂತಭೋಗೋ ಹುತ್ವಾನ, ಕಾಮಭೋಗೀ ಭವಿಸ್ಸತಿ.
‘‘‘ಸಟ್ಠಿ ¶ ¶ ನಾಗಸಹಸ್ಸಾನಿ, ಸಬ್ಬಾಲಙ್ಕಾರಭೂಸಿತಾ;
ಸುವಣ್ಣಕಚ್ಛಾ ಮಾತಙ್ಗಾ, ಹೇಮಕಪ್ಪನವಾಸಸಾ.
‘‘‘ಆರೂಳ್ಹಾ ಗಾಮಣೀಯೇಹಿ, ತೋಮರಙ್ಕುಸಪಾಣಿಭಿ;
ಸಾಯಂ ಪಾತೋ [ಸಾಯಪಾತೋ (ಪೀ.)] ಉಪಟ್ಠಾನಂ, ಆಗಮಿಸ್ಸನ್ತಿಮಂ ನರಂ;
ತೇಹಿ ನಾಗೇಹಿ ಪರಿವುತೋ, ರಮಿಸ್ಸತಿ ಅಯಂ ನರೋ.
‘‘‘ಸಟ್ಠಿ ಅಸ್ಸಸಹಸ್ಸಾನಿ, ಸಬ್ಬಾಲಙ್ಕಾರಭೂಸಿತಾ;
ಆಜಾನೀಯಾವ ಜಾತಿಯಾ, ಸಿನ್ಧವಾ ಸೀಘವಾಹಿನೋ.
‘‘‘ಆರೂಳ್ಹಾ ಗಾಮಣೀಯೇಹಿ, ಇಲ್ಲಿಯಾಚಾಪಧಾರಿಭಿ;
ಪರಿವಾರೇಸ್ಸನ್ತಿಮಂ ನಿಚ್ಚಂ, ಬುದ್ಧಪೂಜಾಯಿದಂ ಫಲಂ.
‘‘‘ಸಟ್ಠಿ ರಥಸಹಸ್ಸಾನಿ, ಸಬ್ಬಾಲಙ್ಕಾರಭೂಸಿತಾ;
ದೀಪಾ ¶ ಅಥೋಪಿ ವೇಯಗ್ಘಾ, ಸನ್ನದ್ಧಾ ಉಸ್ಸಿತದ್ಧಜಾ.
‘‘‘ಆರೂಳ್ಹಾ ಗಾಮಣೀಯೇಹಿ, ಚಾಪಹತ್ಥೇಹಿ ವಮ್ಮಿಭಿ;
ಪರಿವಾರೇಸ್ಸನ್ತಿಮಂ ನಿಚ್ಚಂ, ಬುದ್ಧಪೂಜಾಯಿದಂ ಫಲಂ.
‘‘‘ಸಟ್ಠಿ ಗಾಮಸಹಸ್ಸಾನಿ, ಪರಿಪುಣ್ಣಾನಿ ಸಬ್ಬಸೋ;
ಪಹೂತಧನಧಞ್ಞಾನಿ, ಸುಸಮಿದ್ಧಾನಿ ಸಬ್ಬಸೋ;
ಸದಾ ಪಾತುಭವಿಸ್ಸನ್ತಿ, ಬುದ್ಧಪೂಜಾಯಿದಂ ಫಲಂ.
‘‘‘ಹತ್ಥೀ ಅಸ್ಸಾ ರಥಾ ಪತ್ತೀ, ಸೇನಾ ಚ ಚತುರಙ್ಗಿನೀ;
ಪರಿವಾರೇಸ್ಸನ್ತಿಮಂ ನಿಚ್ಚಂ, ಬುದ್ಧಪೂಜಾಯಿದಂ ಫಲಂ.
‘‘‘ಅಟ್ಠಾರಸೇ ಕಪ್ಪಸತೇ, ದೇವಲೋಕೇ ರಮಿಸ್ಸತಿ;
ಸಹಸ್ಸಕ್ಖತ್ತುಂ ರಾಜಾ ಚ, ಚಕ್ಕವತ್ತೀ ಭವಿಸ್ಸತಿ.
‘‘‘ಸತಾನಂ ¶ ತೀಣಿಕ್ಖತ್ತುಞ್ಚ, ದೇವರಜ್ಜಂ ಕರಿಸ್ಸತಿ;
ಪದೇಸರಜ್ಜಂ ವಿಪುಲಂ, ಗಣನಾತೋ ಅಸಙ್ಖಿಯಂ.
‘‘‘ತಿಂಸಕಪ್ಪಸಹಸ್ಸಮ್ಹಿ, ಓಕ್ಕಾಕಕುಲಸಮ್ಭವೋ;
ಗೋತಮೋ ನಾಮ ಗೋತ್ತೇನ, ಸತ್ಥಾ ಲೋಕೇ ಭವಿಸ್ಸತಿ.
‘‘‘ತಸ್ಸ ಧಮ್ಮೇಸು ದಾಯಾದೋ, ಓರಸೋ ಧಮ್ಮನಿಮ್ಮಿತೋ;
ಸಬ್ಬಾಸವೇ ಪರಿಞ್ಞಾಯ, ವಿಹರಿಸ್ಸತಿನಾಸವೋ’.
‘‘ತಿಂಸಕಪ್ಪಸಹಸ್ಸಮ್ಹಿ ¶ , ಅದ್ದಸಂ ಲೋಕನಾಯಕಂ;
ಏತ್ಥನ್ತರಮುಪಾದಾಯ, ಗವೇಸಿಂ ಅಮತಂ ಪದಂ.
‘‘ಲಾಭಾ ¶ ಮಯ್ಹಂ ಸುಲದ್ಧಂ ಮೇ, ಯಮಹಞ್ಞಾಸಿ ಸಾಸನಂ;
ತಿಸ್ಸೋ ವಿಜ್ಜಾ ಅನುಪ್ಪತ್ತಾ, ಕತಂ ಬುದ್ಧಸ್ಸ ಸಾಸನಂ.
‘‘ನಮೋ ¶ ತೇ ಪುರಿಸಾಜಞ್ಞ, ನಮೋ ತೇ ಪುರಿಸುತ್ತಮ;
ತವ ಞಾಣಂ ಪಕಿತ್ತೇತ್ವಾ, ಪತ್ತೋಮ್ಹಿ ಅಚಲಂ ಪದಂ.
‘‘ಯಂ ಯಂ ಯೋನುಪಪಜ್ಜಾಮಿ, ದೇವತ್ತಂ ಅಥ ಮಾನುಸಂ;
ಸಬ್ಬತ್ಥ ಸುಖಿತೋ ಹೋಮಿ, ಫಲಂ ಮೇ ಞಾಣಕಿತ್ತನೇ.
‘‘ಇದಂ ಪಚ್ಛಿಮಕಂ ಮಯ್ಹಂ, ಚರಿಮೋ ವತ್ತತೇ ಭವೋ;
ನಾಗೋವ ಬನ್ಧನಂ ಛೇತ್ವಾ, ವಿಹರಾಮಿ ಅನಾಸವೋ.
‘‘ಕಿಲೇಸಾ ಝಾಪಿತಾ ಮಯ್ಹಂ, ಭವಾ ಸಬ್ಬೇ ಸಮೂಹತಾ;
ನಾಗೋವ ಬನ್ಧನಂ ಛೇತ್ವಾ, ವಿಹರಾಮಿ ಅನಾಸವೋ.
‘‘ಸ್ವಾಗತಂ ವತ ಮೇ ಆಸಿ, ಮಮ ಬುದ್ಧಸ್ಸ ಸನ್ತಿಕೇ;
ತಿಸ್ಸೋ ವಿಜ್ಜಾ ಅನುಪ್ಪತ್ತಾ, ಕತಂ ಬುದ್ಧಸ್ಸ ಸಾಸನಂ.
‘‘ಪಟಿಸಮ್ಭಿದಾ ಚತಸ್ಸೋ, ವಿಮೋಕ್ಖಾಪಿ ಚ ಅಟ್ಠಿಮೇ;
ಛಳಭಿಞ್ಞಾ ಸಚ್ಛಿಕತಾ, ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಭದ್ದಾಲಿತ್ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಭದ್ದಾಲಿತ್ಥೇರಸ್ಸಾಪದಾನಂ ಪಠಮಂ.
೨. ಏಕಛತ್ತಿಯತ್ಥೇರಅಪದಾನಂ
‘‘ಚನ್ದಭಾಗಾನದೀತೀರೇ, ಅಸ್ಸಮೋ ಸುಕತೋ ಮಮ;
ಸುಸುದ್ಧಪುಲಿನಾಕಿಣ್ಣೋ, ಪನ್ನಸಾಲಾ ಸುಮಾಪಿತಾ.
‘‘ಉತ್ತಾನಕೂಲಾ ನದಿಕಾ, ಸುಪತಿತ್ಥಾ ಮನೋರಮಾ;
ಮಚ್ಛಕಚ್ಛಪಸಮ್ಪನ್ನಾ [… ಸಞ್ಛನ್ನಾ (ಕ.)], ಸುಸುಮಾರನಿಸೇವಿತಾ.
‘‘ಅಚ್ಛಾ ¶ ¶ ದೀಪೀ ಚ ಮಯೂರಾ, ಕರವೀಕಾ ಚ ಸಾಳಿಕಾ;
ಕೂಜನ್ತಿ ಸಬ್ಬದಾ ಏತೇ, ಸೋಭಯನ್ತಾ ಮಮಸ್ಸಮಂ.
‘‘ಕೋಕಿಲಾ ಮಞ್ಜುಭಾಣೀ ಚ, ಹಂಸಾ ಚ ಮಧುರಸ್ಸರಾ;
ಅಭಿಕೂಜನ್ತಿ ತೇ ತತ್ಥ, ಸೋಭಯನ್ತಾ ಮಮಸ್ಸಮಂ.
‘‘ಸೀಹಾ ಬ್ಯಗ್ಘಾ ವರಾಹಾ ಚ, ಅಚ್ಛ [ವಕ (ಸೀ. ಪೀ.), ಬಕಾ (ಸ್ಯಾ.), ವಕಾ (ಕ.)] ಕೋಕತರಚ್ಛಕಾ;
ಗಿರಿದುಗ್ಗಮ್ಹಿ ನಾದೇನ್ತಿ, ಸೋಭಯನ್ತಾ ಮಮಸ್ಸಮಂ.
‘‘ಏಣೀಮಿಗಾ ¶ ¶ ಚ ಸರಭಾ, ಭೇರಣ್ಡಾ ಸೂಕರಾ ಬಹೂ;
ಗಿರಿದುಗ್ಗಮ್ಹಿ ನಾದೇನ್ತಿ, ಸೋಭಯನ್ತಾ ಮಮಸ್ಸಮಂ.
‘‘ಉದ್ದಾಲಕಾ ಚಮ್ಪಕಾ ಚ, ಪಾಟಲೀ ಸಿನ್ದುವಾರಕಾ;
ಅತಿಮುತ್ತಾ ಅಸೋಕಾ ಚ, ಸೋಭಯನ್ತಿ ಮಮಸ್ಸಮಂ [ಪುಪ್ಫನ್ತಿ ಮಮ ಅಸ್ಸಮೇ (ಸೀ. ಪೀ.)].
‘‘ಅಙ್ಕೋಲಾ ಯೂಥಿಕಾ ಚೇವ, ಸತ್ತಲೀ ಬಿಮ್ಬಿಜಾಲಿಕಾ;
ಕಣಿಕಾರಾ ಚ ಪುಪ್ಫನ್ತಿ, ಸೋಭಯನ್ತಾ ಮಮಸ್ಸಮಂ [ಕಣಿಕಾಕಣಿಕಾರಾ ಚ, ಪುಪ್ಫನ್ತಿ ಮಮ ಅಸ್ಸಮೇ (ಸೀ. ಸ್ಯಾ. ಪೀ.)].
‘‘ನಾಗಾ ಸಾಲಾ ಚ ಸಳಲಾ, ಪುಣ್ಡರೀಕೇತ್ಥ ಪುಪ್ಫಿತಾ;
ದಿಬ್ಬಗನ್ಧಂ ಸಮ್ಪವನ್ತಾ, ಸೋಭಯನ್ತಿ ಮಮಸ್ಸಮಂ.
‘‘ಅಜ್ಜುನಾ ಅಸನಾ ಚೇತ್ಥ, ಮಹಾನಾಮಾ ಚ ಪುಪ್ಫಿತಾ;
ಸಾಲಾ ಚ ಕಙ್ಗುಪುಪ್ಫಾ ಚ, ಸೋಭಯನ್ತಿ ಮಮಸ್ಸಮಂ.
‘‘ಅಮ್ಬಾ ಜಮ್ಬೂ ಚ ತಿಲಕಾ, ನಿಮ್ಬಾ ಚ ಸಾಲಕಲ್ಯಾಣೀ;
ದಿಬ್ಬಗನ್ಧಂ ಸಮ್ಪವನ್ತಾ, ಸೋಭಯನ್ತಿ ಮಮಸ್ಸಮಂ.
‘‘ಅಸೋಕಾ ಚ ಕಪಿಟ್ಠಾ ಚ, ಗಿರಿಮಾಲೇತ್ಥ [ಭಗಿನಿಮಾಲೇತ್ಥ (ಸೀ. ಪೀ.), ಭಗಿನಿಮಾಲಾ ಚ (ಸ್ಯಾ.)] ಪುಪ್ಫಿತಾ;
ದಿಬ್ಬಗನ್ಧಂ ಸಮ್ಪವನ್ತಾ, ಸೋಭಯನ್ತಿ ಮಮಸ್ಸಮಂ.
‘‘ಕದಮ್ಬಾ ¶ ಕದಲೀ ಚೇವ, ಇಸಿಮುಗ್ಗಾ ಚ ರೋಪಿತಾ;
ಧುವಂ ಫಲಾನಿ ಧಾರೇನ್ತಿ, ಸೋಭಯನ್ತಾ ಮಮಸ್ಸಮಂ.
‘‘ಹರೀತಕಾ ಆಮಲಕಾ, ಅಮ್ಬಜಮ್ಬುವಿಭೀತಕಾ;
ಕೋಲಾ ಭಲ್ಲಾತಕಾ ಬಿಲ್ಲಾ, ಫಲಿನೋ ಮಮ ಅಸ್ಸಮೇ.
‘‘ಅವಿದೂರೇ ¶ ಪೋಕ್ಖರಣೀ, ಸುಪತಿತ್ಥಾ ಮನೋರಮಾ;
ಮನ್ದಾಲಕೇಹಿ ಸಞ್ಛನ್ನಾ, ಪದುಮುಪ್ಪಲಕೇಹಿ ಚ.
‘‘ಗಬ್ಭಂ ಗಣ್ಹನ್ತಿ ಪದುಮಾ, ಅಞ್ಞೇ ಪುಪ್ಫನ್ತಿ ಕೇಸರೀ;
ಓಪತ್ತಕಣ್ಣಿಕಾ ಚೇವ, ಪುಪ್ಫನ್ತಿ ಮಮ ಅಸ್ಸಮೇ.
‘‘ಪಾಠೀನಾ ಪಾವುಸಾ ಮಚ್ಛಾ, ಬಲಜಾ ಮುಞ್ಜರೋಹಿತಾ;
ಅಚ್ಛೋದಕಮ್ಹಿ ವಿಚರಂ, ಸೋಭಯನ್ತಿ ಮಮಸ್ಸಮಂ.
‘‘ನಯಿತಾ ಅಮ್ಬಗನ್ಧೀ ಚ, ಅನುಕೂಲೇ ಚ ಕೇತಕಾ;
ದಿಬ್ಬಗನ್ಧಂ ಸಮ್ಪವನ್ತಾ, ಸೋಭಯನ್ತಿ ಮಮಸ್ಸಮಂ.
‘‘ಮಧು ಭಿಸಮ್ಹಾ ಸವತಿ, ಖೀರಸಪ್ಪಿ ಮುಳಾಲಿಭಿ;
ದಿಬ್ಬಗನ್ಧಂ ಸಮ್ಪವನ್ತಾ, ಸೋಭಯನ್ತಿ ಮಮಸ್ಸಮಂ.
‘‘ಪುಲಿನಾ ¶ ಸೋಭನಾ ತತ್ಥ, ಆಕಿಣ್ಣಾ ಜಲಸೇವಿತಾ;
ಓಪುಪ್ಫಾ ಪುಪ್ಫಿತಾ ಸೇನ್ತಿ, ಸೋಭಯನ್ತಾ ಮಮಸ್ಸಮಂ.
‘‘ಜಟಾಭಾರೇನ ¶ ಭರಿತಾ, ಅಜಿನುತ್ತರವಾಸನಾ;
ವಾಕಚೀರಧರಾ ಸಬ್ಬೇ, ಸೋಭಯನ್ತಿ ಮಮಸ್ಸಮಂ.
‘‘ಯುಗಮತ್ತಮಪೇಕ್ಖನ್ತಾ, ನಿಪಕಾ ಸನ್ತವುತ್ತಿನೋ;
ಕಾಮಭೋಗೇ ಅನಪೇಕ್ಖಾ, ವಸನ್ತಿ ಮಮ ಅಸ್ಸಮೇ.
‘‘ಪರೂಳ್ಹಕಚ್ಛನಖಲೋಮಾ ¶ , ಪಙ್ಕದನ್ತಾ ರಜಸ್ಸಿರಾ;
ರಜೋಜಲ್ಲಧರಾ ಸಬ್ಬೇ, ವಸನ್ತಿ ಮಮ ಅಸ್ಸಮೇ.
‘‘ಅಭಿಞ್ಞಾಪಾರಮಿಪ್ಪತ್ತಾ, ಅನ್ತಲಿಕ್ಖಚರಾ ಚ ತೇ;
ಉಗ್ಗಚ್ಛನ್ತಾ ನಭಂ ಏತೇ, ಸೋಭಯನ್ತಿ ಮಮಸ್ಸಮಂ.
‘‘ತೇಹಿ ಸಿಸ್ಸೇಹಿ ಪರಿವುತೋ, ವಸಾಮಿ ವಿಪಿನೇ ತದಾ;
ರತ್ತಿನ್ದಿವಂ ನ ಜಾನಾಮಿ, ಸದಾ ಝಾನಸಮಪ್ಪಿತೋ.
‘‘ಭಗವಾ ತಮ್ಹಿ ಸಮಯೇ, ಅತ್ಥದಸ್ಸೀ ಮಹಾಮುನಿ;
ತಮನ್ಧಕಾರಂ ನಾಸೇನ್ತೋ, ಉಪ್ಪಜ್ಜಿ ಲೋಕನಾಯಕೋ.
‘‘ಅಥ ಅಞ್ಞತರೋ ಸಿಸ್ಸೋ, ಆಗಚ್ಛಿ ಮಮ ಸನ್ತಿಕಂ;
ಮನ್ತೇ ಅಜ್ಝೇತುಕಾಮೋ ಸೋ, ಛಳಙ್ಗಂ ನಾಮ ಲಕ್ಖಣಂ.
‘‘ಬುದ್ಧೋ ¶ ಲೋಕೇ ಸಮುಪ್ಪನ್ನೋ, ಅತ್ಥದಸ್ಸೀ ಮಹಾಮುನಿ;
ಚತುಸಚ್ಚಂ ಪಕಾಸೇನ್ತೋ, ದೇಸೇತಿ ಅಮತಂ ಪದಂ.
‘‘ತುಟ್ಠಹಟ್ಠೋ ಪಮುದಿತೋ, ಧಮ್ಮನ್ತರಗತಾಸಯೋ;
ಅಸ್ಸಮಾ ಅಭಿನಿಕ್ಖಮ್ಮ, ಇದಂ ವಚನಮಬ್ರವಿಂ.
‘‘‘ಬುದ್ಧೋ ಲೋಕೇ ಸಮುಪ್ಪನ್ನೋ, ದ್ವತ್ತಿಂಸವರಲಕ್ಖಣೋ;
ಏಥ ಸಬ್ಬೇ ಗಮಿಸ್ಸಾಮ, ಸಮ್ಮಾಸಮ್ಬುದ್ಧಸನ್ತಿಕಂ’.
‘‘ಓವಾದಪಟಿಕರಾ ತೇ, ಸಧಮ್ಮೇ ಪಾರಮಿಂ ಗತಾ;
ಸಾಧೂತಿ ಸಮ್ಪಟಿಚ್ಛಿಂಸು, ಉತ್ತಮತ್ಥಗವೇಸಕಾ.
‘‘ಜಟಾಭಾರಭರಿತಾ ತೇ [ಜಟಾಭಾರೇನ ಭರಿತಾ (ಕ.)], ಅಜಿನುತ್ತರವಾಸನಾ;
ಉತ್ತಮತ್ಥಂ ಗವೇಸನ್ತಾ, ನಿಕ್ಖಮಿಂಸು ವನಾ ತದಾ.
‘‘ಭಗವಾ ¶ ತಮ್ಹಿ ಸಮಯೇ, ಅತ್ಥದಸ್ಸೀ ಮಹಾಯಸೋ;
ಚತುಸಚ್ಚಂ ಪಕಾಸೇನ್ತೋ, ದೇಸೇತಿ ಅಮತಂ ಪದಂ.
‘‘ಸೇತಚ್ಛತ್ತಂ ¶ ಗಹೇತ್ವಾನ, ಬುದ್ಧಸೇಟ್ಠಸ್ಸ ಧಾರಯಿಂ;
ಏಕಾಹಂ ಧಾರಯಿತ್ವಾನ, ಬುದ್ಧಸೇಟ್ಠಂ ಅವನ್ದಹಂ.
‘‘ಅತ್ಥದಸ್ಸೀ ತು ಭಗವಾ, ಲೋಕಜೇಟ್ಠೋ ನರಾಸಭೋ;
ಭಿಕ್ಖುಸಙ್ಘೇ ನಿಸೀದಿತ್ವಾ, ಇಮಾ ಗಾಥಾ ಅಭಾಸಥ.
‘‘‘ಯೋ ಮೇ ಛತ್ತಂ ಅಧಾರೇಸಿ, ಪಸನ್ನೋ ಸೇಹಿ ಪಾಣಿಭಿ;
ತಮಹಂ ಕಿತ್ತಯಿಸ್ಸಾಮಿ, ಸುಣಾಥ ಮಮ ಭಾಸತೋ.
‘‘‘ಇಮಸ್ಸ ಜಾಯಮಾನಸ್ಸ, ದೇವತ್ತೇ ಅಥ ಮಾನುಸೇ;
ಧಾರೇಸ್ಸತಿ ಸದಾ ಛತ್ತಂ, ಛತ್ತದಾನಸ್ಸಿದಂ ಫಲಂ.
‘‘‘ಸತ್ತಸತ್ತತಿಕಪ್ಪಾನಿ ¶ , ದೇವಲೋಕೇ ರಮಿಸ್ಸತಿ;
ಸಹಸ್ಸಕ್ಖತ್ತುಂ ರಾಜಾ ಚ, ಚಕ್ಕವತ್ತೀ ಭವಿಸ್ಸತಿ.
‘‘‘ಸತ್ತಸತ್ತತಿಕ್ಖತ್ತುಞ್ಚ, ದೇವರಜ್ಜಂ ಕರಿಸ್ಸತಿ;
ಪದೇಸರಜ್ಜಂ ವಿಪುಲಂ, ಗಣನಾತೋ ಅಸಙ್ಖಿಯಂ.
‘‘‘ಅಟ್ಠಾರಸೇ ಕಪ್ಪಸತೇ, ಗೋತಮೋ ಸಕ್ಯಪುಙ್ಗವೋ;
ತಮನ್ಧಕಾರಂ ನಾಸೇನ್ತೋ, ಉಪ್ಪಜ್ಜಿಸ್ಸತಿ ಚಕ್ಖುಮಾ.
‘‘‘ತಸ್ಸ ¶ ಧಮ್ಮೇಸು ದಾಯಾದೋ, ಓರಸೋ ಧಮ್ಮನಿಮ್ಮಿತೋ;
ಸಬ್ಬಾಸವೇ ಪರಿಞ್ಞಾಯ, ವಿಹರಿಸ್ಸತಿನಾಸವೋ’.
‘‘ಯತೋ ಅಹಂ ಕಮ್ಮಮಕಂ, ಛತ್ತಂ ಬುದ್ಧಸ್ಸ ಧಾರಯಂ;
ಏತ್ಥನ್ತರೇ ನ ಜಾನಾಮಿ, ಸೇತಚ್ಛತ್ತಂ ಅಧಾರಿತಂ.
‘‘ಇದಂ ¶ ಪಚ್ಛಿಮಕಂ ಮಯ್ಹಂ, ಚರಿಮೋ ವತ್ತತೇ ಭವೋ;
ಛತ್ತಧಾರಣಮಜ್ಜಾಪಿ, ವತ್ತತೇ ನಿಚ್ಚಕಾಲಿಕಂ.
‘‘ಅಹೋ ಮೇ ಸುಕತಂ ಕಮ್ಮಂ, ಅತ್ಥದಸ್ಸಿಸ್ಸ ತಾದಿನೋ;
ಸಬ್ಬಾಸವಾ ಪರಿಕ್ಖೀಣಾ, ನತ್ಥಿ ದಾನಿ ಪುನಬ್ಭವೋ.
‘‘ಕಿಲೇಸಾ ಝಾಪಿತಾ ಮಯ್ಹಂ…ಪೇ… ವಿಹರಾಮಿ ಅನಾಸವೋ.
‘‘ಸ್ವಾಗತಂ ವತ ಮೇ ಆಸಿ…ಪೇ… ಕತಂ ಬುದ್ಧಸ್ಸ ಸಾಸನಂ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಏಕಛತ್ತಿಯೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ;
ಏಕಛತ್ತಿಯತ್ಥೇರಸ್ಸಾಪದಾನಂ ದುತಿಯಂ.
೩. ತಿಣಸೂಲಕಛಾದನಿಯತ್ಥೇರಅಪದಾನಂ
‘‘ಜಾತಿಂ ¶ ಜರಞ್ಚ ಮರಣಂ, ಪಚ್ಚವೇಕ್ಖಿಂ ಅಹಂ ತದಾ;
ಏಕಕೋ ಅಭಿನಿಕ್ಖಮ್ಮ, ಪಬ್ಬಜಿಂ ಅನಗಾರಿಯಂ.
‘‘ಚರಮಾನೋನುಪುಬ್ಬೇನ, ಗಙ್ಗಾತೀರಂ ಉಪಾಗಮಿಂ;
ತತ್ಥದ್ದಸಾಸಿಂ ಪಥವಿಂ, ಗಙ್ಗಾತೀರೇ ಸಮುನ್ನತಂ.
‘‘ಅಸ್ಸಮಂ ತತ್ಥ ಮಾಪೇತ್ವಾ, ವಸಾಮಿ ಅಸ್ಸಮೇ ಅಹಂ;
ಸುಕತೋ ಚಙ್ಕಮೋ ಮಯ್ಹಂ, ನಾನಾದಿಜಗಣಾಯುತೋ.
‘‘ಮಮುಪೇನ್ತಿ ಚ ವಿಸ್ಸತ್ಥಾ, ಕೂಜನ್ತಿ ಚ ಮನೋಹರಂ;
ರಮಮಾನೋ ಸಹ ತೇಹಿ, ವಸಾಮಿ ಅಸ್ಸಮೇ ಅಹಂ.
‘‘ಮಮ ¶ ಅಸ್ಸಮಸಾಮನ್ತಾ, ಮಿಗರಾಜಾ ಚತುಕ್ಕಮೋ;
ಆಸಯಾ ಅಭಿನಿಕ್ಖಮ್ಮ, ಗಜ್ಜಿ ಸೋ ಅಸನೀ ವಿಯ.
‘‘ನದಿತೇ ¶ ¶ ಮಿಗರಾಜೇ ಚ, ಹಾಸೋ ಮೇ ಉದಪಜ್ಜಥ;
ಮಿಗರಾಜಂ ಗವೇಸನ್ತೋ, ಅದ್ದಸಂ ಲೋಕನಾಯಕಂ.
‘‘ದಿಸ್ವಾನಾಹಂ ದೇವದೇವಂ, ತಿಸ್ಸಂ ಲೋಕಗ್ಗನಾಯಕಂ;
ಹಟ್ಠೋ ಹಟ್ಠೇನ ಚಿತ್ತೇನ, ಪೂಜಯಿಂ ನಾಗಕೇಸರಂ.
‘‘ಉಗ್ಗಚ್ಛನ್ತಂವ ಸೂರಿಯಂ, ಸಾಲರಾಜಂವ ಪುಪ್ಫಿತಂ;
ಓಸಧಿಂವ ವಿರೋಚನ್ತಂ, ಸನ್ಥವಿಂ ಲೋಕನಾಯಕಂ.
‘‘‘ತವ ಞಾಣೇನ ಸಬ್ಬಞ್ಞು, ಮೋಚೇಸಿಮಂ ಸದೇವಕಂ;
ತವಂ ಆರಾಧಯಿತ್ವಾನ, ಜಾತಿಯಾ ಪರಿಮುಚ್ಚರೇ.
‘‘‘ಅದಸ್ಸನೇನ ಸಬ್ಬಞ್ಞು, ಬುದ್ಧಾನಂ ಸಬ್ಬದಸ್ಸಿನಂ;
ಪತನ್ತಿವೀಚಿನಿರಯಂ, ರಾಗದೋಸೇಹಿ ಓಫುಟಾ [ಓತ್ಥಟಾ (ಸ್ಯಾ.)].
‘‘‘ತವ ದಸ್ಸನಮಾಗಮ್ಮ, ಸಬ್ಬಞ್ಞು ಲೋಕನಾಯಕ;
ಪಮುಚ್ಚನ್ತಿ ಭವಾ ಸಬ್ಬಾ, ಫುಸನ್ತಿ ಅಮತಂ ಪದಂ.
‘‘‘ಯದಾ ಬುದ್ಧಾ ಚಕ್ಖುಮನ್ತೋ, ಉಪ್ಪಜ್ಜನ್ತಿ ಪಭಙ್ಕರಾ;
ಕಿಲೇಸೇ ಝಾಪಯಿತ್ವಾನ, ಆಲೋಕಂ ದಸ್ಸಯನ್ತಿ ತೇ’.
‘‘ಕಿತ್ತಯಿತ್ವಾನ ಸಮ್ಬುದ್ಧಂ, ತಿಸ್ಸಂ ಲೋಕಗ್ಗನಾಯಕಂ;
ಹಟ್ಠೋ ಹಟ್ಠೇನ ಚಿತ್ತೇನ, ತಿಣಸೂಲಂ ಅಪೂಜಯಿಂ.
‘‘ಮಮ ¶ ¶ ಸಙ್ಕಪ್ಪಮಞ್ಞಾಯ, ತಿಸ್ಸೋ ಲೋಕಗ್ಗನಾಯಕೋ;
ಸಕಾಸನೇ ನಿಸೀದಿತ್ವಾ, ಇಮಾ ಗಾಥಾ ಅಭಾಸಥ.
‘‘‘ಯೋ ಮಂ ಪುಪ್ಫೇಹಿ ಛಾದೇಸಿ, ಪಸನ್ನೋ ಸೇಹಿ ಪಾಣಿಭಿ;
ತಮಹಂ ಕಿತ್ತಯಿಸ್ಸಾಮಿ, ಸುಣಾಥ ಮಮ ಭಾಸತೋ.
‘‘‘ಪಞ್ಚವೀಸತಿಕ್ಖತ್ತುಂ ಸೋ, ದೇವರಜ್ಜಂ ಕರಿಸ್ಸತಿ;
ಪಞ್ಚಸತ್ತತಿಕ್ಖತ್ತುಞ್ಚ, ಚಕ್ಕವತ್ತೀ ಭವಿಸ್ಸತಿ.
‘‘‘ಪದೇಸರಜ್ಜಂ ವಿಪುಲಂ, ಗಣನಾತೋ ಅಸಙ್ಖಿಯಂ;
ತಸ್ಸ ಕಮ್ಮನಿಸ್ಸನ್ದೇನ [ಕಮ್ಮಸ್ಸ ನಿಸ್ಸನ್ದೋ (ಸೀ. ಸ್ಯಾ. ಪೀ.)], ಪುಪ್ಫಾನಂ ಪೂಜನಾಯ ಚ [ಸೋ (ಸ್ಯಾ. ಪೀ.)].
‘‘‘ಸೀಸಂನ್ಹಾತೋ ಚಯಂ ಪೋಸೋ, ಪುಪ್ಫಮಾಕಙ್ಖತೇ ಯದಿ [ಸಾಯಂ ಪಾತೋ ಚಯಂ ಪೋಸೋ, ಪುಪ್ಫೇಹಿ ಮಂ ಅಛಾದಯಿ (ಸ್ಯಾ.)];
ಪುಞ್ಞಕಮ್ಮೇನ ಸಂಯುತ್ತಂ [ಸಂಯುತ್ತೋ (ಸೀ. ಸ್ಯಾ. ಪೀ.)], ಪುರತೋ ಪಾತುಭವಿಸ್ಸತಿ.
‘‘‘ಯಂ ¶ ಯಂ ಇಚ್ಛತಿ ಕಾಮೇಹಿ, ತಂ ತಂ ಪಾತುಭವಿಸ್ಸತಿ;
ಸಙ್ಕಪ್ಪಂ ಪರಿಪೂರೇತ್ವಾ, ನಿಬ್ಬಾಯಿಸ್ಸತಿನಾಸವೋ’.
ಅಟ್ಠಾರಸಮಂ ಭಾಣವಾರಂ.
‘‘ಕಿಲೇಸೇ ಝಾಪಯಿತ್ವಾನ, ಸಮ್ಪಜಾನೋ ಪತಿಸ್ಸತೋ;
ಏಕಾಸನೇ ನಿಸೀದಿತ್ವಾ, ಅರಹತ್ತಮಪಾಪುಣಿಂ.
‘‘ಚಙ್ಕಮನ್ತೋ ¶ ನಿಪಜ್ಜನ್ತೋ, ನಿಸಿನ್ನೋ ಉದ ವಾ ಠಿತೋ;
ಬುದ್ಧಸೇಟ್ಠಂ ಸರಿತ್ವಾನ, ವಿಹರಾಮಿ ಅಹಂ ಸದಾ.
‘‘ಚೀವರೇ ಪಿಣ್ಡಪಾತೇ ಚ, ಪಚ್ಚಯೇ ಸಯನಾಸನೇ;
ತತ್ಥ ಮೇ ಊನತಾ ನತ್ಥಿ, ಬುದ್ಧಪೂಜಾಯಿದಂ ಫಲಂ.
‘‘ಸೋ ದಾನಿ ಪತ್ತೋ ಅಮತಂ, ಸನ್ತಂ ಪದಮನುತ್ತರಂ;
ಸಬ್ಬಾಸವೇ ಪರಿಞ್ಞಾಯ, ವಿಹರಾಮಿ ಅನಾಸವೋ.
‘‘ದ್ವೇನವುತೇ ¶ ಇತೋ ಕಪ್ಪೇ, ಯಂ ಪುಪ್ಫಮಭಿಪೂಜಯಿಂ;
ದುಗ್ಗತಿಂ ನಾಭಿಜಾನಾಮಿ, ಬುದ್ಧಪೂಜಾಯಿದಂ ಫಲಂ.
‘‘ಕಿಲೇಸಾ ಝಾಪಿತಾ ಮಯ್ಹಂ…ಪೇ… ವಿಹರಾಮಿ ಅನಾಸವೋ.
‘‘ಸ್ವಾಗತಂ ವತ ಮೇ ಆಸಿ…ಪೇ… ಕತಂ ಬುದ್ಧಸ್ಸ ಸಾಸನಂ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ತಿಣಸೂಲಕಛಾದನಿಯೋ [ತಿಣಸೂಲಿಕಛಾದನಿಯೋ (ಕ.)] ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ತಿಣಸೂಲಕಛಾದನಿಯತ್ಥೇರಸ್ಸಾಪದಾನಂ ತತಿಯಂ.
೪. ಮಧುಮಂಸದಾಯಕತ್ಥೇರಅಪದಾನಂ
‘‘ನಗರೇ ¶ ಬನ್ಧುಮತಿಯಾ, ಸೂಕರಿಕೋ ಅಹೋಸಹಂ;
ಉಕ್ಕೋಟಂ ರನ್ಧಯಿತ್ವಾನ [ಉಕ್ಕೋಟಕಂ ರನ್ಧಯಿತ್ವಾ (ಸೀ. ಸ್ಯಾ.)], ಮಧುಮಂಸಮ್ಹಿ [ಮಧುಸಪ್ಪಿಮ್ಹಿ (ಪೀ.), ಮಧುಂ ಮಂಸಮ್ಹಿ (ಕ.)] ಓಕಿರಿಂ.
‘‘ಸನ್ನಿಪಾತಂ ¶ ಅಹಂ ಗನ್ತ್ವಾ, ಏಕಂ ಪತ್ತಂ ಗಹೇಸಹಂ;
ಪೂರಯಿತ್ವಾನ ತಂ ಪತ್ತಂ, ಭಿಕ್ಖುಸಙ್ಘಸ್ಸದಾಸಹಂ.
‘‘ಯೋತ್ಥ ಥೇರತರೋ ಭಿಕ್ಖು, ನಿಯ್ಯಾದೇಸಿ ಮಮಂ ತದಾ;
ಇಮಿನಾ ಪತ್ತಪೂರೇನ, ಲಭಸ್ಸು ವಿಪುಲಂ ಸುಖಂ.
‘‘ದುವೇ ಸಮ್ಪತ್ತಿಯೋ ಭುತ್ವಾ, ಸುಕ್ಕಮೂಲೇನ ಚೋದಿತೋ;
ಪಚ್ಛಿಮೇ ವತ್ತಮಾನಮ್ಹಿ, ಕಿಲೇಸೇ ಝಾಪಯಿಸ್ಸತಿ.
‘‘ತತ್ಥ ¶ ಚಿತ್ತಂ ಪಸಾದೇತ್ವಾ, ತಾವತಿಂಸಮಗಚ್ಛಹಂ;
ತತ್ಥ ಭುತ್ವಾ ಪಿವಿತ್ವಾ ಚ, ಲಭಾಮಿ ವಿಪುಲಂ ಸುಖಂ.
‘‘ಮಣ್ಡಪೇ ರುಕ್ಖಮೂಲೇ ವಾ, ಪುಬ್ಬಕಮ್ಮಂ ಅನುಸ್ಸರಿಂ;
ಅನ್ನಪಾನಾಭಿವಸ್ಸೋ ಮೇ, ಅಭಿವಸ್ಸತಿ ತಾವದೇ.
‘‘ಇದಂ ಪಚ್ಛಿಮಕಂ ಮಯ್ಹಂ, ಚರಿಮೋ ವತ್ತತೇ ಭವೋ;
ಇಧಾಪಿ ಅನ್ನಪಾನಂ ಮೇ, ವಸ್ಸತೇ ಸಬ್ಬಕಾಲಿಕಂ.
‘‘ತೇನೇವ ಮಧುದಾನೇನ [ಮಂಸದಾನೇನ (ಸೀ. ಪೀ.)], ಸನ್ಧಾವಿತ್ವಾ ಭವೇ ಅಹಂ;
ಸಬ್ಬಾಸವೇ ಪರಿಞ್ಞಾಯ, ವಿಹರಾಮಿ ಅನಾಸವೋ.
‘‘ಏಕನವುತಿತೋ ¶ ಕಪ್ಪೇ, ಯಂ ದಾನಮದದಿಂ ತದಾ;
ದುಗ್ಗತಿಂ ನಾಭಿಜಾನಾಮಿ, ಮಧುದಾನಸ್ಸಿದಂ ಫಲಂ.
‘‘ಕಿಲೇಸಾ ಝಾಪಿತಾ ಮಯ್ಹಂ…ಪೇ… ವಿಹರಾಮಿ ಅನಾಸವೋ.
‘‘ಸ್ವಾಗತಂ ವತ ಮೇ ಆಸಿ…ಪೇ… ಕತಂ ಬುದ್ಧಸ್ಸ ಸಾಸನಂ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಮಧುಮಂಸದಾಯಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಮಧುಮಂಸದಾಯಕತ್ಥೇರಸ್ಸಾಪದಾನಂ ಚತುತ್ಥಂ.
೫. ನಾಗಪಲ್ಲವತ್ಥೇರಅಪದಾನಂ
‘‘ನಗರೇ ¶ ¶ ಬನ್ಧುಮತಿಯಾ, ರಾಜುಯ್ಯಾನೇ ವಸಾಮಹಂ;
ಮಮ ಅಸ್ಸಮಸಾಮನ್ತಾ, ನಿಸೀದಿ ಲೋಕನಾಯಕೋ.
‘‘ನಾಗಪಲ್ಲವಮಾದಾಯ ¶ , ಬುದ್ಧಸ್ಸ ಅಭಿರೋಪಯಿಂ;
ಪಸನ್ನಚಿತ್ತೋ ಸುಮನೋ, ಸುಗತಂ ಅಭಿವಾದಯಿಂ.
‘‘ಏಕನವುತಿತೋ ಕಪ್ಪೇ, ಯಂ ಪಲ್ಲವಮಪೂಜಯಿಂ;
ದುಗ್ಗತಿಂ ನಾಭಿಜಾನಾಮಿ, ಬುದ್ಧಪೂಜಾಯಿದಂ ಫಲಂ.
‘‘ಕಿಲೇಸಾ ಝಾಪಿತಾ ಮಯ್ಹಂ…ಪೇ… ವಿಹರಾಮಿ ಅನಾಸವೋ.
‘‘ಸ್ವಾಗತಂ ವತ ಮೇ ಆಸಿ…ಪೇ… ಕತಂ ಬುದ್ಧಸ್ಸ ಸಾಸನಂ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ನಾಗಪಲ್ಲವೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ನಾಗಪಲ್ಲವತ್ಥೇರಸ್ಸಾಪದಾನಂ ಪಞ್ಚಮಂ.
೬. ಏಕದೀಪಿಯತ್ಥೇರಅಪದಾನಂ
‘‘ಪರಿನಿಬ್ಬುತೇ ಸುಗತೇ, ಸಿದ್ಧತ್ಥೇ ಲೋಕನಾಯಕೇ;
ಸದೇವಮಾನುಸಾ ಸಬ್ಬೇ, ಪೂಜೇನ್ತಿ ದ್ವಿಪದುತ್ತಮಂ.
‘‘ಆರೋಪಿತೇ ¶ ಚ ಚಿತಕೇ, ಸಿದ್ಧತ್ಥೇ ಲೋಕನಾಯಕೇ;
ಯಥಾಸಕೇನ ಥಾಮೇನ, ಚಿತಂ ಪೂಜೇನ್ತಿ ಸತ್ಥುನೋ.
‘‘ಅವಿದೂರೇ ಚಿತಕಸ್ಸ, ದೀಪಂ ಉಜ್ಜಾಲಯಿಂ ಅಹಂ;
ಯಾವ ಉದೇತಿ ಸೂರಿಯೋ, ದೀಪಂ ಮೇ ತಾವ ಉಜ್ಜಲಿ.
‘‘ತೇನ ಕಮ್ಮೇನ ಸುಕತೇನ, ಚೇತನಾಪಣಿಧೀಹಿ ಚ;
ಜಹಿತ್ವಾ ಮಾನುಸಂ ದೇಹಂ, ತಾವತಿಂಸಮಗಚ್ಛಹಂ.
‘‘ತತ್ಥ ಮೇ ಸುಕತಂ ಬ್ಯಮ್ಹಂ, ಏಕದೀಪೀತಿ ಞಾಯತಿ;
ದೀಪಸತಸಹಸ್ಸಾನಿ, ಬ್ಯಮ್ಹೇ ಪಜ್ಜಲರೇ ಮಮ.
‘‘ಉದಯನ್ತೋವ ¶ ಸೂರಿಯೋ, ದೇಹೋ ಮೇ ಜೋತತೇ ಸದಾ;
ಸಪ್ಪಭಾಹಿ ಸರೀರಸ್ಸ, ಆಲೋಕೋ ಹೋತಿ ಮೇ ಸದಾ.
‘‘ತಿರೋಕುಟ್ಟಂ ¶ [ತಿರೋಕುಡ್ಡಂ (ಸೀ. ಸ್ಯಾ. ಕ.)] ತಿರೋಸೇಲಂ, ಸಮತಿಗ್ಗಯ್ಹ [ಸಬ್ಬತ್ಥಪಿ ಏವಮೇವ ದಿಸ್ಸತಿ] ಪಬ್ಬತಂ;
ಸಮನ್ತಾ ಯೋಜನಸತಂ, ಪಸ್ಸಾಮಿ ಚಕ್ಖುನಾ ಅಹಂ.
‘‘ಸತ್ತಸತ್ತತಿಕ್ಖತ್ತುಞ್ಚ ¶ , ದೇವಲೋಕೇ ರಮಿಂ ಅಹಂ;
ಏಕತಿಂಸತಿಕ್ಖತ್ತುಞ್ಚ, ದೇವರಜ್ಜಮಕಾರಯಿಂ.
‘‘ಅಟ್ಠವೀಸತಿಕ್ಖತ್ತುಞ್ಚ, ಚಕ್ಕವತ್ತೀ ಅಹೋಸಹಂ;
ಪದೇಸರಜ್ಜಂ ವಿಪುಲಂ, ಗಣನಾತೋ ಅಸಙ್ಖಿಯಂ.
‘‘ದೇವಲೋಕಾ ಚವಿತ್ವಾನ, ನಿಬ್ಬತ್ತಿಂ ಮಾತುಕುಚ್ಛಿಯಂ;
ಮಾತುಕುಚ್ಛಿಗತಸ್ಸಾಪಿ, ಅಕ್ಖಿ ಮೇ ನ ನಿಮೀಲತಿ.
‘‘ಜಾತಿಯಾ ಚತುವಸ್ಸೋಹಂ, ಪಬ್ಬಜಿಂ ಅನಗಾರಿಯಂ;
ಅಡ್ಢಮಾಸೇ ಅಸಮ್ಪತ್ತೇ, ಅರಹತ್ತಮಪಾಪುಣಿಂ.
‘‘ದಿಬ್ಬಚಕ್ಖುಂ ¶ ವಿಸೋಧೇಸಿಂ, ಭವಾ ಸಬ್ಬೇ ಸಮೂಹತಾ;
ಸಬ್ಬೇ ಕಿಲೇಸಾ ಸಞ್ಛಿನ್ನಾ, ಏಕದೀಪಸ್ಸಿದಂ ಫಲಂ.
‘‘ತಿರೋಕುಟ್ಟಂ ತಿರೋಸೇಲಂ, ಪಬ್ಬತಞ್ಚಾಪಿ ಕೇವಲಂ;
ಸಮತಿಕ್ಕಮ್ಮ [ಸಬ್ಬತ್ಥಪೀ ಏವಮೇವ ದಿಸ್ಸತಿ] ಪಸ್ಸಾಮಿ, ಏಕದೀಪಸ್ಸಿದಂ ಫಲಂ.
‘‘ವಿಸಮಾ ಮೇ ಸಮಾ ಹೋನ್ತಿ, ಅನ್ಧಕಾರೋ ನ ವಿಜ್ಜತಿ;
ನಾಹಂ ಪಸ್ಸಾಮಿ ತಿಮಿರಂ, ಏಕದೀಪಸ್ಸಿದಂ ಫಲಂ.
‘‘ಚತುನ್ನವುತಿತೋ ಕಪ್ಪೇ, ಯಂ ದೀಪಮದದಿಂ ತದಾ;
ದುಗ್ಗತಿಂ ನಾಭಿಜಾನಾಮಿ, ಏಕದೀಪಸ್ಸಿದಂ ಫಲಂ.
‘‘ಕಿಲೇಸಾ ಝಾಪಿತಾ ಮಯ್ಹಂ…ಪೇ… ವಿಹರಾಮಿ ಅನಾಸವೋ.
‘‘ಸ್ವಾಗತಂ ವತ ಮೇ ಆಸಿ…ಪೇ… ಕತಂ ಬುದ್ಧಸ್ಸ ಸಾಸನಂ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಏಕದೀಪಿಯೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಏಕದೀಪಿಯತ್ಥೇರಸ್ಸಾಪದಾನಂ ಛಟ್ಠಂ.
೭. ಉಚ್ಛಙ್ಗಪುಪ್ಫಿಯತ್ಥೇರಅಪದಾನಂ
‘‘ನಗರೇ ಬನ್ಧುಮತಿಯಾ, ಅಹೋಸಿಂ ಮಾಲಿಕೋ ತದಾ;
ಉಚ್ಛಙ್ಗಂ ಪೂರಯಿತ್ವಾನ, ಅಗಮಂ ಅನ್ತರಾಪಣಂ.
‘‘ಭಗವಾ ¶ ¶ ¶ ತಮ್ಹಿ ಸಮಯೇ, ಭಿಕ್ಖುಸಙ್ಘಪುರಕ್ಖತೋ;
ಮಹತಾ ಆನುಭಾವೇನ, ನಿಯ್ಯಾತಿ ಲೋಕನಾಯಕೋ.
‘‘ದಿಸ್ವಾನ ¶ ಲೋಕಪಜ್ಜೋತಂ, ವಿಪಸ್ಸಿಂ ಲೋಕತಾರಣಂ;
ಪುಪ್ಫಂ ಪಗ್ಗಯ್ಹ ಉಚ್ಛಙ್ಗಾ, ಬುದ್ಧಸೇಟ್ಠಂ ಅಪೂಜಯಿಂ.
‘‘ಏಕನವುತಿತೋ ಕಪ್ಪೇ, ಯಂ ಪುಪ್ಫಮಭಿಪೂಜಯಿಂ;
ದುಗ್ಗತಿಂ ನಾಭಿಜಾನಾಮಿ, ಬುದ್ಧಪೂಜಾಯಿದಂ ಫಲಂ.
‘‘ಕಿಲೇಸಾ ಝಾಪಿತಾ ಮಯ್ಹಂ…ಪೇ… ವಿಹರಾಮಿ ಅನಾಸವೋ.
‘‘ಸ್ವಾಗತಂ ವತ ಮೇ ಆಸಿ…ಪೇ… ಕತಂ ಬುದ್ಧಸ್ಸ ಸಾಸನಂ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಉಚ್ಛಙ್ಗಪುಪ್ಫಿಯೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಉಚ್ಛಙ್ಗಪುಪ್ಫಿಯತ್ಥೇರಸ್ಸಾಪದಾನಂ ಸತ್ತಮಂ.
೮. ಯಾಗುದಾಯಕತ್ಥೇರಅಪದಾನಂ
‘‘ಅತಿಥಿಂ [ಅತೀತಂ (ಕ.)] ಮೇ ಗಹೇತ್ವಾನ, ಅಗಚ್ಛಿಂ ಗಾಮಕಂ ತದಾ;
ಸಮ್ಪುಣ್ಣನದಿಕಂ ದಿಸ್ವಾ, ಸಙ್ಘಾರಾಮಂ ಉಪಾಗಮಿಂ.
‘‘ಆರಞ್ಞಕಾ ಧುತಧರಾ, ಝಾಯಿನೋ ಲೂಖಚೀವರಾ;
ವಿವೇಕಾಭಿರತಾ ಧೀರಾ, ಸಙ್ಘಾರಾಮೇ ವಸನ್ತಿ ತೇ.
‘‘ಗತಿ ¶ ತೇಸಂ ಉಪಚ್ಛಿನ್ನಾ, ಸುವಿಮುತ್ತಾನ ತಾದಿನಂ;
ಪಿಣ್ಡಾಯ ತೇ ನ ಗಚ್ಛನ್ತಿ, ಓರುದ್ಧನದಿತಾಯ ಹಿ [ಓರುದ್ಧನದಿಕಾಯತಿಂ (ಸ್ಯಾ.)].
‘‘ಪಸನ್ನಚಿತ್ತೋ ಸುಮನೋ, ವೇದಜಾತೋ ಕತಞ್ಜಲೀ;
ತಣ್ಡುಲಂ ಮೇ ಗಹೇತ್ವಾನ, ಯಾಗುದಾನಂ ಅದಾಸಹಂ.
‘‘ಪಞ್ಚನ್ನಂ ಯಾಗುಂ ದತ್ವಾನ, ಪಸನ್ನೋ ಸೇಹಿ ಪಾಣಿಭಿ;
ಸಕಕಮ್ಮಾಭಿರದ್ಧೋಹಂ, ತಾವತಿಂಸಮಗಚ್ಛಹಂ.
‘‘ಮಣಿಮಯಞ್ಚ ¶ ಮೇ ಬ್ಯಮ್ಹಂ, ನಿಬ್ಬತ್ತಿ ತಿದಸೇ ಗಣೇ;
ನಾರೀಗಣೇಹಿ ಸಹಿತೋ, ಮೋದಾಮಿ ಬ್ಯಮ್ಹಮುತ್ತಮೇ.
‘‘ತೇತ್ತಿಂಸಕ್ಖತ್ತುಂ ದೇವಿನ್ದೋ, ದೇವರಜ್ಜಮಕಾರಯಿಂ;
ತಿಂಸಕ್ಖತ್ತುಂ ಚಕ್ಕವತ್ತೀ, ಮಹಾರಜ್ಜಮಕಾರಯಿಂ.
‘‘ಪದೇಸರಜ್ಜಂ ¶ ವಿಪುಲಂ, ಗಣನಾತೋ ಅಸಙ್ಖಿಯಂ;
ದೇವಲೋಕೇ ಮನುಸ್ಸೇ ವಾ, ಅನುಭೋತ್ವಾ ಸಯಂ [ಯಸಂ (ಸ್ಯಾ.)] ಅಹಂ.
‘‘ಪಚ್ಛಿಮೇ ಭವೇ ಸಮ್ಪತ್ತೇ, ಪಬ್ಬಜಿಂ ಅನಗಾರಿಯಂ;
ಸಹ ಓರೋಪಿತೇ ಕೇಸೇ, ಸಬ್ಬಂ ಸಮ್ಪಟಿವಿಜ್ಝಹಂ.
‘‘ಖಯತೋ ವಯತೋ ಚಾಪಿ, ಸಮ್ಮಸನ್ತೋ ಕಳೇವರಂ;
ಪುರೇ ಸಿಕ್ಖಾಪದಾದಾನಾ, ಅರಹತ್ತಮಪಾಪುಣಿಂ.
‘‘ಸುದಿನ್ನಂ ¶ ಮೇ ದಾನವರಂ, ವಾಣಿಜ್ಜಂ ಸಮ್ಪಯೋಜಿತಂ;
ತೇನೇವ ಯಾಗುದಾನೇನ, ಪತ್ತೋಮ್ಹಿ ಅಚಲಂ ಪದಂ.
‘‘ಸೋಕಂ ಪರಿದ್ದವಂ ಬ್ಯಾಧಿಂ, ದರಥಂ ಚಿತ್ತತಾಪನಂ;
ನಾಭಿಜಾನಾಮಿ ಉಪ್ಪನ್ನಂ, ಯಾಗುದಾನಸ್ಸಿದಂ ಫಲಂ.
‘‘ಯಾಗುಂ ¶ ಸಙ್ಘಸ್ಸ ದತ್ವಾನ, ಪುಞ್ಞಕ್ಖೇತ್ತೇ ಅನುತ್ತರೇ;
ಪಞ್ಚಾನಿಸಂಸೇ ಅನುಭೋಮಿ, ಅಹೋ ಯಾಗುಸುಯಿಟ್ಠತಾ.
‘‘ಅಬ್ಯಾಧಿತಾ ರೂಪವತಾ, ಖಿಪ್ಪಂ ಧಮ್ಮನಿಸನ್ತಿತಾ [ನಿಬುಜ್ಝಿತಾ (ಸ್ಯಾ.)];
ಲಾಭಿತಾ ಅನ್ನಪಾನಸ್ಸ, ಆಯು ಪಞ್ಚಮಕಂ ಮಮ.
‘‘ಯೋ ಕೋಚಿ ವೇದಂ ಜನಯಂ, ಸಙ್ಘೇ ಯಾಗುಂ ದದೇಯ್ಯ ಸೋ;
ಇಮಾನಿ ಪಞ್ಚ ಠಾನಾನಿ, ಪಟಿಗಣ್ಹೇಯ್ಯ ಪಣ್ಡಿತೋ.
‘‘ಕರಣೀಯಂ ಕತಂ ಸಬ್ಬಂ, ಭವಾ ಉಗ್ಘಾಟಿತಾ ಮಯಾ;
ಸಬ್ಬಾಸವಾ ಪರಿಕ್ಖೀಣಾ, ನತ್ಥಿ ದಾನಿ ಪುನಬ್ಭವೋ.
‘‘ಸೋ ಅಹಂ ವಿಚರಿಸ್ಸಾಮಿ, ಗಾಮಾ ಗಾಮಂ ಪುರಾ ಪುರಂ;
ನಮಸ್ಸಮಾನೋ ಸಮ್ಬುದ್ಧಂ, ಧಮ್ಮಸ್ಸ ಚ ಸುಧಮ್ಮತಂ.
‘‘ತಿಂಸಕಪ್ಪಸಹಸ್ಸಮ್ಹಿ, ಯಂ ದಾನಮದದಿಂ ತದಾ;
ದುಗ್ಗತಿಂ ನಾಭಿಜಾನಾಮಿ, ಯಾಗುದಾನಸ್ಸಿದಂ ಫಲಂ.
‘‘ಕಿಲೇಸಾ ¶ ಝಾಪಿತಾ ಮಯ್ಹಂ…ಪೇ… ವಿಹರಾಮಿ ಅನಾಸವೋ.
‘‘ಸ್ವಾಗತಂ ವತ ಮೇ ಆಸಿ…ಪೇ… ಕತಂ ಬುದ್ಧಸ್ಸ ಸಾಸನಂ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಯಾಗುದಾಯಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಯಾಗುದಾಯಕತ್ಥೇರಸ್ಸಾಪದಾನಂ ಅಟ್ಠಮಂ.
೯. ಪತ್ಥೋದನದಾಯಕತ್ಥೇರಅಪದಾನಂ
‘‘ವನಚಾರೀ ¶ ¶ ಪುರೇ ಆಸಿಂ, ಸತತಂ ವನಕಮ್ಮಿಕೋ;
ಪತ್ಥೋದನಂ ಗಹೇತ್ವಾನ, ಕಮ್ಮನ್ತಂ ಅಗಮಾಸಹಂ.
‘‘ತತ್ಥದ್ದಸಾಸಿಂ ಸಮ್ಬುದ್ಧಂ, ಸಯಮ್ಭುಂ ಅಪರಾಜಿತಂ;
ವನಾ ಪಿಣ್ಡಾಯ ನಿಕ್ಖನ್ತಂ, ದಿಸ್ವಾ ಚಿತ್ತಂ ಪಸಾದಯಿಂ.
‘‘ಪರಕಮ್ಮಾಯನೇ [ವಯಕಮ್ಮಾಯನೇ (ಕ.)] ಯುತ್ತೋ, ಪುಞ್ಞಞ್ಚ ಮೇ ನ ವಿಜ್ಜತಿ;
ಅಯಂ ಪತ್ಥೋದನೋ ಅತ್ಥಿ, ಭೋಜಯಿಸ್ಸಾಮಹಂ [ಭೋಜಯಿಸ್ಸಾಮಿ ಮಂ (ಸ್ಯಾ.)] ಮುನಿಂ.
‘‘ಪತ್ಥೋದನಂ ಗಹೇತ್ವಾನ, ಸಯಮ್ಭುಸ್ಸ ಅದಾಸಹಂ;
ಮಮ ನಿಜ್ಝಾಯಮಾನಸ್ಸ, ಪರಿಭುಞ್ಜಿ ತದಾ ಮುನಿ.
‘‘ತೇನ ಕಮ್ಮೇನ ಸುಕತೇನ, ಚೇತನಾಪಣಿಧೀಹಿ ಚ;
ಜಹಿತ್ವಾ ಮಾನುಸಂ ದೇಹಂ, ತಾವತಿಂಸಮಗಚ್ಛಹಂ.
‘‘ಛತ್ತಿಂಸಕ್ಖತ್ತುಂ ¶ ದೇವಿನ್ದೋ, ದೇವರಜ್ಜಮಕಾರಯಿಂ;
ತೇತ್ತಿಂಸಕ್ಖತ್ತುಂ ರಾಜಾ ಚ, ಚಕ್ಕವತ್ತೀ ಅಹೋಸಹಂ.
‘‘ಪದೇಸರಜ್ಜಂ ವಿಪುಲಂ, ಗಣನಾತೋ ಅಸಙ್ಖಿಯಂ;
ಸುಖಿತೋ ಯಸವಾ ಹೋಮಿ, ಪತ್ಥೋದನಸ್ಸಿದಂ ಫಲಂ.
‘‘ಭವಾಭವೇ ಸಂಸರನ್ತೋ, ಲಭಾಮಿ ಅಮಿತಂ ಧನಂ;
ಭೋಗೇ ಮೇ ಊನತಾ ನತ್ಥಿ, ಪತ್ಥೋದನಸ್ಸಿದಂ ಫಲಂ.
‘‘ನದೀಸೋತಪಟಿಭಾಗಾ ¶ , ಭೋಗಾ ನಿಬ್ಬತ್ತರೇ ಮಮ;
ಪರಿಮೇತುಂ ನ ಸಕ್ಕೋಮಿ, ಪತ್ಥೋದನಸ್ಸಿದಂ ಫಲಂ.
‘‘ಇಮಂ ¶ ಖಾದ ಇಮಂ ಭುಞ್ಜ, ಇಮಮ್ಹಿ ಸಯನೇ ಸಯ;
ತೇನಾಹಂ ಸುಖಿತೋ ಹೋಮಿ, ಪತ್ಥೋದನಸ್ಸಿದಂ ಫಲಂ.
‘‘ಚತುನ್ನವುತಿತೋ ಕಪ್ಪೇ, ಯಂ ದಾನಮದದಿಂ ತದಾ;
ದುಗ್ಗತಿಂ ನಾಭಿಜಾನಾಮಿ, ಪತ್ಥೋದನಸ್ಸಿದಂ ಫಲಂ.
‘‘ಕಿಲೇಸಾ ¶ ಝಾಪಿತಾ ಮಯ್ಹಂ…ಪೇ… ವಿಹರಾಮಿ ಅನಾಸವೋ.
‘‘ಸ್ವಾಗತಂ ವತ ಮೇ ಆಸಿ…ಪೇ… ಕತಂ ಬುದ್ಧಸ್ಸ ಸಾಸನಂ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಪತ್ಥೋದನದಾಯಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಪತ್ಥೋದನದಾಯಕತ್ಥೇರಸ್ಸಾಪದಾನಂ ನವಮಂ.
೧೦. ಮಞ್ಚದಾಯಕತ್ಥೇರಅಪದಾನಂ
‘‘ಪರಿನಿಬ್ಬುತೇ ಕಾರುಣಿಕೇ, ಸಿದ್ಧತ್ಥೇ ಲೋಕನಾಯಕೇ;
ವಿತ್ಥಾರಿಕೇ ಪಾವಚನೇ, ದೇವಮಾನುಸಸಕ್ಕತೇ.
‘‘ಚಣ್ಡಾಲೋ ಆಸಹಂ ತತ್ಥ, ಆಸನ್ದಿಪೀಠಕಾರಕೋ;
ತೇನ ಕಮ್ಮೇನ ಜೀವಾಮಿ, ತೇನ ಪೋಸೇಮಿ ದಾರಕೇ.
‘‘ಆಸನ್ದಿಂ ಸುಕತಂ ಕತ್ವಾ, ಪಸನ್ನೋ ಸೇಹಿ ಪಾಣಿಭಿ;
ಸಯಮೇವುಪಗನ್ತ್ವಾನ, ಭಿಕ್ಖುಸಙ್ಘಸ್ಸದಾಸಹಂ.
‘‘ತೇನ ¶ ಕಮ್ಮೇನ ಸುಕತೇನ, ಚೇತನಾಪಣಿಧೀಹಿ ಚ;
ಜಹಿತ್ವಾ ಮಾನುಸಂ ದೇಹಂ, ತಾವತಿಂಸಮಗಚ್ಛಹಂ.
‘‘ದೇವಲೋಕಗತೋ ಸನ್ತೋ, ಮೋದಾಮಿ ತಿದಸೇ ಗಣೇ;
ಸಯನಾನಿ ಮಹಗ್ಘಾನಿ, ನಿಬ್ಬತ್ತನ್ತಿ ಯದಿಚ್ಛಕಂ.
‘‘ಪಞ್ಞಾಸಕ್ಖತ್ತುಂ ದೇವಿನ್ದೋ, ದೇವರಜ್ಜಮಕಾರಯಿಂ;
ಅಸೀತಿಕ್ಖತ್ತುಂ ರಾಜಾ ಚ, ಚಕ್ಕವತ್ತೀ ಅಹೋಸಹಂ.
‘‘ಪದೇಸರಜ್ಜಂ ¶ ¶ ವಿಪುಲಂ, ಗಣನಾತೋ ಅಸಙ್ಖಿಯಂ;
ಸುಖಿತೋ ಯಸವಾ ಹೋಮಿ, ಮಞ್ಚದಾನಸ್ಸಿದಂ ಫಲಂ.
‘‘ದೇವಲೋಕಾ ಚವಿತ್ವಾನ, ಏಮಿ ಚೇ ಮಾನುಸಂ ಭವಂ;
ಮಹಾರಹಾ ಸುಸಯನಾ, ಸಯಮೇವ ಭವನ್ತಿ ಮೇ.
‘‘ಅಯಂ ಪಚ್ಛಿಮಕೋ ಮಯ್ಹಂ, ಚರಿಮೋ ವತ್ತತೇ ಭವೋ;
ಅಜ್ಜಾಪಿ ಸಯನೇ ಕಾಲೇ [ಸಯನಕಾಲೇ (ಸ್ಯಾ.)], ಸಯನಂ ಉಪತಿಟ್ಠತಿ.
‘‘ಚತುನ್ನವುತಿತೋ ಕಪ್ಪೇ, ಯಂ ದಾನಮದದಿಂ ತದಾ;
ದುಗ್ಗತಿಂ ನಾಭಿಜಾನಾಮಿ, ಮಞ್ಚದಾನಸ್ಸಿದಂ ಫಲಂ.
‘‘ಕಿಲೇಸಾ ¶ ಝಾಪಿತಾ ಮಯ್ಹಂ…ಪೇ… ವಿಹರಾಮಿ ಅನಾಸವೋ.
‘‘ಸ್ವಾಗತಂ ವತ ಮೇ ಆಸಿ…ಪೇ… ಕತಂ ಬುದ್ಧಸ್ಸ ಸಾಸನಂ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ¶ ಸುದಂ ಆಯಸ್ಮಾ ಮಞ್ಚದಾಯಕೋ ಥೇರೋ ಇಮಾ ಗಾಥಾಯೋ
ಅಭಾಸಿತ್ಥಾತಿ.
ಮಞ್ಚದಾಯಕತ್ಥೇರಸ್ಸಾಪದಾನಂ ದಸಮಂ.
ಭದ್ದಾಲಿವಗ್ಗೋ ಬಾಚತ್ತಾಲೀಸಮೋ.
ತಸ್ಸುದ್ದಾನಂ –
ಭದ್ದಾಲೀ ಏಕಛತ್ತೋ ಚ, ತಿಣಸೂಲೋ ಚ ಮಂಸದೋ;
ನಾಗಪಲ್ಲವಿಕೋ ದೀಪೀ, ಉಚ್ಛಙ್ಗಿ ಯಾಗುದಾಯಕೋ.
ಪತ್ಥೋದನೀ ಮಞ್ಚದದೋ, ಗಾಥಾಯೋ ಗಣಿತಾ ಚಿಹ;
ದ್ವೇಸತಾನಿ ಚ ಗಾಥಾನಂ, ಗಾಥಾ ಚೇಕಾ ತದುತ್ತರಿ.