📜
ನಮೋ ತಸ್ಸ ಭಗವತೋ ಅರಹತೋ ಸಮ್ಮಾಸಮ್ಬುದ್ಧಸ್ಸ
ಖುದ್ದಕನಿಕಾಯೇ
ಥೇರಾಪದಾನಪಾಳಿ
(ದುತಿಯೋ ಭಾಗೋ)
೪೩. ಸಕಿಂಸಮ್ಮಜ್ಜಕವಗ್ಗೋ
೧. ಸಕಿಂಸಮ್ಮಜ್ಜಕತ್ಥೇರಅಪದಾನಂ
‘‘ವಿಪಸ್ಸಿನೋ ¶ ¶ ¶ ಭಗವತೋ, ಪಾಟಲಿಂ ಬೋಧಿಮುತ್ತಮಂ;
ದಿಸ್ವಾವ ತಂ ಪಾದಪಗ್ಗಂ, ತತ್ಥ ಚಿತ್ತಂ ಪಸಾದಯಿಂ.
‘‘ಸಮ್ಮಜ್ಜನಿಂ ಗಹೇತ್ವಾನ, ಬೋಧಿಂ ಸಮ್ಮಜ್ಜಿ ತಾವದೇ;
ಸಮ್ಮಜ್ಜಿತ್ವಾನ ತಂ ಬೋಧಿಂ, ಅವನ್ದಿಂ ಪಾಟಲಿಂ ಅಹಂ.
‘‘ತತ್ಥ ಚಿತ್ತಂ ಪಸಾದೇತ್ವಾ, ಸಿರೇ ಕತ್ವಾನ ಅಞ್ಜಲಿಂ;
ನಮಸ್ಸಮಾನೋ ತಂ ಬೋಧಿಂ, ಗಞ್ಛಿಂ ಪಟಿಕುಟಿಂ ಅಹಂ.
‘‘ತಾದಿಮಗ್ಗೇನ ¶ ಗಚ್ಛಾಮಿ, ಸರನ್ತೋ ಬೋಧಿಮುತ್ತಮಂ;
ಅಜಗರೋ ಮಂ ಪೀಳೇಸಿ, ಘೋರರೂಪೋ ಮಹಬ್ಬಲೋ.
‘‘ಆಸನ್ನೇ ¶ ಮೇ ಕತಂ ಕಮ್ಮಂ, ಫಲೇನ ತೋಸಯೀ ಮಮಂ;
ಕಳೇವರಂ ಮೇ ಗಿಲತಿ, ದೇವಲೋಕೇ ರಮಾಮಹಂ.
‘‘ಅನಾವಿಲಂ ಮಮ ಚಿತ್ತಂ, ವಿಸುದ್ಧಂ ಪಣ್ಡರಂ ಸದಾ;
ಸೋಕಸಲ್ಲಂ ನ ಜಾನಾಮಿ, ಚಿತ್ತಸನ್ತಾಪನಂ ಮಮ.
‘‘ಕುಟ್ಠಂ ಗಣ್ಡೋ ಕಿಲಾಸೋ ಚ, ಅಪಮಾರೋ ವಿತಚ್ಛಿಕಾ;
ದದ್ದು ಕಣ್ಡು ಚ ಮೇ ನತ್ಥಿ, ಫಲಂ ಸಮ್ಮಜ್ಜನಾಯಿದಂ [ಸಮ್ಮಜ್ಜನೇ ಇದಂ (ಸೀ.)].
‘‘ಸೋಕೋ ¶ ಚ ಪರಿದೇವೋ ಚ, ಹದಯೇ ಮೇ ನ ವಿಜ್ಜತಿ;
ಅಭನ್ತಂ ಉಜುಕಂ ಚಿತ್ತಂ, ಫಲಂ ಸಮ್ಮಜ್ಜನಾಯಿದಂ.
‘‘ಸಮಾಧೀಸು ¶ ನ ಮಜ್ಜಾಮಿ [ಸಮಾಧೀಸು ನ ಸಜ್ಜಾಮಿ (ಸೀ.), ಸಮಾಧಿಂ ಪುನ ಪಜ್ಜಾಮಿ (ಸ್ಯಾ)], ವಿಸದಂ ಹೋತಿ ಮಾನಸಂ;
ಯಂ ಯಂ ಸಮಾಧಿಮಿಚ್ಛಾಮಿ, ಸೋ ಸೋ ಸಮ್ಪಜ್ಜತೇ ಮಮಂ.
‘‘ರಜನೀಯೇ ನ ರಜ್ಜಾಮಿ, ಅಥೋ ದುಸ್ಸನಿಯೇಸು [ದೋಸನಿಯೇಸು (ಸೀ. ಸ್ಯಾ. ಕ.)] ಚ;
ಮೋಹನೀಯೇ ನ ಮುಯ್ಹಾಮಿ, ಫಲಂ ಸಮ್ಮಜ್ಜನಾಯಿದಂ.
‘‘ಏಕನವುತಿತೋ [ಏಕನವುತೇ ಇತೋ (ಸೀ. ಸ್ಯಾ.)] ಕಪ್ಪೇ, ಯಂ ಕಮ್ಮಮಕರಿಂ ತದಾ;
ದುಗ್ಗತಿಂ ನಾಭಿಜಾನಾಮಿ, ಫಲಂ ಸಮ್ಮಜ್ಜನಾಯಿದಂ.
‘‘ಕಿಲೇಸಾ ಝಾಪಿತಾ ಮಯ್ಹಂ, ಭವಾ ಸಬ್ಬೇ ಸಮೂಹತಾ;
ನಾಗೋವ ಬನ್ಧನಂ ಛೇತ್ವಾ, ವಿಹರಾಮಿ ಅನಾಸವೋ.
‘‘ಸ್ವಾಗತಂ ವತ ಮೇ ಆಸಿ, ಮಮ ಬುದ್ಧಸ್ಸ ಸನ್ತಿಕೇ;
ತಿಸ್ಸೋ ವಿಜ್ಜಾ ಅನುಪ್ಪತ್ತಾ, ಕತಂ ಬುದ್ಧಸ್ಸ ಸಾಸನಂ.
‘‘ಪಟಿಸಮ್ಭಿದಾ ಚತಸ್ಸೋ, ವಿಮೋಕ್ಖಾಪಿ ಚ ಅಟ್ಠಿಮೇ;
ಛಳಭಿಞ್ಞಾ ಸಚ್ಛಿಕತಾ, ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಸಕಿಂಸಮ್ಮಜ್ಜಕೋ ಥೇರೋ ಇಮಾ ಗಾಥಾಯೋ
ಅಭಾಸಿತ್ಥಾತಿ.
ಸಕಿಂಸಮ್ಮಜ್ಜಕತ್ಥೇರಸ್ಸಾಪದಾನಂ ಪಠಮಂ.
೨. ಏಕದುಸ್ಸದಾಯಕತ್ಥೇರಅಪದಾನಂ
‘‘ನಗರೇ ¶ ಹಂಸವತಿಯಾ, ಅಹೋಸಿಂ ತಿಣಹಾರಕೋ;
ತಿಣಹಾರೇನ ಜೀವಾಮಿ, ತೇನ ಪೋಸೇಮಿ ದಾರಕೇ.
‘‘ಪದುಮುತ್ತರೋ ನಾಮ ಜಿನೋ, ಸಬ್ಬಧಮ್ಮಾನ ಪಾರಗೂ;
ತಮನ್ಧಕಾರಂ ನಾಸೇತ್ವಾ, ಉಪ್ಪಜ್ಜಿ ಲೋಕನಾಯಕೋ.
‘‘ಸಕೇ ¶ ಘರೇ ನಿಸೀದಿತ್ವಾ, ಏವಂ ಚಿನ್ತೇಸಿ ತಾವದೇ;
‘ಬುದ್ಧೋ ಲೋಕೇ ಸಮುಪ್ಪನ್ನೋ, ದೇಯ್ಯಧಮ್ಮೋ ನ ವಿಜ್ಜತಿ.
‘‘‘ಇದಂ ¶ ಮೇ ಸಾಟಕಂ ಏಕಂ, ನತ್ಥಿ ಮೇ ಕೋಚಿ ದಾಯಕೋ;
ದುಕ್ಖೋ ನಿರಯಸಮ್ಫಸ್ಸೋ, ರೋಪಯಿಸ್ಸಾಮಿ ದಕ್ಖಿಣಂ’.
‘‘ಏವಾಹಂ ಚಿನ್ತಯಿತ್ವಾನ, ಸಕಂ ಚಿತ್ತಂ ಪಸಾದಯಿಂ;
ಏಕಂ ದುಸ್ಸಂ ಗಹೇತ್ವಾನ, ಬುದ್ಧಸೇಟ್ಠಸ್ಸದಾಸಹಂ.
‘‘ಏಕಂ ¶ ದುಸ್ಸಂ ದದಿತ್ವಾನ, ಉಕ್ಕುಟ್ಠಿಂ ಸಮ್ಪವತ್ತಯಿಂ;
‘ಯದಿ ಬುದ್ಧೋ ತುವಂ ವೀರ, ತಾರೇಹಿ ಮಂ ಮಹಾಮುನಿ’.
‘‘ಪದುಮುತ್ತರೋ ಲೋಕವಿದೂ, ಆಹುತೀನಂ ಪಟಿಗ್ಗಹೋ;
ಮಮ ದಾನಂ ಪಕಿತ್ತೇನ್ತೋ, ಅಕಾ ಮೇ ಅನುಮೋದನಂ.
‘‘‘ಇಮಿನಾ ಏಕದುಸ್ಸೇನ, ಚೇತನಾಪಣಿಧೀಹಿ ಚ;
ಕಪ್ಪಸತಸಹಸ್ಸಾನಿ, ವಿನಿಪಾತಂ ನ ಗಚ್ಛಸಿ.
‘‘‘ಛತ್ತಿಂಸಕ್ಖತ್ತುಂ ದೇವಿನ್ದೋ, ದೇವರಜ್ಜಂ ಕರಿಸ್ಸಸಿ;
ತೇತ್ತಿಂಸಕ್ಖತ್ತುಂ ರಾಜಾ ಚ, ಚಕ್ಕವತ್ತೀ [ಚಕ್ಕವತ್ತಿ (ಸ್ಯಾ.)] ಭವಿಸ್ಸಸಿ.
‘‘‘ಪದೇಸರಜ್ಜಂ ವಿಪುಲಂ, ಗಣನಾತೋ ಅಸಙ್ಖಿಯಂ [ಅಸಙ್ಕಯಂ (ಸ್ಯಾ. ಕ.) ಏವಮುಪರಿಪಿ];
ದೇವಲೋಕೇ ಮನುಸ್ಸೇ ವಾ, ಸಂಸರನ್ತೋ ತುವಂ ಭವೇ.
‘‘‘ರೂಪವಾ ಗುಣಸಮ್ಪನ್ನೋ, ಅನವಕ್ಕನ್ತದೇಹವಾ [ಅನುವತ್ತನ್ತ… (ಸ್ಯಾ)];
ಅಕ್ಖೋಭಂ ಅಮಿತಂ ದುಸ್ಸಂ, ಲಭಿಸ್ಸಸಿ ಯದಿಚ್ಛಕಂ’.
‘‘ಇದಂ ವತ್ವಾನ ಸಮ್ಬುದ್ಧೋ, ಜಲಜುತ್ತಮನಾಮಕೋ;
ನಭಂ ಅಬ್ಭುಗ್ಗಮೀ ವೀರೋ [ಧೀರೋ (ಸೀ. ಸ್ಯಾ.)], ಹಂಸರಾಜಾವ ಅಮ್ಬರೇ.
‘‘ಯಂ ¶ ಯಂ ಯೋನುಪಪಜ್ಜಾಮಿ, ದೇವತ್ತಂ ಅಥ ಮಾನುಸಂ;
ಭೋಗೇ ಮೇ ಊನತಾ ನತ್ಥಿ, ಏಕದುಸ್ಸಸ್ಸಿದಂ ಫಲಂ.
‘‘ಪದುದ್ಧಾರೇ ¶ ಪದುದ್ಧಾರೇ, ದುಸ್ಸಂ ನಿಬ್ಬತ್ತತೇ ಮಮಂ;
ಹೇಟ್ಠಾ ದುಸ್ಸಮ್ಹಿ ತಿಟ್ಠಾಮಿ, ಉಪರಿಚ್ಛದನಂ ಮಮ.
‘‘ಚಕ್ಕವಾಳಂ ಉಪಾದಾಯ, ಸಕಾನನಂ ಸಪಬ್ಬತಂ;
ಇಚ್ಛಮಾನೋ ಚಹಂ ಅಜ್ಜ, ದುಸ್ಸೇಹಚ್ಛಾದಯೇಯ್ಯ ತಂ.
‘‘ತೇನೇವ ಏಕದುಸ್ಸೇನ, ಸಂಸರನ್ತೋ ಭವಾಭವೇ;
ಸುವಣ್ಣವಣ್ಣೋ ಹುತ್ವಾನ, ಸಂಸರಾಮಿ ಭವಾಭವೇ.
‘‘ವಿಪಾಕಂ ¶ ವಿಏಕದುಸ್ಸಸ್ಸ, ನಾಜ್ಝಗಂ ಕತ್ಥಚಿಕ್ಖಯಂ;
ಅಯಂ ಮೇ ಅನ್ತಿಮಾ ಜಾತಿ, ವಿಪಚ್ಚತಿ ಇಧಾಪಿ ಮೇ.
‘‘ಸತಸಹಸ್ಸಿತೋ ಕಪ್ಪೇ, ಯಂ ದುಸ್ಸಮದದಿಂ ತದಾ;
ದುಗ್ಗತಿಂ ನಾಭಿಜಾನಾಮಿ, ಏಕದುಸ್ಸಸ್ಸಿದಂ ಫಲಂ.
‘‘ಕಿಲೇಸಾ ಝಾಪಿತಾ ಮಯ್ಹಂ…ಪೇ… ವಿಹರಾಮಿ ಅನಾಸವೋ.
‘‘ಸ್ವಾಗತಂ ವತ ಮೇ ಆಸಿ…ಪೇ… ಕತಂ ಬುದ್ಧಸ್ಸ ಸಾಸನಂ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಏಕದುಸ್ಸದಾಯಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ;
ಏಕದುಸ್ಸದಾಯಕತ್ಥೇರಸ್ಸಾಪದಾನಂ ದುತಿಯಂ.
೩. ಏಕಾಸನದಾಯಕತ್ಥೇರಅಪದಾನಂ
‘‘ಹಿಮವನ್ತಸ್ಸಾವಿದೂರೇ ¶ ¶ , ಗೋಸಿತೋ ನಾಮ ಪಬ್ಬತೋ;
ಅಸ್ಸಮೋ ಸುಕತೋ ಮಯ್ಹಂ, ಪಣ್ಣಸಾಲಾ ಸುಮಾಪಿತಾ.
‘‘ನಾರದೋ ನಾಮ ನಾಮೇನ, ಕಸ್ಸಪೋ ಇತಿ ಮಂ ವಿದೂ;
ಸುದ್ಧಿಮಗ್ಗಂ ಗವೇಸನ್ತೋ, ವಸಾಮಿ ಗೋಸಿತೇ ತದಾ.
‘‘ಪದುಮುತ್ತರೋ ನಾಮ ಜಿನೋ, ಸಬ್ಬಧಮ್ಮಾನ ಪಾರಗೂ;
ವಿವೇಕಕಾಮೋ ಸಮ್ಬುದ್ಧೋ, ಅಗಞ್ಛಿ ಅನಿಲಞ್ಜಸಾ.
‘‘ವನಗ್ಗೇ ಗಚ್ಛಮಾನಸ್ಸ, ದಿಸ್ವಾ ರಂಸಿಂ ಮಹೇಸಿನೋ;
ಕಟ್ಠಮಞ್ಚಂ ಪಞ್ಞಾಪೇತ್ವಾ, ಅಜಿನಞ್ಚ ಅಪತ್ಥರಿಂ.
‘‘ಆಸನಂ ¶ ಪಞ್ಞಾಪೇತ್ವಾನ, ಸಿರೇ ಕತ್ವಾನ ಅಞ್ಜಲಿಂ;
ಸೋಮನಸ್ಸಂ ಪವೇದಿತ್ವಾ, ಇದಂ ವಚನಮಬ್ರವಿಂ.
‘‘‘ಸಲ್ಲಕತ್ತೋ ಮಹಾವೀರ, ಆತುರಾನಂ ತಿಕಿಚ್ಛಕೋ;
ಮಮಂ ರೋಗಪರೇತಸ್ಸ [ರಾಗ… (ಸ್ಯಾ.)], ತಿಕಿಚ್ಛಂ ದೇಹಿ ನಾಯಕ.
‘‘‘ಕಲ್ಲತ್ಥಿಕಾ ಯೇ ಪಸ್ಸನ್ತಿ, ಬುದ್ಧಸೇಟ್ಠ ತುವಂ ಮುನೇ;
ಧುವತ್ಥಸಿದ್ಧಿಂ ಪಪ್ಪೋನ್ತಿ, ಏತೇಸಂ ಅಜರೋ [ಜಜ್ಜರೋ (ಸೀ. ಪೀ. ಕ.)] ಭವೇ.
‘‘‘ನ ¶ ಮೇ ದೇಯ್ಯಧಮ್ಮೋ ಅತ್ಥಿ, ಪವತ್ತಫಲಭೋಜಿಹಂ;
ಇದಂ ಮೇ ಆಸನಂ ಅತ್ಥಿ [ನ ಮೇ ದೇಯ್ಯಂ ತವ ಅತ್ಥಿ (ಸೀ. ಸ್ಯಾ.)], ನಿಸೀದ ಕಟ್ಠಮಞ್ಚಕೇ’.
‘‘ನಿಸೀದಿ ತತ್ಥ ಭಗವಾ, ಅಸಮ್ಭೀತೋವ [ಅಚ್ಛಮ್ಭಿತೋವ (ಸ್ಯಾ. ಕ.)] ಕೇಸರೀ;
ಮುಹುತ್ತಂ ವೀತಿನಾಮೇತ್ವಾ, ಇದಂ ವಚನಮಬ್ರವಿ.
‘‘‘ವಿಸಟ್ಠೋ ¶ [ವಿಸ್ಸತ್ಥೋ (ಸೀ. ಪೀ), ವಿಸ್ಸಟ್ಠೋ (ಸ್ಯಾ. ಕ.)] ಹೋಹಿ ಮಾ ಭಾಯಿ, ಲದ್ಧೋ ಜೋತಿರಸೋ ತಯಾ;
ಯಂ ತುಯ್ಹಂ ಪತ್ಥಿತಂ ಸಬ್ಬಂ, ಪರಿಪೂರಿಸ್ಸತಿನಾಗತೇ [ಪರಿಪೂರಿಸ್ಸತಾಸನಂ (ಸ್ಯಾ. ಕ.)].
‘‘‘ನ ಮೋಘಂ ತಂ ಕತಂ ತುಯ್ಹಂ, ಪುಞ್ಞಕ್ಖೇತ್ತೇ ಅನುತ್ತರೇ;
ಸಕ್ಕಾ ಉದ್ಧರಿತುಂ ಅತ್ತಾ, ಯಸ್ಸ ಚಿತ್ತಂ ಪಣೀಹಿತಂ [ಸುನೀಹಿತಂ (ಸ್ಯಾ.)].
‘‘‘ಇಮಿನಾಸನದಾನೇನ, ಚೇತನಾಪಣಿಧೀಹಿ ಚ;
ಕಪ್ಪಸತಸಹಸ್ಸಾನಿ, ವಿನಿಪಾತಂ ನ ಗಚ್ಛಸಿ.
‘‘‘ಪಞ್ಞಾಸಕ್ಖತ್ತುಂ ದೇವಿನ್ದೋ, ದೇವರಜ್ಜಂ ಕರಿಸ್ಸಸಿ;
ಅಸೀತಿಕ್ಖತ್ತುಂ ರಾಜಾ ಚ, ಚಕ್ಕವತ್ತೀ ಭವಿಸ್ಸಸಿ.
‘‘‘ಪದೇಸರಜ್ಜಂ ¶ ವಿಪುಲಂ, ಗಣನಾತೋ ಅಸಙ್ಖಿಯಂ;
ಸಬ್ಬತ್ಥ ಸುಖಿತೋ ಹುತ್ವಾ, ಸಂಸಾರೇ ಸಂಸರಿಸ್ಸಸಿ’.
‘‘ಇದಂ ವತ್ವಾನ ಸಮ್ಬುದ್ಧೋ, ಜಲಜುತ್ತಮನಾಮಕೋ;
ನಭಂ ಅಬ್ಭುಗ್ಗಮೀ ವೀರೋ, ಹಂಸರಾಜಾವ ಅಮ್ಬರೇ.
‘‘ಹತ್ಥಿಯಾನಂ ಅಸ್ಸಯಾನಂ, ಸರಥಂ ಸನ್ದಮಾನಿಕಂ;
ಲಭಾಮಿ ಸಬ್ಬಮೇವೇತಂ, ಏಕಾಸನಸ್ಸಿದಂ ಫಲಂ.
‘‘ಕಾನನಂ ಪವಿಸಿತ್ವಾಪಿ, ಯದಾ ಇಚ್ಛಾಮಿ ಆಸನಂ;
ಮಮ ಸಙ್ಕಪ್ಪಮಞ್ಞಾಯ, ಪಲ್ಲಙ್ಕೋ ಉಪತಿಟ್ಠತಿ.
‘‘ವಾರಿಮಜ್ಝಗತೋ ಸನ್ತೋ, ಯದಾ ಇಚ್ಛಾಮಿ ಆಸನಂ;
ಮಮ ಸಙ್ಕಪ್ಪಮಞ್ಞಾಯ, ಪಲ್ಲಙ್ಕೋ ಉಪತಿಟ್ಠತಿ.
‘‘ಯಂ ¶ ಯಂ ಯೋನುಪಪಜ್ಜಾಮಿ, ದೇವತ್ತಂ ಅಥ ಮಾನುಸಂ;
ಪಲ್ಲಙ್ಕಸತಸಹಸ್ಸಾನಿ, ಪರಿವಾರೇನ್ತಿ ಮಂ ಸದಾ.
‘‘ದುವೇ ¶ ¶ ಭವೇ ಸಂಸರಾಮಿ, ದೇವತ್ತೇ ಅಥ ಮಾನುಸೇ;
ದುವೇ ಕುಲೇ ಪಜಾಯಾಮಿ, ಖತ್ತಿಯೇ ಅಥ ಬ್ರಾಹ್ಮಣೇ.
‘‘ಏಕಾಸನಂ ದದಿತ್ವಾನ, ಪುಞ್ಞಕ್ಖೇತ್ತೇ ಅನುತ್ತರೇ;
ಧಮ್ಮಪಲ್ಲಙ್ಕಮಾದಾಯ [ಧಮ್ಮಪಲ್ಲಙ್ಕಮಞ್ಞಾಯ (ಸ್ಯಾ. ಕ.)], ವಿಹರಾಮಿ ಅನಾಸವೋ.
‘‘ಸತಸಹಸ್ಸಿತೋ ಕಪ್ಪೇ, ಯಂ ದಾನಮದದಿಂ ತದಾ;
ದುಗ್ಗತಿಂ ನಾಭಿಜಾನಾಮಿ, ಏಕಾಸನಸ್ಸಿದಂ ಫಲಂ.
‘‘ಕಿಲೇಸಾ ಝಾಪಿತಾ ಮಯ್ಹಂ…ಪೇ… ವಿಹರಾಮಿ ಅನಾಸವೋ.
‘‘ಸ್ವಾಗತಂ ವತ ಮೇ ಆಸಿ…ಪೇ… ಕತಂ ಬುದ್ಧಸ್ಸ ಸಾಸನಂ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಏಕಾಸನದಾಯಕೋ ಥೇರೋ ಇಮಾ ಗಾಥಾಯೋ
ಅಭಾಸಿತ್ಥಾತಿ.
ಏಕಾಸನದಾಯಕತ್ಥೇರಸ್ಸಾಪದಾನಂ ತತಿಯಂ.
೪. ಸತ್ತಕದಮ್ಬಪುಪ್ಫಿಯತ್ಥೇರಅಪದಾನಂ
‘‘ಹಿಮವನ್ತಸ್ಸಾವಿದೂರೇ, ಕುಕ್ಕುಟೋ [ಕದಮ್ಬೋ (ಸೀ. ಸ್ಯಾ. ಪೀ.)] ನಾಮ ಪಬ್ಬತೋ;
ತಮ್ಹಿ ಪಬ್ಬತಪಾದಮ್ಹಿ, ಸತ್ತ ಬುದ್ಧಾ ವಸಿಂಸು ತೇ.
‘‘ಕದಮ್ಬಂ ಪುಪ್ಫಿತಂ ದಿಸ್ವಾ, ಪಗ್ಗಹೇತ್ವಾನ ಅಞ್ಜಲಿಂ;
ಸತ್ತ ಮಾಲಾ ಗಹೇತ್ವಾನ, ಪುಞ್ಞಚಿತ್ತೇನ [ಪುಣ್ಣಚಿತ್ತೇನ (ಕ.)] ಓಕಿರಿಂ.
‘‘ತೇನ ¶ ಕಮ್ಮೇನ ಸುಕತೇನ, ಚೇತನಾಪಣಿಧೀಹಿ ಚ;
ಜಹಿತ್ವಾ ಮಾನುಸಂ ದೇಹಂ, ತಾವತಿಂಸಮಗಚ್ಛಹಂ.
‘‘ಚತುನ್ನವುತಿತೋ ¶ ಕಪ್ಪೇ, ಯಂ ಕಮ್ಮಮಕರಿಂ ತದಾ;
ದುಗ್ಗತಿಂ ನಾಭಿಜಾನಾಮಿ, ಬುದ್ಧಪೂಜಾಯಿದಂ ಫಲಂ.
‘‘ಕಿಲೇಸಾ ¶ ಝಾಪಿತಾ ಮಯ್ಹಂ…ಪೇ… ವಿಹರಾಮಿ ಅನಾಸವೋ.
‘‘ಸ್ವಾಗತಂ ವತ ಮೇ ಆಸಿ…ಪೇ… ಕತಂ ಬುದ್ಧಸ್ಸ ಸಾಸನಂ.
‘‘ಪಟಿಸಮ್ಭಿದಾ ¶ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಸತ್ತಕದಮ್ಬಪುಪ್ಫಿಯೋ ಥೇರೋ ಇಮಾ
ಗಾಥಾಯೋ ಅಭಾಸಿತ್ಥಾತಿ.
ಸತ್ತಕದಮ್ಬಪುಪ್ಫಿಯತ್ಥೇರಸ್ಸಾಪದಾನಂ ಚತುತ್ಥಂ.
೫. ಕೋರಣ್ಡಪುಪ್ಫಿಯತ್ಥೇರಅಪದಾನಂ
‘‘ವನಕಮ್ಮಿಕೋ ಪುರೇ ಆಸಿಂ, ಪಿತುಮಾತುಮತೇನಹಂ [ಪಿತುಪಿತಾಮಹೇನಹಂ (ಸೀ. ಸ್ಯಾ. ಪೀ.)];
ಪಸುಮಾರೇನ ಜೀವಾಮಿ, ಕುಸಲಂ ಮೇ ನ ವಿಜ್ಜತಿ.
‘‘ಮಮ ಆಸಯಸಾಮನ್ತಾ, ತಿಸ್ಸೋ ಲೋಕಗ್ಗನಾಯಕೋ;
ಪದಾನಿ ತೀಣಿ ದಸ್ಸೇಸಿ, ಅನುಕಮ್ಪಾಯ ಚಕ್ಖುಮಾ.
‘‘ಅಕ್ಕನ್ತೇ ಚ ಪದೇ ದಿಸ್ವಾ, ತಿಸ್ಸನಾಮಸ್ಸ ಸತ್ಥುನೋ;
ಹಟ್ಠೋ ಹಟ್ಠೇನ ಚಿತ್ತೇನ, ಪದೇ ಚಿತ್ತಂ ಪಸಾದಯಿಂ.
‘‘ಕೋರಣ್ಡಂ ¶ ಪುಪ್ಫಿತಂ ದಿಸ್ವಾ, ಪಾದಪಂ ಧರಣೀರುಹಂ;
ಸಕೋಸಕಂ ಗಹೇತ್ವಾನ, ಪದಸೇಟ್ಠಮಪೂಜಯಿಂ.
‘‘ತೇನ ಕಮ್ಮೇನ ಸುಕತೇನ, ಚೇತನಾಪಣಿಧೀಹಿ ಚ;
ಜಹಿತ್ವಾ ಮಾನುಸಂ ದೇಹಂ, ತಾವತಿಂಸಮಗಚ್ಛಹಂ.
‘‘ಯಂ ಯಂ ಯೋನುಪಪಜ್ಜಾಮಿ, ದೇವತ್ತಂ ಅಥ ಮಾನುಸಂ;
ಕೋರಣ್ಡವಣ್ಣಕೋಯೇವ, ಸುಪ್ಪಭಾಸೋ ಭವಾಮಹಂ.
‘‘ದ್ವೇನವುತೇ ಇತೋ ಕಪ್ಪೇ, ಯಂ ಕಮ್ಮಮಕರಿಂ ತದಾ;
ದುಗ್ಗತಿಂ ನಾಭಿಜಾನಾಮಿ, ಪದಪೂಜಾಯಿದಂ ಫಲಂ.
‘‘ಕಿಲೇಸಾ ಝಾಪಿತಾ ಮಯ್ಹಂ…ಪೇ… ವಿಹರಾಮಿ ಅನಾಸವೋ.
‘‘ಸ್ವಾಗತಂ ವತ ಮೇ ಆಸಿ…ಪೇ… ಕತಂ ಬುದ್ಧಸ್ಸ ಸಾಸನಂ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಕೋರಣ್ಡಪುಪ್ಫಿಯೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ;
ಕೋರಣ್ಡಪುಪ್ಫಿಯತ್ಥೇರಸ್ಸಾಪದಾನಂ ಪಞ್ಚಮಂ.
೬. ಘತಮಣ್ಡದಾಯಕತ್ಥೇರಅಪದಾನಂ
‘‘ಸುಚಿನ್ತಿತಂ ¶ ¶ ಭಗವನ್ತಂ, ಲೋಕಜೇಟ್ಠಂ ನರಾಸಭಂ;
ಉಪವಿಟ್ಠಂ ಮಹಾರಞ್ಞಂ, ವಾತಾಬಾಧೇನ ಪೀಳಿತಂ.
‘‘ದಿಸ್ವಾ ¶ ಚಿತ್ತಂ ಪಸಾದೇತ್ವಾ, ಘತಮಣ್ಡಮುಪಾನಯಿಂ;
ಕತತ್ತಾ ¶ ಆಚಿತತ್ತಾ ಚ, ಗಙ್ಗಾ ಭಾಗೀರಥೀ ಅಯಂ.
‘‘ಮಹಾಸಮುದ್ದಾ ಚತ್ತಾರೋ, ಘತಂ ಸಮ್ಪಜ್ಜರೇ ಮಮ;
ಅಯಞ್ಚ ಪಥವೀ ಘೋರಾ, ಅಪ್ಪಮಾಣಾ ಅಸಙ್ಖಿಯಾ.
‘‘ಮಮ ಸಙ್ಕಪ್ಪಮಞ್ಞಾಯ, ಭವತೇ ಮಧುಸಕ್ಕರಾ;
ಚಾತುದ್ದೀಪಾ [ಚತುದ್ದಿಸಾ (ಸ್ಯಾ.)] ಇಮೇ ರುಕ್ಖಾ, ಪಾದಪಾ ಧರಣೀರುಹಾ.
‘‘ಮಮ ಸಙ್ಕಪ್ಪಮಞ್ಞಾಯ, ಕಪ್ಪರುಕ್ಖಾ ಭವನ್ತಿ ತೇ;
ಪಞ್ಞಾಸಕ್ಖತ್ತುಂ ದೇವಿನ್ದೋ, ದೇವರಜ್ಜಮಕಾರಯಿಂ.
‘‘ಏಕಪಞ್ಞಾಸಕ್ಖತ್ತುಞ್ಚ, ಚಕ್ಕವತ್ತೀ ಅಹೋಸಹಂ;
ಪದೇಸರಜ್ಜಂ ವಿಪುಲಂ, ಗಣನಾತೋ ಅಸಙ್ಖಿಯಂ.
‘‘ಚತುನ್ನವುತಿತೋ ಕಪ್ಪೇ, ಯಂ ದಾನಮದದಿಂ ತದಾ;
ದುಗ್ಗತಿಂ ನಾಭಿಜಾನಾಮಿ, ಘತಮಣ್ಡಸ್ಸಿದಂ ಫಲಂ.
‘‘ಕಿಲೇಸಾ ಝಾಪಿತಾ ಮಯ್ಹಂ…ಪೇ… ವಿಹರಾಮಿ ಅನಾಸವೋ.
‘‘ಸ್ವಾಗತಂ ವತ ಮೇ ಆಸಿ…ಪೇ… ಕತಂ ಬುದ್ಧಸ್ಸ ಸಾಸನಂ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಘತಮಣ್ಡದಾಯಕೋ ಥೇರೋ ಇಮಾ ಗಾಥಾಯೋ
ಅಭಾಸಿತ್ಥಾತಿ.
ಘತಮಣ್ಡದಾಯಕತ್ಥೇರಸ್ಸಾಪದಾನಂ ಛಟ್ಠಂ.
೭. ಏಕಧಮ್ಮಸ್ಸವನಿಯತ್ಥೇರಅಪದಾನಂ
‘‘ಪದುಮುತ್ತರೋ ¶ ನಾಮ ಜಿನೋ, ಸಬ್ಬಧಮ್ಮಾನ ಪಾರಗೂ;
ಚತುಸಚ್ಚಂ ಪಕಾಸೇನ್ತೋ, ಸನ್ತಾರೇಸಿ ಬಹುಂ ಜನಂ.
‘‘ಅಹಂ ¶ ¶ ತೇನ ಸಮಯೇನ, ಜಟಿಲೋ ಉಗ್ಗತಾಪನೋ;
ಧುನನ್ತೋ ವಾಕಚೀರಾನಿ, ಗಚ್ಛಾಮಿ ಅಮ್ಬರೇ ತದಾ.
‘‘ಬುದ್ಧಸೇಟ್ಠಸ್ಸ ಉಪರಿ, ಗನ್ತುಂ ನ ವಿಸಹಾಮಹಂ;
ಪಕ್ಖೀವ ಸೇಲಮಾಸಜ್ಜ, ಗಮನಂ ನ ಲಭಾಮಹಂ.
‘‘ಉದಕೇ ವೋಕ್ಕಮಿತ್ವಾನ, ಏವಂ ಗಚ್ಛಾಮಿ ಅಮ್ಬರೇ;
ನ ಮೇ ಇದಂ ಭೂತಪುಬ್ಬಂ, ಇರಿಯಾಪಥವಿಕೋಪನಂ.
‘‘ಹನ್ದ ಮೇತಂ ಗವೇಸಿಸ್ಸಂ, ಅಪ್ಪೇವತ್ಥಂ ಲಭೇಯ್ಯಹಂ;
ಓರೋಹನ್ತೋ ಅನ್ತಲಿಕ್ಖಾ, ಸದ್ದಮಸ್ಸೋಸಿ ಸತ್ಥುನೋ.
‘‘ಸರೇನ ರಜನೀಯೇನ, ಸವನೀಯೇನ ವಗ್ಗುನಾ;
ಅನಿಚ್ಚತಂ ಕಥೇನ್ತಸ್ಸ, ತಞ್ಞೇವ ಉಗ್ಗಹಿಂ ತದಾ;
ಅನಿಚ್ಚಸಞ್ಞಮುಗ್ಗಯ್ಹ ¶ , ಅಗಮಾಸಿಂ ಮಮಸ್ಸಮಂ.
‘‘ಯಾವತಾಯುಂ ವಸಿತ್ವಾನ, ತತ್ಥ ಕಾಲಙ್ಕತೋ ಅಹಂ;
ಚರಿಮೇ ವತ್ತಮಾನಮ್ಹಿ, ಸದ್ಧಮ್ಮಸ್ಸವನಂ ಸರಿಂ.
‘‘ತೇನ ಕಮ್ಮೇನ ಸುಕತೇನ, ಚೇತನಾಪಣಿಧೀಹಿ ಚ;
ಜಹಿತ್ವಾ ಮಾನುಸಂ ದೇಹಂ, ತಾವತಿಂಸಮಗಚ್ಛಹಂ.
‘‘ತಿಂಸಕಪ್ಪಸಹಸ್ಸಾನಿ, ದೇವಲೋಕೇ ರಮಿಂ ಅಹಂ;
ಏಕಪಞ್ಞಾಸಕ್ಖತ್ತುಞ್ಚ ¶ , ದೇವರಜ್ಜಮಕಾರಯಿಂ.
‘‘ಏಕವೀಸತಿಕ್ಖತ್ತುಞ್ಚ [ಏಕತಿಂಸತಿ… (ಸ್ಯಾ.)], ಚಕ್ಕವತ್ತೀ ಅಹೋಸಹಂ;
ಪದೇಸರಜ್ಜಂ ವಿಪುಲಂ, ಗಣನಾತೋ ಅಸಙ್ಖಿಯಂ.
‘‘ಅನುಭೋಮಿ ಸಕಂ ಪುಞ್ಞಂ, ಸುಖಿತೋಹಂ ಭವಾಭವೇ;
ಅನುಸ್ಸರಾಮಿ ತಂ ಸಞ್ಞಂ, ಸಂಸರನ್ತೋ ಭವಾಭವೇ;
ನ ಕೋಟಿಂ ಪಟಿವಿಜ್ಝಾಮಿ, ನಿಬ್ಬಾನಂ ಅಚ್ಚುತಂ ಪದಂ.
‘‘ಪಿತುಗೇಹೇ ನಿಸೀದಿತ್ವಾ, ಸಮಣೋ ಭಾವಿತಿನ್ದ್ರಿಯೋ;
ಕಥಂಸ [ಕಥಯಂ (ಸೀ. ಪೀ. ಕ.)] ಪರಿದೀಪೇನ್ತೋ, ಅನಿಚ್ಚತಮುದಾಹರಿ.
‘‘‘ಅನಿಚ್ಚಾ ವತ ಸಙ್ಖಾರಾ, ಉಪ್ಪಾದವಯಧಮ್ಮಿನೋ;
ಉಪ್ಪಜ್ಜಿತ್ವಾ ನಿರುಜ್ಝನ್ತಿ, ತೇಸಂ ವೂಪಸಮೋ ಸುಖೋ’.
‘‘ಸಹ ¶ ಗಾಥಂ ಸುಣಿತ್ವಾನ, ಪುಬ್ಬಸಞ್ಞಮನುಸ್ಸರಿಂ;
ಏಕಾಸನೇ ನಿಸೀದಿತ್ವಾ, ಅರಹತ್ತಮಪಾಪುಣಿಂ.
‘‘ಜಾತಿಯಾ ¶ ಸತ್ತವಸ್ಸೇನ, ಅರಹತ್ತಮಪಾಪುಣಿಂ;
ಉಪಸಮ್ಪಾದಯೀ ಬುದ್ಧೋ, ಧಮ್ಮಸ್ಸವನಸ್ಸಿದಂ ಫಲಂ.
‘‘ಸತಸಹಸ್ಸಿತೋ ಕಪ್ಪೇ, ಯಂ ಧಮ್ಮಮಸುಣಿಂ ತದಾ;
ದುಗ್ಗತಿಂ ನಾಭಿಜಾನಾಮಿ, ಧಮ್ಮಸ್ಸವನಸ್ಸಿದಂ ಫಲಂ.
‘‘ಕಿಲೇಸಾ ಝಾಪಿತಾ ಮಯ್ಹಂ…ಪೇ… ವಿಹರಾಮಿ ಅನಾಸವೋ.
‘‘ಸ್ವಾಗತಂ ವತ ಮೇ ಆಸಿ…ಪೇ… ಕತಂ ಬುದ್ಧಸ್ಸ ಸಾಸನಂ.
‘‘ಪಟಿಸಮ್ಭಿದಾ ¶ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಏಕಧಮ್ಮಸ್ಸವನಿಯೋ ಥೇರೋ ಇಮಾ
ಗಾಥಾಯೋ ಅಭಾಸಿತ್ಥಾತಿ.
ಏಕಧಮ್ಮಸ್ಸವನಿಯತ್ಥೇರಸ್ಸಾಪದಾನಂ ಸತ್ತಮಂ.
೮. ಸುಚಿನ್ತಿತತ್ಥೇರಅಪದಾನಂ
‘‘ನಗರೇ ಹಂಸವತಿಯಾ, ಅಹೋಸಿಂ ಕಸ್ಸಕೋ ತದಾ;
ಕಸಿಕಮ್ಮೇನ ಜೀವಾಮಿ, ತೇನ ಪೋಸೇಮಿ ದಾರಕೇ.
‘‘ಸುಸಮ್ಪನ್ನಂ ¶ ತದಾ ಖೇತ್ತಂ, ಧಞ್ಞಂ ಮೇ ಫಲಿನಂ [ಫಲಿತಂ (ಸೀ. ಪೀ.)] ಅಹು;
ಪಾಕಕಾಲೇ ಚ ಸಮ್ಪತ್ತೇ, ಏವಂ ಚಿನ್ತೇಸಹಂ ತದಾ.
‘‘ನಚ್ಛನ್ನಂ ನಪ್ಪತಿರೂಪಂ, ಜಾನನ್ತಸ್ಸ ಗುಣಾಗುಣಂ;
ಯೋಹಂ ಸಙ್ಘೇ ಅದತ್ವಾನ, ಅಗ್ಗಂ ಭುಞ್ಜೇಯ್ಯ ಚೇ ತದಾ [ಮತ್ತನಾ (ಸ್ಯಾ.)].
‘‘ಅಯಂ ಬುದ್ಧೋ ಅಸಮಸಮೋ, ದ್ವತ್ತಿಂಸವರಲಕ್ಖಣೋ;
ತತೋ ಪಭಾವಿತೋ ಸಙ್ಘೋ, ಪುಞ್ಞಕ್ಖೇತ್ತೋ ಅನುತ್ತರೋ.
‘‘ತತ್ಥ ದಸ್ಸಾಮಹಂ ದಾನಂ, ನವಸಸ್ಸಂ ಪುರೇ ಪುರೇ;
ಏವಾಹಂ ಚಿನ್ತಯಿತ್ವಾನ, ಹಟ್ಠೋ ಪೀಣಿತಮಾನಸೋ [ಪೀತಿಕ… (ಸ್ಯಾ.)].
‘‘ಖೇತ್ತತೋ ¶ ಧಞ್ಞಮಾಹತ್ವಾ, ಸಮ್ಬುದ್ಧಂ ಉಪಸಙ್ಕಮಿಂ;
ಉಪಸಙ್ಕಮ್ಮ ಸಮ್ಬುದ್ಧಂ, ಲೋಕಜೇಟ್ಠಂ ನರಾಸಭಂ;
ವನ್ದಿತ್ವಾ ಸತ್ಥುನೋ ಪಾದೇ, ಇದಂ ವಚನಮಬ್ರವಿಂ.
‘‘‘ನವಸಸ್ಸಞ್ಚ ಸಮ್ಪನ್ನಂ, ಆಯಾಗೋಸಿ [ಇಧ ಹೋಸಿ (ಸ್ಯಾ.)] ಚ ತ್ವಂ ಮುನೇ;
ಅನುಕಮ್ಪಮುಪಾದಾಯ ¶ , ಅಧಿವಾಸೇಹಿ ಚಕ್ಖುಮ’.
‘‘ಪದುಮುತ್ತರೋ ¶ ಲೋಕವಿದೂ, ಆಹುತೀನಂ ಪಟಿಗ್ಗಹೋ;
ಮಮ ಸಙ್ಕಪ್ಪಮಞ್ಞಾಯ, ಇದಂ ವಚನಮಬ್ರವಿ.
‘‘‘ಚತ್ತಾರೋ ಚ ಪಟಿಪನ್ನಾ, ಚತ್ತಾರೋ ಚ ಫಲೇ ಠಿತಾ;
ಏಸ ಸಙ್ಘೋ ಉಜುಭೂತೋ, ಪಞ್ಞಾಸೀಲಸಮಾಹಿತೋ;
ಯಜನ್ತಾನಂ ಮನುಸ್ಸಾನಂ, ಪುಞ್ಞಪೇಕ್ಖಾನ ಪಾಣಿನಂ.
‘‘‘ಕರೋತೋಪಧಿಕಂ ಪುಞ್ಞಂ, ಸಙ್ಘೇ ದಿನ್ನಂ ಮಹಪ್ಫಲಂ;
ತಸ್ಮಿಂ ಸಙ್ಘೇವ [ಸಂಘೇ ಚ (ಸ್ಯಾ. ಪೀ.)] ದಾತಬ್ಬಂ, ತವ ಸಸ್ಸಂ ತಥೇತರಂ.
‘‘‘ಸಙ್ಘತೋ ಉದ್ದಿಸಿತ್ವಾನ, ಭಿಕ್ಖೂ ನೇತ್ವಾನ ಸಂಘರಂ;
ಪಟಿಯತ್ತಂ ಘರೇ ಸನ್ತಂ, ಭಿಕ್ಖುಸಙ್ಘಸ್ಸ ದೇಹಿ ತ್ವಂ’.
‘‘ಸಙ್ಘತೋ ಉದ್ದಿಸಿತ್ವಾನ, ಭಿಕ್ಖೂ ನೇತ್ವಾನ ಸಂಘರಂ;
ಯಂ ಘರೇ ಪಟಿಯತ್ತಂ ಮೇ, ಭಿಕ್ಖುಸಙ್ಘಸ್ಸದಾಸಹಂ.
‘‘ತೇನ ಕಮ್ಮೇನ ಸುಕತೇನ, ಚೇತನಾಪಣಿಧೀಹಿ ಚ;
ಜಹಿತ್ವಾ ಮಾನುಸಂ ದೇಹಂ, ತಾವತಿಂಸಮಗಚ್ಛಹಂ.
‘‘ತತ್ಥ ಮೇ ಸುಕತಂ ಬ್ಯಮ್ಹಂ, ಸೋವಣ್ಣಂ ಸಪ್ಪಭಸ್ಸರಂ;
ಸಟ್ಠಿಯೋಜನಮುಬ್ಬೇಧಂ, ತಿಂಸಯೋಜನವಿತ್ಥತಂ.
ಏಕೂನವೀಸತಿಮಂ ಭಾಣವಾರಂ.
‘‘ಆಕಿಣ್ಣಂ ಭವನಂ ಮಯ್ಹಂ, ನಾರೀಗಣಸಮಾಕುಲಂ;
ತತ್ಥ ಭುತ್ವಾ ಪಿವಿತ್ವಾ ಚ, ವಸಾಮಿ ತಿದಸೇ ಅಹಂ.
‘‘ಸತಾನಂ ¶ ತೀಣಿಕ್ಖತ್ತುಞ್ಚ, ದೇವರಜ್ಜಮಕಾರಯಿಂ;
ಸತಾನಂ ಪಞ್ಚಕ್ಖತ್ತುಞ್ಚ, ಚಕ್ಕವತ್ತೀ ಅಹೋಸಹಂ;
ಪದೇಸರಜ್ಜಂ ವಿಪುಲಂ, ಗಣನಾತೋ ಅಸಙ್ಖಿಯಂ.
‘‘ಭವಾಭವೇ ¶ ¶ ಸಂಸರನ್ತೋ, ಲಭಾಮಿ ಅಮಿತಂ ಧನಂ;
ಭೋಗೇ ಮೇ ಊನತಾ ನತ್ಥಿ, ನವಸಸ್ಸಸ್ಸಿದಂ ಫಲಂ.
‘‘ಹತ್ಥಿಯಾನಂ ಅಸ್ಸಯಾನಂ, ಸಿವಿಕಂ ಸನ್ದಮಾನಿಕಂ;
ಲಭಾಮಿ ಸಬ್ಬಮೇವೇತಂ [ಸಬ್ಬಮೇತಮ್ಪಿ (ಕ.)], ನವಸಸ್ಸಸ್ಸಿದಂ ಫಲಂ.
‘‘ನವವತ್ಥಂ ನವಫಲಂ, ನವಗ್ಗರಸಭೋಜನಂ;
ಲಭಾಮಿ ಸಬ್ಬಮೇವೇತಂ, ನವಸಸ್ಸಸ್ಸಿದಂ ಫಲಂ.
‘‘ಕೋಸೇಯ್ಯಕಮ್ಬಲಿಯಾನಿ ¶ , ಖೋಮಕಪ್ಪಾಸಿಕಾನಿ ಚ;
ಲಭಾಮಿ ಸಬ್ಬಮೇವೇತಂ, ನವಸಸ್ಸಸ್ಸಿದಂ ಫಲಂ.
‘‘ದಾಸೀಗಣಂ ದಾಸಗಣಂ, ನಾರಿಯೋ ಚ ಅಲಙ್ಕತಾ;
ಲಭಾಮಿ ಸಬ್ಬಮೇವೇತಂ, ನವಸಸ್ಸಸ್ಸಿದಂ ಫಲಂ.
‘‘ನ ಮಂ ಸೀತಂ ವಾ ಉಣ್ಹಂ ವಾ, ಪರಿಳಾಹೋ ನ ವಿಜ್ಜತಿ;
ಅಥೋ ಚೇತಸಿಕಂ ದುಕ್ಖಂ, ಹದಯೇ ಮೇ ನ ವಿಜ್ಜತಿ.
‘‘ಇದಂ ಖಾದ ಇದಂ ಭುಞ್ಜ, ಇಮಮ್ಹಿ ಸಯನೇ ಸಯ;
ಲಭಾಮಿ ಸಬ್ಬಮೇವೇತಂ, ನವಸಸ್ಸಸ್ಸಿದಂ ಫಲಂ.
‘‘ಅಯಂ ಪಚ್ಛಿಮಕೋ ದಾನಿ, ಚರಿಮೋ ವತ್ತತೇ ಭವೋ;
ಅಜ್ಜಾಪಿ ದೇಯ್ಯಧಮ್ಮೋ ಮೇ, ಫಲಂ ತೋಸೇಸಿ ಸಬ್ಬದಾ.
‘‘ನವಸಸ್ಸಂ ¶ ದದಿತ್ವಾನ, ಸಙ್ಘೇ ಗಣವರುತ್ತಮೇ;
ಅಟ್ಠಾನಿಸಂಸೇ ಅನುಭೋಮಿ, ಕಮ್ಮಾನುಚ್ಛವಿಕೇ ಮಮ.
‘‘ವಣ್ಣವಾ ಯಸವಾ ಹೋಮಿ, ಮಹಾಭೋಗೋ ಅನೀತಿಕೋ;
ಮಹಾಪಕ್ಖೋ [ಮಹಾಭಕ್ಖೋ (ಸ್ಯಾ. ಕ.)] ಸದಾ ಹೋಮಿ, ಅಭೇಜ್ಜಪರಿಸೋ ಸದಾ.
‘‘ಸಬ್ಬೇ ಮಂ ಅಪಚಾಯನ್ತಿ, ಯೇ ಕೇಚಿ ಪಥವಿಸ್ಸಿತಾ;
ದೇಯ್ಯಧಮ್ಮಾ ಚ ಯೇ ಕೇಚಿ, ಪುರೇ ಪುರೇ ಲಭಾಮಹಂ.
‘‘ಭಿಕ್ಖುಸಙ್ಘಸ್ಸ ವಾ ಮಜ್ಝೇ, ಬುದ್ಧಸೇಟ್ಠಸ್ಸ ಸಮ್ಮುಖಾ;
ಸಬ್ಬೇಪಿ ಸಮತಿಕ್ಕಮ್ಮ, ದೇನ್ತಿ ಮಮೇವ ದಾಯಕಾ.
‘‘ಪಠಮಂ ನವಸಸ್ಸಞ್ಹಿ, ದತ್ವಾ ಸಙ್ಘೇ ಗಣುತ್ತಮೇ;
ಇಮಾನಿಸಂಸೇ ಅನುಭೋಮಿ, ನವಸಸ್ಸಸ್ಸಿದಂ ಫಲಂ.
‘‘ಸತಸಹಸ್ಸಿತೋ ¶ ಕಪ್ಪೇ, ಯಂ ದಾನಮದದಿಂ ತದಾ;
ದುಗ್ಗತಿಂ ನಾಭಿಜಾನಾಮಿ, ನವಸಸ್ಸಸ್ಸಿದಂ ಫಲಂ.
‘‘ಕಿಲೇಸಾ ಝಾಪಿತಾ ಮಯ್ಹಂ…ಪೇ… ವಿಹರಾಮಿ ಅನಾಸವೋ;
‘‘ಸ್ವಾಗತಂ ವತ ಮೇ ಆಸಿ…ಪೇ… ಕತಂ ಬುದ್ಧಸ್ಸ ಸಾಸನಂ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಸುಚಿನ್ತಿತೋ ಥೇರೋ ಇಮಾ ಗಾಥಾಯೋ
ಅಭಾಸಿತ್ಥಾತಿ.
ಸುಚಿನ್ತಿತತ್ಥೇರಸ್ಸಾಪದಾನಂ ಅಟ್ಠಮಂ.
೯. ಸೋವಣ್ಣಕಿಙ್ಕಣಿಯತ್ಥೇರಅಪದಾನಂ
‘‘ಸದ್ಧಾಯ ¶ ¶ ¶ ಅಭಿನಿಕ್ಖಮ್ಮ, ಪಬ್ಬಜಿಂ ಅನಗಾರಿಯಂ;
ವಾಕಚೀರಧರೋ ಆಸಿಂ, ತಪೋಕಮ್ಮಮಪಸ್ಸಿತೋ.
‘‘ಅತ್ಥದಸ್ಸೀ ತು ಭಗವಾ, ಲೋಕಜೇಟ್ಠೋ ನರಾಸಭೋ;
ಉಪ್ಪಜ್ಜಿ ತಮ್ಹಿ ಸಮಯೇ, ತಾರಯನ್ತೋ ಮಹಾಜನಂ.
‘‘ಬಲಞ್ಚ ವತ ಮೇ ಖೀಣಂ, ಬ್ಯಾಧಿನಾ ಪರಮೇನ ತಂ;
ಬುದ್ಧಸೇಟ್ಠಂ ಸರಿತ್ವಾನ, ಪುಲಿನೇ ಥೂಪಮುತ್ತಮಂ.
‘‘ಕರಿತ್ವಾ ಹಟ್ಠಚಿತ್ತೋಹಂ, ಸಹತ್ಥೇನ [ಪಸಾದೇನ (ಕ.)] ಸಮೋಕಿರಿಂ;
ಸೋಣ್ಣಕಿಙ್ಕಣಿಪುಪ್ಫಾನಿ, ಉದಗ್ಗಮನಸೋ ಅಹಂ.
‘‘ಸಮ್ಮುಖಾ ವಿಯ ಸಮ್ಬುದ್ಧಂ, ಥೂಪಂ ಪರಿಚರಿಂ ಅಹಂ;
ತೇನ ಚೇತೋಪಸಾದೇನ, ಅತ್ಥದಸ್ಸಿಸ್ಸ ತಾದಿನೋ.
‘‘ದೇವಲೋಕಂ ಗತೋ ಸನ್ತೋ, ಲಭಾಮಿ ವಿಪುಲಂ ಸುಖಂ;
ಸುವಣ್ಣವಣ್ಣೋ ತತ್ಥಾಸಿಂ, ಬುದ್ಧಪೂಜಾಯಿದಂ ಫಲಂ.
‘‘ಅಸೀತಿಕೋಟಿಯೋ ಮಯ್ಹಂ, ನಾರಿಯೋ ಸಮಲಙ್ಕತಾ;
ಸದಾ ಮಯ್ಹಂ ಉಪಟ್ಠನ್ತಿ, ಬುದ್ಧಪೂಜಾಯಿದಂ ಫಲಂ.
‘‘ಸಟ್ಠಿತುರಿಯಸಹಸ್ಸಾನಿ [ಸಟ್ಠಿತೂರಿಯ… (ಕ.)], ಭೇರಿಯೋ ಪಣವಾನಿ ಚ;
ಸಙ್ಖಾ ಚ ಡಿಣ್ಡಿಮಾ ತತ್ಥ, ವಗ್ಗೂ ವಜ್ಜನ್ತಿ [ನದನ್ತಿ (ಸೀ.), ವದನ್ತಿ (ಪೀ.)] ದುನ್ದುಭೀ.
‘‘ಚುಲ್ಲಾಸೀತಿಸಹಸ್ಸಾನಿ ¶ , ಹತ್ಥಿನೋ ಸಮಲಙ್ಕತಾ;
ತಿಧಾಪಭಿನ್ನಮಾತಙ್ಗಾ, ಕುಞ್ಜರಾ ಸಟ್ಠಿಹಾಯನಾ.
‘‘ಹೇಮಜಾಲಾಭಿಸಞ್ಛನ್ನಾ ¶ , ಉಪಟ್ಠಾನಂ ಕರೋನ್ತಿ ಮೇ;
ಬಲಕಾಯೇ ಗಜೇ ಚೇವ, ಊನತಾ ಮೇ ನ ವಿಜ್ಜತಿ.
‘‘ಸೋಣ್ಣಕಿಙ್ಕಣಿಪುಪ್ಫಾನಂ, ವಿಪಾಕಂ ಅನುಭೋಮಹಂ;
ಅಟ್ಠಪಞ್ಞಾಸಕ್ಖತ್ತುಞ್ಚ, ದೇವರಜ್ಜಮಕಾರಯಿಂ.
‘‘ಏಕಸತ್ತತಿಕ್ಖತ್ತುಞ್ಚ, ಚಕ್ಕವತ್ತೀ ಅಹೋಸಹಂ;
ಪಥಬ್ಯಾ ರಜ್ಜಂ ಏಕಸತಂ, ಮಹಿಯಾ ಕಾರಯಿಂ ಅಹಂ.
‘‘ಸೋ ದಾನಿ ಅಮತಂ ಪತ್ತೋ, ಅಸಙ್ಖತಂ ಸುದುದ್ದಸಂ [ಗಮ್ಭೀರಂ ದುದ್ದಸಂ ಪದಂ (ಸ್ಯಾ.)];
ಸಂಯೋಜನಪರಿಕ್ಖೀಣೋ, ನತ್ಥಿ ದಾನಿ ಪುನಬ್ಭವೋ.
‘‘ಅಟ್ಠಾರಸೇ ¶ ಕಪ್ಪಸತೇ, ಯಂ ಪುಪ್ಫಮಭಿರೋಪಯಿಂ;
ದುಗ್ಗತಿಂ ನಾಭಿಜಾನಾಮಿ, ಬುದ್ಧಪೂಜಾಯಿದಂ ಫಲಂ.
‘‘ಕಿಲೇಸಾ ¶ ಝಾಪಿತಾ ಮಯ್ಹಂ…ಪೇ… ವಿಹರಾಮಿ ಅನಾಸವೋ.
‘‘ಸ್ವಾಗತಂ ವತ ಮೇ ಆಸಿ…ಪೇ… ಕತಂ ಬುದ್ಧಸ್ಸ ಸಾಸನಂ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಸೋವಣ್ಣಕಿಙ್ಕಣಿಯೋ ಥೇರೋ ಇಮಾ
ಗಾಥಾಯೋ ಅಭಾಸಿತ್ಥಾತಿ.
ಸೋವಣ್ಣಕಿಙ್ಕಣಿಯತ್ಥೇರಸ್ಸಾಪದಾನಂ ನವಮಂ.
೧೦. ಸೋಣ್ಣಕೋನ್ತರಿಕತ್ಥೇರಅಪದಾನಂ
‘‘ಮನೋಭಾವನಿಯಂ ¶ ಬುದ್ಧಂ, ಅತ್ತದನ್ತಂ ಸಮಾಹಿತಂ;
ಇರಿಯಮಾನಂ ಬ್ರಹ್ಮಪಥೇ, ಚಿತ್ತವೂಪಸಮೇ ರತಂ.
‘‘ನಿತ್ತಿಣ್ಣಓಘಂ ಸಮ್ಬುದ್ಧಂ, ಝಾಯಿಂ ಝಾನರತಂ ಮುನಿಂ;
ಉಪತಿತ್ಥಂ ಸಮಾಪನ್ನಂ, ಇನ್ದಿವರದಲಪ್ಪಭಂ.
‘‘ಅಲಾಬುನೋದಕಂ ಗಯ್ಹ, ಬುದ್ಧಸೇಟ್ಠಂ ಉಪಾಗಮಿಂ;
ಬುದ್ಧಸ್ಸ ಪಾದೇ ಧೋವಿತ್ವಾ, ಅಲಾಬುಕಮದಾಸಹಂ.
‘‘ಆಣಾಪೇಸಿ ¶ ಚ ಸಮ್ಬುದ್ಧೋ, ಪದುಮುತ್ತರನಾಮಕೋ;
‘ಇಮಿನಾ ದಕಮಾಹತ್ವಾ, ಪಾದಮೂಲೇ ಠಪೇಹಿ ಮೇ’.
‘‘ಸಾಧೂತಿಹಂ ಪಟಿಸ್ಸುತ್ವಾ, ಸತ್ಥುಗಾರವತಾಯ ಚ;
ದಕಂ ಅಲಾಬುನಾಹತ್ವಾ, ಬುದ್ಧಸೇಟ್ಠಂ ಉಪಾಗಮಿಂ.
‘‘ಅನುಮೋದಿ ಮಹಾವೀರೋ, ಚಿತ್ತಂ ನಿಬ್ಬಾಪಯಂ ಮಮ;
‘ಇಮಿನಾಲಾಬುದಾನೇನ, ಸಙ್ಕಪ್ಪೋ ತೇ ಸಮಿಜ್ಝತು’.
‘‘ಪನ್ನರಸೇಸು ಕಪ್ಪೇಸು, ದೇವಲೋಕೇ ರಮಿಂ ಅಹಂ;
ತಿಂಸತಿಕ್ಖತ್ತುಂ ರಾಜಾ ಚ, ಚಕ್ಕವತ್ತೀ ಅಹೋಸಹಂ.
‘‘ದಿವಾ ವಾ ಯದಿ ವಾ ರತ್ತಿಂ, ಚಙ್ಕಮನ್ತಸ್ಸ ತಿಟ್ಠತೋ;
ಸೋವಣ್ಣಂ ಕೋನ್ತರಂ ಗಯ್ಹ, ತಿಟ್ಠತೇ ಪುರತೋ ಮಮ.
‘‘ಬುದ್ಧಸ್ಸ ¶ ದತ್ವಾನಲಾಬುಂ, ಲಭಾಮಿ ಸೋಣ್ಣಕೋನ್ತರಂ;
ಅಪ್ಪಕಮ್ಪಿ ಕತಂ ಕಾರಂ, ವಿಪುಲಂ ಹೋತಿ ತಾದಿಸು.
‘‘ಸತಸಹಸ್ಸಿತೋ ¶ ಕಪ್ಪೇ, ಯಂಲಾಬುಮದದಿಂ ತದಾ;
ದುಗ್ಗತಿಂ ನಾಭಿಜಾನಾಮಿ, ಅಲಾಬುಸ್ಸ ಇದಂ ಫಲಂ.
‘‘ಕಿಲೇಸಾ ಝಾಪಿತಾ ಮಯ್ಹಂ…ಪೇ… ವಿಹರಾಮಿ ಅನಾಸವೋ.
‘‘ಸ್ವಾಗತಂ ವತ ಮೇ ಆಸಿ…ಪೇ… ಕತಂ ಬುದ್ಧಸ್ಸ ಸಾಸನಂ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಸೋಣ್ಣಕೋನ್ತರಿಕೋ ಥೇರೋ ಇಮಾ
ಗಾಥಾಯೋ ಅಭಾಸಿತ್ಥಾತಿ.
ಸೋಣ್ಣಕೋನ್ತರಿಕತ್ಥೇರಸ್ಸಾಪದಾನಂ ದಸಮಂ.
ಸಕಿಂಸಮ್ಮಜ್ಜಕವಗ್ಗೋ ತೇಚತ್ತಾಲೀಸಮೋ.
ತಸ್ಸುದ್ದಾನಂ –
ಸಕಿಂಸಮ್ಮಜ್ಜಕೋ ¶ ಥೇರೋ, ಏಕದುಸ್ಸೀ ಏಕಾಸನೀ;
ಕದಮ್ಬಕೋರಣ್ಡಕದೋ, ಘತಸ್ಸವನಿಕೋಪಿ ಚ.
ಸುಚಿನ್ತಿಕೋ ಕಿಙ್ಕಣಿಕೋ, ಸೋಣ್ಣಕೋನ್ತರಿಕೋಪಿ ಚ;
ಏಕಗಾಥಾಸತಞ್ಚೇತ್ಥ, ಏಕಸತ್ತತಿಮೇವ ಚ.
೪೪. ಏಕವಿಹಾರಿವಗ್ಗೋ
೧. ಏಕವಿಹಾರಿಕತ್ಥೇರಅಪದಾನಂ
‘‘ಇಮಮ್ಹಿ ¶ ¶ ¶ ಭದ್ದಕೇ ಕಪ್ಪೇ, ಬ್ರಹ್ಮಬನ್ಧು ಮಹಾಯಸೋ;
ಕಸ್ಸಪೋ ನಾಮ ಗೋತ್ತೇನ, ಉಪ್ಪಜ್ಜಿ ವದತಂ ವರೋ.
‘‘ನಿಪ್ಪಪಞ್ಚೋ ನಿರಾಲಮ್ಬೋ, ಆಕಾಸಸಮಮಾನಸೋ;
ಸುಞ್ಞತಾಬಹುಲೋ ತಾದೀ, ಅನಿಮಿತ್ತರತೋ ವಸೀ.
‘‘ಅಸಙ್ಗಚಿತ್ತೋ ನಿಕ್ಲೇಸೋ [ನಿಲ್ಲೇಪೋ (ಸ್ಯಾ. ಕ.)], ಅಸಂಸಟ್ಠೋ ಕುಲೇ ಗಣೇ;
ಮಹಾಕಾರುಣಿಕೋ ವೀರೋ, ವಿನಯೋಪಾಯಕೋವಿದೋ.
‘‘ಉಯ್ಯುತ್ತೋ ಪರಕಿಚ್ಚೇಸು, ವಿನಯನ್ತೋ ಸದೇವಕೇ;
ನಿಬ್ಬಾನಗಮನಂ ಮಗ್ಗಂ, ಗತಿಂ ಪಙ್ಕವಿಸೋಸನಂ.
‘‘ಅಮತಂ ಪರಮಸ್ಸಾದಂ, ಜರಾಮಚ್ಚುನಿವಾರಣಂ;
ಮಹಾಪರಿಸಮಜ್ಝೇ ಸೋ, ನಿಸಿನ್ನೋ ಲೋಕತಾರಕೋ.
‘‘ಕರವೀಕರುತೋ [ಕರವೀಕರುದೋ (ಸ್ಯಾ. ಪೀ. ಕ.)] ನಾಥೋ, ಬ್ರಹ್ಮಘೋಸೋ ತಥಾಗತೋ;
ಉದ್ಧರನ್ತೋ ಮಹಾದುಗ್ಗಾ, ವಿಪ್ಪನಟ್ಠೇ ಅನಾಯಕೇ.
‘‘ದೇಸೇನ್ತೋ ವಿರಜಂ ಧಮ್ಮಂ, ದಿಟ್ಠೋ ಮೇ ಲೋಕನಾಯಕೋ;
ತಸ್ಸ ಧಮ್ಮಂ ಸುಣಿತ್ವಾನ, ಪಬ್ಬಜಿಂ ಅನಗಾರಿಯಂ.
‘‘ಪಬ್ಬಜಿತ್ವಾ ತದಾಪಾಹಂ, ಚಿನ್ತೇನ್ತೋ ಜಿನಸಾಸನಂ;
ಏಕಕೋವ ವನೇ ರಮ್ಮೇ, ವಸಿಂ ಸಂಸಗ್ಗಪೀಳಿತೋ.
‘‘ಸಕ್ಕಾಯವೂಪಕಾಸೋ ¶ ಮೇ, ಹೇತುಭೂತೋ ಮಮಾಭವೀ [ಮಮಾಗಮೀ (ಸ್ಯಾ. ಪೀ.)];
ಮನಸೋ ವೂಪಕಾಸಸ್ಸ, ಸಂಸಗ್ಗಭಯದಸ್ಸಿನೋ.
‘‘ಕಿಲೇಸಾ ¶ ಝಾಪಿತಾ ಮಯ್ಹಂ, ಭವಾ ಸಬ್ಬೇ ಸಮೂಹತಾ;
ನಾಗೋವ ಬನ್ಧನಂ ಛೇತ್ವಾ, ವಿಹರಾಮಿ ಅನಾಸವೋ.
‘‘ಸ್ವಾಗತಂ ವತ ಮೇ ಆಸಿ, ಮಮ ಬುದ್ಧಸ್ಸ ಸನ್ತಿಕೇ;
ತಿಸ್ಸೋ ವಿಜ್ಜಾ ಅನುಪ್ಪತ್ತಾ, ಕತಂ ಬುದ್ಧಸ್ಸ ಸಾಸನಂ.
‘‘ಪಟಿಸಮ್ಭಿದಾ ¶ ¶ ಚತಸ್ಸೋ, ವಿಮೋಕ್ಖಾಪಿ ಚ ಅಟ್ಠಿಮೇ;
ಛಳಭಿಞ್ಞಾ ಸಚ್ಛಿಕತಾ, ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಏಕವಿಹಾರಿಕೋ ಥೇರೋ ಇಮಾ ಗಾಥಾಯೋ
ಅಭಾಸಿತ್ಥಾತಿ.
ಏಕವಿಹಾರಿಕತ್ಥೇರಸ್ಸಾಪದಾನಂ ಪಠಮಂ.
೨. ಏಕಸಙ್ಖಿಯತ್ಥೇರಅಪದಾನಂ
‘‘ವಿಪಸ್ಸಿನೋ ಭಗವತೋ, ಮಹಾಬೋಧಿಮಹೋ ಅಹು;
ಮಹಾಜನಾ ಸಮಾಗಮ್ಮ, ಪೂಜೇನ್ತಿ ಬೋಧಿಮುತ್ತಮಂ.
‘‘ನ ಹಿ ತಂ ಓರಕಂ ಮಞ್ಞೇ, ಬುದ್ಧಸೇಟ್ಠೋ ಭವಿಸ್ಸತಿ;
ಯಸ್ಸಾಯಂ ಈದಿಸಾ ಬೋಧಿ, ಪೂಜನೀಯಾ [ಈದಿಸೋ ಬೋಧಿ, ಪೂಜನೀಯೋ (ಸ್ಯಾ.)] ಚ ಸತ್ಥುನೋ.
‘‘ತತೋ ಸಙ್ಖಂ ಗಹೇತ್ವಾನ, ಬೋಧಿರುಕ್ಖಮುಪಟ್ಠಹಿಂ;
ಧಮನ್ತೋ ಸಬ್ಬದಿವಸಂ, ಅವನ್ದಿಂ ಬೋಧಿಮುತ್ತಮಂ.
‘‘ಆಸನ್ನಕೇ ಕತಂ ಕಮ್ಮಂ, ದೇವಲೋಕಂ ಅಪಾಪಯೀ;
ಕಳೇವರಂ ಮೇ ಪತಿತಂ, ದೇವಲೋಕೇ ರಮಾಮಹಂ.
‘‘ಸಟ್ಠಿತುರಿಯಸಹಸ್ಸಾನಿ ¶ , ತುಟ್ಠಹಟ್ಠಾ ಪಮೋದಿತಾ;
ಸದಾ ಮಯ್ಹಂ ಉಪಟ್ಠನ್ತಿ, ಬುದ್ಧಪೂಜಾಯಿದಂ ಫಲಂ.
‘‘ಏಕಸತ್ತತಿಮೇ ಕಪ್ಪೇ, ರಾಜಾ ಆಸಿಂ ಸುದಸ್ಸನೋ;
ಚಾತುರನ್ತೋ ವಿಜಿತಾವೀ, ಜಮ್ಬುಮಣ್ಡಸ್ಸ ಇಸ್ಸರೋ.
‘‘ತತೋ ಅಙ್ಗಸತಾ ತುರಿಯಾ [ತೂರಾ (ಸೀ. ಕ.)], ಪರಿವಾರೇನ್ತಿ ಮಂ ಸದಾ;
ಅನುಭೋಮಿ ಸಕಂ ಕಮ್ಮಂ, ಉಪಟ್ಠಾನಸ್ಸಿದಂ ಫಲಂ.
‘‘ಯಂ ಯಂ ಯೋನುಪಪಜ್ಜಾಮಿ, ದೇವತ್ತಂ ಅಥ ಮಾನುಸಂ;
ಮಾತುಕುಚ್ಛಿಗತಸ್ಸಾಪಿ, ವಜ್ಜರೇ ಭೇರಿಯೋ ಸದಾ.
‘‘ಉಪಟ್ಠಿತ್ವಾನ ಸಮ್ಬುದ್ಧಂ, ಅನುಭುತ್ವಾನ ಸಮ್ಪದಾ;
ಸಿವಂ ಸುಖೇಮಂ ಅಮತಂ, ಪತ್ತೋಮ್ಹಿ ಅಚಲಂ ಪದಂ.
‘‘ಏಕನವುತಿತೋ ಕಪ್ಪೇ, ಯಂ ಕಮ್ಮಮಕರಿಂ ತದಾ;
ದುಗ್ಗತಿಂ ನಾಭಿಜಾನಾಮಿ, ಬುದ್ಧಪೂಜಾಯಿದಂ ಫಲಂ.
‘‘ಕಿಲೇಸಾ ¶ ಝಾಪಿತಾ ಮಯ್ಹಂ…ಪೇ… ವಿಹರಾಮಿ ಅನಾಸವೋ.
‘‘ಸ್ವಾಗತಂ ¶ ವತ ಮೇ ಆಸಿ…ಪೇ… ಕತಂ ಬುದ್ಧಸ್ಸ ಸಾಸನಂ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಏಕಸಙ್ಖಿಯೋ ಥೇರೋ ಇಮಾ ಗಾಥಾಯೋ
ಅಭಾಸಿತ್ಥಾತಿ.
ಏಕಸಙ್ಖಿಯತ್ಥೇರಸ್ಸಾಪದಾನಂ ದುತಿಯಂ.
೩. ಪಾಟಿಹೀರಸಞ್ಞಕತ್ಥೇರಅಪದಾನಂ
‘‘ಪದುಮುತ್ತರೋ ¶ ¶ ನಾಮ ಜಿನೋ, ಆಹುತೀನಂ ಪಟಿಗ್ಗಹೋ;
ವಸೀಸತಸಹಸ್ಸೇಹಿ, ನಗರಂ ಪಾವಿಸೀ ತದಾ.
‘‘ನಗರಂ ಪವಿಸನ್ತಸ್ಸ, ಉಪಸನ್ತಸ್ಸ ತಾದಿನೋ;
ರತನಾನಿ ಪಜ್ಜೋತಿಂಸು [ಪನಾದಿಂಸು (ಪೀ.)], ನಿಗ್ಘೋಸೋ ಆಸಿ ತಾವದೇ.
‘‘ಬುದ್ಧಸ್ಸ ಆನುಭಾವೇನ, ಭೇರೀ ವಜ್ಜುಮಘಟ್ಟಿತಾ;
ಸಯಂ ವೀಣಾ ಪವಜ್ಜನ್ತಿ, ಬುದ್ಧಸ್ಸ ಪವಿಸತೋ ಪುರಂ.
‘‘ಬುದ್ಧಸೇಟ್ಠಂ ನಮಸ್ಸಾಮಿ [ನ ಪಸ್ಸಾಮಿ (ಸೀ.)], ಪದುಮುತ್ತರಮಹಾಮುನಿಂ;
ಪಾಟಿಹೀರಞ್ಚ ಪಸ್ಸಿತ್ವಾ, ತತ್ಥ ಚಿತ್ತಂ ಪಸಾದಯಿಂ.
‘‘ಅಹೋ ಬುದ್ಧೋ ಅಹೋ ಧಮ್ಮೋ, ಅಹೋ ನೋ ಸತ್ಥುಸಮ್ಪದಾ;
ಅಚೇತನಾಪಿ ತುರಿಯಾ, ಸಯಮೇವ ಪವಜ್ಜರೇ.
‘‘ಸತಸಹಸ್ಸಿತೋ ಕಪ್ಪೇ, ಯಂ ಸಞ್ಞಮಲಭಿಂ ತದಾ;
ದುಗ್ಗತಿಂ ನಾಭಿಜಾನಾಮಿ, ಬುದ್ಧಸಞ್ಞಾಯಿದಂ ಫಲಂ.
‘‘ಕಿಲೇಸಾ ಝಾಪಿತಾ ಮಯ್ಹಂ…ಪೇ… ವಿಹರಾಮಿ ಅನಾಸವೋ.
‘‘ಸ್ವಾಗತಂ ವತ ಮೇ ಆಸಿ…ಪೇ… ಕತಂ ಬುದ್ಧಸ್ಸ ಸಾಸನಂ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ¶ ಸುದಂ ಆಯಸ್ಮಾ ಪಾಟಿಹೀರಸಞ್ಞಕೋ ಥೇರೋ ಇಮಾ ಗಾಥಾಯೋ
ಅಭಾಸಿತ್ಥಾತಿ.
ಪಾಟಿಹೀರಸಞ್ಞಕತ್ಥೇರಸ್ಸಾಪದಾನಂ ತತಿಯಂ.
೪. ಞಾಣತ್ಥವಿಕತ್ಥೇರಅಪದಾನಂ
‘‘ಕಣಿಕಾರಂವ ¶ ¶ ಜಲಿತಂ, ದೀಪರುಕ್ಖಂವ ಜೋತಿತಂ;
ಕಞ್ಚನಂವ ವಿರೋಚನ್ತಂ, ಅದ್ದಸಂ ದ್ವಿಪದುತ್ತಮಂ.
‘‘ಕಮಣ್ಡಲುಂ ಠಪೇತ್ವಾನ, ವಾಕಚೀರಞ್ಚ ಕುಣ್ಡಿಕಂ;
ಏಕಂಸಂ ಅಜಿನಂ ಕತ್ವಾ, ಬುದ್ಧಸೇಟ್ಠಂ ಥವಿಂ ಅಹಂ.
‘‘‘ತಮನ್ಧಕಾರಂ ವಿಧಮಂ, ಮೋಹಜಾಲಸಮಾಕುಲಂ;
ಞಾಣಾಲೋಕಂ ದಸ್ಸೇತ್ವಾನ, ನಿತ್ತಿಣ್ಣೋಸಿ ಮಹಾಮುನಿ.
‘‘‘ಸಮುದ್ಧರಸಿಮಂ ಲೋಕಂ, ಸಬ್ಬಾವನ್ತಮನುತ್ತರಂ;
ಞಾಣೇ ತೇ ಉಪಮಾ ನತ್ಥಿ, ಯಾವತಾಜಗತೋಗತಿ [ಯಾವತಾ ಚ ಗತೋಗತಿ (ಪೀ. ಕ.)].
‘‘‘ತೇನ ಞಾಣೇನ ಸಬ್ಬಞ್ಞೂ, ಇತಿ ಬುದ್ಧೋ ಪವುಚ್ಚತಿ;
ವನ್ದಾಮಿ ತಂ ಮಹಾವೀರಂ, ಸಬ್ಬಞ್ಞುತಮನಾವರಂ’.
‘‘ಸತಸಹಸ್ಸಿತೋ ¶ ಕಪ್ಪೇ, ಬುದ್ಧಸೇಟ್ಠಂ ಥವಿಂ ಅಹಂ;
ದುಗ್ಗತಿಂ ನಾಭಿಜಾನಾಮಿ, ಞಾಣತ್ಥವಾಯಿದಂ ಫಲಂ;
‘‘ಕಿಲೇಸಾ ಝಾಪಿತಾ ಮಯ್ಹಂ…ಪೇ… ವಿಹರಾಮಿ ಅನಾಸವೋ;
‘‘ಸ್ವಾಗತಂ ವತ ಮೇ ಆಸಿ…ಪೇ… ಕತಂ ಬುದ್ಧಸ್ಸ ಸಾಸನಂ.
‘‘ಪಟಿಸಮ್ಭಿದಾ ¶ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಞಾಣತ್ಥವಿಕೋ ಥೇರೋ ಇಮಾ ಗಾಥಾಯೋ
ಅಭಾಸಿತ್ಥಾತಿ.
ಞಾಣತ್ಥವಿಕತ್ಥೇರಸ್ಸಾಪದಾನಂ ಚತುತ್ಥಂ.
೫. ಉಚ್ಛುಖಣ್ಡಿಕತ್ಥೇರಅಪದಾನಂ
‘‘ನಗರೇ ಬನ್ಧುಮತಿಯಾ, ದ್ವಾರಪಾಲೋ ಅಹೋಸಹಂ;
ಅದ್ದಸಂ ವಿರಜಂ ಬುದ್ಧಂ, ಸಬ್ಬಧಮ್ಮಾನ ಪಾರಗುಂ.
‘‘ಉಚ್ಛುಖಣ್ಡಿಕಮಾದಾಯ, ಬುದ್ಧಸೇಟ್ಠಸ್ಸದಾಸಹಂ;
ಪಸನ್ನಚಿತ್ತೋ ಸುಮನೋ, ವಿಪಸ್ಸಿಸ್ಸ ಮಹೇಸಿನೋ.
‘‘ಏಕನವುತಿತೋ ¶ ¶ ಕಪ್ಪೇ, ಯಂ ಉಚ್ಛುಮದದಿಂ ತದಾ;
ದುಗ್ಗತಿಂ ನಾಭಿಜಾನಾಮಿ, ಉಚ್ಛುಖಣ್ಡಸ್ಸಿದಂ ಫಲಂ.
‘‘ಕಿಲೇಸಾ ಝಾಪಿತಾ ಮಯ್ಹಂ…ಪೇ… ವಿಹರಾಮಿ ಅನಾಸವೋ.
‘‘ಸ್ವಾಗತಂ ವತ ಮೇ ಆಸಿ…ಪೇ… ಕತಂ ಬುದ್ಧಸ್ಸ ಸಾಸನಂ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಉಚ್ಛುಖಣ್ಡಿಕೋ ಥೇರೋ ಇಮಾ ಗಾಥಾಯೋ
ಅಭಾಸಿತ್ಥಾತಿ.
ಉಚ್ಛುಖಣ್ಡಿಕತ್ಥೇರಸ್ಸಾಪದಾನಂ ಪಞ್ಚಮಂ.
೬. ಕಳಮ್ಬದಾಯಕತ್ಥೇರಅಪದಾನಂ
‘‘ರೋಮಸೋ ¶ ನಾಮ ಸಮ್ಬುದ್ಧೋ, ವಸತೇ ಪಬ್ಬತನ್ತರೇ;
ಕಳಮ್ಬಂ ತಸ್ಸ ಪಾದಾಸಿಂ, ಪಸನ್ನೋ ಸೇಹಿ ಪಾಣಿಭಿ.
‘‘ಚತುನ್ನವುತಿತೋ ಕಪ್ಪೇ, ಯಂ ದಾನಮದದಿಂ ತದಾ;
ದುಗ್ಗತಿಂ ನಾಭಿಜಾನಾಮಿ, ಕಳಮ್ಬಸ್ಸ ಇದಂ ಫಲಂ.
‘‘ಕಿಲೇಸಾ ಝಾಪಿತಾ ಮಯ್ಹಂ…ಪೇ… ವಿಹರಾಮಿ ಅನಾಸವೋ.
‘‘ಸ್ವಾಗತಂ ವತ ಮೇ ಆಸಿ…ಪೇ… ಕತಂ ಬುದ್ಧಸ್ಸ ಸಾಸನಂ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಕಳಮ್ಬದಾಯಕೋ ಥೇರೋ ಇಮಾ ಗಾಥಾಯೋ
ಅಭಾಸಿತ್ಥಾತಿ.
ಕಳಮ್ಬದಾಯಕತ್ಥೇರಸ್ಸಾಪದಾನಂ ಛಟ್ಠಂ.
೭. ಅಮ್ಬಾಟಕದಾಯಕತ್ಥೇರಅಪದಾನಂ
‘‘ವಿಪಿನೇ ¶ ಬುದ್ಧಂ ದಿಸ್ವಾನ, ಸಯಮ್ಭುಂ ಅಪರಾಜಿತಂ;
ಅಮ್ಬಾಟಕಂ ಗಹೇತ್ವಾನ, ಸಯಮ್ಭುಸ್ಸ ಅದಾಸಹಂ.
‘‘ಏಕತಿಂಸೇ ¶ ಇತೋ ಕಪ್ಪೇ, ಯಂ ಫಲಮದದಿಂ ತದಾ;
ದುಗ್ಗತಿಂ ನಾಭಿಜಾನಾಮಿ, ಫಲದಾನಸ್ಸಿದಂ ಫಲಂ.
‘‘ಕಿಲೇಸಾ ¶ ¶ ಝಾಪಿತಾ ಮಯ್ಹಂ…ಪೇ… ವಿಹರಾಮಿ ಅನಾಸವೋ.
‘‘ಸ್ವಾಗತಂ ವತ ಮೇ ಆಸಿ…ಪೇ… ಕತಂ ಬುದ್ಧಸ್ಸ ಸಾಸನಂ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಅಮ್ಬಾಟಕದಾಯಕೋ ಥೇರೋ ಇಮಾ ಗಾಥಾಯೋ
ಅಭಾಸಿತ್ಥಾತಿ.
ಅಮ್ಬಾಟಕದಾಯಕತ್ಥೇರಸ್ಸಾಪದಾನಂ ಸತ್ತಮಂ.
೮. ಹರೀತಕದಾಯಕತ್ಥೇರಅಪದಾನಂ
‘‘ಹರೀತಕಂ ಆಮಲಕಂ, ಅಮ್ಬಜಮ್ಬುವಿಭೀತಕಂ;
ಕೋಲಂ ಭಲ್ಲಾತಕಂ ಬಿಲ್ಲಂ, ಸಯಮೇವ ಹರಾಮಹಂ.
‘‘ದಿಸ್ವಾನ ಪಬ್ಭಾರಗತಂ, ಝಾಯಿಂ ಝಾನರತಂ ಮುನಿಂ;
ಆಬಾಧೇನ ಆಪೀಳೇನ್ತಂ, ಅದುತೀಯಂ ಮಹಾಮುನಿಂ.
‘‘ಹರೀತಕಂ ಗಹೇತ್ವಾನ, ಸಯಮ್ಭುಸ್ಸ ಅದಾಸಹಂ;
ಖಾದಮತ್ತಮ್ಹಿ ಭೇಸಜ್ಜೇ, ಬ್ಯಾಧಿ ಪಸ್ಸಮ್ಭಿ [ಪಸ್ಸದ್ಧಿ (ಕ.)] ತಾವದೇ.
‘‘ಪಹೀನದರಥೋ ಬುದ್ಧೋ, ಅನುಮೋದಮಕಾಸಿ ಮೇ;
‘ಭೇಸಜ್ಜದಾನೇನಿಮಿನಾ, ಬ್ಯಾಧಿವೂಪಸಮೇನ ಚ.
‘‘‘ದೇವಭೂತೋ ಮನುಸ್ಸೋ ವಾ, ಜಾತೋ ವಾ ಅಞ್ಞಜಾತಿಯಾ;
ಸಬ್ಬತ್ಥ ಸುಖಿತೋ ಹೋತು, ಮಾ ಚ ತೇ ಬ್ಯಾಧಿಮಾಗಮಾ’.
‘‘ಇದಂ ¶ ವತ್ವಾನ ಸಮ್ಬುದ್ಧೋ, ಸಯಮ್ಭೂ ಅಪರಾಜಿತೋ;
ನಭಂ ಅಬ್ಭುಗ್ಗಮೀ ಧೀರೋ, ಹಂಸರಾಜಾವ ಅಮ್ಬರೇ.
‘‘ಯತೋ ಹರೀತಕಂ ದಿನ್ನಂ, ಸಯಮ್ಭುಸ್ಸ ಮಹೇಸಿನೋ;
ಇಮಂ ಜಾತಿಂ ಉಪಾದಾಯ, ಬ್ಯಾಧಿ ಮೇ ನುಪಪಜ್ಜಥ.
‘‘ಅಯಂ ಪಚ್ಛಿಮಕೋ ಮಯ್ಹಂ, ಚರಿಮೋ ವತ್ತತೇ ಭವೋ;
ತಿಸ್ಸೋ ವಿಜ್ಜಾ ಸಚ್ಛಿಕತಾ, ಕತಂ ಬುದ್ಧಸ್ಸ ಸಾಸನಂ.
‘‘ಚತುನ್ನವುತಿತೋ ಕಪ್ಪೇ, ಭೇಸಜ್ಜಮದದಿಂ ತದಾ;
ದುಗ್ಗತಿಂ ನಾಭಿಜಾನಾಮಿ, ಭೇಸಜ್ಜಸ್ಸ ಇದಂ ಫಲಂ.
‘‘ಕಿಲೇಸಾ ¶ ¶ ¶ ಝಾಪಿತಾ ಮಯ್ಹಂ…ಪೇ… ವಿಹರಾಮಿ ಅನಾಸವೋ.
‘‘ಸ್ವಾಗತಂ ವತ ಮೇ ಆಸಿ…ಪೇ… ಕತಂ ಬುದ್ಧಸ್ಸ ಸಾಸನಂ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಹರೀತಕದಾಯಕೋ ಥೇರೋ ಇಮಾ ಗಾಥಾಯೋ
ಅಭಾಸಿತ್ಥಾತಿ.
ಹರೀತಕದಾಯಕತ್ಥೇರಸ್ಸಾಪದಾನಂ ಅಟ್ಠಮಂ.
೯. ಅಮ್ಬಪಿಣ್ಡಿಯತ್ಥೇರಅಪದಾನಂ
‘‘ಹತ್ಥಿರಾಜಾ ತದಾ ಆಸಿಂ, ಈಸಾದನ್ತೋ ಉರುಳ್ಹವಾ;
ವಿಚರನ್ತೋ ಬ್ರಹಾರಞ್ಞೇ, ಅದ್ದಸಂ ಲೋಕನಾಯಕಂ.
‘‘ಅಮ್ಬಪಿಣ್ಡಂ ¶ ಗಹೇತ್ವಾನ, ಅದಾಸಿಂ ಸತ್ಥುನೋ ಅಹಂ;
ಪಟಿಗ್ಗಣ್ಹಿ ಮಹಾವೀರೋ, ಸಿದ್ಧತ್ಥೋ ಲೋಕನಾಯಕೋ.
‘‘ಮಮ ನಿಜ್ಝಾಯಮಾನಸ್ಸ, ಪರಿಭುಞ್ಜಿ ತದಾ ಜಿನೋ;
ತತ್ಥ ಚಿತ್ತಂ ಪಸಾದೇತ್ವಾ, ತುಸಿತಂ ಉಪಪಜ್ಜಹಂ.
‘‘ತತೋ ಅಹಂ ಚವಿತ್ವಾನ, ಚಕ್ಕವತ್ತೀ ಅಹೋಸಹಂ;
ಏತೇನೇವ ಉಪಾಯೇನ, ಅನುಭುತ್ವಾನ ಸಮ್ಪದಾ.
‘‘ಪಧಾನಪಹಿತತ್ತೋಹಂ, ಉಪಸನ್ತೋ ನಿರೂಪಧಿ;
ಸಬ್ಬಾಸವೇ ಪರಿಞ್ಞಾಯ, ವಿಹರಾಮಿ ಅನಾಸವೋ.
‘‘ಚತುನ್ನವುತಿತೋ ಕಪ್ಪೇ, ಯಂ ಫಲಮದದಿಂ ತದಾ;
ದುಗ್ಗತಿಂ ನಾಭಿಜಾನಾಮಿ, ಫಲದಾನಸ್ಸಿದಂ ಫಲಂ.
‘‘ಕಿಲೇಸಾ ಝಾಪಿತಾ ಮಯ್ಹಂ…ಪೇ… ವಿಹರಾಮಿ ಅನಾಸವೋ.
‘‘ಸ್ವಾಗತಂ ವತ ಮೇ ಆಸಿ…ಪೇ… ಕತಂ ಬುದ್ಧಸ್ಸ ಸಾಸನಂ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಅಮ್ಬಪಿಣ್ಡಿಯೋ ಥೇರೋ ಇಮಾ ಗಾಥಾಯೋ
ಅಭಾಸಿತ್ಥಾತಿ.
ಅಮ್ಬಪಿಣ್ಡಿಯತ್ಥೇರಸ್ಸಾಪದಾನಂ ನವಮಂ.
೧೦. ಅಮ್ಬಫಲಿಯತ್ಥೇರಅಪದಾನಂ
‘‘ಪದುಮುತ್ತರಬುದ್ಧಸ್ಸ ¶ ¶ ¶ , ಲೋಕಜೇಟ್ಠಸ್ಸ ತಾದಿನೋ;
ಪಿಣ್ಡಾಯ ವಿಚರನ್ತಸ್ಸ, ಧಾರತೋ ಉತ್ತಮಂ ಯಸಂ.
‘‘ಅಗ್ಗಫಲಂ ಗಹೇತ್ವಾನ, ವಿಪ್ಪಸನ್ನೇನ ಚೇತಸಾ;
ದಕ್ಖಿಣೇಯ್ಯಸ್ಸ ವೀರಸ್ಸ, ಅದಾಸಿಂ ಸತ್ಥುನೋ ಅಹಂ.
‘‘ತೇನ ಕಮ್ಮೇನ ದ್ವಿಪದಿನ್ದ [ದಿಪದಿನ್ದ (ಸೀ. ಸ್ಯಾ. ಪೀ.)], ಲೋಕಜೇಟ್ಠ ನರಾಸಭ;
ಪತ್ತೋಮ್ಹಿ ಅಚಲಂ ಠಾನಂ, ಹಿತ್ವಾ ಜಯಪರಾಜಯಂ.
‘‘ಸತಸಹಸ್ಸಿತೋ ¶ ಕಪ್ಪೇ, ಯಂ ದಾನಮದದಿಂ ತದಾ;
ದುಗ್ಗತಿಂ ನಾಭಿಜಾನಾಮಿ, ಅಗ್ಗದಾನಸ್ಸಿದಂ ಫಲಂ.
‘‘ಕಿಲೇಸಾ ಝಾಪಿತಾ ಮಯ್ಹಂ…ಪೇ… ವಿಹರಾಮಿ ಅನಾಸವೋ.
‘‘ಸ್ವಾಗತಂ ವತ ಮೇ ಆಸಿ…ಪೇ… ಕತಂ ಬುದ್ಧಸ್ಸ ಸಾಸನಂ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಅಮ್ಬಫಲಿಯೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ;
ಅಮ್ಬಫಲಿಯತ್ಥೇರಸ್ಸಾಪದಾನಂ ದಸಮಂ.
ಏಕವಿಹಾರಿವಗ್ಗೋ ಚತುಚತ್ತಾಲೀಸಮೋ.
ತಸ್ಸುದ್ದಾನಂ –
ಥೇರೋ ¶ ಏಕವಿಹಾರೀ ಚ, ಸಙ್ಖಿಯೋ ಪಾಟಿಹೀರಕೋ;
ಥವಿಕೋ ಉಚ್ಛುಖಣ್ಡೀ ಚ, ಕಳಮ್ಬಅಮ್ಬಾಟಕದೋ.
ಹರೀತಕಮ್ಬಪಿಣ್ಡೀ ಚ, ಅಮ್ಬದೋ ದಸಮೋ ಯತಿ;
ಛಳಸೀತಿ ಚ ಗಾಥಾಯೋ, ಗಣಿತಾಯೋ ವಿಭಾವಿಭಿ.
೪೫. ವಿಭೀತಕವಗ್ಗೋ
೧. ವಿಭೀತಕಮಿಞ್ಜಿಯತ್ಥೇರಅಪದಾನಂ
‘‘ಕಕುಸನ್ಧೋ ¶ ¶ ¶ ಮಹಾವೀರೋ, ಸಬ್ಬಧಮ್ಮಾನ ಪಾರಗೂ;
ಗಣಮ್ಹಾ ವೂಪಕಟ್ಠೋ ಸೋ, ಅಗಮಾಸಿ ವನನ್ತರಂ.
‘‘ಬೀಜಮಿಞ್ಜಂ ಗಹೇತ್ವಾನ, ಲತಾಯ ಆವುಣಿಂ ಅಹಂ;
ಭಗವಾ ತಮ್ಹಿ ಸಮಯೇ, ಝಾಯತೇ ಪಬ್ಬತನ್ತರೇ.
‘‘ದಿಸ್ವಾನಹಂ ದೇವದೇವಂ, ವಿಪ್ಪಸನ್ನೇನ ಚೇತಸಾ;
ದಕ್ಖಿಣೇಯ್ಯಸ್ಸ ವೀರಸ್ಸ, ಬೀಜಮಿಞ್ಜಮದಾಸಹಂ.
‘‘ಇಮಸ್ಮಿಂಯೇವ ಕಪ್ಪಮ್ಹಿ, ಯಂ ಮಿಞ್ಜಮದದಿಂ [ಫಲಮದದಿಂ (ಸೀ. ಪೀ.), ಬೀಜಮದದಿಂ (ಸ್ಯಾ.)] ತದಾ;
ದುಗ್ಗತಿಂ ನಾಭಿಜಾನಾಮಿ, ಬೀಜಮಿಞ್ಜಸ್ಸಿದಂ ಫಲಂ.
‘‘ಕಿಲೇಸಾ ಝಾಪಿತಾ ಮಯ್ಹಂ, ಭವಾ ಸಬ್ಬೇ ಸಮೂಹತಾ;
ನಾಗೋವ ಬನ್ಧನಂ ಛೇತ್ವಾ, ವಿಹರಾಮಿ ಅನಾಸವೋ.
‘‘ಸ್ವಾಗತಂ ವತ ಮೇ ಆಸಿ, ಮಮ ಬುದ್ಧಸ್ಸ ಸನ್ತಿಕೇ;
ತಿಸ್ಸೋ ವಿಜ್ಜಾ ಅನುಪ್ಪತ್ತಾ, ಕತಂ ಬುದ್ಧಸ್ಸ ಸಾಸನಂ.
‘‘ಪಟಿಸಮ್ಭಿದಾ ಚತಸ್ಸೋ, ವಿಮೋಕ್ಖಾಪಿ ಚ ಅಟ್ಠಿಮೇ;
ಛಳಭಿಞ್ಞಾ ಸಚ್ಛಿಕತಾ, ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ವಿಭೀತಕಮಿಞ್ಜಿಯೋ [ವಿಭೇದಕ… (ಸ್ಯಾ. ಕ.)] ಥೇರೋ ಇಮಾ
ಗಾಥಾಯೋ ಅಭಾಸಿತ್ಥಾತಿ.
ವಿಭೀತಕಮಿಞ್ಜಿಯತ್ಥೇರಸ್ಸಾಪದಾನಂ ಪಠಮಂ.
೨. ಕೋಲದಾಯಕತ್ಥೇರಅಪದಾನಂ
‘‘ಅಜಿನೇನ ¶ ¶ ¶ ನಿವತ್ಥೋಹಂ, ವಾಕಚೀರಧರೋ ತದಾ;
ಖಾರಿಯಾ ಪೂರಯಿತ್ವಾನ, ಕೋಲಂಹಾಸಿಂ ಮಮಸ್ಸಮಂ [ಖಾರಿಭಾರಂ ಹರಿತ್ವಾನ, ಕೋಲಮಾಹರಿಮಸ್ಸಮಂ (ಸೀ. ಪೀ.)].
‘‘ತಮ್ಹಿ ¶ ಕಾಲೇ ಸಿಖೀ ಬುದ್ಧೋ, ಏಕೋ ಅದುತಿಯೋ ಅಹು;
ಮಮಸ್ಸಮಂ ಉಪಾಗಚ್ಛಿ, ಜಾನನ್ತೋ ಸಬ್ಬಕಾಲಿಕಂ.
‘‘ಸಕಂ ಚಿತ್ತಂ ಪಸಾದೇತ್ವಾ, ವನ್ದಿತ್ವಾನ ಚ ಸುಬ್ಬತಂ;
ಉಭೋ ಹತ್ಥೇಹಿ ಪಗ್ಗಯ್ಹ, ಕೋಲಂ ಬುದ್ಧಸ್ಸದಾಸಹಂ.
‘‘ಏಕತಿಂಸೇ ಇತೋ ಕಪ್ಪೇ, ಯಂ ಫಲಮದದಿಂ ತದಾ;
ದುಗ್ಗತಿಂ ನಾಭಿಜಾನಾಮಿ, ಕೋಲದಾನಸ್ಸಿದಂ ಫಲಂ.
‘‘ಕಿಲೇಸಾ ಝಾಪಿತಾ ಮಯ್ಹಂ…ಪೇ… ವಿಹರಾಮಿ ಅನಾಸವೋ.
‘‘ಸ್ವಾಗತಂ ವತ ಮೇ ಆಸಿ…ಪೇ… ಕತಂ ಬುದ್ಧಸ್ಸ ಸಾಸನಂ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಕೋಲದಾಯಕೋ ಥೇರೋ ಇಮಾ ಗಾಥಾಯೋ
ಅಭಾಸಿತ್ಥಾತಿ.
ಕೋಲದಾಯಕತ್ಥೇರಸ್ಸಾಪದಾನಂ ದುತಿಯಂ.
೩. ಬಿಲ್ಲಿಯತ್ಥೇರಅಪದಾನಂ
‘‘ಚನ್ದಭಾಗಾನದೀತೀರೇ ¶ , ಅಸ್ಸಮೋ ಸುಕತೋ ಮಮ;
ಬಿಲ್ಲರುಕ್ಖೇಹಿ [ಬೇಲುವರುಕ್ಖೇಹಿ (ಸ್ಯಾ.)] ಆಕಿಣ್ಣೋ, ನಾನಾದುಮನಿಸೇವಿತೋ.
‘‘ಸುಗನ್ಧಂ ಬೇಲುವಂ ದಿಸ್ವಾ, ಬುದ್ಧಸೇಟ್ಠಮನುಸ್ಸರಿಂ;
ಖಾರಿಭಾರಂ ಪೂರಯಿತ್ವಾ, ತುಟ್ಠೋ ಸಂವಿಗ್ಗಮಾನಸೋ.
‘‘ಕಕುಸನ್ಧಂ ಉಪಾಗಮ್ಮ, ಬಿಲ್ಲಪಕ್ಕಮದಾಸಹಂ;
ಪುಞ್ಞಕ್ಖೇತ್ತಸ್ಸ ವೀರಸ್ಸ, ವಿಪ್ಪಸನ್ನೇನ ಚೇತಸಾ.
‘‘ಇಮಸ್ಮಿಂಯೇವ ಕಪ್ಪಸ್ಮಿಂ, ಯಂ ಫಲಮದದಿಂ ತದಾ;
ದುಗ್ಗತಿಂ ನಾಭಿಜಾನಾಮಿ, ಫಲದಾನಸ್ಸಿದಂ ಫಲಂ.
‘‘ಕಿಲೇಸಾ ¶ ಝಾಪಿತಾ ಮಯ್ಹಂ…ಪೇ… ವಿಹರಾಮಿ ಅನಾಸವೋ.
‘‘ಸ್ವಾಗತಂ ವತ ಮೇ ಆಸಿ…ಪೇ… ಕತಂ ಬುದ್ಧಸ್ಸ ಸಾಸನಂ.
‘‘ಪಟಿಸಮ್ಭಿದಾ ¶ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಬಿಲ್ಲಿಯೋ ಥೇರೋ ಇಮಾ ಗಾಥಾಯೋ
ಅಭಾಸಿತ್ಥಾತಿ.
ಬಿಲ್ಲಿಯತ್ಥೇರಸ್ಸಾಪದಾನಂ ತತಿಯಂ.
೪. ಭಲ್ಲಾತದಾಯಕತ್ಥೇರಅಪದಾನಂ
‘‘ಸುವಣ್ಣವಣ್ಣಂ ¶ ¶ ಸಮ್ಬುದ್ಧಂ, ದ್ವತ್ತಿಂಸವರಲಕ್ಖಣಂ;
ವಿಪಿನಗ್ಗೇನ [ಪವನಗ್ಗೇನ (ಸೀ. ಸ್ಯಾ. ಪೀ.)] ಗಚ್ಛನ್ತಂ, ಸಾಲರಾಜಂವ ಫುಲ್ಲಿತಂ.
‘‘ತಿಣತ್ಥರಂ ಪಞ್ಞಾಪೇತ್ವಾ, ಬುದ್ಧಸೇಟ್ಠಂ ಅಯಾಚಹಂ;
‘ಅನುಕಮ್ಪತು ಮಂ ಬುದ್ಧೋ, ಭಿಕ್ಖಂ ಇಚ್ಛಾಮಿ ದಾತವೇ’.
‘‘ಅನುಕಮ್ಪಕೋ ಕಾರುಣಿಕೋ, ಅತ್ಥದಸ್ಸೀ ಮಹಾಯಸೋ;
ಮಮ ಸಙ್ಕಪ್ಪಮಞ್ಞಾಯ, ಓರೂಹಿ ಮಮ ಅಸ್ಸಮೇ.
‘‘ಓರೋಹಿತ್ವಾನ ಸಮ್ಬುದ್ಧೋ, ನಿಸೀದಿ ಪಣ್ಣಸನ್ಥರೇ;
ಭಲ್ಲಾತಕಂ ಗಹೇತ್ವಾನ, ಬುದ್ಧಸೇಟ್ಠಸ್ಸದಾಸಹಂ.
‘‘ಮಮ ನಿಜ್ಝಾಯಮಾನಸ್ಸ, ಪರಿಭುಞ್ಜಿ ತದಾ ಜಿನೋ;
ತತ್ಥ ಚಿತ್ತಂ ಪಸಾದೇತ್ವಾ, ಅಭಿವನ್ದಿಂ ತದಾ ಜಿನಂ.
‘‘ಅಟ್ಠಾರಸೇ ಕಪ್ಪಸತೇ, ಯಂ ಫಲಮದದಿಂ ತದಾ;
ದುಗ್ಗತಿಂ ನಾಭಿಜಾನಾಮಿ, ಫಲದಾನಸ್ಸಿದಂ ಫಲಂ.
‘‘ಕಿಲೇಸಾ ಝಾಪಿತಾ ಮಯ್ಹಂ…ಪೇ… ವಿಹರಾಮಿ ಅನಾಸವೋ.
‘‘ಸ್ವಾಗತಂ ವತ ಮೇ ಆಸಿ…ಪೇ… ಕತಂ ಬುದ್ಧಸ್ಸ ಸಾಸನಂ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ¶ ಸುದಂ ಆಯಸ್ಮಾ ಭಲ್ಲಾತದಾಯಕೋ ಥೇರೋ ಇಮಾ ಗಾಥಾಯೋ
ಅಭಾಸಿತ್ಥಾತಿ.
ಭಲ್ಲಾತದಾಯಕತ್ಥೇರಸ್ಸಾಪದಾನಂ ಚತುತ್ಥಂ.
೫. ಉತ್ತಲಿಪುಪ್ಫಿಯತ್ಥೇರಅಪದಾನಂ
‘‘ನಿಗ್ರೋಧೇ ¶ ¶ ಹರಿತೋಭಾಸೇ, ಸಂವಿರುಳ್ಹಮ್ಹಿ ಪಾದಪೇ;
ಉತ್ತಲಿಮಾಲಂ [ಉಮ್ಮಾ ಮಾಲಂ ಹಿ (ಸ್ಯಾ.)] ಪಗ್ಗಯ್ಹ, ಬೋಧಿಯಾ ಅಭಿರೋಪಯಿಂ.
‘‘ಇಮಸ್ಮಿಂಯೇವ ಕಪ್ಪಮ್ಹಿ, ಯಂ ಬೋಧಿಮಭಿಪೂಜಯಿಂ;
ದುಗ್ಗತಿಂ ನಾಭಿಜಾನಾಮಿ, ಬೋಧಿಪೂಜಾಯಿದಂ ಫಲಂ.
‘‘ಕಿಲೇಸಾ ಝಾಪಿತಾ ಮಯ್ಹಂ…ಪೇ… ವಿಹರಾಮಿ ಅನಾಸವೋ.
‘‘ಸ್ವಾಗತಂ ವತ ಮೇ ಆಸಿ…ಪೇ… ಕತಂ ಬುದ್ಧಸ್ಸ ಸಾಸನಂ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಉತ್ತಲಿಪುಪ್ಫಿಯೋ ಥೇರೋ ಇಮಾ ಗಾಥಾಯೋ
ಅಭಾಸಿತ್ಥಾತಿ.
ಉತ್ತಲಿಪುಪ್ಫಿಯತ್ಥೇರಸ್ಸಾಪದಾನಂ ಪಞ್ಚಮಂ.
೬. ಅಮ್ಬಾಟಕಿಯತ್ಥೇರಅಪದಾನಂ
‘‘ಸುಪುಪ್ಫಿತಂ ¶ ಸಾಲವನಂ, ಓಗಯ್ಹ ವೇಸ್ಸಭೂ ಮುನಿ;
ನಿಸೀದಿ ಗಿರಿದುಗ್ಗೇಸು, ಅಭಿಜಾತೋವ ಕೇಸರೀ.
‘‘ಪಸನ್ನಚಿತ್ತೋ ¶ ಸುಮನೋ, ಅಮ್ಬಾಟಕಮಪೂಜಯಿಂ;
ಪುಞ್ಞಕ್ಖೇತ್ತಂ ಅನುತ್ತರಂ [ಮಹಾವೀರಂ (ಸೀ. ಸ್ಯಾ.)], ಪಸನ್ನೋ ಸೇಹಿ ಪಾಣಿಭಿ.
‘‘ಏಕತಿಂಸೇ ಇತೋ ಕಪ್ಪೇ, ಯಂ ಪುಪ್ಫಮಭಿರೋಪಯಿಂ;
ದುಗ್ಗತಿ ನಾಭಿಜಾನಾಮಿ, ಬುದ್ಧಪೂಜಾಯಿದಂ ಫಲಂ.
‘‘ಕಿಲೇಸಾ ಝಾಪಿತಾ ಮಯ್ಹಂ…ಪೇ… ವಿಹರಾಮಿ ಅನಾಸವೋ.
‘‘ಸ್ವಾಗತಂ ವತ ಮೇ ಆಸಿ…ಪೇ… ಕತಂ ಬುದ್ಧಸ್ಸ ಸಾಸನಂ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಅಮ್ಬಾಟಕಿಯೋ ಥೇರೋ ಇಮಾ ಗಾಥಾಯೋ
ಅಭಾಸಿತ್ಥಾತಿ.
ಅಮ್ಬಾಟಕಿಯತ್ಥೇರಸ್ಸಾಪದಾನಂ ಛಟ್ಠಂ.
೭. ಸೀಹಾಸನಿಕತ್ಥೇರಅಪದಾನಂ
‘‘ಪದುಮುತ್ತರಸ್ಸ ¶ ¶ ಭಗವತೋ, ಸಬ್ಬಭೂತಹಿತೇಸಿನೋ;
ಪಸನ್ನಚಿತ್ತೋ ಸುಮನೋ, ಸೀಹಾಸನಮದಾಸಹಂ.
‘‘ದೇವಲೋಕೇ ಮನುಸ್ಸೇ ವಾ, ಯತ್ಥ ಯತ್ಥ ವಸಾಮಹಂ;
ಲಭಾಮಿ ವಿಪುಲಂ ಬ್ಯಮ್ಹಂ, ಸೀಹಾಸನಸ್ಸಿದಂ ಫಲಂ.
‘‘ಸೋಣ್ಣಮಯಾ ರೂಪಿಮಯಾ, ಲೋಹಿತಙ್ಗಮಯಾ [ಲೋಹಿತಙ್ಕಮಯಾ (ಸೀ. ಸ್ಯಾ. ಪೀ.)] ಬಹೂ;
ಮಣಿಮಯಾ ಚ ಪಲ್ಲಙ್ಕಾ, ನಿಬ್ಬತ್ತನ್ತಿ ಮಮಂ ಸದಾ.
‘‘ಬೋಧಿಯಾ ¶ ಆಸನಂ ಕತ್ವಾ, ಜಲಜುತ್ತಮನಾಮಿನೋ;
ಉಚ್ಚೇ ಕುಲೇ ಪಜಾಯಾಮಿ, ಅಹೋ ಧಮ್ಮಸುಧಮ್ಮತಾ.
‘‘ಸತಸಹಸ್ಸಿತೋ ಕಪ್ಪೇ, ಸೀಹಾಸನಮಕಾಸಹಂ;
ದುಗ್ಗತಿಂ ನಾಭಿಜಾನಾಮಿ, ಸೀಹಾಸನಸ್ಸಿದಂ ಫಲಂ.
‘‘ಕಿಲೇಸಾ ಝಾಪಿತಾ ಮಯ್ಹಂ…ಪೇ… ವಿಹರಾಮಿ ಅನಾಸವೋ.
‘‘ಸ್ವಾಗತಂ ವತ ಮೇ ಆಸಿ…ಪೇ… ಕತಂ ಬುದ್ಧಸ್ಸ ಸಾಸನಂ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಸೀಹಾಸನಿಕೋ ಥೇರೋ ಇಮಾ ಗಾಥಾಯೋ
ಅಭಾಸಿತ್ಥಾತಿ.
ಸೀಹಾಸನಿಕತ್ಥೇರಸ್ಸಾಪದಾನಂ ಸತ್ತಮಂ.
೮. ಪಾದಪೀಠಿಯತ್ಥೇರಅಪದಾನಂ
‘‘ಸುಮೇಧೋ ¶ ನಾಮ ಸಮ್ಬುದ್ಧೋ, ಅಗ್ಗೋ ಕಾರುಣಿಕೋ ಮುನಿ;
ತಾರಯಿತ್ವಾ ಬಹೂ ಸತ್ತೇ, ನಿಬ್ಬುತೋ ಸೋ ಮಹಾಯಸೋ.
‘‘ಸೀಹಾಸನಸ್ಸ ಸಾಮನ್ತಾ, ಸುಮೇಧಸ್ಸ ಮಹೇಸಿನೋ;
ಪಸನ್ನಚಿತ್ತೋ ಸುಮನೋ, ಪಾದಪೀಠಮಕಾರಯಿಂ.
‘‘ಕತ್ವಾನ ಕುಸಲಂ ಕಮ್ಮಂ, ಸುಖಪಾಕಂ ಸುಖುದ್ರಯಂ;
ಪುಞ್ಞಕಮ್ಮೇನ ಸಂಯುತ್ತೋ, ತಾವತಿಂಸಮಗಚ್ಛಹಂ.
‘‘ತತ್ಥ ¶ ¶ ¶ ಮೇ ವಸಮಾನಸ್ಸ, ಪುಞ್ಞಕಮ್ಮಸಮಙ್ಗಿನೋ;
ಪದಾನಿ ಉದ್ಧರನ್ತಸ್ಸ, ಸೋಣ್ಣಪೀಠಾ ಭವನ್ತಿ ಮೇ.
‘‘ಲಾಭಾ ತೇಸಂ ಸುಲದ್ಧಂ ವೋ, ಯೇ ಲಭನ್ತಿ ಉಪಸ್ಸುತಿಂ;
ನಿಬ್ಬುತೇ ಕಾರಂ ಕತ್ವಾನ, ಲಭನ್ತಿ ವಿಪುಲಂ ಸುಖಂ.
‘‘ಮಯಾಪಿ ಸುಕತಂ ಕಮ್ಮಂ, ವಾಣಿಜ್ಜಂ ಸುಪ್ಪಯೋಜಿತಂ;
ಪಾದಪೀಠಂ ಕರಿತ್ವಾನ, ಸೋಣ್ಣಪೀಠಂ ಲಭಾಮಹಂ.
‘‘ಯಂ ಯಂ ದಿಸಂ ಪಕ್ಕಮಾಮಿ, ಕೇನಚಿ ಕಿಚ್ಚಯೇನಹಂ [ಪಚ್ಚಯೇನಹಂ (ಸೀ. ಪೀ.)];
ಸೋಣ್ಣಪೀಠೇ ಅಕ್ಕಮಾಮಿ [ಸೋಣ್ಣಪೀಠೇನ ಕಮಾಮಿ (ಕ.)], ಪುಞ್ಞಕಮ್ಮಸ್ಸಿದಂ ಫಲಂ.
‘‘ತಿಂಸಕಪ್ಪಸಹಸ್ಸಮ್ಹಿ, ಯಂ ಕಮ್ಮಮಕರಿಂ ತದಾ;
ದುಗ್ಗತಿಂ ನಾಭಿಜಾನಾಮಿ, ಪಾದಪೀಠಸ್ಸಿದಂ ಫಲಂ.
‘‘ಕಿಲೇಸಾ ಝಾಪಿತಾ ಮಯ್ಹಂ…ಪೇ… ವಿಹರಾಮಿ ಅನಾಸವೋ.
‘‘ಸ್ವಾಗತಂ ವತ ಮೇ ಆಸಿ…ಪೇ… ಕತಂ ಬುದ್ಧಸ್ಸ ಸಾಸನಂ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಪಾದಪೀಠಿಯೋ ಥೇರೋ ಇಮಾ ಗಾಥಾಯೋ
ಅಭಾಸಿತ್ಥಾತಿ.
ಪಾದಪೀಠಿಯತ್ಥೇರಸ್ಸಾಪದಾನಂ ಅಟ್ಠಮಂ.
೯. ವೇದಿಕಾರಕತ್ಥೇರಅಪದಾನಂ
‘‘ಪದುಮುತ್ತರಸ್ಸ ¶ ಭಗವತೋ, ಬೋಧಿಯಾ ಪಾದಪುತ್ತಮೇ;
ವೇದಿಕಂ ಸುಕತಂ ಕತ್ವಾ, ಸಕಂ ಚಿತ್ತಂ ಪಸಾದಯಿಂ.
‘‘ಅತೋಳಾರಾನಿ [ಅಥೋಳಾರಾನಿ (ಸೀ. ಪೀ.), ಅಗ್ಗೋಳಾರಾನಿ (ಸ್ಯಾ.)] ಭಣ್ಡಾನಿ, ಕತಾನಿ ಅಕತಾನಿ ಚ;
ಅನ್ತಲಿಕ್ಖಾ ಪವಸ್ಸನ್ತಿ, ವೇದಿಕಾಯ ಇದಂ ಫಲಂ.
‘‘ಉಭತೋ ಬ್ಯೂಳ್ಹಸಙ್ಗಾಮೇ, ಪಕ್ಖನ್ದನ್ತೋ ಭಯಾನಕೇ;
ಭಯಭೇರವಂ ನ ಪಸ್ಸಾಮಿ, ವೇದಿಕಾಯ ಇದಂ ಫಲಂ.
‘‘ಮಮ ¶ ¶ ಸಙ್ಕಪ್ಪಮಞ್ಞಾಯ, ಬ್ಯಮ್ಹಂ ನಿಬ್ಬತ್ತತೇ ಸುಭಂ;
ಸಯನಾನಿ ಮಹಗ್ಘಾನಿ, ವೇದಿಕಾಯ ಇದಂ ಫಲಂ.
‘‘ಸತಸಹಸ್ಸಿತೋ ¶ ಕಪ್ಪೇ, ಯಂ ವೇದಿಕಮಕಾರಯಿಂ;
ದುಗ್ಗತಿಂ ನಾಭಿಜಾನಾಮಿ, ವೇದಿಕಾಯ ಇದಂ ಫಲಂ.
‘‘ಕಿಲೇಸಾ ಝಾಪಿತಾ ಮಯ್ಹಂ…ಪೇ… ವಿಹರಾಮಿ ಅನಾಸವೋ.
‘‘ಸ್ವಾಗತಂ ವತ ಮೇ ಆಸಿ…ಪೇ… ಕತಂ ಬುದ್ಧಸ್ಸ ಸಾಸನಂ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ವೇದಿಕಾರಕೋ ಥೇರೋ ಇಮಾ ಗಾಥಾಯೋ
ಅಭಾಸಿತ್ಥಾತಿ.
ವೇದಿಕಾರಕತ್ಥೇರಸ್ಸಾಪದಾನಂ ನವಮಂ.
೧೦. ಬೋಧಿಘರದಾಯಕತ್ಥೇರಅಪದಾನಂ
‘‘ಸಿದ್ಧತ್ಥಸ್ಸ ¶ ಭಗವತೋ, ದ್ವಿಪದಿನ್ದಸ್ಸ ತಾದಿನೋ;
ಪಸನ್ನಚಿತ್ತೋ ಸುಮನೋ, ಬೋಧಿಘರಮಕಾರಯಿಂ.
‘‘ತುಸಿತಂ ಉಪಪನ್ನೋಮ್ಹಿ, ವಸಾಮಿ ರತನೇ ಘರೇ;
ನ ಮೇ ಸೀತಂ ವಾ ಉಣ್ಹಂ ವಾ, ವಾತೋ ಗತ್ತೇ ನ ಸಮ್ಫುಸೇ.
‘‘ಪಞ್ಚಸಟ್ಠಿಮ್ಹಿತೋ ಕಪ್ಪೇ, ಚಕ್ಕವತ್ತೀ ಅಹೋಸಹಂ;
ಕಾಸಿಕಂ ನಾಮ ನಗರಂ, ವಿಸ್ಸಕಮ್ಮೇನ [ವಿಸುಕಮ್ಮೇನ (ಸ್ಯಾ. ಕ.)] ಮಾಪಿತಂ.
‘‘ದಸಯೋಜನಆಯಾಮಂ, ಅಟ್ಠಯೋಜನವಿತ್ಥತಂ;
ನ ತಮ್ಹಿ ನಗರೇ ಅತ್ಥಿ, ಕಟ್ಠಂ ವಲ್ಲೀ ಚ ಮತ್ತಿಕಾ.
‘‘ತಿರಿಯಂ ಯೋಜನಂ ಆಸಿ, ಅದ್ಧಯೋಜನವಿತ್ಥತಂ;
ಮಙ್ಗಲೋ ನಾಮ ಪಾಸಾದೋ, ವಿಸ್ಸಕಮ್ಮೇನ ಮಾಪಿತೋ.
‘‘ಚುಲ್ಲಾಸೀತಿಸಹಸ್ಸಾನಿ, ಥಮ್ಭಾ ಸೋಣ್ಣಮಯಾ ಅಹುಂ;
ಮಣಿಮಯಾ ಚ ನಿಯ್ಯೂಹಾ, ಛದನಂ ರೂಪಿಯಂ ಅಹು.
‘‘ಸಬ್ಬಸೋಣ್ಣಮಯಂ ¶ ಘರಂ, ವಿಸ್ಸಕಮ್ಮೇನ ಮಾಪಿತಂ;
ಅಜ್ಝಾವುತ್ಥಂ ಮಯಾ ಏತಂ, ಘರದಾನಸ್ಸಿದಂ ಫಲಂ.
‘‘ತೇ ಸಬ್ಬೇ ಅನುಭೋತ್ವಾನ, ದೇವಮಾನುಸಕೇ ಭವೇ;
ಅಜ್ಝಪತ್ತೋಮ್ಹಿ ನಿಬ್ಬಾನಂ, ಸನ್ತಿಪದಮನುತ್ತರಂ.
‘‘ತಿಂಸಕಪ್ಪಸಹಸ್ಸಮ್ಹಿ, ಬೋಧಿಘರಮಕಾರಯಿಂ;
ದುಗ್ಗತಿಂ ¶ ನಾಭಿಜಾನಾಮಿ, ಘರದಾನಸ್ಸಿದಂ ಫಲಂ.
‘‘ಕಿಲೇಸಾ ¶ ಝಾಪಿತಾ ಮಯ್ಹಂ…ಪೇ… ವಿಹರಾಮಿ ಅನಾಸವೋ.
‘‘ಸ್ವಾಗತಂ ವತ ಮೇ ಆಸಿ…ಪೇ… ಕತಂ ಬುದ್ಧಸ್ಸ ಸಾಸನಂ.
‘‘ಪಟಿಸಮ್ಭಿದಾ ¶ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಬೋಧಿಘರದಾಯಕೋ ಥೇರೋ ಇಮಾ ಗಾಥಾಯೋ
ಅಭಾಸಿತ್ಥಾತಿ.
ಬೋಧಿಘರದಾಯಕತ್ಥೇರಸ್ಸಾಪದಾನಂ ದಸಮಂ.
ವಿಭೀತಕವಗ್ಗೋ ಪಞ್ಚಚತ್ತಾಲೀಸಮೋ.
ತಸ್ಸುದ್ದಾನಂ –
ವಿಭೀತಕೀ ಕೋಲಫಲೀ, ಬಿಲ್ಲಭಲ್ಲಾತಕಪ್ಪದೋ;
ಉತ್ತಲಮ್ಬಟಕೀ ಚೇವ, ಆಸನೀ ಪಾದಪೀಠಕೋ.
ವೇದಿಕೋ ಬೋಧಿಘರಿಕೋ, ಗಾಥಾಯೋ ಗಣಿತಾಪಿ ಚ;
ಏಕೂನಾಸೀತಿಕಾ ಸಬ್ಬಾ, ಅಸ್ಮಿಂ ವಗ್ಗೇ ಪಕಿತ್ತಿತಾ.
೪೬. ಜಗತಿದಾಯಕವಗ್ಗೋ
೧. ಜಗತಿದಾಯಕತ್ಥೇರಅಪದಾನಂ
‘‘ಧಮ್ಮದಸ್ಸಿಸ್ಸ ¶ ¶ ¶ ಮುನಿನೋ, ಬೋಧಿಯಾ ಪಾದಪುತ್ತಮೇ;
ಪಸನ್ನಚಿತ್ತೋ ಸುಮನೋ, ಜಗತಿಂ ಕಾರಯಿಂ ಅಹಂ.
‘‘ದರಿತೋ ಪಬ್ಬತತೋ ವಾ, ರುಕ್ಖತೋ ಪತಿತೋ ಅಹಂ;
ಚುತೋ ಪತಿಟ್ಠಂ ವಿನ್ದಾಮಿ, ಜಗತಿಯಾ ಇದಂ ಫಲಂ.
‘‘ನ ಮೇ ಚೋರಾ ವಿಹೇಸನ್ತಿ, ನಾತಿಮಞ್ಞನ್ತಿ ಖತ್ತಿಯಾ [ಪಸಹನ್ತಿ, ನಾತಿಮಞ್ಞತಿ ಖತ್ತಿಯೋ (ಸೀ. ಪೀ.)];
ಸಬ್ಬಾಮಿತ್ತೇತಿಕ್ಕಮಾಮಿ, ಜಗತಿಯಾ ಇದಂ ಫಲಂ.
‘‘ಯಂ ಯಂ ಯೋನುಪಪಜ್ಜಾಮಿ, ದೇವತ್ತಂ ಅಥ ಮಾನುಸಂ;
ಸಬ್ಬತ್ಥ ಪೂಜಿತೋ ಹೋಮಿ, ಜಗತಿಯಾ ಇದಂ ಫಲಂ.
‘‘ಅಟ್ಠಾರಸೇ ಕಪ್ಪಸತೇ, ಜಗತಿಂ ಕಾರಯಿಂ ಅಹಂ;
ದುಗ್ಗತಿಂ ನಾಭಿಜಾನಾಮಿ, ಜಗತಿದಾನಸ್ಸಿದಂ ಫಲಂ.
‘‘ಕಿಲೇಸಾ ಝಾಪಿತಾ ಮಯ್ಹಂ, ಭವಾ ಸಬ್ಬೇ ಸಮೂಹತಾ;
ನಾಗೋವ ಬನ್ಧನಂ ಛೇತ್ವಾ, ವಿಹರಾಮಿ ಅನಾಸವೋ.
‘‘ಸ್ವಾಗತಂ ವತ ಮೇ ಆಸಿ, ಮಮ ಬುದ್ಧಸ್ಸ ಸನ್ತಿಕೇ;
ತಿಸ್ಸೋ ವಿಜ್ಜಾ ಅನುಪ್ಪತ್ತಾ, ಕತಂ ಬುದ್ಧಸ್ಸ ಸಾಸನಂ.
‘‘ಪಟಿಸಮ್ಭಿದಾ ಚತಸ್ಸೋ, ವಿಮೋಕ್ಖಾಪಿ ಚ ಅಟ್ಠಿಮೇ;
ಛಳಭಿಞ್ಞಾ ಸಚ್ಛಿಕತಾ, ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ¶ ಸುದಂ ಆಯಸ್ಮಾ ಜಗತಿದಾಯಕೋ ಥೇರೋ ಇಮಾ ಗಾಥಾಯೋ
ಅಭಾಸಿತ್ಥಾತಿ.
ಜಗತಿದಾಯಕತ್ಥೇರಸ್ಸಾಪದಾನಂ ಪಠಮಂ.
೨. ಮೋರಹತ್ಥಿಯತ್ಥೇರಅಪದಾನಂ
‘‘ಮೋರಹತ್ಥಂ ¶ ¶ ಗಹೇತ್ವಾನ, ಉಪೇಸಿಂ ಲೋಕನಾಯಕಂ;
ಪಸನ್ನಚಿತ್ತೋ ಸುಮನೋ, ಮೋರಹತ್ಥಮದಾಸಹಂ.
‘‘ಇಮಿನಾ ¶ ಮೋರಹತ್ಥೇನ, ಚೇತನಾಪಣಿಧೀಹಿ ಚ;
ನಿಬ್ಬಾಯಿಂಸು ತಯೋ ಅಗ್ಗೀ, ಲಭಾಮಿ ವಿಪುಲಂ ಸುಖಂ.
‘‘ಅಹೋ ಬುದ್ಧೋ ಅಹೋ ಧಮ್ಮೋ, ಅಹೋ ನೋ ಸತ್ಥುಸಮ್ಪದಾ;
ದತ್ವಾನಹಂ ಮೋರಹತ್ಥಂ, ಲಭಾಮಿ ವಿಪುಲಂ ಸುಖಂ.
‘‘ತಿಯಗ್ಗೀ [ತಿಧಗ್ಗೀ (ಸ್ಯಾ. ಕ.), ತಿವಗ್ಗೀ (ಪೀ.)] ನಿಬ್ಬುತಾ ಮಯ್ಹಂ, ಭವಾ ಸಬ್ಬೇ ಸಮೂಹತಾ;
ಸಬ್ಬಾಸವಾ ಪರಿಕ್ಖೀಣಾ, ನತ್ಥಿ ದಾನಿ ಪುನಬ್ಭವೋ.
‘‘ಏಕತಿಂಸೇ ಇತೋ ಕಪ್ಪೇ, ಯಂ ದಾನಮದದಿಂ ತದಾ;
ದುಗ್ಗತಿಂ ನಾಭಿಜಾನಾಮಿ, ಮೋರಹತ್ಥಸ್ಸಿದಂ ಫಲಂ.
‘‘ಕಿಲೇಸಾ ಝಾಪಿತಾ ಮಯ್ಹಂ…ಪೇ… ವಿಹರಾಮಿ ಅನಾಸವೋ.
‘‘ಸ್ವಾಗತಂ ವತ ಮೇ ಆಸಿ…ಪೇ… ಕತಂ ಬುದ್ಧಸ್ಸ ಸಾಸನಂ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ¶ ಸುದಂ ಆಯಸ್ಮಾ ಮೋರಹತ್ಥಿಯೋ ಥೇರೋ ಇಮಾ ಗಾಥಾಯೋ
ಅಭಾಸಿತ್ಥಾತಿ.
ಮೋರಹತ್ಥಿಯತ್ಥೇರಸ್ಸಾಪದಾನಂ ದುತಿಯಂ.
೩. ಸೀಹಾಸನಬೀಜಿಯತ್ಥೇರಅಪದಾನಂ
‘‘ತಿಸ್ಸಸ್ಸಾಹಂ ಭಗವತೋ, ಬೋಧಿರುಕ್ಖಮವನ್ದಿಯಂ;
ಪಗ್ಗಯ್ಹ ಬೀಜನಿಂ ತತ್ಥ, ಸೀಹಾಸನಮಬೀಜಹಂ [ಮಬೀಜಯಿಂ (ಸೀ.), ಮವಿಜ್ಜಹಂ (ಸ್ಯಾ.)].
‘‘ದ್ವೇನವುತೇ ಇತೋ ಕಪ್ಪೇ, ಸೀಹಾಸನಮಬೀಜಹಂ;
ದುಗ್ಗತಿಂ ನಾಭಿಜಾನಾಮಿ, ಬೀಜನಾಯ ಇದಂ ಫಲಂ.
‘‘ಕಿಲೇಸಾ ¶ ಝಾಪಿತಾ ಮಯ್ಹಂ…ಪೇ… ವಿಹರಾಮಿ ಅನಾಸವೋ.
‘‘ಸ್ವಾಗತಂ ವತ ಮೇ ಆಸಿ…ಪೇ… ಕತಂ ಬುದ್ಧಸ್ಸ ಸಾಸನಂ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಸೀಹಾಸನಬೀಜಿಯೋ ಥೇರೋ ಇಮಾ
ಗಾಥಾಯೋ ಅಭಾಸಿತ್ಥಾತಿ.
ಸೀಹಾಸನಬೀಜಿಯತ್ಥೇರಸ್ಸಾಪದಾನಂ ತತಿಯಂ.
೪. ತಿಣುಕ್ಕಧಾರಿಯತ್ಥೇರಅಪದಾನಂ
‘‘ಪದುಮುತ್ತರಬುದ್ಧಸ್ಸ ¶ ¶ , ಬೋಧಿಯಾ ಪಾದಪುತ್ತಮೇ;
ಪಸನ್ನಚಿತ್ತೋ ಸುಮನೋ, ತಯೋ ಉಕ್ಕೇ ಅಧಾರಯಿಂ.
‘‘ಸತಸಹಸ್ಸಿತೋ ¶ ಕಪ್ಪೇ, ಸೋಹಂ ಉಕ್ಕಮಧಾರಯಿಂ;
ದುಗ್ಗತಿಂ ನಾಭಿಜಾನಾಮಿ, ಉಕ್ಕದಾನಸ್ಸಿದಂ ಫಲಂ.
‘‘ಕಿಲೇಸಾ ಝಾಪಿತಾ ಮಯ್ಹಂ…ಪೇ… ವಿಹರಾಮಿ ಅನಾಸವೋ.
‘‘ಸ್ವಾಗತಂ ವತ ಮೇ ಆಸಿ…ಪೇ… ಕತಂ ಬುದ್ಧಸ್ಸ ಸಾಸನಂ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ತಿಣುಕ್ಕಧಾರಿಯೋ ಥೇರೋ ಇಮಾ ಗಾಥಾಯೋ
ಅಭಾಸಿತ್ಥಾತಿ.
ತಿಣುಕ್ಕಧಾರಿಯತ್ಥೇರಸ್ಸಾಪದಾನಂ ಚತುತ್ಥಂ.
೫. ಅಕ್ಕಮನದಾಯಕತ್ಥೇರಅಪದಾನಂ
‘‘ಕಕುಸನ್ಧಸ್ಸ ಮುನಿನೋ, ಬ್ರಾಹ್ಮಣಸ್ಸ ವುಸೀಮತೋ;
ದಿವಾವಿಹಾರಂ ವಜತೋ, ಅಕ್ಕಮನಮದಾಸಹಂ.
‘‘ಇಮಸ್ಮಿಂಯೇವ ಕಪ್ಪಮ್ಹಿ, ಯಂ ದಾನಮದದಿಂ ತದಾ;
ದುಗ್ಗತಿಂ ನಾಭಿಜಾನಾಮಿ, ಅಕ್ಕಮನಸ್ಸಿದಂ ಫಲಂ.
‘‘ಕಿಲೇಸಾ ¶ ಝಾಪಿತಾ ಮಯ್ಹಂ…ಪೇ… ವಿಹರಾಮಿ ಅನಾಸವೋ.
‘‘ಸ್ವಾಗತಂ ವತ ಮೇ ಆಸಿ…ಪೇ… ಕತಂ ಬುದ್ಧಸ್ಸ ಸಾಸನಂ.
‘‘ಪಟಿಸಮ್ಭಿದಾ ¶ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಅಕ್ಕಮನದಾಯಕೋ ಥೇರೋ ಇಮಾ ಗಾಥಾಯೋ
ಅಭಾಸಿತ್ಥಾತಿ.
ಅಕ್ಕಮನದಾಯಕತ್ಥೇರಸ್ಸಾಪದಾನಂ ಪಞ್ಚಮಂ.
೬. ವನಕೋರಣ್ಡಿಯತ್ಥೇರಅಪದಾನಂ
‘‘ಸಿದ್ಧತ್ಥಸ್ಸ ಭಗವತೋ, ಲೋಕಜೇಟ್ಠಸ್ಸ ತಾದಿನೋ;
ವನಕೋರಣ್ಡಮಾದಾಯ, ಬುದ್ಧಸ್ಸ ಅಭಿರೋಪಯಿಂ.
‘‘ಚತುನ್ನವುತಿತೋ ¶ ಕಪ್ಪೇ, ಯಂ ಪುಪ್ಫಮಭಿರೋಪಯಿಂ;
ದುಗ್ಗತಿಂ ನಾಭಿಜಾನಾಮಿ, ಬುದ್ಧಪೂಜಾಯಿದಂ ಫಲಂ.
‘‘ಕಿಲೇಸಾ ಝಾಪಿತಾ ಮಯ್ಹಂ…ಪೇ… ವಿಹರಾಮಿ ಅನಾಸವೋ.
‘‘ಸ್ವಾಗತಂ ವತ ಮೇ ಆಸಿ…ಪೇ… ಕತಂ ಬುದ್ಧಸ್ಸ ಸಾಸನಂ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ವನಕೋರಣ್ಡಿಯೋ ಥೇರೋ ಇಮಾ ಗಾಥಾಯೋ
ಅಭಾಸಿತ್ಥಾತಿ.
ವನಕೋರಣ್ಡಿಯತ್ಥೇರಸ್ಸಾಪದಾನಂ ಛಟ್ಠಂ.
ವೀಸತಿಮಂ ಭಾಣವಾರಂ.
೭. ಏಕಛತ್ತಿಯತ್ಥೇರಅಪದಾನಂ
‘‘ಅಙ್ಗಾರಜಾತಾ ¶ ¶ ಪಥವೀ, ಕುಕ್ಕುಳಾನುಗತಾ ಮಹೀ;
ಪದುಮುತ್ತರೋ ಭಗವಾ, ಅಬ್ಭೋಕಾಸಮ್ಹಿ ಚಙ್ಕಮಿ.
‘‘ಪಣ್ಡರಂ ಛತ್ತಮಾದಾಯ, ಅದ್ಧಾನಂ ಪಟಿಪಜ್ಜಹಂ;
ತತ್ಥ ದಿಸ್ವಾನ ಸಮ್ಬುದ್ಧಂ, ವಿತ್ತಿ ಮೇ ಉಪಪಜ್ಜಥ.
‘‘ಮರೀಚಿಯೋತ್ಥಟಾ ¶ [ಮರಿಚಿಮೋಫುನಾ (ಸ್ಯಾ.), ಮರೀಚಿವೋಫುಟಾ (ಪೀ.)] ಭೂಮಿ, ಅಙ್ಗಾರಾವ ಮಹೀ ಅಯಂ;
ಉಪಹನ್ತಿ [ಉಪವಾಯನ್ತಿ (ಸೀ. ಪೀ.)] ಮಹಾವಾತಾ, ಸರೀರಸ್ಸಾಸುಖೇಪನಾ [ಸರೀರಕಾಯುಖೇಪನಾ (ಸ್ಯಾ.)].
‘‘ಸೀತಂ ಉಣ್ಹಂ ವಿಹನನ್ತಂ [ವಿಹನತಿ (ಸ್ಯಾ. ಕ.)], ವಾತಾತಪನಿವಾರಣಂ;
ಪಟಿಗ್ಗಣ್ಹ ಇಮಂ ಛತ್ತಂ, ಫಸ್ಸಯಿಸ್ಸಾಮಿ [ಪಸ್ಸಯಿಸ್ಸಾಮಿ (ಕ.)] ನಿಬ್ಬುತಿಂ.
‘‘ಅನುಕಮ್ಪಕೋ ಕಾರುಣಿಕೋ, ಪದುಮುತ್ತರೋ ಮಹಾಯಸೋ;
ಮಮ ಸಙ್ಕಪ್ಪಮಞ್ಞಾಯ, ಪಟಿಗ್ಗಣ್ಹಿ ತದಾ ಜಿನೋ.
‘‘ತಿಂಸಕಪ್ಪಾನಿ ದೇವಿನ್ದೋ, ದೇವರಜ್ಜಮಕಾರಯಿಂ;
ಸತಾನಂ ಪಞ್ಚಕ್ಖತ್ತುಞ್ಚ, ಚಕ್ಕವತ್ತೀ ಅಹೋಸಹಂ.
‘‘ಪದೇಸರಜ್ಜಂ ವಿಪುಲಂ, ಗಣನಾತೋ ಅಸಙ್ಖಿಯಂ;
ಅನುಭೋಮಿ ಸಕಂ ಕಮ್ಮಂ, ಪುಬ್ಬೇ ಸುಕತಮತ್ತನೋ.
‘‘ಅಯಂ ¶ ಮೇ ಪಚ್ಛಿಮಾ ಜಾತಿ, ಚರಿಮೋ ವತ್ತತೇ ಭವೋ;
ಅಜ್ಜಾಪಿ ಸೇತಚ್ಛತ್ತಂ ಮೇ, ಸಬ್ಬಕಾಲಂ ಧರೀಯತಿ.
‘‘ಸತಸಹಸ್ಸಿತೋ ಕಪ್ಪೇ, ಯಂ ಛತ್ತಮದದಿಂ ತದಾ;
ದುಗ್ಗತಿಂ ನಾಭಿಜಾನಾಮಿ, ಛತ್ತದಾನಸ್ಸಿದಂ ಫಲಂ.
‘‘ಕಿಲೇಸಾ ¶ ಝಾಪಿತಾ ಮಯ್ಹಂ…ಪೇ… ವಿಹರಾಮಿ ಅನಾಸವೋ.
‘‘ಸ್ವಾಗತಂ ವತ ಮೇ ಆಸಿ…ಪೇ… ಕತಂ ಬುದ್ಧಸ್ಸ ಸಾಸನಂ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಏಕಛತ್ತಿಯೋ ಥೇರೋ ಇಮಾ ಗಾಥಾಯೋ
ಅಭಾಸಿತ್ಥಾತಿ.
ಏಕಛತ್ತಿಯತ್ಥೇರಸ್ಸಾಪದಾನಂ ಸತ್ತಮಂ.
೮. ಜಾತಿಪುಪ್ಫಿಯತ್ಥೇರಅಪದಾನಂ
‘‘ಪರಿನಿಬ್ಬುತೇ ಭಗವತಿ, ಪದುಮುತ್ತರೇ ಮಹಾಯಸೇ;
ಪುಪ್ಫವಟಂಸಕೇ ಕತ್ವಾ [ಪುಪ್ಫಚಙ್ಕೋಟಕೇ ಗಹೇತ್ವಾ (ಸ್ಯಾ.)], ಸರೀರಮಭಿರೋಪಯಿಂ.
‘‘ತತ್ಥ ಚಿತ್ತಂ ಪಸಾದೇತ್ವಾ, ನಿಮ್ಮಾನಂ ಅಗಮಾಸಹಂ;
ದೇವಲೋಕಗತೋ ಸನ್ತೋ, ಪುಞ್ಞಕಮ್ಮಂ ಸರಾಮಹಂ.
‘‘ಅಮ್ಬರಾ ¶ ¶ ಪುಪ್ಫವಸ್ಸೋ ಮೇ, ಸಬ್ಬಕಾಲಂ ಪವಸ್ಸತಿ;
ಸಂಸರಾಮಿ ಮನುಸ್ಸೇ ಚೇ [ವೇ (ಸ್ಯಾ.)], ರಾಜಾ ಹೋಮಿ ಮಹಾಯಸೋ.
‘‘ತಹಿಂ ಕುಸುಮವಸ್ಸೋ ಮೇ, ಅಭಿವಸ್ಸತಿ ಸಬ್ಬದಾ;
ತಸ್ಸೇವ [ಕಾಯೇಸು (ಸ್ಯಾ.), ಕಾಯೇವ (ಪೀ.)] ಪುಪ್ಫಪೂಜಾಯ, ವಾಹಸಾ ಸಬ್ಬದಸ್ಸಿನೋ.
‘‘ಅಯಂ ಪಚ್ಛಿಮಕೋ ಮಯ್ಹಂ, ಚರಿಮೋ ವತ್ತತೇ ಭವೋ;
ಅಜ್ಜಾಪಿ ಪುಪ್ಫವಸ್ಸೋ ಮೇ, ಅಭಿವಸ್ಸತಿ ಸಬ್ಬದಾ.
‘‘ಸತಸಹಸ್ಸಿತೋ ¶ ಕಪ್ಪೇ, ಯಂ ಪುಪ್ಫಮಭಿರೋಪಯಿಂ;
ದುಗ್ಗತಿಂ ನಾಭಿಜಾನಾಮಿ, ದೇಹಪೂಜಾಯಿದಂ ಫಲಂ.
‘‘ಕಿಲೇಸಾ ಝಾಪಿತಾ ಮಯ್ಹಂ…ಪೇ… ವಿಹರಾಮಿ ಅನಾಸವೋ.
‘‘ಸ್ವಾಗತಂ ¶ ವತ ಮೇ ಆಸಿ…ಪೇ… ಕತಂ ಬುದ್ಧಸ್ಸ ಸಾಸನಂ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಜಾತಿಪುಪ್ಫಿಯೋ ಥೇರೋ ಇಮಾ ಗಾಥಾಯೋ
ಅಭಾಸಿತ್ಥಾತಿ.
ಜಾತಿಪುಪ್ಫಿಯತ್ಥೇರಸ್ಸಾಪದಾನಂ ಅಟ್ಠಮಂ.
೯. ಪಟ್ಟಿಪುಪ್ಫಿಯತ್ಥೇರಅಪದಾನಂ
‘‘ನೀಹರನ್ತೇ ಸರೀರಮ್ಹಿ, ವಜ್ಜಮಾನಾಸು ಭೇರಿಸು;
ಪಸನ್ನಚಿತ್ತೋ ಸುಮನೋ, ಪಟ್ಟಿಪುಪ್ಫಮಪೂಜಯಿಂ [ಸತ್ತಿ… (ಸ್ಯಾ. ಪೀ.)].
‘‘ಸತಸಹಸ್ಸಿತೋ ಕಪ್ಪೇ, ಯಂ ಪುಪ್ಫಮಭಿಪೂಜಯಿಂ;
ದುಗ್ಗತಿಂ ನಾಭಿಜಾನಾಮಿ, ದೇಹಪೂಜಾಯಿದಂ ಫಲಂ.
‘‘ಕಿಲೇಸಾ ಝಾಪಿತಾ ಮಯ್ಹಂ…ಪೇ… ವಿಹರಾಮಿ ಅನಾಸವೋ.
‘‘ಸ್ವಾಗತಂ ವತ ಮೇ ಆಸಿ…ಪೇ… ಕತಂ ಬುದ್ಧಸ್ಸ ಸಾಸನಂ.
‘‘ಪಟಿಸಮ್ಭಿದಾ ¶ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಪಟ್ಟಿಪುಪ್ಫಿಯೋ [ಸತ್ತಿಪಣ್ಣಿಯೋ (ಸ್ಯಾ. ಪೀ.)] ಥೇರೋ ಇಮಾ ಗಾಥಾಯೋ
ಅಭಾಸಿತ್ಥಾತಿ.
ಪಟ್ಟಿಪುಪ್ಫಿಯತ್ಥೇರಸ್ಸಾಪದಾನಂ ನವಮಂ.
೧೦. ಗನ್ಧಪೂಜಕತ್ಥೇರಅಪದಾನಂ
‘‘ಚಿತಾಸು ¶ ಕುರುಮಾನಾಸು [ಚಿತ್ತೇಸು ಕಯಿರಮಾನೇಸು (ಸೀ.)], ನಾನಾಗನ್ಧೇ ಸಮಾಹಟೇ;
ಪಸನ್ನಚಿತ್ತೋ ಸುಮನೋ, ಗನ್ಧಮುಟ್ಠಿಮಪೂಜಯಿಂ.
‘‘ಸತಸಹಸ್ಸಿತೋ ಕಪ್ಪೇ, ಚಿತಕಂ ಯಮಪೂಜಯಿಂ;
ದುಗ್ಗತಿಂ ನಾಭಿಜಾನಾಮಿ, ಚಿತಪೂಜಾಯಿದಂ ಫಲಂ.
‘‘ಕಿಲೇಸಾ ಝಾಪಿತಾ ಮಯ್ಹಂ…ಪೇ… ವಿಹರಾಮಿ ಅನಾಸವೋ.
‘‘ಸ್ವಾಗತಂ ವತ ಮೇ ಆಸಿ…ಪೇ… ಕತಂ ಬುದ್ಧಸ್ಸ ಸಾಸನಂ.
‘‘ಪಟಿಸಮ್ಭಿದಾ ¶ ¶ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಗನ್ಧಪೂಜಕೋ ಥೇರೋ ಇಮಾ ಗಾಥಾಯೋ
ಅಭಾಸಿತ್ಥಾತಿ.
ಗನ್ಧಪೂಜಕತ್ಥೇರಸ್ಸಾಪದಾನಂ ದಸಮಂ.
ಜಗತಿದಾಯಕವಗ್ಗೋ ಛಚತ್ತಾಲೀಸಮೋ.
ತಸ್ಸುದ್ದಾನಂ –
ಜಗತೀ ¶ ಮೋರಹತ್ಥೀ ಚ, ಆಸನೀ ಉಕ್ಕಧಾರಕೋ;
ಅಕ್ಕಮಿ ವನಕೋರಣ್ಡಿ, ಛತ್ತದೋ ಜಾತಿಪೂಜಕೋ.
ಪಟ್ಟಿಪುಪ್ಫೀ ಚ ಯೋ ಥೇರೋ, ದಸಮೋ ಗನ್ಧಪೂಜಕೋ;
ಸತ್ತಸಟ್ಠಿ ಚ ಗಾಥಾಯೋ, ಗಣಿತಾಯೋ ವಿಭಾವಿಭಿ.
೪೭. ಸಾಲಕುಸುಮಿಯವಗ್ಗೋ
೧. ಸಾಲಕುಸುಮಿಯತ್ಥೇರಅಪದಾನಂ
‘‘ಪರಿನಿಬ್ಬುತೇ ¶ ¶ ¶ ಭಗವತಿ, ಜಲಜುತ್ತಮನಾಮಕೇ;
ಆರೋಪಿತಮ್ಹಿ ಚಿತಕೇ, ಸಾಲಪುಪ್ಫಮಪೂಜಯಿಂ.
‘‘ಸತಸಹಸ್ಸಿತೋ ಕಪ್ಪೇ, ಯಂ ಪುಪ್ಫಮಭಿರೋಪಯಿಂ [ಪುಪ್ಫಮಭಿಪುಜಯಿಂ (ಸ್ಯಾ.)];
ದುಗ್ಗತಿಂ ನಾಭಿಜಾನಾಮಿ, ಚಿತಪೂಜಾಯಿದಂ [ಬುದ್ಧಪೂಜಾಯಿದಂ (ಸ್ಯಾ.)] ಫಲಂ.
‘‘ಕಿಲೇಸಾ ಝಾಪಿತಾ ಮಯ್ಹಂ, ಭವಾ ಸಬ್ಬೇ ಸಮೂಹತಾ;
ನಾಗೋವ ಬನ್ಧನಂ ಛೇತ್ವಾ, ವಿಹರಾಮಿ ಅನಾಸವೋ.
‘‘ಸ್ವಾಗತಂ ವತ ಮೇ ಆಸಿ, ಮಮ ಬುದ್ಧಸ್ಸ ಸನ್ತಿಕೇ;
ತಿಸ್ಸೋ ವಿಜ್ಜಾ ಅನುಪ್ಪತ್ತಾ, ಕತಂ ಬುದ್ಧಸ್ಸ ಸಾಸನಂ.
‘‘ಪಟಿಸಮ್ಭಿದಾ ಚತಸ್ಸೋ, ವಿಮೋಕ್ಖಾಪಿ ಚ ಅಟ್ಠಿಮೇ;
ಛಳಭಿಞ್ಞಾ ಸಚ್ಛಿಕತಾ, ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಸಾಲಕುಸುಮಿಯೋ ಥೇರೋ ಇಮಾ ಗಾಥಾಯೋ
ಅಭಾಸಿತ್ಥಾತಿ.
ಸಾಲಕುಸುಮಿಯತ್ಥೇರಸ್ಸಾಪದಾನಂ ಪಠಮಂ.
೨. ಚಿತಕಪೂಜಕತ್ಥೇರಅಪದಾನಂ
‘‘ಝಾಯಮಾನಸ್ಸ ಭಗವತೋ, ಸಿಖಿನೋ ಲೋಕಬನ್ಧುನೋ;
ಅಟ್ಠ ಚಮ್ಪಕಪುಪ್ಫಾನಿ, ಚಿತಕಂ ಅಭಿರೋಪಯಿಂ.
‘‘ಏಕತಿಂಸೇ ಇತೋ ಕಪ್ಪೇ, ಯಂ ಪುಪ್ಫಮಭಿರೋಪಯಿಂ;
ದುಗ್ಗತಿಂ ¶ ನಾಭಿಜಾನಾಮಿ, ಚಿತಪೂಜಾಯಿದಂ ಫಲಂ.
‘‘ಕಿಲೇಸಾ ಝಾಪಿತಾ ಮಯ್ಹಂ…ಪೇ… ವಿಹರಾಮಿ ಅನಾಸವೋ.
‘‘ಸ್ವಾಗತಂ ವತ ಮೇ ಆಸಿ…ಪೇ… ಕತಂ ಬುದ್ಧಸ್ಸ ಸಾಸನಂ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ¶ ¶ ಸುದಂ ಆಯಸ್ಮಾ ಚಿತಕಪೂಜಕೋ ಥೇರೋ ಇಮಾ ಗಾಥಾಯೋ
ಅಭಾಸಿತ್ಥಾತಿ.
ಚಿತಕಪೂಜಕತ್ಥೇರಸ್ಸಾಪದಾನಂ ದುತಿಯಂ.
೩. ಚಿತಕನಿಬ್ಬಾಪಕತ್ಥೇರಅಪದಾನಂ
‘‘ದಯ್ಹಮಾನೇ ¶ ಸರೀರಮ್ಹಿ, ವೇಸ್ಸಭುಸ್ಸ ಮಹೇಸಿನೋ;
ಗನ್ಧೋದಕಂ ಗಹೇತ್ವಾನ, ಚಿತಂ ನಿಬ್ಬಾಪಯಿಂ ಅಹಂ.
‘‘ಏಕತಿಂಸೇ ಇತೋ ಕಪ್ಪೇ, ಚಿತಂ ನಿಬ್ಬಾಪಯಿಂ ಅಹಂ;
ದುಗ್ಗತಿಂ ನಾಭಿಜಾನಾಮಿ, ಗನ್ಧೋದಕಸ್ಸಿದಂ ಫಲಂ.
‘‘ಕಿಲೇಸಾ ಝಾಪಿತಾ ಮಯ್ಹಂ…ಪೇ… ವಿಹರಾಮಿ ಅನಾಸವೋ.
‘‘ಸ್ವಾಗತಂ ವತ ಮೇ ಆಸಿ…ಪೇ… ಕತಂ ಬುದ್ಧಸ್ಸ ಸಾಸನಂ.
‘‘ಪಟಿಸಮ್ಭಿದಾ ¶ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಚಿತಕನಿಬ್ಬಾಪಕೋ ಥೇರೋ ಇಮಾ
ಗಾಥಾಯೋ ಅಭಾಸಿತ್ಥಾತಿ.
ಚಿತಕನಿಬ್ಬಾಪಕತ್ಥೇರಸ್ಸಾಪದಾನಂ ತತಿಯಂ.
೪. ಸೇತುದಾಯಕತ್ಥೇರಅಪದಾನಂ
‘‘ವಿಪಸ್ಸಿನೋ ಭಗವತೋ, ಚಙ್ಕಮನ್ತಸ್ಸ ಸಮ್ಮುಖಾ;
ಪಸನ್ನಚಿತ್ತೋ ಸುಮನೋ, ಸೇತುಂ ಕಾರಾಪಯಿಂ ಅಹಂ.
‘‘ಏಕನವುತಿತೋ ಕಪ್ಪೇ, ಯಂ ಸೇತುಂ ಕಾರಯಿಂ ಅಹಂ;
ದುಗ್ಗತಿಂ ನಾಭಿಜಾನಾಮಿ, ಸೇತುದಾನಸ್ಸಿದಂ ಫಲಂ.
‘‘ಕಿಲೇಸಾ ಝಾಪಿತಾ ಮಯ್ಹಂ…ಪೇ… ವಿಹರಾಮಿ ಅನಾಸವೋ.
‘‘ಸ್ವಾಗತಂ ವತ ಮೇ ಆಸಿ…ಪೇ… ಕತಂ ಬುದ್ಧಸ್ಸ ಸಾಸನಂ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ¶ ಸುದಂ ಆಯಸ್ಮಾ ಸೇತುದಾಯಕೋ ಥೇರೋ ಇಮಾ ಗಾಥಾಯೋ
ಅಭಾಸಿತ್ಥಾತಿ.
ಸೇತುದಾಯಕತ್ಥೇರಸ್ಸಾಪದಾನಂ ಚತುತ್ಥಂ.
೫. ಸುಮನತಾಲವಣ್ಟಿಯತ್ಥೇರಅಪದಾನಂ
‘‘ಸಿದ್ಧತ್ಥಸ್ಸ ¶ ¶ ಭಗವತೋ, ತಾಲವಣ್ಟಮದಾಸಹಂ;
ಸುಮನೇಹಿ ಪಟಿಚ್ಛನ್ನಂ, ಧಾರಯಾಮಿ ಮಹಾಯಸಂ.
‘‘ಚತುನ್ನವುತಿತೋ ಕಪ್ಪೇ, ತಾಲವಣ್ಟಮದಾಸಹಂ;
ದುಗ್ಗತಿಂ ನಾಭಿಜಾನಾಮಿ, ತಾಲವಣ್ಟಸ್ಸಿದಂ ಫಲಂ.
‘‘ಕಿಲೇಸಾ ಝಾಪಿತಾ ಮಯ್ಹಂ…ಪೇ… ವಿಹರಾಮಿ ಅನಾಸವೋ.
‘‘ಸ್ವಾಗತಂ ವತ ಮೇ ಆಸಿ…ಪೇ… ಕತಂ ಬುದ್ಧಸ್ಸ ಸಾಸನಂ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಸುಮನತಾಲವಣ್ಟಿಯೋ ಥೇರೋ ಇಮಾ
ಗಾಥಾಯೋ ಅಭಾಸಿತ್ಥಾತಿ.
ಸುಮನತಾಲವಣ್ಟಿಯತ್ಥೇರಸ್ಸಾಪದಾನಂ ಪಞ್ಚಮಂ.
೬. ಅವಟಫಲಿಯತ್ಥೇರಅಪದಾನಂ
‘‘ಸತರಂಸೀ ¶ ನಾಮ ಭಗವಾ, ಸಯಮ್ಭೂ ಅಪರಾಜಿತೋ;
ವಿವೇಕಕಾಮೋ ಸಮ್ಬುದ್ಧೋ, ಗೋಚರಾಯಾಭಿನಿಕ್ಖಮಿ.
‘‘ಫಲಹತ್ಥೋ ಅಹಂ ದಿಸ್ವಾ, ಉಪಗಚ್ಛಿಂ ನರಾಸಭಂ;
ಪಸನ್ನಚಿತ್ತೋ ಸುಮನೋ, ಅದಾಸಿಂ ಅವಟಂ ಫಲಂ.
‘‘ಚತುನ್ನವುತಿತೋ ¶ ಕಪ್ಪೇ, ಯಂ ಫಲಂ ಅದದಿಂ ತದಾ;
ದುಗ್ಗತಿಂ ನಾಭಿಜಾನಾಮಿ, ಫಲದಾನಸ್ಸಿದಂ ಫಲಂ.
‘‘ಕಿಲೇಸಾ ¶ ಝಾಪಿತಾ ಮಯ್ಹಂ…ಪೇ… ವಿಹರಾಮಿ ಅನಾಸವೋ.
‘‘ಸ್ವಾಗತಂ ವತ ಮೇ ಆಸಿ…ಪೇ… ಕತಂ ಬುದ್ಧಸ್ಸ ಸಾಸನಂ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಅವಟಫಲಿಯೋ ಥೇರೋ ಇಮಾ ಗಾಥಾಯೋ
ಅಭಾಸಿತ್ಥಾತಿ.
ಅವಟಫಲಿಯತ್ಥೇರಸ್ಸಾಪದಾನಂ ಛಟ್ಠಂ.
೭. ಲಬುಜಫಲದಾಯಕತ್ಥೇರಅಪದಾನಂ
‘‘ನಗರೇ ¶ ಬನ್ಧುಮತಿಯಾ, ಆರಾಮಿಕೋ ಅಹಂ ತದಾ;
ಅದ್ದಸಂ ವಿರಜಂ ಬುದ್ಧಂ, ಗಚ್ಛನ್ತಂ ಅನಿಲಞ್ಜಸೇ.
‘‘ಲಬುಜಂ ಫಲಮಾದಾಯ, ಬುದ್ಧಸೇಟ್ಠಸ್ಸದಾಸಹಂ;
ಆಕಾಸೇವ ಠಿತೋ ಸನ್ತೋ, ಪಟಿಗ್ಗಣ್ಹಿ ಮಹಾಯಸೋ.
‘‘ವಿತ್ತಿಸಞ್ಜನನೋ ಮಯ್ಹಂ, ದಿಟ್ಠಧಮ್ಮಸುಖಾವಹೋ;
ಫಲಂ ಬುದ್ಧಸ್ಸ ದತ್ವಾನ, ವಿಪ್ಪಸನ್ನೇನ ಚೇತಸಾ.
‘‘ಅಧಿಗಞ್ಛಿಂ ತದಾ ಪೀತಿಂ, ವಿಪುಲಂ ಸುಖಮುತ್ತಮಂ;
ಉಪ್ಪಜ್ಜತೇವ [ಉಪ್ಪಜ್ಜತೇ ಮೇ (ಸ್ಯಾ.)] ರತನಂ, ನಿಬ್ಬತ್ತಸ್ಸ ತಹಿಂ ತಹಿಂ.
‘‘ಏಕನವುತಿತೋ ¶ ಕಪ್ಪೇ, ಯಂ ಫಲಂ ಅದದಿಂ ತದಾ;
ದುಗ್ಗತಿಂ ನಾಭಿಜಾನಾಮಿ, ಫಲದಾನಸ್ಸಿದಂ ಫಲಂ.
‘‘ಕಿಲೇಸಾ ಝಾಪಿತಾ ಮಯ್ಹಂ…ಪೇ… ವಿಹರಾಮಿ ಅನಾಸವೋ.
‘‘ಸ್ವಾಗತಂ ವತ ಮೇ ಆಸಿ…ಪೇ… ಕತಂ ಬುದ್ಧಸ್ಸ ಸಾಸನಂ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಲಬುಜಫಲದಾಯಕೋ ಥೇರೋ ಇಮಾ
ಗಾಥಾಯೋ ಅಭಾಸಿತ್ಥಾತಿ.
ಲಬುಜಫಲದಾಯಕತ್ಥೇರಸ್ಸಾಪದಾನಂ ಸತ್ತಮಂ.
೮. ಪಿಲಕ್ಖಫಲದಾಯಕತ್ಥೇರಅಪದಾನಂ
‘‘ವನನ್ತರೇ ¶ ¶ ಬುದ್ಧಂ ದಿಸ್ವಾ [ವನನ್ತೇ ಬುದ್ಧಂ ದಿಸ್ವಾನ (ಸೀ. ಪೀ.)], ಅತ್ಥದಸ್ಸಿಂ ಮಹಾಯಸಂ;
ಪಸನ್ನಚಿತ್ತೋ ಸುಮನೋ, ಪಿಲಕ್ಖಸ್ಸ [ಪಿಲಕ್ಖುಸ್ಸ (ಪೀ.)] ಫಲಂ ಅದಾ.
‘‘ಅಟ್ಠಾರಸೇ ಕಪ್ಪಸತೇ, ಯಂ ಫಲಂ ಅದದಿಂ ತದಾ;
ದುಗ್ಗತಿಂ ನಾಭಿಜಾನಾಮಿ, ಫಲದಾನಸ್ಸಿದಂ ಫಲಂ.
‘‘ಕಿಲೇಸಾ ಝಾಪಿತಾ ಮಯ್ಹಂ…ಪೇ… ವಿಹರಾಮಿ ಅನಾಸವೋ.
‘‘ಸ್ವಾಗತಂ ವತ ಮೇ ಆಸಿ…ಪೇ… ಕತಂ ಬುದ್ಧಸ್ಸ ಸಾಸನಂ.
‘‘ಪಟಿಸಮ್ಭಿದಾ ¶ ¶ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಪಿಲಕ್ಖಫಲದಾಯಕೋ ಥೇರೋ ಇಮಾ
ಗಾಥಾಯೋ ಅಭಾಸಿತ್ಥಾತಿ.
ಪಿಲಕ್ಖಫಲದಾಯಕತ್ಥೇರಸ್ಸಾಪದಾನಂ ಅಟ್ಠಮಂ.
೯. ಸಯಂಪಟಿಭಾನಿಯತ್ಥೇರಅಪದಾನಂ
‘‘ಕಕುಧಂ ವಿಲಸನ್ತಂವ, ದೇವದೇವಂ ನರಾಸಭಂ;
ರಥಿಯಂ ಪಟಿಪಜ್ಜನ್ತಂ, ಕೋ ದಿಸ್ವಾ ನ ಪಸೀದತಿ.
‘‘ತಮನ್ಧಕಾರಂ ನಾಸೇತ್ವಾ, ಸನ್ತಾರೇತ್ವಾ ಬಹುಂ ಜನಂ;
ಞಾಣಾಲೋಕೇನ ಜೋತನ್ತಂ, ಕೋ ದಿಸ್ವಾ ನ ಪಸೀದತಿ.
‘‘ವಸೀಸತಸಹಸ್ಸೇಹಿ, ನೀಯನ್ತಂ ಲೋಕನಾಯಕಂ;
ಉದ್ಧರನ್ತಂ ಬಹೂ ಸತ್ತೇ, ಕೋ ದಿಸ್ವಾ ನ ಪಸೀದತಿ.
‘‘ಆಹನನ್ತಂ [ಆಹನಿತ್ವಾ (ಸ್ಯಾ. ಕ.)] ಧಮ್ಮಭೇರಿಂ, ಮದ್ದನ್ತಂ ತಿತ್ಥಿಯೇ ಗಣೇ;
ಸೀಹನಾದಂ ವಿನದನ್ತಂ, ಕೋ ದಿಸ್ವಾ ನ ಪಸೀದತಿ.
‘‘ಯಾವತಾ ಬ್ರಹ್ಮಲೋಕತೋ, ಆಗನ್ತ್ವಾನ ಸಬ್ರಹ್ಮಕಾ;
ಪುಚ್ಛನ್ತಿ ನಿಪುಣೇ ಪಞ್ಹೇ, ಕೋ ದಿಸ್ವಾ ನ ಪಸೀದತಿ.
‘‘ಯಸ್ಸಞ್ಜಲಿಂ ಕರಿತ್ವಾನ, ಆಯಾಚನ್ತಿ ಸದೇವಕಾ;
ತೇನ ಪುಞ್ಞಂ ಅನುಭೋನ್ತಿ, ಕೋ ದಿಸ್ವಾ ನ ಪಸೀದತಿ.
‘‘ಸಬ್ಬೇ ¶ ಜನಾ ಸಮಾಗನ್ತ್ವಾ, ಸಮ್ಪವಾರೇನ್ತಿ ಚಕ್ಖುಮಂ;
ನ ವಿಕಮ್ಪತಿ ಅಜ್ಝಿಟ್ಠೋ, ಕೋ ದಿಸ್ವಾ ನ ಪಸೀದತಿ.
‘‘ನಗರಂ ¶ ಪವಿಸತೋ ಯಸ್ಸ, ರವನ್ತಿ ಭೇರಿಯೋ ಬಹೂ;
ವಿನದನ್ತಿ ಗಜಾ ಮತ್ತಾ, ಕೋ ದಿಸ್ವಾ ನ ಪಸೀದತಿ.
‘‘ವೀಥಿಯಾ [ರಥಿಯಾ (ಸೀ.)] ಗಚ್ಛತೋ ಯಸ್ಸ, ಸಬ್ಬಾಭಾ ಜೋತತೇ ಸದಾ;
ಅಬ್ಭುನ್ನತಾ ಸಮಾ ಹೋನ್ತಿ, ಕೋ ದಿಸ್ವಾ ನ ಪಸೀದತಿ.
‘‘ಬ್ಯಾಹರನ್ತಸ್ಸ ¶ ಬುದ್ಧಸ್ಸ, ಚಕ್ಕವಾಳಮ್ಪಿ ಸುಯ್ಯತಿ;
ಸಬ್ಬೇ ಸತ್ತೇ ವಿಞ್ಞಾಪೇತಿ, ಕೋ ದಿಸ್ವಾ ನ ಪಸೀದತಿ.
‘‘ಸತಸಹಸ್ಸಿತೋ ¶ ಕಪ್ಪೇ, ಯಂ ಬುದ್ಧಮಭಿಕಿತ್ತಯಿಂ;
ದುಗ್ಗತಿಂ ನಾಭಿಜಾನಾಮಿ, ಕಿತ್ತನಾಯ ಇದಂ ಫಲಂ.
‘‘ಕಿಲೇಸಾ ಝಾಪಿತಾ ಮಯ್ಹಂ…ಪೇ… ವಿಹರಾಮಿ ಅನಾಸವೋ.
‘‘ಸ್ವಾಗತಂ ವತ ಮೇ ಆಸಿ…ಪೇ… ಕತಂ ಬುದ್ಧಸ್ಸ ಸಾಸನಂ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಸಯಂಪಟಿಭಾನಿಯೋ ಥೇರೋ ಇಮಾ ಗಾಥಾಯೋ
ಅಭಾಸಿತ್ಥಾತಿ.
ಸಯಂಪಟಿಭಾನಿಯತ್ಥೇರಸ್ಸಾಪದಾನಂ ನವಮಂ.
೧೦. ನಿಮಿತ್ತಬ್ಯಾಕರಣಿಯತ್ಥೇರಅಪದಾನಂ
‘‘ಅಜ್ಝೋಗಾಹೇತ್ವಾ ಹಿಮವಂ, ಮನ್ತೇ ವಾಚೇ ಮಹಂ ತದಾ;
ಚತುಪಞ್ಞಾಸಸಹಸ್ಸಾನಿ, ಸಿಸ್ಸಾ ಮಯ್ಹಂ ಉಪಟ್ಠಹುಂ.
‘‘ಅಧಿತಾ ¶ ವೇದಗೂ ಸಬ್ಬೇ, ಛಳಙ್ಗೇ ಪಾರಮಿಂ ಗತಾ;
ಸಕವಿಜ್ಜಾಹುಪತ್ಥದ್ಧಾ, ಹಿಮವನ್ತೇ ವಸನ್ತಿ ತೇ.
‘‘ಚವಿತ್ವಾ ತುಸಿತಾ ಕಾಯಾ, ದೇವಪುತ್ತೋ ಮಹಾಯಸೋ;
ಉಪ್ಪಜ್ಜಿ ಮಾತುಕುಚ್ಛಿಸ್ಮಿಂ, ಸಮ್ಪಜಾನೋ ಪತಿಸ್ಸತೋ.
‘‘ಸಮ್ಬುದ್ಧೇ ಉಪಪಜ್ಜನ್ತೇ, ದಸಸಹಸ್ಸಿ ಕಮ್ಪಥ;
ಅನ್ಧಾ ಚಕ್ಖುಂ ಅಲಭಿಂಸು, ಉಪ್ಪಜ್ಜನ್ತಮ್ಹಿ ನಾಯಕೇ.
‘‘ಸಬ್ಬಾಕಾರಂ ¶ ಪಕಮ್ಪಿತ್ಥ, ಕೇವಲಾ ವಸುಧಾ ಅಯಂ;
ನಿಗ್ಘೋಸಸದ್ದಂ ಸುತ್ವಾನ, ಉಬ್ಬಿಜ್ಜಿಂಸು [ವಿಮ್ಹಯಿಂಸು (ಸ್ಯಾ. ಕ.)] ಮಹಾಜನಾ.
‘‘ಸಬ್ಬೇ ಜನಾ ಸಮಾಗಮ್ಮ, ಆಗಚ್ಛುಂ ಮಮ ಸನ್ತಿಕಂ;
ವಸುಧಾಯಂ ಪಕಮ್ಪಿತ್ಥ, ಕಿಂ ವಿಪಾಕೋ ಭವಿಸ್ಸತಿ.
‘‘ಅವಚಾಸಿಂ [ವಿದಸ್ಸಾಮಿ (ಸ್ಯಾ.)] ತದಾ ತೇಸಂ, ಮಾ ಭೇಥ [ಮಾ ರೋದ (ಕ.), ಮಾಭಾಯಿತ್ಥ (ಸ್ಯಾ.)] ನತ್ಥಿ ವೋ ಭಯಂ;
ವಿಸಟ್ಠಾ ಹೋಥ ಸಬ್ಬೇಪಿ, ಉಪ್ಪಾದೋಯಂ ಸುವತ್ಥಿಕೋ [ಸುಖತ್ಥಿಕೋ (ಸ್ಯಾ.)].
‘‘ಅಟ್ಠಹೇತೂಹಿ ¶ ಸಮ್ಫುಸ್ಸ [ಅಟ್ಠಹೇತೂಹಿ ಸಮ್ಫಸ್ಸ (ಸ್ಯಾ. ಪೀ.), ಅತ್ಥಹೇತು ನಿಸಂಸಯಂ (ಕ.)], ವಸುಧಾಯಂ ಪಕಮ್ಪತಿ;
ತಥಾ ನಿಮಿತ್ತಾ ದಿಸ್ಸನ್ತಿ, ಓಭಾಸೋ ವಿಪುಲೋ ಮಹಾ.
‘‘ಅಸಂಸಯಂ ಬುದ್ಧಸೇಟ್ಠೋ, ಉಪ್ಪಜ್ಜಿಸ್ಸತಿ ಚಕ್ಖುಮಾ;
ಸಞ್ಞಾಪೇತ್ವಾನ ಜನತಂ, ಪಞ್ಚಸೀಲೇ ಕಥೇಸಹಂ.
‘‘ಸುತ್ವಾನ ¶ ಪಞ್ಚ ಸೀಲಾನಿ, ಬುದ್ಧುಪ್ಪಾದಞ್ಚ ದುಲ್ಲಭಂ;
ಉಬ್ಬೇಗಜಾತಾ ಸುಮನಾ, ತುಟ್ಠಹಟ್ಠಾ ಅಹಂಸು ತೇ.
‘‘ದ್ವೇನವುತೇ ಇತೋ ಕಪ್ಪೇ, ಯಂ ನಿಮಿತ್ತಂ ವಿಯಾಕರಿಂ;
ದುಗ್ಗತಿಂ ನಾಭಿಜಾನಾಮಿ, ಬ್ಯಾಕರಣಸ್ಸಿದಂ ಫಲಂ.
‘‘ಕಿಲೇಸಾ ¶ ಝಾಪಿತಾ ಮಯ್ಹಂ…ಪೇ… ವಿಹರಾಮಿ ಅನಾಸವೋ.
‘‘ಸ್ವಾಗತಂ ವತ ಮೇ ಆಸಿ…ಪೇ… ಕತಂ ಬುದ್ಧಸ್ಸ ಸಾಸನಂ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ನಿಮಿತ್ತಬ್ಯಾಕರಣಿಯೋ ಥೇರೋ ಇಮಾ
ಗಾಥಾಯೋ ಅಭಾಸಿತ್ಥಾತಿ.
ನಿಮಿತ್ತಬ್ಯಾಕರಣಿಯತ್ಥೇರಸ್ಸಾಪದಾನಂ ದಸಮಂ.
ಸಾಲಕುಸುಮಿಯವಗ್ಗೋ ಸತ್ತಚತ್ತಾಲೀಸಮೋ.
ತಸ್ಸುದ್ದಾನಂ –
ಸಾಲಕುಸುಮಿಯೋ ಥೇರೋ, ಪೂಜಾ ನಿಬ್ಬಾಪಕೋಪಿ ಚ;
ಸೇತುದೋ ತಾಲವಣ್ಟೀ ಚ, ಅವಟಲಬುಜಪ್ಪದೋ.
ಪಿಲಕ್ಖಪಟಿಭಾನೀ ಚ, ವೇಯ್ಯಾಕರಣಿಯೋ ದಿಜೋ;
ದ್ವೇಸತ್ತತಿ ಚ ಗಾಥಾಯೋ, ಗಣಿತಾಯೋ ವಿಭಾವಿಭಿ.
೪೮. ನಳಮಾಲಿವಗ್ಗೋ
೧. ನಳಮಾಲಿಯತ್ಥೇರಅಪದಾನಂ
‘‘ಸುವಣ್ಣವಣ್ಣಂ ¶ ¶ ¶ ಸಮ್ಬುದ್ಧಂ, ಆಹುತೀನಂ ಪಟಿಗ್ಗಹಂ;
ವಿಪಿನಗ್ಗೇನ ಗಚ್ಛನ್ತಂ, ಅದ್ದಸಂ ಲೋಕನಾಯಕಂ.
‘‘ನಳಮಾಲಂ ಗಹೇತ್ವಾನ, ನಿಕ್ಖಮನ್ತೋ ಚ ತಾವದೇ;
ತತ್ಥದ್ದಸಾಸಿಂ ಸಮ್ಬುದ್ಧಂ, ಓಘತಿಣ್ಣಮನಾಸವಂ.
‘‘ಪಸನ್ನಚಿತ್ತೋ ಸುಮನೋ, ನಳಮಾಲಮಪೂಜಯಿಂ;
ದಕ್ಖಿಣೇಯ್ಯಂ ಮಹಾವೀರಂ, ಸಬ್ಬಲೋಕಾನುಕಮ್ಪಕಂ.
‘‘ಏಕತಿಂಸೇ ಇತೋ ಕಪ್ಪೇ, ಯಂ ಮಾಲಮಭಿರೋಪಯಿಂ [ಪುಪ್ಫಮಭಿರೋಪಯಿಂ (ಸೀ. ಸ್ಯಾ. ಪೀ.)];
ದುಗ್ಗತಿಂ ನಾಭಿಜಾನಾಮಿ, ಬುದ್ಧಪೂಜಾಯಿದಂ ಫಲಂ.
‘‘ಕಿಲೇಸಾ ಝಾಪಿತಾ ಮಯ್ಹಂ, ಭವಾ ಸಬ್ಬೇ ಸಮೂಹತಾ;
ನಾಗೋವ ಬನ್ಧನಂ ಛೇತ್ವಾ, ವಿಹರಾಮಿ ಅನಾಸವೋ.
‘‘ಸ್ವಾಗತಂ ವತ ಮೇ ಆಸಿ, ಮಮ ಬುದ್ಧಸ್ಸ ಸನ್ತಿಕೇ;
ತಿಸ್ಸೋ ವಿಜ್ಜಾ ಅನುಪ್ಪತ್ತಾ, ಕತಂ ಬುದ್ಧಸ್ಸ ಸಾಸನಂ.
‘‘ಪಟಿಸಮ್ಭಿದಾ ಚತಸ್ಸೋ, ವಿಮೋಕ್ಖಾಪಿ ಚ ಅಟ್ಠಿಮೇ;
ಛಳಭಿಞ್ಞಾ ಸಚ್ಛಿಕತಾ, ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ನಳಮಾಲಿಯೋ ಥೇರೋ ಇಮಾ ಗಾಥಾಯೋ
ಅಭಾಸಿತ್ಥಾತಿ.
ನಳಮಾಲಿಯತ್ಥೇರಸ್ಸಾಪದಾನಂ ಪಠಮಂ.
೨. ಮಣಿಪೂಜಕತ್ಥೇರಅಪದಾನಂ
‘‘ಪದುಮುತ್ತರೋ ¶ ¶ ¶ ನಾಮ ಜಿನೋ, ಸಬ್ಬಧಮ್ಮಾನ ಪಾರಗೂ;
ವಿವೇಕಕಾಮೋ ಸಮ್ಬುದ್ಧೋ, ಗಚ್ಛತೇ ಅನಿಲಞ್ಜಸೇ.
‘‘ಅವಿದೂರೇ ಹಿಮವನ್ತಸ್ಸ, ಮಹಾಜಾತಸ್ಸರೋ ಅಹು;
ತತ್ಥ ಮೇ ಭವನಂ ಆಸಿ, ಪುಞ್ಞಕಮ್ಮೇನ ಸಂಯುತಂ.
‘‘ಭವನಾ ¶ ಅಭಿನಿಕ್ಖಮ್ಮ, ಅದ್ದಸಂ ಲೋಕನಾಯಕಂ;
ಇನ್ದೀವರಂವ ಜಲಿತಂ, ಆದಿತ್ತಂವ ಹುತಾಸನಂ.
‘‘ವಿಚಿನಂ ನದ್ದಸಂ ಪುಪ್ಫಂ, ಪೂಜಯಿಸ್ಸನ್ತಿ ನಾಯಕಂ;
ಸಕಂ ಚಿತ್ತಂ ಪಸಾದೇತ್ವಾ, ಅವನ್ದಿಂ ಸತ್ಥುನೋ ಅಹಂ.
‘‘ಮಮ ಸೀಸೇ ಮಣಿಂ ಗಯ್ಹ, ಪೂಜಯಿಂ ಲೋಕನಾಯಕಂ;
ಇಮಾಯ ಮಣಿಪೂಜಾಯ, ವಿಪಾಕೋ ಹೋತು ಭದ್ದಕೋ.
‘‘ಪದುಮುತ್ತರೋ ಲೋಕವಿದೂ, ಆಹುತೀನಂ ಪಟಿಗ್ಗಹೋ;
ಅನ್ತಲಿಕ್ಖೇ ಠಿತೋ ಸತ್ಥಾ, ಇಮಂ ಗಾಥಂ ಅಭಾಸಥ.
‘ಸೋ ತೇ ಇಜ್ಝತು ಸಙ್ಕಪ್ಪೋ, ಲಭಸ್ಸು ವಿಪುಲಂ ಸುಖಂ;
ಇಮಾಯ ಮಣಿಪೂಜಾಯ, ಅನುಭೋಹಿ ಮಹಾಯಸಂ’.
‘‘ಇದಂ ವತ್ವಾನ ಭಗವಾ, ಜಲಜುತ್ತಮನಾಮಕೋ;
ಅಗಮಾಸಿ ಬುದ್ಧಸೇಟ್ಠೋ, ಯತ್ಥ ಚಿತ್ತಂ ಪಣೀಹಿತಂ.
‘‘ಸಟ್ಠಿಕಪ್ಪಾನಿ ದೇವಿನ್ದೋ, ದೇವರಜ್ಜಮಕಾರಯಿಂ;
ಅನೇಕಸತಕ್ಖತ್ತುಞ್ಚ, ಚಕ್ಕವತ್ತೀ ಅಹೋಸಹಂ.
‘‘ಪುಬ್ಬಕಮ್ಮಂ ¶ ಸರನ್ತಸ್ಸ, ದೇವಭೂತಸ್ಸ ಮೇ ಸತೋ;
ಮಣಿ ನಿಬ್ಬತ್ತತೇ ಮಯ್ಹಂ, ಆಲೋಕಕರಣೋ ಮಮಂ.
‘‘ಛಳಸೀತಿಸಹಸ್ಸಾನಿ, ನಾರಿಯೋ ಮೇ ಪರಿಗ್ಗಹಾ;
ವಿಚಿತ್ತವತ್ಥಾಭರಣಾ, ಆಮುಕ್ಕಮಣಿಕುಣ್ಡಲಾ [ಆಮುತ್ತಮಣಿಕುಣ್ಡಲಾ (ಸೀ. ಸ್ಯಾ. ಪೀ.)].
‘‘ಅಳಾರಪಮ್ಹಾ ಹಸುಲಾ, ಸುಸಞ್ಞಾ ತನುಮಜ್ಝಿಮಾ;
ಪರಿವಾರೇನ್ತಿ ಮಂ ನಿಚ್ಚಂ, ಮಣಿಪೂಜಾಯಿದಂ ಫಲಂ.
‘‘ಸೋಣ್ಣಮಯಾ ಮಣಿಮಯಾ, ಲೋಹಿತಙ್ಗಮಯಾ ತಥಾ;
ಭಣ್ಡಾ ಮೇ ಸುಕತಾ ಹೋನ್ತಿ, ಯದಿಚ್ಛಸಿ [ಯದಿಚ್ಛಾಯ (ಸೀ. ಪೀ.)] ಪಿಳನ್ಧನಾ.
‘‘ಕೂಟಾಗಾರಾ ¶ ಗಹಾರಮ್ಮಾ, ಸಯನಞ್ಚ ಮಹಾರಹಂ;
ಮಮ ಸಙ್ಕಪ್ಪಮಞ್ಞಾಯ, ನಿಬ್ಬತ್ತನ್ತಿ ಯದಿಚ್ಛಕಂ.
‘‘ಲಾಭಾ ತೇಸಂ ಸುಲದ್ಧಞ್ಚ, ಯೇ ಲಭನ್ತಿ ಉಪಸ್ಸುತಿಂ;
ಪುಞ್ಞಕ್ಖೇತ್ತಂ ಮನುಸ್ಸಾನಂ, ಓಸಧಂ ಸಬ್ಬಪಾಣಿನಂ.
‘‘ಮಯ್ಹಮ್ಪಿ ¶ ¶ ಸುಕತಂ ಕಮ್ಮಂ, ಯೋಹಂ ಅದಕ್ಖಿ ನಾಯಕಂ;
ವಿನಿಪಾತಾ ಪಮುತ್ತೋಮ್ಹಿ, ಪತ್ತೋಮ್ಹಿ ಅಚಲಂ ಪದಂ.
‘‘ಯಂ ಯಂ ಯೋನುಪಪಜ್ಜಾಮಿ, ದೇವತ್ತಂ ಅಥ ಮಾನುಸಂ;
ದಿವಸಞ್ಚೇವ ರತ್ತಿಞ್ಚ [ಸಮನ್ತಾ ಸತ್ತರತನಾ (ಸೀ. ಪೀ. ಕ.)], ಆಲೋಕೋ ಹೋತಿ ಮೇ ಸದಾ.
‘‘ತಾಯೇವ ಮಣಿಪೂಜಾಯ, ಅನುಭೋತ್ವಾನ ಸಮ್ಪದಾ;
ಞಾಣಾಲೋಕೋ ಮಯಾ ದಿಟ್ಠೋ, ಪತ್ತೋಮ್ಹಿ ಅಚಲಂ ಪದಂ.
‘‘ಸತಸಹಸ್ಸಿತೋ ಕಪ್ಪೇ, ಯಂ ಮಣಿಂ ಅಭಿಪೂಜಯಿಂ;
ದುಗ್ಗತಿಂ ನಾಭಿಜಾನಾಮಿ, ಮಣಿಪೂಜಾಯಿದಂ ಫಲಂ.
‘‘ಕಿಲೇಸಾ ¶ ಝಾಪಿತಾ ಮಯ್ಹಂ…ಪೇ… ವಿಹರಾಮಿ ಅನಾಸವೋ.
‘‘ಸ್ವಾಗತಂ ವತ ಮೇ ಆಸಿ…ಪೇ… ಕತಂ ಬುದ್ಧಸ್ಸ ಸಾಸನಂ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಮಣಿಪೂಜಕೋ ಥೇರೋ ಇಮಾ ಗಾಥಾಯೋ
ಅಭಾಸಿತ್ಥಾತಿ.
ಮಣಿಪೂಜಕತ್ಥೇರಸ್ಸಾಪದಾನಂ ದುತಿಯಂ.
೩. ಉಕ್ಕಾಸತಿಕತ್ಥೇರಅಪದಾನಂ
‘‘ಕೋಸಿಕೋ ನಾಮ ಭಗವಾ, ಚಿತ್ತಕೂಟೇ ವಸೀ ತದಾ;
ಝಾಯೀ ಝಾನರತೋ ಬುದ್ಧೋ, ವಿವೇಕಾಭಿರತೋ ಮುನಿ.
‘‘ಅಜ್ಝೋಗಾಹೇತ್ವಾ [ಅಜ್ಝೋಗಹೇತ್ವಾ (ಸೀ. ಸ್ಯಾ. ಪೀ.)] ಹಿಮವನ್ತಂ, ನಾರೀಗಣಪುರಕ್ಖತೋ;
ಅದ್ದಸಂ ಕೋಸಿಕಂ ಬುದ್ಧಂ, ಪುಣ್ಣಮಾಯೇವ ಚನ್ದಿಮಂ.
‘‘ಉಕ್ಕಾಸತೇ ಗಹೇತ್ವಾನ, ಪರಿವಾರೇಸಹಂ ತದಾ;
ಸತ್ತರತ್ತಿನ್ದಿವಂ ಠತ್ವಾ [ಬುದ್ಧೋ (ಸ್ಯಾ. ಕ.)], ಅಟ್ಠಮೇನ ಅಗಚ್ಛಹಂ.
‘‘ವುಟ್ಠಿತಂ ¶ ಕೋಸಿಕಂ ಬುದ್ಧಂ, ಸಯಮ್ಭುಂ ಅಪರಾಜಿತಂ;
ಪಸನ್ನಚಿತ್ತೋ ವನ್ದಿತ್ವಾ, ಏಕಂ ಭಿಕ್ಖಂ ಅದಾಸಹಂ.
‘‘ತೇನ ಕಮ್ಮೇನ ದ್ವಿಪದಿನ್ದ, ಲೋಕಜೇಟ್ಠ ನರಾಸಭ;
ಉಪ್ಪಜ್ಜಿಂ ತುಸಿತೇ ಕಾಯೇ, ಏಕಭಿಕ್ಖಾಯಿದಂ ಫಲಂ.
‘‘ದಿವಸಞ್ಚೇವ ¶ ¶ ರತ್ತಿಞ್ಚ, ಆಲೋಕೋ ಹೋತಿ ಮೇ ಸದಾ;
ಸಮನ್ತಾ ಯೋಜನಸತಂ, ಓಭಾಸೇನ ಫರಾಮಹಂ.
‘‘ಪಞ್ಚಪಞ್ಞಾಸಕಪ್ಪಮ್ಹಿ, ಚಕ್ಕವತ್ತೀ ಅಹೋಸಹಂ;
ಚಾತುರನ್ತೋ ವಿಜಿತಾವೀ, ಜಮ್ಬುಮಣ್ಡಸ್ಸ [ಜಮ್ಬುಸಣ್ಡಸ್ಸ (ಪೀ.)] ಇಸ್ಸರೋ.
‘‘ತದಾ ಮೇ ನಗರಂ ಆಸಿ, ಇದ್ಧಂ ಫೀತಂ ಸುನಿಮ್ಮಿತಂ;
ತಿಂಸಯೋಜನಮಾಯಾಮಂ, ವಿತ್ಥಾರೇನ ಚ ವೀಸತಿ.
‘‘ಸೋಭಣಂ ನಾಮ ನಗರಂ, ವಿಸ್ಸಕಮ್ಮೇನ ಮಾಪಿತಂ;
ದಸಸದ್ದಾವಿವಿತ್ತಂ ತಂ, ಸಮ್ಮತಾಳಸಮಾಹಿತಂ.
‘‘ನ ¶ ತಮ್ಹಿ ನಗರೇ ಅತ್ಥಿ, ವಲ್ಲಿಕಟ್ಠಞ್ಚ ಮತ್ತಿಕಾ;
ಸಬ್ಬಸೋಣ್ಣಮಯಂಯೇವ, ಜೋತತೇ ನಿಚ್ಚಕಾಲಿಕಂ.
‘‘ಚತುಪಾಕಾರಪರಿಕ್ಖಿತ್ತಂ, ತಯೋ ಆಸುಂ ಮಣಿಮಯಾ;
ವೇಮಜ್ಝೇ ತಾಲಪನ್ತೀ ಚ, ವಿಸ್ಸಕಮ್ಮೇನ ಮಾಪಿತಾ.
‘‘ದಸಸಹಸ್ಸಪೋಕ್ಖರಞ್ಞೋ, ಪದುಮುಪ್ಪಲಛಾದಿತಾ;
ಪುಣ್ಡರೀಕೇಹಿ [ಪುಣ್ಡರೀಕಾದಿ (ಸ್ಯಾ.)] ಸಞ್ಛನ್ನಾ, ನಾನಾಗನ್ಧಸಮೀರಿತಾ.
‘‘ಚತುನ್ನವುತಿತೋ ಕಪ್ಪೇ, ಯಂ ಉಕ್ಕಂ ಧಾರಯಿಂ ಅಹಂ;
ದುಗ್ಗತಿಂ ನಾಭಿಜಾನಾಮಿ, ಉಕ್ಕಧಾರಸ್ಸಿದಂ ಫಲಂ.
‘‘ಕಿಲೇಸಾ ಝಾಪಿತಾ ಮಯ್ಹಂ…ಪೇ… ವಿಹರಾಮಿ ಅನಾಸವೋ.
‘‘ಸ್ವಾಗತಂ ವತ ಮೇ ಆಸಿ…ಪೇ… ಕತಂ ಬುದ್ಧಸ್ಸ ಸಾಸನಂ.
‘‘ಪಟಿಸಮ್ಭಿದಾ ¶ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಉಕ್ಕಾಸತಿಕೋ ಥೇರೋ ಇಮಾ ಗಾಥಾಯೋ
ಅಭಾಸಿತ್ಥಾತಿ.
ಉಕ್ಕಾಸತಿಕತ್ಥೇರಸ್ಸಾಪದಾನಂ ತತಿಯಂ.
೪. ಸುಮನಬೀಜನಿಯತ್ಥೇರಅಪದಾನಂ
‘‘ವಿಪಸ್ಸಿನೋ ¶ ಭಗವತೋ, ಬೋಧಿಯಾ ಪಾದಪುತ್ತಮೇ;
ಸುಮನೋ ಬೀಜನಿಂ ಗಯ್ಹ, ಅಬೀಜಿಂ ಬೋಧಿಮುತ್ತಮಂ.
‘‘ಏಕನವುತಿತೋ ¶ ಕಪ್ಪೇ, ಅಬೀಜಿಂ ಬೋಧಿಮುತ್ತಮಂ;
ದುಗ್ಗತಿಂ ನಾಭಿಜಾನಾಮಿ, ಬೀಜನಾಯ ಇದಂ ಫಲಂ.
‘‘ಕಿಲೇಸಾ ಝಾಪಿತಾ ಮಯ್ಹಂ…ಪೇ… ವಿಹರಾಮಿ ಅನಾಸವೋ.
‘‘ಸ್ವಾಗತಂ ವತ ಮೇ ಆಸಿ…ಪೇ… ಕತಂ ಬುದ್ಧಸ್ಸ ಸಾಸನಂ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಸುಮನಬೀಜನಿಯೋ ಥೇರೋ ಇಮಾ ಗಾಥಾಯೋ
ಅಭಾಸಿತ್ಥಾತಿ.
ಸುಮನಬೀಜನಿಯತ್ಥೇರಸ್ಸಾಪದಾನಂ ಚತುತ್ಥಂ.
೫. ಕುಮ್ಮಾಸದಾಯಕತ್ಥೇರಅಪದಾನಂ
‘‘ಏಸನಾಯ ¶ ಚರನ್ತಸ್ಸ, ವಿಪಸ್ಸಿಸ್ಸ ಮಹೇಸಿನೋ;
ರಿತ್ತಕಂ ಪತ್ತಂ ದಿಸ್ವಾನ, ಕುಮ್ಮಾಸಂ ಪೂರಯಿಂ ಅಹಂ.
‘‘ಏಕನವುತಿತೋ ಕಪ್ಪೇ, ಯಂ ಭಿಕ್ಖಂ ಅದದಿಂ ತದಾ;
ದುಗ್ಗತಿಂ ನಾಭಿಜಾನಾಮಿ, ಕುಮ್ಮಾಸಸ್ಸ ಇದಂ ಫಲಂ.
‘‘ಕಿಲೇಸಾ ಝಾಪಿತಾ ಮಯ್ಹಂ…ಪೇ… ವಿಹರಾಮಿ ಅನಾಸವೋ.
‘‘ಸ್ವಾಗತಂ ವತ ಮೇ ಆಸಿ…ಪೇ… ಕತಂ ಬುದ್ಧಸ್ಸ ಸಾಸನಂ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಕುಮ್ಮಾಸದಾಯಕೋ ಥೇರೋ ಇಮಾ ಗಾಥಾಯೋ
ಅಭಾಸಿತ್ಥಾತಿ.
ಕುಮ್ಮಾಸದಾಯಕತ್ಥೇರಸ್ಸಾಪದಾನಂ ಪಞ್ಚಮಂ.
೬. ಕುಸಟ್ಠಕದಾಯಕತ್ಥೇರಅಪದಾನಂ
‘‘ಕಸ್ಸಪಸ್ಸ ¶ ¶ ಭಗವತೋ, ಬ್ರಾಹ್ಮಣಸ್ಸ ವುಸೀಮತೋ;
ಪಸನ್ನಚಿತ್ತೋ ಸುಮನೋ, ಕುಸಟ್ಠಕಮದಾಸಹಂ.
‘‘ಇಮಸ್ಮಿಂಯೇವ ಕಪ್ಪಸ್ಮಿಂ, ಕುಸಟ್ಠಕಮದಾಸಹಂ;
ದುಗ್ಗತಿಂ ನಾಭಿಜಾನಾಮಿ, ಕುಸಟ್ಠಕಸ್ಸಿದಂ ಫಲಂ.
‘‘ಕಿಲೇಸಾ ¶ ¶ ಝಾಪಿತಾ ಮಯ್ಹಂ…ಪೇ… ವಿಹರಾಮಿ ಅನಾಸವೋ.
‘‘ಸ್ವಾಗತಂ ವತ ಮೇ ಆಸಿ…ಪೇ… ಕತಂ ಬುದ್ಧಸ್ಸ ಸಾಸನಂ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಕುಸಟ್ಠಕದಾಯಕೋ ಥೇರೋ ಇಮಾ ಗಾಥಾಯೋ
ಅಭಾಸಿತ್ಥಾತಿ.
ಕುಸಟ್ಠಕದಾಯಕತ್ಥೇರಸ್ಸಾಪದಾನಂ ಛಟ್ಠಂ.
೭. ಗಿರಿಪುನ್ನಾಗಿಯತ್ಥೇರಅಪದಾನಂ
‘‘ಸೋಭಿತೋ ನಾಮ ಸಮ್ಬುದ್ಧೋ, ಚಿತ್ತಕೂಟೇ ವಸೀ ತದಾ;
ಗಹೇತ್ವಾ ಗಿರಿಪುನ್ನಾಗಂ, ಸಯಮ್ಭುಂ ಅಭಿಪೂಜಯಿಂ.
‘‘ಚತುನ್ನವುತಿತೋ ಕಪ್ಪೇ, ಯಂ ಬುದ್ಧಮಭಿಪೂಜಯಿಂ;
ದುಗ್ಗತಿಂ ನಾಭಿಜಾನಾಮಿ, ಬುದ್ಧಪೂಜಾಯಿದಂ ಫಲಂ.
‘‘ಕಿಲೇಸಾ ಝಾಪಿತಾ ಮಯ್ಹಂ…ಪೇ… ವಿಹರಾಮಿ ಅನಾಸವೋ.
‘‘ಸ್ವಾಗತಂ ವತ ಮೇ ಆಸಿ…ಪೇ… ಕತಂ ಬುದ್ಧಸ್ಸ ಸಾಸನಂ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ¶ ಸುದಂ ಆಯಸ್ಮಾ ಗಿರಿಪುನ್ನಾಗಿಯೋ ಥೇರೋ ಇಮಾ ಗಾಥಾಯೋ
ಅಭಾಸಿತ್ಥಾತಿ.
ಗಿರಿಪುನ್ನಾಗಿಯತ್ಥೇರಸ್ಸಾಪದಾನಂ ಸತ್ತಮಂ.
೮. ವಲ್ಲಿಕಾರಫಲದಾಯಕತ್ಥೇರಅಪದಾನಂ
‘‘ಸುಮನೋ ¶ ನಾಮ ಸಮ್ಬುದ್ಧೋ, ತಕ್ಕರಾಯಂ ವಸೀ ತದಾ;
ವಲ್ಲಿಕಾರಫಲಂ ಗಯ್ಹ, ಸಯಮ್ಭುಸ್ಸ ಅದಾಸಹಂ.
‘‘ಏಕತಿಂಸೇ ಇತೋ ಕಪ್ಪೇ, ಯಂ ಫಲಂ ಅದದಿಂ ತದಾ;
ದುಗ್ಗತಿಂ ನಾಭಿಜಾನಾಮಿ, ಫಲದಾನಸ್ಸಿದಂ ಫಲಂ.
‘‘ಕಿಲೇಸಾ ಝಾಪಿತಾ ಮಯ್ಹಂ…ಪೇ… ವಿಹರಾಮಿ ಅನಾಸವೋ.
‘‘ಸ್ವಾಗತಂ ವತ ಮೇ ಆಸಿ…ಪೇ… ಕತಂ ಬುದ್ಧಸ್ಸ ಸಾಸನಂ.
‘‘ಪಟಿಸಮ್ಭಿದಾ ¶ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ವಲ್ಲಿಕಾರಫಲದಾಯಕೋ ಥೇರೋ ಇಮಾ
ಗಾಥಾಯೋ ಅಭಾಸಿತ್ಥಾತಿ.
ವಲ್ಲಿಕಾರಫಲದಾಯಕತ್ಥೇರಸ್ಸಾಪದಾನಂ ಅಟ್ಠಮಂ.
೯. ಪಾನಧಿದಾಯಕತ್ಥೇರಅಪದಾನಂ
‘‘ಅನೋಮದಸ್ಸೀ ¶ ಭಗವಾ, ಲೋಕಜೇಟ್ಠೋ ನರಾಸಭೋ;
ದಿವಾವಿಹಾರಾ ನಿಕ್ಖಮ್ಮ, ಪಥಮಾರುಹಿ [ಪೀತಿಮಾರುಯ್ಹಿ (ಸ್ಯಾ.)] ಚಕ್ಖುಮಾ.
‘‘ಪಾನಧಿಂ ¶ ಸುಕತಂ ಗಯ್ಹ, ಅದ್ಧಾನಂ ಪಟಿಪಜ್ಜಹಂ;
ತತ್ಥದ್ದಸಾಸಿಂ ಸಮ್ಬುದ್ಧಂ, ಪತ್ತಿಕಂ ಚಾರುದಸ್ಸನಂ.
‘‘ಸಕಂ ಚಿತ್ತಂ ಪಸಾದೇತ್ವಾ, ನೀಹರಿತ್ವಾನ ಪಾನಧಿಂ;
ಪಾದಮೂಲೇ ಠಪೇತ್ವಾನ, ಇದಂ ವಚನಮಬ್ರವಿಂ.
‘‘‘ಅಭಿರೂಹ ಮಹಾವೀರ, ಸುಗತಿನ್ದ ವಿನಾಯಕ;
ಇತೋ ಫಲಂ ಲಭಿಸ್ಸಾಮಿ, ಸೋ ಮೇ ಅತ್ಥೋ ಸಮಿಜ್ಝತು’.
‘‘ಅನೋಮದಸ್ಸೀ ಭಗವಾ, ಲೋಕಜೇಟ್ಠೋ ನರಾಸಭೋ;
ಪಾನಧಿಂ ಅಭಿರೂಹಿತ್ವಾ, ಇದಂ ವಚನಮಬ್ರವಿ.
‘‘‘ಯೋ ಪಾನಧಿಂ ಮೇ ಅದಾಸಿ, ಪಸನ್ನೋ ಸೇಹಿ ಪಾಣಿಭಿ;
ತಮಹಂ ಕಿತ್ತಯಿಸ್ಸಾಮಿ, ಸುಣಾಥ ಮಮ ಭಾಸತೋ’.
‘‘ಬುದ್ಧಸ್ಸ ¶ ಗಿರಮಞ್ಞಾಯ, ಸಬ್ಬೇ ದೇವಾ ಸಮಾಗತಾ;
ಉದಗ್ಗಚಿತ್ತಾ ಸುಮನಾ, ವೇದಜಾತಾ ಕತಞ್ಜಲೀ.
‘‘ಪಾನಧೀನಂ ಪದಾನೇನ, ಸುಖಿತೋಯಂ ಭವಿಸ್ಸತಿ;
ಪಞ್ಚಪಞ್ಞಾಸಕ್ಖತ್ತುಞ್ಚ, ದೇವರಜ್ಜಂ ಕರಿಸ್ಸತಿ.
‘‘ಸಹಸ್ಸಕ್ಖತ್ತುಂ ರಾಜಾ ಚ, ಚಕ್ಕವತ್ತೀ ಭವಿಸ್ಸತಿ;
ಪದೇಸರಜ್ಜಂ ವಿಪುಲಂ, ಗಣನಾತೋ ಅಸಙ್ಖಿಯಂ.
‘‘ಅಪರಿಮೇಯ್ಯೇ ಇತೋ ಕಪ್ಪೇ, ಓಕ್ಕಾಕಕುಲಸಮ್ಭವೋ;
ಗೋತಮೋ ನಾಮ ಗೋತ್ತೇನ [ನಾಮೇನ (ಸಬ್ಬತ್ಥ)], ಸತ್ಥಾ ಲೋಕೇ ಭವಿಸ್ಸತಿ.
‘‘ತಸ್ಸ ¶ ಧಮ್ಮೇಸು ದಾಯಾದೋ, ಓರಸೋ ಧಮ್ಮನಿಮ್ಮಿತೋ;
ಸಬ್ಬಾಸವೇ ಪರಿಞ್ಞಾಯ, ನಿಬ್ಬಾಯಿಸ್ಸತಿನಾಸವೋ.
‘‘ದೇವಲೋಕೇ ¶ ಮನುಸ್ಸೇ ವಾ, ನಿಬ್ಬತ್ತಿಸ್ಸತಿ ಪುಞ್ಞವಾ;
ದೇವಯಾನಪಟಿಭಾಗಂ, ಯಾನಂ ಪಟಿಲಭಿಸ್ಸತಿ.
‘‘ಪಾಸಾದಾ ಸಿವಿಕಾ ವಯ್ಹಂ, ಹತ್ಥಿನೋ ಸಮಲಙ್ಕತಾ;
ರಥಾ ವಾಜಞ್ಞಸಂಯುತ್ತಾ, ಸದಾ ಪಾತುಭವನ್ತಿ ಮೇ.
‘‘ಅಗಾರಾ ನಿಕ್ಖಮನ್ತೋಪಿ, ರಥೇನ ನಿಕ್ಖಮಿಂ ಅಹಂ;
ಕೇಸೇಸು ಛಿಜ್ಜಮಾನೇಸು, ಅರಹತ್ತಮಪಾಪುಣಿಂ.
‘‘ಲಾಭಾ ಮಯ್ಹಂ ಸುಲದ್ಧಂ ಮೇ, ವಾಣಿಜ್ಜಂ ಸುಪ್ಪಯೋಜಿತಂ;
ದತ್ವಾನ ಪಾನಧಿಂ ಏಕಂ, ಪತ್ತೋಮ್ಹಿ ಅಚಲಂ ಪದಂ.
‘‘ಅಪರಿಮೇಯ್ಯೇ ಇತೋ ಕಪ್ಪೇ, ಯಂ ಪಾನಧಿಮದಾಸಹಂ;
ದುಗ್ಗತಿಂ ನಾಭಿಜಾನಾಮಿ, ಪಾನಧಿಸ್ಸ ಇದಂ ಫಲಂ.
‘‘ಕಿಲೇಸಾ ¶ ಝಾಪಿತಾ ಮಯ್ಹಂ…ಪೇ… ವಿಹರಾಮಿ ಅನಾಸವೋ.
‘‘ಸ್ವಾಗತಂ ವತ ಮೇ ಆಸಿ…ಪೇ… ಕತಂ ಬುದ್ಧಸ್ಸ ಸಾಸನಂ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಪಾನಧಿದಾಯಕೋ ಥೇರೋ ಇಮಾ ಗಾಥಾಯೋ
ಅಭಾಸಿತ್ಥಾತಿ.
ಪಾನಧಿದಾಯಕತ್ಥೇರಸ್ಸಾಪದಾನಂ ನವಮಂ.
೧೦. ಪುಲಿನಚಙ್ಕಮಿಯತ್ಥೇರಅಪದಾನಂ
‘‘ಮಿಗಲುದ್ದೋ ¶ ¶ ಪುರೇ ಆಸಿಂ, ಅರಞ್ಞೇ ಕಾನನೇ ಅಹಂ;
ವಾತಮಿಗಂ ಗವೇಸನ್ತೋ, ಚಙ್ಕಮಂ ಅದ್ದಸಂ ಅಹಂ.
‘‘ಉಚ್ಛಙ್ಗೇನ ಪುಲಿನಂ [ಪುಳಿನಂ (ಸೀ. ಸ್ಯಾ. ಪೀ. ಕ.)] ಗಯ್ಹ, ಚಙ್ಕಮೇ ಓಕಿರಿಂ ಅಹಂ;
ಪಸನ್ನಚಿತ್ತೋ ಸುಮನೋ, ಸುಗತಸ್ಸ ಸಿರೀಮತೋ.
‘‘ಏಕತಿಂಸೇ ಇತೋ ಕಪ್ಪೇ, ಪುಲಿನಂ ಓಕಿರಿಂ ಅಹಂ;
ದುಗ್ಗತಿಂ ನಾಭಿಜಾನಾಮಿ, ಪುಲಿನಸ್ಸ ಇದಂ ಫಲಂ.
‘‘ಕಿಲೇಸಾ ¶ ಝಾಪಿತಾ ಮಯ್ಹಂ…ಪೇ… ವಿಹರಾಮಿ ಅನಾಸವೋ.
‘‘ಸ್ವಾಗತಂ ವತ ಮೇ ಆಸಿ…ಪೇ… ಕತಂ ಬುದ್ಧಸ್ಸ ಸಾಸನಂ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಪುಲಿನಚಙ್ಕಮಿಯೋ ಥೇರೋ ಇಮಾ ಗಾಥಾಯೋ
ಅಭಾಸಿತ್ಥಾತಿ.
ಪುಲಿನಚಙ್ಕಮಿಯತ್ಥೇರಸ್ಸಾಪದಾನಂ ದಸಮಂ.
ನಳಮಾಲಿವಗ್ಗೋ ಅಟ್ಠಚತ್ತಾಲೀಸಮೋ.
ತಸ್ಸುದ್ದಾನಂ –
ನಳಮಾಲೀ ಮಣಿದದೋ, ಉಕ್ಕಾಸತಿಕಬೀಜನೀ;
ಕುಮ್ಮಾಸೋ ಚ ಕುಸಟ್ಠೋ ಚ, ಗಿರಿಪುನ್ನಾಗಿಯೋಪಿ ಚ.
ವಲ್ಲಿಕಾರೋ ¶ ಪಾನಧಿದೋ, ಅಥೋ ಪುಲಿನಚಙ್ಕಮೋ;
ಗಾಥಾಯೋ ಪಞ್ಚನವುತಿ, ಗಣಿತಾಯೋ ವಿಭಾವಿಭಿ.
೪೯. ಪಂಸುಕೂಲವಗ್ಗೋ
೧. ಪಂಸುಕೂಲಸಞ್ಞಕತ್ಥೇರಅಪದಾನಂ
‘‘ತಿಸ್ಸೋ ¶ ¶ ನಾಮಾಸಿ ಭಗವಾ, ಸಯಮ್ಭೂ ಅಗ್ಗಪುಗ್ಗಲೋ;
ಪಂಸುಕೂಲಂ ಠಪೇತ್ವಾನ, ವಿಹಾರಂ ಪಾವಿಸೀ ಜಿನೋ.
‘‘ವಿನತಂ [ಸಜ್ಜಿತಂ (ಸ್ಯಾ.), ತಿಯನ್ತಂ (ಪೀ.)] ಧನುಮಾದಾಯ, ಭಕ್ಖತ್ಥಾಯ ಚರಿಂ ಅಹಂ;
ಮಣ್ಡಲಗ್ಗಂ ಗಹೇತ್ವಾನ, ಕಾನನಂ ಪಾವಿಸಿಂ ಅಹಂ.
‘‘ತತ್ಥದ್ದಸಂ ¶ ಪಂಸುಕೂಲಂ, ದುಮಗ್ಗೇ ಲಗ್ಗಿತಂ ತದಾ;
ಚಾಪಂ ತತ್ಥೇವ ನಿಕ್ಖಿಪ್ಪ, ಸಿರೇ ಕತ್ವಾನ ಅಞ್ಜಲಿಂ.
‘‘ಪಸನ್ನಚಿತ್ತೋ ಸುಮನೋ, ವಿಪುಲಾಯ ಚ ಪೀತಿಯಾ;
ಬುದ್ಧಸೇಟ್ಠಂ ಸರಿತ್ವಾನ, ಪಂಸುಕೂಲಂ ಅವನ್ದಹಂ.
‘‘ದ್ವೇನವುತೇ ಇತೋ ಕಪ್ಪೇ, ಪಂಸುಕೂಲಮವನ್ದಹಂ;
ದುಗ್ಗತಿಂ ನಾಭಿಜಾನಾಮಿ, ವನ್ದನಾಯ ಇದಂ ಫಲಂ.
‘‘ಕಿಲೇಸಾ ಝಾಪಿತಾ ಮಯ್ಹಂ, ಭವಾ ಸಬ್ಬೇ ಸಮೂಹತಾ;
ನಾಗೋವ ಬನ್ಧನಂ ಛೇತ್ವಾ, ವಿಹರಾಮಿ ಅನಾಸವೋ.
‘‘ಸ್ವಾಗತಂ ¶ ವತ ಮೇ ಆಸಿ, ಮಮ ಬುದ್ಧಸ್ಸ ಸನ್ತಿಕೇ;
ತಿಸ್ಸೋ ವಿಜ್ಜಾ ಅನುಪ್ಪತ್ತಾ, ಕತಂ ಬುದ್ಧಸ್ಸ ಸಾಸನಂ.
‘‘ಪಟಿಸಮ್ಭಿದಾ ಚತಸ್ಸೋ, ವಿಮೋಕ್ಖಾಪಿ ಚ ಅಟ್ಠಿಮೇ;
ಛಳಭಿಞ್ಞಾ ಸಚ್ಛಿಕತಾ, ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಪಂಸುಕೂಲಸಞ್ಞಕೋ ಥೇರೋ ಇಮಾ ಗಾಥಾಯೋ
ಅಭಾಸಿತ್ಥಾತಿ.
ಪಂಸುಕೂಲಸಞ್ಞಕತ್ಥೇರಸ್ಸಾಪದಾನಂ ಪಠಮಂ.
೨. ಬುದ್ಧಸಞ್ಞಕತ್ಥೇರಅಪದಾನಂ
‘‘ಅಜ್ಝಾಯಕೋ ¶ ಮನ್ತಧರೋ, ತಿಣ್ಣಂ ವೇದಾನ ಪಾರಗೂ;
ಲಕ್ಖಣೇ ಇತಿಹಾಸೇ ಚ, ಸನಿಘಣ್ಡುಸಕೇಟುಭೇ.
‘‘ನದೀಸೋತಪಟಿಭಾಗಾ ¶ , ಸಿಸ್ಸಾ ಆಯನ್ತಿ ಮೇ ತದಾ;
ತೇಸಾಹಂ ಮನ್ತೇ [ಮನ್ತಂ (ಸ್ಯಾ. ಕ.)] ವಾಚೇಮಿ, ರತ್ತಿನ್ದಿವಮತನ್ದಿತೋ.
‘‘ಸಿದ್ಧತ್ಥೋ ನಾಮ ಸಮ್ಬುದ್ಧೋ, ಲೋಕೇ ಉಪ್ಪಜ್ಜಿ ತಾವದೇ;
ತಮನ್ಧಕಾರಂ ನಾಸೇತ್ವಾ, ಞಾಣಾಲೋಕಂ ಪವತ್ತಯಿ.
‘‘ಮಮ ಅಞ್ಞತರೋ ಸಿಸ್ಸೋ, ಸಿಸ್ಸಾನಂ ಸೋ ಕಥೇಸಿ ಮೇ;
ಸುತ್ವಾನ ತೇ ಏತಮತ್ಥಂ, ಆರೋಚೇಸುಂ ಮಮಂ ತದಾ.
‘‘ಬುದ್ಧೋ ಲೋಕೇ ಸಮುಪ್ಪನ್ನೋ, ಸಬ್ಬಞ್ಞೂ ಲೋಕನಾಯಕೋ;
ತಸ್ಸಾನುವತ್ತತಿ ಜನೋ, ಲಾಭೋ ಅಮ್ಹಂ ನ ವಿಜ್ಜತಿ [ನ ಹೇಸ್ಸತಿ (ಸೀ. ಪೀ.)].
‘‘ಅಧಿಚ್ಚುಪ್ಪತ್ತಿಕಾ ಬುದ್ಧಾ, ಚಕ್ಖುಮನ್ತೋ ಮಹಾಯಸಾ;
ಯಂನೂನಾಹಂ ಬುದ್ಧಸೇಟ್ಠಂ, ಪಸ್ಸೇಯ್ಯಂ ಲೋಕನಾಯಕಂ.
‘‘ಅಜಿನಂ ¶ ಮೇ ಗಹೇತ್ವಾನ, ವಾಕಚೀರಂ ಕಮಣ್ಡಲುಂ;
ಅಸ್ಸಮಾ ಅಭಿನಿಕ್ಖಮ್ಮ, ಸಿಸ್ಸೇ ಆಮನ್ತಯಿಂ ಅಹಂ.
‘‘ಓದುಮ್ಬರಿಕಪುಪ್ಫಂವ, ಚನ್ದಮ್ಹಿ ಸಸಕಂ ಯಥಾ;
ವಾಯಸಾನಂ ಯಥಾ ಖೀರಂ, ದುಲ್ಲಭೋ ಲೋಕನಾಯಕೋ [ದುಲ್ಲಭಾ ಲೋಕನಾಯಕಾ (ಸೀ.), ದುಲ್ಲಭಂ ಲೋಕನಾಯಕಂ (ಸ್ಯಾ. ಪೀ. ಕ.)].
‘‘ಬುದ್ಧೋ ಲೋಕಮ್ಹಿ ಉಪ್ಪನ್ನೋ, ಮನುಸ್ಸತ್ತಮ್ಪಿ ದುಲ್ಲಭಂ;
ಉಭೋಸು ವಿಜ್ಜಮಾನೇಸು, ಸವನಞ್ಚ ಸುದುಲ್ಲಭಂ.
‘‘ಬುದ್ಧೋ ಲೋಕೇ ಸಮುಪ್ಪನ್ನೋ, ಚಕ್ಖುಂ ಲಚ್ಛಾಮ ನೋ ಭವಂ;
ಏಥ ಸಬ್ಬೇ ಗಮಿಸ್ಸಾಮ, ಸಮ್ಮಾಸಮ್ಬುದ್ಧಸನ್ತಿಕಂ.
‘‘ಕಮಣ್ಡಲುಧರಾ ¶ ಸಬ್ಬೇ, ಖರಾಜಿನನಿವಾಸಿನೋ;
ತೇ ಜಟಾ ಭಾರಭರಿತಾ, ನಿಕ್ಖಮುಂ ವಿಪಿನಾ ತದಾ.
‘‘ಯುಗಮತ್ತಂ ಪೇಕ್ಖಮಾನಾ, ಉತ್ತಮತ್ಥಂ ಗವೇಸಿನೋ;
ಆಸತ್ತಿದೋಸರಹಿತಾ, ಅಸಮ್ಭೀತಾವ ಕೇಸರೀ.
‘‘ಅಪ್ಪಕಿಚ್ಚಾ ಅಲೋಲುಪ್ಪಾ, ನಿಪಕಾ ಸನ್ತವುತ್ತಿನೋ;
ಉಞ್ಛಾಯ ಚರಮಾನಾ ತೇ, ಬುದ್ಧಸೇಟ್ಠಮುಪಾಗಮುಂ.
‘‘ದಿಯಡ್ಢಯೋಜನೇ ¶ ಸೇಸೇ, ಬ್ಯಾಧಿ ಮೇ ಉಪಪಜ್ಜಥ;
ಬುದ್ಧಸೇಟ್ಠಂ ಸರಿತ್ವಾನ, ತತ್ಥ ಕಾಲಙ್ಕತೋ ಅಹಂ.
‘‘ಚತುನ್ನವುತಿತೋ ¶ ಕಪ್ಪೇ, ಯಂ ಸಞ್ಞಮಲಭಿಂ ತದಾ;
ದುಗ್ಗತಿಂ ನಾಭಿಜಾನಾಮಿ, ಬುದ್ಧಸಞ್ಞಾಯಿದಂ ಫಲಂ.
‘‘ಕಿಲೇಸಾ ಝಾಪಿತಾ ಮಯ್ಹಂ…ಪೇ… ವಿಹರಾಮಿ ಅನಾಸವೋ.
‘‘ಸ್ವಾಗತಂ ¶ ವತ ಮೇ ಆಸಿ…ಪೇ… ಕತಂ ಬುದ್ಧಸ್ಸ ಸಾಸನಂ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಬುದ್ಧಸಞ್ಞಕೋ ಥೇರೋ ಇಮಾ ಗಾಥಾಯೋ
ಅಭಾಸಿತ್ಥಾತಿ.
ಬುದ್ಧಸಞ್ಞಕತ್ಥೇರಸ್ಸಾಪದಾನಂ ದುತಿಯಂ.
೩. ಭಿಸದಾಯಕತ್ಥೇರಅಪದಾನಂ
‘‘ಓಗಯ್ಹ ಯಂ [ಓಗಯ್ಹಾಹಂ (ಸೀ. ಸ್ಯಾ. ಪೀ.)] ಪೋಕ್ಖರಣಿಂ, ನಾನಾಕುಞ್ಜರಸೇವಿತಂ;
ಉದ್ಧರಾಮಿ ಭಿಸಂ ತತ್ಥ, ಘಾಸಹೇತು [ಅಸನಹೇತು (ಸ್ಯಾ.)] ಅಹಂ ತದಾ.
‘‘ಭಗವಾ ತಮ್ಹಿ ಸಮಯೇ, ಪದುಮುತ್ತರಸವ್ಹಯೋ;
ರತ್ತಮ್ಬರಧರೋ [ರತ್ತಕಮ್ಬಲಧರೋ (ಸ್ಯಾ.)] ಬುದ್ಧೋ, ಗಚ್ಛತಿ ಅನಿಲಞ್ಜಸೇ.
‘‘ಧುನನ್ತೋ ಪಂಸುಕೂಲಾನಿ, ಸದ್ದಮಸ್ಸೋಸಹಂ ತದಾ;
ಉದ್ಧಂ ನಿಜ್ಝಾಯಮಾನೋಹಂ, ಅದ್ದಸಂ ಲೋಕನಾಯಕಂ.
‘‘ತತ್ಥೇವ ಠಿತಕೋ ಸನ್ತೋ, ಆಯಾಚಿಂ ಲೋಕನಾಯಕಂ;
ಮಧುಂ ಭಿಸೇಹಿ ಸವತಿ, ಖೀರಂ ಸಪ್ಪಿಂ ಮುಳಾಲಿಭಿ.
‘‘ಪಟಿಗ್ಗಣ್ಹಾತು ಮೇ ಬುದ್ಧೋ, ಅನುಕಮ್ಪಾಯ ಚಕ್ಖುಮಾ;
ತತೋ ಕಾರುಣಿಕೋ ಸತ್ಥಾ, ಓರುಹಿತ್ವಾ ಮಹಾಯಸೋ.
‘‘ಪಟಿಗ್ಗಣ್ಹಿ ಮಮಂ ಭಿಕ್ಖಂ, ಅನುಕಮ್ಪಾಯ ಚಕ್ಖುಮಾ;
ಪಟಿಗ್ಗಹೇತ್ವಾ ಸಮ್ಬುದ್ಧೋ, ಅಕಾ ಮೇ ಅನುಮೋದನಂ.
‘‘‘ಸುಖೀ ¶ ಹೋತು [ಹೋಹಿ (ಸೀ. ಸ್ಯಾ. ಪೀ. ಕ.)] ಮಹಾಪುಞ್ಞ, ಗತಿ ತುಯ್ಹಂ ಸಮಿಜ್ಝತು;
ಇಮಿನಾ ಭಿಸದಾನೇನ, ಲಭಸ್ಸು ವಿಪುಲಂ ಸುಖಂ’.
‘‘ಇದಂ ¶ ¶ ವತ್ವಾನ ಸಮ್ಬುದ್ಧೋ, ಜಲಜುತ್ತಮನಾಮಕೋ;
ಭಿಕ್ಖಮಾದಾಯ ಸಮ್ಬುದ್ಧೋ, ಅಮ್ಬರೇನಾಗಮಾ ಜಿನೋ.
‘‘ತತೋ ¶ ಭಿಸಂ ಗಹೇತ್ವಾನ, ಆಗಚ್ಛಿಂ ಮಮ ಅಸ್ಸಮಂ;
ಭಿಸಂ ರುಕ್ಖೇ ಲಗೇತ್ವಾನ [ಲಗ್ಗಿತ್ವಾನ (ಸ್ಯಾ. ಕ.)], ಮಮ ದಾನಮನುಸ್ಸರಿಂ.
‘‘ಮಹಾವಾತೋ ವುಟ್ಠಹಿತ್ವಾ, ಸಞ್ಚಾಲೇಸಿ ವನಂ ತದಾ;
ಆಕಾಸೋ ಅಭಿನಾದಿತ್ಥ, ಅಸನಿಯಾ ಫಲನ್ತಿಯಾ.
‘‘ತತೋ ಮೇ ಅಸನಿಪಾತೋ, ಮತ್ಥಕೇ ನಿಪತೀ ತದಾ;
ಸೋಹಂ ನಿಸಿನ್ನಕೋ ಸನ್ತೋ, ತತ್ಥ ಕಾಲಙ್ಕತೋ ಅಹುಂ.
‘‘ಪುಞ್ಞಕಮ್ಮೇನ ಸಂಯುತ್ತೋ, ತುಸಿತಂ ಉಪಪಜ್ಜಹಂ;
ಕಳೇವರಂ ಮೇ ಪತಿತಂ, ದೇವಲೋಕೇ ರಮಿಂ ಅಹಂ.
‘‘ಛಳಸೀತಿಸಹಸ್ಸಾನಿ, ನಾರಿಯೋ ಸಮಲಙ್ಕತಾ;
ಸಾಯಪಾತಂ [ಸಾಯಂ ಪಾತಂ (ಸ್ಯಾ. ಕ.)] ಉಪಟ್ಠನ್ತಿ, ಭಿಸದಾನಸ್ಸಿದಂ ಫಲಂ.
‘‘ಮನುಸ್ಸಯೋನಿಮಾಗನ್ತ್ವಾ, ಸುಖಿತೋ ಹೋಮಹಂ ಸದಾ;
ಭೋಗೇ ಮೇ ಊನತಾ ನತ್ಥಿ, ಭಿಸದಾನಸ್ಸಿದಂ ಫಲಂ.
‘‘ಅನುಕಮ್ಪಿತಕೋ ತೇನ, ದೇವದೇವೇನ ತಾದಿನಾ;
ಸಬ್ಬಾಸವಾ ಪರಿಕ್ಖೀಣಾ, ನತ್ಥಿ ದಾನಿ ಪುನಬ್ಭವೋ.
‘‘ಸತಸಹಸ್ಸಿತೋ ಕಪ್ಪೇ, ಯಂ ಭಿಸಂ [ಭಿಕ್ಖಂ (ಸಬ್ಬತ್ಥ)] ಅದದಿಂ ತದಾ;
ದುಗ್ಗತಿಂ ನಾಭಿಜಾನಾಮಿ, ಭಿಸದಾನಸ್ಸಿದಂ ಫಲಂ.
‘‘ಕಿಲೇಸಾ ¶ ಝಾಪಿತಾ ಮಯ್ಹಂ…ಪೇ… ವಿಹರಾಮಿ ಅನಾಸವೋ.
‘‘ಸ್ವಾಗತಂ ವತ ಮೇ ಆಸಿ…ಪೇ… ಕತಂ ಬುದ್ಧಸ್ಸ ಸಾಸನಂ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಭಿಸದಾಯಕೋ ಥೇರೋ ಇಮಾ ಗಾಥಾಯೋ
ಅಭಾಸಿತ್ಥಾತಿ.
ಭಿಸದಾಯಕತ್ಥೇರಸ್ಸಾಪದಾನಂ ತತಿಯಂ.
೪. ಞಾಣಥವಿಕತ್ಥೇರಅಪದಾನಂ
‘‘ದಕ್ಖಿಣೇ ¶ ಹಿಮವನ್ತಸ್ಸ, ಸುಕತೋ ಅಸ್ಸಮೋ ಮಮ;
ಉತ್ತಮತ್ಥಂ ಗವೇಸನ್ತೋ, ವಸಾಮಿ ವಿಪಿನೇ ತದಾ.
‘‘ಲಾಭಾಲಾಭೇನ ¶ ಸನ್ತುಟ್ಠೋ, ಮೂಲೇನ ಚ ಫಲೇನ ಚ;
ಅನ್ವೇಸನ್ತೋ ಆಚರಿಯಂ, ವಸಾಮಿ ಏಕಕೋ ಅಹಂ.
‘‘ಸುಮೇಧೋ ನಾಮ ಸಮ್ಬುದ್ಧೋ, ಲೋಕೇ ಉಪ್ಪಜ್ಜಿ ತಾವದೇ;
ಚತುಸಚ್ಚಂ ಪಕಾಸೇತಿ, ಉದ್ಧರನ್ತೋ ಮಹಾಜನಂ.
‘‘ನಾಹಂ ಸುಣೋಮಿ ಸಮ್ಬುದ್ಧಂ, ನಪಿ ಮೇ ಕೋಚಿ ಸಂಸತಿ [ಭಾಸತಿ (ಸೀ.), ಸಾಸತಿ (ಸ್ಯಾ. ಪೀ.)];
ಅಟ್ಠವಸ್ಸೇ ಅತಿಕ್ಕನ್ತೇ, ಅಸ್ಸೋಸಿಂ ಲೋಕನಾಯಕಂ.
‘‘ಅಗ್ಗಿದಾರುಂ ¶ ನೀಹರಿತ್ವಾ, ಸಮ್ಮಜ್ಜಿತ್ವಾನ ಅಸ್ಸಮಂ;
ಖಾರಿಭಾರಂ ಗಹೇತ್ವಾನ, ನಿಕ್ಖಮಿಂ ವಿಪಿನಾ ಅಹಂ.
‘‘ಏಕರತ್ತಿಂ ¶ ವಸನ್ತೋಹಂ, ಗಾಮೇಸು ನಿಗಮೇಸು ಚ;
ಅನುಪುಬ್ಬೇನ ಚನ್ದವತಿಂ, ತದಾಹಂ ಉಪಸಙ್ಕಮಿಂ.
‘‘ಭಗವಾ ತಮ್ಹಿ ಸಮಯೇ, ಸುಮೇಧೋ ಲೋಕನಾಯಕೋ;
ಉದ್ಧರನ್ತೋ ಬಹೂ ಸತ್ತೇ, ದೇಸೇತಿ ಅಮತಂ ಪದಂ.
‘‘ಜನಕಾಯಮತಿಕ್ಕಮ್ಮ, ವನ್ದಿತ್ವಾ ಜಿನಸಾಗರಂ;
ಏಕಂಸಂ ಅಜಿನಂ ಕತ್ವಾ, ಸನ್ಥವಿಂ ಲೋಕನಾಯಕಂ.
‘‘‘ತುವಂ ಸತ್ಥಾ ಚ ಕೇತು ಚ, ಧಜೋ ಯೂಪೋ ಚ ಪಾಣಿನಂ;
ಪರಾಯನೋ [ಪರಾಯಣೋ (ಸೀ. ಪೀ.)] ಪತಿಟ್ಠಾ ಚ, ದೀಪೋ ಚ ದ್ವಿಪದುತ್ತಮೋ.
ಏಕವೀಸತಿಮಂ ಭಾಣವಾರಂ.
‘‘‘ನೇಪುಞ್ಞೋ ದಸ್ಸನೇ ವೀರೋ, ತಾರೇಸಿ ಜನತಂ ತುವಂ;
ನತ್ಥಞ್ಞೋ ತಾರಕೋ ಲೋಕೇ, ತವುತ್ತರಿತರೋ ಮುನೇ.
‘‘‘ಸಕ್ಕಾ ಥೇವೇ [ಹವೇ (ಸೀ. ಪೀ.) ಭವೇ (ಸ್ಯಾ. ಕ.)] ಕುಸಗ್ಗೇನ, ಪಮೇತುಂ ಸಾಗರುತ್ತಮೇ [ಸಾಗರುತ್ತಮೋ (ಸೀ. ಸ್ಯಾ. ಪೀ.)];
ನತ್ವೇವ ತವ ಸಬ್ಬಞ್ಞು, ಞಾಣಂ ಸಕ್ಕಾ ಪಮೇತವೇ.
‘‘‘ತುಲದಣ್ಡೇ ¶ [ತುಲಮಣ್ಡಲೇ (ಸೀ. ಪೀ.)] ಠಪೇತ್ವಾನ, ಮಹಿಂ [ಮಹೀ (ಸ್ಯಾ. ಪೀ.)] ಸಕ್ಕಾ ಧರೇತವೇ;
ನತ್ವೇವ ತವ ಪಞ್ಞಾಯ, ಪಮಾಣಮತ್ಥಿ ಚಕ್ಖುಮ.
‘‘‘ಆಕಾಸೋ ಮಿನಿತುಂ ಸಕ್ಕಾ, ರಜ್ಜುಯಾ ಅಙ್ಗುಲೇನ ವಾ;
ನತ್ವೇವ ತವ ಸಬ್ಬಞ್ಞು, ಸೀಲಂ ಸಕ್ಕಾ ಪಮೇತವೇ.
‘‘‘ಮಹಾಸಮುದ್ದೇ ¶ ಉದಕಂ, ಆಕಾಸೋ ಚ ವಸುನ್ಧರಾ;
ಪರಿಮೇಯ್ಯಾನಿ ಏತಾನಿ, ಅಪ್ಪಮೇಯ್ಯೋಸಿ ಚಕ್ಖುಮ’.
‘‘ಛಹಿ ¶ ಗಾಥಾಹಿ ಸಬ್ಬಞ್ಞುಂ, ಕಿತ್ತಯಿತ್ವಾ ಮಹಾಯಸಂ;
ಅಞ್ಜಲಿಂ ಪಗ್ಗಹೇತ್ವಾನ, ತುಣ್ಹೀ ಅಟ್ಠಾಸಹಂ ತದಾ.
‘‘ಯಂ ವದನ್ತಿ ಸುಮೇಧೋತಿ, ಭೂರಿಪಞ್ಞಂ ಸುಮೇಧಸಂ;
ಭಿಕ್ಖುಸಙ್ಘೇ ನಿಸೀದಿತ್ವಾ, ಇಮಾ ಗಾಥಾ ಅಭಾಸಥ.
‘‘‘ಯೋ ಮೇ ಞಾಣಂ ಪಕಿತ್ತೇಸಿ, ವಿಪ್ಪಸನ್ನೇನ ಚೇತಸಾ;
ತಮಹಂ ಕಿತ್ತಯಿಸ್ಸಾಮಿ, ಸುಣಾಥ ಮಮ ಭಾಸತೋ.
‘‘‘ಸತ್ತಸತ್ತತಿ ಕಪ್ಪಾನಿ, ದೇವಲೋಕೇ ರಮಿಸ್ಸತಿ;
ಸಹಸ್ಸಕ್ಖತ್ತುಂ ದೇವಿನ್ದೋ, ದೇವರಜ್ಜಂ ಕರಿಸ್ಸತಿ.
‘‘‘ಅನೇಕಸತಕ್ಖತ್ತುಞ್ಚ, ಚಕ್ಕವತ್ತೀ ಭವಿಸ್ಸತಿ;
ಪದೇಸರಜ್ಜಂ ವಿಪುಲಂ, ಗಣನಾತೋ ಅಸಙ್ಖಿಯಂ.
‘‘‘ದೇವಭೂತೋ ¶ ಮನುಸ್ಸೋ ವಾ, ಪುಞ್ಞಕಮ್ಮಸಮಾಹಿತೋ;
ಅನೂನಮನಸಙ್ಕಪ್ಪೋ, ತಿಕ್ಖಪಞ್ಞೋ ಭವಿಸ್ಸತಿ’.
‘‘ತಿಂಸಕಪ್ಪಸಹಸ್ಸಮ್ಹಿ, ಓಕ್ಕಾಕಕುಲಸಮ್ಭವೋ;
ಗೋತಮೋ ನಾಮ ಗೋತ್ತೇನ, ಸತ್ಥಾ ಲೋಕೇ ಭವಿಸ್ಸತಿ.
‘‘ಅಗಾರಾ ಅಭಿನಿಕ್ಖಮ್ಮ, ಪಬ್ಬಜಿಸ್ಸತಿ ಕಿಞ್ಚನೋ;
ಜಾತಿಯಾ ಸತ್ತವಸ್ಸೇನ, ಅರಹತ್ತಂ ಫುಸಿಸ್ಸತಿ.
‘‘ಯತೋ ಸರಾಮಿ ಅತ್ತಾನಂ, ಯತೋ ಪತ್ತೋಸ್ಮಿ ಸಾಸನಂ;
ಏತ್ಥನ್ತರೇ ನ ಜಾನಾಮಿ, ಚೇತನಂ ಅಮನೋರಮಂ.
‘‘ಸಂಸರಿತ್ವಾ ಭವೇ ಸಬ್ಬೇ, ಸಮ್ಪತ್ತಾನುಭವಿಂ ಅಹಂ;
ಭೋಗೇ ¶ ಮೇ ಊನತಾ ನತ್ಥಿ, ಫಲಂ ಞಾಣಸ್ಸ ಥೋಮನೇ.
‘‘ತಿಯಗ್ಗೀ ನಿಬ್ಬುತಾ ಮಯ್ಹಂ, ಭವಾ ಸಬ್ಬೇ ಸಮೂಹತಾ;
ಸಬ್ಬಾಸವಾ ಪರಿಕ್ಖೀಣಾ, ನತ್ಥಿ ದಾನಿ ಪುನಬ್ಭವೋ.
‘‘ತಿಂಸಕಪ್ಪಸಹಸ್ಸಮ್ಹಿ ¶ , ಯಂ ಞಾಣಮಥವಿಂ ಅಹಂ [ಮಭಿಥೋಮಯಿಂ (ಸೀ. ಪೀ.), ಮಭಿಥೋಮಹಂ (ಸ್ಯಾ.)];
ದುಗ್ಗತಿಂ ನಾಭಿಜಾನಾಮಿ, ಫಲಂ ಞಾಣಸ್ಸ ಥೋಮನೇ.
‘‘ಕಿಲೇಸಾ ¶ ಝಾಪಿತಾ ಮಯ್ಹಂ…ಪೇ… ವಿಹರಾಮಿ ಅನಾಸವೋ.
‘‘ಸ್ವಾಗತಂ ವತ ಮೇ ಆಸಿ…ಪೇ… ಕತಂ ಬುದ್ಧಸ್ಸ ಸಾಸನಂ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಞಾಣಥವಿಕೋ ಥೇರೋ ಇಮಾ ಗಾಥಾಯೋ
ಅಭಾಸಿತ್ಥಾತಿ.
ಞಾಣಥವಿಕತ್ಥೇರಸ್ಸಾಪದಾನಂ ಚತುತ್ಥಂ.
೫. ಚನ್ದನಮಾಲಿಯತ್ಥೇರಅಪದಾನಂ
‘‘ಪಞ್ಚ ಕಾಮಗುಣೇ ಹಿತ್ವಾ, ಪಿಯರೂಪೇ ಮನೋರಮೇ;
ಅಸೀತಿಕೋಟಿಯೋ ಹಿತ್ವಾ, ಪಬ್ಬಜಿಂ ಅನಗಾರಿಯಂ.
‘‘ಪಬ್ಬಜಿತ್ವಾನ ಕಾಯೇನ, ಪಾಪಕಮ್ಮಂ ವಿವಜ್ಜಯಿಂ;
ವಚೀದುಚ್ಚರಿತಂ ಹಿತ್ವಾ, ನದೀಕೂಲೇ ವಸಾಮಹಂ.
‘‘ಏಕಕಂ ¶ ಮಂ ವಿಹರನ್ತಂ, ಬುದ್ಧಸೇಟ್ಠೋ ಉಪಾಗಮಿ;
ನಾಹಂ ಜಾನಾಮಿ ಬುದ್ಧೋತಿ, ಅಕಾಸಿಂ ಪಟಿಸನ್ಥರಂ [ಪಟಿಸನ್ಧಾರಂ (ಕ.)].
‘‘ಕರಿತ್ವಾ ಪಟಿಸನ್ಥಾರಂ, ನಾಮಗೋತ್ತಮಪುಚ್ಛಹಂ;
‘ದೇವತಾನುಸಿ ಗನ್ಧಬ್ಬೋ, ಅದು ಸಕ್ಕೋ ಪುರಿನ್ದದೋ.
‘‘‘ಕೋ ವಾ ತ್ವಂ ಕಸ್ಸ ವಾ ಪುತ್ತೋ, ಮಹಾಬ್ರಹ್ಮಾ ಇಧಾಗತೋ;
ವಿರೋಚೇಸಿ ದಿಸಾ ಸಬ್ಬಾ, ಉದಯಂ ಸೂರಿಯೋ ಯಥಾ.
‘‘‘ಸಹಸ್ಸಾರಾನಿ ¶ ಚಕ್ಕಾನಿ, ಪಾದೇ ದಿಸ್ಸನ್ತಿ ಮಾರಿಸ;
ಕೋ ವಾ ತ್ವಂ ಕಸ್ಸ ವಾ ಪುತ್ತೋ, ಕಥಂ ಜಾನೇಮು ತಂ ಮಯಂ;
ನಾಮಗೋತ್ತಂ ಪವೇದೇಹಿ, ಸಂಸಯಂ ಅಪನೇಹಿ ಮೇ’.
‘‘‘ನಮ್ಹಿ ದೇವೋ ನ ಗನ್ಧಬ್ಬೋ, ನಮ್ಹಿ [ನಾಪಿ (ಸೀ.)] ಸಕ್ಕೋ ಪುರಿನ್ದದೋ;
ಬ್ರಹ್ಮಭಾವೋ ಚ ಮೇ ನತ್ಥಿ, ಏತೇಸಂ ಉತ್ತಮೋ ಅಹಂ.
‘‘‘ಅತೀತೋ ವಿಸಯಂ ತೇಸಂ, ದಾಲಯಿಂ ಕಾಮಬನ್ಧನಂ;
ಸಬ್ಬೇ ಕಿಲೇಸೇ ಝಾಪೇತ್ವಾ, ಪತ್ತೋ ಸಮ್ಬೋಧಿಮುತ್ತಮಂ’.
‘‘ತಸ್ಸ ¶ ¶ ವಾಚಂ ಸುಣಿತ್ವಾಹಂ, ಇದಂ ವಚನಮಬ್ರವಿಂ;
‘ಯದಿ ಬುದ್ಧೋತಿ ಸಬ್ಬಞ್ಞೂ, ನಿಸೀದ ತ್ವಂ ಮಹಾಮುನೇ.
‘ತಮಹಂ ಪೂಜಯಿಸ್ಸಾಮಿ, ದುಕ್ಖಸ್ಸನ್ತಕರೋ ತುವಂ’;
‘‘ಪತ್ಥರಿತ್ವಾ ಜಿನಚಮ್ಮಂ, ಅದಾಸಿ ಸತ್ಥುನೋ ಅಹಂ.
‘‘ನಿಸೀದಿ ತತ್ಥ ಭಗವಾ, ಸೀಹೋವ ಗಿರಿಗಬ್ಭರೇ;
ಖಿಪ್ಪಂ ಪಬ್ಬತಮಾರುಯ್ಹ, ಅಮ್ಬಸ್ಸ ಫಲಮಗ್ಗಹಿಂ.
‘‘ಸಾಲಕಲ್ಯಾಣಿಕಂ ಪುಪ್ಫಂ, ಚನ್ದನಞ್ಚ ಮಹಾರಹಂ;
ಖಿಪ್ಪಂ ¶ ಪಗ್ಗಯ್ಹ ತಂ ಸಬ್ಬಂ, ಉಪೇತ್ವಾ ಲೋಕನಾಯಕಂ.
‘‘ಫಲಂ ಬುದ್ಧಸ್ಸ ದತ್ವಾನ, ಸಾಲಪುಪ್ಫಮಪೂಜಯಿಂ;
ಚನ್ದನಂ ಅನುಲಿಮ್ಪಿತ್ವಾ, ಅವನ್ದಿಂ ಸತ್ಥುನೋ ಅಹಂ.
‘‘ಪಸನ್ನಚಿತ್ತೋ ಸುಮನೋ, ವಿಪುಲಾಯ ಚ ಪೀತಿಯಾ;
ಅಜಿನಮ್ಹಿ ನಿಸೀದಿತ್ವಾ, ಸುಮೇಧೋ ಲೋಕನಾಯಕೋ.
‘‘ಮಮ ಕಮ್ಮಂ ಪಕಿತ್ತೇಸಿ, ಹಾಸಯನ್ತೋ ಮಮಂ ತದಾ;
‘ಇಮಿನಾ ಫಲದಾನೇನ, ಗನ್ಧಮಾಲೇಹಿ ಚೂಭಯಂ.
‘‘‘ಪಞ್ಚವೀಸೇ ಕಪ್ಪಸತೇ, ದೇವಲೋಕೇ ರಮಿಸ್ಸತಿ;
ಅನೂನಮನಸಙ್ಕಪ್ಪೋ, ವಸವತ್ತೀ ಭವಿಸ್ಸತಿ.
‘‘‘ಛಬ್ಬೀಸತಿಕಪ್ಪಸತೇ, ಮನುಸ್ಸತ್ತಂ ಗಮಿಸ್ಸತಿ;
ಭವಿಸ್ಸತಿ ಚಕ್ಕವತ್ತೀ, ಚಾತುರನ್ತೋ ಮಹಿದ್ಧಿಕೋ.
‘‘‘ವೇಭಾರಂ ನಾಮ ನಗರಂ, ವಿಸ್ಸಕಮ್ಮೇನ ಮಾಪಿತಂ;
ಹೇಸ್ಸತಿ ಸಬ್ಬಸೋವಣ್ಣಂ, ನಾನಾರತನಭೂಸಿತಂ.
‘‘‘ಏತೇನೇವ ಉಪಾಯೇನ, ಸಂಸರಿಸ್ಸತಿ ಸೋ ಭವೇ [ಯೋನಿಸೋ (ಸ್ಯಾ. ಪೀ.)];
ಸಬ್ಬತ್ಥ ಪೂಜಿತೋ ಹುತ್ವಾ, ದೇವತ್ತೇ ಅಥ ಮಾನುಸೇ.
‘‘‘ಪಚ್ಛಿಮೇ ಭವೇ ಸಮ್ಪತ್ತೇ, ಬ್ರಹ್ಮಬನ್ಧು ಭವಿಸ್ಸತಿ;
ಅಗಾರಾ ಅಭಿನಿಕ್ಖಮ್ಮ, ಅನಗಾರೀ ಭವಿಸ್ಸತಿ;
ಅಭಿಞ್ಞಾಪಾರಗೂ ಹುತ್ವಾ, ನಿಬ್ಬಾಯಿಸ್ಸತಿನಾಸವೋ’.
‘‘ಇದಂ ¶ ವತ್ವಾನ ಸಮ್ಬುದ್ಧೋ, ಸುಮೇಧೋ ಲೋಕನಾಯಕೋ;
ಮಮ ನಿಜ್ಝಾಯಮಾನಸ್ಸ, ಪಕ್ಕಾಮಿ ಅನಿಲಞ್ಜಸೇ.
‘‘ತೇನ ¶ ¶ ಕಮ್ಮೇನ ಸುಕತೇನ, ಚೇತನಾಪಣಿಧೀಹಿ ಚ;
ಜಹಿತ್ವಾ ಮಾನುಸಂ ದೇಹಂ, ತಾವತಿಂಸಮಗಚ್ಛಹಂ.
‘‘ತುಸಿತತೋ ¶ ಚವಿತ್ವಾನ, ನಿಬ್ಬತ್ತಿಂ ಮಾತುಕುಚ್ಛಿಯಂ;
ಭೋಗೇ ಮೇ ಊನತಾ ನತ್ಥಿ, ಯಮ್ಹಿ ಗಬ್ಭೇ ವಸಾಮಹಂ.
‘‘ಮಾತುಕುಚ್ಛಿಗತೇ ಮಯಿ, ಅನ್ನಪಾನಞ್ಚ ಭೋಜನಂ;
ಮಾತುಯಾ ಮಮ ಛನ್ದೇನ, ನಿಬ್ಬತ್ತತಿ ಯದಿಚ್ಛಕಂ.
‘‘ಜಾತಿಯಾ ಪಞ್ಚವಸ್ಸೇನ, ಪಬ್ಬಜಿಂ ಅನಗಾರಿಯಂ;
ಓರೋಪಿತಮ್ಹಿ ಕೇಸಮ್ಹಿ, ಅರಹತ್ತಮಪಾಪುಣಿಂ.
‘‘ಪುಬ್ಬಕಮ್ಮಂ ಗವೇಸನ್ತೋ, ಓರೇನ ನಾದ್ದಸಂ ಅಹಂ;
ತಿಂಸಕಪ್ಪಸಹಸ್ಸಮ್ಹಿ, ಮಮ ಕಮ್ಮಮನುಸ್ಸರಿಂ.
‘‘ನಮೋ ತೇ ಪುರಿಸಾಜಞ್ಞ, ನಮೋ ತೇ ಪುರಿಸುತ್ತಮ;
ತವ ಸಾಸನಮಾಗಮ್ಮ, ಪತ್ತೋಮ್ಹಿ ಅಚಲಂ ಪದಂ.
‘‘ತಿಂಸಕಪ್ಪಸಹಸ್ಸಮ್ಹಿ, ಯಂ ಬುದ್ಧಮಭಿಪೂಜಯಿಂ;
ದುಗ್ಗತಿಂ ನಾಭಿಜಾನಾಮಿ, ಬುದ್ಧಪೂಜಾಯಿದಂ ಫಲಂ.
‘‘ಕಿಲೇಸಾ ಝಾಪಿತಾ ಮಯ್ಹಂ…ಪೇ… ವಿಹರಾಮಿ ಅನಾಸವೋ.
‘‘ಸ್ವಾಗತಂ ವತ ಮೇ ಆಸಿ…ಪೇ… ಕತಂ ಬುದ್ಧಸ್ಸ ಸಾಸನಂ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ¶ ಸುದಂ ಆಯಸ್ಮಾ ಚನ್ದನಮಾಲಿಯೋ ಥೇರೋ ಇಮಾ ಗಾಥಾಯೋ
ಅಭಾಸಿತ್ಥಾತಿ.
ಚನ್ದನಮಾಲಿಯತ್ಥೇರಸ್ಸಾಪದಾನಂ ಪಞ್ಚಮಂ.
೬. ಧಾತುಪೂಜಕತ್ಥೇರಅಪದಾನಂ
‘‘ನಿಬ್ಬುತೇ ಲೋಕನಾಥಮ್ಹಿ, ಸಿದ್ಧತ್ಥೇ ಲೋಕನಾಯಕೇ;
ಮಮ ಞಾತೀ ಸಮಾನೇತ್ವಾ, ಧಾತುಪೂಜಂ ಅಕಾಸಹಂ.
‘‘ಚತುನ್ನವುತಿತೋ ಕಪ್ಪೇ, ಯಂ ಧಾತುಮಭಿಪೂಜಯಿಂ;
ದುಗ್ಗತಿಂ ನಾಭಿಜಾನಾಮಿ, ಧಾತುಪೂಜಾಯಿದಂ ಫಲಂ.
‘‘ಕಿಲೇಸಾ ¶ ಝಾಪಿತಾ ಮಯ್ಹಂ…ಪೇ… ವಿಹರಾಮಿ ಅನಾಸವೋ.
‘‘ಸ್ವಾಗತಂ ವತ ಮೇ ಆಸಿ…ಪೇ… ಕತಂ ಬುದ್ಧಸ್ಸ ಸಾಸನಂ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಧಾತುಪೂಜಕೋ ಥೇರೋ ಇಮಾ ಗಾಥಾಯೋ
ಅಭಾಸಿತ್ಥಾತಿ.
ಧಾತುಪೂಜಕತ್ಥೇರಸ್ಸಾಪದಾನಂ ಛಟ್ಠಂ.
೭. ಪುಲಿನುಪ್ಪಾದಕತ್ಥೇರಅಪದಾನಂ
‘‘ಪಬ್ಬತೇ ¶ ¶ ಹಿಮವನ್ತಮ್ಹಿ, ದೇವಲೋ ನಾಮ ತಾಪಸೋ;
ತತ್ಥ ಮೇ ಚಙ್ಕಮೋ ಆಸಿ, ಅಮನುಸ್ಸೇಹಿ ಮಾಪಿತೋ.
‘‘ಜಟಾಭಾರೇನ ¶ [ಜಟಾಭಾರಸ್ಸ (ಸ್ಯಾ. ಕ.)] ಭರಿತೋ, ಕಮಣ್ಡಲುಧರೋ ಸದಾ;
ಉತ್ತಮತ್ಥಂ ಗವೇಸನ್ತೋ, ವಿಪಿನಾ ನಿಕ್ಖಮಿಂ ತದಾ.
‘‘ಚುಲ್ಲಾಸೀತಿಸಹಸ್ಸಾನಿ, ಸಿಸ್ಸಾ ಮಯ್ಹಂ ಉಪಟ್ಠಹುಂ;
ಸಕಕಮ್ಮಾಭಿಪಸುತಾ, ವಸನ್ತಿ ವಿಪಿನೇ ತದಾ.
‘‘ಅಸ್ಸಮಾ ಅಭಿನಿಕ್ಖಮ್ಮ, ಅಕಂ ಪುಲಿನಚೇತಿಯಂ;
ನಾನಾಪುಪ್ಫಂ ಸಮಾನೇತ್ವಾ, ತಂ ಚೇತಿಯಮಪೂಜಯಿಂ.
‘‘ತತ್ಥ ಚಿತ್ತಂ ಪಸಾದೇತ್ವಾ, ಅಸ್ಸಮಂ ಪವಿಸಾಮಹಂ;
ಸಬ್ಬೇ ಸಿಸ್ಸಾ ಸಮಾಗನ್ತ್ವಾ, ಏತಮತ್ಥಂ ಪುಚ್ಛಿಂಸು ಮಂ [ಏತಮತ್ಥಮಪುಚ್ಛು ಮಂ (ಸೀ.), ಏತಮತ್ತಂ ಅಪುಚ್ಛಿಂಸು (ಸ್ಯಾ. ಕ.)].
‘‘‘ಪುಲಿನೇನ ಕತೋ ಥೂಪೋ [ಕತೋ ಥೂಪೇ (ಸೀ.)], ಯಂ ತ್ವಂ ದೇವ [ದೇವಂ (ಸೀ. ಪೀ.)] ಮಸ್ಸತಿ;
ಮಯಮ್ಪಿ ಞಾತುಮಿಚ್ಛಾಮ, ಪುಟ್ಠೋ ಆಚಿಕ್ಖ ನೋ ತುವಂ’.
‘‘‘ನಿದ್ದಿಟ್ಠಾ ನು [ನಿದ್ದಿಟ್ಠಾ ನೋ (ಸೀ. ಪೀ.), ದಿಟ್ಠಾನೋ ವೋ (ಸ್ಯಾ.)] ಮನ್ತಪದೇ, ಚಕ್ಖುಮನ್ತೋ ಮಹಾಯಸಾ;
ತೇ ಖೋ ಅಹಂ ನಮಸ್ಸಾಮಿ, ಬುದ್ಧಸೇಟ್ಠೇ ಮಹಾಯಸೇ’.
‘‘‘ಕೀದಿಸಾ ತೇ ಮಹಾವೀರಾ, ಸಬ್ಬಞ್ಞೂ ಲೋಕನಾಯಕಾ;
ಕಥಂವಣ್ಣಾ ಕಥಂಸೀಲಾ, ಕೀದಿಸಾ ತೇ ಮಹಾಯಸಾ’.
‘‘‘ಬಾತ್ತಿಂಸಲಕ್ಖಣಾ ¶ ಬುದ್ಧಾ, ಚತ್ತಾಲೀಸದಿಜಾಪಿ ಚ;
ನೇತ್ತಾ ಗೋಪಖುಮಾ ತೇಸಂ, ಜಿಞ್ಜುಕಾ ಫಲಸನ್ನಿಭಾ.
‘‘‘ಗಚ್ಛಮಾನಾ ಚ ತೇ ಬುದ್ಧಾ, ಯುಗಮತ್ತಞ್ಚ ಪೇಕ್ಖರೇ;
ನ ತೇಸಂ ಜಾಣು ನದತಿ, ಸನ್ಧಿಸದ್ದೋ ನ ಸುಯ್ಯತಿ.
‘‘‘ಗಚ್ಛಮಾನಾ ಚ ಸುಗತಾ, ಉದ್ಧರನ್ತಾವ ಗಚ್ಛರೇ;
ಪಠಮಂ ದಕ್ಖಿಣಂ ಪಾದಂ, ಬುದ್ಧಾನಂ ಏಸ ಧಮ್ಮತಾ.
‘‘‘ಅಸಮ್ಭೀತಾ ¶ ಚ ತೇ ಬುದ್ಧಾ, ಮಿಗರಾಜಾವ ಕೇಸರೀ;
ನೇವುಕ್ಕಂಸೇನ್ತಿ ಅತ್ತಾನಂ, ನೋ ಚ ವಮ್ಭೇನ್ತಿ ಪಾಣಿನಂ.
‘‘‘ಮಾನಾವಮಾನತೋ ಮುತ್ತಾ, ಸಮಾ ಸಬ್ಬೇಸು ಪಾಣಿಸು;
ಅನತ್ತುಕ್ಕಂಸಕಾ ಬುದ್ಧಾ, ಬುದ್ಧಾನಂ ಏಸ ಧಮ್ಮತಾ.
‘‘‘ಉಪ್ಪಜ್ಜನ್ತಾ ¶ ಚ ಸಮ್ಬುದ್ಧಾ, ಆಲೋಕಂ ದಸ್ಸಯನ್ತಿ ತೇ;
ಛಪ್ಪಕಾರಂ ಪಕಮ್ಪೇನ್ತಿ, ಕೇವಲಂ ವಸುಧಂ ಇಮಂ.
‘‘‘ಪಸ್ಸನ್ತಿ ¶ ನಿರಯಞ್ಚೇತೇ, ನಿಬ್ಬಾತಿ ನಿರಯೋ ತದಾ;
ಪವಸ್ಸತಿ ಮಹಾಮೇಘೋ, ಬುದ್ಧಾನಂ ಏಸ ಧಮ್ಮತಾ.
‘‘‘ಈದಿಸಾ ತೇ ಮಹಾನಾಗಾ, ಅತುಲಾ ಚ [ತೇ (ಸ್ಯಾ. ಕ.)] ಮಹಾಯಸಾ;
ವಣ್ಣತೋ ಅನತಿಕ್ಕನ್ತಾ, ಅಪ್ಪಮೇಯ್ಯಾ ತಥಾಗತಾ’.
‘‘‘ಅನುಮೋದಿಂಸು ಮೇ ವಾಕ್ಯಂ, ಸಬ್ಬೇ ಸಿಸ್ಸಾ ಸಗಾರವಾ;
ತಥಾ ಚ ಪಟಿಪಜ್ಜಿಂಸು, ಯಥಾಸತ್ತಿ ಯಥಾಬಲಂ’.
‘‘ಪಟಿಪೂಜೇನ್ತಿ ಪುಲಿನಂ, ಸಕಕಮ್ಮಾಭಿಲಾಸಿನೋ;
ಸದ್ದಹನ್ತಾ ಮಮ ವಾಕ್ಯಂ, ಬುದ್ಧಸಕ್ಕತಮಾನಸಾ [ಬುದ್ಧತ್ತಗತಮಾನಸಾ (ಸೀ. ಸ್ಯಾ. ಪೀ.)].
‘‘ತದಾ ಚವಿತ್ವಾ ತುಸಿತಾ, ದೇವಪುತ್ತೋ ಮಹಾಯಸೋ;
ಉಪ್ಪಜ್ಜಿ ಮಾತುಕುಚ್ಛಿಮ್ಹಿ, ದಸಸಹಸ್ಸಿ ಕಮ್ಪಥ.
‘‘ಅಸ್ಸಮಸ್ಸಾವಿದೂರಮ್ಹಿ, ಚಙ್ಕಮಮ್ಹಿ ಠಿತೋ ಅಹಂ;
ಸಬ್ಬೇ ಸಿಸ್ಸಾ ಸಮಾಗನ್ತ್ವಾ, ಆಗಚ್ಛುಂ ಮಮ ಸನ್ತಿಕೇ.
‘‘ಉಸಭೋವ ಮಹೀ ನದತಿ, ಮಿಗರಾಜಾವ ಕೂಜತಿ;
ಸುಸುಮಾರೋವ [ಸುಂಸುಮಾರೋವ (ಸೀ. ಸ್ಯಾ. ಪೀ.)] ಸಳತಿ, ಕಿಂ ವಿಪಾಕೋ ಭವಿಸ್ಸತಿ.
‘‘ಯಂ ¶ ¶ ಪಕಿತ್ತೇಮಿ ಸಮ್ಬುದ್ಧಂ, ಸಿಕತಾಥೂಪಸನ್ತಿಕೇ;
ಸೋ ದಾನಿ ಭಗವಾ ಸತ್ಥಾ, ಮಾತುಕುಚ್ಛಿಮುಪಾಗಮಿ.
‘‘ತೇಸಂ ಧಮ್ಮಕಥಂ ವತ್ವಾ, ಕಿತ್ತಯಿತ್ವಾ ಮಹಾಮುನಿಂ;
ಉಯ್ಯೋಜೇತ್ವಾ ಸಕೇ ಸಿಸ್ಸೇ, ಪಲ್ಲಙ್ಕಮಾಭುಜಿಂ ಅಹಂ.
‘‘ಬಲಞ್ಚ ವತ ಮೇ ಖೀಣಂ, ಬ್ಯಾಧಿನಾ [ಬ್ಯಾಧಿತೋ (ಸೀ. ಸ್ಯಾ. ಪೀ. ಕ.)] ಪರಮೇನ ತಂ;
ಬುದ್ಧಸೇಟ್ಠಂ ಸರಿತ್ವಾನ, ತತ್ಥ ಕಾಲಙ್ಕತೋ [ಕಾಲಕತೋ (ಸೀ. ಪೀ.)] ಅಹಂ.
‘‘ಸಬ್ಬೇ ಸಿಸ್ಸಾ ಸಮಾಗನ್ತ್ವಾ, ಅಕಂಸು ಚಿತಕಂ ತದಾ;
ಕಳೇವರಞ್ಚ ಮೇ ಗಯ್ಹ, ಚಿತಕಂ ಅಭಿರೋಪಯುಂ.
‘‘ಚಿತಕಂ ಪರಿವಾರೇತ್ವಾ, ಸೀಸೇ ಕತ್ವಾನ ಅಞ್ಜಲಿಂ;
ಸೋಕಸಲ್ಲಪರೇತಾ ತೇ, ವಿಕ್ಕನ್ದಿಂಸು ಸಮಾಗತಾ.
‘‘ತೇಸಂ ಲಾಲಪ್ಪಮಾನಾನಂ, ಅಗಮಂ ಚಿತಕಂ ತದಾ;
‘ಅಹಂ ಆಚರಿಯೋ ತುಮ್ಹಂ, ಮಾ ಸೋಚಿತ್ಥ ಸುಮೇಧಸಾ.
‘‘‘ಸದತ್ಥೇ ¶ ವಾಯಮೇಯ್ಯಾಥ, ರತ್ತಿನ್ದಿವಮತನ್ದಿತಾ;
ಮಾ ವೋ ಪಮತ್ತಾ ಅಹುತ್ಥ [ಅಹುವತ್ಥ (ಸೀ.)], ಖಣೋ ವೋ ಪಟಿಪಾದಿತೋ’.
‘‘ಸಕೇ ಸಿಸ್ಸೇನುಸಾಸಿತ್ವಾ, ದೇವಲೋಕಂ ಪುನಾಗಮಿಂ;
ಅಟ್ಠಾರಸ ಚ ಕಪ್ಪಾನಿ, ದೇವಲೋಕೇ ರಮಾಮಹಂ.
‘‘ಸತಾನಂ ¶ ಪಞ್ಚಕ್ಖತ್ತುಞ್ಚ, ಚಕ್ಕವತ್ತೀ ಅಹೋಸಹಂ;
ಅನೇಕಸತಕ್ಖತ್ತುಞ್ಚ, ದೇವರಜ್ಜಮಕಾರಯಿಂ.
‘‘ಅವಸೇಸೇಸು ಕಪ್ಪೇಸು, ವೋಕಿಣ್ಣೋ [ವೋಕಿಣ್ಣಂ (ಸೀ. ಸ್ಯಾ. ಕ.)] ಸಂಸರಿಂ ಅಹಂ;
ದುಗ್ಗತಿಂ ನಾಭಿಜಾನಾಮಿ, ಉಪ್ಪಾದಸ್ಸ ಇದಂ ಫಲಂ [ಪುಲಿನಪೂಜಾಯಿದಂ ಫಲಂ (ಸೀ.)].
‘‘ಯಥಾ ¶ ಕೋಮುದಿಕೇ ಮಾಸೇ, ಬಹೂ ಪುಪ್ಫನ್ತಿ ಪಾದಪಾ;
ತಥೇವಾಹಮ್ಪಿ ಸಮಯೇ, ಪುಪ್ಫಿತೋಮ್ಹಿ ಮಹೇಸಿನಾ.
‘‘ವೀರಿಯಂ ಮೇ ಧುರಧೋರಯ್ಹಂ, ಯೋಗಕ್ಖೇಮಾಧಿವಾಹನಂ;
ನಾಗೋವ ಬನ್ಧನಂ ಛೇತ್ವಾ, ವಿಹರಾಮಿ ಅನಾಸವೋ.
‘‘ಸತಸಹಸ್ಸಿತೋ ಕಪ್ಪೇ, ಯಂ ಬುದ್ಧಮಭಿಕಿತ್ತಯಿಂ;
ದುಗ್ಗತಿಂ ನಾಭಿಜಾನಾಮಿ, ಕಿತ್ತನಾಯ ಇದಂ ಫಲಂ.
‘‘ಕಿಲೇಸಾ ¶ ಝಾಪಿತಾ ಮಯ್ಹಂ…ಪೇ… ವಿಹರಾಮಿ ಅನಾಸವೋ.
‘‘ಸ್ವಾಗತಂ ವತ ಮೇ ಆಸಿ…ಪೇ… ಕತಂ ಬುದ್ಧಸ್ಸ ಸಾಸನಂ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಪುಲಿನುಪ್ಪಾದಕೋ ಥೇರೋ ಇಮಾ ಗಾಥಾಯೋ
ಅಭಾಸಿತ್ಥಾತಿ.
ಪುಲಿನುಪ್ಪಾದಕತ್ಥೇರಸ್ಸಾಪದಾನಂ ಸತ್ತಮಂ.
೮. ತರಣಿಯತ್ಥೇರಅಪದಾನಂ
‘‘ಅತ್ಥದಸ್ಸೀ ತು ಭಗವಾ, ಸಯಮ್ಭೂ ಲೋಕನಾಯಕೋ;
ವಿನತಾ ನದಿಯಾ ತೀರಂ [ತೀರೇ (ಸ್ಯಾ. ಪೀ. ಕ.)], ಉಪಾಗಚ್ಛಿ ತಥಾಗತೋ.
‘‘ಉದಕಾ ಅಭಿನಿಕ್ಖಮ್ಮ, ಕಚ್ಛಪೋ ವಾರಿಗೋಚರೋ;
ಬುದ್ಧಂ ತಾರೇತುಕಾಮೋಹಂ, ಉಪೇಸಿಂ ಲೋಕನಾಯಕಂ.
‘‘‘ಅಭಿರೂಹತು ¶ ¶ ಮಂ ಬುದ್ಧೋ, ಅತ್ಥದಸ್ಸೀ ಮಹಾಮುನಿ;
ಅಹಂ ತಂ ತಾರಯಿಸ್ಸಾಮಿ, ದುಕ್ಖಸ್ಸನ್ತಕರೋ ತುವಂ’.
‘‘ಮಮ ಸಙ್ಕಪ್ಪಮಞ್ಞಾಯ, ಅತ್ಥದಸ್ಸೀ ಮಹಾಯಸೋ;
ಅಭಿರೂಹಿತ್ವಾ ಮೇ ಪಿಟ್ಠಿಂ, ಅಟ್ಠಾಸಿ ಲೋಕನಾಯಕೋ.
‘‘ಯತೋ ಸರಾಮಿ ಅತ್ತಾನಂ, ಯತೋ ಪತ್ತೋಸ್ಮಿ ವಿಞ್ಞುತಂ;
ಸುಖಂ ಮೇ ತಾದಿಸಂ ನತ್ಥಿ, ಫುಟ್ಠೇ ಪಾದತಲೇ ಯಥಾ.
‘‘ಉತ್ತರಿತ್ವಾನ ಸಮ್ಬುದ್ಧೋ, ಅತ್ಥದಸ್ಸೀ ಮಹಾಯಸೋ;
ನದೀತೀರಮ್ಹಿ ಠತ್ವಾನ, ಇಮಾ ಗಾಥಾ ಅಭಾಸಥ.
‘‘‘ಯಾವತಾ ¶ ವತ್ತತೇ ಚಿತ್ತಂ, ಗಙ್ಗಾಸೋತಂ ತರಾಮಹಂ;
ಅಯಞ್ಚ ಕಚ್ಛಪೋ ರಾಜಾ, ತಾರೇಸಿ ಮಮ ಪಞ್ಞವಾ.
‘‘‘ಇಮಿನಾ ಬುದ್ಧತರಣೇನ, ಮೇತ್ತಚಿತ್ತವತಾಯ ಚ;
ಅಟ್ಠಾರಸೇ ಕಪ್ಪಸತೇ, ದೇವಲೋಕೇ ರಮಿಸ್ಸತಿ.
‘‘‘ದೇವಲೋಕಾ ಇಧಾಗನ್ತ್ವಾ, ಸುಕ್ಕಮೂಲೇನ ಚೋದಿತೋ;
ಏಕಾಸನೇ ನಿಸೀದಿತ್ವಾ, ಕಙ್ಖಾಸೋತಂ ತರಿಸ್ಸತಿ.
‘‘‘ಯಥಾಪಿ ¶ ಭದ್ದಕೇ ಖೇತ್ತೇ, ಬೀಜಂ ಅಪ್ಪಮ್ಪಿ ರೋಪಿತಂ;
ಸಮ್ಮಾಧಾರೇ ಪವಚ್ಛನ್ತೇ, ಫಲಂ ತೋಸೇತಿ ಕಸ್ಸಕಂ [ಕಸ್ಸಕೇ (ಸ್ಯಾ.)].
‘‘‘ತಥೇವಿದಂ ಬುದ್ಧಖೇತ್ತಂ, ಸಮ್ಮಾಸಮ್ಬುದ್ಧದೇಸಿತಂ;
ಸಮ್ಮಾಧಾರೇ ಪವಚ್ಛನ್ತೇ, ಫಲಂ ಮಂ ತೋಸಯಿಸ್ಸತಿ’.
‘‘ಪಧಾನಪಹಿತತ್ತೋಮ್ಹಿ, ಉಪಸನ್ತೋ ನಿರೂಪಧಿ;
ಸಬ್ಬಾಸವೇ ಪರಿಞ್ಞಾಯ, ವಿಹರಾಮಿ ಅನಾಸವೋ.
‘‘ಅಟ್ಠಾರಸೇ ¶ ಕಪ್ಪಸತೇ, ಯಂ ಕಮ್ಮಮಕರಿಂ ತದಾ;
ದುಗ್ಗತಿಂ ನಾಭಿಜಾನಾಮಿ, ತರಣಾಯ ಇದಂ ಫಲಂ.
‘‘ಕಿಲೇಸಾ ಝಾಪಿತಾ ಮಯ್ಹಂ…ಪೇ… ವಿಹರಾಮಿ ಅನಾಸವೋ.
‘‘ಸ್ವಾಗತಂ ವತ ಮೇ ಆಸಿ…ಪೇ… ಕತಂ ಬುದ್ಧಸ್ಸ ಸಾಸನಂ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ತರಣಿಯೋ ಥೇರೋ ಇಮಾ ಗಾಥಾಯೋ
ಅಭಾಸಿತ್ಥಾತಿ.
ತರಣಿಯತ್ಥೇರಸ್ಸಾಪದಾನಂ ಅಟ್ಠಮಂ.
೯. ಧಮ್ಮರುಚಿಯತ್ಥೇರಅಪದಾನಂ
‘‘ಯದಾ ¶ ದೀಪಙ್ಕರೋ ಬುದ್ಧೋ, ಸುಮೇಧಂ ಬ್ಯಾಕರೀ ಜಿನೋ;
‘ಅಪರಿಮೇಯ್ಯೇ ಇತೋ ಕಪ್ಪೇ, ಅಯಂ ಬುದ್ಧೋ ಭವಿಸ್ಸತಿ.
‘‘‘ಇಮಸ್ಸ ಜನಿಕಾ ಮಾತಾ, ಮಾಯಾ ನಾಮ ಭವಿಸ್ಸತಿ;
ಪಿತಾ ಸುದ್ಧೋದನೋ ನಾಮ, ಅಯಂ ಹೇಸ್ಸತಿ ಗೋತಮೋ.
‘‘‘ಪಧಾನಂ ಪದಹಿತ್ವಾನ, ಕತ್ವಾ ದುಕ್ಕರಕಾರಿಕಂ;
ಅಸ್ಸತ್ಥಮೂಲೇ ಸಮ್ಬುದ್ಧೋ, ಬುಜ್ಝಿಸ್ಸತಿ ಮಹಾಯಸೋ.
‘‘‘ಉಪತಿಸ್ಸೋ ಕೋಲಿತೋ ಚ, ಅಗ್ಗಾ ಹೇಸ್ಸನ್ತಿ ಸಾವಕಾ;
ಆನನ್ದೋ ನಾಮ ನಾಮೇನ [ಆನನ್ದೋ ನಾಮುಪಟ್ಠಾಕೋ (ಸ್ಯಾ.)], ಉಪಟ್ಠಿಸ್ಸತಿಮಂ ಜಿನಂ.
‘‘‘ಖೇಮಾ ¶ ಉಪ್ಪಲವಣ್ಣಾ ಚ, ಅಗ್ಗಾ ಹೇಸ್ಸನ್ತಿ ಸಾವಿಕಾ;
ಚಿತ್ತೋ ಆಳವಕೋ ಚೇವ, ಅಗ್ಗಾ ಹೇಸ್ಸನ್ತುಪಾಸಕಾ.
‘‘‘ಖುಜ್ಜುತ್ತರಾ ¶ ನನ್ದಮಾತಾ, ಅಗ್ಗಾ ಹೇಸ್ಸನ್ತುಪಾಸಿಕಾ;
ಬೋಧಿ ಇಮಸ್ಸ ವೀರಸ್ಸ, ಅಸ್ಸತ್ಥೋತಿ ಪವುಚ್ಚತಿ’.
‘‘ಇದಂ ¶ ಸುತ್ವಾನ ವಚನಂ, ಅಸಮಸ್ಸ ಮಹೇಸಿನೋ;
ಆಮೋದಿತಾ ನರಮರೂ, ನಮಸ್ಸನ್ತಿ ಕತಞ್ಜಲೀ.
‘‘ತದಾಹಂ ಮಾಣವೋ ಆಸಿಂ, ಮೇಘೋ ನಾಮ ಸುಸಿಕ್ಖಿತೋ;
ಸುತ್ವಾ ಬ್ಯಾಕರಣಂ ಸೇಟ್ಠಂ, ಸುಮೇಧಸ್ಸ ಮಹಾಮುನೇ.
‘‘ಸಂವಿಸಟ್ಠೋ ಭವಿತ್ವಾನ, ಸುಮೇಧೇ ಕರುಣಾಸಯೇ [ಕರುಣಾಲಯೇ (ಸ್ಯಾ.)];
ಪಬ್ಬಜನ್ತಞ್ಚ ತಂ ವೀರಂ, ಸಹಾವ ಅನುಪಬ್ಬಜಿಂ.
‘‘ಸಂವುತೋ ಪಾತಿಮೋಕ್ಖಸ್ಮಿಂ, ಇನ್ದ್ರಿಯೇಸು ಚ ಪಞ್ಚಸು;
ಸುದ್ಧಾಜೀವೋ ಸತೋ ವೀರೋ, ಜಿನಸಾಸನಕಾರಕೋ.
‘‘ಏವಂ ವಿಹರಮಾನೋಹಂ, ಪಾಪಮಿತ್ತೇನ ಕೇನಚಿ;
ನಿಯೋಜಿತೋ ಅನಾಚಾರೇ, ಸುಮಗ್ಗಾ ಪರಿಧಂಸಿತೋ.
‘‘ವಿತಕ್ಕವಸಿಕೋ ಹುತ್ವಾ, ಸಾಸನತೋ ಅಪಕ್ಕಮಿಂ;
ಪಚ್ಛಾ ತೇನ ಕುಮಿತ್ತೇನ, ಪಯುತ್ತೋ ಮಾತುಘಾತನಂ.
‘‘ಅಕರಿಂ ಆನನ್ತರಿಯಂ [ಅಕರಿಂ ನನ್ತರಿಯಞ್ಚ (ಸ್ಯಾ. ಕ.)], ಘಾತಯಿಂ ದುಟ್ಠಮಾನಸೋ;
ತತೋ ಚುತೋ ಮಹಾವೀಚಿಂ, ಉಪಪನ್ನೋ ಸುದಾರುಣಂ.
‘‘ವಿನಿಪಾತಗತೋ ¶ ಸನ್ತೋ, ಸಂಸರಿಂ ದುಕ್ಖಿತೋ ಚಿರಂ;
ನ ಪುನೋ ಅದ್ದಸಂ ವೀರಂ, ಸುಮೇಧಂ ನರಪುಙ್ಗವಂ.
‘‘ಅಸ್ಮಿಂ ¶ ಕಪ್ಪೇ ಸಮುದ್ದಮ್ಹಿ, ಮಚ್ಛೋ ಆಸಿಂ ತಿಮಿಙ್ಗಲೋ;
ದಿಸ್ವಾಹಂ ಸಾಗರೇ ನಾವಂ, ಗೋಚರತ್ಥಮುಪಾಗಮಿಂ.
‘‘ದಿಸ್ವಾ ಮಂ ವಾಣಿಜಾ ಭೀತಾ, ಬುದ್ಧಸೇಟ್ಠಮನುಸ್ಸರುಂ;
ಗೋತಮೋತಿ ಮಹಾಘೋಸಂ, ಸುತ್ವಾ ತೇಹಿ ಉದೀರಿತಂ.
‘‘ಪುಬ್ಬಸಞ್ಞಂ ಸರಿತ್ವಾನ, ತತೋ ಕಾಲಙ್ಕತೋ ಅಹಂ;
ಸಾವತ್ಥಿಯಂ ಕುಲೇ ಇದ್ಧೇ, ಜಾತೋ ಬ್ರಾಹ್ಮಣಜಾತಿಯಂ.
‘‘ಆಸಿಂ ಧಮ್ಮರುಚಿ ನಾಮ, ಸಬ್ಬಪಾಪಜಿಗುಚ್ಛಕೋ;
ದಿಸ್ವಾಹಂ ಲೋಕಪಜ್ಜೋತಂ, ಜಾತಿಯಾ ಸತ್ತವಸ್ಸಿಕೋ.
‘‘ಮಹಾಜೇತವನಂ ¶ ಗನ್ತ್ವಾ, ಪಬ್ಬಜಿಂ ಅನಗಾರಿಯಂ;
ಉಪೇಮಿ ಬುದ್ಧಂ ತಿಕ್ಖತ್ತುಂ, ರತ್ತಿಯಾ ದಿವಸಸ್ಸ ಚ.
‘‘ತದಾ ದಿಸ್ವಾ ಮುನಿ ಆಹ, ಚಿರಂ ಧಮ್ಮರುಚೀತಿ ಮಂ;
ತತೋಹಂ ಅವಚಂ ಬುದ್ಧಂ, ಪುಬ್ಬಕಮ್ಮಪಭಾವಿತಂ.
‘‘ಸುಚಿರಂ ಸತಪುಞ್ಞಲಕ್ಖಣಂ, ಪತಿಪುಬ್ಬೇನ ವಿಸುದ್ಧಪಚ್ಚಯಂ;
ಅಹಮಜ್ಜಸುಪೇಕ್ಖನಂ ¶ ವತ, ತವ ಪಸ್ಸಾಮಿ ನಿರುಪಮಂ ವಿಗ್ಗಹಂ [ನಿರೂಪಮಗ್ಗಹಂ (ಸೀ.)].
‘‘ಸುಚಿರಂ ವಿಹತತ್ತಮೋ ಮಯಾ, ಸುಚಿರಕ್ಖೇನ ನದೀ ವಿಸೋಸಿತಾ;
ಸುಚಿರಂ ಅಮಲಂ ವಿಸೋಧಿತಂ, ನಯನಂ ಞಾಣಮಯಂ ಮಹಾಮುನೇ.
‘‘ಚಿರಕಾಲಸಮಙ್ಗಿತೋ ¶ [ಚಿರಕಾಲಂ ಸಮಾಗತೋ (ಪೀ.)] ತಯಾ, ಅವಿನಟ್ಠೋ ಪುನರನ್ತರಂ ಚಿರಂ;
ಪುನರಜ್ಜಸಮಾಗತೋ ತಯಾ, ನ ಹಿ ನಸ್ಸನ್ತಿ ಕತಾನಿ ಗೋತಮ.
‘‘ಕಿಲೇಸಾ ಝಾಪಿತಾ ಮಯ್ಹಂ…ಪೇ… ವಿಹರಾಮಿ ಅನಾಸವೋ.
‘‘ಸ್ವಾಗತಂ ವತ ಮೇ ಆಸಿ…ಪೇ… ಕತಂ ಬುದ್ಧಸ್ಸ ಸಾಸನಂ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಧಮ್ಮರುಚಿಯೋ ಥೇರೋ ಇಮಾ ಗಾಥಾಯೋ
ಅಭಾಸಿತ್ಥಾತಿ.
ಧಮ್ಮರುಚಿಯತ್ಥೇರಸ್ಸಾಪದಾನಂ ನವಮಂ.
೧೦. ಸಾಲಮಣ್ಡಪಿಯತ್ಥೇರಅಪದಾನಂ
‘‘ಅಜ್ಝೋಗಾಹೇತ್ವಾ ¶ ಸಾಲವನಂ, ಸುಕತೋ ಅಸ್ಸಮೋ ಮಮ;
ಸಾಲಪುಪ್ಫೇಹಿ ಸಞ್ಛನ್ನೋ, ವಸಾಮಿ ವಿಪಿನೇ ತದಾ.
‘‘ಪಿಯದಸ್ಸೀ ಚ ಭಗವಾ, ಸಯಮ್ಭೂ ಅಗ್ಗಪುಗ್ಗಲೋ;
ವಿವೇಕಕಾಮೋ ಸಮ್ಬುದ್ಧೋ, ಸಾಲವನಮುಪಾಗಮಿ.
‘‘ಅಸ್ಸಮಾ ಅಭಿನಿಕ್ಖಮ್ಮ, ಪವನಂ ಅಗಮಾಸಹಂ;
ಮೂಲಫಲಂ ಗವೇಸನ್ತೋ, ಆಹಿಣ್ಡಾಮಿ ವನೇ ತದಾ.
‘‘ತತ್ಥದ್ದಸಾಸಿಂ ¶ ಸಮ್ಬುದ್ಧಂ, ಪಿಯದಸ್ಸಿಂ ಮಹಾಯಸಂ;
ಸುನಿಸಿನ್ನಂ ಸಮಾಪನ್ನಂ, ವಿರೋಚನ್ತಂ ಮಹಾವನೇ.
‘‘ಚತುದಣ್ಡೇ ¶ ಠಪೇತ್ವಾನ, ಬುದ್ಧಸ್ಸ ಉಪರೀ ಅಹಂ;
ಮಣ್ಡಪಂ ಸುಕತಂ ಕತ್ವಾ, ಸಾಲಪುಪ್ಫೇಹಿ ಛಾದಯಿಂ.
‘‘ಸತ್ತಾಹಂ ಧಾರಯಿತ್ವಾನ, ಮಣ್ಡಪಂ ಸಾಲಛಾದಿತಂ;
ತತ್ಥ ಚಿತ್ತಂ ಪಸಾದೇತ್ವಾ, ಬುದ್ಧಸೇಟ್ಠಮವನ್ದಹಂ.
‘‘ಭಗವಾ ¶ ತಮ್ಹಿ ಸಮಯೇ, ವುಟ್ಠಹಿತ್ವಾ ಸಮಾಧಿತೋ;
ಯುಗಮತ್ತಂ ಪೇಕ್ಖಮಾನೋ, ನಿಸೀದಿ ಪುರಿಸುತ್ತಮೋ.
‘‘ಸಾವಕೋ ವರುಣೋ ನಾಮ, ಪಿಯದಸ್ಸಿಸ್ಸ ಸತ್ಥುನೋ;
ವಸೀಸತಸಹಸ್ಸೇಹಿ, ಉಪಗಚ್ಛಿ ವಿನಾಯಕಂ.
‘‘ಪಿಯದಸ್ಸೀ ಚ ಭಗವಾ, ಲೋಕಜೇಟ್ಠೋ ನರಾಸಭೋ;
ಭಿಕ್ಖುಸಙ್ಘೇ ನಿಸೀದಿತ್ವಾ, ಸಿತಂ ಪಾತುಕರೀ ಜಿನೋ.
‘‘ಅನುರುದ್ಧೋ ಉಪಟ್ಠಾಕೋ, ಪಿಯದಸ್ಸಿಸ್ಸ ಸತ್ಥುನೋ;
ಏಕಂಸಂ ಚೀವರಂ ಕತ್ವಾ, ಅಪುಚ್ಛಿತ್ಥ ಮಹಾಮುನಿಂ.
‘‘‘ಕೋ ನು ಖೋ ಭಗವಾ ಹೇತು, ಸಿತಕಮ್ಮಸ್ಸ ಸತ್ಥುನೋ;
ಕಾರಣೇ ವಿಜ್ಜಮಾನಮ್ಹಿ, ಸತ್ಥಾ ಪಾತುಕರೇ ಸಿತಂ’.
‘‘‘ಸತ್ತಾಹಂ ಸಾಲಚ್ಛದನಂ [ಪುಪ್ಫಛದನಂ (ಸೀ. ಸ್ಯಾ. ಪೀ.)], ಯೋ ಮೇ ಧಾರೇಸಿ ಮಾಣವೋ;
ತಸ್ಸ ಕಮ್ಮಂ ಸರಿತ್ವಾನ, ಸಿತಂ ಪಾತುಕರಿಂ ಅಹಂ.
‘‘‘ಅನೋಕಾಸಂ ನ ಪಸ್ಸಾಮಿ, ಯತ್ಥ [ಯಂ ತಂ (ಸ್ಯಾ. ಪೀ. ಕ.)] ಪುಞ್ಞಂ ವಿಪಚ್ಚತಿ;
ದೇವಲೋಕೇ ¶ ಮನುಸ್ಸೇ ವಾ, ಓಕಾಸೋವ ನ ಸಮ್ಮತಿ.
‘‘‘ದೇವಲೋಕೇ ¶ ವಸನ್ತಸ್ಸ, ಪುಞ್ಞಕಮ್ಮಸಮಙ್ಗಿನೋ;
ಯಾವತಾ ಪರಿಸಾ ತಸ್ಸ, ಸಾಲಚ್ಛನ್ನಾ ಭವಿಸ್ಸತಿ.
‘‘‘ತತ್ಥ ದಿಬ್ಬೇಹಿ ನಚ್ಚೇಹಿ, ಗೀತೇಹಿ ವಾದಿತೇಹಿ ಚ;
ರಮಿಸ್ಸತಿ ಸದಾ ಸನ್ತೋ, ಪುಞ್ಞಕಮ್ಮಸಮಾಹಿತೋ.
‘‘‘ಯಾವತಾ ಪರಿಸಾ ತಸ್ಸ, ಗನ್ಧಗನ್ಧೀ ಭವಿಸ್ಸತಿ;
ಸಾಲಸ್ಸ ಪುಪ್ಫವಸ್ಸೋ ಚ, ಪವಸ್ಸಿಸ್ಸತಿ ತಾವದೇ.
‘‘‘ತತೋ ಚುತೋಯಂ ಮನುಜೋ, ಮಾನುಸಂ ಆಗಮಿಸ್ಸತಿ;
ಇಧಾಪಿ ಸಾಲಚ್ಛದನಂ, ಸಬ್ಬಕಾಲಂ ಧರಿಸ್ಸತಿ [ಧರಿಯತಿ (ಸೀ. ಪೀ.)].
‘‘‘ಇಧ ¶ ನಚ್ಚಞ್ಚ ಗೀತಞ್ಚ, ಸಮ್ಮತಾಳಸಮಾಹಿತಂ;
ಪರಿವಾರೇಸ್ಸನ್ತಿ ಮಂ ನಿಚ್ಚಂ, ಬುದ್ಧಪೂಜಾಯಿದಂ ಫಲಂ.
‘‘‘ಉಗ್ಗಚ್ಛನ್ತೇ ಚ ಸೂರಿಯೇ, ಸಾಲವಸ್ಸಂ ಪವಸ್ಸತಿ;
ಪುಞ್ಞಕಮ್ಮೇನ ಸಂಯುತ್ತಂ, ವಸ್ಸತೇ ಸಬ್ಬಕಾಲಿಕಂ.
‘‘‘ಅಟ್ಠಾರಸೇ ಕಪ್ಪಸತೇ, ಓಕ್ಕಾಕಕುಲಸಮ್ಭವೋ;
ಗೋತಮೋ ನಾಮ ಗೋತ್ತೇನ, ಸತ್ಥಾ ಲೋಕೇ ಭವಿಸ್ಸತಿ.
‘‘‘ತಸ್ಸ ಧಮ್ಮೇಸು ದಾಯಾದೋ, ಓರಸೋ ಧಮ್ಮನಿಮ್ಮಿತೋ;
ಸಬ್ಬಾಸವೇ ಪರಿಞ್ಞಾಯ, ನಿಬ್ಬಾಯಿಸ್ಸತಿನಾಸವೋ.
‘‘‘ಧಮ್ಮಂ ಅಭಿಸಮೇನ್ತಸ್ಸ, ಸಾಲಚ್ಛನ್ನಂ ಭವಿಸ್ಸತಿ;
ಚಿತಕೇ ಝಾಯಮಾನಸ್ಸ, ಛದನಂ ತತ್ಥ ಹೇಸ್ಸತಿ’.
‘‘ವಿಪಾಕಂ ಕಿತ್ತಯಿತ್ವಾನ, ಪಿಯದಸ್ಸೀ ಮಹಾಮುನಿ;
ಪರಿಸಾಯ ಧಮ್ಮಂ ದೇಸೇಸಿ, ತಪ್ಪೇನ್ತೋ ಧಮ್ಮವುಟ್ಠಿಯಾ.
‘‘ತಿಂಸಕಪ್ಪಾನಿ ¶ ¶ ದೇವೇಸು, ದೇವರಜ್ಜಮಕಾರಯಿಂ;
ಸಟ್ಠಿ ಚ ಸತ್ತಕ್ಖತ್ತುಞ್ಚ, ಚಕ್ಕವತ್ತೀ ಅಹೋಸಹಂ.
‘‘ದೇವಲೋಕಾ ಇಧಾಗನ್ತ್ವಾ, ಲಭಾಮಿ ವಿಪುಲಂ ಸುಖಂ;
ಇಧಾಪಿ ಸಾಲಚ್ಛದನಂ, ಮಣ್ಡಪಸ್ಸ ಇದಂ ಫಲಂ.
‘‘ಅಯಂ ಪಚ್ಛಿಮಕೋ ಮಯ್ಹಂ, ಚರಿಮೋ ವತ್ತತೇ ಭವೋ;
ಇಧಾಪಿ ಸಾಲಚ್ಛದನಂ, ಹೇಸ್ಸತಿ ಸಬ್ಬಕಾಲಿಕಂ.
‘‘ಮಹಾಮುನಿಂ ತೋಸಯಿತ್ವಾ, ಗೋತಮಂ ಸಕ್ಯಪುಙ್ಗವಂ;
ಪತ್ತೋಮ್ಹಿ ಅಚಲಂ ಠಾನಂ, ಹಿತ್ವಾ ಜಯಪರಾಜಯಂ.
‘‘ಅಟ್ಠಾರಸೇ ¶ ಕಪ್ಪಸತೇ, ಯಂ ಬುದ್ಧಮಭಿಪೂಜಯಿಂ;
ದುಗ್ಗತಿಂ ನಾಭಿಜಾನಾಮಿ, ಬುದ್ಧಪೂಜಾಯಿದಂ ಫಲಂ.
ಕಿಲೇಸಾ ಝಾಪಿತಾ ಮಯ್ಹಂ…ಪೇ… ವಿಹರಾಮಿ ಅನಾಸವೋ.
‘‘ಸ್ವಾಗತಂ ವತ ಮೇ ಆಸಿ…ಪೇ… ಕತಂ ಬುದ್ಧಸ್ಸ ಸಾಸನಂ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ¶ ಸುದಂ ಆಯಸ್ಮಾ ಸಾಲಮಣ್ಡಪಿಯೋ ಥೇರೋ ಇಮಾ ಗಾಥಾಯೋ
ಅಭಾಸಿತ್ಥಾತಿ.
ಸಾಲಮಣ್ಡಪಿಯತ್ಥೇರಸ್ಸಾಪದಾನಂ ದಸಮಂ.
ಪಂಸುಕೂಲವಗ್ಗೋ ಏಕೂನಪಞ್ಞಾಸಮೋ.
ತಸ್ಸುದ್ದಾನಂ –
ಪಂಸುಕೂಲಂ ¶ ಬುದ್ಧಸಞ್ಞೀ, ಭಿಸದೋ ಞಾಣಕಿತ್ತಕೋ;
ಚನ್ದನೀ ಧಾತುಪೂಜೀ ಚ, ಪುಲಿನುಪ್ಪಾದಕೋಪಿ ಚ.
ತರಣೋ ಧಮ್ಮರುಚಿಕೋ, ಸಾಲಮಣ್ಡಪಿಯೋ ತಥಾ;
ಸತಾನಿ ದ್ವೇ ಹೋನ್ತಿ ಗಾಥಾ, ಊನವೀಸತಿಮೇವ ಚ.
೫೦. ಕಿಙ್ಕಣಿಪುಪ್ಫವಗ್ಗೋ
೧. ತಿಕಿಙ್ಕಣಿಪುಪ್ಫಿಯತ್ಥೇರಅಪದಾನಂ
‘‘ಕಣಿಕಾರಂವ ¶ ¶ ¶ ಜೋತನ್ತಂ, ನಿಸಿನ್ನಂ ಪಬ್ಬತನ್ತರೇ;
ಅದ್ದಸಂ ವಿರಜಂ ಬುದ್ಧಂ, ವಿಪಸ್ಸಿಂ ಲೋಕನಾಯಕಂ.
‘‘ತೀಣಿ ಕಿಙ್ಕಣಿಪುಪ್ಫಾನಿ, ಪಗ್ಗಯ್ಹ ಅಭಿರೋಪಯಿಂ;
ಸಮ್ಬುದ್ಧಮಭಿಪೂಜೇತ್ವಾ, ಗಚ್ಛಾಮಿ ದಕ್ಖಿಣಾಮುಖೋ.
‘‘ತೇನ ಕಮ್ಮೇನ ಸುಕತೇನ, ಚೇತನಾಪಣಿಧೀಹಿ ಚ;
ಜಹಿತ್ವಾ ಮಾನುಸಂ ದೇಹಂ, ತಾವತಿಂಸಮಗಚ್ಛಹಂ.
‘‘ಏಕನವುತಿತೋ ಕಪ್ಪೇ, ಯಂ ಬುದ್ಧಮಭಿಪೂಜಯಿಂ;
ದುಗ್ಗತಿಂ ನಾಭಿಜಾನಾಮಿ, ಬುದ್ಧಪೂಜಾಯಿದಂ ಫಲಂ.
‘‘ಕಿಲೇಸಾ ¶ ಝಾಪಿತಾ ಮಯ್ಹಂ, ಭವಾ ಸಬ್ಬೇ ಸಮೂಹತಾ;
ನಾಗೋವ ಬನ್ಧನಂ ಛೇತ್ವಾ, ವಿಹರಾಮಿ ಅನಾಸವೋ.
‘‘ಸ್ವಾಗತಂ ವತ ಮೇ ಆಸಿ, ಮಮ ಬುದ್ಧಸ್ಸ ಸನ್ತಿಕೇ;
ತಿಸ್ಸೋ ವಿಜ್ಜಾ ಅನುಪ್ಪತ್ತಾ, ಕತಂ ಬುದ್ಧಸ್ಸ ಸಾಸನಂ.
‘‘ಪಟಿಸಮ್ಭಿದಾ ಚತಸ್ಸೋ, ವಿಮೋಕ್ಖಾಪಿ ಚ ಅಟ್ಠಿಮೇ;
ಛಳಭಿಞ್ಞಾ ಸಚ್ಛಿಕತಾ, ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ತಿಕಿಙ್ಕಣಿಪುಪ್ಫಿಯೋ ಥೇರೋ ಇಮಾ
ಗಾಥಾಯೋ ಅಭಾಸಿತ್ಥಾತಿ.
ತಿಕಿಙ್ಕಣಿಪುಪ್ಫಿಯತ್ಥೇರಸ್ಸಾಪದಾನಂ ಪಠಮಂ.
೨. ಪಂಸುಕೂಲಪೂಜಕತ್ಥೇರಅಪದಾನಂ
‘‘ಹಿಮವನ್ತಸ್ಸಾವಿದೂರೇ ¶ ¶ , ಉದಙ್ಗಣೋ ನಾಮ ಪಬ್ಬತೋ;
ತತ್ಥದ್ದಸಂ ಪಂಸುಕೂಲಂ, ದುಮಗ್ಗಮ್ಹಿ ವಿಲಮ್ಬಿತಂ.
‘‘ತೀಣಿ ಕಿಙ್ಕಣಿಪುಪ್ಫಾನಿ, ಓಚಿನಿತ್ವಾನಹಂ ತದಾ;
ಹಟ್ಠೋ ಹಟ್ಠೇನ ಚಿತ್ತೇನ, ಪಂಸುಕೂಲಮಪೂಜಯಿಂ.
‘‘ತೇನ ಕಮ್ಮೇನ ಸುಕತೇನ, ಚೇತನಾಪಣಿಧೀಹಿ ಚ;
ಜಹಿತ್ವಾ ಮಾನುಸಂ ದೇಹಂ, ತಾವತಿಂಸಮಗಚ್ಛಹಂ.
‘‘ಏಕನವುತಿತೋ ¶ ಕಪ್ಪೇ, ಯಂ ಕಮ್ಮಮಕರಿಂ ತದಾ;
ದುಗ್ಗತಿಂ ನಾಭಿಜಾನಾಮಿ, ಪೂಜಿತ್ವಾ ಅರಹದ್ಧಜಂ.
‘‘ಕಿಲೇಸಾ ಝಾಪಿತಾ ಮಯ್ಹಂ…ಪೇ… ವಿಹರಾಮಿ ಅನಾಸವೋ.
‘‘ಸ್ವಾಗತಂ ವತ ಮೇ ಆಸಿ…ಪೇ… ಕತಂ ಬುದ್ಧಸ್ಸ ಸಾಸನಂ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಪಂಸುಕೂಲಪೂಜಕೋ ಥೇರೋ ಇಮಾ ಗಾಥಾಯೋ
ಅಭಾಸಿತ್ಥಾತಿ.
ಪಂಸುಕೂಲಪೂಜಕತ್ಥೇರಸ್ಸಾಪದಾನಂ ದುತಿಯಂ.
೩. ಕೋರಣ್ಡಪುಪ್ಫಿಯತ್ಥೇರಅಪದಾನಂ
‘‘ವನಕಮ್ಮಿಕೋ ¶ ಪುರೇ ಆಸಿಂ, ಪಿತುಮಾತುಮತೇನಹಂ [ಪಿತುಪೇತಾಮಹೇನಹಂ (ಸೀ. ಸ್ಯಾ. ಪೀ.)];
ಪಸುಮಾರೇನ ಜೀವಾಮಿ, ಕುಸಲಂ ಮೇ ನ ವಿಜ್ಜತಿ.
‘‘ಮಮ ಆಸಯಸಾಮನ್ತಾ, ತಿಸ್ಸೋ ಲೋಕಗ್ಗನಾಯಕೋ;
ಪದಾನಿ ತೀಣಿ ದಸ್ಸೇಸಿ, ಅನುಕಮ್ಪಾಯ ಚಕ್ಖುಮಾ.
‘‘ಅಕ್ಕನ್ತೇ ಚ ಪದೇ ದಿಸ್ವಾ, ತಿಸ್ಸನಾಮಸ್ಸ ಸತ್ಥುನೋ;
ಹಟ್ಠೋ ಹಟ್ಠೇನ ಚಿತ್ತೇನ, ಪದೇ ಚಿತ್ತಂ ಪಸಾದಯಿಂ.
‘‘ಕೋರಣ್ಡಂ ಪುಪ್ಫಿತಂ ದಿಸ್ವಾ, ಪಾದಪಂ ಧರಣೀರುಹಂ;
ಸಕೋಸಕಂ ಗಹೇತ್ವಾನ, ಪದಸೇಟ್ಠಮಪೂಜಯಿಂ [ಪದಸೇಟ್ಠೇ ಅಪೂಜಯಿಂ (ಸೀ. ಪೀ.)].
‘‘ತೇನ ¶ ¶ ಕಮ್ಮೇನ ಸುಕತೇನ, ಚೇತನಾಪಣಿಧೀಹಿ ಚ;
ಜಹಿತ್ವಾ ಮಾನುಸಂ ದೇಹಂ, ತಾವತಿಂಸಮಗಚ್ಛಹಂ.
‘‘ಯಂ ಯಂ ಯೋನುಪಪಜ್ಜಾಮಿ, ದೇವತ್ತಂ ಅಥ ಮಾನುಸಂ;
ಕೋರಣ್ಡಕಛವಿ ಹೋಮಿ, ಸುಪ್ಪಭಾಸೋ [ಸಪಭಾಸೋ (ಸೀ. ಸ್ಯಾ. ಪೀ. ಕ.)] ಭವಾಮಹಂ.
‘‘ದ್ವೇನವುತೇ ಇತೋ ಕಪ್ಪೇ, ಯಂ ಕಮ್ಮಮಕರಿಂ ತದಾ;
ದುಗ್ಗತಿಂ ನಾಭಿಜಾನಾಮಿ, ಪದಪೂಜಾಯಿದಂ ಫಲಂ.
‘‘ಕಿಲೇಸಾ ಝಾಪಿತಾ ಮಯ್ಹಂ…ಪೇ… ವಿಹರಾಮಿ ಅನಾಸವೋ.
‘‘ಸ್ವಾಗತಂ ¶ ವತ ಮೇ ಆಸಿ…ಪೇ… ಕತಂ ಬುದ್ಧಸ್ಸ ಸಾಸನಂ.
‘‘ಪಟಿಸಮ್ಭಿದಾ ¶ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಕೋರಣ್ಡಪುಪ್ಫಿಯೋ ಥೇರೋ ಇಮಾ ಗಾಥಾಯೋ
ಅಭಾಸಿತ್ಥಾತಿ.
ಕೋರಣ್ಡಪುಪ್ಫಿಯತ್ಥೇರಸ್ಸಾಪದಾನಂ ತತಿಯಂ.
೪. ಕಿಂಸುಕಪುಪ್ಫಿಯತ್ಥೇರಅಪದಾನಂ
‘‘ಕಿಂಸುಕಂ ಪುಪ್ಫಿತಂ ದಿಸ್ವಾ, ಪಗ್ಗಹೇತ್ವಾನ ಅಞ್ಜಲಿಂ;
ಬುದ್ಧಸೇಟ್ಠಂ ಸರಿತ್ವಾನ, ಆಕಾಸೇ ಅಭಿಪೂಜಯಿಂ.
‘‘ತೇನ ಕಮ್ಮೇನ ಸುಕತೇನ, ಚೇತನಾಪಣಿಧೀಹಿ ಚ;
ಜಹಿತ್ವಾ ಮಾನುಸಂ ದೇಹಂ, ತಾವತಿಂಸಮಗಚ್ಛಹಂ.
‘‘ಏಕತಿಂಸೇ ಇತೋ ಕಪ್ಪೇ, ಯಂ ಕಮ್ಮಮಕರಿಂ ತದಾ;
ದುಗ್ಗತಿಂ ನಾಭಿಜಾನಾಮಿ, ಬುದ್ಧಪೂಜಾಯಿದಂ ಫಲಂ.
‘‘ಕಿಲೇಸಾ ಝಾಪಿತಾ ಮಯ್ಹಂ…ಪೇ… ವಿಹರಾಮಿ ಅನಾಸವೋ.
‘‘ಸ್ವಾಗತಂ ವತ ಮೇ ಆಸಿ…ಪೇ… ಕತಂ ಬುದ್ಧಸ್ಸ ಸಾಸನಂ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಕಿಂಸುಕಪುಪ್ಫಿಯೋ ಥೇರೋ ಇಮಾ ಗಾಥಾಯೋ
ಅಭಾಸಿತ್ಥಾತಿ.
ಕಿಂಸುಕಪುಪ್ಫಿಯತ್ಥೇರಸ್ಸಾಪದಾನಂ ಚತುತ್ಥಂ.
೫. ಉಪಡ್ಢದುಸ್ಸದಾಯಕತ್ಥೇರಅಪದಾನಂ
‘‘ಪದುಮುತ್ತರಭಗವತೋ ¶ ¶ , ಸುಜಾತೋ ನಾಮ ಸಾವಕೋ;
ಪಂಸುಕೂಲಂ ಗವೇಸನ್ತೋ, ಸಙ್ಕಾರೇ ಚರತೇ [ಚರತೀ (ಸೀ. ಕ.)] ತದಾ.
‘‘ನಗರೇ ಹಂಸವತಿಯಾ, ಪರೇಸಂ ಭತಕೋ ಅಹಂ;
ಉಪಡ್ಢದುಸ್ಸಂ ದತ್ವಾನ, ಸಿರಸಾ ಅಭಿವಾದಯಿಂ.
‘‘ತೇನ ¶ ಕಮ್ಮೇನ ಸುಕತೇನ, ಚೇತನಾಪಣಿಧೀಹಿ ಚ;
ಜಹಿತ್ವಾ ಮಾನುಸಂ ದೇಹಂ, ತಾವತಿಂಸಮಗಚ್ಛಹಂ.
‘‘ತೇತ್ತಿಂಸಕ್ಖತ್ತುಂ ¶ ದೇವಿನ್ದೋ, ದೇವರಜ್ಜಮಕಾರಯಿಂ;
ಸತ್ತಸತ್ತತಿಕ್ಖತ್ತುಞ್ಚ, ಚಕ್ಕವತ್ತೀ ಅಹೋಸಹಂ.
‘‘ಪದೇಸರಜ್ಜಂ ವಿಪುಲಂ, ಗಣನಾತೋ ಅಸಙ್ಖಿಯಂ;
ಉಪಡ್ಢದುಸ್ಸದಾನೇನ, ಮೋದಾಮಿ ಅಕುತೋಭಯೋ.
‘‘ಇಚ್ಛಮಾನೋ ಚಹಂ ಅಜ್ಜ, ಸಕಾನನಂ ಸಪಬ್ಬತಂ;
ಖೋಮದುಸ್ಸೇಹಿ ಛಾದೇಯ್ಯಂ, ಅಡ್ಢದುಸ್ಸಸ್ಸಿದಂ ಫಲಂ.
‘‘ಸತಸಹಸ್ಸಿತೋ ಕಪ್ಪೇ, ಯಂ ದಾನಮದದಿಂ ತದಾ;
ದುಗ್ಗತಿಂ ನಾಭಿಜಾನಾಮಿ, ಅಡ್ಢದುಸ್ಸಸ್ಸಿದಂ ಫಲಂ.
‘‘ಕಿಲೇಸಾ ಝಾಪಿತಾ ಮಯ್ಹಂ…ಪೇ… ವಿಹರಾಮಿ ಅನಾಸವೋ.
‘‘ಸ್ವಾಗತಂ ವತ ಮೇ ಆಸಿ…ಪೇ… ಕತಂ ಬುದ್ಧಸ್ಸ ಸಾಸನಂ.
‘‘ಪಟಿಸಮ್ಭಿದಾ ¶ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಉಪಡ್ಢದುಸ್ಸದಾಯಕೋ ಥೇರೋ ಇಮಾ
ಗಾಥಾಯೋ ಅಭಾಸಿತ್ಥಾತಿ.
ಉಪಡ್ಢದುಸ್ಸದಾಯಕತ್ಥೇರಸ್ಸಾಪದಾನಂ ಪಞ್ಚಮಂ.
೬. ಘತಮಣ್ಡದಾಯಕತ್ಥೇರಅಪದಾನಂ
‘‘ಸುಚಿನ್ತಿತಂ ಭಗವನ್ತಂ, ಲೋಕಜೇಟ್ಠಂ ನರಾಸಭಂ;
ಉಪವಿಟ್ಠಂ ಮಹಾರಞ್ಞಂ, ವಾತಾಬಾಧೇನ ಪೀಳಿತಂ.
‘‘ದಿಸ್ವಾ ¶ ಚಿತ್ತಂ ಪಸಾದೇತ್ವಾ, ಘತಮಣ್ಡಮುಪಾನಯಿಂ;
ಕತತ್ತಾ ಆಚಿತತ್ತಾ [ಉಪಚಿತತ್ತಾ (ಸ್ಯಾ. ಕ.)] ಚ, ಗಙ್ಗಾ ಭಾಗೀರಥೀ ಅಯಂ.
‘‘ಮಹಾಸಮುದ್ದಾ ಚತ್ತಾರೋ, ಘತಂ ಸಮ್ಪಜ್ಜರೇ ಮಮ;
ಅಯಞ್ಚ ಪಥವೀ ಘೋರಾ, ಅಪ್ಪಮಾಣಾ ಅಸಙ್ಖಿಯಾ.
‘‘ಮಮ ಸಙ್ಕಪ್ಪಮಞ್ಞಾಯ, ಭವತೇ ಮಧುಸಕ್ಕರಾ [ಮಧುಸಕ್ಖರಾ (ಸ್ಯಾ. ಕ.)];
ಚಾತುದ್ದೀಪಾ ಇಮೇ ರುಕ್ಖಾ, ಪಾದಪಾ ಧರಣೀರುಹಾ.
‘‘ಮಮ ¶ ಸಙ್ಕಪ್ಪಮಞ್ಞಾಯ, ಕಪ್ಪರುಕ್ಖಾ ಭವನ್ತಿ ತೇ;
ಪಞ್ಞಾಸಕ್ಖತ್ತುಂ ದೇವಿನ್ದೋ, ದೇವರಜ್ಜಮಕಾರಯಿಂ.
‘‘ಏಕಪಞ್ಞಾಸಕ್ಖತ್ತುಞ್ಚ, ಚಕ್ಕವತ್ತೀ ಅಹೋಸಹಂ;
ಪದೇಸರಜ್ಜಂ ವಿಪುಲಂ, ಗಣನಾತೋ ಅಸಙ್ಖಿಯಂ.
‘‘ಚತುನ್ನವುತಿತೋ [ಛನವುತೇ ಇತೋ (ಸೀ.)] ಕಪ್ಪೇ, ಯಂ ದಾನಮದದಿಂ ತದಾ;
ದುಗ್ಗತಿಂ ನಾಭಿಜಾನಾಮಿ, ಘತಮಣ್ಡಸ್ಸಿದಂ ಫಲಂ.
‘‘ಕಿಲೇಸಾ ¶ ಝಾಪಿತಾ ಮಯ್ಹಂ…ಪೇ… ವಿಹರಾಮಿ ಅನಾಸವೋ.
‘‘ಸ್ವಾಗತಂ ವತ ಮೇ ಆಸಿ…ಪೇ… ಕತಂ ಬುದ್ಧಸ್ಸ ಸಾಸನಂ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಘತಮಣ್ಡದಾಯಕೋ ಥೇರೋ ಇಮಾ ಗಾಥಾಯೋ
ಅಭಾಸಿತ್ಥಾತಿ.
ಘತಮಣ್ಡದಾಯಕತ್ಥೇರಸ್ಸಾಪದಾನಂ ಛಟ್ಠಂ.
೭. ಉದಕದಾಯಕತ್ಥೇರಅಪದಾನಂ
‘‘ಪದುಮುತ್ತರಬುದ್ಧಸ್ಸ ¶ , ಭಿಕ್ಖುಸಙ್ಘೇ ಅನುತ್ತರೇ;
ಪಸನ್ನಚಿತ್ತೋ ಸುಮನೋ, ಪಾನೀಘಟಮಪೂರಯಿಂ.
‘‘ಪಬ್ಬತಗ್ಗೇ ದುಮಗ್ಗೇ ವಾ, ಆಕಾಸೇ ವಾಥ ಭೂಮಿಯಂ;
ಯದಾ ಪಾನೀಯಮಿಚ್ಛಾಮಿ, ಖಿಪ್ಪಂ ನಿಬ್ಬತ್ತತೇ ಮಮ.
‘‘ಸತಸಹಸ್ಸಿತೋ ಕಪ್ಪೇ, ಯಂ ದಾನಮದದಿಂ ತದಾ;
ದುಗ್ಗತಿಂ ನಾಭಿಜಾನಾಮಿ, ದಕದಾನಸ್ಸಿದಂ ಫಲಂ.
‘‘ಕಿಲೇಸಾ ¶ ಝಾಪಿತಾ ಮಯ್ಹಂ…ಪೇ… ವಿಹರಾಮಿ ಅನಾಸವೋ.
‘‘ಸ್ವಾಗತಂ ವತ ಮೇ ಆಸಿ…ಪೇ… ಕತಂ ಬುದ್ಧಸ್ಸ ಸಾಸನಂ.
‘‘ಪಟಿಸಮ್ಭಿದಾ ¶ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಉದಕದಾಯಕೋ ಥೇರೋ ಇಮಾ ಗಾಥಾಯೋ
ಅಭಾಸಿತ್ಥಾತಿ.
ಉದಕದಾಯಕತ್ಥೇರಸ್ಸಾಪದಾನಂ ಸತ್ತಮಂ.
೮. ಪುಲಿನಥೂಪಿಯತ್ಥೇರಅಪದಾನಂ
‘‘ಹಿಮವನ್ತಸ್ಸಾವಿದೂರೇ ¶ , ಯಮಕೋ ನಾಮ ಪಬ್ಬತೋ;
ಅಸ್ಸಮೋ ಸುಕತೋ ಮಯ್ಹಂ, ಪಣ್ಣಸಾಲಾ ಸುಮಾಪಿತಾ.
‘‘ನಾರದೋ ನಾಮ ನಾಮೇನ, ಜಟಿಲೋ ಉಗ್ಗತಾಪನೋ;
ಚತುದ್ದಸಸಹಸ್ಸಾನಿ, ಸಿಸ್ಸಾ ಪರಿಚರನ್ತಿ ಮಂ.
‘‘ಪಟಿಸಲ್ಲೀನಕೋ ಸನ್ತೋ, ಏವಂ ಚಿನ್ತೇಸಹಂ ತದಾ;
‘ಸಬ್ಬೋ ಜನೋ ಮಂ ಪೂಜೇತಿ, ನಾಹಂ ಪೂಜೇಮಿ ಕಿಞ್ಚನಂ.
‘‘‘ನ ಮೇ ಓವಾದಕೋ ಅತ್ಥಿ, ವತ್ತಾ ಕೋಚಿ ನ ವಿಜ್ಜತಿ;
ಅನಾಚರಿಯುಪಜ್ಝಾಯೋ, ವನೇ ವಾಸಂ ಉಪೇಮಹಂ.
‘‘‘ಉಪಾಸಮಾನೋ ಯಮಹಂ, ಗರುಚಿತ್ತಂ ಉಪಟ್ಠಹೇ;
ಸೋ ಮೇ ಆಚರಿಯೋ ನತ್ಥಿ, ವನವಾಸೋ ನಿರತ್ಥಕೋ.
‘‘‘ಆಯಾಗಂ ಮೇ ಗವೇಸಿಸ್ಸಂ, ಗರುಂ ಭಾವನಿಯಂ ತಥಾ;
ಸಾವಸ್ಸಯೋ ವಸಿಸ್ಸಾಮಿ, ನ ಕೋಚಿ ಗರಹಿಸ್ಸತಿ’.
‘‘ಉತ್ತಾನಕೂಲಾ ನದಿಕಾ, ಸುಪತಿತ್ಥಾ ಮನೋರಮಾ;
ಸಂಸುದ್ಧಪುಲಿನಾಕಿಣ್ಣಾ, ಅವಿದೂರೇ ಮಮಸ್ಸಮಂ.
‘‘ನದಿಂ ¶ ಅಮರಿಕಂ ನಾಮ, ಉಪಗನ್ತ್ವಾನಹಂ ತದಾ;
ಸಂವಡ್ಢಯಿತ್ವಾ ಪುಲಿನಂ, ಅಕಂ ಪುಲಿನಚೇತಿಯಂ.
‘‘ಯೇ ¶ ತೇ ಅಹೇಸುಂ ಸಮ್ಬುದ್ಧಾ, ಭವನ್ತಕರಣಾ ಮುನೀ;
ತೇಸಂ ಏತಾದಿಸೋ ಥೂಪೋ, ತಂ ನಿಮಿತ್ತಂ ಕರೋಮಹಂ.
‘‘ಕರಿತ್ವಾ ¶ ಪುಲಿನಂ [ಪುಳಿನೇ (ಸೀ. ಸ್ಯಾ. ಪೀ.)] ಥೂಪಂ, ಸೋವಣ್ಣಂ ಮಾಪಯಿಂ ಅಹಂ;
ಸೋಣ್ಣಕಿಙ್ಕಣಿಪುಪ್ಫಾನಿ, ಸಹಸ್ಸೇ ತೀಣಿ ಪೂಜಯಿಂ.
‘‘ಸಾಯಪಾತಂ ನಮಸ್ಸಾಮಿ, ವೇದಜಾತೋ ಕತಞ್ಜಲೀ;
ಸಮ್ಮುಖಾ ವಿಯ ಸಮ್ಬುದ್ಧಂ, ವನ್ದಿಂ ಪುಲಿನಚೇತಿಯಂ.
‘‘ಯದಾ ಕಿಲೇಸಾ ಜಾಯನ್ತಿ, ವಿತಕ್ಕಾ ಗೇಹನಿಸ್ಸಿತಾ;
ಸರಾಮಿ ಸುಕತಂ ಥೂಪಂ, ಪಚ್ಚವೇಕ್ಖಾಮಿ ತಾವದೇ.
‘‘ಉಪನಿಸ್ಸಾಯ ವಿಹರಂ, ಸತ್ಥವಾಹಂ ವಿನಾಯಕಂ;
ಕಿಲೇಸೇ ಸಂವಸೇಯ್ಯಾಸಿ, ನ ಯುತ್ತಂ ತವ ಮಾರಿಸ.
‘‘ಸಹ ¶ ಆವಜ್ಜಿತೇ ಥೂಪೇ, ಗಾರವಂ ಹೋತಿ ಮೇ ತದಾ;
ಕುವಿತಕ್ಕೇ ವಿನೋದೇಸಿಂ, ನಾಗೋ ತುತ್ತಟ್ಟಿತೋ ಯಥಾ.
‘‘ಏವಂ ವಿಹರಮಾನಂ ಮಂ, ಮಚ್ಚುರಾಜಾಭಿಮದ್ದಥ;
ತತ್ಥ ಕಾಲಙ್ಕತೋ ಸನ್ತೋ, ಬ್ರಹ್ಮಲೋಕಮಗಚ್ಛಹಂ.
‘‘ಯಾವತಾಯುಂ ವಸಿತ್ವಾನ, ತಿದಿವೇ [ತಿದಸೇ (ಸೀ. ಪೀ.)] ಉಪಪಜ್ಜಹಂ;
ಅಸೀತಿಕ್ಖತ್ತುಂ ದೇವಿನ್ದೋ, ದೇವರಜ್ಜಮಕಾರಯಿಂ.
‘‘ಸತಾನಂ ತೀಣಿಕ್ಖತ್ತುಞ್ಚ, ಚಕ್ಕವತ್ತೀ ಅಹೋಸಹಂ;
ಪದೇಸರಜ್ಜಂ ವಿಪುಲಂ, ಗಣನಾತೋ ಅಸಙ್ಖಿಯಂ.
‘‘ಸೋಣ್ಣಕಿಙ್ಕಣಿಪುಪ್ಫಾನಂ ¶ [ತೇಸಂ ಕಿಙ್ಕಣಿಪುಪ್ಫಾನಂ (ಸೀ.)], ವಿಪಾಕಂ ಅನುಭೋಮಹಂ;
ಧಾತೀಸತಸಹಸ್ಸಾನಿ, ಪರಿವಾರೇನ್ತಿ ಮಂ [ಮೇ (ಕ.)] ಭವೇ.
‘‘ಥೂಪಸ್ಸ ಪರಿಚಿಣ್ಣತ್ತಾ, ರಜೋಜಲ್ಲಂ ನ ಲಿಮ್ಪತಿ;
ಗತ್ತೇ ಸೇದಾ ನ ಮುಚ್ಚನ್ತಿ, ಸುಪ್ಪಭಾಸೋ ಭವಾಮಹಂ.
‘‘ಅಹೋ ಮೇ ಸುಕತೋ ಥೂಪೋ, ಸುದಿಟ್ಠಾಮರಿಕಾ ನದೀ;
ಥೂಪಂ ಕತ್ವಾನ ಪುಲಿನಂ, ಪತ್ತೋಮ್ಹಿ ಅಚಲಂ ಪದಂ.
‘‘ಕುಸಲಂ ಕತ್ತುಕಾಮೇನ, ಜನ್ತುನಾ ಸಾರಗಾಹಿನಾ;
ನತ್ಥಿ ಖೇತ್ತಂ ಅಖೇತ್ತಂ ವಾ, ಪಟಿಪತ್ತೀವ ಸಾಧಕಾ [ಸಾರಿಕಾ (ಪೀ.), ಸಾರಕಾ (ಸ್ಯಾ.), ಸಾರತಾ (ಕ.)].
‘‘ಯಥಾಪಿ ಬಲವಾ ಪೋಸೋ, ಅಣ್ಣವಂ ತರಿತುಸ್ಸಹೇ;
ಪರಿತ್ತಂ ಕಟ್ಠಮಾದಾಯ, ಪಕ್ಖನ್ದೇಯ್ಯ ಮಹಾಸರಂ.
‘‘ಇಮಾಹಂ ಕಟ್ಠಂ ನಿಸ್ಸಾಯ, ತರಿಸ್ಸಾಮಿ ಮಹೋದಧಿಂ;
ಉಸ್ಸಾಹೇನ ವೀರಿಯೇನ, ತರೇಯ್ಯ ಉದಧಿಂ ನರೋ.
‘‘ತಥೇವ ¶ ¶ ಮೇ ಕತಂ ಕಮ್ಮಂ, ಪರಿತ್ತಂ ಥೋಕಕಞ್ಚ ಯಂ;
ತಂ ಕಮ್ಮಂ ಉಪನಿಸ್ಸಾಯ, ಸಂಸಾರಂ ಸಮತಿಕ್ಕಮಿಂ.
‘‘ಪಚ್ಛಿಮೇ ಭವೇ ಸಮ್ಪತ್ತೇ, ಸುಕ್ಕಮೂಲೇನ ಚೋದಿತೋ;
ಸಾವತ್ಥಿಯಂ ಪುರೇ ಜಾತೋ, ಮಹಾಸಾಲೇ ಸುಅಡ್ಢಕೇ.
‘‘ಸದ್ಧಾ ಮಾತಾ ಪಿತಾ ಮಯ್ಹಂ, ಬುದ್ಧಸ್ಸ ಸರಣಂ ಗತಾ;
ಉಭೋ ದಿಟ್ಠಪದಾ ಏತೇ, ಅನುವತ್ತನ್ತಿ ಸಾಸನಂ.
‘‘ಬೋಧಿಪಪಟಿಕಂ ¶ ಗಯ್ಹ, ಸೋಣ್ಣಥೂಪಮಕಾರಯುಂ;
ಸಾಯಪಾತಂ [ಸಾಯಂ ಪಾತಂ (ಸ್ಯಾ. ಕ.)] ನಮಸ್ಸನ್ತಿ, ಸಕ್ಯಪುತ್ತಸ್ಸ ಸಮ್ಮುಖಾ.
‘‘ಉಪೋಸಥಮ್ಹಿ ¶ ದಿವಸೇ, ಸೋಣ್ಣಥೂಪಂ ವಿನೀಹರುಂ;
ಬುದ್ಧಸ್ಸ ವಣ್ಣಂ ಕಿತ್ತೇನ್ತಾ, ತಿಯಾಮಂ ವೀತಿನಾಮಯುಂ.
‘‘ಸಹ ದಿಸ್ವಾನಹಂ [ಪಸಾದೇತ್ವಾನಹಂ (ಕ.)] ಥೂಪಂ, ಸರಿಂ ಪುಲಿನಚೇತಿಯಂ;
ಏಕಾಸನೇ ನಿಸೀದಿತ್ವಾ, ಅರಹತ್ತಮಪಾಪುಣಿಂ.
ದ್ವಾವೀಸತಿಮಂ ಭಾಣವಾರಂ.
‘‘ಗವೇಸಮಾನೋ ತಂ ವೀರಂ, ಧಮ್ಮಸೇನಾಪತಿದ್ದಸಂ;
ಅಗಾರಾ ನಿಕ್ಖಮಿತ್ವಾನ, ಪಬ್ಬಜಿಂ ತಸ್ಸ ಸನ್ತಿಕೇ.
‘‘ಜಾತಿಯಾ ಸತ್ತವಸ್ಸೇನ, ಅರಹತ್ತಮಪಾಪುಣಿಂ;
ಉಪಸಮ್ಪಾದಯೀ ಬುದ್ಧೋ, ಗುಣಮಞ್ಞಾಯ ಚಕ್ಖುಮಾ.
‘‘ದಾರಕೇನೇವ ಸನ್ತೇನ, ಕಿರಿಯಂ ನಿಟ್ಠಿತಂ ಮಯಾ;
ಕತಂ ಮೇ ಕರಣೀಯಜ್ಜ, ಸಕ್ಯಪುತ್ತಸ್ಸ ಸಾಸನೇ.
‘‘ಸಬ್ಬವೇರಭಯಾತೀತೋ, ಸಬ್ಬಸಙ್ಗಾತಿಗೋ [ಸಬ್ಬಸಙ್ಕಾತಿತೋ (ಕ.)] ಇಸಿ;
ಸಾವಕೋ ತೇ ಮಹಾವೀರ, ಸೋಣ್ಣಥೂಪಸ್ಸಿದಂ ಫಲಂ.
‘‘ಕಿಲೇಸಾ ಝಾಪಿತಾ ಮಯ್ಹಂ…ಪೇ… ವಿಹರಾಮಿ ಅನಾಸವೋ.
‘‘ಸ್ವಾಗತಂ ವತ ಮೇ ಆಸಿ…ಪೇ… ಕತಂ ಬುದ್ಧಸ್ಸ ಸಾಸನಂ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ¶ ಸುದಂ ಆಯಸ್ಮಾ ಪುಲಿನಥೂಪಿಯೋ ಥೇರೋ ಇಮಾ ಗಾಥಾಯೋ
ಅಭಾಸಿತ್ಥಾತಿ.
ಪುಲಿನಥೂಪಿಯತ್ಥೇರಸ್ಸಾಪದಾನಂ ಅಟ್ಠಮಂ.
೯. ನಳಕುಟಿದಾಯಕತ್ಥೇರಅಪದಾನಂ
‘‘ಹಿಮವನ್ತಸ್ಸಾವಿದೂರೇ ¶ ¶ , ಹಾರಿತೋ ನಾಮ ಪಬ್ಬತೋ;
ಸಯಮ್ಭೂ ನಾರದೋ ನಾಮ, ರುಕ್ಖಮೂಲೇ ವಸೀ ತದಾ.
‘‘ನಳಾಗಾರಂ ¶ ಕರಿತ್ವಾನ, ತಿಣೇನ ಛಾದಯಿಂ ಅಹಂ;
ಚಙ್ಕಮಂ ಸೋಧಯಿತ್ವಾನ, ಸಯಮ್ಭುಸ್ಸ ಅದಾಸಹಂ.
‘‘ತೇನ ಕಮ್ಮೇನ ಸುಕತೇನ, ಚೇತನಾಪಣಿಧೀಹಿ ಚ;
ಜಹಿತ್ವಾ ಮಾನುಸಂ ದೇಹಂ, ತಾವತಿಂಸಮಗಚ್ಛಹಂ.
‘‘ತತ್ಥ ಮೇ ಸುಕತಂ ಬ್ಯಮ್ಹಂ, ನಳಕುಟಿಕನಿಮ್ಮಿತಂ;
ಸಟ್ಠಿಯೋಜನಮುಬ್ಬೇಧಂ, ತಿಂಸಯೋಜನವಿತ್ಥತಂ.
‘‘ಚತುದ್ದಸೇಸು ಕಪ್ಪೇಸು, ದೇವಲೋಕೇ ರಮಿಂ ಅಹಂ;
ಏಕಸತ್ತತಿಕ್ಖತ್ತುಞ್ಚ, ದೇವರಜ್ಜಮಕಾರಯಿಂ.
‘‘ಚತುತಿಂಸತಿಕ್ಖತ್ತುಞ್ಚ, ಚಕ್ಕವತ್ತೀ ಅಹೋಸಹಂ;
ಪದೇಸರಜ್ಜಂ ವಿಪುಲಂ, ಗಣನಾತೋ ಅಸಙ್ಖಿಯಂ.
‘‘ಧಮ್ಮಪಾಸಾದಮಾರುಯ್ಹ, ಸಬ್ಬಾಕಾರವರೂಪಮಂ;
ಯದಿಚ್ಛಕಾಹಂ ವಿಹರೇ, ಸಕ್ಯಪುತ್ತಸ್ಸ ಸಾಸನೇ.
‘‘ಏಕತಿಂಸೇ ಇತೋ ಕಪ್ಪೇ, ಯಂ ಕಮ್ಮಮಕರಿಂ ತದಾ;
ದುಗ್ಗತಿಂ ನಾಭಿಜಾನಾಮಿ, ನಳಕುಟಿಯಿದಂ ಫಲಂ.
‘‘ಕಿಲೇಸಾ ¶ ಝಾಪಿತಾ ಮಯ್ಹಂ…ಪೇ… ವಿಹರಾಮಿ ಅನಾಸವೋ.
‘‘ಸ್ವಾಗತಂ ವತ ಮೇ ಆಸಿ…ಪೇ… ಕತಂ ಬುದ್ಧಸ್ಸ ಸಾಸನಂ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ನಳಕುಟಿದಾಯಕೋ ಥೇರೋ ಇಮಾ ಗಾಥಾಯೋ
ಅಭಾಸಿತ್ಥಾತಿ.
ನಳಕುಟಿದಾಯಕತ್ಥೇರಸ್ಸಾಪದಾನಂ ನವಮಂ.
೧೦. ಪಿಯಾಲಫಲದಾಯಕತ್ಥೇರಅಪದಾನಂ
‘‘ಮಿಗಲುದ್ದೋ ¶ ಪುರೇ ಆಸಿಂ, ವಿಪಿನೇ ವಿಚರಂ ತದಾ;
ಅದ್ದಸಂ ವಿರಜಂ ಬುದ್ಧಂ, ಸಬ್ಬಧಮ್ಮಾನ ಪಾರಗುಂ.
‘‘ಪಿಯಾಲಫಲಮಾದಾಯ, ಬುದ್ಧಸೇಟ್ಠಸ್ಸದಾಸಹಂ;
ಪುಞ್ಞಕ್ಖೇತ್ತಸ್ಸ ವೀರಸ್ಸ, ಪಸನ್ನೋ ಸೇಹಿ ಪಾಣಿಭಿ.
‘‘ಏಕತಿಂಸೇ ¶ ಇತೋ ಕಪ್ಪೇ, ಯಂ ಫಲಂ ಅದದಿಂ ತದಾ;
ದುಗ್ಗತಿಂ ನಾಭಿಜಾನಾಮಿ, ಫಲದಾನಸ್ಸಿದಂ ಫಲಂ.
‘‘ಕಿಲೇಸಾ ¶ ಝಾಪಿತಾ ಮಯ್ಹಂ…ಪೇ… ವಿಹರಾಮಿ ಅನಾಸವೋ.
‘‘ಸ್ವಾಗತಂ ವತ ಮೇ ಆಸಿ…ಪೇ… ಕತಂ ಬುದ್ಧಸ್ಸ ಸಾಸನಂ.
‘‘ಪಟಿಸಮ್ಭಿದಾ ¶ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಪಿಯಾಲಫಲದಾಯಕೋ ಥೇರೋ ಇಮಾ
ಗಾಥಾಯೋ ಅಭಾಸಿತ್ಥಾತಿ.
ಪಿಯಾಲಫಲದಾಯಕತ್ಥೇರಸ್ಸಾಪದಾನಂ ದಸಮಂ.
ಕಿಙ್ಕಣಿಪುಪ್ಫವಗ್ಗೋ ಪಞ್ಞಾಸಮೋ.
ತಸ್ಸುದ್ದಾನಂ –
ಕಿಙ್ಕಣೀ ಪಂಸುಕೂಲಞ್ಚ, ಕೋರಣ್ಡಮಥ ಕಿಂಸುಕಂ;
ಉಪಡ್ಢದುಸ್ಸೀ ಘತದೋ, ಉದಕಂ ಥೂಪಕಾರಕೋ.
ನಳಕಾರೀ ಚ ನವಮೋ, ಪಿಯಾಲಫಲದಾಯಕೋ;
ಸತಮೇಕಞ್ಚ ಗಾಥಾನಂ, ನವಕಞ್ಚ ತದುತ್ತರಿ.
ಅಥ ವಗ್ಗುದ್ದಾನಂ –
ಮೇತ್ತೇಯ್ಯವಗ್ಗೋ ಭದ್ದಾಲಿ, ಸಕಿಂಸಮ್ಮಜ್ಜಕೋಪಿ ಚ;
ಏಕವಿಹಾರೀ ವಿಭೀತಕೀ, ಜಗತೀ ಸಾಲಪುಪ್ಫಿಯೋ.
ನಳಾಗಾರಂ ಪಂಸುಕೂಲಂ, ಕಿಙ್ಕಣಿಪುಪ್ಫಿಯೋ ತಥಾ;
ಅಸೀತಿ ದ್ವೇ ಚ ಗಾಥಾಯೋ, ಚತುದ್ದಸಸತಾನಿ ಚ.
ಮೇತ್ತೇಯ್ಯವಗ್ಗದಸಕಂ.
ಪಞ್ಚಮಸತಕಂ ಸಮತ್ತಂ.
೫೧. ಕಣಿಕಾರವಗ್ಗೋ
೧. ತಿಕಣಿಕಾರಪುಪ್ಫಿಯತ್ಥೇರಅಪದಾನಂ
‘‘ಸುಮೇಧೋ ¶ ¶ ¶ ನಾಮ ಸಮ್ಬುದ್ಧೋ, ಬಾತ್ತಿಂಸವರಲಕ್ಖಣೋ;
ವಿವೇಕಕಾಮೋ ಸಮ್ಬುದ್ಧೋ, ಹಿಮವನ್ತಮುಪಾಗಮಿಂ.
‘‘ಅಜ್ಝೋಗಯ್ಹ ಹಿಮವನ್ತಂ, ಅಗ್ಗೋ ಕಾರುಣಿಕೋ ಮುನಿ;
ಪಲ್ಲಙ್ಕಮಾಭುಜಿತ್ವಾನ, ನಿಸೀದಿ ಪುರಿಸುತ್ತಮೋ.
‘‘ವಿಜ್ಜಾಧರೋ ತದಾ ಆಸಿಂ, ಅನ್ತಲಿಕ್ಖಚರೋ ಅಹಂ;
ತಿಸೂಲಂ ಸುಕತಂ ಗಯ್ಹ, ಗಚ್ಛಾಮಿ ಅಮ್ಬರೇ ತದಾ.
‘‘ಪಬ್ಬತಗ್ಗೇ ಯಥಾ ಅಗ್ಗಿ, ಪುಣ್ಣಮಾಯೇವ ಚನ್ದಿಮಾ;
ವನೇ ಓಭಾಸತೇ ಬುದ್ಧೋ, ಸಾಲರಾಜಾವ ಫುಲ್ಲಿತೋ.
‘‘ವನಗ್ಗಾ ¶ ನಿಕ್ಖಮಿತ್ವಾನ, ಬುದ್ಧರಂಸೀಭಿಧಾವರೇ;
ನಳಗ್ಗಿವಣ್ಣಸಙ್ಕಾಸಾ, ದಿಸ್ವಾ ಚಿತ್ತಂ ಪಸಾದಯಿಂ.
‘‘ವಿಚಿನಂ ಅದ್ದಸಂ ಪುಪ್ಫಂ, ಕಣಿಕಾರಂ ದೇವಗನ್ಧಿಕಂ;
ತೀಣಿ ಪುಪ್ಫಾನಿ ಆದಾಯ, ಬುದ್ಧಸೇಟ್ಠಮಪೂಜಯಿಂ.
‘‘ಬುದ್ಧಸ್ಸ ಆನುಭಾವೇನ, ತೀಣಿ ಪುಪ್ಫಾನಿ ಮೇ ತದಾ;
ಉದ್ಧಂವಣ್ಟಾ ಅಧೋಪತ್ತಾ, ಛಾಯಂ ಕುಬ್ಬನ್ತಿ ಸತ್ಥುನೋ.
‘‘ತೇನ ಕಮ್ಮೇನ ಸುಕತೇನ, ಚೇತನಾಪಣಿಧೀಹಿ ಚ;
ಜಹಿತ್ವಾ ಮಾನುಸಂ ದೇಹಂ, ತಾವತಿಂಸಮಗಚ್ಛಹಂ.
‘‘ತತ್ಥ ¶ ಮೇ ಸುಕತಂ ಬ್ಯಮ್ಹಂ, ಕಣಿಕಾರೀತಿ ಞಾಯತಿ;
ಸಟ್ಠಿಯೋಜನಮುಬ್ಬೇಧಂ, ತಿಂಸಯೋಜನವಿತ್ಥತಂ.
‘‘ಸಹಸ್ಸಕಣ್ಡಂ ಸತಭೇಣ್ಡು [ಸತಗೇಣ್ಡು (ಸ್ಯಾ.)], ಧಜಾಲುಹರಿತಾಮಯಂ;
ಸತಸಹಸ್ಸನಿಯ್ಯೂಹಾ, ಬ್ಯಮ್ಹೇ ಪಾತುಭವಿಂಸು ಮೇ.
‘‘ಸೋಣ್ಣಮಯಾ ಮಣಿಮಯಾ, ಲೋಹಿತಙ್ಗಮಯಾಪಿ ಚ;
ಫಲಿಕಾಪಿ ಚ ಪಲ್ಲಙ್ಕಾ, ಯೇನಿಚ್ಛಕಾ ಯದಿಚ್ಛಕಾ [ಯೇನಿಚ್ಛಯಾ ಯದಿಚ್ಛಕಂ (ಸ್ಯಾ.), ಯದಿಚ್ಛಕಾಯದಿಚ್ಛಕಾ (ಕ.)].
‘‘ಮಹಾರಹಞ್ಚ ¶ ¶ ಸಯನಂ, ತೂಲಿಕಾವಿಕತೀಯುತಂ;
ಉದ್ಧಲೋಮಿಕಏಕನ್ತಂ, ಬಿಮ್ಬೋಹನಸಮಾಯುತಂ [ಬಿಬ್ಬೋಹನಸಮಾಯುತಂ… (ಸ್ಯಾ. ಕ.)].
‘‘ಭವನಾ ನಿಕ್ಖಮಿತ್ವಾನ, ಚರನ್ತೋ ದೇವಚಾರಿಕಂ;
ಯದಾ ಇಚ್ಛಾಮಿ ಗಮನಂ, ದೇವಸಙ್ಘಪುರಕ್ಖತೋ.
‘‘ಪುಪ್ಫಸ್ಸ ಹೇಟ್ಠಾ ತಿಟ್ಠಾಮಿ, ಉಪರಿಚ್ಛದನಂ ಮಮ;
ಸಮನ್ತಾ ಯೋಜನಸತಂ, ಕಣಿಕಾರೇಹಿ ಛಾದಿತಂ.
‘‘ಸಟ್ಠಿತುರಿಯಸಹಸ್ಸಾನಿ, ಸಾಯಪಾತಮುಪಟ್ಠಹುಂ;
ಪರಿವಾರೇನ್ತಿ ಮಂ ನಿಚ್ಚಂ, ರತ್ತಿನ್ದಿವಮತನ್ದಿತಾ.
‘‘ತತ್ಥ ನಚ್ಚೇಹಿ ಗೀತೇಹಿ, ತಾಳೇಹಿ ವಾದಿತೇಹಿ ಚ;
ರಮಾಮಿ ಖಿಡ್ಡಾರತಿಯಾ, ಮೋದಾಮಿ ಕಾಮಕಾಮಿಹಂ.
‘‘ತತ್ಥ ಭುತ್ವಾ ಪಿವಿತ್ವಾ ಚ, ಮೋದಾಮಿ ತಿದಸೇ ತದಾ;
ನಾರೀಗಣೇಹಿ ಸಹಿತೋ, ಮೋದಾಮಿ ಬ್ಯಮ್ಹಮುತ್ತಮೇ.
‘‘ಸತಾನಂ ಪಞ್ಚಕ್ಖತ್ತುಞ್ಚ, ದೇವರಜ್ಜಮಕಾರಯಿಂ;
ಸತಾನಂ ತೀಣಿಕ್ಖತ್ತುಞ್ಚ, ಚಕ್ಕವತ್ತೀ ಅಹೋಸಹಂ;
ಪದೇಸರಜ್ಜಂ ¶ ವಿಪುಲಂ, ಗಣನಾತೋ ಅಸಙ್ಖಿಯಂ.
‘‘ಭವಾಭವೇ ಸಂಸರನ್ತೋ, ಮಹಾಭೋಗಂ ಲಭಾಮಹಂ;
ಭೋಗೇ ಮೇ ಊನತಾ ನತ್ಥಿ, ಬುದ್ಧಪೂಜಾಯಿದಂ ಫಲಂ.
‘‘ದುವೇ ¶ ಭವೇ ಸಂಸರಾಮಿ, ದೇವತ್ತೇ ಅಥ ಮಾನುಸೇ;
ಅಞ್ಞಂ ಗತಿಂ ನ ಜಾನಾಮಿ, ಬುದ್ಧಪೂಜಾಯಿದಂ ಫಲಂ.
‘‘ದುವೇ ಕುಲೇ ಪಜಾಯಾಮಿ, ಖತ್ತಿಯೇ ಚಾಪಿ ಬ್ರಾಹ್ಮಣೇ;
ನೀಚೇ ಕುಲೇ ನ ಜಾಯಾಮಿ, ಬುದ್ಧಪೂಜಾಯಿದಂ ಫಲಂ.
‘‘ಹತ್ಥಿಯಾನಂ ಅಸ್ಸಯಾನಂ, ಸಿವಿಕಂ ಸನ್ದಮಾನಿಕಂ;
ಲಭಾಮಿ ಸಬ್ಬಮೇವೇತಂ, ಬುದ್ಧಪೂಜಾಯಿದಂ ಫಲಂ.
‘‘ದಾಸೀಗಣಂ ದಾಸಗಣಂ, ನಾರಿಯೋ ಸಮಲಙ್ಕತಾ;
ಲಭಾಮಿ ಸಬ್ಬಮೇವೇತಂ, ಬುದ್ಧಪೂಜಾಯಿದಂ ಫಲಂ.
‘‘ಕೋಸೇಯ್ಯಕಮ್ಬಲಿಯಾನಿ, ಖೋಮಕಪ್ಪಾಸಿಕಾನಿ ಚ;
ಲಭಾಮಿ ಸಬ್ಬಮೇವೇತಂ, ಬುದ್ಧಪೂಜಾಯಿದಂ ಫಲಂ.
‘‘ನವವತ್ಥಂ ¶ ¶ ನವಫಲಂ, ನವಗ್ಗರಸಭೋಜನಂ;
ಲಭಾಮಿ ಸಬ್ಬಮೇವೇತಂ, ಬುದ್ಧಪೂಜಾಯಿದಂ ಫಲಂ.
‘‘ಇಮಂ ಖಾದ ಇಮಂ ಭುಞ್ಜ, ಇಮಮ್ಹಿ ಸಯನೇ ಸಯ;
ಲಭಾಮಿ ಸಬ್ಬಮೇವೇತಂ, ಬುದ್ಧಪೂಜಾಯಿದಂ ಫಲಂ.
‘‘ಸಬ್ಬತ್ಥ ಪೂಜಿತೋ ಹೋಮಿ, ಯಸೋ ಅಬ್ಭುಗ್ಗತೋ ಮಮ;
ಮಹಾಪಕ್ಖೋ ಸದಾ ಹೋಮಿ, ಅಭೇಜ್ಜಪರಿಸೋ ಸದಾ;
ಞಾತೀನಂ ಉತ್ತಮೋ ಹೋಮಿ, ಬುದ್ಧಪೂಜಾಯಿದಂ ಫಲಂ.
‘‘ಸೀತಂ ¶ ಉಣ್ಹಂ ನ ಜಾನಾಮಿ, ಪರಿಳಾಹೋ ನ ವಿಜ್ಜತಿ;
ಅಥೋ ಚೇತಸಿಕಂ ದುಕ್ಖಂ, ಹದಯೇ ಮೇ ನ ವಿಜ್ಜತಿ.
‘‘ಸುವಣ್ಣವಣ್ಣೋ ಹುತ್ವಾನ, ಸಂಸರಾಮಿ ಭವಾಭವೇ;
ವೇವಣ್ಣಿಯಂ ನ ಜಾನಾಮಿ, ಬುದ್ಧಪೂಜಾಯಿದಂ ಫಲಂ.
‘‘ದೇವಲೋಕಾ ಚವಿತ್ವಾನ, ಸುಕ್ಕಮೂಲೇನ ಚೋದಿತೋ;
ಸಾವತ್ಥಿಯಂ ಪುರೇ ಜಾತೋ, ಮಹಾಸಾಲೇ ಸುಅಡ್ಢಕೇ.
‘‘ಪಞ್ಚ ಕಾಮಗುಣೇ ಹಿತ್ವಾ, ಪಬ್ಬಜಿಂ ಅನಗಾರಿಯಂ;
ಜಾತಿಯಾ ಸತ್ತವಸ್ಸೋಹಂ, ಅರಹತ್ತಮಪಾಪುಣಿಂ.
‘‘ಉಪಸಮ್ಪಾದಯೀ ಬುದ್ಧೋ, ಗುಣಮಞ್ಞಾಯ ಚಕ್ಖುಮಾ;
ತರುಣೋ ಪೂಜನೀಯೋಹಂ, ಬುದ್ಧಪೂಜಾಯಿದಂ ಫಲಂ.
‘‘ದಿಬ್ಬಚಕ್ಖು ವಿಸುದ್ಧಂ ಮೇ, ಸಮಾಧಿಕುಸಲೋ ಅಹಂ;
ಅಭಿಞ್ಞಾಪಾರಮಿಪ್ಪತ್ತೋ, ಬುದ್ಧಪೂಜಾಯಿದಂ ಫಲಂ.
‘‘ಪಟಿಸಮ್ಭಿದಾ ಅನುಪ್ಪತ್ತೋ, ಇದ್ಧಿಪಾದೇಸು ಕೋವಿದೋ;
ಧಮ್ಮೇಸು ಪಾರಮಿಪ್ಪತ್ತೋ, ಬುದ್ಧಪೂಜಾಯಿದಂ ಫಲಂ.
‘‘ತಿಂಸಕಪ್ಪಸಹಸ್ಸಮ್ಹಿ ¶ , ಯಂ ಬುದ್ಧಮಭಿಪೂಜಯಿಂ;
ದುಗ್ಗತಿಂ ನಾಭಿಜಾನಾಮಿ, ಬುದ್ಧಪೂಜಾಯಿದಂ ಫಲಂ.
‘‘ಕಿಲೇಸಾ ಝಾಪಿತಾ ಮಯ್ಹಂ, ಭವಾ ಸಬ್ಬೇ ಸಮೂಹತಾ;
ನಾಗೋವ ಬನ್ಧನಂ ಛೇತ್ವಾ, ವಿಹರಾಮಿ ಅನಾಸವೋ.
‘‘ಸ್ವಾಗತಂ ವತ ಮೇ ಆಸಿ, ಮಮ ಬುದ್ಧಸ್ಸ ಸನ್ತಿಕೇ;
ತಿಸ್ಸೋ ವಿಜ್ಜಾ ಅನುಪ್ಪತ್ತಾ, ಕತಂ ಬುದ್ಧಸ್ಸ ಸಾಸನಂ.
‘‘ಪಟಿಸಮ್ಭಿದಾ ¶ ¶ ¶ ಚತಸ್ಸೋ, ವಿಮೋಕ್ಖಾಪಿ ಚ ಅಟ್ಠಿಮೇ;
ಛಳಭಿಞ್ಞಾ ಸಚ್ಛಿಕತಾ, ಕತಂ ಬುದ್ಧಸ್ಸ ಸಾಸನಂ.
ಇತ್ಥಂ ಸುದಂ ಆಯಸ್ಮಾ ತಿಕಣಿಕಾರಪುಪ್ಫಿಯೋ ಥೇರೋ ಇಮಾ
ಗಾಥಾಯೋ ಅಭಾಸಿತ್ಥಾತಿ.
ತಿಕಣಿಕಾರಪುಪ್ಫಿಯತ್ಥೇರಸ್ಸಾಪದಾನಂ ಪಠಮಂ.
೨. ಏಕಪತ್ತದಾಯಕತ್ಥೇರಅಪದಾನಂ
‘‘ನಗರೇ ಹಂಸವತಿಯಾ, ಕುಮ್ಭಕಾರೋ ಅಹೋಸಹಂ;
ಅದ್ದಸಂ ವಿರಜಂ ಬುದ್ಧಂ, ಓಘತಿಣ್ಣಮನಾಸವಂ.
‘‘ಸುಕತಂ ಮತ್ತಿಕಾಪತ್ತಂ, ಬುದ್ಧಸೇಟ್ಠಸ್ಸದಾಸಹಂ;
ಪತ್ತಂ ದತ್ವಾ ಭಗವತೋ, ಉಜುಭೂತಸ್ಸ ತಾದಿನೋ.
‘‘ಭವೇ ನಿಬ್ಬತ್ತಮಾನೋಹಂ, ಸೋಣ್ಣಥಾಲೇ ಲಭಾಮಹಂ;
ರೂಪಿಮಯೇ ಚ ಸೋವಣ್ಣೇ, ತಟ್ಟಿಕೇ ಚ ಮಣೀಮಯೇ.
‘‘ಪಾತಿಯೋ ಪರಿಭುಞ್ಜಾಮಿ, ಪುಞ್ಞಕಮ್ಮಸ್ಸಿದಂ ಫಲಂ;
ಯಸಾನಞ್ಚ ಧನಾನಞ್ಚ [ಯಸಸಾವ ಜನಾನಞ್ಚ (ಸ್ಯಾ.)], ಅಗ್ಗಭೂತೋ [ಪತ್ತಭೂತೋ (ಸೀ. ಪೀ.)] ಚ ಹೋಮಹಂ.
‘‘ಯಥಾಪಿ ಭದ್ದಕೇ ಖೇತ್ತೇ, ಬೀಜಂ ಅಪ್ಪಮ್ಪಿ ರೋಪಿತಂ;
ಸಮ್ಮಾಧಾರಂ ಪವಚ್ಛನ್ತೇ, ಫಲಂ ತೋಸೇತಿ ಕಸ್ಸಕಂ.
‘‘ತಥೇವಿದಂ ಪತ್ತದಾನಂ, ಬುದ್ಧಖೇತ್ತಮ್ಹಿ ರೋಪಿತಂ;
ಪೀತಿಧಾರೇ ಪವಸ್ಸನ್ತೇ, ಫಲಂ ಮಂ ತೋಸಯಿಸ್ಸತಿ.
‘‘ಯಾವತಾ ಖೇತ್ತಾ ವಿಜ್ಜನ್ತಿ, ಸಙ್ಘಾಪಿ ಚ ಗಣಾಪಿ ಚ;
ಬುದ್ಧಖೇತ್ತಸಮೋ ನತ್ಥಿ, ಸುಖದೋ ಸಬ್ಬಪಾಣಿನಂ.
‘‘ನಮೋ ¶ ತೇ ಪುರಿಸಾಜಞ್ಞ, ನಮೋ ತೇ ಪುರಿಸುತ್ತಮ;
ಏಕಪತ್ತಂ ದದಿತ್ವಾನ, ಪತ್ತೋಮ್ಹಿ ಅಚಲಂ ಪದಂ.
‘‘ಏಕನವುತಿತೋ ಕಪ್ಪೇ, ಯಂ ಪತ್ತಮದದಿಂ ತದಾ;
ದುಗ್ಗತಿಂ ನಾಭಿಜಾನಾಮಿ, ಪತ್ತದಾನಸ್ಸಿದಂ ಫಲಂ.
‘‘ಕಿಲೇಸಾ ¶ ಝಾಪಿತಾ ಮಯ್ಹಂ…ಪೇ… ವಿಹರಾಮಿ ಅನಾಸವೋ.
‘‘ಸ್ವಾಗತಂ ¶ ವತ ಮೇ ಆಸಿ…ಪೇ… ಕತಂ ಬುದ್ಧಸ್ಸ ಸಾಸನಂ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಏಕಪತ್ತದಾಯಕೋ ಥೇರೋ ಇಮಾ ಗಾಥಾಯೋ
ಅಭಾಸಿತ್ಥಾತಿ.
ಏಕಪತ್ತದಾಯಕತ್ಥೇರಸ್ಸಾಪದಾನಂ ದುತಿಯಂ.
೩. ಕಾಸುಮಾರಫಲಿಯತ್ಥೇರಅಪದಾನಂ
‘‘ಕಣಿಕಾರಂವ ¶ ಜೋತನ್ತಂ, ನಿಸಿನ್ನಂ ಪಬ್ಬತನ್ತರೇ;
ಅದ್ದಸಂ ವಿರಜಂ ಬುದ್ಧಂ, ಲೋಕಜೇಟ್ಠಂ ನರಾಸಭಂ.
‘‘ಪಸನ್ನಚಿತ್ತೋ ಸುಮನೋ, ಸಿರೇ ಕತ್ವಾನ ಅಞ್ಜಲಿಂ;
ಕಾಸುಮಾರಿಕಮಾದಾಯ, ಬುದ್ಧಸೇಟ್ಠಸ್ಸದಾಸಹಂ.
‘‘ಏಕತಿಂಸೇ ಇತೋ ಕಪ್ಪೇ, ಯಂ ಫಲಂ ಅದದಿಂ ತದಾ;
ದುಗ್ಗತಿಂ ನಾಭಿಜಾನಾಮಿ, ಫಲದಾನಸ್ಸಿದಂ ಫಲಂ.
‘‘ಕಿಲೇಸಾ ¶ ಝಾಪಿತಾ ಮಯ್ಹಂ…ಪೇ… ವಿಹರಾಮಿ ಅನಾಸವೋ.
‘‘ಸ್ವಾಗತಂ ವತ ಮೇ ಆಸಿ…ಪೇ… ಕತಂ ಬುದ್ಧಸ್ಸ ಸಾಸನಂ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಕಾಸುಮಾರಫಲಿಯೋ ಥೇರೋ ಇಮಾ ಗಾಥಾಯೋ
ಅಭಾಸಿತ್ಥಾತಿ.
ಕಾಸುಮಾರಫಲಿಯತ್ಥೇರಸ್ಸಾಪದಾನಂ ತತಿಯಂ.
೪. ಅವಟಫಲಿಯತ್ಥೇರಅಪದಾನಂ
‘‘ಸಹಸ್ಸರಂಸೀ ಭಗವಾ, ಸಯಮ್ಭೂ ಅಪರಾಜಿತೋ;
ವಿವೇಕಾ ಉಟ್ಠಹಿತ್ವಾನ, ಗೋಚರಾಯಾಭಿನಿಕ್ಖಮಿ.
‘‘ಫಲಹತ್ಥೋ ¶ ಅಹಂ ದಿಸ್ವಾ, ಉಪಗಚ್ಛಿಂ ನರಾಸಭಂ;
ಪಸನ್ನಚಿತ್ತೋ ಸುಮನೋ, ಅವಟಂ ಅದದಿಂ ಫಲಂ.
‘‘ಚತುನ್ನವುತಿತೋ ¶ ಕಪ್ಪೇ, ಯಂ ಫಲಂ ಅದದಿಂ ತದಾ;
ದುಗ್ಗತಿಂ ನಾಭಿಜಾನಾಮಿ, ಫಲದಾನಸ್ಸಿದಂ ಫಲಂ.
‘‘ಕಿಲೇಸಾ ಝಾಪಿತಾ ಮಯ್ಹಂ…ಪೇ… ವಿಹರಾಮಿ ಅನಾಸವೋ.
‘‘ಸ್ವಾಗತಂ ವತ ಮೇ ಆಸಿ…ಪೇ… ಕತಂ ಬುದ್ಧಸ್ಸ ಸಾಸನಂ.
‘‘ಪಟಿಸಮ್ಭಿದಾ ¶ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಅವಟಫಲಿಯೋ ಥೇರೋ ಇಮಾ ಗಾಥಾಯೋ
ಅಭಾಸಿತ್ಥಾತಿ.
ಅವಟಫಲಿಯತ್ಥೇರಸ್ಸಾಪದಾನಂ ಚತುತ್ಥಂ.
೫. ಪಾದಫಲಿಯತ್ಥೇರಅಪದಾನಂ
‘‘ಸುವಣ್ಣವಣ್ಣಂ ಸಮ್ಬುದ್ಧಂ, ಆಹುತೀನಂ ಪಟಿಗ್ಗಹಂ;
ರಥಿಯಂ ಪಟಿಪಜ್ಜನ್ತಂ, ಪಾದಫಲಂ [ವಾರಫಲಂ (ಸೀ.), ಚಾರಫಲಂ (ಸ್ಯಾ.), ಪಾರಫಲಂ (ಪೀ.)] ಅದಾಸಹಂ.
‘‘ಏಕನವುತಿತೋ ಕಪ್ಪೇ, ಯಂ ಫಲಂ ಅದದಿಂ ತದಾ;
ದುಗ್ಗತಿಂ ನಾಭಿಜಾನಾಮಿ, ಫಲದಾನಸ್ಸಿದಂ ಫಲಂ.
‘‘ಕಿಲೇಸಾ ¶ ಝಾಪಿತಾ ಮಯ್ಹಂ…ಪೇ… ವಿಹರಾಮಿ ಅನಾಸವೋ.
‘‘ಸ್ವಾಗತಂ ವತ ಮೇ ಆಸಿ…ಪೇ… ಕತಂ ಬುದ್ಧಸ್ಸ ಸಾಸನಂ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಪಾದಫಲಿಯೋ ಥೇರೋ ಇಮಾ ಗಾಥಾಯೋ
ಅಭಾಸಿತ್ಥಾತಿ.
ಪಾದಫಲಿಯತ್ಥೇರಸ್ಸಾಪದಾನಂ ಪಞ್ಚಮಂ.
೬. ಮಾತುಲುಙ್ಗಫಲದಾಯಕತ್ಥೇರಅಪದಾನಂ
‘‘ಕಣಿಕಾರಂವ ¶ ¶ ಜಲಿತಂ, ಪುಣ್ಣಮಾಯೇವ ಚನ್ದಿಮಂ;
ಜಲನ್ತಂ ದೀಪರುಕ್ಖಂವ, ಅದ್ದಸಂ ಲೋಕನಾಯಕಂ.
‘‘ಮಾತುಲುಙ್ಗಫಲಂ ¶ ಗಯ್ಹ, ಅದಾಸಿಂ ಸತ್ಥುನೋ ಅಹಂ;
ದಕ್ಖಿಣೇಯ್ಯಸ್ಸ ವೀರಸ್ಸ [ಧೀರಸ್ಸ (ಸೀ.)], ಪಸನ್ನೋ ಸೇಹಿ ಪಾಣಿಭಿ.
‘‘ಏಕತಿಂಸೇ ಇತೋ ಕಪ್ಪೇ, ಯಂ ಫಲಂ ಅದದಿಂ ತದಾ;
ದುಗ್ಗತಿಂ ನಾಭಿಜಾನಾಮಿ, ಫಲದಾನಸ್ಸಿದಂ ಫಲಂ.
‘‘ಕಿಲೇಸಾ ಝಾಪಿತಾ ಮಯ್ಹಂ…ಪೇ… ವಿಹರಾಮಿ ಅನಾಸವೋ.
‘‘ಸ್ವಾಗತಂ ವತ ಮೇ ಆಸಿ…ಪೇ… ಕತಂ ಬುದ್ಧಸ್ಸ ಸಾಸನಂ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಮಾತುಲುಙ್ಗಫಲದಾಯಕೋ ಥೇರೋ ಇಮಾ
ಗಾಥಾಯೋ ಅಭಾಸಿತ್ಥಾತಿ.
ಮಾತುಲುಙ್ಗಫಲದಾಯಕತ್ಥೇರಸ್ಸಾಪದಾನಂ ಛಟ್ಠಂ.
೭. ಅಜೇಲಿಫಲದಾಯಕತ್ಥೇರಅಪದಾನಂ
‘‘ಅಜ್ಜುನೋ [ಅಜಿನೋ (ಸ್ಯಾ.)] ನಾಮ ಸಮ್ಬುದ್ಧೋ, ಹಿಮವನ್ತೇ ವಸೀ ತದಾ;
ಚರಣೇನ ಚ ಸಮ್ಪನ್ನೋ, ಸಮಾಧಿಕುಸಲೋ ಮುನಿ.
‘‘ಕುಮ್ಭಮತ್ತಂ ¶ ಗಹೇತ್ವಾನ, ಅಜೇಲಿಂ [ಅಞ್ಜಲಿಂ (ಸ್ಯಾ.), ಅಜೇಲಂ (ಪೀ.)] ಜೀವಜೀವಕಂ;
ಛತ್ತಪಣ್ಣಂ ಗಹೇತ್ವಾನ, ಅದಾಸಿಂ ಸತ್ಥುನೋ ಅಹಂ.
‘‘ಚತುನ್ನವುತಿತೋ ಕಪ್ಪೇ, ಯಂ ಫಲಂ ಅದದಿಂ ತದಾ;
ದುಗ್ಗತಿಂ ನಾಭಿಜಾನಾಮಿ, ಫಲದಾನಸ್ಸಿದಂ ಫಲಂ.
‘‘ಕಿಲೇಸಾ ಝಾಪಿತಾ ಮಯ್ಹಂ…ಪೇ… ವಿಹರಾಮಿ ಅನಾಸವೋ.
‘‘ಸ್ವಾಗತಂ ವತ ಮೇ ಆಸಿ…ಪೇ… ಕತಂ ಬುದ್ಧಸ್ಸ ಸಾಸನಂ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಅಜೇಲಿಫಲದಾಯಕೋ ಥೇರೋ ಇಮಾ
ಗಾಥಾಯೋ ಅಭಾಸಿತ್ಥಾತಿ.
ಅಜೇಲಿಫಲದಾಯಕತ್ಥೇರಸ್ಸಾಪದಾನಂ ಸತ್ತಮಂ.
೮. ಅಮೋದಫಲಿಯತ್ಥೇರಅಪದಾನಂ
‘‘ಸುವಣ್ಣವಣ್ಣಂ ¶ ¶ ¶ ಸಮ್ಬುದ್ಧಂ, ಆಹುತೀನಂ ಪಟಿಗ್ಗಹಂ;
ರಥಿಯಂ ಪಟಿಪಜ್ಜನ್ತಂ, ಅಮೋದಮದದಿಂ ಫಲಂ.
‘‘ಏಕನವುತಿತೋ ಕಪ್ಪೇ, ಯಂ ಫಲಂ ಅದದಿಂ ತದಾ;
ದುಗ್ಗತಿಂ ನಾಭಿಜಾನಾಮಿ, ಫಲದಾನಸ್ಸಿದಂ ಫಲಂ.
‘‘ಕಿಲೇಸಾ ಝಾಪಿತಾ ಮಯ್ಹಂ…ಪೇ… ವಿಹರಾಮಿ ಅನಾಸವೋ.
‘‘ಸ್ವಾಗತಂ ¶ ವತ ಮೇ ಆಸಿ…ಪೇ… ಕತಂ ಬುದ್ಧಸ್ಸ ಸಾಸನಂ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಅಮೋದಫಲಿಯೋ ಥೇರೋ ಇಮಾ ಗಾಥಾಯೋ
ಅಭಾಸಿತ್ಥಾತಿ.
ಅಮೋದಫಲಿಯತ್ಥೇರಸ್ಸಾಪದಾನಂ ಅಟ್ಠಮಂ.
೯. ತಾಲಫಲದಾಯಕತ್ಥೇರಅಪದಾನಂ
‘‘ಸತರಂಸೀ ನಾಮ ಭಗವಾ, ಸಯಮ್ಭೂ ಅಪರಾಜಿತೋ;
ವಿವೇಕಾ ವುಟ್ಠಹಿತ್ವಾನ, ಗೋಚರಾಯಾಭಿನಿಕ್ಖಮಿ.
‘‘ಫಲಹತ್ಥೋ ಅಹಂ ದಿಸ್ವಾ, ಉಪಗಚ್ಛಿಂ ನರಾಸಭಂ;
ಪಸನ್ನಚಿತ್ತೋ ಸುಮನೋ, ತಾಲಫಲಂ ಅದಾಸಹಂ.
‘‘ಚತುನ್ನವುತಿತೋ ಕಪ್ಪೇ, ಯಂ ಫಲಂ ಅದದಿಂ ತದಾ;
ದುಗ್ಗತಿಂ ನಾಭಿಜಾನಾಮಿ, ಫಲದಾನಸ್ಸಿದಂ ಫಲಂ.
‘‘ಕಿಲೇಸಾ ಝಾಪಿತಾ ಮಯ್ಹಂ…ಪೇ… ವಿಹರಾಮಿ ಅನಾಸವೋ.
‘‘ಸ್ವಾಗತಂ ವತ ಮೇ ಆಸಿ…ಪೇ… ಕತಂ ಬುದ್ಧಸ್ಸ ಸಾಸನಂ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ¶ ಸುದಂ ಆಯಸ್ಮಾ ತಾಲಫಲದಾಯಕೋ ಥೇರೋ ಇಮಾ ಗಾಥಾಯೋ
ಅಭಾಸಿತ್ಥಾತಿ.
ತಾಲಫಲದಾಯಕತ್ಥೇರಸ್ಸಾಪದಾನಂ ನವಮಂ.
೧೦. ನಾಳಿಕೇರಫಲದಾಯಕತ್ಥೇರಅಪದಾನಂ
‘‘ನಗರೇ ¶ ¶ ಬನ್ಧುಮತಿಯಾ, ಆರಾಮಿಕೋ ಅಹಂ ತದಾ;
ಅದ್ದಸಂ ವಿರಜಂ ಬುದ್ಧಂ, ಗಚ್ಛನ್ತಂ ಅನಿಲಞ್ಜಸೇ.
‘‘ನಾಳಿಕೇರಫಲಂ ಗಯ್ಹ, ಬುದ್ಧಸೇಟ್ಠಸ್ಸದಾಸಹಂ;
ಆಕಾಸೇ ಠಿತಕೋ ಸನ್ತೋ, ಪಟಿಗ್ಗಣ್ಹಿ ಮಹಾಯಸೋ.
‘‘ವಿತ್ತಿಸಞ್ಜನನೋ ¶ ಮಯ್ಹಂ, ದಿಟ್ಠಧಮ್ಮಸುಖಾವಹೋ;
ಫಲಂ ಬುದ್ಧಸ್ಸ ದತ್ವಾನ, ವಿಪ್ಪಸನ್ನೇನ ಚೇತಸಾ.
‘‘ಅಧಿಗಚ್ಛಿಂ ತದಾ ಪೀತಿಂ, ವಿಪುಲಞ್ಚ ಸುಖುತ್ತಮಂ;
ಉಪ್ಪಜ್ಜತೇವ ರತನಂ, ನಿಬ್ಬತ್ತಸ್ಸ ತಹಿಂ ತಹಿಂ.
‘‘ಏಕನವುತಿತೋ ಕಪ್ಪೇ, ಯಂ ಫಲಂ ಅದದಿಂ ತದಾ;
ದುಗ್ಗತಿಂ ನಾಭಿಜಾನಾಮಿ, ಫಲದಾನಸ್ಸಿದಂ ಫಲಂ.
‘‘ದಿಬ್ಬಚಕ್ಖು ವಿಸುದ್ಧಂ ಮೇ, ಸಮಾಧಿಕುಸಲೋ ಅಹಂ;
ಅಭಿಞ್ಞಾಪಾರಮಿಪ್ಪತ್ತೋ, ಫಲದಾನಸ್ಸಿದಂ ಫಲಂ.
‘‘ಕಿಲೇಸಾ ಝಾಪಿತಾ ಮಯ್ಹಂ…ಪೇ… ವಿಹರಾಮಿ ಅನಾಸವೋ.
‘‘ಸ್ವಾಗತಂ ವತ ಮೇ ಆಸಿ…ಪೇ… ¶ ಕತಂ ಬುದ್ಧಸ್ಸ ಸಾಸನಂ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ನಾಳಿಕೇರಫಲದಾಯಕೋ ಥೇರೋ ಇಮಾ
ಗಾಥಾಯೋ ಅಭಾಸಿತ್ಥಾತಿ.
ನಾಳಿಕೇರಫಲದಾಯಕತ್ಥೇರಸ್ಸಾಪದಾನಂ ದಸಮಂ.
ಕಣಿಕಾರವಗ್ಗೋ ಏಕಪಞ್ಞಾಸಮೋ.
ತಸ್ಸುದ್ದಾನಂ –
ಕಣಿಕಾರೇಕಪತ್ತಾ ಚ, ಕಾಸುಮಾರೀ ತಥಾವಟಾ;
ಪಾದಞ್ಚ ಮಾತುಲುಙ್ಗಞ್ಚ, ಅಜೇಲೀಮೋದಮೇವ ಚ.
ತಾಲಂ ತಥಾ ನಾಳಿಕೇರಂ, ಗಾಥಾಯೋ ಗಣಿತಾ ವಿಹ;
ಏಕಂ ಗಾಥಾಸತಂ ಹೋತಿ, ಊನಾಧಿಕವಿವಜ್ಜಿತಂ.
೫೨. ಫಲದಾಯಕವಗ್ಗೋ
೧. ಕುರಞ್ಚಿಯಫಲದಾಯಕತ್ಥೇರಅಪದಾನಂ
‘‘ಮಿಗಲುದ್ದೋ ¶ ¶ ¶ ಪುರೇ ಆಸಿಂ, ವಿಪಿನೇ ವಿಚರಂ ಅಹಂ;
ಅದ್ದಸಂ ವಿರಜಂ ಬುದ್ಧಂ, ಸಬ್ಬಧಮ್ಮಾನ ಪಾರಗುಂ.
‘‘ಕುರಞ್ಚಿಯಫಲಂ ಗಯ್ಹ, ಬುದ್ಧಸೇಟ್ಠಸ್ಸದಾಸಹಂ;
ಪುಞ್ಞಕ್ಖೇತ್ತಸ್ಸ ತಾದಿನೋ, ಪಸನ್ನೋ ಸೇಹಿ ಪಾಣಿಭಿ.
‘‘ಏಕತಿಂಸೇ ಇತೋ ಕಪ್ಪೇ, ಯಂ ಫಲಂ ಅದದಿಂ ತದಾ;
ದುಗ್ಗತಿಂ ನಾಭಿಜಾನಾಮಿ, ಫಲದಾನಸ್ಸಿದಂ ಫಲಂ.
‘‘ಕಿಲೇಸಾ ¶ ಝಾಪಿತಾ ಮಯ್ಹಂ, ಭವಾ ಸಬ್ಬೇ ಸಮೂಹತಾ;
ನಾಗೋವ ಬನ್ಧನಂ ಛೇತ್ವಾ, ವಿಹರಾಮಿ ಅನಾಸವೋ.
‘‘ಸ್ವಾಗತಂ ವತ ಮೇ ಆಸಿ, ಬುದ್ಧಸೇಟ್ಠಸ್ಸ ಸನ್ತಿಕೇ;
ತಿಸ್ಸೋ ವಿಜ್ಜಾ ಅನುಪ್ಪತ್ತಾ, ಕತಂ ಬುದ್ಧಸ್ಸ ಸಾಸನಂ.
‘‘ಪಟಿಸಮ್ಭಿದಾ ಚತಸ್ಸೋ, ವಿಮೋಕ್ಖಾಪಿ ಚ ಅಟ್ಠಿಮೇ;
ಛಳಭಿಞ್ಞಾ ಸಚ್ಛಿಕತಾ, ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಕುರಞ್ಚಿಯಫಲದಾಯಕೋ ಥೇರೋ ಇಮಾ
ಗಾಥಾಯೋ ಅಭಾಸಿತ್ಥಾತಿ.
ಕುರಞ್ಚಿಯಫಲದಾಯಕತ್ಥೇರಸ್ಸಾಪದಾನಂ ಪಠಮಂ.
೨. ಕಪಿತ್ಥಫಲದಾಯಕತ್ಥೇರಅಪದಾನಂ
‘‘ಸುವಣ್ಣವಣ್ಣಂ ¶ ಸಮ್ಬುದ್ಧಂ, ಆಹುತೀನಂ ಪಟಿಗ್ಗಹಂ;
ರಥಿಯಂ ಪಟಿಪಜ್ಜನ್ತಂ, ಕಪಿತ್ಥಂ [ಕಪಿಟ್ಠಂ (ಸ್ಯಾ.)] ಅದದಿಂ ಫಲಂ.
‘‘ಏಕನವುತಿತೋ ¶ ಕಪ್ಪೇ, ಯಂ ಫಲಂ ಅದದಿಂ ತದಾ;
ದುಗ್ಗತಿಂ ನಾಭಿಜಾನಾಮಿ, ಫಲದಾನಸ್ಸಿದಂ ಫಲಂ.
‘‘ಕಿಲೇಸಾ ಝಾಪಿತಾ ಮಯ್ಹಂ…ಪೇ… ವಿಹರಾಮಿ ಅನಾಸವೋ.
‘‘ಸ್ವಾಗತಂ ¶ ವತ ಮೇ ಆಸಿ…ಪೇ… ಕತಂ ಬುದ್ಧಸ್ಸ ಸಾಸನಂ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಕಪಿತ್ಥಫಲದಾಯಕೋ ಥೇರೋ ಇಮಾ
ಗಾಥಾಯೋ ಅಭಾಸಿತ್ಥಾತಿ.
ಕಪಿತ್ಥಫಲದಾಯಕತ್ಥೇರಸ್ಸಾಪದಾನಂ ದುತಿಯಂ.
೩. ಕೋಸಮ್ಬಫಲಿಯತ್ಥೇರಅಪದಾನಂ
‘‘ಕಕುಧಂ ವಿಲಸನ್ತಂವ, ದೇವದೇವಂ ನರಾಸಭಂ;
ರಥಿಯಂ ಪಟಿಪಜ್ಜನ್ತಂ, ಕೋಸಮ್ಬಂ [ಕೋಸುಮ್ಬಂ (ಸೀ. ಸ್ಯಾ. ಪೀ.)] ಅದದಿಂ ತದಾ.
‘‘ಏಕತಿಂಸೇ ಇತೋ ಕಪ್ಪೇ, ಯಂ ಫಲಂ ಅದದಿಂ ತದಾ;
ದುಗ್ಗತಿಂ ನಾಭಿಜಾನಾಮಿ, ಫಲದಾನಸ್ಸಿದಂ ಫಲಂ.
‘‘ಕಿಲೇಸಾ ¶ ಝಾಪಿತಾ ಮಯ್ಹಂ…ಪೇ… ವಿಹರಾಮಿ ಅನಾಸವೋ.
‘‘ಸ್ವಾಗತಂ ವತ ಮೇ ಆಸಿ…ಪೇ… ಕತಂ ಬುದ್ಧಸ್ಸ ಸಾಸನಂ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಕೋಸಮ್ಬಫಲಿಯೋ ಥೇರೋ ಇಮಾ ಗಾಥಾಯೋ
ಅಭಾಸಿತ್ಥಾತಿ.
ಕೋಸಮ್ಬಫಲಿಯತ್ಥೇರಸ್ಸಾಪದಾನಂ ತತಿಯಂ.
೪. ಕೇತಕಪುಪ್ಫಿಯತ್ಥೇರಅಪದಾನಂ
‘‘ವಿನತಾನದಿಯಾ ತೀರೇ, ವಿಹಾಸಿ ಪುರಿಸುತ್ತಮೋ;
ಅದ್ದಸಂ ವಿರಜಂ ಬುದ್ಧಂ, ಏಕಗ್ಗಂ ಸುಸಮಾಹಿತಂ.
‘‘ಮಧುಗನ್ಧಸ್ಸ ¶ ಪುಪ್ಫೇನ, ಕೇತಕಸ್ಸ ಅಹಂ ತದಾ;
ಪಸನ್ನಚಿತ್ತೋ ಸುಮನೋ, ಬುದ್ಧಸೇಟ್ಠಮಪೂಜಯಿಂ.
‘‘ಏಕನವುತಿತೋ ¶ ¶ ಕಪ್ಪೇ, ಯಂ ಪುಪ್ಫಮಭಿಪೂಜಯಿಂ;
ದುಗ್ಗತಿಂ ನಾಭಿಜಾನಾಮಿ, ಬುದ್ಧಪೂಜಾಯಿದಂ ಫಲಂ.
‘‘ಕಿಲೇಸಾ ಝಾಪಿತಾ ಮಯ್ಹಂ…ಪೇ… ವಿಹರಾಮಿ ಅನಾಸವೋ.
‘‘ಸ್ವಾಗತಂ ವತ ಮೇ ಆಸಿ…ಪೇ… ¶ ಕತಂ ಬುದ್ಧಸ್ಸ ಸಾಸನಂ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಕೇತಕಪುಪ್ಫಿಯೋ ಥೇರೋ ಇಮಾ ಗಾಥಾಯೋ
ಅಭಾಸಿತ್ಥಾತಿ.
ಕೇತಕಪುಪ್ಫಿಯತ್ಥೇರಸ್ಸಾಪದಾನಂ ಚತುತ್ಥಂ.
೫. ನಾಗಪುಪ್ಫಿಯತ್ಥೇರಅಪದಾನಂ
‘‘ಸುವಣ್ಣವಣ್ಣಂ ಸಮ್ಬುದ್ಧಂ, ಆಹುತೀನಂ ಪಟಿಗ್ಗಹಂ;
ರಥಿಯಂ ಪಟಿಪಜ್ಜನ್ತಂ, ನಾಗಪುಪ್ಫಂ ಅಪೂಜಯಿಂ.
‘‘ಏಕನವುತಿತೋ ಕಪ್ಪೇ, ಯಂ ಪುಪ್ಫಮಭಿಪೂಜಯಿಂ;
ದುಗ್ಗತಿಂ ನಾಭಿಜಾನಾಮಿ, ಬುದ್ಧಪೂಜಾಯಿದಂ ಫಲಂ.
‘‘ಕಿಲೇಸಾ ಝಾಪಿತಾ ಮಯ್ಹಂ…ಪೇ… ವಿಹರಾಮಿ ಅನಾಸವೋ.
‘‘ಸ್ವಾಗತಂ ವತ ಮೇ ಆಸಿ…ಪೇ… ಕತಂ ಬುದ್ಧಸ್ಸ ಸಾಸನಂ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ನಾಗಪುಪ್ಫಿಯೋ ಥೇರೋ ಇಮಾ ಗಾಥಾಯೋ
ಅಭಾಸಿತ್ಥಾತಿ.
ನಾಗಪುಪ್ಫಿಯತ್ಥೇರಸ್ಸಾಪದಾನಂ ಪಞ್ಚಮಂ.
೬. ಅಜ್ಜುನಪುಪ್ಫಿಯತ್ಥೇರಅಪದಾನಂ
‘‘ಚನ್ದಭಾಗಾನದೀತೀರೇ ¶ ¶ , ಅಹೋಸಿಂ ಕಿನ್ನರೋ ತದಾ;
ಅದ್ದಸಂ ವಿರಜಂ ಬುದ್ಧಂ, ಸಯಮ್ಭುಂ ಅಪರಾಜಿತಂ.
‘‘ಪಸನ್ನಚಿತ್ತೋ ಸುಮನೋ, ವೇದಜಾತೋ ಕತಞ್ಜಲೀ;
ಗಹೇತ್ವಾ ಅಜ್ಜುನಂ ಪುಪ್ಫಂ, ಸಯಮ್ಭುಂ ಅಭಿಪೂಜಯಿಂ.
‘‘ತೇನ ¶ ಕಮ್ಮೇನ ಸುಕತೇನ, ಚೇತನಾಪಣಿಧೀಹಿ ಚ;
ಜಹಿತ್ವಾ ಕಿನ್ನರಂ ದೇಹಂ, ತಾವತಿಂಸಮಗಚ್ಛಹಂ.
‘‘ಛತ್ತಿಂಸಕ್ಖತ್ತುಂ ದೇವಿನ್ದೋ, ದೇವರಜ್ಜಮಕಾರಯಿಂ;
ದಸಕ್ಖತ್ತುಂ ಚಕ್ಕವತ್ತೀ, ಮಹಾರಜ್ಜಮಕಾರಯಿಂ.
‘‘ಪದೇಸರಜ್ಜಂ ವಿಪುಲಂ, ಗಣನಾತೋ ಅಸಙ್ಖಿಯಂ;
ಸುಖೇತ್ತೇ ವಪ್ಪಿತಂ ಬೀಜಂ, ಸಯಮ್ಭುಮ್ಹಿ ಅಹೋ ಮಮ [ಅಹೋಸಿ ಮೇ (ಸ್ಯಾ.)].
‘‘ಕುಸಲಂ ವಿಜ್ಜತೇ ಮಯ್ಹಂ, ಪಬ್ಬಜಿಂ ಅನಗಾರಿಯಂ;
ಪೂಜಾರಹೋ ಅಹಂ ಅಜ್ಜ, ಸಕ್ಯಪುತ್ತಸ್ಸ ಸಾಸನೇ.
‘‘ಕಿಲೇಸಾ ಝಾಪಿತಾ ಮಯ್ಹಂ…ಪೇ… ವಿಹರಾಮಿ ಅನಾಸವೋ.
‘‘ಸ್ವಾಗತಂ ವತ ಮೇ ಆಸಿ…ಪೇ… ಕತಂ ಬುದ್ಧಸ್ಸ ಸಾಸನಂ.
‘‘ಪಟಿಸಮ್ಭಿದಾ ¶ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ¶ ಸುದಂ ಆಯಸ್ಮಾ ಅಜ್ಜುನಪುಪ್ಫಿಯೋ ಥೇರೋ ಇಮಾ ಗಾಥಾಯೋ
ಅಭಾಸಿತ್ಥಾತಿ.
ಅಜ್ಜುನಪುಪ್ಫಿಯತ್ಥೇರಸ್ಸಾಪದಾನಂ ಛಟ್ಠಂ.
೭. ಕುಟಜಪುಪ್ಫಿಯತ್ಥೇರಅಪದಾನಂ
‘‘ಹಿಮವನ್ತಸ್ಸಾವಿದೂರೇ, ವಸಲೋ [ಚಾವಲೋ (ಸೀ. ಪೀ.), ಅಚ್ಚಯೋ (ಸ್ಯಾ.)] ನಾಮ ಪಬ್ಬತೋ;
ಬುದ್ಧೋ ಸುದಸ್ಸನೋ ನಾಮ, ವಸತೇ ಪಬ್ಬತನ್ತರೇ.
‘‘ಪುಪ್ಫಂ ಹೇಮವನ್ತಂ ಗಯ್ಹ, ವೇಹಾಸಂ ಅಗಮಾಸಹಂ;
ತತ್ಥದ್ದಸಾಸಿಂ ಸಮ್ಬುದ್ಧಂ, ಓಘತಿಣ್ಣಮನಾಸವಂ.
‘‘ಪುಪ್ಫಂ ¶ ಕುಟಜಮಾದಾಯ, ಸಿರೇ ಕತ್ವಾನ ಅಞ್ಜಲಿಂ [ಕತ್ವಾನಹಂ ತದಾ (ಸ್ಯಾ. ಪೀ. ಕ.)];
ಬುದ್ಧಸ್ಸ ಅಭಿರೋಪೇಸಿಂ, ಸಯಮ್ಭುಸ್ಸ ಮಹೇಸಿನೋ.
‘‘ಏಕತಿಂಸೇ ಇತೋ ಕಪ್ಪೇ, ಯಂ ಪುಪ್ಫಮಭಿಪೂಜಯಿಂ;
ದುಗ್ಗತಿಂ ನಾಭಿಜಾನಾಮಿ, ಬುದ್ಧಪೂಜಾಯಿದಂ ಫಲಂ.
‘‘ಕಿಲೇಸಾ ¶ ಝಾಪಿತಾ ಮಯ್ಹಂ…ಪೇ… ವಿಹರಾಮಿ ಅನಾಸವೋ.
‘‘ಸ್ವಾಗತಂ ವತ ಮೇ ಆಸಿ…ಪೇ… ಕತಂ ಬುದ್ಧಸ್ಸ ಸಾಸನಂ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಕುಟಜಪುಪ್ಫಿಯೋ ಥೇರೋ ಇಮಾ ಗಾಥಾಯೋ
ಅಭಾಸಿತ್ಥಾತಿ.
ಕುಟಜಪುಪ್ಫಿಯತ್ಥೇರಸ್ಸಾಪದಾನಂ ಸತ್ತಮಂ.
೮. ಘೋಸಸಞ್ಞಕತ್ಥೇರಅಪದಾನಂ
‘‘ಮಿಗಲುದ್ದೋ ¶ ಪುರೇ ಆಸಿಂ, ಅರಞ್ಞೇ ವಿಪಿನೇ ಅಹಂ;
ಅದ್ದಸಂ ವಿರಜಂ ಬುದ್ಧಂ, ದೇವಸಙ್ಘಪುರಕ್ಖತಂ.
‘‘ಚತುಸಚ್ಚಂ ಪಕಾಸೇನ್ತಂ, ದೇಸೇನ್ತಂ ಅಮತಂ ಪದಂ;
ಅಸ್ಸೋಸಿಂ ಮಧುರಂ ಧಮ್ಮಂ, ಸಿಖಿನೋ ಲೋಕಬನ್ಧುನೋ.
‘‘ಘೋಸೇ ಚಿತ್ತಂ ಪಸಾದೇಸಿಂ, ಅಸಮಪ್ಪಟಿಪುಗ್ಗಲೇ;
ತತ್ಥ ಚಿತ್ತಂ ಪಸಾದೇತ್ವಾ, ಉತ್ತರಿಂ [ಅತರಿಂ (ಸೀ. ಪೀ.)] ದುತ್ತರಂ ಭವಂ.
‘‘ಏಕತಿಂಸೇ ಇತೋ ಕಪ್ಪೇ, ಯಂ ಸಞ್ಞಮಲಭಿಂ ತದಾ;
ದುಗ್ಗತಿಂ ನಾಭಿಜಾನಾಮಿ, ಘೋಸಸಞ್ಞಾಯಿದಂ ಫಲಂ.
‘‘ಕಿಲೇಸಾ ಝಾಪಿತಾ ಮಯ್ಹಂ…ಪೇ… ವಿಹರಾಮಿ ಅನಾಸವೋ.
‘‘ಸ್ವಾಗತಂ ವತ ಮೇ ಆಸಿ…ಪೇ… ಕತಂ ಬುದ್ಧಸ್ಸ ಸಾಸನಂ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಘೋಸಸಞ್ಞಕೋ ಥೇರೋ ಇಮಾ ಗಾಥಾಯೋ
ಅಭಾಸಿತ್ಥಾತಿ.
ಘೋಸಸಞ್ಞಕತ್ಥೇರಸ್ಸಾಪದಾನಂ ಅಟ್ಠಮಂ.
೯. ಸಬ್ಬಫಲದಾಯಕತ್ಥೇರಅಪದಾನಂ
‘‘ವರುಣೋ ¶ ¶ ¶ ನಾಮ ನಾಮೇನ, ಬ್ರಾಹ್ಮಣೋ ಮನ್ತಪಾರಗೂ;
ಛಡ್ಡೇತ್ವಾ ದಸಪುತ್ತಾನಿ, ವನಮಜ್ಝೋಗಹಿಂ ತದಾ.
‘‘ಅಸ್ಸಮಂ ¶ ಸುಕತಂ ಕತ್ವಾ, ಸುವಿಭತ್ತಂ ಮನೋರಮಂ;
ಪಣ್ಣಸಾಲಂ ಕರಿತ್ವಾನ, ವಸಾಮಿ ವಿಪಿನೇ ಅಹಂ.
‘‘ಪದುಮುತ್ತರೋ ಲೋಕವಿದೂ, ಆಹುತೀನಂ ಪಟಿಗ್ಗಹೋ;
ಮಮುದ್ಧರಿತುಕಾಮೋ ಸೋ, ಆಗಚ್ಛಿ ಮಮ ಅಸ್ಸಮಂ.
‘‘ಯಾವತಾ ವನಸಣ್ಡಮ್ಹಿ, ಓಭಾಸೋ ವಿಪುಲೋ ಅಹು;
ಬುದ್ಧಸ್ಸ ಆನುಭಾವೇನ, ಪಜ್ಜಲೀ ವಿಪಿನಂ ತದಾ.
‘‘ದಿಸ್ವಾನ ತಂ ಪಾಟಿಹೀರಂ, ಬುದ್ಧಸೇಟ್ಠಸ್ಸ ತಾದಿನೋ;
ಪತ್ತಪುಟಂ ಗಹೇತ್ವಾನ, ಫಲೇನ ಪೂಜಯಿಂ ಅಹಂ.
‘‘ಉಪಗನ್ತ್ವಾನ ಸಮ್ಬುದ್ಧಂ, ಸಹಖಾರಿಮದಾಸಹಂ;
ಅನುಕಮ್ಪಾಯ ಮೇ ಬುದ್ಧೋ, ಇದಂ ವಚನಮಬ್ರವಿ.
‘ಖಾರಿಭಾರಂ ಗಹೇತ್ವಾನ, ಪಚ್ಛತೋ ಏಹಿ ಮೇ ತುವಂ;
ಪರಿಭುತ್ತೇ ಚ ಸಙ್ಘಮ್ಹಿ, ಪುಞ್ಞಂ ತವ ಭವಿಸ್ಸತಿ’.
‘‘ಪುಟಕನ್ತಂ ಗಹೇತ್ವಾನ, ಭಿಕ್ಖುಸಙ್ಘಸ್ಸದಾಸಹಂ;
ತತ್ಥ ಚಿತ್ತಂ ಪಸಾದೇತ್ವಾ, ತುಸಿತಂ ಉಪಪಜ್ಜಹಂ.
‘‘ತತ್ಥ ದಿಬ್ಬೇಹಿ ನಚ್ಚೇಹಿ, ಗೀತೇಹಿ ವಾದಿತೇಹಿ ಚ;
ಪುಞ್ಞಕಮ್ಮೇನ ಸಂಯುತ್ತಂ, ಅನುಭೋಮಿ ಸದಾ ಸುಖಂ.
‘‘ಯಂ ¶ ಯಂ ಯೋನುಪಪಜ್ಜಾಮಿ, ದೇವತ್ತಂ ಅಥ ಮಾನುಸಂ;
ಭೋಗೇ ಮೇ ಊನತಾ ನತ್ಥಿ, ಫಲದಾನಸ್ಸಿದಂ ಫಲಂ.
‘‘ಯಾವತಾ ಚತುರೋ ದೀಪಾ, ಸಸಮುದ್ದಾ ಸಪಬ್ಬತಾ;
ಫಲಂ ಬುದ್ಧಸ್ಸ ದತ್ವಾನ, ಇಸ್ಸರಂ ಕಾರಯಾಮಹಂ.
‘‘ಯಾವತಾ ಮೇ ಪಕ್ಖಿಗಣಾ, ಆಕಾಸೇ ಉಪ್ಪತನ್ತಿ ಚೇ;
ತೇಪಿ ಮಂ ವಸಮನ್ವೇನ್ತಿ, ಫಲದಾನಸ್ಸಿದಂ ಫಲಂ.
‘‘ಯಾವತಾ ವನಸಣ್ಡಮ್ಹಿ, ಯಕ್ಖಾ ಭೂತಾ ಚ ರಕ್ಖಸಾ;
ಕುಮ್ಭಣ್ಡಾ ಗರುಳಾ ಚಾಪಿ, ಪಾರಿಚರಿಯಂ ಉಪೇನ್ತಿ ಮೇ.
‘‘ಕುಮ್ಭಾ ¶ ¶ ಸೋಣಾ ಮಧುಕಾರಾ, ಡಂಸಾ ಚ ಮಕಸಾ ಉಭೋ;
ತೇಪಿ ಮಂ ವಸಮನ್ವೇನ್ತಿ, ಫಲದಾನಸ್ಸಿದಂ ಫಲಂ.
‘‘ಸುಪಣ್ಣಾ ¶ ನಾಮ ಸಕುಣಾ, ಪಕ್ಖಿಜಾತಾ ಮಹಬ್ಬಲಾ;
ತೇಪಿ ಮಂ ಸರಣಂ ಯನ್ತಿ, ಫಲದಾನಸ್ಸಿದಂ ಫಲಂ.
‘‘ಯೇಪಿ ದೀಘಾಯುಕಾ ನಾಗಾ, ಇದ್ಧಿಮನ್ತೋ ಮಹಾಯಸಾ;
ತೇಪಿ ಮಂ ವಸಮನ್ವೇನ್ತಿ, ಫಲದಾನಸ್ಸಿದಂ ಫಲಂ.
‘‘ಸೀಹಾ ಬ್ಯಗ್ಘಾ ಚ ದೀಪೀ ಚ, ಅಚ್ಛಕೋಕತರಚ್ಛಕಾ;
ತೇಪಿ ಮಂ ವಸಮನ್ವೇನ್ತಿ, ಫಲದಾನಸ್ಸಿದಂ ಫಲಂ.
‘‘ಓಸಧೀತಿಣವಾಸೀ ಚ, ಯೇ ಚ ಆಕಾಸವಾಸಿನೋ;
ಸಬ್ಬೇ ಮಂ ಸರಣಂ ಯನ್ತಿ, ಫಲದಾನಸ್ಸಿದಂ ಫಲಂ.
‘‘ಸುದುದ್ದಸಂ ಸುನಿಪುಣಂ, ಗಮ್ಭೀರಂ ಸುಪ್ಪಕಾಸಿತಂ;
ಫಸ್ಸಯಿತ್ವಾ [ಫುಸಯಿತ್ವಾ (ಕ.)] ವಿಹರಾಮಿ, ಫಲದಾನಸ್ಸಿದಂ ಫಲಂ.
‘‘ವಿಮೋಕ್ಖೇ ¶ ಅಟ್ಠ ಫುಸಿತ್ವಾ, ವಿಹರಾಮಿ ಅನಾಸವೋ;
ಆತಾಪೀ ನಿಪಕೋ ಚಾಹಂ, ಫಲದಾನಸ್ಸಿದಂ ಫಲಂ.
‘‘ಯೇ ಫಲಟ್ಠಾ ಬುದ್ಧಪುತ್ತಾ, ಖೀಣದೋಸಾ ಮಹಾಯಸಾ;
ಅಹಮಞ್ಞತರೋ ತೇಸಂ, ಫಲದಾನಸ್ಸಿದಂ ಫಲಂ.
‘‘ಅಭಿಞ್ಞಾಪಾರಮಿಂ ಗನ್ತ್ವಾ, ಸುಕ್ಕಮೂಲೇನ ಚೋದಿತೋ;
ಸಬ್ಬಾಸವೇ ಪರಿಞ್ಞಾಯ, ವಿಹರಾಮಿ ಅನಾಸವೋ.
‘‘ತೇವಿಜ್ಜಾ ಇದ್ಧಿಪತ್ತಾ ಚ, ಬುದ್ಧಪುತ್ತಾ ಮಹಾಯಸಾ;
ದಿಬ್ಬಸೋತಸಮಾಪನ್ನಾ, ತೇಸಂ ಅಞ್ಞತರೋ ಅಹಂ.
‘‘ಸತಸಹಸ್ಸಿತೋ ಕಪ್ಪೇ, ಯಂ ಫಲಂ ಅದದಿಂ ತದಾ;
ದುಗ್ಗತಿಂ ನಾಭಿಜಾನಾಮಿ, ಫಲದಾನಸ್ಸಿದಂ ಫಲಂ.
‘‘ಕಿಲೇಸಾ ಝಾಪಿತಾ ಮಯ್ಹಂ…ಪೇ… ವಿಹರಾಮಿ ಅನಾಸವೋ.
‘‘ಸ್ವಾಗತಂ ವತ ಮೇ ಆಸಿ…ಪೇ… ಕತಂ ಬುದ್ಧಸ್ಸ ಸಾಸನಂ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಸಬ್ಬಫಲದಾಯಕೋ ಥೇರೋ ಇಮಾ ಗಾಥಾಯೋ
ಅಭಾಸಿತ್ಥಾತಿ.
ಸಬ್ಬಫಲದಾಯಕತ್ಥೇರಸ್ಸಾಪದಾನಂ ನವಮಂ.
೧೦. ಪದುಮಧಾರಿಕತ್ಥೇರಅಪದಾನಂ
‘‘ಹಿಮವನ್ತಸ್ಸಾವಿದೂರೇ ¶ ¶ ¶ , ರೋಮಸೋ ನಾಮ ಪಬ್ಬತೋ;
ಬುದ್ಧೋಪಿ ಸಮ್ಭವೋ ನಾಮ, ಅಬ್ಭೋಕಾಸೇ ವಸೀ ತದಾ.
‘‘ಭವನಾ ನಿಕ್ಖಮಿತ್ವಾನ, ಪದುಮಂ ಧಾರಯಿಂ ಅಹಂ;
ಏಕಾಹಂ ಧಾರಯಿತ್ವಾನ, ಭವನಂ ಪುನರಾಗಮಿಂ.
‘‘ಏಕತಿಂಸೇ ¶ ಇತೋ ಕಪ್ಪೇ, ಯಂ ಬುದ್ಧಮಭಿಪೂಜಯಿಂ;
ದುಗ್ಗತಿಂ ನಾಭಿಜಾನಾಮಿ, ಬುದ್ಧಪೂಜಾಯಿದಂ ಫಲಂ.
‘‘ಕಿಲೇಸಾ ಝಾಪಿತಾ ಮಯ್ಹಂ…ಪೇ… ವಿಹರಾಮಿ ಅನಾಸವೋ.
‘‘ಸ್ವಾಗತಂ ವತ ಮೇ ಆಸಿ…ಪೇ… ಕತಂ ಬುದ್ಧಸ್ಸ ಸಾಸನಂ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಪದುಮಧಾರಿಕೋ ಥೇರೋ ಇಮಾ ಗಾಥಾಯೋ
ಅಭಾಸಿತ್ಥಾತಿ.
ಪದುಮಧಾರಿಕತ್ಥೇರಸ್ಸಾಪದಾನಂ ದಸಮಂ.
ಫಲದಾಯಕವಗ್ಗೋ ದ್ವೇಪಞ್ಞಾಸಮೋ.
ತಸ್ಸುದ್ದಾನಂ –
ಕುರಞ್ಚಿಯಂ ಕಪಿತ್ಥಞ್ಚ, ಕೋಸಮ್ಬಮಥ ಕೇತಕಂ;
ನಾಗಪುಪ್ಫಜ್ಜುನಞ್ಚೇವ, ಕುಟಜೀ ಘೋಸಸಞ್ಞಕೋ.
ಥೇರೋ ¶ ಚ ಸಬ್ಬಫಲದೋ, ತಥಾ ಪದುಮಧಾರಿಕೋ;
ಅಸೀತಿ ಚೇತ್ಥ ಗಾಥಾಯೋ, ತಿಸ್ಸೋ ಗಾಥಾ ತದುತ್ತರಿ.
೫೩. ತಿಣದಾಯಕವಗ್ಗೋ
೧. ತಿಣಮುಟ್ಠಿದಾಯಕತ್ಥೇರಅಪದಾನಂ
‘‘ಹಿಮವನ್ತಸ್ಸಾವಿದೂರೇ ¶ ¶ , ಲಮ್ಬಕೋ ನಾಮ ಪಬ್ಬತೋ;
ತತ್ಥೇವ ತಿಸ್ಸೋ [ತತ್ಥೋಪತಿಸ್ಸೋ (ಸೀ. ಪೀ. ಕ.)] ಸಮ್ಬುದ್ಧೋ, ಅಬ್ಭೋಕಾಸಮ್ಹಿ ಚಙ್ಕಮಿ.
‘‘ಮಿಗಲುದ್ದೋ ಪುರೇ ಆಸಿಂ, ಅರಞ್ಞೇ ಕಾನನೇ ಅಹಂ;
ದಿಸ್ವಾನ ತಂ ದೇವದೇವಂ, ತಿಣಮುಟ್ಠಿಮದಾಸಹಂ.
‘‘ನಿಸೀದನತ್ಥಂ ಬುದ್ಧಸ್ಸ, ದತ್ವಾ ಚಿತ್ತಂ ಪಸಾದಯಿಂ;
ಸಮ್ಬುದ್ಧಂ ಅಭಿವಾದೇತ್ವಾ, ಪಕ್ಕಾಮಿಂ [ಪಕ್ಕಮಿಂ (ಕ.)] ಉತ್ತರಾಮುಖೋ.
‘‘ಅಚಿರಂ ಗತಮತ್ತಸ್ಸ [ಗತಮತ್ತಂ ಮಂ (ಸೀ. ಸ್ಯಾ.)], ಮಿಗರಾಜಾ ಅಪೋಥಯಿ [ಅಹೇಠಯಿ (ಸೀ. ಸ್ಯಾ. ಪೀ.)];
ಸೀಹೇನ ಪೋಥಿತೋ [ಪಾತಿತೋ (ಸೀ. ಪೀ.), ಘಾಟಿತೋ (ಸ್ಯಾ.)] ಸನ್ತೋ, ತತ್ಥ ಕಾಲಙ್ಕತೋ ಅಹಂ.
‘‘ಆಸನ್ನೇ ಮೇ ಕತಂ ಕಮ್ಮಂ, ಬುದ್ಧಸೇಟ್ಠೇ ಅನಾಸವೇ;
ಸುಮುತ್ತೋ ಸರವೇಗೋವ, ದೇವಲೋಕಮಗಚ್ಛಹಂ.
‘‘ಯೂಪೋ ತತ್ಥ ಸುಭೋ ಆಸಿ, ಪುಞ್ಞಕಮ್ಮಾಭಿನಿಮ್ಮಿತೋ;
ಸಹಸ್ಸಕಣ್ಡೋ ಸತಭೇಣ್ಡು, ಧಜಾಲು ಹರಿತಾಮಯೋ.
‘‘ಪಭಾ ¶ ನಿದ್ಧಾವತೇ ತಸ್ಸ, ಸತರಂಸೀವ ಉಗ್ಗತೋ;
ಆಕಿಣ್ಣೋ ದೇವಕಞ್ಞಾಹಿ, ಆಮೋದಿಂ ಕಾಮಕಾಮಿಹಂ.
‘‘ದೇವಲೋಕಾ ¶ ಚವಿತ್ವಾನ, ಸುಕ್ಕಮೂಲೇನ ಚೋದಿತೋ;
ಆಗನ್ತ್ವಾನ ಮನುಸ್ಸತ್ತಂ, ಪತ್ತೋಮ್ಹಿ ಆಸವಕ್ಖಯಂ.
‘‘ಚತುನ್ನವುತಿತೋ ಕಪ್ಪೇ, ನಿಸೀದನಮದಾಸಹಂ;
ದುಗ್ಗತಿಂ ನಾಭಿಜಾನಾಮಿ, ತಿಣಮುಟ್ಠೇ ಇದಂ ಫಲಂ.
‘‘ಕಿಲೇಸಾ ಝಾಪಿತಾ ಮಯ್ಹಂ, ಭವಾ ಸಬ್ಬೇ ಸಮೂಹತಾ;
ನಾಗೋವ ಬನ್ಧನಂ ಛೇತ್ವಾ, ವಿಹರಾಮಿ ಅನಾಸವೋ.
‘‘ಸ್ವಾಗತಂ ವತ ಮೇ ಆಸಿ, ಮಮ ಬುದ್ಧಸ್ಸ ಸನ್ತಿಕೇ;
ತಿಸ್ಸೋ ವಿಜ್ಜಾ ಅನುಪ್ಪತ್ತಾ, ಕತಂ ಬುದ್ಧಸ್ಸ ಸಾಸನಂ.
‘‘ಪಟಿಸಮ್ಭಿದಾ ¶ ¶ ಚತಸ್ಸೋ, ವಿಮೋಕ್ಖಾಪಿ ಚ ಅಟ್ಠಿಮೇ;
ಛಳಭಿಞ್ಞಾ ಸಚ್ಛಿಕತಾ, ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ತಿಣಮುಟ್ಠಿದಾಯಕೋ ಥೇರೋ ಇಮಾ ಗಾಥಾಯೋ
ಅಭಾಸಿತ್ಥಾತಿ.
ತಿಣಮುಟ್ಠಿದಾಯಕತ್ಥೇರಸ್ಸಾಪದಾನಂ ಪಠಮಂ.
೨. ಮಞ್ಚದಾಯಕತ್ಥೇರಅಪದಾನಂ
‘‘ವಿಪಸ್ಸಿನೋ ಭಗವತೋ, ಲೋಕಜೇಟ್ಠಸ್ಸ ತಾದಿನೋ;
ಏಕಮಞ್ಚಂ [ಏಕಂ ವೇಚ್ಚಂ (ಸ್ಯಾ.), ಏಕಪಚ್ಛಂ (ಪೀ.)] ಮಯಾ ದಿನ್ನಂ, ಪಸನ್ನೇನ ಸಪಾಣಿನಾ.
‘‘ಹತ್ಥಿಯಾನಂ ಅಸ್ಸಯಾನಂ, ದಿಬ್ಬಯಾನಂ ಸಮಜ್ಝಗಂ;
ತೇನ ಮಞ್ಚಕದಾನೇನ, ಪತ್ತೋಮ್ಹಿ ಆಸವಕ್ಖಯಂ.
‘‘ಏಕನವುತಿತೋ ¶ ಕಪ್ಪೇ, ಯಂ ಮಞ್ಚಮದದಿಂ ತದಾ;
ದುಗ್ಗತಿಂ ನಾಭಿಜಾನಾಮಿ, ಮಞ್ಚದಾನಸ್ಸಿದಂ ಫಲಂ.
‘‘ಕಿಲೇಸಾ ಝಾಪಿತಾ ಮಯ್ಹಂ…ಪೇ… ವಿಹರಾಮಿ ಅನಾಸವೋ.
‘‘ಸ್ವಾಗತಂ ವತ ಮೇ ಆಸಿ…ಪೇ… ಕತಂ ಬುದ್ಧಸ್ಸ ಸಾಸನಂ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಮಞ್ಚದಾಯಕೋ [ವೇಚ್ಚಕದಾಯಕೋ (ಸ್ಯಾ.), ಸದ್ದಸಞ್ಞಿಕವಗ್ಗೇಪಿ ಇದಂ§ಅಪದಾನಂ ದಿಸ್ಸತಿ] ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಮಞ್ಚದಾಯಕತ್ಥೇರಸ್ಸಾಪದಾನಂ ದುತಿಯಂ.
೩. ಸರಣಗಮನಿಯತ್ಥೇರಅಪದಾನಂ
‘‘ಆರುಹಿಮ್ಹ ತದಾ ನಾವಂ, ಭಿಕ್ಖು ಚಾಜೀವಿಕೋ ಚಹಂ;
ನಾವಾಯ ಭಿಜ್ಜಮಾನಾಯ, ಭಿಕ್ಖು ಮೇ ಸರಣಂ ಅದಾ.
‘‘ಏಕತಿಂಸೇ ¶ ಇತೋ ಕಪ್ಪೇ, ಯಂ ಸೋ ಮೇ ಸರಣಂ ಅದಾ;
ದುಗ್ಗತಿಂ ನಾಭಿಜಾನಾಮಿ, ಸರಣಗಮನೇ ಫಲಂ.
‘‘ಕಿಲೇಸಾ ¶ ಝಾಪಿತಾ ಮಯ್ಹಂ…ಪೇ… ವಿಹರಾಮಿ ಅನಾಸವೋ.
‘‘ಸ್ವಾಗತಂ ವತ ಮೇ ಆಸಿ…ಪೇ… ಕತಂ ಬುದ್ಧಸ್ಸ ಸಾಸನಂ.
‘‘ಪಟಿಸಮ್ಭಿದಾ ¶ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಸರಣಗಮನಿಯೋ ಥೇರೋ ಇಮಾ ಗಾಥಾಯೋ
ಅಭಾಸಿತ್ಥಾತಿ.
ಸರಣಗಮನಿಯತ್ಥೇರಸ್ಸಾಪದಾನಂ ತತಿಯಂ.
೪. ಅಬ್ಭಞ್ಜನದಾಯಕತ್ಥೇರಅಪದಾನಂ
‘‘ನಗರೇ ¶ ಬನ್ಧುಮತಿಯಾ, ರಾಜುಯ್ಯಾನೇ ವಸಾಮಹಂ;
ಚಮ್ಮವಾಸೀ ತದಾ ಆಸಿಂ, ಕಮಣ್ಡಲುಧರೋ ಅಹಂ.
‘‘ಅದ್ದಸಂ ವಿಮಲಂ ಬುದ್ಧಂ, ಸಯಮ್ಭುಂ ಅಪರಾಜಿತಂ;
ಪಧಾನಂ ಪಹಿತತ್ತಂ ತಂ, ಝಾಯಿಂ ಝಾನರತಂ ವಸಿಂ [ಇಸಿಂ (ಸ್ಯಾ.)].
‘‘ಸಬ್ಬಕಾಮಸಮಿದ್ಧಿಞ್ಚ, ಓಘತಿಣ್ಣಮನಾಸವಂ;
ದಿಸ್ವಾ ಪಸನ್ನೋ ಸುಮನೋ, ಅಬ್ಭಞ್ಜನಮದಾಸಹಂ.
‘‘ಏಕನವುತಿತೋ ಕಪ್ಪೇ, ಯಂ ದಾನಮದದಿಂ ತದಾ;
ದುಗ್ಗತಿಂ ನಾಭಿಜಾನಾಮಿ, ಅಬ್ಭಞ್ಜನಸ್ಸಿದಂ ಫಲಂ.
‘‘ಕಿಲೇಸಾ ಝಾಪಿತಾ ಮಯ್ಹಂ…ಪೇ… ವಿಹರಾಮಿ ಅನಾಸವೋ.
‘‘ಸ್ವಾಗತಂ ವತ ಮೇ ಆಸಿ…ಪೇ… ಕತಂ ಬುದ್ಧಸ್ಸ ಸಾಸನಂ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ¶ ಸುದಂ ಆಯಸ್ಮಾ ಅಬ್ಭಞ್ಜನದಾಯಕೋ ಥೇರೋ ಇಮಾ ಗಾಥಾಯೋ
ಅಭಾಸಿತ್ಥಾತಿ.
ಅಬ್ಭಞ್ಜನದಾಯಕತ್ಥೇರಸ್ಸಾಪದಾನಂ ಚತುತ್ಥಂ.
೫. ಸುಪಟದಾಯಕತ್ಥೇರಅಪದಾನಂ
‘‘ದಿವಾವಿಹಾರಾ ¶ ¶ ನಿಕ್ಖನ್ತೋ, ವಿಪಸ್ಸೀ ಲೋಕನಾಯಕೋ;
ಲಹುಂ ಸುಪಟಕಂ [ಸುಪಟಿಕಂ (ಸ್ಯಾ.), ಪೂಪಪವಂ (ಪೀ.)] ದತ್ವಾ, ಕಪ್ಪಂ ಸಗ್ಗಮ್ಹಿ ಮೋದಹಂ.
‘‘ಏಕನವುತಿತೋ ಕಪ್ಪೇ, ಸುಪಟಕಮದಾಸಹಂ;
ದುಗ್ಗತಿಂ ನಾಭಿಜಾನಾಮಿ, ಸುಪಟಸ್ಸ ಇದಂ ಫಲಂ.
‘‘ಕಿಲೇಸಾ ಝಾಪಿತಾ ಮಯ್ಹಂ…ಪೇ… ವಿಹರಾಮಿ ಅನಾಸವೋ.
‘‘ಸ್ವಾಗತಂ ವತ ಮೇ ಆಸಿ…ಪೇ… ಕತಂ ಬುದ್ಧಸ್ಸ ಸಾಸನಂ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಸುಪಟದಾಯಕೋ ಥೇರೋ ಇಮಾ ಗಾಥಾಯೋ
ಅಭಾಸಿತ್ಥಾತಿ.
ಸುಪಟದಾಯಕತ್ಥೇರಸ್ಸಾಪದಾನಂ ಪಞ್ಚಮಂ.
೬. ದಣ್ಡದಾಯಕತ್ಥೇರಅಪದಾನಂ
‘‘ಕಾನನಂ ವನಮೋಗಯ್ಹ, ವೇಳುಂ ಛೇತ್ವಾನಹಂ ತದಾ;
ಆಲಮ್ಬಣಂ ಕರಿತ್ವಾನ, ಸಙ್ಘಸ್ಸ ಅದದಿಂ ಬಹುಂ [ಅಹಂ (ಸೀ. ಸ್ಯಾ. ಪೀ.)].
‘‘ತೇನ ¶ ಚಿತ್ತಪ್ಪಸಾದೇನ, ಸುಬ್ಬತೇ ಅಭಿವಾದಿಯ;
ಆಲಮ್ಬದಣ್ಡಂ ದತ್ವಾನ, ಪಕ್ಕಾಮಿಂ ಉತ್ತರಾಮುಖೋ.
‘‘ಚತುನ್ನವುತಿತೋ ¶ ಕಪ್ಪೇ, ಯಂ ದಣ್ಡಮದದಿಂ ತದಾ;
ದುಗ್ಗತಿಂ ನಾಭಿಜಾನಾಮಿ, ದಣ್ಡದಾನಸ್ಸಿದಂ ಫಲಂ.
‘‘ಕಿಲೇಸಾ ಝಾಪಿತಾ ಮಯ್ಹಂ…ಪೇ… ವಿಹರಾಮಿ ಅನಾಸವೋ.
‘‘ಸ್ವಾಗತಂ ವತ ಮೇ ಆಸಿ…ಪೇ… ಕತಂ ಬುದ್ಧಸ್ಸ ಸಾಸನಂ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ¶ ಸುದಂ ಆಯಸ್ಮಾ ದಣ್ಡದಾಯಕೋ ಥೇರೋ ಇಮಾ ಗಾಥಾಯೋ
ಅಭಾಸಿತ್ಥಾತಿ.
ದಣ್ಡದಾಯಕತ್ಥೇರಸ್ಸಾಪದಾನಂ ಛಟ್ಠಂ.
ತೇವೀಸತಿಮಂ ಭಾಣವಾರಂ.
೭. ಗಿರಿನೇಲಪೂಜಕತ್ಥೇರಅಪದಾನಂ
‘‘ಮಿಗಲುದ್ದೋ ¶ ಪುರೇ ಆಸಿಂ, ವಿಪಿನೇ ವಿಚರಂ ಅಹಂ;
ಅದ್ದಸಂ ವಿರಜಂ ಬುದ್ಧಂ, ಸಬ್ಬಧಮ್ಮಾನ ಪಾರಗುಂ.
‘‘ತಸ್ಮಿಂ ಮಹಾಕಾರುಣಿಕೇ, ಸಬ್ಬಸತ್ತಹಿತೇ ರತೇ;
ಪಸನ್ನಚಿತ್ತೋ ಸುಮನೋ, ನೇಲಪುಪ್ಫಮಪೂಜಯಿಂ.
‘‘ಏಕತಿಂಸೇ ¶ ಇತೋ ಕಪ್ಪೇ, ಯಂ ಪುಪ್ಫಮಭಿಪೂಜಯಿಂ;
ದುಗ್ಗತಿಂ ನಾಭಿಜಾನಾಮಿ, ಬುದ್ಧಪೂಜಾಯಿದಂ ಫಲಂ.
‘‘ಕಿಲೇಸಾ ಝಾಪಿತಾ ಮಯ್ಹಂ…ಪೇ… ವಿಹರಾಮಿ ಅನಾಸವೋ.
‘‘ಸ್ವಾಗತಂ ವತ ಮೇ ಆಸಿ…ಪೇ… ಕತಂ ಬುದ್ಧಸ್ಸ ಸಾಸನಂ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಗಿರಿನೇಲಪೂಜಕೋ ಥೇರೋ ಇಮಾ ಗಾಥಾಯೋ
ಅಭಾಸಿತ್ಥಾತಿ.
ಗಿರಿನೇಲಪೂಜಕತ್ಥೇರಸ್ಸಾಪದಾನಂ ಸತ್ತಮಂ.
೮. ಬೋಧಿಸಮ್ಮಜ್ಜಕತ್ಥೇರಅಪದಾನಂ
‘‘ಅಹಂ ಪುರೇ ಬೋಧಿಪತ್ತಂ, ಉಜ್ಝಿತಂ ಚೇತಿಯಙ್ಗಣೇ;
ತಂ ಗಹೇತ್ವಾನ ಛಡ್ಡೇಸಿಂ, ಅಲಭಿಂ ವೀಸತೀಗುಣೇ.
‘‘ತಸ್ಸ ಕಮ್ಮಸ್ಸ ತೇಜೇನ, ಸಂಸರನ್ತೋ ಭವಾಭವೇ;
ದುವೇ ಭವೇ ಸಂಸರಾಮಿ, ದೇವತ್ತೇ ಚಾಪಿ ಮಾನುಸೇ.
‘‘ದೇವಲೋಕಾ ಚವಿತ್ವಾನ, ಆಗನ್ತ್ವಾ ಮಾನುಸಂ ಭವಂ;
ದುವೇ ಕುಲೇ ಪಜಾಯಾಮಿ, ಖತ್ತಿಯೇ ಚಾಪಿ ಬ್ರಾಹ್ಮಣೇ.
‘‘ಅಙ್ಗಪಚ್ಚಙ್ಗಸಮ್ಪನ್ನೋ, ಆರೋಹಪರಿಣಾಹವಾ;
ಅಭಿರೂಪೋ ಸುಚಿ ಹೋಮಿ, ಸಮ್ಪುಣ್ಣಙ್ಗೋ ಅನೂನಕೋ.
‘‘ದೇವಲೋಕೇ ¶ ¶ ಮನುಸ್ಸೇ ವಾ, ಜಾತೋ ವಾ ಯತ್ಥ ಕತ್ಥಚಿ;
ಭವೇ ಸುವಣ್ಣವಣ್ಣೋ ಚ, ಉತ್ತತ್ತಕನಕೂಪಮೋ.
‘‘ಮುದುಕಾ ¶ ¶ ಮದ್ದವಾ ಸ್ನಿದ್ಧಾ [ಮುದು ಮದ್ದವಾ ಸಿನಿದ್ಧಾ (ಸ್ಯಾ.)], ಸುಖುಮಾ ಸುಕುಮಾರಿಕಾ;
ಛವಿ ಮೇ ಸಬ್ಬದಾ ಹೋತಿ, ಬೋಧಿಪತ್ತೇ ಸುಛಡ್ಡಿತೇ [ಸುಛಡ್ಡಿನೇ (ಸೀ.)].
‘‘ಯತೋ ಕುತೋಚಿ ಗತೀಸು, ಸರೀರೇ ಸಮುದಾಗತೇ;
ನ ಲಿಮ್ಪತಿ ರಜೋಜಲ್ಲಂ, ವಿಪಾಕೋ ಪತ್ತಛಡ್ಡಿತೇ.
‘‘ಉಣ್ಹೇ ವಾತಾತಪೇ ತಸ್ಸ, ಅಗ್ಗಿತಾಪೇನ ವಾ ಪನ;
ಗತ್ತೇ ಸೇದಾ ನ ಮುಚ್ಚನ್ತಿ, ವಿಪಾಕೋ ಪತ್ತಛಡ್ಡಿತೇ.
‘‘ಕುಟ್ಠಂ ಗಣ್ಡೋ ಕಿಲಾಸೋ ಚ, ತಿಲಕಾ ಪಿಳಕಾ ತಥಾ;
ನ ಹೋನ್ತಿ ಕಾಯೇ ದದ್ದು ಚ, ವಿಪಾಕೋ ಪತ್ತಛಡ್ಡಿತೇ.
‘‘ಅಪರಮ್ಪಿ ಗುಣಂ ತಸ್ಸ, ನಿಬ್ಬತ್ತತಿ ಭವಾಭವೇ;
ರೋಗಾ ನ ಹೋನ್ತಿ ಕಾಯಸ್ಮಿಂ, ವಿಪಾಕೋ ಪತ್ತಛಡ್ಡಿತೇ.
‘‘ಅಪರಮ್ಪಿ ಗುಣಂ ತಸ್ಸ, ನಿಬ್ಬತ್ತತಿ ಭವಾಭವೇ;
ನ ಹೋತಿ ಚಿತ್ತಜಾ ಪೀಳಾ, ವಿಪಾಕೋ ಪತ್ತಛಡ್ಡಿತೇ.
‘‘ಅಪರಮ್ಪಿ ಗುಣಂ ತಸ್ಸ, ನಿಬ್ಬತ್ತತಿ ಭವಾಭವೇ;
ಅಮಿತ್ತಾ ನ ಭವನ್ತಸ್ಸ, ವಿಪಾಕೋ ಪತ್ತಛಡ್ಡಿತೇ.
‘‘ಅಪರಮ್ಪಿ ಗುಣಂ ತಸ್ಸ, ನಿಬ್ಬತ್ತತಿ ಭವಾಭವೇ;
ಅನೂನಭೋಗೋ ಭವತಿ, ವಿಪಾಕೋ ಪತ್ತಛಡ್ಡಿತೇ.
‘‘ಅಪರಮ್ಪಿ ಗುಣಂ ತಸ್ಸ, ನಿಬ್ಬತ್ತತಿ ಭವಾಭವೇ;
ಅಗ್ಗಿರಾಜೂಹಿ ಚೋರೇಹಿ, ನ ಹೋತಿ ಉದಕೇ ಭಯಂ.
‘‘ಅಪರಮ್ಪಿ ¶ ಗುಣಂ ತಸ್ಸ, ನಿಬ್ಬತ್ತತಿ ಭವಾಭವೇ;
ದಾಸಿದಾಸಾ ಅನುಚರಾ, ಹೋನ್ತಿ ಚಿತ್ತಾನುವತ್ತಕಾ.
‘‘ಯಮ್ಹಿ ಆಯುಪ್ಪಮಾಣಮ್ಹಿ, ಜಾಯತೇ ಮಾನುಸೇ ಭವೇ;
ತತೋ ನ ಹಾಯತೇ ಆಯು, ತಿಟ್ಠತೇ ಯಾವತಾಯುಕಂ.
‘‘ಅಬ್ಭನ್ತರಾ ಚ ಬಾಹಿರಾ [ಬಹಿಚರಾ (ಸೀ. ಪೀ. ಕ.)], ನೇಗಮಾ ಚ ಸರಟ್ಠಕಾ;
ನುಯುತ್ತಾ ಹೋನ್ತಿ ಸಬ್ಬೇಪಿ, ವುದ್ಧಿಕಾಮಾ ಸುಖಿಚ್ಛಕಾ.
‘‘ಭೋಗವಾ ಯಸವಾ ಹೋಮಿ, ಸಿರಿಮಾ ಞಾತಿಪಕ್ಖವಾ;
ಅಪೇತಭಯಸನ್ತಾಸೋ, ಭವೇಹಂ ಸಬ್ಬತೋ ಭವೇ.
‘‘ದೇವಾ ¶ ¶ ಮನುಸ್ಸಾ ಅಸುರಾ, ಗನ್ಧಬ್ಬಾ ಯಕ್ಖರಕ್ಖಸಾ;
ಸಬ್ಬೇ ತೇ ಪರಿರಕ್ಖನ್ತಿ, ಭವೇ ಸಂಸರತೋ ಸದಾ.
‘‘ದೇವಲೋಕೇ ಮನುಸ್ಸೇ ಚ, ಅನುಭೋತ್ವಾ ಉಭೋ ಯಸೇ;
ಅವಸಾನೇ ಚ ನಿಬ್ಬಾನಂ, ಸಿವಂ ಪತ್ತೋ ಅನುತ್ತರಂ.
‘‘ಸಮ್ಬುದ್ಧಮುದ್ದಿಸಿತ್ವಾನ, ಬೋಧಿಂ ವಾ ತಸ್ಸ ಸತ್ಥುನೋ;
ಯೋ ಪುಞ್ಞಂ ಪಸವೇ ಪೋಸೋ, ತಸ್ಸ ಕಿಂ ನಾಮ ದುಲ್ಲಭಂ.
‘‘ಮಗ್ಗೇ ¶ ಫಲೇ ಆಗಮೇ ಚ, ಝಾನಾಭಿಞ್ಞಾಗುಣೇಸು ಚ;
ಅಞ್ಞೇಸಂ ಅಧಿಕೋ ಹುತ್ವಾ, ನಿಬ್ಬಾಯಾಮಿ ಅನಾಸವೋ.
‘‘ಪುರೇಹಂ ಬೋಧಿಯಾ ಪತ್ತಂ, ಛಡ್ಡೇತ್ವಾ ಹಟ್ಠಮಾನಸೋ;
ಇಮೇಹಿ ವೀಸತಙ್ಗೇಹಿ, ಸಮಙ್ಗೀ ಹೋಮಿ ಸಬ್ಬದಾ.
‘‘ಕಿಲೇಸಾ ಝಾಪಿತಾ ಮಯ್ಹಂ…ಪೇ… ವಿಹರಾಮಿ ಅನಾಸವೋ.
‘‘ಸ್ವಾಗತಂ ¶ ವತ ಮೇ ಆಸಿ…ಪೇ… ಕತಂ ಬುದ್ಧಸ್ಸ ಸಾಸನಂ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಬೋಧಿಸಮ್ಮಜ್ಜಕೋ ಥೇರೋ ಇಮಾ ಗಾಥಾಯೋ
ಅಭಾಸಿತ್ಥಾತಿ.
ಬೋಧಿಸಮ್ಮಜ್ಜಕತ್ಥೇರಸ್ಸಾಪದಾನಂ ಅಟ್ಠಮಂ.
೯. ಆಮಣ್ಡಫಲದಾಯಕತ್ಥೇರಅಪದಾನಂ
‘‘ಪದುಮುತ್ತರೋ ನಾಮ ಜಿನೋ, ಸಬ್ಬಧಮ್ಮಾನ ಪಾರಗೂ;
ವುಟ್ಠಹಿತ್ವಾ ಸಮಾಧಿಮ್ಹಾ, ಚಙ್ಕಮೀ ಲೋಕನಾಯಕೋ.
‘‘ಖಾರಿಭಾರಂ ಗಹೇತ್ವಾನ, ಆಹರನ್ತೋ ಫಲಂ ತದಾ;
ಅದ್ದಸಂ ವಿರಜಂ ಬುದ್ಧಂ, ಚಙ್ಕಮನ್ತಂ ಮಹಾಮುನಿಂ.
‘‘ಪಸನ್ನಚಿತ್ತೋ ಸುಮನೋ, ಸಿರೇ ಕತ್ವಾನ ಅಞ್ಜಲಿಂ;
ಸಮ್ಬುದ್ಧಂ ಅಭಿವಾದೇತ್ವಾ, ಆಮಣ್ಡಮದದಿಂ ಫಲಂ.
‘‘ಸತಸಹಸ್ಸಿತೋ ಕಪ್ಪೇ, ಯಂ ಫಲಂ ಅದದಿಂ ತದಾ;
ದುಗ್ಗತಿಂ ನಾಭಿಜಾನಾಮಿ, ಆಮಣ್ಡಸ್ಸ ಇದಂ ಫಲಂ.
‘‘ಕಿಲೇಸಾ ¶ ¶ ಝಾಪಿತಾ ಮಯ್ಹಂ…ಪೇ… ವಿಹರಾಮಿ ಅನಾಸವೋ.
‘‘ಸ್ವಾಗತಂ ವತ ಮೇ ಆಸಿ…ಪೇ… ಕತಂ ಬುದ್ಧಸ್ಸ ಸಾಸನಂ.
‘‘ಪಟಿಸಮ್ಭಿದಾ ¶ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಆಮಣ್ಡಫಲದಾಯಕೋ ಥೇರೋ ಇಮಾ
ಗಾಥಾಯೋ ಅಭಾಸಿತ್ಥಾತಿ.
ಆಮಣ್ಡಫಲದಾಯಕತ್ಥೇರಸ್ಸಾಪದಾನಂ ನವಮಂ.
೧೦. ಸುಗನ್ಧತ್ಥೇರಅಪದಾನಂ
‘‘ಇಮಮ್ಹಿ ಭದ್ದಕೇ ಕಪ್ಪೇ, ಬ್ರಹ್ಮಬನ್ಧು ಮಹಾಯಸೋ;
ಕಸ್ಸಪೋ ನಾಮ ಗೋತ್ತೇನ [ನಾಮೇನ (ಸಬ್ಬತ್ಥ)], ಉಪ್ಪಜ್ಜಿ ವದತಂ ವರೋ.
‘‘ಅನುಬ್ಯಞ್ಜನಸಮ್ಪನ್ನೋ, ಬಾತ್ತಿಂಸವರಲಕ್ಖಣೋ;
ಬ್ಯಾಮಪ್ಪಭಾಪರಿವುತೋ, ರಂಸಿಜಾಲಸಮೋತ್ಥಟೋ [ರಂಸಿಜಾಲಸಮೋಸಟೋ (ಸೀ. ಪೀ.)].
‘‘ಅಸ್ಸಾಸೇತಾ ಯಥಾ ಚನ್ದೋ, ಸೂರಿಯೋವ ಪಭಙ್ಕರೋ;
ನಿಬ್ಬಾಪೇತಾ ಯಥಾ ಮೇಘೋ, ಸಾಗರೋವ ಗುಣಾಕರೋ.
‘‘ಧರಣೀರಿವ ¶ ಸೀಲೇನ, ಹಿಮವಾವ ಸಮಾಧಿನಾ;
ಆಕಾಸೋ ವಿಯ ಪಞ್ಞಾಯ, ಅಸಙ್ಗೋ ಅನಿಲೋ ಯಥಾ.
‘‘ಸ ಕದಾಚಿ ಮಹಾವೀರೋ, ಪರಿಸಾಸು ವಿಸಾರದೋ;
ಸಚ್ಚಾನಿ ಸಮ್ಪಕಾಸೇತಿ, ಉದ್ಧರನ್ತೋ ಮಹಾಜನಂ.
‘‘ತದಾ ಹಿ ಬಾರಾಣಸಿಯಂ, ಸೇಟ್ಠಿಪುತ್ತೋ ಮಹಾಯಸೋ;
ಆಸಹಂ ಧನಧಞ್ಞಸ್ಸ [ಅನನ್ತಧನಧಞ್ಞಸ್ಸ (ಕ.)], ಪಹೂತಸ್ಸ ಬಹೂ ತದಾ.
‘‘ಜಙ್ಘಾವಿಹಾರಂ ವಿಚರಂ, ಮಿಗದಾಯಮುಪೇಚ್ಚಹಂ [ಮುಪೇಸಹಂ (ಕ.)];
ಅದ್ದಸಂ ವಿರಜಂ ಬುದ್ಧಂ, ದೇಸೇನ್ತಂ ಅಮತಂ ಪದಂ.
‘‘ವಿಸಟ್ಠಕನ್ತವಚನಂ ¶ , ಕರವೀಕಸಮಸ್ಸರಂ;
ಹಂಸರುತೇಹಿ [ಹಂಸದುನ್ದುಭಿ (ಸ್ಯಾ. ಪೀ.)] ನಿಗ್ಘೋಸಂ, ವಿಞ್ಞಾಪೇನ್ತಂ ಮಹಾಜನಂ.
‘‘ದಿಸ್ವಾ ¶ ದೇವಾತಿದೇವಂ ತಂ, ಸುತ್ವಾವ ಮಧುರಂ ಗಿರಂ;
ಪಹಾಯನಪ್ಪಕೇ ಭೋಗೇ, ಪಬ್ಬಜಿಂ ಅನಗಾರಿಯಂ.
‘‘ಏವಂ ¶ ಪಬ್ಬಜಿತೋ ಚಾಹಂ, ನ ಚಿರೇನ ಬಹುಸ್ಸುತೋ;
ಅಹೋಸಿಂ ಧಮ್ಮಕಥಿಕೋ, ವಿಚಿತ್ತಪಟಿಭಾಣವಾ.
‘‘ಮಹಾಪರಿಸಮಜ್ಝೇಹಂ, ಹಟ್ಠಚಿತ್ತೋ ಪುನಪ್ಪುನಂ;
ವಣ್ಣಯಿಂ ಹೇಮವಣ್ಣಸ್ಸ, ವಣ್ಣಂ ವಣ್ಣವಿಸಾರದೋ.
‘‘ಏಸ ಖೀಣಾಸವೋ ಬುದ್ಧೋ, ಅನೀಘೋ ಛಿನ್ನಸಂಸಯೋ;
ಸಬ್ಬಕಮ್ಮಕ್ಖಯಂ ಪತ್ತೋ, ವಿಮುತ್ತೋಪಧಿಸಙ್ಖಯೇ.
‘‘ಏಸ ಸೋ ಭಗವಾ ಬುದ್ಧೋ, ಏಸ ಸೀಹೋ ಅನುತ್ತರೋ;
ಸದೇವಕಸ್ಸ ಲೋಕಸ್ಸ, ಬ್ರಹ್ಮಚಕ್ಕಪ್ಪವತ್ತಕೋ.
‘‘ದನ್ತೋ ದಮೇತಾ ಸನ್ತೋ ಚ, ಸಮೇತಾ ನಿಬ್ಬುತೋ ಇಸಿ;
ನಿಬ್ಬಾಪೇತಾ ಚ ಅಸ್ಸತ್ಥೋ, ಅಸ್ಸಾಸೇತಾ ಮಹಾಜನಂ.
‘‘ವೀರೋ ಸೂರೋ ಚ ವಿಕ್ಕನ್ತೋ [ಧೀರೋ ಚ (ಸೀ. ಪೀ.)], ಪಞ್ಞೋ ಕಾರುಣಿಕೋ ವಸೀ;
ವಿಜಿತಾವೀ ಚ ಸ ಜಿನೋ, ಅಪ್ಪಗಬ್ಬೋ ಅನಾಲಯೋ.
‘‘ಅನೇಞ್ಜೋ ಅಚಲೋ ಧೀಮಾ, ಅಮೋಹೋ ಅಸಮೋ ಮುನಿ;
ಧೋರಯ್ಹೋ ಉಸಭೋ ನಾಗೋ, ಸೀಹೋ ಸಕ್ಕೋ ಗರೂಸುಪಿ.
‘‘ವಿರಾಗೋ ವಿಮಲೋ ಬ್ರಹ್ಮಾ, ವಾದೀ ಸೂರೋ ರಣಞ್ಜಹೋ;
ಅಖಿಲೋ ಚ ವಿಸಲ್ಲೋ ಚ, ಅಸಮೋ ಸಂಯತೋ [ವುಸಭೋ (ಸ್ಯಾ.), ಪಯತೋ (ಪೀ.)] ಸುಚಿ.
‘‘ಬ್ರಾಹ್ಮಣೋ ¶ ¶ ಸಮಣೋ ನಾಥೋ, ಭಿಸಕ್ಕೋ ಸಲ್ಲಕತ್ತಕೋ;
ಯೋಧೋ ಬುದ್ಧೋ ಸುತಾಸುತೋ [ಸುತೋ ಸುತೋ (ಸೀ. ಪೀ.)], ಅಚಲೋ ಮುದಿತೋ ಸಿತೋ [ದಿತೋ (ಸೀ.)].
‘‘ಧಾತಾ ಧತಾ ಚ ಸನ್ತಿ ಚ, ಕತ್ತಾ ನೇತಾ ಪಕಾಸಿತಾ;
ಸಮ್ಪಹಂಸಿತಾ ಭೇತ್ತಾ ಚ, ಛೇತ್ತಾ ಸೋತಾ ಪಸಂಸಿತಾ.
‘‘ಅಖಿಲೋ ಚ ವಿಸಲ್ಲೋ ಚ, ಅನೀಘೋ ಅಕಥಂಕಥೀ;
ಅನೇಜೋ ವಿರಜೋ ಕತ್ತಾ, ಗನ್ಧಾ ವತ್ತಾ ಪಸಂಸಿತಾ.
‘‘ತಾರೇತಾ ಅತ್ಥಕಾರೇತಾ, ಕಾರೇತಾ ಸಮ್ಪದಾರಿತಾ;
ಪಾಪೇತಾ ಸಹಿತಾ ಕನ್ತಾ, ಹನ್ತಾ ಆತಾಪೀ ತಾಪಸೋ [ಹನ್ತಾ, ತಾಪಿತಾ ಚ ವಿಸೋಸಿತಾ (ಸ್ಯಾ.)].
‘‘ಸಮಚಿತ್ತೋ ¶ [ಸಚ್ಚಟ್ಠಿತೋ (ಸ್ಯಾ.)] ಸಮಸಮೋ, ಅಸಹಾಯೋ ದಯಾಲಯೋ [ದಯಾಸಯೋ (ಸೀ.)];
ಅಚ್ಛೇರಸತ್ತೋ [ಅಚ್ಛೇರಮನ್ತೋ (ಸ್ಯಾ.)] ಅಕುಹೋ, ಕತಾವೀ ಇಸಿಸತ್ತಮೋ.
‘‘ನಿತ್ತಿಣ್ಣಕಙ್ಖೋ ನಿಮ್ಮಾನೋ, ಅಪ್ಪಮೇಯ್ಯೋ ಅನೂಪಮೋ;
ಸಬ್ಬವಾಕ್ಯಪಥಾತೀತೋ, ಸಚ್ಚ ನೇಯ್ಯನ್ತಗೂ [ಸಬ್ಬನೇಯ್ಯನ್ತಿಕೋ (ಸ್ಯಾ.)] ಜಿನೋ.
‘‘ಸತ್ತಸಾರವರೇ ¶ [ಸತರಂಸೀವರೇ (ಸ್ಯಾ.)] ತಸ್ಮಿಂ, ಪಸಾದೋ ಅಮತಾವಹೋ;
ತಸ್ಮಾ ಬುದ್ಧೇ ಚ ಧಮ್ಮೇ ಚ, ಸಙ್ಘೇ ಸದ್ಧಾ ಮಹತ್ಥಿಕಾ [ಮಹಿದ್ಧಿಕಾ (ಸೀ. ಕ.)].
‘‘ಗುಣೇಹಿ ಏವಮಾದೀಹಿ, ತಿಲೋಕಸರಣುತ್ತಮಂ;
ವಣ್ಣೇನ್ತೋ ಪರಿಸಾಮಜ್ಝೇ, ಅಕಂ [ಕಥಿಂ (ಸ್ಯಾ.)] ಧಮ್ಮಕಥಂ ಅಹಂ.
‘‘ತತೋ ಚುತಾಹಂ ತುಸಿತೇ, ಅನುಭೋತ್ವಾ ಮಹಾಸುಖಂ;
ತತೋ ಚುತೋ ಮನುಸ್ಸೇಸು, ಜಾತೋ ಹೋಮಿ ಸುಗನ್ಧಿಕೋ.
‘‘ನಿಸ್ಸಾಸೋ ಮುಖಗನ್ಧೋ ಚ, ದೇಹಗನ್ಧೋ ತಥೇವ ಮೇ;
ಸೇದಗನ್ಧೋ ಚ ಸತತಂ, ಸಬ್ಬಗನ್ಧೋವ ಹೋತಿ ಮೇ [ಸಬ್ಬಗನ್ಧೋತಿಸೇತಿ ಮೇ (ಸೀ. ಪೀ.)].
‘‘ಮುಖಗನ್ಧೋ ¶ ಸದಾ ಮಯ್ಹಂ, ಪದುಮುಪ್ಪಲಚಮ್ಪಕೋ;
ಪರಿಸನ್ತೋ [ಆದಿಸನ್ತೋ (ಸೀ.), ಅತಿಕನ್ತೋ (ಸ್ಯಾ.), ಅತಿಸನ್ತೋ (ಪೀ.)] ಸದಾ ವಾತಿ, ಸರೀರೋ ಚ ತಥೇವ ಮೇ.
‘‘ಗುಣತ್ಥವಸ್ಸ ಸಬ್ಬನ್ತಂ, ಫಲಂ ತು [ಫಲನ್ತಂ (ಸ್ಯಾ.)] ಪರಮಬ್ಭುತಂ;
ಏಕಗ್ಗಮನಸಾ ಸಬ್ಬೇ, ವಣ್ಣಯಿಸ್ಸಂ [ಭಾಸಿತಸ್ಸ (ಸ್ಯಾ.)] ಸುಣಾಥ ಮೇ.
‘‘ಗುಣಂ ¶ ಬುದ್ಧಸ್ಸ ವತ್ವಾನ, ಹಿತಾಯ ಚ ನ ಸದಿಸಂ [ಹಿತಾಯ ಜನಸನ್ಧಿಸು (ಸೀ. ಪೀ.), ಹಿತಾಯ ನಂ ಸುಖಾವಹಂ (ಸ್ಯಾ.)];
ಸುಖಿತೋ [ಸುಚಿತ್ತೋ (ಸ್ಯಾ.)] ಹೋಮಿ ಸಬ್ಬತ್ಥ, ಸಙ್ಘೋ ವೀರಸಮಾಯುತೋ [ಸರದ್ಧನಿಸಮಾಯುತೋ (ಸೀ.)].
‘‘ಯಸಸ್ಸೀ ಸುಖಿತೋ ಕನ್ತೋ, ಜುತಿಮಾ ಪಿಯದಸ್ಸನೋ;
ವತ್ತಾ ಅಪರಿಭೂತೋ ಚ, ನಿದ್ದೋಸೋ ಪಞ್ಞವಾ ತಥಾ.
‘‘ಖೀಣೇ ಆಯುಸಿ [ಪಾಸುಸಿ (ಸ್ಯಾ.)] ನಿಬ್ಬಾನಂ, ಸುಲಭಂ ಬುದ್ಧಭತ್ತಿನೋ;
ತೇಸಂ ಹೇತುಂ ಪವಕ್ಖಾಮಿ, ತಂ ಸುಣಾಥ ಯಥಾತಥಂ.
‘‘ಸನ್ತಂ ¶ ಯಸಂ ಭಗವತೋ, ವಿಧಿನಾ ಅಭಿವಾದಯಂ;
ತತ್ಥ ತತ್ಥೂಪಪನ್ನೋಪಿ [ಯತ್ಥ ತತ್ಥೂಪಪನ್ನೋಪಿ (ಸೀ. ಪೀ.)], ಯಸಸ್ಸೀ ತೇನ ಹೋಮಹಂ.
‘‘ದುಕ್ಖಸ್ಸನ್ತಕರಂ ಬುದ್ಧಂ, ಧಮ್ಮಂ ಸನ್ತಮಸಙ್ಖತಂ;
ವಣ್ಣಯಂ ಸುಖದೋ ಆಸಿಂ, ಸತ್ತಾನಂ ಸುಖಿತೋ ತತೋ.
‘‘ಗುಣಂ ವದನ್ತೋ ಬುದ್ಧಸ್ಸ, ಬುದ್ಧಪೀತಿಸಮಾಯುತೋ;
ಸಕನ್ತಿಂ ಪರಕನ್ತಿಞ್ಚ, ಜನಯಿಂ ತೇನ ಕನ್ತಿಮಾ.
‘‘ಜಿನೋ ತೇ ತಿತ್ಥಿಕಾಕಿಣ್ಣೇ [ಜನೋಘೇ ತಿತ್ಥಕಾಕಿಣ್ಣೇ (ಸೀ. ಪೀ.), ಜಿನೋ ಯೋ ತಿತ್ಥಿಕಾತಿಣ್ಣೋ (ಸ್ಯಾ.)], ಅಭಿಭುಯ್ಯ ಕುತಿತ್ಥಿಯೇ;
ಗುಣಂ ವದನ್ತೋ ಜೋತೇಸಿಂ [ಥೋಮೇಸಿಂ (ಸ್ಯಾ.)], ನಾಯಕಂ ಜುತಿಮಾ ತತೋ.
‘‘ಪಿಯಕಾರೀ ಜನಸ್ಸಾಪಿ, ಸಮ್ಬುದ್ಧಸ್ಸ ಗುಣಂ ವದಂ;
ಸರದೋವ ಸಸಙ್ಕೋಹಂ, ತೇನಾಸಿಂ ಪಿಯದಸ್ಸನೋ.
‘‘ಯಥಾಸತ್ತಿವಸೇನಾಹಂ ¶ ¶ , ಸಬ್ಬವಾಚಾಹಿ ಸನ್ಥವಿಂ;
ಸುಗತಂ ತೇನ ವಾಗಿಸೋ, ವಿಚಿತ್ತಪಟಿಭಾನವಾ.
‘‘ಯೇ ಬಾಲಾ ವಿಮತಿಂ ಪತ್ತಾ, ಪರಿಭೋನ್ತಿ ಮಹಾಮುನಿಂ;
ನಿಗ್ಗಹಿಂ ತೇ ಸದ್ಧಮ್ಮೇನ, ಪರಿಭೂತೋ ನ ತೇನಹಂ [ಪರಿಭೂತೇನ ತೇನಹಂ (ಸ್ಯಾ.)].
‘‘ಬುದ್ಧವಣ್ಣೇನ ಸತ್ತಾನಂ, ಕಿಲೇಸೇ ಅಪನೇಸಹಂ;
ನಿಕ್ಕಿಲೇಸಮನೋ ಹೋಮಿ, ತಸ್ಸ ಕಮ್ಮಸ್ಸ ವಾಹಸಾ.
‘‘ಸೋತೂನಂ ¶ ವುದ್ಧಿಮಜನಿಂ [ಬುದ್ಧಿಮಜನಿಂ (ಸೀ. ಪೀ.)], ಬುದ್ಧಾನುಸ್ಸತಿದೇಸಕೋ;
ತೇನಾಹಮಾಸಿಂ [ತೇನಾಪಿ ಚಾಸಿಂ (ಸ್ಯಾ.)] ಸಪ್ಪಞ್ಞೋ, ನಿಪುಣತ್ಥವಿಪಸ್ಸಕೋ.
‘‘ಸಬ್ಬಾಸವಪರಿಕ್ಖೀಣೋ, ತಿಣ್ಣಸಂಸಾರಸಾಗರೋ;
ಸಿಖೀವ ಅನುಪಾದಾನೋ, ಪಾಪುಣಿಸ್ಸಾಮಿ ನಿಬ್ಬುತಿಂ.
‘‘ಇಮಸ್ಮಿಂಯೇವ ಕಪ್ಪಸ್ಮಿಂ, ಯಮಹಂ ಸನ್ಥವಿಂ ಜಿನಂ;
ದುಗ್ಗತಿಂ ನಾಭಿಜಾನಾಮಿ, ಬುದ್ಧವಣ್ಣಸ್ಸಿದಂ ಫಲಂ.
‘‘ಕಿಲೇಸಾ ಝಾಪಿತಾ ಮಯ್ಹಂ…ಪೇ… ವಿಹರಾಮಿ ಅನಾಸವೋ.
‘‘ಸ್ವಾಗತಂ ವತ ಮೇ ಆಸಿ…ಪೇ… ಕತಂ ಬುದ್ಧಸ್ಸ ಸಾಸನಂ.
‘‘ಪಟಿಸಮ್ಭಿದಾ ¶ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಸುಗನ್ಧೋ ಥೇರೋ ಇಮಾ ಗಾಥಾಯೋ
ಅಭಾಸಿತ್ಥಾತಿ.
ಸುಗನ್ಧತ್ಥೇರಸ್ಸಾಪದಾನಂ ದಸಮಂ.
ತಿಣದಾಯಕವಗ್ಗೋ ತೇಪಞ್ಞಾಸಮೋ.
ತಸ್ಸುದ್ದಾನಂ –
ತಿಣದೋ ¶ ಮಞ್ಚದೋ ಚೇವ, ಸರಣಬ್ಭಞ್ಜನಪ್ಪದೋ;
ಸುಪಟೋ ದಣ್ಡದಾಯೀ ಚ, ನೇಲಪೂಜೀ ತಥೇವ ಚ.
ಬೋಧಿಸಮ್ಮಜ್ಜಕೋ ಮಣ್ಡೋ, ಸುಗನ್ಧೋ ದಸಮೋತಿ ಚ;
ಗಾಥಾಸತಂ ಸತೇವೀಸಂ, ಗಣಿತಞ್ಚೇತ್ಥ ಸಬ್ಬಸೋ.
೫೪. ಕಚ್ಚಾಯನವಗ್ಗೋ
೧. ಮಹಾಕಚ್ಚಾಯನತ್ಥೇರಅಪದಾನಂ
‘‘ಪದುಮುತ್ತರೋ ¶ ¶ ¶ ನಾಮ ಜಿನೋ, ಅನೇಜೋ ಅಜಿತಂ ಜಯೋ;
ಸತಸಹಸ್ಸೇ ಕಪ್ಪಾನಂ, ಇತೋ ಉಪ್ಪಜ್ಜಿ ನಾಯಕೋ.
‘‘ವೀರೋ ಕಮಲಪತ್ತಕ್ಖೋ, ಸಸಙ್ಕವಿಮಲಾನನೋ;
ಕನಕಾಚಲಸಙ್ಕಾಸೋ [ಕಞ್ಚನತಚಸಙ್ಕಾಸೋ (ಸ್ಯಾ.)], ರವಿದಿತ್ತಿಸಮಪ್ಪಭೋ.
‘‘ಸತ್ತನೇತ್ತಮನೋಹಾರೀ, ವರಲಕ್ಖಣಭೂಸಿತೋ;
ಸಬ್ಬವಾಕ್ಯಪಥಾತೀತೋ, ಮನುಜಾಮರಸಕ್ಕತೋ.
‘‘ಸಮ್ಬುದ್ಧೋ ಬೋಧಯಂ ಸತ್ತೇ, ವಾಗೀಸೋ ಮಧುರಸ್ಸರೋ;
ಕರುಣಾನಿಬನ್ಧಸನ್ತಾನೋ, ಪರಿಸಾಸು ವಿಸಾರದೋ.
‘‘ದೇಸೇತಿ ¶ ಮಧುರಂ ಧಮ್ಮಂ, ಚತುಸಚ್ಚೂಪಸಂಹಿತಂ;
ನಿಮುಗ್ಗೇ ಮೋಹಪಙ್ಕಮ್ಹಿ, ಸಮುದ್ಧರತಿ ಪಾಣಿನೇ.
‘‘ತದಾ ಏಕಚರೋ ಹುತ್ವಾ, ತಾಪಸೋ ಹಿಮವಾಲಯೋ;
ನಭಸಾ ಮಾನುಸಂ ಲೋಕಂ, ಗಚ್ಛನ್ತೋ ಜಿನಮದ್ದಸಂ.
‘‘ಉಪೇಚ್ಚ ಸನ್ತಿಕಂ ತಸ್ಸ, ಅಸ್ಸೋಸಿಂ ಧಮ್ಮದೇಸನಂ;
ವಣ್ಣಯನ್ತಸ್ಸ ವೀರಸ್ಸ, ಸಾವಕಸ್ಸ ಮಹಾಗುಣಂ.
‘‘ಸಙ್ಖಿತ್ತೇನ ಮಯಾ ವುತ್ತಂ, ವಿತ್ಥಾರೇನ ಪಕಾಸಯಂ;
ಪರಿಸಂ ಮಞ್ಚ ತೋಸೇತಿ, ಯಥಾ ಕಚ್ಚಾಯನೋ ಅಯಂ.
‘‘‘ನಾಹಂ ¶ ಏವಮಿಧೇಕಚ್ಚಂ [ಏವಂವಿಧಂ ಕಞ್ಚಿ (ಸೀ. ಪೀ.)], ಅಞ್ಞಂ ಪಸ್ಸಾಮಿ ಸಾವಕಂ;
ತಸ್ಮಾತದಗ್ಗೇ [ತಸ್ಮೇತದಗ್ಗೇ (ಸೀ.)] ಏಸಗ್ಗೋ, ಏವಂ ಧಾರೇಥ ಭಿಕ್ಖವೋ’.
‘‘ತದಾಹಂ ವಿಮ್ಹಿತೋ ಹುತ್ವಾ, ಸುತ್ವಾ ವಾಕ್ಯಂ ಮನೋರಮಂ;
ಹಿಮವನ್ತಂ ಗಮಿತ್ವಾನ, ಆಹಿತ್ವಾ [ಆಹತ್ವಾ (ಸೀ. ಪೀ.)] ಪುಪ್ಫಸಞ್ಚಯಂ.
‘‘ಪೂಜೇತ್ವಾ ಲೋಕಸರಣಂ, ತಂ ಠಾನಮಭಿಪತ್ಥಯಿಂ;
ತದಾ ಮಮಾಸಯಂ ಞತ್ವಾ, ಬ್ಯಾಕಾಸಿ ಸ ರಣಞ್ಜಹೋ.
‘‘‘ಪಸ್ಸಥೇತಂ ¶ ಇಸಿವರಂ, ನಿದ್ಧನ್ತಕನಕತ್ತಚಂ;
ಉದ್ಧಗ್ಗಲೋಮಂ ಪೀಣಂಸಂ, ಅಚಲಂ ಪಞ್ಜಲಿಂ ಠಿತಂ.
‘‘‘ಹಾಸಂ ¶ ಸುಪುಣ್ಣನಯನಂ, ಬುದ್ಧವಣ್ಣಗತಾಸಯಂ;
ಧಮ್ಮಜಂ ಉಗ್ಗಹದಯಂ [ಧಮ್ಮಂವ ವಿಗ್ಗಹವರಂ (ಸೀ.), ಧಮ್ಮಪಟಿಗ್ಗಹವರಂ (ಪೀ.)], ಅಮತಾಸಿತ್ತಸನ್ನಿಭಂ’.
‘‘ಕಚ್ಚಾನಸ್ಸ ಗುಣಂ ಸುತ್ವಾ, ತಂ ಠಾನಂ ಪತ್ಥಯಂ ಠಿತೋ;
ಅನಾಗತಮ್ಹಿ ಅದ್ಧಾನೇ, ಗೋತಮಸ್ಸ ಮಹಾಮುನೇ.
‘‘ತಸ್ಸ ಧಮ್ಮೇಸು ದಾಯಾದೋ, ಓರಸೋ ಧಮ್ಮನಿಮ್ಮಿತೋ;
ಕಚ್ಚಾನೋ ನಾಮ ನಾಮೇನ, ಹೇಸ್ಸತಿ ಸತ್ಥು ಸಾವಕೋ.
‘‘ಬಹುಸ್ಸುತೋ ಮಹಾಞಾಣೀ, ಅಧಿಪ್ಪಾಯವಿದೂ ಮುನೇ;
ಪಾಪುಣಿಸ್ಸತಿ ತಂ ಠಾನಂ, ಯಥಾಯಂ ಬ್ಯಾಕತೋ ಮಯಾ.
‘‘ಸತಸಹಸ್ಸಿತೋ ಕಪ್ಪೇ, ಯಂ ಕಮ್ಮಮಕರಿಂ ತದಾ;
ದುಗ್ಗತಿಂ ನಾಭಿಜಾನಾಮಿ, ಬುದ್ಧಪೂಜಾಯಿದಂ ಫಲಂ.
‘‘ದುವೇ ಭವೇ ಸಂಸರಾಮಿ, ದೇವತ್ತೇ ಅಥ ಮಾನುಸೇ;
ಅಞ್ಞಂ ಗತಿಂ ನ ಗಚ್ಛಾಮಿ, ಬುದ್ಧಪೂಜಾಯಿದಂ ಫಲಂ.
‘‘ದುವೇ ¶ ಕುಲೇ ಪಜಾಯಾಮಿ, ಖತ್ತಿಯೇ ಅಥ ಬ್ರಾಹ್ಮಣೇ;
ನೀಚೇ ಕುಲೇ ನ ಜಾಯಾಮಿ, ಬುದ್ಧಪೂಜಾಯಿದಂ ಫಲಂ.
‘‘ಪಚ್ಛಿಮೇ ¶ ಚ ಭವೇ ದಾನಿ, ಜಾತೋ ಉಜ್ಜೇನಿಯಂ ಪುರೇ [ಜಾತೋ, ಉಜ್ಜೇನಿಯಂ ಪುರೇ ರಮೇ (ಸ್ಯಾ.)];
ಪಜ್ಜೋತಸ್ಸ ಚ ಚಣ್ಡಸ್ಸ, ಪುರೋಹಿತದಿಜಾಧಿನೋ [ಪುರೋಹಿತದಿಜಾತಿನೋ (ಸೀ. ಪೀ.)].
‘‘ಪುತ್ತೋ ತಿರಿಟಿವಚ್ಛಸ್ಸ [ತಿರಿಟವಚ್ಛಸ್ಸ (ಸೀ.), ತಿಪಿತಿವಚ್ಛಸ್ಸ (ಸ್ಯಾ.)], ನಿಪುಣೋ ವೇದಪಾರಗೂ;
ಮಾತಾ ಚ ಚನ್ದಿಮಾ ನಾಮ, ಕಚ್ಚಾನೋಹಂ ವರತ್ತಚೋ.
‘‘ವೀಮಂಸನತ್ಥಂ ಬುದ್ಧಸ್ಸ, ಭೂಮಿಪಾಲೇನ ಪೇಸಿತೋ;
ದಿಸ್ವಾ ಮೋಕ್ಖಪುರದ್ವಾರಂ, ನಾಯಕಂ ಗುಣಸಞ್ಚಯಂ.
‘‘ಸುತ್ವಾ ಚ ವಿಮಲಂ ವಾಕ್ಯಂ, ಗತಿಪಙ್ಕವಿಸೋಸನಂ;
ಪಾಪುಣಿಂ ಅಮತಂ ಸನ್ತಂ, ಸೇಸೇಹಿ ಸಹ ಸತ್ತಹಿ.
‘‘ಅಧಿಪ್ಪಾಯವಿದೂ ಜಾತೋ, ಸುಗತಸ್ಸ ಮಹಾಮತೇ;
ಠಪಿತೋ ಏತದಗ್ಗೇ ಚ, ಸುಸಮಿದ್ಧಮನೋರಥೋ.
‘‘ಕಿಲೇಸಾ ಝಾಪಿತಾ ಮಯ್ಹಂ, ಭವಾ ಸಬ್ಬೇ ಸಮೂಹತಾ;
ನಾಗೋವ ಬನ್ಧನಂ ಛೇತ್ವಾ, ವಿಹರಾಮಿ ಅನಾಸವೋ.
‘‘ಸ್ವಾಗತಂ ¶ ¶ ವತ ಮೇ ಆಸಿ, ಮಮ ಬುದ್ಧಸ್ಸ ಸನ್ತಿಕೇ;
‘‘ಸ್ವಾಗತಂ ವತ ಮೇ ಆಸಿ, ಮಮ ಬುದ್ಧಸ್ಸ ಸನ್ತಿಕೇ; ತಿಸ್ಸೋ ವಿಜ್ಜಾ ಅನುಪ್ಪತ್ತಾ, ಕತಂ ಬುದ್ಧಸ್ಸ ಸಾಸನಂ.
‘‘ಪಟಿಸಮ್ಭಿದಾ ಚತಸ್ಸೋ, ವಿಮೋಕ್ಖಾಪಿ ಚ ಅಟ್ಠಿಮೇ;
ಛಳಭಿಞ್ಞಾ ಸಚ್ಛಿಕತಾ, ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಮಹಾಕಚ್ಚಾಯನೋ ಥೇರೋ ಇಮಾ ಗಾಥಾಯೋ
ಅಭಾಸಿತ್ಥಾತಿ.
ಮಹಾಕಚ್ಚಾಯನತ್ಥೇರಸ್ಸಾಪದಾನಂ ಪಠಮಂ.
೨. ವಕ್ಕಲಿತ್ಥೇರಅಪದಾನಂ
‘‘ಇತೋ ¶ ಸತಸಹಸ್ಸಮ್ಹಿ, ಕಪ್ಪೇ ಉಪ್ಪಜ್ಜಿ ನಾಯಕೋ;
ಅನೋಮನಾಮೋ ಅಮಿತೋ, ನಾಮೇನ ಪದುಮುತ್ತರೋ.
‘‘ಪದುಮಾಕಾರವದನೋ, ಪದುಮಾಮಲಸುಚ್ಛವೀ;
ಲೋಕೇನಾನುಪಲಿತ್ತೋವ ತೋಯೇನ ಪದುಮಂ ಯಥಾ.
‘‘ವೀರೋ ಪದುಮಪತ್ತಕ್ಖೋ, ಕನ್ತೋ ಚ ಪದುಮಂ ಯಥಾ;
ಪದುಮುತ್ತರಗನ್ಧೋವ, ತಸ್ಮಾ ಸೋ ಪದುಮುತ್ತರೋ.
‘‘ಲೋಕಜೇಟ್ಠೋ ಚ ನಿಮ್ಮಾನೋ, ಅನ್ಧಾನಂ ನಯನೂಪಮೋ;
ಸನ್ತವೇಸೋ ಗುಣನಿಧಿ, ಕರುಣಾಮತಿಸಾಗರೋ.
‘‘ಸ ಕದಾಚಿ ಮಹಾವೀರೋ, ಬ್ರಹ್ಮಾಸುರಸುರಚ್ಚಿತೋ;
ಸದೇವಮನುಜಾಕಿಣ್ಣೇ, ಜನಮಜ್ಝೇ ಜಿನುತ್ತಮೋ [ಜನುತ್ತಮೋ (ಸ್ಯಾ. ಪೀ.), ಅನುತ್ತಮೋ (ಕ.) ವಙ್ಗೀಸತ್ಥೇರಾಪದಾನೇಪಿ].
‘‘ವದನೇನ ಸುಗನ್ಧೇನ, ಮಧುರೇನ ರುತೇನ ಚ;
ರಞ್ಜಯಂ ಪರಿಸಂ ಸಬ್ಬಂ, ಸನ್ಥವೀ ಸಾವಕಂ ಸಕಂ.
‘‘ಸದ್ಧಾಧಿಮುತ್ತೋ ¶ ಸುಮತಿ, ಮಮ ದಸ್ಸನಲಾಲಸೋ [ದಸ್ಸನಸಾಲಯೋ (ಸ್ಯಾ.)];
ನತ್ಥಿ ಏತಾದಿಸೋ ಅಞ್ಞೋ, ಯಥಾಯಂ ಭಿಕ್ಖು ವಕ್ಕಲಿ.
‘‘ತದಾಹಂ ಹಂಸವತಿಯಂ, ನಗರೇ ಬ್ರಾಹ್ಮಣತ್ರಜೋ;
ಹುತ್ವಾ ಸುತ್ವಾ ಚ ತಂ ವಾಕ್ಯಂ, ತಂ ಠಾನಮಭಿರೋಚಯಿಂ.
‘‘ಸಸಾವಕಂ ¶ ತಂ ವಿಮಲಂ, ನಿಮನ್ತೇತ್ವಾ ತಥಾಗತಂ;
ಸತ್ತಾಹಂ ಭೋಜಯಿತ್ವಾನ, ದುಸ್ಸೇಹಚ್ಛಾದಯಿಂ ತದಾ.
‘‘ನಿಪಚ್ಚ ¶ ¶ ಸಿರಸಾ ತಸ್ಸ, ಅನನ್ತಗುಣಸಾಗರೇ;
ನಿಮುಗ್ಗೋ ಪೀತಿಸಮ್ಪುಣ್ಣೋ, ಇದಂ ವಚನಮಬ್ರವಿಂ.
‘‘‘ಯೋ ಸೋ ತಯಾ ಸನ್ಥವಿತೋ, ಇತೋ ಸತ್ತಮಕೇ ಮುನಿ [ಇಧ ಸದ್ಧಾಧಿಮುತ್ತೋ ಇಸಿ (ಸ್ಯಾ.), ಇತೋ ಸತ್ತಮಕೇಹನಿ (ಸೀ. ಪೀ.)];
ಭಿಕ್ಖು ಸದ್ಧಾವತಂ ಅಗ್ಗೋ, ತಾದಿಸೋ ಹೋಮಹಂ ಮುನೇ’.
‘‘ಏವಂ ವುತ್ತೇ ಮಹಾವೀರೋ, ಅನಾವರಣದಸ್ಸನೋ;
ಇಮಂ ವಾಕ್ಯಂ ಉದೀರೇಸಿ, ಪರಿಸಾಯ ಮಹಾಮುನಿ.
‘‘‘ಪಸ್ಸಥೇತಂ ಮಾಣವಕಂ, ಪೀತಮಟ್ಠನಿವಾಸನಂ;
ಹೇಮಯಞ್ಞೋಪಚಿತಙ್ಗಂ [ಹೇಮಯಞ್ಞೋಪವೀತಙ್ಗಂ (ಸೀ.)], ಜನನೇತ್ತಮನೋಹರಂ.
‘‘‘ಏಸೋ ಅನಾಗತದ್ಧಾನೇ, ಗೋತಮಸ್ಸ ಮಹೇಸಿನೋ;
ಅಗ್ಗೋ ಸದ್ಧಾಧಿಮುತ್ತಾನಂ, ಸಾವಕೋಯಂ ಭವಿಸ್ಸತಿ.
‘‘‘ದೇವಭೂತೋ ಮನುಸ್ಸೋ ವಾ, ಸಬ್ಬಸನ್ತಾಪವಜ್ಜಿತೋ;
ಸಬ್ಬಭೋಗಪರಿಬ್ಯೂಳ್ಹೋ, ಸುಖಿತೋ ಸಂಸರಿಸ್ಸತಿ.
‘‘‘ಸತಸಹಸ್ಸಿತೋ ಕಪ್ಪೇ, ಓಕ್ಕಾಕಕುಲಸಮ್ಭವೋ;
ಗೋತಮೋ ನಾಮ ಗೋತ್ತೇನ, ಸತ್ಥಾ ಲೋಕೇ ಭವಿಸ್ಸತಿ.
‘‘‘ತಸ್ಸ ಧಮ್ಮೇಸು ದಾಯಾದೋ, ಓರಸೋ ಧಮ್ಮನಿಮ್ಮಿತೋ;
ವಕ್ಕಲಿ ನಾಮ ನಾಮೇನ, ಹೇಸ್ಸತಿ ಸತ್ಥು ಸಾವಕೋ’.
‘‘ತೇನ ಕಮ್ಮವಿಸೇಸೇನ, ಚೇತನಾಪಣಿಧೀಹಿ ಚ;
ಜಹಿತ್ವಾ ಮಾನುಸಂ ದೇಹಂ, ತಾವತಿಂಸಮಗಚ್ಛಹಂ.
‘‘ಸಬ್ಬತ್ಥ ಸುಖಿತೋ ಹುತ್ವಾ, ಸಂಸರನ್ತೋ ಭವಾಭವೇ;
ಸಾವತ್ಥಿಯಂ ಪುರೇ ಜಾತೋ, ಕುಲೇ ಅಞ್ಞತರೇ ಅಹಂ.
‘‘ನೋನೀತಸುಖುಮಾಲಂ ¶ ಮಂ, ಜಾತಪಲ್ಲವಕೋಮಲಂ;
ಮನ್ದಂ ಉತ್ತಾನಸಯನಂ, ಪಿಸಾಚಭಯತಜ್ಜಿತಾ.
‘‘ಪಾದಮೂಲೇ ಮಹೇಸಿಸ್ಸ, ಸಾಯೇಸುಂ ದೀನಮಾನಸಾ;
ಇಮಂ ದದಾಮ ತೇ ನಾಥ, ಸರಣಂ ಹೋಹಿ ನಾಯಕ.
‘‘ತದಾ ¶ ¶ ಪಟಿಗ್ಗಹಿ ಸೋ ಮಂ, ಭೀತಾನಂ ಸರಣೋ ಮುನಿ;
ಜಾಲಿನಾ ಚಕ್ಕಙ್ಕಿತೇನ [ಸಙ್ಕಲಙ್ಕೇನ (ಸೀ.)], ಮುದುಕೋಮಲಪಾಣಿನಾ.
‘‘ತದಾ ಪಭುತಿ ತೇನಾಹಂ, ಅರಕ್ಖೇಯ್ಯೇನ ರಕ್ಖಿತೋ;
ಸಬ್ಬವೇರವಿನಿಮುತ್ತೋ [ಸಬ್ಬಬ್ಯಾಧಿವಿನಿಮುತ್ತೋ (ಸ್ಯಾ.), ಸಬ್ಬೂಪಧಿವಿನಿಮುತ್ತೋ (ಪೀ.)], ಸುಖೇನ ಪರಿವುದ್ಧಿತೋ.
‘‘ಸುಗತೇನ ¶ ವಿನಾ ಭೂತೋ, ಉಕ್ಕಣ್ಠಾಮಿ ಮುಹುತ್ತಕಂ;
ಜಾತಿಯಾ ಸತ್ತವಸ್ಸೋಹಂ, ಪಬ್ಬಜಿಂ ಅನಗಾರಿಯಂ.
‘‘ಸಬ್ಬಪಾರಮಿಸಮ್ಭೂತಂ, ನೀಲಕ್ಖಿನಯನಂ [ಲಙ್ಕಿನೀಲಯನಂ (ಸೀ.)] ವರಂ;
ರೂಪಂ ಸಬ್ಬಸುಭಾಕಿಣ್ಣಂ, ಅತಿತ್ತೋ ವಿಹರಾಮಹಂ [ವಿಹಯಾಮಹಂ (ಸೀ. ಪೀ.)].
‘‘ಬುದ್ಧರೂಪರತಿಂ [ಬುದ್ಧೋ ರೂಪರತಿಂ (ಸೀ.)] ಞತ್ವಾ, ತದಾ ಓವದಿ ಮಂ ಜಿನೋ;
‘ಅಲಂ ವಕ್ಕಲಿ ಕಿಂ ರೂಪೇ, ರಮಸೇ ಬಾಲನನ್ದಿತೇ.
‘‘‘ಯೋ ಹಿ ಪಸ್ಸತಿ ಸದ್ಧಮ್ಮಂ, ಸೋ ಮಂ ಪಸ್ಸತಿ ಪಣ್ಡಿತೋ;
ಅಪಸ್ಸಮಾನೋ ಸದ್ಧಮ್ಮಂ, ಮಂ ಪಸ್ಸಮ್ಪಿ ನ ಪಸ್ಸತಿ.
‘‘‘ಅನನ್ತಾದೀನವೋ ಕಾಯೋ, ವಿಸರುಕ್ಖಸಮೂಪಮೋ;
ಆವಾಸೋ ಸಬ್ಬರೋಗಾನಂ, ಪುಞ್ಜೋ ದುಕ್ಖಸ್ಸ ಕೇವಲೋ.
‘‘‘ನಿಬ್ಬಿನ್ದಿಯ ತತೋ ರೂಪೇ, ಖನ್ಧಾನಂ ಉದಯಬ್ಬಯಂ;
ಪಸ್ಸ ಉಪಕ್ಕಿಲೇಸಾನಂ, ಸುಖೇನನ್ತಂ ಗಮಿಸ್ಸತಿ’.
‘‘ಏವಂ ¶ ತೇನಾನುಸಿಟ್ಠೋಹಂ, ನಾಯಕೇನ ಹಿತೇಸಿನಾ;
ಗಿಜ್ಝಕೂಟಂ ಸಮಾರುಯ್ಹ, ಝಾಯಾಮಿ ಗಿರಿಕನ್ದರೇ.
‘‘ಠಿತೋ ಪಬ್ಬತಪಾದಮ್ಹಿ, ಅಸ್ಸಾಸಯಿ [ಮಮಾಹಸೋ (ಸೀ.)] ಮಹಾಮುನಿ;
ವಕ್ಕಲೀತಿ ಜಿನೋ ವಾಚಂ, ತಂ ಸುತ್ವಾ ಮುದಿತೋ ಅಹಂ.
‘‘ಪಕ್ಖನ್ದಿಂ ಸೇಲಪಬ್ಭಾರೇ, ಅನೇಕಸತಪೋರಿಸೇ;
ತದಾ ಬುದ್ಧಾನುಭಾವೇನ, ಸುಖೇನೇವ ಮಹಿಂ ಗತೋ.
‘‘ಪುನೋಪಿ [ಪುನಾಪಿ (ಸ್ಯಾ.), ಮುನಿ ಮಂ (ಕ.)] ಧಮ್ಮಂ ದೇಸೇತಿ, ಖನ್ಧಾನಂ ಉದಯಬ್ಬಯಂ;
ತಮಹಂ ಧಮ್ಮಮಞ್ಞಾಯ, ಅರಹತ್ತಮಪಾಪುಣಿಂ.
‘‘ಸುಮಹಾಪರಿಸಮಜ್ಝೇ ¶ , ತದಾ ಮಂ ಚರಣನ್ತಗೋ;
ಅಗ್ಗಂ ಸದ್ಧಾಧಿಮುತ್ತಾನಂ, ಪಞ್ಞಪೇಸಿ ಮಹಾಮತಿ.
‘‘ಸತಸಹಸ್ಸಿತೋ ಕಪ್ಪೇ, ಯಂ ಕಮ್ಮಮಕರಿಂ ತದಾ;
ದುಗ್ಗತಿಂ ನಾಭಿಜಾನಾಮಿ, ಬುದ್ಧಪೂಜಾಯಿದಂ ಫಲಂ.
‘‘ಕಿಲೇಸಾ ¶ ಝಾಪಿತಾ ಮಯ್ಹಂ…ಪೇ… ವಿಹರಾಮಿ ಅನಾಸವೋ.
‘‘ಸ್ವಾಗತಂ ವತ ಮೇ ಆಸಿ…ಪೇ… ಕತಂ ಬುದ್ಧಸ್ಸ ಸಾಸನಂ.
‘‘ಪಟಿಸಮ್ಭಿದಾ ¶ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ವಕ್ಕಲಿತ್ಥೇರೋ ಇಮಾ ಗಾಥಾಯೋ
ಅಭಾಸಿತ್ಥಾತಿ.
ವಕ್ಕಲಿತ್ಥೇರಸ್ಸಾಪದಾನಂ ದುತಿಯಂ.
೩. ಮಹಾಕಪ್ಪಿನತ್ಥೇರಅಪದಾನಂ
‘‘ಪದುಮುತ್ತರೋ ¶ ನಾಮ ಜಿನೋ, ಸಬ್ಬಧಮ್ಮಾನ ಪಾರಗೂ;
ಉದಿತೋ ಅಜಟಾಕಾಸೇ [ಜಗದಾಕಾಸೇ (ಸೀ.), ಜಲದಾಕಾಸೇ (ಪೀ.)], ರವೀವ ಸರದಮ್ಬರೇ.
‘‘ವಚನಾಭಾಯ ಬೋಧೇತಿ, ವೇನೇಯ್ಯಪದುಮಾನಿ ಸೋ;
ಕಿಲೇಸಪಙ್ಕಂ ಸೋಸೇತಿ, ಮತಿರಂಸೀಹಿ ನಾಯಕೋ.
‘‘ತಿತ್ಥಿಯಾನಂ ಯಸೇ [ಯಸೋ (ಸೀ. ಪೀ.)] ಹನ್ತಿ, ಖಜ್ಜೋತಾಭಾ ಯಥಾ ರವಿ;
ಸಚ್ಚತ್ಥಾಭಂ ಪಕಾಸೇತಿ, ರತನಂವ ದಿವಾಕರೋ.
‘‘ಗುಣಾನಂ ಆಯತಿಭೂತೋ, ರತನಾನಂವ ಸಾಗರೋ;
ಪಜ್ಜುನ್ನೋರಿವ ಭೂತಾನಿ, ಧಮ್ಮಮೇಘೇನ ವಸ್ಸತಿ.
‘‘ಅಕ್ಖದಸ್ಸೋ ತದಾ ಆಸಿಂ, ನಗರೇ ಹಂಸಸವ್ಹಯೇ;
ಉಪೇಚ್ಚ ಧಮ್ಮಮಸ್ಸೋಸಿಂ, ಜಲಜುತ್ತಮನಾಮಿನೋ.
‘‘ಓವಾದಕಸ್ಸ ಭಿಕ್ಖೂನಂ, ಸಾವಕಸ್ಸ ಕತಾವಿನೋ;
ಗುಣಂ ಪಕಾಸಯನ್ತಸ್ಸ, ತಪ್ಪಯನ್ತಸ್ಸ [ತೋಸಯನ್ತಸ್ಸ (ಸೀ.), ಹಾಸಯನ್ತಸ್ಸ (ಸ್ಯಾ.), ವಾಸಯನ್ತಸ್ಸ (ಪೀ.)] ಮೇ ಮನಂ.
‘‘ಸುತ್ವಾ ಪತೀತೋ ಸುಮನೋ, ನಿಮನ್ತೇತ್ವಾ ತಥಾಗತಂ;
ಸಸಿಸ್ಸಂ ಭೋಜಯಿತ್ವಾನ, ತಂ ಠಾನಮಭಿಪತ್ಥಯಿಂ.
‘‘ತದಾ ¶ ಹಂಸಸಮಭಾಗೋ, ಹಂಸದುನ್ದುಭಿನಿಸ್ಸನೋ [ಹಂಸದುನ್ದುಭಿಸುಸ್ಸರೋ (ಸೀ.)];
ಪಸ್ಸಥೇತಂ ಮಹಾಮತ್ತಂ, ವಿನಿಚ್ಛಯವಿಸಾರದಂ.
‘‘ಪತಿತಂ ಪಾದಮೂಲೇ ಮೇ, ಸಮುಗ್ಗತತನೂರುಹಂ;
ಜೀಮೂತವಣ್ಣಂ ಪೀಣಂಸಂ, ಪಸನ್ನನಯನಾನನಂ.
‘‘ಪರಿವಾರೇನ ¶ ಮಹತಾ, ರಾಜಯುತ್ತಂ ಮಹಾಯಸಂ;
ಏಸೋ ಕತಾವಿನೋ ಠಾನಂ, ಪತ್ಥೇತಿ ಮುದಿತಾಸಯೋ.
‘‘‘ಇಮಿನಾ ¶ ¶ ಪಣಿಪಾತೇನ, ಚಾಗೇನ ಪಣಿಧೀಹಿ ಚ [ಪಿಣ್ಡಪಾತೇನ, ಚೇತನಾ ಪಣಿಧೀಹಿ ಚ (ಸೀ.)];
ಕಪ್ಪಸತಸಹಸ್ಸಾನಿ, ನುಪಪಜ್ಜತಿ ದುಗ್ಗತಿಂ.
‘‘‘ದೇವೇಸು ದೇವಸೋಭಗ್ಗಂ, ಮನುಸ್ಸೇಸು ಮಹನ್ತತಂ;
ಅನುಭೋತ್ವಾನ ಸೇಸೇನ [ಅಭುತ್ವಾವ ಸೇಸೇನ (ಸೀ.), ಅನುಭೋತ್ವಾವ ಸೇಸೇನ (ಸ್ಯಾ.)], ನಿಬ್ಬಾನಂ ಪಾಪುಣಿಸ್ಸತಿ.
‘‘‘ಸತಸಹಸ್ಸಿತೋ ಕಪ್ಪೇ, ಓಕ್ಕಾಕಕುಲಸಮ್ಭವೋ;
ಗೋತಮೋ ನಾಮ ಗೋತ್ತೇನ, ಸತ್ಥಾ ಲೋಕೇ ಭವಿಸ್ಸತಿ.
‘‘‘ತಸ್ಸ ಧಮ್ಮೇಸು ದಾಯಾದೋ, ಓರಸೋ ಧಮ್ಮನಿಮ್ಮಿತೋ;
ಕಪ್ಪಿನೋ ನಾಮ ನಾಮೇನ, ಹೇಸ್ಸತಿ ಸತ್ಥು ಸಾವಕೋ’.
‘‘ತತೋಹಂ ಸುಕತಂ ಕಾರಂ, ಕತ್ವಾನ ಜಿನಸಾಸನೇ;
ಜಹಿತ್ವಾ ಮಾನುಸಂ ದೇಹಂ, ತುಸಿತಂ ಅಗಮಾಸಹಂ.
‘‘ದೇವಮಾನುಸರಜ್ಜಾನಿ, ಸತಸೋ ಅನುಸಾಸಿಯ;
ಬಾರಾಣಸಿಯಮಾಸನ್ನೇ, ಜಾತೋ ಕೇನಿಯಜಾತಿಯಂ.
‘‘ಸಹಸ್ಸಪರಿವಾರೇನ [ಸತಸಹಸ್ಸಪರಿವಾರೋ (ಸ್ಯಾ.)], ಸಪಜಾಪತಿಕೋ ಅಹಂ;
ಪಞ್ಚ ಪಚ್ಚೇಕಬುದ್ಧಾನಂ, ಸತಾನಿ ಸಮುಪಟ್ಠಹಿಂ.
‘‘ತೇಮಾಸಂ ಭೋಜಯಿತ್ವಾನ, ಪಚ್ಛಾದಮ್ಹ ತಿಚೀವರಂ;
ತತೋ ಚುತಾ ಮಯಂ ಸಬ್ಬೇ, ಅಹುಮ್ಹ ತಿದಸೂಪಗಾ.
‘‘ಪುನೋ ಸಬ್ಬೇ ಮನುಸ್ಸತ್ತಂ, ಅಗಮಿಮ್ಹ ತತೋ ಚುತಾ;
ಕುಕ್ಕುಟಮ್ಹಿ ಪುರೇ ಜಾತಾ, ಹಿಮವನ್ತಸ್ಸ ಪಸ್ಸತೋ.
‘‘ಕಪ್ಪಿನೋ ¶ ¶ ನಾಮಹಂ ಆಸಿಂ, ರಾಜಪುತ್ತೋ ಮಹಾಯಸೋ;
ಸೇಸಾಮಚ್ಚಕುಲೇ ಜಾತಾ, ಮಮೇವ ಪರಿವಾರಯುಂ.
‘‘ಮಹಾರಜ್ಜಸುಖಂ ಪತ್ತೋ, ಸಬ್ಬಕಾಮಸಮಿದ್ಧಿಮಾ;
ವಾಣಿಜೇಹಿ ಸಮಕ್ಖಾತಂ, ಬುದ್ಧುಪ್ಪಾದಮಹಂ ಸುಣಿಂ.
‘‘‘ಬುದ್ಧೋ ಲೋಕೇ ಸಮುಪ್ಪನ್ನೋ, ಅಸಮೋ ಏಕಪುಗ್ಗಲೋ;
ಸೋ ಪಕಾಸೇತಿ ಸದ್ಧಮ್ಮಂ, ಅಮತಂ ಸುಖಮುತ್ತಮಂ.
‘‘‘ಸುಯುತ್ತಾ ತಸ್ಸ ಸಿಸ್ಸಾ ಚ, ಸುಮುತ್ತಾ ಚ ಅನಾಸವಾ’;
‘‘ಸುತ್ವಾ ನೇಸಂ ಸುವಚನಂ, ಸಕ್ಕರಿತ್ವಾನ ವಾಣಿಜೇ.
‘‘ಪಹಾಯ ರಜ್ಜಂ ಸಾಮಚ್ಚೋ, ನಿಕ್ಖಮಿಂ ಬುದ್ಧಮಾಮಕೋ;
ನದಿಂ ದಿಸ್ವಾ ಮಹಾಚನ್ದಂ, ಪೂರಿತಂ ಸಮತಿತ್ತಿಕಂ.
‘‘ಅಪ್ಪತಿಟ್ಠಂ ¶ ಅನಾಲಮ್ಬಂ, ದುತ್ತರಂ ಸೀಘವಾಹಿನಿಂ;
ಗುಣಂ ಸರಿತ್ವಾ ಬುದ್ಧಸ್ಸ, ಸೋತ್ಥಿನಾ ಸಮತಿಕ್ಕಮಿಂ.
‘‘‘ಭವಸೋತಂ ಸಚೇ ಬುದ್ಧೋ, ತಿಣ್ಣೋ ಲೋಕನ್ತಗೂ ವಿದೂ [ವಿಭೂ (ಕ.)];
ಏತೇನ ಸಚ್ಚವಜ್ಜೇನ, ಗಮನಂ ಮೇ ಸಮಿಜ್ಝತು.
‘‘‘ಯದಿ ¶ ಸನ್ತಿಗಮೋ ಮಗ್ಗೋ, ಮೋಕ್ಖೋ ಚಚ್ಚನ್ತಿಕಂ [ಮೋಕ್ಖದಂ ಸನ್ತಿಕಂ (ಸ್ಯಾ.)] ಸುಖಂ;
ಏತೇನ ಸಚ್ಚವಜ್ಜೇನ, ಗಮನಂ ಮೇ ಸಮಿಜ್ಝತು.
‘‘‘ಸಙ್ಘೋ ಚೇ ತಿಣ್ಣಕನ್ತಾರೋ, ಪುಞ್ಞಕ್ಖೇತ್ತೋ ಅನುತ್ತರೋ;
ಏತೇನ ಸಚ್ಚವಜ್ಜೇನ, ಗಮನಂ ಮೇ ಸಮಿಜ್ಝತು’.
‘‘ಸಹ ಕತೇ ಸಚ್ಚವರೇ, ಮಗ್ಗಾ ಅಪಗತಂ ಜಲಂ;
ತತೋ ಸುಖೇನ ಉತ್ತಿಣ್ಣೋ, ನದೀತೀರೇ ಮನೋರಮೇ.
‘‘ನಿಸಿನ್ನಂ ¶ ಅದ್ದಸಂ ಬುದ್ಧಂ, ಉದೇನ್ತಂವ ಪಭಙ್ಕರಂ;
ಜಲನ್ತಂ ಹೇಮಸೇಲಂವ, ದೀಪರುಕ್ಖಂವ ಜೋತಿತಂ.
‘‘ಸಸಿಂವ ತಾರಾಸಹಿತಂ, ಸಾವಕೇಹಿ ಪುರಕ್ಖತಂ;
ವಾಸವಂ ವಿಯ ವಸ್ಸನ್ತಂ, ದೇಸನಾಜಲದನ್ತರಂ [ದೇವೇನ ಜಲನನ್ದನಂ (ಸ್ಯಾ. ಪೀ.)].
‘‘ವನ್ದಿತ್ವಾನ ಸಹಾಮಚ್ಚೋ, ಏಕಮನ್ತಮುಪಾವಿಸಿಂ;
ತತೋ ನೋ ಆಸಯಂ [ತತೋ ಅಜ್ಝಾಸಯಂ (ಸ್ಯಾ.)] ಞತ್ವಾ, ಬುದ್ಧೋ ಧಮ್ಮಮದೇಸಯಿ.
‘‘ಸುತ್ವಾನ ¶ ಧಮ್ಮಂ ವಿಮಲಂ, ಅವೋಚುಮ್ಹ ಮಯಂ ಜಿನಂ;
‘ಪಬ್ಬಾಜೇಹಿ ಮಹಾವೀರ, ನಿಬ್ಬಿನ್ದಾಮ್ಹ [ನಿಬ್ಬಿನ್ನಾಮ್ಹ (ಸೀ. ಪೀ.), ಓತಿಣ್ಣಮ್ಹ (ಸ್ಯಾ.)] ಮಯಂ ಭವೇ’.
‘‘‘ಸ್ವಕ್ಖಾತೋ ಭಿಕ್ಖವೇ ಧಮ್ಮೋ, ದುಕ್ಖನ್ತಕರಣಾಯ ವೋ;
ಚರಥ ಬ್ರಹ್ಮಚರಿಯಂ’, ಇಚ್ಚಾಹ ಮುನಿಸತ್ತಮೋ.
‘‘ಸಹ ವಾಚಾಯ ಸಬ್ಬೇಪಿ, ಭಿಕ್ಖುವೇಸಧರಾ ಮಯಂ;
ಅಹುಮ್ಹ ಉಪಸಮ್ಪನ್ನಾ, ಸೋತಾಪನ್ನಾ ಚ ಸಾಸನೇ.
‘‘ತತೋ ಜೇತವನಂ ಗನ್ತ್ವಾ, ಅನುಸಾಸಿ ವಿನಾಯಕೋ;
ಅನುಸಿಟ್ಠೋ ಜಿನೇನಾಹಂ, ಅರಹತ್ತಮಪಾಪುಣಿಂ.
‘‘ತತೋ ಭಿಕ್ಖುಸಹಸ್ಸಾನಿ [ಭಿಕ್ಖುಸಹಸ್ಸಂ ತಂ (ಸೀ. ಪೀ.)], ಅನುಸಾಸಿಮಹಂ ತದಾ;
ಮಮಾನುಸಾಸನಕರಾ, ತೇಪಿ ಆಸುಂ ಅನಾಸವಾ.
‘‘ಜಿನೋ ತಸ್ಮಿಂ ಗುಣೇ ತುಟ್ಠೋ, ಏತದಗ್ಗೇ ಠಪೇಸಿ ಮಂ;
ಭಿಕ್ಖುಓವಾದಕಾನಗ್ಗೋ, ಕಪ್ಪಿನೋತಿ ಮಹಾಜನೇ.
‘‘ಸತಸಹಸ್ಸೇ ¶ ಕತಂ ಕಮ್ಮಂ, ಫಲಂ ದಸ್ಸೇಸಿ ಮೇ ಇಧ;
ಪಮುತ್ತೋ ಸರವೇಗೋವ, ಕಿಲೇಸೇ ಝಾಪಯಿಂ [ಝಾಪಯೀ (ಸೀ.)] ಮಮ.
‘‘ಕಿಲೇಸಾ ¶ ಝಾಪಿತಾ ಮಯ್ಹಂ…ಪೇ… ವಿಹರಾಮಿ ಅನಾಸವೋ.
‘‘ಸ್ವಾಗತಂ ವತ ಮೇ ಆಸಿ…ಪೇ… ಕತಂ ಬುದ್ಧಸ್ಸ ಸಾಸನಂ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಮಹಾಕಪ್ಪಿನೋ ಥೇರೋ ಇಮಾ ಗಾಥಾಯೋ
ಅಭಾಸಿತ್ಥಾತಿ.
ಮಹಾಕಪ್ಪಿನತ್ಥೇರಸ್ಸಾಪದಾನಂ ತತಿಯಂ.
೪. ದಬ್ಬಮಲ್ಲಪುತ್ತತ್ಥೇರಅಪದಾನಂ
‘‘ಪದುಮುತ್ತರೋ ¶ ನಾಮ ಜಿನೋ, ಸಬ್ಬಲೋಕವಿದೂ ಮುನಿ;
ಇತೋ ಸತಸಹಸ್ಸಮ್ಹಿ, ಕಪ್ಪೇ ಉಪ್ಪಜ್ಜಿ ಚಕ್ಖುಮಾ.
‘‘ಓವಾದಕೋ ವಿಞ್ಞಾಪಕೋ, ತಾರಕೋ ಸಬ್ಬಪಾಣಿನಂ;
ದೇಸನಾಕುಸಲೋ ಬುದ್ಧೋ, ತಾರೇಸಿ ಜನತಂ ಬಹುಂ.
‘‘ಅನುಕಮ್ಪಕೋ ¶ ಕಾರುಣಿಕೋ, ಹಿತೇಸೀ ಸಬ್ಬಪಾಣಿನಂ;
ಸಮ್ಪತ್ತೇ ತಿತ್ಥಿಯೇ ಸಬ್ಬೇ, ಪಞ್ಚಸೀಲೇ ಪತಿಟ್ಠಪಿ [ಪತಿಟ್ಠಹಿ (ಸ್ಯಾ. ಕ.)].
‘‘ಏವಂ ನಿರಾಕುಲಂ ಆಸಿ, ಸುಞ್ಞತಂ [ಸುಞ್ಞಕಂ (ಸೀ.) ಏವಮುಪರಿಪಿ] ತಿತ್ಥಿಯೇಹಿ ಚ;
ವಿಚಿತ್ತಂ ಅರಹನ್ತೇಹಿ, ವಸೀಭೂತೇಹಿ ತಾದಿಭಿ.
‘‘ರತನಾನಟ್ಠಪಞ್ಞಾಸಂ, ಉಗ್ಗತೋ ಸೋ ಮಹಾಮುನಿ;
ಕಞ್ಚನಗ್ಘಿಯಸಙ್ಕಾಸೋ, ಬಾತ್ತಿಂಸವರಲಕ್ಖಣೋ.
‘‘ವಸ್ಸಸತಸಹಸ್ಸಾನಿ ¶ , ಆಯು ವಿಜ್ಜತಿ ತಾವದೇ;
ತಾವತಾ ತಿಟ್ಠಮಾನೋ ಸೋ, ತಾರೇಸಿ ಜನತಂ ಬಹುಂ.
‘‘ತದಾಹಂ ಹಂಸವತಿಯಂ, ಸೇಟ್ಠಿಪುತ್ತೋ ಮಹಾಯಸೋ;
ಉಪೇತ್ವಾ ಲೋಕಪಜ್ಜೋತಂ, ಅಸ್ಸೋಸಿಂ ಧಮ್ಮದೇಸನಂ.
‘‘ಸೇನಾಸನಾನಿ ಭಿಕ್ಖೂನಂ, ಪಞ್ಞಾಪೇನ್ತಂ ಸಸಾವಕಂ;
ಕಿತ್ತಯನ್ತಸ್ಸ ವಚನಂ, ಸುಣಿತ್ವಾ ಮುದಿತೋ ಅಹಂ.
‘‘ಅಧಿಕಾರಂ ¶ ಸಸಙ್ಘಸ್ಸ, ಕತ್ವಾ ತಸ್ಸ ಮಹೇಸಿನೋ;
ನಿಪಚ್ಚ ಸಿರಸಾ ಪಾದೇ, ತಂ ಠಾನಮಭಿಪತ್ಥಯಿಂ.
‘‘ತದಾಹ ಸ ಮಹಾವೀರೋ, ಮಮ ಕಮ್ಮಂ ಪಕಿತ್ತಯಂ;
‘ಯೋ ಸಸಙ್ಘಮಭೋಜೇಸಿ, ಸತ್ತಾಹಂ ಲೋಕನಾಯಕಂ.
‘‘‘ಸೋಯಂ ಕಮಲಪತ್ತಕ್ಖೋ, ಸೀಹಂಸೋ ಕನಕತ್ತಚೋ;
ಮಮ ಪಾದಮೂಲೇ ನಿಪತಿ [ಪತಿತೋ (ಪೀ.)], ಪತ್ಥಯಂ ಠಾನಮುತ್ತಮಂ.
‘‘‘ಸತಸಹಸ್ಸಿತೋ ಕಪ್ಪೇ, ಓಕ್ಕಾಕಕುಲಸಮ್ಭವೋ;
ಗೋತಮೋ ನಾಮ ಗೋತ್ತೇನ, ಸತ್ಥಾ ಲೋಕೇ ಭವಿಸ್ಸತಿ.
‘‘‘ಸಾವಕೋ ತಸ್ಸ ಬುದ್ಧಸ್ಸ, ದಬ್ಬೋ ನಾಮೇನ ವಿಸ್ಸುತೋ;
ಸೇನಾಸನಪಞ್ಞಾಪಕೋ, ಅಗ್ಗೋ ಹೇಸ್ಸತಿಯಂ ತದಾ’.
‘‘ತೇನ ಕಮ್ಮೇನ ಸುಕತೇನ, ಚೇತನಾಪಣಿಧೀಹಿ ಚ;
ಜಹಿತ್ವಾ ಮಾನುಸಂ ದೇಹಂ, ತಾವತಿಂಸಮಗಚ್ಛಹಂ.
‘‘ಸತಾನಂ ತೀಣಿಕ್ಖತ್ತುಞ್ಚ, ದೇವರಜ್ಜಮಕಾರಯಿಂ;
ಸತಾನಂ ಪಞ್ಚಕ್ಖತ್ತುಞ್ಚ, ಚಕ್ಕವತ್ತೀ ಅಹೋಸಹಂ.
‘‘ಪದೇಸರಜ್ಜಂ ¶ ¶ ¶ ವಿಪುಲಂ, ಗಣನಾತೋ ಅಸಙ್ಖಿಯಂ;
ಸಬ್ಬತ್ಥ ಸುಖಿತೋ ಆಸಿಂ, ತಸ್ಸ ಕಮ್ಮಸ್ಸ ವಾಹಸಾ.
‘‘ಏಕನವುತಿತೋ ಕಪ್ಪೇ, ವಿಪಸ್ಸೀ ನಾಮ ನಾಯಕೋ;
ಉಪ್ಪಜ್ಜಿ ಚಾರುದಸ್ಸನೋ [ಚಾರುನಯನೋ (ಸೀ. ಸ್ಯಾ. ಪೀ.)], ಸಬ್ಬಧಮ್ಮವಿಪಸ್ಸಕೋ.
‘‘ದುಟ್ಠಚಿತ್ತೋ ಉಪವದಿಂ, ಸಾವಕಂ ತಸ್ಸ ತಾದಿನೋ;
ಸಬ್ಬಾಸವಪರಿಕ್ಖೀಣಂ, ಸುದ್ಧೋತಿ ಚ ವಿಜಾನಿಯ.
‘‘ತಸ್ಸೇವ ನರವೀರಸ್ಸ, ಸಾವಕಾನಂ ಮಹೇಸಿನಂ;
ಸಲಾಕಞ್ಚ ಗಹೇತ್ವಾನ [ಸಲಾಕಂ ಪಗ್ಗಹೇತ್ವಾನ (ಸೀ. ಪೀ.)], ಖೀರೋದನಮದಾಸಹಂ.
‘‘ಇಮಮ್ಹಿ ಭದ್ದಕೇ ಕಪ್ಪೇ, ಬ್ರಹ್ಮಬನ್ಧು ಮಹಾಯಸೋ;
ಕಸ್ಸಪೋ ನಾಮ ಗೋತ್ತೇನ, ಉಪ್ಪಜ್ಜಿ ವದತಂ ವರೋ.
‘‘ಸಾಸನಂ ಜೋತಯಿತ್ವಾನ, ಅಭಿಭುಯ್ಯ ಕುತಿತ್ಥಿಯೇ;
ವಿನೇಯ್ಯೇ ವಿನಯಿತ್ವಾವ, ನಿಬ್ಬುತೋ ಸೋ ಸಸಾವಕೋ.
‘‘ಸಸಿಸ್ಸೇ ನಿಬ್ಬುತೇ ನಾಥೇ, ಅತ್ಥಮೇನ್ತಮ್ಹಿ ಸಾಸನೇ;
ದೇವಾ ಕನ್ದಿಂಸು ಸಂವಿಗ್ಗಾ, ಮುತ್ತಕೇಸಾ ರುದಮ್ಮುಖಾ.
‘‘ನಿಬ್ಬಾಯಿಸ್ಸತಿ ¶ ಧಮ್ಮಕ್ಖೋ, ನ ಪಸ್ಸಿಸ್ಸಾಮ ಸುಬ್ಬತೇ;
ನ ಸುಣಿಸ್ಸಾಮ ಸದ್ಧಮ್ಮಂ, ಅಹೋ ನೋ ಅಪ್ಪಪುಞ್ಞತಾ.
‘‘ತದಾಯಂ ಪಥವೀ ಸಬ್ಬಾ, ಅಚಲಾ ಸಾ ಚಲಾಚಲಾ [ಚಲಾಚಲೀ (ಸೀ.), ಪುಲಾಪುಲೀ (ಸ್ಯಾ.)];
ಸಾಗರೋ ಚ ಸಸೋಕೋವ, ವಿನದೀ ಕರುಣಂ ಗಿರಂ.
‘‘ಚತುದ್ದಿಸಾ ದುನ್ದುಭಿಯೋ, ನಾದಯಿಂಸು ಅಮಾನುಸಾ;
ಸಮನ್ತತೋ ಅಸನಿಯೋ, ಫಲಿಂಸು ಚ ಭಯಾವಹಾ.
‘‘ಉಕ್ಕಾ ¶ ಪತಿಂಸು ನಭಸಾ, ಧೂಮಕೇತು ಚ ದಿಸ್ಸತಿ;
ಸಧೂಮಾ ಜಾಲವಟ್ಟಾ ಚ [ಸಬ್ಬಥಲಜಸತ್ತಾ ಚ (ಸೀ.)], ರವಿಂಸು ಕರುಣಂ ಮಿಗಾ.
‘‘ಉಪ್ಪಾದೇ ದಾರುಣೇ ದಿಸ್ವಾ, ಸಾಸನತ್ಥಙ್ಗಸೂಚಕೇ;
ಸಂವಿಗ್ಗಾ ಭಿಕ್ಖವೋ ಸತ್ತ, ಚಿನ್ತಯಿಮ್ಹ ಮಯಂ ತದಾ.
‘‘ಸಾಸನೇನ ವಿನಾಮ್ಹಾಕಂ, ಜೀವಿತೇನ ಅಲಂ ಮಯಂ;
ಪವಿಸಿತ್ವಾ ಮಹಾರಞ್ಞಂ, ಯುಞ್ಜಾಮ ಜಿನಸಾಸನಂ.
‘‘ಅದ್ದಸಮ್ಹ ¶ ತದಾರಞ್ಞೇ, ಉಬ್ಬಿದ್ಧಂ ಸೇಲಮುತ್ತಮಂ;
ನಿಸ್ಸೇಣಿಯಾ ತಮಾರುಯ್ಹ, ನಿಸ್ಸೇಣಿಂ ಪಾತಯಿಮ್ಹಸೇ.
‘‘ತದಾ ¶ ಓವದಿ ನೋ ಥೇರೋ, ಬುದ್ಧುಪ್ಪಾದೋ ಸುದುಲ್ಲಭೋ;
ಸದ್ಧಾತಿದುಲ್ಲಭಾ ಲದ್ಧಾ, ಥೋಕಂ ಸೇಸಞ್ಚ ಸಾಸನಂ.
‘‘ನಿಪತನ್ತಿ ಖಣಾತೀತಾ, ಅನನ್ತೇ ದುಕ್ಖಸಾಗರೇ;
ತಸ್ಮಾ ಪಯೋಗೋ ಕತ್ತಬ್ಬೋ, ಯಾವ ಠಾತಿ ಮುನೇ ಮತಂ [ಯಾವ ತಿಟ್ಠತಿ ಸಾಸನಂ (ಸ್ಯಾ.)].
‘‘ಅರಹಾ ಆಸಿ ಸೋ ಥೇರೋ, ಅನಾಗಾಮೀ ತದಾನುಗೋ;
ಸುಸೀಲಾ ಇತರೇ ಯುತ್ತಾ, ದೇವಲೋಕಂ ಅಗಮ್ಹಸೇ.
‘‘ನಿಬ್ಬುತೋ ತಿಣ್ಣಸಂಸಾರೋ, ಸುದ್ಧಾವಾಸೇ ಚ ಏಕಕೋ;
ಅಹಞ್ಚ ಪಕ್ಕುಸಾತಿ ಚ, ಸಭಿಯೋ ಬಾಹಿಯೋ ತಥಾ.
‘‘ಕುಮಾರಕಸ್ಸಪೋ ಚೇವ, ತತ್ಥ ತತ್ಥೂಪಗಾ ಮಯಂ;
ಸಂಸಾರಬನ್ಧನಾ ಮುತ್ತಾ, ಗೋತಮೇನಾನುಕಮ್ಪಿತಾ.
‘‘ಮಲ್ಲೇಸು ಕುಸಿನಾರಾಯಂ, ಜಾತೋ ಗಬ್ಭೇವ ಮೇ ಸತೋ;
ಮಾತಾ ಮತಾ ಚಿತಾರುಳ್ಹಾ, ತತೋ ನಿಪ್ಪತಿತೋ ಅಹಂ.
‘‘ಪತಿತೋ ¶ ದಬ್ಬಪುಞ್ಜಮ್ಹಿ, ತತೋ ದಬ್ಬೋತಿ ವಿಸ್ಸುತೋ;
ಬ್ರಹ್ಮಚಾರೀಬಲೇನಾಹಂ, ವಿಮುತ್ತೋ ಸತ್ತವಸ್ಸಿಕೋ.
‘‘ಖೀರೋದನಬಲೇನಾಹಂ ¶ , ಪಞ್ಚಹಙ್ಗೇಹುಪಾಗತೋ;
ಖೀಣಾಸವೋಪವಾದೇನ, ಪಾಪೇಹಿ ಬಹುಚೋದಿತೋ.
‘‘ಉಭೋ ಪುಞ್ಞಞ್ಚ ಪಾಪಞ್ಚ, ವೀತಿವತ್ತೋಮ್ಹಿ ದಾನಿಹಂ;
ಪತ್ವಾನ ಪರಮಂ ಸನ್ತಿಂ, ವಿಹರಾಮಿ ಅನಾಸವೋ.
‘‘ಸೇನಾಸನಂ ಪಞ್ಞಾಪಯಿಂ, ಹಾಸಯಿತ್ವಾನ ಸುಬ್ಬತೇ;
ಜಿನೋ ತಸ್ಮಿಂ ಗುಣೇ ತುಟ್ಠೋ, ಏತದಗ್ಗೇ ಠಪೇಸಿ ಮಂ.
‘‘ಕಿಲೇಸಾ ಝಾಪಿತಾ ಮಯ್ಹಂ…ಪೇ… ವಿಹರಾಮಿ ಅನಾಸವೋ.
‘‘ಸ್ವಾಗತಂ ವತ ಮೇ ಆಸಿ…ಪೇ… ಕತಂ ಬುದ್ಧಸ್ಸ ಸಾಸನಂ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ದಬ್ಬಮಲ್ಲಪುತ್ತೋ ಥೇರೋ ಇಮಾ ಗಾಥಾಯೋ
ಅಭಾಸಿತ್ಥಾತಿ.
ದಬ್ಬಮಲ್ಲಪುತ್ತತ್ಥೇರಸ್ಸಾಪದಾನಂ ಚತುತ್ಥಂ.
೫. ಕುಮಾರಕಸ್ಸಪತ್ಥೇರಅಪದಾನಂ
‘‘ಇತೋ ¶ ಸತಸಹಸ್ಸಮ್ಹಿ, ಕಪ್ಪೇ ಉಪ್ಪಜ್ಜಿ ನಾಯಕೋ;
ಸಬ್ಬಲೋಕಹಿತೋ ವೀರೋ, ಪದುಮುತ್ತರನಾಮಕೋ.
‘‘ತದಾಹಂ ¶ ಬ್ರಾಹ್ಮಣೋ ಹುತ್ವಾ, ವಿಸ್ಸುತೋ ವೇದಪಾರಗೂ;
ದಿವಾವಿಹಾರಂ ವಿಚರಂ, ಅದ್ದಸಂ ಲೋಕನಾಯಕಂ.
‘‘ಚತುಸಚ್ಚಂ ¶ ಪಕಾಸೇನ್ತಂ, ಬೋಧಯನ್ತಂ ಸದೇವಕಂ;
ವಿಚಿತ್ತಕಥಿಕಾನಗ್ಗಂ, ವಣ್ಣಯನ್ತಂ ಮಹಾಜನೇ.
‘‘ತದಾ ಮುದಿತಚಿತ್ತೋಹಂ, ನಿಮನ್ತೇತ್ವಾ ತಥಾಗತಂ;
ನಾನಾರತ್ತೇಹಿ ವತ್ಥೇಹಿ, ಅಲಙ್ಕರಿತ್ವಾನ ಮಣ್ಡಪಂ.
‘‘ನಾನಾರತನಪಜ್ಜೋತಂ, ಸಸಙ್ಘಂ ಭೋಜಯಿಂ ತಹಿಂ;
ಭೋಜಯಿತ್ವಾನ ಸತ್ತಾಹಂ, ನಾನಗ್ಗರಸಭೋಜನಂ.
‘‘ನಾನಾಚಿತ್ತೇಹಿ [ನಾನಾವಣ್ಣೇಹಿ (ಸೀ.)] ಪುಪ್ಫೇಹಿ, ಪೂಜಯಿತ್ವಾ ಸಸಾವಕಂ [ಮಹಾವೀರಂ (ಕ.)];
ನಿಪಚ್ಚ ಪಾದಮೂಲಮ್ಹಿ, ತಂ ಠಾನಂ ಪತ್ಥಯಿಂ ಅಹಂ.
‘‘ತದಾ ¶ ಮುನಿವರೋ ಆಹ, ಕರುಣೇಕರಸಾಸಯೋ [ಕರುಣೋ ಕರುಣಾಲಯೋ (ಸ್ಯಾ.)];
‘ಪಸ್ಸಥೇತಂ ದಿಜವರಂ, ಪದುಮಾನನಲೋಚನಂ.
‘‘‘ಪೀತಿಪಾಮೋಜ್ಜಬಹುಲಂ, ಸಮುಗ್ಗತತನೂರುಹಂ;
ಹಾಸಮ್ಹಿತವಿಸಾಲಕ್ಖಂ, ಮಮ ಸಾಸನಲಾಲಸಂ.
‘‘‘ಪತಿತಂ ಪಾದಮೂಲೇ ಮೇ, ಏಕಾವತ್ಥಸುಮಾನಸಂ [ಏಕವತ್ಥಂ ಸುಮಾನಸಂ (ಸ್ಯಾ. ಕ.)];
ಏಸ ಪತ್ಥೇತಿ ತಂ ಠಾನಂ, ವಿಚಿತ್ತಕಥಿಕತ್ತನಂ [ವಿಚಿತ್ತಕಥಿಕತ್ತದಂ (ಸೀ. ಪೀ.)].
‘‘‘ಸತಸಹಸ್ಸಿತೋ ಕಪ್ಪೇ, ಓಕ್ಕಾಕಕುಲಸಮ್ಭವೋ;
ಗೋತಮೋ ನಾಮ ಗೋತ್ತೇನ, ಸತ್ಥಾ ಲೋಕೇ ಭವಿಸ್ಸತಿ.
‘‘‘ತಸ್ಸ ಧಮ್ಮೇಸು ದಾಯಾದೋ, ಓರಸೋ ಧಮ್ಮನಿಮ್ಮಿತೋ;
ಕುಮಾರಕಸ್ಸಪೋ ನಾಮ, ಹೇಸ್ಸತಿ ಸತ್ಥು ಸಾವಕೋ.
‘‘‘ವಿಚಿತ್ತಪುಪ್ಫದುಸ್ಸಾನಂ ¶ , ರತನಾನಞ್ಚ ವಾಹಸಾ;
ವಿಚಿತ್ತಕಥಿಕಾನಂ ಸೋ, ಅಗ್ಗತಂ ಪಾಪುಣಿಸ್ಸತಿ’.
‘‘ತೇನ ¶ ಕಮ್ಮೇನ ಸುಕತೇನ, ಚೇತನಾಪಣಿಧೀಹಿ ಚ;
ಜಹಿತ್ವಾ ಮಾನುಸಂ ದೇಹಂ, ತಾವತಿಂಸಮಗಚ್ಛಹಂ.
‘‘ಪರಿಬ್ಭಮಂ ಭವಾಭವೇ [ಭವಾಕಾಸೇ (ಸೀ. ಪೀ.)], ರಙ್ಗಮಜ್ಝೇ ಯಥಾ ನಟೋ;
ಸಾಖಮಿಗತ್ರಜೋ ಹುತ್ವಾ, ಮಿಗಿಯಾ ಕುಚ್ಛಿಮೋಕ್ಕಮಿಂ.
‘‘ತದಾ ಮಯಿ ಕುಚ್ಛಿಗತೇ, ವಜ್ಝವಾರೋ ಉಪಟ್ಠಿತೋ;
ಸಾಖೇನ ಚತ್ತಾ ಮೇ ಮಾತಾ, ನಿಗ್ರೋಧಂ ಸರಣಂ ಗತಾ.
‘‘ತೇನ ಸಾ ಮಿಗರಾಜೇನ, ಮರಣಾ ಪರಿಮೋಚಿತಾ;
ಪರಿಚ್ಚಜಿತ್ವಾ ಸಪಾಣಂ [ಸಂಪಾಣಂ (ಸೀ. ಪೀ.)], ಮಮೇವಂ ಓವದೀ ತದಾ.
‘‘‘ನಿಗ್ರೋಧಮೇವ ಸೇವೇಯ್ಯ, ನ ಸಾಖಮುಪಸಂವಸೇ;
ನಿಗ್ರೋಧಸ್ಮಿಂ ಮತಂ ಸೇಯ್ಯೋ, ಯಞ್ಚೇ ಸಾಖಮ್ಹಿ ಜೀವಿತಂ’.
‘‘ತೇನಾನುಸಿಟ್ಠಾ ಮಿಗಯೂಥಪೇನ, ಅಹಞ್ಚ ಮಾತಾ ಚ ತಥೇತರೇ ಚ [ಚಿತರೇ ಚ (ಸ್ಯಾ.), ತಸ್ಸೋವಾದೇನ (ಪೀ.), ಚಿತರೇ ಚ ತಸ್ಸೋವಾದಂ (ಕ.)];
ಆಗಮ್ಮ ¶ ರಮ್ಮಂ ತುಸಿತಾಧಿವಾಸಂ, ಗತಾ ಪವಾಸಂ ಸಘರಂ ಯಥೇವ.
‘‘ಪುನೋ ಕಸ್ಸಪವೀರಸ್ಸ, ಅತ್ಥಮೇನ್ತಮ್ಹಿ ಸಾಸನೇ;
ಆರುಯ್ಹ ಸೇಲಸಿಖರಂ, ಯುಞ್ಜಿತ್ವಾ ಜಿನಸಾಸನಂ.
‘‘ಇದಾನಾಹಂ ರಾಜಗಹೇ, ಜಾತೋ ಸೇಟ್ಠಿಕುಲೇ ಅಹುಂ;
ಆಪನ್ನಸತ್ತಾ ಮೇ ಮಾತಾ, ಪಬ್ಬಜಿ ಅನಗಾರಿಯಂ.
‘‘ಸಗಬ್ಭಂ ¶ ¶ ತಂ ವಿದಿತ್ವಾನ, ದೇವದತ್ತಮುಪಾನಯುಂ;
ಸೋ ಅವೋಚ ‘ವಿನಾಸೇಥ, ಪಾಪಿಕಂ ಭಿಕ್ಖುನಿಂ ಇಮಂ’.
‘‘ಇದಾನಿಪಿ ಮುನಿನ್ದೇನ, ಜಿನೇನ ಅನುಕಮ್ಪಿತಾ;
ಸುಖಿನೀ ಅಜನೀ ಮಯ್ಹಂ, ಮಾತಾ ಭಿಕ್ಖುನುಪಸ್ಸಯೇ.
‘‘ತಂ ವಿದಿತ್ವಾ ಮಹೀಪಾಲೋ, ಕೋಸಲೋ ಮಂ ಅಪೋಸಯಿ;
ಕುಮಾರಪರಿಹಾರೇನ, ನಾಮೇನಾಹಞ್ಚ ಕಸ್ಸಪೋ.
‘‘ಮಹಾಕಸ್ಸಪಮಾಗಮ್ಮ, ಅಹಂ ಕುಮಾರಕಸ್ಸಪೋ;
ವಮ್ಮಿಕಸದಿಸಂ ಕಾಯಂ, ಸುತ್ವಾ ಬುದ್ಧೇನ ದೇಸಿತಂ.
‘‘ತತೋ ¶ ಚಿತ್ತಂ ವಿಮುಚ್ಚಿ ಮೇ, ಅನುಪಾದಾಯ ಸಬ್ಬಸೋ;
ಪಾಯಾಸಿಂ ದಮಯಿತ್ವಾಹಂ, ಏತದಗ್ಗಮಪಾಪುಣಿಂ.
‘‘ಕಿಲೇಸಾ ಝಾಪಿತಾ ಮಯ್ಹಂ…ಪೇ… ವಿಹರಾಮಿ ಅನಾಸವೋ.
‘‘ಸ್ವಾಗತಂ ವತ ಮೇ ಆಸಿ…ಪೇ… ಕತಂ ಬುದ್ಧಸ್ಸ ಸಾಸನಂ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಕುಮಾರಕಸ್ಸಪೋ ಥೇರೋ ಇಮಾ ಗಾಥಾಯೋ
ಅಭಾಸಿತ್ಥಾತಿ.
ಕುಮಾರಕಸ್ಸಪತ್ಥೇರಸ್ಸಾಪದಾನಂ ಪಞ್ಚಮಂ.
ಚತುವೀಸತಿಮಂ ಭಾಣವಾರಂ.
೬. ಬಾಹಿಯತ್ಥೇರಅಪದಾನಂ
‘‘ಇತೋ ¶ ಸತಸಹಸ್ಸಮ್ಹಿ, ಕಪ್ಪೇ ಉಪ್ಪಜ್ಜಿ ನಾಯಕೋ;
ಮಹಪ್ಪಭೋ ತಿಲೋಕಗ್ಗೋ, ನಾಮೇನ ಪದುಮುತ್ತರೋ.
‘‘ಖಿಪ್ಪಾಭಿಞ್ಞಸ್ಸ ಭಿಕ್ಖುಸ್ಸ, ಗುಣಂ ಕಿತ್ತಯತೋ ಮುನೇ;
ಸುತ್ವಾ ಉದಗ್ಗಚಿತ್ತೋಹಂ, ಕಾರಂ ಕತ್ವಾ ಮಹೇಸಿನೋ.
‘‘ದತ್ವಾ ಸತ್ತಾಹಿಕಂ ದಾನಂ, ಸಸಿಸ್ಸಸ್ಸ ಮುನೇ ಅಹಂ;
ಅಭಿವಾದಿಯ ಸಮ್ಬುದ್ಧಂ, ತಂ ಠಾನಂ ಪತ್ಥಯಿಂ ತದಾ.
‘‘ತತೋ ಮಂ ಬ್ಯಾಕರಿ ಬುದ್ಧೋ, ‘ಏತಂ ಪಸ್ಸಥ ಬ್ರಾಹ್ಮಣಂ;
ಪತಿತಂ ಪಾದಮೂಲೇ ಮೇ, ಚರಿಯಂ ಪಚ್ಚವೇಕ್ಖಣಂ [ಪಸನ್ನನಯನಾನನಂ (ಸೀ.), ಪೀನಸಮ್ಪನ್ನವೇಕ್ಖಣಂ (ಸ್ಯಾ.), ಪೀಣಂಸಂ ಪಚ್ಚವೇಕ್ಖಣಂ (ಪೀ.)].
‘‘‘ಹೇಮಯಞ್ಞೋಪಚಿತಙ್ಗಂ ¶ ¶ , ಅವದಾತತನುತ್ತಚಂ;
ಪಲಮ್ಬಬಿಮ್ಬತಮ್ಬೋಟ್ಠಂ, ಸೇತತಿಣ್ಹಸಮಂ ದಿಜಂ.
‘‘‘ಗುಣಥಾಮಬಹುತರಂ, ಸಮುಗ್ಗತತನೂರುಹಂ;
ಗುಣೋಘಾಯತನೀಭೂತಂ, ಪೀತಿಸಮ್ಫುಲ್ಲಿತಾನನಂ.
‘‘‘ಏಸೋ ಪತ್ಥಯತೇ ಠಾನಂ, ಖಿಪ್ಪಾಭಿಞ್ಞಸ್ಸ ಭಿಕ್ಖುನೋ;
ಅನಾಗತೇ ಮಹಾವೀರೋ, ಗೋತಮೋ ನಾಮ ಹೇಸ್ಸತಿ.
‘‘‘ತಸ್ಸ ¶ ಧಮ್ಮೇಸು ದಾಯಾದೋ, ಓರಸೋ ಧಮ್ಮನಿಮ್ಮಿತೋ;
ಬಾಹಿಯೋ ನಾಮ ನಾಮೇನ, ಹೇಸ್ಸತಿ ಸತ್ಥು ಸಾವಕೋ’.
‘‘ತದಾ ಹಿ ತುಟ್ಠೋ ವುಟ್ಠಾಯ, ಯಾವಜೀವಂ ಮಹಾಮುನೇ;
ಕಾರಂ ಕತ್ವಾ ಚುತೋ ಸಗ್ಗಂ, ಅಗಂ ಸಭವನಂ ಯಥಾ.
‘‘ದೇವಭೂತೋ ¶ ಮನುಸ್ಸೋ ವಾ, ಸುಖಿತೋ ತಸ್ಸ ಕಮ್ಮುನೋ;
ವಾಹಸಾ ಸಂಸರಿತ್ವಾನ, ಸಮ್ಪತ್ತಿಮನುಭೋಮಹಂ.
‘‘ಪುನ ಕಸ್ಸಪವೀರಸ್ಸ, ಅತ್ಥಮೇನ್ತಮ್ಹಿ [ಅತ್ಥಙ್ಗತಮ್ಹಿ (ಸ್ಯಾ.)] ಸಾಸನೇ;
ಆರುಯ್ಹ ಸೇಲಸಿಖರಂ, ಯುಞ್ಜಿತ್ವಾ ಜಿನಸಾಸನಂ.
‘‘ವಿಸುದ್ಧಸೀಲೋ ಸಪ್ಪಞ್ಞೋ, ಜಿನಸಾಸನಕಾರಕೋ;
ತತೋ ಚುತಾ ಪಞ್ಚ ಜನಾ, ದೇವಲೋಕಂ ಅಗಮ್ಹಸೇ.
‘‘ತತೋಹಂ ಬಾಹಿಯೋ ಜಾತೋ, ಭಾರುಕಚ್ಛೇ ಪುರುತ್ತಮೇ;
ತತೋ ನಾವಾಯ ಪಕ್ಖನ್ದೋ [ಪಕ್ಖನ್ತೋ (ಸೀ.), ಪಕ್ಕನ್ತೋ (ಪೀ.)], ಸಾಗರಂ ಅಪ್ಪಸಿದ್ಧಿಯಂ [ಅತ್ಥಸಿದ್ಧಿಯಂ (ಕ.)].
‘‘ತತೋ ನಾವಾ ಅಭಿಜ್ಜಿತ್ಥ, ಗನ್ತ್ವಾನ ಕತಿಪಾಹಕಂ;
ತದಾ ಭೀಸನಕೇ ಘೋರೇ, ಪತಿತೋ ಮಕರಾಕರೇ.
‘‘ತದಾಹಂ ವಾಯಮಿತ್ವಾನ, ಸನ್ತರಿತ್ವಾ ಮಹೋದಧಿಂ;
ಸುಪ್ಪಾದಪಟ್ಟನವರಂ [ಸುಪ್ಪಾರಪಟ್ಟನವರಂ (ಸೀ. ಪೀ.)], ಸಮ್ಪತ್ತೋ ಮನ್ದವೇಧಿತೋ [ಮನ್ದಮೇಧಿಕೋ (ಸೀ.), ಮನ್ದವೇದಿತೋ (ಸ್ಯಾ.), ಮದ್ದವೇರತಂ (ಕ.)].
‘‘ದಾರುಚೀರಂ ನಿವಾಸೇತ್ವಾ, ಗಾಮಂ ಪಿಣ್ಡಾಯ ಪಾವಿಸಿಂ;
ತದಾಹ ಸೋ ಜನೋ ತುಟ್ಠೋ, ಅರಹಾಯಮಿಧಾಗತೋ.
‘‘ಇಮಂ ಅನ್ನೇನ ಪಾನೇನ, ವತ್ಥೇನ ಸಯನೇನ ಚ;
ಭೇಸಜ್ಜೇನ ಚ ಸಕ್ಕತ್ವಾ, ಹೇಸ್ಸಾಮ ಸುಖಿತಾ ಮಯಂ.
‘‘ಪಚ್ಚಯಾನಂ ತದಾ ಲಾಭೀ, ತೇಹಿ ಸಕ್ಕತಪೂಜಿತೋ;
ಅರಹಾಹನ್ತಿ ಸಙ್ಕಪ್ಪಂ, ಉಪ್ಪಾದೇಸಿಂ ಅಯೋನಿಸೋ.
‘‘ತತೋ ¶ ¶ ಮೇ ಚಿತ್ತಮಞ್ಞಾಯ, ಚೋದಯೀ ಪುಬ್ಬದೇವತಾ;
‘ನ ತ್ವಂ ಉಪಾಯಮಗ್ಗಞ್ಞೂ, ಕುತೋ ತ್ವಂ ಅರಹಾ ಭವೇ’.
‘‘ಚೋದಿತೋ ¶ ತಾಯ ಸಂವಿಗ್ಗೋ, ತದಾಹಂ ಪರಿಪುಚ್ಛಿ ತಂ;
‘ಕೇ ವಾ ಏತೇ ಕುಹಿಂ ಲೋಕೇ, ಅರಹನ್ತೋ ನರುತ್ತಮಾ.
‘‘‘ಸಾವತ್ಥಿಯಂ ¶ ಕೋಸಲಮನ್ದಿರೇ ಜಿನೋ, ಪಹೂತಪಞ್ಞೋ ವರಭೂರಿಮೇಧಸೋ;
ಸೋ ಸಕ್ಯಪುತ್ತೋ ಅರಹಾ ಅನಾಸವೋ, ದೇಸೇತಿ ಧಮ್ಮಂ ಅರಹತ್ತಪತ್ತಿಯಾ.
‘‘‘ತದಸ್ಸ ಸುತ್ವಾ ವಚನಂ ಸುಪೀಣಿತೋ [ಪೀಣಿತ್ವಾ (ಕ.)], ನಿಧಿಂವ ಲದ್ಧಾ ಕಪಣೋತಿ ವಿಮ್ಹಿತೋ;
ಉದಗ್ಗಚಿತ್ತೋ ಅರಹತ್ತಮುತ್ತಮಂ, ಸುದಸ್ಸನಂ ದಟ್ಠುಮನನ್ತಗೋಚರಂ.
‘‘‘ತದಾ ತತೋ ನಿಕ್ಖಮಿತ್ವಾನ ಸತ್ಥುನೋ [ನಿಕ್ಖಮಿತುನ ಸತ್ಥುವರಂ (ಸೀ.)], ಸದಾ ಜಿನಂ ಪಸ್ಸಾಮಿ ವಿಮಲಾನನಂ [ಪರಾಜಿನಂ ಪಸ್ಸಾಮಿ ಕಮಲಾನನಂ (ಕ.)];
ಉಪೇಚ್ಚ ರಮ್ಮಂ ವಿಜಿತವ್ಹಯಂ ವನಂ, ದಿಜೇ ಅಪುಚ್ಛಿಂ ಕುಹಿಂ ಲೋಕನನ್ದನೋ.
‘‘‘ತತೋ ಅವೋಚುಂ ನರದೇವವನ್ದಿತೋ, ಪುರಂ ಪವಿಟ್ಠೋ ಅಸನೇಸನಾಯ ಸೋ;
ಸಸೋವ [ಪಚ್ಚೇಹಿ (ಸೀ. ಸ್ಯಾ.)] ಖಿಪ್ಪಂ ಮುನಿದಸ್ಸನುಸ್ಸುಕೋ, ಉಪೇಚ್ಚ ವನ್ದಾಹಿ ತಮಗ್ಗಪುಗ್ಗಲಂ’.
‘‘ತತೋಹಂ ತುವಟಂ ಗನ್ತ್ವಾ, ಸಾವತ್ಥಿಂ ಪುರಮುತ್ತಮಂ;
ವಿಚರನ್ತಂ ತಮದ್ದಕ್ಖಿಂ, ಪಿಣ್ಡತ್ಥಂ ಅಪಿಹಾಗಿಧಂ.
‘‘ಪತ್ತಪಾಣಿಂ ¶ ಅಲೋಲಕ್ಖಂ, ಪಾಚಯನ್ತಂ ಪೀತಾಕರಂ [ಭಾಜಯನ್ತಂ ವಿಯಾಮತಂ (ಸೀ.), ಜೋತಯನ್ತಂ ಇಧಾಮತಂ (ಸ್ಯಾ.), ಭಾಜಯನ್ತಂ ಇದಂಮತಂ (ಪೀ.)];
ಸಿರೀನಿಲಯಸಙ್ಕಾಸಂ, ರವಿದಿತ್ತಿಹರಾನನಂ.
‘‘ತಂ ಸಮೇಚ್ಚ ನಿಪಚ್ಚಾಹಂ, ಇದಂ ವಚನಮಬ್ರವಿಂ;
‘ಕುಪಥೇ ವಿಪ್ಪನಟ್ಠಸ್ಸ, ಸರಣಂ ಹೋಹಿ ಗೋತಮ.
‘‘‘ಪಾಣಸನ್ತಾರಣತ್ಥಾಯ ¶ , ಪಿಣ್ಡಾಯ ವಿಚರಾಮಹಂ;
ನ ತೇ ಧಮ್ಮಕಥಾಕಾಲೋ, ಇಚ್ಚಾಹ ಮುನಿಸತ್ತಮೋ’.
‘‘ತದಾ ಪುನಪ್ಪುನಂ ಬುದ್ಧಂ, ಆಯಾಚಿಂ ಧಮ್ಮಲಾಲಸೋ;
ಯೋ ಮೇ ಧಮ್ಮಮದೇಸೇಸಿ, ಗಮ್ಭೀರಂ ಸುಞ್ಞತಂ ಪದಂ.
‘‘ತಸ್ಸ ¶ ಧಮ್ಮಂ ಸುಣಿತ್ವಾನ, ಪಾಪುಣಿಂ ಆಸವಕ್ಖಯಂ;
ಪರಿಕ್ಖೀಣಾಯುಕೋ ಸನ್ತೋ, ಅಹೋ ಸತ್ಥಾನುಕಮ್ಪಕೋ.
‘‘ಕಿಲೇಸಾ ಝಾಪಿತಾ ಮಯ್ಹಂ…ಪೇ… ವಿಹರಾಮಿ ಅನಾಸವೋ.
‘‘ಸ್ವಾಗತಂ ವತ ಮೇ ಆಸಿ…ಪೇ… ಕತಂ ಬುದ್ಧಸ್ಸ ಸಾಸನಂ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ.
‘‘ಏವಂ ಥೇರೋ ವಿಯಾಕಾಸಿ, ಬಾಹಿಯೋ ದಾರುಚೀರಿಯೋ;
ಸಙ್ಕಾರಕೂಟೇ ಪತಿತೋ, ಭೂತಾವಿಟ್ಠಾಯ ಗಾವಿಯಾ.
‘‘ಅತ್ತನೋ ¶ ಪುಬ್ಬಚರಿಯಂ, ಕಿತ್ತಯಿತ್ವಾ ಮಹಾಮತಿ;
ಪರಿನಿಬ್ಬಾಯಿ ಸೋ ಥೇರೋ [ವೀರೋ (ಸೀ.), ಧೀರೋ (ಸ್ಯಾ.)], ಸಾವತ್ಥಿಯಂ ಪುರುತ್ತಮೇ.
‘‘ನಗರಾ ¶ ನಿಕ್ಖಮನ್ತೋ ತಂ, ದಿಸ್ವಾನ ಇಸಿಸತ್ತಮೋ;
ದಾರುಚೀರಧರಂ ಧೀರಂ, ಬಾಹಿಯಂ ಬಾಹಿತಾಗಮಂ.
‘‘ಭೂಮಿಯಂ ಪತಿತಂ ದನ್ತಂ, ಇನ್ದಕೇತೂವ ಪಾತಿತಂ;
ಗತಾಯುಂ ಸುಕ್ಖಕಿಲೇಸಂ [ಗತಾಯು ಸಂಗತಕ್ಲೇಸಂ (ಸೀ. ಪೀ.), ತದಾಯು ಸಙ್ಕತಾಲೇಸಂ (ಕ.)], ಜಿನಸಾಸನಕಾರಕಂ.
‘‘ತತೋ ಆಮನ್ತಯೀ ಸತ್ಥಾ, ಸಾವಕೇ ಸಾಸನೇ ರತೇ;
‘ಗಣ್ಹಥ ನೇತ್ವಾ [ಹುತ್ವಾ (ಸ್ಯಾ. ಪೀ. ಕ.)] ಝಾಪೇಥ, ತನುಂ ಸಬ್ರಹ್ಮಚಾರಿನೋ.
‘‘‘ಥೂಪಂ ಕರೋಥ ಪೂಜೇಥ, ನಿಬ್ಬುತೋ ಸೋ ಮಹಾಮತಿ;
ಖಿಪ್ಪಾಭಿಞ್ಞಾನಮೇಸಗ್ಗೋ, ಸಾವಕೋ ಮೇ ವಚೋಕರೋ.
‘‘‘ಸಹಸ್ಸಮಪಿ ಚೇ ಗಾಥಾ, ಅನತ್ಥಪದಸಞ್ಹಿತಾ;
ಏಕಂ ಗಾಥಾಪದಂ ಸೇಯ್ಯೋ, ಯಂ ಸುತ್ವಾ ಉಪಸಮ್ಮತಿ.
‘‘‘ಯತ್ಥ ಆಪೋ ಚ ಪಥವೀ, ತೇಜೋ ವಾಯೋ ನ ಗಾಧತಿ;
ನ ತತ್ಥ ಸುಕ್ಕಾ ಜೋತನ್ತಿ, ಆದಿಚ್ಚೋ ನ ಪಕಾಸತಿ.
‘‘‘ನ ತತ್ಥ ಚನ್ದಿಮಾ ಭಾತಿ, ತಮೋ ತತ್ಥ ನ ವಿಜ್ಜತಿ;
ಯದಾ ಚ ಅತ್ತನಾ ವೇದಿ, ಮುನಿಮೋನೇನ ಬ್ರಾಹ್ಮಣೋ.
‘‘‘ಅಥ ¶ ರೂಪಾ ಅರೂಪಾ ಚ, ಸುಖದುಕ್ಖಾ ವಿಮುಚ್ಚತಿ’;
ಇಚ್ಚೇವಂ ಅಭಣೀ ನಾಥೋ, ತಿಲೋಕಸರಣೋ ಮುನಿ’’.
ಇತ್ಥಂ ಸುದಂ ಆಯಸ್ಮಾ ಬಾಹಿಯೋ ಥೇರೋ ಇಮಾ ಗಾಥಾಯೋ
ಅಭಾಸಿತ್ಥಾತಿ.
ಬಾಹಿಯತ್ಥೇರಸ್ಸಾಪದಾನಂ ಛಟ್ಠಂ.
೭. ಮಹಾಕೋಟ್ಠಿಕತ್ಥೇರಅಪದಾನಂ
‘‘ಪದುಮುತ್ತರೋ ¶ ¶ ನಾಮ ಜಿನೋ, ಸಬ್ಬಲೋಕವಿದೂ ಮುನಿ;
ಇತೋ ಸತಸಹಸ್ಸಮ್ಹಿ, ಕಪ್ಪೇ ಉಪ್ಪಜ್ಜಿ ಚಕ್ಖುಮಾ.
‘‘ಓವಾದಕೋ ವಿಞ್ಞಾಪಕೋ, ತಾರಕೋ ಸಬ್ಬಪಾಣಿನಂ;
ದೇಸನಾಕುಸಲೋ ಬುದ್ಧೋ, ತಾರೇಸಿ ಜನತಂ ಬಹುಂ.
‘‘ಅನುಕಮ್ಪಕೋ ¶ ಕಾರುಣಿಕೋ, ಹಿತೇಸೀ ಸಬ್ಬಪಾಣಿನಂ;
ಸಮ್ಪತ್ತೇ ತಿತ್ಥಿಯೇ ಸಬ್ಬೇ, ಪಞ್ಚಸೀಲೇ ಪತಿಟ್ಠಪಿ.
‘‘ಏವಂ ನಿರಾಕುಲಂ ಆಸಿ, ಸುಞ್ಞತಂ ತಿತ್ಥಿಯೇಹಿ ಚ;
ವಿಚಿತ್ತಂ ಅರಹನ್ತೇಹಿ, ವಸೀಭೂತೇಹಿ ತಾದಿಭಿ.
‘‘ರತನಾನಟ್ಠಪಞ್ಞಾಸಂ, ಉಗ್ಗತೋ ಸೋ ಮಹಾಮುನಿ;
ಕಞ್ಚನಗ್ಘಿಯಸಙ್ಕಾಸೋ, ಬಾತ್ತಿಂಸವರಲಕ್ಖಣೋ.
‘‘ವಸ್ಸಸತಸಹಸ್ಸಾನಿ, ಆಯು ವಿಜ್ಜತಿ ತಾವದೇ;
ತಾವತಾ ತಿಟ್ಠಮಾನೋ ಸೋ, ತಾರೇಸಿ ಜನತಂ ಬಹುಂ.
‘‘ತದಾಹಂ ಹಂಸವತಿಯಂ, ಬ್ರಾಹ್ಮಣೋ ವೇದಪಾರಗೂ;
ಉಪೇಚ್ಚ ಸಬ್ಬಲೋಕಗ್ಗಂ [ಸಬ್ಬಸಾರಗ್ಗಂ (ಸೀ.), ಸತ್ತಪಾರಗಂ (ಪೀ.)], ಅಸ್ಸೋಸಿಂ ಧಮ್ಮದೇಸನಂ.
‘‘ತದಾ ಸೋ ಸಾವಕಂ ವೀರೋ, ಪಭಿನ್ನಮತಿಗೋಚರಂ;
ಅತ್ಥೇ ಧಮ್ಮೇ ನಿರುತ್ತೇ ಚ, ಪಟಿಭಾನೇ ಚ ಕೋವಿದಂ.
‘‘ಠಪೇಸಿ ಏತದಗ್ಗಮ್ಹಿ, ತಂ ಸುತ್ವಾ ಮುದಿತೋ ಅಹಂ;
ಸಸಾವಕಂ ಜಿನವರಂ, ಸತ್ತಾಹಂ ಭೋಜಯಿಂ ತದಾ.
‘‘ದುಸ್ಸೇಹಚ್ಛಾದಯಿತ್ವಾನ ¶ , ಸಸಿಸ್ಸಂ ಬುದ್ಧಿಸಾಗರಂ [ಬುದ್ಧಸಾಗರಂ (ಕ.)];
ನಿಪಚ್ಚ ಪಾದಮೂಲಮ್ಹಿ, ತಂ ಠಾನಂ ಪತ್ಥಯಿಂ ಅಹಂ.
‘‘ತತೋ ¶ ಅವೋಚ ಲೋಕಗ್ಗೋ, ‘ಪಸ್ಸಥೇತಂ ದಿಜುತ್ತಮಂ;
ವಿನತಂ ಪಾದಮೂಲೇ ಮೇ, ಕಮಲೋದರಸಪ್ಪಭಂ.
‘‘‘ಬುದ್ಧಸೇಟ್ಠಸ್ಸ [ಸೇಟ್ಠಂ ಬುದ್ಧಸ್ಸ (ಸ್ಯಾ. ಕ.)] ಭಿಕ್ಖುಸ್ಸ, ಠಾನಂ ಪತ್ಥಯತೇ ಅಯಂ;
ತಾಯ ಸದ್ಧಾಯ ಚಾಗೇನ, ಸದ್ಧಮ್ಮಸ್ಸವನೇನ [ತೇನ ಧಮ್ಮಸ್ಸವೇನ (ಸೀ. ಪೀ. ಕ.)] ಚ.
‘‘‘ಸಬ್ಬತ್ಥ ಸುಖಿತೋ ಹುತ್ವಾ, ಸಂಸರಿತ್ವಾ ಭವಾಭವೇ;
ಅನಾಗತಮ್ಹಿ ಅದ್ಧಾನೇ, ಲಚ್ಛಸೇ ತಂ ಮನೋರಥಂ.
‘‘‘ಸತಸಹಸ್ಸಿತೋ ಕಪ್ಪೇ, ಓಕ್ಕಾಕಕುಲಸಮ್ಭವೋ;
ಗೋತಮೋ ನಾಮ ಗೋತ್ತೇನ, ಸತ್ಥಾ ಲೋಕೇ ಭವಿಸ್ಸತಿ.
‘‘‘ತಸ್ಸ ¶ ಧಮ್ಮೇಸು ದಾಯಾದೋ, ಓರಸೋ ಧಮ್ಮನಿಮ್ಮಿತೋ;
ಕೋಟ್ಠಿಕೋ ನಾಮ ನಾಮೇನ, ಹೇಸ್ಸತಿ ಸತ್ಥು ಸಾವಕೋ’.
‘‘ತಂ ಸುತ್ವಾ ಮುದಿತೋ ಹುತ್ವಾ, ಯಾವಜೀವಂ ತದಾ ಜಿನಂ;
ಮೇತ್ತಚಿತ್ತೋ ಪರಿಚರಿಂ, ಸತೋ ಪಞ್ಞಾಸಮಾಹಿತೋ.
‘‘ತೇನ ¶ ಕಮ್ಮವಿಪಾಕೇನ, ಚೇತನಾಪಣಿಧೀಹಿ ಚ;
ಜಹಿತ್ವಾ ಮಾನುಸಂ ದೇಹಂ, ತಾವತಿಂಸಮಗಚ್ಛಹಂ.
‘‘ಸತಾನಂ ತೀಣಿಕ್ಖತ್ತುಞ್ಚ, ದೇವರಜ್ಜಮಕಾರಯಿಂ;
ಸತಾನಂ ಪಞ್ಚಕ್ಖತ್ತುಞ್ಚ, ಚಕ್ಕವತ್ತೀ ಅಹೋಸಹಂ.
‘‘ಪದೇಸರಜ್ಜಂ ವಿಪುಲಂ, ಗಣನಾತೋ ಅಸಙ್ಖಿಯಂ;
ಸಬ್ಬತ್ಥ ಸುಖಿತೋ ಆಸಿಂ, ತಸ್ಸ ಕಮ್ಮಸ್ಸ ವಾಹಸಾ.
‘‘ದುವೇ ¶ ಭವೇ ಸಂಸರಾಮಿ, ದೇವತ್ತೇ ಅಥ ಮಾನುಸೇ;
ಅಞ್ಞಂ ಗತಿಂ ನ ಗಚ್ಛಾಮಿ, ಸುಚಿಣ್ಣಸ್ಸ ಇದಂ ಫಲಂ.
‘‘ದುವೇ ಕುಲೇ ಪಜಾಯಾಮಿ, ಖತ್ತಿಯೇ ಅಥ ಬ್ರಾಹ್ಮಣೇ;
‘‘ನೀಚೇ ಕುಲೇ ನ ಜಾಯಾಮಿ, ಸುಚಿಣ್ಣಸ್ಸ ಇದಂ ಫಲಂ.
‘‘ಪಚ್ಛಿಮೇ ಭವೇ ಸಮ್ಪತ್ತೇ, ಬ್ರಹ್ಮಬನ್ಧು ಅಹೋಸಹಂ;
ಸಾವತ್ಥಿಯಂ ವಿಪ್ಪಕುಲೇ, ಪಚ್ಚಾಜಾತೋ ಮಹದ್ಧನೇ.
‘‘ಮಾತಾ ಚನ್ದವತೀ ನಾಮ, ಪಿತಾ ಮೇ ಅಸ್ಸಲಾಯನೋ;
ಯದಾ ಮೇ ಪಿತರಂ ಬುದ್ಧೋ, ವಿನಯೀ ಸಬ್ಬಸುದ್ಧಿಯಾ.
‘‘ತದಾ ¶ ಪಸನ್ನೋ ಸುಗತೇ, ಪಬ್ಬಜಿಂ ಅನಗಾರಿಯಂ;
ಮೋಗ್ಗಲ್ಲಾನೋ ಆಚರಿಯೋ, ಉಪಜ್ಝಾ ಸಾರಿಸಮ್ಭವೋ.
‘‘ಕೇಸೇಸು ಛಿಜ್ಜಮಾನೇಸು, ದಿಟ್ಠಿ ಛಿನ್ನಾ ಸಮೂಲಿಕಾ;
ನಿವಾಸೇನ್ತೋ ಚ ಕಾಸಾವಂ, ಅರಹತ್ತಮಪಾಪುಣಿಂ.
‘‘ಅತ್ಥಧಮ್ಮನಿರುತ್ತೀಸು, ಪಟಿಭಾನೇ ಚ ಮೇ ಮತಿ;
ಪಭಿನ್ನಾ ತೇನ ಲೋಕಗ್ಗೋ, ಏತದಗ್ಗೇ ಠಪೇಸಿ ಮಂ.
‘‘ಅಸನ್ದಿಟ್ಠಂ ವಿಯಾಕಾಸಿಂ, ಉಪತಿಸ್ಸೇನ ಪುಚ್ಛಿತೋ;
ಪಟಿಸಮ್ಭಿದಾಸು ತೇನಾಹಂ, ಅಗ್ಗೋ ಸಮ್ಬುದ್ಧಸಾಸನೇ.
‘‘ಕಿಲೇಸಾ ಝಾಪಿತಾ ಮಯ್ಹಂ…ಪೇ… ವಿಹರಾಮಿ ಅನಾಸವೋ.
‘‘ಸ್ವಾಗತಂ ವತ ಮೇ ಆಸಿ…ಪೇ… ಕತಂ ಬುದ್ಧಸ್ಸ ಸಾಸನಂ.
‘‘ಪಟಿಸಮ್ಭಿದಾ ¶ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಮಹಾಕೋಟ್ಠಿಕೋ ಥೇರೋ ಇಮಾ ಗಾಥಾಯೋ
ಅಭಾಸಿತ್ಥಾತಿ.
ಮಹಾಕೋಟ್ಠಿಕತ್ಥೇರಸ್ಸಾಪದಾನಂ ಸತ್ತಮಂ.
೮. ಉರುವೇಳಕಸ್ಸಪತ್ಥೇರಅಪದಾನಂ
‘‘ಪದುಮುತ್ತರೋ ¶ ¶ ನಾಮ ಜಿನೋ, ಸಬ್ಬಲೋಕವಿದೂ ಮುನಿ;
ಇತೋ ಸತಸಹಸ್ಸಮ್ಹಿ, ಕಪ್ಪೇ ಉಪ್ಪಜ್ಜಿ ಚಕ್ಖುಮಾ.
‘‘ಓವಾದಕೋ ವಿಞ್ಞಾಪಕೋ, ತಾರಕೋ ಸಬ್ಬಪಾಣಿನಂ;
ದೇಸನಾಕುಸಲೋ ಬುದ್ಧೋ, ತಾರೇಸಿ ಜನತಂ ಬಹುಂ.
‘‘ಅನುಕಮ್ಪಕೋ ಕಾರುಣಿಕೋ, ಹಿತೇಸೀ ಸಬ್ಬಪಾಣಿನಂ;
ಸಮ್ಪತ್ತೇ ತಿತ್ಥಿಯೇ ಸಬ್ಬೇ, ಪಞ್ಚಸೀಲೇ ಪತಿಟ್ಠಪಿ.
‘‘ಏವಂ ನಿರಾಕುಲಂ ಆಸಿ, ಸುಞ್ಞತಂ ತಿತ್ಥಿಯೇಹಿ ಚ;
ವಿಚಿತ್ತಂ ಅರಹನ್ತೇಹಿ, ವಸೀಭೂತೇಹಿ ತಾದಿಭಿ.
‘‘ರತನಾನಟ್ಠಪಞ್ಞಾಸಂ, ಉಗ್ಗತೋ ಸೋ ಮಹಾಮುನಿ;
ಕಞ್ಚನಗ್ಘಿಯಸಙ್ಕಾಸೋ, ಬಾತ್ತಿಂಸವರಲಕ್ಖಣೋ.
‘‘ವಸ್ಸಸತಸಹಸ್ಸಾನಿ ¶ , ಆಯು ವಿಜ್ಜತಿ ತಾವದೇ;
ತಾವತಾ ತಿಟ್ಠಮಾನೋ ಸೋ, ತಾರೇಸಿ ಜನತಂ ಬಹುಂ.
‘‘ತದಾಹಂ ಹಂಸವತಿಯಾ, ಬ್ರಾಹ್ಮಣೋ ಸಾಧುಸಮ್ಮತೋ;
ಉಪೇಚ್ಚ ಲೋಕಪಜ್ಜೋತಂ, ಅಸ್ಸೋಸಿಂ ಧಮ್ಮದೇಸನಂ.
‘‘ತದಾ ¶ ಮಹಾಪರಿಸತಿಂ, ಮಹಾಪರಿಸಸಾವಕಂ;
ಠಪೇನ್ತಂ ಏತದಗ್ಗಮ್ಹಿ, ಸುತ್ವಾನ ಮುದಿತೋ ಅಹಂ.
‘‘ಮಹತಾ ಪರಿವಾರೇನ, ನಿಮನ್ತೇತ್ವಾ ಮಹಾಜಿನಂ;
ಬ್ರಾಹ್ಮಣಾನಂ ಸಹಸ್ಸೇನ, ಸಹದಾನಮದಾಸಹಂ.
‘‘ಮಹಾದಾನಂ ದದಿತ್ವಾನ, ಅಭಿವಾದಿಯ ನಾಯಕಂ;
ಏಕಮನ್ತಂ ಠಿತೋ ಹಟ್ಠೋ, ಇದಂ ವಚನಮಬ್ರವಿಂ.
‘‘‘ತಯಿ ಸದ್ಧಾಯ ಮೇ ವೀರ, ಅಧಿಕಾರಗುಣೇನ ಚ;
ಪರಿಸಾ ಮಹತೀ ಹೋತು, ನಿಬ್ಬತ್ತಸ್ಸ ತಹಿಂ ತಹಿಂ’.
‘‘ತದಾ ಅವೋಚ ಪರಿಸಂ, ಗಜಗಜ್ಜಿತಸುಸ್ಸರೋ;
ಕರವೀಕರುತೋ ಸತ್ಥಾ, ‘ಏತಂ ಪಸ್ಸಥ ಬ್ರಾಹ್ಮಣಂ.
‘‘‘ಹೇಮವಣ್ಣಂ ಮಹಾಬಾಹುಂ, ಕಮಲಾನನಲೋಚನಂ;
ಉದಗ್ಗತನುಜಂ ಹಟ್ಠಂ, ಸದ್ಧವನ್ತಂ ಗುಣೇ ಮಮ.
‘‘‘ಏಸ ¶ ಪತ್ಥಯತೇ ಠಾನಂ [ಪತ್ಥಯಿ ತಂ ಠಾನಂ (ಸ್ಯಾ.)], ಸೀಹಘೋಸಸ್ಸ ಭಿಕ್ಖುನೋ;
ಅನಾಗತಮ್ಹಿ ಅದ್ಧಾನೇ, ಲಚ್ಛಸೇ ತಂ ಮನೋರಥಂ.
‘‘‘ಸತಸಹಸ್ಸಿತೋ ಕಪ್ಪೇ, ಓಕ್ಕಾಕಕುಲಸಮ್ಭವೋ;
ಗೋತಮೋ ನಾಮ ಗೋತ್ತೇನ, ಸತ್ಥಾ ಲೋಕೇ ಭವಿಸ್ಸತಿ.
‘‘‘ತಸ್ಸ ¶ ಧಮ್ಮೇಸು ದಾಯಾದೋ, ಓರಸೋ ಧಮ್ಮನಿಮ್ಮಿತೋ;
ಕಸ್ಸಪೋ ನಾಮ ಗೋತ್ತೇನ, ಹೇಸ್ಸತಿ ಸತ್ಥು ಸಾವಕೋ’.
‘‘ಇತೋ ದ್ವೇನವುತೇ ಕಪ್ಪೇ, ಅಹು ಸತ್ಥಾ ಅನುತ್ತರೋ;
ಅನೂಪಮೋ ಅಸದಿಸೋ, ಫುಸ್ಸೋ ಲೋಕಗ್ಗನಾಯಕೋ.
‘‘ಸೋ ¶ ಚ ಸಬ್ಬಂ ತಮಂ ಹನ್ತ್ವಾ, ವಿಜಟೇತ್ವಾ ಮಹಾಜಟಂ;
ವಸ್ಸತೇ ಅಮತಂ ವುಟ್ಠಿಂ, ತಪ್ಪಯನ್ತೋ ಸದೇವಕಂ.
‘‘ತದಾ ¶ ಹಿ ಬಾರಾಣಸಿಯಂ, ರಾಜಾ ಪಚ್ಚಾ ಅಹುಮ್ಹಸೇ;
ಭಾತರೋಮ್ಹ ತಯೋ ಸಬ್ಬೇ, ಸಂವಿಸಟ್ಠಾವ ರಾಜಿನೋ.
‘‘ವೀರಙ್ಗರೂಪಾ ಬಲಿನೋ, ಸಙ್ಗಾಮೇ ಅಪರಾಜಿತಾ;
ತದಾ ಕುಪಿತಪಚ್ಚನ್ತೋ [ಕುಪ್ಪತಿ ಪಚ್ಚನ್ತೋ (ಕ.)], ಅಮ್ಹೇ ಆಹ ಮಹೀಪತಿ.
‘‘‘ಏಥ ಗನ್ತ್ವಾನ ಪಚ್ಚನ್ತಂ, ಸೋಧೇತ್ವಾ ಅಟ್ಟವೀಬಲಂ;
ಖೇಮಂ ವಿಜಿರಿತಂ ಕತ್ವಾ, ಪುನ ದೇಥಾತಿ ಭಾಸಥ’.
‘‘ತತೋ ಮಯಂ ಅವೋಚುಮ್ಹ, ಯದಿ ದೇಯ್ಯಾಸಿ ನಾಯಕಂ;
ಉಪಟ್ಠಾನಾಯ ಅಮ್ಹಾಕಂ, ಸಾಧಯಿಸ್ಸಾಮ ವೋ ತತೋ.
‘‘ತತೋ ಮಯಂ ಲದ್ಧವರಾ, ಭೂಮಿಪಾಲೇನ ಪೇಸಿತಾ;
ನಿಕ್ಖಿತ್ತಸತ್ಥಂ ಪಚ್ಚನ್ತಂ, ಕತ್ವಾ ಪುನರುಪಚ್ಚ ತಂ.
‘‘ಯಾಚಿತ್ವಾ ಸತ್ಥುಪಟ್ಠಾನಂ, ರಾಜಾನಂ ಲೋಕನಾಯಕಂ;
ಮುನಿವೀರಂ ಲಭಿತ್ವಾನ, ಯಾವಜೀವಂ ಯಜಿಮ್ಹ ತಂ.
‘‘ಮಹಗ್ಘಾನಿ ಚ ವತ್ಥಾನಿ, ಪಣೀತಾನಿ ರಸಾನಿ ಚ;
ಸೇನಾಸನಾನಿ ರಮ್ಮಾನಿ, ಭೇಸಜ್ಜಾನಿ ಹಿತಾನಿ ಚ.
‘‘ದತ್ವಾ ಸಸಙ್ಘಮುನಿನೋ [ಸಸಂಘಸ್ಸ ಮುನೇ (ಸೀ. ಪೀ.)], ಧಮ್ಮೇನುಪ್ಪಾದಿತಾನಿ ನೋ;
ಸೀಲವನ್ತೋ ಕಾರುಣಿಕಾ, ಭಾವನಾಯುತ್ತಮಾನಸಾ.
‘‘ಸದ್ಧಾ ಪರಿಚರಿತ್ವಾನ, ಮೇತ್ತಚಿತ್ತೇನ ನಾಯಕಂ;
ನಿಬ್ಬುತೇ ತಮ್ಹಿ ಲೋಕಗ್ಗೇ, ಪೂಜಂ ಕತ್ವಾ ಯಥಾಬಲಂ.
‘‘ತತೋ ¶ ¶ ಚುತಾ ಸನ್ತುಸಿತಂ [ತಾವತಿಂಸಂ (ಸ್ಯಾ.)], ಗತಾ ತತ್ಥ ಮಹಾಸುಖಂ;
ಅನುಭೂತಾ ಮಯಂ ಸಬ್ಬೇ, ಬುದ್ಧಪೂಜಾಯಿದಂ ಫಲಂ.
‘‘ಮಾಯಾಕಾರೋ ¶ ಯಥಾ ರಙ್ಗೇ [ಲದ್ಧೋ (ಸ್ಯಾ. ಪೀ.)], ದಸ್ಸೇಸಿ ವಿಕತಿಂ ಬಹುಂ;
ತಥಾ ಭವೇ ಭಮನ್ತೋಹಂ [ಗಮೇನ್ತೋಹಂ (ಕ.), ಭವನ್ತೋಹಂ (ಸ್ಯಾ.)], ವಿದೇಹಾಧಿಪತೀ ಅಹುಂ.
‘‘ಗುಣಾಚೇಳಸ್ಸ ವಾಕ್ಯೇನ, ಮಿಚ್ಛಾದಿಟ್ಠಿಗತಾಸಯೋ;
ನರಕಂ ಮಗ್ಗಮಾರೂಳ್ಹೋ, ರುಚಾಯ ಮಮ ಧೀತುಯಾ.
‘‘ಓವಾದಂ ನಾದಿಯಿತ್ವಾನ, ಬ್ರಹ್ಮುನಾ ನಾರದೇನಹಂ;
ಬಹುಧಾ ಸಂಸಿತೋ ಸನ್ತೋ, ದಿಟ್ಠಿಂ ಹಿತ್ವಾನ ಪಾಪಿಕಂ.
‘‘ಪೂರಯಿತ್ವಾ ¶ ವಿಸೇಸೇನ, ದಸ ಕಮ್ಮಪಥಾನಿಹಂ;
ಹಿತ್ವಾನ ದೇಹಮಗಮಿಂ, ಸಗ್ಗಂ ಸಭವನಂ ಯಥಾ.
‘‘ಪಚ್ಛಿಮೇ ಭವೇ ಸಮ್ಪತ್ತೇ, ಬ್ರಹ್ಮಬನ್ಧು ಅಹೋಸಹಂ;
ಬಾರಾಣಸಿಯಂ ಫೀತಾಯಂ, ಜಾತೋ ವಿಪ್ಪಮಹಾಕುಲೇ.
‘‘ಮಚ್ಚುಬ್ಯಾಧಿಜರಾ ಭೀತೋ, ಓಗಾಹೇತ್ವಾ ಮಹಾವನಂ [ಜಹಿತ್ವಾನ ಮಹಾಧನಂ (ಸೀ.), ಜಹಿತ್ವಾ ಚ ಮಹಾಧನಂ (ಪೀ.)];
ನಿಬ್ಬಾನಂ ಪದಮೇಸನ್ತೋ, ಜಟಿಲೇಸು ಪರಿಬ್ಬಜಿಂ.
‘‘ತದಾ ದ್ವೇ ಭಾತರೋ ಮಯ್ಹಂ, ಪಬ್ಬಜಿಂಸು ಮಯಾ ಸಹ;
ಉರುವೇಳಾಯಂ ಮಾಪೇತ್ವಾ, ಅಸ್ಸಮಂ ನಿವಸಿಂ ಅಹಂ.
‘‘ಕಸ್ಸಪೋ ನಾಮ ಗೋತ್ತೇನ, ಉರುವೇಳನಿವಾಸಿಕೋ [ಉರುವೇಳಾಯ ನಿವಸಿಂ (ಸ್ಯಾ.)];
ತತೋ ಮೇ ಆಸಿ ಪಞ್ಞತ್ತಿ, ಉರುವೇಳಕಸ್ಸಪೋ ಇತಿ.
‘‘ನದೀಸಕಾಸೇ ಭಾತಾ ಮೇ, ನದೀಕಸ್ಸಪಸವ್ಹಯೋ;
ಆಸೀ ಸಕಾಸನಾಮೇನ, ಗಯಾಯಂ ಗಯಾಕಸ್ಸಪೋ.
‘‘ದ್ವೇ ¶ ಸತಾನಿ ಕನಿಟ್ಠಸ್ಸ, ತೀಣಿ ಮಜ್ಝಸ್ಸ ಭಾತುನೋ;
ಮಮ ಪಞ್ಚ ಸತಾನೂನಾ, ಸಿಸ್ಸಾ ಸಬ್ಬೇ ಮಮಾನುಗಾ.
‘‘ತದಾ ಉಪೇಚ್ಚ ಮಂ ಬುದ್ಧೋ, ಕತ್ವಾನ ವಿವಿಧಾನಿ ಮೇ [ಕತ್ವಾ ನಾನಾವಿಧಾನಿ ಮೇ (ಸೀ.)];
ಪಾಟಿಹೀರಾನಿ ಲೋಕಗ್ಗೋ, ವಿನೇಸಿ ನರಸಾರಥಿ.
‘‘ಸಹಸ್ಸಪರಿವಾರೇನ, ಅಹೋಸಿಂ ಏಹಿಭಿಕ್ಖುಕೋ;
ತೇಹೇವ ಸಹ ಸಬ್ಬೇಹಿ, ಅರಹತ್ತಮಪಾಪುಣಿಂ.
‘‘ತೇ ¶ ಚೇವಞ್ಞೇ ಚ ಬಹವೋ, ಸಿಸ್ಸಾ ಮಂ ಪರಿವಾರಯುಂ;
ಸಾಸಿತುಞ್ಚ ಸಮತ್ಥೋಹಂ, ತತೋ ಮಂ ಇಸಿಸತ್ತಮೋ.
‘‘ಮಹಾಪರಿಸಭಾವಸ್ಮಿಂ ¶ , ಏತದಗ್ಗೇ ಠಪೇಸಿ ಮಂ;
ಅಹೋ ಬುದ್ಧೇ ಕತಂ ಕಾರಂ, ಸಫಲಂ ಮೇ ಅಜಾಯಥ.
‘‘ಕಿಲೇಸಾ ಝಾಪಿತಾ ಮಯ್ಹಂ…ಪೇ… ವಿಹರಾಮಿ ಅನಾಸವೋ.
‘‘ಸ್ವಾಗತಂ ವತ ಮೇ ಆಸಿ…ಪೇ… ಕತಂ ಬುದ್ಧಸ್ಸ ಸಾಸನಂ.
‘‘ಪಟಿಸಮ್ಭಿದಾ ¶ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಉರುವೇಳಕಸ್ಸಪೋ ಥೇರೋ ಇಮಾ ಗಾಥಾಯೋ
ಅಭಾಸಿತ್ಥಾತಿ.
ಉರುವೇಳಕಸ್ಸಪತ್ಥೇರಸ್ಸಾಪದಾನಂ ಅಟ್ಠಮಂ.
೯. ರಾಧತ್ಥೇರಅಪದಾನಂ
‘‘ಪದುಮುತ್ತರೋ ¶ ನಾಮ ಜಿನೋ, ಸಬ್ಬಲೋಕವಿದೂ ಮುನಿ;
ಇತೋ ಸತಸಹಸ್ಸಮ್ಹಿ, ಕಪ್ಪೇ ಉಪ್ಪಜ್ಜಿ ಚಕ್ಖುಮಾ.
‘‘ಓವಾದಕೋ ವಿಞ್ಞಾಪಕೋ, ತಾರಕೋ ಸಬ್ಬಪಾಣಿನಂ;
ದೇಸನಾಕುಸಲೋ ಬುದ್ಧೋ, ತಾರೇಸಿ ಜನತಂ ಬಹುಂ.
‘‘ಅನುಕಮ್ಪಕೋ ಕಾರುಣಿಕೋ, ಹಿತೇಸೀ ಸಬ್ಬಪಾಣಿನಂ;
ಸಮ್ಪತ್ತೇ ತಿತ್ಥಿಯೇ ಸಬ್ಬೇ, ಪಞ್ಚಸೀಲೇ ಪತಿಟ್ಠಪಿ.
‘‘ಏವಂ ನಿರಾಕುಲಂ ಆಸಿ, ಸುಞ್ಞತಂ ತಿತ್ಥಿಯೇಹಿ ಚ;
ವಿಚಿತ್ತಂ ಅರಹನ್ತೇಹಿ, ವಸೀಭೂತೇಹಿ ತಾದಿಭಿ.
‘‘ರತನಾನಟ್ಠಪಞ್ಞಾಸಂ, ಉಗ್ಗತೋ ಸೋ ಮಹಾಮುನಿ;
ಕಞ್ಚನಗ್ಘಿಯಸಙ್ಕಾಸೋ, ಬಾತ್ತಿಂಸವರಲಕ್ಖಣೋ.
‘‘ವಸ್ಸಸತಸಹಸ್ಸಾನಿ, ಆಯು ವಿಜ್ಜತಿ ತಾವದೇ;
ತಾವತಾ ತಿಟ್ಠಮಾನೋ ಸೋ, ತಾರೇಸಿ ಜನತಂ ಬಹುಂ.
‘‘ತದಾಹಂ ಹಂಸವತಿಯಂ, ಬ್ರಾಹ್ಮಣೋ ಮನ್ತಪಾರಗೂ;
ಉಪೇಚ್ಚ ತಂ ನರವರಂ, ಅಸ್ಸೋಸಿಂ ಧಮ್ಮದೇಸನಂ.
‘‘ಪಞ್ಞಪೇನ್ತಂ ಮಹಾವೀರಂ, ಪರಿಸಾಸು ವಿಸಾರದಂ;
ಪಟಿಭಾನೇಯ್ಯಕಂ ಭಿಕ್ಖುಂ, ಏತದಗ್ಗೇ ವಿನಾಯಕಂ.
‘‘ತದಾಹಂ ಕಾರಂ ಕತ್ವಾನ, ಸಸಙ್ಘೇ ಲೋಕನಾಯಕೇ;
ನಿಪಚ್ಚ ಸಿರಸಾ ಪಾದೇ, ತಂ ಠಾನಂ ಅಭಿಪತ್ಥಯಿಂ.
‘‘ತತೋ ¶ ಮಂ ಭಗವಾ ಆಹ, ಸಿಙ್ಗೀನಿಕ್ಖಸಮಪ್ಪಭೋ;
ಸರೇನ ರಜನೀಯೇನ, ಕಿಲೇಸಮಲಹಾರಿನಾ.
‘‘‘ಸುಖೀ ¶ ¶ ಭವಸ್ಸು ದೀಘಾಯು, ಸಿಜ್ಝತು ಪಣಿಧೀ ತವ;
ಸಸಙ್ಘೇ ಮೇ ಕತಂ ಕಾರಂ, ಅತೀವ ವಿಪುಲಂ ತಯಾ.
‘‘‘ಸತಸಹಸ್ಸಿತೋ ¶ ಕಪ್ಪೇ, ಓಕ್ಕಾಕಕುಲಸಮ್ಭವೋ;
ಗೋತಮೋ ನಾಮ ಗೋತ್ತೇನ, ಸತ್ಥಾ ಲೋಕೇ ಭವಿಸ್ಸತಿ.
‘‘‘ತಸ್ಸ ಧಮ್ಮೇಸು ದಾಯಾದೋ, ಓರಸೋ ಧಮ್ಮನಿಮ್ಮಿತೋ;
ರಾಧೋತಿ ನಾಮಧೇಯ್ಯೇನ, ಹೇಸ್ಸತಿ ಸತ್ಥು ಸಾವಕೋ.
‘‘‘ಸ ತೇ ಹೇತುಗುಣೇ ತುಟ್ಠೋ, ಸಕ್ಯಪುತ್ತೋ ನರಾಸಭೋ [ಇದಂ ಪಾದದ್ವಯಂ ಸ್ಯಾಮಮೂಲೇ ನತ್ಥೀ];
ಪಟಿಭಾನೇಯ್ಯಕಾನಗ್ಗಂ, ಪಞ್ಞಪೇಸ್ಸತಿ ನಾಯಕೋ’.
‘‘ತಂ ಸುತ್ವಾ ಮುದಿತೋ ಹುತ್ವಾ, ಯಾವಜೀವಂ ತದಾ ಜಿನಂ;
ಮೇತ್ತಚಿತ್ತೋ ಪರಿಚರಿಂ, ಸತೋ ಪಞ್ಞಾಸಮಾಹಿತೋ.
‘‘ತೇನ ಕಮ್ಮೇನ ಸುಕತೇನ, ಚೇತನಾಪಣಿಧೀಹಿ ಚ;
ಜಹಿತ್ವಾ ಮಾನುಸಂ ದೇಹಂ, ತಾವತಿಂಸಮಗಚ್ಛಹಂ.
‘‘ಸತಾನಂ ತೀಣಿಕ್ಖತ್ತುಞ್ಚ, ದೇವರಜ್ಜಮಕಾರಯಿಂ;
ಸತಾನಂ ಪಞ್ಚಕ್ಖತ್ತುಞ್ಚ, ಚಕ್ಕವತ್ತೀ ಅಹೋಸಹಂ.
‘‘ಪದೇಸರಜ್ಜಂ ವಿಪುಲಂ, ಗಣನಾತೋ ಅಸಙ್ಖಿಯಂ;
ಸಬ್ಬತ್ಥ ಸುಖಿತೋ ಆಸಿಂ, ತಸ್ಸ ಕಮ್ಮಸ್ಸ ವಾಹಸಾ.
‘‘ಪಚ್ಛಿಮೇ ಭವೇ ಸಮ್ಪತ್ತೇ, ಗಿರಿಬ್ಬಜಪುರುತ್ತಮೇ;
ಜಾತೋ ವಿಪ್ಪಕುಲೇ ನಿದ್ಧೇ, ವಿಕಲಚ್ಛಾದನಾಸನೇ.
‘‘ಕಟಚ್ಛುಭಿಕ್ಖಂ ಪಾದಾಸಿಂ, ಸಾರಿಪುತ್ತಸ್ಸ ತಾದಿನೋ;
ಯದಾ ¶ ಜಿಣ್ಣೋ ಚ ವುದ್ಧೋ ಚ, ತದಾರಾಮಮುಪಾಗಮಿಂ.
‘‘ಪಬ್ಬಜತಿ ನ ಮಂ ಕೋಚಿ [ಪಬ್ಬಾಜೇನ್ತಿ ನ ಮಂ ಕೇಚಿ (ಸೀ. ಸ್ಯಾ ಪೀ.)], ಜಿಣ್ಣದುಬ್ಬಲಥಾಮಕಂ;
ತೇನ ದೀನೋ ವಿವಣ್ಣಙ್ಗೋ [ವಿವಣ್ಣಕೋ (ಕ.)], ಸೋಕೋ ಚಾಸಿಂ ತದಾ ಅಹಂ.
‘‘ದಿಸ್ವಾ ಮಹಾಕಾರುಣಿಕೋ, ಮಮಮಾಹ [ಮಮಾಹ ಸೋ (ಸೀ.), ಮಮಾಹ ಚ (ಪೀ.)] ಮಹಾಮುನಿ;
‘ಕಿಮತ್ಥಂ ಪುತ್ತಸೋಕಟ್ಟೋ, ಬ್ರೂಹಿ ತೇ ಚಿತ್ತಜಂ ರುಜಂ’.
‘‘‘ಪಬ್ಬಜ್ಜಂ ನ ಲಭೇ ವೀರ, ಸ್ವಾಕ್ಖಾತೇ ತವ ಸಾಸನೇ;
ತೇನ ಸೋಕೇನ ದೀನೋಸ್ಮಿ, ಸರಣಂ ಹೋಹಿ ನಾಯಕ’.
‘‘ತದಾ ¶ ಭಿಕ್ಖೂ ಸಮಾನೇತ್ವಾ, ಅಪುಚ್ಛಿ ಮುನಿಸತ್ತಮೋ;
‘ಇಮಸ್ಸ ಅಧಿಕಾರಂ ಯೇ, ಸರನ್ತಿ ಬ್ಯಾಹರನ್ತು ತೇ’.
‘‘ಸಾರಿಪುತ್ತೋ ¶ ತದಾವೋಚ, ‘ಕಾರಮಸ್ಸ ಸರಾಮಹಂ;
ಕಟಚ್ಛುಭಿಕ್ಖಂ ದಾಪೇಸಿ, ಪಿಣ್ಡಾಯ ಚರತೋ ಮಮ’.
‘‘‘ಸಾಧು ಸಾಧು ಕತಞ್ಞೂಸಿ, ಸಾರಿಪುತ್ತ ಇಮಂ ತುವಂ;
ಪಬ್ಬಾಜೇಹಿ ದಿಜಂ ವುಡ್ಢಂ, ಹೇಸ್ಸತಾಜಾನಿಯೋ ಅಯಂ’.
‘‘ತತೋ ¶ ಅಲತ್ಥಂ ಪಬ್ಬಜ್ಜಂ, ಕಮ್ಮವಾಚೋಪಸಮ್ಪದಂ;
ನ ಚಿರೇನೇವ ಕಾಲೇನ, ಪಾಪುಣಿಂ ಆಸವಕ್ಖಯಂ.
‘‘ಸಕ್ಕಚ್ಚಂ ಮುನಿನೋ ವಾಕ್ಯಂ, ಸುಣಾಮಿ ಮುದಿತೋ ಯತೋ;
ಪಟಿಭಾನೇಯ್ಯಕಾನಗ್ಗಂ, ತತೋ ಮಂ ಠಪಯೀ ಜಿನೋ.
‘‘ಕಿಲೇಸಾ ಝಾಪಿತಾ ಮಯ್ಹಂ…ಪೇ… ವಿಹರಾಮಿ ಅನಾಸವೋ.
‘‘ಸ್ವಾಗತಂ ¶ ವತ ಮೇ ಆಸಿ…ಪೇ… ಕತಂ ಬುದ್ಧಸ್ಸ ಸಾಸನಂ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ರಾಧೋ ಥೇರೋ ಇಮಾ ಗಾಥಾಯೋ
ಅಭಾಸಿತ್ಥಾತಿ.
ರಾಧತ್ಥೇರಸ್ಸಾಪದಾನಂ ನವಮಂ.
೧೦. ಮೋಘರಾಜತ್ಥೇರಅಪದಾನಂ
‘‘ಪದುಮುತ್ತರೋ ನಾಮ ಜಿನೋ, ಸಬ್ಬಲೋಕವಿದೂ ಮುನಿ;
ಇತೋ ಸತಸಹಸ್ಸಮ್ಹಿ, ಕಪ್ಪೇ ಉಪ್ಪಜ್ಜಿ ಚಕ್ಖುಮಾ.
‘‘ಓವಾದಕೋ ವಿಞ್ಞಾಪಕೋ, ತಾರಕೋ ಸಬ್ಬಪಾಣಿನಂ;
ದೇಸನಾಕುಸಲೋ ಬುದ್ಧೋ, ತಾರೇಸಿ ಜನತಂ ಬಹುಂ.
‘‘ಅನುಕಮ್ಪಕೋ ಕಾರುಣಿಕೋ, ಹಿತೇಸೀ ಸಬ್ಬಪಾಣಿನಂ;
ಸಮ್ಪತ್ತೇ ತಿತ್ಥಿಯೇ ಸಬ್ಬೇ, ಪಞ್ಚಸೀಲೇ ಪತಿಟ್ಠಪಿ.
‘‘ಏವಂ ನಿರಾಕುಲಂ ಆಸಿ, ಸುಞ್ಞತಂ ತಿತ್ಥಿಯೇಹಿ ಚ;
ವಿಚಿತ್ತಂ ಅರಹನ್ತೇಹಿ, ವಸೀಭೂತೇಹಿ ತಾದಿಭಿ.
‘‘ರತನಾನಟ್ಠಪಞ್ಞಾಸಂ ¶ , ಉಗ್ಗತೋ ಸೋ ಮಹಾಮುನಿ;
ಕಞ್ಚನಗ್ಘಿಯಸಙ್ಕಾಸೋ, ಬಾತ್ತಿಂಸವರಲಕ್ಖಣೋ.
‘‘ವಸ್ಸಸತಸಹಸ್ಸಾನಿ ¶ , ಆಯು ವಿಜ್ಜತಿ ತಾವದೇ;
ತಾವತಾ ತಿಟ್ಠಮಾನೋ ಸೋ, ತಾರೇಸಿ ಜನತಂ ಬಹುಂ.
‘‘ತದಾಹಂ ¶ ಹಂಸವತಿಯಂ, ಕುಲೇ ಅಞ್ಞತರೇ ಅಹುಂ;
ಪರಕಮ್ಮಾಯನೇ ಯುತ್ತೋ, ನತ್ಥಿ ಮೇ ಕಿಞ್ಚಿ ಸಂಧನಂ.
‘‘ಪಟಿಕ್ಕಮನಸಾಲಾಯಂ, ವಸನ್ತೋ ಕತಭೂಮಿಯಂ;
ಅಗ್ಗಿಂ ಉಜ್ಜಾಲಯಿಂ ತತ್ಥ, ದಳ್ಹಂ ಕಣ್ಹಾಸಿ ಸಾ [ಕಣ್ಹಾ ಸಿಯಾ (ಸೀ. ಪೀ.), ಡಯ್ಹಕಣ್ಹಾ ಸಿಲಾ (ಸ್ಯಾ.)] ಹೀ.
‘‘ತದಾ ಪರಿಸತಿಂ ನಾಥೋ, ಚತುಸಚ್ಚಪಕಾಸಕೋ;
ಸಾವಕಂ ಸಮ್ಪಕಿತ್ತೇಸಿ, ಲೂಖಚೀವರಧಾರಕಂ.
‘‘ತಸ್ಸ ತಮ್ಹಿ ಗುಣೇ ತುಟ್ಠೋ, ಪಣಿಪಚ್ಚ [ಪತಿಪಜ್ಜ (ಸ್ಯಾ.)] ತಥಾಗತಂ;
ಲೂಖಚೀವರಧಾರಗ್ಗಂ, ಪತ್ಥಯಿಂ ಠಾನಮುತ್ತಮಂ.
‘‘ತದಾ ಅವೋಚ ಭಗವಾ, ಸಾವಕೇ ಪದುಮುತ್ತರೋ;
‘ಪಸ್ಸಥೇತಂ ಪುರಿಸಕಂ, ಕುಚೇಲಂ ತನುದೇಹಕಂ.
‘‘‘ಪೀತಿಪ್ಪಸನ್ನವದನಂ ¶ , ಸದ್ಧಾಧನಸಮನ್ವಿತಂ [ಸದ್ಧಾಸ್ನೇಹಸಮನ್ವತಂ (ಕ.)];
ಉದಗ್ಗತನುಜಂ ಹಟ್ಠಂ, ಅಚಲಂ ಸಾಲಪಿಣ್ಡಿತಂ.
‘‘‘ಏಸೋ ಪತ್ಥೇತಿ ತಂ ಠಾನಂ, ಸಚ್ಚಸೇನಸ್ಸ ಭಿಕ್ಖುನೋ;
ಲೂಖಚೀವರಧಾರಿಸ್ಸ, ತಸ್ಸ ವಣ್ಣಸಿತಾಸಯೋ [ವಣ್ಣಗತಾಸಯೋ (ಸೀ. ಸ್ಯಾ. ಪೀ.)].
‘‘ತಂ ಸುತ್ವಾ ಮುದಿತೋ ಹುತ್ವಾ, ನಿಪಚ್ಚ ಸಿರಸಾ ಜಿನಂ;
ಯಾವಜೀವಂ ಸುಭಂ ಕಮ್ಮಂ, ಕರಿತ್ವಾ ಜಿನಸಾಸನೇ.
‘‘ತೇನ ಕಮ್ಮೇನ ಸುಕತೇನ, ಚೇತನಾಪಣಿಧೀಹಿ ಚ;
ಜಹಿತ್ವಾ ಮಾನುಸಂ ದೇಹಂ, ತಾವತಿಂಸೂಪಗೋ ಅಹಂ.
‘‘ಪಟಿಕ್ಕಮನಸಾಲಾಯಂ, ಭೂಮಿದಾಹಕಕಮ್ಮುನಾ;
ಸಮಸಹಸ್ಸಂ ನಿರಯೇ, ಅದಯ್ಹಿಂ ವೇದನಾಟ್ಟಿತೋ.
‘‘ತೇನ ¶ ಕಮ್ಮಾವಸೇಸೇನ, ಪಞ್ಚ ಜಾತಿಸತಾನಿಹಂ;
ಮನುಸ್ಸೋ ಕುಲಜೋ ಹುತ್ವಾ, ಜಾತಿಯಾ ಲಕ್ಖಣಙ್ಕಿತೋ.
‘‘ಪಞ್ಚ ¶ ಜಾತಿಸತಾನೇವ, ಕುಟ್ಠರೋಗಸಮಪ್ಪಿತೋ;
ಮಹಾದುಕ್ಖಂ ಅನುಭವಿಂ, ತಸ್ಸ ಕಮ್ಮಸ್ಸ ವಾಹಸಾ.
‘‘ಇಮಸ್ಮಿಂ ಭದ್ದಕೇ ಕಪ್ಪೇ, ಉಪರಿಟ್ಠಂ ಯಸಸ್ಸಿನಂ;
ಪಿಣ್ಡಪಾತೇನ ತಪ್ಪೇಸಿಂ, ಪಸನ್ನಮಾನಸೋ ಅಹಂ.
‘‘ತೇನ ¶ ಕಮ್ಮವಿಸೇಸೇನ, ಚೇತನಾಪಣಿಧೀಹಿ ಚ;
ಜಹಿತ್ವಾ ಮಾನುಸಂ ದೇಹಂ, ತಾವತಿಂಸಮಗಚ್ಛಹಂ.
‘‘ಪಚ್ಛಿಮೇ ಭವೇ ಸಮ್ಪತ್ತೇ, ಅಜಾಯಿಂ ಖತ್ತಿಯೇ ಕುಲೇ;
ಪಿತುನೋ ಅಚ್ಚಯೇನಾಹಂ, ಮಹಾರಜ್ಜಸಮಪ್ಪಿತೋ.
‘‘ಕುಟ್ಠರೋಗಾಧಿಭೂತೋಹಂ, ನ ರತಿಂ ನ ಸುಖಂ ಲಭೇ;
ಮೋಘಂ ರಜ್ಜಂ ಸುಖಂ ಯಸ್ಮಾ, ಮೋಘರಾಜಾ ತತೋ ಅಹಂ.
‘‘ಕಾಯಸ್ಸ ದೋಸಂ ದಿಸ್ವಾನ, ಪಬ್ಬಜಿಂ ಅನಗಾರಿಯಂ;
ಬಾವರಿಸ್ಸ ದಿಜಗ್ಗಸ್ಸ, ಸಿಸ್ಸತ್ತಂ ಅಜ್ಝುಪಾಗಮಿಂ.
‘‘ಮಹತಾ ಪರಿವಾರೇನ, ಉಪೇಚ್ಚ ನರನಾಯಕಂ;
ಅಪುಚ್ಛಿಂ ನಿಪುಣಂ ಪಞ್ಹಂ, ತಂ ವೀರಂ ವಾದಿಸೂದನಂ.
‘‘‘ಅಯಂ ಲೋಕೋ ಪರೋ ಲೋಕೋ, ಬ್ರಹ್ಮಲೋಕೋ ಸದೇವಕೋ;
ದಿಟ್ಠಿಂ ನೋ [ದಿಟ್ಠಾ ನೋ (ಸೀ.), ದಿಟ್ಠಂ ನೋ (ಪೀ.), ದಿಟ್ಠಿಂ ತೇ (ಸ್ಯಾ.)] ನಾಭಿಜಾನಾಮಿ, ಗೋತಮಸ್ಸ ಯಸಸ್ಸಿನೋ.
‘‘‘ಏವಾಭಿಕ್ಕನ್ತದಸ್ಸಾವಿಂ ¶ , ಅತ್ಥಿ ಪಞ್ಹೇನ ಆಗಮಂ;
ಕಥಂ ಲೋಕಂ ಅವೇಕ್ಖನ್ತಂ, ಮಚ್ಚುರಾಜಾ ನ ಪಸ್ಸತಿ’.
‘‘‘ಸುಞ್ಞತೋ ¶ ಲೋಕಂ ಅವೇಕ್ಖಸ್ಸು, ಮೋಘರಾಜ ಸದಾ ಸತೋ;
ಅತ್ತಾನುದಿಟ್ಠಿಂ ಉಹಚ್ಚ, ಏವಂ ಮಚ್ಚುತರೋ ಸಿಯಾ.
‘‘‘ಏವಂ ಲೋಕಂ ಅವೇಕ್ಖನ್ತಂ, ಮಚ್ಚುರಾಜಾ ನ ಪಸ್ಸತಿ’;
ಇತಿ ಮಂ ಅಭಣಿ ಬುದ್ಧೋ, ಸಬ್ಬರೋಗತಿಕಿಚ್ಛಕೋ.
‘‘ಸಹ ಗಾಥಾವಸಾನೇನ, ಕೇಸಮಸ್ಸುವಿವಜ್ಜಿತೋ;
ಕಾಸಾವವತ್ಥವಸನೋ, ಆಸಿಂ ಭಿಕ್ಖು ತಥಾರಹಾ.
‘‘ಸಙ್ಘಿಕೇಸು ವಿಹಾರೇಸು, ನ ವಸಿಂ ರೋಗಪೀಳಿತೋ;
ಮಾ ವಿಹಾರೋ ಪದುಸ್ಸೀತಿ, ವಾತರೋಗೇಹಿ ಪೀಳಿತೋ [ವಾಚಾಯಾಭಿಸುಪೀಳಿತೋ (ಸ್ಯಾ. ಪೀ.), ವಾತರೋಗೀ ಸುಪೀಳಿತೋ (ಕ.)].
‘‘ಸಙ್ಕಾರಕೂಟಾ ¶ ಆಹಿತ್ವಾ, ಸುಸಾನಾ ರಥಿಕಾಹಿ ಚ;
ತತೋ ಸಙ್ಘಾಟಿಂ ಕರಿತ್ವಾ, ಧಾರಯಿಂ ಲೂಖಚೀವರಂ.
‘‘ಮಹಾಭಿಸಕ್ಕೋ ತಸ್ಮಿಂ ಮೇ, ಗುಣೇ ತುಟ್ಠೋ ವಿನಾಯಕೋ;
ಲೂಖಚೀವರಧಾರೀನಂ, ಏತದಗ್ಗೇ ಠಪೇಸಿ ಮಂ.
‘‘ಪುಞ್ಞಪಾಪಪರಿಕ್ಖೀಣೋ, ಸಬ್ಬರೋಗವಿವಜ್ಜಿತೋ;
ಸಿಖೀವ ಅನುಪಾದಾನೋ, ನಿಬ್ಬಾಯಿಸ್ಸಮನಾಸವೋ.
‘‘ಕಿಲೇಸಾ ¶ ಝಾಪಿತಾ ಮಯ್ಹಂ…ಪೇ… ವಿಹರಾಮಿ ಅನಾಸವೋ.
‘‘ಸ್ವಾಗತಂ ವತ ಮೇ ಆಸಿ…ಪೇ… ಕತಂ ಬುದ್ಧಸ್ಸ ಸಾಸನಂ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ¶ ಸುದಂ ಆಯಸ್ಮಾ ಮೋಘರಾಜಾ ಥೇರೋ ಇಮಾ ಗಾಥಾಯೋ
ಅಭಾಸಿತ್ಥಾತಿ.
ಮೋಘರಾಜತ್ಥೇರಸ್ಸಾಪದಾನಂ ದಸಮಂ.
ಕಚ್ಚಾಯನವಗ್ಗೋ ಚತುಪಞ್ಞಾಸಮೋ.
ತಸ್ಸುದ್ದಾನಂ –
ಕಚ್ಚಾನೋ ವಕ್ಕಲೀ ಥೇರೋ, ಮಹಾಕಪ್ಪಿನಸವ್ಹಯೋ;
ದಬ್ಬೋ ಕುಮಾರನಾಮೋ ಚ, ಬಾಹಿಯೋ ಕೋಟ್ಠಿಕೋ ವಸೀ.
ಉರುವೇಳಕಸ್ಸಪೋ ರಾಧೋ, ಮೋಘರಾಜಾ ಚ ಪಣ್ಡಿತೋ;
ತೀಣಿ ಗಾಥಾಸತಾನೇತ್ಥ, ಬಾಸಟ್ಠಿ ಚೇವ ಪಿಣ್ಡಿತಾ.
೫೫. ಭದ್ದಿಯವಗ್ಗೋ
೧. ಲಕುಣ್ಡಭದ್ದಿಯತ್ಥೇರಅಪದಾನಂ
‘‘ಪದುಮುತ್ತರೋ ¶ ¶ ¶ ¶ ನಾಮ ಜಿನೋ, ಸಬ್ಬಧಮ್ಮೇಸು ಚಕ್ಖುಮಾ;
ಇತೋ ಸತಸಹಸ್ಸಮ್ಹಿ, ಕಪ್ಪೇ ಉಪ್ಪಜ್ಜಿ ನಾಯಕೋ.
‘‘ತದಾಹಂ ಹಂಸವತಿಯಂ, ಸೇಟ್ಠಿಪುತ್ತೋ ಮಹದ್ಧನೋ;
ಜಙ್ಘಾವಿಹಾರಂ ವಿಚರಂ, ಸಙ್ಘಾರಾಮಂ ಅಗಚ್ಛಹಂ.
‘‘ತದಾ ಸೋ ಲೋಕಪಜ್ಜೋತೋ, ಧಮ್ಮಂ ದೇಸೇಸಿ ನಾಯಕೋ;
ಮಞ್ಜುಸ್ಸರಾನಂ ಪವರಂ, ಸಾವಕಂ ಅಭಿಕಿತ್ತಯಿ.
‘‘ತಂ ಸುತ್ವಾ ಮುದಿತೋ ಹುತ್ವಾ, ಕಾರಂ ಕತ್ವಾ ಮಹೇಸಿನೋ;
ವನ್ದಿತ್ವಾ ಸತ್ಥುನೋ ಪಾದೇ, ತಂ ಠಾನಮಭಿಪತ್ಥಯಿಂ.
‘‘ತದಾ ಬುದ್ಧೋ ವಿಯಾಕಾಸಿ, ಸಙ್ಘಮಜ್ಝೇ ವಿನಾಯಕೋ;
‘ಅನಾಗತಮ್ಹಿ ಅದ್ಧಾನೇ, ಲಚ್ಛಸೇ ತಂ ಮನೋರಥಂ.
‘‘‘ಸತಸಹಸ್ಸಿತೋ ಕಪ್ಪೇ, ಓಕ್ಕಾಕಕುಲಸಮ್ಭವೋ;
ಗೋತಮೋ ನಾಮ ಗೋತ್ತೇನ, ಸತ್ಥಾ ಲೋಕೇ ಭವಿಸ್ಸತಿ.
‘‘‘ತಸ್ಸ ಧಮ್ಮೇಸು ದಾಯಾದೋ, ಓರಸೋ ಧಮ್ಮನಿಮ್ಮಿತೋ;
ಭದ್ದಿಯೋ ನಾಮ ನಾಮೇನ, ಹೇಸ್ಸತಿ ಸತ್ಥು ಸಾವಕೋ’.
‘‘ತೇನ ಕಮ್ಮೇನ ಸುಕತೇನ, ಚೇತನಾಪಣಿಧೀಹಿ ಚ;
ಜಹಿತ್ವಾ ಮಾನುಸಂ ದೇಹಂ, ತಾವತಿಂಸಮಗಚ್ಛಹಂ.
‘‘ದ್ವೇನವುತೇ ¶ ಇತೋ ಕಪ್ಪೇ, ಫುಸ್ಸೋ ಉಪ್ಪಜ್ಜಿ ನಾಯಕೋ;
ದುರಾಸದೋ ದುಪ್ಪಸಹೋ, ಸಬ್ಬಲೋಕುತ್ತಮೋ ಜಿನೋ.
‘‘ಚರಣೇನ ಚ ಸಮ್ಪನ್ನೋ, ಬ್ರಹಾ ಉಜು ಪತಾಪವಾ;
ಹಿತೇಸೀ ಸಬ್ಬಸತ್ತಾನಂ [ಸಬ್ಬಪಾಣೀನಂ (ಸೀ.)], ಬಹುಂ ಮೋಚೇಸಿ ಬನ್ಧನಾ.
‘‘ನನ್ದಾರಾಮವನೇ ತಸ್ಸ, ಅಹೋಸಿಂ ಫುಸ್ಸಕೋಕಿಲೋ [ಪುಸ್ಸಕೋಕಿಲೋ (ಸೀ. ಸ್ಯಾ.)];
ಗನ್ಧಕುಟಿಸಮಾಸನ್ನೇ, ಅಮ್ಬರುಕ್ಖೇ ವಸಾಮಹಂ.
‘‘ತದಾ ¶ ಪಿಣ್ಡಾಯ ಗಚ್ಛನ್ತಂ, ದಕ್ಖಿಣೇಯ್ಯಂ ಜಿನುತ್ತಮಂ;
ದಿಸ್ವಾ ಚಿತ್ತಂ ಪಸಾದೇತ್ವಾ, ಮಞ್ಜುನಾಭಿನಿಕೂಜಹಂ [ಮಞ್ಜುನಾದೇನ ಕೂಜಹಂ (ಸೀ. ಪೀ.)].
‘‘ರಾಜುಯ್ಯಾನಂ ¶ ತದಾ ಗನ್ತ್ವಾ, ಸುಪಕ್ಕಂ ಕನಕತ್ತಚಂ;
ಅಮ್ಬಪಿಣ್ಡಂ ಗಹೇತ್ವಾನ, ಸಮ್ಬುದ್ಧಸ್ಸೋಪನಾಮಯಿಂ.
‘‘ತದಾ ಮೇ ಚಿತ್ತಮಞ್ಞಾಯ, ಮಹಾಕಾರುಣಿಕೋ ಜಿನೋ;
ಉಪಟ್ಠಾಕಸ್ಸ ಹತ್ಥತೋ, ಪತ್ತಂ ಪಗ್ಗಣ್ಹಿ ನಾಯಕೋ.
‘‘ಅದಾಸಿಂ ¶ ಹಟ್ಠಚಿತ್ತೋಹಂ [ತುಟ್ಠಚಿತ್ತೋಹಂ (ಸೀ.)], ಅಮ್ಬಪಿಣ್ಡಂ ಮಹಾಮುನೇ;
ಪತ್ತೇ ಪಕ್ಖಿಪ್ಪ ಪಕ್ಖೇಹಿ, ಪಞ್ಜಲಿಂ [ಪಕ್ಖೇಹಞ್ಜಲಿಂ (ಸೀ.)] ಕತ್ವಾನ ಮಞ್ಜುನಾ.
‘‘ಸರೇನ ರಜನೀಯೇನ, ಸವನೀಯೇನ ವಗ್ಗುನಾ;
ವಸ್ಸನ್ತೋ ಬುದ್ಧಪೂಜತ್ಥಂ, ನೀಳಂ [ನಿದ್ದಂ (ಸ್ಯಾ. ಪೀ.)] ಗನ್ತ್ವಾ ನಿಪಜ್ಜಹಂ.
‘‘ತದಾ ಮುದಿತಚಿತ್ತಂ ಮಂ, ಬುದ್ಧಪೇಮಗತಾಸಯಂ;
ಸಕುಣಗ್ಘಿ ಉಪಾಗನ್ತ್ವಾ, ಘಾತಯೀ ದುಟ್ಠಮಾನಸೋ.
‘‘ತತೋ ಚುತೋಹಂ ತುಸಿತೇ, ಅನುಭೋತ್ವಾ ಮಹಾಸುಖಂ;
ಮನುಸ್ಸಯೋನಿಮಾಗಚ್ಛಿಂ, ತಸ್ಸ ಕಮ್ಮಸ್ಸ ವಾಹಸಾ.
‘‘ಇಮಮ್ಹಿ ¶ ಭದ್ದಕೇ ಕಪ್ಪೇ, ಬ್ರಹ್ಮಬನ್ಧು ಮಹಾಯಸೋ;
ಕಸ್ಸಪೋ ನಾಮ ಗೋತ್ತೇನ, ಉಪ್ಪಜ್ಜಿ ವದತಂ ವರೋ.
‘‘ಸಾಸನಂ ಜೋತಯಿತ್ವಾ ಸೋ, ಅಭಿಭುಯ್ಯ ಕುತಿತ್ಥಿಯೇ;
ವಿನಯಿತ್ವಾನ ವೇನೇಯ್ಯೇ, ನಿಬ್ಬುತೋ ಸೋ ಸಸಾವಕೋ.
‘‘ನಿಬ್ಬುತೇ ತಮ್ಹಿ ಲೋಕಗ್ಗೇ, ಪಸನ್ನಾ ಜನತಾ ಬಹೂ;
ಪೂಜನತ್ಥಾಯ ಬುದ್ಧಸ್ಸ, ಥೂಪಂ ಕುಬ್ಬನ್ತಿ ಸತ್ಥುನೋ.
‘‘‘ಸತ್ತಯೋಜನಿಕಂ ಥೂಪಂ, ಸತ್ತರತನಭೂಸಿತಂ;
ಕರಿಸ್ಸಾಮ ಮಹೇಸಿಸ್ಸ’, ಇಚ್ಚೇವಂ ಮನ್ತಯನ್ತಿ ತೇ.
‘‘ಕಿಕಿನೋ ಕಾಸಿರಾಜಸ್ಸ, ತದಾ ಸೇನಾಯ ನಾಯಕೋ;
ಹುತ್ವಾಹಂ ಅಪ್ಪಮಾಣಸ್ಸ, ಪಮಾಣಂ ಚೇತಿಯೇ ವದಿಂ.
‘‘ತದಾ ತೇ ಮಮ ವಾಕ್ಯೇನ, ಚೇತಿಯಂ ಯೋಜನುಗ್ಗತಂ;
ಅಕಂಸು ನರವೀರಸ್ಸ, ನಾನಾರತನಭೂಸಿತಂ.
‘‘ತೇನ ಕಮ್ಮೇನ ಸುಕತೇನ, ಚೇತನಾಪಣಿಧೀಹಿ ಚ;
ಜಹಿತ್ವಾ ಮಾನುಸಂ ದೇಹಂ, ತಾವತಿಂಸಮಗಚ್ಛಹಂ.
‘‘ಪಚ್ಛಿಮೇ ¶ ¶ ಚ ಭವೇ ದಾನಿ, ಜಾತೋ ಸೇಟ್ಠಿಕುಲೇ ಅಹಂ;
ಸಾವತ್ಥಿಯಂ ಪುರವರೇ, ಇದ್ಧೇ ಫೀತೇ ಮಹದ್ಧನೇ.
‘‘ಪುರಪ್ಪವೇಸೇ ಸುಗತಂ, ದಿಸ್ವಾ ವಿಮ್ಹಿತಮಾನಸೋ;
ಪಬ್ಬಜಿತ್ವಾನ ನ ಚಿರಂ, ಅರಹತ್ತಮಪಾಪುಣಿಂ.
‘‘ಚೇತಿಯಸ್ಸ ಪಮಾಣಂ ಯಂ, ಅಕರಿಂ ತೇನ ಕಮ್ಮುನಾ;
ಲಕುಣ್ಡಕಸರೀರೋಹಂ, ಜಾತೋ ಪರಿಭವಾರಹೋ.
‘‘ಸರೇನ ¶ ಮಧುರೇನಾಹಂ, ಪೂಜಿತ್ವಾ ಇಸಿಸತ್ತಮಂ;
ಮಞ್ಜುಸ್ಸರಾನಂ ಭಿಕ್ಖೂನಂ, ಅಗ್ಗತ್ತಮನುಪಾಪುಣಿಂ.
‘‘ಫಲದಾನೇನ ¶ ಬುದ್ಧಸ್ಸ, ಗುಣಾನುಸ್ಸರಣೇನ ಚ;
ಸಾಮಞ್ಞಫಲಸಮ್ಪನ್ನೋ, ವಿಹರಾಮಿ ಅನಾಸವೋ.
‘‘ಕಿಲೇಸಾ ಝಾಪಿತಾ ಮಯ್ಹಂ, ಭವಾ ಸಬ್ಬೇ ಸಮೂಹತಾ;
ನಾಗೋವ ಬನ್ಧನಂ ಛೇತ್ವಾ, ವಿಹರಾಮಿ ಅನಾಸವೋ.
‘‘ಸ್ವಾಗತಂ ವತ ಮೇ ಆಸಿ, ಬುದ್ಧಸೇಟ್ಠಸ್ಸ ಸನ್ತಿಕೇ;
ತಿಸ್ಸೋ ವಿಜ್ಜಾ ಅನುಪ್ಪತ್ತಾ, ಕತಂ ಬುದ್ಧಸ್ಸ ಸಾಸನಂ.
‘‘ಪಟಿಸಮ್ಭಿದಾ ಚತಸ್ಸೋ, ವಿಮೋಕ್ಖಾಪಿ ಚ ಅಟ್ಠಿಮೇ;
ಛಳಭಿಞ್ಞಾ ಸಚ್ಛಿಕತಾ, ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಲಕುಣ್ಡಭದ್ದಿಯೋ ಥೇರೋ ಇಮಾ ಗಾಥಾಯೋ
ಅಭಾಸಿತ್ಥಾತಿ.
ಲಕುಣ್ಡಭದ್ದಿಯತ್ಥೇರಸ್ಸಾಪದಾನಂ ಪಠಮಂ.
೨. ಕಙ್ಖಾರೇವತತ್ಥೇರಅಪದಾನಂ
‘‘ಪದುಮುತ್ತರೋ ನಾಮ ಜಿನೋ, ಸಬ್ಬಧಮ್ಮೇಸು ಚಕ್ಖುಮಾ;
ಇತೋ ಸತಸಹಸ್ಸಮ್ಹಿ, ಕಪ್ಪೇ ಉಪ್ಪಜ್ಜಿ ನಾಯಕೋ.
‘‘ಸೀಹಹನು ಬ್ರಹ್ಮಗಿರೋ, ಹಂಸದುನ್ದುಭಿನಿಸ್ಸನೋ [ಹಂಸದುನ್ದುಭಿನಿಸ್ಸರೋ (ಸೀ.) … ನಿಸ್ಸವನೋ (ಪೀ.) … ಸಾವನೋ (ಸ್ಯಾ.)];
ನಾಗವಿಕ್ಕನ್ತಗಮನೋ, ಚನ್ದಸೂರಾದಿಕಪ್ಪಭೋ.
‘‘ಮಹಾಮತೀ ¶ ಮಹಾವೀರೋ, ಮಹಾಝಾಯೀ ಮಹಾಬಲೋ [ಮಹಾಗತಿ (ಸ್ಯಾ.), ಮಹಾಹಿತೋ (ಪೀ.)];
ಮಹಾಕಾರುಣಿಕೋ ನಾಥೋ, ಮಹಾತಮಪನೂದನೋ [ಮಹಾತಮವಿಧಂಸನೋ (ಸ್ಯಾ.), ಮಹಾತಮನಿಸೂದನೋ (ಪೀ.)].
‘‘ಸ ¶ ¶ ಕದಾಚಿ ತಿಲೋಕಗ್ಗೋ, ವೇನೇಯ್ಯಂ ವಿನಯಂ ಬಹುಂ [ವೇನೇಯ್ಯೇ ವಿನಿಯಂ ಬಹೂ (ಸೀ.)];
ಧಮ್ಮಂ ದೇಸೇಸಿ ಸಮ್ಬುದ್ಧೋ, ಸತ್ತಾಸಯವಿದೂ ಮುನಿ.
‘‘ಝಾಯಿಂ ಝಾನರತಂ ವೀರಂ, ಉಪಸನ್ತಂ ಅನಾವಿಲಂ;
ವಣ್ಣಯನ್ತೋ ಪರಿಸತಿಂ, ತೋಸೇಸಿ [ತೋಸೇತಿ (ಸ್ಯಾ. ಪೀ. ಕ.)] ಜನತಂ ಜಿನೋ.
‘‘ತದಾಹಂ ಹಂಸವತಿಯಂ, ಬ್ರಾಹ್ಮಣೋ ವೇದಪಾರಗೂ;
ಧಮ್ಮಂ ಸುತ್ವಾನ ಮುದಿತೋ, ತಂ ಠಾನಮಭಿಪತ್ಥಯಿಂ.
‘‘ತದಾ ಜಿನೋ ವಿಯಾಕಾಸಿ, ಸಙ್ಘಮಜ್ಝೇ ವಿನಾಯಕೋ;
‘ಮುದಿತೋ ಹೋಹಿ ತ್ವಂ ಬ್ರಹ್ಮೇ, ಲಚ್ಛಸೇ ತಂ ಮನೋರಥಂ.
‘‘‘ಸತಸಹಸ್ಸಿತೋ ಕಪ್ಪೇ, ಓಕ್ಕಾಕಕುಲಸಮ್ಭವೋ;
ಗೋತಮೋ ನಾಮ ಗೋತ್ತೇನ, ಸತ್ಥಾ ಲೋಕೇ ಭವಿಸ್ಸತಿ.
‘‘‘ತಸ್ಸ ಧಮ್ಮೇಸು ದಾಯಾದೋ, ಓರಸೋ ಧಮ್ಮನಿಮ್ಮಿತೋ;
ರೇವತೋ ನಾಮ ನಾಮೇನ, ಹೇಸ್ಸತಿ ಸತ್ಥು ಸಾವಕೋ’.
‘‘ತೇನ ಕಮ್ಮೇನ ಸುಕತೇನ, ಚೇತನಾಪಣಿಧೀಹಿ ಚ;
ಜಹಿತ್ವಾ ಮಾನುಸಂ ದೇಹಂ, ತಾವತಿಂಸಮಗಚ್ಛಹಂ.
‘‘ಪಚ್ಛಿಮೇ ಚ ಭವೇ ದಾನಿ, ಜಾತೋಹಂ ಕೋಲಿಯೇ ಪುರೇ;
ಖತ್ತಿಯೇ ಕುಲಸಮ್ಪನ್ನೇ, ಇದ್ಧೇ ಫೀತೇ ಮಹದ್ಧನೇ.
‘‘ಯದಾ ¶ ಕಪಿಲವತ್ಥುಸ್ಮಿಂ, ಬುದ್ಧೋ ಧಮ್ಮಮದೇಸಯಿ;
ತದಾ ಪಸನ್ನೋ ಸುಗತೇ, ಪಬ್ಬಜಿಂ ಅನಗಾರಿಯಂ.
‘‘ಕಙ್ಖಾ ಮೇ ಬಹುಲಾ ಆಸಿ, ಕಪ್ಪಾಕಪ್ಪೇ ತಹಿಂ ತಹಿಂ;
ಸಬ್ಬಂ ತಂ ವಿನಯೀ ಬುದ್ಧೋ, ದೇಸೇತ್ವಾ ಧಮ್ಮಮುತ್ತಮಂ.
‘‘ತತೋಹಂ ¶ ತಿಣ್ಣಸಂಸಾರೋ, ಸದಾ ಝಾನಸುಖೇ ರತೋ;
ವಿಹರಾಮಿ ತದಾ ಬುದ್ಧೋ, ಮಂ ದಿಸ್ವಾ ಏತದಬ್ರವಿ.
‘‘‘ಯಾ ¶ ಕಾಚಿ ಕಙ್ಖಾ ಇಧ ವಾ ಹುರಂ ವಾ, ಸಕವೇದಿಯಾ ವಾ ಪರವೇದಿಯಾ ವಾ;
ಯೇ ಝಾಯಿನೋ ತಾ ಪಜಹನ್ತಿ ಸಬ್ಬಾ, ಆತಾಪಿನೋ ಬ್ರಹ್ಮಚರಿಯಂ ಚರನ್ತಾ’.
‘‘ಸತಸಹಸ್ಸೇ ಕತಂ ಕಮ್ಮಂ, ಫಲಂ ದಸ್ಸೇಸಿ ಮೇ ಇಧ;
ಸುಮುತ್ತೋ ಸರವೇಗೋವ ಕಿಲೇಸೇ ಝಾಪಯಿಂ ಮಮ.
‘‘ತತೋ ಝಾನರತಂ ದಿಸ್ವಾ, ಬುದ್ಧೋ ಲೋಕನ್ತಗೂ ಮುನಿ;
ಝಾಯೀನಂ ಭಿಕ್ಖೂನಂ ಅಗ್ಗೋ, ಪಞ್ಞಾಪೇತಿ ಮಹಾಮತಿ.
‘‘ಕಿಲೇಸಾ ¶ ಝಾಪಿತಾ ಮಯ್ಹಂ…ಪೇ… ವಿಹರಾಮಿ ಅನಾಸವೋ.
‘‘ಸ್ವಾಗತಂ ವತ ಮೇ ಆಸಿ…ಪೇ… ಕತಂ ಬುದ್ಧಸ್ಸ ಸಾಸನಂ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಕಙ್ಖಾರೇವತೋ ಥೇರೋ ಇಮಾ ಗಾಥಾಯೋ
ಅಭಾಸಿತ್ಥಾತಿ.
ಕಙ್ಖಾರೇವತತ್ಥೇರಸ್ಸಾಪದಾನಂ ದುತಿಯಂ.
೩. ಸೀವಲಿತ್ಥೇರಅಪದಾನಂ
‘‘ಪದುಮುತ್ತರೋ ¶ ನಾಮ ಜಿನೋ, ಸಬ್ಬಧಮ್ಮೇಸು ಚಕ್ಖುಮಾ;
ಇತೋ ಸತಸಹಸ್ಸಮ್ಹಿ, ಕಪ್ಪೇ ಉಪ್ಪಜ್ಜಿ ನಾಯಕೋ.
‘‘ಸೀಲಂ ತಸ್ಸ ಅಸಙ್ಖೇಯ್ಯಂ, ಸಮಾಧಿ ವಜಿರೂಪಮೋ;
ಅಸಙ್ಖೇಯ್ಯಂ ಞಾಣವರಂ, ವಿಮುತ್ತಿ ಚ ಅನೋಪಮಾ.
‘‘ಮನುಜಾಮರನಾಗಾನಂ, ಬ್ರಹ್ಮಾನಞ್ಚ ಸಮಾಗಮೇ;
ಸಮಣಬ್ರಾಹ್ಮಣಾಕಿಣ್ಣೇ, ಧಮ್ಮಂ ದೇಸೇಸಿ ನಾಯಕೋ.
‘‘ಸಸಾವಕಂ ಮಹಾಲಾಭಿಂ, ಪುಞ್ಞವನ್ತಂ ಜುತಿನ್ಧರಂ;
ಠಪೇಸಿ ಏತದಗ್ಗಮ್ಹಿ, ಪರಿಸಾಸು ವಿಸಾರದೋ.
‘‘ತದಾಹಂ ಖತ್ತಿಯೋ ಆಸಿಂ, ನಗರೇ ಹಂಸಸವ್ಹಯೇ;
ಸುತ್ವಾ ಜಿನಸ್ಸ ತಂ ವಾಕ್ಯಂ, ಸಾವಕಸ್ಸ ಗುಣಂ ಬಹುಂ.
‘‘ನಿಮನ್ತಯಿತ್ವಾ ¶ ¶ ಸತ್ತಾಹಂ, ಭೋಜಯಿತ್ವಾ ಸಸಾವಕಂ;
ಮಹಾದಾನಂ ದದಿತ್ವಾನ, ತಂ ಠಾನಮಭಿಪತ್ಥಯಿಂ.
‘‘ತದಾ ಮಂ ವಿನತಂ ಪಾದೇ, ದಿಸ್ವಾನ ಪುರಿಸಾಸಭೋ;
ಸರೇನ ಮಹತಾ ವೀರೋ [ಸುಸ್ಸರೇನ ಮಹಾವೀರೋ (ಸೀ. ಪೀ.)], ಇದಂ ವಚನಮಬ್ರವಿ.
‘‘‘ತತೋ ಜಿನಸ್ಸ ವಚನಂ, ಸೋತುಕಾಮಾ ಮಹಾಜನಾ;
ದೇವದಾನವಗನ್ಧಬ್ಬಾ, ಬ್ರಹ್ಮಾನೋ ಚ ಮಹಿದ್ಧಿಕಾ’.
‘‘ಸಮಣಬ್ರಾಹ್ಮಣಾ ಚೇವ, ನಮಸ್ಸಿಂಸು ಕತಞ್ಜಲೀ;
‘ನಮೋ ತೇ ಪುರಿಸಾಜಞ್ಞ, ನಮೋ ತೇ ಪುರಿಸುತ್ತಮ.
‘‘‘ಖತ್ತಿಯೇನ ¶ ¶ ಮಹಾದಾನಂ, ದಿನ್ನಂ ಸತ್ತಾಹಿಕಮ್ಪಿ ವೋ [ಸತ್ತಹಿಕಂ ಮಿ ವೋ (ಸೀ.), ಸತ್ತಹಿಕಾಧಿಕಂ (ಸ್ಯಾ.), ಸತ್ತಹಿಕಂ ವಿಭೋ (ಪೀ.)];
ಸೋತುಕಾಮಾ ಫಲಂ ತಸ್ಸ, ಬ್ಯಾಕರೋಹಿ ಮಹಾಮುನೇ’.
‘‘ತತೋ ಅವೋಚ ಭಗವಾ, ‘ಸುಣಾಥ ಮಮ ಭಾಸಿತಂ;
ಅಪ್ಪಮೇಯ್ಯಮ್ಹಿ ಬುದ್ಧಮ್ಹಿ, ಸಸಙ್ಘಮ್ಹಿ ಪತಿಟ್ಠಿತಾ [ಸಂಘಮ್ಹಿ ಸುಪ್ಪತಿಟ್ಠಿತಾ (ಸೀ. ಪೀ.)].
‘‘‘ದಕ್ಖಿಣಾ ತಾಯ [ದಕ್ಖಿಣಾದಾಯ (ಸ್ಯಾ. ಪೀ.)] ಕೋ ವತ್ತಾ, ಅಪ್ಪಮೇಯ್ಯಫಲಾ ಹಿ ಸಾ;
ಅಪಿ ಚೇ ಸ ಮಹಾಭೋಗೋ, ಠಾನಂ ಪತ್ಥೇತಿ ಉತ್ತಮಂ.
‘‘‘ಲಾಭೀ ವಿಪುಲಲಾಭಾನಂ, ಯಥಾ ಭಿಕ್ಖು ಸುದಸ್ಸನೋ;
ತಥಾಹಮ್ಪಿ ಭವೇಯ್ಯನ್ತಿ, ಲಚ್ಛಸೇ ತಂ ಅನಾಗತೇ.
‘‘‘ಸತಸಹಸ್ಸಿತೋ ಕಪ್ಪೇ, ಓಕ್ಕಾಕಕುಲಸಮ್ಭವೋ;
ಗೋತಮೋ ನಾಮ ಗೋತ್ತೇನ, ಸತ್ಥಾ ಲೋಕೇ ಭವಿಸ್ಸತಿ.
‘‘‘ತಸ್ಸ ಧಮ್ಮೇಸು ದಾಯಾದೋ, ಓರಸೋ ಧಮ್ಮನಿಮ್ಮಿತೋ;
ಸೀವಲಿ ನಾಮ ನಾಮೇನ, ಹೇಸ್ಸತಿ ಸತ್ಥು ಸಾವಕೋ’.
‘‘ತೇನ ಕಮ್ಮೇನ ಸುಕತೇನ, ಚೇತನಾಪಣಿಧೀಹಿ ಚ;
ಜಹಿತ್ವಾ ಮಾನುಸಂ ದೇಹಂ, ತಾವತಿಂಸೂಪಗೋ ಅಹಂ.
‘‘ಏಕನವುತಿತೋ ಕಪ್ಪೇ, ವಿಪಸ್ಸೀ ಲೋಕನಾಯಕೋ;
ಉಪ್ಪಜ್ಜಿ ಚಾರುದಸ್ಸನೋ, ಸಬ್ಬಧಮ್ಮವಿಪಸ್ಸಕೋ.
‘‘ತದಾಹಂ ¶ ಬನ್ಧುಮತಿಯಂ, ಕುಲಸ್ಸಞ್ಞತರಸ್ಸ ಚ;
ದಯಿತೋ ಪಸ್ಸಿತೋ ಚೇವ, ಆಸಿಂ ಕಮ್ಮನ್ತವಾವಟೋ [ಕಮ್ಮನ್ತಬ್ಯಾವಟೋ (ಸೀ. ಸ್ಯಾ. ಕ.)].
‘‘ತದಾ ಅಞ್ಞತರೋ ಪೂಗೋ, ವಿಪಸ್ಸಿಸ್ಸ ಮಹೇಸಿನೋ;
ಪರಿವೇಸಂ ಅಕಾರಯಿ, ಮಹನ್ತಮತಿವಿಸ್ಸುತಂ.
‘‘ನಿಟ್ಠಿತೇ ¶ ¶ ಚ ಮಹಾದಾನೇ, ದದುಂ ಖಜ್ಜಕಸಞ್ಹಿತಂ;
ನವಂ ದಧಿಂ ಮಧುಞ್ಚೇವ, ವಿಚಿನಂ ನೇವ ಅದ್ದಸುಂ.
‘‘ತದಾಹಂ ತಂ ಗಹೇತ್ವಾನ, ನವಂ ದಧಿಂ ಮಧುಮ್ಪಿ ಚ;
ಕಮ್ಮಸ್ಸಾಮಿಘರಂ ಗಚ್ಛಿಂ, ತಮೇಸನ್ತಾ ಮಮದ್ದಸುಂ.
‘‘ಸಹಸ್ಸಮಪಿ ದತ್ವಾನ, ನಾಲಭಿಂಸು ಚ ತಂ ದ್ವಯಂ;
ತತೋಹಂ ಏವಂ ಚಿನ್ತೇಸಿಂ, ‘ನೇತಂ ಹೇಸ್ಸತಿ ಓರಕಂ.
‘‘‘ಯಥಾ ಇಮೇ ಜನಾ ಸಬ್ಬೇ, ಸಕ್ಕರೋನ್ತಿ ತಥಾಗತಂ;
ಅಹಮ್ಪಿ ಕಾರಂ ಕಸ್ಸಾಮಿ, ಸಸಙ್ಘೇ ಲೋಕನಾಯಕೇ’.
‘‘ತದಾಹಮೇವಂ ¶ ಚಿನ್ತೇತ್ವಾ, ದಧಿಂ ಮಧುಞ್ಚ ಏಕತೋ;
ಮದ್ದಿತ್ವಾ ಲೋಕನಾಥಸ್ಸ, ಸಸಙ್ಘಸ್ಸ ಅದಾಸಹಂ.
‘‘ತೇನ ಕಮ್ಮೇನ ಸುಕತೇನ, ಚೇತನಾಪಣಿಧೀಹಿ ಚ;
ಜಹಿತ್ವಾ ಮಾನುಸಂ ದೇಹಂ, ತಾವತಿಂಸಮಗಚ್ಛಹಂ.
‘‘ಪುನಾಹಂ ಬಾರಾಣಸಿಯಂ, ರಾಜಾ ಹುತ್ವಾ ಮಹಾಯಸೋ;
ಸತ್ತುಕಸ್ಸ ತದಾ ದುಟ್ಠೋ, ದ್ವಾರರೋಧಮಕಾರಯಿಂ.
‘‘ತದಾ ತಪಸ್ಸಿನೋ ರುದ್ಧಾ, ಏಕಾಹಂ ರಕ್ಖಿತಾ ಅಹುಂ;
ತತೋ ತಸ್ಸ ವಿಪಾಕೇನ, ಪಾಪತಿಂ [ಪಾಪಿಟ್ಠಂ (ಸ್ಯಾ.) ಪಾಪತ್ತಂ (ಕ.)] ನಿರಯಂ ಭುಸಂ.
‘‘ಪಚ್ಛಿಮೇ ಚ ಭವೇ ದಾನಿ, ಜಾತೋಹಂ ಕೋಲಿಯೇ ಪುರೇ;
ಸುಪ್ಪವಾಸಾ ಚ ಮೇ ಮಾತಾ, ಮಹಾಲಿ ಲಿಚ್ಛವೀ ಪಿತಾ.
‘‘ಖತ್ತಿಯೇ ಪುಞ್ಞಕಮ್ಮೇನ, ದ್ವಾರರೋಧಸ್ಸ ವಾಹಸಾ;
ಸತ್ತ ವಸ್ಸಾನಿ ನಿವಸಿಂ, ಮಾತುಕುಚ್ಛಿಮ್ಹಿ ದುಕ್ಖಿತೋ.
‘‘ಸತ್ತಾಹಂ ¶ ದ್ವಾರಮೂಳ್ಹೋಹಂ, ಮಹಾದುಕ್ಖಸಮಪ್ಪಿತೋ;
ಮಾತಾ ಮೇ ಛನ್ದದಾನೇನ, ಏವಂ ಆಸಿ ಸುದುಕ್ಖಿತಾ.
‘‘ಸುವತ್ಥಿತೋಹಂ ¶ ನಿಕ್ಖನ್ತೋ, ಬುದ್ಧೇನ ಅನುಕಮ್ಪಿತೋ;
ನಿಕ್ಖನ್ತದಿವಸೇಯೇವ, ಪಬ್ಬಜಿಂ ಅನಗಾರಿಯಂ.
‘‘ಉಪಜ್ಝಾ ಸಾರಿಪುತ್ತೋ ಮೇ, ಮೋಗ್ಗಲ್ಲಾನೋ ಮಹಿದ್ಧಿಕೋ;
ಕೇಸೇ ಓರೋಪಯನ್ತೋ ಮೇ, ಅನುಸಾಸಿ ಮಹಾಮತಿ.
‘‘ಕೇಸೇಸು ¶ ಛಿಜ್ಜಮಾನೇಸು, ಅರಹತ್ತಮಪಾಪುಣಿಂ;
ದೇವಾ ನಾಗಾ ಮನುಸ್ಸಾ ಚ, ಪಚ್ಚಯೇ ಉಪನೇನ್ತಿ ಮೇ.
‘‘ಪದುಮುತ್ತರನಾಥಞ್ಚ, ವಿಪಸ್ಸಿಞ್ಚ ವಿನಾಯಕಂ;
ಯಂ ಪೂಜಯಿಂ ಪಮುದಿತೋ, ಪಚ್ಚಯೇಹಿ ವಿಸೇಸತೋ.
‘‘ತತೋ ತೇಸಂ ವಿಸೇಸೇನ, ಕಮ್ಮಾನಂ ವಿಪುಲುತ್ತಮಂ;
ಲಾಭಂ ಲಭಾಮಿ ಸಬ್ಬತ್ಥ, ವನೇ ಗಾಮೇ ಜಲೇ ಥಲೇ.
‘‘ರೇವತಂ ದಸ್ಸನತ್ಥಾಯ, ಯದಾ ಯಾತಿ ವಿನಾಯಕೋ;
ತಿಂಸಭಿಕ್ಖುಸಹಸ್ಸೇಹಿ, ಸಹ ಲೋಕಗ್ಗನಾಯಕೋ.
‘‘ತದಾ ದೇವೋಪಣೀತೇಹಿ, ಮಮತ್ಥಾಯ ಮಹಾಮತಿ;
ಪಚ್ಚಯೇಹಿ ಮಹಾವೀರೋ, ಸಸಙ್ಘೋ ಲೋಕನಾಯಕೋ.
‘‘ಉಪಟ್ಠಿತೋ ¶ ಮಯಾ ಬುದ್ಧೋ, ಗನ್ತ್ವಾ ರೇವತಮದ್ದಸ;
ತತೋ ಜೇತವನಂ ಗನ್ತ್ವಾ, ಏತದಗ್ಗೇ ಠಪೇಸಿ ಮಂ.
‘‘‘ಲಾಭೀನಂ ಸೀವಲಿ ಅಗ್ಗೋ, ಮಮ ಸಿಸ್ಸೇಸು ಭಿಕ್ಖವೋ’;
ಸಬ್ಬಲೋಕಹಿತೋ ಸತ್ಥಾ, ಕಿತ್ತಯೀ ಪರಿಸಾಸು ಮಂ.
‘‘ಕಿಲೇಸಾ ¶ ಝಾಪಿತಾ ಮಯ್ಹಂ…ಪೇ… ವಿಹರಾಮಿ ಅನಾಸವೋ.
‘‘ಸ್ವಾಗತಂ ವತ ಮೇ ಆಸಿ…ಪೇ… ಕತಂ ಬುದ್ಧಸ್ಸ ಸಾಸನಂ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಸೀವಲಿಥೇರೋ ಇಮಾ ಗಾಥಾಯೋ
ಅಭಾಸಿತ್ಥಾತಿ.
ಸೀವಲಿತ್ಥೇರಸ್ಸಾಪದಾನಂ ತತಿಯಂ.
೪. ವಙ್ಗೀಸತ್ಥೇರಅಪದಾನಂ
‘‘ಪದುಮುತ್ತರೋ ನಾಮ ಜಿನೋ, ಸಬ್ಬಧಮ್ಮೇಸು ಚಕ್ಖುಮಾ;
ಇತೋ ಸತಸಹಸ್ಸಮ್ಹಿ, ಕಪ್ಪೇ ಉಪ್ಪಜ್ಜಿ ನಾಯಕೋ.
‘‘ಯಥಾಪಿ ¶ ಸಾಗರೇ ಊಮಿ, ಗಗನೇ ವಿಯ ತಾರಕಾ;
ಏವಂ ಪಾವಚನಂ ತಸ್ಸ, ಅರಹನ್ತೇಹಿ ಚಿತ್ತಿತಂ.
‘‘ಸದೇವಾಸುರನಾಗೇಹಿ, ಮನುಜೇಹಿ ಪುರಕ್ಖತೋ;
ಸಮಣಬ್ರಾಹ್ಮಣಾಕಿಣ್ಣೇ, ಜನಮಜ್ಝೇ ಜಿನುತ್ತಮೋ.
‘‘ಪಭಾಹಿ ಅನುರಞ್ಜನ್ತೋ, ಲೋಕೇ [ಲೋಕಂ (ಸೀ.)] ಲೋಕನ್ತಗೂ ಜಿನೋ;
ವಚನೇನ ವಿಬೋಧೇನ್ತೋ, ವೇನೇಯ್ಯಪದುಮಾನಿ ಸೋ.
‘‘ವೇಸಾರಜ್ಜೇಹಿ ಸಮ್ಪನ್ನೋ, ಚತೂಹಿ ಪುರಿಸುತ್ತಮೋ;
ಪಹೀನಭಯಸಾರಜ್ಜೋ, ಖೇಮಪ್ಪತ್ತೋ ವಿಸಾರದೋ.
‘‘ಆಸಭಂ ¶ ¶ ಪವರಂ ಠಾನಂ, ಬುದ್ಧಭೂಮಿಞ್ಚ ಕೇವಲಂ;
ಪಟಿಜಾನಾತಿ ಲೋಕಗ್ಗೋ, ನತ್ಥಿ ಸಞ್ಚೋದಕೋ ಕ್ವಚಿ.
‘‘ಸೀಹನಾದಮಸಮ್ಭೀತಂ, ನದತೋ ತಸ್ಸ ತಾದಿನೋ;
ದೇವೋ ನರೋ ವಾ ಬ್ರಹ್ಮಾ ವಾ, ಪಟಿವತ್ತಾ ನ ವಿಜ್ಜತಿ.
‘‘ದೇಸೇನ್ತೋ ¶ ಪವರಂ ಧಮ್ಮಂ, ಸನ್ತಾರೇನ್ತೋ ಸದೇವಕಂ;
ಧಮ್ಮಚಕ್ಕಂ ಪವತ್ತೇತಿ, ಪರಿಸಾಸು ವಿಸಾರದೋ.
‘‘ಪಟಿಭಾನವತಂ ಅಗ್ಗಂ, ಸಾವಕಂ ಸಾಧುಸಮ್ಮತಂ;
ಗುಣಂ ಬಹುಂ ಪಕಿತ್ತೇತ್ವಾ, ಏತದಗ್ಗೇ ಠಪೇಸಿ ತಂ.
‘‘ತದಾಹಂ ಹಂಸವತಿಯಂ, ಬ್ರಾಹ್ಮಣೋ ಸಾಧುಸಮ್ಮತೋ;
ಸಬ್ಬವೇದವಿದೂ ಜಾತೋ, ವಾಗೀಸೋ ವಾದಿಸೂದನೋ.
‘‘ಉಪೇಚ್ಚ ತಂ ಮಹಾವೀರಂ, ಸುತ್ವಾಹಂ ಧಮ್ಮದೇಸನಂ;
ಪೀತಿವರಂ ಪಟಿಲಭಿಂ, ಸಾವಕಸ್ಸ ಗುಣೇ ರತೋ.
‘‘ನಿಮನ್ತೇತ್ವಾವ ಸುಗತಂ, ಸಸಙ್ಘಂ ಲೋಕನನ್ದನಂ;
ಸತ್ತಾಹಂ ಭೋಜಯಿತ್ವಾಹಂ, ದುಸ್ಸೇಹಚ್ಛಾದಯಿಂ ತದಾ.
‘‘ನಿಪಚ್ಚ ಸಿರಸಾ ಪಾದೇ, ಕತೋಕಾಸೋ ಕತಞ್ಜಲೀ;
ಏಕಮನ್ತಂ ಠಿತೋ ಹಟ್ಠೋ, ಸನ್ಥವಿಂ ಜಿನಮುತ್ತಮಂ.
‘‘‘ನಮೋ ತೇ ವಾದಿಮದ್ದನ [ವಾದಿಸದ್ದುಲ (ಸೀ. ಪೀ.), ವಾದಿಸೂದನ (ಸ್ಯಾ.)], ನಮೋ ತೇ ಇಸಿಸತ್ತಮ [ಪುರಿಸುತ್ತಮ (ಸೀ. ಪೀ.)];
ನಮೋ ತೇ ಸಬ್ಬಲೋಕಗ್ಗ, ನಮೋ ತೇ ಅಭಯಙ್ಕರ.
‘‘‘ನಮೋ ¶ ತೇ ಮಾರಮಥನ [ಮಾರಮಸನ (ಅಟ್ಠ.)], ನಮೋ ತೇ ದಿಟ್ಠಿಸೂದನ;
ನಮೋ ತೇ ಸನ್ತಿಸುಖದ, ನಮೋ ತೇ ಸರಣಙ್ಕರ.
‘‘‘ಅನಾಥಾನಂ ¶ ಭವಂ ನಾಥೋ, ಭೀತಾನಂ ಅಭಯಪ್ಪದೋ;
ವಿಸ್ಸಾಮಭೂಮಿ [ವಿಸ್ಸಾಸಂ ಭೂಮಿ (ಸ್ಯಾ.), ವಿಸ್ಸಾನಭೂಮಿ (ಪೀ.)] ಸನ್ತಾನಂ, ಸರಣಂ ಸರಣೇಸಿನಂ’.
‘‘ಏವಮಾದೀಹಿ ಸಮ್ಬುದ್ಧಂ, ಸನ್ಥವಿತ್ವಾ ಮಹಾಗುಣಂ;
ಅವೋಚಂ ವಾದಿಸೂದಸ್ಸ [ವಾದಿಸೂರಸ್ಸ (ಸೀ. ಸ್ಯಾ. ಪೀ.)], ಗತಿಂ ಪಪ್ಪೋಮಿ ಭಿಕ್ಖುನೋ.
‘‘ತದಾ ಅವೋಚ ಭಗವಾ, ಅನನ್ತಪಟಿಭಾನವಾ;
‘ಯೋ ಸೋ ಬುದ್ಧಂ ಅಭೋಜೇಸಿ, ಸತ್ತಾಹಂ ಸಹಸಾವಕಂ.
‘‘‘ಗುಣಞ್ಚ ಮೇ ಪಕಿತ್ತೇಸಿ, ಪಸನ್ನೋ ಸೇಹಿ ಪಾಣಿಭಿ;
ಏಸೋ ಪತ್ಥಯತೇ ಠಾನಂ, ವಾದಿಸೂದಸ್ಸ ಭಿಕ್ಖುನೋ.
‘‘‘ಅನಾಗತಮ್ಹಿ ¶ ಅದ್ಧಾನೇ, ಲಚ್ಛಸೇ ತಂ ಮನೋರಥಂ;
ದೇವಮಾನುಸಸಮ್ಪತ್ತಿಂ, ಅನುಭೋತ್ವಾ ಅನಪ್ಪಕಂ.
‘‘‘ಸತಸಹಸ್ಸಿತೋ ಕಪ್ಪೇ, ಓಕ್ಕಾಕಕುಲಸಮ್ಭವೋ;
ಗೋತಮೋ ನಾಮ ಗೋತ್ತೇನ, ಸತ್ಥಾ ಲೋಕೇ ಭವಿಸ್ಸತಿ.
‘‘‘ತಸ್ಸ ¶ ಧಮ್ಮೇಸು ದಾಯಾದೋ, ಓರಸೋ ಧಮ್ಮನಿಮ್ಮಿತೋ;
ವಙ್ಗೀಸೋ ನಾಮ ನಾಮೇನ, ಹೇಸ್ಸತಿ ಸತ್ಥು ಸಾವಕೋ’.
‘‘ತಂ ಸುತ್ವಾ ಮುದಿತೋ ಹುತ್ವಾ, ಯಾವಜೀವಂ ತದಾ ಜಿನಂ;
ಪಚ್ಚಯೇಹಿ ಉಪಟ್ಠಾಸಿಂ, ಮೇತ್ತಚಿತ್ತೋ ತಥಾಗತಂ.
‘‘ತೇನ ಕಮ್ಮೇನ ಸುಕತೇನ, ಚೇತನಾಪಣಿಧೀಹಿ ಚ;
ಜಹಿತ್ವಾ ಮಾನುಸಂ ದೇಹಂ, ತುಸಿತಂ [ತಾವತಿಂಸಂ (ಸ್ಯಾ.)] ಅಗಮಾಸಹಂ.
‘‘ಪಚ್ಛಿಮೇ ಚ ಭವೇ ದಾನಿ, ಜಾತೋ ವಿಪ್ಪಕುಲೇ [ಪರಿಬ್ಬಾಜಕುಲೇ (ಸೀ. ಸ್ಯಾ. ಪೀ.)] ಅಹಂ;
ಪಚ್ಚಾಜಾತೋ [ಸಮ್ಪತ್ತೋ ಚ (ಕ.)] ಯದಾ ಆಸಿಂ, ಜಾತಿಯಾ ಸತ್ತವಸ್ಸಿಕೋ.
‘‘ಸಬ್ಬವೇದವಿದೂ ¶ ಜಾತೋ, ವಾದಸತ್ಥವಿಸಾರದೋ;
ವಾದಿಸ್ಸರೋ [ವಗ್ಗುಸ್ಸರೋ (ಸ್ಯಾ. ಪೀ.)] ಚಿತ್ತಕಥೀ, ಪರವಾದಪ್ಪಮದ್ದನೋ.
‘‘ವಙ್ಗೇ ಜಾತೋತಿ ವಙ್ಗೀಸೋ, ವಚನೇ ಇಸ್ಸರೋತಿ ವಾ;
ವಙ್ಗೀಸೋ ಇತಿ ಮೇ ನಾಮಂ, ಅಭವೀ ಲೋಕಸಮ್ಮತಂ.
‘‘ಯದಾಹಂ ¶ ವಿಞ್ಞುತಂ ಪತ್ತೋ, ಠಿತೋ ಪಠಮಯೋಬ್ಬನೇ;
ತದಾ ರಾಜಗಹೇ ರಮ್ಮೇ, ಸಾರಿಪುತ್ತಮಹದ್ದಸಂ [ಮಥದ್ದಸಂ (ಸೀ. ಪೀ.), ಚ ಅದ್ದಸಂ (ಸ್ಯಾ.)].
ಪಞ್ಚವೀಸತಿಮಂ ಭಾಣವಾರಂ.
‘‘ಪಿಣ್ಡಾಯ ವಿಚರನ್ತಂ ತಂ, ಪತ್ತಪಾಣಿಂ ಸುಸಂವುತಂ;
ಅಲೋಲಕ್ಖಿಂ ಮಿತಭಾಣಿಂ, ಯುಗಮತ್ತಂ ನಿದಕ್ಖಿತಂ [ನಿರಿಕ್ಖತಂ (ಸೀ. ಪೀ.), ಉದಿಕ್ಖತಂ (ಸ್ಯಾ.)].
‘‘ತಂ ದಿಸ್ವಾ ವಿಮ್ಹಿತೋ ಹುತ್ವಾ, ಅವೋಚಂ ಮಮನುಚ್ಛವಂ [ಮನನುಚ್ಛವಂ (ಸೀ. ಸ್ಯಾ.)];
ಕಣಿಕಾರಂವ ನಿಚಿತಂ [ಕಣಿಕಾರಪರಿಚಿತಂ (ಪೀ.), ಖಣಿಕಂ ಠಾನರಚಿತಂ (ಸೀ.)], ಚಿತ್ತಂ ಗಾಥಾಪದಂ ಅಹಂ.
‘‘ಆಚಿಕ್ಖಿ ಸೋ ಮೇ ಸತ್ಥಾರಂ, ಸಮ್ಬುದ್ಧಂ ಲೋಕನಾಯಕಂ;
ತದಾ ಸೋ ಪಣ್ಡಿತೋ ವೀರೋ, ಉತ್ತರಿಂ [ಉತ್ತರಂ (ಸೀ. ಪೀ.)] ಸಮವೋಚ ಮೇ.
‘‘ವಿರಾಗಸಂಹಿತಂ ವಾಕ್ಯಂ, ಕತ್ವಾ ದುದ್ದಸಮುತ್ತಮಂ;
ವಿಚಿತ್ತಪಟಿಭಾನೇಹಿ, ತೋಸಿತೋ ತೇನ ತಾದಿನಾ.
‘‘ನಿಪಚ್ಚ ಸಿರಸಾ ಪಾದೇ, ‘ಪಬ್ಬಾಜೇಹೀ’ತಿ ಮಂ ಬ್ರವಿ;
ತತೋ ಮಂ ಸ ಮಹಾಪಞ್ಞೋ, ಬುದ್ಧಸೇಟ್ಠಮುಪಾನಯಿ.
‘‘ನಿಪಚ್ಚ ಸಿರಸಾ ಪಾದೇ, ನಿಸೀದಿಂ ಸತ್ಥು ಸನ್ತಿಕೇ;
ಮಮಾಹ ವದತಂ ಸೇಟ್ಠೋ, ಕಚ್ಚಿ ವಙ್ಗೀಸ ಜಾನಾಸಿ [ಸಚ್ಚಂ ವಙ್ಗೀಸ ಕಚ್ಚಿ ತೇ (ಸ್ಯಾ.)].
‘‘ಕಿಞ್ಚಿ ¶ ಸಿಪ್ಪನ್ತಿ ತಸ್ಸಾಹಂ, ‘ಜಾನಾಮೀ’ತಿ ಚ ಅಬ್ರವಿಂ;
ಮತಸೀಸಂ ¶ ¶ ವನಚ್ಛುದ್ಧಂ, ಅಪಿ ಬಾರಸವಸ್ಸಿಕಂ;
ತವ ವಿಜ್ಜಾವಿಸೇಸೇನ, ಸಚೇ ಸಕ್ಕೋಸಿ ವಾಚಯ [ಭಾಸಯ (ಸೀ. ಪೀ.)].
‘‘ಆಮೋತಿ ಮೇ ಪಟಿಞ್ಞಾತೇ, ತೀಣಿ ಸೀಸಾನಿ ದಸ್ಸಯಿ;
ನಿರಯನರದೇವೇಸು, ಉಪಪನ್ನೇ ಅವಾಚಯಿಂ.
‘‘ತದಾ ಖೀಣಾಸವಸ್ಸೇವ [ಪಚ್ಚೇಕಬುದ್ಧಸ್ಸ (ಸೀ. ಪೀ.)], ಸೀಸಂ ದಸ್ಸೇಸಿ ನಾಯಕೋ;
ತತೋಹಂ ವಿಹತಾರಬ್ಭೋ, ಪಬ್ಬಜ್ಜಂ ಸಮಯಾಚಿಸಂ.
‘‘ಪಬ್ಬಜಿತ್ವಾನ ಸುಗತಂ, ಸನ್ಥವಾಮಿ ತಹಿಂ ತಹಿಂ;
ತತೋ ಮಂ ಕಬ್ಬವಿತ್ತೋಸಿ [ಕವಿಚಿತ್ತೋತಿ (ಸ್ಯಾ. ಪೀ.)], ಉಜ್ಝಾಯನ್ತಿಹ ಭಿಕ್ಖವೋ.
‘‘ತತೋ ¶ ವೀಮಂಸನತ್ಥಂ ಮೇ, ಆಹ ಬುದ್ಧೋ ವಿನಾಯಕೋ;
ತಕ್ಕಿಕಾ ಪನಿಮಾ ಗಾಥಾ, ಠಾನಸೋ ಪಟಿಭನ್ತಿ ತಂ.
‘‘ನ ಕಬ್ಬವಿತ್ತೋಹಂ ವೀರ, ಠಾನಸೋ ಪಟಿಭನ್ತಿ ಮಂ;
ತೇನ ಹಿ ದಾನಿ ವಙ್ಗೀಸ, ಠಾನಸೋ ಸನ್ಥವಾಹಿ ಮಂ.
‘‘ತದಾಹಂ ಸನ್ಥವಿಂ ವೀರಂ, ಗಾಥಾಹಿ ಇಸಿಸತ್ತಮಂ;
ಠಾನಸೋ ಮೇ ತದಾ ತುಟ್ಠೋ, ಜಿನೋ ಅಗ್ಗೇ ಠಪೇಸಿ ಮಂ.
‘‘ಪಟಿಭಾನೇನ ಚಿತ್ತೇನ, ಅಞ್ಞೇಸಮತಿಮಞ್ಞಹಂ;
ಪೇಸಲೇ ತೇನ ಸಂವಿಗ್ಗೋ, ಅರಹತ್ತಮಪಾಪುಣಿಂ.
‘‘‘ಪಟಿಭಾನವತಂ ಅಗ್ಗೋ, ಅಞ್ಞೋ ಕೋಚಿ ನ ವಿಜ್ಜತಿ;
ಯಥಾಯಂ ಭಿಕ್ಖು ವಙ್ಗೀಸೋ, ಏವಂ ಧಾರೇಥ ಭಿಕ್ಖವೋ’.
‘‘ಸತಸಹಸ್ಸೇ ಕತಂ ಕಮ್ಮಂ, ಫಲಂ ದಸ್ಸೇಸಿ ಮೇ ಇಧ;
ಸುಮುತ್ತೋ ಸರವೇಗೋವ ಕಿಲೇಸೇ ಝಾಪಯಿಂ ಮಮ.
‘‘ಕಿಲೇಸಾ ¶ ಝಾಪಿತಾ ಮಯ್ಹಂ…ಪೇ… ವಿಹರಾಮಿ ಅನಾಸವೋ.
‘‘ಸ್ವಾಗತಂ ವತ ಮೇ ಆಸಿ…ಪೇ… ಕತಂ ಬುದ್ಧಸ್ಸ ಸಾಸನಂ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ವಙ್ಗೀಸೋ ಥೇರೋ ಇಮಾ ಗಾಥಾಯೋ
ಅಭಾಸಿತ್ಥಾತಿ.
ವಙ್ಗೀಸತ್ಥೇರಸ್ಸಾಪದಾನಂ ಚತುತ್ಥಂ.
೫. ನನ್ದಕತ್ಥೇರಅಪದಾನಂ
‘‘ಪದುಮುತ್ತರೋ ¶ ¶ ನಾಮ ಜಿನೋ, ಸಬ್ಬಧಮ್ಮೇಸು ಚಕ್ಖುಮಾ;
ಇತೋ ಸತಸಹಸ್ಸಮ್ಹಿ, ಕಪ್ಪೇ ಉಪ್ಪಜ್ಜಿ ನಾಯಕೋ.
‘‘ಹಿತಾಯ ಸಬ್ಬಸತ್ತಾನಂ, ಸುಖಾಯ ವದತಂ ವರೋ;
ಅತ್ಥಾಯ ಪುರಿಸಾಜಞ್ಞೋ, ಪಟಿಪನ್ನೋ ಸದೇವಕೇ.
‘‘ಯಸಗ್ಗಪತ್ತೋ ಸಿರಿಮಾ, ಕಿತ್ತಿವಣ್ಣಭತೋ [ಕಿತ್ತಿವಣ್ಣ ಭಟೋ (ಸ್ಯಾ. ಕ.)] ಜಿನೋ;
ಪೂಜಿತೋ ಸಬ್ಬಲೋಕಸ್ಸ, ದಿಸಾ ಸಬ್ಬಾಸು ವಿಸ್ಸುತೋ.
‘‘ಉತ್ತಿಣ್ಣವಿಚಿಕಿಚ್ಛೋ ¶ ಸೋ, ವೀತಿವತ್ತಕಥಂಕಥೋ;
ಪರಿಪುಣ್ಣಮನಸಙ್ಕಪ್ಪೋ, ಪತ್ತೋ ಸಮ್ಬೋಧಿಮುತ್ತಮಂ.
‘‘ಅನುಪ್ಪನ್ನಸ್ಸ ಮಗ್ಗಸ್ಸ, ಉಪ್ಪಾದೇತಾ ನರುತ್ತಮೋ;
ಅನಕ್ಖಾತಞ್ಚ ಅಕ್ಖಾಸಿ, ಅಸಞ್ಜಾತಞ್ಚ ಸಞ್ಜನೀ.
‘‘ಮಗ್ಗಞ್ಞೂ ¶ ಮಗ್ಗವಿದೂ [ಸೋ ಮಗ್ಗವಿದೂ (ಸೀ. ಪೀ.)] ಚ, ಮಗ್ಗಕ್ಖಾಯೀ ನರಾಸಭೋ;
ಮಗ್ಗಸ್ಸ ಕುಸಲೋ ಸತ್ಥಾ, ಸಾರಥೀನಂ ವರುತ್ತಮೋ [ನರುತ್ತಮೋ (ಸ್ಯಾ.)].
‘‘ತದಾ ಮಹಾಕಾರುಣಿಕೋ, ಧಮ್ಮಂ ದೇಸೇಸಿ ನಾಯಕೋ;
ನಿಮುಗ್ಗೇ ಕಾಮಪಙ್ಕಮ್ಹಿ [ಮೋಹಪಙ್ಕಮ್ಹಿ (ಸೀ. ಸ್ಯಾ.), ಮೋಹಮಗ್ಗಮ್ಹಿ (ಪೀ.)], ಸಮುದ್ಧರತಿ ಪಾಣಿನೇ.
‘‘ಭಿಕ್ಖುನೀನಂ ಓವದನೇ, ಸಾವಕಂ ಸೇಟ್ಠಸಮ್ಮತಂ;
ವಣ್ಣಯಂ ಏತದಗ್ಗಮ್ಹಿ, ಪಞ್ಞಪೇಸಿ ಮಹಾಮುನಿ.
‘‘ತಂ ಸುತ್ವಾಹಂ ಪಮುದಿತೋ, ನಿಮನ್ತೇತ್ವಾ ತಥಾಗತಂ;
ಭೋಜಯಿತ್ವಾ ಸಸಙ್ಘಂ ತಂ, ಪತ್ಥಯಿಂ ಠಾನಮುತ್ತಮಂ.
‘‘ತದಾ ಪಮುದಿತೋ ನಾಥೋ, ಮಂ ಅವೋಚ ಮಹಾಇಸಿ;
‘ಸುಖೀ ಭವಸ್ಸು ದೀಘಾವು [ದೀಘಾಯು (ಸೀ. ಸ್ಯಾ.)], ಲಚ್ಛಸೇ ತಂ ಮನೋರಥಂ.
‘‘‘ಸತಸಹಸ್ಸಿತೋ ಕಪ್ಪೇ, ಓಕ್ಕಾಕಕುಲಸಮ್ಭವೋ;
ಗೋತಮೋ ನಾಮ ಗೋತ್ತೇನ, ಸತ್ಥಾ ಲೋಕೇ ಭವಿಸ್ಸತಿ.
‘‘‘ತಸ್ಸ ಧಮ್ಮೇಸು ದಾಯಾದೋ, ಓರಸೋ ಧಮ್ಮನಿಮ್ಮಿತೋ;
ನನ್ದಕೋ ನಾಮ ನಾಮೇನ, ಹೇಸ್ಸತಿ ಸತ್ಥು ಸಾವಕೋ’.
‘‘ತೇನ ಕಮ್ಮೇನ ಸುಕತೇನ, ಚೇತನಾಪಣಿಧೀಹಿ ಚ;
ಜಹಿತ್ವಾ ಮಾನುಸಂ ದೇಹಂ, ತಾವತಿಂಸೂಪಗೋ ಅಹಂ.
‘‘ಪಚ್ಛಿಮೇ ¶ ಚ ಭವೇ ದಾನಿ, ಜಾತೋ ಸೇಟ್ಠಿಕುಲೇ ಅಹಂ;
ಸಾವತ್ಥಿಯಂ ಪುರೇ ವರೇ, ಇದ್ಧೇ ಫೀತೇ ಮಹದ್ಧನೇ.
‘‘ಪುರಪ್ಪವೇಸೇ ಸುಗತಂ, ದಿಸ್ವಾ ವಿಮ್ಹಿತಮಾನಸೋ;
ಜೇತಾರಾಮಪಟಿಗ್ಗಾಹೇ, ಪಬ್ಬಜಿಂ ಅನಗಾರಿಯಂ.
‘‘ನಚಿರೇನೇವ ¶ ¶ ಕಾಲೇನ, ಅರಹತ್ತಮಪಾಪುಣಿಂ;
ತತೋಹಂ ತಿಣ್ಣಸಂಸಾರೋ, ಸಾಸಿತೋ ಸಬ್ಬದಸ್ಸಿನಾ.
‘‘ಭಿಕ್ಖುನೀನಂ ¶ ಧಮ್ಮಕಥಂ, ಪಟಿಪುಚ್ಛಾಕರಿಂ ಅಹಂ;
ಸಾಸಿತಾ ತಾ ಮಯಾ ಸಬ್ಬಾ, ಅಭವಿಂಸು ಅನಾಸವಾ.
‘‘ಸತಾನಿ ಪಞ್ಚನೂನಾನಿ, ತದಾ ತುಟ್ಠೋ ಮಹಾಹಿತೋ;
ಭಿಕ್ಖುನೀನಂ ಓವದತಂ, ಅಗ್ಗಟ್ಠಾನೇ ಠಪೇಸಿ ಮಂ.
‘‘ಸತಸಹಸ್ಸೇ ಕತಂ ಕಮ್ಮಂ, ಫಲಂ ದಸ್ಸೇಸಿ ಮೇ ಇಧ;
ಸುಮುತ್ತೋ ಸರವೇಗೋವ, ಕಿಲೇಸೇ ಝಾಪಯಿಂ ಮಮ.
‘‘ಕಿಲೇಸಾ ಝಾಪಿತಾ ಮಯ್ಹಂ…ಪೇ… ವಿಹರಾಮಿ ಅನಾಸವೋ.
‘‘ಸ್ವಾಗತಂ ವತ ಮೇ ಆಸಿ…ಪೇ… ಕತಂ ಬುದ್ಧಸ್ಸ ಸಾಸನಂ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ನನ್ದಕೋ ಥೇರೋ ಇಮಾ ಗಾಥಾಯೋ
ಅಭಾಸಿತ್ಥಾತಿ.
ನನ್ದಕತ್ಥೇರಸ್ಸಾಪದಾನಂ ಪಞ್ಚಮಂ.
೬. ಕಾಳುದಾಯಿತ್ಥೇರಅಪದಾನಂ
‘‘ಪದುಮುತ್ತರೋ ನಾಮ ಜಿನೋ, ಸಬ್ಬಧಮ್ಮೇಸು ಚಕ್ಖುಮಾ;
ಇತೋ ಸತಸಹಸ್ಸಮ್ಹಿ, ಕಪ್ಪೇ ಉಪ್ಪಜ್ಜಿ ನಾಯಕೋ.
‘‘ನಾಯಕಾನಂ ¶ ವರೋ ಸತ್ಥಾ, ಗುಣಾಗುಣವಿದೂ ಜಿನೋ;
ಕತಞ್ಞೂ ಕತವೇದೀ ಚ, ತಿತ್ಥೇ ಯೋಜೇತಿ ಪಾಣಿನೇ [ಪಾಣಿನೋ (ಸೀ. ಸ್ಯಾ ಪೀ.)].
‘‘ಸಬ್ಬಞ್ಞುತೇನ ಞಾಣೇನ, ತುಲಯಿತ್ವಾ ದಯಾಸಯೋ;
ದೇಸೇತಿ ಪವರಂ ಧಮ್ಮಂ, ಅನನ್ತಗುಣಸಞ್ಚಯೋ.
‘‘ಸ ¶ ಕದಾಚಿ ಮಹಾವೀರೋ, ಅನನ್ತಜಿನಸಂಸರಿ [ಅನನ್ತಜನಸಂಸದಿ (ಸೀ.), ಅನನ್ತಜನಸಂಸುಧಿ (ಸ್ಯಾ.), ಅನನ್ತಜನಸಂಸರೀ (ಪೀ.)];
ದೇಸೇತಿ ಮಧುರಂ ಧಮ್ಮಂ, ಚತುಸಚ್ಚೂಪಸಞ್ಹಿತಂ.
‘‘ಸುತ್ವಾನ ತಂ ಧಮ್ಮವರಂ, ಆದಿಮಜ್ಝನ್ತಸೋಭಣಂ;
ಪಾಣಸತಸಹಸ್ಸಾನಂ, ಧಮ್ಮಾಭಿಸಮಯೋ ಅಹು.
‘‘ನಿನ್ನಾದಿತಾ ತದಾ ಭೂಮಿ, ಗಜ್ಜಿಂಸು ಚ ಪಯೋಧರಾ;
ಸಾಧುಕಾರಂ ಪವತ್ತಿಂಸು, ದೇವಬ್ರಹ್ಮನರಾಸುರಾ.
‘‘‘ಅಹೋ ¶ ಕಾರುಣಿಕೋ ಸತ್ಥಾ, ಅಹೋ ಸದ್ಧಮ್ಮದೇಸನಾ;
ಅಹೋ ಭವಸಮುದ್ದಮ್ಹಿ, ನಿಮುಗ್ಗೇ ಉದ್ಧರೀ ಜಿನೋ’.
‘‘ಏವಂ ಪವೇದಜಾತೇಸು, ಸನರಾಮರಬ್ರಹ್ಮಸು;
ಕುಲಪ್ಪಸಾದಕಾನಗ್ಗಂ, ಸಾವಕಂ ವಣ್ಣಯೀ ಜಿನೋ.
‘‘ತದಾಹಂ ಹಂಸವತಿಯಂ, ಜಾತೋಮಚ್ಚಕುಲೇ ಅಹುಂ;
ಪಾಸಾದಿಕೋ ದಸ್ಸನಿಯೋ, ಪಹೂತಧನಧಞ್ಞವಾ.
‘‘ಹಂಸಾರಾಮಮುಪೇಚ್ಚಾಹಂ ¶ , ವನ್ದಿತ್ವಾ ತಂ ತಥಾಗತಂ;
ಸುಣಿತ್ವಾ ಮಧುರಂ ಧಮ್ಮಂ, ಕಾರಂ ಕತ್ವಾ ಚ ತಾದಿನೋ.
‘‘ನಿಪಚ್ಚ ಪಾದಮೂಲೇಹಂ, ಇಮಂ ವಚನಮಬ್ರವಿಂ;
‘ಕುಲಪ್ಪಸಾದಕಾನಗ್ಗೋ, ಯೋ ತಯಾ ಸನ್ಥುತೋ [ಯೋ ತವ ಸಾಸನೇ (ಸ್ಯಾ.)] ಮುನೇ.
‘‘‘ತಾದಿಸೋ ¶ ಹೋಮಹಂ ವೀರ [ತಾದಿಸೋಹಂ ಮಹಾವೀರ (ಸ್ಯಾ. ಕ.)], ಬುದ್ಧಸೇಟ್ಠಸ್ಸ ಸಾಸನೇ’;
ತದಾ ಮಹಾಕಾರುಣಿಕೋ, ಸಿಞ್ಚನ್ತೋ ವಾ ಮತೇನ ಮಂ.
‘‘ಆಹ ಮಂ ‘ಪುತ್ತ ಉತ್ತಿಟ್ಠ, ಲಚ್ಛಸೇ ತಂ ಮನೋರಥಂ;
ಕಥಂ ನಾಮ ಜಿನೇ ಕಾರಂ, ಕತ್ವಾನ ವಿಫಲೋ ಸಿಯಾ.
‘‘‘ಸತಸಹಸ್ಸಿತೋ ಕಪ್ಪೇ, ಓಕ್ಕಾಕಕುಲಸಮ್ಭವೋ;
ಗೋತಮೋ ನಾಮ ಗೋತ್ತೇನ, ಸತ್ಥಾ ಲೋಕೇ ಭವಿಸ್ಸತಿ.
‘‘‘ತಸ್ಸ ಧಮ್ಮೇಸು ದಾಯಾದೋ, ಓರಸೋ ಧಮ್ಮನಿಮ್ಮಿತೋ;
ಉದಾಯಿ ನಾಮ ನಾಮೇನ, ಹೇಸ್ಸತಿ ಸತ್ಥು ಸಾವಕೋ’.
‘‘ತಂ ಸುತ್ವಾ ಮುದಿತೋ ಹುತ್ವಾ, ಯಾವಜೀವಂ ತದಾ ಜಿನಂ;
ಮೇತ್ತಚಿತ್ತೋ ಪರಿಚರಿಂ, ಪಚ್ಚಯೇಹಿ ವಿನಾಯಕಂ.
‘‘ತೇನ ಕಮ್ಮವಿಪಾಕೇನ, ಚೇತನಾಪಣಿಧೀಹಿ ಚ;
ಜಹಿತ್ವಾ ಮಾನುಸಂ ದೇಹಂ, ತಾವತಿಂಸಮಗಚ್ಛಹಂ.
‘‘ಪಚ್ಛಿಮೇ ¶ ಚ ಭವೇ ದಾನಿ, ರಮ್ಮೇ ಕಪಿಲವತ್ಥವೇ;
ಜಾತೋ ಮಹಾಮಚ್ಚಕುಲೇ, ಸುದ್ಧೋದನಮಹೀಪತೇ [ಸುದ್ಧೋದನೋ ಮಹೀಪತಿ (ಸ್ಯಾ.)].
‘‘ತದಾ ಅಜಾಯಿ ಸಿದ್ಧತ್ಥೋ, ರಮ್ಮೇ ಲುಮ್ಬಿನಿಕಾನನೇ;
ಹಿತಾಯ ಸಬ್ಬಲೋಕಸ್ಸ, ಸುಖಾಯ ಚ ನರಾಸಭೋ.
‘‘ತದಹೇವ ¶ ಅಹಂ ಜಾತೋ, ಸಹ ತೇನೇವ ವಡ್ಢಿತೋ;
ಪಿಯೋ ಸಹಾಯೋ ದಯಿತೋ, ವಿಯತ್ತೋ ನೀತಿಕೋವಿದೋ.
‘‘ಏಕೂನತಿಂಸೋ ವಯಸಾ, ನಿಕ್ಖಮಿತ್ವಾ ಅಗಾರತೋ [ನಿಕ್ಖನ್ತೋ ಪಬ್ಬಜಿತ್ಥಸೋ (ಸೀ. ಸ್ಯಾ.)];
ಛಬ್ಬಸ್ಸಂ ವೀತಿನಾಮೇತ್ವಾ, ಆಸಿ ಬುದ್ಧೋ ವಿನಾಯಕೋ.
‘‘ಜೇತ್ವಾ ¶ ಸಸೇನಕಂ ಮಾರಂ, ಖೇಪಯಿತ್ವಾನ ಆಸವೇ;
ಭವಣ್ಣವಂ ತರಿತ್ವಾನ, ಬುದ್ಧೋ ಆಸಿ ಸದೇವಕೇ.
‘‘ಇಸಿವ್ಹಯಂ ಗಮಿತ್ವಾನ [ಇಸಿವ್ಹಯಂ ಪತನಂ ಗನ್ತ್ವಾ (ಸ್ಯಾ.)], ವಿನೇತ್ವಾ ಪಞ್ಚವಗ್ಗಿಯೇ;
ತತೋ ವಿನೇಸಿ ಭಗವಾ, ಗನ್ತ್ವಾ ಗನ್ತ್ವಾ ತಹಿಂ ತಹಿಂ.
‘‘ವೇನೇಯ್ಯೇ ವಿನಯನ್ತೋ ಸೋ, ಸಙ್ಗಣ್ಹನ್ತೋ ಸದೇವಕಂ;
ಉಪೇಚ್ಚ ಮಗಧೇ ಗಿರಿಂ [ಮಾಗದಗಿರಿಂ (ಸೀ.), ಮಙ್ಗಲಾಗಿರಿಂ (ಪೀ.)], ವಿಹರಿತ್ಥ ತದಾ ಜಿನೋ.
‘‘ತದಾ ¶ ಸುದ್ಧೋದನೇನಾಹಂ, ಭೂಮಿಪಾಲೇನ ಪೇಸಿತೋ;
ಗನ್ತ್ವಾ ದಿಸ್ವಾ ದಸಬಲಂ, ಪಬ್ಬಜಿತ್ವಾರಹಾ ಅಹುಂ.
‘‘ತದಾ ಮಹೇಸಿಂ ಯಾಚಿತ್ವಾ, ಪಾಪಯಿಂ ಕಪಿಲವ್ಹಯಂ;
ತತೋ ಪುರಾಹಂ ಗನ್ತ್ವಾನ, ಪಸಾದೇಸಿಂ ಮಹಾಕುಲಂ.
‘‘ಜಿನೋ ತಸ್ಮಿಂ ಗುಣೇ ತುಟ್ಠೋ, ಮಂ ಮಹಾಪರಿಸಾಯ ಸೋ [ಮಮಾಹ ಪುರಿಸಾಸಭೋ (ಸ್ಯಾ. ಪೀ.)];
ಕುಲಪ್ಪಸಾದಕಾನಗ್ಗಂ, ಪಞ್ಞಾಪೇಸಿ ವಿನಾಯಕೋ.
‘‘ಕಿಲೇಸಾ ಝಾಪಿತಾ ಮಯ್ಹಂ…ಪೇ… ವಿಹರಾಮಿ ಅನಾಸವೋ.
‘‘ಸ್ವಾಗತಂ ವತ ಮೇ ಆಸಿ…ಪೇ… ಕತಂ ಬುದ್ಧಸ್ಸ ಸಾಸನಂ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಕಾಳುದಾಯಿಥೇರೋ ಇಮಾ ಗಾಥಾಯೋ
ಅಭಾಸಿತ್ಥಾತಿ.
ಕಾಳುದಾಯಿತ್ಥೇರಸ್ಸಾಪದಾನಂ ಛಟ್ಠಂ.
೭. ಅಭಯತ್ಥೇರಅಪದಾನಂ
‘‘ಪದುಮುತ್ತರೋ ¶ ¶ ನಾಮ ಜಿನೋ, ಸಬ್ಬಧಮ್ಮೇಸು ಚಕ್ಖುಮಾ;
ಇತೋ ಸತಸಹಸ್ಸಮ್ಹಿ, ಕಪ್ಪೇ ಉಪ್ಪಜ್ಜಿ ನಾಯಕೋ.
‘‘ಸರಣಗಮನೇ ¶ ಕಿಞ್ಚಿ, ನಿವೇಸೇಸಿ ತಥಾಗತೋ;
ಕಿಞ್ಚಿ ಸೀಲೇ ನಿವೇಸೇಸಿ, ದಸಕಮ್ಮಪಥುತ್ತಮೇ.
‘‘ದೇತಿ ಕಸ್ಸಚಿ ಸೋ ವೀರೋ, ಸಾಮಞ್ಞಫಲಮುತ್ತಮಂ;
ಸಮಾಪತ್ತೀ ತಥಾ ಅಟ್ಠ, ತಿಸ್ಸೋ ವಿಜ್ಜಾ ಪವಚ್ಛತಿ.
‘‘ಛಳಭಿಞ್ಞಾಸು ಯೋಜೇಸಿ, ಕಿಞ್ಚಿ ಸತ್ತಂ ನರುತ್ತಮೋ;
ದೇತಿ ಕಸ್ಸಚಿ ನಾಥೋ ಸೋ, ಚತಸ್ಸೋ ಪಟಿಸಮ್ಭಿದಾ.
‘‘ಬೋಧನೇಯ್ಯಂ ಪಜಂ ದಿಸ್ವಾ, ಅಸಙ್ಖೇಯ್ಯಮ್ಪಿ ಯೋಜನಂ [ಅಸಙ್ಖೇಯ್ಯೇಪಿ ಯೋಜನೇ ಸೀ. ಸ್ಯಾ. ಪೀ.)];
ಖಣೇನ ಉಪಗನ್ತ್ವಾನ, ವಿನೇತಿ ನರಸಾರಥಿ.
‘‘ತದಾಹಂ ಹಂಸವತಿಯಂ, ಅಹೋಸಿಂ ಬ್ರಾಹ್ಮಣತ್ರಜೋ;
ಪಾರಗೂ ಸಬ್ಬವೇದಾನಂ, ವೇಯ್ಯಾಕರಣಸಮ್ಮತೋ.
‘‘ನಿರುತ್ತಿಯಾ ಚ ಕುಸಲೋ, ನಿಘಣ್ಡುಮ್ಹಿ ವಿಸಾರದೋ;
ಪದಕೋ ಕೇಟುಭವಿದೂ, ಛನ್ದೋವಿಚಿತಿಕೋವಿದೋ.
‘‘ಜಙ್ಘಾವಿಹಾರಂ ವಿಚರಂ, ಹಂಸಾರಾಮಮುಪೇಚ್ಚಹಂ;
ಅದ್ದಸಂ ವರದಂ [ವದತಂ (ಸೀ. ಪೀ.), ಪವರಂ (ಸ್ಯಾ.)] ಸೇಟ್ಠಂ, ಮಹಾಜನಪುರಕ್ಖತಂ.
‘‘ದೇಸೇನ್ತಂ ವಿರಜಂ ಧಮ್ಮಂ, ಪಚ್ಚನೀಕಮತೀ ಅಹಂ;
ಉಪೇತ್ವಾ ತಸ್ಸ ಕಲ್ಯಾಣಂ, ಸುತ್ವಾನ ವಿಮಲಂ ಅಹಂ [ವಾಕ್ಯಾನಿ, ಸುತ್ವಾನ ವಿಮಲಾನಹಂ (ಸೀ. ಸ್ಯಾ. ಪೀ.)].
‘‘ಬ್ಯಾಹತಂ ¶ ¶ ಪುನರುತ್ತಂ ವಾ, ಅಪತ್ಥಂ ವಾ ನಿರತ್ಥಕಂ;
ನಾದ್ದಸಂ ತಸ್ಸ ಮುನಿನೋ, ತತೋ ಪಬ್ಬಜಿತೋ ಅಹಂ.
‘‘ನಚಿರೇನೇವ ಕಾಲೇನ, ಸಬ್ಬಸತ್ತವಿಸಾರದೋ;
ನಿಪುಣೋ ಬುದ್ಧವಚನೇ, ಅಹೋಸಿಂ ಗುಣಿಸಮ್ಮತೋ.
‘‘ತದಾ ಚತಸ್ಸೋ ಗಾಥಾಯೋ, ಗನ್ಥಯಿತ್ವಾ ಸುಬ್ಯಞ್ಜನಾ;
ಸನ್ಥವಿತ್ವಾ ತಿಲೋಕಗ್ಗಂ, ದೇಸಯಿಸ್ಸಂ ದಿನೇ ದಿನೇ.
‘‘ವಿರತ್ತೋಸಿ ಮಹಾವೀರೋ, ಸಂಸಾರೇ ಸಭಯೇ ವಸಂ;
ಕರುಣಾಯ ನ ನಿಬ್ಬಾಯಿ, ತತೋ ಕಾರುಣಿಕೋ ಮುನಿ.
‘‘ಪುಥುಜ್ಜನೋ ¶ ವಯೋ ಸನ್ತೋ, ನ ಕಿಲೇಸವಸೋ ಅಹು;
ಸಮ್ಪಜಾನೋ ಸತಿಯುತ್ತೋ, ತಸ್ಮಾ ಏಸೋ ಅಚಿನ್ತಿಯೋ.
‘‘ದುಬ್ಬಲಾನಿ ¶ ಕಿಲೇಸಾನಿ, ಯಸ್ಸಾಸಯಗತಾನಿ ಮೇ;
ಞಾಣಗ್ಗಿಪರಿದಡ್ಢಾನಿ, ನ ಖೀಯಿಂಸು ತಮಬ್ಭುತಂ.
‘‘ಯೋ ಸಬ್ಬಲೋಕಸ್ಸ ಗರು, ಲೋಕೋ [ಲೋಕೇ (ಸ್ಯಾ. ಕ.)] ಯಸ್ಸ ತಥಾ ಗರು;
ತಥಾಪಿ ಲೋಕಾಚರಿಯೋ, ಲೋಕೋ ತಸ್ಸಾನುವತ್ತಕೋ.
‘‘ಏವಮಾದೀಹಿ ಸಮ್ಬುದ್ಧಂ, ಕಿತ್ತಯಂ ಧಮ್ಮದೇಸನಂ;
ಯಾವಜೀವಂ ಕರಿತ್ವಾನ, ಗತೋ ಸಗ್ಗಂ ತತೋ ಚುತೋ.
‘‘ಸತಸಹಸ್ಸಿತೋ ಕಪ್ಪೇ, ಯಂ ಬುದ್ಧಮಭಿಕಿತ್ತಯಿಂ;
ದುಗ್ಗತಿಂ ನಾಭಿಜಾನಾಮಿ, ಕಿತ್ತನಾಯ ಇದಂ ಫಲಂ.
‘‘ದೇವಲೋಕೇ ಮಹಾರಜ್ಜಂ, ಪಾದೇಸಿಂ ಕಞ್ಚನಗ್ಘಿಯಂ [ದಿಬ್ಬಾನುಭೋಜಹಂ ತದಾ (ಸ್ಯಾ.), ರಜ್ಜಂ ಪಾದೇಸಿ ಕಂಚಯಂ (ಸೀ.)];
ಚಕ್ಕವತ್ತೀ ಮಹಾರಜ್ಜಂ, ಬಹುಸೋನುಭವಿಂ ಅಹಂ.
‘‘ದುವೇ ¶ ಭವೇ ಪಜಾಯಾಮಿ, ದೇವತ್ತೇ ಅಥ ಮಾನುಸೇ;
ಅಞ್ಞಂ ಗತಿಂ ನ ಜಾನಾಮಿ, ಕಿತ್ತನಾಯ ಇದಂ ಫಲಂ.
‘‘ದುವೇ ಕುಲೇ ಪಜಾಯಾಮಿ, ಖತ್ತಿಯೇ ಅಥ ಬ್ರಾಹ್ಮಣೇ;
ನೀಚೇ ಕುಲೇ ನ ಜಾಯಾಮಿ, ಕಿತ್ತನಾಯ ಇದಂ ಫಲಂ.
‘‘ಪಚ್ಛಿಮೇ ಚ ಭವೇ ದಾನಿ, ಗಿರಿಬ್ಬಜಪುರುತ್ತಮೇ;
ರಞ್ಞೋಹಂ ಬಿಮ್ಬಿಸಾರಸ್ಸ, ಪುತ್ತೋ ನಾಮೇನ ಚಾಭಯೋ.
‘‘ಪಾಪಮಿತ್ತವಸಂ ಗನ್ತ್ವಾ, ನಿಗಣ್ಠೇನ ವಿಮೋಹಿತೋ;
ಪೇಸಿತೋ ನಾಟಪುತ್ತೇನ, ಬುದ್ಧಸೇಟ್ಠಮುಪೇಚ್ಚಹಂ.
‘‘ಪುಚ್ಛಿತ್ವಾ ¶ ನಿಪುಣಂ ಪಞ್ಹಂ, ಸುತ್ವಾ ಬ್ಯಾಕರಣುತ್ತಮಂ;
ಪಬ್ಬಜಿತ್ವಾನ ನಚಿರಂ, ಅರಹತ್ತಮಪಾಪುಣಿಂ.
‘‘ಕಿತ್ತಯಿತ್ವಾ ಜಿನವರಂ, ಕಿತ್ತಿತೋ ಹೋಮಿ ಸಬ್ಬದಾ;
ಸುಗನ್ಧದೇಹವದನೋ, ಆಸಿಂ ಸುಖಸಮಪ್ಪಿತೋ.
‘‘ತಿಕ್ಖಹಾಸಲಹುಪಞ್ಞೋ, ಮಹಾಪಞ್ಞೋ ತಥೇವಹಂ;
ವಿಚಿತ್ತಪಟಿಭಾನೋ ಚ, ತಸ್ಸ ಕಮ್ಮಸ್ಸ ವಾಹಸಾ.
‘‘ಅಭಿತ್ಥವಿತ್ವಾ ಪದುಮುತ್ತರಾಹಂ, ಪಸನ್ನಚಿತ್ತೋ ಅಸಮಂ ಸಯಮ್ಭುಂ;
ನ ಗಚ್ಛಿ ಕಪ್ಪಾನಿ ಅಪಾಯಭೂಮಿಂ, ಸತಂ ಸಹಸ್ಸಾನಿ ಬಲೇನ ತಸ್ಸ.
‘‘ಕಿಲೇಸಾ ¶ ¶ ಝಾಪಿತಾ ಮಯ್ಹಂ…ಪೇ… ವಿಹರಾಮಿ ಅನಾಸವೋ.
‘‘ಸ್ವಾಗತಂ ¶ ವತ ಮೇ ಆಸಿ…ಪೇ… ಕತಂ ಬುದ್ಧಸ್ಸ ಸಾಸನಂ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಅಭಯೋ ಥೇರೋ ಇಮಾ ಗಾಥಾಯೋ
ಅಭಾಸಿತ್ಥಾತಿ.
ಅಭಯತ್ಥೇರಸ್ಸಾಪದಾನಂ ಸತ್ತಮಂ.
೮. ಲೋಮಸಕಙ್ಗಿಯತ್ಥೇರಅಪದಾನಂ
‘‘ಇಮಮ್ಹಿ ಭದ್ದಕೇ ಕಪ್ಪೇ, ಬ್ರಹ್ಮಬನ್ಧು ಮಹಾಯಸೋ;
ಕಸ್ಸಪೋ ನಾಮ ಗೋತ್ತೇನ, ಉಪ್ಪಜ್ಜಿ ವದತಂ ವರೋ.
‘‘ತದಾಹಂ ಚನ್ದನೋ ಚೇವ, ಪಬ್ಬಜಿತ್ವಾನ ಸಾಸನೇ;
ಆಪಾಣಕೋಟಿಕಂ ಧಮ್ಮಂ, ಪೂರಯಿತ್ವಾನ ಸಾಸನೇ.
‘‘ತತೋ ಚುತಾ ಸನ್ತುಸಿತಂ, ಉಪಪನ್ನಾ ಉಭೋ ಮಯಂ;
ತತ್ಥ ದಿಬ್ಬೇಹಿ ನಚ್ಚೇಹಿ, ಗೀತೇಹಿ ವಾದಿತೇಹಿ ಚ.
‘‘ರೂಪಾದಿದಸಹಙ್ಗೇಹಿ, ಅಭಿಭೋತ್ವಾನ ಸೇಸಕೇ;
ಯಾವತಾಯುಂ ವಸಿತ್ವಾನ, ಅನುಭೋತ್ವಾ ಮಹಾಸುಖಂ.
‘‘ತತೋ ಚವಿತ್ವಾ ತಿದಸಂ, ಚನ್ದನೋ ಉಪಪಜ್ಜಥ;
ಅಹಂ ಕಪಿಲವತ್ಥುಸ್ಮಿಂ, ಅಜಾಯಿಂ ಸಾಕಿಯತ್ರಜೋ.
‘‘ಯದಾ ಉದಾಯಿತ್ಥೇರೇನ, ಅಜ್ಝಿಟ್ಠೋ ಲೋಕನಾಯಕೋ;
ಅನುಕಮ್ಪಿಯ ಸಕ್ಯಾನಂ, ಉಪೇಸಿ ಕಪಿಲವ್ಹಯಂ.
‘‘ತದಾತಿಮಾನಿನೋ ¶ ಸಕ್ಯಾ, ನ ಬುದ್ಧಸ್ಸ ಗುಣಞ್ಞುನೋ;
ಪಣಮನ್ತಿ ನ ಸಮ್ಬುದ್ಧಂ, ಜಾತಿಥದ್ಧಾ ಅನಾದರಾ.
‘‘ತೇಸಂ ¶ ಸಙ್ಕಪ್ಪಮಞ್ಞಾಯ, ಆಕಾಸೇ ಚಙ್ಕಮೀ ಜಿನೋ;
ಪಜ್ಜುನ್ನೋ ವಿಯ ವಸ್ಸಿತ್ಥ, ಪಜ್ಜಲಿತ್ಥ ಯಥಾ ಸಿಖೀ.
‘‘ದಸ್ಸೇತ್ವಾ ರೂಪಮತುಲಂ, ಪುನ ಅನ್ತರಧಾಯಥ;
ಏಕೋಪಿ ಹುತ್ವಾ ಬಹುಧಾ, ಅಹೋಸಿ ಪುನರೇಕಕೋ.
‘‘ಅನ್ಧಕಾರಂ ¶ ¶ ಪಕಾಸಞ್ಚ, ದಸ್ಸಯಿತ್ವಾ ಅನೇಕಧಾ;
ಪಾಟಿಹೇರಂ ಕರಿತ್ವಾನ, ವಿನಯೀ ಞಾತಕೇ ಮುನಿ.
‘‘ಚಾತುದ್ದೀಪೋ ಮಹಾಮೇಘೋ, ತಾವದೇವ ಪವಸ್ಸಥ;
ತದಾ ಹಿ ಜಾತಕಂ ಬುದ್ಧೋ, ವೇಸ್ಸನ್ತರಮದೇಸಯಿ.
‘‘ತದಾ ತೇ ಖತ್ತಿಯಾ ಸಬ್ಬೇ, ನಿಹನ್ತ್ವಾ ಜಾತಿಜಂ ಮದಂ;
ಉಪೇಸುಂ ಸರಣಂ ಬುದ್ಧಂ, ಆಹ ಸುದ್ಧೋದನೋ ತದಾ.
‘‘‘ಇದಂ ತತಿಯಂ ತವ ಭೂರಿಪಞ್ಞ, ಪಾದಾನಿ ವನ್ದಾಮಿ ಸಮನ್ತಚಕ್ಖು;
ಯದಾಭಿಜಾತೋ ಪಥವೀ ಪಕಮ್ಪಯೀ, ಯದಾ ಚ ತಂ ನಜ್ಜಹಿ ಜಮ್ಬುಛಾಯಾ’.
‘‘ತದಾ ಬುದ್ಧಾನುಭಾವಂ ತಂ, ದಿಸ್ವಾ ವಿಮ್ಹಿತಮಾನಸೋ;
ಪಬ್ಬಜಿತ್ವಾನ ತತ್ಥೇವ, ನಿವಸಿಂ ಮಾತುಪೂಜಕೋ.
‘‘ಚನ್ದನೋ ದೇವಪುತ್ತೋ ಮಂ, ಉಪಗನ್ತ್ವಾನುಪುಚ್ಛಥ;
ಭದ್ದೇಕರತ್ತಸ್ಸ ತದಾ, ಸಙ್ಖೇಪವಿತ್ಥಾರಂ ನಯಂ.
‘‘ಚೋದಿತೋಹಂ ¶ ತದಾ ತೇನ, ಉಪೇಚ್ಚ ನರನಾಯಕಂ;
ಭದ್ದೇಕರತ್ತಂ ಸುತ್ವಾನ, ಸಂವಿಗ್ಗೋ ವನಮಾಮಕೋ.
‘‘ತದಾ ಮಾತರಮಪುಚ್ಛಿಂ, ವನೇ ವಚ್ಛಾಮಿ ಏಕಕೋ;
ಸುಖುಮಾಲೋತಿ ಮೇ ಮಾತಾ, ವಾರಯೀ ತಂ [ತೇ (ಸ್ಯಾ. ಪೀ. ಕ.)] ತದಾ ವಚಂ.
‘‘ಕಾಸಂ [ದಬ್ಬಂ (ಸೀ. ಸ್ಯಾ. ಪೀ.)] ಕುಸಂ ಪೋಟಕಿಲಂ, ಉಸೀರಂ ಮುಞ್ಜಪಬ್ಬಜಂ [ಮುಞ್ಜಬಬ್ಬಜಂ (ಸೀ. ಪೀ.)];
ಉರಸಾ ಪನುದಿಸ್ಸಾಮಿ, ವಿವೇಕಮನುಬ್ರೂಹಯಂ.
‘‘ತದಾ ವನಂ ಪವಿಟ್ಠೋಹಂ, ಸರಿತ್ವಾ ಜಿನಸಾಸನಂ;
ಭದ್ದೇಕರತ್ತಓವಾದಂ, ಅರಹತ್ತಮಪಾಪುಣಿಂ.
‘‘‘ಅತೀತಂ ¶ ನಾನ್ವಾಗಮೇಯ್ಯ, ನಪ್ಪಟಿಕಙ್ಖೇ ಅನಾಗತಂ;
ಯದತೀತಂ ಪಹೀನಂ ತಂ, ಅಪ್ಪತ್ತಞ್ಚ ಅನಾಗತಂ.
‘‘‘ಪಚ್ಚುಪ್ಪನ್ನಞ್ಚ ಯೋ ಧಮ್ಮಂ, ತತ್ಥ ತತ್ಥ ವಿಪಸ್ಸತಿ;
ಅಸಂಹೀರಂ ಅಸಂಕುಪ್ಪಂ, ತಂ ವಿದ್ವಾ ಮನುಬ್ರೂಹಯೇ.
‘‘‘ಅಜ್ಜೇವ ಕಿಚ್ಚಮಾತಪ್ಪಂ, ಕೋ ಜಞ್ಞಾ ಮರಣಂ ಸುವೇ;
ನ ಹಿ ನೋ ಸಙ್ಗರಂ [ಸಙ್ಕರಂ (ಕ.)] ತೇನ, ಮಹಾಸೇನೇನ ಮಚ್ಚುನಾ.
‘‘‘ಏವಂವಿಹಾರಿಂ ¶ ಆತಾಪಿಂ, ಅಹೋರತ್ತಮತನ್ದಿತಂ;
ತಂ ವೇ ಭದ್ದೇಕರತ್ತೋತಿ, ಸನ್ತೋ ಆಚಿಕ್ಖತೇ ಮುನಿ’.
‘‘ಕಿಲೇಸಾ ¶ ಝಾಪಿತಾ ಮಯ್ಹಂ…ಪೇ… ವಿಹರಾಮಿ ಅನಾಸವೋ.
‘‘ಸ್ವಾಗತಂ ವತ ಮೇ ಆಸಿ…ಪೇ… ಕತಂ ಬುದ್ಧಸ್ಸ ಸಾಸನಂ.
‘‘ಪಟಿಸಮ್ಭಿದಾ ¶ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಲೋಮಸಕಙ್ಗಿಯೋ [ಲೋಮಸಙ್ಖಿಯೋ (ಸ್ಯಾ. ಕ.)] ಥೇರೋ ಇಮಾ ಗಾಥಾಯೋ
ಅಭಾಸಿತ್ಥಾತಿ.
ಲೋಮಸಕಙ್ಗಿಯತ್ಥೇರಸ್ಸಾಪದಾನಂ ಅಟ್ಠಮಂ.
೯. ವನವಚ್ಛತ್ಥೇರಅಪದಾನಂ
‘‘ಇಮಮ್ಹಿ ಭದ್ದಕೇ ಕಪ್ಪೇ, ಬ್ರಹ್ಮಬನ್ಧು ಮಹಾಯಸೋ;
ಕಸ್ಸಪೋ ನಾಮ ಗೋತ್ತೇನ, ಉಪ್ಪಜ್ಜಿ ವದತಂ ವರೋ.
‘‘ತದಾಹಂ ಪಬ್ಬಜಿತ್ವಾನ, ತಸ್ಸ ಬುದ್ಧಸ್ಸ ಸಾಸನೇ;
ಯಾವಜೀವಂ ಚರಿತ್ವಾನ, ಬ್ರಹ್ಮಚಾರಂ ತತೋ ಚುತೋ.
‘‘ತೇನ ಕಮ್ಮೇನ ಸುಕತೇನ, ಚೇತನಾಪಣಿಧೀಹಿ ಚ;
ಜಹಿತ್ವಾ ಮಾನುಸಂ ದೇಹಂ, ತಾವತಿಂಸಮಗಚ್ಛಹಂ.
‘‘ತತೋ ಚುತೋ ಅರಞ್ಞಮ್ಹಿ, ಕಪೋತೋ ಆಸಹಂ ತಹಿಂ;
ವಸತೇ ಗುಣಸಮ್ಪನ್ನೋ, ಭಿಕ್ಖು ಝಾನರತೋ ಸದಾ.
‘‘ಮೇತ್ತಚಿತ್ತೋ ಕಾರುಣಿಕೋ, ಸದಾ ಪಮುದಿತಾನನೋ;
ಉಪೇಕ್ಖಕೋ ಮಹಾವೀರೋ, ಅಪ್ಪಮಞ್ಞಾಸು ಕೋವಿದೋ.
‘‘ವಿನೀವರಣಸಙ್ಕಪ್ಪೇ, ಸಬ್ಬಸತ್ತಹಿತಾಸಯೇ;
ವಿಸಟ್ಠೋ ನಚಿರೇನಾಸಿಂ, ತಸ್ಮಿಂ ಸುಗತಸಾವಕೇ.
‘‘ಉಪೇಚ್ಚ ¶ ಪಾದಮೂಲಮ್ಹಿ, ನಿಸಿನ್ನಸ್ಸ ತದಾಸ್ಸಮೇ;
ಕದಾಚಿ ಸಾಮಿಸಂ ದೇತಿ, ಧಮ್ಮಂ ದೇಸೇಸಿ ಚೇಕದಾ.
‘‘ತದಾ ¶ ವಿಪುಲಪೇಮೇನ, ಉಪಾಸಿತ್ವಾ ಜಿನತ್ರಜಂ;
ತತೋ ಚುತೋ ಗತೋ ಸಗ್ಗಂ, ಪವಾಸೋ ಸಘರಂ ಯಥಾ.
‘‘ಸಗ್ಗಾ ¶ ಚುತೋ ಮನುಸ್ಸೇಸು, ನಿಬ್ಬತ್ತೋ ಪುಞ್ಞಕಮ್ಮುನಾ;
ಅಗಾರಂ ಛಡ್ಡಯಿತ್ವಾನ, ಪಬ್ಬಜಿಂ ಬಹುಸೋ ಅಹಂ.
‘‘ಸಮಣೋ ¶ ತಾಪಸೋ ವಿಪ್ಪೋ, ಪರಿಬ್ಬಜೋ ತಥೇವಹಂ;
ಹುತ್ವಾ ವಸಿಂ ಅರಞ್ಞಮ್ಹಿ, ಅನೇಕಸತಸೋ ಅಹಂ.
‘‘ಪಚ್ಛಿಮೇ ಚ ಭವೇ ದಾನಿ, ರಮ್ಮೇ ಕಪಿಲವತ್ಥವೇ;
ವಚ್ಛಗೋತ್ತೋ ದಿಜೋ ತಸ್ಸ, ಜಾಯಾಯ ಅಹಮೋಕ್ಕಮಿಂ.
‘‘ಮಾತು ಮೇ ದೋಹಳೋ ಆಸಿ, ತಿರೋಕುಚ್ಛಿಗತಸ್ಸ ಮೇ;
ಜಾಯಮಾನಸಮೀಪಮ್ಹಿ, ವನವಾಸಾಯ ನಿಚ್ಛಯೋ.
‘‘ತತೋ ಮೇ ಅಜನೀ ಮಾತಾ, ರಮಣೀಯೇ ವನನ್ತರೇ;
ಗಬ್ಭತೋ ನಿಕ್ಖಮನ್ತಂ ಮಂ, ಕಾಸಾಯೇನ ಪಟಿಗ್ಗಹುಂ.
‘‘ತತೋ ಕುಮಾರೋ ಸಿದ್ಧತ್ಥೋ, ಜಾತೋ ಸಕ್ಯಕುಲದ್ಧಜೋ;
ತಸ್ಸ ಮಿತ್ತೋ ಪಿಯೋ ಆಸಿಂ, ಸಂವಿಸಟ್ಠೋ ಸುಮಾನಿಯೋ.
‘‘ಸತ್ತಸಾರೇಭಿನಿಕ್ಖನ್ತೇ, ಓಹಾಯ ವಿಪುಲಂ ಯಸಂ;
ಅಹಮ್ಪಿ ಪಬ್ಬಜಿತ್ವಾನ, ಹಿಮವನ್ತಮುಪಾಗಮಿಂ.
‘‘ವನಾಲಯಂ ಭಾವನೀಯಂ, ಕಸ್ಸಪಂ ಧುತವಾದಿಕಂ;
ದಿಸ್ವಾ ಸುತ್ವಾ ಜಿನುಪ್ಪಾದಂ, ಉಪೇಸಿಂ ನರಸಾರಥಿಂ.
‘‘ಸೋ ಮೇ ಧಮ್ಮಮದೇಸೇಸಿ, ಸಬ್ಬತ್ಥಂ ಸಮ್ಪಕಾಸಯಂ;
ತತೋಹಂ ಪಬ್ಬಜಿತ್ವಾನ, ವನಮೇವ ಪುನಾಗಮಂ [ಪುನಾಗಮಿಂ (ಸೀ. ಪೀ.), ಪುನೋಕ್ಕಮಂ (ಸ್ಯಾ.)].
‘‘ತತ್ಥಾಪ್ಪಮತ್ತೋ ¶ ವಿಹರಂ, ಛಳಭಿಞ್ಞಾ ಅಫಸ್ಸಯಿಂ [ಅಪಸ್ಸಯಿಂ (ಸ್ಯಾ. ಕ.)];
ಅಹೋ ಸುಲದ್ಧಲಾಭೋಮ್ಹಿ, ಸುಮಿತ್ತೇನಾನುಕಮ್ಪಿತೋ.
‘‘ಕಿಲೇಸಾ ಝಾಪಿತಾ ಮಯ್ಹಂ…ಪೇ… ವಿಹರಾಮಿ ಅನಾಸವೋ.
‘‘ಸ್ವಾಗತಂ ವತ ಮೇ ಆಸಿ…ಪೇ… ಕತಂ ಬುದ್ಧಸ್ಸ ಸಾಸನಂ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ವನವಚ್ಛೋ ಥೇರೋ ಇಮಾ ಗಾಥಾಯೋ
ಅಭಾಸಿತ್ಥಾತಿ.
ವನವಚ್ಛತ್ಥೇರಸ್ಸಾಪದಾನಂ ನವಮಂ.
೧೦. ಚೂಳಸುಗನ್ಧತ್ಥೇರಅಪದಾನಂ
‘‘ಇಮಮ್ಹಿ ¶ ¶ ¶ ಭದ್ದಕೇ ಕಪ್ಪೇ, ಬ್ರಹ್ಮಬನ್ಧು ಮಹಾಯಸೋ;
ಕಸ್ಸಪೋ ನಾಮ ಗೋತ್ತೇನ, ಉಪ್ಪಜ್ಜಿ ವದತಂ ವರೋ.
‘‘ಅನುಬ್ಯಞ್ಜನಸಮ್ಪನ್ನೋ, ಬಾತ್ತಿಂಸವರಲಕ್ಖಣೋ;
ಬ್ಯಾಮಪ್ಪಭಾಪರಿವುತೋ, ರಂಸಿಜಾಲಸಮೋತ್ಥಟೋ.
‘‘ಅಸ್ಸಾಸೇತಾ ಯಥಾ ಚನ್ದೋ, ಸೂರಿಯೋವ ಪಭಙ್ಕರೋ;
ನಿಬ್ಬಾಪೇತಾ ಯಥಾ ಮೇಘೋ, ಸಾಗರೋವ ಗುಣಾಕರೋ.
‘‘ಧರಣೀರಿವ ಸೀಲೇನ, ಹಿಮವಾವ ಸಮಾಧಿನಾ;
ಆಕಾಸೋ ವಿಯ ಪಞ್ಞಾಯ, ಅಸಙ್ಗೋ ಅನಿಲೋ ಯಥಾ.
‘‘ತದಾಹಂ ¶ ಬಾರಾಣಸಿಯಂ, ಉಪಪನ್ನೋ ಮಹಾಕುಲೇ;
ಪಹೂತಧನಧಞ್ಞಸ್ಮಿಂ, ನಾನಾರತನಸಞ್ಚಯೇ.
‘‘ಮಹತಾ ಪರಿವಾರೇನ, ನಿಸಿನ್ನಂ ಲೋಕನಾಯಕಂ;
ಉಪೇಚ್ಚ ಧಮ್ಮಮಸ್ಸೋಸಿಂ, ಅಮತಂವ ಮನೋಹರಂ.
‘‘ದ್ವತ್ತಿಂಸಲಕ್ಖಣಧರೋ, ಸನಕ್ಖತ್ತೋವ ಚನ್ದಿಮಾ;
ಅನುಬ್ಯಞ್ಜನಸಮ್ಪನ್ನೋ, ಸಾಲರಾಜಾವ ಫುಲ್ಲಿತೋ.
‘‘ರಂಸಿಜಾಲಪರಿಕ್ಖಿತ್ತೋ, ದಿತ್ತೋವ ಕನಕಾಚಲೋ;
ಬ್ಯಾಮಪ್ಪಭಾಪರಿವುತೋ, ಸತರಂಸೀ ದಿವಾಕರೋ.
‘‘ಸೋಣ್ಣಾನನೋ ಜಿನವರೋ, ಸಮಣೀವ [ರಮ್ಮಣೀವ (ಸ್ಯಾ.)] ಸಿಲುಚ್ಚಯೋ;
ಕರುಣಾಪುಣ್ಣಹದಯೋ, ಗುಣೇನ ವಿಯ ಸಾಗರೋ.
‘‘ಲೋಕವಿಸ್ಸುತಕಿತ್ತಿ ಚ, ಸಿನೇರೂವ ನಗುತ್ತಮೋ;
ಯಸಸಾ ವಿತ್ಥತೋ ವೀರೋ, ಆಕಾಸಸದಿಸೋ ಮುನಿ.
‘‘ಅಸಙ್ಗಚಿತ್ತೋ ಸಬ್ಬತ್ಥ, ಅನಿಲೋ ವಿಯ ನಾಯಕೋ;
ಪತಿಟ್ಠಾ ಸಬ್ಬಭೂತಾನಂ, ಮಹೀವ ಮುನಿಸತ್ತಮೋ.
‘‘ಅನುಪಲಿತ್ತೋ ಲೋಕೇನ, ತೋಯೇನ ಪದುಮಂ ಯಥಾ;
ಕುವಾದಗಚ್ಛದಹನೋ, ಅಗ್ಗಿಖನ್ಧೋವ ಸೋಭಸಿ [ಸೋಭತಿ (ಸೀ.), ಸೋ ವಸಿ (ಸ್ಯಾ. ಕ.)].
‘‘ಅಗಧೋ ವಿಯ ಸಬ್ಬತ್ಥ, ಕಿಲೇಸವಿಸನಾಸಕೋ;
ಗನ್ಧಮಾದನಸೇಲೋವ, ಗುಣಗನ್ಧವಿಭೂಸಿತೋ.
‘‘ಗುಣಾನಂ ¶ ¶ ಆಕರೋ ವೀರೋ, ರತನಾನಂವ ಸಾಗರೋ;
ಸಿನ್ಧೂವ ವನರಾಜೀನಂ, ಕಿಲೇಸಮಲಹಾರಕೋ.
‘‘ವಿಜಯೀವ ¶ ¶ ಮಹಾಯೋಧೋ, ಮಾರಸೇನಾವಮದ್ದನೋ;
ಚಕ್ಕವತ್ತೀವ ಸೋ ರಾಜಾ, ಬೋಜ್ಝಙ್ಗರತನಿಸ್ಸರೋ.
‘‘ಮಹಾಭಿಸಕ್ಕಸಙ್ಕಾಸೋ, ದೋಸಬ್ಯಾಧಿತಿಕಿಚ್ಛಕೋ;
ಸಲ್ಲಕತ್ತೋ ಯಥಾ ವೇಜ್ಜೋ, ದಿಟ್ಠಿಗಣ್ಡವಿಫಾಲಕೋ.
‘‘ಸೋ ತದಾ ಲೋಕಪಜ್ಜೋತೋ, ಸನರಾಮರಸಕ್ಕತೋ;
ಪರಿಸಾಸು ನರಾದಿಚ್ಚೋ, ಧಮ್ಮಂ ದೇಸಯತೇ ಜಿನೋ.
‘‘ದಾನಂ ದತ್ವಾ ಮಹಾಭೋಗೋ, ಸೀಲೇನ ಸುಗತೂಪಗೋ;
ಭಾವನಾಯ ಚ ನಿಬ್ಬಾತಿ, ಇಚ್ಚೇವಮನುಸಾಸಥ.
‘‘ದೇಸನಂ ತಂ ಮಹಸ್ಸಾದಂ, ಆದಿಮಜ್ಝನ್ತಸೋಭಣಂ;
ಸುಣನ್ತಿ ಪರಿಸಾ ಸಬ್ಬಾ, ಅಮತಂವ ಮಹಾರಸಂ.
‘‘ಸುತ್ವಾ ಸುಮಧುರಂ ಧಮ್ಮಂ, ಪಸನ್ನೋ ಜಿನಸಾಸನೇ;
ಸುಗತಂ ಸರಣಂ ಗನ್ತ್ವಾ, ಯಾವಜೀವಂ ನಮಸ್ಸಹಂ.
‘‘ಮುನಿನೋ ಗನ್ಧಕುಟಿಯಾ, ಓಪುಞ್ಜೇಸಿಂ [ಉಬ್ಬಟ್ಟೇಸಿಂ (ಸ್ಯಾ.)] ತದಾ ಮಹಿಂ;
ಚತುಜ್ಜಾತೇನ ಗನ್ಧೇನ, ಮಾಸೇ ಅಟ್ಠ ದಿನೇಸ್ವಹಂ.
‘‘ಪಣಿಧಾಯ ಸುಗನ್ಧತ್ತಂ, ಸರೀರವಿಸ್ಸಗನ್ಧಿನೋ [ಸರೀರಸ್ಸ ವಿಗನ್ಧಿನೋ (ಸೀ. ಸ್ಯಾ. ಪೀ.)];
ತದಾ ಜಿನೋ ವಿಯಾಕಾಸಿ, ಸುಗನ್ಧತನುಲಾಭಿತಂ.
‘‘‘ಯೋ ಯಂ ಗನ್ಧಕುಟಿಭೂಮಿಂ, ಗನ್ಧೇನೋಪುಞ್ಜತೇ ಸಕಿಂ;
ತೇನ ಕಮ್ಮವಿಪಾಕೇನ, ಉಪಪನ್ನೋ ತಹಿಂ ತಹಿಂ.
‘‘‘ಸುಗನ್ಧದೇಹೋ ಸಬ್ಬತ್ಥ, ಭವಿಸ್ಸತಿ ಅಯಂ ನರೋ;
ಗುಣಗನ್ಧಯುತ್ತೋ ಹುತ್ವಾ, ನಿಬ್ಬಾಯಿಸ್ಸತಿನಾಸವೋ’.
‘‘ತೇನ ¶ ಕಮ್ಮೇನ ಸುಕತೇನ, ಚೇತನಾಪಣಿಧೀಹಿ ಚ;
ಜಹಿತ್ವಾ ಮಾನುಸಂ ದೇಹಂ, ತಾವತಿಂಸಮಗಚ್ಛಹಂ.
‘‘ಪಚ್ಛಿಮೇ ಚ ಭವೇ ದಾನಿ, ಜಾತೋ ವಿಪ್ಪಕುಲೇ ಅಹಂ;
ಗಬ್ಭಂ ಮೇ ವಸತೋ ಮಾತಾ, ದೇಹೇನಾಸಿ ಸುಗನ್ಧಿತಾ.
‘‘ಯದಾ ¶ ಚ ಮಾತುಕುಚ್ಛಿಮ್ಹಾ, ನಿಕ್ಖಮಾಮಿ ತದಾ ಪುರೀ [ಪುರಂ (ಸ್ಯಾ. ಕ.)];
ಸಾವತ್ಥಿಸಬ್ಬಗನ್ಧೇಹಿ, ವಾಸಿತಾ ವಿಯ ವಾಯಥ.
‘‘ಪುಪ್ಫವಸ್ಸಞ್ಚ ¶ ಸುರಭಿ, ದಿಬ್ಬಗನ್ಧಂ ಮನೋರಮಂ;
ಧೂಪಾನಿ ಚ ಮಹಗ್ಘಾನಿ, ಉಪವಾಯಿಂಸು ತಾವದೇ.
‘‘ದೇವಾ ¶ ಚ ಸಬ್ಬಗನ್ಧೇಹಿ, ಧೂಪಪುಪ್ಫೇಹಿ ತಂ ಘರಂ;
ವಾಸಯಿಂಸು ಸುಗನ್ಧೇನ, ಯಸ್ಮಿಂ ಜಾತೋ ಅಹಂ ಘರೇ.
‘‘ಯದಾ ಚ ತರುಣೋ ಭದ್ದೋ, ಪಠಮೇ ಯೋಬ್ಬನೇ ಠಿತೋ;
ತದಾ ಸೇಲಂ [ಸೇಸಂ (ಸ್ಯಾ.)] ಸಪರಿಸಂ, ವಿನೇತ್ವಾ ನರಸಾರಥಿ.
‘‘ತೇಹಿ ಸಬ್ಬೇಹಿ ಪರಿವುತೋ [ಸಹಿತೋ (ಸೀ. ಸ್ಯಾ. ಪೀ.)], ಸಾವತ್ಥಿಪುರಮಾಗತೋ;
ತದಾ ಬುದ್ಧಾನುಭಾವಂ ತಂ, ದಿಸ್ವಾ ಪಬ್ಬಜಿತೋ ಅಹಂ.
‘‘ಸೀಲಂ ಸಮಾಧಿಪಞ್ಞಞ್ಚ, ವಿಮುತ್ತಿಞ್ಚ ಅನುತ್ತರಂ;
ಭಾವೇತ್ವಾ ಚತುರೋ ಧಮ್ಮೇ, ಪಾಪುಣಿಂ ಆಸವಕ್ಖಯಂ.
‘‘ಯದಾ ಪಬ್ಬಜಿತೋ ಚಾಹಂ, ಯದಾ ಚ ಅರಹಾ ಅಹುಂ;
ನಿಬ್ಬಾಯಿಸ್ಸಂ ಯದಾ ಚಾಹಂ, ಗನ್ಧವಸ್ಸೋ ತದಾ ಅಹು.
‘‘ಸರೀರಗನ್ಧೋ ಚ ಸದಾತಿಸೇತಿ [ಸದಾ ವಾಸೇತಿ (ಕ.)] ಮೇ, ಮಹಾರಹಂ ಚನ್ದನಚಮ್ಪಕುಪ್ಪಲಂ;
ತಥೇವ ¶ ಗನ್ಧೇ ಇತರೇ ಚ ಸಬ್ಬಸೋ, ಪಸಯ್ಹ ವಾಯಾಮಿ ತತೋ ತಹಿಂ [ಯಹಿಂ (ಸ್ಯಾ.)] ತಹಿಂ.
‘‘ಕಿಲೇಸಾ ಝಾಪಿತಾ ಮಯ್ಹಂ…ಪೇ… ವಿಹರಾಮಿ ಅನಾಸವೋ.
‘‘ಸ್ವಾಗತಂ ವತ ಮೇ ಆಸಿ…ಪೇ… ಕತಂ ಬುದ್ಧಸ್ಸ ಸಾಸನಂ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಚೂಳಸುಗನ್ಧೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ;
ಚೂಳಸುಗನ್ಧತ್ಥೇರಸ್ಸಾಪದಾನಂ ದಸಮಂ.
ಭದ್ದಿಯವಗ್ಗೋ ಪಞ್ಚಪಞ್ಞಾಸಮೋ.
ತಸ್ಸುದ್ದಾನಂ ¶ –
ಭದ್ದಿಯೋ ರೇವತೋ ಥೇರೋ, ಮಹಾಲಾಭೀ ಚ ಸೀವಲೀ;
ವಙ್ಗೀಸೋ ನನ್ದಕೋ ಚೇವ, ಕಾಳುದಾಯೀ ತಥಾಭಯೋ.
ಲೋಮಸೋ ವನವಚ್ಛೋ ಚ, ಸುಗನ್ಧೋ ಚೇವ ದಸಮೋ;
ತೀಣಿ ಗಾಥಾಸತಾ ತತ್ಥ, ಸೋಳಸಾ ಚ ತದುತ್ತರಿ.
ಅಥ ¶ ವಗ್ಗುದ್ದಾನಂ –
ಕಣಿಕಾರವ್ಹಯೋ ವಗ್ಗೋ, ಫಲದೋ ತಿಣದಾಯಕೋ;
ಕಚ್ಚಾನೋ ಭದ್ದಿಯೋ ವಗ್ಗೋ, ಗಾಥಾಯೋ ಗಣಿತಾ ಚಿಮಾ.
ನವಗಾಥಾಸತಾನೀಹ ¶ ¶ , ಚತುರಾಸೀತಿಯೇವ ಚ;
ಸಪಞ್ಞಾಸಂ ಪಞ್ಚಸತಂ, ಅಪದಾನಾ ಪಕಾಸಿತಾ.
ಸಹ ಉದಾನಗಾಥಾಹಿ, ಛಸಹಸ್ಸಾನಿ ಹೋನ್ತಿಮಾ;
ದ್ವೇಸತಾನಿ ಚ ಗಾಥಾನಂ, ಅಟ್ಠಾರಸ ತದುತ್ತರಿ.
೫೬. ಯಸವಗ್ಗೋ
೧. ಯಸತ್ಥೇರಅಪದಾನಂ
‘‘ಮಹಾಸಮುದ್ದಂ ¶ ¶ ಓಗ್ಗಯ್ಹ, ಭವನಂ ಮೇ ಸುನಿಮ್ಮಿತಂ;
ಸುನಿಮ್ಮಿತಾ ಪೋಕ್ಖರಣೀ, ಚಕ್ಕವಾಕೂಪಕೂಜಿತಾ.
‘‘ಮನ್ದಾರಕೇಹಿ ಸಞ್ಛನ್ನಾ, ಪದುಮುಪ್ಪಲಕೇಹಿ ಚ;
ನದೀ ಚ ಸನ್ದತೇ ತತ್ಥ, ಸುಪತಿತ್ಥಾ ಮನೋರಮಾ.
‘‘ಮಚ್ಛಕಚ್ಛಪಸಞ್ಛನ್ನಾ, ನಾನಾದಿಜಸಮೋತ್ಥಟಾ [ನಾನಾಮಿಗಸಮೋತ್ಥಟಾ (ಸ್ಯಾ.)];
ಮಯೂರಕೋಞ್ಚಾಭಿರುದಾ, ಕೋಕಿಲಾದೀಹಿ ವಗ್ಗುಹಿ.
‘‘ಪಾರೇವತಾ ರವಿಹಂಸಾ, ಚಕ್ಕವಾಕಾ ನದೀಚರಾ;
ತಿತ್ತಿರಾ ಸಾಳಿಕಾ ಚೇತ್ಥ, ಪಾವಕಾ [ಸಮ್ಬಕಾ (ಕ.)] ಜೀವಂಜೀವಕಾ.
‘‘ಹಂಸಾಕೋಞ್ಚಾಭಿನದಿತಾ, ಕೋಸಿಯಾ ಪಿಙ್ಗಲಾ [ಪಿಙ್ಗಲೀ (ಸೀ.), ಸಿಙ್ಗಲೀ, ಸಿಙ್ಘಲೀ (ಕ.)] ಬಹೂ;
ಸತ್ತರತನಸಮ್ಪನ್ನಾ, ಮಣಿಮುತ್ತಪವಾಳಿಕಾ.
‘‘ಸಬ್ಬೇ ಸೋಣ್ಣಮಯಾ ರುಕ್ಖಾ, ನಾನಾಖನ್ಧಸಮೇರಿತಾ;
ಉಜ್ಜೋತೇನ್ತಿ ದಿವಾರತ್ತಿಂ, ಭವನಂ ಸಬ್ಬಕಾಲಿಕಂ.
‘‘ಸಟ್ಠಿತುರಿಯಸಹಸ್ಸಾನಿ, ಸಾಯಂ ಪಾತೋ ಪವಜ್ಜರೇ;
ಸೋಳಸಿತ್ಥಿಸಹಸ್ಸಾನಿ, ಪರಿವಾರೇನ್ತಿ ಮಂ ಸದಾ.
‘‘ಅಭಿನಿಕ್ಖಮ್ಮ ಭವನಾ, ಸುಮೇಧಂ ಲೋಕನಾಯಕಂ;
ಪಸನ್ನಚಿತ್ತೋ ಸುಮನೋ, ವನ್ದಯಿಂ ತಂ [ಸಬ್ಬದಸ್ಸಿಂ (ಕ.)] ಮಹಾಯಸಂ.
‘‘ಸಮ್ಬುದ್ಧಂ ಅಭಿವಾದೇತ್ವಾ, ಸಸಙ್ಘಂ ತಂ ನಿಮನ್ತಯಿಂ;
ಅಧಿವಾಸೇಸಿ ಸೋ ಧೀರೋ, ಸುಮೇಧೋ ಲೋಕನಾಯಕೋ.
‘‘ಮಮ ಧಮ್ಮಕಥಂ ಕತ್ವಾ, ಉಯ್ಯೋಜೇಸಿ ಮಹಾಮುನಿ;
ಸಮ್ಬುದ್ಧಂ ಅಭಿವಾದೇತ್ವಾ, ಭವನಂ ಮೇ ಉಪಾಗಮಿಂ.
‘‘ಆಮನ್ತಯಿಂ ಪರಿಜನಂ, ಸಬ್ಬೇ ಸನ್ನಿಪತುಂ ತದಾ;
‘ಪುಬ್ಬಣ್ಹಸಮಯಂ ಬುದ್ಧೋ, ಭವನಂ ಆಗಮಿಸ್ಸತಿ’.
‘‘‘ಲಾಭಾ ¶ ಅಮ್ಹಂ ಸುಲದ್ಧಾ ನೋ, ಯೇ ವಸಾಮ ತವನ್ತಿಕೇ;
ಮಯಮ್ಪಿ ಬುದ್ಧಸೇಟ್ಠಸ್ಸ, ಪೂಜಯಿಸ್ಸಾಮ ಸತ್ಥುನೋ’.
‘‘ಅನ್ನಂ ¶ ಪಾನಂ ಪಟ್ಠಪೇತ್ವಾ, ಕಾಲಂ ಆರೋಚಯಿಂ ಅಹಂ;
ವಸೀಸತಸಹಸ್ಸೇಹಿ, ಉಪೇಸಿ ಲೋಕನಾಯಕೋ.
‘‘ಪಞ್ಚಙ್ಗಿಕೇಹಿ ತುರಿಯೇಹಿ, ಪಚ್ಚುಗ್ಗಮಮಕಾಸಹಂ;
ಸಬ್ಬಸೋಣ್ಣಮಯೇ ಪೀಠೇ, ನಿಸೀದಿ ಪುರಿಸುತ್ತಮೋ.
‘‘ಉಪರಿಚ್ಛದನಂ ಆಸಿ, ಸಬ್ಬಸೋಣ್ಣಮಯಂ ತದಾ;
ಬೀಜನೀಯೋ ಪವಾಯನ್ತಿ, ಭಿಕ್ಖುಸಙ್ಘಂ ಅನುತ್ತರಂ.
‘‘ಪಹೂತೇನನ್ನಪಾನೇನ, ಭಿಕ್ಖುಸಙ್ಘಂ ಅತಪ್ಪಯಿಂ;
ಪಚ್ಚೇಕದುಸ್ಸಯುಗಲೇ, ಭಿಕ್ಖುಸಙ್ಘಸ್ಸದಾಸಹಂ.
‘‘ಯಂ ವದೇತಿ ಸುಮೇಧೋ ಸೋ, ಆಹುತೀನಂ ಪಟಿಗ್ಗಹೋ;
ಭಿಕ್ಖುಸಙ್ಘೇ ನಿಸೀದಿತ್ವಾ, ಇಮಾ ಗಾಥಾ ಅಭಾಸಥ.
‘‘‘ಯೋ ಮಂ ಅನ್ನೇನ ಪಾನೇನ, ಸಬ್ಬೇ ಇಮೇ ಚ ತಪ್ಪಯಿ;
ತಮಹಂ ಕಿತ್ತಯಿಸ್ಸಾಮಿ, ಸುಣಾಥ ಮಮ ಭಾಸತೋ.
‘‘‘ಅಟ್ಠಾರಸೇ ಕಪ್ಪಸತೇ, ದೇವಲೋಕೇ ರಮಿಸ್ಸತಿ;
ಸಹಸ್ಸಕ್ಖತ್ತುಂ ರಾಜಾಯಂ, ಚಕ್ಕವತ್ತೀ ಭವಿಸ್ಸತಿ.
‘‘‘ಉಪಗಚ್ಛತಿ ಯಂ ಯೋನಿಂ, ದೇವತ್ತಂ ಅಥ ಮಾನುಸಂ;
ಸಬ್ಬಸೋಣ್ಣಮಯಂ ತಸ್ಸ, ಛದನಂ ಧಾರಯಿಸ್ಸತಿ.
‘‘‘ತಿಂಸಕಪ್ಪಸಹಸ್ಸಮ್ಹಿ, ಓಕ್ಕಾಕಕುಲಸಮ್ಭವೋ;
ಗೋತಮೋ ನಾಮ ಗೋತ್ತೇನ, ಸತ್ಥಾ ಲೋಕೇ ಭವಿಸ್ಸತಿ.
‘‘‘ತಸ್ಸ ಧಮ್ಮೇಸು ದಾಯಾದೋ, ಓರಸೋ ಧಮ್ಮನಿಮ್ಮಿತೋ;
ಸಬ್ಬಾಸವೇ ಪರಿಞ್ಞಾಯ, ನಿಬ್ಬಾಯಿಸ್ಸತಿನಾಸವೋ.
‘‘‘ಭಿಕ್ಖುಸಙ್ಘೇ ನಿಸೀದಿತ್ವಾ, ಸೀಹನಾದಂ ನದಿಸ್ಸತಿ’;
ಚಿತಕೇ ಛತ್ತಂ ಧಾರೇನ್ತಿ, ಹೇಟ್ಠಾ ಛತ್ತಮ್ಹಿ ಡಯ್ಹಥ.
‘‘ಸಾಮಞ್ಞಂ ಮೇ ಅನುಪ್ಪತ್ತಂ, ಕಿಲೇಸಾ ಝಾಪಿತಾ ಮಯಾ;
ಮಣ್ಡಪೇ ರುಕ್ಖಮೂಲೇ ವಾ, ಸನ್ತಾಸೋ ಮೇ ನ ವಿಜ್ಜತಿ.
‘‘ತಿಂಸಕಪ್ಪಸಹಸ್ಸಮ್ಹಿ, ಯಂ ದಾನಮದದಿಂ ತದಾ;
ದುಗ್ಗತಿಂ ನಾಭಿಜಾನಾಮಿ, ಸಬ್ಬದಾನಸ್ಸಿದಂ ಫಲಂ.
‘‘ಕಿಲೇಸಾ ¶ ಝಾಪಿತಾ ಮಯ್ಹಂ, ಭವಾ ಸಬ್ಬೇ ಸಮೂಹತಾ;
ನಾಗೋವ ಬನ್ಧನಂ ಛೇತ್ವಾ, ವಿಹರಾಮಿ ಅನಾಸವೋ.
‘‘ಸ್ವಾಗತಂ ವತ ಮೇ ಆಸಿ, ಮಮ ಬುದ್ಧಸ್ಸ ಸನ್ತಿಕೇ;
ತಿಸ್ಸೋ ವಿಜ್ಜಾ ಅನುಪ್ಪತ್ತಾ, ಕತಂ ಬುದ್ಧಸ್ಸ ಸಾಸನಂ.
‘‘ಪಟಿಸಮ್ಭಿದಾ ¶ ಚತಸ್ಸೋ, ವಿಮೋಕ್ಖಾಪಿ ಚ ಅಟ್ಠಿಮೇ;
ಛಳಭಿಞ್ಞಾ ಸಚ್ಛಿಕತಾ, ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಯಸೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಯಸತ್ಥೇರಸ್ಸಾಪದಾನಂ ಪಠಮಂ.
೨. ನದೀಕಸ್ಸಪತ್ಥೇರಅಪದಾನಂ
‘‘ಪದುಮುತ್ತರಸ್ಸ ಭಗವತೋ, ಲೋಕಜೇಟ್ಠಸ್ಸ ತಾದಿನೋ;
ಪಿಣ್ಡಚಾರಂ ಚರನ್ತಸ್ಸ, ವಾರತೋ ಉತ್ತಮಂ ಯಸಂ;
ಅಗ್ಗಫಲಂ ಗಹೇತ್ವಾನ, ಅದಾಸಿಂ ಸತ್ಥುನೋ ಅಹಂ.
‘‘ತೇನ ಕಮ್ಮೇನ ದೇವಿನ್ದೋ, ಲೋಕಜೇಟ್ಠೋ ನರಾಸಭೋ;
ಸಮ್ಪತ್ತೋಮ್ಹಿ ಅಚಲಂ ಠಾನಂ, ಹಿತ್ವಾ ಜಯಪರಾಜಯಂ.
‘‘ಸತಸಹಸ್ಸಿತೋ ಕಪ್ಪೇ, ಯಂ ಫಲಂ ಅದದಿಂ ತದಾ;
ದುಗ್ಗತಿಂ ನಾಭಿಜಾನಾಮಿ, ಅಗ್ಗದಾನಸ್ಸಿದಂ ಫಲಂ.
‘‘ಕಿಲೇಸಾ ಝಾಪಿತಾ ಮಯ್ಹಂ…ಪೇ… ವಿಹರಾಮಿ ಅನಾಸವೋ.
‘‘ಸ್ವಾಗತಂ ವತ ಮೇ ಆಸಿ…ಪೇ… ಕತಂ ಬುದ್ಧಸ್ಸ ಸಾಸನಂ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ನದೀಕಸ್ಸಪೋ ಥೇರೋ ಇಮಾ ಗಾಥಾಯೋ
ಅಭಾಸಿತ್ಥಾತಿ.
ನದೀಕಸ್ಸಪತ್ಥೇರಸ್ಸಾಪದಾನಂ ದುತಿಯಂ.
೩. ಗಯಾಕಸ್ಸಪತ್ಥೇರಅಪದಾನಂ
‘‘ಅಜಿನಚಮ್ಮವತ್ಥೋಹಂ ¶ [ಅಜಿನವತ್ತಂ ನಿವತ್ತೋಹಂ (ಸೀ.)], ಖಾರಿಭಾರಧರೋ ತದಾ;
ಖಾರಿಕಂ ಹಾರಯಿತ್ವಾನ, ಕೋಲಂ ಅಹಾಸಿ ಅಸ್ಸಮಂ.
‘‘ಭಗವಾ ತಮ್ಹಿ ಸಮಯೇ, ಏಕೋ ಅದುತಿಯೋ ಜಿನೋ;
ಮಮಸ್ಸಮಂ ಉಪಾಗಚ್ಛಿ, ಜೋತೇನ್ತೋ ಸಬ್ಬಕಾಲಿಕಂ.
‘‘ಸಕಂ ಚಿತ್ತಂ ಪಸಾದೇತ್ವಾ, ಅಭಿವಾದೇತ್ವಾನ ಸುಬ್ಬತಂ;
ಉಭೋ ಹತ್ಥೇಹಿ ಪಗ್ಗಯ್ಹ, ಕೋಲಂ ಬುದ್ಧಸ್ಸದಾಸಹಂ.
‘‘ಏಕತಿಂಸೇ ¶ ಇತೋ ಕಪ್ಪೇ, ಯಂ ಫಲಂ ಅದದಿಂ ತದಾ;
ದುಗ್ಗತಿಂ ನಾಭಿಜಾನಾಮಿ, ಕೋಲದಾನಸ್ಸಿದಂ ಫಲಂ.
‘‘ಕಿಲೇಸಾ ಝಾಪಿತಾ ಮಯ್ಹಂ…ಪೇ… ವಿಹರಾಮಿ ಅನಾಸವೋ.
‘‘ಸ್ವಾಗತಂ ವತ ಮೇ ಆಸಿ…ಪೇ… ಕತಂ ಬುದ್ಧಸ್ಸ ಸಾಸನಂ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಗಯಾಕಸ್ಸಪೋ ಥೇರೋ ಇಮಾ ಗಾಥಾಯೋ
ಅಭಾಸಿತ್ಥಾತಿ.
ಗಯಾಕಸ್ಸಪತ್ಥೇರಸ್ಸಾಪದಾನಂ ತತಿಯಂ.
೪. ಕಿಮಿಲತ್ಥೇರಅಪದಾನಂ
‘‘ನಿಬ್ಬುತೇ ಕಕುಸನ್ಧಮ್ಹಿ, ಬ್ರಾಹ್ಮಣಮ್ಹಿ ವುಸೀಮತಿ;
ಗಹೇತ್ವಾ ಸಲಲಂ ಮಾಲಂ, ಮಣ್ಡಪಂ ಕಾರಯಿಂ ಅಹಂ.
‘‘ತಾವತಿಂಸಂ ಗತೋ ಸನ್ತೋ, ಲಭಿಮ್ಹ [ಲಭಾಮಿ (ಕ.)] ಬ್ಯಮ್ಹಮುತ್ತಮಂ;
ಅಞ್ಞೇ ದೇವೇತಿರೋಚಾಮಿ, ಪುಞ್ಞಕಮ್ಮಸ್ಸಿದಂ ಫಲಂ.
‘‘ದಿವಾ ವಾ ಯದಿ ವಾ ರತ್ತಿಂ, ಚಙ್ಕಮನ್ತೋ ಠಿತೋ ಚಹಂ;
ಛನ್ನೋ ಸಲಲಪುಪ್ಫೇಹಿ, ಪುಞ್ಞಕಮ್ಮಸ್ಸಿದಂ ಫಲಂ.
‘‘ಇಮಸ್ಮಿಂಯೇವ ಕಪ್ಪಮ್ಹಿ, ಯಂ ಬುದ್ಧಮಭಿಪೂಜಯಿಂ;
ದುಗ್ಗತಿಂ ನಾಭಿಜಾನಾಮಿ, ಬುದ್ಧಪೂಜಾಯಿದಂ ಫಲಂ.
‘‘ಕಿಲೇಸಾ ¶ ಝಾಪಿತಾ ಮಯ್ಹಂ…ಪೇ… ವಿಹರಾಮಿ ಅನಾಸವೋ.
‘‘ಸ್ವಾಗತಂ ವತ ಮೇ ಆಸಿ…ಪೇ… ಕತಂ ಬುದ್ಧಸ್ಸ ಸಾಸನಂ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಕಿಮಿಲೋ [ಕಿಮ್ಬಿಲೋ (ಸೀ.)] ಥೇರೋ ಇಮಾ ಗಾಥಾಯೋ
ಅಭಾಸಿತ್ಥಾತಿ.
ಕಿಮಿಲತ್ಥೇರಸ್ಸಾಪದಾನಂ ಚತುತ್ಥಂ.
೫. ವಜ್ಜೀಪುತ್ತತ್ಥೇರಅಪದಾನಂ
‘‘ಸಹಸ್ಸರಂಸೀ ಭಗವಾ, ಸಯಮ್ಭೂ ಅಪರಾಜಿತೋ;
ವಿವೇಕಾ ವುಟ್ಠಹಿತ್ವಾನ, ಗೋಚರಾಯಾಭಿನಿಕ್ಖಮಿ.
‘‘ಫಲಹತ್ಥೋ ¶ ಅಹಂ ದಿಸ್ವಾ, ಉಪಗಚ್ಛಿಂ ನರಾಸಭಂ;
ಪಸನ್ನಚಿತ್ತೋ ಸುಮನೋ, ಸವಣ್ಟಂ ಅದದಿಂ ಫಲಂ.
‘‘ಚತುನ್ನವುತಿತೋ ಕಪ್ಪೇ, ಯಂ ಫಲಂ ಅದದಿಂ ತದಾ;
ದುಗ್ಗತಿಂ ನಾಭಿಜಾನಾಮಿ, ಫಲದಾನಸ್ಸಿದಂ ಫಲಂ.
‘‘ಕಿಲೇಸಾ ಝಾಪಿತಾ ಮಯ್ಹಂ…ಪೇ… ವಿಹರಾಮಿ ಅನಾಸವೋ.
‘‘ಸ್ವಾಗತಂ ವತ ಮೇ ಆಸಿ…ಪೇ… ಕತಂ ಬುದ್ಧಸ್ಸ ಸಾಸನಂ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ವಜ್ಜೀಪುತ್ತೋ ಥೇರೋ ಇಮಾ ಗಾಥಾಯೋ
ಅಭಾಸಿತ್ಥಾತಿ.
ವಜ್ಜೀಪುತ್ತತ್ಥೇರಸ್ಸಾಪದಾನಂ ಪಞ್ಚಮಂ.
೬. ಉತ್ತರತ್ಥೇರಅಪದಾನಂ
‘‘ಸುಮೇಧೋ ನಾಮ ಸಮ್ಬುದ್ಧೋ, ಬಾತ್ತಿಂಸವರಲಕ್ಖಣೋ;
ವಿವೇಕಕಾಮೋ ಭಗವಾ, ಹಿಮವನ್ತಮುಪಾಗಮಿ.
‘‘ಅಜ್ಝೋಗಾಹೇತ್ವಾ ಹಿಮವನ್ತಂ, ಅಗ್ಗೋ ಕಾರುಣಿಕೋ ಮುನಿ;
ಪಲ್ಲಙ್ಕಂ ಆಭುಜಿತ್ವಾನ, ನಿಸೀದಿ ಪುರಿಸುತ್ತಮೋ.
‘‘ವಿಜ್ಜಧರೋ ¶ ತದಾ ಆಸಿಂ, ಅನ್ತಲಿಕ್ಖಚರೋ ಅಹಂ;
ತಿಸೂಲಂ ಸುಗತಂ ಗಯ್ಹ, ಗಚ್ಛಾಮಿ ಅಮ್ಬರೇ ತದಾ.
‘‘ಪಬ್ಬತಗ್ಗೇ ಯಥಾ ಅಗ್ಗಿ, ಪುಣ್ಣಮಾಯೇವ ಚನ್ದಿಮಾ;
ವನಂ ಓಭಾಸತೇ ಬುದ್ಧೋ, ಸಾಲರಾಜಾವ ಫುಲ್ಲಿತೋ.
‘‘ವನಗ್ಗಾ ನಿಕ್ಖಮಿತ್ವಾನ, ಬುದ್ಧರಂಸೀಭಿಧಾವರೇ [ಬುದ್ಧರಂಸೀ ವಿಧಾವರೇ (ಸೀ. ಕ.)];
ನಳಗ್ಗಿವಣ್ಣಸಙ್ಕಾಸಾ [ನಳಗ್ಗಿವ ನಸಙ್ಕಾಸಂ (ಸೀ.)], ದಿಸ್ವಾ ಚಿತ್ತಂ ಪಸಾದಯಿಂ.
‘‘ವಿಚಿನಂ ಅದ್ದಸಂ ಪುಪ್ಫಂ, ಕಣಿಕಾರಂ ದೇವಗನ್ಧಿಕಂ;
ತೀಣಿ ಪುಪ್ಫಾನಿ ಆದಾಯ, ಬುದ್ಧಸೇಟ್ಠಮಪೂಜಯಿಂ.
‘‘ಬುದ್ಧಸ್ಸ ಆನುಭಾವೇನ, ತೀಣಿ ಪುಪ್ಫಾನಿ ಮೇ ತದಾ;
ಉದ್ಧಂ ವಣ್ಟಾ ಅಧೋಪತ್ತಾ, ಛಾಯಂ ಕುಬ್ಬನ್ತಿ ಸತ್ಥುನೋ.
‘‘ತೇನ ಕಮ್ಮೇನ ಸುಕತೇನ, ಚೇತನಾಪಣಿಧೀಹಿ ಚ;
ಜಹಿತ್ವಾ ಮಾನುಸಂ ದೇಹಂ ತಾವತಿಂಸಮಗಚ್ಛಹಂ.
‘‘ತತ್ಥ ಮೇ ಸುಕತಂ ಬ್ಯಮ್ಹಂ, ಕಣಿಕಾರೀತಿ [ಕಣಿಕಾರೋತಿ (ಸೀ.)] ಞಾಯತಿ;
ಸಟ್ಠಿಯೋಜನಮುಬ್ಬೇಧಂ, ತಿಂಸಯೋಜನವಿತ್ಥತಂ.
‘‘ಸಹಸ್ಸಕಣ್ಡಂ ¶ ಸತಭೇಣ್ಡು, ಧಜಾಲು ಹರಿತಾಮಯಂ;
ಸತಸಹಸ್ಸನಿಯ್ಯೂಹಾ [ಸತಸಹಸ್ಸಾನಿ ಬ್ಯೂಹಾನಿ (ಸೀ.)], ಬ್ಯಮ್ಹೇ ಪಾತುಭವಿಂಸು [ಪಾತುರಹಂಸು (ಸೀ.), ಪಾತುರಹಿಂಸು (ಕ.)] ಮೇ.
‘‘ಸೋಣ್ಣಮಯಾ ಮಣಿಮಯಾ, ಲೋಹಿತಙ್ಕಮಯಾಪಿ ಚ;
ಫಲಿಕಾಪಿ ಚ ಪಲ್ಲಙ್ಕಾ, ಯೇನಿಚ್ಛಕಾ ಯದಿಚ್ಛಕಾ.
‘‘ಮಹಾರಹಞ್ಚ ಸಯನಂ, ತೂಲಿಕಾ ವಿಕತೀಯುತಂ;
ಉದ್ಧಲೋಮಿಞ್ಚ ಏಕನ್ತಂ, ಬಿಮ್ಬೋಹನಸಮಾಯುತಂ.
‘‘ಭವನಾ ನಿಕ್ಖಮಿತ್ವಾನ, ಚರನ್ತೋ ದೇವಚಾರಿಕಂ;
ಯಥಾ ಇಚ್ಛಾಮಿ [ಯಥಾ ಗಚ್ಛಾಮಿ (ಸೀ.)] ಗಮನಂ, ದೇವಸಙ್ಘಪುರಕ್ಖತೋ.
‘‘ಪುಪ್ಫಸ್ಸ ಹೇಟ್ಠಾ ತಿಟ್ಠಾಮಿ, ಉಪರಿಚ್ಛದನಂ ಮಮ;
ಸಮನ್ತಾ ಯೋಜನಸತಂ, ಕಣಿಕಾರೇಹಿ ಛಾದಿತಂ.
‘‘ಸಟ್ಠಿತುರಿಯಸಹಸ್ಸಾನಿ ¶ , ಸಾಯಪಾತಂ ಉಪಟ್ಠಹುಂ;
ಪರಿವಾರೇನ್ತಿ ಮಂ ನಿಚ್ಚಂ, ರತ್ತಿನ್ದಿವಮತನ್ದಿತಾ.
‘‘ತತ್ಥ ನಚ್ಚೇಹಿ ಗೀತೇಹಿ, ತಾಲೇಹಿ ವಾದಿತೇಹಿ ಚ;
ರಮಾಮಿ ಖಿಡ್ಡಾ ರತಿಯಾ, ಮೋದಾಮಿ ಕಾಮಕಾಮಹಂ.
‘‘ತತ್ಥ ಭುತ್ವಾ ಪಿವಿತ್ವಾ ಚ, ಮೋದಾಮಿ ತಿದಸೇ ತದಾ;
ನಾರೀಗಣೇಹಿ ಸಹಿತೋ, ಮೋದಾಮಿ ಬ್ಯಮ್ಹಮುತ್ತಮೇ.
‘‘ಸತಾನಂ ಪಞ್ಚಕ್ಖತ್ತುಞ್ಚ, ದೇವರಜ್ಜಮಕಾರಯಿಂ;
ಸತಾನಂ ತೀಣಿಕ್ಖತ್ತುಞ್ಚ, ಚಕ್ಕವತ್ತೀ ಅಹೋಸಹಂ;
ಪದೇಸರಜ್ಜಂ ವಿಪುಲಂ, ಗಣನಾತೋ ಅಸಙ್ಖಿಯಂ.
‘‘ಭವೇ ಭವೇ ಸಂಸರನ್ತೋ, ಮಹಾಭೋಗಂ ಲಭಾಮಹಂ;
ಭೋಗೇ ಮೇ ಊನತಾ ನತ್ಥಿ, ಬುದ್ಧಪೂಜಾಯಿದಂ ಫಲಂ.
‘‘ದುವೇ ಭವೇ ಸಂಸರಾಮಿ, ದೇವತ್ತೇ ಅಥ ಮಾನುಸೇ;
ಅಞ್ಞಂ ಗತಿಂ ನ ಜಾನಾಮಿ, ಬುದ್ಧಪೂಜಾಯಿದಂ ಫಲಂ.
‘‘ದುವೇ ಕುಲೇ ಪಜಾಯಾಮಿ [ಯತ್ಥ ಪಚ್ಛಾ ಪಜಾಯಾಮಿ (ಸೀ.)], ಖತ್ತಿಯೇ ಚಾಪಿ ಬ್ರಾಹ್ಮಣೇ;
ನೀಚೇ ಕುಲೇ ನ ಜಾಯಾಮಿ, ಬುದ್ಧಪೂಜಾಯಿದಂ ಫಲಂ.
‘‘ಹತ್ಥಿಯಾನಂ ಅಸ್ಸಯಾನಂ, ಸಿವಿಕಂ ಸನ್ದಮಾನಿಕಂ;
ಲಭಾಮಿ ಸಬ್ಬಮೇವೇತಂ, ಬುದ್ಧಪೂಜಾಯಿದಂ ಫಲಂ.
‘‘ದಾಸೀಗಣಂ ದಾಸಗಣಂ, ನಾರಿಯೋ ಸಮಲಙ್ಕತಾ;
ಲಭಾಮಿ ಸಬ್ಬಮೇವೇತಂ, ಬುದ್ಧಪೂಜಾಯಿದಂ ಫಲಂ.
‘‘ಕೋಸೇಯ್ಯಕಮ್ಬಲಿಯಾನಿ, ಖೋಮಕಪ್ಪಾಸಿಕಾನಿ ಚ;
ಲಭಾಮಿ ಸಬ್ಬಮೇವೇತಂ, ಬುದ್ಧಪೂಜಾಯಿದಂ ಫಲಂ.
‘‘ನವವತ್ಥಂ ¶ ನವಫಲಂ, ನವಗ್ಗರಸಭೋಜನಂ;
ಲಭಾಮಿ ಸಬ್ಬಮೇವೇತಂ, ಬುದ್ಧಪೂಜಾಯಿದಂ ಫಲಂ.
‘‘ಇಮಂ ಖಾದ ಇಮಂ ಭುಞ್ಜ, ಇಮಮ್ಹಿ ಸಯನೇ ಸಯ;
ಲಭಾಮಿ ಸಬ್ಬಮೇವೇತಂ, ಬುದ್ಧಪೂಜಾಯಿದಂ ಫಲಂ.
‘‘ಸಬ್ಬತ್ಥ ಪೂಜಿತೋ ಹೋಮಿ, ಯಸೋ ಅಚ್ಚುಗ್ಗತೋ ಮಮ;
ಮಹಾಪಕ್ಖೋ [ಮಹೇಸಕ್ಖೋ (ಕ.)] ಸದಾ ಹೋಮಿ, ಅಭೇಜ್ಜಪರಿಸೋ ಸದಾ;
ಞಾತೀನಂ ಉತ್ತಮೋ ಹೋಮಿ, ಬುದ್ಧಪೂಜಾಯಿದಂ ಫಲಂ.
‘‘ಸೀತಂ ¶ ಉಣ್ಹಂ ನ ಜಾನಾಮಿ, ಪರಿಳಾಹೋ ನ ವಿಜ್ಜತಿ;
ಅಥೋ ಚೇತಸಿಕಂ ದುಕ್ಖಂ, ಹದಯೇ ಮೇ ನ ವಿಜ್ಜತಿ.
‘‘ಸುವಣ್ಣವಣ್ಣೋ ಹುತ್ವಾನ, ಸಂಸರಾಮಿ ಭವಾಭವೇ;
ವೇವಣ್ಣಿಯಂ ನ ಜಾನಾಮಿ, ಬುದ್ಧಪೂಜಾಯಿದಂ ಫಲಂ.
‘‘ದೇವಲೋಕಾ ಚವಿತ್ವಾನ, ಸುಕ್ಕಮೂಲೇನ ಚೋದಿತೋ;
ಸಾವತ್ಥಿಯಂ ಪುರೇ ಜಾತೋ, ಮಹಾಸಾಲೇಸು ಅಡ್ಢಕೇ.
‘‘ಪಞ್ಚ ಕಾಮಗುಣೇ ಹಿತ್ವಾ, ಪಬ್ಬಜಿಂ ಅನಗಾರಿಯಂ;
ಜಾತಿಯಾ ಸತ್ತವಸ್ಸೋಹಂ, ಅರಹತ್ತಮಪಾಪುಣಿಂ.
‘‘ಉಪಸಮ್ಪದಾಯೀ ಬುದ್ಧೋ, ಗುಣಮಞ್ಞಾಯ ಚಕ್ಖುಮಾ;
ತರುಣೋ ಪೂಜನೀಯೋಹಂ, ಬುದ್ಧಪೂಜಾಯಿದಂ ಫಲಂ.
‘‘ದಿಬ್ಬಚಕ್ಖುವಿಸುದ್ಧಂ ಮೇ, ಸಮಾಧಿಕುಸಲೋ ಅಹಂ;
ಅಭಿಞ್ಞಾಪಾರಮಿಪ್ಪತ್ತೋ, ಬುದ್ಧಪೂಜಾಯಿದಂ ಫಲಂ.
‘‘ಪಟಿಸಮ್ಭಿದಾ ಅನುಪ್ಪತ್ತೋ, ಇದ್ಧಿಪಾದೇಸು ಕೋವಿದೋ;
ಧಮ್ಮೇಸು ಪಾರಮಿಪ್ಪತ್ತೋ, ಬುದ್ಧಪೂಜಾಯಿದಂ ಫಲಂ.
‘‘ತಿಂಸಕಪ್ಪಸಹಸ್ಸಮ್ಹಿ, ಯಂ ಬುದ್ಧಮಭಿಪೂಜಯಿಂ;
ದುಗ್ಗತಿಂ ನಾಭಿಜಾನಾಮಿ, ಬುದ್ಧಪೂಜಾಯಿದಂ ಫಲಂ.
‘‘ಕಿಲೇಸಾ ಝಾಪಿತಾ ಮಯ್ಹಂ…ಪೇ… ವಿಹರಾಮಿ ಅನಾಸವೋ.
‘‘ಸ್ವಾಗತಂ ವತ ಮೇ ಆಸಿ…ಪೇ… ಕತಂ ಬುದ್ಧಸ್ಸ ಸಾಸನಂ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಉತ್ತರೋ ಥೇರೋ ಇಮಾ ಗಾಥಾಯೋ
ಅಭಾಸಿತ್ಥಾತಿ.
ಉತ್ತರತ್ಥೇರಸ್ಸಾಪದಾನಂ ಛಟ್ಠಂ.
೭. ಅಪರಉತ್ತರತ್ಥೇರಅಪದಾನಂ
‘‘ನಿಬ್ಬುತೇ ¶ ಲೋಕನಾಥಮ್ಹಿ, ಸಿದ್ಧತ್ಥೇ ಲೋಕನಾಯಕೇ;
ಮಮ ಞಾತೀ ಸಮಾನೇತ್ವಾ, ಧಾತುಪೂಜಂ ಅಕಾಸಹಂ.
‘‘ಚತುನ್ನವುತಿತೋ ಕಪ್ಪೇ, ಯಂ ಧಾತುಮಭಿಪೂಜಯಿಂ;
ದುಗ್ಗತಿಂ ನಾಭಿಜಾನಾಮಿ, ಧಾತುಪೂಜಾಯಿದಂ ಫಲಂ.
‘‘ಕಿಲೇಸಾ ¶ ಝಾಪಿತಾ ಮಯ್ಹಂ…ಪೇ… ವಿಹರಾಮಿ ಅನಾಸವೋ.
‘‘ಸ್ವಾಗತಂ ವತ ಮೇ ಆಸಿ…ಪೇ… ಕತಂ ಬುದ್ಧಸ್ಸ ಸಾಸನಂ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಅಪರಉತ್ತರತ್ಥೇರೋ ಇಮಾ ಗಾಥಾಯೋ
ಅಭಾಸಿತ್ಥಾತಿ.
ಅಪರಸ್ಸ ಉತ್ತರತ್ಥೇರಸ್ಸಾಪದಾನಂ ಸತ್ತಮಂ.
೮. ಭದ್ದಜಿತ್ಥೇರಅಪದಾನಂ
‘‘ಓಗಯ್ಹ ಯಂ ಪೋಕ್ಖರಣಿಂ, ನಾನಾಕುಞ್ಜರಸೇವಿತಂ;
ಉದ್ಧರಾಮಿ ಭಿಸಂ ತತ್ಥ, ಘಾಸಹೇತು ಅಹಂ ತದಾ.
‘‘ಭಗವಾ ತಮ್ಹಿ ಸಮಯೇ, ಪದುಮುತ್ತರಸವ್ಹಯೋ;
ರತ್ತಮ್ಬರಧರೋ ಬುದ್ಧೋ, ಗಚ್ಛತೇ ಅನಿಲಞ್ಜಸೇ.
‘‘ಧುನನ್ತೋ ಪಂಸುಕೂಲಾನಿ, ಸದ್ದಂ ಅಸ್ಸೋಸಹಂ ತದಾ;
ಉದ್ಧಂ ನಿಜ್ಝಾಯಮಾನೋಹಂ, ಅದ್ದಸಂ ಲೋಕನಾಯಕಂ.
‘‘ತತ್ಥೇವ ಠಿತಕೋ ಸನ್ತೋ, ಆಯಾಚಿಂ ಲೋಕನಾಯಕಂ;
ಮಧುಂ ಭಿಸೇಹಿ ಸಹಿತಂ, ಖೀರಂ ಸಪ್ಪಿಂ ಮುಳಾಲಿಕಂ [ಮಧುಂ ಭಿಸೇಹಿ ಪಚತಿ, ಖೀರಸಪ್ಪಿ ಮುಲಾಲಿಭಿ (ಕ.) ಭಿಸದಾಯಕತ್ಥೇರಾಪದಾನೇಪಿ].
‘‘ಪಟಿಗ್ಗಣ್ಹಾತು ಮೇ ಬುದ್ಧೋ, ಅನುಕಮ್ಪಾಯ ಚಕ್ಖುಮಾ;
ತತೋ ಕಾರುಣಿಕೋ ಸತ್ಥಾ, ಓರೋಹಿತ್ವಾ ಮಹಾಯಸೋ.
‘‘ಪಟಿಗ್ಗಣ್ಹಿ ಮಮ ಭಿಕ್ಖಂ, ಅನುಕಮ್ಪಾಯ ಚಕ್ಖುಮಾ;
ಪಟಿಗ್ಗಹೇತ್ವಾ ಸಮ್ಬುದ್ಧೋ, ಅಕಾ ಮೇ ಅನುಮೋದನಂ.
‘‘‘ಸುಖೀ ಹೋತು ಮಹಾಪುಞ್ಞ, ಗತಿ ತುಯ್ಹಂ ಸಮಿಜ್ಝತು;
ಇಮಿನಾ ಭಿಸದಾನೇನ, ಲಭಸ್ಸು ವಿಪುಲಂ ಸುಖಂ’.
‘‘ಇದಂ ¶ ವತ್ವಾನ ಸಮ್ಬುದ್ಧೋ, ಜಲಜುತ್ತಮನಾಮಕೋ;
ಭಿಕ್ಖಮಾದಾಯ ಸಮ್ಬುದ್ಧೋ, ಆಕಾಸೇನಾಗಮಾ ಜಿನೋ.
‘‘ತತೋ ಭಿಸಂ ಗಹೇತ್ವಾನ, ಅಗಚ್ಛಿಂ ಮಮ ಅಸ್ಸಮಂ;
ಭಿಸಂ ರುಕ್ಖೇ ಲಗ್ಗೇತ್ವಾನ, ಮಮ ದಾನಂ ಅನುಸ್ಸರಿಂ.
‘‘ಮಹಾವಾತೋ ¶ ಉಟ್ಠಹಿತ್ವಾ, ಸಞ್ಚಾಲೇಸಿ ವನಂ ತದಾ;
ಆಕಾಸೋ ಅಭಿನಾದಿತ್ಥ, ಅಸನೀ ಚ ಫಲೀ ತದಾ.
‘‘ತತೋ ಮೇ ಅಸನೀಪಾತೋ, ಮತ್ಥಕೇ ನಿಪತೀ ತದಾ;
ಸೋಹಂ ನಿಸಿನ್ನಕೋ ಸನ್ತೋ, ತತ್ಥ ಕಾಲಙ್ಕತೋ ಅಹಂ.
‘‘ಪುಞ್ಞಕಮ್ಮೇನ ಸಞ್ಞುತ್ತೋ, ತುಸಿತಂ ಉಪಪಜ್ಜಹಂ;
ಕಳೇವರಂ ಮೇ ಪತಿತಂ, ದೇವಲೋಕೇ ರಮಾಮಹಂ.
‘‘ಛಳಸೀತಿಸಹಸ್ಸಾನಿ, ನಾರಿಯೋ ಸಮಲಙ್ಕತಾ;
ಸಾಯಂ ಪಾತಂ ಉಪಟ್ಠನ್ತಿ, ಭಿಸದಾನಸ್ಸಿದಂ ಫಲಂ.
‘‘ಮನುಸ್ಸಯೋನಿಮಾಗನ್ತ್ವಾ, ಸುಖಿತೋ ಹೋಮಹಂ ತದಾ;
ಭೋಗಾ ಮೇ ಊನತಾ ನತ್ಥಿ, ಭಿಸದಾನಸ್ಸಿದಂ ಫಲಂ.
‘‘ಅನುಕಮ್ಪಿತಕೋ ತೇನ, ದೇವದೇವೇನ ತಾದಿನಾ;
ಸಬ್ಬಾಸವಪರಿಕ್ಖೀಣಾ, ನತ್ಥಿ ದಾನಿ ಪುನಬ್ಭವೋ.
‘‘ಸತಸಹಸ್ಸಿತೋ ಕಪ್ಪೇ, ಯಂ ಭಿಸಂ ಅದದಿಂ ತದಾ;
ದುಗ್ಗತಿಂ ನಾಭಿಜಾನಾಮಿ, ಭಿಸದಾನಸ್ಸಿದಂ ಫಲಂ.
‘‘ಕಿಲೇಸಾ ಝಾಪಿತಾ ಮಯ್ಹಂ…ಪೇ… ವಿಹರಾಮಿ ಅನಾಸವೋ.
‘‘ಸ್ವಾಗತಂ ವತ ಮೇ ಆಸಿ…ಪೇ… ಕತಂ ಬುದ್ಧಸ್ಸ ಸಾಸನಂ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಭದ್ದಜಿತ್ಥೇರೋ ಇಮಾ ಗಾಥಾಯೋ
ಅಭಾಸಿತ್ಥಾತಿ.
ಭದ್ದಜಿತ್ಥೇರಸ್ಸಾಪದಾನಂ ಅಟ್ಠಮಂ.
೯. ಸಿವಕತ್ಥೇರಅಪದಾನಂ
‘‘ಏಸನಾಯ ಚರನ್ತಸ್ಸ, ವಿಪಸ್ಸಿಸ್ಸ ಮಹೇಸಿನೋ;
ರಿತ್ತಕಂ ಪತ್ತಂ ದಿಸ್ವಾನ, ಕುಮ್ಮಾಸಂ ಪೂರಯಿಂ ಅಹಂ.
‘‘ಏಕನವುತಿತೋ ಕಪ್ಪೇ, ಯಂ ಭಿಕ್ಖಮದದಿಂ ತದಾ;
ದುಗ್ಗತಿಂ ನಾಭಿಜಾನಾಮಿ, ಕುಮ್ಮಾಸಸ್ಸ ಇದಂ ಫಲಂ.
‘‘ಕಿಲೇಸಾ ¶ ಝಾಪಿತಾ ಮಯ್ಹಂ…ಪೇ… ವಿಹರಾಮಿ ಅನಾಸವೋ.
‘‘ಸ್ವಾಗತಂ ¶ ವತ ಮೇ ಆಸಿ…ಪೇ… ಕತಂ ಬುದ್ಧಸ್ಸ ಸಾಸನಂ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಸಿವಕತ್ಥೇರೋ ಇಮಾ ಗಾಥಾಯೋ
ಅಭಾಸಿತ್ಥಾತಿ.
ಸಿವಕತ್ಥೇರಸ್ಸಾಪದಾನಂ ನವಮಂ.
೧೦. ಉಪವಾನತ್ಥೇರಅಪದಾನಂ
‘‘ಪದುಮುತ್ತರೋ ನಾಮ ಜಿನೋ, ಸಬ್ಬಧಮ್ಮಾನ ಪಾರಗೂ;
ಜಲಿತ್ವಾ ಅಗ್ಗಿಕ್ಖನ್ಧೋವ, ಸಮ್ಬುದ್ಧೋ ಪರಿನಿಬ್ಬುತೋ.
‘‘ಮಹಾಜನಾ ಸಮಾಗಮ್ಮ, ಪೂಜಯಿತ್ವಾ ತಥಾಗತಂ;
ಚಿತಂ ಕತ್ವಾನ ಸುಗತಂ, ಸರೀರಂ ಅಭಿರೋಪಯುಂ.
‘‘ಸರೀರಕಿಚ್ಚಂ ಕತ್ವಾನ, ಧಾತುಂ ತತ್ಥ ಸಮಾನಯುಂ;
ಸದೇವಮನುಸ್ಸಾ ಸಬ್ಬೇ, ಬುದ್ಧಥೂಪಂ ಅಕಂಸು ತೇ.
‘‘ಪಠಮಾ ಕಞ್ಚನಮಯಾ, ದುತಿಯಾ ಚ ಮಣಿಮಯಾ;
ತತಿಯಾ ರೂಪಿಯಮಯಾ, ಚತುತ್ಥೀ ಫಲಿಕಾಮಯಾ.
‘‘ತತ್ಥ ಪಞ್ಚಮಿಕಾ ಚೇವ [ತತ್ಥ ಪಞ್ಚಮಿಕಾ ಚೇತಿ (ಸೀ.)], ಲೋಹಿತಙ್ಕಮಯಾ ಅಹು;
ಛಟ್ಠಾ ಮಸಾರಗಲ್ಲಸ್ಸ, ಸಬ್ಬಂ ರತನಮಯೂಪರಿ.
‘‘ಜಙ್ಘಾ ಮಣಿಮಯಾ ಆಸಿ, ವೇದಿಕಾ ರತನಾಮಯಾ;
ಸಬ್ಬಸೋಣ್ಣಮಯೋ ಥೂಪೋ, ಉದ್ಧಂ ಯೋಜನಮುಗ್ಗತೋ.
‘‘ದೇವಾ ತತ್ಥ ಸಮಾಗನ್ತ್ವಾ, ಏಕತೋ ಮನ್ತಯುಂ ತದಾ;
‘ಮಯಮ್ಪಿ ಥೂಪಂ ಕಸ್ಸಾಮ, ಲೋಕನಾಥಸ್ಸ ತಾದಿನೋ.
‘‘‘ಧಾತು ಆವೇಣಿಕಾ ನತ್ಥಿ, ಸರೀರಂ ಏಕಪಿಣ್ಡಿತಂ;
ಇಮಮ್ಹಿ ಬುದ್ಧಥೂಪಮ್ಹಿ, ಕಸ್ಸಾಮ ಕಞ್ಚುಕಂ ಮಯಂ’.
‘‘ದೇವಾ ಸತ್ತಹಿ ರತ್ನೇಹಿ, ಅಞ್ಞಂ ವಡ್ಢೇಸುಂ ಯೋಜನಂ;
ಥೂಪೋ ದ್ವಿಯೋಜನುಬ್ಬೇಧೋ, ತಿಮಿರಂ ಬ್ಯಪಹನ್ತಿ ಸೋ.
‘‘ನಾಗಾ ತತ್ಥ ಸಮಾಗನ್ತ್ವಾ, ಏಕತೋ ಮನ್ತಯುಂ ತದಾ;
‘ಮನುಸ್ಸಾ ಚೇವ ದೇವಾ ಚ, ಬುದ್ಧಥೂಪಂ ಅಕಂಸು ತೇ.
‘‘‘ಮಾ ¶ ನೋ ಪಮತ್ತಾ ಅಸ್ಸುಮ್ಹ, ಅಪ್ಪಮತ್ತಾ ಸದೇವಕಾ;
ಮಯಮ್ಪಿ ಥೂಪಂ ಕಸ್ಸಾಮ, ಲೋಕನಾಥಸ್ಸ ತಾದಿನೋ’.
‘‘ಇನ್ದನೀಲಂ ¶ ಮಹಾನೀಲಂ, ಅಥೋ ಜೋತಿರಸಂ ಮಣಿಂ;
ಏಕತೋ ಸನ್ನಿಪಾತೇತ್ವಾ, ಬುದ್ಧಥೂಪಂ ಅಛಾದಯುಂ.
‘‘ಸಬ್ಬಂ ಮಣಿಮಯಂ ಆಸಿ, ಯಾವತಾ [ತಾವತಾ (ಕ.)] ಬುದ್ಧಚೇತಿಯಂ;
ತಿಯೋಜನಸಮುಬ್ಬೇಧಂ, ಆಲೋಕಕರಣಂ ತದಾ.
‘‘ಗರುಳಾ ಚ ಸಮಾಗನ್ತ್ವಾ, ಏಕತೋ ಮನ್ತಯುಂ ತದಾ;
‘ಮನುಸ್ಸಾ ದೇವನಾಗಾ ಚ, ಬುದ್ಧಪೂಜಂ ಅಕಂಸು ತೇ.
‘‘‘ಮಾ ನೋ ಪಮತ್ತಾ ಅಸ್ಸುಮ್ಹ, ಅಪ್ಪಮತ್ತಾ ಸದೇವಕಾ;
ಮಯಮ್ಪಿ ಥೂಪಂ ಕಸ್ಸಾಮ, ಲೋಕನಾಥಸ್ಸ ತಾದಿನೋ’.
‘‘ಸಬ್ಬಂ ಮಣಿಮಯಂ ಥೂಪಂ, ಅಕರುಂ ತೇ ಚ ಕಞ್ಚುಕಂ;
ಯೋಜನಂ ತೇಪಿ ವಡ್ಢೇಸುಂ, ಆಯತಂ ಬುದ್ಧಚೇತಿಯಂ.
‘‘ಚತುಯೋಜನಮುಬ್ಬೇಧೋ, ಬುದ್ಧಥೂಪೋ ವಿರೋಚತಿ;
ಓಭಾಸೇತಿ ದಿಸಾ ಸಬ್ಬಾ, ಸತರಂಸೀವ ಉಗ್ಗತೋ.
‘‘ಕುಮ್ಭಣ್ಡಾ ಚ ಸಮಾಗನ್ತ್ವಾ, ಏಕತೋ ಮನ್ತಯುಂ ತದಾ;
‘ಮನುಸ್ಸಾ ಚೇವ ದೇವಾ ಚ, ನಾಗಾ ಚ ಗರುಳಾ ತಥಾ.
‘‘‘ಪಚ್ಚೇಕಂ ಬುದ್ಧಸೇಟ್ಠಸ್ಸ, ಅಕಂಸು ಥೂಪಮುತ್ತಮಂ;
ಮಾ ನೋ ಪಮತ್ತಾ ಅಸ್ಸುಮ್ಹ, ಅಪ್ಪಮತ್ತಾ ಸದೇವಕಾ.
‘‘‘ಮಯಮ್ಪಿ ಥೂಪಂ ಕಸ್ಸಾಮ, ಲೋಕನಾಥಸ್ಸ ತಾದಿನೋ;
ರತನೇಹಿ ಛಾದೇಸ್ಸಾಮ, ಆಯತಂ ಬುದ್ಧಚೇತಿಯಂ’.
‘‘ಯೋಜನಂ ತೇಪಿ ವಡ್ಢೇಸುಂ, ಆಯತಂ ಬುದ್ಧಚೇತಿಯಂ;
ಪಞ್ಚಯೋಜನಮುಬ್ಬೇಧೋ, ಥೂಪೋ ಓಭಾಸತೇ ತದಾ.
‘‘ಯಕ್ಖಾ ತತ್ಥ ಸಮಾಗನ್ತ್ವಾ, ಏಕತೋ ಮನ್ತಯುಂ ತದಾ;
‘ಮನುಸ್ಸಾ ದೇವನಾಗಾ ಚ, ಗರುಳಾ ಚ ಕುಮ್ಭಣ್ಡಕಾ.
‘‘‘ಪಚ್ಚೇಕಂ ಬುದ್ಧಸೇಟ್ಠಸ್ಸ, ಅಕಂಸು ಥೂಪಮುತ್ತಮಂ;
ಮಾ ನೋ ಪಮತ್ತಾ ಅಸ್ಸುಮ್ಹ, ಅಪ್ಪಮತ್ತಾ ಸದೇವಕಾ.
‘‘‘ಮಯಮ್ಪಿ ¶ ಥೂಪಂ ಕಸ್ಸಾಮ, ಲೋಕನಾಥಸ್ಸ ತಾದಿನೋ;
ಫಲಿಕಾ ಛಾದಯಿಸ್ಸಾಮ, ಆಯತಂ ಬುದ್ಧಚೇತಿಯಂ’.
‘‘ಯೋಜನಂ ತೇಪಿ ವಡ್ಢೇಸುಂ, ಆಯತಂ ಬುದ್ಧಚೇತಿಯಂ;
ಛಯೋಜನಿಕಮುಬ್ಬೇಧೋ, ಥೂಪೋ ಓಭಾಸತೇ ತದಾ.
‘‘ಗನ್ಧಬ್ಬಾ ಚ ಸಮಾಗನ್ತ್ವಾ, ಏಕತೋ ಮನ್ತಯುಂ ತದಾ;
‘ಮನುಜಾ ದೇವತಾ ನಾಗಾ, ಕುಮ್ಭಣ್ಡಾ ಗರುಳಾ ತಥಾ [ಕುಮ್ಭಣ್ಡಾ ಚ ಯಕ್ಖಾ ತಥಾ (ಸೀ.)].
‘‘‘ಸಬ್ಬೇ ಅಕಂಸು ಬುದ್ಧಥೂಪಂ, ಮಯಮೇತ್ಥ ಅಕಾರಕಾ;
ಮಯಮ್ಪಿ ಥೂಪಂ ಕಸ್ಸಾಮ, ಲೋಕನಾಥಸ್ಸ ತಾದಿನೋ’.
‘‘ವೇದಿಯೋ ¶ ಸತ್ತ ಕತ್ವಾನ, ಧಜಂ ಛತ್ತಂ ಅಕಂಸು ತೇ;
ಸಬ್ಬಸೋಣ್ಣಮಯಂ ಥೂಪಂ, ಗನ್ಧಬ್ಬಾ ಕಾರಯುಂ ತದಾ.
‘‘ಸತ್ತಯೋಜನಮುಬ್ಬೇಧೋ, ಥೂಪೋ ಓಭಾಸತೇ ತದಾ;
ರತ್ತಿನ್ದಿವಾ ನ ಞಾಯನ್ತಿ, ಆಲೋಕೋ ಹೋತಿ ಸಬ್ಬದಾ.
‘‘ಅಭಿಭೋನ್ತಿ ನ ತಸ್ಸಾಭಾ, ಚನ್ದಸೂರಾ ಸತಾರಕಾ;
ಸಮನ್ತಾ ಯೋಜನಸತೇ, ಪದೀಪೋಪಿ ನ ಪಜ್ಜಲಿ.
‘‘ತೇನ ಕಾಲೇನ ಯೇ ಕೇಚಿ, ಥೂಪಂ ಪೂಜೇನ್ತಿ ಮಾನುಸಾ;
ನ ತೇ ಥೂಪಂ ಆರುಹನ್ತಿ, ಅಮ್ಬರೇ ಉಕ್ಖಿಪನ್ತಿ ತೇ.
‘‘ದೇವೇಹಿ ಠಪಿತೋ ಯಕ್ಖೋ, ಅಭಿಸಮ್ಮತನಾಮಕೋ;
ಧಜಂ ವಾ ಪುಪ್ಫದಾಮಂ ವಾ, ಅಭಿರೋಪೇತಿ ಉತ್ತರಿಂ.
‘‘ನ ತೇ ಪಸ್ಸನ್ತಿ ತಂ ಯಕ್ಖಂ, ದಾಮಂ ಪಸ್ಸನ್ತಿ ಗಚ್ಛತೋ;
ಏವಂ ಪಸ್ಸಿತ್ವಾ ಗಚ್ಛನ್ತಾ, ಸಬ್ಬೇ ಗಚ್ಛನ್ತಿ ಸುಗ್ಗತಿಂ.
‘‘ವಿರುದ್ಧಾ ಯೇ ಪಾವಚನೇ, ಪಸನ್ನಾ ಯೇ ಚ ಸಾಸನೇ;
ಪಾಟಿಹೀರಂ ದಟ್ಠುಕಾಮಾ, ಥೂಪಂ ಪೂಜೇನ್ತಿ ಮಾನುಸಾ.
‘‘ನಗರೇ ಹಂಸವತಿಯಾ, ಅಹೋಸಿಂ ಭತಕೋ ತದಾ;
ಆಮೋದಿತಂ ಜನಂ ದಿಸ್ವಾ, ಏವಂ ಚಿನ್ತೇಸಹಂ ತದಾ.
‘‘‘ಉಳಾರೋ ಭಗವಾ ನೇಸೋ, ಯಸ್ಸ ಧಾತುಘರೇ ದಿಸಂ;
ಇಮಾ ಚ ಜನತಾ ತುಟ್ಠಾ, ಕಾರಂ ಕುಬ್ಬಂ ನ ತಪ್ಪರೇ.
‘‘‘ಅಹಮ್ಪಿ ¶ ಕಾರಂ ಕಸ್ಸಾಮಿ, ಲೋಕನಾಥಸ್ಸ ತಾದಿನೋ;
ತಸ್ಸ ಧಮ್ಮೇಸು ದಾಯಾದೋ, ಭವಿಸ್ಸಾಮಿ ಅನಾಗತೇ’.
‘‘ಸುಧೋತಂ ರಜಕೇನಾಹಂ, ಉತ್ತರೇಯ್ಯಂ ಪಟಂ ಮಮ;
ವೇಳಗ್ಗೇ ಆಲಗ್ಗೇತ್ವಾನ, ಧಜಂ ಉಕ್ಖಿಪಿಮಮ್ಬರೇ.
‘‘ಅಭಿಸಮ್ಮತಕೋ ಗಯ್ಹ, ಅಮ್ಬರೇ ಹಾಸಿ ಮೇ ಧಜಂ;
ವಾತೇರಿತಂ ಧಜಂ ದಿಸ್ವಾ, ಭಿಯ್ಯೋ ಹಾಸಂ ಜನೇಸಹಂ.
‘‘ತತ್ಥ ಚಿತ್ತಂ ಪಸಾದೇತ್ವಾ, ಸಮಣಂ ಉಪಸಙ್ಕಮಿಂ;
ತಂ ಭಿಕ್ಖುಂ ಅಭಿವಾದೇತ್ವಾ, ವಿಪಾಕಂ ಪುಚ್ಛಹಂ ಧಜೇ.
‘‘ಸೋ ಮೇ ಕಥೇಸಿ ಆನನ್ದೀ, ಪೀತಿಸಞ್ಜನನಂ ಮಮ;
‘ತಸ್ಸ ಧಜಸ್ಸ ವಿಪಾಕಂ, ಅನುಭೋಸ್ಸಸಿ ಸಬ್ಬದಾ.
‘‘‘ಹತ್ಥಿಅಸ್ಸರಥಾಪತ್ತೀ, ಸೇನಾ ಚ ಚತುರಙ್ಗಿನೀ;
ಪರಿವಾರೇಸ್ಸನ್ತಿ ತಂ ನಿಚ್ಚಂ, ಧಜದಾನಸ್ಸಿದಂ ಫಲಂ.
‘‘‘ಸಟ್ಠಿತುರಿಯಸಹಸ್ಸಾನಿ, ಭೇರಿಯೋ ಸಮಲಙ್ಕತಾ;
ಪರಿವಾರೇಸ್ಸನ್ತಿ ತಂ ನಿಚ್ಚಂ, ಧಜದಾನಸ್ಸಿದಂ ಫಲಂ.
‘‘‘ಛಳಸೀತಿಸಹಸ್ಸಾನಿ ¶ , ನಾರಿಯೋ ಸಮಲಙ್ಕತಾ;
ವಿಚಿತ್ತವತ್ಥಾಭರಣಾ, ಆಮುಕ್ಕಮಣಿಕುಣ್ಡಲಾ.
‘‘‘ಆಳಾರಪಮ್ಹಾ ಹಸುಲಾ, ಸುಸಞ್ಞಾ [ಸುತ್ಥನಾ (ಸೀ.) ಅಪ. ಥೇರ ೨.೪೮.೧೯ ಮಣಿಪೂಜಕತ್ಥೇರಾಪದಾನೇಪಿ] ತನುಮಜ್ಝಿಮಾ;
ಪರಿವಾರೇಸ್ಸನ್ತಿ ತಂ ನಿಚ್ಚಂ, ಧಜದಾನಸ್ಸಿದಂ ಫಲಂ.
‘‘‘ತಿಂಸಕಪ್ಪಸಹಸ್ಸಾನಿ, ದೇವಲೋಕೇ ರಮಿಸ್ಸಸಿ;
ಅಸೀತಿಕ್ಖತ್ತುಂ ದೇವಿನ್ದೋ, ದೇವರಜ್ಜಂ ಕರಿಸ್ಸಸಿ.
‘‘‘ಸಹಸ್ಸಕ್ಖತ್ತುಂ ರಾಜಾ ಚ, ಚಕ್ಕವತ್ತೀ ಭವಿಸ್ಸತಿ;
ಪದೇಸರಜ್ಜಂ ವಿಪುಲಂ, ಗಣನಾತೋ ಅಸಙ್ಖಿಯಂ.
‘‘‘ಕಪ್ಪಸತಸಹಸ್ಸಮ್ಹಿ, ಓಕ್ಕಾಕಕುಲಸಮ್ಭವೋ;
ಗೋತಮೋ ನಾಮ ಗೋತ್ತೇನ, ಸತ್ಥಾ ಲೋಕೇ ಭವಿಸ್ಸತಿ.
‘‘‘ದೇವಲೋಕಾ ಚವಿತ್ವಾನ, ಸುಕ್ಕಮೂಲೇನ ಚೋದಿತೋ;
ಪುಞ್ಞಕಮ್ಮೇನ ಸಞ್ಞುತ್ತೋ, ಬ್ರಹ್ಮಬನ್ಧು ಭವಿಸ್ಸಸಿ.
‘‘‘ಅಸೀತಿಕೋಟಿಂ ¶ ಛಡ್ಡೇತ್ವಾ, ದಾಸೇ ಕಮ್ಮಕರೇ ಬಹೂ;
ಗೋತಮಸ್ಸ ಭಗವತೋ, ಸಾಸನೇ ಪಬ್ಬಜಿಸ್ಸಸಿ.
‘‘‘ಆರಾಧಯಿತ್ವಾ ಸಮ್ಬುದ್ಧಂ, ಗೋತಮಂ ಸಕ್ಯಪುಙ್ಗವಂ;
ಉಪವಾನೋತಿ ನಾಮೇನ, ಹೇಸ್ಸಸಿ ಸತ್ಥು ಸಾವಕೋ’.
‘‘ಸತಸಹಸ್ಸೇ ಕತಂ ಕಮ್ಮಂ, ಫಲಂ ದಸ್ಸೇಸಿ ಮೇ ಇಧ;
ಸುಮುತ್ತೋ ಸರವೇಗೋವ, ಕಿಲೇಸೇ ಝಾಪಯಿಂ [ಕಿಲೇಸಾ ಝಾಪಿತಾ (ಸೀ.)] ಮಮ.
‘‘ಚಕ್ಕವತ್ತಿಸ್ಸ ಸನ್ತಸ್ಸ, ಚಾತುದ್ದೀಪಿಸ್ಸರಸ್ಸ ಮೇ;
ತೀಣಿ ಯೋಜನಾನಿ ಸಾಮನ್ತಾ, ಉಸ್ಸೀಯನ್ತಿ ಧಜಾ ಸದಾ.
‘‘ಸತಸಹಸ್ಸಿತೋ ಕಪ್ಪೇ, ಯಂ ಕಮ್ಮಮಕರಿಂ ತದಾ;
ದುಗ್ಗತಿಂ ನಾಭಿಜಾನಾಮಿ, ಧಜದಾನಸ್ಸಿದಂ ಫಲಂ.
‘‘ಕಿಲೇಸಾ ಝಾಪಿತಾ ಮಯ್ಹಂ…ಪೇ… ವಿಹರಾಮಿ ಅನಾಸವೋ.
‘‘ಸ್ವಾಗತಂ ವತ ಮೇ ಆಸಿ…ಪೇ… ಕತಂ ಬುದ್ಧಸ್ಸ ಸಾಸನಂ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ಉಪವಾನತ್ಥೇರೋ ಇಮಾ ಗಾಥಾಯೋ
ಅಭಾಸಿತ್ಥಾತಿ.
ಉಪವಾನತ್ಥೇರಸ್ಸಾಪದಾನಂ ದಸಮಂ.
೧೧. ರಟ್ಠಪಾಲತ್ಥೇರಅಪದಾನಂ
‘‘ಪದುಮುತ್ತರಸ್ಸ ¶ ಭಗವತೋ, ಲೋಕಜೇಟ್ಠಸ್ಸ ತಾದಿನೋ;
ವರನಾಗೋ ಮಯಾ ದಿನ್ನೋ, ಈಸಾದನ್ತೋ ಉರೂಳ್ಹವಾ.
‘‘ಸೇತಚ್ಛತ್ತೋಪಸೋಭಿತೋ, ಸಕಪ್ಪನೋ [ಸೀದಬ್ಬನೋ (ಸೀ.)] ಸಹತ್ಥಿಪೋ;
ಅಗ್ಘಾಪೇತ್ವಾನ ತಂ ಸಬ್ಬಂ, ಸಙ್ಘಾರಾಮಂ ಅಕಾರಯಿಂ.
‘‘ಚತುಪಞ್ಞಾಸಸಹಸ್ಸಾನಿ, ಪಾಸಾದೇ ಕಾರಯಿಂ ಅಹಂ;
ಮಹೋಘದಾನಂ [ಮಹಗ್ಘಞ್ಚ (ಸೀ.), ಮಯಾ ಭತ್ತಂ (ಕ.) ಅಪ. ಥೇರ ೧.೨.೯೯] ಕರಿತ್ವಾನ, ನಿಯ್ಯಾದೇಸಿಂ ಮಹೇಸಿನೋ.
‘‘ಅನುಮೋದಿ ¶ ಮಹಾವೀರೋ, ಸಯಮ್ಭೂ ಅಗ್ಗಪುಗ್ಗಲೋ;
ಸಬ್ಬೇ ಜನೇ ಹಾಸಯನ್ತೋ, ದೇಸೇಸಿ ಅಮತಂ ಪದಂ.
‘‘ತಂ ಮೇ ಬುದ್ಧೋ ವಿಯಾಕಾಸಿ, ಜಲಜುತ್ತಮನಾಮಕೋ;
ಭಿಕ್ಖುಸಙ್ಘೇ ನಿಸೀದಿತ್ವಾ, ಇಮಾ ಗಾಥಾ ಅಭಾಸಥ.
‘‘‘ಚತುಪಞ್ಞಾಸಸಹಸ್ಸಾನಿ, ಪಾಸಾದೇ ಕಾರಯೀ ಅಯಂ;
ಕಥಯಿಸ್ಸಾಮಿ ವಿಪಾಕಂ, ಸುಣಾಥ ಮಮ ಭಾಸತೋ.
‘‘‘ಅಟ್ಠಾರಸಸಹಸ್ಸಾನಿ, ಕೂಟಾಗಾರಾ ಭವಿಸ್ಸರೇ;
ಬ್ಯಮ್ಹುತ್ತಮಮ್ಹಿ ನಿಬ್ಬತ್ತಾ, ಸಬ್ಬಸೋಣ್ಣಮಯಾ ಚ ತೇ.
‘‘‘ಪಞ್ಞಾಸಕ್ಖತ್ತುಂ ದೇವಿನ್ದೋ, ದೇವರಜ್ಜಂ ಕರಿಸ್ಸತಿ;
ಅಟ್ಠಪಞ್ಞಾಸಕ್ಖತ್ತುಞ್ಚ, ಚಕ್ಕವತ್ತೀ ಭವಿಸ್ಸತಿ.
‘‘‘ಕಪ್ಪಸತಸಹಸ್ಸಮ್ಹಿ, ಓಕ್ಕಾಕಕುಲಸಮ್ಭವೋ;
ಗೋತಮೋ ನಾಮ ಗೋತ್ತೇನ, ಸತ್ಥಾ ಲೋಕೇ ಭವಿಸ್ಸತಿ.
‘‘‘ದೇವಲೋಕಾ ಚವಿತ್ವಾನ, ಸುಕ್ಕಮೂಲೇನ ಚೋದಿತೋ;
ಅಡ್ಢೇ ಕುಲೇ ಮಹಾಭೋಗೇ, ನಿಬ್ಬತ್ತಿಸ್ಸತಿ ತಾವದೇ.
‘‘‘ಸೋ ಪಚ್ಛಾ ಪಬ್ಬಜಿತ್ವಾನ, ಸುಕ್ಕಮೂಲೇನ ಚೋದಿತೋ;
ರಟ್ಠಪಾಲೋತಿ ನಾಮೇನ, ಹೇಸ್ಸತಿ ಸತ್ಥು ಸಾವಕೋ.
‘‘‘ಪಧಾನಪಹಿತತ್ತೋ ಸೋ, ಉಪಸನ್ತೋ ನಿರೂಪಧಿ;
ಸಬ್ಬಾಸವೇ ಪರಿಞ್ಞಾಯ, ನಿಬ್ಬಾಯಿಸ್ಸತಿನಾಸವೋ’.
‘‘ಉಟ್ಠಾಯ ಅಭಿನಿಕ್ಖಮ್ಮ, ಜಹಿತಾ ಭೋಗಸಮ್ಪದಾ;
ಖೇಳಪಿಣ್ಡೇವ ಭೋಗಮ್ಹಿ, ಪೇಮಂ ಮಯ್ಹಂ ನ ವಿಜ್ಜತಿ.
‘‘ವೀರಿಯಂ ಮೇ ಧುರಧೋರಯ್ಹಂ, ಯೋಗಕ್ಖೇಮಾಧಿವಾಹನಂ;
ಧಾರೇಮಿ ಅನ್ತಿಮಂ ದೇಹಂ, ಸಮ್ಮಾಸಮ್ಬುದ್ಧಸಾಸನೇ.
‘‘ಕಿಲೇಸಾ ¶ ಝಾಪಿತಾ ಮಯ್ಹಂ…ಪೇ… ವಿಹರಾಮಿ ಅನಾಸವೋ.
‘‘ಸ್ವಾಗತಂ ವತ ಮೇ ಆಸಿ…ಪೇ… ಕತಂ ಬುದ್ಧಸ್ಸ ಸಾಸನಂ.
‘‘ಪಟಿಸಮ್ಭಿದಾ ¶ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಆಯಸ್ಮಾ ರಟ್ಠಪಾಲೋ ಥೇರೋ ಇಮಾ ಗಾಥಾಯೋ
ಅಭಾಸಿತ್ಥಾತಿ.
ರಟ್ಠಪಾಲತ್ಥೇರಸ್ಸಾಪದಾನಂ ಏಕಾದಸಮಂ.
ಯಸವಗ್ಗೋ ಛಪಞ್ಞಾಸಮೋ.
ತಸ್ಸುದ್ದಾನಂ –
ಯಸೋ ನದೀಕಸ್ಸಪೋ ಚ, ಗಯಾಕಿಮಿಲವಜ್ಜಿನೋ;
ದುವೇ ಉತ್ತರಾ ಭದ್ದಜೀ, ಸಿವಕೋ ಉಪವಾಹನೋ;
ರಟ್ಠಪಾಲೋ ಏಕಸತಂ, ಗಾಥಾನಂ ಪಞ್ಚನವುತಿ.
ಥೇರಾಪದಾನಂ ಸಮತ್ತಂ.
ಏತ್ತಾವತಾ ಬುದ್ಧಾಪದಾನಞ್ಚ ಪಚ್ಚೇಕಾಪದಾನಞ್ಚ ಥೇರಾಪದಾನಞ್ಚ
ಸಮತ್ತಾನಿ.
ನಮೋ ತಸ್ಸ ಭಗವತೋ ಅರಹತೋ ಸಮ್ಮಾಸಮ್ಬುದ್ಧಸ್ಸ
ಖುದ್ದಕನಿಕಾಯೇ
ಥೇರೀಅಪದಾನಪಾಳಿ
೧. ಸುಮೇಧಾವಗ್ಗೋ
೧. ಸುಮೇಧಾಥೇರೀಅಪದಾನಂ
ಅಥ ಥೇರಿಕಾಪದಾನಾನಿ ಸುಣಾಥ –
‘‘ಭಗವತಿ ¶ ¶ ¶ ¶ ಕೋಣಾಗಮನೇ, ಸಙ್ಘಾರಾಮಮ್ಹಿ ನವನಿವೇಸನಮ್ಹಿ [ನಿವೇಸಮ್ಹಿ (ಸ್ಯಾ.)];
ಸಖಿಯೋ ತಿಸ್ಸೋ ಜನಿಯೋ, ವಿಹಾರದಾನಂ ಅದಾಸಿಮ್ಹ.
‘‘ದಸಕ್ಖತ್ತುಂ ಸತಕ್ಖತ್ತುಂ, ದಸಸತಕ್ಖತ್ತುಂ ಸತಾನಞ್ಚ ಸತಕ್ಖತ್ತುಂ [ಸತಾನಿ ಚ ಸತ್ತಕ್ಖತ್ತುಂ (ಸೀ. ಕ.)];
ದೇವೇಸು ಉಪಪಜ್ಜಿಮ್ಹ, ಕೋ ವಾದೋ ಮಾನುಸೇ ಭವೇ.
‘‘ದೇವೇ ¶ ಮಹಿದ್ಧಿಕಾ ಅಹುಮ್ಹ, ಮಾನುಸಕಮ್ಹಿ ಕೋ ವಾದೋ;
ಸತ್ತರತನಮಹೇಸೀ [ಸತ್ತರತನಸ್ಸ ಮಹೇಸೀ (ಸೀ. ಪೀ.)], ಇತ್ಥಿರತನಂ ಅಹಂ ಭವಿಂ.
‘‘ಇಧ ಸಞ್ಚಿತಕುಸಲಾ [ತತ್ಥ ಸಞ್ಚಿತಂ ಕುಸಲಂ (ಸ್ಯಾ.)], ಸುಸಮಿದ್ಧಕುಲಪ್ಪಜಾ;
ಧನಞ್ಜಾನೀ ಚ ಖೇಮಾ ಚ, ಅಹಮ್ಪಿ ಚ ತಯೋ ಜನಾ.
‘‘ಆರಾಮಂ ಸುಕತಂ ಕತ್ವಾ, ಸಬ್ಬಾವಯವಮಣ್ಡಿತಂ;
ಬುದ್ಧಪ್ಪಮುಖಸಙ್ಘಸ್ಸ, ನಿಯ್ಯಾದೇತ್ವಾ ಸಮೋದಿತಾ.
‘‘ಯತ್ಥ ¶ ಯತ್ಥೂಪಪಜ್ಜಾಮಿ, ತಸ್ಸ ಕಮ್ಮಸ್ಸ ವಾಹಸಾ;
ದೇವೇಸು ಅಗ್ಗತಂ ಪತ್ತಾ, ಮನುಸ್ಸೇಸು ತಥೇವ ಚ.
‘‘ಇಮಸ್ಮಿಂಯೇವ ಕಪ್ಪಮ್ಹಿ, ಬ್ರಹ್ಮಬನ್ಧು ಮಹಾಯಸೋ;
ಕಸ್ಸಪೋ ನಾಮ ಗೋತ್ತೇನ, ಉಪ್ಪಜ್ಜಿ ವದತಂ ವರೋ.
‘‘ಉಪಟ್ಠಾಕೋ ¶ ಮಹೇಸಿಸ್ಸ, ತದಾ ಆಸಿ ನರಿಸ್ಸರೋ;
ಕಾಸಿರಾಜಾ ಕಿಕೀ ನಾಮ, ಬಾರಾಣಸಿಪುರುತ್ತಮೇ.
‘‘ತಸ್ಸಾಸುಂ ಸತ್ತ ಧೀತರೋ, ರಾಜಕಞ್ಞಾ ಸುಖೇಧಿತಾ [ಸುಖೇಥಿತಾ (ಸ್ಯಾ.)];
ಬುದ್ಧೋಪಟ್ಠಾನನಿರತಾ, ಬ್ರಹ್ಮಚರಿಯಂ ಚರಿಂಸು ತಾ.
‘‘ತಾಸಂ ಸಹಾಯಿಕಾ ಹುತ್ವಾ, ಸೀಲೇಸು ಸುಸಮಾಹಿತಾ;
ದತ್ವಾ ದಾನಾನಿ ಸಕ್ಕಚ್ಚಂ, ಅಗಾರೇವ ವತಂ [ಅಗಾರೇವ ವತ್ತಂ (ಸ್ಯಾ.)] ಚರಿಂ.
‘‘ತೇನ ಕಮ್ಮೇನ ಸುಕತೇನ, ಚೇತನಾಪಣಿಧೀಹಿ ಚ;
ಜಹಿತ್ವಾ ಮಾನುಸಂ ದೇಹಂ, ತಾವತಿಂಸೂಪಗಾ ಅಹಂ.
‘‘ತತೋ ಚುತಾ ಯಾಮಮಗಂ [ಯಾಮಸಗ್ಗಂ (ಸ್ಯಾ.)], ತತೋಹಂ ತುಸಿತಂ ಗತಾ;
ತತೋ ಚ ನಿಮ್ಮಾನರತಿಂ, ವಸವತ್ತಿಪುರಂ ತತೋ.
‘‘ಯತ್ಥ ಯತ್ಥೂಪಪಜ್ಜಾಮಿ, ಪುಞ್ಞಕಮ್ಮಸಮೋಹಿತಾ;
ತತ್ಥ ತತ್ಥೇವ ರಾಜೂನಂ, ಮಹೇಸಿತ್ತಮಕಾರಯಿಂ.
‘‘ತತೋ ¶ ಚುತಾ ಮನುಸ್ಸತ್ತೇ, ರಾಜೂನಂ ಚಕ್ಕವತ್ತಿನಂ;
ಮಣ್ಡಲೀನಞ್ಚ ರಾಜೂನಂ, ಮಹೇಸಿತ್ತಮಕಾರಯಿಂ.
‘‘ಸಮ್ಪತ್ತಿಮನುಭೋತ್ವಾನ, ದೇವೇಸು ಮಾನುಸೇಸು ಚ;
ಸಬ್ಬತ್ಥ ಸುಖಿತಾ ಹುತ್ವಾ, ನೇಕಜಾತೀಸು ಸಂಸರಿಂ.
‘‘ಸೋ ಹೇತು ಚ ಸೋ ಪಭವೋ, ತಮ್ಮೂಲಂ ಸಾಸನೇ ಖಮಂ [ತಮ್ಮೂಲಂ ಸಾ ಚ ಸಾಸನೇ ಖನ್ತಿ (ಸೀ. ಪೀ. ಕ.)];
ಪಠಮಂ ತಂ ಸಮೋಧಾನಂ, ತಂ ಧಮ್ಮರತಾಯ ನಿಬ್ಬಾನಂ [ನಿಬ್ಬುತಂ (ಸ್ಯಾ.)].
‘‘ಕಿಲೇಸಾ ¶ ಝಾಪಿತಾ ಮಯ್ಹಂ, ಭವಾ ಸಬ್ಬೇ ಸಮೂಹತಾ;
ನಾಗೀವ ಬನ್ಧನಂ ಛೇತ್ವಾ, ವಿಹರಾಮಿ ಅನಾಸವಾ.
‘‘ಸ್ವಾಗತಂ ¶ ವತ ಮೇ ಆಸಿ, ಮಮ ಬುದ್ಧಸ್ಸ [ಬುದ್ಧಸೇಟ್ಠಸ್ಸ (ಸೀ. ಸ್ಯಾ. ಕ.)] ಸನ್ತಿಕೇ;
ತಿಸ್ಸೋ ವಿಜ್ಜಾ ಅನುಪ್ಪತ್ತಾ, ಕತಂ ಬುದ್ಧಸ್ಸ ಸಾಸನಂ.
‘‘ಪಟಿಸಮ್ಭಿದಾ ¶ ಚತಸ್ಸೋ, ವಿಮೋಕ್ಖಾಪಿ ಚ ಅಟ್ಠಿಮೇ;
ಛಳಭಿಞ್ಞಾ ಸಚ್ಛಿಕತಾ, ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಸುಮೇಧಾ ಭಿಕ್ಖುನೀ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಸುಮೇಧಾಥೇರಿಯಾಪದಾನಂ ಪಠಮಂ.
೨. ಮೇಖಲಾದಾಯಿಕಾಥೇರೀಅಪದಾನಂ
‘‘ಸಿದ್ಧತ್ಥಸ್ಸ ಭಗವತೋ, ಥೂಪಕಾರಾಪಿಕಾ ಅಹುಂ [ಥೂಪಕಾರ ಮಕಾಸಹಂ (ಸ್ಯಾ.)];
ಮೇಖಲಿಕಾ ಮಯಾ ದಿನ್ನಾ, ನವಕಮ್ಮಾಯ ಸತ್ಥುನೋ.
‘‘ನಿಟ್ಠಿತೇ ಚ ಮಹಾಥೂಪೇ, ಮೇಖಲಂ ಪುನದಾಸಹಂ;
ಲೋಕನಾಥಸ್ಸ ಮುನಿನೋ, ಪಸನ್ನಾ ಸೇಹಿ ಪಾಣಿಭಿ.
‘‘ಚತುನ್ನವುತಿತೋ ಕಪ್ಪೇ, ಯಂ ಮೇಖಲಮದಂ ತದಾ;
ದುಗ್ಗತಿಂ ನಾಭಿಜಾನಾಮಿ, ಥೂಪಕಾರಸ್ಸಿದಂ ಫಲಂ.
‘‘ಕಿಲೇಸಾ ಝಾಪಿತಾ ಮಯ್ಹಂ…ಪೇ… ವಿಹರಾಮಿ ಅನಾಸವಾ.
‘‘ಸ್ವಾಗತಂ ¶ ವತ ಮೇ ಆಸಿ…ಪೇ… ಕತಂ ಬುದ್ಧಸ್ಸ ಸಾಸನಂ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ¶ ಸುದಂ ಮೇಖಲಾದಾಯಿಕಾ ಭಿಕ್ಖುನೀ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಮೇಖಲಾದಾಯಿಕಾಥೇರಿಯಾಪದಾನಂ ದುತಿಯಂ.
೩. ಮಣ್ಡಪದಾಯಿಕಾಥೇರೀಅಪದಾನಂ
‘‘ಕೋಣಾಗಮನಬುದ್ಧಸ್ಸ ¶ , ಮಣ್ಡಪೋ ಕಾರಿತೋ ಮಯಾ;
ಧುವಂ ತಿಚೀವರಂದಾಸಿಂ [ಥೂಪಞ್ಚ ಪವರಮದಂ (ಸ್ಯಾ.), ಧುವಞ್ಚ ಚೀವರಂ ಅದಂ (ಪೀ.)], ಬುದ್ಧಸ್ಸ ಲೋಕಬನ್ಧುನೋ.
‘‘ಯಂ ಯಂ ಜನಪದಂ ಯಾಮಿ, ನಿಗಮೇ ರಾಜಧಾನಿಯೋ;
ಸಬ್ಬತ್ಥ ಪೂಜಿತೋ ಹೋಮಿ, ಪುಞ್ಞಕಮ್ಮಸ್ಸಿದಂ ಫಲಂ.
‘‘ಕಿಲೇಸಾ ಝಾಪಿತಾ ಮಯ್ಹಂ…ಪೇ… ವಿಹರಾಮಿ ಅನಾಸವಾ.
‘‘ಸ್ವಾಗತಂ ¶ ವತ ಮೇ ಆಸಿ…ಪೇ… ಕತಂ ಬುದ್ಧಸ್ಸ ಸಾಸನಂ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಮಣ್ಡಪದಾಯಿಕಾ ಭಿಕ್ಖುನೀ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಮಣ್ಡಪದಾಯಿಕಾಥೇರಿಯಾಪದಾನಂ ತತಿಯಂ.
೪. ಸಙ್ಕಮನತ್ಥಾಥೇರೀಅಪದಾನಂ
‘‘ವಿಪಸ್ಸಿಸ್ಸ ಭಗವತೋ [ಕೋಣ್ಡಞ್ಞಸ್ಸ ಭಗವತೋ (ಸ್ಯಾ. ಪೀ.)], ಲೋಕಜೇಟ್ಠಸ್ಸ ತಾದಿನೋ;
ರಥಿಯಂ ಪಟಿಪನ್ನಸ್ಸ, ತಾರಯನ್ತಸ್ಸ ಪಾಣಿನೋ.
‘‘ಘರತೋ ¶ ನಿಕ್ಖಮಿತ್ವಾನ, ಅವಕುಜ್ಜಾ ನಿಪಜ್ಜಹಂ;
ಅನುಕಮ್ಪಕೋ ಲೋಕನಾಥೋ, ಸಿರಸಿ [ಸೀಸನ್ತೇ (ಸೀ. ಕ.)] ಅಕ್ಕಮೀ ಮಮ [ತದಾ (ಸ್ಯಾ. ಪೀ.)].
‘‘ಅಕ್ಕಮಿತ್ವಾನ ಸಿರಸಿ [ಸಮ್ಬುದ್ಧೋ (ಕ.)], ಅಗಮಾ ಲೋಕನಾಯಕೋ;
ತೇನ ಚಿತ್ತಪ್ಪಸಾದೇನ, ತುಸಿತಂ ಅಗಮಾಸಹಂ.
‘‘ಕಿಲೇಸಾ ಝಾಪಿತಾ ಮಯ್ಹಂ…ಪೇ… ವಿಹರಾಮಿ ಅನಾಸವಾ.
‘‘ಸ್ವಾಗತಂ ¶ ವತ ಮೇ ಆಸಿ…ಪೇ… ಕತಂ ಬುದ್ಧಸ್ಸ ಸಾಸನಂ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಸಙ್ಕಮನತ್ಥಾ [ಸಙ್ಕಮನದಾ (ಸ್ಯಾ.)] ಭಿಕ್ಖುನೀ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಸಙ್ಕಮನತ್ಥಾಥೇರಿಯಾಪದಾನಂ ಚತುತ್ಥಂ.
೫. ನಳಮಾಲಿಕಾಥೇರೀಅಪದಾನಂ
‘‘ಚನ್ದಭಾಗಾನದೀತೀರೇ ¶ , ಅಹೋಸಿಂ ಕಿನ್ನರೀ ತದಾ;
ಅದ್ದಸಂ ವಿರಜಂ ಬುದ್ಧಂ, ಸಯಮ್ಭುಂ ಅಪರಾಜಿತಂ.
‘‘ಪಸನ್ನಚಿತ್ತಾ ಸುಮನಾ, ವೇದಜಾತಾ ಕತಞ್ಜಲೀ;
ನಳಮಾಲಂ ಗಹೇತ್ವಾನ, ಸಯಮ್ಭುಂ ಅಭಿಪೂಜಯಿಂ.
‘‘ತೇನ ¶ ಕಮ್ಮೇನ ಸುಕತೇನ, ಚೇತನಾಪಣಿಧೀಹಿ ಚ;
ಜಹಿತ್ವಾ ಕಿನ್ನರೀದೇಹಂ, ಅಗಚ್ಛಿಂ ತಿದಸಂ ಗತಿಂ.
‘‘ಛತ್ತಿಂಸದೇವರಾಜೂನಂ ¶ , ಮಹೇಸಿತ್ತಮಕಾರಯಿಂ;
ದಸನ್ನಂ ಚಕ್ಕವತ್ತೀನಂ, ಮಹೇಸಿತ್ತಮಕಾರಯಿಂ;
ಸಂವೇಜೇತ್ವಾನ ಮೇ ಚಿತ್ತಂ [ವೇದಯಿತ್ವಾನ ಕುಸಲಂ (ಸ್ಯಾ.), ಸಂವೇದಯಿತ್ವಾ ಕುಸಲಂ (ಪೀ.)], ಪಬ್ಬಜಿಂ ಅನಗಾರಿಯಂ.
‘‘ಕಿಲೇಸಾ ಝಾಪಿತಾ ಮಯ್ಹಂ, ಭವಾ ಸಬ್ಬೇ ಸಮೂಹತಾ [ಭವಾ ಸಂಘಾತಿತಾ ಮಮ (ಕ.)];
ಸಬ್ಬಾಸವಪರಿಕ್ಖೀಣಾ, ನತ್ಥಿ ದಾನಿ ಪುನಬ್ಭವೋ.
‘‘ಚತುನ್ನವುತಿತೋ ಕಪ್ಪೇ, ಯಂ ಪುಪ್ಫಮಭಿಪೂಜಯಿಂ;
ದುಗ್ಗತಿಂ ನಾಭಿಜಾನಾಮಿ, ಪುಪ್ಫಪೂಜಾಯಿದಂ ಫಲಂ.
‘‘ಕಿಲೇಸಾ ಝಾಪಿತಾ ಮಯ್ಹಂ…ಪೇ… ವಿಹರಾಮಿ ಅನಾಸವಾ.
‘‘ಸ್ವಾಗತಂ ವತ ಮೇ ಆಸಿ…ಪೇ… ಕತಂ ಬುದ್ಧಸ್ಸ ಸಾಸನಂ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ನಳಮಾಲಿಕಾ ಥೇರೀ ಇಮಾ ಗಾಥಾಯೋ ಅಭಾಸಿತ್ಥಾತಿ.
ನಳಮಾಲಿಕಾಥೇರಿಯಾಪದಾನಂ ಪಞ್ಚಮಂ.
೬. ಏಕಪಿಣ್ಡಪಾತದಾಯಿಕಾಥೇರೀಅಪದಾನಂ
‘‘ನಗರೇ ಬನ್ಧುಮತಿಯಾ, ಬನ್ಧುಮಾ ನಾಮ ಖತ್ತಿಯೋ;
ತಸ್ಸ ರಞ್ಞೋ ಅಹುಂ ಭರಿಯಾ, ಏಕಜ್ಝಂ ಚಾರಯಾಮಹಂ [ಏಕಚ್ಚಂ ವಾದಯಾಮಹಂ (ಸ್ಯಾ.)].
‘‘ರಹೋಗತಾ ¶ ¶ ನಿಸೀದಿತ್ವಾ, ಏವಂ ಚಿನ್ತೇಸಹಂ ತದಾ;
‘ಆದಾಯ ಗಮನೀಯಞ್ಹಿ, ಕುಸಲಂ ನತ್ಥಿ ಮೇ ಕತಂ.
‘‘‘ಮಹಾಭಿತಾಪಂ ¶ ಕಟುಕಂ, ಘೋರರೂಪಂ ಸುದಾರುಣಂ;
ನಿರಯಂ ನೂನ ಗಚ್ಛಾಮಿ, ಏತ್ಥ ಮೇ ನತ್ಥಿ ಸಂಸಯೋ’.
‘‘ರಾಜಾನಂ ಉಪಸಙ್ಕಮ್ಮ, ಇದಂ ವಚನಮಬ್ರವಿಂ;
‘ಏಕಂ ಮೇ ಸಮಣಂ ದೇಹಿ, ಭೋಜಯಿಸ್ಸಾಮಿ ಖತ್ತಿಯ’.
‘‘ಅದಾಸಿ ಮೇ ಮಹಾರಾಜಾ, ಸಮಣಂ ಭಾವಿತಿನ್ದ್ರಿಯಂ;
ತಸ್ಸ ಪತ್ತಂ ಗಹೇತ್ವಾನ, ಪರಮನ್ನೇನ ಪೂರಯಿಂ [ತಪ್ಪಯಿಂ (ಸೀ.)].
‘‘ಪೂರಯಿತ್ವಾ ¶ ಪರಮನ್ನಂ, ಗನ್ಧಾಲೇಪಂ ಅಕಾಸಹಂ;
ಜಾಲೇನ ಪಿದಹಿತ್ವಾನ, ವತ್ಥಯುಗೇನ [ಪೀತಚೋಳೇನ (ಸ್ಯಾ.), ಮಹಾನೇಲೇನ (ಪೀ.)] ಛಾದಯಿಂ.
‘‘ಆರಮ್ಮಣಂ ಮಮಂ ಏತಂ, ಸರಾಮಿ ಯಾವಜೀವಿಹಂ;
ತತ್ಥ ಚಿತ್ತಂ ಪಸಾದೇತ್ವಾ, ತಾವತಿಂಸಮಗಚ್ಛಹಂ.
‘‘ತಿಂಸಾನಂ ದೇವರಾಜೂನಂ, ಮಹೇಸಿತ್ತಮಕಾರಯಿಂ;
ಮನಸಾ ಪತ್ಥಿತಂ ಮಯ್ಹಂ, ನಿಬ್ಬತ್ತತಿ ಯಥಿಚ್ಛಿತಂ [ಯತಿಚ್ಛಕಂ (ಸ್ಯಾ.), ಯದಿಚ್ಛಕಂ (ಪೀ. ಕ.)].
‘‘ವೀಸಾನಂ ಚಕ್ಕವತ್ತೀನಂ, ಮಹೇಸಿತ್ತಮಕಾರಯಿಂ;
ಓಚಿತತ್ತಾವ [ಉಪಚಿತತ್ತಾ (ಸ್ಯಾ.)] ಹುತ್ವಾನ, ಸಂಸರಾಮಿ ಭವೇಸ್ವಹಂ.
‘‘ಸಬ್ಬಬನ್ಧನಮುತ್ತಾಹಂ, ಅಪೇತಾ ಮೇ ಉಪಾದಿಕಾ;
ಸಬ್ಬಾಸವಪರಿಕ್ಖೀಣಾ, ನತ್ಥಿ ದಾನಿ ಪುನಬ್ಭವೋ.
‘‘ಏಕನವುತಿತೋ ಕಪ್ಪೇ, ಯಂ ದಾನಮದದಿಂ ತದಾ;
ದುಗ್ಗತಿಂ ¶ ನಾಭಿಜಾನಾಮಿ, ಪಿಣ್ಡಪಾತಸ್ಸಿದಂ ಫಲಂ.
‘‘ಕಿಲೇಸಾ ಝಾಪಿತಾ ಮಯ್ಹಂ…ಪೇ… ವಿಹರಾಮಿ ಅನಾಸವಾ.
‘‘ಸ್ವಾಗತಂ ವತ ಮೇ ಆಸಿ…ಪೇ… ಕತಂ ಬುದ್ಧಸ್ಸ ಸಾಸನಂ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಏಕಪಿಣ್ಡಪಾತದಾಯಿಕಾ ಭಿಕ್ಖುನೀ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಏಕಪಿಣ್ಡಪಾತದಾಯಿಕಾಥೇರಿಯಾಪದಾನಂ ಛಟ್ಠಂ.
೭. ಕಟಚ್ಛುಭಿಕ್ಖಾದಾಯಿಕಾಥೇರೀಅಪದಾನಂ
‘‘ಪಿಣ್ಡಚಾರಂ ¶ ಚರನ್ತಸ್ಸ, ತಿಸ್ಸನಾಮಸ್ಸ ಸತ್ಥುನೋ;
ಕಟಚ್ಛುಭಿಕ್ಖಂ ಪಗ್ಗಯ್ಹ, ಬುದ್ಧಸೇಟ್ಠಸ್ಸ ದಾಸಹಂ.
‘‘ಪಟಿಗ್ಗಹೇತ್ವಾ ¶ ಸಮ್ಬುದ್ಧೋ, ತಿಸ್ಸೋ ಲೋಕಗ್ಗನಾಯಕೋ;
ವೀಥಿಯಾ ಸಣ್ಠಿತೋ ಸತ್ಥಾ, ಅಕಾ ಮೇ ಅನುಮೋದನಂ.
‘‘‘ಕಟಚ್ಛುಭಿಕ್ಖಂ ¶ ದತ್ವಾನ, ತಾವತಿಂಸಂ ಗಮಿಸ್ಸಸಿ;
ಛತ್ತಿಂಸದೇವರಾಜೂನಂ, ಮಹೇಸಿತ್ತಂ ಕರಿಸ್ಸಸಿ.
‘‘‘ಪಞ್ಞಾಸಂ ಚಕ್ಕವತ್ತೀನಂ, ಮಹೇಸಿತ್ತಂ ಕರಿಸ್ಸಸಿ;
ಮನಸಾ ಪತ್ಥಿತಂ ಸಬ್ಬಂ, ಪಟಿಲಚ್ಛಸಿ ಸಬ್ಬದಾ.
‘‘‘ಸಮ್ಪತ್ತಿಂ ¶ ಅನುಭೋತ್ವಾನ, ಪಬ್ಬಜಿಸ್ಸಸಿಕಿಞ್ಚನಾ;
ಸಬ್ಬಾಸವೇ ಪರಿಞ್ಞಾಯ, ನಿಬ್ಬಾಯಿಸ್ಸಸಿನಾಸವಾ’.
‘‘ಇದಂ ವತ್ವಾನ ಸಮ್ಬುದ್ಧೋ, ತಿಸ್ಸೋ ಲೋಕಗ್ಗನಾಯಕೋ;
ನಭಂ ಅಬ್ಭುಗ್ಗಮೀ ವೀರೋ, ಹಂಸರಾಜಾವ ಅಮ್ಬರೇ.
‘‘ಸುದಿನ್ನಂ ಮೇ ದಾನವರಂ [ಸುದಿನ್ನಮೇವ ಮೇ ದಾನಂ (ಸ್ಯಾ.)], ಸುಯಿಟ್ಠಾ ಯಾಗಸಮ್ಪದಾ;
ಕಟಚ್ಛುಭಿಕ್ಖಂ ದತ್ವಾನ, ಪತ್ತಾಹಂ ಅಚಲಂ ಪದಂ.
‘‘ದ್ವೇನವುತೇ ಇತೋ ಕಪ್ಪೇ, ಯಂ ದಾನಮದದಿಂ ತದಾ;
ದುಗ್ಗತಿಂ ನಾಭಿಜಾನಾಮಿ, ಭಿಕ್ಖಾದಾನಸ್ಸಿದಂ ಫಲಂ.
‘‘ಕಿಲೇಸಾ ಝಾಪಿತಾ ಮಯ್ಹಂ…ಪೇ… ವಿಹರಾಮಿ ಅನಾಸವಾ.
‘‘ಸ್ವಾಗತಂ ವತ ಮೇ ಆಸಿ…ಪೇ… ಕತಂ ಬುದ್ಧಸ್ಸ ಸಾಸನಂ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಕಟಚ್ಛುಭಿಕ್ಖಾದಾಯಿಕಾ ಭಿಕ್ಖುನೀ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಕಟಚ್ಛುಭಿಕ್ಖಾದಾಯಿಕಾಥೇರಿಯಾಪದಾನಂ ಸತ್ತಮಂ.
೮. ಸತ್ತುಪ್ಪಲಮಾಲಿಕಾಥೇರೀಅಪದಾನಂ
‘‘ನಗರೇ ¶ ಅರುಣವತಿಯಾ, ಅರುಣೋ ನಾಮ [ಅರುಣವಾ ನಾಮ (ಸೀ. ಪೀ.)] ತ್ತಿಯೋ;
ತಸ್ಸ ರಞ್ಞೋ ಅಹುಂ ಭರಿಯಾ, ವಾರಿತಂ ವಾರಯಾಮಹಂ [ಚಾರಿಕಂ ಚಾರಯಾಮಹಂ (ಸೀ.), ನ ಗುಲಂ ಪಾದಯಾಮಹಂ (ಸ್ಯಾ.), ನ ಮಾಲಂ ಪಾದಯಾಮಹಂ (ಪೀ.)].
‘‘ಸತ್ತಮಾಲಂ ¶ ಗಹೇತ್ವಾನ, ಉಪ್ಪಲಾ ದೇವಗನ್ಧಿಕಾ;
ನಿಸಜ್ಜ ಪಾಸಾದವರೇ, ಏವಂ ಚಿನ್ತೇಸಿ ತಾವದೇ.
‘‘‘ಕಿಂ ¶ ಮೇ ಇಮಾಹಿ ಮಾಲಾಹಿ, ಸಿರಸಾರೋಪಿತಾಹಿ ಮೇ;
ವರಂ ಮೇ ಬುದ್ಧಸೇಟ್ಠಸ್ಸ, ಞಾಣಮ್ಹಿ ಅಭಿರೋಪಿತಂ’.
‘‘ಸಮ್ಬುದ್ಧಂ ¶ ಪಟಿಮಾನೇನ್ತೀ, ದ್ವಾರಾಸನ್ನೇ ನಿಸೀದಹಂ;
‘ಯದಾ ಏಹಿತಿ ಸಮ್ಬುದ್ಧೋ, ಪೂಜಯಿಸ್ಸಂ ಮಹಾಮುನಿಂ’.
‘‘ಕಕುಧೋ ವಿಲಸನ್ತೋವ, ಮಿಗರಾಜಾವ ಕೇಸರೀ;
ಭಿಕ್ಖುಸಙ್ಘೇನ ಸಹಿತೋ, ಆಗಚ್ಛಿ ವೀಥಿಯಾ ಜಿನೋ.
‘‘ಬುದ್ಧಸ್ಸ ರಂಸಿಂ ದಿಸ್ವಾನ, ಹಟ್ಠಾ ಸಂವಿಗ್ಗಮಾನಸಾ;
ದ್ವಾರಂ ಅವಾಪುರಿತ್ವಾನ [ಅಪಾಪುಣಿತ್ವಾ (ಸ್ಯಾ.)], ಬುದ್ಧಸೇಟ್ಠಮಪೂಜಯಿಂ.
‘‘ಸತ್ತ ಉಪ್ಪಲಪುಪ್ಫಾನಿ, ಪರಿಕಿಣ್ಣಾನಿ [ಸುವಿತ್ಥಿಣ್ಣಾನಿ (ಸ್ಯಾ.)] ಅಮ್ಬರೇ;
ಛದಿಂ ಕರೋನ್ತೋ ಬುದ್ಧಸ್ಸ, ಮತ್ಥಕೇ ಧಾರಯನ್ತಿ ತೇ.
‘‘ಉದಗ್ಗಚಿತ್ತಾ ಸುಮನಾ, ವೇದಜಾತಾ ಕತಞ್ಜಲೀ;
ತತ್ಥ ಚಿತ್ತಂ ಪಸಾದೇತ್ವಾ, ತಾವತಿಂಸಮಗಚ್ಛಹಂ.
‘‘ಮಹಾನೇಲಸ್ಸ ಛಾದನಂ, ಧಾರೇನ್ತಿ ಮಮ ಮುದ್ಧನಿ;
ದಿಬ್ಬಗನ್ಧಂ ಪವಾಯಾಮಿ, ಸತ್ತುಪ್ಪಲಸ್ಸಿದಂ ಫಲಂ.
‘‘ಕದಾಚಿ ನೀಯಮಾನಾಯ, ಞಾತಿಸಙ್ಘೇನ ಮೇ ತದಾ;
ಯಾವತಾ ಪರಿಸಾ ಮಯ್ಹಂ, ಮಹಾನೇಲಂ ಧರೀಯತಿ.
‘‘ಸತ್ತತಿ ದೇವರಾಜೂನಂ, ಮಹೇಸಿತ್ತಮಕಾರಯಿಂ;
ಸಬ್ಬತ್ಥ ಇಸ್ಸರಾ ಹುತ್ವಾ, ಸಂಸರಾಮಿ ಭವಾಭವೇ.
‘‘ತೇಸಟ್ಠಿ ¶ ಚಕ್ಕವತ್ತೀನಂ, ಮಹೇಸಿತ್ತಮಕಾರಯಿಂ;
ಸಬ್ಬೇ ಮಮನುವತ್ತನ್ತಿ, ಆದೇಯ್ಯವಚನಾ ಅಹುಂ.
‘‘ಉಪ್ಪಲಸ್ಸೇವ ಮೇ ವಣ್ಣೋ, ಗನ್ಧೋ ಚೇವ ಪವಾಯತಿ;
ದುಬ್ಬಣ್ಣಿಯಂ ನ ಜಾನಾಮಿ [ದುಗ್ಗತಿಂ ನಾಭಿಜಾನಾಮಿ (ಸ್ಯಾ. ಪೀ.)], ಬುದ್ಧಪೂಜಾಯಿದಂ ಫಲಂ.
‘‘ಇದ್ಧಿಪಾದೇಸು ¶ ಕುಸಲಾ, ಬೋಜ್ಝಙ್ಗಭಾವನಾ ರತಾ;
ಅಭಿಞ್ಞಾಪಾರಮಿಪ್ಪತ್ತಾ, ಬುದ್ಧಪೂಜಾಯಿದಂ ಫಲಂ.
‘‘ಸತಿಪಟ್ಠಾನಕುಸಲಾ, ಸಮಾಧಿಝಾನಗೋಚರಾ;
ಸಮ್ಮಪ್ಪಧಾನಮನುಯುತ್ತಾ, ಬುದ್ಧಪೂಜಾಯಿದಂ ಫಲಂ.
‘‘ವೀರಿಯಂ ¶ ಮೇ ಧುರಧೋರಯ್ಹಂ, ಯೋಗಕ್ಖೇಮಾಧಿವಾಹನಂ;
ಸಬ್ಬಾಸವಪರಿಕ್ಖೀಣಾ, ನತ್ಥಿ ದಾನಿ ಪುನಬ್ಭವೋ.
‘‘ಏಕತಿಂಸೇ ¶ ಇತೋ ಕಪ್ಪೇ, ಯಂ ಪುಪ್ಫಮಭಿಪೂಜಯಿಂ;
ದುಗ್ಗತಿಂ ನಾಭಿಜಾನಾಮಿ, ಬುದ್ಧಪೂಜಾಯಿದಂ ಫಲಂ.
‘‘ಕಿಲೇಸಾ ಝಾಪಿತಾ ಮಯ್ಹಂ…ಪೇ… ವಿಹರಾಮಿ ಅನಾಸವಾ.
‘‘ಸ್ವಾಗತಂ ವತ ಮೇ ಆಸಿ…ಪೇ… ಕತಂ ಬುದ್ಧಸ್ಸ ಸಾಸನಂ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಸತ್ತುಪ್ಪಲಮಾಲಿಕಾ ಭಿಕ್ಖುನೀ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಸತ್ತುಪ್ಪಲಮಾಲಿಕಾಥೇರಿಯಾಪದಾನಂ ಅಟ್ಠಮಂ.
೯. ಪಞ್ಚದೀಪಿಕಾಥೇರೀಅಪದಾನಂ
‘‘ನಗರೇ ¶ ಹಂಸವತಿಯಾ, ಚಾರಿಕೀ [ಚಾರಿನಿಂ (ಸ್ಯಾ.)] ಆಸಹಂ ತದಾ;
ಆರಾಮೇನ ಚ ಆರಾಮಂ, ಚರಾಮಿ ಕುಸಲತ್ಥಿಕಾ.
‘‘ಕಾಳಪಕ್ಖಮ್ಹಿ ದಿವಸೇ, ಅದ್ದಸಂ ಬೋಧಿಮುತ್ತಮಂ;
ತತ್ಥ ಚಿತ್ತಂ ಪಸಾದೇತ್ವಾ, ಬೋಧಿಮೂಲೇ ನಿಸೀದಹಂ.
‘‘ಗರುಚಿತ್ತಂ ಉಪಟ್ಠೇತ್ವಾ, ಸಿರೇ ಕತ್ವಾನ ಅಞ್ಜಲಿಂ;
ಸೋಮನಸ್ಸಂ ಪವೇದೇತ್ವಾ, ಏವಂ ಚಿನ್ತೇಸಿ ತಾವದೇ.
‘‘‘ಯದಿ ಬುದ್ಧೋ ಅಮಿತಗುಣೋ, ಅಸಮಪ್ಪಟಿಪುಗ್ಗಲೋ;
ದಸ್ಸೇತು ಪಾಟಿಹೀರಂ ಮೇ, ಬೋಧಿ ಓಭಾಸತು ಅಯಂ’.
‘‘ಸಹ ಆವಜ್ಜಿತೇ ಮಯ್ಹಂ, ಬೋಧಿ ಪಜ್ಜಲಿ ತಾವದೇ;
ಸಬ್ಬಸೋಣ್ಣಮಯಾ ಆಸಿ, ದಿಸಾ ಸಬ್ಬಾ ವಿರೋಚತಿ.
‘‘ಸತ್ತರತ್ತಿನ್ದಿವಂ ¶ [ಸತ್ತರತ್ತಿದಿವಂ (ಪೀ. ಕ.)] ತತ್ಥ, ಬೋಧಿಮೂಲೇ ನಿಸೀದಹಂ;
ಸತ್ತಮೇ ದಿವಸೇ ಪತ್ತೇ, ದೀಪಪೂಜಂ ಅಕಾಸಹಂ.
‘‘ಆಸನಂ ಪರಿವಾರೇತ್ವಾ, ಪಞ್ಚದೀಪಾನಿ ಪಜ್ಜಲುಂ;
ಯಾವ ಉದೇತಿ ಸೂರಿಯೋ, ದೀಪಾ ಮೇ ಪಜ್ಜಲುಂ ತದಾ.
‘‘ತೇನ ¶ ಕಮ್ಮೇನ ಸುಕತೇನ, ಚೇತನಾಪಣಿಧೀಹಿ ಚ;
ಜಹಿತ್ವಾ ಮಾನುಸಂ ದೇಹಂ, ತಾವತಿಂಸಮಗಚ್ಛಹಂ.
‘‘ತತ್ಥ ಮೇ ಸುಕತಂ ಬ್ಯಮ್ಹಂ, ಪಞ್ಚದೀಪಾತಿ ವುಚ್ಚತಿ;
ಸಟ್ಠಿಯೋಜನಮುಬ್ಬೇಧಂ [ಸತಯೋಜನಮುಬ್ಬೇಧಂ (ಸೀ. ಸ್ಯಾ. ಪೀ.)], ತಿಂಸಯೋಜನವಿತ್ಥತಂ [ಸಟ್ಠಿ… (ಸ್ಯಾ. ಪೀ.)].
‘‘ಅಸಙ್ಖಿಯಾನಿ ¶ ದೀಪಾನಿ, ಪರಿವಾರೇ ಜಲನ್ತಿ ಮೇ;
ಯಾವತಾ ದೇವಭವನಂ, ದೀಪಾಲೋಕೇನ ಜೋತತಿ.
‘‘ಪರಮ್ಮುಖಾ ¶ ನಿಸೀದಿತ್ವಾ [ಪುರತ್ಥಾಭಿಮುಖಾ ಸನ್ತಿ (ಸ್ಯಾ.), ಪುರತ್ಥಾಭಿಮುಖಾ ಥಿತಾ (ಪೀ.)], ಯದಿ ಇಚ್ಛಾಮಿ ಪಸ್ಸಿತುಂ;
ಉದ್ಧಂ ಅಧೋ ಚ ತಿರಿಯಂ, ಸಬ್ಬಂ ಪಸ್ಸಾಮಿ ಚಕ್ಖುನಾ.
‘‘ಯಾವತಾ ಅಭಿಕಙ್ಖಾಮಿ, ದಟ್ಠುಂ ಸುಗತದುಗ್ಗತೇ [ಸುಕತದುಕ್ಕತೇ (ಪೀ.];
ತತ್ಥ ಆವರಣಂ ನತ್ಥಿ, ರುಕ್ಖೇಸು ಪಬ್ಬತೇಸು ವಾ.
‘‘ಅಸೀತಿ ದೇವರಾಜೂನಂ, ಮಹೇಸಿತ್ತಮಕಾರಯಿಂ;
ಸತಾನಂ ಚಕ್ಕವತ್ತೀನಂ, ಮಹೇಸಿತ್ತಮಕಾರಯಿಂ.
‘‘ಯಂ ಯಂ ಯೋನುಪಪಜ್ಜಾಮಿ, ದೇವತ್ತಂ ಅಥ ಮಾನುಸಂ;
ದೀಪಸತಸಹಸ್ಸಾನಿ, ಪರಿವಾರೇ ಜಲನ್ತಿ ಮೇ.
‘‘ದೇವಲೋಕಾ ಚವಿತ್ವಾನ, ಉಪ್ಪಜ್ಜಿಂ ಮಾತುಕುಚ್ಛಿಯಂ;
ಮಾತುಕುಚ್ಛಿಗತಾ ಸನ್ತೀ [ಮಾತುಕುಚ್ಛಿಗತಂ ಸನ್ತಿಂ (ಸೀ.)], ಅಕ್ಖಿ ಮೇ ನ ನಿಮೀಲತಿ.
‘‘ದೀಪಸತಸಹಸ್ಸಾನಿ, ಪುಞ್ಞಕಮ್ಮಸಮಙ್ಗಿತಾ;
ಜಲನ್ತಿ ಸೂತಿಕಾಗೇಹೇ [ಸೂತಿಘರೇ ಪಜ್ಜಲನ್ತಿ (ಸಬ್ಬತ್ಥ)], ಪಞ್ಚದೀಪಾನಿದಂ ಫಲಂ.
‘‘ಪಚ್ಛಿಮೇ ಭವೇ ಸಮ್ಪತ್ತೇ, ಮಾನಸಂ ವಿನಿವತ್ತಯಿಂ;
ಅಜರಾಮತಂ ಸೀತಿಭಾವಂ, ನಿಬ್ಬಾನಂ ಫಸ್ಸಯಿಂ ಅಹಂ.
‘‘ಜಾತಿಯಾ ಸತ್ತವಸ್ಸಾಹಂ, ಅರಹತ್ತಮಪಾಪುಣಿಂ;
ಉಪಸಮ್ಪಾದಯೀ ಬುದ್ಧೋ, ಗುಣಮಞ್ಞಾಯ ಗೋತಮೋ.
‘‘ಮಣ್ಡಪೇ ರುಕ್ಖಮೂಲೇ ವಾ, ಪಾಸಾದೇಸು ಗುಹಾಸು ವಾ;
ಸುಞ್ಞಾಗಾರೇ ¶ ವಸನ್ತಿಯಾ [ಚ ಝಾಯನ್ತೇ (ಸೀ.), ಚ ಝಾಯನ್ತಾ (ಪೀ.), ಪಜ್ಝಾಯನ್ತಾ (ಸ್ಯಾ.)], ಪಞ್ಚದೀಪಾ ಜಲನ್ತಿ ಮೇ.
‘‘ದಿಬ್ಬಚಕ್ಖು ¶ ¶ ವಿಸುದ್ಧಂ ಮೇ, ಸಮಾಧಿಕುಸಲಾ ಅಹಂ;
ಅಭಿಞ್ಞಾಪಾರಮಿಪ್ಪತ್ತಾ, ಪಞ್ಚದೀಪಾನಿದಂ ಫಲಂ.
‘‘ಸಬ್ಬವೋಸಿತವೋಸಾನಾ, ಕತಕಿಚ್ಚಾ ಅನಾಸವಾ;
ಪಞ್ಚದೀಪಾ ಮಹಾವೀರ, ಪಾದೇ ವನ್ದಾಮಿ [ವನ್ದತಿ (ಸೀ. ಕ.)] ಚಕ್ಖುಮ.
‘‘ಸತಸಹಸ್ಸಿತೋ ಕಪ್ಪೇ, ಯಂ ದೀಪಮದದಿಂ ತದಾ;
ದುಗ್ಗತಿಂ ನಾಭಿಜಾನಾಮಿ, ಪಞ್ಚದೀಪಾನಿದಂ ಫಲಂ.
‘‘ಕಿಲೇಸಾ ಝಾಪಿತಾ ಮಯ್ಹಂ…ಪೇ… ವಿಹರಾಮಿ ಅನಾಸವಾ.
‘‘ಸ್ವಾಗತಂ ¶ ವತ ಮೇ ಆಸಿ…ಪೇ… ಕತಂ ಬುದ್ಧಸ್ಸ ಸಾಸನಂ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಪಞ್ಚದೀಪಿಕಾ ಭಿಕ್ಖುನೀ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಪಞ್ಚದೀಪಿಕಾಥೇರಿಯಾಪದಾನಂ ನವಮಂ.
೧೦. ಉದಕದಾಯಿಕಾಥೇರೀಅಪದಾನಂ
‘‘ನಗರೇ ಬನ್ಧುಮತಿಯಾ, ಅಹೋಸಿಂ ಉದಹಾರಿಕಾ;
ಉದಹಾರೇನ ಜೀವಾಮಿ, ತೇನ ಪೋಸೇಮಿ ದಾರಕೇ.
‘‘ದೇಯ್ಯಧಮ್ಮೋ ಚ ಮೇ ನತ್ಥಿ, ಪುಞ್ಞಕ್ಖೇತ್ತೇ ಅನುತ್ತರೇ;
ಕೋಟ್ಠಕಂ ಉಪಸಙ್ಕಮ್ಮ, ಉದಕಂ ಪಟ್ಠಪೇಸಹಂ.
‘‘ತೇನ ¶ ಕಮ್ಮೇನ ಸುಕತೇನ, ತಾವತಿಂಸಮಗಚ್ಛಹಂ;
ತತ್ಥ ಮೇ ಸುಕತಂ ಬ್ಯಮ್ಹಂ, ಉದಹಾರೇನ ನಿಮ್ಮಿತಂ.
‘‘ಅಚ್ಛರಾನಂ ಸಹಸ್ಸಸ್ಸ, ಅಹಞ್ಹಿ ಪವರಾ ತದಾ;
ದಸಟ್ಠಾನೇಹಿ ತಾ ಸಬ್ಬಾ, ಅಭಿಭೋಮಿ ಸದಾ ಅಹಂ.
‘‘ಪಞ್ಞಾಸಂ ದೇವರಾಜೂನಂ, ಮಹೇಸಿತ್ತಮಕಾರಯಿಂ;
ವೀಸತಿಚಕ್ಕವತ್ತೀನಂ, ಮಹೇಸಿತ್ತಮಕಾರಯಿಂ.
‘‘ದುವೇ ಭವೇ ಸಂಸರಾಮಿ, ದೇವತ್ತೇ ಅಥ ಮಾನುಸೇ;
ದುಗ್ಗತಿಂ ನಾಭಿಜಾನಾಮಿ, ದಕದಾನಸ್ಸಿದಂ ಫಲಂ.
‘‘ಪಬ್ಬತಗ್ಗೇ ¶ ¶ ದುಮಗ್ಗೇ ವಾ, ಅನ್ತಲಿಕ್ಖೇ ಚ ಭೂಮಿಯಂ;
ಯದಾ ಉದಕಮಿಚ್ಛಾಮಿ, ಖಿಪ್ಪಂ ಪಟಿಲಭಾಮಹಂ.
‘‘ಅವುಟ್ಠಿಕಾ ದಿಸಾ ನತ್ಥಿ, ಸನ್ತತ್ತಾ ಕುಥಿತಾಪಿ [ಸನ್ತತ್ತಾ ಕುಥಿತಾ ನ ಚ (ಸೀ. ಪೀ.), ಸನ್ತತ್ತಾ ಖುಪ್ಪಿತಾ ಹಿ ಮೇ (ಸ್ಯಾ.)] ಚ;
ಮಮ ಸಙ್ಕಪ್ಪಮಞ್ಞಾಯ, ಮಹಾಮೇಘೋ ಪವಸ್ಸತಿ.
‘‘ಕದಾಚಿ ನೀಯಮಾನಾಯ, ಞಾತಿಸಙ್ಘೇನ ಮೇ ತದಾ;
ಯದಾ ಇಚ್ಛಾಮಹಂ ವಸ್ಸಂ, ಮಹಾಮೇಘೋ ಅಜಾಯಥ.
‘‘ಉಣ್ಹಂ ವಾ ಪರಿಳಾಹೋ ವಾ, ಸರೀರೇ ಮೇ ನ ವಿಜ್ಜತಿ;
ಕಾಯೇ ಚ ಮೇ ರಜೋ ನತ್ಥಿ, ದಕದಾನಸ್ಸಿದಂ ಫಲಂ.
‘‘ವಿಸುದ್ಧಮನಸಾ ¶ ಅಜ್ಜ, ಅಪೇತಮನಪಾಪಿಕಾ;
ಸಬ್ಬಾಸವಪರಿಕ್ಖೀಣಾ, ನತ್ಥಿ ದಾನಿ ಪುನಬ್ಭವೋ.
‘‘ಏಕನವುತಿತೋ ಕಪ್ಪೇ, ಯಂ ದಕಂ ಅದದಿಂ ತದಾ;
ದುಗ್ಗತಿಂ ¶ ನಾಭಿಜಾನಾಮಿ, ದಕದಾನಸ್ಸಿದಂ ಫಲಂ.
‘‘ಕಿಲೇಸಾ ಝಾಪಿತಾ ಮಯ್ಹಂ…ಪೇ… ವಿಹರಾಮಿ ಅನಾಸವಾ.
‘‘ಸ್ವಾಗತಂ ವತ ಮೇ ಆಸಿ…ಪೇ… ಕತಂ ಬುದ್ಧಸ್ಸ ಸಾಸನಂ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಉದಕದಾಯಿಕಾ ಭಿಕ್ಖುನೀ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಉದಕದಾಯಿಕಾಥೇರಿಯಾಪದಾನಂ ದಸಮಂ.
ಸುಮೇಧಾವಗ್ಗೋ ಪಠಮೋ.
ತಸ್ಸುದ್ದಾನಂ –
ಸುಮೇಧಾ ಮೇಖಲಾದಾಯೀ, ಮಣ್ಡಪಂ ಸಙ್ಕಮಂ ದದಾ;
ನಳಮಾಲೀ ಪಿಣ್ಡದದಾ, ಕಟಚ್ಛು ಉಪ್ಪಲಪ್ಪದಾ.
ದೀಪದಾ ದಕದಾ ಚೇವ, ಗಾಥಾಯೋ ಗಣಿತಾ ಇಹ;
ಏಕಗಾಥಾಸತಞ್ಚೇವ, ತಿಂಸತಿ ಚ ತದುತ್ತರಿ [ಸತ್ತರಸಂ ತದುತ್ತರಿ (ಸ್ಯಾ.), ಸತ್ತಾದಸ ತದುತ್ತರಿಂ (ಪೀ.)].
೨. ಏಕೂಪೋಸಥಿಕವಗ್ಗೋ
೧. ಏಕೂಪೋಸಥಿಕಾಥೇರೀಅಪದಾನಂ
‘‘ನಗರೇ ¶ ¶ ¶ ಬನ್ಧುಮತಿಯಾ, ಬನ್ಧುಮಾ ನಾಮ ಖತ್ತಿಯೋ;
ದಿವಸೇ ಪುಣ್ಣಮಾಯ ಸೋ, ಉಪವಸಿ ಉಪೋಸಥಂ.
‘‘ಅಹಂ ತೇನ ಸಮಯೇನ, ಕುಮ್ಭದಾಸೀ ಅಹಂ ತಹಿಂ;
ದಿಸ್ವಾ ಸರಾಜಕಂ ಸೇನಂ, ಏವಾಹಂ ಚಿನ್ತಯಿಂ ತದಾ.
‘ರಾಜಾಪಿ ರಜ್ಜಂ ಛಡ್ಡೇತ್ವಾ, ಉಪವಸಿ ಉಪೋಸಥಂ;
ಸಫಲಂ ನೂನ ತಂ ಕಮ್ಮಂ, ಜನಕಾಯೋ ಪಮೋದಿತೋ’.
‘‘ಯೋನಿಸೋ ¶ ಪಚ್ಚವೇಕ್ಖಿತ್ವಾ, ದುಗ್ಗಚ್ಚಞ್ಚ [ದುಗ್ಗತಿಞ್ಚ (ಸ್ಯಾ.)] ದಲಿದ್ದತಂ [ದಳಿದ್ದತಂ (ಸೀ.)];
ಮಾನಸಂ ಸಮ್ಪಹಂಸಿತ್ವಾ, ಉಪವಸಿಂ ಉಪೋಸಥಂ.
‘‘ಅಹಂ ಉಪೋಸಥಂ ಕತ್ವಾ, ಸಮ್ಮಾಸಮ್ಬುದ್ಧಸಾಸನೇ;
ತೇನ ಕಮ್ಮೇನ ಸುಕತೇನ, ತಾವತಿಂಸಮಗಚ್ಛಹಂ.
‘‘ತತ್ಥ ಮೇ ಸುಕತಂ ಬ್ಯಮ್ಹಂ, ಉಬ್ಭಯೋಜನಮುಗ್ಗತಂ [ಉದ್ಧಂ ಯೋಜನಮುಗ್ಗತಂ (ಸೀ. ಸ್ಯಾ. ಪೀ.)];
ಕೂಟಾಗಾರವರೂಪೇತಂ, ಮಹಾಸನಸುಭೂಸಿತಂ.
‘‘ಅಚ್ಛರಾ ಸತಸಹಸ್ಸಾ, ಉಪತಿಟ್ಠನ್ತಿ ಮಂ ಸದಾ;
ಅಞ್ಞೇ ದೇವೇ ಅತಿಕ್ಕಮ್ಮ, ಅತಿರೋಚಾಮಿ ಸಬ್ಬದಾ.
‘‘ಚತುಸಟ್ಠಿ ದೇವರಾಜೂನಂ, ಮಹೇಸಿತ್ತಮಕಾರಯಿಂ;
ತೇಸಟ್ಠಿ ಚಕ್ಕವತ್ತೀನಂ, ಮಹೇಸಿತ್ತಮಕಾರಯಿಂ.
‘‘ಸುವಣ್ಣವಣ್ಣಾ ¶ ಹುತ್ವಾನ, ಭವೇಸು ಸಂಸರಾಮಹಂ;
ಸಬ್ಬತ್ಥ ಪವರಾ ಹೋಮಿ, ಉಪೋಸಥಸ್ಸಿದಂ ಫಲಂ.
‘‘ಹತ್ಥಿಯಾನಂ ಅಸ್ಸಯಾನಂ, ರಥಯಾನಞ್ಚ ಸೀವಿಕಂ [ಕೇವಲಂ (ಸೀ. ಸ್ಯಾ. ಪೀ.)];
ಲಭಾಮಿ ಸಬ್ಬಮೇವೇತಂ, ಉಪೋಸಥಸ್ಸಿದಂ ಫಲಂ.
‘‘ಸೋಣ್ಣಮಯಂ ರೂಪಿಮಯಂ, ಅಥೋಪಿ ಫಲಿಕಾಮಯಂ;
ಲೋಹಿತಙ್ಗಮಯಞ್ಚೇವ, ಸಬ್ಬಂ ಪಟಿಲಭಾಮಹಂ.
‘‘ಕೋಸೇಯ್ಯಕಮ್ಬಲಿಯಾನಿ ¶ , ಖೋಮಕಪ್ಪಾಸಿಕಾನಿ ಚ;
ಮಹಗ್ಘಾನಿ ಚ ವತ್ಥಾನಿ, ಸಬ್ಬಂ ಪಟಿಲಭಾಮಹಂ.
‘‘ಅನ್ನಂ ¶ ಪಾನಂ ಖಾದನೀಯಂ, ವತ್ಥಸೇನಾಸನಾನಿ ಚ;
ಸಬ್ಬಮೇತಂ ಪಟಿಲಭೇ, ಉಪೋಸಥಸ್ಸಿದಂ ಫಲಂ.
‘‘ವರಗನ್ಧಞ್ಚ ಮಾಲಞ್ಚ, ಚುಣ್ಣಕಞ್ಚ ವಿಲೇಪನಂ;
ಸಬ್ಬಮೇತಂ ಪಟಿಲಭೇ, ಉಪೋಸಥಸ್ಸಿದಂ ಫಲಂ.
‘‘ಕೂಟಾಗಾರಞ್ಚ ಪಾಸಾದಂ, ಮಣ್ಡಪಂ ಹಮ್ಮಿಯಂ ಗುಹಂ;
ಸಬ್ಬಮೇತಂ ಪಟಿಲಭೇ, ಉಪೋಸಥಸ್ಸಿದಂ ಫಲಂ.
‘‘ಜಾತಿಯಾ ಸತ್ತವಸ್ಸಾಹಂ, ಪಬ್ಬಜಿಂ ಅನಗಾರಿಯಂ;
ಅಡ್ಢಮಾಸೇ ಅಸಮ್ಪತ್ತೇ, ಅರಹತ್ತಮಪಾಪುಣಿಂ.
‘‘ಕಿಲೇಸಾ ಝಾಪಿತಾ ಮಯ್ಹಂ, ಭವಾ ಸಬ್ಬೇ ಸಮೂಹತಾ;
ಸಬ್ಬಾಸವಪರಿಕ್ಖೀಣಾ, ನತ್ಥಿ ದಾನಿ ಪುನಬ್ಭವೋ.
‘‘ಏಕನವುತಿತೋ ¶ ಕಪ್ಪೇ, ಯಂ ಕಮ್ಮಮಕರಿಂ ತದಾ;
ದುಗ್ಗತಿಂ ನಾಭಿಜಾನಾಮಿ, ಉಪೋಸಥಸ್ಸಿದಂ ಫಲಂ.
‘‘ಕಿಲೇಸಾ ¶ ಝಾಪಿತಾ ಮಯ್ಹಂ…ಪೇ… ವಿಹರಾಮಿ ಅನಾಸವಾ.
‘‘ಸ್ವಾಗತಂ ವತ ಮೇ ಆಸಿ…ಪೇ… ಕತಂ ಬುದ್ಧಸ್ಸ ಸಾಸನಂ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಏಕೂಪೋಸಥಿಕಾ ಭಿಕ್ಖುನೀ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಏಕೂಪೋಸಥಿಕಾಥೇರಿಯಾಪದಾನಂ ಪಠಮಂ.
೨. ಸಳಲಪುಪ್ಫಿಕಾಥೇರೀಅಪದಾನಂ
‘‘ಚನ್ದಭಾಗಾನದೀತೀರೇ, ಅಹೋಸಿಂ ಕಿನ್ನರೀ ತದಾ;
ಅದ್ದಸಾಹಂ ದೇವದೇವಂ, ಚಙ್ಕಮನ್ತಂ ನರಾಸಭಂ.
‘‘ಓಚಿನಿತ್ವಾನ ಸಳಲಂ, ಬುದ್ಧಸೇಟ್ಠಸ್ಸದಾಸಹಂ;
ಉಪಸಿಙ್ಘಿ ಮಹಾವೀರೋ, ಸಳಲಂ ದೇವಗನ್ಧಿಕಂ.
‘‘ಪಟಿಗ್ಗಹೇತ್ವಾ ¶ ಸಮ್ಬುದ್ಧೋ, ವಿಪಸ್ಸೀ ಲೋಕನಾಯಕೋ;
ಉಪಸಿಙ್ಘಿ ಮಹಾವೀರೋ, ಪೇಕ್ಖಮಾನಾಯ ಮೇ ತದಾ.
‘‘ಅಞ್ಜಲಿಂ ಪಗ್ಗಹೇತ್ವಾನ, ವನ್ದಿತ್ವಾ ದ್ವಿಪದುತ್ತಮಂ [ದಿಪದುತ್ತಮಂ (ಸೀ. ಸ್ಯಾ. ಪೀ.)];
ಸಕಂ ಚಿತ್ತಂ ಪಸಾದೇತ್ವಾ, ತತೋ ಪಬ್ಬತಮಾರುಹಿಂ.
‘‘ಏಕನವುತಿತೋ ¶ ಕಪ್ಪೇ, ಯಂ ಪುಪ್ಫಮದದಿಂ ತದಾ;
ದುಗ್ಗತಿಂ ನಾಭಿಜಾನಾಮಿ, ಬುದ್ಧಪೂಜಾಯಿದಂ ಫಲಂ.
‘‘ಕಿಲೇಸಾ ¶ ಝಾಪಿತಾ ಮಯ್ಹಂ…ಪೇ… ವಿಹರಾಮಿ ಅನಾಸವಾ.
‘‘ಸ್ವಾಗತಂ ವತ ಮೇ ಆಸಿ…ಪೇ… ಕತಂ ಬುದ್ಧಸ್ಸ ಸಾಸನಂ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಸಳಲಪುಪ್ಫಿಕಾ ಭಿಕ್ಖುನೀ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಸಳಲಪುಪ್ಫಿಕಾಥೇರಿಯಾಪದಾನಂ ದುತಿಯಂ.
೩. ಮೋದಕದಾಯಿಕಾಥೇರೀಅಪದಾನಂ
‘‘ನಗರೇ ಬನ್ಧುಮತಿಯಾ, ಕುಮ್ಭದಾಸೀ ಅಹೋಸಹಂ;
ಮಮ ಭಾಗಂ ಗಹೇತ್ವಾನ, ಗಚ್ಛಂ ಉದಕಹಾರಿಕಾ [ಉದಕಹಾರಿಕಂ (ಸೀ.), ಉದಕಹಾರಿಕೇ (ಸ್ಯಾ.)].
‘‘ಪನ್ಥಮ್ಹಿ ಸಮಣಂ ದಿಸ್ವಾ, ಸನ್ತಚಿತ್ತಂ ಸಮಾಹತಂ;
ಪಸನ್ನಚಿತ್ತಾ ಸುಮನಾ, ಮೋದಕೇ ತೀಣಿದಾಸಹಂ.
‘‘ತೇನ ¶ ಕಮ್ಮೇನ ಸುಕತೇನ, ಚೇತನಾಪಣಿಧೀಹಿ ಚ;
ಏಕನವುತಿಕಪ್ಪಾನಿ [ಏಕೂನತಿಂಸಕಪ್ಪಾನಿ (ಸ್ಯಾ.)], ವಿನಿಪಾತಂ ನಗಚ್ಛಹಂ.
‘‘ಸಮ್ಪತ್ತಿ ತಂ [ಸಮ್ಪತ್ತಿಞ್ಚ (ಸ್ಯಾ.), ಸಮ್ಪತ್ತಿಕಂ (ಕ.)] ಕರಿತ್ವಾನ, ಸಬ್ಬಂ ಅನುಭವಿಂ ಅಹಂ;
ಮೋದಕೇ ತೀಣಿ ದತ್ವಾನ, ಪತ್ತಾಹಂ ಅಚಲಂ ಪದಂ.
‘‘ಕಿಲೇಸಾ ಝಾಪಿತಾ ಮಯ್ಹಂ…ಪೇ… ವಿಹರಾಮಿ ಅನಾಸವಾ.
‘‘ಸ್ವಾಗತಂ ¶ ವತ ಮೇ ಆಸಿ…ಪೇ… ಕತಂ ಬುದ್ಧಸ್ಸ ಸಾಸನಂ.
‘‘ಪಟಿಸಮ್ಭಿದಾ ¶ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಮೋದಕದಾಯಿಕಾ ಭಿಕ್ಖುನೀ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಮೋದಕದಾಯಿಕಾಥೇರಿಯಾಪದಾನಂ ತತಿಯಂ.
೪. ಏಕಾಸನದಾಯಿಕಾಥೇರೀಅಪದಾನಂ
‘‘ನಗರೇ ¶ ಹಂಸವತಿಯಾ, ಅಹೋಸಿಂ ಬಾಲಿಕಾ [ಮಾಲಿಕಾ (ಸ್ಯಾ. ಪೀ.)] ತದಾ;
ಮಾತಾ ಚ ಮೇ ಪಿತಾ ಚೇವ, ಕಮ್ಮನ್ತಂ ಅಗಮಂಸು ತೇ.
‘‘ಮಜ್ಝನ್ಹಿಕಮ್ಹಿ ಸೂರಿಯೇ, ಅದ್ದಸಂ ಸಮಣಂ ಅಹಂ;
ವೀಥಿಯಾ ಅನುಗಚ್ಛನ್ತಂ, ಆಸನಂ ಪಞ್ಞಪೇಸಹಂ.
‘‘ಗೋನಕಾವಿಕತಿಕಾಹಿ [ಗೋನಕಚಿತ್ತಕಾದೀಹಿ (ಸೀ.)], ಪಞ್ಞಪೇತ್ವಾ ಮಮಾಸನಂ;
ಪಸನ್ನಚಿತ್ತಾ ಸುಮನಾ, ಇದಂ ವಚನಮಬ್ರವಿಂ.
‘‘‘ಸನ್ತತ್ತಾ ಕುಥಿತಾ ಭೂಮಿ, ಸೂರೋ ಮಜ್ಝನ್ಹಿಕೇ ಠಿತೋ;
ಮಾಲುತಾ ಚ ನ ವಾಯನ್ತಿ, ಕಾಲೋ ಚೇವೇತ್ಥ ಮೇಹಿತಿ [ಚೇತ್ಥ ಉಪಟ್ಠಿತೋ (ಸೀ.), ಚೇವತ್ಥಂ ಏತಿ ತಂ (ಪೀ.)].
‘‘‘ಪಞ್ಞತ್ತಮಾಸನಮಿದಂ, ತವತ್ಥಾಯ ಮಹಾಮುನಿ;
ಅನುಕಮ್ಪಂ ಉಪಾದಾಯ, ನಿಸೀದ ಮಮ ಆಸನೇ’.
‘‘ನಿಸೀದಿ ತತ್ಥ ಸಮಣೋ, ಸುದನ್ತೋ ಸುದ್ಧಮಾನಸೋ;
ತಸ್ಸ ಪತ್ತಂ ಗಹೇತ್ವಾನ, ಯಥಾರನ್ಧಂ ಅದಾಸಹಂ.
‘‘ತೇನ ¶ ಕಮ್ಮೇನ ಸುಕತೇನ, ಚೇತನಾಪಣಿಧೀಹಿ ಚ;
ಜಹಿತ್ವಾ ಮಾನುಸಂ ದೇಹಂ, ತಾವತಿಂಸಮಗಚ್ಛಹಂ.
‘‘ತತ್ಥ ಮೇ ಸುಕತಂ ಬ್ಯಮ್ಹಂ, ಆಸನೇನ ಸುನಿಮ್ಮಿತಂ;
ಸಟ್ಠಿಯೋಜನಮುಬ್ಬೇಧಂ, ತಿಂಸಯೋಜನವಿತ್ಥತಂ.
‘‘ಸೋಣ್ಣಮಯಾ ¶ ಮಣಿಮಯಾ, ಅಥೋಪಿ ಫಲಿಕಾಮಯಾ;
ಲೋಹಿತಙ್ಗಮಯಾ ಚೇವ, ಪಲ್ಲಙ್ಕಾ ವಿವಿಧಾ ಮಮ.
‘‘ತೂಲಿಕಾ ವಿಕತಿಕಾಹಿ, ಕಟ್ಟಿಸ್ಸಚಿತ್ತಕಾಹಿ ಚ;
ಉದ್ದಏಕನ್ತಲೋಮೀ ಚ, ಪಲ್ಲಙ್ಕಾ ಮೇ ಸುಸಣ್ಠಿತಾ [ಸುಸನ್ಥತಾ (ಸೀ.)].
‘‘ಯದಾ ¶ ಇಚ್ಛಾಮಿ ಗಮನಂ, ಹಾಸಖಿಡ್ಡಸಮಪ್ಪಿತಾ;
ಸಹ ಪಲ್ಲಙ್ಕಸೇಟ್ಠೇನ, ಗಚ್ಛಾಮಿ ಮಮ ಪತ್ಥಿತಂ.
‘‘ಅಸೀತಿ ದೇವರಾಜೂನಂ, ಮಹೇಸಿತ್ತಮಕಾರಯಿಂ;
ಸತ್ತತಿ ಚಕ್ಕವತ್ತೀನಂ, ಮಹೇಸಿತ್ತಮಕಾರಯಿಂ.
‘‘ಭವಾಭವೇ ¶ ಸಂಸರನ್ತೀ, ಮಹಾಭೋಗಂ ಲಭಾಮಹಂ;
ಭೋಗೇ ಮೇ ಊನತಾ ನತ್ಥಿ, ಏಕಾಸನಸ್ಸಿದಂ ಫಲಂ [ಏಕಾಸನಫಲಂ ಇದಂ (ಸಬ್ಬತ್ಥ) ಏವಮುಪರಿಪಿ].
‘‘ದುವೇ ಭವೇ ಸಂಸರಾಮಿ, ದೇವತ್ತೇ ಅಥ ಮಾನುಸೇ;
ಅಞ್ಞೇ ಭವೇ ನ ಜಾನಾಮಿ, ಏಕಾಸನಸ್ಸಿದಂ ಫಲಂ.
‘‘ದುವೇ ಕುಲೇ ಪಜಾಯಾಮಿ, ಖತ್ತಿಯೇ ಚಾಪಿ ಬ್ರಾಹ್ಮಣೇ;
ಉಚ್ಚಾಕುಲೀನಾ [ಉಚ್ಚಾಕುಲಿಕಾ (ಸ್ಯಾ. ಪೀ. ಕ.)] ಸಬ್ಬತ್ಥ, ಏಕಾಸನಸ್ಸಿದಂ ಫಲಂ.
‘‘ದೋಮನಸ್ಸಂ ನ ಜಾನಾಮಿ, ಚಿತ್ತಸನ್ತಾಪನಂ ಮಮ;
ವೇವಣ್ಣಿಯಂ ನ ಜಾನಾಮಿ, ಏಕಾಸನಸ್ಸಿದಂ ಫಲಂ.
‘‘ಧಾತಿಯೋ ¶ ಮಂ ಉಪಟ್ಠನ್ತಿ, ಖುಜ್ಜಾ ಚೇಲಾಪಿಕಾ [ಖೇಲಾಪಿಕಾ (ಸೀ.), ಚೇಲಾವಿಕಾ (ಪೀ.)] ಬಹೂ;
ಅಙ್ಕೇನ ಅಙ್ಕಂ ಗಚ್ಛಾಮಿ, ಏಕಾಸನಸ್ಸಿದಂ ಫಲಂ.
‘‘ಅಞ್ಞಾ ನ್ಹಾಪೇನ್ತಿ ಭೋಜೇನ್ತಿ, ಅಞ್ಞಾ ರಮೇನ್ತಿ ಮಂ ಸದಾ;
ಅಞ್ಞಾ ಗನ್ಧಂ ವಿಲಿಮ್ಪನ್ತಿ, ಏಕಾಸನಸ್ಸಿದಂ ಫಲಂ [ಅಞ್ಞಾ ಮಮೇವ ನ್ಹಾಪೇನ್ತಿ, ಅಞ್ಞಾ ಭೋಜೇನ್ತಿ ಭೋಜನಂ; ಅಞ್ಞಾ ಮಂ ಅಲಙ್ಕರೋನ್ತಿ, ಅಞ್ಞಾ ರಮೇನ್ತಿ ಮಂ ಸದ್ಧಾ; (ಸ್ಯಾ.)].
‘‘ಮಣ್ಡಪೇ ರುಕ್ಖಮೂಲೇ ವಾ, ಸುಞ್ಞಾಗಾರೇ ವಸನ್ತಿಯಾ;
ಮಮ ಸಙ್ಕಪ್ಪಮಞ್ಞಾಯ, ಪಲ್ಲಙ್ಕೋ ಉಪತಿಟ್ಠತಿ.
‘‘ಅಯಂ ಪಚ್ಛಿಮಕೋ ಮಯ್ಹಂ, ಚರಿಮೋ ವತ್ತತೇ ಭವೋ;
ಅಜ್ಜಾಪಿ ರಜ್ಜಂ ಛಡ್ಡೇತ್ವಾ, ಪಬ್ಬಜಿಂ ಅನಗಾರಿಯಂ.
‘‘ಸತಸಹಸ್ಸಿತೋ ಕಪ್ಪೇ, ಯಂ ದಾನಮದದಿಂ ತದಾ;
ದುಗ್ಗತಿಂ ನಾಭಿಜಾನಾಮಿ, ಏಕಾಸನಸ್ಸಿದಂ ಫಲಂ.
‘‘ಕಿಲೇಸಾ ಝಾಪಿತಾ ಮಯ್ಹಂ…ಪೇ… ವಿಹರಾಮಿ ಅನಾಸವಾ.
‘‘ಸ್ವಾಗತಂ ವತ ಮೇ ಆಸಿ…ಪೇ… ಕತಂ ಬುದ್ಧಸ್ಸ ಸಾಸನಂ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಏಕಾಸನದಾಯಿಕಾ ಭಿಕ್ಖುನೀ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಏಕಾಸನದಾಯಿಕಾಥೇರಿಯಾಪದಾನಂ ಚತುತ್ಥಂ.
೫. ಪಞ್ಚದೀಪದಾಯಿಕಾಥೇರೀಅಪದಾನಂ
‘‘ನಗರೇ ¶ ¶ ¶ ¶ ಹಂಸವತಿಯಾ, ಚಾರಿಕೀ [ಚಾರಿಕಾ (ಸೀ. ಸ್ಯಾ.)] ಆಸಹಂ ತದಾ;
ಆರಾಮೇನ ಚ ಆರಾಮಂ [ಆರಾಮೇನ ವಿಹಾರೇನ (ಸ್ಯಾ. ಪೀ.)], ಚರಾಮಿ ಕುಸಲತ್ಥಿಕಾ.
‘‘ಕಾಳಪಕ್ಖಮ್ಹಿ ದಿವಸೇ, ಅದ್ದಸಂ ಬೋಧಿಮುತ್ತಮಂ;
ತತ್ಥ ಚಿತ್ತಂ ಪಸಾದೇತ್ವಾ, ಬೋಧಿಮೂಲೇ ನಿಸೀದಹಂ.
‘‘ಗರುಚಿತ್ತಂ ಉಪಟ್ಠೇತ್ವಾ, ಸಿರೇ ಕತ್ವಾನ ಅಞ್ಜಲಿಂ;
ಸೋಮನಸ್ಸಂ ಪವೇದೇತ್ವಾ, ಏವಂ ಚಿನ್ತೇಸಿ ತಾವದೇ.
‘‘‘ಯದಿ ಬುದ್ಧೋ ಅಮಿತಗುಣೋ, ಅಸಮಪ್ಪಟಿಪುಗ್ಗಲೋ;
ದಸ್ಸೇತು ಪಾಟಿಹೀರಂ ಮೇ, ಬೋಧಿ ಓಭಾಸತು ಅಯಂ’.
‘‘ಸಹ ಆವಜ್ಜಿತೇ ಮಯ್ಹಂ, ಬೋಧಿ ಪಜ್ಜಲಿ ತಾವದೇ;
ಸಬ್ಬಸೋಣ್ಣಮಯಾ ಆಸಿ, ದಿಸಾ ಸಬ್ಬಾ ವಿರೋಚತಿ.
‘‘ಸತ್ತರತ್ತಿನ್ದಿವಂ ತತ್ಥ, ಬೋಧಿಮೂಲೇ ನಿಸೀದಹಂ;
ಸತ್ತಮೇ ದಿವಸೇ ಪತ್ತೇ, ದೀಪಪೂಜಂ ಅಕಾಸಹಂ.
‘‘ಆಸನಂ ಪರಿವಾರೇತ್ವಾ, ಪಞ್ಚ ದೀಪಾನಿ ಪಜ್ಜಲುಂ;
ಯಾವ ಉದೇತಿ ಸೂರಿಯೋ, ದೀಪಾ ಮೇ ಪಜ್ಜಲುಂ ತದಾ.
‘‘ತೇನ ಕಮ್ಮೇನ ಸುಕತೇನ, ಚೇತನಾಪಣಿಧೀಹಿ ಚ;
ಜಹಿತ್ವಾ ಮಾನುಸಂ ದೇಹಂ, ತಾವತಿಂಸಮಗಚ್ಛಹಂ.
‘‘ತತ್ಥ ಮೇ ಸುಕತಂ ಬ್ಯಮ್ಹಂ, ಪಞ್ಚದೀಪಾತಿ ವುಚ್ಚತಿ;
ಸಟ್ಠಿಯೋಜನಮುಬ್ಬೇಧಂ, ತಿಂಸಯೋಜನವಿತ್ಥತಂ.
‘‘ಅಸಙ್ಖಿಯಾನಿ ¶ ದೀಪಾನಿ, ಪರಿವಾರೇ ಜಲಿಂಸು ಮೇ;
ಯಾವತಾ ದೇವಭವನಂ, ದೀಪಾಲೋಕೇನ ಜೋತತಿ.
‘‘ಪರಮ್ಮುಖಾ [ಪುಬ್ಬಮುಖಾ (ಸ್ಯಾ.)] ನಿಸೀದಿತ್ವಾ, ಯದಿ ಇಚ್ಛಾಮಿ ಪಸ್ಸಿತುಂ;
ಉದ್ಧಂ ಅಧೋ ಚ ತಿರಿಯಂ, ಸಬ್ಬಂ ಪಸ್ಸಾಮಿ ಚಕ್ಖುನಾ.
‘‘ಯಾವತಾ ಅಭಿಕಙ್ಖಾಮಿ, ದಟ್ಠುಂ ಸುಗತದುಗ್ಗತೇ [ಸುಕತದುಕ್ಕಟೇ (ಪೀ.)];
ತತ್ಥ ಆವರಣಂ ನತ್ಥಿ, ರುಕ್ಖೇಸು ಪಬ್ಬತೇಸು ವಾ.
‘‘ಅಸೀತಿ ದೇವರಾಜೂನಂ, ಮಹೇಸಿತ್ತಮಕಾರಯಿಂ;
ಸತಾನಂ ಚಕ್ಕವತ್ತೀನಂ, ಮಹೇಸಿತ್ತಮಕಾರಯಿಂ.
‘‘ಯಂ ¶ ¶ ¶ ಯಂ ಯೋನುಪಪಜ್ಜಾಮಿ, ದೇವತ್ತಂ ಅಥ ಮಾನುಸಂ;
ದೀಪಸತಸಹಸ್ಸಾನಿ, ಪರಿವಾರೇ ಜಲನ್ತಿ ಮೇ.
‘‘ದೇವಲೋಕಾ ಚವಿತ್ವಾನ, ಉಪ್ಪಜ್ಜಿಂ ಮಾತುಕುಚ್ಛಿಯಂ;
ಮಾತುಕುಚ್ಛಿಗತಾ ಸನ್ತೀ, ಅಕ್ಖಿ ಮೇ ನ ನಿಮೀಲತಿ.
‘‘ದೀಪಸತಸಹಸ್ಸಾನಿ, ಪುಞ್ಞಕಮ್ಮಸಮಙ್ಗಿತಾ;
ಜಲನ್ತಿ ಸೂತಿಕಾಗೇಹೇ, ಪಞ್ಚದೀಪಾನಿದಂ ಫಲಂ.
‘‘ಪಚ್ಛಿಮೇ ಭವೇ ಸಮ್ಪತ್ತೇ, ಮಾನಸಂ ವಿನಿವತ್ತಯಿಂ;
ಅಜರಾಮತಂ ಸೀತಿಭಾವಂ, ನಿಬ್ಬಾನಂ ಫಸ್ಸಯಿಂ ಅಹಂ.
‘‘ಜಾತಿಯಾ ಸತ್ತವಸ್ಸಾಹಂ, ಅರಹತ್ತಮಪಾಪುಣಿಂ;
ಉಪಸಮ್ಪಾದಯೀ ಬುದ್ಧೋ, ಗುಣಮಞ್ಞಾಯ ಗೋತಮೋ.
‘‘ಮಣ್ಡಪೇ ರುಕ್ಖಮೂಲೇ ವಾ, ಸುಞ್ಞಾಗಾರೇ ವಸನ್ತಿಯಾ;
ಸದಾ ಪಜ್ಜಲತೇ ದೀಪಂ, ಪಞ್ಚದೀಪಾನಿದಂ ಫಲಂ.
‘‘ದಿಬ್ಬಚಕ್ಖು ವಿಸುದ್ಧಂ ¶ ಮೇ, ಸಮಾಧಿಕುಸಲಾ ಅಹಂ;
ಅಭಿಞ್ಞಾಪಾರಮಿಪ್ಪತ್ತಾ, ಪಞ್ಚದೀಪಾನಿದಂ ಫಲಂ.
‘‘ಸಬ್ಬವೋಸಿತವೋಸಾನಾ, ಕತಕಿಚ್ಚಾ ಅನಾಸವಾ;
ಪಞ್ಚದೀಪಾ ಮಹಾವೀರ, ಪಾದೇ ವನ್ದಾಮಿ ಚಕ್ಖುಮ.
‘‘ಸತಸಹಸ್ಸಿತೋ ಕಪ್ಪೇ, ಯಂ ದೀಪಮದದಿಂ ತದಾ;
ದುಗ್ಗತಿಂ ನಾಭಿಜಾನಾಮಿ, ಪಞ್ಚದೀಪಾನಿದಂ ಫಲಂ.
‘‘ಕಿಲೇಸಾ ಝಾಪಿತಾ ಮಯ್ಹಂ…ಪೇ… ವಿಹರಾಮಿ ಅನಾಸವಾ.
‘‘ಸ್ವಾಗತಂ ವತ ಮೇ ಆಸಿ…ಪೇ… ಕತಂ ಬುದ್ಧಸ್ಸ ಸಾಸನಂ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಪಞ್ಚದೀಪದಾಯಿಕಾ ಭಿಕ್ಖುನೀ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಪಞ್ಚದೀಪದಾಯಿಕಾಥೇರಿಯಾಪದಾನಂ ಪಞ್ಚಮಂ.
೬. ನಳಮಾಲಿಕಾಥೇರೀಅಪದಾನಂ
‘‘ಚನ್ದಭಾಗಾನದೀತೀರೇ ¶ , ಅಹೋಸಿಂ ಕಿನ್ನರೀ ತದಾ;
ಅದ್ದಸಂ ವಿರಜಂ ಬುದ್ಧಂ, ಸಯಮ್ಭುಂ ಅಪರಾಜಿತಂ.
‘‘ಪಸನ್ನಚಿತ್ತಾ ¶ ¶ ಸುಮನಾ, ವೇದಜಾತಾ ಕತಞ್ಜಲೀ;
ನಳಮಾಲಂ ಗಹೇತ್ವಾನ, ಸಯಮ್ಭುಂ ಅಭಿಪೂಜಯಿಂ.
‘‘ತೇನ ¶ ಕಮ್ಮೇನ ಸುಕತೇನ, ಚೇತನಾಪಣಿಧೀಹಿ ಚ;
ಜಹಿತ್ವಾ ಕಿನ್ನರೀದೇಹಂ [ಮಾನಸಂ ದೇಹಂ (ಸೀ. ಪೀ. ಕ.) ಸುಮೇಧಾವಗ್ಗೇಪಿ], ತಾವತಿಂಸಮಗಚ್ಛಹಂ.
‘‘ಛತ್ತಿಂಸದೇವರಾಜೂನಂ, ಮಹೇಸಿತ್ತಮಕಾರಯಿಂ;
ಮನಸಾ ಪತ್ಥಿತಂ ಮಯ್ಹಂ, ನಿಬ್ಬತ್ತತಿ ಯಥಿಚ್ಛಿತಂ.
‘‘ದಸನ್ನಂ ಚಕ್ಕವತ್ತೀನಂ, ಮಹೇಸಿತ್ತಮಕಾರಯಿಂ;
ಓಚಿತತ್ತಾವ [ಸುಚಿತತ್ತಾವ (ಪೀ.)] ಹುತ್ವಾನ, ಸಂಸರಾಮಿ ಭವೇಸ್ವಹಂ.
‘‘ಕುಸಲಂ ವಿಜ್ಜತೇ ಮಯ್ಹಂ, ಪಬ್ಬಜಿಂ ಅನಗಾರಿಯಂ;
ಪೂಜಾರಹಾ ಅಹಂ ಅಜ್ಜ, ಸಕ್ಯಪುತ್ತಸ್ಸ ಸಾಸನೇ.
‘‘ವಿಸುದ್ಧಮನಸಾ ಅಜ್ಜ, ಅಪೇತಮನಪಾಪಿಕಾ;
ಸಬ್ಬಾಸವಪರಿಕ್ಖೀಣಾ, ನತ್ಥಿ ದಾನಿ ಪುನಬ್ಭವೋ.
‘‘ಚತುನ್ನವುತಿತೋ ಕಪ್ಪೇ, ಯಂ ಬುದ್ಧಮಭಿಪೂಜಯಿಂ;
ದುಗ್ಗತಿಂ ನಾಭಿಜಾನಾಮಿ, ನಳಮಾಲಾಯಿದಂ ಫಲಂ.
‘‘ಕಿಲೇಸಾ ಝಾಪಿತಾ ಮಯ್ಹಂ…ಪೇ… ವಿಹರಾಮಿ ಅನಾಸವಾ.
‘‘ಸ್ವಾಗತಂ ವತ ಮೇ ಆಸಿ…ಪೇ… ಕತಂ ಬುದ್ಧಸ್ಸ ಸಾಸನಂ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ನಳಮಾಲಿಕಾ ಭಿಕ್ಖುನೀ ಇಮಾ ಗಾಥಾಯೋ ಅಭಾಸಿತ್ಥಾತಿ.
ನಳಮಾಲಿಕಾಥೇರಿಯಾಪದಾನಂ ಛಟ್ಠಂ.
೭. ಮಹಾಪಜಾಪತಿಗೋತಮೀಥೇರೀಅಪದಾನಂ
‘‘ಏಕದಾ ¶ ¶ ಲೋಕಪಜ್ಜೋತೋ, ವೇಸಾಲಿಯಂ ಮಹಾವನೇ;
ಕೂಟಾಗಾರೇ ಸುಸಾಲಾಯಂ, ವಸತೇ ನರಸಾರಥಿ.
‘‘ತದಾ ಜಿನಸ್ಸ ಮಾತುಚ್ಛಾ, ಮಹಾಗೋತಮಿ ಭಿಕ್ಖುನೀ;
ತಹಿಂ ಕತೇ [ತಹಿಂಯೇವ (ಸ್ಯಾ.)] ಪುರೇ ರಮ್ಮೇ, ವಸೀ ಭಿಕ್ಖುನುಪಸ್ಸಯೇ.
‘‘ಭಿಕ್ಖುನೀಹಿ ¶ ವಿಮುತ್ತಾಹಿ, ಸತೇಹಿ ಸಹ ಪಞ್ಚಹಿ;
ರಹೋಗತಾಯ ತಸ್ಸೇವಂ, ಚಿತಸ್ಸಾಸಿ [ಚಿತ್ತಸ್ಸಾಪಿ (ಸ್ಯಾ.)] ವಿತಕ್ಕಿತಂ.
‘‘ಬುದ್ಧಸ್ಸ ಪರಿನಿಬ್ಬಾನಂ, ಸಾವಕಗ್ಗಯುಗಸ್ಸ ವಾ;
ರಾಹುಲಾನನ್ದನನ್ದಾನಂ, ನಾಹಂ ಲಚ್ಛಾಮಿ ಪಸ್ಸಿತುಂ.
‘‘ಬುದ್ಧಸ್ಸ ಪರಿನಿಬ್ಬಾನಾ, ಸಾವಕಗ್ಗಯುಗಸ್ಸ ವಾ;
ಮಹಾಕಸ್ಸಪನನ್ದಾನಂ, ಆನನ್ದರಾಹುಲಾನ ಚ.
‘‘ಪಟಿಕಚ್ಚಾಯುಸಙ್ಖಾರಂ [ಪಟಿಗಚ್ಚಾಯುಸಙ್ಖಾರೇ (ಸೀ.)] ¶ , ಓಸಜ್ಜಿತ್ವಾನ ನಿಬ್ಬುತಿಂ;
ಗಚ್ಛೇಯ್ಯಂ ಲೋಕನಾಥೇನ, ಅನುಞ್ಞಾತಾ ಮಹೇಸಿನಾ.
‘‘ತಥಾ ಪಞ್ಚಸತಾನಮ್ಪಿ, ಭಿಕ್ಖುನೀನಂ ವಿತಕ್ಕಿತಂ;
ಆಸಿ ಖೇಮಾದಿಕಾನಮ್ಪಿ, ಏತದೇವ ವಿತಕ್ಕಿತಂ.
‘‘ಭೂಮಿಚಾಲೋ ತದಾ ಆಸಿ, ನಾದಿತಾ ದೇವದುನ್ದುಭೀ;
ಉಪಸ್ಸಯಾಧಿವತ್ಥಾಯೋ, ದೇವತಾ ಸೋಕಪೀಳಿತಾ.
‘‘ವಿಲಪನ್ತಾ ಸುಕರುಣಂ [ಸಕರುಣಂ (ಸೀ. ಸ್ಯಾ. ಪೀ.)], ತತ್ಥಸ್ಸೂನಿ ಪವತ್ತಯುಂ;
ಮಿತ್ತಾ [ಸಬ್ಬಾ (ಸ್ಯಾ. ಪೀ.)] ಭಿಕ್ಖುನಿಯೋ ತಾಹಿ, ಉಪಗನ್ತ್ವಾನ ಗೋತಮಿಂ.
‘‘ನಿಪಚ್ಚ ಸಿರಸಾ ಪಾದೇ, ಇದಂ ವಚನಮಬ್ರವುಂ;
‘ತತ್ಥ ತೋಯಲವಾಸಿತ್ತಾ, ಮಯಮಯ್ಯೇ ರಹೋಗತಾ.
‘‘‘ಸಾ ¶ ಚಲಾ ಚಲಿತಾ ಭೂಮಿ, ನಾದಿತಾ ದೇವದುನ್ದುಭೀ;
ಪರಿದೇವಾ ಚ ಸುಯ್ಯನ್ತೇ, ಕಿಮತ್ಥಂ ನೂನ ಗೋತಮೀ’.
‘‘ತದಾ ಅವೋಚ ಸಾ ಸಬ್ಬಂ, ಯಥಾಪರಿವಿತಕ್ಕಿತಂ;
ತಾಯೋಪಿ ಸಬ್ಬಾ ಆಹಂಸು, ಯಥಾಪರಿವಿತಕ್ಕಿತಂ.
‘‘‘ಯದಿ ತೇ ರುಚಿತಂ ಅಯ್ಯೇ, ನಿಬ್ಬಾನಂ ಪರಮಂ ಸಿವಂ;
ನಿಬ್ಬಾಯಿಸ್ಸಾಮ ಸಬ್ಬಾಪಿ, ಬುದ್ಧಾನುಞ್ಞಾಯ ಸುಬ್ಬತೇ.
‘‘‘ಮಯಂ ¶ ಸಹಾವ ನಿಕ್ಖನ್ತಾ, ಘರಾಪಿ ಚ ಭವಾಪಿ ಚ;
ಸಹಾಯೇವ ಗಮಿಸ್ಸಾಮ, ನಿಬ್ಬಾನಂ ಪದಮುತ್ತಮಂ’.
‘‘‘ನಿಬ್ಬಾನಾಯ ವಜನ್ತೀನಂ, ಕಿಂ ವಕ್ಖಾಮೀ’ತಿ ಸಾ ವದಂ;
ಸಹ ಸಬ್ಬಾಹಿ ನಿಗ್ಗಞ್ಛಿ, ಭಿಕ್ಖುನೀನಿಲಯಾ ತದಾ.
‘‘ಉಪಸ್ಸಯೇ ¶ ಯಾಧಿವತ್ಥಾ, ದೇವತಾ ತಾ ಖಮನ್ತು ಮೇ;
ಭಿಕ್ಖುನೀನಿಲಯಸ್ಸೇದಂ, ಪಚ್ಛಿಮಂ ದಸ್ಸನಂ ಮಮ.
‘‘ನ ಜರಾ ಮಚ್ಚು ವಾ ಯತ್ಥ, ಅಪ್ಪಿಯೇಹಿ ಸಮಾಗಮೋ;
ಪಿಯೇಹಿ ನ ವಿಯೋಗೋತ್ಥಿ, ತಂ ವಜಿಸ್ಸಂ [ತಂ ವಜ್ಜಿಯಂ (ಸ್ಯಾ.)] ಅಸಙ್ಖತಂ.
‘‘ಅವೀತರಾಗಾ ತಂ ಸುತ್ವಾ, ವಚನಂ ಸುಗತೋರಸಾ;
ಸೋಕಟ್ಟಾ ಪರಿದೇವಿಂಸು, ಅಹೋ ನೋ ಅಪ್ಪಪುಞ್ಞತಾ.
‘‘ಭಿಕ್ಖುನೀನಿಲಯೋ ¶ ಸುಞ್ಞೋ, ಭೂತೋ ತಾಹಿ ವಿನಾ ಅಯಂ;
ಪಭಾತೇ ವಿಯ ತಾರಾಯೋ, ನ ದಿಸ್ಸನ್ತಿ ಜಿನೋರಸಾ.
‘‘ನಿಬ್ಬಾನಂ ಗೋತಮೀ ಯಾತಿ, ಸತೇಹಿ ಸಹ ಪಞ್ಚಹಿ;
ನದೀಸತೇಹಿವ ಸಹ, ಗಙ್ಗಾ ಪಞ್ಚಹಿ ಸಾಗರಂ.
‘‘ರಥಿಯಾಯ ¶ ವಜನ್ತಿಯೋ [ವಜನ್ತಿಂ ತಂ (ಸೀ.), ವಜನ್ತಿ ತಂ (ಸ್ಯಾ.), ವಜನ್ತಾನಂ (ಪೀ.)], ದಿಸ್ವಾ ಸದ್ಧಾ ಉಪಾಸಿಕಾ;
ಘರಾ ನಿಕ್ಖಮ್ಮ ಪಾದೇಸು, ನಿಪಚ್ಚ ಇದಮಬ್ರವುಂ.
‘‘‘ಪಸೀದಸ್ಸು ಮಹಾಭೋಗೇ, ಅನಾಥಾಯೋ ವಿಹಾಯ ನೋ;
ತಯಾ ನ ಯುತ್ತಾ [ಯುತ್ತಂ (ಸೀ. ಸ್ಯಾ. ಪೀ.)] ನಿಬ್ಬಾತುಂ, ಇಚ್ಛಟ್ಟಾ ವಿಲಪಿಂಸು ತಾ’.
‘‘ತಾಸಂ ಸೋಕಪಹಾನತ್ಥಂ, ಅವೋಚ ಮಧುರಂ ಗಿರಂ;
‘ರುದಿತೇನ ಅಲಂ ಪುತ್ತಾ, ಹಾಸಕಾಲೋಯಮಜ್ಜ ವೋ.
‘‘‘ಪರಿಞ್ಞಾತಂ ಮಯಾ ದುಕ್ಖಂ, ದುಕ್ಖಹೇತು ವಿವಜ್ಜಿತೋ;
ನಿರೋಧೋ ಮೇ ಸಚ್ಛಿಕತೋ, ಮಗ್ಗೋ ಚಾಪಿ ಸುಭಾವಿತೋ.
ಪಠಮಂ ಭಾಣವಾರಂ.
‘‘‘ಪರಿಚಿಣ್ಣೋ ಮಯಾ ಸತ್ಥಾ, ಕತಂ ಬುದ್ಧಸ್ಸ ಸಾಸನಂ;
ಓಹಿತೋ ಗರುಕೋ ಭಾರೋ, ಭವನೇತ್ತಿ ಸಮೂಹತಾ.
‘‘‘ಯಸ್ಸತ್ಥಾಯ ಪಬ್ಬಜಿತಾ, ಅಗಾರಸ್ಮಾನಗಾರಿಯಂ;
ಸೋ ಮೇ ಅತ್ಥೋ ಅನುಪ್ಪತ್ತೋ, ಸಬ್ಬಸಂಯೋಜನಕ್ಖಯೋ.
‘‘‘ಬುದ್ಧೋ ¶ ತಸ್ಸ ಚ ಸದ್ಧಮ್ಮೋ, ಅನೂನೋ ಯಾವ ತಿಟ್ಠತಿ;
ನಿಬ್ಬಾತುಂ ತಾವ ಕಾಲೋ ಮೇ, ಮಾ ಮಂ ಸೋಚಥ ಪುತ್ತಿಕಾ.
‘‘‘ಕೋಣ್ಡಞ್ಞಾನನ್ದನನ್ದಾದೀ ¶ , ತಿಟ್ಠನ್ತಿ ರಾಹುಲೋ ಜಿನೋ;
ಸುಖಿತೋ ಸಹಿತೋ ಸಙ್ಘೋ, ಹತದಬ್ಬಾ ಚ ತಿತ್ಥಿಯಾ.
‘‘‘ಓಕ್ಕಾಕವಂಸಸ್ಸ ಯಸೋ, ಉಸ್ಸಿತೋ ಮಾರಮದ್ದನೋ;
ನನು ಸಮ್ಪತಿ ಕಾಲೋ ಮೇ, ನಿಬ್ಬಾನತ್ಥಾಯ ಪುತ್ತಿಕಾ.
‘‘‘ಚಿರಪ್ಪಭುತಿ ¶ ಯಂ ಮಯ್ಹಂ, ಪತ್ಥಿತಂ ಅಜ್ಜ ಸಿಜ್ಝತೇ;
ಆನನ್ದಭೇರಿಕಾಲೋಯಂ, ಕಿಂ ವೋ ಅಸ್ಸೂಹಿ ಪುತ್ತಿಕಾ.
‘‘‘ಸಚೇ ಮಯಿ ದಯಾ ಅತ್ಥಿ, ಯದಿ ಚತ್ಥಿ ಕತಞ್ಞುತಾ;
ಸದ್ಧಮ್ಮಟ್ಠಿತಿಯಾ ಸಬ್ಬಾ, ಕರೋಥ ವೀರಿಯಂ ದಳ್ಹಂ.
‘‘‘ಥೀನಂ ಅದಾಸಿ ಪಬ್ಬಜ್ಜಂ, ಸಮ್ಬುದ್ಧೋ ಯಾಚಿತೋ ಮಯಾ;
ತಸ್ಮಾ ಯಥಾಹಂ ನನ್ದಿಸ್ಸಂ, ತಥಾ ತಮನುತಿಟ್ಠಥ’.
‘‘ತಾ ಏವಮನುಸಾಸಿತ್ವಾ, ಭಿಕ್ಖುನೀಹಿ ಪುರಕ್ಖತಾ;
ಉಪೇಚ್ಚ ಬುದ್ಧಂ ವನ್ದಿತ್ವಾ, ಇದಂ ವಚನಮಬ್ರವಿ.
‘‘‘ಅಹಂ ¶ ಸುಗತ ತೇ ಮಾತಾ, ತ್ವಞ್ಚ ವೀರ ಪಿತಾ ಮಮ;
ಸದ್ಧಮ್ಮಸುಖದ [ಸದ್ಧಮ್ಮಸುಖದೋ (ಸೀ. ಸ್ಯಾ. ಪೀ.)] ನಾಥ, ತಯಾ ಜಾತಾಮ್ಹಿ ಗೋತಮ.
‘‘‘ಸಂವದ್ಧಿತೋಯಂ ಸುಗತ, ರೂಪಕಾಯೋ ಮಯಾ ತವ;
ಅನಿನ್ದಿತೋ [ಆನನ್ದಿಯೋ (ಸ್ಯಾ.), ಅನಿನ್ದಿಯೋ (ಪೀ.)] ಧಮ್ಮಕಾಯೋ [ಧಮ್ಮತನು (ಸೀ. ಪೀ. ಕ.)], ಮಮ ಸಂವದ್ಧಿತೋ ತಯಾ.
‘‘‘ಮುಹುತ್ತಂ ತಣ್ಹಾಸಮಣಂ, ಖೀರಂ ತ್ವಂ ಪಾಯಿತೋ ಮಯಾ;
ತಯಾಹಂ ಸನ್ತಮಚ್ಚನ್ತಂ, ಧಮ್ಮಖೀರಞ್ಹಿ [ಧಮ್ಮಖೀರಮ್ಪಿ (ಸ್ಯಾ., ಕ.)] ಪಾಯಿತಾ.
‘‘‘ಬನ್ಧನಾರಕ್ಖನೇ ಮಯ್ಹಂ, ಅಣಣೋ [ಅನಣೋ (ಸೀ. ಸ್ಯಾ. ಪೀ.)] ತ್ವಂ ಮಹಾಮುನೇ;
ಪುತ್ತಕಾಮಾ ಥಿಯೋ ಯಾಚಂ, ಲಭನ್ತಿ ತಾದಿಸಂ ಸುತಂ.
‘‘‘ಮನ್ಧಾತಾದಿನರಿನ್ದಾನಂ, ಯಾ ಮಾತಾ ಸಾ ಭವಣ್ಣವೇ;
ನಿಮುಗ್ಗಾಹಂ ತಯಾ ಪುತ್ತ, ತಾರಿತಾ ಭವಸಾಗರಾ.
‘‘‘ರಞ್ಞೋ ಮಾತಾ ಮಹೇಸೀತಿ, ಸುಲಭಂ ನಾಮಮಿತ್ಥಿನಂ;
ಬುದ್ಧಮಾತಾತಿ ಯಂ ನಾಮಂ, ಏತಂ ಪರಮದುಲ್ಲಭಂ.
‘‘‘ತಞ್ಚ ¶ ಲದ್ಧಂ ಮಹಾವೀರ, ಪಣಿಧಾನಂ ಮಮಂ ತಯಾ;
ಅಣುಕಂ ವಾ ಮಹನ್ತಂ ವಾ, ತಂ ಸಬ್ಬಂ ಪೂರಿತಂ ಮಯಾ.
‘‘‘ಪರಿನಿಬ್ಬಾತುಮಿಚ್ಛಾಮಿ ¶ ¶ , ವಿಹಾಯೇಮಂ ಕಳೇವರಂ;
ಅನುಜಾನಾಹಿ ಮೇ ವೀರ, ದುಕ್ಖನ್ತಕರ ನಾಯಕ.
‘‘‘ಚಕ್ಕಙ್ಕುಸಧಜಾಕಿಣ್ಣೇ, ಪಾದೇ ಕಮಲಕೋಮಲೇ;
ಪಸಾರೇಹಿ ಪಣಾಮಂ ತೇ, ಕರಿಸ್ಸಂ ಪುತ್ತಉತ್ತಮೇ [ಪುತ್ತಪೇಮಸಾ (ಸೀ. ಪೀ.), ಪುತ್ತಪೇಮಹಂ (ಸ್ಯಾ.)].
‘‘‘ಸುವಣ್ಣರಾಸಿಸಙ್ಕಾಸಂ, ಸರೀರಂ ಕುರು ಪಾಕಟಂ;
ಕತ್ವಾ ದೇಹಂ ಸುದಿಟ್ಠಂ ತೇ, ಸನ್ತಿಂ ಗಚ್ಛಾಮಿ ನಾಯಕ’.
‘‘ದ್ವತ್ತಿಂಸಲಕ್ಖಣೂಪೇತಂ, ಸುಪ್ಪಭಾಲಙ್ಕತಂ ತನುಂ;
ಸಞ್ಝಾಘನಾವ ಬಾಲಕ್ಕಂ, ಮಾತುಚ್ಛಂ ದಸ್ಸಯೀ ಜಿನೋ.
‘‘ಫುಲ್ಲಾರವಿನ್ದಸಂಕಾಸೇ, ತರುಣಾದಿಚ್ಚಸಪ್ಪಭೇ;
ಚಕ್ಕಙ್ಕಿತೇ ಪಾದತಲೇ, ತತೋ ಸಾ ಸಿರಸಾ ಪತಿ.
‘‘‘ಪಣಮಾಮಿ ನರಾದಿಚ್ಚ, ಆದಿಚ್ಚಕುಲಕೇತುಕಂ;
ಪಚ್ಛಿಮೇ ಮರಣೇ ಮಯ್ಹಂ [ಸರಣಂ ಮಯ್ಹಂ (ಸ್ಯಾ.)], ನ ತಂ ಇಕ್ಖಾಮಹಂ ಪುನೋ.
‘‘‘ಇತ್ಥಿಯೋ ¶ ನಾಮ ಲೋಕಗ್ಗ, ಸಬ್ಬದೋಸಾಕರಾ ಮತಾ;
ಯದಿ ಕೋ ಚತ್ಥಿ ದೋಸೋ ಮೇ, ಖಮಸ್ಸು ಕರುಣಾಕರ.
‘‘‘ಇತ್ಥಿಕಾನಞ್ಚ ಪಬ್ಬಜ್ಜಂ, ಹಂ ತಂ ಯಾಚಿಂ ಪುನಪ್ಪುನಂ;
ತತ್ಥ ಚೇ ಅತ್ಥಿ ದೋಸೋ ಮೇ, ತಂ ಖಮಸ್ಸು ನರಾಸಭ.
‘‘‘ಮಯಾ ಭಿಕ್ಖುನಿಯೋ ವೀರ, ತವಾನುಞ್ಞಾಯ ಸಾಸಿತಾ;
ತತ್ರ ಚೇ ಅತ್ಥಿ ದುನ್ನೀತಂ, ತಂ ಖಮಸ್ಸು ಖಮಾಧಿಪ [ಖಮಾಧಿತಿ (ಸ್ಯಾ.), ಖಮಾಪಿತೋ (ಕ.)].
‘‘‘ಅಕ್ಖನ್ತೇ ¶ ನಾಮ ಖನ್ತಬ್ಬಂ, ಕಿಂ ಭವೇ ಗುಣಭೂಸನೇ;
ಕಿಮುತ್ತರಂ ತೇ ವಕ್ಖಾಮಿ, ನಿಬ್ಬಾನಾಯ ವಜನ್ತಿಯಾ.
‘‘‘ಸುದ್ಧೇ ಅನೂನೇ ಮಮ ಭಿಕ್ಖುಸಙ್ಘೇ, ಲೋಕಾ ಇತೋ ನಿಸ್ಸರಿತುಂ ಖಮನ್ತೇ;
ಪಭಾತಕಾಲೇ ಬ್ಯಸನಙ್ಗತಾನಂ, ದಿಸ್ವಾನ ನಿಯ್ಯಾತಿವ ಚನ್ದಲೇಖಾ’.
‘‘‘ತದೇತರಾ ಭಿಕ್ಖುನಿಯೋ ಜಿನಗ್ಗಂ, ತಾರಾವ ಚನ್ದಾನುಗತಾ ಸುಮೇರುಂ;
ಪದಕ್ಖಿಣಂ ಕಚ್ಚ ನಿಪಚ್ಚ ಪಾದೇ, ಠಿತಾ ಮುಖನ್ತಂ ಸಮುದಿಕ್ಖಮಾನಾ.
‘‘‘ನ ¶ ತಿತ್ತಿಪುಬ್ಬಂ ತವ ದಸ್ಸನೇನ, ಚಕ್ಖುಂ ನ ಸೋತಂ ತವ ಭಾಸಿತೇನ;
ಚಿತ್ತಂ ಮಮಂ ಕೇವಲಮೇಕಮೇವ, ಪಪ್ಪುಯ್ಯ ತಂ ಧಮ್ಮರಸೇನ ತಿತ್ತಿ.
‘‘‘ನದತೋ ಪರಿಸಾಯಂ ತೇ, ವಾದಿತಬ್ಬಪಹಾರಿನೋ;
ಯೇ ತೇ ದಕ್ಖನ್ತಿ ವದನಂ, ಧಞ್ಞಾ ತೇ ನರಪುಙ್ಗವ.
‘‘‘ದೀಘಙ್ಗುಲೀ ¶ ತಮ್ಬನಖೇ, ಸುಭೇ ಆಯತಪಣ್ಹಿಕೇ;
ಯೇ ಪಾದೇ ಪಣಮಿಸ್ಸನ್ತಿ [ಪಣಮಾಯನ್ತಿ (ಸ್ಯಾ.)], ತೇಪಿ ಧಞ್ಞಾ ಗುಣನ್ಧರ.
‘‘‘ಮಧುರಾನಿ ¶ ಪಹಟ್ಠಾನಿ, ದೋಸಗ್ಘಾನಿ ಹಿತಾನಿ ಚ;
ಯೇ ತೇ ವಾಕ್ಯಾನಿ ಸುಯ್ಯನ್ತಿ, ತೇಪಿ ಧಞ್ಞಾ ನರುತ್ತಮ.
‘‘‘ಧಞ್ಞಾಹಂ ¶ ತೇ ಮಹಾವೀರ, ಪಾದಪೂಜನತಪ್ಪರಾ [ಮಾನಪೂಜನತಪ್ಪರಾ (ಕ.)];
ತಿಣ್ಣಸಂಸಾರಕನ್ತಾರಾ, ಸುವಾಕ್ಯೇನ ಸಿರೀಮತೋ’.
‘‘ತತೋ ಸಾ ಅನುಸಾವೇತ್ವಾ [ಅನುಮಾನೇ ತ್ವಾ (ಕ.)], ಭಿಕ್ಖುಸಙ್ಘಮ್ಪಿ ಸುಬ್ಬತಾ;
ರಾಹುಲಾನನ್ದನನ್ದೇ ಚ, ವನ್ದಿತ್ವಾ ಇದಮಬ್ರವಿ.
‘‘‘ಆಸೀವಿಸಾಲಯಸಮೇ, ರೋಗಾವಾಸೇ ಕಳೇವರೇ;
ನಿಬ್ಬಿನ್ದಾ ದುಕ್ಖಸಙ್ಘಾಟೇ, ಜರಾಮರಣಗೋಚರೇ.
‘‘‘ನಾನಾಕಲಿಮಲಾಕಿಣ್ಣೇ [ನಾನಾಕುಣಪಮಲಾಕಿಣ್ಣೇ (ಸ್ಯಾ.), ನಾನಾಕಾಳಮಲಾಕಿಣ್ಣೇ (ಕ.)], ಪರಾಯತ್ತೇ ನಿರೀಹಕೇ;
ತೇನ ನಿಬ್ಬಾತುಮಿಚ್ಛಾಮಿ, ಅನುಮಞ್ಞಥ ಪುತ್ತಕಾ’.
‘‘ನನ್ದೋ ರಾಹುಲಭದ್ದೋ ಚ, ವೀತಸೋಕಾ ನಿರಾಸವಾ;
ಠಿತಾಚಲಟ್ಠಿತಿ ಥಿರಾ, ಧಮ್ಮತಮನುಚಿನ್ತಯುಂ.
‘‘‘ಧಿರತ್ಥು ಸಙ್ಖತಂ ಲೋಲಂ, ಅಸಾರಂ ಕದಲೂಪಮಂ;
ಮಾಯಾಮರೀಚಿಸದಿಸಂ, ಇತರಂ ಅನವಟ್ಠಿತಂ.
‘‘‘ಯತ್ಥ ನಾಮ ಜಿನಸ್ಸಾಯಂ, ಮಾತುಚ್ಛಾ ಬುದ್ಧಪೋಸಿಕಾ;
ಗೋತಮೀ ನಿಧನಂ ಯಾತಿ, ಅನಿಚ್ಚಂ ಸಬ್ಬಸಙ್ಖತಂ’.
‘‘ಆನನ್ದೋ ಚ ತದಾ ಸೇಖೋ, ಸೋಕಟ್ಟೋ [ಕನಿಟ್ಠೋ (ಸ್ಯಾ.)] ಜಿನವಚ್ಛಲೋ;
ತತ್ಥಸ್ಸೂನಿ ಕರೋನ್ತೋ ಸೋ, ಕರುಣಂ ಪರಿದೇವತಿ.
‘‘ಹಾ ಸನ್ತಿಂ [ಭಾಸನ್ತೀ (ಸ್ಯಾ.)] ಗೋತಮೀ ಯಾತಿ, ನೂನ ಬುದ್ಧೋಪಿ ನಿಬ್ಬುತಿಂ;
ಗಚ್ಛತಿ ನ ಚಿರೇನೇವ, ಅಗ್ಗಿರಿವ ನಿರಿನ್ಧನೋ.
‘‘ಏವಂ ¶ ವಿಲಾಪಮಾನಂ ತಂ, ಆನನ್ದಂ ಆಹ ಗೋತಮೀ;
ಸುತಸಾಗರಗಮ್ಭೀರ ¶ , ಬುದ್ಧೋಪಟ್ಠಾನತಪ್ಪರ.
‘‘‘ನ ಯುತ್ತಂ ಸೋಚಿತುಂ ಪುತ್ತ, ಹಾಸಕಾಲೇ ಉಪಟ್ಠಿತೇ;
ತಯಾ ಮೇ ಸರಣಂ ಪುತ್ತ, ನಿಬ್ಬಾನಂ ತಮುಪಾಗತಂ.
‘‘‘ತಯಾ ತಾತ ಸಮಜ್ಝಿಟ್ಠೋ, ಪಬ್ಬಜ್ಜಂ ಅನುಜಾನಿ ನೋ;
ಮಾ ಪುತ್ತ ವಿಮನೋ ಹೋಹಿ, ಸಫಲೋ ತೇ ಪರಿಸ್ಸಮೋ.
‘‘‘ಯಂ ¶ ¶ ನ ದಿಟ್ಠಂ ಪುರಾಣೇಹಿ, ತಿತ್ಥಿಕಾಚರಿಯೇಹಿಪಿ;
ತಂ ಪದಂ ಸುಕುಮಾರೀಹಿ, ಸತ್ತವಸ್ಸಾಹಿ ವೇದಿತಂ.
‘‘‘ಬುದ್ಧಸಾಸನಪಾಲೇತ, ಪಚ್ಛಿಮಂ ದಸ್ಸನಂ ತವ;
ತತ್ಥ ಗಚ್ಛಾಮಹಂ ಪುತ್ತ, ಗತೋ ಯತ್ಥ ನ ದಿಸ್ಸತೇ.
‘‘‘ಕದಾಚಿ ಧಮ್ಮಂ ದೇಸೇನ್ತೋ, ಖಿಪೀ ಲೋಕಗ್ಗನಾಯಕೋ;
ತದಾಹಂ ಆಸೀಸವಾಚಂ, ಅವೋಚಂ ಅನುಕಮ್ಪಿಕಾ.
‘‘‘ಚಿರಂ ಜೀವ ಮಹಾವೀರ, ಕಪ್ಪಂ ತಿಟ್ಠ ಮಹಾಮುನೇ;
ಸಬ್ಬಲೋಕಸ್ಸ ಅತ್ಥಾಯ, ಭವಸ್ಸು ಅಜರಾಮರೋ.
‘‘‘ತಂ ತಥಾವಾದಿನಿಂ ಬುದ್ಧೋ, ಮಮಂ ಸೋ ಏತದಬ್ರವಿ;
‘ನ ಹೇವಂ ವನ್ದಿಯಾ ಬುದ್ಧಾ, ಯಥಾ ವನ್ದಸಿ ಗೋತಮೀ.
‘‘‘ಕಥಂ ಚರಹಿ ಸಬ್ಬಞ್ಞೂ, ವನ್ದಿತಬ್ಬಾ ತಥಾಗತಾ;
ಕಥಂ ಅವನ್ದಿಯಾ ಬುದ್ಧಾ, ತಂ ಮೇ ಅಕ್ಖಾಹಿ ಪುಚ್ಛಿತೋ.
‘‘‘ಆರದ್ಧವೀರಿಯೇ ಪಹಿತತ್ತೇ, ನಿಚ್ಚಂ ದಳ್ಹಪರಕ್ಕಮೇ;
ಸಮಗ್ಗೇ ಸಾವಕೇ ಪಸ್ಸ, ಏತಂ ಬುದ್ಧಾನವನ್ದನಂ.
‘‘‘ತತೋ ಉಪಸ್ಸಯಂ ಗನ್ತ್ವಾ, ಏಕಿಕಾಹಂ ವಿಚಿನ್ತಯಿಂ;
ಸಮಗ್ಗಪರಿಸಂ ನಾಥೋ, ರೋಧೇಸಿ ತಿಭವನ್ತಗೋ.
‘‘‘ಹನ್ದಾಹಂ ¶ ಪರಿನಿಬ್ಬಿಸ್ಸಂ, ಮಾ ವಿಪತ್ತಿತಮದ್ದಸಂ;
ಏವಾಹಂ ಚಿನ್ತಯಿತ್ವಾನ, ದಿಸ್ವಾನ ಇಸಿಸತ್ತಮಂ.
‘‘‘ಪರಿನಿಬ್ಬಾನಕಾಲಂ ಮೇ, ಆರೋಚೇಸಿಂ [ಆರೋಚೇಮಿ (ಸ್ಯಾ.)] ವಿನಾಯಕಂ;
ತತೋ ಸೋ ಸಮನುಞ್ಞಾಸಿ, ಕಾಲಂ ಜಾನಾಹಿ ಗೋತಮೀ.
‘‘‘ಕಿಲೇಸಾ ¶ ಝಾಪಿತಾ ಮಯ್ಹಂ…ಪೇ… ವಿಹರಾಮಿ ಅನಾಸವಾ.
‘‘‘ಸ್ವಾಗತಂ ವತ ಮೇ ಆಸಿ…ಪೇ… ಕತಂ ಬುದ್ಧಸ್ಸ ಸಾಸನಂ.
‘‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ.
‘‘‘ಥೀನಂ ಧಮ್ಮಾಭಿಸಮಯೇ, ಯೇ ಬಾಲಾ ವಿಮತಿಂ ಗತಾ;
ತೇಸಂ ದಿಟ್ಠಿಪ್ಪಹಾನತ್ಥಂ, ಇದ್ಧಿಂ ದಸ್ಸೇಹಿ ಗೋತಮೀ’.
‘‘ತದಾ ನಿಪಚ್ಚ ಸಮ್ಬುದ್ಧಂ, ಉಪ್ಪತಿತ್ವಾನ ಅಮ್ಬರಂ;
ಇದ್ಧೀ ಅನೇಕಾ ದಸ್ಸೇಸಿ, ಬುದ್ಧಾನುಞ್ಞಾಯ ಗೋತಮೀ.
‘‘ಏಕಿಕಾ ಬಹುಧಾ ಆಸಿ, ಬಹುಕಾ ಚೇತಿಕಾ ತಥಾ;
ಆವಿಭಾವಂ ತಿರೋಭಾವಂ, ತಿರೋಕುಟ್ಟಂ [ತಿರೋಕುಡ್ಡಂ (ಸ್ಯಾ.)] ತಿರೋನಗಂ.
‘‘ಅಸಜ್ಜಮಾನಾ ¶ ¶ ಅಗಮಾ, ಭೂಮಿಯಮ್ಪಿ ನಿಮುಜ್ಜಥ;
ಅಭಿಜ್ಜಮಾನೇ ಉದಕೇ, ಅಗಞ್ಛಿ ಮಹಿಯಾ ಯಥಾ.
‘‘ಸಕುಣೀವ ತಥಾಕಾಸೇ, ಪಲ್ಲಙ್ಕೇನ ಕಮೀ ತದಾ;
ವಸಂ ವತ್ತೇಸಿ ಕಾಯೇನ, ಯಾವ ಬ್ರಹ್ಮನಿವೇಸನಂ.
‘‘ಸಿನೇರುಂ ¶ ದಣ್ಡಂ ಕತ್ವಾನ, ಛತ್ತಂ ಕತ್ವಾ ಮಹಾಮಹಿಂ;
ಸಮೂಲಂ ಪರಿವತ್ತೇತ್ವಾ, ಧಾರಯಂ ಚಙ್ಕಮೀ ನಭೇ.
‘‘ಛಸ್ಸೂರೋದಯಕಾಲೇವ, ಲೋಕಞ್ಚಾಕಾಸಿ ಧೂಮಿಕಂ;
ಯುಗನ್ತೇ ವಿಯ ಲೋಕಂ ಸಾ, ಜಾಲಾಮಾಲಾಕುಲಂ ಅಕಾ.
‘‘ಮುಚಲಿನ್ದಂ ಮಹಾಸೇಲಂ, ಮೇರುಮೂಲನದನ್ತರೇ [ಮೇರುಮನ್ದಾರದದ್ದರೇ (ಸೀ. ಪೀ.), ಮೇರುಂ ಮನ್ದಾರದನ್ತರೇ (ಸ್ಯಾ.)];
ಸಾಸಪಾರಿವ ಸಬ್ಬಾನಿ, ಏಕೇನಗ್ಗಹಿ ಮುಟ್ಠಿನಾ.
‘‘ಅಙ್ಗುಲಗ್ಗೇನ ಛಾದೇಸಿ, ಭಾಕರಂ ಸನಿಸಾಕರಂ;
ಚನ್ದಸೂರಸಹಸ್ಸಾನಿ, ಆವೇಳಮಿವ ಧಾರಯಿ.
‘‘ಚತುಸಾಗರತೋಯಾನಿ, ಧಾರಯೀ ಏಕಪಾಣಿನಾ;
ಯುಗನ್ತಜಲದಾಕಾರಂ, ಮಹಾವಸ್ಸಂ ಪವಸ್ಸಥ.
‘‘ಚಕ್ಕವತ್ತಿಂ ಸಪರಿಸಂ, ಮಾಪಯೀ ಸಾ ನಭತ್ತಲೇ;
ಗರುಳಂ ದ್ವಿರದಂ ಸೀಹಂ, ವಿನದನ್ತಂ ಪದಸ್ಸಯಿ.
‘‘ಏಕಿಕಾ ಅಭಿನಿಮ್ಮಿತ್ವಾ, ಅಪ್ಪಮೇಯ್ಯಂ ಭಿಕ್ಖುನೀಗಣಂ;
ಪುನ ಅನ್ತರಧಾಪೇತ್ವಾ, ಏಕಿಕಾ ಮುನಿಮಬ್ರವಿ.
‘‘‘ಮಾತುಚ್ಛಾ ¶ ತೇ ಮಹಾವೀರ, ತವ ಸಾಸನಕಾರಿಕಾ;
ಅನುಪ್ಪತ್ತಾ ಸಕಂ ಅತ್ಥಂ, ಪಾದೇ ವನ್ದಾಮಿ ಚಕ್ಖುಮ’.
‘‘ದಸ್ಸೇತ್ವಾ ವಿವಿಧಾ ಇದ್ಧೀ, ಓರೋಹಿತ್ವಾ ನಭತ್ತಲಾ;
ವನ್ದಿತ್ವಾ ಲೋಕಪಜ್ಜೋತಂ, ಏಕಮನ್ತಂ ನಿಸೀದಿ ಸಾ.
‘‘ಸಾ ವೀಸವಸ್ಸಸತಿಕಾ, ಜಾತಿಯಾಹಂ ಮಹಾಮುನೇ;
ಅಲಮೇತ್ತಾವತಾ ವೀರ, ನಿಬ್ಬಾಯಿಸ್ಸಾಮಿ ನಾಯಕ.
‘‘ತದಾತಿವಿಮ್ಹಿತಾ ¶ ಸಬ್ಬಾ, ಪರಿಸಾ ಸಾ ಕತಞ್ಜಲೀ;
ಅವೋಚಯ್ಯೇ ಕಥಂ ಆಸಿ, ಅತುಲಿದ್ಧಿಪರಕ್ಕಮಾ.
‘‘ಪದುಮುತ್ತರೋ ¶ ನಾಮ ಜಿನೋ, ಸಬ್ಬಧಮ್ಮೇಸು ಚಕ್ಖುಮಾ;
ಇತೋ ಸತಸಹಸ್ಸಮ್ಹಿ, ಕಪ್ಪೇ ಉಪ್ಪಜ್ಜಿ ನಾಯಕೋ.
‘‘ತದಾಹಂ ¶ ಹಂಸವತಿಯಂ, ಜಾತಾಮಚ್ಚಕುಲೇ ಅಹುಂ;
ಸಬ್ಬೋಪಕಾರಸಮ್ಪನ್ನೇ, ಇದ್ಧೇ ಫೀತೇ ಮಹದ್ಧನೇ.
‘‘ಕದಾಚಿ ಪಿತುನಾ ಸದ್ಧಿಂ, ದಾಸಿಗಣಪುರಕ್ಖತಾ;
ಮಹತಾ ಪರಿವಾರೇನ, ತಂ ಉಪೇಚ್ಚ ನರಾಸಭಂ.
‘‘ವಾಸವಂ ವಿಯ ವಸ್ಸನ್ತಂ, ಧಮ್ಮಮೇಘಂ ಅನಾಸವಂ [ಪವಸ್ಸಯಂ (ಕ.)];
ಸರದಾದಿಚ್ಚಸದಿಸಂ, ರಂಸಿಜಾಲಸಮುಜ್ಜಲಂ [ರಂಸಿಮಾಲಾಕುಲಂ ಜಿನಂ (ಸೀ. ಸ್ಯಾ.), ರಂಸಿಜಾಲಾಕುಲಂ ಜಿನಂ (ಪೀ.)].
‘‘ದಿಸ್ವಾ ಚಿತ್ತಂ ಪಸಾದೇತ್ವಾ, ಸುತ್ವಾ ಚಸ್ಸ ಸುಭಾಸಿತಂ;
ಮಾತುಚ್ಛಂ ಭಿಕ್ಖುನಿಂ ಅಗ್ಗೇ, ಠಪೇನ್ತಂ ನರನಾಯಕಂ.
‘‘ಸುತ್ವಾ ದತ್ವಾ ಮಹಾದಾನಂ, ಸತ್ತಾಹಂ ತಸ್ಸ ತಾದಿನೋ;
ಸಸಙ್ಘಸ್ಸ ನರಗ್ಗಸ್ಸ, ಪಚ್ಚಯಾನಿ ಬಹೂನಿ ಚ.
‘‘ನಿಪಚ್ಚ ಪಾದಮೂಲಮ್ಹಿ, ತಂ ಠಾನಮಭಿಪತ್ಥಯಿಂ;
ತತೋ ಮಹಾಪರಿಸತಿಂ, ಅವೋಚ ಇಸಿಸತ್ತಮೋ.
‘‘‘ಯಾ ಸಸಙ್ಘಂ ಅಭೋಜೇಸಿ, ಸತ್ತಾಹಂ ಲೋಕನಾಯಕಂ;
ತಮಹಂ ಕಿತ್ತಯಿಸ್ಸಾಮಿ, ಸುಣಾಥ ಮಮ ಭಾಸತೋ.
‘‘‘ಸತಸಹಸ್ಸಿತೋ ಕಪ್ಪೇ, ಓಕ್ಕಾಕಕುಲಸಮ್ಭವೋ;
ಗೋತಮೋ ನಾಮ ಗೋತ್ತೇನ, ಸತ್ಥಾ ಲೋಕೇ ಭವಿಸ್ಸತಿ.
‘‘‘ತಸ್ಸ ¶ ¶ ಧಮ್ಮೇಸು ದಾಯಾದಾ, ಓರಸಾ ಧಮ್ಮನಿಮ್ಮಿತಾ;
ಗೋತಮೀ ನಾಮ ನಾಮೇನ, ಹೇಸ್ಸತಿ ಸತ್ಥು ಸಾವಿಕಾ.
‘‘‘ತಸ್ಸ ಬುದ್ಧಸ್ಸ ಮಾತುಚ್ಛಾ, ಜೀವಿತಾಪಾದಿಕಾ [ಜೀವಿತಪಾಲಿಕಾ (ಸ್ಯಾ.)] ಅಯಂ;
ರತ್ತಞ್ಞೂನಞ್ಚ ಅಗ್ಗತ್ತಂ, ಭಿಕ್ಖುನೀನಂ ಲಭಿಸ್ಸತಿ’.
‘‘ತಂ ಸುತ್ವಾನ ಪಮೋದಿತ್ವಾ [ತಂ ಸುತ್ವಾಹಂ ಪಮುದಿತಾ (ಸೀ. ಸ್ಯಾ. ಪೀ.)], ಯಾವಜೀವಂ ತದಾ ಜಿನಂ;
ಪಚ್ಚಯೇಹಿ ಉಪಟ್ಠಿತ್ವಾ, ತತೋ ಕಾಲಙ್ಕತಾ ಅಹಂ.
‘‘ತಾವತಿಂಸೇಸು ದೇವೇಸು, ಸಬ್ಬಕಾಮಸಮಿದ್ಧಿಸು;
ನಿಬ್ಬತ್ತಾ ದಸಹಙ್ಗೇಹಿ, ಅಞ್ಞೇ ಅಭಿಭವಿಂ ಅಹಂ.
‘‘ರೂಪಸದ್ದೇಹಿ ಗನ್ಧೇಹಿ, ರಸೇಹಿ ಫುಸನೇಹಿ ಚ;
ಆಯುನಾಪಿ ಚ ವಣ್ಣೇನ, ಸುಖೇನ ಯಸಸಾಪಿ ಚ.
‘‘ತಥೇವಾಧಿಪತೇಯ್ಯೇನ, ಅಧಿಗಯ್ಹ ವಿರೋಚಹಂ;
ಅಹೋಸಿಂ ಅಮರಿನ್ದಸ್ಸ, ಮಹೇಸೀ ದಯಿತಾ ತಹಿಂ.
‘‘ಸಂಸಾರೇ ¶ ¶ ಸಂಸರನ್ತೀಹಂ, ಕಮ್ಮವಾಯುಸಮೇರಿತಾ;
ಕಾಸಿಸ್ಸ ರಞ್ಞೋ ವಿಸಯೇ, ಅಜಾಯಿಂ ದಾಸಗಾಮಕೇ.
‘‘ಪಞ್ಚದಾಸಸತಾನೂನಾ, ನಿವಸನ್ತಿ ತಹಿಂ ತದಾ;
ಸಬ್ಬೇಸಂ ತತ್ಥ ಯೋ ಜೇಟ್ಠೋ, ತಸ್ಸ ಜಾಯಾ ಅಹೋಸಹಂ.
‘‘ಸಯಮ್ಭುನೋ ಪಞ್ಚಸತಾ, ಗಾಮಂ ಪಿಣ್ಡಾಯ ಪಾವಿಸುಂ;
ತೇ ದಿಸ್ವಾನ ಅಹಂ ತುಟ್ಠಾ, ಸಹ ಸಬ್ಬಾಹಿ ಇತ್ಥಿಭಿ [ಞಾತಿಭಿ (ಸೀ. ಸ್ಯಾ. ಪೀ.)].
‘‘ಪೂಗಾ ಹುತ್ವಾವ ಸಬ್ಬಾಯೋ [ಕತ್ವಾ ಪಞ್ಚಸತಕುಟೀ (ಸೀ. ಸ್ಯಾ.)], ಚತುಮಾಸೇ ಉಪಟ್ಠಹುಂ [ಉಪಟ್ಠಿಯ (ಸೀ. ಸ್ಯಾ. ಪೀ.)];
ತಿಚೀವರಾನಿ ದತ್ವಾನ, ಸಂಸರಿಮ್ಹ [ಪಸನ್ನಾಮ್ಹ (ಸ್ಯಾ.)] ಸಸಾಮಿಕಾ.
‘‘ತತೋ ¶ ಚುತಾ ಸಬ್ಬಾಪಿ ತಾ, ತಾವತಿಂಸಗತಾ ಮಯಂ;
ಪಚ್ಛಿಮೇ ಚ ಭವೇ ದಾನಿ, ಜಾತಾ ದೇವದಹೇ ಪುರೇ.
‘‘ಪಿತಾ ಅಞ್ಜನಸಕ್ಕೋ ಮೇ, ಮಾತಾ ಮಮ ಸುಲಕ್ಖಣಾ;
ತತೋ ಕಪಿಲವತ್ಥುಸ್ಮಿಂ, ಸುದ್ಧೋದನಘರಂ ಗತಾ.
‘‘ಸೇಸಾ [ಸಬ್ಬಾ (ಸ್ಯಾ.)] ಸಕ್ಯಕುಲೇ ಜಾತಾ, ಸಕ್ಯಾನಂ ಘರಮಾಗಮುಂ;
ಅಹಂ ವಿಸಿಟ್ಠಾ ಸಬ್ಬಾಸಂ, ಜಿನಸ್ಸಾಪಾದಿಕಾ ಅಹುಂ.
‘‘ಮಮ ¶ ಪುತ್ತೋಭಿನಿಕ್ಖಮ್ಮ [ಸ ಮೇ ಪುತ್ತೋ… (ಸ್ಯಾ.)], ಬುದ್ಧೋ ಆಸಿ ವಿನಾಯಕೋ;
ಪಚ್ಛಾಹಂ ಪಬ್ಬಜಿತ್ವಾನ, ಸತೇಹಿ ಸಹ ಪಞ್ಚಹಿ.
‘‘ಸಾಕಿಯಾನೀಹಿ ಧೀರಾಹಿ, ಸಹ ಸನ್ತಿಸುಖಂ ಫುಸಿಂ;
ಯೇ ತದಾ ಪುಬ್ಬಜಾತಿಯಂ, ಅಮ್ಹಾಕಂ ಆಸು ಸಾಮಿನೋ.
‘‘ಸಹಪುಞ್ಞಸ್ಸ ಕತ್ತಾರೋ, ಮಹಾಸಮಯಕಾರಕಾ;
ಫುಸಿಂಸು ಅರಹತ್ತಂ ತೇ, ಸುಗತೇನಾನುಕಮ್ಪಿತಾ.
‘‘ತದೇತರಾ ಭಿಕ್ಖುನಿಯೋ, ಆರುಹಿಂಸು ನಭತ್ತಲಂ;
ಸಂಗತಾ [ಖಗತಾ (ಸೀ.)] ವಿಯ ತಾರಾಯೋ, ವಿರೋಚಿಂಸು ಮಹಿದ್ಧಿಕಾ.
‘‘ಇದ್ಧೀ ಅನೇಕಾ ದಸ್ಸೇಸುಂ, ಪಿಳನ್ಧವಿಕತಿಂ ಯಥಾ;
ಕಮ್ಮಾರೋ ಕನಕಸ್ಸೇವ, ಕಮ್ಮಞ್ಞಸ್ಸ ಸುಸಿಕ್ಖಿತೋ [ಪುಣ್ಣಕಮ್ಮೇಸು ಸಿಕ್ಖಿತಾ (ಸ್ಯಾ.)].
‘‘ದಸ್ಸೇತ್ವಾ ಪಾಟಿಹೀರಾನಿ, ವಿಚಿತ್ತಾನಿ [ವಿವಿಧಾನಿ (ಸ್ಯಾ.)] ಬಹೂನಿ ಚ;
ತೋಸೇತ್ವಾ ವಾದಿಪವರಂ, ಮುನಿಂ ಸಪರಿಸಂ ತದಾ.
‘‘ಓರೋಹಿತ್ವಾನ ಗಗನಾ, ವನ್ದಿತ್ವಾ ಇಸಿಸತ್ತಮಂ;
ಅನುಞ್ಞಾತಾ ನರಗ್ಗೇನ, ಯಥಾಠಾನೇ ನಿಸೀದಿಸುಂ.
‘‘‘ಅಹೋನುಕಮ್ಪಿಕಾ ¶ ಅಮ್ಹಂ, ಸಬ್ಬಾಸಂ ಚಿರ ಗೋತಮೀ;
ವಾಸಿತಾ ತವ ಪುಞ್ಞೇಹಿ, ಪತ್ತಾ ನೋ ಆಸವಕ್ಖಯಂ.
‘‘‘ಕಿಲೇಸಾ ¶ ಝಾಪಿತಾ ಅಮ್ಹಂ, ಭವಾ ಸಬ್ಬೇ ಸಮೂಹತಾ;
ನಾಗೀವ ಬನ್ಧನಂ ಛೇತ್ವಾ, ವಿಹರಾಮ ಅನಾಸವಾ.
‘‘‘ಸ್ವಾಗತಂ ವತ ನೋ ಆಸಿ, ಬುದ್ಧಸೇಟ್ಠಸ್ಸ ಸನ್ತಿಕೇ;
ತಿಸ್ಸೋ ವಿಜ್ಜಾ ಅನುಪ್ಪತ್ತಾ, ಕತಂ ಬುದ್ಧಸ್ಸ ಸಾಸನಂ.
‘‘‘ಪಟಿಸಮ್ಭಿದಾ ಚತಸ್ಸೋ, ವಿಮೋಕ್ಖಾಪಿ ಚ ಅಟ್ಠಿಮೇ;
ಛಳಭಿಞ್ಞಾ ಸಚ್ಛಿಕತಾ, ಕತಂ ಬುದ್ಧಸ್ಸ ಸಾಸನಂ.
‘‘‘ಇದ್ಧೀಸು ಚ ವಸೀ ಹೋಮ, ದಿಬ್ಬಾಯ ಸೋತಧಾತುಯಾ;
ಚೇತೋಪರಿಯಞಾಣಸ್ಸ, ವಸೀ ಹೋಮ ಮಹಾಮುನೇ.
‘‘‘ಪುಬ್ಬೇನಿವಾಸಂ ಜಾನಾಮ, ದಿಬ್ಬಚಕ್ಖು ವಿಸೋಧಿತಂ;
ಸಬ್ಬಾಸವಪರಿಕ್ಖೀಣಾ, ನತ್ಥಿ ದಾನಿ ಪುನಬ್ಭವೋ.
‘‘‘ಅತ್ಥೇ ¶ ಧಮ್ಮೇ ಚ ನೇರುತ್ತೇ, ಪಟಿಭಾನೇ [ಪಟಿಭಾಣೇ (ಸೀ. ಸ್ಯಾ.)] ಚ ವಿಜ್ಜತಿ;
ಞಾಣಂ ಅಮ್ಹಂ ಮಹಾವೀರ, ಉಪ್ಪನ್ನಂ ತವ ಸನ್ತಿಕೇ.
‘‘‘ಅಸ್ಮಾಭಿ ಪರಿಚಿಣ್ಣೋಸಿ, ಮೇತ್ತಚಿತ್ತಾಹಿ ನಾಯಕ;
ಅನುಜಾನಾಹಿ ಸಬ್ಬಾಸಂ [ಸಬ್ಬಾಯೋ (ಸ್ಯಾ. ಪೀ.)], ನಿಬ್ಬಾನಾಯ ಮಹಾಮುನೇ’.
‘‘ನಿಬ್ಬಾಯಿಸ್ಸಾಮ ಇಚ್ಚೇವಂ, ಕಿಂ ವಕ್ಖಾಮಿ ವದನ್ತಿಯೋ;
ಯಸ್ಸ ದಾನಿ ಚ ವೋ ಕಾಲಂ, ಮಞ್ಞಥಾತಿ ಜಿನೋಬ್ರವಿ.
‘‘ಗೋತಮೀಆದಿಕಾ ತಾಯೋ, ತದಾ ಭಿಕ್ಖುನಿಯೋ ಜಿನಂ;
ವನ್ದಿತ್ವಾ ಆಸನಾ ತಮ್ಹಾ, ವುಟ್ಠಾಯ ಅಗಮಿಂಸು ತಾ.
‘‘ಮಹತಾ ¶ ಜನಕಾಯೇನ, ಸಹ ಲೋಕಗ್ಗನಾಯಕೋ;
ಅನುಸಂಯಾಯೀ ಸೋ [ಅನುಸಂಸಾವಯೀ (ಸ್ಯಾ. ಕ.)] ವೀರೋ, ಮಾತುಚ್ಛಂ ಯಾವಕೋಟ್ಠಕಂ.
‘‘ತದಾ ನಿಪತಿ ಪಾದೇಸು, ಗೋತಮೀ ಲೋಕಬನ್ಧುನೋ;
ಸಹೇವ ತಾಹಿ ಸಬ್ಬಾಹಿ, ಪಚ್ಛಿಮಂ ಪಾದವನ್ದನಂ.
‘‘‘ಇದಂ ಪಚ್ಛಿಮಕಂ ಮಯ್ಹಂ, ಲೋಕನಾಥಸ್ಸ ದಸ್ಸನಂ;
ನ ಪುನೋ ಅಮತಾಕಾರಂ, ಪಸ್ಸಿಸ್ಸಾಮಿ ಮುಖಂ ತವ.
‘‘‘ನ ಚ ಮೇ ವನ್ದನಂ [ವದನಂ (ಕ.)] ವೀರ, ತವ ಪಾದೇ ಸುಕೋಮಲೇ;
ಸಮ್ಫುಸಿಸ್ಸತಿ ಲೋಕಗ್ಗ, ಅಜ್ಜ ಗಚ್ಛಾಮಿ ನಿಬ್ಬುತಿಂ’.
‘‘ರೂಪೇನ ¶ ಕಿಂ ತವಾನೇನ, ದಿಟ್ಠೇ ಧಮ್ಮೇ ಯಥಾತಥೇ;
ಸಬ್ಬಂ ಸಙ್ಖತಮೇವೇತಂ, ಅನಸ್ಸಾಸಿಕಮಿತ್ತರಂ.
‘‘ಸಾ ಸಹ ತಾಹಿ ಗನ್ತ್ವಾನ, ಭಿಕ್ಖುನುಪಸ್ಸಯಂ ಸಕಂ;
ಅಡ್ಢಪಲ್ಲಙ್ಕಮಾಭುಜ್ಜ, ನಿಸೀದಿ ಪರಮಾಸನೇ.
‘‘ತದಾ ಉಪಾಸಿಕಾ ತತ್ಥ, ಬುದ್ಧಸಾಸನವಚ್ಛಲಾ;
ತಸ್ಸಾ ಪವತ್ತಿಂ ಸುತ್ವಾನ, ಉಪೇಸುಂ ಪಾದವನ್ದಿಕಾ.
‘‘ಕರೇಹಿ ಉರಂ ಪಹನ್ತಾ, ಛಿನ್ನಮೂಲಾ ಯಥಾ ಲತಾ;
ರೋದನ್ತಾ ಕರುಣಂ ರವಂ, ಸೋಕಟ್ಟಾ ಭೂಮಿಪಾತಿತಾ.
‘‘ಮಾ ¶ ನೋ ಸರಣದೇ ನಾಥೇ, ವಿಹಾಯ ಗಮಿ ನಿಬ್ಬುತಿಂ;
ನಿಪತಿತ್ವಾನ ಯಾಚಾಮ, ಸಬ್ಬಾಯೋ ಸಿರಸಾ ಮಯಂ.
‘‘ಯಾ ¶ ಪಧಾನತಮಾ ತಾಸಂ, ಸದ್ಧಾ ಪಞ್ಞಾ ಉಪಾಸಿಕಾ;
ತಸ್ಸಾ ಸೀಸಂ ಪಮಜ್ಜನ್ತೀ, ಇದಂ ವಚನಮಬ್ರವಿ.
‘‘‘ಅಲಂ ¶ ಪುತ್ತಾ ವಿಸಾದೇನ, ಮಾರಪಾಸಾನುವತ್ತಿನಾ;
ಅನಿಚ್ಚಂ ಸಙ್ಖತಂ ಸಬ್ಬಂ, ವಿಯೋಗನ್ತಂ ಚಲಾಚಲಂ’.
‘‘ತತೋ ಸಾ ತಾ ವಿಸಜ್ಜಿತ್ವಾ, ಪಠಮಂ ಝಾನಮುತ್ತಮಂ;
ದುತಿಯಞ್ಚ ತತಿಯಞ್ಚ, ಸಮಾಪಜ್ಜಿ ಚತುತ್ಥಕಂ.
‘‘ಆಕಾಸಾಯತನಞ್ಚೇವ, ವಿಞ್ಞಾಣಾಯತನಂ ತಥಾ;
ಆಕಿಞ್ಚಂ ನೇವಸಞ್ಞಞ್ಚ, ಸಮಾಪಜ್ಜಿ ಯಥಾಕ್ಕಮಂ.
‘‘ಪಟಿಲೋಮೇನ ಝಾನಾನಿ, ಸಮಾಪಜ್ಜಿತ್ಥ ಗೋತಮೀ;
ಯಾವತಾ ಪಠಮಂ ಝಾನಂ, ತತೋ ಯಾವಚತುತ್ಥಕಂ.
‘‘ತತೋ ವುಟ್ಠಾಯ ನಿಬ್ಬಾಯಿ, ದೀಪಚ್ಚೀವ ನಿರಾಸವಾ [ನಿರಾಸನಾ (ಸೀ. ಪೀ.)];
ಭೂಮಿಚಾಲೋ ಮಹಾ ಆಸಿ, ನಭಸಾ ವಿಜ್ಜುತಾ ಪತಿ.
‘‘ಪನಾದಿತಾ ದುನ್ದುಭಿಯೋ, ಪರಿದೇವಿಂಸು ದೇವತಾ;
ಪುಪ್ಫವುಟ್ಠೀ ಚ ಗಗನಾ, ಅಭಿವಸ್ಸಥ ಮೇದನಿಂ.
‘‘ಕಮ್ಪಿತೋ ಮೇರುರಾಜಾಪಿ, ರಙ್ಗಮಜ್ಝೇ ಯಥಾ ನಟೋ;
ಸೋಕೇನ ಚಾತಿದೀನೋವ ವಿರವೋ ಆಸಿ ಸಾಗರೋ.
‘‘ದೇವಾ ನಾಗಾಸುರಾ ಬ್ರಹ್ಮಾ, ಸಂವಿಗ್ಗಾಹಿಂಸು ತಙ್ಖಣೇ;
‘ಅನಿಚ್ಚಾ ವತ ಸಙ್ಖಾರಾ, ಯಥಾಯಂ ವಿಲಯಂ ಗತಾ’.
‘‘ಯಾ ¶ ಚೇ ಮಂ ಪರಿವಾರಿಂಸು, ಸತ್ಥು ಸಾಸನಕಾರಿಕಾ;
ತಾಯೋಪಿ ಅನುಪಾದಾನಾ, ದೀಪಚ್ಚಿ ವಿಯ [ದೀಪಸಿಖಾ ವಿಯ (ಸ್ಯಾ.)] ನಿಬ್ಬುತಾ.
‘‘ಹಾ ಯೋಗಾ ವಿಪ್ಪಯೋಗನ್ತಾ, ಹಾನಿಚ್ಚಂ ಸಬ್ಬಸಙ್ಖತಂ;
ಹಾ ಜೀವಿತಂ ವಿನಾಸನ್ತಂ, ಇಚ್ಚಾಸಿ ಪರಿದೇವನಾ.
‘‘ತತೋ ¶ ದೇವಾ ಚ ಬ್ರಹ್ಮಾ ಚ, ಲೋಕಧಮ್ಮಾನುವತ್ತನಂ;
ಕಾಲಾನುರೂಪಂ ಕುಬ್ಬನ್ತಿ, ಉಪೇತ್ವಾ ಇಸಿಸತ್ತಮಂ.
‘‘ತದಾ ¶ ಆಮನ್ತಯೀ ಸತ್ಥಾ, ಆನನ್ದಂ ಸುತಸಾಗರಂ [ಸುತಿಸಾಗರಂ (ಸೀ. ಸ್ಯಾ. ಪೀ.)];
‘ಗಚ್ಛಾನನ್ದ ನಿವೇದೇಹಿ, ಭಿಕ್ಖೂನಂ ಮಾತು ನಿಬ್ಬುತಿಂ’.
‘‘ತದಾನನ್ದೋ ¶ ನಿರಾನನ್ದೋ, ಅಸ್ಸುನಾ ಪುಣ್ಣಲೋಚನೋ;
ಗಗ್ಗರೇನ ಸರೇನಾಹ, ‘ಸಮಾಗಚ್ಛನ್ತು ಭಿಕ್ಖವೋ.
‘‘‘ಪುಬ್ಬದಕ್ಖಿಣಪಚ್ಛಾಸು, ಉತ್ತರಾಯ ಚ ಸನ್ತಿಕೇ;
ಸುಣನ್ತು ಭಾಸಿತಂ ಮಯ್ಹಂ, ಭಿಕ್ಖವೋ ಸುಗತೋರಸಾ.
‘‘‘ಯಾ ವಡ್ಢಯಿ ಪಯತ್ತೇನ, ಸರೀರಂ ಪಚ್ಛಿಮಂ ಮುನೇ;
ಸಾ ಗೋತಮೀ ಗತಾ ಸನ್ತಿಂ, ತಾರಾವ ಸೂರಿಯೋದಯೇ.
‘‘‘ಬುದ್ಧಮಾತಾತಿ ಪಞ್ಞತ್ತಿಂ [ಸಞ್ಞತ್ತಿಂ (ಸ್ಯಾ.)], ಠಪಯಿತ್ವಾ ಗತಾಸಮಂ;
ನ ಯತ್ಥ ಪಞ್ಚನೇತ್ತೋಪಿ, ಗತಿಂ [ಗತಂ (ಸೀ. ಪೀ.), ತತ್ಥ (ಸ್ಯಾ.)] ದಕ್ಖತಿ ನಾಯಕೋ.
‘‘‘ಯಸ್ಸತ್ಥಿ ಸುಗತೇ ಸದ್ಧಾ, ಯೋ ಚ ಪಿಯೋ ಮಹಾಮುನೇ;
ಬುದ್ಧಮಾತುಸ್ಸ [ಬುದ್ಧಮಾತರಿ (ಸೀ.), ಬುದ್ಧಸ್ಸ ಮಾತು (ಸ್ಯಾ.)] ಸಕ್ಕಾರಂ, ಕರೋತು ಸುಗತೋರಸೋ’.
‘‘ಸುದೂರಟ್ಠಾಪಿ ತಂ ಸುತ್ವಾ, ಸೀಘಮಾಗಚ್ಛು ಭಿಕ್ಖವೋ;
ಕೇಚಿ ಬುದ್ಧಾನುಭಾವೇನ, ಕೇಚಿ ಇದ್ಧೀಸು ಕೋವಿದಾ.
‘‘ಕೂಟಾಗಾರವರೇ ರಮ್ಮೇ, ಸಬ್ಬಸೋಣ್ಣಮಯೇ ಸುಭೇ;
ಮಞ್ಚಕಂ ಸಮಾರೋಪೇಸುಂ, ಯತ್ಥ ಸುತ್ತಾಸಿ ಗೋತಮೀ.
‘‘ಚತ್ತಾರೋ ಲೋಕಪಾಲಾ ತೇ, ಅಂಸೇಹಿ ಸಮಧಾರಯುಂ;
ಸೇಸಾ ಸಕ್ಕಾದಿಕಾ ದೇವಾ, ಕೂಟಾಗಾರೇ ಸಮಗ್ಗಹುಂ.
‘‘ಕೂಟಾಗಾರಾನಿ ¶ ಸಬ್ಬಾನಿ, ಆಸುಂ ಪಞ್ಚಸತಾನಿಪಿ;
ಸರದಾದಿಚ್ಚವಣ್ಣಾನಿ, ವಿಸ್ಸಕಮ್ಮಕತಾನಿ ಹಿ.
‘‘ಸಬ್ಬಾ ತಾಪಿ ಭಿಕ್ಖುನಿಯೋ, ಆಸುಂ ಮಞ್ಚೇಸು ಸಾಯಿತಾ;
ದೇವಾನಂ ಖನ್ಧಮಾರುಳ್ಹಾ, ನಿಯ್ಯನ್ತಿ ಅನುಪುಬ್ಬಸೋ.
‘‘ಸಬ್ಬಸೋ ¶ ಛಾದಿತಂ ಆಸಿ, ವಿತಾನೇನ ನಭತ್ತಲಂ;
ಸತಾರಾ ಚನ್ದಸೂರಾ ಚ, ಲಞ್ಛಿತಾ ಕನಕಾಮಯಾ.
‘‘ಪಟಾಕಾ ¶ ಉಸ್ಸಿತಾನೇಕಾ, ವಿತತಾ ಪುಪ್ಫಕಞ್ಚುಕಾ;
ಓಗತಾಕಾಸಪದುಮಾ [ಓಗತಾಕಾಸಧೂಮಾವ (ಪೀ.)], ಮಹಿಯಾ ಪುಪ್ಫಮುಗ್ಗತಂ.
‘‘ದಸ್ಸನ್ತಿ ಚನ್ದಸೂರಿಯಾ, ಪಜ್ಜಲನ್ತಿ ಚ ತಾರಕಾ;
ಮಜ್ಝಂ ಗತೋಪಿ ಚಾದಿಚ್ಚೋ, ನ ತಾಪೇಸಿ ಸಸೀ ಯಥಾ.
‘‘ದೇವಾ ¶ ದಿಬ್ಬೇಹಿ ಗನ್ಧೇಹಿ, ಮಾಲೇಹಿ ಸುರಭೀಹಿ ಚ;
ವಾದಿತೇಹಿ ಚ ನಚ್ಚೇಹಿ, ಸಙ್ಗೀತೀಹಿ ಚ ಪೂಜಯುಂ.
‘‘ನಾಗಾಸುರಾ ಚ ಬ್ರಹ್ಮಾನೋ, ಯಥಾಸತ್ತಿ ಯಥಾಬಲಂ;
ಪೂಜಯಿಂಸು ಚ ನಿಯ್ಯನ್ತಿಂ, ನಿಬ್ಬುತಂ ಬುದ್ಧಮಾತರಂ.
‘‘ಸಬ್ಬಾಯೋ ಪುರತೋ ನೀತಾ, ನಿಬ್ಬುತಾ ಸುಗತೋರಸಾ;
ಗೋತಮೀ ನಿಯ್ಯತೇ ಪಚ್ಛಾ, ಸಕ್ಕತಾ ಬುದ್ಧಪೋಸಿಕಾ.
‘‘ಪುರತೋ ದೇವಮನುಜಾ, ಸನಾಗಾಸುರಬ್ರಹ್ಮಕಾ;
ಪಚ್ಛಾ ಸಸಾವಕೋ ಬುದ್ಧೋ, ಪೂಜತ್ಥಂ ಯಾತಿ ಮಾತುಯಾ.
‘‘ಬುದ್ಧಸ್ಸ ಪರಿನಿಬ್ಬಾನಂ, ನೇದಿಸಂ ಆಸಿ ಯಾದಿಸಂ;
ಗೋತಮೀಪರಿನಿಬ್ಬಾನಂ, ಅತೇವಚ್ಛರಿಯಂ [ಅತೀವಚ್ಛರಿಯಂ (ಸಬ್ಬತ್ಥ) ಮೋಗಲ್ಲಾನಬ್ಯಾಕರಣಂ ಓಲೋಕೇತಬ್ಬಂ] ಅಹು.
‘‘ಬುದ್ಧೋ ¶ ಬುದ್ಧಸ್ಸ ನಿಬ್ಬಾನೇ [ನ ಬುದ್ಧೋ ಬುದ್ಧನಿಬ್ಬಾನೇ (ಸ್ಯಾ. ಪೀ.)], ನೋಪಟಿಯಾದಿ [ನೋಪದಿಸ್ಸತಿ (ಸೀ. ಪೀ.), ಸಾರಿಪುತ್ತಾದಿ (ಸ್ಯಾ.)] ಭಿಕ್ಖವೋ;
ಬುದ್ಧೋ ಗೋತಮಿನಿಬ್ಬಾನೇ, ಸಾರಿಪುತ್ತಾದಿಕಾ ತಥಾ [ಯಥಾ (ಸ್ಯಾ.)].
‘‘ಚಿತಕಾನಿ ಕರಿತ್ವಾನ, ಸಬ್ಬಗನ್ಧಮಯಾನಿ ತೇ;
ಗನ್ಧಚುಣ್ಣಪಕಿಣ್ಣಾನಿ, ಝಾಪಯಿಂಸು ಚ ತಾ ತಹಿಂ.
‘‘ಸೇಸಭಾಗಾನಿ ಡಯ್ಹಿಂಸು, ಅಟ್ಠೀ ಸೇಸಾನಿ ಸಬ್ಬಸೋ;
ಆನನ್ದೋ ಚ ತದಾವೋಚ, ಸಂವೇಗಜನಕಂ ವಚೋ.
‘‘‘ಗೋತಮೀ ನಿಧನಂ ಯಾತಾ, ಡಯ್ಹಞ್ಚಸ್ಸಾ ಸರೀರಕಂ;
ಸಙ್ಕೇತಂ ಬುದ್ಧನಿಬ್ಬಾನಂ, ನ ಚಿರೇನ ಭವಿಸ್ಸತಿ’.
‘‘ತತೋ ಗೋತಮಿಧಾತೂನಿ, ತಸ್ಸಾ ಪತ್ತಗತಾನಿ ಸೋ;
ಉಪನಾಮೇಸಿ ನಾಥಸ್ಸ, ಆನನ್ದೋ ಬುದ್ಧಚೋದಿತೋ.
‘‘ಪಾಣಿನಾ ತಾನಿ ಪಗ್ಗಯ್ಹ, ಅವೋಚ ಇಸಿಸತ್ತಮೋ;
‘ಮಹತೋ ಸಾರವನ್ತಸ್ಸ, ಯಥಾ ರುಕ್ಖಸ್ಸ ತಿಟ್ಠತೋ.
‘‘‘ಯೋ ¶ ¶ ಸೋ ಮಹತ್ತರೋ ಖನ್ಧೋ, ಪಲುಜ್ಜೇಯ್ಯ ಅನಿಚ್ಚತಾ;
ತಥಾ ಭಿಕ್ಖುನಿಸಙ್ಘಸ್ಸ, ಗೋತಮೀ ಪರಿನಿಬ್ಬುತಾ.
‘‘‘ಅಹೋ ಅಚ್ಛರಿಯಂ ಮಯ್ಹಂ [ಆನನ್ದ ಪಸ್ಸ ಬುದ್ಧಸ್ಸ (ಸ್ಯಾ.)], ನಿಬ್ಬುತಾಯಪಿ ಮಾತುಯಾ;
ಸರೀರಮತ್ತಸೇಸಾಯ, ನತ್ಥಿ ಸೋಕಪರಿದ್ದವೋ [ನ ಸೋಕಪರಿದೇವನಾ (ಸ್ಯಾ.)].
‘‘‘ನ ¶ ಸೋಚಿಯಾ ಪರೇಸಂ ಸಾ, ತಿಣ್ಣಸಂಸಾರಸಾಗರಾ;
ಪರಿವಜ್ಜಿತಸನ್ತಾಪಾ, ಸೀತಿಭೂತಾ ಸುನಿಬ್ಬುತಾ.
‘‘‘ಪಣ್ಡಿತಾಸಿ ಮಹಾಪಞ್ಞಾ, ಪುಥುಪಞ್ಞಾ ತಥೇವ ಚ;
ರತ್ತಞ್ಞೂ ಭಿಕ್ಖುನೀನಂ ಸಾ, ಏವಂ ಧಾರೇಥ ಭಿಕ್ಖವೋ.
‘‘‘ಇದ್ಧೀಸು ¶ ಚ ವಸೀ ಆಸಿ, ದಿಬ್ಬಾಯ ಸೋತಧಾತುಯಾ;
ಚೇತೋಪರಿಯಞಾಣಸ್ಸ, ವಸೀ ಆಸಿ ಚ ಗೋತಮೀ.
‘‘‘ಪುಬ್ಬೇನಿವಾಸಮಞ್ಞಾಸಿ, ದಿಬ್ಬಚಕ್ಖು ವಿಸೋಧಿತಂ;
ಸಬ್ಬಾಸವಪರಿಕ್ಖೀಣಾ, ನತ್ಥಿ ತಸ್ಸಾ ಪುನಬ್ಭವೋ.
‘‘‘ಅತ್ಥಧಮ್ಮನಿರುತ್ತೀಸು, ಪಟಿಭಾನೇ ತಥೇವ ಚ;
ಪರಿಸುದ್ಧಂ ಅಹು ಞಾಣಂ, ತಸ್ಮಾ ಸೋಚನಿಯಾ ನ ಸಾ.
‘‘‘ಅಯೋಘನಹತಸ್ಸೇವ, ಜಲತೋ ಜಾತವೇದಸ್ಸ;
ಅನುಪುಬ್ಬೂಪಸನ್ತಸ್ಸ, ಯಥಾ ನ ಞಾಯತೇ ಗತಿ.
‘‘‘ಏವಂ ಸಮ್ಮಾ ವಿಮುತ್ತಾನಂ, ಕಾಮಬನ್ಧೋಘತಾರಿನಂ;
ಪಞ್ಞಾಪೇತುಂ ಗತಿ ನತ್ಥಿ, ಪತ್ತಾನಂ ಅಚಲಂ ಸುಖಂ.
‘‘‘ಅತ್ತದೀಪಾ ತತೋ ಹೋಥ, ಸತಿಪಟ್ಠಾನಗೋಚರಾ;
ಭಾವೇತ್ವಾ ಸತ್ತಬೋಜ್ಝಙ್ಗೇ, ದುಕ್ಖಸ್ಸನ್ತಂ ಕರಿಸ್ಸಥ’’’.
ಇತ್ಥಂ ಸುದಂ ಮಹಾಪಜಾಪತಿಗೋತಮೀ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಮಹಾಪಜಾಪತಿಗೋತಮೀಥೇರಿಯಾಪದಾನಂ ಸತ್ತಮಂ.
೮. ಖೇಮಾಥೇರೀಅಪದಾನಂ
‘‘ಪದುಮುತ್ತರೋ ನಾಮ ಜಿನೋ, ಸಬ್ಬಧಮ್ಮೇಸು ಚಕ್ಖುಮಾ;
ಇತೋ ಸತಸಹಸ್ಸಮ್ಹಿ, ಕಪ್ಪೇ ಉಪ್ಪಜ್ಜಿ ನಾಯಕೋ.
‘‘ತದಾಹಂ ¶ ¶ ಹಂಸವತಿಯಂ, ಜಾತಾ ಸೇಟ್ಠಿಕುಲೇ ಅಹುಂ [ಅಹು (ಸ್ಯಾ.)];
ನಾನಾರತನಪಜ್ಜೋತೇ, ಮಹಾಸುಖಸಮಪ್ಪಿತಾ.
‘‘ಉಪೇತ್ವಾ ¶ ತಂ ಮಹಾವೀರಂ, ಅಸ್ಸೋಸಿಂ ಧಮ್ಮದೇಸನಂ;
ತತೋ ಜಾತಪ್ಪಸಾದಾಹಂ, ಉಪೇಮಿ ಸರಣಂ ಜಿನಂ.
‘‘ಮಾತರಂ ¶ ಪಿತರಂ ಚಾಹಂ, ಆಯಾಚಿತ್ವಾ ವಿನಾಯಕಂ;
ನಿಮನ್ತಯಿತ್ವಾ ಸತ್ತಾಹಂ, ಭೋಜಯಿಂ ಸಹಸಾವಕಂ.
‘‘ಅತಿಕ್ಕನ್ತೇ ಚ ಸತ್ತಾಹೇ, ಮಹಾಪಞ್ಞಾನಮುತ್ತಮಂ;
ಭಿಕ್ಖುನಿಂ ಏತದಗ್ಗಮ್ಹಿ, ಠಪೇಸಿ ನರಸಾರಥಿ.
‘‘ತಂ ಸುತ್ವಾ ಮುದಿತಾ ಹುತ್ವಾ, ಪುನೋ ತಸ್ಸ ಮಹೇಸಿನೋ;
ಕಾರಂ ಕತ್ವಾನ ತಂ ಠಾನಂ, ಪಣಿಪಚ್ಚ ಪಣೀದಹಿಂ.
‘‘ತತೋ ಮಮ ಜಿನೋ [ಮಂ ಸ ಜಿನೋ (ಸ್ಯಾ.)] ಆಹ, ‘ಸಿಜ್ಝತಂ ಪಣಿಧೀ ತವ;
ಸಸಙ್ಘೇ ಮೇ ಕತಂ ಕಾರಂ, ಅಪ್ಪಮೇಯ್ಯಫಲಂ ತಯಾ.
‘‘‘ಸತಸಹಸ್ಸಿತೋ ಕಪ್ಪೇ, ಓಕ್ಕಾಕಕುಲಸಮ್ಭವೋ;
ಗೋತಮೋ ನಾಮ ಗೋತ್ತೇನ, ಸತ್ಥಾ ಲೋಕೇ ಭವಿಸ್ಸತಿ.
‘‘‘ತಸ್ಸ ಧಮ್ಮೇಸು ದಾಯಾದಾ, ಓರಸಾ ಧಮ್ಮನಿಮ್ಮಿತಾ;
ಏತದಗ್ಗಮನುಪ್ಪತ್ತಾ, ಖೇಮಾ ನಾಮ ಭವಿಸ್ಸತಿ’.
‘‘ತೇನ ಕಮ್ಮೇನ ಸುಕತೇನ, ಚೇತನಾಪಣಿಧೀಹಿ ಚ;
ಜಹಿತ್ವಾ ಮಾನುಸಂ ದೇಹಂ, ತಾವತಿಂಸೂಪಗಾ ಅಹಂ.
‘‘ತತೋ ಚುತಾ ಯಾಮಮಗಂ, ತತೋಹಂ ತುಸಿತಂ ಗತಾ;
ತತೋ ಚ ನಿಮ್ಮಾನರತಿಂ, ವಸವತ್ತಿಪುರಂ ತತೋ.
‘‘ಯತ್ಥ ¶ ಯತ್ಥೂಪಪಜ್ಜಾಮಿ, ತಸ್ಸ ಕಮ್ಮಸ್ಸ ವಾಹಸಾ;
ತತ್ಥ ತತ್ಥೇವ ರಾಜೂನಂ, ಮಹೇಸಿತ್ತಮಕಾರಯಿಂ.
‘‘ತತೋ ಚುತಾ ಮನುಸ್ಸತ್ತೇ, ರಾಜೂನಂ ಚಕ್ಕವತ್ತಿನಂ;
ಮಣ್ಡಲೀನಞ್ಚ ರಾಜೂನಂ, ಮಹೇಸಿತ್ತಮಕಾರಯಿಂ.
‘‘ಸಮ್ಪತ್ತಿಂ ಅನುಭೋತ್ವಾನ, ದೇವೇಸು ಮನುಜೇಸು ಚ;
ಸಬ್ಬತ್ಥ ಸುಖಿತಾ ಹುತ್ವಾ, ನೇಕಕಪ್ಪೇಸು ಸಂಸರಿಂ.
‘‘ಏಕನವುತಿತೋ ಕಪ್ಪೇ, ವಿಪಸ್ಸೀ ಲೋಕನಾಯಕೋ;
ಉಪ್ಪಜ್ಜಿ ಚಾರುದಸ್ಸನೋ [ಚಾರುನಯನೋ (ಸೀ. ಪೀ.)], ಸಬ್ಬಧಮ್ಮವಿಪಸ್ಸಕೋ.
‘‘ತಮಹಂ ¶ ¶ ಲೋಕನಾಯಕಂ, ಉಪೇತ್ವಾ ನರಸಾರಥಿಂ;
ಧಮ್ಮಂ ಭಣಿತಂ ಸುತ್ವಾನ, ಪಬ್ಬಜಿಂ ಅನಗಾರಿಯಂ.
‘‘ದಸವಸ್ಸಸಹಸ್ಸಾನಿ ¶ , ತಸ್ಸ ವೀರಸ್ಸ ಸಾಸನೇ;
ಬ್ರಹ್ಮಚರಿಯಂ ಚರಿತ್ವಾನ, ಯುತ್ತಯೋಗಾ ಬಹುಸ್ಸುತಾ.
‘‘ಪಚ್ಚಯಾಕಾರಕುಸಲಾ, ಚತುಸಚ್ಚವಿಸಾರದಾ;
ನಿಪುಣಾ ಚಿತ್ತಕಥಿಕಾ, ಸತ್ಥುಸಾಸನಕಾರಿಕಾ.
‘‘ತತೋ ಚುತಾಹಂ ತುಸಿತಂ, ಉಪಪನ್ನಾ ಯಸಸ್ಸಿನೀ;
ಅಭಿಭೋಮಿ ತಹಿಂ ಅಞ್ಞೇ, ಬ್ರಹ್ಮಚಾರೀಫಲೇನಹಂ.
‘‘ಯತ್ಥ ಯತ್ಥೂಪಪನ್ನಾಹಂ, ಮಹಾಭೋಗಾ ಮಹದ್ಧನಾ;
ಮೇಧಾವಿನೀ ಸೀಲವತೀ [ರೂಪವತೀ (ಸೀ. ಸ್ಯಾ. ಪೀ.)], ವಿನೀತಪರಿಸಾಪಿ ಚ.
‘‘ಭವಾಮಿ ತೇನ ಕಮ್ಮೇನ, ಯೋಗೇನ ಜಿನಸಾಸನೇ;
ಸಬ್ಬಾ ಸಮ್ಪತ್ತಿಯೋ ಮಯ್ಹಂ, ಸುಲಭಾ ಮನಸೋ ಪಿಯಾ.
‘‘ಯೋಪಿ ¶ ಮೇ ಭವತೇ ಭತ್ತಾ, ಯತ್ಥ ಯತ್ಥ ಗತಾಯಪಿ;
ವಿಮಾನೇತಿ ನ ಮಂ ಕೋಚಿ, ಪಟಿಪತ್ತಿಬಲೇನ ಮೇ.
‘‘ಇಮಮ್ಹಿ ಭದ್ದಕೇ ಕಪ್ಪೇ, ಬ್ರಹ್ಮಬನ್ಧು ಮಹಾಯಸೋ;
ನಾಮೇನ ಕೋಣಾಗಮನೋ, ಉಪ್ಪಜ್ಜಿ ವದತಂ ವರೋ.
‘‘ತದಾ ಹಿ ಬಾರಾಣಸಿಯಂ, ಸುಸಮಿದ್ಧಕುಲಪ್ಪಜಾ [ಸುಸಮಿದ್ಧಿ… (ಸ್ಯಾ.)];
ಧನಞ್ಜಾನೀ ಸುಮೇಧಾ ಚ, ಅಹಮ್ಪಿ ಚ ತಯೋ ಜನಾ.
‘‘ಸಙ್ಘಾರಾಮಮದಾಸಿಮ್ಹ, ದಾನಸಹಾಯಿಕಾ ಪುರೇ [ನೇಕೇ ಸಹಸ್ಸಿಕೇ ಮುನೇ (ಸ್ಯಾ.), ದಾನಂ ಸಹಸ್ಸಿಕಂ ಮುನೇ (ಪೀ.)];
ಸಙ್ಘಸ್ಸ ಚ ವಿಹಾರಮ್ಪಿ [ಸಸಂಘಸ್ಸ ವಿಹಾರಂ ಹಿ (ಸ್ಯಾ. ಪೀ.)], ಉದ್ದಿಸ್ಸ ಕಾರಿಕಾ [ದಾಯಿಕಾ (ಪೀ.)] ಮಯಂ.
‘‘ತತೋ ಚುತಾ ಮಯಂ ಸಬ್ಬಾ, ತಾವತಿಂಸೂಪಗಾ ಅಹುಂ;
ಯಸಸಾ ಅಗ್ಗತಂ ಪತ್ತಾ, ಮನುಸ್ಸೇಸು ತಥೇವ ಚ.
‘‘ಇಮಸ್ಮಿಂಯೇವ ಕಪ್ಪಮ್ಹಿ, ಬ್ರಹ್ಮಬನ್ಧು ಮಹಾಯಸೋ;
ಕಸ್ಸಪೋ ನಾಮ ಗೋತ್ತೇನ, ಉಪ್ಪಜ್ಜಿ ವದತಂ ವರೋ.
‘‘ಉಪಟ್ಠಾಕೋ ಮಹೇಸಿಸ್ಸ, ತದಾ ಆಸಿ ನರಿಸ್ಸರೋ;
ಕಾಸಿರಾಜಾ ಕಿಕೀ ನಾಮ, ಬಾರಾಣಸಿಪುರುತ್ತಮೇ.
‘‘ತಸ್ಸಾಸಿಂ ¶ ಜೇಟ್ಠಿಕಾ ಧೀತಾ, ಸಮಣೀ ಇತಿ ವಿಸ್ಸುತಾ;
ಧಮ್ಮಂ ಸುತ್ವಾ ಜಿನಗ್ಗಸ್ಸ, ಪಬ್ಬಜ್ಜಂ ಸಮರೋಚಯಿಂ.
‘‘ಅನುಜಾನಿ ¶ ¶ ನ ನೋ ತಾತೋ, ಅಗಾರೇವ ತದಾ ಮಯಂ;
ವೀಸವಸ್ಸಸಹಸ್ಸಾನಿ, ವಿಚರಿಮ್ಹ ಅತನ್ದಿತಾ.
‘‘ಕೋಮಾರಿಬ್ರಹ್ಮಚರಿಯಂ, ರಾಜಕಞ್ಞಾ ಸುಖೇಧಿತಾ;
ಬುದ್ಧೋಪಟ್ಠಾನನಿರತಾ, ಮುದಿತಾ ಸತ್ತ ಧೀತರೋ.
‘‘ಸಮಣೀ ¶ ಸಮಣಗುತ್ತಾ ಚ, ಭಿಕ್ಖುನೀ ಭಿಕ್ಖುದಾಯಿಕಾ;
ಧಮ್ಮಾ ಚೇವ ಸುಧಮ್ಮಾ ಚ, ಸತ್ತಮೀ ಸಙ್ಘದಾಯಿಕಾ.
‘‘ಅಹಂ ಉಪ್ಪಲವಣ್ಣಾ ಚ, ಪಟಾಚಾರಾ ಚ ಕುಣ್ಡಲಾ;
ಕಿಸಾಗೋತಮೀ ಧಮ್ಮದಿನ್ನಾ, ವಿಸಾಖಾ ಹೋತಿ ಸತ್ತಮೀ.
‘‘ಕದಾಚಿ ಸೋ ನರಾದಿಚ್ಚೋ, ಧಮ್ಮಂ ದೇಸೇಸಿ ಅಬ್ಭುತಂ;
ಮಹಾನಿದಾನಸುತ್ತನ್ತಂ, ಸುತ್ವಾ ತಂ ಪರಿಯಾಪುಣಿಂ.
‘‘ತೇಹಿ ಕಮ್ಮೇಹಿ ಸುಕತೇಹಿ, ಚೇತನಾಪಣಿಧೀಹಿ ಚ;
ಜಹಿತ್ವಾ ಮಾನುಸಂ ದೇಹಂ, ತಾವತಿಂಸಮಗಚ್ಛಹಂ.
‘‘ಪಚ್ಛಿಮೇ ಚ ಭವೇ ದಾನಿ, ಸಾಕಲಾಯ ಪುರುತ್ತಮೇ;
ರಞ್ಞೋ ಮದ್ದಸ್ಸ ಧೀತಾಮ್ಹಿ, ಮನಾಪಾ ದಯಿತಾ ಪಿಯಾ.
‘‘ಸಹ ಮೇ ಜಾತಮತ್ತಮ್ಹಿ, ಖೇಮಂ ತಮ್ಹಿ ಪುರೇ ಅಹು;
ತತೋ ಖೇಮಾತಿ ನಾಮಂ ಮೇ, ಗುಣತೋ ಉಪಪಜ್ಜಥ.
‘‘ಯದಾಹಂ ಯೋಬ್ಬನಂ ಪತ್ತಾ, ರೂಪಲಾವಞ್ಞಭೂಸಿತಾ [ರೂಪವಣ್ಣವಿಭೂಸಿತಾ (ಸ್ಯಾ.), ರೂಪವನ್ತಾ ವಿಭೂಸಿತಾ (ಪೀ.), ರೂಪವಿಲಾಸಭೂಸಿತಾ (ಕ.)];
ತದಾ ಅದಾಸಿ ಮಂ ತಾತೋ, ಬಿಮ್ಬಿಸಾರಸ್ಸ ರಾಜಿನೋ.
‘‘ತಸ್ಸಾಹಂ ಸುಪ್ಪಿಯಾ ಆಸಿಂ, ರೂಪಕೇ ಲಾಯನೇ ರತಾ;
ರೂಪಾನಂ ದೋಸವಾದೀತಿ, ನ ಉಪೇಸಿಂ ಮಹಾದಯಂ.
‘‘ಬಿಮ್ಬಿಸಾರೋ ತದಾ ರಾಜಾ, ಮಮಾನುಗ್ಗಹಬುದ್ಧಿಯಾ;
ವಣ್ಣಯಿತ್ವಾ ವೇಳುವನಂ, ಗಾಯಕೇ ಗಾಪಯೀ ಮಮಂ.
‘‘ರಮ್ಮಂ ವೇಳುವನಂ ಯೇನ, ನ ದಿಟ್ಠಂ ಸುಗತಾಲಯಂ;
ನ ತೇನ ನನ್ದನಂ ದಿಟ್ಠಂ, ಇತಿ ಮಞ್ಞಾಮಸೇ ಮಯಂ.
‘‘ಯೇನ ¶ ¶ ವೇಳುವನಂ ದಿಟ್ಠಂ, ನರನನ್ದನನನ್ದನಂ;
ಸುದಿಟ್ಠಂ ನನ್ದನಂ ತೇನ, ಅಮರಿನ್ದಸುನನ್ದನಂ.
‘‘ವಿಹಾಯ ¶ ನನ್ದನಂ ದೇವಾ, ಓತರಿತ್ವಾ ಮಹೀತಲಂ [ಮಹೀತಲೇ (ಸ್ಯಾ. ಪೀ.)];
ರಮ್ಮಂ ವೇಳುವನಂ ದಿಸ್ವಾ, ನ ತಪ್ಪನ್ತಿ ಸುವಿಮ್ಹಿತಾ.
‘‘ರಾಜಪುಞ್ಞೇನ ¶ ನಿಬ್ಬತ್ತಂ, ಬುದ್ಧಪುಞ್ಞೇನ ಭೂಸಿತಂ;
ಕೋ ವತ್ತಾ ತಸ್ಸ ನಿಸ್ಸೇಸಂ, ವನಸ್ಸ ಗುಣಸಞ್ಚಯಂ.
‘‘ತಂ ಸುತ್ವಾ ವನಸಮಿದ್ಧಂ, ಮಮ ಸೋತಮನೋಹರಂ;
ದಟ್ಠುಕಾಮಾ ತಮುಯ್ಯಾನಂ, ರಞ್ಞೋ ಆರೋಚಯಿಂ ತದಾ.
‘‘ಮಹತಾ ಪರಿವಾರೇನ, ತದಾ ಚ ಸೋ [ತದಾ ಮಂ ಸೋ (ಸ್ಯಾ. ಪೀ.)] ಮಹೀಪತಿ;
ಮಂ ಪೇಸೇಸಿ [ಸಂಪೇಸೇಸಿ (ಸ್ಯಾ.), ಸಮ್ಪಾಪೇಸಿ (ಪೀ.)] ತಮುಯ್ಯಾನಂ, ದಸ್ಸನಾಯ ಸಮುಸ್ಸುಕಂ.
‘‘ಗಚ್ಛ ಪಸ್ಸ ಮಹಾಭೋಗೇ, ವನಂ ನೇತ್ತರಸಾಯನಂ;
ಯಂ ಸದಾ ಭಾತಿ ಸಿರಿಯಾ, ಸುಗತಾಭಾನುರಞ್ಜಿತಂ.
‘‘ಯದಾ ಚ ಪಿಣ್ಡಾಯ ಮುನಿ, ಗಿರಿಬ್ಬಜಪುರುತ್ತಮಂ;
ಪವಿಟ್ಠೋಹಂ ತದಾಯೇವ, ವನಂ ದಟ್ಠುಮುಪಾಗಮಿಂ.
‘‘ತದಾ ತಂ ಫುಲ್ಲವಿಪಿನಂ, ನಾನಾಭಮರಕೂಜಿತಂ;
ಕೋಕಿಲಾಗೀತಸಹಿತಂ, ಮಯೂರಗಣನಚ್ಚಿತಂ.
‘‘ಅಪ್ಪಸದ್ದಮನಾಕಿಣ್ಣಂ, ನಾನಾಚಙ್ಕಮಭೂಸಿತಂ;
ಕುಟಿಮಣ್ಡಪಸಙ್ಕಿಣ್ಣಂ, ಯೋಗೀವರವಿರಾಜಿತಂ.
‘‘ವಿಚರನ್ತೀ ಅಮಞ್ಞಿಸ್ಸಂ, ಸಫಲಂ ನಯನಂ ಮಮ;
ತತ್ಥಾಪಿ ತರುಣಂ ಭಿಕ್ಖುಂ, ಯುತ್ತಂ ದಿಸ್ವಾ ವಿಚಿನ್ತಯಿಂ.
‘‘‘ಈದಿಸೇ ¶ ವಿಪಿನೇ ರಮ್ಮೇ, ಠಿತೋಯಂ ನವಯೋಬ್ಬನೇ;
ವಸನ್ತಮಿವ ಕನ್ತೇನ, ರೂಪೇನ ಚ ಸಮನ್ವಿತೋ.
‘‘‘ನಿಸಿನ್ನೋ ರುಕ್ಖಮೂಲಮ್ಹಿ, ಮುಣ್ಡೋ ಸಙ್ಘಾಟಿಪಾರುತೋ;
ಝಾಯತೇ ವತಯಂ ಭಿಕ್ಖು, ಹಿತ್ವಾ ವಿಸಯಜಂ ರತಿಂ.
‘‘‘ನನು ನಾಮ ಗಹಟ್ಠೇನ, ಕಾಮಂ ಭುತ್ವಾ ಯಥಾಸುಖಂ;
ಪಚ್ಛಾ ಜಿಣ್ಣೇನ ಧಮ್ಮೋಯಂ, ಚರಿತಬ್ಬೋ ಸುಭದ್ದಕೋ’.
‘‘ಸುಞ್ಞಕನ್ತಿ ¶ ¶ ವಿದಿತ್ವಾನ, ಗನ್ಧಗೇಹಂ ಜಿನಾಲಯಂ;
ಉಪೇತ್ವಾ ಜಿನಮದ್ದಕ್ಖಂ, ಉದಯನ್ತಂವ ಭಾಕರಂ.
‘‘ಏಕಕಂ ಸುಖಮಾಸೀನಂ, ಬೀಜಮಾನಂ ವರಿತ್ಥಿಯಾ;
ದಿಸ್ವಾನೇವಂ ವಿಚಿನ್ತೇಸಿಂ, ನಾಯಂ ಲೂಖೋ ನರಾಸಭೋ.
‘‘ಸಾ ಕಞ್ಞಾ ಕನಕಾಭಾಸಾ, ಪದುಮಾನನಲೋಚನಾ;
ಬಿಮ್ಬೋಟ್ಠೀ ಕುನ್ದದಸನಾ, ಮನೋನೇತ್ತರಸಾಯನಾ.
‘‘ಹೇಮದೋಲಾಭಸವನಾ ¶ [ಹೇಮದೋಲಾ ಸುವದೀನಾ (ಸ್ಯಾ.)], ಕಲಿಕಾಕಾರಸುತ್ಥನೀ [ಕಲಸಾಕಾರಸುತ್ತನೀ (ಸೀ. ಪೀ.), ಕಮಲಾಕಾರಸುತ್ತನೀ (ಸ್ಯಾ.)];
ವೇದಿಮಜ್ಝಾವ ಸುಸ್ಸೋಣೀ [ಕನುಮಜ್ಝಾವ ಸುಸ್ಸೋಣೀ (ಸೀ.), ವೇದಿಮಜ್ಝಾ ವರಸೋಣೀ (ಸ್ಯಾ. ಪೀ.)], ರಮ್ಭೋರು ಚಾರುಭೂಸನಾ.
‘‘ರತ್ತಂಸಕುಪಸಂಬ್ಯಾನಾ, ನೀಲಮಟ್ಠನಿವಾಸನಾ;
ಅತಪ್ಪನೇಯ್ಯರೂಪೇನ, ಹಾಸಭಾವಸಮನ್ವಿತಾ [ಹಾವಭಾವಸಮನ್ವಿತಾ (ಸೀ.), ಸಬ್ಬಾಭರಣಮಣ್ಡಿತಾ (ಸ್ಯಾ.)].
‘‘ದಿಸ್ವಾ ತಮೇವಂ ಚಿನ್ತೇಸಿಂ, ಅಹೋಯಮಭಿರೂಪಿನೀ;
ನ ಮಯಾನೇನ ನೇತ್ತೇನ, ದಿಟ್ಠಪುಬ್ಬಾ ಕುದಾಚನಂ.
‘‘ತತೋ ಜರಾಭಿಭೂತಾ ಸಾ, ವಿವಣ್ಣಾ ವಿಕತಾನನಾ;
ಭಿನ್ನದನ್ತಾ ಸೇತಸಿರಾ, ಸಲಾಲಾ ವದನಾಸುಚಿ.
‘‘ಸಙ್ಖಿತ್ತಕಣ್ಣಾ ¶ ಸೇತಕ್ಖೀ, ಲಮ್ಬಾಸುಭಪಯೋಧರಾ;
ವಲಿವಿತತಸಬ್ಬಙ್ಗೀ, ಸಿರಾವಿತತದೇಹಿನೀ.
‘‘ನತಙ್ಗಾ ದಣ್ಡದುತಿಯಾ, ಉಪ್ಫಾಸುಲಿಕತಾ [ಉಪ್ಪಣ್ಡುಪಣ್ಡುಕಾ (ಸೀ. ಸ್ಯಾ.)] ಕಿಸಾ;
ಪವೇಧಮಾನಾ ಪತಿತಾ, ನಿಸ್ಸಸನ್ತೀ ಮುಹುಂ ಮುಹುಂ.
‘‘ತತೋ ಮೇ ಆಸಿ ಸಂವೇಗೋ, ಅಬ್ಭುತೋ ಲೋಮಹಂಸನೋ;
ಧಿರತ್ಥು ರೂಪಂ ಅಸುಚಿಂ, ರಮನ್ತೇ ಯತ್ಥ ಬಾಲಿಸಾ.
‘‘ತದಾ ಮಹಾಕಾರುಣಿಕೋ, ದಿಸ್ವಾ ಸಂವಿಗ್ಗಮಾನಸಂ;
ಉದಗ್ಗಚಿತ್ತೋ ಸುಗತೋ, ಇಮಾ ಗಾಥಾ ಅಭಾಸಥ.
‘‘‘ಆತುರಂ ¶ ಅಸುಚಿಂ ಪೂತಿಂ, ಪಸ್ಸ ಖೇಮೇ ಸಮುಸ್ಸಯಂ;
ಉಗ್ಘರನ್ತಂ ಪಗ್ಘರನ್ತಂ, ಬಾಲಾನಂ ಅಭಿನನ್ದಿತಂ.
‘‘‘ಅಸುಭಾಯ ¶ ಚಿತ್ತಂ ಭಾವೇಹಿ, ಏಕಗ್ಗಂ ಸುಸಮಾಹಿತಂ;
ಸತಿ ಕಾಯಗತಾ ತ್ಯತ್ಥು, ನಿಬ್ಬಿದಾ ಬಹುಲಾ ಭವ.
‘‘‘ಯಥಾ ಇದಂ ತಥಾ ಏತಂ, ಯಥಾ ಏತಂ ತಥಾ ಇದಂ;
ಅಜ್ಝತ್ತಞ್ಚ ಬಹಿದ್ಧಾ ಚ, ಕಾಯೇ ಛನ್ದಂ ವಿರಾಜಯ.
‘‘‘ಅನಿಮಿತ್ತಞ್ಚ ಭಾವೇಹಿ, ಮಾನಾನುಸಯಮುಜ್ಜಹ;
ತತೋ ಮಾನಾಭಿಸಮಯಾ, ಉಪಸನ್ತಾ ಚರಿಸ್ಸಸಿ.
‘‘‘ಯೇ ರಾಗರತ್ತಾನುಪತನ್ತಿ ಸೋತಂ, ಸಯಂ ಕತಂ ಮಕ್ಕಟಕೋವ ಜಾಲಂ;
ಏತಮ್ಪಿ ಛೇತ್ವಾನ ಪರಿಬ್ಬಜನ್ತಿ, ನ ಪೇಕ್ಖಿನೋ [ಅನಪೇಕ್ಖಿನೋ (ಸೀ. ಸ್ಯಾ. ಪೀ.)] ಕಾಮಸುಖಂ ಪಹಾಯ’.
‘‘ತತೋ ¶ ಕಲ್ಲಿತಚಿತ್ತಂ [ಕಲ್ಲಿಕಚಿತ್ತಂ (ಸ್ಯಾ.), ಕಲಿಕಚಿತ್ತಂ (ಪೀ.)] ಮಂ, ಞತ್ವಾನ ನರಸಾರಥಿ;
ಮಹಾನಿದಾನಂ ದೇಸೇಸಿ, ಸುತ್ತನ್ತಂ ವಿನಯಾಯ ಮೇ.
‘‘ಸುತ್ವಾ ¶ ಸುತ್ತನ್ತಸೇಟ್ಠಂ ತಂ, ಪುಬ್ಬಸಞ್ಞಮನುಸ್ಸರಿಂ;
ತತ್ಥ ಠಿತಾವಹಂ ಸನ್ತೀ, ಧಮ್ಮಚಕ್ಖುಂ ವಿಸೋಧಯಿಂ.
‘‘ನಿಪತಿತ್ವಾ ಮಹೇಸಿಸ್ಸ, ಪಾದಮೂಲಮ್ಹಿ ತಾವದೇ;
ಅಚ್ಚಯಂ ದೇಸನತ್ಥಾಯ, ಇದಂ ವಚನಮಬ್ರವಿಂ.
‘‘‘ನಮೋ ತೇ ಸಬ್ಬದಸ್ಸಾವೀ, ನಮೋ ತೇ ಕರುಣಾಕರ;
ನಮೋ ತೇ ತಿಣ್ಣಸಂಸಾರ, ನಮೋ ತೇ ಅಮತಂ ದದ.
‘‘‘ದಿಟ್ಠಿಗಹನಪಕ್ಖನ್ದಾ [… ಪಕ್ಖನ್ತಾ (ಸೀ. ಸ್ಯಾ.)], ಕಾಮರಾಗವಿಮೋಹಿತಾ;
ತಯಾ ಸಮ್ಮಾ ಉಪಾಯೇನ, ವಿನೀತಾ ವಿನಯೇ ರತಾ.
‘‘‘ಅದಸ್ಸನೇನ ವಿಭೋಗಾ [ವಿಬ್ಭೋಗಾ (ಸೀ.), ವಿಹಿತಾ (ಸ್ಯಾ.)], ತಾದಿಸಾನಂ ಮಹೇಸಿನಂ;
ಅನುಭೋನ್ತಿ ಮಹಾದುಕ್ಖಂ, ಸತ್ತಾ ಸಂಸಾರಸಾಗರೇ.
‘‘‘ಯದಾಹಂ ಲೋಕಸರಣಂ, ಅರಣಂ ಅರಣನ್ತಗುಂ [ಮರಣನ್ತಗಂ (ಸ್ಯಾ.)];
ನಾದ್ದಸಾಮಿ ಅದೂರಟ್ಠಂ, ದೇಸಯಾಮಿ [ದೇಸೇಸ್ಸಾಮಿ (ಸ್ಯಾ.)] ತಮಚ್ಚಯಂ.
‘‘‘ಮಹಾಹಿತಂ ¶ ವರದದಂ, ಅಹಿತೋತಿ ವಿಸಙ್ಕಿತಾ;
ನೋಪೇಸಿಂ ರೂಪನಿರತಾ, ದೇಸಯಾಮಿ ತಮಚ್ಚಯಂ’.
‘‘ತದಾ ¶ ಮಧುರನಿಗ್ಘೋಸೋ, ಮಹಾಕಾರುಣಿಕೋ ಜಿನೋ;
ಅವೋಚ ತಿಟ್ಠ ಖೇಮೇತಿ, ಸಿಞ್ಚನ್ತೋ ಅಮತೇನ ಮಂ.
‘‘ತದಾ ಪಣಮ್ಯ ಸಿರಸಾ, ಕತ್ವಾ ಚ ನಂ ಪದಕ್ಖಿಣಂ;
ಗನ್ತ್ವಾ ದಿಸ್ವಾ ನರಪತಿಂ, ಇದಂ ವಚನಮಬ್ರವಿಂ.
‘‘‘ಅಹೋ ¶ ಸಮ್ಮಾ ಉಪಾಯೋ ತೇ, ಚಿನ್ತಿತೋಯಮರಿನ್ದಮ;
ವನದಸ್ಸನಕಾಮಾಯ, ದಿಟ್ಠೋ ನಿಬ್ಬಾನತೋ ಮುನಿ.
‘‘‘ಯದಿ ತೇ ರುಚ್ಚತೇ ರಾಜ [ರಾಜಾ (ಸ್ಯಾ.)], ಸಾಸನೇ ತಸ್ಸ ತಾದಿನೋ;
ಪಬ್ಬಜಿಸ್ಸಾಮಿ ರೂಪೇಹಂ, ನಿಬ್ಬಿನ್ನಾ ಮುನಿವಾಣಿನಾ’ [ಮುನಿಭಾಣಿನಾ (ಸ್ಯಾ. ಪೀ.)].
ದುತಿಯಂ ಭಾಣವಾರಂ.
‘‘ಅಞ್ಜಲಿಂ ಪಗ್ಗಹೇತ್ವಾನ, ತದಾಹ ಸ ಮಹೀಪತಿ;
‘ಅನುಜಾನಾಮಿ ತೇ ಭದ್ದೇ, ಪಬ್ಬಜ್ಜಾ ತವ ಸಿಜ್ಝತು’.
‘‘ಪಬ್ಬಜಿತ್ವಾ ತದಾ ಚಾಹಂ, ಅದ್ಧಮಾಸೇ [ಸತ್ತಮಾಸೇ (ಸ್ಯಾ.)] ಉಪಟ್ಠಿತೇ;
ದೀಪೋದಯಞ್ಚ ಭೇದಞ್ಚ, ದಿಸ್ವಾ ಸಂವಿಗ್ಗಮಾನಸಾ.
‘‘ನಿಬ್ಬಿನ್ನಾ ¶ ಸಬ್ಬಸಙ್ಖಾರೇ, ಪಚ್ಚಯಾಕಾರಕೋವಿದಾ;
ಚತುರೋಘೇ ಅತಿಕ್ಕಮ್ಮ, ಅರಹತ್ತಮಪಾಪುಣಿಂ.
‘‘ಇದ್ಧೀಸು ಚ ವಸೀ ಆಸಿಂ, ದಿಬ್ಬಾಯ ಸೋತಧಾತುಯಾ;
ಚೇತೋಪರಿಯಞಾಣಸ್ಸ, ವಸೀ ಚಾಪಿ ಭವಾಮಹಂ.
‘‘ಪುಬ್ಬೇನಿವಾಸಂ ಜಾನಾಮಿ, ದಿಬ್ಬಚಕ್ಖು ವಿಸೋಧಿತಂ;
ಸಬ್ಬಾಸವಪರಿಕ್ಖೀಣಾ, ನತ್ಥಿ ದಾನಿ ಪುನಬ್ಭವೋ.
‘‘ಅತ್ಥಧಮ್ಮನಿರುತ್ತೀಸು, ಪಟಿಭಾನೇ ತಥೇವ ಚ;
ಪರಿಸುದ್ಧಂ ಮಮ ಞಾಣಂ, ಉಪ್ಪನ್ನಂ ಬುದ್ಧಸಾಸನೇ.
‘‘ಕುಸಲಾಹಂ ವಿಸುದ್ಧೀಸು, ಕಥಾವತ್ಥುವಿಸಾರದಾ;
ಅಭಿಧಮ್ಮನಯಞ್ಞೂ ಚ, ವಸಿಪ್ಪತ್ತಾಮ್ಹಿ ಸಾಸನೇ.
‘‘ತತೋ ¶ ¶ ತೋರಣವತ್ಥುಸ್ಮಿಂ, ರಞ್ಞಾ ಕೋಸಲಸಾಮಿನಾ;
ಪುಚ್ಛಿತಾ ನಿಪುಣೇ ಪಞ್ಹೇ, ಬ್ಯಾಕರೋನ್ತೀ ಯಥಾತಥಂ.
‘‘ತದಾ ಸ ರಾಜಾ ಸುಗತಂ, ಉಪಸಙ್ಕಮ್ಮ ಪುಚ್ಛಥ;
ತಥೇವ ಬುದ್ಧೋ ಬ್ಯಾಕಾಸಿ, ಯಥಾ ತೇ ಬ್ಯಾಕತಾ ಮಯಾ.
‘‘ಜಿನೋ ತಸ್ಮಿಂ ಗುಣೇ ತುಟ್ಠೋ, ಏತದಗ್ಗೇ ಠಪೇಸಿ ಮಂ;
ಮಹಾಪಞ್ಞಾನಮಗ್ಗಾತಿ, ಭಿಕ್ಖುನೀನಂ ನರುತ್ತಮೋ.
‘‘ಕಿಲೇಸಾ ¶ ಝಾಪಿತಾ ಮಯ್ಹಂ…ಪೇ… ವಿಹರಾಮಿ ಅನಾಸವಾ.
‘‘ಸ್ವಾಗತಂ ವತ ಮೇ ಆಸಿ…ಪೇ… ಕತಂ ಬುದ್ಧಸ್ಸ ಸಾಸನಂ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಖೇಮಾ ಭಿಕ್ಖುನೀ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಖೇಮಾಥೇರಿಯಾಪದಾನಂ ಅಟ್ಠಮಂ.
೯. ಉಪ್ಪಲವಣ್ಣಾಥೇರೀಅಪದಾನಂ
‘‘ಭಿಕ್ಖುನೀ ಉಪ್ಪಲವಣ್ಣಾ, ಇದ್ಧಿಯಾ ಪಾರಮಿಂ ಗತಾ;
ವನ್ದಿತ್ವಾ ಸತ್ಥುನೋ ಪಾದೇ, ಇದಂ ವಚನಮಬ್ರವಿ.
‘‘‘ನಿತ್ಥಿಣ್ಣಾ ¶ ಜಾತಿಸಂಸಾರಂ [ಜಾತಿಸಂಸಾರಾ (ಪೀ.)], ಪತ್ತಾಹಂ ಅಚಲಂ ಪದಂ;
ಸಬ್ಬದುಕ್ಖಂ ಮಯಾ ಖೀಣಂ, ಆರೋಚೇಮಿ ಮಹಾಮುನಿ.
‘‘‘ಯಾವತಾ ¶ ಪರಿಸಾ ಅತ್ಥಿ, ಪಸನ್ನಾ ಜಿನಸಾಸನೇ;
ಯಸ್ಸಾ ಚ ಮೇಪರಾಧೋತ್ಥಿ, ಖಮನ್ತು ಜಿನಸಮ್ಮುಖಾ.
‘‘‘ಸಂಸಾರೇ ಸಂಸರನ್ತಿಯಾ [ಸಂಸರನ್ತಾ ಮೇ (ಸ್ಯಾ.)], ಖಲಿತಂ ಮೇ ಸಚೇ ಭವೇ;
ಆರೋಚೇಮಿ ಮಹಾವೀರ, ಅಪರಾಧಂ ಖಮಸ್ಸು ತಂ [ಮೇ (ಸ್ಯಾ.)].
‘‘‘ಇದ್ಧಿಞ್ಚಾಪಿ ನಿದಸ್ಸೇಹಿ, ಮಮ ಸಾಸನಕಾರಿಕೇ;
ಚತಸ್ಸೋ ಪರಿಸಾ ಅಜ್ಜ, ಕಙ್ಖಂ ಛಿನ್ದಾಹಿ ಯಾವತಾ.
‘‘‘ಧೀತಾ ತುಯ್ಹಂ ಮಹಾವೀರ, ಪಞ್ಞವನ್ತ ಜುತಿನ್ಧರ;
ಬಹುಞ್ಚ ದುಕ್ಕರಂ ಕಮ್ಮಂ, ಕತಂ ಮೇ ಅತಿದುಕ್ಕರಂ.
‘‘‘ಉಪ್ಪಲಸ್ಸೇವ ¶ ಮೇ ವಣ್ಣೋ, ನಾಮೇನುಪ್ಪಲನಾಮಿಕಾ;
ಸಾವಿಕಾ ತೇ ಮಹಾವೀರ, ಪಾದೇ ವನ್ದಾಮಿ ಚಕ್ಖುಮ.
‘‘‘ರಾಹುಲೋ ಚ ಅಹಞ್ಚೇವ, ನೇಕಜಾತಿಸತೇ ಬಹೂ;
ಏಕಸ್ಮಿಂ ಸಮ್ಭವೇ ಜಾತಾ, ಸಮಾನಛನ್ದಮಾನಸಾ.
‘‘‘ನಿಬ್ಬತ್ತಿ ಏಕತೋ ಹೋತಿ, ಜಾತಿಯಾಪಿ ಚ ಏಕತೋ [ಜಾತೀಸು ಬಹುಸೋ ಮಮ (ಸೀ.)];
ಪಚ್ಛಿಮೇ ಭವೇ ಸಮ್ಪತ್ತೇ, ಉಭೋಪಿ ನಾನಾಸಮ್ಭವಾ.
‘‘‘ಪುತ್ತೋ ಚ ರಾಹುಲೋ ನಾಮ, ಧೀತಾ ಉಪ್ಪಲಸವ್ಹಯಾ;
ಪಸ್ಸ ವೀರ ಮಮಂ ಇದ್ಧಿಂ, ಬಲಂ ದಸ್ಸೇಮಿ ಸತ್ಥುನೋ.
‘‘‘ಮಹಾಸಮುದ್ದೇ ¶ ಚತುರೋ, ಪಕ್ಖಿಪಿ ಹತ್ಥಪಾತಿಯಂ;
ತೇಲಂ ಹತ್ಥಗತಞ್ಚೇವ, ಖಿಡ್ಡೋ [ವೇಜ್ಜೋ (ಸೀ. ಪೀ.)] ಕೋಮಾರಕೋ ಯಥಾ.
‘‘‘ಉಬ್ಬತ್ತಯಿತ್ವಾ ಪಥವಿಂ, ಪಕ್ಖಿಪಿ ಹತ್ಥಪಾತಿಯಂ;
ಚಿತ್ತಂ ಮುಞ್ಜಂ ಯಥಾ ನಾಮ, ಲುಞ್ಚಿ ಕೋಮಾರಕೋ ಯುವಾ.
‘‘‘ಚಕ್ಕವಾಳಸಮಂ ¶ ಪಾಣಿಂ, ಛಾದಯಿತ್ವಾನ ಮತ್ಥಕೇ;
ವಸ್ಸಾಪೇತ್ವಾನ ಫುಸಿತಂ, ನಾನಾವಣ್ಣಂ ಪುನಪ್ಪುನಂ.
‘‘‘ಭೂಮಿಂ ಉದುಕ್ಖಲಂ ಕತ್ವಾ, ಧಞ್ಞಂ ಕತ್ವಾನ ಸಕ್ಖರಂ;
ಸಿನೇರುಂ ಮುಸಲಂ ಕತ್ವಾ, ಮದ್ದಿ ಕೋಮಾರಿಕಾ ಯಥಾ.
‘‘‘ಧೀತಾಹಂ ಬುದ್ಧಸೇಟ್ಠಸ್ಸ, ನಾಮೇನುಪ್ಪಲಸವ್ಹಯಾ;
ಅಭಿಞ್ಞಾಸು ವಸೀಭೂತಾ, ತವ ಸಾಸನಕಾರಿಕಾ.
‘‘‘ನಾನಾವಿಕುಬ್ಬನಂ ¶ ಕತ್ವಾ, ದಸ್ಸೇತ್ವಾ ಲೋಕನಾಯಕಂ;
ನಾಮಗೋತ್ತಞ್ಚ ಸಾವೇತ್ವಾ [ಪಕಾಸೇತ್ವಾ (ಸ್ಯಾ.)], ಪಾದೇ ವನ್ದಾಮಿ ಚಕ್ಖುಮ.
‘‘‘ಇದ್ಧೀಸು ಚ ವಸೀ ಹೋಮಿ, ದಿಬ್ಬಾಯ ಸೋತಧಾತುಯಾ;
ಚೇತೋಪರಿಯಞಾಣಸ್ಸ, ವಸೀ ಹೋಮಿ ಮಹಾಮುನೇ.
‘‘‘ಪುಬ್ಬೇನಿವಾಸಂ ಜಾನಾಮಿ, ದಿಬ್ಬಚಕ್ಖು ವಿಸೋಧಿತಂ;
ಸಬ್ಬಾಸವಪರಿಕ್ಖೀಣಾ, ನತ್ಥಿ ದಾನಿ ಪುನಬ್ಭವೋ.
‘‘‘ಅತ್ಥಧಮ್ಮನಿರುತ್ತೀಸು, ಪಟಿಭಾನೇ ತಥೇವ ಚ;
ಞಾಣಂ ಮೇ ವಿಮಲಂ [ವಿಪುಲಂ (ಸ್ಯಾ.)] ಸುದ್ಧಂ, ಸಭಾವೇನ ಮಹೇಸಿನೋ.
‘‘‘ಪುರಿಮಾನಂ ¶ ಜಿನಗ್ಗಾನಂ, ಸಙ್ಗಮಂ ತೇ ನಿದಸ್ಸಿತಂ [ಸಮ್ಮುಖಾ ಚ ಪರಮ್ಮುಖಾ (ಸೀ.)];
ಅಧಿಕಾರಂ ಬಹುಂ ಮಯ್ಹಂ, ತುಯ್ಹತ್ಥಾಯ ಮಹಾಮುನಿ.
‘‘‘ಯಂ ಮಯಾ ಪೂರಿತಂ ಕಮ್ಮಂ, ಕುಸಲಂ ಸರ ಮೇ ಮುನಿ;
ತವತ್ಥಾಯ ಮಹಾವೀರ, ಪುಞ್ಞಂ ಉಪಚಿತಂ ಮಯಾ.
‘‘‘ಅಭಬ್ಬಟ್ಠಾನೇ ವಜ್ಜೇತ್ವಾ, ವಾರಯನ್ತೀ [ಪರಿವಜ್ಜನ್ತಿ (ಸೀ.), ಪರಿಪಾಚೇನ್ತೋ (ಸ್ಯಾ.)] ಅನಾಚರಂ;
ತವತ್ಥಾಯ ಮಹಾವೀರ, ಚತ್ತಂ ಮೇ ಜೀವಿತುತ್ತಮಂ.
‘‘‘ದಸಕೋಟಿಸಹಸ್ಸಾನಿ ¶ , ಅದಾಸಿಂ ಮಮ ಜೀವಿತಂ;
ಪರಿಚ್ಚತ್ತಾ ಚ ಮೇ ಹೋಮಿ, ತವತ್ಥಾಯ ಮಹಾಮುನಿ.
‘‘‘ತದಾತಿವಿಮ್ಹಿತಾ ಸಬ್ಬಾ, ಸಿರಸಾವ ಕತಞ್ಜಲೀ;
ಅವೋಚಯ್ಯೇ ಕಥಂ ಆಸಿ, ಅತುಲಿದ್ಧಿಪರಕ್ಕಮಾ’.
‘‘ಸತಸಹಸ್ಸಿತೋ ¶ ಕಪ್ಪೇ, ನಾಗಕಞ್ಞಾ ಅಹಂ ತದಾ;
ವಿಮಲಾ ನಾಮ ನಾಮೇನ, ಕಞ್ಞಾನಂ ಸಾಧುಸಮ್ಮತಾ.
‘‘ಮಹೋರಗೋ ಮಹಾನಾಗೋ, ಪಸನ್ನೋ ಜಿನಸಾಸನೇ;
ಪದುಮುತ್ತರಂ ಮಹಾತೇಜಂ, ನಿಮನ್ತೇಸಿ ಸಸಾವಕಂ.
‘‘ರತನಮಯಂ ಮಣ್ಡಪಂ, ಪಲ್ಲಙ್ಕಂ ರತನಾಮಯಂ;
ರತನಂ ವಾಲುಕಾಕಿಣ್ಣಂ, ಉಪಭೋಗಂ ರತನಾಮಯಂ.
‘‘ಮಗ್ಗಞ್ಚ ಪಟಿಯಾದೇಸಿ, ರತನದ್ಧಜಭೂಸಿತಂ;
ಪಚ್ಚುಗ್ಗನ್ತ್ವಾನ ಸಮ್ಬುದ್ಧಂ, ವಜ್ಜನ್ತೋ ತೂರಿಯೇಹಿ ಸೋ.
‘‘ಪರಿಸಾಹಿ ಚ ಚತೂಹಿ [ಪರಿಸಾಹಿ ಚತೂಹಿ ಸೋ (ಸೀ.), ಪರಿಸಾಹಿ ಚತಸ್ಸೋ ಹಿ (ಪೀ.)], ಪರಿವುತೋ [ಸಹಿತೋ (ಸೀ.), ಫರತೇ (ಸ್ಯಾ.), ಪರೇತೋ (ಪೀ.)] ಲೋಕನಾಯಕೋ;
ಮಹೋರಗಸ್ಸ ಭವನೇ, ನಿಸೀದಿ ಪರಮಾಸನೇ.
‘‘ಅನ್ನಂ ¶ ಪಾನಂ ಖಾದನೀಯಂ, ಭೋಜನಞ್ಚ ಮಹಾರಹಂ;
ವರಂ ವರಞ್ಚ ಪಾದಾಸಿ, ನಾಗರಾಜಾ ಮಹಾಯಸಂ.
‘‘ಭುಞ್ಜಿತ್ವಾನ ಸಮ್ಬುದ್ಧೋ, ಪತ್ತಂ ಧೋವಿತ್ವಾ ಯೋನಿಸೋ;
ಅನುಮೋದನೀಯಂಕಾಸಿ, ನಾಗಕಞ್ಞಾ ಮಹಿದ್ಧಿಕಾ.
‘‘ಸಬ್ಬಞ್ಞುಂ ¶ ಫುಲ್ಲಿತಂ ದಿಸ್ವಾ, ನಾಗಕಞ್ಞಾ ಮಹಾಯಸಂ;
ಪಸನ್ನಂ ಸತ್ಥುನೋ ಚಿತ್ತಂ, ಸುನಿಬನ್ಧಞ್ಚ ಮಾನಸಂ.
‘‘ಮಮಞ್ಚ ¶ ಚಿತ್ತಮಞ್ಞಾಯ, ಜಲಜುತ್ತಮನಾಮಕೋ;
ತಸ್ಮಿಂ ಖಣೇ ಮಹಾವೀರೋ, ಭಿಕ್ಖುನಿಂ ದಸ್ಸಯಿದ್ಧಿಯಾ.
‘‘ಇದ್ಧೀ ಅನೇಕಾ ದಸ್ಸೇಸಿ, ಭಿಕ್ಖುನೀ ಸಾ ವಿಸಾರದಾ;
ಪಮೋದಿತಾ ವೇದಜಾತಾ, ಸತ್ಥಾರಂ ಇದಮಬ್ರವಿ [ಏತದಬ್ರವಿಂ (ಸ್ಯಾ. ಪೀ.)].
‘‘‘ಅದ್ದಸಾಹಂ ಇಮಂ ಇದ್ಧಿಂ, ಸುಮನಂ ಇತರಾಯಪಿ;
ಕಥಂ ಅಹೋಸಿ ಸಾ ವೀರ, ಇದ್ಧಿಯಾ ಸುವಿಸಾರದಾ’.
‘‘‘ಓರಸಾ ಮುಖತೋ ಜಾತಾ, ಧೀತಾ ಮಮ ಮಹಿದ್ಧಿಕಾ;
ಮಮಾನುಸಾಸನಿಕರಾ, ಇದ್ಧಿಯಾ ಸುವಿಸಾರದಾ’.
‘‘ಬುದ್ಧಸ್ಸ ವಚನಂ ಸುತ್ವಾ, ಏವಂ ಪತ್ಥೇಸಹಂ ತದಾ [ತುಟ್ಠಾ ಏವಂ ಅವೋಚಹಂ (ಸ್ಯಾ.), ಏವಮಹೋಸಹಂ ತದಾ (ಕ.)];
ಅಹಮ್ಪಿ ತಾದಿಸಾ ಹೋಮಿ, ಇದ್ಧಿಯಾ ಸುವಿಸಾರದಾ.
‘‘ಪಮೋದಿತಾಹಂ ¶ ಸುಮನಾ, ಪತ್ಥೇ ಉತ್ತಮಮಾನಸಾ [ಪತ್ತಉತ್ತಮಮಾನಸಾ (ಸೀ. ಸ್ಯಾ. ಪೀ.)];
ಅನಾಗತಮ್ಹಿ ಅದ್ಧಾನೇ, ಈದಿಸಾ ಹೋಮಿ ನಾಯಕ.
‘‘ಮಣಿಮಯಮ್ಹಿ ಪಲ್ಲಙ್ಕೇ, ಮಣ್ಡಪಮ್ಹಿ ಪಭಸ್ಸರೇ;
ಅನ್ನಪಾನೇನ ತಪ್ಪೇತ್ವಾ, ಸಸಙ್ಘಂ ಲೋಕನಾಯಕಂ.
‘‘ನಾಗಾನಂ ಪವರಂ ಪುಪ್ಫಂ, ಅರುಣಂ ನಾಮ ಉಪ್ಪಲಂ;
ವಣ್ಣಂ ಮೇ ಈದಿಸಂ ಹೋತು, ಪೂಜೇಸಿಂ ಲೋಕನಾಯಕಂ.
‘‘ತೇನ ಕಮ್ಮೇನ ಸುಕತೇನ, ಚೇತನಾಪಣಿಧೀಹಿ ಚ;
ಜಹಿತ್ವಾ ಮಾನುಸಂ ದೇಹಂ, ತಾವತಿಂಸಮಗಚ್ಛಹಂ.
‘‘ತತೋ ಚುತಾಹಂ ಮನುಜೇ, ಉಪಪನ್ನಾ ಸಯಮ್ಭುನೋ;
ಉಪ್ಪಲೇಹಿ ಪಟಿಚ್ಛನ್ನಂ, ಪಿಣ್ಡಪಾತಮದಾಸಹಂ.
‘‘ಏಕನವುತಿತೋ ¶ ಕಪ್ಪೇ, ವಿಪಸ್ಸೀ ನಾಮ ನಾಯಕೋ;
ಉಪ್ಪಜ್ಜಿ ಚಾರುದಸ್ಸನೋ, ಸಬ್ಬಧಮ್ಮೇಸು ಚಕ್ಖುಮಾ.
‘‘ಸೇಟ್ಠಿಧೀತಾ ¶ ತದಾ ಹುತ್ವಾ, ಬಾರಾಣಸಿಪುರುತ್ತಮೇ;
ನಿಮನ್ತೇತ್ವಾನ ಸಮ್ಬುದ್ಧಂ, ಸಸಙ್ಘಂ ಲೋಕನಾಯಕಂ.
‘‘ಮಹಾದಾನಂ ¶ ದದಿತ್ವಾನ, ಉಪ್ಪಲೇಹಿ ವಿನಾಯಕಂ;
ಪೂಜಯಿತ್ವಾ ಚೇತಸಾವ [ಚ ತೇಹೇವ (ಸ್ಯಾ. ಪೀ.)], ವಣ್ಣಸೋಭಂ ಅಪತ್ಥಯಿಂ.
‘‘ಇಮಮ್ಹಿ ಭದ್ದಕೇ ಕಪ್ಪೇ, ಬ್ರಹ್ಮಬನ್ಧು ಮಹಾಯಸೋ;
ಕಸ್ಸಪೋ ನಾಮ ಗೋತ್ತೇನ, ಉಪ್ಪಜ್ಜಿ ವದತಂ ವರೋ.
‘‘ಉಪಟ್ಠಾಕೋ ಮಹೇಸಿಸ್ಸ, ತದಾ ಆಸಿ ನರಿಸ್ಸರೋ;
ಕಾಸಿರಾಜಾ ಕಿಕೀ ನಾಮ, ಬಾರಾಣಸಿಪುರುತ್ತಮೇ.
‘‘ತಸ್ಸಾಸಿಂ ದುತಿಯಾ ಧೀತಾ, ಸಮಣಗುತ್ತಸವ್ಹಯಾ;
ಧಮ್ಮಂ ಸುತ್ವಾ ಜಿನಗ್ಗಸ್ಸ, ಪಬ್ಬಜ್ಜಂ ಸಮರೋಚಯಿಂ.
‘‘ಅನುಜಾನಿ ನ ನೋ ತಾತೋ, ಅಗಾರೇವ ತದಾ ಮಯಂ;
ವೀಸವಸ್ಸಸಹಸ್ಸಾನಿ, ವಿಚರಿಮ್ಹ ಅತನ್ದಿತಾ.
‘‘ಕೋಮಾರಿಬ್ರಹ್ಮಚರಿಯಂ, ರಾಜಕಞ್ಞಾ ಸುಖೇಧಿತಾ;
ಬುದ್ಧೋಪಟ್ಠಾನನಿರತಾ, ಮುದಿತಾ ಸತ್ತಧೀತರೋ.
‘‘ಸಮಣೀ ಸಮಣಗುತ್ತಾ ಚ, ಭಿಕ್ಖುನೀ ಭಿಕ್ಖುದಾಯಿಕಾ [ಭಿಕ್ಖುದಾಸಿಕಾ (ಸೀ. ಸ್ಯಾ.)];
ಧಮ್ಮಾ ಚೇವ ಸುಧಮ್ಮಾ ಚ, ಸತ್ತಮೀ ಸಙ್ಘದಾಯಿಕಾ [ಸಂಘದಾಸಿಕಾ (ಸೀ. ಸ್ಯಾ.)].
‘‘ಅಹಂ ಖೇಮಾ ಚ ಸಪ್ಪಞ್ಞಾ, ಪಟಾಚಾರಾ ಚ ಕುಣ್ಡಲಾ;
ಕಿಸಾಗೋತಮೀ ಧಮ್ಮದಿನ್ನಾ, ವಿಸಾಖಾ ಹೋತಿ ಸತ್ತಮೀ.
‘‘ತೇಹಿ ¶ ¶ ಕಮ್ಮೇಹಿ ಸುಕತೇಹಿ, ಚೇತನಾಪಣಿಧೀಹಿ ಚ;
ಜಹಿತ್ವಾ ಮಾನುಸಂ ದೇಹಂ, ತಾವತಿಂಸಮಗಚ್ಛಹಂ.
‘‘ತತೋ ಚುತಾ ಮನುಸ್ಸೇಸು, ಉಪಪನ್ನಾ ಮಹಾಕುಲೇ;
ಪೀತಂ ಮಟ್ಠಂ ವರಂ ದುಸ್ಸಂ, ಅದಂ ಅರಹತೋ ಅಹಂ.
‘‘ತತೋ ಚುತಾರಿಟ್ಠಪುರೇ, ಜಾತಾ ವಿಪ್ಪಕುಲೇ ಅಹಂ;
ಧೀತಾ ತಿರಿಟಿವಚ್ಛಸ್ಸ, ಉಮ್ಮಾದನ್ತೀ ಮನೋಹರಾ.
‘‘ತತೋ ಚುತಾ ಜನಪದೇ, ಕುಲೇ ಅಞ್ಞತರೇ ಅಹಂ;
ಪಸೂತಾ ನಾತಿಫೀತಮ್ಹಿ, ಸಾಲಿಂ ಗೋಪೇಮಹಂ ತದಾ.
‘‘ದಿಸ್ವಾ ಪಚ್ಚೇಕಸಮ್ಬುದ್ಧಂ, ಪಞ್ಚಲಾಜಾಸತಾನಿಹಂ;
ದತ್ವಾ ಪದುಮಚ್ಛನ್ನಾನಿ, ಪಞ್ಚ ಪುತ್ತಸತಾನಿಹಂ.
‘‘ಪತ್ಥಯಿಂ ¶ ¶ ತೇಪಿ ಪತ್ಥೇಸುಂ, ಮಧುಂ ದತ್ವಾ ಸಯಮ್ಭುನೋ;
ತತೋ ಚುತಾ ಅರಞ್ಞೇಹಂ, ಅಜಾಯಿಂ ಪದುಮೋದರೇ.
‘‘ಕಾಸಿರಞ್ಞೋ ಮಹೇಸೀಹಂ, ಹುತ್ವಾ ಸಕ್ಕತಪೂಜಿತಾ;
ಅಜನಿಂ ರಾಜಪುತ್ತಾನಂ, ಅನೂನಂ ಸತಪಞ್ಚಕಂ.
‘‘ಯದಾ ತೇ ಯೋಬ್ಬನಪ್ಪತ್ತಾ, ಕೀಳನ್ತಾ ಜಲಕೀಳಿತಂ;
ದಿಸ್ವಾ ಓಪತ್ತಪದುಮಂ, ಆಸುಂ ಪಚ್ಚೇಕನಾಯಕಾ.
‘‘ಸಾಹಂ ತೇಹಿ ವಿನಾಭೂತಾ, ಸುತವೀರೇಹಿ ಸೋಕಿನೀ [ಸುತವರೇಹಿ ಸೋಕಿನೀ (ಸೀ. ಸ್ಯಾ.)];
ಚುತಾ ಇಸಿಗಿಲಿಪಸ್ಸೇ, ಗಾಮಕಮ್ಹಿ ಅಜಾಯಿಹಂ.
‘‘ಯದಾ ಬುದ್ಧಾ ಸುತಮತೀ, ಸುತಾನಂ ಭತ್ತುನೋಪಿ ಚ [ಕಸತಂ ತದಾ (ಸೀ.), ಅತ್ತನೋಪಿ ಚ (ಸ್ಯಾ.)];
ಯಾಗುಂ ಆದಾಯ ಗಚ್ಛನ್ತೀ, ಅಟ್ಠ ಪಚ್ಚೇಕನಾಯಕೇ.
‘‘ಭಿಕ್ಖಾಯ ¶ ಗಾಮಂ ಗಚ್ಛನ್ತೇ, ದಿಸ್ವಾ ಪುತ್ತೇ ಅನುಸ್ಸರಿಂ;
ಖೀರಧಾರಾ ವಿನಿಗ್ಗಚ್ಛಿ, ತದಾ ಮೇ ಪುತ್ತಪೇಮಸಾ.
‘‘ತತೋ ತೇಸಂ ಅದಂ ಯಾಗುಂ, ಪಸನ್ನಾ ಸೇಹಿ ಪಾಣಿಭಿ;
ತತೋ ಚುತಾಹಂ ತಿದಸಂ, ನನ್ದನಂ ಉಪಪಜ್ಜಹಂ.
‘‘ಅನುಭೋತ್ವಾ ಸುಖಂ ದುಕ್ಖಂ, ಸಂಸರಿತ್ವಾ ಭವಾಭವೇ;
ತವತ್ಥಾಯ ಮಹಾವೀರ, ಪರಿಚ್ಚತ್ತಞ್ಚ ಜೀವಿತಂ.
‘‘ಏವಂ ¶ ಬಹುವಿಧಂ ದುಕ್ಖಂ, ಸಮ್ಪತ್ತೀ ಚ ಬಹುಬ್ಬಿಧಾ;
ಪಚ್ಛಿಮೇ ಭವೇ ಸಮ್ಪತ್ತೇ, ಜಾತಾ ಸಾವತ್ಥಿಯಂ ಪುರೇ.
‘‘ಮಹಾಧನಸೇಟ್ಠಿಕುಲೇ, ಸುಖಿತೇ ಸಜ್ಜಿತೇ ತಥಾ;
ನಾನಾರತನಪಜ್ಜೋತೇ, ಸಬ್ಬಕಾಮಸಮಿದ್ಧಿನೇ.
‘‘ಸಕ್ಕತಾ ಪೂಜಿತಾ ಚೇವ, ಮಾನಿತಾಪಚಿತಾ ತಥಾ;
ರೂಪಸೀರಿಮನುಪ್ಪತ್ತಾ [ರೂಪಸೋಭಗ್ಗಸಮ್ಪನ್ನಾ (ಸೀ.)], ಕುಲೇಸು ಅತಿಸಕ್ಕತಾ [ಅಭಿಸಮ್ಮತಾ (ಸೀ.)].
‘‘ಅತೀವ ಪತ್ಥಿತಾ ಚಾಸಿಂ, ರೂಪಭೋಗಸಿರೀಹಿ ಚ;
ಪತ್ಥಿತಾ ಸೇಟ್ಠಿಪುತ್ತೇಹಿ, ಅನೇಕೇಹಿ ಸತೇಹಿಪಿ.
‘‘ಅಗಾರಂ ಪಜಹಿತ್ವಾನ, ಪಬ್ಬಜಿಂ ಅನಗಾರಿಯಂ;
ಅಡ್ಢಮಾಸೇ ಅಸಮ್ಪತ್ತೇ, ಚತುಸಚ್ಚಮಪಾಪುಣಿಂ.
‘‘ಇದ್ಧಿಯಾ ¶ ಅಭಿನಿಮ್ಮಿತ್ವಾ, ಚತುರಸ್ಸಂ ರಥಂ ಅಹಂ;
ಬುದ್ಧಸ್ಸ ಪಾದೇ ವನ್ದಿಸ್ಸಂ, ಲೋಕನಾಥಸ್ಸ ತಾದಿನೋ.
‘‘‘ಸುಪುಪ್ಫಿತಗ್ಗಂ ¶ ಉಪಗಮ್ಮ ಪಾದಪಂ [ಭಿಕ್ಖುನೀ (ಸೀ. ಪೀ. ಕ.) ಥೇರೀಗಾ. ೨೩೦], ಏಕಾ ತುವಂ ತಿಟ್ಠಸಿ ಸಾಲಮೂಲೇ;
ನ ¶ ಚಾಪಿ ತೇ ದುತಿಯೋ ಅತ್ಥಿ ಕೋಚಿ [ನ ಚತ್ಥಿ ತೇ ದುತಿಯಾ ವಣ್ಣಧಾತು (ಸೀ. ಪೀ. ಕ.)], ಬಾಲೇ ನ ತ್ವಂ ಭಾಯಸಿ ಧುತ್ತಕಾನಂ’.
‘‘‘ಸತಂ ಸಹಸ್ಸಾನಿಪಿ ಧುತ್ತಕಾನಂ [ಸಹಸ್ಸಾನಮ್ಪಿ ಧುತ್ತಕಾನಂ (ಪೀ.) ಥೇರೀಗಾ. ೨೩೧], ಸಮಾಗತಾ ಏದಿಸಕಾ ಭವೇಯ್ಯುಂ;
ಲೋಮಂ ನ ಇಞ್ಜೇ ನ ಸಮ್ಪವೇಧೇ, ಕಿಂ ಮೇ ತುವಂ ಮಾರ ಕರಿಸ್ಸಸೇಕೋ [ನ ಮಾರ ಭಾಯಾಮಿ ತವೇಕಿಕಾಪಿ (ಸೀ. ಕ.) … ತಮೇಕಿಕಾಸಿಂ (ಪೀ.)].
‘‘‘ಏಸಾ ಅನ್ತರಧಾಯಾಮಿ, ಕುಚ್ಛಿಂ ವಾ ಪವಿಸಾಮಿ ತೇ;
ಭಮುಕನ್ತರಿಕಾಯಮ್ಪಿ, ತಿಟ್ಠನ್ತಿಂ ಮಂ ನ ದಕ್ಖಸಿ.
‘‘‘ಚಿತ್ತಸ್ಮಿಂ ವಸೀಭೂತಾಮ್ಹಿ, ಇದ್ಧಿಪಾದಾ ಸುಭಾವಿತಾ;
ಸಬ್ಬಬನ್ಧನಮುತ್ತಾಮ್ಹಿ, ನ ತಂ ಭಾಯಾಮಿ ಆವುಸೋ.
‘‘‘ಸತ್ತಿಸೂಲೂಪಮಾ ಕಾಮಾ, ಖನ್ಧಾಸಂ ಅಧಿಕುಟ್ಟನಾ;
ಯಂ ತ್ವಂ ಕಾಮರತಿಂ ಬ್ರೂಸಿ, ಅರತೀ ದಾನಿ ಸಾ ಮಮ.
‘‘‘ಸಬ್ಬತ್ಥ ¶ ವಿಹತಾ ನನ್ದೀ, ತಮೋಖನ್ಧೋ ಪದಾಲಿತೋ;
ಏವಂ ಜಾನಾಹಿ ಪಾಪಿಮ, ನಿಹತೋ ತ್ವಮಸಿ ಅನ್ತಕ’.
‘‘ಜಿನೋ ತಮ್ಹಿ ಗುಣೇ ತುಟ್ಠೋ, ಏತದಗ್ಗೇ ಠಪೇಸಿ ಮಂ;
ಅಗ್ಗಾ ಇದ್ಧಿಮತೀನನ್ತಿ, ಪರಿಸಾಸು ವಿನಾಯಕೋ.
‘‘ಪರಿಚಿಣ್ಣೋ ಮಯಾ ಸತ್ಥಾ, ಕತಂ ಬುದ್ಧಸ್ಸ ಸಾಸನಂ;
ಓಹಿತೋ ಗರುಕೋ ಭಾರೋ, ಭವನೇತ್ತಿ ಸಮೂಹತಾ.
‘‘ಯಸ್ಸತ್ಥಾಯ ಪಬ್ಬಜಿತಾ, ಅಗಾರಸ್ಮಾನಗಾರಿಯಂ;
ಸೋ ಮೇ ಅತ್ಥೋ ಅನುಪ್ಪತ್ತೋ, ಸಬ್ಬಸಂಯೋಜನಕ್ಖಯೋ.
‘‘ಚೀವರಂ ¶ ¶ ಪಿಣ್ಡಪಾತಞ್ಚ, ಪಚ್ಚಯಂ ಸಯನಾಸನಂ;
ಖಣೇನ ಉಪನಾಮೇನ್ತಿ, ಸಹಸ್ಸಾನಿ ಸಮನ್ತತೋ.
‘‘ಕಿಲೇಸಾ ಝಾಪಿತಾ ಮಯ್ಹಂ…ಪೇ… ವಿಹರಾಮಿ ಅನಾಸವಾ;
‘‘ಸ್ವಾಗತಂ ವತ ಮೇ ಆಸಿ…ಪೇ… ಕತಂ ಬುದ್ಧಸ್ಸ ಸಾಸನಂ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಉಪ್ಪಲವಣ್ಣಾ ಭಿಕ್ಖುನೀ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಉಪ್ಪಲವಣ್ಣಾಥೇರಿಯಾಪದಾನಂ ನವಮಂ.
೧೦. ಪಟಾಚಾರಾಥೇರೀಅಪದಾನಂ
‘‘ಪದುಮುತ್ತರೋ ¶ ನಾಮ ಜಿನೋ, ಸಬ್ಬಧಮ್ಮಾನ ಪಾರಗೂ;
ಇತೋ ಸತಸಹಸ್ಸಮ್ಹಿ, ಕಪ್ಪೇ ಉಪ್ಪಜ್ಜಿ ನಾಯಕೋ.
‘‘ತದಾಹಂ ಹಂಸವತಿಯಂ, ಜಾತಾ ಸೇಟ್ಠಿಕುಲೇ ಅಹುಂ;
ನಾನಾರತನಪಜ್ಜೋತೇ, ಮಹಾಸುಖಸಮಪ್ಪಿತಾ.
‘‘ಉಪೇತ್ವಾ ತಂ ಮಹಾವೀರಂ, ಅಸ್ಸೋಸಿಂ ಧಮ್ಮದೇಸನಂ;
ತತೋ ಜಾತಪಸಾದಾಹಂ, ಉಪೇಸಿಂ ಸರಣಂ ಜಿನಂ.
‘‘ತತೋ ವಿನಯಧಾರೀನಂ, ಅಗ್ಗಂ ವಣ್ಣೇಸಿ ನಾಯಕೋ;
ಭಿಕ್ಖುನಿಂ ಲಜ್ಜಿನಿಂ ತಾದಿಂ, ಕಪ್ಪಾಕಪ್ಪವಿಸಾರದಂ.
‘‘ತದಾ ¶ ಮುದಿತಚಿತ್ತಾಹಂ, ತಂ ಠಾನಮಭಿಕಙ್ಖಿನೀ;
ನಿಮನ್ತೇತ್ವಾ ದಸಬಲಂ, ಸಸಙ್ಘಂ ಲೋಕನಾಯಕಂ.
‘‘ಭೋಜಯಿತ್ವಾನ ಸತ್ತಾಹಂ, ದದಿತ್ವಾವ ತಿಚೀವರಂ [ದದಿತ್ವಾ ಪತ್ತಚೀವರಂ (ಸ್ಯಾ.)];
ನಿಪಚ್ಚ ಸಿರಸಾ ಪಾದೇ, ಇದಂ ವಚನಮಬ್ರವಿಂ.
‘‘‘ಯಾ ತಯಾ ವಣ್ಣಿತಾ ವೀರ, ಇತೋ ಅಟ್ಠಮಕೇ ಮುನಿ;
ತಾದಿಸಾಹಂ ಭವಿಸ್ಸಾಮಿ, ಯದಿ ಸಿಜ್ಝತಿ ನಾಯಕ’.
‘‘ತದಾ ¶ ಅವೋಚ ಮಂ ಸತ್ಥಾ, ‘ಭದ್ದೇ ಮಾ ಭಾಯಿ ಅಸ್ಸಸ;
ಅನಾಗತಮ್ಹಿ ಅದ್ಧಾನೇ, ಲಚ್ಛಸೇ ತಂ ಮನೋರಥಂ.
‘‘‘ಸತಸಹಸ್ಸಿತೋ ¶ ಕಪ್ಪೇ, ಓಕ್ಕಾಕಕುಲಸಮ್ಭವೋ;
ಗೋತಮೋ ನಾಮ ಗೋತ್ತೇನ, ಸತ್ಥಾ ಲೋಕೇ ಭವಿಸ್ಸತಿ.
‘‘‘ತಸ್ಸ ಧಮ್ಮೇಸು ದಾಯಾದಾ, ಓರಸಾ ಧಮ್ಮನಿಮ್ಮಿತಾ;
ಪಟಾಚಾರಾತಿ ನಾಮೇನ, ಹೇಸ್ಸತಿ ಸತ್ಥು ಸಾವಿಕಾ’.
‘‘ತದಾಹಂ ಮುದಿತಾ [ಪಮುದೀ (ಕ.)] ಹುತ್ವಾ, ಯಾವಜೀವಂ ತದಾ ಜಿನಂ;
ಮೇತ್ತಚಿತ್ತಾ ಪರಿಚರಿಂ, ಸಸಙ್ಘಂ ಲೋಕನಾಯಕಂ.
‘‘ತೇನ ಕಮ್ಮೇನ ಸುಕತೇನ, ಚೇತನಾಪಣಿಧೀಹಿ ಚ;
ಜಹಿತ್ವಾ ಮಾನುಸಂ ದೇಹಂ, ತಾವತಿಂಸಮಗಚ್ಛಹಂ.
‘‘ಇಮಮ್ಹಿ ಭದ್ದಕೇ ಕಪ್ಪೇ, ಬ್ರಹ್ಮಬನ್ಧು ಮಹಾಯಸೋ;
ಕಸ್ಸಪೋ ನಾಮ ಗೋತ್ತೇನ, ಉಪ್ಪಜ್ಜಿ ವದತಂ ವರೋ.
‘‘ಉಪಟ್ಠಾಕೋ ¶ ಮಹೇಸಿಸ್ಸ, ತದಾ ಆಸಿ ನರಿಸ್ಸರೋ;
ಕಾಸಿರಾಜಾ ಕಿಕೀ ನಾಮ, ಬಾರಾಣಸಿಪುರುತ್ತಮೇ.
‘‘ತಸ್ಸಾಸಿಂ ¶ ತತಿಯಾ ಧೀತಾ, ಭಿಕ್ಖುನೀ ಇತಿ ವಿಸ್ಸುತಾ;
ಧಮ್ಮಂ ಸುತ್ವಾ ಜಿನಗ್ಗಸ್ಸ, ಪಬ್ಬಜ್ಜಂ ಸಮರೋಚಯಿಂ.
‘‘ಅನುಜಾನಿ ನ ನೋ ತಾತೋ, ಅಗಾರೇವ ತದಾ ಮಯಂ;
ವೀಸವಸ್ಸಸಹಸ್ಸಾನಿ, ವಿಚರಿಮ್ಹ ಅತನ್ದಿತಾ.
‘‘ಕೋಮಾರಿಬ್ರಹ್ಮಚರಿಯಂ, ರಾಜಕಞ್ಞಾ ಸುಖೇಧಿತಾ;
ಬುದ್ಧೋಪಟ್ಠಾನನಿರತಾ, ಮುದಿತಾ ಸತ್ತಧೀತರೋ.
‘‘ಸಮಣೀ ಸಮಣಗುತ್ತಾ ಚ, ಭಿಕ್ಖುನೀ ಭಿಕ್ಖುದಾಯಿಕಾ;
ಧಮ್ಮಾ ಚೇವ ಸುಧಮ್ಮಾ ಚ, ಸತ್ತಮೀ ಸಙ್ಘದಾಯಿಕಾ.
‘‘ಅಹಂ ಉಪ್ಪಲವಣ್ಣಾ ಚ, ಖೇಮಾ ಭದ್ದಾ ಚ ಭಿಕ್ಖುನೀ;
ಕಿಸಾಗೋತಮೀ ಧಮ್ಮದಿನ್ನಾ, ವಿಸಾಖಾ ಹೋತಿ ಸತ್ತಮೀ.
‘‘ತೇಹಿ ಕಮ್ಮೇಹಿ ಸುಕತೇಹಿ, ಚೇತನಾಪಣಿಧೀಹಿ ಚ;
ಜಹಿತ್ವಾ ಮಾನುಸಂ ದೇಹಂ, ತಾವತಿಂಸಮಗಚ್ಛಹಂ.
‘‘ಪಚ್ಛಿಮೇ ಚ ಭವೇ ದಾನಿ, ಜಾತಾ ಸೇಟ್ಠಿಕುಲೇ ಅಹಂ;
ಸಾವತ್ಥಿಯಂ ಪುರವರೇ, ಇದ್ಧೇ ಫೀತೇ ಮಹದ್ಧನೇ.
‘‘ಯದಾ ¶ ಚ ಯೋಬ್ಬನೂಪೇತಾ, ವಿತಕ್ಕವಸಗಾ ಅಹಂ;
ನರಂ ಜಾರಪತಿಂ ದಿಸ್ವಾ, ತೇನ ಸದ್ಧಿಂ ಅಗಚ್ಛಹಂ.
‘‘ಏಕಪುತ್ತಪಸೂತಾಹಂ ¶ , ದುತಿಯೋ ಕುಚ್ಛಿಯಾ ಮಮಂ;
ತದಾಹಂ ಮಾತಾಪಿತರೋ, ಓಕ್ಖಾಮೀತಿ [ಇಕ್ಖಾಮೀತಿ (ಸ್ಯಾ.), ದಕ್ಖಾಮೀತಿ (ಸೀ.)] ಸುನಿಚ್ಛಿತಾ.
‘‘ನಾರೋಚೇಸಿಂ ಪತಿಂ ಮಯ್ಹಂ, ತದಾ ತಮ್ಹಿ ಪವಾಸಿತೇ;
ಏಕಿಕಾ ನಿಗ್ಗತಾ ಗೇಹಾ, ಗನ್ತುಂ ಸಾವತ್ಥಿಮುತ್ತಮಂ.
‘‘ತತೋ ¶ ಮೇ ಸಾಮಿ ಆಗನ್ತ್ವಾ, ಸಮ್ಭಾವೇಸಿ ಪಥೇ ಮಮಂ;
ತದಾ ಮೇ ಕಮ್ಮಜಾ ವಾತಾ, ಉಪ್ಪನ್ನಾ ಅತಿದಾರುಣಾ.
‘‘ಉಟ್ಠಿತೋ ಚ ಮಹಾಮೇಘೋ, ಪಸೂತಿಸಮಯೇ ಮಮ;
ದಬ್ಬತ್ಥಾಯ ತದಾ ಗನ್ತ್ವಾ, ಸಾಮಿ ಸಪ್ಪೇನ ಮಾರಿತೋ.
‘‘ತದಾ ವಿಜಾತದುಕ್ಖೇನ, ಅನಾಥಾ ಕಪಣಾ ಅಹಂ;
ಕುನ್ನದಿಂ ಪೂರಿತಂ ದಿಸ್ವಾ, ಗಚ್ಛನ್ತೀ ಸಕುಲಾಲಯಂ.
‘‘ಬಾಲಂ ¶ ಆದಾಯ ಅತರಿಂ, ಪಾರಕೂಲೇ ಚ ಏಕಕಂ;
ಸಾಯೇತ್ವಾ [ಪಾಯೇತ್ವಾ (ಸ್ಯಾ.), ಪಾತೇತ್ವಾ (ಕ.)] ಬಾಲಕಂ ಪುತ್ತಂ, ಇತರಂ ತರಣಾಯಹಂ.
‘‘ನಿವತ್ತಾ ಉಕ್ಕುಸೋ ಹಾಸಿ, ತರುಣಂ ವಿಲಪನ್ತಕಂ;
ಇತರಞ್ಚ ವಹೀ ಸೋತೋ, ಸಾಹಂ ಸೋಕಸಮಪ್ಪಿತಾ.
‘‘ಸಾವತ್ಥಿನಗರಂ ಗನ್ತ್ವಾ, ಅಸ್ಸೋಸಿಂ ಸಜನೇ ಮತೇ;
ತದಾ ಅವೋಚಂ ಸೋಕಟ್ಟಾ, ಮಹಾಸೋಕಸಮಪ್ಪಿತಾ.
‘‘ಉಭೋ ಪುತ್ತಾ ಕಾಲಙ್ಕತಾ, ಪನ್ಥೇ ಮಯ್ಹಂ ಪತೀ ಮತೋ;
ಮಾತಾ ಪಿತಾ ಚ ಭಾತಾ ಚ, ಏಕಚಿತಮ್ಹಿ ಡಯ್ಹರೇ.
‘‘ತದಾ ಕಿಸಾ ಚ ಪಣ್ಡು ಚ, ಅನಾಥಾ ದೀನಮಾನಸಾ;
ಇತೋ ತತೋ ಭಮನ್ತೀಹಂ [ಗಚ್ಛನ್ತೀಹಂ (ಸ್ಯಾ.), ಗಮೇನ್ತೀಹಂ (ಕ.)], ಅದ್ದಸಂ ನರಸಾರಥಿಂ.
‘‘ತತೋ ಅವೋಚ ಮಂ ಸತ್ಥಾ, ‘ಪುತ್ತೇ ಮಾ ಸೋಚಿ ಅಸ್ಸಸ;
ಅತ್ತಾನಂ ತೇ ಗವೇಸಸ್ಸು, ಕಿಂ ನಿರತ್ಥಂ ವಿಹಞ್ಞಸಿ.
‘‘‘ನ ಸನ್ತಿ ಪುತ್ತಾ ತಾಣಾಯ, ನ ಞಾತೀ ನಪಿ ಬನ್ಧವಾ;
ಅನ್ತಕೇನಾಧಿಪನ್ನಸ್ಸ, ನತ್ಥಿ ಞಾತೀಸು ತಾಣತಾ’.
‘‘ತಂ ¶ ¶ ಸುತ್ವಾ ಮುನಿನೋ ವಾಕ್ಯಂ, ಪಠಮಂ ಫಲಮಜ್ಝಗಂ;
ಪಬ್ಬಜಿತ್ವಾನ ನಚಿರಂ, ಅರಹತ್ತಮಪಾಪುಣಿಂ.
‘‘ಇದ್ಧೀಸು ¶ ಚ ವಸೀ ಹೋಮಿ, ದಿಬ್ಬಾಯ ಸೋತಧಾತುಯಾ;
ಪರಚಿತ್ತಾನಿ ಜಾನಾಮಿ, ಸತ್ಥುಸಾಸನಕಾರಿಕಾ.
‘‘ಪುಬ್ಬೇನಿವಾಸಂ ಜಾನಾಮಿ, ದಿಬ್ಬಚಕ್ಖು ವಿಸೋಧಿತಂ;
ಖೇಪೇತ್ವಾ ಆಸವೇ ಸಬ್ಬೇ, ವಿಸುದ್ಧಾಸಿಂ ಸುನಿಮ್ಮಲಾ.
‘‘ತತೋಹಂ ವಿನಯಂ ಸಬ್ಬಂ, ಸನ್ತಿಕೇ ಸಬ್ಬದಸ್ಸಿನೋ;
ಉಗ್ಗಹಿಂ ಸಬ್ಬವಿತ್ಥಾರಂ, ಬ್ಯಾಹರಿಞ್ಚ ಯಥಾತಥಂ.
‘‘ಜಿನೋ ತಸ್ಮಿಂ ಗುಣೇ ತುಟ್ಠೋ, ಏತದಗ್ಗೇ ಠಪೇಸಿ ಮಂ;
ಅಗ್ಗಾ ವಿನಯಧಾರೀನಂ, ಪಟಾಚಾರಾವ ಏಕಿಕಾ.
‘‘ಪರಿಚಿಣ್ಣೋ ಮಯಾ ಸತ್ಥಾ, ಕತಂ ಬುದ್ಧಸ್ಸ ಸಾಸನಂ;
ಓಹಿತೋ ಗರುಕೋ ಭಾರೋ, ಭವನೇತ್ತಿ ಸಮೂಹತಾ.
‘‘ಯಸ್ಸತ್ಥಾಯ ಪಬ್ಬಜಿತಾ, ಅಗಾರಸ್ಮಾನಗಾರಿಯಂ;
ಸೋ ಮೇ ಅತ್ಥೋ ಅನುಪ್ಪತ್ತೋ, ಸಬ್ಬಸಂಯೋಜನಕ್ಖಯೋ.
‘‘ಕಿಲೇಸಾ ¶ ಝಾಪಿತಾ ಮಯ್ಹಂ…ಪೇ… ವಿಹರಾಮಿ ಅನಾಸವಾ.
‘‘ಸ್ವಾಗತಂ ವತ ಮೇ ಆಸಿ…ಪೇ… ಕತಂ ಬುದ್ಧಸ್ಸ ಸಾಸನಂ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ¶ ಸುದಂ ಪಟಾಚಾರಾ ಭಿಕ್ಖುನೀ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಪಟಾಚಾರಾಥೇರಿಯಾಪದಾನಂ ದಸಮಂ.
ಏಕೂಪೋಸಥಿಕವಗ್ಗೋ ದುತಿಯೋ.
ತಸ್ಸುದ್ದಾನಂ –
ಏಕೂಪೋಸಥಿಕಾ ಚೇವ, ಸಳಲಾ ಚಾಥ ಮೋದಕಾ;
ಏಕಾಸನಾ ಪಞ್ಚದೀಪಾ, ನಳಮಾಲೀ ಚ ಗೋತಮೀ.
ಖೇಮಾ ಉಪ್ಪಲವಣ್ಣಾ ಚ, ಪಟಾಚಾರಾ ಚ ಭಿಕ್ಖುನೀ;
ಗಾಥಾ ಸತಾನಿ ಪಞ್ಚೇವ, ನವ ಚಾಪಿ ತದುತ್ತರಿ.
೩. ಕುಣ್ಡಲಕೇಸೀವಗ್ಗೋ
೧. ಕುಣ್ಡಲಕೇಸಾಥೇರೀಅಪದಾನಂ
‘‘ಪದುಮುತ್ತರೋ ¶ ¶ ¶ ನಾಮ ಜಿನೋ, ಸಬ್ಬಧಮ್ಮಾನ ಪಾರಗೂ;
ಇತೋ ಸತಸಹಸ್ಸಮ್ಹಿ, ಕಪ್ಪೇ ಉಪ್ಪಜ್ಜಿ ನಾಯಕೋ.
‘‘ತದಾಹಂ ಹಂಸವತಿಯಂ, ಜಾತಾ ಸೇಟ್ಠಿಕುಲೇ ಅಹುಂ;
ನಾನಾರತನಪಜ್ಜೋತೇ, ಮಹಾಸುಖಸಮಪ್ಪಿತಾ.
‘‘ಉಪೇತ್ವಾ ¶ ತಂ ಮಹಾವೀರಂ, ಅಸ್ಸೋಸಿಂ ಧಮ್ಮದೇಸನಂ;
ತತೋ ಜಾತಪ್ಪಸಾದಾಹಂ, ಉಪೇಸಿಂ ಸರಣಂ ಜಿನಂ.
‘‘ತದಾ ಮಹಾಕಾರುಣಿಕೋ, ಪದುಮುತ್ತರನಾಮಕೋ;
ಖಿಪ್ಪಾಭಿಞ್ಞಾನಮಗ್ಗನ್ತಿ, ಠಪೇಸಿ ಭಿಕ್ಖುನಿಂ ಸುಭಂ.
‘‘ತಂ ಸುತ್ವಾ ಮುದಿತಾ ಹುತ್ವಾ, ದಾನಂ ದತ್ವಾ ಮಹೇಸಿನೋ;
ನಿಪಚ್ಚ ಸಿರಸಾ ಪಾದೇ, ತಂ ಠಾನಮಭಿಪತ್ಥಯಿಂ.
‘‘ಅನುಮೋದಿ ಮಹಾವೀರೋ, ‘ಭದ್ದೇ ಯಂ ತೇಭಿಪತ್ಥಿತಂ;
ಸಮಿಜ್ಝಿಸ್ಸತಿ ತಂ ಸಬ್ಬಂ, ಸುಖಿನೀ ಹೋಹಿ ನಿಬ್ಬುತಾ.
‘‘‘ಸತಸಹಸ್ಸಿತೋ ಕಪ್ಪೇ, ಓಕ್ಕಾಕಕುಲಸಮ್ಭವೋ;
ಗೋತಮೋ ನಾಮ ಗೋತ್ತೇನ, ಸತ್ಥಾ ಲೋಕೇ ಭವಿಸ್ಸತಿ.
‘‘‘ತಸ್ಸ ಧಮ್ಮೇಸು ದಾಯಾದಾ, ಓರಸಾ ಧಮ್ಮನಿಮ್ಮಿತಾ;
ಭದ್ದಾಕುಣ್ಡಲಕೇಸಾತಿ, ಹೇಸ್ಸತಿ ಸತ್ಥು ಸಾವಿಕಾ’.
‘‘ತೇನ ¶ ಕಮ್ಮೇನ ಸುಕತೇನ, ಚೇತನಾಪಣಿಧೀಹಿ ಚ;
ಜಹಿತ್ವಾ ಮಾನುಸಂ ದೇಹಂ, ತಾವತಿಂಸಮಗಚ್ಛಹಂ.
‘‘ತತೋ ಚುತಾ ಯಾಮಮಗಂ, ತತೋಹಂ ತುಸಿತಂ ಗತಾ;
ತತೋ ಚ ನಿಮ್ಮಾನರತಿಂ, ವಸವತ್ತಿಪುರಂ ತತೋ.
‘‘ಯತ್ಥ ಯತ್ಥೂಪಪಜ್ಜಾಮಿ, ತಸ್ಸ ಕಮ್ಮಸ್ಸ ವಾಹಸಾ;
ತತ್ಥ ತತ್ಥೇವ ರಾಜೂನಂ, ಮಹೇಸಿತ್ತಮಕಾರಯಿಂ.
‘‘ತತೋ ¶ ಚುತಾ ಮನುಸ್ಸೇಸು, ರಾಜೂನಂ ಚಕ್ಕವತ್ತಿನಂ;
ಮಣ್ಡಲೀನಞ್ಚ ರಾಜೂನಂ, ಮಹೇಸಿತ್ತಮಕಾರಯಿಂ.
‘‘ಸಮ್ಪತ್ತಿಂ ¶ ಅನುಭೋತ್ವಾನ, ದೇವೇಸು ಮಾನುಸೇಸು ಚ;
ಸಬ್ಬತ್ಥ ಸುಖಿತಾ ಹುತ್ವಾ, ನೇಕಕಪ್ಪೇಸು ಸಂಸರಿಂ.
‘‘ಇಮಮ್ಹಿ ಭದ್ದಕೇ ಕಪ್ಪೇ, ಬ್ರಹ್ಮಬನ್ಧು ಮಹಾಯಸೋ;
ಕಸ್ಸಪೋ ನಾಮ ಗೋತ್ತೇನ, ಉಪ್ಪಜ್ಜಿ ವದತಂ ವರೋ.
‘‘ಉಪಟ್ಠಾಕೋ ಮಹೇಸಿಸ್ಸ, ತದಾ ಆಸಿ ನರಿಸ್ಸರೋ;
ಕಾಸಿರಾಜಾ ಕಿಕೀ ನಾಮ, ಬಾರಾಣಸಿಪುರುತ್ತಮೇ.
‘‘ತಸ್ಸ ಧೀತಾ ಚತುತ್ಥಾಸಿಂ, ಭಿಕ್ಖುದಾಯೀತಿ ವಿಸ್ಸುತಾ;
ಧಮ್ಮಂ ಸುತ್ವಾ ಜಿನಗ್ಗಸ್ಸ, ಪಬ್ಬಜ್ಜಂ ಸಮರೋಚಯಿಂ.
‘‘ಅನುಜಾನಿ ನ ನೋ ತಾತೋ, ಅಗಾರೇವ ತದಾ ಮಯಂ;
ವೀಸವಸ್ಸಸಹಸ್ಸಾನಿ, ವಿಚರಿಮ್ಹ ಅತನ್ದಿತಾ.
‘‘ಕೋಮಾರಿಬ್ರಹ್ಮಚರಿಯಂ, ರಾಜಕಞ್ಞಾ ಸುಖೇಧಿತಾ;
ಬುದ್ಧೋಪಟ್ಠಾನನಿರತಾ, ಮುದಿತಾ ಸತ್ತ ಧೀತರೋ.
‘‘ಸಮಣೀ ¶ ಸಮಣಗುತ್ತಾ ಚ, ಭಿಕ್ಖುನೀ ಭಿಕ್ಖುದಾಯಿಕಾ;
ಧಮ್ಮಾ ಚೇವ ಸುಧಮ್ಮಾ ಚ, ಸತ್ತಮೀ ಸಙ್ಘದಾಯಿಕಾ.
‘‘ಖೇಮಾ ¶ ಉಪ್ಪಲವಣ್ಣಾ ಚ, ಪಟಾಚಾರಾ ಅಹಂ ತದಾ;
ಕಿಸಾಗೋತಮೀ ಧಮ್ಮದಿನ್ನಾ, ವಿಸಾಖಾ ಹೋತಿ ಸತ್ತಮೀ.
‘‘ತೇಹಿ ಕಮ್ಮೇಹಿ ಸುಕತೇಹಿ, ಚೇತನಾಪಣಿಧೀಹಿ ಚ;
ಜಹಿತ್ವಾ ಮಾನುಸಂ ದೇಹಂ, ತಾವತಿಂಸಮಗಚ್ಛಹಂ.
‘‘ಪಚ್ಛಿಮೇ ಚ ಭವೇ ದಾನಿ, ಗಿರಿಬ್ಬಜಪುರುತ್ತಮೇ;
ಜಾತಾ ಸೇಟ್ಠಿಕುಲೇ ಫೀತೇ, ಯದಾಹಂ ಯೋಬ್ಬನೇ ಠಿತಾ.
‘‘ಚೋರಂ ವಧತ್ಥಂ ನೀಯನ್ತಂ, ದಿಸ್ವಾ ರತ್ತಾ ತಹಿಂ ಅಹಂ;
ಪಿತಾ ಮೇ ತಂ ಸಹಸ್ಸೇನ, ಮೋಚಯಿತ್ವಾ ವಧಾ ತತೋ.
‘‘ಅದಾಸಿ ತಸ್ಸ ಮಂ ತಾತೋ, ವಿದಿತ್ವಾನ ಮನಂ ಮಮ;
ತಸ್ಸಾಹಮಾಸಿಂ ವಿಸಟ್ಠಾ, ಅತೀವ ದಯಿತಾ ಹಿತಾ.
‘‘ಸೋ ಮೇ ಭೂಸನಲೋಭೇನ, ಬಲಿಮಜ್ಝಾಸಯೋ [ಖಲಿತಜ್ಝಾಸಯೋ (ಸೀ.), ಬಲಿಂ ಪಚ್ಚಾಹರಂ (ಸ್ಯಾ.), ಮಾಲಪಚ್ಛಾಹತಂ (ಪೀ.)] ದಿಸೋ;
ಚೋರಪ್ಪಪಾತಂ ನೇತ್ವಾನ, ಪಬ್ಬತಂ ಚೇತಯೀ ವಧಂ.
‘‘ತದಾಹಂ ¶ ¶ ಪಣಮಿತ್ವಾನ, ಸತ್ತುಕಂ ಸುಕತಞ್ಜಲೀ;
ರಕ್ಖನ್ತೀ ಅತ್ತನೋ ಪಾಣಂ, ಇದಂ ವಚನಮಬ್ರವಿಂ.
‘‘‘ಇದಂ ಸುವಣ್ಣಕೇಯೂರಂ, ಮುತ್ತಾ ವೇಳುರಿಯಾ ಬಹೂ;
ಸಬ್ಬಂ ಹರಸ್ಸು [ವರಸ್ಸು (ಕ.)] ಭದ್ದನ್ತೇ, ಮಞ್ಚ ದಾಸೀತಿ ಸಾವಯ’.
‘‘‘ಓರೋಪಯಸ್ಸು ಕಲ್ಯಾಣೀ, ಮಾ ಬಾಳ್ಹಂ ಪರಿದೇವಸಿ;
ನ ಚಾಹಂ ಅಭಿಜಾನಾಮಿ, ಅಹನ್ತ್ವಾ ಧನಮಾಭತಂ’.
‘‘‘ಯತೋ ¶ ಸರಾಮಿ ಅತ್ತಾನಂ, ಯತೋ ಪತ್ತೋಸ್ಮಿ ವಿಞ್ಞುತಂ;
ನ ಚಾಹಂ ಅಭಿಜಾನಾಮಿ, ಅಞ್ಞಂ ಪಿಯತರಂ ತಯಾ’.
‘‘‘ಏಹಿ ತಂ ಉಪಗೂಹಿಸ್ಸಂ, ಕತ್ವಾನ ತಂ ಪದಕ್ಖಿಣಂ;
ನ ಚ ದಾನಿ ಪುನೋ ಅತ್ಥಿ [ತಂ ವನ್ದಾಮಿ ಪುನ ನತ್ಥಿ (ಸ್ಯಾ.)], ಮಮ ತುಯ್ಹಞ್ಚ ಸಙ್ಗಮೋ.
‘‘‘ನ ಹಿ ಸಬ್ಬೇಸು ಠಾನೇಸು, ಪುರಿಸೋ ಹೋತಿ ಪಣ್ಡಿತೋ;
ಇತ್ಥೀಪಿ ಪಣ್ಡಿತಾ ಹೋತಿ, ತತ್ಥ ತತ್ಥ ವಿಚಕ್ಖಣಾ.
‘‘‘ನ ಹಿ ಸಬ್ಬೇಸು ಠಾನೇಸು, ಪುರಿಸೋ ಹೋತಿ ಪಣ್ಡಿತೋ;
ಇತ್ಥೀಪಿ ಪಣ್ಡಿತಾ ಹೋತಿ, ಲಹುಂ ಅತ್ಥವಿಚಿನ್ತಿಕಾ.
‘‘‘ಲಹುಞ್ಚ ¶ ವತ ಖಿಪ್ಪಞ್ಚ, ನಿಕಟ್ಠೇ [ನೇಕತ್ಥೇ (ಸೀ. ಸ್ಯಾ.)] ಸಮಚೇತಯಿಂ;
ಮಿಗಂ ಉಣ್ಣಾ ಯಥಾ ಏವಂ [ಚಿತ್ತಪುಣ್ಣಾಯ ತಾನೇವ (ಸ್ಯಾ.), ಮಿಗಂ ಪುಣ್ಣಾಯ ತೇನೇವ (ಪೀ.)], ತದಾಹಂ ಸತ್ತುಕಂ ವಧಿಂ.
‘‘‘ಯೋ ಚ ಉಪ್ಪತಿತಂ ಅತ್ಥಂ, ನ ಖಿಪ್ಪಮನುಬುಜ್ಝತಿ;
ಸೋ ಹಞ್ಞತೇ ಮನ್ದಮತಿ, ಚೋರೋವ ಗಿರಿಗಬ್ಭರೇ.
‘‘‘ಯೋ ಚ ಉಪ್ಪತಿತಂ ಅತ್ಥಂ, ಖಿಪ್ಪಮೇವ ನಿಬೋಧತಿ;
ಮುಚ್ಚತೇ ಸತ್ತುಸಮ್ಬಾಧಾ, ತದಾಹಂ ಸತ್ತುಕಾ ಯಥಾ’.
‘‘ತದಾಹಂ ಪಾತಯಿತ್ವಾನ, ಗಿರಿದುಗ್ಗಮ್ಹಿ ಸತ್ತುಕಂ;
ಸನ್ತಿಕಂ ಸೇತವತ್ಥಾನಂ, ಉಪೇತ್ವಾ ಪಬ್ಬಜಿಂ ಅಹಂ.
‘‘ಸಣ್ಡಾಸೇನ ಚ ಕೇಸೇ ಮೇ, ಲುಞ್ಚಿತ್ವಾ ಸಬ್ಬಸೋ ತದಾ;
ಪಬ್ಬಜಿತ್ವಾನ ಸಮಯಂ, ಆಚಿಕ್ಖಿಂಸು ನಿರನ್ತರಂ.
‘‘ತತೋ ತಂ ಉಗ್ಗಹೇತ್ವಾಹಂ, ನಿಸೀದಿತ್ವಾನ ಏಕಿಕಾ;
ಸಮಯಂ ತಂ ವಿಚಿನ್ತೇಸಿಂ, ಸುವಾನೋ ಮಾನುಸಂ ಕರಂ.
‘‘ಛಿನ್ನಂ ¶ ¶ ಗಯ್ಹ ಸಮೀಪೇ ಮೇ, ಪಾತಯಿತ್ವಾ ಅಪಕ್ಕಮಿ;
ದಿಸ್ವಾ ನಿಮಿತ್ತಮಲಭಿಂ, ಹತ್ಥಂ ತಂ ಪುಳವಾಕುಲಂ.
‘‘ತತೋ ¶ ಉಟ್ಠಾಯ ಸಂವಿಗ್ಗಾ, ಅಪುಚ್ಛಿಂ ಸಹಧಮ್ಮಿಕೇ;
ತೇ ಅವೋಚುಂ ವಿಜಾನನ್ತಿ, ತಂ ಅತ್ಥಂ ಸಕ್ಯಭಿಕ್ಖವೋ.
‘‘ಸಾಹಂ ತಮತ್ಥಂ ಪುಚ್ಛಿಸ್ಸಂ, ಉಪೇತ್ವಾ ಬುದ್ಧಸಾವಕೇ;
ತೇ ಮಮಾದಾಯ ಗಚ್ಛಿಂಸು, ಬುದ್ಧಸೇಟ್ಠಸ್ಸ ಸನ್ತಿಕಂ.
‘‘ಸೋ ಮೇ ಧಮ್ಮಮದೇಸೇಸಿ, ಖನ್ಧಾಯತನಧಾತುಯೋ;
ಅಸುಭಾನಿಚ್ಚದುಕ್ಖಾತಿ, ಅನತ್ತಾತಿ ಚ ನಾಯಕೋ.
‘‘ತಸ್ಸ ಧಮ್ಮಂ ಸುಣಿತ್ವಾಹಂ, ಧಮ್ಮಚಕ್ಖುಂ ವಿಸೋಧಯಿಂ;
ತತೋ ವಿಞ್ಞಾತಸದ್ಧಮ್ಮಾ, ಪಬ್ಬಜ್ಜಂ ಉಪಸಮ್ಪದಂ.
‘‘ಆಯಾಚಿತೋ ತದಾ ಆಹ, ‘ಏಹಿ ಭದ್ದೇ’ತಿ ನಾಯಕೋ;
ತದಾಹಂ ಉಪಸಮ್ಪನ್ನಾ, ಪರಿತ್ತಂ ತೋಯಮದ್ದಸಂ.
‘‘ಪಾದಪಕ್ಖಾಲನೇನಾಹಂ ¶ , ಞತ್ವಾ ಸಉದಯಬ್ಬಯಂ;
ತಥಾ ಸಬ್ಬೇಪಿ ಸಙ್ಖಾರೇ, ಈದಿಸಂ ಚಿನ್ತಯಿಂ [ಸಙ್ಖಾರಾ, ಇತಿ ಸಂಚಿನ್ತಯಿಂ (ಸೀ. ಸ್ಯಾ. ಪೀ.)] ತದಾ.
‘‘ತತೋ ಚಿತ್ತಂ ವಿಮುಚ್ಚಿ ಮೇ, ಅನುಪಾದಾಯ ಸಬ್ಬಸೋ;
ಖಿಪ್ಪಾಭಿಞ್ಞಾನಮಗ್ಗಂ ಮೇ, ತದಾ ಪಞ್ಞಾಪಯೀ ಜಿನೋ.
‘‘ಇದ್ಧೀಸು ಚ ವಸೀ ಹೋಮಿ, ದಿಬ್ಬಾಯ ಸೋತಧಾತುಯಾ;
ಪರಚಿತ್ತಾನಿ ಜಾನಾಮಿ, ಸತ್ಥುಸಾಸನಕಾರಿಕಾ.
‘‘ಪುಬ್ಬೇನಿವಾಸಂ ಜಾನಾಮಿ, ದಿಬ್ಬಚಕ್ಖು ವಿಸೋಧಿತಂ;
ಖೇಪೇತ್ವಾ ಆಸವೇ ಸಬ್ಬೇ, ವಿಸುದ್ಧಾಸಿಂ ಸುನಿಮ್ಮಲಾ.
‘‘ಪರಿಚಿಣ್ಣೋ ¶ ಮಯಾ ಸತ್ಥಾ, ಕತಂ ಬುದ್ಧಸ್ಸ ಸಾಸನಂ;
ಓಹಿತೋ ಗರುಕೋ ಭಾರೋ, ಭವನೇತ್ತಿ ಸಮೂಹತಾ.
‘‘ಯಸ್ಸತ್ಥಾಯ ಪಬ್ಬಜಿತಾ, ಅಗಾರಸ್ಮಾನಗಾರಿಯಂ;
ಸೋ ಮೇ ಅತ್ಥೋ ಅನುಪ್ಪತ್ತೋ, ಸಬ್ಬಸಂಯೋಜನಕ್ಖಯೋ.
‘‘ಅತ್ಥಧಮ್ಮನಿರುತ್ತೀಸು, ಪಟಿಭಾನೇ ತಥೇವ ಚ;
ಞಾಣಂ ಮೇ ವಿಮಲಂ ಸುದ್ಧಂ, ಬುದ್ಧಸೇಟ್ಠಸ್ಸ ಸಾಸನೇ.
‘‘ಕಿಲೇಸಾ ¶ ಝಾಪಿತಾ ಮಯ್ಹಂ, ಭವಾ ಸಬ್ಬೇ ಸಮೂಹತಾ;
ನಾಗೀವ ಬನ್ಧನಂ ಛೇತ್ವಾ, ವಿಹರಾಮಿ ಅನಾಸವಾ.
‘‘ಸ್ವಾಗತಂ ವತ ಮೇ ಆಸಿ, ಮಮ ಬುದ್ಧಸ್ಸ ಸನ್ತಿಕೇ;
ತಿಸ್ಸೋ ವಿಜ್ಜಾ ಅನುಪ್ಪತ್ತಾ, ಕತಂ ಬುದ್ಧಸ್ಸ ಸಾಸನಂ.
‘‘ಪಟಿಸಮ್ಭಿದಾ ¶ ಚತಸ್ಸೋ, ವಿಮೋಕ್ಖಾಪಿ ಚ ಅಟ್ಠಿಮೇ;
ಛಳಭಿಞ್ಞಾ ಸಚ್ಛಿಕತಾ, ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಭದ್ದಾಕುಣ್ಡಲಕೇಸಾ ಭಿಕ್ಖುನೀ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಕುಣ್ಡಲಕೇಸಾಥೇರಿಯಾಪದಾನಂ ಪಠಮಂ.
೨. ಕಿಸಾಗೋತಮೀಥೇರೀಅಪದಾನಂ
‘‘ಪದುಮುತ್ತರೋ ನಾಮ ಜಿನೋ, ಸಬ್ಬಧಮ್ಮಾನ ಪಾರಗೂ;
ಇತೋ ಸತಸಹಸ್ಸಮ್ಹಿ, ಕಪ್ಪೇ ಉಪ್ಪಜ್ಜಿ ನಾಯಕೋ.
‘‘ತದಾಹಂ ¶ ಹಂಸವತಿಯಂ, ಜಾತಾ ಅಞ್ಞತರೇ ಕುಲೇ;
ಉಪೇತ್ವಾ ತಂ ನರವರಂ, ಸರಣಂ ಸಮುಪಾಗಮಿಂ.
‘‘ಧಮ್ಮಞ್ಚ ತಸ್ಸ ಅಸ್ಸೋಸಿಂ, ಚತುಸಚ್ಚೂಪಸಞ್ಹಿತಂ;
ಮಧುರಂ ಪರಮಸ್ಸಾದಂ, ವಟ್ಟಸನ್ತಿಸುಖಾವಹಂ [ಚಿತ್ತಸನ್ತಿ … (ಸ್ಯಾ.)].
‘‘ತದಾ ಚ ಭಿಕ್ಖುನಿಂ ವೀರೋ, ಲೂಖಚೀವರಧಾರಿನಿಂ;
ಠಪೇನ್ತೋ ಏತದಗ್ಗಮ್ಹಿ, ವಣ್ಣಯೀ ಪುರಿಸುತ್ತಮೋ.
‘‘ಜನೇತ್ವಾನಪ್ಪಕಂ ¶ ಪೀತಿಂ, ಸುತ್ವಾ ಭಿಕ್ಖುನಿಯಾ ಗುಣೇ;
ಕಾರಂ ಕತ್ವಾನ ಬುದ್ಧಸ್ಸ, ಯಥಾಸತ್ತಿ ಯಥಾಬಲಂ.
‘‘ನಿಪಚ್ಚ ಮುನಿವರಂ ತಂ, ತಂ ಠಾನಮಭಿಪತ್ಥಯಿಂ;
ತದಾನುಮೋದಿ ಸಮ್ಬುದ್ಧೋ, ಠಾನಲಾಭಾಯ ನಾಯಕೋ.
‘‘‘ಸತಸಹಸ್ಸಿತೋ ಕಪ್ಪೇ, ಓಕ್ಕಾಕಕುಲಸಮ್ಭವೋ;
ಗೋತಮೋ ನಾಮ ಗೋತ್ತೇನ, ಸತ್ಥಾ ಲೋಕೇ ಭವಿಸ್ಸತಿ.
‘‘‘ತಸ್ಸ ಧಮ್ಮೇಸು ದಾಯಾದಾ, ಓರಸಾ ಧಮ್ಮನಿಮ್ಮಿತಾ;
ಕಿಸಾಗೋತಮೀ [ಗೋತಮೀ ನಾಮ (ಸೀ. ಕ.)] ನಾಮೇನ, ಹೇಸ್ಸತಿ ಸತ್ಥು ಸಾವಿಕಾ’.
‘‘ತಂ ¶ ಸುತ್ವಾ ಮುದಿತಾ ಹುತ್ವಾ, ಯಾವಜೀವಂ ತದಾ ಜಿನಂ;
ಮೇತ್ತಚಿತ್ತಾ ಪರಿಚರಿಂ, ಪಚ್ಚಯೇಹಿ ವಿನಾಯಕಂ.
‘‘ತೇನ ಕಮ್ಮೇನ ಸುಕತೇನ, ಚೇತನಾಪಣಿಧೀಹಿ ಚ;
ಜಹಿತ್ವಾ ಮಾನುಸಂ ದೇಹಂ, ತಾವತಿಂಸಮಗಚ್ಛಹಂ.
‘‘ಇಮಮ್ಹಿ ¶ ಭದ್ದಕೇ ಕಪ್ಪೇ, ಬ್ರಹ್ಮಬನ್ಧು ಮಹಾಯಸೋ;
ಕಸ್ಸಪೋ ನಾಮ ಗೋತ್ತೇನ, ಉಪ್ಪಜ್ಜಿ ವದತಂ ವರೋ.
‘‘ಉಪಟ್ಠಾಕೋ ¶ ಮಹೇಸಿಸ್ಸ, ತದಾ ಆಸಿ ನರಿಸ್ಸರೋ;
ಕಾಸಿರಾಜಾ ಕಿಕೀ ನಾಮ, ಬಾರಾಣಸಿಪುರುತ್ತಮೇ.
‘‘ಪಞ್ಚಮೀ ತಸ್ಸ ಧೀತಾಸಿಂ, ಧಮ್ಮಾ ನಾಮೇನ ವಿಸ್ಸುತಾ;
ಧಮ್ಮಂ ಸುತ್ವಾ ಜಿನಗ್ಗಸ್ಸ, ಪಬ್ಬಜ್ಜಂ ಸಮರೋಚಯಿಂ.
‘‘ಅನುಜಾನಿ ನ ನೋ ತಾತೋ, ಅಗಾರೇವ ತದಾ ಮಯಂ;
ವೀಸವಸ್ಸಸಹಸ್ಸಾನಿ, ವಿಚರಿಮ್ಹ ಅತನ್ದಿತಾ.
‘‘ಕೋಮಾರಿಬ್ರಹ್ಮಚರಿಯಂ, ರಾಜಕಞ್ಞಾ ಸುಖೇಧಿತಾ;
ಬುದ್ಧೋಪಟ್ಠಾನನಿರತಾ, ಮುದಿತಾ ಸತ್ತ ಧೀತರೋ.
‘‘ಸಮಣೀ ಸಮಣಗುತ್ತಾ ಚ, ಭಿಕ್ಖುನೀ ಭಿಕ್ಖುದಾಯಿಕಾ;
ಧಮ್ಮಾ ಚೇವ ಸುಧಮ್ಮಾ ಚ, ಸತ್ತಮೀ ಸಙ್ಘದಾಯಿಕಾ.
‘‘ಖೇಮಾ ಉಪ್ಪಲವಣ್ಣಾ ಚ, ಪಟಾಚಾರಾ ಚ ಕುಣ್ಡಲಾ;
ಅಹಞ್ಚ ಧಮ್ಮದಿನ್ನಾ ಚ, ವಿಸಾಖಾ ಹೋತಿ ಸತ್ತಮೀ.
‘‘ತೇಹಿ ಕಮ್ಮೇಹಿ ಸುಕತೇಹಿ, ಚೇತನಾಪಣಿಧೀಹಿ ಚ;
ಜಹಿತ್ವಾ ಮಾನುಸಂ ದೇಹಂ, ತಾವತಿಂಸಮಗಚ್ಛಹಂ.
‘‘ಪಚ್ಛಿಮೇ ಚ ಭವೇ ದಾನಿ, ಜಾತಾ ಸೇಟ್ಠಿಕುಲೇ ಅಹಂ;
ದುಗ್ಗತೇ ಅಧನೇ ನಟ್ಠೇ [ನೀಚೇ (ಸ್ಯಾ.), ನಿದ್ಧೇ (ಪೀ.)], ಗತಾ ಚ ಸಧನಂ ಕುಲಂ.
‘‘ಪತಿಂ ಠಪೇತ್ವಾ ಸೇಸಾ ಮೇ, ದೇಸ್ಸನ್ತಿ ಅಧನಾ ಇತಿ;
ಯದಾ ಚ ಪಸೂತಾ [ಸಸುತಾ (ಸೀ. ಪೀ.)] ಆಸಿಂ, ಸಬ್ಬೇಸಂ ದಯಿತಾ ತದಾ.
‘‘ಯದಾ ¶ ಸೋ ತರುಣೋ ಭದ್ದೋ [ಪುತ್ತೋ (ಸೀ. ಸ್ಯಾ.)], ಕೋಮಲಕೋ [ಕೋಮಾರಕೋ (ಸ್ಯಾ.), ಕೋಮಲಙ್ಗೋ (ಸೀ. ಪೀ.)] ಸುಖೇಧಿತೋ;
ಸಪಾಣಮಿವ ಕನ್ತೋ ಮೇ, ತದಾ ಯಮವಸಂ ಗತೋ.
‘‘ಸೋಕಟ್ಟಾ ¶ ದೀನವದನಾ ¶ , ಅಸ್ಸುನೇತ್ತಾ ರುದಮ್ಮುಖಾ;
ಮತಂ ಕುಣಪಮಾದಾಯ, ವಿಲಪನ್ತೀ ಗಮಾಮಹಂ.
‘‘ತದಾ ಏಕೇನ ಸನ್ದಿಟ್ಠಾ, ಉಪೇತ್ವಾಭಿಸಕ್ಕುತ್ತಮಂ;
ಅವೋಚಂ ದೇಹಿ ಭೇಸಜ್ಜಂ, ಪುತ್ತಸಞ್ಜೀವನನ್ತಿ ಭೋ.
‘‘ನ ವಿಜ್ಜನ್ತೇ ಮತಾ ಯಸ್ಮಿಂ, ಗೇಹೇ ಸಿದ್ಧತ್ಥಕಂ ತತೋ;
ಆಹರಾತಿ ಜಿನೋ ಆಹ, ವಿನಯೋಪಾಯಕೋವಿದೋ.
‘‘ತದಾ ¶ ಗಮಿತ್ವಾ ಸಾವತ್ಥಿಂ, ನ ಲಭಿಂ ತಾದಿಸಂ ಘರಂ;
ಕುತೋ ಸಿದ್ಧತ್ಥಕಂ ತಸ್ಮಾ, ತತೋ ಲದ್ಧಾ ಸತಿಂ ಅಹಂ.
‘‘ಕುಣಪಂ ಛಡ್ಡಯಿತ್ವಾನ, ಉಪೇಸಿಂ ಲೋಕನಾಯಕಂ;
ದೂರತೋವ ಮಮಂ ದಿಸ್ವಾ, ಅವೋಚ ಮಧುರಸ್ಸರೋ.
‘‘‘ಯೋ ಚ ವಸ್ಸಸತಂ ಜೀವೇ, ಅಪಸ್ಸಂ ಉದಯಬ್ಬಯಂ;
ಏಕಾಹಂ ಜೀವಿತಂ ಸೇಯ್ಯೋ, ಪಸ್ಸತೋ ಉದಯಬ್ಬಯಂ.
‘‘‘ನ ಗಾಮಧಮ್ಮೋ ನಿಗಮಸ್ಸ ಧಮ್ಮೋ, ನ ಚಾಪಿಯಂ ಏಕಕುಲಸ್ಸ ಧಮ್ಮೋ;
ಸಬ್ಬಸ್ಸ ಲೋಕಸ್ಸ ಸದೇವಕಸ್ಸ, ಏಸೇವ ಧಮ್ಮೋ ಯದಿದಂ ಅನಿಚ್ಚತಾ’.
‘‘ಸಾಹಂ ಸುತ್ವಾನಿಮಾ [ಸಹಸುತ್ವಾನಿಮಾ (ಕ.)] ಗಾಥಾ, ಧಮ್ಮಚಕ್ಖುಂ ವಿಸೋಧಯಿಂ;
ತತೋ ವಿಞ್ಞಾತಸದ್ಧಮ್ಮಾ, ಪಬ್ಬಜಿಂ ಅನಗಾರಿಯಂ.
‘‘ತಥಾ ಪಬ್ಬಜಿತಾ ಸನ್ತೀ, ಯುಞ್ಜನ್ತೀ ಜಿನಸಾಸನೇ;
ನ ಚಿರೇನೇವ ಕಾಲೇನ, ಅರಹತ್ತಮಪಾಪುಣಿಂ.
‘‘ಇದ್ಧೀಸು ¶ ಚ ವಸೀ ಹೋಮಿ, ದಿಬ್ಬಾಯ ಸೋತಧಾತುಯಾ;
ಪರಚಿತ್ತಾನಿ ಜಾನಾಮಿ, ಸತ್ಥುಸಾಸನಕಾರಿಕಾ.
‘‘ಪುಬ್ಬೇನಿವಾಸಂ ಜಾನಾಮಿ, ದಿಬ್ಬಚಕ್ಖು ವಿಸೋಧಿತಂ;
ಖೇಪೇತ್ವಾ ಆಸವೇ ಸಬ್ಬೇ, ವಿಸುದ್ಧಾಸಿಂ ಸುನಿಮ್ಮಲಾ.
‘‘ಪರಿಚಿಣ್ಣೋ ಮಯಾ ಸತ್ಥಾ, ಕತಂ ಬುದ್ಧಸ್ಸ ಸಾಸನಂ;
ಓಹಿತೋ ಗರುಕೋ ಭಾರೋ, ಭವನೇತ್ತಿ ಸಮೂಹತಾ.
‘‘ಯಸ್ಸತ್ಥಾಯ ¶ ¶ ಪಬ್ಬಜಿತಾ, ಅಗಾರಸ್ಮಾನಗಾರಿಯಂ;
ಸೋ ಮೇ ಅತ್ಥೋ ಅನುಪ್ಪತ್ತೋ, ಸಬ್ಬಸಂಯೋಜನಕ್ಖಯೋ.
‘‘ಅತ್ಥಧಮ್ಮನಿರುತ್ತೀಸು, ಪಟಿಭಾನೇ ತಥೇವ ಚ;
ಞಾಣಂ ಮೇ ವಿಮಲಂ ಸುದ್ಧಂ, ಬುದ್ಧಸೇಟ್ಠಸ್ಸ ವಾಹಸಾ.
‘‘ಸಙ್ಕಾರಕೂಟಾ ಆಹಿತ್ವಾ, ಸುಸಾನಾ ರಥಿಯಾಪಿ ಚ;
ತತೋ ಸಙ್ಘಾಟಿಕಂ ಕತ್ವಾ, ಲೂಖಂ ಧಾರೇಮಿ ಚೀವರಂ.
‘‘ಜಿನೋ ತಸ್ಮಿಂ ಗುಣೇ ತುಟ್ಠೋ, ಲೂಖಚೀವರಧಾರಣೇ;
ಠಪೇಸಿ ಏತದಗ್ಗಮ್ಹಿ, ಪರಿಸಾಸು ವಿನಾಯಕೋ.
‘‘ಕಿಲೇಸಾ ¶ ಝಾಪಿತಾ ಮಯ್ಹಂ…ಪೇ… ವಿಹರಾಮಿ ಅನಾಸವಾ.
‘‘ಸ್ವಾಗತಂ ವತ ಮೇ ಆಸಿ…ಪೇ… ಕತಂ ಬುದ್ಧಸ್ಸ ಸಾಸನಂ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ¶ ಸುದಂ ಕಿಸಾಗೋತಮೀ ಭಿಕ್ಖುನೀ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಕಿಸಾಗೋತಮೀಥೇರಿಯಾಪದಾನಂ ದುತಿಯಂ.
೩. ಧಮ್ಮದಿನ್ನಾಥೇರೀಅಪದಾನಂ
‘‘ಪದುಮುತ್ತರೋ ನಾಮ ಜಿನೋ, ಸಬ್ಬಧಮ್ಮಾನ ಪಾರಗೂ;
ಇತೋ ಸತಸಹಸ್ಸಮ್ಹಿ, ಕಪ್ಪೇ ಉಪ್ಪಜ್ಜಿ ನಾಯಕೋ.
‘‘ತದಾಹಂ ಹಂಸವತಿಯಂ, ಕುಲೇ ಅಞ್ಞತರೇ ಅಹುಂ;
ಪರಕಮ್ಮಕಾರೀ ಆಸಿಂ, ನಿಪಕಾ ಸೀಲಸಂವುತಾ.
‘‘ಪದುಮುತ್ತರಬುದ್ಧಸ್ಸ, ಸುಜಾತೋ ಅಗ್ಗಸಾವಕೋ;
ವಿಹಾರಾ ಅಭಿನಿಕ್ಖಮ್ಮ, ಪಿಣ್ಡಪಾತಾಯ [ಪತ್ತಮಾದಾಯ (ಕ.)] ಗಚ್ಛತಿ.
‘‘ಘಟಂ ಗಹೇತ್ವಾ ಗಚ್ಛನ್ತೀ, ತದಾ ಉದಕಹಾರಿಕಾ;
ತಂ ದಿಸ್ವಾ ಅದದಂ ಪೂಪಂ, ಪಸನ್ನಾ ಸೇಹಿ ಪಾಣಿಭಿ.
‘‘ಪಟಿಗ್ಗಹೇತ್ವಾ ತತ್ಥೇವ, ನಿಸಿನ್ನೋ ಪರಿಭುಞ್ಜಿ ಸೋ;
ತತೋ ನೇತ್ವಾನ ತಂ ಗೇಹಂ, ಅದಾಸಿಂ ತಸ್ಸ ಭೋಜನಂ.
‘‘ತತೋ ¶ ಮೇ ಅಯ್ಯಕೋ ತುಟ್ಠೋ, ಅಕರೀ ಸುಣಿಸಂ ಸಕಂ;
ಸಸ್ಸುಯಾ ಸಹ ಗನ್ತ್ವಾನ, ಸಮ್ಬುದ್ಧಂ ಅಭಿವಾದಯಿಂ.
‘‘ತದಾ ಸೋ ಧಮ್ಮಕಥಿಕಂ, ಭಿಕ್ಖುನಿಂ ಪರಿಕಿತ್ತಯಂ;
ಠಪೇಸಿ ಏತದಗ್ಗಮ್ಹಿ, ತಂ ಸುತ್ವಾ ಮುದಿತಾ ಅಹಂ.
‘‘ನಿಮನ್ತಯಿತ್ವಾ ¶ ಸುಗತಂ, ಸಸಙ್ಘಂ ಲೋಕನಾಯಕಂ;
ಮಹಾದಾನಂ ದದಿತ್ವಾನ, ತಂ ಠಾನಮಭಿಪತ್ಥಯಿಂ.
‘‘ತತೋ ¶ ಮಂ ಸುಗತೋ ಆಹ, ಘನನಿನ್ನಾದಸುಸ್ಸರೋ [ಘನನಿನ್ನಾದಸುಸ್ಸರೇ (ಕ.)];
‘ಮಮುಪಟ್ಠಾನನಿರತೇ, ಸಸಙ್ಘಪರಿವೇಸಿಕೇ.
‘‘‘ಸದ್ಧಮ್ಮಸ್ಸವನೇ ¶ ಯುತ್ತೇ, ಗುಣವದ್ಧಿತಮಾನಸೇ;
ಭದ್ದೇ ಭವಸ್ಸು ಮುದಿತಾ, ಲಚ್ಛಸೇ ಪಣಿಧೀಫಲಂ.
‘‘‘ಸತಸಹಸ್ಸಿತೋ ಕಪ್ಪೇ, ಓಕ್ಕಾಕಕುಲಸಮ್ಭವೋ;
ಗೋತಮೋ ನಾಮ ಗೋತ್ತೇನ, ಸತ್ಥಾ ಲೋಕೇ ಭವಿಸ್ಸತಿ.
‘‘‘ತಸ್ಸ ಧಮ್ಮೇಸು ದಾಯಾದಾ, ಓರಸಾ ಧಮ್ಮನಿಮ್ಮಿತಾ;
ಧಮ್ಮದಿನ್ನಾತಿ ನಾಮೇನ, ಹೇಸ್ಸತಿ ಸತ್ಥು ಸಾವಿಕಾ’.
‘‘ತಂ ಸುತ್ವಾ ಮುದಿತಾ ಹುತ್ವಾ, ಯಾವಜೀವಂ ಮಹಾಮುನಿಂ;
ಮೇತ್ತಚಿತ್ತಾ ಪರಿಚರಿಂ, ಪಚ್ಚಯೇಹಿ ವಿನಾಯಕಂ.
‘‘ತೇನ ಕಮ್ಮೇನ ಸುಕತೇನ, ಚೇತನಾಪಣಿಧೀಹಿ ಚ;
ಜಹಿತ್ವಾ ಮಾನುಸಂ ದೇಹಂ, ತಾವತಿಂಸಮಗಚ್ಛಹಂ.
‘‘ಇಮಮ್ಹಿ ಭದ್ದಕೇ ಕಪ್ಪೇ, ಬ್ರಹ್ಮಬನ್ಧು ಮಹಾಯಸೋ;
ಕಸ್ಸಪೋ ನಾಮ ಗೋತ್ತೇನ, ಉಪ್ಪಜ್ಜಿ ವದತಂ ವರೋ.
‘‘ಉಪಟ್ಠಾಕೋ ಮಹೇಸಿಸ್ಸ, ತದಾ ಆಸಿ ನರಿಸ್ಸರೋ;
ಕಾಸಿರಾಜಾ ಕಿಕೀ ನಾಮ, ಬಾರಾಣಸಿಪುರುತ್ತಮೇ.
‘‘ಛಟ್ಠಾ ತಸ್ಸಾಸಹಂ ಧೀತಾ, ಸುಧಮ್ಮಾ ಇತಿ ವಿಸ್ಸುತಾ;
ಧಮ್ಮಂ ಸುತ್ವಾ ಜಿನಗ್ಗಸ್ಸ, ಪಬ್ಬಜ್ಜಂ ಸಮರೋಚಯಿಂ.
‘‘ಅನುಜಾನಿ ನ ನೋ ತಾತೋ, ಅಗಾರೇವ ತದಾ ಮಯಂ;
ವೀಸವಸ್ಸಸಹಸ್ಸಾನಿ, ವಿಚರಿಮ್ಹ ಅತನ್ದಿತಾ.
ತತಿಯಂ ಭಾಣವಾರಂ.
‘‘ಕೋಮಾರಿಬ್ರಹ್ಮಚರಿಯಂ ¶ ¶ , ರಾಜಕಞ್ಞಾ ಸುಖೇಧಿತಾ;
ಬುದ್ಧೋಪಟ್ಠಾನನಿರತಾ, ಮುದಿತಾ ಸತ್ತ ಧೀತರೋ.
‘‘ಸಮಣೀ ಸಮಣಗುತ್ತಾ ಚ, ಭಿಕ್ಖುನೀ ಭಿಕ್ಖುದಾಯಿಕಾ;
ಧಮ್ಮಾ ಚೇವ ಸುಧಮ್ಮಾ ಚ, ಸತ್ತಮೀ ಸಙ್ಘದಾಯಿಕಾ.
‘‘ಖೇಮಾ ಉಪ್ಪಲವಣ್ಣಾ ಚ, ಪಟಾಚಾರಾ ಚ ಕುಣ್ಡಲಾ;
ಗೋತಮೀ ಚ ಅಹಞ್ಚೇವ, ವಿಸಾಖಾ ಹೋತಿ ಸತ್ತಮೀ.
‘‘ತೇಹಿ ಕಮ್ಮೇಹಿ ಸುಕತೇಹಿ, ಚೇತನಾಪಣಿಧೀಹಿ ಚ;
ಜಹಿತ್ವಾ ಮಾನುಸಂ ದೇಹಂ, ತಾವತಿಂಸಮಗಚ್ಛಹಂ.
‘‘ಪಚ್ಛಿಮೇ ¶ ¶ ಚ ಭವೇ ದಾನಿ, ಗಿರಿಬ್ಬಜಪುರುತ್ತಮೇ;
ಜಾತಾ ಸೇಟ್ಠಿಕುಲೇ ಫೀತೇ, ಸಬ್ಬಕಾಮಸಮಿದ್ಧಿನೇ.
‘‘ಯದಾ ರೂಪಗುಣೂಪೇತಾ, ಪಠಮೇ ಯೋಬ್ಬನೇ ಠಿತಾ;
ತದಾ ಪರಕುಲಂ ಗನ್ತ್ವಾ, ವಸಿಂ ಸುಖಸಮಪ್ಪಿತಾ.
‘‘ಉಪೇತ್ವಾ ಲೋಕಸರಣಂ, ಸುಣಿತ್ವಾ ಧಮ್ಮದೇಸನಂ;
ಅನಾಗಾಮಿಫಲಂ ಪತ್ತೋ, ಸಾಮಿಕೋ ಮೇ ಸುಬುದ್ಧಿಮಾ.
‘‘ತದಾಹಂ ಅನುಜಾನೇತ್ವಾ, ಪಬ್ಬಜಿಂ ಅನಗಾರಿಯಂ;
ನ ಚಿರೇನೇವ ಕಾಲೇನ, ಅರಹತ್ತಮಪಾಪುಣಿಂ.
‘‘ತದಾ ಉಪಾಸಕೋ ಸೋ ಮಂ, ಉಪಗನ್ತ್ವಾ ಅಪುಚ್ಛಥ;
ಗಮ್ಭೀರೇ ನಿಪುಣೇ ಪಞ್ಹೇ, ತೇ ಸಬ್ಬೇ ಬ್ಯಾಕರಿಂ ಅಹಂ.
‘‘ಜಿನೋ ತಸ್ಮಿಂ ಗುಣೇ ತುಟ್ಠೋ, ಏತದಗ್ಗೇ ಠಪೇಸಿ ಮಂ;
‘ಭಿಕ್ಖುನಿಂ ಧಮ್ಮಕಥಿಕಂ, ನಾಞ್ಞಂ ಪಸ್ಸಾಮಿ ಏದಿಸಿಂ.
‘ಧಮ್ಮದಿನ್ನಾ ¶ ಯಥಾ ಧೀರಾ, ಏವಂ ಧಾರೇಥ ಭಿಕ್ಖವೋ’;
‘‘ಏವಾಹಂ ಪಣ್ಡಿತಾ ಹೋಮಿ [ಜಾತಾ (ಸೀ.), ನಾಮ (ಸ್ಯಾ.)], ನಾಯಕೇನಾನುಕಮ್ಪಿತಾ.
‘‘ಪರಿಚಿಣ್ಣೋ ಮಯಾ ಸತ್ಥಾ, ಕತಂ ಬುದ್ಧಸ್ಸ ಸಾಸನಂ;
ಓಹಿತೋ ಗರುಕೋ ಭಾರೋ, ಭವನೇತ್ತಿ ಸಮೂಹತಾ.
‘‘ಯಸ್ಸತ್ಥಾಯ ಪಬ್ಬಜಿತಾ, ಅಗಾರಸ್ಮಾನಗಾರಿಯಂ;
ಸೋ ಮೇ ಅತ್ಥೋ ಅನುಪ್ಪತ್ತೋ, ಸಬ್ಬಸಂಯೋಜನಕ್ಖಯೋ.
‘‘ಇದ್ಧೀಸು ¶ ಚ ವಸೀ ಹೋಮಿ, ದಿಬ್ಬಾಯ ಸೋತಧಾತುಯಾ;
ಪರಚಿತ್ತಾನಿ ಜಾನಾಮಿ, ಸತ್ಥುಸಾಸನಕಾರಿಕಾ.
‘‘ಪುಬ್ಬೇನಿವಾಸಂ ಜಾನಾಮಿ, ದಿಬ್ಬಚಕ್ಖು ವಿಸೋಧಿತಂ;
ಖೇಪೇತ್ವಾ ಆಸವೇ ಸಬ್ಬೇ, ವಿಸುದ್ಧಾಸಿಂ ಸುನಿಮ್ಮಲಾ.
‘‘ಕಿಲೇಸಾ ಝಾಪಿತಾ ಮಯ್ಹಂ…ಪೇ… ವಿಹರಾಮಿ ಅನಾಸವಾ.
‘‘ಸ್ವಾಗತಂ ವತ ಮೇ ಆಸಿ…ಪೇ… ಕತಂ ಬುದ್ಧಸ್ಸ ಸಾಸನಂ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಧಮ್ಮದಿನ್ನಾ ಭಿಕ್ಖುನೀ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಧಮ್ಮದಿನ್ನಾಥೇರಿಯಾಪದಾನಂ ತತಿಯಂ.
೪. ಸಕುಲಾಥೇರೀಅಪದಾನಂ
‘‘ಪದುಮುತ್ತರೋ ¶ ¶ ನಾಮ ಜಿನೋ, ಸಬ್ಬಧಮ್ಮಾನ ಪಾರಗೂ;
ಇತೋ ಸತಸಹಸ್ಸಮ್ಹಿ, ಕಪ್ಪೇ ಉಪ್ಪಜ್ಜಿ ನಾಯಕೋ.
‘‘ಹಿತಾಯ ಸಬ್ಬಸತ್ತಾನಂ, ಸುಖಾಯ ವದತಂ ವರೋ;
ಅತ್ಥಾಯ ಪುರಿಸಾಜಞ್ಞೋ, ಪಟಿಪನ್ನೋ ಸದೇವಕೇ.
‘‘ಯಸಗ್ಗಪತ್ತೋ ¶ ಸಿರಿಮಾ, ಕಿತ್ತಿವಣ್ಣಗತೋ ಜಿನೋ;
ಪೂಜಿತೋ ಸಬ್ಬಲೋಕಸ್ಸ, ದಿಸಾಸಬ್ಬಾಸು ವಿಸ್ಸುತೋ.
‘‘ಉತ್ತಿಣ್ಣವಿಚಿಕಿಚ್ಛೋ ಸೋ, ವೀತಿವತ್ತಕಥಂಕಥೋ;
ಸಮ್ಪುಣ್ಣಮನಸಙ್ಕಪ್ಪೋ, ಪತ್ತೋ ಸಮ್ಬೋಧಿಮುತ್ತಮಂ.
‘‘ಅನುಪ್ಪನ್ನಸ್ಸ ಮಗ್ಗಸ್ಸ, ಉಪ್ಪಾದೇತಾ ನರುತ್ತಮೋ;
ಅನಕ್ಖಾತಞ್ಚ ಅಕ್ಖಾಸಿ, ಅಸಞ್ಜಾತಞ್ಚ ಸಞ್ಜನೀ.
‘‘ಮಗ್ಗಞ್ಞೂ ಚ ಮಗ್ಗವಿದೂ, ಮಗ್ಗಕ್ಖಾಯೀ ನರಾಸಭೋ;
ಮಗ್ಗಸ್ಸ ಕುಸಲೋ ಸತ್ಥಾ, ಸಾರಥೀನಂ ವರುತ್ತಮೋ.
‘‘ಮಹಾಕಾರುಣಿಕೋ ಸತ್ಥಾ, ಧಮ್ಮಂ ದೇಸೇಸಿ ನಾಯಕೋ;
ನಿಮುಗ್ಗೇ ಕಾಮಪಙ್ಕಮ್ಹಿ, ಸಮುದ್ಧರತಿ ಪಾಣಿನೇ.
‘‘ತದಾಹಂ ಹಂಸವತಿಯಂ, ಜಾತಾ ಖತ್ತಿಯನನ್ದನಾ;
ಸುರೂಪಾ ಸಧನಾ ಚಾಪಿ, ದಯಿತಾ ಚ ಸಿರೀಮತೀ.
‘‘ಆನನ್ದಸ್ಸ ¶ ಮಹಾರಞ್ಞೋ, ಧೀತಾ ಪರಮಸೋಭಣಾ;
ವೇಮಾತಾ [ವೇಮಾತು (ಸೀ.)] ಭಗಿನೀ ಚಾಪಿ, ಪದುಮುತ್ತರನಾಮಿನೋ.
‘‘ರಾಜಕಞ್ಞಾಹಿ ¶ ಸಹಿತಾ, ಸಬ್ಬಾಭರಣಭೂಸಿತಾ;
ಉಪಾಗಮ್ಮ ಮಹಾವೀರಂ, ಅಸ್ಸೋಸಿಂ ಧಮ್ಮದೇಸನಂ.
‘‘ತದಾ ಹಿ ಸೋ ಲೋಕಗರು, ಭಿಕ್ಖುನಿಂ ದಿಬ್ಬಚಕ್ಖುಕಂ;
ಕಿತ್ತಯಂ ಪರಿಸಾಮಜ್ಝೇ [ಚತುಪರಿಸಾಯ ಮಜ್ಝೇ (ಸ್ಯಾ.)], ಅಗ್ಗಟ್ಠಾನೇ ಠಪೇಸಿ ತಂ.
‘‘ಸುಣಿತ್ವಾ ತಮಹಂ ಹಟ್ಠಾ, ದಾನಂ ದತ್ವಾನ ಸತ್ಥುನೋ;
ಪೂಜಿತ್ವಾನ ಚ ಸಮ್ಬುದ್ಧಂ, ದಿಬ್ಬಚಕ್ಖುಂ ಅಪತ್ಥಯಿಂ.
‘‘ತತೋ ಅವೋಚ ಮಂ ಸತ್ಥಾ, ‘ನನ್ದೇ ಲಚ್ಛಸಿ ಪತ್ಥಿತಂ;
ಪದೀಪಧಮ್ಮದಾನಾನಂ, ಫಲಮೇತಂ ಸುನಿಚ್ಛಿತಂ.
‘‘‘ಸತಸಹಸ್ಸಿತೋ ¶ ಕಪ್ಪೇ, ಓಕ್ಕಾಕಕುಲಸಮ್ಭವೋ;
ಗೋತಮೋ ನಾಮ ಗೋತ್ತೇನ, ಸತ್ಥಾ ಲೋಕೇ ಭವಿಸ್ಸತಿ.
‘‘‘ತಸ್ಸ ಧಮ್ಮೇಸು ದಾಯಾದಾ, ಓರಸಾ ಧಮ್ಮನಿಮ್ಮಿತಾ;
ಸಕುಲಾ ನಾಮ ನಾಮೇನ [ಸಕುಲಾತಿ ಚ ನಾಮೇನ (ಸ್ಯಾ.)], ಹೇಸ್ಸತಿ ಸತ್ಥು ಸಾವಿಕಾ’.
‘‘ತೇನ ¶ ಕಮ್ಮೇನ ಸುಕತೇನ, ಚೇತನಾಪಣಿಧೀಹಿ ಚ;
ಜಹಿತ್ವಾ ಮಾನುಸಂ ದೇಹಂ, ತಾವತಿಂಸಮಗಚ್ಛಹಂ.
‘‘ಇಮಮ್ಹಿ ಭದ್ದಕೇ ಕಪ್ಪೇ, ಬ್ರಹ್ಮಬನ್ಧು ಮಹಾಯಸೋ;
ಕಸ್ಸಪೋ ನಾಮ ಗೋತ್ತೇನ, ಉಪ್ಪಜ್ಜಿ ವದತಂ ವರೋ.
‘‘ಪರಿಬ್ಬಾಜಕಿನೀ ಆಸಿಂ, ತದಾಹಂ ಏಕಚಾರಿನೀ;
ಭಿಕ್ಖಾಯ ವಿಚರಿತ್ವಾನ, ಅಲಭಿಂ ತೇಲಮತ್ತಕಂ.
‘‘ತೇನ ದೀಪಂ ಪದೀಪೇತ್ವಾ, ಉಪಟ್ಠಿಂ ಸಬ್ಬಸಂವರಿಂ;
ಚೇತಿಯಂ ದ್ವಿಪದಗ್ಗಸ್ಸ [ದಿಪದಗ್ಗಸ್ಸ (ಸೀ. ಸ್ಯಾ. ಪೀ.)], ವಿಪ್ಪಸನ್ನೇನ ಚೇತಸಾ.
‘‘ತೇನ ¶ ಕಮ್ಮೇನ ಸುಕತೇನ, ಚೇತನಾಪಣಿಧೀಹಿ ಚ;
ಜಹಿತ್ವಾ ಮಾನುಸಂ ದೇಹಂ, ತಾವತಿಂಸಮಗಚ್ಛಹಂ.
‘‘ಯತ್ಥ ಯತ್ಥೂಪಪಜ್ಜಾಮಿ, ತಸ್ಸ ಕಮ್ಮಸ್ಸ ವಾಹಸಾ;
ಪಜ್ಜಲನ್ತಿ [ಸಞ್ಜಲನ್ತಿ (ಸ್ಯಾ. ಕ.), ಸಂಚರನ್ತಿ (ಪೀ.)] ಮಹಾದೀಪಾ, ತತ್ಥ ತತ್ಥ ಗತಾಯ ಮೇ.
‘‘ತಿರೋಕುಟ್ಟಂ ¶ ತಿರೋಸೇಲಂ, ಸಮತಿಗ್ಗಯ್ಹ ಪಬ್ಬತಂ;
ಪಸ್ಸಾಮಹಂ ಯದಿಚ್ಛಾಮಿ, ದೀಪದಾನಸ್ಸಿದಂ ಫಲಂ.
‘‘ವಿಸುದ್ಧನಯನಾ ಹೋಮಿ, ಯಸಸಾ ಚ ಜಲಾಮಹಂ;
ಸದ್ಧಾಪಞ್ಞಾವತೀ ಚೇವ, ದೀಪದಾನಸ್ಸಿದಂ ಫಲಂ.
‘‘ಪಚ್ಛಿಮೇ ಚ ಭವೇ ದಾನಿ, ಜಾತಾ ವಿಪ್ಪಕುಲೇ ಅಹಂ;
ಪಹೂತಧನಧಞ್ಞಮ್ಹಿ, ಮುದಿತೇ ರಾಜಪೂಜಿತೇ.
‘‘ಅಹಂ ಸಬ್ಬಙ್ಗಸಮ್ಪನ್ನಾ, ಸಬ್ಬಾಭರಣಭೂಸಿತಾ;
ಪುರಪ್ಪವೇಸೇ ಸುಗತಂ, ವಾತಪಾನೇ ಠಿತಾ ಅಹಂ.
‘‘ದಿಸ್ವಾ ಜಲನ್ತಂ ಯಸಸಾ, ದೇವಮನುಸ್ಸಸಕ್ಕತಂ;
ಅನುಬ್ಯಞ್ಜನಸಮ್ಪನ್ನಂ, ಲಕ್ಖಣೇಹಿ ವಿಭೂಸಿತಂ.
‘‘ಉದಗ್ಗಚಿತ್ತಾ ಸುಮನಾ, ಪಬ್ಬಜ್ಜಂ ಸಮರೋಚಯಿಂ;
ನ ಚಿರೇನೇವ ಕಾಲೇನ, ಅರಹತ್ತಮಪಾಪುಣಿಂ.
‘‘ಇದ್ಧೀಸು ¶ ಚ ವಸೀ ಹೋಮಿ, ದಿಬ್ಬಾಯ ಸೋತಧಾತುಯಾ;
ಪರಚಿತ್ತಾನಿ ಜಾನಾಮಿ, ಸತ್ಥುಸಾಸನಕಾರಿಕಾ.
‘‘ಪುಬ್ಬೇನಿವಾಸಂ ಜಾನಾಮಿ, ದಿಬ್ಬಚಕ್ಖು ವಿಸೋಧಿತಂ;
ಖೇಪೇತ್ವಾ ಆಸವೇ ಸಬ್ಬೇ, ವಿಸುದ್ಧಾಸಿಂ ಸುನಿಮ್ಮಲಾ.
‘‘ಪರಿಚಿಣ್ಣೋ ¶ ಮಯಾ ಸತ್ಥಾ, ಕತಂ ಬುದ್ಧಸ್ಸ ಸಾಸನಂ;
ಓಹಿತೋ ಗರುಕೋ ಭಾರೋ, ಭವನೇತ್ತಿ ಸಮೂಹತಾ.
‘‘ಯಸ್ಸತ್ಥಾಯ ¶ ಪಬ್ಬಜಿತಾ, ಅಗಾರಸ್ಮಾನಗಾರಿಯಂ;
ಸೋ ಮೇ ಅತ್ಥೋ ಅನುಪ್ಪತ್ತೋ, ಸಬ್ಬಸಂಯೋಜನಕ್ಖಯೋ.
‘‘ತತೋ ಮಹಾಕಾರುಣಿಕೋ, ಏತದಗ್ಗೇ ಠಪೇಸಿ ಮಂ;
ದಿಬ್ಬಚಕ್ಖುಕಾನಂ ಅಗ್ಗಾ, ಸಕುಲಾತಿ ನರುತ್ತಮೋ.
‘‘ಕಿಲೇಸಾ ಝಾಪಿತಾ ಮಯ್ಹಂ…ಪೇ… ವಿಹರಾಮಿ ಅನಾಸವಾ.
‘‘ಸ್ವಾಗತಂ ವತ ಮೇ ಆಸಿ…ಪೇ… ಕತಂ ಬುದ್ಧಸ್ಸ ಸಾಸನಂ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಸಕುಲಾ ಭಿಕ್ಖುನೀ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಸಕುಲಾಥೇರಿಯಾಪದಾನಂ ಚತುತ್ಥಂ.
೫. ನನ್ದಾಥೇರೀಅಪದಾನಂ
‘‘ಪದುಮುತ್ತರೋ ¶ ನಾಮ ಜಿನೋ, ಸಬ್ಬಧಮ್ಮಾನ ಪಾರಗೂ;
ಇತೋ ಸತಸಹಸ್ಸಮ್ಹಿ, ಕಪ್ಪೇ ಉಪ್ಪಜ್ಜಿ ನಾಯಕೋ.
‘‘ಓವಾದಕೋ ವಿಞ್ಞಾಪಕೋ, ತಾರಕೋ ಸಬ್ಬಪಾಣಿನಂ;
ದೇಸನಾಕುಸಲೋ ಬುದ್ಧೋ, ತಾರೇಸಿ ಜನತಂ ಬಹುಂ.
‘‘ಅನುಕಮ್ಪಕೋ ¶ ಕಾರುಣಿಕೋ, ಹಿತೇಸೀ ಸಬ್ಬಪಾಣಿನಂ;
ಸಮ್ಪತ್ತೇ ತಿತ್ಥಿಯೇ ಸಬ್ಬೇ, ಪಞ್ಚಸೀಲೇ ಪತಿಟ್ಠಪಿ.
‘‘ಏವಂ ನಿರಾಕುಲಂ ಆಸಿ, ಸುಞ್ಞತಂ ತಿತ್ಥಿಯೇಹಿ ಚ;
ವಿಚಿತ್ತಂ ಅರಹನ್ತೇಹಿ, ವಸೀಭೂತೇಹಿ ತಾದಿಭಿ.
‘‘ರತನಾನಟ್ಠಪಞ್ಞಾಸಂ ¶ , ಉಗ್ಗತೋವ ಮಹಾಮುನಿ;
ಕಞ್ಚನಗ್ಘಿಯಸಙ್ಕಾಸೋ, ಬಾತ್ತಿಂಸವರಲಕ್ಖಣೋ.
‘‘ವಸ್ಸಸತಸಹಸ್ಸಾನಿ, ಆಯು ವಿಜ್ಜತಿ ತಾವದೇ;
ತಾವತಾ ತಿಟ್ಠಮಾನೋ ಸೋ, ತಾರೇಸಿ ಜನತಂ ಬಹುಂ.
‘‘ತದಾಹಂ ಹಂಸವತಿಯಂ, ಜಾತಾ ಸೇಟ್ಠಿಕುಲೇ ಅಹುಂ;
ನಾನಾರತನಪಜ್ಜೋತೇ, ಮಹಾಸುಖಸಮಪ್ಪಿತಾ.
‘‘ಉಪೇತ್ವಾ ತಂ ಮಹಾವೀರಂ, ಅಸ್ಸೋಸಿಂ ಧಮ್ಮದೇಸನಂ;
ಅಮತಂ ಪರಮಸ್ಸಾದಂ, ಪರಮತ್ಥನಿವೇದಕಂ.
‘‘ತದಾ ನಿಮನ್ತಯಿತ್ವಾನ, ಸಸಙ್ಘಂ ಲೋಕನಾಯಕಂ;
ದತ್ವಾ ತಸ್ಸ ಮಹಾದಾನಂ, ಪಸನ್ನಾ ಸೇಹಿ ಪಾಣಿಭಿ.
‘‘ಝಾಯಿನೀನಂ ¶ ಭಿಕ್ಖುನೀನಂ, ಅಗ್ಗಟ್ಠಾನಮಪತ್ಥಯಿಂ;
ನಿಪಚ್ಚ ಸಿರಸಾ ಧೀರಂ, ಸಸಙ್ಘಂ ಲೋಕನಾಯಕಂ.
‘‘ತದಾ ಅದನ್ತದಮಕೋ, ತಿಲೋಕಸರಣೋ ಪಭೂ;
ಬ್ಯಾಕಾಸಿ ನರಸಾರಥಿ, ‘ಲಚ್ಛಸೇ ತಂ ಸುಪತ್ಥಿತಂ.
‘‘‘ಸತಸಹಸ್ಸಿತೋ ಕಪ್ಪೇ, ಓಕ್ಕಾಕಕುಲಸಮ್ಭವೋ;
ಗೋತಮೋ ನಾಮ ಗೋತ್ತೇನ, ಸತ್ಥಾ ಲೋಕೇ ಭವಿಸ್ಸತಿ.
‘‘‘ತಸ್ಸ ¶ ಧಮ್ಮೇಸು ದಾಯಾದಾ, ಓರಸಾ ಧಮ್ಮನಿಮ್ಮಿತಾ;
ನನ್ದಾತಿ ನಾಮ ನಾಮೇನ, ಹೇಸ್ಸತಿ ಸತ್ಥು ಸಾವಿಕಾ’.
‘‘ತಂ ¶ ಸುತ್ವಾ ಮುದಿತಾ ಹುತ್ವಾ, ಯಾವಜೀವಂ ತದಾ ಜಿನಂ;
ಮೇತ್ತಚಿತ್ತಾ ಪರಿಚರಿಂ, ಪಚ್ಚಯೇಹಿ ವಿನಾಯಕಂ.
‘‘ತೇನ ಕಮ್ಮೇನ ಸುಕತೇನ, ಚೇತನಾಪಣಿಧೀಹಿ ಚ;
ಜಹಿತ್ವಾ ಮಾನುಸಂ ದೇಹಂ, ತಾವತಿಂಸಮಗಚ್ಛಹಂ.
‘‘ತತೋ ಚುತಾ ಯಾಮಮಗಂ, ತತೋಹಂ ತುಸಿತಂ ಗತಾ [ಅಗಂ (ಸೀ. ಪೀ. ಕ.)];
ತತೋ ಚ ನಿಮ್ಮಾನರತಿಂ, ವಸವತ್ತಿಪುರಂ ತತೋ [ಗತಾ (ಸ್ಯಾ.)].
‘‘ಯತ್ಥ ಯತ್ಥೂಪಪಜ್ಜಾಮಿ, ತಸ್ಸ ಕಮ್ಮಸ್ಸ ವಾಹಸಾ;
ತತ್ಥ ತತ್ಥೇವ ರಾಜೂನಂ, ಮಹೇಸಿತ್ತಮಕಾರಯಿಂ.
‘‘ತತೋ ಚುತಾ ಮನುಸ್ಸತ್ತೇ, ರಾಜಾನಂ ಚಕ್ಕವತ್ತಿನಂ;
ಮಣ್ಡಲೀನಞ್ಚ ರಾಜೂನಂ, ಮಹೇಸಿತ್ತಮಕಾರಯಿಂ.
‘‘ಸಮ್ಪತ್ತಿಂ ¶ ಅನುಭೋತ್ವಾನ, ದೇವೇಸು ಮನುಜೇಸು ಚ;
ಸಬ್ಬತ್ಥ ಸುಖಿತಾ ಹುತ್ವಾ, ನೇಕಕಪ್ಪೇಸು ಸಂಸರಿಂ.
‘‘ಪಚ್ಛಿಮೇ ಭವೇ ಸಮ್ಪತ್ತೇ, ಸುರಮ್ಮೇ [ಪುರಸ್ಮಿಂ (ಸ್ಯಾ.)] ಕಪಿಲವ್ಹಯೇ;
ರಞ್ಞೋ ಸುದ್ಧೋದನಸ್ಸಾಹಂ, ಧೀತಾ ಆಸಿಂ ಅನಿನ್ದಿತಾ.
‘‘ಸಿರಿಯಾ [ಸಿರಿಂವ (ಸೀ.), ರಂಸಿರಿವ (ಸ್ಯಾ.)] ರೂಪಿನಿಂ ದಿಸ್ವಾ, ನನ್ದಿತಂ ಆಸಿ ತಂ ಕುಲಂ;
ತೇನ ನನ್ದಾತಿ ಮೇ ನಾಮಂ, ಸುನ್ದರಂ ಪವರಂ ಅಹು.
‘‘ಯುವತೀನಞ್ಚ ಸಬ್ಬಾಸಂ, ಕಲ್ಯಾಣೀತಿ ಚ ವಿಸ್ಸುತಾ;
ತಸ್ಮಿಮ್ಪಿ ನಗರೇ ರಮ್ಮೇ, ಠಪೇತ್ವಾ ತಂ ಯಸೋಧರಂ.
‘‘ಜೇಟ್ಠೋ ¶ ಭಾತಾ ತಿಲೋಕಗ್ಗೋ, ಪಚ್ಛಿಮೋ [ಮಜ್ಝಿಮೋ (ಪೀ.)] ಅರಹಾ ತಥಾ;
ಏಕಾಕಿನೀ ಗಹಟ್ಠಾಹಂ, ಮಾತರಾ ಪರಿಚೋದಿತಾ.
‘‘‘ಸಾಕಿಯಮ್ಹಿ ¶ ಕುಲೇ ಜಾತಾ, ಪುತ್ತೇ ಬುದ್ಧಾನುಜಾ ತುವಂ;
ನನ್ದೇನಪಿ ವಿನಾ ಭೂತಾ, ಅಗಾರೇ ಕಿಂ ನು ಅಚ್ಛಸಿ.
‘‘‘ಜರಾವಸಾನಂ ಯೋಬ್ಬಞ್ಞಂ, ರೂಪಂ ಅಸುಚಿಸಮ್ಮತಂ;
ರೋಗನ್ತಮಪಿಚಾರೋಗ್ಯಂ, ಜೀವಿತಂ ಮರಣನ್ತಿಕಂ.
‘‘‘ಇದಮ್ಪಿ ತೇ ಸುಭಂ ರೂಪಂ, ಸಸೀಕನ್ತಂ ಮನೋಹರಂ;
ಭೂಸನಾನಂ ಅಲಙ್ಕಾರಂ, ಸಿರಿಸಙ್ಘಾಟಸನ್ನಿಭಂ.
‘‘‘ಪುಞ್ಜಿತಂ ¶ ಲೋಕಸಾರಂವ, ನಯನಾನಂ ರಸಾಯನಂ;
ಪುಞ್ಞಾನಂ ಕಿತ್ತಿಜನನಂ, ಉಕ್ಕಾಕಕುಲನನ್ದನಂ.
‘‘‘ನ ಚಿರೇನೇವ ಕಾಲೇನ, ಜರಾ ಸಮಧಿಸೇಸ್ಸತಿ [ಸಮಭಿಭೋಸ್ಸತಿ (ಸೀ. ಸ್ಯಾ.), ಸಮಧಿಹೇಸ್ಸತಿ (ಪೀ.)];
ವಿಹಾಯ ಗೇಹಂ ಕಾರುಞ್ಞೇ [ಕಾರುಞ್ಞೇ (ಸೀ. ಪೀ.), ಪಾರಯ್ಹಿಂ (ಸ್ಯಾ.)], ಚರ ಧಮ್ಮಮನಿನ್ದಿತೇ’.
‘‘ಸುತ್ವಾಹಂ ಮಾತು ವಚನಂ, ಪಬ್ಬಜಿಂ ಅನಗಾರಿಯಂ;
ದೇಹೇನ ನ ತು ಚಿತ್ತೇನ, ರೂಪಯೋಬ್ಬನಲಾಳಿತಾ.
‘‘ಮಹತಾ ಚ ಪಯತ್ತೇನ, ಝಾನಜ್ಝೇನ ಪರಂ ಮಮ;
ಕಾತುಞ್ಚ ವದತೇ ಮಾತಾ, ನ ಚಾಹಂ ತತ್ಥ ಉಸ್ಸುಕಾ.
‘‘ತತೋ ಮಹಾಕಾರುಣಿಕೋ, ದಿಸ್ವಾ ಮಂ ಕಾಮಲಾಲಸಂ [ಕಮಲಾನನಂ (ಸ್ಯಾ.)];
ನಿಬ್ಬಿನ್ದನತ್ಥಂ ರೂಪಸ್ಮಿಂ, ಮಮ ಚಕ್ಖುಪಥೇ ಜಿನೋ.
‘‘ಸಕೇನ ಆನುಭಾವೇನ, ಇತ್ಥಿಂ ಮಾಪೇಸಿ ಸೋಭಿನಿಂ;
ದಸ್ಸನೀಯಂ ಸುರುಚಿರಂ, ಮಮತೋಪಿ ಸುರೂಪಿನಿಂ.
‘‘ತಮಹಂ ¶ ¶ ವಿಮ್ಹಿತಾ ದಿಸ್ವಾ, ಅತಿವಿಮ್ಹಿತದೇಹಿನಿಂ;
ಚಿನ್ತಯಿಂ ಸಫಲಂ ಮೇತಿ, ನೇತ್ತಲಾಭಞ್ಚ ಮಾನುಸಂ.
‘‘ತಮಹಂ ಏಹಿ ಸುಭಗೇ, ಯೇನತ್ಥೋ ತಂ ವದೇಹಿ ಮೇ;
ಕುಲಂ ತೇ ನಾಮಗೋತ್ತಞ್ಚ, ವದ ಮೇ ಯದಿ ತೇ ಪಿಯಂ.
‘ನ ¶ ವಞ್ಚಕಾಲೋ ಸುಭಗೇ [ಪಞ್ಹಕಾಲೋ ಸುಭಣೇ (ಸೀ. ಸ್ಯಾ. ಪೀ.)], ಉಚ್ಛಙ್ಗೇ ಮಂ ನಿವಾಸಯ;
ಸೀದನ್ತೀವ ಮಮಙ್ಗಾನಿ, ಪಸುಪ್ಪಯ ಮುಹುತ್ತಕಂ’.
‘‘ತತೋ ಸೀಸಂ ಮಮಙ್ಕೇ ಸಾ, ಕತ್ವಾ ಸಯಿ ಸುಲೋಚನಾ;
ತಸ್ಸಾ ನಲಾಟೇ ಪತಿತಾ, ಲುದ್ಧಾ [ಲೂತಾ (ಸ್ಯಾ.)] ಪರಮದಾರುಣಾ.
‘‘ಸಹ ತಸ್ಸಾ ನಿಪಾತೇನ, ಪಿಳಕಾ ಉಪಪಜ್ಜಥ;
ಪಗ್ಘರಿಂಸು ಪಭಿನ್ನಾ ಚ, ಕುಣಪಾ ಪುಬ್ಬಲೋಹಿತಾ.
‘‘ಪಭಿನ್ನಂ ವದನಞ್ಚಾಪಿ, ಕುಣಪಂ ಪೂತಿಗನ್ಧನಂ;
ಉದ್ಧುಮಾತಂ ವಿನಿಲಞ್ಚ, ಪುಬ್ಬಞ್ಚಾಪಿ ಸರೀರಕಂ.
‘‘ಸಾ ಪವೇದಿತಸಬ್ಬಙ್ಗೀ, ನಿಸ್ಸಸನ್ತೀ ಮುಹುಂ ಮುಹುಂ;
ವೇದಯನ್ತೀ ಸಕಂ ದುಕ್ಖಂ, ಕರುಣಂ ಪರಿದೇವಯಿ.
‘‘‘ದುಕ್ಖೇನ ¶ ದುಕ್ಖಿತಾ ಹೋಮಿ, ಫುಸಯನ್ತಿ ಚ ವೇದನಾ;
ಮಹಾದುಕ್ಖೇ ನಿಮುಗ್ಗಮ್ಹಿ, ಸರಣಂ ಹೋಹಿ ಮೇ ಸಖೀ’.
‘‘‘ಕುಹಿಂ ವದನಸೋಭಂ ತೇ, ಕುಹಿಂ ತೇ ತುಙ್ಗನಾಸಿಕಾ;
ತಮ್ಬಬಿಮ್ಬವರೋಟ್ಠಂ ತೇ, ವದನಂ ತೇ ಕುಹಿಂ ಗತಂ.
‘‘‘ಕುಹಿಂ ಸಸೀನಿಭಂ ವಣ್ಣಂ, ಕಮ್ಬುಗೀವಾ ಕುಹಿಂ ಗತಾ;
ದೋಳಾಲೋಲಾವ [ದಾಮಾಮಾಲಞ್ಚ (ಸ್ಯಾ.), ದೋಲೋಲುಲ್ಲಾವ (ಕ.)] ತೇ ಕಣ್ಣಾ, ವೇವಣ್ಣಂ ಸಮುಪಾಗತಾ.
‘‘‘ಮಕುಳಖಾರಕಾಕಾರಾ ¶ [ಮಕುಲಮ್ಬುರೂಹಾಕಾರಾ (ಸೀ.), ಮಕುಳಪದುಮಾಕಾರಾ (ಸ್ಯಾ.)], ಕಲಿಕಾವ [ಕಲಸಾವ (ಸೀ. ಸ್ಯಾ. ಪೀ.)] ಪಯೋಧರಾ;
ಪಭಿನ್ನಾ ಪೂತಿಕುಣಪಾ, ದುಟ್ಠಗನ್ಧಿತ್ತಮಾಗತಾ.
‘‘‘ವೇದಿಮಜ್ಝಾವ ಸುಸ್ಸೋಣೀ [ತನುಮಜ್ಝಾ ಪುಥುಸ್ಸೋಣೀ (ಸೀ. ಸ್ಯಾ.), ವೇದಿಮಜ್ಝಾ ಪುಥುಸ್ಸೋಣೀ (ಪೀ.)], ಸೂನಾವ ನೀತಕಿಬ್ಬಿಸಾ;
ಜಾತಾ ಅಮೇಜ್ಝಭರಿತಾ, ಅಹೋ ರೂಪಮಸಸ್ಸತಂ.
‘‘‘ಸಬ್ಬಂ ಸರೀರಸಞ್ಜಾತಂ, ಪೂತಿಗನ್ಧಂ ಭಯಾನಕಂ;
ಸುಸಾನಮಿವ ಬೀಭಚ್ಛಂ, ರಮನ್ತೇ ಯತ್ಥ ಬಾಲಿಸಾ’.
‘‘ತದಾ ¶ ಮಹಾಕಾರುಣಿಕೋ, ಭಾತಾ ಮೇ ಲೋಕನಾಯಕೋ;
ದಿಸ್ವಾ ಸಂವಿಗ್ಗಚಿತ್ತಂ ಮಂ, ಇಮಾ ಗಾಥಾ ಅಭಾಸಥ.
‘‘‘ಆತುರಂ ¶ ಕುಣಪಂ ಪೂತಿಂ, ಪಸ್ಸ ನನ್ದೇ ಸಮುಸ್ಸಯಂ;
ಅಸುಭಾಯ ಚಿತ್ತಂ ಭಾವೇಹಿ, ಏಕಗ್ಗಂ ಸುಸಮಾಹಿತಂ.
‘‘‘ಯಥಾ ಇದಂ ತಥಾ ಏತಂ, ಯಥಾ ಏತಂ ತಥಾ ಇದಂ;
ದುಗ್ಗನ್ಧಂ ಪೂತಿಕಂ ವಾತಿ, ಬಾಲಾನಂ ಅಭಿನನ್ದಿತಂ.
‘‘‘ಏವಮೇತಂ ಅವೇಕ್ಖನ್ತೀ, ರತ್ತಿನ್ದಿವಮತನ್ದಿತಾ;
ತತೋ ಸಕಾಯ ಪಞ್ಞಾಯ, ಅಭಿನಿಬ್ಬಿಜ್ಝ ದಕ್ಖಸಿ’.
‘‘ತತೋಹಂ ಅತಿಸಂವಿಗ್ಗಾ, ಸುತ್ವಾ ಗಾಥಾ ಸುಭಾಸಿತಾ;
ತತ್ರಟ್ಠಿತಾವಹಂ ಸನ್ತೀ, ಅರಹತ್ತಮಪಾಪುಣಿಂ.
‘‘ಯತ್ಥ ಯತ್ಥ ನಿಸಿನ್ನಾಹಂ, ಸದಾ ಝಾನಪರಾಯನಾ;
ಜಿನೋ ತಸ್ಮಿಂ ಗುಣೇ ತುಟ್ಠೋ, ಏತದಗ್ಗೇ ಠಪೇಸಿ ಮಂ.
‘‘ಕಿಲೇಸಾ ಝಾಪಿತಾ ಮಯ್ಹಂ…ಪೇ… ವಿಹರಾಮಿ ಅನಾಸವಾ.
‘‘ಸ್ವಾಗತಂ ¶ ¶ ವತ ಮೇ ಆಸಿ…ಪೇ… ಕತಂ ಬುದ್ಧಸ್ಸ ಸಾಸನಂ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ನನ್ದಾ ಭಿಕ್ಖುನೀ ಜನಪದಕಲ್ಯಾಣೀ ಇಮಾ ಗಾಥಾಯೋ ಅಭಾಸಿತ್ಥಾತಿ.
ನನ್ದಾಥೇರಿಯಾಪದಾನಂ ಪಞ್ಚಮಂ.
೬. ಸೋಣಾಥೇರೀಅಪದಾನಂ
‘‘ಪದುಮುತ್ತರೋ ನಾಮ ಜಿನೋ, ಸಬ್ಬಧಮ್ಮಾನ ಪಾರಗೂ;
ಇತೋ ಸತಸಹಸ್ಸಮ್ಹಿ, ಕಪ್ಪೇ ಉಪ್ಪಜ್ಜಿ ನಾಯಕೋ.
‘‘ತದಾ ಸೇಟ್ಠಿಕುಲೇ ಜಾತಾ, ಸುಖಿತಾ ಪೂಜಿತಾ ಪಿಯಾ;
ಉಪೇತ್ವಾ ತಂ ಮುನಿವರಂ, ಅಸ್ಸೋಸಿಂ ಮಧುರಂ ವಚಂ.
‘‘ಆರದ್ಧವೀರಿಯಾನಗ್ಗಂ, ವಣ್ಣೇಸಿ [ವಣ್ಣೇತಿ (ಸ್ಯಾ.)] ಭಿಕ್ಖುನಿಂ ಜಿನೋ;
ತಂ ಸುತ್ವಾ ಮುದಿತಾ ಹುತ್ವಾ, ಕಾರಂ ಕತ್ವಾನ ಸತ್ಥುನೋ.
‘‘ಅಭಿವಾದಿಯ ಸಮ್ಬುದ್ಧಂ, ಠಾನಂ ತಂ ಪತ್ಥಯಿಂ ತದಾ;
ಅನುಮೋದಿ ಮಹಾವೀರೋ, ‘ಸಿಜ್ಝತಂ ಪಣಿಧೀ ತವ.
‘‘‘ಸತಸಹಸ್ಸಿತೋ ¶ ಕಪ್ಪೇ, ಓಕ್ಕಾಕಕುಲಸಮ್ಭವೋ;
ಗೋತಮೋ ನಾಮ ಗೋತ್ತೇನ, ಸತ್ಥಾ ಲೋಕೇ ಭವಿಸ್ಸತಿ.
‘‘‘ತಸ್ಸ ¶ ¶ ಧಮ್ಮೇಸು ದಾಯಾದಾ, ಓರಸಾ ಧಮ್ಮನಿಮ್ಮಿತಾ;
ಸೋಣಾತಿ ನಾಮ ನಾಮೇನ, ಹೇಸ್ಸತಿ ಸತ್ಥು ಸಾವಿಕಾ’.
‘‘ತಂ ಸುತ್ವಾ ಮುದಿತಾ ಹುತ್ವಾ, ಯಾವಜೀವಂ ತದಾ ಜಿನಂ;
ಮೇತ್ತಚಿತ್ತಾ ಪರಿಚರಿಂ, ಪಚ್ಚಯೇಹಿ ವಿನಾಯಕಂ.
‘‘ತೇನ ಕಮ್ಮೇನ ಸುಕತೇನ, ಚೇತನಾಪಣಿಧೀಹಿ ಚ;
ಜಹಿತ್ವಾ ಮಾನುಸಂ ದೇಹಂ, ತಾವತಿಂಸಮಗಚ್ಛಹಂ.
‘‘ಪಚ್ಛಿಮೇ ಚ ಭವೇ ದಾನಿ, ಜಾತಾ ಸೇಟ್ಠಿಕುಲೇ ಅಹಂ;
ಸಾವತ್ಥಿಯಂ ಪುರವರೇ, ಇದ್ಧೇ ಫೀತೇ ಮಹದ್ಧನೇ.
‘‘ಯದಾ ¶ ಚ ಯೋಬ್ಬನಪ್ಪತ್ತಾ, ಗನ್ತ್ವಾ ಪತಿಕುಲಂ ಅಹಂ;
ದಸ ಪುತ್ತಾನಿ ಅಜನಿಂ, ಸುರೂಪಾನಿ ವಿಸೇಸತೋ.
‘‘ಸುಖೇಧಿತಾ ಚ ತೇ ಸಬ್ಬೇ, ಜನನೇತ್ತಮನೋಹರಾ;
ಅಮಿತ್ತಾನಮ್ಪಿ ರುಚಿತಾ, ಮಮ ಪಗೇವ ತೇ ಪಿಯಾ.
‘‘ತತೋ ಮಯ್ಹಂ ಅಕಾಮಾಯ, ದಸಪುತ್ತಪುರಕ್ಖತೋ;
ಪಬ್ಬಜಿತ್ಥ ಸ ಮೇ ಭತ್ತಾ, ದೇವದೇವಸ್ಸ ಸಾಸನೇ.
‘‘ತದೇಕಿಕಾ ವಿಚಿನ್ತೇಸಿಂ, ಜೀವಿತೇನಾಲಮತ್ಥು ಮೇ;
ಚತ್ತಾಯ ಪತಿಪುತ್ತೇಹಿ, ವುಡ್ಢಾಯ ಚ ವರಾಕಿಯಾ.
‘‘ಅಹಮ್ಪಿ ತತ್ಥ ಗಚ್ಛಿಸ್ಸಂ, ಸಮ್ಪತ್ತೋ ಯತ್ಥ ಮೇ ಪತಿ;
ಏವಾಹಂ ಚಿನ್ತಯಿತ್ವಾನ, ಪಬ್ಬಜಿಂ ಅನಗಾರಿಯಂ.
‘‘ತತೋ ಚ ಮಂ ಭಿಕ್ಖುನಿಯೋ, ಏಕಂ ಭಿಕ್ಖುನುಪಸ್ಸಯೇ;
ವಿಹಾಯ ಗಚ್ಛುಮೋವಾದಂ, ತಾಪೇಹಿ ಉದಕಂ ಇತಿ.
‘‘ತದಾ ¶ ಉದಕಮಾಹಿತ್ವಾ, ಓಕಿರಿತ್ವಾನ ಕುಮ್ಭಿಯಾ;
ಚುಲ್ಲೇ ಠಪೇತ್ವಾ ಆಸೀನಾ, ತತೋ ಚಿತ್ತಂ ಸಮಾದಹಿಂ.
‘‘ಖನ್ಧೇ ಅನಿಚ್ಚತೋ ದಿಸ್ವಾ, ದುಕ್ಖತೋ ಚ ಅನತ್ತತೋ;
ಖೇಪೇತ್ವಾ ಆಸವೇ ಸಬ್ಬೇ, ಅರಹತ್ತಮಪಾಪುಣಿಂ.
‘‘ತದಾಗನ್ತ್ವಾ ಭಿಕ್ಖುನಿಯೋ, ಉಣ್ಹೋದಕಮಪುಚ್ಛಿಸುಂ;
ತೇಜೋಧಾತುಮಧಿಟ್ಠಾಯ, ಖಿಪ್ಪಂ ಸನ್ತಾಪಯಿಂ ಜಲಂ.
‘‘ವಿಮ್ಹಿತಾ ¶ ¶ ತಾ ಜಿನವರಂ, ಏತಮತ್ಥಮಸಾವಯುಂ;
ತಂ ಸುತ್ವಾ ಮುದಿತೋ ನಾಥೋ, ಇಮಂ ಗಾಥಂ ಅಭಾಸಥ.
‘‘‘ಯೋ ಚ ವಸ್ಸಸತಂ ಜೀವೇ, ಕುಸೀತೋ ಹೀನವೀರಿಯೋ;
ಏಕಾಹಂ ಜೀವಿತಂ ಸೇಯ್ಯೋ, ವೀರಿಯಮಾರಭತೋ ದಳ್ಹಂ’.
‘‘ಆರಾಧಿತೋ ಮಹಾವೀರೋ, ಮಯಾ ಸುಪ್ಪಟಿಪತ್ತಿಯಾ;
ಆರದ್ಧವೀರಿಯಾನಗ್ಗಂ, ಮಮಾಹ ಸ ಮಹಾಮುನಿ.
‘‘ಕಿಲೇಸಾ ಝಾಪಿತಾ ಮಯ್ಹಂ…ಪೇ… ವಿಹರಾಮಿ ಅನಾಸವಾ.
‘‘ಸ್ವಾಗತಂ ವತ ಮೇ ಆಸಿ…ಪೇ… ಕತಂ ಬುದ್ಧಸ್ಸ ಸಾಸನಂ.
‘‘ಪಟಿಸಮ್ಭಿದಾ ¶ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಸೋಣಾ ಭಿಕ್ಖುನೀ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಸೋಣಾಥೇರಿಯಾಪದಾನಂ ಛಟ್ಠಂ.
೭. ಭದ್ದಕಾಪಿಲಾನೀಥೇರೀಅಪದಾನಂ
‘‘ಪದುಮುತ್ತರೋ ¶ ನಾಮ ಜಿನೋ, ಸಬ್ಬಧಮ್ಮಾನ ಪಾರಗೂ [ಸಬ್ಬಧಮ್ಮೇಸು ಚಕ್ಖುಮಾ (ಸೀ. ಪೀ.)];
ಇತೋ ಸತಸಹಸ್ಸಮ್ಹಿ, ಕಪ್ಪೇ ಉಪ್ಪಜ್ಜಿ ನಾಯಕೋ.
‘‘ತದಾಹು ಹಂಸವತಿಯಂ, ವಿದೇಹೋ ನಾಮ ನಾಮತೋ [ನಾಮಕೋ (ಸ್ಯಾ. ಪೀ.)];
ಸೇಟ್ಠೀ ಪಹೂತರತನೋ, ತಸ್ಸ ಜಾಯಾ ಅಹೋಸಹಂ.
‘‘ಕದಾಚಿ ಸೋ ನರಾದಿಚ್ಚಂ, ಉಪೇಚ್ಚ ಸಪರಿಜ್ಜನೋ;
ಧಮ್ಮಮಸ್ಸೋಸಿ ಬುದ್ಧಸ್ಸ, ಸಬ್ಬದುಕ್ಖಭಯಪ್ಪಹಂ [ದುಕ್ಖಕ್ಖಯಾವಹಂ (ಸ್ಯಾ.)].
‘‘ಸಾವಕಂ ಧುತವಾದಾನಂ, ಅಗ್ಗಂ ಕಿತ್ತೇಸಿ ನಾಯಕೋ;
ಸುತ್ವಾ ಸತ್ತಾಹಿಕಂ ದಾನಂ, ದತ್ವಾ ಬುದ್ಧಸ್ಸ ತಾದಿನೋ.
‘‘ನಿಪಚ್ಚ ಸಿರಸಾ ಪಾದೇ, ತಂ ಠಾನಮಭಿಪತ್ಥಯಿಂ;
ಸ ಹಾಸಯನ್ತೋ ಪರಿಸಂ, ತದಾ ಹಿ ನರಪುಙ್ಗವೋ.
‘‘ಸೇಟ್ಠಿನೋ ಅನುಕಮ್ಪಾಯ, ಇಮಾ ಗಾಥಾ ಅಭಾಸಥ;
‘ಲಚ್ಛಸೇ ಪತ್ಥಿತಂ ಠಾನಂ, ನಿಬ್ಬುತೋ ಹೋಹಿ ಪುತ್ತಕ.
‘‘‘ಸತಸಹಸ್ಸಿತೋ ¶ ¶ ಕಪ್ಪೇ, ಓಕ್ಕಾಕಕುಲಸಮ್ಭವೋ;
ಗೋತಮೋ ನಾಮ ಗೋತ್ತೇನ, ಸತ್ಥಾ ಲೋಕೇ ಭವಿಸ್ಸತಿ.
‘‘‘ತಸ್ಸ ಧಮ್ಮೇಸು ದಾಯಾದೋ, ಓರಸೋ ಧಮ್ಮನಿಮ್ಮಿತೋ;
ಕಸ್ಸಪೋ ನಾಮ ಗೋತ್ತೇನ, ಹೇಸ್ಸತಿ ಸತ್ಥು ಸಾವಕೋ’.
‘‘ತಂ ಸುತ್ವಾ ಮುದಿತೋ ಹುತ್ವಾ, ಯಾವಜೀವಂ ತದಾ ಜಿನಂ;
ಮೇತ್ತಚಿತ್ತೋ ಪರಿಚರಿ, ಪಚ್ಚಯೇಹಿ ವಿನಾಯಕಂ.
‘‘ಸಾಸನಂ ¶ ಜೋತಯಿತ್ವಾನ, ಸೋ ಮದ್ದಿತ್ವಾ ಕುತಿತ್ಥಿಯೇ;
ವೇನೇಯ್ಯಂ ವಿನಯಿತ್ವಾ ಚ, ನಿಬ್ಬುತೋ ಸೋ ಸಸಾವಕೋ.
‘‘ನಿಬ್ಬುತೇ ¶ ತಮ್ಹಿ ಲೋಕಗ್ಗೇ, ಪೂಜನತ್ಥಾಯ ಸತ್ಥುನೋ;
ಞಾತಿಮಿತ್ತೇ ಸಮಾನೇತ್ವಾ, ಸಹ ತೇಹಿ ಅಕಾರಯಿ.
‘‘ಸತ್ತಯೋಜನಿಕಂ ಥೂಪಂ, ಉಬ್ಬಿದ್ಧಂ ರತನಾಮಯಂ;
ಜಲನ್ತಂ ಸತರಂಸಿಂವ, ಸಾಲರಾಜಂವ ಫುಲ್ಲಿತಂ.
‘‘ಸತ್ತಸತಸಹಸ್ಸಾನಿ, ಪಾತಿಯೋ [ಚಾತಿಯೋ (ಸ್ಯಾ.)] ತತ್ಥ ಕಾರಯಿ;
ನಳಗ್ಗೀ ವಿಯ ಜೋತನ್ತೀ [ಜೋತನ್ತೇ (ಸ್ಯಾ. ಪೀ.)], ರತನೇಹೇವ ಸತ್ತಹಿ.
‘‘ಗನ್ಧತೇಲೇನ ಪೂರೇತ್ವಾ, ದೀಪಾನುಜ್ಜಲಯೀ ತಹಿಂ;
ಪೂಜನತ್ಥಾಯ [ಪೂಜತ್ಥಾಯ (ಸೀ. ಕ.)] ಮಹೇಸಿಸ್ಸ, ಸಬ್ಬಭೂತಾನುಕಮ್ಪಿನೋ.
‘‘ಸತ್ತಸತಸಹಸ್ಸಾನಿ, ಪುಣ್ಣಕುಮ್ಭಾನಿ ಕಾರಯಿ;
ರತನೇಹೇವ ಪುಣ್ಣಾನಿ, ಪೂಜನತ್ಥಾಯ ಮಹೇಸಿನೋ.
‘‘ಮಜ್ಝೇ ಅಟ್ಠಟ್ಠಕುಮ್ಭೀನಂ, ಉಸ್ಸಿತಾ ಕಞ್ಚನಗ್ಘಿಯೋ;
ಅತಿರೋಚನ್ತಿ ವಣ್ಣೇನ, ಸರದೇವ ದಿವಾಕರೋ.
‘‘ಚತುದ್ವಾರೇಸು ಸೋಭನ್ತಿ, ತೋರಣಾ ರತನಾಮಯಾ;
ಉಸ್ಸಿತಾ ಫಲಕಾ ರಮ್ಮಾ, ಸೋಭನ್ತಿ ರತನಾಮಯಾ.
‘‘ವಿರೋಚನ್ತಿ ಪರಿಕ್ಖಿತ್ತಾ [ಪರಿಕ್ಖಾಯೋ (ಸ್ಯಾ.)], ಅವಟಂಸಾ ಸುನಿಮ್ಮಿತಾ;
ಉಸ್ಸಿತಾನಿ ಪಟಾಕಾನಿ, ರತನಾನಿ ವಿರೋಚರೇ.
‘‘ಸುರತ್ತಂ ಸುಕತಂ ಚಿತ್ತಂ, ಚೇತಿಯಂ ರತನಾಮಯಂ;
ಅತಿರೋಚತಿ ವಣ್ಣೇನ, ಸಸಞ್ಝೋವ [ಸಸಜ್ಝಾವ (ಸ್ಯಾ. ಕ.), ಸಸಞ್ಜಾವ (ಪೀ.)] ದಿವಾಕರೋ.
‘‘ಥೂಪಸ್ಸ ¶ ¶ ವೇದಿಯೋ ತಿಸ್ಸೋ, ಹರಿತಾಲೇನ ಪೂರಯಿ;
ಏಕಂ ಮನೋಸಿಲಾಯೇಕಂ, ಅಞ್ಜನೇನ ಚ ಏಕಿಕಂ.
‘‘ಪೂಜಂ ¶ ಏತಾದಿಸಂ ರಮ್ಮಂ, ಕಾರೇತ್ವಾ ವರವಾದಿನೋ;
ಅದಾಸಿ ದಾನಂ ಸಙ್ಘಸ್ಸ, ಯಾವಜೀವಂ ಯಥಾಬಲಂ.
‘‘ಸಹಾವ ಸೇಟ್ಠಿನಾ ತೇನ, ತಾನಿ ಪುಞ್ಞಾನಿ ಸಬ್ಬಸೋ;
ಯಾವಜೀವಂ ಕರಿತ್ವಾನ, ಸಹಾವ ಸುಗತಿಂ ಗತಾ.
‘‘ಸಮ್ಪತ್ತಿಯೋನುಭೋತ್ವಾನ, ದೇವತ್ತೇ ಅಥ ಮಾನುಸೇ;
ಛಾಯಾ ವಿಯ ಸರೀರೇನ, ಸಹ ತೇನೇವ ಸಂಸರಿಂ.
‘‘ಏಕನವುತಿತೋ ¶ ಕಪ್ಪೇ, ವಿಪಸ್ಸೀ ನಾಮ ನಾಯಕೋ;
ಉಪ್ಪಜ್ಜಿ ಚಾರುದಸ್ಸನೋ, ಸಬ್ಬಧಮ್ಮವಿಪಸ್ಸಕೋ.
‘‘ತದಾಯಂ ಬನ್ಧುಮತಿಯಂ, ಬ್ರಾಹ್ಮಣೋ ಸಾಧುಸಮ್ಮತೋ;
ಅಡ್ಢೋ ಸನ್ತೋ ಗುಣೇನಾಪಿ [ಸತ್ಥಾಗಮೇನಾಸಿ (ಸೀ.)], ಧನೇನ ಚ ಸುದುಗ್ಗತೋ.
‘‘ತದಾಪಿ ತಸ್ಸಾಹಂ ಆಸಿಂ, ಬ್ರಾಹ್ಮಣೀ ಸಮಚೇತಸಾ;
ಕದಾಚಿ ಸೋ ದಿಜವರೋ, ಸಙ್ಗಮೇಸಿ ಮಹಾಮುನಿಂ.
‘‘ನಿಸಿನ್ನಂ ಜನಕಾಯಮ್ಹಿ, ದೇಸೇನ್ತಂ ಅಮತಂ ಪದಂ;
ಸುತ್ವಾ ಧಮ್ಮಂ ಪಮುದಿತೋ, ಅದಾಸಿ ಏಕಸಾಟಕಂ.
‘‘ಘರಮೇಕೇನ ವತ್ಥೇನ, ಗನ್ತ್ವಾನೇತಂ ಸ ಮಬ್ರವಿ [ಮಮಬ್ರವಿ (ಸೀ. ಸ್ಯಾ. ಪೀ.)];
‘ಅನುಮೋದ ಮಹಾಪುಞ್ಞಂ [ಮಹಾಪಞ್ಞೇ (ಸೀ.), ಮಹಾಪುಞ್ಞೇ (ಸ್ಯಾ. ಕ.)], ದಿನ್ನಂ ಬುದ್ಧಸ್ಸ ಸಾಟಕಂ’.
‘‘ತದಾಹಂ ಅಞ್ಜಲಿಂ ಕತ್ವಾ, ಅನುಮೋದಿಂ ಸುಪೀಣಿತಾ [ಸುವಿದಿತಾ (ಸ್ಯಾ.), ಸುಪೀತಿಯಾ (ಕ.)];
‘ಸುದಿನ್ನೋ ಸಾಟಕೋ ಸಾಮಿ, ಬುದ್ಧಸೇಟ್ಠಸ್ಸ ತಾದಿನೋ’.
‘‘ಸುಖಿತೋ ¶ ಸಜ್ಜಿತೋ ಹುತ್ವಾ, ಸಂಸರನ್ತೋ ಭವಾಭವೇ;
ಬಾರಾಣಸಿಪುರೇ ರಮ್ಮೇ, ರಾಜಾ ಆಸಿ ಮಹೀಪತಿ.
‘‘ತದಾ ¶ ತಸ್ಸ ಮಹೇಸೀಹಂ, ಇತ್ಥಿಗುಮ್ಬಸ್ಸ ಉತ್ತಮಾ;
ತಸ್ಸಾತಿ ದಯಿತಾ [ತಸ್ಸಾವಿ ದುತಿಯಿಕಾ (ಸ್ಯಾ.)] ಆಸಿಂ, ಪುಬ್ಬಸ್ನೇಹೇನ ಭತ್ತುನೋ [ಚುತ್ತರಿ (ಸ್ಯಾ. ಪೀ. ಕ.)].
‘‘ಪಿಣ್ಡಾಯ ವಿಚರನ್ತೇ ತೇ [ಸೋ (ಸೀ. ಸ್ಯಾ. ಪೀ.)], ಅಟ್ಠ ಪಚ್ಚೇಕನಾಯಕೇ;
ದಿಸ್ವಾ ಪಮುದಿತೋ ಹುತ್ವಾ, ದತ್ವಾ ಪಿಣ್ಡಂ ಮಹಾರಹಂ.
‘‘ಪುನೋ ನಿಮನ್ತಯಿತ್ವಾನ, ಕತ್ವಾ ರತನಮಣ್ಡಪಂ;
ಕಮ್ಮಾರೇಹಿ ಕತಂ ಪತ್ತಂ [ಕತಂ ಛತ್ತಂ (ಸೀ.), ಕತಮಟ್ಠಂ (ಸ್ಯಾ.)], ಸೋವಣ್ಣಂ ವತ ತತ್ತಕಂ.
‘‘ಸಮಾನೇತ್ವಾನ ತೇ ಸಬ್ಬೇ, ತೇಸಂ ದಾನಮದಾಸಿ ಸೋ;
ಸೋಣ್ಣಾಸನೇ ಪವಿಟ್ಠಾನಂ, ಪಸನ್ನೋ ಸೇಹಿ ಪಾಣಿಭಿ.
‘‘ತಮ್ಪಿ ¶ ದಾನಂ ಸಹಾದಾಸಿಂ, ಕಾಸಿರಾಜೇನಹಂ ತದಾ;
ಪುನಾಹಂ ಬಾರಾಣಸಿಯಂ, ಜಾತಾ ಕಾಸಿಕಗಾಮಕೇ.
‘‘ಕುಟುಮ್ಬಿಕಕುಲೇ ¶ ಫೀತೇ, ಸುಖಿತೋ ಸೋ ಸಭಾತುಕೋ;
ಜೇಟ್ಠಸ್ಸ ಭಾತುನೋ ಜಾಯಾ, ಅಹೋಸಿಂ ಸುಪತಿಬ್ಬತಾ.
‘‘ಪಚ್ಚೇಕಬುದ್ಧಂ ದಿಸ್ವಾನ, ಕನಿಯಸ್ಸ ಮಮ ಭತ್ತುನೋ [ಭತ್ತುಕನಿಯಸೋ (ಸ್ಯಾ.)];
ಭಾಗನ್ನಂ ತಸ್ಸ ದತ್ವಾನ, ಆಗತೇ ತಮ್ಹಿ ಪಾವದಿಂ.
‘‘ನಾಭಿನನ್ದಿತ್ಥ ಸೋ ದಾನಂ, ತತೋ ತಸ್ಸ ಅದಾಸಹಂ;
ಉಖಾ [ಬುದ್ಧಾ (ಸ್ಯಾ.)] ಆನಿಯ ತಂ ಅನ್ನಂ, ಪುನೋ ತಸ್ಸೇವ ಸೋ ಅದಾ.
‘‘ತದನ್ನಂ ಛಡ್ಡಯಿತ್ವಾನ, ದುಟ್ಠಾ ಬುದ್ಧಸ್ಸಹಂ ತದಾ;
ಪತ್ತಂ ಕಲಲಪುಣ್ಣಂ ತಂ, ಅದಾಸಿಂ ತಸ್ಸ ತಾದಿನೋ.
‘‘ದಾನೇ ¶ ಚ ಗಹಣೇ ಚೇವ, ಅಪಚೇ ಪದುಸೇಪಿ ಚ;
ಸಮಚಿತ್ತಮುಖಂ ದಿಸ್ವಾ, ತದಾಹಂ ಸಂವಿಜಿಂ ಭುಸಂ.
‘‘ಪುನೋ ¶ ಪತ್ತಂ ಗಹೇತ್ವಾನ, ಸೋಧಯಿತ್ವಾ ಸುಗನ್ಧಿನಾ;
ಪಸನ್ನಚಿತ್ತಾ ಪೂರೇತ್ವಾ, ಸಘತಂ ಸಕ್ಕರಂ ಅದಂ.
‘‘ಯತ್ಥ ಯತ್ಥೂಪಪಜ್ಜಾಮಿ, ಸುರೂಪಾ ಹೋಮಿ ದಾನತೋ;
ಬುದ್ಧಸ್ಸ ಅಪಕಾರೇನ, ದುಗ್ಗನ್ಧಾ ವದನೇನ ಚ.
‘‘ಪುನ ಕಸ್ಸಪವೀರಸ್ಸ, ನಿಧಾಯನ್ತಮ್ಹಿ ಚೇತಿಯೇ;
ಸೋವಣ್ಣಂ ಇಟ್ಠಕಂ ವರಂ, ಅದಾಸಿಂ ಮುದಿತಾ ಅಹಂ.
‘‘ಚತುಜ್ಜಾತೇನ ಗನ್ಧೇನ, ನಿಚಯಿತ್ವಾ ತಮಿಟ್ಠಕಂ;
ಮುತ್ತಾ ದುಗ್ಗನ್ಧದೋಸಮ್ಹಾ, ಸಬ್ಬಙ್ಗಸುಸಮಾಗತಾ.
‘‘ಸತ್ತಪಾತಿಸಹಸ್ಸಾನಿ, ರತನೇಹೇವ ಸತ್ತಹಿ;
ಕಾರೇತ್ವಾ ಘತಪೂರಾನಿ, ವಟ್ಟೀನಿ [ವಟ್ಟೀಯೋ (ಸೀ.)] ಚ ಸಹಸ್ಸಸೋ.
‘‘ಪಕ್ಖಿಪಿತ್ವಾ ಪದೀಪೇತ್ವಾ, ಠಪಯಿಂ ಸತ್ತಪನ್ತಿಯೋ;
ಪೂಜನತ್ಥಂ ಲೋಕನಾಥಸ್ಸ, ವಿಪ್ಪಸನ್ನೇನ ಚೇತಸಾ.
‘‘ತದಾಪಿ ತಮ್ಹಿ ಪುಞ್ಞಮ್ಹಿ, ಭಾಗಿನೀಯಿ ವಿಸೇಸತೋ;
ಪುನ ಕಾಸೀಸು ಸಞ್ಜಾತೋ, ಸುಮಿತ್ತಾ ಇತಿ ವಿಸ್ಸುತೋ.
‘‘ತಸ್ಸಾಹಂ ಭರಿಯಾ ಆಸಿಂ, ಸುಖಿತಾ ಸಜ್ಜಿತಾ ಪಿಯಾ;
ತದಾ ಪಚ್ಚೇಕಮುನಿನೋ, ಅದಾಸಿಂ ಘನವೇಠನಂ.
‘‘ತಸ್ಸಾಪಿ ¶ ¶ ಭಾಗಿನೀ ಆಸಿಂ, ಮೋದಿತ್ವಾ ದಾನಮುತ್ತಮಂ;
ಪುನಾಪಿ ಕಾಸಿರಟ್ಠಮ್ಹಿ, ಜಾತೋ ಕೋಲಿಯಜಾತಿಯಾ.
‘‘ತದಾ ¶ ಕೋಲಿಯಪುತ್ತಾನಂ, ಸತೇಹಿ ಸಹ ಪಞ್ಚಹಿ;
ಪಞ್ಚಪಚ್ಚೇಕಬುದ್ಧಾನಂ, ಸತಾನಿ ಸಮುಪಟ್ಠಹಿ.
‘‘ತೇಮಾಸಂ ತಪ್ಪಯಿತ್ವಾನ [ವಾಸಯಿತ್ವಾನ (ಸ್ಯಾ. ಪೀ.)], ಅದಾಸಿ ಚ ತಿಚೀವರೇ [ತಿಚೀವರಂ (ಸ್ಯಾ.)];
ಜಾಯಾ ತಸ್ಸ ತದಾ ಆಸಿಂ, ಪುಞ್ಞಕಮ್ಮಪಥಾನುಗಾ.
‘‘ತತೋ ¶ ಚುತೋ ಅಹು ರಾಜಾ, ನನ್ದೋ ನಾಮ ಮಹಾಯಸೋ;
ತಸ್ಸಾಪಿ ಮಹೇಸೀ ಆಸಿಂ, ಸಬ್ಬಕಾಮಸಮಿದ್ಧಿನೀ.
‘‘ತದಾ ರಾಜಾ ಭವಿತ್ವಾನ, ಬ್ರಹ್ಮದತ್ತೋ ಮಹೀಪತಿ;
ಪದುಮವತೀಪುತ್ತಾನಂ, ಪಚ್ಚೇಕಮುನಿನಂ ತದಾ.
‘‘ಸತಾನಿ ಪಞ್ಚನೂನಾನಿ, ಯಾವಜೀವಂ ಉಪಟ್ಠಹಿಂ;
ರಾಜುಯ್ಯಾನೇ ನಿವಾಸೇತ್ವಾ, ನಿಬ್ಬುತಾನಿ ಚ ಪೂಜಯಿಂ.
‘‘ಚೇತಿಯಾನಿ ಚ ಕಾರೇತ್ವಾ, ಪಬ್ಬಜಿತ್ವಾ ಉಭೋ ಮಯಂ;
ಭಾವೇತ್ವಾ ಅಪ್ಪಮಞ್ಞಾಯೋ, ಬ್ರಹ್ಮಲೋಕಂ ಅಗಮ್ಹಸೇ.
‘‘ತತೋ ಚುತೋ ಮಹಾತಿತ್ಥೇ, ಸುಜಾತೋ ಪಿಪ್ಫಲಾಯನೋ;
ಮಾತಾ ಸುಮನದೇವೀತಿ, ಕೋಸಿಗೋತ್ತೋ ದಿಜೋ ಪಿತಾ.
‘‘ಅಹಂ ಮದ್ದೇ ಜನಪದೇ, ಸಾಕಲಾಯ ಪುರುತ್ತಮೇ;
ಕಪ್ಪಿಲಸ್ಸ ದಿಜಸ್ಸಾಸಿಂ, ಧೀತಾ ಮಾತಾ ಸುಚೀಮತಿ.
‘‘ಘನಕಞ್ಚನಬಿಮ್ಬೇನ, ನಿಮ್ಮಿನಿತ್ವಾನ ಮಂ ಪಿತಾ;
ಅದಾ ಕಸ್ಸಪಧೀರಸ್ಸ, ಕಾಮೇಹಿ ವಜ್ಜಿತಸ್ಸಮಂ.
‘‘ಕದಾಚಿ ಸೋ ಕಾರುಣಿಕೋ, ಗನ್ತ್ವಾ ಕಮ್ಮನ್ತಪೇಕ್ಖಕೋ;
ಕಾಕಾದಿಕೇಹಿ ಖಜ್ಜನ್ತೇ, ಪಾಣೇ ದಿಸ್ವಾನ ಸಂವಿಜಿ.
‘‘ಘರೇವಾಹಂ ¶ ತಿಲೇ ಜಾತೇ, ದಿಸ್ವಾನಾತಪತಾಪನೇ;
ಕಿಮಿ ಕಾಕೇಹಿ ಖಜ್ಜನ್ತೇ, ಸಂವೇಗಮಲಭಿಂ ತದಾ.
‘‘ತದಾ ಸೋ ಪಬ್ಬಜೀ ಧೀರೋ, ಅಹಂ ತಮನುಪಬ್ಬಜಿಂ;
ಪಞ್ಚವಸ್ಸಾನಿ ನಿವಸಿಂ, ಪರಿಬ್ಬಾಜವತೇ [ಪರಿಬ್ಬಾಜಪಥೇ (ಸ್ಯಾ. ಪೀ.)] ಅಹಂ.
‘‘ಯದಾ ¶ ಪಬ್ಬಜಿತಾ ಆಸಿ, ಗೋತಮೀ ಜಿನಪೋಸಿಕಾ;
ತದಾಹಂ ತಮುಪಗನ್ತ್ವಾ, ಬುದ್ಧೇನ ಅನುಸಾಸಿತಾ.
‘‘ನ ¶ ಚಿರೇನೇವ ಕಾಲೇನ, ಅರಹತ್ತಮಪಾಪುಣಿಂ;
ಅಹೋ ಕಲ್ಯಾಣಮಿತ್ತತ್ತಂ, ಕಸ್ಸಪಸ್ಸ ಸಿರೀಮತೋ.
‘‘ಸುತೋ ಬುದ್ಧಸ್ಸ ದಾಯಾದೋ, ಕಸ್ಸಪೋ ಸುಸಮಾಹಿತೋ;
ಪುಬ್ಬೇನಿವಾಸಂ ಯೋ ವೇದಿ, ಸಗ್ಗಾಪಾಯಞ್ಚ ಪಸ್ಸತಿ.
‘‘ಅಥೋ ¶ ಜಾತಿಕ್ಖಯಂ ಪತ್ತೋ, ಅಭಿಞ್ಞಾವೋಸಿತೋ ಮುನಿ;
ಏತಾಹಿ ತೀಹಿ ವಿಜ್ಜಾಹಿ, ತೇವಿಜ್ಜೋ ಹೋತಿ ಬ್ರಾಹ್ಮಣೋ.
‘‘ತಥೇವ ಭದ್ದಕಾಪಿಲಾನೀ [ಭದ್ದಾಕಾಪಿಲಾನೀ (ಸೀ. ಪೀ.)], ತೇವಿಜ್ಜಾ ಮಚ್ಚುಹಾಯಿನೀ;
ಧಾರೇತಿ ಅನ್ತಿಮಂ ದೇಹಂ, ಜಿತ್ವಾ ಮಾರಂ ಸವಾಹನಂ.
‘‘ದಿಸ್ವಾ ಆದೀನವಂ ಲೋಕೇ, ಉಭೋ ಪಬ್ಬಜಿತಾ ಮಯಂ;
ತ್ಯಮ್ಹ ಖೀಣಾಸವಾ ದನ್ತಾ, ಸೀತಿಭೂತಾಮ್ಹ ನಿಬ್ಬುತಾ.
‘‘ಕಿಲೇಸಾ ಝಾಪಿತಾ ಮಯ್ಹಂ…ಪೇ… ವಿಹರಾಮಿ ಅನಾಸವಾ.
‘‘ಸ್ವಾಗತಂ ವತ ಮೇ ಆಸಿ…ಪೇ… ಕತಂ ಬುದ್ಧಸ್ಸ ಸಾಸನಂ.
‘‘ಪಟಿಸಮ್ಭಿದಾ ¶ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಭದ್ದಕಾಪಿಲಾನೀ ಭಿಕ್ಖುನೀ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಭದ್ದಕಾಪಿಲಾನೀಥೇರಿಯಾಪದಾನಂ ಸತ್ತಮಂ.
೮. ಯಸೋಧರಾಥೇರೀಅಪದಾನಂ
ಏಕಸ್ಮಿಂ ಸಮಯೇ ರಮ್ಮೇ, ಇದ್ಧೇ ರಾಜಗಹೇ ಪುರೇ;
ಪಬ್ಭಾರಮ್ಹಿ ವರೇಕಮ್ಹಿ, ವಸನ್ತೇ ನರನಾಯಕೇ.
ವಸನ್ತಿಯಾ ತಮ್ಹಿ ನಗರೇ, ರಮ್ಮೇ ಭಿಕ್ಖುನುಪಸ್ಸಯೇ;
ಯಸೋಧರಾಭಿಕ್ಖುನಿಯಾ, ಏವಂ ಆಸಿ ವಿತಕ್ಕಿತಂ.
‘‘ಸುದ್ಧೋದನೋ ಮಹಾರಾಜಾ, ಗೋತಮೀ ಚ ಪಜಾಪತೀ;
ಅಭಿಞ್ಞಾತಾ ಮಹಾಥೇರಾ, ಥೇರಿಯೋ ಚ ಮಹಿದ್ಧಿಕಾ.
‘‘ಸನ್ತಿಂ ¶ ಗತಾವ ಆಸುಂ ತೇ, ದೀಪಚ್ಚೀವ ನಿರಾಸವಾ;
ಲೋಕನಾಥೇ ಧರನ್ತೇವ, ಅಹಮ್ಪಿ ಚ ಸಿವಂ ಪದಂ.
‘‘ಗಮಿಸ್ಸಾಮೀತಿ ¶ ಚಿನ್ತೇತ್ವಾ, ಪಸ್ಸನ್ತೀ ಆಯುಮತ್ತನೋ;
ಪಸ್ಸಿತ್ವಾ ಆಯುಸಙ್ಖಾರಂ, ತದಹೇವ ಖಯಂ ಗತಂ.
‘‘ಪತ್ತಚೀವರಮಾದಾಯ, ನಿಕ್ಖಮಿತ್ವಾ ಸಕಸ್ಸಮಾ;
ಪುರಕ್ಖತಾ ಭಿಕ್ಖುನೀಭಿ, ಸತೇಹಿ ಸಹಸ್ಸೇಹಿ ಸಾ [ಸಹ ಪಞ್ಚಹಿ (ಸೀ. ಪೀ.)].
‘‘ಮಹಿದ್ಧಿಕಾ ಮಹಾಪಞ್ಞಾ, ಸಮ್ಬುದ್ಧಂ ಉಪಸಙ್ಕಮಿ;
ಸಮ್ಬುದ್ಧಂ ಅಭಿವಾದೇತ್ವಾ, ಸತ್ಥುನೋ ಚಕ್ಕಲಕ್ಖಣೇ;
ನಿಸಿನ್ನಾ ಏಕಮನ್ತಮ್ಹಿ, ಇದಂ ವಚನಮಬ್ರವಿ.
‘‘‘ಅಟ್ಠಸತ್ತತಿವಸ್ಸಾಹಂ, ಪಚ್ಛಿಮೋ ವತ್ತತೇ ವಯೋ [ಪಚ್ಛಿಮಾ ವತ್ತಯಿ ವಯಾ (ಸ್ಯಾ.)];
ಪಬ್ಭಾರಮ್ಹಿ ಅನುಪ್ಪತ್ತಾ, ಆರೋಚೇಮಿ ಮಹಾಮುನಿ.
‘‘‘ಪರಿಪಕ್ಕೋ ವಯೋ ಮಯ್ಹಂ, ಪರಿತ್ತಂ ಮಮ ಜೀವಿತಂ;
ಪಹಾಯ ವೋ ಗಮಿಸ್ಸಾಮಿ, ಕತಂ ಮೇ ಸರಣಮತ್ತನೋ.
‘‘‘ವಯಮ್ಹಿ ಪಚ್ಛಿಮೇ ಕಾಲೇ, ಮರಣಂ ಉಪರುದ್ಧತಿ;
ಅಜ್ಜರತ್ತಿಂ ಮಹಾವೀರ, ಪಾಪುಣಿಸ್ಸಾಮಿ ನಿಬ್ಬುತಿಂ.
‘‘‘ನತ್ಥಿ ಜಾತಿ ಜರಾ ಬ್ಯಾಧಿ, ಮರಣಞ್ಚ ಮಹಾಮುನೇ;
ಅಜರಾಮರಣಂ ಪುರಂ, ಗಮಿಸ್ಸಾಮಿ ಅಸಙ್ಖತಂ.
‘‘‘ಯಾವತಾ ಪರಿಸಾ ನಾಮ, ಸಮುಪಾಸನ್ತಿ ಸತ್ಥುನೋ;
ಅಪರಾಧಮಜಾನನ್ತೀ [ಸಚೇ ಮೇತ್ಥಿ (ಸೀ.), ಪಜಾನನ್ತೀ (ಕ.)], ಖಮನ್ತಂ ಸಮ್ಮುಖಾ ಮುನೇ.
‘‘‘ಸಂಸರಿತ್ವಾ ¶ ¶ ಚ ಸಂಸಾರೇ, ಖಲಿತಞ್ಚೇ ಮಮಂ ತಯಿ;
ಆರೋಚೇಮಿ ಮಹಾವೀರ, ಅಪರಾಧಂ ಖಮಸ್ಸು ಮೇ’.
‘‘ಸುತ್ವಾನ ವಚನಂ ತಸ್ಸಾ, ಮುನಿನ್ದೋ ಇದಮಬ್ರವಿ;
‘ಕಿಮುತ್ತರಂ ತೇ ವಕ್ಖಾಮಿ, ನಿಬ್ಬಾನಾಯ ವಜನ್ತಿಯಾ.
‘‘‘ಇದ್ಧಿಞ್ಚಾಪಿ ನಿದಸ್ಸೇಹಿ, ಮಮ ಸಾಸನಕಾರಿಕೇ;
ಪರಿಸಾನಞ್ಚ ಸಬ್ಬಾಸಂ, ಕಙ್ಖಂ ಛಿನ್ದಸ್ಸು ಯಾವತಾ’.
‘‘ಸುತ್ವಾ ತಂ ಮುನಿನೋ ವಾಚಂ, ಭಿಕ್ಖುನೀ ಸಾ ಯಸೋಧರಾ;
ವನ್ದಿತ್ವಾ ಮುನಿರಾಜಂ ತಂ, ಇದಂ ವಚನಮಬ್ರವಿ.
‘‘‘ಯಸೋಧರಾ ¶ ಅಹಂ ವೀರ, ಅಗಾರೇ ತೇ ಪಜಾಪತಿ;
ಸಾಕಿಯಮ್ಹಿ ಕುಲೇ ಜಾತಾ, ಇತ್ಥಿಅಙ್ಗೇ ಪತಿಟ್ಠಿತಾ.
‘‘‘ಥೀನಂ ಸತಸಹಸ್ಸಾನಂ, ನವುತೀನಂ ಛದುತ್ತರಿ;
ಅಗಾರೇ ತೇ ಅಹಂ ವೀರ, ಪಾಮೋಕ್ಖಾ ಸಬ್ಬಾ ಇಸ್ಸರಾ.
‘‘‘ರೂಪಾಚಾರಗುಣೂಪೇತಾ ¶ , ಯೋಬ್ಬನಟ್ಠಾ ಪಿಯಂವದಾ;
ಸಬ್ಬಾ ಮಂ ಅಪಚಾಯನ್ತಿ, ದೇವತಾ ವಿಯ ಮಾನುಸಾ.
‘‘‘ಕಞ್ಞಾಸತಸಹಸ್ಸಪಮುಖಾ, ಸಕ್ಯಪುತ್ತನಿವೇಸನೇ;
ಸಮಾನಸುಖದುಕ್ಖತಾ, ದೇವತಾ ವಿಯ ನನ್ದನೇ.
‘‘‘ಕಾಮಧಾತುಮತಿಕ್ಕಮ್ಮ [ಕಾಮಧಾತುಮತಿಕ್ಕನ್ತಾ (ಸೀ. ಸ್ಯಾ. ಪೀ. ಕ.)], ಸಣ್ಠಿತಾ ರೂಪಧಾತುಯಾ;
ರೂಪೇನ ಸದಿಸಾ ನತ್ಥಿ, ಠಪೇತ್ವಾ ಲೋಕನಾಯಕಂ.
‘‘‘ಸಮ್ಬುದ್ಧಂ ಅಭಿವಾದೇತ್ವಾ, ಇದ್ಧಿಂ ದಸ್ಸೇಸಿ ಸತ್ಥುನೋ;
ನೇಕಾ ನಾನಾವಿಧಾಕಾರಾ, ಮಹಾಇದ್ಧೀಪಿ ದಸ್ಸಯೀ [ಏವಮಾದೀನಿ ವತ್ವಾನ, ಉಪತಿತ್ವಾನ ಅಮ್ಬರಂ; ಇದ್ಧೀ ಅನೇಕಾ ದಸ್ಸೇಸಿ, ಬುದ್ಧಾನುಞ್ಞಾ ಯಸೋಧರಾ; (ಸೀ.)].
‘‘‘ಚಕ್ಕವಾಳಸಮಂ ಕಾಯಂ, ಸೀಸಂ ಉತ್ತರತೋ ಕುರು;
ಉಭೋ ಪಕ್ಖಾ ದುವೇ ದೀಪಾ, ಜಮ್ಬುದೀಪಂ ಸರೀರತೋ.
‘‘‘ದಕ್ಖಿಣಞ್ಚ ಸರಂ ಪಿಞ್ಛಂ, ನಾನಾಸಾಖಾ ತು ಪತ್ತಕಾ;
ಚನ್ದಞ್ಚ ಸೂರಿಯಞ್ಚಕ್ಖಿ, ಮೇರುಪಬ್ಬತತೋ ಸಿಖಂ.
‘‘‘ಚಕ್ಕವಾಲಗಿರಿಂ ¶ ತುಣ್ಡಂ, ಜಮ್ಬುರುಕ್ಖಂ ಸಮೂಲಕಂ;
ಬೀಜಮಾನಾ ಉಪಾಗನ್ತ್ವಾ, ವನ್ದನ್ತೀ ಲೋಕನಾಯಕಂ.
‘‘‘ಹತ್ಥಿವಣ್ಣಂ ತಥೇವಸ್ಸಂ, ಪಬ್ಬತಂ ಜಲಧಿಂ ತಥಾ;
ಚನ್ದಿಮಂ ಸೂರಿಯಂ ಮೇರುಂ, ಸಕ್ಕವಣ್ಣಞ್ಚ ದಸ್ಸಯಿ.
‘‘‘ಯಸೋಧರಾ ¶ ಅಹಂ ವೀರ, ಪಾದೇ ವನ್ದಾಮಿ ಚಕ್ಖುಮ;
ಸಹಸ್ಸಲೋಕಧಾತೂನಂ, ಫುಲ್ಲಪದ್ಮೇನ ಛಾದಯಿ.
‘‘‘ಬ್ರಹ್ಮವಣ್ಣಞ್ಚ ಮಾಪೇತ್ವಾ, ಧಮ್ಮಂ ದೇಸೇಸಿ ಸುಞ್ಞತಂ;
ಯಸೋಧರಾ ಅಹಂ ವೀರ, ಪಾದೇ ವನ್ದಾಮಿ ಚಕ್ಖುಮ.
‘‘‘ಇದ್ಧೀಸು ಚ ವಸೀ ಹೋಮಿ, ದಿಬ್ಬಾಯ ಸೋತಧಾತುಯಾ;
ಚೇತೋಪರಿಯಞಾಣಸ್ಸ, ವಸೀ ಹೋಮಿ ಮಹಾಮುನಿ.
‘‘‘ಪುಬ್ಬೇನಿವಾಸಂ ¶ ಜಾನಾಮಿ, ದಿಬ್ಬಚಕ್ಖು ವಿಸೋಧಿತಂ;
ಸಬ್ಬಾಸವಪರಿಕ್ಖೀಣಾ, ನತ್ಥಿ ದಾನಿ ಪುನಬ್ಭವೋ.
‘‘‘ಅತ್ಥಧಮ್ಮನಿರುತ್ತೀಸು, ಪಟಿಭಾನೇ ತಥೇವ ಚ;
ಞಾಣಂ ಮಯ್ಹಂ ಮಹಾವೀರ, ಉಪ್ಪನ್ನಂ ತವ ಸನ್ತಿಕೇ.
‘‘‘ಪುಬ್ಬಾನಂ ಲೋಕನಾಥಾನಂ, ಸಙ್ಗಮಂ ತೇ ನಿದಸ್ಸಿತಂ [ಸುದಸ್ಸಿತಂ (ಸ್ಯಾ. ಪೀ. ಕ.)];
ಅಧಿಕಾರಂ ಬಹುಂ ಮಯ್ಹಂ, ತುಯ್ಹತ್ಥಾಯ ಮಹಾಮುನೇ.
‘‘‘ಯಂ ¶ ಮಯ್ಹಂ ಪೂರಿತಂ ಕಮ್ಮಂ, ಕುಸಲಂ ಸರಸೇ ಮುನೇ;
ತುಯ್ಹತ್ಥಾಯ ಮಹಾವೀರ, ಪುಞ್ಞಂ ಉಪಚಿತಂ ಮಯಾ.
‘‘‘ಅಭಬ್ಬಟ್ಠಾನೇ ವಜ್ಜೇತ್ವಾ, ವಾರಯಿತ್ವಾ ಅನಾಚರಂ;
ತುಯ್ಹತ್ಥಾಯ ಮಹಾವೀರ, ಸಞ್ಚತ್ತಂ ಜೀವಿತಂ ಮಯಾ.
‘‘‘ನೇಕಕೋಟಿಸಹಸ್ಸಾನಿ ¶ , ಭರಿಯತ್ಥಾಯದಾಸಿ ಮಂ;
ನ ತತ್ಥ ವಿಮನಾ ಹೋಮಿ, ತುಯ್ಹತ್ಥಾಯ ಮಹಾಮುನಿ.
‘‘‘ನೇಕಕೋಟಿಸಹಸ್ಸಾನಿ, ಉಪಕಾರಾಯದಾಸಿ ಮಂ;
ನ ತತ್ಥ ವಿಮನಾ ಹೋಮಿ, ತುಯ್ಹತ್ಥಾಯ ಮಹಾಮುನಿ.
‘‘‘ನೇಕಕೋಟಿಸಹಸ್ಸಾನಿ, ಭೋಜನತ್ಥಾಯದಾಸಿ ಮಂ;
ನ ತತ್ಥ ವಿಮನಾ ಹೋಮಿ, ತುಯ್ಹತ್ಥಾಯ ಮಹಾಮುನಿ.
‘‘‘ನೇಕಕೋಟಿಸಹಸ್ಸಾನಿ, ಜೀವಿತಾನಿ ಪರಿಚ್ಚಜಿಂ;
ಭಯಮೋಕ್ಖಂ ಕರಿಸ್ಸನ್ತಿ, ದದಾಮಿ ಮಮ ಜೀವಿತಂ.
‘‘‘ಅಙ್ಗಗತೇ [ಅಙ್ಗೇ ಏವಂ (ಕ.)] ಅಲಙ್ಕಾರೇ, ವತ್ಥೇ ನಾನಾವಿಧೇ ಬಹೂ;
ಇತ್ಥಿಮಣ್ಡೇ ನ ಗೂಹಾಮಿ, ತುಯ್ಹತ್ಥಾಯ ಮಹಾಮುನಿ.
‘‘‘ಧನಧಞ್ಞಪರಿಚ್ಚಾಗಂ ¶ , ಗಾಮಾನಿ ನಿಗಮಾನಿ ಚ;
ಖೇತ್ತಂ ಪುತ್ತಾ ಚ ಧೀತಾ ಚ, ಪರಿಚ್ಚತ್ತಾ ಮಹಾಮುನಿ.
‘‘‘ಹತ್ಥೀ ಅಸ್ಸಾ ಗವಾ ಚಾಪಿ, ದಾಸಿಯೋ ಪರಿಚಾರಿಕಾ;
ತುಯ್ಹತ್ಥಾಯ ಮಹಾವೀರ, ಪರಿಚ್ಚತ್ತಾ ಅಸಙ್ಖಿಯಾ.
‘‘‘ಯಂ ಮಯ್ಹಂ ಪಟಿಮನ್ತೇಸಿ [ಪತಿಮನ್ತೇಸಿ (ಸೀ.)], ದಾನಂ ದಸ್ಸಾಮಿ ಯಾಚಕೇ;
ವಿಮನಂ ಮೇ ನ ಪಸ್ಸಾಮಿ, ದದತೋ ದಾನಮುತ್ತಮಂ.
‘‘‘ನಾನಾವಿಧಂ ¶ ಬಹುಂ ದುಕ್ಖಂ, ಸಂಸಾರೇ ಚ ಬಹುಬ್ಬಿಧೇ;
ತುಯ್ಹತ್ಥಾಯ ಮಹಾವೀರ, ಅನುಭುತ್ತಂ ಅಸಙ್ಖಿಯಂ.
‘‘‘ಸುಖಪ್ಪತ್ತಾನುಮೋದಾಮಿ, ನ ಚ ದುಕ್ಖೇಸು ದುಮ್ಮನಾ;
ಸಬ್ಬತ್ಥ ತುಲಿತಾ ಹೋಮಿ, ತುಯ್ಹತ್ಥಾಯ ಮಹಾಮುನಿ.
‘‘‘ಅನುಮಗ್ಗೇನ ¶ ಸಮ್ಬುದ್ಧೋ, ಯಂ ಧಮ್ಮಂ ಅಭಿನೀಹರಿ;
ಅನುಭೋತ್ವಾ ಸುಖಂ ದುಕ್ಖಂ, ಪತ್ತೋ ಬೋಧಿಂ ಮಹಾಮುನಿ.
‘‘‘ಬ್ರಹ್ಮದೇವಞ್ಚ ಸಮ್ಬುದ್ಧಂ, ಗೋತಮಂ ಲೋಕನಾಯಕಂ;
ಅಞ್ಞೇಸಂ ಲೋಕನಾಥಾನಂ, ಸಙ್ಗಮಂ ತೇ ಬಹುಂ ಮಯಾ.
‘‘‘ಅಧಿಕಾರಂ ¶ ಬಹುಂ ಮಯ್ಹಂ, ತುಯ್ಹತ್ಥಾಯ ಮಹಾಮುನಿ;
ಗವೇಸತೋ ಬುದ್ಧಧಮ್ಮೇ, ಅಹಂ ತೇ ಪರಿಚಾರಿಕಾ.
‘‘‘ಕಪ್ಪೇ ಚ ಸತಸಹಸ್ಸೇ, ಚತುರೋ ಚ ಅಸಙ್ಖಿಯೇ;
ದೀಪಙ್ಕರೋ ಮಹಾವೀರೋ, ಉಪ್ಪಜ್ಜಿ ಲೋಕನಾಯಕೋ.
‘‘‘ಪಚ್ಚನ್ತದೇಸವಿಸಯೇ, ನಿಮನ್ತೇತ್ವಾ ತಥಾಗತಂ;
ತಸ್ಸ ಆಗಮನಂ ಮಗ್ಗಂ, ಸೋಧೇನ್ತಿ ತುಟ್ಠಮಾನಸಾ.
‘‘‘ತೇನ ಕಾಲೇನ ಸೋ ಆಸಿ, ಸುಮೇಧೋ ನಾಮ ಬ್ರಾಹ್ಮಣೋ;
ಮಗ್ಗಞ್ಚ ಪಟಿಯಾದೇಸಿ, ಆಯತೋ [ಆಯತಂ (ಸೀ.)] ಸಬ್ಬದಸ್ಸಿನೋ.
‘‘‘ತೇನ ಕಾಲೇನಹಂ ಆಸಿಂ, ಕಞ್ಞಾ ಬ್ರಾಹ್ಮಣಸಮ್ಭವಾ;
ಸುಮಿತ್ತಾನಾಮ ನಾಮೇನ, ಉಪಗಚ್ಛಿಂ ಸಮಾಗಮಂ.
‘‘‘ಅಟ್ಠ ಉಪ್ಪಲಹತ್ಥಾನಿ, ಪೂಜನತ್ಥಾಯ ಸತ್ಥುನೋ;
ಆದಾಯ ಜನಸಂಮಜ್ಝೇ, ಅದ್ದಸಂ ಇಸಿ ಮುಗ್ಗತಂ.
‘‘‘ಚಿರಾನುಗತಂ ¶ ದಯಿತಂ [ಚಿರಾನುಪರಿ ಆಸೀನಂ (ಸೀ.)], ಅತಿಕ್ಕನ್ತಂ ಮನೋಹರಂ;
ದಿಸ್ವಾ ತದಾ ಅಮಞ್ಞಿಸ್ಸಂ, ಸಫಲಂ ಜೀವಿತಂ ಮಮ.
‘‘‘ಪರಕ್ಕಮಂ ತಂ ಸಫಲಂ, ಅದ್ದಸಂ ಇಸಿನೋ ತದಾ;
ಪುಬ್ಬಕಮ್ಮೇನ ಸಮ್ಬುದ್ಧೇ, ಚಿತ್ತಞ್ಚಾಪಿ ಪಸೀದಿ ಮೇ.
‘‘‘ಭಿಯ್ಯೋ ¶ ಚಿತ್ತಂ ಪಸಾದೇಸಿಂ, ಇಸೇ ಉಗ್ಗತಮಾನಸೇ;
ದೇಯ್ಯಂ ಅಞ್ಞಂ ನ ಪಸ್ಸಾಮಿ, ದೇಮಿ ಪುಪ್ಫಾನಿ ತೇ ಇಸಿ.
‘‘‘ಪಞ್ಚಹತ್ಥಾ ¶ ತವ ಹೋನ್ತು, ತಯೋ ಹೋನ್ತು ಮಮಂ ಇಸೇ;
ತೇನ ಸದ್ಧಿಂ ಸಮಾ ಹೋನ್ತು, ಬೋಧತ್ಥಾಯ ತವಂ ಇಸೇ’.
ಚತುತ್ಥಂ ಭಾಣವಾರಂ.
‘‘ಇಸಿ ಗಹೇತ್ವಾ ಪುಪ್ಫಾನಿ, ಆಗಚ್ಛನ್ತಂ ಮಹಾಯಸಂ;
ಪೂಜೇಸಿ ಜನಸಂಮಜ್ಝೇ, ಬೋಧತ್ಥಾಯ ಮಹಾಇಸಿ.
‘‘ಪಸ್ಸಿತ್ವಾ ಜನಸಂಮಜ್ಝೇ, ದೀಪಙ್ಕರೋ ಮಹಾಮುನಿ;
ವಿಯಾಕಾಸಿ ಮಹಾವೀರೋ, ಇಸಿ ಮುಗ್ಗತಮಾನಸಂ.
‘‘ಅಪರಿಮೇಯ್ಯೇ ಇತೋ ಕಪ್ಪೇ, ದೀಪಙ್ಕರೋ ಮಹಾಮುನಿ;
ಮಮ ಕಮ್ಮಂ ವಿಯಾಕಾಸಿ, ಉಜುಭಾವಂ ಮಹಾಮುನಿ.
‘‘‘ಸಮಚಿತ್ತಾ ¶ ಸಮಕಮ್ಮಾ, ಸಮಕಾರೀ ಭವಿಸ್ಸತಿ;
ಪಿಯಾ ಹೇಸ್ಸತಿ ಕಮ್ಮೇನ, ತುಯ್ಹತ್ಥಾಯ ಮಹಾಇಸಿ [ಮಹಾಇಸೇ (ಸ್ಯಾ.)].
‘‘‘ಸುದಸ್ಸನಾ ಸುಪಿಯಾ ಚ, ಮನಾಪಾ ಪಿಯವಾದಿನೀ;
ತಸ್ಸ ಧಮ್ಮೇಸು ದಾಯಾದಾ, ವಿಹರಿಸ್ಸತಿ ಇದ್ಧಿಕಾ.
‘‘‘ಯಥಾಪಿ ಭಣ್ಡಸಾಮುಗ್ಗಂ, ಅನುರಕ್ಖತಿ ಸಾಮಿನೋ;
ಏವಂ ಕುಸಲಧಮ್ಮಾನಂ, ಅನುರಕ್ಖಿಸ್ಸತೇ ಅಯಂ.
‘‘‘ತಸ್ಸ ತೇ [ತಸ್ಸ ತಂ (ಸ್ಯಾ.)] ಅನುಕಮ್ಪನ್ತೀ, ಪೂರಯಿಸ್ಸತಿ ಪಾರಮೀ;
ಸೀಹೋವ ಪಞ್ಜರಂ ಭೇತ್ವಾ [ಹಿತ್ವಾ (ಸ್ಯಾ.), ಹೇತ್ವಾ (ಪೀ.)], ಪಾಪುಣಿಸ್ಸತಿ ಬೋಧಿಯಂ’.
‘‘ಅಪರಿಮೇಯ್ಯೇ ¶ ಇತೋ ಕಪ್ಪೇ, ಯಂ ಮಂ ಬುದ್ಧೋ ವಿಯಾಕರೀ;
ತಂ ವಾಚಂ ಅನುಮೋದೇನ್ತೀ, ಏವಂಕಾರೀ ಭವಿಂ ಅಹಂ.
‘‘ತಸ್ಸ ¶ ಕಮ್ಮಸ್ಸ ಸುಕತಸ್ಸ, ತತ್ಥ ಚಿತ್ತಂ ಪಸಾದಯಿಂ;
ದೇವಮನುಸ್ಸಕಂ ಯೋನಿಂ, ಅನುಭೋತ್ವಾ ಅಸಙ್ಖಿಯಂ.
‘‘ಸುಖದುಕ್ಖೇನುಭೋತ್ವಾಹಂ, ದೇವೇಸು ಮಾನುಸೇಸು ಚ;
ಪಚ್ಛಿಮೇ ಭವೇ ಸಮ್ಪತ್ತೇ, ಅಜಾಯಿಂ ಸಾಕಿಯೇ ಕುಲೇ.
‘‘ರೂಪವತೀ ಭೋಗವತೀ, ಯಸಸೀಲವತೀ ತತೋ;
ಸಬ್ಬಙ್ಗಸಮ್ಪದಾ ಹೋಮಿ, ಕುಲೇಸು ಅಭಿಸಕ್ಕತಾ.
‘‘ಲಾಭಂ ¶ ಸಿಲೋಕಂ ಸಕ್ಕಾರಂ, ಲೋಕಧಮ್ಮಸಮಾಗಮಂ;
ಚಿತ್ತಞ್ಚ ದುಕ್ಖಿತಂ ನತ್ಥಿ, ವಸಾಮಿ ಅಕುತೋಭಯಾ.
‘‘ವುತ್ತಞ್ಹೇತಂ ಭಗವತಾ, ರಞ್ಞೋ ಅನ್ತೇಪುರೇ ತದಾ;
ಖತ್ತಿಯಾನಂ ಪುರೇ ವೀರ, ಉಪಕಾರಞ್ಚ ನಿದ್ದಿಸಿ.
‘‘ಉಪಕಾರಾ ಚ ಯಾ ನಾರೀ, ಯಾ ಚ ನಾರೀ ಸುಖೇ ದುಖೇ;
ಅತ್ಥಕ್ಖಾಯೀ ಚ ಯಾ ನಾರೀ, ಯಾ ಚ ನಾರೀನುಕಮ್ಪಿಕಾ.
‘‘ಪಞ್ಚಕೋಟಿಸತಾ ಬುದ್ಧಾ, ನವಕೋಟಿಸತಾನಿ ಚ;
ಏತೇಸಂ ದೇವದೇವಾನಂ, ಮಹಾದಾನಂ ಪವತ್ತಯಿಂ.
‘‘ಅಧಿಕಾರಂ ಮಹಾ [ಸದಾ (ಪೀ.) ಏವಮುಪರಿಪಿ] ಮಯ್ಹಂ, ಧಮ್ಮರಾಜ ಸುಣೋಹಿ ಮೇ;
ಏಕಾದಸಕೋಟಿಸತಾ, ಬುದ್ಧಾ ದ್ವಾದಸ ಕೋಟಿಯೋ [ಹೋನ್ತಿ ಲೋಕಗ್ಗನಾಯಕಾ (ಸೀ. ಸ್ಯಾ.), ಪಣ್ಣಾಕೋಟಿಸತಾನಿ ಚ (ಪೀ.)].
‘‘ಏತೇಸಂ ದೇವದೇವಾನಂ, ಮಹಾದಾನಂ ಪವತ್ತಯಿಂ;
ಅಧಿಕಾರಂ ಮಹಾ ಮಯ್ಹಂ, ಧಮ್ಮರಾಜ ಸುಣೋಹಿ ಮೇ.
‘‘‘ವೀಸಕೋಟಿಸತಾ ¶ ¶ ಬುದ್ಧಾ, ತಿಂಸಕೋಟಿಸತಾನಿ ಚ;
ಏತೇಸಂ ದೇವದೇವಾನಂ, ಮಹಾದಾನಂ ಪವತ್ತಯಿಂ.
‘‘‘ಅಧಿಕಾರಂ ಮಹಾ ಮಯ್ಹಂ, ಧಮ್ಮರಾಜ ಸುಣೋಹಿ ಮೇ;
ಚತ್ತಾಲೀಸಕೋಟಿಸತಾ, ಪಞ್ಞಾಸ ಕೋಟಿಸತಾನಿ ಚ.
‘‘‘ಏತೇಸಂ ¶ ದೇವದೇವಾನಂ, ಮಹಾದಾನಂ ಪವತ್ತಯಿಂ;
ಅಧಿಕಾರಂ ಮಹಾ ಮಯ್ಹಂ, ಧಮ್ಮರಾಜ ಸುಣೋಹಿ ಮೇ.
‘‘‘ಸಟ್ಠಿಕೋಟಿಸತಾ ಬುದ್ಧಾ, ಸತ್ತತಿಕೋಟಿಸತಾನಿ ಚ;
ಏತೇಸಂ ದೇವದೇವಾನಂ, ಮಹಾದಾನಂ ಪವತ್ತಯಿಂ.
‘‘‘ಅಧಿಕಾರಂ ಮಹಾ ಮಯ್ಹಂ, ಧಮ್ಮರಾಜ ಸುಣೋಹಿ ಮೇ;
ಅಸೀತಿಕೋಟಿಸತಾ ಬುದ್ಧಾ, ನವುತಿಕೋಟಿಸತಾನಿ ಚ.
‘‘‘ಏತೇಸಂ ದೇವದೇವಾನಂ, ಮಹಾದಾನಂ ಪವತ್ತಯಿಂ;
ಅಧಿಕಾರಂ ಮಹಾ ಮಯ್ಹಂ, ಧಮ್ಮರಾಜ ಸುಣೋಹಿ ಮೇ.
‘‘‘ಕೋಟಿಸತಸಹಸ್ಸಾನಿ, ಹೋನ್ತಿ ಲೋಕಗ್ಗನಾಯಕಾ;
ಏತೇಸಂ ದೇವದೇವಾನಂ, ಮಹಾದಾನಂ ಪವತ್ತಯಿಂ.
‘‘‘ಅಧಿಕಾರಂ ¶ ಮಹಾ ಮಯ್ಹಂ, ಧಮ್ಮರಾಜ ಸುಣೋಹಿ ಮೇ;
ನವಕೋಟಿಸಹಸ್ಸಾನಿ, ಅಪರೇ ಲೋಕನಾಯಕಾ.
‘‘‘ಏತೇಸಂ ದೇವದೇವಾನಂ, ಮಹಾದಾನಂ ಪವತ್ತಯಿಂ;
ಅಧಿಕಾರಂ ಮಹಾ ಮಯ್ಹಂ, ಧಮ್ಮರಾಜ ಸುಣೋಹಿ ಮೇ.
‘‘‘ಕೋಟಿಸತಸಹಸ್ಸಾನಿ, ಪಞ್ಚಾಸೀತಿಮಹೇಸಿನಂ;
ಪಞ್ಚಾಸೀತಿಕೋಟಿಸತಾ, ಸತ್ತತಿಂಸಾ ಚ ಕೋಟಿಯೋ.
‘‘‘ಏತೇಸಂ ¶ ದೇವದೇವಾನಂ, ಮಹಾದಾನಂ ಪವತ್ತಯಿಂ;
ಅಧಿಕಾರಂ ಮಹಾ ಮಯ್ಹಂ, ಧಮ್ಮರಾಜ ಸುಣೋಹಿ ಮೇ.
‘‘‘ಪಚ್ಚೇಕಬುದ್ಧಾ ವೀತರಾಗಾ [ಧುತರಾಗಾ (ಪೀ. ಕ.)], ಅಟ್ಠಟ್ಠಮಕಕೋಟಿಯೋ [ಅಟ್ಠಮತ್ತಕ… (ಸೀ.), ಅಟ್ಠಮತ್ಥಕ… (ಸ್ಯಾ.)];
ಅಧಿಕಾರಂ ಮಹಾ ಮಯ್ಹಂ, ಧಮ್ಮರಾಜ ಸುಣೋಹಿ ಮೇ.
‘‘‘ಖೀಣಾಸವಾ ವೀತಮಲಾ, ಅಸಙ್ಖಿಯಾ ಬುದ್ಧಸಾವಕಾ;
ಅಧಿಕಾರಂ ಮಹಾ ಮಯ್ಹಂ, ಧಮ್ಮರಾಜ ಸುಣೋಹಿ ಮೇ.
‘‘‘ಏವಂ ಧಮ್ಮೇ ಸುಚಿಣ್ಣಾನಂ, ಸದಾ ಧಮ್ಮಸ್ಸ ಚಾರಿನಂ;
ಧಮ್ಮಚಾರೀ ಸುಖಂ ಸೇತಿ, ಅಸ್ಮಿಂ ಲೋಕೇ ಪರಮ್ಹಿ ಚ.
‘‘‘ಧಮ್ಮಂ ¶ ಚರೇ ಸುಚರಿತಂ, ನ ನಂ ದುಚ್ಚರಿತಂ ಚರೇ;
ಧಮ್ಮಚಾರೀ ಸುಖಂ ಸೇತಿ, ಅಸ್ಮಿಂ ಲೋಕೇ ಪರಮ್ಹಿ ಚ.
‘‘‘ನಿಬ್ಬಿನ್ದಿತ್ವಾನ ಸಂಸಾರೇ, ಪಬ್ಬಜಿಂ ಅನಗಾರಿಯಂ;
ಸಹಸ್ಸಪರಿವಾರೇನ, ಪಬ್ಬಜಿತ್ವಾ ಅಕಿಞ್ಚನಾ.
‘‘‘ಅಗಾರಂ ವಿಜಹಿತ್ವಾನ, ಪಬ್ಬಜಿಂ ಅನಗಾರಿಯಂ;
ಅಡ್ಢಮಾಸೇ ಅಸಮ್ಪತ್ತೇ, ಚತುಸಚ್ಚಮಪಾಪುಣಿಂ.
‘‘‘ಚೀವರಂ ಪಿಣ್ಡಪಾತಞ್ಚ, ಪಚ್ಚಯಂ ಸಯನಾಸನಂ;
ಉಪನೇನ್ತಿ ಬಹೂ ಜನಾ, ಸಾಗರೇಯೇವ ಊಮಿಯೋ.
‘‘‘ಕಿಲೇಸಾ ಝಾಪಿತಾ ಮಯ್ಹಂ…ಪೇ… ವಿಹರಾಮಿ ಅನಾಸವಾ.
‘‘‘ಸ್ವಾಗತಂ ವತ ಮೇ ಆಸಿ…ಪೇ… ಕತಂ ಬುದ್ಧಸ್ಸ ಸಾಸನಂ.
‘‘‘ಪಟಿಸಮ್ಭಿದಾ ¶ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’.
‘‘ಏವಂ ಬಹುವಿಧಂ ದುಕ್ಖಂ, ಸಮ್ಪತ್ತೀ ಚ ಬಹುಬ್ಬಿಧಾ;
ವಿಸುದ್ಧಿಭಾವಂ ಸಮ್ಪತ್ತಾ, ಲಭಾಮಿ ಸಬ್ಬಸಮ್ಪದಾ.
‘‘ಯಾ ¶ ದದಾತಿ ಸಕತ್ತಾನಂ, ಪುಞ್ಞತ್ಥಾಯ ಮಹೇಸಿನೋ;
ಸಹಾಯಸಮ್ಪದಾ ಹೋನ್ತಿ, ನಿಬ್ಬಾನಪದಮಸಙ್ಖತಂ.
‘‘ಪರಿಕ್ಖೀಣಂ ಅತೀತಞ್ಚ, ಪಚ್ಚುಪ್ಪನ್ನಂ ಅನಾಗತಂ;
ಸಬ್ಬಕಮ್ಮಂ ಮಮಂ ಖೀಣಂ, ಪಾದೇ ವನ್ದಾಮಿ ಚಕ್ಖುಮ’’.
ಇತ್ಥಂ ಸುದಂ ಯಸೋಧರಾ ಭಿಕ್ಖುನೀ ಭಗವತೋ ಸಮ್ಮುಖಾ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಯಸೋಧರಾಥೇರಿಯಾಪದಾನಂ ಅಟ್ಠಮಂ.
೯. ಯಸೋಧರಾಪಮುಖದಸಭಿಕ್ಖುನೀಸಹಸ್ಸಅಪದಾನಂ
‘‘ಕಪ್ಪೇ ¶ ಚ ಸತಸಹಸ್ಸೇ, ಚತುರೋ ಚ ಅಸಙ್ಖಿಯೇ;
ದೀಪಙ್ಕರೋ ನಾಮ ಜಿನೋ, ಉಪ್ಪಜ್ಜಿ ಲೋಕನಾಯಕೋ.
‘‘ದೀಪಙ್ಕರೋ ಮಹಾವೀರೋ, ವಿಯಾಕಾಸಿ ವಿನಾಯಕೋ;
ಸುಮೇಧಞ್ಚ ಸುಮಿತ್ತಞ್ಚ, ಸಮಾನಸುಖದುಕ್ಖತಂ.
‘‘ಸದೇವಕಞ್ಚ ¶ ಪಸ್ಸನ್ತೋ, ವಿಚರನ್ತೋ ಸದೇವಕಂ;
ತೇಸಂ ಪಕಿತ್ತನೇ ಅಮ್ಹೇ, ಉಪಗಮ್ಮ ಸಮಾಗಮಂ.
‘‘ಅಮ್ಹಂ ¶ ಸಬ್ಬಪತಿ ಹೋಹಿ [ಸಬ್ಬಾ ಪತೀ ಹೋನ್ತಿ (ಪೀ.)], ಅನಾಗತಸಮಾಗಮೇ;
ಸಬ್ಬಾವ ತುಯ್ಹಂ ಭರಿಯಾ, ಮನಾಪಾ ಪಿಯವಾದಿಕಾ.
‘‘ದಾನಂ ಸೀಲಮಯಂ ಸಬ್ಬಂ, ಭಾವನಾ ಚ ಸುಭಾವಿತಾ;
ದೀಘರತ್ತಞ್ಚ ನೋ [ದೀಘರತ್ತಮಿದಂ (ಸ್ಯಾ. ಕ.)] ಸಬ್ಬಂ, ಪರಿಚ್ಚತ್ತಂ ಮಹಾಮುನೇ.
‘‘ಗನ್ಧಂ ವಿಲೇಪನಂ ಮಾಲಂ, ದೀಪಞ್ಚ ರತನಾಮಯಂ;
ಯಂಕಿಞ್ಚಿ ಪತ್ಥಿತಂ ಸಬ್ಬಂ, ಪರಿಚ್ಚತ್ತಂ ಮಹಾಮುನಿ.
‘‘ಅಞ್ಞಂ ವಾಪಿ ಕತಂ ಕಮ್ಮಂ, ಪರಿಭೋಗಞ್ಚ ಮಾನುಸಂ;
ದೀಘರತ್ತಞ್ಹಿ ನೋ ಸಬ್ಬಂ, ಪರಿಚ್ಚತ್ತಂ ಮಹಾಮುನಿ.
‘‘ಅನೇಕಜಾತಿಸಂಸಾರಂ, ಬಹುಂ ಪುಞ್ಞಮ್ಪಿ ನೋ ಕತಂ;
ಇಸ್ಸರಮನುಭೋತ್ವಾನ, ಸಂಸರಿತ್ವಾ ಭವಾಭವೇ.
‘‘ಪಚ್ಛಿಮೇ ¶ ಭವೇ ಸಮ್ಪತ್ತೇ, ಸಕ್ಯಪುತ್ತನಿವೇಸನೇ;
ನಾನಾಕುಲೂಪಪನ್ನಾಯೋ, ಅಚ್ಛರಾ ಕಾಮವಣ್ಣಿನೀ.
‘‘ಲಾಭಗ್ಗೇನ ಯಸಂ ಪತ್ತಾ, ಪೂಜಿತಾ ಸಬ್ಬಸಕ್ಕತಾ;
ಲಾಭಿಯೋ ಅನ್ನಪಾನಾನಂ, ಸದಾ ಸಮ್ಮಾನಿತಾ ಮಯಂ.
‘‘ಅಗಾರಂ ಪಜಹಿತ್ವಾನ, ಪಬ್ಬಜಿಮ್ಹನಗಾರಿಯಂ;
ಅಡ್ಢಮಾಸೇ ಅಸಮ್ಪತ್ತೇ, ಸಬ್ಬಾ ಪತ್ತಾಮ್ಹ ನಿಬ್ಬುತಿಂ.
‘‘ಲಾಭಿಯೋ ಅನ್ನಪಾನಾನಂ, ವತ್ಥಸೇನಾಸನಾನಿ ಚ;
ಉಪೇನ್ತಿ ಪಚ್ಚಯಾ ಸಬ್ಬೇ, ಸದಾ ಸಕ್ಕತಪೂಜಿತಾ.
‘‘ಕಿಲೇಸಾ ¶ ಝಾಪಿತಾ ಅಮ್ಹಂ…ಪೇ… ವಿಹರಾಮ ಅನಾಸವಾ.
‘‘ಸ್ವಾಗತಂ ¶ ವತ ನೋ ಆಸಿ…ಪೇ… ಕತಂ ಬುದ್ಧಸ್ಸ ಸಾಸನಂ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಯಸೋಧರಾಪಮುಖಾನಿ ದಸಭಿಕ್ಖುನೀಸಹಸ್ಸಾನಿ ಭಗವತೋ ಸಮ್ಮುಖಾ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಯಸೋಧರಾಪಮುಖದಸಭಿಕ್ಖುನೀಸಹಸ್ಸಾಪದಾನಂ ನವಮಂ.
೧೦. ಯಸೋಧರಾಪಮುಖಅಟ್ಠಾರಸಭಿಕ್ಖುನೀಸಹಸ್ಸಅಪದಾನಂ
‘‘ಅಟ್ಠಾರಸಸಹಸ್ಸಾನಿ ¶ , ಭಿಕ್ಖುನೀ ಸಕ್ಯಸಮ್ಭವಾ;
ಯಸೋಧರಾಪಮುಖಾನಿ, ಸಮ್ಬುದ್ಧಂ ಉಪಸಙ್ಕಮುಂ.
‘‘ಅಟ್ಠಾರಸಸಹಸ್ಸಾನಿ, ಸಬ್ಬಾ ಹೋನ್ತಿ ಮಹಿದ್ಧಿಕಾ;
ವನ್ದನ್ತೀ ಮುನಿನೋ ಪಾದೇ, ಆರೋಚೇನ್ತಿ ಯಥಾಬಲಂ.
‘‘‘ಜಾತಿ ಖೀಣಾ ಜರಾ ಬ್ಯಾಧಿ, ಮರಣಞ್ಚ ಮಹಾಮುನಿ;
ಅನಾಸವಂ ಪದಂ ಸನ್ತಂ, ಅಮತಂ ಯಾಮ ನಾಯಕ.
‘‘‘ಖಲಿತಞ್ಚೇ ಪುರೇ ಅತ್ಥಿ, ಸಬ್ಬಾಸಮ್ಪಿ ಮಹಾಮುನಿ;
ಅಪರಾಧಮಜಾನನ್ತೀ, ಖಮ ಅಮ್ಹಂ ವಿನಾಯಕ.
‘‘‘ಇದ್ಧಿಞ್ಚಾಪಿ ನಿದಸ್ಸೇಥ, ಮಮ ಸಾಸನಕಾರಿಕಾ;
ಪರಿಸಾನಞ್ಚ ಸಬ್ಬಾಸಂ, ಕಙ್ಖಂ ಛಿನ್ದಥ ಯಾವತಾ.
‘‘‘ಯಸೋಧರಾ ¶ ಮಹಾವೀರ, ಮನಾಪಾ ಪಿಯದಸ್ಸನಾ;
ಸಬ್ಬಾ ¶ ತುಯ್ಹಂ ಮಹಾವೀರ, ಅಗಾರಸ್ಮಿಂ ಪಜಾಪತಿ.
‘‘‘ಥೀನಂ ಸತಸಹಸ್ಸಾನಂ, ನವುತೀನಂ ಛದುತ್ತರಿ;
ಅಗಾರೇ ತೇ ಮಯಂ ವೀರ, ಪಾಮೋಕ್ಖಾ ಸಬ್ಬಾ ಇಸ್ಸರಾ.
‘‘‘ರೂಪಾಚಾರಗುಣೂಪೇತಾ, ಯೋಬ್ಬನಟ್ಠಾ ಪಿಯಂವದಾ;
ಸಬ್ಬಾ ನೋ ಅಪಚಾಯನ್ತಿ, ದೇವತಾ ವಿಯ ಮಾನುಸಾ.
‘‘‘ಅಟ್ಠಾರಸಸಹಸ್ಸಾನಿ, ಸಬ್ಬಾ ಸಾಕಿಯಸಮ್ಭವಾ;
ಯಸೋಧರಾಸಹಸ್ಸಾನಿ, ಪಾಮೋಕ್ಖಾ ಇಸ್ಸರಾ ತದಾ.
‘‘‘ಕಾಮಧಾತುಮತಿಕ್ಕಮ್ಮ ¶ , ಸಣ್ಠಿತಾ ರೂಪಧಾತುಯಾ;
ರೂಪೇನ ಸದಿಸಾ ನತ್ಥಿ, ಸಹಸ್ಸಾನಂ ಮಹಾಮುನಿ.
‘‘‘ಸಮ್ಬುದ್ಧಂ ಅಭಿವಾದೇತ್ವಾ, ಇದ್ಧಿಂ ದಸ್ಸಂಸು ಸತ್ಥುನೋ;
ನೇಕಾ ನಾನಾವಿಧಾಕಾರಾ, ಮಹಾಇದ್ಧೀಪಿ ದಸ್ಸಯುಂ.
‘‘‘ಚಕ್ಕವಾಳಸಮಂ ಕಾಯಂ, ಸೀಸಂ ಉತ್ತರತೋ ಕುರು;
ಉಭೋ ಪಕ್ಖಾ ದುವೇ ದೀಪಾ, ಜಮ್ಬುದೀಪಂ ಸರೀರತೋ.
‘‘‘ದಕ್ಖಿಣಞ್ಚ ಸರಂ ಪಿಞ್ಛಂ, ನಾನಾಸಾಖಾ ತು ಪತ್ತಕಾ;
ಚನ್ದಞ್ಚ ಸೂರಿಯಞ್ಚಕ್ಖಿ, ಮೇರುಪಬ್ಬತತೋ ಸಿಖಂ.
‘‘‘ಚಕ್ಕವಾಳಗಿರಿಂ ¶ ತುಣ್ಡಂ, ಜಮ್ಬುರುಕ್ಖಂ ಸಮೂಲಕಂ;
ಬೀಜಮಾನಾ ಉಪಾಗನ್ತ್ವಾ, ವನ್ದನ್ತೀ ಲೋಕನಾಯಕಂ.
‘‘‘ಹತ್ಥಿವಣ್ಣಂ ತಥೇವಸ್ಸಂ, ಪಬ್ಬತಂ ಜಲಧಿಂ ತಥಾ;
ಚನ್ದಞ್ಚ ಸೂರಿಯಂ ಮೇರುಂ, ಸಕ್ಕವಣ್ಣಞ್ಚ ದಸ್ಸಯುಂ.
‘‘‘ಯಸೋಧರಾ ¶ ಮಯಂ ವೀರ, ಪಾದೇ ವನ್ದಾಮ ಚಕ್ಖುಮ;
ತವ ಚಿರಪಭಾವೇನ, ನಿಪ್ಫನ್ನಾ ನರನಾಯಕ.
‘‘‘ಇದ್ಧೀಸು ಚ ವಸೀ ಹೋಮ, ದಿಬ್ಬಾಯ ಸೋತಧಾತುಯಾ;
ಚೇತೋಪರಿಯಞಾಣಸ್ಸ, ವಸೀ ಹೋಮ ಮಹಾಮುನೇ.
‘‘‘ಪುಬ್ಬೇನಿವಾಸಂ ಜಾನಾಮ, ದಿಬ್ಬಚಕ್ಖು ವಿಸೋಧಿತಂ;
ಸಬ್ಬಾಸವಪರಿಕ್ಖೀಣಾ, ನತ್ಥಿ ದಾನಿ ಪುನಬ್ಭವೋ.
‘‘‘ಅತ್ಥಧಮ್ಮನಿರುತ್ತೀಸು, ಪಟಿಭಾನೇ ತಥೇವ ಚ;
ಞಾಣಂ ಅಮ್ಹಂ ಮಹಾವೀರ, ಉಪ್ಪನ್ನಂ ತವ ಸನ್ತಿಕೇ.
‘‘‘ಪುಬ್ಬಾನಂ ¶ ಲೋಕನಾಥಾನಂ, ಸಙ್ಗಮಂ ನೋ ನಿದಸ್ಸಿತಂ;
ಅಧಿಕಾರಾ ಬಹೂ ಅಮ್ಹಂ, ತುಯ್ಹತ್ಥಾಯ ಮಹಾಮುನೇ.
‘‘‘ಯಂ ಅಮ್ಹಂ ಪೂರಿತಂ ಕಮ್ಮಂ, ಕುಸಲಂ ಸರಸೇ ಮುನೇ;
ತುಯ್ಹತ್ಥಾಯ ಮಹಾವೀರ, ಪುಞ್ಞಾನುಪಚಿತಾನಿ ನೋ.
‘‘‘ಅಭಬ್ಬಟ್ಠಾನೇ ವಜ್ಜೇತ್ವಾ, ವಾರಯಿಮ್ಹ ಅನಾಚರಂ;
ತುಯ್ಹತ್ಥಾಯ ಮಹಾವೀರ, ಚತ್ತಾನಿ ಜೀವಿತಾನಿ ನೋ [ಸಞ್ಚತ್ತಂ ಜೀವಿತಮ್ಪಿ ನೋ (ಸ್ಯಾ.)].
‘‘‘ನೇಕಕೋಟಿಸಹಸ್ಸಾನಿ ¶ , ಭರಿಯತ್ಥಾಯದಾಸಿ ನೋ;
ನ ತತ್ಥ ವಿಮನಾ ಹೋಮ, ತುಯ್ಹತ್ಥಾಯ ಮಹಾಮುನೇ.
‘‘‘ನೇಕಕೋಟಿಸಹಸ್ಸಾನಿ, ಉಪಕಾರಾಯದಾಸಿ ನೋ;
ನ ತತ್ಥ ವಿಮನಾ ಹೋಮ, ತುಯ್ಹತ್ಥಾಯ ಮಹಾಮುನೇ.
‘‘‘ನೇಕಕೋಟಿಸಹಸ್ಸಾನಿ, ಭೋಜನತ್ಥಾಯದಾಸಿ ನೋ;
ನ ತತ್ಥ ವಿಮನಾ ಹೋಮ, ತುಯ್ಹತ್ಥಾಯ ಮಹಾಮುನೇ.
‘‘‘ನೇಕಕೋಟಿಸಹಸ್ಸಾನಿ ¶ , ಜೀವಿತಾನಿ ಚಜಿಮ್ಹಸೇ [ಚಜಿಮ್ಹ ನೋ (ಪೀ. ಕ.)];
ಭಯಮೋಕ್ಖಂ ಕರಿಸ್ಸಾಮ, ಜೀವಿತಾನಿ ಚಜಿಮ್ಹಸೇ.
‘‘‘ಅಙ್ಗಗತೇ ಅಲಙ್ಕಾರೇ, ವತ್ಥೇ ನಾನಾವಿಧೇ ಬಹೂ;
ಇತ್ಥಿಭಣ್ಡೇ ನ ಗೂಹಾಮ, ತುಯ್ಹತ್ಥಾಯ ಮಹಾಮುನೇ.
‘‘‘ಧನಧಞ್ಞಪರಿಚ್ಚಾಗಂ ¶ , ಗಾಮಾನಿ ನಿಗಮಾನಿ ಚ;
ಖೇತ್ತಂ ಪುತ್ತಾ ಚ ಧೀತಾ ಚ, ಪರಿಚ್ಚತ್ತಾ ಮಹಾಮುನೇ.
‘‘‘ಹತ್ಥೀ ಅಸ್ಸಾ ಗವಾ ಚಾಪಿ, ದಾಸಿಯೋ ಪರಿಚಾರಿಕಾ;
ತುಯ್ಹತ್ಥಾಯ ಮಹಾವೀರ, ಪರಿಚ್ಚತ್ತಂ ಅಸಙ್ಖಿಯಂ.
‘‘‘ಯಂ ಅಮ್ಹೇ ಪಟಿಮನ್ತೇಸಿ, ದಾನಂ ದಸ್ಸಾಮ ಯಾಚಕೇ;
ವಿಮನಂ ನೋ ನ ಪಸ್ಸಾಮ, ದದತೋ ದಾನಮುತ್ತಮಂ.
‘‘‘ನಾನಾವಿಧಂ ಬಹುಂ ದುಕ್ಖಂ, ಸಂಸಾರೇ ಚ ಬಹುಬ್ಬಿಧೇ;
ತುಯ್ಹತ್ಥಾಯ ಮಹಾವೀರ, ಅನುಭುತ್ತಂ ಅಸಙ್ಖಿಯಂ.
‘‘‘ಸುಖಪ್ಪತ್ತಾನುಮೋದಾಮ, ನ ಚ ದುಕ್ಖೇಸು ದುಮ್ಮನಾ;
ಸಬ್ಬತ್ಥ ತುಲಿತಾ ಹೋಮ, ತುಯ್ಹತ್ಥಾಯ ಮಹಾಮುನೇ.
‘‘‘ಅನುಮಗ್ಗೇನ ¶ ಸಮ್ಬುದ್ಧೋ, ಯಂ ಧಮ್ಮಂ ಅಭಿನೀಹರಿ;
ಅನುಭೋತ್ವಾ ಸುಖಂ ದುಕ್ಖಂ, ಪತ್ತೋ ಬೋಧಿಂ ಮಹಾಮುನೇ.
‘‘‘ಬ್ರಹ್ಮದೇವಞ್ಚ ಸಮ್ಬುದ್ಧಂ, ಗೋತಮಂ ಲೋಕನಾಯಕಂ;
ಅಞ್ಞೇಸಂ ಲೋಕನಾಥಾನಂ, ಸಙ್ಗಮಂ ತೇಹಿ ನೋ ಬಹೂ.
‘‘‘ಅಧಿಕಾರಂ ಬಹುಂ ಅಮ್ಹೇ, ತುಯ್ಹತ್ಥಾಯ ಮಹಾಮುನೇ;
ಗವೇಸತೋ ಬುದ್ಧಧಮ್ಮೇ, ಮಯಂ ತೇ ಪರಿಚಾರಿಕಾ.
‘‘‘ಕಪ್ಪೇ ¶ ಚ ಸತಸಹಸ್ಸೇ, ಚತುರೋ ಚ ಅಸಙ್ಖಿಯೇ;
ದೀಪಙ್ಕರೋ ಮಹಾವೀರೋ, ಉಪ್ಪಜ್ಜಿ ಲೋಕನಾಯಕೋ.
‘‘‘ಪಚ್ಚನ್ತದೇಸವಿಸಯೇ, ನಿಮನ್ತೇತ್ವಾ ತಥಾಗತಂ;
ತಸ್ಸ ಆಗಮನಂ ಮಗ್ಗಂ, ಸೋಧೇನ್ತಿ ತುಟ್ಠಮಾನಸಾ.
‘‘‘ತೇನ ¶ ಕಾಲೇನ ಸೋ ಆಸಿ, ಸುಮೇಧೋ ನಾಮ ಬ್ರಾಹ್ಮಣೋ;
ಮಗ್ಗಞ್ಚ ಪಟಿಯಾದೇಸಿ, ಆಯತೋ ಸಬ್ಬದಸ್ಸಿನೋ.
‘‘‘ತೇನ ಕಾಲೇನ ಅಹುಮ್ಹ, ಸಬ್ಬಾ ಬ್ರಾಹ್ಮಣಸಮ್ಭವಾ;
ಥಲೂದಜಾನಿ ಪುಪ್ಫಾನಿ, ಆಹರಿಮ್ಹ ಸಮಾಗಮಂ.
‘‘‘ತಸ್ಮಿಂ ಸೋ ಸಮಯೇ ಬುದ್ಧೋ, ದೀಪಙ್ಕರೋ ಮಹಾಯಸೋ;
ವಿಯಾಕಾಸಿ ಮಹಾವೀರೋ, ಇಸಿಮುಗ್ಗತಮಾನಸಂ.
‘‘‘ಚಲತೀ ರವತೀ ಪುಥವೀ, ಸಙ್ಕಮ್ಪತಿ ಸದೇವಕೇ;
ತಸ್ಸ ಕಮ್ಮಂ ಪಕಿತ್ತೇನ್ತೇ, ಇಸಿಮುಗ್ಗತಮಾನಸಂ.
‘‘‘ದೇವಕಞ್ಞಾ ¶ ಮನುಸ್ಸಾ ಚ, ಮಯಞ್ಚಾಪಿ ಸದೇವಕಾ;
ನಾನಾಪೂಜನೀಯಂ ಭಣ್ಡಂ, ಪೂಜಯಿತ್ವಾನ ಪತ್ಥಯುಂ.
‘‘‘ತೇಸಂ ಬುದ್ಧೋ ವಿಯಾಕಾಸಿ, ಜೋತಿದೀಪ ಸನಾಮಕೋ;
ಅಜ್ಜ ಯೇ ಪತ್ಥಿತಾ ಅತ್ಥಿ, ತೇ ಭವಿಸ್ಸನ್ತಿ ಸಮ್ಮುಖಾ.
‘‘‘ಅಪರಿಮೇಯ್ಯೇ ಇತೋ ಕಪ್ಪೇ, ಯಂ ನೋ ಬುದ್ಧೋ ವಿಯಾಕರಿ;
ತಂ ವಾಚಮನುಮೋದೇನ್ತಾ, ಏವಂಕಾರೀ ಅಹುಮ್ಹ ನೋ.
‘‘‘ತಸ್ಸ ಕಮ್ಮಸ್ಸ ಸುಕತಸ್ಸ, ತಸ್ಸ ಚಿತ್ತಂ ಪಸಾದಯುಂ;
ದೇವಮಾನುಸಿಕಂ ಯೋನಿಂ, ಅನುಭೋತ್ವಾ ಅಸಙ್ಖಿಯಂ.
‘‘‘ಸುಖದುಕ್ಖೇನುಭೋತ್ವಾನ ¶ , ದೇವೇಸು ಮಾನುಸೇಸು ಚ;
ಪಚ್ಛಿಮೇ ಭವೇ ಸಮ್ಪತ್ತೇ, ಜಾತಾಮ್ಹ ಸಾಕಿಯೇ ಕುಲೇ.
‘‘‘ರೂಪವತೀ ¶ ಭೋಗವತೀ, ಯಸಸೀಲವತೀ ತತೋ;
ಸಬ್ಬಙ್ಗಸಮ್ಪದಾ ಹೋಮ, ಕುಲೇಸು ಅಭಿಸಕ್ಕತಾ.
‘‘‘ಲಾಭಂ ಸಿಲೋಕಂ ಸಕ್ಕಾರಂ, ಲೋಕಧಮ್ಮಸಮಾಗಮಂ;
ಚಿತ್ತಞ್ಚ ದುಕ್ಖಿತಂ ನತ್ಥಿ, ವಸಾಮ ಅಕುತೋಭಯಾ.
‘‘‘ವುತ್ತಞ್ಹೇತಂ ಭಗವತಾ, ರಞ್ಞೋ ಅನ್ತೇಪುರೇ ತದಾ;
ಖತ್ತಿಯಾನಂ ಪುರೇ ವೀರ [ತಾಸಂ (ಸ್ಯಾ.)], ಉಪಕಾರಞ್ಚ ನಿದ್ದಿಸಿ.
‘‘‘ಉಪಕಾರಾ ಚ ಯಾ ನಾರೀ, ಯಾ ಚ ನಾರೀ ಸುಖೇ ದುಖೇ;
ಅತ್ಥಕ್ಖಾಯೀ ಚ ಯಾ ನಾರೀ, ಯಾ ಚ ನಾರೀನುಕಮ್ಪಿಕಾ.
‘‘‘ಧಮ್ಮಂ ¶ ಚರೇ ಸುಚರಿತಂ, ನ ನಂ ದುಚ್ಚರಿತಂ ಚರೇ;
ಧಮ್ಮಚಾರೀ ಸುಖಂ ಸೇತಿ, ಅಸ್ಮಿಂ ಲೋಕೇ ಪರಮ್ಹಿ ಚ.
‘‘‘ಅಗಾರಂ ವಿಜಹಿತ್ವಾನ, ಪಬ್ಬಜಿಮ್ಹನಗಾರಿಯಂ;
ಅಡ್ಢಮಾಸೇ ಅಸಮ್ಪತ್ತೇ, ಚತುಸಚ್ಚಂ ಫುಸಿಮ್ಹ ನೋ.
‘‘‘ಚೀವರಂ ಪಿಣ್ಡಪಾತಞ್ಚ, ಪಚ್ಚಯಂ ಸಯನಾಸನಂ;
ಉಪನೇನ್ತಿ ಬಹೂ ಅಮ್ಹೇ, ಸಾಗರಸ್ಸೇವ ಊಮಿಯೋ.
‘‘‘ಕಿಲೇಸಾ ಝಾಪಿತಾ ಅಮ್ಹಂ [ಮಯ್ಹಂ (ಸ್ಯಾ.), ಅಮ್ಹಾಕಂ (ಕ.)], ಭವಾ ಸಬ್ಬೇ ಸಮೂಹತಾ;
ನಾಗೀವ ಬನ್ಧನಂ ಛೇತ್ವಾ, ವಿಹರಾಮ ಅನಾಸವಾ.
‘‘‘ಸ್ವಾಗತಂ ವತ ನೋ ಆಸಿ, ಮಮ ಬುದ್ಧಸ್ಸ ಸನ್ತಿಕೇ;
ತಿಸ್ಸೋ ವಿಜ್ಜಾ ಅನುಪ್ಪತ್ತಾ, ಕತಂ ಬುದ್ಧಸ್ಸ ಸಾಸನಂ.
‘‘‘ಪಟಿಸಮ್ಭಿದಾ ¶ ¶ ಚತಸ್ಸೋ, ವಿಮೋಕ್ಖಾಪಿ ಚ ಅಟ್ಠಿಮೇ;
ಛಳಭಿಞ್ಞಾ ಸಚ್ಛಿಕತಾ, ಕತಂ ಬುದ್ಧಸ್ಸ ಸಾಸನಂ’.
‘‘ಏವಂ ಬಹುವಿಧಂ ದುಕ್ಖಂ, ಸಮ್ಪತ್ತೀ ಚ ಬಹುಬ್ಬಿಧಾ;
ವಿಸುದ್ಧಭಾವಂ ಸಮ್ಪತ್ತಾ, ಲಭಾಮ ಸಬ್ಬಸಮ್ಪದಾ.
‘‘ಯಾ ದದನ್ತಿ ಸಕತ್ತಾನಂ, ಪುಞ್ಞತ್ಥಾಯ ಮಹೇಸಿನೋ;
ಸಹಾಯಸಮ್ಪದಾ ಹೋನ್ತಿ, ನಿಬ್ಬಾನಪದಮಸಙ್ಖತಂ.
‘‘ಪರಿಕ್ಖೀಣಂ ಅತೀತಞ್ಚ, ಪಚ್ಚುಪ್ಪನ್ನಂ ಅನಾಗತಂ;
ಸಬ್ಬಕಮ್ಮಮ್ಪಿ ನೋ ಖೀಣಂ, ಪಾದೇ ವನ್ದಾಮ ಚಕ್ಖುಮ.
‘‘ನಿಬ್ಬಾನಾಯ ¶ ವದನ್ತೀನಂ, ಕಿಂ ವೋ ವಕ್ಖಾಮ ಉತ್ತರಿ;
ಸನ್ತಸಙ್ಖತದೋಸಞ್ಹಿ, ಪಪ್ಪೋಥ [ಸನ್ತಸಙ್ಖತದೋಸೋ ಯೋ, ಪಜ್ಜೋತಂ (ಸ್ಯಾ. ಪೀ. ಕ.)] ಅಮತಂ ಪದಂ’’.
ಇತ್ಥಂ ಸುದಂ ಯಸೋಧರಾಪಮುಖಾನಿ ಅಟ್ಠಾರಸಭಿಕ್ಖುನೀಸಹಸ್ಸಾನಿ ಭಗವತೋ ಸಮ್ಮುಖಾ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಯಸೋಧರಾಪಮುಖಅಟ್ಠಾರಸಭಿಕ್ಖುನೀಸಹಸ್ಸಾಪದಾನಂ ದಸಮಂ.
ಕುಣ್ಡಲಕೇಸೀವಗ್ಗೋ ತತಿಯೋ.
ತಸ್ಸುದ್ದಾನಂ –
ಕುಣ್ಡಲಾ ಗೋತಮೀ ಚೇವ, ಧಮ್ಮದಿನ್ನಾ ಚ ಸಕುಲಾ;
ವರನನ್ದಾ ಚ ಸೋಣಾ ಚ, ಕಾಪಿಲಾನೀ ಯಸೋಧರಾ.
ದಸಸಹಸ್ಸಭಿಕ್ಖುನೀ, ಅಟ್ಠಾರಸಸಹಸ್ಸಕಾ;
ಗಾಥಾಸತಾನಿ ಚತ್ತಾರಿ, ಛ ಚ ಸತ್ತತಿಮೇವ ಚ [ಅಟ್ಠಸತ್ತತಿಮೇವ ಚ (ಸ್ಯಾ.)].
೪. ಖತ್ತಿಯಾವಗ್ಗೋ
೧. ಯಸವತೀಪಮುಖಅಟ್ಠಾರಸಭಿಕ್ಖುನೀಸಹಸ್ಸಅಪದಾನಂ
‘‘ಭವಾ ¶ ¶ ¶ ¶ ಸಬ್ಬೇ ಪರಿಕ್ಖೀಣಾ, ಭವಾ ಸನ್ತಿ ವಿಮೋಚಿತಾ;
ಸಬ್ಬಾಸವಾ ಚ ನೋ ನತ್ಥಿ, ಆರೋಚೇಮ ಮಹಾಮುನೇ.
‘‘ಪುರಿಮಂ ಕುಸಲಂ ಕಮ್ಮಂ [ಪರಿಕಮ್ಮಞ್ಚ ಕುಸಲಂ (ಸ್ಯಾ.)], ಯಂ ಕಿಞ್ಚಿ ಸಾಧುಪತ್ಥಿತಂ;
ಪರಿಭೋಗಮಯಂ ದಿನ್ನಂ, ತುಯ್ಹತ್ಥಾಯ ಮಹಾಮುನೇ.
‘‘ಬುದ್ಧಪಚ್ಚೇಕಬುದ್ಧಾನಂ, ಸಾವಕಾನಞ್ಚ ಪತ್ಥಿತಂ [ಬುದ್ಧಾನಂ ಸಾವಕಾನಞ್ಚ (ಸೀ. ಕ.)];
ಪರಿಭೋಗಮಯಂ ದಿನ್ನಂ, ತುಯ್ಹತ್ಥಾಯ ಮಹಾಮುನೇ.
‘‘ಉಚ್ಚನೀಚಮಯಂ ಕಮ್ಮಂ, ಭಿಕ್ಖೂನಂ ಸಾಧುಪತ್ಥಿತಂ;
ಉಚ್ಚಾಕುಲಪರಿಕಮ್ಮಂ, ಕತಮೇತಂ ಮಹಾಮುನೇ [ಕತಮ್ಹೇಹಿ ಮಹಾಮುನೇ (ಸ್ಯಾ. ಪೀ.)].
‘‘ತೇನೇವ ಸುಕ್ಕಮೂಲೇನ, ಚೋದಿತಾ ಕಮ್ಮಸಮ್ಪದಾ;
ಮಾನುಸಿಕಮತಿಕ್ಕನ್ತಾ, ಜಾಯಿಂಸು ಖತ್ತಿಯೇ ಕುಲೇ.
‘‘ಉಪ್ಪತ್ತೇ ಚ ಕತೇ ಕಮ್ಮೇ, ಜಾತಿಯಾ ವಾಪಿ ಏಕತೋ;
ಪಚ್ಛಿಮೇ ಏಕತೋ ಜಾತಾ, ಖತ್ತಿಯಾ ಕುಲಸಮ್ಭವಾ.
‘‘ರೂಪವತೀ ಭೋಗವತೀ, ಲಾಭಸಕ್ಕಾರಪೂಜಿತಾ;
ಅನ್ತೇಪುರೇ ಮಹಾವೀರ, ದೇವಾನಂ ವಿಯ ನನ್ದನೇ.
‘‘ನಿಬ್ಬಿನ್ದಿತ್ವಾ ಅಗಾರಮ್ಹಾ, ಪಬ್ಬಜಿಮ್ಹನಗಾರಿಯಂ;
ಕತಿಪಾಹಂ ಉಪಾದಾಯ, ಸಬ್ಬಾ ಪತ್ತಾಮ್ಹ ನಿಬ್ಬುತಿಂ.
‘‘ಚೀವರಂ ¶ ಪಿಣ್ಡಪಾತಞ್ಚ, ಪಚ್ಚಯಂ ಸಯನಾಸನಂ;
ಉಪನೇನ್ತಿ ಬಹೂ ಅಮ್ಹೇ, ಸದಾ ಸಕ್ಕತಪೂಜಿತಾ.
‘‘ಕಿಲೇಸಾ ಝಾಪಿತಾ ಅಮ್ಹಂ, ಭವಾ ಸಬ್ಬೇ ಸಮೂಹತಾ;
ನಾಗೀವ ಬನ್ಧನಂ ಛೇತ್ವಾ, ವಿಹರಾಮ ಅನಾಸವಾ.
‘‘ಸ್ವಾಗತಂ ವತ ನೋ ಆಸಿ, ಮಮ ಬುದ್ಧಸ್ಸ ಸನ್ತಿಕೇ;
ತಿಸ್ಸೋ ವಿಜ್ಜಾ ಅನುಪ್ಪತ್ತಾ, ಕತಂ ಬುದ್ಧಸ್ಸ ಸಾಸನಂ.
‘‘ಪಟಿಸಮ್ಭಿದಾ ¶ ¶ ಚತಸ್ಸೋ, ವಿಮೋಕ್ಖಾಪಿ ಚ ಅಟ್ಠಿಮೇ;
ಛಳಭಿಞ್ಞಾ ಸಚ್ಛಿಕತಾ, ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಯಸವತೀಪಮುಖಾನಿ ಖತ್ತಿಯಕಞ್ಞಾಭಿಕ್ಖುನಿಯೋ ಅಟ್ಠಾರಸಸಹಸ್ಸಾನಿ ಭಗವತೋ ಸಮ್ಮುಖಾ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಯಸವತೀಪಮುಖಅಟ್ಠಾರಸಭಿಕ್ಖುನೀಸಹಸ್ಸಾಪದಾನಂ ಪಠಮಂ.
೨. ಚತುರಾಸೀತಿಭಿಕ್ಖುನೀಸಹಸ್ಸಅಪದಾನಂ
‘‘ಚುಲ್ಲಾಸೀತಿಸಹಸ್ಸಾನಿ ¶ , ಬ್ರಾಹ್ಮಞ್ಞಕುಲಸಮ್ಭವಾ [ಬ್ರಾಹ್ಮಣಕುಲಸಮ್ಭವಾ (ಸ್ಯಾ. ಕ.)];
ಸುಖುಮಾಲಹತ್ಥಪಾದಾ, ಪುರೇ ತುಯ್ಹಂ ಮಹಾಮುನೇ.
‘‘ವೇಸ್ಸಸುದ್ದಕುಲೇ ಜಾತಾ, ದೇವಾ ನಾಗಾ ಚ ಕಿನ್ನರಾ;
ಚಾತುದ್ದೀಪಾ ಬಹೂ ಕಞ್ಞಾ, ಪುರೇ ತುಯ್ಹಂ ಮಹಾಮುನೇ.
‘‘ಕಾಚಿ ಪಬ್ಬಜಿತಾ ಅತ್ಥಿ, ಸಬ್ಬದಸ್ಸಾವಿನೋ [ಸಚ್ಚದಸ್ಸಾವಿನೋ (ಸೀ. ಪೀ.)] ಹೂ;
ದೇವಾ ಚ ಕಿನ್ನರಾ ನಾಗಾ, ಫುಸಿಸ್ಸನ್ತಿ ಅನಾಗತೇ.
‘‘ಅನುಭೋತ್ವಾ ಯಸಂ ಸಬ್ಬಂ, ಪತ್ವಾನ ಸಬ್ಬಸಮ್ಪದಾ;
ತುಮ್ಹಂ ¶ [ತ್ವಯಿ (ಸೀ. ಪೀ.)] ಪಸಾದಂ ಪಟಿಲದ್ಧಾ, ಬುಜ್ಝಿಸ್ಸನ್ತಿ ಅನಾಗತೇ.
‘‘ಅಮ್ಹೇ ಬ್ರಾಹ್ಮಣಧೀತಾ ತು, ಬ್ರಾಹ್ಮಞ್ಞಕುಲಸಮ್ಭವಾ;
ಪೇಕ್ಖತೋ ನೋ [ಲಕ್ಖಣಾ ಚ (ಸ್ಯಾ.)] ಮಹಾವೀರ, ಪಾದೇ ವನ್ದಾಮ ಚಕ್ಖುಮ.
‘‘ಉಪಹತಾ ಭವಾ ಸಬ್ಬೇ, ಮೂಲತಣ್ಹಾ ಸಮೂಹತಾ;
ಸಮುಚ್ಛಿನ್ನಾ ಅನುಸಯಾ, ಪುಞ್ಞಸಙ್ಖಾರದಾಲಿತಾ.
‘‘ಸಮಾಧಿಗೋಚರಾ ಸಬ್ಬಾ, ಸಮಾಪತ್ತಿವಸೀ ಕತಾ;
ಝಾನೇನ ಧಮ್ಮರತಿಯಾ, ವಿಹರಿಸ್ಸಾಮ ನೋ ಸದಾ.
‘‘ಭವನೇತ್ತಿ ಅವಿಜ್ಜಾ ಚ, ಸಙ್ಖಾರಾಪಿ ಚ ಖೇಪಿತಾ;
ಸುದುದ್ದಸಂ ಪದಂ ಗನ್ತ್ವಾ, ಅನುಜಾನಾಥ [ಅನುಜಾನಿಮ್ಹ (ಸ್ಯಾ. ಪೀ. ಕ.)] ನಾಯಕ.
‘‘ಉಪಕಾರಾ ಮಮಂ ತುಮ್ಹೇ, ದೀಘರತ್ತಂ ಕತಾವಿನೋ;
ಚತುನ್ನಂ ಸಂಸಯಂ ಛೇತ್ವಾ, ಸಬ್ಬಾ ಗಚ್ಛನ್ತು ನಿಬ್ಬುತಿಂ.
‘‘ವನ್ದಿತ್ವಾ ¶ ¶ ಮುನಿನೋ ಪಾದೇ, ಕತ್ವಾ ಇದ್ಧಿವಿಕುಬ್ಬನಂ;
ಕಾಚಿ ದಸ್ಸೇನ್ತಿ ಆಲೋಕಂ, ಅನ್ಧಕಾರಮಥಾಪರಾ.
‘‘ದಸ್ಸೇನ್ತಿ ಚನ್ದಸೂರಿಯೇ, ಸಾಗರಞ್ಚ ಸಮಚ್ಛಕಂ;
ಸಿನೇರುಂ ಪರಿಭಣ್ಡಞ್ಚ, ದಸ್ಸೇನ್ತಿ ಪಾರಿಛತ್ತಕಂ.
‘‘ತಾವತಿಂಸಞ್ಚ ಭವನಂ, ಯಾಮಂ ದಸ್ಸೇನ್ತಿ ಇದ್ಧಿಯಾ;
ತುಸಿತಂ ನಿಮ್ಮಿತೇ ದೇವೇ, ವಸವತ್ತೀ ಮಹಿಸ್ಸರೇ.
‘‘ಬ್ರಹ್ಮಾನೋ ಕಾಚಿ ದಸ್ಸೇನ್ತಿ, ಚಙ್ಕಮಞ್ಚ ಮಹಾರಹಂ;
ಬ್ರಹ್ಮವಣ್ಣಞ್ಚ ಮಾಪೇತ್ವಾ, ಧಮ್ಮಂ ದೇಸೇನ್ತಿ ಸುಞ್ಞತಂ.
‘‘ನಾನಾವಿಕುಬ್ಬನಂ ಕತ್ವಾ, ಇದ್ಧಿಂ ದಸ್ಸಿಯ ಸತ್ಥುನೋ;
ದಸ್ಸಯಿಂಸು ¶ ಬಲಂ ಸಬ್ಬಾ, ಪಾದೇ ವನ್ದಿಂಸು ಸತ್ಥುನೋ.
‘‘ಇದ್ಧೀಸು ¶ ಚ ವಸೀ ಹೋಮ, ದಿಬ್ಬಾಯ ಸೋತಧಾತುಯಾ;
ಚೇತೋಪರಿಯಞಾಣಸ್ಸ, ವಸೀ ಹೋಮ ಮಹಾಮುನೇ.
‘‘ಪುಬ್ಬೇನಿವಾಸಂ ಜಾನಾಮ, ದಿಬ್ಬಚಕ್ಖು ವಿಸೋಧಿತಂ;
ಸಬ್ಬಾಸವಪರಿಕ್ಖೀಣಾ, ನತ್ಥಿ ದಾನಿ ಪುನಬ್ಭವೋ.
‘‘ಅತ್ಥಧಮ್ಮನಿರುತ್ತೀಸು, ಪಟಿಭಾನೇ ತಥೇವ ಚ;
ಞಾಣಂ ಅಮ್ಹಂ ಮಹಾವೀರ, ಉಪ್ಪನ್ನಂ ತವ ಸನ್ತಿಕೇ.
‘‘ಪುಬ್ಬಾನಂ ಲೋಕನಾಥಾನಂ, ಸಙ್ಗಮಂ ನೋ ನಿದಸ್ಸಿತಂ;
ಅಧಿಕಾರಂ ಬಹುಂ ಅಮ್ಹಂ, ತುಯ್ಹತ್ಥಾಯ ಮಹಾಮುನೇ.
‘‘ಯಂ ಅಮ್ಹೇಹಿ ಕತಂ ಕಮ್ಮಂ, ಕುಸಲಂ ಸರ ತಂ ಮುನೇ;
ತುಯ್ಹತ್ಥಾಯ ಮಹಾವೀರ, ಪುಞ್ಞಾನುಪಚಿತಾನಿ ನೋ.
‘‘ಸತಸಹಸ್ಸಿತೋ ಕಪ್ಪೇ, ಪದುಮುತ್ತರೋ ಮಹಾಮುನಿ;
ಪುರಂ ಹಂಸವತೀ ನಾಮ, ಸಮ್ಬುದ್ಧಸ್ಸ ಕುಲಾಸಯಂ.
‘‘ದ್ವಾರೇನ ಹಂಸವತಿಯಾ, ಗಙ್ಗಾ ಸನ್ದತಿ ಸಬ್ಬದಾ;
ಉಬ್ಬಳ್ಹಾ ನದಿಯಾ ಭಿಕ್ಖೂ, ಗಮನಂ ನ ಲಭನ್ತಿ ತೇ.
‘‘ದಿವಸಂ ದ್ವೇ ತಯೋ ಚೇವ, ಸತ್ತಾಹಂ ಮಾಸಿಕಂ ತತೋ;
ಚತುಮಾಸಮ್ಪಿ ಸಮ್ಪುಣ್ಣಂ, ಗಮನಂ ನ ಲಭನ್ತಿ ತೇ.
‘‘ತದಾ ಅಹು ಸತ್ತಸಾರೋ, ಜಟಿಲೋ ನಾಮ ರಟ್ಠಿಕೋ;
ಓರುದ್ಧೇ [ಓರತೀರೇ (ಸ್ಯಾ.)] ಭಿಕ್ಖವೋ ದಿಸ್ವಾ, ಸೇತುಂ ಗಙ್ಗಾಯ ಕಾರಯಿ.
‘‘ತದಾ ¶ ¶ ¶ ಸತಸಹಸ್ಸೇಹಿ, ಸೇತುಂ ಗಙ್ಗಾಯ ಕಾರಯಿ;
ಸಙ್ಘಸ್ಸ ಓರಿಮೇ ತೀರೇ, ವಿಹಾರಞ್ಚ ಅಕಾರಯಿ.
‘‘ಇತ್ಥಿಯೋ ಪುರಿಸಾ ಚೇವ, ಉಚ್ಚನೀಚಕುಲಾನಿ ಚ;
ತಸ್ಸ ಸೇತುಂ ವಿಹಾರಞ್ಚ [ತೇಸು ಸೇತುವಿಹಾರೇಸು (ಸೀ.), ತಸ್ಸ ಸೇತೂ ವಿಹಾರೇ ಚ (ಪೀ.)], ಸಮಭಾಗಂ ಅಕಂಸು ತೇ.
‘‘ಅಮ್ಹೇ ಅಞ್ಞೇ ಚ ಮಾನುಜಾ, ವಿಪ್ಪಸನ್ನೇನ ಚೇತಸಾ;
ತಸ್ಸ ಧಮ್ಮೇಸು ದಾಯಾದಾ, ನಗರೇ ಜನಪದೇಸು ಚ.
‘‘ಇತ್ಥೀ ಪುಮಾ ಕುಮಾರಾ ಚ, ಬಹೂ ಚೇವ ಕುಮಾರಿಕಾ;
ಸೇತುನೋ ಚ ವಿಹಾರಸ್ಸ, ವಾಲುಕಾ ಆಕಿರಿಂಸು ತೇ.
‘‘ವೀಥಿಂ ¶ ಸಮ್ಮಜ್ಜನಂ ಕತ್ವಾ, ಕದಲೀಪುಣ್ಣಘಟೇ ಧಜೇ;
ಧೂಪಂ ಚುಣ್ಣಞ್ಚ ಮಾಲಞ್ಚ, ಕಾರಂ ಕತ್ವಾನ ಸತ್ಥುನೋ.
‘‘ಸೇತುವಿಹಾರೇ ಕಾರೇತ್ವಾ, ನಿಮನ್ತೇತ್ವಾ ವಿನಾಯಕಂ;
ಮಹಾದಾನಂ ದದಿತ್ವಾನ, ಸಮ್ಬೋಧಿಂ ಅಭಿಪತ್ಥಯಿಂ.
‘‘ಪದುಮುತ್ತರೋ ಮಹಾವೀರೋ, ತಾರಕೋ ಸಬ್ಬಪಾಣಿನಂ;
ಅನುಮೋದನೀಯಂಕಾಸಿ, ಜಟಿಲಸ್ಸ ಮಹಾಮುನಿ [ಕತ್ವಾ, ವಿಯಾಕಾಸಿ ಮಹಾಮುನಿ (ಸ್ಯಾ.)].
‘‘‘ಸತಸಹಸ್ಸಾತಿಕ್ಕನ್ತೇ, ಕಪ್ಪೋ ಹೇಸ್ಸತಿ ಭದ್ದಕೋ;
ಭವಾಭವೇನುಭೋತ್ವಾನ, ಪಾಪುಣಿಸ್ಸತಿ ಬೋಧಿಯಂ.
‘‘‘ಕಾಚಿ ಹತ್ಥಪರಿಕಮ್ಮಂ, ಕತಾವೀ ನರನಾರಿಯೋ;
ಅನಾಗತಮ್ಹಿ ಅದ್ಧಾನೇ, ಸಬ್ಬಾ ಹೇಸ್ಸನ್ತಿ ಸಮ್ಮುಖಾ’.
‘‘ತೇನ ಕಮ್ಮವಿಪಾಕೇನ, ಚೇತನಾಪಣಿಧೀಹಿ ಚ;
ಉಪ್ಪನ್ನಾ ದೇವಭವನಂ, ತುಯ್ಹಂ ತಾ ಪರಿಚಾರಿಕಾ.
‘‘ದಿಬ್ಬಸುಖಂ ¶ ಅಸಙ್ಖಿಯಂ, ಮಾನುಸಞ್ಚ ಅಸಙ್ಖಿಯಂ;
ತುಯ್ಹಂ ತೇ ಪರಿಚಾರೇಮ, ಸಂಸರಿಮ್ಹ ಭವಾಭವೇ.
‘‘ಸತಸಹಸ್ಸಿತೋ ಕಪ್ಪೇ, ಸುಕತಂ ಕಮ್ಮಸಮ್ಪದಂ;
ಸುಖುಮಾಲೀ ಮನುಸ್ಸಾನಂ, ಅಥೋ ದೇವಪುರೇ ವರೇ.
‘‘ರೂಪಭೋಗಯಸೇ ಚೇವ, ಅಥೋ ಕಿತ್ತಿಞ್ಚ ಸಕ್ಕತಂ [ಕಿತ್ತಿಸುಖಂ ಪಿಯಂ (ಸ್ಯಾ.)];
ಲಭಾಮ ಸತತಂ ಸಬ್ಬಂ, ಸುಕತಂ ಕಮ್ಮಸಮ್ಪದಂ.
‘‘ಪಚ್ಛಿಮೇ ¶ ಭವೇ ಸಮ್ಪತ್ತೇ, ಜಾತಾಮ್ಹ ಬ್ರಾಹ್ಮಣೇ ಕುಲೇ;
ಸುಖುಮಾಲಹತ್ಥಪಾದಾ, ಸಕ್ಯಪುತ್ತನಿವೇಸನೇ.
‘‘ಸಬ್ಬಕಾಲಮ್ಪಿ ¶ ಪಥವಿಂ, ನ ಪಸ್ಸಾಮ ನ ಲಙ್ಕತಂ;
ಚಿಕ್ಖಲ್ಲಭೂಮಿಮಸುಚಿಂ [ಚಿಕ್ಖಲ್ಲಂ ಭೂಮಿಂ ಗಮನಂ (ಸ್ಯಾ.)], ನ ಪಸ್ಸಾಮ ಮಹಾಮುನೇ.
‘‘ಅಗಾರಂ ವಸನ್ತೇ ಅಮ್ಹೇ, ಸಕ್ಕಾರಂ ಸಬ್ಬಕಾಲಿಕಂ;
ಉಪನೇನ್ತಿ ಸದಾ ಸಬ್ಬಂ, ಪುಬ್ಬಕಮ್ಮಫಲೇನ ನೋ [ಪುಬ್ಬಕಮ್ಮಫಲಂ ತತೋ (ಸೀ. ಪೀ.)].
‘‘ಅಗಾರಂ ¶ ಪಜಹಿತ್ವಾನ, ಪಬ್ಬಜಿತ್ವಾನಗಾರಿಯಂ;
ಸಂಸಾರಪಥನಿತ್ಥಿಣ್ಣಾ, ವೀತರಾಗಾ ಭವಾಮಸೇ [ನತ್ಥಿ ದಾನಿ ಪುನಬ್ಭವೋ (ಸೀ. ಸ್ಯಾ. ಪೀ.)].
‘‘ಚೀವರಂ ಪಿಣ್ಡಪಾತಞ್ಚ, ಪಚ್ಚಯಂ ಸಯನಾಸನಂ;
ಉಪನೇನ್ತಿ ಸದಾ ಅಮ್ಹೇ, ಸಹಸ್ಸಾನಿ ತತೋ ತತೋ.
‘‘ಕಿಲೇಸಾ ಝಾಪಿತಾ ಅಮ್ಹಂ…ಪೇ… ವಿಹರಾಮ ಅನಾಸವಾ.
‘‘ಸ್ವಾಗತಂ ¶ ವತ ನೋ ಆಸಿ…ಪೇ… ಕತಂ ಬುದ್ಧಸ್ಸ ಸಾಸನಂ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಚತುರಾಸೀತಿಬ್ರಾಹ್ಮಣಕಞ್ಞಾಭಿಕ್ಖುನೀಸಹಸ್ಸಾನಿ ಭಗವತೋ ಸಮ್ಮುಖಾ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಚತುರಾಸೀತಿಭಿಕ್ಖುನೀಸಹಸ್ಸಾಪದಾನಂ ದುತಿಯಂ.
೩. ಉಪ್ಪಲದಾಯಿಕಾಥೇರೀಅಪದಾನಂ
‘‘ನಗರೇ ಅರುಣವತಿಯಾ, ಅರುಣೋ ನಾಮ ಖತ್ತಿಯೋ;
ತಸ್ಸ ರಞ್ಞೋ ಅಹುಂ ಭರಿಯಾ, ಏಕಜ್ಝಂ ಚಾರಯಾಮಹಂ.
‘‘ರಹೋಗತಾ ನಿಸೀದಿತ್ವಾ, ಏವಂ ಚಿನ್ತೇಸಹಂ ತದಾ;
‘ಕುಸಲಂ ಮೇ ಕತಂ ನತ್ಥಿ, ಆದಾಯ ಗಮಿಯಂ ಮಮ.
‘‘‘ಮಹಾಭಿತಾಪಂ ಕಟುಕಂ, ಘೋರರೂಪಂ ಸುದಾರುಣಂ;
ನಿರಯಂ ನೂನ ಗಚ್ಛಾಮಿ, ಏತ್ಥ ಮೇ ನತ್ಥಿ ಸಂಸಯೋ’.
‘‘ಏವಾಹಂ ¶ ಚಿನ್ತಯಿತ್ವಾನ, ಪಹಂಸೇತ್ವಾನ ಮಾನಸಂ;
ರಾಜಾನಂ ಉಪಗನ್ತ್ವಾನ, ಇದಂ ವಚನಮಬ್ರವಿಂ.
‘‘‘ಇತ್ಥೀ ನಾಮ ಮಯಂ ದೇವ, ಪುರಿಸಾನಿತ್ತರಾ ಅಹು [ಪುರಿಸಾನುಗತಾ ಸದಾ (ಸೀ.), ಪುರಿಸಾ ನ ಭವಾಮ ನೋ (ಸ್ಯಾ.), ಪುರಿಸಾನಂ ಭರಾ ಮಯಂ (ಪೀ.)];
ಏಕಂ ಮೇ ಸಮಣಂ ದೇಹಿ, ಭೋಜಯಿಸ್ಸಾಮಿ ಖತ್ತಿಯ’.
‘‘ಅದಾಸಿ ¶ ಮೇ ತದಾ ರಾಜಾ, ಸಮಣಂ ಭಾವಿತಿನ್ದ್ರಿಯಂ;
ತಸ್ಸ ಪತ್ತಂ ಗಹೇತ್ವಾನ, ಪರಮನ್ನೇನ ಪೂರಯಿಂ.
‘‘ಪೂರೇತ್ವಾ ¶ ¶ ಪರಮಂ ಅನ್ನಂ, ಸಹ ಸುಗನ್ಧಲೇಪನಂ;
ಮಹಾಚೇಲೇನ ಛಾದಿತ್ವಾ, ಅದಾಸಿಂ ತುಟ್ಠಮಾನಸಾ.
‘‘ತೇನ ಕಮ್ಮೇನ ಸುಕತೇನ, ಚೇತನಾಪಣಿಧೀಹಿ ಚ;
ಜಹಿತ್ವಾ ಮಾನುಸಂ ದೇಹಂ, ತಾವತಿಂಸಮಗಚ್ಛಹಂ.
‘‘ಸಹಸ್ಸದೇವರಾಜೂನಂ, ಮಹೇಸಿತ್ತಮಕಾರಯಿಂ;
ಸಹಸ್ಸಚಕ್ಕವತ್ತೀನಂ, ಮಹೇಸಿತ್ತಮಕಾರಯಿಂ.
‘‘ಪದೇಸರಜ್ಜಂ ವಿಪುಲಂ, ಗಣನಾತೋ ಅಸಙ್ಖಿಯಂ;
ನಾನಾವಿಧಂ ಬಹುಂ ಅಞ್ಞಂ, ತಸ್ಸ ಕಮ್ಮಫಲಂ ತತೋ.
‘‘ಉಪ್ಪಲಸ್ಸೇವ ಮೇ ವಣ್ಣೋ, ಅಭಿರೂಪಾ ಸುದಸ್ಸನಾ;
ಇತ್ಥಿಸಬ್ಬಙ್ಗಸಮ್ಪನ್ನಾ, ಅಭಿಜಾತಾ ಜುತಿನ್ಧರಾ.
‘‘ಪಚ್ಛಿಮೇ ಭವೇ ಸಮ್ಪತ್ತೇ, ಅಜಾಯಿಂ ಸಾಕಿಯೇ ಕುಲೇ;
ನಾರೀಸಹಸ್ಸಪಾಮೋಕ್ಖಾ, ಸುದ್ಧೋದನಸುತಸ್ಸಹಂ.
‘‘ನಿಬ್ಬಿನ್ದಿತ್ವಾ ಅಗಾರೇಹಂ, ಪಬ್ಬಜಿಂ ಅನಗಾರಿಯಂ;
ಸತ್ತಮೀರತ್ತಿಸಮ್ಪತ್ತಾ [ಸತ್ತಮಿಂರತ್ತಿಮಪತ್ತಾ (ಸೀ. ಸ್ಯಾ. ಪೀ.)], ಚತುಸಚ್ಚಮಪಾಪುಣಿಂ.
‘‘ಚೀವರಂ ಪಿಣ್ಡಪಾತಞ್ಚ, ಪಚ್ಚಯಂ ಸಯನಾಸನಂ;
ಪರಿಮೇತುಂ ನ ಸಕ್ಕೋಮಿ, ಪಿಣ್ಡಪಾತಸ್ಸಿದಂ ಫಲಂ.
‘‘ಯಂ ಮಯ್ಹಂ ಪೂರಿತಂ ಕಮ್ಮಂ, ಕುಸಲಂ ಸರಸೇ ಮುನಿ;
ತುಯ್ಹತ್ಥಾಯ ಮಹಾವೀರ, ಪರಿಚತ್ತಂ ಬಹುಂ ಮಯಾ.
‘‘ಏಕತ್ತಿಂಸೇ ಇತೋ ಕಪ್ಪೇ, ಯಂ ದಾನಮದದಿಂ ತದಾ;
ದುಗ್ಗತಿಂ ನಾಭಿಜಾನಾಮಿ, ಪಿಣ್ಡಪಾತಸ್ಸಿದಂ ಫಲಂ.
‘‘ದ್ವೇ ¶ ¶ ಗತಿಯೋ ಪಜಾನಾಮಿ, ದೇವತ್ತಂ ಅಥ ಮಾನುಸಂ;
ಅಞ್ಞಂ ಗತಿಂ ನ ಜಾನಾಮಿ, ಪಿಣ್ಡಪಾತಸ್ಸಿದಂ ಫಲಂ.
‘‘ಉಚ್ಚೇ ಕುಲೇ ಪಜಾಯಾಮಿ, ಮಹಾಸಾಲೇ [ತಯೋ ಸಾಲ (ಕ.)] ಮಹದ್ಧನೇ;
ಅಞ್ಞೇ ಕುಲೇ ನ ಜಾಯಾಮಿ, ಪಿಣ್ಡಪಾತಸ್ಸಿದಂ ಫಲಂ.
‘‘ಭವಾಭವೇ ಸಂಸರಿತ್ವಾ, ಸುಕ್ಕಮೂಲೇನ ಚೋದಿತಾ;
ಅಮನಾಪಂ ನ ಪಸ್ಸಾಮಿ, ಸೋಮನಸ್ಸಕತಂ ಫಲಂ.
‘‘ಇದ್ಧೀಸು ¶ ¶ ಚ ವಸೀ ಹೋಮಿ, ದಿಬ್ಬಾಯ ಸೋತಧಾತುಯಾ;
ಚೇತೋಪರಿಯಞಾಣಸ್ಸ, ವಸೀ ಹೋಮಿ ಮಹಾಮುನೇ.
‘‘ಪುಬ್ಬೇನಿವಾಸಂ ಜಾನಾಮಿ, ದಿಬ್ಬಚಕ್ಖು ವಿಸೋಧಿತಂ;
ಸಬ್ಬಾಸವಪರಿಕ್ಖೀಣಾ, ನತ್ಥಿ ದಾನಿ ಪುನಬ್ಭವೋ.
‘‘ಅತ್ಥಧಮ್ಮನಿರುತ್ತೀಸು, ಪಟಿಭಾನೇ ತಥೇವ ಚ;
ಞಾಣಂ ಮಮ ಮಹಾವೀರ, ಉಪ್ಪನ್ನಂ ತವ ಸನ್ತಿಕೇ.
‘‘ಕಿಲೇಸಾ ಝಾಪಿತಾ ಮಯ್ಹಂ…ಪೇ… ವಿಹರಾಮಿ ಅನಾಸವಾ.
‘‘ಸ್ವಾಗತಂ ವತ ಮೇ ಆಸಿ…ಪೇ… ಕತಂ ಬುದ್ಧಸ್ಸ ಸಾಸನಂ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಉಪ್ಪಲದಾಯಿಕಾ ಭಿಕ್ಖುನೀ ಭಗವತೋ ಸಮ್ಮುಖಾ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಉಪ್ಪಲದಾಯಿಕಾಥೇರಿಯಾಪದಾನಂ ತತಿಯಂ.
೪. ಸಿಙ್ಗಾಲಮಾತುಥೇರೀಅಪದಾನಂ
‘‘ಪದುಮುತ್ತರೋ ¶ ನಾಮ ಜಿನೋ, ಸಬ್ಬಧಮ್ಮಾನ ಪಾರಗೂ;
ಇತೋ ಸತಸಹಸ್ಸಮ್ಹಿ, ಕಪ್ಪೇ ಉಪ್ಪಜ್ಜಿ ನಾಯಕೋ.
‘‘ತದಾಹಂ ಹಂಸವತಿಯಂ, ಜಾತಾಮಚ್ಚಕುಲೇ ಅಹುಂ;
ನಾನಾರತನಪಜ್ಜೋತೇ, ಇದ್ಧೇ ಫೀತೇ ಮಹದ್ಧನೇ.
‘‘ಪಿತುನಾ ಸಹ ಗನ್ತ್ವಾನ, ಮಹಾಜನಪುರಕ್ಖತಾ;
ಧಮ್ಮಂ ಬುದ್ಧಸ್ಸ ಸುತ್ವಾನ, ಪಬ್ಬಜಿಂ ಅನಗಾರಿಯಂ.
‘‘ಪಬ್ಬಜಿತ್ವಾನ ¶ ಕಾಯೇನ, ಪಾಪಕಮ್ಮಂ ವಿವಜ್ಜಯಿಂ;
ವಚೀದುಚ್ಚರಿತಂ ಹಿತ್ವಾ, ಆಜೀವಂ ಪರಿಸೋಧಯಿಂ.
‘‘ಬುದ್ಧೇ ಪಸನ್ನಾ ಧಮ್ಮೇ ಚ, ಸಙ್ಘೇ ಚ ತಿಬ್ಬಗಾರವಾ;
ಸದ್ಧಮ್ಮಸ್ಸವನೇ ಯುತ್ತಾ, ಬುದ್ಧದಸ್ಸನಲಾಲಸಾ [ಬುದ್ಧದಸ್ಸನಸಾಲಯಾ (ಸ್ಯಾ.)].
‘‘ಅಗ್ಗಂ ಸದ್ಧಾಧಿಮುತ್ತಾನಂ, ಅಸ್ಸೋಸಿಂ ಭಿಕ್ಖುನಿಂ ತದಾ;
ತಂ ಠಾನಂ ಪತ್ಥಯಿತ್ವಾನ, ತಿಸ್ಸೋ ಸಿಕ್ಖಾ ಅಪೂರಯಿಂ.
‘‘ತತೋ ¶ ಮಂ ಸುಗತೋ ಆಹ, ಕರುಣಾನುಗತಾಸಯೋ;
‘ಯಸ್ಸ ಸದ್ಧಾ ತಥಾಗತೇ, ಅಚಲಾ ಸುಪ್ಪತಿಟ್ಠಿತಾ;
ಸೀಲಞ್ಚ ¶ ಯಸ್ಸ ಕಲ್ಯಾಣಂ, ಅರಿಯಕನ್ತಂ ಪಸಂಸಿತಂ.
‘‘‘ಸಙ್ಘೇ ಪಸಾದೋ ಯಸ್ಸತ್ಥಿ, ಉಜುಭೂತಞ್ಚ ದಸ್ಸನಂ;
ಅದಲಿದ್ದೋತಿ ತಂ ಆಹು, ಅಮೋಘಂ ತಸ್ಸ ಜೀವಿತಂ.
‘‘‘ತಸ್ಮಾ ಸದ್ಧಞ್ಚ ಸೀಲಞ್ಚ, ಪಸಾದಂ ಧಮ್ಮದಸ್ಸನಂ;
ಅನುಯುಞ್ಜೇಥ ¶ ಮೇಧಾವೀ, ಸರಂ ಬುದ್ಧಾನ [ಬುದ್ಧಾನುಸಾಸನಂ (ಸೀ.), ಬುದ್ಧಾನಂ ಸಾಸನಂ (ಸ್ಯಾ.)] ಸಾಸನಂ’.
‘‘ತಂ ಸುತ್ವಾಹಂ ಪಮುದಿತಾ, ಅಪುಚ್ಛಿಂ ಪಣಿಧಿಂ ಮಮ;
ತದಾ ಅನೋಮೋ ಅಮಿತೋ, ಬ್ಯಾಕರಿತ್ಥ ವಿನಾಯಕೋ;
‘ಬುದ್ಧೇ ಪಸನ್ನಾ ಕಲ್ಯಾಣೀ, ಲಚ್ಛಸೇ ತಂ ಸುಪತ್ಥಿತಂ.
‘‘‘ಸತಸಹಸ್ಸಿತೋ ಕಪ್ಪೇ, ಓಕ್ಕಾಕಕುಲಸಮ್ಭವೋ;
ಗೋತಮೋ ನಾಮ ಗೋತ್ತೇನ, ಸತ್ಥಾ ಲೋಕೇ ಭವಿಸ್ಸತಿ.
‘‘‘ತಸ್ಸ ಧಮ್ಮೇಸು ದಾಯಾದಾ, ಓರಸಾ ಧಮ್ಮನಿಮ್ಮಿತಾ;
ಸಿಙ್ಗಾಲಕಸ್ಸ [ಸಿಗಾಲಕಸ್ಸ (ಸೀ. ಪೀ.)] ಮಾತಾತಿ, ಹೇಸ್ಸತಿ ಸತ್ಥು ಸಾವಿಕಾ’.
‘‘ತಂ ಸುತ್ವಾ ಮುದಿತಾ ಹುತ್ವಾ, ಯಾವಜೀವಂ ತದಾ ಜಿನಂ;
ಮೇತ್ತಚಿತ್ತಾ ಪರಿಚರಿಂ, ಪಟಿಪತ್ತೀಹಿ ನಾಯಕಂ.
‘‘ತೇನ ಕಮ್ಮೇನ ಸುಕತೇನ, ಚೇತನಾಪಣಿಧೀಹಿ ಚ;
ಜಹಿತ್ವಾ ಮಾನುಸಂ ದೇಹಂ, ತಾವತಿಂಸಮಗಚ್ಛಹಂ.
‘‘ಪಚ್ಛಿಮೇ ಚ ಭವೇ ದಾನಿ, ಗಿರಿಬ್ಬಜಪುರುತ್ತಮೇ;
ಜಾತಾ ಸೇಟ್ಠಿಕುಲೇ ಫೀತೇ, ಮಹಾರತನಸಞ್ಚಯೇ.
‘‘ಪುತ್ತೋ ¶ ಸಿಙ್ಗಾಲಕೋ ನಾಮ, ಮಮಾಸಿ ವಿಪಥೇ ರತೋ;
ದಿಟ್ಠಿಗಹನಪಕ್ಖನ್ದೋ, ದಿಸಾಪೂಜನತಪ್ಪರೋ.
‘‘ನಾನಾದಿಸಾ ನಮಸ್ಸನ್ತಂ [ನಮಸ್ಸತಿ (ಸ್ಯಾ.)], ಪಿಣ್ಡಾಯ ನಗರಂ ವಜಂ;
ತಂ ದಿಸ್ವಾ ಓವದೀ ಬುದ್ಧೋ, ಮಗ್ಗೇ ಠತ್ವಾ ವಿನಾಯಕೋ.
‘‘ತಸ್ಸ ದೇಸಯತೋ ಧಮ್ಮಂ, ಪನಾದೋ ವಿಮ್ಹಯೋ ಅಹು;
ದ್ವೇಕೋಟಿನರನಾರೀನಂ, ಧಮ್ಮಾಭಿಸಮಯೋ ಅಹು.
‘‘ತದಾಹಂ ¶ ಪರಿಸಂ ಗನ್ತ್ವಾ, ಸುತ್ವಾ ಸುಗತಭಾಸಿತಂ;
ಸೋತಾಪತ್ತಿಫಲಂ ಪತ್ತಾ, ಪಬ್ಬಜಿಂ ಅನಗಾರಿಯಂ.
‘‘ನ ¶ ¶ ಚಿರೇನೇವ ಕಾಲೇನ, ಬುದ್ಧದಸ್ಸನಲಾಲಸಾ;
ಅನುಸ್ಸತಿಂ ತಂ ಭಾವೇತ್ವಾ, ಅರಹತ್ತಮಪಾಪುಣಿಂ.
‘‘ದಸ್ಸನತ್ಥಾಯ ಬುದ್ಧಸ್ಸ, ಸಬ್ಬದಾ ಚ ವಜಾಮಹಂ;
ಅತಿತ್ತಾಯೇವ ಪಸ್ಸಾಮಿ, ರೂಪಂ ನಯನನನ್ದನಂ.
‘‘ಸಬ್ಬಪಾರಮಿಸಮ್ಭೂತಂ, ಲಕ್ಖೀನಿಲಯನಂ ವರಂ;
ರೂಪಂ ಸಬ್ಬಸುಭಾಕಿಣ್ಣಂ, ಅತಿತ್ತಾ ವಿಹರಾಮಹಂ.
‘‘ಜಿನೋ ತಸ್ಮಿಂ ಗುಣೇ ತುಟ್ಠೋ, ಏತದಗ್ಗೇ ಠಪೇಸಿ ಮಂ;
ಸಿಙ್ಗಾಲಕಸ್ಸ ಯಾ ಮಾತಾ, ಅಗ್ಗಾ ಸದ್ಧಾಧಿಮುತ್ತಿಕಾ [ಸಂಘವಿಮುತ್ತಿಕಾ (ಪೀ.), ಮಮಾಧಿಮುತ್ತಿಕಾ (ಕ.)].
‘‘ಇದ್ಧೀಸು ಚ ವಸೀ ಹೋಮಿ, ದಿಬ್ಬಾಯ ಸೋತಧಾತುಯಾ;
ಚೇತೋಪರಿಯಞಾಣಸ್ಸ, ವಸೀ ಹೋಮಿ ಮಹಾಮುನಿ.
‘‘ಪುಬ್ಬೇನಿವಾಸಂ ಜಾನಾಮಿ, ದಿಬ್ಬಚಕ್ಖು ವಿಸೋಧಿತಂ;
ಸಬ್ಬಾಸವಪರಿಕ್ಖೀಣಾ, ನತ್ಥಿ ದಾನಿ ಪುನಬ್ಭವೋ.
‘‘ಅತ್ಥಧಮ್ಮನಿರುತ್ತೀಸು, ಪಟಿಭಾನೇ ತಥೇವ ಚ;
ಞಾಣಂ ಮಮ ಮಹಾವೀರ, ಉಪ್ಪನ್ನಂ ತವ ಸನ್ತಿಕೇ.
‘‘ಕಿಲೇಸಾ ಝಾಪಿತಾ ಮಯ್ಹಂ…ಪೇ… ವಿಹರಾಮಿ ಅನಾಸವಾ.
‘‘ಸ್ವಾಗತಂ ವತ ಮೇ ಆಸಿ…ಪೇ… ಕತಂ ಬುದ್ಧಸ್ಸ ಸಾಸನಂ.
‘‘ಪಟಿಸಮ್ಭಿದಾ ¶ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಸಿಙ್ಗಾಲಮಾತಾ ಭಿಕ್ಖುನೀ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಸಿಙ್ಗಾಲಮಾತುಥೇರಿಯಾಪದಾನಂ ಚತುತ್ಥಂ.
೫. ಸುಕ್ಕಾಥೇರೀಅಪದಾನಂ
‘‘ಏಕನವುತಿತೋ ¶ ಕಪ್ಪೇ, ವಿಪಸ್ಸೀ ನಾಮ ನಾಯಕೋ;
ಉಪ್ಪಜ್ಜಿ ಚಾರುದಸ್ಸನೋ, ಸಬ್ಬಧಮ್ಮವಿಪಸ್ಸಕೋ.
‘‘ತದಾಹಂ ಬನ್ಧುಮತಿಯಂ, ಜಾತಾ ಅಞ್ಞತರೇ ಕುಲೇ;
ಧಮ್ಮಂ ಸುತ್ವಾನ ಮುನಿನೋ, ಪಬ್ಬಜಿಂ ಅನಗಾರಿಯಂ.
‘‘ಬಹುಸ್ಸುತಾ ¶ ಧಮ್ಮಧರಾ, ಪಟಿಭಾನವತೀ ತಥಾ;
ವಿಚಿತ್ತಕಥಿಕಾ ಚಾಪಿ, ಜಿನಸಾಸನಕಾರಿಕಾ.
‘‘ತದಾ ¶ ಧಮ್ಮಕಥಂ ಕತ್ವಾ, ಹಿತಾಯ ಜನತಂ ಬಹುಂ [ಜನತಾಯ ಹಿತಂ ಬಹುಂ (ಸೀ.) … ಸದಾ (ಸ್ಯಾ.), ಹಿತಾಯ ಜನಸಂಸರಿಂ (ಪೀ.)];
ತತೋ ಚುತಾಹಂ ತುಸಿತಂ, ಉಪಪನ್ನಾ ಯಸಸ್ಸಿನೀ.
‘‘ಏಕತಿಂಸೇ ಇತೋ ಕಪ್ಪೇ, ಸಿಖೀ ವಿಯ ಸಿಖೀ ಜಿನೋ;
ತಪನ್ತೋ ಯಸಸಾ ಲೋಕೇ [ಲೋಕಂ (ಸ್ಯಾ. ಪೀ.)], ಉಪ್ಪಜ್ಜಿ ವದತಂ ವರೋ.
‘‘ತದಾಪಿ ಪಬ್ಬಜಿತ್ವಾನ, ಬುದ್ಧಸಾಸನಕೋವಿದಾ;
ಜೋತೇತ್ವಾ ಜಿನವಾಕ್ಯಾನಿ, ತತೋಪಿ ತಿದಿವಂ ಗತಾ.
‘‘ಏಕತಿಂಸೇವ ಕಪ್ಪಮ್ಹಿ, ವೇಸ್ಸಭೂ ನಾಮ ನಾಯಕೋ;
ಉಪ್ಪಜ್ಜಿತ್ಥ ಮಹಾಞಾಣೀ, ತದಾಪಿ ಚ ತಥೇವಹಂ.
‘‘ಪಬ್ಬಜಿತ್ವಾ ¶ ಧಮ್ಮಧರಾ, ಜೋತಯಿಂ ಜಿನಸಾಸನಂ;
ಗನ್ತ್ವಾ ಮರುಪುರಂ ರಮ್ಮಂ, ಅನುಭೋಸಿಂ ಮಹಾಸುಖಂ.
‘‘ಇಮಮ್ಹಿ ಭದ್ದಕೇ ಕಪ್ಪೇ, ಕಕುಸನ್ಧೋ ಜಿನುತ್ತಮೋ;
ಉಪ್ಪಜ್ಜಿ ನರಸರಣೋ [ನರಸದ್ದೂಲೋ (ಸೀ. ಸ್ಯಾ. ಪೀ.)], ತದಾಪಿ ಚ ತಥೇವಹಂ.
‘‘ಪಬ್ಬಜಿತ್ವಾ ಮುನಿಮತಂ, ಜೋತಯಿತ್ವಾ ಯಥಾಯುಕಂ;
ತತೋ ಚುತಾಹಂ ತಿದಿವಂ, ಅಗಂ ಸಭವನಂ ಯಥಾ.
‘‘ಇಮಸ್ಮಿಂಯೇವ ಕಪ್ಪಮ್ಹಿ, ಕೋಣಾಗಮನನಾಯಕೋ;
ಉಪ್ಪಜ್ಜಿ ಲೋಕಸರಣೋ, ಅರಣೋ ಅಮತಙ್ಗತೋ [ವದತಂ ವರೋ, ಸಬ್ಬಸತ್ತಾನಮುತ್ತಮೋ (ಸ್ಯಾ.)].
‘‘ತದಾಪಿ ಪಬ್ಬಜಿತ್ವಾನ, ಸಾಸನೇ ತಸ್ಸ ತಾದಿನೋ;
ಬಹುಸ್ಸುತಾ ಧಮ್ಮಧರಾ, ಜೋತಯಿಂ ಜಿನಸಾಸನಂ.
‘‘ಇಮಸ್ಮಿಂಯೇವ ¶ ಕಪ್ಪಮ್ಹಿ, ಕಸ್ಸಪೋ ಮುನಿಮುತ್ತಮೋ;
ಉಪ್ಪಜ್ಜಿ ಲೋಕಸರಣೋ, ಅರಣೋ ಮರಣನ್ತಗೂ.
‘‘ತಸ್ಸಾಪಿ ನರವೀರಸ್ಸ, ಪಬ್ಬಜಿತ್ವಾನ ಸಾಸನೇ;
ಪರಿಯಾಪುಟಸದ್ಧಮ್ಮಾ, ಪರಿಪುಚ್ಛಾವಿಸಾರದಾ.
‘‘ಸುಸೀಲಾ ಲಜ್ಜಿನೀ ಚೇವ, ತೀಸು ಸಿಕ್ಖಾಸು ಕೋವಿದಾ;
ಬಹುಂ ಧಮ್ಮಕಥಂ ಕತ್ವಾ, ಯಾವಜೀವಂ ಮಹಾಮುನೇ.
‘‘ತೇನ ¶ ಕಮ್ಮವಿಪಾಕೇನ, ಚೇತನಾಪಣಿಧೀಹಿ ಚ;
ಜಹಿತ್ವಾ ಮಾನುಸಂ ದೇಹಂ, ತಾವತಿಂಸಮಗಚ್ಛಹಂ.
‘‘ಪಚ್ಛಿಮೇ ¶ ಚ ಭವೇ ದಾನಿ, ಗಿರಿಬ್ಬಜಪುರುತ್ತಮೇ;
ಜಾತಾ ಸೇಟ್ಠಿಕುಲೇ ಫೀತೇ, ಮಹಾರತನಸಞ್ಚಯೇ.
‘‘ಯದಾ ¶ ಭಿಕ್ಖುಸಹಸ್ಸೇನ, ಪರಿವುತೋ ಲೋಕನಾಯಕೋ;
ಉಪಾಗಮಿ ರಾಜಗಹಂ, ಸಹಸ್ಸಕ್ಖೇನ ವಣ್ಣಿತೋ.
‘‘‘ದನ್ತೋ ದನ್ತೇಹಿ ಸಹ ಪುರಾಣಜಟಿಲೇಹಿ, ವಿಪ್ಪಮುತ್ತೋ ವಿಪ್ಪಮುತ್ತೇಹಿ;
ಸಿಙ್ಗೀನಿಕ್ಖಸವಣ್ಣೋ, ರಾಜಗಹಂ ಪಾವಿಸಿ ಭಗವಾ’.
‘‘ದಿಸ್ವಾ ಬುದ್ಧಾನುಭಾವಂ ತಂ, ಸುತ್ವಾವ ಗುಣಸಞ್ಚಯಂ;
ಬುದ್ಧೇ ಚಿತ್ತಂ ಪಸಾದೇತ್ವಾ, ಪೂಜಯಿಂ ತಂ ಯಥಾಬಲಂ.
‘‘ಅಪರೇನ ಚ ಕಾಲೇನ, ಧಮ್ಮದಿನ್ನಾಯ ಸನ್ತಿಕೇ;
ಅಗಾರಾ ನಿಕ್ಖಮಿತ್ವಾನ, ಪಬ್ಬಜಿಂ ಅನಗಾರಿಯಂ.
‘‘ಕೇಸೇಸು ಛಿಜ್ಜಮಾನೇಸು, ಕಿಲೇಸೇ ಝಾಪಯಿಂ ಅಹಂ;
ಉಗ್ಗಹಿಂ ಸಾಸನಂ ಸಬ್ಬಂ, ಪಬ್ಬಜಿತ್ವಾಚಿರೇನಹಂ.
‘‘ತತೋ ಧಮ್ಮಮದೇಸೇಸಿಂ, ಮಹಾಜನಸಮಾಗಮೇ;
ಧಮ್ಮೇ ದೇಸಿಯಮಾನಮ್ಹಿ, ಧಮ್ಮಾಭಿಸಮಯೋ ಅಹು.
‘‘ನೇಕಪಾಣಸಹಸ್ಸಾನಂ, ತಂ ವಿದಿತ್ವಾತಿವಿಮ್ಹಿತೋ;
ಅಭಿಪ್ಪಸನ್ನೋ ಮೇ ಯಕ್ಖೋ, ಭಮಿತ್ವಾನ ಗಿರಿಬ್ಬಜಂ.
‘‘ಕಿಂ ಮೇ ಕತಾ ರಾಜಗಹೇ ಮನುಸ್ಸಾ, ಮಧುಂ ಪೀತಾವ ಅಚ್ಛರೇ;
ಯೇ ಸುಕ್ಕಂ ನ ಉಪಾಸನ್ತಿ, ದೇಸೇನ್ತಿಂ ಅಮತಂ ಪದಂ.
‘‘ತಞ್ಚ ¶ ಅಪ್ಪಟಿವಾನೀಯಂ, ಅಸೇಚನಕಮೋಜವಂ;
ಪಿವನ್ತಿ ಮಞ್ಞೇ ಸಪ್ಪಞ್ಞಾ, ವಲಾಹಕಮಿವದ್ಧಗೂ.
‘‘ಇದ್ಧೀಸು ¶ ಚ ವಸೀ ಹೋಮಿ, ದಿಬ್ಬಾಯ ಸೋತಧಾತುಯಾ;
ಚೇತೋಪರಿಯಞಾಣಸ್ಸ, ವಸೀ ಹೋಮಿ ಮಹಾಮುನೇ.
‘‘ಪುಬ್ಬೇನಿವಾಸಂ ಜಾನಾಮಿ, ದಿಬ್ಬಚಕ್ಖು ವಿಸೋಧಿತಂ;
ಸಬ್ಬಾಸವಪರಿಕ್ಖೀಣಾ, ನತ್ಥಿ ದಾನಿ ಪುನಬ್ಭವೋ.
‘‘ಅತ್ಥಧಮ್ಮನಿರುತ್ತೀಸು ¶ , ಪಟಿಭಾನೇ ತಥೇವ ಚ;
ಞಾಣಂ ಮಮ ಮಹಾವೀರ, ಉಪ್ಪನ್ನಂ ತವ ಸನ್ತಿಕೇ.
‘‘ಕಿಲೇಸಾ ¶ ಝಾಪಿತಾ ಮಯ್ಹಂ…ಪೇ… ವಿಹರಾಮಿ ಅನಾಸವಾ.
‘‘ಸ್ವಾಗತಂ ವತ ಮೇ ಆಸಿ…ಪೇ… ಕತಂ ಬುದ್ಧಸ್ಸ ಸಾಸನಂ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಸುಕ್ಕಾ ಭಿಕ್ಖುನೀ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಸುಕ್ಕಾಥೇರಿಯಾಪದಾನಂ ಪಞ್ಚಮಂ.
ಪಞ್ಚಮಂ ಭಾಣವಾರಂ.
೬. ಅಭಿರೂಪನನ್ದಾಥೇರೀಅಪದಾನಂ
‘‘ಏಕನವುತಿತೋ ಕಪ್ಪೇ, ವಿಪಸ್ಸೀ ನಾಮ ನಾಯಕೋ;
ಉಪ್ಪಜ್ಜಿ ಚಾರುದಸ್ಸನೋ, ಸಬ್ಬಧಮ್ಮೇಸು ಚಕ್ಖುಮಾ.
‘‘ತದಾಹಂ ಬನ್ಧುಮತಿಯಂ, ಇದ್ಧೇ ಫೀತೇ ಮಹಾಕುಲೇ;
ಜಾತಾ ¶ ಸುರೂಪಾ ದಯಿತಾ, ಪೂಜನೀಯಾ ಜನಸ್ಸ ಚ.
‘‘ಉಪಗನ್ತ್ವಾ ಮಹಾವೀರಂ, ವಿಪಸ್ಸಿಂ ಲೋಕನಾಯಕಂ;
ಧಮ್ಮಂ ಸುಣಿತ್ವಾ ಸರಣಂ, ಉಪೇಸಿಂ ನರನಾಯಕಂ.
‘‘ಸೀಲೇಸು ಸಂವುತಾ ಹುತ್ವಾ, ನಿಬ್ಬುತೇ ಚ ನರುತ್ತಮೇ;
ಧಾತುಥೂಪಸ್ಸ ಉಪರಿ, ಸೋಣ್ಣಚ್ಛತ್ತಮಪೂಜಯಿಂ.
‘‘ಮುತ್ತಚಾಗಾ ಸೀಲವತೀ, ಯಾವಜೀವಂ ತತೋ ಚುತಾ;
ಜಹಿತ್ವಾ ಮಾನುಸಂ ದೇಹಂ, ತಾವತಿಂಸೂಪಗಾ ಅಹಂ.
‘‘ತದಾ ¶ ದಸಹಿ ಠಾನೇಹಿ, ಅಧಿಭೋತ್ವಾನ ಸೇಸಕೇ [ಅಧಿಭೋತ್ವಾ ಅಸೇಸತೋ (ಸ್ಯಾ.)];
ರೂಪಸದ್ದೇಹಿ ಗನ್ಧೇಹಿ, ರಸೇಹಿ ಫುಸನೇಹಿ ಚ.
‘‘ಆಯುನಾಪಿ ಚ ವಣ್ಣೇನ, ಸುಖೇನ ಯಸಸಾಪಿ ಚ;
ತಥೇವಾಧಿಪತೇಯ್ಯೇನ, ಅಧಿಗಯ್ಹ ವಿರೋಚಹಂ.
‘‘ಪಚ್ಛಿಮೇ ಚ ಭವೇ ದಾನಿ, ಜಾತಾಹಂ ಕಪಿಲವ್ಹಯೇ;
ಧೀತಾ ಖೇಮಕಸಕ್ಕಸ್ಸ, ನನ್ದಾ ನಾಮಾತಿ ವಿಸ್ಸುತಾ.
‘‘ಅಭಿರೂಪಸಮ್ಪದಮ್ಪಿ [ಅಭಿರುಪಂ ಉಪಪದಂ (ಸೀ.), ಅಭಿರುಪಂ ಉಪ್ಪಾದಂ (ಪೀ.)], ಅಹು ಮೇ ಕನ್ತಿಸೂಚಕಂ;
ಯದಾಹಂ ಯೋಬ್ಬನಪ್ಪತ್ತಾ, ರೂಪಲಾವಞ್ಞಭೂಸಿತಾ.
‘‘ತದಾ ¶ ¶ [ತದಾ ಮಮತ್ಥಂ (ಸೀ.), ಇಧ ಮಮತ್ತೇ (ಸ್ಯಾ. ಕ.)] ಮತ್ಥೇ ಸಕ್ಯಾನಂ, ವಿವಾದೋ ಸುಮಹಾ ಅಹು;
ಪಬ್ಬಾಜೇಸಿ ತತೋ ತಾತೋ, ಮಾ ಸಕ್ಯಾ ವಿನಸ್ಸಿಂಸುತಿ.
‘‘ಪಬ್ಬಜಿತ್ವಾ ತಥಾಗತಂ, ರೂಪದೇಸ್ಸಿಂ ನರುತ್ತಮಂ;
ಸುತ್ವಾನ ನೋಪಗಚ್ಛಾಮಿ, ಮಮ ರೂಪೇನ ಗಬ್ಬಿತಾ.
‘‘ಓವಾದಮ್ಪಿ ¶ ನ ಗಚ್ಛಾಮಿ, ಬುದ್ಧದಸ್ಸನಭೀರುತಾ;
ತದಾ ಜಿನೋ ಉಪಾಯೇನ, ಉಪನೇತ್ವಾ ಸಸನ್ತಿಕಂ.
‘‘ತಿಸ್ಸಿತ್ಥಿಯೋ [ತಿಸ್ಸೋ ಥೀಯೋ (ಸೀ. ಪೀ.)] ನಿದಸ್ಸೇಸಿ, ಇದ್ಧಿಯಾ ಮಗ್ಗಕೋವಿದೋ;
ಅಚ್ಛರಾರೂಪಸದಿಸಂ, ತರುಣಿಂ ಜರಿತಂ [ಜರಿಕಂ (ಸ್ಯಾ. ಕ.)] ಮತಂ.
‘‘ತಾಯೋ ದಿಸ್ವಾ ಸುಸಂವಿಗ್ಗಾ, ವಿರತ್ತಾಸೇ ಕಳೇವರೇ;
ಅಟ್ಠಾಸಿಂ ಭವನಿಬ್ಬಿನ್ದಾ, ತದಾ ಮಂ ಆಹ ನಾಯಕೋ.
‘‘‘ಆತುರಂ ಅಸುಚಿಂ ಪೂತಿಂ, ಪಸ್ಸ ನನ್ದೇ ಸಮುಸ್ಸಯಂ;
ಉಗ್ಘರನ್ತಂ ಪಗ್ಘರನ್ತಂ, ಬಾಲಾನಂ ಅಭಿನನ್ದಿತಂ.
‘‘‘ಅಸುಭಾಯ ಚಿತ್ತಂ ಭಾವೇಹಿ, ಏಕಗ್ಗಂ ಸುಸಮಾಹಿತಂ;
ಯಥಾ ಇದಂ ತಥಾ ಏತಂ, ಯಥಾ ಏತಂ ತಥಾ ಇದಂ.
‘‘‘ಏವಮೇತಂ ಅವೇಕ್ಖನ್ತೀ, ರತ್ತಿನ್ದಿವಮತನ್ದಿತಾ;
ತತೋ ಸಕಾಯ ಪಞ್ಞಾಯ, ಅಭಿನಿಬ್ಬಿಜ್ಝ ವಚ್ಛಸಿ’.
‘‘ತಸ್ಸಾ ¶ ಮೇ ಅಪ್ಪಮತ್ತಾಯ, ವಿಚರನ್ತಿಯಾ [ವಿಚರನ್ತ್ವಾಧ (ಸೀ.), ವಿಚಿನನ್ತೀಧ (ಸ್ಯಾ. ಪೀ.)] ಯೋನಿಸೋ;
ಯಥಾಭೂತಂ ಅಯಂ ಕಾಯೋ, ದಿಟ್ಠೋ ಸನ್ತರಬಾಹಿರೋ.
‘‘ಅಥ ನಿಬ್ಬಿನ್ದಹಂ ಕಾಯೇ, ಅಜ್ಝತ್ತಞ್ಚ ವಿರಜ್ಜಹಂ;
ಅಪ್ಪಮತ್ತಾ ವಿಸಂಯುತ್ತಾ, ಉಪಸನ್ತಾಮ್ಹಿ ನಿಬ್ಬುತಾ.
‘‘ಇದ್ಧೀಸು ಚ ವಸೀ ಹೋಮಿ, ದಿಬ್ಬಾಯ ಸೋತಧಾತುಯಾ;
ಚೇತೋಪರಿಯಞಾಣಸ್ಸ, ವಸೀ ಹೋಮಿ ಮಹಾಮುನೇ.
‘‘ಪುಬ್ಬೇನಿವಾಸಂ ಜಾನಾಮಿ, ದಿಬ್ಬಚಕ್ಖು ವಿಸೋಧಿತಂ;
ಸಬ್ಬಾಸವಪರಿಕ್ಖೀಣಾ ¶ , ನತ್ಥಿ ದಾನಿ ಪುನಬ್ಭವೋ.
‘‘ಅತ್ಥಧಮ್ಮನಿರುತ್ತೀಸು, ಪಟಿಭಾನೇ ತಥೇವ ಚ;
ಞಾಣಂ ಮಮ ಮಹಾವೀರ, ಉಪ್ಪನ್ನಂ ತವ ಸನ್ತಿಕೇ.
‘‘ಕಿಲೇಸಾ ¶ ¶ ಝಾಪಿತಾ ಮಯ್ಹಂ…ಪೇ… ವಿಹರಾಮಿ ಅನಾಸವಾ.
‘‘ಸ್ವಾಗತಂ ವತ ಮೇ ಆಸಿ…ಪೇ… ಕತಂ ಬುದ್ಧಸ್ಸ ಸಾಸನಂ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಅಭಿರೂಪನನ್ದಾ ಭಿಕ್ಖುನೀ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಅಭಿರೂಪನನ್ದಾಥೇರಿಯಾಪದಾನಂ ಛಟ್ಠಂ.
೭. ಅಡ್ಢಕಾಸಿಥೇರೀಅಪದಾನಂ
‘‘ಇಮಮ್ಹಿ ಭದ್ದಕೇ ಕಪ್ಪೇ, ಬ್ರಹ್ಮಬನ್ಧು ಮಹಾಯಸೋ;
ಕಸ್ಸಪೋ ನಾಮ ಗೋತ್ತೇನ, ಉಪ್ಪಜ್ಜಿ ವದತಂ ವರೋ.
‘‘ತದಾಹಂ ಪಬ್ಬಜಿತ್ವಾನ, ತಸ್ಸ ಬುದ್ಧಸ್ಸ ಸಾಸನೇ;
ಸಂವುತಾ ಪಾತಿಮೋಕ್ಖಮ್ಹಿ, ಇನ್ದ್ರಿಯೇಸು ಚ ಪಞ್ಚಸು.
‘‘ಮತ್ತಞ್ಞುನೀ ಚ ಅಸನೇ, ಯುತ್ತಾ ಜಾಗರಿಯೇಪಿ ಚ;
ವಸನ್ತೀ ಯುತ್ತಯೋಗಾಹಂ, ಭಿಕ್ಖುನಿಂ ವಿಗತಾಸವಂ.
‘‘ಅಕ್ಕೋಸಿಂ ದುಟ್ಠಚಿತ್ತಾಹಂ, ಗಣಿಕೇತಿ ಭಣಿಂ ತದಾ;
ತೇನ ಪಾಪೇನ ಕಮ್ಮೇನ, ನಿರಯಮ್ಹಿ ಅಪಚ್ಚಿಸಂ.
‘‘ತೇನ ¶ ¶ ಕಮ್ಮಾವಸೇಸೇನ, ಅಜಾಯಿಂ ಗಣಿಕಾಕುಲೇ;
ಬಹುಸೋವ ಪರಾಧೀನಾ, ಪಚ್ಛಿಮಾಯ ಚ ಜಾತಿಯಂ.
‘‘ಕಾಸೀಸು ಸೇಟ್ಠಿಕುಲಜಾ, ಬ್ರಹ್ಮಚಾರೀಬಲೇನಹಂ;
ಅಚ್ಛರಾ ವಿಯ ದೇವೇಸು, ಅಹೋಸಿಂ ರೂಪಸಮ್ಪದಾ.
‘‘ದಿಸ್ವಾನ ದಸ್ಸನೀಯಂ ಮಂ, ಗಿರಿಬ್ಬಜಪುರುತ್ತಮೇ;
ಗಣಿಕತ್ತೇ ನಿವೇಸೇಸುಂ, ಅಕ್ಕೋಸನಬಲೇನ ಮೇ.
‘‘ಸಾಹಂ ಸುತ್ವಾನ ಸದ್ಧಮ್ಮಂ, ಬುದ್ಧಸೇಟ್ಠೇನ ದೇಸಿತಂ;
ಪುಬ್ಬವಾಸನಸಮ್ಪನ್ನಾ, ಪಬ್ಬಜಿಂ ಅನಗಾರಿಯಂ.
‘‘ತದೂಪಸಮ್ಪದತ್ಥಾಯ, ಗಚ್ಛನ್ತೀ ಜಿನಸನ್ತಿಕಂ;
ಮಗ್ಗೇ ಧುತ್ತೇ ಠಿತೇ ಸುತ್ವಾ, ಲಭಿಂ ದೂತೋಪಸಮ್ಪದಂ.
‘‘ಸಬ್ಬಕಮ್ಮಂ ¶ ¶ ಪರಿಕ್ಖೀಣಂ, ಪುಞ್ಞಂ ಪಾಪಂ ತಥೇವ ಚ;
ಸಬ್ಬಸಂಸಾರಮುತ್ತಿಣ್ಣಾ, ಗಣಿಕತ್ತಞ್ಚ ಖೇಪಿತಂ.
‘‘ಇದ್ಧೀಸು ಚ ವಸೀ ಹೋಮಿ, ದಿಬ್ಬಾಯ ಸೋತಧಾತುಯಾ;
ಚೇತೋಪರಿಯಞಾಣಸ್ಸ, ವಸೀ ಹೋಮಿ ಮಹಾಮುನೇ.
‘‘ಪುಬ್ಬೇನಿವಾಸಂ ಜಾನಾಮಿ, ದಿಬ್ಬಚಕ್ಖು ವಿಸೋಧಿತಂ;
ಸಬ್ಬಾಸವಪರಿಕ್ಖೀಣಾ, ನತ್ಥಿ ದಾನಿ ಪುನಬ್ಭವೋ.
‘‘ಅತ್ಥಧಮ್ಮನಿರುತ್ತೀಸು, ಪಟಿಭಾನೇ ತಥೇವ ಚ;
ಞಾಣಂ ಮಮ ಮಹಾವೀರ, ಉಪ್ಪನ್ನಂ ತವ ಸನ್ತಿಕೇ.
‘‘ಕಿಲೇಸಾ ಝಾಪಿತಾ ಮಯ್ಹಂ…ಪೇ… ವಿಹರಾಮಿ ಅನಾಸವಾ.
‘‘ಸ್ವಾಗತಂ ¶ ವತ ಮೇ ಆಸಿ…ಪೇ… ಕತಂ ಬುದ್ಧಸ್ಸ ಸಾಸನಂ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಅಡ್ಢಕಾಸಿ ಭಿಕ್ಖುನೀ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಅಡ್ಢಕಾಸಿಥೇರಿಯಾಪದಾನಂ ಸತ್ತಮಂ.
೮. ಪುಣ್ಣಿಕಾಥೇರೀಅಪದಾನಂ
‘‘ವಿಪಸ್ಸಿನೋ ಭಗವತೋ, ಸಿಖಿನೋ ವೇಸ್ಸಭುಸ್ಸ ಚ;
ಕಕುಸನ್ಧಸ್ಸ ಮುನಿನೋ, ಕೋಣಾಗಮನತಾದಿನೋ.
‘‘ಕಸ್ಸಪಸ್ಸ ¶ ಚ ಬುದ್ಧಸ್ಸ, ಪಬ್ಬಜಿತ್ವಾನ ಸಾಸನೇ;
ಭಿಕ್ಖುನೀ ಸೀಲಸಮ್ಪನ್ನಾ, ನಿಪಕಾ ಸಂವುತಿನ್ದ್ರಿಯಾ.
‘‘ಬಹುಸ್ಸುತಾ ಧಮ್ಮಧರಾ, ಧಮ್ಮತ್ಥಪಟಿಪುಚ್ಛಿಕಾ;
ಉಗ್ಗಹೇತಾ ಚ ಧಮ್ಮಾನಂ, ಸೋತಾ ಪಯಿರುಪಾಸಿತಾ.
‘‘ದೇಸೇನ್ತೀ ಜನಮಜ್ಝೇಹಂ, ಅಹೋಸಿಂ ಜಿನಸಾಸನೇ;
ಬಾಹುಸಚ್ಚೇನ ತೇನಾಹಂ, ಪೇಸಲಾ ಅತಿಮಞ್ಞಿಸಂ.
‘‘ಪಚ್ಛಿಮೇ ¶ ಚ ಭವೇ ದಾನಿ, ಸಾವತ್ಥಿಯಂ ಪುರುತ್ತಮೇ;
ಅನಾಥಪಿಣ್ಡಿನೋ ಗೇಹೇ, ಜಾತಾಹಂ ಕುಮ್ಭದಾಸಿಯಾ.
‘‘ಗತಾ ಉದಕಹಾರಿಯಂ, ಸೋತ್ಥಿಯಂ ದಿಜಮದ್ದಸಂ;
ಸೀತಟ್ಟಂ ತೋಯಮಜ್ಝಮ್ಹಿ, ತಂ ದಿಸ್ವಾ ಇದಮಬ್ರವಿಂ.
‘‘‘ಉದಹಾರೀ ¶ ¶ ಅಹಂ ಸೀತೇ, ಸದಾ ಉದಕಮೋತರಿಂ;
ಅಯ್ಯಾನಂ ದಣ್ಡಭಯಭೀತಾ, ವಾಚಾದೋಸಭಯಟ್ಟಿತಾ [ವಾಚಾರೋಸಭಯಟ್ಟಿತಾ (ಸ್ಯಾ.)].
‘‘‘ಕಸ್ಸ ಬ್ರಾಹ್ಮಣ ತ್ವಂ ಭೀತೋ, ಸದಾ ಉದಕಮೋತರಿ;
ವೇಧಮಾನೇಹಿ ಗತ್ತೇಹಿ, ಸೀತಂ ವೇದಯಸೇ ಭುಸಂ’.
‘‘‘ಜಾನನ್ತೀ ವತ ಮಂ ಭೋತಿ, ಪುಣ್ಣಿಕೇ ಪರಿಪುಚ್ಛಸಿ;
ಕರೋನ್ತಂ ಕುಸಲಂ ಕಮ್ಮಂ, ರುನ್ಧನ್ತಂ [ನಿದ್ಧನ್ತಂ (ಸೀ. ಪೀ.), ನುದನ್ತಂ (ಸ್ಯಾ.)] ಕತಪಾಪಕಂ.
‘‘‘ಯೋ ಚೇ ವುಡ್ಢೋ ದಹರೋ ವಾ, ಪಾಪಕಮ್ಮಂ ಪಕುಬ್ಬತಿ;
ದಕಾಭಿಸಿಞ್ಚನಾ ಸೋಪಿ [ಭೋತಿ (ಸೀ. ಕ.) ಥೇರೀಗಾ. ೨೩೯], ಪಾಪಕಮ್ಮಾ ಪಮುಚ್ಚತಿ’.
‘‘ಉತ್ತರನ್ತಸ್ಸ ಅಕ್ಖಾಸಿಂ, ಧಮ್ಮತ್ಥಸಂಹಿತಂ ಪದಂ;
ತಞ್ಚ ಸುತ್ವಾ ಸ ಸಂವಿಗ್ಗೋ [ಸುಸಂವಿಗ್ಗೋ (ಸ್ಯಾ.)], ಪಬ್ಬಜಿತ್ವಾರಹಾ ಅಹು.
‘‘ಪೂರೇನ್ತೀ ಊನಕಸತಂ, ಜಾತಾ ದಾಸಿಕುಲೇ ಯತೋ;
ತತೋ ಪುಣ್ಣಾತಿ ನಾಮಂ ಮೇ, ಭುಜಿಸ್ಸಂ ಮಂ ಅಕಂಸು ತೇ.
‘‘ಸೇಟ್ಠಿಂ ತತೋನುಜಾನೇತ್ವಾ [ತತೋ ಅನುಮೋದೇತ್ವಾ (ಸೀ. ಸ್ಯಾ.), ತತೋ ಅನುಮಾನೇತ್ವಾ (ಪೀ.)], ಪಬ್ಬಜಿಂ ಅನಗಾರಿಯಂ;
ನ ಚಿರೇನೇವ ಕಾಲೇನ, ಅರಹತ್ತಮಪಾಪುಣಿಂ.
‘‘ಇದ್ಧೀಸು ¶ ಚ ವಸೀ ಹೋಮಿ, ದಿಬ್ಬಾಯ ಸೋತಧಾತುಯಾ;
ಚೇತೋಪರಿಯಞಾಣಸ್ಸ, ವಸೀ ಹೋಮಿ ಮಹಾಮುನೇ.
‘‘ಪುಬ್ಬೇನಿವಾಸಂ ಜಾನಾಮಿ, ದಿಬ್ಬಚಕ್ಖು ವಿಸೋಧಿತಂ;
ಸಬ್ಬಾಸವಪರಿಕ್ಖೀಣಾ, ನತ್ಥಿ ದಾನಿ ಪುನಬ್ಭವೋ.
‘‘ಅತ್ಥಧಮ್ಮನಿರುತ್ತೀಸು, ಪಟಿಭಾನೇ ತಥೇವ ಚ;
ಞಾಣಂ ¶ ಮೇ ವಿಮಲಂ ಸುದ್ಧಂ, ಬುದ್ಧಸೇಟ್ಠಸ್ಸ ವಾಹಸಾ.
‘‘ಭಾವನಾಯ ಮಹಾಪಞ್ಞಾ, ಸುತೇನೇವ ಸುತಾವಿನೀ;
ಮಾನೇನ ನೀಚಕುಲಜಾ, ನ ಹಿ ಕಮ್ಮಂ ವಿನಸ್ಸತಿ [ಪನಸ್ಸತಿ (ಸ್ಯಾ.)].
‘‘ಕಿಲೇಸಾ ¶ ಝಾಪಿತಾ ಮಯ್ಹಂ…ಪೇ… ವಿಹರಾಮಿ ಅನಾಸವಾ.
‘‘ಸ್ವಾಗತಂ ವತ ಮೇ ಆಸಿ…ಪೇ… ಕತಂ ಬುದ್ಧಸ್ಸ ಸಾಸನಂ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಪುಣ್ಣಿಕಾ ಭಿಕ್ಖುನೀ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಪುಣ್ಣಿಕಾಥೇರಿಯಾಪದಾನಂ ಅಟ್ಠಮಂ.
೯. ಅಮ್ಬಪಾಲಿಥೇರೀಅಪದಾನಂ
‘‘ಯೋ ¶ ರಂಸಿಫುಸಿತಾವೇಳೋ, ಫುಸ್ಸೋ ನಾಮ ಮಹಾಮುನಿ;
ತಸ್ಸಾಹಂ ಭಗಿನೀ ಆಸಿಂ, ಅಜಾಯಿಂ ಖತ್ತಿಯೇ ಕುಲೇ.
‘‘ತಸ್ಸ ಧಮ್ಮಂ ಸುಣಿತ್ವಾಹಂ, ವಿಪ್ಪಸನ್ನೇನ ಚೇತಸಾ;
ಮಹಾದಾನಂ ದದಿತ್ವಾನ, ಪತ್ಥಯಿಂ ರೂಪಸಮ್ಪದಂ.
‘‘ಏಕತಿಂಸೇ ಇತೋ ಕಪ್ಪೇ, ಸಿಖೀ ಲೋಕಗ್ಗನಾಯಕೋ;
ಉಪ್ಪನ್ನೋ ಲೋಕಪಜ್ಜೋತೋ, ತಿಲೋಕಸರಣೋ ಜಿನೋ.
‘‘ತದಾರುಣಪುರೇ ರಮ್ಮೇ, ಬ್ರಾಹ್ಮಞ್ಞಕುಲಸಮ್ಭವಾ;
ವಿಮುತ್ತಚಿತ್ತಂ ಕುಪಿತಾ, ಭಿಕ್ಖುನಿಂ ಅಭಿಸಾಪಯಿಂ.
‘‘ವೇಸಿಕಾವ ¶ ಅನಾಚಾರಾ, ಜಿನಸಾಸನದೂಸಿಕಾ;
ಏವಂ ಅಕ್ಕೋಸಯಿತ್ವಾನ, ತೇನ ಪಾಪೇನ ಕಮ್ಮುನಾ.
‘‘ದಾರುಣಂ ¶ ನಿರಯಂ ಗನ್ತ್ವಾ, ಮಹಾದುಕ್ಖಸಮಪ್ಪಿತಾ;
ತತೋ ಚುತಾ ಮನುಸ್ಸೇಸು, ಉಪಪನ್ನಾ ತಪಸ್ಸಿನೀ.
‘‘ದಸಜಾತಿಸಹಸ್ಸಾನಿ, ಗಣಿಕತ್ತಮಕಾರಯಿಂ;
ತಮ್ಹಾ ಪಾಪಾ ನ ಮುಚ್ಚಿಸ್ಸಂ, ಭುತ್ವಾ ದುಟ್ಠವಿಸಂ ಯಥಾ.
‘‘ಬ್ರಹ್ಮಚರಿಯಮಸೇವಿಸ್ಸಂ [ಬ್ರಹ್ಮವೇಸಮಸೇವಿಸ್ಸಂ (ಸ್ಯಾ.), ಬ್ರಹ್ಮಚೇರಮಸೇವಿಸ್ಸಂ (ಪೀ.)], ಕಸ್ಸಪೇ ಜಿನಸಾಸನೇ;
ತೇನ ಕಮ್ಮವಿಪಾಕೇನ, ಅಜಾಯಿಂ ತಿದಸೇ ಪುರೇ.
‘‘ಪಚ್ಛಿಮೇ ಭವೇ ಸಮ್ಪತ್ತೇ, ಅಹೋಸಿಂ ಓಪಪಾತಿಕಾ;
ಅಮ್ಬಸಾಖನ್ತರೇ ಜಾತಾ, ಅಮ್ಬಪಾಲೀತಿ ತೇನಹಂ.
‘‘ಪರಿವುತಾ ¶ ಪಾಣಕೋಟೀಹಿ, ಪಬ್ಬಜಿಂ ಜಿನಸಾಸನೇ;
ಪತ್ತಾಹಂ ಅಚಲಂ ಠಾನಂ, ಧೀತಾ ಬುದ್ಧಸ್ಸ ಓರಸಾ.
‘‘ಇದ್ಧೀಸು ಚ ವಸೀ ಹೋಮಿ, ಸೋತಧಾತುವಿಸುದ್ಧಿಯಾ;
ಚೇತೋಪರಿಯಞಾಣಸ್ಸ, ವಸೀ ಹೋಮಿ ಮಹಾಮುನೇ.
‘‘ಪುಬ್ಬೇನಿವಾಸಂ ಜಾನಾಮಿ, ದಿಬ್ಬಚಕ್ಖು ವಿಸೋಧಿತಂ;
ಸಬ್ಬಾಸವಪರಿಕ್ಖೀಣಾ, ನತ್ಥಿ ದಾನಿ ಪುನಬ್ಭವೋ.
‘‘ಅತ್ಥಧಮ್ಮನಿರುತ್ತೀಸು, ಪಟಿಭಾನೇ ತಥೇವ ಚ;
ಞಾಣಂ ಮೇ ವಿಮಲಂ ಸುದ್ಧಂ, ಬುದ್ಧಸೇಟ್ಠಸ್ಸ ವಾಹಸಾ.
‘‘ಕಿಲೇಸಾ ¶ ಝಾಪಿತಾ ಮಯ್ಹಂ…ಪೇ… ವಿಹರಾಮಿ ಅನಾಸವಾ.
‘‘ಸ್ವಾಗತಂ ¶ ವತ ಮೇ ಆಸಿ…ಪೇ… ಕತಂ ಬುದ್ಧಸ್ಸ ಸಾಸನಂ.
‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಅಮ್ಬಪಾಲಿ ಭಿಕ್ಖುನೀ ಇಮಾ ಗಾಥಾಯೋ
ಅಭಾಸಿತ್ಥಾತಿ.
ಅಮ್ಬಪಾಲಿಥೇರಿಯಾಪದಾನಂ ನವಮಂ.
೧೦. ಪೇಸಲಾಥೇರೀಅಪದಾನಂ
‘‘ಇಮಮ್ಹಿ ಭದ್ದಕೇ ಕಪ್ಪೇ, ಬ್ರಹ್ಮಬನ್ಧು ಮಹಾಯಸೋ;
ಕಸ್ಸಪೋ ನಾಮ ಗೋತ್ತೇನ, ಉಪ್ಪಜ್ಜಿ ವದತಂ ವರೋ.
‘‘ಸಾವತ್ಥಿಯಂ ¶ ಪುರೇ ವರೇ, ಉಪಾಸಕಕುಲೇ ಅಹಂ;
ಪಸೂತಾ ತಂ [ನಂ (ಸ್ಯಾ.)] ಜಿನವರಂ, ದಿಸ್ವಾ ಸುತ್ವಾ ಚ ದೇಸನಂ.
‘‘ತಂ ವೀರಂ ಸರಣಂ ಗನ್ತ್ವಾ, ಸೀಲಾನಿ ಚ ಸಮಾದಿಯಿಂ;
ಕದಾಚಿ ಸೋ ಮಹಾವೀರೋ, ಮಹಾಜನಸಮಾಗಮೇ.
‘‘ಅತ್ತನೋ ಅಭಿಸಮ್ಬೋಧಿಂ, ಪಕಾಸೇಸಿ ನರಾಸಭೋ;
ಅನನುಸ್ಸುತಧಮ್ಮೇಸು, ಪುಬ್ಬೇ ದುಕ್ಖಾದಿಕೇಸು ಚ.
‘‘ಚಕ್ಖು ಞಾಣಞ್ಚ ಪಞ್ಞಾ ಚ, ವಿಜ್ಜಾಲೋಕೋ ಚ ಆಸಿ ಮೇ;
ತಂ ಸುತ್ವಾ ಉಗ್ಗಹೇತ್ವಾನ, ಪರಿಪುಚ್ಛಿಞ್ಚ ಭಿಕ್ಖವೋ.
‘‘ತೇನ ¶ ಕಮ್ಮೇನ ಸುಕತೇನ, ಚೇತನಾಪಣಿಧೀಹಿ ಚ;
ಜಹಿತ್ವಾ ಮಾನುಸಂ ದೇಹಂ, ತಾವತಿಂಸಮಗಚ್ಛಹಂ.
‘‘ಪಚ್ಛಿಮೇ ¶ ಚ ಭವೇ ದಾನಿ, ಜಾತಾ ಸೇಟ್ಠಿಮಹಾಕುಲೇ;
ಉಪೇಚ್ಚ ಬುದ್ಧಂ ಸದ್ಧಮ್ಮಂ, ಸುತ್ವಾ ಸಚ್ಚೂಪಸಂಹಿತಂ.
‘‘ಪಬ್ಬಜಿತ್ವಾಚಿರೇನೇವ, ಸಚ್ಚತ್ಥಾನಿ [ಸಬ್ಬತ್ಥಾನಿ (ಸ್ಯಾ. ಕ.)] ವಿಚಿನ್ತಯಂ;
ಖೇಪೇತ್ವಾ ಆಸವೇ ಸಬ್ಬೇ, ಅರಹತ್ತಮಪಾಪುಣಿಂ.
‘‘ಇದ್ಧೀಸು ಚ ವಸೀ ಹೋಮಿ, ದಿಬ್ಬಾಯ ಸೋತಧಾತುಯಾ;
ಚೇತೋಪರಿಯಞಾಣಸ್ಸ, ವಸೀ ಹೋಮಿ ಮಹಾಮುನೇ.
‘‘ಪುಬ್ಬೇನಿವಾಸಂ ಜಾನಾಮಿ, ದಿಬ್ಬಚಕ್ಖು ವಿಸೋಧಿತಂ;
ಸಬ್ಬಾಸವಪರಿಕ್ಖೀಣಾ, ನತ್ಥಿ ದಾನಿ ಪುನಬ್ಭವೋ.
‘‘ಅತ್ಥಧಮ್ಮನಿರುತ್ತೀಸು, ಪಟಿಭಾನೇ ತಥೇವ ಚ;
ಞಾಣಂ ಮೇ ವಿಮಲಂ ಸುದ್ಧಂ, ಬುದ್ಧಸೇಟ್ಠಸ್ಸ ವಾಹಸಾ.
‘‘ಕಿಲೇಸಾ ಝಾಪಿತಾ ಮಯ್ಹಂ, ಭವಾ ಸಬ್ಬೇ ಸಮೂಹತಾ;
ನಾಗೀವ ಬನ್ಧನಂ ಛೇತ್ವಾ, ವಿಹರಾಮಿ ಅನಾಸವಾ.
‘‘ಸ್ವಾಗತಂ ¶ ವತ ಮೇ ಆಸಿ, ಮಮ ಬುದ್ಧಸ್ಸ ಸನ್ತಿಕೇ;
ತಿಸ್ಸೋ ವಿಜ್ಜಾ ಅನುಪ್ಪತ್ತಾ, ಕತಂ ಬುದ್ಧಸ್ಸ ಸಾಸನಂ.
‘‘ಪಟಿಸಮ್ಭಿದಾ ¶ ಚತಸ್ಸೋ, ವಿಮೋಕ್ಖಾಪಿ ಚ ಅಟ್ಠಿಮೇ;
ಛಳಭಿಞ್ಞಾ ಸಚ್ಛಿಕತಾ, ಕತಂ ಬುದ್ಧಸ್ಸ ಸಾಸನಂ’’.
ಇತ್ಥಂ ಸುದಂ ಪೇಸಲಾ [ಸೇಲಾ (ಸ್ಯಾ. ಪೀ.)] ಭಿಕ್ಖುನೀ ಇಮಾ ಗಾಥಾಯೋ ಅಭಾಸಿತ್ಥಾತಿ.
ಪೇಸಲಾಥೇರಿಯಾಪದಾನಂ ದಸಮಂ.
ಖತ್ತಿಯಾವಗ್ಗೋ ಚತುತ್ಥೋ.
ತಸ್ಸುದ್ದಾನಂ –
ಖತ್ತಿಯಾ ¶ ಬ್ರಾಹ್ಮಣೀ ಚೇವ, ತಥಾ ಉಪ್ಪಲದಾಯಿಕಾ;
ಸಿಙ್ಗಾಲಮಾತಾ ಸುಕ್ಕಾ ಚ, ಅಭಿರೂಪಾ ಅಡ್ಢಕಾಸಿಕಾ.
ಪುಣ್ಣಾ ಚ ಅಮ್ಬಪಾಲೀ ಚ, ಪೇಸಲಾತಿ ಚ ತಾ ದಸ;
ಗಾಥಾಯೋ ದ್ವಿಸತಾನೇತ್ಥ, ದ್ವಿಚತ್ತಾಲೀಸ ಚುತ್ತರಿ.
ಅಥ ¶ ವಗ್ಗುದ್ದಾನಂ –
ಸುಮೇಧಾ ಏಕೂಪೋಸಥಾ, ಕುಣ್ಡಲಕೇಸೀ ಖತ್ತಿಯಾ;
ಸಹಸ್ಸಂ ತಿಸತಾ ಗಾಥಾ, ಸತ್ತತಾಲೀಸ ಪಿಣ್ಡಿತಾ.
ಸಹ ಉದ್ದಾನಗಾಥಾಹಿ, ಗಣಿತಾಯೋ ವಿಭಾವಿಭಿ;
ಸಹಸ್ಸಂ ತಿಸತಂ ಗಾಥಾ, ಸತ್ತಪಞ್ಞಾಸಮೇವ ಚಾತಿ.
ಥೇರಿಕಾಪದಾನಂ ಸಮತ್ತಂ.
ಅಪದಾನಪಾಳಿ ಸಮತ್ತಾ.