ಮೂಲ > ಸುತ್ತಪಿಟಕ > ಖುದ್ದಕನಿಕಾಯ

THA Vol 2
MMR Vol 2
VRI Vol 2
PTS Vol 0

Misc. Paragraph

ಖುದ್ದಕನಿಕಾಯೇ

ಚರಿಯಾಪಿಟಕಪಾಳಿ

ನಮೋ ತಸ್ಸ ಭಗವತೋ ಅರಹತೋ ಸಮ್ಮಾಸಮ್ಬುದ್ಧಸ್ಸ

‘‘ಕಪ್ಪೇ ¶ ¶ ¶ ¶ ಚ ಸತಸಹಸ್ಸೇ, ಚತುರೋ ಚ ಅಸಙ್ಖಿಯೇ;

ಏತ್ಥನ್ತರೇ ಯಂ ಚರಿತಂ, ಸಬ್ಬಂ ತಂ ಬೋಧಿಪಾಚನಂ.

‘‘ಅತೀತಕಪ್ಪೇ ಚರಿತಂ, ಠಪಯಿತ್ವಾ ಭವಾಭವೇ;

ಇಮಮ್ಹಿ ಕಪ್ಪೇ ಚರಿತಂ, ಪವಕ್ಖಿಸ್ಸಂ ಸುಣೋಹಿ ಮೇ.

‘‘ಯದಾ ಅಹಂ ಬ್ರಹಾರಞ್ಞೇ, ಸುಞ್ಞೇ ವಿಪಿನಕಾನನೇ;

ಅಜ್ಝೋಗಾಹೇತ್ವಾ [ಅಜ್ಝೋಗಹೇತ್ವಾ (ಸೀ. ಸ್ಯಾ.)] ವಿಹರಾಮಿ, ಅಕಿತ್ತಿ ನಾಮ ತಾಪಸೋ.

‘‘ತದಾ ¶ ಮಂ ತಪತೇಜೇನ, ಸನ್ತತ್ತೋ ತಿದಿವಾಭಿಭೂ;

ಧಾರೇನ್ತೋ ಬ್ರಾಹ್ಮಣವಣ್ಣಂ, ಭಿಕ್ಖಾಯ ಮಂ ಉಪಾಗಮಿ.

‘‘ಪವನಾ ಆಭತಂ ಪಣ್ಣಂ, ಅತೇಲಞ್ಚ ಅಲೋಣಿಕಂ;

ಮಮ ದ್ವಾರೇ ಠಿತಂ ದಿಸ್ವಾ, ಸಕಟಾಹೇನ ಆಕಿರಿಂ.

‘‘ತಸ್ಸ ದತ್ವಾನಹಂ ಪಣ್ಣಂ, ನಿಕ್ಕುಜ್ಜಿತ್ವಾನ ಭಾಜನಂ;

ಪುನೇಸನಂ ಜಹಿತ್ವಾನ, ಪಾವಿಸಿಂ ಪಣ್ಣಸಾಲಕಂ.

‘‘ದುತಿಯಮ್ಪಿ ¶ ತತಿಯಮ್ಪಿ, ಉಪಗಞ್ಛಿ ಮಮನ್ತಿಕಂ;

ಅಕಮ್ಪಿತೋ ಅನೋಲಗ್ಗೋ, ಏವಮೇವಮದಾಸಹಂ.

‘‘ನ ¶ ಮೇ ತಪ್ಪಚ್ಚಯಾ ಅತ್ಥಿ, ಸರೀರಸ್ಮಿಂ ವಿವಣ್ಣಿಯಂ;

ಪೀತಿಸುಖೇನ ರತಿಯಾ, ವೀತಿನಾಮೇಮಿ ತಂ ದಿವಂ.

‘‘ಯದಿ ಮಾಸಮ್ಪಿ ದ್ವೇಮಾಸಂ, ದಕ್ಖಿಣೇಯ್ಯಂ ವರಂ ಲಭೇ;

ಅಕಮ್ಪಿತೋ ಅನೋಲೀನೋ, ದದೇಯ್ಯಂ ದಾನಮುತ್ತಮಂ.

‘‘ನ ತಸ್ಸ ದಾನಂ ದದಮಾನೋ, ಯಸಂ ಲಾಭಞ್ಚ ಪತ್ಥಯಿಂ;

ಸಬ್ಬಞ್ಞುತಂ ಪತ್ಥಯಾನೋ, ತಾನಿ ಕಮ್ಮಾನಿ ಆಚರಿ’’ನ್ತಿ.

‘‘ಪುನಾಪರಂ ¶ ಯದಾ ಹೋಮಿ, ಬ್ರಾಹ್ಮಣೋ ಸಙ್ಖಸವ್ಹಯೋ;

ಮಹಾಸಮುದ್ದಂ ತರಿತುಕಾಮೋ, ಉಪಗಚ್ಛಾಮಿ ಪಟ್ಟನಂ.

‘‘ತತ್ಥದ್ದಸಂ ಪಟಿಪಥೇ, ಸಯಮ್ಭುಂ ಅಪರಾಜಿತಂ;

ಕನ್ತಾರದ್ಧಾನಂ ಪಟಿಪನ್ನಂ [ಕನ್ತಾರದ್ಧಾನಪಟಿಪನ್ನಂ (ಸೀ. ಸ್ಯಾ.)], ತತ್ತಾಯ ಕಠಿನಭೂಮಿಯಾ.

‘‘ತಮಹಂ ಪಟಿಪಥೇ ದಿಸ್ವಾ, ಇಮಮತ್ಥಂ ವಿಚಿನ್ತಯಿಂ;

‘ಇದಂ ಖೇತ್ತಂ ಅನುಪ್ಪತ್ತಂ, ಪುಞ್ಞಕಾಮಸ್ಸ ಜನ್ತುನೋ.

‘‘‘ಯಥಾ ಕಸ್ಸಕೋ ಪುರಿಸೋ, ಖೇತ್ತಂ ದಿಸ್ವಾ ಮಹಾಗಮಂ;

ತತ್ಥ ಬೀಜಂ ನ ರೋಪೇತಿ, ನ ಸೋ ಧಞ್ಞೇನ ಅತ್ಥಿಕೋ.

‘‘‘ಏವಮೇವಾಹಂ ¶ ¶ ಪುಞ್ಞಕಾಮೋ, ದಿಸ್ವಾ ಖೇತ್ತವರುತ್ತಮಂ;

ಯದಿ ತತ್ಥ ಕಾರಂ ನ ಕರೋಮಿ, ನಾಹಂ ಪುಞ್ಞೇನ ಅತ್ಥಿಕೋ.

‘‘‘ಯಥಾ ಅಮಚ್ಚೋ ಮುದ್ದಿಕಾಮೋ, ರಞ್ಞೋ ಅನ್ತೇಪುರೇ ಜನೇ;

ನ ದೇತಿ ತೇಸಂ ಧನಧಞ್ಞಂ, ಮುದ್ದಿತೋ ಪರಿಹಾಯತಿ.

‘‘‘ಏವಮೇವಾಹಂ ಪುಞ್ಞಕಾಮೋ, ವಿಪುಲಂ ದಿಸ್ವಾನ ದಕ್ಖಿಣಂ;

ಯದಿ ತಸ್ಸ ದಾನಂ ನ ದದಾಮಿ, ಪರಿಹಾಯಿಸ್ಸಾಮಿ ಪುಞ್ಞತೋ’.

‘‘ಏವಾಹಂ ಚಿನ್ತಯಿತ್ವಾನ, ಓರೋಹಿತ್ವಾ ಉಪಾಹನಾ;

ತಸ್ಸ ಪಾದಾನಿ ವನ್ದಿತ್ವಾ, ಅದಾಸಿಂ ಛತ್ತುಪಾಹನಂ.

‘‘ತೇನೇವಾಹಂ ¶ ಸತಗುಣತೋ, ಸುಖುಮಾಲೋ ಸುಖೇಧಿತೋ;

ಅಪಿ ಚ ದಾನಂ ಪರಿಪೂರೇನ್ತೋ, ಏವಂ ತಸ್ಸ ಅದಾಸಹ’’ನ್ತಿ.

‘‘ಪುನಾಪರಂ ಯದಾ ಹೋಮಿ, ಇನ್ದಪತ್ಥೇ [ಇನ್ದಪತ್ತೇ (ಸೀ. ಕ.)] ಪುರುತ್ತಮೇ;

ರಾಜಾ ಧನಞ್ಚಯೋ ನಾಮ, ಕುಸಲೇ ದಸಹುಪಾಗತೋ.

‘‘ಕಲಿಙ್ಗರಟ್ಠವಿಸಯಾ, ಬ್ರಾಹ್ಮಣಾ ಉಪಗಞ್ಛು ಮಂ;

ಆಯಾಚುಂ ಮಂ ಹತ್ಥಿನಾಗಂ, ಧಞ್ಞಂ ಮಙ್ಗಲಸಮ್ಮತಂ.

‘‘‘ಅವುಟ್ಠಿಕೋ ಜನಪದೋ, ದುಬ್ಭಿಕ್ಖೋ ಛಾತಕೋ ಮಹಾ;

ದದಾಹಿ ಪವರಂ ನಾಗಂ, ನೀಲಂ ಅಞ್ಜನಸವ್ಹಯಂ.

‘‘‘ನ ¶ ¶ ಮೇ ಯಾಚಕಮನುಪ್ಪತ್ತೇ, ಪಟಿಕ್ಖೇಪೋ ಅನುಚ್ಛವೋ;

ಮಾ ಮೇ ಭಿಜ್ಜಿ ಸಮಾದಾನಂ, ದಸ್ಸಾಮಿ ವಿಪುಲಂ ಗಜಂ’.

‘‘ನಾಗಂ ಗಹೇತ್ವಾ ಸೋಣ್ಡಾಯ, ಭಿಙ್ಗಾರೇ [ಭಿಙ್ಕಾರೇ (ಸೀ.)] ರತನಾಮಯೇ;

ಜಲಂ ಹತ್ಥೇ ಆಕಿರಿತ್ವಾ, ಬ್ರಾಹ್ಮಣಾನಂ ಅದಂ ಗಜಂ.

‘‘ತಸ್ಸ ನಾಗೇ ಪದಿನ್ನಮ್ಹಿ, ಅಮಚ್ಚಾ ಏತದಬ್ರವುಂ;

‘ಕಿಂ ನು ತುಯ್ಹಂ ವರಂ ನಾಗಂ, ಯಾಚಕಾನಂ ಪದಸ್ಸಸಿ.

‘‘‘ಧಞ್ಞಂ ¶ ಮಙ್ಗಲಸಮ್ಪನ್ನಂ, ಸಙ್ಗಾಮವಿಜಯುತ್ತಮಂ;

ತಸ್ಮಿಂ ನಾಗೇ ಪದಿನ್ನಮ್ಹಿ, ಕಿಂ ತೇ ರಜ್ಜಂ ಕರಿಸ್ಸತಿ.

‘‘‘ರಜ್ಜಮ್ಪಿ ಮೇ ದದೇ ಸಬ್ಬಂ, ಸರೀರಂ ದಜ್ಜಮತ್ತನೋ;

ಸಬ್ಬಞ್ಞುತಂ ಪಿಯಂ ಮಯ್ಹಂ, ತಸ್ಮಾ ನಾಗಂ ಅದಾಸಹ’’’ನ್ತಿ.

‘‘ಕುಸಾವತಿಮ್ಹಿ ನಗರೇ, ಯದಾ ಆಸಿಂ ಮಹೀಪತಿ;

ಮಹಾಸುದಸ್ಸನೋ ನಾಮ, ಚಕ್ಕವತ್ತೀ ಮಹಬ್ಬಲೋ.

‘‘ತತ್ಥಾಹಂ ¶ ದಿವಸೇ ತಿಕ್ಖತ್ತುಂ, ಘೋಸಾಪೇಮಿ ತಹಿಂ ತಹಿಂ;

‘ಕೋ ಕಿಂ ಇಚ್ಛತಿ ಪತ್ಥೇತಿ, ಕಸ್ಸ ಕಿಂ ದೀಯತೂ ಧನಂ.

‘‘‘ಕೋ ಛಾತಕೋ ಕೋ ತಸಿತೋ, ಕೋ ಮಾಲಂ ಕೋ ವಿಲೇಪನಂ;

ನಾನಾರತ್ತಾನಿ ವತ್ಥಾನಿ, ಕೋ ನಗ್ಗೋ ಪರಿದಹಿಸ್ಸತಿ.

‘‘‘ಕೋ ಪಥೇ ಛತ್ತಮಾದೇತಿ, ಕೋಪಾಹನಾ ಮುದೂ ಸುಭಾ’;

ಇತಿ ¶ ಸಾಯಞ್ಚ ಪಾತೋ ಚ, ಘೋಸಾಪೇಮಿ ತಹಿಂ ತಹಿಂ.

‘‘ನ ತಂ ದಸಸು ಠಾನೇಸು, ನಪಿ ಠಾನಸತೇಸು ವಾ;

ಅನೇಕಸತಠಾನೇಸು, ಪಟಿಯತ್ತಂ ಯಾಚಕೇ ಧನಂ.

‘‘ದಿವಾ ವಾ ಯದಿ ವಾ ರತ್ತಿಂ, ಯದಿ ಏತಿ ವನಿಬ್ಬಕೋ;

ಲದ್ಧಾ ಯದಿಚ್ಛಕಂ ಭೋಗಂ, ಪೂರಹತ್ಥೋವ ಗಚ್ಛತಿ.

‘‘ಏವರೂಪಂ ಮಹಾದಾನಂ, ಅದಾಸಿಂ ಯಾವಜೀವಿಕಂ;

ನಪಾಹಂ ದೇಸ್ಸಂ ಧನಂ ದಮ್ಮಿ, ನಪಿ ನತ್ಥಿ ನಿಚಯೋ ಮಯಿ.

‘‘ಯಥಾಪಿ ಆತುರೋ ನಾಮ, ರೋಗತೋ ಪರಿಮುತ್ತಿಯಾ;

ಧನೇನ ವೇಜ್ಜಂ ತಪ್ಪೇತ್ವಾ, ರೋಗತೋ ಪರಿಮುಚ್ಚತಿ.

‘‘ತಥೇವಾಹಂ ಜಾನಮಾನೋ, ಪರಿಪೂರೇತುಮಸೇಸತೋ;

ಊನಮನಂ ಪೂರಯಿತುಂ, ದೇಮಿ ದಾನಂ ವನಿಬ್ಬಕೇ;

ನಿರಾಲಯೋ ಅಪಚ್ಚಾಸೋ, ಸಮ್ಬೋಧಿಮನುಪತ್ತಿಯಾ’’ತಿ.

‘‘ಪುನಾಪರಂ ¶ ¶ ಯದಾ ಹೋಮಿ, ಸತ್ತರಾಜಪುರೋಹಿತೋ;

ಪೂಜಿತೋ ನರದೇವೇಹಿ, ಮಹಾಗೋವಿನ್ದಬ್ರಾಹ್ಮಣೋ.

‘‘ತದಾಹಂ ಸತ್ತರಜ್ಜೇಸು, ಯಂ ಮೇ ಆಸಿ ಉಪಾಯನಂ;

ತೇನ ದೇಮಿ ಮಹಾದಾನಂ, ಅಕ್ಖೋಬ್ಭಂ [ಅಕ್ಖೋಭಂ (ಸ್ಯಾ. ಕಂ.)] ಸಾಗರೂಪಮಂ.

‘‘ನ ¶ ¶ ಮೇ ದೇಸ್ಸಂ ಧನಂ ಧಞ್ಞಂ, ನಪಿ ನತ್ಥಿ ನಿಚಯೋ ಮಯಿ;

ಸಬ್ಬಞ್ಞುತಂ ಪಿಯಂ ಮಯ್ಹಂ, ತಸ್ಮಾ ದೇಮಿ ವರಂ ಧನ’’ನ್ತಿ.

‘‘ಪುನಾಪರಂ ಯದಾ ಹೋಮಿ, ಮಿಥಿಲಾಯಂ ಪುರುತ್ತಮೇ;

ನಿಮಿ ನಾಮ ಮಹಾರಾಜಾ, ಪಣ್ಡಿತೋ ಕುಸಲತ್ಥಿಕೋ.

‘‘ತದಾಹಂ ಮಾಪಯಿತ್ವಾನ, ಚತುಸ್ಸಾಲಂ ಚತುಮ್ಮುಖಂ;

ತತ್ಥ ದಾನಂ ಪವತ್ತೇಸಿಂ, ಮಿಗಪಕ್ಖಿನರಾದಿನಂ.

‘‘ಅಚ್ಛಾದನಞ್ಚ ಸಯನಂ, ಅನ್ನಂ ಪಾನಞ್ಚ ಭೋಜನಂ;

ಅಬ್ಬೋಚ್ಛಿನ್ನಂ ಕರಿತ್ವಾನ, ಮಹಾದಾನಂ ಪವತ್ತಯಿಂ.

‘‘ಯಥಾಪಿ ಸೇವಕೋ ಸಾಮಿಂ, ಧನಹೇತುಮುಪಾಗತೋ;

ಕಾಯೇನ ವಾಚಾ ಮನಸಾ, ಆರಾಧನೀಯಮೇಸತಿ.

‘‘ತಥೇವಾಹಂ ಸಬ್ಬಭವೇ, ಪರಿಯೇಸಿಸ್ಸಾಮಿ ಬೋಧಿಜಂ;

ದಾನೇನ ಸತ್ತೇ ತಪ್ಪೇತ್ವಾ, ಇಚ್ಛಾಮಿ ಬೋಧಿಮುತ್ತಮ’’ನ್ತಿ.

‘‘ಪುನಾಪರಂ ¶ ¶ ಯದಾ ಹೋಮಿ, ಏಕರಾಜಸ್ಸ ಅತ್ರಜೋ;

ನಗರೇ ಪುಪ್ಫವತಿಯಾ, ಕುಮಾರೋ ಚನ್ದಸವ್ಹಯೋ.

‘‘ತದಾಹಂ ¶ ಯಜನಾ ಮುತ್ತೋ, ನಿಕ್ಖನ್ತೋ ಯಞ್ಞವಾಟತೋ;

ಸಂವೇಗಂ ಜನಯಿತ್ವಾನ, ಮಹಾದಾನಂ ಪವತ್ತಯಿಂ.

‘‘ನಾಹಂ ಪಿವಾಮಿ ಖಾದಾಮಿ, ನಪಿ ಭುಞ್ಜಾಮಿ ಭೋಜನಂ;

ದಕ್ಖಿಣೇಯ್ಯೇ ಅದತ್ವಾನ, ಅಪಿ ಛಪ್ಪಞ್ಚರತ್ತಿಯೋ.

‘‘ಯಥಾಪಿ ¶ ವಾಣಿಜೋ ನಾಮ, ಕತ್ವಾನ ಭಣ್ಡಸಞ್ಚಯಂ;

ಯತ್ಥ ಲಾಭೋ ಮಹಾ ಹೋತಿ, ತತ್ಥ ತಂ [ತತ್ಥ ನಂ (ಸೀ.), ತತ್ಥ (ಕ.)] ಹರತಿ ಭಣ್ಡಕಂ.

‘‘ತಥೇವ ಸಕಭುತ್ತಾಪಿ, ಪರೇ ದಿನ್ನಂ ಮಹಪ್ಫಲಂ;

ತಸ್ಮಾ ಪರಸ್ಸ ದಾತಬ್ಬಂ, ಸತಭಾಗೋ ಭವಿಸ್ಸತಿ.

‘‘ಏತಮತ್ಥವಸಂ ಞತ್ವಾ, ದೇಮಿ ದಾನಂ ಭವಾಭವೇ;

ನ ಪಟಿಕ್ಕಮಾಮಿ ದಾನತೋ, ಸಮ್ಬೋಧಿಮನುಪತ್ತಿಯಾ’’ತಿ.

‘‘ಅರಿಟ್ಠಸವ್ಹಯೇ ನಗರೇ, ಸಿವಿನಾಮಾಸಿ ಖತ್ತಿಯೋ;

ನಿಸಜ್ಜ ಪಾಸಾದವರೇ, ಏವಂ ಚಿನ್ತೇಸಹಂ ತದಾ.

‘‘‘ಯಂ ಕಿಞ್ಚಿ ಮಾನುಸಂ ದಾನಂ, ಅದಿನ್ನಂ ಮೇ ನ ವಿಜ್ಜತಿ;

ಯೋಪಿ ಯಾಚೇಯ್ಯ ಮಂ ಚಕ್ಖುಂ, ದದೇಯ್ಯಂ ಅವಿಕಮ್ಪಿತೋ’.

‘‘ಮಮ ಸಙ್ಕಪ್ಪಮಞ್ಞಾಯ, ಸಕ್ಕೋ ದೇವಾನಮಿಸ್ಸರೋ;

ನಿಸಿನ್ನೋ ದೇವಪರಿಸಾಯ, ಇದಂ ವಚನಮಬ್ರವಿ.

‘‘‘ನಿಸಜ್ಜ ¶ ಪಾಸಾದವರೇ, ಸಿವಿರಾಜಾ ಮಹಿದ್ಧಿಕೋ;

ಚಿನ್ತೇನ್ತೋ ವಿವಿಧಂ ದಾನಂ, ಅದೇಯ್ಯಂ ಸೋ ನ ಪಸ್ಸತಿ.

‘‘‘ತಥಂ ¶ ನು ವಿತಥಂ ನೇತಂ, ಹನ್ದ ವೀಮಂಸಯಾಮಿ ತಂ;

ಮುಹುತ್ತಂ ಆಗಮೇಯ್ಯಾಥ, ಯಾವ ಜಾನಾಮಿ ತಂ ಮನಂ’.

‘‘ಪವೇಧಮಾನೋ ಪಲಿತಸಿರೋ, ವಲಿಗತ್ತೋ [ವಲಿತಗತ್ತೋ (ಸೀ.)] ಜರಾತುರೋ;

ಅನ್ಧವಣ್ಣೋವ ಹುತ್ವಾನ, ರಾಜಾನಂ ಉಪಸಙ್ಕಮಿ.

‘‘ಸೋ ¶ ತದಾ ಪಗ್ಗಹೇತ್ವಾನ, ವಾಮಂ ದಕ್ಖಿಣಬಾಹು ಚ;

ಸಿರಸ್ಮಿಂ ಅಞ್ಜಲಿಂ ಕತ್ವಾ, ಇದಂ ವಚನಮಬ್ರವಿ.

‘‘‘ಯಾಚಾಮಿ ತಂ ಮಹಾರಾಜ, ಧಮ್ಮಿಕ ರಟ್ಠವಡ್ಢನ;

ತವ ದಾನರತಾ ಕಿತ್ತಿ, ಉಗ್ಗತಾ ದೇವಮಾನುಸೇ.

‘‘‘ಉಭೋಪಿ ¶ ನೇತ್ತಾ ನಯನಾ, ಅನ್ಧಾ ಉಪಹತಾ ಮಮ;

ಏಕಂ ಮೇ ನಯನಂ ದೇಹಿ, ತ್ವಮ್ಪಿ ಏಕೇನ ಯಾಪಯ’.

‘‘ತಸ್ಸಾಹಂ ವಚನಂ ಸುತ್ವಾ, ಹಟ್ಠೋ ಸಂವಿಗ್ಗಮಾನಸೋ;

ಕತಞ್ಜಲೀ ವೇದಜಾತೋ, ಇದಂ ವಚನಮಬ್ರವಿಂ.

‘‘‘ಇದಾನಾಹಂ ಚಿನ್ತಯಿತ್ವಾನ, ಪಾಸಾದತೋ ಇಧಾಗತೋ;

ತ್ವಂ ಮಮ ಚಿತ್ತಮಞ್ಞಾಯ, ನೇತ್ತಂ ಯಾಚಿತುಮಾಗತೋ.

‘‘‘ಅಹೋ ಮೇ ಮಾನಸಂ ಸಿದ್ಧಂ, ಸಙ್ಕಪ್ಪೋ ಪರಿಪೂರಿತೋ;

ಅದಿನ್ನಪುಬ್ಬಂ ದಾನವರಂ, ಅಜ್ಜ ದಸ್ಸಾಮಿ ಯಾಚಕೇ.

‘‘‘ಏಹಿ ಸಿವಕ ಉಟ್ಠೇಹಿ, ಮಾ ದನ್ಧಯಿ ಮಾ ಪವೇಧಯಿ;

ಉಭೋಪಿ ನಯನಂ ದೇಹಿ, ಉಪ್ಪಾಟೇತ್ವಾ ವಣಿಬ್ಬಕೇ’.

‘‘ತತೋ ¶ ಸೋ ಚೋದಿತೋ ಮಯ್ಹಂ, ಸಿವಕೋ ವಚನಂ ಕರೋ;

ಉದ್ಧರಿತ್ವಾನ ಪಾದಾಸಿ, ತಾಲಮಿಞ್ಜಂವ ಯಾಚಕೇ.

‘‘ದದಮಾನಸ್ಸ ದೇನ್ತಸ್ಸ, ದಿನ್ನದಾನಸ್ಸ ಮೇ ಸತೋ;

ಚಿತ್ತಸ್ಸ ಅಞ್ಞಥಾ ನತ್ಥಿ, ಬೋಧಿಯಾಯೇವ ಕಾರಣಾ.

‘‘ನ ಮೇ ದೇಸ್ಸಾ ಉಭೋ ಚಕ್ಖೂ, ಅತ್ತಾ ನ ಮೇ ನ ದೇಸ್ಸಿಯೋ;

ಸಬ್ಬಞ್ಞುತಂ ಪಿಯಂ ಮಯ್ಹಂ, ತಸ್ಮಾ ಚಕ್ಖುಂ ಅದಾಸಹ’’ನ್ತಿ.

‘‘ಯಾ ¶ ಮೇ ಅಹೋಸಿ ಜನಿಕಾ, ಫುಸ್ಸತೀ [ಫುಸತೀ (ಸೀ.)] ನಾಮ ಖತ್ತಿಯಾ;

ಸಾ ಅತೀತಾಸು ಜಾತೀಸು, ಸಕ್ಕಸ್ಸ ಮಹೇಸೀ ಪಿಯಾ.

‘‘ತಸ್ಸಾ ಆಯುಕ್ಖಯಂ ಞತ್ವಾ, ದೇವಿನ್ದೋ ಏತದಬ್ರವಿ;

‘ದದಾಮಿ ತೇ ದಸ ವರೇ, ವರಭದ್ದೇ ಯದಿಚ್ಛಸಿ’.

‘‘ಏವಂ ವುತ್ತಾ ಚ ಸಾ ದೇವೀ, ಸಕ್ಕಂ ಪುನಿದಮಬ್ರವಿ;

‘ಕಿಂ ನು ಮೇ ಅಪರಾಧತ್ಥಿ, ಕಿಂ ನು ದೇಸ್ಸಾ ಅಹಂ ತವ;

ರಮ್ಮಾ ಚಾವೇಸಿ ಮಂ ಠಾನಾ, ವಾತೋವ ಧರಣೀರುಹಂ’.

‘‘ಏವಂ ¶ ವುತ್ತೋ ಚ ಸೋ ಸಕ್ಕೋ, ಪುನ ತಸ್ಸಿದಮಬ್ರವಿ;

‘ನ ಚೇವ ತೇ ಕತಂ ಪಾಪಂ, ನ ಚ ಮೇ ತ್ವಂಸಿ ಅಪ್ಪಿಯಾ.

‘‘‘ಏತ್ತಕಂಯೇವ ¶ ತೇ ಆಯು, ಚವನಕಾಲೋ ಭವಿಸ್ಸತಿ;

ಪಟಿಗ್ಗಣ್ಹ ಮಯಾ ದಿನ್ನೇ, ವರೇ ದಸ ವರುತ್ತಮೇ’.

‘‘ಸಕ್ಕೇನ ¶ ಸಾ ದಿನ್ನವರಾ, ತುಟ್ಠಹಟ್ಠಾ ಪಮೋದಿತಾ;

ಮಮಂ ಅಬ್ಭನ್ತರಂ ಕತ್ವಾ, ಫುಸ್ಸತೀ ದಸ ವರೇ ವರೀ.

‘‘ತತೋ ಚುತಾ ಸಾ ಫುಸ್ಸತೀ, ಖತ್ತಿಯೇ ಉಪಪಜ್ಜಥ;

ಜೇತುತ್ತರಮ್ಹಿ ನಗರೇ, ಸಞ್ಜಯೇನ ಸಮಾಗಮಿ.

‘‘ಯದಾಹಂ ಫುಸ್ಸತಿಯಾ ಕುಚ್ಛಿಂ, ಓಕ್ಕನ್ತೋ ಪಿಯಮಾತುಯಾ;

ಮಮ ತೇಜೇನ ಮೇ ಮಾತಾ, ಸದಾ ದಾನರತಾ ಅಹು.

‘‘ಅಧನೇ ಆತುರೇ ಜಿಣ್ಣೇ, ಯಾಚಕೇ ಅದ್ಧಿಕೇ [ಪಥಿಕೇ (ಕ.)] ಜನೇ;

ಸಮಣೇ ಬ್ರಾಹ್ಮಣೇ ಖೀಣೇ, ದೇತಿ ದಾನಂ ಅಕಿಞ್ಚನೇ.

‘‘ದಸ ಮಾಸೇ ಧಾರಯಿತ್ವಾನ, ಕರೋನ್ತೇ ಪುರಂ ಪದಕ್ಖಿಣಂ;

ವೇಸ್ಸಾನಂ ವೀಥಿಯಾ ಮಜ್ಝೇ, ಜನೇಸಿ ಫುಸ್ಸತೀ ಮಮಂ.

‘‘ನ ಮಯ್ಹಂ ಮತ್ತಿಕಂ ನಾಮಂ, ನಪಿ ಪೇತ್ತಿಕಸಮ್ಭವಂ;

ಜಾತೇತ್ಥ ವೇಸ್ಸವೀಥಿಯಾ, ತಸ್ಮಾ ವೇಸ್ಸನ್ತರೋ ಅಹು.

‘‘ಯದಾಹಂ ದಾರಕೋ ಹೋಮಿ, ಜಾತಿಯಾ ಅಟ್ಠವಸ್ಸಿಕೋ;

ತದಾ ನಿಸಜ್ಜ ಪಾಸಾದೇ, ದಾನಂ ದಾತುಂ ವಿಚಿನ್ತಯಿಂ.

‘‘‘ಹದಯಂ ¶ ದದೇಯ್ಯಂ ಚಕ್ಖುಂ, ಮಂಸಮ್ಪಿ ರುಧಿರಮ್ಪಿ ಚ;

ದದೇಯ್ಯಂ ಕಾಯಂ ಸಾವೇತ್ವಾ, ಯದಿ ಕೋಚಿ ಯಾಚಯೇ ಮಮಂ’.

‘‘ಸಭಾವಂ ಚಿನ್ತಯನ್ತಸ್ಸ, ಅಕಮ್ಪಿತಮಸಣ್ಠಿತಂ;

ಅಕಮ್ಪಿ ತತ್ಥ ಪಥವೀ, ಸಿನೇರುವನವಟಂಸಕಾ.

‘‘ಅನ್ವದ್ಧಮಾಸೇ ಪನ್ನರಸೇ, ಪುಣ್ಣಮಾಸೇ ಉಪೋಸಥೇ;

ಪಚ್ಚಯಂ ನಾಗಮಾರುಯ್ಹ, ದಾನಂ ದಾತುಂ ಉಪಾಗಮಿಂ.

‘‘ಕಲಿಙ್ಗರಟ್ಠವಿಸಯಾ ¶ , ಬ್ರಾಹ್ಮಣಾ ಉಪಗಞ್ಛು ಮಂ;

ಅಯಾಚುಂ ಮಂ ಹತ್ಥಿನಾಗಂ, ಧಞ್ಞಂ ಮಙ್ಗಲಸಮ್ಮತಂ.

‘‘ಅವುಟ್ಠಿಕೋ ¶ ಜನಪದೋ, ದುಬ್ಭಿಕ್ಖೋ ಛಾತಕೋ ಮಹಾ;

ದದಾಹಿ ಪವರಂ ನಾಗಂ, ಸಬ್ಬಸೇತಂ ಗಜುತ್ತಮಂ.

‘‘ದದಾಮಿ ನ ವಿಕಮ್ಪಾಮಿ, ಯಂ ಮಂ ಯಾಚನ್ತಿ ಬ್ರಾಹ್ಮಣಾ;

ಸನ್ತಂ ನಪ್ಪತಿಗೂಹಾಮಿ [ನಪ್ಪತಿಗುಯ್ಹಾಮಿ (ಸೀ. ಕ.)], ದಾನೇ ಮೇ ರಮತೇ ಮನೋ.

‘‘ನ ಮೇ ಯಾಚಕಮನುಪ್ಪತ್ತೇ, ಪಟಿಕ್ಖೇಪೋ ಅನುಚ್ಛವೋ;

‘ಮಾ ಮೇ ಭಿಜ್ಜಿ ಸಮಾದಾನಂ, ದಸ್ಸಾಮಿ ವಿಪುಲಂ ಗಜಂ’.

‘‘ನಾಗಂ ಗಹೇತ್ವಾ ಸೋಣ್ಡಾಯ, ಭಿಙ್ಗಾರೇ ರತನಾಮಯೇ;

ಜಲಂ ಹತ್ಥೇ ಆಕಿರಿತ್ವಾ, ಬ್ರಾಹ್ಮಣಾನಂ ಅದಂ ಗಜಂ.

‘‘ಪುನಾಪರಂ ದದನ್ತಸ್ಸ, ಸಬ್ಬಸೇತಂ ಗಜುತ್ತಮಂ;

ತದಾಪಿ ಪಥವೀ ಕಮ್ಪಿ, ಸಿನೇರುವನವಟಂಸಕಾ.

‘‘ತಸ್ಸ ನಾಗಸ್ಸ ದಾನೇನ, ಸಿವಯೋ ಕುದ್ಧಾ ಸಮಾಗತಾ;

ಪಬ್ಬಾಜೇಸುಂ ಸಕಾ ರಟ್ಠಾ, ‘ವಙ್ಕಂ ಗಚ್ಛತು ಪಬ್ಬತಂ’.

‘‘ತೇಸಂ ನಿಚ್ಛುಭಮಾನಾನಂ, ಅಕಮ್ಪಿತ್ಥಮಸಣ್ಠಿತಂ;

ಮಹಾದಾನಂ ಪವತ್ತೇತುಂ, ಏಕಂ ವರಮಯಾಚಿಸಂ.

‘‘ಯಾಚಿತಾ ¶ ಸಿವಯೋ ಸಬ್ಬೇ, ಏಕಂ ವರಮದಂಸು ಮೇ;

ಸಾವಯಿತ್ವಾ ಕಣ್ಣಭೇರಿಂ, ಮಹಾದಾನಂ ದದಾಮಹಂ.

‘‘ಅಥೇತ್ಥ ವತ್ತತೀ ಸದ್ದೋ, ತುಮುಲೋ ಭೇರವೋ ಮಹಾ;

ದಾನೇನಿಮಂ ನೀಹರನ್ತಿ, ಪುನ ದಾನಂ ದದಾತಯಂ.

‘‘ಹತ್ಥಿಂ ¶ ಅಸ್ಸೇ ರಥೇ ದತ್ವಾ, ದಾಸಿಂ ದಾಸಂ ಗವಂ ಧನಂ;

ಮಹಾದಾನಂ ದದಿತ್ವಾನ, ನಗರಾ ನಿಕ್ಖಮಿಂ ತದಾ.

‘‘ನಿಕ್ಖಮಿತ್ವಾನ ¶ ನಗರಾ, ನಿವತ್ತಿತ್ವಾ ವಿಲೋಕಿತೇ;

ತದಾಪಿ ಪಥವೀ ಕಮ್ಪಿ, ಸಿನೇರುವನವಟಂಸಕಾ.

‘‘ಚತುವಾಹಿಂ ರಥಂ ದತ್ವಾ, ಠತ್ವಾ ಚಾತುಮ್ಮಹಾಪಥೇ;

ಏಕಾಕಿಯೋ ಅದುತಿಯೋ, ಮದ್ದಿದೇವಿಂ ಇದಮಬ್ರವಿಂ.

‘‘‘ತ್ವಂ ಮದ್ದಿ ಕಣ್ಹಂ ಗಣ್ಹಾಹಿ, ಲಹುಕಾ ಏಸಾ ಕನಿಟ್ಠಿಕಾ;

ಅಹಂ ಜಾಲಿಂ ಗಹೇಸ್ಸಾಮಿ, ಗರುಕೋ ಭಾತಿಕೋ ಹಿ ಸೋ’.

‘‘ಪದುಮಂ ¶ ಪುಣ್ಡರೀಕಂವ, ಮದ್ದೀ ಕಣ್ಹಾಜಿನಗ್ಗಹೀ;

ಅಹಂ ಸುವಣ್ಣಬಿಮ್ಬಂವ, ಜಾಲಿಂ ಖತ್ತಿಯಮಗ್ಗಹಿಂ.

‘‘ಅಭಿಜಾತಾ ಸುಖುಮಾಲಾ, ಖತ್ತಿಯಾ ಚತುರೋ ಜನಾ;

ವಿಸಮಂ ಸಮಂ ಅಕ್ಕಮನ್ತಾ, ವಙ್ಕಂ ಗಚ್ಛಾಮ ಪಬ್ಬತಂ.

‘‘ಯೇ ಕೇಚಿ ಮನುಜಾ ಏನ್ತಿ, ಅನುಮಗ್ಗೇ ಪಟಿಪ್ಪಥೇ;

ಮಗ್ಗನ್ತೇ ಪಟಿಪುಚ್ಛಾಮ, ‘ಕುಹಿಂ ವಙ್ಕನ್ತ [ವಙ್ಕತ (ಸೀ.)] ಪಬ್ಬತೋ’.

‘‘ತೇ ತತ್ಥ ಅಮ್ಹೇ ಪಸ್ಸಿತ್ವಾ, ಕರುಣಂ ಗಿರಮುದೀರಯುಂ;

ದುಕ್ಖಂ ತೇ ಪಟಿವೇದೇನ್ತಿ, ದೂರೇ ವಙ್ಕನ್ತಪಬ್ಬತೋ.

‘‘ಯದಿ ಪಸ್ಸನ್ತಿ ಪವನೇ, ದಾರಕಾ ಫಲಿನೇ ದುಮೇ;

ತೇಸಂ ಫಲಾನಂ ಹೇತುಮ್ಹಿ, ಉಪರೋದನ್ತಿ ದಾರಕಾ.

‘‘ರೋದನ್ತೇ ದಾರಕೇ ದಿಸ್ವಾ, ಉಬ್ಬಿದ್ಧಾ [ಉಬ್ಬಿಗ್ಗಾ (ಸ್ಯಾ. ಕಂ.)] ವಿಪುಲಾ ದುಮಾ;

ಸಯಮೇವೋಣಮಿತ್ವಾನ, ಉಪಗಚ್ಛನ್ತಿ ದಾರಕೇ.

‘‘ಇದಂ ¶ ಅಚ್ಛರಿಯಂ ದಿಸ್ವಾ, ಅಬ್ಭುತಂ ಲೋಮಹಂಸನಂ;

ಸಾಹುಕಾರಂ [ಸಾಧುಕಾರಂ (ಸಬ್ಬತ್ಥ)] ಪವತ್ತೇಸಿ, ಮದ್ದೀ ಸಬ್ಬಙ್ಗಸೋಭನಾ.

‘‘ಅಚ್ಛೇರಂ ವತ ಲೋಕಸ್ಮಿಂ, ಅಬ್ಭುತಂ ಲೋಮಹಂಸನಂ;

ವೇಸ್ಸನ್ತರಸ್ಸ ತೇಜೇನ, ಸಯಮೇವೋಣತಾ ದುಮಾ.

‘‘ಸಙ್ಖಿಪಿಂಸು ಪಥಂ ಯಕ್ಖಾ, ಅನುಕಮ್ಪಾಯ ದಾರಕೇ;

ನಿಕ್ಖನ್ತದಿವಸೇನೇವ [ನಿಕ್ಖನ್ತದಿವಸೇಯೇವ (ಸೀ.)], ಚೇತರಟ್ಠಮುಪಾಗಮುಂ.

‘‘ಸಟ್ಠಿರಾಜಸಹಸ್ಸಾನಿ, ತದಾ ವಸನ್ತಿ ಮಾತುಲೇ;

ಸಬ್ಬೇ ಪಞ್ಜಲಿಕಾ ಹುತ್ವಾ, ರೋದಮಾನಾ ಉಪಾಗಮುಂ.

‘‘ತತ್ಥ ವತ್ತೇತ್ವಾ ಸಲ್ಲಾಪಂ, ಚೇತೇಹಿ ಚೇತಪುತ್ತೇಹಿ;

ತೇ ತತೋ ನಿಕ್ಖಮಿತ್ವಾನ, ವಙ್ಕಂ ಅಗಮು ಪಬ್ಬತಂ.

‘‘ಆಮನ್ತಯಿತ್ವಾ ¶ ದೇವಿನ್ದೋ, ವಿಸ್ಸಕಮ್ಮಂ [ವಿಸುಕಮ್ಮಂ (ಕ.)] ಮಹಿದ್ಧಿಕಂ;

ಅಸ್ಸಮಂ ಸುಕತಂ ರಮ್ಮಂ, ಪಣ್ಣಸಾಲಂ ಸುಮಾಪಯ.

‘‘ಸಕ್ಕಸ್ಸ ವಚನಂ ಸುತ್ವಾ, ವಿಸ್ಸಕಮ್ಮೋ ಮಹಿದ್ಧಿಕೋ;

ಅಸ್ಸಮಂ ¶ ಸುಕತಂ ರಮ್ಮಂ, ಪಣ್ಣಸಾಲಂ ಸುಮಾಪಯಿ.

‘‘ಅಜ್ಝೋಗಾಹೇತ್ವಾ ¶ ಪವನಂ, ಅಪ್ಪಸದ್ದಂ ನಿರಾಕುಲಂ;

ಚತುರೋ ಜನಾ ಮಯಂ ತತ್ಥ, ವಸಾಮ ಪಬ್ಬತನ್ತರೇ.

‘‘ಅಹಞ್ಚ ಮದ್ದಿದೇವೀ ಚ, ಜಾಲೀ ಕಣ್ಹಾಜಿನಾ ಚುಭೋ;

ಅಞ್ಞಮಞ್ಞಂ ಸೋಕನುದಾ, ವಸಾಮ ಅಸ್ಸಮೇ ತದಾ.

‘‘ದಾರಕೇ ಅನುರಕ್ಖನ್ತೋ, ಅಸುಞ್ಞೋ ಹೋಮಿ ಅಸ್ಸಮೇ;

ಮದ್ದೀ ಫಲಂ ಆಹರಿತ್ವಾ, ಪೋಸೇತಿ ಸಾ ತಯೋ ಜನೇ.

‘‘ಪವನೇ ¶ ವಸಮಾನಸ್ಸ, ಅದ್ಧಿಕೋ ಮಂ ಉಪಾಗಮಿ;

ಆಯಾಚಿ ಪುತ್ತಕೇ ಮಯ್ಹಂ, ಜಾಲಿಂ ಕಣ್ಹಾಜಿನಂ ಚುಭೋ.

‘‘ಯಾಚಕಂ ಉಪಗತಂ ದಿಸ್ವಾ, ಹಾಸೋ ಮೇ ಉಪಪಜ್ಜಥ;

ಉಭೋ ಪುತ್ತೇ ಗಹೇತ್ವಾನ, ಅದಾಸಿಂ ಬ್ರಾಹ್ಮಣೇ ತದಾ.

‘‘ಸಕೇ ಪುತ್ತೇ ಚಜನ್ತಸ್ಸ, ಜೂಜಕೇ ಬ್ರಾಹ್ಮಣೇ ಯದಾ;

ತದಾಪಿ ಪಥವೀ ಕಮ್ಪಿ, ಸಿನೇರುವನವಟಂಸಕಾ.

‘‘ಪುನದೇವ ಸಕ್ಕೋ ಓರುಯ್ಹ, ಹುತ್ವಾ ಬ್ರಾಹ್ಮಣಸನ್ನಿಭೋ;

ಆಯಾಚಿ ಮಂ ಮದ್ದಿದೇವಿಂ, ಸೀಲವನ್ತಿಂ ಪತಿಬ್ಬತಂ.

‘‘ಮದ್ದಿಂ ಹತ್ಥೇ ಗಹೇತ್ವಾನ, ಉದಕಞ್ಜಲಿ ಪೂರಿಯ;

ಪಸನ್ನಮನಸಙ್ಕಪ್ಪೋ, ತಸ್ಸ ಮದ್ದಿಂ ಅದಾಸಹಂ.

‘‘ಮದ್ದಿಯಾ ದೀಯಮಾನಾಯ, ಗಗನೇ ದೇವಾ ಪಮೋದಿತಾ;

ತದಾಪಿ ಪಥವೀ ಕಮ್ಪಿ, ಸಿನೇರುವನವಟಂಸಕಾ.

‘‘ಜಾಲಿಂ ಕಣ್ಹಾಜಿನಂ ಧೀತಂ, ಮದ್ದಿದೇವಿಂ ಪತಿಬ್ಬತಂ;

ಚಜಮಾನೋ ನ ಚಿನ್ತೇಸಿಂ, ಬೋಧಿಯಾಯೇವ ಕಾರಣಾ.

‘‘ನ ಮೇ ದೇಸ್ಸಾ ಉಭೋ ಪುತ್ತಾ, ಮದ್ದಿದೇವೀ ನ ದೇಸ್ಸಿಯಾ;

ಸಬ್ಬಞ್ಞುತಂ ಪಿಯಂ ಮಯ್ಹಂ, ತಸ್ಮಾ ಪಿಯೇ ಅದಾಸಹಂ.

‘‘ಪುನಾಪರಂ ಬ್ರಹಾರಞ್ಞೇ, ಮಾತಾಪಿತುಸಮಾಗಮೇ;

ಕರುಣಂ ಪರಿದೇವನ್ತೇ, ಸಲ್ಲಪನ್ತೇ ಸುಖಂ ದುಖಂ.

‘‘ಹಿರೋತ್ತಪ್ಪೇನ ¶ ಗರುನಾ [ಗರುನಂ (ಸ್ಯಾ. ಕ.)], ಉಭಿನ್ನಂ ಉಪಸಙ್ಕಮಿ;

ತದಾಪಿ ಪಥವೀ ಕಮ್ಪಿ, ಸಿನೇರುವನವಟಂಸಕಾ.

‘‘ಪುನಾಪರಂ ¶ ¶ ಬ್ರಹಾರಞ್ಞಾ, ನಿಕ್ಖಮಿತ್ವಾ ಸಞಾತಿಭಿ;

ಪವಿಸಾಮಿ ಪುರಂ ರಮ್ಮಂ, ಜೇತುತ್ತರಂ ಪುರುತ್ತಮಂ.

‘‘ರತನಾನಿ ಸತ್ತ ವಸ್ಸಿಂಸು, ಮಹಾಮೇಘೋ ಪವಸ್ಸಥ;

ತದಾಪಿ ಪಥವೀ ಕಮ್ಪಿ, ಸಿನೇರುವನವಟಂಸಕಾ.

‘‘ಅಚೇತನಾಯಂ ಪಥವೀ, ಅವಿಞ್ಞಾಯ ಸುಖಂ ದುಖಂ;

ಸಾಪಿ ದಾನಬಲಾ ಮಯ್ಹಂ, ಸತ್ತಕ್ಖತ್ತುಂ ಪಕಮ್ಪಥಾ’’ತಿ.

‘‘ಪುನಾಪರಂ ¶ ಯದಾ ಹೋಮಿ, ಸಸಕೋ ಪವನಚಾರಕೋ;

ತಿಣಪಣ್ಣಸಾಕಫಲಭಕ್ಖೋ, ಪರಹೇಠನವಿವಜ್ಜಿತೋ.

‘‘ಮಕ್ಕಟೋ ಚ ಸಿಙ್ಗಾಲೋ ಚ, ಸುತ್ತಪೋತೋ ಚಹಂ ತದಾ;

ವಸಾಮ ಏಕಸಾಮನ್ತಾ, ಸಾಯಂ ಪಾತೋ ಚ ದಿಸ್ಸರೇ [ಸಾಯಂ ಪಾತೋ ಪದಿಸ್ಸರೇ (ಕ.)].

‘‘ಅಹಂ ತೇ ಅನುಸಾಸಾಮಿ, ಕಿರಿಯೇ ಕಲ್ಯಾಣಪಾಪಕೇ;

‘ಪಾಪಾನಿ ಪರಿವಜ್ಜೇಥ, ಕಲ್ಯಾಣೇ ಅಭಿನಿವಿಸ್ಸಥ’.

‘‘ಉಪೋಸಥಮ್ಹಿ ದಿವಸೇ, ಚನ್ದಂ ದಿಸ್ವಾನ ಪೂರಿತಂ;

ಏತೇಸಂ ತತ್ಥ ಆಚಿಕ್ಖಿಂ, ದಿವಸೋ ಅಜ್ಜುಪೋಸಥೋ.

‘‘ದಾನಾನಿ ಪಟಿಯಾದೇಥ, ದಕ್ಖಿಣೇಯ್ಯಸ್ಸ ದಾತವೇ;

ದತ್ವಾ ದಾನಂ ದಕ್ಖಿಣೇಯ್ಯೇ, ಉಪವಸ್ಸಥುಪೋಸಥಂ.

‘‘ತೇ ¶ ಮೇ ಸಾಧೂತಿ ವತ್ವಾನ, ಯಥಾಸತ್ತಿ ಯಥಾಬಲಂ;

ದಾನಾನಿ ಪಟಿಯಾದೇತ್ವಾ, ದಕ್ಖಿಣೇಯ್ಯಂ ಗವೇಸಿಸುಂ [ಗವೇಸಯ್ಯುಂ (ಕ.)].

‘‘ಅಹಂ ನಿಸಜ್ಜ ಚಿನ್ತೇಸಿಂ, ದಾನಂ ದಕ್ಖಿಣನುಚ್ಛವಂ;

‘ಯದಿಹಂ ಲಭೇ ದಕ್ಖಿಣೇಯ್ಯಂ, ಕಿಂ ಮೇ ದಾನಂ ಭವಿಸ್ಸತಿ.

‘‘‘ನ ¶ ಮೇ ಅತ್ಥಿ ತಿಲಾ ಮುಗ್ಗಾ, ಮಾಸಾ ವಾ ತಣ್ಡುಲಾ ಘತಂ;

ಅಹಂ ತಿಣೇನ ಯಾಪೇಮಿ, ನ ಸಕ್ಕಾ ತಿಣ ದಾತವೇ.

‘‘‘ಯದಿ ¶ ಕೋಚಿ ಏತಿ ದಕ್ಖಿಣೇಯ್ಯೋ, ಭಿಕ್ಖಾಯ ಮಮ ಸನ್ತಿಕೇ;

ದಜ್ಜಾಹಂ ಸಕಮತ್ತಾನಂ, ನ ಸೋ ತುಚ್ಛೋ ಗಮಿಸ್ಸತಿ’.

‘‘ಮಮ ಸಙ್ಕಪ್ಪಮಞ್ಞಾಯ, ಸಕ್ಕೋ ಬ್ರಾಹ್ಮಣವಣ್ಣಿನಾ;

ಆಸಯಂ ಮೇ ಉಪಾಗಚ್ಛಿ, ದಾನವೀಮಂಸನಾಯ ಮೇ.

‘‘ತಮಹಂ ದಿಸ್ವಾನ ಸನ್ತುಟ್ಠೋ, ಇದಂ ವಚನಮಬ್ರವಿಂ;

‘ಸಾಧು ಖೋಸಿ ಅನುಪ್ಪತ್ತೋ, ಘಾಸಹೇತು ಮಮನ್ತಿಕೇ.

‘‘‘ಅದಿನ್ನಪುಬ್ಬಂ ದಾನವರಂ, ಅಜ್ಜ ದಸ್ಸಾಮಿ ತೇ ಅಹಂ;

ತುವಂ ಸೀಲಗುಣೂಪೇತೋ, ಅಯುತ್ತಂ ತೇ ಪರಹೇಠನಂ.

‘‘‘ಏಹಿ ಅಗ್ಗಿಂ ಪದೀಪೇಹಿ, ನಾನಾಕಟ್ಠೇ ಸಮಾನಯ;

ಅಹಂ ಪಚಿಸ್ಸಮತ್ತಾನಂ, ಪಕ್ಕಂ ತ್ವಂ ಭಕ್ಖಯಿಸ್ಸಸಿ’.

‘‘‘ಸಾಧೂ’ತಿ ಸೋ ಹಟ್ಠಮನೋ, ನಾನಾಕಟ್ಠೇ ಸಮಾನಯಿ;

ಮಹನ್ತಂ ಅಕಾಸಿ ಚಿತಕಂ, ಕತ್ವಾ ಅಙ್ಗಾರಗಬ್ಭಕಂ.

‘‘ಅಗ್ಗಿಂ ತತ್ಥ ಪದೀಪೇಸಿ, ಯಥಾ ಸೋ ಖಿಪ್ಪಂ ಮಹಾ ಭವೇ;

ಫೋಟೇತ್ವಾ ರಜಗತೇ ಗತ್ತೇ, ಏಕಮನ್ತಂ ಉಪಾವಿಸಿಂ.

‘‘ಯದಾ ¶ ಮಹಾಕಟ್ಠಪುಞ್ಜೋ, ಆದಿತ್ತೋ ಧಮಧಮಾಯತಿ [ಧುಮಧುಮಾಯತಿ (ಸೀ.), ಧಮಮಾಯತಿ (ಕ.)];

ತದುಪ್ಪತಿತ್ವಾ ಪಪತಿಂ, ಮಜ್ಝೇ ಜಾಲಸಿಖನ್ತರೇ.

‘‘ಯಥಾ ¶ ಸೀತೋದಕಂ ನಾಮ, ಪವಿಟ್ಠಂ ಯಸ್ಸ ಕಸ್ಸಚಿ;

ಸಮೇತಿ ದರಥಪರಿಳಾಹಂ, ಅಸ್ಸಾದಂ ದೇತಿ ಪೀತಿ ಚ.

‘‘ತಥೇವ ಜಲಿತಂ ಅಗ್ಗಿಂ, ಪವಿಟ್ಠಸ್ಸ ಮಮಂ ತದಾ;

ಸಬ್ಬಂ ಸಮೇತಿ ದರಥಂ, ಯಥಾ ಸೀತೋದಕಂ ವಿಯ.

‘‘ಛವಿಂ ಚಮ್ಮಂ ಮಂಸಂ ನ್ಹಾರುಂ, ಅಟ್ಠಿಂ ಹದಯಬನ್ಧನಂ;

ಕೇವಲಂ ಸಕಲಂ ಕಾಯಂ, ಬ್ರಾಹ್ಮಣಸ್ಸ ಅದಾಸಹ’’ನ್ತಿ.

ಅಕಿತ್ತಿಬ್ರಾಹ್ಮಣೋ ¶ ಸಙ್ಖೋ, ಕುರುರಾಜಾ ಧನಞ್ಚಯೋ;

ಮಹಾಸುದಸ್ಸನೋ ರಾಜಾ, ಮಹಾಗೋವಿನ್ದಬ್ರಾಹ್ಮಣೋ.

ನಿಮಿ ಚನ್ದಕುಮಾರೋ ಚ, ಸಿವಿ ವೇಸ್ಸನ್ತರೋ ಸಸೋ;

ಅಹಮೇವ ತದಾ ಆಸಿಂ, ಯೋ ತೇ ದಾನವರೇ ಅದಾ.

ಏತೇ ದಾನಪರಿಕ್ಖಾರಾ, ಏತೇ ದಾನಸ್ಸ ಪಾರಮೀ;

ಜೀವಿತಂ ಯಾಚಕೇ ದತ್ವಾ, ಇಮಂ ಪಾರಮಿ ಪೂರಯಿಂ.

ಭಿಕ್ಖಾಯ ಉಪಗತಂ ದಿಸ್ವಾ, ಸಕತ್ತಾನಂ ಪರಿಚ್ಚಜಿಂ;

ದಾನೇನ ಮೇ ಸಮೋ ನತ್ಥಿ, ಏಸಾ ಮೇ ದಾನಪಾರಮೀತಿ.

‘‘ಯದಾ ¶ ¶ ¶ ¶ ಅಹೋಸಿಂ ಪವನೇ, ಕುಞ್ಜರೋ ಮಾತುಪೋಸಕೋ;

ನ ತದಾ ಅತ್ಥಿ ಮಹಿಯಾ, ಗುಣೇನ ಮಮ ಸಾದಿಸೋ.

‘‘ಪವನೇ ದಿಸ್ವಾ ವನಚರೋ, ರಞ್ಞೋ ಮಂ ಪಟಿವೇದಯಿ;

‘ತವಾನುಚ್ಛವೋ ಮಹಾರಾಜ, ಗಜೋ ವಸತಿ ಕಾನನೇ.

‘‘‘ನ ತಸ್ಸ ಪರಿಕ್ಖಾಯತ್ಥೋ, ನಪಿ ಆಳಕಕಾಸುಯಾ;

ಸಹ ಗಹಿತೇ [ಸಮಂ ಗಹಿತೇ (ಸೀ.)] ಸೋಣ್ಡಾಯ, ಸಯಮೇವ ಇಧೇಹಿ’ತಿ.

‘‘ತಸ್ಸ ತಂ ವಚನಂ ಸುತ್ವಾ, ರಾಜಾಪಿ ತುಟ್ಠಮಾನಸೋ;

ಪೇಸೇಸಿ ಹತ್ಥಿದಮಕಂ, ಛೇಕಾಚರಿಯಂ ಸುಸಿಕ್ಖಿತಂ.

‘‘ಗನ್ತ್ವಾ ಸೋ ಹತ್ಥಿದಮಕೋ, ಅದ್ದಸ ಪದುಮಸ್ಸರೇ;

ಭಿಸಮುಳಾಲಂ [ಭಿಸಮೂಲಂ (ಕ.)] ಉದ್ಧರನ್ತಂ, ಯಾಪನತ್ಥಾಯ ಮಾತುಯಾ.

‘‘ವಿಞ್ಞಾಯ ಮೇ ಸೀಲಗುಣಂ, ಲಕ್ಖಣಂ ಉಪಧಾರಯಿ;

‘ಏಹಿ ಪುತ್ತಾ’ತಿ ಪತ್ವಾನ, ಮಮ ಸೋಣ್ಡಾಯ ಅಗ್ಗಹಿ.

‘‘ಯಂ ಮೇ ತದಾ ಪಾಕತಿಕಂ, ಸರೀರಾನುಗತಂ ಬಲಂ;

ಅಜ್ಜ ನಾಗಸಹಸ್ಸಾನಂ, ಬಲೇನ ಸಮಸಾದಿಸಂ.

‘‘ಯದಿಹಂ ತೇಸಂ ಪಕುಪ್ಪೇಯ್ಯಂ, ಉಪೇತಾನಂ ಗಹಣಾಯ ಮಂ;

ಪಟಿಬಲೋ ಭವೇ ತೇಸಂ, ಯಾವ ರಜ್ಜಮ್ಪಿ ಮಾನುಸಂ.

‘‘ಅಪಿ ¶ ಚಾಹಂ ಸೀಲರಕ್ಖಾಯ, ಸೀಲಪಾರಮಿಪೂರಿಯಾ;

ನ ಕರೋಮಿ ಚಿತ್ತೇ ಅಞ್ಞಥತ್ತಂ, ಪಕ್ಖಿಪನ್ತಂ ಮಮಾಳಕೇ.

‘‘ಯದಿ ತೇ ಮಂ ತತ್ಥ ಕೋಟ್ಟೇಯ್ಯುಂ, ಫರಸೂಹಿ ತೋಮರೇಹಿ ಚ;

ನೇವ ತೇಸಂ ಪಕುಪ್ಪೇಯ್ಯಂ, ಸೀಲಖಣ್ಡಭಯಾ ಮಮಾ’’ತಿ.

‘‘ಪುನಾಪರಂ ¶ ¶ ¶ ಯದಾ ಹೋಮಿ, ಭೂರಿದತ್ತೋ ಮಹಿದ್ಧಿಕೋ;

ವಿರೂಪಕ್ಖೇನ ಮಹಾರಞ್ಞಾ, ದೇವಲೋಕಮಗಞ್ಛಹಂ.

‘‘ತತ್ಥ ಪಸ್ಸಿತ್ವಾಹಂ ದೇವೇ, ಏಕನ್ತಂ ಸುಖಸಮಪ್ಪಿತೇ;

ತಂ ಸಗ್ಗಗಮನತ್ಥಾಯ, ಸೀಲಬ್ಬತಂ ಸಮಾದಿಯಿಂ.

‘‘ಸರೀರಕಿಚ್ಚಂ ಕತ್ವಾನ, ಭುತ್ವಾ ಯಾಪನಮತ್ತಕಂ;

ಚತುರೋ ಅಙ್ಗೇ ಅಧಿಟ್ಠಾಯ, ಸೇಮಿ ವಮ್ಮಿಕಮುದ್ಧನಿ.

‘‘ಛವಿಯಾ ಚಮ್ಮೇನ ಮಂಸೇನ, ನಹಾರುಅಟ್ಠಿಕೇಹಿ ವಾ;

ಯಸ್ಸ ಏತೇನ ಕರಣೀಯಂ, ದಿನ್ನಂಯೇವ ಹರಾತು ಸೋ.

‘‘ಸಂಸಿತೋ ಅಕತಞ್ಞುನಾ, ಆಲಮ್ಪಾಯನೋ [ಆಲಮ್ಬಣೋ (ಸೀ.)] ಮಮಗ್ಗಹಿ;

ಪೇಳಾಯ ಪಕ್ಖಿಪಿತ್ವಾನ, ಕೀಳೇತಿ ಮಂ ತಹಿಂ ತಹಿಂ.

‘‘ಪೇಳಾಯ ಪಕ್ಖಿಪನ್ತೇಪಿ, ಸಮ್ಮದ್ದನ್ತೇಪಿ ಪಾಣಿನಾ;

ಆಲಮ್ಪಾಯನೇ [ಆಲಮ್ಬಣೇ (ಸೀ.)] ನ ಕುಪ್ಪಾಮಿ, ಸೀಲಖಣ್ಡಭಯಾ ಮಮ.

‘‘ಸಕಜೀವಿತಪರಿಚ್ಚಾಗೋ ¶ , ತಿಣತೋ ಲಹುಕೋ ಮಮ;

ಸೀಲವೀತಿಕ್ಕಮೋ ಮಯ್ಹಂ, ಪಥವೀಉಪ್ಪತನಂ ವಿಯ.

‘‘ನಿರನ್ತರಂ ಜಾತಿಸತಂ, ಚಜೇಯ್ಯಂ ಮಮ ಜೀವಿತಂ;

ನೇವ ಸೀಲಂ ಪಭಿನ್ದೇಯ್ಯಂ, ಚತುದ್ದೀಪಾನ ಹೇತುಪಿ.

‘‘ಅಪಿ ಚಾಹಂ ಸೀಲರಕ್ಖಾಯ, ಸೀಲಪಾರಮಿಪೂರಿಯಾ;

ನ ಕರೋಮಿ ಚಿತ್ತೇ ಅಞ್ಞಥತ್ತಂ, ಪಕ್ಖಿಪನ್ತಮ್ಪಿ ಪೇಳಕೇ’’ತಿ.

‘‘ಪುನಾಪರಂ ಯದಾ ಹೋಮಿ, ಚಮ್ಪೇಯ್ಯಕೋ ಮಹಿದ್ಧಿಕೋ;

ತದಾಪಿ ಧಮ್ಮಿಕೋ ಆಸಿಂ, ಸೀಲಬ್ಬತಸಮಪ್ಪಿತೋ.

‘‘ತದಾಪಿ ¶ ಮಂ ಧಮ್ಮಚಾರಿಂ, ಉಪವುತ್ಥಂ ಉಪೋಸಥಂ;

ಅಹಿತುಣ್ಡಿಕೋ ಗಹೇತ್ವಾನ, ರಾಜದ್ವಾರಮ್ಹಿ ಕೀಳತಿ.

‘‘ಯಂ ¶ ಯಂ ಸೋ ವಣ್ಣಂ ಚಿನ್ತಯಿ, ನೀಲಂವ ಪೀತಲೋಹಿತಂ;

ತಸ್ಸ ಚಿತ್ತಾನುವತ್ತನ್ತೋ, ಹೋಮಿ ಚಿನ್ತಿತಸನ್ನಿಭೋ.

‘‘ಥಲಂ ¶ ಕರೇಯ್ಯಮುದಕಂ, ಉದಕಮ್ಪಿ ಥಲಂ ಕರೇ;

ಯದಿಹಂ ತಸ್ಸ ಪಕುಪ್ಪೇಯ್ಯಂ, ಖಣೇನ ಛಾರಿಕಂ ಕರೇ.

‘‘ಯದಿ ಚಿತ್ತವಸೀ ಹೇಸ್ಸಂ, ಪರಿಹಾಯಿಸ್ಸಾಮಿ ಸೀಲತೋ;

ಸೀಲೇನ ಪರಿಹೀನಸ್ಸ, ಉತ್ತಮತ್ಥೋ ನ ಸಿಜ್ಝತಿ.

‘‘ಕಾಮಂ ¶ ಭಿಜ್ಜತುಯಂ ಕಾಯೋ, ಇಧೇವ ವಿಕಿರೀಯತು;

ನೇವ ಸೀಲಂ ಪಭಿನ್ದೇಯ್ಯಂ, ವಿಕಿರನ್ತೇ ಭುಸಂ ವಿಯಾ’’ತಿ.

‘‘ಪುನಾಪರಂ ಯದಾ ಹೋಮಿ, ಚೂಳಬೋಧಿ ಸುಸೀಲವಾ;

ಭವಂ ದಿಸ್ವಾನ ಭಯತೋ, ನೇಕ್ಖಮ್ಮಂ ಅಭಿನಿಕ್ಖಮಿಂ.

‘‘ಯಾ ಮೇ ದುತಿಯಿಕಾ ಆಸಿ, ಬ್ರಾಹ್ಮಣೀ ಕನಕಸನ್ನಿಭಾ;

ಸಾಪಿ ವಟ್ಟೇ ಅನಪೇಕ್ಖಾ, ನೇಕ್ಖಮ್ಮಂ ಅಭಿನಿಕ್ಖಮಿ.

‘‘ನಿರಾಲಯಾ ಛಿನ್ನಬನ್ಧೂ, ಅನಪೇಕ್ಖಾ ಕುಲೇ ಗಣೇ;

ಚರನ್ತಾ ಗಾಮನಿಗಮಂ, ಬಾರಾಣಸಿಮುಪಾಗಮುಂ.

‘‘ತತ್ಥ ವಸಾಮ ನಿಪಕಾ, ಅಸಂಸಟ್ಠಾ ಕುಲೇ ಗಣೇ;

ನಿರಾಕುಲೇ ಅಪ್ಪಸದ್ದೇ, ರಾಜುಯ್ಯಾನೇ ವಸಾಮುಭೋ.

‘‘ಉಯ್ಯಾನದಸ್ಸನಂ ಗನ್ತ್ವಾ, ರಾಜಾ ಅದ್ದಸ ಬ್ರಾಹ್ಮಣಿಂ;

ಉಪಗಮ್ಮ ಮಮಂ ಪುಚ್ಛಿ, ‘ತುಯ್ಹೇಸಾ ಕಾ ಕಸ್ಸ ಭರಿಯಾ’.

‘‘ಏವಂ ವುತ್ತೇ ಅಹಂ ತಸ್ಸ, ಇದಂ ವಚನಮಬ್ರವಿಂ;

‘ನ ಮಯ್ಹಂ ಭರಿಯಾ ಏಸಾ, ಸಹಧಮ್ಮಾ ಏಕಸಾಸನೀ’.

‘‘ತಿಸ್ಸಾ ¶ [ತಸ್ಸಾ (ಸೀ.)] ಸಾರತ್ತಗಧಿತೋ, ಗಾಹಾಪೇತ್ವಾನ ಚೇಟಕೇ;

ನಿಪ್ಪೀಳಯನ್ತೋ ಬಲಸಾ, ಅನ್ತೇಪುರಂ ಪವೇಸಯಿ.

‘‘ಓದಪತ್ತಕಿಯಾ ¶ ಮಯ್ಹಂ, ಸಹಜಾ ಏಕಸಾಸನೀ;

ಆಕಡ್ಢಿತ್ವಾ ನಯನ್ತಿಯಾ, ಕೋಪೋ ಮೇ ಉಪಪಜ್ಜಥ.

‘‘ಸಹ ¶ ಕೋಪೇ ಸಮುಪ್ಪನ್ನೇ, ಸೀಲಬ್ಬತಮನುಸ್ಸರಿಂ;

ತತ್ಥೇವ ಕೋಪಂ ನಿಗ್ಗಣ್ಹಿಂ, ನಾದಾಸಿಂ ವಡ್ಢಿತೂಪರಿ.

‘‘ಯದಿ ನಂ ಬ್ರಾಹ್ಮಣಿಂ ಕೋಚಿ, ಕೋಟ್ಟೇಯ್ಯ ತಿಣ್ಹಸತ್ತಿಯಾ;

ನೇವ ಸೀಲಂ ಪಭಿನ್ದೇಯ್ಯಂ, ಬೋಧಿಯಾಯೇವ ಕಾರಣಾ.

‘‘ನ ಮೇಸಾ ಬ್ರಾಹ್ಮಣೀ ದೇಸ್ಸಾ, ನಪಿ ಮೇ ಬಲಂ ನ ವಿಜ್ಜತಿ;

ಸಬ್ಬಞ್ಞುತಂ ಪಿಯಂ ಮಯ್ಹಂ, ತಸ್ಮಾ ಸೀಲಾನುರಕ್ಖಿಸ’’ನ್ತಿ.

‘‘ಪುನಾಪರಂ ¶ ಯದಾ ಹೋಮಿ, ಮಹಿಂಸೋ ಪವನಚಾರಕೋ;

ಪವಡ್ಢಕಾಯೋ ಬಲವಾ, ಮಹನ್ತೋ ಭೀಮದಸ್ಸನೋ.

‘‘ಪಬ್ಭಾರೇ ಗಿರಿದುಗ್ಗೇ [ವನದುಗ್ಗೇ (ಸೀ.)] ಚ, ರುಕ್ಖಮೂಲೇ ದಕಾಸಯೇ;

ಹೋತೇತ್ಥ ಠಾನಂ ಮಹಿಂಸಾನಂ, ಕೋಚಿ ಕೋಚಿ ತಹಿಂ ತಹಿಂ.

‘‘ವಿಚರನ್ತೋ ಬ್ರಹಾರಞ್ಞೇ, ಠಾನಂ ಅದ್ದಸ ಭದ್ದಕಂ;

ತಂ ಠಾನಂ ಉಪಗನ್ತ್ವಾನ, ತಿಟ್ಠಾಮಿ ಚ ಸಯಾಮಿ ಚ.

‘‘ಅಥೇತ್ಥ ಕಪಿಮಾಗನ್ತ್ವಾ, ಪಾಪೋ ಅನರಿಯೋ ಲಹು;

ಖನ್ಧೇ ನಲಾಟೇ ಭಮುಕೇ, ಮುತ್ತೇತಿ ಓಹನೇತಿತಂ.

‘‘ಸಕಿಮ್ಪಿ ದಿವಸಂ ದುತಿಯಂ, ತತಿಯಂ ಚತುತ್ಥಮ್ಪಿ ಚ;

ದೂಸೇತಿ ಮಂ ಸಬ್ಬಕಾಲಂ, ತೇನ ಹೋಮಿ ಉಪದ್ದುತೋ.

‘‘ಮಮಂ ¶ ಉಪದ್ದುತಂ ದಿಸ್ವಾ, ಯಕ್ಖೋ ಮಂ ಇದಮಬ್ರವಿ;

‘ನಾಸೇಹೇತಂ ಛವಂ ಪಾಪಂ, ಸಿಙ್ಗೇಹಿ ಚ ಖುರೇಹಿ ಚ’.

‘‘ಏವಂ ¶ ವುತ್ತೇ ತದಾ ಯಕ್ಖೇ, ಅಹಂ ತಂ ಇದಮಬ್ರವಿಂ;

‘ಕಿಂ ತ್ವಂ ಮಕ್ಖೇಸಿ ಕುಣಪೇನ, ಪಾಪೇನ ಅನರಿಯೇನ ಮಂ.

‘‘‘ಯದಿಹಂ ¶ ತಸ್ಸ ಪಕುಪ್ಪೇಯ್ಯಂ, ತತೋ ಹೀನತರೋ ಭವೇ;

ಸೀಲಞ್ಚ ಮೇ ಪಭಿಜ್ಜೇಯ್ಯ, ವಿಞ್ಞೂ ಚ ಗರಹೇಯ್ಯು ಮಂ.

‘‘‘ಹೀಳಿತಾ ಜೀವಿತಾ ವಾಪಿ, ಪರಿಸುದ್ಧೇನ ಮತಂ ವರಂ;

ಕ್ಯಾಹಂ ಜೀವಿತಹೇತೂಪಿ, ಕಾಹಾಮಿಂ ಪರಹೇಠನಂ’.

‘‘ಮಮೇವಾಯಂ ಮಞ್ಞಮಾನೋ, ಅಞ್ಞೇಪೇವಂ ಕರಿಸ್ಸತಿ;

ತೇವ ತಸ್ಸ ವಧಿಸ್ಸನ್ತಿ, ಸಾ ಮೇ ಮುತ್ತಿ ಭವಿಸ್ಸತಿ.

‘‘ಹೀನಮಜ್ಝಿಮಉಕ್ಕಟ್ಠೇ, ಸಹನ್ತೋ ಅವಮಾನಿತಂ;

ಏವಂ ಲಭತಿ ಸಪ್ಪಞ್ಞೋ, ಮನಸಾ ಯಥಾ ಪತ್ಥಿತ’’ನ್ತಿ.

‘‘ಪುನಾಪರಂ ಯದಾ ಹೋಮಿ, ಸುತತ್ತಕನಕಸನ್ನಿಭೋ;

ಮಿಗರಾಜಾ ರುರುನಾಮ, ಪರಮಸೀಲಸಮಾಹಿತೋ.

‘‘ರಮ್ಮೇ ಪದೇಸೇ ರಮಣೀಯೇ, ವಿವಿತ್ತೇ ಅಮನುಸ್ಸಕೇ;

ತತ್ಥ ವಾಸಂ ಉಪಗಞ್ಛಿಂ, ಗಙ್ಗಾಕೂಲೇ ಮನೋರಮೇ.

‘‘ಅಥ ¶ ಉಪರಿ ಗಙ್ಗಾಯ, ಧನಿಕೇಹಿ ಪರಿಪೀಳಿತೋ;

ಪುರಿಸೋ ಗಙ್ಗಾಯ ಪಪತಿ, ‘ಜೀವಾಮಿ ವಾ ಮರಾಮಿ ವಾ’.

‘‘ರತ್ತಿನ್ದಿವಂ ¶ ಸೋ ಗಙ್ಗಾಯ, ವುಯ್ಹಮಾನೋ ಮಹೋದಕೇ;

ರವನ್ತೋ ಕರುಣಂ ರವಂ, ಮಜ್ಝೇ ಗಙ್ಗಾಯ ಗಚ್ಛತಿ.

‘‘ತಸ್ಸಾಹಂ ಸದ್ದಂ ಸುತ್ವಾನ, ಕರುಣಂ ಪರಿದೇವತೋ;

ಗಙ್ಗಾಯ ತೀರೇ ಠತ್ವಾನ, ಅಪುಚ್ಛಿಂ ‘ಕೋಸಿ ತ್ವಂ ನರೋ’.

‘‘ಸೋ ಮೇ ಪುಟ್ಠೋ ಚ ಬ್ಯಾಕಾಸಿ, ಅತ್ತನೋ ಕರಣಂ ತದಾ;

‘ಧನಿಕೇಹಿ ಭೀತೋ ತಸಿತೋ, ಪಕ್ಖನ್ದೋಹಂ ಮಹಾನದಿಂ’.

‘‘ತಸ್ಸ ¶ ಕತ್ವಾನ ಕಾರುಞ್ಞಂ, ಚಜಿತ್ವಾ ಮಮ ಜೀವಿತಂ;

ಪವಿಸಿತ್ವಾ ನೀಹರಿಂ ತಸ್ಸ, ಅನ್ಧಕಾರಮ್ಹಿ ರತ್ತಿಯಾ.

‘‘ಅಸ್ಸತ್ಥಕಾಲಮಞ್ಞಾಯ, ತಸ್ಸಾಹಂ ಇದಮಬ್ರವಿಂ;

‘ಏಕಂ ತಂ ವರಂ ಯಾಚಾಮಿ, ಮಾ ಮಂ ಕಸ್ಸಚಿ ಪಾವದ’.

‘‘ನಗರಂ ¶ ಗನ್ತ್ವಾನ ಆಚಿಕ್ಖಿ, ಪುಚ್ಛಿತೋ ಧನಹೇತುಕೋ;

ರಾಜಾನಂ ಸೋ ಗಹೇತ್ವಾನ, ಉಪಗಞ್ಛಿ ಮಮನ್ತಿಕಂ.

‘‘ಯಾವತಾ ಕರಣಂ ಸಬ್ಬಂ, ರಞ್ಞೋ ಆರೋಚಿತಂ ಮಯಾ;

ರಾಜಾ ಸುತ್ವಾನ ವಚನಂ, ಉಸುಂ ತಸ್ಸ ಪಕಪ್ಪಯಿ;

‘ಇಧೇವ ಘಾತಯಿಸ್ಸಾಮಿ, ಮಿತ್ತದುಬ್ಭಿಂ [ಮಿತ್ತದೂಭಿಂ (ಸೀ.)] ಅನಾರಿಯಂ’.

‘‘ತಮಹಂ ಅನುರಕ್ಖನ್ತೋ, ನಿಮ್ಮಿನಿಂ ಮಮ ಅತ್ತನಾ;

‘ತಿಟ್ಠತೇಸೋ ಮಹಾರಾಜ, ಕಾಮಕಾರೋ ಭವಾಮಿ ತೇ’.

‘‘ಅನುರಕ್ಖಿಂ ಮಮ ಸೀಲಂ, ನಾರಕ್ಖಿಂ ಮಮ ಜೀವಿತಂ;

ಸೀಲವಾ ಹಿ ತದಾ ಆಸಿಂ, ಬೋಧಿಯಾಯೇವ ಕಾರಣಾ’’ತಿ.

‘‘ಪುನಾಪರಂ ¶ ಯದಾ ಹೋಮಿ, ಜಟಿಲೋ ಉಗ್ಗತಾಪನೋ;

ಮಾತಙ್ಗೋ ನಾಮ ನಾಮೇನ, ಸೀಲವಾ ಸುಸಮಾಹಿತೋ.

‘‘ಅಹಞ್ಚ ಬ್ರಾಹ್ಮಣೋ ಏಕೋ, ಗಙ್ಗಾಕೂಲೇ ವಸಾಮುಭೋ;

ಅಹಂ ವಸಾಮಿ ಉಪರಿ, ಹೇಟ್ಠಾ ವಸತಿ ಬ್ರಾಹ್ಮಣೋ.

‘‘ವಿಚರನ್ತೋ ಅನುಕೂಲಮ್ಹಿ, ಉದ್ಧಂ ಮೇ ಅಸ್ಸಮದ್ದಸ;

ತತ್ಥ ಮಂ ಪರಿಭಾಸೇತ್ವಾ, ಅಭಿಸಪಿ ಮುದ್ಧಫಾಲನಂ.

‘‘ಯದಿಹಂ ತಸ್ಸ ಪಕುಪ್ಪೇಯ್ಯಂ, ಯದಿ ಸೀಲಂ ನ ಗೋಪಯೇ;

ಓಲೋಕೇತ್ವಾನಹಂ ತಸ್ಸ, ಕರೇಯ್ಯಂ ಛಾರಿಕಂ ವಿಯ.

‘‘ಯಂ ¶ ಸೋ ತದಾ ಮಂ ಅಭಿಸಪಿ, ಕುಪಿತೋ ದುಟ್ಠಮಾನಸೋ;

ತಸ್ಸೇವ ಮತ್ಥಕೇ ನಿಪತಿ, ಯೋಗೇನ ತಂ ಪಮೋಚಯಿಂ.

‘‘ಅನುರಕ್ಖಿಂ ¶ ಮಮ ಸೀಲಂ, ನಾರಕ್ಖಿಂ ಮಮ ಜೀವಿತಂ;

ಸೀಲವಾ ಹಿ ತದಾ ಆಸಿಂ, ಬೋಧಿಯಾಯೇವ ಕಾರಣಾ’’ತಿ.

‘‘ಪುನಾಪರಂ ¶ ಯದಾ ಹೋಮಿ, ಮಹಾಪಕ್ಖೋ ಮಹಿದ್ಧಿಕೋ;

ಧಮ್ಮೋ ನಾಮ ಮಹಾಯಕ್ಖೋ, ಸಬ್ಬಲೋಕಾನುಕಮ್ಪಕೋ.

‘‘ದಸಕುಸಲಕಮ್ಮಪಥೇ ¶ , ಸಮಾದಪೇನ್ತೋ ಮಹಾಜನಂ;

ಚರಾಮಿ ಗಾಮನಿಗಮಂ, ಸಮಿತ್ತೋ ಸಪರಿಜ್ಜನೋ.

‘‘ಪಾಪೋ ಕದರಿಯೋ ಯಕ್ಖೋ, ದೀಪೇನ್ತೋ ದಸ ಪಾಪಕೇ;

ಸೋಪೇತ್ಥ ಮಹಿಯಾ ಚರತಿ, ಸಮಿತ್ತೋ ಸಪರಿಜ್ಜನೋ.

‘‘ಧಮ್ಮವಾದೀ ಅಧಮ್ಮೋ ಚ, ಉಭೋ ಪಚ್ಚನಿಕಾ ಮಯಂ;

ಧುರೇ ಧುರಂ ಘಟ್ಟಯನ್ತಾ, ಸಮಿಮ್ಹಾ ಪಟಿಪಥೇ ಉಭೋ.

‘‘ಕಲಹೋ ವತ್ತತೀ ಭೇಸ್ಮಾ, ಕಲ್ಯಾಣಪಾಪಕಸ್ಸ ಚ;

ಮಗ್ಗಾ ಓಕ್ಕಮನತ್ಥಾಯ, ಮಹಾಯುದ್ಧೋ ಉಪಟ್ಠಿತೋ.

‘‘ಯದಿಹಂ ತಸ್ಸ ಕುಪ್ಪೇಯ್ಯಂ, ಯದಿ ಭಿನ್ದೇ ತಪೋಗುಣಂ;

ಸಹಪರಿಜನಂ ತಸ್ಸ, ರಜಭೂತಂ ಕರೇಯ್ಯಹಂ.

‘‘ಅಪಿಚಾಹಂ ಸೀಲರಕ್ಖಾಯ, ನಿಬ್ಬಾಪೇತ್ವಾನ ಮಾನಸಂ;

ಸಹ ಜನೇನೋಕ್ಕಮಿತ್ವಾ, ಪಥಂ ಪಾಪಸ್ಸ ದಾಸಹಂ.

‘‘ಸಹ ಪಥತೋ ಓಕ್ಕನ್ತೇ, ಕತ್ವಾ ಚಿತ್ತಸ್ಸ ನಿಬ್ಬುತಿಂ;

ವಿವರಂ ಅದಾಸಿ ಪಥವೀ, ಪಾಪಯಕ್ಖಸ್ಸ ತಾವದೇ’’ತಿ.

‘‘ಪಞ್ಚಾಲರಟ್ಠೇ ¶ ¶ ನಗರವರೇ, ಕಪಿಲಾಯಂ [ಕಮ್ಪಿಲಾಯಂ (ಸೀ.), ಕಪ್ಪಿಲಾಯಂ (ಸ್ಯಾ.)] ಪುರುತ್ತಮೇ;

ರಾಜಾ ಜಯದ್ದಿಸೋ ನಾಮ, ಸೀಲಗುಣಮುಪಾಗತೋ.

‘‘ತಸ್ಸ ¶ ರಞ್ಞೋ ಅಹಂ ಪುತ್ತೋ, ಸುತಧಮ್ಮೋ ಸುಸೀಲವಾ;

ಅಲೀನಸತ್ತೋ ಗುಣವಾ, ಅನುರಕ್ಖಪರಿಜನೋ ಸದಾ.

‘‘ಪಿತಾ ಮೇ ಮಿಗವಂ ಗನ್ತ್ವಾ, ಪೋರಿಸಾದಂ ಉಪಾಗಮಿ;

ಸೋ ಮೇ ಪಿತುಮಗ್ಗಹೇಸಿ, ‘ಭಕ್ಖೋಸಿ ಮಮ ಮಾ ಚಲಿ’.

‘‘ತಸ್ಸ ¶ ತಂ ವಚನಂ ಸುತ್ವಾ, ಭೀತೋ ತಸಿತವೇಧಿತೋ;

ಊರುಕ್ಖಮ್ಭೋ ಅಹು ತಸ್ಸ, ದಿಸ್ವಾನ ಪೋರಿಸಾದಕಂ.

‘‘ಮಿಗವಂ ಗಹೇತ್ವಾ ಮುಞ್ಚಸ್ಸು, ಕತ್ವಾ ಆಗಮನಂ ಪುನ;

ಬ್ರಾಹ್ಮಣಸ್ಸ ಧನಂ ದತ್ವಾ, ಪಿತಾ ಆಮನ್ತಯೀ ಮಮಂ.

‘‘‘ರಜ್ಜಂ ಪುತ್ತ ಪಟಿಪಜ್ಜ, ಮಾ ಪಮಜ್ಜಿ ಪುರಂ ಇದಂ;

ಕತಂ ಮೇ ಪೋರಿಸಾದೇನ, ಮಮ ಆಗಮನಂ ಪುನ’.

‘‘ಮಾತಾಪಿತೂ ಚ ವನ್ದಿತ್ವಾ, ನಿಮ್ಮಿನಿತ್ವಾನ ಅತ್ತನಾ;

ನಿಕ್ಖಿಪಿತ್ವಾ ಧನುಂ ಖಗ್ಗಂ, ಪೋರಿಸಾದಂ ಉಪಾಗಮಿಂ.

‘‘ಸಸತ್ಥಹತ್ಥೂಪಗತಂ, ಕದಾಚಿ ಸೋ ತಸಿಸ್ಸತಿ;

ತೇನ ಭಿಜ್ಜಿಸ್ಸತಿ ಸೀಲಂ, ಪರಿತ್ತಾಸಂ [ಪರಿತಾಸಂ (ಸೀ.)] ಕತೇ ಮಯಿ.

‘‘ಸೀಲಖಣ್ಡಭಯಾ ಮಯ್ಹಂ, ತಸ್ಸ ದೇಸ್ಸಂ ನ ಬ್ಯಾಹರಿಂ;

ಮೇತ್ತಚಿತ್ತೋ ಹಿತವಾದೀ, ಇದಂ ವಚನಮಬ್ರವಿಂ.

‘‘‘ಉಜ್ಜಾಲೇಹಿ ಮಹಾಅಗ್ಗಿಂ, ಪಪತಿಸ್ಸಾಮಿ ರುಕ್ಖತೋ;

ತ್ವಂ ಪಕ್ಕಕಾಲಮಞ್ಞಾಯ [ಸುಪಕ್ಕಕಾಲಮಞ್ಞಾಯ (ಪೀ.)], ಭಕ್ಖಯ ಮಂ ಪಿತಾಮಹ’.

‘‘ಇತಿ ಸೀಲವತಂ ಹೇತು, ನಾರಕ್ಖಿಂ ಮಮ ಜೀವಿತಂ;

ಪಬ್ಬಾಜೇಸಿಂ ಚಹಂ ತಸ್ಸ, ಸದಾ ಪಾಣಾತಿಪಾತಿಕ’’ನ್ತಿ.

‘‘ಪುನಾಪರಂ ¶ ¶ ¶ ಯದಾ ಹೋಮಿ, ಸಙ್ಖಪಾಲೋ ಮಹಿದ್ಧಿಕೋ;

ದಾಠಾವುಧೋ ಘೋರವಿಸೋ, ದ್ವಿಜಿವ್ಹೋ ಉರಗಾಧಿಭೂ.

‘‘ಚತುಪ್ಪಥೇ ಮಹಾಮಗ್ಗೇ, ನಾನಾಜನಸಮಾಕುಲೇ;

ಚತುರೋ ಅಙ್ಗೇ ಅಧಿಟ್ಠಾಯ, ತತ್ಥ ವಾಸಮಕಪ್ಪಯಿಂ.

‘‘ಛವಿಯಾ ಚಮ್ಮೇನ ಮಂಸೇನ, ನಹಾರುಅಟ್ಠಿಕೇಹಿ ವಾ;

ಯಸ್ಸ ಏತೇನ ಕರಣೀಯಂ, ದಿನ್ನಂಯೇವ ಹರಾತು ಸೋ.

‘‘ಅದ್ದಸಂಸು ¶ ಭೋಜಪುತ್ತಾ, ಖರಾ ಲುದ್ದಾ ಅಕಾರುಣಾ;

ಉಪಗಞ್ಛುಂ ಮಮಂ ತತ್ಥ, ದಣ್ಡಮುಗ್ಗರಪಾಣಿನೋ.

‘‘ನಾಸಾಯ ವಿನಿವಿಜ್ಝಿತ್ವಾ, ನಙ್ಗುಟ್ಠೇ ಪಿಟ್ಠಿಕಣ್ಟಕೇ;

ಕಾಜೇ ಆರೋಪಯಿತ್ವಾನ, ಭೋಜಪುತ್ತಾ ಹರಿಂಸು ಮಂ.

‘‘ಸಸಾಗರನ್ತಂ ಪಥವಿಂ, ಸಕಾನನಂ ಸಪಬ್ಬತಂ;

ಇಚ್ಛಮಾನೋ ಚಹಂ ತತ್ಥ, ನಾಸಾವಾತೇನ ಝಾಪಯೇ.

‘‘ಸೂಲೇಹಿ ವಿನಿವಿಜ್ಝನ್ತೇ, ಕೋಟ್ಟಯನ್ತೇಪಿ ಸತ್ತಿಭಿ;

ಭೋಜಪುತ್ತೇ ನ ಕುಪ್ಪಾಮಿ, ಏಸಾ ಮೇ ಸೀಲಪಾರಮೀ’’ತಿ.

ಹತ್ಥಿನಾಗೋ ¶ ಭೂರಿದತ್ತೋ, ಚಮ್ಪೇಯ್ಯೋ ಬೋಧಿ ಮಹಿಂಸೋ;

ರುರು ಮಾತಙ್ಗೋ ಧಮ್ಮೋ ಚ, ಅತ್ರಜೋ ಚ ಜಯದ್ದಿಸೋ.

ಏತೇ ನವ ಸೀಲಬಲಾ, ಪರಿಕ್ಖಾರಾ ಪದೇಸಿಕಾ;

ಜೀವಿತಂ ಪರಿರಕ್ಖಿತ್ವಾ, ಸೀಲಾನಿ ಅನುರಕ್ಖಿಸಂ.

ಸಙ್ಖಪಾಲಸ್ಸ ಮೇ ಸತೋ, ಸಬ್ಬಕಾಲಮ್ಪಿ ಜೀವಿತಂ;

ಯಸ್ಸ ಕಸ್ಸಚಿ ನಿಯ್ಯತ್ತಂ, ತಸ್ಮಾ ಸಾ ಸೀಲಪಾರಮೀತಿ.

‘‘ಯದಾಹಂ ¶ ¶ ¶ ಅಮಿತಯಸೋ, ರಾಜಪುತ್ತೋ ಯುಧಞ್ಜಯೋ;

ಉಸ್ಸಾವಬಿನ್ದುಂ ಸೂರಿಯಾತಪೇ, ಪತಿತಂ ದಿಸ್ವಾನ ಸಂವಿಜಿಂ.

‘‘ತಞ್ಞೇವಾಧಿಪತಿಂ ಕತ್ವಾ, ಸಂವೇಗಮನುಬ್ರೂಹಯಿಂ;

ಮಾತಾಪಿತೂ ಚ ವನ್ದಿತ್ವಾ, ಪಬ್ಬಜ್ಜಮನುಯಾಚಹಂ.

‘‘ಯಾಚನ್ತಿ ಮಂ ಪಞ್ಜಲಿಕಾ, ಸನೇಗಮಾ ಸರಟ್ಠಕಾ;

‘ಅಜ್ಜೇವ ಪುತ್ತ ಪಟಿಪಜ್ಜ, ಇದ್ಧಂ ಫೀತಂ ಮಹಾಮಹಿಂ’.

‘‘ಸರಾಜಕೇ ಸಹೋರೋಧೇ, ಸನೇಗಮೇ ಸರಟ್ಠಕೇ;

ಕರುಣಂ ಪರಿದೇವನ್ತೇ, ಅನಪೇಕ್ಖೋವ ಪರಿಚ್ಚಜಿಂ.

‘‘ಕೇವಲಂ ಪಥವಿಂ ರಜ್ಜಂ, ಞಾತಿಪರಿಜನಂ ಯಸಂ;

ಚಜಮಾನೋ ನ ಚಿನ್ತೇಸಿಂ, ಬೋಧಿಯಾಯೇವ ಕಾರಣಾ.

‘‘ಮಾತಾಪಿತಾ ನ ಮೇ ದೇಸ್ಸಾ, ನಪಿ ಮೇ ದೇಸ್ಸಂ ಮಹಾಯಸಂ;

ಸಬ್ಬಞ್ಞುತಂ ಪಿಯಂ ಮಯ್ಹಂ, ತಸ್ಮಾ ರಜ್ಜಂ ಪರಿಚ್ಚಜಿ’’ನ್ತಿ.

‘‘ಪುನಾಪರಂ ¶ ಯದಾ ಹೋಮಿ, ಇನ್ದಪತ್ಥೇ ಪುರುತ್ತಮೇ;

ಕಾಮಿತೋ ದಯಿತೋ ಪುತ್ತೋ, ಸೋಮನಸ್ಸೋತಿ ವಿಸ್ಸುತೋ.

‘‘ಸೀಲವಾ ಗುಣಸಮ್ಪನ್ನೋ, ಕಲ್ಯಾಣಪಟಿಭಾನವಾ;

ವುಡ್ಢಾಪಚಾಯೀ ಹಿರೀಮಾ, ಸಙ್ಗಹೇಸು ಚ ಕೋವಿದೋ.

‘‘ತಸ್ಸ ¶ ರಞ್ಞೋ ಪತಿಕರೋ, ಅಹೋಸಿ ಕುಹಕತಾಪಸೋ;

ಆರಾಮಂ ಮಾಲಾವಚ್ಛಞ್ಚ, ರೋಪಯಿತ್ವಾನ ಜೀವತಿ.

‘‘ತಮಹಂ ¶ ದಿಸ್ವಾನ ಕುಹಕಂ, ಥುಸರಾಸಿಂವ ಅತಣ್ಡುಲಂ;

ದುಮಂವ ಅನ್ತೋ ಸುಸಿರಂ, ಕದಲಿಂವ ಅಸಾರಕಂ.

‘‘ನತ್ಥಿಮಸ್ಸ ¶ ಸತಂ ಧಮ್ಮೋ, ಸಾಮಞ್ಞಾಪಗತೋ ಅಯಂ;

ಹಿರೀಸುಕ್ಕಧಮ್ಮಜಹಿತೋ, ಜೀವಿತವುತ್ತಿಕಾರಣಾ.

‘‘ಕುಪಿತೋ ಅಹು [ಅಹೋಸಿ (ಸೀ.), ಆಸಿ (ಸ್ಯಾ.)] ಪಚ್ಚನ್ತೋ, ಅಟವೀಹಿ ಪರನ್ತಿಹಿ;

ತಂ ನಿಸೇಧೇತುಂ ಗಚ್ಛನ್ತೋ, ಅನುಸಾಸಿ ಪಿತಾ ಮಮಂ.

‘‘‘ಮಾ ಪಮಜ್ಜಿ ತುವಂ ತಾತ, ಜಟಿಲಂ ಉಗ್ಗತಾಪನಂ;

ಯದಿಚ್ಛಕಂ ಪವತ್ತೇಹಿ, ಸಬ್ಬಕಾಮದದೋ ಹಿ ಸೋ’.

‘‘ತಮಹಂ ಗನ್ತ್ವಾನುಪಟ್ಠಾನಂ, ಇದಂ ವಚನಮಬ್ರವಿಂ;

‘ಕಚ್ಚಿ ತೇ ಗಹಪತಿ ಕುಸಲಂ, ಕಿಂ ವಾ ತೇ ಆಹರೀಯತು’.

‘‘ತೇನ ಸೋ ಕುಪಿತೋ ಆಸಿ, ಕುಹಕೋ ಮಾನನಿಸ್ಸಿತೋ;

‘ಘಾತಾಪೇಮಿ ತುವಂ ಅಜ್ಜ, ರಟ್ಠಾ ಪಬ್ಬಾಜಯಾಮಿ ವಾ’.

‘‘ನಿಸೇಧಯಿತ್ವಾ ¶ ಪಚ್ಚನ್ತಂ, ರಾಜಾ ಕುಹಕಮಬ್ರವಿ;

‘ಕಚ್ಚಿ ತೇ ಭನ್ತೇ ಖಮನೀಯಂ, ಸಮ್ಮಾನೋ ತೇ ಪವತ್ತಿತೋ’.

‘‘ತಸ್ಸ ಆಚಿಕ್ಖತೀ ಪಾಪೋ, ಕುಮಾರೋ ಯಥಾ ನಾಸಿಯೋ;

ತಸ್ಸ ತಂ ವಚನಂ ಸುತ್ವಾ, ಆಣಾಪೇಸಿ ಮಹೀಪತಿ.

‘‘‘ಸೀಸಂ ತತ್ಥೇವ ಛಿನ್ದಿತ್ವಾ, ಕತ್ವಾನ ಚತುಖಣ್ಡಿಕಂ;

ರಥಿಯಾ ರಥಿಯಂ ದಸ್ಸೇಥ, ಸಾ ಗತಿ ಜಟಿಲಹೀಳಿತಾ’.

‘‘ತತ್ಥ ಕಾರಣಿಕಾ ಗನ್ತ್ವಾ, ಚಣ್ಡಾ ಲುದ್ದಾ ಅಕಾರುಣಾ;

ಮಾತುಅಙ್ಕೇ ನಿಸಿನ್ನಸ್ಸ, ಆಕಡ್ಢಿತ್ವಾ ನಯನ್ತಿ ಮಂ.

‘‘ತೇಸಾಹಂ ಏವಮವಚಂ, ಬನ್ಧತಂ ಗಾಳ್ಹಬನ್ಧನಂ;

‘ರಞ್ಞೋ ದಸ್ಸೇಥ ಮಂ ಖಿಪ್ಪಂ, ರಾಜಕಿರಿಯಾನಿ ಅತ್ಥಿ ಮೇ’.

‘‘ತೇ ಮಂ ರಞ್ಞೋ ದಸ್ಸಯಿಂಸು, ಪಾಪಸ್ಸ ಪಾಪಸೇವಿನೋ;

ದಿಸ್ವಾನ ತಂ ಸಞ್ಞಾಪೇಸಿಂ, ಮಮಞ್ಚ ವಸಮಾನಯಿಂ.

‘‘ಸೋ ಮಂ ತತ್ಥ ಖಮಾಪೇಸಿ, ಮಹಾರಜ್ಜಮದಾಸಿ ಮೇ;

ಸೋಹಂ ತಮಂ ದಾಲಯಿತ್ವಾ, ಪಬ್ಬಜಿಂ ಅನಗಾರಿಯಂ.

‘‘ನ ¶ ಮೇ ದೇಸ್ಸಂ ಮಹಾರಜ್ಜಂ, ಕಾಮಭೋಗೋ ನ ದೇಸ್ಸಿಯೋ;

ಸಬ್ಬಞ್ಞುತಂ ಪಿಯಂ ಮಯ್ಹಂ, ತಸ್ಮಾ ರಜ್ಜಂ ಪರಿಚ್ಚಜಿ’’ನ್ತಿ.

‘‘ಪುನಾಪರಂ ¶ ¶ ¶ ಯದಾ ಹೋಮಿ, ಕಾಸಿರಾಜಸ್ಸ ಅತ್ರಜೋ;

ಅಯೋಘರಮ್ಹಿ ಸಂವಡ್ಢೋ, ನಾಮೇನಾಸಿ ಅಯೋಘರೋ.

‘‘ದುಕ್ಖೇನ ಜೀವಿತೋ ಲದ್ಧೋ, ಸಂಪೀಳೇ ಪತಿಪೋಸಿತೋ;

ಅಜ್ಜೇವ ಪುತ್ತ ಪಟಿಪಜ್ಜ, ಕೇವಲಂ ವಸುಧಂ ಇಮಂ.

‘‘ಸರಟ್ಠಕಂ ಸನಿಗಮಂ, ಸಜನಂ ವನ್ದಿತ್ವ ಖತ್ತಿಯಂ;

ಅಞ್ಜಲಿಂ ಪಗ್ಗಹೇತ್ವಾನ, ಇದಂ ವಚನಮಬ್ರವಿಂ.

‘‘‘ಯೇ ಕೇಚಿ ಮಹಿಯಾ ಸತ್ತಾ, ಹೀನಮುಕ್ಕಟ್ಠಮಜ್ಝಿಮಾ;

ನಿರಾರಕ್ಖಾ ಸಕೇ ಗೇಹೇ, ವಡ್ಢನ್ತಿ ಸಕಞಾತಿಭಿ.

‘‘‘ಇದಂ ಲೋಕೇ ಉತ್ತರಿಯಂ, ಸಂಪೀಳೇ ಮಮ ಪೋಸನಂ;

ಅಯೋಘರಮ್ಹಿ ಸಂವಡ್ಢೋ, ಅಪ್ಪಭೇ ಚನ್ದಸೂರಿಯೇ.

‘‘‘ಪೂತಿಕುಣಪಸಮ್ಪುಣ್ಣಾ, ಮುಚ್ಚಿತ್ವಾ ಮಾತು ಕುಚ್ಛಿತೋ;

ತತೋ ಘೋರತರೇ ದುಕ್ಖೇ, ಪುನ ಪಕ್ಖಿತ್ತಯೋಘರೇ.

‘‘‘ಯದಿಹಂ ತಾದಿಸಂ ಪತ್ವಾ, ದುಕ್ಖಂ ಪರಮದಾರುಣಂ;

ರಜ್ಜೇಸು ಯದಿ ರಜ್ಜಾಮಿ [ರಞ್ಜಾಮಿ (ಸೀ.)], ಪಾಪಾನಂ ಉತ್ತಮೋ ಸಿಯಂ.

‘‘‘ಉಕ್ಕಣ್ಠಿತೋಮ್ಹಿ ಕಾಯೇನ, ರಜ್ಜೇನಮ್ಹಿ ಅನತ್ಥಿಕೋ;

ನಿಬ್ಬುತಿಂ ಪರಿಯೇಸಿಸ್ಸಂ, ಯತ್ಥ ಮಂ ಮಚ್ಚು ನ ಮದ್ದಿಯೇ’.

‘‘ಏವಾಹಂ ಚಿನ್ತಯಿತ್ವಾನ, ವಿರವನ್ತೇ ಮಹಾಜನೇ;

ನಾಗೋವ ಬನ್ಧನಂ ಛೇತ್ವಾ, ಪಾವಿಸಿಂ ಕಾನನಂ ವನಂ.

‘‘ಮಾತಾಪಿತಾ ¶ ¶ ನ ಮೇ ದೇಸ್ಸಾ, ನಪಿ ಮೇ ದೇಸ್ಸಂ ಮಹಾಯಸಂ;

ಸಬ್ಬಞ್ಞುತಂ ಪಿಯಂ ಮಯ್ಹಂ, ತಸ್ಮಾ ರಜ್ಜಂ ಪರಿಚ್ಚಜಿ’’ನ್ತಿ.

‘‘ಪುನಾಪರಂ ಯದಾ ಹೋಮಿ, ಕಾಸೀನಂ ಪುರವರುತ್ತಮೇ;

ಭಗಿನೀ ಚ ಭಾತರೋ ಸತ್ತ, ನಿಬ್ಬತ್ತಾ ಸೋತ್ಥಿಯೇ ಕುಲೇ.

‘‘ಏತೇಸಂ ¶ ಪುಬ್ಬಜೋ ಆಸಿಂ, ಹಿರೀಸುಕ್ಕಮುಪಾಗತೋ;

ಭವಂ ದಿಸ್ವಾನ ಭಯತೋ, ನೇಕ್ಖಮ್ಮಾಭಿರತೋ ಅಹಂ.

‘‘ಮಾತಾಪಿತೂಹಿ ¶ ಪಹಿತಾ, ಸಹಾಯಾ ಏಕಮಾನಸಾ;

ಕಾಮೇಹಿ ಮಂ ನಿಮನ್ತೇನ್ತಿ, ‘ಕುಲವಂಸಂ ಧರೇಹಿ’ತಿ.

‘‘ಯಂ ತೇಸಂ ವಚನಂ ವುತ್ತಂ, ಗಿಹೀಧಮ್ಮೇ ಸುಖಾವಹಂ;

ತಂ ಮೇ ಅಹೋಸಿ ಕಠಿನಂ, ತತ್ತ [ಸನ್ತತ್ತ (ಕ.)] ಫಾಲಸಮಂ ವಿಯ.

‘‘ತೇ ಮಂ ತದಾ ಉಕ್ಖಿಪನ್ತಂ, ಪುಚ್ಛಿಂಸು ಪತ್ಥಿತಂ ಮಮ;

‘ಕಿಂ ತ್ವಂ ಪತ್ಥಯಸೇ ಸಮ್ಮ, ಯದಿ ಕಾಮೇ ನ ಭುಞ್ಜಸಿ’.

‘‘ತೇಸಾಹಂ ಏವಮವಚಂ, ಅತ್ಥಕಾಮೋ ಹಿತೇಸಿನಂ;

‘ನಾಹಂ ಪತ್ಥೇಮಿ ಗಿಹೀಭಾವಂ, ನೇಕ್ಖಮ್ಮಾಭಿರತೋ ಅಹಂ’.

‘‘ತೇ ಮಯ್ಹಂ ವಚನಂ ಸುತ್ವಾ, ಪಿತುಮಾತು ಚ ಸಾವಯುಂ;

ಮಾತಾಪಿತಾ ಏವಮಾಹು, ‘ಸಬ್ಬೇವ ಪಬ್ಬಜಾಮ ಭೋ’.

‘‘ಉಭೋ ¶ ಮಾತಾಪಿತಾ ಮಯ್ಹಂ, ಭಗಿನೀ ಚ ಸತ್ತ ಭಾತರೋ;

ಅಮಿತಧನಂ ಛಡ್ಡಯಿತ್ವಾ, ಪಾವಿಸಿಮ್ಹಾ ಮಹಾವನ’’ನ್ತಿ.

‘‘ಪುನಾಪರಂ ¶ ಯದಾ ಹೋಮಿ, ನಗರೇ ಬ್ರಹ್ಮವಡ್ಢನೇ;

ತತ್ಥ ಕುಲವರೇ ಸೇಟ್ಠೇ, ಮಹಾಸಾಲೇ ಅಜಾಯಹಂ.

‘‘ತದಾಪಿ ಲೋಕಂ ದಿಸ್ವಾನ, ಅನ್ಧೀಭೂತಂ ತಮೋತ್ಥಟಂ;

ಚಿತ್ತಂ ಭವತೋ ಪತಿಕುಟತಿ, ತುತ್ತವೇಗಹತಂ ವಿಯ.

‘‘ದಿಸ್ವಾನ ವಿವಿಧಂ ಪಾಪಂ, ಏವಂ ಚಿನ್ತೇಸಹಂ ತದಾ;

‘ಕದಾಹಂ ಗೇಹಾ ನಿಕ್ಖಮ್ಮ, ಪವಿಸಿಸ್ಸಾಮಿ ಕಾನನಂ’.

‘‘ತದಾಪಿ ಮಂ ನಿಮನ್ತೇಸುಂ, ಕಾಮಭೋಗೇಹಿ ಞಾತಯೋ;

ತೇಸಮ್ಪಿ ಛನ್ದಮಾಚಿಕ್ಖಿಂ, ‘ಮಾ ನಿಮನ್ತೇಥ ತೇಹಿ ಮಂ’.

‘‘ಯೋ ¶ ಮೇ ಕನಿಟ್ಠಕೋ ಭಾತಾ, ನನ್ದೋ ನಾಮಾಸಿ ಪಣ್ಡಿತೋ;

ಸೋಪಿ ಮಂ ಅನುಸಿಕ್ಖನ್ತೋ, ಪಬ್ಬಜ್ಜಂ ಸಮರೋಚಯಿ.

‘‘ಅಹಂ ಸೋಣೋ ಚ ನನ್ದೋ ಚ, ಉಭೋ ಮಾತಾಪಿತಾ ಮಮ;

ತದಾಪಿ ಭೋಗೇ ಛಡ್ಡೇತ್ವಾ, ಪಾವಿಸಿಮ್ಹಾ ಮಹಾವನ’’ನ್ತಿ.

‘‘ಪುನಾಪರಂ ¶ ¶ ಯದಾ ಹೋಮಿ, ಕಾಸಿರಾಜಸ್ಸ ಅತ್ರಜೋ;

ಮೂಗಪಕ್ಖೋತಿ ನಾಮೇನ, ತೇಮಿಯೋತಿ ವದನ್ತಿ ಮಂ.

‘‘ಸೋಳಸಿತ್ಥಿಸಹಸ್ಸಾನಂ, ನ ವಿಜ್ಜತಿ ಪುಮೋ ತದಾ [ಸದಾ (ಸೀ.)];

ಅಹೋರತ್ತಾನಂ ಅಚ್ಚಯೇನ, ನಿಬ್ಬತ್ತೋ ಅಹಮೇಕಕೋ.

‘‘ಕಿಚ್ಛಾ ಲದ್ಧಂ ಪಿಯಂ ಪುತ್ತಂ, ಅಭಿಜಾತಂ ಜುತಿನ್ಧರಂ;

ಸೇತಚ್ಛತ್ತಂ ಧಾರಯಿತ್ವಾನ, ಸಯನೇ ಪೋಸೇತಿ ಮಂ ಪಿತಾ.

‘‘ನಿದ್ದಾಯಮಾನೋ ಸಯನವರೇ, ಪಬುಜ್ಝಿತ್ವಾನಹಂ ತದಾ;

ಅದ್ದಸಂ ಪಣ್ಡರಂ ಛತ್ತಂ, ಯೇನಾಹಂ ನಿರಯಂ ಗತೋ.

‘‘ಸಹ ¶ ದಿಟ್ಠಸ್ಸ ಮೇ ಛತ್ತಂ, ತಾಸೋ ಉಪ್ಪಜ್ಜಿ ಭೇರವೋ;

ವಿನಿಚ್ಛಯಂ ಸಮಾಪನ್ನೋ, ‘ಕಥಾಹಂ ಇಮಂ ಮುಞ್ಚಿಸ್ಸಂ’.

‘‘ಪುಬ್ಬಸಾಲೋಹಿತಾ ಮಯ್ಹಂ, ದೇವತಾ ಅತ್ಥಕಾಮಿನೀ;

ಸಾ ಮಂ ದಿಸ್ವಾನ ದುಕ್ಖಿತಂ, ತೀಸು ಠಾನೇಸು ಯೋಜಯಿ.

‘‘‘ಮಾ ಪಣ್ಡಿಚ್ಚಯಂ ವಿಭಾವಯ, ಬಾಲಮತೋ ಭವ ಸಬ್ಬಪಾಣಿನಂ;

ಸಬ್ಬೋ ತಂ ಜನೋ ಓಚಿನಾಯತು, ಏವಂ ತವ ಅತ್ಥೋ ಭವಿಸ್ಸತಿ’.

‘‘ಏವಂ ವುತ್ತಾಯಹಂ ತಸ್ಸಾ, ಇದಂ ವಚನಮಬ್ರವಿಂ;

‘ಕರೋಮಿ ತೇ ತಂ ವಚನಂ, ಯಂ ತ್ವಂ ಭಣಸಿ ದೇವತೇ;

ಅತ್ಥಕಾಮಾಸಿ ಮೇ ಅಮ್ಮ, ಹಿತಕಾಮಾಸಿ ದೇವತೇ’.

‘‘ತಸ್ಸಾಹಂ ವಚನಂ ಸುತ್ವಾ, ಸಾಗರೇವ ಥಲಂ ಲಭಿಂ;

ಹಟ್ಠೋ ¶ ಸಂವಿಗ್ಗಮಾನಸೋ, ತಯೋ ಅಙ್ಗೇ ಅಧಿಟ್ಠಹಿಂ.

‘‘ಮೂಗೋ ¶ ಅಹೋಸಿಂ ಬಧಿರೋ, ಪಕ್ಖೋ ಗತಿವಿವಜ್ಜಿತೋ;

ಏತೇ ಅಙ್ಗೇ ಅಧಿಟ್ಠಾಯ, ವಸ್ಸಾನಿ ಸೋಳಸಂ ವಸಿಂ.

‘‘ತತೋ ಮೇ ಹತ್ಥಪಾದೇ ಚ, ಜಿವ್ಹಂ ಸೋತಞ್ಚ ಮದ್ದಿಯ;

ಅನೂನತಂ ಮೇ ಪಸ್ಸಿತ್ವಾ, ‘ಕಾಳಕಣ್ಣೀ’ತಿ ನಿನ್ದಿಸುಂ.

‘‘ತತೋ ಜಾನಪದಾ ಸಬ್ಬೇ, ಸೇನಾಪತಿಪುರೋಹಿತಾ;

ಸಬ್ಬೇ ಏಕಮನಾ ಹುತ್ವಾ, ಛಡ್ಡನಂ ಅನುಮೋದಿಸುಂ.

‘‘ಸೋಹಂ ತೇಸಂ ಮತಿಂ ಸುತ್ವಾ, ಹಟ್ಠೋ ಸಂವಿಗ್ಗಮಾನಸೋ;

ಯಸ್ಸತ್ಥಾಯ ತಪೋಚಿಣ್ಣೋ, ಸೋ ಮೇ ಅತ್ಥೋ ಸಮಿಜ್ಝಥ.

‘‘ನ್ಹಾಪೇತ್ವಾ ಅನುಲಿಮ್ಪಿತ್ವಾ, ವೇಠೇತ್ವಾ ರಾಜವೇಠನಂ;

ಛತ್ತೇನ ಅಭಿಸಿಞ್ಚಿತ್ವಾ, ಕಾರೇಸುಂ ಪುರಂ ಪದಕ್ಖಿಣಂ.

‘‘ಸತ್ತಾಹಂ ಧಾರಯಿತ್ವಾನ, ಉಗ್ಗತೇ ರವಿಮಣ್ಡಲೇ;

ರಥೇನ ಮಂ ನೀಹರಿತ್ವಾ, ಸಾರಥೀ ವನಮುಪಾಗಮಿ.

‘‘ಏಕೋಕಾಸೇ ¶ ರಥಂ ಕತ್ವಾ, ಸಜ್ಜಸ್ಸಂ ಹತ್ಥಮುಚ್ಚಿತೋ [ಹತ್ಥಮುಞ್ಚಿತೋ (ಸೀ. ಸ್ಯಾ.)];

ಸಾರಥೀ ಖಣತೀ ಕಾಸುಂ, ನಿಖಾತುಂ ಪಥವಿಯಾ ಮಮಂ.

‘‘ಅಧಿಟ್ಠಿತಮಧಿಟ್ಠಾನಂ, ತಜ್ಜೇನ್ತೋ ವಿವಿಧಕಾರಣಾ;

ನ ಭಿನ್ದಿಂ ತಮಧಿಟ್ಠಾನಂ, ಬೋಧಿಯಾಯೇವ ಕಾರಣಾ.

‘‘ಮಾತಾಪಿತಾ ನ ಮೇ ದೇಸ್ಸಾ, ಅತ್ತಾ ಮೇ ನ ಚ ದೇಸ್ಸಿಯೋ;

ಸಬ್ಬಞ್ಞುತಂ ಪಿಯಂ ಮಯ್ಹಂ, ತಸ್ಮಾ ವತಮಧಿಟ್ಠಹಿಂ.

‘‘ಏತೇ ¶ ¶ ಅಙ್ಗೇ ಅಧಿಟ್ಠಾಯ, ವಸ್ಸಾನಿ ಸೋಳಸಂ ವಸಿಂ;

ಅಧಿಟ್ಠಾನೇನ ಮೇ ಸಮೋ ನತ್ಥಿ, ಏಸಾ ಮೇ ಅಧಿಟ್ಠಾನಪಾರಮೀ’’ತಿ.

‘‘ಯದಾ ಅಹಂ ಕಪಿ ಆಸಿಂ, ನದೀಕೂಲೇ ದರೀಸಯೇ;

ಪೀಳಿತೋ ಸುಸುಮಾರೇನ, ಗಮನಂ ನ ಲಭಾಮಹಂ.

‘‘ಯಮ್ಹೋಕಾಸೇ ¶ ಅಹಂ ಠತ್ವಾ, ಓರಾ ಪಾರಂ ಪತಾಮಹಂ;

ತತ್ಥಚ್ಛಿ ಸತ್ತು ವಧಕೋ, ಕುಮ್ಭೀಲೋ ಲುದ್ದದಸ್ಸನೋ.

‘‘ಸೋ ಮಂ ಅಸಂಸಿ ‘ಏಹೀ’ತಿ, ‘ಅಹಂಪೇಮೀ’ತಿ ತಂ ವತಿಂ;

ತಸ್ಸ ಮತ್ಥಕಮಕ್ಕಮ್ಮ, ಪರಕೂಲೇ ಪತಿಟ್ಠಹಿಂ.

‘‘ನ ತಸ್ಸ ಅಲಿಕಂ ಭಣಿತಂ, ಯಥಾ ವಾಚಂ ಅಕಾಸಹಂ;

ಸಚ್ಚೇನ ಮೇ ಸಮೋ ನತ್ಥಿ, ಏಸಾ ಮೇ ಸಚ್ಚಪಾರಮೀ’’ತಿ.

‘‘ಪುನಾಪರಂ ಯದಾ ಹೋಮಿ, ತಾಪಸೋ ಸಚ್ಚಸವ್ಹಯೋ;

ಸಚ್ಚೇನ ಲೋಕಂ ಪಾಲೇಸಿಂ, ಸಮಗ್ಗಂ ಜನಮಕಾಸಹ’’ನ್ತಿ.

‘‘ಪುನಾಪರಂ ¶ ¶ ¶ ಯದಾ ಹೋಮಿ, ಮಗಧೇ ವಟ್ಟಪೋತಕೋ;

ಅಜಾತಪಕ್ಖೋ ತರುಣೋ, ಮಂಸಪೇಸಿ ಕುಲಾವಕೇ.

‘‘ಮುಖತುಣ್ಡಕೇನಾಹರಿತ್ವಾ [ಮುಖತುಣ್ಡೇನಾಹರಿತ್ವಾ (ಸೀ.)], ಮಾತಾ ಪೋಸಯತೀ ಮಮಂ;

ತಸ್ಸಾ ಫಸ್ಸೇನ ಜೀವಾಮಿ, ನತ್ಥಿ ಮೇ ಕಾಯಿಕಂ ಬಲಂ.

‘‘ಸಂವಚ್ಛರೇ ಗಿಮ್ಹಸಮಯೇ, ದವಡಾಹೋ [ವನದಾಹೋ (ಕ.)] ಪದಿಪ್ಪತಿ;

ಉಪಗಚ್ಛತಿ ಅಮ್ಹಾಕಂ, ಪಾವಕೋ ಕಣ್ಹವತ್ತನೀ.

‘‘ಧಮಧಮಾ ಇತಿಏವಂ, ಸದ್ದಾಯನ್ತೋ ಮಹಾಸಿಖೀ;

ಅನುಪುಬ್ಬೇನ ಝಾಪೇನ್ತೋ, ಅಗ್ಗಿ ಮಮಮುಪಾಗಮಿ.

‘‘ಅಗ್ಗಿವೇಗಭಯಾತೀತಾ, ತಸಿತಾ ಮಾತಾಪಿತಾ ಮಮ;

ಕುಲಾವಕೇ ಮಂ ಛಡ್ಡೇತ್ವಾ, ಅತ್ತಾನಂ ಪರಿಮೋಚಯುಂ.

‘‘ಪಾದೇ ¶ ಪಕ್ಖೇ ಪಜಹಾಮಿ, ನತ್ಥಿ ಮೇ ಕಾಯಿಕಂ ಬಲಂ;

ಸೋಹಂ ಅಗತಿಕೋ ತತ್ಥ, ಏವಂ ಚಿನ್ತೇಸಹಂ ತದಾ.

‘‘‘ಯೇಸಾಹಂ ಉಪಧಾವೇಯ್ಯಂ, ಭೀತೋ ತಸಿತವೇಧಿತೋ;

ತೇ ಮಂ ಓಹಾಯ ಪಕ್ಕನ್ತಾ, ಕಥಂ ಮೇ ಅಜ್ಜ ಕಾತವೇ.

‘‘‘ಅತ್ಥಿ ಲೋಕೇ ಸೀಲಗುಣೋ, ಸಚ್ಚಂ ಸೋಚೇಯ್ಯನುದ್ದಯಾ;

ತೇನ ಸಚ್ಚೇನ ಕಾಹಾಮಿ, ಸಚ್ಚಕಿರಿಯಮುತ್ತಮಂ.

‘‘‘ಆವೇಜ್ಜೇತ್ವಾ ಧಮ್ಮಬಲಂ, ಸರಿತ್ವಾ ಪುಬ್ಬಕೇ ಜಿನೇ;

ಸಚ್ಚಬಲಮವಸ್ಸಾಯ, ಸಚ್ಚಕಿರಿಯಮಕಾಸಹಂ.

‘‘‘ಸನ್ತಿ ¶ ಪಕ್ಖಾ ಅಪತನಾ, ಸನ್ತಿ ಪಾದಾ ಅವಞ್ಚನಾ;

ಮಾತಾಪಿತಾ ಚ ನಿಕ್ಖನ್ತಾ, ಜಾತವೇದ ಪಟಿಕ್ಕಮ’.

‘‘ಸಹಸಚ್ಚೇ ಕತೇ ಮಯ್ಹಂ, ಮಹಾಪಜ್ಜಲಿತೋ ಸಿಖೀ;

ವಜ್ಜೇಸಿ ಸೋಳಸಕರೀಸಾನಿ, ಉದಕಂ ಪತ್ವಾ ಯಥಾ ಸಿಖೀ;

ಸಚ್ಚೇನ ಮೇ ಸಮೋ ನತ್ಥಿ, ಏಸಾ ಮೇ ಸಚ್ಚಪಾರಮೀ’’ತಿ.

‘‘ಪುನಾಪರಂ ¶ ¶ ಯದಾ ಹೋಮಿ, ಮಚ್ಛರಾಜಾ ಮಹಾಸರೇ;

ಉಣ್ಹೇ ಸೂರಿಯಸನ್ತಾಪೇ, ಸರೇ ಉದಕ ಖೀಯಥ.

‘‘ತತೋ ಕಾಕಾ ಚ ಗಿಜ್ಝಾ ಚ, ಕಙ್ಕಾ [ಬಕಾ (ಸೀ.)] ಕುಲಲಸೇನಕಾ;

ಭಕ್ಖಯನ್ತಿ ದಿವಾರತ್ತಿಂ, ಮಚ್ಛೇ ಉಪನಿಸೀದಿಯ.

‘‘ಏವಂ ಚಿನ್ತೇಸಹಂ ತತ್ಥ, ಸಹ ಞಾತೀಹಿ ಪೀಳಿತೋ;

‘ಕೇನ ನು ಖೋ ಉಪಾಯೇನ, ಞಾತೀ ದುಕ್ಖಾ ಪಮೋಚಯೇ’.

‘‘ವಿಚಿನ್ತಯಿತ್ವಾ ಧಮ್ಮತ್ಥಂ, ಸಚ್ಚಂ ಅದ್ದಸ ಪಸ್ಸಯಂ;

ಸಚ್ಚೇ ಠತ್ವಾ ಪಮೋಚೇಸಿಂ, ಞಾತೀನಂ ತಂ ಅತಿಕ್ಖಯಂ.

‘‘ಅನುಸ್ಸರಿತ್ವಾ ಸತಂ ಧಮ್ಮಂ, ಪರಮತ್ಥಂ ವಿಚಿನ್ತಯಂ;

ಅಕಾಸಿ ಸಚ್ಚಕಿರಿಯಂ, ಯಂ ಲೋಕೇ ಧುವಸಸ್ಸತಂ.

‘‘‘ಯತೋ ¶ ಸರಾಮಿ ಅತ್ತಾನಂ, ಯತೋ ಪತ್ತೋಸ್ಮಿ ವಿಞ್ಞುತಂ;

ನಾಭಿಜಾನಾಮಿ ಸಞ್ಚಿಚ್ಚ, ಏಕಪಾಣಮ್ಪಿ ಹಿಂಸಿತಂ.

‘‘‘ಏತೇನ ¶ ಸಚ್ಚವಜ್ಜೇನ, ಪಜ್ಜುನ್ನೋ ಅಭಿವಸ್ಸತು;

ಅಭಿತ್ಥನಯ ಪಜ್ಜುನ್ನ, ನಿಧಿಂ ಕಾಕಸ್ಸ ನಾಸಯ;

ಕಾಕಂ ಸೋಕಾಯ ರನ್ಧೇಹಿ, ಮಚ್ಛೇ ಸೋಕಾ ಪಮೋಚಯ’.

‘‘ಸಹಕತೇ ಸಚ್ಚವರೇ, ಪಜ್ಜುನ್ನೋ ಅಭಿಗಜ್ಜಿಯ;

ಥಲಂ ನಿನ್ನಞ್ಚ ಪೂರೇನ್ತೋ, ಖಣೇನ ಅಭಿವಸ್ಸಥ.

‘‘ಏವರೂಪಂ ಸಚ್ಚವರಂ, ಕತ್ವಾ ವೀರಿಯಮುತ್ತಮಂ;

ವಸ್ಸಾಪೇಸಿಂ ಮಹಾಮೇಘಂ, ಸಚ್ಚತೇಜಬಲಸ್ಸಿತೋ;

ಸಚ್ಚೇನ ಮೇ ಸಮೋ ನತ್ಥಿ, ಏಸಾ ಮೇ ಸಚ್ಚಪಾರಮೀ’’ತಿ.

‘‘ಪುನಾಪರಂ ¶ ಯದಾ ಹೋಮಿ, ಕಣ್ಹದೀಪಾಯನೋ ಇಸಿ;

ಪರೋಪಞ್ಞಾಸವಸ್ಸಾನಿ, ಅನಭಿರತೋಚರಿಂ ಅಹಂ.

‘‘ನ ಕೋಚಿ ಏತಂ ಜಾನಾತಿ, ಅನಭಿರತಿಮನಂ ಮಮ;

ಅಹಞ್ಹಿ ಕಸ್ಸಚಿ ನಾಚಿಕ್ಖಿಂ, ಅರತಿ ಮೇ ಚರತಿ ಮಾನಸೇ.

‘‘ಸಬ್ರಹ್ಮಚಾರೀ ¶ ಮಣ್ಡಬ್ಯೋ, ಸಹಾಯೋ ಮೇ ಮಹಾಇಸಿ;

ಪುಬ್ಬಕಮ್ಮಸಮಾಯುತ್ತೋ, ಸೂಲಮಾರೋಪನಂ ಲಭಿ.

‘‘ತಮಹಂ ಉಪಟ್ಠಹಿತ್ವಾನ, ಆರೋಗ್ಯಮನುಪಾಪಯಿಂ;

ಆಪುಚ್ಛಿತ್ವಾನ ಆಗಞ್ಛಿಂ, ಯಂ ಮಯ್ಹಂ ಸಕಮಸ್ಸಮಂ.

‘‘ಸಹಾಯೋ ¶ ಬ್ರಾಹ್ಮಣೋ ಮಯ್ಹಂ, ಭರಿಯಂ ಆದಾಯ ಪುತ್ತಕಂ;

ತಯೋ ಜನಾ ಸಮಾಗನ್ತ್ವಾ, ಆಗಞ್ಛುಂ ಪಾಹುನಾಗತಂ.

‘‘ಸಮ್ಮೋದಮಾನೋ ತೇಹಿ ಸಹ, ನಿಸಿನ್ನೋ ಸಕಮಸ್ಸಮೇ;

ದಾರಕೋ ವಟ್ಟಮನುಕ್ಖಿಪಂ, ಆಸೀವಿಸಮಕೋಪಯಿ.

‘‘ತತೋ ಸೋ ವಟ್ಟಗತಂ ಮಗ್ಗಂ, ಅನ್ವೇಸನ್ತೋ ಕುಮಾರಕೋ;

ಆಸೀವಿಸಸ್ಸ ಹತ್ಥೇನ, ಉತ್ತಮಙ್ಗಂ ಪರಾಮಸಿ.

‘‘ತಸ್ಸ ¶ ಆಮಸನೇ ಕುದ್ಧೋ, ಸಪ್ಪೋ ವಿಸಬಲಸ್ಸಿತೋ;

ಕುಪಿತೋ ಪರಮಕೋಪೇನ, ಅಡಂಸಿ ದಾರಕಂ ಖಣೇ.

‘‘ಸಹದಟ್ಠೋ ಆಸೀವಿಸೇನ [ಅತಿವಿಸೇನ (ಪೀ. ಕ.)], ದಾರಕೋ ಪಪತಿ [ಪತತಿ (ಕ.)] ಭೂಮಿಯಂ;

ತೇನಾಹಂ ದುಕ್ಖಿತೋ ಆಸಿಂ, ಮಮ ವಾಹಸಿ ತಂ ದುಕ್ಖಂ.

‘‘ತ್ಯಾಹಂ ಅಸ್ಸಾಸಯಿತ್ವಾನ, ದುಕ್ಖಿತೇ ಸೋಕಸಲ್ಲಿತೇ;

ಪಠಮಂ ಅಕಾಸಿಂ ಕಿರಿಯಂ, ಅಗ್ಗಂ ಸಚ್ಚಂ ವರುತ್ತಮಂ.

‘‘‘ಸತ್ತಾಹಮೇವಾಹಂ ಪಸನ್ನಚಿತ್ತೋ, ಪುಞ್ಞತ್ಥಿಕೋ ಅಚರಿಂ ಬ್ರಹ್ಮಚರಿಯಂ;

ಅಥಾಪರಂ ಯಂ ಚರಿತಂ ಮಮೇದಂ, ವಸ್ಸಾನಿ ಪಞ್ಞಾಸಸಮಾಧಿಕಾನಿ.

‘‘‘ಅಕಾಮಕೋ ವಾಹಿ ಅಹಂ ಚರಾಮಿ, ಏತೇನ ಸಚ್ಚೇನ ಸುವತ್ಥಿ ಹೋತು;

‘‘ಸಹ ¶ ¶ ಸಚ್ಚೇ ಕತೇ ಮಯ್ಹಂ, ವಿಸವೇಗೇನ ವೇಧಿತೋ;

ಅಬುಜ್ಝಿತ್ವಾನ ವುಟ್ಠಾಸಿ, ಅರೋಗೋ ಚಾಸಿ ಮಾಣವೋ;

ಸಚ್ಚೇನ ಮೇ ಸಮೋ ನತ್ಥಿ, ಏಸಾ ಮೇ ಸಚ್ಚಪಾರಮೀ’’ತಿ.

‘‘ಪುನಾಪರಂ ಯದಾ ಹೋಮಿ, ಸುತಸೋಮೋ ಮಹೀಪತಿ;

ಗಹಿತೋ ಪೋರಿಸಾದೇನ, ಬ್ರಾಹ್ಮಣೇ ಸಙ್ಗರಂ ಸರಿಂ.

‘‘ಖತ್ತಿಯಾನಂ ಏಕಸತಂ, ಆವುಣಿತ್ವಾ ಕರತ್ತಲೇ;

ಏತೇಸಂ ಪಮಿಲಾಪೇತ್ವಾ, ಯಞ್ಞತ್ಥೇ ಉಪನಯೀ ಮಮಂ.

‘‘ಅಪುಚ್ಛಿ ¶ ಮಂ ಪೋರಿಸಾದೋ, ‘ಕಿಂ ತ್ವಂ ಇಚ್ಛಸಿ ನಿಸ್ಸಜಂ;

ಯಥಾಮತಿ ತೇ ಕಾಹಾಮಿ, ಯದಿ ಮೇ ತ್ವಂ ಪುನೇಹಿಸಿ’.

‘‘ತಸ್ಸ ¶ ಪಟಿಸ್ಸುಣಿತ್ವಾನ, ಪಣ್ಹೇ ಆಗಮನಂ ಮಮ;

ಉಪಗನ್ತ್ವಾ ಪುರಂ ರಮ್ಮಂ, ರಜ್ಜಂ ನಿಯ್ಯಾದಯಿಂ ತದಾ.

‘‘ಅನುಸ್ಸರಿತ್ವಾ ಸತಂ ಧಮ್ಮಂ, ಪುಬ್ಬಕಂ ಜಿನಸೇವಿತಂ;

ಬ್ರಾಹ್ಮಣಸ್ಸ ಧನಂ ದತ್ವಾ, ಪೋರಿಸಾದಂ ಉಪಾಗಮಿಂ.

‘‘ನತ್ಥಿ ಮೇ ಸಂಸಯೋ ತತ್ಥ, ಘಾತಯಿಸ್ಸತಿ ವಾ ನ ವಾ;

ಸಚ್ಚವಾಚಾನುರಕ್ಖನ್ತೋ, ಜೀವಿತಂ ಚಜಿತುಮುಪಾಗಮಿಂ;

ಸಚ್ಚೇನ ಮೇ ಸಮೋ ನತ್ಥಿ, ಏಸಾ ಮೇ ಸಚ್ಚಪಾರಮೀ’’ತಿ.

‘‘ಸಾಮೋ ¶ ¶ ಯದಾ ವನೇ ಆಸಿಂ, ಸಕ್ಕೇನ ಅಭಿನಿಮ್ಮಿತೋ;

ಪವನೇ ಸೀಹಬ್ಯಗ್ಘೇ ಚ, ಮೇತ್ತಾಯಮುಪನಾಮಯಿಂ.

‘‘ಸೀಹಬ್ಯಗ್ಘೇಹಿ ದೀಪೀಹಿ, ಅಚ್ಛೇಹಿ ಮಹಿಸೇಹಿ ಚ;

ಪಸದಮಿಗವರಾಹೇಹಿ, ಪರಿವಾರೇತ್ವಾ ವನೇ ವಸಿಂ.

‘‘ನ ಮಂ ಕೋಚಿ ಉತ್ತಸತಿ, ನಪಿ ಭಾಯಾಮಿ ಕಸ್ಸಚಿ;

ಮೇತ್ತಾಬಲೇನುಪತ್ಥದ್ಧೋ, ರಮಾಮಿ ಪವನೇ ತದಾ’’ತಿ.

‘‘ಪುನಾಪರಂ ಯದಾ ಹೋಮಿ, ಏಕರಾಜಾತಿ ವಿಸ್ಸುತೋ;

ಪರಮಂ ಸೀಲಂ ಅಧಿಟ್ಠಾಯ, ಪಸಾಸಾಮಿ ಮಹಾಮಹಿಂ.

‘‘ದಸ ಕುಸಲಕಮ್ಮಪಥೇ, ವತ್ತಾಮಿ ಅನವಸೇಸತೋ;

ಚತೂಹಿ ಸಙ್ಗಹವತ್ಥೂಹಿ, ಸಙ್ಗಣ್ಹಾಮಿ [ಸಙ್ಗಹಾಮಿ (ಕ.)] ಮಹಾಜನಂ.

‘‘ಏವಂ ಮೇ ಅಪ್ಪಮತ್ತಸ್ಸ, ಇಧ ಲೋಕೇ ಪರತ್ಥ ಚ;

ದಬ್ಬಸೇನೋ ¶ ಉಪಗನ್ತ್ವಾ, ಅಚ್ಛಿನ್ದನ್ತೋ ಪುರಂ ಮಮ.

‘‘ರಾಜೂಪಜೀವೇ ¶ ನಿಗಮೇ, ಸಬಲಟ್ಠೇ ಸರಟ್ಠಕೇ;

ಸಬ್ಬಂ ಹತ್ಥಗತಂ ಕತ್ವಾ, ಕಾಸುಯಾ ನಿಖಣೀ ಮಮಂ.

‘‘ಅಮಚ್ಚಮಣ್ಡಲಂ ರಜ್ಜಂ, ಫೀತಂ ಅನ್ತೇಪುರಂ ಮಮ;

ಅಚ್ಛಿನ್ದಿತ್ವಾನ ಗಹಿತಂ, ಪಿಯಂ ಪುತ್ತಂವ ಪಸ್ಸಹಂ;

ಮೇತ್ತಾಯ ಮೇ ಸಮೋ ನತ್ಥಿ, ಏಸಾ ಮೇ ಮೇತ್ತಾಪಾರಮೀ’’ತಿ.

‘‘ಸುಸಾನೇ ¶ ¶ ಸೇಯ್ಯಂ ಕಪ್ಪೇಮಿ, ಛವಟ್ಠಿಕಂ ಉಪನಿಧಾಯಹಂ;

ಗಾಮಣ್ಡಲಾ [ಗೋಮಣ್ಡಲಾ (ಸೀ.), ಗಾಮಮಣ್ಡಲಾ (ಸ್ಯಾ.)] ಉಪಾಗನ್ತ್ವಾ, ರೂಪಂ ದಸ್ಸೇನ್ತಿನಪ್ಪಕಂ.

‘‘ಅಪರೇ ಗನ್ಧಮಾಲಞ್ಚ, ಭೋಜನಂ ವಿವಿಧಂ ಬಹುಂ;

ಉಪಾಯನಾನೂಪನೇನ್ತಿ, ಹಟ್ಠಾ ಸಂವಿಗ್ಗಮಾನಸಾ.

‘‘ಯೇ ಮೇ ದುಕ್ಖಂ ಉಪಹರನ್ತಿ, ಯೇ ಚ ದೇನ್ತಿ ಸುಖಂ ಮಮ;

ಸಬ್ಬೇಸಂ ಸಮಕೋ ಹೋಮಿ, ದಯಾ ಕೋಪೋ ನ ವಿಜ್ಜತಿ.

‘‘ಸುಖದುಕ್ಖೇ ತುಲಾಭೂತೋ, ಯಸೇಸು ಅಯಸೇಸು ಚ;

ಸಬ್ಬತ್ಥ ಸಮಕೋ ಹೋಮಿ, ಏಸಾ ಮೇ ಉಪೇಕ್ಖಾಪಾರಮೀ’’ತಿ.

ಯುಧಞ್ಜಯೋ ಸೋಮನಸ್ಸೋ, ಅಯೋಘರಭಿಸೇನ ಚ;

ಸೋಣನನ್ದೋ ಮೂಗಪಕ್ಖೋ, ಕಪಿರಾಜಾ ಸಚ್ಚಸವ್ಹಯೋ.

ವಟ್ಟಕೋ ಮಚ್ಛರಾಜಾ ಚ, ಕಣ್ಹದೀಪಾಯನೋ ಇಸಿ;

ಸುತಸೋಮೋ ಪುನ ಆಸಿಂ [ಆಸಿ (ಸ್ಯಾ.)], ಸಾಮೋ ಚ ಏಕರಾಜಹು;

ಉಪೇಕ್ಖಾಪಾರಮೀ ಆಸಿ, ಇತಿ ವುತ್ಥಂ [ವುತ್ತಂ (ಸಬ್ಬತ್ಥ) ಅಟ್ಠಕಥಾ ಓಲೋಕೇತಬ್ಬಾ] ಮಹೇಸಿನಾ.

ಏವಂ ¶ ಬಹುಬ್ಬಿಧಂ ದುಕ್ಖಂ, ಸಮ್ಪತ್ತೀ ಚ ಬಹುಬ್ಬಿಧಾ [ಸಮ್ಪತ್ತಿ ಚ ಬಹುವಿಧಾ (ಸೀ.), ಸಮ್ಪತ್ತಿಂ ಚ ಬಹುವಿಧಂ (ಕ.)];

ಭವಾಭವೇ ಅನುಭವಿತ್ವಾ, ಪತ್ತೋ ಸಮ್ಬೋಧಿಮುತ್ತಮಂ.

ದತ್ವಾ ದಾತಬ್ಬಕಂ ದಾನಂ, ಸೀಲಂ ಪೂರೇತ್ವಾ ಅಸೇಸತೋ;

ನೇಕ್ಖಮ್ಮೇ ಪಾರಮಿಂ ಗನ್ತ್ವಾ, ಪತ್ತೋ ಸಮ್ಬೋಧಿಮುತ್ತಮಂ.

ಪಣ್ಡಿತೇ ¶ ಪರಿಪುಚ್ಛಿತ್ವಾ, ವೀರಿಯಂ ಕತ್ವಾನ ಮುತ್ತಮಂ;

ಖನ್ತಿಯಾ ಪಾರಮಿಂ ಗನ್ತ್ವಾ, ಪತ್ತೋ ಸಮ್ಬೋಧಿಮುತ್ತಮಂ.

ಕತ್ವಾ ದಳ್ಹಮಧಿಟ್ಠಾನಂ, ಸಚ್ಚವಾಚಾನುರಕ್ಖಿಯ;

ಮೇತ್ತಾಯ ¶ ಪಾರಮಿಂ ಗನ್ತ್ವಾ, ಪತ್ತೋ ಸಮ್ಬೋಧಿಮುತ್ತಮಂ.

ಲಾಭಾಲಾಭೇ ¶ ಯಸಾಯಸೇ, ಸಮ್ಮಾನನಾವಮಾನನೇ;

ಸಬ್ಬತ್ಥ ಸಮಕೋ ಹುತ್ವಾ, ಪತ್ತೋ ಸಮ್ಬೋಧಿಮುತ್ತಮಂ.

ಕೋಸಜ್ಜಂ ಭಯತೋ ದಿಸ್ವಾ, ವೀರಿಯಾರಮ್ಭಞ್ಚ ಖೇಮತೋ;

ಆರದ್ಧವೀರಿಯಾ ಹೋಥ, ಏಸಾ ಬುದ್ಧಾನುಸಾಸನೀ.

ವಿವಾದಂ ಭಯತೋ ದಿಸ್ವಾ, ಅವಿವಾದಞ್ಚ ಖೇಮತೋ;

ಸಮಗ್ಗಾ ಸಖಿಲಾ ಹೋಥ, ಏಸಾ ಬುದ್ಧಾನುಸಾಸನೀ.

ಪಮಾದಂ ಭಯತೋ ದಿಸ್ವಾ, ಅಪ್ಪಮಾದಞ್ಚ ಖೇಮತೋ;

ಭಾವೇಥಟ್ಠಙ್ಗಿಕಂ ಮಗ್ಗಂ, ಏಸಾ ಬುದ್ಧಾನುಸಾಸನೀ.

ಇತ್ಥಂ ಸುದಂ ಭಗವಾ ಅತ್ತನೋ ಪುಬ್ಬಚರಿಯಂ ಸಮ್ಭಾವಯಮಾನೋ ಬುದ್ಧಾಪದಾನಿಯಂ ನಾಮ ಧಮ್ಮಪರಿಯಾಯಂ ಅಭಾಸಿತ್ಥಾತಿ.