📜
ನಮೋ ತಸ್ಸ ಭಗವತೋ ಅರಹತೋ ಸಮ್ಮಾಸಮ್ಬುದ್ಧಸ್ಸ
ಖುದ್ದಕನಿಕಾಯೇ
ಜಾತಕಪಾಳಿ
(ದುತಿಯೋ ಭಾಗೋ)
೧೭. ಚತ್ತಾಲೀಸನಿಪಾತೋ
೫೨೧. ತೇಸಕುಣಜಾತಕಂ (೧)
‘‘ವೇಸ್ಸನ್ತರಂ ¶ ¶ ¶ ತಂ ಪುಚ್ಛಾಮಿ, ಸಕುಣ ಭದ್ದಮತ್ಥು ತೇ;
ರಜ್ಜಂ ಕಾರೇತುಕಾಮೇನ, ಕಿಂ ಸು ಕಿಚ್ಚಂ ಕತಂ ವರಂ’’.
‘‘ಚಿರಸ್ಸಂ ವತ ಮಂ ತಾತೋ, ಕಂಸೋ ಬಾರಾಣಸಿಗ್ಗಹೋ;
ಪಮತ್ತೋ ಅಪ್ಪಮತ್ತಂ ಮಂ, ಪಿತಾ ಪುತ್ತಂ ಅಚೋದಯಿ.
‘‘ಪಠಮೇನೇವ ವಿತಥಂ, ಕೋಧಂ ಹಾಸಂ ನಿವಾರಯೇ;
ತತೋ ಕಿಚ್ಚಾನಿ ಕಾರೇಯ್ಯ, ತಂ ವತಂ ಆಹು ಖತ್ತಿಯ.
‘‘ಯಂ ¶ ತ್ವಂ ತಾತ ತಪೋಕಮ್ಮಂ [ತಪೇ ಕಮ್ಮಂ (ಸೀ. ಸ್ಯಾ. ಪೀ.)], ಪುಬ್ಬೇ ಕತಮಸಂಸಯಂ;
ರತ್ತೋ ದುಟ್ಠೋ ಚ ಯಂ ಕಯಿರಾ, ನ ತಂ ಕಯಿರಾ ತತೋ ಪುನ [ಪುನಂ (ಪೀ.)].
‘‘ಖತ್ತಿಯಸ್ಸ ಪಮತ್ತಸ್ಸ, ರಟ್ಠಸ್ಮಿಂ ರಟ್ಠವಡ್ಢನ;
ಸಬ್ಬೇ ಭೋಗಾ ವಿನಸ್ಸನ್ತಿ, ರಞ್ಞೋ ತಂ ವುಚ್ಚತೇ ಅಘಂ.
‘‘ಸಿರೀ ತಾತ ಅಲಕ್ಖೀ ಚ [ಸಿರೀ ಚ ತಾತ ಲಕ್ಖೀ ಚ (ಸ್ಯಾ. ಪೀ.)], ಪುಚ್ಛಿತಾ ಏತದಬ್ರವುಂ;
ಉಟ್ಠಾನ [ಉಟ್ಠಾನೇ (ಸ್ಯಾ.)] ವೀರಿಯೇ ಪೋಸೇ, ರಮಾಹಂ ಅನುಸೂಯಕೇ.
‘‘ಉಸೂಯಕೇ ¶ ದುಹದಯೇ, ಪುರಿಸೇ ಕಮ್ಮದುಸ್ಸಕೇ;
ಕಾಲಕಣ್ಣೀ ಮಹಾರಾಜ, ರಮತಿ [ರಮಾತಿ (ಕ.)] ಚಕ್ಕಭಞ್ಜನೀ.
‘‘ಸೋ ತ್ವಂ ಸಬ್ಬೇಸು ಸುಹದಯೋ [ಸೋ ತ್ವಂ ಸಬ್ಬೇಸಂ ಸುಹದಯೋ (ಸ್ಯಾ. ಪೀ.), ಸೋ ತ್ವಂ ಸಬ್ಬೇ ಸುಹದಯೋ (ಕ.)], ಸಬ್ಬೇಸಂ ರಕ್ಖಿತೋ ಭವ;
ಅಲಕ್ಖಿಂ ನುದ ಮಹಾರಾಜ, ಲಕ್ಖ್ಯಾ ಭವ ನಿವೇಸನಂ.
‘‘ಸ ¶ ಲಕ್ಖೀಧಿತಿಸಮ್ಪನ್ನೋ, ಪುರಿಸೋ ಹಿ ಮಹಗ್ಗತೋ;
ಅಮಿತ್ತಾನಂ ಕಾಸಿಪತಿ, ಮೂಲಂ ಅಗ್ಗಞ್ಚ ಛಿನ್ದತಿ.
‘‘ಸಕ್ಕೋಪಿ ಹಿ ಭೂತಪತಿ, ಉಟ್ಠಾನೇ ನಪ್ಪಮಜ್ಜತಿ;
ಸ ಕಲ್ಯಾಣೇ ಧಿತಿಂ ಕತ್ವಾ, ಉಟ್ಠಾನೇ ಕುರುತೇ ಮನೋ.
‘‘ಗನ್ಧಬ್ಬಾ ಪಿತರೋ ದೇವಾ, ಸಾಜೀವಾ [ಸಞ್ಜೀವಾ (ಪೀ.)] ಹೋನ್ತಿ ತಾದಿನೋ;
ಉಟ್ಠಾಹತೋ [ಉಟ್ಠಹತೋ (ಸ್ಯಾ. ಪೀ.)] ಅಪ್ಪಮಜ್ಜತೋ [ಮಪ್ಪಮಜ್ಜತೋ (ಕ.)], ಅನುತಿಟ್ಠನ್ತಿ ದೇವತಾ.
‘‘ಸೋ ಅಪ್ಪಮತ್ತೋ ಅಕ್ಕುದ್ಧೋ [ಅಕ್ಕುಟ್ಠೋ (ಪೀ.)], ತಾತ ಕಿಚ್ಚಾನಿ ಕಾರಯ;
ವಾಯಮಸ್ಸು ಚ ಕಿಚ್ಚೇಸು, ನಾಲಸೋ ವಿನ್ದತೇ ಸುಖಂ.
‘‘ತತ್ಥೇವ ತೇ ವತ್ತಪದಾ, ಏಸಾವ [ಏಸಾ ಚ (ಪೀ.)] ಅನುಸಾಸನೀ;
ಅಲಂ ಮಿತ್ತೇ ಸುಖಾಪೇತುಂ, ಅಮಿತ್ತಾನಂ ದುಖಾಯ [ದುಕ್ಖಾಯ (ಪೀ.)] ಚ’’.
‘‘ಸಕ್ಖಿಸಿ ತ್ವಂ [ಸಕ್ಖೀ ತುವಂ (ಸೀ. ಸ್ಯಾ. ಪೀ.)] ಕುಣ್ಡಲಿನಿ, ಮಞ್ಞಸಿ ಖತ್ತಬನ್ಧುನಿ [ಖತ್ತಿಯಬನ್ಧುನೀ (ಪೀ.)];
ರಜ್ಜಂ ಕಾರೇತುಕಾಮೇನ, ಕಿಂ ಸು ಕಿಚ್ಚಂ ಕತಂ ವರಂ’’.
‘‘ದ್ವೇವ ತಾತ ಪದಕಾನಿ, ಯತ್ಥ [ಯೇಸು (ಪೀ.)] ಸಬ್ಬಂ ಪತಿಟ್ಠಿತಂ;
ಅಲದ್ಧಸ್ಸ ಚ ಯೋ ಲಾಭೋ, ಲದ್ಧಸ್ಸ ಚಾನುರಕ್ಖಣಾ.
‘‘ಅಮಚ್ಚೇ ತಾತ ಜಾನಾಹಿ, ಧೀರೇ ಅತ್ಥಸ್ಸ ಕೋವಿದೇ;
ಅನಕ್ಖಾ ಕಿತವೇ ತಾತ, ಅಸೋಣ್ಡೇ ಅವಿನಾಸಕೇ.
‘‘ಯೋ ಚ ತಂ ತಾತ ರಕ್ಖೇಯ್ಯ, ಧನಂ ಯಞ್ಚೇವ ತೇ ಸಿಯಾ;
ಸೂತೋವ ರಥಂ ಸಙ್ಗಣ್ಹೇ, ಸೋ ತೇ ಕಿಚ್ಚಾನಿ ಕಾರಯೇ.
‘‘ಸುಸಙ್ಗಹಿತನ್ತಜನೋ, ಸಯಂ ವಿತ್ತಂ ಅವೇಕ್ಖಿಯ;
ನಿಧಿಞ್ಚ ಇಣದಾನಞ್ಚ, ನ ಕರೇ ಪರಪತ್ತಿಯಾ.
‘‘ಸಯಂ ¶ ¶ ಆಯಂ ¶ ವಯಂ [ಆಯವಯಂ (ಪೀ.)] ಜಞ್ಞಾ, ಸಯಂ ಜಞ್ಞಾ ಕತಾಕತಂ;
ನಿಗ್ಗಣ್ಹೇ ನಿಗ್ಗಹಾರಹಂ, ಪಗ್ಗಣ್ಹೇ ಪಗ್ಗಹಾರಹಂ.
‘‘ಸಯಂ ಜಾನಪದಂ ಅತ್ಥಂ, ಅನುಸಾಸ ರಥೇಸಭ;
ಮಾ ತೇ ಅಧಮ್ಮಿಕಾ ಯುತ್ತಾ, ಧನಂ ರಟ್ಠಞ್ಚ ನಾಸಯುಂ.
‘‘ಮಾ ಚ ವೇಗೇನ ಕಿಚ್ಚಾನಿ, ಕರೋಸಿ [ಕಾರೇಸಿ (ಸೀ. ಸ್ಯಾ. ಪೀ.)] ಕಾರಯೇಸಿ ವಾ;
ವೇಗಸಾ ಹಿ ಕತಂ ಕಮ್ಮಂ, ಮನ್ದೋ ಪಚ್ಛಾನುತಪ್ಪತಿ.
‘‘ಮಾ ತೇ ಅಧಿಸರೇ ಮುಞ್ಚ, ಸುಬಾಳ್ಹಮಧಿಕೋಧಿತಂ [ಕೋಪಿತಂ (ಸೀ. ಸ್ಯಾ.)];
ಕೋಧಸಾ ಹಿ ಬಹೂ ಫೀತಾ, ಕುಲಾ ಅಕುಲತಂ ಗತಾ.
‘‘ಮಾ ತಾತ ಇಸ್ಸರೋಮ್ಹೀತಿ, ಅನತ್ಥಾಯ ಪತಾರಯಿ;
ಇತ್ಥೀನಂ ಪುರಿಸಾನಞ್ಚ, ಮಾ ತೇ ಆಸಿ ದುಖುದ್ರಯೋ.
‘‘ಅಪೇತಲೋಮಹಂಸಸ್ಸ, ರಞ್ಞೋ ಕಾಮಾನುಸಾರಿನೋ;
ಸಬ್ಬೇ ಭೋಗಾ ವಿನಸ್ಸನ್ತಿ, ರಞ್ಞೋ ತಂ ವುಚ್ಚತೇ ಅಘಂ.
‘‘ತತ್ಥೇವ ತೇ ವತ್ತಪದಾ, ಏಸಾವ ಅನುಸಾಸನೀ;
ದಕ್ಖಸ್ಸುದಾನಿ ಪುಞ್ಞಕರೋ, ಅಸೋಣ್ಡೋ ಅವಿನಾಸಕೋ;
ಸೀಲವಾಸ್ಸು [ಸೀಲವಾಸ್ಸ (ಟೀಕಾ)] ಮಹಾರಾಜ, ದುಸ್ಸೀಲೋ ವಿನಿಪಾತಿಕೋ’’ [ವಿನಿಪಾತಕೋ (ಪೀ.)].
‘‘ಅಪುಚ್ಛಿಮ್ಹ ಕೋಸಿಯಗೋತ್ತಂ [ಅಪುಚ್ಛಿಮ್ಹಾ ಕೋಸಿಯಗೋತ್ತಂ (ಸ್ಯಾ.), ಅಪುಚ್ಛಮ್ಹಾಪಿ ಕೋಸಿಕಂ (ಪೀ.)], ಕುಣ್ಡಲಿನಿಂ ತಥೇವ ಚ;
ತ್ವಂ ದಾನಿ ವದೇಹಿ ಜಮ್ಬುಕ [ಜಮ್ಬುಕ ತ್ವಂ ದಾನಿ ವದೇಹಿ (ಸ್ಯಾ. ಪೀ.)], ಬಲಾನಂ ಬಲಮುತ್ತಮಂ’’.
‘‘ಬಲಂ ಪಞ್ಚವಿಧಂ ಲೋಕೇ, ಪುರಿಸಸ್ಮಿಂ ಮಹಗ್ಗತೇ;
ತತ್ಥ ಬಾಹುಬಲಂ ನಾಮ, ಚರಿಮಂ ವುಚ್ಚತೇ ಬಲಂ.
‘‘ಭೋಗಬಲಞ್ಚ ದೀಘಾವು, ದುತಿಯಂ ವುಚ್ಚತೇ ಬಲಂ;
ಅಮಚ್ಚಬಲಞ್ಚ ¶ ದೀಘಾವು, ತತಿಯಂ ವುಚ್ಚತೇ ಬಲಂ.
‘‘ಅಭಿಜಚ್ಚಬಲಂ ಚೇವ, ತಂ ಚತುತ್ಥಂ ಅಸಂಸಯಂ;
ಯಾನಿ ಚೇತಾನಿ ಸಬ್ಬಾನಿ, ಅಧಿಗಣ್ಹಾತಿ ಪಣ್ಡಿತೋ.
‘‘ತಂ ಬಲಾನಂ ಬಲಂ ಸೇಟ್ಠಂ, ಅಗ್ಗಂ ಪಞ್ಞಾಬಂ ಬಲಂ [ವರಂ (ಸೀ.)];
ಪಞ್ಞಾಬಲೇನುಪತ್ಥದ್ಧೋ, ಅತ್ಥಂ ವಿನ್ದತಿ ಪಣ್ಡಿತೋ.
‘‘ಅಪಿ ¶ ಚೇ ಲಭತಿ ಮನ್ದೋ, ಫೀತಂ ಧರಣಿಮುತ್ತಮಂ;
ಅಕಾಮಸ್ಸ ಪಸಯ್ಹಂ ವಾ, ಅಞ್ಞೋ ತಂ ಪಟಿಪಜ್ಜತಿ.
‘‘ಅಭಿಜಾತೋಪಿ ಚೇ ಹೋತಿ, ರಜ್ಜಂ ಲದ್ಧಾನ ಖತ್ತಿಯೋ;
ದುಪ್ಪಞ್ಞೋ ಹಿ ಕಾಸಿಪತಿ, ಸಬ್ಬೇನಪಿ ನ ಜೀವತಿ.
‘‘ಪಞ್ಞಾವ ¶ ಸುತಂ ವಿನಿಚ್ಛಿನೀ [ಪಞ್ಞಾ ಸುತವಿನಿಚ್ಛಿನೀ (ಸ್ಯಾ. ಪೀ.)], ಪಞ್ಞಾ ಕಿತ್ತಿ ಸಿಲೋಕವಡ್ಢನೀ [ವದ್ಧನೀ (ಪೀ.)];
ಪಞ್ಞಾಸಹಿತೋ ನರೋ ಇಧ, ಅಪಿ ದುಕ್ಖೇ ಸುಖಾನಿ ವಿನ್ದತಿ.
‘‘ಪಞ್ಞಞ್ಚ ಖೋ ಅಸುಸ್ಸೂಸಂ, ನ ಕೋಚಿ ಅಧಿಗಚ್ಛತಿ;
ಬಹುಸ್ಸುತಂ ಅನಾಗಮ್ಮ, ಧಮ್ಮಟ್ಠಂ ಅವಿನಿಬ್ಭುಜಂ.
‘‘ಯೋ ಚ ಧಮ್ಮವಿಭಙ್ಗಞ್ಞೂ [ಯೋ ಧಮ್ಮಞ್ಚ ವಿಭಾಗಞ್ಞೂ (ಪೀ.)], ಕಾಲುಟ್ಠಾಯೀ ಮತನ್ದಿತೋ;
ಅನುಟ್ಠಹತಿ ಕಾಲೇನ, ಕಮ್ಮಫಲಂ ತಸ್ಸ ಇಜ್ಝತಿ [ಕಮ್ಮಫಲಂ ತಸ್ಸಿಜ್ಝತಿ, ಫಲಂ ತಸ್ಸ ಸಮಿಜ್ಝತಿ (ಕ.)].
‘‘ಅನಾಯತನ [ನಾ’ನಾಯತನ (ಪೀ.)] ಸೀಲಸ್ಸ, ಅನಾಯತನ [ನಾ’ನಾಯತನ (ಪೀ.)] ಸೇವಿನೋ;
ನ ನಿಬ್ಬಿನ್ದಿಯಕಾರಿಸ್ಸ, ಸಮ್ಮದತ್ಥೋ ವಿಪಚ್ಚತಿ.
‘‘ಅಜ್ಝತ್ತಞ್ಚ ಪಯುತ್ತಸ್ಸ, ತಥಾಯತನಸೇವಿನೋ;
ಅನಿಬ್ಬಿನ್ದಿಯಕಾರಿಸ್ಸ, ಸಮ್ಮದತ್ಥೋ ವಿಪಚ್ಚತಿ.
‘‘ಯೋಗಪ್ಪಯೋಗಸಙ್ಖಾತಂ, ಸಮ್ಭತಸ್ಸಾನುರಕ್ಖಣಂ;
ತಾನಿ ¶ ತ್ವಂ ತಾತ ಸೇವಸ್ಸು, ಮಾ ಅಕಮ್ಮಾಯ ರನ್ಧಯಿ;
ಅಕಮ್ಮುನಾ ಹಿ ದುಮ್ಮೇಧೋ, ನಳಾಗಾರಂವ ಸೀದತಿ’’.
‘‘ಧಮ್ಮಂ ಚರ ಮಹಾರಾಜ, ಮಾತಾಪಿತೂಸು ಖತ್ತಿಯ;
ಇಧ ಧಮ್ಮಂ ಚರಿತ್ವಾನ, ರಾಜ ಸಗ್ಗಂ ಗಮಿಸ್ಸಸಿ.
‘‘ಧಮ್ಮಂ ಚರ ಮಹಾರಾಜ, ಪುತ್ತದಾರೇಸು ಖತ್ತಿಯ;
ಇಧ ಧಮ್ಮಂ ಚರಿತ್ವಾನ, ರಾಜ ಸಗ್ಗಂ ಗಮಿಸ್ಸಸಿ.
‘‘ಧಮ್ಮಂ ಚರ ಮಹಾರಾಜ, ಮಿತ್ತಾಮಚ್ಚೇಸು ಖತ್ತಿಯ;
ಇಧ ಧಮ್ಮಂ ಚರಿತ್ವಾನ, ರಾಜ ಸಗ್ಗಂ ಗಮಿಸ್ಸಸಿ.
‘‘ಧಮ್ಮಂ ಚರ ಮಹಾರಾಜ, ವಾಹನೇಸು ಬಲೇಸು ಚ;
ಇಧ ಧಮ್ಮಂ ಚರಿತ್ವಾನ, ರಾಜ ಸಗ್ಗಂ ಗಮಿಸ್ಸಸಿ.
‘‘ಧಮ್ಮಂ ¶ ಚರ ಮಹಾರಾಜ, ಗಾಮೇಸು ನಿಗಮೇಸು ಚ…ಪೇ….
‘‘ಧಮ್ಮಂ ಚರ ಮಹಾರಾಜ, ರಟ್ಠೇಸು [ರಟ್ಠೇ (ಪೀ.)] ಜನಪದೇಸು ಚ…ಪೇ….
‘‘ಧಮ್ಮಂ ಚರ ಮಹಾರಾಜ, ಸಮಣ [ಸಮಣೇ (ಸ್ಯಾ. ಕ.)] ಬ್ರಾಹ್ಮಣೇಸು ಚ…ಪೇ….
‘‘ಧಮ್ಮಂ ಚರ ಮಹಾರಾಜ, ಮಿಗಪಕ್ಖೀಸು ಖತ್ತಿಯ;
ಇಧ ಧಮ್ಮಂ ಚರಿತ್ವಾನ, ರಾಜ ಸಗ್ಗಂ ಗಮಿಸ್ಸಸಿ.
‘‘ಧಮ್ಮಂ ¶ ಚರ ಮಹಾರಾಜ, ಧಮ್ಮೋ ಚಿಣ್ಣೋ ಸುಖಾವಹೋ [ಧಮ್ಮೋ ಸುಚಿಣ್ಣೋ ಸುಖಮಾವಹತಿ (ಕ.)];
ಇಧ ಧಮ್ಮಂ ಚರಿತ್ವಾನ, ರಾಜ ಸಗ್ಗಂ ಗಮಿಸ್ಸಸಿ.
‘‘ಧಮ್ಮಂ ಚರ ಮಹಾರಾಜ, ಸಇನ್ದಾ [ಇನ್ದೋ (ಪೀ.), ಸಿನ್ದಾ (ಕ.)] ದೇವಾ ಸಬ್ರಹ್ಮಕಾ;
ಸುಚಿಣ್ಣೇನ ದಿವಂ ಪತ್ತಾ, ಮಾ ಧಮ್ಮಂ ರಾಜ ಪಾಮದೋ [ಪಮಾದೋ (ಪೀ. ಕ.)].
‘‘ತತ್ಥೇವ ¶ ತೇ [ವೇತೇ (ಪೀ.)] ವತ್ತಪದಾ, ಏಸಾವ [ಏಸಾ ಚ (ಪೀ.)] ಅನುಸಾಸನೀ;
ಸಪ್ಪಞ್ಞಸೇವೀ ಕಲ್ಯಾಣೀ, ಸಮತ್ತಂ ಸಾಮ [ಸಾಮಂ (ಕ.)] ತಂ ವಿದೂ’’ತಿ.
ತೇಸಕುಣಜಾತಕಂ ಪಠಮಂ.
೫೨೨. ಸರಭಙ್ಗಜಾತಕಂ (೨)
‘‘ಅಲಙ್ಕತಾ ಕುಣ್ಡಲಿನೋ ಸುವತ್ಥಾ, ವೇಳುರಿಯಮುತ್ತಾಥರುಖಗ್ಗಬನ್ಧಾ [ಬದ್ಧಾ (ಪೀ.)];
ರಥೇಸಭಾ ತಿಟ್ಠಥ ಕೇ ನು ತುಮ್ಹೇ, ಕಥಂ ವೋ ಜಾನನ್ತಿ ಮನುಸ್ಸಲೋಕೇ’’.
‘‘ಅಹಮಟ್ಠಕೋ ಭೀಮರಥೋ ಪನಾಯಂ, ಕಾಲಿಙ್ಗರಾಜಾ ಪನ ಉಗ್ಗತೋಯಂ [ಉಗ್ಗತೋ ಅಯಂ (ಪೀ.), ಉಗ್ಗತಾಯಂ (ಕ.)];
ಸುಸಞ್ಞತಾನಂ ಇಸೀನಂ [ಸುಸಞ್ಞತಾನಿಸಿನಂ (ಪೀ.)] ದಸ್ಸನಾಯ, ಇಧಾಗತಾ ಪುಚ್ಛಿತಾಯೇಮ್ಹ ಪಞ್ಹೇ’’.
‘‘ವೇಹಾಯಸಂ ¶ ತಿಟ್ಠಸಿ [ತಿಟ್ಠತಿ (ಪೀ.)] ಅನ್ತಲಿಕ್ಖೇ, ಪಥದ್ಧುನೋ ಪನ್ನರಸೇವ ಚನ್ದೋ;
ಪುಚ್ಛಾಮಿ ತಂ ಯಕ್ಖ ಮಹಾನುಭಾವ, ಕಥಂ ತಂ ಜಾನನ್ತಿ ಮನುಸ್ಸಲೋಕೇ’’.
‘‘ಯಮಾಹು ದೇವೇಸು ಸುಜಮ್ಪತೀತಿ, ಮಘವಾತಿ ¶ ತಂ ಆಹು ಮನುಸ್ಸಲೋಕೇ;
ಸ ದೇವರಾಜಾ ಇದಮಜ್ಜ ಪತ್ತೋ, ಸುಸಞ್ಞತಾನಂ ಇಸೀನಂ ದಸ್ಸನಾಯ’’.
‘‘ದೂರೇ ಸುತಾ ನೋ ಇಸಯೋ ಸಮಾಗತಾ, ಮಹಿದ್ಧಿಕಾ ಇದ್ಧಿಗುಣೂಪಪನ್ನಾ;
ವನ್ದಾಮಿ ತೇ ಅಯಿರೇ ಪಸನ್ನಚಿತ್ತೋ, ಯೇ ಜೀವಲೋಕೇತ್ಥ ಮನುಸ್ಸಸೇಟ್ಠಾ’’.
ಗನ್ಧೋ ಇಸೀನಂ ಚಿರದಿಕ್ಖಿತಾನಂ [ದಕ್ಖಿತಾನಂ (ಸ್ಯಾ. ಪೀ.)], ಕಾಯಾ ಚುತೋ ಗಚ್ಛತಿ ಮಾಲುತೇನ;
ಇತೋ ಪಟಿಕ್ಕಮ್ಮ ಸಹಸ್ಸನೇತ್ತ, ಗನ್ಧೋ ಇಸೀನಂ ಅಸುಚಿ ದೇವರಾಜ’’.
‘‘ಗನ್ಧೋ ಇಸೀನಂ ಚಿರದಿಕ್ಖಿತಾನಂ, ಕಾಯಾ ಚುತೋ ಗಚ್ಛತು ಮಾಲುತೇನ;
ವಿಚಿತ್ರಪುಪ್ಫಂ ಸುರಭಿಂವ ಮಾಲಂ, ಗನ್ಧಞ್ಚ ಏತಂ ಪಾಟಿಕಙ್ಖಾಮ ಭನ್ತೇ;
ನ ಹೇತ್ಥ ದೇವಾ ಪಟಿಕ್ಕೂಲಸಞ್ಞಿನೋ’’.
‘‘ಪುರಿನ್ದದೋ ಭೂತಪತೀ ಯಸಸ್ಸೀ, ದೇವಾನಮಿನ್ದೋ ಸಕ್ಕೋ [ಇದಂ ಪದಂ ನತ್ಥಿ (ಸೀ. ಸ್ಯಾ. ಪೀ. ಪೋತ್ಥಕೇಸು)] ಮಘವಾ ಸುಜಮ್ಪತಿ;
ಸ ದೇವರಾಜಾ ಅಸುರಗಣಪ್ಪಮದ್ದನೋ, ಓಕಾಸಮಾಕಙ್ಖತಿ ಪಞ್ಹ ಪುಚ್ಛಿತುಂ.
‘‘ಕೋ ¶ ನೇವಿಮೇಸಂ ಇಧ ಪಣ್ಡಿತಾನಂ, ಪಞ್ಹೇ ಪುಟ್ಠೋ ನಿಪುಣೇ ಬ್ಯಾಕರಿಸ್ಸತಿ;
ತಿಣ್ಣಞ್ಚ ರಞ್ಞಂ ಮನುಜಾಧಿಪಾನಂ, ದೇವಾನಮಿನ್ದಸ್ಸ ಚ ವಾಸವಸ್ಸ’’.
‘‘ಅಯಂ ¶ ಇಸಿ [ಇಸೀ (ಸೀ. ಪೀ.)] ಸರಭಙ್ಗೋ ತಪಸ್ಸೀ [ಯಸಸ್ಸೀ (ಸೀ.)], ಯತೋ ಜಾತೋ ವಿರತೋ ಮೇಥುನಸ್ಮಾ;
ಆಚೇರಪುತ್ತೋ [ಆಚರಿಯಪುತ್ತೋ (ಪೀ. ಕ.)] ಸುವಿನೀತರೂಪೋ, ಸೋ ನೇಸಂ ಪಞ್ಹಾನಿ ವಿಯಾಕರಿಸ್ಸತಿ’’.
‘‘ಕೋಣ್ಡಞ್ಞ ಪಞ್ಹಾನಿ ವಿಯಾಕರೋಹಿ, ಯಾಚನ್ತಿ ತಂ ಇಸಯೋ ಸಾಧುರೂಪಾ;
ಕೋಣ್ಡಞ್ಞ ಏಸೋ ಮನುಜೇಸು ಧಮ್ಮೋ, ಯಂ ವುದ್ಧ [ವದ್ಧ (ಪೀ.), ಬುದ್ಧ (ಕ.)] ಮಾಗಚ್ಛತಿ ಏಸ ಭಾರೋ’’.
‘‘ಕತಾವಕಾಸಾ ¶ ಪುಚ್ಛನ್ತು ಭೋನ್ತೋ, ಯಂ ಕಿಞ್ಚಿ ಪಞ್ಹಂ ಮನಸಾಭಿಪತ್ಥಿತಂ;
ಅಹಞ್ಹಿ ತಂ ತಂ ವೋ ವಿಯಾಕರಿಸ್ಸಂ, ಞತ್ವಾ ಸಯಂ ಲೋಕಮಿಮಂ ಪರಞ್ಚ’’.
‘‘ತತೋ ಚ ಮಘವಾ ಸಕ್ಕೋ, ಅತ್ಥದಸ್ಸೀ ಪುರಿನ್ದದೋ;
ಅಪುಚ್ಛಿ ಪಠಮಂ ಪಞ್ಹಂ, ಯಞ್ಚಾಸಿ ಅಭಿಪತ್ಥಿತಂ’’.
‘‘ಕಿಂ ಸೂ ವಧಿತ್ವಾ ನ ಕದಾಚಿ ಸೋಚತಿ, ಕಿಸ್ಸಪ್ಪಹಾನಂ ಇಸಯೋ ವಣ್ಣಯನ್ತಿ;
ಕಸ್ಸೀಧ ¶ ವುತ್ತಂ ಫರುಸಂ ಖಮೇಥ, ಅಕ್ಖಾಹಿ ಮೇ ಕೋಣ್ಡಞ್ಞ ಏತಮತ್ಥಂ’’.
‘‘ಕೋಧಂ ವಧಿತ್ವಾ ನ ಕದಾಚಿ ಸೋಚತಿ, ಮಕ್ಖಪ್ಪಹಾನಂ ಇಸಯೋ ವಣ್ಣಯನ್ತಿ;
ಸಬ್ಬೇಸಂ ವುತ್ತಂ ಫರುಸಂ ಖಮೇಥ, ಏತಂ ಖನ್ತಿಂ ಉತ್ತಮಮಾಹು ಸನ್ತೋ’’.
‘‘ಸಕ್ಕಾ ಉಭಿನ್ನಂ [ಹಿ ದ್ವಿನ್ನಂ (ಪೀ.)] ವಚನಂ ತಿತಿಕ್ಖಿತುಂ, ಸದಿಸಸ್ಸ ವಾ ಸೇಟ್ಠತರಸ್ಸ [ಸೇಟ್ಠನರಸ್ಸ (ಪೀ.)] ವಾಪಿ;
ಕಥಂ ನು ಹೀನಸ್ಸ ವಚೋ ಖಮೇಥ, ಅಕ್ಖಾಹಿ ಮೇ ಕೋಣ್ಡಞ್ಞ ಏತಮತ್ಥಂ’’.
‘‘ಭಯಾ ¶ ಹಿ ಸೇಟ್ಠಸ್ಸ ವಚೋ ಖಮೇಥ, ಸಾರಮ್ಭಹೇತೂ ಪನ ಸಾದಿಸಸ್ಸ;
ಯೋ ಚೀಧ ಹೀನಸ್ಸ ವಚೋ ಖಮೇಥ, ಏತಂ ಖನ್ತಿಂ ಉತ್ತಮಮಾಹು ಸನ್ತೋ’’.
‘‘ಕಥಂ ವಿಜಞ್ಞಾ ಚತುಪತ್ಥರೂಪಂ [ಚತುಮಟ್ಠರೂಪಂ (ಸ್ಯಾ. ಪೀ.)], ಸೇಟ್ಠಂ ಸರಿಕ್ಖಂ ಅಥವಾಪಿ ಹೀನಂ;
ವಿರೂಪರೂಪೇನ ಚರನ್ತಿ ಸನ್ತೋ, ತಸ್ಮಾ ಹಿ ಸಬ್ಬೇಸಂ ವಚೋ ಖಮೇಥ’’.
‘‘ನ ಹೇತಮತ್ಥಂ ಮಹತೀಪಿ ಸೇನಾ, ಸರಾಜಿಕಾ ಯುಜ್ಝಮಾನಾ ಲಭೇಥ;
ಯಂ ¶ ಖನ್ತಿಮಾ ಸಪ್ಪುರಿಸೋ ಲಭೇಥ, ಖನ್ತೀ ಬಲಸ್ಸೂಪಸಮನ್ತಿ ವೇರಾ’’.
‘‘ಸುಭಾಸಿತಂ ತೇ ಅನುಮೋದಿಯಾನ, ಅಞ್ಞಂ ತಂ ಪುಚ್ಛಾಮಿ ತದಿಙ್ಘ ಬ್ರೂಹಿ;
ಯಥಾ ಅಹುಂ [ಅಹೂ (ಸೀ. ಸ್ಯಾ. ಪೀ.)] ದಣ್ಡಕೀ ನಾಳಿಕೇರೋ [ನಾಳಿಕೀರೋ (ಸೀ. ಸ್ಯಾ. ಪೀ.)], ಅಥಜ್ಜುನೋ ಕಲಾಬು ಚಾಪಿ ರಾಜಾ;
ತೇಸಂ ಗತಿಂ ಬ್ರೂಹಿ ಸುಪಾಪಕಮ್ಮಿನಂ, ಕತ್ಥೂಪಪನ್ನಾ ಇಸಿನಂ ವಿಹೇಠಕಾ’’.
‘‘ಕಿಸಞ್ಹಿ [ಕಿಸಂಪಿ (ಪೀ.)] ವಚ್ಛಂ ಅವಕಿರಿಯ ದಣ್ಡಕೀ, ಉಚ್ಛಿನ್ನಮೂಲೋ ಸಜನೋ ಸರಟ್ಠೋ;
ಕುಕ್ಕುಳನಾಮೇ ನಿರಯಮ್ಹಿ ಪಚ್ಚತಿ, ತಸ್ಸ ಫುಲಿಙ್ಗಾನಿ ಪತನ್ತಿ ಕಾಯೇ.
‘‘ಯೋ ಸಞ್ಞತೇ ಪಬ್ಬಜಿತೇ ಅಹೇಠಯಿ [ಅವಞ್ಚಸಿ (ಪೀ.)], ಧಮ್ಮಂ ಭಣನ್ತೇ ಸಮಣೇ ಅದೂಸಕೇ;
ತಂ ನಾಳಿಕೇರಂ ಸುನಖಾ ಪರತ್ಥ, ಸಙ್ಗಮ್ಮ ಖಾದನ್ತಿ ವಿಫನ್ದಮಾನಂ.
‘‘ಅಥಜ್ಜುನೋ ¶ ನಿರಯೇ ಸತ್ತಿಸೂಲೇ, ಅವಂಸಿರೋ ಪತಿತೋ ಉದ್ಧಂಪಾದೋ [ಉದ್ಧಪಾದೋ (ಸ್ಯಾ.), ಅದ್ಧಪಾದೋ (ಪೀ.)];
ಅಙ್ಗೀರಸಂ ಗೋತಮಂ ಹೇಠಯಿತ್ವಾ, ಖನ್ತಿಂ ತಪಸ್ಸಿಂ ಚಿರಬ್ರಹ್ಮಚಾರಿಂ.
‘‘ಯೋ ¶ ಖಣ್ಡಸೋ ಪಬ್ಬಜಿತಂ ಅಛೇದಯಿ, ಖನ್ತಿಂ ವದನ್ತಂ ಸಮಣಂ ಅದೂಸಕಂ;
ಕಲಾಬುವೀಚಿಂ ಉಪಪಜ್ಜ ಪಚ್ಚತಿ, ಮಹಾಪತಾಪಂ [ಮಹಾಭಿತಾಪಂ (ಪೀ.)] ಕಟುಕಂ ಭಯಾನಕಂ.
‘‘ಏತಾನಿ ಸುತ್ವಾ ನಿರಯಾನಿ ಪಣ್ಡಿತೋ, ಅಞ್ಞಾನಿ ಪಾಪಿಟ್ಠತರಾನಿ ಚೇತ್ಥ;
ಧಮ್ಮಂ ಚರೇ ಸಮಣಬ್ರಾಹ್ಮಣೇಸು, ಏವಙ್ಕರೋ ಸಗ್ಗಮುಪೇತಿ ಠಾನಂ’’.
‘‘ಸುಭಾಸಿತಂ ¶ ತೇ ಅನುಮೋದಿಯಾನ, ಅಞ್ಞಂ ತಂ ಪುಚ್ಛಾಮಿ ತದಿಙ್ಘ ಬ್ರೂಹಿ;
ಕಥಂವಿಧಂ ಸೀಲವನ್ತಂ ವದನ್ತಿ, ಕಥಂವಿಧಂ ಪಞ್ಞವನ್ತಂ ವದನ್ತಿ;
ಕಥಂವಿಧಂ ಸಪ್ಪುರಿಸಂ ವದನ್ತಿ, ಕಥಂವಿಧಂ ನೋ ಸಿರಿ ನೋ ಜಹಾತಿ’’.
‘‘ಕಾಯೇನ ವಾಚಾಯ ಚ ಯೋ’ಧ [ಯೋ ಚ (ಪೀ.)] ಸಞ್ಞತೋ, ಮನಸಾ ಚ ಕಿಞ್ಚಿ ನ ಕರೋತಿ ಪಾಪಂ;
ನ ಅತ್ತಹೇತೂ ಅಲಿಕಂ ಭಣೇತಿ [ಭಣಾತಿ (ಸೀ. ಸ್ಯಾ. ಪೀ.)], ತಥಾವಿಧಂ ಸೀಲವನ್ತಂ ವದನ್ತಿ.
‘‘ಗಮ್ಭೀರಪಞ್ಹಂ ಮನಸಾಭಿಚಿನ್ತಯಂ [ಮನಸಾ ವಿಚಿನ್ತಯಂ (ಸೀ.)], ನಾಚ್ಚಾಹಿತಂ ಕಮ್ಮ ಕರೋತಿ ಲುದ್ದಂ;
ಕಾಲಾಗತಂ ¶ [ಕಾಲಾಭತಂ (ಪೀ.)] ಅತ್ಥಪದಂ ನ ರಿಞ್ಚತಿ, ತಥಾವಿಧಂ ಪಞ್ಞವನ್ತಂ ವದನ್ತಿ.
‘‘ಯೋ ¶ ವೇ ಕತಞ್ಞೂ ಕತವೇದಿ ಧೀರೋ, ಕಲ್ಯಾಣಮಿತ್ತೋ ದಳ್ಹಭತ್ತಿ ಚ ಹೋತಿ;
ದುಖಿತಸ್ಸ ಸಕ್ಕಚ್ಚ ಕರೋತಿ ಕಿಚ್ಚಂ, ತಥಾವಿಧಂ ಸಪ್ಪುರಿಸಂ ವದನ್ತಿ.
‘‘ಏತೇಹಿ ಸಬ್ಬೇಹಿ ಗುಣೇಹುಪೇತೋ, ಸದ್ಧೋ ಮುದೂ ಸಂವಿಭಾಗೀ ವದಞ್ಞೂ;
ಸಙ್ಗಾಹಕಂ ಸಖಿಲಂ ಸಣ್ಹವಾಚಂ, ತಥಾವಿಧಂ ನೋ ಸಿರಿ ನೋ ಜಹಾತಿ’’.
‘‘ಸುಭಾಸಿತಂ ತೇ ಅನುಮೋದಿಯಾನ, ಅಞ್ಞಂ ತಂ ಪುಚ್ಛಾಮಿ ತದಿಙ್ಘ ಬ್ರೂಹಿ;
ಸೀಲಂ ಸಿರಿಞ್ಚಾಪಿ ಸತಞ್ಚ ಧಮ್ಮಂ, ಪಞ್ಞಞ್ಚ ಕಂ ಸೇಟ್ಠತರಂ ವದನ್ತಿ’’.
‘‘ಪಞ್ಞಾ ಹಿ ಸೇಟ್ಠಾ ಕುಸಲಾ ವದನ್ತಿ, ನಕ್ಖತ್ತರಾಜಾರಿವ ತಾರಕಾನಂ;
ಸೀಲಂ ಸೀರೀ ಚಾಪಿ ಸತಞ್ಚ ಧಮ್ಮೋ [ಧಮ್ಮಾ (ಪೀ.)], ಅನ್ವಾಯಿಕಾ ಪಞ್ಞವತೋ ಭವನ್ತಿ’’.
‘‘ಸುಭಾಸಿತಂ ತೇ ಅನುಮೋದಿಯಾನ, ಅಞ್ಞಂ ತಂ ಪುಚ್ಛಾಮಿ ತದಿಙ್ಘ ಬ್ರೂಹಿ;
ಕಥಂಕರೋ ¶ ಕಿನ್ತಿಕರೋ ಕಿಮಾಚರಂ, ಕಿಂ ಸೇವಮಾನೋ ಲಭತೀಧ ಪಞ್ಞಂ;
ಪಞ್ಞಾಯ ದಾನಿಪ್ಪಟಿಪಂ [ದಾನಿ ಪಟಿಪದಂ (ಸೀ. ಸ್ಯಾ. ಪೀ.)] ವದೇಹಿ, ಕಥಂಕರೋ ಪಞ್ಞವಾ ಹೋತಿ ಮಚ್ಚೋ’’.
‘‘ಸೇವೇಥ ವುದ್ಧೇ ನಿಪುಣೇ ಬಹುಸ್ಸುತೇ, ಉಗ್ಗಾಹಕೋ ಚ ಪರಿಪುಚ್ಛಕೋ ಸಿಯಾ;
ಸುಣೇಯ್ಯ ಸಕ್ಕಚ್ಚ ಸುಭಾಸಿತಾನಿ, ಏವಂಕರೋ ಪಞ್ಞವಾ ಹೋತಿ ಮಚ್ಚೋ.
‘‘ ¶ ಪಞ್ಞವಾ ಕಾಮಗುಣೇ ಅವೇಕ್ಖತಿ, ಅನಿಚ್ಚತೋ ದುಕ್ಖತೋ ರೋಗತೋ ಚ;
ಏವಂ ವಿಪಸ್ಸೀ ಪಜಹಾತಿ ಛನ್ದಂ, ದುಕ್ಖೇಸು ಕಾಮೇಸು ಮಹಬ್ಭಯೇಸು.
‘‘ಸ ವೀತರಾಗೋ ಪವಿನೇಯ್ಯ ದೋಸಂ, ಮೇತ್ತಂ [ಮೇತ್ತ (ಸ್ಯಾ. ಕ.)] ಚಿತ್ತಂ ಭಾವಯೇ [ಭಾವೇಯ್ಯ (ಸೀ. ಸ್ಯಾ. ಕ.)] ಅಪ್ಪಮಾಣಂ;
ಸಬ್ಬೇಸು ಭೂತೇಸು ನಿಧಾಯ ದಣ್ಡಂ, ಅನಿನ್ದಿತೋ ಬ್ರಹ್ಮಮುಪೇತಿ ಠಾನಂ’’.
‘‘ಮಹತ್ಥಿಯಂ [ಮಹಿದ್ಧಿಯಂ (ಸೀ. ಸ್ಯಾ. ಪೀ.)] ಆಗಮನಂ ಅಹೋಸಿ, ತವಮಟ್ಠಕಾ [ಮಟ್ಠಕ (ಸೀ. ಸ್ಯಾ. ಕ.)] ಭೀಮರಥಸ್ಸ ಚಾಪಿ;
ಕಾಲಿಙ್ಗರಾಜಸ್ಸ ಚ ಉಗ್ಗತಸ್ಸ, ಸಬ್ಬೇಸ ¶ ವೋ ಕಾಮರಾಗೋ ಪಹೀನೋ’’.
‘‘ಏವಮೇತಂ ಪರಚಿತ್ತವೇದಿ, ಸಬ್ಬೇಸ ನೋ ಕಾಮರಾಗೋ ಪಹೀನೋ;
ಕರೋಹಿ ಓಕಾಸಮನುಗ್ಗಹಾಯ, ಯಥಾ ಗತಿಂ ತೇ ಅಭಿಸಮ್ಭವೇಮ’’.
‘‘ಕರೋಮಿ ಓಕಾಸಮನುಗ್ಗಹಾಯ, ತಥಾ ಹಿ ವೋ ಕಾಮರಾಗೋ ಪಹೀನೋ;
ಫರಾಥ ಕಾಯಂ ವಿಪುಲಾಯ ಪೀತಿಯಾ, ಯಥಾ ಗತಿಂ ಮೇ ಅಭಿಸಮ್ಭವೇಥ’’.
‘‘ಸಬ್ಬಂ ¶ ಕರಿಸ್ಸಾಮ ತವಾನುಸಾಸನಿಂ, ಯಂ ಯಂ ತುವಂ ವಕ್ಖಸಿ ಭೂರಿಪಞ್ಞ;
ಫರಾಮ ಕಾಯಂ ವಿಪುಲಾಯ ಪೀತಿಯಾ, ಯಥಾ ಗತಿಂ ತೇ ಅಭಿಸಮ್ಭವೇಮ’’.
‘‘ಕತಾಯ [ಕತಾಯಂ (ಸೀ. ಪೀ.)] ವಚ್ಛಸ್ಸ ಕಿಸಸ್ಸ ಪೂಜಾ, ಗಚ್ಛನ್ತು ಭೋನ್ತೋ ಇಸಯೋ ಸಾಧುರೂಪಾ;
ಝಾನೇ ರತಾ ಹೋಥ ಸದಾ ಸಮಾಹಿತಾ, ಏಸಾ ರತೀ ಪಬ್ಬಜಿತಸ್ಸ ಸೇಟ್ಠಾ’’.
‘‘ಸುತ್ವಾನ ¶ ಗಾಥಾ ಪರಮತ್ಥಸಂಹಿತಾ, ಸುಭಾಸಿತಾ ಇಸಿನಾ ಪಣ್ಡಿತೇನ;
ತೇ ವೇದಜಾತಾ ಅನುಮೋದಮಾನಾ, ಪಕ್ಕಾಮು ¶ [ಪಕ್ಕಮು (ಕ.)] ದೇವಾ ದೇವಪುರಂ ಯಸಸ್ಸಿನೋ.
‘‘ಗಾಥಾ ಇಮಾ ಅತ್ಥವತೀ ಸುಬ್ಯಞ್ಜನಾ, ಸುಭಾಸಿತಾ ಇಸಿನಾ ಪಣ್ಡಿತೇನ;
ಯೋ ಕೋಚಿಮಾ ಅಟ್ಠಿಕತ್ವಾ [ಅಟ್ಠಿಂ ಕತ್ವಾ (ಕ.)] ಸುಣೇಯ್ಯ, ಲಭೇಥ ಪುಬ್ಬಾಪರಿಯಂ ವಿಸೇಸಂ;
ಲದ್ಧಾನ ಪುಬ್ಬಾಪರಿಯಂ ವಿಸೇಸಂ, ಅದಸ್ಸನಂ ಮಚ್ಚುರಾಜಸ್ಸ ಗಚ್ಛೇ’’.
‘‘ಸಾಲಿಸ್ಸರೋ ಸಾರಿಪುತ್ತೋ, ಮೇಣ್ಡಿಸ್ಸರೋ ಚ ಕಸ್ಸಪೋ;
ಪಬ್ಬತೋ ಅನುರುದ್ಧೋ ಚ, ಕಚ್ಚಾಯನೋ ಚ ದೇವಲೋ [ದೇವಿಲೋ (ಸ್ಯಾ. ಕ.)].
‘‘ಅನುಸಿಸ್ಸೋ ಚ ಆನನ್ದೋ, ಕಿಸವಚ್ಛೋ ಚ ಕೋಲಿತೋ;
ನಾರದೋ ಉದಾಯೀ ಥೇರೋ [ನಾರದೋ ಪುಣ್ಣೋ ಮನ್ತಾನೀಪುತ್ತೋ (ಸೀ.)], ಪರಿಸಾ ಬುದ್ಧಪರಿಸಾ;
ಸರಭಙ್ಗೋ ಲೋಕನಾಥೋ, ಏವಂ ಧಾರೇಥ ಜಾತಕ’’ನ್ತಿ.
ಸರಭಙ್ಗಜಾತಕಂ ದುತಿಯಂ.
೫೨೩. ಅಲಮ್ಬುಸಾಜಾತಕಂ (೩)
‘‘ಅಥ ಬ್ರವಿ ಬ್ರಹಾ ಇನ್ದೋ, ವತ್ರಭೂ ಜಯತಂ ಪಿತಾ;
ದೇವಕಞ್ಞಂ ಪರಾಭೇತ್ವಾ, ಸುಧಮ್ಮಾಯಂ ಅಲಮ್ಬುಸಂ.
‘‘ಮಿಸ್ಸೇ ದೇವಾ ತಂ ಯಾಚನ್ತಿ, ತಾವತಿಂಸಾ ಸಇನ್ದಕಾ;
ಇಸಿಪ್ಪಲೋಭನೇ ¶ [ಇಸಿಪಲೋಭಿಕೇ (ಸೀ. ಸ್ಯಾ.), ಇಸಿಂ ಪಲೋಭಿಕೇ (ಪೀ.)] ಗಚ್ಛ, ಇಸಿಸಿಙ್ಗಂ ಅಲಮ್ಬುಸೇ.
‘‘ಪುರಾಯಂ ಅಮ್ಹೇ ಅಚ್ಚೇತಿ [ನಾಚ್ಚೇತಿ (ಸ್ಯಾ. ಕ.)], ವತ್ತವಾ [ವತವಾ (ಸೀ. ಸ್ಯಾ. ಪೀ.)] ಬ್ರಹ್ಮಚರಿಯವಾ;
ನಿಬ್ಬಾನಾಭಿರತೋ ವುದ್ಧೋ [ವದ್ಧೋ (ಪೀ.), ಬುದ್ಧೋ (ಸ್ಯಾ. ಕ.)], ತಸ್ಸ ಮಗ್ಗಾನಿ ಆವರ’’.
‘‘ದೇವರಾಜ ಕಿಮೇವ ತ್ವಂ, ಮಮೇವ ತುವಂ ಸಿಕ್ಖಸಿ;
ಇಸಿಪ್ಪಲೋಭನೇ [ಇಸಿಪಲೋಭಿಕೇ (ಸೀ. ಸ್ಯಾ.), ಇಸಿಂ ಪಲೋಭಿಕೇ (ಪೀ.)] ಗಚ್ಛ, ಸನ್ತಿ ಅಞ್ಞಾಪಿ ಅಚ್ಛರಾ.
‘‘ಮಾದಿಸಿಯೋ ¶ ಪವರಾ ಚೇವ, ಅಸೋಕೇ ನನ್ದನೇ ವನೇ;
ತಾಸಮ್ಪಿ ಹೋತು ಪರಿಯಾಯೋ, ತಾಪಿ ಯನ್ತು ಪಲೋಭನಾ’’ [ಪಲೋಭಿಕಾ (ಸ್ಯಾ. ಪೀ.)].
‘‘ಅದ್ಧಾ ¶ ಹಿ ಸಚ್ಚಂ ಭಣಸಿ, ಸನ್ತಿ ಅಞ್ಞಾಪಿ ಅಚ್ಛರಾ;
ತಾದಿಸಿಯೋ ಪವರಾ ಚೇವ, ಅಸೋಕೇ ನನ್ದನೇ ವನೇ.
‘‘ನ ತಾ ಏವಂ ಪಜಾನನ್ತಿ, ಪಾರಿಚರಿಯಂ ಪುಮಂ ಗತಾ;
ಯಾದಿಸಂ ತ್ವಂ ಪಜಾನಾಸಿ, ನಾರಿ ಸಬ್ಬಙ್ಗಸೋಭನೇ.
‘‘ತ್ವಮೇವ ಗಚ್ಛ ಕಲ್ಯಾಣಿ, ಇತ್ಥೀನಂ ಪವರಾ ಚಸಿ;
ತವೇವ ವಣ್ಣರೂಪೇನ, ಸವಸಮಾನಯಿಸ್ಸಸಿ’’ [ವಸಮಾನಾಪಯಿಸ್ಸಸಿ (ಸ್ಯಾ.), ವಸಮಾನಾಮಯಿಸ್ಸಸಿ (ಪೀ.), ತಂ ವಸಮಾನಯಿಸ್ಸಸಿ (ಕ.)].
‘‘ನ ವಾಹಂ ನ ಗಮಿಸ್ಸಾಮಿ, ದೇವರಾಜೇನ ಪೇಸಿತಾ;
ವಿಭೇಮಿ ಚೇತಂ ಆಸಾದುಂ, ಉಗ್ಗತೇಜೋ ಹಿ ಬ್ರಾಹ್ಮಣೋ.
‘‘ಅನೇಕೇ ನಿರಯಂ ಪತ್ತಾ, ಇಸಿಮಾಸಾದಿಯಾ ಜನಾ;
ಆಪನ್ನಾ ಮೋಹಸಂಸಾರಂ, ತಸ್ಮಾ ಲೋಮಾನಿ ಹಂಸಯೇ’’.
‘‘ಇದಂ ವತ್ವಾನ ಪಕ್ಕಾಮಿ, ಅಚ್ಛರಾ ಕಾಮವಣ್ಣಿನೀ;
ಮಿಸ್ಸಾ ಮಿಸ್ಸಿತು [ಮಿಸ್ಸೇತು (ಸೀ. ಸ್ಯಾ. ಪೀ.)] ಮಿಚ್ಛನ್ತೀ, ಇಸಿಸಿಙ್ಗಂ ಅಲಮ್ಬುಸಾ.
‘‘ಸಾ ಚ ತಂ ವನಮೋಗಯ್ಹ, ಇಸಿಸಿಙ್ಗೇನ ರಕ್ಖಿತಂ;
ಬಿಮ್ಬಜಾಲಕಸಞ್ಛನ್ನಂ ¶ , ಸಮನ್ತಾ ಅಡ್ಢಯೋಜನಂ.
‘‘ಪಾತೋವ ಪಾತರಾಸಮ್ಹಿ, ಉದಣ್ಹಸಮಯಂ [ಉದಯಸಮಯಂ (ಸ್ಯಾ.), ಉದನ್ತಸಮಯಂ (ಕ.)] ಪತಿ;
ಅಗ್ಗಿಟ್ಠಂ ಪರಿಮಜ್ಜನ್ತಂ, ಇಸಿಸಿಙ್ಗಂ ಉಪಾಗಮಿ’’.
‘‘ಕಾ ನು ವಿಜ್ಜುರಿವಾಭಾಸಿ, ಓಸಧೀ ವಿಯ ತಾರಕಾ;
ವಿಚಿತ್ತಹತ್ಥಾಭರಣಾ [ವಿಚಿತ್ತವತ್ಥಾಭರಣಾ (ಸೀ.)], ಆಮುತ್ತಮಣಿಕುಣ್ಡಲಾ [ಆಮುಕ್ಕಮಣಿಕುಣ್ಡಲಾ (?)].
‘‘ಆದಿಚ್ಚವಣ್ಣಸಙ್ಕಾಸಾ, ಹೇಮಚನ್ದನಗನ್ಧಿನೀ;
ಸಞ್ಞತೂರೂ ಮಹಾಮಾಯಾ, ಕುಮಾರೀ ಚಾರುದಸ್ಸನಾ.
‘‘ವಿಲಗ್ಗಾ [ವಿಲಾಕಾ (ಸೀ. ಸ್ಯಾ. ಪೀ.)] ಮುದುಕಾ ಸುದ್ಧಾ, ಪಾದಾ ತೇ ಸುಪ್ಪತಿಟ್ಠಿತಾ;
ಗಮನಾ ಕಾಮನೀಯಾ [ಕಮನಾ ಕಮನೀಯಾ (ಸೀ. ಪೀ.)] ತೇ, ಹರನ್ತಿಯೇವ ಮೇ ಮನೋ.
‘‘ಅನುಪುಬ್ಬಾವ ¶ ತೇ ಊರೂ, ನಾಗನಾಸಸಮೂಪಮಾ;
ವಿಮಟ್ಠಾ ತುಯ್ಹಂ ಸುಸ್ಸೋಣೀ, ಅಕ್ಖಸ್ಸ ಫಲಕಂ ಯಥಾ.
‘‘ಉಪ್ಪಲಸ್ಸೇವ ಕಿಞ್ಜಕ್ಖಾ, ನಾಭಿ ತೇ ಸಾಧು ಸಣ್ಠಿತಾ;
ಪೂರಾ ಕಣ್ಹಞ್ಜನಸ್ಸೇವ, ದೂರತೋ ಪಟಿದಿಸ್ಸತಿ.
‘‘ದುವಿಧಾ ಜಾತಾ ಉರಜಾ, ಅವಣ್ಟಾ ಸಾಧು ಪಚ್ಚುದಾ;
ಪಯೋಧರಾ ಅಪತಿತಾ [ಅಪ್ಪತೀತಾ (ಸೀ. ಸ್ಯಾ. ಪೀ.)], ಅಡ್ಢಲಾಬುಸಮಾ ಥನಾ.
‘‘ದೀಘಾ ಕಮ್ಬುತಲಾಭಾಸಾ, ಗೀವಾ ಏಣೇಯ್ಯಕಾ ಯಥಾ;
ಪಣ್ಡರಾವರಣಾ ವಗ್ಗು, ಚತುತ್ಥಮನಸನ್ನಿಭಾ.
‘‘ಉದ್ಧಗ್ಗಾ ¶ ಚ ಅಧಗ್ಗಾ ಚ, ದುಮಗ್ಗಪರಿಮಜ್ಜಿತಾ;
ದುವಿಜಾ ನೇಲಸಮ್ಭೂತಾ, ದನ್ತಾ ತವ ಸುದಸ್ಸನಾ.
‘‘ಅಪಣ್ಡರಾ ಲೋಹಿತನ್ತಾ, ಜಿಞ್ಜೂಕ [ಜಿಞ್ಜುಕ (ಸೀ. ಸ್ಯಾ. ಪೀ.)] ಫಲಸನ್ನಿಭಾ;
ಆಯತಾ ¶ ಚ ವಿಸಾಲಾ ಚ, ನೇತ್ತಾ ತವ ಸುದಸ್ಸನಾ.
‘‘ನಾತಿದೀಘಾ ಸುಸಮ್ಮಟ್ಠಾ, ಕನಕಬ್ಯಾ [ಕನಕಗ್ಗಾ (ಪೀ.)] ಸಮೋಚಿತಾ;
ಉತ್ತಮಙ್ಗರುಹಾ ತುಯ್ಹಂ, ಕೇಸಾ ಚನ್ದನಗನ್ಧಿಕಾ.
‘‘ಯಾವತಾ ಕಸಿಗೋರಕ್ಖಾ, ವಾಣಿಜಾನಂ [ವಣಿಜಾನಂ (ಪೀ.)] ಚ ಯಾ ಗತಿ;
ಇಸೀನಞ್ಚ ಪರಕ್ಕನ್ತಂ, ಸಞ್ಞತಾನಂ ತಪಸ್ಸಿನಂ.
‘‘ನ ತೇ ಸಮಸಮಂ ಪಸ್ಸೇ, ಅಸ್ಮಿಂ ಪಥವಿ [ಪುಥುವಿ (ಪೀ.)] ಮಣ್ಡಲೇ;
ಕೋ ವಾ ತ್ವಂ ಕಸ್ಸ ವಾ ಪುತ್ತೋ, ಕಥಂ ಜಾನೇಮು ತಂ ಮಯಂ’’.
‘‘ನ ಪಞ್ಹಕಾಲೋ ಭದ್ದನ್ತೇ, ಕಸ್ಸಪೇವಂ ಗತೇ ಸತಿ;
ಏಹಿ ಸಮ್ಮ ರಮಿಸ್ಸಾಮ, ಉಭೋ ಅಸ್ಮಾಕಮಸ್ಸಮೇ;
ಏಹಿ ತಂ ಉಪಗೂಹಿಸ್ಸಂ [ಉಪಗುಯ್ಹಿಸ್ಸಂ (ಸ್ಯಾ.)], ರತೀನಂ ಕುಸಲೋ ಭವ’’.
‘‘ಇದಂ ವತ್ವಾನ ಪಕ್ಕಾಮಿ, ಅಚ್ಛರಾ ಕಾಮವಣ್ಣಿನೀ;
ಮಿಸ್ಸಾ ಮಿಸ್ಸಿತುಮಿಚ್ಛನ್ತೀ, ಇಸಿಸಿಙ್ಗಂ ಅಲಮ್ಬುಸಾ’’.
‘‘ಸೋ ಚ ವೇಗೇನ ನಿಕ್ಖಮ್ಮ, ಛೇತ್ವಾ ದನ್ಧಪರಕ್ಕಮಂ [ದನ್ಧಪದಕ್ಕಮಂ (ಕ.)];
ತಮುತ್ತಮಾಸು ವೇಣೀಸು, ಅಜ್ಝಪ್ಪತ್ತೋ [ಅಜ್ಝಾಪತ್ತೋ (ಪೀ.)] ಪರಾಮಸಿ;
‘‘ತಮುದಾವತ್ತ ¶ ಕಲ್ಯಾಣೀ, ಪಲಿಸ್ಸಜಿ ಸುಸೋಭನಾ [ಸುಸೋಭಣೀ (ಸ್ಯಾ. ಕ.)];
ಚವಿತಮ್ಹಿ [ಚವಿ ತಮ್ಹಾ (ಸ್ಯಾ. ಕ.)] ಬ್ರಹ್ಮಚರಿಯಾ, ಯಥಾ ತಂ ಅಥ ತೋಸಿತಾ.
‘‘ಮನಸಾ ಅಗಮಾ ಇನ್ದಂ, ವಸನ್ತಂ ನನ್ದನೇ ವನೇ;
ತಸ್ಸಾ ಸಙ್ಕಪ್ಪಮಞ್ಞಾಯ, ಮಘವಾ ದೇವಕುಞ್ಜರೋ.
‘‘ಪಲ್ಲಙ್ಕಂ ಪಹಿಣೀ ಖಿಪ್ಪಂ, ಸೋವಣ್ಣಂ ಸೋಪವಾಹನಂ;
ಸಉತ್ತರಚ್ಛದಪಞ್ಞಾಸಂ, ಸಹಸ್ಸಪಟಿಯತ್ಥತಂ [ಪಟಿಕತ್ಥತಂ (ಸೀ.)].
‘‘ತಮೇನಂ ¶ ತತ್ಥ ಧಾರೇಸಿ, ಉರೇ ಕತ್ವಾನ ಸೋಭನಾ;
ಯಥಾ ಏಕಮುಹುತ್ತಂವ, ತೀಣಿ ವಸ್ಸಾನಿ ಧಾರಯಿ.
‘‘ವಿಮದೋ ತೀಹಿ ವಸ್ಸೇಹಿ, ಪಬುಜ್ಝಿತ್ವಾನ ಬ್ರಾಹ್ಮಣೋ;
ಅದ್ದಸಾಸಿ ಹರಿತ [ಹರೀ (ಪೀ.)] ರುಕ್ಖೇ, ಸಮನ್ತಾ ಅಗ್ಗಿಯಾಯನಂ.
‘‘ನವಪತ್ತವನಂ ಫುಲ್ಲಂ, ಕೋಕಿಲಗ್ಗಣಘೋಸಿತಂ;
ಸಮನ್ತಾ ಪವಿಲೋಕೇತ್ವಾ, ರುದಂ ಅಸ್ಸೂನಿ ವತ್ತಯಿ.
‘‘ನ ¶ ಜುಹೇ ನ ಜಪೇ [ಜಪ್ಪೇ (ಕ.)] ಮನ್ತೇ, ಅಗ್ಗಿಹುತ್ತಂ ಪಹಾಪಿತಂ;
ಕೋ ನು ಮೇ ಪಾರಿಚರಿಯಾಯ, ಪುಬ್ಬೇ ಚಿತ್ತಂ ಪಲೋಭಯಿ.
‘‘ಅರಞ್ಞೇ ಮೇ ವಿಹರತೋ, ಯೋ ಮೇ ತೇಜಾ ಹ ಸಮ್ಭುತಂ [ಸಮ್ಭತಂ (ಪೀ.)];
ನಾನಾರತ್ನಪರಿಪೂರಂ, ನಾವಂವ ಗಣ್ಹಿ ಅಣ್ಣವೇ’’.
‘‘ಅಹಂ ತೇ ಪಾರಿಚರಿಯಾಯ, ದೇವರಾಜೇನ ಪೇಸಿತಾ;
ಅವಧಿಂ [ಅವಧೀ (ಸ್ಯಾ. ಪೀ. ಕ.)] ಚಿತ್ತಂ ಚಿತ್ತೇನ, ಪಮಾದೋ [ಪಮಾದಾ (ಸ್ಯಾ. ಪೀ.)] ತ್ವಂ ನ ಬುಜ್ಝಸಿ’’.
‘‘ಇಮಾನಿ ಕಿರ ಮಂ ತಾತೋ, ಕಸ್ಸಪೋ ಅನುಸಾಸತಿ;
ಕಮಲಾಸದಿಸಿತ್ಥಿಯೋ [ಸರಿಸಿತ್ಥಿಯೋ (ಸ್ಯಾ. ಪೀ.)], ತಾಯೋ ಬುಜ್ಝೇಸಿ ಮಾಣವ.
‘‘ಉರೇ ಗಣ್ಡಾಯೋ ಬುಜ್ಝೇಸಿ, ತಾಯೋ ಬುಜ್ಝೇಸಿ ಮಾಣವ;
ಇಚ್ಚಾನುಸಾಸಿ ಮಂ ತಾತೋ, ಯಥಾ ಮಂ ಅನುಕಮ್ಪಕೋ.
‘‘ತಸ್ಸಾಹಂ ವಚನಂ ನಾಕಂ, ಪಿತು ವುದ್ಧಸ್ಸ ಸಾಸನಂ;
ಅರಞ್ಞೇ ನಿಮ್ಮನುಸ್ಸಮ್ಹಿ, ಸ್ವಜ್ಜ ಝಾಯಾಮಿ [ಸ್ವಾಜ್ಜಜ್ಝಾಯಾಮಿ (ಸೀ. ಪೀ.)] ಏಕಕೋ.
‘‘ಸೋಹಂ ¶ ತಥಾ ಕರಿಸ್ಸಾಮಿ, ಧಿರತ್ಥು ಜೀವಿತೇನ ಮೇ;
ಪುನ ವಾ ತಾದಿಸೋ ಹೇಸ್ಸಂ, ಮರಣಂ ಮೇ ಭವಿಸ್ಸತಿ’’.
‘‘ತಸ್ಸ ¶ ತೇಜಂ [ತೇಜಞ್ಚ (ಸೀ. ಪೀ.)] ವೀರಿಯಞ್ಚ, ಧಿತಿಂ [ಧಿತಿಞ್ಚ (ಪೀ.)] ಞತ್ವಾ ಅವಟ್ಠಿತಂ [ಸುವಡ್ಢಿತಂ (ಸೀ.)];
ಸಿರಸಾ ಅಗ್ಗಹೀ ಪಾದೇ, ಇಸಿಸಿಙ್ಗಂ ಅಲಮ್ಬುಸಾ.
‘‘ಮಾ ಮೇ ಕುಜ್ಝ [ಕುಜ್ಝಿ (ಪೀ.)] ಮಹಾವೀರ, ಮಾ ಮೇ ಕುಜ್ಝ [ಕುಜ್ಝಿ (ಪೀ.)] ಮಹಾಇಸೇ;
ಮಹಾ ಅತ್ಥೋ ಮಯಾ ಚಿಣ್ಣೋ, ತಿದಸಾನಂ ಯಸಸ್ಸಿನಂ;
ತಯಾ ಸಂಕಮ್ಪಿತಂ ಆಸಿ, ಸಬ್ಬಂ ದೇವಪುರಂ ತದಾ’’.
‘‘ತಾವತಿಂಸಾ ಚ ಯೇ ದೇವಾ, ತಿದಸಾನಞ್ಚ ವಾಸವೋ;
ತ್ವಞ್ಚ ಭದ್ದೇ ಸುಖೀ ಹೋಹಿ, ಗಚ್ಛ ಕಞ್ಞೇ ಯಥಾಸುಖಂ’’.
‘‘ತಸ್ಸ ಪಾದೇ ಗಹೇತ್ವಾನ, ಕತ್ವಾ ಚ ನಂ ಪದಕ್ಖಿಣಂ;
ಅಞ್ಜಲಿಂ ಪಗ್ಗಹೇತ್ವಾನ, ತಮ್ಹಾ ಠಾನಾ ಅಪಕ್ಕಮಿ.
‘‘ಯೋ ಚ ತಸ್ಸಾಸಿ ಪಲ್ಲಙ್ಕೋ, ಸೋವಣ್ಣೋ ಸೋಪವಾಹನೋ;
ಸಉತ್ತರಚ್ಛದಪಞ್ಞಾಸೋ, ಸಹಸ್ಸಪಟಿಯತ್ಥತೋ;
ತಮೇವ ಪಲ್ಲಙ್ಕಮಾರುಯ್ಹ, ಅಗಾ ದೇವಾನ ಸನ್ತಿಕೇ.
‘‘ತಮೋಕ್ಕಮಿವ ಆಯನ್ತಿಂ, ಜಲನ್ತಿಂ ವಿಜ್ಜುತಂ ಯಥಾ;
ಪತೀತೋ ಸುಮನೋ ವಿತ್ತೋ, ದೇವಿನ್ದೋ ಅದದಾ ವರಂ’’.
‘‘ವರಞ್ಚೇ ¶ ಮೇ ಅದೋ ಸಕ್ಕ, ಸಬ್ಬಭೂತಾನಮಿಸ್ಸರ;
ನಿಸಿಪ್ಪಲೋಭಿಕಾ [ನ ಇಸಿಪಲೋಭಿಕಾ (ಸ್ಯಾ.), ನ ಇಸಿಪಲೋಭಿಯಂ (ಪೀ.)] ಗಚ್ಛೇ, ಏತಂ ಸಕ್ಕ ವರಂ ವರೇ’’ತಿ.
ಅಲಮ್ಬುಸಾಜಾತಕಂ ತತಿಯಂ.
೫೨೪. ಸಙ್ಖಪಾಲಜಾತಕಂ (೪)
‘‘ಅರಿಯಾವಕಾಸೋಸಿ ಪಸನ್ನನೇತ್ತೋ, ಮಞ್ಞೇ ¶ ಭವಂ ಪಬ್ಬಜಿತೋ ಕುಲಮ್ಹಾ;
ಕಥಂ ನು ವಿತ್ತಾನಿ ಪಹಾಯ ಭೋಗೇ, ಪಬ್ಬಜಿ ನಿಕ್ಖಮ್ಮ ಘರಾ ಸಪಞ್ಞ’’ [ಸಪಞ್ಞೋ (ಸ್ಯಾ.), ಸಪಞ್ಞಾ (ಪೀ.)].
‘‘ಸಯಂ ¶ ವಿಮಾನಂ ನರದೇವ ದಿಸ್ವಾ, ಮಹಾನುಭಾವಸ್ಸ ಮಹೋರಗಸ್ಸ;
ದಿಸ್ವಾನ ಪುಞ್ಞಾನ ಮಹಾವಿಪಾಕಂ, ಸದ್ಧಾಯಹಂ ಪಬ್ಬಜಿತೋಮ್ಹಿ ರಾಜ’’.
‘‘ನ ಕಾಮಕಾಮಾ ನ ಭಯಾ ನ ದೋಸಾ, ವಾಚಂ ಮುಸಾ ಪಬ್ಬಜಿತಾ ಭಣನ್ತಿ;
ಅಕ್ಖಾಹಿ ಮೇ ಪುಚ್ಛಿತೋ ಏತಮತ್ಥಂ, ಸುತ್ವಾನ ಮೇ ಜಾಯಿಹಿತಿಪ್ಪಸಾದೋ’’.
‘‘ವಾಣಿಜ್ಜ [ವಣಿಜ್ಜ (ಪೀ.)] ರಟ್ಠಾಧಿಪ ಗಚ್ಛಮಾನೋ, ಪಥೇ ಅದ್ದಸಾಸಿಮ್ಹಿ ಭೋಜಪುತ್ತೇ [ಮಿಲಾಚಪುತ್ತೇ (ಸೀ. ಪೀ.)];
ಪವದ್ಧಕಾಯಂ ಉರಗಂ ಮಹನ್ತಂ, ಆದಾಯ ಗಚ್ಛನ್ತೇ ಪಮೋದಮಾನೇ’’.
‘‘ಸೋಹಂ ಸಮಾಗಮ್ಮ ಜನಿನ್ದ ತೇಹಿ, ಪಹಟ್ಠಲೋಮೋ ಅವಚಮ್ಹಿ ಭೀತೋ;
ಕುಹಿಂ ಅಯಂ ನೀಯತಿ [ನಿಯ್ಯತಿ (ಕ.)] ಭೀಮಕಾಯೋ, ನಾಗೇನ ಕಿಂ ಕಾಹಥ ಭೋಜಪುತ್ತಾ.
‘‘ನಾಗೋ ಅಯಂ ನೀಯತಿ ಭೋಜನತ್ಥಾ [ಭೋಜನತ್ಥಂ (ಸೀ. ಸ್ಯಾ. ಪೀ.)], ಪವದ್ಧಕಾಯೋ ¶ ಉರಗೋ ಮಹನ್ತೋ;
ಸಾದುಞ್ಚ ಥೂಲಞ್ಚ ಮುದುಞ್ಚ ಮಂಸಂ, ನ ತ್ವಂ ರಸಞ್ಞಾಸಿ ವಿದೇಹಪುತ್ತ.
‘‘ಇತೋ ಮಯಂ ಗನ್ತ್ವಾ ಸಕಂ ನಿಕೇತಂ [ನಿಕೇತನಂ (ಪೀ.)], ಆದಾಯ ಸತ್ಥಾನಿ ವಿಕೋಪಯಿತ್ವಾ;
ಮಂಸಾನಿ ಭೋಕ್ಖಾಮ [ಭಕ್ಖಾಮ (ಸ್ಯಾ.)] ಪಮೋದಮಾನಾ, ಮಯಞ್ಹಿ ವೇ ಸತ್ತವೋ ಪನ್ನಗಾನಂ.
‘‘ಸಚೇ ಅಯಂ ನೀಯತಿ ಭೋಜನತ್ಥಾ, ಪವದ್ಧಕಾಯೋ ಉರಗೋ ಮಹನ್ತೋ;
ದದಾಮಿ ವೋ ಬಲಿಬದ್ದಾನಿ [ಬಲಿವದ್ದಾನಿ (ಪೀ.)] ಸೋಳಸ, ನಾಗಂ ಇಮಂ ಮುಞ್ಚಥ ಬನ್ಧನಸ್ಮಾ.
‘‘ಅದ್ಧಾ ¶ ಹಿ ನೋ ಭಕ್ಖೋ ಅಯಂ ಮನಾಪೋ, ಬಹೂ ಚ ನೋ ಉರಗಾ ಭುತ್ತಪುಬ್ಬಾ [ಬಹುಂ ಚ ನೋ ಉರಗೋ ಭುತ್ತಪುಬ್ಬೋ (ಕ.)];
ಕರೋಮ ತೇ ತಂ ವಚನಂ ಅಳಾರ [ಆಳಾರ (ಕ.) ಏವಮುಪರಿಪಿ], ಮಿತ್ತಞ್ಚ ನೋ ಹೋಹಿ ವಿದೇಹಪುತ್ತ.
‘‘ತದಸ್ಸು ತೇ ಬನ್ಧನಾ ಮೋಚಯಿಂಸು, ಯಂ ನತ್ಥುತೋ ಪಟಿಮೋಕ್ಕಸ್ಸ ಪಾಸೇ;
ಮುತ್ತೋ ಚ ಸೋ ಬನ್ಧನಾ ನಾಗರಾಜಾ, ಪಕ್ಕಾಮಿ ಪಾಚೀನಮುಖೋ ಮುಹುತ್ತಂ.
‘‘ಗನ್ತ್ವಾನ ಪಾಚೀನಮುಖೋ ಮುಹುತ್ತಂ, ಪುಣ್ಣೇಹಿ ¶ ನೇತ್ತೇಹಿ ಪಲೋಕಯೀ ಮಂ;
ತದಾಸ್ಸಹಂ ಪಿಟ್ಠಿತೋ ಅನ್ವಗಚ್ಛಿಂ, ದಸಙ್ಗುಲಿಂ ಅಞ್ಜಲಿಂ ಪಗ್ಗಹೇತ್ವಾ.
‘‘ಗಚ್ಛೇವ ¶ ಖೋ ತ್ವಂ ತರಮಾನರೂಪೋ, ಮಾ ತಂ ಅಮಿತ್ತಾ ಪುನರಗ್ಗಹೇಸುಂ;
ದುಕ್ಖೋ ಹಿ ಲುದ್ದೇಹಿ ಪುನಾ ಸಮಾಗಮೋ, ಅದಸ್ಸನಂ ಭೋಜಪುತ್ತಾನ ಗಚ್ಛ.
‘‘ಅಗಮಾಸಿ ಸೋ ರಹದಂ ವಿಪ್ಪಸನ್ನಂ, ನೀಲೋಭಾಸಂ ರಮಣೀಯಂ ಸುತಿತ್ಥಂ;
ಸಮೋತತಂ [ಸಮೋನತಂ (ಸ್ಯಾ. ಕ.)] ಜಮ್ಬುಹಿ ವೇತಸಾಹಿ, ಪಾವೇಕ್ಖಿ ನಿತ್ತಿಣ್ಣಭಯೋ ಪತೀತೋ.
‘‘ಸೋ ತಂ ಪವಿಸ್ಸ ನ ಚಿರಸ್ಸ ನಾಗೋ, ದಿಬ್ಬೇನ ಮೇ ಪಾತುರಹುಂ ಜನಿನ್ದ;
ಉಪಟ್ಠಹೀ ಮಂ ಪಿತರಂವ ಪುತ್ತೋ, ಹದಯಙ್ಗಮಂ ಕಣ್ಣಸುಖಂ ಭಣನ್ತೋ.
‘‘ತ್ವಂ ¶ ಮೇಸಿ ಮಾತಾ ಚ ಪಿತಾ [ಪಿತಾ ಚ (ಪೀ.)] ಅಳಾರ, ಅಬ್ಭನ್ತರೋ ಪಾಣದದೋ ಸಹಾಯೋ;
ಸಕಞ್ಚ ಇದ್ಧಿಂ ಪಟಿಲಾಭಕೋಸ್ಮಿ [ಪಟಿಲಾಭಿತೋಸ್ಮಿ (ಪೀ.)], ಅಳಾರ ಪಸ್ಸ ಮೇ ನಿವೇಸನಾನಿ;
ಪಹೂತಭಕ್ಖಂ ಬಹುಅನ್ನಪಾನಂ, ಮಸಕ್ಕಸಾರಂ ¶ ವಿಯ ವಾಸವಸ್ಸ’’.
‘‘ತಂ ಭೂಮಿಭಾಗೇಹಿ ಉಪೇತರೂಪಂ, ಅಸಕ್ಖರಾ ಚೇವ ಮುದೂ ಸುಭಾ ಚ;
ನೀಚತ್ತಿಣಾ [ನೀಚಾ ತಿಣಾ (ಸ್ಯಾ. ಪೀ.)] ಅಪ್ಪರಜಾ ಚ ಭೂಮಿ, ಪಾಸಾದಿಕಾ ಯತ್ಥ ಜಹನ್ತಿ ಸೋಕಂ.
‘‘ಅನಾವಕುಲಾ ವೇಳುರಿಯೂಪನೀಲಾ, ಚತುದ್ದಿಸಂ ಅಮ್ಬವನಂ ಸುರಮ್ಮಂ;
ಪಕ್ಕಾ ಚ ಪೇಸೀ ಚ ಫಲಾ ಸುಫುಲ್ಲಾ, ನಿಚ್ಚೋತುಕಾ ಧಾರಯನ್ತೀ ಫಲಾನಿ.
‘‘ತೇಸಂ ವನಾನಂ ನರದೇವ ಮಜ್ಝೇ, ನಿವೇಸನಂ ಭಸ್ಸರಸನ್ನಿಕಾಸಂ;
ರಜತಗ್ಗಳಂ ಸೋವಣ್ಣಮಯಂ ಉಳಾರಂ, ಓಭಾಸತೀ ವಿಜ್ಜುರಿವನ್ತಲಿಕ್ಖೇ.
‘‘ಮಣೀಮಯಾ ಸೋಣ್ಣಮಯಾ [ಸೋವಣ್ಣಮಯಾ (ಸೀ. ಸ್ಯಾ. ಪೀ.)] ಉಳಾರಾ, ಅನೇಕಚಿತ್ತಾ ಸತತಂ ಸುನಿಮ್ಮಿತಾ;
ಪರಿಪೂರಾ ಕಞ್ಞಾಹಿ ಅಲಙ್ಕತಾಭಿ, ಸುವಣ್ಣಕಾಯೂರಧರಾಹಿ ರಾಜ.
‘‘ಸೋ ಸಙ್ಖಪಾಲೋ ತರಮಾನರೂಪೋ, ಪಾಸಾದಮಾರುಯ್ಹ ಅನೋಮವಣ್ಣೋ;
ಸಹಸ್ಸಥಮ್ಭಂ ಅತುಲಾನುಭಾವಂ, ಯತ್ಥಸ್ಸ ¶ ಭರಿಯಾ ಮಹೇಸೀ ಅಹೋಸಿ.
‘‘ಏಕಾ ¶ ಚ ನಾರೀ ತರಮಾನರೂಪಾ, ಆದಾಯ ವೇಳುರಿಯಮಯಂ ಮಹಗ್ಘಂ;
ಸುಭಂ ಮಣಿಂ ಜಾತಿಮನ್ತೂಪಪನ್ನಂ, ಅಚೋದಿತಾ ಆಸನಮಬ್ಭಿಹಾಸಿ.
‘‘ತತೋ ಮಂ ಉರಗೋ ಹತ್ಥೇ ಗಹೇತ್ವಾ, ನಿಸೀದಯೀ ಪಾಮುಖಆಸನಸ್ಮಿಂ;
ಇದಮಾಸನಂ ಅತ್ರ ಭವಂ ನಿಸೀದತು, ಭವಞ್ಹಿ ಮೇ ಅಞ್ಞತರೋ ಗರೂನಂ.
‘‘ಅಞ್ಞಾ ಚ ನಾರೀ ತರಮಾನರೂಪಾ, ಆದಾಯ ವಾರಿಂ ಉಪಸಙ್ಕಮಿತ್ವಾ;
ಪಾದಾನಿ ಪಕ್ಖಾಲಯೀ ಮೇ ಜನಿನ್ದ, ಭರಿಯಾವ [ಭರಿಯಾ ಚ (ಪೀ.)] ಭತ್ತೂ ಪತಿನೋ ಪಿಯಸ್ಸ.
‘‘ಅಪರಾ ಚ ನಾರೀ ತರಮಾನರೂಪಾ, ಪಗ್ಗಯ್ಹ ಸೋವಣ್ಣಮಯಾಯ [ಸೋವಣ್ಣಮಯಾ (ಪೀ.)] ಪಾತಿಯಾ;
ಅನೇಕಸೂಪಂ ವಿವಿಧಂ ವಿಯಞ್ಜನಂ, ಉಪನಾಮಯೀ ಭತ್ತ ಮನುಞ್ಞರೂಪಂ.
‘‘ತುರಿಯೇಹಿ [ತೂರಿಯೇಹಿ (ಕ.)] ಮಂ ಭಾರತ ಭುತ್ತವನ್ತಂ, ಉಪಟ್ಠಹುಂ ಭತ್ತು ಮನೋ ವಿದಿತ್ವಾ;
ತತುತ್ತರಿಂ [ತದುತ್ತರಿಂ (ಕ.)] ಮಂ ನಿಪತೀ ಮಹನ್ತಂ, ದಿಬ್ಬೇಹಿ ¶ ಕಾಮೇಹಿ ಅನಪ್ಪಕೇಹಿ.
‘‘ಭರಿಯಾ ¶ ಮಮೇತಾ ತಿಸತಾ ಅಳಾರ, ಸಬ್ಬತ್ತಮಜ್ಝಾ ಪದುಮುತ್ತರಾಭಾ;
ಅಳಾರ ಏತಾಸ್ಸು ತೇ ಕಾಮಕಾರಾ, ದದಾಮಿ ತೇ ತಾ ಪರಿಚಾರಯಸ್ಸು.
‘‘ಸಂವಚ್ಛರಂ ದಿಬ್ಬರಸಾನುಭುತ್ವಾ, ತದಾಸ್ಸುಹಂ [ತದಸ್ಸಹಂ (ಪೀ.)] ಉತ್ತರಿಮಜ್ಝಭಾಸಿಂ [ಉತ್ತರಿ ಪಚ್ಚಭಾಸಿಂ (ಸೀ. ಸ್ಯಾ.), ಉತ್ತರಿಂ ಪಚ್ಚಭಾಸಿಂ (ಪೀ.)];
ನಾಗಸ್ಸಿದಂ ಕಿನ್ತಿ ಕಥಞ್ಚ ಲದ್ಧಂ, ಕಥಜ್ಝಗಮಾಸಿ ವಿಮಾನಸೇಟ್ಠಂ’’.
‘‘ಅಧಿಚ್ಚ ¶ ಲದ್ಧಂ ಪರಿಣಾಮಜಂ ತೇ, ಸಯಂಕತಂ ಉದಾಹು ದೇವೇಹಿ ದಿನ್ನಂ;
ಪುಚ್ಛಾಮಿ ತಂ [ತೇ (ಪೀ.)] ನಾಗರಾಜೇತಮತ್ಥಂ, ಕಥಜ್ಝಗಮಾಸಿ ವಿಮಾನಸೇಟ್ಠಂ’’.
‘‘ನಾಧಿಚ್ಚ ಲದ್ಧಂ ನ ಪರಿಣಾಮಜಂ ಮೇ, ನ ಸಯಂಕತಂ ನಾಪಿ ದೇವೇಹಿ ದಿನ್ನಂ;
ಸಕೇಹಿ ಕಮ್ಮೇಹಿ ಅಪಾಪಕೇಹಿ, ಪುಞ್ಞೇಹಿ ಮೇ ಲದ್ಧಮಿದಂ ವಿಮಾನಂ’’.
‘‘ಕಿಂ ತೇ ವತಂ ಕಿಂ ಪನ ಬ್ರಹ್ಮಚರಿಯಂ, ಕಿಸ್ಸ ಸುಚಿಣ್ಣಸ್ಸ ಅಯಂ ವಿಪಾಕೋ;
ಅಕ್ಖಾಹಿ ಮೇ ನಾಗರಾಜೇತಮತ್ಥಂ, ಕಥಂ ¶ ನು ತೇ ಲದ್ಧಮಿದಂ ವಿಮಾನಂ’’.
‘‘ರಾಜಾ ಅಹೋಸಿಂ ಮಗಧಾನಮಿಸ್ಸರೋ, ದುಯ್ಯೋಧನೋ ನಾಮ ಮಹಾನುಭಾವೋ;
ಸೋ ಇತ್ತರಂ ಜೀವಿತಂ ಸಂವಿದಿತ್ವಾ, ಅಸಸ್ಸತಂ ವಿಪರಿಣಾಮಧಮ್ಮಂ.
‘‘ಅನ್ನಞ್ಚ ಪಾನಞ್ಚ ಪಸನ್ನಚಿತ್ತೋ, ಸಕ್ಕಚ್ಚ ದಾನಂ ವಿಪುಲಂ ಅದಾಸಿಂ [ಅದಾಸಿ (ಪೀ.)];
ಓಪಾನಭೂತಂ ಮೇ ಘರಂ ತದಾಸಿ, ಸನ್ತಪ್ಪಿತಾ ಸಮಣಬ್ರಾಹ್ಮಣಾ ಚ.
[ಅಯಂ ಗಾಥಾ ಪೀ. ಪೋತ್ಥಕೇ ನತ್ಥಿ] ‘‘ಮಾಲಞ್ಚ ಗನ್ಧಞ್ಚ ವಿಲೇಪನಞ್ಚ, ಪದೀಪಿಯಂ [ಪದೀಪಯಂ (ಸ್ಯಾ. ಕ.)] ಯಾನಮುಪಸ್ಸಯಞ್ಚ;
ಅಚ್ಛಾದನಂ ಸೇಯ್ಯಮಥನ್ನಪಾನಂ, ಸಕ್ಕಚ್ಚ ದಾನಾನಿ ಅದಮ್ಹ ತತ್ಥ [ಅಯಂ ಗಾಥಾ ಪೀ. ಪೋತ್ಥಕೇ ನತ್ಥಿ].
‘‘ತಂ ¶ ಮೇ ವತಂ ತಂ ಪನ ಬ್ರಹ್ಮಚರಿಯಂ, ತಸ್ಸ ಸುಚಿಣ್ಣಸ್ಸ ಅಯಂ ವಿಪಾಕೋ;
ತೇನೇವ ಮೇ ಲದ್ಧಮಿದಂ ವಿಮಾನಂ, ಪಹೂತಭಕ್ಖಂ ಬಹುಅನ್ನಪಾನಂ’’;
‘‘ನಚ್ಚೇಹಿ ಗೀತೇಹಿ ಚುಪೇತರೂಪಂ, ಚಿರಟ್ಠಿತಿಕಂ ನ ಚ ಸಸ್ಸತಾಯಂ.
‘‘ಅಪ್ಪಾನುಭಾವಾ ತಂ ಮಹಾನುಭಾವಂ, ತೇಜಸ್ಸಿನಂ ¶ ಹನ್ತಿ ಅತೇಜವನ್ತೋ;
ಕಿಮೇವ ದಾಠಾವುಧ ಕಿಂ ಪಟಿಚ್ಚ, ಹತ್ಥತ್ತ [ಹತ್ಥತ್ಥ (ಸೀ. ಸ್ಯಾ. ಪೀ.)] ಮಾಗಚ್ಛಿ ವನಿಬ್ಬಕಾನಂ [ವಣಿಬ್ಬಕಾನಂ (ಸೀ.)].
‘‘ಭಯಂ ನು ತೇ ಅನ್ವಗತಂ ಮಹನ್ತಂ, ತೇಜೋ ನು ತೇ ನಾನ್ವಗಂ ದನ್ತಮೂಲಂ;
ಕಿಮೇವ ದಾಠಾವುಧ ಕಿಂ ಪಟಿಚ್ಚ, ಕಿಲೇಸಮಾಪಜ್ಜಿ ವನಿಬ್ಬಕಾನಂ’’.
‘‘ನ ಮೇ ಭಯಂ ಅನ್ವಗತಂ ಮಹನ್ತಂ, ತೇಜೋ ನ ಸಕ್ಕಾ ಮಮ ತೇಹಿ ಹನ್ತುಂ [ತೇಭಿಹನ್ತುಂ (ಸ್ಯಾ. ಕ.)];
ಸತಞ್ಚ ಧಮ್ಮಾನಿ ಸುಕಿತ್ತಿತಾನಿ, ಸಮುದ್ದವೇಲಾವ ದುರಚ್ಚಯಾನಿ.
‘‘ಚಾತುದ್ದಸಿಂ ಪಞ್ಚದಸಿಂ ಅಳಾರ, ಉಪೋಸಥಂ ನಿಚ್ಚಮುಪಾವಸಾಮಿ;
ಅಥಾಗಮುಂ ಸೋಳಸ ಭೋಜಪುತ್ತಾ, ರಜ್ಜುಂ ಗಹೇತ್ವಾನ ದಳ್ಹಞ್ಚ ಪಾಸಂ.
‘‘ಭೇತ್ವಾನ ನಾಸಂ ಅತಿಕಸ್ಸ [ಅನ್ತಕಸ್ಸ (ಕ.)] ರಜ್ಜುಂ, ನಯಿಂಸು ಮಂ ಸಮ್ಪರಿಗಯ್ಹ ಲುದ್ದಾ;
ಏತಾದಿಸಂ ದುಕ್ಖಮಹಂ ತಿತಿಕ್ಖಂ [ತಿತಿಕ್ಖಿಂ (ಪೀ.)], ಉಪೋಸಥಂ ಅಪ್ಪಟಿಕೋಪಯನ್ತೋ’’.
‘‘ಏಕಾಯನೇ ¶ ¶ ತಂ ಪಥೇ ಅದ್ದಸಂಸು, ಬಲೇನ ¶ ವಣ್ಣೇನ ಚುಪೇತರೂಪಂ;
ಸಿರಿಯಾ ಪಞ್ಞಾಯ ಚ ಭಾವಿತೋಸಿ, ಕಿಂ ಪತ್ಥಯಂ [ಕಿಮತ್ಥಿಯಂ (ಸೀ. ಸ್ಯಾ. ಪೀ.)] ನಾಗ ತಪೋ ಕರೋಸಿ.
‘‘ನ ಪುತ್ತಹೇತೂ ನ ಧನಸ್ಸ ಹೇತು, ನ ಆಯುನೋ ಚಾಪಿ ಅಳಾರ ಹೇತು;
ಮನುಸ್ಸಯೋನಿಂ ಅಭಿಪತ್ಥಯಾನೋ, ತಸ್ಮಾ ಪರಕ್ಕಮ್ಮ ತಪೋ ಕರೋಮಿ’’.
‘‘ತ್ವಂ ಲೋಹಿತಕ್ಖೋ ವಿಹತನ್ತರಂಸೋ, ಅಲಙ್ಕತೋ ಕಪ್ಪಿತಕೇಸಮಸ್ಸು;
ಸುರೋಸಿತೋ ಲೋಹಿತಚನ್ದನೇನ, ಗನ್ಧಬ್ಬರಾಜಾವ ದಿಸಾ ಪಭಾಸಸಿ [ಪಭಾಸಿ (ಕ.)].
‘‘ದೇವಿದ್ಧಿಪತ್ತೋಸಿ ಮಹಾನುಭಾವೋ, ಸಬ್ಬೇಹಿ ಕಾಮೇಹಿ ಸಮಙ್ಗಿಭೂತೋ;
ಪುಚ್ಛಾಮಿ ತಂ ನಾಗರಾಜೇತಮತ್ಥಂ, ಸೇಯ್ಯೋ ಇತೋ ಕೇನ ಮನುಸ್ಸಲೋಕೋ’’.
‘‘ಅಳಾರ ನಾಞ್ಞತ್ರ ಮನುಸ್ಸಲೋಕಾ, ಸುದ್ಧೀ ವ ಸಂವಿಜ್ಜತಿ ಸಂಯಮೋ ವಾ;
ಅಹಞ್ಚ ಲದ್ಧಾನ ಮನುಸ್ಸಯೋನಿಂ, ಕಾಹಾಮಿ ಜಾತಿಮರಣಸ್ಸ ಅನ್ತಂ’’.
‘‘ಸಂವಚ್ಛರೋ ¶ ಮೇ ವಸತೋ [ವುಸಿತೋ (ಪೀ.)] ತವನ್ತಿಕೇ, ಅನ್ನೇನ ಪಾನೇನ ಉಪಟ್ಠಿತೋಸ್ಮಿ;
ಆಮನ್ತಯಿತ್ವಾನ ಪಲೇಮಿ ನಾಗ, ಚಿರಪ್ಪವುಟ್ಠೋಸ್ಮಿ [ಚಿರಪ್ಪವುತ್ಥೋ ಅಸ್ಮಿ (ಪೀ.)] ಅಹಂ ಜನಿನ್ದ’’.
‘‘ಪುತ್ತಾ ಚ ದಾರಾ ಅನುಜೀವಿನೋ ಚ [ಚ’ನುಜೀವಿನೋ (ಸ್ಯಾ. ಪೀ.)], ನಿಚ್ಚಾನುಸಿಟ್ಠಾ ಉಪತಿಟ್ಠತೇ ತಂ;
ಕಚ್ಚಿನ್ನು ತಂ ನಾಭಿಸಪಿತ್ಥ [ನಾಭಿಸಂಸಿತ್ಥ (ಸ್ಯಾ. ಪೀ.)] ಕೋಚಿ, ಪಿಯಞ್ಹಿ ಮೇ ದಸ್ಸನಂ ತುಯ್ಹಂ [ತುಯ್ಹ (ಪೀ.)] ಅಳಾರ’’.
‘‘ಯಥಾಪಿ ¶ ಮಾತೂ ಚ ಪಿತೂ ಅಗಾರೇ, ಪುತ್ತೋ ಪಿಯೋ ಪಟಿವಿಹಿತೋ ವಸೇಯ್ಯ [ಸೇಯ್ಯೋ (ಪೀ.)];
ತತೋಪಿ ಮಯ್ಹಂ ಇಧಮೇವ ಸೇಯ್ಯೋ, ಚಿತ್ತಞ್ಹಿ ತೇ ನಾಗ ಮಯೀ ಪಸನ್ನಂ’’.
‘‘ಮಣೀ ಮಮಂ ವಿಜ್ಜತಿ ಲೋಹಿತಙ್ಕೋ [ಲೋಹಿತಙ್ಗೋ (ಕ.)], ಧನಾಹರೋ ಮಣಿರತನಂ ಉಳಾರಂ;
ಆದಾಯ ತ್ವಂ [ತಂ (ಪೀ.)] ಗಚ್ಛ ಸಕಂ ನಿಕೇತಂ, ಲದ್ಧಾ ಧನಂ ತಂ ಮಣಿಮೋಸ್ಸಜಸ್ಸು’’.
‘‘ದಿಟ್ಠಾ ಮಯಾ ಮಾನುಸಕಾಪಿ ಕಾಮಾ, ಅಸಸ್ಸತಾ ವಿಪರಿಣಾಮಧಮ್ಮಾ;
ಆದೀನವಂ ಕಾಮಗುಣೇಸು ದಿಸ್ವಾ, ಸದ್ಧಾಯಹಂ ಪಬ್ಬಜಿತೋಮ್ಹಿ ರಾಜ.
‘‘ದುಮಪ್ಫಲಾನೀವ ¶ ಪತನ್ತಿ ಮಾಣವಾ, ದಹರಾ ಚ ವುದ್ಧಾ ಚ ಸರೀರಭೇದಾ;
ಏತಮ್ಪಿ ದಿಸ್ವಾ ಪಬ್ಬಜಿತೋಮ್ಹಿ ರಾಜ, ಅಪಣ್ಣಕಂ ಸಾಮಞ್ಞಮೇವ ಸೇಯ್ಯೋ’’.
‘‘ಅದ್ಧಾ ಹವೇ ಸೇವಿತಬ್ಬಾ ಸಪಞ್ಞಾ, ಬಹುಸ್ಸುತಾ ಯೇ ಬಹುಠಾನಚಿನ್ತಿನೋ;
ನಾಗಞ್ಚ ಸುತ್ವಾನ ತವಞ್ಚಳಾರ, ಕಾಹಾಮಿ ಪುಞ್ಞಾನಿ ಅನಪ್ಪಕಾನಿ’’.
‘‘ಅದ್ಧಾ ಹವೇ ಸೇವಿತಬ್ಬಾ ಸಪಞ್ಞಾ, ಬಹುಸ್ಸುತಾ ಯೇ ಬಹುಠಾನಚಿನ್ತಿನೋ;
ನಾಗಞ್ಚ ಸುತ್ವಾನ ಮಮಞ್ಚ ರಾಜ, ಕರೋಹಿ ಪುಞ್ಞಾನಿ ಅನಪ್ಪಕಾನೀ’’ತಿ.
ಸಙ್ಖಪಾಲಜಾತಕಂ ಚತುತ್ಥಂ.
೫೨೫. ಚೂಳಸುತಸೋಮಜಾತಕಂ (೫)
‘‘ಆಮನ್ತಯಾಮಿ ¶ ¶ ನಿಗಮಂ, ಮಿತ್ತಾಮಚ್ಚೇ ಪರಿಸ್ಸಜೇ [ಪಾರಿಸಜ್ಜೇ (ಸೀ. ಸ್ಯಾ.)];
ಸಿರಸ್ಮಿಂ ಪಲಿತಂ ಜಾತಂ, ಪಬ್ಬಜ್ಜಂ ದಾನಿ ರೋಚಹಂ’’.
‘‘ಅಭುಮ್ಮೇ ಕಥಂ ನು ಭಣಸಿ, ಸಲ್ಲಂ ಮೇ ದೇವ ಉರಸಿ ಕಪ್ಪೇಸಿ [ಕಮ್ಪೇಸಿ (ಪೀ.)];
ಸತ್ತಸತಾ ತೇ ಭರಿಯಾ, ಕಥಂ ¶ ನು ತೇ ತಾ ಭವಿಸ್ಸನ್ತಿ’’.
‘‘ಪಞ್ಞಾಯಿಹಿನ್ತಿ ಏತಾ, ದಹರಾ ಅಞ್ಞಮ್ಪಿ ತಾ ಗಮಿಸ್ಸನ್ತಿ;
ಸಗ್ಗಞ್ಚಸ್ಸ ಪತ್ಥಯಾನೋ, ತೇನ ಅಹಂ ಪಬ್ಬಜಿಸ್ಸಾಮಿ’’.
‘‘ದುಲ್ಲದ್ಧಂ ಮೇ ಆಸಿ ಸುತಸೋಮ, ಯಸ್ಸ ತೇ ಹೋಮಹಂ ಮಾತಾ;
ಯಂ ಮೇ ವಿಲಪನ್ತಿಯಾ, ಅನಪೇಕ್ಖೋ ಪಬ್ಬಜಸಿ ದೇವ.
‘‘ದುಲ್ಲದ್ಧಂ ಮೇ ಆಸಿ ಸುತಸೋಮ, ಯಂ ತಂ ಅಹಂ ವಿಜಾಯಿಸ್ಸಂ;
ಯಂ ಮೇ ವಿಲಪನ್ತಿಯಾ, ಅನಪೇಕ್ಖೋ ಪಬ್ಬಜಸಿ ದೇವ’’.
‘‘ಕೋ ನಾಮೇಸೋ ಧಮ್ಮೋ, ಸುತಸೋಮ ಕಾ ಚ ನಾಮ ಪಬ್ಬಜ್ಜಾ;
ಯಂ ನೋ ಅಮ್ಹೇ ಜಿಣ್ಣೇ, ಅನಪೇಕ್ಖೋ ಪಬ್ಬಜಸಿ ದೇವ.
‘‘ಪುತ್ತಾಪಿ ತುಯ್ಹಂ ಬಹವೋ, ದಹರಾ ಅಪ್ಪತ್ತಯೋಬ್ಬನಾ;
ಮಞ್ಜೂ ತೇಪಿ [ತೇ (ಸೀ. ಪೀ.)] ತಂ ಅಪಸ್ಸನ್ತಾ, ಮಞ್ಞೇ ¶ ದುಕ್ಖಂ ನಿಗಚ್ಛನ್ತಿ’’.
‘‘ಪುತ್ತೇಹಿ ಚ ಮೇ ಏತೇಹಿ, ದಹರೇಹಿ ಅಪ್ಪತ್ತಯೋಬ್ಬನೇಹಿ;
ಮಞ್ಜೂಹಿ ಸಬ್ಬೇಹಿಪಿ ತುಮ್ಹೇಹಿ, ಚಿರಮ್ಪಿ ಠತ್ವಾ ವಿನಾಸಭಾವೋ’’ [ವಿನಾಭಾವೋ (ಸೀ. ಸ್ಯಾ. ಪೀ.)].
‘‘ಛಿನ್ನಂ ¶ ನು ತುಯ್ಹಂ ಹದಯಂ, ಅದು ತೇ [ಆದು (ಸೀ. ಪೀ.), ಆದೂ (ಸ್ಯಾ.)] ಕರುಣಾ ಚ ನತ್ಥಿ ಅಮ್ಹೇಸು;
ಯಂ ನೋ ವಿಕನ್ದನ್ತಿಯೋ [ವಿಕ್ಕನ್ದನ್ತಿಯೋ (ಸೀ.)], ಅನಪೇಕ್ಖೋ ಪಬ್ಬಜಸಿ ದೇವ’’.
‘‘ನ ಚ ಮಯ್ಹಂ ಛಿನ್ನಂ ಹದಯಂ, ಅತ್ಥಿ ಕರುಣಾಪಿ ಮಯ್ಹಂ ತುಮ್ಹೇಸು;
ಸಗ್ಗಞ್ಚ ಪತ್ಥಯಾನೋ, ತೇನ ಅಹಂ [ತೇನಾಹಂ (ಸೀ. ಸ್ಯಾ.), ತೇನಮಹಂ (ಪೀ.)] ಪಬ್ಬಜಿಸ್ಸಾಮಿ’’.
‘‘ದುಲ್ಲದ್ಧಂ ಮೇ ಆಸಿ, ಸುತಸೋಮ ಯಸ್ಸ ತೇ ಅಹಂ ಭರಿಯಾ;
ಯಂ ಮೇ ವಿಲಪನ್ತಿಯಾ, ಅನಪೇಕ್ಖೋ ಪಬ್ಬಜಸಿ ದೇವ.
‘‘ದುಲ್ಲದ್ಧಂ ಮೇ ಆಸಿ, ಸುತಸೋಮ ಯಸ್ಸ ತೇ ಅಹಂ ಭರಿಯಾ;
ಯಂ ಮೇ ಕುಚ್ಛಿಪಟಿಸನ್ಧಿಂ [ಮಂ ಕುಚ್ಛಿಮತಿಂ ಸನ್ತಿಂ (ಪೀ.)], ಅನಪೇಕ್ಖೋ ¶ ಪಬ್ಬಜಸಿ ದೇವ.
‘‘ಪರಿಪಕ್ಕೋ ಮೇ ಗಬ್ಭೋ, ಕುಚ್ಛಿಗತೋ ಯಾವ ನಂ ವಿಜಾಯಾಮಿ;
ಮಾಹಂ ಏಕಾ ವಿಧವಾ, ಪಚ್ಛಾ ದುಕ್ಖಾನಿ ಅದ್ದಕ್ಖಿಂ’’.
‘‘ಪರಿಪಕ್ಕೋ ತೇ ಗಬ್ಭೋ, ಕುಚ್ಛಿಗತೋ ಇಙ್ಘ ತ್ವಂ [ತ್ವ (ಸೀ.), ನಂ (ಪೀ.)] ವಿಜಾಯಸ್ಸು;
ಪುತ್ತಂ ಅನೋಮವಣ್ಣಂ, ತಂ ಹಿತ್ವಾ ಪಬ್ಬಜಿಸ್ಸಾಮಿ’’.
‘‘ಮಾ ¶ ತ್ವಂ ಚನ್ದೇ ರುದಿ, ಮಾ ಸೋಚಿ ವನತಿಮಿರಮತ್ತಕ್ಖಿ;
ಆರೋಹ ವರಪಾಸಾದಂ [ಚ ಪಾಸಾದಂ (ಪೀ.)], ಅನಪೇಕ್ಖೋ ಅಹಂ ಗಮಿಸ್ಸಾಮಿ’’.
‘‘ಕೋ ¶ ತಂ ಅಮ್ಮ ಕೋಪೇಸಿ, ಕಿಂ ರೋದಸಿ ಪೇಕ್ಖಸಿ ಚ ಮಂ ಬಾಳ್ಹಂ;
ಕಂ ಅವಜ್ಝಂ ಘಾತೇಮಿ [ಘಾತೇಮಿ ಕಂ ಅವಜ್ಝಂ (ಪೀ.), ತಂ ಅವಜ್ಝಂ ಘಾತೇಮಿ (ಕ.)], ಞಾತೀನಂ ಉದಿಕ್ಖಮಾನಾನಂ’’.
‘‘ನ ಹಿ ಸೋ ಸಕ್ಕಾ ಹನ್ತುಂ, ವಿಜಿತಾವೀ [ಜೀವಿತಾವೀ (ಪೀ.)] ಯೋ ಮಂ ತಾತ ಕೋಪೇಸಿ;
ಪಿತಾ ತೇ ಮಂ ತಾತ ಅವಚ, ಅನಪೇಕ್ಖೋ ¶ ಅಹಂ ಗಮಿಸ್ಸಾಮಿ’’.
‘‘ಯೋಹಂ ಪುಬ್ಬೇ ನಿಯ್ಯಾಮಿ, ಉಯ್ಯಾನಂ ಮತ್ತಕುಞ್ಜರೇ ಚ ಯೋಧೇಮಿ;
ಸುತಸೋಮೇ ಪಬ್ಬಜಿತೇ, ಕಥಂ ನು ದಾನಿ ಕರಿಸ್ಸಾಮಿ’’.
‘‘ಮಾತುಚ್ಚ [ಮಾತು ಚ (ಸೀ. ಸ್ಯಾ.)] ಮೇ ರುದನ್ತ್ಯಾ [ರುದತ್ಯಾ (ಪೀ.)], ಜೇಟ್ಠಸ್ಸ ಚ ಭಾತುನೋ ಅಕಾಮಸ್ಸ;
ಹತ್ಥೇಪಿ ತೇ ಗಹೇಸ್ಸಂ, ನ ಹಿ ಗಚ್ಛಸಿ [ಗಞ್ಛಿಸಿ (ಪೀ.)] ನೋ ಅಕಾಮಾನಂ’’.
‘‘ಉಟ್ಠೇಹಿ ತ್ವಂ ಧಾತಿ, ಇಮಂ ಕುಮಾರಂ ರಮೇಹಿ ಅಞ್ಞತ್ಥ;
ಮಾ ಮೇ ಪರಿಪನ್ಥಮಕಾಸಿ [ಮಕಾ (ಸೀ. ಪೀ.)], ಸಗ್ಗಂ ಮಮ ಪತ್ಥಯಾನಸ್ಸ’’.
‘‘ಯಂ ನೂನಿಮಂ ದದೇಯ್ಯಂ [ಜಹೇಯ್ಯಂ (ಪೀ.)] ಪಭಙ್ಕರಂ, ಕೋ ನು ಮೇ ಇಮಿನಾತ್ಥೋ [ಕೋ ನು ಮೇ ಇಮಿನಾ ಅತ್ಥೋ (ಸೀ. ಸ್ಯಾ.), ಕೋ ನು ಮೇ ನತ್ಥೋ (ಪೀ.)];
ಸುತಸೋಮೇ ಪಬ್ಬಜಿತೇ, ಕಿಂ ನು ಮೇನಂ ಕರಿಸ್ಸಾಮಿ’’.
‘‘ಕೋಸೋ ¶ ಚ ತುಯ್ಹಂ ವಿಪುಲೋ, ಕೋಟ್ಠಾಗಾರಞ್ಚ ತುಯ್ಹಂ ಪರಿಪೂರಂ;
ಪಥವೀ ಚ ತುಯ್ಹಂ ವಿಜಿತಾ, ರಮಸ್ಸು ¶ ಮಾ ಪಬ್ಬಜಿ [ಪಬ್ಬಜಸ್ಸು (ಸೀ.), ಪಬ್ಬಜ (ಪೀ.)] ದೇವ’’.
‘‘ಕೋಸೋ ಚ ಮಯ್ಹಂ ವಿಪುಲೋ, ಕೋಟ್ಠಾಗಾರಞ್ಚ ಮಯ್ಹಂ ಪರಿಪೂರಂ;
ಪಥವೀ ಚ ಮಯ್ಹಂ ವಿಜಿತಾ, ತಂ ಹಿತ್ವಾ ಪಬ್ಬಜಿಸ್ಸಾಮಿ’’.
‘‘ಮಯ್ಹಮ್ಪಿ ಧನಂ ಪಹೂತಂ, ಸಙ್ಖಾತುಂ [ಸಙ್ಖ್ಯಾತುಂ (ಸೀ.)] ನೋಪಿ ದೇವ ಸಕ್ಕೋಮಿ;
ತಂ ತೇ ದದಾಮಿ ಸಬ್ಬಮ್ಪಿ [ತಂ ದೇವ ತೇ ದದಾಮಿ ಸಬ್ಬಮ್ಪಿ (ಸೀ.), ತಂ ತೇ ದದಾಮಿ ಸಬ್ಬಂ (ಪೀ.)], ರಮಸ್ಸು ಮಾ ಪಬ್ಬಜಿ ದೇವ’’.
‘‘ಜಾನಾಮಿ [ಜಾನಾಮಿ ತೇ (ಸೀ. ಸ್ಯಾ.)] ಧನಂ ಪಹೂತಂ, ಕುಲವದ್ಧನ ಪೂಜಿತೋ ತಯಾ ಚಸ್ಮಿ;
ಸಗ್ಗಞ್ಚ ಪತ್ಥಯಾನೋ, ತೇನ ಅಹಂ ಪಬ್ಬಜಿಸ್ಸಾಮಿ’’.
‘‘ಉಕ್ಕಣ್ಠಿತೋಸ್ಮಿ ಬಾಳ್ಹಂ, ಅರತಿ ಮಂ ಸೋಮದತ್ತ ಆವಿಸತಿ [ಆವೀಸತಿ (ಕ.)];
ಬಹುಕಾಪಿ [ಬಹುಕಾ ಹಿ (ಸೀ. ಸ್ಯಾ.)] ಮೇ ಅನ್ತರಾಯಾ, ಅಜ್ಜೇವಾಹಂ ಪಬ್ಬಜಿಸ್ಸಾಮಿ’’.
‘‘ಇದಞ್ಚ ತುಯ್ಹಂ ರುಚಿತಂ, ಸುತಸೋಮ ಅಜ್ಜೇವ ದಾನಿ ತ್ವಂ ಪಬ್ಬಜ;
ಅಹಮ್ಪಿ ಪಬ್ಬಜಿಸ್ಸಾಮಿ, ನ ¶ ಉಸ್ಸಹೇ ತಯಾ ವಿನಾ ಅಹಂ ಠಾತುಂ’’.
‘‘ನ ಹಿ ಸಕ್ಕಾ ಪಬ್ಬಜಿತುಂ, ನಗರೇ ನ ಹಿ ಪಚ್ಚತಿ ಜನಪದೇ ಚ’’;
‘‘ಸುತಸೋಮೇ ಪಬ್ಬಜಿತೇ, ಕಥಂ ನು ದಾನಿ ಕರಿಸ್ಸಾಮ’’.
‘‘ಉಪನೀಯತಿದಂ ಮಞ್ಞೇ, ಪರಿತ್ತಂ ಉದಕಂವ ಚಙ್ಕವಾರಮ್ಹಿ;
ಏವಂ ಸುಪರಿತ್ತಕೇ ಜೀವಿತೇ, ನ ಚ ಪಮಜ್ಜಿತುಂ ಕಾಲೋ.
‘‘ಉಪನೀಯತಿದಂ ¶ ಮಞ್ಞೇ, ಪರಿತ್ತಂ ಉದಕಂವ ಚಙ್ಕವಾರಮ್ಹಿ;
ಏವಂ ಸುಪರಿತ್ತಕೇ ಜೀವಿತೇ, ಅನ್ಧಬಾಲಾ [ಅಥ ಬಾಲಾ (ಸೀ. ಸ್ಯಾ. ಪೀ.)] ಪಮಜ್ಜನ್ತಿ.
‘‘ತೇ ವಡ್ಢಯನ್ತಿ ನಿರಯಂ, ತಿರಚ್ಛಾನಯೋನಿಞ್ಚ ಪೇತ್ತಿವಿಸಯಞ್ಚ;
ತಣ್ಹಾಯ ಬನ್ಧನಬದ್ಧಾ, ವಡ್ಢೇನ್ತಿ ಅಸುರಕಾಯಂ’’.
‘‘ಊಹಞ್ಞತೇ ¶ ರಜಗ್ಗಂ, ಅವಿದೂರೇ ಪುಬ್ಬಕಮ್ಹಿ ಚ [ಪುಪ್ಫಕಮ್ಹಿ ಚ (ಸೀ. ಪೀ.)] ಪಾಸಾದೇ;
ಮಞ್ಞೇ ನೋ ಕೇಸಾ ಛಿನ್ನಾ, ಯಸಸ್ಸಿನೋ ¶ ಧಮ್ಮರಾಜಸ್ಸ’’.
‘‘ಅಯಮಸ್ಸ ಪಾಸಾದೋ, ಸೋವಣ್ಣ [ಸೋವಣ್ಣೋ (ಪೀ.)] ಪುಪ್ಫಮಾಲ್ಯವೀತಿಕಿಣ್ಣೋ;
ಯಹಿ [ಯಮ್ಹಿ (ಪೀ.)] ಮನುವಿಚರಿ ರಾಜಾ, ಪರಿಕಿಣ್ಣೋ ಇತ್ಥಾಗಾರೇಹಿ.
‘‘ಅಯಮಸ್ಸ ಪಾಸಾದೋ, ಸೋವಣ್ಣಪುಪ್ಫಮಾಲ್ಯವೀತಿಕಿಣ್ಣೋ;
ಯಹಿಮನುವಿಚರಿ ರಾಜಾ, ಪರಿಕಿಣ್ಣೋ ಞಾತಿಸಙ್ಘೇನ.
‘‘ಇದಮಸ್ಸ ಕೂಟಾಗಾರಂ, ಸೋವಣ್ಣಪುಪ್ಫಮಾಲ್ಯವೀತಿಕಿಣ್ಣಂ;
ಯಹಿಮನುವಿಚರಿ ರಾಜಾ, ಪರಿಕಿಣ್ಣೋ ಇತ್ಥಾಗಾರೇಹಿ.
‘‘ಇದಮಸ್ಸ ಕೂಟಾಗಾರಂ, ಸೋವಣ್ಣ [ಸೋವಣ್ಣಂ (ಪೀ.)] ಪುಪ್ಫಮಾಲ್ಯವೀತಿಕಿಣ್ಣಂ;
ಯಹಿಮನುವಿಚರಿ ರಾಜಾ, ಪರಿಕಿಣ್ಣೋ ಞಾತಿಸಙ್ಘೇನ.
‘‘ಅಯಮಸ್ಸ ಅಸೋಕವನಿಕಾ, ಸುಪುಪ್ಫಿತಾ ಸಬ್ಬಕಾಲಿಕಾ ರಮ್ಮಾ;
ಯಹಿಮನುವಿಚರಿ ರಾಜಾ, ಪರಿಕಿಣ್ಣೋ ¶ ಇತ್ಥಾಗಾರೇಹಿ.
‘‘ಅಯಮಸ್ಸ ಅಸೋಕವನಿಕಾ, ಸುಪುಪ್ಫಿತಾ ಸಬ್ಬಕಾಲಿಕಾ ರಮ್ಮಾ;
ಯಹಿಮನುವಿಚರಿ ರಾಜಾ, ಪರಿಕಿಣ್ಣೋ ಞಾತಿಸಙ್ಘೇನ.
‘‘ಇದಮಸ್ಸ ಉಯ್ಯಾನಂ, ಸುಪುಪ್ಫಿತಂ ಸಬ್ಬಕಾಲಿಕಂ ರಮ್ಮಂ;
ಯಹಿಮನುವಿಚರಿ ರಾಜಾ, ಪರಿಕಿಣ್ಣೋ ಇತ್ಥಾಗಾರೇಹಿ.
‘‘ಇದಮಸ್ಸ ಉಯ್ಯಾನಂ, ಸುಪುಪ್ಫಿತಂ ಸಬ್ಬಕಾಲಿಕಂ ರಮ್ಮಂ;
ಯಹಿಮನುವಿಚರಿ ರಾಜಾ, ಪರಿಕಿಣ್ಣೋ ಞಾತಿಸಙ್ಘೇನ.
‘‘ಇದಮಸ್ಸ ಕಣಿಕಾರವನಂ, ಸುಪುಪ್ಫಿತಂ ಸಬ್ಬಕಾಲಿಕಂ ರಮ್ಮಂ;
ಯಹಿಮನುವಿಚರಿ ರಾಜಾ, ಪರಿಕಿಣ್ಣೋ ಇತ್ಥಾಗಾರೇಹಿ.
‘‘ಇದಮಸ್ಸ ಕಣಿಕಾರವನಂ, ಸುಪುಪ್ಫಿತಂ ಸಬ್ಬಕಾಲಿಕಂ ರಮ್ಮಂ;
ಯಹಿಮನುವಿಚರಿ ರಾಜಾ, ಪರಿಕಿಣ್ಣೋ ¶ ಞಾತಿಸಙ್ಘೇನ.
‘‘ಇದಮಸ್ಸ ಪಾಟಲಿವನಂ [ಪಾಟಲೀವನಂ (ಸೀ.)], ಸುಪುಪ್ಫಿತಂ ಸಬ್ಬಕಾಲಿಕಂ ರಮ್ಮಂ;
ಯಹಿಮನುವಿಚರಿ ರಾಜಾ, ಪರಿಕಿಣ್ಣೋ ಇತ್ಥಾಗಾರೇಹಿ.
‘‘ಇದಮಸ್ಸ ಪಾಟಲಿವನಂ, ಸುಪುಪ್ಫಿತಂ ಸಬ್ಬಕಾಲಿಕಂ ರಮ್ಮಂ;
ಯಹಿಮನುವಿಚರಿ ರಾಜಾ, ಪರಿಕಿಣ್ಣೋ ಞಾತಿಸಙ್ಘೇನ.
‘‘ಇದಮಸ್ಸ ¶ ¶ ಅಮ್ಬವನಂ, ಸುಪುಪ್ಫಿತಂ ಸಬ್ಬಕಾಲಿಕಂ ರಮ್ಮಂ;
ಯಹಿಮನುವಿಚರಿ ರಾಜಾ, ಪರಿಕಿಣ್ಣೋ ಇತ್ಥಾಗಾರೇಹಿ.
‘‘ಇದಮಸ್ಸ ಅಮ್ಬವನಂ, ಸುಪುಪ್ಫಿತಂ ಸಬ್ಬಕಾಲಿಕಂ ರಮ್ಮಂ;
ಯಹಿಮನುವಿಚರಿ ರಾಜಾ, ಪರಿಕಿಣ್ಣೋ ಞಾತಿಸಙ್ಘೇನ.
‘‘ಅಯಮಸ್ಸ ಪೋಕ್ಖರಣೀ, ಸಞ್ಛನ್ನಾ ಅಣ್ಡಜೇಹಿ ವೀತಿಕಿಣ್ಣಾ;
ಯಹಿಮನುವಿಚರಿ ರಾಜಾ, ಪರಿಕಿಣ್ಣೋ ¶ ಇತ್ಥಾಗಾರೇಹಿ.
‘‘ಅಯಮಸ್ಸ ಪೋಕ್ಖರಣೀ, ಸಞ್ಛನ್ನಾ ಅಣ್ಡಜೇಹಿ ವೀತಿಕಿಣ್ಣಾ;
ಯಹಿಮನುವಿಚರಿ ರಾಜಾ, ಪರಿಕಿಣ್ಣೋ ಞಾತಿಸಙ್ಘೇನ’’.
‘‘ರಾಜಾ ವೋ ಖೋ [ರಾಜಾ ಖೋ (ಸೀ. ಸ್ಯಾ. ಪೀ.)] ಪಬ್ಬಜಿತೋ, ಸುತಸೋಮೋ ರಜ್ಜಂ ಇಮಂ ಪಹತ್ವಾನ [ಪಹನ್ತ್ವಾನ (ಸ್ಯಾ. ಕ.)];
ಕಾಸಾಯವತ್ಥವಸನೋ, ನಾಗೋವ ಏಕಕೋ [ಏಕಕೋವ (ಸೀ.)] ಚರತಿ’’.
‘‘ಮಾಸ್ಸು ಪುಬ್ಬೇ ರತಿಕೀಳಿತಾನಿ, ಹಸಿತಾನಿ ಚ ಅನುಸ್ಸರಿತ್ಥ [ಅನುಸ್ಸರಿತ್ಥೋ (ಪೀ.)];
ಮಾ ವೋ ಕಾಮಾ ಹನಿಂಸು, ರಮ್ಮಂ ಹಿ [ಸುರಮ್ಮಞ್ಹಿ (ಸ್ಯಾ. ಕ.)] ಸುದಸ್ಸನಂ [ಸುದಸ್ಸನಂ ನಾಮ (ಸೀ.)] ನಗರಂ.
‘‘ಮೇತ್ತಚಿತ್ತಞ್ಚ [ಮೇತ್ತಞ್ಚ (ಪೀ.)] ಭಾವೇಥ, ಅಪ್ಪಮಾಣಂ ದಿವಾ ಚ ರತ್ತೋ ಚ;
ಅಗಚ್ಛಿತ್ಥ [ಅಥ ಗಞ್ಛಿತ್ಥ (ಸೀ. ಸ್ಯಾ. ಪೀ.)] ದೇವಪುರ, ಆವಾಸಂ ಪುಞ್ಞಕಮ್ಮಿನ’’ನ್ತಿ [ಪುಞ್ಞಕಮ್ಮಾನನ್ತಿ (ಪೀ.)].
ಚೂಳಸುತಸೋಮಜಾತಕಂ ಪಞ್ಚಮಂ.
ಚತ್ತಾಲೀಸನಿಪಾತಂ ನಿಟ್ಠಿತಂ.
ತಸ್ಸುದ್ದಾನಂ –
ಸುವಪಣ್ಡಿತಜಮ್ಬುಕಕುಣ್ಡಲಿನೋ ¶ , ವರಕಞ್ಞಮಲಮ್ಬುಸಜಾತಕಞ್ಚ;
ಪವರುತ್ತಮಸಙ್ಖಸಿರೀವ್ಹಯಕೋ, ಸುತಸೋಮಅರಿನ್ಧಮರಾಜವರೋ.
೧೮. ಪಣ್ಣಾಸನಿಪಾತೋ
೫೨೬. ನಿಳಿನಿಕಾಜಾತಕಂ (೧)
‘‘ಉದ್ದಯ್ಹತೇ ¶ ¶ ¶ [ಉಡ್ಡಯ್ಹತೇ (ಸೀ. ಪೀ.)] ಜನಪದೋ, ರಟ್ಠಞ್ಚಾಪಿ ವಿನಸ್ಸತಿ;
ಏಹಿ ನಿಳಿನಿಕೇ [ನಿಳಿಕೇ (ಸೀ. ಸ್ಯಾ. ಪೀ.), ಏವಮುಪರಿಪಿ] ಗಚ್ಛ, ತಂ ಮೇ ಬ್ರಾಹ್ಮಣಮಾನಯ’’.
‘‘ನಾಹಂ ದುಕ್ಖಕ್ಖಮಾ ರಾಜ, ನಾಹಂ ಅದ್ಧಾನಕೋವಿದಾ;
ಕಥಂ ಅಹಂ ಗಮಿಸ್ಸಾಮಿ, ವನಂ ಕುಞ್ಜರಸೇವಿತಂ’’.
‘‘ಫೀತಂ ಜನಪದಂ ಗನ್ತ್ವಾ, ಹತ್ಥಿನಾ ಚ ರಥೇನ ಚ;
ದಾರುಸಙ್ಘಾಟಯಾನೇನ, ಏವಂ ಗಚ್ಛ ನಿಳಿನಿಕೇ.
‘‘ಹತ್ಥಿಅಸ್ಸರಥೇ ಪತ್ತೀ, ಗಚ್ಛೇವಾದಾಯ ಖತ್ತಿಯೇ;
ತವೇವ ವಣ್ಣರೂಪೇನ, ವಸಂ ತಮಾನಯಿಸ್ಸಸಿ’’.
‘‘ಕದಲೀಧಜಪಞ್ಞಾಣೋ, ಆಭುಜೀಪರಿವಾರಿತೋ;
ಏಸೋ ಪದಿಸ್ಸತಿ ರಮ್ಮೋ, ಇಸಿಸಿಙ್ಗಸ್ಸ ಅಸ್ಸಮೋ.
‘‘ಏಸೋ ಅಗ್ಗಿಸ್ಸ ಸಙ್ಖಾತೋ, ಏಸೋ ಧೂಮೋ ಪದಿಸ್ಸತಿ;
ಮಞ್ಞೇ ನೋ ಅಗ್ಗಿಂ ಹಾಪೇತಿ, ಇಸಿಸಿಙ್ಗೋ ಮಹಿದ್ಧಿಕೋ’’.
‘‘ತಞ್ಚ ¶ ದಿಸ್ವಾನ ಆಯನ್ತಿಂ, ಆಮುತ್ತಮಣಿಕುಣ್ಡಲಂ;
ಇಸಿಸಿಙ್ಗೋ ಪಾವಿಸಿ ಭೀತೋ, ಅಸ್ಸಮಂ ಪಣ್ಣಛಾದನಂ.
‘‘ಅಸ್ಸಮಸ್ಸ ಚ ಸಾ ದ್ವಾರೇ, ಗೇಣ್ಡುಕೇನಸ್ಸ [ಭೇಣ್ಡುಕೇನಸ್ಸ (ಸೀ. ಪೀ.)] ಕೀಳತಿ;
ವಿದಂಸಯನ್ತೀ ಅಙ್ಗಾನಿ, ಗುಯ್ಹಂ ಪಕಾಸಿತಾನಿ ಚ.
‘‘ತಞ್ಚ ದಿಸ್ವಾನ ಕೀಳನ್ತಿಂ, ಪಣ್ಣಸಾಲಗತೋ ಜಟೀ;
ಅಸ್ಸಮಾ ನಿಕ್ಖಮಿತ್ವಾನ, ಇದಂ ವಚನಮಬ್ರವಿ.
‘‘ಅಮ್ಭೋ ಕೋ ನಾಮ ಸೋ ರುಕ್ಖೋ, ಯಸ್ಸ ತೇವಂಗತಂ ಫಲಂ;
ದೂರೇಪಿ ಖಿತ್ತಂ ಪಚ್ಚೇತಿ, ನ ತಂ ಓಹಾಯ ಗಚ್ಛತಿ’’.
‘‘ಅಸ್ಸಮಸ್ಸ ¶ ಮಮ [ಮಂ (ಸೀ.)] ಬ್ರಹ್ಮೇ, ಸಮೀಪೇ ಗನ್ಧಮಾದನೇ;
ಬಹವೋ [ಪಬ್ಬತೇ (ಸೀ.)] ತಾದಿಸಾ ರುಕ್ಖಾ, ಯಸ್ಸ ತೇವಂಗತಂ ಫಲಂ;
ದೂರೇಪಿ ಖಿತ್ತಂ ಪಚ್ಚೇತಿ, ನ ಮಂ ಓಹಾಯ ಗಚ್ಛತಿ’’.
‘‘ಏತೂ ¶ [ಏತು (ಸೀ. ಸ್ಯಾ. ಕ.)] ಭವಂ ಅಸ್ಸಮಿಮಂ ಅದೇತು, ಪಜ್ಜಞ್ಚ ಭಕ್ಖಞ್ಚ ಪಟಿಚ್ಛ ದಮ್ಮಿ;
ಇದಮಾಸನಂ ಅತ್ರ ಭವಂ ನಿಸೀದತು, ಇತೋ ಭವಂ ಮೂಲಫಲಾನಿ ಭುಞ್ಜತು’’ [ಖಾದತು (ಸೀ.)].
‘‘ಕಿಂ ತೇ ಇದಂ ಊರೂನಮನ್ತರಸ್ಮಿಂ, ಸುಪಿಚ್ಛಿತಂ ಕಣ್ಹರಿವಪ್ಪಕಾಸತಿ;
ಅಕ್ಖಾಹಿ ಮೇ ಪುಚ್ಛಿತೋ ಏತಮತ್ಥಂ, ಕೋಸೇ ನು ತೇ ಉತ್ತಮಙ್ಗಂ ಪವಿಟ್ಠಂ’’.
‘‘ಅಹಂ ವನೇ ಮೂಲಫಲೇಸನಂ ಚರಂ, ಆಸಾದಯಿಂ ¶ [ಅಸ್ಸಾದಯಿಂ (ಕ.)] ಅಚ್ಛಂ ಸುಘೋರರೂಪಂ;
ಸೋ ಮಂ ಪತಿತ್ವಾ ಸಹಸಾಜ್ಝಪತ್ತೋ, ಪನುಜ್ಜ ಮಂ ಅಬ್ಬಹಿ [ಅಬ್ಬುಹಿ (ಸ್ಯಾ. ಕ.)] ಉತ್ತಮಙ್ಗಂ.
‘‘ಸ್ವಾಯಂ ವಣೋ ಖಜ್ಜತಿ ಕಣ್ಡುವಾಯತಿ, ಸಬ್ಬಞ್ಚ ಕಾಲಂ ನ ಲಭಾಮಿ ಸಾತಂ;
ಪಹೋ ಭವಂ ಕಣ್ಡುಮಿಮಂ ವಿನೇತುಂ, ಕುರುತಂ ಭವಂ ಯಾಚಿತೋ ಬ್ರಾಹ್ಮಣತ್ಥಂ’’.
‘‘ಗಮ್ಭೀರರೂಪೋ ತೇ ವಣೋ ಸಲೋಹಿತೋ, ಅಪೂತಿಕೋ ವಣಗನ್ಧೋ [ಪಕ್ಕಗನ್ಧೋ (ಸೀ.), ಪನ್ನಗನ್ಧೋ (ಸ್ಯಾ. ಪೀ.)] ಮಹಾ ಚ;
ಕರೋಮಿ ತೇ ಕಿಞ್ಚಿ ಕಸಾಯಯೋಗಂ, ಯಥಾ ಭವಂ ಪರಮಸುಖೀ ಭವೇಯ್ಯ’’.
‘‘ನ ¶ ಮನ್ತಯೋಗಾ ನ ಕಸಾಯಯೋಗಾ, ನ ಓಸಧಾ ಬ್ರಹ್ಮಚಾರಿ [ಬ್ರಹ್ಮಚಾರೀ (ಸೀ. ಸ್ಯಾ. ಪೀ.)] ಕಮನ್ತಿ;
ಘಟ್ಟೇ ಮುದುಕೇನ [ಯಂ ತೇ ಮುದು ತೇನ (ಸೀ.), ಯಂ ತೇ ಮುದೂ ತೇನ (ಪೀ.)] ವಿನೇಹಿ ಕಣ್ಡುಂ [ಕಣ್ಡುಕಂ (ಪೀ.)], ಯಥಾ ಅಹಂ ಪರಮಸುಖೀ ಭವೇಯ್ಯಂ’’.
‘‘ಇತೋ ನು ಭೋತೋ ಕತಮೇನ ಅಸ್ಸಮೋ, ಕಚ್ಚಿ ಭವಂ ಅಭಿರಮಸಿ [ಅಭಿರಮಸೀ (ಪೀ.)] ಅರಞ್ಞೇ;
ಕಚ್ಚಿ ನು ತೇ [ಕಚ್ಚಿ ತೇ (ಪೀ.)] ಮೂಲಫಲಂ ಪಹೂತಂ, ಕಚ್ಚಿ ಭವನ್ತಂ ನ ವಿಹಿಂಸನ್ತಿ ವಾಳಾ’’.
‘‘ಇತೋ ¶ ಉಜುಂ ಉತ್ತರಾಯಂ ದಿಸಾಯಂ, ಖೇಮಾನದೀ ಹಿಮವತಾ ಪಭಾವೀ [ಪಭಾತಿ (ಸೀ. ಪೀ.)];
ತಸ್ಸಾ ತೀರೇ ಅಸ್ಸಮೋ ಮಯ್ಹ ರಮ್ಮೋ, ಅಹೋ ಭವಂ ಅಸ್ಸಮಂ ಮಯ್ಹಂ ಪಸ್ಸೇ.
‘‘ಅಮ್ಬಾ ಚ ಸಾಲಾ ತಿಲಕಾ ಚ ಜಮ್ಬುಯೋ, ಉದ್ದಾಲಕಾ ಪಾಟಲಿಯೋ ಚ ಫುಲ್ಲಾ;
ಸಮನ್ತತೋ ಕಿಮ್ಪುರಿಸಾಭಿಗೀತಂ, ಅಹೋ ಭವಂ ಅಸ್ಸಮಂ ಮಯ್ಹಂ ಪಸ್ಸೇ.
‘‘ತಾಲಾ ಚ ಮೂಲಾ ಚ ಫಲಾ ಚ ಮೇತ್ಥ, ವಣ್ಣೇನ ಗನ್ಧೇನ ಉಪೇತರೂಪಂ;
ತಂ ಭೂಮಿಭಾಗೇಹಿ ಉಪೇತರೂಪಂ, ಅಹೋ ಭವಂ ಅಸ್ಸಮಂ ಮಯ್ಹಂ ಪಸ್ಸೇ.
‘‘ಫಲಾ ಚ ಮೂಲಾ ಚ ಪಹೂತಮೇತ್ಥ, ವಣ್ಣೇನ ಗನ್ಧೇನ ರಸೇನುಪೇತಾ;
ಆಯನ್ತಿ ಚ ಲುದ್ದಕಾ ತಂ ಪದೇಸಂ, ಮಾ ಮೇ ತತೋ ಮೂಲಫಲಂ ಅಹಾಸುಂ’’.
‘‘ಪಿತಾ ಮಮಂ ಮೂಲಫಲೇಸನಂ ಗತೋ, ಇದಾನಿ ಆಗಚ್ಛತಿ ಸಾಯಕಾಲೇ;
ಉಭೋವ ಗಚ್ಛಾಮಸೇ ಅಸ್ಸಮಂ ತಂ, ಯಾವ ¶ ಪಿತಾ ಮೂಲಫಲತೋ ಏತು’’.
‘‘ಅಞ್ಞೇ ¶ ಬಹೂ ಇಸಯೋ ಸಾಧುರೂಪಾ, ರಾಜೀಸಯೋ ಅನುಮಗ್ಗೇ ವಸನ್ತಿ;
ತೇ ಯೇವ ಪುಚ್ಛೇಸಿ ಮಮಸ್ಸಮಂ ತಂ, ತೇ ತಂ ನಯಿಸ್ಸನ್ತಿ ಮಮಂ ಸಕಾಸೇ’’.
‘‘ನ ತೇ ಕಟ್ಠಾನಿ ಭಿನ್ನಾನಿ, ನ ತೇ ಉದಕಮಾಭತಂ;
ಅಗ್ಗೀಪಿ ತೇ ನ ಹಾಪಿತೋ [ಹಾಸಿತೋ (ಸೀ. ಸ್ಯಾ.)], ಕಿಂ ನು ಮನ್ದೋವ ಝಾಯಸಿ.
‘‘ಭಿನ್ನಾನಿ ಕಟ್ಠಾನಿ ಹುತೋ ಚ ಅಗ್ಗಿ, ತಪನೀಪಿ ತೇ ಸಮಿತಾ ಬ್ರಹ್ಮಚಾರೀ [ಬ್ರಹ್ಮಚಾರಿ (?)];
ಪೀಠಞ್ಚ ಮಯ್ಹಂ ಉದಕಞ್ಚ ಹೋತಿ, ರಮಸಿ ತುವಂ [ತ್ವಂ (ಸೀ.)] ಬ್ರಹ್ಮಭೂತೋ ಪುರತ್ಥಾ.
‘‘ಅಭಿನ್ನಕಟ್ಠೋಸಿ ¶ ಅನಾಭತೋದಕೋ, ಅಹಾಪಿತಗ್ಗೀಸಿ [ಅಹಾಪಿತಗ್ಗೀಪಿ (ಕ.)] ಅಸಿದ್ಧಭೋಜನೋ [ಅಸಿಟ್ಠಭೋಜನೋ (ಕ.)];
ನ ಮೇ ತುವಂ ಆಲಪಸೀ ಮಮಜ್ಜ, ನಟ್ಠಂ ನು ಕಿಂ ಚೇತಸಿಕಞ್ಚ ದುಕ್ಖಂ’’.
‘‘ಇಧಾಗಮಾ ಜಟಿಲೋ ಬ್ರಹ್ಮಚಾರೀ, ಸುದಸ್ಸನೇಯ್ಯೋ ಸುತನೂ ವಿನೇತಿ;
ನೇವಾತಿದೀಘೋ ನ ಪನಾತಿರಸ್ಸೋ, ಸುಕಣ್ಹಕಣ್ಹಚ್ಛದನೇಹಿ ಭೋತೋ.
‘‘ಅಮಸ್ಸುಜಾತೋ ¶ ಅಪುರಾಣವಣ್ಣೀ, ಆಧಾರರೂಪಞ್ಚ ಪನಸ್ಸ ಕಣ್ಠೇ;
ದ್ವೇ ಯಮಾ [ದ್ವೇ ಪಸ್ಸ (ಸೀ.), ದ್ವಾಸ್ಸ (ಪೀ.)] ಗಣ್ಡಾ ಉರೇಸು ಜಾತಾ, ಸುವಣ್ಣತಿನ್ದುಕನಿಭಾ [ಸುವಣ್ಣಪಿನ್ದೂಪನಿಭಾ (ಸೀ.), ಸುವಣ್ಣತಿಣ್ಡುಸನ್ನಿಭಾ (ಸ್ಯಾ.), ಸೋವನ್ನಪಿಣ್ಡೂಪನಿಭಾ (ಪೀ.)] ಪಭಸ್ಸರಾ.
‘‘ಮುಖಞ್ಚ ತಸ್ಸ ಭುಸದಸ್ಸನೇಯ್ಯಂ, ಕಣ್ಣೇಸು ಲಮ್ಬನ್ತಿ ಚ ಕುಞ್ಚಿತಗ್ಗಾ;
ತೇ ಜೋತರೇ ಚರತೋ ಮಾಣವಸ್ಸ, ಸುತ್ತಞ್ಚ ಯಂ ಸಂಯಮನಂ ಜಟಾನಂ.
‘‘ಅಞ್ಞಾ ¶ ಚ ತಸ್ಸ ಸಂಯಮಾನಿ [ಸಂಯಮನೀ (ಸೀ. ಪೀ.)] ಚತಸ್ಸೋ, ನೀಲಾ ಪೀತಾ [ನೀಲಾಪಿ ತಾ (ಪೀ.)] ಲೋಹಿತಿಕಾ [ಲೋಹಿತಕಾ (ಸ್ಯಾ. ಪೀ. ಕ.)] ಚ ಸೇತಾ;
ತಾ ಪಿಂಸರೇ [ಸಂಸರೇ (ಸೀ. ಸ್ಯಾ.)] ಚರತೋ ಮಾಣವಸ್ಸ, ತಿರಿಟಿ [ಚಿರೀಟಿ (ಸೀ. ಪೀ.)] ಸಙ್ಘಾರಿವ ಪಾವುಸಮ್ಹಿ.
‘‘ನ ಮಿಖಲಂ ಮುಞ್ಜಮಯಂ ಧಾರೇತಿ, ನ ಸನ್ಥರೇ [ಸನ್ತಚೇ (ಸೀ.), ಸನ್ತಚಂ (ಪೀ.), ಸನ್ತರೇ (ಕ.)] ನೋ ಪನ ಪಬ್ಬಜಸ್ಸ;
ತಾ ಜೋತರೇ ಜಘನನ್ತರೇ [ಜಘನವರೇ (ಸೀ. ಪೀ.)] ವಿಲಗ್ಗಾ, ಸತೇರತಾ ವಿಜ್ಜುರಿವನ್ತಲಿಕ್ಖೇ.
‘‘ಅಖೀಲಕಾನಿ ಚ ಅವಣ್ಟಕಾನಿ, ಹೇಟ್ಠಾ ನಭ್ಯಾ ಕಟಿಸಮೋಹಿತಾನಿ;
ಅಘಟ್ಟಿತಾ ನಿಚ್ಚಕೀಳಂ ಕರೋನ್ತಿ, ಹಂ ತಾತ ಕಿಂರುಕ್ಖಫಲಾನಿ ತಾನಿ.
‘‘ಜಟಾ ¶ ಚ ತಸ್ಸ ಭುಸದಸ್ಸನೇಯ್ಯಾ, ಪರೋಸತಂ ವೇಲ್ಲಿತಗ್ಗಾ ಸುಗನ್ಧಾ;
ದ್ವೇಧಾ ಸಿರೋ ಸಾಧು ವಿಭತ್ತರೂಪೋ, ಅಹೋ ನು ಖೋ ಮಯ್ಹ ತಥಾ ಜಟಾಸ್ಸು.
‘‘ಯದಾ ಚ ಸೋ ಪಕಿರತಿ ತಾ ಜಟಾಯೋ, ವಣ್ಣೇನ ಗನ್ಧೇನ ಉಪೇತರೂಪಾ;
ನೀಲುಪ್ಪಲಂ ವಾತಸಮೇರಿತಂವ, ತಥೇವ ಸಂವಾತಿ ಪನಸ್ಸಮೋ ಅಯಂ.
‘‘ಪಙ್ಕೋ ಚ ತಸ್ಸ ಭುಸದಸ್ಸನೇಯ್ಯೋ, ನೇತಾದಿಸೋ ಯಾದಿಸೋ ಮಯ್ಹಂ ಕಾಯೇ [ಕಾಯೋ (ಸೀ. ಸ್ಯಾ. ಪೀ.)];
ಸೋ ವಾಯತೀ ಏರಿತೋ ಮಾಲುತೇನ, ವನಂ ಯಥಾ ಅಗ್ಗಗಿಮ್ಹೇ ಸುಫುಲ್ಲಂ.
‘‘ನಿಹನ್ತಿ ¶ ಸೋ ರುಕ್ಖಫಲಂ ಪಥಬ್ಯಾ, ಸುಚಿತ್ತರೂಪಂ ರುಚಿರಂ ದಸ್ಸನೇಯ್ಯಂ;
ಖಿತ್ತಞ್ಚ ತಸ್ಸ ಪುನರೇತಿ ಹತ್ಥಂ, ಹಂ ತಾತ ಕಿಂರುಕ್ಖಫಲಂ ನು ಖೋ ತಂ.
‘‘ದನ್ತಾ ಚ ತಸ್ಸ ಭುಸದಸ್ಸನೇಯ್ಯಾ, ಸುದ್ಧಾ ಸಮಾ ಸಙ್ಖವರೂಪಪನ್ನಾ;
ಮನೋ ಪಸಾದೇನ್ತಿ ವಿವರಿಯಮಾನಾ, ನ ಹಿ [ನ ಹ (ಸೀ. ಪೀ.)] ನೂನ ಸೋ ಸಾಕಮಖಾದಿ ತೇಹಿ.
‘‘ಅಕಕ್ಕಸಂ ¶ ಅಗ್ಗಳಿತಂ ಮುಹುಂ ಮುದುಂ, ಉಜುಂ ಅನುದ್ಧತಂ ಅಚಪಲಮಸ್ಸ ಭಾಸಿತಂ;
ರುದಂ ಮನುಞ್ಞಂ ಕರವೀಕಸುಸ್ಸರಂ, ಹದಯಙ್ಗಮಂ ರಞ್ಜಯತೇವ ಮೇ ಮನೋ.
‘‘ಬಿನ್ದುಸ್ಸರೋ ನಾತಿವಿಸಟ್ಠವಾಕ್ಯೋ [ನಾತಿವಿಸ್ಸಟ್ಠವಾಕ್ಯೋ (ಸೀ. ಸ್ಯಾ. ಪೀ.)], ನ ನೂನ ಸಜ್ಝಾಯಮತಿಪ್ಪಯುತ್ತೋ;
ಇಚ್ಛಾಮಿ ಭೋ [ಖೋ (ಸೀ. ಸ್ಯಾ. ಪೀ.)] ತಂ ಪುನದೇವ ದಟ್ಠುಂ, ಮಿತ್ತೋ ಹಿ [ಮಿತ್ತಂ ಹಿ (ಸೀ. ಸ್ಯಾ. ಪೀ.)] ಮೇ ಮಾಣವೋಹು [ಮಾಣವಾಹು (ಸೀ. ಸ್ಯಾ.), ಮಾಣವಾಹೂ (ಪೀ.)] ಪುರತ್ಥಾ.
‘‘ಸುಸನ್ಧಿ ¶ ಸಬ್ಬತ್ಥ ವಿಮಟ್ಠಿಮಂ ವಣಂ, ಪುಥೂ [ಪುಥುಂ (ಪೀ.), ಪುಥು (ಕ.)] ಸುಜಾತಂ ಖರಪತ್ತಸನ್ನಿಭಂ;
ತೇನೇವ ಮಂ ಉತ್ತರಿಯಾನ ಮಾಣವೋ, ವಿವರಿತಂ ಊರುಂ ಜಘನೇನ ಪೀಳಯಿ.
‘‘ತಪನ್ತಿ ಆಭನ್ತಿ ವಿರೋಚರೇ ಚ, ಸತೇರತಾ ವಿಜ್ಜುರಿವನ್ತಲಿಕ್ಖೇ;
ಬಾಹಾ ಮುದೂ ಅಞ್ಜನಲೋಮಸಾದಿಸಾ, ವಿಚಿತ್ರವಟ್ಟಙ್ಗುಲಿಕಾಸ್ಸ ಸೋಭರೇ.
‘‘ಅಕಕ್ಕಸಙ್ಗೋ ¶ ನ ಚ ದೀಘಲೋಮೋ, ನಖಾಸ್ಸ ದೀಘಾ ಅಪಿ ಲೋಹಿತಗ್ಗಾ;
ಮುದೂಹಿ ಬಾಹಾಹಿ ಪಲಿಸ್ಸಜನ್ತೋ, ಕಲ್ಯಾಣರೂಪೋ ರಮಯಂ [ರಮಯ್ಹಂ (ಕ.)] ಉಪಟ್ಠಹಿ.
‘‘ದುಮಸ್ಸ ¶ ತೂಲೂಪನಿಭಾ ಪಭಸ್ಸರಾ, ಸುವಣ್ಣಕಮ್ಬುತಲವಟ್ಟಸುಚ್ಛವೀ;
ಹತ್ಥಾ ಮುದೂ ತೇಹಿ ಮಂ ಸಂಫುಸಿತ್ವಾ, ಇತೋ ಗತೋ ತೇನ ಮಂ ದಹನ್ತಿ ತಾತ.
‘‘ನ ನೂನ [ನ ಹ ನೂನ (ಸೀ. ಪೀ.)] ಸೋ ಖಾರಿವಿಧಂ ಅಹಾಸಿ, ನ ನೂನ ಸೋ ಕಟ್ಠಾನಿ ಸಯಂ ಅಭಞ್ಜಿ;
ನ ನೂನ ಸೋ ಹನ್ತಿ ದುಮೇ ಕುಠಾರಿಯಾ [ಕುಧಾರಿಯಾ (ಕ.)], ನ ಹಿಸ್ಸ [ನ ಪಿಸ್ಸ (ಸೀ. ಸ್ಯಾ. ಪೀ.)] ಹತ್ಥೇಸು ಖಿಲಾನಿ ಅತ್ಥಿ.
‘‘ಅಚ್ಛೋ ಚ ಖೋ ತಸ್ಸ ವಣಂ ಅಕಾಸಿ, ಸೋ ಮಂಬ್ರವಿ ಸುಖಿತಂ ಮಂ ಕರೋಹಿ;
ತಾಹಂ ಕರಿಂ ತೇನ ಮಮಾಸಿ ಸೋಖ್ಯಂ, ಸೋ ಚಬ್ರವಿ ಸುಖಿತೋಸ್ಮೀತಿ ಬ್ರಹ್ಮೇ.
‘‘ಅಯಞ್ಚ ತೇ ಮಾಲುವಪಣ್ಣಸನ್ಥತಾ, ವಿಕಿಣ್ಣರೂಪಾವ ಮಯಾ ಚ ತೇನ ಚ;
ಕಿಲನ್ತರೂಪಾ ಉದಕೇ ರಮಿತ್ವಾ, ಪುನಪ್ಪುನಂ ಪಣ್ಣಕುಟಿಂ ವಜಾಮ.
‘‘ನ ಮಜ್ಜ ಮನ್ತಾ ಪಟಿಭನ್ತಿ ತಾತ, ನ ಅಗ್ಗಿಹುತ್ತಂ ನಪಿ ಯಞ್ಞತನ್ತಂ [ಯಞ್ಞತನ್ತ್ರಂ (ಸೀ.), ಯಞ್ಞಂ ತತ್ರ (ಪೀ. ಕ.), ಯಞ್ಞತತ್ರ (ಸ್ಯಾ.)];
ನ ಚಾಪಿ ತೇ ಮೂಲಫಲಾನಿ ಭುಞ್ಜೇ, ಯಾವ ¶ ನ ಪಸ್ಸಾಮಿ ತಂ ಬ್ರಹ್ಮಚಾರಿಂ.
‘‘ಅದ್ಧಾ ¶ ಪಜಾನಾಸಿ ತುವಮ್ಪಿ ತಾತ, ಯಸ್ಸಂ ದಿಸಂ [ದಿಸಾಯಂ (ಸ್ಯಾ. ಪೀ. ಕ.)] ವಸತೇ ಬ್ರಹ್ಮಚಾರೀ;
ತಂ ಮಂ ದಿಸಂ ಪಾಪಯ ತಾತ ಖಿಪ್ಪಂ, ಮಾ ತೇ ಅಹಂ ಅಮರಿಮಸ್ಸಮಮ್ಹಿ.
‘‘ವಿಚಿತ್ರಫುಲ್ಲಂ [ವಿಚಿತ್ರಪುಪ್ಫಂ (ಸೀ. ಪೀ.)] ಹಿ ವನಂ ಸುತಂ ಮಯಾ, ದಿಜಾಭಿಘುಟ್ಠಂ ದಿಜಸಙ್ಘಸೇವಿತಂ;
ತಂ ಮಂ ವನಂ ಪಾಪಯ ತಾತ ಖಿಪ್ಪಂ, ಪುರಾ ತೇ ಪಾಣಂ ವಿಜಹಾಮಿ ಅಸ್ಸಮೇ’’.
‘‘ಇಮಸ್ಮಾಹಂ ಜೋತಿರಸೇ ವನಮ್ಹಿ, ಗನ್ಧಬ್ಬದೇವಚ್ಛರಸಙ್ಘಸೇವಿತೇ;
ಇಸೀನಮಾವಾಸೇ ಸನನ್ತನಮ್ಹಿ, ನೇತಾದಿಸಂ ಅರತಿಂ ಪಾಪುಣೇಥ.
‘‘ಭವನ್ತಿ ಮಿತ್ತಾನಿ ಅಥೋ ನ ಹೋನ್ತಿ, ಞಾತೀಸು ಮಿತ್ತೇಸು ಕರೋನ್ತಿ ಪೇಮಂ;
ಅಯಞ್ಚ ಜಮ್ಮೋ ಕಿಸ್ಸ ವಾ ನಿವಿಟ್ಠೋ, ಯೋ ನೇವ ಜಾನಾತಿ ಕುತೋಮ್ಹಿ ಆಗತೋ.
‘‘ಸಂವಾಸೇನ ಹಿ ಮಿತ್ತಾನಿ, ಸನ್ಧಿಯನ್ತಿ [ಸನ್ಧೀಯನ್ತಿ (ಸೀ. ಪೀ.)] ಪುನಪ್ಪುನಂ;
ಸ್ವೇವ ಮಿತ್ತೋ [ಸಾ ಚ ಮೇತ್ತಿ (ಪೀ.)] ಅಸಂಗನ್ತು, ಅಸಂವಾಸೇನ ಜೀರತಿ.
‘‘ಸಚೇ ¶ ತುವಂ ದಕ್ಖಸಿ ಬ್ರಹ್ಮಚಾರಿಂ, ಸಚೇ ತುವಂ ಸಲ್ಲಪೇ [ಸಲ್ಲಪಿ (ಸೀ.)] ಬ್ರಹ್ಮಚಾರಿನಾ;
ಸಮ್ಪನ್ನಸಸ್ಸಂವ ಮಹೋದಕೇನ, ತಪೋಗುಣಂ ಖಿಪ್ಪಮಿಮಂ ಪಹಿಸ್ಸಸಿ [ಪಹಸ್ಸಸಿ (ಸೀ. ಸ್ಯಾ. ಪೀ.)].
‘‘ಪುನಪಿ ¶ [ಪುನಪ್ಪಿ (ಪೀ.)] ಚೇ ದಕ್ಖಸಿ ಬ್ರಹ್ಮಚಾರಿಂ, ಪುನಪಿ [ಪುನಪ್ಪಿ (ಪೀ.)] ಚೇ ಸಲ್ಲಪೇ ಬ್ರಹ್ಮಚಾರಿನಾ;
ಸಮ್ಪನ್ನಸಸ್ಸಂವ ಮಹೋದಕೇನ, ಉಸ್ಮಾಗತಂ ಖಿಪ್ಪಮಿಮಂ ಪಹಿಸ್ಸಸಿ.
‘‘ಭೂತಾನಿ ¶ ಹೇತಾನಿ [ಏತಾನಿ (ಪೀ.)] ಚರನ್ತಿ ತಾತ, ವಿರೂಪರೂಪೇನ ಮನುಸ್ಸಲೋಕೇ;
ನ ತಾನಿ ಸೇವೇಥ ನರೋ ಸಪಞ್ಞೋ, ಆಸಜ್ಜ ನಂ ನಸ್ಸತಿ ಬ್ರಹ್ಮಚಾರೀ’’ತಿ.
ನಿಳಿನಿಕಾಜಾತಕಂ [ನಳಿನೀಜಾತಕಂ (ಸೀ.), ನಳಿನಿಜಾತಕಂ (ಪೀ.)] ಪಠಮಂ.
೫೨೭. ಉಮ್ಮಾದನ್ತೀಜಾತಕಂ (೨)
‘‘ನಿವೇಸನಂ ಕಸ್ಸ ನುದಂ ಸುನನ್ದ, ಪಾಕಾರೇನ ಪಣ್ಡುಮಯೇನ ಗುತ್ತಂ;
ಕಾ ದಿಸ್ಸತಿ ಅಗ್ಗಿಸಿಖಾವ ದೂರೇ, ವೇಹಾಯಸಂ [ವೇಹಾಸಯಂ (ಸೀ. ಪೀ.)] ಪಬ್ಬತಗ್ಗೇವ ಅಚ್ಚಿ.
‘‘ಧೀತಾ ¶ ನ್ವಯಂ [ನಯಂ (ಸೀ. ಪೀ.), ನ್ವಾಯಂ (ಸ್ಯಾ.)] ಕಸ್ಸ ಸುನನ್ದ ಹೋತಿ, ಸುಣಿಸಾ ನ್ವಯಂ [ನಯಂ (ಸೀ. ಪೀ.), ನ್ವಾಯಂ (ಸ್ಯಾ.)] ಕಸ್ಸ ಅಥೋಪಿ ಭರಿಯಾ;
ಅಕ್ಖಾಹಿ ಮೇ ಖಿಪ್ಪಮಿಧೇವ ಪುಟ್ಠೋ, ಅವಾವಟಾ ಯದಿ ವಾ ಅತ್ಥಿ ಭತ್ತಾ’’.
‘‘ಅಹಞ್ಹಿ ಜಾನಾಮಿ ಜನಿನ್ದ ಏತಂ, ಮತ್ಯಾ ಚ ಪೇತ್ಯಾ ಚ ಅಥೋಪಿ ಅಸ್ಸಾ;
ತವೇವ ಸೋ ಪುರಿಸೋ ಭೂಮಿಪಾಲ, ರತ್ತಿನ್ದಿವಂ ಅಪ್ಪಮತ್ತೋ ತವತ್ಥೇ.
‘‘ಇದ್ಧೋ ಚ ಫೀತೋ ಚ ಸುವಡ್ಢಿತೋ [ಸುಬಾಳ್ಹಿಕೋ (ಪೀ.)] ಚ, ಅಮಚ್ಚೋ ಚ ತೇ ಅಞ್ಞತರೋ ಜನಿನ್ದ;
ತಸ್ಸೇಸಾ ಭರಿಯಾಭಿಪಾರಕಸ್ಸ [ಅಹಿಪಾರಕಸ್ಸ (ಸೀ. ಪೀ.), ಅಭಿಪಾದಕಸ್ಸ (ಕ.)], ಉಮ್ಮಾದನ್ತೀ [ಉಮ್ಮಾದನ್ತೀತಿ (ಕ.)] ನಾಮಧೇಯ್ಯೇನ ರಾಜ’’.
‘‘ಅಮ್ಭೋ ¶ ಅಮ್ಭೋ ನಾಮಮಿದಂ ಇಮಿಸ್ಸಾ, ಮತ್ಯಾ ಚ ಪೇತ್ಯಾ ಚ ಕತಂ ಸುಸಾಧು;
ತದಾ [ತಥಾ (ಸೀ. ಸ್ಯಾ. ಪೀ.)] ಹಿ ಮಯ್ಹಂ ಅವಲೋಕಯನ್ತೀ, ಉಮ್ಮತ್ತಕಂ ಉಮ್ಮದನ್ತೀ ಅಕಾಸಿ’’.
‘‘ಯಾ ಪುಣ್ಣಮಾಸೇ [ಪುಣ್ಣಮಾಯೇ (ಕ.)] ಮಿಗಮನ್ದಲೋಚನಾ, ಉಪಾವಿಸಿ ಪುಣ್ಡರೀಕತ್ತಚಙ್ಗೀ;
ದ್ವೇ ಪುಣ್ಣಮಾಯೋ ತದಹೂ ಅಮಞ್ಞಹಂ, ದಿಸ್ವಾನ ಪಾರಾವತರತ್ತವಾಸಿನಿಂ.
‘‘ಅಳಾರಪಮ್ಹೇಹಿ ¶ ಸುಭೇಹಿ ವಗ್ಗುಭಿ, ಪಲೋಭಯನ್ತೀ ಮಂ ಯದಾ ಉದಿಕ್ಖತಿ;
ವಿಜಮ್ಭಮಾನಾ ಹರತೇವ ಮೇ ಮನೋ, ಜಾತಾ ವನೇ ಕಿಮ್ಪುರಿಸೀವ ಪಬ್ಬತೇ.
‘‘ತದಾ ಹಿ ಬ್ರಹತೀ ಸಾಮಾ, ಆಮುತ್ತಮಣಿಕುಣ್ಡಲಾ;
ಏಕಚ್ಚವಸನಾ ನಾರೀ, ಮಿಗೀ ಭನ್ತಾವುದಿಕ್ಖತಿ.
‘‘ಕದಾಸ್ಸು ಮಂ ತಮ್ಬನಖಾ ಸುಲೋಮಾ, ಬಾಹಾಮುದೂ ಚನ್ದನಸಾರಲಿತ್ತಾ;
ವಟ್ಟಙ್ಗುಲೀ ಸನ್ನತಧೀರಕುತ್ತಿಯಾ, ನಾರೀ ಉಪಞ್ಞಿಸ್ಸತಿ ಸೀಸತೋ ಸುಭಾ.
‘‘ಕದಾಸ್ಸು ಮಂ ಕಞ್ಚನಜಾಲುರಚ್ಛದಾ, ಧೀತಾ ತಿರೀಟಿಸ್ಸ ವಿಲಗ್ಗಮಜ್ಝಾ;
ಮುದೂಹಿ ಬಾಹಾಹಿ ಪಲಿಸ್ಸಜಿಸ್ಸತಿ, ಬ್ರಹಾವನೇ ಜಾತದುಮಂವ ಮಾಲುವಾ.
‘‘ಕದಾಸ್ಸು ¶ [ಕದಾಸ್ಸು ಮಂ (ಸ್ಯಾ. ಕ.)] ಲಾಖಾರಸರತ್ತಸುಚ್ಛವೀ, ಬಿನ್ದುತ್ಥನೀ ಪುಣ್ಡರೀಕತ್ತಚಙ್ಗೀ;
ಮುಖಂ ಮುಖೇನ ಉಪನಾಮಯಿಸ್ಸತಿ, ಸೋಣ್ಡೋವ ಸೋಣ್ಡಸ್ಸ ಸುರಾಯ ಥಾಲಂ.
‘‘ಯದಾದ್ದಸಂ [ಯಥಾದ್ದಸಂ (ಪೀ.)] ತಂ ತಿಟ್ಠನ್ತಿಂ, ಸಬ್ಬಭದ್ದಂ [ಸಬ್ಬಗತ್ತಂ (ಸೀ. ಸ್ಯಾ. ಪೀ.)] ಮನೋರಮಂ;
ತತೋ ¶ ಸಕಸ್ಸ ಚಿತ್ತಸ್ಸ, ನಾವಬೋಧಾಮಿ ಕಞ್ಚಿನಂ [ಕಿಞ್ಚಿನಂ (ಕ.), ಕಿಞ್ಚನಂ (ಪೀ.)].
‘‘ಉಮ್ಮಾದನ್ತಿಮಹಂ ¶ ದಟ್ಠಾ [ದಿಟ್ಠಾ (ಸೀ. ಸ್ಯಾ. ಪೀ. ಕ.)], ಆಮುತ್ತಮಣಿಕುಣ್ಡಲಂ;
ನ ಸುಪಾಮಿ ದಿವಾರತ್ತಿಂ, ಸಹಸ್ಸಂವ ಪರಾಜಿತೋ.
‘‘ಸಕ್ಕೋ ಚೇ [ಚ (ಸೀ. ಪೀ.)] ಮೇ ವರಂ ದಜ್ಜಾ, ಸೋ ಚ ಲಬ್ಭೇಥ ಮೇ ವರೋ;
ಏಕರತ್ತಂ ದ್ವಿರತ್ತಂ [ದಿರತ್ತಂ (ಪೀ.)] ವಾ, ಭವೇಯ್ಯಂ ಅಭಿಪಾರಕೋ;
ಉಮ್ಮಾದನ್ತ್ಯಾ ರಮಿತ್ವಾನ, ಸಿವಿರಾಜಾ ತತೋ ಸಿಯಂ’’ [ಸಿಯಾ (ಸ್ಯಾ. ಪೀ.)].
‘‘ಭೂತಾನಿ ಮೇ ಭೂತಪತೀ ನಮಸ್ಸತೋ, ಆಗಮ್ಮ ಯಕ್ಖೋ ಇದಮೇತದಬ್ರವಿ;
ರಞ್ಞೋ ಮನೋ ಉಮ್ಮದನ್ತ್ಯಾ ನಿವಿಟ್ಠೋ, ದದಾಮಿ ತೇ ತಂ ಪರಿಚಾರಯಸ್ಸು’’.
‘‘ಪುಞ್ಞಾ ವಿಧಂಸೇ ಅಮರೋ ನ ಚಮ್ಹಿ, ಜನೋ ಚ ಮೇ ಪಾಪಮಿದಞ್ಚ [ಪಾಪಮಿದನ್ತಿ (ಸೀ. ಪೀ.)] ಜಞ್ಞಾ;
ಭುಸೋ ಚ ತ್ಯಸ್ಸ ಮನಸೋ ವಿಘಾತೋ, ದತ್ವಾ ಪಿಯಂ ಉಮ್ಮದನ್ತಿಂ ಅದಟ್ಠಾ’’.
‘‘ಜನಿನ್ದ ನಾಞ್ಞತ್ರ ತಯಾ ಮಯಾ ವಾ, ಸಬ್ಬಾಪಿ ಕಮ್ಮಸ್ಸ ಕತಸ್ಸ ಜಞ್ಞಾ;
ಯಂ ತೇ ಮಯಾ ಉಮ್ಮದನ್ತೀ ಪದಿನ್ನಾ, ಭುಸೇಹಿ ರಾಜಾ ವನಥಂ ಸಜಾಹಿ’’.
‘‘ಯೋ ಪಾಪಕಂ ಕಮ್ಮ ಕರಂ ಮನುಸ್ಸೋ, ಸೋ ¶ ಮಞ್ಞತಿ ಮಾಯಿದ [ಮಾಯಿಧ (ಕ.)] ಮಞ್ಞಿಂಸು ಅಞ್ಞೇ;
ಪಸ್ಸನ್ತಿ ಭೂತಾನಿ ಕರೋನ್ತಮೇತಂ, ಯುತ್ತಾ ಚ ಯೇ ಹೋನ್ತಿ ನರಾ ಪಥಬ್ಯಾ.
‘‘ಅಞ್ಞೋ ನು ತೇ ಕೋಚಿ [ಕೋಧ (ಪೀ.)] ನರೋ ಪಥಬ್ಯಾ, ಸದ್ಧೇಯ್ಯ [ಸದ್ದಹೇಯ್ಯ (ಸೀ.)] ಲೋಕಸ್ಮಿ ನ ಮೇ ಪಿಯಾತಿ;
ಭುಸೋ ಚ ತ್ಯಸ್ಸ ಮನಸೋ ವಿಘಾತೋ, ದತ್ವಾ ಪಿಯಂ ಉಮ್ಮದನ್ತಿಂ ಅದಟ್ಠಾ’’.
‘‘ಅದ್ಧಾ ¶ ಪಿಯಾ ಮಯ್ಹ ಜನಿನ್ದ ಏಸಾ, ನ ಸಾ ಮಮಂ ಅಪ್ಪಿಯಾ ಭೂಮಿಪಾಲ;
ಗಚ್ಛೇವ ತ್ವಂ ಉಮ್ಮದನ್ತಿಂ ಭದನ್ತೇ, ಸೀಹೋವ ಸೇಲಸ್ಸ ಗುಹಂ ಉಪೇತಿ’’.
‘‘ನ ಪೀಳಿತಾ ಅತ್ತದುಖೇನ ಧೀರಾ, ಸುಖಪ್ಫಲಂ ಕಮ್ಮ ಪರಿಚ್ಚಜನ್ತಿ;
ಸಮ್ಮೋಹಿತಾ ವಾಪಿ ಸುಖೇನ ಮತ್ತಾ, ನ ಪಾಪಕಮ್ಮಞ್ಚ [ಪಾಪಕಂ ಕಮ್ಮ (ಪೀ.)] ಸಮಾಚರನ್ತಿ’’.
‘‘ತುವಞ್ಹಿ ಮಾತಾ ಚ ಪಿತಾ ಚ ಮಯ್ಹಂ, ಭತ್ತಾ ಪತೀ ಪೋಸಕೋ ದೇವತಾ ಚ;
ದಾಸೋ ಅಹಂ ತುಯ್ಹ ಸಪುತ್ತದಾರೋ, ಯಥಾಸುಖಂ ಸಾಮಿ [ಸಿಬ್ಬ (ಸೀ.), ಸೀವಿ (ಸ್ಯಾ.)] ಕರೋಹಿ ಕಾಮಂ’’.
‘‘ಯೋ ಇಸ್ಸರೋಮ್ಹೀತಿ ಕರೋತಿ ಪಾಪಂ, ಕತ್ವಾ ¶ ಚ ಸೋ ನುತ್ತಸತೇ [ನುತ್ತಪತೇ (ಪೀ.)] ಪರೇಸಂ;
ನ ತೇನ ಸೋ ಜೀವತಿ ದೀಘಮಾಯು [ದೀಘಮಾಯುಂ (ಸೀ. ಸ್ಯಾ.)], ದೇವಾಪಿ ಪಾಪೇನ ಸಮೇಕ್ಖರೇ ನಂ.
‘‘ಅಞ್ಞಾತಕಂ ಸಾಮಿಕೇಹೀ ಪದಿನ್ನಂ, ಧಮ್ಮೇ ಠಿತಾ ಯೇ ಪಟಿಚ್ಛನ್ತಿ ದಾನಂ;
ಪಟಿಚ್ಛಕಾ ದಾಯಕಾ ಚಾಪಿ ತತ್ಥ, ಸುಖಪ್ಫಲಞ್ಞೇವ ಕರೋನ್ತಿ ಕಮ್ಮಂ’’.
‘‘ಅಞ್ಞೋ ¶ ನು ತೇ ಕೋಚಿ ನರೋ ಪಥಬ್ಯಾ, ಸದ್ಧೇಯ್ಯ ಲೋಕಸ್ಮಿ ನ ಮೇ ಪಿಯಾತಿ;
ಭುಸೋ ಚ ತ್ಯಸ್ಸ ಮನಸೋ ವಿಘಾತೋ, ದತ್ವಾ ಪಿಯಂ ಉಮ್ಮದನ್ತಿಂ ಅದಟ್ಠಾ’’.
‘‘ಅದ್ಧಾ ಪಿಯಾ ಮಯ್ಹ ಜನಿನ್ದ ಏಸಾ, ನ ಸಾ ಮಮಂ ಅಪ್ಪಿಯಾ ಭೂಮಿಪಾಲ;
ಯಂ ತೇ ಮಯಾ ಉಮ್ಮದನ್ತೀ ಪದಿನ್ನಾ, ಭುಸೇಹಿ ರಾಜಾ ವನಥಂ ಸಜಾಹಿ’’.
‘‘ಯೋ ¶ ಅತ್ತದುಕ್ಖೇನ ಪರಸ್ಸ ದುಕ್ಖಂ, ಸುಖೇನ ವಾ ಅತ್ತಸುಖಂ ದಹಾತಿ;
ಯಥೇವಿದಂ ಮಯ್ಹ ತಥಾ ಪರೇಸಂ, ಯೋ [ಸೋ (ಪೀ.)] ಏವಂ ಜಾನಾತಿ [ಪಜಾನಾತಿ (ಕ.)] ಸ ವೇದಿ ಧಮ್ಮಂ.
‘‘ಅಞ್ಞೋ ನು ತೇ ಕೋಚಿ ನರೋ ಪಥಬ್ಯಾ, ಸದ್ಧೇಯ್ಯ ¶ ಲೋಕಸ್ಮಿ ನ ಮೇ ಪಿಯಾತಿ;
ಭುಸೋ ಚ ತ್ಯಸ್ಸ ಮನಸೋ ವಿಘಾತೋ, ದತ್ವಾ ಪಿಯಂ ಉಮ್ಮದನ್ತಿಂ ಅದಟ್ಠಾ’’.
‘‘ಜನಿನ್ದ ಜಾನಾಸಿ ಪಿಯಾ ಮಮೇಸಾ, ನ ಸಾ ಮಮಂ ಅಪ್ಪಿಯಾ ಭೂಮಿಪಾಲ;
ಪಿಯೇನ ತೇ ದಮ್ಮಿ ಪಿಯಂ ಜನಿನ್ದ, ಪಿಯದಾಯಿನೋ ದೇವ ಪಿಯಂ ಲಭನ್ತಿ’’.
‘‘ಸೋ ನೂನಾಹಂ ವಧಿಸ್ಸಾಮಿ, ಅತ್ತಾನಂ ಕಾಮಹೇತುಕಂ;
ನ ಹಿ ಧಮ್ಮಂ ಅಧಮ್ಮೇನ, ಅಹಂ ವಧಿತುಮುಸ್ಸಹೇ’’.
‘‘ಸಚೇ ತುವಂ ಮಯ್ಹ ಸತಿಂ [ಸನ್ತಿ (ಕ.)] ಜನಿನ್ದ, ನ ಕಾಮಯಾಸಿ ನರವೀರ ಸೇಟ್ಠ;
ಚಜಾಮಿ ನಂ ಸಬ್ಬಜನಸ್ಸ ಸಿಬ್ಯಾ [ಸಿಬ್ಬ (ಸೀ. ಪೀ.), ಮಜ್ಝೇ (ಸ್ಯಾ.)], ಮಯಾ ಪಮುತ್ತಂ ತತೋ ಅವ್ಹಯೇಸಿ [ಅವ್ಹಯಾಸಿ (ಕ.)] ನಂ’’.
‘‘ಅದೂಸಿಯಂ ಚೇ ಅಭಿಪಾರಕ ತ್ವಂ, ಚಜಾಸಿ ಕತ್ತೇ ಅಹಿತಾಯ ತ್ಯಸ್ಸ;
ಮಹಾ ಚ ತೇ ಉಪವಾದೋಪಿ ಅಸ್ಸ, ನ ಚಾಪಿ ತ್ಯಸ್ಸ ನಗರಮ್ಹಿ ಪಕ್ಖೋ’’.
‘‘ಅಹಂ ಸಹಿಸ್ಸಂ ಉಪವಾದಮೇತಂ, ನಿನ್ದಂ ಪಸಂಸಂ ಗರಹಞ್ಚ ಸಬ್ಬಂ;
ಮಮೇತಮಾಗಚ್ಛತು ಭೂಮಿಪಾಲ, ಯಥಾಸುಖಂ ¶ ಸಿವಿ [ಸಿಬ್ಬ (ಸೀ. ಪೀ.)] ಕರೋಹಿ ಕಾಮಂ’’.
‘‘ಯೋ ¶ ನೇವ ನಿನ್ದಂ ನ ಪನಪ್ಪಸಂಸಂ, ಆದಿಯತಿ ಗರಹಂ ನೋಪಿ ಪೂಜಂ;
ಸಿರೀ ಚ ಲಕ್ಖೀ ಚ ಅಪೇತಿ ತಮ್ಹಾ, ಆಪೋ ಸುವುಟ್ಠೀವ ಯಥಾ ಥಲಮ್ಹಾ’’.
‘‘ಯಂ ಕಿಞ್ಚಿ ದುಕ್ಖಞ್ಚ ಸುಖಞ್ಚ ಏತ್ತೋ, ಧಮ್ಮಾತಿಸಾರಞ್ಚ ಮನೋವಿಘಾತಂ;
ಉರಸಾ ಅಹಂ ಪಚ್ಚುತ್ತರಿಸ್ಸಾಮಿ [ಪಟಿಚ್ಛಿಸ್ಸಾಮಿ (ಸೀ. ಸ್ಯಾ.), ಪಚ್ಚುಪದಿಸ್ಸಾಮಿ (ಪೀ.)] ಸಬ್ಬಂ, ಪಥವೀ ಯಥಾ ಥಾವರಾನಂ ತಸಾನಂ’’.
‘‘ಧಮ್ಮಾತಿಸಾರಞ್ಚ ಮನೋವಿಘಾತಂ, ದುಕ್ಖಞ್ಚ ನಿಚ್ಛಾಮಿ ಅಹಂ ಪರೇಸಂ;
ಏಕೋವಿಮಂ ಹಾರಯಿಸ್ಸಾಮಿ ಭಾರಂ, ಧಮ್ಮೇ ಠಿತೋ ಕಿಞ್ಚಿ ಅಹಾಪಯನ್ತೋ’’.
‘‘ಸಗ್ಗೂಪಗಂ ಪುಞ್ಞಕಮ್ಮಂ ಜನಿನ್ದ, ಮಾ ಮೇ ತುವಂ ಅನ್ತರಾಯಂ ಅಕಾಸಿ;
ದದಾಮಿ ತೇ ಉಮ್ಮದನ್ತಿಂ ಪಸನ್ನೋ, ರಾಜಾವ ಯಞ್ಞೇ ಧನಂ ಬ್ರಾಹ್ಮಣಾನಂ’’.
‘‘ಅದ್ಧಾ ತುವಂ ಕತ್ತೇ ಹಿತೇಸಿ ಮಯ್ಹಂ, ಸಖಾ ಮಮಂ ಉಮ್ಮದನ್ತೀ ತುವಞ್ಚ;
ನಿನ್ದೇಯ್ಯು ದೇವಾ ಪಿತರೋ ಚ ಸಬ್ಬೇ, ಪಾಪಞ್ಚ ¶ ಪಸ್ಸಂ ಅಭಿಸಮ್ಪರಾಯಂ’’.
‘‘ನ ಹೇತಧಮ್ಮಂ ಸಿವಿರಾಜ ವಜ್ಜುಂ, ಸನೇಗಮಾ ಜಾನಪದಾ ಚ ಸಬ್ಬೇ;
ಯಂ ತೇ ಮಯಾ ಉಮ್ಮದನ್ತೀ ಪದಿನ್ನಾ, ಭುಸೇಹಿ ರಾಜಾ ವನಥಂ ಸಜಾಹಿ’’.
‘‘ಅದ್ಧಾ ¶ ತುವಂ ಕತ್ತೇ ಹಿತೇಸಿ ಮಯ್ಹಂ, ಸಖಾ ಮಮಂ ಉಮ್ಮದನ್ತೀ ತುವಞ್ಚ;
ಸತಞ್ಚ ಧಮ್ಮಾನಿ ಸುಕಿತ್ತಿತಾನಿ, ಸಮುದ್ದವೇಲಾವ ದುರಚ್ಚಯಾನಿ’’.
‘‘ಆಹುನೇಯ್ಯೋ ¶ ಮೇಸಿ ಹಿತಾನುಕಮ್ಪೀ, ಧಾತಾ ವಿಧಾತಾ ಚಸಿ ಕಾಮಪಾಲೋ;
ತಯೀ ಹುತಾ ರಾಜ ಮಹಪ್ಫಲಾ ಹಿ [ಮಹಪ್ಫಲಾ ಹಿ ಮೇ (ಪೀ.)], ಕಾಮೇನ ಮೇ ಉಮ್ಮದನ್ತಿಂ ಪಟಿಚ್ಛ’’.
‘‘ಅದ್ಧಾ ಹಿ ಸಬ್ಬಂ ಅಭಿಪಾರಕ ತ್ವಂ, ಧಮ್ಮಂ ಅಚಾರೀ ಮಮ ಕತ್ತುಪುತ್ತ;
ಅಞ್ಞೋ ನು ತೇ ಕೋ ಇಧ ಸೋತ್ಥಿಕತ್ತಾ, ದ್ವಿಪದೋ ನರೋ ಅರುಣೇ ಜೀವಲೋಕೇ’’.
‘‘ತುವಂ ನು ಸೇಟ್ಠೋ ತ್ವಮನುತ್ತರೋಸಿ, ತ್ವಂ ಧಮ್ಮಗೂ [ಧಮ್ಮಗುತ್ತೋ (ಸೀ.)] ಧಮ್ಮವಿದೂ ಸುಮೇಧೋ;
ಸೋ ಧಮ್ಮಗುತ್ತೋ ಚಿರಮೇವ ಜೀವ, ಧಮ್ಮಞ್ಚ ¶ ಮೇ ದೇಸಯ ಧಮ್ಮಪಾಲ’’.
‘‘ತದಿಙ್ಘ ಅಭಿಪಾರಕ, ಸುಣೋಹಿ ವಚನಂ ಮಮ;
ಧಮ್ಮಂ ತೇ ದೇಸಯಿಸ್ಸಾಮಿ, ಸತಂ ಆಸೇವಿತಂ ಅಹಂ.
‘‘ಸಾಧು ಧಮ್ಮರುಚಿ ರಾಜಾ, ಸಾಧು ಪಞ್ಞಾಣವಾ ನರೋ;
ಸಾಧು ಮಿತ್ತಾನಮದ್ದುಬ್ಭೋ, ಪಾಪಸ್ಸಾಕರಣಂ ಸುಖಂ.
‘‘ಅಕ್ಕೋಧನಸ್ಸ ವಿಜಿತೇ, ಠಿತಧಮ್ಮಸ್ಸ ರಾಜಿನೋ;
ಸುಖಂ ಮನುಸ್ಸಾ ಆಸೇಥ, ಸೀತಚ್ಛಾಯಾಯ ಸಙ್ಘರೇ.
‘‘ನ ಚಾಹಮೇತಂ ಅಭಿರೋಚಯಾಮಿ, ಕಮ್ಮಂ ಅಸಮೇಕ್ಖಕತಂ ಅಸಾಧು;
ಯೇ ವಾಪಿ ಞತ್ವಾನ ಸಯಂ ಕರೋನ್ತಿ, ಉಪಮಾ ಇಮಾ ಮಯ್ಹಂ ತುವಂ ಸುಣೋಹಿ.
‘‘ಗವಂ ಚೇ ತರಮಾನಾನಂ, ಜಿಮ್ಹಂ ಗಚ್ಛತಿ ಪುಙ್ಗವೋ;
ಸಬ್ಬಾ ತಾ ಜಿಮ್ಹಂ ಗಚ್ಛನ್ತಿ, ನೇತ್ತೇ ಜಿಮ್ಹಂ ಗತೇ ಸತಿ.
‘‘ಏವಮೇವ [ಏವಮೇವಂ (ಪೀ.)] ಮನುಸ್ಸೇಸು, ಯೋ ಹೋತಿ ಸೇಟ್ಠಸಮ್ಮತೋ;
ಸೋ ಚೇ ಅಧಮ್ಮಂ ಚರತಿ, ಪಗೇವ ಇತರಾ ಪಜಾ;
ಸಬ್ಬಂ ¶ ರಟ್ಠಂ ದುಖಂ ಸೇತಿ, ರಾಜಾ ಚೇ ಹೋತಿ ಅಧಮ್ಮಿಕೋ.
‘‘ಗವಂ ¶ ಚೇ ತರಮಾನಾನಂ, ಉಜುಂ ಗಚ್ಛತಿ ಪುಙ್ಗವೋ;
ಸಬ್ಬಾ ಗಾವೀ ಉಜುಂ ಯನ್ತಿ, ನೇತ್ತೇ ಉಜುಂ ಗತೇ ಸತಿ.
‘‘ಏವಮೇವ ಮನುಸ್ಸೇಸು, ಯೋ ಹೋತಿ ಸೇಟ್ಠಸಮ್ಮತೋ;
ಸೋ ಸಚೇ ಧಮ್ಮಂ ಚರತಿ, ಪಗೇವ ಇತರಾ ಪಜಾ;
ಸಬ್ಬಂ ರಟ್ಠಂ ಸುಖಂ ಸೇತಿ, ರಾಜಾ ಚೇ ಹೋತಿ ಧಮ್ಮಿಕೋ.
‘‘ನ ಚಾಪಾಹಂ ಅಧಮ್ಮೇನ, ಅಮರತ್ತಮಭಿಪತ್ಥಯೇ;
ಇಮಂ ವಾ ಪಥವಿಂ ಸಬ್ಬಂ, ವಿಜೇತುಂ ಅಭಿಪಾರಕ.
‘‘ಯಞ್ಹಿ ಕಿಞ್ಚಿ ಮನುಸ್ಸೇಸು, ರತನಂ ಇಧ ವಿಜ್ಜತಿ;
ಗಾವೋ ದಾಸೋ ಹಿರಞ್ಞಞ್ಚ, ವತ್ಥಿಯಂ ಹರಿಚನ್ದನಂ.
‘‘ಅಸ್ಸಿತ್ಥಿಯೋ ¶ [ಅಸ್ಸಿತ್ಥಿಯೋ ಚ (ಸೀ.)] ರತನಂ ಮಣಿಕಞ್ಚ, ಯಞ್ಚಾಪಿ ಮೇ ಚನ್ದಸೂರಿಯಾ ಅಭಿಪಾಲಯನ್ತಿ;
ನ ತಸ್ಸ ಹೇತು ವಿಸಮಂ ಚರೇಯ್ಯಂ, ಮಜ್ಝೇ ಸಿವೀನಂ ಉಸಭೋಮ್ಹಿ ಜಾತೋ.
‘‘ನೇತಾ ಹಿತಾ [ನೇತಾಭಿ ತಾ (ಸೀ.)] ಉಗ್ಗತೋ ರಟ್ಠಪಾಲೋ, ಧಮ್ಮಂ ಸಿವೀನಂ ಅಪಚಾಯಮಾನೋ;
ಸೋ ಧಮ್ಮಮೇವಾನುವಿಚಿನ್ತಯನ್ತೋ, ತಸ್ಮಾ ಸಕೇ ಚಿತ್ತವಸೇ ನ ವತ್ತೋ’’.
‘‘ಅದ್ಧಾ ತುವಂ ಮಹಾರಾಜ, ನಿಚ್ಚಂ ಅಬ್ಯಸನಂ ಸಿವಂ;
ಕರಿಸ್ಸಸಿ ಚಿರಂ ರಜ್ಜಂ, ಪಞ್ಞಾ ಹಿ ತವ ತಾದಿಸೀ.
‘‘ಏತಂ ತೇ ಅನುಮೋದಾಮ, ಯಂ ಧಮ್ಮಂ ನಪ್ಪಮಜ್ಜಸಿ;
ಧಮ್ಮಂ ಪಮಜ್ಜ ಖತ್ತಿಯೋ, ರಟ್ಠಾ [ಠಾನಾ (ಸೀ.)] ಚವತಿ ಇಸ್ಸರೋ.
‘‘ಧಮ್ಮಂ ಚರ ಮಹಾರಾಜ, ಮಾತಾಪಿತೂಸು ಖತ್ತಿಯ;
ಇಧ ¶ ಧಮ್ಮಂ ಚರಿತ್ವಾನ, ರಾಜ ಸಗ್ಗಂ ಗಮಿಸ್ಸಸಿ.
‘‘ಧಮ್ಮಂ ಚರ ಮಹಾರಾಜ, ಪುತ್ತದಾರೇಸು ಖತ್ತಿಯ…ಪೇ….
‘‘ಧಮ್ಮಂ ಚರ ಮಹಾರಾಜ, ಮಿತ್ತಾಮಚ್ಚೇಸು ಖತ್ತಿಯ…ಪೇ….
‘‘ಧಮ್ಮಂ ಚರ ಮಹಾರಾಜ, ವಾಹನೇಸು ಬಲೇಸು ಚ…ಪೇ….
‘‘ಧಮ್ಮಂ ಚರ ಮಹಾರಾಜ, ಗಾಮೇಸು ನಿಗಮೇಸು ಚ…ಪೇ….
‘‘ಧಮ್ಮಂ ¶ ಚರ ಮಹಾರಾಜ, ರಟ್ಠೇಸು ಜನಪದೇಸು ಚ…ಪೇ….
‘‘ಧಮ್ಮಂ ಚರ ಮಹಾರಾಜ, ಸಮಣಬ್ರಾಹ್ಮಣೇಸು ಚ…ಪೇ….
‘‘ಧಮ್ಮಂ ಚರ ಮಹಾರಾಜ, ಮಿಗಪಕ್ಖೀಸು ಖತ್ತಿಯ…ಪೇ….
‘‘ಧಮ್ಮಂ ಚರ ಮಹಾರಾಜ, ಧಮ್ಮೋ ಚಿಣ್ಣೋ ಸುಖಾವಹೋ;
ಇಧ ಧಮ್ಮಂ ಚರಿತ್ವಾನ, ರಾಜ ಸಗ್ಗಂ ಗಮಿಸ್ಸಸಿ.
‘‘ಧಮ್ಮಂ ಚರ ಮಹಾರಾಜ, ಸಇನ್ದಾ ದೇವಾ ಸಬ್ರಹ್ಮಕಾ;
ಸುಚಿಣ್ಣೇನ ದಿವಂ ಪತ್ತಾ, ಮಾ ಧಮ್ಮಂ ರಾಜ ಪಾಮದೋ’’ತಿ.
ಉಮ್ಮಾದನ್ತೀಜಾತಕಂ ದುತಿಯಂ.
೫೨೮. ಮಹಾಬೋಧಿಜಾತಕಂ (೩)
‘‘ಕಿಂ ¶ ನು ದಣ್ಡಂ ಕಿಮಜಿನಂ, ಕಿಂ ಛತ್ತಂ ಕಿಮುಪಾಹನಂ;
ಕಿಮಙ್ಕುಸಞ್ಚ ಪತ್ತಞ್ಚ, ಸಙ್ಘಾಟಿಞ್ಚಾಪಿ ಬ್ರಾಹ್ಮಣ;
ತರಮಾನರೂಪೋಹಾಸಿ [ಗಣ್ಹಾಸಿ (ಸೀ. ಸ್ಯಾ. ಪೀ.)], ಕಿಂ ನು ಪತ್ಥಯಸೇ ದಿಸಂ’’.
‘‘ದ್ವಾದಸೇತಾನಿ ¶ ವಸ್ಸಾನಿ, ವುಸಿತಾನಿ ತವನ್ತಿಕೇ;
ನಾಭಿಜಾನಾಮಿ ಸೋಣೇನ, ಪಿಙ್ಗಲೇನಾಭಿಕೂಜಿತಂ.
‘‘ಸ್ವಾಯಂ ದಿತ್ತೋವ ನದತಿ, ಸುಕ್ಕದಾಠಂ ವಿದಂಸಯಂ;
ತವ ಸುತ್ವಾ ಸಭರಿಯಸ್ಸ, ವೀತಸದ್ಧಸ್ಸ ಮಂ ಪತಿ’’.
‘‘ಅಹು ಏಸ ಕತೋ ದೋಸೋ, ಯಥಾ ಭಾಸಸಿ ಬ್ರಾಹ್ಮಣ;
ಏಸ ಭಿಯ್ಯೋ ಪಸೀದಾಮಿ, ವಸ ಬ್ರಾಹ್ಮಣ ಮಾಗಮಾ’’.
‘‘ಸಬ್ಬಸೇತೋ ಪುರೇ ಆಸಿ, ತತೋಪಿ ಸಬಲೋ ಅಹು;
ಸಬ್ಬಲೋಹಿತಕೋ ದಾನಿ, ಕಾಲೋ ಪಕ್ಕಮಿತುಂ ಮಮ.
‘‘ಅಬ್ಭನ್ತರಂ ಪುರೇ ಆಸಿ, ತತೋ ಮಜ್ಝೇ ತತೋ ಬಹಿ;
ಪುರಾ ನಿದ್ಧಮನಾ ಹೋತಿ, ಸಯಮೇವ ವಜಾಮಹಂ.
‘‘ವೀತಸದ್ಧಂ ನ ಸೇವೇಯ್ಯ, ಉದಪಾನಂವನೋದಕಂ;
ಸಚೇಪಿ ನಂ ಅನುಖಣೇ, ವಾರಿ ಕದ್ದಮಗನ್ಧಿಕಂ.
‘‘ಪಸನ್ನಮೇವ ಸೇವೇಯ್ಯ, ಅಪ್ಪಸನ್ನಂ ವಿವಜ್ಜಯೇ;
ಪಸನ್ನಂ ಪಯಿರುಪಾಸೇಯ್ಯ, ರಹದಂ ವುದಕತ್ಥಿಕೋ.
‘‘ಭಜೇ ¶ ಭಜನ್ತಂ ಪುರಿಸಂ, ಅಭಜನ್ತಂ ನ ಭಜ್ಜಯೇ [ಭಾಜಯೇ (ಪೀ.)];
ಅಸಪ್ಪುರಿಸಧಮ್ಮೋ ಸೋ, ಯೋ ಭಜನ್ತಂ ನ ಭಜ್ಜತಿ [ಭಾಜತಿ (ಪೀ.)].
‘‘ಯೋ ¶ ಭಜನ್ತಂ ನ ಭಜತಿ, ಸೇವಮಾನಂ ನ ಸೇವತಿ;
ಸ ವೇ ಮನುಸ್ಸಪಾಪಿಟ್ಠೋ, ಮಿಗೋ ಸಾಖಸ್ಸಿತೋ ಯಥಾ.
‘‘ಅಚ್ಚಾಭಿಕ್ಖಣಸಂಸಗ್ಗಾ, ಅಸಮೋಸರಣೇನ ಚ;
ಏತೇನ ಮಿತ್ತಾ ಜೀರನ್ತಿ, ಅಕಾಲೇ ಯಾಚನಾಯ ಚ.
‘‘ತಸ್ಮಾ ನಾಭಿಕ್ಖಣಂ ಗಚ್ಛೇ, ನ ಚ ಗಚ್ಛೇ ಚಿರಾಚಿರಂ;
ಕಾಲೇನ ಯಾಚಂ ಯಾಚೇಯ್ಯ, ಏವಂ ಮಿತ್ತಾ ನ ಜೀಯರೇ [ಜೀರರೇ (ಸ್ಯಾ. ಪೀ.)].
‘‘ಅತಿಚಿರಂ ನಿವಾಸೇನ, ಪಿಯೋ ಭವತಿ ಅಪ್ಪಿಯೋ;
ಆಮನ್ತ ಖೋ ತಂ ಗಚ್ಛಾಮ, ಪುರಾ ತೇ ಹೋಮ ಅಪ್ಪಿಯಾ’’.
‘‘ಏವಂ ಚೇ ಯಾಚಮಾನಾನಂ, ಅಞ್ಜಲಿಂ ನಾವಬುಜ್ಝಸಿ;
ಪರಿಚಾರಕಾನಂ ಸತಂ [ಪರಿಚಾರಿಕಾನಂ ಸತ್ತಾನಂ (ಸೀ. ಸ್ಯಾ. ಪೀ.)], ವಚನಂ ನ ಕರೋಸಿ ನೋ;
ಏವಂ ತಂ ಅಭಿಯಾಚಾಮ, ಪುನ ಕಯಿರಾಸಿ ಪರಿಯಾಯಂ’’.
‘‘ಏವಂ ಚೇ ನೋ ವಿಹರತಂ, ಅನ್ತರಾಯೋ ನ ಹೇಸ್ಸತಿ;
ತುಯ್ಹಂ ವಾಪಿ [ತುಮ್ಹಞ್ಚಾಪಿ (ಸೀ.), ತುಯ್ಹಞ್ಚಾಪಿ (ಪೀ.)] ಮಹಾರಾಜ, ಮಯ್ಹಂ ವಾ [ಅಮ್ಹಂ ವಾ (ಸೀ.), ಮಯ್ಹಞ್ಚ (ಪೀ.)] ರಟ್ಠವದ್ಧನ;
ಅಪ್ಪೇವ ನಾಮ ಪಸ್ಸೇಮ, ಅಹೋರತ್ತಾನಮಚ್ಚಯೇ’’.
‘‘ಉದೀರಣಾ ¶ ಚೇ ಸಂಗತ್ಯಾ, ಭಾವಾಯ ಮನುವತ್ತತಿ;
ಅಕಾಮಾ ಅಕರಣೀಯಂ ವಾ, ಕರಣೀಯಂ ವಾಪಿ ಕುಬ್ಬತಿ;
ಆಕಾಮಾಕರಣೀಯಮ್ಹಿ, ಕ್ವಿಧ ಪಾಪೇನ ಲಿಪ್ಪತಿ [ಲಿಮ್ಪತಿ (ಸ್ಯಾ. ಕ.)].
‘‘ಸೋ ಚೇ ಅತ್ಥೋ ಚ ಧಮ್ಮೋ ಚ, ಕಲ್ಯಾಣೋ ನ ಚ ಪಾಪಕೋ;
ಭೋತೋ ಚೇ ವಚನಂ ಸಚ್ಚಂ, ಸುಹತೋ ವಾನರೋ ಮಯಾ.
‘‘ಅತ್ತನೋ ಚೇ ಹಿ ವಾದಸ್ಸ, ಅಪರಾಧಂ ವಿಜಾನಿಯಾ [ವಿಜಾನಿಯ (ಸೀ. ಸ್ಯಾ. ಪೀ.)];
ನ ¶ ಮಂ ತ್ವಂ ಗರಹೇಯ್ಯಾಸಿ, ಭೋತೋ ವಾದೋ ಹಿ ತಾದಿಸೋ’’.
‘‘ಇಸ್ಸರೋ ¶ ಸಬ್ಬಲೋಕಸ್ಸ, ಸಚೇ ಕಪ್ಪೇತಿ ಜೀವಿತಂ;
ಇದ್ಧಿಂ [ಇದ್ಧಿ (ಪೀ. ಕ.)] ಬ್ಯಸನಭಾವಞ್ಚ, ಕಮ್ಮಂ ಕಲ್ಯಾಣಪಾಪಕಂ;
ನಿದ್ದೇಸಕಾರೀ ಪುರಿಸೋ, ಇಸ್ಸರೋ ತೇನ ಲಿಪ್ಪತಿ.
‘‘ಸೋ ಚೇ ಅತ್ಥೋ ಚ ಧಮ್ಮೋ ಚ, ಕಲ್ಯಾಣೋ ನ ಚ ಪಾಪಕೋ;
ಭೋತೋ ಚೇ ವಚನಂ ಸಚ್ಚಂ, ಸುಹತೋ ವಾನರೋ ಮಯಾ.
‘‘ಅತ್ತನೋ ಚೇ ಹಿ ವಾದಸ್ಸ, ಅಪರಾಧಂ ವಿಜಾನಿಯಾ;
ನ ಮಂ ತ್ವಂ ಗರಹೇಯ್ಯಾಸಿ, ಭೋತೋ ವಾದೋ ಹಿ ತಾದಿಸೋ’’.
‘‘ಸಚೇ ಪುಬ್ಬೇಕತಹೇತು, ಸುಖದುಕ್ಖಂ ನಿಗಚ್ಛತಿ;
ಪೋರಾಣಕಂ ಕತಂ ಪಾಪಂ, ತಮೇಸೋ ಮುಚ್ಚತೇ [ಮುಞ್ಚತೇ (ಸೀ. ಸ್ಯಾ.)] ಇಣಂ;
ಪೋರಾಣಕಇಣಮೋಕ್ಖೋ, ಕ್ವಿಧ ಪಾಪೇನ ಲಿಪ್ಪತಿ.
‘‘ಸೋ ಚೇ ಅತ್ಥೋ ಚ ಧಮ್ಮೋ ಚ, ಕಲ್ಯಾಣೋ ನ ಚ ಪಾಪಕೋ;
ಭೋತೋ ಚೇ ವಚನಂ ಸಚ್ಚಂ, ಸುಹತೋ ವಾನರೋ ಮಯಾ.
‘‘ಅತ್ತನೋ ಚೇ ಹಿ ವಾದಸ್ಸ, ಅಪರಾಧಂ ವಿಜಾನಿಯಾ;
ನ ಮಂ ತ್ವಂ ಗರಹೇಯ್ಯಾಸಿ, ಭೋತೋ ವಾದೋ ಹಿ ತಾದಿಸೋ’’.
‘‘ಚತುನ್ನಂಯೇವುಪಾದಾಯ, ರೂಪಂ ಸಮ್ಭೋತಿ ಪಾಣಿನಂ;
ಯತೋ ಚ ರೂಪಂ ಸಮ್ಭೋತಿ, ತತ್ಥೇವಾನುಪಗಚ್ಛತಿ;
ಇಧೇವ ಜೀವತಿ ಜೀವೋ, ಪೇಚ್ಚ ಪೇಚ್ಚ ವಿನಸ್ಸತಿ.
ಉಚ್ಛಿಜ್ಜತಿ ಅಯಂ ಲೋಕೋ, ಯೇ ಬಾಲಾ ಯೇ ಚ ಪಣ್ಡಿತಾ;
ಉಚ್ಛಿಜ್ಜಮಾನೇ ಲೋಕಸ್ಮಿಂ, ಕ್ವಿಧ ಪಾಪೇನ ಲಿಪ್ಪತಿ.
‘‘ಸೋ ¶ ಚೇ ಅತ್ಥೋ ಚ ಧಮ್ಮೋ ಚ, ಕಲ್ಯಾಣೋ ನ ಚ ಪಾಪಕೋ;
ಭೋತೋ ಚೇ ವಚನಂ ಸಚ್ಚಂ, ಸುಹತೋ ವಾನರೋ ಮಯಾ.
‘‘ಅತ್ತನೋ ಚೇ ಹಿ ವಾದಸ್ಸ, ಅಪರಾಧಂ ವಿಜಾನಿಯಾ;
ನ ಮಂ ತ್ವಂ ಗರಹೇಯ್ಯಾಸಿ, ಭೋತೋ ವಾದೋ ಹಿ ತಾದಿಸೋ’’.
‘‘ಆಹು ¶ ಖತ್ತವಿದಾ [ಖತ್ತವಿಧಾ (ಸೀ. ಸ್ಯಾ. ಪೀ.)] ಲೋಕೇ, ಬಾಲಾ ಪಣ್ಡಿತಮಾನಿನೋ.
ಮಾತರಂ ಪಿತರಂ ಹಞ್ಞೇ, ಅಥೋ ಜೇಟ್ಠಮ್ಪಿ ಭಾತರಂ;
ಹನೇಯ್ಯ ಪುತ್ತ [ಪುತ್ತೇ ಚ (ಪೀ.)] ದಾರೇ ಚ, ಅತ್ಥೋ ಚೇ ತಾದಿಸೋ ಸಿಯಾ.
‘‘ಯಸ್ಸ ¶ ರುಕ್ಖಸ್ಸ ಛಾಯಾಯ, ನಿಸೀದೇಯ್ಯ ಸಯೇಯ್ಯ ವಾ;
ನ ತಸ್ಸ ಸಾಖಂ ಭಞ್ಜೇಯ್ಯ, ಮಿತ್ತದುಬ್ಭೋ [ಮಿತ್ತದೂಭೀ (ಪೀ.)] ಹಿ ಪಾಪಕೋ.
‘‘ಅಥ ಅತ್ಥೇ ಸಮುಪ್ಪನ್ನೇ, ಸಮೂಲಮಪಿ ಅಬ್ಬಹೇ [ಅಬ್ಭಹೇ (ಸ್ಯಾ. ಕ.)];
ಅತ್ಥೋ ಮೇ ಸಮ್ಬಲೇನಾಪಿ, ಸುಹತೋ ವಾನರೋ ಮಯಾ.
[ಅಯಂ ಗಾಥಾ ಸೀಹಳಪೋತ್ಥಕೇ ನತ್ಥಿ] ‘‘ಸೋ ಚೇ ಅತ್ಥೋ ಚ ಧಮ್ಮೋ ಚ, ಕಲ್ಯಾಣೋ ನ ಚ ಪಾಪಕೋ;
ಭೋತೋ ಚೇ ವಚನಂ ಸಚ್ಚಂ, ಸುಹತೋ ವಾನರೋ ಮಯಾ [ಅಯಂ ಗಾಥಾ ಸೀಹಳಪೋತ್ಥಕೇ ನತ್ಥಿ].
‘‘ಅತ್ತನೋ ಚೇ ಹಿ ವಾದಸ್ಸ, ಅಪರಾಧಂ ವಿಜಾನಿಯಾ;
ನ ಮಂ ತ್ವಂ ಗರಹೇಯ್ಯಾಸಿ, ಭೋತೋ ವಾದೋ ಹಿ ತಾದಿಸೋ.
‘‘ಅಹೇತುವಾದೋ ಪುರಿಸೋ, ಯೋ ಚ ಇಸ್ಸರಕುತ್ತಿಕೋ;
ಪುಬ್ಬೇಕತೀ ಚ ಉಚ್ಛೇದೀ, ಯೋ ಚ ಖತ್ತವಿದೋ ನರೋ.
‘‘ಏತೇ ಅಸಪ್ಪುರಿಸಾ ಲೋಕೇ, ಬಾಲಾ ಪಣ್ಡಿತಮಾನಿನೋ;
ಕರೇಯ್ಯ ತಾದಿಸೋ ಪಾಪಂ, ಅಥೋ ಅಞ್ಞಮ್ಪಿ ಕಾರಯೇ;
ಅಸಪ್ಪುರಿಸಸಂಸಗ್ಗೋ ¶ , ದುಕ್ಖನ್ತೋ [ದುಕ್ಕಟೋ (ಸೀ.)] ಕಟುಕುದ್ರಯೋ.
‘‘ಉರಬ್ಭರೂಪೇನ ವಕಸ್ಸು [ಬಕಾಸು (ಸೀ. ಸ್ಯಾ.), ವಕಾಸು (ಪೀ.)] ಪುಬ್ಬೇ, ಅಸಂಕಿತೋ ಅಜಯೂಥಂ ಉಪೇತಿ;
ಹನ್ತ್ವಾ ಉರಣಿಂ ಅಜಿಕಂ [ಅಜಿಯಂ (ಸೀ. ಸ್ಯಾ. ಪೀ.)] ಅಜಞ್ಚ, ಉತ್ರಾಸಯಿತ್ವಾ [ಚಿತ್ರಾಸಯಿತ್ವಾ (ಸೀ. ಪೀ.)] ಯೇನ ಕಾಮಂ ಪಲೇತಿ.
‘‘ತಥಾವಿಧೇಕೇ ಸಮಣಬ್ರಾಹ್ಮಣಾಸೇ, ಛದನಂ ಕತ್ವಾ ವಞ್ಚಯನ್ತಿ ಮನುಸ್ಸೇ;
ಅನಾಸಕಾ ಥಣ್ಡಿಲಸೇಯ್ಯಕಾ ಚ, ರಜೋಜಲ್ಲಂ ಉಕ್ಕುಟಿಕಪ್ಪಧಾನಂ;
ಪರಿಯಾಯಭತ್ತಞ್ಚ ಅಪಾನಕತ್ತಾ, ಪಾಪಾಚಾರಾ ಅರಹನ್ತೋ ವದಾನಾ.
‘‘ಏತೇ ಅಸಪ್ಪುರಿಸಾ ಲೋಕೇ, ಬಾಲಾ ಪಣ್ಡಿತಮಾನಿನೋ;
ಕರೇಯ್ಯ ತಾದಿಸೋ ಪಾಪಂ, ಅಥೋ ಅಞ್ಞಮ್ಪಿ ಕಾರಯೇ;
ಅಸಪ್ಪುರಿಸಸಂಸಗ್ಗೋ, ದುಕ್ಖನ್ತೋ ಕಟುಕುದ್ರಯೋ.
‘‘ಯಮಾಹು ¶ ನತ್ಥಿ ವೀರಿಯನ್ತಿ, ಅಹೇತುಞ್ಚ ಪವದನ್ತಿ [ಹೇತುಞ್ಚ ಅಪವದನ್ತಿ (ಸೀ. ಸ್ಯಾ. ಪೀ.)] ಯೇ;
ಪರಕಾರಂ ಅತ್ತಕಾರಞ್ಚ, ಯೇ ತುಚ್ಛಂ ಸಮವಣ್ಣಯುಂ.
‘‘ಏತೇ ಅಸಪ್ಪುರಿಸಾ ಲೋಕೇ, ಬಾಲಾ ಪಣ್ಡಿತಮಾನಿನೋ;
ಕರೇಯ್ಯ ತಾದಿಸೋ ಪಾಪಂ, ಅಥೋ ಅಞ್ಞಮ್ಪಿ ಕಾರಯೇ;
ಅಸಪ್ಪುರಿಸಸಂಸಗ್ಗೋ, ದುಕ್ಖನ್ತೋ ಕಟುಕುದ್ರಯೋ.
‘‘ಸಚೇ ¶ ಹಿ ವೀರಿಯಂ ನಾಸ್ಸ, ಕಮ್ಮಂ ಕಲ್ಯಾಣಪಾಪಕಂ;
ನ ¶ ಭರೇ ವಡ್ಢಕಿಂ ರಾಜಾ, ನಪಿ ಯನ್ತಾನಿ ಕಾರಯೇ.
‘‘ಯಸ್ಮಾ ಚ ವೀರಿಯಂ ಅತ್ಥಿ, ಕಮ್ಮಂ ಕಲ್ಯಾಣಪಾಪಕಂ;
ತಸ್ಮಾ ಯನ್ತಾನಿ ಕಾರೇತಿ, ರಾಜಾ ಭರತಿ ವಡ್ಢಕಿಂ.
‘‘ಯದಿ ವಸ್ಸಸತಂ ದೇವೋ, ನ ವಸ್ಸೇ ನ ಹಿಮಂ ಪತೇ;
ಉಚ್ಛಿಜ್ಜೇಯ್ಯ ಅಯಂ ಲೋಕೋ, ವಿನಸ್ಸೇಯ್ಯ ಅಯಂ ಪಜಾ.
‘‘ಯಸ್ಮಾ ಚ ವಸ್ಸತೀ ದೇವೋ, ಹಿಮಞ್ಚಾನುಫುಸಾಯತಿ;
ತಸ್ಮಾ ಸಸ್ಸಾನಿ ಪಚ್ಚನ್ತಿ, ರಟ್ಠಞ್ಚ ಪಾಲಿತೇ [ಪಲ್ಲತೇ (ಸೀ. ಪೀ.), ಪೋಲಯತೇ (ಸ್ಯಾ.)] ಚಿರಂ.
‘‘ಗವಂ ಚೇ ತರಮಾನಾನಂ, ಜಿಮ್ಹಂ ಗಚ್ಛತಿ ಪುಙ್ಗವೋ;
ಸಬ್ಬಾ ತಾ ಜಿಮ್ಹಂ ಗಚ್ಛನ್ತಿ, ನೇತ್ತೇ ಜಿಮ್ಹಂ [ಜಿಮ್ಹ (ಪೀ.)] ಗತೇ ಸತಿ.
‘‘ಏವಮೇವ [ಏವಮೇವಂ (ಪೀ.)] ಮನುಸ್ಸೇಸು, ಯೋ ಹೋತಿ ಸೇಟ್ಠಸಮ್ಮತೋ;
ಸೋ ಚೇ ಅಧಮ್ಮಂ ಚರತಿ, ಪಗೇವ ಇತರಾ ಪಜಾ;
ಸಬ್ಬಂ ರಟ್ಠಂ ದುಖಂ ಸೇತಿ, ರಾಜಾ ಚೇ ಹೋತಿ ಅಧಮ್ಮಿಕೋ.
‘‘ಗವಂ ಚೇ ತರಮಾನಾನಂ, ಉಜುಂ ಗಚ್ಛತಿ ಪುಙ್ಗವೋ;
ಸಬ್ಬಾ ಗಾವೀ ಉಜುಂ ಯನ್ತಿ, ನೇತ್ತೇ ಉಜುಂ [ಉಜೂ (ಪೀ.)] ಗತೇ ಸತಿ.
‘‘ಏವಮೇವ ಮನುಸ್ಸೇಸು, ಯೋ ಹೋತಿ ಸೇಟ್ಠಸಮ್ಮತೋ;
ಸೋ ಸಚೇ [ಚೇವ (ಸೀ.), ಚೇಪಿ (ಕ.)] ಧಮ್ಮಂ ಚರತಿ, ಪಗೇವ ಇತರಾ ಪಜಾ;
ಸಬ್ಬಂ ರಟ್ಠಂ ಸುಖಂ ಸೇತಿ, ರಾಜಾ ಚೇ ಹೋತಿ ಧಮ್ಮಿಕೋ.
‘‘ಮಹಾರುಕ್ಖಸ್ಸ ಫಲಿನೋ, ಆಮಂ ಛಿನ್ದತಿ ಯೋ ಫಲಂ;
ರಸಞ್ಚಸ್ಸ ನ ಜಾನಾತಿ, ಬೀಜಞ್ಚಸ್ಸ ವಿನಸ್ಸತಿ.
‘‘ಮಹಾರುಕ್ಖೂಪಮಂ ¶ ರಟ್ಠಂ, ಅಧಮ್ಮೇನ ಪಸಾಸತಿ;
ರಸಞ್ಚಸ್ಸ ನ ಜಾನಾತಿ, ರಟ್ಠಞ್ಚಸ್ಸ ವಿನಸ್ಸತಿ.
‘‘ಮಹಾರುಕ್ಖಸ್ಸ ¶ ಫಲಿನೋ, ಪಕ್ಕಂ ಛಿನ್ದತಿ ಯೋ ಫಲಂ;
ರಸಞ್ಚಸ್ಸ ವಿಜಾನಾತಿ, ಬೀಜಞ್ಚಸ್ಸ ನ ನಸ್ಸತಿ.
‘‘ಮಹಾರುಕ್ಖೂಪಮಂ ರಟ್ಠಂ, ಧಮ್ಮೇನ ಯೋ ಪಸಾಸತಿ;
ರಸಞ್ಚಸ್ಸ ವಿಜಾನಾತಿ, ರಟ್ಠಞ್ಚಸ್ಸ ನ ನಸ್ಸತಿ.
‘‘ಯೋ ಚ ರಾಜಾ ಜನಪದಂ, ಅಧಮ್ಮೇನ ಪಸಾಸತಿ;
ಸಬ್ಬೋಸಧೀಹಿ ಸೋ ರಾಜಾ, ವಿರುದ್ಧೋ ಹೋತಿ ಖತ್ತಿಯೋ.
‘‘ತಥೇವ ನೇಗಮೇ ಹಿಂಸಂ, ಯೇ ಯುತ್ತಾ ಕಯವಿಕ್ಕಯೇ;
ಓಜದಾನಬಲೀಕಾರೇ, ಸ ಕೋಸೇನ ವಿರುಜ್ಝತಿ.
‘‘ಪಹಾರವರಖೇತ್ತಞ್ಞೂ ¶ , ಸಙ್ಗಾಮೇ ಕತನಿಸ್ಸಮೇ [ಕತನಿಯಮೇ (ಕ.)];
ಉಸ್ಸಿತೇ ಹಿಂಸಯಂ ರಾಜಾ, ಸ ಬಲೇನ ವಿರುಜ್ಝತಿ.
‘‘ತಥೇವ ಇಸಯೋ ಹಿಂಸಂ, ಸಞ್ಞತೇ [ಸಂಯಮೇ (ಸ್ಯಾ. ಕ.)] ಬ್ರಹ್ಮಚಾರಿಯೋ [ಬ್ರಹ್ಮಚಾರಿನೋ (ಸೀ.)];
ಅಧಮ್ಮಚಾರೀ ಖತ್ತಿಯೋ, ಸೋ ಸಗ್ಗೇನ ವಿರುಜ್ಝತಿ.
‘‘ಯೋ ಚ ರಾಜಾ ಅಧಮ್ಮಟ್ಠೋ, ಭರಿಯಂ ಹನ್ತಿ ಅದೂಸಿಕಂ;
ಲುದ್ದಂ ಪಸವತೇ ಠಾನಂ [ಪಾಪಂ (ಸೀ.)], ಪುತ್ತೇಹಿ ಚ ವಿರುಜ್ಝತಿ.
‘‘ಧಮ್ಮಂ ಚರೇ ಜಾನಪದೇ, ನೇಗಮೇಸು [ನಿಗಮೇಸು (ಸೀ.)] ಬಲೇಸು ಚ;
ಇಸಯೋ ಚ ನ ಹಿಂಸೇಯ್ಯ, ಪುತ್ತದಾರೇ ಸಮಂ ಚರೇ.
‘‘ಸ ತಾದಿಸೋ ಭೂಮಿಪತಿ, ರಟ್ಠಪಾಲೋ ಅಕೋಧನೋ;
ಸಪತ್ತೇ ¶ [ಸಾಮನ್ತೇ (ಸೀ. ಸ್ಯಾ. ಪೀ.)] ಸಮ್ಪಕಮ್ಪೇತಿ, ಇನ್ದೋವ ಅಸುರಾಧಿಪೋ’’ತಿ.
ಮಹಾಬೋಧಿಜಾತಕಂ ತತಿಯಂ.
ಪಣ್ಣಾಸನಿಪಾತಂ ನಿಟ್ಠಿತಂ.
ತಸ್ಸುದ್ದಾನಂ –
ಸನಿಳೀನಿಕಮವ್ಹಯನೋ ಪಠಮೋ, ದುತಿಯೋ ಪನ ಸಉಮ್ಮದನ್ತಿವರೋ;
ತತಿಯೋ ಪನ ಬೋಧಿಸಿರೀವ್ಹಯನೋ, ಕಥಿತಾ ಪನ ತೀಣಿ ಜಿನೇನ ಸುಭಾತಿ.
೧೯. ಸಟ್ಠಿನಿಪಾತೋ
೫೨೯. ಸೋಣಕಜಾತಕಂ (೧)
‘‘ತಸ್ಸ ¶ ¶ ¶ ಸುತ್ವಾ ಸತಂ ದಮ್ಮಿ, ಸಹಸ್ಸಂ ದಿಟ್ಠ [ದಟ್ಠು (ಸೀ. ಪೀ.)] ಸೋಣಕಂ;
ಕೋ ಮೇ ಸೋಣಕಮಕ್ಖಾತಿ, ಸಹಾಯಂ ಪಂಸುಕೀಳಿತಂ’’.
‘‘ಅಥಬ್ರವೀ ಮಾಣವಕೋ, ದಹರೋ ಪಞ್ಚಚೂಳಕೋ;
ಮಯ್ಹಂ ಸುತ್ವಾ ಸತಂ ದೇಹಿ, ಸಹಸ್ಸಂ ದಿಟ್ಠ [ದಟ್ಠು (ಸೀ. ಪೀ.)] ಸೋಣಕಂ;
ಅಹಂ ತೇ ಸೋಣಕಕ್ಖಿಸ್ಸಂ [ಅಹಂ ಸೋಣಕಮಕ್ಖಿಸ್ಸಂ (ಸೀ. ಪೀ.), ಅಹಂ ತೇ ಸೋಣಕಮಕ್ಖಿಸ್ಸಂ (ಸ್ಯಾ.)], ಸಹಾಯಂ ಪಂಸುಕೀಳಿತಂ’’.
‘‘ಕತಮಸ್ಮಿಂ [ಕತರಸ್ಮಿಂ (ಸೀ. ಸ್ಯಾ. ಪೀ.)] ಸೋ ಜನಪದೇ, ರಟ್ಠೇಸು ನಿಗಮೇಸು ಚ;
ಕತ್ಥ ಸೋಣಕಮದ್ದಕ್ಖಿ [ಕತ್ಥ ತೇ ಸೋಣಕೋ ದಿಟ್ಠೋ (ಸೀ. ಪೀ.)], ತಂ ಮೇ ಅಕ್ಖಾಹಿ ಪುಚ್ಛಿತೋ’’.
‘‘ತವೇವ ದೇವ ವಿಜಿತೇ, ತವೇವುಯ್ಯಾನಭೂಮಿಯಾ;
ಉಜುವಂಸಾ ಮಹಾಸಾಲಾ, ನೀಲೋಭಾಸಾ ಮನೋರಮಾ.
‘‘ತಿಟ್ಠನ್ತಿ ಮೇಘಸಮಾನಾ, ರಮ್ಮಾ ಅಞ್ಞೋಞ್ಞನಿಸ್ಸಿತಾ;
ತೇಸಂ ಮೂಲಮ್ಹಿ [ಮೂಲಸ್ಮಿಂ (ಸೀ. ಪೀ.), ಮೂಲಸ್ಮಿ (ಸ್ಯಾ.)] ಸೋಣಕೋ, ಝಾಯತೀ ಅನುಪಾದನೋ [ಅನುಪಾದಿನೋ (ಸ್ಯಾ.), ಅನುಪಾದಾನೋ (ಪೀ.)];
ಉಪಾದಾನೇಸು ಲೋಕೇಸು, ಡಯ್ಹಮಾನೇಸು ನಿಬ್ಬುತೋ.
‘‘ತತೋ ಚ ರಾಜಾ ಪಾಯಾಸಿ, ಸೇನಾಯ ಚತುರಙ್ಗಿಯಾ;
ಕಾರಾಪೇತ್ವಾ ಸಮಂ ಮಗ್ಗಂ, ಅಗಮಾ ಯೇನ ಸೋಣಕೋ.
‘‘ಉಯ್ಯಾನಭೂಮಿಂ ಗನ್ತ್ವಾನ, ವಿಚರನ್ತೋ ಬ್ರಹಾವನೇ;
ಆಸೀನಂ ¶ ಸೋಣಕಂ ದಕ್ಖಿ, ಡಯ್ಹಮಾನೇಸು ನಿಬ್ಬುತಂ’’.
‘‘ಕಪಣೋ ವತಯಂ ಭಿಕ್ಖು, ಮುಣ್ಡೋ ಸಙ್ಘಾಟಿಪಾರುತೋ;
ಅಮಾತಿಕೋ ಅಪಿತಿಕೋ, ರುಕ್ಖಮೂಲಸ್ಮಿ ಝಾಯತಿ’’.
‘‘ಇಮಂ ವಾಕ್ಯಂ ನಿಸಾಮೇತ್ವಾ, ಸೋಣಕೋ ಏತದಬ್ರವಿ;
‘ನ ರಾಜ ಕಪಣೋ ಹೋತಿ, ಧಮ್ಮಂ ಕಾಯೇನ ಫಸ್ಸಯಂ [ಫುಸಯಂ (ಕ.)].
‘ಯೋ ¶ ಚ [ಯೋಧ (ಸೀ. ಸ್ಯಾ.)] ಧಮ್ಮಂ ನಿರಂಕತ್ವಾ [ನಿರಾಕತ್ವಾ (?)], ಅಧಮ್ಮಮನುವತ್ತತಿ;
ಸ ರಾಜ ಕಪಣೋ ಹೋತಿ, ಪಾಪೋ ಪಾಪಪರಾಯನೋ’’’.
‘‘‘ಅರಿನ್ದಮೋತಿ ¶ ಮೇ ನಾಮಂ, ಕಾಸಿರಾಜಾತಿ ಮಂ ವಿದೂ;
ಕಚ್ಚಿ ಭೋತೋ ಸುಖಸ್ಸೇಯ್ಯಾ [ಸುಖಾ ಸೇಯ್ಯಾ (ಪೀ.), ಸುಖಸೇಯ್ಯೋ (ಕ.)], ಇಧ ಪತ್ತಸ್ಸ ಸೋಣಕ’’’.
‘‘ಸದಾಪಿ ಭದ್ರಮಧನಸ್ಸ, ಅನಾಗಾರಸ್ಸ ಭಿಕ್ಖುನೋ;
ನ ತೇಸಂ ಕೋಟ್ಠೇ ಓಪೇನ್ತಿ, ನ ಕುಮ್ಭಿಂ ನ ಖಳೋಪಿಯಂ [ನ ಕುಮ್ಭೇ ನ ಕಳೋಪಿಯಾ (ಸ್ಯಾ. ಪೀ.)];
ಪರನಿಟ್ಠಿತಮೇಸಾನಾ, ತೇನ ಯಾಪೇನ್ತಿ ಸುಬ್ಬತಾ.
‘‘ದುತಿಯಮ್ಪಿ ಭದ್ರಮಧನಸ್ಸ, ಅನಾಗಾರಸ್ಸ ಭಿಕ್ಖುನೋ;
ಅನವಜ್ಜಪಿಣ್ಡೋ [ಅನವಜ್ಜೋ ಪಿಣ್ಡಾ (ಪೀ.)] ಭೋತ್ತಬ್ಬೋ, ನ ಚ ಕೋಚೂಪರೋಧತಿ.
‘‘ತತಿಯಮ್ಪಿ ಭದ್ರಮಧನಸ್ಸ, ಅನಾಗಾರಸ್ಸ ಭಿಕ್ಖುನೋ;
ನಿಬ್ಬುತೋ ಪಿಣ್ಡೋ ಭೋತ್ತಬ್ಬೋ, ನ ಚ ಕೋಚೂಪರೋಧತಿ.
‘‘ಚತುತ್ಥಮ್ಪಿ [ಚತುತ್ಥಂ (ಪೀ.)] ಭದ್ರಮಧನಸ್ಸ, ಅನಾಗಾರಸ್ಸ ಭಿಕ್ಖುನೋ;
ಮುತ್ತಸ್ಸ ರಟ್ಠೇ ಚರತೋ, ಸಙ್ಗೋ ಯಸ್ಸ ನ ವಿಜ್ಜತಿ.
‘‘ಪಞ್ಚಮಮ್ಪಿ [ಪಞ್ಚಮಂ (ಪೀ.)] ಭದ್ರಮಧನಸ್ಸ, ಅನಾಗಾರಸ್ಸ ಭಿಕ್ಖುನೋ;
ನಗರಮ್ಹಿ ಡಯ್ಹಮಾನಮ್ಹಿ, ನಾಸ್ಸ ಕಿಞ್ಚಿ ಅಡಯ್ಹಥ.
‘‘ಛಟ್ಠಮ್ಪಿ ¶ [ಛಟ್ಠಂ (ಪೀ.)] ಭದ್ರಮಧನಸ್ಸ, ಅನಾಗಾರಸ್ಸ ಭಿಕ್ಖುನೋ;
ರಟ್ಠೇ ವಿಲುಮ್ಪಮಾನಮ್ಹಿ [ವಿಲುಪ್ಪಮಾನಮ್ಹಿ (ಕ.)], ನಾಸ್ಸ ಕಿಞ್ಚಿ ಅಹೀರಥ [ಅಹಾರಥ (ಸೀ. ಸ್ಯಾ.)].
‘‘ಸತ್ತಮಮ್ಪಿ [ಸತ್ತಮಂ (ಪೀ.)] ಭದ್ರಮಧನಸ್ಸ, ಅನಾಗಾರಸ್ಸ ಭಿಕ್ಖುನೋ;
ಚೋರೇಹಿ ರಕ್ಖಿತಂ ಮಗ್ಗಂ, ಯೇ ಚಞ್ಞೇ ಪರಿಪನ್ಥಿಕಾ;
ಪತ್ತಚೀವರಮಾದಾಯ, ಸೋತ್ಥಿಂ ಗಚ್ಛತಿ ಸುಬ್ಬತೋ.
‘‘ಅಟ್ಠಮಮ್ಪಿ [ಅಟ್ಠಮಂ (ಪೀ.)] ಭದ್ರಮಧನಸ್ಸ, ಅನಾಗಾರಸ್ಸ ಭಿಕ್ಖುನೋ;
ಯಂ ಯಂ ದಿಸಂ ಪಕ್ಕಮತಿ, ಅನಪೇಕ್ಖೋವ ಗಚ್ಛತಿ’’.
‘‘ಬಹೂಪಿ ಭದ್ರಾ [ಬಹೂನಿ ಸಮಣಭದ್ರಾನಿ (ಸೀ.), ಬಹೂಪಿ ಭದ್ರಕಾ ಏತೇ (ಪೀ.)] ಏತೇಸಂ, ಯೋ ತ್ವಂ ಭಿಕ್ಖು ಪಸಂಸಸಿ;
ಅಹಞ್ಚ ಗಿದ್ಧೋ ಕಾಮೇಸು, ಕಥಂ ಕಾಹಾಮಿ ಸೋಣಕ.
‘‘ಪಿಯಾ ¶ ಮೇ ಮಾನುಸಾ ಕಾಮಾ, ಅಥೋ ದಿಬ್ಯಾಪಿ ಮೇ ಪಿಯಾ;
ಅಥ ಕೇನ ನು ವಣ್ಣೇನ, ಉಭೋ ಲೋಕೇ ಲಭಾಮಸೇ’’.
‘‘ಕಾಮೇ ಗಿದ್ಧಾ [ಕಾಮೇಸು ಗಿದ್ಧಾ (ಸೀ. ಪೀ.)] ಕಾಮರತಾ, ಕಾಮೇಸು ಅಧಿಮುಚ್ಛಿತಾ;
ನರಾ ಪಾಪಾನಿ ಕತ್ವಾನ, ಉಪಪಜ್ಜನ್ತಿ ದುಗ್ಗತಿಂ.
‘‘ಯೇ ಚ ಕಾಮೇ ಪಹನ್ತ್ವಾನ [ಪಹತ್ವಾನ (ಸೀ. ಪೀ.)], ನಿಕ್ಖನ್ತಾ ಅಕುತೋಭಯಾ;
ಏಕೋದಿಭಾವಾಧಿಗತಾ, ನ ತೇ ಗಚ್ಛನ್ತಿ ದುಗ್ಗತಿಂ.
‘‘ಉಪಮಂ ತೇ ಕರಿಸ್ಸಾಮಿ, ತಂ ಸುಣೋಹಿ ಅರಿನ್ದಮ;
ಉಪಮಾಯ ಮಿಧೇಕಚ್ಚೇ [ಪಿಧೇಕಚ್ಚೇ (ಸೀ. ಪೀ.)], ಅತ್ಥಂ ಜಾನನ್ತಿ ಪಣ್ಡಿತಾ.
‘‘ಗಙ್ಗಾಯ ¶ ಕುಣಪಂ ದಿಸ್ವಾ, ವುಯ್ಹಮಾನಂ ಮಹಣ್ಣವೇ;
ವಾಯಸೋ ಸಮಚಿನ್ತೇಸಿ, ಅಪ್ಪಪಞ್ಞೋ ಅಚೇತಸೋ.
‘‘‘ಯಾನಞ್ಚ ¶ ವತಿದಂ ಲದ್ಧಂ, ಭಕ್ಖೋ ಚಾಯಂ ಅನಪ್ಪಕೋ’;
ತತ್ಥ ರತ್ತಿಂ ತತ್ಥ ದಿವಾ, ತತ್ಥೇವ ನಿರತೋ ಮನೋ.
‘‘ಖಾದಂ ನಾಗಸ್ಸ ಮಂಸಾನಿ, ಪಿವಂ ಭಾಗೀರಥೋದಕಂ [ಭಾಗಿರಸೋದಕಂ (ಸೀ. ಸ್ಯಾ. ಪೀ. ಕ.)];
ಸಮ್ಪಸ್ಸಂ ವನಚೇತ್ಯಾನಿ, ನ ಪಲೇತ್ಥ [ಪಲೇತ್ವಾ (ಕ.)] ವಿಹಙ್ಗಮೋ.
‘‘ತಞ್ಚ [ತಂವ (ಪೀ.)] ಓತರಣೀ ಗಙ್ಗಾ, ಪಮತ್ತಂ ಕುಣಪೇ ರತಂ;
ಸಮುದ್ದಂ ಅಜ್ಝಗಾಹಾಸಿ [ಅಜ್ಝಗಾಹಯಿ (ಪೀ.)], ಅಗತೀ ಯತ್ಥ ಪಕ್ಖಿನಂ.
‘‘ಸೋ ಚ ಭಕ್ಖಪರಿಕ್ಖೀಣೋ, ಉದಪತ್ವಾ [ಉಪ್ಪತಿತ್ವಾ (ಸೀ. ಸ್ಯಾ.), ಉದಾಪತ್ವಾ (ಪೀ.)] ವಿಹಙ್ಗಮೋ.
ನ ಪಚ್ಛತೋ ನ ಪುರತೋ, ನುತ್ತರಂ ನೋಪಿ ದಕ್ಖಿಣಂ.
‘‘ದೀಪಂ ಸೋ ನಜ್ಝಗಾಗಞ್ಛಿ [ನ ಅಜ್ಝಗಞ್ಛಿ (ಸೀ.), ನ ಅಜ್ಝಗಚ್ಛಿ (ಪೀ.)], ಅಗತೀ ಯತ್ಥ ಪಕ್ಖಿನಂ;
ಸೋ ಚ ತತ್ಥೇವ ಪಾಪತ್ಥ, ಯಥಾ ದುಬ್ಬಲಕೋ ತಥಾ.
‘‘ತಞ್ಚ ಸಾಮುದ್ದಿಕಾ ಮಚ್ಛಾ, ಕುಮ್ಭೀಲಾ ಮಕರಾ ಸುಸೂ;
ಪಸಯ್ಹಕಾರಾ ಖಾದಿಂಸು, ಫನ್ದಮಾನಂ ವಿಪಕ್ಖಕಂ [ವಿಪಕ್ಖಿನಂ (ಸೀ. ಪೀ.), ವಿಪಕ್ಖಿಕಂ (ಸ್ಯಾ.)].
‘‘ಏವಮೇವ ¶ ತುವಂ ರಾಜ, ಯೇ ಚಞ್ಞೇ ಕಾಮಭೋಗಿನೋ;
ಗಿದ್ಧಾ ಚೇ ನ ವಮಿಸ್ಸನ್ತಿ, ಕಾಕಪಞ್ಞಾವ [ಕಾಕಪಞ್ಞಾಯ (ಸೀ. ಸ್ಯಾ. ಪೀ.)] ತೇ ವಿದೂ.
‘‘ಏಸಾ ತೇ ಉಪಮಾ ರಾಜ, ಅತ್ಥಸನ್ದಸ್ಸನೀ ಕತಾ;
ತ್ವಞ್ಚ ಪಞ್ಞಾಯಸೇ ತೇನ, ಯದಿ ಕಾಹಸಿ ವಾ ನ ವಾ.
‘‘ಏಕವಾಚಮ್ಪಿ ದ್ವಿವಾಚಂ, ಭಣೇಯ್ಯ ಅನುಕಮ್ಪಕೋ;
ತತುತ್ತರಿಂ ನ ಭಾಸೇಯ್ಯ, ದಾಸೋವಯ್ಯಸ್ಸ [ದಾಸೋ ಅಯ್ಯಸ್ಸ (ಸೀ.), ದಾಸೋ ಅಯಿರಸ್ಸ (ಪೀ.)] ಸನ್ತಿಕೇ’’.
‘‘ಇದಂ ವತ್ವಾನ ಪಕ್ಕಾಮಿ, ಸೋಣಕೋ ಅಮಿತಬುದ್ಧಿಮಾ [ಸೋಣಕೋ’ಮಿತಬುದ್ಧಿಮಾ (?)];
ವೇಹಾಸೇ ಅನ್ತಲಿಕ್ಖಸ್ಮಿಂ, ಅನುಸಾಸಿತ್ವಾನ ಖತ್ತಿಯಂ’’.
‘‘ಕೋ ¶ ನುಮೇ ರಾಜಕತ್ತಾರೋ, ಸುದ್ದಾ ವೇಯ್ಯತ್ತಮಾಗತಾ [ಸೂತಾ ವೇಯ್ಯತ್ತಿಮಾಗತಾ (ಸೀ. ಸ್ಯಾ. ಪೀ.)];
ರಜ್ಜಂ ನಿಯ್ಯಾದಯಿಸ್ಸಾಮಿ, ನಾಹಂ ರಜ್ಜೇನ ಮತ್ಥಿಕೋ.
‘‘ಅಜ್ಜೇವ ಪಬ್ಬಜಿಸ್ಸಾಮಿ, ಕೋ ಜಞ್ಞಾ ಮರಣಂ ಸುವೇ;
ಮಾಹಂ ಕಾಕೋವ ದುಮ್ಮೇಧೋ, ಕಾಮಾನಂ ವಸಮನ್ವಗಂ’’ [ವಸಮನ್ನಗಾ (ಪೀ.)].
‘‘ಅತ್ಥಿ ತೇ ದಹರೋ ಪುತ್ತೋ, ದೀಘಾವು ರಟ್ಠವಡ್ಢನೋ;
ತಂ ರಜ್ಜೇ ಅಭಿಸಿಞ್ಚಸ್ಸು, ಸೋ ನೋ ರಾಜಾ ಭವಿಸ್ಸತಿ’’.
‘‘ಖಿಪ್ಪಂ ಕುಮಾರಮಾನೇಥ, ದೀಘಾವುಂ ರಟ್ಠವಡ್ಢನಂ;
ತಂ ರಜ್ಜೇ ಅಭಿಸಿಞ್ಚಿಸ್ಸಂ, ಸೋ ವೋ ರಾಜಾ ಭವಿಸ್ಸತಿ’’.
‘‘ತತೋ ¶ ಕುಮಾರಮಾನೇಸುಂ, ದೀಘಾವುಂ ರಟ್ಠವಡ್ಢನಂ;
ತಂ ದಿಸ್ವಾ ಆಲಪೀ ರಾಜಾ, ಏಕಪುತ್ತಂ ಮನೋರಮಂ.
‘‘ಸಟ್ಠಿ ಗಾಮಸಹಸ್ಸಾನಿ, ಪರಿಪುಣ್ಣಾನಿ ಸಬ್ಬಸೋ;
ತೇ ಪುತ್ತ ಪಟಿಪಜ್ಜಸ್ಸು, ರಜ್ಜಂ ನಿಯ್ಯಾದಯಾಮಿ ತೇ.
‘‘ಅಜ್ಜೇವ ಪಬ್ಬಜಿಸ್ಸಾಮಿ, ಕೋ ಜಞ್ಞಾ ಮರಣಂ ಸುವೇ;
ಮಾಹಂ ಕಾಕೋವ ದುಮ್ಮೇಧೋ, ಕಾಮಾನಂ ವಸಮನ್ವಗಂ [ವಸಮನ್ನಗಾ (ಪೀ.)].
‘‘ಸಟ್ಠಿ ನಾಗಸಹಸ್ಸಾನಿ, ಸಬ್ಬಾಲಙ್ಕಾರಭೂಸಿತಾ;
ಸುವಣ್ಣಕಚ್ಛಾ ಮಾತಙ್ಗಾ, ಹೇಮಕಪ್ಪನವಾಸಸಾ.
‘‘ಆರೂಳ್ಹಾ ¶ ಗಾಮಣೀಯೇಹಿ, ತೋಮರಙ್ಕುಸಪಾಣಿಭಿ;
ತೇ ಪುತ್ತ ಪಟಿಪಜ್ಜಸ್ಸು, ರಜ್ಜಂ ನಿಯ್ಯಾದಯಾಮಿ ತೇ.
‘‘ಅಜ್ಜೇವ ಪಬ್ಬಜಿಸ್ಸಾಮಿ, ಕೋ ಜಞ್ಞಾ ಮರಣಂ ಸುವೇ;
ಮಾಹಂ ಕಾಕೋವ ದುಮ್ಮೇಧೋ, ಕಾಮಾನಂ ವಸಮನ್ವಗಂ.
‘‘ಸಟ್ಠಿ ¶ ಅಸ್ಸಸಹಸ್ಸಾನಿ, ಸಬ್ಬಾಲಙ್ಕಾರಭೂಸಿತಾ;
ಆಜಾನೀಯಾವ ಜಾತಿಯಾ, ಸಿನ್ಧವಾ ಸೀಘವಾಹಿನೋ.
‘‘ಆರೂಳ್ಹಾ ಗಾಮಣೀಯೇಹಿ, ಇಲ್ಲಿಯಾಚಾಪಧಾರಿಭಿ [ಇನ್ದಿಯಾಚಾಪಧಾರಿಭಿ (ಕ.)];
ತೇ ಪುತ್ತ ಪಟಿಪಜ್ಜಸ್ಸು, ರಜ್ಜಂ ನಿಯ್ಯಾದಯಾಮಿ ತೇ.
‘‘ಅಜ್ಜೇವ ಪಬ್ಬಜಿಸ್ಸಾಮಿ, ಕೋ ಜಞ್ಞಾ ಮರಣಂ ಸುವೇ;
ಮಾಹಂ ಕಾಕೋವ ದುಮ್ಮೇಧೋ, ಕಾಮಾನಂ ವಸಮನ್ವಗಂ.
‘‘ಸಟ್ಠಿ ರಥಸಹಸ್ಸಾನಿ, ಸನ್ನದ್ಧಾ ಉಸ್ಸಿತದ್ಧಜಾ;
ದೀಪಾ ಅಥೋಪಿ ವೇಯ್ಯಗ್ಘಾ, ಸಬ್ಬಾಲಙ್ಕಾರಭೂಸಿತಾ.
‘‘ಆರೂಳ್ಹಾ ಗಾಮಣೀಯೇಹಿ, ಚಾಪಹತ್ಥೇಹಿ ವಮ್ಮಿಭಿ;
ತೇ ಪುತ್ತ ಪಟಿಪಜ್ಜಸ್ಸು, ರಜ್ಜಂ ನಿಯ್ಯಾದಯಾಮಿ ತೇ.
‘‘ಅಜ್ಜೇವ ಪಬ್ಬಜಿಸ್ಸಾಮಿ, ಕೋ ಜಞ್ಞಾ ಮರಣಂ ಸುವೇ;
ಮಾಹಂ ಕಾಕೋವ ದುಮ್ಮೇಧೋ, ಕಾಮಾನಂ ವಸಮನ್ವಗಂ.
‘‘ಸಟ್ಠಿ ಧೇನುಸಹಸ್ಸಾನಿ, ರೋಹಞ್ಞಾ ಪುಙ್ಗವೂಸಭಾ;
ತಾ ಪುತ್ತ ಪಟಿಪಜ್ಜಸ್ಸು, ರಜ್ಜಂ ನಿಯ್ಯಾದಯಾಮಿ ತೇ.
‘‘ಅಜ್ಜೇವ ಪಬ್ಬಜಿಸ್ಸಾಮಿ, ಕೋ ಜಞ್ಞಾ ಮರಣಂ ಸುವೇ;
ಮಾಹಂ ಕಾಕೋವ ದುಮ್ಮೇಧೋ, ಕಾಮಾನಂ ವಸಮನ್ವಗಂ.
‘‘ಸೋಳಸಿತ್ಥಿಸಹಸ್ಸಾನಿ ¶ , ಸಬ್ಬಾಲಙ್ಕಾರಭೂಸಿತಾ;
ವಿಚಿತ್ರವತ್ಥಾಭರಣಾ, ಆಮುತ್ತಮಣಿಕುಣ್ಡಲಾ;
ತಾ ಪುತ್ತ ಪಟಿಪಜ್ಜಸ್ಸು, ರಜ್ಜಂ ನಿಯ್ಯಾದಯಾಮಿ ತೇ.
‘‘ಅಜ್ಜೇವ ಪಬ್ಬಜಿಸ್ಸಾಮಿ, ಕೋ ಜಞ್ಞಾ ಮರಣಂ ಸುವೇ;
ಮಾಹಂ ¶ ಕಾಕೋವ ದುಮ್ಮೇಧೋ, ಕಾಮಾನಂ ವಸಮನ್ವಗಂ’’.
‘‘ದಹರಸ್ಸೇವ ¶ ಮೇ ತಾತ, ಮಾತಾ ಮತಾತಿ ಮೇ ಸುತಂ;
ತಯಾ ವಿನಾ ಅಹಂ ತಾತ, ಜೀವಿತುಮ್ಪಿ ನ ಉಸ್ಸಹೇ.
‘‘ಯಥಾ ಆರಞ್ಞಕಂ ನಾಗಂ, ಪೋತೋ ಅನ್ವೇತಿ ಪಚ್ಛತೋ;
ಜೇಸ್ಸನ್ತಂ ಗಿರಿದುಗ್ಗೇಸು, ಸಮೇಸು ವಿಸಮೇಸು ಚ.
‘‘ಏವಂ ತಂ ಅನುಗಚ್ಛಾಮಿ, ಪುತ್ತಮಾದಾಯ [ಪತ್ತಮಾದಾಯ (ಪೀ.)] ಪಚ್ಛತೋ;
ಸುಭರೋ ತೇ ಭವಿಸ್ಸಾಮಿ, ನ ತೇ ಹೇಸ್ಸಾಮಿ ದುಬ್ಭರೋ’’.
‘‘ಯಥಾ ಸಾಮುದ್ದಿಕಂ ನಾವಂ, ವಾಣಿಜಾನಂ ಧನೇಸಿನಂ;
ವೋಹಾರೋ ತತ್ಥ ಗಣ್ಹೇಯ್ಯ, ವಾಣಿಜಾ ಬ್ಯಸನೀ [ಬ್ಯಸನಂ (ಕ.)] ಸಿಯಾ.
‘‘ಏವಮೇವಾಯಂ ಪುತ್ತಕಲಿ [ಪುತ್ತಕ (ಸ್ಯಾ.)], ಅನ್ತರಾಯಕರೋ ಮಮ [ಮಮಂ (ಪೀ.)];
ಇಮಂ ಕುಮಾರಂ ಪಾಪೇಥ, ಪಾಸಾದಂ ರತಿವಡ್ಢನಂ.
‘‘ತತ್ಥ ಕಮ್ಬುಸಹತ್ಥಾಯೋ, ಯಥಾ ಸಕ್ಕಂವ ಅಚ್ಛರಾ;
ತಾ ನಂ ತತ್ಥ ರಮೇಸ್ಸನ್ತಿ [ರಮಿಸ್ಸನ್ತಿ (ಸ್ಯಾ. ಕ.)], ತಾಹಿ ಚೇಸೋ [ಮೇಸೋ (ಪೀ.)] ರಮಿಸ್ಸತಿ.
‘‘ತತೋ ಕುಮಾರಂ ಪಾಪೇಸುಂ, ಪಾಸಾದಂ ರತಿವಡ್ಢನಂ;
ತಂ ದಿಸ್ವಾ ಅವಚುಂ ಕಞ್ಞಾ, ದೀಘಾವುಂ ರಟ್ಠವಡ್ಢನಂ.
‘‘ದೇವತಾ ನುಸಿ ಗನ್ಧಬ್ಬೋ, ಅದು [ಆದು (ಸೀ. ಪೀ.)] ಸಕ್ಕೋ ಪುರಿನ್ದದೋ;
ಕೋ ವಾ ತ್ವಂ ಕಸ್ಸ ವಾ ಪುತ್ತೋ, ಕಥಂ ಜಾನೇಮು ತಂ ಮಯಂ’’.
‘‘ನಮ್ಹಿ ದೇವೋ ನ ಗನ್ಧಬ್ಬೋ, ನಾಪಿ [ನಮ್ಹಿ (ಕ.)] ಸಕ್ಕೋ ಪುರಿನ್ದದೋ;
ಕಾಸಿರಞ್ಞೋ ಅಹಂ ಪುತ್ತೋ, ದೀಘಾವು ರಟ್ಠವಡ್ಢನೋ;
ಮಮಂ [ಮಮ (ಪೀ.)] ಭರಥ ಭದ್ದಂ ವೋ [ಭದ್ದನ್ತೇ (ಕ.)], ಅಹಂ ಭತ್ತಾ ಭವಾಮಿ ವೋ’’.
‘‘ತಂ ¶ ತತ್ಥ ಅವಚುಂ ಕಞ್ಞಾ, ದೀಘಾವುಂ ರಟ್ಠವಡ್ಢನಂ;
‘ಕುಹಿಂ ರಾಜಾ ಅನುಪ್ಪತ್ತೋ, ಇತೋ ರಾಜಾ ಕುಹಿಂ ಗತೋ’’’.
‘‘ಪಙ್ಕಂ ರಾಜಾ ಅತಿಕ್ಕನ್ತೋ, ಥಲೇ ರಾಜಾ ಪತಿಟ್ಠಿತೋ;
ಅಕಣ್ಟಕಂ ಅಗಹನಂ, ಪಟಿಪನ್ನೋ ಮಹಾಪಥಂ.
‘‘ಅಹಞ್ಚ ಪಟಿಪನ್ನೋಸ್ಮಿ, ಮಗ್ಗಂ ದುಗ್ಗತಿಗಾಮಿನಂ;
ಸಕಣ್ಟಕಂ ಸಗಹನಂ, ಯೇನ ಗಚ್ಛನ್ತಿ ದುಗ್ಗತಿಂ’’.
‘‘ತಸ್ಸ ¶ ¶ ತೇ ಸ್ವಾಗತಂ ರಾಜ, ಸೀಹಸ್ಸೇವ ಗಿರಿಬ್ಬಜಂ;
ಅನುಸಾಸ ಮಹಾರಾಜ, ತ್ವಂ ನೋ ಸಬ್ಬಾಸಮಿಸ್ಸರೋ’’ತಿ.
ಸೋಣಕಜಾತಕಂ ಪಠಮಂ.
೫೩೦. ಸಂಕಿಚ್ಚಜಾತಕಂ (೨)
‘‘ದಿಸ್ವಾ ನಿಸಿನ್ನಂ ರಾಜಾನಂ, ಬ್ರಹ್ಮದತ್ತಂ ರಥೇಸಭಂ;
ಅಥಸ್ಸ ಪಟಿವೇದೇಸಿ, ಯಸ್ಸಾಸಿ ಅನುಕಮ್ಪಕೋ.
‘‘ಸಂಕಿಚ್ಚಾಯಂ ಅನುಪ್ಪತ್ತೋ, ಇಸೀನಂ ಸಾಧುಸಮ್ಮತೋ;
ತರಮಾನರೂಪೋ ನಿಯ್ಯಾಹಿ, ಖಿಪ್ಪಂ ಪಸ್ಸ ಮಹೇಸಿನಂ.
‘‘ತತೋ ಚ ರಾಜಾ ತರಮಾನೋ, ಯುತ್ತಮಾರುಯ್ಹ ಸನ್ದನಂ;
ಮಿತ್ತಾಮಚ್ಚಪರಿಬ್ಯೂಳ್ಹೋ [ಪರಿಬ್ಬೂಳ್ಹೋ (ಸೀ. ಪೀ.)], ಅಗಮಾಸಿ ರಥೇಸಭೋ.
‘‘ನಿಕ್ಖಿಪ್ಪ ಪಞ್ಚ ಕಕುಧಾನಿ, ಕಾಸೀನಂ ರಟ್ಠವಡ್ಢನೋ;
ವಾಳಬೀಜನಿ [ವಾ ಳವೀಜನೀ (ಸೀ. ಪೀ.)] ಮುಣ್ಹೀಸಂ, ಖಗ್ಗಂ ಛತ್ತಞ್ಚುಪಾಹನಂ;
‘‘ಓರುಯ್ಹ ರಾಜಾ ಯಾನಮ್ಹಾ, ಠಪಯಿತ್ವಾ ಪಟಿಚ್ಛದಂ;
ಆಸೀನಂ ¶ ದಾಯಪಸ್ಸಸ್ಮಿಂ, ಸಂಕಿಚ್ಚಮುಪಸಙ್ಕಮಿ.
‘‘ಉಪಸಙ್ಕಮಿತ್ವಾ ಸೋ ರಾಜಾ, ಸಮ್ಮೋದಿ ಇಸಿನಾ ಸಹ;
ತಂ ಕಥಂ ವೀತಿಸಾರೇತ್ವಾ, ಏಕಮನ್ತಂ ಉಪಾವಿಸಿ.
‘‘ಏಕಮನ್ತಂ ನಿಸಿನ್ನೋವ, ಅಥ ಕಾಲಂ ಅಮಞ್ಞಥ;
ತತೋ ಪಾಪಾನಿ ಕಮ್ಮಾನಿ, ಪುಚ್ಛಿತುಂ ಪಟಿಪಜ್ಜಥ.
‘‘ಇಸಿಂ ಪುಚ್ಛಾಮ [ಪುಚ್ಛಾಮಿ (ಸೀ. ಪೀ.)] ಸಂಕಿಚ್ಚಂ, ಇಸೀನಂ ಸಾಧುಸಮ್ಮತಂ;
ಆಸೀನಂ ದಾಯಪಸ್ಸಸ್ಮಿಂ, ಇಸಿಸಙ್ಘಪುರಕ್ಖತಂ [ಪುರಕ್ಖಿತಂ (ಕ.)].
‘‘ಕಂ ಗತಿಂ ಪೇಚ್ಚ ಗಚ್ಛನ್ತಿ, ನರಾ ಧಮ್ಮಾತಿಚಾರಿನೋ;
ಅತಿಚಿಣ್ಣೋ ಮಯಾ ಧಮ್ಮೋ, ತಂ ಮೇ ಅಕ್ಖಾಹಿ ಪುಚ್ಛಿತೋ.
‘‘ಇಸೀ ಅವಚ ಸಂಕಿಚ್ಚೋ, ಕಾಸೀನಂ ರಟ್ಠವಡ್ಢನಂ;
ಆಸೀನಂ ದಾಯಪಸ್ಸಸ್ಮಿಂ, ಮಹಾರಾಜ ಸುಣೋಹಿ ಮೇ.
‘‘ಉಪ್ಪಥೇನ ¶ ವಜನ್ತಸ್ಸ, ಯೋ ಮಗ್ಗಮನುಸಾಸತಿ;
ತಸ್ಸ ಚೇ ವಚನಂ ಕಯಿರಾ, ನಾಸ್ಸ ಮಗ್ಗೇಯ್ಯ ಕಣ್ಟಕೋ.
‘‘ಅಧಮ್ಮಂ ¶ ಪಟಿಪನ್ನಸ್ಸ, ಯೋ ಧಮ್ಮಮನುಸಾಸತಿ;
ತಸ್ಸ ಚೇ ವಚನಂ ಕಯಿರಾ, ನ ಸೋ ಗಚ್ಛೇಯ್ಯ ದುಗ್ಗತಿಂ.
‘‘ಧಮ್ಮೋ ಪಥೋ ಮಹಾರಾಜ, ಅಧಮ್ಮೋ ಪನ ಉಪ್ಪಥೋ;
ಅಧಮ್ಮೋ ನಿರಯಂ ನೇತಿ, ಧಮ್ಮೋ ಪಾಪೇತಿ ಸುಗ್ಗತಿಂ.
‘‘ಅಧಮ್ಮಚಾರಿನೋ ರಾಜ, ನರಾ ವಿಸಮಜೀವಿನೋ;
ಯಂ ಗತಿಂ ಪೇಚ್ಚ ಗಚ್ಛನ್ತಿ, ನಿರಯೇ ತೇ ಸುಣೋಹಿ ಮೇ.
‘‘ಸಞ್ಜೀವೋ ಕಾಳಸುತ್ತೋ ಚ, ಸಙ್ಘಾತೋ [ಸಙ್ಖಾಟೋ (ಸ್ಯಾ. ಕ.)] ದ್ವೇ ಚ ರೋರುವಾ;
ಅಥಾಪರೋ ¶ ಮಹಾವೀಚಿ, ತಾಪನೋ [ತಪನೋ (ಸೀ. ಪೀ.)] ಚ ಪತಾಪನೋ.
‘‘ಇಚ್ಚೇತೇ ಅಟ್ಠ ನಿರಯಾ, ಅಕ್ಖಾತಾ ದುರತಿಕ್ಕಮಾ;
ಆಕಿಣ್ಣಾ ಲುದ್ದಕಮ್ಮೇಹಿ, ಪಚ್ಚೇಕಾ ಸೋಳಸುಸ್ಸದಾ.
‘‘ಕದರಿಯತಾಪನಾ [ಕದರಿಯತಪನಾ (ಸೀ. ಪೀ.)] ಘೋರಾ, ಅಚ್ಚಿಮನ್ತೋ [ಅಚ್ಚಿಮನ್ತಾ (ಪೀ.)] ಮಹಬ್ಭಯಾ;
ಲೋಮಹಂಸನರೂಪಾ ಚ, ಭೇಸ್ಮಾ ಪಟಿಭಯಾ ದುಖಾ.
‘‘ಚತುಕ್ಕಣ್ಣಾ ಚತುದ್ವಾರಾ, ವಿಭತ್ತಾ ಭಾಗಸೋ ಮಿತಾ;
ಅಯೋಪಾಕಾರಪರಿಯನ್ತಾ, ಅಯಸಾ ಪಟಿಕುಜ್ಜಿತಾ.
‘‘ತೇಸಂ ಅಯೋಮಯಾ ಭೂಮಿ, ಜಲಿತಾ ತೇಜಸಾ ಯುತಾ;
ಸಮನ್ತಾ ಯೋಜನಸತಂ, ಫುಟಾ [ಫರಿತ್ವಾ (ಅ. ನಿ. ೩.೩೬; ಪೇ. ವ. ೭೧)] ತಿಟ್ಠನ್ತಿ ಸಬ್ಬದಾ.
‘‘ಏತೇ ಪತನ್ತಿ ನಿರಯೇ, ಉದ್ಧಂಪಾದಾ ಅವಂಸಿರಾ;
ಇಸೀನಂ ಅತಿವತ್ತಾರೋ, ಸಞ್ಞತಾನಂ ತಪಸ್ಸಿನಂ.
‘‘ತೇ ಭೂನಹುನೋ ಪಚ್ಚನ್ತಿ, ಮಚ್ಛಾ ಬಿಲಕತಾ ಯಥಾ;
ಸಂವಚ್ಛರೇ ಅಸಙ್ಖೇಯ್ಯೇ, ನರಾ ಕಿಬ್ಬಿಸಕಾರಿನೋ.
‘‘ಡಯ್ಹಮಾನೇನ ಗತ್ತೇನ, ನಿಚ್ಚಂ ಸನ್ತರಬಾಹಿರಂ;
ನಿರಯಾ ನಾಧಿಗಚ್ಛನ್ತಿ, ದ್ವಾರಂ ನಿಕ್ಖಮನೇಸಿನೋ.
‘‘ಪುರತ್ಥಿಮೇನ ¶ ಧಾವನ್ತಿ, ತತೋ ಧಾವನ್ತಿ ಪಚ್ಛತೋ;
ಉತ್ತರೇನಪಿ ಧಾವನ್ತಿ, ತತೋ ಧಾವನ್ತಿ ದಕ್ಖಿಣಂ;
ಯಂ ಯಞ್ಹಿ ದ್ವಾರಂ ಗಚ್ಛನ್ತಿ, ತಂ ತದೇವ ಪಿಧೀಯರೇ [ಪಿಥಿಯ್ಯತಿ (ಸೀ.), ಪಿಥಿಯ್ಯರೇ (ಸ್ಯಾ.), ಪಿಥೀಯರೇ (ಪೀ.)].
‘‘ಬಹೂನಿ ವಸ್ಸಸಹಸ್ಸಾನಿ, ಜನಾ ನಿರಯಗಾಮಿನೋ;
ಬಾಹಾ ಪಗ್ಗಯ್ಹ ಕನ್ದನ್ತಿ, ಪತ್ವಾ ದುಕ್ಖಂ ಅನಪ್ಪಕಂ.
‘‘ಆಸೀವಿಸಂವ ¶ ಕುಪಿತಂ, ತೇಜಸ್ಸಿಂ ದುರತಿಕ್ಕಮಂ;
ನ ಸಾಧುರೂಪೇ ಆಸೀದೇ, ಸಞ್ಞತಾನಂ ತಪಸ್ಸಿನಂ.
‘‘ಅತಿಕಾಯೋ ¶ ಮಹಿಸ್ಸಾಸೋ, ಅಜ್ಜುನೋ ಕೇಕಕಾಧಿಪೋ;
ಸಹಸ್ಸಬಾಹು ಉಚ್ಛಿನ್ನೋ, ಇಸಿಮಾಸಜ್ಜ ಗೋತಮಂ.
‘‘ಅರಜಂ ರಜಸಾ ವಚ್ಛಂ, ಕಿಸಂ ಅವಕಿರಿಯ ದಣ್ಡಕೀ;
ತಾಲೋವ ಮೂಲತೋ [ಸಮೂಲೋ (ಕ.)] ಛಿನ್ನೋ, ಸ ರಾಜಾ ವಿಭವಙ್ಗತೋ.
‘‘ಉಪಹಚ್ಚ ಮನಂ ಮಜ್ಝೋ [ಮೇಜ್ಝೋ (ಕ.)], ಮಾತಙ್ಗಸ್ಮಿಂ ಯಸಸ್ಸಿನೇ;
ಸಪಾರಿಸಜ್ಜೋ ಉಚ್ಛಿನ್ನೋ, ಮಜ್ಝಾರಞ್ಞಂ ತದಾ ಅಹು.
‘‘ಕಣ್ಹದೀಪಾಯನಾಸಜ್ಜ, ಇಸಿಂ ಅನ್ಧಕವೇಣ್ಡಯೋ [ವೇಣ್ಹುಯೋ (ಸೀ. ಪೀ.), ಪಿಣ್ಹಯೋ (?)];
ಅಞ್ಞೋಞ್ಞಂ [ಅಞ್ಞಮಞ್ಞಂ (ಸೀ. ಪೀ.)] ಮುಸಲಾ [ಮುಸಲೇ (ಸೀ. ಸ್ಯಾ. ಪೀ.)] ಹನ್ತ್ವಾ, ಸಮ್ಪತ್ತಾ ಯಮಸಾಧನಂ [ಯಮಸಾದನಂ (ಪೀ.)].
‘‘ಅಥಾಯಂ ಇಸಿನಾ ಸತ್ತೋ, ಅನ್ತಲಿಕ್ಖಚರೋ ಪುರೇ;
ಪಾವೇಕ್ಖಿ ಪಥವಿಂ [ಪಠವಿಂ (ಸೀ. ಸ್ಯಾ. ಪೀ.)] ಚೇಚ್ಚೋ, ಹೀನತ್ತೋ ಪತ್ತಪರಿಯಾಯಂ.
‘‘ತಸ್ಮಾ ಹಿ ಛನ್ದಾಗಮನಂ, ನಪ್ಪಸಂಸನ್ತಿ ಪಣ್ಡಿತಾ;
ಅದುಟ್ಠಚಿತ್ತೋ ಭಾಸೇಯ್ಯ, ಗಿರಂ ಸಚ್ಚೂಪಸಂಹಿತಂ.
‘‘ಮನಸಾ ಚೇ ಪದುಟ್ಠೇನ, ಯೋ ನರೋ ಪೇಕ್ಖತೇ ಮುನಿಂ;
ವಿಜ್ಜಾಚರಣಸಮ್ಪನ್ನಂ, ಗನ್ತಾ ಸೋ ನಿರಯಂ ಅಧೋ.
‘‘ಯೇ ವುಡ್ಢೇ [ವದ್ಧೇ (ಕ.)] ಪರಿಭಾಸನ್ತಿ, ಫರುಸೂಪಕ್ಕಮಾ ಜನಾ;
ಅನಪಚ್ಚಾ ಅದಾಯಾದಾ, ತಾಲವತ್ಥು [ತಾಲವತ್ಥೂ (ಸ್ಯಾ.), ತಾಲಾವತ್ಥು (ಪೀ.)] ಭವನ್ತಿ ತೇ.
‘‘ಯೋ ¶ ಚ ಪಬ್ಬಜಿತಂ ಹನ್ತಿ, ಕತಕಿಚ್ಚಂ ಮಹೇಸಿನಂ;
ಸ ಕಾಳಸುತ್ತೇ ನಿರಯೇ, ಚಿರರತ್ತಾಯ ಪಚ್ಚತಿ.
‘‘ಯೋ ¶ ಚ ರಾಜಾ ಅಧಮ್ಮಟ್ಠೋ, ರಟ್ಠವಿದ್ಧಂಸನೋ ಮಗೋ [ಚುತೋ (ಸೀ.)];
ತಾಪಯಿತ್ವಾ ಜನಪದಂ, ತಾಪನೇ ಪೇಚ್ಚ ಪಚ್ಚತಿ.
‘‘ಸೋ ಚ ವಸ್ಸಸಹಸ್ಸಾನಿ [ವಸ್ಸಸಹಸ್ಸಾನಂ (ಸೀ. ಸ್ಯಾ.)], ಸತಂ ದಿಬ್ಬಾನಿ ಪಚ್ಚತಿ;
ಅಚ್ಚಿಸಙ್ಘಪರೇತೋ ಸೋ, ದುಕ್ಖಂ ವೇದೇತಿ ವೇದನಂ.
‘‘ತಸ್ಸ ಅಗ್ಗಿಸಿಖಾ ಕಾಯಾ, ನಿಚ್ಛರನ್ತಿ ಪಭಸ್ಸರಾ;
ತೇಜೋಭಕ್ಖಸ್ಸ ಗತ್ತಾನಿ, ಲೋಮೇಹಿ ಚ [ಲೋಮಗ್ಗೇಹಿ ಚ (ಸೀ. ಸ್ಯಾ. ಪೀ.)] ನಖೇಹಿ ಚ.
‘‘ಡಯ್ಹಮಾನೇನ ಗತ್ತೇನ, ನಿಚ್ಚಂ ಸನ್ತರಬಾಹಿರಂ;
ದುಕ್ಖಾಭಿತುನ್ನೋ ನದತಿ, ನಾಗೋ ತುತ್ತಟ್ಟಿತೋ [ತುತ್ತದ್ದಿತೋ (ಸೀ.)] ಯಥಾ.
‘‘ಯೋ ಲೋಭಾ ಪಿತರಂ ಹನ್ತಿ, ದೋಸಾ ವಾ ಪುರಿಸಾಧಮೋ;
ಸ ಕಾಳಸುತ್ತೇ ನಿರಯೇ, ಚಿರರತ್ತಾಯ ಪಚ್ಚತಿ.
‘‘ಸ ¶ ತಾದಿಸೋ ಪಚ್ಚತಿ ಲೋಹಕುಮ್ಭಿಯಂ, ಪಕ್ಕಞ್ಚ ಸತ್ತೀಹಿ ಹನನ್ತಿ ನಿತ್ತಚಂ;
ಅನ್ಧಂ ಕರಿತ್ವಾ ಮುತ್ತಕರೀಸಭಕ್ಖಂ, ಖಾರೇ ನಿಮುಜ್ಜನ್ತಿ ತಥಾವಿಧಂ ನರಂ.
‘‘ತತ್ತಂ ಪಕ್ಕುಥಿತಮಯೋಗುಳಞ್ಚ [ಪಕ್ಕುಧಿತಮಯೋಗುಳಞ್ಚ (ಕ.)], ದೀಘೇ ಚ ಫಾಲೇ ಚಿರರತ್ತತಾಪಿತೇ;
ವಿಕ್ಖಮ್ಭಮಾದಾಯ ವಿಬನ್ಧ [ವಿಬದ್ಧ (ಸೀ.), ವಿಭಜ್ಜ (ಸ್ಯಾ. ಪೀ.)] ರಜ್ಜುಭಿ, ವಿವಟೇ ಮುಖೇ ಸಮ್ಪವಿಸನ್ತಿ [ಸಂಚವನ್ತಿ (ಸೀ. ಸ್ಯಾ. ಪೀ.)] ರಕ್ಖಸಾ.
‘‘ಸಾಮಾ ಚ ಸೋಣಾ ಸಬಲಾ ಚ ಗಿಜ್ಝಾ, ಕಾಕೋಳಸಙ್ಘಾ ಚ ದಿಜಾ ಅಯೋಮುಖಾ;
ಸಙ್ಗಮ್ಮ ¶ ಖಾದನ್ತಿ ವಿಪ್ಫನ್ದಮಾನಂ, ಜಿವ್ಹಂ ವಿಭಜ್ಜ ವಿಘಾಸಂ ಸಲೋಹಿತಂ.
‘‘ತಂ ¶ ದಡ್ಢತಾಲಂ ಪರಿಭಿನ್ನಗತ್ತಂ, ನಿಪ್ಪೋಥಯನ್ತಾ ಅನುವಿಚರನ್ತಿ ರಕ್ಖಸಾ;
ರತೀ ಹಿ ನೇಸಂ ದುಖಿನೋ ಪನೀತರೇ, ಏತಾದಿಸಸ್ಮಿಂ ನಿರಯೇ ವಸನ್ತಿ;
ಯೇ ಕೇಚಿ ಲೋಕೇ ಇಧ ಪೇತ್ತಿಘಾತಿನೋ.
‘‘ಪುತ್ತೋ ಚ ಮಾತರಂ ಹನ್ತ್ವಾ, ಇತೋ ಗನ್ತ್ವಾ ಯಮಕ್ಖಯಂ;
ಭುಸಮಾಪಜ್ಜತೇ ದುಕ್ಖಂ, ಅತ್ತಕಮ್ಮಫಲೂಪಗೋ.
‘‘ಅಮನುಸ್ಸಾ ಅತಿಬಲಾ, ಹನ್ತಾರಂ ಜನಯನ್ತಿಯಾ;
ಅಯೋಮಯೇಹಿ ವಾಳೇಹಿ [ಫಾಲೇಹಿ (ಪೀ.)], ಪೀಳಯನ್ತಿ ಪುನಪ್ಪುನಂ.
‘‘ತಮಸ್ಸವಂ [ತಂ ಪಸ್ಸವಂ (ಸೀ. ಸ್ಯಾ.), ತಂ ಪಸ್ಸುತಂ (ಪೀ.)] ಸಕಾ ಗತ್ತಾ, ರುಹಿರಂ [ರುಧಿರಂ (ಸೀ. ಸ್ಯಾ.)] ಅತ್ತಸಮ್ಭವಂ;
ತಮ್ಬಲೋಹವಿಲೀನಂವ, ತತ್ತಂ ಪಾಯೇನ್ತಿ ಮತ್ತಿಘಂ [ಮತ್ತಿಯಂ (ಸೀ.)].
‘‘ಜಿಗುಚ್ಛಂ ಕುಣಪಂ ಪೂತಿಂ, ದುಗ್ಗನ್ಧಂ ಗೂಥಕದ್ದಮಂ;
ಪುಬ್ಬಲೋಹಿತಸಙ್ಕಾಸಂ, ರಹದಮೋಗಯ್ಹ [ರಹದೋಗ್ಗಯ್ಹ (ಕ.)] ತಿಟ್ಠತಿ.
‘‘ತಮೇನಂ ಕಿಮಯೋ ತತ್ಥ, ಅತಿಕಾಯಾ ಅಯೋಮುಖಾ;
ಛವಿಂ ಭೇತ್ವಾನ [ಛೇತ್ವಾನ (ಸೀ. ಪೀ.)] ಖಾದನ್ತಿ, ಸಂಗಿದ್ಧಾ [ಪಗಿದ್ಧಾ (ಸೀ. ಸ್ಯಾ. ಪೀ.)] ಮಂಸಲೋಹಿತೇ.
‘‘ಸೋ ಚ ತಂ ನಿರಯಂ ಪತ್ತೋ, ನಿಮುಗ್ಗೋ ಸತಪೋರಿಸಂ;
ಪೂತಿಕಂ ಕುಣಪಂ ವಾತಿ, ಸಮನ್ತಾ ಸತಯೋಜನಂ.
‘‘ಚಕ್ಖುಮಾಪಿ ಹಿ ಚಕ್ಖೂಹಿ, ತೇನ ಗನ್ಧೇನ ಜೀಯತಿ;
ಏತಾದಿಸಂ ¶ ಬ್ರಹ್ಮದತ್ತ, ಮಾತುಘೋ ಲಭತೇ ದುಖಂ.
‘‘ಖುರಧಾರಮನುಕ್ಕಮ್ಮ, ತಿಕ್ಖಂ ದುರಭಿಸಮ್ಭವಂ;
ಪತನ್ತಿ ಗಬ್ಭಪಾತಿಯೋ [ಗಬ್ಭಪಾತಿನಿಯೋ (ಸೀ. ಸ್ಯಾ. ಪೀ.)], ದುಗ್ಗಂ ವೇತರಣಿಂ [ವೇತ್ತರಣಿಂ (ಸ್ಯಾ. ಕ.)] ನದಿಂ.
‘‘ಅಯೋಮಯಾ ಸಿಮ್ಬಲಿಯೋ, ಸೋಳಸಙ್ಗುಲಕಣ್ಟಕಾ;
ಉಭತೋ ಅಭಿಲಮ್ಬನ್ತಿ, ದುಗ್ಗಂ ವೇತರಣಿಂ [ವೇತ್ತರಣಿಂ (ಸ್ಯಾ. ಕ.)] ನದಿಂ.
‘‘ತೇ ¶ ಅಚ್ಚಿಮನ್ತೋ ತಿಟ್ಠನ್ತಿ, ಅಗ್ಗಿಕ್ಖನ್ಧಾವ ಆರಕಾ;
ಆದಿತ್ತಾ ಜಾತವೇದೇನ, ಉದ್ಧಂ ಯೋಜನಮುಗ್ಗತಾ.
‘‘ಏತೇ ¶ ವಜನ್ತಿ [ಸಜನ್ತಿ (ಸೀ. ಪೀ.), ಪಜ್ಜನ್ತಿ (ಸ್ಯಾ.)] ನಿರಯೇ, ತತ್ತೇ ತಿಖಿಣಕಣ್ಟಕೇ;
ನಾರಿಯೋ ಚ ಅತಿಚಾರಾ [ಅತಿಚಾರಿನಿಯೋ (ಸೀ. ಸ್ಯಾ. ಪೀ.)], ನರಾ ಚ ಪರದಾರಗೂ.
‘‘ತೇ ಪತನ್ತಿ ಅಧೋಕ್ಖನ್ಧಾ, ವಿವತ್ತಾ ವಿಹತಾ ಪುಥೂ;
ಸಯನ್ತಿ ವಿನಿವಿದ್ಧಙ್ಗಾ, ದೀಘಂ ಜಗ್ಗನ್ತಿ ಸಬ್ಬದಾ [ಸಂವರಿಂ (ಸೀ. ಪೀ.)].
‘‘ತತೋ ರತ್ಯಾ ವಿವಸಾನೇ [ವಿವಸನೇ (ಸೀ. ಸ್ಯಾ. ಪೀ.)], ಮಹತಿಂ ಪಬ್ಬತೂಪಮಂ;
ಲೋಹಕುಮ್ಭಿಂ ಪವಜ್ಜನ್ತಿ, ತತ್ತಂ ಅಗ್ಗಿಸಮೂದಕಂ.
‘‘ಏವಂ ದಿವಾ ಚ ರತ್ತೋ ಚ, ದುಸ್ಸೀಲಾ ಮೋಹಪಾರುತಾ;
ಅನುಭೋನ್ತಿ ಸಕಂ ಕಮ್ಮಂ, ಪುಬ್ಬೇ ದುಕ್ಕಟಮತ್ತನೋ.
‘‘ಯಾ ಚ ಭರಿಯಾ ಧನಕ್ಕೀತಾ, ಸಾಮಿಕಂ ಅತಿಮಞ್ಞತಿ;
ಸಸ್ಸುಂ ವಾ ಸಸುರಂ ವಾಪಿ, ಜೇಟ್ಠಂ ವಾಪಿ ನನನ್ದರಂ [ನನನ್ದನಂ (ಸ್ಯಾ. ಕ.)].
‘‘ತಸ್ಸಾ ವಙ್ಕೇನ ಜಿವ್ಹಗ್ಗಂ, ನಿಬ್ಬಹನ್ತಿ ಸಬನ್ಧನಂ;
ಸ ಬ್ಯಾಮಮತ್ತಂ ಕಿಮಿನಂ, ಜಿವ್ಹಂ ಪಸ್ಸತಿ ಅತ್ತನಿ [ಅತ್ತನೋ (ಸೀ. ಸ್ಯಾ.)];
ವಿಞ್ಞಾಪೇತುಂ ¶ ನ ಸಕ್ಕೋತಿ, ತಾಪನೇ ಪೇಚ್ಚ ಪಚ್ಚತಿ.
‘‘ಓರಬ್ಭಿಕಾ ಸೂಕರಿಕಾ, ಮಚ್ಛಿಕಾ ಮಿಗಬನ್ಧಕಾ;
ಚೋರಾ ಗೋಘಾತಕಾ ಲುದ್ದಾ, ಅವಣ್ಣೇ ವಣ್ಣಕಾರಕಾ.
‘‘ಸತ್ತೀಹಿ ಲೋಹಕೂಟೇಹಿ, ನೇತ್ತಿಂಸೇಹಿ ಉಸೂಹಿ ಚ;
ಹಞ್ಞಮಾನಾ ಖಾರನದಿಂ, ಪಪತನ್ತಿ [ಸಮ್ಪತನ್ತಿ (ಕ.)] ಅವಂಸಿರಾ.
‘‘ಸಾಯಂ ಪಾತೋ ಕೂಟಕಾರೀ, ಅಯೋಕೂಟೇಹಿ ಹಞ್ಞತಿ;
ತತೋ ವನ್ತಂ ದುರತ್ತಾನಂ, ಪರೇಸಂ ಭುಞ್ಜರೇ [ಭುಞ್ಜತೇ (ಸೀ. ಸ್ಯಾ. ಪೀ.)] ಸದಾ.
‘‘ಧಙ್ಕಾ ಭೇರಣ್ಡಕಾ [ಭೇದಣ್ಡಕಾ (ಕ.)] ಗಿಜ್ಝಾ, ಕಾಕೋಳಾ ಚ ಅಯೋಮುಖಾ;
ವಿಪ್ಫನ್ದಮಾನಂ ಖಾದನ್ತಿ, ನರಂ ಕಿಬ್ಬಿಸಕಾರಕಂ [ಕಿಬ್ಬಿಸಕಾರಿನಂ (ಪೀ.)].
‘‘ಯೇ ಮಿಗೇನ ಮಿಗಂ ಹನ್ತಿ, ಪಕ್ಖಿಂ ವಾ ಪನ ಪಕ್ಖಿನಾ;
ಅಸನ್ತೋ ರಜಸಾ ಛನ್ನಾ, ಗನ್ತಾ [ಗತಾ (ಕ.)] ತೇ ನಿರಯುಸ್ಸದಂ [ನಿರಯಂ ಅಧೋ (ಪೀ.)].
‘‘ಸನ್ತೋ ¶ ಚ [ಸನ್ತೋವ (ಸ್ಯಾ.)] ಉದ್ಧಂ ಗಚ್ಛನ್ತಿ, ಸುಚಿಣ್ಣೇನಿಧ ಕಮ್ಮುನಾ;
ಸುಚಿಣ್ಣಸ್ಸ ಫಲಂ ಪಸ್ಸ, ಸಇನ್ದಾ [ಸಹಿನ್ದಾ (ಸೀ.)] ದೇವಾ ಸಬ್ರಹ್ಮಕಾ.
‘‘ತಂ ¶ ತಂ ಬ್ರೂಮಿ ಮಹಾರಾಜ, ಧಮ್ಮಂ ರಟ್ಠಪತೀ ಚರ;
ತಥಾ [ತಥಾ ತಥಾ (ಸೀ. ಸ್ಯಾ. ಪೀ.)] ರಾಜ ಚರಾಹಿ ಧಮ್ಮಂ, ಯಥಾ ತಂ ಸುಚಿಣ್ಣಂ ನಾನುತಪ್ಪೇಯ್ಯ ಪಚ್ಛಾ’’ತಿ.
ಸಂಕಿಚ್ಚಜಾತಕಂ ದುತಿಯಂ.
ಸಟ್ಠಿನಿಪಾತಂ ನಿಟ್ಠಿತಂ.
ತಸ್ಸುದ್ದಾನಂ –
ಅಥ ಸಟ್ಠಿನಿಪಾತಮ್ಹಿ, ಸುಣಾಥ ಮಮ ಭಾಸಿತಂ;
ಜಾತಕಸವ್ಹಯನೋ ¶ ಪವರೋ, ಸೋಣಕಅರಿನ್ದಮಸವ್ಹಯನೋ;
ತಥಾ ವುತ್ತರಥೇಸಭಕಿಚ್ಚವರೋತಿ.
೨೦. ಸತ್ತತಿನಿಪಾತೋ
೫೩೧. ಕುಸಜಾತಕಂ (೧)
‘‘ಇದಂ ¶ ¶ ¶ ತೇ ರಟ್ಠಂ ಸಧನಂ ಸಯೋಗ್ಗಂ, ಸಕಾಯುರಂ ಸಬ್ಬಕಾಮೂಪಪನ್ನಂ;
ಇದಂ ತೇ ರಜ್ಜಂ [ರಟ್ಠಂ (ಕ.)] ಅನುಸಾಸ ಅಮ್ಮ, ಗಚ್ಛಾಮಹಂ ಯತ್ಥ ಪಿಯಾ ಪಭಾವತೀ’’.
‘‘ಅನುಜ್ಜುಭೂತೇನ ಹರಂ ಮಹನ್ತಂ, ದಿವಾ ಚ ರತ್ತೋ ಚ ನಿಸೀಥಕಾಲೇ [ನಿಸೀದ ಕಾಲೇ (ಕ.)];
ಪಟಿಗಚ್ಛ ತ್ವಂ ಖಿಪ್ಪಂ ಕುಸಾವತಿಂ ಕುಸ [ಕುಸಾವತಿಂ (ಸ್ಯಾ. ಕ.)], ನಿಚ್ಛಾಮಿ ದುಬ್ಬಣ್ಣಮಹಂ ವಸನ್ತಂ’’.
‘‘ನಾಹಂ ಗಮಿಸ್ಸಾಮಿ ಇತೋ ಕುಸಾವತಿಂ, ಪಭಾವತೀ ವಣ್ಣಪಲೋಭಿತೋ ತವ;
ರಮಾಮಿ ಮದ್ದಸ್ಸ ನಿಕೇತರಮ್ಮೇ, ಹಿತ್ವಾನ ರಟ್ಠಂ ತವ ದಸ್ಸನೇ ರತೋ.
‘‘ಪಭಾವತೀ ವಣ್ಣಪಲೋಭಿತೋ ತವ, ಸಮ್ಮೂಳ್ಹರೂಪೋ ವಿಚರಾಮಿ ಮೇದಿನಿಂ [ಮೇದನಿಂ (ಸ್ಯಾ. ಕ.)];
ದಿಸಂ ನ ಜಾನಾಮಿ ಕುತೋಮ್ಹಿ ಆಗತೋ, ತಯಮ್ಹಿ ಮತ್ತೋ ಮಿಗಮನ್ದಲೋಚನೇ.
‘‘ಸುವಣ್ಣಚೀರವಸನೇ, ಜಾತರೂಪಸುಮೇಖಲೇ;
ಸುಸ್ಸೋಣಿ ¶ ತವ ಕಾಮಾ ಹಿ [ಕಾಮೇಹಿ (ಸೀ. ಸ್ಯಾ. ಪೀ.)], ನಾಹಂ ರಜ್ಜೇನ ಮತ್ಥಿಕೋ’’.
‘‘ಅಬ್ಭೂತಿ [ಅಬ್ಭೂ ಹಿ (ಸೀ.), ಅಭೂತಿ (ಸ್ಯಾ.), ಅಬ್ಭು ಹಿ (ಪೀ.)] ತಸ್ಸ ಭೋ ಹೋತಿ, ಯೋ ಅನಿಚ್ಛನ್ತಮಿಚ್ಛತಿ;
ಅಕಾಮಂ ರಾಜ ಕಾಮೇಸಿ [ಕಾಮೇಹಿ (ಸೀ. ಪೀ.)], ಅಕನ್ತಂ ಕನ್ತು [ಅಕನ್ತೋ ಕನ್ತ (ಸೀ. ಸ್ಯಾ. ಪೀ.)] ಮಿಚ್ಛಸಿ’’.
‘‘ಅಕಾಮಂ ವಾ ಸಕಾಮಂ ವಾ, ಯೋ ನರೋ ಲಭತೇ ಪಿಯಂ;
ಲಾಭಮೇತ್ಥ ಪಸಂಸಾಮ, ಅಲಾಭೋ ತತ್ಥ ಪಾಪಕೋ’’.
‘‘ಪಾಸಾಣಸಾರಂ ¶ ಖಣಸಿ, ಕಣಿಕಾರಸ್ಸ ದಾರುನಾ;
ವಾತಂ ಜಾಲೇನ ಬಾಧೇಸಿ, ಯೋ ಅನಿಚ್ಛನ್ತಮಿಚ್ಛಸಿ’’.
‘‘ಪಾಸಾಣೋ ನೂನ ತೇ ಹದಯೇ, ಓಹಿತೋ ಮುದುಲಕ್ಖಣೇ;
ಯೋ ತೇ ಸಾತಂ ನ ವಿನ್ದಾಮಿ, ತಿರೋಜನಪದಾಗತೋ.
‘‘ಯದಾ ಮಂ ಭಕುಟಿಂ [ಭೂಕುಟಿಂ (ಸೀ. ಪೀ.)] ಕತ್ವಾ, ರಾಜಪುತ್ತೀ ಉದಿಕ್ಖತಿ [ರಾಜಪುತ್ತಿ ಉದಿಕ್ಖಸಿ (ಸೀ. ಪೀ.)];
ಆಳಾರಿಕೋ ತದಾ ಹೋಮಿ, ರಞ್ಞೋ ಮದ್ದಸ್ಸನ್ತೇಪುರೇ [ಮದ್ದಸ್ಸ ಥೀಪುರೇ (ಸೀ. ಪೀ.) ಏವಮುಪರಿಪಿ].
‘‘ಯದಾ ಉಮ್ಹಯಮಾನಾ ಮಂ, ರಾಜಪುತ್ತೀ ಉದಿಕ್ಖತಿ [ರಾಜಪುತ್ತಿ ಉದಿಕ್ಖಸಿ (ಸೀ. ಪೀ.)];
ನಾಳಾರಿಕೋ ತದಾ ಹೋಮಿ, ರಾಜಾ ಹೋಮಿ ತದಾ ಕುಸೋ’’.
‘‘ಸಚೇ ¶ ಹಿ ವಚನಂ ಸಚ್ಚಂ, ನೇಮಿತ್ತಾನಂ ಭವಿಸ್ಸತಿ;
ನೇವ ಮೇ ತ್ವಂ ಪತೀ ಅಸ್ಸ, ಕಾಮಂ ಛಿನ್ದನ್ತು ಸತ್ತಧಾ’’.
‘‘ಸಚೇ ಹಿ ವಚನಂ ಸಚ್ಚಂ, ಅಞ್ಞೇಸಂ ಯದಿ ವಾ ಮಮಂ;
ನೇವ ತುಯ್ಹಂ ಪತೀ ಅತ್ಥಿ, ಅಞ್ಞೋ ಸೀಹಸ್ಸರಾ ಕುಸಾ’’.
‘‘ನೇಕ್ಖಂ ಗೀವಂ ತೇ ಕಾರೇಸ್ಸಂ, ಪತ್ವಾ ಖುಜ್ಜೇ ಕುಸಾವತಿಂ;
ಸಚೇ ಮಂ ನಾಗನಾಸೂರೂ, ಓಲೋಕೇಯ್ಯ ಪಭಾವತೀ.
‘‘ನೇಕ್ಖಂ ¶ ಗೀವಂ ತೇ ಕಾರೇಸ್ಸಂ, ಪತ್ವಾ ಖುಜ್ಜೇ ಕುಸಾವತಿಂ;
ಸಚೇ ಮಂ ನಾಗನಾಸೂರೂ, ಆಲಪೇಯ್ಯ ಪಭಾವತೀ.
‘‘ನೇಕ್ಖಂ ಗೀವಂ ತೇ ಕಾರೇಸ್ಸಂ, ಪತ್ವಾ ಖುಜ್ಜೇ ಕುಸಾವತಿಂ;
ಸಚೇ ಮಂ ನಾಗನಾಸೂರೂ, ಉಮ್ಹಾಯೇಯ್ಯ ಪಭಾವತೀ.
‘‘ನೇಕ್ಖಂ ಗೀವಂ ತೇ ಕಾರೇಸ್ಸಂ, ಪತ್ವಾ ಖುಜ್ಜೇ ಕುಸಾವತಿಂ;
ಸಚೇ ಮಂ ನಾಗನಾಸೂರೂ, ಪಮ್ಹಾಯೇಯ್ಯ ಪಭಾವತೀ.
‘‘ನೇಕ್ಖಂ ಗೀವಂ ತೇ ಕಾರೇಸ್ಸಂ, ಪತ್ವಾ ಖುಜ್ಜೇ ಕುಸಾವತಿಂ;
ಸಚೇ ಮೇ ನಾಗನಾಸೂರೂ, ಪಾಣೀಹಿ ಉಪಸಮ್ಫುಸೇ’’.
‘‘ನ ಹಿ ನೂನಾಯಂ ರಾಜಪುತ್ತೀ, ಕುಸೇ ಸಾತಮ್ಪಿ ವಿನ್ದತಿ;
ಆಳಾರಿಕೇ ಭತೇ ಪೋಸೇ, ವೇತನೇನ ಅನತ್ಥಿಕೇ’’.
‘‘ನ ಹಿ ನೂನಾಯಂ ಸಾ [ನೂನ ಅಯಂ (ಸೀ. ಸ್ಯಾ.)] ಖುಜ್ಜಾ, ಲಭತಿ ಜಿವ್ಹಾಯ ಛೇದನಂ;
ಸುನಿಸಿತೇನ ಸತ್ಥೇನ, ಏವಂ ದುಬ್ಭಾಸಿತಂ ಭಣಂ’’.
‘‘ಮಾ ¶ ನಂ ರೂಪೇನ ಪಾಮೇಸಿ, ಆರೋಹೇನ ಪಭಾವತಿ;
ಮಹಾಯಸೋತಿ ಕತ್ವಾನ, ಕರಸ್ಸು ರುಚಿರೇ ಪಿಯಂ.
‘‘ಮಾ ನಂ ರೂಪೇನ ಪಾಮೇಸಿ, ಆರೋಹೇನ ಪಭಾವತಿ;
ಮಹದ್ಧನೋತಿ ಕತ್ವಾನ, ಕರಸ್ಸು ರುಚಿರೇ ಪಿಯಂ.
‘‘ಮಾ ನಂ ರೂಪೇನ ಪಾಮೇಸಿ, ಆರೋಹೇನ ಪಭಾವತಿ;
ಮಹಬ್ಬಲೋತಿ ಕತ್ವಾನ, ಕರಸ್ಸು ರುಚಿರೇ ಪಿಯಂ.
‘‘ಮಾ ¶ ನಂ ರೂಪೇನ ಪಾಮೇಸಿ, ಆರೋಹೇನ ಪಭಾವತಿ;
ಮಹಾರಟ್ಠೋತಿ ಕತ್ವಾನ, ಕರಸ್ಸು ರುಚಿರೇ ಪಿಯಂ.
‘‘ಮಾ ನಂ ರೂಪೇನ ಪಾಮೇಸಿ, ಆರೋಹೇನ ಪಭಾವತಿ;
ಮಹಾರಾಜಾತಿ ಕತ್ವಾನ, ಕರಸ್ಸು ರುಚಿರೇ ಪಿಯಂ.
‘‘ಮಾ ನಂ ರೂಪೇನ ಪಾಮೇಸಿ, ಆರೋಹೇನ ಪಭಾವತಿ;
ಸೀಹಸ್ಸರೋತಿ ಕತ್ವಾನ, ಕರಸ್ಸು ರುಚಿರೇ ಪಿಯಂ.
‘‘ಮಾ ¶ ನಂ ರೂಪೇನ ಪಾಮೇಸಿ, ಆರೋಹೇನ ಪಭಾವತಿ;
ವಗ್ಗುಸ್ಸರೋತಿ ಕತ್ವಾನ, ಕರಸ್ಸು ರುಚಿರೇ ಪಿಯಂ.
‘‘ಮಾ ನಂ ರೂಪೇನ ಪಾಮೇಸಿ, ಆರೋಹೇನ ಪಭಾವತಿ;
ಬಿನ್ದುಸ್ಸರೋತಿ ಕತ್ವಾನ, ಕರಸ್ಸು ರುಚಿರೇ ಪಿಯಂ.
‘‘ಮಾ ನಂ ರೂಪೇನ ಪಾಮೇಸಿ, ಆರೋಹೇನ ಪಭಾವತಿ;
ಮಞ್ಜುಸ್ಸರೋತಿ ಕತ್ವಾನ, ಕರಸ್ಸು ರುಚಿರೇ ಪಿಯಂ.
‘‘ಮಾ ನಂ ರೂಪೇನ ಪಾಮೇಸಿ, ಆರೋಹೇನ ಪಭಾವತಿ;
ಮಧುಸ್ಸರೋತಿ [ಮಧುರಸ್ಸರೋತಿ (ಸೀ.)] ಕತ್ವಾನ, ಕರಸ್ಸು ರುಚಿರೇ ಪಿಯಂ.
‘‘ಮಾ ನಂ ರೂಪೇನ ಪಾಮೇಸಿ, ಆರೋಹೇನ ಪಭಾವತಿ;
ಸತಸಿಪ್ಪೋತಿ ಕತ್ವಾನ, ಕರಸ್ಸು ರುಚಿರೇ ಪಿಯಂ.
‘‘ಮಾ ನಂ ರೂಪೇನ ಪಾಮೇಸಿ, ಆರೋಹೇನ ಪಭಾವತಿ;
ಖತ್ತಿಯೋತಿಪಿ ಕತ್ವಾನ [ಕರಿತ್ವಾನ (ಸೀ.)], ಕರಸ್ಸು ರುಚಿರೇ ಪಿಯಂ.
‘‘ಮಾ ನಂ ರೂಪೇನ ಪಾಮೇಸಿ, ಆರೋಹೇನ ಪಭಾವತಿ;
ಕುಸರಾಜಾತಿ ಕತ್ವಾನ, ಕರಸ್ಸು ರುಚಿರೇ ಪಿಯಂ’’.
‘‘ಏತೇ ¶ ನಾಗಾ ಉಪತ್ಥದ್ಧಾ, ಸಬ್ಬೇ ತಿಟ್ಠನ್ತಿ ವಮ್ಮಿತಾ [ವಮ್ಮಿಕಾ (ಸ್ಯಾ.)];
ಪುರಾ ಮದ್ದನ್ತಿ ಪಾಕಾರಂ, ಆನೇನ್ತೇತಂ ಪಭಾವತಿಂ’’.
‘‘ಸತ್ತ ¶ ಬಿಲೇ [ಖಣ್ಡೇ (ಸೀ. ಪೀ.)] ಕರಿತ್ವಾನ, ಅಹಮೇತಂ ಪಭಾವತಿಂ;
ಖತ್ತಿಯಾನಂ ಪದಸ್ಸಾಮಿ, ಯೇ ಮಂ ಹನ್ತುಂ ಇಧಾಗತಾ’’.
‘‘ಅವುಟ್ಠಹಿ ರಾಜಪುತ್ತೀ, ಸಾಮಾ ಕೋಸೇಯ್ಯವಾಸಿನೀ;
ಅಸ್ಸುಪುಣ್ಣೇಹಿ ನೇತ್ತೇಹಿ, ದಾಸೀಗಣಪುರಕ್ಖತಾ’’.
‘‘ತಂ ನೂನ ಕಕ್ಕೂಪನಿಸೇವಿತಂ ಮುಖಂ, ಆದಾಸದನ್ತಾಥರುಪಚ್ಚವೇಕ್ಖಿತಂ;
ಸುಭಂ ಸುನೇತ್ತಂ ವಿರಜಂ ಅನಙ್ಗಣಂ, ಛುದ್ಧಂ ವನೇ ಠಸ್ಸತಿ ಖತ್ತಿಯೇಹಿ.
‘‘ತೇ ನೂನ ಮೇ ಅಸಿತೇ ವೇಲ್ಲಿತಗ್ಗೇ, ಕೇಸೇ ಮುದೂ ಚನ್ದನಸಾರಲಿತ್ತೇ;
ಸಮಾಕುಲೇ ಸೀವಥಿಕಾಯ ಮಜ್ಝೇ, ಪಾದೇಹಿ ಗಿಜ್ಝಾ ಪರಿಕಡ್ಢಿಸ್ಸನ್ತಿ [ಪರಿಕಡ್ಢಯನ್ತಿ (ಸೀ. ಸ್ಯಾ. ಪೀ.)].
‘‘ತಾ ನೂನ ಮೇ ತಮ್ಬನಖಾ ಸುಲೋಮಾ, ಬಾಹಾ ಮುದೂ ಚನ್ದನಸಾರಲಿತ್ತಾ;
ಛಿನ್ನಾ ವನೇ ಉಜ್ಝಿತಾ ಖತ್ತಿಯೇಹಿ, ಗಯ್ಹ ಧಙ್ಕೋ [ವಕೋ (ಪೀ.)] ಗಚ್ಛತಿ ಯೇನ ಕಾಮಂ.
‘‘ತೇ ನೂನ ತಾಲೂಪನಿಭೇ ಅಲಮ್ಬೇ, ನಿಸೇವಿತೇ ಕಾಸಿಕಚನ್ದನೇನ;
ಥನೇಸು ಮೇ ಲಮ್ಬಿಸ್ಸತಿ [ಲಮ್ಬಹೀತಿ (ಪೀ.)] ಸಿಙ್ಗಾಲೋ [ಸಿಗಾಲೋ (ಸೀ. ಸ್ಯಾ. ಪೀ.)], ಮಾತೂವ ಪುತ್ತೋ ತರುಣೋ ತನೂಜೋ.
‘‘ತಂ ¶ ನೂನ ಸೋಣಿಂ ಪುಥುಲಂ ಸುಕೋಟ್ಟಿತಂ, ನಿಸೇವಿತಂ ಕಞ್ಚನಮೇಖಲಾಹಿ;
ಛಿನ್ನಂ ವನೇ ಖತ್ತಿಯೇಹೀ ಅವತ್ಥಂ, ಸಿಙ್ಗಾಲಸಙ್ಘಾ ಪರಿಕಡ್ಢಿಸ್ಸನ್ತಿ [ಗಯ್ಹಾ ವಕೋ ಗಚ್ಛತಿ ಯೇನಕಾಮಂ (ಪೀ.)].
‘‘ಸೋಣಾ ¶ ¶ ಧಙ್ಕಾ [ವಕಾ (ಪೀ.)] ಸಿಙ್ಗಾಲಾ ಚ, ಯೇ ಚಞ್ಞೇ ಸನ್ತಿ ದಾಠಿನೋ;
ಅಜರಾ ನೂನ ಹೇಸ್ಸನ್ತಿ, ಭಕ್ಖಯಿತ್ವಾ ಪಭಾವತಿಂ.
‘‘ಸಚೇ ಮಂಸಾನಿ ಹರಿಂಸು, ಖತ್ತಿಯಾ ದೂರಗಾಮಿನೋ;
ಅಟ್ಠೀನಿ ಅಮ್ಮ ಯಾಚಿತ್ವಾ, ಅನುಪಥೇ ದಹಾಥ ನಂ.
‘‘ಖೇತ್ತಾನಿ ಅಮ್ಮ ಕಾರೇತ್ವಾ, ಕಣಿಕಾರೇತ್ಥ ರೋಪಯ [ರೋಪಯೇ (ಕ.)];
ಯದಾ ತೇ ಪುಪ್ಫಿತಾ ಅಸ್ಸು, ಹೇಮನ್ತಾನಂ ಹಿಮಚ್ಚಯೇ;
ಸರೇಯ್ಯಾಥ ಮಮಂ [ಮಮ (ಪೀ.)] ಅಮ್ಮ, ಏವಂವಣ್ಣಾ ಪಭಾವತೀ’’.
‘‘ತಸ್ಸಾ ಮಾತಾ ಉದಟ್ಠಾಸಿ, ಖತ್ತಿಯಾ ದೇವವಣ್ಣಿನೀ;
ದಿಸ್ವಾ ಅಸಿಞ್ಚ ಸೂನಞ್ಚ, ರಞ್ಞೋ ಮದ್ದಸ್ಸನ್ತೇಪುರೇ’’.
‘‘ಇಮಿನಾ ನೂನ ಅಸಿನಾ, ಸುಸಞ್ಞಂ ತನುಮಜ್ಝಿಮಂ;
ಧೀತರಂ ಮದ್ದ [ಮಮ (ಸೀ.), ಮದ್ದೋ (ಪೀ.)] ಹನ್ತ್ವಾನ, ಖತ್ತಿಯಾನಂ ಪದಸ್ಸಸಿ’’ [ಪದಸ್ಸತಿ (ಪೀ. ಕ.)].
‘‘ನ ಮೇ ಅಕಾಸಿ ವಚನಂ, ಅತ್ಥಕಾಮಾಯ ಪುತ್ತಿಕೇ;
ಸಾಜ್ಜ ಲೋಹಿತಸಞ್ಛನ್ನಾ, ಗಚ್ಛಸಿ [ಗಞ್ಛಿಸಿ (ಸೀ. ಪೀ.)] ಯಮಸಾಧನಂ.
‘‘ಏವಮಾಪಜ್ಜತೀ ಪೋಸೋ, ಪಾಪಿಯಞ್ಚ ನಿಗಚ್ಛತಿ;
ಯೋ ವೇ ಹಿತಾನಂ ವಚನಂ, ನ ಕರೋತಿ [ನ ಕರಂ (ಸೀ.)] ಅತ್ಥದಸ್ಸಿನಂ.
‘‘ಸಚೇ ಚ ಅಜ್ಜ [ತ್ವಂ ಅಮ್ಮ (ಸೀ.)] ಧಾರೇಸಿ [ವಾರೇಸಿ (ಪೀ.)], ಕುಮಾರಂ ಚಾರುದಸ್ಸನಂ;
ಕುಸೇನ ¶ ಜಾತಂ ಖತ್ತಿಯಂ, ಸುವಣ್ಣಮಣಿಮೇಖಲಂ;
ಪೂಜಿತಂ [ಪೂಜಿತಾ (ಪೀ.)] ಞಾತಿಸಙ್ಘೇಹಿ, ನ ಗಚ್ಛಸಿ [ಗಞ್ಛಿಸಿ (ಸೀ. ಪೀ.)] ಯಮಕ್ಖಯಂ.
‘‘ಯತ್ಥಸ್ಸು ಭೇರೀ ನದತಿ, ಕುಞ್ಜರೋ ಚ ನಿಕೂಜತಿ [ನಿಕುಞ್ಜತಿ (ಪೀ.)];
ಖತ್ತಿಯಾನಂ ಕುಲೇ ಭದ್ದೇ, ಕಿಂ ನು ಸುಖತರಂ ತತೋ.
‘‘ಅಸ್ಸೋ ಚ ಸಿಸತಿ [ಅಸ್ಸೋ ಹಸಿಸತಿ (ಸೀ.), ಅಸ್ಸೋ ಹಸಿಯತಿ (ಸ್ಯಾ.), ಅಸ್ಸೋ ಚ ಸಿಂಸತಿ (ಪೀ.)] ದ್ವಾರೇ, ಕುಮಾರೋ ಉಪರೋದತಿ;
ಖತ್ತಿಯಾನಂ ಕುಲೇ ಭದ್ದೇ, ಕಿಂ ನು ಸುಖತರಂ ತತೋ.
‘‘ಮಯೂರಕೋಞ್ಚಾಭಿರುದೇ, ಕೋಕಿಲಾಭಿನಿಕೂಜಿತೇ;
ಖತ್ತಿಯಾನಂ ಕುಲೇ ಭದ್ದೇ, ಕಿಂ ನು ಸುಖತರಂ ತತೋ’’.
‘‘ಕಹಂ ¶ ನು ಸೋ ಸತ್ತುಮದ್ದನೋ, ಪರರಟ್ಠಪ್ಪಮದ್ದನೋ;
ಕುಸೋ ಸೋಳಾರಪಞ್ಞಾಣೋ, ಯೋ ನೋ ದುಕ್ಖಾ ಪಮೋಚಯೇ’’.
‘‘ಇಧೇವ ಸೋ ಸತ್ತುಮದ್ದನೋ, ಪರರಟ್ಠಪ್ಪಮದ್ದನೋ;
ಕುಸೋ ಸೋಳಾರಪಞ್ಞಾಣೋ, ಯೋ ತೇ ಸಬ್ಬೇ ವಧಿಸ್ಸತಿ’’ [ಯೋ ನೋ ದುಕ್ಖಾ ಪಮೋಚಯೇ (ಸೀ.), ಸೋ ನೋ ಸಬ್ಬೇ ವಧಿಸ್ಸತಿ (ಪೀ.)].
‘‘ಉಮ್ಮತ್ತಿಕಾ ನು ಭಣಸಿ, ಅನ್ಧಬಾಲಾ ಪಭಾಸಸಿ [ಆದು ಬಾಲಾವ ಭಾಸಸಿ (ಸೀ. ಪೀ.)];
ಕುಸೋ ಚೇ ಆಗತೋ ಅಸ್ಸ, ಕಿಂ ನ [ಕಿನ್ನು (ಸ್ಯಾ. ಕ.)] ಜಾನೇಮು ತಂ ಮಯಂ’’.
‘‘ಏಸೋ ¶ ಆಳಾರಿಕೋ ಪೋಸೋ, ಕುಮಾರೀಪುರಮನ್ತರೇ;
ದಳ್ಹಂ ಕತ್ವಾನ ಸಂವೇಲ್ಲಿಂ, ಕುಮ್ಭಿಂ ಧೋವತಿ ಓಣತೋ’’.
‘‘ವೇಣೀ ತ್ವಮಸಿ ಚಣ್ಡಾಲೀ, ಅದೂಸಿ ಕುಲಗನ್ಧಿನೀ;
ಕಥಂ ಮದ್ದಕುಲೇ ಜಾತಾ, ದಾಸಂ ಕಯಿರಾಸಿ ಕಾಮುಕಂ’’.
‘‘ನಮ್ಹಿ ವೇಣೀ ನ ಚಣ್ಡಾಲೀ, ನ ಚಮ್ಹಿ ಕುಲಗನ್ಧಿನೀ;
ಓಕ್ಕಾಕಪುತ್ತೋ ಭದ್ದನ್ತೇ, ತ್ವಂ ನು ದಾಸೋತಿ ಮಞ್ಞಸಿ’’.
‘‘ಯೋ ¶ ಬ್ರಾಹ್ಮಣಸಹಸ್ಸಾನಿ, ಸದಾ ಭೋಜೇತಿ ವೀಸತಿಂ;
ಓಕ್ಕಾಕಪುತ್ತೋ ಭದ್ದನ್ತೇ, ತ್ವಂ ನು ದಾಸೋತಿ ಮಞ್ಞಸಿ’’.
‘‘ಯಸ್ಸ ನಾಗಸಹಸ್ಸಾನಿ, ಸದಾ ಯೋಜೇನ್ತಿ ವೀಸತಿಂ;
ಓಕ್ಕಾಕಪುತ್ತೋ ಭದ್ದನ್ತೇ, ತ್ವಂ ನು ದಾಸೋತಿ ಮಞ್ಞಸಿ.
‘‘ಯಸ್ಸ ಅಸ್ಸಸಹಸ್ಸಾನಿ, ಸದಾ ಯೋಜೇನ್ತಿ ವೀಸತಿಂ;
ಓಕ್ಕಾಕಪುತ್ತೋ ಭದ್ದನ್ತೇ, ತ್ವಂ ನು ದಾಸೋತಿ ಮಞ್ಞಸಿ.
‘‘ಯಸ್ಸ ರಥಸಹಸ್ಸಾನಿ, ಸದಾ ಯೋಜೇನ್ತಿ ವೀಸತಿಂ;
ಓಕ್ಕಾಕಪುತ್ತೋ ಭದ್ದನ್ತೇ, ತ್ವಂ ನು ದಾಸೋತಿ ಮಞ್ಞಸಿ.
[( ) ಅಯಂ ಗಾಥಾ ಸೀ. ಪೀ. ಪೋತ್ಥಕೇಸುಯೇವ ದಿಸ್ಸತಿ] (‘‘ಯಸ್ಸ ಉಸಭಸಹಸ್ಸಾನಿ, ಸದಾ ಯೋಜೇನ್ತಿ ವೀಸತಿಂ;
ಓಕ್ಕಾಕಪುತ್ತೋ ಭದ್ದನ್ತೇ, ತ್ವಂ ನು ದಾಸೋತಿ ಮಞ್ಞಸಿ) [( ) ಅಯಂ ಗಾಥಾ ಸೀ. ಪೀ. ಪೋತ್ಥಕೇಸುಯೇವ ದಿಸ್ಸತಿ].
‘‘ಯಸ್ಸ ಧೇನುಸಹಸ್ಸಾನಿ, ಸದಾ ದುಹನ್ತಿ ವೀಸತಿಂ [ದುಯ್ಹನ್ತಿ ವೀಸತಿ (ಸೀ. ಪೀ.)];
ಓಕ್ಕಾಕಪುತ್ತೋ ಭದ್ದನ್ತೇ, ತ್ವಂ ನು ದಾಸೋತಿ ಮಞ್ಞಸಿ’’.
‘‘ತಗ್ಘ ¶ ತೇ ದುಕ್ಕಟಂ ಬಾಲೇ, ಯಂ ಖತ್ತಿಯಂ ಮಹಬ್ಬಲಂ;
ನಾಗಂ ಮಣ್ಡೂಕವಣ್ಣೇನ, ನ ನಂ [ನ ತಂ (ಸೀ. ಪೀ.)] ಅಕ್ಖಾಸಿಧಾಗತಂ’’ [ಅಕ್ಖಾಸಿ ಆಗತಂ (ಸೀ.)].
‘‘ಅಪರಾಧಂ ಮಹಾರಾಜ, ತ್ವಂ ನೋ ಖಮ ರಥೇಸಭ;
ಯಂ ತಂ ಅಞ್ಞಾತವೇಸೇನ, ನಾಞ್ಞಾಸಿಮ್ಹಾ ಇಧಾಗತಂ’’.
‘‘ಮಾದಿಸಸ್ಸ ನ ತಂ ಛನ್ನಂ, ಯೋಹಂ ಆಳಾರಿಕೋ ಭವೇ;
ತ್ವಞ್ಞೇವ ಮೇ ಪಸೀದಸ್ಸು, ನತ್ಥಿ ತೇ ದೇವ ದುಕ್ಕಟಂ’’.
‘‘ಗಚ್ಛ ಬಾಲೇ ಖಮಾಪೇಹಿ, ಕುಸರಾಜಂ ಮಹಬ್ಬಲಂ;
ಖಮಾಪಿತೋ ಕುಸೋ ರಾಜಾ [ಕುಸರಾಜಾ (ಸಬ್ಬತ್ಥ)], ಸೋ ತೇ ದಸ್ಸತಿ ಜೀವಿತಂ’’.
‘‘ಪಿತುಸ್ಸ ವಚನಂ ಸುತ್ವಾ, ದೇವವಣ್ಣೀ ಪಭಾವತೀ;
ಸಿರಸಾ ಅಗ್ಗಹೀ ಪಾದೇ, ಕುಸರಾಜಂ ಮಹಬ್ಬಲಂ’’.
‘‘ಯಾಮಾ ¶ ರತ್ಯೋ ಅತಿಕ್ಕನ್ತಾ, ತಾಮಾ ದೇವ ತಯಾ ವಿನಾ;
ವನ್ದೇ ತೇ ಸಿರಸಾ ಪಾದೇ, ಮಾ ಮೇ ಕುಜ್ಝಂ ರಥೇಸಭ.
‘‘ಸಬ್ಬಂ ¶ [ಸಚ್ಚಂ (ಸೀ. ಸ್ಯಾ. ಪೀ.)] ತೇ ಪಟಿಜಾನಾಮಿ, ಮಹಾರಾಜ ಸುಣೋಹಿ ಮೇ;
ನ ಚಾಪಿ ಅಪ್ಪಿಯಂ ತುಯ್ಹಂ, ಕರೇಯ್ಯಾಮಿ ಅಹಂ ಪುನ.
‘‘ಏವಂ ಚೇ ಯಾಚಮಾನಾಯ, ವಚನಂ ಮೇ ನ ಕಾಹಸಿ;
ಇದಾನಿ ಮಂ ತಾತೋ ಹನ್ತ್ವಾ, ಖತ್ತಿಯಾನಂ ಪದಸ್ಸತಿ’’.
‘‘ಏವಂ ತೇ ಯಾಚಮಾನಾಯ, ಕಿಂ ನ ಕಾಹಾಮಿ ತೇ ವಚೋ;
ವಿಕುದ್ಧೋ ತ್ಯಸ್ಮಿ ಕಲ್ಯಾಣಿ, ಮಾ ತ್ವಂ ಭಾಯಿ ಪಭಾವತಿ.
‘‘ಸಬ್ಬಂ ತೇ ಪಟಿಜಾನಾಮಿ, ರಾಜಪುತ್ತಿ ಸುಣೋಹಿ ಮೇ;
ನ ಚಾಪಿ ಅಪ್ಪಿಯಂ ತುಯ್ಹಂ, ಕರೇಯ್ಯಾಮಿ ಅಹಂ ಪುನ.
‘‘ತವ ಕಾಮಾ ಹಿ ಸುಸ್ಸೋಣಿ, ಪಹು [ಬಹು (ಸ್ಯಾ.), ಬಹೂ (ಪೀ.), ಬಹುಂ (ಕ.)] ದುಕ್ಖಂ ತಿತಿಕ್ಖಿಸಂ [ತಿತಿಕ್ಖಿಸ್ಸಂ (ಸೀ. ಪೀ.)];
ಬಹುಂ ಮದ್ದಕುಲಂ ಹನ್ತ್ವಾ, ನಯಿತುಂ ತಂ ಪಭಾವತಿ’’.
‘‘ಯೋಜಯನ್ತು ರಥೇ ಅಸ್ಸೇ, ನಾನಾಚಿತ್ತೇ ಸಮಾಹಿತೇ;
ಅಥ ದಕ್ಖಥ ಮೇ ವೇಗಂ, ವಿಧಮನ್ತಸ್ಸ [ವಿಧಮೇನ್ತಸ್ಸ (ಸಬ್ಬತ್ಥ)] ಸತ್ತವೋ’’.
‘‘ತಞ್ಚ ತತ್ಥ ಉದಿಕ್ಖಿಂಸು, ರಞ್ಞೋ ಮದ್ದಸ್ಸನ್ತೇಪುರೇ;
ವಿಜಮ್ಭಮಾನಂ ಸೀಹಂವ, ಫೋಟೇನ್ತಂ ದಿಗುಣಂ ಭುಜಂ.
‘‘ಹತ್ಥಿಕ್ಖನ್ಧಞ್ಚ ¶ ಆರುಯ್ಹ, ಆರೋಪೇತ್ವಾ ಪಭಾವತಿಂ;
ಸಙ್ಗಾಮಂ ಓತರಿತ್ವಾನ, ಸೀಹನಾದಂ ನದೀ ಕುಸೋ.
‘‘ತಸ್ಸ ತಂ ನದತೋ ಸುತ್ವಾ, ಸೀಹಸ್ಸೇವಿತರೇ ಮಿಗಾ;
ಖತ್ತಿಯಾ ¶ ವಿಪಲಾಯಿಂಸು, ಕುಸಸದ್ದಭಯಟ್ಟಿತಾ [ಕುಸಸದ್ದಭಯಟ್ಠಿತಾ (ಪೀ.)].
‘‘ಹತ್ಥಾರೋಹಾ ಅನೀಕಟ್ಠಾ, ರಥಿಕಾ ಪತ್ತಿಕಾರಕಾ;
ಅಞ್ಞಮಞ್ಞಸ್ಸ ಛಿನ್ದನ್ತಿ, ಕುಸಸದ್ದಭಯಟ್ಟಿತಾ.
‘‘ತಸ್ಮಿಂ ಸಙ್ಗಾಮಸೀಸಸ್ಮಿಂ, ಪಸ್ಸಿತ್ವಾ ಹಟ್ಠ [ತುಟ್ಠ (ಸೀ.)] ಮಾನಸೋ;
ಕುಸಸ್ಸ ರಞ್ಞೋ ದೇವಿನ್ದೋ, ಅದಾ ವೇರೋಚನಂ ಮಣಿಂ.
‘‘ಸೋ ತಂ ವಿಜಿತ್ವಾ ಸಙ್ಗಾಮಂ, ಲದ್ಧಾ ವೇರೋಚನಂ ಮಣಿಂ;
ಹತ್ಥಿಕ್ಖನ್ಧಗತೋ ರಾಜಾ, ಪಾವೇಕ್ಖಿ ನಗರಂ ಪುರಂ.
‘‘ಜೀವಗ್ಗಾಹಂ [ಜೀವಗಾಹಂ (ಸೀ. ಪೀ.)] ಗಹೇತ್ವಾನ, ಬನ್ಧಿತ್ವಾ ಸತ್ತ ಖತ್ತಿಯೇ;
ಸಸುರಸ್ಸುಪನಾಮೇಸಿ, ಇಮೇ ತೇ ದೇವ ಸತ್ತವೋ.
‘‘ಸಬ್ಬೇವ ತೇ ವಸಂ ಗತಾ, ಅಮಿತ್ತಾ ವಿಹತಾ ತವ;
ಕಾಮಂ ಕರೋಹಿ ತೇ ತಯಾ, ಮುಞ್ಚ ವಾ ತೇ ಹನಸ್ಸು ವಾ’’.
‘‘ತುಯ್ಹೇವ ಸತ್ತವೋ ಏತೇ, ನ ಹಿ ತೇ ಮಯ್ಹ ಸತ್ತವೋ;
ತ್ವಞ್ಞೇವ ನೋ ಮಹಾರಾಜ, ಮುಞ್ಚ ವಾ ತೇ ಹನಸ್ಸು ವಾ’’.
‘‘ಇಮಾ ¶ ತೇ ಧೀತರೋ ಸತ್ತ, ದೇವಕಞ್ಞೂಪಮಾ ಸುಭಾ;
ದದಾಹಿ ನೇಸಂ ಏಕೇಕಂ, ಹೋನ್ತು ಜಾಮಾತರೋ ತವ’’.
‘‘ಅಮ್ಹಾಕಞ್ಚೇವ ತಾಸಞ್ಚ, ತ್ವಂ ನೋ ಸಬ್ಬೇಸಮಿಸ್ಸರೋ;
ತ್ವಞ್ಞೇವ ನೋ ಮಹಾರಾಜ, ದೇಹಿ ನೇಸಂ ಯದಿಚ್ಛಸಿ’’.
‘‘ಏಕಮೇಕಸ್ಸ ಏಕೇಕಂ, ಅದಾ ಸೀಹಸ್ಸರೋ ಕುಸೋ;
ಖತ್ತಿಯಾನಂ ತದಾ ತೇಸಂ, ರಞ್ಞೋ ಮದ್ದಸ್ಸ ಧೀತರೋ.
‘‘ಪೀಣಿತಾ ತೇನ ಲಾಭೇನ, ತುಟ್ಠಾ ಸೀಹಸ್ಸರೇ ಕುಸೇ;
ಸಕರಟ್ಠಾನಿ ¶ ಪಾಯಿಂಸು, ಖತ್ತಿಯಾ ಸತ್ತ ತಾವದೇ.
‘‘ಪಭಾವತಿಞ್ಚ ಆದಾಯ, ಮಣಿಂ ವೇರೋಚನಂ ಸುಭಂ [ತದಾ (ಪೀ.)];
ಕುಸಾವತಿಂ ಕುಸೋ ರಾಜಾ, ಅಗಮಾಸಿ ಮಹಬ್ಬಲೋ.
‘‘ತ್ಯಸ್ಸು ¶ ಏಕರಥೇ ಯನ್ತಾ, ಪವಿಸನ್ತಾ ಕುಸಾವತಿಂ;
ಸಮಾನಾ ವಣ್ಣರೂಪೇನ, ನಾಞ್ಞಮಞ್ಞಾತಿರೋಚಿಸುಂ [ನಾಞ್ಞಮಞ್ಞಮತಿರೋಚಯುಂ (ಸೀ.)].
‘‘ಮಾತಾ ಪುತ್ತೇನ ಸಙ್ಗಚ್ಛಿ [ಸಙ್ಗಞ್ಛಿ (ಸೀ. ಸ್ಯಾ. ಪೀ.)], ಉಭಯೋ ಚ ಜಯಮ್ಪತೀ;
ಸಮಗ್ಗಾ ತೇ ತದಾ ಆಸುಂ, ಫೀತಂ ಧರಣಿಮಾವಸು’’ನ್ತಿ.
ಕುಸಜಾತಕಂ ಪಠಮಂ.
೫೩೨. ಸೋಣನನ್ದಜಾತಕಂ (೨)
‘‘ದೇವತಾ ನುಸಿ ಗನ್ಧಬ್ಬೋ, ಅದು [ಆದು (ಸೀ. ಸ್ಯಾ.)] ಸಕ್ಕೋ ಪುರಿನ್ದದೋ;
ಮನುಸ್ಸಭೂತೋ ಇದ್ಧಿಮಾ, ಕಥಂ ಜಾನೇಮು ತಂ ಮಯಂ’’.
‘‘ನಾಪಿ ದೇವೋ ನ ಗನ್ಧಬ್ಬೋ, ನಾಪಿ ಸಕ್ಕೋ ಪುರಿನ್ದದೋ;
ಮನುಸ್ಸಭೂತೋ ಇದ್ಧಿಮಾ, ಏವಂ ಜಾನಾಹಿ ಭಾರಧ’’ [ಭಾರಭ (ಕ.)].
‘‘ಕತರೂಪಮಿದಂ ಭೋತೋ [ಭೋತೋ (ಸೀ. ಪೀ.)], ವೇಯ್ಯಾವಚ್ಚಂ ಅನಪ್ಪಕಂ;
ದೇವಮ್ಹಿ ವಸ್ಸಮಾನಮ್ಹಿ, ಅನೋವಸ್ಸಂ ಭವಂ ಅಕಾ.
‘‘ತತೋ ವಾತಾತಪೇ ಘೋರೇ, ಸೀತಚ್ಛಾಯಂ ಭವಂ ಅಕಾ;
ತತೋ ಅಮಿತ್ತಮಜ್ಝೇಸು [ಅಮಿತ್ತಮಜ್ಝೇ ಚ (ಸೀ.)], ಸರತಾಣಂ ಭವಂ ಅಕಾ.
‘‘ತತೋ ಫೀತಾನಿ ರಟ್ಠಾನಿ, ವಸಿನೋ ತೇ ಭವಂ ಅಕಾ;
ತತೋ ಏಕಸತಂ ಖತ್ಯೇ, ಅನುಯನ್ತೇ [ಅನುಯುತ್ತೇ (ಪೀ.)] ಭವಂ ಅಕಾ.
‘‘ಪತೀತಾಸ್ಸು ¶ ¶ ಮಯಂ ಭೋತೋ, ವದ ತಂ [ವರ ತಂ (ಸೀ. ಸ್ಯಾ. ಪೀ.)] ಭಞ್ಜ [ಭಞ್ಞ (ಸೀ. ಪೀ.), ಭುಞ್ಜ (ಸ್ಯಾ. ಕ.)] ಮಿಚ್ಛಸಿ;
ಹತ್ಥಿಯಾನಂ ಅಸ್ಸರಥಂ, ನಾರಿಯೋ ಚ ಅಲಙ್ಕತಾ;
ನಿವೇಸನಾನಿ ರಮ್ಮಾನಿ, ಮಯಂ ಭೋತೋ ದದಾಮಸೇ.
‘‘ಅಥ ವಙ್ಗೇ [ಅಥ ವಾ ಸಙ್ಗೇ (ಸೀ. ಪೀ.)] ವಾ ಮಗಧೇ, ಮಯಂ ಭೋತೋ ದದಾಮಸೇ;
ಅಥ ವಾ ಅಸ್ಸಕಾವನ್ತೀ [ಅಸ್ಸಕಾವನ್ತಿಂ (ಸೀ. ಸ್ಯಾ. ಪೀ.)], ಸುಮನಾ ದಮ್ಮ ತೇ ಮಯಂ.
‘‘ಉಪಡ್ಢಂ ವಾಪಿ ರಜ್ಜಸ್ಸ, ಮಯಂ ಭೋತೋ ದದಾಮಸೇ;
ಸಚೇ ತೇ ಅತ್ಥೋ ರಜ್ಜೇನ, ಅನುಸಾಸ ಯದಿಚ್ಛಸಿ’’.
‘‘ನ ¶ ಮೇ ಅತ್ಥೋಪಿ ರಜ್ಜೇನ, ನಗರೇನ ಧನೇನ ವಾ;
ಅಥೋಪಿ ಜನಪದೇನ, ಅತ್ಥೋ ಮಯ್ಹಂ ನ ವಿಜ್ಜತಿ.
‘‘ಭೋತೋವ ರಟ್ಠೇ ವಿಜಿತೇ, ಅರಞ್ಞೇ ಅತ್ಥಿ ಅಸ್ಸಮೋ;
ಪಿತಾ ಮಯ್ಹಂ ಜನೇತ್ತೀ ಚ, ಉಭೋ ಸಮ್ಮನ್ತಿ ಅಸ್ಸಮೇ.
‘‘ತೇಸಾಹಂ [ತೇಸ್ವಹಂ (ಕ.)] ಪುಬ್ಬಾಚರಿಯೇಸು, ಪುಞ್ಞಂ ನ ಲಭಾಮಿ ಕಾತವೇ;
ಭವನ್ತಂ ಅಜ್ಝಾವರಂ ಕತ್ವಾ, ಸೋಣಂ [ಸೋನಂ (ಪೀ.)] ಯಾಚೇಮು ಸಂವರಂ’’.
‘‘ಕರೋಮಿ ತೇ ತಂ ವಚನಂ, ಯಂ ಮಂ ಭಣಸಿ ಬ್ರಾಹ್ಮಣ;
ಏತಞ್ಚ ಖೋ ನೋ ಅಕ್ಖಾಹಿ, ಕೀವನ್ತೋ ಹೋನ್ತು ಯಾಚಕಾ’’.
‘‘ಪರೋಸತಂ ಜಾನಪದಾ, ಮಹಾಸಾಲಾ ಚ ಬ್ರಾಹ್ಮಣಾ;
ಇಮೇ ಚ ಖತ್ತಿಯಾ ಸಬ್ಬೇ, ಅಭಿಜಾತಾ ಯಸಸ್ಸಿನೋ;
ಭವಞ್ಚ ರಾಜಾ ಮನೋಜೋ, ಅಲಂ ಹೇಸ್ಸನ್ತಿ ಯಾಚಕಾ’’.
‘‘ಹತ್ಥೀ ಅಸ್ಸೇ ಚ ಯೋಜೇನ್ತು, ರಥಂ ಸನ್ನಯ್ಹ ಸಾರಥಿ [ನಂ ರಥಿ (ಪೀ.)];
ಆಬನ್ಧನಾನಿ ಗಣ್ಹಾಥ, ಪಾದಾಸುಸ್ಸಾರಯದ್ಧಜೇ [ಪಾದೇಸುಸ್ಸಾರಯಂ ಧಜೇ (ಸೀ.), ಪಾದಾಸುಸ್ಸಾರಯಂ ಧಜೇ (ಪೀ.)];
ಅಸ್ಸಮಂ ¶ ತಂ ಗಮಿಸ್ಸಾಮಿ, ಯತ್ಥ ಸಮ್ಮತಿ ಕೋಸಿಯೋ’’.
‘‘ತತೋ ಚ ರಾಜಾ ಪಾಯಾಸಿ, ಸೇನಾಯ ಚತುರಙ್ಗಿನೀ;
ಅಗಮಾ ಅಸ್ಸಮಂ ರಮ್ಮಂ, ಯತ್ಥ ಸಮ್ಮತಿ ಕೋಸಿಯೋ’’.
‘‘ಕಸ್ಸ ಕಾದಮ್ಬಯೋ [ಕಸ್ಸ ಕಾದಮ್ಬಮಯೋ (ಕ.)] ಕಾಜೋ, ವೇಹಾಸಂ ಚತುರಙ್ಗುಲಂ;
ಅಂಸಂ ಅಸಮ್ಫುಸಂ ಏತಿ, ಉದಹಾರಾಯ [ಉದಹಾರಸ್ಸ (ಸೀ. ಸ್ಯಾ. ಪೀ.)] ಗಚ್ಛತೋ’’.
‘‘ಅಹಂ ಸೋಣೋ ಮಹಾರಾಜ, ತಾಪಸೋ ಸಹಿತಬ್ಬತೋ [ಸಹಿತಂ ವತೋ (ಪೀ.)];
ಭರಾಮಿ ಮಾತಾಪಿತರೋ, ರತ್ತಿನ್ದಿವಮತನ್ದಿತೋ.
‘‘ವನೇ ಫಲಞ್ಚ ಮೂಲಞ್ಚ, ಆಹರಿತ್ವಾ ದಿಸಮ್ಪತಿ;
ಪೋಸೇಮಿ ಮಾತಾಪಿತರೋ, ಪುಬ್ಬೇ ಕತಮನುಸ್ಸರಂ’’.
‘‘ಇಚ್ಛಾಮ ¶ ಅಸ್ಸಮಂ ಗನ್ತುಂ, ಯತ್ಥ ಸಮ್ಮತಿ ಕೋಸಿಯೋ;
ಮಗ್ಗಂ ನೋ ಸೋಣ ಅಕ್ಖಾಹಿ, ಯೇನ ಗಚ್ಛೇಮು [ಗಚ್ಛಾಮ (ಸೀ.)] ಅಸ್ಸಮಂ’’.
‘‘ಅಯಂ ¶ ಏಕಪದೀ ರಾಜ, ಯೇನೇತಂ [ಯೇನ ತಂ (ಕ.)] ಮೇಘಸನ್ನಿಭಂ;
ಕೋವಿಳಾರೇಹಿ ಸಞ್ಛನ್ನಂ, ಏತ್ಥ ಸಮ್ಮತಿ ಕೋಸಿಯೋ’’.
‘‘ಇದಂ ವತ್ವಾನ ಪಕ್ಕಾಮಿ, ತರಮಾನೋ ಮಹಾಇಸಿ;
ವೇಹಾಸೇ ಅನ್ತಲಿಕ್ಖಸ್ಮಿಂ, ಅನುಸಾಸಿತ್ವಾನ ಖತ್ತಿಯೇ.
‘‘ಅಸ್ಸಮಂ ಪರಿಮಜ್ಜಿತ್ವಾ, ಪಞ್ಞಪೇತ್ವಾನ [ಪಞ್ಞಪೇತ್ವಾನ (ಸೀ. ಸ್ಯಾ.)] ಆಸನಂ;
ಪಣ್ಣಸಾಲಂ ಪವಿಸಿತ್ವಾ, ಪಿತರಂ ಪಟಿಬೋಧಯಿ.
‘‘ಇಮೇ ಆಯನ್ತಿ ರಾಜಾನೋ, ಅಭಿಜಾತಾ ಯಸಸ್ಸಿನೋ;
ಅಸ್ಸಮಾ ನಿಕ್ಖಮಿತ್ವಾನ, ನಿಸೀದ ತ್ವಂ [ನಿಸೀದಾಹಿ (ಸೀ.)] ಮಹಾಇಸೇ.
‘‘ತಸ್ಸ ತಂ ವಚನಂ ಸುತ್ವಾ, ತರಮಾನೋ ಮಹಾಇಸಿ;
ಅಸ್ಸಮಾ ¶ ನಿಕ್ಖಮಿತ್ವಾನ, ಸದ್ವಾರಮ್ಹಿ ಉಪಾವಿಸಿ’’.
‘‘ತಞ್ಚ ದಿಸ್ವಾನ ಆಯನ್ತಂ, ಜಲನ್ತಂರಿವ ತೇಜಸಾ;
ಖತ್ಯಸಙ್ಘಪರಿಬ್ಯೂಳ್ಹಂ, ಕೋಸಿಯೋ ಏತದಬ್ರವಿ.
‘‘ಕಸ್ಸ ಭೇರೀ ಮುದಿಙ್ಗಾ ಚ [ಮುತಿಙ್ಗಾ ಚ (ಪೀ.)], ಸಙ್ಖಾ ಪಣವದಿನ್ದಿಮಾ [ದೇಣ್ಡಿಮಾ (ಸೀ. ಪೀ.)];
ಪುರತೋ ಪಟಿಪನ್ನಾನಿ, ಹಾಸಯನ್ತಾ ರಥೇಸಭಂ.
‘‘ಕಸ್ಸ ಕಞ್ಚನಪಟ್ಟೇನ, ಪುಥುನಾ ವಿಜ್ಜುವಣ್ಣಿನಾ;
ಯುವಾ ಕಲಾಪಸನ್ನದ್ಧೋ, ಕೋ ಏತಿ ಸಿರಿಯಾ ಜಲಂ.
‘‘ಉಕ್ಕಾಮುಖಪಹಟ್ಠಂವ, ಖದಿರಙ್ಗಾರಸನ್ನಿಭಂ;
ಮುಖಞ್ಚ ರುಚಿರಾ ಭಾತಿ, ಕೋ ಏತಿ ಸಿರಿಯಾ ಜಲಂ.
‘‘ಕಸ್ಸ ಪಗ್ಗಹಿತಂ ಛತ್ತಂ, ಸಸಲಾಕಂ ಮನೋರಮಂ;
ಆದಿಚ್ಚರಂಸಾವರಣಂ, ಕೋ ಏತಿ ಸಿರಿಯಾ ಜಲಂ.
‘‘ಕಸ್ಸ ಅಙ್ಗಂ ಪರಿಗ್ಗಯ್ಹ, ವಾಳಬೀಜನಿಮುತ್ತಮಂ;
ಚರನ್ತಿ ವರಪುಞ್ಞಸ್ಸ [ವರಪಞ್ಞಸ್ಸ (ಸೀ. ಪೀ.)], ಹತ್ಥಿಕ್ಖನ್ಧೇನ ಆಯತೋ.
‘‘ಕಸ್ಸ ಸೇತಾನಿ ಛತ್ತಾನಿ, ಆಜಾನೀಯಾ ಚ ವಮ್ಮಿತಾ;
ಸಮನ್ತಾ ಪರಿಕಿರೇನ್ತಿ [ಪರಿಕಿರನ್ತಿ (ಸೀ. ಸ್ಯಾ. ಪೀ.)], ಕೋ ಏತಿ ಸಿರಿಯಾ ಜಲಂ.
‘‘ಕಸ್ಸ ¶ ಏಕಸತಂ ಖತ್ಯಾ, ಅನುಯನ್ತಾ [ಅನುಯುತ್ತಾ (ಪೀ.)] ಯಸಸ್ಸಿನೋ;
ಸಮನ್ತಾನುಪರಿಯನ್ತಿ, ಕೋ ಏತಿ ಸಿರಿಯಾ ಜಲಂ.
‘‘ಹತ್ಥಿ ಅಸ್ಸರಥ ಪತ್ತಿ [ಹತ್ಥೀ ಅಸ್ಸಾ ರಥಾ ಪತ್ತೀ (ಸೀ.)], ಸೇನಾ ಚ ಚತುರಙ್ಗಿನೀ;
ಸಮನ್ತಾನುಪರಿಯನ್ತಿ [ಸಮನ್ತಾ ಅನುಪರಿಯಾತಿ (ಪೀ.)], ಕೋ ಏತಿ ಸಿರಿಯಾ ಜಲಂ.
‘‘ಕಸ್ಸೇಸಾ ¶ ಮಹತೀ ಸೇನಾ, ಪಿಟ್ಠಿತೋ ಅನುವತ್ತತಿ;
ಅಕ್ಖೋಭಣೀ ¶ [ಅಕ್ಖಾಭನೀ (ಸೀ.), ಅಕ್ಖೋಭಿನೀ (ಸ್ಯಾ.)] ಅಪರಿಯನ್ತಾ, ಸಾಗರಸ್ಸೇವ ಊಮಿಯೋ’’.
‘‘ರಾಜಾಭಿರಾಜಾ [ರಾಜಾಧಿರಾಜಾ (ಕ.)] ಮನೋಜೋ, ಇನ್ದೋವ ಜಯತಂ ಪತಿ;
ನನ್ದಸ್ಸಜ್ಝಾವರಂ ಏತಿ, ಅಸ್ಸಮಂ ಬ್ರಹ್ಮಚಾರಿನಂ.
‘‘ತಸ್ಸೇಸಾ ಮಹತೀ ಸೇನಾ, ಪಿಟ್ಠಿತೋ ಅನುವತ್ತತಿ;
ಅಕ್ಖೋಭಣೀ ಅಪರಿಯನ್ತಾ, ಸಾಗರಸ್ಸೇವ ಊಮಿಯೋ’’.
‘‘ಅನುಲಿತ್ತಾ ಚನ್ದನೇನ, ಕಾಸಿಕುತ್ತಮಧಾರಿನೋ [ಕಾಸಿಕವತ್ಥಧಾರಿನೋ (ಪೀ.)];
ಸಬ್ಬೇ ಪಞ್ಜಲಿಕಾ ಹುತ್ವಾ, ಇಸೀನಂ ಅಜ್ಝುಪಾಗಮುಂ’’.
‘‘ಕಚ್ಚಿ ನು ಭೋತೋ ಕುಸಲಂ, ಕಚ್ಚಿ ಭೋತೋ ಅನಾಮಯಂ;
ಕಚ್ಚಿ ಉಞ್ಛೇನ ಯಾಪೇಥ, ಕಚ್ಚಿ ಮೂಲಫಲಾ ಬಹೂ.
‘‘ಕಚ್ಚಿ ಡಂಸಾ ಮಕಸಾ ಚ, ಅಪ್ಪಮೇವ ಸರೀಸಪಾ [ಸಿರಿಂಸಪಾ (ಸೀ. ಸ್ಯಾ. ಪೀ.)];
ವನೇ ವಾಳಮಿಗಾಕಿಣ್ಣೇ, ಕಚ್ಚಿ ಹಿಂಸಾ ನ ವಿಜ್ಜತಿ’’.
‘‘ಕುಸಲಞ್ಚೇವ ನೋ ರಾಜ, ಅಥೋ ರಾಜ ಅನಾಮಯಂ;
ಅಥೋ ಉಞ್ಛೇನ ಯಾಪೇಮ, ಅಥೋ ಮೂಲಫಲಾ ಬಹೂ.
‘‘ಅಥೋ ಡಂಸಾ ಮಕಸಾ ಚ [ಡಂಸಾ ಚ ಮಕಸಾ (ಸೀ.), ಡಂಸಾ ಚ ಮಕಸಾ ಚ (ಪೀ.)], ಅಪ್ಪಮೇವ ಸರೀಸಪಾ [ಸಿರಿಂಸಪಾ (ಸೀ. ಸ್ಯಾ. ಪೀ.)];
ವನೇ ವಾಳಮಿಗಾಕಿಣ್ಣೇ, ಹಿಂಸಾ ಮಯ್ಹಂ [ಅ ಮ್ಹಂ (ಸೀ. ಪೀ.)] ನ ವಿಜ್ಜತಿ.
‘‘ಬಹೂನಿ ವಸ್ಸಪೂಗಾನಿ, ಅಸ್ಸಮೇ ಸಮ್ಮತಂ [ವಸತೋ (ಸೀ.)] ಇಧ;
ನಾಭಿಜಾನಾಮಿ ಉಪ್ಪನ್ನಂ, ಆಬಾಧಂ ಅಮನೋರಮಂ.
‘‘ಸ್ವಾಗತಂ ತೇ ಮಹಾರಾಜ, ಅಥೋ ತೇ ಅದುರಾಗತಂ;
ಇಸ್ಸರೋಸಿ ಅನುಪ್ಪತ್ತೋ, ಯಂ ಇಧತ್ಥಿ ಪವೇದಯ.
‘‘ತಿನ್ದುಕಾನಿ ¶ ಪಿಯಾಲಾನಿ, ಮಧುಕೇ ಕಾಸುಮಾರಿಯೋ [ಕಾಸಮಾರಿಯೋ (ಸೀ. ಸ್ಯಾ.)];
ಫಲಾನಿ ¶ ಖುದ್ದಕಪ್ಪಾನಿ, ಭುಞ್ಜ ರಾಜ ವರಂ ವರಂ.
‘‘ಇದಮ್ಪಿ ಪಾನೀಯಂ ಸೀತಂ, ಆಭತಂ ಗಿರಿಗಬ್ಭರಾ;
ತತೋ ಪಿವ ಮಹಾರಾಜ, ಸಚೇ ತ್ವಂ ಅಭಿಕಙ್ಖಸಿ’’.
‘‘ಪಟಿಗ್ಗಹಿತಂ ಯಂ ದಿನ್ನಂ, ಸಬ್ಬಸ್ಸ ಅಗ್ಘಿಯಂ ಕತಂ;
ನನ್ದಸ್ಸಾಪಿ ನಿಸಾಮೇಥ, ವಚನಂ ಸೋ [ಯಂ (ಸೀ.), ಯಂ ಸೋ (ಪೀ.)] ಪವಕ್ಖತಿ.
‘‘ಅಜ್ಝಾವರಮ್ಹಾ ನನ್ದಸ್ಸ, ಭೋತೋ ಸನ್ತಿಕಮಾಗತಾ;
ಸುಣಾತು [ಸುಣಾತು ಮೇ (ಸೀ. ಸ್ಯಾ.)] ಭವಂ ವಚನಂ, ನನ್ದಸ್ಸ ಪರಿಸಾಯ ಚ’’.
‘‘ಪರೋಸತಂ ¶ ಜಾನಪದಾ [ಜನಪದಾ (ಪೀ.)], ಮಹಾಸಾಲಾ ಚ ಬ್ರಾಹ್ಮಣಾ;
ಇಮೇ ಚ ಖತ್ತಿಯಾ ಸಬ್ಬೇ, ಅಭಿಜಾತಾ ಯಸಸ್ಸಿನೋ;
ಭವಞ್ಚ ರಾಜಾ ಮನೋಜೋ, ಅನುಮಞ್ಞನ್ತು ಮೇ ವಚೋ.
‘‘ಯೇ ಚ ಸನ್ತಿ [ಯೇ ವಸನ್ತಿ (ಸೀ.), ಯೇ ಹಿ ಸನ್ತಿ (ಪೀ.)] ಸಮೀತಾರೋ, ಯಕ್ಖಾನಿ ಇಧ ಮಸ್ಸಮೇ;
ಅರಞ್ಞೇ ಭೂತಭಬ್ಯಾನಿ, ಸುಣನ್ತು ವಚನಂ ಮಮ.
‘‘ನಮೋ ಕತ್ವಾನ ಭೂತಾನಂ, ಇಸಿಂ ವಕ್ಖಾಮಿ ಸುಬ್ಬತಂ;
ಸೋ ತ್ಯಾಹಂ ದಕ್ಖಿಣಾ ಬಾಹು, ತವ ಕೋಸಿಯ ಸಮ್ಮತೋ.
‘‘ಪಿತರಂ ಮೇ ಜನೇತ್ತಿಞ್ಚ, ಭತ್ತುಕಾಮಸ್ಸ ಮೇ ಸತೋ;
ವೀರ ಪುಞ್ಞಮಿದಂ ಠಾನಂ, ಮಾ ಮಂ ಕೋಸಿಯ ವಾರಯ.
‘‘ಸಬ್ಭಿ ಹೇತಂ ಉಪಞ್ಞಾತಂ, ಮಮೇತಂ ಉಪನಿಸ್ಸಜ;
ಉಟ್ಠಾನಪಾರಿಚರಿಯಾಯ, ದೀಘರತ್ತಂ ತಯಾ ಕತಂ;
ಮಾತಾಪಿತೂಸು ಪುಞ್ಞಾನಿ, ಮಮ ಲೋಕದದೋ ಭವ.
‘‘ತಥೇವ ಸನ್ತಿ ಮನುಜಾ, ಧಮ್ಮೇ ಧಮ್ಮಪದಂ ವಿದೂ;
ಮಗ್ಗೋ ¶ ಸಗ್ಗಸ್ಸ ಲೋಕಸ್ಸ, ಯಥಾ ಜಾನಾಸಿ ತ್ವಂ ಇಸೇ.
‘‘ಉಟ್ಠಾನಪಾರಿಚರಿಯಾಯ, ಮಾತಾಪಿತುಸುಖಾವಹಂ;
ತಂ ಮಂ ಪುಞ್ಞಾ ನಿವಾರೇತಿ, ಅರಿಯಮಗ್ಗಾವರೋ ನರೋ’’.
‘‘ಸುಣನ್ತು ¶ ಭೋನ್ತೋ ವಚನಂ, ಭಾತುರಜ್ಝಾವರಾ ಮಮ;
ಕುಲವಂಸಂ ಮಹಾರಾಜ, ಪೋರಾಣಂ ಪರಿಹಾಪಯಂ;
ಅಧಮ್ಮಚಾರೀ ಜೇಟ್ಠೇಸು [ಯೋ ಜೇಟ್ಠೋ (ಸೀ.)], ನಿರಯಂ ಸೋಪಪಜ್ಜತಿ [ಸೋ ಉಪಪಜ್ಜತಿ (ಸೀ. ಸ್ಯಾ. ಪೀ.)].
‘‘ಯೇ ಚ ಧಮ್ಮಸ್ಸ ಕುಸಲಾ, ಪೋರಾಣಸ್ಸ ದಿಸಮ್ಪತಿ;
ಚಾರಿತ್ತೇನ ಚ ಸಮ್ಪನ್ನಾ, ನ ತೇ ಗಚ್ಛನ್ತಿ ದುಗ್ಗತಿಂ.
‘‘ಮಾತಾಪಿತಾ ಚ ಭಾತಾ ಚ, ಭಗಿನೀ ಞಾತಿಬನ್ಧವಾ;
ಸಬ್ಬೇ ಜೇಟ್ಠಸ್ಸ ತೇ ಭಾರಾ, ಏವಂ ಜಾನಾಹಿ ಭಾರಧ [ಭಾರಥ (ಸ್ಯಾ.)].
‘‘ಆದಿಯಿತ್ವಾ ಗರುಂ ಭಾರಂ, ನಾವಿಕೋ ವಿಯ ಉಸ್ಸಹೇ;
ಧಮ್ಮಞ್ಚ ನಪ್ಪಮಜ್ಜಾಮಿ, ಜೇಟ್ಠೋ ಚಸ್ಮಿ ರಥೇಸಭ’’.
‘‘ಅಧಿಗಮಾ [ಅಧಿಗತಮ್ಹಾ (ಸೀ.), ಅಧಿಗಮ್ಹಾ (ಸ್ಯಾ.), ಅಧಿಗತಮ್ಹ (ಪೀ.)] ತಮೇ ಞಾಣಂ, ಜಾಲಂವ ಜಾತವೇದತೋ;
ಏವಮೇವ ನೋ ಭವಂ ಧಮ್ಮಂ, ಕೋಸಿಯೋ ಪವಿದಂಸಯಿ.
‘‘ಯಥಾ ಉದಯಮಾದಿಚ್ಚೋ, ವಾಸುದೇವೋ ಪಭಙ್ಕರೋ;
ಪಾಣೀನಂ ಪವಿದಂಸೇತಿ, ರೂಪಂ ಕಲ್ಯಾಣಪಾಪಕಂ;
ಏವಮೇವ ನೋ ಭವಂ ಧಮ್ಮಂ, ಕೋಸಿಯೋ ಪವಿದಂಸಯಿ’’.
‘‘ಏವಂ ¶ ಮೇ ಯಾಚಮಾನಸ್ಸ, ಅಞ್ಜಲಿಂ ನಾವಬುಜ್ಝಥ;
ತವ ಪದ್ಧಚರೋ [ತವ ಪಟ್ಠಚರೋ (ಸ್ಯಾ.), ತವ ಬದ್ಧಞ್ಚರೋ (ಪೀ.), ತವುಪಟ್ಠಚರೋ (ಕ.)] ಹೇಸ್ಸಂ, ವುಟ್ಠಿತೋ ಪರಿಚಾರಕೋ’’.
‘‘ಅದ್ಧಾ ನನ್ದ ವಿಜಾನಾಸಿ [ಪಜಾನಾಸಿ (ಸೀ.)], ಸದ್ಧಮ್ಮಂ ಸಬ್ಭಿ ದೇಸಿತಂ;
ಅರಿಯೋ ¶ ಅರಿಯಸಮಾಚಾರೋ, ಬಾಳ್ಹಂ ತ್ವಂ ಮಮ ರುಚ್ಚಸಿ.
‘‘ಭವನ್ತಂ ವದಾಮಿ ಭೋತಿಞ್ಚ, ಸುಣಾಥ ವಚನಂ ಮಮ;
ನಾಯಂ ಭಾರೋ ಭಾರಮತೋ [ಭಾರಮತ್ತೋ (ಸೀ. ಸ್ಯಾ.)], ಅಹು ಮಯ್ಹಂ ಕುದಾಚನಂ.
‘‘ತಂ ಮಂ ಉಪಟ್ಠಿತಂ ಸನ್ತಂ, ಮಾತಾಪಿತುಸುಖಾವಹಂ;
ನನ್ದೋ ಅಜ್ಝಾವರಂ ಕತ್ವಾ, ಉಪಟ್ಠಾನಾಯ ಯಾಚತಿ.
‘‘ಯೋ ವೇ ಇಚ್ಛತಿ ಕಾಮೇನ, ಸನ್ತಾನಂ ಬ್ರಹ್ಮಚಾರಿನಂ;
ನನ್ದಂ ವೋ ವರಥ ಏಕೋ [ನನ್ದಂ ವದಥ ಏಕೇ (ಪೀ.)], ಕಂ ನನ್ದೋ ಉಪತಿಟ್ಠತು’’.
‘‘ತಯಾ ¶ ತಾತ ಅನುಞ್ಞಾತಾ, ಸೋಣ ತಂ ನಿಸ್ಸಿತಾ ಮಯಂ;
ಉಪಘಾತುಂ [ಉಪಘಾಯಿತುಂ (ಸೀ.)] ಲಭೇ ನನ್ದಂ, ಮುದ್ಧನಿ ಬ್ರಹ್ಮಚಾರಿನಂ’’.
‘‘ಅಸ್ಸತ್ಥಸ್ಸೇವ ತರುಣಂ, ಪವಾಳಂ ಮಾಲುತೇರಿತಂ;
ಚಿರಸ್ಸಂ ನನ್ದಂ ದಿಸ್ವಾನ, ಹದಯಂ ಮೇ ಪವೇಧತಿ.
‘‘ಯದಾ ಸುತ್ತಾಪಿ ಸುಪಿನೇ [ಸುಪ್ಪನ್ತೇ (ಸ್ಯಾ. ಪೀ.)], ನನ್ದಂ ಪಸ್ಸಾಮಿ ಆಗತಂ;
ಉದಗ್ಗಾ ಸುಮನಾ ಹೋಮಿ, ನನ್ದೋ ನೋ ಆಗತೋ ಅಯಂ.
‘‘ಯದಾ ಚ ಪಟಿಬುಜ್ಝಿತ್ವಾ, ನನ್ದಂ ಪಸ್ಸಾಮಿ ನಾಗತಂ;
ಭಿಯ್ಯೋ ಆವಿಸತೀ ಸೋಕೋ, ದೋಮನಸ್ಸಞ್ಚನಪ್ಪಕಂ.
‘‘ಸಾಹಂ ಅಜ್ಜ ಚಿರಸ್ಸಮ್ಪಿ, ನನ್ದಂ ಪಸ್ಸಾಮಿ ಆಗತಂ;
ಭತ್ತುಚ್ಚ [ಭತ್ತುಞ್ಚ (ಕ.)] ಮಯ್ಹಞ್ಚ ಪಿಯೋ, ನನ್ದೋ ನೋ ಪಾವಿಸೀ ಘರಂ.
‘‘ಪಿತುಪಿ ನನ್ದೋ ಸುಪ್ಪಿಯೋ, ಯಂ ನನ್ದೋ ನಪ್ಪವಸೇ [ಪಾವಿಸೀ (ಪೀ.)] ಘರಾ [ಘರಂ (ಸ್ಯಾ. ಪೀ. ಕ.)];
ಲಭತೂ ತಾತ ನನ್ದೋ ತಂ, ಮಂ ನನ್ದೋ ಉಪತಿಟ್ಠತು’’.
‘‘ಅನುಕಮ್ಪಿಕಾ ¶ ಪತಿಟ್ಠಾ ಚ, ಪುಬ್ಬೇ ರಸದದೀ ಚ ನೋ;
ಮಗ್ಗೋ ಸಗ್ಗಸ್ಸ ಲೋಕಸ್ಸ, ಮಾತಾ ತಂ ವರತೇ ಇಸೇ.
‘‘ಪುಬ್ಬೇ ರಸದದೀ ಗೋತ್ತೀ, ಮಾತಾ ಪುಞ್ಞೂಪಸಂಹಿತಾ;
ಮಗ್ಗೋ ಸಗ್ಗಸ್ಸ ಲೋಕಸ್ಸ, ಮಾತಾ ತಂ ವರತೇ ಇಸೇ’’.
‘‘ಆಕಙ್ಖಮಾನಾ ಪುತ್ತಫಲಂ, ದೇವತಾಯ ನಮಸ್ಸತಿ;
ನಕ್ಖತ್ತಾನಿ ಚ ಪುಚ್ಛತಿ, ಉತುಸಂವಚ್ಛರಾನಿ ಚ.
‘‘ತಸ್ಸಾ ಉತುಮ್ಹಿ ನ್ಹಾತಾಯ [ಉತುಸಿನಾತಾಯ (ಪೀ.)], ಹೋತಿ ಗಬ್ಭಸ್ಸ ವೋಕ್ಕಮೋ [ಗಬ್ಭಸ್ಸ’ವಕ್ಕಮೋ (ಸೀ. ಸ್ಯಾ. ಪೀ.)];
ತೇನ ದೋಹಳಿನೀ ಹೋತಿ, ಸುಹದಾ ತೇನ ವುಚ್ಚತಿ.
‘‘ಸಂವಚ್ಛರಂ ¶ ವಾ ಊನಂ ವಾ, ಪರಿಹರಿತ್ವಾ ವಿಜಾಯತಿ;
ತೇನ ಸಾ ಜನಯನ್ತೀತಿ, ಜನೇತ್ತಿ [ಜನೇತ್ತೀ (ಸೀ. ಸ್ಯಾ. ಪೀ.)] ತೇನ ವುಚ್ಚತಿ.
‘‘ಥನಖೀರೇನ [ಥನಕ್ಖೀರೇನ (ಸೀ.)] ಗೀತೇನ, ಅಙ್ಗಪಾವುರಣೇನ [ಅಙ್ಗಪಾಪುರಣೇನ (ಪೀ.)] ಚ;
ರೋದನ್ತಂ ಪುತ್ತಂ [ಏವ (ಪೀ.)] ತೋಸೇತಿ, ತೋಸೇನ್ತೀ ತೇನ ವುಚ್ಚತಿ.
‘‘ತತೋ ¶ ವಾತಾತಪೇ ಘೋರೇ, ಮಮಂ ಕತ್ವಾ ಉದಿಕ್ಖತಿ;
ದಾರಕಂ ಅಪ್ಪಜಾನನ್ತಂ, ಪೋಸೇನ್ತೀ ತೇನ ವುಚ್ಚತಿ.
‘‘ಯಞ್ಚ ಮಾತುಧನಂ ಹೋತಿ, ಯಞ್ಚ ಹೋತಿ ಪಿತುದ್ಧನಂ;
ಉಭಯಮ್ಪೇತಸ್ಸ ಗೋಪೇತಿ, ಅಪಿ ಪುತ್ತಸ್ಸ ನೋ ಸಿಯಾ.
‘‘ಏವಂ ಪುತ್ತ ಅದುಂ ಪುತ್ತ, ಇತಿ ಮಾತಾ ವಿಹಞ್ಞತಿ;
ಪಮತ್ತಂ ಪರದಾರೇಸು, ನಿಸೀಥೇ ಪತ್ತಯೋಬ್ಬನೇ;
ಸಾಯಂ ಪುತ್ತಂ ಅನಾಯನ್ತಂ, ಇತಿ ಮಾತಾ ವಿಹಞ್ಞತಿ.
‘‘ಏವಂ ಕಿಚ್ಛಾ ಭತೋ ಪೋಸೋ, ಮಾತು ಅಪರಿಚಾರಕೋ;
ಮಾತರಿ ಮಿಚ್ಛಾ ಚರಿತ್ವಾನ, ನಿರಯಂ ಸೋಪಪಜ್ಜತಿ.
‘‘ಏವಂ ¶ ಕಿಚ್ಛಾ ಭತೋ ಪೋಸೋ, ಪಿತು ಅಪರಿಚಾರಕೋ;
ಪಿತರಿ ಮಿಚ್ಛಾ ಚರಿತ್ವಾನ, ನಿರಯಂ ಸೋಪಪಜ್ಜತಿ.
‘‘ಧನಾಪಿ ಧನಕಾಮಾನಂ, ನಸ್ಸತಿ ಇತಿ ಮೇ ಸುತಂ;
ಮಾತರಂ ಅಪರಿಚರಿತ್ವಾನ, ಕಿಚ್ಛಂ ವಾ ಸೋ ನಿಗಚ್ಛತಿ.
‘‘ಧನಾಪಿ ಧನಕಾಮಾನಂ, ನಸ್ಸತಿ ಇತಿ ಮೇ ಸುತಂ;
ಪಿತರಂ ಅಪರಿಚರಿತ್ವಾನ, ಕಿಚ್ಛಂ ವಾ ಸೋ ನಿಗಚ್ಛತಿ.
‘‘ಆನನ್ದೋ ಚ ಪಮೋದೋ ಚ, ಸದಾ ಹಸಿತಕೀಳಿತಂ;
ಮಾತರಂ ಪರಿಚರಿತ್ವಾನ, ಲಬ್ಭಮೇತಂ ವಿಜಾನತೋ.
‘‘ಆನನ್ದೋ ಚ ಪಮೋದೋ ಚ, ಸದಾ ಹಸಿತಕೀಳಿತಂ;
ಪಿತರಂ ಪರಿಚರಿತ್ವಾನ, ಲಬ್ಭಮೇತಂ ವಿಜಾನತೋ.
‘‘ದಾನಞ್ಚ ಪೇಯ್ಯವಜ್ಜಞ್ಚ [ಪಿಯವಾಚಾ ಚ (ಸೀ. ಸ್ಯಾ. ಕ.)], ಅತ್ಥಚರಿಯಾ ಚ ಯಾ ಇಧ;
ಸಮಾನತ್ತತಾ [ಸಮಾನತ್ತಾ (ಪೀ.)] ಚ ಧಮ್ಮೇಸು, ತತ್ಥ ತತ್ಥ ಯಥಾರಹಂ;
ಏತೇ ಖೋ ಸಙ್ಗಹಾ ಲೋಕೇ, ರಥಸ್ಸಾಣೀವ ಯಾಯತೋ.
ಏತೇ ಚ ಸಙ್ಗಹಾ ನಾಸ್ಸು, ನ ಮಾತಾ ಪುತ್ತಕಾರಣಾ;
ಲಭೇಥ ಮಾನಂ ಪೂಜಂ ವಾ [ಪೂಜಞ್ಚ (ಪೀ.)], ಪಿತಾ ವಾ ಪುತ್ತಕಾರಣಾ.
‘‘ಯಸ್ಮಾ ಚ ಸಙ್ಗಹಾ [ಸಙ್ಗಹೇ (ದೀ. ನಿ. ೩.೨೭೩; ಅ. ನಿ. ೪.೩೨) ತದಟ್ಠಕಥಾಯೋ ಓಲೋಕೇತಬ್ಬಾ] ಏತೇ, ಸಮ್ಮಪೇಕ್ಖನ್ತಿ [ಸಮವೇಕ್ಖನ್ತಿ (ಸೀ. ಸ್ಯಾ. ಪೀ.) ಅ. ನಿ. ೪.೩೨] ಪಣ್ಡಿತಾ;
ತಸ್ಮಾ ಮಹತ್ತಂ ಪಪ್ಪೋನ್ತಿ, ಪಾಸಂಸಾ ಚ ಭವನ್ತಿ ತೇ.
‘‘ಬ್ರಹ್ಮಾತಿ ¶ ¶ [ಬ್ರಹ್ಮಾ ಹಿ (ಪೀ.)] ಮಾತಾಪಿತರೋ, ಪುಬ್ಬಾಚರಿಯಾತಿ ವುಚ್ಚರೇ;
ಆಹುನೇಯ್ಯಾ ¶ ಚ ಪುತ್ತಾನಂ, ಪಜಾಯ ಅನುಕಮ್ಪಕಾ.
‘‘ತಸ್ಮಾ ಹಿ ನೇ ನಮಸ್ಸೇಯ್ಯ, ಸಕ್ಕರೇಯ್ಯ ಚ ಪಣ್ಡಿತೋ;
ಅನ್ನೇನ ಅಥೋ [ಮಥೋ (ಪೀ.), ಅಥ (ಅ. ನಿ. ೪.೬೩; ಇತಿವು. ೧೦೬)] ಪಾನೇನ, ವತ್ಥೇನ ಸಯನೇನ ಚ;
ಉಚ್ಛಾದನೇನ ನ್ಹಾಪನೇನ [ನಹಾಪನೇನ (ಸೀ. ಪೀ.)], ಪಾದಾನಂ ಧೋವನೇನ ಚ.
‘‘ತಾಯ ನಂ ಪಾರಿಚರಿಯಾಯ [ಪರಿಚರಿಯಾಯ (ಪೀ.)], ಮಾತಾಪಿತೂಸು ಪಣ್ಡಿತಾ;
ಇಧೇವ ನಂ ಪಸಂಸನ್ತಿ, ಪೇಚ್ಚ ಸಗ್ಗೇ ಪಮೋದತೀ’’ತಿ.
ಸೋಣನನ್ದಜಾತಕಂ ದುತಿಯಂ.
ಸತ್ತತಿನಿಪಾತಂ ನಿಟ್ಠಿತಂ.
ತಸ್ಸುದ್ದಾನಂ –
ಅಥ ಸತ್ತತಿಮಮ್ಹಿ ನಿಪಾತವರೇ, ಸಭಾವನ್ತು ಕುಸಾವತಿರಾಜವರೋ;
ಅಥ ಸೋಣಸುನನ್ದವರೋ ಚ ಪುನ, ಅಭಿವಾಸಿತಸತ್ತತಿಮಮ್ಹಿ ಸುತೇತಿ.
೨೧. ಅಸೀತಿನಿಪಾತೋ
೫೩೩. ಚೂಳಹಂಸಜಾತಕಂ (೧)
‘‘ಸುಮುಖ ¶ ¶ ¶ ಅನುಪಚಿನನ್ತಾ, ಪಕ್ಕಮನ್ತಿ ವಿಹಙ್ಗಮಾ;
ಗಚ್ಛ ತುವಮ್ಪಿ ಮಾ ಕಙ್ಖಿ, ನತ್ಥಿ ಬದ್ಧೇ [ಬನ್ಧೇ (ಸ್ಯಾ. ಕ.)] ಸಹಾಯತಾ’’.
‘‘ಗಚ್ಛೇ ವಾಹಂ ನ ವಾ ಗಚ್ಛೇ, ನ ತೇನ ಅಮರೋ ಸಿಯಂ;
ಸುಖಿತಂ ತಂ ಉಪಾಸಿತ್ವಾ, ದುಕ್ಖಿತಂ ತಂ ಕಥಂ ಜಹೇ.
‘‘ಮರಣಂ ವಾ ತಯಾ ಸದ್ಧಿಂ, ಜೀವಿತಂ ವಾ ತಯಾ ವಿನಾ;
ತದೇವ ಮರಣಂ ಸೇಯ್ಯೋ, ಯಞ್ಚೇ ಜೀವೇ ತಯಾ ವಿನಾ.
‘‘ನೇಸ ಧಮ್ಮೋ ಮಹಾರಾಜ, ಯಂ ತಂ ಏವಂ ಗತಂ ಜಹೇ;
ಯಾ ಗತಿ ತುಯ್ಹಂ ಸಾ ಮಯ್ಹಂ, ರುಚ್ಚತೇ ವಿಹಗಾಧಿಪ.
‘‘ಕಾ ನು ಪಾಸೇನ ಬದ್ಧಸ್ಸ [ಬನ್ಧಸ್ಸ (ಸ್ಯಾ. ಕ.)], ಗತಿ ಅಞ್ಞಾ ಮಹಾನಸಾ;
ಸಾ ಕಥಂ ಚೇತಯಾನಸ್ಸ, ಮುತ್ತಸ್ಸ ತವ ರುಚ್ಚತಿ.
‘‘ಕಂ ವಾ ತ್ವಂ ಪಸ್ಸಸೇ ಅತ್ಥಂ, ಮಮ ತುಯ್ಹಞ್ಚ ಪಕ್ಖಿಮ;
ಞಾತೀನಂ ವಾವಸಿಟ್ಠಾನಂ, ಉಭಿನ್ನಂ ಜೀವಿತಕ್ಖಯೇ.
‘‘ಯಂ ನ ಕಞ್ಚನದೇಪಿಞ್ಛ [ದೇಪಿಚ್ಛ (ಸೀ. ಪೀ.), ದ್ವೇಪಿಚ್ಛ (ಸ್ಯಾ.)], ಅನ್ಧೇನ ತಮಸಾ ಗತಂ;
ತಾದಿಸೇ ಸಞ್ಚಜಂ ಪಾಣಂ, ಕಮತ್ಥಮಭಿಜೋತಯೇ’’.
‘‘ಕಥಂ ನು ಪತತಂ ಸೇಟ್ಠ, ಧಮ್ಮೇ ಅತ್ಥಂ ನ ಬುಜ್ಝಸಿ [ಬುಜ್ಝಸೇ (ಸೀ.)];
ಧಮ್ಮೋ ಅಪಚಿತೋ ಸನ್ತೋ, ಅತ್ಥಂ ದಸ್ಸೇತಿ ಪಾಣಿನಂ.
‘‘ಸೋಹಂ ಧಮ್ಮಂ ಅಪೇಕ್ಖಾನೋ, ಧಮ್ಮಾ ಚತ್ಥಂ ಸಮುಟ್ಠಿತಂ;
ಭತ್ತಿಞ್ಚ ¶ ತಯಿ ಸಮ್ಪಸ್ಸಂ, ನಾವಕಙ್ಖಾಮಿ ಜೀವಿತಂ’’.
‘‘ಅದ್ಧಾ ಏಸೋ ಸತಂ ಧಮ್ಮೋ, ಯೋ ಮಿತ್ತೋ ಮಿತ್ತಮಾಪದೇ;
ನ ಚಜೇ ಜೀವಿತಸ್ಸಾಪಿ, ಹೇತುಧಮ್ಮಮನುಸ್ಸರಂ.
‘‘ಸ್ವಾಯಂ ಧಮ್ಮೋ ಚ ತೇ ಚಿಣ್ಣೋ, ಭತ್ತಿ ಚ ವಿದಿತಾ ಮಯಿ;
ಕಾಮಂ ಕರಸ್ಸು ಮಯ್ಹೇತಂ, ಗಚ್ಛೇವಾನುಮತೋ ಮಯಾ’’.
‘‘ಅಪಿ ¶ ¶ ತ್ವೇವಂ ಗತೇ ಕಾಲೇ, ಯಂ ಖಣ್ಡಂ [ಬದ್ಧಂ (ಸೀ.), ಬನ್ಧಂ (ಪೀ.)] ಞಾತಿನಂ ಮಯಾ;
ತಯಾ ತಂ ಬುದ್ಧಿಸಮ್ಪನ್ನಂ [ಬುದ್ಧಿಸಮ್ಪನ್ನ (ಸೀ. ಸ್ಯಾ. ಪೀ.)], ಅಸ್ಸ ಪರಮಸಂವುತಂ.
‘‘ಇಚ್ಚೇವಂ [ಇಚ್ಚೇವ (ಸೀ. ಪೀ.)] ಮನ್ತಯನ್ತಾನಂ, ಅರಿಯಾನಂ ಅರಿಯವುತ್ತಿನಂ;
ಪಚ್ಚದಿಸ್ಸಥ ನೇಸಾದೋ, ಆತುರಾನಮಿವನ್ತಕೋ.
‘‘ತೇ ಸತ್ತುಮಭಿಸಞ್ಚಿಕ್ಖ, ದೀಘರತ್ತಂ ಹಿತಾ ದಿಜಾ;
ತುಣ್ಹೀಮಾಸಿತ್ಥ ಉಭಯೋ, ನ ಸಞ್ಚಲೇಸುಮಾಸನಾ [ನ ಚ ಸಞ್ಚೇಸು’ಮಾಸನಾ (ಸೀ. ಪೀ.)].
‘‘ಧತರಟ್ಠೇ ಚ ದಿಸ್ವಾನ, ಸಮುಡ್ಡೇನ್ತೇ ತತೋ ತತೋ;
ಅಭಿಕ್ಕಮಥ ವೇಗೇನ, ದಿಜಸತ್ತು ದಿಜಾಧಿಪೇ.
‘‘ಸೋ ಚ ವೇಗೇನಭಿಕ್ಕಮ್ಮ, ಆಸಜ್ಜ ಪರಮೇ ದಿಜೇ;
ಪಚ್ಚಕಮಿತ್ಥ [ಪಚ್ಚಕಮ್ಪಿತ್ಥ (ಸೀ. ಸ್ಯಾ. ಪೀ.)] ನೇಸಾದೋ, ಬದ್ಧಾ ಇತಿ ವಿಚಿನ್ತಯಂ.
‘‘ಏಕಂವ ಬದ್ಧಮಾಸೀನಂ, ಅಬದ್ಧಞ್ಚ ಪುನಾಪರಂ;
ಆಸಜ್ಜ ಬದ್ಧಮಾಸೀನಂ, ಪೇಕ್ಖಮಾನಮದೀನವಂ.
‘‘ತತೋ ಸೋ ವಿಮತೋಯೇವ, ಪಣ್ಡರೇ ಅಜ್ಝಭಾಸಥ;
ಪವಡ್ಢಕಾಯೇ ಆಸೀನೇ, ದಿಜಸಙ್ಘಗಣಾಧಿಪೇ.
‘‘ಯಂ ನು ಪಾಸೇನ ಮಹತಾ, ಬದ್ಧೋ ನ ಕುರುತೇ ದಿಸಂ;
ಅಥ ¶ ಕಸ್ಮಾ ಅಬದ್ಧೋ ತ್ವಂ, ಬಲೀ ಪಕ್ಖಿ ನ ಗಚ್ಛಸಿ.
‘‘ಕಿನ್ನು ತ್ಯಾಯಂ [ತಾ’ಯಂ (ಸೀ. ಪೀ. ಕ.)] ದಿಜೋ ಹೋತಿ, ಮುತ್ತೋ ಬದ್ಧಂ ಉಪಾಸಸಿ;
ಓಹಾಯ ಸಕುಣಾ ಯನ್ತಿ, ಕಿಂ ಏಕೋ ಅವಹೀಯಸಿ’’.
‘‘ರಾಜಾ ಮೇ ಸೋ ದಿಜಾಮಿತ್ತ, ಸಖಾ ಪಾಣಸಮೋ ಚ ಮೇ;
ನೇವ ನಂ ವಿಜಹಿಸ್ಸಾಮಿ, ಯಾವ ಕಾಲಸ್ಸ ಪರಿಯಾಯಂ.
‘‘ಕಥಂ ಪನಾಯಂ ವಿಹಙ್ಗೋ, ನಾದ್ದಸ ಪಾಸಮೋಡ್ಡಿತಂ;
ಪದಞ್ಹೇತಂ ಮಹನ್ತಾನಂ, ಬೋದ್ಧುಮರಹನ್ತಿ ಆಪದಂ.
‘‘ಯದಾ ಪರಾಭವೋ ಹೋತಿ, ಪೋಸೋ ಜೀವಿತಸಙ್ಖಯೇ;
ಅಥ ಜಾಲಞ್ಚ ಪಾಸಞ್ಚ, ಆಸಜ್ಜಾಪಿ ನ ಬುಜ್ಝತಿ.
‘‘ಅಪಿ ¶ ತ್ವೇವ ಮಹಾಪಞ್ಞ, ಪಾಸಾ ಬಹುವಿಧಾ ತತಾ [ತತಾ (ಸ್ಯಾ. ಕ.)];
ಗುಯ್ಹಮಾಸಜ್ಜ [ಗೂಳ್ಹಮಾಸಜ್ಜ (ಸೀ. ಪೀ.)] ಬಜ್ಝನ್ತಿ, ಅಥೇವಂ ಜೀವಿತಕ್ಖಯೇ’’.
‘‘ಅಪಿ ನಾಯಂ ತಯಾ ಸದ್ಧಿಂ, ಸಂವಾಸಸ್ಸ [ಸಮ್ಭಾಸಸ್ಸ (ಸೀ. ಪೀ.)] ಸುಖುದ್ರಯೋ;
ಅಪಿ ನೋ ಅನುಮಞ್ಞಾಸಿ, ಅಪಿ ನೋ ಜೀವಿತಂ ದದೇ’’.
‘‘ನ ಚೇವ ಮೇ ತ್ವಂ ಬದ್ಧೋಸಿ, ನಪಿ ಇಚ್ಛಾಮಿ ತೇ ವಧಂ;
ಕಾಮಂ ಖಿಪ್ಪಮಿತೋ ಗನ್ತ್ವಾ, ಜೀವ ತ್ವಂ ಅನಿಘೋ ಚಿರಂ’’.
‘‘ನೇವಾಹಮೇತಮಿಚ್ಛಾಮಿ ¶ , ಅಞ್ಞತ್ರೇತಸ್ಸ ಜೀವಿತಾ;
ಸಚೇ ಏಕೇನ ತುಟ್ಠೋಸಿ, ಮುಞ್ಚೇತಂ ಮಞ್ಚ ಭಕ್ಖಯ.
‘‘ಆರೋಹಪರಿಣಾಹೇನ, ತುಲ್ಯಾಸ್ಮಾ [ತುಲ್ಯಾಮ್ಹಾ (ಕ.)] ವಯಸಾ ಉಭೋ;
ನ ತೇ ಲಾಭೇನ ಜೀವತ್ಥಿ [ಜೀನತ್ಥಿ (ಸೀ. ಸ್ಯಾ. ಪೀ.)], ಏತೇನ ನಿಮಿನಾ ತುವಂ.
‘‘ತದಿಙ್ಘ ¶ ಸಮಪೇಕ್ಖಸ್ಸು [ಸಮವೇಕ್ಖಸು (ಸೀ. ಪೀ.)], ಹೋತು ಗಿದ್ಧಿ ತವಮ್ಹಸು [ತವಸ್ಮಸು (ಸೀ. ಸ್ಯಾ.)];
ಮಂ ಪುಬ್ಬೇ ಬನ್ಧ ಪಾಸೇನ, ಪಚ್ಛಾ ಮುಞ್ಚ ದಿಜಾಧಿಪಂ.
‘‘ತಾವದೇವ ಚ ತೇ ಲಾಭೋ, ಕತಾಸ್ಸ [ಕತಸ್ಸಾ (ಸೀ. ಪೀ.)] ಯಾಚನಾಯ ಚ;
ಮಿತ್ತಿ ಚ ಧತರಟ್ಠೇಹಿ, ಯಾವಜೀವಾಯ ತೇ ಸಿಯಾ’’.
‘‘ಪಸ್ಸನ್ತು ನೋ ಮಹಾಸಙ್ಘಾ, ತಯಾ ಮುತ್ತಂ ಇತೋ ಗತಂ;
ಮಿತ್ತಾಮಚ್ಚಾ ಚ ಭಚ್ಚಾ ಚ, ಪುತ್ತದಾರಾ ಚ ಬನ್ಧವಾ.
‘‘ನ ಚ ತೇ ತಾದಿಸಾ ಮಿತ್ತಾ, ಬಹೂನಂ [ಬಹುನ್ನಂ (ಸೀ. ಪೀ.)] ಇಧ ವಿಜ್ಜತಿ;
ಯಥಾ ತ್ವಂ ಧತರಟ್ಠಸ್ಸ, ಪಾಣಸಾಧಾರಣೋ ಸಖಾ.
‘‘ಸೋ ತೇ ಸಹಾಯಂ ಮುಞ್ಚಾಮಿ, ಹೋತು ರಾಜಾ ತವಾನುಗೋ;
ಕಾಮಂ ಖಿಪ್ಪಮಿತೋ ಗನ್ತ್ವಾ, ಞಾತಿಮಜ್ಝೇ ವಿರೋಚಥ’’.
‘‘ಸೋ ಪತೀತೋ ಪಮುತ್ತೇನ, ಭತ್ತುನಾ [ಭತ್ತುನೋ (ಸ್ಯಾ.)] ಭತ್ತುಗಾರವೋ;
ಅಜ್ಝಭಾಸಥ ವಕ್ಕಙ್ಗೋ [ವಙ್ಕಙ್ಗೋ (ಸ್ಯಾ.)], ವಾಚಂ ಕಣ್ಣಸುಖಂ ಭಣಂ.
‘‘ಏವಂ ಲುದ್ದಕ ನನ್ದಸ್ಸು, ಸಹ ಸಬ್ಬೇಹಿ ಞಾತಿಭಿ;
ಯಥಾಹಮಜ್ಜ ನನ್ದಾಮಿ, ಮುತ್ತಂ ದಿಸ್ವಾ ದಿಜಾಧಿಪಂ’’.
‘‘ಏಹಿ ¶ ತಂ ಅನುಸಿಕ್ಖಾಮಿ, ಯಥಾ ತ್ವಮಪಿ ಲಚ್ಛಸೇ;
ಲಾಭಂ ತವಾಯಂ [ಯಥಾಯಂ (ಸೀ. ಪೀ.)] ಧತರಟ್ಠೋ, ಪಾಪಂ ಕಿಞ್ಚಿ [ಕಞ್ಚಿ (ಸೀ.)] ನ ದಕ್ಖತಿ.
‘‘ಖಿಪ್ಪಮನ್ತೇಪುರಂ ನೇತ್ವಾ [ಗನ್ತ್ವಾ (ಸ್ಯಾ. ಕ.)], ರಞ್ಞೋ ದಸ್ಸೇಹಿ ನೋ ಉಭೋ;
ಅಬದ್ಧೇ ಪಕತಿಭೂತೇ, ಕಾಜೇ [ಕಾಚೇ (ಪೀ.)] ಉಭಯತೋ ಠಿತೇ.
‘‘ಧತರಟ್ಠಾ ಮಹಾರಾಜ, ಹಂಸಾಧಿಪತಿನೋ ಇಮೇ;
ಅಯಞ್ಹಿ ¶ ರಾಜಾ ಹಂಸಾನಂ, ಅಯಂ ಸೇನಾಪತೀತರೋ.
‘‘ಅಸಂಸಯಂ ಇಮಂ ದಿಸ್ವಾ, ಹಂಸರಾಜಂ ನರಾಧಿಪೋ;
ಪತೀತೋ ಸುಮನೋ ವಿತ್ತೋ [ಚಿತ್ತೋ (ಕ.)], ಬಹುಂ ದಸ್ಸತಿ ತೇ ಧನಂ’’.
‘‘ತಸ್ಸ ತಂ ವಚನಂ ಸುತ್ವಾ, ಕಮ್ಮುನಾ ಉಪಪಾದಯಿ;
ಖಿಪ್ಪಮನ್ತೇಪುರಂ ಗನ್ತ್ವಾ, ರಞ್ಞೋ ಹಂಸೇ ಅದಸ್ಸಯಿ;
ಅಬದ್ಧೇ ಪಕತಿಭೂತೇ, ಕಾಜೇ ಉಭಯತೋ ಠಿತೇ.
‘‘ಧತರಟ್ಠಾ ¶ ಮಹಾರಾಜ, ಹಂಸಾಧಿಪತಿನೋ ಇಮೇ;
ಅಯಞ್ಹಿ ರಾಜಾ ಹಂಸಾನಂ, ಅಯಂ ಸೇನಾಪತೀತರೋ’’.
‘‘ಕಥಂ ಪನಿಮೇ ವಿಹಙ್ಗಾ [ವಿಹಗಾ (ಸೀ. ಪೀ.)], ತವ ಹತ್ಥತ್ತಮಾಗತಾ [ಹತ್ಥತ್ಥ’ಮಾಗತಾ (ಸೀ. ಸ್ಯಾ. ಪೀ.)];
ಕಥಂ ಲುದ್ದೋ ಮಹನ್ತಾನಂ, ಇಸ್ಸರೇ ಇಧ ಅಜ್ಝಗಾ’’.
‘‘ವಿಹಿತಾ ಸನ್ತಿಮೇ ಪಾಸಾ, ಪಲ್ಲಲೇಸು ಜನಾಧಿಪ;
ಯಂ ಯದಾಯತನಂ ಮಞ್ಞೇ, ದಿಜಾನಂ ಪಾಣರೋಧನಂ.
‘‘ತಾದಿಸಂ ಪಾಸಮಾಸಜ್ಜ, ಹಂಸರಾಜಾ ಅಬಜ್ಝಥ;
ತಂ ಅಬದ್ಧೋ ಉಪಾಸೀನೋ, ಮಮಾಯಂ ಅಜ್ಝಭಾಸಥ.
‘‘ಸುದುಕ್ಕರಂ ಅನರಿಯೇಹಿ, ದಹತೇ ಭಾವಮುತ್ತಮಂ;
ಭತ್ತುರತ್ಥೇ ಪರಕ್ಕನ್ತೋ, ಧಮ್ಮಯುತ್ತೋ [ಧಮ್ಮೇ ಯುತ್ತೋ (ಸೀ. ಪೀ.)] ವಿಹಙ್ಗಮೋ.
‘‘ಅತ್ತನಾಯಂ [ಅತ್ತನೋ ಯಂ (ಸ್ಯಾ.)] ಚಜಿತ್ವಾನ, ಜೀವಿತಂ ಜೀವಿತಾರಹೋ;
ಅನುತ್ಥುನನ್ತೋ ಆಸೀನೋ, ಭತ್ತು ಯಾಚಿತ್ಥ ಜೀವಿತಂ.
‘‘ತಸ್ಸ ತಂ ವಚನಂ ಸುತ್ವಾ, ಪಸಾದಮಹಮಜ್ಝಗಾ;
ತತೋ ನಂ ಪಾಮುಚಿಂ [ಪಾಮುಞ್ಚಿಂ (ಪೀ. ಕ.)] ಪಾಸಾ, ಅನುಞ್ಞಾಸಿಂ ಸುಖೇನ ಚ.
‘‘‘ಸೋ ¶ ¶ ಪತೀತೋ ಪಮುತ್ತೇನ, ಭತ್ತುನಾ ಭತ್ತುಗಾರವೋ;
ಅಜ್ಝಭಾಸಥ ವಕ್ಕಙ್ಗೋ, ವಾಚಂ ಕಣ್ಣಸುಖಂ ಭಣಂ.
‘‘‘ಏವಂ ಲುದ್ದಕ ನನ್ದಸ್ಸು, ಸಹ ಸಬ್ಬೇಹಿ ಞಾತಿಭಿ;
ಯಥಾಹಮಜ್ಜ ನನ್ದಾಮಿ, ಮುತ್ತಂ ದಿಸ್ವಾ ದಿಜಾಧಿಪಂ.
‘‘‘ಏಹಿ ತಂ ಅನುಸಿಕ್ಖಾಮಿ, ಯಥಾ ತ್ವಮಪಿ ಲಚ್ಛಸೇ;
ಲಾಭಂ ತವಾಯಂ ಧತರಟ್ಠೋ, ಪಾಪಂ ಕಿಞ್ಚಿ ನ ದಕ್ಖತಿ.
‘‘‘ಖಿಪ್ಪಮನ್ತೇಪುರಂ ನೇತ್ವಾ [ಗನ್ತ್ವಾ (ಸಬ್ಬತ್ಥ)], ರಞ್ಞೋ ದಸ್ಸೇಹಿ ನೋ ಉಭೋ;
ಅಬದ್ಧೇ ಪಕತಿಭೂತೇ, ಕಾಜೇ ಉಭಯತೋ ಠಿತೇ.
‘‘‘ಧತರಟ್ಠಾ ಮಹಾರಾಜ, ಹಂಸಾಧಿಪತಿನೋ ಇಮೇ;
ಅಯಞ್ಹಿ ರಾಜಾ ಹಂಸಾನಂ, ಅಯಂ ಸೇನಾಪತೀತರೋ.
‘‘‘ಅಸಂಸಯಂ ಇಮಂ ದಿಸ್ವಾ, ಹಂಸರಾಜಂ ನರಾಧಿಪೋ;
ಪತೀತೋ ಸುಮನೋ ವಿತ್ತೋ, ಬಹುಂ ದಸ್ಸತಿ ತೇ ಧನಂ’.
‘‘ಏವಮೇತಸ್ಸ ವಚನಾ, ಆನೀತಾಮೇ ಉಭೋ ಮಯಾ;
ಏತ್ಥೇವ ಹಿ ಇಮೇ ಆಸುಂ [ಅಸ್ಸು (ಸೀ. ಸ್ಯಾ. ಪೀ.)], ಉಭೋ ಅನುಮತಾ ಮಯಾ.
‘‘ಸೋಯಂ ಏವಂ ಗತೋ ಪಕ್ಖೀ, ದಿಜೋ ಪರಮಧಮ್ಮಿಕೋ;
ಮಾದಿಸಸ್ಸ ಹಿ ಲುದ್ದಸ್ಸ, ಜನಯೇಯ್ಯಾಥ ಮದ್ದವಂ.
‘‘ಉಪಾಯನಞ್ಚ ¶ ತೇ ದೇವ, ನಾಞ್ಞಂ ಪಸ್ಸಾಮಿ ಏದಿಸಂ;
ಸಬ್ಬಸಾಕುಣಿಕಾಗಾಮೇ, ತಂ ಪಸ್ಸ ಮನುಜಾಧಿಪ’’.
‘‘ದಿಸ್ವಾ ನಿಸಿನ್ನಂ ರಾಜಾನಂ, ಪೀಠೇ ಸೋವಣ್ಣಯೇ ಸುಭೇ;
ಅಜ್ಝಭಾಸಥ ವಕ್ಕಙ್ಗೋ, ವಾಚಂ ಕಣ್ಣಸುಖಂ ಭಣಂ.
‘‘ಕಚ್ಚಿನ್ನು ¶ ಭೋತೋ ಕುಸಲಂ, ಕಚ್ಚಿ ಭೋತೋ ಅನಾಮಯಂ;
ಕಚ್ಚಿ ರಟ್ಠಮಿದಂ ಫೀತಂ, ಧಮ್ಮೇನ ಮನುಸಾಸಸಿ’’.
‘‘ಕುಸಲಞ್ಚೇವ ಮೇ ಹಂಸ, ಅಥೋ ಹಂಸ ಅನಾಮಯಂ;
ಅಥೋ ರಟ್ಠಮಿದಂ ಫೀತಂ, ಧಮ್ಮೇನ ಮನುಸಾಸಹಂ’’ [ಮನುಸಿಸ್ಸತಿ (ಸೀ. ಪೀ.)].
‘‘ಕಚ್ಚಿ ಭೋತೋ ಅಮಚ್ಚೇಸು, ದೋಸೋ ಕೋಚಿ ನ ವಿಜ್ಜತಿ;
ಕಚ್ಚಿ ಚ [ಕಚ್ಚಿನ್ನು (ಸೀ. ಪೀ.)] ತೇ ತವತ್ಥೇಸು, ನಾವಕಙ್ಖನ್ತಿ ಜೀವಿತಂ’’.
‘‘ಅಥೋಪಿ ¶ ಮೇ ಅಮಚ್ಚೇಸು, ದೋಸೋ ಕೋಚಿ ನ ವಿಜ್ಜತಿ;
ಅಥೋಪಿ ತೇ [ಅಥೋಪಿಮೇ (ಸೀ. ಪೀ.)] ಮಮತ್ಥೇಸು, ನಾವಕಙ್ಖನ್ತಿ ಜೀವಿತಂ’’.
‘‘ಕಚ್ಚಿ ತೇ ಸಾದಿಸೀ ಭರಿಯಾ, ಅಸ್ಸವಾ ಪಿಯಭಾಣಿನೀ;
ಪುತ್ತರೂಪಯಸೂಪೇತಾ, ತವ ಛನ್ದವಸಾನುಗಾ’’.
‘‘ಅಥೋ ಮೇ ಸಾದಿಸೀ ಭರಿಯಾ, ಅಸ್ಸವಾ ಪಿಯಭಾಣಿನೀ;
ಪುತ್ತರೂಪಯಸೂಪೇತಾ, ಮಮ ಛನ್ದವಸಾನುಗಾ’’.
‘‘ಭವನ್ತಂ [ಭವಂ ತು (ಸೀ. ಪೀ.), ಭವನ್ನು (ಸ್ಯಾ.)] ಕಚ್ಚಿ ನು ಮಹಾ-ಸತ್ತುಹತ್ಥತ್ತತಂ [ಹತ್ಥತ್ಥತಂ (ಸೀ. ಸ್ಯಾ. ಪೀ.)] ಗತೋ;
ದುಕ್ಖಮಾಪಜ್ಜಿ ವಿಪುಲಂ, ತಸ್ಮಿಂ ಪಠಮಮಾಪದೇ.
‘‘ಕಚ್ಚಿ ಯನ್ತಾಪತಿತ್ವಾನ, ದಣ್ಡೇನ ಸಮಪೋಥಯಿ;
ಏವಮೇತೇಸಂ ಜಮ್ಮಾನಂ, ಪಾತಿಕಂ [ಪಾಕತಿಕಂ (ಸೀ. ಪೀ.)] ಭವತಿ ತಾವದೇ’’.
‘‘ಖೇಮಮಾಸಿ ಮಹಾರಾಜ, ಏವಮಾಪದಿಯಾ ಸತಿ [ಏವಮಾಪದಿ ಸಂಸತಿ (ಸೀ. ಪೀ.)];
ನ ಚಾಯಂ ಕಿಞ್ಚಿ ರಸ್ಮಾಸು, ಸತ್ತೂವ ಸಮಪಜ್ಜಥ.
‘‘ಪಚ್ಚಗಮಿತ್ಥ ನೇಸಾದೋ, ಪುಬ್ಬೇವ ಅಜ್ಝಭಾಸಥ;
ತದಾಯಂ ಸುಮುಖೋಯೇವ, ಪಣ್ಡಿತೋ ಪಚ್ಚಭಾಸಥ.
‘‘ತಸ್ಸ ¶ ತಂ ವಚನಂ ಸುತ್ವಾ, ಪಸಾದಮಯಮಜ್ಝಗಾ;
ತತೋ ಮಂ ಪಾಮುಚೀ ಪಾಸಾ, ಅನುಞ್ಞಾಸಿ ಸುಖೇನ ಚ.
‘‘ಇದಞ್ಚ ಸುಮುಖೇನೇವ, ಏತದತ್ಥಾಯ ಚಿನ್ತಿತಂ;
ಭೋತೋ ಸಕಾಸೇಗಮನಂ [ಸಕಾಸೇ + ಆಗಮನಂ], ಏತಸ್ಸ ಧನಮಿಚ್ಛತಾ’’.
‘‘ಸ್ವಾಗತಞ್ಚೇವಿದಂ ಭವತಂ, ಪತೀತೋ ಚಸ್ಮಿ ದಸ್ಸನಾ;
ಏಸೋ ಚಾಪಿ ಬಹುಂ ವಿತ್ತಂ, ಲಭತಂ ಯಾವದಿಚ್ಛತಿ’’ [ಯಾವತಿಚ್ಛತಿ (ಸೀ. ಪೀ.)].
‘‘ಸನ್ತಪ್ಪಯಿತ್ವಾ ¶ ನೇಸಾದಂ, ಭೋಗೇಹಿ ಮನುಜಾಧಿಪೋ;
ಅಜ್ಝಭಾಸಥ ವಕ್ಕಙ್ಗಂ, ವಾಚಂ ಕಣ್ಣಸುಖಂ ಭಣಂ’’.
‘‘ಯಂ ಖಲು ಧಮ್ಮಮಾಧೀನಂ, ವಸೋ ವತ್ತತಿ ಕಿಞ್ಚನಂ;
ಸಬ್ಬತ್ಥಿಸ್ಸರಿಯಂ ತವ [ಸಬ್ಬತ್ಥಿಸ್ಸರಿಯಂ ಭವತಂ (ಸೀ. ಸ್ಯಾ. ಪೀ.), ಸಬ್ಬಿಸ್ಸರಿಯಂ ಭವತಂ (ಸ್ಯಾ. ಕ.)], ತಂ ಪಸಾಸ [ಪಸಾಸಥ (ಸೀ. ಸ್ಯಾ. ಪೀ.)] ಯದಿಚ್ಛಥ.
‘‘ದಾನತ್ಥಂ ¶ ಉಪಭೋತ್ತುಂ ವಾ, ಯಂ ಚಞ್ಞಂ ಉಪಕಪ್ಪತಿ;
ಏತಂ ದದಾಮಿ ವೋ ವಿತ್ತಂ, ಇಸ್ಸರಿಯಂ [ಇಸ್ಸೇರಂ (ಸೀ.), ಇಸ್ಸರಂ (ಪೀ.)] ವಿಸ್ಸಜಾಮಿ ವೋ’’.
‘‘ಯಥಾ ಚ ಮ್ಯಾಯಂ ಸುಮುಖೋ, ಅಜ್ಝಭಾಸೇಯ್ಯ ಪಣ್ಡಿತೋ;
ಕಾಮಸಾ ಬುದ್ಧಿಸಮ್ಪನ್ನೋ, ತಂ ಮ್ಯಾಸ್ಸ ಪರಮಪ್ಪಿಯಂ’’.
‘‘ಅಹಂ ಖಲು ಮಹಾರಾಜ, ನಾಗರಾಜಾರಿವನ್ತರಂ;
ಪಟಿವತ್ತುಂ ನ ಸಕ್ಕೋಮಿ, ನ ಮೇ ಸೋ ವಿನಯೋ ಸಿಯಾ.
‘‘ಅಮ್ಹಾಕಞ್ಚೇವ ಸೋ [ಯೋ (ಸೀ. ಪೀ.)] ಸೇಟ್ಠೋ, ತ್ವಞ್ಚ ಉತ್ತಮಸತ್ತವೋ;
ಭೂಮಿಪಾಲೋ ಮನುಸ್ಸಿನ್ದೋ, ಪೂಜಾ ಬಹೂಹಿ ಹೇತುಹಿ.
‘‘ತೇಸಂ ಉಭಿನ್ನಂ ಭಣತಂ, ವತ್ತಮಾನೇ ವಿನಿಚ್ಛಯೇ;
ನನ್ತರಂ [ನಾನ್ತರಂ (ಸೀ. ಪೀ.)] ಪಟಿವತ್ತಬ್ಬಂ, ಪೇಸ್ಸೇನ [ಪೇಸೇನ (ಕ.)] ಮನುಜಾಧಿಪ’’.
‘‘ಧಮ್ಮೇನ ¶ ಕಿರ ನೇಸಾದೋ, ಪಣ್ಡಿತೋ ಅಣ್ಡಜೋ ಇತಿ;
ನ ಹೇವ ಅಕತತ್ತಸ್ಸ, ನಯೋ ಏತಾದಿಸೋ ಸಿಯಾ.
‘‘ಏವಂ ಅಗ್ಗಪಕತಿಮಾ, ಏವಂ ಉತ್ತಮಸತ್ತವೋ;
ಯಾವತತ್ಥಿ ಮಯಾ ದಿಟ್ಠಾ, ನಾಞ್ಞಂ ಪಸ್ಸಾಮಿ ಏದಿಸಂ.
‘‘ತುಟ್ಠೋಸ್ಮಿ ವೋ ಪಕತಿಯಾ, ವಾಕ್ಯೇನ ಮಧುರೇನ ಚ;
ಏಸೋ ಚಾಪಿ ಮಮಚ್ಛನ್ದೋ, ಚಿರಂ ಪಸ್ಸೇಯ್ಯ ವೋ ಉಭೋ’’.
‘‘ಯಂ ಕಿಚ್ಚಂ [ಯಂಕಿಞ್ಚಿ (ಪೀ.)] ಪರಮೇ ಮಿತ್ತೇ, ಕತಮಸ್ಮಾಸು [ರಸ್ಮಾಸು (ಸೀ. ಪೀ.)] ತಂ ತಯಾ;
ಪತ್ತಾ ನಿಸ್ಸಂಸಯಂ ತ್ಯಾಮ್ಹಾ [ತ್ಯಮ್ಹಾ (ಪೀ.)], ಭತ್ತಿರಸ್ಮಾಸು ಯಾ ತವ.
‘‘ಅದುಞ್ಚ ನೂನ ಸುಮಹಾ, ಞಾತಿಸಙ್ಘಸ್ಸ ಮನ್ತರಂ;
ಅದಸ್ಸನೇನ ಅಸ್ಮಾಕಂ [ಅಮ್ಹಾಕಂ (ಸೀ. ಪೀ.)], ದುಕ್ಖಂ ಬಹೂಸು ಪಕ್ಖಿಸು.
‘‘ತೇಸಂ ಸೋಕವಿಘಾತಾಯ, ತಯಾ ಅನುಮತಾ ಮಯಂ;
ತಂ ಪದಕ್ಖಿಣತೋ ಕತ್ವಾ, ಞಾತಿಂ [ಞಾತೀ (ಸೀ. ಸ್ಯಾ. ಪೀ.)] ಪಸ್ಸೇಮುರಿನ್ದಮ [ಪಸ್ಸೇಮರಿನ್ದಮ (ಸೀ. ಪೀ.)].
‘‘ಅದ್ಧಾಹಂ ವಿಪುಲಂ ಪೀತಿಂ, ಭವತಂ ವಿನ್ದಾಮಿ ದಸ್ಸನಾ;
ಏಸೋ ಚಾಪಿ ಮಹಾ ಅತ್ಥೋ, ಞಾತಿವಿಸ್ಸಾಸನಾ ಸಿಯಾ’’.
‘‘ಇದಂ ¶ ವತ್ವಾ ಧತರಟ್ಠೋ [ಧತರಟ್ಠಾ (ಸೀ.)], ಹಂಸರಾಜಾ ನರಾಧಿಪಂ;
ಉತ್ತಮಂ ಜವಮನ್ವಾಯ [ಉತ್ತಮಜವಮತ್ತಾಯ (ಸೀ. ಪೀ.)], ಞಾತಿಸಙ್ಘಂ ಉಪಾಗಮುಂ.
‘‘ತೇ ¶ ಅರೋಗೇ ಅನುಪ್ಪತ್ತೇ, ದಿಸ್ವಾನ ಪರಮೇ ದಿಜೇ;
ಕೇಕಾತಿ ಮಕರುಂ ಹಂಸಾ, ಪುಥುಸದ್ದೋ ಅಜಾಯಥ.
‘‘ತೇ ಪತೀತಾ ಪಮುತ್ತೇನ, ಭತ್ತುನಾ ಭತ್ತುಗಾರವಾ;
ಸಮನ್ತಾ ಪರಿಕಿರಿಂಸು [ಪರಿಕರಿಂಸು (ಸೀ. ಸ್ಯಾ. ಪೀ.)], ಅಣ್ಡಜಾ ಲದ್ಧಪಚ್ಚಯಾ’’.
‘‘ಏವಂ ¶ ಮಿತ್ತವತಂ ಅತ್ಥಾ, ಸಬ್ಬೇ ಹೋನ್ತಿ ಪದಕ್ಖಿಣಾ;
ಹಂಸಾ ಯಥಾ ಧತರಟ್ಠಾ, ಞಾತಿಸಙ್ಘಂ ಉಪಾಗಮು’’ನ್ತಿ.
ಚೂಳ [ಚುಲ್ಲ (ಸೀ. ಸ್ಯಾ. ಪೀ.)] ಹಂಸಜಾತಕಂ ಪಠಮಂ.
೫೩೪. ಮಹಾಹಂಸಜಾತಕಂ (೨)
‘‘ಏತೇ ಹಂಸಾ ಪಕ್ಕಮನ್ತಿ, ವಕ್ಕಙ್ಗಾ ಭಯಮೇರಿತಾ;
ಹರಿತ್ತಚ ಹೇಮವಣ್ಣ, ಕಾಮಂ ಸುಮುಖ ಪಕ್ಕಮ.
‘‘ಓಹಾಯ ಮಂ ಞಾತಿಗಣಾ, ಏಕಂ ಪಾಸವಸಂ ಗತಂ;
ಅನಪೇಕ್ಖಮಾನಾ ಗಚ್ಛನ್ತಿ, ಕಿಂ ಏಕೋ ಅವಹೀಯಸಿ.
‘‘ಪತೇವ ಪತತಂ ಸೇಟ್ಠ, ನತ್ಥಿ ಬದ್ಧೇ ಸಹಾಯತಾ;
ಮಾ ಅನೀಘಾಯ ಹಾಪೇಸಿ, ಕಾಮಂ ಸುಮುಖ ಪಕ್ಕಮ’’.
‘‘ನಾಹಂ ದುಕ್ಖಪರೇತೋಪಿ [ದುಕ್ಖಪರೇತೋ’’ತಿ (ಜಾ. ೧.೧೫.೧೩೬) ಅಟ್ಠಕಥಾಯೋ ಓಲೋಕೇತಬ್ಬಾ], ಧತರಟ್ಠ ತುವಂ [ತವಂ (ಸೀ. ಪೀ.)] ಜಹೇ;
ಜೀವಿತಂ ಮರಣಂ ವಾ ಮೇ, ತಯಾ ಸದ್ಧಿಂ ಭವಿಸ್ಸತಿ.
‘‘ನಾಹಂ ದುಕ್ಖಪರೇತೋಪಿ, ಧತರಟ್ಠ ತುವಂ ಜಹೇ;
ನ ಮಂ ಅನರಿಯಸಂಯುತ್ತೇ, ಕಮ್ಮೇ ಯೋಜೇತುಮರಹಸಿ.
‘‘ಸಕುಮಾರೋ ಸಖಾ ತ್ಯಸ್ಮಿ, ಸಚಿತ್ತೇ ಚಸ್ಮಿ ತೇ [ಸಮಿತೇ (ಪೀ.), ತ್ಯಸ್ಮಿ ತೇ (ಕ.)] ಠಿತೋ;
ಞಾತೋ ಸೇನಾಪತಿ ತ್ಯಾಹಂ, ಹಂಸಾನಂ ಪವರುತ್ತಮ.
‘‘ಕಥಂ ¶ ಅಹಂ ವಿಕತ್ಥಿಸ್ಸಂ [ವಿಕತ್ತಿಸ್ಸಂ (ಪೀ.)], ಞಾತಿಮಜ್ಝೇ ಇತೋ ಗತೋ;
ತಂ ಹಿತ್ವಾ ಪತತಂ ಸೇಟ್ಠ, ಕಿಂ ತೇ ವಕ್ಖಾಮಿತೋ ಗತೋ;
ಇಧ ಪಾಣಂ ಚಜಿಸ್ಸಾಮಿ, ನಾನರಿಯಂ [ನ ಅನರಿಯಂ (ಪೀ.)] ಕತ್ತುಮುಸ್ಸಹೇ’’.
‘‘ಏಸೋ ¶ ಹಿ ಧಮ್ಮೋ ಸುಮುಖ, ಯಂ ತ್ವಂ ಅರಿಯಪಥೇ ಠಿತೋ;
ಯೋ ಭತ್ತಾರಂ ಸಖಾರಂ ಮಂ, ನ ಪರಿಚ್ಚತ್ತುಮುಸ್ಸಹೇ.
‘‘ತಞ್ಹಿ ಮೇ ಪೇಕ್ಖಮಾನಸ್ಸ, ಭಯಂ ನತ್ವೇವ ಜಾಯತಿ;
ಅಧಿಗಚ್ಛಸಿ ತ್ವಂ ಮಯ್ಹಂ, ಏವಂ ಭೂತಸ್ಸ ಜೀವಿತಂ’’.
‘‘ಇಚ್ಚೇವಂ ¶ [ಇಚ್ಚೇವ (ಸೀ. ಪೀ.)] ಮನ್ತಯನ್ತಾನಂ, ಅರಿಯಾನಂ ಅರಿಯವುತ್ತಿನಂ;
ದಣ್ಡಮಾದಾಯ ನೇಸಾದೋ, ಆಪತೀ [ಆಪದೀ (ಕ.)] ತುರಿತೋ ಭುಸಂ.
‘‘ತಮಾಪತನ್ತಂ ದಿಸ್ವಾನ, ಸುಮುಖೋ ಅತಿಬ್ರೂಹಯಿ [ಅಪರಿಬ್ರೂಹಯಿ (ಸೀ. ಪೀ.)];
ಅಟ್ಠಾಸಿ ಪುರತೋ ರಞ್ಞೋ, ಹಂಸೋ ವಿಸ್ಸಾಸಯಂ ಬ್ಯಧಂ [ಬ್ಯಥಂ (ಸೀ. ಸ್ಯಾ. ಪೀ.)].
‘‘ಮಾ ಭಾಯಿ ಪತತಂ ಸೇಟ್ಠ, ನ ಹಿ ಭಾಯನ್ತಿ ತಾದಿಸಾ;
ಅಹಂ ಯೋಗಂ ಪಯುಞ್ಜಿಸ್ಸಂ, ಯುತ್ತಂ ಧಮ್ಮೂಪಸಂಹಿತಂ;
ತೇನ ಪರಿಯಾಪದಾನೇನ [ಪರಿಯಾದಾನೇನ (ಕ.)], ಖಿಪ್ಪಂ ಪಾಸಾ ಪಮೋಕ್ಖಸಿ’’.
‘‘ತಸ್ಸ ತಂ ವಚನಂ ಸುತ್ವಾ, ಸುಮುಖಸ್ಸ ಸುಭಾಸಿತಂ;
ಪಹಟ್ಠಲೋಮೋ ನೇಸಾದೋ, ಅಞ್ಜಲಿಸ್ಸ ಪಣಾಮಯಿ.
‘‘ನ ಮೇ ಸುತಂ ವಾ ದಿಟ್ಠಂ ವಾ, ಭಾಸನ್ತೋ ಮಾನುಸಿಂ ದಿಜೋ;
ಅರಿಯಂ ಬ್ರುವಾನೋ [ಬ್ರೂಹನ್ತೋ (ಸ್ಯಾ. ಕ.)] ವಕ್ಕಙ್ಗೋ, ಚಜನ್ತೋ ಮಾನುಸಿಂ ಗಿರಂ.
‘‘ಕಿನ್ನು ತಾಯಂ ದಿಜೋ ಹೋತಿ, ಮುತ್ತೋ ಬದ್ಧಂ ಉಪಾಸಸಿ;
ಓಹಾಯ ಸಕುಣಾ ಯನ್ತಿ, ಕಿಂ ಏಕೋ ಅವಹೀಯಸಿ’’.
‘‘ರಾಜಾ ಮೇ ಸೋ ದಿಜಾಮಿತ್ತ, ಸೇನಾಪಚ್ಚಸ್ಸ ಕಾರಯಿಂ;
ತಮಾಪದೇ ಪರಿಚ್ಚತ್ತುಂ, ನುಸ್ಸಹೇ ವಿಹಗಾಧಿಪಂ.
‘‘ಮಹಾಗಣಾಯ ಭತ್ತಾ ಮೇ, ಮಾ ಏಕೋ ಬ್ಯಸನಂ ಅಗಾ;
ತಥಾ ¶ ತಂ ಸಮ್ಮ ನೇಸಾದ, ಭತ್ತಾಯಂ ಅಭಿತೋ ರಮೇ’’.
‘‘ಅರಿಯವತ್ತಸಿ ¶ ವಕ್ಕಙ್ಗ, ಯೋ ಪಿಣ್ಡಮಪಚಾಯಸಿ;
ಚಜಾಮಿ ತೇ ತಂ ಭತ್ತಾರಂ, ಗಚ್ಛಥೂಭೋ [ಗಚ್ಛತು ಭೋ (ಪೀ.)] ಯಥಾಸುಖಂ’’.
‘‘ಸಚೇ ಅತ್ತಪ್ಪಯೋಗೇನ, ಓಹಿತೋ ಹಂಸಪಕ್ಖಿನಂ;
ಪಟಿಗಣ್ಹಾಮ ತೇ ಸಮ್ಮ, ಏತಂ ಅಭಯದಕ್ಖಿಣಂ.
‘‘ನೋ ಚೇ ಅತ್ತಪ್ಪಯೋಗೇನ, ಓಹಿತೋ ಹಂಸಪಕ್ಖಿನಂ;
ಅನಿಸ್ಸರೋ ಮುಞ್ಚಮಮ್ಹೇ, ಥೇಯ್ಯಂ ಕಯಿರಾಸಿ ಲುದ್ದಕ’’.
‘‘ಯಸ್ಸ ತ್ವಂ ಭತಕೋ [ಭಟಕೋ (ಕ.)] ರಞ್ಞೋ, ಕಾಮಂ ತಸ್ಸೇವ ಪಾಪಯ;
ತತ್ಥ ಸಂಯಮನೋ [ಸಂಯಮಾನೋ (ಪೀ.)] ರಾಜಾ, ಯಥಾಭಿಞ್ಞಂ ಕರಿಸ್ಸತಿ’’.
‘‘ಇಚ್ಚೇವಂ ವುತ್ತೋ ನೇಸಾದೋ, ಹೇಮವಣ್ಣೇ ಹರಿತ್ತಚೇ;
ಉಭೋ ಹತ್ಥೇಹಿ ಸಙ್ಗಯ್ಹ [ಪಗ್ಗಯ್ಹ (ಸ್ಯಾ. ಕ.)], ಪಞ್ಜರೇ ಅಜ್ಝವೋದಹಿ.
‘‘ತೇ ಪಞ್ಜರಗತೇ ಪಕ್ಖೀ, ಉಭೋ ಭಸ್ಸರವಣ್ಣಿನೇ;
ಸುಮುಖಂ ಧತರಟ್ಠಞ್ಚ, ಲುದ್ದೋ ಆದಾಯ ಪಕ್ಕಮಿ’’.
‘‘ಹರೀಯಮಾನೋ ¶ ಧತರಟ್ಠೋ, ಸುಮುಖಂ ಏತದಬ್ರವಿ;
ಬಾಳ್ಹಂ ಭಾಯಾಮಿ ಸುಮುಖ, ಸಾಮಾಯ ಲಕ್ಖಣೂರುಯಾ;
ಅಸ್ಮಾಕಂ ವಧಮಞ್ಞಾಯ, ಅಥತ್ತಾನಂ ವಧಿಸ್ಸತಿ.
‘‘ಪಾಕಹಂಸಾ ಚ ಸುಮುಖ, ಸುಹೇಮಾ ಹೇಮಸುತ್ತಚಾ;
ಕೋಞ್ಚೀ ಸಮುದ್ದತೀರೇವ, ಕಪಣಾ ನೂನ ರುಚ್ಛತಿ’’.
‘‘ಏವಂ ಮಹನ್ತೋ ಲೋಕಸ್ಸ, ಅಪ್ಪಮೇಯ್ಯೋ ಮಹಾಗಣೀ;
ಏಕಿತ್ಥಿಮನುಸೋಚೇಯ್ಯ, ನಯಿದಂ ಪಞ್ಞವತಾಮಿವ.
‘‘ವಾತೋವ ¶ ಗನ್ಧಮಾದೇತಿ, ಉಭಯಂ ಛೇಕಪಾಪಕಂ;
ಬಾಲೋ ಆಮಕಪಕ್ಕಂವ, ಲೋಲೋ ಅನ್ಧೋವ ಆಮಿಸಂ.
‘‘ಅವಿನಿಚ್ಛಯಞ್ಞು ಅತ್ಥೇಸು, ಮನ್ದೋವ ಪಟಿಭಾಸಿ [ಪಟಿಭಾತಿ (ಕ.)] ಮಂ;
ಕಿಚ್ಚಾಕಿಚ್ಚಂ ನ ಜಾನಾಸಿ, ಸಮ್ಪತ್ತೋ ಕಾಲಪರಿಯಾಯಂ.
‘‘ಅಡ್ಢುಮ್ಮತ್ತೋ ಉದೀರೇಸಿ, ಯೋ ಸೇಯ್ಯಾ ಮಞ್ಞಸಿತ್ಥಿಯೋ;
ಬಹುಸಾಧಾರಣಾ ಹೇತಾ, ಸೋಣ್ಡಾನಂವ ಸುರಾಘರಂ.
‘‘ಮಾಯಾ ¶ ಚೇಸಾ ಮರೀಚೀ ಚ, ಸೋಕೋ ರೋಗೋ ಚುಪದ್ದವೋ;
ಖರಾ ಚ ಬನ್ಧನಾ ಚೇತಾ, ಮಚ್ಚುಪಾಸಾ ಗುಹಾಸಯಾ [ಪಚ್ಚುಪಾಸೋ ಗುಹಾಸಯೋ (ಸೀ. ಪೀ.)];
ತಾಸು ಯೋ ವಿಸ್ಸಸೇ ಪೋಸೋ, ಸೋ ನರೇಸು ನರಾಧಮೋ’’.
‘‘ಯಂ ವುದ್ಧೇಹಿ ಉಪಞ್ಞಾತಂ, ಕೋ ತಂ ನಿನ್ದಿತುಮರಹತಿ;
ಮಹಾಭೂತಿತ್ಥಿಯೋ ನಾಮ, ಲೋಕಸ್ಮಿಂ ಉದಪಜ್ಜಿಸುಂ.
‘‘ಖಿಡ್ಡಾ ಪಣಿಹಿತಾ ತ್ಯಾಸು, ರತಿ ತ್ಯಾಸು ಪತಿಟ್ಠಿತಾ;
ಬೀಜಾನಿ ತ್ಯಾಸು ರೂಹನ್ತಿ, ಯದಿದಂ ಸತ್ತಾ ಪಜಾಯರೇ;
ತಾಸು ಕೋ ನಿಬ್ಬಿದೇ [ನಿಬ್ಬಿಜೇ (ಕ.)] ಪೋಸೋ, ಪಾಣಮಾಸಜ್ಜ ಪಾಣಿಭಿ [ಪಾಣಹಿ (ಸೀ.)].
‘‘ತ್ವಮೇವ ನಞ್ಞೋ ಸುಮುಖ, ಥೀನಂ ಅತ್ಥೇಸು ಯುಞ್ಜಸಿ;
ತಸ್ಸ ತ್ಯಜ್ಜ ಭಯೇ ಜಾತೇ, ಭೀತೇನ ಜಾಯತೇ ಮತಿ.
‘‘ಸಬ್ಬೋ ಹಿ ಸಂಸಯಂ ಪತ್ತೋ, ಭಯಂ ಭೀರು ತಿತಿಕ್ಖತಿ;
ಪಣ್ಡಿತಾ ಚ ಮಹನ್ತಾನೋ [ಮಹತ್ತಾನೋ (ಸೀ.)], ಅತ್ಥೇ ಯುಞ್ಜನ್ತಿ ದುಯ್ಯುಜೇ.
‘‘ಏತದತ್ಥಾಯ ರಾಜಾನೋ, ಸೂರಮಿಚ್ಛನ್ತಿ ಮನ್ತಿನಂ;
ಪಟಿಬಾಹತಿ ಯಂ ಸೂರೋ, ಆಪದಂ ಅತ್ತಪರಿಯಾಯಂ.
‘‘ಮಾ ¶ ನೋ ಅಜ್ಜ ವಿಕನ್ತಿಂಸು, ರಞ್ಞೋ ಸೂದಾ ಮಹಾನಸೇ;
ತಥಾ ಹಿ ವಣ್ಣೋ ಪತ್ತಾನಂ, ಫಲಂ ವೇಳುಂವ ತಂ ವಧಿ.
‘‘ಮುತ್ತೋಪಿ ¶ ನ ಇಚ್ಛಿ [ನಿಚ್ಛಸಿ (ಕ.)] ಉಡ್ಡೇತುಂ [ಓಡ್ಡೇತುಂ (ಸೀ.)], ಸಯಂ ಬನ್ಧಂ ಉಪಾಗಮಿ;
ಸೋಪಜ್ಜ ಸಂಸಯಂ ಪತ್ತೋ, ಅತ್ಥಂ ಗಣ್ಹಾಹಿ ಮಾ ಮುಖಂ’’.
‘‘ಸೋ ತಂ [ತ್ವಂ (ಸ್ಯಾ. ಪೀ.)] ಯೋಗಂ ಪಯುಞ್ಜಸ್ಸು, ಯುತ್ತಂ ಧಮ್ಮೂಪಸಂಹಿತಂ [ಧಮ್ಮೋಪಸಞ್ಹಿತಂ (ಕ.)];
ತವ ಪರಿಯಾಪದಾನೇನ, ಮಮ ಪಾಣೇಸನಂ ಚರ’’.
‘‘ಮಾ ಭಾಯಿ ಪತತಂ ಸೇಟ್ಠ, ನ ಹಿ ಭಾಯನ್ತಿ ತಾದಿಸಾ;
ಅಹಂ ಯೋಗಂ ಪಯುಞ್ಜಿಸ್ಸಂ, ಯುತ್ತಂ ಧಮ್ಮೂಪಸಂಹಿತಂ [ಧಮ್ಮೋಪಸಞ್ಹಿತಂ (ಕ.)];
ಮಮ ಪರಿಯಾಪದಾನೇನ, ಖಿಪ್ಪಂ ಪಾಸಾ ಪಮೋಕ್ಖಸಿ’’.
‘‘ಸೋ [ಸ (ಸೀ.)] ಲುದ್ದೋ ಹಂಸಕಾಜೇನ [ಹಂಸಕಾಚೇನ (ಪೀ.)], ರಾಜದ್ವಾರಂ ಉಪಾಗಮಿ;
ಪಟಿವೇದೇಥ ಮಂ ರಞ್ಞೋ, ಧತರಟ್ಠಾಯಮಾಗತೋ’’.
‘‘ತೇ ¶ ದಿಸ್ವಾ ಪುಞ್ಞಸಂಕಾಸೇ, ಉಭೋ ಲಕ್ಖಣಸಮ್ಮತೇ [ಲಕ್ಖಞ್ಞಾಸಮ್ಮತೇ (ಸೀ. ಪೀ.)];
ಖಲು ಸಂಯಮನೋ ರಾಜಾ, ಅಮಚ್ಚೇ ಅಜ್ಝಭಾಸಥ.
‘‘ದೇಥ ಲುದ್ದಸ್ಸ ವತ್ಥಾನಿ, ಅನ್ನಂ ಪಾನಞ್ಚ ಭೋಜನಂ;
ಕಾಮಂ ಕರೋ ಹಿರಞ್ಞಸ್ಸ, ಯಾವನ್ತೋ ಏಸ ಇಚ್ಛತಿ’’.
‘‘ದಿಸ್ವಾ ಲುದ್ದಂ ಪಸನ್ನತ್ತಂ, ಕಾಸಿರಾಜಾ ತದಬ್ರವಿ;
ಯದ್ಯಾಯಂ [ಯದಾಯಂ (ಸೀ. ಸ್ಯಾ. ಪೀ.)] ಸಮ್ಮ ಖೇಮಕ, ಪುಣ್ಣಾ ಹಂಸೇಹಿ ತಿಟ್ಠತಿ.
‘‘ಕಥಂ ರುಚಿಮಜ್ಝಗತಂ, ಪಾಸಹತ್ಥೋ ಉಪಾಗಮಿ;
ಓಕಿಣ್ಣಂ ಞಾತಿಸಙ್ಘೇಹಿ, ನಿಮ್ಮಜ್ಝಿಮಂ [ನಿಮಜ್ಝಿಮಂ (ಸೀ. ಪೀ. ಕ.)] ಕಥಂ ಗಹಿ’’.
‘‘ಅಜ್ಜ ಮೇ ಸತ್ತಮಾ ರತ್ತಿ, ಅದನಾನಿ [ಆದಾನಾನಿ (ಸ್ಯಾ. ಪೀ. ಕ.)] ಉಪಾಸತೋ [ಉಪಾಗತೋ (ಕ.)];
ಪದಮೇತಸ್ಸ ¶ ಅನ್ವೇಸಂ, ಅಪ್ಪಮತ್ತೋ ಘಟಸ್ಸಿತೋ.
‘‘ಅಥಸ್ಸ ಪದಮದ್ದಕ್ಖಿಂ, ಚರತೋ ಅದನೇಸನಂ;
ತತ್ಥಾಹಂ ಓದಹಿಂ ಪಾಸಂ, ಏವಂ ತಂ [ಏವೇತಂ (ಸೀ. ಪೀ.)] ದಿಜಮಗ್ಗಹಿಂ’’.
‘‘ಲುದ್ದ ದ್ವೇ ಇಮೇ ಸಕುಣಾ, ಅಥ ಏಕೋತಿ ಭಾಸಸಿ;
ಚಿತ್ತಂ ನು ತೇ ವಿಪರಿಯತ್ತಂ [ವಿಪರಿಯತ್ಥಂ (ಪೀ.)], ಅದು ಕಿನ್ನು ಜಿಗೀಸಸಿ’’ [ಜಿಗಿಂಸಸಿ (ಸೀ. ಪೀ.)].
‘‘ಯಸ್ಸ ಲೋಹಿತಕಾ ತಾಲಾ, ತಪನೀಯನಿಭಾ ಸುಭಾ;
ಉರಂ ಸಂಹಚ್ಚ ತಿಟ್ಠನ್ತಿ, ಸೋ ಮೇ ಬನ್ಧಂ ಉಪಾಗಮಿ.
‘‘ಅಥಾಯಂ ಭಸ್ಸರೋ ಪಕ್ಖೀ, ಅಬದ್ಧೋ ಬದ್ಧಮಾತುರಂ;
ಅರಿಯಂ ಬ್ರುವಾನೋ ಅಟ್ಠಾಸಿ, ಚಜನ್ತೋ ಮಾನುಸಿಂ ಗಿರಂ’’.
‘‘ಅಥ ಕಿಂ [ಅಥ ಕಿನ್ನು (ಸೀ. ಪೀ.), ಕಥಂ ನು (ಸ್ಯಾ.)] ದಾನಿ ಸುಮುಖ, ಹನುಂ ಸಂಹಚ್ಚ ತಿಟ್ಠಸಿ;
ಅದು ಮೇ ಪರಿಸಂ ಪತ್ತೋ, ಭಯಾ ಭೀತೋ ನ ಭಾಸಸಿ’’.
‘‘ನಾಹಂ ¶ ಕಾಸಿಪತಿ ಭೀತೋ, ಓಗಯ್ಹ ಪರಿಸಂ ತವ;
ನಾಹಂ ಭಯಾ ನ ಭಾಸಿಸ್ಸಂ, ವಾಕ್ಯಂ ಅತ್ಥಮ್ಹಿ ತಾದಿಸೇ’’.
‘‘ನ ತೇ ಅಭಿಸರಂ ಪಸ್ಸೇ, ನ ರಥೇ ನಪಿ ಪತ್ತಿಕೇ;
ನಾಸ್ಸ ಚಮ್ಮಂ ವ ಕೀಟಂ ವಾ, ವಮ್ಮಿತೇ ಚ ಧನುಗ್ಗಹೇ.
‘‘ನ ¶ ಹಿರಞ್ಞಂ ಸುವಣ್ಣಂ ವಾ, ನಗರಂ ವಾ ಸುಮಾಪಿತಂ;
ಓಕಿಣ್ಣಪರಿಖಂ ದುಗ್ಗಂ, ದಳ್ಹಮಟ್ಟಾಲಕೋಟ್ಠಕಂ;
ಯತ್ಥ ಪವಿಟ್ಠೋ ಸುಮುಖ, ಭಾಯಿತಬ್ಬಂ ನ ಭಾಯಸಿ’’.
‘‘ನ ಮೇ ಅಭಿಸರೇನತ್ಥೋ, ನಗರೇನ ಧನೇನ ವಾ;
ಅಪಥೇನ ಪಥಂ ಯಾಮ, ಅನ್ತಲಿಕ್ಖೇಚರಾ ಮಯಂ.
‘‘ಸುತಾ ¶ ಚ ಪಣ್ಡಿತಾ ತ್ಯಮ್ಹಾ, ನಿಪುಣಾ ಅತ್ಥಚಿನ್ತಕಾ [ಚತ್ಥಚಿನ್ತಕಾ (ಕ.)];
ಭಾಸೇಮತ್ಥವತಿಂ ವಾಚಂ, ಸಚ್ಚೇ ಚಸ್ಸ ಪತಿಟ್ಠಿತೋ.
‘‘ಕಿಞ್ಚ ತುಯ್ಹಂ ಅಸಚ್ಚಸ್ಸ, ಅನರಿಯಸ್ಸ ಕರಿಸ್ಸತಿ;
ಮುಸಾವಾದಿಸ್ಸ ಲುದ್ದಸ್ಸ, ಭಣಿತಮ್ಪಿ ಸುಭಾಸಿತಂ’’.
‘‘ತಂ ಬ್ರಾಹ್ಮಣಾನಂ ವಚನಾ, ಇಮಂ ಖೇಮಮಕಾರಯಿ [ಖೇಮಿಕಾರಯಿ (ಸೀ. ಪೀ.)];
ಅಭಯಞ್ಚ ತಯಾ ಘುಟ್ಠಂ, ಇಮಾಯೋ ದಸಧಾ ದಿಸಾ.
‘‘ಓಗಯ್ಹ ತೇ ಪೋಕ್ಖರಣಿಂ, ವಿಪ್ಪಸನ್ನೋದಕಂ ಸುಚಿಂ;
ಪಹೂತಂ ಚಾದನಂ ತತ್ಥ, ಅಹಿಂಸಾ ಚೇತ್ಥ ಪಕ್ಖಿನಂ.
‘‘ಇದಂ ಸುತ್ವಾನ ನಿಗ್ಘೋಸಂ, ಆಗತಮ್ಹ ತವನ್ತಿಕೇ;
ತೇ ತೇ ಬನ್ಧಸ್ಮ ಪಾಸೇನ, ಏತಂ ತೇ ಭಾಸಿತಂ ಮುಸಾ.
‘‘ಮುಸಾವಾದಂ ಪುರಕ್ಖತ್ವಾ, ಇಚ್ಛಾಲೋಭಞ್ಚ ಪಾಪಕಂ;
ಉಭೋ ಸನ್ಧಿಮತಿಕ್ಕಮ್ಮ, ಅಸಾತಂ ಉಪಪಜ್ಜತಿ’’.
‘‘ನಾಪರಜ್ಝಾಮ ಸುಮುಖ, ನಪಿ ಲೋಭಾವ ಮಗ್ಗಹಿಂ;
ಸುತಾ ಚ ಪಣ್ಡಿತಾತ್ಯತ್ಥ, ನಿಪುಣಾ ಅತ್ಥಚಿನ್ತಕಾ.
‘‘ಅಪ್ಪೇವತ್ಥವತಿಂ ವಾಚಂ, ಬ್ಯಾಹರೇಯ್ಯುಂ [ಬ್ಯಾಕರೇಯ್ಯುಂ (ಸೀ. ಪೀ.)] ಇಧಾಗತಾ;
ತಥಾ ತಂ ಸಮ್ಮ ನೇಸಾದೋ, ವುತ್ತೋ ಸುಮುಖ ಮಗ್ಗಹಿ’’.
‘‘ನೇವ ಭೀತಾ [ಭೂತಾ (ಸ್ಯಾ. ಕ.)] ಕಾಸಿಪತಿ, ಉಪನೀತಸ್ಮಿ ಜೀವಿತೇ;
ಭಾಸೇಮತ್ಥವತಿಂ ವಾಚಂ, ಸಮ್ಪತ್ತಾ ಕಾಲಪರಿಯಾಯಂ.
‘‘ಯೋ ಮಿಗೇನ ಮಿಗಂ ಹನ್ತಿ, ಪಕ್ಖಿಂ ವಾ ಪನ ಪಕ್ಖಿನಾ;
ಸುತೇನ ವಾ ಸುತಂ ಕಿಣ್ಯಾ [ಕಿಣೇ (ಸೀ. ಪೀ.)], ಕಿಂ ಅನರಿಯತರಂ ತತೋ.
‘‘ಯೋ ¶ ¶ ¶ ಚಾರಿಯರುದಂ [ಚ ಅರಿಯರುದಂ (ಸೀ. ಪೀ.)] ಭಾಸೇ, ಅನರಿಯಧಮ್ಮವಸ್ಸಿತೋ [ಅನರಿಯಧಮ್ಮಮವಸ್ಸಿತೋ (ಸೀ.)];
ಉಭೋ ಸೋ ಧಂಸತೇ ಲೋಕಾ, ಇಧ ಚೇವ ಪರತ್ಥ ಚ.
‘‘ನ ಮಜ್ಜೇಥ ಯಸಂ ಪತ್ತೋ, ನ ಬ್ಯಾಧೇ [ಬ್ಯಥೇ (ಸೀ. ಪೀ.)] ಪತ್ತಸಂಸಯಂ;
ವಾಯಮೇಥೇವ ಕಿಚ್ಚೇಸು, ಸಂವರೇ ವಿವರಾನಿ ಚ.
‘‘ಯೇ ವುದ್ಧಾ ಅಬ್ಭತಿಕ್ಕನ್ತಾ [ನಾಬ್ಭಚಿಕ್ಖನ್ತಾ (ಕ.)], ಸಮ್ಪತ್ತಾ ಕಾಲಪರಿಯಾಯಂ;
ಇಧ ಧಮ್ಮಂ ಚರಿತ್ವಾನ, ಏವಂತೇ [ಏವೇತೇ (ಸೀ. ಪೀ.)] ತಿದಿವಂ ಗತಾ.
‘‘ಇದಂ ಸುತ್ವಾ ಕಾಸಿಪತಿ, ಧಮ್ಮಮತ್ತನಿ ಪಾಲಯ;
ಧತರಟ್ಠಞ್ಚ ಮುಞ್ಚಾಹಿ, ಹಂಸಾನಂ ಪವರುತ್ತಮಂ’’.
‘‘ಆಹರನ್ತುದಕಂ ಪಜ್ಜಂ, ಆಸನಞ್ಚ ಮಹಾರಹಂ;
ಪಞ್ಜರತೋ ಪಮೋಕ್ಖಾಮಿ, ಧತರಟ್ಠಂ ಯಸಸ್ಸಿನಂ.
‘‘ತಞ್ಚ ಸೇನಾಪತಿಂ ಧೀರಂ, ನಿಪುಣಂ ಅತ್ಥಚಿನ್ತಕಂ;
ಯೋ ಸುಖೇ ಸುಖಿತೋ ರಞ್ಞೇ [ರಞ್ಞೋ (ಸೀ. ಸ್ಯಾ. ಪೀ. ಕ.)], ದುಕ್ಖಿತೇ ಹೋತಿ ದುಕ್ಖಿತೋ.
‘‘ಏದಿಸೋ ಖೋ ಅರಹತಿ, ಪಿಣ್ಡಮಸ್ನಾತು ಭತ್ತುನೋ;
ಯಥಾಯಂ ಸುಮುಖೋ ರಞ್ಞೋ, ಪಾಣಸಾಧಾರಣೋ ಸಖಾ’’.
‘‘ಪೀಠಞ್ಚ ಸಬ್ಬಸೋವಣ್ಣಂ, ಅಟ್ಠಪಾದಂ ಮನೋರಮಂ;
ಮಟ್ಠಂ ಕಾಸಿಕಮತ್ಥನ್ನಂ [ಕಾಸಿಕಪತ್ಥಿಣ್ಣಂ (ಸೀ.), ಕಾಸಿಕವತ್ಥಿನಂ (ಸ್ಯಾ. ಪೀ.)], ಧತರಟ್ಠೋ ಉಪಾವಿಸಿ.
‘‘ಕೋಚ್ಛಞ್ಚ ಸಬ್ಬಸೋವಣ್ಣಂ, ವೇಯ್ಯಗ್ಘಪರಿಸಿಬ್ಬಿತಂ;
ಸುಮುಖೋ ಅಜ್ಝುಪಾವೇಕ್ಖಿ, ಧತರಟ್ಠಸ್ಸನನ್ತರಾ [ಅನನ್ತರಂ (ಸೀ.)].
‘‘ತೇಸಂ ಕಞ್ಚನಪತ್ತೇಹಿ, ಪುಥೂ ಆದಾಯ ಕಾಸಿಯೋ;
ಹಂಸಾನಂ ಅಭಿಹಾರೇಸುಂ, ಅಗ್ಗರಞ್ಞೋ ಪವಾಸಿತಂ’’.
‘‘ದಿಸ್ವಾ ¶ ಅಭಿಹಟಂ ಅಗ್ಗಂ, ಕಾಸಿರಾಜೇನ ಪೇಸಿತಂ;
ಕುಸಲೋ ಖತ್ತಧಮ್ಮಾನಂ, ತತೋ ಪುಚ್ಛಿ ಅನನ್ತರಾ.
‘‘ಕಚ್ಚಿನ್ನು ಭೋತೋ ಕುಸಲಂ, ಕಚ್ಚಿ ಭೋತೋ ಅನಾಮಯಂ;
ಕಚ್ಚಿ ರಟ್ಠಮಿದಂ ಫೀತಂ, ಧಮ್ಮೇನ ಮನುಸಾಸಸಿ’’.
‘‘ಕುಸಲಞ್ಚೇವ ¶ ಮೇ ಹಂಸ, ಅಥೋ ಹಂಸ ಅನಾಮಯಂ;
ಅಥೋ ರಟ್ಠಮಿದಂ ಫೀತಂ, ಧಮ್ಮೇನಂ ಮನುಸಾಸಹಂ.
‘‘ಕಚ್ಚಿ ಭೋತೋ ಅಮಚ್ಚೇಸು, ದೋಸೋ ಕೋಚಿ ನ ವಿಜ್ಜತಿ;
ಕಚ್ಚಿ ಚ ತೇ ತವತ್ಥೇಸು, ನಾವಕಙ್ಖನ್ತಿ ಜೀವಿತಂ’’.
‘‘ಅಥೋಪಿ ಮೇ ಅಮಚ್ಚೇಸು, ದೋಸೋ ಕೋಚಿ ನ ವಿಜ್ಜತಿ;
ಅಥೋಪಿ ತೇ ಮಮತ್ಥೇಸು, ನಾವಕಙ್ಖನ್ತಿ ಜೀವಿತಂ’’.
‘‘ಕಚ್ಚಿ ¶ ತೇ ಸಾದಿಸೀ ಭರಿಯಾ, ಅಸ್ಸವಾ ಪಿಯಭಾಣಿನೀ;
ಪುತ್ತರೂಪಯಸೂಪೇತಾ, ತವ ಛನ್ದವಸಾನುಗಾ’’.
‘‘ಅಥೋ ಮೇ ಸಾದಿಸೀ ಭರಿಯಾ, ಅಸ್ಸವಾ ಪಿಯಭಾಣಿನೀ;
ಪುತ್ತರೂಪಯಸೂಪೇತಾ, ಮಮ ಛನ್ದವಸಾನುಗಾ’’.
‘‘ಕಚ್ಚಿ ರಟ್ಠಂ ಅನುಪ್ಪೀಳಂ, ಅಕುತೋಚಿಉಪದ್ದವಂ;
ಅಸಾಹಸೇನ ಧಮ್ಮೇನ, ಸಮೇನ ಮನುಸಾಸಸಿ’’.
‘‘ಅಥೋ ರಟ್ಠಂ ಅನುಪ್ಪೀಳಂ, ಅಕುತೋಚಿಉಪದ್ದವಂ;
ಅಸಾಹಸೇನ ಧಮ್ಮೇನ, ಸಮೇನ ಮನುಸಾಸಹಂ’’.
‘‘ಕಚ್ಚಿ ಸನ್ತೋ ಅಪಚಿತಾ, ಅಸನ್ತೋ ಪರಿವಜ್ಜಿತಾ;
ನೋ ಚೇ [ಚ (ಸ್ಯಾ. ಕ.)] ಧಮ್ಮಂ ನಿರಂಕತ್ವಾ, ಅಧಮ್ಮಮನುವತ್ತಸಿ’’.
‘‘ಸನ್ತೋ ¶ ಚ ಮೇ ಅಪಚಿತಾ, ಅಸನ್ತೋ ಪರಿವಜ್ಜಿತಾ;
ಧಮ್ಮಮೇವಾನುವತ್ತಾಮಿ, ಅಧಮ್ಮೋ ಮೇ ನಿರಙ್ಕತೋ’’.
‘‘ಕಚ್ಚಿ ನಾನಾಗತಂ [ಕಚ್ಚಿ ನುನಾಗತಂ (ಸ್ಯಾ. ಕ.)] ದೀಘಂ, ಸಮವೇಕ್ಖಸಿ ಖತ್ತಿಯ;
ಕಚ್ಚಿ ಮತ್ತೋ [ನ ಮತ್ತೋ (ಸೀ.)] ಮದನೀಯೇ, ಪರಲೋಕಂ ನ ಸನ್ತಸಿ’’.
‘‘ನಾಹಂ ಅನಾಗತಂ [ಅಹಂ ಅನಾಗತಂ (ಸ್ಯಾ.)] ದೀಘಂ, ಸಮವೇಕ್ಖಾಮಿ ಪಕ್ಖಿಮ;
ಠಿತೋ ದಸಸು ಧಮ್ಮೇಸು, ಪರಲೋಕಂ ನ ಸನ್ತಸೇ [ಸನ್ತಸಿಂ (ಸ್ಯಾ.)].
‘‘ದಾನಂ ಸೀಲಂ ಪರಿಚ್ಚಾಗಂ, ಅಜ್ಜವಂ ಮದ್ದವಂ ತಪಂ;
ಅಕ್ಕೋಧಂ ಅವಿಹಿಂಸಞ್ಚ, ಖನ್ತಿಞ್ಚ [ಖನ್ತೀ ಚ (ಕ.)] ಅವಿರೋಧನಂ.
‘‘ಇಚ್ಚೇತೇ ಕುಸಲೇ ಧಮ್ಮೇ, ಠಿತೇ ಪಸ್ಸಾಮಿ ಅತ್ತನಿ;
ತತೋ ಮೇ ಜಾಯತೇ ಪೀತಿ, ಸೋಮನಸ್ಸಞ್ಚನಪ್ಪಕಂ.
‘‘ಸುಮುಖೋ ¶ ಚ ಅಚಿನ್ತೇತ್ವಾ, ವಿಸಜ್ಜಿ [ವಿಸ್ಸಜಿ (ಸೀ. ಪೀ.)] ಫರುಸಂ ಗಿರಂ;
ಭಾವದೋಸಮನಞ್ಞಾಯ, ಅಸ್ಮಾಕಾಯಂ ವಿಹಙ್ಗಮೋ.
‘‘ಸೋ ಕುದ್ಧೋ ಫರುಸಂ ವಾಚಂ, ನಿಚ್ಛಾರೇಸಿ ಅಯೋನಿಸೋ;
ಯಾನಸ್ಮಾಸು [ಯಾನಸ್ಮಾಸು (ಸೀ. ಸ್ಯಾ ಪೀ.)] ನ ವಿಜ್ಜನ್ತಿ, ನಯಿದಂ [ನ ಇದಂ (ಸೀ. ಪೀ.)] ಪಞ್ಞವತಾಮಿವ’’.
‘‘ಅತ್ಥಿ ಮೇ ತಂ ಅತಿಸಾರಂ, ವೇಗೇನ ಮನುಜಾಧಿಪ;
ಧತರಟ್ಠೇ ಚ ಬದ್ಧಸ್ಮಿಂ, ದುಕ್ಖಂ ಮೇ ವಿಪುಲಂ ಅಹು.
‘‘ತ್ವಂ ನೋ ಪಿತಾವ ಪುತ್ತಾನಂ, ಭೂತಾನಂ ಧರಣೀರಿವ;
ಅಸ್ಮಾಕಂ ಅಧಿಪನ್ನಾನಂ, ಖಮಸ್ಸು ರಾಜಕುಞ್ಜರ’’.
‘‘ಏತಂ [ಏವಂ (ಸ್ಯಾ. ಕ.)] ತೇ ಅನುಮೋದಾಮ, ಯಂ ಭಾವಂ ನ ನಿಗೂಹಸಿ;
ಖಿಲಂ ಪಭಿನ್ದಸಿ ಪಕ್ಖಿ, ಉಜುಕೋಸಿ ವಿಹಙ್ಗಮ’’.
‘‘ಯಂ ¶ ¶ ಕಿಞ್ಚಿ ರತನಂ ಅತ್ಥಿ, ಕಾಸಿರಾಜ ನಿವೇಸನೇ;
ರಜತಂ ಜಾತರೂಪಞ್ಚ, ಮುತ್ತಾ ವೇಳುರಿಯಾ ಬಹೂ.
‘‘ಮಣಯೋ ಸಙ್ಖಮುತ್ತಞ್ಚ, ವತ್ಥಕಂ ಹರಿಚನ್ದನಂ;
ಅಜಿನಂ ದನ್ತಭಣ್ಡಞ್ಚ, ಲೋಹಂ ಕಾಳಾಯಸಂ ಬಹುಂ;
ಏತಂ ದದಾಮಿ ವೋ ವಿತ್ತಂ, ಇಸ್ಸರಿಯಂ [ಇಸ್ಸೇರಂ (ಸೀ.), ಇಸ್ಸರಂ (ಸ್ಯಾ. ಪೀ. ಕ.)] ವಿಸ್ಸಜಾಮಿ ವೋ’’.
‘‘ಅದ್ಧಾ ಅಪಚಿತಾ ತ್ಯಮ್ಹಾ, ಸಕ್ಕತಾ ಚ ರಥೇಸಭ;
ಧಮ್ಮೇಸು ವತ್ತಮಾನಾನಂ, ತ್ವಂ ನೋ ಆಚರಿಯೋ ಭವ.
‘‘ಆಚರಿಯ ಸಮನುಞ್ಞಾತಾ, ತಯಾ ಅನುಮತಾ ಮಯಂ;
ತಂ ಪದಕ್ಖಿಣತೋ ಕತ್ವಾ, ಞಾತಿಂ [ಞಾತೀ (ಸೀ. ಸ್ಯಾ. ಪೀ.)] ಪಸ್ಸೇಮುರಿನ್ದಮ’’ [ಪಸ್ಸೇಮರಿನ್ದಮ (ಸೀ. ಪೀ.)].
‘‘ಸಬ್ಬರತ್ತಿಂ ಚಿನ್ತಯಿತ್ವಾ, ಮನ್ತಯಿತ್ವಾ ಯಥಾತಥಂ;
ಕಾಸಿರಾಜಾ ಅನುಞ್ಞಾಸಿ, ಹಂಸಾನಂ ಪವರುತ್ತಮಂ’’.
‘‘ತತೋ ರತ್ಯಾ ವಿವಸಾನೇ, ಸೂರಿಯುಗ್ಗಮನಂ [ಸುರಿಯಸ್ಸುಗ್ಗಮನಂ (ಸೀ. ಸ್ಯಾ.), ಸುರಿಯುಗ್ಗಮನಂ (ಪೀ.)] ಪತಿ;
ಪೇಕ್ಖತೋ ಕಾಸಿರಾಜಸ್ಸ, ಭವನಾ ತೇ [ಭವನತೋ (ಸ್ಯಾ. ಕ.)] ವಿಗಾಹಿಸುಂ’’.
‘‘ತೇ ಅರೋಗೇ ಅನುಪ್ಪತ್ತೇ, ದಿಸ್ವಾನ ಪರಮೇ ದಿಜೇ;
ಕೇಕಾತಿ ಮಕರುಂ ಹಂಸಾ, ಪುಥುಸದ್ದೋ ಅಜಾಯಥ.
‘‘ತೇ ¶ ಪತೀತಾ ಪಮುತ್ತೇನ, ಭತ್ತುನಾ ಭತ್ತುಗಾರವಾ;
ಸಮನ್ತಾ ಪರಿಕಿರಿಂಸು, ಅಣ್ಡಜಾ ಲದ್ಧಪಚ್ಚಯಾ’’.
‘‘ಏವಂ ಮಿತ್ತವತಂ ಅತ್ಥಾ, ಸಬ್ಬೇ ಹೋನ್ತಿ ಪದಕ್ಖಿಣಾ;
ಹಂಸಾ ಯಥಾ ಧತರಟ್ಠಾ, ಞಾತಿಸಙ್ಘಂ ಉಪಾಗಮು’’ನ್ತಿ.
ಮಹಾಹಂಸಜಾತಕಂ ದುತಿಯಂ.
೫೩೫. ಸುಧಾಭೋಜನಜಾತಕಂ (೩)
‘‘ನೇವ ¶ ಕಿಣಾಮಿ ನಪಿ ವಿಕ್ಕಿಣಾಮಿ, ನ ಚಾಪಿ ಮೇ ಸನ್ನಿಚಯೋ ಚ ಅತ್ಥಿ [ಇಧತ್ಥಿ (ಸ್ಯಾ.)];
ಸುಕಿಚ್ಛರೂಪಂ ವತಿದಂ ಪರಿತ್ತಂ, ಪತ್ಥೋದನೋ ನಾಲಮಯಂ ದುವಿನ್ನಂ’’.
‘‘ಅಪ್ಪಮ್ಹಾ ಅಪ್ಪಕಂ ದಜ್ಜಾ, ಅನುಮಜ್ಝತೋ ಮಜ್ಝಕಂ;
ಬಹುಮ್ಹಾ ಬಹುಕಂ ದಜ್ಜಾ, ಅದಾನಂ ನುಪಪಜ್ಜತಿ [ನ ಉಪಪಜ್ಜತಿ (ಸೀ. ಪೀ.)].
‘‘ತಂ ತಂ ವದಾಮಿ ಕೋಸಿಯ, ದೇಹಿ ದಾನಾನಿ ಭುಞ್ಜ ಚ;
ಅರಿಯಮಗ್ಗಂ ಸಮಾರೂಹ [ಅರಿಯಂ ಮಗ್ಗಂ ಸಮಾರುಹ (ಸೀ. ಪೀ.)], ನೇಕಾಸೀ ಲಭತೇ ಸುಖಂ’’.
‘‘ಮೋಘಞ್ಚಸ್ಸ ¶ ಹುತಂ ಹೋತಿ, ಮೋಘಞ್ಚಾಪಿ ಸಮೀಹಿತಂ;
ಅತಿಥಿಸ್ಮಿಂ ಯೋ ನಿಸಿನ್ನಸ್ಮಿಂ, ಏಕೋ ಭುಞ್ಜತಿ ಭೋಜನಂ.
‘‘ತಂ ತಂ ವದಾಮಿ ಕೋಸಿಯ, ದೇಹಿ ದಾನಾನಿ ಭುಞ್ಜ ಚ;
ಅರಿಯಮಗ್ಗಂ ಸಮಾರೂಹ, ನೇಕಾಸೀ ಲಭತೇ ಸುಖಂ’’.
‘‘ಸಚ್ಚಞ್ಚಸ್ಸ ಹುತಂ ಹೋತಿ, ಸಚ್ಚಞ್ಚಾಪಿ ಸಮೀಹಿತಂ;
ಅತಿಥಿಸ್ಮಿಂ ಯೋ ನಿಸಿನ್ನಸ್ಮಿಂ, ನೇಕೋ ಭುಞ್ಜತಿ ಭೋಜನಂ.
‘‘ತಂ ತಂ ವದಾಮಿ ಕೋಸಿಯ, ದೇಹಿ ದಾನಾನಿ ಭುಞ್ಜ ಚ;
ಅರಿಯಮಗ್ಗಂ ಸಮಾರೂಹ, ನೇಕಾಸೀ ಲಭತೇ ಸುಖಂ’’.
‘‘ಸರಞ್ಚ ಜುಹತಿ ಪೋಸೋ, ಬಹುಕಾಯ ಗಯಾಯ ಚ;
ದೋಣೇ ತಿಮ್ಬರುತಿತ್ಥಸ್ಮಿಂ, ಸೀಘಸೋತೇ ಮಹಾವಹೇ.
‘‘ಅತ್ರ ಚಸ್ಸ ಹುತಂ ಹೋತಿ, ಅತ್ರ ಚಸ್ಸ ಸಮೀಹಿತಂ;
ಅತಿಥಿಸ್ಮಿಂ ¶ ಯೋ ನಿಸಿನ್ನಸ್ಮಿಂ, ನೇಕೋ ಭುಞ್ಜತಿ ಭೋಜನಂ.
‘‘ತಂ ¶ ತಂ ವದಾಮಿ ಕೋಸಿಯ, ದೇಹಿ ದಾನಾನಿ ಭುಞ್ಜ ಚ;
ಅರಿಯಮಗ್ಗಂ ಸಮಾರೂಹ, ನೇಕಾಸೀ ಲಭತೇ ಸುಖಂ’’.
‘‘ಬಳಿಸಞ್ಹಿ ಸೋ ನಿಗಿಲತಿ [ನಿಗ್ಗಿಲತಿ (ಸೀ. ಪೀ.)], ದೀಘಸುತ್ತಂ ಸಬನ್ಧನಂ;
ಅತಿಥಿಸ್ಮಿಂ ಯೋ ನಿಸಿನ್ನಸ್ಮಿಂ, ಏಕೋ ಭುಞ್ಜತಿ ಭೋಜನಂ.
‘‘ತಂ ತಂ ವದಾಮಿ ಕೋಸಿಯ, ದೇಹಿ ದಾನಾನಿ ಭುಞ್ಜ ಚ;
ಅರಿಯಮಗ್ಗಂ ಸಮಾರೂಹ, ನೇಕಾಸೀ ಲಭತೇ ಸುಖಂ’’.
‘‘ಉಳಾರವಣ್ಣಾ ವತ ಬ್ರಾಹ್ಮಣಾ ಇಮೇ, ಅಯಞ್ಚ ವೋ ಸುನಖೋ ಕಿಸ್ಸ ಹೇತು;
ಉಚ್ಚಾವಚಂ ವಣ್ಣನಿಭಂ ವಿಕುಬ್ಬತಿ, ಅಕ್ಖಾಥ ನೋ ಬ್ರಾಹ್ಮಣಾ ಕೇ ನು ತುಮ್ಹೇ’’.
‘‘ಚನ್ದೋ ಚ ಸೂರಿಯೋ ಚ [ಸೂರಿಯೋ ಚ (ಕ.)] ಉಭೋ ಇಧಾಗತಾ, ಅಯಂ ಪನ ಮಾತಲಿ ದೇವಸಾರಥಿ;
ಸಕ್ಕೋಹಮಸ್ಮಿ ತಿದಸಾನಮಿನ್ದೋ, ಏಸೋ ಚ ಖೋ ಪಞ್ಚಸಿಖೋತಿ ವುಚ್ಚತಿ.
‘‘ಪಾಣಿಸ್ಸರಾ ಮುದಿಙ್ಗಾ ಚ [ಮುತಿಙ್ಗಾ ಚ (ಸೀ. ಸ್ಯಾ. ಪೀ.)], ಮುರಜಾಲಮ್ಬರಾನಿ ಚ;
ಸುತ್ತಮೇನಂ ಪಬೋಧೇನ್ತಿ, ಪಟಿಬುದ್ಧೋ ಚ ನನ್ದತಿ’’.
‘‘ಯೇ ಕೇಚಿಮೇ ಮಚ್ಛರಿನೋ ಕದರಿಯಾ, ಪರಿಭಾಸಕಾ ಸಮಣಬ್ರಾಹ್ಮಣಾನಂ;
ಇಧೇವ ನಿಕ್ಖಿಪ್ಪ ಸರೀರದೇಹಂ, ಕಾಯಸ್ಸ ¶ ಭೇದಾ ನಿರಯಂ ವಜನ್ತಿ’’.
‘‘ಯೇ ಕೇಚಿಮೇ ಸುಗ್ಗತಿಮಾಸಮಾನಾ [ಸುಗ್ಗತಿಮಾಸಸಾನಾ (ಸೀ. ಪೀ.), ಸುಗ್ಗತಾಸಿಸಮಾನಾ (ಕ.)], ಧಮ್ಮೇ ಠಿತಾ ಸಂಯಮೇ ಸಂವಿಭಾಗೇ;
ಇಧೇವ ನಿಕ್ಖಿಪ್ಪ ಸರೀರದೇಹಂ, ಕಾಯಸ್ಸ ಭೇದಾ ಸುಗತಿಂ ವಜನ್ತಿ’’.
‘‘ತ್ವಂ ¶ ನೋಸಿ ಞಾತಿ ಪುರಿಮಾಸು ಜಾತಿಸು, ಸೋ ಮಚ್ಛರೀ ರೋಸಕೋ [ಕೋಸಿಯೋ (ಸ್ಯಾ. ಕ.)] ಪಾಪಧಮ್ಮೋ;
ತವೇವ ಅತ್ಥಾಯ ಇಧಾಗತಮ್ಹಾ, ಮಾ ಪಾಪಧಮ್ಮೋ ನಿರಯಂ ಗಮಿತ್ಥ’’ [ಅಪತ್ಥ (ಕ. ಸೀ. ಸ್ಯಾ. ಪೀ.)].
‘‘ಅದ್ಧಾ ¶ ಹಿ ಮಂ ವೋ ಹಿತಕಾಮಾ, ಯಂ ಮಂ ಸಮನುಸಾಸಥ;
ಸೋಹಂ ತಥಾ ಕರಿಸ್ಸಾಮಿ, ಸಬ್ಬಂ ವುತ್ತಂ ಹಿತೇಸಿಭಿ.
‘‘ಏಸಾಹಮಜ್ಜೇವ ಉಪಾರಮಾಮಿ, ನ ಚಾಪಿಹಂ [ನ ಚಾಪಹಂ (ಸೀ. ಪೀ.)] ಕಿಞ್ಚಿ ಕರೇಯ್ಯ ಪಾಪಂ;
ನ ಚಾಪಿ ಮೇ ಕಿಞ್ಚಿ ಅದೇಯ್ಯಮತ್ಥಿ, ನ ಚಾಪಿದತ್ವಾ ಉದಕಂ ಪಿವಾಮಿ [ಉದಕಮ್ಪಹಂ ಪಿಬೇ (ಸೀ.)].
‘‘ಏವಞ್ಚ ಮೇ ದದತೋ ಸಬ್ಬಕಾಲಂ [ಸಬ್ಬಕಾಲೇ (ಕ.)], ಭೋಗಾ ಇಮೇ ವಾಸವ ಖೀಯಿಸ್ಸನ್ತಿ;
ತತೋ ಅಹಂ ಪಬ್ಬಜಿಸ್ಸಾಮಿ ಸಕ್ಕ, ಹಿತ್ವಾನ ಕಾಮಾನಿ ಯಥೋಧಿಕಾನಿ’’.
‘‘ನಗುತ್ತಮೇ ಗಿರಿವರೇ ಗನ್ಧಮಾದನೇ, ಮೋದನ್ತಿ ¶ ತಾ ದೇವವರಾಭಿಪಾಲಿತಾ;
ಅಥಾಗಮಾ ಇಸಿವರೋ ಸಬ್ಬಲೋಕಗೂ, ಸುಪುಪ್ಫಿತಂ ದುಮವರಸಾಖಮಾದಿಯ.
‘‘ಸುಚಿಂ ಸುಗನ್ಧಂ ತಿದಸೇಹಿ ಸಕ್ಕತಂ, ಪುಪ್ಫುತ್ತಮಂ ಅಮರವರೇಹಿ ಸೇವಿತಂ;
ಅಲದ್ಧ ಮಚ್ಚೇಹಿ ವ ದಾನವೇಹಿ ವಾ, ಅಞ್ಞತ್ರ ದೇವೇಹಿ ತದಾರಹಂ ಹಿದಂ [ಹಿತಂ (ಸ್ಯಾ.)].
‘‘ತತೋ ಚತಸ್ಸೋ ಕನಕತ್ತಚೂಪಮಾ, ಉಟ್ಠಾಯ ನಾರಿಯೋ ಪಮದಾಧಿಪಾ ಮುನಿಂ;
ಆಸಾ ಚ ಸದ್ಧಾ ಚ ಸಿರೀ ತತೋ ಹಿರೀ, ಇಚ್ಚಬ್ರವುಂ ನಾರದದೇವ ಬ್ರಾಹ್ಮಣಂ.
‘‘ಸಚೇ ¶ ಅನುದ್ದಿಟ್ಠಂ ತಯಾ ಮಹಾಮುನಿ, ಪುಪ್ಫಂ ಇಮಂ ಪಾರಿಛತ್ತಸ್ಸ ಬ್ರಹ್ಮೇ;
ದದಾಹಿ ನೋ ಸಬ್ಬಾ ಗತಿ ತೇ ಇಜ್ಝತು, ತುವಮ್ಪಿ ನೋ ಹೋಹಿ ಯಥೇವ ವಾಸವೋ.
‘‘ತಂ ಯಾಚಮಾನಾಭಿಸಮೇಕ್ಖ ನಾರದೋ, ಇಚ್ಚಬ್ರವೀ ಸಂಕಲಹಂ ಉದೀರಯಿ;
ನ ಮಯ್ಹಮತ್ಥತ್ಥಿ ಇಮೇಹಿ ಕೋಚಿ ನಂ, ಯಾಯೇವ ವೋ ಸೇಯ್ಯಸಿ ಸಾ ಪಿಳನ್ಧಥ’’ [ಪಿಳಯ್ಹಥ (ಸೀ. ಪೀ.)].
‘‘ತ್ವಂ ನೋತ್ತಮೇವಾಭಿಸಮೇಕ್ಖ ನಾರದ, ಯಸ್ಸಿಚ್ಛಸಿ ¶ ತಸ್ಸಾ ಅನುಪ್ಪವೇಚ್ಛಸು;
ಯಸ್ಸಾ ಹಿ ನೋ ನಾರದ ತ್ವಂ ಪದಸ್ಸಸಿ, ಸಾಯೇವ ನೋ ಹೇಹಿತಿ ಸೇಟ್ಠಸಮ್ಮತಾ’’.
‘‘ಅಕಲ್ಲಮೇತಂ ವಚನಂ ಸುಗತ್ತೇ, ಕೋ ಬ್ರಾಹ್ಮಣೋ ಸಂಕಲಹಂ ಉದೀರಯೇ;
ಗನ್ತ್ವಾನ ಭೂತಾಧಿಪಮೇವ ಪುಚ್ಛಥ, ಸಚೇ ನ ಜಾನಾಥ ಇಧುತ್ತಮಾಧಮಂ’’.
‘‘ತಾ ನಾರದೇನ ಪರಮಪ್ಪಕೋಪಿತಾ, ಉದೀರಿತಾ ವಣ್ಣಮದೇನ ಮತ್ತಾ;
ಸಕಾಸೇ [ಸಕಾಸಂ (ಕ.)] ಗನ್ತ್ವಾನ ಸಹಸ್ಸಚಕ್ಖುನೋ, ಪುಚ್ಛಿಂಸು ಭೂತಾಧಿಪಂ ಕಾ ನು ಸೇಯ್ಯಸಿ’’.
‘‘ತಾ ದಿಸ್ವಾ ಆಯತ್ತಮನಾ ಪುರಿನ್ದದೋ, ಇಚ್ಚಬ್ರವೀ ದೇವವರೋ ಕತಞ್ಜಲೀ;
ಸಬ್ಬಾವ ವೋ ಹೋಥ ಸುಗತ್ತೇ ಸಾದಿಸೀ, ಕೋ ನೇವ ಭದ್ದೇ ಕಲಹಂ ಉದೀರಯಿ’’.
‘‘ಯೋ ¶ ಸಬ್ಬಲೋಕಚ್ಚರಿತೋ [ಸಬ್ಬಲೋಕಂ ಚರಕೋ (ಸೀ. ಸ್ಯಾ. ಪೀ.)] ಮಹಾಮುನಿ, ಧಮ್ಮೇ ಠಿತೋ ನಾರದೋ [ನಾರದ (ಸ್ಯಾ.)] ಸಚ್ಚನಿಕ್ಕಮೋ;
ಸೋ ನೋಬ್ರವಿ [ಬ್ರವೀ (ಸೀ. ಸ್ಯಾ. ಪೀ.)] ಗಿರಿವರೇ ಗನ್ಧಮಾದನೇ, ಗನ್ತ್ವಾನ ಭೂತಾಧಿಪಮೇವ ಪುಚ್ಛಥ;
ಸಚೇ ನ ಜಾನಾಥ ಇಧುತ್ತಮಾಧಮಂ’’.
‘‘ಅಸು ¶ [ಅಸೂ (ಸ್ಯಾ.)] ಬ್ರಹಾರಞ್ಞಚರೋ ಮಹಾಮುನಿ, ನಾದತ್ವಾ ಭತ್ತಂ ವರಗತ್ತೇ ಭುಞ್ಜತಿ;
ವಿಚೇಯ್ಯ ದಾನಾನಿ ದದಾತಿ ಕೋಸಿಯೋ, ಯಸ್ಸಾ ಹಿ ಸೋ ದಸ್ಸತಿ ಸಾವ ಸೇಯ್ಯಸಿ’’.
‘‘ಅಸೂ ¶ ಹಿ ಯೋ ಸಮ್ಮತಿ ದಕ್ಖಿಣಂ ದಿಸಂ, ಗಙ್ಗಾಯ ತೀರೇ ಹಿಮವನ್ತಪಸ್ಸನಿ [ಹಿಮವನ್ತಪಸ್ಮನಿ (ಸೀ. ಪೀ. ಕ.)];
ಸ ಕೋಸಿಯೋ ದುಲ್ಲಭಪಾನಭೋಜನೋ, ತಸ್ಸ ಸುಧಂ ಪಾಪಯ ದೇವಸಾರಥಿ’’.
‘‘ಸ [ಸೋ (ಸ್ಯಾ.)] ಮಾತಲೀ ದೇವವರೇನ ಪೇಸಿತೋ, ಸಹಸ್ಸಯುತ್ತಂ ಅಭಿರುಯ್ಹ ಸನ್ದನಂ;
ಸುಖಿಪ್ಪಮೇವ [ಸ ಖಿಪ್ಪಮೇವ (ಸೀ. ಪೀ.)] ಉಪಗಮ್ಮ ಅಸ್ಸಮಂ, ಅದಿಸ್ಸಮಾನೋ ಮುನಿನೋ ಸುಧಂ ಅದಾ’’.
‘‘ಉದಗ್ಗಿಹುತ್ತಂ ಉಪತಿಟ್ಠತೋ ಹಿ ಮೇ, ಪಭಙ್ಕರಂ ಲೋಕತಮೋನುದುತ್ತಮಂ;
ಸಬ್ಬಾನಿ ಭೂತಾನಿ ಅಧಿಚ್ಚ [ಅತಿಚ್ಚ (ಸೀ. ಪೀ.)] ವಾಸವೋ, ಕೋ ನೇವ ಮೇ ಪಾಣಿಸು ಕಿಂ ಸುಧೋದಹಿ.
‘‘ಸಙ್ಖೂಪಮಂ ಸೇತಮತುಲ್ಯದಸ್ಸನಂ, ಸುಚಿಂ ಸುಗನ್ಧಂ ಪಿಯರೂಪಮಬ್ಭುತಂ;
ಅದಿಟ್ಠಪುಬ್ಬಂ ಮಮ ಜಾತು ಚಕ್ಖುಭಿ [ಜಾತಚಕ್ಖುಹಿ (ಸೀ. ಪೀ.)], ಕಾ ದೇವತಾ ಪಾಣಿಸು ಕಿಂ ಸುಧೋದಹಿ’’.
‘‘ಅಹಂ ¶ ¶ ಮಹಿನ್ದೇನ ಮಹೇಸಿ ಪೇಸಿತೋ, ಸುಧಾಭಿಹಾಸಿಂ ತುರಿತೋ ಮಹಾಮುನಿ;
ಜಾನಾಸಿ ಮಂ ಮಾತಲಿ ದೇವಸಾರಥಿ, ಭುಞ್ಜಸ್ಸು ಭತ್ತುತ್ತಮ ಮಾಭಿವಾರಯಿ [ಮಾ ವಿಚಾರಯಿ (ಸೀ. ಪೀ.)].
‘‘ಭುತ್ತಾ ಚ ಸಾ ದ್ವಾದಸ ಹನ್ತಿ ಪಾಪಕೇ, ಖುದಂ ಪಿಪಾಸಂ ಅರತಿಂ ದರಕ್ಲಮಂ [ದರಥಂ ಕಿಲಂ (ಸ್ಯಾ.), ದರಥಕ್ಖಮಂ (ಕ.)];
ಕೋಧೂಪನಾಹಞ್ಚ ವಿವಾದಪೇಸುಣಂ, ಸೀತುಣ್ಹತನ್ದಿಞ್ಚ ರಸುತ್ತಮಂ ಇದಂ’’.
‘‘ನ ಕಪ್ಪತೀ ಮಾತಲಿ ಮಯ್ಹ ಭುಞ್ಜಿತುಂ, ಪುಬ್ಬೇ ಅದತ್ವಾ ಇತಿ ಮೇ ವತುತ್ತಮಂ;
ನ ಚಾಪಿ ಏಕಾಸ್ನಮರೀಯಪೂಜಿತಂ [ಏಕಾಸನಂ ಅರಿಯಪೂಜಿತಂ (ಸೀ. ಪೀ.)], ಅಸಂವಿಭಾಗೀ ಚ ಸುಖಂ ನ ವಿನ್ದತಿ’’.
‘‘ಥೀಘಾತಕಾ ಯೇ ಚಿಮೇ ಪಾರದಾರಿಕಾ, ಮಿತ್ತದ್ದುನೋ ಯೇ ಚ ಸಪನ್ತಿ ಸುಬ್ಬತೇ;
ಸಬ್ಬೇ ಚ ತೇ ಮಚ್ಛರಿಪಞ್ಚಮಾಧಮಾ, ತಸ್ಮಾ ಅದತ್ವಾ ಉದಕಮ್ಪಿ ನಾಸ್ನಿಯೇ [ನಾಸ್ಮಿಯೇ (ಸೀ. ಪೀ.)].
‘‘ಸೋ ಹಿತ್ಥಿಯಾ ವಾ ಪುರಿಸಸ್ಸ ವಾ ಪನ, ದಸ್ಸಾಮಿ ದಾನಂ ವಿದುಸಮ್ಪವಣ್ಣಿತಂ;
ಸದ್ಧಾ ವದಞ್ಞೂ ಇಧ ವೀತಮಚ್ಛರಾ, ಭವನ್ತಿ ¶ ಹೇತೇ ಸುಚಿಸಚ್ಚಸಮ್ಮತಾ’’ [ಸಮ್ಮಸಮ್ಮತಾ (ಸೀ.)].
‘‘ಅತೋ ಮತಾ [ಮುತಾ (ಸೀ. ಪೀ.)] ದೇವವರೇನ ಪೇಸಿತಾ, ಕಞ್ಞಾ ಚತಸ್ಸೋ ಕನಕತ್ತಚೂಪಮಾ;
ಆಸಾ ಚ ಸದ್ಧಾ ಚ ಸಿರೀ ತತೋ ಹಿರೀ [ಸಿರೀ ಹಿರೀ ತತೋ (ಪೀ.)], ತಂ ಅಸ್ಸಮಂ ಆಗಮು [ಆಗಮುಂ (ಸೀ. ಪೀ. ಕ.)] ಯತ್ಥ ಕೋಸಿಯೋ.
‘‘ತಾ ¶ ದಿಸ್ವಾ ಸಬ್ಬೋ ಪರಮಪ್ಪಮೋದಿತೋ [ಸಬ್ಬಾ ಪರಮಪ್ಪಮೋದಿತಾ (ಸ್ಯಾ.)], ಸುಭೇನ ವಣ್ಣೇನ ಸಿಖಾರಿವಗ್ಗಿನೋ;
ಕಞ್ಞಾ ಚತಸ್ಸೋ ಚತುರೋ ಚತುದ್ದಿಸಾ, ಇಚ್ಚಬ್ರವೀ ಮಾತಲಿನೋ ಚ ಸಮ್ಮುಖಾ.
‘‘ಪುರಿಮಂ ದಿಸಂ ಕಾ ತ್ವಂ ಪಭಾಸಿ ದೇವತೇ, ಅಲಙ್ಕತಾ ತಾರವರಾವ ಓಸಧೀ;
ಪುಚ್ಛಾಮಿ ತಂ ಕಞ್ಚನವೇಲ್ಲಿವಿಗ್ಗಹೇ, ಆಚಿಕ್ಖ ಮೇ ತ್ವಂ ಕತಮಾಸಿ ದೇವತಾ.
‘‘ಸಿರಾಹ ದೇವೀಮನುಜೇಭಿ [ಮನುಜೇಸು (ಸೀ. ಸ್ಯಾ. ಪೀ.)] ಪೂಜಿತಾ, ಅಪಾಪಸತ್ತೂಪನಿಸೇವಿನೀ ಸದಾ;
ಸುಧಾವಿವಾದೇನ ತವನ್ತಿಮಾಗತಾ, ತಂ ¶ ಮಂ ಸುಧಾಯ ವರಪಞ್ಞ ಭಾಜಯ.
‘‘ಯಸ್ಸಾಹಮಿಚ್ಛಾಮಿ ಸುಧಂ [ಸುಖಂ (ಪೀ.)] ಮಹಾಮುನಿ, ಸೋ [ಸ (ಸೀ. ಪೀ.)] ಸಬ್ಬಕಾಮೇಹಿ ನರೋ ಪಮೋದತಿ;
ಸಿರೀತಿ ಮಂ ಜಾನಹಿ ಜೂಹತುತ್ತಮ, ತಂ ಮಂ ಸುಧಾಯ ವರಪಞ್ಞ ಭಾಜಯ’’.
‘‘ಸಿಪ್ಪೇನ ವಿಜ್ಜಾಚರಣೇನ ಬುದ್ಧಿಯಾ, ನರಾ ಉಪೇತಾ ಪಗುಣಾ ಸಕಮ್ಮುನಾ [ಸಕಮ್ಮನಾ (ಸೀ. ಪೀ.)];
ತಯಾ ವಿಹೀನಾ ನ ಲಭನ್ತಿ ಕಿಞ್ಚನಂ [ಕಿಞ್ಚಿನಂ (ಕ.)], ತಯಿದಂ ನ ಸಾಧು ಯದಿದಂ ತಯಾ ಕತಂ.
‘‘ಪಸ್ಸಾಮಿ ¶ ಪೋಸಂ ಅಲಸಂ ಮಹಗ್ಘಸಂ, ಸುದುಕ್ಕುಲೀನಮ್ಪಿ ಅರೂಪಿಮಂ ನರಂ;
ತಯಾನುಗುತ್ತೋ ಸಿರಿ ಜಾತಿಮಾಮಪಿ [ಜಾತಿಮಂ ಅಪಿ (ಸೀ.)], ಪೇಸೇತಿ ದಾಸಂ ವಿಯ ಭೋಗವಾ ಸುಖೀ.
‘‘ತಂ ತಂ ಅಸಚ್ಚಂ ಅವಿಭಜ್ಜಸೇವಿನಿಂ, ಜಾನಾಮಿ ಮೂಳ್ಹಂ ವಿದುರಾನುಪಾತಿನಿಂ;
ನ ತಾದಿಸೀ ಅರಹತಿ ಆಸನೂದಕಂ, ಕುತೋ ಸುಧಾ ಗಚ್ಛ ನ ಮಯ್ಹ ರುಚ್ಚಸಿ’’.
‘‘ಕಾ ¶ ಸುಕ್ಕದಾಠಾ ಪಟಿಮುಕ್ಕಕುಣ್ಡಲಾ, ಚಿತ್ತಙ್ಗದಾ ಕಮ್ಬುವಿಮಟ್ಠಧಾರಿನೀ;
ಓಸಿತ್ತವಣ್ಣಂ ಪರಿದಯ್ಹ ಸೋಭಸಿ, ಕುಸಗ್ಗಿರತ್ತಂ ಅಪಿಳಯ್ಹ ಮಞ್ಜರಿಂ.
‘‘ಮಿಗೀವ ಭನ್ತಾ ಸರಚಾಪಧಾರಿನಾ, ವಿರಾಧಿತಾ ಮನ್ದಮಿವ ಉದಿಕ್ಖಸಿ;
ಕೋ ತೇ ದುತೀಯೋ ಇಧ ಮನ್ದಲೋಚನೇ, ನ ¶ ಭಾಯಸಿ ಏಕಿಕಾ ಕಾನನೇ ವನೇ’’.
‘‘ನ ಮೇ ದುತೀಯೋ ಇಧ ಮತ್ಥಿ ಕೋಸಿಯ, ಮಸಕ್ಕಸಾರಪ್ಪಭವಮ್ಹಿ ದೇವತಾ;
ಆಸಾ ಸುಧಾಸಾಯ ತವನ್ತಿಮಾಗತಾ, ತಂ ಮಂ ಸುಧಾಯ ವರಪಞ್ಞ ಭಾಜಯ’’.
‘‘ಆಸಾಯ ಯನ್ತಿ ವಾಣಿಜಾ ಧನೇಸಿನೋ, ನಾವಂ ಸಮಾರುಯ್ಹ ಪರೇನ್ತಿ ಅಣ್ಣವೇ;
ತೇ ತತ್ಥ ಸೀದನ್ತಿ ಅಥೋಪಿ ಏಕದಾ, ಜೀನಾಧನಾ ಏನ್ತಿ ವಿನಟ್ಠಪಾಭತಾ.
‘‘ಆಸಾಯ ಖೇತ್ತಾನಿ ಕಸನ್ತಿ ಕಸ್ಸಕಾ, ವಪನ್ತಿ ಬೀಜಾನಿ ಕರೋನ್ತುಪಾಯಸೋ;
ಈತೀನಿಪಾತೇನ ಅವುಟ್ಠಿತಾಯ [ಅವುಟ್ಠಿಕಾಯ (ಸೀ. ಪೀ.)] ವಾ, ನ ಕಿಞ್ಚಿ ವಿನ್ದನ್ತಿ ತತೋ ಫಲಾಗಮಂ.
‘‘ಅಥತ್ತಕಾರಾನಿ ಕರೋನ್ತಿ ಭತ್ತುಸು, ಆಸಂ ಪುರಕ್ಖತ್ವಾ ನರಾ ಸುಖೇಸಿನೋ;
ತೇ ಭತ್ತುರತ್ಥಾ ಅತಿಗಾಳ್ಹಿತಾ ಪುನ, ದಿಸಾ ಪನಸ್ಸನ್ತಿ ಅಲದ್ಧ ಕಿಞ್ಚನಂ.
‘‘ಹಿತ್ವಾನ [ಜಹಿತ್ವ (ಸೀ. ಸ್ಯಾ. ಪೀ.)] ಧಞ್ಞಞ್ಚ ಧನಞ್ಚ ಞಾತಕೇ, ಆಸಾಯ ಸಗ್ಗಾಧಿಮನಾ ಸುಖೇಸಿನೋ;
ತಪನ್ತಿ ¶ ಲೂಖಮ್ಪಿ ತಪಂ ಚಿರನ್ತರಂ, ಕುಮಗ್ಗಮಾರುಯ್ಹ [ಕುಮ್ಮಗ್ಗಮಾರುಯ್ಹ (ಸೀ. ಸ್ಯಾ. ಪೀ.)] ಪರೇನ್ತಿ ದುಗ್ಗತಿಂ.
‘‘ಆಸಾ ¶ ವಿಸಂವಾದಿಕಸಮ್ಮತಾ ಇಮೇ, ಆಸೇ ಸುಧಾಸಂ [ಸುಧಾಯ (ಸ್ಯಾ ಪೀ. ಕ.)] ವಿನಯಸ್ಸು ಅತ್ತನಿ;
ನ ತಾದಿಸೀ ಅರಹತಿ ಆಸನೂದಕಂ, ಕುತೋ ಸುಧಾ ಗಚ್ಛ ನ ಮಯ್ಹ ರುಚ್ಚಸಿ’’.
‘‘ದದ್ದಲ್ಲಮಾನಾ ಯಸಸಾ ಯಸಸ್ಸಿನೀ, ಜಿಘಞ್ಞನಾಮವ್ಹಯನಂ ದಿಸಂ ಪತಿ;
ಪುಚ್ಛಾಮಿ ತಂ ಕಞ್ಚನವೇಲ್ಲಿವಿಗ್ಗಹೇ, ಆಚಿಕ್ಖ ಮೇ ತ್ವಂ ಕತಮಾಸಿ ದೇವತಾ’’.
‘‘ಸದ್ಧಾಹ ದೇವೀಮನುಜೇಹಿ [ದೇವೀಮನುಜೇಸು (ಸೀ. ಸ್ಯಾ. ಪೀ.)] ಪೂಜಿತಾ, ಅಪಾಪಸತ್ತೂಪನಿಸೇವಿನೀ ಸದಾ;
ಸುಧಾವಿವಾದೇನ ತವನ್ತಿಮಾಗತಾ, ತಂ ಮಂ ಸುಧಾಯ ವರಪಞ್ಞ ಭಾಜಯ’’.
‘‘ದಾನಂ ದಮಂ ಚಾಗಮಥೋಪಿ ಸಂಯಮಂ, ಆದಾಯ ಸದ್ಧಾಯ ಕರೋನ್ತಿ ಹೇಕದಾ;
ಥೇಯ್ಯಂ ಮುಸಾ ಕೂಟಮಥೋಪಿ ಪೇಸುಣಂ, ಕರೋನ್ತಿ ಹೇಕೇ ಪುನ ವಿಚ್ಚುತಾ ತಯಾ.
‘‘ಭರಿಯಾಸು ಪೋಸೋ ಸದಿಸೀಸು ಪೇಕ್ಖವಾ [ಪೇಖವಾ (ಪೀ.)], ಸೀಲೂಪಪನ್ನಾಸು ಪತಿಬ್ಬತಾಸುಪಿ;
ವಿನೇತ್ವಾನ ¶ [ವಿನೇತ್ವಾ (ಸೀ. ಸ್ಯಾ. ಪೀ.)] ಛನ್ದಂ ಕುಲಿತ್ಥಿಯಾಸುಪಿ [ಕುಲಧೀತಿಯಾಸುಪಿ (ಸೀ. ಪೀ.)], ಕರೋತಿ ಸದ್ಧಂ ಪುನ [ಪನ (ಸೀ. ಪೀ.)] ಕುಮ್ಭದಾಸಿಯಾ.
‘‘ತ್ವಮೇವ ಸದ್ಧೇ ಪರದಾರಸೇವಿನೀ, ಪಾಪಂ ಕರೋಸಿ ಕುಸಲಮ್ಪಿ ರಿಞ್ಚಸಿ;
ನ ತಾದಿಸೀ ಅರಹತಿ ಆಸನೂದಕಂ, ಕುತೋ ಸುಧಾ ಗಚ್ಛ ನ ಮಯ್ಹ ರುಚ್ಚಸಿ’’.
‘‘ಜಿಘಞ್ಞರತ್ತಿಂ ¶ ಅರುಣಸ್ಮಿಮೂಹತೇ, ಯಾ ದಿಸ್ಸತಿ ಉತ್ತಮರೂಪವಣ್ಣಿನೀ;
ತಥೂಪಮಾ ಮಂ ಪಟಿಭಾಸಿ ದೇವತೇ, ಆಚಿಕ್ಖ ಮೇ ತ್ವಂ ಕತಮಾಸಿ ಅಚ್ಛರಾ.
‘‘ಕಾಲಾ ¶ ನಿದಾಘೇರಿವ ಅಗ್ಗಿಜಾರಿವ [ಅಗ್ಗಜಾತಿವ (ಸೀ.), ಅಗ್ಗಿಜಾತಿವ (ಪೀ.)], ಅನಿಲೇರಿತಾ ಲೋಹಿತಪತ್ತಮಾಲಿನೀ;
ಕಾ ತಿಟ್ಠಸಿ ಮನ್ದಮಿಗಾವಲೋಕಯಂ [ಮನ್ದಮಿವಾವಲೋಕಯಂ (ಸೀ. ಪೀ.)], ಭಾಸೇಸಮಾನಾವ ಗಿರಂ ನ ಮುಞ್ಚಸಿ’’.
‘‘ಹಿರಾಹ ದೇವೀಮನುಜೇಹಿ ಪೂಜಿತಾ, ಅಪಾಪಸತ್ತೂಪನಿಸೇವಿನೀ ಸದಾ;
ಸುಧಾವಿವಾದೇನ ತವನ್ತಿಮಾಗತಾ, ಸಾಹಂ ನ ಸಕ್ಕೋಮಿ ಸುಧಮ್ಪಿ ಯಾಚಿತುಂ;
ಕೋಪೀನರೂಪಾ ವಿಯ ಯಾಚನಿತ್ಥಿಯಾ’’.
‘‘ಧಮ್ಮೇನ ಞಾಯೇನ ಸುಗತ್ತೇ ಲಚ್ಛಸಿ, ಏಸೋ ¶ ಹಿ ಧಮ್ಮೋ ನ ಹಿ ಯಾಚನಾ ಸುಧಾ;
ತಂ ತಂ ಅಯಾಚನ್ತಿಮಹಂ ನಿಮನ್ತಯೇ, ಸುಧಾಯ ಯಞ್ಚಿಚ್ಛಸಿ ತಮ್ಪಿ ದಮ್ಮಿ ತೇ.
‘‘ಸಾ ತ್ವಂ ಮಯಾ ಅಜ್ಜ ಸಕಮ್ಹಿ ಅಸ್ಸಮೇ, ನಿಮನ್ತಿತಾ ಕಞ್ಚನವೇಲ್ಲಿವಿಗ್ಗಹೇ;
ತುವಞ್ಹಿ ಮೇ ಸಬ್ಬರಸೇಹಿ ಪೂಜಿಯಾ, ತಂ ಪೂಜಯಿತ್ವಾನ ಸುಧಮ್ಪಿ ಅಸ್ನಿಯೇ’’.
‘‘ಸಾ ಕೋಸಿಯೇನಾನುಮತಾ ಜುತೀಮತಾ, ಅದ್ಧಾ ಹಿರಿ ರಮ್ಮಂ ಪಾವಿಸಿ ಯಸ್ಸಮಂ;
ಉದಕವನ್ತಂ [ಉದಞ್ಞವನ್ತಂ (ಸೀ. ಪೀ.)] ಫಲಮರಿಯಪೂಜಿತಂ, ಅಪಾಪಸತ್ತೂಪನಿಸೇವಿತಂ ಸದಾ.
‘‘ರುಕ್ಖಗ್ಗಹಾನಾ ಬಹುಕೇತ್ಥ ಪುಪ್ಫಿತಾ, ಅಮ್ಬಾ ಪಿಯಾಲಾ ಪನಸಾ ಚ ಕಿಂಸುಕಾ;
ಸೋಭಞ್ಜನಾ ಲೋದ್ದಮಥೋಪಿ ಪದ್ಮಕಾ, ಕೇಕಾ ಚ ಭಙ್ಗಾ ತಿಲಕಾ ಸುಪುಪ್ಫಿತಾ.
‘‘ಸಾಲಾ ¶ ಕರೇರೀ ಬಹುಕೇತ್ಥ ಜಮ್ಬುಯೋ, ಅಸ್ಸತ್ಥನಿಗ್ರೋಧಮಧುಕವೇತಸಾ [ವೇದಿಸಾ (ಕ.)];
ಉದ್ದಾಲಕಾ ಪಾಟಲಿ ಸಿನ್ದುವಾರಕಾ [ಸಿನ್ದುವಾರಿತಾ (ಬಹೂಸು)], ಮನುಞ್ಞಗನ್ಧಾ ಮುಚಲಿನ್ದಕೇತಕಾ.
‘‘ಹರೇಣುಕಾ ವೇಳುಕಾ ಕೇಣು [ವೇಣು (ಸೀ. ಪೀ.)] ತಿನ್ದುಕಾ, ಸಾಮಾಕನೀವಾರಮಥೋಪಿ ¶ ಚೀನಕಾ;
ಮೋಚಾ ಕದಲೀ ಬಹುಕೇತ್ಥ ಸಾಲಿಯೋ, ಪವೀಹಯೋ ಆಭೂಜಿನೋ ಚ [ಆಭುಜಿನೋಪಿ (ಸೀ. ಸ್ಯಾ.)] ತಣ್ಡುಲಾ.
‘‘ತಸ್ಸೇವುತ್ತರಪಸ್ಸೇನ [ತಸ್ಸ ಚ ಉತ್ತರೇ ಪಸ್ಸೇ (ಸೀ. ಪೀ.), ತಸ್ಸ ಚ ಉತ್ತರಪಸ್ಸೇನ (ಸ್ಯಾ.)], ಜಾತಾ ಪೋಕ್ಖರಣೀ ಸಿವಾ;
ಅಕಕ್ಕಸಾ ಅಪಬ್ಭಾರಾ, ಸಾಧು ಅಪ್ಪಟಿಗನ್ಧಿಕಾ.
‘‘ತತ್ಥ ಮಚ್ಛಾ ಸನ್ನಿರತಾ, ಖೇಮಿನೋ ಬಹುಭೋಜನಾ;
ಸಿಙ್ಗೂ ಸವಙ್ಕಾ ಸಂಕುಲಾ [ಸಕುಲಾ (ಸೀ. ಸ್ಯಾ. ಪೀ.)], ಸತವಙ್ಕಾ ಚ ರೋಹಿತಾ;
ಆಳಿಗಗ್ಗರಕಾಕಿಣ್ಣಾ, ಪಾಠೀನಾ ಕಾಕಮಚ್ಛಕಾ.
‘‘ತತ್ಥ ಪಕ್ಖೀ ಸನ್ನಿರತಾ, ಖೇಮಿನೋ ಬಹುಭೋಜನಾ;
ಹಂಸಾ ಕೋಞ್ಚಾ ಮಯೂರಾ ಚ, ಚಕ್ಕವಾಕಾ ಚ ಕುಕ್ಕುಹಾ;
ಕುಣಾಲಕಾ ಬಹೂ ಚಿತ್ರಾ, ಸಿಖಣ್ಡೀ ಜೀವಜೀವಕಾ.
‘‘ತತ್ಥ ಪಾನಾಯ ಮಾಯನ್ತಿ, ನಾನಾ ಮಿಗಗಣಾ ಬಹೂ;
ಸೀಹಾ ಬ್ಯಗ್ಘಾ ವರಾಹಾ ಚ, ಅಚ್ಛಕೋಕತರಚ್ಛಯೋ.
‘‘ಪಲಾಸಾದಾ ¶ ಗವಜಾ ಚ, ಮಹಿಂಸಾ [ಮಹಿಸಾ (ಸೀ. ಸ್ಯಾ. ಪೀ.)] ರೋಹಿತಾ ರುರೂ;
ಏಣೇಯ್ಯಾ ಚ ವರಾಹಾ ಚ, ಗಣಿನೋ ನೀಕಸೂಕರಾ;
ಕದಲಿಮಿಗಾ ಬಹುಕೇತ್ಥ, ಬಿಳಾರಾ ಸಸಕಣ್ಣಿಕಾ [ಸಸಕಣ್ಣಕಾ (ಸೀ.)].
‘‘ಛಮಾಗಿರೀ ಪುಪ್ಫವಿಚಿತ್ರಸನ್ಥತಾ, ದಿಜಾಭಿಘುಟ್ಠಾ ದಿಜಸಙ್ಘಸೇವಿತಾ’’.
‘‘ಸಾ ¶ ಸುತ್ತಚಾ ನೀಲದುಮಾಭಿಲಮ್ಬಿತಾ, ವಿಜ್ಜು ಮಹಾಮೇಘರಿವಾನುಪಜ್ಜಥ;
ತಸ್ಸಾ ¶ ಸುಸಮ್ಬನ್ಧಸಿರಂ ಕುಸಾಮಯಂ, ಸುಚಿಂ ಸುಗನ್ಧಂ ಅಜಿನೂಪಸೇವಿತಂ;
ಅತ್ರಿಚ್ಚ [ಅತ್ರಿಚ್ಛ (ಸೀ. ಸ್ಯಾ. ಪೀ.)] ಕೋಚ್ಛಂ ಹಿರಿಮೇತದಬ್ರವಿ, ‘ನಿಸೀದ ಕಲ್ಯಾಣಿ ಸುಖಯಿದಮಾಸನಂ’.
‘‘ತಸ್ಸಾ ತದಾ ಕೋಚ್ಛಗತಾಯ ಕೋಸಿಯೋ, ಯದಿಚ್ಛಮಾನಾಯ ಜಟಾಜಿನನ್ಧರೋ [ಜಟಾಜುತಿನ್ಧರೋ (ಸ್ಯಾ. ಕ.)];
ನವೇಹಿ ಪತ್ತೇಹಿ ಸಯಂ ಸಹೂದಕಂ, ಸುಧಾಭಿಹಾಸೀ ತುರಿತೋ ಮಹಾಮುನಿ.
‘‘ಸಾ ತಂ ಪಟಿಗ್ಗಯ್ಹ ಉಭೋಹಿ ಪಾಣಿಭಿ, ಇಚ್ಚಬ್ರವಿ ಅತ್ತಮನಾ ಜಟಾಧರಂ;
‘ಹನ್ದಾಹಂ ಏತರಹಿ ಪೂಜಿತಾ ತಯಾ, ಗಚ್ಛೇಯ್ಯಂ ಬ್ರಹ್ಮೇ ತಿದಿವಂ ಜಿತಾವಿನೀ’.
‘‘ಸಾ ಕೋಸಿಯೇನಾನುಮತಾ ಜುತೀಮತಾ, ಉದೀರಿತಾ [ಉದಿರಯಿ (ಕ.)] ವಣ್ಣಮದೇನ ಮತ್ತಾ;
ಸಕಾಸೇ ಗನ್ತ್ವಾನ ಸಹಸ್ಸಚಕ್ಖುನೋ, ಅಯಂ ಸುಧಾ ವಾಸವ ದೇಹಿ ಮೇ ಜಯಂ.
‘‘ತಮೇನ [ತಮೇನಂ (ಸ್ಯಾ. ಕ.)] ಸಕ್ಕೋಪಿ ತದಾ ಅಪೂಜಯಿ, ಸಹಿನ್ದದೇವಾ [ಸಹಿನ್ದಾ ಚ ದೇವಾ (ಸೀ. ಪೀ.)] ಸುರಕಞ್ಞಮುತ್ತಮಂ;
ಸಾ ಪಞ್ಜಲೀ ದೇವಮನುಸ್ಸಪೂಜಿತಾ, ನವಮ್ಹಿ ಕೋಚ್ಛಮ್ಹಿ ಯದಾ ಉಪಾವಿಸಿ’’.
‘‘ತಮೇವ ¶ ಸಂಸೀ [ತಮೇವ ಅಸಂಸೀ (ಸ್ಯಾ.)] ಪುನದೇವ ಮಾತಲಿಂ, ಸಹಸ್ಸನೇತ್ತೋ ತಿದಸಾನಮಿನ್ದೋ;
ಗನ್ತ್ವಾನ ವಾಕ್ಯಂ ಮಮ ಬ್ರೂಹಿ ಕೋಸಿಯಂ, ಆಸಾಯ ಸದ್ಧಾ [ಸದ್ಧ (ಪೀ.)] ಸಿರಿಯಾ ಚ ಕೋಸಿಯ;
ಹಿರೀ ಸುಧಂ ಕೇನ ಮಲತ್ಥ ಹೇತುನಾ.
‘‘ತಂ ¶ ಸು ವತ್ಥಂ ಉದತಾರಯೀ ರಥಂ, ದದ್ದಲ್ಲಮಾನಂ ಉಪಕಾರಿಯಸಾದಿಸಂ [ಉಪಕಿರಿಯಸಾದಿಸಂ (ಸೀ. ಸ್ಯಾ. ಪೀ.)].
ಜಮ್ಬೋನದೀಸಂ ತಪನೇಯ್ಯಸನ್ನಿಭಂ [ಸನ್ತಿಕಂ (ಸೀ.ಪೀ.)], ಅಲಙ್ಕತಂ ಕಞ್ಚನಚಿತ್ತಸನ್ನಿಭಂ.
‘‘ಸುವಣ್ಣಚನ್ದೇತ್ಥ ಬಹೂ ನಿಪಾತಿತಾ, ಹತ್ಥೀ ಗವಸ್ಸಾ ಕಿಕಿಬ್ಯಗ್ಘದೀಪಿಯೋ [ಕಿಮ್ಪುರಿಸಬ್ಯಗ್ಘದೀಪಿಯೋ (ಕ.)];
ಏಣೇಯ್ಯಕಾ ಲಙ್ಘಮಯೇತ್ಥ ಪಕ್ಖಿನೋ [ಪಕ್ಖಿಯೋ (ಸೀ. ಪೀ.)], ಮಿಗೇತ್ಥ ವೇಳುರಿಯಮಯಾ ಯುಧಾ ಯುತಾ.
‘‘ತತ್ಥಸ್ಸರಾಜಹರಯೋ ಅಯೋಜಯುಂ, ದಸಸತಾನಿ ಸುಸುನಾಗಸಾದಿಸೇ;
ಅಲಙ್ಕತೇ ಕಞ್ಚನಜಾಲುರಚ್ಛದೇ, ಆವೇಳಿನೇ ಸದ್ದಗಮೇ ಅಸಙ್ಗಿತೇ.
‘‘ತಂ ಯಾನಸೇಟ್ಠಂ ಅಭಿರುಯ್ಹ ಮಾತಲಿ, ದಿಸಾ ಇಮಾಯೋ [ದಸ ದಿಸಾ ಇಮಾ (ಸೀ. ಸ್ಯಾ. ಪೀ.)] ಅಭಿನಾದಯಿತ್ಥ;
ನಭಞ್ಚ ಸೇಲಞ್ಚ ವನಪ್ಪತಿನಿಞ್ಚ [ವನಸ್ಪತೀನಿ ಚ (ಸೀ. ಪೀ.), ವನಪ್ಪತಿಞ್ಚ (ಸ್ಯಾ. ಕ.)], ಸಸಾಗರಂ ¶ ಪಬ್ಯಧಯಿತ್ಥ [ಪಬ್ಯಾಥಯಿತ್ಥ (ಸೀ. ಪೀ.)] ಮೇದಿನಿಂ.
‘‘ಸ ಖಿಪ್ಪಮೇವ ಉಪಗಮ್ಮ ಅಸ್ಸಮಂ, ಪಾವಾರಮೇಕಂಸಕತೋ ಕತಞ್ಜಲೀ;
ಬಹುಸ್ಸುತಂ ವುದ್ಧಂ ವಿನೀತವನ್ತಂ, ಇಚ್ಚಬ್ರವೀ ಮಾತಲಿ ದೇವಬ್ರಾಹ್ಮಣಂ.
‘‘ಇನ್ದಸ್ಸ ವಾಕ್ಯಂ ನಿಸಾಮೇಹಿ ಕೋಸಿಯ, ದೂತೋ ಅಹಂ ಪುಚ್ಛತಿ ತಂ ಪುರಿನ್ದದೋ;
ಆಸಾಯ ಸದ್ಧಾ ಸಿರಿಯಾ ಚ ಕೋಸಿಯ, ಹಿರೀ ಸುಧಂ ಕೇನ ಮಲತ್ಥ ಹೇತುನಾ’’.
‘‘ಅನ್ಧಾ ¶ ¶ ಸಿರೀ ಮಂ ಪಟಿಭಾತಿ ಮಾತಲಿ, ಸದ್ಧಾ ಅನಿಚ್ಚಾ ಪನ ದೇವಸಾರಥಿ;
ಆಸಾ ವಿಸಂವಾದಿಕಸಮ್ಮತಾ ಹಿ ಮೇ, ಹಿರೀ ಚ ಅರಿಯಮ್ಹಿ ಗುಣೇ ಪತಿಟ್ಠಿತಾ’’.
‘‘ಕುಮಾರಿಯೋ ಯಾಚಿಮಾ ಗೋತ್ತರಕ್ಖಿತಾ, ಜಿಣ್ಣಾ ಚ ಯಾ ಯಾ ಚ ಸಭತ್ತುಇತ್ಥಿಯೋ;
ತಾ ಛನ್ದರಾಗಂ ಪುರಿಸೇಸು ಉಗ್ಗತಂ, ಹಿರಿಯಾ ನಿವಾರೇನ್ತಿ ಸಚಿತ್ತಮತ್ತನೋ.
‘‘ಸಙ್ಗಾಮಸೀಸೇ ಸರಸತ್ತಿಸಂಯುತೇ, ಪರಾಜಿತಾನಂ ಪತತಂ ಪಲಾಯಿನಂ;
ಹಿರಿಯಾ ನಿವತ್ತನ್ತಿ ಜಹಿತ್ವ [ಜಹಿತ್ವಾನ (ಸ್ಯಾ. ಕ.)] ಜೀವಿತಂ, ತೇ ¶ ಸಮ್ಪಟಿಚ್ಛನ್ತಿ ಪುನಾ ಹಿರೀಮನಾ.
‘‘ವೇಲಾ ಯಥಾ ಸಾಗರವೇಗವಾರಿನೀ, ಹಿರಾಯ ಹಿ ಪಾಪಜನಂ ನಿವಾರಿನೀ;
ತಂ ಸಬ್ಬಲೋಕೇ ಹಿರಿಮರಿಯಪೂಜಿತಂ, ಇನ್ದಸ್ಸ ತಂ ವೇದಯ ದೇವಸಾರಥಿ’’.
‘‘ಕೋ ತೇ ಇಮಂ ಕೋಸಿಯ ದಿಟ್ಠಿಮೋದಹಿ, ಬ್ರಹ್ಮಾ ಮಹಿನ್ದೋ ಅಥ ವಾ ಪಜಾಪತಿ;
ಹಿರಾಯ ದೇವೇಸು ಹಿ ಸೇಟ್ಠಸಮ್ಮತಾ, ಧೀತಾ ಮಹಿನ್ದಸ್ಸ ಮಹೇಸಿ ಜಾಯಥ’’.
‘‘ಹನ್ದೇಹಿ ದಾನಿ ತಿದಿವಂ ಅಪಕ್ಕಮ [ಸಮಕ್ಕಮ (ಸೀ. ಪೀ.)], ರಥಂ ಸಮಾರುಯ್ಹ ಮಮಾಯಿತಂ ಇಮಂ [ಇದಂ (ಸ್ಯಾ. ಕ.)];
ಇನ್ದೋ ಚ ತಂ ಇನ್ದಸಗೋತ್ತ ಕಙ್ಖತಿ, ಅಜ್ಜೇವ ತ್ವಂ ಇನ್ದಸಹಬ್ಯತಂ ವಜ’’.
‘‘ಏವಂ ವಿಸುಜ್ಝನ್ತಿ [ಸಮಿಜ್ಝನ್ತಿ (ಸೀ. ಪೀ.)] ಅಪಾಪಕಮ್ಮಿನೋ, ಅಥೋ ಸುಚಿಣ್ಣಸ್ಸ ಫಲಂ ನ ನಸ್ಸತಿ;
ಯೇ ಕೇಚಿ ಮದ್ದಕ್ಖು ಸುಧಾಯ ಭೋಜನಂ, ಸಬ್ಬೇವ ತೇ ಇನ್ದಸಹಬ್ಯತಂ ಗತಾ’’.
‘‘ಹಿರೀ ¶ ಉಪ್ಪಲವಣ್ಣಾಸಿ, ಕೋಸಿಯೋ ದಾನಪತಿ ಭಿಕ್ಖು;
ಅನುರುದ್ಧೋ ಪಞ್ಚಸಿಖೋ, ಆನನ್ದೋ ಆಸಿ ಮಾತಲಿ.
‘‘ಸೂರಿಯೋ ಕಸ್ಸಪೋ ಭಿಕ್ಖು, ಮೋಗ್ಗಲ್ಲಾನೋಸಿ ಚನ್ದಿಮಾ;
ನಾರದೋ ¶ ಸಾರಿಪುತ್ತೋಸಿ, ಸಮ್ಬುದ್ಧೋ ಆಸಿ ವಾಸವೋ’’ತಿ.
ಸುಧಾಭೋಜನಜಾತಕಂ ತತಿಯಂ.
೫೩೬. ಕುಣಾಲಜಾತಕಂ (೪)
ಏವಮಕ್ಖಾಯತಿ, ಏವಮನುಸೂಯತಿ [ಸುಯ್ಯತಿ (ಕ.)]. ಸಬ್ಬೋಸಧಧರಣಿಧರೇ ನೇಕಪುಪ್ಫಮಾಲ್ಯವಿತತೇ ಗಜ-ಗವಜ ಮಹಿಂಸ-ರುರು-ಚಮರ-ಪಸದ-ಖಗ್ಗ-ಗೋಕಣ್ಣ-ಸೀಹ-ಬ್ಯಗ್ಘ-ದೀಪಿ-ಅಚ್ಛ-ಕೋಕ-ತರಚ್ಛ-ಉದ್ದಾರ-ಕದಲಿಮಿಗ- ಬಿಳಾರ-ಸಸ-ಕಣ್ಣಿಕಾನುಚರಿತೇಆಕಿಣ್ಣನೇಲಮಣ್ಡಲಮಹಾವರಾಹನಾಗಕುಲಕರೇಣು [ಕಣೇರು (ಸೀ. ಪೀ.)] -ಸಙ್ಘಾಧಿವುಟ್ಠೇ [ವುತ್ಥೇ (ಸೀ. ಪೀ.)] ಇಸ್ಸಮಿಗ- ಸಾಖಮಿಗ-ಸರಭಮಿಗ-ಏಣೀಮಿಗ-ವಾತಮಿಗ-ಪಸದಮಿಗ-ಪುರಿಸಾಲು [ಪುರಿಸಲ್ಲು (ಸೀ. ಪೀ.)] -ಕಿಮ್ಪುರಿಸ-ಯಕ್ಖ-ರಕ್ಖಸನಿಸೇವಿತೇ ಅಮಜ್ಜವಮಞ್ಜರೀಧರ-ಪಹಟ್ಠ [ಬ್ರಹಟ್ಠ (ಸೀ. ಪೀ.)] -ಪುಪ್ಫಫುಸಿತಗ್ಗಾ [ಪುಪ್ಫಿತಗ್ಗ (ಸೀ. ಪೀ.)] ನೇಕಪಾದಪಗಣವಿತತೇಕುರರ-ಚಕೋರ-ವಾರಣ-ಮಯೂರ-ಪರಭತ- ಜೀವಞ್ಜೀವಕ-ಚೇಲಾವಕಾ-ಭಿಙ್ಕಾರ-ಕರವೀಕಮತ್ತವಿಹಙ್ಗಗಣ-ಸತತ [ವಿಹಙ್ಗಸತ (ಸೀ. ಪೀ.)] ಸಮ್ಪಘುಟ್ಠೇಅಞ್ಜನ-ಮನೋಸಿಲಾ-ಹರಿತಾಲ- ಹಿಙ್ಗುಲಕಹೇಮ-ರಜತಕನಕಾನೇಕಧಾತುಸತವಿನದ್ಧಪಟಿಮಣ್ಡಿತಪ್ಪದೇಸೇ ¶ ಏವರೂಪೇ ಖಲು, ಭೋ, ರಮ್ಮೇ ವನಸಣ್ಡೇ ಕುಣಾಲೋ ನಾಮ ಸಕುಣೋ ಪಟಿವಸತಿ ಅತಿವಿಯ ಚಿತ್ತೋ ಅತಿವಿಯ ಚಿತ್ತಪತ್ತಚ್ಛದನೋ.
ತಸ್ಸೇವ ಖಲು, ಭೋ, ಕುಣಾಲಸ್ಸ ಸಕುಣಸ್ಸ ಅಡ್ಢುಡ್ಢಾನಿ ಇತ್ಥಿಸಹಸ್ಸಾನಿ ಪರಿಚಾರಿಕಾ ದಿಜಕಞ್ಞಾಯೋ. ಅಥ ಖಲು, ಭೋ, ದ್ವೇ ದಿಜಕಞ್ಞಾಯೋ ಕಟ್ಠಂ ಮುಖೇನ ಡಂಸಿತ್ವಾ [ಡಸಿತ್ವಾ (ಸೀ. ಪೀ.) ಏವಮುಪರಿಪಿ] ತಂ ಕುಣಾಲಂ ಸಕುಣಂ ಮಜ್ಝೇ ನಿಸೀದಾಪೇತ್ವಾ ಉಡ್ಡೇನ್ತಿ [ಡೇನ್ತಿ (ಸೀ. ಪೀ.) ಏವಮುಪರಿಪಿ] – ‘‘ಮಾ ನಂ ಕುಣಾಲಂ ಸಕುಣಂ ಅದ್ಧಾನಪರಿಯಾಯಪಥೇ ಕಿಲಮಥೋ ಉಬ್ಬಾಹೇತ್ಥಾ’’ತಿ [ಉಬ್ಬಾಹೇಥಾತಿ (ಸ್ಯಾ. ಕ.)].
ಪಞ್ಚಸತಾ [ಪಞ್ಚಸತ (ಪೀ.)] ದಿಜಕಞ್ಞಾಯೋ ಹೇಟ್ಠತೋ ಹೇಟ್ಠತೋ ಉಡ್ಡೇನ್ತಿ – [ಡೇನ್ತಿ (ಸೀ. ಪೀ.) ಏವಮುಪರಿಪಿ] ‘‘ಸಚಾಯಂ ಕುಣಾಲೋ ¶ ಸಕುಣೋ ಆಸನಾ ಪರಿಪತಿಸ್ಸತಿ, ಮಯಂ ತಂ ಪಕ್ಖೇಹಿ ಪಟಿಗ್ಗಹೇಸ್ಸಾಮಾತಿ.
ಪಞ್ಚಸತಾ ದಿಜಕಞ್ಞಾಯೋ ಉಪರೂಪರಿ ಉಡ್ಡೇನ್ತಿ – [ಡೇನ್ತಿ (ಸೀ. ಪೀ.) ಏವಮುಪರಿಪಿ] ‘‘ಮಾ ನಂ ಕುಣಾಲಂ ಸಕುಣಂ ಆತಪೋ ಪರಿತಾಪೇಸೀ’’ತಿ [ಪರಿಕಾಪೀತಿ (ಸೀ. ಪೀ.)].
ಪಞ್ಚಸತಾ ¶ ಪಞ್ಚಸತಾ [ಸೀ. ಪೀ. ಪೋತ್ಥಕೇಸು ‘‘ಪಞ್ಚಸತಾ’’ತಿ ಸಕಿದೇವ ಆಗತಂ] ದಿಜಕಞ್ಞಾಯೋ ಉಭತೋಪಸ್ಸೇನ ಉಡ್ಡೇನ್ತಿ – [ಡೇನ್ತಿ (ಸೀ. ಪೀ.) ಏವಮುಪರಿಪಿ] ‘‘ಮಾ ನಂ ಕುಣಾಲಂ ಸಕುಣಂ ಸೀತಂ ವಾ ಉಣ್ಹಂ ವಾ ತಿಣಂ ವಾ ರಜೋ ವಾ ವಾತೋ ವಾ ಉಸ್ಸಾವೋ ವಾ ಉಪಪ್ಫುಸೀ’’ತಿ.
ಪಞ್ಚಸತಾ ದಿಜಕಞ್ಞಾಯೋ ಪುರತೋ ಪುರತೋ ಉಡ್ಡೇನ್ತಿ – ‘‘ಮಾ ನಂ ಕುಣಾಲಂ ಸಕುಣಂ ಗೋಪಾಲಕಾ ವಾ ಪಸುಪಾಲಕಾ ವಾ ತಿಣಹಾರಕಾ ವಾ ಕಟ್ಠಹಾರಕಾ ವಾ ವನಕಮ್ಮಿಕಾ ವಾ ಕಟ್ಠೇನ ವಾ ಕಠಲೇನ ವಾ [ಕಥಲಾಯ ವಾ (ಕ.)] ಪಾಣಿನಾ ವಾ ( ) [(ಪಾಸಾಣೇನ ವಾ) (ಸ್ಯಾ.)] ಲೇಡ್ಡುನಾ ವಾ ದಣ್ಡೇನ ವಾ ಸತ್ಥೇನ ವಾ ಸಕ್ಖರಾಹಿ ವಾ [ಸಕ್ಖರಾಯ ವಾ (ಸೀ.)] ಪಹಾರಂ ಅದಂಸು. ಮಾಯಂ ಕುಣಾಲೋ ಸಕುಣೋ ಗಚ್ಛೇಹಿ ವಾ ಲತಾಹಿ ವಾ ರುಕ್ಖೇಹಿ ವಾ ಸಾಖಾಹಿ ವಾ [ಇದಂ ಪದದ್ವಯಂ ಸೀ. ಪೀ. ಪೋತ್ಥಕೇಸು ನತ್ಥಿ] ಥಮ್ಭೇಹಿ ವಾ ಪಾಸಾಣೇಹಿ ವಾ ಬಲವನ್ತೇಹಿ ವಾ ಪಕ್ಖೀಹಿ ಸಙ್ಗಮೇಸೀ’’ತಿ [ಸಙ್ಗಾಮೇಸೀತಿ (ಸೀ. ಪೀ.)].
ಪಞ್ಚಸತಾ ದಿಜಕಞ್ಞಾಯೋ ಪಚ್ಛತೋ ಪಚ್ಛತೋ ಉಡ್ಡೇನ್ತಿ ಸಣ್ಹಾಹಿ ಸಖಿಲಾಹಿ ಮಞ್ಜೂಹಿ ಮಧುರಾಹಿ ವಾಚಾಹಿ ಸಮುದಾಚರನ್ತಿಯೋ – ‘‘ಮಾಯಂ ಕುಣಾಲೋ ಸಕುಣೋ ಆಸನೇ ಪರಿಯುಕ್ಕಣ್ಠೀ’’ತಿ.
ಪಞ್ಚಸತಾ ದಿಜಕಞ್ಞಾಯೋ ದಿಸೋದಿಸಂ ಉಡ್ಡೇನ್ತಿ ಅನೇಕರುಕ್ಖವಿವಿಧವಿಕತಿಫಲಮಾಹರನ್ತಿಯೋ – ‘‘ಮಾಯಂ ಕುಣಾಲೋ ಸಕುಣೋ ಖುದಾಯ ಪರಿಕಿಲಮಿತ್ಥಾ’’ತಿ.
ಅಥ ಖಲು, ಭೋ, ತಾ [ನತ್ಥಿ ಸೀ. ಪೀ. ಪೋತ್ಥಕೇಸು] ದಿಜಕಞ್ಞಾಯೋ ತಂ ಕುಣಾಲಂ ಸಕುಣಂ ಆರಾಮೇನೇವ ಆರಾಮಂ ಉಯ್ಯಾನೇನೇವ ಉಯ್ಯಾನಂ ¶ ನದೀತಿತ್ಥೇನೇವ ನದೀತಿತ್ಥಂ ಪಬ್ಬತಸಿಖರೇನೇವ ಪಬ್ಬತಸಿಖರಂ ಅಮ್ಬವನೇನೇವ ಅಮ್ಬವನಂ ಜಮ್ಬುವನೇನೇವ ಜಮ್ಬುವನಂ ಲಬುಜವನೇನೇವ ಲಬುಜವನಂ ನಾಳಿಕೇರಸಞ್ಚಾರಿಯೇನೇವ [ಸಞ್ಜಾದಿಯೇನೇವ (ಪೀ.)] ನಾಳಿಕೇರಸಞ್ಚಾರಿಯಂ ಖಿಪ್ಪಮೇವ ಅಭಿಸಮ್ಭೋನ್ತಿ ¶ ರತಿತ್ಥಾಯ [ರತತ್ಥಾಯ (ಸೀ. ಪೀ.)].
ಅಥ ಖಲು, ಭೋ, ಕುಣಾಲೋ ಸಕುಣೋ ತಾಹಿ ದಿಜಕಞ್ಞಾಹಿ ದಿವಸಂ ಪರಿಬ್ಯೂಳ್ಹೋ ಏವಂ ಅಪಸಾದೇತಿ – ‘‘ನಸ್ಸಥ ತುಮ್ಹೇ ವಸಲಿಯೋ, ವಿನಸ್ಸಥ ತುಮ್ಹೇ ವಸಲಿಯೋ, ಚೋರಿಯೋ ಧುತ್ತಿಯೋ ಅಸತಿಯೋ ಲಹುಚಿತ್ತಾಯೋ ಕತಸ್ಸ ಅಪ್ಪಟಿಕಾರಿಕಾಯೋ ಅನಿಲೋ ವಿಯ ಯೇನಕಾಮಂಗಮಾಯೋ’’ತಿ.
ತಸ್ಸೇವ ಖಲು, ಭೋ, ಹಿಮವತೋ ಪಬ್ಬತರಾಜಸ್ಸ ಪುರತ್ಥಿಮದಿಸಾಭಾಗೇ ಸುಸುಖುಮಸುನಿಪುಣಗಿರಿಪ್ಪಭವ [ಪ್ಪಭವಾ (ಸೀ. ಪೀ.)] – ಹರಿತುಪಯನ್ತಿಯೋ.
ಉಪ್ಪಲ ¶ ಪದುಮ ಕುಮುದ ನಳಿನ ಸತಪತ್ತ ಸೋಗನ್ಧಿಕ ಮನ್ದಾಲಕ [ಮನ್ದಾಲವ (ಸೀ. ಪೀ.), ಮನ್ದಾರವ (ಕ.)] ಸಮ್ಪತಿವಿರೂಳ್ಹಸುಚಿಗನ್ಧ ಮನುಞ್ಞಮಾವಕಪ್ಪದೇಸೇ [ಪಾವಕಪ್ಪದೇಸೇ (ಸೀ. ಪೀ.)].
ಕುರವಕ-ಮುಚಲಿನ್ದ-ಕೇತಕ-ವೇದಿಸ-ವಞ್ಜುಲ [ವೇತಸಮಞ್ಜುಲ (ಸೀ.)] -ಪುನ್ನಾಗಬಕುಲ-ತಿಲಕ-ಪಿಯಕ-ಹಸನಸಾಲ-ಸಳಲಚಮ್ಪಕ ಅಸೋಕ-ನಾಗರುಕ್ಖ-ತಿರೀಟಿ-ಭುಜಪತ್ತ-ಲೋದ್ದ-ಚನ್ದನೋಘವನೇಕಾಳಾಗರು-ಪದ್ಮಕ-ಪಿಯಙ್ಗು-ದೇವದಾರುಕಚೋಚಗಹನೇ ಕಕುಧಕುಟಜಅಙ್ಕೋಲ-ಕಚ್ಚಿಕಾರ [ಕಚ್ಛಿಕಾರ (ಕ.)] -ಕಣಿಕಾರ-ಕಣ್ಣಿಕಾರ-ಕನವೇರ-ಕೋರಣ್ಡಕ-ಕೋವಿಳಾರ-ಕಿಂಸುಕ-ಯೋಧಿಕ ವನಮಲ್ಲಿಕ [ನವಮಲ್ಲಿಕ (ಸೀ. ಪೀ.)] -ಮನಙ್ಗಣ-ಮನವಜ್ಜ-ಭಣ್ಡಿ-ಸುರುಚಿರ-ಭಗಿನಿಮಾಲಾಮಲ್ಯಧರೇ ಜಾತಿಸುಮನಮಧುಗನ್ಧಿಕ- [ಮಧುಕಬನ್ಧುಕ (ಕ.)] ಧನುತಕ್ಕಾರಿ [ಧನುಕಾರಿ (ಸೀ.), ಧನುಕಾರಿಕ (ಪೀ.)] ತಾಲೀಸ-ತಗರಮುಸೀರಕೋಟ್ಠ-ಕಚ್ಛವಿತತೇ ಅತಿಮುತ್ತಕಸಂಕುಸುಮಿತಲತಾವಿತತಪಟಿಮಣ್ಡಿತಪ್ಪದೇಸೇ ಹಂಸ-ಪಿಲವ-ಕಾದಮ್ಬ-ಕಾರಣ್ಡವಾಭಿನದಿತೇ ವಿಜ್ಜಾಧರ-ಸಿದ್ಧ [ಸಿನ್ಧವ (ಸೀ. ಪೀ.)] -ಸಮಣ-ತಾಪಸಗಣಾಧಿವುಟ್ಠೇ ವರದೇವ-ಯಕ್ಖ-ರಕ್ಖಸ-ದಾನವ-ಗನ್ಧಬ್ಬ-ಕಿನ್ನರಮಹೋರಗಾನುಚಿಣ್ಣಪ್ಪದೇಸೇ ಏವರೂಪೇ ಖಲು, ಭೋ, ರಮ್ಮೇ ವನಸಣ್ಡೇ ಪುಣ್ಣಮುಖೋ ನಾಮ ಫುಸ್ಸಕೋಕಿಲೋ ಪಟಿವಸತಿ ಅತಿವಿಯ ಮಧುರಗಿರೋ ವಿಲಾಸಿತನಯನೋ ಮತ್ತಕ್ಖೋ [ಸವಿಲಾಸಿತನಯನಮತ್ತಕ್ಖೋ (ಕ.)].
ತಸ್ಸೇವ ಖಲು, ಭೋ, ಪುಣ್ಣಮುಖಸ್ಸ ಫುಸ್ಸಕೋಕಿಲಸ್ಸ ಅಡ್ಢುಡ್ಢಾನಿ ಇತ್ಥಿಸತಾನಿ ಪರಿಚಾರಿಕಾ ದಿಜಕಞ್ಞಾಯೋ. ಅಥ ಖಲು, ಭೋ, ದ್ವೇ ದಿಜಕಞ್ಞಾಯೋ ಕಟ್ಠಂ ಮುಖೇನ ಡಂಸಿತ್ವಾ ತಂ ಪುಣ್ಣಮುಖಂ ಫುಸ್ಸಕೋಕಿಲಂ ಮಜ್ಝೇ ನಿಸೀದಾಪೇತ್ವಾ ಉಡ್ಡೇನ್ತಿ ¶ – ‘‘ಮಾ ನಂ ಪುಣ್ಣಮುಖಂ ಫುಸ್ಸಕೋಕಿಲಂ ಅದ್ಧಾನಪರಿಯಾಯಪಥೇ ಕಿಲಮಥೋ ಉಬ್ಬಾಹೇತ್ಥಾ’’ತಿ.
ಪಞ್ಞಾಸ ¶ ದಿಜಕಞ್ಞಾಯೋ ಹೇಟ್ಠತೋ ಹೇಟ್ಠತೋ ಉಡ್ಡೇನ್ತಿ – ‘‘ಸಚಾಯಂ ಪುಣ್ಣಮುಖೋ ಫುಸ್ಸಕೋಕಿಲೋ ಆಸನಾ ಪರಿಪತಿಸ್ಸತಿ, ಮಯಂ ತಂ ಪಕ್ಖೇಹಿ ಪಟಿಗ್ಗಹೇಸ್ಸಾಮಾ’’ತಿ.
ಪಞ್ಞಾಸ ದಿಜಕಞ್ಞಾಯೋ ಉಪರೂಪರಿ ಉಡ್ಡೇನ್ತಿ – ‘‘ಮಾ ನಂ ಪುಣ್ಣಮುಖಂ ಫುಸ್ಸಕೋಕಿಲಂ ಆತಪೋ ಪರಿತಾಪೇಸೀ’’ತಿ.
ಪಞ್ಞಾಸ ಪಞ್ಞಾಸ ದಿಜಕಞ್ಞಾಯೋ ಉಭತೋಪಸ್ಸೇನ ಉಡ್ಡೇನ್ತಿ – ‘‘ಮಾ ನಂ ಪುಣ್ಣಮುಖಂ ಫುಸ್ಸಕೋಕಿಲಂ ಸೀತಂ ವಾ ಉಣ್ಹಂ ವಾ ತಿಣಂ ವಾ ರಜೋ ವಾ ವಾತೋ ವಾ ಉಸ್ಸಾವೋ ವಾ ಉಪಪ್ಫುಸೀ’’ತಿ.
ಪಞ್ಞಾಸ ¶ ದಿಜಕಞ್ಞಾಯೋ ಪುರತೋ ಪುರತೋ ಉಡ್ಡೇನ್ತಿ – ‘‘ಮಾ ನಂ ಪುಣ್ಣಮುಖಂ ಫುಸ್ಸಕೋಕಿಲಂ ಗೋಪಾಲಕಾ ವಾ ಪಸುಪಾಲಕಾ ವಾ ತಿಣಹಾರಕಾ ವಾ ಕಟ್ಠಹಾರಕಾ ವಾ ವನಕಮ್ಮಿಕಾ ವಾ ಕಟ್ಠೇನ ವಾ ಕಥಲಾಯ ವಾ ಪಾಣಿನಾ ವಾ ಲೇಡ್ಡುನಾ ವಾ ದಣ್ಡೇನ ವಾ ಸತ್ಥೇನ ವಾ ಸಕ್ಖರಾಹಿ ವಾ ಪಹಾರಂ ಅದಂಸು. ಮಾಯಂ ಪುಣ್ಣಮುಖೋ ಫುಸ್ಸಕೋಕಿಲೋ ಗಚ್ಛೇಹಿ ವಾ ಲತಾಹಿ ವಾ ರುಕ್ಖೇಹಿ ವಾ ಸಾಖಾಹಿ ವಾ ಥಮ್ಭೇಹಿ ವಾ ಪಾಸಾಣೇಹಿ ವಾ ಬಲವನ್ತೇಹಿ ವಾ ಪಕ್ಖೀಹಿ ಸಙ್ಗಾಮೇಸೀ’’ತಿ.
ಪಞ್ಞಾಸ ದಿಜಕಞ್ಞಾಯೋ ಪಚ್ಛತೋ ಪಚ್ಛತೋ ಉಡ್ಡೇನ್ತಿ ಸಣ್ಹಾಹಿ ಸಖಿಲಾಹಿ ಮಞ್ಜೂಹಿ ಮಧುರಾಹಿ ವಾಚಾಹಿ ಸಮುದಾಚರನ್ತಿಯೋ – ‘‘ಮಾಯಂ ಪುಣ್ಣಮುಖೋ ಫುಸ್ಸಕೋಕಿಲೋ ಆಸನೇ ಪರಿಯುಕ್ಕಣ್ಠೀ’’ತಿ.
ಪಞ್ಞಾಸ ದಿಜಕಞ್ಞಾಯೋ ದಿಸೋದಿಸಂ ಉಡ್ಡೇನ್ತಿ ಅನೇಕರುಕ್ಖವಿವಿಧವಿಕತಿಫಲಮಾಹರನ್ತಿಯೋ – ‘‘ಮಾಯಂ ಪುಣ್ಣಮುಖೋ ಫುಸ್ಸಕೋಕಿಲೋ ಖುದಾಯ ಪರಿಕಿಲಮಿತ್ಥಾ’’ತಿ.
ಅಥ ಖಲು, ಭೋ, ತಾ ದಿಜಕಞ್ಞಾಯೋ ತಂ ಪುಣ್ಣಮುಖಂ ಫುಸ್ಸಕೋಕಿಲಂ ¶ ಆರಾಮೇನೇವ ಆರಾಮಂ ಉಯ್ಯಾನೇನೇವ ಉಯ್ಯಾನಂ ನದೀತಿತ್ಥೇನೇವ ನದೀತಿತ್ಥಂ ಪಬ್ಬತಸಿಖರೇನೇವ ಪಬ್ಬತಸಿಖರಂ ಅಮ್ಬವನೇನೇವ ಅಮ್ಬವನಂ ಜಮ್ಬುವನೇನೇವ ಜಮ್ಬುವನಂ ಲಬುಜವನೇನೇವ ಲಬುಜವನಂ ನಾಳಿಕೇರಸಞ್ಚಾರಿಯೇನೇವ ನಾಳಿಕೇರಸಞ್ಚಾರಿಯಂ ಖಿಪ್ಪಮೇವ ಅಭಿಸಮ್ಭೋನ್ತಿ ರತಿತ್ಥಾಯ.
ಅಥ ಖಲು, ಭೋ, ಪುಣ್ಣಮುಖೋ ಫುಸ್ಸಕೋಕಿಲೋ ತಾಹಿ ದಿಜಕಞ್ಞಾಹಿ ದಿವಸಂ ಪರಿಬ್ಯೂಳ್ಹೋ ಏವಂ ಪಸಂಸತಿ – ‘‘ಸಾಧು, ಸಾಧು, ಭಗಿನಿಯೋ, ಏತಂ ಖೋ, ಭಗಿನಿಯೋ, ತುಮ್ಹಾಕಂ ಪತಿರೂಪಂ ಕುಲಧೀತಾನಂ, ಯಂ ತುಮ್ಹೇ ಭತ್ತಾರಂ ಪರಿಚರೇಯ್ಯಾಥಾ’’ತಿ.
ಅಥ ¶ ಖಲು, ಭೋ, ಪುಣ್ಣಮುಖೋ ಫುಸ್ಸಕೋಕಿಲೋ ಯೇನ ಕುಣಾಲೋ ಸಕುಣೋ ತೇನುಪಸಙ್ಕಮಿ. ಅದ್ದಸಂಸು ಖೋ ಕುಣಾಲಸ್ಸ ಸಕುಣಸ್ಸ ಪರಿಚಾರಿಕಾ ದಿಜಕಞ್ಞಾಯೋ ತಂ ಪುಣ್ಣಮುಖಂ ಫುಸ್ಸಕೋಕಿಲಂ ದೂರತೋವ ಆಗಚ್ಛನ್ತಂ; ದಿಸ್ವಾನ ಯೇನ ಪುಣ್ಣಮುಖೋ ಫುಸ್ಸಕೋಕಿಲೋ ತೇನುಪಸಙ್ಕಮಿಂಸು; ಉಪಸಙ್ಕಮಿತ್ವಾ ತಂ ಪುಣ್ಣಮುಖಂ ಫುಸ್ಸಕೋಕಿಲಂ ಏತದವೋಚುಂ – ‘‘ಅಯಂ, ಸಮ್ಮ ಪುಣ್ಣಮುಖ, ಕುಣಾಲೋ ಸಕುಣೋ ಅತಿವಿಯ ಫರುಸೋ ಅತಿವಿಯ ಫರುಸವಾಚೋ, ಅಪ್ಪೇವನಾಮ ತವಮ್ಪಿ ಆಗಮ್ಮ ಪಿಯವಾಚಂ ಲಭೇಯ್ಯಾಮಾ’’ತಿ. ‘‘ಅಪ್ಪೇವನಾಮ, ಭಗಿನಿಯೋ’’ತಿ ವತ್ವಾ ಯೇನ ಕುಣಾಲೋ ಸಕುಣೋ ತೇನುಪಸಙ್ಕಮಿ; ಉಪಸಙ್ಕಮಿತ್ವಾ ಕುಣಾಲೇನ ¶ ಸಕುಣೇನ ಸದ್ಧಿಂ ಪಟಿಸಮ್ಮೋದಿತ್ವಾ ಏಕಮನ್ತಂ ನಿಸೀದಿ. ಏಕಮನ್ತಂ ನಿಸಿನ್ನೋ ಖೋ ಪುಣ್ಣಮುಖೋ ಫುಸ್ಸಕೋಕಿಲೋ ತಂ ಕುಣಾಲಂ ಸಕುಣಂ ಏತದವೋಚ – ‘‘ಕಿಸ್ಸ ತ್ವಂ, ಸಮ್ಮ ಕುಣಾಲ, ಇತ್ಥೀನಂ ಸುಜಾತಾನಂ ಕುಲಧೀತಾನಂ ಸಮ್ಮಾಪಟಿಪನ್ನಾನಂ ಮಿಚ್ಛಾಪಟಿಪನ್ನೋ’ಸಿ [ಪಟಿಪನ್ನೋ (ಸೀ. ಪೀ.)]? ಅಮನಾಪಭಾಣೀನಮ್ಪಿ ಕಿರ, ಸಮ್ಮ ಕುಣಾಲ, ಇತ್ಥೀನಂ ಮನಾಪಭಾಣಿನಾ ಭವಿತಬ್ಬಂ, ಕಿಮಙ್ಗ ಪನ ಮನಾಪಭಾಣೀನ’’ನ್ತಿ!
ಏವಂ ವುತ್ತೇ, ಕುಣಾಲೋ ಸಕುಣೋ ತಂ ಪುಣ್ಣಮುಖಂ ಫುಸ್ಸಕೋಕಿಲಂ ಏವಂ ಅಪಸಾದೇಸಿ – ‘‘ನಸ್ಸ ತ್ವಂ, ಸಮ್ಮ ಜಮ್ಮ ವಸಲ, ವಿನಸ್ಸ ತ್ವಂ, ಸಮ್ಮ ಜಮ್ಮ ವಸಲ, ಕೋ ನು ತಯಾ ವಿಯತ್ತೋ ಜಾಯಾಜಿನೇನಾ’’ತಿ. ಏವಂ ಅಪಸಾದಿತೋ ಚ ಪನ ಪುಣ್ಣಮುಖೋ ಫುಸ್ಸಕೋಕಿಲೋ ತತೋಯೇವ [ತತೋ ಹೇವ (ಸೀ. ಪೀ.)] ಪಟಿನಿವತ್ತಿ.
ಅಥ ಖಲು, ಭೋ, ಪುಣ್ಣಮುಖಸ್ಸ ಫುಸ್ಸಕೋಕಿಲಸ್ಸ ಅಪರೇನ ಸಮಯೇನ ನಚಿರಸ್ಸೇವ [ಅಚಿರಸ್ಸೇವ ಅಚ್ಚಯೇನ (ಕ.)] ಖರೋ ಆಬಾಧೋ ಉಪ್ಪಜ್ಜಿ ಲೋಹಿತಪಕ್ಖನ್ದಿಕಾ. ಬಾಳ್ಹಾ ವೇದನಾ ವತ್ತನ್ತಿ ಮಾರಣನ್ತಿಕಾ [ಮರಣನ್ತಿಕಾ (ಸ್ಯಾ.)]. ಅಥ ಖಲು, ಭೋ, ಪುಣ್ಣಮುಖಸ್ಸ ಫುಸ್ಸಕೋಕಿಲಸ್ಸ ಪರಿಚಾರಿಕಾನಂ ದಿಜಕಞ್ಞಾನಂ ಏತದಹೋಸಿ – ‘‘ಆಬಾಧಿಕೋ ಖೋ ಅಯಂ ಪುಣ್ಣಮುಖೋ ಫುಸ್ಸಕೋಕಿಲೋ, ಅಪ್ಪೇವನಾಮ ಇಮಮ್ಹಾ ಆಬಾಧಾ ವುಟ್ಠಹೇಯ್ಯಾ’’ತಿ ಏಕಂ ಅದುತಿಯಂ ಓಹಾಯ ಯೇನ ಕುಣಾಲೋ ಸಕುಣೋ ತೇನುಪಸಙ್ಕಮಿಂಸು. ಅದ್ದಸಾ ಖೋ ಕುಣಾಲೋ ಸಕುಣೋ ತಾ ದಿಜಕಞ್ಞಾಯೋ ದೂರತೋವ ಆಗಚ್ಛನ್ತಿಯೋ, ದಿಸ್ವಾನ ತಾ ದಿಜಕಞ್ಞಾಯೋ ಏತದವೋಚ – ‘‘ಕಹಂ ಪನ ತುಮ್ಹಂ ವಸಲಿಯೋ ಭತ್ತಾ’’ತಿ? ‘‘ಆಬಾಧಿಕೋ ಖೋ, ಸಮ್ಮ ಕುಣಾಲ, ಪುಣ್ಣಮುಖೋ ಫುಸ್ಸಕೋಕಿಲೋ ಅಪ್ಪೇವನಾಮ ತಮ್ಹಾ ಆಬಾಧಾ ವುಟ್ಠಹೇಯ್ಯಾ’’ತಿ. ಏವಂ ವುತ್ತೇ, ಕುಣಾಲೋ ಸಕುಣೋ ತಾ ದಿಜಕಞ್ಞಾಯೋ ಏವಂ ಅಪಸಾದೇಸಿ – ‘‘ನಸ್ಸಥ ತುಮ್ಹೇ ವಸಲಿಯೋ, ವಿನಸ್ಸಥ ತುಮ್ಹೇ ವಸಲಿಯೋ, ಚೋರಿಯೋ ಧುತ್ತಿಯೋ ಅಸತಿಯೋ ಲಹುಚಿತ್ತಾಯೋ ಕತಸ್ಸ ಅಪ್ಪಟಿಕಾರಿಕಾಯೋ ಅನಿಲೋ ವಿಯ ಯೇನಕಾಮಂಗಮಾಯೋ’’ತಿ; ವತ್ವಾ ಯೇನ ಪುಣ್ಣಮುಖೋ ಫುಸ್ಸಕೋಕಿಲೋ ತೇನುಪಸಙ್ಕಮಿ; ಉಪಸಙ್ಕಮಿತ್ವಾ ತಂ ¶ ಪುಣ್ಣಮುಖಂ ಫುಸ್ಸಕೋಕಿಲಂ ಏತದವೋಚ – ‘‘ಹಂ, ಸಮ್ಮ, ಪುಣ್ಣಮುಖಾ’’ತಿ. ‘‘ಹಂ, ಸಮ್ಮ, ಕುಣಾಲಾ’’ತಿ.
ಅಥ ಖಲು, ಭೋ ಕುಣಾಲೋ ಸಕುಣೋ ತಂ ಪುಣ್ಣಮುಖಂ ಫುಸ್ಸಕೋಕಿಲಂ ಪಕ್ಖೇಹಿ ಚ ಮುಖತುಣ್ಡಕೇನ ¶ ಚ ಪರಿಗ್ಗಹೇತ್ವಾ ವುಟ್ಠಾಪೇತ್ವಾ ನಾನಾಭೇಸಜ್ಜಾನಿ ಪಾಯಾಪೇಸಿ. ಅಥ ಖಲು, ಭೋ, ಪುಣ್ಣಮುಖಸ್ಸ ಫುಸ್ಸಕೋಕಿಲಸ್ಸ ಸೋ ಆಬಾಧೋ ಪಟಿಪ್ಪಸ್ಸಮ್ಭೀತಿ. ಅಥ ಖಲು, ಭೋ, ಕುಣಾಲೋ ಸಕುಣೋ ತಂ ಪುಣ್ಣಮುಖಂ ¶ ಫುಸ್ಸಕೋಕಿಲಂ ಗಿಲಾನವುಟ್ಠಿತಂ [ಗಿಲಾನಾವುಟ್ಠಿತಂ (ಸೀ. ಸ್ಯಾ. ಪೀ.)] ಅಚಿರವುಟ್ಠಿತಂ ಗೇಲಞ್ಞಾ ಏತದವೋಚ –
‘‘ದಿಟ್ಠಾ ಮಯಾ, ಸಮ್ಮ ಪುಣ್ಣಮುಖ, ಕಣ್ಹಾ ದ್ವೇಪಿತಿಕಾ ಪಞ್ಚಪತಿಕಾಯ ಛಟ್ಠೇ ಪುರಿಸೇ ಚಿತ್ತಂ ಪಟಿಬನ್ಧನ್ತಿಯಾ, ಯದಿದಂ ಕಬನ್ಧೇ [ಕವನ್ಧೇ (ಸೀ. ಪೀ.)] ಪೀಠಸಪ್ಪಿಮ್ಹೀತಿ. ಭವತಿ ಚ ಪನುತ್ತರೇತ್ಥ [ಪುನುತ್ತಚೇತ್ಥ (ಕ.) ಏವಮುಪರಿಪಿ] ವಾಕ್ಯಂ –
‘‘ಅಥಜ್ಜುನೋ ನಕುಲೋ ಭೀಮಸೇನೋ [ಭಿಮ್ಮಸೇನೋ (ಸೀ. ಸ್ಯಾ. ಪೀ.)], ಯುಧಿಟ್ಠಿಲೋ ಸಹದೇವೋ [ಸೀಹದೇವೋ (ಕ.)] ಚ ರಾಜಾ;
ಏತೇ ಪತೀ ಪಞ್ಚ ಮತ್ತಿಚ್ಚ ನಾರೀ, ಅಕಾಸಿ ಖುಜ್ಜವಾಮನಕೇನ [ಖುಜ್ಜವಾಮನೇನ (ಪೀ.)] ಪಾಪ’’ನ್ತಿ.
‘‘ದಿಟ್ಠಾ ಮಯಾ, ಸಮ್ಮ ಪುಣ್ಣಮುಖ, ಸಚ್ಚತಪಾಪೀ [ಸಚ್ಚತಪಾವೀ (ಸೀ. ಪೀ.), ಪಞ್ಚತಪಾವೀ (ಸ್ಯಾ.)] ನಾಮ ಸಮಣೀ ಸುಸಾನಮಜ್ಝೇ ವಸನ್ತೀ ಚತುತ್ಥಭತ್ತಂ ಪರಿಣಾಮಯಮಾನಾ ಸುರಾಧುತ್ತಕೇನ [ತುಲಾಪುತ್ತಕೇನ (ಸೀ. ಪೀ.), ಸಾ ಸುರಾಧುತ್ತಕೇನ (ಕ.)] ಪಾಪಮಕಾಸಿ.
‘‘ದಿಟ್ಠಾ ಮಯಾ, ಸಮ್ಮ ಪುಣ್ಣಮುಖ, ಕಾಕವತೀ [ಕಾಕಾತೀ (ಸೀ.), ಕಾಕಾತಿ (ಪೀ.)] ನಾಮ ದೇವೀ ಸಮುದ್ದಮಜ್ಝೇ ವಸನ್ತೀ ಭರಿಯಾ ವೇನತೇಯ್ಯಸ್ಸ ನಟಕುವೇರೇನ ಪಾಪಮಕಾಸಿ.
ದಿಟ್ಠಾ ಮಯಾ, ಸಮ್ಮ ಪುಣ್ಣಮುಖ, ಕುರುಙ್ಗದೇವೀ [ಕುರಙ್ಗವೀ (ಸೀ. ಪೀ.)] ನಾಮ ಲೋಮಸುದ್ದರೀ [ಲೋಮಸುನ್ದರೀ (ಸೀ. ಸ್ಯಾ. ಪೀ.)] ಏಳಿಕಕುಮಾರಂ [ಏಳಮಾರಕಂ (ಸೀ.), ಏಳಕಕುಮಾರಂ (ಸ್ಯಾ.), ಏಳಕಮಾರಂ (ಪೀ.)] ಕಾಮಯಮಾನಾ ಛಳಙ್ಗಕುಮಾರಧನನ್ತೇವಾಸಿನಾ ಪಾಪಮಕಾಸಿ.
ಏವಞ್ಹೇತಂ ¶ ಮಯಾ ಞಾತಂ, ಬ್ರಹ್ಮದತ್ತಸ್ಸ ಮಾತರಂ [ಮಾತುಕಾ (ಸ್ಯಾ.)] ಓಹಾಯ ಕೋಸಲರಾಜಂ ಪಞ್ಚಾಲಚಣ್ಡೇನ ಪಾಪಮಕಾಸಿ.
‘‘ಏತಾ ಚ ಅಞ್ಞಾ ಚ ಅಕಂಸು ಪಾಪಂ, ತಸ್ಮಾಹಮಿತ್ಥೀನಂ ನ ವಿಸ್ಸಸೇ ನಪ್ಪಸಂಸೇ;
ಮಹೀ ಯಥಾ ಜಗತಿ ಸಮಾನರತ್ತಾ, ವಸುನ್ಧರಾ ಇತರೀತರಾಪತಿಟ್ಠಾ [ಇತರೀತರಾನಂ ಪತಿಟ್ಠಾ (ಸ್ಯಾ.), ಇತ್ತರೀತರಪ್ಪತಿಟ್ಠಾ (?)];
ಸಬ್ಬಸಹಾ ಅಫನ್ದನಾ ಅಕುಪ್ಪಾ, ತಥಿತ್ಥಿಯೋ ತಾಯೋ ನ ವಿಸ್ಸಸೇ ನರೋ.
‘‘ಸೀಹೋ ¶ ಯಥಾ ಲೋಹಿತಮಂಸಭೋಜನೋ, ವಾಳಮಿಗೋ ಪಞ್ಚಾವುಧೋ [ಪಞ್ಚಹತ್ಥೋ (ಸೀ. ಪೀ.)] ಸುರುದ್ಧೋ;
ಪಸಯ್ಹಖಾದೀ ಪರಹಿಂಸನೇ ರತೋ, ತಥಿತ್ಥಿಯೋ ತಾಯೋ ನ ವಿಸ್ಸಸೇ ನರೋ.
‘‘ನ ಖಲು [ನ ಖಲು ಭೋ (ಸ್ಯಾ. ಕ.)], ಸಮ್ಮ ಪುಣ್ಣಮುಖ, ವೇಸಿಯೋ ನಾರಿಯೋ ಗಮನಿಯೋ, ನ ಹೇತಾ ಬನ್ಧಕಿಯೋ ನಾಮ, ವಧಿಕಾಯೋ ನಾಮ ಏತಾಯೋ, ಯದಿದಂ ವೇಸಿಯೋ ನಾರಿಯೋ ಗಮನಿಯೋ’’ತಿ.
‘‘ಚೋರೋ ¶ [ಚೋರಾ (ಸೀ. ಸ್ಯಾ. ಪೀ.)] ವಿಯ ವೇಣಿಕತಾ, ಮದಿರಾವ [ಮದಿರಾ ವಿಯ (ಸೀ. ಸ್ಯಾ.), ಮದಿರಿವ (ಪೀ.)] ದಿದ್ಧಾ [ದಿಟ್ಠಾ (ಕ.), ವಿಸದುಟ್ಠಾ (ಸ್ಯಾ.)] ವಾಣಿಜೋ [ವಾಣಿಜಾ (ಪೀ.)] ವಿಯ ವಾಚಾಸನ್ಥುತಿಯೋ, ಇಸ್ಸಸಿಙ್ಘಮಿವ ವಿಪರಿವತ್ತಾಯೋ [ಪರಿವತ್ತಾಯೋ (ಪೀ.), ವಿಪರಿವತ್ತಾರೋ (ಕ.)], ಉರಗಾಮಿವ ದುಜಿವ್ಹಾಯೋ, ಸೋಬ್ಭಮಿವ ಪಟಿಚ್ಛನ್ನಾ, ಪಾತಾಲಮಿವ ದುಪ್ಪೂರಾ ರಕ್ಖಸೀ ವಿಯ ದುತ್ತೋಸಾ, ಯಮೋವೇಕನ್ತಹಾರಿಯೋ, ಸಿಖೀರಿವ ಸಬ್ಬಭಕ್ಖಾ, ನದೀರಿವ ಸಬ್ಬವಾಹೀ, ಅನಿಲೋ ವಿಯ ಯೇನಕಾಮಂಚರಾ, ನೇರು ವಿಯ ಅವಿಸೇಸಕರಾ, ವಿಸರುಕ್ಖೋ ವಿಯ ನಿಚ್ಚಫಲಿತಾಯೋ’’ತಿ. ಭವತಿ ಚ ಪನುತ್ತರೇತ್ಥ ವಾಕ್ಯಂ –
‘‘ಯಥಾ ¶ ಚೋರೋ ಯಥಾ ದಿದ್ಧೋ, ವಾಣಿಜೋವ ವಿಕತ್ಥನೀ;
ಇಸ್ಸಸಿಙ್ಘಮಿವ ಪರಿವತ್ತಾ [ಮಿವಾವಟ್ಟೋ (ಸೀ.), ಮಿವಾವತ್ತಾ (ಪೀ.)], ದುಜಿವ್ಹಾ [ದುಜ್ಜಿವ್ಹ (ಪೀ.)] ಉರಗೋ ವಿಯ.
‘‘ಸೋಬ್ಭಮಿವ ಪಟಿಚ್ಛನ್ನಾ, ಪಾತಾಲಮಿವ ದುಪ್ಪುರಾ;
ರಕ್ಖಸೀ ವಿಯ ದುತ್ತೋಸಾ, ಯಮೋವೇಕನ್ತಹಾರಿಯೋ.
[ಯಥಾ ಸಿಖೀ ನದೀವಾಹೋ, ಅನಿಲೋ ಕಾಮಚಾರವಾ;§ನೇರೂವ ಅವಿಸೇಸಾ ಚ, ವಿಸರುಕ್ಖೋ ವಿಯ ನಿಚ್ಚಫಲಾ;§ನಾಸಯನ್ತಿ ಘರೇ ಭೋಗಂ, ರತನಾನನ್ತಕರಿತ್ಥಿ ಯೋತಿ; (ಸೀ. ಸ್ಯಾ.)]
‘‘ಯಥಾ ಸಿಖೀ ನದೀ ವಾತೋ, ನೇರುನಾವ ಸಮಾಗತಾ.
ವಿಸರುಕ್ಖೋ ವಿಯ ನಿಚ್ಚಫಲಾ, ನಾಸಯನ್ತಿ ಘರೇ ಭೋಗಂ;
ರತನನ್ತಕರಿತ್ಥಿಯೋ’’ತಿ [ಯಥಾ ಸಿಖೀ ನದೀವಾಹೋ, ಅನಿಲೋ ಕಾಮಚಾರವಾ;§ನೇರೂವ ಅವಿಸೇಸಾ ಚ, ವಿಸರುಕ್ಖೋ ವಿಯ ನಿಚ್ಚಫಲಾ;§ನಾಸಯನ್ತಿ ಘರೇ ಭೋಗಂ, ರತನಾನನ್ತಕರಿತ್ಥಿ ಯೋತಿ; (ಸೀ. ಸ್ಯಾ.)].
‘‘ಚತ್ತಾರಿಮಾನಿ, ಸಮ್ಮ ಪುಣ್ಣಮುಖ, ಯಾನಿ (ವತ್ಥೂನಿ ಕಿಚ್ಚೇ ಜಾತೇ ಅನತ್ಥಚರಾನಿ ಭವನ್ತಿ; ತಾನಿ) [( ) ಸೀ. ಸ್ಯಾ. ಪೋತ್ಥಕೇಸು ನ ದಿಸ್ಸತಿ] ಪರಕುಲೇ ನ ವಾಸೇತಬ್ಬಾನಿ – ಗೋಣಂ ಧೇನುಂ ಯಾನಂ ಭರಿಯಾ. ಚತ್ತಾರಿ ಏತಾನಿ ಪಣ್ಡಿತೋ ಧನಾನಿ [ಯಾನಿ (ಸೀ. ಸ್ಯಾ. ಪೀ.)] ಘರಾ ನ ವಿಪ್ಪವಾಸಯೇ.
‘ಗೋಣಂ ¶ ಧೇನುಞ್ಚ ಯಾನಞ್ಚ, ಭರಿಯಂ ಞಾತಿಕುಲೇ ನ ವಾಸಯೇ;
ಭಞ್ಜನ್ತಿ ರಥಂ ಅಯಾನಕಾ, ಅತಿವಾಹೇನ ಹನನ್ತಿ ಪುಙ್ಗವಂ;
ದೋಹೇನ ಹನನ್ತಿ ವಚ್ಛಕಂ, ಭರಿಯಾ ಞಾತಿಕುಲೇ ಪದುಸ್ಸತೀ’’’ತಿ.
‘‘ಛ ಇಮಾನಿ, ಸಮ್ಮ ಪುಣ್ಣಮುಖ, ಯಾನಿ (ವತ್ಥೂನಿ) [( ) ಸೀ. ಪೀ. ಪೋತ್ಥಕೇಸು ನು ದಿಸ್ಸತಿ] ಕಿಚ್ಚೇ ಜಾತೇ ಅನತ್ಥಚರಾನಿ ಭವನ್ತಿ –
‘ಅಗುಣಂ ಧನು ಞಾತಿಕುಲೇ ಚ ಭರಿಯಾ, ಪಾರಂ ನಾವಾ ಅಕ್ಖಭಗ್ಗಞ್ಚ ಯಾನಂ;
ದೂರೇ ¶ ಮಿತ್ತೋ ಪಾಪಸಹಾಯಕೋ ಚ, ಕಿಚ್ಚೇ ಜಾತೇ ಅನತ್ಥಚರಾನಿ ಭವ’’’ನ್ತಿ.
‘‘ಅಟ್ಠಹಿ ಖಲು, ಸಮ್ಮ ಪುಣ್ಣಮುಖ, ಠಾನೇಹಿ ಇತ್ಥೀ ಸಾಮಿಕಂ ಅವಜಾನಾತಿ. ದಲಿದ್ದತಾ, ಆತುರತಾ, ಜಿಣ್ಣತಾ, ಸುರಾಸೋಣ್ಡತಾ, ಮುದ್ಧತಾ, ಪಮತ್ತತಾ, ಸಬ್ಬಕಿಚ್ಚೇಸು ಅನುವತ್ತನತಾ, ಸಬ್ಬಧನಅನುಪ್ಪದಾನೇನ ¶ – ಇಮೇಹಿ ಖಲು, ಸಮ್ಮ ಪುಣ್ಣಮುಖ, ಅಟ್ಠಹಿ ಠಾನೇಹಿ ಇತ್ಥೀ ಸಾಮಿಕಂ ಅವಜಾನಾತಿ. ಭವತಿ ಚ ಪನುತ್ತರೇತ್ಥ ವಾಕ್ಯಂ –
‘ದಲಿದ್ದಂ ಆತುರಞ್ಚಾಪಿ, ಜಿಣ್ಣಕಂ ಸುರಸೋಣ್ಡಕಂ;
ಪಮತ್ತಂ ಮುದ್ಧಪತ್ತಞ್ಚ, ಸಬ್ಬಕಿಚ್ಚೇಸು [ರತ್ತಂ ಕಿಚ್ಚೇಸು (ಸೀ. ಪೀ.)] ಹಾಪನಂ;
ಸಬ್ಬಕಾಮಪ್ಪದಾನೇನ [ಸಬ್ಬಕಾಮಪಣಿಧಾನೇನ (ಸ್ಯಾ)], ಅವಜಾನಾತಿ [ಅವಜಾನನ್ತಿ (ಸೀ. ಪೀ.)] ಸಾಮಿಕ’’’ನ್ತಿ.
‘‘ನವಹಿ ಖಲು, ಸಮ್ಮ ಪುಣ್ಣಮುಖ, ಠಾನೇಹಿ ಇತ್ಥೀ ಪದೋಸಮಾಹರತಿ. ಆರಾಮಗಮನಸೀಲಾ ಚ ಹೋತಿ, ಉಯ್ಯಾನಗಮನಸೀಲಾ ಚ ಹೋತಿ, ನದೀತಿತ್ಥಗಮನಸೀಲಾ ಚ ಹೋತಿ, ಞಾತಿಕುಲಗಮನಸೀಲಾ ಚ ಹೋತಿ, ಪರಕುಲಗಮನಸೀಲಾ ಚ ಹೋತಿ, ಆದಾಸದುಸ್ಸಮಣ್ಡನಾನುಯೋಗಮನುಯುತ್ತಸೀಲಾ ಚ ಹೋತಿ, ಮಜ್ಜಪಾಯಿನೀ ಚ ಹೋತಿ, ನಿಲ್ಲೋಕನಸೀಲಾ ಚ ಹೋತಿ, ಸದ್ವಾರಠಾಯಿನೀ [ಪದ್ವಾರಟ್ಠಾಯಿನೀ (ಸೀ. ಸ್ಯಾ. ಪೀ.)] ಚ ಹೋತಿ – ಇಮೇಹಿ ಖಲು, ಸಮ್ಮ ಪುಣ್ಣಮುಖ, ನವಹಿ ಠಾನೇಹಿ ಇತ್ಥೀ ಪದೋಸಮಾಹರತೀತಿ. ಭವತಿ ಚ ಪನುತ್ತರೇತ್ಥ ವಾಕ್ಯಂ –
‘ಆರಾಮಸೀಲಾ ಚ [ಆರಾಮಸೀಲಾ (ಸೀ. ಪೀ.)] ಉಯ್ಯಾನಂ, ನದೀ ಞಾತಿ ಪರಕುಲಂ;
ಆದಾಸದುಸ್ಸಮಣ್ಡನಮನುಯುತ್ತಾ, ಯಾ ¶ ಚಿತ್ಥೀ ಮಜ್ಜಪಾಯಿನೀ.
‘ಯಾ ¶ ಚ ನಿಲ್ಲೋಕನಸೀಲಾ, ಯಾ ಚ ಸದ್ವಾರಠಾಯಿನೀ;
ನವಹೇತೇಹಿ ಠಾನೇಹಿ, ಪದೋಸಮಾಹರನ್ತಿ ಇತ್ಥಿಯೋ’’’ತಿ.
‘‘ಚತ್ತಾಲೀಸಾಯ [ಚತ್ತಾಲೀಸಾಯಿ (ಪೀ. ಕ.)] ಖಲು, ಸಮ್ಮ ಪುಣ್ಣಮುಖ, ಠಾನೇಹಿ ಇತ್ಥೀ ಪುರಿಸಂ ಅಚ್ಚಾಚರತಿ [ಅಚ್ಚಾವದತಿ (ಸೀ. ಸ್ಯಾ. ಪೀ.)]. ವಿಜಮ್ಭತಿ, ವಿನಮತಿ, ವಿಲಸತಿ, ವಿಲಜ್ಜತಿ, ನಖೇನ ನಖಂ ಘಟ್ಟೇತಿ, ಪಾದೇನ ಪಾದಂ ಅಕ್ಕಮತಿ, ಕಟ್ಠೇನ ಪಥವಿಂ ವಿಲಿಖತಿ [ಲಿಖತಿ (ಸೀ. ಪೀ.)], ದಾರಕಂ ಉಲ್ಲಙ್ಘತಿ ಉಲ್ಲಙ್ಘಾಪೇತಿ [ದಾರಕಂ ಉಲ್ಲಙ್ಘೇತಿ ಓಲಙ್ಘೇತಿ (ಸೀ. ಪೀ.)], ಕೀಳತಿ ಕೀಳಾಪೇತಿ, ಚುಮ್ಬತಿ ಚುಮ್ಬಾಪೇತಿ, ಭುಞ್ಜತಿ ಭುಞ್ಜಾಪೇತಿ, ದದಾತಿ, ಯಾಚತಿ, ಕತಮನುಕರೋತಿ, ಉಚ್ಚಂ ಭಾಸತಿ, ನೀಚಂ ಭಾಸತಿ, ಅವಿಚ್ಚಂ ಭಾಸತಿ, ವಿವಿಚ್ಚಂ ಭಾಸತಿ, ನಚ್ಚೇನ ಗೀತೇನ ವಾದಿತೇನ ರೋದನೇನ [ರೋದಿತೇನ (ಸೀ. ಪೀ.)] ವಿಲಸಿತೇನ ವಿಭೂಸಿತೇನ ಜಗ್ಘತಿ, ಪೇಕ್ಖತಿ, ಕಟಿಂ ಚಾಲೇತಿ, ಗುಯ್ಹಭಣ್ಡಕಂ ಸಞ್ಚಾಲೇತಿ, ಊರುಂ ವಿವರತಿ, ಊರುಂ ಪಿದಹತಿ, ಥನಂ ದಸ್ಸೇತಿ, ಕಚ್ಛಂ ದಸ್ಸೇತಿ, ನಾಭಿಂ ದಸ್ಸೇತಿ, ಅಕ್ಖಿಂ ನಿಖನತಿ, ಭಮುಕಂ ಉಕ್ಖಿಪತಿ, ಓಟ್ಠಂ ಉಪಲಿಖತಿ [ಓಟ್ಠಂ ಪಲಿಖತಿ ಜಿವ್ಹಂ ಪಲಿಖತಿ (ಸೀ. ಪೀ.)], ಜಿವ್ಹಂ ನಿಲ್ಲಾಲೇತಿ, ದುಸ್ಸಂ ಮುಞ್ಚತಿ, ದುಸ್ಸಂ ಪಟಿಬನ್ಧತಿ, ಸಿರಸಂ ಮುಞ್ಚತಿ, ಸಿರಸಂ ಬನ್ಧತಿ – ಇಮೇಹಿ ಖಲು, ಸಮ್ಮ ಪುಣ್ಣಮುಖ, ಚತ್ತಾಲೀಸಾಯ ಠಾನೇಹಿ ಇತ್ಥೀ ಪುರಿಸಂ ಅಚ್ಚಾಚರತಿ.
‘‘ಪಞ್ಚವೀಸಾಯ [ಪಞ್ಚವೀಸಾಹಿ (ಪೀ. ಕ.)] ಖಲು, ಸಮ್ಮ ಪುಣ್ಣಮುಖ, ಠಾನೇಹಿ ಇತ್ಥೀ ಪದುಟ್ಠಾ ವೇದಿತಬ್ಬಾ ಭವತಿ. ಸಾಮಿಕಸ್ಸ ಪವಾಸಂ ವಣ್ಣೇತಿ, ಪವುಟ್ಠಂ ನ ¶ ಸರತಿ, ಆಗತಂ ನಾಭಿನನ್ದತಿ, ಅವಣ್ಣಂ ತಸ್ಸ ಭಣತಿ, ವಣ್ಣಂ ¶ ತಸ್ಸ ನ ಭಣತಿ, ಅನತ್ಥಂ ತಸ್ಸ ಚರತಿ, ಅತ್ಥಂ ತಸ್ಸ ನ ಚರತಿ, ಅಕಿಚ್ಚಂ ತಸ್ಸ ಕರೋತಿ, ಕಿಚ್ಚಂ ತಸ್ಸ ನ ಕರೋತಿ, ಪರಿದಹಿತ್ವಾ ಸಯತಿ, ಪರಮ್ಮುಖೀ ನಿಪಜ್ಜತಿ, ಪರಿವತ್ತಕಜಾತಾ ಖೋ ಪನ ಹೋತಿ ಕುಙ್ಕುಮಿಯಜಾತಾ, ದೀಘಂ ಅಸ್ಸಸತಿ, ದುಕ್ಖಂ ವೇದಯತಿ, ಉಚ್ಚಾರಪಸ್ಸಾವಂ ಅಭಿಣ್ಹಂ ಗಚ್ಛತಿ, ವಿಲೋಮಮಾಚರತಿ, ಪರಪುರಿಸಸದ್ದಂ ಸುತ್ವಾ ಕಣ್ಣಸೋತಂ ವಿವರಮೋದಹತಿ [ವಿವರತಿ ಕಮೋದಹತಿ (ಪೀ.)], ನಿಹತಭೋಗಾ ಖೋ ಪನ ಹೋತಿ, ಪಟಿವಿಸ್ಸಕೇಹಿ ಸನ್ಥವಂ ಕರೋತಿ, ನಿಕ್ಖನ್ತಪಾದಾ ಖೋ ಪನ ಹೋತಿ, ವಿಸಿಖಾನುಚಾರಿನೀ ಅತಿಚಾರಿನೀ ಖೋ ಪನ ಹೋತಿ, ನಿಚ್ಚಂ [ನತ್ಥಿ ಸೀ. ಸ್ಯಾ. ಪೀ. ಪೋತ್ಥಕೇಸು] ಸಾಮಿಕೇ ಅಗಾರವಾ ಪದುಟ್ಠಮನಸಙ್ಕಪ್ಪಾ, ಅಭಿಣ್ಹಂ ದ್ವಾರೇ ತಿಟ್ಠತಿ, ಕಚ್ಛಾನಿ ಅಙ್ಗಾನಿ ಥನಾನಿ ದಸ್ಸೇತಿ, ದಿಸೋದಿಸಂ ಗನ್ತ್ವಾ ಪೇಕ್ಖತಿ – ಇಮೇಹಿ ಖಲು, ಸಮ್ಮ ಪುಣ್ಣಮುಖ, ಪಞ್ಚವೀಸಾಯ [ಪಞ್ಚವೀಸಾಹಿ (ಕ.)] ಠಾನೇಹಿ ಇತ್ಥೀ ಪದುಟ್ಠಾ ವೇದಿತಬ್ಬಾ ಭವತಿ. ಭವತಿ ಚ ಪನುತ್ತರೇತ್ಥ ವಾಕ್ಯಂ –
‘ಪವಾಸಂ ¶ ತಸ್ಸ ವಣ್ಣೇತಿ, ಗತಂ ತಸ್ಸ ನ ಸೋಚತಿ [ಪವಾಸ’ಮಸ್ಸ ವಣ್ಣೇತಿ ಗತಿಂ ನಾನುಸೋಚತಿ (ಸೀ. ಪೀ.)];
ದಿಸ್ವಾನ ಪತಿಮಾಗತಂ [ದಿಸ್ವಾಪತಿಂ ಆಗತಂ (ಸೀ. ಪೀ.)] ನಾಭಿನನ್ದತಿ;
ಭತ್ತಾರವಣ್ಣಂ ನ ಕದಾಚಿ ಭಾಸತಿ, ಏತೇ ಪದುಟ್ಠಾಯ ಭವನ್ತಿ ಲಕ್ಖಣಾ.
‘ಅನತ್ಥಂ ತಸ್ಸ ಚರತಿ ಅಸಞ್ಞತಾ, ಅತ್ಥಞ್ಚ ಹಾಪೇತಿ ಅಕಿಚ್ಚಕಾರಿನೀ;
ಪರಿದಹಿತ್ವಾ ¶ ಸಯತಿ ಪರಮ್ಮುಖೀ, ಏತೇ ಪದುಟ್ಠಾಯ ಭವನ್ತಿ ಲಕ್ಖಣಾ.
‘ಪರಿವತ್ತಜಾತಾ ಚ [ಪರಾವತ್ತಕಜಾತಾ ಚ (ಸೀ.)] ಭವತಿ ಕುಙ್ಕುಮೀ, ದೀಘಞ್ಚ ಅಸ್ಸಸತಿ ದುಕ್ಖವೇದಿನೀ;
ಉಚ್ಚಾರಪಸ್ಸಾವಮಭಿಣ್ಹಂ ಗಚ್ಛತಿ, ಏತೇ ಪದುಟ್ಠಾಯ ಭವನ್ತಿ ಲಕ್ಖಣಾ.
‘‘ವಿಲೋಮಮಾಚರತಿ ಅಕಿಚ್ಚಕಾರಿನೀ, ಸದ್ದಂ ನಿಸಾಮೇತಿ ಪರಸ್ಸ ಭಾಸತೋ;
ನಿಹತಭೋಗಾ ಚ ಕರೋತಿ ಸನ್ಥವಂ, ಏತೇ ಪದುಟ್ಠಾಯ ಭವನ್ತಿ ಲಕ್ಖಣಾ.
‘ಕಿಚ್ಛೇನ ಲದ್ಧಂ ಕಸಿರಾಭತಂ [ಕಸಿರೇನಾಭತಂ (ಸೀ.)] ಧನಂ, ವಿತ್ತಂ ವಿನಾಸೇತಿ ದುಕ್ಖೇನ ಸಮ್ಭತಂ;
ಪಟಿವಿಸ್ಸಕೇಹಿ ಚ ಕರೋತಿ ಸನ್ಥವಂ, ಏತೇ ಪದುಟ್ಠಾಯ ಭವನ್ತಿ ಲಕ್ಖಣಾ.
‘ನಿಕ್ಖನ್ತಪಾದಾ ವಿಸಿಖಾನುಚಾರಿನೀ, ನಿಚ್ಚಞ್ಚ ಸಾಮಿಮ್ಹಿ [ನಿಚ್ಚಂ ಸಸಾಮಿಮ್ಹಿ (ಪೀ. ಕ.)] ಪದುಟ್ಠಮಾನಸಾ;
ಅತಿಚಾರಿನೀ ಹೋತಿ ಅಪೇತಗಾರವಾ [ತಥೇವ’ಗಾರವಾ (ಸೀ. ಪೀ.)], ಏತೇ ಪದುಟ್ಠಾಯ ಭವನ್ತಿ ಲಕ್ಖಣಾ.
‘ಅಭಿಕ್ಖಣಂ ¶ ತಿಟ್ಠತಿ ದ್ವಾರಮೂಲೇ, ಥನಾನಿ ಕಚ್ಛಾನಿ ಚ ದಸ್ಸಯನ್ತೀ;
ದಿಸೋದಿಸಂ ¶ ಪೇಕ್ಖತಿ ಭನ್ತಚಿತ್ತಾ, ಏತೇ ಪದುಟ್ಠಾಯ ಭವನ್ತಿ ಲಕ್ಖಣಾ.
‘ಸಬ್ಬಾ ನದೀ ವಙ್ಕಗತೀ [ವಙ್ಕನದೀ (ಕ.)], ಸಬ್ಬೇ ಕಟ್ಠಮಯಾ ವನಾ;
ಸಬ್ಬಿತ್ಥಿಯೋ ಕರೇ ಪಾಪಂ, ಲಭಮಾನೇ ನಿವಾತಕೇ.
‘ಸಚೇ ಲಭೇಥ ಖಣಂ ವಾ ರಹೋ ವಾ, ನಿವಾತಕಂ ವಾಪಿ ಲಭೇಥ ತಾದಿಸಂ;
ಸಬ್ಬಾವ ಇತ್ಥೀ ಕಯಿರುಂ ನು [ಕರೇಯ್ಯು ನೋ (ಸೀ.), ಕರೇಯ್ಯುಂ ನೋ (ಪೀ.)] ಪಾಪಂ, ಅಞ್ಞಂ ಅಲತ್ಥ [ಅಲದ್ಧಾ (ಸ್ಯಾ. ಪೀ. ಕ.)] ಪೀಠಸಪ್ಪಿನಾಪಿ ಸದ್ಧಿಂ.
‘‘ನರಾನಮಾರಾಮಕರಾಸು ¶ ನಾರಿಸು, ಅನೇಕಚಿತ್ತಾಸು ಅನಿಗ್ಗಹಾಸು ಚ;
ಸಬ್ಬತ್ಥ ನಾಪೀತಿಕರಾಪಿ [ಸಬ್ಬ’ತ್ತನಾ’ಪೀತಿಕಾರಾಪಿ (ಸೀ. ಸ್ಯಾ.)] ಚೇ ಸಿಯಾ [ಸಿಯುಂ (ಸ್ಯಾ.)], ನ ವಿಸ್ಸಸೇ ತಿತ್ಥಸಮಾ ಹಿ ನಾರಿಯೋ’’ತಿ.
‘ಯಂ ವೇ [ಯಞ್ಚ (ಸ್ಯಾ. ಕ.)] ದಿಸ್ವಾ ಕಣ್ಡರೀಕಿನ್ನರಾನಂ [ಕಿನ್ನರಕಿನ್ನರೀನಂ (ಸ್ಯಾ.), ಕಿನ್ನರೀಕಿನ್ನರಾನಂ (ಕ.)], ಸಬ್ಬಿತ್ಥಿಯೋ ನ ರಮನ್ತಿ ಅಗಾರೇ;
ತಂ ತಾದಿಸಂ ಮಚ್ಚಂ ಚಜಿತ್ವಾ ಭರಿಯಾ, ಅಞ್ಞಂ ದಿಸ್ವಾ ಪುರಿಸಂ ಪೀಠಸಪ್ಪಿಂ.
‘ಬಕಸ್ಸ ಚ ಬಾವರಿಕಸ್ಸ [ಪಾವಾರಿಕಸ್ಸ (ಸೀ.), ಬಾವರಿಯಸ್ಸ (ಸ್ಯಾ.)] ರಞ್ಞೋ, ಅಚ್ಚನ್ತಕಾಮಾನುಗತಸ್ಸ ಭರಿಯಾ;
ಅವಾಚರೀ [ಅಚ್ಚಾಚರಿ (ಸ್ಯಾ.), ಅನಾಚರಿ (ಕ.)] ಪಟ್ಠವಸಾನುಗಸ್ಸ [ಬದ್ಧವಸಾನುಗಸ್ಸ (ಸೀ. ಸ್ಯಾ.), ಪತ್ತವಸಾನುಗತಸ್ಸ (ಕ.)], ಕಂ ವಾಪಿ ಇತ್ಥೀ ನಾತಿಚರೇ ತದಞ್ಞಂ.
‘ಪಿಙ್ಗಿಯಾನೀ ¶ ¶ ಸಬ್ಬಲೋಕಿಸ್ಸರಸ್ಸ, ರಞ್ಞೋ ಪಿಯಾ ಬ್ರಹ್ಮದತ್ತಸ್ಸ ಭರಿಯಾ;
ಅವಾಚರೀ ಪಟ್ಠವಸಾನುಗಸ್ಸ, ತಂ ವಾಪಿ ಸಾ ನಾಜ್ಝಗಾ ಕಾಮಕಾಮಿನೀ.
‘ಲುದ್ಧಾನಂ [ಖುದ್ದಾನಂ (ಸೀ. ಸ್ಯಾ. ಪೀ.)] ಲಹುಚಿತ್ತಾನಂ, ಅಕತಞ್ಞೂನ ದುಬ್ಭಿನಂ;
ನಾದೇವಸತ್ತೋ ಪುರಿಸೋ, ಥೀನಂ ಸದ್ಧಾತುಮರಹತಿ.
‘ನ ತಾ ಪಜಾನನ್ತಿ ಕತಂ ನ ಕಿಚ್ಚಂ, ನ ಮಾತರಂ ಪಿತರಂ ಭಾತರಂ ವಾ;
ಅನರಿಯಾ ಸಮತಿಕ್ಕನ್ತಧಮ್ಮಾ, ಸಸ್ಸೇವ ಚಿತ್ತಸ್ಸ ವಸಂ ವಜನ್ತಿ.
‘ಚಿರಾನುವುಟ್ಠಮ್ಪಿ [ಚಿರಾನುವುತ್ಥಮ್ಪಿ (ಸೀ. ಪೀ.)] ಪಿಯಂ ಮನಾಪಂ, ಅನುಕಮ್ಪಕಂ ಪಾಣಸಮಮ್ಪಿ ಭತ್ತುಂ [ಸನ್ತಂ (ಸೀ. ಸ್ಯಾ. ಪೀ.)];
ಆವಾಸು ಕಿಚ್ಚೇಸು ಚ ನಂ ಜಹನ್ತಿ, ತಸ್ಮಾಹಮಿತ್ಥೀನಂ ನ ವಿಸ್ಸಸಾಮಿ.
‘ಥೀನಞ್ಹಿ ಚಿತ್ತಂ ಯಥಾ ವಾನರಸ್ಸ, ಕನ್ನಪ್ಪಕನ್ನಂ ಯಥಾ ರುಕ್ಖಛಾಯಾ;
ಚಲಾಚಲಂ ಹದಯಮಿತ್ಥಿಯಾನಂ, ಚಕ್ಕಸ್ಸ ನೇಮಿ ವಿಯ ಪರಿವತ್ತತಿ.
‘ಯದಾ ತಾ ಪಸ್ಸನ್ತಿ ಸಮೇಕ್ಖಮಾನಾ, ಆದೇಯ್ಯರೂಪಂ ಪುರಿಸಸ್ಸ ವಿತ್ತಂ;
ಸಣ್ಹಾಹಿ ¶ ವಾಚಾಹಿ ನಯನ್ತಿ ಮೇನಂ, ಕಮ್ಬೋಜಕಾ ಜಲಜೇನೇವ ಅಸ್ಸಂ.
‘ಯದಾ ನ ಪಸ್ಸನ್ತಿ ಸಮೇಕ್ಖಮಾನಾ, ಆದೇಯ್ಯರೂಪಂ ಪುರಿಸಸ್ಸ ವಿತ್ತಂ;
ಸಮನ್ತತೋ ನಂ ಪರಿವಜ್ಜಯನ್ತಿ, ತಿಣ್ಣೋ ನದೀಪಾರಗತೋವ ಕುಲ್ಲಂ.
‘ಸಿಲೇಸೂಪಮಾಂ ¶ ಸಿಖಿರಿವ ಸಬ್ಬಭಕ್ಖಾ, ತಿಕ್ಖಮಾಯಾ ನದೀರಿವ ಸೀಘಸೋತಾ;
ಸೇವನ್ತಿ ಹೇತಾ ಪಿಯಮಪ್ಪಿಯಞ್ಚ, ನಾವಾ ಯಥಾ ಓರಕೂಲಂ [ಓರಕುಲಂ (ಸೀ.) ಏವಮುಪರಿಪಿ] ಪರಞ್ಚ.
‘ನ ತಾ ಏಕಸ್ಸ ನ ದ್ವಿನ್ನಂ, ಆಪಣೋವ ಪಸಾರಿತೋ;
ಯೋ ತಾ ಮಯ್ಹನ್ತಿ ಮಞ್ಞೇಯ್ಯ, ವಾತಂ ಜಾಲೇನ ಬಾಧಯೇ [ಬನ್ಧಯೇ (ಸ್ಯಾ. ಕ.)].
‘ಯಥಾ ನದೀ ಚ ಪನ್ಥೋ ಚ, ಪಾನಾಗಾರಂ ಸಭಾ ಪಪಾ;
ಏವಂ ಲೋಕಿತ್ಥಿಯೋ ನಾಮ, ವೇಲಾ ತಾಸಂ ನ ವಿಜ್ಜತಿ [ಕೇಸುಚಿ ಪೋತ್ಥಕೇಸು ಇಮಿಸ್ಸಾ ಗಾಥಾಯ ಪುಬ್ಬದ್ಧಾಪರದ್ಧಂ ವಿಪರಿಯಾಯೇನ ದಿಸ್ಸತಿ].
‘ಘತಾಸನಸಮಾ ಏತಾ, ಕಣ್ಹಸಪ್ಪಸಿರೂಪಮಾ;
ಗಾವೋ ಬಹಿತಿಣಸ್ಸೇವ, ಓಮಸನ್ತಿ ವರಂ ವರಂ.
‘ಘತಾಸನಂ ಕುಞ್ಜರಂ ಕಣ್ಹಸಪ್ಪಂ, ಮುದ್ಧಾಭಿಸಿತ್ತಂ ಪಮದಾ ಚ ಸಬ್ಬಾ;
ಏತೇ ನರೋ [ಏತೇನ ಸೋ (ಪೀ.)] ನಿಚ್ಚಯತೋ [ನಿಚ್ಚಯತ್ತೋ (ಸೀ. ಪೀ.)] ಭಜೇಥ, ತೇಸಂ ಹವೇ ದುಬ್ಬಿದು ಸಬ್ಬಭಾವೋ [ಸಚ್ಚಭಾವೋ (ಸ್ಯಾ.)].
‘ನಚ್ಚನ್ತವಣ್ಣಾ ¶ ¶ ನ ಬಹೂನಂ ಕನ್ತಾ, ನ ದಕ್ಖಿಣಾ ಪಮದಾ ಸೇವಿತಬ್ಬಾ;
ನ ಪರಸ್ಸ ಭರಿಯಾ ನ ಧನಸ್ಸ ಹೇತು, ಏತಿತ್ಥಿಯೋ ಪಞ್ಚ ನ ಸೇವಿತಬ್ಬಾ’’’.
ಅಥ ಖಲು, ಭೋ, ಆನನ್ದೋ ಗಿಜ್ಝರಾಜಾ ಕುಣಾಲಸ್ಸ ಸಕುಣಸ್ಸ ಆದಿಮಜ್ಝಕಥಾಪರಿಯೋಸಾನಂ [ಆದಿಮಜ್ಝಗಾಥಾಪರಿಯೋಸಾನಂ (ಸ್ಯಾ. ಕ.)] ವಿದಿತ್ವಾ ತಾಯಂ ವೇಲಾಯಂ ಇಮಾ ಗಾಥಾಯೋ ಅಭಾಸಿ –
‘‘ಪುಣ್ಣಮ್ಪಿ ಚೇಮಂ ಪಥವಿಂ ಧನೇನ, ದಜ್ಜಿತ್ಥಿಯಾ ಪುರಿಸೋ ಸಮ್ಮತಾಯ;
ಲದ್ಧಾ ಖಣಂ ಅತಿಮಞ್ಞೇಯ್ಯ ತಮ್ಪಿ, ತಾಸಂ ವಸಂ ಅಸತೀನಂ ನ ಗಚ್ಛೇ.
‘‘ಉಟ್ಠಾಹಕಂ ¶ ಚೇಪಿ ಅಲೀನವುತ್ತಿಂ, ಕೋಮಾರಭತ್ತಾರಂ ಪಿಯಂ ಮನಾಪಂ;
ಆವಾಸು ಕಿಚ್ಚೇಸು ಚ ನಂ ಜಹನ್ತಿ, ತಸ್ಮಾಹಮಿತ್ಥೀನಂ [ತಸ್ಮಾ ಹಿ ಇತ್ಥೀನಂ (ಸೀ. ಪೀ.)] ನ ವಿಸ್ಸಸಾಮಿ.
‘‘ನ ವಿಸ್ಸಸೇ ಇಚ್ಛತಿ ಮನ್ತಿ ಪೋಸೋ, ನ ವಿಸ್ಸಸೇ ರೋದತಿ ಮೇ ಸಕಾಸೇ;
ಸೇವನ್ತಿ ಹೇತಾ ಪಿಯಮಪ್ಪಿಯಞ್ಚ, ನಾವಾ ಯಥಾ ಓರಕೂಲಂ ಪರಞ್ಚ.
‘‘ನ ವಿಸ್ಸಸೇ ಸಾಖಪುರಾಣಸನ್ಥತಂ, ನ ¶ ವಿಸ್ಸಸೇ ಮಿತ್ತಪುರಾಣಚೋರಂ;
ನ ವಿಸ್ಸಸೇ ರಾಜಾನಂ ಸಖಾ [ರಾಜಾ ಸಖಾ (ಸೀ. ಪೀ.)] ಮಮನ್ತಿ, ನ ವಿಸ್ಸಸೇ ಇತ್ಥಿ ದಸನ್ನ ಮಾತರಂ.
‘‘ನ ವಿಸ್ಸಸೇ ರಾಮಕರಾಸು ನಾರಿಸು, ಅಚ್ಚನ್ತಸೀಲಾಸು ಅಸಞ್ಞತಾಸು;
ಅಚ್ಚನ್ತಪೇಮಾನುಗತಸ್ಸ ಭರಿಯಾ, ನ ವಿಸ್ಸಸೇ ತಿತ್ಥಸಮಾ ಹಿ ನಾರಿಯೋ.
‘‘ಹನೇಯ್ಯುಂ ಛಿನ್ದೇಯ್ಯುಂ ಛೇದಾಪೇಯ್ಯುಮ್ಪಿ [ಹನೇಯ್ಯು ಛಿನ್ದೇಯ್ಯುಂಪಿ ಛದಯೇಯ್ಯುಂ (ಸೀ. ಪೀ.), ಹನೇಯ್ಯುಂಪಿ ಛಿನ್ದೇಯ್ಯುಂಪಿ ಛೇದಾಪೇಯ್ಯುಂಪಿ (ಸ್ಯಾ.)], ಕಣ್ಠೇಪಿ [ಕಣ್ಠಮ್ಪಿ (ಸೀ. ಸ್ಯಾ.)] ಛೇತ್ವಾ ರುಧಿರಂ ಪಿವೇಯ್ಯುಂ;
ಮಾ ದೀನಕಾಮಾಸು ಅಸಞ್ಞತಾಸು, ಭಾವಂ ಕರೇ ಗಙ್ಗತಿತ್ಥೂಪಮಾಸು.
‘‘ಮುಸಾ ತಾಸಂ ಯಥಾ ಸಚ್ಚಂ, ಸಚ್ಚಂ ತಾಸಂ ಯಥಾ ಮುಸಾ;
ಗಾವೋ ಬಹಿತಿಣಸ್ಸೇವ, ಓಮಸನ್ತಿ ವರಂ ವರಂ.
‘‘ಗತೇನೇತಾ ಪಲೋಭೇನ್ತಿ, ಪೇಕ್ಖಿತೇನ ಮ್ಹಿತೇನ ಚ;
ಅಥೋಪಿ ದುನ್ನಿವತ್ಥೇನ, ಮಞ್ಜುನಾ ಭಣಿತೇನ ಚ.
‘‘ಚೋರಿಯೋ ಕಥಿನಾ [ಕಠಿನಾ (ಸೀ. ಸ್ಯಾ. ಪೀ.)] ಹೇತಾ, ವಾಳಾ ಚ ಲಪಸಕ್ಖರಾ;
ನ ತಾ ಕಿಞ್ಚಿ ನ ಜಾನನ್ತಿ, ಯಂ ಮನುಸ್ಸೇಸು ವಞ್ಚನಂ.
‘‘ಅಸಾ ¶ ಲೋಕಿತ್ಥಿಯೋ ನಾಮ, ವೇಲಾ ತಾಸಂ ನ ವಿಜ್ಜತಿ;
ಸಾರತ್ತಾ ಚ ಪಗಬ್ಭಾ ಚ, ಸಿಖೀ ಸಬ್ಬಘಸೋ ಯಥಾ.
‘‘ನತ್ಥಿತ್ಥೀನಂ ¶ ಪಿಯೋ ನಾಮ, ಅಪ್ಪಿಯೋಪಿ ನ ವಿಜ್ಜತಿ;
ಸೇವನ್ತಿ ಹೇತಾ ಪಿಯಮಪ್ಪಿಯಞ್ಚ, ನಾವಾ ಯಥಾ ಓರಕೂಲಂ ಪರಞ್ಚ.
‘‘ನತ್ಥಿತ್ಥೀನಂ ಪಿಯೋ ನಾಮ, ಅಪ್ಪಿಯೋಪಿ ನ ವಿಜ್ಜತಿ;
ಧನತ್ತಾ [ಧನತ್ಥಾ (ಸ್ಯಾ.)] ಪಟಿವಲ್ಲನ್ತಿ, ಲತಾವ ದುಮನಿಸ್ಸಿತಾ.
‘‘ಹತ್ಥಿಬನ್ಧಂ ¶ ಅಸ್ಸಬನ್ಧಂ, ಗೋಪುರಿಸಞ್ಚ ಮಣ್ಡಲಂ [ಚಣ್ಡಲಂ (ಸೀ. ಸ್ಯಾ. ಪೀ.)];
ಛವಡಾಹಕಂ ಪುಪ್ಫಛಡ್ಡಕಂ, ಸಧನಮನುಪತನ್ತಿ ನಾರಿಯೋ.
‘‘ಕುಲಪುತ್ತಮ್ಪಿ ಜಹನ್ತಿ ಅಕಿಞ್ಚನಂ, ಛವಕಸಮಸದಿಸಮ್ಪಿ [ಛವಕಸಮಂ (ಸ್ಯಾ. ಪೀ.)];
ಅನುಗಚ್ಛನ್ತಿ [ಗಚ್ಛನ್ತಿ (ಪೀ.)] ಅನುಪತನ್ತಿ, ಧನಹೇತು ಹಿ ನಾರಿಯೋ’’ತಿ [ಧನಹೇತು ಚ ನಾರಿಯೋ (ಸ್ಯಾ.), ಧನಹೇತು ನಾರಿಯೋ (ಪೀ.)].
ಅಥ ಖಲು, ಭೋ, ನಾರದೋ ದೇವಬ್ರಾಹ್ಮಣೋ ಆನನ್ದಸ್ಸ ಗಿಜ್ಝರಾಜಸ್ಸ ಆದಿಮಜ್ಝಕಥಾಪರಿಯೋಸಾನಂ ವಿದಿತ್ವಾ ತಾಯಂ ವೇಲಾಯಂ ಇಮಾ ಗಾಥಾಯೋ ಅಭಾಸಿ –
‘‘ಚತ್ತಾರೋಮೇ ನ ಪೂರೇನ್ತಿ, ತೇ ಮೇ ಸುಣಾಥ ಭಾಸತೋ;
ಸಮುದ್ದೋ ಬ್ರಾಹ್ಮಣೋ ರಾಜಾ, ಇತ್ಥೀ ಚಾಪಿ ದಿಜಮ್ಪತಿ.
‘‘ಸರಿತಾ ಸಾಗರಂ ಯನ್ತಿ, ಯಾ ಕಾಚಿ ಪಥವಿಸ್ಸಿತಾ;
ತಾ ಸಮುದ್ದಂ ನ ಪೂರೇನ್ತಿ, ಊನತ್ತಾ ಹಿ ನ ಪೂರತಿ.
‘‘ಬ್ರಾಹ್ಮಣೋ ಚ ಅಧೀಯಾನ, ವೇದಮಕ್ಖಾನಪಞ್ಚಮಂ;
ಭಿಯ್ಯೋಪಿ ಸುತಮಿಚ್ಛೇಯ್ಯ, ಊನತ್ತಾ ಹಿ ನ ಪೂರತಿ.
‘‘ರಾಜಾ ಚ ಪಥವಿಂ ಸಬ್ಬಂ, ಸಸಮುದ್ದಂ ಸಪಬ್ಬತಂ;
ಅಜ್ಝಾವಸಂ ವಿಜಿನಿತ್ವಾ, ಅನನ್ತರತನೋಚಿತಂ;
ಪಾರಂ ¶ ಸಮುದ್ದಂ ಪತ್ಥೇತಿ, ಊನತ್ತಾ ಹಿ ನ ಪೂರತಿ.
‘‘ಏಕಮೇಕಾಯ ಇತ್ಥಿಯಾ, ಅಟ್ಠಟ್ಠ ಪತಿನೋ ಸಿಯಾ;
ಸೂರಾ ಚ ಬಲವನ್ತೋ ಚ, ಸಬ್ಬಕಾಮರಸಾಹರಾ;
ಕರೇಯ್ಯ ನವಮೇ ಛನ್ದಂ, ಊನತ್ತಾ ಹಿ ನ ಪೂರತಿ.
‘‘ಸಬ್ಬಿತ್ಥಿಯೋ ¶ ಸಿಖಿರಿವ ಸಬ್ಬಭಕ್ಖಾ, ಸಬ್ಬಿತ್ಥಿಯೋ ನದೀರಿವ ಸಬ್ಬವಾಹೀ;
ಸಬ್ಬಿತ್ಥಿಯೋ ಕಣ್ಟಕಾನಂವ ಸಾಖಾ, ಸಬ್ಬಿತ್ಥಿಯೋ ಧನಹೇತು ವಜನ್ತಿ.
‘‘ವಾತಞ್ಚ ಜಾಲೇನ ನರೋ ಪರಾಮಸೇ, ಓಸಿಞ್ಚಯೇ [ಓಸಞ್ಚಿಯಾ (ಸೀ. ಪೀ.)] ಸಾಗರಮೇಕಪಾಣಿನಾ;
ಸಕೇನ ಹತ್ಥೇನ ಕರೇಯ್ಯ ಘೋಸಂ [ಸಕೇನ ಕಾಲೇನ ಹನೇಯ್ಯ ಘೋಸನಂ (ಪೀ.)], ಯೋ ಸಬ್ಬಭಾವಂ ಪಮದಾಸು ಓಸಜೇ.
‘‘ಚೋರೀನಂ ಬಹುಬುದ್ಧೀನಂ, ಯಾಸು ಸಚ್ಚಂ ಸುದುಲ್ಲಭಂ;
ಥೀನಂ ಭಾವೋ ದುರಾಜಾನೋ, ಮಚ್ಛಸ್ಸೇವೋದಕೇ ಗತಂ.
‘‘ಅನಲಾ ಮುದುಸಮ್ಭಾಸಾ, ದುಪ್ಪೂರಾ ತಾ ನದೀಸಮಾ;
ಸೀದನ್ತಿ ನಂ ವಿದಿತ್ವಾನ, ಆರಕಾ ಪರಿವಜ್ಜಯೇ.
‘‘ಆವಟ್ಟನೀ ಮಹಾಮಾಯಾ, ಬ್ರಹ್ಮಚರಿಯವಿಕೋಪನಾ;
ಸೀದನ್ತಿ ನಂ ವಿದಿತ್ವಾನ, ಆರಕಾ ಪರಿವಜ್ಜಯೇ.
‘‘ಯಂ ¶ ಏತಾ [ಯಞ್ಚೇತಾ (ಸ್ಯಾ.)] ಉಪಸೇವನ್ತಿ, ಛನ್ದಸಾ ವಾ ಧನೇನ ವಾ;
ಜಾತವೇದೋವ ಸಣ್ಠಾನಂ, ಖಿಪ್ಪಂ ಅನುದಹನ್ತಿ ನ’’ನ್ತಿ.
ಅಥ ¶ ಖಲು, ಭೋ, ಕುಣಾಲೋ ಸಕುಣೋ ನಾರದಸ್ಸ ದೇವಬ್ರಾಹ್ಮಣಸ್ಸ ಆದಿಮಜ್ಝಕಥಾಪರಿಯೋಸಾನಂ ವಿದಿತ್ವಾ ತಾಯಂ ವೇಲಾಯಂ ಇಮಾ ಗಾಥಾಯೋ ಅಭಾಸಿ –
‘‘ಸಲ್ಲಪೇ ನಿಸಿತಖಗ್ಗಪಾಣಿನಾ, ಪಣ್ಡಿತೋ ಅಪಿ ಪಿಸಾಚದೋಸಿನಾ;
ಉಗ್ಗತೇಜಮುರಗಮ್ಪಿ ಆಸಿದೇ, ಏಕೋ ಏಕಾಯ ಪಮದಾಯ ನಾಲಪೇ [ಏಕೋ ಏಕಪಮದಂ ಹಿ ನಾಲಪೇ (ಪೀ.) ಏಕೋ ಏಕಪಮಾದಾಯ ನಾಲಪೇ (?)].
‘‘ಲೋಕಚಿತ್ತಮಥನಾ ಹಿ ನಾರಿಯೋ, ನಚ್ಚಗೀತಭಣಿತಮ್ಹಿತಾವುಧಾ;
ಬಾಧಯನ್ತಿ ಅನುಪಟ್ಠಿತಸ್ಸತಿಂ [ಅನುಪಟ್ಠಿತಾಸತೀ (ಪೀ.)], ದೀಪೇ ರಕ್ಖಸಿಗಣೋವ [ದೀಪರಕ್ಖಸಿಗಣಾವ (ಸೀ.)] ವಾಣಿಜೇ.
‘‘ನತ್ಥಿ ¶ ತಾಸಂ ವಿನಯೋ ನ ಸಂವರೋ, ಮಜ್ಜಮಂಸನಿರತಾ [ಮಜ್ಜಮಂಸಾಭಿರತಾ (ಕ.)] ಅಸಞ್ಞತಾ;
ತಾ ಗಿಲನ್ತಿ ಪುರಿಸಸ್ಸ ಪಾಭತಂ, ಸಾಗರೇವ ಮಕರಂ ತಿಮಿಙ್ಗಲೋ [ತಿಮಿಙ್ಗಿಲೋ (ಸೀ. ಪೀ.)].
‘‘ಪಞ್ಚಕಾಮಗುಣಸಾತಗೋಚರಾ, ಉದ್ಧತಾ ಅನಿಯತಾ ಅಸಞ್ಞತಾ;
ಓಸರನ್ತಿ ಪಮದಾ ಪಮಾದಿನಂ, ಲೋಣತೋಯವತಿಯಂವ ಆಪಕಾ.
‘‘ಯಂ ನರಂ ಉಪಲಪೇನ್ತಿ [ಉಪರಮನ್ತಿ (ಸೀ. ಪೀ.), ಪಲಾಪೇನ್ತಿ (ಕ.)] ನಾರಿಯೋ, ಛನ್ದಸಾ ವ ¶ ರತಿಯಾ ಧನೇನ ವಾ;
ಜಾತವೇದಸದಿಸಮ್ಪಿ ತಾದಿಸಂ, ರಾಗದೋಸವಧಿಯೋ [ರಾಗದೋಸವತಿಯೋ (ಸೀ. ಪೀ.)] ದಹನ್ತಿ ನಂ.
‘‘ಅಡ್ಢಂ ಞತ್ವಾ ಪುರಿಸಂ ಮಹದ್ಧನಂ, ಓಸರನ್ತಿ ಸಧನಾ ಸಹತ್ತನಾ;
ರತ್ತಚಿತ್ತಮತಿವೇಠಯನ್ತಿ ನಂ, ಸಾಲ ಮಾಲುವಲತಾವ ಕಾನನೇ.
‘‘ತಾ ಉಪೇನ್ತಿ ವಿವಿಧೇನ ಛನ್ದಸಾ, ಚಿತ್ರಬಿಮ್ಬಮುಖಿಯೋ ಅಲಙ್ಕತಾ;
ಉಹಸನ್ತಿ [ಊಹಸನ್ತಿ (ಸೀ. ಪೀ.), ಓಹಸನ್ತಿ (ಸ್ಯಾ.)] ಪಹಸನ್ತಿ ನಾರಿಯೋ, ಸಮ್ಬರೋವ [ಸಂವರೋವ (ಸ್ಯಾ. ಪೀ. ಕ.)] ಸತಮಾಯಕೋವಿದಾ.
‘‘ಜಾತರೂಪಮಣಿಮುತ್ತಭೂಸಿತಾ, ಸಕ್ಕತಾ ಪತಿಕುಲೇಸು ನಾರಿಯೋ;
ರಕ್ಖಿತಾ ಅತಿಚರನ್ತಿ ಸಾಮಿಕಂ, ದಾನವಂವ ಹದಯನ್ತರಸ್ಸಿತಾ [ಹದಯನ್ತನಿಸ್ಸಿತಾ (ಕ.), ಹದಯನ್ತರನಿಸ್ಸಿತಾ (ಸ್ಯಾ.)].
‘‘ತೇಜವಾಪಿ ¶ ಹಿ ನರೋ ವಿಚಕ್ಖಣೋ, ಸಕ್ಕತೋ ಬಹುಜನಸ್ಸ ಪೂಜಿತೋ;
ನಾರಿನಂ ವಸಗತೋ ನ ಭಾಸತಿ, ರಾಹುನಾ ಉಪಹತೋವ ಚನ್ದಿಮಾ.
‘‘ಯಂ ಕರೇಯ್ಯ ಕುಪಿತೋ ದಿಸೋ ದಿಸಂ, ದುಟ್ಠಚಿತ್ತೋ ¶ ವಸಮಾಗತಂ ಅರಿಂ [ಅರಿ (ಸೀ. ಪೀ.)];
ತೇನ ಭಿಯ್ಯೋ ಬ್ಯಸನಂ ನಿಗಚ್ಛತಿ, ನಾರಿನಂ ವಸಗತೋ ಅಪೇಕ್ಖವಾ.
‘‘ಕೇಸಲೂನನಖಛಿನ್ನತಜ್ಜಿತಾ, ಪಾದಪಾಣಿಕಸದಣ್ಡತಾಳಿತಾ;
ಹೀನಮೇವುಪಗತಾ ಹಿ ನಾರಿಯೋ, ತಾ ರಮನ್ತಿ ಕುಣಪೇವ ಮಕ್ಖಿಕಾ.
‘‘ತಾ ಕುಲೇಸು ವಿಸಿಖನ್ತರೇಸು ವಾ, ರಾಜಧಾನಿನಿಗಮೇಸು ವಾ ಪುನ [ವಾ ಪನ (ಸ್ಯಾ.)];
ಓಡ್ಡಿತಂ ನಮುಚಿಪಾಸವಾಕರಂ [ವಾಗುರಂ (ಸ್ಯಾ.)], ಚಕ್ಖುಮಾ ಪರಿವಜ್ಜೇ ಸುಖತ್ಥಿಕೋ.
‘‘ಓಸ್ಸಜಿತ್ವ ¶ ಕುಸಲಂ ತಪೋಗುಣಂ, ಯೋ ಅನರಿಯಚರಿತಾನಿ ಮಾಚರಿ;
ದೇವತಾಹಿ ನಿರಯಂ ನಿಮಿಸ್ಸತಿ, ಛೇದಗಾಮಿಮಣಿಯಂವ ವಾಣಿಜೋ.
‘‘ಸೋ ಇಧ ಗರಹಿತೋ ಪರತ್ಥ ಚ, ದುಮ್ಮತೀ ಉಪಹತೋ [ಉಪಗತೋ (ಸೀ. ಪೀ.)] ಸಕಮ್ಮುನಾ;
ಗಚ್ಛತೀ ಅನಿಯತೋ ಗಳಾಗಳಂ, ದುಟ್ಠಗದ್ರಭರಥೋವ ಉಪ್ಪಥೇ.
‘‘ಸೋ ಉಪೇತಿ ನಿರಯಂ ಪತಾಪನಂ, ಸತ್ತಿಸಿಮ್ಬಲಿವನಞ್ಚ ¶ ಆಯಸಂ;
ಆವಸಿತ್ವಾ ತಿರಚ್ಛಾನಯೋನಿಯಂ, ಪೇತರಾಜವಿಸಯಂ ನ ಮುಞ್ಚತಿ [ಮುಚ್ಚತಿ (ಕ.)].
‘‘ದಿಬ್ಯಖಿಡ್ಡರತಿಯೋಂ ¶ ಚ ನನ್ದನೇ, ಚಕ್ಕವತ್ತಿಚರಿತಞ್ಚ ಮಾನುಸೇ;
ನಾಸಯನ್ತಿ ಪಮದಾ ಪಮಾದಿನಂ, ದುಗ್ಗತಿಞ್ಚ ಪಟಿಪಾದಯನ್ತಿ ನಂ.
‘‘ದಿಬ್ಯಖಿಡ್ಡರತಿಯೋ ನ ದುಲ್ಲಭಾ, ಚಕ್ಕವತ್ತಿಚರಿತಞ್ಚ ಮಾನುಸೇ;
ಸೋಣ್ಣಬ್ಯಮ್ಹನಿಲಯಾ [ಸುವಣ್ಣಬ್ಯಮ್ಹನಿಲಯಾ (ಸ್ಯಾ. ಕ.), ಸೋವಣ್ಣಬ್ಯಮ್ಹನಿಲಯಾ (ಪೀ.)] ಚ ಅಚ್ಛರಾ, ಯೇ ಚರನ್ತಿ ಪಮದಾಹನತ್ಥಿಕಾ.
‘‘ಕಾಮಧಾತುಸಮತಿಕ್ಕಮಾ ಗತಿ, ರೂಪಧಾತುಯಾ ಭಾವೋ [ರೂಪಧಾತುಯಾ ಭವೋ (ಸೀ.), ರೂಪಧಾತುಸಮ್ಭವೋ (ಸ್ಯಾ.)] ನ ದುಲ್ಲಭೋ;
ವೀತರಾಗವಿಸಯೂಪಪತ್ತಿಯಾ, ಯೇ ಚರನ್ತಿ ಪಮದಾಹನತ್ಥಿಕಾ.
‘‘ಸಬ್ಬದುಕ್ಖಸಮತಿಕ್ಕಮಂ ಸಿವಂ, ಅಚ್ಚನ್ತಮಚಲಿತಂ ಅಸಙ್ಖತಂ;
ನಿಬ್ಬುತೇಹಿ ಸುಚಿಹೀ ನ ದುಲ್ಲಭಂ, ಯೇ ಚರನ್ತಿ ಪಮದಾಹನತ್ಥಿಕಾ’’ತಿ.
‘‘ಕುಣಾಲೋಹಂ ತದಾ ಆಸಿಂ, ಉದಾಯೀ ಫುಸ್ಸಕೋಕಿಲೋ;
ಆನನ್ದೋ ¶ ಗಿಜ್ಝರಾಜಾಸಿ, ಸಾರಿಪುತ್ತೋ ಚ ನಾರದೋ;
ಪರಿಸಾ ಬುದ್ಧಪರಿಸಾ, ಏವಂ ಧಾರೇಥ ಜಾತಕ’’ನ್ತಿ.
ಕುಣಾಲಜಾತಕಂ ಚತುತ್ಥಂ.
೫೩೭. ಮಹಾಸುತಸೋಮಜಾತಕಂ (೫)
‘‘ಕಸ್ಮಾ ತುವಂ ರಸಕ ಏದಿಸಾನಿ, ಕರೋಸಿ ಕಮ್ಮಾನಿ ಸುದಾರುಣಾನಿ;
ಹನಾಸಿ ಇತ್ಥೀ ಪುರಿಸೇ ಚ ಮೂಳ್ಹೋ, ಮಂಸಸ್ಸ ಹೇತು ಅದು [ಆದು (ಸೀ. ಸ್ಯಾ.)] ಧನಸ್ಸ ಕಾರಣಾ’’.
‘‘ನಂ ¶ ಅತ್ತಹೇತೂ ನ ಧನಸ್ಸ ಕಾರಣಾ, ನ ಪುತ್ತದಾರಸ್ಸ ಸಹಾಯಞಾತಿನಂ;
ಭತ್ತಾ ಚ ಮೇ ಭಗವಾ ಭೂಮಿಪಾಲೋ, ಸೋ ಖಾದತಿ ಮಂಸಂ ಭದನ್ತೇದಿಸಂ’’.
‘‘ಸಚೇ ತುವಂ ಭತ್ತುರತ್ಥೇ ಪಯುತ್ತೋ, ಕರೋಸಿ ಕಮ್ಮಾನಿ ಸುದಾರುಣಾನಿ;
ಪಾತೋವ ಅನ್ತೇಪುರಂ ಪಾಪುಣಿತ್ವಾ, ಲಪೇಯ್ಯಾಸಿ ಮೇ ರಾಜಿನೋ ಸಮ್ಮುಖೇ ತಂ’’.
‘‘ತಥಾ ಕರಿಸ್ಸಾಮಿ ಅಹಂ ಭದನ್ತೇ, ಯಥಾ ತುವಂ [ಯಮೇವ ತ್ವಂ (ಸೀ.)] ಭಾಸಸಿ ಕಾಳಹತ್ಥಿ;
ಪಾತೋವ ಅನ್ತೇಪುರಂ ಪಾಪುಣಿತ್ವಾ, ವಕ್ಖಾಮಿ ¶ ತೇ ರಾಜಿನೋ ಸಮ್ಮುಖೇ ತಂ’’.
ತತೋ ¶ ರತ್ಯಾ ವಿವಸಾನೇ [ವಿವಸನೇ (ಸೀ. ಸ್ಯಾ. ಪೀ.)], ಸೂರಿಯುಗ್ಗಮನಂ ಪತಿ;
ಕಾಳೋ ರಸಕಮಾದಾಯ, ರಾಜಾನಂ ಉಪಸಙ್ಕಮಿ;
ಉಪಸಙ್ಕಮ್ಮ [ಉಪಸಙ್ಕಮಿತ್ವಾ (ಸೀ. ಸ್ಯಾ. ಪೀ.)] ರಾಜಾನಂ, ಇದಂ ವಚನಮಬ್ರವಿ.
‘‘ಸಚ್ಚಂ ಕಿರ ಮಹಾರಾಜ, ರಸಕೋ ಪೇಸಿತೋ ತಯಾ;
ಹನತಿ ಇತ್ಥಿಪುರಿಸೇ, ತುವಂ ಮಂಸಾನಿ ಖಾದಸಿ’’.
‘‘ಏವಮೇವ ತಥಾ ಕಾಳ, ರಸಕೋ ಪೇಸಿತೋ ಮಯಾ;
ಮಮ ಅತ್ಥಂ ಕರೋನ್ತಸ್ಸ, ಕಿಮೇತಂ ಪರಿಭಾಸಸಿ’’.
‘‘ಆನನ್ದೋ ಸಬ್ಬಮಚ್ಛಾನಂ, ಖಾದಿತ್ವಾ ರಸಗಿದ್ಧಿಮಾ;
ಪರಿಕ್ಖೀಣಾಯ ಪರಿಸಾಯ, ಅತ್ತಾನಂ ಖಾದಿಯಾ ಮತೋ.
‘‘ಏವಂ ಪಮತ್ತೋ ರಸಗಾರವೇ ರತ್ತೋ [ರತೋ (ಸೀ. ಸ್ಯಾ. ಪೀ.)], ಬಾಲೋ ಯದೀ ಆಯತಿ ನಾವಬುಜ್ಝತಿ;
ವಿಧಮ್ಮ ಪುತ್ತೇ ಚಜಿ [ಚಜಿತ್ವಾ (ಕ.)] ಞಾತಕೇ ಚ, ಪರಿವತ್ತಿಯ ಅತ್ತಾನಞ್ಞೇವ [ಅತ್ತಾನಮೇವ (ಸೀ. ಪೀ.)] ಖಾದತಿ.
‘‘ಇದಂ ¶ ತೇ ಸುತ್ವಾನ ವಿಗೇತು [ವಿಹೇತು (ಸೀ. ಪೀ.)] ಛನ್ದೋ, ಮಾ ಭಕ್ಖಯೀ [ಮಾ ಭಕ್ಖಸೀ (ಸೀ. ಪೀ.)] ರಾಜ ಮನುಸ್ಸಮಂಸಂ;
ಮಾ ತ್ವಂ ಇಮಂ ಕೇವಲಂ ವಾರಿಜೋವ, ದ್ವಿಪದಾಧಿಪ [ದಿಪದಾದಿಪ (ಸೀ. ಪೀ.) ಏವಮುಪರಿಪಿ] ಸುಞ್ಞಮಕಾಸಿ ರಟ್ಠಂ’’.
‘‘ಸುಜಾತೋ ನಾಮ ನಾಮೇನ, ಓರಸೋ ತಸ್ಸ ಅತ್ರಜೋ [ತಸ್ಸ ಓರಸ ಅತ್ರಜೋ (ಸೀ.), ತಸ್ಸ ಅತ್ರಜ ಓರಸೋ (ಪೀ.)];
ಜಮ್ಬುಪೇಸಿಮಲದ್ಧಾನ, ಮತೋ ಸೋ ತಸ್ಸ ಸಙ್ಖಯೇ.
‘‘ಏವಮೇವ ¶ ಅಹಂ ಕಾಳ, ಭುತ್ವಾ ಭಕ್ಖಂ ರಸುತ್ತಮಂ;
ಅಲದ್ಧಾ ಮಾನುಸಂ ಮಂಸಂ, ಮಞ್ಞೇ ಹಿಸ್ಸಾಮಿ [ಹೇಸ್ಸಾಮಿ (ಸೀ. ಸ್ಯಾ.), ಹಸ್ಸಾಮಿ (ಪೀ.)] ಜೀವಿತಂ’’.
‘‘ಮಾಣವ ಅಭಿರೂಪೋಸಿ, ಕುಲೇ ಜಾತೋಸಿ ಸೋತ್ಥಿಯೇ;
ನ ತ್ವಂ ಅರಹಸಿ ತಾತ, ಅಭಕ್ಖಂ ಭಕ್ಖಯೇತವೇ’’.
‘‘ರಸಾನಂ ಅಞ್ಞತರಂ ಏತಂ, ಕಸ್ಮಾ [ಯಸ್ಮಾ (ಸೀ. ಪೀ.)] ಮಂ ತ್ವಂ ನಿವಾರಯೇ;
ಸೋಹಂ ತತ್ಥ ಗಮಿಸ್ಸಾಮಿ, ಯತ್ಥ ಲಚ್ಛಾಮಿ ಏದಿಸಂ.
‘‘ಸೋವಾಹಂ ನಿಪ್ಪತಿಸ್ಸಾಮಿ, ನ ತೇ ವಚ್ಛಾಮಿ ಸನ್ತಿಕೇ;
ಯಸ್ಸ ಮೇ ದಸ್ಸನೇನ ತ್ವಂ, ನಾಭಿನನ್ದಸಿ ಬ್ರಾಹ್ಮಣ’’.
‘‘ಅದ್ಧಾ ಅಞ್ಞೇಪಿ ದಾಯಾದೇ, ಪುತ್ತೇ ಲಚ್ಛಾಮ ಮಾಣವ;
ತ್ವಞ್ಚ ಜಮ್ಮ ವಿನಸ್ಸಸ್ಸು, ಯತ್ಥ ಪತ್ತಂ ನ ತಂ ಸುಣೇ’’.
‘‘ಏವಮೇವ ತುವಂ ರಾಜ, ದ್ವಿಪದಿನ್ದ ಸುಣೋಹಿ ಮೇ;
ಪಬ್ಬಾಜೇಸ್ಸನ್ತಿ ತಂ ರಟ್ಠಾ, ಸೋಣ್ಡಂ ಮಾಣವಕಂ ಯಥಾ’’.
‘‘ಸುಜಾತೋ ನಾಮ ನಾಮೇನ, ಭಾವಿತತ್ತಾನ ಸಾವಕೋ;
ಅಚ್ಛರಂ ಕಾಮಯನ್ತೋವ, ನ ಸೋ ಭುಞ್ಜಿ ನ ಸೋ ಪಿವಿ.
‘‘ಕುಸಗ್ಗೇನುದಕಮಾದಾಯ ¶ [ಕುಸಗ್ಗೇ ಉದಕಮಾದಾಯ (ಸೀ. ಪೀ.)], ಸಮುದ್ದೇ ಉದಕಂ ಮಿನೇ;
ಏವಂ ಮಾನುಸಕಾ ಕಾಮಾ, ದಿಬ್ಬಕಾಮಾನ ಸನ್ತಿಕೇ.
‘‘ಏವಮೇವ ಅಹಂ ಕಾಳ, ಭುತ್ವಾ ಭಕ್ಖಂ ರಸುತ್ತಮಂ;
ಅಲದ್ಧಾ ಮಾನುಸಂ ಮಂಸಂ, ಮಞ್ಞೇ ಹಿಸ್ಸಾಮಿ ಜೀವಿತಂ’’.
‘‘ಯಥಾಪಿ ¶ ತೇ ಧತರಟ್ಠಾ, ಹಂಸಾ ವೇಹಾಯಸಙ್ಗಮಾ;
ಅಭುತ್ತಪರಿಭೋಗೇನ [ಅವುತ್ತಿಪರಿಭೋಗೇನ (ಸೀ. ಪೀ.), ಅಯುತ್ತಪರಿಭೋಗೇನ (ಸ್ಯಾ.)], ಸಬ್ಬೇ ಅಬ್ಭತ್ಥತಂ ಗತಾ.
‘‘ಏವಮೇವ ¶ ತುವಂ ರಾಜ, ದ್ವಿಪದಿನ್ದ ಸುಣೋಹಿ ಮೇ;
ಅಭಕ್ಖಂ ರಾಜ ಭಕ್ಖೇಸಿ, ತಸ್ಮಾ ಪಬ್ಬಾಜಯನ್ತಿ ತಂ’’.
‘‘ತಿಟ್ಠಾಹೀತಿ ಮಯಾ ವುತ್ತೋ, ಸೋ ತ್ವಂ ಗಚ್ಛಸಿ ಪಮ್ಮುಖೋ [ಪಾಮುಖೋ (ಕ.)];
ಅಟ್ಠಿತೋ ತ್ವಂ ಠಿತೋಮ್ಹೀತಿ, ಲಪಸಿ ಬ್ರಹ್ಮಚಾರಿನಿ;
ಇದಂ ತೇ ಸಮಣಾಯುತ್ತಂ, ಅಸಿಞ್ಚ ಮೇ ಮಞ್ಞಸಿ ಕಙ್ಕಪತ್ತಂ’’ [ಕಙ್ಖಪತ್ತಂ (ಸ್ಯಾ. ಕ.)].
‘‘ಠಿತೋಹಮಸ್ಮೀ ಸಧಮ್ಮೇಸು ರಾಜ, ನ ನಾಮಗೋತ್ತಂ ಪರಿವತ್ತಯಾಮಿ;
ಚೋರಞ್ಚ ಲೋಕೇ ಅಠಿತಂ ವದನ್ತಿ, ಆಪಾಯಿಕಂ ನೇರಯಿಕಂ ಇತೋ ಚುತಂ.
‘‘ಸಚೇ ತ್ವಂ ಸದ್ದಹಸಿ [ಸಚೇಪಿ ಸಹಸಿ (ಸೀ. ಪೀ.)] ರಾಜ, ಸುತಂ ಗಣ್ಹಾಹಿ ಖತ್ತಿಯ [ಖತ್ತಿಯಂ (ಸ್ಯಾ.)];
ತೇನ ಯಞ್ಞಂ ಯಜಿತ್ವಾನ, ಏವಂ ಸಗ್ಗಂ ಗಮಿಸ್ಸಸಿ’’.
‘‘ಕಿಸ್ಮಿಂ ನು ರಟ್ಠೇ ತವ ಜಾತಿಭೂಮಿ [ಜಾತಭೂಮಿ (ಸೀ.)], ಅಥ ಕೇನ ಅತ್ಥೇನ ಇಧಾನುಪತ್ತೋ;
ಅಕ್ಖಾಹಿ ಮೇ ಬ್ರಾಹ್ಮಣ ಏತಮತ್ಥಂ, ಕಿಮಿಚ್ಛಸೀ ದೇಮಿ ತಯಜ್ಜ ಪತ್ಥಿತಂ’’.
‘‘ಗಾಥಾ ಚತಸ್ಸೋ ಧರಣೀಮಹಿಸ್ಸರ, ಸುಗಮ್ಭಿರತ್ಥಾ ವರಸಾಗರೂಪಮಾ;
ತವೇವ ಅತ್ಥಾಯ ಇಧಾಗತೋಸ್ಮಿ, ಸುಣೋಹಿ ಗಾಥಾ ಪರಮತ್ಥಸಂಹಿತಾ’’.
‘‘ನ ವೇ ರುದನ್ತಿ ಮತಿಮನ್ತೋ ಸಪಞ್ಞಾ, ಬಹುಸ್ಸುತಾ ¶ ಯೇ ಬಹುಟ್ಠಾನಚಿನ್ತಿನೋ;
ದೀಪಞ್ಹಿ ಏತಂ ಪರಮಂ ನರಾನಂ, ಯಂ ಪಣ್ಡಿತಾ ಸೋಕನುದಾ ಭವನ್ತಿ.
‘‘ಅತ್ತಾನಂ ¶ ಞಾತೀ ಉದಾಹು [ಉದ (ಸೀ. ಪೀ.)] ಪುತ್ತದಾರಂ, ಧಞ್ಞಂ ಧನಂ ರಜತಂ ಜಾತರೂಪಂ;
ಕಿಮೇವ ತ್ವಂ [ಕಿಮೋ ನು ತ್ವಂ (ಸೀ. ಪೀ.)] ಸುತಸೋಮಾನುತಪ್ಪೇ, ಕೋರಬ್ಯಸೇಟ್ಠ ವಚನಂ ಸುಣೋಮ ತೇತಂ’.
‘‘ನೇವಾಹಮತ್ತಾನಮನುತ್ಥುನಾಮಿ, ನ ಪುತ್ತದಾರಂ ನ ಧನಂ ನ ರಟ್ಠಂ;
ಸತಞ್ಚ ಧಮ್ಮೋ ಚರಿತೋ ಪುರಾಣೋ, ತಂ ಸಙ್ಕರಂ [ಸಙ್ಗರಂ (ಸೀ. ಸ್ಯಾ. ಪೀ.) ಏವಮುಪರಿಪಿ] ಬ್ರಾಹ್ಮಣಸ್ಸಾನುತಪ್ಪೇ.
‘‘ಕತೋ ಮಯಾ ಸಙ್ಕರೋ ಬ್ರಾಹ್ಮಣೇನ, ರಟ್ಠೇ ಸಕೇ ಇಸ್ಸರಿಯೇ ಠಿತೇನ;
ತಂ ಸಙ್ಕರಂ ಬ್ರಾಹ್ಮಣಸಪ್ಪದಾಯ, ಸಚ್ಚಾನುರಕ್ಖೀ ಪುನರಾವಜಿಸ್ಸಂ’’.
‘‘ನೇವಾಹಮೇತಂ ಅಭಿಸದ್ದಹಾಮಿ, ಸುಖೀ ನರೋ ಮಚ್ಚುಮುಖಾ ಪಮುತ್ತೋ;
ಅಮಿತ್ತಹತ್ಥಂ ಪುನರಾವಜೇಯ್ಯ, ಕೋರಬ್ಯಸೇಟ್ಠ ನ ಹಿ ಮಂ ಉಪೇಸಿ.
‘‘ಮುತ್ತೋ ¶ ತುವಂ ಪೋರಿಸಾದಸ್ಸ ಹತ್ಥಾ, ಗನ್ತ್ವಾ ¶ ಸಕಂ ಮನ್ದಿರಂ ಕಾಮಕಾಮೀ;
ಮಧುರಂ ಪಿಯಂ ಜೀವಿತಂ ಲದ್ಧ ರಾಜ, ಕುತೋ ತುವಂ ಏಹಿಸಿ ಮೇ ಸಕಾಸಂ’’.
‘‘ಮತಂ ವರೇಯ್ಯ ಪರಿಸುದ್ಧಸೀಲೋ, ನ ಜೀವಿತಂ [ನ ಹಿ ಜೀವಿತಂ (ಸೀ.)] ಗರಹಿತೋ ಪಾಪಧಮ್ಮೋ;
ನ ಹಿ ತಂ ನರಂ ತಾಯತಿ [ತಾಯತೇ (ಸೀ. ಸ್ಯಾ. ಪೀ. ಕ.)] ದುಗ್ಗತೀಹಿ, ಯಸ್ಸಾಪಿ ಹೇತು ಅಲಿಕಂ ಭಣೇಯ್ಯ.
‘‘ಸಚೇಪಿ ವಾತೋ ಗಿರಿಮಾವಹೇಯ್ಯ, ಚನ್ದೋ ಚ ಸೂರಿಯೋ ಚ ಛಮಾ ಪತೇಯ್ಯುಂ;
ಸಬ್ಬಾ ಚ ನಜ್ಜೋ ಪಟಿಸೋತಂ ವಜೇಯ್ಯುಂ, ನ ತ್ವೇವಹಂ ರಾಜ ಮುಸಾ ಭಣೇಯ್ಯಂ.
[ಅಯಂ ಗಾಥಾ ಸೀ. ಪೀ. ಪೋತ್ಥಕೇಸು ನ ದಿಸ್ಸತಿ] ‘‘ನಭಂ ¶ ಫಲೇಯ್ಯ ಉದಧೀಪಿ ಸುಸ್ಸೇ, ಸಂವಟ್ಟಯೇ ಭೂತಧರಾ ವಸುನ್ಧರಾ;
ಸಿಲುಚ್ಚಯೋ ಮೇರು ಸಮೂಲಮುಪ್ಪತೇ, ನ ತ್ವೇವಹಂ ರಾಜ ಮುಸಾ ಭಣೇಯ್ಯಂ’’ [ಅಯಂ ಗಾಥಾ ಸೀ. ಪೀ. ಪೋತ್ಥಕೇಸು ನ ದಿಸ್ಸತಿ].
‘‘ಅಸಿಞ್ಚ ಸತ್ತಿಞ್ಚ ಪರಾಮಸಾಮಿ, ಸಪಥಮ್ಪಿ ತೇ ಸಮ್ಮ ಅಹಂ ಕರೋಮಿ;
ತಯಾ ಪಮುತ್ತೋ ಅನಣೋ ಭವಿತ್ವಾ, ಸಚ್ಚಾನುರಕ್ಖೀ ಪುನರಾವಜಿಸ್ಸಂ’’.
‘‘ಯೋ ತೇ ಕತೋ ಸಙ್ಕರೋ ಬ್ರಾಹ್ಮಣೇನ, ರಟ್ಠೇ ಸಕೇ ಇಸ್ಸರಿಯೇ ಠಿತೇನ;
ತಂ ಸಙ್ಕರಂ ಬ್ರಾಹ್ಮಣಸಪ್ಪದಾಯ, ಸಚ್ಚಾನುರಕ್ಖೀ ಪುನರಾವಜಸ್ಸು’’.
‘‘ಯೋ ಮೇ ಕತೋ ಸಙ್ಕರೋ ಬ್ರಾಹ್ಮಣೇನ, ರಟ್ಠೇ ¶ ಸಕೇ ಇಸ್ಸರಿಯೇ ಠಿತೇನ;
ತಂ ಸಙ್ಕರಂ ಬ್ರಾಹ್ಮಣಸಪ್ಪದಾಯ, ಸಚ್ಚಾನುರಕ್ಖೀ ಪುನರಾವಜಿಸ್ಸಂ’’.
‘‘ಮುತ್ತೋ ಚ ಸೋ ಪೋರಿಸಾದಸ್ಸ ಹತ್ಥಾ, ಗನ್ತ್ವಾನ ತಂ ಬ್ರಾಹ್ಮಣಂ ಏತದವೋಚ;
ಸುಣೋಮ [ಸುಣೋಮಿ (ಸೀ. ಸ್ಯಾ.)] ಗಾಥಾಯೋ ಸತಾರಹಾಯೋ, ಯಾ ಮೇ ಸುತಾ ಅಸ್ಸು ಹಿತಾಯ ಬ್ರಹ್ಮೇ’’.
‘‘ಸಕಿದೇವ ಸುತಸೋಮ, ಸಬ್ಭಿ ಹೋತಿ [ಹೋತು (ಪೀ.)] ಸಮಾಗಮೋ;
ಸಾ ನಂ ಸಙ್ಗತಿ ಪಾಲೇತಿ, ನಾಸಬ್ಭಿ ಬಹುಸಙ್ಗಮೋ.
‘‘ಸಬ್ಭಿರೇವ ಸಮಾಸೇಥ, ಸಬ್ಭಿ ಕುಬ್ಬೇಥ ಸನ್ಥವಂ;
ಸತಂ ಸದ್ಧಮ್ಮಮಞ್ಞಾಯ, ಸೇಯ್ಯೋ ಹೋತಿ ನ ಪಾಪಿಯೋ.
‘‘ಜೀರನ್ತಿ ವೇ ರಾಜರಥಾ ಸುಚಿತ್ತಾ, ಅಥೋ ಸರೀರಮ್ಪಿ ಜರಂ ಉಪೇತಿ;
ಸತಞ್ಚ ಧಮ್ಮೋ ನ ಜರಂ ಉಪೇತಿ, ಸನ್ತೋ ಹವೇ ಸಬ್ಭಿ ಪವೇದಯನ್ತಿ.
‘‘ನಭಞ್ಚಂ ¶ ದೂರೇ ಪಥವೀ ಚ ದೂರೇ, ಪಾರಂ ¶ ಸಮುದ್ದಸ್ಸ ತದಾಹು ದೂರೇ;
ತತೋ ಹವೇ ದೂರತರಂ ವದನ್ತಿ, ಸತಞ್ಚ ಧಮ್ಮೋ [ಧಮ್ಮಂ (ಸೀ. ಪೀ.)] ಅಸತಞ್ಚ ರಾಜ’’.
‘‘ಸಹಸ್ಸಿಯಾ [ಸಹಸ್ಸಿಯೋ (ಸೀ. ಪೀ.)] ಇಮಾ ಗಾಥಾ, ನಹಿಮಾ [ನ ಇಮಾ, (ಸೀ. ಪೀ.) ನಯಿಮಾ (ಸ್ಯಾ.)] ಗಾಥಾ ಸತಾರಹಾ;
ಚತ್ತಾರಿ ತ್ವಂ ಸಹಸ್ಸಾನಿ, ಖಿಪ್ಪಂ ಗಣ್ಹಾಹಿ ಬ್ರಾಹ್ಮಣ’’.
‘‘ಆಸೀತಿಯಾ ನಾವುತಿಯಾ [ಅಸೀತಿಯಾ ನವುತಿಯಾ (ಪೀ.)] ಚ ಗಾಥಾ, ಸತಾರಹಾ ಚಾಪಿ ಭವೇಯ್ಯ [ಭವೇಯ್ಯು (ಸೀ. ಸ್ಯಾ. ಪೀ.)] ಗಾಥಾ;
ಪಚ್ಚತ್ತಮೇವ ಸುತಸೋಮ ಜಾನಹಿ, ಸಹಸ್ಸಿಯಾ ನಾಮ ಕಾ ಅತ್ಥಿ [ಸಹಸ್ಸಿಯೋ ನಾಮ ಇಧತ್ಥಿ (ಸೀ.)] ಗಾಥಾ’’.
‘‘ಇಚ್ಛಾಮಿ ವೋಹಂ ಸುತವುದ್ಧಿಮತ್ತನೋ, ಸನ್ತೋತಿ ಮಂ [ಸನ್ತೋ ಮಮಂ (ಸ್ಯಾ.), ಸನ್ತೋ ಚ ಮಂ (ಸೀ. ಪೀ. ಕ.)] ಸಪ್ಪುರಿಸಾ ಭಜೇಯ್ಯುಂ;
ಅಹಂ ಸವನ್ತೀಹಿ ಮಹೋದಧೀವ, ನ ಹಿ ತಾತ ತಪ್ಪಾಮಿ ಸುಭಾಸಿತೇನ.
‘‘ಅಗ್ಗಿ ¶ ಯಥಾ ತಿಣಕಟ್ಠಂ ದಹನ್ತೋ, ನ ತಪ್ಪತೀ ಸಾಗರೋವ [ಸಾಗರೋ ವಾ (ಸೀ. ಪೀ.)] ನದೀಹಿ;
ಏವಮ್ಪಿ ತೇ ಪಣ್ಡಿತಾ ರಾಜಸೇಟ್ಠ, ಸುತ್ವಾ ನ ತಪ್ಪನ್ತಿ ಸುಭಾಸಿತೇನ.
‘‘ಸಕಸ್ಸ ದಾಸಸ್ಸ ಯದಾ ಸುಣೋಮಿ, ಗಾಥಂ ಅಹಂ ಅತ್ಥವತಿಂ [ಗಾಥಾ ಅಹಂ ಅತ್ಥವತೀ (ಸೀ. ಪೀ.)] ಜನಿನ್ದ;
ತಮೇವ ಸಕ್ಕಚ್ಚ ನಿಸಾಮಯಾಮಿ, ನ ¶ ಹಿ ತಾತ ಧಮ್ಮೇಸು ಮಮತ್ಥಿ ತಿತ್ತಿ’’.
‘‘ಇದಂ ¶ ತೇ ರಟ್ಠಂ ಸಧನಂ ಸಯೋಗ್ಗಂ, ಸಕಾಯುರಂ ಸಬ್ಬಕಾಮೂಪಪನ್ನಂ;
ಕಿಂ ಕಾಮಹೇತು ಪರಿಭಾಸಸಿಮಂ [ಭಾಸಸೇ ಮಂ (ಸೀ. ಸ್ಯಾ. ಪೀ.)], ಗಚ್ಛಾಮಹಂ ಪೋರಿಸಾದಸ್ಸ ಞತ್ತೇ’’ [ಪೋರಿಸಾದಸ್ಸ ಕನ್ತೇ (ಸೀ. ಪೀ.), ಪೋರಿಸಾದಸ್ಸುಪನ್ತೇ (ಕ.)].
‘‘ಅತ್ತಾನುರಕ್ಖಾಯ ಭವನ್ತಿ ಹೇತೇ, ಹತ್ಥಾರೋಹಾ ರಥಿಕಾ ಪತ್ತಿಕಾ ಚ;
ಅಸ್ಸಾರುಹಾ [ಅಸ್ಸಾರೋಹಾ (ಸ್ಯಾ. ಪೀ.)] ಯೇ ಚ ಧನುಗ್ಗಹಾಸೇ, ಸೇನಂ ಪಯುಞ್ಜಾಮ ಹನಾಮ ಸತ್ತುಂ’’.
‘‘ಸುದುಕ್ಕರಂ ಪೋರಿಸಾದೋ ಅಕಾಸಿ, ಜೀವಂ ಗಹೇತ್ವಾನ ಅವಸ್ಸಜೀ ಮಂ;
ತಂ ತಾದಿಸಂ ಪುಬ್ಬಕಿಚ್ಚಂ ಸರನ್ತೋ, ದುಬ್ಭೇ ಅಹಂ ತಸ್ಸ ಕಥಂ ಜನಿನ್ದ’’.
‘‘ವನ್ದಿತ್ವಾ ಸೋ ಪಿತರಂ ಮಾತರಞ್ಚ, ಅನುಸಾಸೇತ್ವಾ ನೇಗಮಞ್ಚ ಬಲಞ್ಚ;
ಸಚ್ಚವಾದೀ ಸಚ್ಚಾನುರಕ್ಖಮಾನೋ, ಅಗಮಾಸಿ ಸೋ ಯತ್ಥ ಪೋರಿಸಾದೋ’’.
‘‘ಕತೋ ಮಯಾ ಸಙ್ಕರೋ ಬ್ರಾಹ್ಮಣೇನ, ರಟ್ಠೇ ಸಕೇ ಇಸ್ಸರಿಯೇ ಠಿತೇನ;
ತಂ ಸಙ್ಕರಂ ಬ್ರಾಹ್ಮಣಸಪ್ಪದಾಯ, ಸಚ್ಚಾನುರಕ್ಖೀ ¶ ಪುನರಾಗತೋಸ್ಮಿ;
ಯಜಸ್ಸು ಯಞ್ಞಂ ಖಾದ ಮಂ ಪೋರಿಸಾದ’’.
‘‘ನ ಹಾಯತೇ ಖಾದಿತಂ [ಖಾದಿತುಂ (ಸೀ. ಸ್ಯಾ. ಪೀ.)] ಮಯ್ಹಂ ಪಚ್ಛಾ, ಚಿತಕಾ ಅಯಂ ತಾವ ಸಧೂಮಿಕಾವ [ಸಧೂಮಕಾ ಚ (ಸ್ಯಾ.)];
ನಿದ್ಧೂಮಕೇ ಪಚಿತಂ ಸಾಧುಪಕ್ಕಂ, ಸುಣೋಮ [ಸುಣೋಮಿ (ಸೀ.), ಸುಣಾಮ (ಪೀ.)] ಗಾಥಾಯೋ ಸತಾರಹಾಯೋ’’.
‘‘ಅಧಮ್ಮಿಕೋ ¶ ತ್ವಂ ಪೋರಿಸಾದಕಾಸಿ [ಪೋರಿಸಾದಮಕಾಸಿ (ಕ.)], ರಟ್ಠಾ ಚ ಭಟ್ಠೋ ಉದರಸ್ಸ ಹೇತು;
ಧಮ್ಮಞ್ಚಿಮಾ ಅಭಿವದನ್ತಿ ಗಾಥಾ, ಧಮ್ಮೋ ಚ ಅಧಮ್ಮೋ ಚ ಕುಹಿಂ ಸಮೇತಿ.
‘‘ಅಧಮ್ಮಿಕಸ್ಸ ಲುದ್ದಸ್ಸ, ನಿಚ್ಚಂ ಲೋಹಿತಪಾಣಿನೋ;
ನತ್ಥಿ ಸಚ್ಚಂ ಕುತೋ ಧಮ್ಮೋ, ಕಿಂ ಸುತೇನ ಕರಿಸ್ಸಸಿ’’.
‘‘ಯೋ ಮಂಸಹೇತು ಮಿಗವಂ ಚರೇಯ್ಯ, ಯೋ ವಾ ಹನೇ ಪುರಿಸಮತ್ತಹೇತು;
ಉಭೋಪಿ ತೇ ಪೇಚ್ಚ ಸಮಾ ಭವನ್ತಿ, ಕಸ್ಮಾ ನೋ [ಕಸ್ಮಾ ನು (ಕ.)] ಅಧಮ್ಮಿಕಂ ಬ್ರೂಸಿ ಮಂ ತ್ವಂ’’.
‘‘ಪಞ್ಚ ಪಞ್ಚನಖಾ ಭಕ್ಖಾ, ಖತ್ತಿಯೇನ ಪಜಾನತಾ;
ಅಭಕ್ಖಂ ರಾಜ ಭಕ್ಖೇಸಿ, ತಸ್ಮಾ ಅಧಮ್ಮಿಕೋ ತುವಂ’’.
‘‘ಮುತ್ತೋ ತುವಂ ಪೋರಿಸಾದಸ್ಸ ಹತ್ಥಾ, ಗನ್ತ್ವಾ ಸಕಂ ಮನ್ದಿರಂ ಕಾಮಕಾಮೀ;
ಅಮಿತ್ತಹತ್ಥಂ ¶ ಪುನರಾಗತೋಸಿ, ನ ಖತ್ತಧಮ್ಮೇ ಕುಸಲೋಸಿ ರಾಜ’’.
‘‘ಯೇ ¶ ಖತ್ತಧಮ್ಮೇ ಕುಸಲಾ ಭವನ್ತಿ, ಪಾಯೇನ ತೇ ನೇರಯಿಕಾ ಭವನ್ತಿ;
ತಸ್ಮಾ ಅಹಂ ಖತ್ತಧಮ್ಮಂ ಪಹಾಯ, ಸಚ್ಚಾನುರಕ್ಖೀ ಪುನರಾಗತೋಸ್ಮಿ;
ಯಜಸ್ಸು ಯಞ್ಞಂ ಖಾದ ಮಂ ಪೋರಿಸಾದ’’.
‘‘ಪಾಸಾದವಾಸಾ ಪಥವೀಗವಸ್ಸಾ, ಕಾಮಿತ್ಥಿಯೋ ಕಾಸಿಕಚನ್ದನಞ್ಚ;
ಸಬ್ಬಂ ತಹಿಂ ಲಭಸಿ [ಲಬ್ಭತಿ (ಪೀ.)] ಸಾಮಿತಾಯ, ಸಚ್ಚೇನ ಕಿಂ ಪಸ್ಸಸಿ ಆನಿಸಂಸಂ’’.
‘‘ಯೇ ¶ ಕೇಚಿಮೇ ಅತ್ಥಿ ರಸಾ ಪಥಬ್ಯಾ, ಸಚ್ಚಂ ತೇಸಂ ಸಾಧುತರಂ ರಸಾನಂ;
ಸಚ್ಚೇ ಠಿತಾ ಸಮಣಬ್ರಾಹ್ಮಣಾ ಚ, ತರನ್ತಿ ಜಾತಿಮರಣಸ್ಸ ಪಾರಂ’’.
‘‘ಮುತ್ತೋ ತುವಂ ಪೋರಿಸಾದಸ್ಸ ಹತ್ಥಾ, ಗನ್ತ್ವಾ ಸಕಂ ಮನ್ದಿರಂ ಕಾಮಕಾಮೀ;
ಅಮಿತ್ತಹತ್ಥಂ ಪುನರಾಗತೋಸಿ, ನ ಹಿ ನೂನ ತೇ ಮರಣಭಯಂ ಜನಿನ್ದ;
ಅಲೀನಚಿತ್ತೋ ಅಸಿ [ಚ’ಸಿ (ಸೀ. ಸ್ಯಾ. ಪೀ.)] ಸಚ್ಚವಾದೀ’’.
‘‘ಕತಾ ¶ ಮೇ ಕಲ್ಯಾಣಾ ಅನೇಕರೂಪಾ, ಯಞ್ಞಾ ಯಿಟ್ಠಾ ಯೇ ವಿಪುಲಾ ಪಸತ್ಥಾ;
ವಿಸೋಧಿತೋ ಪರಲೋಕಸ್ಸ ಮಗ್ಗೋ, ಧಮ್ಮೇ ಠಿತೋ ಕೋ ಮರಣಸ್ಸ ಭಾಯೇ.
‘‘ಕತಾ ಮೇ ಕಲ್ಯಾಣಾ ಅನೇಕರೂಪಾ, ಯಞ್ಞಾ ಯಿಟ್ಠಾ ಯೇ ವಿಪುಲಾ ಪಸತ್ಥಾ;
ಅನಾನುತಪ್ಪಂ ಪರಲೋಕಂ ಗಮಿಸ್ಸಂ, ಯಜಸ್ಸು ಯಞ್ಞಂ ಅದ [ಖಾದ (ಸೀ. ಸ್ಯಾ. ಪೀ.)] ಮಂ ಪೋರಿಸಾದ.
‘‘ಪಿತಾ ಚ ಮಾತಾ ಚ ಉಪಟ್ಠಿತಾ ಮೇ, ಧಮ್ಮೇನ ಮೇ ಇಸ್ಸರಿಯಂ ಪಸತ್ಥಂ;
ವಿಸೋಧಿತೋ ಪರಲೋಕಸ್ಸ ಮಗ್ಗೋ, ಧಮ್ಮೇ ಠಿತೋ ಕೋ ಮರಣಸ್ಸ ಭಾಯೇ.
‘‘ಪಿತಾ ಚ ಮಾತಾ ಚ ಉಪಟ್ಠಿತಾ ಮೇ, ಧಮ್ಮೇನ ಮೇ ಇಸ್ಸರಿಯಂ ಪಸತ್ಥಂ;
ಅನಾನುತಪ್ಪಂ ಪರಲೋಕಂ ಗಮಿಸ್ಸಂ, ಯಜಸ್ಸು ಯಞ್ಞಂ ಅದ ಮಂ ಪೋರಿಸಾದ.
‘‘ಞಾತೀಸು ¶ ಮಿತ್ತೇಸು ಕತಾ ಮೇ ಕಾರಾ [ಕತೂಪಕಾರೋ (ಸ್ಯಾ. ಕ.)], ಧಮ್ಮೇನ ಮೇ ಇಸ್ಸರಿಯಂ ಪಸತ್ಥಂ;
ವಿಸೋಧಿತೋ ಪರಲೋಕಸ್ಸ ಮಗ್ಗೋ, ಧಮ್ಮೇ ಠಿತೋ ಕೋ ಮರಣಸ್ಸ ಭಾಯೇ.
‘‘ಞಾತೀಸುಂ ¶ ಮಿತ್ತೇಸು ಕತಾ ಮೇ ಕಾರಾ, ಧಮ್ಮೇನ ಮೇ ಇಸ್ಸರಿಯಂ ಪಸತ್ಥಂ;
ಅನಾನುತಪ್ಪಂ ಪರಲೋಕಂ ಗಮಿಸ್ಸಂ, ಯಜಸ್ಸು ಯಞ್ಞಂ ಅದ ಮಂ ಪೋರಿಸಾದ.
‘‘ದಿನ್ನಂ ಮೇ ದಾನಂ ಬಹುಧಾ ಬಹೂನಂ, ಸನ್ತಪ್ಪಿತಾ ಸಮಣಬ್ರಾಹ್ಮಣಾ ಚ;
ವಿಸೋಧಿತೋ ಪರಲೋಕಸ್ಸ ಮಗ್ಗೋ, ಧಮ್ಮೇ ಠಿತೋ ಕೋ ಮರಣಸ್ಸ ಭಾಯೇ.
‘‘ದಿನ್ನಂ ಮೇ ದಾನಂ ಬಹುಧಾ ಬಹೂನಂ, ಸನ್ತಪ್ಪಿತಾ ಸಮಣಬ್ರಾಹ್ಮಣಾ ಚ;
ಅನಾನುತಪ್ಪಂ ಪರಲೋಕಂ ಗಮಿಸ್ಸಂ, ಯಜಸ್ಸು ಯಞ್ಞಂ ಅದ ಮಂ ಪೋರಿಸಾದ’’.
‘‘ವಿಸಂ ಪಜಾನಂ ಪುರಿಸೋ ಅದೇಯ್ಯ, ಆಸೀವಿಸಂ ಜಲಿತಮುಗ್ಗತೇಜಂ;
ಮುದ್ಧಾಪಿ ತಸ್ಸ ವಿಫಲೇಯ್ಯ [ವಿಪತೇಯ್ಯ (ಸೀ. ಪೀ.)] ಸತ್ತಧಾ, ಯೋ ತಾದಿಸಂ ಸಚ್ಚವಾದಿಂ ಅದೇಯ್ಯ’’.
‘‘ಸುತ್ವಾ ಧಮ್ಮಂ ವಿಜಾನನ್ತಿ, ನರಾ ಕಲ್ಯಾಣಪಾಪಕಂ;
ಅಪಿ ಗಾಥಾ ಸುಣಿತ್ವಾನ, ಧಮ್ಮೇ ಮೇ ರಮತೇ [ರಮತೀ (ಸೀ. ಪೀ.)] ಮನೋ’’.
‘‘ಸಕಿದೇವ ¶ ಮಹಾರಾಜ [ಸುತಸೋಮ (ಸೀ. ಪೀ.)], ಸಬ್ಭಿ ಹೋತಿ ಸಮಾಗಮೋ;
ಸಾ ನಂ ಸಙ್ಗತಿ ಪಾಲೇತಿ, ನಾಸಬ್ಭಿ ಬಹುಸಙ್ಗಮೋ.
‘‘ಸಬ್ಭಿರೇವ ¶ ಸಮಾಸೇಥ, ಸಬ್ಭಿ ಕುಬ್ಬೇಥ ಸನ್ಥವಂ;
ಸತಂ ಸದ್ಧಮ್ಮಮಞ್ಞಾಯ, ಸೇಯ್ಯೋ ಹೋತಿ ನ ಪಾಪಿಯೋ.
‘‘ಜೀರನ್ತಿ ವೇ ರಾಜರಥಾ ಸುಚಿತ್ತಾ, ಅಥೋ ಸರೀರಮ್ಪಿ ಜರಂ ಉಪೇತಿ;
ಸತಞ್ಚ ಧಮ್ಮೋ ನ ಜರಂ ಉಪೇತಿ, ಸನ್ತೋ ಹವೇ ಸಬ್ಭಿ ಪವೇದಯನ್ತಿ.
‘‘ನಭಞ್ಚಂ ¶ ದೂರೇ ಪಥವೀ ಚ ದೂರೇ, ಪಾರಂ ಸಮುದ್ದಸ್ಸ ತದಾಹು ದೂರೇ;
ತತೋ ಹವೇ ದೂರತರಂ ವದನ್ತಿ, ಸತಞ್ಚ ಧಮ್ಮೋ [ಧಮ್ಮಂ (ಸೀ. ಪೀ.)] ಅಸತಞ್ಚ ರಾಜ’’.
‘‘ಗಾಥಾ ಇಮಾ ಅತ್ಥವತೀ ಸುಬ್ಯಞ್ಜನಾ, ಸುಭಾಸಿತಾ ತುಯ್ಹ ಜನಿನ್ದ ಸುತ್ವಾ;
ಆನನ್ದಿ ವಿತ್ತೋ ಸುಮನೋ ಪತೀತೋ, ಚತ್ತಾರಿ ತೇ ಸಮ್ಮ ವರೇ ದದಾಮಿ’’.
‘‘ಯೋ ನತ್ತನೋ ಮರಣಂ ಬುಜ್ಝಸಿ ತುವಂ [ಬುಜ್ಝಸೇ ತ್ವಂ (ಸೀ. ಪೀ.), ಬುಜ್ಝಸೇ ತುವಂ (ಸ್ಯಾ.)], ಹಿತಾಹಿತಂ ವಿನಿಪಾತಞ್ಚ ಸಗ್ಗಂ;
ಗಿದ್ಧೋ ರಸೇ ದುಚ್ಚರಿತೇ ನಿವಿಟ್ಠೋ, ಕಿಂ ತ್ವಂ ವರಂ ದಸ್ಸಸಿ ಪಾಪಧಮ್ಮ.
‘‘ಅಹಞ್ಚ ತಂ ದೇಹಿ ವರನ್ತಿ ವಜ್ಜಂ, ತ್ವಞ್ಚಾಪಿ ದತ್ವಾನ ಅವಾಕರೇಯ್ಯ;
ಸನ್ದಿಟ್ಠಿಕಂ ¶ ಕಲಹಮಿಮಂ ವಿವಾದಂ, ಕೋ ಪಣ್ಡಿತೋ ಜಾನಮುಪಬ್ಬಜೇಯ್ಯ’’.
‘‘ನ ತಂ ವರಂ ಅರಹತಿ ಜನ್ತು ದಾತುಂ, ಯಂ ವಾಪಿ ದತ್ವಾನ ಅವಾಕರೇಯ್ಯ;
ವರಸ್ಸು ಸಮ್ಮ ಅವಿಕಮ್ಪಮಾನೋ, ಪಾಣಂ ಚಜಿತ್ವಾನಪಿ ದಸ್ಸಮೇವ’’.
‘‘ಅರಿಯಸ್ಸ ಅರಿಯೇನ ಸಮೇತಿ ಸಖ್ಯಂ [ಸಕ್ಖಿ (ಸೀ. ಸ್ಯಾ. ಪೀ.)], ಪಞ್ಞಸ್ಸ ಪಞ್ಞಾಣವತಾ ಸಮೇತಿ;
ಪಸ್ಸೇಯ್ಯ ತಂ ವಸ್ಸಸತಂ ಅರೋಗಂ [ಆರೋಗ್ಯಂ (ಕ.)], ಏತಂ ವರಾನಂ ಪಠಮಂ ವರಾಮಿ’’.
‘‘ಅರಿಯಸ್ಸ ಅರಿಯೇನ ಸಮೇತಿ ಸಖ್ಯಂ, ಪಞ್ಞಸ್ಸ ಪಞ್ಞಾಣವತಾ ಸಮೇತಿ;
ಪಸ್ಸಾಸಿ ಮಂ ವಸ್ಸಸತಂ ಅರೋಗಂ, ಏತಂ ವರಾನಂ ಪಠಮಂ ದದಾಮಿ’’.
‘‘ಯೇ ¶ ಖತ್ತಿಯಾಸೇ ಇಧ ಭೂಮಿಪಾಲಾ, ಮುದ್ಧಾಭಿಸಿತ್ತಾ ಕತನಾಮಧೇಯ್ಯಾ;
ನ ತಾದಿಸೇ ಭೂಮಿಪತೀ ಅದೇಸಿ, ಏತಂ ವರಾನಂ ದುತಿಯಂ ವರಾಮಿ’’.
‘‘ಯೇ ಖತ್ತಿಯಾಸೇ ಇಧ ಭೂಮಿಪಾಲಾ, ಮುದ್ಧಾಭಿಸಿತ್ತಾ ಕತನಾಮಧೇಯ್ಯಾ;
ನ ¶ ತಾದಿಸೇ ಭೂಮಿಪತೀ ಅದೇಮಿ, ಏತಂ ವರಾನಂ ದುತಿಯಂ ದದಾಮಿ’’.
‘‘ಪರೋಸತಂ ಖತ್ತಿಯಾ ತೇ ಗಹಿತಾ, ತಲಾವುತಾ ಅಸ್ಸುಮುಖಾ ರುದನ್ತಾ;
ಸಕೇ ತೇ ರಟ್ಠೇ ಪಟಿಪಾದಯಾಹಿ, ಏತಂ ವರಾನಂ ತತಿಯಂ ವರಾಮಿ’’.
‘‘ಪರೋಸತಂ ಖತ್ತಿಯಾ ಮೇ ಗಹಿತಾ, ತಲಾವುತಾ ಅಸ್ಸುಮುಖಾ ರುದನ್ತಾ;
ಸಕೇ ತೇ ರಟ್ಠೇ ಪಟಿಪಾದಯಾಮಿ [ಸಕೇನ ರಟ್ಠೇನ ಪಟಿಪಾದಯಾಮಿ ತೇ (ಸೀ.)], ಏತಂ ವರಾನಂ ತತಿಯಂ ದದಾಮಿ’’.
‘‘ಛಿದ್ದಂ ತೇ ರಟ್ಠಂ ಬ್ಯಥಿತಾ [ಬ್ಯಥಿತಂ (ಸೀ.), ಬ್ಯಾಧಿತಂ (ಪೀ.)] ಭಯಾ ಹಿ, ಪುಥೂ ನರಾ ಲೇಣಮನುಪ್ಪವಿಟ್ಠಾ;
ಮನುಸ್ಸಮಂಸಂ ವಿರಮೇಹಿ [ವಿರಮಾಹಿ (ಸ್ಯಾ.)] ರಾಜ, ಏತಂ ವರಾನಂ ಚತುತ್ಥಂ ವರಾಮಿ’’.
‘‘ಅದ್ಧಾ ¶ ಹಿ ಸೋ ಭಕ್ಖೋ ಮಮ [ಮಮಂ (ಸೀ. ಸ್ಯಾ. ಪೀ.)] ಮನಾಪೋ, ಏತಸ್ಸ ಹೇತುಮ್ಹಿ [ಹೇತುಮ್ಪಿ (ಪೀ.)] ವನಂ ಪವಿಟ್ಠೋ;
ಸೋಹಂ ಕಥಂ ಏತ್ತೋ ಉಪಾರಮೇಯ್ಯಂ, ಅಞ್ಞಂ ವರಾನಂ ಚತುತ್ಥಂ ವರಸ್ಸು’’.
‘‘ನಂ ¶ ವೇ ಪಿಯಂ ಮೇತಿ ಜನಿನ್ದ ತಾದಿಸೋ, ಅತ್ತಂ ನಿರಂಕಚ್ಚ [ನಿರಂಕತ್ವಾ (ಸೀ. ಸ್ಯಾ. ಪೀ.)] ಪಿಯಾನಿ ಸೇವತಿ;
ಅತ್ತಾವ ¶ ಸೇಯ್ಯೋ ಪರಮಾ ಚ [ಪರಮಾವ (ಬಹೂಸು) ಜಾ. ೧.೬.೮೧ ಸಂಸನ್ದೇತಬ್ಬಂ] ಸೇಯ್ಯೋ, ಲಬ್ಭಾ ಪಿಯಾ ಓಚಿತತ್ಥೇನ [ಓಚಿತತ್ತೇನ (ಕ.)] ಪಚ್ಛಾ’’.
‘‘ಪಿಯಂ ಮೇ ಮಾನುಸಂ ಮಂಸಂ, ಸುತಸೋಮ ವಿಜಾನಹಿ;
ನಮ್ಹಿ ಸಕ್ಕಾ [ನಮ್ಹಿ ಸಕ್ಕೋ (ಸೀ. ಪೀ.)] ನಿವಾರೇತುಂ, ಅಞ್ಞಂ [ಅಞ್ಞಂ ತುವಂ (ಸೀ. ಸ್ಯಾ. ಪೀ.)] ವರಂ ಸಮ್ಮ ವರಸ್ಸು’’.
‘‘ಯೋ ವೇ ಪಿಯಂ ಮೇತಿ ಪಿಯಾನುರಕ್ಖೀ [ಪಿಯಾನುಕಙ್ಖೀ (ಸೀ. ಪೀ.)], ಅತ್ತಂ ನಿರಂಕಚ್ಚ ಪಿಯಾನಿ ಸೇವತಿ;
ಸೋಣ್ಡೋವ ಪಿತ್ವಾ ವಿಸಮಿಸ್ಸಪಾನಂ [ಪೀತ್ವನ ವಿಸಸ್ಸ ಥಾಲಂ (ಸೀ. ಪೀ.), ಪಿತ್ವಾ ವಿಸಮಿಸ್ಸಥಾಲಂ (ಸ್ಯಾ. ಕ.)], ತೇನೇವ ಸೋ ಹೋತಿ ದುಕ್ಖೀ ಪರತ್ಥ.
‘‘ಯೋ ಚೀಧ ಸಙ್ಖಾಯ ಪಿಯಾನಿ ಹಿತ್ವಾ, ಕಿಚ್ಛೇನಪಿ ಸೇವತಿ ಅರಿಯಧಮ್ಮೇ [ಅರಿಯಧಮ್ಮಂ (ಸೀ. ಪೀ.)];
ದುಕ್ಖಿತೋವ ಪಿತ್ವಾನ ಯಥೋಸಧಾನಿ, ತೇನೇವ ಸೋ ಹೋತಿ ಸುಖೀ ಪರತ್ಥ’’.
‘‘ಓಹಾಯಹಂ ಪಿತರಂ ಮಾತರಞ್ಚ, ಮನಾಪಿಯೇ ಕಾಮಗುಣೇ ಚ [ಕಾಮಗುಣೇಪಿ (ಸ್ಯಾ. ಕ.)] ಪಞ್ಚ;
ಏತಸ್ಸ ಹೇತುಮ್ಹಿ ವನಂ ಪವಿಟ್ಠೋ, ತಂ ತೇ ವರಂ ಕಿನ್ತಿ ಮಹಂ ದದಾಮಿ’’.
‘‘ನ ಪಣ್ಡಿತಾ ದಿಗುಣಮಾಹು ವಾಕ್ಯಂ, ಸಚ್ಚಪ್ಪಟಿಞ್ಞಾವ ಭವನ್ತಿ ಸನ್ತೋ;
ವರಸ್ಸು ಸಮ್ಮ ಇತಿ ಮಂ ಅವೋಚ, ಇಚ್ಚಬ್ರವೀ ತ್ವಂ ನ ಹಿ ತೇ ಸಮೇತಿ’’.
‘‘ಅಪುಞ್ಞಲಾಭಂ ¶ ಅಯಸಂ ಅಕಿತ್ತಿಂ, ಪಾಪಂ ಬಹುಂ ದುಚ್ಚರಿತಂ ಕಿಲೇಸಂ;
ಮನುಸ್ಸಮಂಸಸ್ಸ ಕತೇ [ಭವೋ (ಸ್ಯಾ. ಕ.)] ಉಪಾಗಾ, ತಂ ತೇ ವರಂ ಕಿನ್ತಿ ಮಹಂ ದದೇಯ್ಯಂ.
‘‘ನಂ ¶ ತಂ ವರಂ ಅರಹತಿ ಜನ್ತು ದಾತುಂ, ಯಂ ವಾಪಿ ದತ್ವಾನ ಅವಾಕರೇಯ್ಯ;
ವರಸ್ಸು ಸಮ್ಮ ಅವಿಕಮ್ಪಮಾನೋ, ಪಾಣಂ ಚಜಿತ್ವಾನಪಿ ದಸ್ಸಮೇವ’’.
‘‘ಪಾಣಂ ಚಜನ್ತಿ ಸನ್ತೋ ನಾಪಿ ಧಮ್ಮಂ, ಸಚ್ಚಪ್ಪಟಿಞ್ಞಾವ ಭವನ್ತಿ ಸನ್ತೋ;
ದತ್ವಾ ವರಂ ಖಿಪ್ಪಮವಾಕರೋಹಿ, ಏತೇನ ಸಮ್ಪಜ್ಜ ಸುರಾಜಸೇಟ್ಠ.
‘‘ಚಜೇ ಧನಂ [ಧನಂ ಚಜೇ (ಸೀ.)] ಅಙ್ಗವರಸ್ಸ ಹೇತು [ಯೋ ಪನ ಅಙ್ಗಹೇತು (ಸೀ. ಪೀ.)], ಅಙ್ಗಂ ಚಜೇ ಜೀವಿತಂ ರಕ್ಖಮಾನೋ;
ಅಙ್ಗಂ ಧನಂ ಜೀವಿತಞ್ಚಾಪಿ ಸಬ್ಬಂ, ಚಜೇ ನರೋ ಧಮ್ಮಮನುಸ್ಸರನ್ತೋ’’.
‘‘ಯಸ್ಮಾ ಹಿ ಧಮ್ಮಂ ಪುರಿಸೋ ವಿಜಞ್ಞಾ, ಯೇ ಚಸ್ಸ ಕಙ್ಖಂ ವಿನಯನ್ತಿ ಸನ್ತೋ;
ತಂ ಹಿಸ್ಸ ದೀಪಞ್ಚ ಪರಾಯಣಞ್ಚ, ನ ¶ ತೇನ ಮಿತ್ತಿಂ ಜಿರಯೇಥ [ಜರಯೇಥ (ಸೀ. ಪೀ.)] ಪಞ್ಞೋ.
‘‘ಅದ್ಧಾ ಹಿ ಸೋ ಭಕ್ಖೋ ಮಮ ಮನಾಪೋ, ಏತಸ್ಸ ಹೇತುಮ್ಹಿ ವನಂ ಪವಿಟ್ಠೋ;
ಸಚೇ ಚ ಮಂ ಯಾಚಸಿ ಏತಮತ್ಥಂ, ಏತಮ್ಪಿ ತೇ ಸಮ್ಮ ವರಂ ದದಾಮಿ.
‘‘ಸತ್ಥಾ ಚ ಮೇ ಹೋಸಿ ಸಖಾ ಚ ಮೇಸಿ, ವಚನಮ್ಪಿ ತೇ ಸಮ್ಮ ಅಹಂ ಅಕಾಸಿಂ;
ತುವಮ್ಪಿ [ತ್ವಂಪಿ (ಸ್ಯಾ. ಕ.)] ಮೇ ಸಮ್ಮ ಕರೋಹಿ ವಾಕ್ಯಂ, ಉಭೋಪಿ ಗನ್ತ್ವಾನ ಪಮೋಚಯಾಮ’’.
‘‘ಸತ್ಥಾ ಚ ತೇ ಹೋಮಿ ಸಖಾ ಚ ತ್ಯಮ್ಹಿ, ವಚನಮ್ಪಿ ಮೇ ಸಮ್ಮ ತುವಂ ಅಕಾಸಿ;
ಅಹಮ್ಪಿ ತೇ ಸಮ್ಮ ಕರೋಮಿ ವಾಕ್ಯಂ, ಉಭೋಪಿ ಗನ್ತ್ವಾನ ಪಮೋಚಯಾಮ’’.
‘‘ಕಮ್ಮಾಸಪಾದೇನಂ ¶ ¶ ವಿಹೇಠಿತತ್ಥ [ವಿಹೇಠಿತಮ್ಹಾ (ಸ್ಯಾ. ಕ.)], ತಲಾವುತಾ ಅಸ್ಸುಮುಖಾ ರುದನ್ತಾ;
ನ ಜಾತು ದುಬ್ಭೇಥ ಇಮಸ್ಸ ರಞ್ಞೋ, ಸಚ್ಚಪ್ಪಟಿಞ್ಞಂ ¶ ಮೇ ಪಟಿಸ್ಸುಣಾಥ’’.
‘‘ಕಮ್ಮಾಸಪಾದೇನ ವಿಹೇಠಿತಮ್ಹಾ, ತಲಾವುತಾ ಅಸ್ಸುಮುಖಾ ರುದನ್ತಾ;
ನ ಜಾತು ದುಬ್ಭೇಮ ಇಮಸ್ಸ ರಞ್ಞೋ, ಸಚ್ಚಪ್ಪಟಿಞ್ಞಂ ತೇ ಪಟಿಸ್ಸುಣಾಮ’’.
‘‘ಯಥಾ ಪಿತಾ ವಾ ಅಥ ವಾಪಿ ಮಾತಾ, ಅನುಕಮ್ಪಕಾ ಅತ್ಥಕಾಮಾ ಪಜಾನಂ;
ಏವಮೇವ ವೋ [ಏವಮೇವ (ಸೀ.), ಏವಮ್ಪಿ ವೋ (ಸ್ಯಾ.)] ಹೋತು ಅಯಞ್ಚ ರಾಜಾ, ತುಮ್ಹೇ ಚ ವೋ ಹೋಥ ಯಥೇವ ಪುತ್ತಾ’’.
‘‘ಯಥಾ ಪಿತಾ ವಾ ಅಥ ವಾಪಿ ಮಾತಾ, ಅನುಕಮ್ಪಕಾ ಅತ್ಥಕಾಮಾ ಪಜಾನಂ;
ಏವಮೇವ ನೋ ಹೋತು [ಏವಮ್ಪಿ ನೋ (ಸ್ಯಾ.)] ಅಯಞ್ಚ ರಾಜಾ, ಮಯಮ್ಪಿ ಹೇಸ್ಸಾಮ ಯಥೇವ [ತಥೇವ (ಪೀ.)] ಪುತ್ತಾ’’.
‘‘ಚತುಪ್ಪದಂ ಸಕುಣಞ್ಚಾಪಿ ಮಂಸಂ, ಸೂದೇಹಿ ರನ್ಧಂ ಸುಕತಂ ಸುನಿಟ್ಠಿತಂ;
ಸುಧಂವ ಇನ್ದೋ ಪರಿಭುಞ್ಜಿಯಾನ, ಹಿತ್ವಾ ಕಥೇಕೋ ರಮಸೀ ಅರಞ್ಞೇ.
‘‘ತಾ ಖತ್ತಿಯಾ ವಲ್ಲಿವಿಲಾಕಮಜ್ಝಾ, ಅಲಙ್ಕತಾ ಸಮ್ಪರಿವಾರಯಿತ್ವಾ;
ಇನ್ದಂವ ದೇವೇಸು ಪಮೋದಯಿಂಸು, ಹಿತ್ವಾ ¶ ಕಥೇಕೋ ರಮಸೀ ಅರಞ್ಞೇ.
‘‘ತಮ್ಬೂಪಧಾನೇ ಬಹುಗೋಣಕಮ್ಹಿ, ಸುಭಮ್ಹಿ [ಸುಚಿಮ್ಹಿ (ಸೀ. ಪೀ.)] ಸಬ್ಬಸ್ಸಯನಮ್ಹಿ ಸಙ್ಗೇ [ಸಞ್ಞತೇ (ಸೀ. ಪೀ.), ಲಙ್ಗತೇ (ಸ್ಯಾ.)];
ಸೇಯ್ಯಸ್ಸ [ಸಯನಸ್ಸ (ಸೀ. ಸ್ಯಾ. ಪೀ. ಕ.)] ಮಜ್ಝಮ್ಹಿ ಸುಖಂ ಸಯಿತ್ವಾ, ಹಿತ್ವಾ ಕಥೇಕೋ ರಮಸೀ ಅರಞ್ಞೇ.
‘‘ಪಾಣಿಸ್ಸರಂ ¶ ಕುಮ್ಭಥೂಣಂ ನಿಸೀಥೇ, ಅಥೋಪಿ ವೇ ನಿಪ್ಪುರಿಸಮ್ಪಿ ತೂರಿಯಂ;
ಬಹುಂ ಸುಗೀತಞ್ಚ ಸುವಾದಿತಞ್ಚ, ಹಿತ್ವಾ ಕಥೇಕೋ ರಮಸೀ ಅರಞ್ಞೇ.
‘‘ಉಯ್ಯಾನಸಮ್ಪನ್ನಂ ಪಹೂತಮಾಲ್ಯಂ, ಮಿಗಾಜಿನೂಪೇತಪುರಂ [ಮಿಗಾಚಿರೂಪೇತಪುರಂ (ಸೀ. ಪೀ.)] ಸುರಮ್ಮಂ;
ಹಯೇಹಿ ನಾಗೇಹಿ ರಥೇಹುಪೇತಂ, ಹಿತ್ವಾ ಕಥೇಕೋ ರಮಸೀ ಅರಞ್ಞೇ’’.
‘‘ಕಾಳಪಕ್ಖೇ ಯಥಾ ಚನ್ದೋ, ಹಾಯತೇವ ಸುವೇ ಸುವೇ;
ಕಾಳಪಕ್ಖೂಪಮೋ ರಾಜ, ಅಸತಂ ಹೋತಿ ಸಮಾಗಮೋ.
‘‘ಯಥಾಹಂ [ಯಥಾ (ಸೀ.)] ರಸಕಮಾಗಮ್ಮ, ಸೂದಂ ಕಾಪುರಿಸಾಧಮಂ [ಸೂದಕಂ ಪುರಿಸಾಧಮಂ (ಸೀ. ಪೀ.)];
ಅಕಾಸಿಂ ಪಾಪಕಂ ಕಮ್ಮಂ, ಯೇನ ಗಚ್ಛಾಮಿ ದುಗ್ಗತಿಂ.
‘‘ಸುಕ್ಕಪಕ್ಖೇ ಯಥಾ ಚನ್ದೋ, ವಡ್ಢತೇವ ಸುವೇ ಸುವೇ;
ಸುಕ್ಕಪಕ್ಖೂಪಮೋ ರಾಜ, ಸತಂ ಹೋತಿ ಸಮಾಗಮೋ.
‘‘ಯಥಾಹಂ ತುವಮಾಗಮ್ಮ, ಸುತಸೋಮ ವಿಜಾನಹಿ;
ಕಾಹಾಮಿ ಕುಸಲಂ ಕಮ್ಮಂ, ಯೇನ ಗಚ್ಛಾಮಿ ಸುಗ್ಗತಿಂ.
‘‘ಥಲೇ ಯಥಾ ವಾರಿ ಜನಿನ್ದ ವುಟ್ಠಂ [ವಟ್ಟಂ (ಸೀ. ಪೀ.)], ಅನದ್ಧನೇಯ್ಯಂ ನ ಚಿರಟ್ಠಿತೀಕಂ;
ಏವಮ್ಪಿ ¶ ಹೋತಿ ಅಸತಂ ಸಮಾಗಮೋ, ಅನದ್ಧನೇಯ್ಯೋ ಉದಕಂ ಥಲೇವ.
‘‘ಸರೇ ಯಥಾ ವಾರಿ ಜನಿನ್ದ ವುಟ್ಠಂ, ಚಿರಟ್ಠಿತೀಕಂ ನರವೀರಸೇಟ್ಠ [ನರವಿರಿಯಸೇಟ್ಠ (ಸೀ. ಪೀ.)];
ಏವಮ್ಪಿ ವೇ [ಏವಮ್ಪಿ ಮೇ (ಸ್ಯಾ.), ಏವಮ್ಪಿ ಚೇ (ಪೀ. ಕ.)] ಹೋತಿ ಸತಂ ಸಮಾಗಮೋ, ಚಿರಟ್ಠಿತೀಕೋ [ಚಿರಟ್ಠಿತಿಕಂ (ಕ.)] ಉದಕಂ ಸರೇವ.
‘‘ಅಬ್ಯಾಯಿಕೋ ¶ ¶ ಹೋತಿ ಸತಂ ಸಮಾಗಮೋ, ಯಾವಮ್ಪಿ ತಿಟ್ಠೇಯ್ಯ ತಥೇವ ಹೋತಿ;
ಖಿಪ್ಪಞ್ಹಿ ವೇತಿ ಅಸತಂ ಸಮಾಗಮೋ, ತಸ್ಮಾ ಸತಂ ಧಮ್ಮೋ ಅಸಬ್ಭಿ ಆರಕಾ’’.
‘‘ನ ಸೋ ರಾಜಾ ಯೋ [ರಾಜಾ ನ ಸೋ ಯೋ (ಕ.)] ಅಜೇಯ್ಯಂ ಜಿನಾತಿ, ನ ಸೋ ಸಖಾ ಯೋ ಸಖಾರಂ ಜಿನಾತಿ;
ನ ಸಾ ಭರಿಯಾ ಯಾ ಪತಿನೋ ನ ವಿಭೇತಿ, ನ ತೇ ಪುತ್ತಾ [ಪುತ್ತಾ ನ ತೇ (ಕ.)] ಯೇ ನ ಭರನ್ತಿ ಜಿಣ್ಣಂ.
‘‘ನ ಸಾ ಸಭಾ ಯತ್ಥ ನ ಸನ್ತಿ ಸನ್ತೋ, ನ ತೇ ಸನ್ತೋ [ಸನ್ತೋ ನ ತೇ (ಕ.)] ಯೇ ನ ಭಣನ್ತಿ ಧಮ್ಮಂ;
ರಾಗಞ್ಚ ದೋಸಞ್ಚ ಪಹಾಯ ಮೋಹಂ, ಧಮ್ಮಂ ಭಣನ್ತಾವ ಭವನ್ತಿ ಸನ್ತೋ.
‘‘ನಾಭಾಸಮಾನಂ ಜಾನನ್ತಿ, ಮಿಸ್ಸಂ ಬಾಲೇಹಿ ಪಣ್ಡಿತಂ;
ಭಾಸಮಾನಞ್ಚ ಜಾನನ್ತಿ, ದೇಸೇನ್ತಂ ಅಮತಂ ಪದಂ.
‘‘ಭಾಸಯೇ ¶ ಜೋತಯೇ ಧಮ್ಮಂ, ಪಗ್ಗಣ್ಹೇ ಇಸಿನಂ ಧಜಂ;
ಸುಭಾಸಿತದ್ಧಜಾ ಇಸಯೋ, ಧಮ್ಮೋ ಹಿ ಇಸಿನಂ ಧಜೋ’’ತಿ.
ಮಹಾಸುತಸೋಮಜಾತಕಂ ಪಞ್ಚಮಂ.
ಅಸೀತಿನಿಪಾತಂ ನಿಟ್ಠಿತಂ.
ತಸ್ಸುದ್ದಾನಂ –
ಸುಮುಖೋ ಪನ ಹಂಸವರೋ ಚ ಮಹಾ, ಸುಧಭೋಜನಿಕೋ ಚ ಪರೋ ಪವರೋ;
ಸಕುಣಾಲದಿಜಾಧಿಪತಿವ್ಹಯನೋ, ಸುತಸೋಮವರುತ್ತಮಸವ್ಹಯನೋತಿ.
೨೨. ಮಹಾನಿಪಾತೋ
೫೩೮. ಮೂಗಪಕ್ಖಜಾತಕಂ (೧)
‘‘ಮಾ ¶ ¶ ¶ ಪಣ್ಡಿಚ್ಚಯಂ [ಪಣ್ಡಿತಿಯಂ (ಸೀ.), ಪಣ್ಡಿಚ್ಚಿಯಂ (ಪೀ.)] ವಿಭಾವಯ, ಬಾಲಮತೋ ಭವ ಸಬ್ಬಪಾಣಿನಂ;
ಸಬ್ಬೋ ತಂ ಜನೋ ಓಚಿನಾಯತು, ಏವಂ ತವ ಅತ್ಥೋ ಭವಿಸ್ಸತಿ’’.
‘‘ಕರೋಮಿ ತೇ ತಂ ವಚನಂ, ಯಂ ಮಂ ಭಣಸಿ ದೇವತೇ;
ಅತ್ಥಕಾಮಾಸಿ ಮೇ ಅಮ್ಮ, ಹಿತಕಾಮಾಸಿ ದೇವತೇ’’.
‘‘ಕಿಂ ನು ಸನ್ತರಮಾನೋವ, ಕಾಸುಂ ಖಣಸಿ ಸಾರಥಿ;
ಪುಟ್ಠೋ ಮೇ ಸಮ್ಮ ಅಕ್ಖಾಹಿ, ಕಿಂ ಕಾಸುಯಾ ಕರಿಸ್ಸಸಿ’’.
‘‘ರಞ್ಞೋ ಮೂಗೋ ಚ ಪಕ್ಖೋ ಚ, ಪುತ್ತೋ ಜಾತೋ ಅಚೇತಸೋ;
ಸೋಮ್ಹಿ ರಞ್ಞಾ ಸಮಜ್ಝಿಟ್ಠೋ, ಪುತ್ತಂ ಮೇ ನಿಖಣಂ ವನೇ’’.
‘‘ನ ಬಧಿರೋ ನ ಮೂಗೋಸ್ಮಿ, ನ ಪಕ್ಖೋ ನ ಚ ವೀಕಲೋ [ನಪಿ ಪಙ್ಗುಲೋ (ಸೀ. ಪೀ.), ನ ಚ ಪಿಙ್ಗಲೋ (ಸ್ಯಾ.)];
ಅಧಮ್ಮಂ ಸಾರಥಿ ಕಯಿರಾ, ಮಂ ಚೇ ತ್ವಂ ನಿಖಣಂ ವನೇ’’.
‘‘ಊರೂ ಬಾಹುಂ [ಬಾಹೂ (ಸೀ. ಕ.)] ಚ ಮೇ ಪಸ್ಸ, ಭಾಸಿತಞ್ಚ ಸುಣೋಹಿ ಮೇ;
ಅಧಮ್ಮಂ ಸಾರಥಿ ಕಯಿರಾ, ಮಂ ಚೇ ತ್ವಂ ನಿಖಣಂ ವನೇ’’.
‘‘ದೇವತಾ ನುಸಿ ಗನ್ಧಬ್ಬೋ, ಅದು [ಆದು (ಸೀ.), ಆದೂ (ಸ್ಯಾ.)] ಸಕ್ಕೋ ಪುರಿನ್ದದೋ;
ಕೋ ವಾ ತ್ವಂ ಕಸ್ಸ ವಾ ಪುತ್ತೋ, ಕಥಂ ಜಾನೇಮು ತಂ ಮಯಂ’’.
‘‘ನಮ್ಹಿ ದೇವೋ ನ ಗನ್ಧಬ್ಬೋ, ನಾಪಿ ಸಕ್ಕೋ ಪುರಿನ್ದದೋ;
ಕಾಸಿರಞ್ಞೋ ಅಹಂ ಪುತ್ತೋ, ಯಂ ಕಾಸುಯಾ ನಿಖಞ್ಞಸಿ [ನಿಘಞ್ಞಸಿ (ಸೀ. ಪೀ.), ನಿಖಞ್ಛಸಿ (?)].
‘‘ತಸ್ಸ ¶ ರಞ್ಞೋ ಅಹಂ ಪುತ್ತೋ, ಯಂ ತ್ವಂ ಸಮ್ಮೂಪಜೀವಸಿ [ಸಮುಪಜೀವಸಿ (ಸೀ. ಪೀ.)];
ಅಧಮ್ಮಂ ಸಾರಥಿ ಕಯಿರಾ, ಮಂ ಚೇ ತ್ವಂ ನಿಖಣಂ ವನೇ.
‘‘ಯಸ್ಸ ರುಕ್ಖಸ್ಸ ಛಾಯಾಯ, ನಿಸೀದೇಯ್ಯ ಸಯೇಯ್ಯ ವಾ;
ನ ತಸ್ಸ ಸಾಖಂ ಭಞ್ಜೇಯ್ಯ, ಮಿತ್ತದುಬ್ಭೋ [ಮಿತ್ತದೂಭೋ (ಸೀ. ಪೀ.)] ಹಿ ಪಾಪಕೋ.
‘‘ಯಥಾ ¶ ರುಕ್ಖೋ ತಥಾ ರಾಜಾ, ಯಥಾ ಸಾಖಾ ತಥಾ ಅಹಂ;
ಯಥಾ ಛಾಯೂಪಗೋ ಪೋಸೋ, ಏವಂ ತ್ವಮಸಿ ಸಾರಥಿ;
ಅಧಮ್ಮಂ ಸಾರಥಿ ಕಯಿರಾ, ಮಂ ಚೇ ತ್ವಂ ನಿಖಣಂ ವನೇ.
‘‘ಪಹೂತಭಕ್ಖೋ ¶ [ಬಹುತ್ತಭಕ್ಖೋ (ಕ.)] ಭವತಿ, ವಿಪ್ಪವುಟ್ಠೋ [ವಿಪ್ಪವುತ್ಥೋ (ಸೀ. ಪೀ.), ವಿಪ್ಪಮುತ್ತೋ (ಕ.)] ಸಕಂ [ಸಕಾ (ಸೀ. ಪೀ.)] ಘರಾ;
ಬಹೂ ನಂ ಉಪಜೀವನ್ತಿ, ಯೋ ಮಿತ್ತಾನಂ ನ ದುಬ್ಭತಿ.
‘‘ಯಂ ಯಂ ಜನಪದಂ ಯಾತಿ, ನಿಗಮೇ ರಾಜಧಾನಿಯೋ;
ಸಬ್ಬತ್ಥ ಪೂಜಿತೋ ಹೋತಿ, ಯೋ ಮಿತ್ತಾನಂ ನ ದುಬ್ಭತಿ.
‘‘ನಾಸ್ಸ ಚೋರಾ ಪಸಾಹನ್ತಿ [ಪಸಹನ್ತಿ (ಸೀ. ಸ್ಯಾ. ಪೀ.)], ನಾತಿಮಞ್ಞನ್ತಿ ಖತ್ತಿಯಾ [ನಾತಿಮಞ್ಞೇತಿ ಖತ್ತಿಯೋ (ಸೀ. ಸ್ಯಾ. ಪೀ.)];
ಸಬ್ಬೇ ಅಮಿತ್ತೇ ತರತಿ, ಯೋ ಮಿತ್ತಾನಂ ನ ದುಬ್ಭತಿ.
‘‘ಅಕ್ಕುದ್ಧೋ ಸಘರಂ ಏತಿ, ಸಭಾಯಂ [ಸಭಾಯ (ಸೀ. ಸ್ಯಾ. ಪೀ.)] ಪಟಿನನ್ದಿತೋ;
ಞಾತೀನಂ ಉತ್ತಮೋ ಹೋತಿ, ಯೋ ಮಿತ್ತಾನಂ ನ ದುಬ್ಭತಿ.
‘‘ಸಕ್ಕತ್ವಾ ಸಕ್ಕತೋ ಹೋತಿ, ಗರು ಹೋತಿ ಸಗಾರವೋ [ಗರುಕೋ ಹೋತಿ ಗಾರವೋ (ಕ.)];
ವಣ್ಣಕಿತ್ತಿಭತೋ ಹೋತಿ, ಯೋ ಮಿತ್ತಾನಂ ನ ದುಬ್ಭತಿ.
‘‘ಪೂಜಕೋ ಲಭತೇ ಪೂಜಂ, ವನ್ದಕೋ ಪಟಿವನ್ದನಂ;
ಯಸೋ ಕಿತ್ತಿಞ್ಚ ಪಪ್ಪೋತಿ, ಯೋ ಮಿತ್ತಾನಂ ನ ದುಬ್ಭತಿ.
‘‘ಅಗ್ಗಿ ಯಥಾ ಪಜ್ಜಲತಿ, ದೇವತಾವ ವಿರೋಚತಿ;
ಸಿರಿಯಾ ¶ ಅಜಹಿತೋ ಹೋತಿ, ಯೋ ಮಿತ್ತಾನಂ ನ ದುಬ್ಭತಿ.
‘‘ಗಾವೋ ತಸ್ಸ ಪಜಾಯನ್ತಿ, ಖೇತ್ತೇ ವುತ್ತಂ ವಿರೂಹತಿ;
ವುತ್ತಾನಂ ಫಲಮಸ್ನಾತಿ, ಯೋ ಮಿತ್ತಾನಂ ನ ದುಬ್ಭತಿ.
‘‘ದರಿತೋ ಪಬ್ಬತಾತೋ ವಾ, ರುಕ್ಖತೋ ಪತಿತೋ ನರೋ;
ಚುತೋ ಪತಿಟ್ಠಂ ಲಭತಿ, ಯೋ ಮಿತ್ತಾನಂ ನ ದುಬ್ಭತಿ.
‘‘ವಿರೂಳ್ಹಮೂಲಸನ್ತಾನಂ, ನಿಗ್ರೋಧಮಿವ ಮಾಲುತೋ;
ಅಮಿತ್ತಾ ನಪ್ಪಸಾಹನ್ತಿ, ಯೋ ಮಿತ್ತಾನಂ ನ ದುಬ್ಭತಿ’’.
‘‘ಏಹಿ ತಂ ಪಟಿನೇಸ್ಸಾಮಿ, ರಾಜಪುತ್ತ ಸಕಂ ಘರಂ;
ರಜ್ಜಂ ಕಾರೇಹಿ ಭದ್ದನ್ತೇ, ಕಿಂ ಅರಞ್ಞೇ ಕರಿಸ್ಸಸಿ’’.
‘‘ಅಲಂ ¶ ಮೇ ತೇನ ರಜ್ಜೇನ, ಞಾತಕೇಹಿ [ಞಾತಕೇನ (ಸ್ಯಾ. ಕ.)] ಧನೇನ ವಾ;
ಯಂ ಮೇ ಅಧಮ್ಮಚರಿಯಾಯ, ರಜ್ಜಂ ಲಬ್ಭೇಥ ಸಾರಥಿ’’.
‘‘ಪುಣ್ಣಪತ್ತಂ ಮಂ ಲಾಭೇಹಿ [ಪಲಾಭೇಹಿ (ಸೀ. ಪೀ.)], ರಾಜಪುತ್ತ ಇತೋ ಗತೋ;
ಪಿತಾ ಮಾತಾ ಚ ಮೇ ದಜ್ಜುಂ, ರಾಜಪುತ್ತ ತಯೀ ಗತೇ.
‘‘ಓರೋಧಾ ಚ ಕುಮಾರಾ ಚ, ವೇಸಿಯಾನಾ ಚ ಬ್ರಾಹ್ಮಣಾ;
ತೇಪಿ ಅತ್ತಮನಾ ದಜ್ಜುಂ, ರಾಜಪುತ್ತ ತಯೀ ಗತೇ.
‘‘ಹತ್ಥಾರೋಹಾ [ಹತ್ಥಾರೂಹಾ (ಸೀ. ಪೀ.) ಏವಮುಪರಿಪಿ] ಅನೀಕಟ್ಠಾ, ರಥಿಕಾ ಪತ್ತಿಕಾರಕಾ;
ತೇಪಿ ಅತ್ತಮನಾ ದಜ್ಜುಂ [ತೇಪಿ ದಜ್ಜುಂ ಪತೀತಾಮೇ (ಸೀ. ಪೀ.)], ರಾಜಪುತ್ತ ತಯೀ ಗತೇ.
‘‘ಬಹುಧಞ್ಞಾ ¶ ಜಾನಪದಾ [ಬಹೂ ಜಾನಪದಾ ಚಞ್ಞೇ (ಸೀ.), ಬಹೂ ಜನಪದಾ ಚಞ್ಞೇ (ಪೀ.)], ನೇಗಮಾ ಚ ಸಮಾಗತಾ;
ಉಪಾಯನಾನಿ ಮೇ ದಜ್ಜುಂ, ರಾಜಪುತ್ತ ತಯೀ ಗತೇ’’.
‘‘ಪಿತು ಮಾತು ಚಹಂ ಚತ್ತೋ, ರಟ್ಠಸ್ಸ ನಿಗಮಸ್ಸ ಚ;
ಅಥೋ ¶ ಸಬ್ಬಕುಮಾರಾನಂ, ನತ್ಥಿ ಮಯ್ಹಂ ಸಕಂ ಘರಂ.
‘‘ಅನುಞ್ಞಾತೋ ಅಹಂ ಮತ್ಯಾ, ಸಞ್ಚತ್ತೋ ಪಿತರಾ ಮಹಂ;
ಏಕೋರಞ್ಞೇ ಪಬ್ಬಜಿತೋ, ನ ಕಾಮೇ ಅಭಿಪತ್ಥಯೇ.
‘‘ಅಪಿ ಅತರಮಾನಾನಂ, ಫಲಾಸಾವ ಸಮಿಜ್ಝತಿ;
ವಿಪಕ್ಕಬ್ರಹ್ಮಚರಿಯೋಸ್ಮಿ, ಏವಂ ಜಾನಾಹಿ ಸಾರಥಿ.
‘‘ಅಪಿ ಅತರಮಾನಾನಂ, ಸಮ್ಮದತ್ಥೋ ವಿಪಚ್ಚತಿ;
ವಿಪಕ್ಕಬ್ರಹ್ಮಚರಿಯೋಸ್ಮಿ, ನಿಕ್ಖನ್ತೋ ಅಕುತೋಭಯೋ’’.
‘‘ಏವಂ ವಗ್ಗುಕಥೋ ಸನ್ತೋ, ವಿಸಟ್ಠವಚನೋ ಚಸಿ [ಚ ಸೋ (ಸ್ಯಾ. ಕ.)];
ಕಸ್ಮಾ ಪಿತು ಚ ಮಾತುಚ್ಚ, ಸನ್ತಿಕೇ ನ ಭಣೀ ತದಾ’’.
‘‘ನಾಹಂ ಅಸನ್ಧಿತಾ [ಅಸತ್ಥಿತಾ (ಸೀ.)] ಪಕ್ಖೋ, ನ ಬಧಿರೋ ಅಸೋತತಾ;
ನಾಹಂ ಅಜಿವ್ಹತಾ ಮೂಗೋ, ಮಾ ಮಂ ಮೂಗಮಧಾರಯಿ [ಮೂಗೋ ಅಧಾರಯಿ (ಸೀ.)].
‘‘ಪುರಿಮಂ ಸರಾಮಹಂ ಜಾತಿಂ, ಯತ್ಥ ರಜ್ಜಮಕಾರಯಿಂ;
ಕಾರಯಿತ್ವಾ ತಹಿಂ ರಜ್ಜಂ, ಪಾಪತ್ಥಂ ನಿರಯಂ ಭುಸಂ.
‘‘ವೀಸತಿಞ್ಚೇವ ¶ ವಸ್ಸಾನಿ, ತಹಿಂ ರಜ್ಜಮಕಾರಯಿಂ;
ಅಸೀತಿವಸ್ಸಸಹಸ್ಸಾನಿ, ನಿರಯಮ್ಹಿ ಅಪಚ್ಚಿಸಂ [ಅಪಚ್ಚಸಿಂ (ಸ್ಯಾ.), ಅಪಚ್ಚಯಿಂ (ಪೀ.)].
‘‘ತಸ್ಸ ರಜ್ಜಸ್ಸಹಂ ಭೀತೋ, ಮಾ ಮಂ ರಜ್ಜಾಭಿಸೇಚಯುಂ [ರಜ್ಜೇಭಿಸೇಚಯುಂ (ಸ್ಯಾ. ಕ.)];
ತಸ್ಮಾ ಪಿತು ಚ ಮಾತುಚ್ಚ, ಸನ್ತಿಕೇ ನ ಭಣಿಂ ತದಾ.
‘‘ಉಚ್ಛಙ್ಗೇ ಮಂ ನಿಸಾದೇತ್ವಾ, ಪಿತಾ ಅತ್ಥಾನುಸಾಸತಿ;
ಏಕಂ ಹನಥ ಬನ್ಧಥ, ಏಕಂ ಖಾರಾಪತಚ್ಛಿಕಂ [ಖರಾಪತಿಚ್ಛಕಂ (ಸ್ಯಾ.), ಖರಾಪಟಿಚ್ಛಕಂ (ಕ.)];
ಏಕಂ ಸೂಲಸ್ಮಿಂ ಉಪ್ಪೇಥ [ಅಪ್ಪೇಥ (ಸೀ.), ಉಬ್ಬೇಥ (ಸ್ಯಾ.), ಅಚ್ಚೇಥ (ಪೀ.)], ಇಚ್ಚಸ್ಸ ಮನುಸಾಸತಿ.
‘‘ತಾಯಾಹಂ ¶ [ತಸ್ಸಾಹಂ (ಸೀ. ಪೀ.)] ಫರುಸಂ ಸುತ್ವಾ, ವಾಚಾಯೋ ಸಮುದೀರಿತಾ;
ಅಮೂಗೋ ಮೂಗವಣ್ಣೇನ, ಅಪಕ್ಖೋ ಪಕ್ಖಸಮ್ಮತೋ;
ಸಕೇ ಮುತ್ತಕರೀಸಸ್ಮಿಂ, ಅಚ್ಛಾಹಂ ಸಮ್ಪರಿಪ್ಲುತೋ.
‘‘ಕಸಿರಞ್ಚ ಪರಿತ್ತಞ್ಚ, ತಞ್ಚ ದುಕ್ಖೇನ ಸಂಯುತಂ;
ಕೋಮಂ [ಕೋ ತಂ (ಸೀ. ಪೀ.)] ಜೀವಿತಮಾಗಮ್ಮ, ವೇರಂ ಕಯಿರಾಥ ಕೇನಚಿ.
‘‘ಪಞ್ಞಾಯ ಚ ಅಲಾಭೇನ, ಧಮ್ಮಸ್ಸ ಚ ಅದಸ್ಸನಾ;
ಕೋಮಂ [ಕೋ ತಂ (ಸೀ. ಪೀ.)] ಜೀವಿತಮಾಗಮ್ಮ, ವೇರಂ ಕಯಿರಾಥ ಕೇನಚಿ.
‘‘ಅಪಿ ¶ ಅತರಮಾನಾನಂ, ಫಲಾಸಾವ ಸಮಿಜ್ಝತಿ;
ವಿಪಕ್ಕಬ್ರಹ್ಮಚರಿಯೋಸ್ಮಿ, ಏವಂ ಜಾನಾಹಿ ಸಾರಥಿ.
‘‘ಅಪಿ ಅತರಮಾನಾನಂ, ಸಮ್ಮದತ್ಥೋ ವಿಪಚ್ಚತಿ;
ವಿಪಕ್ಕಬ್ರಹ್ಮಚರಿಯೋಸ್ಮಿ, ನಿಕ್ಖನ್ತೋ ಅಕುತೋಭಯೋ’’.
‘‘ಅಹಮ್ಪಿ ಪಬ್ಬಜಿಸ್ಸಾಮಿ, ರಾಜಪುತ್ತ ತವನ್ತಿಕೇ;
ಅವ್ಹಾಯಸ್ಸು [ಅವ್ಹಯಸ್ಸು (ಸೀ. ಪೀ.)] ಮಂ ಭದ್ದನ್ತೇ, ಪಬ್ಬಜ್ಜಾ ಮಮ ರುಚ್ಚತಿ’’.
‘‘ರಥಂ ನಿಯ್ಯಾದಯಿತ್ವಾನ, ಅನಣೋ ಏಹಿ ಸಾರಥಿ;
ಅನಣಸ್ಸ ಹಿ ಪಬ್ಬಜ್ಜಾ, ಏತಂ ಇಸೀಹಿ ವಣ್ಣಿತಂ’’.
‘‘ಯದೇವ ತ್ಯಾಹಂ ವಚನಂ, ಅಕರಂ ಭದ್ದಮತ್ಥು ತೇ;
ತದೇವ ಮೇ ತ್ವಂ ವಚನಂ, ಯಾಚಿತೋ ಕತ್ತುಮರಹಸಿ.
‘‘ಇಧೇವ ¶ ತಾವ ಅಚ್ಛಸ್ಸು, ಯಾವ ರಾಜಾನಮಾನಯೇ;
ಅಪ್ಪೇವ ತೇ ಪಿತಾ ದಿಸ್ವಾ, ಪತೀತೋ ಸುಮನೋ ಸಿಯಾ’’.
‘‘ಕರೋಮಿ ತೇತಂ ವಚನಂ, ಯಂ ಮಂ ಭಣಸಿ ಸಾರಥಿ;
ಅಹಮ್ಪಿ ¶ ದಟ್ಠುಕಾಮೋಸ್ಮಿ, ಪಿತರಂ ಮೇ ಇಧಾಗತಂ.
‘‘ಏಹಿ ಸಮ್ಮ ನಿವತ್ತಸ್ಸು, ಕುಸಲಂ ವಜ್ಜಾಸಿ ಞಾತಿನಂ;
ಮಾತರಂ ಪಿತರಂ ಮಯ್ಹಂ, ವುತ್ತೋ ವಜ್ಜಾಸಿ ವನ್ದನಂ’’.
ತಸ್ಸ ಪಾದೇ ಗಹೇತ್ವಾನ, ಕತ್ವಾ ಚ ನಂ ಪದಕ್ಖಿಣಂ;
ಸಾರಥಿ ರಥಮಾರುಯ್ಹ, ರಾಜದ್ವಾರಂ ಉಪಾಗಮಿ.
‘‘ಸುಞ್ಞಂ ಮಾತಾ ರಥಂ ದಿಸ್ವಾ, ಏಕಂ ಸಾರಥಿಮಾಗತಂ;
ಅಸ್ಸುಪುಣ್ಣೇಹಿ ನೇತ್ತೇಹಿ, ರೋದನ್ತೀ ನಂ ಉದಿಕ್ಖತಿ.
‘‘ಅಯಂ ಸೋ ಸಾರಥಿ ಏತಿ, ನಿಹನ್ತ್ವಾ ಮಮ ಅತ್ರಜಂ;
ನಿಹತೋ ನೂನ ಮೇ ಪುತ್ತೋ, ಪಥಬ್ಯಾ ಭೂಮಿವಡ್ಢನೋ.
‘‘ಅಮಿತ್ತಾ ನೂನ ನನ್ದನ್ತಿ, ಪತೀತಾ ನೂನ ವೇರಿನೋ;
ಆಗತಂ ಸಾರಥಿಂ ದಿಸ್ವಾ, ನಿಹನ್ತ್ವಾ ಮಮ ಅತ್ರಜಂ.
‘‘ಸುಞ್ಞಂ ಮಾತಾ ರಥಂ ದಿಸ್ವಾ, ಏಕಂ ಸಾರಥಿಮಾಗತಂ;
ಅಸ್ಸುಪುಣ್ಣೇಹಿ ನೇತ್ತೇಹಿ, ರೋದನ್ತೀ ಪರಿಪುಚ್ಛಿ ನಂ [ರೋದನ್ತೀ ಪರಿಪುಚ್ಛತಿ (ಸೀ. ಪೀ.), ರೋದನ್ತೀ ನಂ ಪರಿಪುಚ್ಛತಿ (ಸ್ಯಾ.)].
‘‘ಕಿನ್ನು ಮೂಗೋ ಕಿಂ ನು ಪಕ್ಖೋ, ಕಿನ್ನು ಸೋ ವಿಲಪೀ ತದಾ;
ನಿಹಞ್ಞಮಾನೋ ಭೂಮಿಯಾ, ತಂ ಮೇ ಅಕ್ಖಾಹಿ ಸಾರಥಿ.
‘‘ಕಥಂ ಹತ್ಥೇಹಿ ಪಾದೇಹಿ, ಮೂಗಪಕ್ಖೋ ವಿವಜ್ಜಯಿ;
ನಿಹಞ್ಞಮಾನೋ ಭೂಮಿಯಾ, ತಂ ಮೇ ಅಕ್ಖಾಹಿ ಪುಚ್ಛಿತೋ’’.
‘‘ಅಕ್ಖೇಯ್ಯಂ ¶ [ಅಕ್ಖಿಸ್ಸಂ (ಸೀ. ಪೀ.)] ತೇ ಅಹಂ ಅಯ್ಯೇ, ದಜ್ಜಾಸಿ ಅಭಯಂ ಮಮ;
ಯಂ ಮೇ ಸುತಂ ವಾ ದಿಟ್ಠಂ ವಾ, ರಾಜಪುತ್ತಸ್ಸ ಸನ್ತಿಕೇ’’.
‘‘ಅಭಯಂ ಸಮ್ಮ ತೇ ದಮ್ಮಿ, ಅಭೀತೋ ಭಣ ಸಾರಥಿ;
ಯಂ ¶ ತೇ ಸುತಂ ವಾ ದಿಟ್ಠಂ ವಾ, ರಾಜಪುತ್ತಸ್ಸ ಸನ್ತಿಕೇ’’.
‘‘ನ ಸೋ ಮೂಗೋ ನ ಸೋ ಪಕ್ಖೋ, ವಿಸಟ್ಠವಚನೋ ಚ ಸೋ;
ರಜ್ಜಸ್ಸ ಕಿರ ಸೋ ಭೀತೋ, ಅಕರಾ [ಅಕರೀ (ಸೀ. ಪೀ.)] ಆಲಯೇ ಬಹೂ.
‘‘ಪುರಿಮಂ ¶ ಸರತಿ ಸೋ ಜಾತಿಂ, ಯತ್ಥ ರಜ್ಜಮಕಾರಯಿ;
ಕಾರಯಿತ್ವಾ ತಹಿಂ ರಜ್ಜಂ, ಪಾಪತ್ಥ ನಿರಯಂ ಭುಸಂ.
‘‘ವೀಸತಿಞ್ಚೇವ ವಸ್ಸಾನಿ, ತಹಿಂ ರಜ್ಜಮಕಾರಯಿ;
ಅಸೀತಿವಸ್ಸಸಹಸ್ಸಾನಿ, ನಿರಯಮ್ಹಿ ಅಪಚ್ಚಿ ಸೋ.
‘‘ತಸ್ಸ ರಜ್ಜಸ್ಸ ಸೋ ಭೀತೋ, ಮಾ ಮಂ ರಜ್ಜಾಭಿಸೇಚಯುಂ;
ತಸ್ಮಾ ಪಿತು ಚ ಮಾತುಚ್ಚ, ಸನ್ತಿಕೇ ನ ಭಣೀ ತದಾ.
‘‘ಅಙ್ಗಪಚ್ಚಙ್ಗಸಮ್ಪನ್ನೋ, ಆರೋಹಪರಿಣಾಹವಾ;
ವಿಸಟ್ಠವಚನೋ ಪಞ್ಞೋ, ಮಗ್ಗೇ ಸಗ್ಗಸ್ಸ ತಿಟ್ಠತಿ.
‘‘ಸಚೇ ತ್ವಂ ದಟ್ಠುಕಾಮಾಸಿ, ರಾಜಪುತ್ತಂ [ರಾಜಪುತ್ತಿ (ಸೀ.)] ತವತ್ರಜಂ;
ಏಹಿ ತಂ ಪಾಪಯಿಸ್ಸಾಮಿ, ಯತ್ಥ ಸಮ್ಮತಿ ತೇಮಿಯೋ’’.
‘‘ಯೋಜಯನ್ತು ರಥೇ ಅಸ್ಸೇ, ಕಚ್ಛಂ ನಾಗಾನ [ನಾಗಾನಿ (ಸ್ಯಾ. ಕ.)] ಬನ್ಧಥ;
ಉದೀರಯನ್ತು ಸಙ್ಖಪಣವಾ, ವಾದನ್ತು [ವದನ್ತು (ಸೀ.), ನದನ್ತು (ಸ್ಯಾ. ಕ.), ವದತಂ (ಪೀ.)] ಏಕಪೋಕ್ಖರಾ.
‘‘ವಾದನ್ತು [ನದನ್ತು (ಸೀ. ಸ್ಯಾ. ಪೀ.)] ಭೇರೀ ಸನ್ನದ್ಧಾ, ವಗ್ಗೂ ವಾದನ್ತು ದುನ್ದುಭೀ;
ನೇಗಮಾ ಚ ಮಂ ಅನ್ವೇನ್ತು, ಗಚ್ಛಂ ಪುತ್ತನಿವೇದಕೋ [ನಿವಾದಕೋ (ಸ್ಯಾ. ಕ.)].
‘‘ಓರೋಧಾ ಚ ಕುಮಾರಾ ಚ, ವೇಸಿಯಾನಾ ಚ ಬ್ರಾಹ್ಮಣಾ;
ಖಿಪ್ಪಂ ಯಾನಾನಿ ಯೋಜೇನ್ತು, ಗಚ್ಛಂ ಪುತ್ತನಿವೇದಕೋ [ನಿವಾದಕೋ (ಸ್ಯಾ. ಕ.)].
‘‘ಹತ್ಥಾರೋಹಾ ಅನೀಕಟ್ಠಾ, ರಥಿಕಾ ಪತ್ತಿಕಾರಕಾ;
ಖಿಪ್ಪಂ ¶ ಯಾನಾನಿ ಯೋಜೇನ್ತು, ಗಚ್ಛಂ ಪುತ್ತನಿವೇದಕೋ [ನಿವಾದಕೋ (ಸ್ಯಾ. ಕ.)].
‘‘ಸಮಾಗತಾ ಜಾನಪದಾ, ನೇಗಮಾ ಚ ಸಮಾಗತಾ;
ಖಿಪ್ಪಂ ಯಾನಾನಿ ಯೋಜೇನ್ತು, ಗಚ್ಛಂ ಪುತ್ತನಿವೇದಕೋ’’ [ನಿವಾದಕೋ (ಸ್ಯಾ. ಕ.)].
‘‘ಅಸ್ಸೇ ಚ ಸಾರಥೀ ಯುತ್ತೇ, ಸಿನ್ಧವೇ ಸೀಘವಾಹನೇ;
ರಾಜದ್ವಾರಂ ಉಪಾಗಚ್ಛುಂ, ಯುತ್ತಾ ದೇವ ಇಮೇ ಹಯಾ’’.
‘‘ಥೂಲಾ ಜವೇನ ಹಾಯನ್ತಿ, ಕಿಸಾ ಹಾಯನ್ತಿ ಥಾಮುನಾ;
ಕಿಸೇ ಥೂಲೇ ವಿವಜ್ಜೇತ್ವಾ, ಸಂಸಟ್ಠಾ ಯೋಜಿತಾ ಹಯಾ’’.
‘‘ತತೋ ¶ ¶ ರಾಜಾ ತರಮಾನೋ, ಯುತ್ತಮಾರುಯ್ಹ ಸನ್ದನಂ;
ಇತ್ಥಾಗಾರಂ ಅಜ್ಝಭಾಸಿ [ಅಭಾಸಥ (ಕ.)], ಸಬ್ಬಾವ ಅನುಯಾಥ ಮಂ.
‘‘ವಾಲಬೀಜನಿಮುಣ್ಹೀಸಂ, ಖಗ್ಗಂ ಛತ್ತಞ್ಚ ಪಣ್ಡರಂ;
ಉಪಾಧಿ ರಥಮಾರುಯ್ಹ [ಉಪಾದಿರಥಮಾರುಯ್ಹ (ಸೀ.), ಉಪಾಧೀ ರಥಮಾರುಯ್ಹ (ಸ್ಯಾ.)], ಸುವಣ್ಣೇಹಿ ಅಲಙ್ಕತಾ.
‘‘ತತೋ ಸ [ಚ (ಸೀ. ಸ್ಯಾ. ಪೀ.)] ರಾಜಾ ಪಾಯಾಸಿ, ಪುರಕ್ಖತ್ವಾನ ಸಾರಥಿಂ;
ಖಿಪ್ಪಮೇವ ಉಪಾಗಚ್ಛಿ, ಯತ್ಥ ಸಮ್ಮತಿ ತೇಮಿಯೋ.
‘‘ತಞ್ಚ ದಿಸ್ವಾನ ಆಯನ್ತಂ, ಜಲನ್ತಮಿವ ತೇಜಸಾ;
ಖತ್ತಸಙ್ಘಪರಿಬ್ಯೂಳ್ಹಂ [ಪರಿಬ್ಬೂಳ್ಹಂ (ಸೀ.)], ತೇಮಿಯೋ ಏತದಬ್ರವಿ’’.
‘‘ಕಚ್ಚಿ ನು ತಾತ ಕುಸಲಂ, ಕಚ್ಚಿ ತಾತ ಅನಾಮಯಂ;
ಸಬ್ಬಾ ಚ [ಕಚ್ಚಿನ್ನು (ಸೀ. ಪೀ.)] ರಾಜಕಞ್ಞಾಯೋ, ಅರೋಗಾ ಮಯ್ಹ ಮಾತರೋ’’.
‘‘ಕುಸಲಞ್ಚೇವ ಮೇ ಪುತ್ತ, ಅಥೋ ಪುತ್ತ ಅನಾಮಯಂ;
ಸಬ್ಬಾ ಚ ರಾಜಕಞ್ಞಾಯೋ, ಅರೋಗಾ ತುಯ್ಹ ಮಾತರೋ’’.
‘‘ಕಚ್ಚಿ ಅಮಜ್ಜಪೋ [ಕಚ್ಚಿಸ್ಸ’ಮಜ್ಜಪೋ (ಸೀ. ಪೀ.)] ತಾತ, ಕಚ್ಚಿ ತೇ ಸುರಮಪ್ಪಿಯಂ;
ಕಚ್ಚಿ ¶ ಸಚ್ಚೇ ಚ ಧಮ್ಮೇ ಚ, ದಾನೇ ತೇ ರಮತೇ ಮನೋ’’.
‘‘ಅಮಜ್ಜಪೋ ಅಹಂ ಪುತ್ತ, ಅಥೋ ಮೇ ಸುರಮಪ್ಪಿಯಂ;
ಅಥೋ ಸಚ್ಚೇ ಚ ಧಮ್ಮೇ ಚ, ದಾನೇ ಮೇ ರಮತೇ ಮನೋ’’.
‘‘ಕಚ್ಚಿ ಅರೋಗಂ ಯೋಗ್ಗಂ ತೇ, ಕಚ್ಚಿ ವಹತಿ ವಾಹನಂ;
ಕಚ್ಚಿ ತೇ ಬ್ಯಾಧಯೋ ನತ್ಥಿ, ಸರೀರಸ್ಸುಪತಾಪನಾ’’.
‘‘ಅಥೋ ಅರೋಗಂ ಯೋಗ್ಗಂ ಮೇ, ಅಥೋ ವಹತಿ ವಾಹನಂ;
ಅಥೋ ಮೇ ಬ್ಯಾಧಯೋ ನತ್ಥಿ, ಸರೀರಸ್ಸುಪತಾಪನಾ’’ [ಸರೀರಸ್ಸುಪತಾಪಿಯಾ (ಸ್ಯಾ. ಕ.)].
‘‘ಕಚ್ಚಿ ಅನ್ತಾ ಚ ತೇ ಫೀತಾ, ಮಜ್ಝೇ ಚ ಬಹಲಾ ತವ;
ಕೋಟ್ಠಾಗಾರಞ್ಚ ಕೋಸಞ್ಚ, ಕಚ್ಚಿ ತೇ ಪಟಿಸನ್ಥತಂ’’ [ಪಟಿಸಣ್ಠಿತಂ (ಸ್ಯಾ. ಕ.)].
‘‘ಅಥೋ ಅನ್ತಾ ಚ ಮೇ ಫೀತಾ, ಮಜ್ಝೇ ಚ ಬಹಲಾ ಮಮ;
ಕೋಟ್ಠಾಗಾರಞ್ಚ ಕೋಸಞ್ಚ, ಸಬ್ಬಂ ಮೇ ಪಟಿಸನ್ಥತಂ’’.
‘‘ಸ್ವಾಗತಂ ¶ ತೇ ಮಹಾರಾಜ, ಅಥೋ ತೇ ಅದುರಾಗತಂ;
ಪತಿಟ್ಠಪೇನ್ತು [ಪತಿಟ್ಠಾಪೇನ್ತು (ಸೀ. ಸ್ಯಾ. ಪೀ.)] ಪಲ್ಲಙ್ಕಂ, ಯತ್ಥ ರಾಜಾ ನಿಸಕ್ಕತಿ’’.
‘‘ಇಧೇವ ತೇ ನಿಸೀದಸ್ಸು [ನಿಸಿನ್ನಸ್ಸ (ಸೀ. ಸ್ಯಾ. ಪೀ.), ನಿಸಿನ್ನಸ್ಸು (ಕ.)], ನಿಯತೇ ಪಣ್ಣಸನ್ಥರೇ;
ಏತ್ತೋ ಉದಕಮಾದಾಯ, ಪಾದೇ ಪಕ್ಖಾಲಯಸ್ಸು [ಪಕ್ಖಾಲಯನ್ತು (ಸೀ.), ಪಕ್ಖಾಲಯನ್ತಿ (ಪೀ.)] ತೇ’’.
‘‘ಇದಮ್ಪಿ ಪಣ್ಣಕಂ ಮಯ್ಹಂ, ರನ್ಧಂ ರಾಜ ಅಲೋಣಕಂ;
ಪರಿಭುಞ್ಜ ಮಹಾರಾಜ, ಪಾಹುನೋ ಮೇಸಿಧಾಗತೋ’’ [ಆಗತೋ (ಸೀ. ಸ್ಯಾ.)].
‘‘ನ ¶ ಚಾಹಂ [ನ ವಾಹಂ (ಕ.)] ಪಣ್ಣಂ ಭುಞ್ಜಾಮಿ, ನ ಹೇತಂ ಮಯ್ಹ ಭೋಜನಂ;
ಸಾಲೀನಂ ಓದನಂ ಭುಞ್ಜೇ, ಸುಚಿಂ ಮಂಸೂಪಸೇಚನಂ’’.
‘‘ಅಚ್ಛೇರಕಂ ಮಂ ಪಟಿಭಾತಿ, ಏಕಕಮ್ಪಿ ರಹೋಗತಂ;
ಏದಿಸಂ ¶ ಭುಞ್ಜಮಾನಾನಂ, ಕೇನ ವಣ್ಣೋ ಪಸೀದತಿ’’.
‘‘ಏಕೋ ರಾಜ ನಿಪಜ್ಜಾಮಿ, ನಿಯತೇ ಪಣ್ಣಸನ್ಥರೇ;
ತಾಯ ಮೇ ಏಕಸೇಯ್ಯಾಯ, ರಾಜ ವಣ್ಣೋ ಪಸೀದತಿ.
‘‘ನ ಚ ನೇತ್ತಿಂಸಬನ್ಧಾ [ನೇತ್ತಿಸಬದ್ಧಾ (ಸೀ. ಪೀ.)] ಮೇ, ರಾಜರಕ್ಖಾ ಉಪಟ್ಠಿತಾ;
ತಾಯ ಮೇ ಸುಖಸೇಯ್ಯಾಯ, ರಾಜ ವಣ್ಣೋ ಪಸೀದತಿ.
‘‘ಅತೀತಂ ನಾನುಸೋಚಾಮಿ, ನಪ್ಪಜಪ್ಪಾಮಿನಾಗತಂ [ನಪ್ಪಜಪ್ಪಾಮ’ನಾಗತಂ (ಸೀ. ಸ್ಯಾ. ಪೀ.)];
ಪಚ್ಚುಪ್ಪನ್ನೇನ ಯಾಪೇಮಿ, ತೇನ ವಣ್ಣೋ ಪಸೀದತಿ.
‘‘ಅನಾಗತಪ್ಪಜಪ್ಪಾಯ, ಅತೀತಸ್ಸಾನುಸೋಚನಾ;
ಏತೇನ ಬಾಲಾ ಸುಸ್ಸನ್ತಿ, ನಳೋವ ಹರಿತೋ ಲುತೋ’’.
‘‘ಹತ್ಥಾನೀಕಂ ರಥಾನೀಕಂ, ಅಸ್ಸೇ ಪತ್ತೀ ಚ ವಮ್ಮಿನೋ;
ನಿವೇಸನಾನಿ ರಮ್ಮಾನಿ, ಅಹಂ ಪುತ್ತ ದದಾಮಿ ತೇ.
‘‘ಇತ್ಥಾಗಾರಮ್ಪಿ ತೇ ದಮ್ಮಿ, ಸಬ್ಬಾಲಙ್ಕಾರಭೂಸಿತಂ;
ತಾ ಪುತ್ತ ಪಟಿಪಜ್ಜಸ್ಸು [ತಾಸು ಪುತ್ತೇ ಪಟಿಪಜ್ಜ (ಕ.)], ತ್ವಂ ನೋ ರಾಜಾ ಭವಿಸ್ಸಸಿ.
‘‘ಕುಸಲಾ ನಚ್ಚಗೀತಸ್ಸ, ಸಿಕ್ಖಿತಾ ಚಾತುರಿತ್ಥಿಯೋ [ಚತುರಿತ್ಥಿಯೋ (ಸೀ. ಪೀ.)];
ಕಾಮೇ ತಂ ರಮಯಿಸ್ಸನ್ತಿ, ಕಿಂ ಅರಞ್ಞೇ ಕರಿಸ್ಸಸಿ.
‘‘ಪಟಿರಾಜೂಹಿ ¶ ತೇ ಕಞ್ಞಾ, ಆನಯಿಸ್ಸಂ ಅಲಙ್ಕತಾ;
ತಾಸು ಪುತ್ತೇ ಜನೇತ್ವಾನ, ಅಥ ಪಚ್ಛಾ ಪಬ್ಬಜಿಸ್ಸಸಿ.
‘‘ಯುವಾ ಚ ದಹರೋ ಚಾಸಿ [ಚಾಪಿ (ಸ್ಯಾ. ಕ.)], ಪಠಮುಪ್ಪತ್ತಿಕೋ [ಪಠಮುಪ್ಪತ್ತಿತೋ (ಸೀ. ಪೀ.)] ಸುಸು;
ರಜ್ಜಂ ಕಾರೇಹಿ ಭದ್ದನ್ತೇ, ಕಿಂ ಅರಞ್ಞೇ ಕರಿಸ್ಸಸಿ’’.
‘‘ಯುವಾ ಚರೇ ಬ್ರಹ್ಮಚರಿಯಂ, ಬ್ರಹ್ಮಚಾರೀ ಯುವಾ ಸಿಯಾ;
ದಹರಸ್ಸ ¶ ಹಿ ಪಬ್ಬಜ್ಜಾ, ಏತಂ ಇಸೀಹಿ ವಣ್ಣಿತಂ.
‘‘ಯುವಾ ಚರೇ ಬ್ರಹ್ಮಚರಿಯಂ, ಬ್ರಹ್ಮಚಾರೀ ಯುವಾ ಸಿಯಾ;
ಬ್ರಹ್ಮಚರಿಯಂ ಚರಿಸ್ಸಾಮಿ, ನಾಹಂ ರಜ್ಜೇನ ಮತ್ಥಿಕೋ.
‘‘ಪಸ್ಸಾಮಿ ವೋಹಂ ದಹರಂ, ಅಮ್ಮ ತಾತ ವದನ್ತರಂ [ವದಂ ನರಂ (ಸೀ.)];
ಕಿಚ್ಛಾಲದ್ಧಂ ಪಿಯಂ ಪುತ್ತಂ, ಅಪ್ಪತ್ವಾವ ಜರಂ ಮತಂ.
‘‘ಪಸ್ಸಾಮಿ ವೋಹಂ ದಹರಿಂ, ಕುಮಾರಿಂ ಚಾರುದಸ್ಸನಿಂ;
ನವವಂಸಕಳೀರಂವ, ಪಲುಗ್ಗಂ ಜೀವಿತಕ್ಖಯಂ [ಜೀವಿತಕ್ಖಯೇ (ಸೀ. ಪೀ.)].
‘‘ದಹರಾಪಿ ¶ ಹಿ ಮಿಯ್ಯನ್ತಿ, ನರಾ ಚ ಅಥ ನಾರಿಯೋ;
ತತ್ಥ ಕೋ ವಿಸ್ಸಸೇ ಪೋಸೋ, ದಹರೋಮ್ಹೀತಿ ಜೀವಿತೇ.
‘‘ಯಸ್ಸ ರತ್ಯಾ ವಿವಸಾನೇ, ಆಯು ಅಪ್ಪತರಂ ಸಿಯಾ;
ಅಪ್ಪೋದಕೇವ ಮಚ್ಛಾನಂ, ಕಿಂ ನು ಕೋಮಾರಕಂ [ಕೋಮಾರತಂ (ಕ.)] ತಹಿಂ.
‘‘ನಿಚ್ಚಮಬ್ಭಾಹತೋ ಲೋಕೋ, ನಿಚ್ಚಞ್ಚ ಪರಿವಾರಿತೋ;
ಅಮೋಘಾಸು ವಜನ್ತೀಸು, ಕಿಂ ಮಂ ರಜ್ಜೇಭಿಸಿಞ್ಚಸಿ’’ [ರಜ್ಜೇನ ಸಿಞ್ಚಸಿ (ಸೀ. ಪೀ.)].
‘‘ಕೇನ ಮಬ್ಭಾಹತೋ ಲೋಕೋ, ಕೇನ ಚ ಪರಿವಾರಿತೋ;
ಕಾಯೋ ಅಮೋಘಾ ಗಚ್ಛನ್ತಿ, ತಂ ಮೇ ಅಕ್ಖಾಹಿ ಪುಚ್ಛಿತೋ’’.
‘‘ಮಚ್ಚುನಾಬ್ಭಾಹತೋ ಲೋಕೋ, ಜರಾಯ ಪರಿವಾರಿತೋ;
ರತ್ಯೋ ಅಮೋಘಾ ಗಚ್ಛನ್ತಿ, ಏವಂ ಜಾನಾಹಿ ಖತ್ತಿಯ.
‘‘ಯಥಾಪಿ ತನ್ತೇ ವಿತತೇ [ವಿತನ್ತೇ (ಸ್ಯಾ. ಕ.)], ಯಂ ಯದೇವೂಪವಿಯ್ಯತಿ [ಯಂ ಯಂ ದೇವೂಪವಿಯ್ಯತಿ (ಸೀ. ಪೀ.)];
ಅಪ್ಪಕಂ ಹೋತಿ ವೇತಬ್ಬಂ, ಏವಂ ಮಚ್ಚಾನ ಜೀವಿತಂ.
‘‘ಯಥಾ ¶ ವಾರಿವಹೋ ಪೂರೋ, ಗಚ್ಛಂ ನುಪನಿವತ್ತತಿ [ನ ಪರಿವತ್ತತಿ (ಸ್ಯಾ.), ನುಪರಿವತ್ತತಿ (ಕ.)];
ಏವಮಾಯು ¶ ಮನುಸ್ಸಾನಂ, ಗಚ್ಛಂ ನುಪನಿವತ್ತತಿ.
‘‘ಯಥಾ ವಾರಿವಹೋ ಪೂರೋ, ವಹೇ ರುಕ್ಖೇಪಕೂಲಜೇ;
ಏವಂ ಜರಾಮರಣೇನ, ವುಯ್ಹನ್ತೇ ಸಬ್ಬಪಾಣಿನೋ’’.
‘‘ಹತ್ಥಾನೀಕಂ ರಥಾನೀಕಂ, ಅಸ್ಸೇ ಪತ್ತೀ ಚ ವಮ್ಮಿನೋ;
ನಿವೇಸನಾನಿ ರಮ್ಮಾನಿ, ಅಹಂ ಪುತ್ತ ದದಾಮಿ ತೇ.
‘‘ಇತ್ಥಾಗಾರಮ್ಪಿ ತೇ ದಮ್ಮಿ, ಸಬ್ಬಾಲಙ್ಕಾರಭೂಸಿತಂ;
ತಾ ಪುತ್ತ ಪಟಿಪಜ್ಜಸ್ಸು, ತ್ವಂ ನೋ ರಾಜಾ ಭವಿಸ್ಸಸಿ.
‘‘ಕುಸಲಾ ನಚ್ಚಗೀತಸ್ಸ, ಸಿಕ್ಖಿತಾ ಚಾತುರಿತ್ಥಿಯೋ;
ಕಾಮೇ ತಂ ರಮಯಿಸ್ಸನ್ತಿ, ಕಿಂ ಅರಞ್ಞೇ ಕರಿಸ್ಸಸಿ.
‘‘ಪಟಿರಾಜೂಹಿ ತೇ ಕಞ್ಞಾ, ಆನಯಿಸ್ಸಂ ಅಲಙ್ಕತಾ;
ತಾಸು ಪುತ್ತೇ ಜನೇತ್ವಾನ, ಅಥ ಪಚ್ಛಾ ಪಬ್ಬಜಿಸ್ಸಸಿ.
‘‘ಯುವಾ ಚ ದಹರೋ ಚಾಸಿ, ಪಠಮುಪ್ಪತ್ತಿಕೋ ಸುಸು;
ರಜ್ಜಂ ಕಾರೇಹಿ ಭದ್ದನ್ತೇ, ಕಿಂ ಅರಞ್ಞೇ ಕರಿಸ್ಸಸಿ.
‘‘ಕೋಟ್ಠಾಗಾರಞ್ಚ ಕೋಸಞ್ಚ, ವಾಹನಾನಿ ಬಲಾನಿ ಚ;
ನಿವೇಸನಾನಿ ರಮ್ಮಾನಿ, ಅಹಂ ಪುತ್ತ ದದಾಮಿ ತೇ.
‘‘ಗೋಮಣ್ಡಲಪರಿಬ್ಯೂಳ್ಹೋ, ದಾಸಿಸಙ್ಘಪುರಕ್ಖತೋ;
ರಜ್ಜಂ ಕಾರೇಹಿ ಭದ್ದನ್ತೇ, ಕಿಂ ಅರಞ್ಞೇ ಕರಿಸ್ಸಸಿ’’.
‘‘ಕಿಂ ¶ ಧನೇನ ಯಂ ಖೀಯೇಥ [ಕಿಂ ಧನೇನ ಯಂ ಜೀಯೇಥ (ಸೀ.), ಕಿಂ ಮಂ ಧನೇನ ಕೀಯೇಥ (ಸ್ಯಾ. ಕ.)], ಕಿಂ ಭರಿಯಾಯ ಮರಿಸ್ಸತಿ;
ಕಿಂ ಯೋಬ್ಬನೇನ ಜಿಣ್ಣೇನ [ಚಿಣ್ಣೇನ (ಸೀ. ಪೀ.), ವಣ್ಣೇನ (ಕ.)], ಯಂ ಜರಾಯಾಭಿಭುಯ್ಯತಿ [ಯಂ ಜರಾ ಅಭಿಹೇಸ್ಸತಿ (ಸೀ. ಪೀ.)].
‘‘ತತ್ಥ ಕಾ ನನ್ದಿ ಕಾ ಖಿಡ್ಡಾ, ಕಾ ರತಿ ಕಾ ಧನೇಸನಾ;
ಕಿಂ ¶ ಮೇ ಪುತ್ತೇಹಿ ದಾರೇಹಿ, ರಾಜ ಮುತ್ತೋಸ್ಮಿ ಬನ್ಧನಾ.
‘‘ಯೋಹಂ [ಸೋಹಂ (ಸೀ. ಪೀ.)] ಏವಂ ಪಜಾನಾಮಿ, ಮಚ್ಚು ಮೇ ನಪ್ಪಮಜ್ಜತಿ;
ಅನ್ತಕೇನಾಧಿಪನ್ನಸ್ಸ, ಕಾ ರತೀ ಕಾ ಧನೇಸನಾ.
‘‘ಫಲಾನಮಿವ ¶ ಪಕ್ಕಾನಂ, ನಿಚ್ಚಂ ಪತನತೋ ಭಯಂ;
ಏವಂ ಜಾತಾನ ಮಚ್ಚಾನಂ, ನಿಚ್ಚಂ ಮರಣತೋ ಭಯಂ.
‘‘ಸಾಯಮೇಕೇ ನ ದಿಸ್ಸನ್ತಿ, ಪಾತೋ ದಿಟ್ಠಾ ಬಹೂ ಜನಾ;
ಪಾತೋ ಏಕೇ ನ ದಿಸ್ಸನ್ತಿ, ಸಾಯಂ ದಿಟ್ಠಾ ಬಹೂ ಜನಾ.
‘‘ಅಜ್ಜೇವ ಕಿಚ್ಚಂ ಆತಪ್ಪಂ, ಕೋ ಜಞ್ಞಾ ಮರಣಂ ಸುವೇ;
ನ ಹಿ ನೋ ಸಙ್ಕರಂ [ಸಙ್ಗರಂ (ಸೀ. ಪೀ.) ಮ. ನಿ. ೩.೨೭೨] ತೇನ, ಮಹಾಸೇನೇನ ಮಚ್ಚುನಾ.
‘‘ಚೋರಾ ಧನಸ್ಸ ಪತ್ಥೇನ್ತಿ, ರಾಜಮುತ್ತೋಸ್ಮಿ ಬನ್ಧನಾ;
ಏಹಿ ರಾಜ ನಿವತ್ತಸ್ಸು, ನಾಹಂ ರಜ್ಜೇನ ಮತ್ಥಿಕೋ’’ತಿ.
ಮೂಗಪಕ್ಖಜಾತಕಂ ಪಠಮಂ.
೫೩೯. ಮಹಾಜನಕಜಾತಕಂ (೨)
‘‘ಕೋಯಂ ಮಜ್ಝೇ ಸಮುದ್ದಸ್ಮಿಂ, ಅಪಸ್ಸಂ ತೀರಮಾಯುಹೇ;
ಕಂ [ಕಿಂ (ಸ್ಯಾ. ಕ.)] ತ್ವಂ ಅತ್ಥವಸಂ ಞತ್ವಾ, ಏವಂ ವಾಯಮಸೇ ಭುಸಂ’’.
‘‘ನಿಸಮ್ಮ ವತ್ತಂ ಲೋಕಸ್ಸ, ವಾಯಾಮಸ್ಸ ಚ ದೇವತೇ;
ತಸ್ಮಾ ಮಜ್ಝೇ ಸಮುದ್ದಸ್ಮಿಂ, ಅಪಸ್ಸಂ ತೀರಮಾಯುಹೇ’’.
‘‘ಗಮ್ಭೀರೇ ಅಪ್ಪಮೇಯ್ಯಸ್ಮಿಂ, ತೀರಂ ಯಸ್ಸ ನ ದಿಸ್ಸತಿ;
ಮೋಘೋ ತೇ ಪುರಿಸವಾಯಾಮೋ, ಅಪ್ಪತ್ವಾವ ಮರಿಸ್ಸಸಿ’’.
‘‘ಅನಣೋ ¶ ಞಾತಿನಂ ಹೋತಿ, ದೇವಾನಂ ಪಿತುನಞ್ಚ [ಪಿತುನೋ ಚ (ಸೀ. ಪೀ.)] ಸೋ;
ಕರಂ ಪುರಿಸಕಿಚ್ಚಾನಿ, ನ ಚ ಪಚ್ಛಾನುತಪ್ಪತಿ’’.
‘‘ಅಪಾರಣೇಯ್ಯಂ ಯಂ ಕಮ್ಮಂ, ಅಫಲಂ ಕಿಲಮಥುದ್ದಯಂ;
ತತ್ಥ ಕೋ ವಾಯಮೇನತ್ಥೋ, ಮಚ್ಚು ಯಸ್ಸಾಭಿನಿಪ್ಪತಂ’’ [ಯಸ್ಸಾಭಿನಿಪ್ಫತಂ (ಸ್ಯಾ.)].
‘‘ಅಪಾರಣೇಯ್ಯಮಚ್ಚನ್ತಂ ¶ , ಯೋ ವಿದಿತ್ವಾನ ದೇವತೇ;
ನ ರಕ್ಖೇ ಅತ್ತನೋ ಪಾಣಂ, ಜಞ್ಞಾ ಸೋ ಯದಿ ಹಾಪಯೇ.
‘‘ಅಧಿಪ್ಪಾಯಫಲಂ ಏಕೇ, ಅಸ್ಮಿಂ ಲೋಕಸ್ಮಿ ದೇವತೇ;
ಪಯೋಜಯನ್ತಿ ಕಮ್ಮಾನಿ, ತಾನಿ ಇಜ್ಝನ್ತಿ ವಾ ನ ವಾ.
‘‘ಸನ್ದಿಟ್ಠಿಕಂ ¶ ಕಮ್ಮಫಲಂ, ನನು ಪಸ್ಸಸಿ ದೇವತೇ;
ಸನ್ನಾ ಅಞ್ಞೇ ತರಾಮಹಂ, ತಞ್ಚ ಪಸ್ಸಾಮಿ ಸನ್ತಿಕೇ.
‘‘ಸೋ ಅಹಂ ವಾಯಮಿಸ್ಸಾಮಿ, ಯಥಾಸತ್ತಿ ಯಥಾಬಲಂ;
ಗಚ್ಛಂ ಪಾರಂ ಸಮುದ್ದಸ್ಸ, ಕಸ್ಸಂ [ಕಾಸಂ (ಸೀ. ಪೀ.)] ಪುರಿಸಕಾರಿಯಂ’’.
‘‘ಯೋ ತ್ವಂ ಏವಂ ಗತೇ ಓಘೇ, ಅಪ್ಪಮೇಯ್ಯೇ ಮಹಣ್ಣವೇ;
ಧಮ್ಮವಾಯಾಮಸಮ್ಪನ್ನೋ, ಕಮ್ಮುನಾ ನಾವಸೀದಸಿ;
ಸೋ ತ್ವಂ ತತ್ಥೇವ ಗಚ್ಛಾಹಿ, ಯತ್ಥ ತೇ ನಿರತೋ ಮನೋ’’.
‘‘ಆಸೀಸೇಥೇವ ¶ [ಆಸಿಂಸೇಥೇವ (ಸೀ. ಸ್ಯಾ. ಪೀ.)] ಪುರಿಸೋ, ನ ನಿಬ್ಬಿನ್ದೇಯ್ಯ ಪಣ್ಡಿತೋ;
ಪಸ್ಸಾಮಿ ವೋಹಂ ಅತ್ತಾನಂ, ಯಥಾ ಇಚ್ಛಿಂ ತಥಾ ಅಹು.
‘‘ಆಸೀಸೇಥೇವ ಪುರಿಸೋ, ನ ನಿಬ್ಬಿನ್ದೇಯ್ಯ ಪಣ್ಡಿತೋ;
ಪಸ್ಸಾಮಿ ವೋಹಂ ಅತ್ತಾನಂ, ಉದಕಾ ಥಲಮುಬ್ಭತಂ.
‘‘ವಾಯಮೇಥೇವ ಪುರಿಸೋ, ನ ನಿಬ್ಬಿನ್ದೇಯ್ಯ ಪಣ್ಡಿತೋ;
ಪಸ್ಸಾಮಿ ವೋಹಂ ಅತ್ತಾನಂ, ಯಥಾ ಇಚ್ಛಿಂ ತಥಾ ಅಹು.
‘‘ವಾಯಮೇಥೇವ ಪುರಿಸೋ, ನ ನಿಬ್ಬಿನ್ದೇಯ್ಯ ಪಣ್ಡಿತೋ;
ಪಸ್ಸಾಮಿ ವೋಹಂ ಅತ್ತಾನಂ, ಉದಕಾ ಥಲಮುಬ್ಭತಂ.
‘‘ದುಕ್ಖೂಪನೀತೋಪಿ ನರೋ ಸಪಞ್ಞೋ, ಆಸಂ ನ ಛಿನ್ದೇಯ್ಯ ಸುಖಾಗಮಾಯ;
ಬಹೂ ಹಿ ಫಸ್ಸಾ ಅಹಿತಾ ಹಿತಾ ಚ, ಅವಿತಕ್ಕಿತಾ ಮಚ್ಚುಮುಪಬ್ಬಜನ್ತಿ [ಮಚ್ಚುಮುಪ್ಪಜ್ಜನ್ತಿ (ಸ್ಯಾ.)].
‘‘ಅಚಿನ್ತಿತಮ್ಪಿ ಭವತಿ, ಚಿನ್ತಿತಮ್ಪಿ ವಿನಸ್ಸತಿ;
ನ ಹಿ ಚಿನ್ತಾಮಯಾ ಭೋಗಾ, ಇತ್ಥಿಯಾ ಪುರಿಸಸ್ಸ ವಾ’’.
‘‘ಅಪೋರಾಣಂ [ಅಪುರಾಣಂ (ಸೀ. ಪೀ.)] ವತ ಭೋ ರಾಜಾ, ಸಬ್ಬಭುಮ್ಮೋ ದಿಸಮ್ಪತಿ;
ನಾಜ್ಜ ನಚ್ಚೇ [ನ ಚ ನಚ್ಚೇ (ಕ.)] ನಿಸಾಮೇತಿ, ನ ಗೀತೇ ಕುರುತೇ ಮನೋ.
‘‘ನ ಮಿಗೇ [ಮಗೇ (ಕ.)] ನಪಿ ಉಯ್ಯಾನೇ, ನಪಿ ಹಂಸೇ ಉದಿಕ್ಖತಿ;
ಮೂಗೋವ ತುಣ್ಹಿಮಾಸೀನೋ, ನ ಅತ್ಥಮನುಸಾಸತಿ’’.
‘‘ಸುಖಕಾಮಾ ¶ ¶ ರಹೋಸೀಲಾ, ವಧಬನ್ಧಾ ಉಪಾರತಾ [ಉಪಾರುತಾ (ಸ್ಯಾ. ಕ.)];
ಕಸ್ಸ [ಕೇಸಂ (ಸೀ. ಪೀ.)] ನು ಅಜ್ಜ ಆರಾಮೇ, ದಹರಾ ವುದ್ಧಾ ಚ ಅಚ್ಛರೇ.
‘‘ಅತಿಕ್ಕನ್ತವನಥಾ ¶ ಧೀರಾ, ನಮೋ ತೇಸಂ ಮಹೇಸಿನಂ;
ಯೇ ಉಸ್ಸುಕಮ್ಹಿ ಲೋಕಮ್ಹಿ, ವಿಹರನ್ತಿ ಮನುಸ್ಸುಕಾ.
‘‘ತೇ ಛೇತ್ವಾ ಮಚ್ಚುನೋ ಜಾಲಂ, ತತಂ [ತನ್ತಂ (ಸೀ. ಸ್ಯಾ. ಪೀ.), ತಂ ತಂ (ಕ.)] ಮಾಯಾವಿನೋ ದಳಂ;
ಛಿನ್ನಾಲಯತ್ತಾ [ಸನ್ತಾಲಯನ್ತಾ (ಸ್ಯಾ. ಕ.)] ಗಚ್ಛನ್ತಿ, ಕೋ ತೇಸಂ ಗತಿಮಾಪಯೇ’’ [ನೇಸಂ ಗತಿ ಪಾಪಯೇ (ಕ.)].
‘‘ಕದಾಹಂ ಮಿಥಿಲಂ [ಮಿಧಿಲಂ (ಕ.)] ಫೀತಂ, ವಿಭತ್ತಂ ಭಾಗಸೋ ಮಿತಂ;
ಪಹಾಯ ಪಬ್ಬಜಿಸ್ಸಾಮಿ, ತಂ ಕುದಾಸ್ಸು [ಕದಾಸ್ಸು (ಸೀ. ಪೀ.), ಕದಾಸು (ಸ್ಯಾ.)] ಭವಿಸ್ಸತಿ.
‘‘ಕದಾಹಂ ಮಿಥಿಲಂ ಫೀತಂ, ವಿಸಾಲಂ ಸಬ್ಬತೋಪಭಂ;
ಪಹಾಯ ಪಬ್ಬಜಿಸ್ಸಾಮಿ, ತಂ ಕುದಾಸ್ಸು ಭವಿಸ್ಸತಿ.
‘‘ಕದಾಹಂ ಮಿಥಿಲಂ ಫೀತಂ, ಬಹುಪಾಕಾರತೋರಣಂ;
ಪಹಾಯ ಪಬ್ಬಜಿಸ್ಸಾಮಿ, ತಂ ಕುದಾಸ್ಸು ಭವಿಸ್ಸತಿ.
‘‘ಕದಾಹಂ ಮಿಥಿಲಂ ಫೀತಂ, ದಳ್ಹಮಟ್ಟಾಲಕೋಟ್ಠಕಂ;
ಪಹಾಯ ಪಬ್ಬಜಿಸ್ಸಾಮಿ, ತಂ ಕುದಾಸ್ಸು ಭವಿಸ್ಸತಿ.
‘‘ಕದಾಹಂ ಮಿಥಿಲಂ ಫೀತಂ, ಸುವಿಭತ್ತಂ ಮಹಾಪಥಂ;
ಪಹಾಯ ಪಬ್ಬಜಿಸ್ಸಾಮಿ, ತಂ ಕುದಾಸ್ಸು ಭವಿಸ್ಸತಿ.
‘‘ಕದಾಹಂ ಮಿಥಿಲಂ ಫೀತಂ, ಸುವಿಭತ್ತನ್ತರಾಪಣಂ;
ಪಹಾಯ ಪಬ್ಬಜಿಸ್ಸಾಮಿ, ತಂ ಕುದಾಸ್ಸು ಭವಿಸ್ಸತಿ.
‘‘ಕದಾಹಂ ಮಿಥಿಲಂ ಫೀತಂ, ಗವಸ್ಸರಥಪೀಳಿತಂ;
ಪಹಾಯ ಪಬ್ಬಜಿಸ್ಸಾಮಿ, ತಂ ಕುದಾಸ್ಸು ಭವಿಸ್ಸತಿ.
‘‘ಕದಾಹಂ ¶ ಮಿಥಿಲಂ ಫೀತಂ, ಆರಾಮವನಮಾಲಿನಿಂ;
ಪಹಾಯ ಪಬ್ಬಜಿಸ್ಸಾಮಿ, ತಂ ಕುದಾಸ್ಸು ಭವಿಸ್ಸತಿ.
‘‘ಕದಾಹಂ ಮಿಥಿಲಂ ಫೀತಂ, ಉಯ್ಯಾನವನಮಾಲಿನಿಂ;
ಪಹಾಯ ಪಬ್ಬಜಿಸ್ಸಾಮಿ, ತಂ ಕುದಾಸ್ಸು ಭವಿಸ್ಸತಿ.
‘‘ಕದಾಹಂ ಮಿಥಿಲಂ ಫೀತಂ, ಪಾಸಾದವನಮಾಲಿನಿಂ;
ಪಹಾಯ ಪಬ್ಬಜಿಸ್ಸಾಮಿ, ತಂ ಕುದಾಸ್ಸು ಭವಿಸ್ಸತಿ.
‘‘ಕದಾಹಂ ¶ ಮಿಥಿಲಂ ಫೀತಂ, ತಿಪುರಂ ರಾಜಬನ್ಧುನಿಂ;
ಮಾಪಿತಂ ಸೋಮನಸ್ಸೇನ, ವೇದೇಹೇನ ಯಸಸ್ಸಿನಾ;
ಪಹಾಯ ಪಬ್ಬಜಿಸ್ಸಾಮಿ, ತಂ ಕುದಾಸ್ಸು ಭವಿಸ್ಸತಿ.
‘‘ಕದಾಹಂ ವೇದೇಹೇ ಫೀತೇ, ನಿಚಿತೇ ಧಮ್ಮರಕ್ಖಿತೇ;
ಪಹಾಯ ಪಬ್ಬಜಿಸ್ಸಾಮಿ, ತಂ ಕುದಾಸ್ಸು ಭವಿಸ್ಸತಿ.
‘‘ಕದಾಹಂ ¶ ವೇದೇಹೇ ಫೀತೇ, ಅಜೇಯ್ಯೇ ಧಮ್ಮರಕ್ಖಿತೇ;
ಪಹಾಯ ಪಬ್ಬಜಿಸ್ಸಾಮಿ, ತಂ ಕುದಾಸ್ಸು ಭವಿಸ್ಸತಿ.
‘‘ಕದಾಹಂ ಅನ್ತೇಪುರಂ [ಕದಾ ಅನ್ತೇಪುರಂ (ಸೀ. ಪೀ.)] ರಮ್ಮಂ, ವಿಭತ್ತಂ ಭಾಗಸೋ ಮಿತಂ;
ಪಹಾಯ ಪಬ್ಬಜಿಸ್ಸಾಮಿ, ತಂ ಕುದಾಸ್ಸು ಭವಿಸ್ಸತಿ.
‘‘ಕದಾಹಂ ಅನ್ತೇಪುರಂ ರಮ್ಮಂ, ಸುಧಾಮತ್ತಿಕಲೇಪನಂ;
ಪಹಾಯ ಪಬ್ಬಜಿಸ್ಸಾಮಿ, ತಂ ಕುದಾಸ್ಸು ಭವಿಸ್ಸತಿ.
‘‘ಕದಾಹಂ ಅನ್ತೇಪುರಂ ರಮ್ಮಂ, ಸುಚಿಗನ್ಧಂ ಮನೋರಮಂ;
ಪಹಾಯ ಪಬ್ಬಜಿಸ್ಸಾಮಿ, ತಂ ಕುದಾಸ್ಸು ಭವಿಸ್ಸತಿ.
‘‘ಕದಾಹಂ ಕೂಟಾಗಾರೇ ಚ, ವಿಭತ್ತೇ ಭಾಗಸೋ ಮಿತೇ;
ಪಹಾಯ ಪಬ್ಬಜಿಸ್ಸಾಮಿ, ತಂ ಕುದಾಸ್ಸು ಭವಿಸ್ಸತಿ.
‘‘ಕದಾಹಂ ಕೂಟಾಗಾರೇ ಚ, ಸುಧಾಮತ್ತಿಕಲೇಪನೇ;
ಪಹಾಯ ಪಬ್ಬಜಿಸ್ಸಾಮಿ, ತಂ ಕುದಾಸ್ಸು ಭವಿಸ್ಸತಿ.
‘‘ಕದಾಹಂ ಕೂಟಾಗಾರೇ ಚ, ಸುಚಿಗನ್ಧೇ ಮನೋರಮೇ;
ಪಹಾಯ ¶ ಪಬ್ಬಜಿಸ್ಸಾಮಿ, ತಂ ಕುದಾಸ್ಸು ಭವಿಸ್ಸತಿ.
‘‘ಕದಾಹಂ ಕೂಟಾಗಾರೇ ಚ, ಲಿತ್ತೇ ಚನ್ದನಫೋಸಿತೇ;
ಪಹಾಯ ಪಬ್ಬಜಿಸ್ಸಾಮಿ, ತಂ ಕುದಾಸ್ಸು ಭವಿಸ್ಸತಿ.
‘‘ಕದಾಹಂ ಸೋಣ್ಣಪಲ್ಲಙ್ಕೇ [ಸುವಣ್ಣಪಲ್ಲಙ್ಕೇ (ಸೀ. ಸ್ಯಾ. ಪೀ.)], ಗೋನಕೇ ಚಿತ್ತಸನ್ಥತೇ;
ಪಹಾಯ ಪಬ್ಬಜಿಸ್ಸಾಮಿ, ತಂ ಕುದಾಸ್ಸು ಭವಿಸ್ಸತಿ.
[ಅಯಂ ಗಾಥಾ ಸೀ. ಪೀ. ಪೋತ್ಥಕೇಸು ನ ದಿಸ್ಸತಿ] ‘‘ಕದಾಹಂ ಮಣಿಪಲ್ಲಙ್ಕೇ, ಗೋನಕೇ ಚಿತ್ತಸನ್ಥತೇ;
ಪಹಾಯ ಪಬ್ಬಜಿಸ್ಸಾಮಿ, ತಂ ಕುದಾಸ್ಸು ಭವಿಸ್ಸತಿ [ಅಯಂ ಗಾಥಾ ಸೀ. ಪೀ. ಪೋತ್ಥಕೇಸು ನ ದಿಸ್ಸತಿ].
‘‘ಕದಾಹಂ ¶ ಕಪ್ಪಾಸಕೋಸೇಯ್ಯಂ, ಖೋಮಕೋಟುಮ್ಬರಾನಿ ಚ;
ಪಹಾಯ ಪಬ್ಬಜಿಸ್ಸಾಮಿ, ತಂ ಕುದಾಸ್ಸು ಭವಿಸ್ಸತಿ.
‘‘ಕದಾಹಂ ಪೋಕ್ಖರಣೀ ರಮ್ಮಾ, ಚಕ್ಕವಾಕಪಕೂಜಿತಾ [ಚಕ್ಕವಾಕೂಪಕೂಜಿತಾ (ಸೀ. ಪೀ.)];
ಮನ್ದಾಲಕೇಹಿ ಸಞ್ಛನ್ನಾ, ಪದುಮುಪ್ಪಲಕೇಹಿ ಚ;
ಪಹಾಯ ಪಬ್ಬಜಿಸ್ಸಾಮಿ, ತಂ ಕುದಾಸ್ಸು ಭವಿಸ್ಸತಿ.
‘‘ಕದಾಹಂ ಹತ್ಥಿಗುಮ್ಬೇ ಚ, ಸಬ್ಬಾಲಙ್ಕಾರಭೂಸಿತೇ;
ಸುವಣ್ಣಕಚ್ಛೇ ಮಾತಙ್ಗೇ, ಹೇಮಕಪ್ಪನವಾಸಸೇ.
‘‘ಆರೂಳ್ಹೇ ಗಾಮಣೀಯೇಹಿ, ತೋಮರಙ್ಕುಸಪಾಣಿಭಿ;
ಪಹಾಯ ಪಬ್ಬಜಿಸ್ಸಾಮಿ, ತಂ ಕುದಾಸ್ಸು ಭವಿಸ್ಸತಿ.
‘‘ಕದಾಹಂ ¶ ¶ ಅಸ್ಸಗುಮ್ಬೇ ಚ, ಸಬ್ಬಾಲಙ್ಕಾರಭೂಸಿತೇ;
ಆಜಾನೀಯೇವ ಜಾತಿಯಾ, ಸಿನ್ಧವೇ ಸೀಘವಾಹನೇ.
‘‘ಆರೂಳ್ಹೇ ಗಾಮಣೀಯೇಹಿ, ಇಲ್ಲಿಯಾಚಾಪಧಾರಿಭಿ;
ಪಹಾಯ ಪಬ್ಬಜಿಸ್ಸಾಮಿ, ತಂ ಕುದಾಸ್ಸು ಭವಿಸ್ಸತಿ.
‘‘ಕದಾಹಂ ರಥಸೇನಿಯೋ, ಸನ್ನದ್ಧೇ ಉಸ್ಸಿತದ್ಧಜೇ;
ದೀಪೇ ಅಥೋಪಿ ವೇಯ್ಯಗ್ಘೇ, ಸಬ್ಬಾಲಙ್ಕಾರಭೂಸಿತೇ.
‘‘ಆರೂಳ್ಹೇ ಗಾಮಣೀಯೇಹಿ, ಚಾಪಹತ್ಥೇಹಿ ವಮ್ಮಿಭಿ;
ಪಹಾಯ ಪಬ್ಬಜಿಸ್ಸಾಮಿ, ತಂ ಕುದಾಸ್ಸು ಭವಿಸ್ಸತಿ.
‘‘ಕದಾಹಂ ಸೋವಣ್ಣರಥೇ, ಸನ್ನದ್ಧೇ ಉಸ್ಸಿತದ್ಧಜೇ;
ದೀಪೇ ಅಥೋಪಿ ವೇಯ್ಯಗ್ಘೇ, ಸಬ್ಬಾಲಙ್ಕಾರಭೂಸಿತೇ.
‘‘ಆರೂಳ್ಹೇ ಗಾಮಣೀಯೇಹಿ, ಚಾಪಹತ್ಥೇಹಿ ವಮ್ಮಿಭಿ;
ಪಹಾಯ ಪಬ್ಬಜಿಸ್ಸಾಮಿ, ತಂ ಕುದಾಸ್ಸು ಭವಿಸ್ಸತಿ.
‘‘ಕದಾಹಂ ಸಜ್ಝುರಥೇ ಚ, ಸನ್ನದ್ಧೇ ಉಸ್ಸಿತದ್ಧಜೇ;
ದೀಪೇ ಅಥೋಪಿ ವೇಯ್ಯಗ್ಘೇ, ಸಬ್ಬಾಲಙ್ಕಾರಭೂಸಿತೇ.
‘‘ಆರೂಳ್ಹೇ ಗಾಮಣೀಯೇಹಿ, ಚಾಪಹತ್ಥೇಹಿ ವಮ್ಮಿಭಿ;
ಪಹಾಯ ಪಬ್ಬಜಿಸ್ಸಾಮಿ, ತಂ ಕುದಾಸ್ಸು ಭವಿಸ್ಸತಿ.
‘‘ಕದಾಹಂ ¶ ಅಸ್ಸರಥೇ ಚ, ಸನ್ನದ್ಧೇ ಉಸ್ಸಿತದ್ಧಜೇ;
ದೀಪೇ ಅಥೋಪಿ ವೇಯ್ಯಗ್ಘೇ, ಸಬ್ಬಾಲಙ್ಕಾರಭೂಸಿತೇ.
‘‘ಆರೂಳ್ಹೇ ಗಾಮಣೀಯೇಹಿ, ಚಾಪಹತ್ಥೇಹಿ ವಮ್ಮಿಭಿ;
ಪಹಾಯ ಪಬ್ಬಜಿಸ್ಸಾಮಿ, ತಂ ಕುದಾಸ್ಸು ಭವಿಸ್ಸತಿ.
‘‘ಕದಾಹಂ ¶ ಓಟ್ಠರಥೇ ಚ, ಸನ್ನದ್ಧೇ ಉಸ್ಸಿತದ್ಧಜೇ;
ದೀಪೇ ಅಥೋಪಿ ವೇಯ್ಯಗ್ಘೇ, ಸಬ್ಬಾಲಙ್ಕಾರಭೂಸಿತೇ.
‘‘ಆರೂಳ್ಹೇ ಗಾಮಣೀಯೇಹಿ, ಚಾಪಹತ್ಥೇಹಿ ವಮ್ಮಿಭಿ;
ಪಹಾಯ ಪಬ್ಬಜಿಸ್ಸಾಮಿ, ತಂ ಕುದಾಸ್ಸು ಭವಿಸ್ಸತಿ.
‘‘ಕದಾಹಂ ಗೋಣರಥೇ ಚ, ಸನ್ನದ್ಧೇ ಉಸ್ಸಿತದ್ಧಜೇ;
ದೀಪೇ ಅಥೋಪಿ ವೇಯ್ಯಗ್ಘೇ, ಸಬ್ಬಾಲಙ್ಕಾರಭೂಸಿತೇ.
‘‘ಆರೂಳ್ಹೇ ಗಾಮಣೀಯೇಹಿ, ಚಾಪಹತ್ಥೇಹಿ ವಮ್ಮಿಭಿ;
ಪಹಾಯ ಪಬ್ಬಜಿಸ್ಸಾಮಿ, ತಂ ಕುದಾಸ್ಸು ಭವಿಸ್ಸತಿ.
‘‘ಕದಾಹಂ ಅಜರಥೇ ಚ, ಸನ್ನದ್ಧೇ ಉಸ್ಸಿತದ್ಧಜೇ;
ದೀಪೇ ಅಥೋಪಿ ವೇಯ್ಯಗ್ಘೇ, ಸಬ್ಬಾಲಙ್ಕಾರಭೂಸಿತೇ.
‘‘ಆರೂಳ್ಹೇ ¶ ಗಾಮಣೀಯೇಹಿ, ಚಾಪಹತ್ಥೇಹಿ ವಮ್ಮಿಭಿ;
ಪಹಾಯ ಪಬ್ಬಜಿಸ್ಸಾಮಿ, ತಂ ಕುದಾಸ್ಸು ಭವಿಸ್ಸತಿ.
‘‘ಕದಾಹಂ ಮೇಣ್ಡರಥೇ ಚ, ಸನ್ನದ್ಧೇ ಉಸ್ಸಿತದ್ಧಜೇ;
ದೀಪೇ ಅಥೋಪಿ ವೇಯ್ಯಗ್ಘೇ, ಸಬ್ಬಾಲಙ್ಕಾರಭೂಸಿತೇ.
‘‘ಆರೂಳ್ಹೇ ಗಾಮಣೀಯೇಹಿ, ಚಾಪಹತ್ಥೇಹಿ ವಮ್ಮಿಭಿ;
ಪಹಾಯ ಪಬ್ಬಜಿಸ್ಸಾಮಿ, ತಂ ಕುದಾಸ್ಸು ಭವಿಸ್ಸತಿ.
‘‘ಕದಾಹಂ ಮಿಗರಥೇ ಚ, ಸನ್ನದ್ಧೇ ಉಸ್ಸಿತದ್ಧಜೇ;
ದೀಪೇ ಅಥೋಪಿ ವೇಯ್ಯಗ್ಘೇ, ಸಬ್ಬಾಲಙ್ಕಾರಭೂಸಿತೇ.
‘‘ಆರೂಳ್ಹೇ ಗಾಮಣೀಯೇಹಿ, ಚಾಪಹತ್ಥೇಹಿ ವಮ್ಮಿಭಿ;
ಪಹಾಯ ಪಬ್ಬಜಿಸ್ಸಾಮಿ, ತಂ ಕುದಾಸ್ಸು ಭವಿಸ್ಸತಿ.
‘‘ಕದಾಹಂ ¶ ಹತ್ಥಾರೋಹೇ ಚ, ಸಬ್ಬಾಲಙ್ಕಾರಭೂಸಿತೇ;
ನೀಲವಮ್ಮಧರೇ ಸೂರೇ, ತೋಮರಙ್ಕುಸಪಾಣಿನೇ [ಪಾಣಿನೋ (ಸ್ಯಾ. ಕ.)];
ಪಹಾಯ ಪಬ್ಬಜಿಸ್ಸಾಮಿ, ತಂ ಕುದಾಸ್ಸು ಭವಿಸ್ಸತಿ.
‘‘ಕದಾಹಂ ¶ ಅಸ್ಸಾರೋಹೇ ಚ, ಸಬ್ಬಾಲಙ್ಕಾರಭೂಸಿತೇ;
ನೀಲವಮ್ಮಧರೇ ಸೂರೇ, ಇಲ್ಲಿಯಾಚಾಪಧಾರಿನೇ [ಧಾರಿನೋ (ಸ್ಯಾ. ಕ.)];
ಪಹಾಯ ಪಬ್ಬಜಿಸ್ಸಾಮಿ, ತಂ ಕುದಾಸ್ಸು ಭವಿಸ್ಸತಿ.
‘‘ಕದಾಹಂ ರಥಾರೋಹೇ ಚ, ಸಬ್ಬಾಲಙ್ಕಾರಭೂಸಿತೇ;
ನೀಲವಮ್ಮಧರೇ ಸೂರೇ, ಚಾಪಹತ್ಥೇ ಕಲಾಪಿನೇ [ಕಲಾಪಿನೋ (ಸ್ಯಾ. ಕ.)];
ಪಹಾಯ ಪಬ್ಬಜಿಸ್ಸಾಮಿ, ತಂ ಕುದಾಸ್ಸು ಭವಿಸ್ಸತಿ.
[ಅಯಂ ಗಾಥಾ ಸೀ. ಪೀ. ಪೋತ್ಥಕೇಸು ನ ದಿಸ್ಸತಿ] ‘‘ಕದಾಹಂ ಧನುಗ್ಗಹೇ ಚ, ಸಬ್ಬಾಲಙ್ಕಾರಭೂಸಿತೇ;
ನೀಲವಮ್ಮಧರೇ ಸೂರೇ, ಚಾಪಹತ್ಥೇ ಕಲಾಪಿನೇ;
ಪಹಾಯ ಪಬ್ಬಜಿಸ್ಸಾಮಿ, ತಂ ಕುದಾಸ್ಸು ಭವಿಸ್ಸತಿ [ಅಯಂ ಗಾಥಾ ಸೀ. ಪೀ. ಪೋತ್ಥಕೇಸು ನ ದಿಸ್ಸತಿ].
‘‘ಕದಾಹಂ ರಾಜಪುತ್ತೇ ಚ, ಸಬ್ಬಾಲಙ್ಕಾರಭೂಸಿತೇ;
ಚಿತ್ರವಮ್ಮಧರೇ ಸೂರೇ, ಕಞ್ಚನಾವೇಳಧಾರಿನೇ;
ಪಹಾಯ ಪಬ್ಬಜಿಸ್ಸಾಮಿ, ತಂ ಕುದಾಸ್ಸು ಭವಿಸ್ಸತಿ.
‘‘ಕದಾಹಂ ಅರಿಯಗಣೇ ಚ, ವತವನ್ತೇ [ವತ್ಥವನ್ತೇ (ಸೀ. ಸ್ಯಾ. ಪೀ.)] ಅಲಙ್ಕತೇ;
ಹರಿಚನ್ದನಲಿತ್ತಙ್ಗೇ, ಕಾಸಿಕುತ್ತಮಧಾರಿನೇ;
ಪಹಾಯ ಪಬ್ಬಜಿಸ್ಸಾಮಿ, ತಂ ಕುದಾಸ್ಸು ಭವಿಸ್ಸತಿ.
[ಅಯಂ ಗಾಥಾ ಸೀ. ಪೀ. ಪೋತ್ಥಕೇಸು ನ ದಿಸ್ಸತಿ] ‘‘ಕದಾಹಂ ¶ ಅಮಚ್ಚಗಣೇ ಚ, ಸಬ್ಬಾಲಙ್ಕಾರಭೂಸಿತೇ;
ಪೀತವಮ್ಮಧರೇ ಸೂರೇ, ಪುರತೋ ಗಚ್ಛಮಾಲಿನೇ [ಗಚ್ಛಮಾಲಿನೋ (ಸ್ಯಾ. ಕ.)];
ಪಹಾಯ ¶ ಪಬ್ಬಜಿಸ್ಸಾಮಿ, ತಂ ಕುದಾಸ್ಸು ಭವಿಸ್ಸತಿ [ಅಯಂ ಗಾಥಾ ಸೀ. ಪೀ. ಪೋತ್ಥಕೇಸು ನ ದಿಸ್ಸತಿ].
‘‘ಕದಾಹಂ [ಕದಾ (ಸೀ. ಪೀ.)] ಸತ್ತಸತಾ ಭರಿಯಾ, ಸಬ್ಬಾಲಙ್ಕಾರಭೂಸಿತಾ;
ಪಹಾಯ ಪಬ್ಬಜಿಸ್ಸಾಮಿ, ತಂ ಕುದಾಸ್ಸು ಭವಿಸ್ಸತಿ.
‘‘ಕದಾಹಂ [ಕದಾ (ಸೀ. ಪೀ.)] ಸತ್ತಸತಾ ಭರಿಯಾ, ಸುಸಞ್ಞಾ ತನುಮಜ್ಝಿಮಾ;
ಪಹಾಯ ಪಬ್ಬಜಿಸ್ಸಾಮಿ, ತಂ ಕುದಾಸ್ಸು ಭವಿಸ್ಸತಿ.
‘‘ಕದಾಹಂ [ಕದಾ (ಸೀ. ಪೀ.)] ಸತ್ತಸತಾ ಭರಿಯಾ, ಅಸ್ಸವಾ ಪಿಯಭಾಣಿನೀ;
ಪಹಾಯ ಪಬ್ಬಜಿಸ್ಸಾಮಿ, ತಂ ಕುದಾಸ್ಸು ಭವಿಸ್ಸತಿ.
‘‘ಕದಾಹಂ ¶ [ಕದಾ (ಸೀ. ಪೀ.)] ಸತಪಲಂ ಕಂಸಂ, ಸೋವಣ್ಣಂ ಸತರಾಜಿಕಂ;
ಪಹಾಯ ಪಬ್ಬಜಿಸ್ಸಾಮಿ, ತಂ ಕುದಾಸ್ಸು ಭವಿಸ್ಸತಿ.
‘‘ಕದಾಸ್ಸು ಮಂ ಹತ್ಥಿಗುಮ್ಬಾ, ಸಬ್ಬಾಲಙ್ಕಾರಭೂಸಿತಾ;
ಸುವಣ್ಣಕಚ್ಛಾ ಮಾತಙ್ಗಾ, ಹೇಮಕಪ್ಪನವಾಸಸಾ.
‘‘ಆರೂಳ್ಹಾ ಗಾಮಣೀಯೇಹಿ, ತೋಮರಙ್ಕುಸಪಾಣಿಭಿ;
ಯನ್ತಂ ಮಂ ನಾನುಯಿಸ್ಸನ್ತಿ, ತಂ ಕುದಾಸ್ಸು ಭವಿಸ್ಸತಿ.
‘‘ಕದಾಸ್ಸು ಮಂ ಅಸ್ಸಗುಮ್ಬಾ, ಸಬ್ಬಾಲಙ್ಕಾರಭೂಸಿತಾ;
ಆಜಾನೀಯಾವ ಜಾತಿಯಾ, ಸಿನ್ಧವಾ ಸೀಘವಾಹನಾ.
‘‘ಆರೂಳ್ಹಾ ಗಾಮಣೀಯೇಹಿ, ಇಲ್ಲಿಯಾಚಾಪಧಾರಿಭಿ;
ಯನ್ತಂ ಮಂ ನಾನುಯಿಸ್ಸನ್ತಿ, ತಂ ಕುದಾಸ್ಸು ಭವಿಸ್ಸತಿ.
‘‘ಕದಾಸ್ಸು ಮಂ ರಥಸೇನೀ, ಸನ್ನದ್ಧಾ ಉಸ್ಸಿತದ್ಧಜಾ;
ದೀಪಾ ಅಥೋಪಿ ವೇಯ್ಯಗ್ಘಾ, ಸಬ್ಬಾಲಙ್ಕಾರಭೂಸಿತಾ.
‘‘ಆರೂಳ್ಹಾ ಗಾಮಣೀಯೇಹಿ, ಚಾಪಹತ್ಥೇಹಿ ವಮ್ಮಿಭಿ;
ಯನ್ತಂ ಮಂ ನಾನುಯಿಸ್ಸನ್ತಿ, ತಂ ಕುದಾಸ್ಸು ಭವಿಸ್ಸತಿ.
‘‘ಕದಾಸ್ಸು ಮಂ ಸೋಣ್ಣರಥಾ [ಸೋವಣ್ಣರಥಾ (ಪೀ. ಕ.)], ಸನ್ನದ್ಧಾ ಉಸ್ಸಿತದ್ಧಜಾ;
ದೀಪಾ ಅಥೋಪಿ ವೇಯ್ಯಗ್ಘಾ, ಸಬ್ಬಾಲಙ್ಕಾರಭೂಸಿತಾ.
‘‘ಆರೂಳ್ಹಾ ಗಾಮಣೀಯೇಹಿ, ಚಾಪಹತ್ಥೇಹಿ ವಮ್ಮಿಭಿ;
ಯನ್ತಂ ¶ ಮಂ ನಾನುಯಿಸ್ಸನ್ತಿ, ತಂ ಕುದಾಸ್ಸು ಭವಿಸ್ಸತಿ.
‘‘ಕದಾಸ್ಸು ಮಂ ಸಜ್ಝುರಥಾ, ಸನ್ನದ್ಧಾ ಉಸ್ಸಿತದ್ಧಜಾ;
ದೀಪಾ ಅಥೋಪಿ ವೇಯ್ಯಗ್ಘಾ, ಸಬ್ಬಾಲಙ್ಕಾರಭೂಸಿತಾ.
‘‘ಆರೂಳ್ಹಾ ¶ ಗಾಮಣೀಯೇಹಿ, ಚಾಪಹತ್ಥೇಹಿ ವಮ್ಮಿಭಿ;
ಯನ್ತಂ ಮಂ ನಾನುಯಿಸ್ಸನ್ತಿ, ತಂ ಕುದಾಸ್ಸು ಭವಿಸ್ಸತಿ.
‘‘ಕದಾಸ್ಸು ಮಂ ಅಸ್ಸರಥಾ, ಸನ್ನದ್ಧಾ ಉಸ್ಸಿತದ್ಧಜಾ;
ದೀಪಾ ಅಥೋಪಿ ವೇಯ್ಯಗ್ಘಾ, ಸಬ್ಬಾಲಙ್ಕಾರಭೂಸಿತಾ.
‘‘ಆರೂಳ್ಹಾ ಗಾಮಣೀಯೇಹಿ, ಚಾಪಹತ್ಥೇಹಿ ವಮ್ಮಿಭಿ;
ಯನ್ತಂ ಮಂ ನಾನುಯಿಸ್ಸನ್ತಿ, ತಂ ಕುದಾಸ್ಸು ಭವಿಸ್ಸತಿ.
‘‘ಕದಾಸ್ಸು ¶ ಮಂ ಓಟ್ಠರಥಾ, ಸನ್ನದ್ಧಾ ಉಸ್ಸಿತದ್ಧಜಾ;
ದೀಪಾ ಅಥೋಪಿ ವೇಯ್ಯಗ್ಘಾ, ಸಬ್ಬಾಲಙ್ಕಾರಭೂಸಿತಾ.
‘‘ಆರೂಳ್ಹಾ ಗಾಮಣೀಯೇಹಿ, ಚಾಪಹತ್ಥೇಹಿ ವಮ್ಮಿಭಿ;
ಯನ್ತಂ ಮಂ ನಾನುಯಿಸ್ಸನ್ತಿ, ತಂ ಕುದಾಸ್ಸು ಭವಿಸ್ಸತಿ.
‘‘ಕದಾಸ್ಸು ಮಂ ಗೋಣರಥಾ, ಸನ್ನದ್ಧಾ ಉಸ್ಸಿತದ್ಧಜಾ;
ದೀಪಾ ಅಥೋಪಿ ವೇಯ್ಯಗ್ಘಾ, ಸಬ್ಬಾಲಙ್ಕಾರಭೂಸಿತಾ.
‘‘ಆರೂಳ್ಹಾ ಗಾಮಣೀಯೇಹಿ, ಚಾಪಹತ್ಥೇಹಿ ವಮ್ಮಿಭಿ;
ಯನ್ತಂ ಮಂ ನಾನುಯಿಸ್ಸನ್ತಿ, ತಂ ಕುದಾಸ್ಸು ಭವಿಸ್ಸತಿ.
‘‘ಕದಾಸ್ಸು ಮಂ ಅಜರಥಾ, ಸನ್ನದ್ಧಾ ಉಸ್ಸಿತದ್ಧಜಾ;
ದೀಪಾ ಅಥೋಪಿ ವೇಯ್ಯಗ್ಘಾ, ಸಬ್ಬಾಲಙ್ಕಾರಭೂಸಿತಾ.
‘‘ಆರೂಳ್ಹಾ ಗಾಮಣೀಯೇಹಿ, ಚಾಪಹತ್ಥೇಹಿ ವಮ್ಮಿಭಿ;
ಯನ್ತಂ ¶ ಮಂ ನಾನುಯಿಸ್ಸನ್ತಿ, ತಂ ಕುದಾಸ್ಸು ಭವಿಸ್ಸತಿ.
‘‘ಕದಾಸ್ಸು ಮಂ ಮೇಣ್ಡರಥಾ, ಸನ್ನದ್ಧಾ ಉಸ್ಸಿತದ್ಧಜಾ;
ದೀಪಾ ಅಥೋಪಿ ವೇಯ್ಯಗ್ಘಾ, ಸಬ್ಬಾಲಙ್ಕಾರಭೂಸಿತಾ.
‘‘ಆರೂಳ್ಹಾ ಗಾಮಣೀಯೇಹಿ, ಚಾಪಹತ್ಥೇಹಿ ವಮ್ಮಿಭಿ;
ಯನ್ತಂ ಮಂ ನಾನುಯಿಸ್ಸನ್ತಿ, ತಂ ಕುದಾಸ್ಸು ಭವಿಸ್ಸತಿ.
‘‘ಕದಾಸ್ಸು ಮಂ ಮಿಗರಥಾ, ಸನ್ನದ್ಧಾ ಉಸ್ಸಿತದ್ಧಜಾ;
ದೀಪಾ ಅಥೋಪಿ ವೇಯ್ಯಗ್ಘಾ, ಸಬ್ಬಾಲಙ್ಕಾರಭೂಸಿತಾ.
‘‘ಆರೂಳ್ಹಾ ಗಾಮಣೀಯೇಹಿ, ಚಾಪಹತ್ಥೇಹಿ ವಮ್ಮಿಭಿ;
ಯನ್ತಂ ಮಂ ನಾನುಯಿಸ್ಸನ್ತಿ, ತಂ ಕುದಾಸ್ಸು ಭವಿಸ್ಸತಿ.
‘‘ಕದಾಸ್ಸು ಮಂ ಹತ್ಥಾರೋಹಾ, ಸಬ್ಬಾಲಙ್ಕಾರಭೂಸಿತಾ;
ನೀಲವಮ್ಮಧರಾ ಸೂರಾ, ತೋಮರಙ್ಕುಸಪಾಣಿನೋ;
ಯನ್ತಂ ಮಂ ನಾನುಯಿಸ್ಸನ್ತಿ, ತಂ ಕುದಾಸ್ಸು ಭವಿಸ್ಸತಿ.
‘‘ಕದಾಸ್ಸು ¶ ಮಂ ಅಸ್ಸಾರೋಹಾ, ಸಬ್ಬಾಲಙ್ಕಾರಭೂಸಿತಾ;
ನೀಲವಮ್ಮಧರಾ ಸೂರಾ, ಇಲ್ಲಿಯಾಚಾಪಧಾರಿನೋ;
ಯನ್ತಂ ಮಂ ನಾನುಯಿಸ್ಸನ್ತಿ, ತಂ ಕುದಾಸ್ಸು ಭವಿಸ್ಸತಿ.
‘‘ಕದಾಸ್ಸು ¶ ಮಂ ರಥಾರೋಹಾ, ಸಬ್ಬಾಲಙ್ಕಾರಭೂಸಿತಾ;
ನೀಲವಮ್ಮಧರಾ ಸೂರಾ, ಚಾಪಹತ್ಥಾ ಕಲಾಪಿನೋ;
ಯನ್ತಂ ಮಂ ನಾನುಯಿಸ್ಸನ್ತಿ, ತಂ ಕುದಾಸ್ಸು ಭವಿಸ್ಸತಿ.
‘‘ಕದಾಸ್ಸು ಮಂ ಧನುಗ್ಗಹಾ, ಸಬ್ಬಾಲಙ್ಕಾರಭೂಸಿತಾ;
ನೀಲವಮ್ಮಧರಾ ಸೂರಾ, ಚಾಪಹತ್ಥಾ ಕಲಾಪಿನೋ;
ಯನ್ತಂ ¶ ಮಂ ನಾನುಯಿಸ್ಸನ್ತಿ, ತಂ ಕುದಾಸ್ಸು ಭವಿಸ್ಸತಿ.
‘‘ಕದಾಸ್ಸು ಮಂ ರಾಜಪುತ್ತಾ, ಸಬ್ಬಾಲಙ್ಕಾರಭೂಸಿತಾ;
ಚಿತ್ರವಮ್ಮಧರಾ ಸೂರಾ, ಕಞ್ಚನಾವೇಳಧಾರಿನೋ;
ಯನ್ತಂ ಮಂ ನಾನುಯಿಸ್ಸನ್ತಿ, ತಂ ಕುದಾಸ್ಸು ಭವಿಸ್ಸತಿ.
‘‘ಕದಾಸ್ಸು ಮಂ ಅರಿಯಗಣಾ, ವತವನ್ತಾ ಅಲಙ್ಕತಾ;
ಹರಿಚನ್ದನಲಿತ್ತಙ್ಗಾ, ಕಾಸಿಕುತ್ತಮಧಾರಿನೋ;
ಯನ್ತಂ ಮಂ ನಾನುಯಿಸ್ಸನ್ತಿ, ತಂ ಕುದಾಸ್ಸು ಭವಿಸ್ಸತಿ.
‘‘ಕದಾಸ್ಸು ಮಂ ಅಮಚ್ಚಗಣಾ, ಸಬ್ಬಾಲಙ್ಕಾರಭೂಸಿತಾ;
ಪೀತವಮ್ಮಧರಾ ಸೂರಾ, ಪುರತೋ ಗಚ್ಛಮಾಲಿನೋ [ಗಚ್ಛಮಾಲಿನೀ (ಸ್ಯಾ. ಕ.)];
ಯನ್ತಂ ಮಂ ನಾನುಯಿಸ್ಸನ್ತಿ, ತಂ ಕುದಾಸ್ಸು ಭವಿಸ್ಸತಿ.
‘‘ಕದಾಸ್ಸು ಮಂ ಸತ್ತಸತಾ ಭರಿಯಾ, ಸಬ್ಬಾಲಙ್ಕಾರಭೂಸಿತಾ;
ಯನ್ತಂ ಮಂ ನಾನುಯಿಸ್ಸನ್ತಿ, ತಂ ಕುದಾಸ್ಸು ಭವಿಸ್ಸತಿ.
‘‘ಕದಾಸ್ಸು ಮಂ ಸತ್ತಸತಾ ಭರಿಯಾ, ಸುಸಞ್ಞಾ ತನುಮಜ್ಝಿಮಾ;
ಯನ್ತಂ ಮಂ ನಾನುಯಿಸ್ಸನ್ತಿ, ತಂ ಕುದಾಸ್ಸು ಭವಿಸ್ಸತಿ.
‘‘ಕದಾಸ್ಸು ಮಂ ಸತ್ತಸತಾ ಭರಿಯಾ, ಅಸ್ಸವಾ ಪಿಯಭಾಣಿನೀ;
ಯನ್ತಂ ಮಂ ನಾನುಯಿಸ್ಸನ್ತಿ, ತಂ ಕುದಾಸ್ಸು ಭವಿಸ್ಸತಿ.
‘‘ಕದಾಹಂ ¶ ಪತ್ತಂ ಗಹೇತ್ವಾನ, ಮುಣ್ಡೋ ಸಙ್ಘಾಟಿಪಾರುತೋ;
ಪಿಣ್ಡಿಕಾಯ ಚರಿಸ್ಸಾಮಿ, ತಂ ಕುದಾಸ್ಸು ಭವಿಸ್ಸತಿ.
‘‘ಕದಾಹಂ ಪಂಸುಕೂಲಾನಂ, ಉಜ್ಝಿತಾನಂ [ಉಜ್ಝಿಟ್ಠಾನಂ (ಕ.)] ಮಹಾಪಥೇ;
ಸಙ್ಘಾಟಿಂ ಧಾರಯಿಸ್ಸಾಮಿ, ತಂ ಕುದಾಸ್ಸು ಭವಿಸ್ಸತಿ.
‘‘ಕದಾಹಂ ಸತ್ತಾಹಸಮ್ಮೇಘೇ [ಸತ್ತಾಹಂ ಮೇಘೇ (ಸೀ. ಸ್ಯಾ.)], ಓವಟ್ಠೋ ಅಲ್ಲಚೀವರೋ;
ಪಿಣ್ಡಿಕಾಯ ಚರಿಸ್ಸಾಮಿ, ತಂ ಕುದಾಸ್ಸು ಭವಿಸ್ಸತಿ.
‘‘ಕದಾಹಂ ¶ ¶ ಸಬ್ಬತ್ಥ ಗನ್ತ್ವಾ [ಸಬ್ಬಹಂ ಠಾನಂ (ಸೀ.), ಸಬ್ಬಣ್ಹಂ ಗನ್ತ್ವಾ (ಸ್ಯಾ.), ಸಬ್ಬಾಹಂ ಠಾನಂ (ಪೀ.), ಸಬ್ಬಟ್ಠಾನಂ (ಕ.)], ರುಕ್ಖಾ ರುಕ್ಖಂ ವನಾ ವನಂ;
ಅನಪೇಕ್ಖೋ ಗಮಿಸ್ಸಾಮಿ, ತಂ ಕುದಾಸ್ಸು ಭವಿಸ್ಸತಿ.
‘‘ಕದಾಹಂ ಗಿರಿದುಗ್ಗೇಸು, ಪಹೀನಭಯಭೇರವೋ;
ಅದುತಿಯೋ ಗಮಿಸ್ಸಾಮಿ [ವಿಹರಿಸ್ಸಾಮಿ (ಸೀ. ಪೀ.)], ತಂ ಕುದಾಸ್ಸು ಭವಿಸ್ಸತಿ.
‘‘ಕದಾಹಂ ವೀಣಂ ವರುಜ್ಜಕೋ [ವೀಣರುಜ್ಜಕೋ (ಸ್ಯಾ.), ವೀಣಂ ವಿರುಜ್ಜಕೋ (ಕ.)], ಸತ್ತತನ್ತಿಂ ಮನೋರಮಂ;
ಚಿತ್ತಂ ಉಜುಂ ಕರಿಸ್ಸಾಮಿ, ತಂ ಕುದಾಸ್ಸು ಭವಿಸ್ಸತಿ.
‘‘ಕದಾಹಂ ರಥಕಾರೋವ, ಪರಿಕನ್ತಂ ಉಪಾಹನಂ;
ಕಾಮಸಞ್ಞೋಜನೇ ಛೇಚ್ಛಂ [ಛೇತ್ವಾ (ಕ.)], ಯೇ ದಿಬ್ಬೇ ಯೇ ಚ ಮಾನುಸೇ’’.
‘‘ತಾ ಚ ಸತ್ತಸತಾ ಭರಿಯಾ, ಸಬ್ಬಾಲಙ್ಕಾರಭೂಸಿತಾ;
ಬಾಹಾ ಪಗ್ಗಯ್ಹ ಪಕ್ಕನ್ದುಂ, ಕಸ್ಮಾ ನೋ ವಿಜಹಿಸ್ಸಸಿ.
‘‘ತಾ ಚ ಸತ್ತಸತಾ ಭರಿಯಾ, ಸುಸಞ್ಞಾ ತನುಮಜ್ಝಿಮಾ;
ಬಾಹಾ ಪಗ್ಗಯ್ಹ ಪಕ್ಕನ್ದುಂ, ಕಸ್ಮಾ ನೋ ವಿಜಹಿಸ್ಸಸಿ.
‘‘ತಾ ಚ ಸತ್ತಸತಾ ಭರಿಯಾ, ಅಸ್ಸವಾ ಪಿಯಭಾಣಿನೀ;
ಬಾಹಾ ಪಗ್ಗಯ್ಹ ಪಕ್ಕನ್ದುಂ, ಕಸ್ಮಾ ನೋ ವಿಜಹಿಸ್ಸಸಿ.
‘‘ತಾ ¶ ಚ ಸತ್ತಸತಾ ಭರಿಯಾ, ಸಬ್ಬಾಲಙ್ಕಾರಭೂಸಿತಾ;
ಹಿತ್ವಾ ಸಮ್ಪದ್ದವೀ [ಸಮ್ಪದ್ದಯೀ (ಸೀ.)] ರಾಜಾ, ಪಬ್ಬಜ್ಜಾಯ ಪುರಕ್ಖತೋ.
‘‘ತಾ ಚ ಸತ್ತಸತಾ ಭರಿಯಾ, ಸುಸಞ್ಞಾ ತನುಮಜ್ಝಿಮಾ;
ಹಿತ್ವಾ ಸಮ್ಪದ್ದವೀ ರಾಜಾ, ಪಬ್ಬಜ್ಜಾಯ ಪುರಕ್ಖತೋ.
‘‘ತಾ ಚ ಸತ್ತಸತಾ ಭರಿಯಾ, ಅಸ್ಸವಾ ಪಿಯಭಾಣಿನೀ;
ಹಿತ್ವಾ ಸಮ್ಪದ್ದವೀ ರಾಜಾ, ಪಬ್ಬಜ್ಜಾಯ ಪುರಕ್ಖತೋ’’.
‘‘ಹಿತ್ವಾ ಸತಪಲಂ ಕಂಸಂ, ಸೋವಣ್ಣಂ ಸತರಾಜಿಕಂ;
ಅಗ್ಗಹೀ ಮತ್ತಿಕಂ ಪತ್ತಂ, ತಂ ದುತಿಯಾಭಿಸೇಚನಂ’’.
‘‘ಭೇಸ್ಮಾ [ವೇಸ್ಮಾ (ಸೀ.), ಭಿಂಸಾ (ಪೀ.), ಭೀಸಾ (ಕ.)] ಅಗ್ಗಿಸಮಾ ಜಾಲಾ, ಕೋಸಾ ಡಯ್ಹನ್ತಿ ಭಾಗಸೋ;
ರಜತಂ ಜಾತರೂಪಞ್ಚ, ಮುತ್ತಾ ವೇಳುರಿಯಾ ಬಹೂ.
‘‘ಮಣಯೋ ¶ ಸಙ್ಖಮುತ್ತಾ ಚ, ವತ್ಥಿಕಂ ಹರಿಚನ್ದನಂ;
ಅಜಿನಂ ದಣ್ಡಭಣ್ಡಞ್ಚ, ಲೋಹಂ ಕಾಳಾಯಸಂ ಬಹೂ;
ಏಹಿ ರಾಜ ನಿವತ್ತಸ್ಸು, ಮಾ ತೇತಂ ವಿನಸಾ ಧನಂ’’ [ವಿನಸ್ಸಾ ಧನಂ (ಸ್ಯಾ. ಕ.)].
‘‘ಸುಸುಖಂ ವತ ಜೀವಾಮ, ಯೇಸಂ ನೋ ನತ್ಥಿ ಕಿಞ್ಚನಂ;
ಮಿಥಿಲಾಯ ದಯ್ಹಮಾನಾಯ, ನ ಮೇ ಕಿಞ್ಚಿ ಅದಯ್ಹಥ’’.
‘‘ಅಟವಿಯೋ ¶ ಸಮುಪ್ಪನ್ನಾ, ರಟ್ಠಂ ವಿದ್ಧಂಸಯನ್ತಿ ತಂ;
ಏಹಿ ರಾಜ ನಿವತ್ತಸ್ಸು, ಮಾ ರಟ್ಠಂ ವಿನಸಾ ಇದಂ’’.
‘‘ಸುಸುಖಂ ವತ ಜೀವಾಮ, ಯೇಸಂ ನೋ ನತ್ಥಿ ಕಿಞ್ಚನಂ;
ರಟ್ಠೇ ವಿಲುಮ್ಪಮಾನಮ್ಹಿ, ನ [ಮಾ (ಕ.)] ಮೇ ಕಿಞ್ಚಿ ಅಹೀರಥ.
‘‘ಸುಸುಖಂ ¶ ವತ ಜೀವಾಮ, ಯೇಸಂ ನೋ ನತ್ಥಿ ಕಿಞ್ಚನಂ;
ಪೀತಿಭಕ್ಖಾ ಭವಿಸ್ಸಾಮ, ದೇವಾ ಆಭಸ್ಸರಾ ಯಥಾ’’.
‘‘ಕಿಮ್ಹೇಸೋ ಮಹತೋ ಘೋಸೋ, ಕಾ ನು ಗಾಮೇವ ಕೀಳಿಯಾ [ಗಾಮೇ ಕಿಲೀಲಿಯಾ (ಸೀ.)];
ಸಮಣ ತೇವ [ಸಮಣಞ್ಞೇವ (ಸೀ. ಪೀ.), ಸಮಣತ್ವೇವ (ಸ್ಯಾ.)] ಪುಚ್ಛಾಮ, ಕತ್ಥೇಸೋ ಅಭಿಸಟೋ ಜನೋ’’.
‘‘ಮಮಂ ಓಹಾಯ ಗಚ್ಛನ್ತಂ, ಏತ್ಥೇಸೋ ಅಭಿಸಟೋ ಜನೋ;
ಸೀಮಾತಿಕ್ಕಮನಂ ಯನ್ತಂ, ಮುನಿಮೋನಸ್ಸ ಪತ್ತಿಯಾ;
ಮಿಸ್ಸಂ ನನ್ದೀಹಿ ಗಚ್ಛನ್ತಂ, ಕಿಂ ಜಾನಮನುಪುಚ್ಛಸಿ’’.
‘‘ಮಾಸ್ಸು ತಿಣ್ಣೋ ಅಮಞ್ಞಿತ್ಥ [ಅಮಞ್ಞಿತ್ಥೋ (ಸೀ. ಸ್ಯಾ. ಪೀ.)], ಸರೀರಂ ಧಾರಯಂ ಇಮಂ;
ಅತೀರಣೇಯ್ಯ ಯಮಿದಂ [ಅತೀರಣೇಯ್ಯಮಿದಂ ಕಮ್ಮಂ (ಸೀ. ಸ್ಯಾ. ಪೀ.)], ಬಹೂ ಹಿ ಪರಿಪನ್ಥಯೋ’’.
‘‘ಕೋ ನು ಮೇ ಪರಿಪನ್ಥಸ್ಸ, ಮಮಂ ಏವಂವಿಹಾರಿನೋ;
ಯೋ ನೇವ ದಿಟ್ಠೇ ನಾದಿಟ್ಠೇ, ಕಾಮಾನಮಭಿಪತ್ಥಯೇ’’.
‘‘ನಿದ್ದಾ ತನ್ದೀ ವಿಜಮ್ಭಿತಾ, ಅರತೀ ಭತ್ತಸಮ್ಮದೋ;
ಆವಸನ್ತಿ ಸರೀರಟ್ಠಾ, ಬಹೂ ಹಿ ಪರಿಪನ್ಥಯೋ’’.
‘‘ಕಲ್ಯಾಣಂ ವತ ಮಂ ಭವಂ, ಬ್ರಾಹ್ಮಣ ಮನುಸಾಸತಿ [ಮನುಸಾಸಸಿ (ಸೀ.)];
ಬ್ರಾಹ್ಮಣ ತೇವ [ಬ್ರಾಹ್ಮಣಞ್ಞೇವ (ಸೀ.)] ಪುಚ್ಛಾಮಿ, ಕೋ ನು ತ್ವಮಸಿ ಮಾರಿಸ’’.
‘‘ನಾರದೋ ಇತಿ ಮೇ ನಾಮಂ [ನಾಮೇನ (ಸ್ಯಾ. ಕ.)], ಕಸ್ಸಪೋ ಇತಿ ಮಂ ವಿದೂ;
ಭೋತೋ ಸಕಾಸಮಾಗಚ್ಛಿಂ, ಸಾಧು ಸಬ್ಭಿ ಸಮಾಗಮೋ.
‘‘ತಸ್ಸ ¶ ತೇ ಸಬ್ಬೋ ಆನನ್ದೋ, ವಿಹಾರೋ ಉಪವತ್ತತು;
ಯಂ ಊನಂ [ಯದೂನಂ (ಸೀ. ಸ್ಯಾ. ಪೀ.)] ತಂ ಪರಿಪೂರೇಹಿ, ಖನ್ತಿಯಾ ಉಪಸಮೇನ ಚ.
‘‘ಪಸಾರಯ ಸನ್ನತಞ್ಚ, ಉನ್ನತಞ್ಚ ಪಸಾರಯ [ಪಹಾರಯ (ಸ್ಯಾ. ಪೀ. ಕ.)];
ಕಮ್ಮಂ ¶ ವಿಜ್ಜಞ್ಚ ಧಮ್ಮಞ್ಚ, ಸಕ್ಕತ್ವಾನ ಪರಿಬ್ಬಜ’’.
‘‘ಬಹೂ ಹತ್ಥೀ ಚ ಅಸ್ಸೇ ಚ, ನಗರೇ ಜನಪದಾನಿ ಚ;
ಹಿತ್ವಾ ಜನಕ ಪಬ್ಬಜಿತೋ, ಕಪಾಲೇ [ಕಪಲ್ಲೇ (ಸೀ. ಪೀ.)] ರತಿಮಜ್ಝಗಾ.
‘‘ಕಚ್ಚಿ ನು ತೇ ಜಾನಪದಾ, ಮಿತ್ತಾಮಚ್ಚಾ ಚ ಞಾತಕಾ;
ದುಬ್ಭಿಮಕಂಸು ಜನಕ, ಕಸ್ಮಾ ತೇ ತಂ ಅರುಚ್ಚಥ’’.
‘‘ನ ¶ ಮಿಗಾಜಿನ ಜಾತುಚ್ಛೇ [ಜಾತುಚ್ಚ (ಸೀ. ಪೀ.)], ಅಹಂ ಕಞ್ಚಿ ಕುದಾಚನಂ;
ಅಧಮ್ಮೇನ ಜಿನೇ ಞಾತಿಂ, ನ ಚಾಪಿ ಞಾತಯೋ ಮಮಂ.
‘‘ದಿಸ್ವಾನ ಲೋಕವತ್ತನ್ತಂ, ಖಜ್ಜನ್ತಂ ಕದ್ದಮೀಕತಂ;
ಹಞ್ಞರೇ ಬಜ್ಝರೇ ಚೇತ್ಥ, ಯತ್ಥ ಸನ್ನೋ [ಸತ್ತೋ (ಸೀ.)] ಪುಥುಜ್ಜನೋ;
ಏತಾಹಂ ಉಪಮಂ ಕತ್ವಾ, ಭಿಕ್ಖಕೋಸ್ಮಿ ಮಿಗಾಜಿನ’’.
‘‘ಕೋ ನು ತೇ ಭಗವಾ ಸತ್ಥಾ, ಕಸ್ಸೇತಂ ವಚನಂ ಸುಚಿ;
ನ ಹಿ ಕಪ್ಪಂ ವಾ ವಿಜ್ಜಂ ವಾ, ಪಚ್ಚಕ್ಖಾಯ ರಥೇಸಭ;
ಸಮಣಂ ಆಹು ವತ್ತನ್ತಂ, ಯಥಾ ದುಕ್ಖಸ್ಸತಿಕ್ಕಮೋ’’.
‘‘ನ ಮಿಗಾಜಿನ ಜಾತುಚ್ಛೇ, ಅಹಂ ಕಞ್ಚಿ ಕುದಾಚನಂ;
ಸಮಣಂ ಬ್ರಾಹ್ಮಣಂ ವಾಪಿ, ಸಕ್ಕತ್ವಾ ಅನುಪಾವಿಸಿಂ’’.
‘‘ಮಹತಾ ಚಾನುಭಾವೇನ, ಗಚ್ಛನ್ತೋ ಸಿರಿಯಾ ಜಲಂ;
ಗೀಯಮಾನೇಸು ಗೀತೇಸು, ವಜ್ಜಮಾನೇಸು ವಗ್ಗುಸು.
‘‘ತೂರಿಯತಾಳಸಙ್ಘುಟ್ಠೇ [ತುರಿಯತಾಳಿತಸಙ್ಘುಟ್ಠೇ (ಸೀ. ಪೀ.)], ಸಮ್ಮತಾಲಸಮಾಹಿತೇ;
ಸ ಮಿಗಾಜಿನ ಮದ್ದಕ್ಖಿಂ, ಫಲಿಂ [ಫಲಂ (ಸೀ. ಪೀ. ಕ.)] ಅಮ್ಬಂ ತಿರೋಚ್ಛದಂ;
ಹಞ್ಞಮಾನಂ [ತುಜ್ಜಮಾನಂ (ಸೀ.), ತುದಮಾನಂ (ಸ್ಯಾ.), ತದ್ದಮಾನಂ (ಪೀ.), ಹತಮಾನಂ (ಕ.)] ಮನುಸ್ಸೇಹಿ, ಫಲಕಾಮೇಹಿ ಜನ್ತುಭಿ.
‘‘ಸೋ ¶ ಖೋಹಂ ತಂ ಸಿರಿಂ ಹಿತ್ವಾ, ಓರೋಹಿತ್ವಾ ಮಿಗಾಜಿನ;
ಮೂಲಂ ಅಮ್ಬಸ್ಸುಪಾಗಚ್ಛಿಂ, ಫಲಿನೋ ನಿಪ್ಫಲಸ್ಸ ಚ.
‘‘ಫಲಿಂ ¶ [ಫಲಂ (ಸೀ. ಪೀ. ಕ.)] ಅಮ್ಬಂ ಹತಂ ದಿಸ್ವಾ, ವಿದ್ಧಂಸ್ತಂ ವಿನಳೀಕತಂ;
ಅಥೇಕಂ [ಅಥೇತಂ (ಸೀ. ಪೀ.)] ಇತರಂ ಅಮ್ಬಂ, ನೀಲೋಭಾಸಂ ಮನೋರಮಂ.
‘‘ಏವಮೇವ ನೂನಮ್ಹೇಪಿ [ನೂನ ಅಮ್ಹೇ (ಸೀ. ಪೀ.)], ಇಸ್ಸರೇ ಬಹುಕಣ್ಟಕೇ;
ಅಮಿತ್ತಾ ನೋ ವಧಿಸ್ಸನ್ತಿ, ಯಥಾ ಅಮ್ಬೋ ಫಲೀ ಹತೋ.
‘‘ಅಜಿನಮ್ಹಿ ಹಞ್ಞತೇ ದೀಪಿ, ನಾಗೋ ದನ್ತೇಹಿ ಹಞ್ಞತೇ;
ಧನಮ್ಹಿ ಧನಿನೋ ಹನ್ತಿ, ಅನಿಕೇತಮಸನ್ಥವಂ;
ಫಲೀ ಅಮ್ಬೋ ಅಫಲೋ ಚ, ತೇ ಸತ್ಥಾರೋ ಉಭೋ ಮಮ’’.
‘‘ಸಬ್ಬೋ ಜನೋ ಪಬ್ಯಾಧಿತೋ, ರಾಜಾ ಪಬ್ಬಜಿತೋ ಇತಿ;
ಹತ್ಥಾರೋಹಾ ಅನೀಕಟ್ಠಾ, ರಥಿಕಾ ಪತ್ತಿಕಾರಕಾ.
‘‘ಅಸ್ಸಾಸಯಿತ್ವಾ ಜನತಂ, ಠಪಯಿತ್ವಾ ಪಟಿಚ್ಛದಂ;
ಪುತ್ತಂ ರಜ್ಜೇ ಠಪೇತ್ವಾನ, ಅಥ ಪಚ್ಛಾ ಪಬ್ಬಜಿಸ್ಸಸಿ’’.
‘‘ಚತ್ತಾ ¶ ಮಯಾ ಜಾನಪದಾ, ಮಿತ್ತಾಮಚ್ಚಾ ಚ ಞಾತಕಾ;
ಸನ್ತಿ ಪುತ್ತಾ ವಿದೇಹಾನಂ, ದೀಘಾವು ರಟ್ಠವಡ್ಢನೋ;
ತೇ ರಜ್ಜಂ ಕಾರಯಿಸ್ಸನ್ತಿ, ಮಿಥಿಲಾಯಂ ಪಜಾಪತಿ’’.
‘‘ಏಹಿ ತಂ ಅನುಸಿಕ್ಖಾಮಿ, ಯಂ ವಾಕ್ಯಂ ಮಮ ರುಚ್ಚತಿ;
ರಜ್ಜಂ ತುವಂ ಕಾರಯಸಿ [ಕಾರಯನ್ತೀ (ಸೀ. ಸ್ಯಾ. ಪೀ.)], ಪಾಪಂ ದುಚ್ಚರಿತಂ ಬಹುಂ;
ಕಾಯೇನ ವಾಚಾ ಮನಸಾ, ಯೇನ ಗಚ್ಛಸಿ [ಕಞ್ಛಿಸಿ (ಸೀ. ಪೀ.)] ದುಗ್ಗತಿಂ.
‘‘ಪರದಿನ್ನಕೇನ ಪರನಿಟ್ಠಿತೇನ, ಪಿಣ್ಡೇನ ಯಾಪೇಹಿ ಸ ಧೀರಧಮ್ಮೋ’’.
‘‘ಯೋಪಿ ¶ ಚತುತ್ಥೇ ಭತ್ತಕಾಲೇ ನ ಭುಞ್ಜೇ, ಅಜುಟ್ಠಮಾರೀವ [ಅಜದ್ಧುಮಾರೀವ (ಸೀ.), ಅಜ್ಝುಟ್ಠಮಾರಿವ (ಸ್ಯಾ.), ಅಜದ್ಧುಮಾರಿವ (ಪೀ.) ಮಜ್ಝಿಮನಿಕಾಯೇ, ಅಙ್ಗುತ್ತರನಿಕಾಯೇ ಚ ಪಸ್ಸಿತಬ್ಬಂ] ಖುದಾಯ ಮಿಯ್ಯೇ;
ನ ತ್ವೇವ ಪಿಣ್ಡಂ ಲುಳಿತಂ ಅನರಿಯಂ, ಕುಲಪುತ್ತರೂಪೋ ಸಪ್ಪುರಿಸೋ ನ ಸೇವೇ;
ತಯಿದಂ ನ ಸಾಧು ತಯಿದಂ ನ ಸುಟ್ಠು, ಸುನಖುಚ್ಛಿಟ್ಠಕಂ ಜನಕ ಭುಞ್ಜಸೇ ತುವಂ’’.
‘‘ನ ¶ ಚಾಪಿ ಮೇ ಸೀವಲಿ ಸೋ ಅಭಕ್ಖೋ, ಯಂ ಹೋತಿ ಚತ್ತಂ ಗಿಹಿನೋ ಸುನಸ್ಸ ವಾ;
ಯೇ ಕೇಚಿ ಭೋಗಾ ಇಧ ಧಮ್ಮಲದ್ಧಾ, ಸಬ್ಬೋ ಸೋ ಭಕ್ಖೋ ಅನವಯೋತಿ [ಅನವಜ್ಜೋತಿ (ಸೀ. ಪೀ.)] ವುತ್ತೋ’’.
‘‘ಕುಮಾರಿಕೇ ಉಪಸೇನಿಯೇ, ನಿಚ್ಚಂ ನಿಗ್ಗಳಮಣ್ಡಿತೇ;
ಕಸ್ಮಾ ತೇ ಏಕೋ ಭುಜೋ ಜನತಿ, ಏಕೋ ತೇ ನ ಜನತೀ ಭುಜೋ’’.
‘‘ಇಮಸ್ಮಿಂ ಮೇ ಸಮಣ ಹತ್ಥೇ, ಪಟಿಮುಕ್ಕಾ ದುನೀವರಾ [ದುನೀಧುರಾ (ಸೀ. ಪೀ.)];
ಸಙ್ಘಾತಾ [ಸಂಘಟ್ಟಾ (ಸ್ಯಾ. ಕ.)] ಜಾಯತೇ ಸದ್ದೋ, ದುತಿಯಸ್ಸೇವ ಸಾ ಗತಿ.
‘‘ಇಮಸ್ಮಿಂ ಮೇ ಸಮಣ ಹತ್ಥೇ, ಪಟಿಮುಕ್ಕೋ ಏಕನೀವರೋ [ಏಕನೀಧುರೋ (ಸೀ. ಪೀ.)];
ಸೋ ಅದುತಿಯೋ ನ ಜನತಿ, ಮುನಿಭೂತೋವ ತಿಟ್ಠತಿ.
‘‘ವಿವಾದಪ್ಪತ್ತೋ [ವಿವಾದಮತ್ತೋ (ಪೀ.)] ದುತಿಯೋ, ಕೇನೇಕೋ ವಿವದಿಸ್ಸತಿ;
ತಸ್ಸ ತೇ ಸಗ್ಗಕಾಮಸ್ಸ, ಏಕತ್ತಮುಪರೋಚತಂ’’.
‘‘ಸುಣಾಸಿ ಸೀವಲಿ ಕಥಾ [ಗಾಥಾ (ಸೀ. ಸ್ಯಾ. ಪೀ.)], ಕುಮಾರಿಯಾ ಪವೇದಿತಾ;
ಪೇಸಿಯಾ [ಪೇಸ್ಸಿಯಾ (ಸೀ. ಪೀ.)] ಮಂ ಗರಹಿತ್ಥೋ, ದುತಿಯಸ್ಸೇವ ಸಾ ಗತಿ.
‘‘ಅಯಂ ¶ ದ್ವೇಧಾಪಥೋ ಭದ್ದೇ, ಅನುಚಿಣ್ಣೋ ಪಥಾವಿಹಿ;
ತೇಸಂ ತ್ವಂ ಏಕಂ ಗಣ್ಹಾಹಿ, ಅಹಮೇಕಂ ಪುನಾಪರಂ.
‘‘ಮಾವಚ [ನೇವ (ಸೀ. ಪೀ.), ಮಾ ಚ (ಸ್ಯಾ. ಕ.)] ಮಂ ತ್ವಂ ಪತಿ ಮೇತಿ, ನಾಹಂ [ಮಾಹಂ (ಸೀ. ಪೀ.)] ಭರಿಯಾತಿ ವಾ ಪುನ’’;
‘‘ಇಮಮೇವ ಕಥಯನ್ತಾ, ಥೂಣಂ ನಗರುಪಾಗಮುಂ.
‘‘ಕೋಟ್ಠಕೇ ಉಸುಕಾರಸ್ಸ, ಭತ್ತಕಾಲೇ ಉಪಟ್ಠಿತೇ;
ತತ್ರಾ ಚ ಸೋ ಉಸುಕಾರೋ, (ಏಕಂ ದಣ್ಡಂ ಉಜುಂ ಕತಂ;) [( ) ನತ್ಥಿ ಬಹೂಸು]
ಏಕಞ್ಚ ಚಕ್ಖುಂ ನಿಗ್ಗಯ್ಹ, ಜಿಮ್ಹಮೇಕೇನ ಪೇಕ್ಖತಿ’’.
‘‘ಏವಂ ¶ ನೋ ಸಾಧು ಪಸ್ಸಸಿ, ಉಸುಕಾರ ಸುಣೋಹಿ ಮೇ;
ಯದೇಕಂ ಚಕ್ಖುಂ ನಿಗ್ಗಯ್ಹ, ಜಿಮ್ಹಮೇಕೇನ ಪೇಕ್ಖಸಿ’’.
‘‘ದ್ವೀಹಿ ¶ ಸಮಣ ಚಕ್ಖೂಹಿ, ವಿಸಾಲಂ ವಿಯ ಖಾಯತಿ;
ಅಸಮ್ಪತ್ವಾ ಪರಮಂ [ಪರಂ (ಸೀ. ಪೀ.)] ಲಿಙ್ಗಂ, ನುಜುಭಾವಾಯ ಕಪ್ಪತಿ.
‘‘ಏಕಞ್ಚ ಚಕ್ಖುಂ ನಿಗ್ಗಯ್ಹ, ಜಿಮ್ಹಮೇಕೇನ ಪೇಕ್ಖತೋ;
ಸಮ್ಪತ್ವಾ ಪರಮಂ ಲಿಙ್ಗಂ, ಉಜುಭಾವಾಯ ಕಪ್ಪತಿ.
‘‘ವಿವಾದಪ್ಪತ್ತೋ [ವಿವಾದಮತ್ತೋ (ಪೀ.)] ದುತಿಯೋ, ಕೇನೇಕೋ ವಿವದಿಸ್ಸತಿ;
ತಸ್ಸ ತೇ ಸಗ್ಗಕಾಮಸ್ಸ, ಏಕತ್ತಮುಪರೋಚತಂ’’.
‘‘ಸುಣಾಸಿ ಸೀವಲಿ ಕಥಾ [ಗಾಥಾ (ಸೀ. ಸ್ಯಾ. ಪೀ.)], ಉಸುಕಾರೇನ ವೇದಿತಾ;
ಪೇಸಿಯಾ ಮಂ ಗರಹಿತ್ಥೋ, ದುತಿಯಸ್ಸೇವ ಸಾ ಗತಿ.
‘‘ಅಯಂ ದ್ವೇಧಾಪಥೋ ಭದ್ದೇ, ಅನುಚಿಣ್ಣೋ ಪಥಾವಿಹಿ;
ತೇಸಂ ತ್ವಂ ಏಕಂ ಗಣ್ಹಾಹಿ, ಅಹಮೇಕಂ ಪುನಾಪರಂ.
‘‘ಮಾವಚ ಮಂ ತ್ವಂ ಪತಿ ಮೇತಿ, ನಾಹಂ ಭರಿಯಾತಿ ವಾ ಪುನ’’;
‘‘ಮುಞ್ಜಾವೇಸಿಕಾ ¶ ಪವಾಳ್ಹಾ, ಏಕಾ ವಿಹರ ಸೀವಲೀ’’ತಿ.
ಮಹಾಜನಕಜಾತಕಂ ದುತಿಯಂ.
೫೪೦. ಸುವಣ್ಣಸಾಮಜಾತಕಂ (೩)
‘‘ಕೋ ನು ಮಂ ಉಸುನಾ ವಿಜ್ಝಿ, ಪಮತ್ತಂ ಉದಹಾರಕಂ [ಹಾರಿಕಂ (ಸ್ಯಾ.), ಹಾರಿಯಂ (ಕ.)];
ಖತ್ತಿಯೋ ಬ್ರಾಹ್ಮಣೋ ವೇಸ್ಸೋ, ಕೋ ಮಂ ವಿದ್ಧಾ ನಿಲೀಯಸಿ.
‘‘ನ ಮೇ ಮಂಸಾನಿ ಖಜ್ಜಾನಿ, ಚಮ್ಮೇನತ್ಥೋ ನ ವಿಜ್ಜತಿ;
ಅಥ ಕೇನ ನು ವಣ್ಣೇನ, ವಿದ್ಧೇಯ್ಯಂ ಮಂ ಅಮಞ್ಞಥ.
‘‘ಕೋ ವಾ ತ್ವಂ ಕಸ್ಸ ವಾ ಪುತ್ತೋ, ಕಥಂ ಜಾನೇಮು ತಂ ಮಯಂ;
ಪುಟ್ಠೋ ಮೇ ಸಮ್ಮ ಅಕ್ಖಾಹಿ, ಕಿಂ ಮಂ ವಿದ್ಧಾ ನಿಲೀಯಸಿ’’.
‘‘ರಾಜಾಹಮಸ್ಮಿ ಕಾಸೀನಂ, ಪೀಳಿಯಕ್ಖೋತಿ ಮಂ ವಿದೂ;
ಲೋಭಾ ರಟ್ಠಂ ಪಹಿತ್ವಾನ, ಮಿಗಮೇಸಂ ಚರಾಮಹಂ.
‘‘ಇಸ್ಸತ್ಥೇ ಚಸ್ಮಿ ಕುಸಲೋ, ದಳ್ಹಧಮ್ಮೋತಿ ವಿಸ್ಸುತೋ;
ನಾಗೋಪಿ ಮೇ ನ ಮುಚ್ಚೇಯ್ಯ, ಆಗತೋ ಉಸುಪಾತನಂ.
‘‘ಕೋ ¶ ¶ ವಾ ತ್ವಂ ಕಸ್ಸ ವಾ ಪುತ್ತೋ [ತ್ವಂ ಚ ಕಸ್ಸ ವಾ ಪುತ್ತೋಸಿ (ಸೀ. ಪೀ.)], ಕಥಂ ಜಾನೇಮು ತಂ ಮಯಂ;
ಪಿತುನೋ ಅತ್ತನೋ ಚಾಪಿ, ನಾಮಗೋತ್ತಂ ಪವೇದಯ’’.
‘‘ನೇಸಾದಪುತ್ತೋ ಭದ್ದನ್ತೇ, ಸಾಮೋ ಇತಿ ಮಂ ಞಾತಯೋ;
ಆಮನ್ತಯಿಂಸು ಜೀವನ್ತಂ, ಸ್ವಜ್ಜೇವಾಹಂ ಗತೋ [ಸ್ವಾಜ್ಜೇವಙ್ಗತೋ (ಸ್ಯಾ.), ಸ್ವಜ್ಜೇವಙ್ಗತೇ (ಕ.)] ಸಯೇ.
‘‘ವಿದ್ಧೋಸ್ಮಿ ಪುಥುಸಲ್ಲೇನ, ಸವಿಸೇನ ಯಥಾ ಮಿಗೋ;
ಸಕಮ್ಹಿ ಲೋಹಿತೇ ರಾಜ, ಪಸ್ಸ ಸೇಮಿ ಪರಿಪ್ಲುತೋ.
‘‘ಪಟಿವಾಮಗತಂ ¶ [ಪಟಿಧಮ್ಮ ಗತಂ (ಸೀ. ಪೀ.)] ಸಲ್ಲಂ, ಪಸ್ಸ ಧಿಮ್ಹಾಮಿ [ವಿಹಾಮ್ಹಿ (ಸೀ. ಪೀ.)] ಲೋಹಿತಂ;
ಆತುರೋ ತ್ಯಾನುಪುಚ್ಛಾಮಿ, ಕಿಂ ಮಂ ವಿದ್ಧಾ ನಿಲೀಯಸಿ.
‘‘ಅಜಿನಮ್ಹಿ ಹಞ್ಞತೇ ದೀಪಿ, ನಾಗೋ ದನ್ತೇಹಿ ಹಞ್ಞತೇ;
ಅಥ ಕೇನ ನು ವಣ್ಣೇನ, ವಿದ್ಧೇಯ್ಯಂ ಮಂ ಅಮಞ್ಞಥ’’.
‘‘ಮಿಗೋ ಉಪಟ್ಠಿತೋ ಆಸಿ, ಆಗತೋ ಉಸುಪಾತನಂ;
ತಂ ದಿಸ್ವಾ ಉಬ್ಬಿಜೀ ಸಾಮ, ತೇನ ಕೋಧೋ ಮಮಾವಿಸಿ’’.
‘‘ಯತೋ ಸರಾಮಿ ಅತ್ತಾನಂ, ಯತೋ ಪತ್ತೋಸ್ಮಿ ವಿಞ್ಞುತಂ;
ನ ಮಂ ಮಿಗಾ ಉತ್ತಸನ್ತಿ, ಅರಞ್ಞೇ ಸಾಪದಾನಿಪಿ.
‘‘ಯತೋ ನಿಧಿಂ ಪರಿಹರಿಂ, ಯತೋ ಪತ್ತೋಸ್ಮಿ ಯೋಬ್ಬನಂ;
ನ ಮಂ ಮಿಗಾ ಉತ್ತಸನ್ತಿ, ಅರಞ್ಞೇ ಸಾಪದಾನಿಪಿ.
‘‘ಭೀರೂ ಕಿಮ್ಪುರಿಸಾ ರಾಜ, ಪಬ್ಬತೇ ಗನ್ಧಮಾದನೇ;
ಸಮ್ಮೋದಮಾನಾ ಗಚ್ಛಾಮ, ಪಬ್ಬತಾನಿ ವನಾನಿ ಚ.
(‘‘ನ ಮಂ ಮಿಗಾ ಉತ್ತಸನ್ತಿ, ಅರಞ್ಞೇ ಸಾಪದಾನಿಪಿ;) [( ) ನತ್ಥಿ ಸೀ. ಸ್ಯಾ. ಪೀ. ಪೋತ್ಥಕೇಸು]
ಅಥ ಕೇನ ನು ವಣ್ಣೇನ, ಉತ್ರಾಸನ್ತಿ ಮಿಗಾ ಮಮಂ’’ [ಉತ್ರಾಸೇ ಸೋ ಮಿಗೋ ಮಮಂ (ಸೀ. ಪೀ.)].
‘‘ನ ತಂ ತಸ [ನ ತದ್ದಸಾ (ಸೀ. ಪೀ.)] ಮಿಗೋ ಸಾಮ, ಕಿಂ ತಾಹಂ ಅಲಿಕಂ ಭಣೇ;
ಕೋಧಲೋಭಾಭಿಭೂತಾಹಂ, ಉಸುಂ ತೇ ತಂ ಅವಸ್ಸಜಿಂ [ಅವಿಸ್ಸಜಿಂ (ಸ್ಯಾ.)].
‘‘ಕುತೋ ನು ಸಾಮ ಆಗಮ್ಮ, ಕಸ್ಸ ವಾ ಪಹಿತೋ ತುವಂ;
ಉದಹಾರೋ ನದಿಂ ಗಚ್ಛ, ಆಗತೋ ಮಿಗಸಮ್ಮತಂ’’.
‘‘ಅನ್ಧಾ ¶ ಮಾತಾಪಿತಾ ಮಯ್ಹಂ, ತೇ ಭರಾಮಿ ಬ್ರಹಾವನೇ;
ತೇಸಾಹಂ ಉದಕಾಹಾರೋ, ಆಗತೋ ಮಿಗಸಮ್ಮತಂ.
‘‘ಅತ್ಥಿ ನೇಸಂ ಉಸಾಮತ್ತಂ, ಅಥ ಸಾಹಸ್ಸ ಜೀವಿತಂ;
ಉದಕಸ್ಸ ಅಲಾಭೇನ ¶ , ಮಞ್ಞೇ ಅನ್ಧಾ ಮರಿಸ್ಸರೇ.
‘‘ನ ಮೇ ಇದಂ ತಥಾ ದುಕ್ಖಂ, ಲಬ್ಭಾ ಹಿ ಪುಮುನಾ ಇದಂ;
ಯಞ್ಚ ಅಮ್ಮಂ ನ ಪಸ್ಸಾಮಿ, ತಂ ಮೇ ದುಕ್ಖತರಂ ಇತೋ.
‘‘ನ ¶ ಮೇ ಇದಂ ತಥಾ ದುಕ್ಖಂ, ಲಬ್ಭಾ ಹಿ ಪುಮುನಾ ಇದಂ;
ಯಞ್ಚ ತಾತಂ ನ ಪಸ್ಸಾಮಿ, ತಂ ಮೇ ದುಕ್ಖತರಂ ಇತೋ.
‘‘ಸಾ ನೂನ ಕಪಣಾ ಅಮ್ಮಾ, ಚಿರರತ್ತಾಯ ರುಚ್ಛತಿ [ರುಚ್ಚತಿ (ಕ.)];
ಅಡ್ಢರತ್ತೇವ ರತ್ತೇ ವಾ, ನದೀವ ಅವಸುಚ್ಛತಿ [ಅವಸುಸ್ಸತಿ (ಸ್ಯಾ.)].
‘‘ಸೋ ನೂನ ಕಪಣೋ ತಾತೋ, ಚಿರರತ್ತಾಯ ರುಚ್ಛತಿ [ರುಚ್ಚತಿ (ಕ.)];
ಅಡ್ಢರತ್ತೇವ ರತ್ತೇ ವಾ, ನದೀವ ಅವಸುಚ್ಛತಿ [ಅವಸುಸ್ಸತಿ (ಸ್ಯಾ.)].
‘‘ಉಟ್ಠಾನಪಾದಚರಿಯಾಯ [ಪಾರಿಚರಿಯಾಯ (ಸೀ. ಪೀ.)], ಪಾದಸಮ್ಬಾಹನಸ್ಸ ಚ;
ಸಾಮ ತಾತ ವಿಲಪನ್ತಾ, ಹಿಣ್ಡಿಸ್ಸನ್ತಿ ಬ್ರಹಾವನೇ.
‘‘ಇದಮ್ಪಿ ದುತಿಯಂ ಸಲ್ಲಂ, ಕಮ್ಪೇತಿ ಹದಯಂ ಮಮಂ;
ಯಞ್ಚ ಅನ್ಧೇ ನ ಪಸ್ಸಾಮಿ, ಮಞ್ಞೇ ಹಿಸ್ಸಾಮಿ [ಯಞ್ಚ ಹೇಸ್ಸಾಮಿ (ಸೀ. ಪೀ.), ತಂ ಮೇಂ ಹಿಸ್ಸಾಮಿ (ಕ.)] ಜೀವಿತಂ’’.
‘‘ಮಾ ಬಾಳ್ಹಂ ಪರಿದೇವೇಸಿ, ಸಾಮ ಕಲ್ಯಾಣದಸ್ಸನ;
ಅಹಂ ಕಮ್ಮಕರೋ ಹುತ್ವಾ, ಭರಿಸ್ಸಂ ತೇ ಬ್ರಹಾವನೇ.
‘‘ಇಸ್ಸತ್ಥೇ ಚಸ್ಮಿ ಕುಸಲೋ, ದಳ್ಹಧಮ್ಮೋತಿ ವಿಸ್ಸುತೋ;
ಅಹಂ ಕಮ್ಮಕರೋ ಹುತ್ವಾ, ಭರಿಸ್ಸಂ ತೇ ಬ್ರಹಾವನೇ.
‘‘ಮಿಗಾನಂ [ಮಗಾನಂ (ಕ.)] ವಿಘಾಸಮನ್ವೇಸಂ, ವನಮೂಲಫಲಾನಿ ಚ;
ಅಹಂ ಕಮ್ಮಕರೋ ಹುತ್ವಾ, ಭರಿಸ್ಸಂ ತೇ ಬ್ರಹಾವನೇ.
‘‘ಕತಮಂ ತಂ ವನಂ ಸಾಮ, ಯತ್ಥ ಮಾತಾಪಿತಾ ತವ;
ಅಹಂ ¶ ತೇ ತಥಾ ಭರಿಸ್ಸಂ, ಯಥಾ ತೇ ಅಭರೀ ತುವಂ’’.
‘‘ಅಯಂ ¶ ಏಕಪದೀ ರಾಜ, ಯೋಯಂ ಉಸ್ಸೀಸಕೇ ಮಮ;
ಇತೋ ಗನ್ತ್ವಾ ಅಡ್ಢಕೋಸಂ, ತತ್ಥ ನೇಸಂ ಅಗಾರಕಂ;
ಯತ್ಥ ಮಾತಾಪಿತಾ ಮಯ್ಹಂ, ತೇ ಭರಸ್ಸು ಇತೋ ಗತೋ.
‘‘ನಮೋ ತೇ ಕಾಸಿರಾಜತ್ಥು, ನಮೋ ತೇ ಕಾಸಿವಡ್ಢನ;
ಅನ್ಧಾ ಮಾತಾಪಿತಾ ಮಯ್ಹಂ, ತೇ ಭರಸ್ಸು ಬ್ರಹಾವನೇ.
‘‘ಅಞ್ಜಲಿಂ ತೇ ಪಗ್ಗಣ್ಹಾಮಿ, ಕಾಸಿರಾಜ ನಮತ್ಥು ತೇ;
ಮಾತರಂ ಪಿತರಂ ಮಯ್ಹಂ, ವುತ್ತೋ ವಜ್ಜಾಸಿ ವನ್ದನಂ’’.
‘‘ಇದಂ ವತ್ವಾನ ಸೋ ಸಾಮೋ, ಯುವಾ ಕಲ್ಯಾಣದಸ್ಸನೋ;
ಮುಚ್ಛಿತೋ ವಿಸವೇಗೇನ, ವಿಸಞ್ಞೀ ಸಮಪಜ್ಜಥ.
‘‘ಸ ರಾಜಾ ಪರಿದೇವೇಸಿ, ಬಹುಂ ಕಾರುಞ್ಞಸಞ್ಹಿತಂ;
ಅಜರಾಮರೋಹಂ ಆಸಿಂ, ಅಜ್ಜೇತಂ ಞಾಮಿ [ಅಜ್ಜಹಞ್ಞಾಮಿ (ಕ.)] ನೋ ಪುರೇ;
ಸಾಮಂ ಕಾಲಙ್ಕತಂ ದಿಸ್ವಾ, ನತ್ಥಿ ಮಚ್ಚುಸ್ಸ ನಾಗಮೋ.
‘‘ಯಸ್ಸು ¶ ಮಂ ಪಟಿಮನ್ತೇತಿ, ಸವಿಸೇನ ಸಮಪ್ಪಿತೋ;
ಸ್ವಜ್ಜೇವಂ ಗತೇ ಕಾಲೇ, ನ ಕಿಞ್ಚಿ ಮಭಿಭಾಸತಿ.
‘‘ನಿರಯಂ ನೂನ ಗಚ್ಛಾಮಿ, ಏತ್ಥ ಮೇ ನತ್ಥಿ ಸಂಸಯೋ;
ತದಾ ಹಿ ಪಕತಂ ಪಾಪಂ, ಚಿರರತ್ತಾಯ ಕಿಬ್ಬಿಸಂ.
‘‘ಭವನ್ತಿ ತಸ್ಸ ವತ್ತಾರೋ, ಗಾಮೇ ಕಿಬ್ಬಿಸಕಾರಕೋ;
ಅರಞ್ಞೇ ನಿಮ್ಮನುಸ್ಸಮ್ಹಿ, ಕೋ ಮಂ ವತ್ತುಮರಹತಿ.
‘‘ಸಾರಯನ್ತಿ ಹಿ ಕಮ್ಮಾನಿ, ಗಾಮೇ ಸಂಗಚ್ಛ ಮಾಣವಾ;
ಅರಞ್ಞೇ ¶ ನಿಮ್ಮನುಸ್ಸಮ್ಹಿ, ಕೋ ನು ಮಂ ಸಾರಯಿಸ್ಸತಿ’’.
‘‘ಸಾ ದೇವತಾ ಅನ್ತರಹಿತಾ, ಪಬ್ಬತೇ ಗನ್ಧಮಾದನೇ;
ರಞ್ಞೋವ ಅನುಕಮ್ಪಾಯ, ಇಮಾ ಗಾಥಾ ಅಭಾಸಥ.
‘‘ಆಗುಂ ಕಿರ ಮಹಾರಾಜ, ಅಕರಿ [ಅಕರಾ (ಸೀ.)] ಕಮ್ಮ ದುಕ್ಕಟಂ;
ಅದೂಸಕಾ ಪಿತಾಪುತ್ತಾ, ತಯೋ ಏಕೂಸುನಾ ಹತಾ.
‘‘ಏಹಿ ತಂ ಅನುಸಿಕ್ಖಾಮಿ, ಯಥಾ ತೇ ಸುಗತೀ ಸಿಯಾ;
ಧಮ್ಮೇನನ್ಧೇ ವನೇ ಪೋಸ, ಮಞ್ಞೇಹಂ ಸುಗತೀ ತಯಾ.
‘‘ಸ ¶ ರಾಜಾ ಪರಿದೇವಿತ್ವಾ, ಬಹುಂ ಕಾರುಞ್ಞಸಞ್ಹಿತಂ;
ಉದಕಕುಮ್ಭಮಾದಾಯ, ಪಕ್ಕಾಮಿ ದಕ್ಖಿಣಾಮುಖೋ.
‘‘ಕಸ್ಸ ನು ಏಸೋ ಪದಸದ್ದೋ, ಮನುಸ್ಸಸ್ಸೇವ ಆಗತೋ;
ನೇಸೋ ಸಾಮಸ್ಸ ನಿಗ್ಘೋಸೋ, ಕೋ ನು ತ್ವಮಸಿ ಮಾರಿಸ.
‘‘ಸನ್ತಞ್ಹಿ ಸಾಮೋ ವಜತಿ, ಸನ್ತಂ ಪಾದಾನಿ ನೇಯತಿ [ಉತ್ತಹಿ (ಸೀ.)];
ನೇಸೋ ಸಾಮಸ್ಸ ನಿಗ್ಘೋಸೋ, ಕೋ ನು ತ್ವಮಸಿ ಮಾರಿಸ’’.
‘‘ರಾಜಾಹಮಸ್ಮಿ ಕಾಸೀನಂ, ಪೀಳಿಯಕ್ಖೋತಿ ಮಂ ವಿದೂ;
ಲೋಭಾ ರಟ್ಠಂ ಪಹಿತ್ವಾನ, ಮಿಗಮೇಸಂ ಚರಾಮಹಂ.
‘‘ಇಸ್ಸತ್ಥೇ ಚಸ್ಮಿ ಕುಸಲೋ, ದಳ್ಹಧಮ್ಮೋತಿ ವಿಸ್ಸುತೋ;
ನಾಗೋಪಿ ಮೇ ನ ಮುಚ್ಚೇಯ್ಯ, ಆಗತೋ ಉಸುಪಾತನಂ’’.
‘‘ಸ್ವಾಗತಂ ತೇ ಮಹಾರಾಜ, ಅಥೋ ತೇ ಅದುರಾಗತಂ;
ಇಸ್ಸರೋಸಿ ಅನುಪ್ಪತ್ತೋ, ಯಂ ಇಧತ್ಥಿ ಪವೇದಯ.
‘‘ತಿನ್ದುಕಾನಿ ಪಿಯಾಲಾನಿ, ಮಧುಕೇ ಕಾಸುಮಾರಿಯೋ;
ಫಲಾನಿ ¶ ಖುದ್ದಕಪ್ಪಾನಿ, ಭುಞ್ಜ ರಾಜ ವರಂ ವರಂ.
‘‘ಇದಮ್ಪಿ ಪಾನೀಯಂ ಸೀತಂ, ಆಭತಂ ಗಿರಿಗಬ್ಭರಾ;
ತತೋ ಪಿವ ಮಹಾರಾಜ, ಸಚೇ ತ್ವಂ ಅಭಿಕಙ್ಖಸಿ’’.
‘‘ನಾಲಂ ¶ ಅನ್ಧಾ ವನೇ ದಟ್ಠುಂ, ಕೋ ನು ವೋ ಫಲಮಾಹರಿ;
ಅನನ್ಧಸ್ಸೇವಯಂ ಸಮ್ಮಾ, ನಿವಾಪೋ ಮಯ್ಹ ಖಾಯತಿ’’.
‘‘ದಹರೋ ಯುವಾ ನಾತಿಬ್ರಹಾ, ಸಾಮೋ ಕಲ್ಯಾಣದಸ್ಸನೋ;
ದೀಘಸ್ಸ ಕೇಸಾ ಅಸಿತಾ, ಅಥೋ ಸೂನಗ್ಗ [ಸೋನಗ್ಗ (ಕ.)] ವೇಲ್ಲಿತಾ.
‘‘ಸೋ ಹವೇ ಫಲಮಾಹರಿತ್ವಾ, ಇತೋ ಆದಾಯ [ಆದಾ (ಸೀ. ಪೀ.)] ಕಮಣ್ಡಲುಂ;
ನದಿಂ ಗತೋ ಉದಹಾರೋ, ಮಞ್ಞೇ ನ ದೂರಮಾಗತೋ’’.
‘‘ಅಹಂ ತಂ ಅವಧಿಂ ಸಾಮಂ, ಯೋ ತುಯ್ಹಂ ಪರಿಚಾರಕೋ;
ಯಂ ಕುಮಾರಂ ಪವೇದೇಥ, ಸಾಮಂ ಕಲ್ಯಾಣದಸ್ಸನಂ.
‘‘ದೀಘಸ್ಸ ಕೇಸಾ ಅಸಿತಾ, ಅಥೋ ಸೂನಗ್ಗವೇಲ್ಲಿತಾ;
ತೇಸು ಲೋಹಿತಲಿತ್ತೇಸು, ಸೇತಿ ಸಾಮೋ ಮಯಾ ಹತೋ’’.
‘‘ಕೇನ ¶ ದುಕೂಲಮನ್ತೇಸಿ, ಹತೋ ಸಾಮೋತಿ ವಾದಿನಾ;
ಹತೋ ಸಾಮೋತಿ ಸುತ್ವಾನ, ಹದಯಂ ಮೇ ಪವೇಧತಿ.
‘‘ಅಸ್ಸತ್ಥಸ್ಸೇವ ತರುಣಂ, ಪವಾಳಂ ಮಾಲುತೇರಿತಂ;
ಹತೋ ಸಾಮೋತಿ ಸುತ್ವಾನ, ಹದಯಂ ಮೇ ಪವೇಧತಿ’’.
‘‘ಪಾರಿಕೇ ಕಾಸಿರಾಜಾಯಂ, ಸೋ ಸಾಮಂ ಮಿಗಸಮ್ಮತೇ;
ಕೋಧಸಾ ಉಸುನಾ ವಿಜ್ಝಿ, ತಸ್ಸ ಮಾ ಪಾಪಮಿಚ್ಛಿಮ್ಹಾ’’.
‘‘ಕಿಚ್ಛಾ ಲದ್ಧೋ ಪಿಯೋ ಪುತ್ತೋ, ಯೋ ಅನ್ಧೇ ಅಭರೀ ವನೇ;
ತಂ ¶ ಏಕಪುತ್ತಂ ಘಾತಿಮ್ಹಿ, ಕಥಂ ಚಿತ್ತಂ ನ ಕೋಪಯೇ’’.
‘‘ಕಿಚ್ಛಾ ಲದ್ಧೋ ಪಿಯೋ ಪುತ್ತೋ, ಯೋ ಅನ್ಧೇ ಅಭರೀ ವನೇ;
ತಂ ಏಕಪುತ್ತಂ ಘಾತಿಮ್ಹಿ, ಅಕ್ಕೋಧಂ ಆಹು ಪಣ್ಡಿತಾ’’.
‘‘ಮಾ ಬಾಳ್ಹಂ ಪರಿದೇವೇಥ, ಹತೋ ಸಾಮೋತಿ ವಾದಿನಾ;
ಅಹಂ ಕಮ್ಮಕರೋ ಹುತ್ವಾ, ಭರಿಸ್ಸಾಮಿ ಬ್ರಹಾವನೇ.
‘‘ಇಸ್ಸತ್ಥೇ ಚಸ್ಮಿ ಕುಸಲೋ, ದಳ್ಹಧಮ್ಮೋತಿ ವಿಸ್ಸುತೋ;
ಅಹಂ ಕಮ್ಮಕರೋ ಹುತ್ವಾ, ಭರಿಸ್ಸಾಮಿ ಬ್ರಹಾವನೇ.
‘‘ಮಿಗಾನಂ ವಿಘಾಸಮನ್ವೇಸಂ, ವನಮೂಲಫಲಾನಿ ಚ;
ಅಹಂ ಕಮ್ಮಕರೋ ಹುತ್ವಾ, ಭರಿಸ್ಸಾಮಿ ಬ್ರಹಾವನೇ’’.
‘‘ನೇಸ ಧಮ್ಮೋ ಮಹಾರಾಜ, ನೇತಂ ಅಮ್ಹೇಸು ಕಪ್ಪತಿ;
ರಾಜಾ ತ್ವಮಸಿ ಅಮ್ಹಾಕಂ, ಪಾದೇ ವನ್ದಾಮ ತೇ ಮಯಂ’’.
‘‘ಧಮ್ಮಂ ನೇಸಾದ ಭಣಥ, ಕತಾ ಅಪಚಿತೀ ತಯಾ;
ಪಿತಾ ತ್ವಮಸಿ [ತ್ವಮಹಿ (?)] ಅಮ್ಹಾಕಂ, ಮಾತಾ ತ್ವಮಸಿ ಪಾರಿಕೇ’’.
‘‘ನಮೋ ¶ ತೇ ಕಾಸಿರಾಜತ್ಥು, ನಮೋ ತೇ ಕಾಸಿವಡ್ಢನ;
ಅಞ್ಜಲಿಂ ತೇ ಪಗ್ಗಣ್ಹಾಮ, ಯಾವ ಸಾಮಾನುಪಾಪಯ.
‘‘ತಸ್ಸ ಪಾದೇ ಸಮಜ್ಜನ್ತಾ [ಪವಟ್ಟನ್ತಾ (ಪೀ.)], ಮುಖಞ್ಚ ಭುಜದಸ್ಸನಂ;
ಸಂಸುಮ್ಭಮಾನಾ ಅತ್ತಾನಂ, ಕಾಲಮಾಗಮಯಾಮಸೇ’’.
‘‘ಬ್ರಹಾ ವಾಳಮಿಗಾಕಿಣ್ಣಂ, ಆಕಾಸನ್ತಂವ ದಿಸ್ಸತಿ;
ಯತ್ಥ ಸಾಮೋ ಹತೋ ಸೇತಿ, ಚನ್ದೋವ ಪತಿತೋ ಛಮಾ.
‘‘ಬ್ರಹಾ ¶ ¶ ವಾಳಮಿಗಾಕಿಣ್ಣಂ, ಆಕಾಸನ್ತಂವ ದಿಸ್ಸತಿ;
ಯತ್ಥ ಸಾಮೋ ಹತೋ ಸೇತಿ, ಸೂರಿಯೋವ ಪತಿತೋ ಛಮಾ.
‘‘ಬ್ರಹಾ ವಾಳಮಿಗಾಕಿಣ್ಣಂ, ಆಕಾಸನ್ತಂವ ದಿಸ್ಸತಿ;
ಯತ್ಥ ಸಾಮೋ ಹತೋ ಸೇತಿ, ಪಂಸುನಾ ಪತಿಕುನ್ತಿತೋ [ಕುಣ್ಠಿತೋ (ಸೀ. ಸ್ಯಾ. ಪೀ.) ಏವಮುಪರಿಪಿ].
‘‘ಬ್ರಹಾ ವಾಳಮಿಗಾಕಿಣ್ಣಂ, ಆಕಾಸನ್ತಂವ ದಿಸ್ಸತಿ;
ಯತ್ಥ ಸಾಮೋ ಹತೋ ಸೇತಿ, ಇಧೇವ ವಸಥಸ್ಸಮೇ’’.
‘‘ಯದಿ ತತ್ಥ ಸಹಸ್ಸಾನಿ, ಸತಾನಿ ನಿಯುತಾನಿ [ನಹುತಾನಿ (ಸೀ. ಸ್ಯಾ. ಪೀ.)] ಚ;
ನೇವಮ್ಹಾಕಂ ಭಯಂ ಕೋಚಿ, ವನೇ ವಾಳೇಸು ವಿಜ್ಜತಿ’’.
‘‘ತತೋ ಅನ್ಧಾನಮಾದಾಯ, ಕಾಸಿರಾಜಾ ಬ್ರಹಾವನೇ;
ಹತ್ಥೇ ಗಹೇತ್ವಾ ಪಕ್ಕಾಮಿ, ಯತ್ಥ ಸಾಮೋ ಹತೋ ಅಹು.
‘‘ದಿಸ್ವಾನ ಪತಿತಂ ಸಾಮಂ, ಪುತ್ತಕಂ ಪಂಸುಕುನ್ಥಿತಂ;
ಅಪವಿದ್ಧಂ ಬ್ರಹಾರಞ್ಞೇ, ಚನ್ದಂವ ಪತಿತಂ ಛಮಾ.
‘‘ದಿಸ್ವಾನ ಪತಿತಂ ಸಾಮಂ, ಪುತ್ತಕಂ ಪಂಸುಕುನ್ಥಿತಂ;
ಅಪವಿದ್ಧಂ ಬ್ರಹಾರಞ್ಞೇ, ಸೂರಿಯಂವ ಪತಿತಂ ಛಮಾ.
‘‘ದಿಸ್ವಾನ ಪತಿತಂ ಸಾಮಂ, ಪುತ್ತಕಂ ಪಂಸುಕುನ್ಥಿತಂ;
ಅಪವಿದ್ಧಂ ಬ್ರಹಾರಞ್ಞೇ, ಕಲೂನಂ [ಕರುಣಂ (ಸೀ. ಪೀ.)] ಪರಿದೇವಯುಂ.
‘‘ದಿಸ್ವಾನ ಪತಿತಂ ಸಾಮಂ, ಪುತ್ತಕಂ ಪಂಸುಕುನ್ಥಿತಂ;
ಬಾಹಾ ಪಗ್ಗಯ್ಹ ಪಕ್ಕನ್ದುಂ, ಅಧಮ್ಮೋ ಕಿರ ಭೋ ಇತಿ.
‘‘ಬಾಳ್ಹಂ ಖೋ ತ್ವಂ ಪಮತ್ತೋಸಿ, ಸಾಮ ಕಲ್ಯಾಣದಸ್ಸನ;
ಯೋ ಅಜ್ಜೇವಂ [ಸ್ವಜ್ಜೇವಂ (ಕ.) ಏವಮುಪರಿಪಿ] ಗತೇ ಕಾಲೇ, ನ ಕಿಞ್ಚಿ ಮಭಿಭಾಸಸಿ.
‘‘ಬಾಳ್ಹಂ ¶ ಖೋ ತ್ವಂ ಪದಿತ್ತೋಸಿ, ಸಾಮ ಕಲ್ಯಾಣದಸ್ಸನ;
ಯೋ ಅಜ್ಜೇವಂ ಗತೇ ಕಾಲೇ, ನ ಕಿಞ್ಚಿ ಮಭಿಭಾಸಸಿ.
‘‘ಬಾಳ್ಹಂ ಖೋ ತ್ವಂ ಪಕುದ್ಧೋಸಿ, ಸಾಮ ಕಲ್ಯಾಣದಸ್ಸನ;
ಯೋ ಅಜ್ಜೇವಂ ಗತೇ ಕಾಲೇ, ನ ಕಿಞ್ಚಿ ಮಭಿಭಾಸಸಿ.
‘‘ಬಾಳ್ಹಂ ¶ ಖೋ ತ್ವಂ ಪಸುತ್ತೋಸಿ, ಸಾಮ ಕಲ್ಯಾಣದಸ್ಸನ;
ಯೋ ಅಜ್ಜೇವಂ ಗತೇ ಕಾಲೇ, ನ ಕಿಞ್ಚಿ ಮಭಿಭಾಸಸಿ.
‘‘ಬಾಳ್ಹಂ ¶ ಖೋ ತ್ವಂ ವಿಮನೋಸಿ, ಸಾಮ ಕಲ್ಯಾಣದಸ್ಸನ;
ಯೋ ಅಜ್ಜೇವಂ ಗತೇ ಕಾಲೇ, ನ ಕಿಞ್ಚಿ ಮಭಿಭಾಸಸಿ.
‘‘ಜಟಂ ವಲಿನಂ ಪಂಸುಗತಂ [ಪಙ್ಕಹತಂ (ಸೀ. ಪೀ.)], ಕೋ ದಾನಿ ಸಣ್ಠಪೇಸ್ಸತಿ [ಸಣ್ಠಪೇಸ್ಸತಿ (ಸೀ. ಸ್ಯಾ. ಪೀ.)];
ಸಾಮೋ ಅಯಂ ಕಾಲಙ್ಕತೋ, ಅನ್ಧಾನಂ ಪರಿಚಾರಕೋ.
‘‘ಕೋ ಮೇ ಸಮ್ಮಜ್ಜಮಾದಾಯ [ಚೇ ಸಮ್ಮಜ್ಜನಾದಾಯ (ಸೀ.), ನೋ ಸಮ್ಮಜ್ಜನಾದಾಯ (ಸ್ಯಾ.), ಮೇ ಸಮ್ಮಜ್ಜನಾದಾಯ (ಪೀ.)], ಸಮ್ಮಜ್ಜಿಸ್ಸತಿ ಅಸ್ಸಮಂ;
ಸಾಮೋ ಅಯಂ ಕಾಲಙ್ಕತೋ, ಅನ್ಧಾನಂ ಪರಿಚಾರಕೋ.
‘‘ಕೋ ದಾನಿ ನ್ಹಾಪಯಿಸ್ಸತಿ, ಸೀತೇನುಣ್ಹೋದಕೇನ ಚ;
ಸಾಮೋ ಅಯಂ ಕಾಲಙ್ಕತೋ, ಅನ್ಧಾನಂ ಪರಿಚಾರಕೋ.
‘‘ಕೋ ದಾನಿ ಭೋಜಯಿಸ್ಸತಿ, ವನಮೂಲಫಲಾನಿ ಚ;
ಸಾಮೋ ಅಯಂ ಕಾಲಙ್ಕತೋ, ಅನ್ಧಾನಂ ಪರಿಚಾರಕೋ’’.
‘‘ದಿಸ್ವಾನ ಪತಿತಂ ಸಾಮಂ, ಪುತ್ತಕಂ ಪಂಸುಕುನ್ಥಿತಂ;
ಅಟ್ಟಿತಾ ಪುತ್ತಸೋಕೇನ, ಮಾತಾ ಸಚ್ಚಂ ಅಭಾಸಥ.
‘‘ಯೇನ ಸಚ್ಚೇನಯಂ ಸಾಮೋ, ಧಮ್ಮಚಾರೀ ಪುರೇ ಅಹು;
ಏತೇನ ಸಚ್ಚವಜ್ಜೇನ, ವಿಸಂ ಸಾಮಸ್ಸ ಹಞ್ಞತು.
‘‘ಯೇನ ¶ ಸಚ್ಚೇನಯಂ ಸಾಮೋ, ಬ್ರಹ್ಮಚಾರೀ ಪುರೇ ಅಹು;
ಏತೇನ ಸಚ್ಚವಜ್ಜೇನ, ವಿಸಂ ಸಾಮಸ್ಸ ಹಞ್ಞತು.
‘‘ಯೇನ ಸಚ್ಚೇನಯಂ ಸಾಮೋ, ಸಚ್ಚವಾದೀ ಪುರೇ ಅಹು;
ಏತೇನ ಸಚ್ಚವಜ್ಜೇನ, ವಿಸಂ ಸಾಮಸ್ಸ ಹಞ್ಞತು.
‘‘ಯೇನ ಸಚ್ಚೇನಯಂ ಸಾಮೋ, ಮಾತಾಪೇತ್ತಿಭರೋ [ಮಾತಾಪೇತಿಭರೋ (ಸ್ಯಾ.), ಮಾತಾಪಿತ್ತಿಭರೋ (ಕ.)] ಅಹು;
ಏತೇನ ಸಚ್ಚವಜ್ಜೇನ, ವಿಸಂ ಸಾಮಸ್ಸ ಹಞ್ಞತು.
‘‘ಯೇನ ಸಚ್ಚೇನಯಂ ಸಾಮೋ, ಕುಲೇ ಜೇಟ್ಠಾಪಚಾಯಿಕೋ;
ಏತೇನ ಸಚ್ಚವಜ್ಜೇನ, ವಿಸಂ ಸಾಮಸ್ಸ ಹಞ್ಞತು.
‘‘ಯೇನ ಸಚ್ಚೇನಯಂ ಸಾಮೋ, ಪಾಣಾ ಪಿಯತರೋ ಮಮ;
ಏತೇನ ಸಚ್ಚವಜ್ಜೇನ, ವಿಸಂ ಸಾಮಸ್ಸ ಹಞ್ಞತು.
‘‘ಯಂ ¶ ಕಿಞ್ಚಿತ್ಥಿ ಕತಂ ಪುಞ್ಞಂ, ಮಯ್ಹಞ್ಚೇವ ಪಿತುಚ್ಚ ತೇ;
ಸಬ್ಬೇನ ತೇನ ಕುಸಲೇನ, ವಿಸಂ ಸಾಮಸ್ಸ ಹಞ್ಞತು’’.
‘‘ದಿಸ್ವಾನ ಪತಿತಂ ಸಾಮಂ, ಪುತ್ತಕಂ ಪಂಸುಕುನ್ಥಿತಂ;
ಅಟ್ಟಿತೋ ಪುತ್ತಸೋಕೇನ, ಪಿತಾ ಸಚ್ಚಂ ಅಭಾಸಥ.
‘‘ಯೇನ ¶ ಸಚ್ಚೇನಯಂ ಸಾಮೋ, ಧಮ್ಮಚಾರೀ ಪುರೇ ಅಹು;
ಏತೇನ ಸಚ್ಚವಜ್ಜೇನ, ವಿಸಂ ಸಾಮಸ್ಸ ಹಞ್ಞತು.
‘‘ಯೇನ ಸಚ್ಚೇನಯಂ ಸಾಮೋ, ಬ್ರಹ್ಮಚಾರೀ ಪುರೇ ಅಹು;
ಏತೇನ ಸಚ್ಚವಜ್ಜೇನ, ವಿಸಂ ಸಾಮಸ್ಸ ಹಞ್ಞತು.
‘‘ಯೇನ ಸಚ್ಚೇನಯಂ ಸಾಮೋ, ಸಚ್ಚವಾದೀ ಪುರೇ ಅಹು;
ಏತೇನ ಸಚ್ಚವಜ್ಜೇನ, ವಿಸಂ ಸಾಮಸ್ಸ ಹಞ್ಞತು.
‘‘ಯೇನ ¶ ಸಚ್ಚೇನಯಂ ಸಾಮೋ, ಮಾತಾಪೇತ್ತಿಭರೋ ಅಹು;
ಏತೇನ ಸಚ್ಚವಜ್ಜೇನ, ವಿಸಂ ಸಾಮಸ್ಸ ಹಞ್ಞತು.
‘‘ಯೇನ ಸಚ್ಚೇನಯಂ ಸಾಮೋ, ಕುಲೇ ಜೇಟ್ಠಾಪಚಾಯಿಕೋ;
ಏತೇನ ಸಚ್ಚವಜ್ಜೇನ, ವಿಸಂ ಸಾಮಸ್ಸ ಹಞ್ಞತು.
‘‘ಯೇನ ಸಚ್ಚೇನಯಂ ಸಾಮೋ, ಪಾಣಾ ಪಿಯತರೋ ಮಮ;
ಏತೇನ ಸಚ್ಚವಜ್ಜೇನ, ವಿಸಂ ಸಾಮಸ್ಸ ಹಞ್ಞತು.
‘‘ಯಂ ಕಿಞ್ಚಿತ್ಥಿ [ಕಿಞ್ಚತ್ಥಿ (ಸೀ. ಪೀ.)] ಕತಂ ಪುಞ್ಞಂ, ಮಯ್ಹಞ್ಚೇವ ಮಾತುಚ್ಚ ತೇ;
ಸಬ್ಬೇನ ತೇನ ಕುಸಲೇನ, ವಿಸಂ ಸಾಮಸ್ಸ ಹಞ್ಞತು.
‘‘ಸಾ ದೇವತಾ ಅನ್ತರಹಿತಾ, ಪಬ್ಬತೇ ಗನ್ಧಮಾದನೇ;
ಸಾಮಸ್ಸ ಅನುಕಮ್ಪಾಯ, ಇಮಂ ಸಚ್ಚಂ ಅಭಾಸಥ.
‘‘ಪಬ್ಬತ್ಯಾಹಂ ಗನ್ಧಮಾದನೇ, ಚಿರರತ್ತನಿವಾಸಿನೀ [ಚಿರಂ ರತ್ತಂ ನಿವಾಸಿನೀ (ಸ್ಯಾ.)];
ನ ಮೇ ಪಿಯತರೋ ಕೋಚಿ, ಅಞ್ಞೋ ಸಾಮೇನ [ಸಾಮಾ ನ (ಸೀ. ಪೀ.)] ವಿಜ್ಜತಿ;
ಏತೇನ ಸಚ್ಚವಜ್ಜೇನ, ವಿಸಂ ಸಾಮಸ್ಸ ಹಞ್ಞತು.
‘‘ಸಬ್ಬೇ ವನಾ ಗನ್ಧಮಯಾ, ಪಬ್ಬತೇ ಗನ್ಧಮಾದನೇ;
ಏತೇನ ಸಚ್ಚವಜ್ಜೇನ, ವಿಸಂ ಸಾಮಸ್ಸ ಹಞ್ಞತು’’.
ತೇಸಂ ¶ ಲಾಲಪ್ಪಮಾನಾನಂ, ಬಹುಂ ಕಾರುಞ್ಞಸಞ್ಹಿತಂ;
ಖಿಪ್ಪಂ ಸಾಮೋ ಸಮುಟ್ಠಾಸಿ, ಯುವಾ ಕಲ್ಯಾಣದಸ್ಸನೋ.
‘‘ಸಾಮೋಹಮಸ್ಮಿ ಭದ್ದಂ ವೋ [ಭದ್ದನ್ತೇ (ಕ.)], ಸೋತ್ಥಿನಾಮ್ಹಿ ಸಮುಟ್ಠಿತೋ;
ಮಾ ಬಾಳ್ಹಂ ಪರಿದೇವೇಥ, ಮಞ್ಜುನಾಭಿವದೇಥ ಮಂ’’.
‘‘ಸ್ವಾಗತಂ ತೇ ಮಹಾರಾಜ, ಅಥೋ ತೇ ಅದುರಾಗತಂ;
ಇಸ್ಸರೋಸಿ ¶ ಅನುಪ್ಪತ್ತೋ, ಯಂ ಇಧತ್ಥಿ ಪವೇದಯ.
‘‘ತಿನ್ದುಕಾನಿ ಪಿಯಾಲಾನಿ, ಮಧುಕೇ ಕಾಸುಮಾರಿಯೋ;
ಫಲಾನಿ ಖುದ್ದಕಪ್ಪಾನಿ, ಭುಞ್ಜ ರಾಜ ವರಂ ವರಂ.
‘‘ಅತ್ಥಿ ¶ ಮೇ ಪಾನಿಯಂ ಸೀತಂ, ಆಭತಂ ಗಿರಿಗಬ್ಭರಾ;
ತತೋ ಪಿವ ಮಹಾರಾಜ, ಸಚೇ ತ್ವಂ ಅಭಿಕಙ್ಖಸಿ’’.
‘‘ಸಮ್ಮುಯ್ಹಾಮಿ ಪಮುಯ್ಹಾಮಿ, ಸಬ್ಬಾ ಮುಯ್ಹನ್ತಿ ಮೇ ದಿಸಾ;
ಪೇತಂ ತಂ ಸಾಮಮದ್ದಕ್ಖಿಂ, ಕೋ ನು ತ್ವಂ ಸಾಮ ಜೀವಸಿ’’.
‘‘ಅಪಿ ಜೀವಂ ಮಹಾರಾಜ, ಪುರಿಸಂ ಗಾಳ್ಹವೇದನಂ;
ಉಪನೀತಮನಸಙ್ಕಪ್ಪಂ, ಜೀವನ್ತಂ ಮಞ್ಞತೇ ಮತಂ.
‘‘ಅಪಿ ಜೀವಂ ಮಹಾರಾಜ, ಪುರಿಸಂ ಗಾಳ್ಹವೇದನಂ;
ತಂ ನಿರೋಧಗತಂ ಸನ್ತಂ, ಜೀವನ್ತಂ ಮಞ್ಞತೇ ಮತಂ.
‘‘ಯೋ ಮಾತರಂ ಪಿತರಂ ವಾ, ಮಚ್ಚೋ ಧಮ್ಮೇನ ಪೋಸತಿ;
ದೇವಾಪಿ ನಂ ತಿಕಿಚ್ಛನ್ತಿ, ಮಾತಾಪೇತ್ತಿಭರಂ ನರಂ.
‘‘ಯೋ ಮಾತರಂ ಪಿತರಂ ವಾ, ಮಚ್ಚೋ ಧಮ್ಮೇನ ಪೋಸತಿ;
ಇಧೇವ ನಂ ಪಸಂಸನ್ತಿ, ಪೇಚ್ಚ ಸಗ್ಗೇ ಪಮೋದತಿ’’.
‘‘ಏಸ ಭಿಯ್ಯೋ ಪಮುಯ್ಹಾಮಿ, ಸಬ್ಬಾ ಮುಯ್ಹನ್ತಿ ಮೇ ದಿಸಾ;
ಸರಣಂ ತಂ ಸಾಮ ಗಚ್ಛಾಮಿ [ಸರಣಂ ಸಾಮ ಗಚ್ಛಾಮಿ (ಸ್ಯಾ. ಕ.)], ತ್ವಞ್ಚ ಮೇ ಸರಣಂ ಭವ’’.
‘‘ಧಮ್ಮಂ ಚರ ಮಹಾರಾಜ, ಮಾತಾಪಿತೂಸು ಖತ್ತಿಯ;
ಇಧ ಧಮ್ಮಂ ಚರಿತ್ವಾನ, ರಾಜ ಸಗ್ಗಂ ಗಮಿಸ್ಸಸಿ.
‘‘ಧಮ್ಮಂ ಚರ ಮಹಾರಾಜ, ಪುತ್ತದಾರೇಸು ಖತ್ತಿಯ;
ಇಧ ಧಮ್ಮಂ ಚರಿತ್ವಾನ, ರಾಜ ಸಗ್ಗಂ ಗಮಿಸ್ಸಸಿ.
‘‘ಧಮ್ಮಂ ¶ ¶ ಚರ ಮಹಾರಾಜ, ಮಿತ್ತಾಮಚ್ಚೇಸು ಖತ್ತಿಯ;
ಇಧ ಧಮ್ಮಂ ಚರಿತ್ವಾನ, ರಾಜ ಸಗ್ಗಂ ಗಮಿಸ್ಸಸಿ.
‘‘ಧಮ್ಮಂ ಚರ ಮಹಾರಾಜ, ವಾಹನೇಸು ಬಲೇಸು ಚ;
ಇಧ ಧಮ್ಮಂ ಚರಿತ್ವಾನ, ರಾಜ ಸಗ್ಗಂ ಗಮಿಸ್ಸಸಿ.
‘‘ಧಮ್ಮಂ ಚರ ಮಹಾರಾಜ, ಗಾಮೇಸು ನಿಗಮೇಸು ಚ;
ಇಧ ಧಮ್ಮಂ ಚರಿತ್ವಾನ, ರಾಜ ಸಗ್ಗಂ ಗಮಿಸ್ಸಸಿ.
‘‘ಧಮ್ಮಂ ಚರ ಮಹಾರಾಜ, ರಟ್ಠೇಸು ಜನಪದೇಸು ಚ;
ಇಧ ಧಮ್ಮಂ ಚರಿತ್ವಾನ, ರಾಜ ಸಗ್ಗಂ ಗಮಿಸ್ಸಸಿ.
‘‘ಧಮ್ಮಂ ಚರ ಮಹಾರಾಜ, ಸಮಣಬ್ರಾಹ್ಮಣೇಸು ಚ;
ಇಧ ಧಮ್ಮಂ ಚರಿತ್ವಾನ, ರಾಜ ಸಗ್ಗಂ ಗಮಿಸ್ಸಸಿ.
‘‘ಧಮ್ಮಂ ಚರ ಮಹಾರಾಜ, ಮಿಗಪಕ್ಖೀಸು ಖತ್ತಿಯ;
ಇಧ ಧಮ್ಮಂ ಚರಿತ್ವಾನ, ರಾಜ ಸಗ್ಗಂ ಗಮಿಸ್ಸಸಿ.
‘‘ಧಮ್ಮಂ ¶ ಚರ ಮಹಾರಾಜ, ಧಮ್ಮೋ ಚಿಣ್ಣೋ ಸುಖಾವಹೋ;
ಇಧ ಧಮ್ಮಂ ಚರಿತ್ವಾನ, ರಾಜ ಸಗ್ಗಂ ಗಮಿಸ್ಸಸಿ.
‘‘ಧಮ್ಮಂ ಚರ ಮಹಾರಾಜ, ಸಇನ್ದಾ ದೇವಾ ಸಬ್ರಹ್ಮಕಾ;
ಸುಚಿಣ್ಣೇನ ದಿವಂ ಪತ್ತಾ, ಮಾ ಧಮ್ಮಂ ರಾಜ ಪಾಮದೋ’’ತಿ.
ಸುವಣ್ಣಸಾಮಜಾತಕಂ [ಸಾಮಜಾತಕಂ (ಸೀ. ಪೀ.)] ತತಿಯಂ.
೫೪೧. ನಿಮಿಜಾತಕಂ (೪)
‘‘ಅಚ್ಛೇರಂ ¶ ವತ ಲೋಕಸ್ಮಿಂ, ಉಪ್ಪಜ್ಜನ್ತಿ ವಿಚಕ್ಖಣಾ;
ಯದಾ ಅಹು ನಿಮಿರಾಜಾ, ಪಣ್ಡಿತೋ ಕುಸಲತ್ಥಿಕೋ.
‘‘ರಾಜಾ ಸಬ್ಬವಿದೇಹಾನಂ, ಅದಾ ದಾನಂ ಅರಿನ್ದಮೋ;
ತಸ್ಸ ತಂ ದದತೋ ದಾನಂ, ಸಙ್ಕಪ್ಪೋ ಉದಪಜ್ಜಥ;
ದಾನಂ ವಾ ಬ್ರಹ್ಮಚರಿಯಂ ವಾ, ಕತಮಂ ಸು ಮಹಪ್ಫಲಂ.
ತಸ್ಸ ಸಙ್ಕಪ್ಪಮಞ್ಞಾಯ, ಮಘವಾ ದೇವಕುಞ್ಜರೋ;
ಸಹಸ್ಸನೇತ್ತೋ ಪಾತುರಹು, ವಣ್ಣೇನ ವಿಹನಂ [ನಿಹನಂ (ಸೀ. ಪೀ.), ವಿಹತಂ (ಸ್ಯಾ. ಕ.)] ತಮಂ.
ಸಲೋಮಹಟ್ಠೋ ¶ ಮನುಜಿನ್ದೋ, ವಾಸವಂ ಅವಚಾ ನಿಮಿ;
‘‘ದೇವತಾ ನುಸಿ ಗನ್ಧಬ್ಬೋ, ಅದು ಸಕ್ಕೋ ಪುರಿನ್ದದೋ.
‘‘ನ ಚ ಮೇ ತಾದಿಸೋ ವಣ್ಣೋ, ದಿಟ್ಠೋ ವಾ ಯದಿ ವಾ ಸುತೋ;
[ನತ್ಥಿ ಸೀ. ಪೀ. ಪೋತ್ಥಕೇಸು] ಆಚಿಕ್ಖ ಮೇ ತ್ವಂ ಭದ್ದನ್ತೇ, ಕಥಂ ಜಾನೇಮು ತಂ ಮಯಂ’’ [ನತ್ಥಿ ಸೀ. ಪೀ. ಪೋತ್ಥಕೇಸು].
ಸಲೋಮಹಟ್ಠಂ ಞತ್ವಾನ, ವಾಸವೋ ಅವಚಾ ನಿಮಿಂ;
‘‘ಸಕ್ಕೋಹಮಸ್ಮಿ ದೇವಿನ್ದೋ, ಆಗತೋಸ್ಮಿ ತವನ್ತಿಕೇ;
ಅಲೋಮಹಟ್ಠೋ ಮನುಜಿನ್ದ, ಪುಚ್ಛ ಪಞ್ಹಂ ಯಮಿಚ್ಛಸಿ’’.
ಸೋ ಚ ತೇನ ಕತೋಕಾಸೋ, ವಾಸವಂ ಅವಚಾ ನಿಮಿ;
‘‘ಪುಚ್ಛಾಮಿ ತಂ ಮಹಾರಾಜ [ಮಹಾಬಾಹು (ಸೀ. ಪೀ.), ದೇವರಾಜ (ಕ.)], ಸಬ್ಬಭೂತಾನಮಿಸ್ಸರ;
ದಾನಂ ವಾ ಬ್ರಹ್ಮಚರಿಯಂ ವಾ, ಕತಮಂ ಸು ಮಹಪ್ಫಲಂ’’.
ಸೋ ಪುಟ್ಠೋ ನರದೇವೇನ, ವಾಸವೋ ಅವಚಾ ನಿಮಿಂ;
‘‘ವಿಪಾಕಂ ಬ್ರಹ್ಮಚರಿಯಸ್ಸ, ಜಾನಂ ಅಕ್ಖಾಸಿಜಾನತೋ.
‘‘ಹೀನೇನ ¶ ಬ್ರಹ್ಮಚರಿಯೇನ, ಖತ್ತಿಯೇ ಉಪಪಜ್ಜತಿ;
ಮಜ್ಝಿಮೇನ ಚ ದೇವತ್ತಂ, ಉತ್ತಮೇನ ವಿಸುಜ್ಝತಿ.
‘‘ನ ¶ ಹೇತೇ ಸುಲಭಾ ಕಾಯಾ, ಯಾಚಯೋಗೇನ ಕೇನಚಿ;
ಯೇ ಕಾಯೇ ಉಪಪಜ್ಜನ್ತಿ, ಅನಾಗಾರಾ ತಪಸ್ಸಿನೋ.
‘‘ದುದೀಪೋ [ದುತಿಪೋ (ಕ.)] ಸಾಗರೋ ಸೇಲೋ, ಮುಜಕಿನ್ದೋ [ಮುಚಲಿನ್ದೋ (ಸೀ. ಸ್ಯಾ. ಪೀ.), ಮುಜಕಿನ್ತೋ (ಕ.)] ಭಗೀರಸೋ;
ಉಸಿನ್ದರೋ [ಉಸೀನರೋ (ಸೀ. ಪೀ.)] ಕಸ್ಸಪೋ ಚ [ಅಟ್ಠಕೋ ಚ (ಸೀ. ಪೀ.), ಅತ್ಥಕೋ ಚ (ಸ್ಯಾ.)], ಅಸಕೋ ಚ ಪುಥುಜ್ಜನೋ.
‘‘ಏತೇ ಚಞ್ಞೇ ಚ ರಾಜಾನೋ, ಖತ್ತಿಯಾ ಬ್ರಾಹ್ಮಣಾ ಬಹೂ;
ಪುಥುಯಞ್ಞಂ ಯಜಿತ್ವಾನ, ಪೇತತ್ತಂ [ಪೇತಂ ತೇ (ಸೀ. ಪೀ.)] ನಾತಿವತ್ತಿಸುಂ.
‘‘ಅಥ ಯೀಮೇ [ಅದ್ಧಾ ಇಮೇ (ಸೀ. ಪೀ.), ಅದ್ಧಾಯಿಮೇ (ಸ್ಯಾ.)] ಅವತ್ತಿಂಸು, ಅನಾಗಾರಾ ತಪಸ್ಸಿನೋ;
ಸತ್ತಿಸಯೋ ಯಾಮಹನು, ಸೋಮಯಾಮೋ [ಸೋಮಯಾಗೋ (ಸೀ. ಸ್ಯಾ. ಪೀ.)] ಮನೋಜವೋ.
‘‘ಸಮುದ್ದೋ ಮಾಘೋ ಭರತೋ ಚ, ಇಸಿ ಕಾಲಪುರಕ್ಖತೋ [ಕಾಲಿಕರಿಕ್ಖಿಯೋ (ಸೀ. ಪೀ.)];
ಅಙ್ಗೀರಸೋ ಕಸ್ಸಪೋ ಚ, ಕಿಸವಚ್ಛೋ ಅಕತ್ತಿ [ಅಕಿತ್ತಿ (ಸೀ. ಪೀ.), ಅಕನ್ತಿ (ಸ್ಯಾ.)] ಚ.
‘‘ಉತ್ತರೇನ ¶ ನದೀ ಸೀದಾ, ಗಮ್ಭೀರಾ ದುರತಿಕ್ಕಮಾ;
ನಳಗ್ಗಿವಣ್ಣಾ ಜೋತನ್ತಿ, ಸದಾ ಕಞ್ಚನಪಬ್ಬತಾ.
‘‘ಪರೂಳ್ಹಕಚ್ಛಾ ತಗರಾ, ರೂಳ್ಹಕಚ್ಛಾ ವನಾ ನಗಾ;
ತತ್ರಾಸುಂ ದಸಸಹಸ್ಸಾ, ಪೋರಾಣಾ ಇಸಯೋ ಪುರೇ.
‘‘ಅಹಂ ¶ ಸೇಟ್ಠೋಸ್ಮಿ ದಾನೇನ, ಸಂಯಮೇನ ದಮೇನ ಚ;
ಅನುತ್ತರಂ ವತಂ ಕತ್ವಾ, ಪಕಿರಚಾರೀ ಸಮಾಹಿತೇ.
‘‘ಜಾತಿಮನ್ತಂ ಅಜಚ್ಚಞ್ಚ, ಅಹಂ ಉಜುಗತಂ ನರಂ;
ಅತಿವೇಲಂ ನಮಸ್ಸಿಸ್ಸಂ, ಕಮ್ಮಬನ್ಧೂ ಹಿ ಮಾಣವಾ [ಮಾತಿಯಾ (ಸೀ. ಪೀ.)].
‘‘ಸಬ್ಬೇ ವಣ್ಣಾ ಅಧಮ್ಮಟ್ಠಾ, ಪತನ್ತಿ ನಿರಯಂ ಅಧೋ;
ಸಬ್ಬೇ ವಣ್ಣಾ ವಿಸುಜ್ಝನ್ತಿ, ಚರಿತ್ವಾ ಧಮ್ಮಮುತ್ತಮಂ’’.
ಇದಂ ವತ್ವಾನ ಮಘವಾ, ದೇವರಾಜಾ ಸುಜಮ್ಪತಿ;
ವೇದೇಹಮನುಸಾಸಿತ್ವಾ, ಸಗ್ಗಕಾಯಂ ಅಪಕ್ಕಮಿ.
‘‘ಇಮಂ ಭೋನ್ತೋ ನಿಸಾಮೇಥ, ಯಾವನ್ತೇತ್ಥ ಸಮಾಗತಾ;
ಧಮ್ಮಿಕಾನಂ ಮನುಸ್ಸಾನಂ, ವಣ್ಣಂ ಉಚ್ಚಾವಚಂ ಬಹುಂ.
‘‘ಯಥಾ ಅಯಂ ನಿಮಿರಾಜಾ, ಪಣ್ಡಿತೋ ಕುಸಲತ್ಥಿಕೋ;
ರಾಜಾ ಸಬ್ಬವಿದೇಹಾನಂ, ಅದಾ ದಾನಂ ಅರಿನ್ದಮೋ.
‘‘ತಸ್ಸ ತಂ ದದತೋ ದಾನಂ, ಸಙ್ಕಪ್ಪೋ ಉದಪಜ್ಜಥ;
ದಾನಂ ವಾ ಬ್ರಹ್ಮಚರಿಯಂ ವಾ, ಕತಮಂ ಸು ಮಹಪ್ಫಲಂ’’.
ಅಬ್ಭುತೋ ವತ ಲೋಕಸ್ಮಿಂ, ಉಪ್ಪಜ್ಜಿ ಲೋಮಹಂಸನೋ;
ದಿಬ್ಬೋ ರಥೋ ಪಾತುರಹು, ವೇದೇಹಸ್ಸ ಯಸಸ್ಸಿನೋ.
ದೇವಪುತ್ತೋ ¶ ಮಹಿದ್ಧಿಕೋ, ಮಾತಲಿ ದೇವಸಾರಥಿ;
ನಿಮನ್ತಯಿತ್ಥ ರಾಜಾನಂ, ವೇದೇಹಂ ಮಿಥಿಲಗ್ಗಹಂ.
‘‘ಏಹಿಮಂ ರಥಮಾರುಯ್ಹ, ರಾಜಸೇಟ್ಠ ದಿಸಮ್ಪತಿ;
ದೇವಾ ದಸ್ಸನಕಾಮಾ ತೇ, ತಾವತಿಂಸಾ ಸಇನ್ದಕಾ;
ಸರಮಾನಾ ¶ ಹಿ ತೇ ದೇವಾ, ಸುಧಮ್ಮಾಯಂ ಸಮಚ್ಛರೇ’’.
ತತೋ ¶ ರಾಜಾ ತರಮಾನೋ, ವೇದೇಹೋ ಮಿಥಿಲಗ್ಗಹೋ;
ಆಸನಾ ವುಟ್ಠಹಿತ್ವಾನ, ಪಮುಖೋ ರಥಮಾರುಹಿ.
ಅಭಿರೂಳ್ಹಂ ರಥಂ ದಿಬ್ಬಂ, ಮಾತಲಿ ಏತದಬ್ರವಿ;
‘‘ಕೇನ ತಂ ನೇಮಿ ಮಗ್ಗೇನ, ರಾಜಸೇಟ್ಠ ದಿಸಮ್ಪತಿ;
ಯೇನ ವಾ ಪಾಪಕಮ್ಮನ್ತಾ, ಪುಞ್ಞಕಮ್ಮಾ ಚ ಯೇ ನರಾ’’.
‘‘ಉಭಯೇನೇವ ಮಂ ನೇಹಿ, ಮಾತಲಿ ದೇವಸಾರಥಿ;
ಯೇನ ವಾ ಪಾಪಕಮ್ಮನ್ತಾ, ಪುಞ್ಞಕಮ್ಮಾ ಚ ಯೇ ನರಾ’’.
‘‘ಕೇನ ತಂ ಪಠಮಂ ನೇಮಿ, ರಾಜಸೇಟ್ಠ ದಿಸಮ್ಪತಿ;
ಯೇನ ವಾ ಪಾಪಕಮ್ಮನ್ತಾ, ಪುಞ್ಞಕಮ್ಮಾ ಚ ಯೇ ನರಾ’’.
‘‘ನಿರಯೇ [ನಿರಿಯಂ (ಸ್ಯಾ. ಕ.)] ತಾವ ಪಸ್ಸಾಮಿ, ಆವಾಸೇ [ಆವಾಸಂ (ಸ್ಯಾ. ಕ.)] ಪಾಪಕಮ್ಮಿನಂ;
ಠಾನಾನಿ ಲುದ್ದಕಮ್ಮಾನಂ, ದುಸ್ಸೀಲಾನಞ್ಚ ಯಾ ಗತಿ’’.
ದಸ್ಸೇಸಿ ಮಾತಲಿ ರಞ್ಞೋ, ದುಗ್ಗಂ ವೇತರಣಿಂ ನದಿಂ;
ಕುಥಿತಂ ಖಾರಸಂಯುತ್ತಂ, ತತ್ತಂ ಅಗ್ಗಿಸಿಖೂಪಮಂ [ಅಗ್ಗಿಸಮೋದಕಂ (ಕ.)].
ನಿಮೀ ಹವೇ ಮಾತಲಿಮಜ್ಝಭಾಸಥ [ಮಾತಲಿಮಜ್ಝಭಾಸಿ (ಸ್ಯಾ.)], ದಿಸ್ವಾ ಜನಂ ಪತಮಾನಂ ವಿದುಗ್ಗೇ;
‘‘ಭಯಞ್ಹಿ ಮಂ ವಿನ್ದತಿ ಸೂತ ದಿಸ್ವಾ, ಪುಚ್ಛಾಮಿ ತಂ ಮಾತಲಿ ದೇವಸಾರಥಿ;
ಇಮೇ ನು ಮಚ್ಚಾ ಕಿಮಕಂಸು ಪಾಪಂ, ಯೇಮೇ ಜನಾ ವೇತರಣಿಂ ಪತನ್ತಿ’’.
ತಸ್ಸ ¶ ಪುಟ್ಠೋ ವಿಯಾಕಾಸಿ, ಮಾತಲಿ ದೇವಸಾರಥಿ;
ವಿಪಾಕಂ ಪಾಪಕಮ್ಮಾನಂ, ಜಾನಂ ಅಕ್ಖಾಸಿಜಾನತೋ.
‘‘ಯೇ ದುಬ್ಬಲೇ ಬಲವನ್ತಾ ಜೀವಲೋಕೇ, ಹಿಂಸನ್ತಿ ರೋಸನ್ತಿ ಸುಪಾಪಧಮ್ಮಾ;
ತೇ ಲುದ್ದಕಮ್ಮಾ ಪಸವೇತ್ವ ಪಾಪಂ, ತೇಮೇ ಜನಾ ವೇತರಣಿಂ ಪತನ್ತಿ’’.
‘‘ಸಾಮಾ ¶ ಚ ಸೋಣಾ ಸಬಲಾ ಚ ಗಿಜ್ಝಾ, ಕಾಕೋಲಸಙ್ಘಾ ಅದನ್ತಿ [ಅದೇನ್ತಿ (ಸೀ. ಸ್ಯಾ. ಪೀ.) ಏವಮುಪರಿಪಿ] ಭೇರವಾ;
ಭಯಞ್ಹಿ ಮಂ ವಿನ್ದತಿ ಸೂತ ದಿಸ್ವಾ, ಪುಚ್ಛಾಮಿ ತಂ ಮಾತಲಿ ದೇವಸಾರಥಿ;
ಇಮೇ ನು ಮಚ್ಚಾ ಕಿಮಕಂಸು ಪಾಪಂ, ಯೇಮೇ ಜನೇ ಕಾಕೋಲಸಙ್ಘಾ ಅದನ್ತಿ’’.
ತಸ್ಸ ಪುಟ್ಠೋ ವಿಯಾಕಾಸಿ, ಮಾತಲಿ ದೇವಸಾರಥಿ;
ವಿಪಾಕಂ ಪಾಪಕಮ್ಮಾನಂ, ಜಾನಂ ಅಕ್ಖಾಸಿಜಾನತೋ.
‘‘ಯೇ ¶ ಕೇಚಿಮೇ ಮಚ್ಛರಿನೋ ಕದರಿಯಾ, ಪರಿಭಾಸಕಾ ಸಮಣಬ್ರಾಹ್ಮಣಾನಂ;
ಹಿಂಸನ್ತಿ ರೋಸನ್ತಿ ಸುಪಾಪಧಮ್ಮಾ, ತೇ ಲುದ್ದಕಮ್ಮಾ ಪಸವೇತ್ವ ಪಾಪಂ;
ತೇಮೇ ಜನೇ ಕಾಕೋಲಸಙ್ಘಾ ಅದನ್ತಿ’’.
‘‘ಸಜೋತಿಭೂತಾ ಪಥವಿಂ ಕಮನ್ತಿ, ತತ್ತೇಹಿ ¶ ಖನ್ಧೇಹಿ ಚ ಪೋಥಯನ್ತಿ;
ಭಯಞ್ಹಿ ಮಂ ವಿನ್ದತಿ ಸೂತ ದಿಸ್ವಾ, ಪುಚ್ಛಾಮಿ ತಂ ಮಾತಲಿ ದೇವಸಾರಥಿ;
ಇಮೇ ನು ಮಚ್ಚಾ ಕಿಮಕಂಸು ಪಾಪಂ, ಯೇಮೇ ಜನಾ ಖನ್ಧಹತಾ ಸಯನ್ತಿ’’.
ತಸ್ಸ ಪುಟ್ಠೋ ವಿಯಾಕಾಸಿ, ಮಾತಲಿ ದೇವಸಾರಥಿ;
ವಿಪಾಕಂ ಪಾಪಕಮ್ಮಾನಂ, ಜಾನಂ ಅಕ್ಖಾಸಿಜಾನತೋ.
‘‘ಯೇ ಜೀವಲೋಕಸ್ಮಿ ಸುಪಾಪಧಮ್ಮಿನೋ, ನರಞ್ಚ ನಾರಿಞ್ಚ ಅಪಾಪಧಮ್ಮಂ;
ಹಿಂಸನ್ತಿ ರೋಸನ್ತಿ ಸುಪಾಪಧಮ್ಮಾ [ಸುಪಾಪಧಮ್ಮಿನೋ (ಕ.)], ತೇ ಲುದ್ದಕಮ್ಮಾ ಪಸವೇತ್ವ ಪಾಪಂ;
ತೇಮೇ ಜನಾ ಖನ್ಧಹತಾ ಸಯನ್ತಿ’’.
‘‘ಅಙ್ಗಾರಕಾಸುಂ ¶ ಅಪರೇ ಫುಣನ್ತಿ [ಥುನನ್ತಿ (ಸೀ. ಸ್ಯಾ.), ಫುನನ್ತಿ (ಪೀ.)], ನರಾ ರುದನ್ತಾ ಪರಿದಡ್ಢಗತ್ತಾ;
ಭಯಞ್ಹಿ ಮಂ ವಿದನ್ತಿ ಸೂತ ದಿಸ್ವಾ, ಪುಚ್ಛಾಮಿ ತಂ ಮಾತಲಿ ದೇವಸಾರಥಿ;
ಇಮೇ ನು ಮಚ್ಚಾ ಕಿಮಕಂಸು ಪಾಪಂ, ಯೇಮೇ ಜನಾ ಅಙ್ಗಾರಕಾಸುಂ ಫುಣನ್ತಿ’’.
ತಸ್ಸ ಪುಟ್ಠೋ ವಿಯಾಕಾಸಿ, ಮಾತಲಿ ದೇವಸಾರಥಿ;
ವಿಪಾಕಂ ಪಾಪಕಮ್ಮಾನಂ, ಜಾನಂ ಅಕ್ಖಾಸಿಜಾನತೋ.
‘‘ಯೇ ¶ ಕೇಚಿ ಪೂಗಾಯ ಧನಸ್ಸ [ಪೂಗಾಯತನಸ್ಸ (ಸೀ. ಪೀ.)] ಹೇತು, ಸಕ್ಖಿಂ ಕರಿತ್ವಾ ಇಣಂ ಜಾಪಯನ್ತಿ;
ತೇ ಜಾಪಯಿತ್ವಾ ಜನತಂ ಜನಿನ್ದ, ತೇ ಲುದ್ದಕಮ್ಮಾ ಪಸವೇತ್ವ ಪಾಪಂ;
ತೇಮೇ ಜನಾ ಅಙ್ಗಾರಕಾಸುಂ ಫುಣನ್ತಿ’’.
‘‘ಸಜೋತಿಭೂತಾ ಜಲಿತಾ ಪದಿತ್ತಾ, ಪದಿಸ್ಸತಿ ಮಹತೀ ಲೋಹಕುಮ್ಭೀ;
ಭಯಞ್ಹಿ ಮಂ ವಿನ್ದತಿ ಸೂತ ದಿಸ್ವಾ, ಪುಚ್ಛಾಮಿ ತಂ ಮಾತಲಿ ದೇವಸಾರಥಿ;
ಇಮೇ ನು ಮಚ್ಚಾ ಕಿಮಕಂಸು ಪಾಪಂ, ಯೇಮೇ ಜನಾ ಅವಂಸಿರಾ ಲೋಹಕುಮ್ಭಿಂ ಪತನ್ತಿ’’.
ತಸ್ಸ ಪುಟ್ಠೋ ವಿಯಾಕಾಸಿ, ಮಾತಲಿ ದೇವಸಾರಥಿ;
ವಿಪಾಕಂ ಪಾಪಕಮ್ಮಾನಂ, ಜಾನಂ ಅಕ್ಖಾಸಿಜಾನತೋ.
‘‘ಯೇ ಸೀಲವನ್ತಂ [ಸೀಲವಂ (ಪೀ.)] ಸಮಣಂ ಬ್ರಾಹ್ಮಣಂ ವಾ, ಹಿಂಸನ್ತಿ ರೋಸನ್ತಿ ಸುಪಾಪಧಮ್ಮಾ;
ತೇ ಲುದ್ದಕಮ್ಮಾ ಪಸವೇತ್ವ ಪಾಪಂ, ತೇಮೇ ಜನಾ ಅವಂಸಿರಾ ಲೋಹಕುಮ್ಭಿಂ ಪತನ್ತಿ’’.
‘‘ಲುಞ್ಚನ್ತಿ ¶ ಗೀವಂ ಅಥ ವೇಠಯಿತ್ವಾ [ಅವಿವೇಠಯಿತ್ವಾ (ಕ.)], ಉಣ್ಹೋದಕಸ್ಮಿಂ ಪಕಿಲೇದಯಿತ್ವಾ [ಪಕಿಲೇದಯಿತ್ವಾ (ಸೀ. ಪೀ.)];
ಭಯಞ್ಹಿ ಮಂ ವಿನ್ದತಿ ಸೂತ ದಿಸ್ವಾ, ಪುಚ್ಛಾಮಿ ¶ ತಂ ಮಾತಲಿ ದೇವಸಾರಥಿ;
ಇಮೇ ನು ಮಚ್ಚಾ ಕಿಮಕಂಸು ಪಾಪಂ, ಯೇಮೇ ಜನಾ ಲುತ್ತಸಿರಾ ಸಯನ್ತಿ’’.
ತಸ್ಸ ¶ ಪುಟ್ಠೋ ವಿಯಾಕಾಸಿ, ಮಾತಲಿ ದೇವಸಾರಥಿ;
ವಿಪಾಕಂ ಪಾಪಕಮ್ಮಾನಂ, ಜಾನಂ ಅಕ್ಖಾಸಿಜಾನತೋ.
‘‘ಯೇ ಜೀವಲೋಕಸ್ಮಿ ಸುಪಾಪಧಮ್ಮಿನೋ, ಪಕ್ಖೀ ಗಹೇತ್ವಾನ ವಿಹೇಠಯನ್ತಿ ತೇ;
ವಿಹೇಠಯಿತ್ವಾ ಸಕುಣಂ ಜನಿನ್ದ, ತೇ ಲುದ್ದಕಾಮಾ ಪಸವೇತ್ವ ಪಾಪಂ;
ತೇಮೇ ಜನಾ ಲುತ್ತಸಿರಾ ಸಯನ್ತಿ.
‘‘ಪಹೂತತೋಯಾ ಅನಿಗಾಧಕೂಲಾ [ಅನಿಖಾತಕೂಲಾ (ಸೀ. ಸ್ಯಾ. ಪೀ.)], ನದೀ ಅಯಂ ಸನ್ದತಿ ಸುಪ್ಪತಿತ್ಥಾ;
ಘಮ್ಮಾಭಿತತ್ತಾ ಮನುಜಾ ಪಿವನ್ತಿ, ಪೀತಞ್ಚ [ಪಿವತಂ ಚ (ಸೀ. ಸ್ಯಾ. ಪೀ. ಕ.)] ತೇಸಂ ಭುಸ ಹೋತಿ ಪಾನಿ.
‘‘ಭಯಞ್ಹಿ ಮಂ ವಿನ್ದತಿ ಸೂತ ದಿಸ್ವಾ, ಪುಚ್ಛಾಮಿ ತಂ ಮಾತಲಿ ದೇವಸಾರಥಿ;
ಇಮೇ ನು ಮಚ್ಚಾ ಕಿಮಕಂಸು ಪಾಪಂ, ಪೀತಞ್ಚ ತೇಸಂ ಭುಸ ಹೋತಿ ಪಾನಿ’’.
ತಸ್ಸ ಪುಟ್ಠೋ ವಿಯಾಕಾಸಿ, ಮಾತಲಿ ದೇವಸಾರಥಿ;
ವಿಪಾಕಂ ¶ ಪಾಪಕಮ್ಮಾನಂ, ಜಾನಂ ಅಕ್ಖಾಸಿಜಾನತೋ.
‘‘ಯೇ ಸುದ್ಧಧಞ್ಞಂ ಪಲಾಸೇನ ಮಿಸ್ಸಂ, ಅಸುದ್ಧಕಮ್ಮಾ ಕಯಿನೋ ದದನ್ತಿ;
ಘಮ್ಮಾಭಿತತ್ತಾನ ಪಿಪಾಸಿತಾನಂ, ಪೀತಞ್ಚ ತೇಸಂ ಭುಸ ಹೋತಿ ಪಾನಿ’’.
‘‘ಉಸೂಹಿ ¶ ಸತ್ತೀಹಿ ಚ ತೋಮರೇಹಿ, ದುಭಯಾನಿ ಪಸ್ಸಾನಿ ತುದನ್ತಿ ಕನ್ದತಂ;
ಭಯಞ್ಹಿ ಮಂ ವಿನ್ದತಿ ಸೂತ ದಿಸ್ವಾ, ಪುಚ್ಛಾಮಿ ತಂ ಮಾತಲಿ ದೇವಸಾರಥಿ;
ಇಮೇ ನು ಮಚ್ಚಾ ಕಿಮಕಂಸು ಪಾಪಂ, ಯೇಮೇ ಜನಾ ಸತ್ತಿಹತಾ ಸಯನ್ತಿ’’.
ತಸ್ಸ ಪುಟ್ಠೋ ವಿಯಾಕಾಸಿ, ಮಾತಲಿ ದೇವಸಾರಥಿ;
ವಿಪಾಕಂ ಪಾಪಕಮ್ಮಾನಂ, ಜಾನಂ ಅಕ್ಖಾಸಿಜಾನತೋ.
‘‘ಯೇ ಜೀವಲೋಕಸ್ಮಿ ಅಸಾಧುಕಮ್ಮಿನೋ, ಅದಿನ್ನಮಾದಾಯ ಕರೋನ್ತಿ ಜೀವಿಕಂ;
ಧಞ್ಞಂ ಧನಂ ರಜತಂ ಜಾತರೂಪಂ, ಅಜೇಳಕಞ್ಚಾಪಿ ಪಸುಂ ಮಹಿಂಸಂ [ಮಹೀಸಂ (ಸೀ. ಪೀ.)];
ತೇ ಲುದ್ದಕಮ್ಮಾ ಪಸವೇತ್ವ ಪಾಪಂ, ತೇಮೇ ಜನಾ ಸತ್ತಿಹತಾ ಸಯನ್ತಿ’’.
‘‘ಗೀವಾಯ ಬದ್ಧಾ ಕಿಸ್ಸ ಇಮೇ ಪುನೇಕೇ, ಅಞ್ಞೇ ¶ ವಿಕನ್ತಾ [ವಿಕತ್ತಾ (ಸೀ. ಪೀ.)] ಬಿಲಕತಾ ಸಯನ್ತಿ [ಪುನೇಕೇ (ಸೀ. ಪೀ.)];
ಭಯಞ್ಹಿ ಮಂ ವಿನ್ದತಿ ಸೂತ ದಿಸ್ವಾ, ಪುಚ್ಛಾಮಿ ತಂ ಮಾತಲಿ ದೇವಸಾರಥಿ;
ಇಮೇ ನು ಮಚ್ಚಾ ಕಿಮಕಂಸು ಪಾಪಂ, ಯೇಮೇ ಜನಾ ಬಿಲಕತಾ ಸಯನ್ತಿ’’.
ತಸ್ಸ ಪುಟ್ಠೋ ವಿಯಾಕಾಸಿ, ಮಾತಲಿ ದೇವಸಾರಥಿ;
ವಿಪಾಕಂ ಪಾಪಕಮ್ಮಾನಂ, ಜಾನಂ ಅಕ್ಖಾಸಿಜಾನತೋ.
‘‘ಓರಬ್ಭಿಕಾ ಸೂಕರಿಕಾ ಚ ಮಚ್ಛಿಕಾ, ಪಸುಂ ಮಹಿಂಸಞ್ಚ ಅಜೇಳಕಞ್ಚ;
ಹನ್ತ್ವಾನ ಸೂನೇಸು ಪಸಾರಯಿಂಸು, ತೇ ಲುದ್ದಕಮ್ಮಾ ಪಸವೇತ್ವ ಪಾಪಂ;
ತೇಮೇ ಜನಾ ಬಿಲಕತಾ ಸಯನ್ತಿ.
‘‘ರಹದೋ ¶ ¶ ಅಯಂ ಮುತ್ತಕರೀಸಪೂರೋ, ದುಗ್ಗನ್ಧರೂಪೋ ಅಸುಚಿ ಪೂತಿ ವಾತಿ;
ಖುದಾಪರೇತಾ ಮನುಜಾ ಅದನ್ತಿ, ಭಯಞ್ಹಿ ಮಂ ವಿನ್ದತಿ ಸೂತ ದಿಸ್ವಾ;
ಪುಚ್ಛಾಮಿ ತಂ ಮಾತಲಿ ದೇವಸಾರಥಿ, ಇಮೇ ನು ಮಚ್ಚಾ ಕಿಮಕಂಸು ಪಾಪಂ;
ಯೇಮೇ ಜನಾ ಮುತ್ತಕರೀಸಭಕ್ಖಾ’’.
ತಸ್ಸ ಪುಟ್ಠೋ ವಿಯಾಕಾಸಿ, ಮಾತಲಿ ದೇವಸಾರಥಿ;
ವಿಪಾಕಂ ¶ ಪಾಪಕಮ್ಮಾನಂ, ಜಾನಂ ಅಕ್ಖಾಸಿಜಾನತೋ.
‘‘ಯೇ ಕೇಚಿಮೇ ಕಾರಣಿಕಾ ವಿರೋಸಕಾ, ಪರೇಸಂ ಹಿಂಸಾಯ ಸದಾ ನಿವಿಟ್ಠಾ;
ತೇ ಲುದ್ದಕಮ್ಮಾ ಪಸವೇತ್ವ ಪಾಪಂ, ಮಿತ್ತದ್ದುನೋ ಮೀಳ್ಹಮದನ್ತಿ ಬಾಲಾ.
‘‘ರಹದೋ ಅಯಂ ಲೋಹಿತಪುಬ್ಬಪೂರೋ, ದುಗ್ಗನ್ಧರೂಪೋ ಅಸುಚಿ ಪೂತಿ ವಾತಿ;
ಘಮ್ಮಾಭಿತತ್ತಾ ಮನುಜಾ ಪಿವನ್ತಿ, ಭಯಞ್ಹಿ ಮಂ ವಿನ್ದತಿ ಸೂತ ದಿಸ್ವಾ;
ಪುಚ್ಛಾಮಿ ತಂ ಮಾತಲಿ ದೇವಸಾರಥಿ, ಇಮೇ ನು ಮಚ್ಚಾ ಕಿಮಕಂಸು ಪಾಪಂ;
ಯೇಮೇ ಜನಾ ಲೋಹಿತಪುಬ್ಬಭಕ್ಖಾ’’.
ತಸ್ಸ ಪುಟ್ಠೋ ವಿಯಾಕಾಸಿ, ಮಾತಲಿ ದೇವಸಾರಥಿ;
ವಿಪಾಕಂ ಪಾಪಕಮ್ಮಾನಂ, ಜಾನಂ ಅಕ್ಖಾಸಿಜಾನತೋ.
‘‘ಯೇ ಮಾತರಂ ವಾ ಪಿತರಂ ವಾ ಜೀವಲೋಕೇ [ಪಿತರಂ ವ ಜೀವಲೋಕೇ (ಸೀ.), ಪಿತರಂ ವ ಲೋಕೇ (ಪೀ.)], ಪಾರಾಜಿಕಾ ಅರಹನ್ತೇ ಹನನ್ತಿ;
ತೇ ಲುದ್ದಕಮ್ಮಾ ಪಸವೇತ್ವ ಪಾಪಂ, ತೇಮೇ ಜನಾ ಲೋಹಿತಪುಬ್ಬಭಕ್ಖಾ’’.
‘‘ಜಿವ್ಹಞ್ಚ ¶ ಪಸ್ಸ ಬಳಿಸೇನ ವಿದ್ಧಂ, ವಿಹತಂ ಯಥಾ ಸಙ್ಕುಸತೇನ ಚಮ್ಮಂ;
ಫನ್ದನ್ತಿ ¶ ಮಚ್ಛಾವ ಥಲಮ್ಹಿ ಖಿತ್ತಾ, ಮುಞ್ಚನ್ತಿ ಖೇಳಂ ರುದಮಾನಾ ಕಿಮೇತೇ.
‘‘ಭಯಞ್ಹಿ ಮಂ ವಿನ್ದತಿ ಸೂತ ದಿಸ್ವಾ, ಪುಚ್ಛಾಮಿ ತಂ ಮಾತಲಿ ದೇವಸಾರಥಿ;
ಇಮೇ ನು ಮಚ್ಚಾ ಕಿಮಕಂಸು ಪಾಪಂ, ಯೇಮೇ ಜನಾ ವಙ್ಕಘಸ್ತಾ ಸಯನ್ತಿ’’.
ತಸ್ಸ ಪುಟ್ಠೋ ವಿಯಾಕಾಸಿ, ಮಾತಲಿ ದೇವಸಾರಥಿ;
ವಿಪಾಕಂ ಪಾಪಕಮ್ಮಾನಂ, ಜಾನಂ ಅಕ್ಖಾಸಿಜಾನತೋ.
‘‘ಯೇ ಕೇಚಿ ಸನ್ಧಾನಗತಾ [ಸನ್ಥಾನಗತಾ (ಸೀ. ಪೀ.), ಸಣ್ಠಾನಗತಾ (ಸ್ಯಾ.)] ಮನುಸ್ಸಾ, ಅಗ್ಘೇನ ಅಗ್ಘಂ ಕಯಂ ಹಾಪಯನ್ತಿ;
ಕುಟೇನ ಕುಟಂ ಧನಲೋಭಹೇತು, ಛನ್ನಂ ಯಥಾ ವಾರಿಚರಂ ವಧಾಯ.
‘‘ನ ಹಿ ಕೂಟಕಾರಿಸ್ಸ ಭವನ್ತಿ ತಾಣಾ, ಸಕೇಹಿ ಕಮ್ಮೇಹಿ ಪುರಕ್ಖತಸ್ಸ;
ತೇ ಲುದ್ದಕಮ್ಮಾ ಪಸವೇತ್ವ ಪಾಪಂ, ತೇಮೇ ಜನಾ ವಙ್ಕಘಸ್ತಾ ಸಯನ್ತಿ’’.
‘‘ನಾರೀ ಇಮಾ ಸಮ್ಪರಿಭಿನ್ನಗತ್ತಾ, ಪಗ್ಗಯ್ಹ ಕನ್ದನ್ತಿ ಭುಜೇ ದುಜಚ್ಚಾ;
ಸಮ್ಮಕ್ಖಿತಾ [ಸಮಕ್ಖಿತಾ (ಸ್ಯಾ.), ಸಮಕ್ಖಿಕಾ (ಕ.)] ಲೋಹಿತಪುಬ್ಬಲಿತ್ತಾ, ಗಾವೋ ಯಥಾ ಆಘಾತನೇ ವಿಕನ್ತಾ;
ತಾ ¶ ಭೂಮಿಭಾಗಸ್ಮಿಂ ಸದಾ ನಿಖಾತಾ, ಖನ್ಧಾತಿವತ್ತನ್ತಿ ಸಜೋತಿಭೂತಾ.
‘‘ಭಯಞ್ಹಿ ¶ ಮಂ ವಿನ್ದತಿ ಸೂತ ದಿಸ್ವಾ, ಪುಚ್ಛಾಮಿ ತಂ ಮಾತಲಿ ದೇವಸಾರಥಿ;
ಇಮಾ ನು ನಾರಿಯೋ ಕಿಮಕಂಸು ಪಾಪಂ, ಯಾ ಭೂಮಿಭಾಗಸ್ಮಿಂ ಸದಾ ನಿಖಾತಾ;
ಖನ್ಧಾತಿವತ್ತನ್ತಿ ಸಜೋತಿಭೂತಾ’’.
ತಸ್ಸ ¶ ಪುಟ್ಠೋ ವಿಯಾಕಾಸಿ, ಮಾತಲಿ ದೇವಸಾರಥಿ;
ವಿಪಾಕಂ ಪಾಪಕಮ್ಮಾನಂ, ಜಾನಂ ಅಕ್ಖಾಸಿಜಾನತೋ.
‘‘ಕೋಲಿತ್ಥಿಯಾಯೋ [ಕೋಲಿನಿಯಾಯೋ (ಸೀ. ಪೀ.)] ಇಧ ಜೀವಲೋಕೇ, ಅಸುದ್ಧಕಮ್ಮಾ ಅಸತಂ ಅಚಾರುಂ;
ತಾ ದಿತ್ತರೂಪಾ [ಧುತ್ತರೂಪಾ (ಕ.)] ಪತಿ ವಿಪ್ಪಹಾಯ, ಅಞ್ಞಂ ಅಚಾರುಂ ರತಿಖಿಡ್ಡಹೇತು;
ತಾ ಜೀವಲೋಕಸ್ಮಿಂ ರಮಾಪಯಿತ್ವಾ, ಖನ್ಧಾತಿವತ್ತನ್ತಿ ಸಜೋತಿಭೂತಾ.
‘‘ಪಾದೇ ಗಹೇತ್ವಾ ಕಿಸ್ಸ ಇಮೇ ಪುನೇಕೇ, ಅವಂಸಿರಾ ನರಕೇ ಪಾತಯನ್ತಿ;
ಭಯಞ್ಹಿ ಮಂ ವಿನ್ದತಿ ಸೂತ ದಿಸ್ವಾ, ಪುಚ್ಛಾಮಿ ತಂ ಮಾತಲಿ ದೇವಸಾರಥಿ;
ಇಮೇ ¶ ನು ಮಚ್ಚಾ ಕಿಮಕಂಸು ಪಾಪಂ, ಯೇಮೇ ಜನಾ ಅವಂಸಿರಾ ನರಕೇ ಪಾತಯನ್ತಿ’’.
ತಸ್ಸ ಪುಟ್ಠೋ ವಿಯಾಕಾಸಿ, ಮಾತಲಿ ದೇವಸಾರಥಿ;
ವಿಪಾಕಂ ಪಾಪಕಮ್ಮಾನಂ, ಜಾನಂ ಅಕ್ಖಾಸಿಜಾನತೋ.
‘‘ಯೇ ಜೀವಲೋಕಸ್ಮಿ ಅಸಾಧುಕಮ್ಮಿನೋ, ಪರಸ್ಸ ದಾರಾನಿ ಅತಿಕ್ಕಮನ್ತಿ;
ತೇ ತಾದಿಸಾ ಉತ್ತಮಭಣ್ಡಥೇನಾ, ತೇಮೇ ಜನಾ ಅವಂಸಿರಾ ನರಕೇ ಪಾತಯನ್ತಿ.
‘‘ತೇ ವಸ್ಸಪೂಗಾನಿ ಬಹೂನಿ ತತ್ಥ, ನಿರಯೇಸು ದುಕ್ಖಂ ವೇದನಂ ವೇದಯನ್ತಿ;
ನ ಹಿ ಪಾಪಕಾರಿಸ್ಸ [ಕೂಟಕಾರಿಸ್ಸ (ಕ.)] ಭವನ್ತಿ ತಾಣಾ, ಸಕೇಹಿ ಕಮ್ಮೇಹಿ ಪುರಕ್ಖತಸ್ಸ;
ತೇ ಲುದ್ದಕಮ್ಮಾ ಪಸವೇತ್ವ ಪಾಪಂ, ತೇಮೇ ಜನಾ ಅವಂಸಿರಾ ನರಕೇ ಪಾತಯನ್ತಿ’’.
‘‘ಉಚ್ಚಾವಚಾಮೇ ¶ ವಿವಿಧಾ ಉಪಕ್ಕಮಾ, ನಿರಯೇಸು ದಿಸ್ಸನ್ತಿ ಸುಘೋರರೂಪಾ;
ಭಯಞ್ಹಿ ಮಂ ವಿನ್ದತಿ ಸೂತ ದಿಸ್ವಾ, ಪುಚ್ಛಾಮಿ ತಂ ಮಾತಲಿ ದೇವಸಾರಥಿ;
ಇಮೇ ನು ಮಚ್ಚಾ ಕಿಮಕಂಸು ಪಾಪಂ, ಯೇಮೇ ಜನಾ ಅಧಿಮತ್ತಾ ದುಕ್ಖಾ ತಿಬ್ಬಾ;
ಖರಾ ¶ ಕಟುಕಾ ವೇದನಾ ವೇದಯನ್ತಿ’’.
ತಸ್ಸ ಪುಟ್ಠೋ ವಿಯಾಕಾಸಿ, ಮಾತಲಿ ದೇವಸಾರಥಿ;
ವಿಪಾಕಂ ಪಾಪಕಮ್ಮಾನಂ, ಜಾನಂ ಅಕ್ಖಾಸಿಜಾನತೋ.
‘‘ಯೇ ಜೀವಲೋಕಸ್ಮಿ ಸುಪಾಪದಿಟ್ಠಿನೋ, ವಿಸ್ಸಾಸಕಮ್ಮಾನಿ ಕರೋನ್ತಿ ಮೋಹಾ;
ಪರಞ್ಚ ದಿಟ್ಠೀಸು ಸಮಾದಪೇನ್ತಿ, ತೇ ಪಾಪದಿಟ್ಠಿಂ [ಪಾಪದಿಟ್ಠೀ (ಸೀ. ಸ್ಯಾ.), ಪಾಪದಿಟ್ಠೀಸು (ಪೀ.)] ಪಸವೇತ್ವ ಪಾಪಂ;
ತೇಮೇ ಜನಾ ಅಧಿಮತ್ತಾ ದುಕ್ಖಾ ತಿಬ್ಬಾ, ಖರಾ ಕಟುಕಾ ವೇದನಾ ವೇದಯನ್ತಿ.
‘‘ವಿದಿತಾ ತೇ ಮಹಾರಾಜ, ಆವಾಸಾ ಪಾಪಕಮ್ಮಿನಂ;
ಠಾನಾನಿ ಲುದ್ದಕಮ್ಮಾನಂ, ದುಸ್ಸೀಲಾನಞ್ಚ ಯಾ ಗತಿ;
ಉಯ್ಯಾಹಿ ದಾನಿ ರಾಜೀಸಿ, ದೇವರಾಜಸ್ಸ ಸನ್ತಿಕೇ’’.
‘‘ಪಞ್ಚಥೂಪಂ ¶ ದಿಸ್ಸತಿದಂ ವಿಮಾನಂ, ಮಾಲಾಪಿಳನ್ಧಾ ಸಯನಸ್ಸ ಮಜ್ಝೇ;
ತತ್ಥಚ್ಛತಿ ನಾರೀ ಮಹಾನುಭಾವಾ, ಉಚ್ಚಾವಚಂ ಇದ್ಧಿ ವಿಕುಬ್ಬಮಾನಾ.
‘‘ವಿತ್ತೀ ಹಿ ಮಂ ವಿನ್ದತಿ ಸೂತ ದಿಸ್ವಾ, ಪುಚ್ಛಾಮಿ ತಂ ಮಾತಲಿ ದೇವಸಾರಥಿ;
ಅಯಂ ನು ನಾರೀ ಕಿಮಕಾಸಿ ಸಾಧುಂ, ಯಾ ಮೋದತಿ ಸಗ್ಗಪತ್ತಾ ವಿಮಾನೇ’’.
ತಸ್ಸ ¶ ಪುಟ್ಠೋ ವಿಯಾಕಾಸಿ, ಮಾತಲಿ ದೇವಸಾರಥಿ;
ವಿಪಾಕಂ ಪುಞ್ಞಕಮ್ಮಾನಂ, ಜಾನಂ ಅಕ್ಖಾಸಿಜಾನತೋ.
‘‘ಯದಿ ¶ ತೇ ಸುತಾ ಬೀರಣೀ ಜೀವಲೋಕೇ, ಆಮಾಯದಾಸೀ ಅಹು ಬ್ರಾಹ್ಮಣಸ್ಸ;
ಸಾ ಪತ್ತಕಾಲೇ [ಪತ್ತಕಾಲಂ (ಸೀ. ಸ್ಯಾ. ಪೀ.)] ಅತಿಥಿಂ ವಿದಿತ್ವಾ, ಮಾತಾವ ಪುತ್ತಂ ಸಕಿಮಾಭಿನನ್ದೀ;
ಸಂಯಮಾ ಸಂವಿಭಾಗಾ ಚ, ಸಾ ವಿಮಾನಸ್ಮಿ ಮೋದತಿ.
‘‘ದದ್ದಲ್ಲಮಾನಾ ಆಭೇನ್ತಿ [ಆಭನ್ತಿ (ಸ್ಯಾ. ಕ.)], ವಿಮಾನಾ ಸತ್ತ ನಿಮ್ಮಿತಾ;
ತತ್ಥ ಯಕ್ಖೋ ಮಹಿದ್ಧಿಕೋ, ಸಬ್ಬಾಭರಣಭೂಸಿತೋ;
ಸಮನ್ತಾ ಅನುಪರಿಯಾತಿ, ನಾರೀಗಣಪುರಕ್ಖತೋ.
‘‘ವಿತ್ತೀ ಹಿ ಮಂ ವಿನ್ದತಿ ಸೂತ ದಿಸ್ವಾ, ಪುಚ್ಛಾಮಿ ತಂ ಮಾತಲಿ ದೇವಸಾರಥಿ;
ಅಯಂ ನು ಮಚ್ಚೋ ಕಿಮಕಾಸಿ ಸಾಧುಂ, ಯೋ ಮೋದತಿ ಸಗ್ಗಪತ್ತೋ ವಿಮಾನೇ’’.
ತಸ್ಸ ಪುಟ್ಠೋ ವಿಯಾಕಾಸಿ, ಮಾತಲಿ ದೇವಸಾರಥಿ;
ವಿಪಾಕಂ ಪುಞ್ಞಕಮ್ಮಾನಂ, ಜಾನಂ ಅಕ್ಖಾಸಿಜಾನತೋ.
‘‘ಸೋಣದಿನ್ನೋ ಗಹಪತಿ, ಏಸ ದಾನಪತೀ ಅಹು;
ಏಸ ಪಬ್ಬಜಿತುದ್ದಿಸ್ಸ, ವಿಹಾರೇ ಸತ್ತ ಕಾರಯಿ.
‘‘ಸಕ್ಕಚ್ಚಂ ತೇ ಉಪಟ್ಠಾಸಿ, ಭಿಕ್ಖವೋ ತತ್ಥ ವಾಸಿಕೇ;
ಅಚ್ಛಾದನಞ್ಚ ಭತ್ತಞ್ಚ, ಸೇನಾಸನಂ ಪದೀಪಿಯಂ.
ಅದಾಸಿ ¶ ಉಜುಭೂತೇಸು, ವಿಪ್ಪಸನ್ನೇನ ಚೇತಸಾ.
‘‘ಚಾತುದ್ದಸಿಂ ಪಞ್ಚದಸಿಂ, ಯಾ ಚ [ಯಾ ವ (ಸೀ. ಪೀ.)] ಪಕ್ಖಸ್ಸ ಅಟ್ಠಮೀ [ಅಟ್ಠಮಿಂ (ಸೀ. ಪೀ.)];
ಪಾಟಿಹಾರಿಯಪಕ್ಖಞ್ಚ, ಅಟ್ಠಙ್ಗಸುಸಮಾಹಿತಂ.
‘‘ಉಪೋಸಥಂ ಉಪವಸೀ, ಸದಾ ಸೀಲೇಸು ಸಂವುತೋ;
ಸಂಯಮಾ ಸಂವಿಭಾಗಾ ಚ, ಸೋ ವಿಮಾನಸ್ಮಿ ಮೋದತಿ.
‘‘ಪಭಾಸತಿ ಮಿದಂ ಬ್ಯಮ್ಹಂ, ಫಲಿಕಾಸು ಸುನಿಮ್ಮಿತಂ;
ನಾರೀವರಗಣಾಕಿಣ್ಣಂ, ಕೂಟಾಗಾರವರೋಚಿತಂ;
ಉಪೇತಂ ಅನ್ನಪಾನೇಹಿ, ನಚ್ಚಗೀತೇಹಿ ಚೂಭಯಂ.
‘‘ವಿತ್ತೀ ¶ ಹಿ ಮಂ ವಿನ್ದತಿ ಸೂತ ದಿಸ್ವಾ, ಪುಚ್ಛಾಮಿ ತಂ ಮಾತಲಿ ದೇವಸಾರಥಿ;
ಇಮೇ ನು ಮಚ್ಚಾ ಕಿಮಕಂಸು ಸಾಧುಂ, ಯೇ ಮೋದರೇ ಸಗ್ಗಪತ್ತಾ ವಿಮಾನೇ’’.
ತಸ್ಸ ¶ ಪುಟ್ಠೋ ವಿಯಾಕಾಸಿ, ಮಾತಲಿ ದೇವಸಾರಥಿ;
ವಿಪಾಕಂ ಪುಞ್ಞಕಮ್ಮಾನಂ, ಜಾನಂ ಅಕ್ಖಾಸಿಜಾನತೋ.
‘‘ಯಾ ಕಾಚಿ ನಾರಿಯೋ ಇಧ ಜೀವಲೋಕೇ, ಸೀಲವನ್ತಿಯೋ ಉಪಾಸಿಕಾ;
ದಾನೇ ರತಾ ನಿಚ್ಚಂ ಪಸನ್ನಚಿತ್ತಾ, ಸಚ್ಚೇ ಠಿತಾ ಉಪೋಸಥೇ ಅಪ್ಪಮತ್ತಾ;
ಸಂಯಮಾ ಸಂವಿಭಾಗಾ ಚ, ತಾ ವಿಮಾನಸ್ಮಿ ಮೋದರೇ.
‘‘ಪಭಾಸತಿ ಮಿದಂ ಬ್ಯಮ್ಹಂ, ವೇಳುರಿಯಾಸು ನಿಮ್ಮಿತಂ;
ಉಪೇತಂ ¶ ಭೂಮಿಭಾಗೇಹಿ, ವಿಭತ್ತಂ ಭಾಗಸೋ ಮಿತಂ.
‘‘ಆಳಮ್ಬರಾ ಮುದಿಙ್ಗಾ ಚ, ನಚ್ಚಗೀತಾ ಸುವಾದಿತಾ;
ದಿಬ್ಬಾ ಸದ್ದಾ ನಿಚ್ಛರನ್ತಿ, ಸವನೀಯಾ ಮನೋರಮಾ.
‘‘ನಾಹಂ ಏವಂಗತಂ ಜಾತು [ಜಾತಂ (ಕ.)], ಏವಂಸುರುಚಿರಂ ಪುರೇ;
ಸದ್ದಂ ಸಮಭಿಜಾನಾಮಿ, ದಿಟ್ಠಂ ವಾ ಯದಿ ವಾ ಸುತಂ.
‘‘ವಿತ್ತೀ ಹಿ ಮಂ ವಿನ್ದತಿ ಸೂತ ದಿಸ್ವಾ, ಪುಚ್ಛಾಮಿ ತಂ ಮಾತಲಿ ದೇವಸಾರಥಿ;
ಇಮೇ ನು ಮಚ್ಚಾ ಕಿಮಕಂಸು ಸಾಧುಂ, ಯೇ ಮೋದರೇ ಸಗ್ಗಪತ್ತಾ ವಿಮಾನೇ’’.
ತಸ್ಸ ಪುಟ್ಠೋ ವಿಯಾಕಾಸಿ, ಮಾತಲಿ ದೇವಸಾರಥಿ;
ವಿಪಾಕಂ ಪುಞ್ಞಕಮ್ಮಾನಂ, ಜಾನಂ ಅಕ್ಖಾಸಿಜಾನತೋ.
‘‘ಯೇ ಕೇಚಿ ಮಚ್ಚಾ ಇಧ ಜೀವಲೋಕೇ, ಸೀಲವನ್ತಾ [ಸೀಲವನ್ತೋ (ಸೀ. ಪೀ.)] ಉಪಾಸಕಾ;
ಆರಾಮೇ ಉದಪಾನೇ ಚ, ಪಪಾ ಸಙ್ಕಮನಾನಿ ಚ;
ಅರಹನ್ತೇ ಸೀತಿಭೂತೇ [ಅರಹನ್ತೇಸು ಸೀತಿಭೂತೇಸು (ಕ.)], ಸಕ್ಕಚ್ಚಂ ಪಟಿಪಾದಯುಂ.
‘‘ಚೀವರಂ ¶ ಪಿಣ್ಡಪಾತಞ್ಚ, ಪಚ್ಚಯಂ ಸಯನಾಸನಂ;
ಅದಂಸು ಉಜುಭೂತೇಸು, ವಿಪ್ಪಸನ್ನೇನ ಚೇತಸಾ.
‘‘ಚಾತುದ್ದಸಿಂ ಪಞ್ಚದಸಿಂ, ಯಾ ಚ ಪಕ್ಖಸ್ಸ ಅಟ್ಠಮೀ;
ಪಾಟಿಹಾರಿಯಪಕ್ಖಞ್ಚ, ಅಟ್ಠಙ್ಗಸುಸಮಾಹಿತಂ.
‘‘ಉಪೋಸಥಂ ಉಪವಸುಂ, ಸದಾ ಸೀಲೇಸು ಸಂವುತಾ;
ಸಂಯಮಾ ಸಂವಿಭಾಗಾ ಚ, ತೇ ವಿಮಾನಸ್ಮಿ ಮೋದರೇ.
‘‘ಪಭಾಸತಿ ¶ ಮಿದಂ ಬ್ಯಮ್ಹಂ, ಫಲಿಕಾಸು ಸುನಿಮ್ಮಿತಂ;
ನಾರೀವರಗಣಾಕಿಣ್ಣಂ, ಕೂಟಾಗಾರವರೋಚಿತಂ.
‘‘ಉಪೇತಂ ಅನ್ನಪಾನೇಹಿ, ನಚ್ಚಗೀತೇಹಿ ಚೂಭಯಂ;
ನಜ್ಜೋ ಚಾನುಪರಿಯಾತಿ, ನಾನಾಪುಪ್ಫದುಮಾಯುತಾ.
‘‘ವಿತ್ತೀ ಹಿ ಮಂ ವಿನ್ದತಿ ಸೂತ ದಿಸ್ವಾ, ಪುಚ್ಛಾಮಿ ತಂ ಮಾತಲಿ ದೇವಸಾರಥಿ;
ಅಯಂ ನು ಮಚ್ಚೋ ಕಿಮಕಾಸಿ ಸಾಧುಂ, ಯೋ ಮೋದತೀ ಸಗ್ಗಪತ್ತೋ ವಿಮಾನೇ’’.
ತಸ್ಸ ¶ ಪುಟ್ಠೋ ವಿಯಾಕಾಸಿ, ಮಾತಲಿ ದೇವಸಾರಥಿ;
ವಿಪಾಕಂ ಪುಞ್ಞಕಮ್ಮಾನಂ, ಜಾನಂ ಅಕ್ಖಾಸಿಜಾನತೋ.
‘‘ಮಿಥಿಲಾಯಂ ಗಹಪತಿ, ಏಸ ದಾನಪತೀ ಅಹು;
ಆರಾಮೇ ಉದಪಾನೇ ಚ, ಪಪಾ ಸಙ್ಕಮನಾನಿ ಚ;
ಅರಹನ್ತೇ ಸೀತಿಭೂತೇ, ಸಕ್ಕಚ್ಚಂ ಪಟಿಪಾದಯಿ.
‘‘ಚೀವರಂ ಪಿಣ್ಡಪಾತಞ್ಚ, ಪಚ್ಚಯಂ ಸಯನಾಸನಂ;
ಅದಾಸಿ ಉಜುಭೂತೇಸು, ವಿಪ್ಪಸನ್ನೇನ ಚೇತಸಾ.
‘‘ಚಾತುದ್ದಸಿಂ ಪಞ್ಚದಸಿಂ, ಯಾ ಚ ಪಕ್ಖಸ್ಸ ಅಟ್ಠಮೀ;
ಪಾಟಿಹಾರಿಯಪಕ್ಖಞ್ಚ, ಅಟ್ಠಙ್ಗಸುಸಮಾಹಿತಂ.
‘‘ಉಪೋಸಥಂ ಉಪವಸೀ, ಸದಾ ಸೀಲೇಸು ಸಂವುತೋ;
ಸಂಯಮಾ ಸಂವಿಭಾಗಾ ಚ, ಸೋ ವಿಮಾನಸ್ಮಿ ಮೋದತಿ’’.
‘‘ಪಭಾಸತಿ ಮಿದಂ ಬ್ಯಮ್ಹಂ, ಫಲಿಕಾಸು ಸುನಿಮ್ಮಿತಂ [ವೇಳುರಿಯಾಸು ನಿಮ್ಮಿತಂ (ಪೀ.)];
ನಾರೀವರಗಣಾಕಿಣ್ಣಂ ¶ , ಕೂಟಾಗಾರವರೋಚಿತಂ.
‘‘ಉಪೇತಂ ¶ ಅನ್ನಪಾನೇಹಿ, ನಚ್ಚಗೀತೇಹಿ ಚೂಭಯಂ;
ನಜ್ಜೋ ಚಾನುಪರಿಯಾತಿ, ನಾನಾಪುಪ್ಫದುಮಾಯುತಾ.
‘‘ರಾಜಾಯತನಾ ಕಪಿತ್ಥಾ ಚ, ಅಮ್ಬಾ ಸಾಲಾ ಚ ಜಮ್ಬುಯೋ;
ತಿನ್ದುಕಾ ಚ ಪಿಯಾಲಾ ಚ, ದುಮಾ ನಿಚ್ಚಫಲಾ ಬಹೂ.
‘‘ವಿತ್ತೀ ಹಿ ಮಂ ವಿನ್ದತಿ ಸೂತ ದಿಸ್ವಾ, ಪುಚ್ಛಾಮಿ ತಂ ಮಾತಲಿ ದೇವಸಾರಥಿ;
ಅಯಂ ನು ಮಚ್ಚೋ ಕಿಮಕಾಸಿ ಸಾಧುಂ, ಯೋ ಮೋದತೀ ಸಗ್ಗಪತ್ತೋ ವಿಮಾನೇ’’.
‘‘ತಸ್ಸ ಪುಟ್ಠೋ ವಿಯಾಕಾಸಿ, ಮಾತಲಿ ದೇವಸಾರಥಿ;
ವಿಪಾಕಂ ಪುಞ್ಞಕಮ್ಮಾನಂ, ಜಾನಂ ಅಕ್ಖಾಸಿಜಾನತೋ.
‘‘ಮಿಥಿಲಾಯಂ ಗಹಪತಿ, ಏಸ ದಾನಪತೀ ಅಹು;
ಆರಾಮೇ ಉದಪಾನೇ ಚ, ಪಪಾ ಸಙ್ಕಮನಾನಿ ಚ;
ಅರಹನ್ತೇ ಸೀತಿಭೂತೇ, ಸಕ್ಕಚ್ಚಂ ಪಟಿಪಾದಯಿ.
‘‘ಚೀವರಂ ಪಿಣ್ಡಪಾತಞ್ಚ, ಪಚ್ಚಯಂ ಸಯನಾಸನಂ;
ಅದಾಸಿ ಉಜುಭೂತೇಸು, ವಿಪ್ಪಸನ್ನೇನ ಚೇತಸಾ.
‘‘ಚಾತುದ್ದಸಿಂ ಪಞ್ಚದಸಿಂ, ಯಾ ಚ ಪಕ್ಖಸ್ಸ ಅಟ್ಠಮೀ;
ಪಾಟಿಹಾರಿಯಪಕ್ಖಞ್ಚ, ಅಟ್ಠಙ್ಗಸುಸಮಾಹಿತಂ.
‘‘ಉಪೋಸಥಂ ಉಪವಸೀ, ಸದಾ ಸೀಲೇಸು ಸಂವುತೋ;
ಸಂಯಮಾ ಸಂವಿಭಾಗಾ ಚ, ಸೋ ವಿಮಾನಸ್ಮಿ ಮೋದತಿ’’.
‘‘ಪಭಾಸತಿ ¶ ¶ ಮಿದಂ ಬ್ಯಮ್ಹಂ, ವೇಳುರಿಯಾಸು ನಿಮ್ಮಿತಂ;
ಉಪೇತಂ ಭೂಮಿಭಾಗೇಹಿ, ವಿಭತ್ತಂ ಭಾಗಸೋ ಮಿತಂ.
‘‘ಆಳಮ್ಬರಾ ಮುದಿಙ್ಗಾ ಚ, ನಚ್ಚಗೀತಾ ಸುವಾದಿತಾ;
ದಿಬ್ಯಾ ಸದ್ದಾ ನಿಚ್ಛರನ್ತಿ, ಸವನೀಯಾ ಮನೋರಮಾ.
‘‘ನಾಹಂ ಏವಂಗತಂ ಜಾತು [ಜಾತಂ (ಕ.)], ಏವಂಸುರುಚಿಯಂ ಪುರೇ;
ಸದ್ದಂ ಸಮಭಿಜಾನಾಮಿ, ದಿಟ್ಠಂ ವಾ ಯದಿ ವಾ ಸುತಂ.
‘‘ವಿತ್ತೀ ¶ ಹಿ ಮಂ ವಿನ್ದತಿ ಸೂತ ದಿಸ್ವಾ, ಪುಚ್ಛಾಮಿ ತಂ ಮಾತಲಿ ದೇವಸಾರಥಿ;
ಅಯಂ ನು ಮಚ್ಚೋ ಕಿಮಕಾಸಿ ಸಾಧುಂ, ಯೋ ಮೋದತಿ ಸಗ್ಗಪತ್ತೋ ವಿಮಾನೇ’’.
ತಸ್ಸ ಪುಟ್ಠೋ ವಿಯಾಕಾಸಿ, ಮಾತಲಿ ದೇವಸಾರಥಿ;
ವಿಪಾಕಂ ಪುಞ್ಞಕಮ್ಮಾನಂ, ಜಾನಂ ಅಕ್ಖಾಸಿಜಾನತೋ.
‘‘ಬಾರಾಣಸಿಯಂ ಗಹಪತಿ, ಏಸ ದಾನಪತೀ ಅಹು;
ಆರಾಮೇ ಉದಪಾನೇ ಚ, ಪಪಾ ಸಙ್ಕಮನಾನಿ ಚ;
ಅರಹನ್ತೇ ಸೀತಿಭೂತೇ, ಸಕ್ಕಚ್ಚಂ ಪಟಿಪಾದಯಿ.
‘‘ಚೀವರಂ ಪಿಣ್ಡಪಾತಞ್ಚ, ಪಚ್ಚಯಂ ಸಯನಾಸನಂ;
ಅದಾಸಿ ಉಜುಭೂತೇಸು, ವಿಪ್ಪಸನ್ನೇನ ಚೇತಸಾ.
‘‘ಚಾತುದ್ದಸಿಂ ಪಞ್ಚದಸಿಂ, ಯಾ ಚ ಪಕ್ಖಸ್ಸ ಅಟ್ಠಮೀ;
ಪಾಟಿಹಾರಿಯಪಕ್ಖಞ್ಚ, ಅಟ್ಠಙ್ಗಸುಸಮಾಹಿತಂ.
‘‘ಉಪೋಸಥಂ ಉಪವಸೀ, ಸದಾಸೀಲೇಸು ಸಂವುತೋ;
ಸಂಯಮಾ ¶ ಸಂವಿಭಾಗಾ ಚ, ಸೋ ವಿಮಾನಸ್ಮಿ ಮೋದತಿ.
‘‘ಯಥಾ ಉದಯಮಾದಿಚ್ಚೋ, ಹೋತಿ ಲೋಹಿತಕೋ ಮಹಾ;
ತಥೂಪಮಂ ಇದಂ ಬ್ಯಮ್ಹಂ, ಜಾತರೂಪಸ್ಸ ನಿಮ್ಮಿತಂ.
‘‘ವಿತ್ತೀ ಹಿ ಮಂ ವಿನ್ದತಿ ಸೂತ ದಿಸ್ವಾ, ಪುಚ್ಛಾಮಿ ತಂ ಮಾತಲಿ ದೇವಸಾರಥಿ;
ಅಯಂ ನು ಮಚ್ಚೋ ಕಿಮಕಾಸಿ ಸಾಧುಂ, ಯೋ ಮೋದತೀ ಸಗ್ಗಪತ್ತೋ ವಿಮಾನೇ’’.
ತಸ್ಸ ಪುಟ್ಠೋ ವಿಯಾಕಾಸಿ, ಮಾತಲಿ ದೇವಸಾರಥಿ;
ವಿಪಾಕಂ ಪುಞ್ಞಕಮ್ಮಾನಂ, ಜಾನಂ ಅಕ್ಖಾಸಿಜಾನತೋ.
‘‘ಸಾವತ್ಥಿಯಂ ಗಹಪತಿ, ಏಸ ದಾನಪತೀ ಅಹು;
ಆರಾಮೇ ಉದಪಾನೇ ಚ, ಪಪಾ ಸಙ್ಕಮನಾನಿ ಚ;
ಅರಹನ್ತೇ ಸೀತಿಭೂತೇ, ಸಕ್ಕಚ್ಚಂ ಪಟಿಪಾದಯಿ.
‘‘ಚೀವರಂ ಪಿಣ್ಡಪಾತಞ್ಚ, ಪಚ್ಚಯಂ ಸಯನಾಸನಂ;
ಅದಾಸಿ ಉಜುಭೂತೇಸು, ವಿಪ್ಪಸನ್ನೇನ ಚೇತಸಾ.
‘‘ಚಾತುದ್ದಸಿಂ ¶ ¶ ಪಞ್ಚದಸಿಂ, ಯಾ ಚ ಪಕ್ಖಸ್ಸ ಅಟ್ಠಮೀ;
ಪಾಟಿಹಾರಿಯಪಕ್ಖಞ್ಚ, ಅಟ್ಠಙ್ಗಸುಸಮಾಹಿತಂ.
‘‘ಉಪೋಸಥಂ ಉಪವಸೀ, ಸದಾ ಸೀಲೇಸು ಸಂವುತೋ;
ಸಂಯಮಾ ಸಂವಿಭಾಗಾ ಚ, ಸೋ ವಿಮಾನಸ್ಮಿ ಮೋದತಿ.
‘‘ವೇಹಾಯಸಾ ಮೇ ಬಹುಕಾ, ಜಾತರೂಪಸ್ಸ ನಿಮ್ಮಿತಾ;
ದದ್ದಲ್ಲಮಾನಾ ಆಭೇನ್ತಿ, ವಿಜ್ಜುವಬ್ಭಘನನ್ತರೇ.
‘‘ವಿತ್ತೀ ¶ ಹಿ ಮಂ ವಿನ್ದತಿ ಸೂತ ದಿಸ್ವಾ, ಪುಚ್ಛಾಮಿ ತಂ ಮಾತಲಿ ದೇವಸಾರಥಿ;
ಇಮೇ ನು ಮಚ್ಚಾ ಕಿಮಕಂಸು ಸಾಧುಂ, ಯೇ ಮೋದರೇ ಸಗ್ಗಪತ್ತಾ ವಿಮಾನೇ’’.
ತಸ್ಸ ಪುಟ್ಠೋ ವಿಯಾಕಾಸಿ, ಮಾತಲಿ ದೇವಸಾರಥಿ;
ವಿಪಾಕಂ ಪುಞ್ಞಕಮ್ಮಾನಂ, ಜಾನಂ ಅಕ್ಖಾಸಿಜಾನತೋ.
‘‘ಸದ್ಧಾಯ ಸುನಿವಿಟ್ಠಾಯ, ಸದ್ಧಮ್ಮೇ ಸುಪ್ಪವೇದಿತೇ;
ಅಕಂಸು ಸತ್ಥು ವಚನಂ, ಸಮ್ಮಾಸಮ್ಬುದ್ಧಸಾಸನೇ [ಸಮ್ಮಾಸಮ್ಬುದ್ಧಸಾವಕಾ (ಸ್ಯಾ.), ಸಮ್ಮಾಸಮ್ಬುದ್ಧಸಾಸನಂ (ಪೀ.)];
ತೇಸಂ ಏತಾನಿ ಠಾನಾನಿ, ಯಾನಿ ತ್ವಂ ರಾಜ ಪಸ್ಸಸಿ.
‘‘ವಿದಿತಾ ತೇ ಮಹಾರಾಜ, ಆವಾಸಾ ಪಾಪಕಮ್ಮಿನಂ;
ಅಥೋ ಕಲ್ಯಾಣಕಮ್ಮಾನಂ, ಠಾನಾನಿ ವಿದಿತಾನಿ ತೇ;
ಉಯ್ಯಾಹಿ ದಾನಿ ರಾಜೀಸಿ, ದೇವರಾಜಸ್ಸ ಸನ್ತಿಕೇ’’.
‘‘ಸಹಸ್ಸಯುತ್ತಂ ಹಯವಾಹಿಂ, ದಿಬ್ಬಯಾನಮಧಿಟ್ಠಿತೋ;
ಯಾಯಮಾನೋ ಮಹಾರಾಜಾ, ಅದ್ದಾ ಸೀದನ್ತರೇ ನಗೇ;
ದಿಸ್ವಾನಾಮನ್ತಯೀ ಸೂತಂ, ‘‘ಇಮೇ ಕೇ ನಾಮ ಪಬ್ಬತಾ’’.
[ಅಯಂ ಗಾಥಾ ಸೀ. ಸ್ಯಾ. ಪೀ. ಪೋತ್ಥಕೇಸು ಅಟ್ಠಕಥಾಯಞ್ಚ ನ ದಿಸ್ಸತಿ] ತಸ್ಸ ಪುಟ್ಠೋ ವಿಯಾಕಾಸಿ, ಮಾತಲಿ ದೇವಸಾರಥಿ;
ವಿಪಾಕಂ ಪುಞ್ಞಕಮ್ಮಾನಂ, ಜಾನಂ ಅಕ್ಖಾಸಿಜಾನತೋ [ಅಯಂ ಗಾಥಾ ಸೀ. ಸ್ಯಾ. ಪೀ. ಪೋತ್ಥಕೇಸು ಅಟ್ಠಕಥಾಯಞ್ಚ ನ ದಿಸ್ಸತಿ].
‘‘ಸುದಸ್ಸನೋ ಕರವೀಕೋ, ಈಸಧರೋ [ಇಸಿನ್ಧರೋ (ಸ್ಯಾ.), ಈಸನ್ಧರೋ (ಕ.)] ಯುಗನ್ಧರೋ;
ನೇಮಿನ್ಧರೋ ವಿನತಕೋ, ಅಸ್ಸಕಣ್ಣೋ ಗಿರೀ ಬ್ರಹಾ.
‘‘ಏತೇ ¶ ಸೀದನ್ತರೇ ನಗಾ, ಅನುಪುಬ್ಬಸಮುಗ್ಗತಾ;
ಮಹಾರಾಜಾನಮಾವಾಸಾ ¶ , ಯಾನಿ ತ್ವಂ ರಾಜ ಪಸ್ಸಸಿ.
‘‘ಅನೇಕರೂಪಂ ರುಚಿರಂ, ನಾನಾಚಿತ್ರಂ ಪಕಾಸತಿ;
ಆಕಿಣ್ಣಂ ಇನ್ದಸದಿಸೇಹಿ, ಬ್ಯಗ್ಘೇಹೇವ ಸುರಕ್ಖಿತಂ [ಪುರಕ್ಖಿತಂ (ಸ್ಯಾ. ಕ.)].
‘‘ವಿತ್ತೀ ಹಿ ಮಂ ವಿನ್ದತಿ ಸೂತ ದಿಸ್ವಾ, ಪುಚ್ಛಾಮಿ ತಂ ಮಾತಲಿ ದೇವಸಾರಥಿ;
ಇಮಂ ನು ದ್ವಾರಂ ಕಿಮಭಞ್ಞಮಾಹು [ಕಿಮಭಿಞ್ಞಮಾಹು (ಸೀ. ಪೀ.)], (ಮನೋರಮ ದಿಸ್ಸತಿ ದೂರತೋವ.) [( ) ಅಯಂ ಪಾಠೋ ಸ್ಯಾಮಪೋತ್ಥಕೇಯೇವ ದಿಸ್ಸತಿ]
ತಸ್ಸ ¶ ಪುಟ್ಠೋ ವಿಯಾಕಾಸಿ, ಮಾತಲಿ ದೇವಸಾರಥಿ;
ವಿಪಾಕಂ ಪುಞ್ಞಕಮ್ಮಾನಂ, ಜಾನಂ ಅಕ್ಖಾಸಿಜಾನತೋ.
‘‘ಚಿತ್ರಕೂಟೋತಿ ಯಂ ಆಹು, ದೇವರಾಜಪವೇಸನಂ;
ಸುದಸ್ಸನಸ್ಸ ಗಿರಿನೋ, ದ್ವಾರಞ್ಹೇತಂ ಪಕಾಸತಿ.
‘‘ಅನೇಕರೂಪಂ ರುಚಿರಂ, ನಾನಾಚಿತ್ರಂ ಪಕಾಸತಿ;
ಆಕಿಣ್ಣಂ ಇನ್ದಸದಿಸೇಹಿ, ಬ್ಯಗ್ಘೇಹೇವ ಸುರಕ್ಖಿತಂ;
ಪವಿಸೇತೇನ ರಾಜೀಸಿ, ಅರಜಂ ಭೂಮಿಮಕ್ಕಮ’’.
‘‘ಸಹಸ್ಸಯುತ್ತಂ ಹಯವಾಹಿಂ, ದಿಬ್ಬಯಾನಮಧಿಟ್ಠಿತೋ;
ಯಾಯಮಾನೋ ಮಹಾರಾಜಾ, ಅದ್ದಾ ದೇವಸಭಂ ಇದಂ.
‘‘ಯಥಾ ಸರದೇ ಆಕಾಸೇ [ಆಕಾಸೋ (ಸೀ. ಸ್ಯಾ. ಪೀ.)], ನೀಲೋಭಾಸೋ ಪದಿಸ್ಸತಿ;
ತಥೂಪಮಂ ಇದಂ ಬ್ಯಮ್ಹಂ, ವೇಳುರಿಯಾಸು ನಿಮ್ಮಿತಂ.
‘‘ವಿತ್ತೀ ಹಿ ಮಂ ವಿನ್ದತಿ ಸೂತ ದಿಸ್ವಾ, ಪುಚ್ಛಾಮಿ ತಂ ಮಾತಲಿ ದೇವಸಾರಥಿ;
ಇಮಂ ¶ ನು ಬ್ಯಮ್ಹಂ ಕಿಮಭಞ್ಞಮಾಹು [ಕಿಮಭಿಞ್ಞಮಾಹು (ಸೀ. ಪೀ.)], (ಮನೋರಮ ದಿಸ್ಸತಿ ದೂರತೋವ.) [( ) ಅಯಂ ಪಾಠೋ ಸ್ಯಾಮಪೋತ್ಥಕೇಯೇವ ದಿಸ್ಸತಿ]
ತಸ್ಸ ಪುಟ್ಠೋ ವಿಯಾಕಾಸಿ, ಮಾತಲಿ ದೇವಸಾರಥಿ;
ವಿಪಾಕಂ ಪುಞ್ಞಕಮ್ಮಾನಂ, ಜಾನಂ ಅಕ್ಖಾಸಿಜಾನತೋ.
‘‘ಸುಧಮ್ಮಾ ¶ ಇತಿ ಯಂ ಆಹು, ಪಸ್ಸೇಸಾ [ಏಸೇಸಾ (ಸ್ಯಾ. ಕ.)] ದಿಸ್ಸತೇ ಸಭಾ;
ವೇಳುರಿಯಾರುಚಿರಾ ಚಿತ್ರಾ, ಧಾರಯನ್ತಿ ಸುನಿಮ್ಮಿತಾ.
‘‘ಅಟ್ಠಂಸಾ ಸುಕತಾ ಥಮ್ಭಾ, ಸಬ್ಬೇ ವೇಳುರಿಯಾಮಯಾ;
ಯತ್ಥ ದೇವಾ ತಾವತಿಂಸಾ, ಸಬ್ಬೇ ಇನ್ದಪುರೋಹಿತಾ.
‘‘ಅತ್ಥಂ ದೇವಮನುಸ್ಸಾನಂ, ಚಿನ್ತಯನ್ತಾ ಸಮಚ್ಛರೇ;
ಪವಿಸೇತೇನ ರಾಜೀಸಿ, ದೇವಾನಂ ಅನುಮೋದನಂ’’.
‘‘ತಂ ದೇವಾ ಪಟಿನನ್ದಿಂಸು, ದಿಸ್ವಾ ರಾಜಾನಮಾಗತಂ;
‘‘ಸ್ವಾಗತಂ ತೇ ಮಹಾರಾಜ, ಅಥೋ ತೇ ಅದುರಾಗತಂ;
ನಿಸೀದ ದಾನಿ ರಾಜೀಸಿ, ದೇವರಾಜಸ್ಸ ಸನ್ತಿಕೇ’’.
‘‘ಸಕ್ಕೋಪಿ ಪಟಿನನ್ದಿತ್ಥ [ಪಟಿನನ್ದಿತ್ವಾ (ಕ.)], ವೇದೇಹಂ ಮಿಥಿಲಗ್ಗಹಂ;
ನಿಮನ್ತಯಿತ್ಥ [ನಿಮನ್ತಯೀ ಚ (ಸೀ. ಪೀ.)] ಕಾಮೇಹಿ, ಆಸನೇನ ಚ ವಾಸವೋ.
‘‘ಸಾಧು ಖೋಸಿ ಅನುಪ್ಪತ್ತೋ, ಆವಾಸಂ ವಸವತ್ತಿನಂ;
ವಸ ದೇವೇಸು ರಾಜೀಸಿ, ಸಬ್ಬಕಾಮಸಮಿದ್ಧಿಸು;
ತಾವತಿಂಸೇಸು ದೇವೇಸು, ಭುಞ್ಜ ಕಾಮೇ ಅಮಾನುಸೇ’’.
‘‘ಯಥಾ ¶ ಯಾಚಿತಕಂ ಯಾನಂ, ಯಥಾ ಯಾಚಿತಕಂ ಧನಂ;
ಏವಂಸಮ್ಪದಮೇವೇತಂ, ಯಂ ಪರತೋ ದಾನಪಚ್ಚಯಾ.
‘‘ನ ಚಾಹಮೇತಮಿಚ್ಛಾಮಿ, ಯಂ ಪರತೋ ದಾನಪಚ್ಚಯಾ;
ಸಯಂಕತಾನಿ ¶ ಪುಞ್ಞಾನಿ, ತಂ ಮೇ ಆವೇಣಿಕಂ [ಆವೇಣಿಯಂ (ಸೀ. ಸ್ಯಾ. ಪೀ.), ಆವೇನಿಕಂ (ಕ.)] ಧನಂ.
‘‘ಸೋಹಂ ಗನ್ತ್ವಾ ಮನುಸ್ಸೇಸು, ಕಾಹಾಮಿ ಕುಸಲಂ ಬಹುಂ;
ದಾನೇನ ಸಮಚರಿಯಾಯ, ಸಂಯಮೇನ ದಮೇನ ಚ;
ಯಂ ಕತ್ವಾ ಸುಖಿತೋ ಹೋತಿ, ನ ಚ ಪಚ್ಛಾನುತಪ್ಪತಿ’’.
‘‘ಬಹೂಪಕಾರೋ ನೋ ಭವಂ, ಮಾತಲಿ ದೇವಸಾರಥಿ;
ಯೋ ಮೇ ಕಲ್ಯಾಣಕಮ್ಮಾನಂ, ಪಾಪಾನಂ ಪಟಿದಸ್ಸಯಿ’’ [ಪಟಿದಂಸಯಿ (ಪೀ.)].
‘‘ಇದಂ ವತ್ವಾ ನಿಮಿರಾಜಾ, ವೇದೇಹೋ ಮಿಥಿಲಗ್ಗಹೋ;
ಪುಥುಯಞ್ಞಂ ಯಜಿತ್ವಾನ, ಸಂಯಮಂ ಅಜ್ಝುಪಾಗಮೀ’’ತಿ.
ನಿಮಿಜಾತಕಂ [ನೇಮಿರಾಜಜಾತಕಂ (ಸ್ಯಾ.)] ಚತುತ್ಥಂ.
೫೪೨. ಉಮಙ್ಗಜಾತಕಂ (೫)
‘‘ಪಞ್ಚಾಲೋ ¶ ಸಬ್ಬಸೇನಾಯ, ಬ್ರಹ್ಮದತ್ತೋಯಮಾಗತೋ;
ಸಾಯಂ ಪಞ್ಚಾಲಿಯಾ ಸೇನಾ, ಅಪ್ಪಮೇಯ್ಯಾ ಮಹೋಸಧ.
‘‘ವೀಥಿಮತೀ [ಪಿಟ್ಠಿಮತೀ (ಸೀ. ಪೀ.), ವಿದ್ಧಿಮತೀ (ಸ್ಯಾ.)] ಪತ್ತಿಮತೀ, ಸಬ್ಬಸಙ್ಗಾಮಕೋವಿದಾ;
ಓಹಾರಿನೀ ಸದ್ದವತೀ, ಭೇರಿಸಙ್ಖಪ್ಪಬೋಧನಾ.
‘‘ಲೋಹವಿಜ್ಜಾ ಅಲಙ್ಕಾರಾ, ಧಜಿನೀ ವಾಮರೋಹಿನೀ;
ಸಿಪ್ಪಿಯೇಹಿ ಸುಸಮ್ಪನ್ನಾ, ಸೂರೇಹಿ ಸುಪ್ಪತಿಟ್ಠಿತಾ.
‘‘ದಸೇತ್ಥ ಪಣ್ಡಿತಾ ಆಹು, ಭೂರಿಪಞ್ಞಾ ರಹೋಗಮಾ [ರಹೋಗತಾ (ಸ್ಯಾ. ಕ.)];
ಮಾತಾ ಏಕಾದಸೀ ರಞ್ಞೋ, ಪಞ್ಚಾಲಿಯಂ ಪಸಾಸತಿ.
‘‘ಅಥೇತ್ಥೇಕಸತಂ ¶ ಖತ್ಯಾ, ಅನುಯನ್ತಾ ಯಸಸ್ಸಿನೋ;
ಅಚ್ಛಿನ್ನರಟ್ಠಾ ಬ್ಯಥಿತಾ, ಪಞ್ಚಾಲಿಯಂ [ಪಞ್ಚಾಲೀನಂ (ಬಹೂಸು)] ವಸಂ ಗತಾ.
‘‘ಯಂವದಾ-ತಕ್ಕರಾ ರಞ್ಞೋ, ಅಕಾಮಾ ಪಿಯಭಾಣಿನೋ;
ಪಞ್ಚಾಲಮನುಯಾಯನ್ತಿ, ಅಕಾಮಾ ವಸಿನೋ ಗತಾ.
‘‘ತಾಯ ಸೇನಾಯ ಮಿಥಿಲಾ, ತಿಸನ್ಧಿಪರಿವಾರಿತಾ;
ರಾಜಧಾನೀ ವಿದೇಹಾನಂ, ಸಮನ್ತಾ ಪರಿಖಞ್ಞತಿ.
‘‘ಉದ್ಧಂ ¶ ತಾರಕಜಾತಾವ, ಸಮನ್ತಾ ಪರಿವಾರಿತಾ;
ಮಹೋಸಧ ವಿಜಾನಾಹಿ, ಕಥಂ ಮೋಕ್ಖೋ ಭವಿಸ್ಸತಿ’’.
‘‘ಪಾದೇ ದೇವ ಪಸಾರೇಹಿ, ಭುಞ್ಜ ಕಾಮೇ ರಮಸ್ಸು ಚ;
ಹಿತ್ವಾ ಪಞ್ಚಾಲಿಯಂ ಸೇನಂ, ಬ್ರಹ್ಮದತ್ತೋ ಪಲಾಯಿತಿ’’ [ಪಲಾಯತಿ (ಸೀ. ಸ್ಯಾ.)].
‘‘ರಾಜಾ ಸನ್ಥವಕಾಮೋ ತೇ, ರತನಾನಿ ಪವೇಚ್ಛತಿ;
ಆಗಚ್ಛನ್ತು ಇತೋ [ತತೋ (ಸೀ. ಸ್ಯಾ.)] ದೂತಾ, ಮಞ್ಜುಕಾ ಪಿಯಭಾಣಿನೋ.
‘‘ಭಾಸನ್ತು ಮುದುಕಾ ವಾಚಾ, ಯಾ ವಾಚಾ ಪಟಿನನ್ದಿತಾ;
ಪಞ್ಚಾಲೋ ಚ ವಿದೇಹೋ ಚ [ಪಞ್ಚಾಲಾ ಚ ವಿದೇಹಾ ಚ (ಸೀ. ಪೀ.)], ಉಭೋ ಏಕಾ ಭವನ್ತು ತೇ’’.
‘‘ಕಥಂ ನು ಕೇವಟ್ಟ ಮಹೋಸಧೇನ, ಸಮಾಗಮೋ ಆಸಿ ತದಿಙ್ಘ ಬ್ರೂಹಿ;
ಕಚ್ಚಿ ತೇ ಪಟಿನಿಜ್ಝತ್ತೋ, ಕಚ್ಚಿ ತುಟ್ಠೋ ಮಹೋಸಧೋ’’.
‘‘ಅನರಿಯರೂಪೋ ¶ ಪುರಿಸೋ ಜನಿನ್ದ, ಅಸಮ್ಮೋದಕೋ ಥದ್ಧೋ ಅಸಬ್ಭಿರೂಪೋ;
ಯಥಾ ಮೂಗೋ ಚ ಬಧಿರೋ ಚ, ನ ಕಿಞ್ಚಿತ್ಥಂ ಅಭಾಸಥ’’ [ಅಭಾಸಿತ್ಥ (ಕ.)].
‘‘ಅದ್ಧಾ ¶ ಇದಂ ಮನ್ತಪದಂ ಸುದುದ್ದಸಂ, ಅತ್ಥೋ ಸುದ್ಧೋ ನರವೀರಿಯೇನ ದಿಟ್ಠೋ;
ತಥಾ ಹಿ ಕಾಯೋ ಮಮ ಸಮ್ಪವೇಧತಿ, ಹಿತ್ವಾ ಸಯಂ ಕೋ ಪರಹತ್ಥಮೇಸ್ಸತಿ’’.
‘‘ಛನ್ನಞ್ಹಿ ಏಕಾವ ಮತೀ ಸಮೇತಿ, ಯೇ ಪಣ್ಡಿತಾ ಉತ್ತಮಭೂರಿಪತ್ತಾ;
ಯಾನಂ ಅಯಾನಂ ಅಥ ವಾಪಿ ಠಾನಂ, ಮಹೋಸಧ ತ್ವಮ್ಪಿ ಮತಿಂ ಕರೋಹಿ’’.
‘‘ಜಾನಾಸಿ ಖೋ ರಾಜ ಮಹಾನುಭಾವೋ, ಮಹಬ್ಬಲೋ ಚೂಳನಿಬ್ರಹ್ಮದತ್ತೋ;
ರಾಜಾ ಚ ತಂ ಇಚ್ಛತಿ ಮಾರಣತ್ಥಂ [ಕಾರಣತ್ಥಂ (ಸೀ. ಪೀ.)], ಮಿಗಂ ಯಥಾ ಓಕಚರೇನ ಲುದ್ದೋ.
‘‘ಯಥಾಪಿ ಮಚ್ಛೋ ಬಳಿಸಂ, ವಙ್ಕಂ ಮಂಸೇನ ಛಾದಿತಂ;
ಆಮಗಿದ್ಧೋ ನ ಜಾನಾತಿ, ಮಚ್ಛೋ ಮರಣಮತ್ತನೋ.
‘‘ಏವಮೇವ ತುವಂ ರಾಜ, ಚೂಳನೇಯ್ಯಸ್ಸ ಧೀತರಂ;
ಕಾಮಗಿದ್ಧೋ ನ ಜಾನಾಸಿ, ಮಚ್ಛೋವ ಮರಣಮತ್ತನೋ.
‘‘ಸಚೇ ಗಚ್ಛಸಿ ಪಞ್ಚಾಲಂ, ಖಿಪ್ಪಮತ್ತಂ ಜಹಿಸ್ಸತಿ;
ಮಿಗಂ ಪನ್ಥಾನುಬನ್ಧಂವ [ಪಥಾನುಪನ್ನಂವ (ಸೀ. ಸ್ಯಾ. ಪೀ.)], ಮಹನ್ತಂ ಭಯಮೇಸ್ಸತಿ’’.
‘‘ಮಯಮೇವ ಬಾಲಮ್ಹಸೇ ಏಳಮೂಗಾ, ಯೇ ಉತ್ತಮತ್ಥಾನಿ ತಯೀ ಲಪಿಮ್ಹಾ;
ಕಿಮೇವ ¶ ತ್ವಂ ನಙ್ಗಲಕೋಟಿವಡ್ಢೋ, ಅತ್ಥಾನಿ ಜಾನಾಸಿ ಯಥಾಪಿ ಅಞ್ಞೇ’’.
‘‘ಇಮಂ ಗಲೇ ಗಹೇತ್ವಾನ, ನಾಸೇಥ ವಿಜಿತಾ ಮಮ;
ಯೋ ಮೇ ರತನಲಾಭಸ್ಸ, ಅನ್ತರಾಯಾಯ ಭಾಸತಿ’’.
‘‘ತತೋ ¶ ಚ ಸೋ ಅಪಕ್ಕಮ್ಮ, ವೇದೇಹಸ್ಸ ಉಪನ್ತಿಕಾ;
ಅಥ ಆಮನ್ತಯೀ ದೂತಂ, ಮಾಧರಂ [ಮಢರಂ (ಸೀ.), ಮಾಧುರಂ (ಸ್ಯಾ.), ಮಾಠರಂ (ಪೀ.)] ಸುವಪಣ್ಡಿತಂ.
‘‘ಏಹಿ ¶ ಸಮ್ಮ ಹರಿತಪಕ್ಖ [ಹರೀಪಕ್ಖ (ಸೀ. ಪೀ.)], ವೇಯ್ಯಾವಚ್ಚಂ ಕರೋಹಿ ಮೇ;
ಅತ್ಥಿ ಪಞ್ಚಾಲರಾಜಸ್ಸ, ಸಾಳಿಕಾ ಸಯನಪಾಲಿಕಾ.
‘ತಂ ಬನ್ಧನೇನ [ತಂ ಪತ್ಥರೇನ (ಸೀ. ಪೀ.), ತಂ ಸನ್ಥವೇನ (ಸ್ಯಾ.)] ಪುಚ್ಛಸ್ಸು, ಸಾ ಹಿ ಸಬ್ಬಸ್ಸ ಕೋವಿದಾ;
ಸಾ ತೇಸಂ ಸಬ್ಬಂ ಜಾನಾತಿ, ರಞ್ಞೋ ಚ ಕೋಸಿಯಸ್ಸ ಚ.
‘‘‘ಆಮೋ’ತಿ ಸೋ ಪಟಿಸ್ಸುತ್ವಾ, ಮಾಧರೋ ಸುವಪಣ್ಡಿತೋ;
ಅಗಮಾಸಿ ಹರಿತಪಕ್ಖೋ [ಹರೀಪಕ್ಖೋ (ಸೀ. ಪೀ.)], ಸಾಳಿಕಾಯ ಉಪನ್ತಿಕಂ.
‘‘ತತೋ ಚ ಖೋ ಸೋ ಗನ್ತ್ವಾನ, ಮಾಧರೋ ಸುವಪಣ್ಡಿತೋ;
ಅಥಾಮನ್ತಯಿ ಸುಘರಂ, ಸಾಳಿಕಂ ಮಞ್ಜುಭಾಣಿಕಂ.
‘ಕಚ್ಚಿ ತೇ ಸುಘರೇ ಖಮನೀಯಂ, ಕಚ್ಚಿ ವೇಸ್ಸೇ ಅನಾಮಯಂ;
ಕಚ್ಚಿ ತೇ ಮಧುನಾ ಲಾಜಾ, ಲಬ್ಭತೇ ಸುಘರೇ ತುವಂ’ [ತವ (ಸೀ. ಪೀ.)].
‘ಕುಸಲಞ್ಚೇವ ಮೇ ಸಮ್ಮ, ಅಥೋ ಸಮ್ಮ ಅನಾಮಯಂ;
ಅಥೋ ಮೇ ಮಧುನಾ ಲಾಜಾ, ಲಬ್ಭತೇ ಸುವಪಣ್ಡಿತ.
‘ಕುತೋ ನು ಸಮ್ಮ ಆಗಮ್ಮ, ಕಸ್ಸ ವಾ ಪಹಿತೋ ತುವಂ;
ನ ¶ ಚ ಮೇಸಿ ಇತೋ ಪುಬ್ಬೇ, ದಿಟ್ಠೋ ವಾ ಯದಿ ವಾ ಸುತೋ’’.
‘‘ಅಹೋಸಿಂ ಸಿವಿರಾಜಸ್ಸ, ಪಾಸಾದೇ ಸಯನಪಾಲಕೋ;
ತತೋ ಸೋ ಧಮ್ಮಿಕೋ ರಾಜಾ, ಬದ್ಧೇ ಮೋಚೇಸಿ ಬನ್ಧನಾ’’.
‘‘ತಸ್ಸ ಮೇಕಾ ದುತಿಯಾಸಿ, ಸಾಳಿಕಾ ಮಞ್ಜುಭಾಣಿಕಾ;
ತಂ ತತ್ಥ ಅವಧೀ ಸೇನೋ, ಪೇಕ್ಖತೋ ಸುಘರೇ ಮಮ’’.
‘‘ತಸ್ಸಾ ಕಾಮಾ ಹಿ ಸಮ್ಮತ್ತೋ, ಆಗತೋಸ್ಮಿ ತವನ್ತಿಕೇ;
ಸಚೇ ಕರೇಯ್ಯ [ಕರೇಯ್ಯಾಸಿ (ಸೀ.), ಕರೇಯು (ಸ್ಯಾ.), ಕರೇಯ್ಯಾಸಿ ಮೇ (ಪೀ.)] ಓಕಾಸಂ, ಉಭಯೋವ ವಸಾಮಸೇ’’.
‘‘ಸುವೋವ ಸುವಿಂ ಕಾಮೇಯ್ಯ, ಸಾಳಿಕೋ ಪನ ಸಾಳಿಕಂ;
ಸುವಸ್ಸ ಸಾಳಿಕಾಯೇವ [ಸಾಳಿಕಾಯ ಚ (ಸೀ. ಪೀ.)], ಸಂವಾಸೋ ಹೋತಿ ಕೀದಿಸೋ’’.
‘‘ಯೋಯಂ ¶ ಕಾಮೇ [ಯಂ ಯಂ ಕಾಮೀ (ಸೀ. ಪೀ.)] ಕಾಮಯತಿ, ಅಪಿ ಚಣ್ಡಾಲಿಕಾಮಪಿ;
ಸಬ್ಬೋ ಹಿ ಸದಿಸೋ ಹೋತಿ, ನತ್ಥಿ ಕಾಮೇ ಅಸಾದಿಸೋ’’.
‘‘ಅತ್ಥಿ ಜಮ್ಪಾವತೀ [ಜಮ್ಬಾವತೀ (ಸೀ. ಸ್ಯಾ.), ಚಮ್ಪಾವತೀ (ಕ.)] ನಾಮ, ಮಾತಾ ಸಿವಿಸ್ಸ [ಸಿಬ್ಬಿಸ್ಸ (ಸೀ. ಪೀ.)] ರಾಜಿನೋ;
ಸಾ ಭರಿಯಾ ವಾಸುದೇವಸ್ಸ, ಕಣ್ಹಸ್ಸ ಮಹೇಸೀ ಪಿಯಾ.
‘‘ರಟ್ಠವತೀ [ರಥವತೀ (ಸೀ. ಪೀ.), ರತನವತೀ (ಸ್ಯಾ.)] ಕಿಮ್ಪುರಿಸೀ, ಸಾಪಿ ವಚ್ಛಂ ಅಕಾಮಯಿ;
ಮನುಸ್ಸೋ ಮಿಗಿಯಾ ಸದ್ಧಿಂ, ನತ್ಥಿ ಕಾಮೇ ಅಸಾದಿಸೋ’’.
‘‘ಹನ್ದ ಖ್ವಾಹಂ ಗಮಿಸ್ಸಾಮಿ, ಸಾಳಿಕೇ ಮಞ್ಜುಭಾಣಿಕೇ;
ಪಚ್ಚಕ್ಖಾನುಪದಞ್ಹೇತಂ, ಅತಿಮಞ್ಞಸಿ ನೂನ ಮಂ’’.
‘‘ನ ¶ ಸಿರೀ ತರಮಾನಸ್ಸ, ಮಾಧರ ಸುವಪಣ್ಡಿತ;
ಇಧೇವ ತಾವ ಅಚ್ಛಸ್ಸು, ಯಾವ ರಾಜಾನ ದಕ್ಖಸಿ [ದಕ್ಖಿಸಿ (ಪೀ.)];
ಸೋಸ್ಸಿ [ಸೋಸ್ಸಸಿ (ಸೀ.)] ಸದ್ದಂ ಮುದಿಙ್ಗಾನಂ, ಆನುಭಾವಞ್ಚ ರಾಜಿನೋ’’.
‘‘ಯೋ ¶ ನು ಖ್ವಾಯಂ ತಿಬ್ಬೋ ಸದ್ದೋ, ತಿರೋಜನಪದೇ [ತಿರೋಜನಪದಂ (ಪೀ. ಕ.)] ಸುತೋ;
ಧೀತಾ ಪಞ್ಚಾಲರಾಜಸ್ಸ, ಓಸಧೀ ವಿಯ ವಣ್ಣಿನೀ;
ತಂ ದಸ್ಸತಿ ವಿದೇಹಾನಂ, ಸೋ ವಿವಾಹೋ ಭವಿಸ್ಸತಿ’’.
‘‘ಏದಿಸೋ ಮಾ [ನೇದಿಸೋ ತೇ (ಸೀ.)] ಅಮಿತ್ತಾನಂ, ವಿವಾಹೋ ಹೋತು ಮಾಧರ;
ಯಥಾ ಪಞ್ಚಾಲರಾಜಸ್ಸ, ವೇದೇಹೇನ ಭವಿಸ್ಸತಿ’’.
‘‘ಆನಯಿತ್ವಾನ ವೇದೇಹಂ, ಪಞ್ಚಾಲಾನಂ ರಥೇಸಭೋ;
ತತೋ ನಂ ಘಾತಯಿಸ್ಸತಿ, ನಸ್ಸ ಸಖೀ ಭವಿಸ್ಸತಿ’’.
‘‘ಹನ್ದ ಖೋ ಮಂ ಅನುಜಾನಾಹಿ, ರತ್ತಿಯೋ ಸತ್ತಮತ್ತಿಯೋ;
ಯಾವಾಹಂ ಸಿವಿರಾಜಸ್ಸ, ಆರೋಚೇಮಿ ಮಹೇಸಿನೋ;
ಲದ್ಧೋ ಚ ಮೇ ಆವಸಥೋ, ಸಾಳಿಕಾಯ ಉಪನ್ತಿಕಂ’’ [ಉಪನ್ತಿಕಾ (ಸೀ. ಕ.)].
‘‘ಹನ್ದ ಖೋ ತಂ ಅನುಜಾನಾಮಿ, ರತ್ತಿಯೋ ಸತ್ತಮತ್ತಿಯೋ;
ಸಚೇ ತ್ವಂ ಸತ್ತರತ್ತೇನ, ನಾಗಚ್ಛಸಿ ಮಮನ್ತಿಕೇ;
ಮಞ್ಞೇ ಓಕ್ಕನ್ತಸತ್ತಂ [ಓಕ್ಕನ್ತಸನ್ತಂ (ಸ್ಯಾ. ಪೀ. ಕ.)] ಮಂ, ಮತಾಯ ಆಗಮಿಸ್ಸಸಿ’’.
‘‘ತತೋ ¶ ಚ ಖೋ ಸೋ ಗನ್ತ್ವಾನ, ಮಾಧರೋ ಸುವಪಣ್ಡಿತೋ;
ಮಹೋಸಧಸ್ಸ ಅಕ್ಖಾಸಿ, ಸಾಳಿಕಾವಚನಂ ಇದಂ’’.
‘‘ಯಸ್ಸೇವ ಘರೇ ಭುಞ್ಜೇಯ್ಯ ಭೋಗಂ, ತಸ್ಸೇವ ಅತ್ಥಂ ಪುರಿಸೋ ಚರೇಯ್ಯ’’;
‘‘ಹನ್ದಾಹಂ ಗಚ್ಛಾಮಿ ಪುರೇ ಜನಿನ್ದ, ಪಞ್ಚಾಲರಾಜಸ್ಸ ಪುರಂ ಸುರಮ್ಮಂ;
ನಿವೇಸನಾನಿ ಮಾಪೇತುಂ, ವೇದೇಹಸ್ಸ ಯಸಸ್ಸಿನೋ.
‘‘ನಿವೇಸನಾನಿ ¶ ಮಾಪೇತ್ವಾ, ವೇದೇಹಸ್ಸ ಯಸಸ್ಸಿನೋ;
ಯದಾ ತೇ ಪಹಿಣೇಯ್ಯಾಮಿ, ತದಾ ಏಯ್ಯಾಸಿ ಖತ್ತಿಯ’’.
‘‘ತತೋ ಚ ಪಾಯಾಸಿ ಪುರೇ ಮಹೋಸಧೋ, ಪಞ್ಚಾಲರಾಜಸ್ಸ ಪುರಂ ಸುರಮ್ಮಂ;
ನಿವೇಸನಾನಿ ಮಾಪೇತುಂ, ವೇದೇಹಸ್ಸ ಯಸಸ್ಸಿನೋ’’.
‘‘ನಿವೇಸನಾನಿ ಮಾಪೇತ್ವಾ, ವೇದೇಹಸ್ಸ ಯಸಸ್ಸಿನೋ;
ಅಥಸ್ಸ ಪಾಹಿಣೀ ದೂತಂ, [ನತ್ಥಿ ಸೀ. ಪೀ. ಪೋತ್ಥಕೇಸು] ವೇದೇಹಂ ಮಿಥಿಲಗ್ಗಹಂ [ನತ್ಥಿ ಸೀ. ಪೀ. ಪೋತ್ಥಕೇಸು];
ಏಹಿ ದಾನಿ ಮಹಾರಾಜ, ಮಾಪಿತಂ ತೇ ನಿವೇಸನಂ’’.
‘‘ತತೋ ಚ ರಾಜಾ ಪಾಯಾಸಿ, ಸೇನಾಯ ಚತುರಙ್ಗಿಯಾ [ಚತುರಙ್ಗಿನಿಯಾ (ಕ.)];
ಅನನ್ತವಾಹನಂ ದಟ್ಠುಂ, ಫೀತಂ ಕಪಿಲಿಯಂ [ಕಮ್ಪಿಲ್ಲಿಯಂ (ಸೀ. ಪೀ.)] ಪುರಂ’’.
‘‘ತತೋ ¶ ಚ ಖೋ ಸೋ ಗನ್ತ್ವಾನ, ಬ್ರಹ್ಮದತ್ತಸ್ಸ ಪಾಹಿಣಿ;
‘ಆಗತೋ’ಸ್ಮಿ ಮಹಾರಾಜ, ತವ ಪಾದಾನಿ ವನ್ದಿತುಂ.
‘ದದಾಹಿ ದಾನಿ ಮೇ ಭರಿಯಂ, ನಾರಿಂ ಸಬ್ಬಙ್ಗಸೋಭಿನಿಂ;
ಸುವಣ್ಣೇನ ಪಟಿಚ್ಛನ್ನಂ, ದಾಸೀಗಣಪುರಕ್ಖತಂ’’’.
‘‘ಸ್ವಾಗತಂ ತೇವ [ತೇ (ಸೀ.), ತೇಪಿ (ಸ್ಯಾ.), ತೇನ (ಪೀ.)] ವೇದೇಹ, ಅಥೋ ತೇ ಅದುರಾಗತಂ;
ನಕ್ಖತ್ತಂಯೇವ ಪರಿಪುಚ್ಛ, ಅಹಂ ಕಞ್ಞಂ ದದಾಮಿ ತೇ;
ಸುವಣ್ಣೇನ ಪಟಿಚ್ಛನ್ನಂ, ದಾಸೀಗಣಪುರಕ್ಖತಂ’’.
‘‘ತತೋ ಚ ರಾಜಾ ವೇದೇಹೋ, ನಕ್ಖತ್ತಂ ಪರಿಪುಚ್ಛಥ [ಪರಿಪುಚ್ಛತಿ (ಸ್ಯಾ. ಕ.)];
ನಕ್ಖತ್ತಂ ಪರಿಪುಚ್ಛಿತ್ವಾ, ಬ್ರಹ್ಮದತ್ತಸ್ಸ ಪಾಹಿಣಿ.
‘‘ದದಾಹಿ ¶ ದಾನಿ ಮೇ ಭರಿಯಂ, ನಾರಿಂ ಸಬ್ಬಙ್ಗಸೋಭಿನಿಂ;
ಸುವಣ್ಣೇನ ಪಟಿಚ್ಛನ್ನಂ, ದಾಸೀಗಣಪುರಕ್ಖತಂ’’.
‘‘ದದಾಮಿ ದಾನಿ ತೇ ಭರಿಯಂ, ನಾರಿಂ ಸಬ್ಬಙ್ಗಸೋಭಿನಿಂ;
ಸುವಣ್ಣೇನ ¶ ಪಟಿಚ್ಛನ್ನಂ, ದಾಸೀಗಣಪುರಕ್ಖತಂ’’.
‘‘ಹತ್ಥೀ ಅಸ್ಸಾ ರಥಾ ಪತ್ತೀ, ಸೇನಾ ತಿಟ್ಠನ್ತಿ ವಮ್ಮಿತಾ [ವಮ್ಮಿಕಾ (ಸ್ಯಾ. ಕ.)];
ಉಕ್ಕಾ ಪದಿತ್ತಾ ಝಾಯನ್ತಿ, ಕಿನ್ನು ಮಞ್ಞನ್ತಿ ಪಣ್ಡಿತಾ.
‘‘ಹತ್ಥೀ ಅಸ್ಸಾ ರಥಾ ಪತ್ತೀ, ಸೇನಾ ತಿಟ್ಠನ್ತಿ ವಮ್ಮಿತಾ [ವಮ್ಮಿಕಾ (ಸ್ಯಾ. ಕ.)];
ಉಕ್ಕಾ ಪದಿತ್ತಾ ಝಾಯನ್ತಿ, ಕಿಂ ನು ಕಾಹನ್ತಿ [ಕಾಹತಿ (ಕ.)] ಪಣ್ಡಿತ’’.
‘‘ರಕ್ಖತಿ ತಂ ಮಹಾರಾಜ, ಚೂಳನೇಯ್ಯೋ ಮಹಬ್ಬಲೋ;
ಪದುಟ್ಠೋ ಬ್ರಹ್ಮದತ್ತೇನ [ಪದುಟ್ಠೋ ತೇ ಬ್ರಹ್ಮದತ್ತೋ (ಸೀ. ಸ್ಯಾ. ಪೀ.)], ಪಾತೋ ತಂ ಘಾತಯಿಸ್ಸತಿ’’.
‘‘ಉಬ್ಬೇಧತಿ ಮೇ ಹದಯಂ, ಮುಖಞ್ಚ ಪರಿಸುಸ್ಸತಿ;
ನಿಬ್ಬುತಿಂ ನಾಧಿಗಚ್ಛಾಮಿ, ಅಗ್ಗಿದಡ್ಢೋವ ಆತಪೇ.
‘‘ಕಮ್ಮಾರಾನಂ ಯಥಾ ಉಕ್ಕಾ, ಅನ್ತೋ ಝಾಯತಿ ನೋ ಬಹಿ;
ಏವಮ್ಪಿ ಹದಯಂ ಮಯ್ಹಂ, ಅನ್ತೋ ಝಾಯತಿ ನೋ ಬಹಿ’’.
‘‘ಪಮತ್ತೋ ಮನ್ತನಾತೀತೋ, ಭಿನ್ನಮನ್ತೋಸಿ ಖತ್ತಿಯ;
ಇದಾನಿ ಖೋ ತಂ ತಾಯನ್ತು, ಪಣ್ಡಿತಾ ಮನ್ತಿನೋ ಜನಾ.
‘‘ಅಕತ್ವಾಮಚ್ಚಸ್ಸ ವಚನಂ, ಅತ್ಥಕಾಮಹಿತೇಸಿನೋ;
ಅತ್ತಪೀತಿರತೋ ರಾಜಾ, ಮಿಗೋ ಕೂಟೇವ ಓಹಿತೋ.
‘‘ಯಥಾಪಿ ಮಚ್ಛೋ ಬಳಿಸಂ, ವಙ್ಕಂ ಮಂಸೇನ ಛಾದಿತಂ;
ಆಮಗಿದ್ಧೋ ನ ಜಾನಾತಿ, ಮಚ್ಛೋ ಮರಣಮತ್ತನೋ.
‘‘ಏವಮೇವ ¶ ತುವಂ ರಾಜ, ಚೂಳನೇಯ್ಯಸ್ಸ ಧೀತರಂ;
ಕಾಮಗಿದ್ಧೋ ¶ ನ ಜಾನಾಸಿ, ಮಚ್ಛೋವ ಮರಣಮತ್ತನೋ.
‘‘ಸಚೇ ಗಚ್ಛಸಿ ಪಞ್ಚಾಲಂ, ಖಿಪ್ಪಮತ್ತಂ ಜಹಿಸ್ಸಸಿ;
ಮಿಗಂ ಪನ್ಥಾನುಬನ್ಧಂವ, ಮಹನ್ತಂ ಭಯಮೇಸ್ಸತಿ.
‘‘ಅನರಿಯರೂಪೋ ¶ ಪುರಿಸೋ ಜನಿನ್ದ, ಅಹೀವ ಉಚ್ಛಙ್ಗಗತೋ ಡಸೇಯ್ಯ;
ನ ತೇನ ಮಿತ್ತಿಂ ಕಯಿರಾಥ ಧೀರೋ [ಪಞ್ಞೋ (ಪೀ.)], ದುಕ್ಖೋ ಹವೇ ಕಾಪುರಿಸೇನ [ಕಾಪುರಿಸೇಹಿ (ಕ.)] ಸಙ್ಗಮೋ.
‘‘ಯದೇವ [ಯಂ ತ್ವೇವ (ಸೀ. ಸ್ಯಾ. ಪೀ.)] ಜಞ್ಞಾ ಪುರಿಸಂ [ಪುರಿಸೋ (ಸ್ಯಾ. ಕ.)] ಜನಿನ್ದ, ಸೀಲವಾಯಂ ಬಹುಸ್ಸುತೋ;
ತೇನೇವ ಮಿತ್ತಿಂ ಕಯಿರಾಥ ಧೀರೋ, ಸುಖೋ ಹವೇ ಸಪ್ಪುರಿಸೇನ ಸಙ್ಗಮೋ’’.
‘‘ಬಾಲೋ ತುವಂ ಏಳಮೂಗೋಸಿ ರಾಜ, ಯೋ ಉತ್ತಮತ್ಥಾನಿ ಮಯೀ ಲಪಿತ್ಥೋ;
ಕಿಮೇವಹಂ ನಙ್ಗಲಕೋಟಿವಡ್ಢೋ, ಅತ್ಥಾನಿ ಜಾನಾಮಿ [ಜಾನಿಸ್ಸಂ (ಸೀ. ಸ್ಯಾ. ಪೀ.)] ಯಥಾಪಿ ಅಞ್ಞೇ.
‘‘ಇಮಂ ಗಲೇ ಗಹೇತ್ವಾನ, ನಾಸೇಥ ವಿಜಿತಾ ಮಮ;
ಯೋ ಮೇ ರತನಲಾಭಸ್ಸ, ಅನ್ತರಾಯಾಯ ಭಾಸತಿ’’.
‘‘ಮಹೋಸಧ ಅತೀತೇನ, ನಾನುವಿಜ್ಝನ್ತಿ ಪಣ್ಡಿತಾ;
ಕಿಂ ಮಂ ಅಸ್ಸಂವ ಸಮ್ಬನ್ಧಂ, ಪತೋದೇನೇವ ವಿಜ್ಝಸಿ.
‘‘ಸಚೇ ಪಸ್ಸಸಿ ಮೋಕ್ಖಂ ವಾ, ಖೇಮಂ ವಾ ಪನ ಪಸ್ಸಸಿ;
ತೇನೇವ ¶ ಮಂ ಅನುಸಾಸ, ಕಿಂ ಅತೀತೇನ ವಿಜ್ಝಸಿ’’.
‘‘ಅತೀತಂ ಮಾನುಸಂ ಕಮ್ಮಂ, ದುಕ್ಕರಂ ದುರಭಿಸಮ್ಭವಂ;
ನ ತಂ ಸಕ್ಕೋಮಿ ಮೋಚೇತುಂ, ತ್ವಂ ಪಜಾನಸ್ಸು [ತ್ವಮ್ಪಿ ಜಾನಸ್ಸು (ಸೀ. ಪೀ.)] ಖತ್ತಿಯ.
‘‘ಸನ್ತಿ ವೇಹಾಯಸಾ [ವೇಹಾಸಯಾ (ಸೀ. ಪೀ.)] ನಾಗಾ, ಇದ್ಧಿಮನ್ತೋ ಯಸಸ್ಸಿನೋ;
ತೇಪಿ ಆದಾಯ ಗಚ್ಛೇಯ್ಯುಂ, ಯಸ್ಸ ಹೋನ್ತಿ ತಥಾವಿಧಾ.
‘‘ಸನ್ತಿ ವೇಹಾಯಸಾ ಅಸ್ಸಾ, ಇದ್ಧಿಮನ್ತೋ ಯಸಸ್ಸಿನೋ;
ತೇಪಿ ಆದಾಯ ಗಚ್ಛೇಯ್ಯುಂ, ಯಸ್ಸ ಹೋನ್ತಿ ತಥಾವಿಧಾ.
‘‘ಸನ್ತಿ ವೇಹಾಯಸಾ ಪಕ್ಖೀ, ಇದ್ಧಿಮನ್ತೋ ಯಸಸ್ಸಿನೋ;
ತೇಪಿ ಆದಾಯ ಗಚ್ಛೇಯ್ಯುಂ, ಯಸ್ಸ ಹೋನ್ತಿ ತಥಾವಿಧಾ.
‘‘ಸನ್ತಿ ¶ ವೇಹಾಯಸಾ ಯಕ್ಖಾ, ಇದ್ಧಿಮನ್ತೋ ಯಸಸ್ಸಿನೋ;
ತೇಪಿ ಆದಾಯ ಗಚ್ಛೇಯ್ಯುಂ, ಯಸ್ಸ ಹೋನ್ತಿ ತಥಾವಿಧಾ.
‘‘ಅತೀತಂ ಮಾನುಸಂ ಕಮ್ಮಂ, ದುಕ್ಕರಂ ದುರಭಿಸಮ್ಭವಂ;
ನ ತಂ ಸಕ್ಕೋಮಿ ಮೋಚೇತುಂ, ಅನ್ತಲಿಕ್ಖೇನ ಖತ್ತಿಯ’’.
‘‘ಅತೀರದಸ್ಸೀ ಪುರಿಸೋ, ಮಹನ್ತೇ ಉದಕಣ್ಣವೇ;
ಯತ್ಥ ಸೋ ಲಭತೇ ಗಾಧಂ [ನಾವಂ (ಕ.)], ತತ್ಥ ಸೋ ವಿನ್ದತೇ ಸುಖಂ.
‘‘ಏವಂ ¶ ಅಮ್ಹಞ್ಚ ರಞ್ಞೋ ಚ, ತ್ವಂ ಪತಿಟ್ಠಾ ಮಹೋಸಧ;
ತ್ವಂ ನೋಸಿ ಮನ್ತಿನಂ ಸೇಟ್ಠೋ, ಅಮ್ಹೇ ದುಕ್ಖಾ ಪಮೋಚಯ’’.
‘‘ಅತೀತಂ ಮಾನುಸಂ ಕಮ್ಮಂ, ದುಕ್ಕರಂ ದುರಭಿಸಮ್ಭವಂ;
ನ ತಂ ಸಕ್ಕೋಮಿ ಮೋಚೇತುಂ, ತ್ವಂ ಪಜಾನಸ್ಸು ಸೇನಕ’’.
‘‘ಸುಣೋಹಿ ¶ ಮೇತಂ [ಏತಂ (ಸೀ. ಕ.)] ವಚನಂ, ಪಸ್ಸ ಸೇನಂ [ಪಸ್ಸಸೇ’ತಂ (ಸೀ. ಪೀ.)] ಮಹಬ್ಭಯಂ;
ಸೇನಕಂ ದಾನಿ ಪುಚ್ಛಾಮಿ, ಕಿಂ ಕಿಚ್ಚಂ ಇಧ ಮಞ್ಞಸಿ’’.
‘‘ಅಗ್ಗಿಂ ವಾ ದ್ವಾರತೋ ದೇಮ, ಗಣ್ಹಾಮಸೇ ವಿಕನ್ತನಂ [ವಿಕತ್ತನಂ (ಸೀ. ಪೀ.)];
ಅಞ್ಞಮಞ್ಞಂ ವಧಿತ್ವಾನ, ಖಿಪ್ಪಂ ಹಿಸ್ಸಾಮ ಜೀವಿತಂ;
ಮಾ ನೋ ರಾಜಾ ಬ್ರಹ್ಮದತ್ತೋ, ಚಿರಂ ದುಕ್ಖೇನ ಮಾರಯಿ’’.
‘‘ಸುಣೋಹಿ ಮೇತಂ ವಚನಂ, ಪಸ್ಸ ಸೇನಂ ಮಹಬ್ಭಯಂ;
ಪುಕ್ಕುಸಂ ದಾನಿ ಪುಚ್ಛಾಮಿ, ಕಿಂ ಕಿಚ್ಚಂ ಇಧ ಮಞ್ಞಸಿ’’.
‘‘ವಿಸಂ ಖಾದಿತ್ವಾ ಮಿಯ್ಯಾಮ, ಖಿಪ್ಪಂ ಹಿಸ್ಸಾಮ ಜೀವಿತಂ;
ಮಾ ನೋ ರಾಜಾ ಬ್ರಹ್ಮದತ್ತೋ, ಚಿರಂ ದುಕ್ಖೇನ ಮಾರಯಿ’’.
‘‘ಸುಣೋಹಿ ಮೇತಂ ವಚನಂ, ಪಸ್ಸ ಸೇನಂ ಮಹಬ್ಭಯಂ;
ಕಾಮಿನ್ದಂ [ಕಾವಿನ್ದಂ (ಸೀ. ಪೀ.)] ದಾನಿ ಪುಚ್ಛಾಮಿ, ಕಿಂ ಕಿಚ್ಚಂ ಇಧ ಮಞ್ಞಸಿ’’.
‘‘ರಜ್ಜುಯಾ ಬಜ್ಝ ಮಿಯ್ಯಾಮ, ಪಪಾತಾ ಪಪತಾಮಸೇ [ಪಪತೇಮಸೇ (ಸೀ. ಪೀ.)];
ಮಾ ನೋ ರಾಜಾ ಬ್ರಹ್ಮದತ್ತೋ, ಚಿರಂ ದುಕ್ಖೇನ ಮಾರಯಿ’’.
‘‘ಸುಣೋಹಿ ಮೇತಂ ವಚನಂ, ಪಸ್ಸ ಸೇನಂ ಮಹಬ್ಭಯಂ;
ದೇವಿನ್ದಂ ದಾನಿ ಪುಚ್ಛಾಮಿ, ಕಿಂ ಕಿಚ್ಚಂ ಇಧ ಮಞ್ಞಸಿ’’.
‘‘ಅಗ್ಗಿಂ ¶ ವಾ ದ್ವಾರತೋ ದೇಮ, ಗಣ್ಹಾಮಸೇ ವಿಕನ್ತನಂ;
ಅಞ್ಞಮಞ್ಞಂ ವಧಿತ್ವಾನ, ಖಿಪ್ಪಂ ಹಿಸ್ಸಾಮ ಜೀವಿತಂ;
ನ ನೋ ಸಕ್ಕೋತಿ ಮೋಚೇತುಂ, ಸುಖೇನೇವ ಮಹೋಸಧೋ’’.
‘‘ಯಥಾ ಕದಲಿನೋ ಸಾರಂ, ಅನ್ವೇಸಂ ನಾಧಿಗಚ್ಛತಿ;
ಏವಂ ಅನ್ವೇಸಮಾನಾ ನಂ, ಪಞ್ಹಂ ನಜ್ಝಗಮಾಮಸೇ.
‘‘ಯಥಾ ಸಿಮ್ಬಲಿನೋ ¶ ಸಾರಂ, ಅನ್ವೇಸಂ ನಾಧಿಗಚ್ಛತಿ;
ಏವಂ ಅನ್ವೇಸಮಾನಾ ನಂ, ಪಞ್ಹಂ ನಜ್ಝಗಮಾಮಸೇ.
‘‘ಅದೇಸೇ ವತ ನೋ ವುಟ್ಠಂ, ಕುಞ್ಜರಾನಂವನೋದಕೇ;
ಸಕಾಸೇ ದುಮ್ಮನುಸ್ಸಾನಂ, ಬಾಲಾನಂ ಅವಿಜಾನತಂ.
‘‘ಉಬ್ಬೇಧತಿ ಮೇ ಹದಯಂ, ಮುಖಞ್ಚ ಪರಿಸುಸ್ಸತಿ;
ನಿಬ್ಬುತಿಂ ನಾಧಿಗಚ್ಛಾಮಿ, ಅಗ್ಗಿದಡ್ಢೋವ ಆತಪೇ.
‘‘ಕಮ್ಮಾರಾನಂ ¶ ಯಥಾ ಉಕ್ಕಾ, ಅನ್ತೋ ಝಾಯತಿ ನೋ ಬಹಿ;
ಏವಮ್ಪಿ ಹದಯಂ ಮಯ್ಹಂ, ಅನ್ತೋ ಝಾಯತಿ ನೋ ಬಹಿ’’.
‘‘ತತೋ ಸೋ ಪಣ್ಡಿತೋ ಧೀರೋ, ಅತ್ಥದಸ್ಸೀ ಮಹೋಸಧೋ;
ವೇದೇಹಂ ದುಕ್ಖಿತಂ ದಿಸ್ವಾ, ಇದಂ ವಚನಮಬ್ರವಿ.
‘ಮಾ ತ್ವಂ ಭಾಯಿ ಮಹಾರಾಜ, ಮಾ ತ್ವಂ ಭಾಯಿ ರಥೇಸಭ;
ಅಹಂ ತಂ ಮೋಚಯಿಸ್ಸಾಮಿ, ರಾಹುಗ್ಗಹಂವ [ರಾಹುಗಹಿತಂವ (ಸೀ. ಸ್ಯಾ. ಪೀ.)] ಚನ್ದಿಮಂ.
‘ಮಾ ತ್ವಂ ಭಾಯಿ ಮಹಾರಾಜ, ಮಾ ತ್ವಂ ಭಾಯಿ ರಥೇಸಭ;
ಅಹಂ ತಂ ಮೋಚಯಿಸ್ಸಾಮಿ, ರಾಹುಗ್ಗಹಂವ ಸೂರಿಯಂ.
‘‘ಮಾ ತ್ವಂ ಭಾಯಿ ಮಹಾರಾಜ, ಮಾ ತ್ವಂ ಭಾಯಿ ರಥೇಸಭ;
ಅಹಂ ತಂ ಮೋಚಯಿಸ್ಸಾಮಿ, ಪಙ್ಕೇ ಸನ್ನಂವ ಕುಞ್ಜರಂ.
‘ಮಾ ತ್ವಂ ಭಾಯಿ ಮಹಾರಾಜ, ಮಾ ತ್ವಂ ಭಾಯಿ ರಥೇಸಭ;
ಅಹಂ ತಂ ಮೋಚಯಿಸ್ಸಾಮಿ, ಪೇಳಾಬದ್ಧಂವ ಪನ್ನಗಂ.
[ಅಯಂ ಗಾಥಾ ಸೀ. ಪೀ. ಪೋತ್ಥಕೇಸು ನ ದಿಸ್ಸತಿ] ‘ಮಾ ತ್ವಂ ಭಾಯಿ ಮಹಾರಾಜ, ಮಾ ತ್ವಂ ಭಾಯಿ ರಥೇಸಭ;
ಅಹಂ ತಂ ಮೋಚಯಿಸ್ಸಾಮಿ, ಪಕ್ಖಿಂ ಬದ್ಧಂವ ಪಞ್ಜರೇ [ಅಯಂ ಗಾಥಾ ಸೀ. ಪೀ. ಪೋತ್ಥಕೇಸು ನ ದಿಸ್ಸತಿ].
‘ಮಾ ¶ ¶ ತ್ವಂ ಭಾಯಿ ಮಹಾರಾಜ, ಮಾ ತ್ವಂ ಭಾಯಿ ರಥೇಸಭ;
ಅಹಂ ತಂ ಮೋಚಯಿಸ್ಸಾಮಿ, ಮಚ್ಛೇ ಜಾಲಗತೇರಿವ.
‘ಮಾ ತ್ವಂ ಭಾಯಿ ಮಹಾರಾಜ, ಮಾ ತ್ವಂ ಭಾಯಿ ರಥೇಸಭ;
ಅಹಂ ತಂ ಮೋಚಯಿಸ್ಸಾಮಿ, ಸಯೋಗ್ಗಬಲವಾಹನಂ.
‘ಮಾ ತ್ವಂ ಭಾಯಿ ಮಹಾರಾಜ, ಮಾ ತ್ವಂ ಭಾಯಿ ರಥೇಸಭ;
ಪಞ್ಚಾಲಂ ವಾಹಯಿಸ್ಸಾಮಿ [ಬಾಹಯಿಸ್ಸಾಮಿ (ಸ್ಯಾ.), ವಾರಯಿಸ್ಸಾಮಿ (ಕ.)], ಕಾಕಸೇನಂವ ಲೇಡ್ಡುನಾ.
‘ಅದು ಪಞ್ಞಾ ಕಿಮತ್ಥಿಯಾ, ಅಮಚ್ಚೋ ವಾಪಿ ತಾದಿಸೋ;
ಯೋ ತಂ ಸಮ್ಬಾಧಪಕ್ಖನ್ದಂ [ಸಮ್ಬಾಧಪಕ್ಖನ್ತಂ (ಸೀ. ಪೀ.)], ದುಕ್ಖಾ ನ ಪರಿಮೋಚಯೇ’’’.
‘‘ಏಥ ಮಾಣವಾ ಉಟ್ಠೇಥ, ಮುಖಂ ಸೋಧೇಥ ಸನ್ಧಿನೋ;
ವೇದೇಹೋ ಸಹಮಚ್ಚೇಹಿ, ಉಮಙ್ಗೇನ [ಉಮ್ಮಗ್ಗೇನ (ಸೀ. ಪೀ.), ಉಮ್ಮಙ್ಗೇ (ಸ್ಯಾ.) ಏವಮುಪರಿಪಿ] ಗಮಿಸ್ಸತಿ’’.
‘‘ತಸ್ಸ ತಂ ವಚನಂ ಸುತ್ವಾ, ಪಣ್ಡಿತಸ್ಸಾನುಚಾರಿನೋ [ಪಣ್ಡಿತಸ್ಸಾನುಸಾರಿನೋ (ಸೀ. ಸ್ಯಾ. ಪೀ.)];
ಉಮಙ್ಗದ್ವಾರಂ ವಿವರಿಂಸು, ಯನ್ತಯುತ್ತೇ ಚ ಅಗ್ಗಳೇ’’.
‘‘ಪುರತೋ ಸೇನಕೋ ಯಾತಿ, ಪಚ್ಛತೋ ಚ ಮಹೋಸಧೋ;
ಮಜ್ಝೇ ಚ ರಾಜಾ ವೇದೇಹೋ, ಅಮಚ್ಚಪರಿವಾರಿತೋ’’.
‘‘ಉಮಙ್ಗಾ ನಿಕ್ಖಮಿತ್ವಾನ, ವೇದೇಹೋ ನಾವಮಾರುಹಿ;
ಅಭಿರೂಳ್ಹಞ್ಚ ತಂ ಞತ್ವಾ [ಅಭಿರುಯ್ಹಞ್ಚ ಞತ್ವಾನ (ಸ್ಯಾ. ಕ.)], ಅನುಸಾಸಿ ಮಹೋಸಧೋ.
‘ಅಯಂ ¶ ತೇ ಸಸುರೋ ದೇವ, ಅಯಂ ಸಸ್ಸು ಜನಾಧಿಪ;
ಯಥಾ ಮಾತು ಪಟಿಪತ್ತಿ, ಏವಂ ತೇ ಹೋತು ಸಸ್ಸುಯಾ.
‘ಯಥಾಪಿ ನಿಯಕೋ ಭಾತಾ, ಸಉದರಿಯೋ ಏಕಮಾತುಕೋ;
ಏವಂ ಪಞ್ಚಾಲಚನ್ದೋ ತೇ, ದಯಿತಬ್ಬೋ ರಥೇಸಭ.
‘ಅಯಂ ¶ ಪಞ್ಚಾಲಚನ್ದೀ ತೇ, ರಾಜಪುತ್ತೀ ಅಭಿಚ್ಛಿತಾ [ಅಭಿಜ್ಝಿತಾ (ಸೀ. ಸ್ಯಾ. ಪೀ.)];
ಕಾಮಂ ಕರೋಹಿ ತೇ ತಾಯ, ಭರಿಯಾ ತೇ ರಥೇಸಭ’’’.
‘‘ಆರುಯ್ಹ ನಾವಂ ತರಮಾನೋ, ಕಿನ್ನು ತೀರಮ್ಹಿ ತಿಟ್ಠಸಿ;
ಕಿಚ್ಛಾ ಮುತ್ತಾಮ್ಹ ದುಕ್ಖತೋ, ಯಾಮ ದಾನಿ ಮಹೋಸಧ’’.
‘‘ನೇಸ ¶ ಧಮ್ಮೋ ಮಹಾರಾಜ, ಯೋಹಂ ಸೇನಾಯ ನಾಯಕೋ;
ಸೇನಙ್ಗಂ ಪರಿಹಾಪೇತ್ವಾ, ಅತ್ತಾನಂ ಪರಿಮೋಚಯೇ.
‘‘ನಿವೇಸನಮ್ಹಿ ತೇ ದೇವ, ಸೇನಙ್ಗಂ ಪರಿಹಾಪಿತಂ;
ತಂ ದಿನ್ನಂ ಬ್ರಹ್ಮದತ್ತೇನ, ಆನಯಿಸ್ಸಂ ರಥೇಸಭ’’.
‘‘ಅಪ್ಪಸೇನೋ ಮಹಾಸೇನಂ, ಕಥಂ ವಿಗ್ಗಯ್ಹ [ನಿಗ್ಗಯ್ಹ (ಸ್ಯಾ. ಕ.)] ಠಸ್ಸಸಿ;
ದುಬ್ಬಲೋ ಬಲವನ್ತೇನ, ವಿಹಞ್ಞಿಸ್ಸಸಿ ಪಣ್ಡಿತ’’.
‘‘ಅಪ್ಪಸೇನೋಪಿ ಚೇ ಮನ್ತೀ, ಮಹಾಸೇನಂ ಅಮನ್ತಿನಂ;
ಜಿನಾತಿ ರಾಜಾ ರಾಜಾನೋ, ಆದಿಚ್ಚೋವುದಯಂ ತಮಂ’’.
‘‘ಸುಸುಖಂ ವತ ಸಂವಾಸೋ, ಪಣ್ಡಿತೇಹೀತಿ ಸೇನಕ;
ಪಕ್ಖೀವ ಪಞ್ಜರೇ ಬದ್ಧೇ, ಮಚ್ಛೇ ಜಾಲಗತೇರಿವ;
ಅಮಿತ್ತಹತ್ಥತ್ತಗತೇ [ಅಮಿತ್ತಸ್ಸ ಹತ್ಥಗತೇ (ಕ.)], ಮೋಚಯೀ ನೋ ಮಹೋಸಧೋ’’.
‘‘ಏವಮೇತಂ [ಏವಮೇವ (ಸ್ಯಾ.)] ಮಹಾರಾಜ, ಪಣ್ಡಿತಾ ಹಿ ಸುಖಾವಹಾ;
ಪಕ್ಖೀವ ಪಞ್ಜರೇ ಬದ್ಧೇ, ಮಚ್ಛೇ ಜಾಲಗತೇರಿವ;
ಅಮಿತ್ತಹತ್ಥತ್ತಗತೇ, ಮೋಚಯೀ ನೋ ಮಹೋಸಧೋ’’.
‘‘ರಕ್ಖಿತ್ವಾ ಕಸಿಣಂ ರತ್ತಿಂ, ಚೂಳನೇಯ್ಯೋ ಮಹಬ್ಬಲೋ;
ಉದೇನ್ತಂ ಅರುಣುಗ್ಗಸ್ಮಿಂ, ಉಪಕಾರಿಂ ಉಪಾಗಮಿ.
‘‘ಆರುಯ್ಹ ¶ ಪವರಂ ನಾಗಂ, ಬಲವನ್ತಂ ಸಟ್ಠಿಹಾಯನಂ;
ರಾಜಾ ಅವೋಚ ಪಞ್ಚಾಲೋ, ಚೂಳನೇಯ್ಯೋ ಮಹಬ್ಬಲೋ.
‘‘ಸನ್ನದ್ಧೋ ಮಣಿವಮ್ಮೇನ [ಮಣಿಚಮ್ಮೇನ (ಸ್ಯಾ.)], ಸರಮಾದಾಯ ಪಾಣಿನಾ;
ಪೇಸಿಯೇ ಅಜ್ಝಭಾಸಿತ್ಥ, ಪುಥುಗುಮ್ಬೇ ಸಮಾಗತೇ.
‘‘ಹತ್ಥಾರೋಹೇ ಅನೀಕಟ್ಠೇ, ರಥಿಕೇ ಪತ್ತಿಕಾರಕೇ;
ಉಪಾಸನಮ್ಹಿ ಕತಹತ್ಥೇ, ವಾಲವೇಧೇ ಸಮಾಗತೇ’’.
‘‘ಪೇಸೇಥ ¶ ಕುಞ್ಜರೇ ದನ್ತೀ, ಬಲವನ್ತೇ ಸಟ್ಠಿಹಾಯನೇ;
ಮದ್ದನ್ತು ಕುಞ್ಜರಾ ನಗರಂ, ವೇದೇಹೇನ ಸುಮಾಪಿತಂ.
‘‘ವಚ್ಛದನ್ತಮುಖಾ ಸೇತಾ, ತಿಕ್ಖಗ್ಗಾ ಅಟ್ಠಿವೇಧಿನೋ;
ಪಣುನ್ನಾ ಧನುವೇಗೇನ, ಸಮ್ಪತನ್ತುತರೀತರಾ.
‘‘ಮಾಣವಾ ¶ ವಮ್ಮಿನೋ ಸೂರಾ, ಚಿತ್ರದಣ್ಡಯುತಾವುಧಾ;
ಪಕ್ಖನ್ದಿನೋ ಮಹಾನಾಗಾ, ಹತ್ಥೀನಂ ಹೋನ್ತು ಸಮ್ಮುಖಾ.
‘‘ಸತ್ತಿಯೋ ತೇಲಧೋತಾಯೋ, ಅಚ್ಚಿಮನ್ತಾ [ಅಚ್ಚಿಮನ್ತೀ (ಸೀ.)] ಪಭಸ್ಸರಾ;
ವಿಜ್ಜೋತಮಾನಾ ತಿಟ್ಠನ್ತು, ಸತರಂಸೀವ [ಸತರಂಸಾ ವಿಯ (ಸೀ.)] ತಾರಕಾ.
‘‘ಆವುಧಬಲವನ್ತಾನಂ, ಗುಣಿಕಾಯೂರಧಾರಿನಂ;
ಏತಾದಿಸಾನಂ ಯೋಧಾನಂ, ಸಙ್ಗಾಮೇ ಅಪಲಾಯಿನಂ;
ವೇದೇಹೋ ಕುತೋ ಮುಚ್ಚಿಸ್ಸತಿ, ಸಚೇ ಪಕ್ಖೀವ ಕಾಹಿತಿ.
‘‘ತಿಂಸ ಮೇ ಪುರಿಸನಾವುತ್ಯೋ, ಸಬ್ಬೇವೇಕೇಕನಿಚ್ಚಿತಾ;
ಯೇಸಂ ಸಮಂ ನ ಪಸ್ಸಾಮಿ, ಕೇವಲಂ ಮಹಿಮಂ ಚರಂ.
‘‘ನಾಗಾ ಚ ಕಪ್ಪಿತಾ ದನ್ತೀ, ಬಲವನ್ತೋ ಸಟ್ಠಿಹಾಯನಾ;
ಯೇಸಂ ¶ ಖನ್ಧೇಸು ಸೋಭನ್ತಿ, ಕುಮಾರಾ ಚಾರುದಸ್ಸನಾ;
‘‘ಪೀತಾಲಙ್ಕಾರಾ ಪೀತವಸನಾ, ಪೀತುತ್ತರನಿವಾಸನಾ;
ನಾಗಖನ್ಧೇಸು ಸೋಭನ್ತಿ, ದೇವಪುತ್ತಾವ ನನ್ದನೇ.
‘‘ಪಾಠೀನವಣ್ಣಾ ನೇತ್ತಿಂಸಾ, ತೇಲಧೋತಾ ಪಭಸ್ಸರಾ;
ನಿಟ್ಠಿತಾ ನರಧೀರೇಹಿ [ನರವೀರೇಹಿ (ಸೀ. ಸ್ಯಾ. ಪೀ.)], ಸಮಧಾರಾ ಸುನಿಸ್ಸಿತಾ.
‘‘ವೇಲ್ಲಾಲಿನೋ ವೀತಮಲಾ, ಸಿಕ್ಕಾಯಸಮಯಾ ದಳ್ಹಾ;
ಗಹಿತಾ ಬಲವನ್ತೇಹಿ, ಸುಪ್ಪಹಾರಪ್ಪಹಾರಿಭಿ.
‘‘ಸುವಣ್ಣಥರುಸಮ್ಪನ್ನಾ, ಲೋಹಿತಕಚ್ಛುಪಧಾರಿತಾ;
ವಿವತ್ತಮಾನಾ ಸೋಭನ್ತಿ, ವಿಜ್ಜುವಬ್ಭಘನನ್ತರೇ.
‘‘ಪಟಾಕಾ [ಪತಾಕಾ (ಸೀ. ಪೀ.), ಪಥಕಾ (ಸ್ಯಾ.)] ವಮ್ಮಿನೋ ಸೂರಾ, ಅಸಿಚಮ್ಮಸ್ಸ ಕೋವಿದಾ;
ಧನುಗ್ಗಹಾ ಸಿಕ್ಖಿತರಾ [ಥರುಗ್ಗಹಾ ಸಿಕ್ಖಿತಾರೋ (ಸೀ. ಪೀ.)], ನಾಗಖನ್ಧೇ ನಿಪಾತಿನೋ [ನಾಗಖನ್ಧಾತಿಪಾತಿನೋ (ಸೀ. ಪೀ.)].
‘‘ಏತಾದಿಸೇಹಿ ಪರಿಕ್ಖಿತ್ತೋ, ನತ್ಥಿ ಮೋಕ್ಖೋ ಇತೋ ತವ;
ಪಭಾವಂ ತೇ ನ ಪಸ್ಸಾಮಿ, ಯೇನ ತ್ವಂ ಮಿಥಿಲಂ ವಜೇ’’.
‘‘ಕಿಂ ನು ಸನ್ತರಮಾನೋವ, ನಾಗಂ ಪೇಸೇಸಿ ಕುಞ್ಜರಂ;
ಪಹಟ್ಠರೂಪೋ ಆಪತಸಿ [ಆಗಮಸಿ (ಸ್ಯಾ.), ಆತಪಸಿ (ಕ.)], ಸಿದ್ಧತ್ಥೋಸ್ಮೀತಿ [ಲದ್ಧತ್ಥೋಸ್ಮೀತಿ (ಸೀ. ಸ್ಯಾ. ಪೀ.)] ಮಞ್ಞಸಿ.
‘‘ಓಹರೇತಂ ¶ ¶ ಧನುಂ ಚಾಪಂ, ಖುರಪ್ಪಂ ಪಟಿಸಂಹರ;
ಓಹರೇತಂ ಸುಭಂ ವಮ್ಮಂ, ವೇಳುರಿಯಮಣಿಸನ್ಥತಂ’’ [ವೇಳುರಿಯಮಣಿಸನ್ನಿಭಂ (ಸ್ಯಾ.)].
‘‘ಪಸನ್ನಮುಖವಣ್ಣೋಸಿ, ಮಿತಪುಬ್ಬಞ್ಚ ಭಾಸಸಿ;
ಹೋತಿ ಖೋ ಮರಣಕಾಲೇ, ಏದಿಸೀ [ತಾದಿಸೀ (ಸೀ. ಪೀ.)] ವಣ್ಣಸಮ್ಪದಾ’’.
‘‘ಮೋಘಂ ತೇ ಗಜ್ಜಿತಂ ರಾಜ, ಭಿನ್ನಮನ್ತೋಸಿ ಖತ್ತಿಯ;
ದುಗ್ಗಣ್ಹೋಸಿ ¶ [ದುಗ್ಗಣ್ಹೋ ಹಿ (ಸೀ. ಸ್ಯಾ. ಪೀ.)] ತಯಾ ರಾಜಾ, ಖಳುಙ್ಕೇನೇವ [ಖಳುಙ್ಗೇನೇವ (ಕ.)] ಸಿನ್ಧವೋ.
‘‘ತಿಣ್ಣೋ ಹಿಯ್ಯೋ ರಾಜಾ ಗಙ್ಗಂ, ಸಾಮಚ್ಚೋ ಸಪರಿಜ್ಜನೋ;
ಹಂಸರಾಜಂ ಯಥಾ ಧಙ್ಕೋ, ಅನುಜ್ಜವಂ ಪತಿಸ್ಸಸಿ’’.
‘‘ಸಿಙ್ಗಾಲಾ ರತ್ತಿಭಾಗೇನ, ಫುಲ್ಲಂ ದಿಸ್ವಾನ ಕಿಂಸುಕಂ;
ಮಂಸಪೇಸೀತಿ ಮಞ್ಞನ್ತಾ, ಪರಿಬ್ಯೂಳ್ಹಾ ಮಿಗಾಧಮಾ.
‘‘ವೀತಿವತ್ತಾಸು ರತ್ತೀಸು, ಉಗ್ಗತಸ್ಮಿಂ ದಿವಾಕರೇ [ದಿವಾಕರೇ (ಸೀ. ಸ್ಯಾ. ಪೀ.)];
ಕಿಂಸುಕಂ ಫುಲ್ಲಿತಂ ದಿಸ್ವಾ, ಆಸಚ್ಛಿನ್ನಾ ಮಿಗಾಧಮಾ.
‘‘ಏವಮೇವ ತುವಂ ರಾಜ, ವೇದೇಹಂ ಪರಿವಾರಿಯ [ಪರಿವಾರಯ (ಸ್ಯಾ. ಪೀ.), ಪರಿವಾರಿತಂ (ಕ.)];
ಆಸಚ್ಛಿನ್ನೋ ಗಮಿಸ್ಸಸಿ, ಸಿಙ್ಗಾಲಾ ಕಿಂಸುಕಂ ಯಥಾ’’.
‘‘ಇಮಸ್ಸ ಹತ್ಥೇ ಪಾದೇ ಚ, ಕಣ್ಣನಾಸಞ್ಚ ಛಿನ್ದಥ;
ಯೋ ಮೇ ಅಮಿತ್ತಂ ಹತ್ಥಗತಂ, ವೇದೇಹಂ ಪರಿಮೋಚಯಿ.
‘‘ಇಮಂ ಮಂಸಂವ ಪಾತಬ್ಯಂ [ಮಂಸಂವ ಪಾತಬ್ಬಂ (ಸೀ. ಪೀ.), ಮಂಸಞ್ಚ ಪಾತಬ್ಯಂ (ಕ.)], ಸೂಲೇ ಕತ್ವಾ ಪಚನ್ತು ನಂ;
ಯೋ ಮೇ ಅಮಿತ್ತಂ ಹತ್ಥಗತಂ, ವೇದೇಹಂ ಪರಿಮೋಚಯಿ.
‘‘ಯಥಾಪಿ ಆಸಭಂ ಚಮ್ಮಂ, ಪಥಬ್ಯಾ ವಿತನಿಯ್ಯತಿ;
ಸೀಹಸ್ಸ ಅಥೋ ಬ್ಯಗ್ಘಸ್ಸ, ಹೋತಿ ಸಙ್ಕುಸಮಾಹತಂ.
‘‘ಏವಂ ತಂ ವಿತನಿತ್ವಾನ, ವೇಧಯಿಸ್ಸಾಮಿ ಸತ್ತಿಯಾ;
ಯೋ ಮೇ ಅಮಿತ್ತಂ ಹತ್ಥಗತಂ, ವೇದೇಹಂ ಪರಿಮೋಚಯಿ’’.
‘‘ಸಚೇ ಮೇ ಹತ್ಥೇ ಪಾದೇ ಚ, ಕಣ್ಣನಾಸಞ್ಚ ಛೇಚ್ಛಸಿ;
ಏವಂ ಪಞ್ಚಾಲಚನ್ದಸ್ಸ, ವೇದೇಹೋ ಛೇದಯಿಸ್ಸತಿ.
‘‘ಸಚೇ ¶ ಮೇ ಹತ್ಥೇ ಪಾದೇ ಚ, ಕಣ್ಣನಾಸಞ್ಚ ಛೇಚ್ಛಸಿ;
ಏವಂ ¶ ಪಞ್ಚಾಲಚನ್ದಿಯಾ, ವೇದೇಹೋ ಛೇದಯಿಸ್ಸತಿ.
‘‘ಸಚೇ ಮೇ ಹತ್ಥೇ ಪಾದೇ ಚ, ಕಣ್ಣನಾಸಞ್ಚ ಛೇಚ್ಛಸಿ;
ಏವಂ ನನ್ದಾಯ ದೇವಿಯಾ, ವೇದೇಹೋ ಛೇದಯಿಸ್ಸತಿ.
‘‘ಸಚೇ ಮೇ ಹತ್ಥೇ ಪಾದೇ ಚ, ಕಣ್ಣನಾಸಞ್ಚ ಛೇಚ್ಛಸಿ;
ಏವಂ ತೇ ಪುತ್ತದಾರಸ್ಸ, ವೇದೇಹೋ ಛೇದಯಿಸ್ಸತಿ.
‘‘ಸಚೇ ¶ ಮಂಸಂವ ಪಾತಬ್ಯಂ, ಸೂಲೇ ಕತ್ವಾ ಪಚಿಸ್ಸಸಿ;
ಏವಂ ಪಞ್ಚಾಲಚನ್ದಸ್ಸ, ವೇದೇಹೋ ಪಾಚಯಿಸ್ಸತಿ.
‘‘ಸಚೇ ಮಂಸಂವ ಪಾತಬ್ಯಂ, ಸೂಲೇ ಕತ್ವಾ ಪಚಿಸ್ಸಸಿ;
ಏವಂ ಪಞ್ಚಾಲಚನ್ದಿಯಾ, ವೇದೇಹೋ ಪಾಚಯಿಸ್ಸತಿ.
‘‘ಸಚೇ ಮಂಸಂವ ಪಾತಬ್ಯಂ, ಸೂಲೇ ಕತ್ವಾ ಪಚಿಸ್ಸಸಿ;
ಏವಂ ನನ್ದಾಯ ದೇವಿಯಾ, ವೇದೇಹೋ ಪಾಚಯಿಸ್ಸತಿ.
‘‘ಸಚೇ ಮಂಸಂವ ಪಾತಬ್ಯಂ, ಸೂಲೇ ಕತ್ವಾ ಪಚಿಸ್ಸಸಿ;
ಏವಂ ತೇ ಪುತ್ತದಾರಸ್ಸ, ವೇದೇಹೋ ಪಾಚಯಿಸ್ಸತಿ.
‘‘ಸಚೇ ಮಂ ವಿತನಿತ್ವಾನ, ವೇಧಯಿಸ್ಸಸಿ ಸತ್ತಿಯಾ;
ಏವಂ ಪಞ್ಚಾಲಚನ್ದಸ್ಸ, ವೇದೇಹೋ ವೇಧಯಿಸ್ಸತಿ.
‘‘ಸಚೇ ಮಂ ವಿತನಿತ್ವಾನ, ವೇಧಯಿಸ್ಸಸಿ ಸತ್ತಿಯಾ;
ಏವಂ ಪಞ್ಚಾಲಚನ್ದಿಯಾ, ವೇದೇಹೋ ವೇಧಯಿಸ್ಸತಿ.
‘‘ಸಚೇ ಮಂ ವಿತನಿತ್ವಾನ, ವೇಧಯಿಸ್ಸಸಿ ಸತ್ತಿಯಾ;
ಏವಂ ನನ್ದಾಯ ದೇವಿಯಾ, ವೇದೇಹೋ ವೇಧಯಿಸ್ಸತಿ.
‘‘ಸಚೇ ಮಂ ವಿತನಿತ್ವಾನ, ವೇಧಯಿಸ್ಸಸಿ ಸತ್ತಿಯಾ;
ಏವಂ ¶ ತೇ ಪುತ್ತದಾರಸ್ಸ, ವೇದೇಹೋ ವೇಧಯಿಸ್ಸತಿ;
ಏವಂ ನೋ ಮನ್ತಿತಂ ರಹೋ, ವೇದೇಹೇನ ಮಯಾ ಸಹ.
‘‘ಯಥಾಪಿ ಪಲಸತಂ ಚಮ್ಮಂ, ಕೋನ್ತಿಮನ್ತಾಸುನಿಟ್ಠಿತಂ [ಕೋನ್ತೀಮನ್ತೀಸುನಿಟ್ಠಿತಂ (ಸೀ. ಪೀ.)];
ಉಪೇತಿ ತನುತಾಣಾಯ, ಸರಾನಂ ಪಟಿಹನ್ತವೇ.
‘‘ಸುಖಾವಹೋ ¶ ದುಕ್ಖನುದೋ, ವೇದೇಹಸ್ಸ ಯಸಸ್ಸಿನೋ;
ಮತಿಂ ತೇ ಪಟಿಹಞ್ಞಾಮಿ, ಉಸುಂ ಪಲಸತೇನ ವಾ’’.
‘‘ಇಙ್ಘ ಪಸ್ಸ ಮಹಾರಾಜ, ಸುಞ್ಞಂ ಅನ್ತೇಪುರಂ ತವ;
ಓರೋಧಾ ಚ ಕುಮಾರಾ ಚ, ತವ ಮಾತಾ ಚ ಖತ್ತಿಯ;
ಉಮಙ್ಗಾ ನೀಹರಿತ್ವಾನ, ವೇದೇಹಸ್ಸುಪನಾಮಿತಾ’’.
‘‘ಇಙ್ಘ ಅನ್ತೇಪುರಂ ಮಯ್ಹಂ, ಗನ್ತ್ವಾನ ವಿಚಿನಾಥ ನಂ;
ಯಥಾ ಇಮಸ್ಸ ವಚನಂ, ಸಚ್ಚಂ ವಾ ಯದಿ ವಾ ಮುಸಾ’’.
‘‘ಏವಮೇತಂ ಮಹಾರಾಜ, ಯಥಾ ಆಹ ಮಹೋಸಧೋ;
ಸುಞ್ಞಂ ಅನ್ತೇಪುರಂ ಸಬ್ಬಂ, ಕಾಕಪಟ್ಟನಕಂ ಯಥಾ’’.
‘‘ಇತೋ ಗತಾ ಮಹಾರಾಜ, ನಾರೀ ಸಬ್ಬಙ್ಗಸೋಭನಾ;
ಕೋಸಮ್ಬಫಲಕಸುಸ್ಸೋಣೀ [ಕೋಸುಮ್ಭಫಲಕಸುಸ್ಸೋಣೀ (ಸೀ. ಸ್ಯಾ. ಪೀ.)], ಹಂಸಗಗ್ಗರಭಾಣಿನೀ.
‘‘ಇತೋ ¶ ನೀತಾ ಮಹಾರಾಜ, ನಾರೀ ಸಬ್ಬಙ್ಗಸೋಭನಾ;
ಕೋಸೇಯ್ಯವಸನಾ ಸಾಮಾ, ಜಾತರೂಪಸುಮೇಖಲಾ.
‘‘ಸುರತ್ತಪಾದಾ ಕಲ್ಯಾಣೀ, ಸುವಣ್ಣಮಣಿಮೇಖಲಾ;
ಪಾರೇವತಕ್ಖೀ ಸುತನೂ, ಬಿಮ್ಬೋಟ್ಠಾ ತನುಮಜ್ಝಿಮಾ.
‘‘ಸುಜಾತಾ ಭುಜಲಟ್ಠೀವ, ವೇದೀವ [ವೇಲ್ಲೀವ (ಸೀ. ಪೀ.)] ತನುಮಜ್ಝಿಮಾ;
ದೀಘಸ್ಸಾ ¶ ಕೇಸಾ ಅಸಿತಾ, ಈಸಕಗ್ಗಪವೇಲ್ಲಿತಾ.
‘‘ಸುಜಾತಾ ಮಿಗಛಾಪಾವ, ಹೇಮನ್ತಗ್ಗಿಸಿಖಾರಿವ;
ನದೀವ ಗಿರಿದುಗ್ಗೇಸು, ಸಞ್ಛನ್ನಾ ಖುದ್ದವೇಳುಭಿ.
‘‘ನಾಗನಾಸೂರು ಕಲ್ಯಾಣೀ, ಪರಮಾ [ಪಠಮಾ (ಸೀ. ಪೀ.)] ತಿಮ್ಬರುತ್ಥನೀ;
ನಾತಿದೀಘಾ ನಾತಿರಸ್ಸಾ, ನಾಲೋಮಾ ನಾತಿಲೋಮಸಾ’’.
‘‘ನನ್ದಾಯ ನೂನ ಮರಣೇನ, ನನ್ದಸಿ ಸಿರಿವಾಹನ;
ಅಹಞ್ಚ ನೂನ ನನ್ದಾ ಚ, ಗಚ್ಛಾಮ ಯಮಸಾಧನಂ’’.
‘‘ದಿಬ್ಬಂ ಅಧೀಯಸೇ ಮಾಯಂ, ಅಕಾಸಿ ಚಕ್ಖುಮೋಹನಂ;
ಯೋ ಮೇ ಅಮಿತ್ತಂ ಹತ್ಥಗತಂ, ವೇದೇಹಂ ಪರಿಮೋಚಯಿ’’.
‘‘ಅಧೀಯನ್ತಿ ¶ ಮಹಾರಾಜ [ಅಧಿಯನ್ತಿ ವೇ ಮಹಾರಾಜ (ಸ್ಯಾ. ಕ.)], ದಿಬ್ಬಮಾಯಿಧ ಪಣ್ಡಿತಾ;
ತೇ ಮೋಚಯನ್ತಿ ಅತ್ತಾನಂ, ಪಣ್ಡಿತಾ ಮನ್ತಿನೋ ಜನಾ.
‘‘ಸನ್ತಿ ಮಾಣವಪುತ್ತಾ ಮೇ, ಕುಸಲಾ ಸನ್ಧಿಛೇದಕಾ;
ಯೇಸಂ ಕತೇನ ಮಗ್ಗೇನ, ವೇದೇಹೋ ಮಿಥಿಲಂ ಗತೋ’’.
‘‘ಇಙ್ಘ ಪಸ್ಸ ಮಹಾರಾಜ, ಉಮಙ್ಗಂ ಸಾಧು ಮಾಪಿತಂ;
ಹತ್ಥೀನಂ ಅಥ ಅಸ್ಸಾನಂ, ರಥಾನಂ ಅಥ ಪತ್ತಿನಂ;
ಆಲೋಕಭೂತಂ ತಿಟ್ಠನ್ತಂ, ಉಮಙ್ಗಂ ಸಾಧು ಮಾಪಿತಂ’’ [ನಿಟ್ಠಿತಂ (ಸೀ. ಸ್ಯಾ. ಪೀ.)].
‘‘ಲಾಭಾ ವತ ವಿದೇಹಾನಂ, ಯಸ್ಸಿಮೇದಿಸಾ ಪಣ್ಡಿತಾ;
ಘರೇ ವಸನ್ತಿ ವಿಜಿತೇ, ಯಥಾ ತ್ವಂಸಿ ಮಹೋಸಧ’’.
‘‘ವುತ್ತಿಞ್ಚ ಪರಿಹಾರಞ್ಚ, ದಿಗುಣಂ ಭತ್ತವೇತನಂ;
ದದಾಮಿ ವಿಪುಲೇ ಭೋಗೇ, ಭುಞ್ಜ ಕಾಮೇ ರಮಸ್ಸು ಚ;
ಮಾ ¶ ವಿದೇಹಂ ಪಚ್ಚಗಮಾ, ಕಿಂ ವಿದೇಹೋ ಕರಿಸ್ಸತಿ’’.
‘‘ಯೋ ಚಜೇಥ ಮಹಾರಾಜ, ಭತ್ತಾರಂ ಧನಕಾರಣಾ;
ಉಭಿನ್ನಂ ಹೋತಿ ಗಾರಯ್ಹೋ, ಅತ್ತನೋ ಚ ಪರಸ್ಸ ಚ;
ಯಾವ ಜೀವೇಯ್ಯ ವೇದೇಹೋ, ನಾಞ್ಞಸ್ಸ ಪುರಿಸೋ ಸಿಯಾ.
‘‘ಯೋ ¶ ಚಜೇಥ ಮಹಾರಾಜ, ಭತ್ತಾರಂ ಧನಕಾರಣಾ;
ಉಭಿನ್ನಂ ಹೋತಿ ಗಾರಯ್ಹೋ, ಅತ್ತನೋ ಚ ಪರಸ್ಸ ಚ;
ಯಾವ ತಿಟ್ಠೇಯ್ಯ ವೇದೇಹೋ, ನಾಞ್ಞಸ್ಸ ವಿಜಿತೇ ವಸೇ’’.
‘‘ದಮ್ಮಿ ನಿಕ್ಖಸಹಸ್ಸಂ ತೇ, ಗಾಮಾಸೀತಿಞ್ಚ ಕಾಸಿಸು;
ದಾಸಿಸತಾನಿ ಚತ್ತಾರಿ, ದಮ್ಮಿ ಭರಿಯಾಸತಞ್ಚ ತೇ;
ಸಬ್ಬಂ ಸೇನಙ್ಗಮಾದಾಯ, ಸೋತ್ಥಿಂ ಗಚ್ಛ ಮಹೋಸಧ.
‘‘ಯಾವ ದದನ್ತು ಹತ್ಥೀನಂ, ಅಸ್ಸಾನಂ ದಿಗುಣಂ ವಿಧಂ;
ತಪ್ಪೇನ್ತು ಅನ್ನಪಾನೇನ, ರಥಿಕೇ ಪತ್ತಿಕಾರಕೇ’’.
‘‘ಹತ್ಥೀ ಅಸ್ಸೇ ರಥೇ ಪತ್ತೀ, ಗಚ್ಛೇವಾದಾಯ ಪಣ್ಡಿತ;
ಪಸ್ಸತು ತಂ ಮಹಾರಾಜಾ, ವೇದೇಹೋ ಮಿಥಿಲಂ ಗತಂ [ಮಿಥಿಲಗ್ಗಹಂ (ಕ.)].
‘‘ಹತ್ಥೀ ಅಸ್ಸಾ ರಥಾ ಪತ್ತೀ, ಸೇನಾ ಪದಿಸ್ಸತೇ ಮಹಾ;
ಚತುರಙ್ಗಿನೀ ಭೀಸರೂಪಾ, ಕಿಂ ನು ಮಞ್ಞಸಿ ಪಣ್ಡಿತ’’ [ಮಞ್ಞನ್ತಿ ಪಣ್ಡಿತಾ (ಸೀ. ಸ್ಯಾ. ಪೀ.)].
‘‘ಆನನ್ದೋ ¶ ತೇ ಮಹಾರಾಜ, ಉತ್ತಮೋ ಪಟಿದಿಸ್ಸತಿ;
ಸಬ್ಬಂ ಸೇನಙ್ಗಮಾದಾಯ, ಸೋತ್ಥಿಂ ಪತ್ತೋ ಮಹೋಸಧೋ’’.
‘‘ಯಥಾ ಪೇತಂ ಸುಸಾನಸ್ಮಿಂ, ಛಡ್ಡೇತ್ವಾ ಚತುರೋ ಜನಾ;
ಏವಂ ಕಪಿಲಯೇ ತ್ಯಮ್ಹ [ಕಪ್ಪಿಲಿಯೇ ತ್ಯಮ್ಹಾ (ಸ್ಯಾ.), ಕಮ್ಪಿಲ್ಲಿಯೇ ತ್ಯಮ್ಹಾ (ಸೀ.), ಕಮ್ಪಿಲ್ಲಿಯರಟ್ಠೇ (ಪೀ.)], ಛಡ್ಡಯಿತ್ವಾ ಇಧಾಗತಾ.
‘‘ಅಥ ¶ ತ್ವಂ ಕೇನ ವಣ್ಣೇನ, ಕೇನ ವಾ ಪನ ಹೇತುನಾ;
ಕೇನ ವಾ ಅತ್ಥಜಾತೇನ, ಅತ್ತಾನಂ ಪರಿಮೋಚಯಿ’’.
‘‘ಅತ್ಥಂ ಅತ್ಥೇನ ವೇದೇಹ, ಮನ್ತಂ ಮನ್ತೇನ ಖತ್ತಿಯ;
ಪರಿವಾರಯಿಂ [ಪರಿವಾರಯಿಸ್ಸಂ (ಸೀ. ಸ್ಯಾ.)] ರಾಜಾನಂ, ಜಮ್ಬುದೀಪಂವ ಸಾಗರೋ’’.
‘‘ದಿನ್ನಂ ನಿಕ್ಖಸಹಸ್ಸಂ ಮೇ, ಗಾಮಾಸೀತಿ ಚ ಕಾಸಿಸು;
ದಾಸೀಸತಾನಿ ಚತ್ತಾರಿ, ದಿನ್ನಂ ಭರಿಯಾಸತಞ್ಚ ಮೇ;
ಸಬ್ಬಂ ಸೇನಙ್ಗಮಾದಾಯ, ಸೋತ್ಥಿನಾಮ್ಹಿ ಇಧಾಗತೋ’’.
‘‘ಸುಸುಖಂ ವತ ಸಂವಾಸೋ, ಪಣ್ಡಿತೇಹೀತಿ ಸೇನಕ;
ಪಕ್ಖೀವ ಪಞ್ಜರೇ ಬದ್ಧೇ, ಮಚ್ಛೇ ಜಾಲಗತೇರಿವ;
ಅಮಿತ್ತಹತ್ಥತ್ತಗತೇ [ಅಮಿತ್ತಸ್ಸ ಹತ್ಥಗತೇ (ಕ.)], ಮೋಚಯೀ ನೋ ಮಹೋಸಧೋ’’.
‘‘ಏವಮೇತಂ ಮಹಾರಾಜ, ಪಣ್ಡಿತಾ ಹಿ ಸುಖಾವಹಾ;
ಪಕ್ಖೀವ ಪಞ್ಜರೇ ಬದ್ಧೇ, ಮಚ್ಛೇ ಜಾಲಗತೇರಿವ;
ಅಮಿತ್ತಹತ್ಥತ್ತಗತೇ, ಮೋಚಯೀ ನೋ ಮಹೋಸಧೋ’’.
‘‘ಆಹಞ್ಞನ್ತು ¶ ಸಬ್ಬವೀಣಾ, ಭೇರಿಯೋ ದಿನ್ದಿಮಾನಿ ಚ;
ಧಮೇನ್ತು ಮಾಗಧಾ ಸಙ್ಖಾ, ವಗ್ಗೂ ನದನ್ತು ದುನ್ದುಭೀ’’.
‘‘ಓರೋಧಾ ಚ ಕುಮಾರಾ ಚ, ವೇಸಿಯಾನಾ ಚ ಬ್ರಾಹ್ಮಣಾ;
ಬಹುಂ ಅನ್ನಞ್ಚ ಪಾನಞ್ಚ, ಪಣ್ಡಿತಸ್ಸಾಭಿಹಾರಯುಂ.
‘‘ಹತ್ಥಾರೋಹಾ ಅನೀಕಟ್ಠಾ, ರಥಿಕಾ ಪತ್ತಿಕಾರಕಾ;
ಬಹುಂ ಅನ್ನಞ್ಚ ಪಾನಞ್ಚ, ಪಣ್ಡಿತಸ್ಸಾಭಿಹಾರಯುಂ.
‘‘ಸಮಾಗತಾ ಜಾನಪದಾ, ನೇಗಮಾ ಚ ಸಮಾಗತಾ;
ಬಹುಂ ¶ ಅನ್ನಞ್ಚ ಪಾನಞ್ಚ, ಪಣ್ಡಿತಸ್ಸಾಭಿಹಾರಯುಂ.
‘‘ಬಹುಜನೋ ¶ ಪಸನ್ನೋಸಿ, ದಿಸ್ವಾ ಪಣ್ಡಿತಮಾಗತಂ;
ಪಣ್ಡಿತಮ್ಹಿ ಅನುಪ್ಪತ್ತೇ, ಚೇಲುಕ್ಖೇಪೋ ಅವತ್ತಥಾ’’ತಿ.
ಉಮಙ್ಗಜಾತಕಂ [ಮಹಾಉಮ್ಮಗ್ಗಜಾತಕಂ (ಸೀ. ಪೀ.), ಮಹೋಸಧಜಾತಕಂ (ಸ್ಯಾ.§ಕ.)] ಪಞ್ಚಮಂ.
೫೪೩. ಭೂರಿದತ್ತಜಾತಕಂ (೬)
‘‘ಯಂ ಕಿಞ್ಚಿ ರತನಂ ಅತ್ಥಿ, ಧತರಟ್ಠನಿವೇಸನೇ;
ಸಬ್ಬಾನಿ ತೇ ಉಪಯನ್ತು, ಧೀತರಂ ದೇಹಿ ರಾಜಿನೋ’’.
‘‘ನ ನೋ ವಿವಾಹೋ ನಾಗೇಹಿ, ಕತಪುಬ್ಬೋ ಕುದಾಚನಂ;
ತಂ ವಿವಾಹಂ ಅಸಂಯುತ್ತಂ, ಕಥಂ ಅಮ್ಹೇ ಕರೋಮಸೇ’’.
‘‘ಜೀವಿತಂ ನೂನ ತೇ ಚತ್ತಂ, ರಟ್ಠಂ ವಾ ಮನುಜಾಧಿಪ;
ನ ಹಿ ನಾಗೇ ಕುಪಿತಮ್ಹಿ, ಚಿರಂ ಜೀವನ್ತಿ ತಾದಿಸಾ.
‘‘ಯೋ ತ್ವಂ ದೇವ ಮನುಸ್ಸೋಸಿ, ಇದ್ಧಿಮನ್ತಂ ಅನಿದ್ಧಿಮಾ;
ವರುಣಸ್ಸ ನಿಯಂ ಪುತ್ತಂ, ಯಾಮುನಂ ಅತಿಮಞ್ಞಸಿ’’.
‘‘ನಾತಿಮಞ್ಞಾಮಿ ರಾಜಾನಂ, ಧತರಟ್ಠಂ ಯಸಸ್ಸಿನಂ;
ಧತರಟ್ಠೋ ಹಿ ನಾಗಾನಂ, ಬಹೂನಮಪಿ ಇಸ್ಸರೋ.
‘‘ಅಹಿ ಮಹಾನುಭಾವೋಪಿ, ನ ಮೇ ಧೀತರಮಾರಹೋ;
ಖತ್ತಿಯೋ ಚ ವಿದೇಹಾನಂ, ಅಭಿಜಾತಾ ಸಮುದ್ದಜಾ’’.
‘‘ಕಮ್ಬಲಸ್ಸತರಾ ಉಟ್ಠೇನ್ತು, ಸಬ್ಬೇ ನಾಗೇ ನಿವೇದಯ;
ಬಾರಾಣಸಿಂ ಪವಜ್ಜನ್ತು, ಮಾ ಚ ಕಞ್ಚಿ [ಕಿಞ್ಚಿ (ಸೀ. ಪೀ. ಕ.)] ವಿಹೇಠಯುಂ’’.
‘‘ನಿವೇಸನೇಸು ¶ ¶ ಸೋಬ್ಭೇಸು, ರಥಿಯಾ ಚಚ್ಚರೇಸು ಚ;
ರುಕ್ಖಗ್ಗೇಸು ಚ ಲಮ್ಬನ್ತು, ವಿತತಾ ತೋರಣೇಸು ಚ.
‘‘ಅಹಮ್ಪಿ ಸಬ್ಬಸೇತೇನ, ಮಹತಾ ಸುಮಹಂ ಪುರಂ;
ಪರಿಕ್ಖಿಪಿಸ್ಸಂ ಭೋಗೇಹಿ, ಕಾಸೀನಂ ಜನಯಂ ಭಯಂ’’.
ತಸ್ಸ ತಂ ವಚನಂ ಸುತ್ವಾ, ಉರಗಾನೇಕವಣ್ಣಿನೋ;
ಬಾರಾಣಸಿಂ ಪವಜ್ಜಿಂಸು, ನ ಚ ಕಞ್ಚಿ ವಿಹೇಠಯುಂ.
ನಿವೇಸನೇಸು ಸೋಬ್ಭೇಸು, ರಥಿಯಾ ಚಚ್ಚರೇಸು ಚ;
ರುಕ್ಖಗ್ಗೇಸು ಚ ಲಮ್ಬಿಂಸು, ವಿತತಾ ತೋರಣೇಸು ಚ.
ತೇಸು ¶ ದಿಸ್ವಾನ ಲಮ್ಬನ್ತೇ, ಪುಥೂ ಕನ್ದಿಂಸು ನಾರಿಯೋ;
ನಾಗೇ ಸೋಣ್ಡಿಕತೇ ದಿಸ್ವಾ, ಪಸ್ಸಸನ್ತೇ ಮುಹುಂ ಮುಹುಂ.
ಬಾರಾಣಸೀ ಪಬ್ಯಧಿತಾ, ಆತುರಾ ಸಮಪಜ್ಜಥ;
ಬಾಹಾ ಪಗ್ಗಯ್ಹ ಪಕ್ಕನ್ದುಂ, ‘‘ಧೀತರಂ ದೇಹಿ ರಾಜಿನೋ’’.
‘‘ಪುಪ್ಫಾಭಿಹಾರಸ್ಸ ವನಸ್ಸ ಮಜ್ಝೇ, ಕೋ ಲೋಹಿತಕ್ಖೋ ವಿತತನ್ತರಂಸೋ;
ಕಾ ಕಮ್ಬುಕಾಯೂರಧರಾ ಸುವತ್ಥಾ, ತಿಟ್ಠನ್ತಿ ನಾರಿಯೋ ದಸ ವನ್ದಮಾನಾ.
‘‘ಕೋ ತ್ವಂ ಬ್ರಹಾಬಾಹು ವನಸ್ಸ ಮಜ್ಝೇ, ವಿರೋಚಸಿ ಘತಸಿತ್ತೋವ ಅಗ್ಗಿ;
ಮಹೇಸಕ್ಖೋ ಅಞ್ಞತರೋಸಿ ಯಕ್ಖೋ, ಉದಾಹು ನಾಗೋಸಿ ಮಹಾನುಭಾವೋ’’.
‘‘ನಾಗೋಹಮಸ್ಮಿ ¶ ಇದ್ಧಿಮಾ, ತೇಜಸ್ಸೀ [ತೇಜಸೀ (ಸೀ. ಸ್ಯಾ. ಪೀ. ಕ.)] ದುರತಿಕ್ಕಮೋ;
ಡಂಸೇಯ್ಯಂ ತೇಜಸಾ ಕುದ್ಧೋ, ಫೀತಂ ಜನಪದಂ ಅಪಿ.
‘‘ಸಮುದ್ದಜಾ ಹಿ ಮೇ ಮಾತಾ, ಧತರಟ್ಠೋ ಚ ಮೇ ಪಿತಾ;
ಸುದಸ್ಸನಕನಿಟ್ಠೋಸ್ಮಿ, ಭೂರಿದತ್ತೋತಿ ಮಂ ವಿದೂ’’.
‘‘ಯಂ ಗಮ್ಭೀರಂ ಸದಾವಟ್ಟಂ, ರಹದಂ ಭಿಸ್ಮಂ ಪೇಕ್ಖಸಿ;
ಏಸ ದಿಬ್ಯೋ ಮಮಾವಾಸೋ, ಅನೇಕಸತಪೋರಿಸೋ.
‘‘ಮಯೂರಕೋಞ್ಚಾಭಿರುದಂ, ನೀಲೋದಂ ವನಮಜ್ಝತೋ;
ಯಮುನಂ ಪವಿಸ ಮಾ ಭೀತೋ, ಖೇಮಂ ವತ್ತವತಂ [ವತ್ತವತಿಂ (ಸ್ಯಾ. ಕ.)] ಸಿವಂ’’.
‘‘ತತ್ಥ ಪತ್ತೋ ಸಾನುಚರೋ, ಸಹ ಪುತ್ತೇನ ಬ್ರಾಹ್ಮಣ;
ಪೂಜಿತೋ ಮಯ್ಹಂ ಕಾಮೇಹಿ, ಸುಖಂ ಬ್ರಾಹ್ಮಣ ವಚ್ಛಸಿ’’.
‘‘ಸಮಾ ಸಮನ್ತಪರಿತೋ, ಪಹೂತತಗರಾ [ಬಹುಕಾ ತಗ್ಗರಾ (ಸೀ. ಸ್ಯಾ. ಪೀ.)] ಮಹೀ;
ಇನ್ದಗೋಪಕಸಞ್ಛನ್ನಾ, ಸೋಭತಿ ಹರಿತುತ್ತಮಾ.
‘‘ರಮ್ಮಾನಿ ವನಚೇತ್ಯಾನಿ, ರಮ್ಮಾ ಹಂಸೂಪಕೂಜಿತಾ;
ಓಪುಪ್ಫಾಪದ್ಮಾ ತಿಟ್ಠನ್ತಿ, ಪೋಕ್ಖರಞ್ಞೋ [ಪೋಕ್ಖರಞ್ಞಾ (ಸ್ಯಾ. ಪೀ.)] ಸುನಿಮ್ಮಿತಾ.
‘‘ಅಟ್ಠಂಸಾ ¶ ¶ ಸುಕತಾ ಥಮ್ಭಾ, ಸಬ್ಬೇ ವೇಳುರಿಯಾಮಯಾ;
ಸಹಸ್ಸಥಮ್ಭಾ ಪಾಸಾದಾ, ಪೂರಾ ಕಞ್ಞಾಹಿ ಜೋತರೇ.
‘‘ವಿಮಾನಂ ಉಪಪನ್ನೋಸಿ, ದಿಬ್ಯಂ ಪುಞ್ಞೇಹಿ ಅತ್ತನೋ;
ಅಸಮ್ಬಾಧಂ ಸಿವಂ ರಮ್ಮಂ, ಅಚ್ಚನ್ತಸುಖಸಂಹಿತಂ.
‘‘ಮಞ್ಞೇ ಸಹಸ್ಸನೇತ್ತಸ್ಸ, ವಿಮಾನಂ ನಾಭಿಕಙ್ಖಸಿ;
ಇದ್ಧೀ ಹಿ ತ್ಯಾಯಂ ವಿಪುಲಾ, ಸಕ್ಕಸ್ಸೇವ ಜುತೀಮತೋ’’.
‘‘ಮನಸಾಪಿ ¶ ನ ಪತ್ತಬ್ಬೋ, ಆನುಭಾವೋ ಜುತೀಮತೋ;
ಪರಿಚಾರಯಮಾನಾನಂ, ಸಇನ್ದಾನಂ [ಇನ್ದಾನಂ (ಸ್ಯಾ. ಕ.)] ವಸವತ್ತಿನಂ’’.
‘‘ತಂ ವಿಮಾನಂ ಅಭಿಜ್ಝಾಯ, ಅಮರಾನಂ ಸುಖೇಸಿನಂ;
ಉಪೋಸಥಂ ಉಪವಸನ್ತೋ, ಸೇಮಿ ವಮ್ಮಿಕಮುದ್ಧನಿ’’.
‘‘ಅಹಞ್ಚ ಮಿಗಮೇಸಾನೋ, ಸಪುತ್ತೋ ಪಾವಿಸಿಂ ವನಂ;
ತಂ ಮಂ ಮತಂ ವಾ ಜೀವಂ ವಾ, ನಾಭಿವೇದೇನ್ತಿ ಞಾತಕಾ.
‘‘ಆಮನ್ತಯೇ ಭೂರಿದತ್ತಂ, ಕಾಸಿಪುತ್ತಂ ಯಸಸ್ಸಿನಂ;
ತಯಾ ನೋ ಸಮನುಞ್ಞಾತಾ, ಅಪಿ ಪಸ್ಸೇಮು ಞಾತಕೇ’’.
‘‘ಏಸೋ ಹಿ ವತ ಮೇ ಛನ್ದೋ, ಯಂ ವಸೇಸಿ ಮಮನ್ತಿಕೇ;
ನ ಹಿ ಏತಾದಿಸಾ ಕಾಮಾ, ಸುಲಭಾ ಹೋನ್ತಿ ಮಾನುಸೇ.
‘‘ಸಚೇ ತ್ವಂ ನಿಚ್ಛಸೇ ವತ್ಥುಂ, ಮಮ ಕಾಮೇಹಿ ಪೂಜಿತೋ;
ಮಯಾ ತ್ವಂ ಸಮನುಞ್ಞಾತೋ, ಸೋತ್ಥಿಂ ಪಸ್ಸಾಹಿ ಞಾತಕೇ’’.
‘‘ಧಾರಯಿಮಂ ಮಣಿಂ ದಿಬ್ಯಂ, ಪಸುಂ ಪುತ್ತೇ ಚ ವಿನ್ದತಿ;
ಅರೋಗೋ ಸುಖಿತೋ ಹೋತಿ [ಹೋಹಿ (ಸ್ಯಾ.)], ಗಚ್ಛೇವಾದಾಯ ಬ್ರಾಹ್ಮಣ’’.
‘‘ಕುಸಲಂ ಪಟಿನನ್ದಾಮಿ, ಭೂರಿದತ್ತ ವಚೋ ತವ;
ಪಬ್ಬಜಿಸ್ಸಾಮಿ ಜಿಣ್ಣೋಸ್ಮಿ, ನ ಕಾಮೇ ಅಭಿಪತ್ಥಯೇ’’.
‘‘ಬ್ರಹ್ಮಚರಿಯಸ್ಸ ಚೇ ಭಙ್ಗೋ, ಹೋತಿ ಭೋಗೇಹಿ ಕಾರಿಯಂ;
ಅವಿಕಮ್ಪಮಾನೋ ಏಯ್ಯಾಸಿ, ಬಹುಂ ದಸ್ಸಾಮಿ ತೇ ಧನಂ’’.
‘‘ಕುಸಲಂ ಪಟಿನನ್ದಾಮಿ, ಭೂರಿದತ್ತ ವಚೋ ತವ;
ಪುನಪಿ ಆಗಮಿಸ್ಸಾಮಿ, ಸಚೇ ಅತ್ಥೋ ಭವಿಸ್ಸತಿ’’.
‘‘ಇದಂ ¶ ¶ ವತ್ವಾ ಭೂರಿದತ್ತೋ, ಪೇಸೇಸಿ ಚತುರೋ ಜನೇ;
ಏಥ ಗಚ್ಛಥ ಉಟ್ಠೇಥ, ಖಿಪ್ಪಂ ಪಾಪೇಥ ಬ್ರಾಹ್ಮಣಂ.
ತಸ್ಸ ತಂ ವಚನಂ ಸುತ್ವಾ, ಉಟ್ಠಾಯ ಚತುರೋ ಜನಾ;
ಪೇಸಿತಾ ಭೂರಿದತ್ತೇನ, ಖಿಪ್ಪಂ ಪಾಪೇಸು ಬ್ರಾಹ್ಮಣಂ.
‘‘ಮಣಿಂ ¶ ಪಗ್ಗಯ್ಹ ಮಙ್ಗಲ್ಯಂ, ಸಾಧುವಿತ್ತಂ [ಸಾಧುಚಿತ್ತಂ (ಪೀ.)] ಮನೋರಮಂ;
ಸೇಲಂ ಬ್ಯಞ್ಜನಸಮ್ಪನ್ನಂ, ಕೋ ಇಮಂ ಮಣಿಮಜ್ಝಗಾ’’.
‘‘ಲೋಹಿತಕ್ಖಸಹಸ್ಸಾಹಿ, ಸಮನ್ತಾ ಪರಿವಾರಿತಂ;
ಅಜ್ಜ ಕಾಲಂ ಪಥಂ [ಪದಂ (ಸೀ. ಪೀ.)] ಗಚ್ಛಂ, ಅಜ್ಝಗಾಹಂ ಮಣಿಂ ಇಮಂ’’.
‘‘ಸುಪಚಿಣ್ಣೋ ಅಯಂ ಸೇಲೋ, ಅಚ್ಚಿತೋ ಮಹಿತೋ [ಮಾನಿತೋ (ಕ.)] ಸದಾ;
ಸುಧಾರಿತೋ ಸುನಿಕ್ಖಿತ್ತೋ, ಸಬ್ಬತ್ಥಮಭಿಸಾಧಯೇ.
‘‘ಉಪಚಾರವಿಪನ್ನಸ್ಸ, ನಿಕ್ಖೇಪೇ ಧಾರಣಾಯ ವಾ;
ಅಯಂ ಸೇಲೋ ವಿನಾಸಾಯ, ಪರಿಚಿಣ್ಣೋ ಅಯೋನಿಸೋ.
‘‘ನ ಇಮಂ ಅಕುಸಲೋ [ಕುಸಲಂ (ಕ.)] ದಿಬ್ಯಂ, ಮಣಿಂ ಧಾರೇತುಮಾರಹೋ;
ಪಟಿಪಜ್ಜ ಸತಂ ನಿಕ್ಖಂ, ದೇಹಿಮಂ ರತನಂ ಮಮ’’.
‘‘ನ ಚ ಮ್ಯಾಯಂ ಮಣೀ ಕೇಯ್ಯೋ, ಗೋಹಿ [ಕೇಹಿ (ಕ.)] ವಾ ರತನೇಹಿ ವಾ;
ಸೇಲೋ ಬ್ಯಞ್ಜನಸಮ್ಪನ್ನೋ, ನೇವ ಕೇಯ್ಯೋ ಮಣೀ ಮಮ’’.
‘‘ನೋ ಚೇ ತಯಾ ಮಣೀ ಕೇಯ್ಯೋ, ಗೋಹಿ [ಕೇಹಿ (ಕ.)] ವಾ ರತನೇಹಿ ವಾ;
ಅಥ ಕೇನ ಮಣೀ ಕೇಯ್ಯೋ, ತಂ ಮೇ ಅಕ್ಖಾಹಿ ಪುಚ್ಛಿತೋ’’.
‘‘ಯೋ ಮೇ ಸಂಸೇ ಮಹಾನಾಗಂ, ತೇಜಸ್ಸಿಂ ದುರತಿಕ್ಕಮಂ;
ತಸ್ಸ ¶ ದಜ್ಜಂ ಇಮಂ ಸೇಲಂ, ಜಲನ್ತಮಿವ ತೇಜಸಾ’’.
‘‘ಕೋ ನು ಬ್ರಾಹ್ಮಣವಣ್ಣೇನ, ಸುಪಣ್ಣೋ ಪತತಂ ವರೋ;
ನಾಗಂ ಜಿಗೀಸಮನ್ವೇಸಿ, ಅನ್ವೇಸಂ ಭಕ್ಖಮತ್ತನೋ.
‘‘ನಾಹಂ ದಿಜಾಧಿಪೋ ಹೋಮಿ, ನ ದಿಟ್ಠೋ ಗರುಳೋ ಮಯಾ;
ಆಸೀವಿಸೇನ ವಿತ್ತೋತಿ [ವಿತ್ತೋಸ್ಮಿ (ಸ್ಯಾ. ಕ.)], ವಜ್ಜೋ ಬ್ರಾಹ್ಮಣ ಮಂ ವಿದೂ’’.
‘‘ಕಿಂ ನು ತುಯ್ಹಂ ಬಲಂ ಅತ್ಥಿ, ಕಿಂ ಸಿಪ್ಪಂ ವಿಜ್ಜತೇ ತವ;
ಕಿಸ್ಮಿಂ ವಾ ತ್ವಂ ಪರತ್ಥದ್ಧೋ, ಉರಗಂ ನಾಪಚಾಯಸಿ’’.
‘‘ಆರಞ್ಞಿಕಸ್ಸ ¶ ಇಸಿನೋ, ಚಿರರತ್ತಂ ತಪಸ್ಸಿನೋ;
ಸುಪಣ್ಣೋ ಕೋಸಿಯಸ್ಸಕ್ಖಾ, ವಿಸವಿಜ್ಜಂ ಅನುತ್ತರಂ.
‘‘ತಂ ಭಾವಿತತ್ತಞ್ಞತರಂ, ಸಮ್ಮನ್ತಂ ಪಬ್ಬತನ್ತರೇ;
ಸಕ್ಕಚ್ಚಂ ತಂ ಉಪಟ್ಠಾಸಿಂ, ರತ್ತಿನ್ದಿವಮತನ್ದಿತೋ.
‘‘ಸೋ ತದಾ ಪರಿಚಿಣ್ಣೋ ಮೇ, ವತ್ತವಾ ಬ್ರಹ್ಮಚರಿಯವಾ;
ದಿಬ್ಬಂ ಪಾತುಕರೀ ಮನ್ತಂ, ಕಾಮಸಾ ಭಗವಾ ಮಮ.
‘‘ತ್ಯಾಹಂ ಮನ್ತೇ ಪರತ್ಥದ್ಧೋ, ನಾಹಂ ಭಾಯಾಮಿ ಭೋಗಿನಂ;
ಆಚರಿಯೋ ವಿಸಘಾತಾನಂ, ಅಲಮ್ಪಾನೋತಿ [ಆಲಮ್ಬಾನೋತಿ (ಸೀ. ಪೀ.), ಆಲಮ್ಬಾಯನೋತಿ (ಸ್ಯಾ.)] ಮಂ ವಿದೂ’’.
‘‘ಗಣ್ಹಾಮಸೇ ¶ ಮಣಿಂ ತಾತ, ಸೋಮದತ್ತ ವಿಜಾನಹಿ;
ಮಾ ದಣ್ಡೇನ ಸಿರಿಂ ಪತ್ತಂ, ಕಾಮಸಾ ಪಜಹಿಮ್ಹಸೇ’’.
‘‘ಸಕಂ ನಿವೇಸನಂ ಪತ್ತಂ, ಯೋ ತಂ ಬ್ರಾಹ್ಮಣ ಪೂಜಯಿ;
ಏವಂ ಕಲ್ಯಾಣಕಾರಿಸ್ಸ, ಕಿಂ ಮೋಹಾ ದುಬ್ಭಿಮಿಚ್ಛಸಿ’’.
‘‘ಸಚೇ ¶ ತ್ವಂ [ಸಚೇ ಹಿ (ಸೀ. ಪೀ. ಕ.)] ಧನಕಾಮೋಸಿ, ಭೂರಿದತ್ತೋ ಪದಸ್ಸತಿ [ಭೂರಿದತ್ತಂ ಪದಿಸ್ಸಸಿ (ಕ.)];
ತಮೇವ ಗನ್ತ್ವಾ ಯಾಚಸ್ಸು, ಬಹುಂ ದಸ್ಸತಿ ತೇ ಧನಂ’’.
‘‘ಹತ್ಥಗತಂ ಪತ್ತಗತಂ, ನಿಕಿಣ್ಣಂ ಖಾದಿತುಂ ವರಂ;
ಮಾ ನೋ ಸನ್ದಿಟ್ಠಿಕೋ ಅತ್ಥೋ, ಸೋಮದತ್ತ ಉಪಚ್ಚಗಾ’’.
‘‘ಪಚ್ಚತಿ ನಿರಯೇ ಘೋರೇ, ಮಹಿಸ್ಸಮಪಿ ವಿವರತಿ [ಮಹಿಸ್ಸಮವ ದೀಯತಿ (ಸೀ. ಪೀ.), ಮಹಿಮಸ್ಸ ವಿನ್ದ್ರೀಯತಿ (ಸ್ಯಾ.)];
ಮಿತ್ತದುಬ್ಭೀ ಹಿತಚ್ಚಾಗೀ, ಜೀವರೇವಾಪಿ ಸುಸ್ಸತಿ [ಜೀವರೇ ಚಾಪಿ ಸುಸ್ಸರೇ (ಸೀ. ಪೀ.)].
‘‘ಸಚೇ ತ್ವಂ [ಸಚೇ ಹಿ (ಸೀ. ಪೀ. ಕ.)] ಧನಕಾಮೋಸಿ, ಭೂರಿದತ್ತೋ ಪದಸ್ಸತಿ;
ಮಞ್ಞೇ ಅತ್ತಕತಂ ವೇರಂ, ನಚಿರಂ ವೇದಯಿಸ್ಸಸಿ’’.
‘‘ಮಹಾಯಞ್ಞಂ ಯಜಿತ್ವಾನ, ಏವಂ ಸುಜ್ಝನ್ತಿ ಬ್ರಾಹ್ಮಣಾ;
ಮಹಾಯಞ್ಞಂ ಯಜಿಸ್ಸಾಮ, ಏವಂ ಮೋಕ್ಖಾಮ ಪಾಪಕಾ’’.
‘‘ಹನ್ದ ದಾನಿ ಅಪಾಯಾಮಿ, ನಾಹಂ ಅಜ್ಜ ತಯಾ ಸಹ;
ಪದಮ್ಪೇಕಂ [ಪದಮೇಕಂ (ಸ್ಯಾ. ಕ.)] ನ ಗಚ್ಛೇಯ್ಯಂ, ಏವಂ ಕಿಬ್ಬಿಸಕಾರಿನಾ’’.
‘‘ಇದಂ ¶ ವತ್ವಾನ ಪಿತರಂ, ಸೋಮದತ್ತೋ ಬಹುಸ್ಸುತೋ;
ಉಜ್ಝಾಪೇತ್ವಾನ ಭೂತಾನಿ, ತಮ್ಹಾ ಠಾನಾ ಅಪಕ್ಕಮಿ.
‘‘ಗಣ್ಹಾಹೇತಂ ಮಹಾನಾಗಂ, ಆಹರೇತಂ ಮಣಿಂ ಮಮ;
ಇನ್ದಗೋಪಕವಣ್ಣಾಭೋ, ಯಸ್ಸ ಲೋಹಿತಕೋ ಸಿರೋ.
‘‘ಕಪ್ಪಾಸಪಿಚುರಾಸೀವ, ಏಸೋ ಕಾಯೋ ಪದಿಸ್ಸತಿ [ಕಾಯ’ಸ್ಸ ದಿಸ್ಸತಿ (ಸೀ. ಪೀ.)];
ವಮ್ಮಿಕಗ್ಗಗತೋ ಸೇತಿ, ತಂ ತ್ವಂ ಗಣ್ಹಾಹಿ ಬ್ರಾಹ್ಮಣ’’.
‘‘ಅಥೋಸಧೇಹಿ ದಿಬ್ಬೇಹಿ, ಜಪ್ಪಂ ಮನ್ತಪದಾನಿ ಚ;
ಏವಂ ತಂ ಅಸಕ್ಖಿ ಸತ್ಥುಂ [ಸಟ್ಠುಂ (ಸೀ. ಪೀ.), ಯುಟ್ಠುಂ (ಸ್ಯಾ.), ಸುತ್ತುಂ (ಕ.)], ಕತ್ವಾ ಪರಿತ್ತಮತ್ತನೋ’’.
‘‘ಮಮಂ ¶ ದಿಸ್ವಾನ ಆಯನ್ತಂ, ಸಬ್ಬಕಾಮಸಮಿದ್ಧಿನಂ;
ಇನ್ದ್ರಿಯಾನಿ ಅಹಟ್ಠಾನಿ, ಸಾವಂ [ಸಾಮಂ (ಸೀ. ಪೀ.)] ಜಾತಂ ಮುಖಂ ತವ.
‘‘ಪದ್ಮಂ ಯಥಾ ಹತ್ಥಗತಂ, ಪಾಣಿನಾ ಪರಿಮದ್ದಿತಂ;
ಸಾವಂ ಜಾತಂ [ಯನ್ತಂ (ಕ.)] ಮುಖಂ ತುಯ್ಹಂ, ಮಮಂ ದಿಸ್ವಾನ ಏದಿಸಂ.
‘‘ಕಚ್ಚಿ ನು ತೇ ನಾಭಿಸಸಿ [ತೇ ನಾಭಿಸಯಿ (ಸೀ.), ತೇ ನಾಭಿಸ್ಸಸಿ (ಸ್ಯಾ.)], ಕಚ್ಚಿ ತೇ ಅತ್ಥಿ ವೇದನಾ;
ಯೇನ ಸಾವಂ ಮುಖಂ ತುಯ್ಹಂ, ಮಮಂ ದಿಸ್ವಾನ ಆಗತಂ’’.
‘‘ಸುಪಿನಂ ¶ ತಾತ ಅದ್ದಕ್ಖಿಂ, ಇತೋ ಮಾಸಂ ಅಧೋಗತಂ;
ದಕ್ಖಿಣಂ ವಿಯ ಮೇ ಬಾಹುಂ, ಛೇತ್ವಾ ರುಹಿರಮಕ್ಖಿತಂ;
ಪುರಿಸೋ ಆದಾಯ ಪಕ್ಕಾಮಿ, ಮಮ ರೋದನ್ತಿಯಾ ಸತಿ.
‘‘ಯತೋಹಂ [ಯತೋ ತಂ (ಸೀ.)] ಸುಪಿನಮದ್ದಕ್ಖಿಂ, ಸುದಸ್ಸನ ವಿಜಾನಹಿ;
ತತೋ ದಿವಾ ವಾ ರತ್ತಿಂ ವಾ, ಸುಖಂ ಮೇ ನೋಪಲಬ್ಭತಿ’’.
‘‘ಯಂ ಪುಬ್ಬೇ ಪರಿವಾರಿಂಸು [ಪರಿಚಾರಿಂಸು (ಸೀ. ಪೀ.)], ಕಞ್ಞಾ ರುಚಿರವಿಗ್ಗಹಾ;
ಹೇಮಜಾಲಪಟಿಚ್ಛನ್ನಾ, ಭೂರಿದತ್ತೋ ನ ದಿಸ್ಸತಿ.
‘‘ಯಂ ಪುಬ್ಬೇ ಪರಿವಾರಿಂಸು [ಪರಿಚಾರಿಂಸು (ಸೀ. ಪೀ.)], ನೇತ್ತಿಂಸವರಧಾರಿನೋ;
ಕಣಿಕಾರಾವ ಸಮ್ಫುಲ್ಲಾ, ಭೂರಿದತ್ತೋ ನ ದಿಸ್ಸತಿ.
‘‘ಹನ್ದ ¶ ದಾನಿ ಗಮಿಸ್ಸಾಮ, ಭೂರಿದತ್ತನಿವೇಸನಂ;
ಧಮ್ಮಟ್ಠಂ ಸೀಲಸಮ್ಪನ್ನಂ, ಪಸ್ಸಾಮ ತವ ಭಾತರಂ’’.
‘‘ತಞ್ಚ ದಿಸ್ವಾನ ಆಯನ್ತಿಂ, ಭೂರಿದತ್ತಸ್ಸ ಮಾತರಂ;
ಬಾಹಾ ಪಗ್ಗಯ್ಹ ಪಕ್ಕನ್ದುಂ, ಭೂರಿದತ್ತಸ್ಸ ನಾರಿಯೋ.
‘‘ಪುತ್ತಂ ತೇಯ್ಯೇ ನ ಜಾನಾಮ, ಇತೋ ಮಾಸಂ ಅಧೋಗತಂ;
ಮತಂ ¶ ವಾ ಯದಿ ವಾ ಜೀವಂ, ಭೂರಿದತ್ತಂ ಯಸಸ್ಸಿನಂ’’.
‘‘ಸಕುಣೀ ಹತಪುತ್ತಾವ, ಸುಞ್ಞಂ ದಿಸ್ವಾ ಕುಲಾವಕಂ;
ಚಿರಂ ದುಕ್ಖೇನ ಝಾಯಿಸ್ಸಂ, ಭೂರಿದತ್ತಂ ಅಪಸ್ಸತೀ [ಇಮಿಸ್ಸಾ ಗಾಥಾಯಾನನ್ತರೇ ಸೀ. ಪೀ. ಪೋತ್ಥಕೇಸು – ‘‘ಸಕುಣೀ ಹತಪುತ್ತಾವ, ಸುಞ್ಞಂ ದಿಸ್ವಾ ಕುಲಾವಕಂ; ತೇನ ತೇನ ಪಧಾವಿಸ್ಸ, ಪಿಯಪುತ್ತಂ ಅಪಸ್ಸತೀ’’ತಿ ಇತಿ ಅಯಮ್ಪಿ ಗಾಥಾ ಆಗತಾ].
‘‘ಕುರರೀ ಹತಛಾಪಾವ, ಸುಞ್ಞಂ ದಿಸ್ವಾ ಕುಲಾವಕಂ;
ಚಿರಂ ದುಕ್ಖೇನ ಝಾಯಿಸ್ಸಂ, ಭೂರಿದತ್ತಂ ಅಪಸ್ಸತೀ.
‘‘ಸಾ ನೂನ ಚಕ್ಕವಾಕೀವ, ಪಲ್ಲಲಸ್ಮಿಂ ಅನೋದಕೇ;
ಚಿರಂ ದುಕ್ಖೇನ ಝಾಯಿಸ್ಸಂ, ಭೂರಿದತ್ತಂ ಅಪಸ್ಸತೀ.
‘‘ಕಮ್ಮಾರಾನಂ ಯಥಾ ಉಕ್ಕಾ, ಅನ್ತೋ ಝಾಯತಿ ನೋ ಬಹಿ;
ಏವಂ ಝಾಯಾಮಿ ಸೋಕೇನ, ಭೂರಿದತ್ತಂ ಅಪಸ್ಸತೀ’’.
‘‘ಸಾಲಾವ ಸಮ್ಪಮಥಿತಾ [ಸಮ್ಪಮದ್ದಿತಾ (ಸ್ಯಾ. ಕ.)], ಮಾಲುತೇನ ಪಮದ್ದಿತಾ;
ಸೇನ್ತಿ ಪುತ್ತಾ ಚ ದಾರಾ ಚ, ಭೂರಿದತ್ತನಿವೇಸನೇ’’.
‘‘ಇದಂ ಸುತ್ವಾನ ನಿಗ್ಘೋಸಂ, ಭೂರಿದತ್ತನಿವೇಸನೇ;
ಅರಿಟ್ಠೋ ಚ ಸುಭೋಗೋ [ಸುಭಗೋ (ಸೀ. ಪೀ.)] ಚ, ಪಧಾವಿಂಸು ಅನನ್ತರಾ [ಉಪಧಾವಿಂಸು ಅನನ್ತರಾ (ಸೀ. ಪೀ.)].
‘‘ಅಮ್ಮ ¶ ಅಸ್ಸಾಸ ಮಾ ಸೋಚಿ, ಏವಂಧಮ್ಮಾ ಹಿ ಪಾಣಿನೋ;
ಚವನ್ತಿ ಉಪಪಜ್ಜನ್ತಿ, ಏಸಸ್ಸ ಪರಿಣಾಮಿತಾ’’.
‘‘ಅಹಮ್ಪಿ ತಾತ ಜಾನಾಮಿ, ಏವಂಧಮ್ಮಾ ಹಿ ಪಾಣಿನೋ;
ಸೋಕೇನ ಚ ಪರೇತಸ್ಮಿ, ಭೂರಿದತ್ತಂ ಅಪಸ್ಸತೀ.
‘‘ಅಜ್ಜ ಚೇ ಮೇ ಇಮಂ ರತ್ತಿಂ, ಸುದಸ್ಸನ ವಿಜಾನಹಿ;
ಭೂರಿದತ್ತಂ ಅಪಸ್ಸನ್ತೀ, ಮಞ್ಞೇ ಹಿಸ್ಸಾಮಿ ಜೀವಿತಂ’’.
‘‘ಅಮ್ಮ ¶ ಅಸ್ಸಾಸ ಮಾ ಸೋಚಿ, ಆನಯಿಸ್ಸಾಮ ಭಾತರಂ;
ದಿಸೋದಿಸಂ ¶ ಗಮಿಸ್ಸಾಮ, ಭಾತುಪರಿಯೇಸನಂ ಚರಂ.
‘‘ಪಬ್ಬತೇ ಗಿರಿದುಗ್ಗೇಸು, ಗಾಮೇಸು ನಿಗಮೇಸು ಚ;
ಓರೇನ ಸತ್ತರತ್ತಸ್ಸ [ಓರೇನ ದಸರತ್ತಸ್ಸ (ಸೀ. ಪೀ.)], ಭಾತರಂ ಪಸ್ಸ ಆಗತಂ’’.
‘‘ಹತ್ಥಾ ಪಮುತ್ತೋ ಉರಗೋ, ಪಾದೇ ತೇ ನಿಪತೀ ಭುಸಂ;
ಕಚ್ಚಿ ನು ತಂ ಡಂಸೀ ತಾತ [ಕಚ್ಚಿ ತಂ ನು ಡಸೀ ತಾತ (ಸೀ.), ಕಚ್ಚಿ ನು ಡಂಸಿತೋ ತಾತ (ಸ್ಯಾ.), ಕಚ್ಚಿತಾನುಡಸೀ ತಾತ (ಪೀ.)], ಮಾ ಭಾಯಿ ಸುಖಿತೋ ಭವ’’.
‘‘ನೇವ ಮಯ್ಹಂ ಅಯಂ ನಾಗೋ, ಅಲಂ ದುಕ್ಖಾಯ ಕಾಯಚಿ;
ಯಾವತತ್ಥಿ ಅಹಿಗ್ಗಾಹೋ, ಮಯಾ ಭಿಯ್ಯೋ ನ ವಿಜ್ಜತಿ’’.
‘‘ಕೋ ನು ಬ್ರಾಹ್ಮಣವಣ್ಣೇನ, ದಿತ್ತೋ [ದತ್ತೋ (ಸೀ. ಸ್ಯಾ. ಪೀ.)] ಪರಿಸಮಾಗತೋ;
ಅವ್ಹಾಯನ್ತು ಸುಯುದ್ಧೇನ, ಸುಣನ್ತು ಪರಿಸಾ ಮಮ’’.
‘‘ತ್ವಂ ಮಂ ನಾಗೇನ ಆಲಮ್ಪ, ಅಹಂ ಮಣ್ಡೂಕಛಾಪಿಯಾ;
ಹೋತು ನೋ ಅಬ್ಭುತಂ ತತ್ಥ, ಆಸಹಸ್ಸೇಹಿ ಪಞ್ಚಹಿ’’.
‘‘ಅಹಞ್ಹಿ ವಸುಮಾ ಅಡ್ಢೋ, ತ್ವಂ ದಲಿದ್ದೋಸಿ ಮಾಣವ;
ಕೋ ನು ತೇ ಪಾಟಿಭೋಗತ್ಥಿ, ಉಪಜೂತಞ್ಚ ಕಿಂ ಸಿಯಾ.
‘‘ಉಪಜೂತಞ್ಚ ಮೇ ಅಸ್ಸ, ಪಾಟಿಭೋಗೋ ಚ ತಾದಿಸೋ;
ಹೋತು ನೋ ಅಬ್ಭುತಂ ತತ್ಥ, ಆಸಹಸ್ಸೇಹಿ ಪಞ್ಚಹಿ’’.
‘‘ಸುಣೋಹಿ ಮೇ ಮಹಾರಾಜ, ವಚನಂ ಭದ್ದಮತ್ಥು ತೇ;
ಪಞ್ಚನ್ನಂ ಮೇ ಸಹಸ್ಸಾನಂ, ಪಾಟಿಭೋಗೋ ಹಿ ಕಿತ್ತಿಮ’’.
‘‘ಪೇತ್ತಿಕಂ ವಾ ಇಣಂ ಹೋತಿ, ಯಂ ವಾ ಹೋತಿ ಸಯಂಕತಂ;
ಕಿಂ ತ್ವಂ ಏವಂ ಬಹುಂ ಮಯ್ಹಂ, ಧನಂ ಯಾಚಸಿ ಬ್ರಾಹ್ಮಣ’’.
‘‘ಅಲಮ್ಪಾನೋ ಹಿ ನಾಗೇನ, ಮಮಂ ಅಭಿಜಿಗೀಸತಿ [ಅಭಿಜಿಗಿಂಸತಿ (ಸೀ. ಸ್ಯಾ. ಪೀ.)];
ಅಹಂ ¶ ಮಣ್ಡೂಕಛಾಪಿಯಾ, ಡಂಸಯಿಸ್ಸಾಮಿ ಬ್ರಾಹ್ಮಣಂ.
‘‘ತಂ ತ್ವಂ ದಟ್ಠುಂ ಮಹಾರಾಜ, ಅಜ್ಜ ರಟ್ಠಾಭಿವಡ್ಢನ;
ಖತ್ತಸಙ್ಘಪರಿಬ್ಯೂಳ್ಹೋ, ನಿಯ್ಯಾಹಿ ಅಹಿದಸ್ಸನಂ’’ [ಅಭಿದಸ್ಸನಂ (ಸೀ. ಪೀ.)].
‘‘ನೇವ ¶ ¶ ತಂ ಅತಿಮಞ್ಞಾಮಿ, ಸಿಪ್ಪವಾದೇನ ಮಾಣವ;
ಅತಿಮತ್ತೋಸಿ ಸಿಪ್ಪೇನ, ಉರಗಂ ನಾಪಚಾಯಸಿ’’.
‘‘ಅಹಮ್ಪಿ ನಾತಿಮಞ್ಞಾಮಿ, ಸಿಪ್ಪವಾದೇನ ಬ್ರಾಹ್ಮಣ;
ಅವಿಸೇನ ಚ ನಾಗೇನ, ಭುಸಂ ವಞ್ಚಯಸೇ ಜನಂ.
‘‘ಏವಂ ಚೇತಂ ಜನೋ ಜಞ್ಞಾ, ಯಥಾ ಜಾನಾಮಿ ತಂ ಅಹಂ;
ನ ತ್ವಂ ಲಭಸಿ ಆಲಮ್ಪ, ಭುಸಮುಟ್ಠಿಂ [ಥುಸಮುಟ್ಠಿಂ (ಸ್ಯಾ.), ಸತ್ತುಮುಟ್ಠಿಂ (ಸೀ. ಪೀ.)] ಕುತೋ ಧನಂ’’.
‘‘ಖರಾಜಿನೋ ಜಟೀ ದುಮ್ಮೀ [ರುಮ್ಮೀ (ಸೀ. ಸ್ಯಾ. ಪೀ.)], ದಿತ್ತೋ ಪರಿಸಮಾಗತೋ;
ಯೋ ತ್ವಂ ಏವಂ ಗತಂ ನಾಗಂ, ಅವಿಸೋ ಅತಿಮಞ್ಞಸಿ.
‘‘ಆಸಜ್ಜ ಖೋ ನಂ ಜಞ್ಞಾಸಿ, ಪುಣ್ಣಂ ಉಗ್ಗಸ್ಸ ತೇಜಸೋ;
ಮಞ್ಞೇ ತಂ ಭಸ್ಮರಾಸಿಂವ, ಖಿಪ್ಪಮೇಸೋ ಕರಿಸ್ಸತಿ’’.
‘‘ಸಿಯಾ ವಿಸಂ ಸಿಲುತ್ತಸ್ಸ, ದೇಡ್ಡುಭಸ್ಸ ಸಿಲಾಭುನೋ;
ನೇವ ಲೋಹಿತಸೀಸಸ್ಸ, ವಿಸಂ ನಾಗಸ್ಸ ವಿಜ್ಜತಿ’’.
‘‘ಸುತಮೇತಂ ಅರಹತಂ, ಸಞ್ಞತಾನಂ ತಪಸ್ಸಿನಂ;
ಇಧ ದಾನಾನಿ ದತ್ವಾನ, ಸಗ್ಗಂ ಗಚ್ಛನ್ತಿ ದಾಯಕಾ;
ಜೀವನ್ತೋ ದೇಹಿ ದಾನಾನಿ, ಯದಿ ತೇ ಅತ್ಥಿ ದಾತವೇ.
‘‘ಅಯಂ ನಾಗೋ ಮಹಿದ್ಧಿಕೋ, ತೇಜಸ್ಸೀ ದುರತಿಕ್ಕಮೋ;
ತೇನ ತಂ ಡಂಸಯಿಸ್ಸಾಮಿ, ಸೋ ತಂ ಭಸ್ಮಂ ಕರಿಸ್ಸತಿ’’.
‘‘ಮಯಾಪೇತಂ ¶ ಸುತಂ ಸಮ್ಮ, ಸಞ್ಞತಾನಂ ತಪಸ್ಸಿನಂ;
ಇಧ ದಾನಾನಿ ದತ್ವಾನ, ಸಗ್ಗಂ ಗಚ್ಛನ್ತಿ ದಾಯಕಾ;
ತ್ವಮೇವ ದೇಹಿ ಜೀವನ್ತೋ, ಯದಿ ತೇ ಅತ್ಥಿ ದಾತವೇ.
‘‘ಅಯಂ ಅಜಮುಖೀ [ಅಚ್ಚಿಮುಖೀ (ಸೀ. ಸ್ಯಾ. ಪೀ.)] ನಾಮ, ಪುಣ್ಣಾ ಉಗ್ಗಸ್ಸ ತೇಜಸೋ;
ತಾಯ ತಂ ಡಂಸಯಿಸ್ಸಾಮಿ, ಸಾ ತಂ ಭಸ್ಮಂ ಕರಿಸ್ಸತಿ’’.
‘‘ಯಾ ಧೀತಾ ಧತರಟ್ಠಸ್ಸ, ವೇಮಾತಾ ಭಗಿನೀ ಮಮ;
ಸಾ ತಂ ಡಂಸತ್ವಜಮುಖೀ [ಸಾ ದಿಸ್ಸತು ಅಚ್ಚಿಮುಖೀ (ಸೀ. ಪೀ.)], ಪುಣ್ಣಾ ಉಗ್ಗಸ್ಸ ತೇಜಸೋ’’.
‘‘ಛಮಾಯಂ ಚೇ ನಿಸಿಞ್ಚಿಸ್ಸಂ, ಬ್ರಹ್ಮದತ್ತ ವಿಜಾನಹಿ;
ತಿಣಲತಾನಿ ಓಸಧ್ಯೋ, ಉಸ್ಸುಸ್ಸೇಯ್ಯುಂ ಅಸಂಸಯಂ.
‘‘ಉದ್ಧಂ ¶ ಚೇ ಪಾತಯಿಸ್ಸಾಮಿ, ಬ್ರಹ್ಮದತ್ತ ವಿಜಾನಹಿ;
ಸತ್ತ ವಸ್ಸಾನಿಯಂ ದೇವೋ, ನ ವಸ್ಸೇ ನ ಹಿಮಂ ಪತೇ.
‘‘ಉದಕೇ ಚೇ ನಿಸಿಞ್ಚಿಸ್ಸಂ, ಬ್ರಹ್ಮದತ್ತ ವಿಜಾನಹಿ;
ಯಾವನ್ತೋದಕಜಾ [ಯಾವತಾ ಓದಕಾ (ಸೀ.), ಯಾವತಾ ಉದಕಜಾ (ಪೀ.)] ಪಾಣಾ, ಮರೇಯ್ಯುಂ ಮಚ್ಛಕಚ್ಛಪಾ’’.
‘‘ಲೋಕ್ಯಂ ¶ ಸಜನ್ತಂ ಉದಕಂ, ಪಯಾಗಸ್ಮಿಂ ಪತಿಟ್ಠಿತಂ;
ಕೋಮಂ ಅಜ್ಝೋಹರೀ ಭೂತೋ, ಓಗಾಳ್ಹಂ ಯಮುನಂ ನದಿಂ’’.
‘‘ಯದೇಸ ಲೋಕಾಧಿಪತೀ ಯಸಸ್ಸೀ, ಬಾರಾಣಸಿಂ ಪಕ್ರಿಯ [ಪಕಿರಪರೀ (ಸೀ. ಪೀ.), ಪಕಿರಹರೀ (ಸ್ಯಾ.)] ಸಮನ್ತತೋ;
ತಸ್ಸಾಹ ಪುತ್ತೋ ಉರಗೂಸಭಸ್ಸ, ಸುಭೋಗೋತಿ ಮಂ ಬ್ರಾಹ್ಮಣ ವೇದಯನ್ತಿ’’.
‘‘ಸಚೇ ಹಿ ಪುತ್ತೋ ಉರಗೂಸಭಸ್ಸ, ಕಾಸಿಸ್ಸ ¶ [ಕಂಸಸ್ಸ (ಸೀ. ಪೀ.)] ರಞ್ಞೋ ಅಮರಾಧಿಪಸ್ಸ;
ಮಹೇಸಕ್ಖೋ ಅಞ್ಞತರೋ ಪಿತಾ ತೇ, ಮಚ್ಚೇಸು ಮಾತಾ ಪನ ತೇ ಅತುಲ್ಯಾ;
ನ ತಾದಿಸೋ ಅರಹತಿ ಬ್ರಾಹ್ಮಣಸ್ಸ, ದಾಸಮ್ಪಿ ಓಹಾರಿತುಂ [ಓಹಾತುಂ (ಸೀ. ಪೀ.)] ಮಹಾನುಭಾವೋ’’.
‘‘ರುಕ್ಖಂ ನಿಸ್ಸಾಯ ವಿಜ್ಝಿತ್ಥೋ, ಏಣೇಯ್ಯಂ ಪಾತುಮಾಗತಂ;
ಸೋ ವಿದ್ಧೋ ದೂರಮಚರಿ [ದೂರ’ಮಸರಾ (ಸೀ. ಪೀ.)], ಸರವೇಗೇನ ಸೀಘವಾ [ಸೇಖವಾ (ಸೀ. ಪೀ.), ಪೇಕ್ಖವಾ (ಸ್ಯಾ. ಕ.)].
‘‘ತಂ ತ್ವಂ ಪತಿತಮದ್ದಕ್ಖಿ, ಅರಞ್ಞಸ್ಮಿಂ ಬ್ರಹಾವನೇ;
ಸಮಂ ಸಕಾಜಮಾದಾಯ, ಸಾಯಂ ನಿಗ್ರೋಧುಪಾಗಮಿ.
‘‘ಸುಕಸಾಳಿಕಸಙ್ಘುಟ್ಠಂ, ಪಿಙ್ಗಲಂ [ಪಿಙ್ಗಿಯಂ (ಸೀ. ಸ್ಯಾ. ಪೀ.)] ಸನ್ಥತಾಯುತಂ;
ಕೋಕಿಲಾಭಿರುದಂ ರಮ್ಮಂ, ಧುವಂ ಹರಿತಸದ್ದಲಂ.
‘‘ತತ್ಥ ತೇ ಸೋ ಪಾತುರಹು, ಇದ್ಧಿಯಾ ಯಸಸಾ ಜಲಂ;
ಮಹಾನುಭಾವೋ ಭಾತಾ ಮೇ, ಕಞ್ಞಾಹಿ ಪರಿವಾರಿತೋ.
‘‘ಸೋ ತೇನ ಪರಿಚಿಣ್ಣೋ ತ್ವಂ, ಸಬ್ಬಕಾಮೇಹಿ ತಪ್ಪಿತೋ;
ಅದುಟ್ಠಸ್ಸ ತುವಂ ದುಬ್ಭಿ, ತಂ ತೇ ವೇರಂ ಇಧಾಗತಂ.
‘‘ಖಿಪ್ಪಂ ¶ ಗೀವಂ ಪಸಾರೇಹಿ, ನ ತೇ ದಸ್ಸಾಮಿ ಜೀವಿತಂ;
ಭಾತು ಪರಿಸರಂ ವೇರಂ, ಛೇದಯಿಸ್ಸಾಮಿ ತೇ ಸಿರಂ’’.
‘‘ಅಜ್ಝಾಯಕೋ ಯಾಚಯೋಗೀ, ಆಹುತಗ್ಗಿ ಚ ಬ್ರಾಹ್ಮಣೋ;
ಏತೇಹಿ ತೀಹಿ ಠಾನೇಹಿ, ಅವಜ್ಝೋ ಹೋತಿ [ಭವತಿ (ಸೀ. ಸ್ಯಾ. ಪೀ.)] ಬ್ರಾಹ್ಮಣೋ’’.
‘‘ಯಂ ಪೂರಂ ಧತರಟ್ಠಸ್ಸ, ಓಗಾಳ್ಹಂ ಯಮುನಂ ನದಿಂ;
ಜೋತತೇ ¶ ಸಬ್ಬಸೋವಣ್ಣಂ, ಗಿರಿಮಾಹಚ್ಚ ಯಾಮುನಂ.
‘‘ತತ್ಥ ತೇ ಪುರಿಸಬ್ಯಗ್ಘಾ, ಸೋದರಿಯಾ ಮಮ ಭಾತರೋ;
ಯಥಾ ತೇ ತತ್ಥ ವಕ್ಖನ್ತಿ, ತಥಾ ಹೇಸ್ಸಸಿ ಬ್ರಾಹ್ಮಣ’’.
‘‘ಅನಿತ್ತರಾ ಇತ್ತರಸಮ್ಪಯುತ್ತಾ, ಯಞ್ಞಾ ಚ ವೇದಾ ಚ ಸುಭೋಗಲೋಕೇ;
ತದಗ್ಗರಯ್ಹಞ್ಹಿ ವಿನಿನ್ದಮಾನೋ, ಜಹಾತಿ ವಿತ್ತಞ್ಚ ಸತಞ್ಚ ಧಮ್ಮಂ.
‘‘ಅಜ್ಝೇನಮರಿಯಾ ¶ ಪಥವಿಂ ಜನಿನ್ದಾ, ವೇಸ್ಸಾ ಕಸಿಂ ಪಾರಿಚರಿಯಞ್ಚ ಸುದ್ದಾ;
ಉಪಾಗು ಪಚ್ಚೇಕಂ ಯಥಾಪದೇಸಂ, ಕತಾಹು ಏತೇ ವಸಿನಾತಿ ಆಹು’’.
‘‘ಧಾತಾ ವಿಧಾತಾ ವರುಣೋ ಕುವೇರೋ, ಸೋಮೋ ಯಮೋ ಚನ್ದಿಮಾ ವಾಯು ಸೂರಿಯೋ;
ಏತೇಪಿ ಯಞ್ಞಂ ಪುಥುಸೋ ಯಜಿತ್ವಾ, ಅಜ್ಝಾಯಕಾನಂ ಅಥೋ ಸಬ್ಬಕಾಮೇ.
‘‘ವಿಕಾಸಿತಾ ಚಾಪಸತಾನಿ ಪಞ್ಚ, ಯೋ ಅಜ್ಜುನೋ ಬಲವಾ ಭೀಮಸೇನೋ;
ಸಹಸ್ಸಬಾಹು ಅಸಮೋ ಪಥಬ್ಯಾ, ಸೋಪಿ ತದಾ ಮಾದಹಿ ಜಾತವೇದಂ’’.
‘‘ಯೋ ಬ್ರಾಹ್ಮಣೇ ಭೋಜಯಿ ದೀಘರತ್ತಂ, ಅನ್ನೇನ ¶ ಪಾನೇನ ಯಥಾನುಭಾವಂ;
ಪಸನ್ನಚಿತ್ತೋ ಅನುಮೋದಮಾನೋ, ಸುಭೋಗ ದೇವಞ್ಞತರೋ ಅಹೋಸಿ’’.
‘‘ಮಹಾಸನಂ ¶ ದೇವಮನೋಮವಣ್ಣಂ, ಯೋ ಸಪ್ಪಿನಾ ಅಸಕ್ಖಿ ಭೋಜೇತುಮಗ್ಗಿಂ [ಜೇತುಮಗ್ಗಿಂ (ಸೀ. ಪೀ.)];
ಸ ಯಞ್ಞತನ್ತಂ ವರತೋ ಯಜಿತ್ವಾ, ದಿಬ್ಬಂ ಗತಿಂ ಮುಚಲಿನ್ದಜ್ಝಗಚ್ಛಿ’’.
‘‘ಮಹಾನುಭಾವೋ ವಸ್ಸಸಹಸ್ಸಜೀವೀ, ಯೋ ಪಬ್ಬಜೀ ದಸ್ಸನೇಯ್ಯೋ ಉಳಾರೋ;
ಹಿತ್ವಾ ಅಪರಿಯನ್ತರಟ್ಠಂ [ರಥಂ (ಸೀ. ಪೀ.)] ಸಸೇನಂ, ರಾಜಾ ದುದೀಪೋಪಿ ಜಗಾಮ [ದುದೀಪೋಪಜ್ಝಗಾಮಿ (ಸ್ಯಾ.)] ಸಗ್ಗಂ’’.
‘‘ಯೋ ಸಾಗರನ್ತಂ ಸಾಗರೋ ವಿಜಿತ್ವಾ, ಯೂಪಂ ಸುಭಂ ಸೋಣ್ಣಮಯಂ [ಸೋವಣ್ಣಮಯಂ (ಸ್ಯಾ. ಕ.)] ಉಳಾರಂ;
ಉಸ್ಸೇಸಿ ವೇಸ್ಸಾನರಮಾದಹಾನೋ, ಸುಭೋಗ ದೇವಞ್ಞತರೋ ಅಹೋಸಿ.
‘‘ಯಸ್ಸಾನುಭಾವೇನ ಸುಭೋಗ ಗಙ್ಗಾ, ಪವತ್ತಥ [ಪವತ್ತತಿ (ಸ್ಯಾ. ಕ.)] ದಧಿಸನ್ನಿಸಿನ್ನಂ [ದಧಿಸನ್ನ (ಸೀ. ಪೀ.)] ಸಮುದ್ದಂ;
ಸಲೋಮಪಾದೋ ಪರಿಚರಿಯಮಗ್ಗಿಂ, ಅಙ್ಗೋ ಸಹಸ್ಸಕ್ಖಪುರಜ್ಝಗಚ್ಛಿ’’.
‘‘ಮಹಿದ್ಧಿಕೋ ದೇವವರೋ ಯಸಸ್ಸೀ, ಸೇನಾಪತಿ ¶ ತಿದಿವೇ ವಾಸವಸ್ಸ;
ಸೋ ಸೋಮಯಾಗೇನ ಮಲಂ ವಿಹನ್ತ್ವಾ, ಸುಭೋಗ ದೇವಞ್ಞತರೋ ಅಹೋಸಿ’’.
‘‘ಅಕಾರಯಿ ಲೋಕಮಿಮಂ ಪರಞ್ಚ, ಭಾಗೀರಥಿಂ ಹಿಮವನ್ತಞ್ಚ ಗಿಜ್ಝಂ [ಗಿಜ್ಝಂ (ಸ್ಯಾ. ಕ.), ವಿಞ್ಝಂ (?)];
ಯೋ ಇದ್ಧಿಮಾ ದೇವವರೋ ಯಸಸ್ಸೀ, ಸೋಪಿ ತದಾ ಆದಹಿ ಜಾತವೇದಂ.
‘‘ಮಾಲಾಗಿರೀ ¶ ಹಿಮವಾ ಯೋ ಚ ಗಿಜ್ಝೋ [ವಿಜ್ಝೋ (ಕ.), ವಿಜ್ಝಾ (ಸ್ಯಾ.)], ಸುದಸ್ಸನೋ ನಿಸಭೋ ಕುವೇರು [ಕಾಕನೇರು (ಸೀ. ಪೀ.), ಕಾಕವೇರು (ಸ್ಯಾ.)];
ಏತೇ ಚ ಅಞ್ಞೇ ಚ ನಗಾ ಮಹನ್ತಾ, ಚಿತ್ಯಾ ಕತಾ ಯಞ್ಞಕರೇಹಿ ಮಾಹು’’.
‘‘ಅಜ್ಝಾಯಕಂ ಮನ್ತಗುಣೂಪಪನ್ನಂ, ತಪಸ್ಸಿನಂ ಯಾಚಯೋಗೋತಿಧಾಹು [ತಿಚಾಹ (ಸೀ. ಪೀ.), ತಿ ಚಾಹು (ಕ.)];
ತೀರೇ ಸಮುದ್ದಸ್ಸುದಕಂ ಸಜನ್ತಂ [ಸಿಞ್ಚನ್ತಂ (ಕ.)], ಸಾಗರೋಜ್ಝೋಹರಿ ತೇನಪೇಯ್ಯೋ.
‘‘ಆಯಾಗವತ್ಥೂನಿ ಪುಥೂ ಪಥಬ್ಯಾ, ಸಂವಿಜ್ಜನ್ತಿ ಬ್ರಾಹ್ಮಣಾ ವಾಸವಸ್ಸ;
ಪುರಿಮಂ ದಿಸಂ ಪಚ್ಛಿಮಂ ದಕ್ಖಿಣುತ್ತರಂ, ಸಂವಿಜ್ಜಮಾನಾ ಜನಯನ್ತಿ ವೇದಂ’’.
‘‘ಕಲೀ ಹಿ ಧೀರಾನ ಕಟಂ ಮಗಾನಂ, ಭವನ್ತಿ ¶ ವೇದಜ್ಝಗತಾನರಿಟ್ಠ;
ಮರೀಚಿಧಮ್ಮಂ ಅಸಮೇಕ್ಖಿತತ್ತಾ, ಮಾಯಾಗುಣಾ ನಾತಿವಹನ್ತಿ ಪಞ್ಞಂ.
‘‘ವೇದಾ ನ ತಾಣಾಯ ಭವನ್ತಿ ದಸ್ಸ, ಮಿತ್ತದ್ದುನೋ ಭೂನಹುನೋ ನರಸ್ಸ;
ನ ತಾಯತೇ ಪರಿಚಿಣ್ಣೋ ಚ ಅಗ್ಗಿ, ದೋಸನ್ತರಂ ಮಚ್ಚಮನರಿಯಕಮ್ಮಂ.
‘‘ಸಬ್ಬಞ್ಚ ¶ ಮಚ್ಚಾ ಸಧನಂ ಸಭೋಗಂ [ಸಧನಾ ಸಭೋಗಾ (ಸೀ. ಸ್ಯಾ. ಪೀ. ಕ.)], ಆದೀಪಿತಂ ದಾರು ತಿಣೇನ ಮಿಸ್ಸಂ;
ದಹಂ ನ ತಪ್ಪೇ [ನ ತಪ್ಪೇ ಅಗ್ಗಿ (ಕ.)] ಅಸಮತ್ಥತೇಜೋ, ಕೋ ತಂ ಸುಭಿಕ್ಖಂ ದ್ವಿರಸಞ್ಞು ಕಯಿರಾ [ದಿರಸಞ್ಞ ಕುರಿಯಾ (ಸೀ.), ದಿರಸಞ್ಞು ಕುರಿಯಾ (ಪೀ.)].
‘‘ಯಥಾಪಿ ¶ ಖೀರಂ ವಿಪರಿಣಾಮಧಮ್ಮಂ, ದಧಿ ಭವಿತ್ವಾ ನವನೀತಮ್ಪಿ ಹೋತಿ;
ಏವಮ್ಪಿ ಅಗ್ಗಿ ವಿಪರಿಣಾಮಧಮ್ಮೋ, ತೇಜೋ ಸಮೋರೋಹತೀ ಯೋಗಯುತ್ತೋ.
‘‘ನ ದಿಸ್ಸತೀ ಅಗ್ಗಿಮನುಪ್ಪವಿಟ್ಠೋ, ಸುಕ್ಖೇಸು ಕಟ್ಠೇಸು ನವೇಸು ಚಾಪಿ;
ನಾಮತ್ಥಮಾನೋ [ನಾಮನ್ಥಮಾನೋ (ಸೀ. ಪೀ.)] ಅರಣೀನರೇನ, ನಾಕಮ್ಮುನಾ ಜಾಯತಿ ಜಾತವೇದೋ.
‘‘ಸಚೇ ಹಿ ಅಗ್ಗಿ ಅನ್ತರತೋ ವಸೇಯ್ಯ, ಸುಕ್ಖೇಸು ¶ ಕಟ್ಠೇಸು ನವೇಸು ಚಾಪಿ;
ಸಬ್ಬಾನಿ ಸುಸ್ಸೇಯ್ಯು ವನಾನಿ ಲೋಕೇ, ಸುಕ್ಖಾನಿ ಕಟ್ಠಾನಿ ಚ ಪಜ್ಜಲೇಯ್ಯುಂ.
‘‘ಕರೋತಿ ಚೇ ದಾರುತಿಣೇನ ಪುಞ್ಞಂ, ಭೋಜಂ ನರೋ ಧೂಮಸಿಖಿಂ ಪತಾಪವಂ;
ಅಙ್ಗಾರಿಕಾ ಲೋಣಕರಾ ಚ ಸೂದಾ, ಸರೀರದಾಹಾಪಿ ಕರೇಯ್ಯು ಪುಞ್ಞಂ.
‘‘ಅಥ ಚೇ ಹಿ ಏತೇ ನ ಕರೋನ್ತಿ ಪುಞ್ಞಂ, ಅಜ್ಝೇನಮಗ್ಗಿಂ ಇಧ ತಪ್ಪಯಿತ್ವಾ;
ನ ಕೋಚಿ ಲೋಕಸ್ಮಿಂ ಕರೋತಿ ಪುಞ್ಞಂ, ಭೋಜಂ ನರೋ ಧೂಮಸಿಖಿಂ ಪತಾಪವಂ.
‘‘ಕಥಞ್ಹಿ ಲೋಕಾಪಚಿತೋ ಸಮಾನೋ, ಅಮನುಞ್ಞಗನ್ಧಂ ಬಹೂನಂ ಅಕನ್ತಂ;
ಯದೇವ ಮಚ್ಚಾ ಪರಿವಜ್ಜಯನ್ತಿ, ತದಪ್ಪಸತ್ಥಂ ದ್ವಿರಸಞ್ಞು ಭುಞ್ಜೇ.
‘‘ಸಿಖಿಮ್ಪಿ ದೇವೇಸು ವದನ್ತಿ ಹೇಕೇ, ಆಪಂ ಮಿಲಕ್ಖೂ [ಮಿಲಕ್ಖಾ (ಸೀ. ಪೀ.)] ಪನ ದೇವಮಾಹು;
ಸಬ್ಬೇವ ಏತೇ ವಿತಥಂ ಭಣನ್ತಿ [ಗಣ್ಹನ್ತಿ (ಕ.)], ಅಗ್ಗೀ ನ ದೇವಞ್ಞತರೋ ನ ಚಾಪೋ.
‘‘ಅನಿನ್ದ್ರಿಯಬದ್ಧಮಸಞ್ಞಕಾಯಂ ¶ [ನಿರಿನ್ದ್ರಿಯಂ ಅನ್ತಂ ಅಸಞ್ಞಕಾಯಂ (ಸೀ. ಪೀ.), ಅನಿದ್ರಿಯಂ ಸನ್ತಮಸಞ್ಞಕಾಯಂ (ಸ್ಯಾ.)], ವೇಸ್ಸಾನರಂ ¶ ಕಮ್ಮಕರಂ ಪಜಾನಂ;
ಪರಿಚರಿಯ ಮಗ್ಗಿಂ ಸುಗತಿಂ ಕಥಂ ವಜೇ, ಪಾಪಾನಿ ಕಮ್ಮಾನಿ ಪಕುಬ್ಬಮಾನೋ [ಪಕೂಬ್ಬಮಾನೋ (ಸ್ಯಾ. ಕ.)].
‘‘ಸಬ್ಬಾಭಿಭೂ ತಾಹುಧ ಜೀವಿಕತ್ಥಾ, ಅಗ್ಗಿಸ್ಸ ಬ್ರಹ್ಮಾ ಪರಿಚಾರಕೋತಿ;
ಸಬ್ಬಾನುಭಾವೀ ಚ ವಸೀ ಕಿಮತ್ಥಂ, ಅನಿಮ್ಮಿತೋ ನಿಮ್ಮಿತಂ ವನ್ದಿತಸ್ಸ.
‘‘ಹಸ್ಸಂ ಅನಿಜ್ಝಾನಖಮಂ ಅತಚ್ಛಂ, ಸಕ್ಕಾರಹೇತು ಪಕಿರಿಂಸು ಪುಬ್ಬೇ;
ತೇ ಲಾಭಸಕ್ಕಾರೇ ಅಪಾತುಭೋನ್ತೇ, ಸನ್ಧಾಪಿತಾ [ಸನ್ಥಮ್ಭಿತಾ (ಸೀ. ಪೀ.), ಸನ್ಧಾಭಿತಾ (ಸ್ಯಾ.), ಸನ್ತಾಪಿತಾ (ಕ.)] ಜನ್ತುಭಿ ಸನ್ತಿಧಮ್ಮಂ.
‘‘ಅಜ್ಝೇನಮರಿಯಾ ಪಥವಿಂ ಜನಿನ್ದಾ, ವೇಸ್ಸಾ ಕಸಿಂ ಪಾರಿಚರಿಯಞ್ಚ ಸುದ್ದಾ;
ಉಪಾಗು ಪಚ್ಚೇಕಂ ಯಥಾಪದೇಸಂ, ಕತಾಹು ಏತೇ ವಸಿನಾತಿ ಆಹು.
‘‘ಏತಞ್ಚ ಸಚ್ಚಂ ವಚನಂ ಭವೇಯ್ಯ, ಯಥಾ ಇದಂ ಭಾಸಿತಂ ಬ್ರಾಹ್ಮಣೇಹಿ;
ನಾಖತ್ತಿಯೋ ಜಾತು ಲಭೇಥ ರಜ್ಜಂ, ನಾಬ್ರಾಹ್ಮಣೋ ಮನ್ತಪದಾನಿ ಸಿಕ್ಖೇ;
ನಾಞ್ಞತ್ರ ವೇಸ್ಸೇಹಿ ಕಸಿಂ ಕರೇಯ್ಯ, ಸುದ್ದೋ ¶ ನ ಮುಚ್ಚೇ ಪರಪೇಸನಾಯ [ಪರಪೇಸ್ಸಿತಾಯ (ಸೀ. ಪೀ.)].
‘‘ಯಸ್ಮಾ ಚ ಏತಂ ವಚನಂ ಅಭೂತಂ, ಮುಸಾವಿಮೇ ಓದರಿಯಾ ಭಣನ್ತಿ;
ತದಪ್ಪಪಞ್ಞಾ ಅಭಿಸದ್ದಹನ್ತಿ, ಪಸ್ಸನ್ತಿ ತಂ ಪಣ್ಡಿತಾ ಅತ್ತನಾವ.
‘‘ಖತ್ಯಾ ¶ ¶ ಹಿ ವೇಸ್ಸಾನಂ [ಖತ್ತಾ ನ ವೇಸ್ಸಾ ನ (ಸೀ. ಪೀ.)] ಬಲಿಂ ಹರನ್ತಿ, ಆದಾಯ ಸತ್ಥಾನಿ ಚರನ್ತಿ ಬ್ರಾಹ್ಮಣಾ;
ತಂ ತಾದಿಸಂ ಸಙ್ಖುಭಿತಂ ಪಭಿನ್ನಂ, ಕಸ್ಮಾ ಬ್ರಹ್ಮಾ ನುಜ್ಜು ಕರೋತಿ ಲೋಕಂ.
‘‘ಸಚೇ ಹಿ ಸೋ ಇಸ್ಸರೋ ಸಬ್ಬಲೋಕೇ, ಬ್ರಹ್ಮಾ ಬಹೂಭೂತಪತೀ [ಬ್ರಹ್ಮಪಹೂ ಭೂತಪತೀ (ಸ್ಯಾ.)] ಪಜಾನಂ;
ಕಿಂ ಸಬ್ಬಲೋಕಂ ವಿದಹೀ ಅಲಕ್ಖಿಂ, ಕಿಂ ಸಬ್ಬಲೋಕಂ ನ ಸುಖಿಂ ಅಕಾಸಿ.
‘‘ಸಚೇ ಹಿ ಸೋ ಇಸ್ಸರೋ ಸಬ್ಬಲೋಕೇ, ಬ್ರಹ್ಮಾ ಬಹೂಭೂತಪತೀ ಪಜಾನಂ;
ಮಾಯಾ ಮುಸಾವಜ್ಜಮದೇನ [ಮುಸಾವಞ್ಚನಪದೇನ (ಕ.)] ಚಾಪಿ, ಲೋಕಂ ಅಧಮ್ಮೇನ ಕಿಮತ್ಥಮಕಾರಿ [ಕಿಮತ್ಥ’ಕಾಸಿ (ಸೀ. ಪೀ.), ಕಿಮತ್ಥಕಾರೀ (ಸ್ಯಾ.)].
‘‘ಸಚೇ ಹಿ ಸೋ ಇಸ್ಸರೋ ಸಬ್ಬಲೋಕೇ, ಬ್ರಹ್ಮಾ ಬಹೂಭೂತಪತೀ ಪಜಾನಂ;
ಅಧಮ್ಮಿಕೋ ¶ ಭೂತಪತೀ ಅರಿಟ್ಠ, ಧಮ್ಮೇ ಸತಿ ಯೋ ವಿದಹೀ ಅಧಮ್ಮಂ.
‘‘ಕೀಟಾ ಪಟಙ್ಗಾ ಉರಗಾ ಚ ಭೇಕಾ [ಭಿಙ್ಗಾ (ಸ್ಯಾ.)], ಹನ್ತ್ವಾ ಕಿಮೀ ಸುಜ್ಝತಿ ಮಕ್ಖಿಕಾ ಚ;
ಏತೇಪಿ ಧಮ್ಮಾ ಅನರಿಯರೂಪಾ, ಕಮ್ಬೋಜಕಾನಂ ವಿತಥಾ ಬಹೂನಂ.
‘‘ಸಚೇ ಹಿ ಸೋ ಸುಜ್ಝತಿ ಯೋ ಹನಾತಿ, ಹತೋಪಿ ಸೋ ಸಗ್ಗಮುಪೇತಿ ಠಾನಂ;
ಭೋವಾದಿ ಭೋವಾದಿನ ಮಾರಯೇಯ್ಯುಂ [ಮಾರಭೇಯ್ಯುಂ (ಕ.)], ಯೇ ಚಾಪಿ ತೇಸಂ ಅಭಿಸದ್ದಹೇಯ್ಯುಂ.
‘‘ನೇವ ¶ ಮಿಗಾ ನ ಪಸೂ ನೋಪಿ ಗಾವೋ, ಆಯಾಚನ್ತಿ ಅತ್ತವಧಾಯ ಕೇಚಿ;
ವಿಪ್ಫನ್ದಮಾನೇ ಇಧ ಜೀವಿಕತ್ಥಾ, ಯಞ್ಞೇಸು ಪಾಣೇ ಪಸುಮಾರಭನ್ತಿ [ಮಾಹರನ್ತಿ (ಸೀ. ಸ್ಯಾ. ಪೀ.)].
‘‘ಯೂಪುಸ್ಸನೇ [ಯೂಪಸ್ಸ ತೇ (ಸೀ.), ಯೂಪಸ್ಸ ನೇ (ಪೀ.)] ಪಸುಬನ್ಧೇ ಚ ಬಾಲಾ, ಚಿತ್ತೇಹಿ ವಣ್ಣೇಹಿ ಮುಖಂ ನಯನ್ತಿ;
ಅಯಂ ತೇ ಯೂಪೋ ಕಾಮದುಹೋ ಪರತ್ಥ, ಭವಿಸ್ಸತಿ ಸಸ್ಸತೋ ಸಮ್ಪರಾಯೇ.
‘‘ಸಚೇ ಚ ಯೂಪೇ ಮಣಿಸಙ್ಖಮುತ್ತಂ, ಧಞ್ಞಂ ¶ ಧನಂ ರಜತಂ ಜಾತರೂಪಂ;
ಸುಕ್ಖೇಸು ಕಟ್ಠೇಸು ನವೇಸು ಚಾಪಿ, ಸಚೇ ದುಹೇ ತಿದಿವೇ ಸಬ್ಬಕಾಮೇ;
ತೇವಿಜ್ಜಸಙ್ಘಾವ ಪುಥೂ ಯಜೇಯ್ಯುಂ, ಅಬ್ರಾಹ್ಮಣಂ [ನ ಬ್ರಾಹ್ಮಣಾ (ಸೀ. ಸ್ಯಾ.)] ಕಞ್ಚಿ ನ ಯಾಜಯೇಯ್ಯುಂ.
‘‘ಕುತೋ ಚ ಯೂಪೇ ಮಣಿಸಙ್ಖಮುತ್ತಂ, ಧಞ್ಞಂ ಧನಂ ರಜತಂ ಜಾತರೂಪಂ;
ಸುಕ್ಖೇಸು ಕಟ್ಠೇಸು ನವೇಸು ಚಾಪಿ, ಕುತೋ ದುಹೇ ತಿದಿವೇ ಸಬ್ಬಕಾಮೇ.
‘‘ಸಠಾ ಚ ಲುದ್ದಾ ಚ ಪಲುದ್ಧಬಾಲಾ [ಉಪಲದ್ಧಬಾಲಾ (ಸೀ. ಪೀ.)], ಚಿತ್ತೇಹಿ ವಣ್ಣೇಹಿ ಮುಖಂ ನಯನ್ತಿ;
ಆದಾಯ ಅಗ್ಗಿಂ ಮಮ ದೇಹಿ ವಿತ್ತಂ, ತತೋ ಸುಖೀ ಹೋಹಿಸಿ ಸಬ್ಬಕಾಮೇ.
‘‘ತಮಗ್ಗಿಹುತ್ತಂ ಸರಣಂ ಪವಿಸ್ಸ, ಚಿತ್ತೇಹಿ ವಣ್ಣೇಹಿ ಮುಖಂ ನಯನ್ತಿ;
ಓರೋಪಯಿತ್ವಾ ಕೇಸಮಸ್ಸುಂ ನಖಞ್ಚ, ವೇದೇಹಿ ವಿತ್ತಂ ಅತಿಗಾಳ್ಹಯನ್ತಿ [ಅತಿಗಾಳಯನ್ತಿ (ಸೀ. ಪೀ.)].
‘‘ಕಾಕಾ ¶ ಉಲೂಕಂವ ರಹೋ ಲಭಿತ್ವಾ, ಏಕಂ ಸಮಾನಂ ಬಹುಕಾ ಸಮೇಚ್ಚ;
ಅನ್ನಾನಿ ಭುತ್ವಾ ಕುಹಕಾ ಕುಹಿತ್ವಾ, ಮುಣ್ಡಂ ¶ ಕರಿತ್ವಾ ಯಞ್ಞಪಥೋಸ್ಸಜನ್ತಿ.
‘‘ಏವಞ್ಹಿ ಸೋ ವಞ್ಚಿತೋ ಬ್ರಾಹ್ಮಣೇಹಿ, ಏಕೋ ಸಮಾನೋ ಬಹುಕಾ [ಬಹುಹೀ (ಸೀ.)] ಸಮೇಚ್ಚ;
ತೇ ಯೋಗಯೋಗೇನ ವಿಲುಮ್ಪಮಾನಾ, ದಿಟ್ಠಂ ಅದಿಟ್ಠೇನ ಧನಂ ಹರನ್ತಿ.
‘‘ಅಕಾಸಿಯಾ ¶ ರಾಜೂಹಿವಾನುಸಿಟ್ಠಾ, ತದಸ್ಸ ಆದಾಯ ಧನಂ ಹರನ್ತಿ;
ತೇ ತಾದಿಸಾ ಚೋರಸಮಾ ಅಸನ್ತಾ, ವಜ್ಝಾ ನ ಹಞ್ಞನ್ತಿ ಅರಿಟ್ಠ ಲೋಕೇ.
‘‘ಇನ್ದಸ್ಸ ಬಾಹಾರಸಿ ದಕ್ಖಿಣಾತಿ, ಯಞ್ಞೇಸು ಛಿನ್ದನ್ತಿ ಪಲಾಸಯಟ್ಠಿಂ;
ತಂ ಚೇಪಿ ಸಚ್ಚಂ ಮಘವಾ ಛಿನ್ನಬಾಹು, ಕೇನಸ್ಸ ಇನ್ದೋ ಅಸುರೇ ಜಿನಾತಿ.
‘‘ತಞ್ಚೇವ ತುಚ್ಛಂ ಮಘವಾ ಸಮಙ್ಗೀ, ಹನ್ತಾ ಅವಜ್ಝೋ ಪರಮೋ ಸ ದೇವೋ [ಸುದೇವೋ (ಸ್ಯಾ. ಕ.)];
ಮನ್ತಾ ಇಮೇ ಬ್ರಾಹ್ಮಣಾ ತುಚ್ಛರೂಪಾ, ಸನ್ದಿಟ್ಠಿಕಾ ವಞ್ಚನಾ ಏಸ ಲೋಕೇ.
‘‘ಮಾಲಾಗಿರಿ ಹಿಮವಾ ಯೋ ಚ ಗಿಜ್ಝೋ, ಸುದಸ್ಸನೋ ನಿಸಭೋ ಕುವೇರು;
ಏತೇ ಚ ಅಞ್ಞೇ ಚ ನಗಾ ಮಹನ್ತಾ, ಚಿತ್ಯಾ ¶ ಕತಾ ಯಞ್ಞಕರೇಹಿ ಮಾಹು.
‘‘ಯಥಾಪಕಾರಾನಿ ಹಿ ಇಟ್ಠಕಾನಿ, ಚಿತ್ಯಾ ಕತಾ ಯಞ್ಞಕರೇಹಿ ಮಾಹು;
ನ ಪಬ್ಬತಾ ಹೋನ್ತಿ ತಥಾಪಕಾರಾ, ಅಞ್ಞಾ ದಿಸಾ ಅಚಲಾ ತಿಟ್ಠಸೇಲಾ.
‘‘ನ ¶ ಇಟ್ಠಕಾ ಹೋನ್ತಿ ಸಿಲಾ ಚಿರೇನ [ಚಿರೇನಪಿ (ಸೀ. ಪೀ.)], ನ ತತ್ಥ ಸಞ್ಜಾಯತಿ ಅಯೋ ನ ಲೋಹಂ;
ಯಞ್ಞಞ್ಚ ಏತಂ ಪರಿವಣ್ಣಯನ್ತಾ, ಚಿತ್ಯಾ ಕತಾ ಯಞ್ಞಕರೇಹಿ ಮಾಹು.
‘‘ಅಜ್ಝಾಯಕಂ ಮನ್ತಗುಣೂಪಪನ್ನಂ, ತಪಸ್ಸಿನಂ ಯಾಚಯೋಗೋತಿಧಾಹು;
ತೀರೇ ಸಮುದ್ದಸ್ಸುದಕಂ ಸಜನ್ತಂ, ತಂ ಸಾಗರೋಜ್ಝೋಹರಿ ತೇನಪೇಯ್ಯೋ.
‘‘ಪರೋಸಹಸ್ಸಮ್ಪಿ ಸಮನ್ತವೇದೇ, ಮನ್ತೂಪಪನ್ನೇ ನದಿಯೋ ವಹನ್ತಿ;
ನ ತೇನ ಬ್ಯಾಪನ್ನರಸೂದಕಾ ನ, ಕಸ್ಮಾ ಸಮುದ್ದೋ ಅತುಲೋ ಅಪೇಯ್ಯೋ.
‘‘ಯೇ ಕೇಚಿ ಕೂಪಾ ಇಧ ಜೀವಲೋಕೇ, ಲೋಣೂದಕಾ ಕೂಪಖಣೇಹಿ ಖಾತಾ;
ನ ಬ್ರಾಹ್ಮಣಜ್ಝೋಹರಣೇನ [ಬ್ರಾಹ್ಮಣಜ್ಝೋಹರಿ ತೇನ (ಕ.)] ತೇಸು, ಆಪೋ ¶ ಅಪೇಯ್ಯೋ ದ್ವಿರಸಞ್ಞು ಮಾಹು.
‘‘ಪುರೇ ಪುರತ್ಥಾ ಕಾ ಕಸ್ಸ ಭರಿಯಾ, ಮನೋ ಮನುಸ್ಸಂ ಅಜನೇಸಿ ಪುಬ್ಬೇ;
ತೇನಾಪಿ ಧಮ್ಮೇನ ನ ಕೋಚಿ ಹೀನೋ, ಏವಮ್ಪಿ ವೋಸ್ಸಗ್ಗವಿಭಙ್ಗಮಾಹು [ವೋಸ್ಸಗ್ಗವಿಭಾಗಮಾಹು (ಸೀ.)].
‘‘ಚಣ್ಡಾಲಪುತ್ತೋಪಿ ಅಧಿಚ್ಚ ವೇದೇ, ಭಾಸೇಯ್ಯ ಮನ್ತೇ ಕುಸಲೋ ಮತೀಮಾ [ಮುತೀಮಾ (ಸೀ. ಪೀ.)];
ನ ತಸ್ಸ ಮುದ್ಧಾಪಿ ಫಲೇಯ್ಯ ಸತ್ತಧಾ, ಮನ್ತಾ ಇಮೇ ಅತ್ತವಧಾಯ ಕತಾ [ಕತ್ತ (ಸೀ. ಪೀ.)].
‘‘ವಾಚಾಕತಾ ಗಿದ್ಧಿಕತಾ [ಗಿದ್ಧಿಗತಾ (ಕ.)] ಗಹೀತಾ, ದುಮ್ಮೋಚಯಾ ಕಬ್ಯಪಥಾನುಪನ್ನಾ;
ಬಾಲಾನ ಚಿತ್ತಂ ವಿಸಮೇ ನಿವಿಟ್ಠಂ, ತದಪ್ಪಪಞ್ಞಾ ಅಭಿಸದ್ದಹನ್ತಿ.
‘‘ಸೀಹಸ್ಸ ¶ ಬ್ಯಗ್ಘಸ್ಸ ಚ ದೀಪಿನೋ ಚ, ನ ವಿಜ್ಜತೀ ಪೋರಿಸಿಯಂಬಲೇನ;
ಮನುಸ್ಸಭಾವೋ ಚ ಗವಂವ ಪೇಕ್ಖೋ, ಜಾತೀ ಹಿ ತೇಸಂ ಅಸಮಾ ಸಮಾನಾ [ಸಮಾನಂ (ಸ್ಯಾ. ಕ.)].
‘‘ಸಚೇ ಚ ರಾಜಾ ಪಥವಿಂ ವಿಜಿತ್ವಾ, ಸಜೀವವಾ ಅಸ್ಸವಪಾರಿಸಜ್ಜೋ;
ಸಯಮೇವ ಸೋ ಸತ್ತುಸಙ್ಘಂ ವಿಜೇಯ್ಯ, ತಸ್ಸಪ್ಪಜಾ ¶ ನಿಚ್ಚಸುಖೀ [ನಿಚ್ಚಸುಖಾ (ಪೀ.)] ಭವೇಯ್ಯ.
‘‘ಖತ್ತಿಯಮನ್ತಾ ಚ ತಯೋ ಚ ವೇದಾ, ಅತ್ಥೇನ ಏತೇ ಸಮಕಾ ಭವನ್ತಿ;
ತೇಸಞ್ಚ ಅತ್ಥಂ ಅವಿನಿಚ್ಛಿನಿತ್ವಾ, ನ ಬುಜ್ಝತೀ ಓಘಪಥಂವ ಛನ್ನಂ.
‘‘ಖತ್ತಿಯಮನ್ತಾ ¶ ಚ ತಯೋ ಚ ವೇದಾ, ಅತ್ಥೇನ ಏತೇ ಸಮಕಾ ಭವನ್ತಿ;
ಲಾಭೋ ಅಲಾಭೋ ಅಯಸೋ ಯಸೋ ಚ, ಸಬ್ಬೇವ ತೇಸಂ ಚತುನ್ನಞ್ಚ [ಸಬ್ಬೇ ತೇ ಸಬ್ಬೇಸಂ ಚತುನ್ನ (ಸೀ. ಪೀ.)] ಧಮ್ಮಾ.
‘‘ಯಥಾಪಿ ಇಬ್ಭಾ ಧನಧಞ್ಞಹೇತು, ಕಮ್ಮಾನಿ ಕರೋನ್ತಿ [ಕಾರೇನ್ತಿ (ಸೀ. ಸ್ಯಾ. ಪೀ.)] ಪುಥೂ ಪಥಬ್ಯಾ;
ತೇವಿಜ್ಜಸಙ್ಘಾ ಚ ತಥೇವ ಅಜ್ಜ, ಕಮ್ಮಾನಿ ಕರೋನ್ತಿ [ಕಾರೇನ್ತಿ (ಸೀ. ಸ್ಯಾ. ಪೀ.)] ಪುಥೂ ಪಥಬ್ಯಾ.
‘‘ಇಬ್ಭೇಹಿ ಯೇ ತೇ [ಏತೇ (ಸೀ. ಸ್ಯಾ. ಪೀ.)] ಸಮಕಾ ಭವನ್ತಿ, ನಿಚ್ಚುಸ್ಸುಕಾ ಕಾಮಗುಣೇಸು ಯುತ್ತಾ;
ಕಮ್ಮಾನಿ ಕರೋನ್ತಿ [ಕಾರೇನ್ತಿ (ಸೀ. ಸ್ಯಾ. ಪೀ.)] ಪುಥೂ ಪಥಬ್ಯಾ, ತದಪ್ಪಪಞ್ಞಾ ದ್ವಿರಸಞ್ಞುರಾ ತೇ’’.
‘‘ಕಸ್ಸ ಭೇರೀ ಮುದಿಙ್ಗಾ ಚ, ಸಙ್ಖಾಪಣವದಿನ್ದಿಮಾ;
ಪುರತೋ ಪಟಿಪನ್ನಾನಿ, ಹಾಸಯನ್ತಾ ರಥೇಸಭಂ.
‘‘ಕಸ್ಸ ಕಞ್ಚನಪಟ್ಟೇನ, ಪುಥುನಾ ವಿಜ್ಜುವಣ್ಣಿನಾ;
ಯುವಾ ¶ ಕಲಾಪಸನ್ನದ್ಧೋ, ಕೋ ಏತಿ ಸಿರಿಯಾ ಜಲಂ.
‘‘ಉಕ್ಕಾಮುಖಪಹಟ್ಠಂವ ¶ , ಖದಿರಙ್ಗಾರಸನ್ನಿಭಂ;
ಮುಖಞ್ಚ ರುಚಿರಾ ಭಾತಿ, ಕೋ ಏತಿ ಸಿರಿಯಾ ಜಲಂ.
‘‘ಕಸ್ಸ ಜಮ್ಬೋನದಂ ಛತ್ತಂ, ಸಸಲಾಕಂ ಮನೋರಮಂ;
ಆದಿಚ್ಚರಂಸಾವರಣಂ, ಕೋ ಏತಿ ಸಿರಿಯಾ ಜಲಂ.
‘‘ಕಸ್ಸ ಅಙ್ಗಂ [ಅಙ್ಕಂ (ಸೀ. ಪೀ.)] ಪರಿಗ್ಗಯ್ಹ, ವಾಳಬೀಜನಿಮುತ್ತಮಂ;
ಉಭತೋ ವರಪುಞ್ಞಸ್ಸ [ಚರತೇ ವರಪಞ್ಞಸ್ಸ (ಸೀ. ಪೀ.)], ಮುದ್ಧನಿ ಉಪರೂಪರಿ.
‘‘ಕಸ್ಸ ಪೇಖುಣಹತ್ಥಾನಿ, ಚಿತ್ರಾನಿ ಚ ಮುದೂನಿ ಚ;
ಕಞ್ಚನಮಣಿದಣ್ಡಾನಿ [ತಪಞ್ಞಮಣಿದಣ್ಡಾನಿ (ಸೀ. ಪೀ.), ಸುವಣ್ಣಮಣಿದಣ್ಡಾನಿ (ಸ್ಯಾ. ಕ.)], ಚರನ್ತಿ ದುಭತೋ ಮುಖಂ.
‘‘ಖದಿರಙ್ಗಾರವಣ್ಣಾಭಾ, ಉಕ್ಕಾಮುಖಪಹಂಸಿತಾ;
ಕಸ್ಸೇತೇ ಕುಣ್ಡಲಾ ವಗ್ಗೂ, ಸೋಭನ್ತಿ ದುಭತೋ ಮುಖಂ.
‘‘ಕಸ್ಸ ವಾತೇನ ಛುಪಿತಾ, ನಿದ್ಧನ್ತಾ ಮುದುಕಾಳಕಾ [ಮುದುಕಾಳಕಂ (ಸೀ.), ಮುದು ಕಾಳಿಕಾ (ಸ್ಯಾ.)];
ಸೋಭಯನ್ತಿ ನಲಾಟನ್ತಂ, ನಭಾ ವಿಜ್ಜುರಿವುಗ್ಗತಾ.
‘‘ಕಸ್ಸ ಏತಾನಿ ಅಕ್ಖೀನಿ, ಆಯತಾನಿ ಪುಥೂನಿ ಚ;
ಕೋ ಸೋಭತಿ ವಿಸಾಲಕ್ಖೋ, ಕಸ್ಸೇತಂ ಉಣ್ಣಜಂ ಮುಖಂ.
‘‘ಕಸ್ಸೇತೇ ಲಪನಜಾತಾ [ಲಪನಜಾ ಸುದ್ಧಾ (ಸೀ. ಪೀ.)], ಸುದ್ಧಾ ಸಙ್ಖವರೂಪಮಾ;
ಭಾಸಮಾನಸ್ಸ ಸೋಭನ್ತಿ, ದನ್ತಾ ಕುಪ್ಪಿಲಸಾದಿಸಾ.
‘‘ಕಸ್ಸ ಲಾಖಾರಸಸಮಾ, ಹತ್ಥಪಾದಾ ಸುಖೇಧಿತಾ;
ಕೋ ಸೋ ಬಿಮ್ಬೋಟ್ಠಸಮ್ಪನ್ನೋ, ದಿವಾ ಸೂರಿಯೋವ ಭಾಸತಿ.
‘‘ಹಿಮಚ್ಚಯೇ ಹಿಮವತಿ [ಹೇಮವತೋ (ಸೀ. ಸ್ಯಾ. ಪೀ.)], ಮಹಾಸಾಲೋವ ಪುಪ್ಫಿತೋ;
ಕೋ ¶ ಸೋ ಓದಾತಪಾವಾರೋ, ಜಯಂ ಇನ್ದೋವ ಸೋಭತಿ.
‘‘ಸುವಣ್ಣಪೀಳಕಾಕಿಣ್ಣಂ ¶ , ಮಣಿದಣ್ಡವಿಚಿತ್ತಕಂ;
ಕೋ ಸೋ ಪರಿಸಮೋಗಯ್ಹ, ಈಸಂ ಖಗ್ಗಂ ಪಮುಞ್ಚತಿ [ಈಸೋ ಖಗ್ಗಂವ ಮುಞ್ಚತಿ (ಸೀ. ಪೀ.), ಭನ್ತೇ ಖಗ್ಗಂ ಪಮುಞ್ಚತಿ (ಸ್ಯಾ.)].
‘‘ಸುವಣ್ಣವಿಕತಾ ¶ ಚಿತ್ತಾ, ಸುಕತಾ ಚಿತ್ತಸಿಬ್ಬನಾ [ಸಿಬ್ಬಿನೀ (ಸ್ಯಾ. ಕ.)];
ಕೋ ಸೋ ಓಮುಞ್ಚತೇ ಪಾದಾ, ನಮೋ ಕತ್ವಾ ಮಹೇಸಿನೋ’’.
‘‘ಧತರಟ್ಠಾ ಹಿ ತೇ ನಾಗಾ, ಇದ್ಧಿಮನ್ತೋ ಯಸಸ್ಸಿನೋ;
ಸಮುದ್ದಜಾಯ ಉಪ್ಪನ್ನಾ, ನಾಗಾ ಏತೇ ಮಹಿದ್ಧಿಕಾ’’ತಿ.
ಭೂರಿದತ್ತಜಾತಕಂ ಛಟ್ಠಂ.
೫೪೪. ಚನ್ದಕುಮಾರಜಾತಕಂ (೭)
‘‘ರಾಜಾಸಿ ಲುದ್ದಕಮ್ಮೋ, ಏಕರಾಜಾ ಪುಪ್ಫವತೀಯಾ;
ಸೋ ಪುಚ್ಛಿ ಬ್ರಹ್ಮಬನ್ಧುಂ, ಖಣ್ಡಹಾಲಂ ಪುರೋಹಿತಂ ಮೂಳ್ಹಂ.
‘ಸಗ್ಗಾನ ಮಗ್ಗಮಾಚಿಕ್ಖ [ಸಗ್ಗಮಗ್ಗಮಾಚಿಕ್ಖ (ಸೀ. ಪೀ.)], ತ್ವಂಸಿ ಬ್ರಾಹ್ಮಣ ಧಮ್ಮವಿನಯಕುಸಲೋ;
ಯಥಾ ಇತೋ ವಜನ್ತಿ ಸುಗತಿಂ, ನರಾ ಪುಞ್ಞಾನಿ ಕತ್ವಾನ’.
‘ಅತಿದಾನಂ ದದಿತ್ವಾನ, ಅವಜ್ಝೇ ¶ ದೇವ ಘಾತೇತ್ವಾ;
ಏವಂ ವಜನ್ತಿ ಸುಗತಿಂ, ನರಾ ಪುಞ್ಞಾನಿ ಕತ್ವಾನ’.
‘ಕಿಂ ಪನ ತಂ ಅತಿದಾನಂ, ಕೇ ಚ ಅವಜ್ಝಾ ಇಮಸ್ಮಿ ಲೋಕಸ್ಮಿಂ;
ಏತಞ್ಚ ಖೋ ನೋ ಅಕ್ಖಾಹಿ, ಯಜಿಸ್ಸಾಮಿ ದದಾಮಿ [ಯಜಿಸ್ಸಾಮ ದದಾಮ (ಸೀ. ಪೀ.)] ದಾನಾನಿ’.
‘ಪುತ್ತೇಹಿ ದೇವ ಯಜಿತಬ್ಬಂ, ಮಹೇಸೀಹಿ ನೇಗಮೇಹಿ ಚ;
ಉಸಭೇಹಿ ಆಜಾನಿಯೇಹಿ ಚತೂಹಿ, ಸಬ್ಬಚತುಕ್ಕೇನ ದೇವ ಯಜಿತಬ್ಬಂ’’’.
‘‘ತಂ ಸುತ್ವಾ ಅನ್ತೇಪುರೇ, ಕುಮಾರಾ ಮಹೇಸಿಯೋ ಚ ಹಞ್ಞನ್ತು;
ಏಕೋ ಅಹೋಸಿ ನಿಗ್ಘೋಸೋ, ಭಿಸ್ಮಾ ಅಚ್ಚುಗ್ಗತೋ ಸದ್ದೋ’’.
‘‘ಗಚ್ಛಥ ವದೇಥ ಕುಮಾರೇ, ಚನ್ದಂ ಸೂರಿಯಞ್ಚ ಭದ್ದಸೇನಞ್ಚ;
ಸೂರಞ್ಚ ವಾಮಗೋತ್ತಞ್ಚ, ಪಚುರಾ [ಪಸುರಾ (ಸೀ. ಪೀ. ಕ.)] ಕಿರ ಹೋಥ ಯಞ್ಞತ್ಥಾಯ.
‘‘ಕುಮಾರಿಯೋಪಿ ವದೇಥ, ಉಪಸೇನಂ ¶ [ಉಪಸೇನಿಂ (ಸೀ.), ಉಪಸೇಣಿಂ (ಪೀ.)] ಕೋಕಿಲಞ್ಚ ಮುದಿತಞ್ಚ;
ನನ್ದಞ್ಚಾಪಿ ಕುಮಾರಿಂ, ಪಚುರಾ [ಪಸುರಾ (ಸೀ. ಪೀ. ಕ.)] ಕಿರ ಹೋಥ ಯಞ್ಞತ್ಥಾಯ.
‘‘ವಿಜಯಮ್ಪಿ ಮಯ್ಹಂ ಮಹೇಸಿಂ, ಏರಾವತಿಂ [ಏಕಪತಿಂ (ಪೀ.), ಏರಾಪತಿಂ (ಕ.)] ಕೇಸಿನಿಂ ಸುನನ್ದಞ್ಚ;
ಲಕ್ಖಣವರೂಪಪನ್ನಾ, ಪಚುರಾ ಕಿರ ಹೋಥ ಯಞ್ಞತ್ಥಾಯ.
‘‘ಗಹಪತಯೋ ¶ ¶ ಚ ವದೇಥ, ಪುಣ್ಣಮುಖಂ ಭದ್ದಿಯಂ ಸಿಙ್ಗಾಲಞ್ಚ;
ವಡ್ಢಞ್ಚಾಪಿ ಗಹಪತಿಂ, ಪಚುರಾ ಕಿರ ಹೋಥ ಯಞ್ಞತ್ಥಾಯ’’.
‘‘ತೇ ತತ್ಥ ಗಹಪತಯೋ, ಅವೋಚಿಸುಂ ಸಮಾಗತಾ ಪುತ್ತದಾರಪರಿಕಿಣ್ಣಾ;
ಸಬ್ಬೇವ ಸಿಖಿನೋ ದೇವ ಕರೋಹಿ, ಅಥ ವಾ ನೋ ದಾಸೇ ಸಾವೇಹಿ’’.
‘‘ಅಭಯಂಕರಮ್ಪಿ ಮೇ ಹತ್ಥಿಂ, ನಾಳಾಗಿರಿಂ ಅಚ್ಚುಗ್ಗತಂ ವರುಣದನ್ತಂ [ನಾಳಾಗಿರಿಂ ಅಚ್ಚುತಂ ವರುಣದನ್ತಂ (ಸೀ.), ರಾಜಗಿರಿಂ ಅಚ್ಚುತವರುಣದನ್ತಂ (ಪೀ.)];
ಆನೇಥ ಖೋ ನೇ ಖಿಪ್ಪಂ, ಯಞ್ಞತ್ಥಾಯ ಭವಿಸ್ಸನ್ತಿ.
‘‘ಅಸ್ಸರತನಮ್ಪಿ [ಅಸ್ಸತರಮ್ಪಿ (ಸೀ. ಪೀ.), ಅಸ್ಸರತನಮ್ಪಿ ಮೇ (ಸ್ಯಾ.)] ಕೇಸಿಂ, ಸುರಾಮುಖಂ ಪುಣ್ಣಕಂ ವಿನತಕಞ್ಚ;
ಆನೇಥ ಖೋ ನೇ ಖಿಪ್ಪಂ, ಯಞ್ಞತ್ಥಾಯ ಭವಿಸ್ಸನ್ತಿ.
‘‘ಉಸಭಮ್ಪಿ ¶ [ಉಸಭಮ್ಪಿ ಮೇ (ಸ್ಯಾ.)] ಯೂಥಪತಿಂ ಅನೋಜಂ, ನಿಸಭಂ ಗವಮ್ಪತಿಂ ತೇಪಿ ಮಯ್ಹಂ ಆನೇಥ;
ಸಮೂಹ [ಸಮುಪಾ (ಸೀ. ಪೀ.), ಸಮ್ಮುಖಾ (ಸ್ಯಾ.)] ಕರೋನ್ತು ಸಬ್ಬಂ, ಯಜಿಸ್ಸಾಮಿ ದದಾಮಿ ದಾನಾನಿ.
‘‘ಸಬ್ಬಂ [ಸಬ್ಬಮ್ಪಿ (ಸ್ಯಾ.)] ಪಟಿಯಾದೇಥ, ಯಞ್ಞಂ ಪನ ಉಗ್ಗತಮ್ಹಿ ಸೂರಿಯಮ್ಹಿ;
ಆಣಾಪೇಥ ಚ ಕುಮಾರೇ [ಆಣಾಪೇಥ ಚನ್ದಕುಮಾರೇ (ಸ್ಯಾ. ಕ.)], ಅಭಿರಮನ್ತು ಇಮಂ ರತ್ತಿಂ.
‘‘ಸಬ್ಬಂ [ಸಬ್ಬಮ್ಪಿ (ಸ್ಯಾ.)] ಉಪಟ್ಠಪೇಥ, ಯಞ್ಞಂ ಪನ ಉಗ್ಗತಮ್ಹಿ ಸೂರಿಯಮ್ಹಿ;
ವದೇಥ ದಾನಿ ಕುಮಾರೇ, ಅಜ್ಜ ಖೋ [ವೋ (ಪೀ.)] ಪಚ್ಛಿಮಾ ರತ್ತಿ’’.
‘‘ತಂತಂ ಮಾತಾ ಅವಚ, ರೋದನ್ತೀ ಆಗನ್ತ್ವಾ ವಿಮಾನತೋ;
ಯಞ್ಞೋ ಕಿರ ತೇ ಪುತ್ತ, ಭವಿಸ್ಸತಿ ಚತೂಹಿ ಪುತ್ತೇಹಿ’’.
‘‘ಸಬ್ಬೇಪಿ ಮಯ್ಹಂ ಪುತ್ತಾ ಚತ್ತಾ, ಚನ್ದಸ್ಮಿಂ ಹಞ್ಞಮಾನಸ್ಮಿಂ;
ಪುತ್ತೇಹಿ ಯಞ್ಞಂ ಯಜಿತ್ವಾನ, ಸುಗತಿಂ ಸಗ್ಗಂ ಗಮಿಸ್ಸಾಮಿ’’.
‘‘ಮಾ ತಂ [ಮಾ (ಸೀ. ಪೀ.)] ಪುತ್ತ ಸದ್ದಹೇಸಿ, ಸುಗತಿ ಕಿರ ಹೋತಿ ಪುತ್ತಯಞ್ಞೇನ;
ನಿರಯಾನೇಸೋ ಮಗ್ಗೋ, ನೇಸೋ ಮಗ್ಗೋ ಹಿ ಸಗ್ಗಾನಂ.
‘‘ದಾನಾನಿ ¶ ದೇಹಿ ಕೋಣ್ಡಞ್ಞ, ಅಹಿಂಸಾ ಸಬ್ಬಭೂತಭಬ್ಯಾನಂ’’;
ಏಸ ಮಗ್ಗೋ ಸುಗತಿಯಾ, ನ ಚ ಮಗ್ಗೋ ಪುತ್ತಯಞ್ಞೇನ’’.
‘‘ಆಚರಿಯಾನಂ ¶ ವಚನಾ, ಘಾತೇಸ್ಸಂ ಚನ್ದಞ್ಚ ಸೂರಿಯಞ್ಚ;
ಪುತ್ತೇಹಿ ಯಞ್ಞಂ [ಪುತ್ತೇಹಿ (ಸೀ. ಸ್ಯಾ. ಪೀ.)] ಯಜಿತ್ವಾನ ದುಚ್ಚಜೇಹಿ, ಸುಗತಿಂ ಸಗ್ಗಂ ಗಮಿಸ್ಸಾಮಿ’’.
‘‘ತಂತಂ ಪಿತಾಪಿ ಅವಚ, ವಸವತ್ತೀ ಓರಸಂ ಸಕಂ ಪುತ್ತಂ;
ಯಞ್ಞೋ ಕಿರ ತೇ ಪುತ್ತ, ಭವಿಸ್ಸತಿ ಚತೂಹಿ ಪುತ್ತೇಹಿ’’.
‘‘ಸಬ್ಬೇಪಿ ಮಯ್ಹಂ ಪುತ್ತಾ ಚತ್ತಾ, ಚನ್ದಸ್ಮಿಂ ಹಞ್ಞಮಾನಸ್ಮಿಂ;
ಪುತ್ತೇಹಿ ಯಞ್ಞಂ ಯಜಿತ್ವಾನ, ಸುಗತಿಂ ಸಗ್ಗಂ ಗಮಿಸ್ಸಾಮಿ’’.
‘‘ಮಾ ತಂ ಪುತ್ತ ಸದ್ದಹೇಸಿ, ಸುಗತಿ ಕಿರ ಹೋತಿ ಪುತ್ತಯಞ್ಞೇನ;
ನಿರಯಾನೇಸೋ ಮಗ್ಗೋ, ನೇಸೋ ಮಗ್ಗೋ ಹಿ ಸಗ್ಗಾನಂ.
‘‘ದಾನಾನಿ ¶ ದೇಹಿ ಕೋಣ್ಡಞ್ಞ, ಅಹಿಂಸಾ ಸಬ್ಬಭೂತಭಬ್ಯಾನಂ;
ಏಸ ಮಗ್ಗೋ ಸುಗತಿಯಾ, ನ ಚ ಮಗ್ಗೋ ಪುತ್ತಯಞ್ಞೇನ’’.
‘‘ಆಚರಿಯಾನಂ ವಚನಾ, ಘಾತೇಸ್ಸಂ ಚನ್ದಞ್ಚ ಸೂರಿಯಞ್ಚ;
ಪುತ್ತೇಹಿ ಯಞ್ಞಂ ಯಜಿತ್ವಾನ ದುಚ್ಚಜೇಹಿ, ಸುಗತಿಂ ಸಗ್ಗಂ ಗಮಿಸ್ಸಾಮಿ’’.
‘‘ದಾನಾನಿ ದೇಹಿ ಕೋಣ್ಡಞ್ಞ, ಅಹಿಂಸಾ ಸಬ್ಬಭೂತಭಬ್ಯಾನಂ;
ಪುತ್ತಪರಿವುತೋ ತುವಂ, ರಟ್ಠಂ ಜನಪದಞ್ಚ ಪಾಲೇಹಿ’’.
‘‘ಮಾ ನೋ ದೇವ ಅವಧಿ, ದಾಸೇ ನೋ ದೇಹಿ ಖಣ್ಡಹಾಲಸ್ಸ;
ಅಪಿ ನಿಗಳಬನ್ಧಕಾಪಿ, ಹತ್ಥೀ ಅಸ್ಸೇ ಚ ಪಾಲೇಮ.
‘‘ಮಾ ¶ ನೋ ದೇವ ಅವಧಿ, ದಾಸೇ ನೋ ದೇಹಿ ಖಣ್ಡಹಾಲಸ್ಸ;
ಅಪಿ ನಿಗಳಬನ್ಧಕಾಪಿ, ಹತ್ಥಿಛಕಣಾನಿ ಉಜ್ಝೇಮ.
‘‘ಮಾ ನೋ ದೇವ ಅವಧಿ, ದಾಸೇ ನೋ ದೇಹಿ ಖಣ್ಡಹಾಲಸ್ಸ;
ಅಪಿ ನಿಗಳಬನ್ಧಕಾಪಿ, ಅಸ್ಸಛಕಣಾನಿ ಉಜ್ಝೇಮ.
‘‘ಮಾ ನೋ ದೇವ ಅವಧಿ, ದಾಸೇ ನೋ ದೇಹಿ ಖಣ್ಡಹಾಲಸ್ಸ [ಇದಂ ಪದಂ ಸೀ. ಪೀ. ಪೋತ್ಥಕೇಸು ನತ್ಥಿ];
ಯಸ್ಸ ಹೋನ್ತಿ ತವ ಕಾಮಾ, ಅಪಿ ರಟ್ಠಾ ಪಬ್ಬಾಜಿತಾ;
ಭಿಕ್ಖಾಚರಿಯಂ ಚರಿಸ್ಸಾಮ’’.
‘‘ದುಕ್ಖಂ ¶ ಖೋ ಮೇ ಜನಯಥ, ವಿಲಪನ್ತಾ ಜೀವಿತಸ್ಸ ಕಾಮಾ ಹಿ;
ಮುಞ್ಚೇಥ [ಮುಞ್ಚಥ (ಸೀ. ಪೀ.)] ದಾನಿ ಕುಮಾರೇ, ಅಲಮ್ಪಿ ಮೇ ಹೋತು ಪುತ್ತಯಞ್ಞೇನ’’.
‘‘ಪುಬ್ಬೇವ ಖೋಸಿ ಮೇ ವುತ್ತೋ, ದುಕ್ಕರಂ ದುರಭಿಸಮ್ಭವಞ್ಚೇತಂ;
ಅಥ ನೋ ಉಪಕ್ಖಟಸ್ಸ ಯಞ್ಞಸ್ಸ, ಕಸ್ಮಾ ಕರೋಸಿ ವಿಕ್ಖೇಪಂ.
‘‘ಸಬ್ಬೇ ವಜನ್ತಿ ಸುಗತಿಂ, ಯೇ ಯಜನ್ತಿ ಯೇಪಿ ಯಾಜೇನ್ತಿ;
ಯೇ ಚಾಪಿ ಅನುಮೋದನ್ತಿ, ಯಜನ್ತಾನಂ ಏದಿಸಂ ಮಹಾಯಞ್ಞಂ’’.
‘‘ಅಥ ಕಿಸ್ಸ ಜನೋ [ಚ ನೋ (ಸೀ. ಸ್ಯಾ. ಪೀ.)] ಪುಬ್ಬೇ, ಸೋತ್ಥಾನಂ ಬ್ರಾಹ್ಮಣೇ ಅವಾಚೇಸಿ;
ಅಥ ನೋ ಅಕಾರಣಸ್ಮಾ, ಯಞ್ಞತ್ಥಾಯ ದೇವ ಘಾತೇಸಿ.
‘‘ಪುಬ್ಬೇವ ನೋ ದಹರಕಾಲೇ [ದಹರಕೇ ಸಮಾನೇ (ಸೀ. ಪೀ.)], ನ ಹನೇಸಿ [ನ ಮಾರೇಸಿ (ಸೀ. ಪೀ.)] ನ ಘಾತೇಸಿ;
ದಹರಮ್ಹಾ ಯೋಬ್ಬನಂ ಪತ್ತಾ, ಅದೂಸಕಾ ತಾತ ಹಞ್ಞಾಮ.
‘‘ಹತ್ಥಿಗತೇ ಅಸ್ಸಗತೇ, ಸನ್ನದ್ಧೇ ಪಸ್ಸ ನೋ ಮಹಾರಾಜ;
ಯುದ್ಧೇ ವಾ ಯುಜ್ಝಮಾನೇ ವಾ, ನ ಹಿ ಮಾದಿಸಾ ಸೂರಾ ಹೋನ್ತಿ ಯಞ್ಞತ್ಥಾಯ.
‘‘ಪಚ್ಚನ್ತೇ ವಾಪಿ ಕುಪಿತೇ, ಅಟವೀಸು ವಾ ಮಾದಿಸೇ ನಿಯೋಜೇನ್ತಿ;
ಅಥ ನೋ ಅಕಾರಣಸ್ಮಾ, ಅಭೂಮಿಯಂ ತಾತ ಹಞ್ಞಾಮ.
‘‘ಯಾಪಿ ¶ ಹಿ ತಾ ಸಕುಣಿಯೋ, ವಸನ್ತಿ ತಿಣಘರಾನಿ ಕತ್ವಾನ;
ತಾಸಮ್ಪಿ ಪಿಯಾ ಪುತ್ತಾ, ಅಥ ನೋ ತ್ವಂ ದೇವ ಘಾತೇಸಿ.
‘‘ಮಾ ತಸ್ಸ ಸದ್ದಹೇಸಿ, ನ ಮಂ ಖಣ್ಡಹಾಲೋ ಘಾತೇಯ್ಯ;
ಮಮಞ್ಹಿ ¶ ಸೋ ಘಾತೇತ್ವಾನ, ಅನನ್ತರಾ ತಮ್ಪಿ ದೇವ ಘಾತೇಯ್ಯ.
‘‘ಗಾಮವರಂ ನಿಗಮವರಂ ದದನ್ತಿ, ಭೋಗಮ್ಪಿಸ್ಸ ಮಹಾರಾಜ;
ಅಥಗ್ಗಪಿಣ್ಡಿಕಾಪಿ, ಕುಲೇ ಕುಲೇ ಹೇತೇ ಭುಞ್ಜನ್ತಿ.
‘‘ತೇಸಮ್ಪಿ ತಾದಿಸಾನಂ, ಇಚ್ಛನ್ತಿ ದುಬ್ಭಿತುಂ ಮಹಾರಾಜ;
ಯೇಭುಯ್ಯೇನ ಏತೇ, ಅಕತಞ್ಞುನೋ ಬ್ರಾಹ್ಮಣಾ ದೇವ.
‘‘ಮಾ ನೋ ದೇವ ಅವಧಿ, ದಾಸೇ ನೋ ದೇಹಿ ಖಣ್ಡಹಾಲಸ್ಸ;
ಅಪಿ ನಿಗಳಬನ್ಧಕಾಪಿ, ಹತ್ಥೀ ಅಸ್ಸೇ ಚ ಪಾಲೇಮ.
‘‘ಮಾ ¶ ನೋ ದೇವ ಅವಧಿ, ದಾಸೇ ನೋ ದೇಹಿ ಖಣ್ಡಹಾಲಸ್ಸ;
ಅಪಿ ನಿಗಳಬನ್ಧಕಾಪಿ, ಹತ್ಥಿಛಕಣಾನಿ ಉಜ್ಝೇಮ.
‘‘ಮಾ ನೋ ದೇವ ಅವಧಿ, ದಾಸೇ ನೋ ದೇಹಿ ಖಣ್ಡಹಾಲಸ್ಸ;
ಅಪಿ ನಿಗಳಬನ್ಧಕಾಪಿ, ಅಸ್ಸಛಕಣಾನಿ ಉಜ್ಝೇಮ.
‘‘ಮಾ ನೋ ದೇವ ಅವಧಿ, ದಾಸೇ ನೋ ದೇಹಿ ಖಣ್ಡಹಾಲಸ್ಸ;
ಯಸ್ಸ ಹೋನ್ತಿ ತವ ಕಾಮಾ, ಅಪಿ ರಟ್ಠಾ ಪಬ್ಬಾಜಿತಾ;
ಭಿಕ್ಖಾಚರಿಯಂ ಚರಿಸ್ಸಾಮ’’.
‘‘ದುಕ್ಖಂ ಖೋ ಮೇ ಜನಯಥ, ವಿಲಪನ್ತಾ ಜೀವಿತಸ್ಸ ಕಾಮಾ ಹಿ;
ಮುಞ್ಚೇಥ ದಾನಿ ಕುಮಾರೇ, ಅಲಮ್ಪಿ ಮೇ ಹೋತು ಪುತ್ತಯಞ್ಞೇನ’’.
‘‘ಪುಬ್ಬೇವ ಖೋಸಿ ಮೇ ವುತ್ತೋ, ದುಕ್ಕರಂ ದುರಭಿಸಮ್ಭವಞ್ಚೇತಂ;
ಅಥ ನೋ ಉಪಕ್ಖಟಸ್ಸ ಯಞ್ಞಸ್ಸ, ಕಸ್ಮಾ ಕರೋಸಿ ವಿಕ್ಖೇಪಂ.
‘‘ಸಬ್ಬೇ ವಜನ್ತಿ ಸುಗತಿಂ, ಯೇ ಯಜನ್ತಿ ಯೇಪಿ ಯಾಜೇನ್ತಿ;
ಯೇ ಚಾಪಿ ಅನುಮೋದನ್ತಿ, ಯಜನ್ತಾನಂ ಏದಿಸಂ ಮಹಾಯಞ್ಞಂ’’.
‘‘ಯದಿ ¶ ಕಿರ ಯಜಿತ್ವಾ ಪುತ್ತೇಹಿ, ದೇವಲೋಕಂ ಇತೋ ಚುತಾ ಯನ್ತಿ;
ಬ್ರಾಹ್ಮಣೋ ತಾವ ಯಜತು, ಪಚ್ಛಾಪಿ ಯಜಸಿ ತುವಂ ರಾಜಾ.
‘‘ಯದಿ ಕಿರ ಯಜಿತ್ವಾ ಪುತ್ತೇಹಿ, ದೇವಲೋಕಂ ಇತೋ ಚುತಾ ಯನ್ತಿ;
ಏಸ್ವೇವ ಖಣ್ಡಹಾಲೋ, ಯಜತಂ ಸಕೇಹಿ ಪುತ್ತೇಹಿ.
‘‘ಏವಂ ಜಾನನ್ತೋ ಖಣ್ಡಹಾಲೋ, ಕಿಂ ಪುತ್ತಕೇ ನ ಘಾತೇಸಿ;
ಸಬ್ಬಞ್ಚ ಞಾತಿಜನಂ, ಅತ್ತಾನಞ್ಚ ನ ಘಾತೇಸಿ.
‘‘ಸಬ್ಬೇ ¶ ವಜನ್ತಿ ನಿರಯಂ, ಯೇ ಯಜನ್ತಿ ಯೇಪಿ ಯಾಜೇನ್ತಿ;
ಯೇ ಚಾಪಿ ಅನುಮೋದನ್ತಿ, ಯಜನ್ತಾನಂ ಏದಿಸಂ ಮಹಾಯಞ್ಞಂ.
[ಅಯಂ ಗಾಥಾ ಸೀ. ಸ್ಯಾ. ಪೀ. ಪೋತ್ಥಕೇಸು ನ ದಿಸ್ಸತಿ] ‘‘ಸಚೇ ಹಿ ಸೋ ಸುಜ್ಝತಿ ಯೋ ಹನಾತಿ, ಹತೋಪಿ ಸೋ ಸಗ್ಗಮುಪೇತಿ ಠಾನಂ;
ಭೋವಾದಿ ಭೋವಾದಿನ ಮಾರಯೇಯ್ಯುಂ, ಯೇ ಚಾಪಿ ತೇಸಂ ಅಭಿಸದ್ದಹೇಯ್ಯುಂ’’ [ಅಯಂ ಗಾಥಾ ಸೀ. ಸ್ಯಾ. ಪೀ. ಪೋತ್ಥಕೇಸು ನ ದಿಸ್ಸತಿ].
‘‘ಕಥಞ್ಚ ಕಿರ ಪುತ್ತಕಾಮಾಯೋ, ಗಹಪತಯೋ ಘರಣಿಯೋ ಚ;
ನಗರಮ್ಹಿ ನ ಉಪರವನ್ತಿ ರಾಜಾನಂ, ಮಾ ಘಾತಯಿ ಓರಸಂ ಪುತ್ತಂ.
‘‘ಕಥಞ್ಚ ¶ ಕಿರ ಪುತ್ತಕಾಮಾಯೋ, ಗಹಪತಯೋ ಘರಣಿಯೋ ಚ;
ನಗರಮ್ಹಿ ನ ಉಪರವನ್ತಿ ರಾಜಾನಂ, ಮಾ ಘಾತಯಿ ಅತ್ರಜಂ ಪುತ್ತಂ.
‘‘ರಞ್ಞೋ ಚಮ್ಹಿ ಅತ್ಥಕಾಮೋ, ಹಿತೋ ಚ ಸಬ್ಬಜನಪದಸ್ಸ [ಸಬ್ಬದಾ ಜನಪದಸ್ಸ (ಸೀ. ಪೀ.)];
ನ ಕೋಚಿ ಅಸ್ಸ ಪಟಿಘಂ, ಮಯಾ ಜಾನಪದೋ ನ ಪವೇದೇತಿ’’.
‘‘ಗಚ್ಛಥ ¶ ವೋ ಘರಣಿಯೋ, ತಾತಞ್ಚ ವದೇಥ ಖಣ್ಡಹಾಲಞ್ಚ;
ಮಾ ಘಾತೇಥ ಕುಮಾರೇ, ಅದೂಸಕೇ ಸೀಹಸಙ್ಕಾಸೇ.
‘‘ಗಚ್ಛಥ ವೋ ಘರಣಿಯೋ, ತಾತಞ್ಚ ವದೇಥ ಖಣ್ಡಹಾಲಞ್ಚ;
ಮಾ ಘಾತೇಥ ಕುಮಾರೇ, ಅಪೇಕ್ಖಿತೇ ಸಬ್ಬಲೋಕಸ್ಸ’’.
‘‘ಯಂ ನೂನಾಹಂ ಜಾಯೇಯ್ಯಂ, ರಥಕಾರಕುಲೇಸು ವಾ;
ಪುಕ್ಕುಸಕುಲೇಸು ವಾ ವೇಸ್ಸೇಸು ವಾ ಜಾಯೇಯ್ಯಂ;
ನ ಹಜ್ಜ ಮಂ ರಾಜ ಯಞ್ಞೇ [ಯಞ್ಞತ್ಥಾಯ (ಸೀ. ಪೀ.)] ಘಾತೇಯ್ಯ’’.
‘‘ಸಬ್ಬಾ ಸೀಮನ್ತಿನಿಯೋ ಗಚ್ಛಥ, ಅಯ್ಯಸ್ಸ ಖಣ್ಡಹಾಲಸ್ಸ;
ಪಾದೇಸು ನಿಪತಥ, ಅಪರಾಧಾಹಂ ನ ಪಸ್ಸಾಮಿ.
‘‘ಸಬ್ಬಾ ಸೀಮನ್ತಿನಿಯೋ ಗಚ್ಛಥ, ಅಯ್ಯಸ್ಸ ಖಣ್ಡಹಾಲಸ್ಸ;
ಪಾದೇಸು ನಿಪತಥ, ಕಿನ್ತೇ ಭನ್ತೇ ಮಯಂ ಅದೂಸೇಮ’’.
‘‘ಕಪಣಾ [ಕಪಣಂ (ಸೀ. ಪೀ.)] ವಿಲಪತಿ ಸೇಲಾ, ದಿಸ್ವಾನ ಭಾತರೇ [ಭಾತರೋ (ಸೀ. ಸ್ಯಾ. ಪೀ. ಕ.)] ಉಪನೀತತ್ತೇ;
ಯಞ್ಞೋ ಕಿರ ಮೇ ಉಕ್ಖಿಪಿತೋ, ತಾತೇನ ಸಗ್ಗಕಾಮೇನ’’.
‘‘ಆವತ್ತಿ ಪರಿವತ್ತಿ ಚ, ವಸುಲೋ ಸಮ್ಮುಖಾ ರಞ್ಞೋ;
ಮಾ ನೋ ಪಿತರಂ ಅವಧಿ, ದಹರಮ್ಹಾ ಯೋಬ್ಬನಂ ಪತ್ತಾ’’.
‘‘ಏಸೋ ತೇ ವಸುಲ ಪಿತಾ, ಸಮೇಹಿ ಪಿತರಾ ಸಹ;
ದುಕ್ಖಂ ಖೋ ಮೇ ಜನಯಸಿ, ವಿಲಪನ್ತೋ ಅನ್ತೇಪುರಸ್ಮಿಂ;
ಮುಞ್ಚೇಥ ದಾನಿ ಕುಮಾರೇ, ಅಲಮ್ಪಿ ಮೇ ಹೋತು ಪುತ್ತಯಞ್ಞೇನ’’.
‘‘ಪುಬ್ಬೇವ ಖೋಸಿ ಮೇ ವುತ್ತೋ, ದುಕ್ಕರಂ ದುರಭಿಸಮ್ಭವಞ್ಚೇತಂ;
ಅಥ ¶ ನೋ ಉಪಕ್ಖಟಸ್ಸ ಯಞ್ಞಸ್ಸ, ಕಸ್ಮಾ ಕರೋಸಿ ವಿಕ್ಖೇಪಂ.
‘‘ಸಬ್ಬೇ ¶ ವಜನ್ತಿ ಸುಗತಿಂ, ಯೇ ಯಜನ್ತಿ ಯೇಪಿ ಯಾಜೇನ್ತಿ;
ಯೇ ಚಾಪಿ ಅನುಮೋದನ್ತಿ, ಯಜನ್ತಾನಂ ಏದಿಸಂ ಮಹಾಯಞ್ಞಂ’’.
‘‘ಸಬ್ಬರತನಸ್ಸ ¶ ಯಞ್ಞೋ ಉಪಕ್ಖಟೋ, ಏಕರಾಜ ತವ ಪಟಿಯತ್ತೋ;
ಅಭಿನಿಕ್ಖಮಸ್ಸು ದೇವ, ಸಗ್ಗಂ ಗತೋ ತ್ವಂ ಪಮೋದಿಸ್ಸಸಿ’’.
‘‘ದಹರಾ ಸತ್ತಸತಾ ಏತಾ, ಚನ್ದಕುಮಾರಸ್ಸ ಭರಿಯಾಯೋ;
ಕೇಸೇ ಪಕಿರಿತ್ವಾನ [ಪರಿಕಿರಿತ್ವಾನ (ಸೀ. ಪೀ.), ವಿಕಿರಿತ್ವಾನ (ಸ್ಯಾ. ಕ.)], ರೋದನ್ತಿಯೋ ಮಗ್ಗಮನುಯಾಯಿಂಸು [ಮಗ್ಗಮನುಯನ್ತಿ (ಸೀ. ಪೀ.), ಮಗ್ಗಮನುಯಾಯನ್ತಿ (ಸ್ಯಾ.)].
‘‘ಅಪರಾ ಪನ ಸೋಕೇನ, ನಿಕ್ಖನ್ತಾ ನನ್ದನೇ ವಿಯ ದೇವಾ;
ಕೇಸೇ ಪಕಿರಿತ್ವಾನ [ಪರಿಕಿರಿತ್ವಾನ (ಸೀ. ಪೀ.), ವಿಕಿರಿತ್ವಾನ (ಸ್ಯಾ. ಕ.)], ರೋದನ್ತಿಯೋ ಮಗ್ಗಮನುಯಾಯಿಂಸು’’ [ಮಗ್ಗಮನುಯನ್ತಿ (ಸೀ. ಪೀ.), ಮಗ್ಗಮನುಯಾಯನ್ತಿ (ಸ್ಯಾ.)].
‘‘ಕಾಸಿಕಸುಚಿವತ್ಥಧರಾ, ಕುಣ್ಡಲಿನೋ ಅಗಲುಚನ್ದನವಿಲಿತ್ತಾ;
ನಿಯ್ಯನ್ತಿ ಚನ್ದಸೂರಿಯಾ, ಯಞ್ಞತ್ಥಾಯ ಏಕರಾಜಸ್ಸ.
‘‘ಕಾಸಿಕಸುಚಿವತ್ಥಧರಾ, ಕುಣ್ಡಲಿನೋ ಅಗಲುಚನ್ದನವಿಲಿತ್ತಾ;
ನಿಯ್ಯನ್ತಿ ಚನ್ದಸೂರಿಯಾ, ಮಾತು ಕತ್ವಾ ಹದಯಸೋಕಂ.
‘‘ಕಾಸಿಕಸುಚಿವತ್ಥಧರಾ, ಕುಣ್ಡಲಿನೋ ಅಗಲುಚನ್ದನವಿಲಿತ್ತಾ;
ನಿಯ್ಯನ್ತಿ ಚನ್ದಸೂರಿಯಾ, ಜನಸ್ಸ ಕತ್ವಾ ಹದಯಸೋಕಂ.
‘‘ಮಂಸರಸಭೋಜನಾ ನ್ಹಾಪಕಸುನ್ಹಾಪಿತಾ [ನಹಾಪಕಸುನಹಾತಾ (ಪೀ.)], ಕುಣ್ಡಲಿನೋ ಅಗಲುಚನ್ದನವಿಲಿತ್ತಾ;
ನಿಯ್ಯನ್ತಿ ಚನ್ದಸೂರಿಯಾ, ಯಞ್ಞತ್ಥಾಯ ಏಕರಾಜಸ್ಸ.
[ಇಮಾ ದ್ವೇ ಗಾಥಾ ನತ್ಥಿ ಪೀ ಪೋತ್ಥಕೇ] ‘‘ಮಂಸರಸಭೋಜನಾ ನ್ಹಾಪಕಸುನ್ಹಾಪಿತಾ, ಕುಣ್ಡಲಿನೋ ಅಗಲುಚನ್ದನವಿಲಿತ್ತಾ;
ನಿಯ್ಯನ್ತಿ ಚನ್ದಸೂರಿಯಾ, ಮಾತು ಕತ್ವಾ ಹದಯಸೋಕಂ.
‘‘ಮಂಸರಸಭೋಜನಾ ನ್ಹಾಪಕಸುನ್ಹಾಪಿತಾ, ಕುಣ್ಡಲಿನೋ ಅಗಲುಚನ್ದನವಿಲಿತ್ತಾ;
ನಿಯ್ಯನ್ತಿ ¶ ಚನ್ದಸೂರಿಯಾ, ಜನಸ್ಸ ಕತ್ವಾ ಹದಯಸೋಕಂ [ಇಮಾ ದ್ವೇ ಗಾಥಾ ನತ್ಥಿ ಪೀ ಪೋತ್ಥಕೇ].
‘‘ಯಸ್ಸು ಪುಬ್ಬೇ ಹತ್ಥಿವರಧುರಗತೇ, ಹತ್ಥೀಹಿ [ಹತ್ಥಿಕಾ (ಸ್ಯಾ.), ಪತ್ತಿಕಾ (ಪೀ.)] ಅನುವಜನ್ತಿ;
ತ್ಯಜ್ಜ ಚನ್ದಸೂರಿಯಾ, ಉಭೋವ ಪತ್ತಿಕಾ ಯನ್ತಿ.
‘‘ಯಸ್ಸು ¶ ಪುಬ್ಬೇ ಅಸ್ಸವರಧುರಗತೇ, ಅಸ್ಸೇಹಿ [ಅಸ್ಸಕಾ (ಸ್ಯಾ.), ಪತ್ತಿಕಾ (ಪೀ.)] ಅನುವಜನ್ತಿ;
ತ್ಯಜ್ಜ ಚನ್ದಸೂರಿಯಾ, ಉಭೋವ ಪತ್ತಿಕಾ ಯನ್ತಿ.
‘‘ಯಸ್ಸು ಪುಬ್ಬೇ ರಥವರಧುರಗತೇ, ರಥೇಹಿ [ರಥಿಕಾ (ಸ್ಯಾ.), ಪತ್ತಿಕಾ (ಪೀ.)] ಅನುವಜನ್ತಿ;
ತ್ಯಜ್ಜ ಚನ್ದಸೂರಿಯಾ, ಉಭೋವ ಪತ್ತಿಕಾ ಯನ್ತಿ.
‘‘ಯೇಹಿಸ್ಸು ಪುಬ್ಬೇ ನೀಯಿಂಸು [ನಿಯ್ಯಂಸು (ಸೀ. ಪೀ.)], ತಪನೀಯಕಪ್ಪನೇಹಿ ತುರಙ್ಗೇಹಿ;
ತ್ಯಜ್ಜ ಚನ್ದಸೂರಿಯಾ, ಉಭೋವ ಪತ್ತಿಕಾ ಯನ್ತಿ’’.
‘‘ಯದಿ ಸಕುಣಿ ಮಂಸಮಿಚ್ಛಸಿ, ಡಯಸ್ಸು [ಉಯ್ಯಸ್ಸು (ಸ್ಯಾ. ಕ.)] ಪುಬ್ಬೇನ ಪುಪ್ಫವತಿಯಾ;
ಯಜತೇತ್ಥ ಏಕರಾಜಾ, ಸಮ್ಮೂಳ್ಹೋ ಚತೂಹಿ ಪುತ್ತೇಹಿ.
‘‘ಯದಿ ¶ ಸಕುಣಿ ಮಂಸಮಿಚ್ಛಸಿ, ಡಯಸ್ಸು ಪುಬ್ಬೇನ ಪುಪ್ಫವತಿಯಾ;
ಯಜತೇತ್ಥ ಏಕರಾಜಾ, ಸಮ್ಮೂಳ್ಹೋ ಚತೂಹಿ ಕಞ್ಞಾಹಿ.
‘‘ಯದಿ ಸಕುಣಿ ಮಂಸಮಿಚ್ಛಸಿ, ಡಯಸ್ಸು ಪುಬ್ಬೇನ ಪುಪ್ಫವತಿಯಾ;
ಯಜತೇತ್ಥ ಏಕರಾಜಾ, ಸಮ್ಮೂಳ್ಹೋ ಚತೂಹಿ ಮಹೇಸೀಹಿ.
‘‘ಯದಿ ಸಕುಣಿ ಮಂಸಮಿಚ್ಛಸಿ, ಡಯಸ್ಸು ಪುಬ್ಬೇನ ಪುಪ್ಫವತಿಯಾ;
ಯಜತೇತ್ಥ ಏಕರಾಜಾ, ಸಮ್ಮೂಳ್ಹೋ ಚತೂಹಿ ಗಹಪತೀಹಿ.
‘‘ಯದಿ ಸಕುಣಿ ಮಂಸಮಿಚ್ಛಸಿ, ಡಯಸ್ಸು ಪುಬ್ಬೇ ಪುಪ್ಫವತಿಯಾ;
ಯಜತೇತ್ಥ ಏಕರಾಜಾ, ಸಮ್ಮೂಳ್ಹೋ ಚತೂಹಿ ಹತ್ಥೀಹಿ.
‘‘ಯದಿ ಸಕುಣಿ ಮಂಸಮಿಚ್ಛಸಿ, ಡಯಸ್ಸು ಪುಬ್ಬೇನ ಪುಪ್ಫವತಿಯಾ;
ಯಜತೇತ್ಥ ಏಕರಾಜಾ, ಸಮ್ಮೂಳ್ಹೋ ಚತೂಹಿ ಅಸ್ಸೇಹಿ.
‘‘ಯದಿ ಸಕುಣಿ ಮಂಸಮಿಚ್ಛಸಿ, ಡಯಸ್ಸು ಪುಬ್ಬೇನ ಪುಪ್ಫವತಿಯಾ;
ಯಜತೇತ್ಥ ಏಕರಾಜಾ, ಸಮ್ಮೂಳ್ಹೋ ಚತೂಹಿ ಉಸಭೇಹಿ.
‘‘ಯದಿ ¶ ಸಕುಣಿ ಮಂಸಮಿಚ್ಛಸಿ, ಡಯಸ್ಸು ಪುಬ್ಬೇನ ಪುಪ್ಫವತಿಯಾ;
ಯಜತೇತ್ಥ ಏಕರಾಜಾ, ಸಮ್ಮೂಳ್ಹೋ ಸಬ್ಬಚತುಕ್ಕೇನ’’.
‘‘ಅಯಮಸ್ಸ ಪಾಸಾದೋ, ಇದಂ ಅನ್ತೇಪುರಂ ಸುರಮಣೀಯಂ [ಸೋವಣ್ಣೋ ಪುಪ್ಫಮಲ್ಯವಿಕಿಣ್ಣೋ (ಕ.)];
ತೇದಾನಿ ಅಯ್ಯಪುತ್ತಾ, ಚತ್ತಾರೋ ವಧಾಯ ನಿನ್ನೀತಾ.
‘‘ಇದಮಸ್ಸ ಕೂಟಾಗಾರಂ, ಸೋವಣ್ಣಂ ಪುಪ್ಫಮಲ್ಯವಿಕಿಣ್ಣಂ;
ತೇದಾನಿ ಅಯ್ಯಪುತ್ತಾ, ಚತ್ತಾರೋ ವಧಾಯ ನಿನ್ನೀತಾ.
‘‘ಇದಮಸ್ಸ ¶ ಉಯ್ಯಾನಂ, ಸುಪುಪ್ಫಿತಂ ಸಬ್ಬಕಾಲಿಕಂ ರಮ್ಮಂ;
ತೇದಾನಿ ಅಯ್ಯಪುತ್ತಾ, ಚತ್ತಾರೋ ವಧಾಯ ನಿನ್ನೀತಾ.
‘‘ಇದಮಸ್ಸ ಅಸೋಕವನಂ, ಸುಪುಪ್ಫಿತಂ ಸಬ್ಬಕಾಲಿಕಂ ರಮ್ಮಂ;
ತೇದಾನಿ ಅಯ್ಯಪುತ್ತಾ, ಚತ್ತಾರೋ ವಧಾಯ ನಿನ್ನೀತಾ.
‘‘ಇದಮಸ್ಸ ಕಣಿಕಾರವನಂ, ಸುಪುಪ್ಫಿತಂ ಸಬ್ಬಕಾಲಿಕಂ ರಮ್ಮಂ;
ತೇದಾನಿ ಅಯ್ಯಪುತ್ತಾ, ಚತ್ತಾರೋ ವಧಾಯ ನಿನ್ನೀತಾ.
‘‘ಇದಮಸ್ಸ ಪಾಟಲಿವನಂ, ಸುಪುಪ್ಫಿತಂ ಸಬ್ಬಕಾಲಿಕಂ ರಮ್ಮಂ;
ತೇದಾನಿ ಅಯ್ಯಪುತ್ತಾ, ಚತ್ತಾರೋ ವಧಾಯ ನಿನ್ನೀತಾ.
‘‘ಇದಮಸ್ಸ ಅಮ್ಬವನಂ, ಸುಪುಪ್ಫಿತಂ ಸಬ್ಬಕಾಲಿಕಂ ರಮ್ಮಂ;
ತೇದಾನಿ ಅಯ್ಯಪುತ್ತಾ, ಚತ್ತಾರೋ ವಧಾಯ ನಿನ್ನೀತಾ.
‘‘ಅಯಮಸ್ಸ ¶ ಪೋಕ್ಖರಣೀ, ಸಞ್ಛನ್ನಾ ಪದುಮಪುಣ್ಡರೀಕೇಹಿ;
ನಾವಾ ಚ ಸೋವಣ್ಣವಿಕತಾ, ಪುಪ್ಫವಲ್ಲಿಯಾ [ಪುಪ್ಫಾವಲಿಯಾ (ಸೀ. ಪೀ.)] ಚಿತ್ತಾ ಸುರಮಣೀಯಾ;
ತೇದಾನಿ ¶ ಅಯ್ಯಪುತ್ತಾ, ಚತ್ತಾರೋ ವಧಾಯ ನಿನ್ನೀತಾ’’.
‘‘ಇದಮಸ್ಸ ಹತ್ಥಿರತನಂ, ಏರಾವಣೋ ಗಜೋ ಬಲೀ ದನ್ತೀ;
ತೇದಾನಿ ಅಯ್ಯಪುತ್ತಾ, ಚತ್ತಾರೋ ವಧಾಯ ನಿನ್ನೀತಾ.
‘‘ಇದಮಸ್ಸ ಅಸ್ಸರತನಂ, ಏಕಖೂರೋ [ಏಕಖೂರೋ ವೇಗೋ (ಸ್ಯಾ.)] ಅಸ್ಸೋ;
ತೇದಾನಿ ಅಯ್ಯಪುತ್ತಾ, ಚತ್ತಾರೋ ವಧಾಯ ನಿನ್ನೀತಾ.
‘‘ಅಯಮಸ್ಸ ಅಸ್ಸರಥೋ, ಸಾಳಿಯ [ಸಾಳಿಯ ವಿಯ (ಸ್ಯಾ.)] ನಿಗ್ಘೋಸೋ ಸುಭೋ ರತನವಿಚಿತ್ತೋ;
ಯತ್ಥಸ್ಸು ಅಯ್ಯಪುತ್ತಾ, ಸೋಭಿಂಸು ನನ್ದನೇ ವಿಯ ದೇವಾ;
ತೇದಾನಿ ಅಯ್ಯಪುತ್ತಾ, ಚತ್ತಾರೋ ವಧಾಯ ನಿನ್ನೀತಾ.
‘‘ಕಥಂ ನಾಮ ಸಾಮಸಮಸುನ್ದರೇಹಿ, ಚನ್ದನಮುದುಕಗತ್ತೇಹಿ [ಚನ್ದನಮರಕತಗತ್ತೇಹಿ (ಸೀ. ಪೀ.)];
ರಾಜಾ ಯಜಿಸ್ಸತೇ ಯಞ್ಞಂ, ಸಮ್ಮೂಳ್ಹೋ ಚತೂಹಿ ಪುತ್ತೇಹಿ.
‘‘ಕಥಂ ನಾಮ ಸಾಮಸಮಸುನ್ದರಾಹಿ, ಚನ್ದನಮುದುಕಗತ್ತಾಹಿ;
ರಾಜಾ ಯಜಿಸ್ಸತೇ ಯಞ್ಞಂ, ಸಮ್ಮೂಳ್ಹೋ ಚತೂಹಿ ಕಞ್ಞಾಹಿ.
‘‘ಕಥಂ ¶ ನಾಮ ಸಾಮಸಮಸುನ್ದರಾಹಿ, ಚನ್ದನಮುದುಕಗತ್ತಾಹಿ;
ರಾಜಾ ಯಜಿಸ್ಸತೇ ಯಞ್ಞಂ, ಸಮ್ಮೂಳ್ಹೋ ಚತೂಹಿ ಮಹೇಸೀಹಿ.
‘‘ಕಥಂ ನಾಮ ಸಾಮಸಮಸುನ್ದರೇಹಿ, ಚನ್ದನಮುದುಕಗತ್ತೇಹಿ;
ರಾಜಾ ಯಜಿಸ್ಸತೇ ಯಞ್ಞಂ, ಸಮ್ಮೂಳ್ಹೋ ಚತೂಹಿ ಗಹಪತೀಹಿ.
‘‘ಯಥಾ ಹೋನ್ತಿ ಗಾಮನಿಗಮಾ, ಸುಞ್ಞಾ ಅಮನುಸ್ಸಕಾ ಬ್ರಹಾರಞ್ಞಾ;
ತಥಾ ¶ ಹೇಸ್ಸತಿ ಪುಪ್ಫವತಿಯಾ, ಯಿಟ್ಠೇಸು ಚನ್ದಸೂರಿಯೇಸು’’.
‘‘ಉಮ್ಮತ್ತಿಕಾ ಭವಿಸ್ಸಾಮಿ, ಭೂನಹತಾ ಪಂಸುನಾ ಚ [ಪಂಸುನಾವ (ಸ್ಯಾ. ಕ.)] ಪರಿಕಿಣ್ಣಾ;
ಸಚೇ ಚನ್ದವರಂ [ಚನ್ದಕುಮಾರಂ (ಸ್ಯಾ.)] ಹನ್ತಿ, ಪಾಣಾ ಮೇ ದೇವ ರುಜ್ಝನ್ತಿ [ನಿರುಜ್ಝನ್ತಿ (ಸೀ.), ಭಿಜ್ಜನ್ತಿ (ಸ್ಯಾ.)].
‘‘ಉಮ್ಮತ್ತಿಕಾ ಭವಿಸ್ಸಾಮಿ, ಭೂನಹತಾ ಪಂಸುನಾ ಚ ಪರಿಕಿಣ್ಣಾ;
ಸಚೇ ಸೂರಿಯವರಂ ಹನ್ತಿ, ಪಾಣಾ ಮೇ ದೇವ ರುಜ್ಝನ್ತಿ’’.
‘‘ಕಿಂ ನು ಮಾ ನ ರಮಾಪೇಯ್ಯುಂ, ಅಞ್ಞಮಞ್ಞಂ ಪಿಯಂವದಾ;
ಘಟ್ಟಿಕಾ ಉಪರಿಕ್ಖೀ ಚ, ಪೋಕ್ಖರಣೀ ಚ ಭಾರಿಕಾ [ಘಟ್ಟಿಯಾ ಓಪರಕ್ಖೀ ಚ ಪೋಕ್ಖರಕ್ಖೀ ಚ ನಾಯಿಕಾ (ಸೀ.) ಘಟ್ಟಿಯಾ ಓಪರಕ್ಖೀ ಚ ಪೋಕ್ಖರಕ್ಖೀ ಚ ಗಾಯಿಕಾ (ಪೀ.)];
ಚನ್ದಸೂರಿಯೇಸು ನಚ್ಚನ್ತಿಯೋ, ಸಮಾ ತಾಸಂ ನ ವಿಜ್ಜತಿ’’.
‘‘ಇಮಂ ಮಯ್ಹಂ ಹದಯಸೋಕಂ, ಪಟಿಮುಞ್ಚತು [ಪಟಿಮುಚ್ಚತು (ಕ.)] ಖಣ್ಡಹಾಲ ತವ ಮಾತಾ;
ಯೋ ಮಯ್ಹಂ ಹದಯಸೋಕೋ, ಚನ್ದಮ್ಹಿ ವಧಾಯ ನಿನ್ನೀತೇ.
‘‘ಇಮಂ ¶ ಮಯ್ಹಂ ಹದಯಸೋಕಂ, ಪಟಿಮುಞ್ಚತು ಖಣ್ಡಹಾಲ ತವ ಮಾತಾ;
ಯೋ ಮಯ್ಹಂ ಹದಯಸೋಕೋ, ಸೂರಿಯಮ್ಹಿ ವಧಾಯ ನಿನ್ನೀತೇ.
‘‘ಇಮಂ ಮಯ್ಹಂ ಹದಯಸೋಕಂ, ಪಟಿಮುಞ್ಚತು ಖಣ್ಡಹಾಲ ತವ ಜಾಯಾ;
ಯೋ ಮಯ್ಹಂ ಹದಯಸೋಕೋ, ಚನ್ದಮ್ಹಿ ವಧಾಯ ನಿನ್ನೀತೇ.
‘‘ಇಮಂ ಮಯ್ಹಂ ಹದಯಸೋಕಂ, ಪಟಿಮುಞ್ಚತು ಖಣ್ಡಹಾಲ ತವ ಜಾಯಾ;
ಯೋ ಮಯ್ಹಂ ಹದಯಸೋಕೋ, ಸೂರಿಯಮ್ಹಿ ವಧಾಯ ನಿನ್ನೀತೇ.
‘‘ಮಾ ¶ ಚ ಪುತ್ತೇ ಮಾ ಚ ಪತಿಂ, ಅದ್ದಕ್ಖಿ ಖಣ್ಡಹಾಲ ತವ ಮಾತಾ;
ಯೋ ಘಾತೇಸಿ ಕುಮಾರೇ, ಅದೂಸಕೇ ಸೀಹಸಙ್ಕಾಸೇ.
‘‘ಮಾ ಚ ಪುತ್ತೇ ಮಾ ಚ ಪತಿಂ, ಅದ್ದಕ್ಖಿ ಖಣ್ಡಹಾಲ ತವ ಮಾತಾ;
ಯೋ ಘಾತೇಸಿ ಕುಮಾರೇ, ಅಪೇಕ್ಖಿತೇ ಸಬ್ಬಲೋಕಸ್ಸ.
‘‘ಮಾ ¶ ಚ ಪುತ್ತೇ ಮಾ ಚ ಪತಿಂ, ಅದ್ದಕ್ಖಿ ಖಣ್ಡಹಾಲ ತವ ಜಾಯಾ;
ಯೋ ಘಾತೇಸಿ ಕುಮಾರೇ, ಅದೂಸಕೇ ಸೀಹಸಙ್ಕಾಸೇ.
‘‘ಮಾ ಚ ಪುತ್ತೇ ಮಾ ಚ ಪತಿಂ, ಅದ್ದಕ್ಖಿ ಖಣ್ಡಹಾಲ ತವ ಜಾಯಾ;
ಯೋ ಘಾತೇಸಿ ಕುಮಾರೇ, ಅಪೇಕ್ಖಿತೇ ಸಬ್ಬಲೋಕಸ್ಸ’’.
‘‘ಮಾ ನೋ ದೇವ ಅವಧಿ, ದಾಸೇ ನೋ ದೇಹಿ ಖಣ್ಡಹಾಲಸ್ಸ;
ಅಪಿ ನಿಗಳಬನ್ಧಕಾಪಿ, ಹತ್ಥೀ ಅಸ್ಸೇ ಚ ಪಾಲೇಮ.
‘‘ಮಾ ನೋ ದೇವ ಅವಧಿ, ದಾಸೇ ನೋ ದೇಹಿ ಖಣ್ಡಹಾಲಸ್ಸ;
ಅಪಿ ನಿಗಳಬನ್ಧಕಾಪಿ, ಹತ್ಥಿಛಕಣಾನಿ ಉಜ್ಝೇಮ.
‘‘ಮಾ ನೋ ದೇವ ಅವಧಿ, ದಾಸೇ ನೋ ದೇಹಿ ಖಣ್ಡಹಾಲಸ್ಸ;
ಅಪಿ ನಿಗಳಬನ್ಧಕಾಪಿ, ಅಸ್ಸಛಕಣಾನಿ ಉಜ್ಝೇಮ.
‘‘ಮಾ ನೋ ದೇವ ಅವಧಿ, ದಾಸೇ ನೋ ದೇಹಿ ಖಣ್ಡಹಾಲಸ್ಸ;
ಯಸ್ಸ ಹೋನ್ತಿ ತವ ಕಾಮಾ, ಅಪಿ ರಟ್ಠಾ ಪಬ್ಬಾಜಿತಾ;
ಭಿಕ್ಖಾಚರಿಯಂ ಚರಿಸ್ಸಾಮ.
‘‘ದಿಬ್ಬಂ ದೇವ ಉಪಯಾಚನ್ತಿ, ಪುತ್ತತ್ಥಿಕಾಪಿ ದಲಿದ್ದಾ;
ಪಟಿಭಾನಾನಿಪಿ ಹಿತ್ವಾ, ಪುತ್ತೇ ನ ಲಭನ್ತಿ ಏಕಚ್ಚಾ.
‘‘ಆಸೀಸಿಕಾನಿ [ಅಸ್ಸಾಸಕಾನಿ (ಸೀ. ಪೀ.), ಆಸಾಸಕಾನಿ (ಸ್ಯಾ.)] ಕರೋನ್ತಿ, ಪುತ್ತಾ ನೋ ಜಾಯನ್ತು ತತೋ ಪಪುತ್ತಾ [ಪುತ್ತಾ (ಸೀ. ಪೀ.)];
ಅಥ ನೋ ಅಕಾರಣಸ್ಮಾ, ಯಞ್ಞತ್ಥಾಯ ದೇವ ಘಾತೇಸಿ.
‘‘ಉಪಯಾಚಿತಕೇನ ಪುತ್ತಂ ಲಭನ್ತಿ, ಮಾ ತಾತ ನೋ ಅಘಾತೇಸಿ;
ಮಾ ಕಿಚ್ಛಾಲದ್ಧಕೇಹಿ ಪುತ್ತೇಹಿ, ಯಜಿತ್ಥೋ ಇಮಂ ಯಞ್ಞಂ.
‘‘ಉಪಯಾಚಿತಕೇನ ¶ ಪುತ್ತಂ ಲಭನ್ತಿ, ಮಾ ತಾತ ನೋ ಅಘಾತೇಸಿ;
ಮಾ ¶ ಕಪಣಲದ್ಧಕೇಹಿ ಪುತ್ತೇಹಿ, ಅಮ್ಮಾಯ ನೋ ವಿಪ್ಪವಾಸೇಸಿ’’.
‘‘ಬಹುದುಕ್ಖಾ [ಬಹುದುಕ್ಖಂ (ಸ್ಯಾ. ಕ.)] ಪೋಸಿಯ ಚನ್ದಂ, ಅಮ್ಮ ತುವಂ ಜೀಯಸೇ ಪುತ್ತಂ;
ವನ್ದಾಮಿ ಖೋ ತೇ ಪಾದೇ, ಲಭತಂ ತಾತೋ ಪರಲೋಕಂ.
‘‘ಹನ್ದ ಚ ಮಂ ಉಪಗುಯ್ಹ, ಪಾದೇ ತೇ ಅಮ್ಮ ವನ್ದಿತುಂ ದೇಹಿ;
ಗಚ್ಛಾಮಿ ದಾನಿ ಪವಾಸಂ [ವಿಪ್ಪವಾಸಂ (ಕ.)], ಯಞ್ಞತ್ಥಾಯ ಏಕರಾಜಸ್ಸ.
‘‘ಹನ್ದ ¶ ಚ ಮಂ ಉಪಗುಯ್ಹ [ಉಪಗುಯ್ಹ (ಸ್ಯಾ. ಕ.)], ಪಾದೇ ತೇ ಅಮ್ಮ ವನ್ದಿತುಂ ದೇಹಿ;
ಗಚ್ಛಾಮಿ ದಾನಿ ಪವಾಸಂ, ಮಾತು ಕತ್ವಾ ಹದಯಸೋಕಂ.
ಹನ್ದ ಚ ಮಂ ಉಪಗುಯ್ಹ [ಉಪಗುಯ್ಹ (ಸ್ಯಾ. ಕ.)], ಪಾದೇ ತೇ ಅಮ್ಮ ವನ್ದಿತುಂ ದೇಹಿ;
ಗಚ್ಛಾಮಿ ದಾನಿ ಪವಾಸಂ, ಜನಸ್ಸ ಕತ್ವಾ ಹದಯಸೋಕಂ’’.
‘‘ಹನ್ದ ಚ ಪದುಮಪತ್ತಾನಂ, ಮೋಳಿಂ ಬನ್ಧಸ್ಸು ಗೋತಮಿಪುತ್ತ;
ಚಮ್ಪಕದಲಮಿಸ್ಸಾಯೋ [ಚಮ್ಪಕದಲಿವೀತಿಮಿಸ್ಸಾಯೋ (ಸೀ. ಪೀ.), ಚಮ್ಪಕದಲಿಮಿಸ್ಸಾಯೋ (ಕ.)], ಏಸಾ ತೇ ಪೋರಾಣಿಕಾ ಪಕತಿ.
‘‘ಹನ್ದ ಚ ವಿಲೇಪನಂ ತೇ, ಪಚ್ಛಿಮಕಂ ಚನ್ದನಂ ವಿಲಿಮ್ಪಸ್ಸು;
ಯೇಹಿ ಚ ಸುವಿಲಿತ್ತೋ, ಸೋಭಸಿ ರಾಜಪರಿಸಾಯಂ.
‘‘ಹನ್ದ ಚ ಮುದುಕಾನಿ ವತ್ಥಾನಿ, ಪಚ್ಛಿಮಕಂ ಕಾಸಿಕಂ ನಿವಾಸೇಹಿ;
ಯೇಹಿ ಚ ಸುನಿವತ್ಥೋ, ಸೋಭಸಿ ರಾಜಪರಿಸಾಯಂ.
‘‘ಮುತ್ತಾಮಣಿಕನಕವಿಭೂಸಿತಾನಿ, ಗಣ್ಹಸ್ಸು ಹತ್ಥಾಭರಣಾನಿ;
ಯೇಹಿ ಚ ಹತ್ಥಾಭರಣೇಹಿ, ಸೋಭಸಿ ರಾಜಪರಿಸಾಯಂ’’.
‘‘ನ ಹಿ ನೂನಾಯಂ ರಟ್ಠಪಾಲೋ, ಭೂಮಿಪತಿ ಜನಪದಸ್ಸ ದಾಯಾದೋ;
ಲೋಕಿಸ್ಸರೋ ಮಹನ್ತೋ, ಪುತ್ತೇ ಸ್ನೇಹಂ ಜನಯತಿ’’.
‘‘ಮಯ್ಹಮ್ಪಿ ¶ ಪಿಯಾ ಪುತ್ತಾ, ಅತ್ತಾ ಚ ಪಿಯೋ ತುಮ್ಹೇ ಚ ಭರಿಯಾಯೋ;
ಸಗ್ಗಞ್ಚ ಪತ್ಥಯಾನೋ [ಪತ್ಥಯಮಾನೋ (ಸ್ಯಾ. ಕ.)], ತೇನಾಹಂ ಘಾತಯಿಸ್ಸಾಮಿ’’.
‘‘ಮಂ ಪಠಮಂ ಘಾತೇಹಿ, ಮಾ ಮೇ ಹದಯಂ ದುಕ್ಖಂ ಫಾಲೇಸಿ;
ಅಲಙ್ಕತೋ [ಅನಲಙ್ಕತೋ (ಕ.)] ಸುನ್ದರಕೋ, ಪುತ್ತೋ ದೇವ ತವ ಸುಖುಮಾಲೋ.
‘‘ಹನ್ದಯ್ಯ ಮಂ ಹನಸ್ಸು, ಪರಲೋಕೇ [ಸಲೋಕಾ (ಸೀ. ಸ್ಯಾ. ಕ.)] ಚನ್ದಕೇನ [ಚನ್ದಿಯೇನ (ಸೀ. ಪೀ. ಕ.)] ಹೇಸ್ಸಾಮಿ;
ಪುಞ್ಞಂ ಕರಸ್ಸು ವಿಪುಲಂ, ವಿಚರಾಮ ಉಭೋಪಿ ಪರಲೋಕೇ’’.
‘‘ಮಾ ತ್ವಂ ಚನ್ದೇ ರುಚ್ಚಿ ಮರಣಂ [ಇದಂ ಪದಂ ನತ್ಥಿ ಸೀ. ಪೀ. ಪೋತ್ಥಕೇಸು], ಬಹುಕಾ ತವ ದೇವರಾ ವಿಸಾಲಕ್ಖಿ;
ತೇ ತಂ ರಮಯಿಸ್ಸನ್ತಿ, ಯಿಟ್ಠಸ್ಮಿಂ ಗೋತಮಿಪುತ್ತೇ’’.
‘‘ಏವಂ ವುತ್ತೇ ಚನ್ದಾ ಅತ್ತಾನಂ, ಹನ್ತಿ ಹತ್ಥತಲಕೇಹಿ’’;
‘‘ಅಲಮೇತ್ಥ [ಅಲಮತ್ಥು (ಸೀ. ಪೀ.)] ಜೀವಿತೇನ, ಪಿಸ್ಸಾಮಿ [ಪಾಯಾಮಿ (ಸೀ. ಪೀ.)] ವಿಸಂ ಮರಿಸ್ಸಾಮಿ.
‘‘ನ ¶ ¶ ಹಿ ನೂನಿಮಸ್ಸ ರಞ್ಞೋ, ಮಿತ್ತಾಮಚ್ಚಾ ಚ ವಿಜ್ಜರೇ ಸುಹದಾ;
ಯೇ ನ ವದನ್ತಿ ರಾಜಾನಂ, ಮಾ ಘಾತಯಿ ಓರಸೇ ಪುತ್ತೇ.
‘‘ನ ಹಿ ನೂನಿಮಸ್ಸ ರಞ್ಞೋ, ಞಾತೀ ಮಿತ್ತಾ ಚ ವಿಜ್ಜರೇ ಸುಹದಾ;
ಯೇ ನ ವದನ್ತಿ ರಾಜಾನಂ, ಮಾ ಘಾತಯಿ ಅತ್ರಜೇ ಪುತ್ತೇ.
‘‘ಇಮೇ ತೇಪಿ ಮಯ್ಹಂ ಪುತ್ತಾ, ಗುಣಿನೋ ಕಾಯೂರಧಾರಿನೋ ರಾಜ;
ತೇಹಿಪಿ ಯಜಸ್ಸು ಯಞ್ಞಂ, ಅಥ ಮುಞ್ಚತು [ಮುಚ್ಚತು (ಪೀ. ಕ.)] ಗೋತಮಿಪುತ್ತೇ.
‘‘ಬಿಲಸತಂ ಮಂ ಕತ್ವಾನ, ಯಜಸ್ಸು ಸತ್ತಧಾ ಮಹಾರಾಜ;
ಮಾ ಜೇಟ್ಠಪುತ್ತಮವಧಿ, ಅದೂಸಕಂ ಸೀಹಸಙ್ಕಾಸಂ.
‘‘ಬಿಲಸತಂ ಮಂ ಕತ್ವಾನ, ಯಜಸ್ಸು ಸತ್ತಧಾ ಮಹಾರಾಜ;
ಮಾ ¶ ಜೇಟ್ಠಪುತ್ತಮವಧಿ, ಅಪೇಕ್ಖಿತಂ ಸಬ್ಬಲೋಕಸ್ಸ’’.
‘‘ಬಹುಕಾ ತವ ದಿನ್ನಾಭರಣಾ, ಉಚ್ಚಾವಚಾ ಸುಭಣಿತಮ್ಹಿ;
ಮುತ್ತಾಮಣಿವೇಳುರಿಯಾ, ಏತಂ ತೇ ಪಚ್ಛಿಮಕಂ ದಾನಂ’’.
‘‘ಯೇಸಂ ಪುಬ್ಬೇ ಖನ್ಧೇಸು, ಫುಲ್ಲಾ ಮಾಲಾಗುಣಾ ವಿವತ್ತಿಂಸು;
ತೇಸಜ್ಜಪಿ ಸುನಿಸಿತೋ [ಪಿತನಿಸಿತೋ (ಸೀ. ಪೀ.)], ನೇತ್ತಿಂಸೋ ವಿವತ್ತಿಸ್ಸತಿ ಖನ್ಧೇಸು.
‘‘ಯೇಸಂ ಪುಬ್ಬೇ ಖನ್ಧೇಸು, ಚಿತ್ತಾ ಮಾಲಾಗುಣಾ ವಿವತ್ತಿಂಸು;
ತೇಸಜ್ಜಪಿ ಸುನಿಸಿತೋ, ನೇತ್ತಿಂಸೋ ವಿವತ್ತಿಸ್ಸತಿ ಖನ್ಧೇಸು.
‘‘ಅಚಿರಂ [ಅಚಿರಾ (ಸೀ. ಸ್ಯಾ. ಪೀ.)] ವತ ನೇತ್ತಿಂಸೋ, ವಿವತ್ತಿಸ್ಸತಿ ರಾಜಪುತ್ತಾನಂ ಖನ್ಧೇಸು;
ಅಥ ಮಮ ಹದಯಂ ನ ಫಲತಿ, ತಾವ ದಳ್ಹಬನ್ಧಞ್ಚ ಮೇ ಆಸಿ.
‘‘ಕಾಸಿಕಸುಚಿವತ್ಥಧರಾ, ಕುಣ್ಡಲಿನೋ ಅಗಲುಚನ್ದನವಿಲಿತ್ತಾ;
ನಿಯ್ಯಾಥ ಚನ್ದಸೂರಿಯಾ, ಯಞ್ಞತ್ಥಾಯ ಏಕರಾಜಸ್ಸ.
‘‘ಕಾಸಿಕಸುಚಿವತ್ಥಧರಾ, ಕುಣ್ಡಲಿನೋ ಅಗಲುಚನ್ದನವಿಲಿತ್ತಾ;
ನಿಯ್ಯಾಥ ಚನ್ದಸೂರಿಯಾ, ಮಾತು ಕತ್ವಾ ಹದಯಸೋಕಂ.
‘‘ಕಾಸಿಕಸುಚಿವತ್ಥಧರಾ, ಕುಣ್ಡಲಿನೋ ಅಗಲುಚನ್ದನವಿಲಿತ್ತಾ;
ನಿಯ್ಯಾಥ ಚನ್ದಸೂರಿಯಾ, ಜನಸ್ಸ ಕತ್ವಾ ಹದಯಸೋಕಂ.
‘‘ಮಂಸರಸಭೋಜನಾ ನ್ಹಾಪಕಸುನ್ಹಾಪಿತಾ, ಕುಣ್ಡಲಿನೋ ಅಗಲುಚನ್ದನವಿಲಿತ್ತಾ;
ನಿಯ್ಯಾಥ ಚನ್ದಸೂರಿಯಾ, ಯಞ್ಞತ್ಥಾಯ ಏಕರಾಜಸ್ಸ.
‘‘ಮಂಸರಸಭೋಜನಾ ¶ ನ್ಹಾಪಕಸುನ್ಹಾಪಿತಾ, ಕುಣ್ಡಲಿನೋ ಅಗಲುಚನ್ದನವಿಲಿತ್ತಾ;
ನಿಯ್ಯಾಥ ಚನ್ದಸೂರಿಯಾ, ಮಾತು ಕತ್ವಾ ಹದಯಸೋಕಂ.
‘‘ಮಂಸರಸಭೋಜನಾ ನ್ಹಾಪಕಸುನ್ಹಾಪಿತಾ, ಕುಣ್ಡಲಿನೋ ಅಗಲುಚನ್ದನವಿಲಿತ್ತಾ;
ನಿಯ್ಯಾಥ ¶ ಚನ್ದಸೂರಿಯಾ, ಜನಸ್ಸ ಕತ್ವಾ ಹದಯಸೋಕಂ’’.
‘‘ಸಬ್ಬಸ್ಮಿಂ ¶ ಉಪಕ್ಖಟಸ್ಮಿಂ, ನಿಸೀದಿತೇ ಚನ್ದಸ್ಮಿಂ [ಚನ್ದಿಯಸ್ಮಿಂ (ಸೀ. ಪೀ.), ಚನ್ದಸೂರಿಯಸ್ಮಿಂ (ಸ್ಯಾ.)] ಯಞ್ಞತ್ಥಾಯ;
ಪಞ್ಚಾಲರಾಜಧೀತಾ ಪಞ್ಜಲಿಕಾ, ಸಬ್ಬಪರಿಸಾಯ ಸಮನುಪರಿಯಾಯಿ [ಸಬ್ಬಪರಿಸಮನುಪರಿಯಾಸಿ (ಸೀ. ಪೀ.), ಸಬ್ಬಪರಿಸನ್ತರಮನುಪರಿಯಾಸಿ (ಸ್ಯಾ.)].
‘‘ಯೇನ ಸಚ್ಚೇನ ಖಣ್ಡಹಾಲೋ, ಪಾಪಕಮ್ಮಂ ಕರೋತಿ ದುಮ್ಮೇಧೋ;
ಏತೇನ ಸಚ್ಚವಜ್ಜೇನ, ಸಮಙ್ಗಿನೀ ಸಾಮಿಕೇನ ಹೋಮಿ.
‘‘ಯೇ ಇಧತ್ಥಿ ಅಮನುಸ್ಸಾ, ಯಾನಿ ಚ ಯಕ್ಖಭೂತಭಬ್ಯಾನಿ;
ಕರೋನ್ತು ಮೇ ವೇಯ್ಯಾವಟಿಕಂ, ಸಮಙ್ಗಿನೀ ಸಾಮಿಕೇನ ಹೋಮಿ.
‘‘ಯಾ ದೇವತಾ ಇಧಾಗತಾ, ಯಾನಿ ಚ ಯಕ್ಖಭೂತಭಬ್ಯಾನಿ;
ಸರಣೇಸಿನಿಂ ಅನಾಥಂ ತಾಯಥ ಮಂ, ಯಾಚಾಮಹಂ ಪತಿಮಾಹಂ ಅಜೇಯಂ’’ [ಅಜಿಯ್ಯಂ (ಸೀ.)].
‘‘ತಂ ಸುತ್ವಾ ಅಮನುಸ್ಸೋ, ಅಯೋಕೂಟಂ ಪರಿಬ್ಭಮೇತ್ವಾನ;
ಭಯಮಸ್ಸ ಜನಯನ್ತೋ, ರಾಜಾನಂ ಇದಮವೋಚ.
‘‘ಬುಜ್ಝಸ್ಸು ಖೋ ರಾಜಕಲಿ, ಮಾ ತಾಹಂ [ಮಾ ತೇಹಂ (ಸ್ಯಾ.)] ಮತ್ಥಕಂ ನಿತಾಳೇಸಿಂ [ನಿತಾಲೇಮಿ (ಸೀ. ಪೀ.), ನಿಪ್ಫಾಲೇಸಿಂ (ಕ.)];
ಮಾ ಜೇಟ್ಠಪುತ್ತಮವಧಿ, ಅದೂಸಕಂ ಸೀಹಸಙ್ಕಾಸಂ.
‘‘ಕೋ ತೇ ದಿಟ್ಠೋ ರಾಜಕಲಿ, ಪುತ್ತಭರಿಯಾಯೋ ಹಞ್ಞಮಾನಾಯೋ [ಹಞ್ಞಮಾನಾ (ಕ.)];
ಸೇಟ್ಠಿ ಚ ಗಹಪತಯೋ, ಅದೂಸಕಾ ಸಗ್ಗಕಾಮಾ ಹಿ.
‘‘ತಂ ಸುತ್ವಾ ಖಣ್ಡಹಾಲೋ, ರಾಜಾ ಚ ಅಬ್ಭುತಮಿದಂ ದಿಸ್ವಾನ;
ಸಬ್ಬೇಸಂ ಬನ್ಧನಾನಿ ಮೋಚೇಸುಂ, ಯಥಾ ತಂ ಅನುಪಘಾತಂ [ಅಪಾಪಾನಂ (ಸೀ. ಪೀ.)].
‘‘ಸಬ್ಬೇಸು ¶ ವಿಪ್ಪಮುತ್ತೇಸು, ಯೇ ತತ್ಥ ಸಮಾಗತಾ ತದಾ ಆಸುಂ;
ಸಬ್ಬೇ ಏಕೇಕಲೇಡ್ಡುಕಮದಂಸು, ಏಸ ವಧೋ ಖಣ್ಡಹಾಲಸ್ಸ’’.
‘‘ಸಬ್ಬೇ ¶ ಪವಿಟ್ಠಾ [ಪತಿಂಸು (ಸೀ.), ಪತಿತ್ವಾ (ಪೀ.)] ನಿರಯಂ, ಯಥಾ ತಂ ಪಾಪಕಂ ಕರಿತ್ವಾನ;
ನ ಹಿ ಪಾಪಕಮ್ಮಂ ಕತ್ವಾ, ಲಬ್ಭಾ ಸುಗತಿಂ ಇತೋ ಗನ್ತುಂ’’.
‘‘ಸಬ್ಬೇಸು ವಿಪ್ಪಮುತ್ತೇಸು, ಯೇ ತತ್ಥ ಸಮಾಗತಾ ತದಾ ಆಸುಂ;
ಚನ್ದಂ ಅಭಿಸಿಞ್ಚಿಂಸು, ಸಮಾಗತಾ ರಾಜಪರಿಸಾ [ರಾಜಪುರಿಸಾ (ಸ್ಯಾ.)] ಚ.
‘‘ಸಬ್ಬೇಸು ವಿಪ್ಪಮುತ್ತೇಸು, ಯೇ [ಯಾ (ಸ್ಯಾ.)] ತತ್ಥ ಸಮಾಗತಾ ತದಾ ಆಸುಂ;
ಚನ್ದಂ ಅಭಿಸಿಞ್ಚಿಂಸು, ಸಮಾಗತಾ ರಾಜಕಞ್ಞಾಯೋ ಚ.
‘‘ಸಬ್ಬೇಸು ವಿಪ್ಪಮುತ್ತೇಸು, ಯೇ ತತ್ಥ ಸಮಾಗತಾ ತದಾ ಆಸುಂ;
ಚನ್ದಂ ಅಭಿಸಿಞ್ಚಿಂಸು, ಸಮಾಗತಾ ದೇವಪರಿಸಾ [ದೇವಪುರಿಸಾ (ಸ್ಯಾ.)] ಚ.
‘‘ಸಬ್ಬೇಸು ವಿಪ್ಪಮುತ್ತೇಸು, ಯೇ [ಯಾ (ಸ್ಯಾ.)] ತತ್ಥ ಸಮಾಗತಾ ತದಾ ಆಸುಂ;
ಚನ್ದಂ ಅಭಿಸಿಞ್ಚಿಂಸು, ಸಮಾಗತಾ ದೇವಕಞ್ಞಾಯೋ ಚ.
‘‘ಸಬ್ಬೇಸು ವಿಪ್ಪಮುತ್ತೇಸು, ಯೇ ತತ್ಥ ಸಮಾಗತಾ ತದಾ ಆಸುಂ;
ಚೇಲುಕ್ಖೇಪಮಕರುಂ, ಸಮಾಗತಾ ರಾಜಪರಿಸಾ [ರಾಜಪುರಿಸಾ (ಸ್ಯಾ.)] ಚ.
‘‘ಸಬ್ಬೇಸು ¶ ವಿಪ್ಪಮುತ್ತೇಸು, ಯೇ [ಯಾ (ಸ್ಯಾ.)] ತತ್ಥ ಸಮಾಗತಾ ತದಾ ಆಸುಂ;
ಚೇಲುಕ್ಖೇಪಮಕರುಂ, ಸಮಾಗತಾ ರಾಜಕಞ್ಞಾಯೋ ಚ.
‘‘ಸಬ್ಬೇಸು ವಿಪ್ಪಮುತ್ತೇಸು, ಯೇ ತತ್ಥ ಸಮಾಗತಾ ತದಾ ಆಸುಂ;
ಚೇಲುಕ್ಖೇಪಮಕರುಂ, ಸಮಾಗತಾ ದೇವಪರಿಸಾ [ದೇವಪುರಿಸಾ (ಸ್ಯಾ.)] ಚ.
‘‘ಸಬ್ಬೇಸು ವಿಪ್ಪಮುತ್ತೇಸು, ಯೇ [ಯಾ (ಸ್ಯಾ.)] ತತ್ಥ ಸಮಾಗತಾ ತದಾ ಆಸುಂ;
ಚೇಲುಕ್ಖೇಪಮಕರುಂ, ಸಮಾಗತಾ ದೇವಕಞ್ಞಾಯೋ ಚ.
‘‘ಸಬ್ಬೇಸು ವಿಪ್ಪಮುತ್ತೇಸು, ಬಹೂ ಆನನ್ದಿತಾ ಅಹುಂ [ಬಹು ಆನನ್ದನೋ ಅಹು ವಂಸೋ (ಸೀ.), ಬಹು ಆನನ್ದಿತೋ ಅಹು ವಂಸೋ (ಪೀ.)];
ನನ್ದಿಂ ¶ ಪವೇಸಿ ನಗರಂ [ವಾದಿಂಸು ನನ್ದಿಪವೇಸನಗರಂ (ಸ್ಯಾ.), ನನ್ದಿಂ ಪವೇಸಿ ನಗರೇ (ಕ.)], ಬನ್ಧನಾ ಮೋಕ್ಖೋ ಅಘೋಸಿತ್ಥಾ’’ತಿ.
ಚನ್ದಕುಮಾರಜಾತಕಂ [ಖಣ್ಡಹಾಲಜಾತಕಂ (ಸೀ. ಪೀ.)] ಸತ್ತಮಂ.
೫೪೫. ಮಹಾನಾರದಕಸ್ಸಪಜಾತಕಂ (೮)
‘‘ಅಹು ¶ ¶ ರಾಜಾ ವಿದೇಹಾನಂ, ಅಙ್ಗತಿ [ಅಙ್ಗಾತಿ (ಸೀ.) ಏವಮುಪರಿಪಿ] ನಾಮ ಖತ್ತಿಯೋ;
ಪಹೂತಯೋಗ್ಗೋ ಧನಿಮಾ, ಅನನ್ತಬಲಪೋರಿಸೋ.
ಸೋ ಚ ಪನ್ನರಸಿಂ [ಪನ್ನರಸೇ (ಸ್ಯಾ. ಕ.)] ರತ್ತಿಂ, ಪುರಿಮಯಾಮೇ ಅನಾಗತೇ;
ಚಾತುಮಾಸಾ [ಚಾತುಮಸ್ಸ (ಸೀ. ಪೀ.)] ಕೋಮುದಿಯಾ, ಅಮಚ್ಚೇ ಸನ್ನಿಪಾತಯಿ.
‘‘ಪಣ್ಡಿತೇ ಸುತಸಮ್ಪನ್ನೇ, ಮಿತಪುಬ್ಬೇ [ಮಿಹಿತಪುಬ್ಬೇ (ಸೀ. ಪೀ.)] ವಿಚಕ್ಖಣೇ;
ವಿಜಯಞ್ಚ ಸುನಾಮಞ್ಚ, ಸೇನಾಪತಿಂ ಅಲಾತಕಂ.
‘‘ತಮನುಪುಚ್ಛಿ ವೇದೇಹೋ, ‘‘ಪಚ್ಚೇಕಂ ಬ್ರೂಥ ಸಂ ರುಚಿಂ;
ಚಾತುಮಾಸಾ ಕೋಮುದಜ್ಜ, ಜುಣ್ಹಂ ಬ್ಯಪಹತಂ [ಬ್ಯಪಗತಂ (ಸೀ. ಪೀ.)] ತಮಂ;
ಕಾಯಜ್ಜ ರತಿಯಾ ರತ್ತಿಂ, ವಿಹರೇಮು ಇಮಂ ಉತುಂ’’.
‘‘ತತೋ ಸೇನಾಪತಿ ರಞ್ಞೋ, ಅಲಾತೋ ಏತದಬ್ರವಿ;
‘‘ಹಟ್ಠಂ ಯೋಗ್ಗಂ ಬಲಂ ಸಬ್ಬಂ, ಸೇನಂ ಸನ್ನಾಹಯಾಮಸೇ.
‘‘ನಿಯ್ಯಾಮ ದೇವ ಯುದ್ಧಾಯ, ಅನನ್ತಬಲಪೋರಿಸಾ;
ಯೇ ತೇ ವಸಂ ನ ಆಯನ್ತಿ, ವಸಂ ಉಪನಯಾಮಸೇ [ಉಪನಿಯ್ಯಾಮಸೇ (ಕ.)];
ಏಸಾ ಮಯ್ಹಂ ಸಕಾ ದಿಟ್ಠಿ, ಅಜಿತಂ ಓಜಿನಾಮಸೇ.
ಅಲಾತಸ್ಸ ¶ ವಚೋ ಸುತ್ವಾ, ಸುನಾಮೋ ಏತದಬ್ರವಿ;
‘‘ಸಬ್ಬೇ ತುಯ್ಹಂ ಮಹಾರಾಜ, ಅಮಿತ್ತಾ ವಸಮಾಗತಾ.
‘‘ನಿಕ್ಖಿತ್ತಸತ್ಥಾ ಪಚ್ಚತ್ಥಾ, ನಿವಾತಮನುವತ್ತರೇ;
ಉತ್ತಮೋ ಉಸ್ಸವೋ ಅಜ್ಜ, ನ ಯುದ್ಧಂ ಮಮ ರುಚ್ಚತಿ.
‘‘ಅನ್ನಪಾನಞ್ಚ ಖಜ್ಜಞ್ಚ, ಖಿಪ್ಪಂ ಅಭಿಹರನ್ತು ತೇ;
ರಮಸ್ಸು ದೇವ ಕಾಮೇಹಿ, ನಚ್ಚಗೀತೇ ಸುವಾದಿತೇ’’.
ಸುನಾಮಸ್ಸ ವಚೋ ಸುತ್ವಾ, ವಿಜಯೋ ಏತದಬ್ರವಿ;
‘‘ಸಬ್ಬೇ ಕಾಮಾ ಮಹಾರಾಜ, ನಿಚ್ಚಂ ತವ ಮುಪಟ್ಠಿತಾ.
‘‘ನ ಹೇತೇ ದುಲ್ಲಭಾ ದೇವ, ತವ ಕಾಮೇಹಿ ಮೋದಿತುಂ;
ಸದಾಪಿ ಕಾಮಾ ಸುಲಭಾ, ನೇತಂ ಚಿತ್ತಮತಂ [ಚಿತ್ತಂ ಮತೀ (ಕ.)] ಮಮ.
‘‘ಸಮಣಂ ¶ ಬ್ರಾಹ್ಮಣಂ ವಾಪಿ, ಉಪಾಸೇಮು ಬಹುಸ್ಸುತಂ;
ಯೋ ನಜ್ಜ ವಿನಯೇ ಕಙ್ಖಂ, ಅತ್ಥಧಮ್ಮವಿದೂ ಇಸೇ’’.
ವಿಜಯಸ್ಸ ವಚೋ ಸುತ್ವಾ, ರಾಜಾ ಅಙ್ಗತಿ ಮಬ್ರವಿ;
‘‘ಯಥಾ ವಿಜಯೋ ಭಣತಿ, ಮಯ್ಹಮ್ಪೇತಂವ ರುಚ್ಚತಿ.
‘‘ಸಮಣಂ ¶ ಬ್ರಾಹ್ಮಣಂ ವಾಪಿ, ಉಪಾಸೇಮು ಬಹುಸ್ಸುತಂ;
ಯೋ ನಜ್ಜ ವಿನಯೇ ಕಙ್ಖಂ, ಅತ್ಥಧಮ್ಮವಿದೂ ಇಸೇ.
‘‘ಸಬ್ಬೇವ ಸನ್ತಾ ಕರೋಥ ಮತಿಂ, ಕಂ ಉಪಾಸೇಮು ಪಣ್ಡಿತಂ;
ಯೋ [ಕೋ (ಸೀ. ಪೀ.)] ನಜ್ಜ ವಿನಯೇ ಕಙ್ಖಂ, ಅತ್ಥಧಮ್ಮವಿದೂ ಇಸೇ’’.
‘‘ವೇದೇಹಸ್ಸ ವಚೋ ಸುತ್ವಾ, ಅಲಾತೋ ಏತದಬ್ರವಿ;
‘‘ಅತ್ಥಾಯಂ ¶ ಮಿಗದಾಯಸ್ಮಿಂ, ಅಚೇಲೋ ಧೀರಸಮ್ಮತೋ.
‘‘ಗುಣೋ ಕಸ್ಸಪಗೋತ್ತಾಯಂ, ಸುತೋ ಚಿತ್ರಕಥೀ ಗಣೀ;
ತಂ ದೇವ [ತದೇವ (ಕ.)] ಪಯಿರುಪಾಸೇಮು [ಪಯಿರುಪಾಸಯ (ಸೀ. ಪೀ.)], ಸೋ ನೋ ಕಙ್ಖಂ ವಿನೇಸ್ಸತಿ’’.
‘‘ಅಲಾತಸ್ಸ ವಚೋ ಸುತ್ವಾ, ರಾಜಾ ಚೋದೇಸಿ ಸಾರಥಿಂ;
‘‘ಮಿಗದಾಯಂ ಗಮಿಸ್ಸಾಮ, ಯುತ್ತಂ ಯಾನಂ ಇಧಾನಯ’’.
ತಸ್ಸ ಯಾನಂ ಅಯೋಜೇಸುಂ, ದನ್ತಂ ರೂಪಿಯಪಕ್ಖರಂ [ರೂಪಿಯುಪಕ್ಖರಂ (ಕ.)];
ಸುಕ್ಕಮಟ್ಠಪರಿವಾರಂ, ಪಣ್ಡರಂ ದೋಸಿನಾಮುಖಂ.
‘‘ತತ್ರಾಸುಂ ಕುಮುದಾಯುತ್ತಾ, ಚತ್ತಾರೋ ಸಿನ್ಧವಾ ಹಯಾ;
ಅನಿಲೂಪಮಸಮುಪ್ಪಾತಾ [ಅನಿಲೂಪಮಸಮುಪ್ಪಾದಾ (ಕ.)], ಸುದನ್ತಾ ಸೋಣ್ಣಮಾಲಿನೋ.
‘‘ಸೇತಚ್ಛತ್ತಂ ಸೇತರಥೋ, ಸೇತಸ್ಸಾ ಸೇತಬೀಜನೀ;
ವೇದೇಹೋ ಸಹಮಚ್ಚೇಹಿ, ನಿಯ್ಯಂ ಚನ್ದೋವ ಸೋಭತಿ.
‘‘ತಮನುಯಾಯಿಂಸು ಬಹವೋ, ಇನ್ದಿಖಗ್ಗಧರಾ [ಇನ್ದಖಗ್ಗಧರಾ (ಸೀ.), ಇಟ್ಠಿಖಗ್ಗಧರಾ (ಪೀ.)] ಬಲೀ;
ಅಸ್ಸಪಿಟ್ಠಿಗತಾ ವೀರಾ, ನರಾ ನರವರಾಧಿಪಂ.
ಸೋ ಮುಹುತ್ತಂವ ಯಾಯಿತ್ವಾ, ಯಾನಾ ಓರುಯ್ಹ ಖತ್ತಿಯೋ;
ವೇದೇಹೋ ಸಹಮಚ್ಚೇಹಿ, ಪತ್ತೀ ಗುಣಮುಪಾಗಮಿ.
ಯೇಪಿ ತತ್ಥ ತದಾ ಆಸುಂ, ಬ್ರಾಹ್ಮಣಿಬ್ಭಾ ಸಮಾಗತಾ;
ನ ತೇ ಅಪನಯೀ ರಾಜಾ, ಅಕತಂ ಭೂಮಿಮಾಗತೇ.
‘‘ತತೋ ¶ ಸೋ ಮುದುಕಾ ಭಿಸಿಯಾ, ಮುದುಚಿತ್ತಕಸನ್ಥತೇ [ಮುದುಚಿತ್ತಕಳನ್ದಕೇ (ಸೀ. ಪೀ.)];
ಮುದುಪಚ್ಚತ್ಥತೇ ರಾಜಾ, ಏಕಮನ್ತಂ ಉಪಾವಿಸಿ.
‘‘ನಿಸಜ್ಜ ರಾಜಾ ಸಮ್ಮೋದಿ, ಕಥಂ ಸಾರಣಿಯಂ ತತೋ;
‘‘ಕಚ್ಚಿ ¶ ಯಾಪನಿಯಂ ಭನ್ತೇ, ವಾತಾನಮವಿಯಗ್ಗತಾ [ವಾತಾನಮವಿಸಗ್ಗತಾ (ಸೀ. ಪೀ.), ವಾತಾನಮವಿಯತ್ತತಾ (ಸ್ಯಾ.)].
‘‘ಕಚ್ಚಿ ಅಕಸಿರಾ ವುತ್ತಿ, ಲಭಸಿ [ಲಬ್ಭತಿ (ಸೀ. ಪೀ.)] ಪಿಣ್ಡಯಾಪನಂ [ಪಿಣ್ಡಿಯಾಪನಂ (ಸ್ಯಾ. ಕ.)];
ಅಪಾಬಾಧೋ ಚಸಿ ಕಚ್ಚಿ, ಚಕ್ಖುಂ ನ ಪರಿಹಾಯತಿ’’.
ತಂ ಗುಣೋ ಪಟಿಸಮ್ಮೋದಿ, ವೇದೇಹಂ ವಿನಯೇ ರತಂ;
‘‘ಯಾಪನೀಯಂ ಮಹಾರಾಜ, ಸಬ್ಬಮೇತಂ ತದೂಭಯಂ.
‘‘ಕಚ್ಚಿ ¶ ತುಯ್ಹಮ್ಪಿ ವೇದೇಹ, ಪಚ್ಚನ್ತಾ ನ ಬಲೀಯರೇ;
ಕಚ್ಚಿ ಅರೋಗಂ ಯೋಗ್ಗಂ ತೇ, ಕಚ್ಚಿ ವಹತಿ ವಾಹನಂ;
ಕಚ್ಚಿ ತೇ ಬ್ಯಾಧಯೋ ನತ್ಥಿ, ಸರೀರಸ್ಸುಪತಾಪಿಯಾ’’ [ಸರೀರಸ್ಸುಪತಾಪಿಕಾ (ಸೀ. ಪೀ.), ಸರೀರಸ್ಸುಪತಾಪನಾ (?)].
ಪಟಿಸಮ್ಮೋದಿತೋ ರಾಜಾ, ತತೋ ಪುಚ್ಛಿ ಅನನ್ತರಾ;
ಅತ್ಥಂ ಧಮ್ಮಞ್ಚ ಞಾಯಞ್ಚ, ಧಮ್ಮಕಾಮೋ ರಥೇಸಭೋ.
‘‘ಕಥಂ ಧಮ್ಮಂ ಚರೇ ಮಚ್ಚೋ, ಮಾತಾಪಿತೂಸು ಕಸ್ಸಪ;
ಕಥಂ ಚರೇ ಆಚರಿಯೇ, ಪುತ್ತದಾರೇ ಕಥಂ ಚರೇ.
‘‘ಕಥಂ ಚರೇಯ್ಯ ವುಡ್ಢೇಸು, ಕಥಂ ಸಮಣಬ್ರಾಹ್ಮಣೇ;
ಕಥಞ್ಚ ಬಲಕಾಯಸ್ಮಿಂ, ಕಥಂ ಜನಪದೇ ಚರೇ.
‘‘ಕಥಂ ಧಮ್ಮಂ ಚರಿತ್ವಾನ, ಮಚ್ಚಾ ಗಚ್ಛನ್ತಿ [ಪೇಚ್ಚ ಗಚ್ಛತಿ (ಸೀ. ಸ್ಯಾ. ಪೀ.)] ಸುಗ್ಗತಿಂ;
ಕಥಞ್ಚೇಕೇ ಅಧಮ್ಮಟ್ಠಾ, ಪತನ್ತಿ ನಿರಯಂ ಅಥೋ’’.
‘‘ವೇದೇಹಸ್ಸ ವಚೋ ಸುತ್ವಾ, ಕಸ್ಸಪೋ ಏತದಬ್ರವಿ;
‘‘‘ಸುಣೋಹಿ ಮೇ ಮಹಾರಾಜ, ಸಚ್ಚಂ ಅವಿತಥಂ ಪದಂ.
‘‘‘ನತ್ಥಿ ಧಮ್ಮಚರಿತಸ್ಸ [ಧಮ್ಮಸ್ಸ ಚಿಣ್ಣಸ್ಸ (ಸೀ.)], ಫಲಂ ಕಲ್ಯಾಣಪಾಪಕಂ;
ನತ್ಥಿ ¶ ದೇವ ಪರೋ ಲೋಕೋ, ಕೋ ತತೋ ಹಿ ಇಧಾಗತೋ.
‘‘‘ನತ್ಥಿ ¶ ದೇವ ಪಿತರೋ ವಾ, ಕುತೋ ಮಾತಾ ಕುತೋ ಪಿತಾ;
ನತ್ಥಿ ಆಚರಿಯೋ ನಾಮ, ಅದನ್ತಂ ಕೋ ದಮೇಸ್ಸತಿ.
‘‘‘ಸಮತುಲ್ಯಾನಿ ಭೂತಾನಿ, ನತ್ಥಿ ಜೇಟ್ಠಾಪಚಾಯಿಕಾ;
ನತ್ಥಿ ಬಲಂ ವೀರಿಯಂ ವಾ, ಕುತೋ ಉಟ್ಠಾನಪೋರಿಸಂ;
ನಿಯತಾನಿ ಹಿ ಭೂತಾನಿ, ಯಥಾ ಗೋಟವಿಸೋ ತಥಾ.
‘‘‘ಲದ್ಧೇಯ್ಯಂ ಲಭತೇ ಮಚ್ಚೋ, ತತ್ಥ ದಾನಫಲಂ ಕುತೋ;
ನತ್ಥಿ ದಾನಫಲಂ ದೇವ, ಅವಸೋ ದೇವವೀರಿಯೋ.
‘‘‘ಬಾಲೇಹಿ ದಾನಂ ಪಞ್ಞತ್ತಂ, ಪಣ್ಡಿತೇಹಿ ಪಟಿಚ್ಛಿತಂ;
ಅವಸಾ ದೇನ್ತಿ ಧೀರಾನಂ, ಬಾಲಾ ಪಣ್ಡಿತಮಾನಿನೋ.
‘‘‘ಸತ್ತಿಮೇ ಸಸ್ಸತಾ ಕಾಯಾ, ಅಚ್ಛೇಜ್ಜಾ ಅವಿಕೋಪಿನೋ;
ತೇಜೋ ಪಥವೀ ಆಪೋ ಚ, ವಾಯೋ ಸುಖಂ ದುಖಞ್ಚಿಮೇ;
ಜೀವೇ ಚ ಸತ್ತಿಮೇ ಕಾಯಾ, ಯೇಸಂ ಛೇತ್ತಾ ನ ವಿಜ್ಜತಿ.
‘‘‘ನತ್ಥಿ ಹನ್ತಾ ವ ಛೇತ್ತಾ ವಾ, ಹಞ್ಞೇ ಯೇವಾಪಿ [ಹಞ್ಞರೇ ವಾಪಿ (ಸೀ. ಸ್ಯಾ. ಪೀ.)] ಕೋಚಿ ನಂ;
ಅನ್ತರೇನೇವ ಕಾಯಾನಂ, ಸತ್ಥಾನಿ ವೀತಿವತ್ತರೇ.
‘‘‘ಯೋ ¶ ಚಾಪಿ [ಯೋಪಾಯಂ (ಸೀ. ಪೀ.), ಯೋ ಚಾಯಂ (ಸ್ಯಾ. ಕ.)] ಸಿರಮಾದಾಯ, ಪರೇಸಂ ನಿಸಿತಾಸಿನಾ;
ನ ಸೋ ಛಿನ್ದತಿ ತೇ ಕಾಯೇ, ತತ್ಥ ಪಾಪಫಲಂ ಕುತೋ.
‘‘‘ಚುಲ್ಲಾಸೀತಿಮಹಾಕಪ್ಪೇ, ಸಬ್ಬೇ ಸುಜ್ಝನ್ತಿ ಸಂಸರಂ;
ಅನಾಗತೇ ತಮ್ಹಿ ಕಾಲೇ, ಸಞ್ಞತೋಪಿ ನ ಸುಜ್ಝತಿ.
‘‘‘ಚರಿತ್ವಾಪಿ ಬಹುಂ ಭದ್ರಂ, ನೇವ ಸುಜ್ಝನ್ತಿನಾಗತೇ;
ಪಾಪಞ್ಚೇಪಿ ¶ ಬಹುಂ ಕತ್ವಾ, ತಂ ಖಣಂ ನಾತಿವತ್ತರೇ.
‘‘‘ಅನುಪುಬ್ಬೇನ ನೋ ಸುದ್ಧಿ, ಕಪ್ಪಾನಂ ಚುಲ್ಲಸೀತಿಯಾ;
ನಿಯತಿಂ ನಾತಿವತ್ತಾಮ, ವೇಲನ್ತಮಿವ ಸಾಗರೋ’’’.
ಕಸ್ಸಪಸ್ಸ ವಚೋ ಸುತ್ವಾ, ಅಲಾತೋ ಏತದಬ್ರವಿ;
‘‘ಯಥಾ ಭದನ್ತೋ ಭಣತಿ, ಮಯ್ಹಮ್ಪೇತಂವ ರುಚ್ಚತಿ.
‘‘ಅಹಮ್ಪಿ ಪುರಿಮಂ ಜಾತಿಂ, ಸರೇ ಸಂಸರಿತತ್ತನೋ;
ಪಿಙ್ಗಲೋ ನಾಮಹಂ ಆಸಿಂ, ಲುದ್ದೋ ಗೋಘಾತಕೋ ಪುರೇ.
‘‘ಬಾರಾಣಸಿಯಂ ¶ ಫೀತಾಯಂ, ಬಹುಂ ಪಾಪಂ ಕತಂ ಮಯಾ;
ಬಹೂ ಮಯಾ ಹತಾ ಪಾಣಾ, ಮಹಿಂಸಾ ಸೂಕರಾ ಅಜಾ.
‘‘ತತೋ ಚುತೋ ಇಧ ಜಾತೋ, ಇದ್ಧೇ ಸೇನಾಪತೀಕುಲೇ;
ನತ್ಥಿ ನೂನ ಫಲಂ ಪಾಪಂ, ಯೋಹಂ [ಪಾಪೇ ಸೋಹಂ (ಸೀ. ಪೀ.)] ನ ನಿರಯಂ ಗತೋ.
ಅಥೇತ್ಥ ಬೀಜಕೋ ನಾಮ, ದಾಸೋ ಆಸಿ ಪಟಚ್ಚರೀ [ಪಳಚ್ಚರೀ (ಸೀ. ಪೀ.), ಪಟಜ್ಜರೀ (ಕ.)];
ಉಪೋಸಥಂ ಉಪವಸನ್ತೋ, ಗುಣಸನ್ತಿಕುಪಾಗಮಿ.
ಕಸ್ಸಪಸ್ಸ ವಚೋ ಸುತ್ವಾ, ಅಲಾತಸ್ಸ ಚ ಭಾಸಿತಂ;
ಪಸ್ಸಸನ್ತೋ ಮುಹುಂ ಉಣ್ಹಂ, ರುದಂ ಅಸ್ಸೂನಿ ವತ್ತಯಿ.
ತಮನುಪುಚ್ಛಿ ವೇದೇಹೋ, ‘‘ಕಿಮತ್ಥಂ ಸಮ್ಮ ರೋದಸಿ;
ಕಿಂ ತೇ ಸುತಂ ವಾ ದಿಟ್ಠಂ ವಾ, ಕಿಂ ಮಂ ವೇದೇಸಿ ವೇದನಂ’’.
ವೇದೇಹಸ್ಸ ವಚೋ ಸುತ್ವಾ, ಬೀಜಕೋ ಏತದಬ್ರವಿ;
‘‘ನತ್ಥಿ ಮೇ ವೇದನಾ ದುಕ್ಖಾ, ಮಹಾರಾಜ ಸುಣೋಹಿ ಮೇ.
‘‘ಅಹಮ್ಪಿ ಪುರಿಮಂ ಜಾತಿಂ, ಸರಾಮಿ ಸುಖಮತ್ತನೋ;
ಸಾಕೇತಾಹಂ ¶ ಪುರೇ ಆಸಿಂ, ಭಾವಸೇಟ್ಠಿ ಗುಣೇ ರತೋ.
‘‘ಸಮ್ಮತೋ ಬ್ರಾಹ್ಮಣಿಬ್ಭಾನಂ, ಸಂವಿಭಾಗರತೋ ಸುಚಿ;
ನ ಚಾಪಿ ಪಾಪಕಂ ಕಮ್ಮಂ, ಸರಾಮಿ ಕತಮತ್ತನೋ.
‘‘ತತೋ ಚುತಾಹಂ ವೇದೇಹ, ಇಧ ಜಾತೋ ದುರಿತ್ಥಿಯಾ;
ಗಬ್ಭಮ್ಹಿ ಕುಮ್ಭದಾಸಿಯಾ, ಯತೋ ಜಾತೋ ಸುದುಗ್ಗತೋ.
‘‘ಏವಮ್ಪಿ ¶ ದುಗ್ಗತೋ ಸನ್ತೋ, ಸಮಚರಿಯಂ ಅಧಿಟ್ಠಿತೋ;
ಉಪಡ್ಢಭಾಗಂ ಭತ್ತಸ್ಸ, ದದಾಮಿ ಯೋ ಮೇ ಇಚ್ಛತಿ.
‘‘ಚಾತುದ್ದಸಿಂ ಪಞ್ಚದಸಿಂ, ಸದಾ ಉಪವಸಾಮಹಂ;
ನ ಚಾಪಿ [ನ ಅಹಂ (ಕ.)] ಭೂತೇ ಹಿಂಸಾಮಿ, ಥೇಯ್ಯಞ್ಚಾಪಿ ವಿವಜ್ಜಯಿಂ.
‘‘ಸಬ್ಬಮೇವ ಹಿ ನೂನೇತಂ, ಸುಚಿಣ್ಣಂ ಭವತಿ ನಿಪ್ಫಲಂ;
ನಿರತ್ಥಂ ಮಞ್ಞಿದಂ ಸೀಲಂ, ಅಲಾತೋ ಭಾಸತೀ ಯಥಾ.
‘‘ಕಲಿಮೇವ ನೂನ ಗಣ್ಹಾಮಿ, ಅಸಿಪ್ಪೋ ಧುತ್ತಕೋ ಯಥಾ;
ಕಟಂ ಅಲಾತೋ ಗಣ್ಹಾತಿ, ಕಿತವೋಸಿಕ್ಖಿತೋ ಯಥಾ.
‘‘ದ್ವಾರಂ ¶ ನಪ್ಪಟಿಪಸ್ಸಾಮಿ, ಯೇನ ಗಚ್ಛಾಮಿ ಸುಗ್ಗತಿಂ;
ತಸ್ಮಾ ರಾಜ ಪರೋದಾಮಿ, ಸುತ್ವಾ ಕಸ್ಸಪಭಾಸಿತಂ’’.
ಬೀಜಕಸ್ಸ ವಚೋ ಸುತ್ವಾ, ರಾಜಾ ಅಙ್ಗತಿ ಮಬ್ರವಿ;
‘‘ನತ್ಥಿ ದ್ವಾರಂ ಸುಗತಿಯಾ, ನಿಯತಿಂ [ನಿಯತಂ (ಸ್ಯಾ.)] ಕಙ್ಖ ಬೀಜಕ.
‘‘ಸುಖಂ ವಾ ಯದಿ ವಾ ದುಕ್ಖಂ, ನಿಯತಿಯಾ ಕಿರ ಲಬ್ಭತಿ;
ಸಂಸಾರಸುದ್ಧಿ ಸಬ್ಬೇಸಂ, ಮಾ ತುರಿತ್ಥೋ [ತುರಿತೋ (ಸ್ಯಾ.)] ಅನಾಗತೇ.
‘‘ಅಹಮ್ಪಿ ಪುಬ್ಬೇ ಕಲ್ಯಾಣೋ, ಬ್ರಾಹ್ಮಣಿಬ್ಭೇಸು ಬ್ಯಾವಟೋ [ವಾವಟೋ (ಕ.)];
ವೋಹಾರಮನುಸಾಸನ್ತೋ ¶ , ರತಿಹೀನೋ ತದನ್ತರಾ’’.
‘‘ಪುನಪಿ ಭನ್ತೇ ದಕ್ಖೇಮು, ಸಙ್ಗತಿ ಚೇ ಭವಿಸ್ಸತಿ’’;
ಇದಂ ವತ್ವಾನ ವೇದೇಹೋ, ಪಚ್ಚಗಾ ಸನಿವೇಸನಂ.
ತತೋ ರತ್ಯಾ ವಿವಸಾನೇ, ಉಪಟ್ಠಾನಮ್ಹಿ ಅಙ್ಗತಿ;
ಅಮಚ್ಚೇ ಸನ್ನಿಪಾತೇತ್ವಾ, ಇದಂ ವಚನಮಬ್ರವಿ.
‘‘ಚನ್ದಕೇ ಮೇ ವಿಮಾನಸ್ಮಿಂ, ಸದಾ ಕಾಮೇ ವಿಧೇನ್ತು ಮೇ;
ಮಾ ಉಪಗಚ್ಛುಂ ಅತ್ಥೇಸು, ಗುಯ್ಹಪ್ಪಕಾಸಿಯೇಸು ಚ.
‘‘ವಿಜಯೋ ಚ ಸುನಾಮೋ ಚ, ಸೇನಾಪತಿ ಅಲಾತಕೋ;
ಏತೇ ಅತ್ಥೇ ನಿಸೀದನ್ತು, ವೋಹಾರಕುಸಲಾ ತಯೋ’’.
ಇದಂ ವತ್ವಾನ ವೇದೇಹೋ, ಕಾಮೇವ ಬಹುಮಞ್ಞಥ;
ನ ಚಾಪಿ ಬ್ರಾಹ್ಮಣಿಬ್ಭೇಸು, ಅತ್ಥೇ ಕಿಸ್ಮಿಞ್ಚಿ ಬ್ಯಾವಟೋ.
ತತೋ ದ್ವೇಸತ್ತರತ್ತಸ್ಸ, ವೇದೇಹಸ್ಸತ್ರಜಾ ಪಿಯಾ;
ರಾಜಕಞ್ಞಾ ರುಚಾ [ರುಜಾ (ಸೀ. ಪೀ.) ಏವಮುಪರಿಪಿ] ನಾಮ, ಧಾತಿಮಾತರಮಬ್ರವಿ.
‘ಅಲಙ್ಕರೋಥ ಮಂ ಖಿಪ್ಪಂ, ಸಖಿಯೋ ಚಾಲಙ್ಕರೋನ್ತು [ಚ ಕರೋನ್ತು (ಸೀ. ಪೀ.)] ಮೇ;
ಸುವೇ ಪನ್ನರಸೋ ದಿಬ್ಯೋ, ಗಚ್ಛಂ ಇಸ್ಸರಸನ್ತಿಕೇ’ [ಪಿತುಸ್ಸ ಸನ್ತಿಕೇ (ಸ್ಯಾ.)].
ತಸ್ಸಾ ¶ ಮಾಲ್ಯಂ ಅಭಿಹರಿಂಸು, ಚನ್ದನಞ್ಚ ಮಹಾರಹಂ;
ಮಣಿಸಙ್ಖಮುತ್ತಾರತನಂ, ನಾನಾರತ್ತೇ ಚ ಅಮ್ಬರೇ.
ತಞ್ಚ ¶ ಸೋವಣ್ಣಯೇ [ಸೋಣ್ಣಮಯೇ (ಕ.)] ಪೀಠೇ, ನಿಸಿನ್ನಂ ಬಹುಕಿತ್ಥಿಯೋ;
ಪರಿಕಿರಿಯ ಪಸೋಭಿಂಸು [ಅಸೋಭಿಂಸು (ಸೀ. ಸ್ಯಾ. ಪೀ.)], ರುಚಂ ರುಚಿರವಣ್ಣಿನಿಂ.
ಸಾ ಚ ಸಖಿಮಜ್ಝಗತಾ, ಸಬ್ಬಾಭರಣಭೂಸಿತಾ;
ಸತೇರತಾ ¶ ಅಬ್ಭಮಿವ, ಚನ್ದಕಂ ಪಾವಿಸೀ ರುಚಾ.
ಉಪಸಙ್ಕಮಿತ್ವಾ ವೇದೇಹಂ, ವನ್ದಿತ್ವಾ ವಿನಯೇ ರತಂ;
ಸುವಣ್ಣಖಚಿತೇ [ಸುವಣ್ಣವಿಕತೇ (ಸೀ. ಪೀ.)] ಪೀಠೇ, ಏಕಮನ್ತಂ ಉಪಾವಿಸಿ’’.
ತಞ್ಚ ದಿಸ್ವಾನ ವೇದೇಹೋ, ಅಚ್ಛರಾನಂವ ಸಙ್ಗಮಂ;
ರುಚಂ ಸಖಿಮಜ್ಝಗತಂ, ಇದಂ ವಚನಮಬ್ರವಿ.
‘‘ಕಚ್ಚಿ ರಮಸಿ ಪಾಸಾದೇ, ಅನ್ತೋಪೋಕ್ಖರಣಿಂ ಪತಿ;
ಕಚ್ಚಿ ಬಹುವಿಧಂ ಖಜ್ಜಂ, ಸದಾ ಅಭಿಹರನ್ತಿ ತೇ.
‘‘ಕಚ್ಚಿ ಬಹುವಿಧಂ ಮಾಲ್ಯಂ, ಓಚಿನಿತ್ವಾ ಕುಮಾರಿಯೋ;
ಘರಕೇ ಕರೋಥ ಪಚ್ಚೇಕಂ, ಖಿಡ್ಡಾರತಿರತಾ ಮುಹುಂ [ಅಹು (ಸ್ಯಾ. ಕ.)].
‘‘ಕೇನ ವಾ ವಿಕಲಂ ತುಯ್ಹಂ, ಕಿಂ ಖಿಪ್ಪಂ ಆಹರನ್ತು ತೇ;
ಮನೋಕರಸ್ಸು ಕುಡ್ಡಮುಖೀ [ಕುಟ್ಟಮುಖೀ (ಸೀ. ಪೀ.)], ಅಪಿ ಚನ್ದಸಮಮ್ಹಿಪಿ’’ [ಅಪಿ ಚನ್ದಸಮಮ್ಪಿ ತೇ (ಕ.)].
ವೇದೇಹಸ್ಸ ವಚೋ ಸುತ್ವಾ, ರುಚಾ ಪಿತರಮಬ್ರವಿ;
‘‘ಸಬ್ಬಮೇತಂ ಮಹಾರಾಜ, ಲಬ್ಭತಿಸ್ಸರಸನ್ತಿಕೇ.
‘‘ಸುವೇ ಪನ್ನರಸೋ ದಿಬ್ಯೋ, ಸಹಸ್ಸಂ ಆಹರನ್ತು ಮೇ;
ಯಥಾದಿನ್ನಞ್ಚ ದಸ್ಸಾಮಿ, ದಾನಂ ಸಬ್ಬವನೀಸ್ವಹಂ’’ [ಸಬ್ಬವಣೀಸ್ವಹಂ (ಸ್ಯಾ. ಕ.)].
ರುಚಾಯ ವಚನಂ ಸುತ್ವಾ, ರಾಜಾ ಅಙ್ಗತಿ ಮಬ್ರವಿ;
‘‘ಬಹುಂ ವಿನಾಸಿತಂ ವಿತ್ತಂ, ನಿರತ್ಥಂ ಅಫಲಂ ತಯಾ.
‘‘ಉಪೋಸಥೇ ವಸಂ ನಿಚ್ಚಂ, ಅನ್ನಪಾನಂ ನ ಭುಞ್ಜಸಿ;
ನಿಯತೇತಂ ಅಭುತ್ತಬ್ಬಂ, ನತ್ಥಿ ಪುಞ್ಞಂ ಅಭುಞ್ಜತೋ’’.
‘‘ಬೀಜಕೋಪಿ ಹಿ ಸುತ್ವಾನ, ತದಾ ಕಸ್ಸಪಭಾಸಿತಂ;
ಪಸ್ಸಸನ್ತೋ ¶ ಮುಹುಂ ಉಣ್ಹಂ, ರುದಂ ಅಸ್ಸೂನಿ ವತ್ತಯಿ.
‘‘ಯಾವ ¶ ರುಚೇ ಜೀವಮಾನಾ [ಜೀವಸಿನೋ (ಸೀ. ಪೀ.)], ಮಾ ಭತ್ತಮಪನಾಮಯಿ;
ನತ್ಥಿ ಭದ್ದೇ ಪರೋ ಲೋಕೋ, ಕಿಂ ನಿರತ್ಥಂ ವಿಹಞ್ಞಸಿ’’.
ವೇದೇಹಸ್ಸ ವಚೋ ಸುತ್ವಾ, ರುಚಾ ರುಚಿರವಣ್ಣಿನೀ;
ಜಾನಂ ಪುಬ್ಬಾಪರಂ ಧಮ್ಮಂ, ಪಿತರಂ ಏತದಬ್ರವಿ.
‘‘ಸುತಮೇವ ¶ ಪುರೇ ಆಸಿ, ಸಕ್ಖಿ [ಪಚ್ಚಕ್ಖಂ (ಕ.)] ದಿಟ್ಠಮಿದಂ ಮಯಾ;
ಬಾಲೂಪಸೇವೀ ಯೋ ಹೋತಿ, ಬಾಲೋವ ಸಮಪಜ್ಜಥ.
‘‘ಮೂಳ್ಹೋ ಹಿ ಮೂಳ್ಹಮಾಗಮ್ಮ, ಭಿಯ್ಯೋ ಮೋಹಂ ನಿಗಚ್ಛತಿ;
ಪತಿರೂಪಂ ಅಲಾತೇನ, ಬೀಜಕೇನ ಚ ಮುಯ್ಹಿತುಂ.
‘‘ತ್ವಞ್ಚ ದೇವಾಸಿ ಸಪ್ಪಞ್ಞೋ, ಧೀರೋ ಅತ್ಥಸ್ಸ ಕೋವಿದೋ;
ಕಥಂ ಬಾಲೇಹಿ ಸದಿಸಂ, ಹೀನದಿಟ್ಠಿಂ ಉಪಾಗಮಿ.
‘‘ಸಚೇಪಿ ಸಂಸಾರಪಥೇನ ಸುಜ್ಝತಿ, ನಿರತ್ಥಿಯಾ ಪಬ್ಬಜ್ಜಾ ಗುಣಸ್ಸ;
ಕೀಟೋವ ಅಗ್ಗಿಂ ಜಲಿತಂ ಅಪಾಪತಂ, ಉಪಪಜ್ಜತಿ ಮೋಹಮೂಳ್ಹೋ [ಮೋಮುಹೋ (ಸೀ. ಪೀ.)] ನಗ್ಗಭಾವಂ.
‘‘ಸಂಸಾರಸುದ್ಧೀತಿ ಪುರೇ ನಿವಿಟ್ಠಾ, ಕಮ್ಮಂ ವಿದೂಸೇನ್ತಿ ಬಹೂ ಅಜಾನಂ [ಬಹೂ ಪಜಾ (ಕ.)];
ಪುಬ್ಬೇ ಕಲೀ ದುಗ್ಗಹಿತೋವಅತ್ಥಾ [ಅತ್ಥೋ (ಕ.), ದುಗ್ಗಹಿತೋವ’ನತ್ಥಾ (?)], ದುಮ್ಮೋ ಚ ಯಾ ಬಲಿಸಾ ಅಮ್ಬುಜೋವ.
‘‘ಉಪಮಂ ತೇ ಕರಿಸ್ಸಾಮಿ, ಮಹಾರಾಜ ತವತ್ಥಿಯಾ;
ಉಪಮಾಯ ¶ ಮಿಧೇಕಚ್ಚೇ, ಅತ್ಥಂ ಜಾನನ್ತಿ ಪಣ್ಡಿತಾ.
‘‘ವಾಣಿಜಾನಂ ಯಥಾ ನಾವಾ, ಅಪ್ಪಮಾಣಭರಾ [ಅಪ್ಪಮಾಣಹರಾ (ಪೀ.)] ಗರು;
ಅತಿಭಾರಂ ಸಮಾದಾಯ, ಅಣ್ಣವೇ ಅವಸೀದತಿ.
‘‘ಏವಮೇವ ನರೋ ಪಾಪಂ, ಥೋಕಂ ಥೋಕಮ್ಪಿ ಆಚಿನಂ;
ಅತಿಭಾರಂ ಸಮಾದಾಯ, ನಿರಯೇ ಅವಸೀದತಿ.
‘‘ನ ತಾವ ಭಾರೋ ಪರಿಪೂರೋ, ಅಲಾತಸ್ಸ ಮಹೀಪತಿ;
ಆಚಿನಾತಿ ಚ ತಂ ಪಾಪಂ, ಯೇನ ಗಚ್ಛತಿ ದುಗ್ಗತಿಂ.
‘‘ಪುಬ್ಬೇವಸ್ಸ ¶ ಕತಂ ಪುಞ್ಞಂ, ಅಲಾತಸ್ಸ ಮಹೀಪತಿ;
ತಸ್ಸೇವ ದೇವ ನಿಸ್ಸನ್ದೋ, ಯಞ್ಚೇಸೋ ಲಭತೇ ಸುಖಂ.
‘‘ಖೀಯತೇ ಚಸ್ಸ ತಂ ಪುಞ್ಞಂ, ತಥಾ ಹಿ ಅಗುಣೇ ರತೋ;
ಉಜುಮಗ್ಗಂ ಅವಹಾಯ [ಅಪಾಹಾಯ (ಸೀ.)], ಕುಮ್ಮಗ್ಗಮನುಧಾವತಿ.
‘‘ತುಲಾ ಯಥಾ ಪಗ್ಗಹಿತಾ, ಓಹಿತೇ ತುಲಮಣ್ಡಲೇ;
ಉನ್ನಮೇತಿ ತುಲಾಸೀಸಂ, ಭಾರೇ ಓರೋಪಿತೇ ಸತಿ.
‘‘ಏವಮೇವ ನರೋ ಪುಞ್ಞಂ, ಥೋಕಂ ಥೋಕಮ್ಪಿ ಆಚಿನಂ;
ಸಗ್ಗಾತಿಮಾನೋ ದಾಸೋವ, ಬೀಜಕೋ ಸಾತವೇ [ಸಾಧವೇ (ಕ.)] ರತೋ.
‘‘ಯಮಜ್ಜ ಬೀಜಕೋ ದಾಸೋ, ದುಕ್ಖಂ ಪಸ್ಸತಿ ಅತ್ತನಿ;
ಪುಬ್ಬೇವಸ್ಸ [ಪುಬ್ಬೇ ತಸ್ಸ (ಸೀ. ಪೀ.)] ಕತಂ ಪಾಪಂ, ತಮೇಸೋ ಪಟಿಸೇವತಿ.
‘‘ಖೀಯತೇ ಚಸ್ಸ ತಂ ಪಾಪಂ, ತಥಾ ಹಿ ವಿನಯೇ ರತೋ;
ಕಸ್ಸಪಞ್ಚ ಸಮಾಪಜ್ಜ, ಮಾ ಹೇವುಪ್ಪಥಮಾಗಮಾ.
‘‘ಯಂ ¶ ¶ ಯಞ್ಹಿ ರಾಜ ಭಜತಿ, ಸನ್ತಂ ವಾ ಯದಿ ವಾ ಅಸಂ;
ಸೀಲವನ್ತಂ ವಿಸೀಲಂ ವಾ, ವಸಂ ತಸ್ಸೇವ ಗಚ್ಛತಿ.
‘‘ಯಾದಿಸಂ ಕುರುತೇ ಮಿತ್ತಂ, ಯಾದಿಸಂ ಚೂಪಸೇವತಿ;
ಸೋಪಿ ತಾದಿಸಕೋ ಹೋತಿ, ಸಹವಾಸೋ ಹಿ [ಸಹವಾಸೋಪಿ (ಕ.)] ತಾದಿಸೋ.
‘‘ಸೇವಮಾನೋ ಸೇವಮಾನಂ, ಸಮ್ಫುಟ್ಠೋ ಸಮ್ಫುಸಂ ಪರಂ;
ಸರೋ ದಿದ್ಧೋ ಕಲಾಪಂವ, ಅಲಿತ್ತಮುಪಲಿಮ್ಪತಿ;
ಉಪಲೇಪಭಯಾ [ಉಪಲಿಮ್ಪಭಯಾ (ಕ.)] ಧೀರೋ, ನೇವ ಪಾಪಸಖಾ ಸಿಯಾ.
‘‘ಪೂತಿಮಚ್ಛಂ ಕುಸಗ್ಗೇನ, ಯೋ ನರೋ ಉಪನಯ್ಹತಿ;
ಕುಸಾಪಿ ಪೂತಿ ವಾಯನ್ತಿ, ಏವಂ ಬಾಲೂಪಸೇವನಾ.
‘‘ತಗರಞ್ಚ ಪಲಾಸೇನ, ಯೋ ನರೋ ಉಪನಯ್ಹತಿ;
ಪತ್ತಾಪಿ ಸುರಭಿ ವಾಯನ್ತಿ, ಏವಂ ಧೀರೂಪಸೇವನಾ.
‘‘ತಸ್ಮಾ ಪತ್ತಪುಟಸ್ಸೇವ [ಫಲಪುಟಸ್ಸೇವ (ಸೀ. ಪೀ.)], ಞತ್ವಾ ಸಮ್ಪಾಕಮತ್ತನೋ;
ಅಸನ್ತೇ ನೋಪಸೇವೇಯ್ಯ, ಸನ್ತೇ ಸೇವೇಯ್ಯ ಪಣ್ಡಿತೋ;
ಅಸನ್ತೋ ನಿರಯಂ ನೇನ್ತಿ, ಸನ್ತೋ ಪಾಪೇನ್ತಿ ಸುಗ್ಗತಿಂ’’.
ಅಹಮ್ಪಿ ¶ ಜಾತಿಯೋ ಸತ್ತ, ಸರೇ ಸಂಸರಿತತ್ತನೋ;
ಅನಾಗತಾಪಿ ಸತ್ತೇವ, ಯಾ ಗಮಿಸ್ಸಂ ಇತೋ ಚುತಾ.
‘‘ಯಾ ಮೇ ಸಾ ಸತ್ತಮೀ ಜಾತಿ, ಅಹು ಪುಬ್ಬೇ ಜನಾಧಿಪ;
ಕಮ್ಮಾರಪುತ್ತೋ ಮಗಧೇಸು, ಅಹುಂ ರಾಜಗಹೇ ಪುರೇ.
‘‘ಪಾಪಂ ಸಹಾಯಮಾಗಮ್ಮ, ಬಹುಂ ಪಾಪಂ ಕತಂ ಮಯಾ;
ಪರದಾರಸ್ಸ ಹೇಠೇನ್ತೋ, ಚರಿಮ್ಹಾ ಅಮರಾ ವಿಯ.
‘‘ತಂ ¶ ಕಮ್ಮಂ ನಿಹಿತಂ ಅಟ್ಠಾ, ಭಸ್ಮಚ್ಛನ್ನೋವ ಪಾವಕೋ;
ಅಥ ಅಞ್ಞೇಹಿ ಕಮ್ಮೇಹಿ, ಅಜಾಯಿಂ ವಂಸಭೂಮಿಯಂ.
‘‘ಕೋಸಮ್ಬಿಯಂ ಸೇಟ್ಠಿಕುಲೇ, ಇದ್ಧೇ ಫೀತೇ ಮಹದ್ಧನೇ;
ಏಕಪುತ್ತೋ ಮಹಾರಾಜ, ನಿಚ್ಚಂ ಸಕ್ಕತಪೂಜಿತೋ.
‘‘ತತ್ಥ ಮಿತ್ತಂ ಅಸೇವಿಸ್ಸಂ, ಸಹಾಯಂ ಸಾತವೇ ರತಂ;
ಪಣ್ಡಿತಂ ಸುತಸಮ್ಪನ್ನಂ, ಸೋ ಮಂ ಅತ್ಥೇ ನಿವೇಸಯಿ.
‘‘ಚಾತುದ್ದಸಿಂ ಪಞ್ಚದಸಿಂ, ಬಹುಂ ರತ್ತಿಂ ಉಪಾವಸಿಂ;
ತಂ ಕಮ್ಮಂ ನಿಹಿತಂ ಅಟ್ಠಾ, ನಿಧೀವ ಉದಕನ್ತಿಕೇ.
‘‘ಅಥ ಪಾಪಾನ ಕಮ್ಮಾನಂ, ಯಮೇತಂ ಮಗಧೇ ಕತಂ;
ಫಲಂ ಪರಿಯಾಗ ಮಂ [ಪರಿಯಾಗ ತಂ (ಸೀ.), ಪರಿಯಾಗತಂ (ಸ್ಯಾ. ಪೀ.)] ಪಚ್ಛಾ, ಭುತ್ವಾ ದುಟ್ಠವಿಸಂ ಯಥಾ.
‘‘ತತೋ ¶ ಚುತಾಹಂ ವೇದೇಹ, ರೋರುವೇ ನಿರಯೇ ಚಿರಂ;
ಸಕಮ್ಮುನಾ ಅಪಚ್ಚಿಸ್ಸಂ, ತಂ ಸರಂ ನ ಸುಖಂ ಲಭೇ.
‘‘ಬಹುವಸ್ಸಗಣೇ ತತ್ಥ, ಖೇಪಯಿತ್ವಾ ಬಹುಂ ದುಖಂ;
ಭಿನ್ನಾಗತೇ [ಭೇಣ್ಣಾಕಟೇ (ಸೀ. ಪೀ.)] ಅಹುಂ ರಾಜ, ಛಗಲೋ ಉದ್ಧತಪ್ಫಲೋ [ಛಕಲೋ ಉದ್ಧಿತಪ್ಫಲೋ (ಸೀ. ಪೀ.)].
‘‘ಸಾತಪುತ್ತಾ ಮಯಾ ವೂಳ್ಹಾ, ಪಿಟ್ಠಿಯಾ ಚ ರಥೇನ ಚ;
ತಸ್ಸ ಕಮ್ಮಸ್ಸ ನಿಸ್ಸನ್ದೋ, ಪರದಾರಗಮನಸ್ಸ ಮೇ.
‘‘ತತೋ ಚುತಾಹಂ ವೇದೇಹ, ಕಪಿ ಆಸಿಂ ಬ್ರಹಾವನೇ;
ನಿಲುಞ್ಚಿತಫಲೋ [ನಿಲಿಚ್ಛಿತಫಲೋ (ಸೀ. ಪೀ.)] ಯೇವ, ಯೂಥಪೇನ ಪಗಬ್ಭಿನಾ;
ತಸ್ಸ ಕಮ್ಮಸ್ಸ ನಿಸ್ಸನ್ದೋ, ಪರದಾರಗಮನಸ್ಸ ಮೇ.
‘‘ತತೋ ¶ ಚುತಾಹಂ ವೇದೇಹ, ದಸ್ಸನೇಸು [ದಸಣ್ಣೇಸು (ಸೀ. ಪೀ.), ದಸನ್ನೇಸು (ಸ್ಯಾ.)] ಪಸೂ ಅಹುಂ;
ನಿಲುಞ್ಚಿತೋ ¶ ಜವೋ ಭದ್ರೋ, ಯೋಗ್ಗಂ ವೂಳ್ಹಂ ಚಿರಂ ಮಯಾ;
ತಸ್ಸ ಕಮ್ಮಸ್ಸ ನಿಸ್ಸನ್ದೋ, ಪರದಾರಗಮನಸ್ಸ ಮೇ.
‘‘ತತೋ ಚುತಾಹಂ ವೇದೇಹ, ವಜ್ಜೀಸು ಕುಲಮಾಗಮಾ;
ನೇವಿತ್ಥೀ ನ ಪುಮಾ ಆಸಿಂ, ಮನುಸ್ಸತ್ತೇ ಸುದುಲ್ಲಭೇ;
ತಸ್ಸ ಕಮ್ಮಸ್ಸ ನಿಸ್ಸನ್ದೋ, ಪರದಾರಗಮನಸ್ಸ ಮೇ.
‘‘ತತೋ ಚುತಾಹಂ ವೇದೇಹ, ಅಜಾಯಿಂ ನನ್ದನೇ ವನೇ;
ಭವನೇ ತಾವತಿಂಸಾಹಂ, ಅಚ್ಛರಾ ಕಾಮವಣ್ಣಿನೀ [ವರವಣ್ಣಿನೀ (ಕ.)].
‘‘ವಿಚಿತ್ತವತ್ಥಾಭರಣಾ, ಆಮುತ್ತಮಣಿಕುಣ್ಡಲಾ;
ಕುಸಲಾ ನಚ್ಚಗೀತಸ್ಸ, ಸಕ್ಕಸ್ಸ ಪರಿಚಾರಿಕಾ.
‘‘ತತ್ಥ ಠಿತಾಹಂ ವೇದೇಹ, ಸರಾಮಿ ಜಾತಿಯೋ ಇಮಾ;
ಅನಾಗತಾಪಿ ಸತ್ತೇವ, ಯಾ ಗಮಿಸ್ಸಂ ಇತೋ ಚುತಾ.
‘‘ಪರಿಯಾಗತಂ ತಂ ಕುಸಲಂ, ಯಂ ಮೇ ಕೋಸಮ್ಬಿಯಂ ಕತಂ;
ದೇವೇ ಚೇವ ಮನುಸ್ಸೇ ಚ, ಸನ್ಧಾವಿಸ್ಸಂ ಇತೋ ಚುತಾ.
‘‘ಸತ್ತ ಜಚ್ಚೋ [ಜಚ್ಚಾ (ಸ್ಯಾ. ಪೀ.)] ಮಹಾರಾಜ, ನಿಚ್ಚಂ ಸಕ್ಕತಪೂಜಿತಾ;
ಥೀಭಾವಾಪಿ ನ ಮುಚ್ಚಿಸ್ಸಂ, ಛಟ್ಠಾ ನಿಗತಿಯೋ [ಛಟ್ಠಾ ಗತಿಯೋ (ಸ್ಯಾ.)] ಇಮಾ.
‘‘ಸತ್ತಮೀ ಚ ಗತಿ ದೇವ, ದೇವಪುತ್ತೋ ಮಹಿದ್ಧಿಕೋ;
ಪುಮಾ ದೇವೋ ಭವಿಸ್ಸಾಮಿ [ಭವಿಸ್ಸತಿ (ಕ.)], ದೇವಕಾಯಸ್ಮಿಮುತ್ತಮೋ.
‘‘ಅಜ್ಜಾಪಿ ಸನ್ತಾನಮಯಂ, ಮಾಲಂ ಗನ್ಥೇನ್ತಿ ನನ್ದನೇ;
ದೇವಪುತ್ತೋ ಜವೋ ನಾಮ, ಯೋ ಮೇ ಮಾಲಂ ಪಟಿಚ್ಛತಿ.
‘‘ಮುಹುತ್ತೋ ¶ ವಿಯ ಸೋ ದಿಬ್ಯೋ, ಇಧ ವಸ್ಸಾನಿ ಸೋಳಸ;
ರತ್ತಿನ್ದಿವೋ ¶ ಚ ಸೋ ದಿಬ್ಯೋ, ಮಾನುಸಿಂ ಸರದೋಸತಂ.
‘‘ಇತಿ ಕಮ್ಮಾನಿ ಅನ್ವೇನ್ತಿ, ಅಸಙ್ಖೇಯ್ಯಾಪಿ ಜಾತಿಯೋ;
ಕಲ್ಯಾಣಂ ಯದಿ ವಾ ಪಾಪಂ, ನ ಹಿ ಕಮ್ಮಂ ವಿನಸ್ಸತಿ [ಪನಸ್ಸತಿ (ಸೀ. ಪೀ.)].
‘‘ಯೋ ¶ ಇಚ್ಛೇ ಪುರಿಸೋ ಹೋತುಂ, ಜಾತಿಂ ಜಾತಿಂ [ಜಾತಿಜಾತಿಂ (ಸೀ. ಪೀ.)] ಪುನಪ್ಪುನಂ;
ಪರದಾರಂ ವಿವಜ್ಜೇಯ್ಯ, ಧೋತಪಾದೋವ ಕದ್ದಮಂ.
‘‘ಯಾ ಇಚ್ಛೇ ಪುರಿಸೋ ಹೋತುಂ, ಜಾತಿಂ ಜಾತಿಂ ಪುನಪ್ಪುನಂ;
ಸಾಮಿಕಂ ಅಪಚಾಯೇಯ್ಯ, ಇನ್ದಂವ ಪರಿಚಾರಿಕಾ.
‘‘ಯೋ ಇಚ್ಛೇ ದಿಬ್ಯಭೋಗಞ್ಚ, ದಿಬ್ಬಮಾಯುಂ ಯಸಂ ಸುಖಂ;
ಪಾಪಾನಿ ಪರಿವಜ್ಜೇತ್ವಾ [ಪರಿವಜ್ಜೇಯ್ಯ (ಕ.)], ತಿವಿಧಂ ಧಮ್ಮಮಾಚರೇ.
‘‘ಕಾಯೇನ ವಾಚಾ ಮನಸಾ, ಅಪ್ಪಮತ್ತೋ ವಿಚಕ್ಖಣೋ;
ಅತ್ತನೋ ಹೋತಿ ಅತ್ಥಾಯ, ಇತ್ಥೀ ವಾ ಯದಿ ವಾ ಪುಮಾ.
‘‘ಯೇ ಕೇಚಿಮೇ ಮಾನುಜಾ ಜೀವಲೋಕೇ, ಯಸಸ್ಸಿನೋ ಸಬ್ಬಸಮನ್ತಭೋಗಾ;
ಅಸಂಸಯಂ ತೇಹಿ ಪುರೇ ಸುಚಿಣ್ಣಂ, ಕಮ್ಮಸ್ಸಕಾಸೇ ಪುಥು ಸಬ್ಬಸತ್ತಾ.
‘‘ಇಙ್ಘಾನುಚಿನ್ತೇಸಿ ಸಯಮ್ಪಿ ದೇವ, ಕುತೋನಿದಾನಾ ತೇ ಇಮಾ ಜನಿನ್ದ;
ಯಾ ತೇ ಇಮಾ ಅಚ್ಛರಾಸನ್ನಿಕಾಸಾ, ಅಲಙ್ಕತಾ ಕಞ್ಚನಜಾಲಛನ್ನಾ’’.
ಇಚ್ಚೇವಂ ಪಿತರಂ ಕಞ್ಞಾ, ರುಚಾ ತೋಸೇಸಿ ಅಙ್ಗತಿಂ;
ಮೂಳ್ಹಸ್ಸ ¶ ಮಗ್ಗಮಾಚಿಕ್ಖಿ, ಧಮ್ಮಮಕ್ಖಾಸಿ ಸುಬ್ಬತಾ.
ಅಥಾಗಮಾ ಬ್ರಹ್ಮಲೋಕಾ, ನಾರದೋ ಮಾನುಸಿಂ ಪಜಂ;
ಜಮ್ಬುದೀಪಂ ಅವೇಕ್ಖನ್ತೋ, ಅದ್ದಾ ರಾಜಾನಮಙ್ಗತಿಂ.
‘‘ತತೋ ಪತಿಟ್ಠಾ ಪಾಸಾದೇ, ವೇದೇಹಸ್ಸ ಪುರತ್ಥತೋ [ಪುರಕ್ಖತೋ (ಸ್ಯಾ. ಕ.)];
ತಞ್ಚ ದಿಸ್ವಾನಾನುಪ್ಪತ್ತಂ, ರುಚಾ ಇಸಿಮವನ್ದಥ.
‘‘ಅಥಾಸನಮ್ಹಾ ಓರುಯ್ಹ, ರಾಜಾ ಬ್ಯಥಿತಮಾನಸೋ [ಬ್ಯಮ್ಹಿತಮಾನಸೋ (ಸೀ. ಸ್ಯಾ. ಪೀ.)];
ನಾರದಂ ಪರಿಪುಚ್ಛನ್ತೋ, ಇದಂ ವಚನಮಬ್ರವಿ.
‘‘ಕುತೋ ¶ ನು ಆಗಚ್ಛಸಿ ದೇವವಣ್ಣಿ, ಓಭಾಸಯಂ ಸಬ್ಬದಿಸಾ [ಸಂವರಿಂ (ಸೀ. ಪೀ.)] ಚನ್ದಿಮಾವ;
ಅಕ್ಖಾಹಿ ಮೇ ಪುಚ್ಛಿತೋ ನಾಮಗೋತ್ತಂ, ಕಥಂ ತಂ ಜಾನನ್ತಿ ಮನುಸ್ಸಲೋಕೇ’’.
‘‘ಅಹಞ್ಹಿ ದೇವತೋ ಇದಾನಿ ಏಮಿ, ಓಭಾಸಯಂ ಸಬ್ಬದಿಸಾ [ಸಂವರಿಂ (ಸೀ. ಪೀ.)] ಚನ್ದಿಮಾವ;
ಅಕ್ಖಾಮಿ ತೇ ಪುಚ್ಛಿತೋ ನಾಮಗೋತ್ತಂ, ಜಾನನ್ತಿ ಮಂ ನಾರದೋ ಕಸ್ಸಪೋ ಚ’’.
‘‘ಅಚ್ಛೇರರೂಪಂ ತವ [ವತ (ಸೀ. ಪೀ.)] ಯಾದಿಸಞ್ಚ, ವೇಹಾಯಸಂ ಗಚ್ಛಸಿ ತಿಟ್ಠಸೀ ಚ;
ಪುಚ್ಛಾಮಿ ತಂ ನಾರದ ಏತಮತ್ಥಂ, ಅಥ ಕೇನ ವಣ್ಣೇನ ತವಾಯಮಿದ್ಧಿ’’.
‘‘ಸಚ್ಚಞ್ಚ ¶ ¶ ಧಮ್ಮೋ ಚ ದಮೋ ಚ ಚಾಗೋ, ಗುಣಾ ಮಮೇತೇ ಪಕತಾ ಪುರಾಣಾ;
ತೇಹೇವ ಧಮ್ಮೇಹಿ ಸುಸೇವಿತೇಹಿ, ಮನೋಜವೋ ಯೇನ ಕಾಮಂ ಗತೋಸ್ಮಿ’’.
‘‘ಅಚ್ಛೇರಮಾಚಿಕ್ಖಸಿ ಪುಞ್ಞಸಿದ್ಧಿಂ, ಸಚೇ ಹಿ ಏತೇಹಿ [ಏತೇ ತ್ವಂ (ಸೀ. ಪೀ.)] ಯಥಾ ವದೇಸಿ;
ಪುಚ್ಛಾಮಿ ತಂ ನಾರದ ಏತಮತ್ಥಂ, ಪುಟ್ಠೋ ಚ ಮೇ ಸಾಧು ವಿಯಾಕರೋಹಿ’’.
‘‘ಪುಚ್ಛಸ್ಸು ಮಂ ರಾಜ ತವೇಸ ಅತ್ಥೋ, ಯಂ ಸಂಸಯಂ ಕುರುಸೇ ಭೂಮಿಪಾಲ;
ಅಹಂ ತಂ ನಿಸ್ಸಂಸಯತಂ ಗಮೇಮಿ, ನಯೇಹಿ ಞಾಯೇಹಿ ಚ ಹೇತುಭೀ ಚ’’.
‘‘ಪುಚ್ಛಾಮಿ ತಂ ನಾರದ ಏತಮತ್ಥಂ, ಪುಟ್ಠೋ ಚ ಮೇ ನಾರದ ಮಾ ಮುಸಾ ಭಣಿ;
ಅತ್ಥಿ ನು ದೇವಾ ಪಿತರೋ ನು ಅತ್ಥಿ, ಲೋಕೋ ಪರೋ ಅತ್ಥಿ ಜನೋ ಯಮಾಹು’’.
‘‘ಅತ್ಥೇವ ¶ ದೇವಾ ಪಿತರೋ ಚ ಅತ್ಥಿ, ಲೋಕೋ ಪರೋ ಅತ್ಥಿ ಜನೋ ಯಮಾಹು;
ಕಾಮೇಸು ಗಿದ್ಧಾ ಚ ನರಾ ಪಮೂಳ್ಹಾ, ಲೋಕಂ ಪರಂ ನ ವಿದೂ ಮೋಹಯುತ್ತಾ’’.
‘‘ಅತ್ಥೀತಿ ¶ ಚೇ ನಾರದ ಸದ್ದಹಾಸಿ, ನಿವೇಸನಂ ಪರಲೋಕೇ ಮತಾನಂ;
ಇಧೇವ ಮೇ ಪಞ್ಚ ಸತಾನಿ ದೇಹಿ, ದಸ್ಸಾಮಿ ತೇ ಪರಲೋಕೇ ಸಹಸ್ಸಂ’’.
‘‘ದಜ್ಜೇಮು ಖೋ ಪಞ್ಚ ಸತಾನಿ ಭೋತೋ, ಜಞ್ಞಾಮು ಚೇ ಸೀಲವನ್ತಂ ವದಞ್ಞುಂ [ವತಞ್ಞುಂ (ಕ.)];
ಲುದ್ದಂ ತಂ ಭೋನ್ತಂ ನಿರಯೇ ವಸನ್ತಂ, ಕೋ ಚೋದಯೇ ಪರಲೋಕೇ ಸಹಸ್ಸಂ.
‘‘ಇಧೇವ ಯೋ ಹೋತಿ ಅಧಮ್ಮಸೀಲೋ [ಅಕಮ್ಮಸೀಲೋ (ಪೀ.)], ಪಾಪಾಚಾರೋ ಅಲಸೋ ಲುದ್ದಕಮ್ಮೋ;
ನ ಪಣ್ಡಿತಾ ತಸ್ಮಿಂ ಇಣಂ ದದನ್ತಿ, ನ ಹಿ ಆಗಮೋ ಹೋತಿ ತಥಾವಿಧಮ್ಹಾ.
‘‘ದಕ್ಖಞ್ಚ ಪೋಸಂ ಮನುಜಾ ವಿದಿತ್ವಾ, ಉಟ್ಠಾನಕಂ [ಉಟ್ಠಾಹಕಂ (ಸೀ.)] ಸೀಲವನ್ತಂ ವದಞ್ಞುಂ;
ಸಯಮೇವ ಭೋಗೇಹಿ ನಿಮನ್ತಯನ್ತಿ, ಕಮ್ಮಂ ಕರಿತ್ವಾ ಪುನ ಮಾಹರೇಸಿ’’.
‘‘ಇತೋ ಚುತೋ [ಗತೋ (ಸೀ. ಪೀ.)] ದಕ್ಖಸಿ ತತ್ಥ ರಾಜ, ಕಾಕೋಲಸಙ್ಘೇಹಿ ವಿಕಸ್ಸಮಾನಂ [ಕಾಕೋಳಸಙ್ಘೇಹಿಪಿ ಕಡ್ಢಮಾನಂ (ಸೀ. ಪೀ.)];
ತಂ ಖಜ್ಜಮಾನಂ ನಿರಯೇ ವಸನ್ತಂ, ಕಾಕೇಹಿ ಗಿಜ್ಝೇಹಿ ಚ ಸೇನಕೇಹಿ [ಸೋಣಕೇಹಿ (ಸ್ಯಾ. ಕ.)];
ಸಞ್ಛಿನ್ನಗತ್ತಂ ¶ ರುಹಿರಂ ಸವನ್ತಂ, ಕೋ ಚೋದಯೇ ಪರಲೋಕೇ ಸಹಸ್ಸಂ.
‘‘ಅನ್ಧಂತಮಂ ¶ ತತ್ಥ ನ ಚನ್ದಸೂರಿಯಾ, ನಿರಯೋ ಸದಾ ತುಮುಲೋ ಘೋರರೂಪೋ;
ಸಾ ನೇವ ರತ್ತೀ ನ ದಿವಾ ಪಞ್ಞಾಯತಿ, ತಥಾವಿಧೇ ಕೋ ವಿಚರೇ ಧನತ್ಥಿಕೋ.
‘‘ಸಬಲೋ ಚ ಸಾಮೋ ಚ ದುವೇ ಸುವಾನಾ, ಪವದ್ಧಕಾಯಾ ಬಲಿನೋ ಮಹನ್ತಾ;
ಖಾದನ್ತಿ ದನ್ತೇಹಿ ಅಯೋಮಯೇಹಿ, ಇತೋ ಪಣುನ್ನಂ ಪರಲೋಕಪತ್ತಂ [ಪರಲೋಕೇ ಪತನ್ತಂ (ಕ.)].
‘‘ತಂ ಖಜ್ಜಮಾನಂ ನಿರಯೇ ವಸನ್ತಂ, ಲುದ್ದೇಹಿ ವಾಳೇಹಿ ಅಘಮ್ಮಿಗೇಹಿ ಚ;
ಸಞ್ಛಿನ್ನಗತ್ತಂ ರುಹಿರಂ ಸವನ್ತಂ, ಕೋ ಚೋದಯೇ ಪರಲೋಕೇ ಸಹಸ್ಸಂ.
‘‘ಉಸೂಹಿ ಸತ್ತೀಹಿ ಚ ಸುನಿಸಿತಾಹಿ, ಹನನ್ತಿ ವಿಜ್ಝನ್ತಿ ಚ ಪಚ್ಚಮಿತ್ತಾ [ಪೋಥಯನ್ತಿ (ಕ.)];
ಕಾಳೂಪಕಾಳಾ ನಿರಯಮ್ಹಿ ಘೋರೇ, ಪುಬ್ಬೇ ನರಂ ದುಕ್ಕಟಕಮ್ಮಕಾರಿಂ.
‘‘ತಂ ¶ ಹಞ್ಞಮಾನಂ ನಿರಯೇ ವಜನ್ತಂ, ಕುಚ್ಛಿಸ್ಮಿಂ ಪಸ್ಸಸ್ಮಿಂ ವಿಪ್ಫಾಲಿತೂದರಂ;
ಸಞ್ಛಿನ್ನಗತ್ತಂ ¶ ರುಹಿರಂ ಸವನ್ತಂ, ಕೋ ಚೋದಯೇ ಪರಲೋಕೇ ಸಹಸ್ಸಂ.
‘‘ಸತ್ತೀ ಉಸೂ ತೋಮರಭಿಣ್ಡಿವಾಲಾ, ವಿವಿಧಾವುಧಾ ವಸ್ಸನ್ತಿ ತತ್ಥ ದೇವಾ;
ಪತನ್ತಿ ಅಙ್ಗಾರಮಿವಚ್ಚಿಮನ್ತೋ, ಸಿಲಾಸನೀ ವಸ್ಸತಿ ಲುದ್ದಕಮ್ಮೇ.
‘‘ಉಣ್ಹೋ ಚ ವಾತೋ ನಿರಯಮ್ಹಿ ದುಸ್ಸಹೋ, ನ ತಮ್ಹಿ ಸುಖಂ ಲಬ್ಭತಿ [ಸೇತಿ (ಕ.)] ಇತ್ತರಮ್ಪಿ;
ತಂ ತಂ ವಿಧಾವನ್ತಮಲೇನಮಾತುರಂ, ಕೋ ಚೋದಯೇ ಪರಲೋಕೇ ಸಹಸ್ಸಂ.
‘‘ಸನ್ಧಾವಮಾನಮ್ಪಿ ¶ [ಸನ್ಧಾವಮಾನಂ ತಂ (ಸೀ. ಪೀ.)] ರಥೇಸು ಯುತ್ತಂ, ಸಜೋತಿಭೂತಂ ಪಥವಿಂ ಕಮನ್ತಂ;
ಪತೋದಲಟ್ಠೀಹಿ ಸುಚೋದಯನ್ತಂ [ಸುಚೋದಿಯನ್ತಂ (ಸೀ. ಪೀ.)], ಕೋ ಚೋದಯೇ ಪರಲೋಕೇ ಸಹಸ್ಸಂ.
‘‘ತಮಾರುಹನ್ತಂ ಖುರಸಞ್ಚಿತಂ ಗಿರಿಂ, ವಿಭಿಂಸನಂ ಪಜ್ಜಲಿತಂ ಭಯಾನಕಂ;
ಸಞ್ಛಿನ್ನಗತ್ತಂ ರುಹಿರಂ ಸವನ್ತಂ, ಕೋ ಚೋದಯೇ ಪರಲೋಕೇ ಸಹಸ್ಸಂ.
‘‘ತಮಾರುಹನ್ತಂ ಪಬ್ಬತಸನ್ನಿಕಾಸಂ, ಅಙ್ಗಾರರಾಸಿಂ ಜಲಿತಂ ಭಯಾನಕಂ;
ಸುದಡ್ಢಗತ್ತಂ ¶ ಕಪಣಂ ರುದನ್ತಂ, ಕೋ ಚೋದಯೇ ಪರಲೋಕೇ ಸಹಸ್ಸಂ.
‘‘ಅಬ್ಭಕೂಟಸಮಾ ಉಚ್ಚಾ, ಕಣ್ಟಕನಿಚಿತಾ [ಕಣ್ಟಕಾಪಚಿತಾ (ಸೀ. ಪೀ.), ಕಣ್ಟಕಾಹಿಚಿತಾ (ಸ್ಯಾ.)] ದುಮಾ;
ಅಯೋಮಯೇಹಿ ತಿಕ್ಖೇಹಿ, ನರಲೋಹಿತಪಾಯಿಭಿ.
‘‘ತಮಾರುಹನ್ತಿ ನಾರಿಯೋ, ನರಾ ಚ ಪರದಾರಗೂ;
ಚೋದಿತಾ ಸತ್ತಿಹತ್ಥೇಹಿ, ಯಮನಿದ್ದೇಸಕಾರಿಭಿ.
‘‘ತಮಾರುಹನ್ತಂ ನಿರಯಂ, ಸಿಮ್ಬಲಿಂ ರುಹರಿಮಕ್ಖಿತಂ;
ವಿದಡ್ಢಕಾಯಂ [ವಿದುಟ್ಠಕಾಯಂ (ಪೀ.)] ವಿತಚಂ, ಆತುರಂ ಗಾಳ್ಹವೇದನಂ.
‘‘ಪಸ್ಸಸನ್ತಂ ಮುಹುಂ ಉಣ್ಹಂ, ಪುಬ್ಬಕಮ್ಮಾಪರಾಧಿಕಂ;
ದುಮಗ್ಗೇ ವಿತಚಂ ಗತ್ತಂ [ದುಮಗ್ಗವಿಟಪಗ್ಗತಂ (ಸೀ.)], ಕೋ ತಂ ಯಾಚೇಯ್ಯ ತಂ ಧನಂ.
‘‘ಅಬ್ಭಕೂಟಸಮಾ ಉಚ್ಚಾ, ಅಸಿಪತ್ತಾಚಿತಾ ದುಮಾ;
ಅಯೋಮಯೇಹಿ ತಿಕ್ಖೇಹಿ, ನರಲೋಹಿತಪಾಯಿಭಿ.
‘‘ತಮಾರುಹನ್ತಂ ಅಸಿಪತ್ತಪಾದಪಂ, ಅಸೀಹಿ ತಿಕ್ಖೇಹಿ ಚ ಛಿಜ್ಜಮಾನಂ [ಪಭಿಜ್ಜಮಾನಂ (ಕ.)];
ಸಞ್ಛಿನ್ನಗತ್ತಂ ರುಹಿರಂ ಸವನ್ತಂ, ಕೋ ಚೋದಯೇ ಪರಲೋಕೇ ಸಹಸ್ಸಂ.
‘‘ತತೋ ¶ ನಿಕ್ಖನ್ತಮತ್ತಂ ತಂ, ಅಸಿಪತ್ತಾಚಿತಾ ದುಮಾ [ಅಸಿಪತ್ತನಿರಯಾ ದುಖಾ (ಸೀ. ಪೀ.)];
ಸಮ್ಪತಿತಂ ವೇತರಣಿಂ, ಕೋ ತಂ ಯಾಚೇಯ್ಯ ತಂ ಧನಂ.
‘‘ಖರಾ ಖರೋದಕಾ [ಖಾರೋದಿಕಾ (ಸೀ.), ಖರೋದಿಕಾ (ಪೀ.)] ತತ್ತಾ, ದುಗ್ಗಾ ವೇತರಣೀ ನದೀ;
ಅಯೋಪೋಕ್ಖರಸಞ್ಛನ್ನಾ, ತಿಕ್ಖಾ ಪತ್ತೇಹಿ ಸನ್ದತಿ.
‘‘ತತ್ಥ ¶ ಸಞ್ಛಿನ್ನಗತ್ತಂ ತಂ, ವುಯ್ಹನ್ತಂ ರುಹಿರಮಕ್ಖಿತಂ;
ವೇತರಞ್ಞೇ ಅನಾಲಮ್ಬೇ, ಕೋ ತಂ ಯಾಚೇಯ್ಯ ತಂ ಧನಂ’’.
‘‘ವೇಧಾಮಿ ¶ ರುಕ್ಖೋ ವಿಯ ಛಿಜ್ಜಮಾನೋ, ದಿಸಂ ನ ಜಾನಾಮಿ ಪಮೂಳ್ಹಸಞ್ಞೋ;
ಭಯಾನುತಪ್ಪಾಮಿ ಮಹಾ ಚ ಮೇ ಭಯಾ, ಸುತ್ವಾನ ಕಥಾ [ಗಾಥಾ (ಸೀ. ಸ್ಯಾ. ಪೀ.)] ತವ ಭಾಸಿತಾ ಇಸೇ.
‘‘ಆದಿತ್ತೇ ವಾರಿಮಜ್ಝಂವ, ದೀಪಂವೋಘೇ ಮಹಣ್ಣವೇ;
ಅನ್ಧಕಾರೇವ ಪಜ್ಜೋತೋ, ತ್ವಂ ನೋಸಿ ಸರಣಂ ಇಸೇ.
‘‘ಅತ್ಥಞ್ಚ ಧಮ್ಮಂ ಅನುಸಾಸ ಮಂ ಇಸೇ, ಅತೀತಮದ್ಧಾ ಅಪರಾಧಿತಂ ಮಯಾ;
ಆಚಿಕ್ಖ ಮೇ ನಾರದ ಸುದ್ಧಿಮಗ್ಗಂ, ಯಥಾ ಅಹಂ ನೋ ನಿರಯಂ ಪತೇಯ್ಯಂ’’.
‘‘ಯಥಾ ಅಹು ಧತರಟ್ಠೋ ( ) [ಏತ್ಥ ಕಿಞ್ಚಿ ಊನಂ ವಿಯ ದಿಸ್ಸತಿ], ವೇಸ್ಸಾಮಿತ್ತೋ ಅಟ್ಠಕೋ ಯಾಮತಗ್ಗಿ;
ಉಸಿನ್ದರೋ ಚಾಪಿ ಸಿವೀ ಚ ರಾಜಾ, ಪರಿಚಾರಕಾ ಸಮಣಬ್ರಾಹ್ಮಣಾನಂ.
‘‘ಏತೇ ಚಞ್ಞೇ ಚ ರಾಜಾನೋ, ಯೇ ಸಗ್ಗವಿಸಯಂ [ಸಕ್ಕವಿಸಯಂ (ಸೀ. ಪೀ.)] ಗತಾ;
ಅಧಮ್ಮಂ ಪರಿವಜ್ಜೇತ್ವಾ, ಧಮ್ಮಂ ಚರ ಮಹೀಪತಿ.
‘‘ಅನ್ನಹತ್ಥಾ ಚ ತೇ ಬ್ಯಮ್ಹೇ, ಘೋಸಯನ್ತು ಪುರೇ ತವ;
ಕೋ ಛಾತೋ ಕೋ ಚ ತಸಿತೋ, ಕೋ ಮಾಲಂ ಕೋ ವಿಲೇಪನಂ;
ನಾನಾರತ್ತಾನಂ ವತ್ಥಾನಂ, ಕೋ ನಗ್ಗೋ ಪರಿದಹಿಸ್ಸತಿ.
‘‘ಕೋ ¶ ¶ ಪನ್ಥೇ ಛತ್ತಮಾನೇತಿ [ಛತ್ತ’ಮಾದೇತಿ (ಸೀ. ಸ್ಯಾ. ಪೀ.)], ಪಾದುಕಾ ಚ ಮುದೂ ಸುಭಾ;
ಇತಿ ಸಾಯಞ್ಚ ಪಾತೋ ಚ, ಘೋಸಯನ್ತು ಪುರೇ ತವ.
‘‘ಜಿಣ್ಣಂ ಪೋಸಂ ಗವಸ್ಸಞ್ಚ, ಮಾಸ್ಸು ಯುಞ್ಜ ಯಥಾ ಪುರೇ;
ಪರಿಹಾರಞ್ಚ ದಜ್ಜಾಸಿ, ಅಧಿಕಾರಕತೋ ಬಲೀ.
‘‘ಕಾಯೋ ತೇ ರಥಸಞ್ಞಾತೋ, ಮನೋಸಾರಥಿಕೋ ಲಹು;
ಅವಿಹಿಂಸಾಸಾರಿತಕ್ಖೋ, ಸಂವಿಭಾಗಪಟಿಚ್ಛದೋ.
‘‘ಪಾದಸಞ್ಞಮನೇಮಿಯೋ, ಹತ್ಥಸಞ್ಞಮಪಕ್ಖರೋ;
ಕುಚ್ಛಿಸಞ್ಞಮನಬ್ಭನ್ತೋ, ವಾಚಾಸಞ್ಞಮಕೂಜನೋ.
‘‘ಸಚ್ಚವಾಕ್ಯಸಮತ್ತಙ್ಗೋ, ಅಪೇಸುಞ್ಞಸುಸಞ್ಞತೋ;
ಗಿರಾಸಖಿಲನೇಲಙ್ಗೋ, ಮಿತಭಾಣಿಸಿಲೇಸಿತೋ.
‘‘ಸದ್ಧಾಲೋಭಸುಸಙ್ಖಾರೋ, ನಿವಾತಞ್ಜಲಿಕುಬ್ಬರೋ;
ಅಥದ್ಧತಾನತೀಸಾಕೋ [ಅತ್ಥದ್ಧತಾನತೀಸಾಕೋ (ಸೀ. ಪೀ.)], ಸೀಲಸಂವರನನ್ಧನೋ.
‘‘ಅಕ್ಕೋಧನಮನುಗ್ಘಾತೀ, ಧಮ್ಮಪಣ್ಡರಛತ್ತಕೋ;
ಬಾಹುಸಚ್ಚಮಪಾಲಮ್ಬೋ, ಠಿತಚಿತ್ತಮುಪಾಧಿಯೋ [ಧಿತಿಚಿತ್ತಮುಪಾಧಿಯೋ (ಕ.)].
‘‘ಕಾಲಞ್ಞುತಾಚಿತ್ತಸಾರೋ, ವೇಸಾರಜ್ಜತಿದಣ್ಡಕೋ;
ನಿವಾತವುತ್ತಿಯೋತ್ತಕೋ [ನಿವಾತವುತ್ತಿಯೋತ್ತಙ್ಗೋ (ಕ.)], ಅನತಿಮಾನಯುಗೋ ಲಹು.
‘‘ಅಲೀನಚಿತ್ತಸನ್ಥಾರೋ ¶ , ವುದ್ಧಿಸೇವೀ ರಜೋಹತೋ;
ಸತಿ ಪತೋದೋ ಧೀರಸ್ಸ, ಧಿತಿ ಯೋಗೋ ಚ ರಸ್ಮಿಯೋ.
‘‘ಮನೋ ದನ್ತಂ ಪಥಂ ನೇತಿ [ಪಥ’ನ್ವೇತಿ (ಸೀ. ಪೀ.)], ಸಮದನ್ತೇಹಿ ವಾಹಿಭಿ;
ಇಚ್ಛಾ ¶ ಲೋಭೋ ಚ ಕುಮ್ಮಗ್ಗೋ, ಉಜುಮಗ್ಗೋ ಚ ಸಂಯಮೋ.
‘‘ರೂಪೇ ಸದ್ದೇ ರಸೇ ಗನ್ಧೇ, ವಾಹನಸ್ಸ ಪಧಾವತೋ;
ಪಞ್ಞಾ ಆಕೋಟನೀ ರಾಜ, ತತ್ಥ ಅತ್ತಾವ ಸಾರಥಿ.
‘‘ಸಚೇ ಏತೇನ ಯಾನೇನ, ಸಮಚರಿಯಾ ದಳ್ಹಾ ಧಿತಿ;
ಸಬ್ಬಕಾಮದುಹೋ ರಾಜ, ನ ಜಾತು ನಿರಯಂ ವಜೇ’’.
‘‘ಅಲಾತೋ ¶ ದೇವದತ್ತೋಸಿ, ಸುನಾಮೋ ಆಸಿ ಭದ್ದಜಿ;
ವಿಜಯೋ ಸಾರಿಪುತ್ತೋಸಿ, ಮೋಗ್ಗಲ್ಲಾನೋಸಿ ಬೀಜಕೋ.
‘‘ಸುನಕ್ಖತ್ತೋ ಲಿಚ್ಛವಿಪುತ್ತೋ, ಗುಣೋ ಆಸಿ ಅಚೇಲಕೋ;
ಆನನ್ದೋ ಸಾ ರುಚಾ ಆಸಿ, ಯಾ ರಾಜಾನಂ ಪಸಾದಯಿ.
‘‘ಊರುವೇಳಕಸ್ಸಪೋ ರಾಜಾ, ಪಾಪದಿಟ್ಠಿ ತದಾ ಅಹು;
ಮಹಾಬ್ರಹ್ಮಾ ಬೋಧಿಸತ್ತೋ, ಏವಂ ಧಾರೇಥ ಜಾತಕ’’ನ್ತಿ.
ಮಹಾನಾರದಕಸ್ಸಪಜಾತಕಂ ಅಟ್ಠಮಂ.
೫೪೬. ವಿಧುರಜಾತಕಂ (೯)
ದೋಹಳಕಣ್ಡಂ
‘‘ಪಣ್ಡು ಕಿಸಿಯಾಸಿ ದುಬ್ಬಲಾ, ವಣ್ಣರೂಪಂ [ವಣ್ಣರೂಪೇ (ಕ.)] ನತವೇದಿಸಂ ಪುರೇ;
ವಿಮಲೇ ಅಕ್ಖಾಹಿ ಪುಚ್ಛಿತಾ, ಕೀದಿಸೀ ತುಯ್ಹಂ ಸರೀರವೇದನಾ’’.
‘‘ಧಮ್ಮೋ ಮನುಜೇಸು ಮಾತೀನಂ [ಮಾತಿನಂ (ಸೀ. ಪೀ.)], ದೋಹಳೋ ನಾಮ ಜನಿನ್ದ ವುಚ್ಚತಿ;
ಧಮ್ಮಾಹತಂ ¶ ನಾಗಕುಞ್ಜರ, ವಿಧುರಸ್ಸ ಹದಯಾಭಿಪತ್ಥಯೇ’’.
‘‘ಚನ್ದಂ ಖೋ ತ್ವಂ ದೋಹಳಾಯಸಿ, ಸೂರಿಯಂ ವಾ ಅಥ ವಾಪಿ ಮಾಲುತಂ;
ದುಲ್ಲಭಞ್ಹಿ [ದುಲ್ಲಭೇ (ಸೀ. ಪೀ.)] ವಿಧುರಸ್ಸ ದಸ್ಸನಂ [ದಸ್ಸನೇ (ಸೀ. ಪೀ.)], ಕೋ ವಿಧುರಮಿಧ ಮಾನಯಿಸ್ಸತಿ’’.
‘‘ಕಿನ್ನು ತಾತ ತುವಂ ಪಜ್ಝಾಯಸಿ, ಪದುಮಂ ಹತ್ಥಗತಂವ ತೇ ಮುಖಂ;
ಕಿನ್ನು ದುಮ್ಮನರೂಪೋಸಿ ಇಸ್ಸರ, ಮಾ ತ್ವಂ ಸೋಚಿ ಅಮಿತ್ತತಾಪನ’’.
‘‘ಮಾತಾ ¶ ¶ ಹಿ ತವ ಇರನ್ಧತಿ [ಇರನ್ದತಿ (ಸೀ. ಸ್ಯಾ. ಪೀ.)], ವಿಧುರಸ್ಸ ಹದಯಂ ಧನಿಯತಿ;
ದುಲ್ಲಭಞ್ಹಿ ವಿಧುರಸ್ಸ ದಸ್ಸನಂ, ಕೋ ವಿಧುರಮಿಧ ಮಾನಯಿಸ್ಸತಿ’’.
‘‘ತಸ್ಸ ಭತ್ತುಪರಿಯೇಸನಂ [ಭತ್ತುಪರಿಯೇಸನಂ (ಸೀ. ಪೀ.)] ಚರ, ಯೋ ವಿಧುರಮಿಧ ಮಾನಯಿಸ್ಸತಿ’’;
‘‘ಪಿತುನೋ ಚ ಸಾ ಸುತ್ವಾನ ವಾಕ್ಯಂ, ರತ್ತಿಂ ನಿಕ್ಖಮ್ಮ ಅವಸ್ಸುತಿಂ ಚರಿ’’.
‘‘ಕೇ ಗನ್ಧಬ್ಬೇ ರಕ್ಖಸೇ ಚ ನಾಗೇ, ಕೇ ಕಿಮ್ಪುರಿಸೇ ಚಾಪಿ ಮಾನುಸೇ;
ಕೇ ¶ ಪಣ್ಡಿತೇ ಸಬ್ಬಕಾಮದದೇ [ಸಬ್ಬಕಾಮದೇ (ಸೀ. ಪೀ.)], ದೀಘರತ್ತಂ ಭತ್ತಾ ಮೇ ಭವಿಸ್ಸತಿ’’.
‘‘ಅಸ್ಸಾಸ ಹೇಸ್ಸಾಮಿ ತೇ ಪತಿ, ಭತ್ತಾ ತೇ ಹೇಸ್ಸಾಮಿ ಅನಿನ್ದಲೋಚನೇ;
ಪಞ್ಞಾ ಹಿ ಮಮಂ ತಥಾವಿಧಾ, ಅಸ್ಸಾಸ ಹೇಸ್ಸಸಿ ಭರಿಯಾ ಮಮ.
‘‘ಅವಚಾಸಿ ಪುಣ್ಣಕಂ ಇರನ್ಧತೀ [ಇರನ್ದತೀ (ಸೀ. ಪೀ.)], ಪುಬ್ಬಪಥಾನುಗತೇನ ಚೇತಸಾ;
ಏಹಿ ಗಚ್ಛಾಮ ಪಿತು ಮಮನ್ತಿಕೇ [ಪಿತು ಮಮ ಸನ್ತಿಕಂ (ಕ.)], ಏಸೋವ ತೇ ಏತಮತ್ಥಂ ಪವಕ್ಖತಿ.
‘‘ಅಲಙ್ಕತಾ ಸುವಸನಾ, ಮಾಲಿನೀ ಚನ್ದನುಸ್ಸದಾ;
ಯಕ್ಖಂ ಹತ್ಥೇ ಗಹೇತ್ವಾನ, ಪಿತುಸನ್ತಿಕುಪಾಗಮಿ’’.
‘‘ನಾಗವರ ವಚೋ ಸುಣೋಹಿ ಮೇ, ಪತಿರೂಪಂ ಪಟಿಪಜ್ಜ ಸುಙ್ಕಿಯಂ;
ಪತ್ಥೇಮಿ ಅಹಂ ಇರನ್ಧತಿಂ, ತಾಯ ಸಮಙ್ಗಿಂ ಕರೋಹಿ ಮಂ ತುವಂ.
‘‘ಸತಂ ಹತ್ಥೀ ಸತಂ ಅಸ್ಸಾ, ಸತಂ ಅಸ್ಸತರೀರಥಾ;
ಸತಂ ವಲಭಿಯೋ ಪುಣ್ಣಾ, ನಾನಾರತ್ನಸ್ಸ ಕೇವಲಾ;
ತೇ ನಾಗ ಪಟಿಪಜ್ಜಸ್ಸು, ಧೀತರಂ ದೇಹಿರನ್ಧತಿಂ’’.
‘‘ಯಾವ ¶ ¶ ಆಮನ್ತಯೇ ಞಾತೀ, ಮಿತ್ತೇ ಚ ಸುಹದಜ್ಜನೇ [ಸುಹದಂಜನಂ (ಸೀ. ಪೀ.)];
ಅನಾಮನ್ತ ಕತಂ ಕಮ್ಮಂ, ತಂ ಪಚ್ಛಾ ಅನುತಪ್ಪತಿ’’.
ತತೋ ಸೋ ವರುಣೋ ನಾಗೋ, ಪವಿಸಿತ್ವಾ ನಿವೇಸನಂ;
ಭರಿಯಂ ಆಮನ್ತಯಿತ್ವಾನ, ಇದಂ ವಚನಮಬ್ರವಿ.
‘‘ಅಯಂ ಸೋ ಪುಣ್ಣಕೋ ಯಕ್ಖೋ, ಯಾಚತೀ ಮಂ ಇರನ್ಧತಿಂ;
ಬಹುನಾ ವಿತ್ತಲಾಭೇನ, ತಸ್ಸ ದೇಮ ಪಿಯಂ ಮಮಂ’’.
‘‘ನ ಧನೇನ ನ ವಿತ್ತೇನ, ಲಬ್ಭಾ ಅಮ್ಹಂ ಇರನ್ಧತೀ;
ಸಚೇ ಚ ಖೋ ಹದಯಂ ಪಣ್ಡಿತಸ್ಸ, ಧಮ್ಮೇನ ಲದ್ಧಾ ಇಧ ಮಾಹರೇಯ್ಯ;
ಏತೇನ ವಿತ್ತೇನ ಕುಮಾರಿ ಲಬ್ಭಾ, ನಾಞ್ಞಂ ಧನಂ ಉತ್ತರಿ ಪತ್ಥಯಾಮ’’.
ತತೋ ಸೋ ವರುಣೋ ನಾಗೋ, ನಿಕ್ಖಮಿತ್ವಾ ನಿವೇಸನಾ;
ಪುಣ್ಣಕಾಮನ್ತಯಿತ್ವಾನ, ಇದಂ ವಚನಮಬ್ರವಿ.
‘‘ನ ¶ ಧನೇನ ನ ವಿತ್ತೇನ, ಲಬ್ಭಾ ಅಮ್ಹಂ ಇರನ್ಧತೀ;
ಸಚೇ ತುವಂ ಹದಯಂ ಪಣ್ಡಿತಸ್ಸ, ಧಮ್ಮೇನ ಲದ್ಧಾ ಇಧ ಮಾಹರೇಸಿ;
ಏತೇನ ವಿತ್ತೇನ ಕುಮಾರಿ ಲಬ್ಭಾ, ನಾಞ್ಞಂ ಧನಂ ಉತ್ತರಿ ಪತ್ಥಯಾಮ’’.
‘‘ಯಂ ಪಣ್ಡಿತೋತ್ಯೇಕೇ ವದನ್ತಿ ಲೋಕೇ, ತಮೇವ ಬಾಲೋತಿ ಪುನಾಹು ಅಞ್ಞೇ;
ಅಕ್ಖಾಹಿ ¶ ಮೇ ವಿಪ್ಪವದನ್ತಿ ಏತ್ಥ, ಕಂ ಪಣ್ಡಿತಂ ನಾಗ ತುವಂ ವದೇಸಿ’’.
‘‘ಕೋರಬ್ಯರಾಜಸ್ಸ ಧನಞ್ಚಯಸ್ಸ [ಧನಞ್ಜಯಸ್ಸ (ಸೀ. ಸ್ಯಾ. ಪೀ.)], ಯದಿ ತೇ ಸುತೋ ವಿಧುರೋ ನಾಮ ಕತ್ತಾ;
ಆನೇಹಿ ತಂ ಪಣ್ಡಿತಂ ಧಮ್ಮಲದ್ಧಾ, ಇರನ್ಧತೀ ಪದಚರಾ [ಪದ್ಧಚರಾ (ಸೀ. ಪೀ.), ಪಟ್ಠಚರಾ (ಸ್ಯಾ. ಕ.)] ತೇ ಹೋತು.
‘‘ಇದಞ್ಚ ಸುತ್ವಾ ವರುಣಸ್ಸ ವಾಕ್ಯಂ, ಉಟ್ಠಾಯ ಯಕ್ಖೋ ಪರಮಪ್ಪತೀತೋ;
ತತ್ಥೇವ ಸನ್ತೋ ಪುರಿಸಂ ಅಸಂಸಿ, ಆನೇಹಿ ಆಜಞ್ಞಮಿಧೇವ ಯುತ್ತಂ.
‘‘ಜಾತರೂಪಮಯಾ ¶ ಕಣ್ಣಾ, ಕಾಚಮ್ಹಿಚಮಯಾ [ಕಾಚಮ್ಹಮಯಾ (ಸೀ.), ಕಾಚಮ್ಭಮಯಾ (ಪೀ.)] ಖುರಾ;
ಜಮ್ಬೋನದಸ್ಸ ಪಾಕಸ್ಸ, ಸುವಣ್ಣಸ್ಸ ಉರಚ್ಛದೋ’’.
‘‘ದೇವವಾಹವಹಂ ಯಾನಂ, ಅಸ್ಸಮಾರುಯ್ಹ ಪುಣ್ಣಕೋ;
ಅಲಙ್ಕತೋ ಕಪ್ಪಿತಕೇಸಮಸ್ಸು, ಪಕ್ಕಾಮಿ ವೇಹಾಯಸಮನ್ತಲಿಕ್ಖೇ [ಅನ್ತಲಿಕ್ಖಂ (ಕ.)].
‘‘ಸೋ ಪುಣ್ಣಕೋ ಕಾಮರಾಗೇನ [ಕಾಮವೇಗೇನ (ಸೀ. ಪೀ.)] ಗಿದ್ಧೋ, ಇರನ್ಧತಿಂ ನಾಗಕಞ್ಞಂ ಜಿಗೀಸಂ [ಜಿಗಿಂಸಂ (ಸೀ. ಸ್ಯಾ. ಪೀ.)];
ಗನ್ತ್ವಾನ ತಂ ಭೂತಪತಿಂ ಯಸಸ್ಸಿಂ, ಇಚ್ಚಬ್ರವೀ ವೇಸ್ಸವಣಂ ಕುವೇರಂ.
‘‘ಭೋಗವತೀ ನಾಮ ಮನ್ದಿರೇ, ವಾಸಾ ¶ ಹಿರಞ್ಞವತೀತಿ ವುಚ್ಚತಿ;
ನಗರೇ ನಿಮ್ಮಿತೇ ಕಞ್ಚನಮಯೇ, ಮಣ್ಡಲಸ್ಸ ಉರಗಸ್ಸ ನಿಟ್ಠಿತಂ.
‘‘ಅಟ್ಟಾಲಕಾ ಓಟ್ಠಗೀವಿಯೋ, ಲೋಹಿತಙ್ಕಸ್ಸ ಮಸಾರಗಲ್ಲಿನೋ;
ಪಾಸಾದೇತ್ಥ ಸಿಲಾಮಯಾ, ಸೋವಣ್ಣರತನೇಹಿ ಛಾದಿತಾ.
‘‘ಅಮ್ಬಾ ತಿಲಕಾ ಚ ಜಮ್ಬುಯೋ, ಸತ್ತಪಣ್ಣಾ ಮುಚಲಿನ್ದಕೇತಕಾ;
ಪಿಯಙ್ಗು [ಪಿಯಕಾ (ಸೀ. ಪೀ.), ಪಿಯಙ್ಗುಕಾ (ಸ್ಯಾ.)] ಉದ್ದಾಲಕಾ ಸಹಾ, ಉಪರಿಭದ್ದಕಾ ಸಿನ್ದುವಾರಕಾ [ಭಿನ್ದುವಾರಿತಾ (ಸ್ಯಾ. ಪೀ.), ಭಿನ್ಧವಾರಿತಾ (ಕ.)].
‘‘ಚಮ್ಪೇಯ್ಯಕಾ ನಾಗಮಲ್ಲಿಕಾ, ಭಗಿನೀಮಾಲಾ ಅಥ ಮೇತ್ಥ ಕೋಲಿಯಾ;
ಏತೇ ದುಮಾ ಪರಿಣಾಮಿತಾ, ಸೋಭಯನ್ತಿ ಉರಗಸ್ಸ ಮನ್ದಿರಂ [ಮನ್ದಿರೇ (ಸ್ಯಾ. ಕ.)].
‘‘ಖಜ್ಜುರೇತ್ಥ ¶ ಸಿಲಾಮಯಾ, ಸೋವಣ್ಣಧುವಪುಪ್ಫಿತಾ ಬಹೂ;
ಯತ್ಥ ವಸತೋ ಪಪಾತಿಕೋ, ನಾಗರಾಜಾ ವರುಣೋ ಮಹಿದ್ಧಿಕೋ.
‘‘ತಸ್ಸ ಕೋಮಾರಿಕಾ ಭರಿಯಾ, ವಿಮಲಾ ಕಞ್ಚನವೇಲ್ಲಿವಿಗ್ಗಹಾ;
ಕಾಲಾ ¶ ತರುಣಾವ ಉಗ್ಗತಾ, ಪುಚಿಮನ್ದತ್ಥನೀ ಚಾರುದಸ್ಸನಾ.
‘‘ಲಾಖಾರಸರತ್ತಸುಚ್ಛವೀ ¶ , ಕಣಿಕಾರಾವ ನಿವಾತಪುಪ್ಫಿತಾ [ಕಣಿಕಾರೋವ ನಿವಾತಪುಪ್ಫಿತೋ (ಸೀ. ಪೀ.)];
ತಿದಿವೋಕಚರಾವ ಅಚ್ಛರಾ, ವಿಜ್ಜುವಬ್ಭಘನಾ ವಿನಿಸ್ಸಟಾ.
‘‘ಸಾ ದೋಹಳಿನೀ ಸುವಿಮ್ಹಿತಾ, ವಿಧುರಸ್ಸ ಹದಯಂ ಧನಿಯತಿ;
ತಂ ತೇಸಂ ದೇಮಿ ಇಸ್ಸರ, ತೇನ ತೇ ದೇನ್ತಿ ಇರನ್ಧತಿಂ ಮಮಂ’’.
‘‘ಸೋ ಪುಣ್ಣಕೋ ಭೂತಪತಿಂ ಯಸಸ್ಸಿಂ, ಆಮನ್ತಯ ವೇಸ್ಸವಣಂ ಕುವೇರಂ;
ತತ್ಥೇವ ಸನ್ತೋ [ಸನ್ತಂ (ಪೀ.)] ಪುರಿಸಂ ಅಸಂಸಿ, ಆನೇಹಿ ಆಜಞ್ಞಮಿಧೇವ ಯುತ್ತಂ.
‘‘ಜಾತರೂಪಮಯಾ ಕಣ್ಣಾ, ಕಾಚಮ್ಹಿಚಮಯಾ ಖುರಾ;
ಜಮ್ಬೋನದಸ್ಸ ಪಾಕಸ್ಸ, ಸುವಣ್ಣಸ್ಸ ಉರಚ್ಛದೋ.
‘‘ದೇವವಾಹವಹಂ ಯಾನಂ, ಅಸ್ಸಮಾರುಯ್ಹ ಪುಣ್ಣಕೋ;
ಅಲಙ್ಕತೋ ಕಪ್ಪಿತಕೇಸಮಸ್ಸು, ಪಕ್ಕಾಮಿ ವೇಹಾಯಸಮನ್ತಲಿಕ್ಖೇ’’.
‘‘ಸೋ ¶ ಅಗ್ಗಮಾ ರಾಜಗಹಂ ಸುರಮ್ಮಂ, ಅಙ್ಗಸ್ಸ ¶ ರಞ್ಞೋ ನಗರಂ ದುರಾಯುತಂ [ದುರಾಸದಂ (ಸ್ಯಾ.)];
ಪಹೂತಭಕ್ಖಂ ಬಹುಅನ್ನಪಾನಂ, ಮಸಕ್ಕಸಾರಂ ವಿಯ ವಾಸವಸ್ಸ.
‘‘ಮಯೂರಕೋಞ್ಚಾಗಣಸಮ್ಪಘುಟ್ಠಂ, ದಿಜಾಭಿಘುಟ್ಠಂ ದಿಜಸಙ್ಘಸೇವಿತಂ;
ನಾನಾಸಕುನ್ತಾಭಿರುದಂ ಸುವಙ್ಗಣಂ [ಸುಭಙ್ಗಣಂ (ಸೀ. ಪೀ.)], ಪುಪ್ಫಾಭಿಕಿಣ್ಣಂ ಹಿಮವಂವ ಪಬ್ಬತಂ.
‘‘ಸೋ ಪುಣ್ಣಕೋ ವೇಪುಲಮಾಭಿರೂಹಿ [ವೇಪುಲ್ಲಮಾಭಿರುಚ್ಛಿ (ಸೀ. ಪೀ.)], ಸಿಲುಚ್ಚಯಂ ಕಿಮ್ಪುರಿಸಾನುಚಿಣ್ಣಂ;
ಅನ್ವೇಸಮಾನೋ ಮಣಿರತನಂ ಉಳಾರಂ, ತಮದ್ದಸಾ ಪಬ್ಬತಕೂಟಮಜ್ಝೇ.
‘‘ದಿಸ್ವಾ ಮಣಿಂ ಪಭಸ್ಸರಂ ಜಾತಿಮನ್ತಂ [ಜಾತಿವನ್ತಂ (ಸೀ. ಸ್ಯಾ.)], ಮನೋಹರಂ [ಧನಾಹರಂ (ಸೀ. ಪೀ. ಕ.)] ಮಣಿರತನಂ ಉಳಾರಂ;
ದದ್ದಲ್ಲಮಾನಂ ಯಸಸಾ ಯಸಸ್ಸಿನಂ, ಓಭಾಸತೀ ವಿಜ್ಜುರಿವನ್ತಲಿಕ್ಖೇ.
‘‘ತಮಗ್ಗಹೀ ವೇಳುರಿಯಂ ಮಹಗ್ಘಂ, ಮನೋಹರಂ ನಾಮ ಮಹಾನುಭಾವಂ;
ಆಜಞ್ಞಮಾರುಯ್ಹ ಮನೋಮವಣ್ಣೋ, ಪಕ್ಕಾಮಿ ವೇಹಾಯಸಮನ್ತಲಿಕ್ಖೇ.
‘‘ಸೋ ¶ ಅಗ್ಗಮಾ [ಅಗಮಾ (ಸ್ಯಾ. ಪೀ. ಕ.)] ನಗರಮಿನ್ದಪತ್ಥಂ, ಓರುಯ್ಹುಪಾಗಚ್ಛಿ ಸಭಂ ಕುರೂನಂ;
ಸಮಾಗತೇ ಏಕಸತಂ ಸಮಗ್ಗೇ, ಅವ್ಹೇತ್ಥ ಯಕ್ಖೋ ಅವಿಕಮ್ಪಮಾನೋ.
‘‘ಕೋ ನೀಧ ರಞ್ಞಂ ವರಮಾಭಿಜೇತಿ, ಕಮಾಭಿಜೇಯ್ಯಾಮ ವರದ್ಧನೇನ [ವರಂಧನೇನ (ಸೀ. ಪೀ.)];
ಕಮನುತ್ತರಂ ರತನವರಂ ಜಿನಾಮ, ಕೋ ವಾಪಿ ನೋ ಜೇತಿ ವರದ್ಧನೇನ’’.
‘‘ಕುಹಿಂ ¶ ನು ರಟ್ಠೇ ತವ ಜಾತಿಭೂಮಿ, ನ ಕೋರಬ್ಯಸ್ಸೇವ ವಚೋ ತವೇದಂ;
ಅಭೀತೋಸಿ [ಅಭಿಭೋಸಿ (ಸೀ. ಪೀ.)] ನೋ ವಣ್ಣನಿಭಾಯ ಸಬ್ಬೇ, ಅಕ್ಖಾಹಿ ಮೇ ನಾಮಞ್ಚ ಬನ್ಧವೇ ಚ’’.
‘‘ಕಚ್ಚಾಯನೋ ಮಾಣವಕೋಸ್ಮಿ ರಾಜ, ಅನೂನನಾಮೋ ಇತಿ ಮವ್ಹಯನ್ತಿ;
ಅಙ್ಗೇಸು ಮೇ ಞಾತಯೋ ಬನ್ಧವಾ ಚ, ಅಕ್ಖೇನ ದೇವಸ್ಮಿ ಇಧಾನುಪತ್ತೋ’’.
‘‘ಕಿಂ ಮಾಣವಸ್ಸ ರತನಾನಿ ಅತ್ಥಿ, ಯೇ ತಂ ಜಿನನ್ತೋ ಹರೇ ಅಕ್ಖಧುತ್ತೋ;
ಬಹೂನಿ ರಞ್ಞೋ ರತನಾನಿ ಅತ್ಥಿ, ತೇ ತ್ವಂ ದಲಿದ್ದೋ ಕಥಮವ್ಹಯೇಸಿ’’.
‘‘ಮನೋಹರೋ ¶ ¶ ನಾಮ ಮಣೀ ಮಮಾಯಂ, ಮನೋಹರಂ ಮಣಿರತನಂ ಉಳಾರಂ;
ಇಮಞ್ಚ ಆಜಞ್ಞಮಮಿತ್ತತಾಪನಂ, ಏತಂ ಮೇ ಜಿನಿತ್ವಾ ಹರೇ ಅಕ್ಖಧುತ್ತೋ’’.
‘‘ಏಕೋ ಮಣೀ ಮಾಣವ ಕಿಂ ಕರಿಸ್ಸತಿ, ಆಜಾನಿಯೇಕೋ ಪನ ಕಿಂ ಕರಿಸ್ಸತಿ;
ಬಹೂನಿ ರಞ್ಞೋ ಮಣಿರತನಾನಿ ಅತ್ಥಿ, ಆಜಾನಿಯಾ ವಾತಜವಾ ಅನಪ್ಪಕಾ’’.
ದೋಹಳಕಣ್ಡಂ ನಾಮ.
ಮಣಿಕಣ್ಡಂ
‘‘ಇದಞ್ಚ ಮೇ ಮಣಿರತನಂ, ಪಸ್ಸ ತ್ವಂ ದ್ವಿಪದುತ್ತಮ;
ಇತ್ಥೀನಂ ವಿಗ್ಗಹಾ ಚೇತ್ಥ, ಪುರಿಸಾನಞ್ಚ ವಿಗ್ಗಹಾ.
‘‘ಮಿಗಾನಂ ವಿಗ್ಗಹಾ ಚೇತ್ಥ, ಸಕುಣಾನಞ್ಚ ವಿಗ್ಗಹಾ;
ನಾಗರಾಜಾ ಸುಪಣ್ಣಾ ಚ [ನಾಗರಾಜೇ ಸುಪಣ್ಣೇ ಚ (ಸೀ. ಸ್ಯಾ. ಪೀ.)], ಮಣಿಮ್ಹಿ ಪಸ್ಸ ನಿಮ್ಮಿತಂ.
‘‘ಹತ್ಥಾನೀಕಂ ¶ ರಥಾನೀಕಂ, ಅಸ್ಸೇ ಪತ್ತೀ ಚ ವಮ್ಮಿನೇ [ಧಜಾನಿ ಚ (ಪೀ.)];
ಚತುರಙ್ಗಿನಿಮಂ ಸೇನಂ, ಮಣಿಮ್ಹಿ ಪಸ್ಸ ನಿಮ್ಮಿತಂ.
‘‘ಹತ್ಥಾರೋಹೇ ಅನೀಕಟ್ಠೇ, ರಥಿಕೇ ಪತ್ತಿಕಾರಕೇ;
ಬಲಗ್ಗಾನಿ ವಿಯೂಳ್ಹಾನಿ [ವಿಯೂಹಾನಿ (ಸ್ಯಾ. ಕ.)], ಮಣಿಮ್ಹಿ ಪಸ್ಸ ನಿಮ್ಮಿತಂ.
‘‘ಪುರಂ ಉದ್ಧಾಪಸಮ್ಪನ್ನಂ [ಉದ್ದಾಪಸಮ್ಪನ್ನಂ (ಸೀ. ಪೀ.), ಅಟ್ಟಾಲಸಮ್ಪನ್ನಂ (ಸ್ಯಾ.)], ಬಹುಪಾಕಾರತೋರಣಂ;
ಸಿಙ್ಘಾಟಕೇಸು ಭೂಮಿಯೋ, ಮಣಿಮ್ಹಿ ಪಸ್ಸ ನಿಮ್ಮಿತಂ.
‘‘ಏಸಿಕಾ ¶ ಪರಿಖಾಯೋ ಚ, ಪಲಿಖಂ ಅಗ್ಗಳಾನಿ ಚ;
ಅಟ್ಟಾಲಕೇ ಚ ದ್ವಾರೇ ಚ, ಮಣಿಮ್ಹಿ ಪಸ್ಸ ನಿಮ್ಮಿತಂ.
‘‘ಪಸ್ಸ ತೋರಣಮಗ್ಗೇಸು, ನಾನಾದಿಜಾ ಗಣಾ ಬಹೂ;
ಹಂಸಾ ಕೋಞ್ಚಾ ಮಯೂರಾ ಚ, ಚಕ್ಕವಾಕಾ ಚ ಕುಕ್ಕುಹಾ.
‘‘ಕುಣಾಲಕಾ ಬಹೂ ಚಿತ್ರಾ, ಸಿಖಣ್ಡೀ ಜೀವಜೀವಕಾ;
ನಾನಾದಿಜಗಣಾಕಿಣ್ಣಂ, ಮಣಿಮ್ಹಿ ಪಸ್ಸ ನಿಮ್ಮಿತಂ.
‘‘ಪಸ್ಸ ನಗರಂ ಸುಪಾಕಾರಂ, ಅಬ್ಭುತಂ ಲೋಮಹಂಸನಂ;
ಸಮುಸ್ಸಿತಧಜಂ ರಮ್ಮಂ, ಸೋಣ್ಣವಾಲುಕಸನ್ಥತಂ.
‘‘ಪಸ್ಸೇತ್ಥ [ಪಸ್ಸ ತ್ವಂ (ಸೀ. ಪೀ.)] ಪಣ್ಣಸಾಲಾಯೋ, ವಿಭತ್ತಾ ಭಾಗಸೋ ಮಿತಾ;
ನಿವೇಸನೇ ನಿವೇಸೇ ಚ, ಸನ್ಧಿಬ್ಯೂಹೇ ಪಥದ್ಧಿಯೋ.
‘‘ಪಾನಾಗಾರೇ ¶ ಚ ಸೋಣ್ಡೇ ಚ, ಸೂನಾ [ಸೂಣಾ (ಸೀ. ಪೀ.), ಸುದ್ದಾ (ಸ್ಯಾ. ಕ.)] ಓದನಿಯಾ ಘರಾ;
ವೇಸೀ ಚ ಗಣಿಕಾಯೋ ಚ, ಮಣಿಮ್ಹಿ ಪಸ್ಸ ನಿಮ್ಮಿತಂ.
‘‘ಮಾಲಾಕಾರೇ ಚ ರಜಕೇ, ಗನ್ಧಿಕೇ ಅಥ ದುಸ್ಸಿಕೇ;
ಸುವಣ್ಣಕಾರೇ ಮಣಿಕಾರೇ, ಮಣಿಮ್ಹಿ ಪಸ್ಸ ನಿಮ್ಮಿತಂ.
‘‘ಆಳಾರಿಕೇ ಚ ಸೂದೇ ಚ, ನಟನಾಟಕಗಾಯಿನೋ;
ಪಾಣಿಸ್ಸರೇ ಕುಮ್ಭಥೂನಿಕೇ, ಮಣಿಮ್ಹಿ ಪಸ್ಸ ನಿಮ್ಮಿತಂ.
‘‘ಪಸ್ಸ ಭೇರೀ ಮುದಿಙ್ಗಾ ಚ, ಸಙ್ಖಾ ಪಣವದಿನ್ದಿಮಾ;
ಸಬ್ಬಞ್ಚ ತಾಳಾವಚರಂ, ಮಣಿಮ್ಹಿ ಪಸ್ಸ ನಿಮ್ಮಿತಂ.
‘‘ಸಮ್ಮತಾಲಞ್ಚ ¶ ವೀಣಞ್ಚ, ನಚ್ಚಗೀತಂ ಸುವಾದಿತಂ;
ತೂರಿಯತಾಳಿತಸಙ್ಘುಟ್ಠಂ ¶ , ಮಣಿಮ್ಹಿ ಪಸ್ಸ ನಿಮ್ಮಿತಂ.
‘‘ಲಙ್ಘಿಕಾ ಮುಟ್ಠಿಕಾ ಚೇತ್ಥ, ಮಾಯಾಕಾರಾ ಚ ಸೋಭಿಯಾ;
ವೇತಾಲಿಕೇ [ವೇತ್ತಲಿಕೇ (ಕ.)] ಚ ಜಲ್ಲೇ ಚ, ಮಣಿಮ್ಹಿ ಪಸ್ಸ ನಿಮ್ಮಿತಂ.
‘‘ಸಮಜ್ಜಾ ಚೇತ್ಥ ವತ್ತನ್ತಿ, ಆಕಿಣ್ಣಾ ನರನಾರಿಭಿ;
ಮಞ್ಚಾತಿಮಞ್ಚೇ ಭೂಮಿಯೋ, ಮಣಿಮ್ಹಿ ಪಸ್ಸ ನಿಮ್ಮಿತಂ.
‘‘ಪಸ್ಸ ಮಲ್ಲೇ ಸಮಜ್ಜಸ್ಮಿಂ, ಫೋಟೇನ್ತೇ [ಪಾಠೇನ್ತೇ (ಸೀ. ಸ್ಯಾ. ಪೀ.)] ದಿಗುಣಂ ಭುಜಂ;
ನಿಹತೇ ನಿಹತಮಾನೇ ಚ, ಮಣಿಮ್ಹಿ ಪಸ್ಸ ನಿಮ್ಮಿತಂ.
‘‘ಪಸ್ಸ ಪಬ್ಬತಪಾದೇಸು, ನಾನಾಮಿಗಗಣಾ ಬಹೂ;
ಸೀಹಾ ಬ್ಯಗ್ಘಾ ವರಾಹಾ ಚ, ಅಚ್ಛಕೋಕತರಚ್ಛಯೋ.
‘‘ಪಲಾಸಾದಾ ಗವಜಾ ಚ, ಮಹಿಂಸಾ ರೋಹಿತಾ ರುರೂ;
ಏಣೇಯ್ಯಾ ಚ ವರಾಹಾ [ಸರಭಾ (ಸ್ಯಾ.)] ಚ, ಗಣಿನೋ ನೀಕ [ನಿಙ್ಕ (ಸೀ. ಸ್ಯಾ. ಪೀ.)] ಸೂಕರಾ.
‘‘ಕದಲಿಮಿಗಾ ಬಹೂ ಚಿತ್ರಾ, ಬಿಳಾರಾ ಸಸಕಣ್ಟಕಾ;
ನಾನಾಮಿಗಗಣಾಕಿಣ್ಣಂ, ಮಣಿಮ್ಹಿ ಪಸ್ಸ ನಿಮ್ಮಿತಂ.
‘‘ನಜ್ಜಾಯೋ ಸುಪತಿತ್ಥಾಯೋ, ಸೋಣ್ಣವಾಲುಕಸನ್ಥತಾ;
ಅಚ್ಛಾ ಸವನ್ತಿ ಅಮ್ಬೂನಿ, ಮಚ್ಛಗುಮ್ಬನಿಸೇವಿತಾ.
‘‘ಕುಮ್ಭೀಲಾ ಮಕರಾ ಚೇತ್ಥ, ಸುಸುಮಾರಾ ಚ ಕಚ್ಛಪಾ;
ಪಾಠೀನಾ ಪಾವುಸಾ ಮಚ್ಛಾ, ಬಲಜಾ [ವಲಜಾ (ಸೀ.), ವಾಲಜಾ (ಪೀ.)] ಮುಞ್ಜರೋಹಿತಾ.
‘‘ನಾನಾದಿಜಗಣಾಕಿಣ್ಣಾ, ನಾನಾದುಮಗಣಾಯುತಾ;
ವೇಳುರಿಯಕ-ರೋದಾಯೋ [ವೇಳುರಿಯಫಲಕರೋದಾಯೋ (ಸೀ.)], ಮಣಿಮ್ಹಿ ಪಸ್ಸ ನಿಮ್ಮಿತಂ.
‘‘ಪಸ್ಸೇತ್ಥ ¶ ಪೋಕ್ಖರಣಿಯೋ, ಸುವಿಭತ್ತಾ ಚತುದ್ದಿಸಾ;
ನಾನಾದಿಜಗಣಾಕಿಣ್ಣಾ, ಪುಥುಲೋಮನಿಸೇವಿತಾ.
‘‘ಸಮನ್ತೋದಕಸಮ್ಪನ್ನಂ ¶ , ಮಹಿಂ ಸಾಗರಕುಣ್ಡಲಂ;
ಉಪೇತಂ ವನರಾಜೇಹಿ, ಮಣಿಮ್ಹಿ ಪಸ್ಸ ನಿಮ್ಮಿತಂ.
‘‘ಪುರತೋ ವಿದೇಹೇ ಪಸ್ಸ, ಗೋಯಾನಿಯೇ ಚ ಪಚ್ಛತೋ;
ಕುರುಯೋ ಜಮ್ಬುದೀಪಞ್ಚ, ಮಣಿಮ್ಹಿ ಪಸ್ಸ ನಿಮ್ಮಿತಂ.
‘‘ಪಸ್ಸ ¶ ಚನ್ದಂ ಸೂರಿಯಞ್ಚ, ಓಭಾಸನ್ತೇ ಚತುದ್ದಿಸಾ;
ಸಿನೇರುಂ ಅನುಪರಿಯನ್ತೇ, ಮಣಿಮ್ಹಿ ಪಸ್ಸ ನಿಮ್ಮಿತಂ.
‘‘ಸಿನೇರುಂ ಹಿಮವನ್ತಞ್ಚ, ಸಾಗರಞ್ಚ ಮಹೀತಲಂ [ಮಹಿದ್ಧಿಕಂ (ಸೀ. ಪೀ.), ಮಹಿದ್ಧಿಯಂ (ಸ್ಯಾ.)];
ಚತ್ತಾರೋ ಚ ಮಹಾರಾಜೇ, ಮಣಿಮ್ಹಿ ಪಸ್ಸ ನಿಮ್ಮಿತಂ.
‘‘ಆರಾಮೇ ವನಗುಮ್ಬೇ ಚ, ಪಾಟಿಯೇ [ಪಿಟ್ಠಿಯೇ (ಕ.)] ಚ ಸಿಲುಚ್ಚಯೇ;
ರಮ್ಮೇ ಕಿಮ್ಪುರಿಸಾಕಿಣ್ಣೇ, ಮಣಿಮ್ಹಿ ಪಸ್ಸ ನಿಮ್ಮಿತಂ.
‘‘ಫಾರುಸಕಂ ಚಿತ್ತಲತಂ, ಮಿಸ್ಸಕಂ ನನ್ದನಂ ವನಂ;
ವೇಜಯನ್ತಞ್ಚ ಪಾಸಾದಂ, ಮಣಿಮ್ಹಿ ಪಸ್ಸ ನಿಮ್ಮಿತಂ.
‘‘ಸುಧಮ್ಮಂ ತಾವತಿಂಸಞ್ಚ, ಪಾರಿಛತ್ತಞ್ಚ ಪುಪ್ಫಿತಂ;
ಏರಾವಣಂ ನಾಗರಾಜಂ, ಮಣಿಮ್ಹಿ ಪಸ್ಸ ನಿಮ್ಮಿತಂ.
‘‘ಪಸ್ಸೇತ್ಥ ದೇವಕಞ್ಞಾಯೋ, ನಭಾ ವಿಜ್ಜುರಿವುಗ್ಗತಾ;
ನನ್ದನೇ ವಿಚರನ್ತಿಯೋ, ಮಣಿಮ್ಹಿ ಪಸ್ಸ ನಿಮ್ಮಿತಂ.
‘‘ಪಸ್ಸೇತ್ಥ ದೇವಕಞ್ಞಾಯೋ, ದೇವಪುತ್ತಪಲೋಭಿನೀ;
ದೇವಪುತ್ತೇ ¶ ರಮಮಾನೇ [ಚರಮಾನೇ (ಸೀ. ಪೀ.)], ಮಣಿಮ್ಹಿ ಪಸ್ಸ ನಿಮ್ಮಿತಂ.
‘‘ಪರೋಸಹಸ್ಸಪಾಸಾದೇ, ವೇಳುರಿಯಫಲಸನ್ಥತೇ;
ಪಜ್ಜಲನ್ತೇ ಚ [ಪಜ್ಜಲನ್ತೇನ (ಸೀ. ಸ್ಯಾ. ಪೀ.)] ವಣ್ಣೇನ, ಮಣಿಮ್ಹಿ ಪಸ್ಸ ನಿಮ್ಮಿತಂ.
‘‘ತಾವತಿಂಸೇ ಚ ಯಾಮೇ ಚ, ತುಸಿತೇ ಚಾಪಿ ನಿಮ್ಮಿತೇ;
ಪರನಿಮ್ಮಿತವಸವತ್ತಿನೋ [ಪರನಿಮ್ಮಿತಾಭಿರತಿನೋ (ಸೀ. ಪೀ.)], ಮಣಿಮ್ಹಿ ಪಸ್ಸ ನಿಮ್ಮಿತಂ.
‘‘ಪಸ್ಸೇತ್ಥ ಪೋಕ್ಖರಣಿಯೋ, ವಿಪ್ಪಸನ್ನೋದಿಕಾ ಸುಚೀ;
ಮನ್ದಾಲಕೇಹಿ ಸಞ್ಛನ್ನಾ, ಪದುಮುಪ್ಪಲಕೇಹಿ ಚ.
‘‘ದಸೇತ್ಥ ರಾಜಿಯೋ ಸೇತಾ, ದಸನೀಲಾ [ದಸ್ಸನೀಯಾ (ಕ.)] ಮನೋರಮಾ;
ಛ ಪಿಙ್ಗಲಾ ಪನ್ನರಸ, ಹಲಿದ್ದಾ ಚ ಚತುದ್ದಸ.
‘‘ವೀಸತಿ ತತ್ಥ ಸೋವಣ್ಣಾ, ವೀಸತಿ ರಜತಾಮಯಾ;
ಇನ್ದಗೋಪಕವಣ್ಣಾಭಾ, ತಾವ ದಿಸ್ಸನ್ತಿ ತಿಂಸತಿ.
‘‘ದಸೇತ್ಥ ಕಾಳಿಯೋ ಛಚ್ಚ, ಮಞ್ಜೇಟ್ಠಾ ಪನ್ನವೀಸತಿ;
ಮಿಸ್ಸಾ ಬನ್ಧುಕಪುಪ್ಫೇಹಿ, ನೀಲುಪ್ಪಲವಿಚಿತ್ತಿಕಾ.
‘‘ಏವಂ ¶ ¶ ಸಬ್ಬಙ್ಗಸಮ್ಪನ್ನಂ, ಅಚ್ಚಿಮನ್ತಂ ಪಭಸ್ಸರಂ;
ಓಧಿಸುಙ್ಕಂ ಮಹಾರಾಜ, ಪಸ್ಸ ತ್ವಂ ದ್ವಿಪದುತ್ತಮ’’.
ಮಣಿಕಣ್ಡಂ ನಾಮ.
ಅಕ್ಖಕಣ್ಡಂ
‘‘ಉಪಾಗತಂ ರಾಜ ಮುಪೇಹಿ ಲಕ್ಖಂ, ನೇತಾದಿಸಂ ಮಣಿರತನಂ ತವತ್ಥಿ;
ಧಮ್ಮೇನ ಜಿಸ್ಸಾಮ [ಜಿಯ್ಯಾಮ (ಸೀ. ಸ್ಯಾ. ಪೀ.)] ಅಸಾಹಸೇನ, ಜಿತೋ ಚ ನೋ ಖಿಪ್ಪಮವಾಕರೋಹಿ.
‘‘ಪಞ್ಚಾಲ ¶ -ಪಚ್ಚುಗ್ಗತ-ಸೂರಸೇನ, ಮಚ್ಛಾ [ಮಜ್ಝಾ (ಕ.)] ಚ ಮದ್ದಾ ಸಹ ಕೇಕಕೇಭಿ;
ಪಸ್ಸನ್ತು ನೋತೇ ಅಸಠೇನ ಯುದ್ಧಂ, ನ ನೋ ಸಭಾಯಂ ನ ಕರೋನ್ತಿ ಕಿಞ್ಚಿ’’.
‘‘ತೇ ಪಾವಿಸುಂ ಅಕ್ಖಮದೇನ ಮತ್ತಾ, ರಾಜಾ ಕುರೂನಂ ಪುಣ್ಣಕೋ ಚಾಪಿ ಯಕ್ಖೋ;
ರಾಜಾ ಕಲಿಂ ವಿಚ್ಚಿನಮಗ್ಗಹೇಸಿ, ಕಟಂ ಅಗ್ಗಹೀ ಪುಣ್ಣಕೋ ನಾಮ ಯಕ್ಖೋ.
‘‘ತೇ ತತ್ಥ ಜೂತೇ ಉಭಯೇ ಸಮಾಗತೇ, ರಞ್ಞಂ ಸಕಾಸೇ ಸಖೀನಞ್ಚ ಮಜ್ಝೇ;
ಅಜೇಸಿ ಯಕ್ಖೋ ನರವೀರಸೇಟ್ಠಂ, ತತ್ಥಪ್ಪನಾದೋ ತುಮುಲೋ ಬಭೂವ’’.
‘‘ಜಯೋ ಮಹಾರಾಜ ಪರಾಜಯೋ ಚ, ಆಯೂಹತಂ ಅಞ್ಞತರಸ್ಸ ಹೋತಿ;
ಜನಿನ್ದ ಜೀನೋಸಿ [ಜಿನ್ನೋಸಿ (ಸ್ಯಾ.), ಜಿತೋಸಿ (ಪೀ.) ಜಿನೋಮ್ಹಿ (ಕ.)] ವರದ್ಧನೇನ, ಜಿತೋ ಚ ಮೇ ಖಿಪ್ಪಮವಾಕರೋಹಿ’’.
‘‘ಹತ್ಥೀ ¶ ಗವಸ್ಸಾ ಮಣಿಕುಣ್ಡಲಾ ಚ, ಯಞ್ಚಾಪಿ ಮಯ್ಹಂ [ಅಞ್ಞಂ (ಕ.)] ರತನಂ ಪಥಬ್ಯಾ;
ಗಣ್ಹಾಹಿ ಕಚ್ಚಾನ ವರಂ ಧನಾನಂ, ಆದಾಯ ¶ ಯೇನಿಚ್ಛಸಿ ತೇನ ಗಚ್ಛ’’.
‘‘ಹತ್ಥೀ ಗವಸ್ಸಾ ಮಣಿಕುಣ್ಡಲಾ ಚ, ಯಞ್ಚಾಪಿ ತುಯ್ಹಂ ರತನಂ ಪಥಬ್ಯಾ;
ತೇಸಂ ವರೋ ವಿಧುರೋ ನಾಮ ಕತ್ತಾ, ಸೋ ಮೇ ಜಿತೋ ತಂ ಮೇ ಅವಾಕರೋಹಿ’’.
‘‘ಅತ್ತಾ ಚ ಮೇ ಸೋ ಸರಣಂ ಗತೀ ಚ, ದೀಪೋ ಚ ಲೇಣೋ ಚ ಪರಾಯಣೋ ಚ;
ಅಸನ್ತುಲೇಯ್ಯೋ ಮಮ ಸೋ ಧನೇನ, ಪಾಣೇನ ಮೇ ಸಾದಿಸೋ ಏಸ ಕತ್ತಾ’’.
‘‘ಚಿರಂ ವಿವಾದೋ ಮಮ ತುಯ್ಹಞ್ಚಸ್ಸ, ಕಾಮಞ್ಚ ಪುಚ್ಛಾಮ ತಮೇವ ಗನ್ತ್ವಾ;
ಏಸೋವ ನೋ ವಿವರತು ಏತಮತ್ಥಂ, ಯಂ ವಕ್ಖತೀ ಹೋತು ಕಥಾ [ತಥಾ (ಸ್ಯಾ. ಕ.)] ಉಭಿನ್ನಂ’’.
‘‘ಅದ್ಧಾ ಹಿ ಸಚ್ಚಂ ಭಣಸಿ, ನ ಚ ಮಾಣವ ಸಾಹಸಂ;
ತಮೇವ ಗನ್ತ್ವಾ ಪುಚ್ಛಾಮ, ತೇನ ತುಸ್ಸಾಮುಭೋ ಜನಾ’’.
‘‘ಸಚ್ಚಂ ನು ದೇವಾ ವಿದಹೂ ಕುರೂನಂ, ಧಮ್ಮೇ ಠಿತಂ ವಿಧುರಂ ನಾಮಮಚ್ಚಂ;
ದಾಸೋಸಿ ರಞ್ಞೋ ಉದ ವಾಸಿ ಞಾತಿ, ವಿಧುರೋತಿ ಸಙ್ಖಾ ಕತಮಾಸಿ ಲೋಕೇ’’.
‘‘ಆಮಾಯದಾಸಾಪಿ ¶ ಭವನ್ತಿ ಹೇಕೇ, ಧನೇನ ¶ ಕೀತಾಪಿ ಭವನ್ತಿ ದಾಸಾ;
ಸಯಮ್ಪಿ ಹೇಕೇ ಉಪಯನ್ತಿ ದಾಸಾ, ಭಯಾ ಪಣುನ್ನಾಪಿ ಭವನ್ತಿ ದಾಸಾ.
‘‘ಏತೇ ¶ ನರಾನಂ ಚತುರೋವ ದಾಸಾ, ಅದ್ಧಾ ಹಿ ಯೋನಿತೋ ಅಹಮ್ಪಿ ಜಾತೋ;
ಭವೋ ಚ ರಞ್ಞೋ ಅಭವೋ ಚ ರಞ್ಞೋ, ದಾಸಾಹಂ ದೇವಸ್ಸ ಪರಮ್ಪಿ ಗನ್ತ್ವಾ;
ಧಮ್ಮೇನ ಮಂ ಮಾಣವ ತುಯ್ಹ ದಜ್ಜಾ’’.
‘‘ಅಯಂ [ಅಯಮ್ಪಿ (ಸ್ಯಾ. ಕ.)] ದುತೀಯೋ ವಿಜಯೋ ಮಮಜ್ಜ, ಪುಟ್ಠೋ ಹಿ ಕತ್ತಾ ವಿವರೇತ್ಥ [ವಿವರಿತ್ಥ (ಸೀ. ಸ್ಯಾ. ಕ.)] ಪಞ್ಹಂ;
ಅಧಮ್ಮರೂಪೋ ವತ ರಾಜಸೇಟ್ಠೋ, ಸುಭಾಸಿತಂ ನಾನುಜಾನಾಸಿ ಮಯ್ಹಂ’’.
‘‘ಏವಂ ಚೇ ನೋ ಸೋ ವಿವರೇತ್ಥ ಪಞ್ಹಂ, ದಾಸೋಹಮಸ್ಮಿ ನ ಚ ಖೋಸ್ಮಿ ಞಾತಿ;
ಗಣ್ಹಾಹಿ ಕಚ್ಚಾನ ವರಂ ಧನಾನಂ, ಆದಾಯ ಯೇನಿಚ್ಛಸಿ ತೇನ ಗಚ್ಛ’’.
ಅಕ್ಖಕಣ್ಡಂ ನಾಮ.
ಘರಾವಾಸಪಞ್ಹಾ
‘‘ವಿಧುರ ವಸಮಾನಾಸ್ಸ, ಗಹಟ್ಠಸ್ಸ ಸಕಂ ಘರಂ;
ಖೇಮಾ ವುತ್ತಿ ಕಥಂ ಅಸ್ಸ, ಕಥನ್ನು ಅಸ್ಸ ಸಙ್ಗಹೋ.
‘‘ಅಬ್ಯಾಬಜ್ಝಂ [ಅಬ್ಯಾಪಜ್ಝಂ (ಸೀ. ಸ್ಯಾ. ಪೀ.)] ಕಥಂ ಅಸ್ಸ, ಸಚ್ಚವಾದೀ ಚ ಮಾಣವೋ;
ಅಸ್ಮಾ ¶ ಲೋಕಾ ಪರಂ ಲೋಕಂ, ಕಥಂ ಪೇಚ್ಚ ನ ಸೋಚತಿ’’.
ತಂ ತತ್ಥ ಗತಿಮಾ ಧಿತಿಮಾ, ಮತಿಮಾ ಅತ್ಥದಸ್ಸಿಮಾ;
ಸಙ್ಖಾತಾ [ಸಙ್ಖಾತೋ (ಕ.)] ಸಬ್ಬಧಮ್ಮಾನಂ, ವಿಧುರೋ ಏತದಬ್ರವಿ.
‘‘ನ ಸಾಧಾರಣದಾರಸ್ಸ, ನ ಭುಞ್ಜೇ ಸಾದುಮೇಕಕೋ;
ನ ಸೇವೇ ಲೋಕಾಯತಿಕಂ, ನೇತಂ ಪಞ್ಞಾಯ ವಡ್ಢನಂ.
‘‘ಸೀಲವಾ ವತ್ತಸಮ್ಪನ್ನೋ, ಅಪ್ಪಮತ್ತೋ ವಿಚಕ್ಖಣೋ;
ನಿವಾತವುತ್ತಿ ಅತ್ಥದ್ಧೋ, ಸುರತೋ ಸಖಿಲೋ ಮುದು.
‘‘ಸಙ್ಗಹೇತಾ ¶ ಚ ಮಿತ್ತಾನಂ, ಸಂವಿಭಾಗೀ ವಿಧಾನವಾ;
ತಪ್ಪೇಯ್ಯ ಅನ್ನಪಾನೇನ, ಸದಾ ಸಮಣಬ್ರಾಹ್ಮಣೇ.
‘‘ಧಮ್ಮಕಾಮೋ ಸುತಾಧಾರೋ, ಭವೇಯ್ಯ ಪರಿಪುಚ್ಛಕೋ;
ಸಕ್ಕಚ್ಚಂ ಪಯಿರುಪಾಸೇಯ್ಯ, ಸೀಲವನ್ತೇ ಬಹುಸ್ಸುತೇ.
‘‘ಘರಮಾವಸಮಾನಸ್ಸ, ಗಹಟ್ಠಸ್ಸ ಸಕಂ ಘರಂ;
ಖೇಮಾ ವುತ್ತಿ ಸಿಯಾ ಏವಂ, ಏವಂ ನು ಅಸ್ಸ ಸಙ್ಗಹೋ.
‘‘ಅಬ್ಯಾಬಜ್ಝಂ ¶ ಸಿಯಾ ಏವಂ, ಸಚ್ಚವಾದೀ ಚ ಮಾಣವೋ;
ಅಸ್ಮಾ ಲೋಕಾ ಪರಂ ಲೋಕಂ, ಏವಂ ಪೇಚ್ಚ ನ ಸೋಚತಿ’’.
ಘರಾವಾಸಪಞ್ಹಾ ನಾಮ.
ಲಕ್ಖಣಕಣ್ಡಂ
‘‘ಏಹಿ ದಾನಿ ಗಮಿಸ್ಸಾಮ, ದಿನ್ನೋ ನೋ ಇಸ್ಸರೇನ ಮೇ;
ಮಮೇವತ್ಥಂ [ತಮೇವತ್ಥಂ (ಪೀ.)] ಪಟಿಪಜ್ಜ, ಏಸ ಧಮ್ಮೋ ಸನನ್ತನೋ’’.
‘‘ಜಾನಾಮಿ ಮಾಣವ ತಯಾಹಮಸ್ಮಿ, ದಿನ್ನೋಹಮಸ್ಮಿ ತವ ಇಸ್ಸರೇನ;
ತೀಹಞ್ಚ ¶ ತಂ ವಾಸಯೇಮು ಅಗಾರೇ, ಯೇನದ್ಧುನಾ ಅನುಸಾಸೇಮು ಪುತ್ತೇ’’.
‘‘ತಂ ಮೇ ತಥಾ ಹೋತು ವಸೇಮು ತೀಹಂ, ಕುರುತಂ ಭವಜ್ಜ ಘರೇಸು ಕಿಚ್ಚಂ;
ಅನುಸಾಸತಂ ಪುತ್ತದಾರೇ ಭವಜ್ಜ, ಯಥಾ ತಯೀ ಪೇಚ್ಚ [ಪಚ್ಛಾ (ಸೀ. ಪೀ.)] ಸುಖೀ ಭವೇಯ್ಯ’’.
‘‘ಸಾಧೂತಿ ವತ್ವಾನ ಪಹೂತಕಾಮೋ, ಪಕ್ಕಾಮಿ ಯಕ್ಖೋ ವಿಧುರೇನ ಸದ್ಧಿಂ;
ತಂ ಕುಞ್ಜರಾಜಞ್ಞಹಯಾನುಚಿಣ್ಣಂ, ಪಾವೇಕ್ಖಿ ಅನ್ತೇಪುರಮರಿಯಸೇಟ್ಠೋ’’.
‘‘ಕೋಞ್ಚಂ ಮಯೂರಞ್ಚ ಪಿಯಞ್ಚ ಕೇತಂ, ಉಪಾಗಮಿ ತತ್ಥ ಸುರಮ್ಮರೂಪಂ;
ಪಹೂತಭಕ್ಖಂ ಬಹುಅನ್ನಪಾನಂ, ಮಸಕ್ಕಸಾರಂ ವಿಯ ವಾಸವಸ್ಸ’’.
‘‘ತತ್ಥ ¶ ನಚ್ಚನ್ತಿ ಗಾಯನ್ತಿ, ಅವ್ಹಾಯನ್ತಿ ವರಾವರಂ;
ಅಚ್ಛರಾ ವಿಯ ದೇವೇಸು, ನಾರಿಯೋ ಸಮಲಙ್ಕತಾ.
‘‘ಸಮಙ್ಗಿಕತ್ವಾ ಪಮದಾಹಿ ಯಕ್ಖಂ, ಅನ್ನೇನ ಪಾನೇನ ಚ ಧಮ್ಮಪಾಲೋ;
ಅತ್ಥತ್ಥ [ಅಗ್ಗತ್ಥ (ಸ್ಯಾ. ಅಟ್ಠ.)] ಮೇವಾನುವಿಚಿನ್ತಯನ್ತೋ, ಪಾವೇಕ್ಖಿ ಭರಿಯಾಯ ತದಾ ಸಕಾಸೇ.
‘‘ತಂ ¶ ಚನ್ದನಗನ್ಧರಸಾನುಲಿತ್ತಂ, ಸುವಣ್ಣಜಮ್ಬೋನದನಿಕ್ಖಸಾದಿಸಂ;
ಭರಿಯಂವಚಾ ಏಹಿ ಸುಣೋಹಿ ಭೋತಿ, ಪುತ್ತಾನಿ ಆಮನ್ತಯ ತಮ್ಬನೇತ್ತೇ.
‘‘ಸುತ್ವಾನ ವಾಕ್ಯಂ ಪತಿನೋ ಅನುಜ್ಜಾ [ಅನೋಜಾ (ಸ್ಯಾ. ಕ.)], ಸುಣಿಸಂವಚ ತಮ್ಬನಖಿಂ ಸುನೇತ್ತಂ;
ಆಮನ್ತಯ ವಮ್ಮಧರಾನಿ ಚೇತೇ, ಪುತ್ತಾನಿ ಇನ್ದೀವರಪುಪ್ಫಸಾಮೇ’’.
‘‘ತೇ ಆಗತೇ ಮುದ್ಧನಿ ಧಮ್ಮಪಾಲೋ, ಚುಮ್ಬಿತ್ವಾ ಪುತ್ತೇ ಅವಿಕಮ್ಪಮಾನೋ;
ಆಮನ್ತಯಿತ್ವಾನ ಅವೋಚ ವಾಕ್ಯಂ, ದಿನ್ನಾಹಂ ರಞ್ಞಾ ಇಧ ಮಾಣವಸ್ಸ.
‘‘ತಸ್ಸಜ್ಜಹಂ ಅತ್ತಸುಖೀ ವಿಧೇಯ್ಯೋ, ಆದಾಯ ಯೇನಿಚ್ಛತಿ ತೇನ ಗಚ್ಛತಿ;
ಅಹಞ್ಚ ವೋ ಸಾಸಿತುಮಾಗತೋಸ್ಮಿ [ಅನುಸಾಸಿತುಂ ಆಗತೋಸ್ಮಿ (ಸ್ಯಾ. ಕ.)], ಕಥಂ ಅಹಂ ಅಪರಿತ್ತಾಯ ಗಚ್ಛೇ.
‘‘ಸಚೇ ¶ ¶ ವೋ ರಾಜಾ ಕುರುರಟ್ಠವಾಸೀ [ಕುರುಖೇತ್ತವಾಸೀ (ಸೀ. ಪೀ.)], ಜನಸನ್ಧೋ ಪುಚ್ಛೇಯ್ಯ ಪಹೂತಕಾಮೋ;
ಕಿಮಾಭಿಜಾನಾಥ ಪುರೇ ಪುರಾಣಂ, ಕಿಂ ವೋ ಪಿತಾ ಅನುಸಾಸೇ ಪುರತ್ಥಾ.
‘‘ಸಮಾಸನಾ ¶ ಹೋಥ ಮಯಾವ ಸಬ್ಬೇ, ಕೋನೀಧ ರಞ್ಞೋ ಅಬ್ಭತಿಕೋ ಮನುಸ್ಸೋ;
ತಮಞ್ಜಲಿಂ ಕರಿಯ ವದೇಥ ಏವಂ, ಮಾ ಹೇವಂ ದೇವ ನ ಹಿ ಏಸ ಧಮ್ಮೋ;
ವಿಯಗ್ಘರಾಜಸ್ಸ ನಿಹೀನಜಚ್ಚೋ, ಸಮಾಸನೋ ದೇವ ಕಥಂ ಭವೇಯ್ಯ’’.
ಲಕ್ಖಣಕಣ್ಡಂ [ಪೇಕ್ಖಣಕಣ್ಡಂ (ಸೀ. ಕ.)] ನಾಮ.
ರಾಜವಸತಿ
‘‘ಸೋ ಚ ಪುತ್ತೇ [ಮಿತ್ತೇ (ಸೀ. ಪೀ.)] ಅಮಚ್ಚೇ ಚ, ಞಾತಯೋ ಸುಹದಜ್ಜನೇ;
ಅಲೀನಮನಸಙ್ಕಪ್ಪೋ, ವಿಧುರೋ ಏತದಬ್ರವಿ.
‘‘ಏಥಯ್ಯೋ [ಏಥಯ್ಯಾ (ಸ್ಯಾ.)] ರಾಜವಸತಿಂ, ನಿಸೀದಿತ್ವಾ ಸುಣಾಥ ಮೇ;
ಯಥಾ ರಾಜಕುಲಂ ಪತ್ತೋ, ಯಸಂ ಪೋಸೋ ನಿಗಚ್ಛತಿ.
‘‘ನ ಹಿ ರಾಜಕುಲಂ ಪತ್ತೋ, ಅಞ್ಞಾತೋ ಲಭತೇ ಯಸಂ;
ನಾಸೂರೋ ನಾಪಿ ದುಮ್ಮೇಧೋ, ನಪ್ಪಮತ್ತೋ ಕುದಾಚನಂ.
‘‘ಯದಾಸ್ಸ ಸೀಲಂ ಪಞ್ಞಞ್ಚ, ಸೋಚೇಯ್ಯಂ ಚಾಧಿಗಚ್ಛತಿ;
ಅಥ ವಿಸ್ಸಸತೇ ತ್ಯಮ್ಹಿ, ಗುಯ್ಹಞ್ಚಸ್ಸ ನ ರಕ್ಖತಿ.
‘‘ತುಲಾ ಯಥಾ ಪಗ್ಗಹಿತಾ, ಸಮದಣ್ಡಾ ಸುಧಾರಿತಾ;
ಅಜ್ಝಿಟ್ಠೋ ನ ವಿಕಮ್ಪೇಯ್ಯ, ಸ ರಾಜವಸತಿಂ ವಸೇ.
‘‘ತುಲಾ ಯಥಾ ಪಗ್ಗಹಿತಾ, ಸಮದಣ್ಡಾ ಸುಧಾರಿತಾ;
ಸಬ್ಬಾನಿ ಅಭಿಸಮ್ಭೋನ್ತೋ, ಸ ರಾಜವಸತಿಂ ವಸೇ.
‘‘ದಿವಾ ¶ ವಾ ಯದಿ ವಾ ರತ್ತಿಂ, ರಾಜಕಿಚ್ಚೇಸು ಪಣ್ಡಿತೋ;
ಅಜ್ಝಿಟ್ಠೋ ನ ವಿಕಮ್ಪೇಯ್ಯ, ಸ ರಾಜವಸತಿಂ ವಸೇ.
‘‘ದಿವಾ ¶ ವಾ ಯದಿ ವಾ ರತ್ತಿಂ, ರಾಜಕಿಚ್ಚೇಸು ಪಣ್ಡಿತೋ;
ಸಬ್ಬಾನಿ ಅಭಿಸಮ್ಭೋನ್ತೋ, ಸ ರಾಜವಸತಿಂ ವಸೇ.
‘‘ಯೋ ಚಸ್ಸ ಸುಕತೋ ಮಗ್ಗೋ, ರಞ್ಞೋ ಸುಪ್ಪಟಿಯಾದಿತೋ;
ನ ತೇನ ವುತ್ತೋ ಗಚ್ಛೇಯ್ಯ, ಸ ರಾಜವಸತಿಂ ವಸೇ.
‘‘ನ ರಞ್ಞೋ ಸದಿಸಂ [ಸಮಕಂ (ಸೀ. ಸ್ಯಾ. ಪೀ.)] ಭುಞ್ಜೇ, ಕಾಮಭೋಗೇ ಕುದಾಚನಂ;
ಸಬ್ಬತ್ಥ ಪಚ್ಛತೋ ಗಚ್ಛೇ, ಸ ರಾಜವಸತಿಂ ವಸೇ.
‘‘ನ ¶ ರಞ್ಞೋ ಸದಿಸಂ ವತ್ಥಂ, ನ ಮಾಲಂ ನ ವಿಲೇಪನಂ;
ಆಕಪ್ಪಂ ಸರಕುತ್ತಿಂ ವಾ, ನ ರಞ್ಞೋ ಸದಿಸಮಾಚರೇ;
ಅಞ್ಞಂ ಕರೇಯ್ಯ ಆಕಪ್ಪಂ, ಸ ರಾಜವಸತಿಂ ವಸೇ.
‘‘ಕೀಳೇ ರಾಜಾ ಅಮಚ್ಚೇಹಿ, ಭರಿಯಾಹಿ ಪರಿವಾರಿತೋ;
ನಾಮಚ್ಚೋ ರಾಜಭರಿಯಾಸು, ಭಾವಂ ಕುಬ್ಬೇಥ ಪಣ್ಡಿತೋ.
‘‘ಅನುದ್ಧತೋ ಅಚಪಲೋ, ನಿಪಕೋ ಸಂವುತಿನ್ದ್ರಿಯೋ;
ಮನೋಪಣಿಧಿಸಮ್ಪನ್ನೋ, ಸ ರಾಜವಸತಿಂ ವಸೇ.
‘‘ನಾಸ್ಸ ಭರಿಯಾಹಿ ಕೀಳೇಯ್ಯ, ನ ಮನ್ತೇಯ್ಯ ರಹೋಗತೋ;
ನಾಸ್ಸ ಕೋಸಾ ಧನಂ ಗಣ್ಹೇ, ಸ ರಾಜವಸತಿಂ ವಸೇ.
‘‘ನ ನಿದ್ದಂ ಬಹು ಮಞ್ಞೇಯ್ಯ [ನ ನಿದ್ದನ್ನಂ ಬಹುಂ ಮಞ್ಞೇ (ಸೀ. ಪೀ.)], ನ ಮದಾಯ ಸುರಂ ಪಿವೇ;
ನಾಸ್ಸ ದಾಯೇ ಮಿಗೇ ಹಞ್ಞೇ, ಸ ರಾಜವಸತಿಂ ವಸೇ.
‘‘ನಾಸ್ಸ ಪೀಠಂ ನ ಪಲ್ಲಙ್ಕಂ, ನ ಕೋಚ್ಛಂ ನ ನಾವಂ [ನಾಗಂ (ಸೀ. ಪೀ.)] ರಥಂ;
ಸಮ್ಮತೋಮ್ಹೀತಿ ¶ ಆರೂಹೇ, ಸ ರಾಜವಸತಿಂ ವಸೇ.
‘‘ನಾತಿದೂರೇ ಭಜೇ [ಭವೇ (ಸೀ. ಪೀ.)] ರಞ್ಞೋ, ನಾಚ್ಚಾಸನ್ನೇ ವಿಚಕ್ಖಣೋ;
ಸಮ್ಮುಖಞ್ಚಸ್ಸ ತಿಟ್ಠೇಯ್ಯ, ಸನ್ದಿಸ್ಸನ್ತೋ ಸಭತ್ತುನೋ.
‘‘ನ ವೇ [ಮೇ (ಸ್ಯಾ. ಕ.)] ರಾಜಾ ಸಖಾ ಹೋತಿ, ನ ರಾಜಾ ಹೋತಿ ಮೇಥುನೋ;
ಖಿಪ್ಪಂ ಕುಜ್ಝನ್ತಿ ರಾಜಾನೋ, ಸೂಕೇನ’ಕ್ಖೀವ ಘಟ್ಟಿತಂ.
‘‘ನ ಪೂಜಿತೋ ಮಞ್ಞಮಾನೋ, ಮೇಧಾವೀ ಪಣ್ಡಿತೋ ನರೋ;
ಫರುಸಂ ಪತಿಮನ್ತೇಯ್ಯ, ರಾಜಾನಂ ಪರಿಸಂಗತಂ.
‘‘ಲದ್ಧದ್ವಾರೋ ¶ ಲಭೇ ದ್ವಾರಂ [ಲದ್ಧವಾರೋಲಭೇ ವಾರಂ (ಪೀ.)], ನೇವ ರಾಜೂಸು ವಿಸ್ಸಸೇ;
ಅಗ್ಗೀವ ಸಂಯತೋ ತಿಟ್ಠೇ [ಅಗ್ಗೀವ ಯತೋ ತಿಟ್ಠೇಯ್ಯ (ಸೀ. ಪೀ.)], ಸ ರಾಜವಸತಿಂ ವಸೇ.
‘‘ಪುತ್ತಂ ವಾ ಭಾತರಂ ವಾ ಸಂ, ಸಮ್ಪಗ್ಗಣ್ಹಾತಿ ಖತ್ತಿಯೋ;
ಗಾಮೇಹಿ ನಿಗಮೇಹಿ ವಾ, ರಟ್ಠೇಹಿ ಜನಪದೇಹಿ ವಾ;
ತುಣ್ಹೀಭೂತೋ ಉಪೇಕ್ಖೇಯ್ಯ, ನ ಭಣೇ ಛೇಕಪಾಪಕಂ.
‘‘ಹತ್ಥಾರೋಹೇ ಅನೀಕಟ್ಠೇ, ರಥಿಕೇ ಪತ್ತಿಕಾರಕೇ;
ತೇಸಂ ಕಮ್ಮಾವದಾನೇನ [ಕಮ್ಮಾಪವಾದೇನ (ಸ್ಯಾ.)], ರಾಜಾ ವಡ್ಢೇತಿ ವೇತನಂ;
ನ ತೇಸಂ ಅನ್ತರಾ ಗಚ್ಛೇ, ಸ ರಾಜವಸತಿಂ ವಸೇ.
‘‘ಚಾಪೋವೂನುದರೋ ಧೀರೋ [ಚಾಪೋವ ಓನಮೇ ಧೀರೋ (ಸ್ಯಾ.)], ವಂಸೋವಾಪಿ ಪಕಮ್ಪಯೇ;
ಪಟಿಲೋಮಂ ನ ವತ್ತೇಯ್ಯ, ಸ ರಾಜವಸತಿಂ ವಸೇ.
‘‘ಚಾಪೋವೂನುದರೋ ¶ ಅಸ್ಸ, ಮಚ್ಛೋವಸ್ಸ ಅಜಿವ್ಹವಾ [ಅಜಿವ್ಹತಾ (ಸ್ಯಾ. ಕ.)];
ಅಪ್ಪಾಸೀ ನಿಪಕೋ ಸೂರೋ, ಸ ರಾಜವಸತಿಂ ವಸೇ.
‘‘ನ ¶ ಬಾಳ್ಹಂ ಇತ್ಥಿಂ ಗಚ್ಛೇಯ್ಯ, ಸಮ್ಪಸ್ಸಂ ತೇಜಸಙ್ಖಯಂ;
ಕಾಸಂ ಸಾಸಂ ದರಂ ಬಲ್ಯಂ, ಖೀಣಮೇಧೋ ನಿಗಚ್ಛತಿ.
‘‘ನಾತಿವೇಲಂ ಪಭಾಸೇಯ್ಯ, ನ ತುಣ್ಹೀ ಸಬ್ಬದಾ ಸಿಯಾ;
ಅವಿಕಿಣ್ಣಂ ಮಿತಂ ವಾಚಂ, ಪತ್ತೇ ಕಾಲೇ ಉದೀರಯೇ.
‘‘ಅಕ್ಕೋಧನೋ ಅಸಙ್ಘಟ್ಟೋ, ಸಚ್ಚೋ ಸಣ್ಹೋ ಅಪೇಸುಣೋ;
ಸಮ್ಫಂ ಗಿರಂ ನ ಭಾಸೇಯ್ಯ, ಸ ರಾಜವಸತಿಂ ವಸೇ.
[ಅಯಂ ಗಾಥಾ ನತ್ಥಿ ಪೀ. ಪೋತ್ಥಕೇ] ‘‘ಮಾತಾಪೇತ್ತಿಭರೋ ಅಸ್ಸ, ಕುಲೇ ಜೇಟ್ಠಾಪಚಾಯಿಕೋ;
ಸಣ್ಹೋ ಸಖಿಲಸಮ್ಭಾಸೋ [ಹಿರಿಓತ್ತಪ್ಪಸಮ್ಪನ್ನೋ (ಸೀ. ಕ.)], ಸ ರಾಜವಸತಿಂ ವಸೇ [ಅಯಂ ಗಾಥಾ ನತ್ಥಿ ಪೀ. ಪೋತ್ಥಕೇ].
‘‘ವಿನೀತೋ ಸಿಪ್ಪವಾ ದನ್ತೋ, ಕತತ್ತೋ ನಿಯತೋ ಮುದು;
ಅಪ್ಪಮತ್ತೋ ಸುಚಿ ದಕ್ಖೋ, ಸ ರಾಜವಸತಿಂ ವಸೇ.
‘‘ನಿವಾತವುತ್ತಿ ವುದ್ಧೇಸು, ಸಪ್ಪತಿಸ್ಸೋ ಸಗಾರವೋ;
ಸುರತೋ ಸುಖಸಂವಾಸೋ, ಸ ರಾಜವಸತಿಂ ವಸೇ.
‘‘ಆರಕಾ ¶ ಪರಿವಜ್ಜೇಯ್ಯ, ಸಹಿತುಂ ಪಹಿತಂ ಜನಂ;
ಭತ್ತಾರಞ್ಞೇವುದಿಕ್ಖೇಯ್ಯ, ನ ಚ ಅಞ್ಞಸ್ಸ ರಾಜಿನೋ.
‘‘ಸಮಣೇ ಬ್ರಾಹ್ಮಣೇ ಚಾಪಿ, ಸೀಲವನ್ತೇ ಬಹುಸ್ಸುತೇ;
ಸಕ್ಕಚ್ಚಂ ಪಯಿರುಪಾಸೇಯ್ಯ, ಸ ರಾಜವಸತಿಂ ವಸೇ.
‘‘ಸಮಣೇ ಬ್ರಾಹ್ಮಣೇ ಚಾಪಿ, ಸೀಲವನ್ತೇ ಬಹುಸ್ಸುತೇ;
ಸಕ್ಕಚ್ಚಂ ಅನುವಾಸೇಯ್ಯ, ಸ ರಾಜವಸತಿಂ ವಸೇ.
‘‘ಸಮಣೇ ಬ್ರಾಹ್ಮಣೇ ಚಾಪಿ, ಸೀಲವನ್ತೇ ಬಹುಸ್ಸುತೇ;
ತಪ್ಪೇಯ್ಯ ¶ ಅನ್ನಪಾನೇನ, ಸ ರಾಜವಸತಿಂ ವಸೇ.
‘‘ಸಮಣೇ ಬ್ರಾಹ್ಮಣೇ ಚಾಪಿ, ಸೀಲವನ್ತೇ ಬಹುಸ್ಸುತೇ;
ಆಸಜ್ಜ ಪಞ್ಞೇ ಸೇವೇಥ, ಆಕಙ್ಖಂ ವುದ್ಧಿಮತ್ತನೋ.
‘‘ದಿನ್ನಪುಬ್ಬಂ ನ ಹಾಪೇಯ್ಯ, ದಾನಂ ಸಮಣಬ್ರಾಹ್ಮಣೇ;
ನ ಚ ಕಿಞ್ಚಿ ನಿವಾರೇಯ್ಯ, ದಾನಕಾಲೇ ವಣಿಬ್ಬಕೇ.
‘‘ಪಞ್ಞವಾ ಬುದ್ಧಿಸಮ್ಪನ್ನೋ, ವಿಧಾನವಿಧಿಕೋವಿದೋ;
ಕಾಲಞ್ಞೂ ಸಮಯಞ್ಞೂ ಚ, ಸ ರಾಜವಸತಿಂ ವಸೇ.
‘‘ಉಟ್ಠಾತಾ ಕಮ್ಮಧೇಯ್ಯೇಸು, ಅಪ್ಪಮತ್ತೋ ವಿಚಕ್ಖಣೋ;
ಸುಸಂವಿಹೀತಕಮ್ಮನ್ತೋ, ಸ ರಾಜವಸತಿಂ ವಸೇ.
‘‘ಖಲಂ ¶ ಸಾಲಂ ಪಸುಂ ಖೇತ್ತಂ, ಗನ್ತಾ ಚಸ್ಸ ಅಭಿಕ್ಖಣಂ;
ಮಿತಂ ಧಞ್ಞಂ ನಿಧಾಪೇಯ್ಯ, ಮಿತಂವ ಪಾಚಯೇ ಘರೇ.
‘‘ಪುತ್ತಂ ವಾ ಭಾತರಂ ವಾ ಸಂ, ಸೀಲೇಸು ಅಸಮಾಹಿತಂ;
ಅನಙ್ಗವಾ ಹಿ ತೇ ಬಾಲಾ, ಯಥಾ ಪೇತಾ ತಥೇವ ತೇ;
ಚೋಳಞ್ಚ ನೇಸಂ ಪಿಣ್ಡಞ್ಚ, ಆಸೀನಾನಂ ಪದಾಪಯೇ.
‘‘ದಾಸೇ ಕಮ್ಮಕರೇ ಪೇಸ್ಸೇ, ಸೀಲೇಸು ಸುಸಮಾಹಿತೇ;
ದಕ್ಖೇ ಉಟ್ಠಾನಸಮ್ಪನ್ನೇ, ಆಧಿಪಚ್ಚಮ್ಹಿ ಠಾಪಯೇ.
‘‘ಸೀಲವಾ ಚ ಅಲೋಲೋ [ಅಲೋಭೋ (ಸ್ಯಾ. ಕ.)] ಚ, ಅನುರಕ್ಖೋ [ಅನುರತ್ತೋ (ಸೀ. ಪೀ.)] ಚ ರಾಜಿನೋ;
ಆವೀ ರಹೋ ಹಿತೋ ತಸ್ಸ, ಸ ರಾಜವಸತಿಂ ವಸೇ.
‘‘ಛನ್ದಞ್ಞೂ ¶ ರಾಜಿನೋ ಚಸ್ಸ, ಚಿತ್ತಟ್ಠೋ ಅಸ್ಸ ರಾಜಿನೋ;
ಅಸಙ್ಕುಸಕವುತ್ತಿ’ಸ್ಸ, ಸ ರಾಜವಸತಿಂ ವಸೇ.
‘‘ಉಚ್ಛಾದಯೇ ¶ ಚ ನ್ಹಾಪಯೇ [ಅಚ್ಛಾದನೇ ಚ ನ್ಹಾಪೇ ಚ (ಸ್ಯಾ. ಕ.)], ಧೋವೇ ಪಾದೇ ಅಧೋಸಿರಂ;
ಆಹತೋಪಿ ನ ಕುಪ್ಪೇಯ್ಯ, ಸ ರಾಜವಸತಿಂ ವಸೇ.
‘‘ಕುಮ್ಭಮ್ಪಞ್ಜಲಿಂ ಕರಿಯಾ [ಕುರಿಯಾ (ಸೀ.)], ಚಾಟಞ್ಚಾಪಿ [ವಾಯಸಂ ವಾ (ಸೀ. ಪೀ.)] ಪದಕ್ಖಿಣಂ;
ಕಿಮೇವ ಸಬ್ಬಕಾಮಾನಂ, ದಾತಾರಂ ಧೀರಮುತ್ತಮಂ.
‘‘ಯೋ ದೇತಿ ಸಯನಂ ವತ್ಥಂ, ಯಾನಂ ಆವಸಥಂ ಘರಂ;
ಪಜ್ಜುನ್ನೋರಿವ ಭೂತಾನಿ, ಭೋಗೇಹಿ ಅಭಿವಸ್ಸತಿ.
‘‘ಏಸಯ್ಯೋ ರಾಜವಸತಿ, ವತ್ತಮಾನೋ ಯಥಾ ನರೋ;
ಆರಾಧಯತಿ ರಾಜಾನಂ, ಪೂಜಂ ಲಭತಿ ಭತ್ತುಸು’’.
ರಾಜವಸತಿ ನಾಮ.
ಅನ್ತರಪೇಯ್ಯಾಲಂ
‘‘ಏವಂ ಸಮನುಸಾಸಿತ್ವಾ, ಞಾತಿಸಙ್ಘಂ ವಿಚಕ್ಖಣೋ;
ಪರಿಕಿಣ್ಣೋ ಸುಹದೇಹಿ, ರಾಜಾನಮುಪಸಙ್ಕಮಿ.
‘‘ವನ್ದಿತ್ವಾ ಸಿರಸಾ ಪಾದೇ, ಕತ್ವಾ ಚ ನಂ ಪದಕ್ಖಿಣಂ;
ವಿಧುರೋ ಅವಚ ರಾಜಾನಂ, ಪಗ್ಗಹೇತ್ವಾನ ಅಞ್ಜಲಿಂ.
‘‘ಅಯಂ ಮಂ ಮಾಣವೋ ನೇತಿ, ಕತ್ತುಕಾಮೋ [ಗನ್ತುಕಾಮೋ (ಕ.)] ಯಥಾಮತಿ;
ಞಾತೀನತ್ಥಂ ಪವಕ್ಖಾಮಿ, ತಂ ಸುಣೋಹಿ ಅರಿನ್ದಮ.
‘‘ಪುತ್ತೇ ¶ ಚ ಮೇ ಉದಿಕ್ಖೇಸಿ, ಯಞ್ಚ ಮಞ್ಞಂ ಘರೇ ಧನಂ;
ಯಥಾ ಪೇಚ್ಚ [ಪಚ್ಛಾ (ಸ್ಯಾ. ಕ.)] ನ ಹಾಯೇಥ, ಞಾತಿಸಙ್ಘೋ ಮಯೀ ಗತೇ.
‘‘ಯಥೇವ ಖಲತೀ ಭೂಮ್ಯಾ, ಭೂಮ್ಯಾಯೇವ ಪತಿಟ್ಠತಿ;
ಏವೇತಂ ಖಲಿತಂ ಮಯ್ಹಂ, ಏತಂ ಪಸ್ಸಾಮಿ ಅಚ್ಚಯಂ’’.
‘‘ಸಕ್ಕಾ ¶ ನ ಗನ್ತುಂ ಇತಿ ಮಯ್ಹ ಹೋತಿ, ಛೇತ್ವಾ [ಝತ್ವಾ (ಸೀ. ಪೀ.)] ವಧಿತ್ವಾ ಇಧ ಕಾತಿಯಾನಂ;
ಇಧೇವ ಹೋಹೀ ಇತಿ ಮಯ್ಹ ರುಚ್ಚತಿ, ಮಾ ತ್ವಂ ಅಗಾ ಉತ್ತಮಭೂರಿಪಞ್ಞ’’.
‘‘ಮಾ ¶ ಹೇವಧಮ್ಮೇಸು ಮನಂ ಪಣೀದಹಿ, ಅತ್ಥೇ ಚ ಧಮ್ಮೇ ಚ ಯುತ್ತೋ ಭವಸ್ಸು;
ಧಿರತ್ಥು ಕಮ್ಮಂ ಅಕುಸಲಂ ಅನರಿಯಂ, ಯಂ ಕತ್ವಾ ಪಚ್ಛಾ ನಿರಯಂ ವಜೇಯ್ಯ.
‘‘ನೇವೇಸ ಧಮ್ಮೋ ನ ಪುನೇತ [ಪುನೇತಿ (ಸ್ಯಾ. ಕ.)] ಕಿಚ್ಚಂ, ಅಯಿರೋ ಹಿ ದಾಸಸ್ಸ ಜನಿನ್ದ ಇಸ್ಸರೋ;
ಘಾತೇತುಂ ಝಾಪೇತುಂ ಅಥೋಪಿ ಹನ್ತುಂ, ನ ಚ ಮಯ್ಹ ಕೋಧತ್ಥಿ ವಜಾಮಿ ಚಾಹಂ’’.
‘‘ಜೇಟ್ಠಪುತ್ತಂ ಉಪಗುಯ್ಹ, ವಿನೇಯ್ಯ ಹದಯೇ ದರಂ;
ಅಸ್ಸುಪುಣ್ಣೇಹಿ ನೇತ್ತೇಹಿ, ಪಾವಿಸೀ ಸೋ ಮಹಾಘರಂ’’.
‘‘ಸಾಲಾವ ಸಮ್ಮಪತಿತಾ [ಸಮ್ಪಮಥಿತಾ (ಸೀ. ಪೀ.)], ಮಾಲುತೇನ ಪಮದ್ದಿತಾ;
ಸೇನ್ತಿ ಪುತ್ತಾ ಚ ದಾರಾ ಚ, ವಿಧುರಸ್ಸ ನಿವೇಸನೇ.
‘‘ಇತ್ಥಿಸಹಸ್ಸಂ ಭರಿಯಾನಂ, ದಾಸಿಸತ್ತಸತಾನಿ ಚ;
ಬಾಹಾ ಪಗ್ಗಯ್ಹ ಪಕ್ಕನ್ದುಂ, ವಿಧುರಸ್ಸ ನಿವೇಸನೇ.
‘‘ಓರೋಧಾ ಚ ಕುಮಾರಾ ಚ, ವೇಸಿಯಾನಾ ಚ ಬ್ರಾಹ್ಮಣಾ;
ಬಾಹಾ ಪಗ್ಗಯ್ಹ ಪಕ್ಕನ್ದುಂ, ವಿಧುರಸ್ಸ ನಿವೇಸನೇ.
‘‘ಹತ್ಥಾರೋಹಾ ¶ ಅನೀಕಟ್ಠಾ, ರಥಿಕಾ ಪತ್ತಿಕಾರಕಾ;
ಬಾಹಾ ಪಗ್ಗಯ್ಹ ಪಕ್ಕನ್ದುಂ, ವಿಧುರಸ್ಸ ನಿವೇಸನೇ.
‘‘ಸಮಾಗತಾ ಜಾನಪದಾ, ನೇಗಮಾ ಚ ಸಮಾಗತಾ;
ಬಾಹಾ ಪಗ್ಗಯ್ಹ ಪಕ್ಕನ್ದುಂ, ವಿಧುರಸ್ಸ ನಿವೇಸನೇ.
‘‘ಇತ್ಥಿಸಹಸ್ಸಂ ಭರಿಯಾನಂ, ದಾಸಿಸತ್ತಸತಾನಿ ಚ;
ಬಾಹಾ ಪಗ್ಗಯ್ಹ ಪಕ್ಕನ್ದುಂ, ಕಸ್ಮಾ ನೋ ವಿಜಹಿಸ್ಸಸಿ.
‘‘ಓರೋಧಾ ಚ ಕುಮಾರಾ ಚ, ದಾಸಿಸತ್ತಸತಾನಿ ಚ;
ಬಾಹಾ ಪಗ್ಗಯ್ಹ ಪಕ್ಕನ್ದುಂ, ಕಸ್ಮಾ ನೋ ವಿಜಹಿಸ್ಸಸಿ.
‘‘ಹತ್ಥಾರೋಹಾ ಅನೀಕಟ್ಠಾ, ದಾಸಿಸತ್ತಸತಾನಿ ಚ;
ಬಾಹಾ ಪಗ್ಗಯ್ಹ ಪಕ್ಕನ್ದುಂ, ಕಸ್ಮಾ ನೋ ವಿಜಹಿಸ್ಸಸಿ.
‘‘ಸಮಾಗತಾ ¶ ಜಾನಪದಾ, ದಾಸಿಸತ್ತಸತಾನಿ ಚ;
ಬಾಹಾ ಪಗ್ಗಯ್ಹ ಪಕ್ಕನ್ದುಂ, ಕಸ್ಮಾ ನೋ ವಿಜಹಿಸ್ಸಸಿ’’.
‘‘ಕತ್ವಾ ¶ ಘರೇಸು ಕಿಚ್ಚಾನಿ, ಅನುಸಾಸಿತ್ವಾ ಸಕಂ ಜನಂ;
ಮಿತ್ತಾಮಚ್ಚೇ ಚ ಭಚ್ಚೇ ಚ [ಸುಹಜ್ಜೇ (ಪೀ. ಕ.)], ಪುತ್ತದಾರೇ ಚ ಬನ್ಧವೇ.
‘‘ಕಮ್ಮನ್ತಂ ಸಂವಿಧೇತ್ವಾನ, ಆಚಿಕ್ಖಿತ್ವಾ ಘರೇ ಧನಂ;
ನಿಧಿಞ್ಚ ಇಣದಾನಞ್ಚ, ಪುಣ್ಣಕಂ ಏತದಬ್ರವಿ.
‘‘ಅವಸೀ ತುವಂ ಮಯ್ಹ ತೀಹಂ ಅಗಾರೇ, ಕತಾನಿ ಕಿಚ್ಚಾನಿ ಘರೇಸು ಮಯ್ಹಂ;
ಅನುಸಾಸಿತಾ ಪುತ್ತದಾರಾ ಮಯಾ ಚ, ಕರೋಮ ಕಚ್ಚಾನ [ಕಿಚ್ಚಾನಿ (ಸ್ಯಾ. ಕ.)] ಯಥಾಮತಿಂ ತೇ’’.
‘‘ಸಚೇ ¶ ಹಿ ಕತ್ತೇ ಅನುಸಾಸಿತಾ ತೇ, ಪುತ್ತಾ ಚ ದಾರಾ ಅನುಜೀವಿನೋ ಚ;
ಹನ್ದೇಹಿ ದಾನೀ ತರಮಾನರೂಪೋ, ದೀಘೋ ಹಿ ಅದ್ಧಾಪಿ ಅಯಂ ಪುರತ್ಥಾ.
‘‘ಅಛಮ್ಭಿತೋವ [ಅಯಮ್ಭಿತೋವ (ಸೀ. ಪೀ.)] ಗಣ್ಹಾಹಿ, ಆಜಾನೇಯ್ಯಸ್ಸ ವಾಲಧಿಂ;
ಇದಂ ಪಚ್ಛಿಮಕಂ ತುಯ್ಹಂ, ಜೀವಲೋಕಸ್ಸ ದಸ್ಸನಂ’’.
‘‘ಸೋಹಂ ಕಿಸ್ಸ ನು ಭಾಯಿಸ್ಸಂ, ಯಸ್ಸ ಮೇ ನತ್ಥಿ ದುಕ್ಕಟಂ;
ಕಾಯೇನ ವಾಚಾ ಮನಸಾ, ಯೇನ ಗಚ್ಛೇಯ್ಯ ದುಗ್ಗತಿಂ’’.
‘‘ಸೋ ಅಸ್ಸರಾಜಾ ವಿಧುರಂ ವಹನ್ತೋ, ಪಕ್ಕಾಮಿ ವೇಹಾಯಸಮನ್ತಲಿಕ್ಖೇ;
ಸಾಖಾಸು ಸೇಲೇಸು ಅಸಜ್ಜಮಾನೋ, ಕಾಲಾಗಿರಿಂ ಖಿಪ್ಪಮುಪಾಗಮಾಸಿ’’.
‘‘ಇತ್ಥಿಸಹಸ್ಸಂ ಭರಿಯಾನಂ, ದಾಸಿಸತ್ತಸತಾನಿ ಚ;
ಬಾಹಾ ಪಗ್ಗಯ್ಹ ಪಕ್ಕನ್ದುಂ, ಯಕ್ಖೋ ¶ ಬ್ರಾಹ್ಮಣವಣ್ಣೇನ;
ವಿಧುರಂ ಆದಾಯ ಗಚ್ಛತಿ.
‘‘ಸಮಾಗತಾ ¶ ಜಾನಪದಾ, ನೇಗಮಾ ಚ ಸಮಾಗತಾ;
ಬಾಹಾ ಪಗ್ಗಯ್ಹ ಪಕ್ಕನ್ದುಂ, ಯಕ್ಖೋ ಬ್ರಾಹ್ಮಣವಣ್ಣೇನ;
ವಿಧುರಂ ಆದಾಯ ಗಚ್ಛತಿ.
‘‘ಇತ್ಥಿಸಹಸ್ಸಂ ಭರಿಯಾನಂ, ದಾಸಿಸತ್ತಸತಾನಿ ಚ;
ಬಾಹಾ ಪಗ್ಗಯ್ಹ ಪಕ್ಕನ್ದುಂ, ಪಣ್ಡಿತೋ ಸೋ ಕುಹಿಂ ಗತೋ.
‘‘ಸಮಾಗತಾ ಜಾನಪದಾ, ನೇಗಮಾ ಚ ಸಮಾಗತಾ;
ಬಾಹಾ ಪಗ್ಗಯ್ಹ ಪಕ್ಕನ್ದುಂ, ಪಣ್ಡಿತೋ ಸೋ ಕುಹಿಂ ಗತೋ’’.
‘‘ಸಚೇ ಸೋ ಸತ್ತರತ್ತೇನ, ನಾಗಚ್ಛಿಸ್ಸತಿ ಪಣ್ಡಿತೋ;
ಸಬ್ಬೇ ಅಗ್ಗಿಂ ಪವೇಕ್ಖಾಮ [ಪವಿಸ್ಸಾಮ (ಸ್ಯಾ.)], ನತ್ಥತ್ಥೋ ಜೀವಿತೇನ ನೋ’’.
‘‘ಪಣ್ಡಿತೋ ಚ ವಿಯತ್ತೋ ಚ, ವಿಭಾವೀ ಚ ವಿಚಕ್ಖಣೋ;
ಖಿಪ್ಪಂ ಮೋಚಿಯ ಅತ್ತಾನಂ, ಮಾ ಭಾಯಿತ್ಥಾಗಮಿಸ್ಸತಿ’’ [ಖಿಪ್ಪಂ ಮೋಚೇಸ್ಸತ’ತ್ತಾನಂ, ಮಾ ಭಾಥ ಆಗಮಿಸ್ಸತಿ (ಸೀ. ಪೀ.)].
ಅನ್ತರಪೇಯ್ಯಾಲಂ ನಾಮ.
ಸಾಧುನರಧಮ್ಮಕಣ್ಡಂ
‘‘ಸೋ ¶ ತತ್ಥ ಗನ್ತ್ವಾನ ವಿಚಿನ್ತಯನ್ತೋ, ಉಚ್ಚಾವಚಾ ಚೇತನಕಾ [ಚೇತನತಾ (ಕ.)] ಭವನ್ತಿ;
ನಯಿಮಸ್ಸ ಜೀವೇನ ಮಮತ್ಥಿ ಕಿಞ್ಚಿ, ಹನ್ತ್ವಾನಿಮಂ ¶ ಹದಯಮಾನಯಿಸ್ಸಂ’’ [ಆದಿಯಿಸ್ಸಂ (ಸೀ. ಪೀ.)].
‘‘ಸೋ ತತ್ಥ ಗನ್ತ್ವಾ ಪಬ್ಬತನ್ತರಸ್ಮಿಂ [ಪಬ್ಬತಪಾದಸ್ಮಿಂ (ಕ.)], ಅನ್ತೋ ಪವಿಸಿತ್ವಾನ ಪದುಟ್ಠಚಿತ್ತೋ;
ಅಸಂವುತಸ್ಮಿಂ ಜಗತಿಪ್ಪದೇಸೇ, ಅಧೋಸಿರಂ ಧಾರಯಿ ಕಾತಿಯಾನೋ.
‘‘ಸೋ ಲಮ್ಬಮಾನೋ ನರಕೇ ಪಪಾತೇ, ಮಹಬ್ಭಯೇ ಲೋಮಹಂಸೇ ವಿದುಗ್ಗೇ;
ಅಸನ್ತಸನ್ತೋ ಕುರೂನಂ ಕತ್ತುಸೇಟ್ಠೋ, ಇಚ್ಚಬ್ರವಿ ಪುಣ್ಣಕಂ ನಾಮ ಯಕ್ಖಂ.
‘‘ಅರಿಯಾವಕಾಸೋಸಿ ¶ ಅನರಿಯರೂಪೋ, ಅಸಞ್ಞತೋ ಸಞ್ಞತಸನ್ನಿಕಾಸೋ;
ಅಚ್ಚಾಹಿತಂ ಕಮ್ಮಂ ಕರೋಸಿ ಲುದ್ರಂ, ಭಾವೇ ಚ ತೇ ಕುಸಲಂ ನತ್ಥಿ ಕಿಞ್ಚಿ.
‘‘ಯಂ ಮಂ ಪಪಾತಸ್ಮಿಂ ಪಪಾತುಮಿಚ್ಛಸಿ, ಕೋ ನು ತವತ್ಥೋ ಮರಣೇನ ಮಯ್ಹಂ;
ಅಮಾನುಸಸ್ಸೇವ ತವಜ್ಜ ವಣ್ಣೋ, ಆಚಿಕ್ಖ ಮೇ ತ್ವಂ ಕತಮಾಸಿ ದೇವತಾ’’.
‘‘ಯದಿ ತೇ ಸುತೋ ಪುಣ್ಣಕೋ ನಾಮ ಯಕ್ಖೋ, ರಞ್ಞೋ ಕುವೇರಸ್ಸ ಹಿ ಸೋ ಸಜಿಬ್ಬೋ [ಸಜೀವೋ (ಸೀ. ಪೀ.)];
ಭೂಮಿನ್ಧರೋ ¶ ವರುಣೋ ನಾಮ ನಾಗೋ, ಬ್ರಹಾ ಸುಚೀ ವಣ್ಣಬಲೂಪಪನ್ನೋ.
‘‘ತಸ್ಸಾನುಜಂ ಧೀತರಂ ಕಾಮಯಾಮಿ, ಇರನ್ಧತೀ ನಾಮ ಸಾ ನಾಗಕಞ್ಞಾ;
ತಸ್ಸಾ ಸುಮಜ್ಝಾಯ ಪಿಯಾಯ ಹೇತು, ಪತಾರಯಿಂ ತುಯ್ಹ ವಧಾಯ ಧೀರ’’.
‘‘ಮಾ ಹೇವ ತ್ವಂ [ತೇ (ಸ್ಯಾ. ಕ.)] ಯಕ್ಖ ಅಹೋಸಿ ಮೂಳ್ಹೋ, ನಟ್ಠಾ ಬಹೂ ದುಗ್ಗಹೀತೇನ ಲೋಕೇ [ಲೋಕಾ (ಸೀ. ಸ್ಯಾ. ಕ.)];
ಕಿಂ ತೇ ಸುಮಜ್ಝಾಯ ಪಿಯಾಯ ಕಿಚ್ಚಂ, ಮರಣೇನ ಮೇ ಇಙ್ಘ ಸುಣೋಮಿ [ಸುಣೋಮ (ಸೀ. ಪೀ.)] ಸಬ್ಬಂ’’.
‘‘ಮಹಾನುಭಾವಸ್ಸ ಮಹೋರಗಸ್ಸ, ಧೀತುಕಾಮೋ ಞಾತಿಭತೋ [ಞಾತಿಗತೋ (ಪೀ.)] ಹಮಸ್ಮಿ;
ತಂ ಯಾಚಮಾನಂ ಸಸುರೋ ಅವೋಚ, ಯಥಾ ಮಮಞ್ಞಿಂಸು ಸುಕಾಮನೀತಂ.
‘‘ದಜ್ಜೇಮು ¶ ಖೋ ತೇ ಸುತನುಂ ಸುನೇತ್ತಂ, ಸುಚಿಮ್ಹಿತಂ ಚನ್ದನಲಿತ್ತಗತ್ತಂ;
ಸಚೇ ತುವಂ ಹದಯಂ ಪಣ್ಡಿತಸ್ಸ, ಧಮ್ಮೇನ ಲದ್ಧಾ ಇಧ ಮಾಹರೇಸಿ;
ಏತೇನ ವಿತ್ತೇನ ಕುಮಾರಿ ಲಬ್ಭಾ, ನಞ್ಞಂ ಧನಂ ಉತ್ತರಿ ಪತ್ಥಯಾಮ.
‘‘ಏವಂ ¶ ನ ಮೂಳ್ಹೋಸ್ಮಿ ಸುಣೋಹಿ ಕತ್ತೇ, ನ ಚಾಪಿ ಮೇ ದುಗ್ಗಹಿತತ್ಥಿ ಕಿಞ್ಚಿ;
ಹದಯೇನ ತೇ ಧಮ್ಮಲದ್ಧೇನ ನಾಗಾ, ಇರನ್ಧತಿಂ ನಾಗಕಞ್ಞಂ ದದನ್ತಿ.
‘‘ತಸ್ಮಾ ಅಹಂ ತುಯ್ಹಂ ವಧಾಯ ಯುತ್ತೋ, ಏವಂ ಮಮತ್ಥೋ ಮರಣೇನ ತುಯ್ಹಂ;
ಇಧೇವ ತಂ ನರಕೇ ಪಾತಯಿತ್ವಾ, ಹನ್ತ್ವಾನ ತಂ ಹದಯಮಾನಯಿಸ್ಸಂ’’.
‘‘ಖಿಪ್ಪಂ ಮಮಂ ಉದ್ಧರ ಕಾತಿಯಾನ, ಹದಯೇನ ಮೇ ಯದಿ ತೇ ಅತ್ಥಿ ಕಿಚ್ಚಂ;
ಯೇ ಕೇಚಿಮೇ ಸಾಧುನರಸ್ಸ ಧಮ್ಮಾ, ಸಬ್ಬೇವ ತೇ ಪಾತುಕರೋಮಿ ಅಜ್ಜ’’.
‘‘ಸೋ ¶ ಪುಣ್ಣಕೋ ಕುರೂನಂ ಕತ್ತುಸೇಟ್ಠಂ, ನಗಮುದ್ಧನಿ ಖಿಪ್ಪಂ ಪತಿಟ್ಠಪೇತ್ವಾ;
ಅಸ್ಸತ್ಥಮಾಸೀನಂ ಸಮೇಕ್ಖಿಯಾನ, ಪರಿಪುಚ್ಛಿ ಕತ್ತಾರಮನೋಮಪಞ್ಞಂ.
‘‘ಸಮುದ್ಧತೋ ಮೇಸಿ ತುವಂ ಪಪಾತಾ, ಹದಯೇನ ತೇ ಅಜ್ಜ ಮಮತ್ಥಿ ಕಿಚ್ಚಂ;
ಯೇ ಕೇಚಿಮೇ ಸಾಧುನರಸ್ಸ ಧಮ್ಮಾ, ಸಬ್ಬೇವ ಮೇ ಪಾತುಕರೋಹಿ ಅಜ್ಜ’’.
‘‘ಸಮುದ್ಧತೋ ¶ ತ್ಯಸ್ಮಿ ಅಹಂ ಪಪಾತಾ, ಹದಯೇನ ಮೇ ಯದಿ ತೇ ಅತ್ಥಿ ಕಿಚ್ಚಂ;
ಯೇ ಕೇಚಿಮೇ ಸಾಧುನರಸ್ಸ ಧಮ್ಮಾ, ಸಬ್ಬೇವ ತೇ ಪಾತುಕರೋಮಿ ಅಜ್ಜ’’.
‘‘ಯಾತಾನುಯಾಯೀ ¶ ಚ ಭವಾಹಿ ಮಾಣವ, ಅಲ್ಲಞ್ಚ [ಅದ್ದಞ್ಚ (ಸೀ. ಪೀ.)] ಪಾಣಿಂ ಪರಿವಜ್ಜಯಸ್ಸು;
ಮಾ ಚಸ್ಸು ಮಿತ್ತೇಸು ಕದಾಚಿ ದುಬ್ಭೀ, ಮಾ ಚ ವಸಂ ಅಸತೀನಂ ನಿಗಚ್ಛೇ’’.
‘‘ಕಥಂ ನು ಯಾತಂ ಅನುಯಾಯೀ ಹೋತಿ, ಅಲ್ಲಞ್ಚ ಪಾಣಿಂ ದಹತೇ ಕಥಂ ಸೋ;
ಅಸತೀ ಚ ಕಾ ಕೋ ಪನ ಮಿತ್ತದುಬ್ಭೋ, ಅಕ್ಖಾಹಿ ಮೇ ಪುಚ್ಛಿತೋ ಏತಮತ್ಥಂ’’.
‘‘ಅಸನ್ಥುತಂ [ಅಸನ್ಧವಂ (ಸ್ಯಾ. ಕ.)] ನೋಪಿ ಚ ದಿಟ್ಠಪುಬ್ಬಂ, ಯೋ ಆಸನೇನಾಪಿ ನಿಮನ್ತಯೇಯ್ಯ;
ತಸ್ಸೇವ ಅತ್ಥಂ ಪುರಿಸೋ ಕರೇಯ್ಯ, ಯಾತಾನುಯಾಯೀತಿ ತಮಾಹು ಪಣ್ಡಿತಾ.
‘‘ಯಸ್ಸೇಕರತ್ತಮ್ಪಿ ಘರೇ ವಸೇಯ್ಯ, ಯತ್ಥನ್ನಪಾನಂ ಪುರಿಸೋ ಲಭೇಯ್ಯ;
ನ ತಸ್ಸ ಪಾಪಂ ಮನಸಾಪಿ ಚಿನ್ತಯೇ, ಅದುಬ್ಭೀ ¶ ಪಾಣಿಂ ದಹತೇ ಮಿತ್ತದುಬ್ಭೋ.
‘‘ಯಸ್ಸ ರುಕ್ಖಸ್ಸ ಛಾಯಾಯ, ನಿಸೀದೇಯ್ಯ ಸಯೇಯ್ಯ ವಾ;
ನ ತಸ್ಸ ಸಾಖಂ ಭಞ್ಜೇಯ್ಯ, ಮಿತ್ತದುಬ್ಭೋ ಹಿ ಪಾಪಕೋ.
‘‘ಪುಣ್ಣಮ್ಪಿ ಚೇಮಂ ಪಥವಿಂ ಧನೇನ, ದಜ್ಜಿತ್ಥಿಯಾ ಪುರಿಸೋ ಸಮ್ಮತಾಯ;
ಲದ್ಧಾ ಖಣಂ ಅತಿಮಞ್ಞೇಯ್ಯ ತಮ್ಪಿ, ತಾಸಂ ವಸಂ ಅಸತೀನಂ ನ ಗಚ್ಛೇ.
‘‘ಏವಂ ಖೋ ಯಾತಂ ಅನುಯಾಯೀ ಹೋತಿ, ಅಲ್ಲಞ್ಚ ಪಾಣಿಂ ದಹತೇ ಪುನೇವಂ;
ಅಸತೀ ಚ ಸಾ ಸೋ ಪನ ಮಿತ್ತದುಬ್ಭೋ, ಸೋ ಧಮ್ಮಿಕೋ ಹೋತಿ ಜಹಸ್ಸು ಅಧಮ್ಮಂ’’.
ಸಾಧುನರಧಮ್ಮಕಣ್ಡಂ ನಾಮ.
ಕಾಲಾಗಿರಿಕಣ್ಡಂ
‘‘ಅವಸಿಂ ¶ ಅಹಂ ತುಯ್ಹಂ ತೀಹಂ ಅಗಾರೇ, ಅನ್ನೇನ ಪಾನೇನ ಉಪಟ್ಠಿತೋಸ್ಮಿ;
ಮಿತ್ತೋ ಮಮಾಸೀ ವಿಸಜ್ಜಾಮಹಂ ತಂ, ಕಾಮಂ ಘರಂ ಉತ್ತಮಪಞ್ಞ ಗಚ್ಛ.
‘‘ಅಪಿ ಹಾಯತು ನಾಗಕುಲಾ [ನಾಗಕುಲಸ್ಸ (ಸೀ. ಸ್ಯಾ. ಪೀ.)] ಅತ್ಥೋ, ಅಲಮ್ಪಿ ಮೇ ನಾಗಕಞ್ಞಾಯ ಹೋತು;
ಸೋ ತ್ವಂ ಸಕೇನೇವ ಸುಭಾಸಿತೇನ, ಮುತ್ತೋಸಿ ಮೇ ಅಜ್ಜ ವಧಾಯ ಪಞ್ಞ’’.
‘‘ಹನ್ದ ¶ ¶ ತುವಂ ಯಕ್ಖ ಮಮಮ್ಪಿ ನೇಹಿ, ಸಸುರಂ ತೇ [ಸಸ್ಸುರಂ ನು ತೇ (ಸೀ. ಸ್ಯಾ. ಪೀ. ಕ.)] ಅತ್ಥಂ ಮಯಿ ಚರಸ್ಸು;
ಮಯಞ್ಚ ನಾಗಾಧಿಪತಿಂ ವಿಮಾನಂ, ದಕ್ಖೇಮು ನಾಗಸ್ಸ ಅದಿಟ್ಠಪುಬ್ಬಂ’’.
‘‘ಯಂ ವೇ ನರಸ್ಸ ಅಹಿತಾಯ ಅಸ್ಸ, ನ ತಂ ಪಞ್ಞೋ ಅರಹತಿ ದಸ್ಸನಾಯ;
ಅಥ ಕೇನ ವಣ್ಣೇನ ಅಮಿತ್ತಗಾಮಂ, ತುವಮಿಚ್ಛಸಿ ಉತ್ತಮಪಞ್ಞ ಗನ್ತುಂ’’.
‘‘ಅದ್ಧಾ ಪಜಾನಾಮಿ ಅಹಮ್ಪಿ ಏತಂ, ನ ತಂ ಪಞ್ಞೋ ಅರಹತಿ ದಸ್ಸನಾಯ;
ಪಾಪಞ್ಚ ಮೇ ನತ್ಥಿ ಕತಂ ಕುಹಿಞ್ಚಿ, ತಸ್ಮಾ ನ ಸಙ್ಕೇ ಮರಣಾಗಮಾಯ’’.
‘‘ಹನ್ದ ಚ ಠಾನಂ ಅತುಲಾನುಭಾವಂ, ಮಯಾ ಸಹ ದಕ್ಖಸಿ ಏಹಿ ಕತ್ತೇ;
ಯತ್ಥಚ್ಛತಿ ನಚ್ಚಗೀತೇಹಿ ನಾಗೋ, ರಾಜಾ ಯಥಾ ವೇಸ್ಸವಣೋ ನಳಿಞ್ಞಂ [ನಿಳಿಞ್ಞಂ (ಸ್ಯಾ.), ನಿಳಞ್ಞಂ (ಕ.)].
‘‘ತಂ ¶ ನಾಗಕಞ್ಞಾ ಚರಿತಂ ಗಣೇನ, ನಿಕೀಳಿತಂ ನಿಚ್ಚಮಹೋ ಚ ರತ್ತಿಂ;
ಪಹೂತಮಾಲ್ಯಂ [ಬಹುತ್ತಮಲ್ಲಂ (ಕ.)] ಬಹುಪುಪ್ಫಛನ್ನಂ [ಬಹುಪುಪ್ಫಸಞ್ಛನ್ನಂ (ಕ.)], ಓಭಾಸತೀ ¶ ವಿಜ್ಜುರಿವನ್ತಲಿಕ್ಖೇ.
‘‘ಅನ್ನೇನ ಪಾನೇನ ಉಪೇತರೂಪಂ, ನಚ್ಚೇಹಿ ಗೀತೇಹಿ ಚ ವಾದಿತೇಹಿ;
ಪರಿಪೂರಂ ಕಞ್ಞಾಹಿ ಅಲಙ್ಕತಾಹಿ, ಉಪಸೋಭತಿ ವತ್ಥಪಿಲನ್ಧನೇನ [ವತ್ಥಪಿಲನ್ಧನೇಹಿ (ಕ.)].
‘‘ಸೋ ಪುಣ್ಣಕೋ ಕುರೂನಂ ಕತ್ತುಸೇಟ್ಠಂ, ನಿಸೀದಯೀ ಪಚ್ಛತೋ ಆಸನಸ್ಮಿಂ;
ಆದಾಯ ಕತ್ತಾರಮನೋಮಪಞ್ಞಂ, ಉಪಾನಯೀ ಭವನಂ ನಾಗರಞ್ಞೋ.
‘‘ಪತ್ವಾನ ಠಾನಂ ಅತುಲಾನುಭಾವಂ, ಅಟ್ಠಾಸಿ ಕತ್ತಾ ಪಚ್ಛತೋ ಪುಣ್ಣಕಸ್ಸ;
ಸಾಮಗ್ಗಿ ಪೇಕ್ಖಮಾನೋ [ಸಾಮಗ್ಗಿಪೇಕ್ಖೀ ಪನ (ಸೀ. ಸ್ಯಾ. ಪೀ.)] ನಾಗರಾಜಾ, ಪುಬ್ಬೇವ ಜಾಮಾತರಮಜ್ಝಭಾಸಥ’’.
‘‘ಯನ್ನು ತುವಂ ಅಗಮಾ ಮಚ್ಚಲೋಕಂ, ಅನ್ವೇಸಮಾನೋ ಹದಯಂ ಪಣ್ಡಿತಸ್ಸ;
ಕಚ್ಚಿ ಸಮಿದ್ಧೇನ ಇಧಾನುಪತ್ತೋ, ಆದಾಯ ಕತ್ತಾರಮನೋಮಪಞ್ಞಂ’’.
‘‘ಅಯಞ್ಹಿ ಸೋ ಆಗತೋ ಯಂ ತ್ವಮಿಚ್ಛಸಿ, ಧಮ್ಮೇನ ಲದ್ಧೋ ಮಮ ಧಮ್ಮಪಾಲೋ;
ತಂ ಪಸ್ಸಥ ಸಮ್ಮುಖಾ [ತಂ ಪಸ್ಸ ಧಮ್ಮಂ ಸಮುಖಾ (ಕ.)] ಭಾಸಮಾನಂ, ಸುಖೋ ¶ ಹವೇ [ಭವೇ (ಪೀ.)] ಸಪ್ಪುರಿಸೇಹಿ ಸಙ್ಗಮೋ’’.
ಕಾಲಾಗಿರಿಕಣ್ಡಂ ನಾಮ.
‘‘ಅದಿಟ್ಠಪುಬ್ಬಂ ¶ ದಿಸ್ವಾನ, ಮಚ್ಚೋ ಮಚ್ಚುಭಯಟ್ಟಿತೋ [ಭಯದ್ದಿತೋ (ಸೀ. ಪೀ.)];
ಬ್ಯಮ್ಹಿತೋ ನಾಭಿವಾದೇಸಿ, ನಯಿದಂ ಪಞ್ಞವತಾಮಿವ’’.
‘‘ನ ಚಮ್ಹಿ ಬ್ಯಮ್ಹಿತೋ ನಾಗ, ನ ಚ ಮಚ್ಚುಭಯಟ್ಟಿತೋ;
ನ ವಜ್ಝೋ ಅಭಿವಾದೇಯ್ಯ, ವಜ್ಝಂ ವಾ ನಾಭಿವಾದಯೇ.
‘‘ಕಥಂ ನೋ ಅಭಿವಾದೇಯ್ಯ, ಅಭಿವಾದಾಪಯೇಥ ವೇ;
ಯಂ ನರೋ ಹನ್ತುಮಿಚ್ಛೇಯ್ಯ, ತಂ ಕಮ್ಮಂ ನುಪಪಜ್ಜತಿ’’.
‘‘ಏವಮೇತಂ ¶ ಯಥಾ ಬ್ರೂಸಿ, ಸಚ್ಚಂ ಭಾಸಸಿ ಪಣ್ಡಿತ;
ನ ವಜ್ಝೋ ಅಭಿವಾದೇಯ್ಯ, ವಜ್ಝಂ ವಾ ನಾಭಿವಾದಯೇ.
‘‘ಕಥಂ ನೋ ಅಭಿವಾದೇಯ್ಯ, ಅಭಿವಾದಾಪಯೇಥ ವೇ;
ಯಂ ನರೋ ಹನ್ತುಮಿಚ್ಛೇಯ್ಯ, ತಂ ಕಮ್ಮಂ ನುಪಪಜ್ಜತಿ’’.
‘‘ಅಸಸ್ಸತಂ ಸಸ್ಸತಂ ನು ತವಯಿದಂ, ಇದ್ಧೀಜುತೀಬಲವೀರಿಯೂಪಪತ್ತಿ [ಇದ್ಧಿಂ ಜುತಿಂ ಬಲಂ ವೀರಿಯೂಪಪತ್ತಿ (ಕ.)];
ಪುಚ್ಛಾಮಿ ತಂ ನಾಗರಾಜೇತಮತ್ಥಂ, ಕಥಂ ನು ತೇ ಲದ್ಧಮಿದಂ ವಿಮಾನಂ.
‘‘ಅಧಿಚ್ಚಲದ್ಧಂ ಪರಿಣಾಮಜಂ ತೇ, ಸಯಂಕತಂ ಉದಾಹು ದೇವೇಹಿ ದಿನ್ನಂ;
ಅಕ್ಖಾಹಿ ಮೇ ನಾಗರಾಜೇತಮತ್ಥಂ, ಯಥೇವ ತೇ ಲದ್ಧಮಿದಂ ವಿಮಾನಂ.
‘‘ನಾಧಿಚ್ಚಲದ್ಧಂ ¶ ನ ಪರಿಣಾಮಜಂ ಮೇ, ನ ಸಯಂಕತಂ ನಾಪಿ ದೇವೇಹಿ ದಿನ್ನಂ;
ಸಕೇಹಿ ಕಮ್ಮೇಹಿ ಅಪಾಪಕೇಹಿ, ಪುಞ್ಞೇಹಿ ಮೇ ಲದ್ಧಮಿದಂ ವಿಮಾನಂ’’.
‘‘ಕಿಂ ತೇ ವತಂ ಕಿಂ ಪನ ಬ್ರಹ್ಮಚರಿಯಂ, ಕಿಸ್ಸ ಸುಚಿಣ್ಣಸ್ಸ ಅಯಂ ವಿಪಾಕೋ;
ಇದ್ಧೀಜುತೀಬಲವೀರಿಯೂಪಪತ್ತಿ, ಇದಞ್ಚ ತೇ ನಾಗ ಮಹಾವಿಮಾನಂ’’.
‘‘ಅಹಞ್ಚ ¶ ಭರಿಯಾ ಚ ಮನುಸ್ಸಲೋಕೇ, ಸದ್ಧಾ ಉಭೋ ದಾನಪತೀ ಅಹುಮ್ಹಾ;
ಓಪಾನಭೂತಂ ಮೇ ಘರಂ ತದಾಸಿ, ಸನ್ತಪ್ಪಿತಾ ಸಮಣಬ್ರಾಹ್ಮಣಾ ಚ.
‘‘ಮಾಲಞ್ಚ ಗನ್ಧಞ್ಚ ವಿಲೇಪನಞ್ಚ, ಪದೀಪಿಯಂ ಸೇಯ್ಯಮುಪಸ್ಸಯಞ್ಚ;
ಅಚ್ಛಾದನಂ ಸಾಯನಮನ್ನಪಾನಂ, ಸಕ್ಕಚ್ಚ ದಾನಾನಿ ಅದಮ್ಹ ತತ್ಥ.
‘‘ತಂ ಮೇ ವತಂ ತಂ ಪನ ಬ್ರಹ್ಮಚರಿಯಂ, ತಸ್ಸ ಸುಚಿಣ್ಣಸ್ಸ ಅಯಂ ವಿಪಾಕೋ;
ಇದ್ಧೀಜುತೀಬಲವೀರಿಯೂಪಪತ್ತಿ, ಇದಞ್ಚ ಮೇ ಧೀರ ಮಹಾವಿಮಾನಂ’.
‘‘ಏವಂ ¶ ಚೇ ತೇ ಲದ್ಧಮಿದಂ ವಿಮಾನಂ, ಜಾನಾಸಿ ಪುಞ್ಞಾನಂ ಫಲೂಪಪತ್ತಿಂ;
ತಸ್ಮಾ ಹಿ ಧಮ್ಮಂ ಚರ ಅಪ್ಪಮತ್ತೋ, ಯಥಾ ವಿಮಾನಂ ಪುನ ಮಾವಸೇಸಿ’.
‘‘ನಯಿಧ ಸನ್ತಿ ಸಮಣಬ್ರಾಹ್ಮಣಾ ಚ, ಯೇಸನ್ನಪಾನಾನಿ ದದೇಮು ಕತ್ತೇ;
ಅಕ್ಖಾಹಿ ಮೇ ಪುಚ್ಛಿತೋ ಏತಮತ್ಥಂ, ಯಥಾ ವಿಮಾನಂ ಪುನ ಮಾವಸೇಮ’’.
‘‘ಭೋಗೀ ಹಿ ತೇ ಸನ್ತಿ ಇಧೂಪಪನ್ನಾ, ಪುತ್ತಾ ಚ ದಾರಾ ಅನುಜೀವಿನೋ ಚ;
ತೇಸು ತುವಂ ವಚಸಾ ಕಮ್ಮುನಾ ಚ, ಅಸಮ್ಪದುಟ್ಠೋ ಚ ಭವಾಹಿ ನಿಚ್ಚಂ.
‘‘ಏವಂ ತುವಂ ನಾಗ ಅಸಮ್ಪದೋಸಂ, ಅನುಪಾಲಯ ವಚಸಾ ಕಮ್ಮುನಾ ಚ;
ಠತ್ವಾ ಇಧ ಯಾವತಾಯುಕಂ ವಿಮಾನೇ, ಉದ್ಧಂ ಇತೋ ಗಚ್ಛಸಿ ದೇವಲೋಕಂ’’.
‘‘ಅದ್ಧಾ ¶ ಹಿ ಸೋ ಸೋಚತಿ ರಾಜಸೇಟ್ಠೋ, ತಯಾ ವಿನಾ ಯಸ್ಸ ತುವಂ ಸಜಿಬ್ಬೋ;
ದುಕ್ಖೂಪನೀತೋಪಿ ತಯಾ ಸಮೇಚ್ಚ, ವಿನ್ದೇಯ್ಯ ಪೋಸೋ ಸುಖಮಾತುರೋಪಿ’’.
‘‘ಅದ್ಧಾ ¶ ಸತಂ ಭಾಸಸಿ ನಾಗ ಧಮ್ಮಂ, ಅನುತ್ತರಂ ಅತ್ಥಪದಂ ಸುಚಿಣ್ಣಂ;
ಏತಾದಿಸಿಯಾಸು ಹಿ ಆಪದಾಸು, ಪಞ್ಞಾಯತೇ ಮಾದಿಸಾನಂ ವಿಸೇಸೋ’’.
‘‘ಅಕ್ಖಾಹಿ ¶ ನೋ ತಾಯಂ ಮುಧಾ ನು ಲದ್ಧೋ, ಅಕ್ಖೇಹಿ ನೋ ತಾಯಂ ಅಜೇಸಿ ಜೂತೇ;
ಧಮ್ಮೇನ ಲದ್ಧೋ ಇತಿ ತಾಯಮಾಹ [ಮಾ’ಯ’ಮಾಹ (ಸ್ಯಾ.)], ಕಥಂ ನು ತ್ವಂ ಹತ್ಥಮಿಮಸ್ಸ ಮಾಗತೋ’’.
‘‘ಯೋ ಮಿಸ್ಸರೋ ತತ್ಥ ಅಹೋಸಿ ರಾಜಾ, ತಮಾಯಮಕ್ಖೇಹಿ ಅಜೇಸಿ ಜೂತೇ;
ಸೋ ಮಂ ಜಿತೋ ರಾಜಾ ಇಮಸ್ಸದಾಸಿ, ಧಮ್ಮೇನ ಲದ್ಧೋಸ್ಮಿ ಅಸಾಹಸೇನ.
‘‘ಮಹೋರಗೋ ಅತ್ತಮನೋ ಉದಗ್ಗೋ, ಸುತ್ವಾನ ಧೀರಸ್ಸ ಸುಭಾಸಿತಾನಿ;
ಹತ್ಥೇ ಗಹೇತ್ವಾನ ಅನೋಮಪಞ್ಞಂ, ಪಾವೇಕ್ಖಿ ಭರಿಯಾಯ ತದಾ ಸಕಾಸೇ.
‘‘ಯೇನ ತ್ವಂ ವಿಮಲೇ ಪಣ್ಡು, ಯೇನ ಭತ್ತಂ ನ ರುಚ್ಚತಿ;
ನ ಚ ಮೇ ತಾದಿಸೋ ವಣ್ಣೋ, ಅಯಮೇಸೋ ತಮೋನುದೋ.
‘‘ಯಸ್ಸ ತೇ ಹದಯೇನತ್ಥೋ, ಆಗತಾಯಂ ಪಭಙ್ಕರೋ;
ತಸ್ಸ ವಾಕ್ಯಂ ನಿಸಾಮೇಹಿ, ದುಲ್ಲಭಂ ದಸ್ಸನಂ ಪುನ.
‘‘ದಿಸ್ವಾನ ¶ ತಂ ವಿಮಲಾ ಭೂರಿಪಞ್ಞಂ, ದಸಙ್ಗುಲೀ ಅಞ್ಜಲಿಂ ಪಗ್ಗಹೇತ್ವಾ;
ಹಟ್ಠೇನ ಭಾವೇನ ಪತೀತರೂಪಾ, ಇಚ್ಚಬ್ರವಿ ಕುರೂನಂ ಕತ್ತುಸೇಟ್ಠಂ.
‘‘ಅದಿಟ್ಠಪುಬ್ಬಂ ದಿಸ್ವಾನ, ಮಚ್ಚೋ ಮಚ್ಚುಭಯಟ್ಟಿತೋ;
ಬ್ಯಮ್ಹಿತೋ ನಾಭಿವಾದೇಸಿ, ನಯಿದಂ ಪಞ್ಞವತಾಮಿವ’’.
‘‘ನ ¶ ಚಮ್ಹಿ ಬ್ಯಮ್ಹಿತೋ ನಾಗಿ, ನ ಚ ಮಚ್ಚುಭಯಟ್ಟಿತೋ;
ನ ವಜ್ಝೋ ಅಭಿವಾದೇಯ್ಯ, ವಜ್ಝಂ ವಾ ನಾಭಿವಾದಯೇ.
‘‘ಕಥಂ ನೋ ಅಭಿವಾದೇಯ್ಯ, ಅಭಿವಾದಾಪಯೇಥ ವೇ;
ಯಂ ನರೋ ಹನ್ತುಮಿಚ್ಛೇಯ್ಯ, ತಂ ಕಮ್ಮಂ ನುಪಪಜ್ಜತಿ’’.
‘‘ಏವಮೇತಂ ಯಥಾ ಬ್ರೂಸಿ, ಸಚ್ಚಂ ಭಾಸಸಿ ಪಣ್ಡಿತ;
ನ ವಜ್ಝೋ ಅಭಿವಾದೇಯ್ಯ, ವಜ್ಝಂ ವಾ ನಾಭಿವಾದಯೇ.
‘‘ಕಥಂ ನೋ ಅಭಿವಾದೇಯ್ಯ, ಅಭಿವಾದಾಪಯೇಥ ವೇ;
ಯಂ ನರೋ ಹನ್ತುಮಿಚ್ಛೇಯ್ಯ, ತಂ ಕಮ್ಮಂ ನುಪಪಜ್ಜತಿ’’.
‘‘ಅಸಸ್ಸತಂ ಸಸ್ಸತಂ ನು ತವಯಿದಂ, ಇದ್ಧೀಜುತೀಬಲವೀರಿಯೂಪಪತ್ತಿ;
ಪುಚ್ಛಾಮಿ ತಂ ನಾಗಕಞ್ಞೇತಮತ್ಥಂ, ಕಥಂ ನು ತೇ ಲದ್ಧಮಿದಂ ವಿಮಾನಂ.
‘‘ಅಧಿಚ್ಚಲದ್ಧಂ ಪರಿಣಾಮಜಂ ತೇ, ಸಯಂಕತಂ ಉದಾಹು ದೇವೇಹಿ ದಿನ್ನಂ;
ಅಕ್ಖಾಹಿ ¶ ಮೇ ನಾಗಕಞ್ಞೇತಮತ್ಥಂ, ಯಥೇವ ತೇ ಲದ್ಧಮಿದಂ ವಿಮಾನಂ’’.
‘‘ನಾಧಿಚ್ಚಲದ್ಧಂ ನ ಪರಿಣಾಮಜಂ ಮೇ, ನ ಸಯಂ ಕತಂ ನಾಪಿ ದೇವೇಹಿ ದಿನ್ನಂ;
ಸಕೇಹಿ ಕಮ್ಮೇಹಿ ಅಪಾಪಕೇಹಿ, ಪುಞ್ಞೇಹಿ ಮೇ ಲದ್ಧಮಿದಂ ವಿಮಾನಂ’’.
‘‘ಕಿಂ ತೇ ವತಂ ಕಿಂ ಪನ ಬ್ರಹ್ಮಚರಿಯಂ, ಕಿಸ್ಸ ಸುಚಿಣ್ಣಸ್ಸ ಅಯಂ ವಿಪಾಕೋ;
ಇದ್ಧೀಜುತೀಬಲವೀರಿಯೂಪಪತ್ತಿ, ಇದಞ್ಚ ತೇ ನಾಗಿ ಮಹಾವಿಮಾನಂ’’.
‘‘ಅಹಞ್ಚ ¶ ಖೋ ಸಾಮಿಕೋ ಚಾಪಿ ಮಯ್ಹಂ, ಸದ್ಧಾ ಉಭೋ ದಾನಪತೀ ಅಹುಮ್ಹಾ;
ಓಪಾನಭೂತಂ ಮೇ ಘರಂ ತದಾಸಿ, ಸನ್ತಪ್ಪಿತಾ ಸಮಣಬ್ರಾಹ್ಮಣಾ ಚ.
‘‘ಮಾಲಞ್ಚ ¶ ಗನ್ಧಞ್ಚ ವಿಲೇಪನಞ್ಚ, ಪದೀಪಿಯಂ ಸೇಯ್ಯಮುಪಸ್ಸಯಞ್ಚ;
ಅಚ್ಛಾದನಂ ಸಾಯನಮನ್ನಪಾನಂ, ಸಕ್ಕಚ್ಚಂ ದಾನಾನಿ ಅದಮ್ಹ ತತ್ಥ.
‘‘ತಂ ಮೇ ವತಂ ತಂ ಪನ ಬ್ರಹ್ಮಚರಿಯಂ, ತಸ್ಸ ಸುಚಿಣ್ಣಸ್ಸ ಅಯಂ ವಿಪಾಕೋ;
ಇದ್ಧೀಜುತೀಬಲವೀರಿಯೂಪಪತ್ತಿ ¶ , ಇದಞ್ಚ ಮೇ ಧೀರ ಮಹಾವಿಮಾನಂ’’.
‘‘ಏವಂ ಚೇ ತೇ ಲದ್ಧಮಿದಂ ವಿಮಾನಂ, ಜಾನಾಸಿ ಪುಞ್ಞಾನಂ ಫಲೂಪಪತ್ತಿಂ;
ತಸ್ಮಾ ಹಿ ಧಮ್ಮಂ ಚರ ಅಪ್ಪಮತ್ತಾ, ಯಥಾ ವಿಮಾನಂ ಪುನ ಮಾವಸೇಸಿ’’.
‘‘ನಯಿಧ ಸನ್ತಿ ಸಮಣಬ್ರಾಹ್ಮಣಾ ಚ, ಯೇಸನ್ನಪಾನಾನಿ ದದೇಮು ಕತ್ತೇ;
ಅಕ್ಖಾಹಿ ಮೇ ಪುಚ್ಛಿತೋ ಏತಮತ್ಥಂ, ಯಥಾ ವಿಮಾನಂ ಪುನ ಮಾವಸೇಮ’’.
‘‘ಭೋಗೀ ಹಿ ತೇ ಸನ್ತಿ ಇಧೂಪಪನ್ನಾ, ಪುತ್ತಾ ಚ ದಾರಾ ಅನುಜೀವಿನೋ ಚ;
ತೇಸು ತುವಂ ವಚಸಾ ಕಮ್ಮುನಾ ಚ, ಅಸಮ್ಪದುಟ್ಠಾ ಚ ಭವಾಹಿ ನಿಚ್ಚಂ.
‘‘ಏವಂ ತುವಂ ನಾಗಿ ಅಸಮ್ಪದೋಸಂ, ಅನುಪಾಲಯ ವಚಸಾ ಕಮ್ಮುನಾ ಚ;
ಠತ್ವಾ ಇಧ ಯಾವತಾಯುಕಂ ವಿಮಾನೇ, ಉದ್ಧಂ ಇತೋ ಗಚ್ಛಸಿ ದೇವಲೋಕಂ’’.
‘‘ಅದ್ಧಾ ಹಿ ಸೋ ಸೋಚತಿ ರಾಜಸೇಟ್ಠೋ, ತಯಾ ವಿನಾ ಯಸ್ಸ ತುವಂ ಸಜಿಬ್ಬೋ;
ದುಕ್ಖೂಪನೀತೋಪಿ ¶ ತಯಾ ಸಮೇಚ್ಚ, ವಿನ್ದೇಯ್ಯ ಪೋಸೋ ಸುಖಮಾತುರೋಪಿ’’.
‘‘ಅದ್ಧಾ ¶ ಸತಂ ಭಾಸಸಿ ನಾಗಿ ಧಮ್ಮಂ, ಅನುತ್ತರಂ ಅತ್ಥಪದಂ ಸುಚಿಣ್ಣಂ;
ಏತಾದಿಸಿಯಾಸು ಹಿ ಆಪದಾಸು, ಪಞ್ಞಾಯತೇ ಮಾದಿಸಾನಂ ವಿಸೇಸೋ’’.
‘‘ಅಕ್ಖಾಹಿ ನೋ ತಾಯಂ ಮುಧಾ ನು ಲದ್ಧೋ, ಅಕ್ಖೇಹಿ ನೋ ತಾಯಂ ಅಜೇಸಿ ಜೂತೇ;
ಧಮ್ಮೇನ ಲದ್ಧೋ ಇತಿ ತಾಯಮಾಹ, ಕಥಂ ನು ತ್ವಂ ಹತ್ಥಮಿಮಸ್ಸ ಮಾಗತೋ’’.
‘‘ಯೋ ಮಿಸ್ಸರೋ ತತ್ಥ ಅಹೋಸಿ ರಾಜಾ, ತಮಾಯಮಕ್ಖೇಹಿ ಅಜೇಸಿ ಜೂತೇ;
ಸೋ ಮಂ ಜಿತೋ ರಾಜಾ ಇಮಸ್ಸದಾಸಿ, ಧಮ್ಮೇನ ಲದ್ಧೋಸ್ಮಿ ಅಸಾಹಸೇನ.
‘‘ಯಥೇವ ವರುಣೋ ನಾಗೋ, ಪಞ್ಹಂ ಪುಚ್ಛಿತ್ಥ ಪಣ್ಡಿತಂ;
ತಥೇವ ನಾಗಕಞ್ಞಾಪಿ, ಪಞ್ಹಂ ಪುಚ್ಛಿತ್ಥ ಪಣ್ಡಿತಂ.
‘‘ಯಥೇವ ವರುಣಂ ನಾಗಂ, ಧೀರೋ ತೋಸೇಸಿ ಪುಚ್ಛಿತೋ;
ತಥೇವ ನಾಗಕಞ್ಞಮ್ಪಿ, ಧೀರೋ ತೋಸೇಸಿ ಪುಚ್ಛಿತೋ.
‘‘ಉಭೋಪಿ ತೇ ಅತ್ತಮನೇ ವಿದಿತ್ವಾ, ಮಹೋರಗಂ ನಾಗಕಞ್ಞಞ್ಚ ಧೀರೋ [ವಿಧೂರೋ (ಕ.)];
ಅಛಮ್ಭೀ ¶ ಅಭೀತೋ ಅಲೋಮಹಟ್ಠೋ, ಇಚ್ಚಬ್ರವಿ ವರುಣಂ ನಾಗರಾಜಾನಂ.
‘‘ಮಾ ರೋಧಯಿ [ಮಾ ಹೇಠಯಿ (ಪೀ.)] ನಾಗ ಆಯಾಹಮಸ್ಮಿ, ಯೇನ ತವತ್ಥೋ ಇದಂ ಸರೀರಂ;
ಹದಯೇನ ಮಂಸೇನ ಕರೋಹಿ ಕಿಚ್ಚಂ, ಸಯಂ ಕರಿಸ್ಸಾಮಿ ಯಥಾಮತಿ ತೇ’’.
‘‘ಪಞ್ಞಾ ¶ ಹವೇ ಹದಯಂ ಪಣ್ಡಿತಾನಂ, ತೇ ತ್ಯಮ್ಹ ಪಞ್ಞಾಯ ಮಯಂ ಸುತುಟ್ಠಾ;
ಅನೂನನಾಮೋ ಲಭತಜ್ಜ ದಾರಂ, ಅಜ್ಜೇವ ತಂ ಕುರುಯೋ ಪಾಪಯಾತು’’.
‘‘ಸ ¶ ಪುಣ್ಣಕೋ ಅತ್ತಮನೋ ಉದಗ್ಗೋ, ಇರನ್ಧತಿಂ ನಾಗಕಞ್ಞಂ ಲಭಿತ್ವಾ;
ಹಟ್ಠೇನ ಭಾವೇನ ಪತೀತರೂಪೋ, ಇಚ್ಚಬ್ರವಿ ಕುರೂನಂ ಕತ್ತುಸೇಟ್ಠಂ.
‘‘ಭರಿಯಾಯ ಮಂ ತ್ವಂ ಅಕರಿ ಸಮಙ್ಗಿಂ, ಅಹಞ್ಚ ತೇ ವಿಧುರ ಕರೋಮಿ ಕಿಚ್ಚಂ;
ಇದಞ್ಚ ತೇ ಮಣಿರತನಂ ದದಾಮಿ, ಅಜ್ಜೇವ ತಂ ಕುರುಯೋ ಪಾಪಯಾಮಿ’’.
‘‘ಅಜೇಯ್ಯಮೇಸಾ ತವ ಹೋತು ಮೇತ್ತಿ, ಭರಿಯಾಯ ¶ ಕಚ್ಚಾನ ಪಿಯಾಯ ಸದ್ಧಿಂ;
ಆನನ್ದಿ ವಿತ್ತೋ [ಆನನ್ದಚಿತ್ತೋ (ಸ್ಯಾ. ಪೀ.)] ಸುಮನೋ ಪತೀತೋ, ದತ್ವಾ ಮಣಿಂ ಮಞ್ಚ ನಯಿನ್ದಪತ್ಥಂ.
‘‘ಸ ಪುಣ್ಣಕೋ ಕುರೂನಂ ಕತ್ತುಸೇಟ್ಠಂ, ನಿಸೀದಯೀ ಪುರತೋ ಆಸನಸ್ಮಿಂ;
ಆದಾಯ ಕತ್ತಾರಮನೋಮಪಞ್ಞಂ, ಉಪಾನಯೀ ನಗರಂ ಇನ್ದಪತ್ಥಂ.
‘‘ಮನೋ ಮನುಸ್ಸಸ್ಸ ಯಥಾಪಿ ಗಚ್ಛೇ, ತತೋಪಿಸ್ಸ ಖಿಪ್ಪತರಂ [ತತೋಪಿ ಸಂಖಿಪ್ಪತರಂ (ಸೀ. ಪೀ.)] ಅಹೋಸಿ;
ಸ ಪುಣ್ಣಕೋ ಕುರೂನಂ ಕತ್ತುಸೇಟ್ಠಂ, ಉಪಾನಯೀ ನಗರಂ ಇನ್ದಪತ್ಥಂ’’.
‘‘ಏತಿನ್ದಪತ್ಥಂ ನಗರಂ ಪದಿಸ್ಸತಿ, ರಮ್ಮಾನಿ ಚ ಅಮ್ಬವನಾನಿ ಭಾಗಸೋ;
ಅಹಞ್ಚ ಭರಿಯಾಯ ಸಮಙ್ಗಿಭೂತೋ, ತುವಞ್ಚ ಪತ್ತೋಸಿ ಸಕಂ ನಿಕೇತಂ’’.
‘‘ಸ ಪುಣ್ಣಕೋ ಕುರೂನಂ ಕತ್ತುಸೇಟ್ಠಂ, ಓರೋಪಿಯ ಧಮ್ಮಸಭಾಯ ಮಜ್ಝೇ;
ಆಜಞ್ಞಮಾರುಯ್ಹ ಅನೋಮವಣ್ಣೋ, ಪಕ್ಕಾಮಿ ¶ ವೇಹಾಯಸಮನ್ತಲಿಕ್ಖೇ.
‘‘ತಂ ¶ ದಿಸ್ವಾ ರಾಜಾ ಪರಮಪ್ಪತೀತೋ, ಉಟ್ಠಾಯ ಬಾಹಾಹಿ ಪಲಿಸ್ಸಜಿತ್ವಾ;
ಅವಿಕಮ್ಪಯಂ ಧಮ್ಮಸಭಾಯ ಮಜ್ಝೇ, ನಿಸೀದಯೀ ಪಮುಖಮಾಸನಸ್ಮಿಂ’’.
‘‘ತ್ವಂ ನೋ ವಿನೇತಾಸಿ ರಥಂವ ನದ್ಧಂ, ನನ್ದನ್ತಿ ತಂ ಕುರುಯೋ ದಸ್ಸನೇನ;
ಅಕ್ಖಾಹಿ ಮೇ ಪುಚ್ಛಿತೋ ಏತಮತ್ಥಂ, ಕಥಂ ಪಮೋಕ್ಖೋ ಅಹು ಮಾಣವಸ್ಸ’’.
‘‘ಯಂ ಮಾಣವೋತ್ಯಾಭಿವದೀ ಜನಿನ್ದ, ನ ಸೋ ಮನುಸ್ಸೋ ನರವೀರಸೇಟ್ಠ;
ಯದಿ ತೇ ಸುತೋ ಪುಣ್ಣಕೋ ನಾಮ ಯಕ್ಖೋ, ರಞ್ಞೋ ಕುವೇರಸ್ಸ ಹಿ ಸೋ ಸಜಿಬ್ಬೋ.
‘‘ಭೂಮಿನ್ಧರೋ ವರುಣೋ ನಾಮ ನಾಗೋ, ಬ್ರಹಾ ಸುಚೀ ವಣ್ಣಬಲೂಪಪನ್ನೋ;
ತಸ್ಸಾನುಜಂ ಧೀತರಂ ಕಾಮಯಾನೋ, ಇರನ್ಧತೀ ನಾಮ ಸಾ ನಾಗಕಞ್ಞಾ.
‘‘ತಸ್ಸಾ ಸುಮಜ್ಝಾಯ ಪಿಯಾಯ ಹೇತು, ಪತಾರಯಿತ್ಥ ಮರಣಾಯ ಮಯ್ಹಂ;
ಸೋ ಚೇವ ಭರಿಯಾಯ ಸಮಙ್ಗಿಭೂತೋ, ಅಹಞ್ಚ ¶ ಅನುಞ್ಞಾತೋ ಮಣಿ ಚ ಲದ್ಧೋ’’.
‘‘ರುಕ್ಖೋ ಹಿ ಮಯ್ಹಂ ಪದ್ಧಾರೇ [ಘರದ್ವಾರೇ (ಸ್ಯಾ.)] ಸುಜಾತೋ, ಪಞ್ಞಾಕ್ಖನ್ಧೋ ಸೀಲಮಯಸ್ಸ ಸಾಖಾ;
ಅತ್ಥೇ ಚ ಧಮ್ಮೇ ಚ ಠಿತೋ ನಿಪಾಕೋ, ಗವಪ್ಫಲೋ ಹತ್ಥಿಗವಸ್ಸಛನ್ನೋ.
‘‘ನಚ್ಚಗೀತತೂರಿಯಾಭಿನಾದಿತೇ, ಉಚ್ಛಿಜ್ಜ ಸೇನಂ [ಮೇನಂ (ಸೀ. ಪೀ.)] ಪುರಿಸೋ ಅಹಾಸಿ;
ಸೋ ನೋ ಅಯಂ ಆಗತೋ ಸನ್ನಿಕೇತಂ, ರುಕ್ಖಸ್ಸಿಮಸ್ಸಾಪಚಿತಿಂ ಕರೋಥ.
‘‘ಯೇ ¶ ¶ ಕೇಚಿ ವಿತ್ತಾ ಮಮ ಪಚ್ಚಯೇನ, ಸಬ್ಬೇವ ತೇ ಪಾತುಕರೋನ್ತು ಅಜ್ಜ;
ತಿಬ್ಬಾನಿ ಕತ್ವಾನ ಉಪಾಯನಾನಿ, ರುಕ್ಖಸ್ಸಿಮಸ್ಸಾಪಚಿತಿಂ ಕರೋಥ.
‘‘ಯೇ ಕೇಚಿ ಬದ್ಧಾ ಮಮ ಅತ್ಥಿ ರಟ್ಠೇ, ಸಬ್ಬೇವ ತೇ ಬನ್ಧನಾ ಮೋಚಯನ್ತು;
ಯಥೇವ ಯಂ ಬನ್ಧನಸ್ಮಾ ಪಮುತ್ತೋ, ಏವಮೇತೇ ಮುಞ್ಚರೇ ಬನ್ಧನಸ್ಮಾ.
‘‘ಉನ್ನಙ್ಗಲಾ ಮಾಸಮಿಮಂ ಕರೋನ್ತು, ಮಂಸೋದನಂ ಬ್ರಾಹ್ಮಣಾ ಭಕ್ಖಯನ್ತು;
ಅಮಜ್ಜಪಾ ಮಜ್ಜರಹಾ ಪಿವನ್ತು, ಪುಣ್ಣಾಹಿ ¶ ಥಾಲಾಹಿ ಪಲಿಸ್ಸುತಾಹಿ.
‘‘ಮಹಾಪಥಂ ನಿಚ್ಚ ಸಮವ್ಹಯನ್ತು, ತಿಬ್ಬಞ್ಚ ರಕ್ಖಂ ವಿದಹನ್ತು ರಟ್ಠೇ;
ಯಥಾಞ್ಞಮಞ್ಞಂ ನ ವಿಹೇಠಯೇಯ್ಯುಂ, ರುಕ್ಖಸ್ಸಿಮಸ್ಸಾಪಚಿತಿಂ ಕರೋಥ’’.
ಓರೋಧಾ ಚ ಕುಮಾರಾ ಚ, ವೇಸಿಯಾನಾ ಚ ಬ್ರಾಹ್ಮಣಾ;
ಬಹುಂ ಅನ್ನಞ್ಚ ಪಾನಞ್ಚ, ಪಣ್ಡಿತಸ್ಸಾಭಿಹಾರಯುಂ.
ಹತ್ಥಾರೋಹಾ ಅನೀಕಟ್ಠಾ, ರಥಿಕಾ ಪತ್ತಿಕಾರಕಾ;
ಬಹುಂ ಅನ್ನಞ್ಚ ಪಾನಞ್ಚ, ಪಣ್ಡಿತಸ್ಸಾಭಿಹಾರಯುಂ.
ಸಮಾಗತಾ ಜಾನಪದಾ, ನೇಗಮಾ ಚ ಸಮಾಗತಾ;
ಬಹುಂ ಅನ್ನಞ್ಚ ಪಾನಞ್ಚ, ಪಣ್ಡಿತಸ್ಸಾಭಿಹಾರಯುಂ.
ಬಹುಜನೋ ಪಸನ್ನೋಸಿ, ದಿಸ್ವಾ ಪಣ್ಡಿತಮಾಗತೇ;
ಪಣ್ಡಿತಮ್ಹಿ ಅನುಪ್ಪತ್ತೇ, ಚೇಲುಕ್ಖೇಪೋ ಪವತ್ತಥಾತಿ.
ವಿಧುರಜಾತಕಂ ನವಮಂ.
೫೪೭. ವೇಸ್ಸನ್ತರಜಾತಕಂ (೧೦)
ದಸವರಕಥಾ
‘‘ಫುಸ್ಸತೀ ¶ ¶ ¶ [ಫುಸತಿ (ಸೀ. ಪೀ.)] ವರವಣ್ಣಾಭೇ, ವರಸ್ಸು ದಸಧಾ ವರೇ;
ಪಥಬ್ಯಾ ಚಾರುಪುಬ್ಬಙ್ಗಿ, ಯಂ ತುಯ್ಹಂ ಮನಸೋ ಪಿಯಂ’’.
‘‘ದೇವರಾಜ ನಮೋ ತ್ಯತ್ಥು, ಕಿಂ ಪಾಪಂ ಪಕತಂ ಮಯಾ;
ರಮ್ಮಾ ಚಾವೇಸಿ ಮಂ ಠಾನಾ, ವಾತೋವ ಧರಣೀರುಹಂ’’.
‘‘ನ ಚೇವ ತೇ ಕತಂ ಪಾಪಂ, ನ ಚ ಮೇ ತ್ವಮಸಿ ಅಪ್ಪಿಯಾ;
ಪುಞ್ಞಞ್ಚ ತೇ ಪರಿಕ್ಖೀಣಂ, ಯೇನ ತೇವಂ ವದಾಮಹಂ.
‘‘ಸನ್ತಿಕೇ ಮರಣಂ ತುಯ್ಹಂ, ವಿನಾಭಾವೋ ಭವಿಸ್ಸತಿ;
ಪಟಿಗಣ್ಹಾಹಿ ಮೇ ಏತೇ, ವರೇ ದಸ ಪವೇಚ್ಛತೋ’’.
‘‘ವರಂ ಚೇ ಮೇ ಅದೋ ಸಕ್ಕ, ಸಬ್ಬಭೂತಾನಮಿಸ್ಸರ;
ಸಿವಿರಾಜಸ್ಸ ಭದ್ದನ್ತೇ, ತತ್ಥ ಅಸ್ಸಂ ನಿವೇಸನೇ.
‘‘ನೀಲನೇತ್ತಾ ನೀಲಭಮು, ನಿಲಕ್ಖೀ ಚ ಯಥಾ ಮಿಗೀ;
ಫುಸ್ಸತೀ ನಾಮ ನಾಮೇನ, ತತ್ಥಪಸ್ಸಂ ಪುರಿನ್ದದ.
‘‘ಪುತ್ತಂ ಲಭೇಥ ವರದಂ, ಯಾಚಯೋಗಂ [ಯಾಚಯೋಗಿಂ (ಕ.)] ಅಮಚ್ಛರಿಂ;
ಪೂಜಿತಂ ಪಟಿರಾಜೂಹಿ, ಕಿತ್ತಿಮನ್ತಂ ಯಸಸ್ಸಿನಂ.
‘‘ಗಬ್ಭಂ ಮೇ ಧಾರಯನ್ತಿಯಾ, ಮಜ್ಝಿಮಙ್ಗಂ ಅನುನ್ನತಂ;
ಕುಚ್ಛಿ ಅನುನ್ನತೋ ಅಸ್ಸ, ಚಾಪಂವ ಲಿಖಿತಂ ಸಮಂ.
‘‘ಥನಾ ಮೇ ನಪ್ಪಪತೇಯ್ಯುಂ, ಪಲಿತಾ ನ ಸನ್ತು ವಾಸವ;
ಕಾಯೇ ರಜೋ ನ ಲಿಮ್ಪೇಥ, ವಜ್ಝಞ್ಚಾಪಿ ಪಮೋಚಯೇ.
‘‘ಮಯೂರಕೋಞ್ಚಾಭಿರುದೇ, ನಾರಿವರಗಣಾಯುತೇ;
ಖುಜ್ಜಚೇಲಾಪಕಾಕಿಣ್ಣೇ ¶ , ಸೂದಮಾಗಧವಣ್ಣಿತೇ.
‘‘ಚಿತ್ರಗ್ಗಳೇರುಘುಸಿತೇ, ಸುರಾಮಂಸಪಬೋಧನೇ;
ಸಿವಿರಾಜಸ್ಸ ಭದ್ದನ್ತೇ, ತತ್ಥಸ್ಸಂ ಮಹೇಸೀ ಪಿಯಾ’’.
‘‘ಯೇ ತೇ ದಸ ವರಾ ದಿನ್ನಾ, ಮಯಾ ಸಬ್ಬಙ್ಗಸೋಭನೇ;
ಸಿವಿರಾಜಸ್ಸ ವಿಜಿತೇ, ಸಬ್ಬೇ ತೇ ಲಚ್ಛಸೀ ವರೇ.
‘‘ಇದಂ ¶ ವತ್ವಾನ ಮಘವಾ, ದೇವರಾಜಾ ಸುಜಮ್ಪತಿ;
ಫುಸ್ಸತಿಯಾ ವರಂ ದತ್ವಾ, ಅನುಮೋದಿತ್ಥ ವಾಸವೋ.
ದಸವರಕಥಾ ನಾಮ.
ಹೇಮವನ್ತಂ
‘‘ಪರೂಳ್ಹಕಚ್ಛನಖಲೋಮಾ ¶ ¶ , ಪಙ್ಕದನ್ತಾ ರಜಸ್ಸಿರಾ;
ಪಗ್ಗಯ್ಹ ದಕ್ಖಿಣಂ ಬಾಹುಂ, ಕಿಂ ಮಂ ಯಾಚನ್ತಿ ಬ್ರಾಹ್ಮಣಾ’’.
‘‘ರತನಂ ದೇವ ಯಾಚಾಮ, ಸಿವೀನಂ ರಟ್ಠವಡ್ಢನಂ;
ದದಾಹಿ ಪವರಂ ನಾಗಂ, ಈಸಾದನ್ತಂ ಉರೂಳ್ಹವಂ’’.
‘‘ದದಾಮಿ ನ ವಿಕಮ್ಪಾಮಿ, ಯಂ ಮಂ ಯಾಚನ್ತಿ ಬ್ರಾಹ್ಮಣಾ;
ಪಭಿನ್ನಂ ಕುಞ್ಜರಂ ದನ್ತಿಂ, ಓಪವಯ್ಹಂ ಗಜುತ್ತಮಂ’’.
‘‘ಹತ್ಥಿಕ್ಖನ್ಧತೋ ಓರುಯ್ಹ, ರಾಜಾ ಚಾಗಾಧಿಮಾನಸೋ;
ಬ್ರಾಹ್ಮಣಾನಂ ಅದಾ ದಾನಂ, ಸಿವೀನಂ ರಟ್ಠವಡ್ಢನೋ’’.
‘‘ತದಾಸಿ ಯಂ ಭಿಂಸನಕಂ, ತದಾಸಿ ಲೋಮಹಂಸನಂ;
ಹತ್ಥಿನಾಗೇ ಪದಿನ್ನಮ್ಹಿ, ಮೇದನೀ ಸಮ್ಪಕಮ್ಪಥ.
‘‘ತದಾಸಿ ಯಂ ಭಿಂಸನಕಂ, ತದಾಸಿ ಲೋಮಹಂಸನಂ;
ಹತ್ಥಿನಾಗೇ ಪದಿನ್ನಮ್ಹಿ, ಖುಬ್ಭಿತ್ಥ ನಗರಂ ತದಾ.
‘‘ಸಮಾಕುಲಂ ಪುರಂ ಆಸಿ, ಘೋಸೋ ಚ ವಿಪುಲೋ ಮಹಾ;
ಹತ್ಥಿನಾಗೇ ¶ ಪದಿನ್ನಮ್ಹಿ, ಸಿವೀನಂ ರಟ್ಠವಡ್ಢನೇ’’.
‘‘ಉಗ್ಗಾ ಚ ರಾಜಪುತ್ತಾ ಚ, ವೇಸಿಯಾನಾ ಚ ಬ್ರಾಹ್ಮಣಾ;
ಹತ್ಥಾರೋಹಾ ಅನೀಕಟ್ಠಾ, ರಥಿಕಾ ಪತ್ತಿಕಾರಕಾ.
‘‘ಕೇವಲೋ ಚಾಪಿ ನಿಗಮೋ, ಸಿವಯೋ ಚ ಸಮಾಗತಾ;
ದಿಸ್ವಾ ನಾಗಂ ನೀಯಮಾನಂ, ತೇ ರಞ್ಞೋ ಪಟಿವೇದಯುಂ.
‘‘ವಿಧಮಂ ದೇವ ತೇ ರಟ್ಠಂ, ಪುತ್ತೋ ವೇಸ್ಸನ್ತರೋ ತವ;
ಕಥಂ ನೋ ಹತ್ಥಿನಂ ದಜ್ಜಾ, ನಾಗಂ ರಟ್ಠಸ್ಸ ಪೂಜಿತಂ.
‘‘ಕಥಂ ನೋ ಕುಞ್ಜರಂ ದಜ್ಜಾ, ಈಸಾದನ್ತಂ ಉರೂಳ್ಹವಂ;
ಖೇತ್ತಞ್ಞುಂ ಸಬ್ಬಯುದ್ಧಾನಂ, ಸಬ್ಬಸೇತಂ ಗಜುತ್ತಮಂ.
‘‘ಪಣ್ಡುಕಮ್ಬಲಸಞ್ಛನ್ನಂ, ¶ ಪಭಿನ್ನಂ ಸತ್ತುಮದ್ದನಂ;
ದನ್ತಿಂ ಸವಾಳಬೀಜನಿಂ, ಸೇತಂ ಕೇಲಾಸಸಾದಿಸಂ.
‘‘ಸಸೇತಚ್ಛತ್ತಂ ¶ ಸಉಪಾಧೇಯ್ಯಂ, ಸಾಥಬ್ಬನಂ ಸಹತ್ಥಿಪಂ;
ಅಗ್ಗಯಾನಂ ರಾಜವಾಹಿಂ, ಬ್ರಾಹ್ಮಣಾನಂ ಅದಾ ಗಜಂ [ಧನಂ (ಸೀ. ಪೀ.), ದಾನಂ (ಸ್ಯಾ.)].
‘‘ಅನ್ನಂ ಪಾನಞ್ಚ ಯೋ [ಸೋ (ಸೀ. ಸ್ಯಾ. ಕ.)] ದಜ್ಜಾ, ವತ್ಥಸೇನಾಸನಾನಿ ಚ;
ಏತಂ ಖೋ ದಾನಂ ಪತಿರೂಪಂ, ಏತಂ ಖೋ ಬ್ರಾಹ್ಮಣಾರಹಂ.
‘‘ಅಯಂ ತೇ ವಂಸರಾಜಾ ನೋ, ಸಿವೀನಂ ರಟ್ಠವಡ್ಢನೋ [ರಟ್ಠವಡ್ಢನಂ (ಸೀ.), ರಟ್ಠವಡ್ಢನ (ಪೀ.)];
ಕಥಂ ವೇಸ್ಸನ್ತರೋ ಪುತ್ತೋ, ಗಜಂ ಭಾಜೇತಿ ಸಞ್ಜಯ.
‘‘ಸಚೇ ತ್ವಂ ನ ಕರಿಸ್ಸಸಿ, ಸಿವೀನಂ ವಚನಂ ಇದಂ;
ಮಞ್ಞೇ ತಂ ಸಹ ಪುತ್ತೇನ, ಸಿವೀ ಹತ್ಥೇ ಕರಿಸ್ಸರೇ’’.
‘‘ಕಾಮಂ ¶ ಜನಪದೋ ಮಾಸಿ, ರಟ್ಠಞ್ಚಾಪಿ ವಿನಸ್ಸತು;
ನಾಹಂ ಸಿವೀನಂ ವಚನಾ, ರಾಜಪುತ್ತಂ ಅದೂಸಕಂ;
ಪಬ್ಬಾಜೇಯ್ಯಂ ಸಕಾ ರಟ್ಠಾ, ಪುತ್ತೋ ಹಿ ಮಮ ಓರಸೋ.
‘‘ಕಾಮಂ ಜನಪದೋ ಮಾಸಿ, ರಟ್ಠಞ್ಚಾಪಿ ವಿನಸ್ಸತು;
ನಾಹಂ ಸಿವೀನಂ ವಚನಾ, ರಾಜಪುತ್ತಂ ಅದೂಸಕಂ;
ಪಬ್ಬಾಜೇಯ್ಯಂ ಸಕಾ ರಟ್ಠಾ, ಪುತ್ತೋ ಹಿ ಮಮ ಅತ್ರಜೋ.
‘‘ನ ಚಾಹಂ ತಸ್ಮಿಂ ದುಬ್ಭೇಯ್ಯಂ, ಅರಿಯಸೀಲವತೋ ಹಿ ಸೋ;
ಅಸಿಲೋಕೋಪಿ ಮೇ ಅಸ್ಸ, ಪಾಪಞ್ಚ ಪಸವೇ ಬಹುಂ;
ಕಥಂ ವೇಸ್ಸನ್ತರಂ ಪುತ್ತಂ, ಸತ್ಥೇನ ಘಾತಯಾಮಸೇ’’.
‘‘ಮಾ ನಂ ದಣ್ಡೇನ ಸತ್ಥೇನ, ನ ಹಿ ಸೋ ಬನ್ಧನಾರಹೋ;
ಪಬ್ಬಾಜೇಹಿ ಚ ನಂ ರಟ್ಠಾ, ವಙ್ಕೇ ವಸತು ಪಬ್ಬತೇ’’.
‘‘ಏಸೋ ಚೇ ಸಿವೀನಂ ಛನ್ದೋ, ಛನ್ದಂ ನ ಪನುದಾಮಸೇ;
ಇಮಂ ಸೋ ವಸತು ರತ್ತಿಂ, ಕಾಮೇ ಚ ಪರಿಭುಞ್ಜತು.
‘‘ತತೋ ರತ್ಯಾ ವಿವಸಾನೇ, ಸೂರಿಯಸ್ಸುಗ್ಗಮನಂ ಪತಿ [ಸೂರಿಯುಗ್ಗಮನೇ ಸತಿ (ಕ.)];
ಸಮಗ್ಗಾ ಸಿವಯೋ ಹುತ್ವಾ, ರಟ್ಠಾ ಪಬ್ಬಾಜಯನ್ತು ನಂ’’.
‘‘ಉಟ್ಠೇಹಿ ¶ ಕತ್ತೇ ತರಮಾನೋ, ಗನ್ತ್ವಾ ವೇಸ್ಸನ್ತರಂ ವದ;
ಸಿವಯೋ ದೇವ ತೇ ಕುದ್ಧಾ, ನೇಗಮಾ ಚ ಸಮಾಗತಾ.
‘‘ಉಗ್ಗಾ ಚ ರಾಜಪುತ್ತಾ ಚ, ವೇಸಿಯಾನಾ ಚ ಬ್ರಾಹ್ಮಣಾ;
ಹತ್ಥಾರೋಹಾ ಅನೀಕಟ್ಠಾ, ರಥಿಕಾ ಪತ್ತಿಕಾರಕಾ;
ಕೇವಲೋ ¶ ಚಾಪಿ ನಿಗಮೋ, ಸಿವಯೋ ಚ ಸಮಾಗತಾ.
‘‘ಅಸ್ಮಾ ರತ್ಯಾ ವಿವಸಾನೇ, ಸೂರಿಯಸ್ಸುಗ್ಗಮನಂ ಪತಿ;
ಸಮಗ್ಗಾ ಸಿವಯೋ ಹುತ್ವಾ, ರಟ್ಠಾ ಪಬ್ಬಾಜಯನ್ತಿ ತಂ.
‘‘ಸ ¶ ಕತ್ತಾ ತರಮಾನೋವ, ಸಿವಿರಾಜೇನ ಪೇಸಿತೋ;
ಆಮುತ್ತಹತ್ಥಾಭರಣಾ, ಸುವತ್ಥೋ ಚನ್ದನಭೂಸಿತೋ.
‘‘ಸೀಸಂ ನ್ಹಾತೋ ಉದಕೇ ಸೋ, ಆಮುತ್ತಮಣಿಕುಣ್ಡಲೋ;
ಉಪಾಗಮಿ ಪುರಂ ರಮ್ಮಂ, ವೇಸ್ಸನ್ತರನಿವೇಸನಂ.
‘‘ತತ್ಥದ್ದಸ ಕುಮಾರಂ ಸೋ, ರಮಮಾನಂ ಸಕೇ ಪುರೇ;
ಪರಿಕಿಣ್ಣಂ ಅಮಚ್ಚೇಹಿ, ತಿದಸಾನಂವ ವಾಸವಂ.
‘‘ಸೋ ತತ್ಥ ಗನ್ತ್ವಾ ತರಮಾನೋ, ಕತ್ತಾ ವೇಸ್ಸನ್ತರಂಬ್ರವಿ;
ದುಕ್ಖಂ ತೇ ವೇದಯಿಸ್ಸಾಮಿ, ಮಾ ಮೇ ಕುಜ್ಝಿ ರಥೇಸಭ.
‘‘ವನ್ದಿತ್ವಾ ರೋದಮಾನೋ ಸೋ, ಕತ್ತಾ ರಾಜಾನಮಬ್ರವಿ;
ಭತ್ತಾ ಮೇಸಿ ಮಹಾರಾಜ, ಸಬ್ಬಕಾಮರಸಾಹರೋ.
‘‘ದುಕ್ಖಂ ತೇ ವೇದಯಿಸ್ಸಾಮಿ, ತತ್ಥ ಅಸ್ಸಾಸಯನ್ತು ಮಂ;
ಸಿವಯೋ ದೇವ ತೇ ಕುದ್ಧಾ, ನೇಗಮಾ ಚ ಸಮಾಗತಾ.
‘‘ಉಗ್ಗಾ ಚ ರಾಜಪುತ್ತಾ ಚ, ವೇಸಿಯಾನಾ ಚ ಬ್ರಾಹ್ಮಣಾ;
ಹತ್ಥಾರೋಹಾ ಅನೀಕಟ್ಠಾ, ರಥಿಕಾ ಪತ್ತಿಕಾರಕಾ;
ಕೇವಲೋ ಚಾಪಿ ನಿಗಮೋ, ಸಿವಯೋ ಚ ಸಮಾಗತಾ.
‘‘ಅಸ್ಮಾ ರತ್ಯಾ ವಿವಸಾನೇ, ಸೂರಿಯಸ್ಸುಗ್ಗಮನಂ ಪತಿ;
ಸಮಗ್ಗಾ ಸಿವಯೋ ಹುತ್ವಾ, ರಟ್ಠಾ ಪಬ್ಬಾಜಯನ್ತಿ ತಂ’’.
‘‘ಕಿಸ್ಮಿಂ ¶ ಮೇ ಸಿವಯೋ ಕುದ್ಧಾ, ನಾಹಂ ಪಸ್ಸಾಮಿ ದುಕ್ಕಟಂ;
ತಂ ಮೇ ಕತ್ತೇ ವಿಯಾಚಿಕ್ಖ, ಕಸ್ಮಾ ಪಬ್ಬಾಜಯನ್ತಿ ಮಂ’’.
‘‘ಉಗ್ಗಾ ¶ ಚ ರಾಜಪುತ್ತಾ ಚ, ವೇಸಿಯಾನಾ ಚ ಬ್ರಾಹ್ಮಣಾ;
ಹತ್ಥಾರೋಹಾ ಅನೀಕಟ್ಠಾ, ರಥಿಕಾ ಪತ್ತಿಕಾರಕಾ;
ನಾಗದಾನೇನ ಖಿಯ್ಯನ್ತಿ, ತಸ್ಮಾ ಪಬ್ಬಾಜಯನ್ತಿ ತಂ’’.
‘‘ಹದಯಂ ಚಕ್ಖುಮ್ಪಹಂ ದಜ್ಜಂ, ಕಿಂ ಮೇ ಬಾಹಿರಕಂ ಧನಂ;
ಹಿರಞ್ಞಂ ವಾ ಸುವಣ್ಣಂ ವಾ, ಮುತ್ತಾ ವೇಳುರಿಯಾ ಮಣಿ.
‘‘ದಕ್ಖಿಣಂ ವಾಪಹಂ ಬಾಹುಂ, ದಿಸ್ವಾ ಯಾಚಕಮಾಗತೇ;
ದದೇಯ್ಯಂ ನ ವಿಕಮ್ಪೇಯ್ಯಂ, ದಾನೇ ಮೇ ರಮತೇ ಮನೋ.
‘‘ಕಾಮಂ ಮಂ ಸಿವಯೋ ಸಬ್ಬೇ, ಪಬ್ಬಾಜೇನ್ತು ಹನನ್ತು ವಾ;
ನೇವ ದಾನಾ ವಿರಮಿಸ್ಸಂ, ಕಾಮಂ ಛಿನ್ದನ್ತು ಸತ್ತಧಾ’’.
‘‘ಏವಂ ¶ ತಂ ಸಿವಯೋ ಆಹು, ನೇಗಮಾ ಚ ಸಮಾಗತಾ;
ಕೋನ್ತಿಮಾರಾಯ ತೀರೇನ, ಗಿರಿಮಾರಞ್ಜರಂ ಪತಿ;
ಯೇನ ಪಬ್ಬಾಜಿತಾ ಯನ್ತಿ, ತೇನ ಗಚ್ಛತು ಸುಬ್ಬತೋ’’.
‘‘ಸೋಹಂ ತೇನ ಗಮಿಸ್ಸಾಮಿ, ಯೇನ ಗಚ್ಛನ್ತಿ ದೂಸಕಾ;
ರತ್ತಿನ್ದಿವಂ ಮೇ ಖಮಥ, ಯಾವ ದಾನಂ ದದಾಮಹಂ’’.
‘‘ಆಮನ್ತಯಿತ್ಥ ರಾಜಾನಂ, ಮದ್ದಿಂ ಸಬ್ಬಙ್ಗಸೋಭನಂ;
ಯಂ ತೇ ಕಿಞ್ಚಿ ಮಯಾ ದಿನ್ನಂ, ಧನಂ ಧಞ್ಞಞ್ಚ ವಿಜ್ಜತಿ.
‘‘ಹಿರಞ್ಞಂ ವಾ ಸುವಣ್ಣಂ ವಾ, ಮುತ್ತಾ ವೇಳುರಿಯಾ ಬಹೂ;
ಸಬ್ಬಂ ತಂ ನಿದಹೇಯ್ಯಾಸಿ, ಯಞ್ಚ ತೇ ಪೇತ್ತಿಕಂ ಧನಂ.
‘‘ತಮಬ್ರವಿ ¶ ರಾಜಪುತ್ತೀ, ಮದ್ದೀ ಸಬ್ಬಙ್ಗಸೋಭನಾ;
ಕುಹಿಂ ದೇವ ನಿದಹಾಮಿ, ತಂ ಮೇ ಅಕ್ಖಾಹಿ ಪುಚ್ಛಿತೋ’’.
‘‘ಸೀಲವನ್ತೇಸು ದಜ್ಜಾಸಿ, ದಾನಂ ಮದ್ದಿ ಯಥಾರಹಂ;
ನ ಹಿ ದಾನಾ ಪರಂ ಅತ್ಥಿ, ಪತಿಟ್ಠಾ ಸಬ್ಬಪಾಣಿನಂ.
‘‘ಪುತ್ತೇಸು ಮದ್ದಿ ದಯೇಸಿ, ಸಸ್ಸುಯಾ ಸಸುರಮ್ಹಿ ಚ;
ಯೋ ಚ ತಂ ಭತ್ತಾ ಮಞ್ಞೇಯ್ಯ, ಸಕ್ಕಚ್ಚಂ ತಂ ಉಪಟ್ಠಹೇ.
‘‘ನೋ ಚೇ ತಂ ಭತ್ತಾ ಮಞ್ಞೇಯ್ಯ, ಮಯಾ ವಿಪ್ಪವಸೇನ ತೇ;
ಅಞ್ಞಂ ಭತ್ತಾರಂ ಪರಿಯೇಸ, ಮಾ ಕಿಸಿತ್ಥೋ [ಮಾ ಕಿಲಿತ್ಥ (ಸೀ. ಪೀ.)] ಮಯಾ ವಿನಾ’’.
‘‘ಅಹಞ್ಹಿ ¶ ವನಂ ಗಚ್ಛಾಮಿ, ಘೋರಂ ವಾಳಮಿಗಾಯುತಂ;
ಸಂಸಯೋ ಜೀವಿತಂ ಮಯ್ಹಂ, ಏಕಕಸ್ಸ ಬ್ರಹಾವನೇ’’.
‘‘ತಮಬ್ರವಿ ರಾಜಪುತ್ತೀ, ಮದ್ದೀ ಸಬ್ಬಙ್ಗಸೋಭನಾ;
‘‘ಅಭುಮ್ಮೇ ಕಥಂ ನು ಭಣಸಿ, ಪಾಪಕಂ ವತ ಭಾಸಸಿ.
‘‘ನೇಸ ಧಮ್ಮೋ ಮಹಾರಾಜ, ಯಂ ತ್ವಂ ಗಚ್ಛೇಯ್ಯ ಏಕಕೋ;
ಅಹಮ್ಪಿ ತೇನ ಗಚ್ಛಾಮಿ, ಯೇನ ಗಚ್ಛಸಿ ಖತ್ತಿಯ.
‘‘ಮರಣಂ ವಾ ತಯಾ ಸದ್ಧಿಂ, ಜೀವಿತಂ ವಾ ತಯಾ ವಿನಾ;
ತದೇವ ಮರಣಂ ಸೇಯ್ಯೋ, ಯಂ ಚೇ ಜೀವೇ ತಯಾ ವಿನಾ.
‘‘ಅಗ್ಗಿಂ ಉಜ್ಜಾಲಯಿತ್ವಾನ [ನಿಜ್ಜಾಲಯಿತ್ವಾನ (ಸೀ. ಪೀ.)], ಏಕಜಾಲಸಮಾಹಿತಂ;
ತತ್ಥ ಮೇ [ತತ್ಥೇವ (ಸ್ಯಾ. ಕ.)] ಮರಣಂ ಸೇಯ್ಯೋ, ಯಂ ಚೇ ಜೀವೇ ತಯಾ ವಿನಾ.
‘‘ಯಥಾ ಆರಞ್ಞಕಂ ನಾಗಂ, ದನ್ತಿಂ ಅನ್ವೇತಿ ಹತ್ಥಿನೀ;
ಜೇಸ್ಸನ್ತಂ ಗಿರಿದುಗ್ಗೇಸು, ಸಮೇಸು ವಿಸಮೇಸು ಚ.
‘‘ಏವಂ ¶ ¶ ತಂ ಅನುಗಚ್ಛಾಮಿ, ಪುತ್ತೇ ಆದಾಯ ಪಚ್ಛತೋ;
ಸುಭರಾ ತೇ ಭವಿಸ್ಸಾಮಿ, ನ ತೇ ಹೇಸ್ಸಾಮಿ ದುಬ್ಭರಾ.
‘‘ಇಮೇ ಕುಮಾರೇ ಪಸ್ಸನ್ತೋ, ಮಞ್ಜುಕೇ ಪಿಯಭಾಣಿನೇ;
ಆಸೀನೇ [ಆಸನೇ (ಕ.)] ವನಗುಮ್ಬಸ್ಮಿಂ, ನ ರಜ್ಜಸ್ಸ ಸರಿಸ್ಸಸಿ.
‘‘ಇಮೇ ಕುಮಾರೇ ಪಸ್ಸನ್ತೋ, ಮಞ್ಜುಕೇ ಪಿಯಭಾಣಿನೇ;
ಕೀಳನ್ತೇ ವನಗುಮ್ಬಸ್ಮಿಂ, ನ ರಜ್ಜಸ್ಸ ಸರಿಸ್ಸಸಿ.
‘‘ಇಮೇ ಕುಮಾರೇ ಪಸ್ಸನ್ತೋ, ಮಞ್ಜುಕೇ ಪಿಯಭಾಣಿನೇ;
ಅಸ್ಸಮೇ ರಮಣೀಯಮ್ಹಿ, ನ ರಜ್ಜಸ್ಸ ಸರಿಸ್ಸಸಿ.
‘‘ಇಮೇ ಕುಮಾರೇ ಪಸ್ಸನ್ತೋ, ಮಞ್ಜುಕೇ ಪಿಯಭಾಣಿನೇ;
ಕೀಳನ್ತೇ ಅಸ್ಸಮೇ ರಮ್ಮೇ, ನ ರಜ್ಜಸ್ಸ ಸರಿಸ್ಸಸಿ.
‘‘ಇಮೇ ಕುಮಾರೇ ಪಸ್ಸನ್ತೋ, ಮಾಲಧಾರೀ ಅಲಙ್ಕತೇ;
ಅಸ್ಸಮೇ ರಮಣೀಯಮ್ಹಿ, ನ ರಜ್ಜಸ್ಸ ಸರಿಸ್ಸಸಿ.
‘‘ಇಮೇ ಕುಮಾರೇ ಪಸ್ಸನ್ತೋ, ಮಾಲಧಾರೀ ಅಲಙ್ಕತೇ;
ಕೀಳನ್ತೇ ಅಸ್ಸಮೇ ರಮ್ಮೇ, ನ ರಜ್ಜಸ್ಸ ಸರಿಸ್ಸಸಿ.
‘‘ಯದಾ ¶ ದಕ್ಖಿಸಿ ನಚ್ಚನ್ತೇ, ಕುಮಾರೇ ಮಾಲಧಾರಿನೇ;
ಅಸ್ಸಮೇ ರಮಣೀಯಮ್ಹಿ, ನ ರಜ್ಜಸ್ಸ ಸರಿಸ್ಸಸಿ.
‘‘ಯದಾ ದಕ್ಖಿಸಿ ನಚ್ಚನ್ತೇ, ಕುಮಾರೇ ಮಾಲಧಾರಿನೇ;
ಕೀಳನ್ತೇ ಅಸ್ಸಮೇ ರಮ್ಮೇ, ನ ರಜ್ಜಸ್ಸ ಸರಿಸ್ಸಸಿ.
‘‘ಯದಾ ¶ ದಕ್ಖಿಸಿ ಮಾತಙ್ಗಂ, ಕುಞ್ಜರಂ ಸಟ್ಠಿಹಾಯನಂ;
ಏಕಂ ಅರಞ್ಞೇ ಚರನ್ತಂ, ನ ರಜ್ಜಸ್ಸ ಸರಿಸ್ಸಸಿ.
‘‘ಯದಾ ದಕ್ಖಿಸಿ ಮಾತಙ್ಗಂ, ಕುಞ್ಜರಂ ಸಟ್ಠಿಹಾಯನಂ;
ಸಾಯಂ ಪಾತೋ ವಿಚರನ್ತಂ, ನ ರಜ್ಜಸ್ಸ ಸರಿಸ್ಸಸಿ.
‘‘ಯದಾ ಕರೇಣುಸಙ್ಘಸ್ಸ, ಯೂಥಸ್ಸ ಪುರತೋ ವಜಂ;
ಕೋಞ್ಚಂ ಕಾಹತಿ ಮಾತಙ್ಗೋ, ಕುಞ್ಜರೋ ಸಟ್ಠಿಹಾಯನೋ;
ತಸ್ಸ ತಂ ನದತೋ ಸುತ್ವಾ, ನ ರಜ್ಜಸ್ಸ ಸರಿಸ್ಸಸಿ.
‘‘ದುಭತೋ ವನವಿಕಾಸೇ, ಯದಾ ದಕ್ಖಿಸಿ ಕಾಮದೋ;
ವನೇ ವಾಳಮಿಗಾಕಿಣ್ಣೇ, ನ ರಜ್ಜಸ್ಸ ಸರಿಸ್ಸಸಿ.
‘‘ಮಿಗಂ ದಿಸ್ವಾನ ಸಾಯನ್ಹಂ, ಪಞ್ಚಮಾಲಿನಮಾಗತಂ;
ಕಿಮ್ಪುರಿಸೇ ಚ ನಚ್ಚನ್ತೇ, ನ ರಜ್ಜಸ್ಸ ಸರಿಸ್ಸಸಿ.
‘‘ಯದಾ ¶ ಸೋಸ್ಸಸಿ ನಿಗ್ಘೋಸಂ, ಸನ್ದಮಾನಾಯ ಸಿನ್ಧುಯಾ;
ಗೀತಂ ಕಿಮ್ಪುರಿಸಾನಞ್ಚ, ನ ರಜ್ಜಸ್ಸ ಸರಿಸ್ಸಸಿ.
‘‘ಯದಾ ಸೋಸ್ಸಸಿ ನಿಗ್ಘೋಸಂ, ಗಿರಿಗಬ್ಭರಚಾರಿನೋ;
ವಸ್ಸಮಾನಸ್ಸುಲೂಕಸ್ಸ, ನ ರಜ್ಜಸ್ಸ ಸರಿಸ್ಸಸಿ.
‘‘ಯದಾ ಸೀಹಸ್ಸ ಬ್ಯಗ್ಘಸ್ಸ, ಖಗ್ಗಸ್ಸ ಗವಯಸ್ಸ ಚ;
ವನೇ ಸೋಸ್ಸಸಿ ವಾಳಾನಂ, ನ ರಜ್ಜಸ್ಸ ಸರಿಸ್ಸಸಿ.
‘‘ಯದಾ ಮೋರೀಹಿ ಪರಿಕಿಣ್ಣಂ, ಬರಿಹೀನಂ ಮತ್ಥಕಾಸಿನಂ;
ಮೋರಂ ದಕ್ಖಿಸಿ ನಚ್ಚನ್ತಂ, ನ ರಜ್ಜಸ್ಸ ಸರಿಸ್ಸಸಿ.
‘‘ಯದಾ ಮೋರೀಹಿ ಪರಿಕಿಣ್ಣಂ, ಅಣ್ಡಜಂ ಚಿತ್ರಪಕ್ಖಿನಂ;
ಮೋರಂ ದಕ್ಖಿಸಿ ನಚ್ಚನ್ತಂ, ನ ರಜ್ಜಸ್ಸ ಸರಿಸ್ಸಸಿ.
‘‘ಯದಾ ¶ ಮೋರೀಹಿ ಪರಿಕಿಣ್ಣಂ, ನೀಲಗೀವಂ ಸಿಖಣ್ಡಿನಂ;
ಮೋರಂ ದಕ್ಖಿಸಿ ನಚ್ಚನ್ತಂ, ನ ರಜ್ಜಸ್ಸ ಸರಿಸ್ಸಸಿ.
‘‘ಯದಾ ¶ ದಕ್ಖಿಸಿ ಹೇಮನ್ತೇ, ಪುಪ್ಫಿತೇ ಧರಣೀರುಹೇ;
ಸುರಭಿಂ ಸಮ್ಪವಾಯನ್ತೇ, ನ ರಜ್ಜಸ್ಸ ಸರಿಸ್ಸಸಿ.
‘‘ಯದಾ ಹೇಮನ್ತಿಕೇ ಮಾಸೇ, ಹರಿತಂ ದಕ್ಖಿಸಿ ಮೇದನಿಂ [ಮೇದಿನಿಂ (ಸೀ. ಪೀ.)];
ಇನ್ದಗೋಪಕಸಞ್ಛನ್ನಂ, ನ ರಜ್ಜಸ್ಸ ಸರಿಸ್ಸಸಿ.
‘‘ಯದಾ ದಕ್ಖಿಸಿ ಹೇಮನ್ತೇ, ಪುಪ್ಫಿತೇ ಧರಣೀರುಹೇ;
ಕುಟಜಂ ಬಿಮ್ಬಜಾಲಞ್ಚ, ಪುಪ್ಫಿತಂ ಲೋದ್ದಪದ್ಮಕಂ [ಲೋಮಪದ್ಧಕಂ (ಸೀ. ಪೀ.)];
ಸುರಭಿಂ ಸಮ್ಪವಾಯನ್ತೇ, ನ ರಜ್ಜಸ್ಸ ಸರಿಸ್ಸಸಿ.
‘‘ಯದಾ ಹೇಮನ್ತಿಕೇ ಮಾಸೇ, ವನಂ ದಕ್ಖಿಸಿ ಪುಪ್ಫಿತಂ;
ಓಪುಪ್ಫಾನಿ ಚ ಪದ್ಮಾನಿ, ನ ರಜ್ಜಸ್ಸ ಸರಿಸ್ಸಸಿ’’.
ಹೇಮವನ್ತಂ ನಾಮ.
ದಾನಕಣ್ಡಂ
‘‘ತೇಸಂ ಲಾಲಪ್ಪಿತಂ ಸುತ್ವಾ, ಪುತ್ತಸ್ಸ ಸುಣಿಸಾಯ ಚ;
ಕಲುನಂ [ಕರುಣಂ (ಸೀ. ಪೀ.), ಕಲೂನಂ (ಸ್ಯಾ. ಕ.)] ಪರಿದೇವೇಸಿ, ರಾಜಪುತ್ತೀ ಯಸಸ್ಸಿನೀ.
‘‘ಸೇಯ್ಯೋ ¶ ವಿಸಂ ಮೇ ಖಾಯಿತಂ, ಪಪಾತಾ ಪಪತೇಯ್ಯಹಂ;
ರಜ್ಜುಯಾ ಬಜ್ಝ ಮಿಯ್ಯಾಹಂ, ಕಸ್ಮಾ ವೇಸ್ಸನ್ತರಂ ಪುತ್ತಂ;
ಪಬ್ಬಾಜೇನ್ತಿ ಅದೂಸಕಂ.
‘‘ಅಜ್ಝಾಯಕಂ ದಾನಪತಿಂ, ಯಾಚಯೋಗಂ ಅಮಚ್ಛರಿಂ;
ಪೂಜಿತಂ ¶ ಪಟಿರಾಜೂಹಿ, ಕಿತ್ತಿಮನ್ತಂ ಯಸಸ್ಸಿನಂ;
ಕಸ್ಮಾ ವೇಸ್ಸನ್ತರಂ ಪುತ್ತಂ, ಪಬ್ಬಾಜೇನ್ತಿ ಅದೂಸಕಂ.
‘‘ಮಾತಾಪೇತ್ತಿಭರಂ ಜನ್ತುಂ, ಕುಲೇ ಜೇಟ್ಠಾಪಚಾಯಿಕಂ;
ಕಸ್ಮಾ ವೇಸ್ಸನ್ತರಂ ಪುತ್ತಂ, ಪಬ್ಬಾಜೇನ್ತಿ ಅದೂಸಕಂ.
‘‘ರಞ್ಞೋ ಹಿತಂ ದೇವಿಹಿತಂ, ಞಾತೀನಂ ಸಖಿನಂ ಹಿತಂ;
ಹಿತಂ ಸಬ್ಬಸ್ಸ ರಟ್ಠಸ್ಸ, ಕಸ್ಮಾ ವೇಸ್ಸನ್ತರಂ ಪುತ್ತಂ;
ಪಬ್ಬಾಜೇನ್ತಿ ಅದೂಸಕಂ.
‘‘ಮಧೂನಿವ ಪಲಾತಾನಿ, ಅಮ್ಬಾವ ಪತಿತಾ ಛಮಾ;
ಏವಂ ಹೇಸ್ಸತಿ ತೇ ರಟ್ಠಂ, ಪಬ್ಬಾಜೇನ್ತಿ ಅದೂಸಕಂ.
‘‘ಹಂಸೋ ¶ ನಿಖೀಣಪತ್ತೋವ, ಪಲ್ಲಲಸ್ಮಿಂ ಅನೂದಕೇ;
ಅಪವಿಟ್ಠೋ ಅಮಚ್ಚೇಹಿ, ಏಕೋ ರಾಜಾ ವಿಹಿಯ್ಯಸಿ.
‘‘ತಂ ತಂ ಬ್ರೂಮಿ ಮಹಾರಾಜ, ಅತ್ಥೋ ತೇ ಮಾ ಉಪಚ್ಚಗಾ;
ಮಾ ನಂ ಸಿವೀನಂ ವಚನಾ, ಪಬ್ಬಾಜೇಸಿ ಅದೂಸಕಂ’’.
‘‘ಧಮ್ಮಸ್ಸಾಪಚಿತಿಂ ಕುಮ್ಮಿ, ಸಿವೀನಂ ವಿನಯಂ ಧಜಂ;
ಪಬ್ಬಾಜೇಮಿ ಸಕಂ ಪುತ್ತಂ, ಪಾಣಾ ಪಿಯತರೋ ಹಿ ಮೇ’’.
‘‘ಯಸ್ಸ ಪುಬ್ಬೇ ಧಜಗ್ಗಾನಿ, ಕಣಿಕಾರಾವ ಪುಪ್ಫಿತಾ;
ಯಾಯನ್ತಮನುಯಾಯನ್ತಿ, ಸ್ವಜ್ಜೇಕೋವ ಗಮಿಸ್ಸತಿ.
‘‘ಯಸ್ಸ ಪುಬ್ಬೇ ಧಜಗ್ಗಾನಿ, ಕಣಿಕಾರವನಾನಿವ;
ಯಾಯನ್ತಮನುಯಾಯನ್ತಿ ¶ , ಸ್ವಜ್ಜೇಕೋವ ಗಮಿಸ್ಸತಿ.
‘‘ಯಸ್ಸ ಪುಬ್ಬೇ ಅನೀಕಾನಿ, ಕಣಿಕಾರಾವ ಪುಪ್ಫಿತಾ;
ಯಾಯನ್ತಮನುಯಾಯನ್ತಿ, ಸ್ವಜ್ಜೇಕೋವ ಗಮಿಸ್ಸತಿ.
‘‘ಯಸ್ಸ ಪುಬ್ಬೇ ಅನೀಕಾನಿ, ಕಣಿಕಾರವನಾನಿವ;
ಯಾಯನ್ತಮನುಯಾಯನ್ತಿ, ಸ್ವಜ್ಜೇಕೋವ ಗಮಿಸ್ಸತಿ.
‘‘ಇನ್ದಗೋಪಕವಣ್ಣಾಭಾ, ಗನ್ಧಾರಾ ಪಣ್ಡುಕಮ್ಬಲಾ;
ಯಾಯನ್ತಮನುಯಾಯನ್ತಿ, ಸ್ವಜ್ಜೇಕೋವ ಗಮಿಸ್ಸತಿ.
‘‘ಯೋ ¶ ಪುಬ್ಬೇ ಹತ್ಥಿನಾ ಯಾತಿ, ಸಿವಿಕಾಯ ರಥೇನ ಚ;
ಸ್ವಜ್ಜ ವೇಸ್ಸನ್ತರೋ ರಾಜಾ, ಕಥಂ ಗಚ್ಛತಿ ಪತ್ತಿಕೋ.
‘‘ಕಥಂ ಚನ್ದನಲಿತ್ತಙ್ಗೋ, ನಚ್ಚಗೀತಪ್ಪಬೋಧನೋ;
ಖುರಾಜಿನಂ ಫರಸುಞ್ಚ, ಖಾರಿಕಾಜಞ್ಚ ಹಾಹಿತಿ [ಹಾರಿತಿ (ಸ್ಯಾ. ಕ.)].
‘‘ಕಸ್ಮಾ ನಾಭಿಹರಿಸ್ಸನ್ತಿ, ಕಾಸಾವ ಅಜಿನಾನಿ ಚ;
ಪವಿಸನ್ತಂ ಬ್ರಹಾರಞ್ಞಂ, ಕಸ್ಮಾ ಚೀರಂ ನ ಬಜ್ಝರೇ.
‘‘ಕಥಂ ನು ಚೀರಂ ಧಾರೇನ್ತಿ, ರಾಜಪಬ್ಬಾಜಿತಾ ಜನಾ;
ಕಥಂ ಕುಸಮಯಂ ಚೀರಂ, ಮದ್ದೀ ಪರಿದಹಿಸ್ಸತಿ.
‘‘ಕಾಸಿಯಾನಿ ಚ ಧಾರೇತ್ವಾ, ಖೋಮಕೋಟುಮ್ಬರಾನಿ ಚ;
ಕುಸಚೀರಾನಿ ಧಾರೇನ್ತೀ, ಕಥಂ ಮದ್ದೀ ಕರಿಸ್ಸತಿ.
‘‘ವಯ್ಹಾಹಿ ¶ ಪರಿಯಾಯಿತ್ವಾ, ಸಿವಿಕಾಯ ರಥೇನ ಚ;
ಸಾ ಕಥಜ್ಜ ಅನುಜ್ಝಙ್ಗೀ, ಪಥಂ ಗಚ್ಛತಿ ಪತ್ತಿಕಾ.
‘‘ಯಸ್ಸಾ ಮುದುತಲಾ ಹತ್ಥಾ, ಚರಣಾ ಚ ಸುಖೇಧಿತಾ;
ಸಾ ಕಥಜ್ಜ ಅನುಜ್ಝಙ್ಗೀ, ಪಥಂ ಗಚ್ಛತಿ ಪತ್ತಿಕಾ.
‘‘ಯಸ್ಸಾ ¶ ಮುದುತಲಾ ಪಾದಾ, ಚರಣಾ ಚ ಸುಖೇಧಿತಾ;
ಪಾದುಕಾಹಿ ಸುವಣ್ಣಾಹಿ, ಪೀಳಮಾನಾವ ಗಚ್ಛತಿ;
ಸಾ ಕಥಜ್ಜ ಅನುಜ್ಝಙ್ಗೀ, ಪಥಂ ಗಚ್ಛತಿ ಪತ್ತಿಕಾ.
‘‘ಯಾಸ್ಸು ಇತ್ಥಿಸಹಸ್ಸಾನಂ, ಪುರತೋ ಗಚ್ಛತಿ ಮಾಲಿನೀ;
ಸಾ ಕಥಜ್ಜ ಅನುಜ್ಝಙ್ಗೀ, ವನಂ ಗಚ್ಛತಿ ಏಕಿಕಾ.
‘‘ಯಾಸ್ಸು ಸಿವಾಯ ಸುತ್ವಾನ, ಮುಹುಂ ಉತ್ತಸತೇ ಪುರೇ;
ಸಾ ಕಥಜ್ಜ ಅನುಜ್ಝಙ್ಗೀ, ವನಂ ಗಚ್ಛತಿ ಭೀರುಕಾ.
‘‘ಯಾಸ್ಸು ಇನ್ದಸಗೋತ್ತಸ್ಸ, ಉಲೂಕಸ್ಸ ಪವಸ್ಸತೋ;
ಸುತ್ವಾನ ನದತೋ ಭೀತಾ, ವಾರುಣೀವ ಪವೇಧತಿ;
ಸಾ ಕಥಜ್ಜ ಅನುಜ್ಝಙ್ಗೀ, ವನಂ ಗಚ್ಛತಿ ಭೀರುಕಾ.
‘‘ಸಕುಣೀ ಹತಪುತ್ತಾವ, ಸುಞ್ಞಂ ದಿಸ್ವಾ ಕುಲಾವಕಂ;
ಚಿರಂ ದುಕ್ಖೇನ ಝಾಯಿಸ್ಸಂ, ಸುಞ್ಞಂ ಆಗಮ್ಮಿಮಂ ಪುರಂ.
‘‘ಸಕುಣೀ ಹತಪುತ್ತಾವ, ಸುಞ್ಞಂ ದಿಸ್ವಾ ಕುಲಾವಕಂ;
ಕಿಸಾ ಪಣ್ಡು ಭವಿಸ್ಸಾಮಿ, ಪಿಯೇ ಪುತ್ತೇ ಅಪಸ್ಸತೀ.
‘‘ಸಕುಣೀ ಹತಪುತ್ತಾವ, ಸುಞ್ಞಂ ದಿಸ್ವಾ ಕುಲಾವಕಂ;
ತೇನ ತೇನ ಪಧಾವಿಸ್ಸಂ, ಪಿಯೇ ಪುತ್ತೇ ಅಪಸ್ಸತೀ.
‘‘ಕುರರೀ ¶ [ಕುರುರೀ (ಸ್ಯಾ. ಕ.)] ಹತಛಾಪಾವ, ಸುಞ್ಞಂ ದಿಸ್ವಾ ಕುಲಾವಕಂ;
ಚಿರಂ ದುಕ್ಖೇನ ಝಾಯಿಸ್ಸಂ, ಸುಞ್ಞಂ ಆಗಮ್ಮಿಮಂ ಪುರಂ.
‘‘ಕುರರೀ ಹತಛಾಪಾವ, ಸುಞ್ಞಂ ದಿಸ್ವಾ ಕುಲಾವಕಂ;
ಕಿಸಾ ಪಣ್ಡು ಭವಿಸ್ಸಾಮಿ, ಪಿಯೇ ಪುತ್ತೇ ಅಪಸ್ಸತೀ.
‘‘ಕುರರೀ ¶ ಹತಛಾಪಾವ, ಸುಞ್ಞಂ ದಿಸ್ವಾ ಕುಲಾವಕಂ;
ತೇನ ತೇನ ಪಧಾವಿಸ್ಸಂ, ಪಿಯೇ ಪುತ್ತೇ ಅಪಸ್ಸತೀ.
‘‘ಸಾ ¶ ನೂನ ಚಕ್ಕವಾಕೀವ, ಪಲ್ಲಲಸ್ಮಿಂ ಅನೂದಕೇ;
ಚಿರಂ ದುಕ್ಖೇನ ಝಾಯಿಸ್ಸಂ, ಸುಞ್ಞಂ ಆಗಮ್ಮಿಮಂ ಪುರಂ.
‘‘ಸಾ ನೂನ ಚಕ್ಕವಾಕೀವ, ಪಲ್ಲಲಸ್ಮಿಂ ಅನೂದಕೇ;
ಕಿಸಾ ಪಣ್ಡು ಭವಿಸ್ಸಾಮಿ, ಪಿಯೇ ಪುತ್ತೇ ಅಪಸ್ಸತೀ.
‘‘ಸಾ ನೂನ ಚಕ್ಕವಾಕೀವ, ಪಲ್ಲಲಸ್ಮಿಂ ಅನೂದಕೇ;
ತೇನ ತೇನ ಪಧಾವಿಸ್ಸಂ, ಪಿಯೇ ಪುತ್ತೇ ಅಪಸ್ಸತೀ.
‘‘ಏವಂ ಮೇ ವಿಲಪನ್ತಿಯಾ, ರಾಜಾ ಪುತ್ತಂ ಅದೂಸಕಂ;
ಪಬ್ಬಾಜೇಸಿ ವನಂ ರಟ್ಠಾ, ಮಞ್ಞೇ ಹಿಸ್ಸಾಮಿ ಜೀವಿತಂ’’.
‘‘ತಸ್ಸಾ ಲಾಲಪ್ಪಿತಂ ಸುತ್ವಾ, ಸಬ್ಬಾ ಅನ್ತೇಪುರೇ ಬಹೂ [ಅಹು (ಸ್ಯಾ. ಕ.)];
ಬಾಹಾ ಪಗ್ಗಯ್ಹ ಪಕ್ಕನ್ದುಂ, ಸಿವಿಕಞ್ಞಾ ಸಮಾಗತಾ.
‘‘ಸಾಲಾವ ಸಮ್ಪಮಥಿತಾ, ಮಾಲುತೇನ ಪಮದ್ದಿತಾ;
ಸೇನ್ತಿ ಪುತ್ತಾ ಚ ದಾರಾ ಚ, ವೇಸ್ಸನ್ತರನಿವೇಸನೇ.
‘‘ಓರೋಧಾ ಚ ಕುಮಾರಾ ಚ, ವೇಸಿಯಾನಾ ಚ ಬ್ರಾಹ್ಮಣಾ;
ಬಾಹಾ ಪಗ್ಗಯ್ಹ ಪಕ್ಕನ್ದುಂ, ವೇಸ್ಸನ್ತರನಿವೇಸನೇ.
‘‘ಹತ್ಥಾರೋಹಾ ಅನೀಕಟ್ಠಾ, ರಥಿಕಾ ಪತ್ತಿಕಾರಕಾ;
ಬಾಹಾ ಪಗ್ಗಯ್ಹ ಪಕ್ಕನ್ದುಂ, ವೇಸ್ಸನ್ತರನಿವೇಸನೇ.
‘‘ತತೋ ರತ್ಯಾ ವಿವಸಾನೇ, ಸೂರಿಯಸ್ಸುಗ್ಗಮನಂ ಪತಿ;
ಅಥ ವೇಸ್ಸನ್ತರೋ ರಾಜಾ, ದಾನಂ ದಾತುಂ ಉಪಾಗಮಿ.
‘‘ವತ್ಥಾನಿ ¶ ವತ್ಥಕಾಮಾನಂ, ಸೋಣ್ಡಾನಂ ದೇಥ ವಾರುಣಿಂ;
ಭೋಜನಂ ಭೋಜನತ್ಥೀನಂ, ಸಮ್ಮದೇವ ಪವೇಚ್ಛಥ.
‘‘ಮಾ ಚ ಕಿಞ್ಚಿ ವನಿಬ್ಬಕೇ, ಹೇಟ್ಠಯಿತ್ಥ ಇಧಾಗತೇ;
ತಪ್ಪೇಥ ಅನ್ನಪಾನೇನ, ಗಚ್ಛನ್ತು ಪಟಿಪೂಜಿತಾ.
‘‘ಅಥೇತ್ಥ ವತ್ತತೀ ಸದ್ದೋ, ತುಮುಲೋ ಭೇರವೋ ಮಹಾ;
ದಾನೇನ ತಂ ನೀಹರನ್ತಿ, ಪುನ ದಾನಂ ಅದಾ ತುವಂ [ಅಯಂ ಗಾಥಾ ಸೀ. ಸ್ಯಾ. ಪೀ. ಪೋತ್ಥಕೇಸು ನ ದಿಸ್ಸತಿ].
‘‘ತೇಸು ¶ ಮತ್ತಾ ಕಿಲನ್ತಾವ, ಸಮ್ಪತನ್ತಿ ವನಿಬ್ಬಕಾ;
ನಿಕ್ಖಮನ್ತೇ ಮಹಾರಾಜೇ, ಸಿವೀನಂ ರಟ್ಠವಡ್ಢನೇ.
‘‘ಅಚ್ಛೇಚ್ಛುಂ ¶ ವತ ಭೋ ರುಕ್ಖಂ, ನಾನಾಫಲಧರಂ ದುಮಂ;
ಯಥಾ ವೇಸ್ಸನ್ತರಂ ರಟ್ಠಾ, ಪಬ್ಬಾಜೇನ್ತಿ ಅದೂಸಕಂ.
‘‘ಅಚ್ಛೇಚ್ಛುಂ ವತ ಭೋ ರುಕ್ಖಂ, ಸಬ್ಬಕಾಮದದಂ ದುಮಂ;
ಯಥಾ ವೇಸ್ಸನ್ತರಂ ರಟ್ಠಾ, ಪಬ್ಬಾಜೇನ್ತಿ ಅದೂಸಕಂ.
‘‘ಅಚ್ಛೇಚ್ಛುಂ ವತ ಭೋ ರುಕ್ಖಂ, ಸಬ್ಬಕಾಮರಸಾಹರಂ;
ಯಥಾ ವೇಸ್ಸನ್ತರಂ ರಟ್ಠಾ, ಪಬ್ಬಾಜೇನ್ತಿ ಅದೂಸಕಂ.
‘‘ಯೇ ವುಡ್ಢಾ ಯೇ ಚ ದಹರಾ, ಯೇ ಚ ಮಜ್ಝಿಮಪೋರಿಸಾ;
ಬಾಹಾ ಪಗ್ಗಯ್ಹ ಪಕ್ಕನ್ದುಂ, ನಿಕ್ಖಮನ್ತೇ ಮಹಾರಾಜೇ;
ಸಿವೀನಂ ರಟ್ಠವಡ್ಢನೇ.
‘‘ಅತಿಯಕ್ಖಾ ¶ ವಸ್ಸವರಾ, ಇತ್ಥಾಗಾರಾ ಚ ರಾಜಿನೋ;
ಬಾಹಾ ಪಗ್ಗಯ್ಹ ಪಕ್ಕನ್ದುಂ, ನಿಕ್ಖಮನ್ತೇ ಮಹಾರಾಜೇ;
ಸಿವೀನಂ ರಟ್ಠವಡ್ಢನೇ.
‘‘ಥಿಯೋಪಿ ತತ್ಥ ಪಕ್ಕನ್ದುಂ, ಯಾ ತಮ್ಹಿ ನಗರೇ ಅಹು;
ನಿಕ್ಖಮನ್ತೇ ಮಹಾರಾಜೇ, ಸಿವೀನಂ ರಟ್ಠವಡ್ಢನೇ.
‘‘ಯೇ ಬ್ರಾಹ್ಮಣಾ ಯೇ ಚ ಸಮಣಾ, ಅಞ್ಞೇ ವಾಪಿ ವನಿಬ್ಬಕಾ;
ಬಾಹಾ ಪಗ್ಗಯ್ಹ ಪಕ್ಕನ್ದುಂ, ಅಧಮ್ಮೋ ಕಿರ ಭೋ ಇತಿ.
‘‘ಯಥಾ ವೇಸ್ಸನ್ತರೋ ರಾಜಾ, ಯಜಮಾನೋ ಸಕೇ ಪುರೇ;
ಸಿವೀನಂ ವಚನತ್ಥೇನ, ಸಮ್ಹಾ ರಟ್ಠಾ ನಿರಜ್ಜತಿ.
‘‘ಸತ್ತ ಹತ್ಥಿಸತೇ ದತ್ವಾ, ಸಬ್ಬಾಲಙ್ಕಾರಭೂಸಿತೇ;
ಸುವಣ್ಣಕಚ್ಛೇ ಮಾತಙ್ಗೇ, ಹೇಮಕಪ್ಪನವಾಸಸೇ.
‘‘ಆರೂಳ್ಹೇ ಗಾಮಣೀಯೇಹಿ, ತೋಮರಙ್ಕುಸಪಾಣಿಭಿ;
ಏಸ ವೇಸ್ಸನ್ತರೋ ರಾಜಾ, ಸಮ್ಹಾ ರಟ್ಠಾ ನಿರಜ್ಜತಿ.
‘‘ಸತ್ತ ಅಸ್ಸಸತೇ ದತ್ವಾ, ಸಬ್ಬಾಲಙ್ಕಾರಭೂಸಿತೇ;
ಆಜಾನೀಯೇವ ಜಾತಿಯಾ, ಸಿನ್ಧವೇ ಸೀಘವಾಹನೇ.
‘‘ಆರೂಳ್ಹೇ ಗಾಮಣೀಯೇಹಿ, ಇಲ್ಲಿಯಾಚಾಪಧಾರಿಭಿ;
ಏಸ ವೇಸ್ಸನ್ತರೋ ರಾಜಾ, ಸಮ್ಹಾ ರಟ್ಠಾ ನಿರಜ್ಜತಿ.
‘‘ಸತ್ತ ರಥಸತೇ ದತ್ವಾ, ಸನ್ನದ್ಧೇ ಉಸ್ಸಿತದ್ಧಜೇ;
ದೀಪೇ ಅಥೋಪಿ ವೇಯಗ್ಘೇ, ಸಬ್ಬಾಲಙ್ಕಾರಭೂಸಿತೇ.
‘‘ಆರೂಳ್ಹೇ ¶ ¶ ಗಾಮಣೀಯೇಹಿ, ಚಾಪಹತ್ಥೇಹಿ ವಮ್ಮಿಭಿ;
ಏಸ ¶ ವೇಸ್ಸನ್ತರೋ ರಾಜಾ, ಸಮ್ಹಾ ರಟ್ಠಾ ನಿರಜ್ಜತಿ.
‘‘ಸತ್ತ ಇತ್ಥಿಸತೇ ದತ್ವಾ, ಏಕಮೇಕಾ ರಥೇ ಠಿತಾ;
ಸನ್ನದ್ಧಾ ನಿಕ್ಖರಜ್ಜೂಹಿ, ಸುವಣ್ಣೇಹಿ ಅಲಙ್ಕತಾ.
‘‘ಪೀತಾಲಙ್ಕಾರಾ ಪೀತವಸನಾ, ಪೀತಾಭರಣವಿಭೂಸಿತಾ;
ಅಳಾರಪಮ್ಹಾ ಹಸುಲಾ, ಸುಸಞ್ಞಾ ತನುಮಜ್ಝಿಮಾ;
ಏಸ ವೇಸ್ಸನ್ತರೋ ರಾಜಾ, ಸಮ್ಹಾ ರಟ್ಠಾ ನಿರಜ್ಜತಿ.
‘‘ಸತ್ತ ಧೇನುಸತೇ ದತ್ವಾ, ಸಬ್ಬಾ ಕಂಸುಪಧಾರಣಾ [ಕುಸುಮಧಾರಿನೇ (ಕ.)];
ಏಸ ವೇಸ್ಸನ್ತರೋ ರಾಜಾ, ಸಮ್ಹಾ ರಟ್ಠಾ ನಿರಜ್ಜತಿ.
‘‘ಸತ್ತ ದಾಸಿಸತೇ ದತ್ವಾ, ಸತ್ತ ದಾಸಸತಾನಿ ಚ;
ಏಸ ವೇಸ್ಸನ್ತರೋ ರಾಜಾ, ಸಮ್ಹಾ ರಟ್ಠಾ ನಿರಜ್ಜತಿ.
‘‘ಹತ್ಥೀ ಅಸ್ಸರಥೇ [ಅಸ್ಸೇ ರಥೇ (ಸ್ಯಾ.)] ದತ್ವಾ, ನಾರಿಯೋ ಚ ಅಲಙ್ಕತಾ;
ಏಸ ವೇಸ್ಸನ್ತರೋ ರಾಜಾ, ಸಮ್ಹಾ ರಟ್ಠಾ ನಿರಜ್ಜತಿ.
‘‘ತದಾಸಿ ಯಂ ಭಿಂಸನಕಂ, ತದಾಸಿ ಲೋಮಹಂಸನಂ;
ಮಹಾದಾನೇ ಪದಿನ್ನಮ್ಹಿ, ಮೇದನೀ ಸಮ್ಪಕಮ್ಪಥ.
‘‘ತದಾಸಿ ಯಂ ಭಿಂಸನಕಂ, ತದಾಸಿ ಲೋಮಹಂಸನಂ;
ಯಂ ಪಞ್ಜಲಿಕತೋ ರಾಜಾ, ಸಮ್ಹಾ ರಟ್ಠಾ ನಿರಜ್ಜತಿ.
‘‘ಅಥೇತ್ಥ ವತ್ತತೀ ಸದ್ದೋ, ತುಮುಲೋ ಭೇರವೋ ಮಹಾ;
ದಾನೇನ ತಂ ನೀಹರನ್ತಿ, ಪುನ ದಾನಂ ಅದಾ ತುವಂ.
‘‘ತೇಸು ¶ ಮತ್ತಾ ಕಿಲನ್ತಾವ, ಸಮ್ಪತನ್ತಿ ವನಿಬ್ಬಕಾ;
ನಿಕ್ಖಮನ್ತೇ ಮಹಾರಾಜೇ, ಸಿವೀನಂ ರಟ್ಠವಡ್ಢನೇ’’.
‘‘ಆಮನ್ತಯಿತ್ಥ ರಾಜಾನಂ, ಸಞ್ಜಯಂ ಧಮ್ಮಿನಂ ವರಂ [ಧಮ್ಮಿಕಂವರಂ (ಸ್ಯಾ. ಕ.)];
ಅವರುದ್ಧಸಿ ಮಂ ದೇವ, ವಙ್ಕಂ ಗಚ್ಛಾಮಿ ಪಬ್ಬತಂ.
‘‘ಯೇ ಹಿ ಕೇಚಿ ಮಹಾರಾಜ, ಭೂತಾ ಯೇ ಚ ಭವಿಸ್ಸರೇ;
ಅತಿತ್ತಾಯೇವ ಕಾಮೇಹಿ, ಗಚ್ಛನ್ತಿ ಯಮಸಾಧನಂ.
‘‘ಸ್ವಾಹಂ ¶ ಸಕೇ ಅಭಿಸ್ಸಸಿಂ, ಯಜಮಾನೋ ಸಕೇ ಪುರೇ;
ಸಿವೀನಂ ವಚನತ್ಥೇನ, ಸಮ್ಹಾ ರಟ್ಠಾ ನಿರಜ್ಜತಿ.
‘‘ಅಘಂ ತಂ ಪಟಿಸೇವಿಸ್ಸಂ, ವನೇ ವಾಳಮಿಗಾಕಿಣ್ಣೇ;
ಖಗ್ಗದೀಪಿನಿಸೇವಿತೇ, ಅಹಂ ಪುಞ್ಞಾನಿ ಕರೋಮಿ;
ತುಮ್ಹೇ ಪಙ್ಕಮ್ಹಿ ಸೀದಥ’’.
‘‘ಅನುಜಾನಾಹಿ ¶ ಮಂ ಅಮ್ಮ, ಪಬ್ಬಜ್ಜಾ ಮಮ ರುಚ್ಚತಿ;
ಸ್ವಾಹಂ ಸಕೇ ಅಭಿಸ್ಸಸಿಂ, ಯಜಮಾನೋ ಸಕೇ ಪುರೇ;
ಸಿವೀನಂ ವಚನತ್ಥೇನ, ಸಮ್ಹಾ ರಟ್ಠಾ ನಿರಜ್ಜತಿ.
‘‘ಅಘಂ ತಂ ಪಟಿಸೇವಿಸ್ಸಂ, ವನೇ ವಾಳಮಿಗಾಕಿಣ್ಣೇ;
ಖಗ್ಗದೀಪಿನಿಸೇವಿತೇ, ಅಹಂ ಪುಞ್ಞಾನಿ ಕರೋಮಿ;
ತುಮ್ಹೇ ಪಙ್ಕಮ್ಹಿ ಸೀದಥ [ವಙ್ಕಂ ಗಚ್ಛಾಮಿ ಪಬ್ಬತಂ (ಕ.)].
‘‘ಅನುಜಾನಾಮಿ ತಂ ಪುತ್ತ, ಪಬ್ಬಜ್ಜಾ ತೇ ಸಮಿಜ್ಝತು;
ಅಯಞ್ಚ ಮದ್ದೀ ಕಲ್ಯಾಣೀ, ಸುಸಞ್ಞಾ ತನುಮಜ್ಝಿಮಾ;
ಅಚ್ಛತಂ ಸಹ ಪುತ್ತೇಹಿ, ಕಿಂ ಅರಞ್ಞೇ ಕರಿಸ್ಸತಿ’’.
‘‘ನಾಹಂ ¶ ಅಕಾಮಾ ದಾಸಿಮ್ಪಿ, ಅರಞ್ಞಂ ನೇತುಮುಸ್ಸಹೇ;
ಸಚೇ ಇಚ್ಛತಿ ಅನ್ವೇತು, ಸಚೇ ನಿಚ್ಛತಿ ಅಚ್ಛತು’’.
‘‘ತತೋ ಸುಣ್ಹಂ ಮಹಾರಾಜಾ, ಯಾಚಿತುಂ ಪಟಿಪಜ್ಜಥ;
ಮಾ ಚನ್ದನಸಮಾಚಾರೇ, ರಜೋಜಲ್ಲಂ ಅಧಾರಯಿ.
‘‘ಮಾ ಕಾಸಿಯಾನಿ ಧಾರೇತ್ವಾ [ಕಾಸಿಯಾನಿ ಚ ಧಾರೇತ್ವಾ (ಕ.)], ಕುಸಚೀರಂ ಅಧಾರಯಿ;
ದುಕ್ಖೋ ವಾಸೋ ಅರಞ್ಞಸ್ಮಿಂ, ಮಾ ಹಿ ತ್ವಂ ಲಕ್ಖಣೇ ಗಮಿ.
‘‘ತಮಬ್ರವಿ ರಾಜಪುತ್ತೀ, ಮದ್ದೀ ಸಬ್ಬಙ್ಗಸೋಭನಾ;
ನಾಹಂ ತಂ ಸುಖಮಿಚ್ಛೇಯ್ಯಂ, ಯಂ ಮೇ ವೇಸ್ಸನ್ತರಂ ವಿನಾ’’.
‘‘ತಮಬ್ರವಿ ಮಹಾರಾಜಾ, ಸಿವೀನಂ ರಟ್ಠವಡ್ಢನೋ;
ಇಙ್ಘ ಮದ್ದೀ ನಿಸಾಮೇತಿ, ವನೇ ಯೇ ಹೋನ್ತಿ ದುಸ್ಸಹಾ.
‘‘ಬಹೂ ಕೀಟಾ ಪಟಙ್ಗಾ ಚ, ಮಕಸಾ ಮಧುಮಕ್ಖಿಕಾ;
ತೇಪಿ ತಂ ತತ್ಥ ಹಿಂಸೇಯ್ಯುಂ, ತಂ ತೇ ದುಕ್ಖತರಂ ಸಿಯಾ.
‘‘ಅಪರೇ ¶ ಪಸ್ಸ ಸನ್ತಾಪೇ, ನದೀನುಪನಿಸೇವಿತೇ;
ಸಪ್ಪಾ ಅಜಗರಾ ನಾಮ, ಅವಿಸಾ ತೇ ಮಹಬ್ಬಲಾ.
‘‘ತೇ ಮನುಸ್ಸಂ ಮಿಗಂ ವಾಪಿ, ಅಪಿ ಮಾಸನ್ನಮಾಗತಂ;
ಪರಿಕ್ಖಿಪಿತ್ವಾ ಭೋಗೇಹಿ, ವಸಮಾನೇನ್ತಿ ಅತ್ತನೋ.
‘‘ಅಞ್ಞೇಪಿ ಕಣ್ಹಜಟಿನೋ [ಕಣ್ಹಜಟಿಲಾ (ಕ.)], ಅಚ್ಛಾ ನಾಮ ಅಘಮ್ಮಿಗಾ;
ನ ತೇಹಿ ಪುರಿಸೋ ದಿಟ್ಠೋ, ರುಕ್ಖಮಾರುಯ್ಹ ಮುಚ್ಚತಿ.
‘‘ಸಙ್ಘಟ್ಟಯನ್ತಾ ಸಿಙ್ಗಾನಿ, ತಿಕ್ಖಗ್ಗಾತಿಪ್ಪಹಾರಿನೋ [ತಿಕ್ಖಗ್ಗಾನಿ ಪಹಾರಿನೋ (ಸೀ. ಸ್ಯಾ.)];
ಮಹಿಂಸಾ ವಿಚರನ್ತೇತ್ಥ, ನದಿಂ ಸೋತುಮ್ಬರಂ ಪತಿ.
‘‘ದಿಸ್ವಾ ¶ ¶ ಮಿಗಾನಂ ಯೂಥಾನಂ, ಗವಂ ಸಞ್ಚರತಂ ವನೇ;
ಧೇನುವ ವಚ್ಛಗಿದ್ಧಾವ, ಕಥಂ ಮದ್ದಿ ಕರಿಸ್ಸಸಿ.
‘‘ದಿಸ್ವಾ ಸಮ್ಪತಿತೇ ಘೋರೇ, ದುಮಗ್ಗೇಸು ಪ್ಲವಙ್ಗಮೇ;
ಅಖೇತ್ತಞ್ಞಾಯ ತೇ ಮದ್ದಿ, ಭವಿಸ್ಸತೇ ಮಹಬ್ಭಯಂ.
‘‘ಯಾ ತ್ವಂ ಸಿವಾಯ ಸುತ್ವಾನ, ಮುಹುಂ ಉತ್ತಸಯೀ [ಉತ್ತಸಸೇ (ಸೀ. ಸ್ಯಾ. ಕ.)] ಪುರೇ;
ಸಾ ತ್ವಂ ವಙ್ಕಮನುಪ್ಪತ್ತಾ, ಕಥಂ ಮದ್ದಿ ಕರಿಸ್ಸಸಿ.
‘‘ಠಿತೇ ಮಜ್ಝನ್ಹಿಕೇ [ಮಜ್ಝನ್ತಿಕೇ (ಸೀ. ಸ್ಯಾ. ಪೀ.)] ಕಾಲೇ, ಸನ್ನಿಸಿನ್ನೇಸು ಪಕ್ಖಿಸು;
ಸಣತೇವ ಬ್ರಹಾರಞ್ಞಂ, ತತ್ಥ ಕಿಂ ಗನ್ತುಮಿಚ್ಛಸಿ’’.
‘‘ತಮಬ್ರವಿ ರಾಜಪುತ್ತೀ, ಮದ್ದೀ ಸಬ್ಬಙ್ಗಸೋಭನಾ;
ಯಾನಿ ಏತಾನಿ ಅಕ್ಖಾಸಿ, ವನೇ ಪಟಿಭಯಾನಿ ಮೇ;
ಸಬ್ಬಾನಿ ಅಭಿಸಮ್ಭೋಸ್ಸಂ, ಗಚ್ಛಞ್ಞೇವ ರಥೇಸಭ.
‘‘ಕಾಸಂ ಕುಸಂ ಪೋಟಕಿಲಂ, ಉಸಿರಂ ಮುಞ್ಜಪಬ್ಬಜಂ [ಮುಞ್ಜಬಬ್ಬಜಂ (ಸೀ.)];
ಉರಸಾ ಪನುದಹಿಸ್ಸಾಮಿ, ನಸ್ಸ ಹೇಸ್ಸಾಮಿ ದುನ್ನಯಾ.
‘‘ಬಹೂಹಿ ವತ ಚರಿಯಾಹಿ, ಕುಮಾರೀ ವಿನ್ದತೇ ಪತಿಂ;
ಉದರಸ್ಸುಪರೋಧೇನ, ಗೋಹನುವೇಠನೇನ ಚ.
‘‘ಅಗ್ಗಿಸ್ಸ ಪಾರಿಚರಿಯಾಯ, ಉದಕುಮ್ಮುಜ್ಜನೇನ ಚ;
ವೇಧಬ್ಯಂ [ವೇಧಬ್ಬಂ (ಸೀ. ಪೀ.)] ಕಟುಕಂ ಲೋಕೇ, ಗಚ್ಛಞ್ಞೇವ ರಥೇಸಭ.
‘‘ಅಪಿಸ್ಸಾ ¶ ಹೋತಿ ಅಪ್ಪತ್ತೋ, ಉಚ್ಛಿಟ್ಠಮಪಿ ಭುಞ್ಜಿತುಂ;
ಯೋ ನಂ ಹತ್ಥೇ ಗಹೇತ್ವಾನ, ಅಕಾಮಂ ಪರಿಕಡ್ಢತಿ;
ವೇಧಬ್ಯಂ ಕಟುಕಂ ಲೋಕೇ, ಗಚ್ಛಞ್ಞೇವ ರಥೇಸಭ.
‘‘ಕೇಸಗ್ಗಹಣಮುಕ್ಖೇಪಾ ¶ , ಭೂಮ್ಯಾ ಚ ಪರಿಸುಮ್ಭನಾ;
ದತ್ವಾ ಚ ನೋಪಕ್ಕಮತಿ, ಬಹುದುಕ್ಖಂ ಅನಪ್ಪಕಂ;
ವೇಧಬ್ಯಂ ಕಟುಕಂ ಲೋಕೇ, ಗಚ್ಛಞ್ಞೇವ ರಥೇಸಭ.
‘‘ಸುಕಚ್ಛವೀ ವೇಧವೇರಾ, ದತ್ವಾ ಸುಭಗಮಾನಿನೋ;
ಅಕಾಮಂ ಪರಿಕಡ್ಢನ್ತಿ, ಉಲೂಕಞ್ಞೇವ ವಾಯಸಾ;
ವೇಧಬ್ಯಂ ಕಟುಕಂ ಲೋಕೇ, ಗಚ್ಛಞ್ಞೇವ ರಥೇಸಭ.
‘‘ಅಪಿ ಞಾತಿಕುಲೇ ಫೀತೇ, ಕಂಸಪಜ್ಜೋತನೇ ವಸಂ;
ನೇವಾಭಿವಾಕ್ಯಂ ನ ಲಭೇ, ಭಾತೂಹಿ ಸಖಿನೀಹಿಪಿ [ಸಖಿಕಾಹಿ ಚ (ಸೀ. ಪೀ.)];
ವೇಧಬ್ಯಂ ಕಟುಕಂ ಲೋಕೇ, ಗಚ್ಛಞ್ಞೇವ ರಥೇಸಭ.
‘‘ನಗ್ಗಾ ¶ ನದೀ ಅನೂದಕಾ, ನಗ್ಗಂ ರಟ್ಠಂ ಅರಾಜಕಂ;
ಇತ್ಥೀಪಿ ವಿಧವಾ ನಗ್ಗಾ, ಯಸ್ಸಾಪಿ ದಸ ಭಾತರೋ;
ವೇಧಬ್ಯಂ ಕಟುಕಂ ಲೋಕೇ, ಗಚ್ಛಞ್ಞೇವ ರಥೇಸಭ.
‘‘ಧಜೋ ರಥಸ್ಸ ಪಞ್ಞಾಣಂ, ಧೂಮೋ ಪಞ್ಞಾಣಮಗ್ಗಿನೋ;
ರಾಜಾ ರಥಸ್ಸ ಪಞ್ಞಾಣಂ, ಭತ್ತಾ ಪಞ್ಞಾಣಮಿತ್ಥಿಯಾ;
ವೇಧಬ್ಯಂ ಕಟುಕಂ ಲೋಕೇ, ಗಚ್ಛಞ್ಞೇವ ರಥೇಸಭ.
‘‘ಯಾ ದಲಿದ್ದೀ ದಲಿದ್ದಸ್ಸ, ಅಡ್ಢಾ ಅಡ್ಢಸ್ಸ ಕಿತ್ತಿಮಂ;
ತಂ ವೇ ದೇವಾ ಪಸಂಸನ್ತಿ, ದುಕ್ಕರಞ್ಹಿ ಕರೋತಿ ಸಾ.
‘‘ಸಾಮಿಕಂ ಅನುಬನ್ಧಿಸ್ಸಂ, ಸದಾ ಕಾಸಾಯವಾಸಿನೀ;
ಪಥಬ್ಯಾಪಿ ಅಭಿಜ್ಜನ್ತ್ಯಾ [ಅಭೇಜ್ಜನ್ತ್ಯಾ (ಸೀ. ಪೀ.)], ವೇಧಬ್ಯಂ ಕಟುಕಿತ್ಥಿಯಾ.
‘‘ಅಪಿ ಸಾಗರಪರಿಯನ್ತಂ, ಬಹುವಿತ್ತಧರಂ ಮಹಿಂ;
ನಾನಾರತನಪರಿಪೂರಂ ¶ , ನಿಚ್ಛೇ ವೇಸ್ಸನ್ತರಂ ವಿನಾ.
‘‘ಕಥಂ ನು ತಾಸಂ ಹದಯಂ, ಸುಖರಾ ವತ ಇತ್ಥಿಯೋ;
ಯಾ ಸಾಮಿಕೇ ದುಕ್ಖಿತಮ್ಹಿ, ಸುಖಮಿಚ್ಛನ್ತಿ ಅತ್ತನೋ.
‘‘ನಿಕ್ಖಮನ್ತೇ ¶ ಮಹಾರಾಜೇ, ಸಿವೀನಂ ರಟ್ಠವಡ್ಢನೇ;
ತಮಹಂ ಅನುಬನ್ಧಿಸ್ಸಂ, ಸಬ್ಬಕಾಮದದೋ ಹಿ ಮೇ’’.
‘‘ತಮಬ್ರವಿ ಮಹಾರಾಜಾ, ಮದ್ದಿಂ ಸಬ್ಬಙ್ಗಸೋಭನಂ;
ಇಮೇ ತೇ ದಹರಾ ಪುತ್ತಾ, ಜಾಲೀ ಕಣ್ಹಾಜಿನಾ ಚುಭೋ;
ನಿಕ್ಖಿಪ್ಪ ಲಕ್ಖಣೇ ಗಚ್ಛ, ಮಯಂ ತೇ ಪೋಸಯಾಮಸೇ’’ [ಪೋಸಿಯಾಮಸೇ (ಸೀ. ಪೀ. ಕ.)].
‘‘ತಮಬ್ರವಿ ರಾಜಪುತ್ತೀ, ಮದ್ದೀ ಸಬ್ಬಙ್ಗಸೋಭನಾ;
ಪಿಯಾ ಮೇ ಪುತ್ತಕಾ ದೇವ, ಜಾಲೀ ಕಣ್ಹಾಜಿನಾ ಚುಭೋ;
ತ್ಯಮ್ಹಂ ತತ್ಥ ರಮೇಸ್ಸನ್ತಿ, ಅರಞ್ಞೇ ಜೀವಸೋಕಿನಂ’’.
‘‘ತಮಬ್ರವಿ ಮಹಾರಾಜಾ, ಸಿವೀನಂ ರಟ್ಠವಡ್ಢನೋ;
ಸಾಲೀನಂ ಓದನಂ ಭುತ್ವಾ, ಸುಚಿಂ ಮಂಸೂಪಸೇಚನಂ;
ರುಕ್ಖಫಲಾನಿ ಭುಞ್ಜನ್ತಾ, ಕಥಂ ಕಾಹನ್ತಿ ದಾರಕಾ.
‘‘ಭುತ್ವಾ ಸತಪಲೇ ಕಂಸೇ, ಸೋವಣ್ಣೇ ಸತರಾಜಿಕೇ;
ರುಕ್ಖಪತ್ತೇಸು ಭುಞ್ಜನ್ತಾ, ಕಥಂ ಕಾಹನ್ತಿ ದಾರಕಾ.
‘‘ಕಾಸಿಯಾನಿ ಚ ಧಾರೇತ್ವಾ, ಖೋಮಕೋಟುಮ್ಬರಾನಿ ಚ;
ಕುಸಚೀರಾನಿ ಧಾರೇನ್ತಾ, ಕಥಂ ಕಾಹನ್ತಿ ದಾರಕಾ.
‘‘ವಯ್ಹಾಹಿ ¶ ಪರಿಯಾಯಿತ್ವಾ, ಸಿವಿಕಾಯ ರಥೇನ ಚ;
ಪತ್ತಿಕಾ ಪರಿಧಾವನ್ತಾ, ಕಥಂ ಕಾಹನ್ತಿ ದಾರಕಾ.
‘‘ಕೂಟಾಗಾರೇ ¶ ಸಯಿತ್ವಾನ, ನಿವಾತೇ ಫುಸಿತಗ್ಗಳೇ;
ಸಯನ್ತಾ ರುಕ್ಖಮೂಲಸ್ಮಿಂ, ಕಥಂ ಕಾಹನ್ತಿ ದಾರಕಾ.
‘‘ಪಲ್ಲಙ್ಕೇಸು ಸಯಿತ್ವಾನ, ಗೋನಕೇ ಚಿತ್ತಸನ್ಥತೇ;
ಸಯನ್ತಾ ತಿಣಸನ್ಥಾರೇ, ಕಥಂ ಕಾಹನ್ತಿ ದಾರಕಾ.
‘‘ಗನ್ಧಕೇನ ವಿಲಿಮ್ಪಿತ್ವಾ, ಅಗರುಚನ್ದನೇನ ಚ;
ರಜೋಜಲ್ಲಾನಿ ಧಾರೇನ್ತಾ, ಕಥಂ ಕಾಹನ್ತಿ ದಾರಕಾ.
‘‘ಚಾಮರಮೋರಹತ್ಥೇಹಿ, ಬೀಜಿತಙ್ಗಾ ಸುಖೇಧಿತಾ [ಸುಖೇ ಠಿತಾ (ಸ್ಯಾ. ಪೀ.)];
ಫುಟ್ಠಾ ಡಂಸೇಹಿ ಮಕಸೇಹಿ, ಕಥಂ ಕಾಹನ್ತಿ ದಾರಕಾ’’.
‘‘ತಮಬ್ರವಿ ¶ ರಾಜಪುತ್ತೀ, ಮದ್ದೀ ಸಬ್ಬಙ್ಗಸೋಭನಾ;
ಮಾ ದೇವ ಪರಿದೇವೇಸಿ, ಮಾ ಚ ತ್ವಂ ವಿಮನೋ ಅಹು;
ಯಥಾ ಮಯಂ ಭವಿಸ್ಸಾಮ, ತಥಾ ಹೇಸ್ಸನ್ತಿ ದಾರಕಾ.
‘‘ಇದಂ ವತ್ವಾನ ಪಕ್ಕಾಮಿ, ಮದ್ದೀ ಸಬ್ಬಙ್ಗಸೋಭನಾ;
ಸಿವಿಮಗ್ಗೇನ ಅನ್ವೇಸಿ, ಪುತ್ತೇ ಆದಾಯ ಲಕ್ಖಣಾ’’.
ತತೋ ವೇಸ್ಸನ್ತರೋ ರಾಜಾ, ದಾನಂ ದತ್ವಾನ ಖತ್ತಿಯೋ;
ಪಿತು ಮಾತು ಚ ವನ್ದಿತ್ವಾ, ಕತ್ವಾ ಚ ನಂ ಪದಕ್ಖಿಣಂ.
ಚತುವಾಹಿಂ ರಥಂ ಯುತ್ತಂ, ಸೀಘಮಾರುಯ್ಹ ಸನ್ದನಂ;
ಆದಾಯ ಪುತ್ತದಾರಞ್ಚ, ವಙ್ಕಂ ಪಾಯಾಸಿ ಪಬ್ಬತಂ.
ತತೋ ವೇಸ್ಸನ್ತರೋ ರಾಜಾ, ಯೇನಾಸಿ ಬಹುಕೋ ಜನೋ;
‘‘ಆಮನ್ತ ಖೋ ತಂ ಗಚ್ಛಾಮ, ಅರೋಗಾ ಹೋನ್ತು ಞಾತಯೋ’’.
‘‘ಇಙ್ಘ ¶ ಮದ್ದಿ ನಿಸಾಮೇಹಿ, ರಮ್ಮರೂಪಂವ ದಿಸ್ಸತಿ;
ಆವಾಸಂ ಸಿವಿಸೇಟ್ಠಸ್ಸ, ಪೇತ್ತಿಕಂ ಭವನಂ ಮಮ’’.
‘‘ತಂ ಬ್ರಾಹ್ಮಣಾ ಅನ್ವಗಮುಂ, ತೇ ನಂ ಅಸ್ಸೇ ಅಯಾಚಿಸುಂ;
ಯಾಚಿತೋ ಪಟಿಪಾದೇಸಿ, ಚತುನ್ನಂ ಚತುರೋ ಹಯೇ’’’.
‘‘ಇಙ್ಘ ಮದ್ದಿ ನಿಸಾಮೇಹಿ, ಚಿತ್ತರೂಪಂವ ದಿಸ್ಸತಿ;
ಮಿಗರೋಹಿಚ್ಚವಣ್ಣೇನ, ದಕ್ಖಿಣಸ್ಸಾ ವಹನ್ತಿ ಮಂ’’.
‘‘ಅಥೇತ್ಥ ಪಞ್ಚಮೋ ಆಗಾ, ಸೋ ತಂ ರಥಮಯಾಚಥ;
ತಸ್ಸ ತಂ ಯಾಚಿತೋದಾಸಿ, ನ ಚಸ್ಸುಪಹತೋ ಮನೋ.
‘‘ತತೋ ¶ ವೇಸ್ಸನ್ತರೋ ರಾಜಾ, ಓರೋಪೇತ್ವಾ [ಓತಾರೇತ್ವಾ (ಕ.)] ಸಕಂ ಜನಂ;
ಅಸ್ಸಾಸಯಿ ಅಸ್ಸರಥಂ, ಬ್ರಾಹ್ಮಣಸ್ಸ ಧನೇಸಿನೋ’’.
‘‘ತ್ವಂ ಮದ್ದಿ ಕಣ್ಹಂ ಗಣ್ಹಾಹಿ, ಲಹು ಏಸಾ ಕನಿಟ್ಠಿಕಾ;
ಅಹಂ ಜಾಲಿಂ ಗಹೇಸ್ಸಾಮಿ, ಗರುಕೋ ಭಾತಿಕೋ ಹಿ ಸೋ’’.
‘‘ರಾಜಾ ಕುಮಾರಮಾದಾಯ, ರಾಜಪುತ್ತೀ ಚ ದಾರಿಕಂ;
ಸಮ್ಮೋದಮಾನಾ ಪಕ್ಕಾಮುಂ, ಅಞ್ಞಮಞ್ಞಂ ಪಿಯಂವದಾ’’.
ದಾನಕಣ್ಡಂ ನಾಮ.
ವನಪವೇಸನಂ
‘‘ಯದಿ ¶ ಕೇಚಿ ಮನುಜಾ ಏನ್ತಿ, ಅನುಮಗ್ಗೇ ಪಟಿಪಥೇ;
ಮಗ್ಗಂ ತೇ ಪಟಿಪುಚ್ಛಾಮ, ಕುಹಿಂ ವಙ್ಕತಪಬ್ಬತೋ.
‘‘ತೇ ತತ್ಥ ಅಮ್ಹೇ ಪಸ್ಸಿತ್ವಾ, ಕಲುನಂ ಪರಿದೇವಯುಂ;
ದುಕ್ಖಂ ¶ ತೇ ಪಟಿವೇದೇನ್ತಿ, ದೂರೇ ವಙ್ಕತಪಬ್ಬತೋ’’.
‘‘ಯದಿ ಪಸ್ಸನ್ತಿ ಪವನೇ, ದಾರಕಾ ಫಲಿನೇ [ಫಲಿತೇ (ಸೀ. ಸ್ಯಾ. ಪೀ.)] ದುಮೇ;
ತೇಸಂ ಫಲಾನಂ ಹೇತುಮ್ಹಿ, ಉಪರೋದನ್ತಿ ದಾರಕಾ.
‘‘ರೋದನ್ತೇ ದಾರಕೇ ದಿಸ್ವಾ, ಉಬ್ಬಿದ್ಧಾ [ಉಬ್ಬಿಗ್ಗಾ (ಸೀ. ಸ್ಯಾ. ಪೀ.)] ವಿಪುಲಾ ದುಮಾ;
ಸಯಮೇವೋನಮಿತ್ವಾನ, ಉಪಗಚ್ಛನ್ತಿ ದಾರಕೇ.
‘‘ಇದಂ ಅಚ್ಛೇರಕಂ ದಿಸ್ವಾ, ಅಬ್ಭುತಂ ಲೋಮಹಂಸನಂ;
ಸಾಧುಕಾರಂ ಪವತ್ತೇಸಿ, ಮದ್ದೀ ಸಬ್ಬಙ್ಗಸೋಭನಾ.
‘‘ಅಚ್ಛೇರಂ ವತ ಲೋಕಸ್ಮಿಂ, ಅಬ್ಭುತಂ ಲೋಮಹಂಸನಂ;
ವೇಸ್ಸನ್ತರಸ್ಸ ತೇಜೇನ, ಸಯಮೇವೋನತಾ ದುಮಾ’’.
‘‘ಸಙ್ಖಿಪಿಂಸು ಪಥಂ ಯಕ್ಖಾ, ಅನುಕಮ್ಪಾಯ ದಾರಕೇ;
ನಿಕ್ಖನ್ತದಿವಸೇನೇವ, ಚೇತರಟ್ಠಂ ಉಪಾಗಮುಂ’’.
‘‘ತೇ ಗನ್ತ್ವಾ ದೀಘಮದ್ಧಾನಂ, ಚೇತರಟ್ಠಂ ಉಪಾಗಮುಂ;
ಇದ್ಧಂ ಫೀತಂ ಜನಪದಂ, ಬಹುಮಂಸಸುರೋದನಂ’’.
‘‘ಚೇತಿಯೋ ಪರಿವಾರಿಂಸು, ದಿಸ್ವಾ ಲಕ್ಖಣಮಾಗತಂ;
ಸುಖುಮಾಲೀ ವತ ಅಯ್ಯಾ, ಪತ್ತಿಕಾ ಪರಿಧಾವತಿ.
‘‘ವಯ್ಹಾಹಿ ¶ ಪರಿಯಾಯಿತ್ವಾ, ಸಿವಿಕಾಯ ರಥೇನ ಚ;
ಸಾಜ್ಜ ಮದ್ದೀ ಅರಞ್ಞಸ್ಮಿಂ, ಪತ್ತಿಕಾ ಪರಿಧಾವತಿ’’.
‘‘ತಂ ದಿಸ್ವಾ ಚೇತಪಾಮೋಕ್ಖಾ, ರೋದಮಾನಾ ಉಪಾಗಮುಂ;
ಕಚ್ಚಿ ನು ದೇವ ಕುಸಲಂ, ಕಚ್ಚಿ ದೇವ ಅನಾಮಯಂ;
ಕಚ್ಚಿ ¶ ಪಿತಾ ಅರೋಗೋ ತೇ, ಸಿವೀನಞ್ಚ ಅನಾಮಯಂ.
‘‘ಕೋ ತೇ ಬಲಂ ಮಹಾರಾಜ, ಕೋ ನು ತೇ ರಥಮಣ್ಡಲಂ;
ಅನಸ್ಸಕೋ ಅರಥಕೋ, ದೀಘಮದ್ಧಾನಮಾಗತೋ;
ಕಚ್ಚಾಮಿತ್ತೇಹಿ ಪಕತೋ, ಅನುಪ್ಪತ್ತೋಸಿಮಂ ದಿಸಂ’’.
‘‘ಕುಸಲಞ್ಚೇವ ¶ ಮೇ ಸಮ್ಮ, ಅಥೋ ಸಮ್ಮ ಅನಾಮಯಂ;
ಅಥೋ ಪಿತಾ ಅರೋಗೋ ಮೇ, ಸಿವೀನಞ್ಚ ಅನಾಮಯಂ.
‘‘ಅಹಞ್ಹಿ ಕುಞ್ಜರಂ ದಜ್ಜಂ, ಈಸಾದನ್ತಂ ಉರೂಳ್ಹವಂ;
ಖೇತ್ತಞ್ಞುಂ ಸಬ್ಬಯುದ್ಧಾನಂ, ಸಬ್ಬಸೇತಂ ಗಜುತ್ತಮಂ.
‘‘ಪಣ್ಡುಕಮ್ಬಲಸಞ್ಛನ್ನಂ, ಪಭಿನ್ನಂ ಸತ್ತುಮದ್ದನಂ;
ದನ್ತಿಂ ಸವಾಳಬೀಜನಿಂ, ಸೇತಂ ಕೇಲಾಸಸಾದಿಸಂ.
‘‘ಸಸೇತಚ್ಛತ್ತಂ ಸಉಪಾಧೇಯ್ಯಂ, ಸಾಥಪ್ಪನಂ ಸಹತ್ಥಿಪಂ;
ಅಗ್ಗಯಾನಂ ರಾಜವಾಹಿಂ, ಬ್ರಾಹ್ಮಣಾನಂ ಅದಾಸಹಂ.
‘‘ತಸ್ಮಿಂ ಮೇ ಸಿವಯೋ ಕುದ್ಧಾ, ಪಿತಾ ಚುಪಹತೋಮನೋ;
ಅವರುದ್ಧಸಿ ಮಂ ರಾಜಾ, ವಙ್ಕಂ ಗಚ್ಛಾಮಿ ಪಬ್ಬತಂ;
ಓಕಾಸಂ ಸಮ್ಮಾ ಜಾನಾಥ, ವನೇ ಯತ್ಥ ವಸಾಮಸೇ’’.
‘‘ಸ್ವಾಗತಂ ತೇ ಮಹಾರಾಜ, ಅಥೋ ತೇ ಅದುರಾಗತಂ;
ಇಸ್ಸರೋಸಿ ಅನುಪ್ಪತ್ತೋ, ಯಂ ಇಧತ್ಥಿ ಪವೇದಯ.
‘‘ಸಾಕಂ ಭಿಸಂ ಮಧುಂ ಮಂಸಂ, ಸುದ್ಧಂ ಸಾಲಿನಮೋದನಂ;
ಪರಿಭುಞ್ಜ ಮಹಾರಾಜ, ಪಾಹುನೋ ನೋಸಿ ಆಗತೋ’’.
‘‘ಪಟಿಗ್ಗಹಿತಂ ¶ ಯಂ ದಿನ್ನಂ, ಸಬ್ಬಸ್ಸ ಅಗ್ಘಿಯಂ ಕತಂ;
ಅವರುದ್ಧಸಿ ಮಂ ರಾಜಾ, ವಙ್ಕಂ ಗಚ್ಛಾಮಿ ಪಬ್ಬತಂ;
ಓಕಾಸಂ ಸಮ್ಮಾ ಜಾನಾಥ, ವನೇ ಯತ್ಥ ವಸಾಮಸೇ’’.
‘‘ಇಧೇವ ತಾವ ಅಚ್ಛಸ್ಸು, ಚೇತರಟ್ಠೇ ರಥೇಸಭ;
ಯಾವ ಚೇತಾ ಗಮಿಸ್ಸನ್ತಿ, ರಞ್ಞೋ ಸನ್ತಿಕ ಯಾಚಿತುಂ.
‘‘ನಿಜ್ಝಾಪೇತುಂ ¶ ಮಹಾರಾಜಂ, ಸಿವೀನಂ ರಟ್ಠವಡ್ಢನಂ;
ತಂ ತಂ ಚೇತಾ ಪುರಕ್ಖತ್ವಾ, ಪತೀತಾ ಲದ್ಧಪಚ್ಚಯಾ;
ಪರಿವಾರೇತ್ವಾನ ಗಚ್ಛನ್ತಿ, ಏವಂ ಜಾನಾಹಿ ಖತ್ತಿಯ’’.
‘‘ಮಾ ವೋ ರುಚ್ಚಿತ್ಥ ಗಮನಂ, ರಞ್ಞೋ ಸನ್ತಿಕ ಯಾಚಿತುಂ;
ನಿಜ್ಝಾಪೇತುಂ ಮಹಾರಾಜಂ, ರಾಜಾಪಿ ತತ್ಥ ನಿಸ್ಸರೋ.
‘‘ಅಚ್ಚುಗ್ಗತಾ ಹಿ ಸಿವಯೋ, ಬಲಗ್ಗಾ ನೇಗಮಾ ಚ ಯೇ;
ತೇ ವಿಧಂಸೇತುಮಿಚ್ಛನ್ತಿ, ರಾಜಾನಂ ಮಮ ಕಾರಣಾ’’.
‘‘ಸಚೇ ¶ ಏಸಾ ಪವತ್ತೇತ್ಥ, ರಟ್ಠಸ್ಮಿಂ ರಟ್ಠವಡ್ಢನ;
ಇಧೇವ ರಜ್ಜಂ ಕಾರೇಹಿ, ಚೇತೇಹಿ ಪರಿವಾರಿತೋ.
‘‘ಇದ್ಧಂ ಫೀತಞ್ಚಿದಂ ರಟ್ಠಂ, ಇದ್ಧೋ ಜನಪದೋ ಮಹಾ;
ಮತಿಂ ಕರೋಹಿ ತ್ವಂ ದೇವ, ರಜ್ಜಸ್ಸ ಮನುಸಾಸಿತುಂ’’.
‘‘ನ ಮೇ ಛನ್ದೋ ಮತಿ ಅತ್ಥಿ, ರಜ್ಜಸ್ಸ ಅನುಸಾಸಿತುಂ;
ಪಬ್ಬಾಜಿತಸ್ಸ ರಟ್ಠಸ್ಮಾ, ಚೇತಪುತ್ತಾ ಸುಣಾಥ ಮೇ.
‘‘ಅತುಟ್ಠಾ ಸಿವಯೋ ಆಸುಂ, ಬಲಗ್ಗಾ ನೇಗಮಾ ಚ ಯೇ;
ಪಬ್ಬಾಜಿತಸ್ಸ ರಟ್ಠಸ್ಮಾ, ಚೇತಾ ರಜ್ಜೇಭಿಸೇಚಯುಂ.
‘‘ಅಸಮ್ಮೋದಿಯಮ್ಪಿ ¶ ವೋ ಅಸ್ಸ, ಅಚ್ಚನ್ತಂ ಮಮ ಕಾರಣಾ;
ಸಿವೀಹಿ ಭಣ್ಡನಞ್ಚಾಪಿ, ವಿಗ್ಗಹೋ ಮೇ ನ ರುಚ್ಚತಿ.
‘‘ಅಥಸ್ಸ ಭಣ್ಡನಂ ಘೋರಂ, ಸಮ್ಪಹಾರೋ ಅನಪ್ಪಕೋ;
ಏಕಸ್ಸ ಕಾರಣಾ ಮಯ್ಹಂ, ಹಿಂಸೇಯ್ಯ ಬಹುಕೋ ಜನೋ.
‘‘ಪಟಿಗ್ಗಹಿತಂ ಯಂ ದಿನ್ನಂ, ಸಬ್ಬಸ್ಸ ಅಗ್ಘಿಯಂ ಕತಂ;
ಅವರುದ್ಧಸಿ ಮಂ ರಾಜಾ, ವಙ್ಕಂ ಗಚ್ಛಾಮಿ ಪಬ್ಬತಂ;
ಓಕಾಸಂ ಸಮ್ಮಾ ಜಾನಾಥ, ವನೇ ಯತ್ಥ ವಸಾಮಸೇ’’.
‘‘ತಗ್ಘ ತೇ ಮಯಮಕ್ಖಾಮ, ಯಥಾಪಿ ಕುಸಲಾ ತಥಾ;
ರಾಜಿಸೀ ಯತ್ಥ ಸಮ್ಮನ್ತಿ, ಆಹುತಗ್ಗೀ ಸಮಾಹಿತಾ.
‘‘ಏಸ ಸೇಲೋ ಮಹಾರಾಜ, ಪಬ್ಬತೋ ಗನ್ಧಮಾದನೋ;
ಯತ್ಥ ತ್ವಂ ಸಹ ಪುತ್ತೇಹಿ, ಸಹ ಭರಿಯಾಯ ಚಚ್ಛಸಿ.
‘‘ತಂ ಚೇತಾ ಅನುಸಾಸಿಂಸು, ಅಸ್ಸುನೇತ್ತಾ ರುದಂಮುಖಾ;
ಇತೋ ಗಚ್ಛ ಮಹಾರಾಜ, ಉಜುಂ ಯೇನುತ್ತರಾ ಮುಖೋ.
‘‘ಅಥ ದಕ್ಖಿಸಿ ಭದ್ದನ್ತೇ, ವೇಪುಲ್ಲಂ ನಾಮ ಪಬ್ಬತಂ;
ನಾನಾದುಮಗಣಾಕಿಣ್ಣಂ, ಸೀತಚ್ಛಾಯಂ ಮನೋರಮಂ.
‘‘ತಮತಿಕ್ಕಮ್ಮ ¶ ಭದ್ದನ್ತೇ, ಅಥ ದಕ್ಖಿಸಿ ಆಪಗಂ;
ನದಿಂ ಕೇತುಮತಿಂ ನಾಮ, ಗಮ್ಭೀರಂ ಗಿರಿಗಬ್ಭರಂ.
‘‘ಪುಥುಲೋಮಮಚ್ಛಾಕಿಣ್ಣಂ, ಸುಪತಿತ್ಥಂ ಮಹೋದಕಂ;
ತತ್ಥ ನ್ಹತ್ವಾ ಪಿವಿತ್ವಾ ಚ, ಅಸ್ಸಾಸೇತ್ವಾ ಸಪುತ್ತಕೇ.
‘‘ಅಥ ¶ ದಕ್ಖಿಸಿ ಭದ್ದನ್ತೇ, ನಿಗ್ರೋಧಂ ಮಧುಪಿಪ್ಫಲಂ;
ರಮ್ಮಕೇ ¶ ಸಿಖರೇ ಜಾತಂ, ಸೀತಚ್ಛಾಯಂ ಮನೋರಮಂ.
‘‘ಅಥ ದಕ್ಖಿಸಿ ಭದ್ದನ್ತೇ, ನಾಳಿಕಂ ನಾಮ ಪಬ್ಬತಂ;
ನಾನಾದಿಜಗಣಾಕಿಣ್ಣಂ, ಸೇಲಂ ಕಿಮ್ಪುರಿಸಾಯುತಂ.
‘‘ತಸ್ಸ ಉತ್ತರಪುಬ್ಬೇನ, ಮುಚಲಿನ್ದೋ ನಾಮ ಸೋ ಸರೋ;
ಪುಣ್ಡರೀಕೇಹಿ ಸಞ್ಛನ್ನೋ, ಸೇತಸೋಗನ್ಧಿಕೇಹಿ ಚ.
‘‘ಸೋ ವನಂ ಮೇಘಸಙ್ಕಾಸಂ, ಧುವಂ ಹರಿತಸದ್ದಲಂ;
ಸೀಹೋವಾಮಿಸಪೇಕ್ಖೀವ ವನಸಣ್ಡಂ ವಿಗಾಹಯ;
ಪುಪ್ಫರುಕ್ಖೇಹಿ ಸಞ್ಛನ್ನಂ, ಫಲರುಕ್ಖೇಹಿ ಚೂಭಯಂ.
‘‘ತತ್ಥ ಬಿನ್ದುಸ್ಸರಾ ವಗ್ಗೂ, ನಾನಾವಣ್ಣಾ ಬಹೂ ದಿಜಾ;
ಕೂಜನ್ತಮುಪಕೂಜನ್ತಿ, ಉತುಸಂಪುಪ್ಫಿತೇ ದುಮೇ.
‘‘ಗನ್ತ್ವಾ ಗಿರಿವಿದುಗ್ಗಾನಂ, ನದೀನಂ ಪಭವಾನಿ ಚ;
ಸೋ ಅದ್ದಸ [ದಕ್ಖಸಿ (ಸೀ. ಪೀ.)] ಪೋಕ್ಖರಣಿಂ, ಕರಞ್ಜಕಕುಧಾಯುತಂ.
‘‘ಪುಥುಲೋಮಮಚ್ಛಾಕಿಣ್ಣಂ, ಸುಪತಿತ್ಥಂ ಮಹೋದಕಂ;
ಸಮಞ್ಚ ಚತುರಂಸಞ್ಚ, ಸಾದುಂ ಅಪ್ಪಟಿಗನ್ಧಿಯಂ.
‘‘ತಸ್ಸಾ ಉತ್ತರಪುಬ್ಬೇನ, ಪಣ್ಣಸಾಲಂ ಅಮಾಪಯ;
ಪಣ್ಣಸಾಲಂ ಅಮಾಪೇತ್ವಾ, ಉಞ್ಛಾಚರಿಯಾಯ ಈಹಥ’’.
ವನಪವೇಸನಂ ನಾಮ.
ಜೂಜಕಪಬ್ಬಂ
‘‘ಅಹು ವಾಸೀ ಕಲಿಙ್ಗೇಸು, ಜೂಜಕೋ ನಾಮ ಬ್ರಾಹ್ಮಣೋ;
ತಸ್ಸಾಸಿ ದಹರಾ ಭರಿಯಾ, ನಾಮೇನಾಮಿತ್ತತಾಪನಾ.
‘‘ತಾ ನಂ ತತ್ಥ ಗತಾವೋಚುಂ, ನದಿಂ ಉದಕಹಾರಿಯಾ;
ಥಿಯೋ ¶ ನಂ ಪರಿಭಾಸಿಂಸು, ಸಮಾಗನ್ತ್ವಾ ಕುತೂಹಲಾ.
‘‘ಅಮಿತ್ತಾ ¶ ನೂನ ತೇ ಮಾತಾ, ಅಮಿತ್ತೋ ನೂನ ತೇ ಪಿತಾ;
ಯೇ ತಂ ಜಿಣ್ಣಸ್ಸ ಪಾದಂಸು, ಏವಂ ದಹರಿಯಂ ಸತಿಂ.
‘‘ಅಹಿತಂ ¶ ವತ ತೇ ಞಾತೀ, ಮನ್ತಯಿಂಸು ರಹೋಗತಾ;
ಯೇ ತಂ ಜಿಣ್ಣಸ್ಸ ಪಾದಂಸು, ಏವಂ ದಹರಿಯಂ ಸತಿಂ.
‘‘ಅಮಿತ್ತಾ ವತ ತೇ ಞಾತೀ, ಮನ್ತಯಿಂಸು ರಹೋಗತಾ;
ಯೇ ತಂ ಜಿಣ್ಣಸ್ಸ ಪಾದಂಸು, ಏವಂ ದಹರಿಯಂ ಸತಿಂ.
‘‘ದುಕ್ಕಟಂ ವತ ತೇ ಞಾತೀ, ಮನ್ತಯಿಂಸು ರಹೋಗತಾ;
ಯೇ ತಂ ಜಿಣ್ಣಸ್ಸ ಪಾದಂಸು, ಏವಂ ದಹರಿಯಂ ಸತಿಂ.
‘‘ಪಾಪಕಂ ವತ ತೇ ಞಾತೀ, ಮನ್ತಯಿಂಸು ರಹೋಗತಾ;
ಯೇ ತಂ ಜಿಣ್ಣಸ್ಸ ಪಾದಂಸು, ಏವಂ ದಹರಿಯಂ ಸತಿಂ.
‘‘ಅಮನಾಪಂ ವತ ತೇ ಞಾತೀ, ಮನ್ತಯಿಂಸು ರಹೋಗತಾ;
ಯೇ ತಂ ಜಿಣ್ಣಸ್ಸ ಪಾದಂಸು, ಏವಂ ದಹರಿಯಂ ಸತಿಂ.
‘‘ಅಮನಾಪವಾಸಂ ವಸಿ, ಜಿಣ್ಣೇನ ಪತಿನಾ ಸಹ [ಏವಂ ದಹರಿಯಾ ಸತೀ (ಸೀ. ಪೀ.)];
ಯಾ ತ್ವಂ ವಸಸಿ ಜಿಣ್ಣಸ್ಸ, ಮತಂ ತೇ ಜೀವಿತಾ ವರಂ.
‘‘ನ ಹಿ ನೂನ ತುಯ್ಹಂ ಕಲ್ಯಾಣಿ, ಪಿತಾ ಮಾತಾ ಚ ಸೋಭನೇ;
ಅಞ್ಞಂ ಭತ್ತಾರಂ ವಿನ್ದಿಂಸು, ಯೇ ತಂ ಜಿಣ್ಣಸ್ಸ ಪಾದಂಸು;
ಏವಂ ದಹರಿಯಂ ಸತಿಂ.
‘‘ದುಯಿಟ್ಠಂ ತೇ ನವಮಿಯಂ, ಅಕತಂ ಅಗ್ಗಿಹುತ್ತಕಂ;
ಯೇ ತಂ ಜಿಣ್ಣಸ್ಸ ಪಾದಂಸು, ಏವಂ ದಹರಿಯಂ ಸತಿಂ.
‘‘ಸಮಣೇ ಬ್ರಾಹ್ಮಣೇ ನೂನ, ಬ್ರಾಹ್ಮಣಚರಿಯಪರಾಯಣೇ;
ಸಾ ¶ ತ್ವಂ ಲೋಕೇ ಅಭಿಸಪಿ, ಸೀಲವನ್ತೇ ಬಹುಸ್ಸುತೇ;
ಯಾ ತ್ವಂ ವಸಸಿ ಜಿಣ್ಣಸ್ಸ, ಏವಂ ದಹರಿಯಾ ಸತೀ.
‘‘ನ ದುಕ್ಖಂ ಅಹಿನಾ ದಟ್ಠಂ, ನ ದುಕ್ಖಂ ಸತ್ತಿಯಾ ಹತಂ;
ತಞ್ಚ ದುಕ್ಖಞ್ಚ ತಿಬ್ಬಞ್ಚ, ಯಂ ಪಸ್ಸೇ ಜಿಣ್ಣಕಂ ಪತಿಂ.
‘‘ನತ್ಥಿ ಖಿಡ್ಡಾ ನತ್ಥಿ ರತಿ, ಜಿಣ್ಣೇನ ಪತಿನಾ ಸಹ;
ನತ್ಥಿ ಅಲ್ಲಾಪಸಲ್ಲಾಪೋ, ಜಗ್ಘಿತುಮ್ಪಿ [ಜಗ್ಘಿತಮ್ಪಿ (ಸೀ. ಪೀ.)] ನ ಸೋಭತಿ.
‘‘ಯದಾ ಚ ದಹರೋ ದಹರಾ, ಮನ್ತಯನ್ತಿ [ಮನ್ತಯಿಂಸು (ಸ್ಯಾ. ಕ.)] ರಹೋಗತಾ;
ಸಬ್ಬೇಸಂ ಸೋಕಾ ನಸ್ಸನ್ತಿ, ಯೇ ಕೇಚಿ ಹದಯಸ್ಸಿತಾ.
‘‘ದಹರಾ ¶ ತ್ವಂ ರೂಪವತೀ, ಪುರಿಸಾನಂಭಿಪತ್ಥಿತಾ;
ಗಚ್ಛ ಞಾತಿಕುಲೇ ಅಚ್ಛ, ಕಿಂ ಜಿಣ್ಣೋ ರಮಯಿಸ್ಸತಿ’’.
‘‘ನ ¶ ತೇ ಬ್ರಾಹ್ಮಣ ಗಚ್ಛಾಮಿ, ನದಿಂ ಉದಕಹಾರಿಯಾ;
ಥಿಯೋ ಮಂ ಪರಿಭಾಸನ್ತಿ, ತಯಾ ಜಿಣ್ಣೇನ ಬ್ರಾಹ್ಮಣ’’.
‘‘ಮಾ ಮೇ ತ್ವಂ ಅಕರಾ ಕಮ್ಮಂ, ಮಾ ಮೇ ಉದಕಮಾಹರಿ;
ಅಹಂ ಉದಕಮಾಹಿಸ್ಸಂ, ಮಾ ಭೋತಿ ಕುಪಿತಾ ಅಹು’’.
‘‘ನಾಹಂ ತಮ್ಹಿ ಕುಲೇ ಜಾತಾ, ಯಂ ತ್ವಂ ಉದಕಮಾಹರೇ;
ಏವಂ ಬ್ರಾಹ್ಮಣ ಜಾನಾಹಿ, ನ ತೇ ವಚ್ಛಾಮಹಂ ಘರೇ.
‘‘ಸಚೇ ಮೇ ದಾಸಂ ದಾಸಿಂ ವಾ, ನಾನಯಿಸ್ಸಸಿ ಬ್ರಾಹ್ಮಣ;
ಏವಂ ಬ್ರಾಹ್ಮಣ ಜಾನಾಹಿ, ನ ತೇ ವಚ್ಛಾಮಿ ಸನ್ತಿಕೇ’’.
‘‘ನತ್ಥಿ ಮೇ ಸಿಪ್ಪಠಾನಂ ವಾ, ಧನಂ ಧಞ್ಞಞ್ಚ ಬ್ರಾಹ್ಮಣಿ;
ಕುತೋಹಂ ¶ ದಾಸಂ ದಾಸಿಂ ವಾ, ಆನಯಿಸ್ಸಾಮಿ ಭೋತಿಯಾ;
ಅಹಂ ಭೋತಿಂ ಉಪಟ್ಠಿಸ್ಸಂ, ಮಾ ಭೋತಿ ಕುಪಿತಾ ಅಹು’’.
‘‘ಏಹಿ ತೇ ಅಹಮಕ್ಖಿಸ್ಸಂ, ಯಥಾ ಮೇ ವಚನಂ ಸುತಂ;
ಏಸ ವೇಸ್ಸನ್ತರೋ ರಾಜಾ, ವಙ್ಕೇ ವಸತಿ ಪಬ್ಬತೇ.
‘‘ತಂ ತ್ವಂ ಗನ್ತ್ವಾನ ಯಾಚಸ್ಸು, ದಾಸಂ ದಾಸಿಞ್ಚ ಬ್ರಾಹ್ಮಣ;
ಸೋ ತೇ ದಸ್ಸತಿ ಯಾಚಿತೋ, ದಾಸಂ ದಾಸಿಞ್ಚ ಖತ್ತಿಯೋ’’.
‘‘ಜಿಣ್ಣೋಹಮಸ್ಮಿ ದುಬ್ಬಲೋ [ಅಬಲೋ (ಸೀ. ಪೀ. ಕ.)], ದೀಘೋ ಚದ್ಧಾ ಸುದುಗ್ಗಮೋ;
ಮಾ ಭೋತಿ ಪಟಿದೇವೇಸಿ, ಮಾ ಚ ತ್ವಂ [ಮಾ ಭೋತಿ (ಸ್ಯಾ. ಕ.)] ವಿಮನಾ ಅಹು;
ಅಹಂ ಭೋತಿಂ ಉಪಟ್ಠಿಸ್ಸಂ, ಮಾ ಭೋತಿ ಕುಪಿತಾ ಅಹು’’.
‘‘ಯಥಾ ಅಗನ್ತ್ವಾ ಸಙ್ಗಾಮಂ, ಅಯುದ್ಧೋವ ಪರಾಜಿತೋ;
ಏವಮೇವ ತುವಂ ಬ್ರಹ್ಮೇ, ಅಗನ್ತ್ವಾವ ಪರಾಜಿತೋ.
‘‘ಸಚೇ ಮೇ ದಾಸಂ ದಾಸಿಂ ವಾ, ನಾನಯಿಸ್ಸಸಿ ಬ್ರಾಹ್ಮಣ;
ಏವಂ ಬ್ರಾಹ್ಮಣ ಜಾನಾಹಿ, ನ ತೇ ವಚ್ಛಾಮಹಂ ಘರೇ;
ಅಮನಾಪಂ ತೇ ಕರಿಸ್ಸಾಮಿ, ತಂ ತೇ ದುಕ್ಖಂ ಭವಿಸ್ಸತಿ.
‘‘ನಕ್ಖತ್ತೇ ಉತುಪುಬ್ಬೇಸು, ಯದಾ ಮಂ ದಕ್ಖಿಸಿಲಙ್ಕತಂ;
ಅಞ್ಞೇಹಿ ಸದ್ಧಿಂ ರಮಮಾನಂ, ತಂ ತೇ ದುಕ್ಖಂ ಭವಿಸ್ಸತಿ.
‘‘ಅದಸ್ಸನೇನ ¶ ಮಯ್ಹಂ ತೇ, ಜಿಣ್ಣಸ್ಸ ಪರಿದೇವತೋ;
ಭಿಯ್ಯೋ ವಙ್ಕಾ ಚ ಪಲಿತಾ, ಬಹೂ ಹೇಸ್ಸನ್ತಿ ಬ್ರಾಹ್ಮಣ’’.
‘‘ತತೋ ಸೋ ಬ್ರಾಹ್ಮಣೋ ಭೀತೋ, ಬ್ರಾಹ್ಮಣಿಯಾ ವಸಾನುಗೋ;
ಅಟ್ಟಿತೋ ಕಾಮರಾಗೇನ, ಬ್ರಾಹ್ಮಣಿಂ ಏತದಬ್ರವಿ’’.
‘‘ಪಾಥೇಯ್ಯಂ ¶ ¶ ಮೇ ಕರೋಹಿ ತ್ವಂ, ಸಂಕುಲ್ಯಾ ಸಗುಳಾನಿ ಚ [ಸಙ್ಕುಲಾ ಸಙ್ಗುಳಾನಿ ಚ (ಸ್ಯಾ.), ಅಙ್ಗುಳಾ ಸಕಲಾನಿ ಚ (ಕ.)];
ಮಧುಪಿಣ್ಡಿಕಾ ಚ ಸುಕತಾಯೋ, ಸತ್ತುಭತ್ತಞ್ಚ ಬ್ರಾಹ್ಮಣಿ.
‘‘ಆನಯಿಸ್ಸಂ ಮೇಥುನಕೇ, ಉಭೋ ದಾಸಕುಮಾರಕೇ;
ತೇ ತಂ ಪರಿಚರಿಸ್ಸನ್ತಿ, ರತ್ತಿನ್ದಿವಮತನ್ದಿತಾ’’.
‘‘ಇದಂ ವತ್ವಾ ಬ್ರಹ್ಮಬನ್ಧು, ಪಟಿಮುಞ್ಚಿ ಉಪಾಹನಾ;
ತತೋ ಸೋ ಮನ್ತಯಿತ್ವಾನ, ಭರಿಯಂ ಕತ್ವಾ ಪದಕ್ಖಿಣಂ.
‘‘ಪಕ್ಕಾಮಿ ಸೋ ರುಣ್ಣಮುಖೋ, ಬ್ರಾಹ್ಮಣೋ ಸಹಿತಬ್ಬತೋ;
ಸಿವೀನಂ ನಗರಂ ಫೀತಂ, ದಾಸಪರಿಯೇಸನಂ ಚರಂ’’.
‘‘ಸೋ ತತ್ಥ ಗನ್ತ್ವಾ ಅವಚ [ಅವಚಾಸಿ (ಸ್ಯಾ. ಕ.)], ಯೇ ತತ್ಥಾಸುಂ ಸಮಾಗತಾ;
ಕುಹಿಂ ವೇಸ್ಸನ್ತರೋ ರಾಜಾ, ಕತ್ಥ ಪಸ್ಸೇಮು ಖತ್ತಿಯಂ’’.
‘‘ತೇ ಜನಾ ತಂ ಅವಚಿಂಸು, ಯೇ ತತ್ಥಾಸುಂ ಸಮಾಗತಾ;
ತುಮ್ಹೇಹಿ ಬ್ರಹ್ಮೇ ಪಕತೋ, ಅತಿದಾನೇನ ಖತ್ತಿಯೋ;
ಪಬ್ಬಾಜಿತೋ ಸಕಾ ರಟ್ಠಾ, ವಙ್ಕೇ ವಸತಿ ಪಬ್ಬತೇ.
‘‘ತುಮ್ಹೇಹಿ ಬ್ರಹ್ಮೇ ಪಕತೋ, ಅತಿದಾನೇನ ಖತ್ತಿಯೋ;
ಆದಾಯ ಪುತ್ತದಾರಞ್ಚ, ವಙ್ಕೇ ವಸತಿ ಪಬ್ಬತೇ’’.
‘‘ಸೋ ಚೋದಿತೋ ಬ್ರಾಹ್ಮಣಿಯಾ, ಬ್ರಾಹ್ಮಣೋ ಕಾಮಗಿದ್ಧಿಮಾ;
ಅಘಂ ತಂ ಪಟಿಸೇವಿತ್ಥ, ವನೇ ವಾಳಮಿಗಾಕಿಣ್ಣೇ;
ಖಗ್ಗದೀಪಿನಿಸೇವಿತೇ.
‘‘ಆದಾಯ ಬೇಳುವಂ ದಣ್ಡಂ, ಅಗ್ಗಿಹುತ್ತಂ ಕಮಣ್ಡಲುಂ;
ಸೋ ಪಾವಿಸಿ ಬ್ರಹಾರಞ್ಞಂ, ಯತ್ಥ ಅಸ್ಸೋಸಿ ಕಾಮದಂ.
‘‘ತಂ ¶ ಪವಿಟ್ಠಂ ಬ್ರಹಾರಞ್ಞಂ, ಕೋಕಾ ನಂ ಪರಿವಾರಯುಂ;
ವಿಕ್ಕನ್ದಿ ಸೋ ವಿಪ್ಪನಟ್ಠೋ, ದೂರೇ ಪನ್ಥಾ ಅಪಕ್ಕಮಿ.
‘‘ತತೋ ¶ ಸೋ ಬ್ರಾಹ್ಮಣೋ ಗನ್ತ್ವಾ, ಭೋಗಲುದ್ಧೋ ಅಸಞ್ಞತೋ;
ವಙ್ಕಸ್ಸೋರೋಹಣೇ ನಟ್ಠೇ, ಇಮಾ ಗಾಥಾ ಅಭಾಸಥ’’.
‘‘ಕೋ ರಾಜಪುತ್ತಂ ನಿಸಭಂ, ಜಯನ್ತಮಪರಾಜಿತಂ;
ಭಯೇ ಖೇಮಸ್ಸ ದಾತಾರಂ, ಕೋ ಮೇ ವೇಸ್ಸನ್ತರಂ ವಿದೂ.
‘‘ಯೋ ಯಾಚತಂ ಪತಿಟ್ಠಾಸಿ, ಭೂತಾನಂ ಧರಣೀರಿವ;
ಧರಣೂಪಮಂ ಮಹಾರಾಜಂ, ಕೋ ಮೇ ವೇಸ್ಸನ್ತರಂ ವಿದೂ.
‘‘ಯೋ ಯಾಚತಂ ಗತೀ ಆಸಿ, ಸವನ್ತೀನಂವ ಸಾಗರೋ;
ಸಾಗರೂಪಮಂ [ಉದಧೂಪಮಂ (ಸೀ. ಸ್ಯಾ. ಪೀ.), ತಥೂಪಮಂ (ಕ.)] ಮಹಾರಾಜಂ, ಕೋ ಮೇ ವೇಸ್ಸನ್ತರಂ ವಿದೂ.
‘‘ಕಲ್ಯಾಣತಿತ್ಥಂ ¶ ಸುಚಿಮಂ, ಸೀತೂದಕಂ ಮನೋರಮಂ;
ಪುಣ್ಡರೀಕೇಹಿ ಸಞ್ಛನ್ನಂ, ಯುತ್ತಂ ಕಿಞ್ಜಕ್ಖರೇಣುನಾ;
ರಹದೂಪಮಂ [ಸರೂಪಮಂ (ಕ.)] ಮಹಾರಾಜಂ, ಕೋ ಮೇ ವೇಸ್ಸನ್ತರಂ ವಿದೂ.
‘‘ಅಸ್ಸತ್ಥಂವ ಪಥೇ ಜಾತಂ, ಸೀತಚ್ಛಾಯಂ ಮನೋರಮಂ;
ಸನ್ತಾನಂ ವಿಸಮೇತಾರಂ, ಕಿಲನ್ತಾನಂ ಪಟಿಗ್ಗಹಂ;
ತಥೂಪಮಂ ಮಹಾರಾಜಂ, ಕೋ ಮೇ ವೇಸ್ಸನ್ತರಂ ವಿದೂ.
‘‘ನಿಗ್ರೋಧಂವ ಪಥೇ ಜಾತಂ, ಸೀತಚ್ಛಾಯಂ ಮನೋರಮಂ;
ಸನ್ತಾನಂ ವಿಸಮೇತಾರಂ, ಕಿಲನ್ತಾನಂ ಪಟಿಗ್ಗಹಂ;
ತಥೂಪಮಂ ಮಹಾರಾಜಂ, ಕೋ ಮೇ ವೇಸ್ಸನ್ತರಂ ವಿದೂ.
‘‘ಅಮ್ಬಂ ಇವ ಪಥೇ ಜಾತಂ, ಸೀತಚ್ಛಾಯಂ ಮನೋರಮಂ;
ಸನ್ತಾನಂ ¶ ವಿಸಮೇತಾರಂ, ಕಿಲನ್ತಾನಂ ಪಟಿಗ್ಗಹಂ;
ತಥೂಪಮಂ ಮಹಾರಾಜಂ, ಕೋ ಮೇ ವೇಸ್ಸನ್ತರಂ ವಿದೂ.
‘‘ಸಾಲಂ ಇವ ಪಥೇ ಜಾತಂ, ಸೀತಚ್ಛಾಯಂ ಮನೋರಮಂ;
ಸನ್ತಾನಂ ವಿಸಮೇತಾರಂ, ಕಿಲನ್ತಾನಂ ಪಟಿಗ್ಗಹಂ;
ತಥೂಪಮಂ ಮಹಾರಾಜಂ, ಕೋ ಮೇ ವೇಸ್ಸನ್ತರಂ ವಿದೂ.
‘‘ದುಮಂ ಇವ ಪಥೇ ಜಾತಂ, ಸೀತಚ್ಛಾಯಂ ಮನೋರಮಂ;
ಸನ್ತಾನಂ ವಿಸಮೇತಾರಂ, ಕಿಲನ್ತಾನಂ ಪಟಿಗ್ಗಹಂ;
ತಥೂಪಮಂ ಮಹಾರಾಜಂ, ಕೋ ಮೇ ವೇಸ್ಸನ್ತರಂ ವಿದೂ.
‘‘ಏವಞ್ಚ ¶ ಮೇ ವಿಲಪತೋ, ಪವಿಟ್ಠಸ್ಸ ಬ್ರಹಾವನೇ;
ಅಹಂ ಜಾನನ್ತಿ ಯೋ ವಜ್ಜಾ, ನನ್ದಿಂ ಸೋ ಜನಯೇ ಮಮ.
‘‘ಏವಞ್ಚ ಮೇ ವಿಲಪತೋ, ಪವಿಟ್ಠಸ್ಸ ಬ್ರಹಾವನೇ;
ಅಹಂ ಜಾನನ್ತಿ ಯೋ ವಜ್ಜಾ, ತಾಯ ಸೋ ಏಕವಾಚಾಯ;
ಪಸವೇ ಪುಞ್ಞಂ ಅನಪ್ಪಕಂ’’.
‘‘ತಸ್ಸ ಚೇತೋ ಪಟಿಸ್ಸೋಸಿ, ಅರಞ್ಞೇ ಲುದ್ದಕೋ ಚರಂ;
ತುಮ್ಹೇಹಿ ಬ್ರಹ್ಮೇ ಪಕತೋ, ಅತಿದಾನೇನ ಖತ್ತಿಯೋ;
ಪಬ್ಬಾಜಿತೋ ಸಕಾ ರಟ್ಠಾ, ವಙ್ಕೇ ವಸತಿ ಪಬ್ಬತೇ.
‘‘ತುಮ್ಹೇಹಿ ಬ್ರಹ್ಮೇ ಪಕತೋ, ಅತಿದಾನೇನ ಖತ್ತಿಯೋ;
ಆದಾಯ ¶ ಪುತ್ತದಾರಞ್ಚ, ವಙ್ಕೇ ವಸತಿ ಪಬ್ಬತೇ.
‘‘ಅಕಿಚ್ಚಕಾರೀ ದುಮ್ಮೇಧೋ, ರಟ್ಠಾ ಪವನಮಾಗತೋ;
ರಾಜಪುತ್ತಂ ಗವೇಸನ್ತೋ, ಬಕೋ ಮಚ್ಛಮಿವೋದಕೇ.
‘‘ತಸ್ಸ ¶ ತ್ಯಾಹಂ ನ ದಸ್ಸಾಮಿ, ಜೀವಿತಂ ಇಧ ಬ್ರಾಹ್ಮಣ;
ಅಯಞ್ಹಿ ತೇ ಮಯಾ ನುನ್ನೋ [ಮಯಾ’ರುಳ್ಹೋ (ಕ.)], ಸರೋ ಪಿಸ್ಸತಿ ಲೋಹಿತಂ.
‘‘ಸಿರೋ ತೇ ವಜ್ಝಯಿತ್ವಾನ, ಹದಯಂ ಛೇತ್ವಾ ಸಬನ್ಧನಂ;
ಪನ್ಥಸಕುಣಂ [ಬನ್ಧಸಕುಣಂ (ಕ.)] ಯಜಿಸ್ಸಾಮಿ, ತುಯ್ಹಂ ಮಂಸೇನ ಬ್ರಾಹ್ಮಣ.
‘‘ತುಯ್ಹಂ ಮಂಸೇನ ಮೇದೇನ, ಮತ್ಥಕೇನ ಚ ಬ್ರಾಹ್ಮಣ;
ಆಹುತಿಂ ಪಗ್ಗಹೇಸ್ಸಾಮಿ, ಛೇತ್ವಾನ ಹದಯಂ ತವ.
‘‘ತಂ ಮೇ ಸುಯಿಟ್ಠಂ ಸುಹುತಂ, ತುಯ್ಹಂ ಮಂಸೇನ ಬ್ರಾಹ್ಮಣ;
ನ ಚ ತ್ವಂ ರಾಜಪುತ್ತಸ್ಸ, ಭರಿಯಂ ಪುತ್ತೇ ಚ ನೇಸ್ಸಸಿ’’.
‘‘ಅವಜ್ಝೋ ಬ್ರಾಹ್ಮಣೋ ದೂತೋ, ಚೇತಪುತ್ತ ಸುಣೋಹಿ ಮೇ;
ತಸ್ಮಾ ಹಿ ದೂತಂ ನ ಹನ್ತಿ, ಏಸ ಧಮ್ಮೋ ಸನನ್ತನೋ.
‘‘ನಿಜ್ಝತ್ತಾ ಸಿವಯೋ ಸಬ್ಬೇ, ಪಿತಾ ನಂ ದಟ್ಠುಮಿಚ್ಛತಿ;
ಮಾತಾ ಚ ದುಬ್ಬಲಾ ತಸ್ಸ, ಅಚಿರಾ ಚಕ್ಖೂನಿ ಜೀಯರೇ.
‘‘ತೇಸಾಹಂ ಪಹಿತೋ ದೂತೋ, ಚೇತಪುತ್ತ ಸುಣೋಹಿ ಮೇ;
ರಾಜಪುತ್ತಂ ನಯಿಸ್ಸಾಮಿ, ಯದಿ ಜಾನಾಸಿ ಸಂಸ ಮೇ.
‘‘ಪಿಯಸ್ಸ ಮೇ ಪಿಯೋ ದೂತೋ, ಪುಣ್ಣಪತ್ತಂ ದದಾಮಿ ತೇ’’;
‘‘ಇಮಞ್ಚ ¶ ಮಧುನೋ ತುಮ್ಬಂ, ಮಿಗಸತ್ಥಿಞ್ಚ ಬ್ರಾಹ್ಮಣ;
ತಞ್ಚ ¶ ತೇ ದೇಸಮಕ್ಖಿಸ್ಸಂ, ಯತ್ಥ ಸಮ್ಮತಿ ಕಾಮದೋ’’.
ಜೂಜಕಪಬ್ಬಂ ನಾಮ.
ಚೂಳವನವಣ್ಣನಾ
‘‘ಏಸ ಸೇಲೋ ಮಹಾಬ್ರಹ್ಮೇ, ಪಬ್ಬತೋ ಗನ್ಧಮಾದನೋ;
ಯತ್ಥ ವೇಸ್ಸನ್ತರೋ ರಾಜಾ, ಸಹ ಪುತ್ತೇಹಿ ಸಮ್ಮತಿ.
‘‘ಧಾರೇನ್ತೋ ಬ್ರಾಹ್ಮಣವಣ್ಣಂ, ಆಸದಞ್ಚ [ಆಸಟಞ್ಚ (ಕ.)] ಮಸಂ ಜಟಂ;
ಚಮ್ಮವಾಸೀ ಛಮಾ ಸೇತಿ, ಜಾತವೇದಂ ನಮಸ್ಸತಿ.
‘‘ಏತೇ ನೀಲಾ ಪದಿಸ್ಸನ್ತಿ, ನಾನಾಫಲಧರಾ ದುಮಾ;
ಉಗ್ಗತಾ ಅಬ್ಭಕೂಟಾವ, ನೀಲಾ ಅಞ್ಜನಪಬ್ಬತಾ.
‘‘ಧವಸ್ಸಕಣ್ಣಾ ಖದಿರಾ, ಸಾಲಾ ಫನ್ದನಮಾಲುವಾ;
ಸಮ್ಪವೇಧನ್ತಿ ವಾತೇನ, ಸಕಿಂ ಪೀತಾವ ಮಾಣವಾ.
‘‘ಉಪರಿ ¶ ದುಮಪರಿಯಾಯೇಸು, ಸಙ್ಗೀತಿಯೋವ ಸುಯ್ಯರೇ;
ನಜ್ಜುಹಾ ಕೋಕಿಲಸಙ್ಘಾ [ಕೋಕಿಲಾ ಸಿಙ್ಘಾ (ಕ.)], ಸಮ್ಪತನ್ತಿ ದುಮಾ ದುಮಂ.
‘‘ಅವ್ಹಯನ್ತೇವ ಗಚ್ಛನ್ತಂ, ಸಾಖಾಪತ್ತಸಮೀರಿತಾ;
ರಮಯನ್ತೇವ ಆಗನ್ತಂ, ಮೋದಯನ್ತಿ ನಿವಾಸಿನಂ;
ಯತ್ಥ ವೇಸ್ಸನ್ತರೋ ರಾಜಾ, ಸಹ ಪುತ್ತೇಹಿ ಸಮ್ಮತಿ.
‘‘ಧಾರೇನ್ತೋ ಬ್ರಾಹ್ಮಣವಣ್ಣಂ, ಆಸದಞ್ಚ ಮಸಂ ಜಟಂ;
ಚಮ್ಮವಾಸೀ ಛಮಾ ಸೇತಿ, ಜಾತವೇದಂ ನಮಸ್ಸತಿ.
‘‘ಅಮ್ಬಾ ಕಪಿತ್ಥಾ ಪನಸಾ, ಸಾಲಾ ಜಮ್ಬೂ ವಿಭೀತಕಾ;
ಹರೀತಕೀ ಆಮಲಕಾ, ಅಸ್ಸತ್ಥಾ ಬದರಾನಿ ಚ.
‘‘ಚಾರುತಿಮ್ಬರುಕ್ಖಾ ¶ ಚೇತ್ಥ, ನಿಗ್ರೋಧಾ ಚ ಕಪಿತ್ಥನಾ;
ಮಧುಮಧುಕಾ ಥೇವನ್ತಿ, ನೀಚೇ ಪಕ್ಕಾ ಚುದುಮ್ಬರಾ.
‘‘ಪಾರೇವತಾ ಭವೇಯ್ಯಾ ಚ, ಮುದ್ದಿಕಾ ಚ ಮಧುತ್ಥಿಕಾ;
ಮಧುಂ ಅನೇಲಕಂ ತತ್ಥ, ಸಕಮಾದಾಯ ಭುಞ್ಜರೇ.
‘‘ಅಞ್ಞೇತ್ಥ ¶ ಪುಪ್ಫಿತಾ ಅಮ್ಬಾ, ಅಞ್ಞೇ ತಿಟ್ಠನ್ತಿ ದೋವಿಲಾ;
ಅಞ್ಞೇ ಆಮಾ ಚ ಪಕ್ಕಾ ಚ, ಭೇಕವಣ್ಣಾ ತದೂಭಯಂ.
‘‘ಅಥೇತ್ಥ ಹೇಟ್ಠಾ ಪುರಿಸೋ, ಅಮ್ಬಪಕ್ಕಾನಿ ಗಣ್ಹತಿ;
ಆಮಾನಿ ಚೇವ ಪಕ್ಕಾನಿ, ವಣ್ಣಗನ್ಧರಸುತ್ತಮೇ.
‘‘ಅತೇವ ಮೇ ಅಚ್ಛರಿಯಂ, ಹಿಙ್ಕಾರೋ ಪಟಿಭಾತಿ ಮಂ;
ದೇವಾನಮಿವ ಆವಾಸೋ, ಸೋಭತಿ ನನ್ದನೂಪಮೋ.
‘‘ವಿಭೇದಿಕಾ ನಾಳಿಕೇರಾ, ಖಜ್ಜುರೀನಂ ಬ್ರಹಾವನೇ;
ಮಾಲಾವ ಗನ್ಥಿತಾ ಠನ್ತಿ, ಧಜಗ್ಗಾನೇವ ದಿಸ್ಸರೇ;
ನಾನಾವಣ್ಣೇಹಿ ಪುಪ್ಫೇತಿ, ನಭಂ ತಾರಾಚಿತಾಮಿವ.
‘‘ಕುಟಜೀ ಕುಟ್ಠತಗರಾ, ಪಾಟಲಿಯೋ ಚ ಪುಪ್ಫಿತಾ;
ಪುನ್ನಾಗಾ ಗಿರಿಪುನ್ನಾಗಾ, ಕೋವಿಳಾರಾ ಚ ಪುಪ್ಫಿತಾ.
‘‘ಉದ್ದಾಲಕಾ ಸೋಮರುಕ್ಖಾ, ಅಗರುಫಲ್ಲಿಯಾ [ಅಗರುಭಲ್ಲಿಯಾ (ಸೀ. ಸ್ಯಾ. ಪೀ.)] ಬಹೂ;
ಪುತ್ತಜೀವಾ [ಪುಟಜೀವಾ (ಕ.)] ಚ ಕಕುಧಾ, ಅಸನಾ ಚೇತ್ಥ ಪುಪ್ಫಿತಾ.
‘‘ಕುಟಜಾ ಸಲಳಾ ನೀಪಾ [ನಿಮ್ಬಾ (ಕ.)], ಕೋಸಮ್ಬಾ ಲಬುಜಾ ಧವಾ;
ಸಾಲಾ ಚ ಪುಪ್ಫಿತಾ ತತ್ಥ, ಪಲಾಲಖಲಸನ್ನಿಭಾ.
‘‘ತಸ್ಸಾವಿದೂರೇ ¶ ಪೋಕ್ಖರಣೀ, ಭೂಮಿಭಾಗೇ ಮನೋರಮೇ;
ಪದುಮುಪ್ಪಲಸಞ್ಛನ್ನಾ, ದೇವಾನಮಿವ ನನ್ದನೇ.
‘‘ಅಥೇತ್ಥ ¶ ಪುಪ್ಫರಸಮತ್ತಾ, ಕೋಕಿಲಾ ಮಞ್ಜುಭಾಣಿಕಾ;
ಅಭಿನಾದೇನ್ತಿ ಪವನಂ, ಉತುಸಮ್ಪುಪ್ಫಿತೇ ದುಮೇ.
‘‘ಭಸ್ಸನ್ತಿ ಮಕರನ್ದೇಹಿ, ಪೋಕ್ಖರೇ ಪೋಕ್ಖರೇ ಮಧೂ;
ಅಥೇತ್ಥ ವಾತಾ ವಾಯನ್ತಿ, ದಕ್ಖಿಣಾ ಅಥ ಪಚ್ಛಿಮಾ;
ಪದುಮಕಿಞ್ಜಕ್ಖರೇಣೂಹಿ, ಓಕಿಣ್ಣೋ ಹೋತಿ ಅಸ್ಸಮೋ.
‘‘ಥೂಲಾ ಸಿಙ್ಘಾಟಕಾ ಚೇತ್ಥ, ಸಂಸಾದಿಯಾ ಪಸಾದಿಯಾ [ಸಂಸಾರಿಯಾ ಪಸಾರಿಯಾ (ಕ.)];
ಮಚ್ಛಕಚ್ಛಪಬ್ಯಾವಿದ್ಧಾ, ಬಹೂ ಚೇತ್ಥ ಮುಪಯಾನಕಾ;
ಮಧುಂ ಭಿಸೇಹಿ ಸವತಿ, ಖಿರಸಪ್ಪಿಮುಳಾಲಿಭಿ.
‘‘ಸುರಭೀ ¶ ತಂ ವನಂ ವಾತಿ, ನಾನಾಗನ್ಧಸಮೋದಿತಂ [ನಾನಾಗನ್ಧಸಮೇರಿತಂ (ಸೀ. ಸ್ಯಾ. ಪೀ.)];
ಸಮ್ಮದ್ದತೇವ [ಸಮೋದತೇವ (ಕ.)] ಗನ್ಧೇನ, ಪುಪ್ಫಸಾಖಾಹಿ ತಂ ವನಂ;
ಭಮರಾ ಪುಪ್ಫಗನ್ಧೇನ, ಸಮನ್ತಾ ಮಭಿನಾದಿತಾ.
‘‘ಅಥೇತ್ಥ ಸಕುಣಾ ಸನ್ತಿ, ನಾನಾವಣ್ಣಾ ಬಹೂ ದಿಜಾ;
ಮೋದನ್ತಿ ಸಹ ಭರಿಯಾಹಿ, ಅಞ್ಞಮಞ್ಞಂ ಪಕೂಜಿನೋ.
‘‘ನನ್ದಿಕಾ ಜೀವಪುತ್ತಾ ಚ, ಜೀವಪುತ್ತಾ ಪಿಯಾ ಚ ನೋ;
ಪಿಯಾ ಪುತ್ತಾ ಪಿಯಾ ನನ್ದಾ, ದಿಜಾ ಪೋಕ್ಖರಣೀಘರಾ.
‘‘ಮಾಲಾವ ಗನ್ಥಿತಾ ಠನ್ತಿ, ಧಜಗ್ಗಾನೇವ ದಿಸ್ಸರೇ;
ನಾನಾವಣ್ಣೇಹಿ ಪುಪ್ಫೇಹಿ, ಕುಸಲೇಹೇವ ಸುಗನ್ಥಿತಾ [ಸುಗನ್ಥಿಕಾ (ಸೀ. ಪೀ.)];
ಯತ್ಥ ¶ ವೇಸ್ಸನ್ತರೋ ರಾಜಾ, ಸಹ ಪುತ್ತೇಹಿ ಸಮ್ಮತಿ.
‘‘ಧಾರೇನ್ತೋ ಬ್ರಾಹ್ಮಣವಣ್ಣಂ, ಆಸದಞ್ಚ ಮಸಂ ಜಟಂ;
ಚಮ್ಮವಾಸೀ ಛಮಾ ಸೇತಿ, ಜಾತವೇದಂ ನಮಸ್ಸತಿ’’.
‘‘ಇದಞ್ಚ ಮೇ ಸತ್ತುಭತ್ತಂ, ಮಧುನಾ ಪಟಿಸಂಯುತಂ;
ಮಧುಪಿಣ್ಡಿಕಾ ಚ ಸುಕತಾಯೋ, ಸತ್ತುಭತ್ತಂ ದದಾಮಿ ತೇ’’.
‘‘ತುಯ್ಹೇವ ಸಮ್ಬಲಂ ಹೋತು, ನಾಹಂ ಇಚ್ಛಾಮಿ ಸಮ್ಬಲಂ;
ಇತೋಪಿ ಬ್ರಹ್ಮೇ ಗಣ್ಹಾಹಿ, ಗಚ್ಛ ಬ್ರಹ್ಮೇ ಯಥಾಸುಖಂ.
‘‘ಅಯಂ ಏಕಪದೀ ಏತಿ, ಉಜುಂ ಗಚ್ಛತಿ ಅಸ್ಸಮಂ;
ಇಸೀಪಿ ಅಚ್ಚುತೋ ತತ್ಥ, ಪಙ್ಕದನ್ತೋ ರಜಸ್ಸಿರೋ;
ಧಾರೇನ್ತೋ ಬ್ರಾಹ್ಮಣವಣ್ಣಂ, ಆಸದಞ್ಚ ಮಸಂ ಜಟಂ.
‘‘ಚಮ್ಮವಾಸೀ ಛಮಾ ಸೇತಿ, ಜಾತವೇದಂ ನಮಸ್ಸತಿ;
ತಂ ತ್ವಂ ಗನ್ತ್ವಾನ ಪುಚ್ಛಸ್ಸು, ಸೋ ತೇ ಮಗ್ಗಂ ಪವಕ್ಖತಿ’’.
ಇದಂ ¶ ಸುತ್ವಾ ಬ್ರಹ್ಮಬನ್ಧು, ಚೇತಂ ಕತ್ವಾ ಪದಕ್ಖಿಣಂ;
ಉದಗ್ಗಚಿತ್ತೋ ಪಕ್ಕಾಮಿ, ಯೇನಾಸಿ ಅಚ್ಚುತೋ ಇಸಿ.
ಚೂಳವನವಣ್ಣನಾ.
ಮಹಾವನವಣ್ಣನಾ
ಗಚ್ಛನ್ತೋ ¶ ಸೋ ಭಾರದ್ವಾಜೋ, ಅದ್ದಸ್ಸ ಅಚ್ಚುತಂ ಇಸಿಂ;
ದಿಸ್ವಾನ ತಂ ಭಾರದ್ವಾಜೋ, ಸಮ್ಮೋದಿ ಇಸಿನಾ ಸಹ.
‘‘ಕಚ್ಚಿ ನು ಭೋತೋ ಕುಸಲಂ, ಕಚ್ಚಿ ಭೋತೋ ಅನಾಮಯಂ;
ಕಚ್ಚಿ ಉಞ್ಛೇನ ಯಾಪೇಸಿ, ಕಚ್ಚಿ ಮೂಲಫಲಾ ಬಹೂ.
‘‘ಕಚ್ಚಿ ಡಂಸಾ ಮಕಸಾ ಚ, ಅಪ್ಪಮೇವ ಸರೀಸಪಾ;
ವನೇ ¶ ವಾಳಮಿಗಾಕಿಣ್ಣೇ, ಕಚ್ಚಿ ಹಿಂಸಾ ನ ವಿಜ್ಜತಿ’’.
‘‘ಕುಸಲಞ್ಚೇವ ಮೇ ಬ್ರಹ್ಮೇ, ಅಥೋ ಬ್ರಹ್ಮೇ ಅನಾಮಯಂ;
ಅಥೋ ಉಞ್ಛೇನ ಯಾಪೇಮಿ, ಅಥೋ ಮೂಲಫಲಾ ಬಹೂ.
‘‘ಅಥೋ ಡಂಸಾ ಮಕಸಾ ಚ, ಅಪ್ಪಮೇವ ಸರೀಸಪಾ;
ವನೇ ವಾಳಮಿಗಾಕಿಣ್ಣೇ, ಹಿಂಸಾ ಮಯ್ಹಂ ನ ವಿಜ್ಜತಿ.
‘‘ಬಹೂನಿ ವಸ್ಸಪೂಗಾನಿ, ಅಸ್ಸಮೇ ವಸತೋ ಮಮ;
ನಾಭಿಜಾನಾಮಿ ಉಪ್ಪನ್ನಂ, ಆಬಾಧಂ ಅಮನೋರಮಂ.
‘‘ಸ್ವಾಗತಂ ತೇ ಮಹಾಬ್ರಹ್ಮೇ, ಅಥೋ ತೇ ಅದುರಾಗತಂ;
ಅನ್ತೋ ಪವಿಸ ಭದ್ದನ್ತೇ, ಪಾದೇ ಪಕ್ಖಾಲಯಸ್ಸು ತೇ.
‘‘ತಿನ್ದುಕಾನಿ ಪಿಯಾಲಾನಿ, ಮಧುಕೇ ಕಾಸುಮಾರಿಯೋ;
ಫಲಾನಿ ಖುದ್ದಕಪ್ಪಾನಿ, ಭುಞ್ಜ ಬ್ರಹ್ಮೇ ವರಂ ವರಂ.
‘‘ಇದಮ್ಪಿ ಪಾನೀಯಂ ಸೀತಂ, ಆಭತಂ ಗಿರಿಗಬ್ಭರಾ;
ತತೋ ಪಿವ ಮಹಾಬ್ರಹ್ಮೇ, ಸಚೇ ತ್ವಂ ಅಭಿಕಙ್ಖಸಿ’’.
‘‘ಪಟಿಗ್ಗಹಿತಂ ಯಂ ದಿನ್ನಂ, ಸಬ್ಬಸ್ಸ ಅಗ್ಘಿಯಂ ಕತಂ;
ಸಞ್ಜಯಸ್ಸ ಸಕಂ ಪುತ್ತಂ, ಸಿವೀಹಿ ವಿಪ್ಪವಾಸಿತಂ;
ತಮಹಂ ದಸ್ಸನಮಾಗತೋ, ಯದಿ ಜಾನಾಸಿ ಸಂಸ ಮೇ’’.
‘‘ನ ¶ ಭವಂ ಏತಿ ಪುಞ್ಞತ್ಥಂ, ಸಿವಿರಾಜಸ್ಸ ದಸ್ಸನಂ;
ಮಞ್ಞೇ ಭವಂ ಪತ್ಥಯತಿ, ರಞ್ಞೋ ಭರಿಯಂ ಪತಿಬ್ಬತಂ;
ಮಞ್ಞೇ ಕಣ್ಹಾಜಿನಂ ದಾಸಿಂ, ಜಾಲಿಂ ದಾಸಞ್ಚ ಇಚ್ಛಸಿ.
‘‘ಅಥ ವಾ ತಯೋ ಮಾತಾಪುತ್ತೇ, ಅರಞ್ಞಾ ನೇತುಮಾಗತೋ;
ನ ¶ ತಸ್ಸ ಭೋಗಾ ವಿಜ್ಜನ್ತಿ, ಧನಂ ಧಞ್ಞಞ್ಚ ಬ್ರಾಹ್ಮಣ’’.
‘‘ಅಕುದ್ಧರೂಪೋಹಂ ¶ ಭೋತೋ [ಭೋತೋ (ಸೀ. ಪೀ.)], ನಾಹಂ ಯಾಚಿತುಮಾಗತೋ;
ಸಾಧು ದಸ್ಸನಮರಿಯಾನಂ, ಸನ್ನಿವಾಸೋ ಸದಾ ಸುಖೋ.
‘‘ಅದಿಟ್ಠಪುಬ್ಬೋ ಸಿವಿರಾಜಾ, ಸಿವೀಹಿ ವಿಪ್ಪವಾಸಿತೋ;
ತಮಹಂ ದಸ್ಸನಮಾಗತೋ, ಯದಿ ಜಾನಾಸಿ ಸಂಸ ಮೇ’’.
‘‘ಏಸ ಸೇಲೋ ಮಹಾಬ್ರಹ್ಮೇ, ಪಬ್ಬತೋ ಗನ್ಧಮಾದನೋ;
ಯತ್ಥ ವೇಸ್ಸನ್ತರೋ ರಾಜಾ, ಸಹ ಪುತ್ತೇಹಿ ಸಮ್ಮತಿ.
‘‘ಧಾರೇನ್ತೋ ಬ್ರಾಹ್ಮಣವಣ್ಣಂ, ಆಸದಞ್ಚ ಮಸಂ ಜಟಂ;
ಚಮ್ಮವಾಸೀ ಛಮಾ ಸೇತಿ, ಜಾತವೇದಂ ನಮಸ್ಸತಿ.
‘‘ಏತೇ ನೀಲಾ ಪದಿಸ್ಸನ್ತಿ, ನಾನಾಫಲಧರಾ ದುಮಾ;
ಉಗ್ಗತಾ ಅಬ್ಭಕೂಟಾವ ನೀಲಾ ಅಞ್ಜನಪಬ್ಬತಾ.
‘‘ಧವಸ್ಸಕಣ್ಣಾ ಖದಿರಾ, ಸಾಲಾ ಫನ್ದನಮಾಲುವಾ;
ಸಮ್ಪವೇಧನ್ತಿ ವಾತೇನ, ಸಕಿಂ ಪೀತಾವ ಮಾಣವಾ.
‘‘ಉಪರಿ ದುಮಪರಿಯಾಯೇಸು, ಸಙ್ಗೀತಿಯೋವ ಸುಯ್ಯರೇ;
ನಜ್ಜುಹಾ ಕೋಕಿಲಸಙ್ಘಾ, ಸಮ್ಪತನ್ತಿ ದುಮಾ ದುಮಂ.
‘‘ಅವ್ಹಯನ್ತೇವ ಗಚ್ಛನ್ತಂ, ಸಾಖಾಪತ್ತಸಮೀರಿತಾ;
ರಮಯನ್ತೇವ ಆಗನ್ತಂ, ಮೋದಯನ್ತಿ ನಿವಾಸಿನಂ;
ಯತ್ಥ ವೇಸ್ಸನ್ತರೋ ರಾಜಾ, ಸಹ ಪುತ್ತೇಹಿ ಸಮ್ಮತಿ.
‘‘ಧಾರೇನ್ತೋ ಬ್ರಾಹ್ಮಣವಣ್ಣಂ, ಆಸದಞ್ಚ ಮಸಂ ಜಟಂ;
ಚಮ್ಮವಾಸೀ ಛಮಾ ಸೇತಿ, ಜಾತವೇದಂ ನಮಸ್ಸತಿ.
‘‘ಕರೇರಿಮಾಲಾ ¶ ವಿತತಾ, ಭೂಮಿಭಾಗೇ ಮನೋರಮೇ;
ಸದ್ದಲಾಹರಿತಾ ಭೂಮಿ, ನ ತತ್ಥುದ್ಧಂಸತೇ ರಜೋ.
‘‘ಮಯೂರಗೀವಸಙ್ಕಾಸಾ, ತೂಲಫಸ್ಸಸಮೂಪಮಾ;
ತಿಣಾನಿ ನಾತಿವತ್ತನ್ತಿ, ಸಮನ್ತಾ ಚತುರಙ್ಗುಲಾ.
‘‘ಅಮ್ಬಾ ಜಮ್ಬೂ ಕಪಿತ್ಥಾ ಚ, ನೀಚೇ ಪಕ್ಕಾ ಚುದುಮ್ಬರಾ;
ಪರಿಭೋಗೇಹಿ ರುಕ್ಖೇಹಿ, ವನಂ ತಂ ರತಿವಡ್ಢನಂ.
‘‘ವೇಳುರಿಯವಣ್ಣಸನ್ನಿಭಂ ¶ ¶ , ಮಚ್ಛಗುಮ್ಬನಿಸೇವಿತಂ;
ಸುಚಿಂ ಸುಗನ್ಧಂ ಸಲಿಲಂ, ಆಪೋ ತತ್ಥಪಿ ಸನ್ದತಿ.
‘‘ತಸ್ಸಾವಿದೂರೇ ಪೋಕ್ಖರಣೀ, ಭೂಮಿಭಾಗೇ ಮನೋರಮೇ;
ಪದುಮುಪ್ಪಲಸಞ್ಛನ್ನಾ, ದೇವಾನಮಿವ ನನ್ದನೇ.
‘‘ತೀಣಿ ಉಪ್ಪಲಜಾತಾನಿ, ತಸ್ಮಿಂ ಸರಸಿ ಬ್ರಾಹ್ಮಣ;
ವಿಚಿತ್ತಂ ನೀಲಾನೇಕಾನಿ, ಸೇತಾ ಲೋಹಿತಕಾನಿ ಚ.
‘‘ಖೋಮಾವ ತತ್ಥ ಪದುಮಾ, ಸೇತಸೋಗನ್ಧಿಕೇಹಿ ಚ;
ಕಲಮ್ಬಕೇಹಿ ಸಞ್ಛನ್ನೋ, ಮುಚಲಿನ್ದೋ ನಾಮ ಸೋ ಸರೋ.
‘‘ಅಥೇತ್ಥ ಪದುಮಾ ಫುಲ್ಲಾ, ಅಪರಿಯನ್ತಾವ ದಿಸ್ಸರೇ;
ಗಿಮ್ಹಾ ಹೇಮನ್ತಿಕಾ ಫುಲ್ಲಾ, ಜಣ್ಣುತಗ್ಘಾ ಉಪತ್ಥರಾ.
‘‘ಸುರಭೀ ಸಮ್ಪವಾಯನ್ತಿ, ವಿಚಿತ್ತಪುಪ್ಫಸನ್ಥತಾ;
ಭಮರಾ ಪುಪ್ಫಗನ್ಧೇನ, ಸಮನ್ತಾ ಮಭಿನಾದಿತಾ.
‘‘ಅಥೇತ್ಥ ಉದಕನ್ತಸ್ಮಿಂ, ರುಕ್ಖಾ ತಿಟ್ಠನ್ತಿ ಬ್ರಾಹ್ಮಣ;
ಕದಮ್ಬಾ ಪಾಟಲೀ ಫುಲ್ಲಾ, ಕೋವಿಳಾರಾ ಚ ಪುಪ್ಫಿತಾ.
‘‘ಅಙ್ಕೋಲಾ ಕಚ್ಛಿಕಾರಾ ಚ, ಪಾರಿಜಞ್ಞಾ ಚ ಪುಪ್ಫಿತಾ;
ವಾರಣಾ ¶ ವಯನಾ [ಸಾಯನಾ (ಸೀ. ಪೀ.), ವುಯ್ಹನಾ (ಸ್ಯಾ.)] ರುಕ್ಖಾ, ಮುಚಲಿನ್ದಮುಭತೋ [ಮುಚಲಿನ್ದಮಭಿತೋ (ಸೀ. ಪೀ.)] ಸರಂ.
‘‘ಸಿರೀಸಾ ಸೇತಪಾರಿಸಾ [ಸೇತವಾರಿಸಾ (ಸೀ. ಪೀ.)], ಸಾಧು ವಾಯನ್ತಿ ಪದ್ಮಕಾ;
ನಿಗ್ಗುಣ್ಡೀ ಸಿರೀನಿಗ್ಗುಣ್ಡೀ [ಸರನಿಗ್ಗುಣ್ಡೀ (ಕ.)], ಅಸನಾ ಚೇತ್ಥ ಪುಪ್ಫಿತಾ.
‘‘ಪಙ್ಗುರಾ [ಪಙ್ಕುರಾ (ಸ್ಯಾ.), ಪಙ್ಗುಲಾ (ಕ.)] ಬಹುಲಾ ಸೇಲಾ, ಸೋಭಞ್ಜನಾ ಚ ಪುಪ್ಫಿತಾ;
ಕೇತಕಾ ಕಣಿಕಾರಾ ಚ, ಕನವೇರಾ ಚ ಪುಪ್ಫಿತಾ.
‘‘ಅಜ್ಜುನಾ ಅಜ್ಜುಕಣ್ಣಾ ಚ, ಮಹಾನಾಮಾ ಚ ಪುಪ್ಫಿತಾ;
ಸುಪುಪ್ಫಿತಗ್ಗಾ ತಿಟ್ಠನ್ತಿ, ಪಜ್ಜಲನ್ತೇವ ಕಿಂಸುಕಾ.
‘‘ಸೇತಪಣ್ಣೀ ಸತ್ತಪಣ್ಣಾ, ಕದಲಿಯೋ ಕುಸುಮ್ಭರಾ;
ಧನುತಕ್ಕಾರೀ ಪುಪ್ಫೇಹಿ, ಸೀಸಪಾವರಣಾನಿ ಚ.
‘‘ಅಚ್ಛಿವಾ ಸಲ್ಲವಾ [ಸಬಲಾ (ಸೀ.), ಸಿಮಲಾ (ಪೀ.)] ರುಕ್ಖಾ, ಸಲ್ಲಕಿಯೋ ಚ ಪುಪ್ಫಿತಾ;
ಸೇತಗೇರು ಚ ತಗರಾ, ಮಂಸಿಕುಟ್ಠಾ ಕುಲಾವರಾ.
‘‘ದಹರಾ ¶ ರುಕ್ಖಾ ಚ ವುದ್ಧಾ ಚ, ಅಕುಟಿಲಾ ಚೇತ್ಥ ಪುಪ್ಫಿತಾ;
ಅಸ್ಸಮಂ ಉಭತೋ ಠನ್ತಿ, ಅಗ್ಯಾಗಾರಂ ಸಮನ್ತತೋ.
‘‘ಅಥೇತ್ಥ ಉದಕನ್ತಸ್ಮಿಂ, ಬಹುಜಾತೋ ಫಣಿಜ್ಜಕೋ;
ಮುಗ್ಗತಿಯೋ ಕರತಿಯೋ, ಸೇವಾಲಸೀಸಕಾ ಬಹೂ.
‘‘ಉದ್ದಾಪವತ್ತಂ ¶ [ಉದ್ಧಾಪವತ್ತಂ (ಸ್ಯಾ. ಪೀ.)] ಉಲ್ಲುಳಿತಂ, ಮಕ್ಖಿಕಾ ಹಿಙ್ಗುಜಾಲಿಕಾ;
ದಾಸಿಮಕಞ್ಜಕೋ [ದಾಸಿಮಾ ಕೋಞ್ಜಕೋ (ಕ.)] ಚೇತ್ಥ, ಬಹೂ ನೀಚೇಕಳಮ್ಬಕಾ.
‘‘ಏಲಮ್ಫುರಕಸಞ್ಛನ್ನಾ [ಏಲಮ್ಬರಕಸಞ್ಛನ್ನಾ (ಸೀ. ಪೀ.), ಏಳಮ್ಬಕೇಹಿ ಸಞ್ಛನ್ನಾ (ಸ್ಯಾ.)], ರುಕ್ಖಾ ತಿಟ್ಠನ್ತಿ ಬ್ರಾಹ್ಮಣ;
ಸತ್ತಾಹಂ ಧಾರಿಯಮಾನಾನಂ, ಗನ್ಧೋ ತೇಸಂ ನ ಛಿಜ್ಜತಿ.
‘‘ಉಭತೋ ¶ ಸರಂ ಮುಚಲಿನ್ದಂ, ಪುಪ್ಫಾ ತಿಟ್ಠನ್ತಿ ಸೋಭನಾ;
ಇನ್ದೀವರೇಹಿ ಸಞ್ಛನ್ನಂ, ವನಂ ತಂ ಉಪಸೋಭತಿ.
‘‘ಅಡ್ಢಮಾಸಂ ಧಾರಿಯಮಾನಾನಂ, ಗನ್ಧೋ ತೇಸಂ ನ ಛಿಜ್ಜತಿ;
ನೀಲಪುಪ್ಫೀ ಸೇತವಾರೀ, ಪುಪ್ಫಿತಾ ಗಿರಿಕಣ್ಣಿಕಾ;
ಕಲೇರುಕ್ಖೇಹಿ [ಕಟೇರುಕೇಹಿ (ಸೀ.), ಕಟೇರುಕ್ಖೇಹಿ (ಪೀ.)] ಸಞ್ಛನ್ನಂ, ವನಂ ತಂ ತುಲಸೀಹಿ ಚ.
‘‘ಸಮ್ಮದ್ದತೇವ ಗನ್ಧೇನ, ಪುಪ್ಫಸಾಖಾಹಿ ತಂ ವನಂ;
ಭಮರಾ ಪುಪ್ಫಗನ್ಧೇನ, ಸಮನ್ತಾ ಮಭಿನಾದಿತಾ.
‘‘ತೀಣಿ ಕಕ್ಕಾರುಜಾತಾನಿ, ತಸ್ಮಿಂ ಸರಸಿ ಬ್ರಾಹ್ಮಣ;
ಕುಮ್ಭಮತ್ತಾನಿ ಚೇಕಾನಿ, ಮುರಜಮತ್ತಾನಿ ತಾ ಉಭೋ.
‘‘ಅಥೇತ್ಥ ಸಾಸಪೋ ಬಹುಕೋ, ನಾದಿಯೋ [ನಾರಿಯೋ (ಕ.)] ಹರಿತಾಯುತೋ;
ಅಸೀ ತಾಲಾವ ತಿಟ್ಠನ್ತಿ, ಛೇಜ್ಜಾ ಇನ್ದೀವರಾ ಬಹೂ.
‘‘ಅಪ್ಫೋಟಾ ಸುರಿಯವಲ್ಲೀ ಚ, ಕಾಳೀಯಾ [ಕೋಳೀಯಾ (ಕ.)] ಮಧುಗನ್ಧಿಯಾ;
ಅಸೋಕಾ ಮುದಯನ್ತೀ ಚ, ವಲ್ಲಿಭೋ ಖುದ್ದಪುಪ್ಫಿಯೋ.
‘‘ಕೋರಣ್ಡಕಾ ಅನೋಜಾ ಚ, ಪುಪ್ಫಿತಾ ನಾಗಮಲ್ಲಿಕಾ [ನಾಗವಲ್ಲಿಕಾ (ಸೀ. ಪೀ.)];
ರುಕ್ಖಮಾರುಯ್ಹ ತಿಟ್ಠನ್ತಿ, ಫುಲ್ಲಾ ಕಿಂಸುಕವಲ್ಲಿಯೋ.
‘‘ಕಟೇರುಹಾ ¶ ಚ ವಾಸನ್ತೀ, ಯೂಥಿಕಾ ಮಧುಗನ್ಧಿಯಾ;
ನಿಲಿಯಾ ಸುಮನಾ ಭಣ್ಡೀ, ಸೋಭತಿ ಪದುಮುತ್ತರೋ.
‘‘ಪಾಟಲೀ ಸಮುದ್ದಕಪ್ಪಾಸೀ, ಕಣಿಕಾರಾ ಚ ಪುಪ್ಫಿತಾ;
ಹೇಮಜಾಲಾವ ದಿಸ್ಸನ್ತಿ, ರುಚಿರಗ್ಗಿ ಸಿಖೂಪಮಾ.
‘‘ಯಾನಿ ತಾನಿ ಚ ಪುಪ್ಫಾನಿ, ಥಲಜಾನುದಕಾನಿ ಚ;
ಸಬ್ಬಾನಿ ¶ ತತ್ಥ ದಿಸ್ಸನ್ತಿ, ಏವಂ ರಮ್ಮೋ ಮಹೋದಧಿ.
‘‘ಅಥಸ್ಸಾ ಪೋಕ್ಖರಣಿಯಾ, ಬಹುಕಾ ವಾರಿಗೋಚರಾ;
ರೋಹಿತಾ ನಳಪೀ [ನಳಪೇ (ಕ.)] ಸಿಙ್ಗೂ, ಕುಮ್ಭಿಲಾ ಮಕರಾ ಸುಸೂ.
‘‘ಮಧು ಚ ಮಧುಲಟ್ಠಿ ಚ, ತಾಲಿಸಾ ಚ ಪಿಯಙ್ಗುಕಾ;
ಕುಟನ್ದಜಾ ಭದ್ದಮುತ್ತಾ [ಉನ್ನಕಾ ಭದ್ದಮುಟ್ಠಾ ಚ (ಕ.)], ಸೇತಪುಪ್ಫಾ ಚ ಲೋಲುಪಾ.
‘‘ಸುರಭೀ ¶ ಚ ರುಕ್ಖಾ ತಗರಾ, ಬಹುಕಾ ತುಙ್ಗವಣ್ಟಕಾ [ತುಙ್ಗವಲ್ಲಿಕಾ (ಕ.)];
ಪದ್ಮಕಾ ನರದಾ ಕುಟ್ಠಾ, ಝಾಮಕಾ ಚ ಹರೇಣುಕಾ.
‘‘ಹಲಿದ್ದಕಾ ಗನ್ಧಸಿಲಾ, ಹಿರಿವೇರಾ ಚ ಗುಗ್ಗುಲಾ;
ವಿಭೇದಿಕಾ ಚೋರಕಾ ಕುಟ್ಠಾ, ಕಪ್ಪುರಾ ಚ ಕಲಿಙ್ಗುಕಾ.
‘‘ಅಥೇತ್ಥ ಸೀಹಬ್ಯಗ್ಘಾ ಚ, ಪುರಿಸಾಲೂ ಚ ಹತ್ಥಿಯೋ;
ಏಣೇಯ್ಯಾ ಪಸದಾ ಚೇವ, ರೋಹಿಚ್ಚಾ ಸರಭಾ ಮಿಗಾ.
‘‘ಕೋಟ್ಠಸುಣಾ ಸುಣೋಪಿ ಚ, ತುಲಿಯಾ ನಳಸನ್ನಿಭಾ;
ಚಾಮರೀ ಚಲನೀ ಲಙ್ಘೀ, ಝಾಪಿತಾ ಮಕ್ಕಟಾ ಪಿಚು.
‘‘ಕಕ್ಕಟಾ ಕಟಮಾಯಾ ಚ, ಇಕ್ಕಾ ಗೋಣಸಿರಾ ಬಹೂ;
ಖಗ್ಗಾ ವರಾಹಾ ನಕುಲಾ, ಕಾಳಕೇತ್ಥ ಬಹೂತಸೋ.
‘‘ಮಹಿಂಸಾ ಸೋಣಸಿಙ್ಗಾಲಾ, ಪಮ್ಪಕಾ ಚ ಸಮನ್ತತೋ;
ಆಕುಚ್ಛಾ ಪಚಲಾಕಾ ಚ, ಚಿತ್ರಕಾ ಚಾಪಿ ದೀಪಿಯೋ.
‘‘ಪೇಲಕಾ ಚ ವಿಘಾಸಾದಾ, ಸೀಹಾ ಗೋಗಣಿಸಾದಕಾ;
ಅಟ್ಠಪಾದಾ ಚ ಮೋರಾ ಚ, ಭಸ್ಸರಾ ಚ ಕುಕುತ್ಥಕಾ.
‘‘ಚಙ್ಕೋರಾ ¶ ಕುಕ್ಕುಟಾ ನಾಗಾ, ಅಞ್ಞಮಞ್ಞಂ ಪಕೂಜಿನೋ;
ಬಕಾ ಬಲಾಕಾ ನಜ್ಜುಹಾ, ದಿನ್ದಿಭಾ ಕುಞ್ಜವಾಜಿತಾ [ಕುಞ್ಜವಾದಿಕಾ (ಸೀ. ಪೀ.)].
‘‘ಬ್ಯಗ್ಘಿನಸಾ ¶ ಲೋಹಪಿಟ್ಠಾ, ಪಮ್ಮಕಾ [ಪಮ್ಪಕಾ (ಸೀ. ಪೀ.), ಚಪ್ಪಕಾ (ಸ್ಯಾ.), ಪಬ್ಬಕಾ (ಕ.)] ಜೀವಜೀವಕಾ;
ಕಪಿಞ್ಜರಾ ತಿತ್ತಿರಾಯೋ, ಕುಲಾ ಚ ಪಟಿಕುತ್ಥಕಾ.
‘‘ಮನ್ದಾಲಕಾ ಚೇಲಕೇಟು, ಭಣ್ಡುತಿತ್ತಿರನಾಮಕಾ;
ಚೇಲಾವಕಾ ಪಿಙ್ಗಲಾಯೋ [ಪಿಙ್ಗುಲಾಯೋ (ಸೀ. ಪೀ.)], ಗೋಟಕಾ ಅಙ್ಗಹೇತುಕಾ.
‘‘ಕರವಿಯಾ ಚ ಸಗ್ಗಾ ಚ, ಉಹುಙ್ಕಾರಾ ಚ ಕುಕ್ಕುಹಾ;
ನಾನಾದಿಜಗಣಾಕಿಣ್ಣಂ, ನಾನಾಸರನಿಕೂಜಿತಂ.
‘‘ಅಥೇತ್ಥ ಸಕುಣಾ ಸನ್ತಿ, ನೀಲಕಾ [ಸಾಳಿಕಾ (ಕ.)] ಮಞ್ಜುಭಾಣಿಕಾ;
ಮೋದನ್ತಿ ಸಹ ಭರಿಯಾಹಿ, ಅಞ್ಞಮಞ್ಞಂ ಪಕೂಜಿನೋ.
‘‘ಅಥೇತ್ಥ ಸಕುಣಾ ಸನ್ತಿ, ದಿಜಾ ಮಞ್ಜುಸ್ಸರಾ ಸಿತಾ;
ಸೇತಚ್ಛಿಕುಟಾ ಭದ್ರಕ್ಖಾ, ಅಣ್ಡಜಾ ಚಿತ್ರಪೇಖುಣಾ.
‘‘ಅಥೇತ್ಥ ಸಕುಣಾ ಸನ್ತಿ, ದಿಜಾ ಮಞ್ಜುಸ್ಸರಾ ಸಿತಾ;
ಸಿಖಣ್ಡೀ ನೀಲಗೀವಾಹಿ, ಅಞ್ಞಮಞ್ಞಂ ಪಕೂಜಿನೋ.
‘‘ಕುಕುತ್ಥಕಾ ಕುಳೀರಕಾ, ಕೋಟ್ಠಾ ಪೋಕ್ಖರಸಾತಕಾ;
ಕಾಲಾಮೇಯ್ಯಾ ಬಲಿಯಕ್ಖಾ, ಕದಮ್ಬಾ ಸುವಸಾಳಿಕಾ.
‘‘ಹಲಿದ್ದಾ ¶ ಲೋಹಿತಾ ಸೇತಾ, ಅಥೇತ್ಥ ನಲಕಾ ಬಹೂ;
ವಾರಣಾ ಭಿಙ್ಗರಾಜಾ ಚ, ಕದಮ್ಬಾ ಸುವಕೋಕಿಲಾ.
‘‘ಉಕ್ಕುಸಾ ಕುರರಾ ಹಂಸಾ, ಆಟಾ ಪರಿವದೇನ್ತಿಕಾ;
ಪಾಕಹಂಸಾ ¶ ಅತಿಬಲಾ, ನಜ್ಜುಹಾ ಜೀವಜೀವಕಾ.
‘‘ಪಾರೇವತಾ ರವಿಹಂಸಾ, ಚಕ್ಕವಾಕಾ ನದೀಚರಾ;
ವಾರಣಾಭಿರುದಾ ರಮ್ಮಾ, ಉಭೋ ಕಾಲೂಪಕೂಜಿನೋ.
‘‘ಅಥೇತ್ಥ ಸಕುಣಾ ಸನ್ತಿ, ನಾನಾವಣ್ಣಾ ಬಹೂ ದಿಜಾ;
ಮೋದನ್ತಿ ಸಹ ಭರಿಯಾಹಿ, ಅಞ್ಞಮಞ್ಞಂ ಪಕೂಜಿನೋ.
‘‘ಅಥೇತ್ಥ ಸಕುಣಾ ಸನ್ತಿ, ನಾನಾವಣ್ಣಾ ಬಹೂ ದಿಜಾ;
ಸಬ್ಬೇ ಮಞ್ಜೂ ನಿಕೂಜನ್ತಿ, ಮುಚಲಿನ್ದಮುಭತೋಸರಂ.
‘‘ಅಥೇತ್ಥ ಸಕುಣಾ ಸನ್ತಿ, ಕರವಿಯಾ ನಾಮ ತೇ ದಿಜಾ [ಕರವೀ ನಾಮ ತೇ ದಿಜಾ (ಸೀ. ಪೀ.)];
ಮೋದನ್ತಿ ಸಹ ಭರಿಯಾಹಿ, ಅಞ್ಞಮಞ್ಞಂ ಪಕೂಜಿನೋ.
‘‘ಅಥೇತ್ಥ ¶ ಸಕುಣಾ ಸನ್ತಿ, ಕರವಿಯಾ ನಾಮ ತೇ ದಿಜಾ;
ಸಬ್ಬೇ ಮಞ್ಜೂ ನಿಕೂಜನ್ತಿ, ಮುಚಲಿನ್ದಮುಭತೋಸರಂ.
‘‘ಏಣೇಯ್ಯಪಸದಾಕಿಣ್ಣಂ, ನಾಗಸಂಸೇವಿತಂ ವನಂ;
ನಾನಾಲತಾಹಿ ಸಞ್ಛನ್ನಂ, ಕದಲೀಮಿಗಸೇವಿತಂ.
‘‘ಅಥೇತ್ಥ ಸಾಸಪೋ ಬಹುಕೋ [ಸಾಮಾ ಬಹುಕಾ (ಸ್ಯಾ. ಕ.)], ನೀವಾರೋ ವರಕೋ ಬಹು;
ಸಾಲಿ ಅಕಟ್ಠಪಾಕೋ ಚ, ಉಚ್ಛು ತತ್ಥ ಅನಪ್ಪಕೋ.
‘‘ಅಯಂ ಏಕಪದೀ ಏತಿ, ಉಜುಂ ಗಚ್ಛತಿ ಅಸ್ಸಮಂ;
ಖುದಂ [ಖುದ್ದಂ (ಸ್ಯಾ. ಕ.)] ಪಿಪಾಸಂ ಅರತಿಂ, ತತ್ಥ ಪತ್ತೋ ನ ವಿನ್ದತಿ;
ಯತ್ಥ ವೇಸ್ಸನ್ತರೋ ರಾಜಾ, ಸಹ ಪುತ್ತೇಹಿ ಸಮ್ಮತಿ.
‘‘ಧಾರೇನ್ತೋ ಬ್ರಾಹ್ಮಣವಣ್ಣಂ, ಆಸದಞ್ಚ ಮಸಂ ಜಟಂ;
ಚಮ್ಮವಾಸೀ ಛಮಾ ಸೇತಿ, ಜಾತವೇದಂ ನಮಸ್ಸತಿ’’.
ಇದಂ ¶ ಸುತ್ವಾ ಬ್ರಹ್ಮಬನ್ಧು, ಇಸಿಂ ಕತ್ವಾ ಪದಕ್ಖಿಣಂ;
ಉದಗ್ಗಚಿತ್ತೋ ಪಕ್ಕಾಮಿ, ಯತ್ಥ ವೇಸ್ಸನ್ತರೋ ಅಹು’’.
ಮಹಾವನವಣ್ಣನಾ.
ದಾರಕಪಬ್ಬಂ
‘‘ಉಟ್ಠೇಹಿ ¶ ಜಾಲಿ ಪತಿಟ್ಠ, ಪೋರಾಣಂ ವಿಯ ದಿಸ್ಸತಿ;
ಬ್ರಾಹ್ಮಣಂ ವಿಯ ಪಸ್ಸಾಮಿ, ನನ್ದಿಯೋ ಮಾಭಿಕೀರರೇ’’.
‘‘ಅಹಮ್ಪಿ ತಾತ ಪಸ್ಸಾಮಿ, ಯೋ ಸೋ ಬ್ರಹ್ಮಾವ ದಿಸ್ಸತಿ;
ಅದ್ಧಿಕೋ ವಿಯ [ಅತ್ಥಿಕೋ ವಿಯ (ಸೀ. ಪೀ.)] ಆಯಾತಿ, ಅತಿಥೀ ನೋ ಭವಿಸ್ಸತಿ’’.
‘‘ಕಚ್ಚಿ ನು ಭೋತೋ ಕುಸಲಂ, ಕಚ್ಚಿ ಭೋತೋ ಅನಾಮಯಂ;
ಕಚ್ಚಿ ಉಞ್ಛೇನ ಯಾಪೇಥ, ಕಚ್ಚಿ ಮೂಲಫಲಾ ಬಹೂ.
‘‘ಕಚ್ಚಿ ಡಂಸಾ ಮಕಸಾ ಚ, ಅಪ್ಪಮೇವ ಸರೀಸಪಾ;
ವನೇ ವಾಳಮಿಗಾಕಿಣ್ಣೇ, ಕಚ್ಚಿ ಹಿಂಸಾ ನ ವಿಜ್ಜತಿ’’.
‘‘ಕುಸಲಞ್ಚೇವ ನೋ ಬ್ರಹ್ಮೇ, ಅಥೋ ಬ್ರಹ್ಮೇ ಅನಾಮಯಂ;
ಅಥೋ ಉಞ್ಛೇನ ಯಾಪೇಮ, ಅಥೋ ಮೂಲಫಲಾ ಬಹೂ.
‘‘ಅಥೋ ¶ ಡಂಸಾ ಮಕಸಾ ಚ, ಅಪ್ಪಮೇವ ಸರೀಸಪಾ;
ವನೇ ವಾಳಮಿಗಾಕಿಣ್ಣೇ, ಹಿಂಸಾ ಅಮ್ಹಂ [ಮಯ್ಹಂ (ಸ್ಯಾ. ಕ.)] ನ ವಿಜ್ಜತಿ’’.
‘‘ಸತ್ತ ನೋ ಮಾಸೇ ವಸತಂ, ಅರಞ್ಞೇ ಜೀವಸೋಕಿನಂ [ಜೀವಿಸೋಕಿನಂ (ಸ್ಯಾ.)];
ಇದಮ್ಪಿ ಪಠಮಂ ಪಸ್ಸಾಮ, ಬ್ರಾಹ್ಮಣಂ ದೇವವಣ್ಣಿನಂ;
ಆದಾಯ ವೇಳುವಂ ದಣ್ಡಂ, ಅಗ್ಗಿಹುತ್ತಂ ಕಮಣ್ಡಲುಂ.
‘‘ಸ್ವಾಗತಂ ತೇ ಮಹಾಬ್ರಹ್ಮೇ, ಅಥೋ ತೇ ಅದುರಾಗತಂ;
ಅನ್ತೋ ಪವಿಸ ಭದ್ದನ್ತೇ, ಪಾದೇ ಪಕ್ಖಾಲಯಸ್ಸು ತೇ.
‘‘ತಿನ್ದುಕಾನಿ ¶ ಪಿಯಾಲಾನಿ, ಮಧುಕೇ ಕಾಸುಮಾರಿಯೋ;
ಫಲಾನಿ ಖುದ್ದಕಪ್ಪಾನಿ, ಭುಞ್ಜ ಬ್ರಹ್ಮೇ ವರಂ ವರಂ.
‘‘ಇದಮ್ಪಿ ಪಾನೀಯಂ ಸೀತಂ, ಆಭತಂ ಗಿರಿಗಬ್ಭರಾ;
ತತೋ ಪಿವ ಮಹಾಬ್ರಹ್ಮೇ, ಸಚೇ ತ್ವಂ ಅಭಿಕಙ್ಖಸಿ.
‘‘ಅಥ ತ್ವಂ ಕೇನ ವಣ್ಣೇನ, ಕೇನ ವಾ ಪನ ಹೇತುನಾ;
ಅನುಪ್ಪತ್ತೋ ಬ್ರಹಾರಞ್ಞಂ, ತಂ ಮೇ ಅಕ್ಖಾಹಿ ಪುಚ್ಛಿತೋ’’.
‘‘ಯಥಾ ವಾರಿವಹೋ ಪೂರೋ, ಸಬ್ಬಕಾಲಂ ನ ಖೀಯತಿ;
ಏವಂ ತಂ ಯಾಚಿತಾಗಚ್ಛಿಂ, ಪುತ್ತೇ ಮೇ ದೇಹಿ ಯಾಚಿತೋ’’.
‘‘ದದಾಮಿ ನ ವಿಕಮ್ಪಾಮಿ, ಇಸ್ಸರೋ ನಯ ಬ್ರಾಹ್ಮಣ;
ಪಾತೋ ಗತಾ ರಾಜಪುತ್ತೀ, ಸಾಯಂ ಉಞ್ಛಾತೋ ಏಹಿತಿ.
‘‘ಏಕರತ್ತಿಂ ¶ ವಸಿತ್ವಾನ, ಪಾತೋ ಗಚ್ಛಸಿ ಬ್ರಾಹ್ಮಣ;
ತಸ್ಸಾ ನ್ಹಾತೇ ಉಪಘಾತೇ, ಅಥ ನೇ ಮಾಲಧಾರಿನೇ.
‘‘ಏಕರತ್ತಿಂ ವಸಿತ್ವಾನ, ಪಾತೋ ಗಚ್ಛಸಿ ಬ್ರಾಹ್ಮಣ;
ನಾನಾಪುಪ್ಫೇಹಿ ಸಞ್ಛನ್ನೇ, ನಾನಾಗನ್ಧೇಹಿ ಭೂಸಿತೇ;
ನಾನಾಮೂಲಫಲಾಕಿಣ್ಣೇ, ಗಚ್ಛ ಸ್ವಾದಾಯ ಬ್ರಾಹ್ಮಣ’’.
‘‘ನ ವಾಸಮಭಿರೋಚಾಮಿ, ಗಮನಂ ಮಯ್ಹ ರುಚ್ಚತಿ;
ಅನ್ತರಾಯೋಪಿ ಮೇ ಅಸ್ಸ, ಗಚ್ಛಞ್ಞೇವ ರಥೇಸಭ.
‘‘ನ ಹೇತಾ ಯಾಚಯೋಗೀ ನಂ, ಅನ್ತರಾಯಸ್ಸ ಕಾರಿಯಾ;
ಇತ್ಥಿಯೋ ಮನ್ತಂ [ಇತ್ಥಿಕಾಮನ್ತಂ (ಕ.)] ಜಾನನ್ತಿ, ಸಬ್ಬಂ ಗಣ್ಹನ್ತಿ ವಾಮತೋ.
‘‘ಸದ್ಧಾಯ ¶ ದಾನಂ ದದತೋ, ಮಾಸಂ ಅದಕ್ಖಿ ಮಾತರಂ;
ಅನ್ತರಾಯಮ್ಪಿ ¶ ಸಾ ಕಯಿರಾ, ಗಚ್ಛಞ್ಞೇವ ರಥೇಸಭ.
‘‘ಆಮನ್ತಯಸ್ಸು ತೇ ಪುತ್ತೇ, ಮಾ ತೇ ಮಾತರಮದ್ದಸುಂ;
ಸದ್ಧಾಯ ದಾನಂ ದದತೋ, ಏವಂ ಪುಞ್ಞಂ ಪವಡ್ಢತಿ.
‘‘ಆಮನ್ತಯಸ್ಸು ತೇ ಪುತ್ತೇ, ಮಾ ತೇ ಮಾತರಮದ್ದಸುಂ;
ಮಾದಿಸಸ್ಸ ಧನಂ ದತ್ವಾ, ರಾಜ ಸಗ್ಗಂ ಗಮಿಸ್ಸಸಿ’’.
‘‘ಸಚೇ ತ್ವಂ ನಿಚ್ಛಸೇ ದಟ್ಠುಂ, ಮಮ ಭರಿಯಂ ಪತಿಬ್ಬತಂ;
ಅಯ್ಯಕಸ್ಸಪಿ ದಸ್ಸೇಹಿ, ಜಾಲಿಂ ಕಣ್ಹಾಜಿನಂ ಚುಭೋ.
‘‘ಇಮೇ ಕುಮಾರೇ ದಿಸ್ವಾನ, ಮಞ್ಜುಕೇ ಪಿಯಭಾಣಿನೇ;
ಪತೀತೋ ಸುಮನೋ ವಿತ್ತೋ, ಬಹುಂ ದಸ್ಸತಿ ತೇ ಧನಂ’’.
‘‘ಅಚ್ಛೇದನಸ್ಸ ಭಾಯಾಮಿ, ರಾಜಪುತ್ತ ಸುಣೋಹಿ ಮೇ;
ರಾಜದಣ್ಡಾಯ ಮಂ ದಜ್ಜಾ, ವಿಕ್ಕಿಣೇಯ್ಯ ಹನೇಯ್ಯ ವಾ;
ಜಿನೋ ಧನಞ್ಚ ದಾಸೇ ಚ, ಗಾರಯ್ಹಸ್ಸ ಬ್ರಹ್ಮಬನ್ಧುಯಾ’’.
‘‘ಇಮೇ ಕುಮಾರೇ ದಿಸ್ವಾನ, ಮಞ್ಜುಕೇ ಪಿಯಭಾಣಿನೇ;
ಧಮ್ಮೇ ಠಿತೋ ಮಹಾರಾಜಾ, ಸಿವೀನಂ ರಟ್ಠವಡ್ಢನೋ;
ಲದ್ಧಾ ಪೀತಿಸೋಮನಸ್ಸಂ, ಬಹುಂ ದಸ್ಸತಿ ತೇ ಧನಂ’’.
‘‘ನಾಹಂ ತಮ್ಪಿ ಕರಿಸ್ಸಾಮಿ, ಯಂ ಮಂ ತ್ವಂ ಅನುಸಾಸಸಿ;
ದಾರಕೇವ ಅಹಂ ನೇಸ್ಸಂ, ಬ್ರಾಹ್ಮಣ್ಯಾ ಪರಿಚಾರಕೇ’’.
‘‘ತತೋ ಕುಮಾರಾ ಬ್ಯಥಿತಾ [ಬ್ಯಧಿತಾ (ಸೀ. ಪೀ. ಕ.)], ಸುತ್ವಾ ಲುದ್ದಸ್ಸ ಭಾಸಿತಂ;
ತೇನ ತೇನ ಪಧಾವಿಂಸು, ಜಾಲೀ ಕಣ್ಹಾಜಿನಾ ಚುಭೋ’’.
‘‘ಏಹಿ ¶ ತಾತ ಪಿಯಪುತ್ತ, ಪೂರೇಥ ಮಮ ಪಾರಮಿಂ;
ಹದಯಂ ¶ ಮೇಭಿಸಿಞ್ಚೇಥ, ಕರೋಥ ವಚನಂ ಮಮ.
‘‘ಯಾನಾ ನಾವಾ ಚ ಮೇ ಹೋಥ, ಅಚಲಾ ಭವಸಾಗರೇ;
ಜಾತಿಪಾರಂ ತರಿಸ್ಸಾಮಿ, ಸನ್ತಾರೇಸ್ಸಂ ಸದೇವಕಂ’’.
‘‘ಏಹಿ ಅಮ್ಮ ಪಿಯಧೀತಿ, ಪೂರೇಥ ಮಮ ಪಾರಮಿಂ [ಪಿಯಾ ಮೇ ದಾನಪಾರಮೀ (ಸ್ಯಾ. ಕ.)];
ಹದಯಂ ಮೇಭಿಸಿಞ್ಚೇಥ, ಕರೋಥ ವಚನಂ ಮಮ.
‘‘ಯಾನಾ ¶ ನಾವಾ ಚ ಮೇ ಹೋಥ, ಅಚಲಾ ಭವಸಾಗರೇ;
ಜಾತಿಪಾರಂ ತರಿಸ್ಸಾಮಿ, ಉದ್ಧರಿಸ್ಸಂ ಸದೇವಕಂ’’.
‘‘ತತೋ ಕುಮಾರೇ ಆದಾಯ, ಜಾಲಿಂ ಕಣ್ಹಾಜಿನಂ ಚುಭೋ;
ಬ್ರಾಹ್ಮಣಸ್ಸ ಅದಾ ದಾನಂ, ಸಿವೀನಂ ರಟ್ಠವಡ್ಢನೋ.
‘‘ತತೋ ಕುಮಾರೇ ಆದಾಯ, ಜಾಲಿಂ ಕಣ್ಹಾಜಿನಂ ಚುಭೋ;
ಬ್ರಾಹ್ಮಣಸ್ಸ ಅದಾ ವಿತ್ತೋ, ಪುತ್ತಕೇ ದಾನಮುತ್ತಮಂ.
‘‘ತದಾಸಿ ಯಂ ಭಿಂಸನಕಂ, ತದಾಸಿ ಲೋಮಹಂಸನಂ;
ಯಂ ಕುಮಾರೇ ಪದಿನ್ನಮ್ಹಿ, ಮೇದನೀ ಸಮ್ಪಕಮ್ಪಥ.
‘‘ತದಾಸಿ ಯಂ ಭಿಂಸನಕಂ, ತದಾಸಿ ಲೋಮಹಂಸನಂ;
ಯಂ ಪಞ್ಜಲಿಕತೋ ರಾಜಾ, ಕುಮಾರೇ ಸುಖವಚ್ಛಿತೇ;
ಬ್ರಾಹ್ಮಣಸ್ಸ ಅದಾ ದಾನಂ, ಸಿವೀನಂ ರಟ್ಠವಡ್ಢನೋ’’.
‘‘ತತೋ ಸೋ ಬ್ರಾಹ್ಮಣೋ ಲುದ್ದೋ, ಲತಂ ದನ್ತೇಹಿ ಛಿನ್ದಿಯ;
ಲತಾಯ ಹತ್ಥೇ ಬನ್ಧಿತ್ವಾ, ಲತಾಯ ಅನುಮಜ್ಜಥ [ಅನುಪಜ್ಜಥ (ಕ.)].
‘‘ತತೋ ಸೋ ರಜ್ಜುಮಾದಾಯ, ದಣ್ಡಞ್ಚಾದಾಯ ಬ್ರಾಹ್ಮಣೋ;
ಆಕೋಟಯನ್ತೋ ¶ ತೇ ನೇತಿ, ಸಿವಿರಾಜಸ್ಸ ಪೇಕ್ಖತೋ’’.
‘‘ತತೋ ಕುಮಾರಾ ಪಕ್ಕಾಮುಂ, ಬ್ರಾಹ್ಮಣಸ್ಸ ಪಮುಞ್ಚಿಯ;
ಅಸ್ಸುಪುಣ್ಣೇಹಿ ನೇತ್ತೇಹಿ, ಪಿತರಂ ಸೋ ಉದಿಕ್ಖತಿ.
‘‘ವೇಧಮಸ್ಸತ್ಥಪತ್ತಂವ, ಪಿತು ಪಾದಾನಿ ವನ್ದತಿ;
ಪಿತು ಪಾದಾನಿ ವನ್ದಿತ್ವಾ, ಇದಂ ವಚನಮಬ್ರವಿ.
‘‘ಅಮ್ಮಾ ಚ ತಾತ ನಿಕ್ಖನ್ತಾ, ತ್ವಞ್ಚ ನೋ ತಾತ ದಸ್ಸಸಿ;
ಯಾವ ಅಮ್ಮಮ್ಪಿ ಪಸ್ಸೇಮು, ಅಥ ನೋ ತಾತ ದಸ್ಸಸಿ.
‘‘ಅಮ್ಮಾ ಚ ತಾತ ನಿಕ್ಖನ್ತಾ, ತ್ವಞ್ಚ ನೋ ತಾತ ದಸ್ಸಸಿ;
ಮಾ ನೋ ತ್ವಂ ತಾತ ಅದದಾ, ಯಾವ ಅಮ್ಮಾಪಿ ಏತು ನೋ;
ತದಾಯಂ ಬ್ರಾಹ್ಮಣೋ ಕಾಮಂ, ವಿಕ್ಕಿಣಾತು ಹನಾತು ವಾ.
‘‘ಬಲಙ್ಕಪಾದೋ ¶ [ಬಿಲಙ್ಕಪಾದೋ (ಕ.)] ಅನ್ಧನಖೋ [ಅದ್ಧನಖೋ (ಸೀ. ಸ್ಯಾ. ಪೀ.)], ಅಥೋ ಓವದ್ಧಪಿಣ್ಡಿಕೋ [ಓಬನ್ಧಪಿಣ್ಡಿಕೋ (ಕ.)];
ದೀಘುತ್ತರೋಟ್ಠೋ ಚಪಲೋ, ಕಳಾರೋ ಭಗ್ಗನಾಸಕೋ.
‘‘ಕುಮ್ಭೋದರೋ ¶ ಭಗ್ಗಪಿಟ್ಠಿ, ಅಥೋ ವಿಸಮಚಕ್ಖುಕೋ;
ಲೋಹಮಸ್ಸು ಹರಿತಕೇಸೋ, ವಲೀನಂ ತಿಲಕಾಹತೋ.
‘‘ಪಿಙ್ಗಲೋ ಚ ವಿನತೋ ಚ, ವಿಕಟೋ ಚ ಬ್ರಹಾ ಖರೋ;
ಅಜಿನಾನಿ ಚ ಸನ್ನದ್ಧೋ, ಅಮನುಸ್ಸೋ ಭಯಾನಕೋ.
‘‘ಮನುಸ್ಸೋ ಉದಾಹು ಯಕ್ಖೋ, ಮಂಸಲೋಹಿತಭೋಜನೋ;
ಗಾಮಾ ಅರಞ್ಞಮಾಗಮ್ಮ, ಧನಂ ತಂ ತಾತ ಯಾಚತಿ.
‘‘ನೀಯಮಾನೇ ಪಿಸಾಚೇನ, ಕಿಂ ನು ತಾತ ಉದಿಕ್ಖಸಿ;
ಅಸ್ಮಾ ನೂನ ತೇ ಹದಯಂ, ಆಯಸಂ ದಳ್ಹಬನ್ಧನಂ.
‘‘ಯೋ ¶ ನೋ ಬದ್ಧೇ ನ ಜಾನಾಸಿ, ಬ್ರಾಹ್ಮಣೇನ ಧನೇಸಿನಾ;
ಅಚ್ಚಾಯಿಕೇನ ಲುದ್ದೇನ, ಯೋ ನೋ ಗಾವೋವ ಸುಮ್ಭತಿ.
‘‘ಇಧೇವ ಅಚ್ಛತಂ ಕಣ್ಹಾ, ನ ಸಾ ಜಾನಾತಿ ಕಿಸ್ಮಿಞ್ಚಿ;
ಮಿಗೀವ ಖೀರಸಮ್ಮತ್ತಾ, ಯೂಥಾ ಹೀನಾ ಪಕನ್ದತಿ.
‘‘ನ ಮೇ ಇದಂ ತಥಾ ದುಕ್ಖಂ, ಲಬ್ಭಾ ಹಿ ಪುಮುನಾ ಇದಂ;
ಯಞ್ಚ ಅಮ್ಮಂ ನ ಪಸ್ಸಾಮಿ, ತಂ ಮೇ ದುಕ್ಖತರಂ ಇತೋ.
‘‘ನ ಮೇ ಇದಂ ತಥಾ ದುಕ್ಖಂ, ಲಬ್ಭಾ ಹಿ ಪುಮುನಾ ಇದಂ;
ಯಞ್ಚ ತಾತಂ ನ ಪಸ್ಸಾಮಿ, ತಂ ಮೇ ದುಕ್ಖತರಂ ಇತೋ.
‘‘ಸಾ ನೂನ ಕಪಣಾ ಅಮ್ಮಾ, ಚಿರರತ್ತಾಯ ರುಚ್ಛತಿ [ರುಜ್ಜತಿ (ಸ್ಯಾ. ಕ.)];
ಕಣ್ಹಾಜಿನಂ ಅಪಸ್ಸನ್ತೀ, ಕುಮಾರಿಂ ಚಾರುದಸ್ಸನಿಂ.
‘‘ಸೋ ನೂನ ಕಪಣೋ ತಾತೋ, ಚಿರರತ್ತಾಯ ರುಚ್ಛತಿ;
ಕಣ್ಹಾಜಿನಂ ಅಪಸ್ಸನ್ತೋ, ಕುಮಾರಿಂ ಚಾರುದಸ್ಸನಿಂ.
‘‘ಸಾ ನೂನ ಕಪಣಾ ಅಮ್ಮಾ, ಚಿರಂ ರುಚ್ಛತಿ ಅಸ್ಸಮೇ;
ಕಣ್ಹಾಜಿನಂ ಅಪಸ್ಸನ್ತೀ, ಕುಮಾರಿಂ ಚಾರುದಸ್ಸನಿಂ.
‘‘ಸೋ ನೂನ ಕಪಣೋ ತಾತೋ, ಚಿರಂ ರುಚ್ಛತಿ ಅಸ್ಸಮೇ;
ಕಣ್ಹಾಜಿನಂ ಅಪಸ್ಸನ್ತೋ, ಕುಮಾರಿಂ ಚಾರುದಸ್ಸನಿಂ.
‘‘ಸಾ ನೂನ ಕಪಣಾ ಅಮ್ಮಾ, ಚಿರರತ್ತಾಯ ರುಚ್ಛತಿ;
ಅಡ್ಢರತ್ತೇ ವ ರತ್ತೇ ವಾ, ನದೀವ ಅವಸುಚ್ಛತಿ.
‘‘ಸೋ ¶ ನೂನ ಕಪಣೋ ತಾತೋ, ಚಿರರತ್ತಾಯ ರುಚ್ಛತಿ;
ಅಡ್ಢರತ್ತೇ ವ ರತ್ತೇ ವಾ, ನದೀವ ಅವಸುಚ್ಛತಿ.
‘‘ಇಮೇ ¶ ¶ ತೇ ಜಮ್ಬುಕಾ ರುಕ್ಖಾ, ವೇದಿಸಾ ಸಿನ್ದುವಾರಕಾ [ಸಿನ್ಧುವಾರಿತಾ (ಬಹೂಸು)];
ವಿವಿಧಾನಿ ರುಕ್ಖಜಾತಾನಿ, ತಾನಿ ಅಜ್ಜ ಜಹಾಮಸೇ.
‘‘ಅಸ್ಸತ್ಥಾ ಪನಸಾ ಚೇಮೇ, ನಿಗ್ರೋಧಾ ಚ ಕಪಿತ್ಥನಾ;
ವಿವಿಧಾನಿ ಫಲಜಾತಾನಿ, ತಾನಿ ಅಜ್ಜ ಜಹಾಮಸೇ.
‘‘ಇಮೇ ತಿಟ್ಠನ್ತಿ ಆರಾಮಾ, ಅಯಂ ಸೀತೂದಕಾ [ಸೀತೋದಿಕಾ (ಸೀ. ಪೀ.)] ನದೀ;
ಯತ್ಥಸ್ಸು ಪುಬ್ಬೇ ಕೀಳಾಮ, ತಾನಿ ಅಜ್ಜ ಜಹಾಮಸೇ.
‘‘ವಿವಿಧಾನಿ ಪುಪ್ಫಜಾತಾನಿ, ಅಸ್ಮಿಂ ಉಪರಿಪಬ್ಬತೇ;
ಯಾನಸ್ಸು ಪುಬ್ಬೇ ಧಾರೇಮ, ತಾನಿ ಅಜ್ಜ ಜಹಾಮಸೇ.
‘‘ವಿವಿಧಾನಿ ಫಲಜಾತಾನಿ, ಅಸ್ಮಿಂ ಉಪರಿಪಬ್ಬತೇ;
ಯಾನಸ್ಸು ಪುಬ್ಬೇ ಭುಞ್ಜಾಮ, ತಾನಿ ಅಜ್ಜ ಜಹಾಮಸೇ.
‘‘ಇಮೇ ನೋ ಹತ್ಥಿಕಾ ಅಸ್ಸಾ, ಬಲಿಬದ್ದಾ ಚ ನೋ ಇಮೇ;
ಯೇಹಿಸ್ಸು ಪುಬ್ಬೇ ಕೀಳಾಮ, ತಾನಿ ಅಜ್ಜ ಜಹಾಮಸೇ’’.
‘‘ನೀಯಮಾನಾ ಕುಮಾರಾ ತೇ, ಪಿತರಂ ಏತದಬ್ರವುಂ;
ಅಮ್ಮಂ ಆರೋಗ್ಯಂ ವಜ್ಜಾಸಿ, ತ್ವಞ್ಚ ತಾತ ಸುಖೀ ಭವ.
‘‘ಇಮೇ ನೋ ಹತ್ಥಿಕಾ ಅಸ್ಸಾ, ಬಲಿಬದ್ದಾ ಚ ನೋ ಇಮೇ;
ತಾನಿ ಅಮ್ಮಾಯ ದಜ್ಜೇಸಿ, ಸೋಕಂ ತೇಹಿ ವಿನೇಸ್ಸತಿ.
‘‘ಇಮೇ ನೋ ಹತ್ಥಿಕಾ ಅಸ್ಸಾ, ಬಲಿಬದ್ದಾ ಚ ನೋ ಇಮೇ;
ತಾನಿ ಅಮ್ಮಾ ಉದಿಕ್ಖನ್ತೀ, ಸೋಕಂ ಪಟಿವಿನೇಸ್ಸತಿ.
‘‘ತತೋ ವೇಸ್ಸನ್ತರೋ ರಾಜಾ, ದಾನಂ ದತ್ವಾನ ಖತ್ತಿಯೋ;
ಪಣ್ಣಸಾಲಂ ಪವಿಸಿತ್ವಾ, ಕಲುನಂ ಪರಿದೇವಯಿ’’.
‘‘ಕಂ ¶ ನ್ವಜ್ಜ ಛಾತಾ ತಸಿತಾ, ಉಪರುಚ್ಛನ್ತಿ ದಾರಕಾ;
ಸಾಯಂ ಸಂವೇಸನಾಕಾಲೇ, ಕೋ ನೇ ದಸ್ಸತಿ ಭೋಜನಂ.
‘‘ಕಂ ನ್ವಜ್ಜ ಛಾತಾ ತಸಿತಾ, ಉಪರುಚ್ಛನ್ತಿ ದಾರಕಾ;
ಸಾಯಂ ಸಂವೇಸನಾಕಾಲೇ, ಅಮ್ಮಾ ಛಾತಮ್ಹ ದೇಥ ನೋ.
‘‘ಕಥಂ ¶ ನು ಪಥಂ ಗಚ್ಛನ್ತಿ, ಪತ್ತಿಕಾ ಅನುಪಾಹನಾ;
ಸನ್ತಾ ಸೂನೇಹಿ ಪಾದೇಹಿ, ಕೋ ನೇ ಹತ್ಥೇ ಗಹೇಸ್ಸತಿ.
‘‘ಕಥಂ ನು ಸೋ ನ ಲಜ್ಜೇಯ್ಯ, ಸಮ್ಮುಖಾ ಪಹರಂ ಮಮ;
ಅದೂಸಕಾನಂ ಪುತ್ತಾನಂ, ಅಲಜ್ಜೀ ವತ ಬ್ರಾಹ್ಮಣೋ.
‘‘ಯೋಪಿ ಮೇ ದಾಸಿದಾಸಸ್ಸ, ಅಞ್ಞೋ ವಾ ಪನ ಪೇಸಿಯೋ;
ತಸ್ಸಾಪಿ ಸುವಿಹೀನಸ್ಸ, ಕೋ ಲಜ್ಜೀ ಪಹರಿಸ್ಸತಿ.
‘‘ವಾರಿಜಸ್ಸೇವ ¶ ಮೇ ಸತೋ, ಬದ್ಧಸ್ಸ ಕುಮಿನಾಮುಖೇ;
ಅಕ್ಕೋಸತಿ ಪಹರತಿ, ಪಿಯೇ ಪುತ್ತೇ ಅಪಸ್ಸತೋ.
‘‘ಅದು ಚಾಪಂ ಗಹೇತ್ವಾನ, ಖಗ್ಗಂ ಬನ್ಧಿಯ ವಾಮತೋ;
ಆನೇಸ್ಸಾಮಿ ಸಕೇ ಪುತ್ತೇ, ಪುತ್ತಾನಞ್ಹಿ ವಧೋ ದುಖೋ.
‘‘ಅಟ್ಠಾನಮೇತಂ [ಅದ್ಧಾ ಹಿ ಮೇತಂ (ಪೀ.)] ದುಕ್ಖರೂಪಂ, ಯಂ ಕುಮಾರಾ ವಿಹಞ್ಞರೇ;
ಸತಞ್ಚ ಧಮ್ಮಮಞ್ಞಾಯ, ಕೋ ದತ್ವಾ ಅನುತಪ್ಪತಿ’’.
‘‘ಸಚ್ಚಂ ಕಿರೇವಮಾಹಂಸು, ನರಾ ಏಕಚ್ಚಿಯಾ ಇಧ;
ಯಸ್ಸ ನತ್ಥಿ ಸಕಾ ಮಾತಾ, ಯಥಾ ನತ್ಥಿ [ಪಿತಾ ಅತ್ಥಿ (ಕ.)] ತಥೇವ ಸೋ.
‘‘ಏಹಿ ಕಣ್ಹೇ ಮರಿಸ್ಸಾಮ, ನತ್ಥತ್ಥೋ ಜೀವಿತೇನ ನೋ;
ದಿನ್ನಮ್ಹಾತಿ ¶ [ದಿನ್ನಮ್ಹಾಪಿ (ಸೀ. ಸ್ಯಾ.), ದಿನ್ನಮಾಸಿ (ಕ.)] ಜನಿನ್ದೇನ, ಬ್ರಾಹ್ಮಣಸ್ಸ ಧನೇಸಿನೋ;
ಅಚ್ಚಾಯಿಕಸ್ಸ ಲುದ್ದಸ್ಸ, ಯೋ ನೋ ಗಾವೋವ ಸುಮ್ಭತಿ.
‘‘ಇಮೇ ತೇ ಜಮ್ಬುಕಾ ರುಕ್ಖಾ, ವೇದಿಸಾ ಸಿನ್ದುವಾರಕಾ;
ವಿವಿಧಾನಿ ರುಕ್ಖಜಾತಾನಿ, ತಾನಿ ಕಣ್ಹೇ ಜಹಾಮಸೇ.
‘‘ಅಸ್ಸತ್ಥಾ ಪನಸಾ ಚೇಮೇ, ನಿಗ್ರೋಧಾ ಚ ಕಪಿತ್ಥನಾ;
ವಿವಿಧಾನಿ ಫಲಜಾತಾನಿ, ತಾನಿ ಕಣ್ಹೇ ಜಹಾಮಸೇ.
‘‘ಇಮೇ ತಿಟ್ಠನ್ತಿ ಆರಾಮಾ, ಅಯಂ ಸೀತೂದಕಾ ನದೀ;
ಯತ್ಥಸ್ಸು ಪುಬ್ಬೇ ಕೀಳಾಮ, ತಾನಿ ಕಣ್ಹೇ ಜಹಾಮಸೇ.
‘‘ವಿವಿಧಾನಿ ಪುಪ್ಫಜಾತಾನಿ, ಅಸ್ಮಿಂ ಉಪರಿಪಬ್ಬತೇ;
ಯಾನಸ್ಸು ಪುಬ್ಬೇ ಧಾರೇಮ, ತಾನಿ ಕಣ್ಹೇ ಜಹಾಮಸೇ.
‘‘ವಿವಿಧಾನಿ ¶ ಫಲಜಾತಾನಿ, ಅಸ್ಮಿಂ ಉಪರಿಪಬ್ಬತೇ;
ಯಾನಸ್ಸು ಪುಬ್ಬೇ ಭುಞ್ಜಾಮ, ತಾನಿ ಕಣ್ಹೇ ಜಹಾಮಸೇ.
‘‘ಇಮೇ ನೋ ಹತ್ಥಿಕಾ ಅಸ್ಸಾ, ಬಲಿಬದ್ದಾ ಚ ನೋ ಇಮೇ;
ಯೇಹಿಸ್ಸು ಪುಬ್ಬೇ ಕೀಳಾಮ, ತಾನಿ ಕಣ್ಹೇ ಜಹಾಮಸೇ’’.
‘‘ನೀಯಮಾನಾ ಕುಮಾರಾ ತೇ, ಬ್ರಾಹ್ಮಣಸ್ಸ ಪಮುಞ್ಚಿಯ;
ತೇನ ತೇನ ಪಧಾವಿಂಸು, ಜಾಲೀ ಕಣ್ಹಾಜಿನಾ ಚುಭೋ’’.
‘‘ತತೋ ಸೋ ರಜ್ಜುಮಾದಾಯ, ದಣ್ಡಞ್ಚಾದಾಯ ಬ್ರಾಹ್ಮಣೋ;
ಆಕೋಟಯನ್ತೋ ತೇ ನೇತಿ, ಸಿವಿರಾಜಸ್ಸ ಪೇಕ್ಖತೋ’’.
‘‘ತಂ ತಂ ಕಣ್ಹಾಜಿನಾವೋಚ, ಅಯಂ ಮಂ ತಾತ ಬ್ರಾಹ್ಮಣೋ;
ಲಟ್ಠಿಯಾ ಪಟಿಕೋಟೇತಿ, ಘರೇ ಜಾತಂವ ದಾಸಿಯಂ.
‘‘ನ ¶ ಚಾಯಂ ಬ್ರಾಹ್ಮಣೋ ತಾತ, ಧಮ್ಮಿಕಾ ಹೋನ್ತಿ ಬ್ರಾಹ್ಮಣಾ;
ಯಕ್ಖೋ ¶ ಬ್ರಾಹ್ಮಣವಣ್ಣೇನ, ಖಾದಿತುಂ ತಾತ ನೇತಿ ನೋ;
ನೀಯಮಾನೇ ಪಿಸಾಚೇನ, ಕಿಂ ನು ತಾತ ಉದಿಕ್ಖಸಿ’’.
‘‘ಇಮೇ ನೋ ಪಾದಕಾ ದುಕ್ಖಾ, ದೀಘೋ ಚದ್ಧಾ ಸುದುಗ್ಗಮೋ;
ನೀಚೇ ಚೋಲಮ್ಬತೇ ಸೂರಿಯೋ, ಬ್ರಾಹ್ಮಣೋ ಚ ಧಾರೇತಿ [ತರೇತಿ (ಸೀ. ಸ್ಯಾ. ಪೀ.)] ನೋ.
‘‘ಓಕನ್ದಾಮಸೇ [ಓಕ್ಕನ್ತಾಮಸಿ (ಕ.)] ಭೂತಾನಿ, ಪಬ್ಬತಾನಿ ವನಾನಿ ಚ;
ಸರಸ್ಸ ಸಿರಸಾ ವನ್ದಾಮ, ಸುಪತಿತ್ಥೇ ಚ ಆಪಕೇ [ಆವಕೇ (ಕ.)].
‘‘ತಿಣಲತಾನಿ ಓಸಧ್ಯೋ, ಪಬ್ಬತಾನಿ ವನಾನಿ ಚ;
ಅಮ್ಮಂ ಆರೋಗ್ಯಂ ವಜ್ಜಾಥ, ಅಯಂ ನೋ ನೇತಿ ಬ್ರಾಹ್ಮಣೋ.
‘‘ವಜ್ಜನ್ತು ಭೋನ್ತೋ ಅಮ್ಮಞ್ಚ, ಮದ್ದಿಂ ಅಸ್ಮಾಕ ಮಾತರಂ;
ಸಚೇ ಅನುಪತಿತುಕಾಮಾಸಿ, ಖಿಪ್ಪಂ ಅನುಪತಿಯಾಸಿ ನೋ.
‘‘ಅಯಂ ಏಕಪದೀ ಏತಿ, ಉಜುಂ ಗಚ್ಛತಿ ಅಸ್ಸಮಂ;
ತಮೇವಾನುಪತೇಯ್ಯಾಸಿ, ಅಪಿ ಪಸ್ಸೇಸಿ ನೇ ಲಹುಂ.
‘‘ಅಹೋ ವತ ರೇ ಜಟಿನೀ, ವನಮೂಲಫಲಹಾರಿಕೇ [ಹಾರಿಯಾ (ಸ್ಯಾ. ಕ.)];
ಸುಞ್ಞಂ ದಿಸ್ವಾನ ಅಸ್ಸಮಂ, ತಂ ತೇ ದುಕ್ಖಂ ಭವಿಸ್ಸತಿ.
‘‘ಅತಿವೇಲಂ ¶ ನು ಅಮ್ಮಾಯ, ಉಞ್ಛಾ ಲದ್ಧೋ ಅನಪ್ಪಕೋ [ಉಞ್ಛಾಲದ್ಧಂ ಅನಪ್ಪಕಂ (ಸ್ಯಾ.)];
ಯಾ ನೋ ಬದ್ಧೇ ನ ಜಾನಾಸಿ, ಬ್ರಾಹ್ಮಣೇನ ಧನೇಸಿನಾ.
‘‘ಅಚ್ಚಾಯಿಕೇನ ಲುದ್ದೇನ, ಯೋ ನೋ ಗಾವೋವ ಸುಮ್ಭತಿ;
ಅಪಜ್ಜ ಅಮ್ಮಂ ಪಸ್ಸೇಮು, ಸಾಯಂ ಉಞ್ಛಾತೋ ಆಗತಂ.
‘‘ದಜ್ಜಾ ಅಮ್ಮಾ ಬ್ರಾಹ್ಮಣಸ್ಸ, ಫಲಂ ಖುದ್ದೇನ ಮಿಸ್ಸಿತಂ;
ತದಾಯಂ ¶ ಅಸಿತೋ ಧಾತೋ, ನ ಬಾಳ್ಹಂ ಧಾರಯೇಯ್ಯ [ತರಯೇಯ್ಯ (ಸೀ. ಸ್ಯಾ. ಪೀ.)] ನೋ.
‘‘ಸೂನಾ ಚ ವತ ನೋ ಪಾದಾ, ಬಾಳ್ಹಂ ಧಾರೇತಿ ಬ್ರಾಹ್ಮಣೋ;
ಇತಿ ತತ್ಥ ವಿಲಪಿಂಸು, ಕುಮಾರಾ ಮಾತುಗಿದ್ಧಿನೋ’’.
ದಾರಕಪಬ್ಬಂ ನಾಮ.
ಮದ್ದೀಪಬ್ಬಂ
‘‘ತೇಸಂ ಲಾಲಪ್ಪಿತಂ ಸುತ್ವಾ, ತಯೋ ವಾಳಾ ವನೇ ಮಿಗಾ;
ಸೀಹೋ ಬ್ಯಗ್ಘೋ ಚ ದೀಪಿ ಚ, ಇದಂ ವಚನಮಬ್ರವುಂ.
‘‘ಮಾ ¶ ಹೇವ ನೋ ರಾಜಪುತ್ತೀ, ಸಾಯಂ ಉಞ್ಛಾತೋ ಆಗಮಾ;
ಮಾ ಹೇವಮ್ಹಾಕ ನಿಬ್ಭೋಗೇ, ಹೇಠಯಿತ್ಥ ವನೇ ಮಿಗಾ.
‘‘ಸೀಹೋ ಚ ನಂ ವಿಹೇಠೇಯ್ಯ, ಬ್ಯಗ್ಘೋ ದೀಪಿ ಚ ಲಕ್ಖಣಂ;
ನೇವ ಜಾಲೀಕುಮಾರಸ್ಸ, ಕುತೋ ಕಣ್ಹಾಜಿನಾ ಸಿಯಾ;
ಉಭಯೇನೇವ ಜೀಯೇಥ, ಪತಿಂ ಪುತ್ತೇ ಚ ಲಕ್ಖಣಾ’’.
‘‘ಖಣಿತ್ತಿಕಂ ಮೇ ಪತಿತಂ, ದಕ್ಖಿಣಕ್ಖಿ ಚ ಫನ್ದತಿ;
ಅಫಲಾ ಫಲಿನೋ ರುಕ್ಖಾ, ಸಬ್ಬಾ ಮುಯ್ಹನ್ತಿ ಮೇ ದಿಸಾ.
‘‘ತಸ್ಸಾ ಸಾಯನ್ಹಕಾಲಸ್ಮಿಂ, ಅಸ್ಸಮಾಗಮನಂ ಪತಿ;
ಅತ್ಥಙ್ಗತಮ್ಹಿ ಸೂರಿಯೇ, ವಾಳಾ ಪನ್ಥೇ ಉಪಟ್ಠಹುಂ.
‘‘ನೀಚೇ ಚೋಲಮ್ಬತೇ ಸೂರಿಯೋ, ದೂರೇ ಚ ವತ ಅಸ್ಸಮೋ;
ಯಞ್ಚ ನೇಸಂ ಇತೋ ಹಸ್ಸಂ [ಹಿಸ್ಸಂ (ಕ.)], ತಂ ತೇ ಭುಞ್ಜೇಯ್ಯು ಭೋಜನಂ.
‘‘ಸೋ ನೂನ ಖತ್ತಿಯೋ ಏಕೋ, ಪಣ್ಣಸಾಲಾಯ ಅಚ್ಛತಿ;
ತೋಸೇನ್ತೋ ದಾರಕೇ ಛಾತೇ, ಮಮಂ ದಿಸ್ವಾ ಅನಾಯತಿಂ.
‘‘ತೇ ¶ ನೂನ ಪುತ್ತಕಾ ಮಯ್ಹಂ, ಕಪಣಾಯ ವರಾಕಿಯಾ;
ಸಾಯಂ ¶ ಸಂವೇಸನಾಕಾಲೇ, ಖೀರಪೀತಾವ ಅಚ್ಛರೇ.
‘‘ತೇ ನೂನ ಪುತ್ತಕಾ ಮಯ್ಹಂ, ಕಪಣಾಯ ವರಾಕಿಯಾ;
ಸಾಯಂ ಸಂವೇಸನಾಕಾಲೇ, ವಾರಿಪೀತಾವ ಅಚ್ಛರೇ.
‘‘ತೇ ನೂನ ಪುತ್ತಕಾ ಮಯ್ಹಂ, ಕಪಣಾಯ ವರಾಕಿಯಾ;
ಪಚ್ಚುಗ್ಗತಾ ಮಂ ತಿಟ್ಠನ್ತಿ, ವಚ್ಛಾ ಬಾಲಾವ ಮಾತರಂ.
‘‘ತೇ ನೂನ ಪುತ್ತಕಾ ಮಯ್ಹಂ, ಕಪಣಾಯ ವರಾಕಿಯಾ;
ಪಚ್ಚುಗ್ಗತಾ ಮಂ ತಿಟ್ಠನ್ತಿ, ಹಂಸಾವುಪರಿಪಲ್ಲಲೇ.
‘‘ತೇ ನೂನ ಪುತ್ತಕಾ ಮಯ್ಹಂ, ಕಪಣಾಯ ವರಾಕಿಯಾ;
ಪಚ್ಚುಗ್ಗತಾ ಮಂ ತಿಟ್ಠನ್ತಿ, ಅಸ್ಸಮಸ್ಸಾವಿದೂರತೋ.
‘‘ಏಕಾಯನೋ ಏಕಪಥೋ, ಸರಾ ಸೋಬ್ಭಾ ಚ ಪಸ್ಸತೋ;
ಅಞ್ಞಂ ಮಗ್ಗಂ ನ ಪಸ್ಸಾಮಿ, ಯೇನ ಗಚ್ಛೇಯ್ಯ ಅಸ್ಸಮಂ.
‘‘ಮಿಗಾ ನಮತ್ಥು ರಾಜಾನೋ, ಕಾನನಸ್ಮಿಂ ಮಹಬ್ಬಲಾ;
ಧಮ್ಮೇನ ಭಾತರೋ ಹೋಥ, ಮಗ್ಗಂ ಮೇ ದೇಥ ಯಾಚಿತಾ.
‘‘ಅವರುದ್ಧಸ್ಸಾಹಂ ಭರಿಯಾ, ರಾಜಪುತ್ತಸ್ಸ ಸಿರೀಮತೋ;
ತಂ ಚಾಹಂ ನಾತಿಮಞ್ಞಾಮಿ, ರಾಮಂ ಸೀತಾವನುಬ್ಬತಾ.
‘‘ತುಮ್ಹೇ ¶ ಚ ಪುತ್ತೇ ಪಸ್ಸಥ, ಸಾಯಂ ಸಂವೇಸನಂ ಪತಿ;
ಅಹಞ್ಚ ಪುತ್ತೇ ಪಸ್ಸೇಯ್ಯಂ, ಜಾಲಿಂ ಕಣ್ಹಾಜಿನಂ ಚುಭೋ.
‘‘ಬಹುಂ ಚಿದಂ ಮೂಲಫಲಂ, ಭಕ್ಖೋ ಚಾಯಂ ಅನಪ್ಪಕೋ;
ತತೋ ಉಪಡ್ಢಂ ದಸ್ಸಾಮಿ, ಮಗ್ಗಂ ಮೇ ದೇಥ ಯಾಚಿತಾ.
‘‘ರಾಜಪುತ್ತೀ ಚ ನೋ ಮಾತಾ, ರಾಜಪುತ್ತೋ ಚ ನೋ ಪಿತಾ;
ಧಮ್ಮೇನ ¶ ಭಾತರೋ ಹೋಥ, ಮಗ್ಗಂ ಮೇ ದೇಥ ಯಾಚಿತಾ’’.
‘‘ತಸ್ಸಾ ಲಾಲಪ್ಪಮಾನಾಯ, ಬಹುಂ ಕಾರುಞ್ಞಸಞ್ಹಿತಂ;
ಸುತ್ವಾ ನೇಲಪತಿಂ ವಾಚಂ, ವಾಳಾ ಪನ್ಥಾ ಅಪಕ್ಕಮುಂ’’.
‘‘ಇಮಮ್ಹಿ ನಂ ಪದೇಸಮ್ಹಿ, ಪುತ್ತಕಾ ಪಂಸುಕುಣ್ಠಿತಾ;
ಪಚ್ಚುಗ್ಗತಾ ಮಂ ತಿಟ್ಠನ್ತಿ, ವಚ್ಛಾ ಬಾಲಾವ ಮಾತರಂ.
‘‘ಇಮಮ್ಹಿ ¶ ನಂ ಪದೇಸಮ್ಹಿ, ಪುತ್ತಕಾ ಪಂಸುಕುಣ್ಠಿತಾ;
ಪಚ್ಚುಗ್ಗತಾ ಮಂ ತಿಟ್ಠನ್ತಿ, ಹಂಸಾವುಪರಿಪಲ್ಲಲೇ.
‘‘ಇಮಮ್ಹಿ ನಂ ಪದೇಸಮ್ಹಿ, ಪುತ್ತಕಾ ಪಂಸುಕುಣ್ಠಿತಾ;
ಪಚ್ಚುಗ್ಗತಾ ಮಂ ತಿಟ್ಠನ್ತಿ, ಅಸ್ಸಮಸ್ಸಾವಿದೂರತೋ.
‘‘ದ್ವೇ ಮಿಗಾ ವಿಯ [ತೇ ಮಿಗಾವಿಯ (ಸೀ. ಸ್ಯಾ. ಪೀ.)] ಉಕ್ಕಣ್ಣಾ [ಓಕ್ಕಣ್ಣಾ (ಕ.)], ಸಮನ್ತಾ ಮಭಿಧಾವಿನೋ;
ಆನನ್ದಿನೋ ಪಮುದಿತಾ, ವಗ್ಗಮಾನಾವ ಕಮ್ಪರೇ;
ತ್ಯಜ್ಜ ಪುತ್ತೇ ನ ಪಸ್ಸಾಮಿ, ಜಾಲಿಂ ಕಣ್ಹಾಜಿನಂ ಚುಭೋ.
‘‘ಛಕಲೀವ ಮಿಗೀ ಛಾಪಂ, ಪಕ್ಖೀ ಮುತ್ತಾವ ಪಞ್ಜರಾ;
ಓಹಾಯ ಪುತ್ತೇ ನಿಕ್ಖಮಿಂ, ಸೀಹೀವಾಮಿಸಗಿದ್ಧಿನೀ;
ತ್ಯಜ್ಜ ಪುತ್ತೇ ನ ಪಸ್ಸಾಮಿ, ಜಾಲಿಂ ಕಣ್ಹಾಜಿನಂ ಚುಭೋ.
‘‘ಇದಂ ನೇಸಂ ಪದಕ್ಕನ್ತಂ, ನಾಗಾನಮಿವ ಪಬ್ಬತೇ;
ಚಿತಕಾ ಪರಿಕಿಣ್ಣಾಯೋ, ಅಸ್ಸಮಸ್ಸಾವಿದೂರತೋ;
ತ್ಯಜ್ಜ ಪುತ್ತೇ ನ ಪಸ್ಸಾಮಿ, ಜಾಲಿಂ ಕಣ್ಹಾಜಿನಂ ಚುಭೋ.
‘‘ವಾಲಿಕಾಯಪಿ ಓಕಿಣ್ಣಾ, ಪುತ್ತಕಾ ಪಂಸುಕುಣ್ಠಿತಾ;
ಸಮನ್ತಾ ಮಭಿಧಾವನ್ತಿ, ತೇ ನ ಪಸ್ಸಾಮಿ ದಾರಕೇ.
‘‘ಯೇ ¶ ಮಂ ಪುರೇ ಪಚ್ಚುಟ್ಠೇನ್ತಿ [ಪಚ್ಚುದೇನ್ತಿ (ಸೀ. ಸ್ಯಾ. ಪೀ.)], ಅರಞ್ಞಾ ದೂರಮಾಯತಿಂ;
ತ್ಯಜ್ಜ ಪುತ್ತೇ ನ ಪಸ್ಸಾಮಿ, ಜಾಲಿಂ ಕಣ್ಹಾಜಿನಂ ಚುಭೋ.
‘‘ಛಕಲಿಂವ ಮಿಗಿಂ ಛಾಪಾ, ಪಚ್ಚುಗ್ಗನ್ತುನ ಮಾತರಂ;
ದೂರೇ ಮಂ ಪವಿಲೋಕೇನ್ತಿ [ಅಪಲೋಕೇನ್ತಿ (ಕ.), ಪಟಿವಿಲೋಕೇನ್ತಿ (ಸ್ಯಾ.)], ತೇ ನ ಪಸ್ಸಾಮಿ ದಾರಕೇ.
‘‘ಇದಂ ¶ ನೇಸಂ ಕೀಳಾನಕಂ, ಪತಿತಂ ಪಣ್ಡುಬೇಳುವಂ;
ತ್ಯಜ್ಜ ಪುತ್ತೇ ನ ಪಸ್ಸಾಮಿ, ಜಾಲಿಂ ಕಣ್ಹಾಜಿನಂ ಚುಭೋ.
‘‘ಥನಾ ಚ ಮಯ್ಹಿಮೇ ಪೂರಾ, ಉರೋ ಚ ಸಮ್ಪದಾಲತಿ;
ತ್ಯಜ್ಜ ಪುತ್ತೇ ನ ಪಸ್ಸಾಮಿ, ಜಾಲಿಂ ಕಣ್ಹಾಜಿನಂ ಚುಭೋ.
‘‘ಉಚ್ಛಙ್ಗೇಕೋ ವಿಚಿನಾತಿ, ಥನಮೇಕಾವಲಮ್ಬತಿ;
ತ್ಯಜ್ಜ ಪುತ್ತೇ ನ ಪಸ್ಸಾಮಿ, ಜಾಲಿಂ ಕಣ್ಹಾಜಿನಂ ಚುಭೋ.
‘‘ಯಸ್ಸು ¶ ಸಾಯನ್ಹಸಮಯಂ, ಪುತ್ತಕಾ ಪಂಸುಕುಣ್ಠಿತಾ;
ಉಚ್ಛಙ್ಗೇ ಮೇ ವಿವತ್ತನ್ತಿ, ತೇ ನ ಪಸ್ಸಾಮಿ ದಾರಕೇ.
‘‘ಅಯಂ ಸೋ ಅಸ್ಸಮೋ ಪುಬ್ಬೇ, ಸಮಜ್ಜೋ ಪಟಿಭಾತಿ ಮಂ;
ತ್ಯಜ್ಜ ಪುತ್ತೇ ಅಪಸ್ಸನ್ತ್ಯಾ, ಭಮತೇ ವಿಯ ಅಸ್ಸಮೋ.
‘‘ಕಿಮಿದಂ ಅಪ್ಪಸದ್ದೋವ, ಅಸ್ಸಮೋ ಪಟಿಭಾತಿ ಮಂ;
ಕಾಕೋಲಾಪಿ ನ ವಸ್ಸನ್ತಿ, ಮತಾ ಮೇ ನೂನ ದಾರಕಾ.
‘‘ಕಿಮಿದಂ ಅಪ್ಪಸದ್ದೋವ, ಅಸ್ಸಮೋ ಪಟಿಭಾತಿ ಮಂ;
ಸಕುಣಾಪಿ ನ ವಸ್ಸನ್ತಿ, ಮತಾ ಮೇ ನೂನ ದಾರಕಾ.
‘‘ಕಿಮಿದಂ ತುಣ್ಹಿಭೂತೋಸಿ, ಅಪಿ ರತ್ತೇವ ಮೇ ಮನೋ;
ಕಾಕೋಲಾಪಿ ನ ವಸ್ಸನ್ತಿ, ಮತಾ ಮೇ ನೂನ ದಾರಕಾ.
‘‘ಕಿಮಿದಂ ¶ ತುಣ್ಹಿಭೂತೋಸಿ, ಅಪಿ ರತ್ತೇವ ಮೇ ಮನೋ;
ಸಕುಣಾಪಿ ನ ವಸ್ಸನ್ತಿ, ಮತಾ ಮೇ ನೂನ ದಾರಕಾ.
‘‘ಕಚ್ಚಿ ನು ಮೇ ಅಯ್ಯಪುತ್ತ, ಮಿಗಾ ಖಾದಿಂಸು ದಾರಕೇ;
ಅರಞ್ಞೇ ಇರಿಣೇ ವಿವನೇ, ಕೇನ ನೀತಾ ಮೇ ದಾರಕಾ.
‘‘ಅದು ತೇ ಪಹಿತಾ ದೂತಾ, ಅದು ಸುತ್ತಾ ಪಿಯಂವದಾ;
ಅದು ಬಹಿ ನೋ ನಿಕ್ಖನ್ತಾ, ಖಿಡ್ಡಾಸು ಪಸುತಾ ನು ತೇ.
‘‘ನೇವಾಸಂ ಕೇಸಾ ದಿಸ್ಸನ್ತಿ, ಹತ್ಥಪಾದಾ ಚ ಜಾಲಿನೋ;
ಸಕುಣಾನಞ್ಚ ಓಪಾತೋ, ಕೇನ ನೀತಾ ಮೇ ದಾರಕಾ.
‘‘ಇದಂ ತತೋ ದುಕ್ಖತರಂ, ಸಲ್ಲವಿದ್ಧೋ ಯಥಾ ವಣೋ;
ತ್ಯಜ್ಜ ಪುತ್ತೇ ನ ಪಸ್ಸಾಮಿ, ಜಾಲಿಂ ಕಣ್ಹಾಜಿನಂ ಚುಭೋ.
‘‘ಇದಮ್ಪಿ ದುತಿಯಂ ಸಲ್ಲಂ, ಕಮ್ಪೇತಿ ಹದಯಂ ಮಮ;
ಯಞ್ಚ ಪುತ್ತೇ ನ ಪಸ್ಸಾಮಿ, ತ್ವಞ್ಚ ಮಂ ನಾಭಿಭಾಸಸಿ.
‘‘ಅಜ್ಜೇವ [ಅಜ್ಜ ಚೇ (ಸ್ಯಾ.)] ಮೇ ಇಮಂ ರತ್ತಿಂ, ರಾಜಪುತ್ತ ನ ಸಂಸಸಿ;
ಮಞ್ಞೇ ಓಕ್ಕನ್ತಸನ್ತಂ [ಉಕ್ಕನ್ತಸತ್ತಂ (ಸೀ. ಪೀ.)] ಮಂ, ಪಾತೋ ದಕ್ಖಿಸಿ ನೋ ಮತಂ’’.
‘‘ನೂನ ¶ ಮದ್ದೀ ವರಾರೋಹಾ, ರಾಜಪುತ್ತೀ ಯಸಸ್ಸಿನೀ;
ಪಾತೋ ಗತಾಸಿ ಉಞ್ಛಾಯ, ಕಿಮಿದಂ ಸಾಯಮಾಗತಾ’’.
‘‘ನನು ¶ ತ್ವಂ ಸದ್ದಮಸ್ಸೋಸಿ, ಯೇ ಸರಂ ಪಾತುಮಾಗತಾ;
ಸೀಹಸ್ಸಪಿ ನದನ್ತಸ್ಸ, ಬ್ಯಗ್ಘಸ್ಸ ಚ ನಿಕುಜ್ಜಿತಂ.
‘‘ಅಹು ಪುಬ್ಬನಿಮಿತ್ತಂ ಮೇ, ವಿಚರನ್ತ್ಯಾ ಬ್ರಹಾವನೇ;
ಖಣಿತ್ತೋ ಮೇ ಹತ್ಥಾ ಪತಿತೋ, ಉಗ್ಗೀವಞ್ಚಾಪಿ [ಉಙ್ಗೀವಞ್ಚಾಪಿ (ಕ.)] ಅಂಸತೋ.
‘‘ತದಾಹಂ ¶ ಬ್ಯಥಿತಾ ಭೀತಾ, ಪುಥು ಕತ್ವಾನ ಪಞ್ಜಲಿಂ;
ಸಬ್ಬದಿಸಾ ನಮಸ್ಸಿಸ್ಸಂ, ಅಪಿ ಸೋತ್ಥಿ ಇತೋ ಸಿಯಾ.
‘‘ಮಾ ಹೇವ ನೋ ರಾಜಪುತ್ತೋ, ಹತೋ ಸೀಹೇನ ದೀಪಿನಾ;
ದಾರಕಾ ವಾ ಪರಾಮಟ್ಠಾ, ಅಚ್ಛಕೋಕತರಚ್ಛಿಹಿ.
‘‘ಸೀಹೋ ಬ್ಯಗ್ಘೋ ಚ ದೀಪಿ ಚ, ತಯೋ ವಾಳಾ ವನೇ ಮಿಗಾ;
ತೇ ಮಂ ಪರಿಯಾವರುಂ ಮಗ್ಗಂ, ತೇನ ಸಾಯಮ್ಹಿ ಆಗತಾ.
‘‘ಅಹಂ ಪತಿಞ್ಚ ಪುತ್ತೇ ಚ, ಆಚೇರಮಿವ ಮಾಣವೋ;
ಅನುಟ್ಠಿತಾ ದಿವಾರತ್ತಿಂ, ಜಟಿನೀ ಬ್ರಹ್ಮಚಾರಿನೀ.
‘‘ಅಜಿನಾನಿ ಪರಿದಹಿತ್ವಾ, ವನಮೂಲಫಲಹಾರಿಯಾ;
ವಿಚರಾಮಿ ದಿವಾರತ್ತಿಂ, ತುಮ್ಹಂ ಕಾಮಾ ಹಿ ಪುತ್ತಕಾ.
‘‘ಅಹಂ ಸುವಣ್ಣಹಲಿದ್ದಿಂ, ಆಭತಂ ಪಣ್ಡುಬೇಳುವಂ;
ರುಕ್ಖಪಕ್ಕಾನಿ ಚಾಹಾಸಿಂ, ಇಮೇ ವೋ ಪುತ್ತ ಕೀಳನಾ.
‘‘ಇಮಂ ಮೂಲಾಳಿವತ್ತಕಂ, ಸಾಲುಕಂ ಚಿಞ್ಚಭೇದಕಂ;
ಭುಞ್ಜ ಖುದ್ದೇಹಿ ಸಂಯುತ್ತಂ, ಸಹ ಪುತ್ತೇಹಿ ಖತ್ತಿಯ.
‘‘ಪದುಮಂ ಜಾಲಿನೋ ದೇಹಿ, ಕುಮುದಞ್ಚ ಕುಮಾರಿಯಾ;
ಮಾಲಿನೇ ಪಸ್ಸ ನಚ್ಚನ್ತೇ, ಸಿವಿ ಪುತ್ತಾನಿ ಅವ್ಹಯ.
‘‘ತತೋ ಕಣ್ಹಾಜಿನಾಯಪಿ, ನಿಸಾಮೇಹಿ ರಥೇಸಭ;
ಮಞ್ಜುಸ್ಸರಾಯ ವಗ್ಗುಯಾ, ಅಸ್ಸಮಂ ಉಪಯನ್ತಿಯಾ [ಉಪಗನ್ಥಿಯಾ (ಸ್ಯಾ. ಕ.)].
‘‘ಸಮಾನಸುಖದುಕ್ಖಮ್ಹಾ, ರಟ್ಠಾ ಪಬ್ಬಾಜಿತಾ ಉಭೋ;
ಅಪಿ ¶ ಸಿವಿ ಪುತ್ತೇ ಪಸ್ಸೇಸಿ, ಜಾಲಿಂ ಕಣ್ಹಾಜಿನಂ ಚುಭೋ.
‘‘ಸಮಣೇ ¶ ಬ್ರಾಹ್ಮಣೇ ನೂನ, ಬ್ರಹ್ಮಚರಿಯಪರಾಯಣೇ;
ಅಹಂ ಲೋಕೇ ಅಭಿಸ್ಸಪಿಂ, ಸೀಲವನ್ತೇ ಬಹುಸ್ಸುತೇ;
ತ್ಯಜ್ಜ ಪುತ್ತೇ ನ ಪಸ್ಸಾಮಿ, ಜಾಲಿಂ ಕಣ್ಹಾಜಿನಂ ಚುಭೋ’’.
‘‘ಇಮೇ ¶ ತೇ ಜಮ್ಬುಕಾ ರುಕ್ಖಾ, ವೇದಿಸಾ ಸಿನ್ದುವಾರಕಾ;
ವಿವಿಧಾನಿ ರುಕ್ಖಜಾತಾನಿ, ತೇ ಕುಮಾರಾ ನ ದಿಸ್ಸರೇ.
‘‘ಅಸ್ಸತ್ಥಾ ಪನಸಾ ಚೇಮೇ, ನಿಗ್ರೋಧಾ ಚ ಕಪಿತ್ಥನಾ;
ವಿವಿಧಾನಿ ಫಲಜಾತಾನಿ, ತೇ ಕುಮಾರಾ ನ ದಿಸ್ಸರೇ.
‘‘ಇಮೇ ತಿಟ್ಠನ್ತಿ ಆರಾಮಾ, ಅಯಂ ಸೀತೂದಕಾ ನದೀ;
ಯತ್ಥಸ್ಸು ಪುಬ್ಬೇ ಕೀಳಿಂಸು, ತೇ ಕುಮಾರಾ ನ ದಿಸ್ಸರೇ.
‘‘ವಿವಿಧಾನಿ ಪುಪ್ಫಜಾತಾನಿ, ಅಸ್ಮಿಂ ಉಪರಿಪಬ್ಬತೇ;
ಯಾನಸ್ಸು ಪುಬ್ಬೇ ಧಾರಿಂಸು, ತೇ ಕುಮಾರಾ ನ ದಿಸ್ಸರೇ.
‘‘ವಿವಿಧಾನಿ ಫಲಜಾತಾನಿ, ಅಸ್ಮಿಂ ಉಪರಿಪಬ್ಬತೇ;
ಯಾನಸ್ಸು ಪುಬ್ಬೇ ಭುಞ್ಜಿಂಸು, ತೇ ಕುಮಾರಾ ನ ದಿಸ್ಸರೇ.
‘‘ಇಮೇ ತೇ ಹತ್ಥಿಕಾ ಅಸ್ಸಾ, ಬಲಿಬದ್ದಾ ಚ ತೇ ಇಮೇ;
ಯೇಹಿಸ್ಸು ಪುಬ್ಬೇ ಕೀಳಿಂಸು, ತೇ ಕುಮಾರಾ ನ ದಿಸ್ಸರೇ’’.
‘‘ಇಮೇ ಸಾಮಾ ಸಸೋಲೂಕಾ, ಬಹುಕಾ ಕದಲೀಮಿಗಾ;
ಯೇಹಿಸ್ಸು ಪುಬ್ಬೇ ಕೀಳಿಂಸು, ತೇ ಕುಮಾರಾ ನ ದಿಸ್ಸರೇ.
‘‘ಇಮೇ ಹಂಸಾ ಚ ಕೋಞ್ಚಾ ಚ, ಮಯೂರಾ ಚಿತ್ರಪೇಖುಣಾ;
ಯೇಹಿಸ್ಸು ಪುಬ್ಬೇ ಕೀಳಿಂಸು, ತೇ ಕುಮಾರಾ ನ ದಿಸ್ಸರೇ’’.
‘‘ಇಮಾ ¶ ತಾ ವನಗುಮ್ಬಾಯೋ, ಪುಪ್ಫಿತಾ ಸಬ್ಬಕಾಲಿಕಾ;
ಯತ್ಥಸ್ಸು ಪುಬ್ಬೇ ಕೀಳಿಂಸು, ತೇ ಕುಮಾರಾ ನ ದಿಸ್ಸರೇ.
‘‘ಇಮಾ ತಾ ಪೋಕ್ಖರಣೀ ರಮ್ಮಾ, ಚಕ್ಕವಾಕೂಪಕೂಜಿತಾ;
ಮನ್ದಾಲಕೇಹಿ ಸಞ್ಛನ್ನಾ, ಪದುಮುಪ್ಪಲಕೇಹಿ ಚ;
ಯತ್ಥಸ್ಸು ಪುಬ್ಬೇ ಕೀಳಿಂಸು, ತೇ ಕುಮಾರಾ ನ ದಿಸ್ಸರೇ.
‘‘ನ ತೇ ಕಟ್ಠಾನಿ ಭಿನ್ನಾನಿ, ನ ತೇ ಉದಕಮಾಹತಂ;
ಅಗ್ಗಿಪಿ ತೇ ನ ಹಾಪಿತೋ, ಕಿಂ ನು ಮನ್ದೋವ ಝಾಯಸಿ.
‘‘ಪಿಯೋ ¶ ಪಿಯೇನ ಸಙ್ಗಮ್ಮ, ಸಮೋ ಮೇ [ಸಮೋಹಂ (ಸ್ಯಾ.), ಸಮ್ಮೋಹಂ (ಕ.)] ಬ್ಯಪಹಞ್ಞತಿ;
ತ್ಯಜ್ಜ ಪುತ್ತೇ ನ ಪಸ್ಸಾಮಿ, ಜಾಲಿಂ ಕಣ್ಹಾಜಿನಂ ಚುಭೋ’’.
‘‘ನ ಖೋ ನೋ ದೇವ ಪಸ್ಸಾಮಿ, ಯೇನ ತೇ ನೀಹತಾ ಮತಾ;
ಕಾಕೋಲಾಪಿ ನ ವಸ್ಸನ್ತಿ, ಮತಾ ಮೇ ನೂನ ದಾರಕಾ.
‘‘ನ ಖೋ ನೋ ದೇವ ಪಸ್ಸಾಮಿ, ಯೇನ ತೇ ನೀಹತಾ ಮತಾ;
ಸಕುಣಾಪಿ ನ ವಸ್ಸನ್ತಿ, ಮತಾ ಮೇ ನೂನ ದಾರಕಾ’’.
‘‘ಸಾ ¶ ತತ್ಥ ಪರಿದೇವಿತ್ವಾ, ಪಬ್ಬತಾನಿ ವನಾನಿ ಚ;
ಪುನದೇವಸ್ಸಮಂ ಗನ್ತ್ವಾ, ರೋದಿ ಸಾಮಿಕಸನ್ತಿಕೇ [ಸಾಮಿಕಸನ್ತಿಕೇ ರೋದಿ (ಸೀ. ಸ್ಯಾ. ಪೀ.)].
‘‘‘ನ ಖೋ ನೋ ದೇವ ಪಸ್ಸಾಮಿ, ಯೇನ ತೇ ನೀಹತಾ ಮತಾ;
ಕಾಕೋಲಾಪಿ ನ ವಸ್ಸನ್ತಿ, ಮತಾ ಮೇ ನೂನ ದಾರಕಾ.
‘‘‘ನ ಖೋ ನೋ ದೇವ ಪಸ್ಸಾಮಿ, ಯೇನ ತೇ ನೀಹತಾ ಮತಾ;
ಸಕುಣಾಪಿ ನ ವಸ್ಸನ್ತಿ, ಮತಾ ಮೇ ನೂನ ದಾರಕಾ.
‘‘‘ನ ಖೋ ನೋ ದೇವ ಪಸ್ಸಾಮಿ, ಯೇನ ತೇ ನೀಹತಾ ಮತಾ;
ವಿಚರನ್ತಿ ¶ ರುಕ್ಖಮೂಲೇಸು, ಪಬ್ಬತೇಸು ಗುಹಾಸು ಚ’.
‘‘ಇತಿ ಮದ್ದೀ ವರಾರೋಹಾ, ರಾಜಪುತ್ತೀ ಯಸಸ್ಸಿನೀ;
ಬಾಹಾ ಪಗ್ಗಯ್ಹ ಕನ್ದಿತ್ವಾ, ತತ್ಥೇವ ಪತಿತಾ ಛಮಾ’’.
‘‘ತಮಜ್ಝಪತ್ತಂ ರಾಜಪುತ್ತಿಂ, ಉದಕೇನಾಭಿಸಿಞ್ಚಥ;
ಅಸ್ಸತ್ಥಂ ನಂ ವಿದಿತ್ವಾನ, ಅಥ ನಂ ಏತದಬ್ರವಿ’’.
‘‘ಆದಿಯೇನೇವ ತೇ ಮದ್ದಿ, ದುಕ್ಖಂ ನಕ್ಖಾತುಮಿಚ್ಛಿಸಂ;
ದಲಿದ್ದೋ ಯಾಚಕೋ ವುಡ್ಢೋ, ಬ್ರಾಹ್ಮಣೋ ಘರಮಾಗತೋ.
‘‘ತಸ್ಸ ದಿನ್ನಾ ಮಯಾ ಪುತ್ತಾ, ಮದ್ದಿ ಮಾ ಭಾಯಿ ಅಸ್ಸಸ;
ಮಂ ಪಸ್ಸ ಮದ್ದಿ ಮಾ ಪುತ್ತೇ, ಮಾ ಬಾಳ್ಹಂ ಪರಿದೇವಸಿ;
ಲಚ್ಛಾಮ ಪುತ್ತೇ ಜೀವನ್ತಾ, ಅರೋಗಾ ಚ ಭವಾಮಸೇ.
‘‘ಪುತ್ತೇ ಪಸುಞ್ಚ ಧಞ್ಞಞ್ಚ, ಯಞ್ಚ ಅಞ್ಞಂ ಘರೇ ಧನಂ;
ದಜ್ಜಾ ಸಪ್ಪುರಿಸೋ ದಾನಂ, ದಿಸ್ವಾ ಯಾಚಕಮಾಗತಂ;
ಅನುಮೋದಾಹಿ ಮೇ ಮದ್ದಿ, ಪುತ್ತಕೇ ದಾನಮುತ್ತಮಂ’’.
‘‘ಅನುಮೋದಾಮಿ ¶ ತೇ ದೇವ, ಪುತ್ತಕೇ ದಾನಮುತ್ತಮಂ;
ದತ್ವಾ ಚಿತ್ತಂ ಪಸಾದೇಹಿ, ಭಿಯ್ಯೋ ದಾನಂ ದದೋ ಭವ.
‘‘ಯೋ ತ್ವಂ ಮಚ್ಛೇರಭೂತೇಸು, ಮನುಸ್ಸೇಸು ಜನಾಧಿಪ;
ಬ್ರಾಹ್ಮಣಸ್ಸ ಅದಾ ದಾನಂ, ಸಿವೀನಂ ರಟ್ಠವಡ್ಢನೋ’’.
‘‘ನಿನ್ನಾದಿತಾ ತೇ ಪಥವೀ, ಸದ್ದೋ ತೇ ತಿದಿವಙ್ಗತೋ;
ಸಮನ್ತಾ ವಿಜ್ಜುತಾ ಆಗುಂ, ಗಿರೀನಂವ ಪತಿಸ್ಸುತಾ.
‘‘ತಸ್ಸ ತೇ ಅನುಮೋದನ್ತಿ, ಉಭೋ ನಾರದಪಬ್ಬತಾ;
ಇನ್ದೋ ¶ ಚ ಬ್ರಹ್ಮಾ ಪಜಾಪತಿ, ಸೋಮೋ ಯಮೋ ವೇಸ್ಸವಣೋ;
ಸಬ್ಬೇ ದೇವಾನುಮೋದನ್ತಿ, ತಾವತಿಂಸಾ ಸಇನ್ದಕಾ.
‘‘ಇತಿ ¶ ಮದ್ದೀ ವರಾರೋಹಾ, ರಾಜಪುತ್ತೀ ಯಸಸ್ಸಿನೀ;
ವೇಸ್ಸನ್ತರಸ್ಸ ಅನುಮೋದಿ, ಪುತ್ತಕೇ ದಾನಮುತ್ತಮಂ’’.
ಮದ್ದೀಪಬ್ಬಂ ನಾಮ.
ಸಕ್ಕಪಬ್ಬಂ
ತತೋ ರತ್ಯಾ ವಿವಸಾನೇ, ಸೂರಿಯಸ್ಸುಗ್ಗಮನಂ ಪತಿ;
ಸಕ್ಕೋ ಬ್ರಾಹ್ಮಣವಣ್ಣೇನ, ಪಾತೋ ತೇಸಂ ಅದಿಸ್ಸಥ.
‘‘ಕಚ್ಚಿ ನು ಭೋತೋ ಕುಸಲಂ, ಕಚ್ಚಿ ಭೋತೋ ಅನಾಮಯಂ;
ಕಚ್ಚಿ ಉಞ್ಛೇನ ಯಾಪೇಥ, ಕಚ್ಚಿ ಮೂಲಫಲಾ ಬಹೂ.
‘‘ಕಚ್ಚಿ ಡಂಸಾ ಮಕಸಾ ಚ, ಅಪ್ಪಮೇವ ಸರೀಸಪಾ;
ವನೇ ವಾಳಮಿಗಾಕಿಣ್ಣೇ, ಕಚ್ಚಿ ಹಿಂಸಾ ನ ವಿಜ್ಜತಿ’’.
‘‘ಕುಸಲಞ್ಚೇವ ನೋ ಬ್ರಹ್ಮೇ, ಅಥೋ ಬ್ರಹ್ಮೇ ಅನಾಮಯಂ;
ಅಥೋ ಉಞ್ಛೇನ ಯಾಪೇಮ, ಅಥೋ ಮೂಲಫಲಾ ಬಹೂ.
‘‘ಅಥೋ ಡಂಸಾ ಮಕಸಾ ಚ, ಅಪ್ಪಮೇವ ಸರೀಸಪಾ;
ವನೇ ವಾಳಮಿಗಾಕಿಣ್ಣೇ, ಹಿಂಸಾ ಮಯ್ಹಂ ನ ವಿಜ್ಜತಿ.
‘‘ಸತ್ತ ನೋ ಮಾಸೇ ವಸತಂ, ಅರಞ್ಞೇ ಜೀವಸೋಕಿನಂ;
ಇದಂ ದುತಿಯಂ ಪಸ್ಸಾಮ, ಬ್ರಾಹ್ಮಣಂ ದೇವವಣ್ಣಿನಂ;
ಆದಾಯ ವೇಳುವಂ ದಣ್ಡಂ, ಧಾರೇನ್ತಂ ಅಜಿನಕ್ಖಿಪಂ.
‘‘ಸ್ವಾಗತಂ ¶ ತೇ ಮಹಾಬ್ರಹ್ಮೇ, ಅಥೋ ಮೇ ಅದುರಾಗತಂ;
ಅನ್ತೋ ¶ ಪವಿಸ ಭದ್ದನ್ತೇ, ಪಾದೇ ಪಕ್ಖಾಲಯಸ್ಸು ತೇ.
‘‘ತಿನ್ದುಕಾನಿ ಪಿಯಾಲಾನಿ, ಮಧುಕೇ ಕಾಸುಮಾರಿಯೋ;
ಫಲಾನಿ ಖುದ್ದಕಪ್ಪಾನಿ, ಭುಞ್ಜ ಬ್ರಹ್ಮೇ ವರಂ ವರಂ.
‘‘ಇದಮ್ಪಿ ಪಾನೀಯಂ ಸೀತಂ, ಆಭತಂ ಗಿರಿಗಬ್ಭರಾ;
ತತೋ ಪಿವ ಮಹಾಬ್ರಹ್ಮೇ, ಸಚೇ ತ್ವಂ ಅಭಿಕಙ್ಖಸಿ.
‘‘ಅಥ ತ್ವಂ ಕೇನ ವಣ್ಣೇನ, ಕೇನ ವಾ ಪನ ಹೇತುನಾ;
ಅನುಪ್ಪತ್ತೋ ಬ್ರಹಾರಞ್ಞಂ, ತಂ ಮೇ ಅಕ್ಖಾಹಿ ಪುಚ್ಛಿತೋ’’.
‘‘ಯಥಾ ವಾರಿವಹೋ ಪೂರೋ, ಸಬ್ಬಕಾಲಂ ನ ಖೀಯತಿ;
ಏವಂ ತಂ ಯಾಚಿತಾಗಚ್ಛಿಂ, ಭರಿಯಂ ಮೇ ದೇಹಿ ಯಾಚಿತೋ’’.
‘‘ದದಾಮಿ ¶ ನ ವಿಕಮ್ಪಾಮಿ, ಯಂ ಮಂ ಯಾಚಸಿ ಬ್ರಾಹ್ಮಣ;
ಸನ್ತಂ ನಪ್ಪಟಿಗುಯ್ಹಾಮಿ, ದಾನೇ ಮೇ ರಮತೀ ಮನೋ’’.
‘‘ಮದ್ದಿಂ ಹತ್ಥೇ ಗಹೇತ್ವಾನ, ಉದಕಸ್ಸ ಕಮಣ್ಡಲುಂ;
ಬ್ರಾಹ್ಮಣಸ್ಸ ಅದಾ ದಾನಂ, ಸಿವೀನಂ ರಟ್ಠವಡ್ಢನೋ.
‘‘ತದಾಸಿ ಯಂ ಭಿಂಸನಕಂ, ತದಾಸಿ ಲೋಮಹಂಸನಂ;
ಮದ್ದಿಂ ಪರಿಚಜನ್ತಸ್ಸ, ಮೇದನೀ ಸಮ್ಪಕಮ್ಪಥ.
‘‘ನೇವ ಸಾ ಮದ್ದೀ ಭಾಕುಟಿ, ನ ಸನ್ಧೀಯತಿ ನ ರೋದತಿ;
ಪೇಕ್ಖತೇವಸ್ಸ ತುಣ್ಹೀ ಸಾ, ಏಸೋ ಜಾನಾತಿ ಯಂ ವರಂ’’.
‘‘ಕೋಮಾರೀ ¶ ಯಸ್ಸಾಹಂ ಭರಿಯಾ, ಸಾಮಿಕೋ ಮಮ ಇಸ್ಸರೋ;
ಯಸ್ಸಿಚ್ಛೇ ತಸ್ಸ ಮಂ ದಜ್ಜಾ, ವಿಕ್ಕಿಣೇಯ್ಯ ಹನೇಯ್ಯ ವಾ’’.
‘‘ತೇಸಂ ಸಙ್ಕಪ್ಪಮಞ್ಞಾಯ, ದೇವಿನ್ದೋ ಏತದಬ್ರವಿ;
ಸಬ್ಬೇ ಜಿತಾ ತೇ ಪಚ್ಚೂಹಾ, ಯೇ ದಿಬ್ಬಾ ಯೇ ಚ ಮಾನುಸಾ.
‘‘ನಿನ್ನಾದಿತಾ ತೇ ಪಥವೀ, ಸದ್ದೋ ತೇ ತಿದಿವಙ್ಗತೋ;
ಸಮನ್ತಾ ವಿಜ್ಜುತಾ ಆಗುಂ, ಗಿರೀನಂವ ಪತಿಸ್ಸುತಾ.
‘‘ತಸ್ಸ ತೇ ಅನುಮೋದನ್ತಿ, ಉಭೋ ನಾರದಪಬ್ಬತಾ;
ಇನ್ದೋ ಚ ಬ್ರಹ್ಮಾ ಪಜಾಪತಿ, ಸೋಮೋ ಯಮೋ ವೇಸ್ಸವಣೋ;
ಸಬ್ಬೇ ದೇವಾನುಮೋದನ್ತಿ, ದುಕ್ಕರಞ್ಹಿ ಕರೋತಿ ಸೋ.
‘‘ದುದ್ದದಂ ¶ ದದಮಾನಾನಂ, ದುಕ್ಕರಂ ಕಮ್ಮ ಕುಬ್ಬತಂ;
ಅಸನ್ತೋ ನಾನುಕುಬ್ಬನ್ತಿ, ಸತಂ ಧಮ್ಮೋ ದುರನ್ನಯೋ.
‘‘ತಸ್ಮಾ ಸತಞ್ಚ ಅಸತಂ, ನಾನಾ ಹೋತಿ ಇತೋ ಗತಿ;
ಅಸನ್ತೋ ನಿರಯಂ ಯನ್ತಿ, ಸನ್ತೋ ಸಗ್ಗಪರಾಯಣಾ.
‘‘ಯಮೇತಂ ಕುಮಾರೇ ಅದಾ, ಭರಿಯಂ ಅದಾ ವನೇ ವಸಂ;
ಬ್ರಹ್ಮಯಾನಮನೋಕ್ಕಮ್ಮ, ಸಗ್ಗೇ ತೇ ತಂ ವಿಪಚ್ಚತು’’.
‘‘ದದಾಮಿ ಭೋತೋ ಭರಿಯಂ, ಮದ್ದಿಂ ಸಬ್ಬಙ್ಗಸೋಭನಂ;
ತ್ವಞ್ಚೇವ ಮದ್ದಿಯಾ ಛನ್ನೋ, ಮದ್ದೀ ಚ ಪತಿನಾ ಸಹ.
‘‘ಯಥಾ ¶ ಪಯೋ ಚ ಸಙ್ಖೋ ಚ, ಉಭೋ ಸಮಾನವಣ್ಣಿನೋ;
ಏವಂ ತುವಞ್ಚ ಮದ್ದೀ ಚ, ಸಮಾನಮನಚೇತಸಾ.
‘‘ಅವರುದ್ಧೇತ್ಥ ಅರಞ್ಞಸ್ಮಿಂ, ಉಭೋ ಸಮ್ಮಥ ಅಸ್ಸಮೇ;
ಖತ್ತಿಯಾ ಗೋತ್ತಸಮ್ಪನ್ನಾ, ಸುಜಾತಾ ಮಾತುಪೇತ್ತಿತೋ;
ಯಥಾ ಪುಞ್ಞಾನಿ ಕಯಿರಾಥ, ದದನ್ತಾ ಅಪರಾಪರಂ’’.
‘‘ಸಕ್ಕೋಹಮಸ್ಮಿ ¶ ದೇವಿನ್ದೋ, ಆಗತೋಸ್ಮಿ ತವನ್ತಿಕೇ;
ವರಂ ವರಸ್ಸು ರಾಜಿಸಿ, ವರೇ ಅಟ್ಠ ದದಾಮಿ ತೇ’’.
‘‘ವರಂ ಚೇ ಮೇ ಅದೋ ಸಕ್ಕ, ಸಬ್ಬಭೂತಾನಮಿಸ್ಸರ;
ಪಿತಾ ಮಂ ಅನುಮೋದೇಯ್ಯ, ಇತೋ ಪತ್ತಂ ಸಕಂ ಘರಂ;
ಆಸನೇನ ನಿಮನ್ತೇಯ್ಯ, ಪಠಮೇತಂ ವರಂ ವರೇ.
‘‘ಪುರಿಸಸ್ಸ ವಧಂ ನ ರೋಚೇಯ್ಯಂ, ಅಪಿ ಕಿಬ್ಬಿಸಕಾರಕಂ;
ವಜ್ಝಂ ವಧಮ್ಹಾ ಮೋಚೇಯ್ಯಂ, ದುತಿಯೇತಂ ವರಂ ವರೇ.
‘‘ಯೇ ವುಡ್ಢಾ ಯೇ ಚ ದಹರಾ, ಯೇ ಚ ಮಜ್ಝಿಮಪೋರಿಸಾ;
ಮಮೇವ ಉಪಜೀವೇಯ್ಯುಂ, ತತಿಯೇತಂ ವರಂ ವರೇ.
‘‘ಪರದಾರಂ ನ ಗಚ್ಛೇಯ್ಯಂ, ಸದಾರಪಸುತೋ ಸಿಯಂ;
ಥೀನಂ ವಸಂ ನ ಗಚ್ಛೇಯ್ಯಂ, ಚತುತ್ಥೇತಂ ವರಂ ವರೇ.
‘‘ಪುತ್ತೋ ಮೇ ಸಕ್ಕ ಜಾಯೇಥ, ಸೋ ಚ ದೀಘಾಯುಕೋ ಸಿಯಾ;
ಧಮ್ಮೇನ ಜಿನೇ ಪಥವಿಂ, ಪಞ್ಚಮೇತಂ ವರಂ ವರೇ.
‘‘ತತೋ ರತ್ಯಾ ವಿವಸಾನೇ, ಸೂರಿಯಸ್ಸುಗ್ಗಮನಂ ಪತಿ;
ದಿಬ್ಬಾ ಭಕ್ಖಾ ಪಾತುಭವೇಯ್ಯುಂ, ಛಟ್ಠಮೇತಂ ವರಂ ವರೇ.
‘‘ದದತೋ ¶ ¶ ಮೇ ನ ಖೀಯೇಥ, ದತ್ವಾ ನಾನುತಪೇಯ್ಯಹಂ;
ದದಂ ಚಿತ್ತಂ ಪಸಾದೇಯ್ಯಂ, ಸತ್ತಮೇತಂ ವರಂ ವರೇ.
‘‘ಇತೋ ವಿಮುಚ್ಚಮಾನಾಹಂ, ಸಗ್ಗಗಾಮೀ ವಿಸೇಸಗೂ;
ಅನಿವತ್ತಿ ತತೋ ಅಸ್ಸಂ, ಅಟ್ಠಮೇತಂ ವರಂ ವರೇ’’.
‘‘ತಸ್ಸ ತಂ ವಚನಂ ಸುತ್ವಾ, ದೇವಿನ್ದೋ ಏತದಬ್ರವಿ;
ಅಚಿರಂ ವತ ತೇ ತತೋ, ಪಿತಾ ತಂ ದಟ್ಠುಮೇಸ್ಸತಿ’’.
‘‘ಇದಂ ವತ್ವಾನ ಮಘವಾ, ದೇವರಾಜಾ ಸುಜಮ್ಪತಿ;
ವೇಸ್ಸನ್ತರೇ ವರಂ ದತ್ವಾ, ಸಗ್ಗಕಾಯಂ ಅಪಕ್ಕಮಿ’’.
ಸಕ್ಕಪಬ್ಬಂ ನಾಮ.
ಮಹಾರಾಜಪಬ್ಬಂ
‘‘ಕಸ್ಸೇತಂ ¶ ಮುಖಮಾಭಾತಿ, ಹೇಮಂ ವುತ್ತತ್ತಮಗ್ಗಿನಾ;
ನಿಕ್ಖಂವ ಜಾತರೂಪಸ್ಸ, ಉಕ್ಕಾಮುಖಪಹಂಸಿತಂ.
‘‘ಉಭೋ ಸದಿಸಪಚ್ಚಙ್ಗಾ, ಉಭೋ ಸದಿಸಲಕ್ಖಣಾ;
ಜಾಲಿಸ್ಸ ಸದಿಸೋ ಏಕೋ, ಏಕಾ ಕಣ್ಹಾಜಿನಾ ಯಥಾ.
‘‘ಸೀಹಾ ಬಿಲಾವ ನಿಕ್ಖನ್ತಾ, ಉಭೋ ಸಮ್ಪತಿರೂಪಕಾ;
ಜಾತರೂಪಮಯಾಯೇವ, ಇಮೇ ದಿಸ್ಸನ್ತಿ ದಾರಕಾ’’.
‘‘ಕುತೋ ನು ಭವಂ ಭಾರದ್ವಾಜ, ಇಮೇ ಆನೇಸಿ ದಾರಕೇ;
ಅಜ್ಜ ರಟ್ಠಂ ಅನುಪ್ಪತ್ತೋ, ಕುಹಿಂ ಗಚ್ಛಸಿ ಬ್ರಾಹ್ಮಣ’’ [ಇದಂ ಗಾಥದ್ಧಂ ಪೀ ಪೋತ್ಥಕೇ ನತ್ಥಿ].
‘‘ಮಯ್ಹಂ ತೇ ದಾರಕಾ ದೇವ, ದಿನ್ನಾ ವಿತ್ತೇನ ಸಞ್ಜಯ;
ಅಜ್ಜ ಪನ್ನರಸಾ ರತ್ತಿ, ಯತೋ ಲದ್ಧಾ [ದಿನ್ನಾ (ಸೀ. ಪೀ.)] ಮೇ ದಾರಕಾ’’.
‘‘ಕೇನ ¶ ವಾ ವಾಚಪೇಯ್ಯೇನ, ಸಮ್ಮಾಞಾಯೇನ ಸದ್ದಹೇ;
ಕೋ ತೇತಂ ದಾನಮದದಾ, ಪುತ್ತಕೇ ದಾನಮುತ್ತಮಂ’’.
‘‘ಯೋ ಯಾಚತಂ ಪತಿಟ್ಠಾಸಿ, ಭೂತಾನಂ ಧರಣೀರಿವ;
ಸೋ ಮೇ ವೇಸ್ಸನ್ತರೋ ರಾಜಾ, ಪುತ್ತೇದಾಸಿ ವನೇ ವಸಂ.
‘‘ಯೋ ಯಾಚತಂ ಗತೀ ಆಸಿ, ಸವನ್ತೀನಂವ ಸಾಗರೋ;
ಸೋ ಮೇ ವೇಸ್ಸನ್ತರೋ ರಾಜಾ, ಪುತ್ತೇದಾಸಿ ವನೇ ವಸಂ’’.
‘‘ದುಕ್ಕಟಂ ¶ ವತ ಭೋ ರಞ್ಞಾ, ಸದ್ಧೇನ ಘರಮೇಸಿನಾ;
ಕಥಂ ನು ಪುತ್ತಕೇ ದಜ್ಜಾ, ಅರಞ್ಞೇ ಅವರುದ್ಧಕೋ.
‘‘ಇಮಂ ಭೋನ್ತೋ ನಿಸಾಮೇಥ, ಯಾವನ್ತೇತ್ಥ ಸಮಾಗತಾ;
ಕಥಂ ವೇಸ್ಸನ್ತರೋ ರಾಜಾ, ಪುತ್ತೇದಾಸಿ ವನೇ ವಸಂ.
‘‘ದಾಸಿಂ ದಾಸಂ ಚ [ದಾಸಂ ದಾಸಿ ಚ (ಸೀ. ಪೀ.)] ಸೋ ದಜ್ಜಾ, ಅಸ್ಸಂ ಚಸ್ಸತರೀರಥಂ;
ಹತ್ಥಿಞ್ಚ ಕುಞ್ಜರಂ ದಜ್ಜ, ಕಥಂ ಸೋ ದಜ್ಜ ದಾರಕೇ’’.
‘‘ಯಸ್ಸ ನಸ್ಸ [ನತ್ಥಿ (ಸೀ. ಪೀ.)] ಘರೇ ದಾಸೋ, ಅಸ್ಸೋ ಚಸ್ಸತರೀರಥೋ;
ಹತ್ಥೀ ಚ ಕುಞ್ಜರೋ ನಾಗೋ, ಕಿಂ ಸೋ ದಜ್ಜಾ ಪಿತಾಮಹ’’.
‘‘ದಾನಮಸ್ಸ ಪಸಂಸಾಮ, ನ ಚ ನಿನ್ದಾಮ ಪುತ್ತಕಾ;
ಕಥಂ ನು ಹದಯಂ ಆಸಿ, ತುಮ್ಹೇ ದತ್ವಾ ವನಿಬ್ಬಕೇ’’.
‘‘ದುಕ್ಖಸ್ಸ ಹದಯಂ ಆಸಿ, ಅಥೋ ಉಣ್ಹಮ್ಪಿ ಪಸ್ಸಸಿ;
ರೋಹಿನೀಹೇವ ¶ ತಮ್ಬಕ್ಖೀ, ಪಿತಾ ಅಸ್ಸೂನಿ ವತ್ತಯಿ’’.
‘‘ಯಂ ¶ ತಂ ಕಣ್ಹಾಜಿನಾವೋಚ, ಅಯಂ ಮಂ ತಾತ ಬ್ರಾಹ್ಮಣೋ;
ಲಟ್ಠಿಯಾ ಪಟಿಕೋಟೇತಿ, ಘರೇ ಜಾತಂವ ದಾಸಿಯಂ.
‘‘ನ ಚಾಯಂ ಬ್ರಾಹ್ಮಣೋ ತಾತ, ಧಮ್ಮಿಕಾ ಹೋನ್ತಿ ಬ್ರಾಹ್ಮಣಾ;
ಯಕ್ಖೋ ಬ್ರಾಹ್ಮಣವಣ್ಣೇನ, ಖಾದಿತುಂ ತಾತ ನೇತಿ ನೋ;
ನೀಯಮಾನೇ ಪಿಸಾಚೇನ, ಕಿನ್ನು ತಾತ ಉದಿಕ್ಖಸಿ’’.
‘‘ರಾಜಪುತ್ತೀ ಚ ವೋ ಮಾತಾ, ರಾಜಪುತ್ತೋ ಚ ವೋ ಪಿತಾ;
ಪುಬ್ಬೇ ಮೇ ಅಙ್ಗಮಾರುಯ್ಹ, ಕಿಂ ನು ತಿಟ್ಠಥ ಆರಕಾ’’.
‘‘ರಾಜಪುತ್ತೀ ಚ ನೋ ಮಾತಾ, ರಾಜಪುತ್ತೋ ಚ ನೋ ಪಿತಾ;
ದಾಸಾ ಮಯಂ ಬ್ರಾಹ್ಮಣಸ್ಸ, ತಸ್ಮಾ ತಿಟ್ಠಾಮ ಆರಕಾ’’.
‘‘ಮಾ ಸಮ್ಮೇವಂ ಅವಚುತ್ಥ, ಡಯ್ಹತೇ ಹದಯಂ ಮಮ;
ಚಿತಕಾಯಂವ ಮೇ ಕಾಯೋ, ಆಸನೇ ನ ಸುಖಂ ಲಭೇ.
‘‘ಮಾ ಸಮ್ಮೇವಂ ಅವಚುತ್ಥ, ಭಿಯ್ಯೋ ಸೋಕಂ ಜನೇಥ ಮಂ;
ನಿಕ್ಕಿಣಿಸ್ಸಾಮಿ ದಬ್ಬೇನ, ನ ವೋ ದಾಸಾ ಭವಿಸ್ಸಥ.
‘‘ಕಿಮಗ್ಘಿಯಞ್ಹಿ ¶ ವೋ ತಾತ, ಬ್ರಾಹ್ಮಣಸ್ಸ ಪಿತಾ ಅದಾ;
ಯಥಾಭೂತಂ ಮೇ ಅಕ್ಖಾಥ, ಪಟಿಪಾದೇನ್ತು ಬ್ರಾಹ್ಮಣಂ’’.
‘‘ಸಹಸ್ಸಗ್ಘಞ್ಹಿ ಮಂ ತಾತ, ಬ್ರಾಹ್ಮಣಸ್ಸ ಪಿತಾ ಅದಾ;
ಅಥ [ಅಚ್ಛಂ (ಸೀ. ಸ್ಯಾ. ಕ.)] ಕಣ್ಹಾಜಿನಂ ಕಞ್ಞಂ, ಹತ್ಥಿನಾ ಚ ಸತೇನ ಚ’’ [ಹತ್ಥಿಆದಿಸತೇನ ಚ (ಸ್ಯಾ.), ಹತ್ಥಿನಾದಿಸತೇನ ಚ (ಕ.)].
‘‘ಉಟ್ಠೇಹಿ ಕತ್ತೇ ತರಮಾನೋ, ಬ್ರಾಹ್ಮಣಸ್ಸ ಅವಾಕರ;
ದಾಸಿಸತಂ ದಾಸಸತಂ, ಗವಂ ಹತ್ಥುಸಭಂ ಸತಂ;
ಜಾತರೂಪಸಹಸ್ಸಞ್ಚ ¶ , ಪುತ್ತಾನಂ ದೇಹಿ ನಿಕ್ಕಯಂ.
‘‘ತತೋ ಕತ್ತಾ ತರಮಾನೋ, ಬ್ರಾಹ್ಮಣಸ್ಸ ಅವಾಕರಿ;
ದಾಸಿಸತಂ ದಾಸಸತಂ, ಗವಂ ಹತ್ಥುಸಭಂ ಸತಂ;
ಜಾತರೂಪಸಹಸ್ಸಞ್ಚ, ಪುತ್ತಾನಂದಾಸಿ ನಿಕ್ಕಯಂ’’.
‘‘ನಿಕ್ಕಿಣಿತ್ವಾ ನಹಾಪೇತ್ವಾ, ಭೋಜಯಿತ್ವಾನ ದಾರಕೇ;
ಸಮಲಙ್ಕರಿತ್ವಾ ಭಣ್ಡೇನ, ಉಚ್ಛಙ್ಗೇ ಉಪವೇಸಯುಂ.
‘‘ಸೀಸಂ ನ್ಹಾತೇ ಸುಚಿವತ್ಥೇ, ಸಬ್ಬಾಭರಣಭೂಸಿತೇ;
ರಾಜಾ ಅಙ್ಕೇ ಕರಿತ್ವಾನ, ಅಯ್ಯಕೋ ಪರಿಪುಚ್ಛಥ.
‘‘ಕುಣ್ಡಲೇ ಘುಸಿತೇ ಮಾಲೇ, ಸಬ್ಬಾಭರಣಭೂಸಿತೇ;
ರಾಜಾ ಅಙ್ಕೇ ಕರಿತ್ವಾನ, ಇದಂ ವಚನಮಬ್ರವಿ.
‘‘ಕಚ್ಚಿ ¶ ಉಭೋ ಅರೋಗಾ ತೇ, ಜಾಲಿ ಮಾತಾಪಿತಾ ತವ;
ಕಚ್ಚಿ ಉಞ್ಛೇನ ಯಾಪೇಥ, ಕಚ್ಚಿ ಮೂಲಫಲಾ ಬಹೂ.
‘‘ಕಚ್ಚಿ ಡಂಸಾ ಮಕಸಾ ಚ, ಅಪ್ಪಮೇವ ಸರೀಸಪಾ;
ವನೇ ವಾಳಮಿಗಾಕಿಣ್ಣೇ, ಕಚ್ಚಿ ಹಿಂಸಾ ನ ವಿಜ್ಜತಿ’’.
‘‘ಅಥೋ ಉಭೋ ಅರೋಗಾ ಮೇ, ದೇವ ಮಾತಾಪಿತಾ ಮಮ;
ಅಥೋ ¶ ಉಞ್ಛೇನ ಯಾಪೇನ್ತಿ, ಅಥೋ ಮೂಲಫಲಾ ಬಹೂ.
‘‘ಅಥೋ ಡಂಸಾ ಮಕಸಾ ಚ, ಅಪ್ಪಮೇವ ಸರೀಸಪಾ;
ವನೇ ವಾಳಮಿಗಾಕಿಣ್ಣೇ, ಹಿಂಸಾ ನೇಸಂ ನ ವಿಜ್ಜತಿ.
‘‘ಖಣನ್ತಾಲುಕಲಮ್ಬಾನಿ, ಬಿಲಾನಿ ತಕ್ಕಲಾನಿ ಚ;
ಕೋಲಂ ಭಲ್ಲಾತಕಂ ಬೇಲ್ಲಂ, ಸಾ ನೋ ಆಹತ್ವ ಪೋಸತಿ.
‘‘ಯಞ್ಚೇವ ¶ ಸಾ ಆಹರತಿ, ವನಮೂಲಫಲಹಾರಿಯಾ;
ತಂ ನೋ ಸಬ್ಬೇ ಸಮಾಗನ್ತ್ವಾ, ರತ್ತಿಂ ಭುಞ್ಜಾಮ ನೋ ದಿವಾ.
‘‘ಅಮ್ಮಾವ ನೋ ಕಿಸಾ ಪಣ್ಡು, ಆಹರನ್ತೀ ದುಮಪ್ಫಲಂ;
ವಾತಾತಪೇನ ಸುಖುಮಾಲೀ, ಪದುಮಂ ಹತ್ಥಗತಾಮಿವ.
‘‘ಅಮ್ಮಾಯ ಪತನೂಕೇಸಾ, ವಿಚರನ್ತ್ಯಾ ಬ್ರಹಾವನೇ;
ವನೇ ವಾಳಮಿಗಾಕಿಣ್ಣೇ, ಖಗ್ಗದೀಪಿನಿಸೇವಿತೇ.
‘‘ಕೇಸೇಸು ಜಟಂ ಬನ್ಧಿತ್ವಾ, ಕಚ್ಛೇ ಜಲ್ಲಮಧಾರಯಿ;
ಚಮ್ಮವಾಸೀ ಛಮಾ ಸೇತಿ, ಜಾತವೇದಂ ನಮಸ್ಸತಿ.
‘‘ಪುತ್ತಾ ಪಿಯಾ ಮನುಸ್ಸಾನಂ, ಲೋಕಸ್ಮಿಂ ಉದಪಜ್ಜಿಸುಂ;
ನ ಹಿ ನೂನಮ್ಹಾಕಂ ಅಯ್ಯಸ್ಸ, ಪುತ್ತೇ ಸ್ನೇಹೋ ಅಜಾಯಥ’’.
‘‘ದುಕ್ಕಟಞ್ಚ ಹಿ ನೋ ಪುತ್ತ, ಭೂನಹಚ್ಚಂ ಕತಂ ಮಯಾ;
ಯೋಹಂ ಸಿವೀನಂ ವಚನಾ, ಪಬ್ಬಾಜೇಸಿಮದೂಸಕಂ.
‘‘ಯಂ ಮೇ ಕಿಞ್ಚಿ ಇಧ ಅತ್ಥಿ, ಧನಂ ಧಞ್ಞಞ್ಚ ವಿಜ್ಜತಿ;
ಏತು ¶ ವೇಸ್ಸನ್ತರೋ ರಾಜಾ, ಸಿವಿರಟ್ಠೇ ಪಸಾಸತು’’.
‘‘ನ ದೇವ ಮಯ್ಹಂ ವಚನಾ, ಏಹಿತಿ ಸಿವಿಸುತ್ತಮೋ;
ಸಯಮೇವ ದೇವೋ ಗನ್ತ್ವಾ, ಸಿಞ್ಚ ಭೋಗೇಹಿ ಅತ್ರಜಂ’’.
‘‘ತತೋ ಸೇನಾಪತಿಂ ರಾಜಾ, ಸಜ್ಜಯೋ ಅಜ್ಝಭಾಸಥ;
ಹತ್ಥೀ ಅಸ್ಸಾ ರಥಾ ಪತ್ತೀ, ಸೇನಾ ಸನ್ನಾಹಯನ್ತು ನಂ;
ನೇಗಮಾ ಚ ಮಂ ಅನ್ವೇನ್ತು, ಬ್ರಾಹ್ಮಣಾ ಚ ಪುರೋಹಿತಾ.
‘‘ತತೋ ¶ ಸಟ್ಠಿಸಹಸ್ಸಾನಿ, ಯೋಧಿನೋ [ಯುಥಿನೋ (ಕ.)] ಚಾರುದಸ್ಸನಾ;
ಖಿಪ್ಪಮಾಯನ್ತು ಸನ್ನದ್ಧಾ, ನಾನಾವಣ್ಣೇಹಿಲಙ್ಕತಾ.
‘‘ನೀಲವತ್ಥಧರಾ ನೇಕೇ [ನೀಲವಣ್ಣಧರಾನೇಕೇ (ಸೀ. ಪೀ.), ನೀಲವತ್ಥಧರಾ ಏಕೇ (?)], ಪೀತಾನೇಕೇ ನಿವಾಸಿತಾ;
ಅಞ್ಞೇ ಲೋಹಿತಉಣ್ಹೀಸಾ, ಸುದ್ಧಾನೇಕೇ ನಿವಾಸಿತಾ;
ಖಿಪ್ಪಮಾಯನ್ತು ಸನ್ನದ್ಧಾ, ನಾನಾವಣ್ಣೇಹಿಲಙ್ಕತಾ.
‘‘ಹಿಮವಾ ಯಥಾ ಗನ್ಧಧರೋ, ಪಬ್ಬತೋ ಗನ್ಧಮಾದನೋ;
ನಾನಾರುಕ್ಖೇಹಿ ಸಞ್ಛನ್ನೋ, ಮಹಾಭೂತಗಣಾಲಯೋ.
‘‘ಓಸಧೇಹಿ ¶ ಚ ದಿಬ್ಬೇಹಿ, ದಿಸಾ ಭಾತಿ ಪವಾತಿ ಚ;
ಖಿಪ್ಪಮಾಯನ್ತು ಸನ್ನದ್ಧಾ, ದಿಸಾ ಭನ್ತು ಪವನ್ತು ಚ.
‘‘ತತೋ ನಾಗಸಹಸ್ಸಾನಿ, ಯೋಜಯನ್ತು ಚತುದ್ದಸ;
ಸುವಣ್ಣಕಚ್ಛಾ ಮಾತಙ್ಗಾ, ಹೇಮಕಪ್ಪನವಾಸಸಾ.
‘‘ಆರೂಳ್ಹಾ ಗಾಮಣೀಯೇಹಿ, ತೋಮರಙ್ಕುಸಪಾಣಿಭಿ;
ಖಿಪ್ಪಮಾಯನ್ತು ಸನ್ನದ್ಧಾ, ಹತ್ಥಿಕ್ಖನ್ಧೇಹಿ ದಸ್ಸಿತಾ.
‘‘ತತೋ ಅಸ್ಸಸಹಸ್ಸಾನಿ, ಯೋಜಯನ್ತು ಚತುದ್ದಸ;
ಆಜಾನೀಯಾವ ¶ ಜಾತಿಯಾ, ಸಿನ್ಧವಾ ಸೀಘವಾಹನಾ.
‘‘ಆರೂಳ್ಹಾ ಗಾಮಣೀಯೇಹಿ, ಇಲ್ಲಿಯಾಚಾಪಧಾರಿಭಿ;
ಖಿಪ್ಪಮಾಯನ್ತು ಸನ್ನದ್ಧಾ, ಅಸ್ಸಪಿಟ್ಠೇ ಅಲಙ್ಕತಾ.
‘‘ತತೋ ರಥಸಹಸ್ಸಾನಿ, ಯೋಜಯನ್ತು ಚತುದ್ದಸ;
ಅಯೋಸುಕತನೇಮಿಯೋ, ಸುವಣ್ಣಚಿತಪಕ್ಖರೇ.
‘‘ಆರೋಪೇನ್ತು ಧಜೇ ತತ್ಥ, ಚಮ್ಮಾನಿ ಕವಚಾನಿ ಚ;
ವಿಪ್ಪಾಲೇನ್ತು [ವಿಪ್ಫಾಲೇನ್ತು (ಸೀ. ಸ್ಯಾ. ಪೀ.)] ಚ ಚಾಪಾನಿ, ದಳ್ಹಧಮ್ಮಾ ಪಹಾರಿನೋ;
ಖಿಪ್ಪಮಾಯನ್ತು ಸನ್ನದ್ಧಾ, ರಥೇಸು ರಥಜೀವಿನೋ’’.
‘‘ಲಾಜಾಓಲೋಪಿಯಾ [ಲಾಜಾ ಓಲೋಕಿರಾ (ಕ.)] ಪುಪ್ಫಾ, ಮಾಲಾಗನ್ಧವಿಲೇಪನಾ;
ಅಗ್ಘಿಯಾನಿ ಚ ತಿಟ್ಠನ್ತು, ಯೇನ ಮಗ್ಗೇನ ಏಹಿತಿ.
‘‘ಗಾಮೇ ಗಾಮೇ ಸತಂ ಕುಮ್ಭಾ, ಮೇರಯಸ್ಸ ಸುರಾಯ ಚ;
ಮಗ್ಗಮ್ಹಿ ಪತಿತಿಟ್ಠನ್ತು [ಪತಿತಾ ಠನ್ತು (ಸ್ಯಾ. ಕ.)], ಯೇನ ಮಗ್ಗೇನ ಏಹಿತಿ.
‘‘ಮಂಸಾ ಪೂವಾ ಸಙ್ಕುಲಿಯೋ, ಕುಮ್ಮಾಸಾ ಮಚ್ಛಸಂಯುತಾ;
ಮಗ್ಗಮ್ಹಿ ಪತಿತಿಟ್ಠನ್ತು, ಯೇನ ಮಗ್ಗೇನ ಏಹಿತಿ.
‘‘ಸಪ್ಪಿ ತೇಲಂ ದಧಿ ಖೀರಂ, ಕಙ್ಗುಬೀಜಾ [ಕಙ್ಗುವೀಹಿ (ಸೀ. ಪೀ.), ಕಙ್ಗುಪಿಟ್ಠಾ (ಸ್ಯಾ.)] ಬಹೂ ಸುರಾ;
ಮಗ್ಗಮ್ಹಿ ಪತಿತಿಟ್ಠನ್ತು, ಯೇನ ಮಗ್ಗೇನ ಏಹಿತಿ.
‘‘ಆಳಾರಿಕಾ ¶ ಚ ಸೂದಾ ಚ, ನಟನಟ್ಟಕಗಾಯಿನೋ;
ಪಾಣಿಸ್ಸರಾ ಕುಮ್ಭಥೂಣಿಯೋ, ಮನ್ದಕಾ ಸೋಕಜ್ಝಾಯಿಕಾ [ಸೋಕಚ್ಛಾಯಿಕಾ (ಕ.)].
‘‘ಆಹಞ್ಞನ್ತು ¶ ಸಬ್ಬವೀಣಾ, ಭೇರಿಯೋ ದಿನ್ದಿಮಾನಿ ಚ;
ಖರಮುಖಾನಿ ¶ ಧಮೇನ್ತು [ವದನ್ತು (ಸೀ. ಪೀ.)], ನದನ್ತು ಏಕಪೋಕ್ಖರಾ.
‘‘ಮುದಿಙ್ಗಾ ಪಣವಾ ಸಙ್ಖಾ, ಗೋಧಾ ಪರಿವದೇನ್ತಿಕಾ;
ದಿನ್ದಿಮಾನಿ ಚ ಹಞ್ಞನ್ತು, ಕುತುಮ್ಪ [ಕುಟುಮ್ಬಾ (ಸೀ. ಸ್ಯಾ. ಪೀ.)] ದಿನ್ದಿಮಾನಿ ಚ’’.
‘‘ಸಾ ಸೇನಾ ಮಹತೀ ಆಸಿ, ಉಯ್ಯುತ್ತಾ ಸಿವಿವಾಹಿನೀ;
ಜಾಲಿನಾ ಮಗ್ಗನಾಯೇನ, ವಙ್ಕಂ ಪಾಯಾಸಿ ಪಬ್ಬತಂ.
‘‘ಕೋಞ್ಚಂ ನದತಿ ಮಾತಙ್ಗೋ, ಕುಞ್ಜರೋ ಸಟ್ಠಿಹಾಯನೋ;
ಕಚ್ಛಾಯ ಬದ್ಧಮಾನಾಯ, ಕೋಞ್ಚಂ ನದತಿ ವಾರಣೋ.
‘‘ಆಜಾನೀಯಾ ಹಸಿಯನ್ತಿ [ಹಸಿಸ್ಸಿಂಸು (ಸೀ. ಪೀ.)], ನೇಮಿಘೋಸೋ ಅಜಾಯಥ;
ಅಬ್ಭಂ ರಜೋ ಅಚ್ಛಾದೇಸಿ, ಉಯ್ಯುತ್ತಾ ಸಿವಿವಾಹಿನೀ.
‘‘ಸಾ ಸೇನಾ ಮಹತೀ ಆಸಿ, ಉಯ್ಯುತ್ತಾ ಹಾರಹಾರಿನೀ;
ಜಾಲಿನಾ ಮಗ್ಗನಾಯೇನ, ವಙ್ಕಂ ಪಾಯಾಸಿ ಪಬ್ಬತಂ.
‘‘ತೇ ಪಾವಿಂಸು ಬ್ರಹಾರಞ್ಞಂ, ಬಹುಸಾಖಂ ಮಹೋದಕಂ [ಬಹುದಿಜಂ (ಪೀ.)];
ಪುಪ್ಫರುಕ್ಖೇಹಿ ಸಞ್ಛನ್ನಂ, ಫಲರುಕ್ಖೇಹಿ ಚೂಭಯಂ.
‘‘ತತ್ಥ ಬಿನ್ದುಸ್ಸರಾ ವಗ್ಗೂ, ನಾನಾವಣ್ಣಾ ಬಹೂ ದಿಜಾ;
ಕೂಜನ್ತಮುಪಕೂಜನ್ತಿ, ಉತುಸಮ್ಪುಪ್ಫಿತೇ ದುಮೇ.
‘‘ತೇ ಗನ್ತ್ವಾ ದೀಘಮದ್ಧಾನಂ, ಅಹೋರತ್ತಾನಮಚ್ಚಯೇ;
ಪದೇಸಂ ತಂ ಉಪಾಗಚ್ಛುಂ, ಯತ್ಥ ವೇಸ್ಸನ್ತರೋ ಅಹು’’.
ಮಹಾರಾಜಪಬ್ಬಂ ನಾಮ.
ಛಖತ್ತಿಯಕಮ್ಮಂ
‘‘ತೇಸಂ ಸುತ್ವಾನ ನಿಗ್ಘೋಸಂ, ಭೀತೋ ವೇಸ್ಸನ್ತರೋ ಅಹು;
ಪಬ್ಬತಂ ಅಭಿರುಹಿತ್ವಾ, ಭೀತೋ ಸೇನಂ ಉದಿಕ್ಖತಿ.
‘‘ಇಙ್ಘ ¶ ಮದ್ದಿ ನಿಸಾಮೇಹಿ, ನಿಗ್ಘೋಸೋ ಯಾದಿಸೋ ವನೇ;
ಆಜಾನೀಯಾ ಹಸಿಯನ್ತಿ, ಧಜಗ್ಗಾನಿ ಚ ದಿಸ್ಸರೇ.
‘‘ಇಮೇ ¶ ¶ ನೂನ ಅರಞ್ಞಸ್ಮಿಂ, ಮಿಗಸಙ್ಘಾನಿ ಲುದ್ದಕಾ;
ವಾಗುರಾಹಿ ಪರಿಕ್ಖಿಪ್ಪ, ಸೋಬ್ಭಂ ಪಾತೇತ್ವಾ ತಾವದೇ;
ವಿಕ್ಕೋಸಮಾನಾ ತಿಬ್ಬಾಹಿ, ಹನ್ತಿ ನೇಸಂ ವರಂ ವರಂ.
‘‘ಯಥಾ ಮಯಂ ಅದೂಸಕಾ, ಅರಞ್ಞೇ ಅವರುದ್ಧಕಾ;
ಅಮಿತ್ತಹತ್ಥತ್ತಂ ಗತಾ, ಪಸ್ಸ ದುಬ್ಬಲಘಾತಕಂ’’.
‘‘ಅಮಿತ್ತಾ ನಪ್ಪಸಾಹೇಯ್ಯುಂ, ಅಗ್ಗೀವ ಉದಕಣ್ಣವೇ;
ತದೇವ ತ್ವಂ ವಿಚಿನ್ತೇಹಿ, ಅಪಿ ಸೋತ್ಥಿ ಇತೋ ಸಿಯಾ’’.
‘‘ತತೋ ವೇಸ್ಸನ್ತರೋ ರಾಜಾ, ಓರೋಹಿತ್ವಾನ ಪಬ್ಬತಾ;
ನಿಸೀದಿ ಪಣ್ಣಸಾಲಾಯಂ, ದಳ್ಹಂ ಕತ್ವಾನ ಮಾನಸಂ’’.
‘‘ನಿವತ್ತಯಿತ್ವಾನ ರಥಂ, ವುಟ್ಠಪೇತ್ವಾನ ಸೇನಿಯೋ;
ಏಕಂ ಅರಞ್ಞೇ ವಿಹರನ್ತಂ, ಪಿತಾ ಪುತ್ತಂ ಉಪಾಗಮಿ.
‘‘ಹತ್ಥಿಕ್ಖನ್ಧತೋ ಓರುಯ್ಹ, ಏಕಂಸೋ ಪಞ್ಜಲೀಕತೋ;
ಪರಿಕಿಣ್ಣೋ [ಪರಿಕ್ಖಿತ್ತೋ (ಸೀ. ಪೀ.)] ಅಮಚ್ಚೇಹಿ, ಪುತ್ತಂ ಸಿಞ್ಚಿತುಮಾಗಮಿ.
‘‘ತತ್ಥದ್ದಸ ಕುಮಾರಂ ಸೋ, ರಮ್ಮರೂಪಂ ಸಮಾಹಿತಂ;
ನಿಸಿನ್ನಂ ಪಣ್ಣಸಾಲಾಯಂ, ಝಾಯನ್ತಂ ಅಕುತೋಭಯಂ.
‘‘ತಞ್ಚ ದಿಸ್ವಾನ ಆಯನ್ತಂ, ಪಿತರಂ ಪುತ್ತಗಿದ್ಧಿನಂ;
ವೇಸ್ಸನ್ತರೋ ಚ ಮದ್ದೀ ಚ, ಪಚ್ಚುಗ್ಗನ್ತ್ವಾ ಅವನ್ದಿಸುಂ.
‘‘ಮದ್ದೀ ಚ ಸಿರಸಾ ಪಾದೇ, ಸಸುರಸ್ಸಾಭಿವಾದಯಿ;
‘ಮದ್ದೀ ¶ ಅಹಞ್ಹಿ ತೇ ದೇವ, ಪಾದೇ ವನ್ದಾಮಿ ತೇ ಸುಣ್ಹಾ’ [ಹುಸಾ (ಸೀ. ಸ್ಯಾ. ಪೀ.)];
ತೇಸು ತತ್ಥ ಪಲಿಸಜ್ಜ, ಪಾಣಿನಾ ಪರಿಮಜ್ಜಥ’’.
‘‘ಕಚ್ಚಿ ವೋ ಕುಸಲಂ ಪುತ್ತ, ಕಚ್ಚಿ ಪುತ್ತ ಅನಾಮಯಂ;
ಕಚ್ಚಿ ಉಞ್ಛೇನ ಯಾಪೇಥ, ಕಚ್ಚಿ ಮೂಲಫಲಾ ಬಹೂ.
‘‘ಕಚ್ಚಿ ಡಂಸಾ ಮಕಸಾ ಚ, ಅಪ್ಪಮೇವ ಸರೀಸಪಾ;
ವನೇ ವಾಳಮಿಗಾಕಿಣ್ಣೇ, ಕಚ್ಚಿ ಹಿಂಸಾ ನ ವಿಜ್ಜತಿ’’.
‘‘ಅತ್ಥಿ ನೋ ಜೀವಿಕಾ ದೇವ, ಸಾ ಚ ಯಾದಿಸಕೀದಿಸಾ;
ಕಸಿರಾ ಜೀವಿಕಾ ಹೋಮ [ಅಹೋಸಿ (?)], ಉಞ್ಛಾಚರಿಯಾಯ ಜೀವಿತಂ.
‘‘ಅನಿದ್ಧಿನಂ ¶ ಮಹಾರಾಜ, ದಮೇತಸ್ಸಂವ ಸಾರಥಿ;
ತ್ಯಮ್ಹಾ ಅನಿದ್ಧಿಕಾ ದನ್ತಾ, ಅಸಮಿದ್ಧಿ ದಮೇತಿ ನೋ.
‘‘ಅಪಿ ನೋ ಕಿಸಾನಿ ಮಂಸಾನಿ, ಪಿತು ಮಾತು ಅದಸ್ಸನಾ;
ಅವರುದ್ಧಾನಂ ಮಹಾರಾಜ, ಅರಞ್ಞೇ ಜೀವಸೋಕಿನಂ’’.
‘‘ಯೇಪಿ ¶ ತೇ ಸಿವಿಸೇಟ್ಠಸ್ಸ, ದಾಯಾದಾಪತ್ತಮಾನಸಾ;
ಜಾಲೀ ಕಣ್ಹಾಜಿನಾ ಚುಭೋ, ಬ್ರಾಹ್ಮಣಸ್ಸ ವಸಾನುಗಾ;
ಅಚ್ಚಾಯಿಕಸ್ಸ ಲುದ್ದಸ್ಸ, ಯೋ ನೇ ಗಾವೋವ ಸುಮ್ಭತಿ.
‘‘ತೇ ರಾಜಪುತ್ತಿಯಾ ಪುತ್ತೇ, ಯದಿ ಜಾನಾಥ ಸಂಸಥ;
ಪರಿಯಾಪುಣಾಥ ನೋ ಖಿಪ್ಪಂ, ಸಪ್ಪದಟ್ಠಂವ ಮಾಣವಂ’’.
‘‘ಉಭೋ ಕುಮಾರಾ ನಿಕ್ಕೀತಾ, ಜಾಲೀ ಕಣ್ಹಾಜಿನಾ ಚುಭೋ;
ಬ್ರಾಹ್ಮಣಸ್ಸ ಧನಂ ದತ್ವಾ, ಪುತ್ತ ಮಾ ಭಾಯಿ ಅಸ್ಸಸ’’.
‘‘ಕಚ್ಚಿ ¶ ನು ತಾತ ಕುಸಲಂ, ಕಚ್ಚಿ ತಾತ ಅನಾಮಯಂ;
ಕಚ್ಚಿ ನು ತಾತ ಮೇ ಮಾತು, ಚಕ್ಖು ನ ಪರಿಹಾಯತಿ’’.
‘‘ಕುಸಲಞ್ಚೇವ ಮೇ ಪುತ್ತ, ಅಥೋ ಪುತ್ತ ಅನಾಮಯಂ;
ಅಥೋ ಚ ಪುತ್ತ ತೇ ಮಾತು, ಚಕ್ಖು ನ ಪರಿಹಾಯತಿ’’.
‘‘ಕಚ್ಚಿ ಅರೋಗಂ ಯೋಗ್ಗಂ ತೇ, ಕಚ್ಚಿ ವಹತಿ ವಾಹನಂ;
ಕಚ್ಚಿ ಫೀತೋ ಜನಪದೋ, ಕಚ್ಚಿ ವುಟ್ಠಿ ನ ಛಿಜ್ಜತಿ’’.
‘‘ಅಥೋ ಅರೋಗಂ ಯೋಗ್ಗಂ ಮೇ, ಅಥೋ ವಹತಿ ವಾಹನಂ;
ಅಥೋ ಫೀತೋ ಜನಪದೋ, ಅಥೋ ವುಟ್ಠಿ ನ ಛಿಜ್ಜತಿ’’.
‘‘ಇಚ್ಚೇವಂ ಮನ್ತಯನ್ತಾನಂ, ಮಾತಾ ನೇಸಂ ಅದಿಸ್ಸಥ;
ರಾಜಪುತ್ತೀ ಗಿರಿದ್ವಾರೇ, ಪತ್ತಿಕಾ ಅನುಪಾಹನಾ.
‘‘ತಞ್ಚ ದಿಸ್ವಾನ ಆಯನ್ತಂ, ಮಾತರಂ ಪುತ್ತಗಿದ್ಧಿನಿಂ;
ವೇಸ್ಸನ್ತರೋ ಚ ಮದ್ದೀ ಚ, ಪಚ್ಚುಗ್ಗನ್ತ್ವಾ ಅವನ್ದಿಸುಂ.
‘‘ಮದ್ದೀ ಚ ಸಿರಸಾ ಪಾದೇ, ಸಸ್ಸುಯಾ ಅಭಿವಾದಯಿ;
ಮದ್ದೀ ಅಹಞ್ಹಿ ತೇ ಅಯ್ಯೇ, ಪಾದೇ ವನ್ದಾಮಿ ತೇ ಸುಣ್ಹಾ’’.
‘‘ಮದ್ದಿಞ್ಚ ಪುತ್ತಕಾ ದಿಸ್ವಾ, ದೂರತೋ ಸೋತ್ಥಿಮಾಗತಾ;
ಕನ್ದನ್ತಾ ಮಭಿಧಾವಿಂಸು, ವಚ್ಛಬಾಲಾವ ಮಾತರಂ.
‘‘ಮದ್ದೀ ¶ ಚ ಪುತ್ತಕೇ ದಿಸ್ವಾ, ದೂರತೋ ಸೋತ್ಥಿಮಾಗತೇ;
ವಾರುಣೀವ ಪವೇಧೇನ್ತೀ, ಥನಧಾರಾಭಿಸಿಞ್ಚಥ’’.
‘‘ಸಮಾಗತಾನಂ ಞಾತೀನಂ, ಮಹಾಘೋಸೋ ಅಜಾಯಥ;
ಪಬ್ಬತಾ ಸಮನಾದಿಂಸು, ಮಹೀ ಪಕಮ್ಪಿತಾ ಅಹು.
‘‘ವುಟ್ಠಿಧಾರಂ ಪವತ್ತೇನ್ತೋ, ದೇವೋ ಪಾವಸ್ಸಿ ತಾವದೇ;
ಅಥ ¶ ವೇಸ್ಸನ್ತರೋ ರಾಜಾ, ಞಾತೀಹಿ ಸಮಗಚ್ಛಥ.
‘‘ನತ್ತಾರೋ ¶ ಸುಣಿಸಾ ಪುತ್ತೋ, ರಾಜಾ ದೇವೀ ಚ ಏಕತೋ;
ಯದಾ ಸಮಾಗತಾ ಆಸುಂ, ತದಾಸಿ ಲೋಮಹಂಸನಂ.
‘‘ಪಞ್ಜಲಿಕಾ ತಸ್ಸ ಯಾಚನ್ತಿ, ರೋದನ್ತಾ ಭೇರವೇ ವನೇ;
ವೇಸ್ಸನ್ತರಞ್ಚ ಮದ್ದಿಞ್ಚ, ಸಬ್ಬೇ ರಟ್ಠಾ ಸಮಾಗತಾ;
ತ್ವಂ ನೋಸಿ ಇಸ್ಸರೋ ರಾಜಾ, ರಜ್ಜಂ ಕಾರೇಥ ನೋ ಉಭೋ’’.
ಛಖತ್ತಿಯಕಮ್ಮಂ ನಾಮ.
‘‘ಧಮ್ಮೇನ ರಜ್ಜಂ ಕಾರೇನ್ತಂ, ರಟ್ಠಾ ಪಬ್ಬಾಜಯಿತ್ಥ ಮಂ;
ತ್ವಞ್ಚ ಜಾನಪದಾ ಚೇವ, ನೇಗಮಾ ಚ ಸಮಾಗತಾ’’.
‘‘ದುಕ್ಕಟಞ್ಚ ಹಿ ನೋ ಪುತ್ತ, ಭೂನಹಚ್ಚಂ ಕತಂ ಮಯಾ;
ಯೋಹಂ ಸಿವೀನಂ ವಚನಾ, ಪಬ್ಬಾಜೇಸಿಮದೂಸಕಂ’’.
‘‘ಯೇನ ಕೇನಚಿ ವಣ್ಣೇನ, ಪಿತು ದುಕ್ಖಂ ಉದಬ್ಬಹೇ;
ಮಾತು ಭಗಿನಿಯಾ ಚಾಪಿ, ಅಪಿ ಪಾಣೇಹಿ ಅತ್ತನೋ’’.
‘‘ತತೋ ವೇಸ್ಸನ್ತರೋ ರಾಜಾ, ರಜೋಜಲ್ಲಂ ಪವಾಹಯಿ;
ರಜೋಜಲ್ಲಂ ಪವಾಹೇತ್ವಾ, ಸಙ್ಖವಣ್ಣಂ [ಸಚ್ಚವಣ್ಣಂ (ಸೀ. ಸ್ಯಾ.)] ಅಧಾರಯಿ’’.
‘‘ಸೀಸಂ ನ್ಹಾತೋ ಸುಚಿವತ್ಥೋ, ಸಬ್ಬಾಭರಣಭೂಸಿತೋ;
ಪಚ್ಚಯಂ ನಾಗಮಾರುಯ್ಹ, ಖಗ್ಗಂ ಬನ್ಧಿ ಪರನ್ತಪಂ.
‘‘ತತೋ ¶ ಸಟ್ಠಿಸಹಸ್ಸಾನಿ, ಯೋಧಿನೋ ಚಾರುದಸ್ಸನಾ;
ಸಹಜಾತಾ ಪಕಿರಿಂಸು, ನನ್ದಯನ್ತಾ ರಥೇಸಭಂ.
‘‘ತತೋ ¶ ಮದ್ದಿಮ್ಪಿ ನ್ಹಾಪೇಸುಂ, ಸಿವಿಕಞ್ಞಾ ಸಮಾಗತಾ;
ವೇಸ್ಸನ್ತರೋ ತಂ ಪಾಲೇತು, ಜಾಲೀ ಕಣ್ಹಾಜಿನಾ ಚುಭೋ;
ಅಥೋಪಿ ತಂ ಮಹಾರಾಜಾ, ಸಞ್ಜಯೋ ಅಭಿರಕ್ಖತು’’.
‘‘ಇದಞ್ಚ ಪಚ್ಚಯಂ ಲದ್ಧಾ, ಪುಬ್ಬೇ ಸಂಕ್ಲೇಸಮತ್ತನೋ;
ಆನನ್ದಿಯಂ ಆಚರಿಂಸು, ರಮಣೀಯೇ ಗಿರಿಬ್ಬಜೇ.
‘‘ಇದಞ್ಚ ಪಚ್ಚಯಂ ಲದ್ಧಾ, ಪುಬ್ಬೇ ಸಂಕ್ಲೇಸಮತ್ತನೋ;
ಆನನ್ದಿ ವಿತ್ತಾ ಸುಮನಾ, ಪುತ್ತೇ ಸಙ್ಗಮ್ಮ ಲಕ್ಖಣಾ.
‘‘ಇದಞ್ಚ ಪಚ್ಚಯಂ ಲದ್ಧಾ, ಪುಬ್ಬೇ ಸಂಕ್ಲೇಸಮತ್ತನೋ;
ಆನನ್ದಿ ವಿತ್ತಾ ಪತೀತಾ, ಸಹ ಪುತ್ತೇಹಿ ಲಕ್ಖಣಾ’’.
‘‘ಏಕಭತ್ತಾ ¶ ಪುರೇ ಆಸಿಂ, ನಿಚ್ಚಂ ಥಣ್ಡಿಲಸಾಯಿನೀ;
ಇತಿ ಮೇತಂ ವತಂ ಆಸಿ, ತುಮ್ಹಂ ಕಾಮಾ ಹಿ ಪುತ್ತಕಾ.
‘‘ತಂ ಮೇ ವತಂ ಸಮಿದ್ಧಜ್ಜ, ತುಮ್ಹೇ ಸಙ್ಗಮ್ಮ ಪುತ್ತಕಾ;
ಮಾತುಜಮ್ಪಿ ತಂ ಪಾಲೇತು, ಪಿತುಜಮ್ಪಿ ಚ ಪುತ್ತಕ;
ಅಥೋಪಿ ತಂ ಮಹಾರಾಜಾ, ಸಞ್ಜಯೋ ಅಭಿರಕ್ಖತು.
‘‘ಯಂ ಕಿಞ್ಚಿತ್ಥಿ ಕತಂ ಪುಞ್ಞಂ, ಮಯ್ಹಞ್ಚೇವ ಪಿತುಚ್ಚ ತೇ;
ಸಬ್ಬೇನ ತೇನ ಕುಸಲೇನ, ಅಜರೋ ಅಮರೋ ಭವ’’.
‘‘ಕಪ್ಪಾಸಿಕಞ್ಚ ಕೋಸೇಯ್ಯಂ, ಖೋಮಕೋಟುಮ್ಬರಾನಿ ಚ;
ಸಸ್ಸು ¶ ಸುಣ್ಹಾಯ ಪಾಹೇಸಿ, ಯೇಹಿ ಮದ್ದೀ ಅಸೋಭಥ.
‘‘ತತೋ ಹೇಮಞ್ಚ ಕಾಯೂರಂ, ಗೀವೇಯ್ಯಂ ರತನಾಮಯಂ;
ಸಸ್ಸು ಸುಣ್ಹಾಯ ಪಾಹೇಸಿ, ಯೇಹಿ ಮದ್ದೀ ಅಸೋಭಥ.
‘‘ತತೋ ಹೇಮಞ್ಚ ಕಾಯೂರಂ, ಅಙ್ಗದಂ ಮಣಿಮೇಖಲಂ;
ಸಸ್ಸು ಸುಣ್ಹಾಯ ಪಾಹೇಸಿ, ಯೇಹಿ ಮದ್ದೀ ಅಸೋಭಥ.
‘‘ಉಣ್ಣತಂ ಮುಖಫುಲ್ಲಞ್ಚ, ನಾನಾರತ್ತೇ ಚ ಮಾಣಿಕೇ [ಮಾಣಿಯೇ (ಸೀ. ಪೀ.)];
ಸಸ್ಸು ಸುಣ್ಹಾಯ ಪಾಹೇಸಿ, ಯೇಹಿ ಮದ್ದೀ ಅಸೋಭಥ.
‘‘ಉಗ್ಗತ್ಥನಂ ಗಿಙ್ಗಮಕಂ, ಮೇಖಲಂ ಪಾಟಿಪಾದಕಂ [ಪಟಿಪಾದುಕಂ (ಸೀ. ಸ್ಯಾ.), ಪಾಲಿಪಾದಕಂ (ಪೀ.)];
ಸಸ್ಸು ಸುಣ್ಹಾಯ ಪಾಹೇಸಿ, ಯೇಹಿ ಮದ್ದೀ ಅಸೋಭಥ.
‘‘ಸುತ್ತಞ್ಚ ¶ ಸುತ್ತವಜ್ಜಞ್ಚ, ಉಪನಿಜ್ಝಾಯ ಸೇಯ್ಯಸಿ;
ಅಸೋಭಥ ರಾಜಪುತ್ತೀ, ದೇವಕಞ್ಞಾವ ನನ್ದನೇ.
‘‘ಸೀಸಂ ನ್ಹಾತಾ ಸುಚಿವತ್ಥಾ, ಸಬ್ಬಾಲಙ್ಕಾರಭೂಸಿತಾ;
ಅಸೋಭಥ ರಾಜಪುತ್ತೀ, ತಾವತಿಂಸೇವ ಅಚ್ಛರಾ.
‘‘ಕದಲೀವ ವಾತಚ್ಛುಪಿತಾ, ಜಾತಾ ಚಿತ್ತಲತಾವನೇ;
ದನ್ತಾವರಣಸಮ್ಪನ್ನಾ, ರಾಜಪುತ್ತೀ ಅಸೋಭಥ.
‘‘ಸಕುಣೀ ಮಾನುಸಿನೀವ, ಜಾತಾ ಚಿತ್ತಪತ್ತಾ ಪತೀ;
ನಿಗ್ರೋಧಪಕ್ಕಬಿಮ್ಬೋಟ್ಠೀ, ರಾಜಪುತ್ತೀ ಅಸೋಭಥ.
‘‘ತಸ್ಸಾ ಚ ನಾಗಮಾನೇಸುಂ, ನಾತಿಬದ್ಧಂವ ಕುಞ್ಜರಂ;
ಸತ್ತಿಕ್ಖಮಂ ಸರಕ್ಖಮಂ, ಈಸಾದನ್ತಂ ಉರೂಳ್ಹವಂ.
‘‘ಸಾ ಮದ್ದೀ ನಾಗಮಾರುಹಿ, ನಾತಿಬದ್ಧಂವ ಕುಞ್ಜರಂ;
ಸತ್ತಿಕ್ಖಮಂ ¶ ಸರಕ್ಖಮಂ, ಈಸಾದನ್ತಂ ಉರೂಳ್ಹವಂ’’.
‘‘ಸಬ್ಬಮ್ಹಿ ¶ ತಂಅರಞ್ಞಮ್ಹಿ, ಯಾವನ್ತೇತ್ಥ ಮಿಗಾ ಅಹುಂ;
ವೇಸ್ಸನ್ತರಸ್ಸ ತೇಜೇನ, ನಞ್ಞಮಞ್ಞಂ ವಿಹೇಠಯುಂ.
‘‘ಸಬ್ಬಮ್ಹಿ ತಂಅರಞ್ಞಮ್ಹಿ, ಯಾವನ್ತೇತ್ಥ ದಿಜಾ ಅಹುಂ;
ವೇಸ್ಸನ್ತರಸ್ಸ ತೇಜೇನ, ನಞ್ಞಮಞ್ಞಂ ವಿಹೇಠಯುಂ.
‘‘ಸಬ್ಬಮ್ಹಿ ತಂಅರಞ್ಞಮ್ಹಿ, ಯಾವನ್ತೇತ್ಥ ಮಿಗಾ ಅಹುಂ;
ಏಕಜ್ಝಂ ಸನ್ನಿಪಾತಿಂಸು, ವೇಸ್ಸನ್ತರೇ ಪಯಾತಮ್ಹಿ;
ಸಿವೀನಂ ರಟ್ಠವಡ್ಢನೇ.
‘‘ಸಬ್ಬಮ್ಹಿ ತಂಅರಞ್ಞಮ್ಹಿ, ಯಾವನ್ತೇತ್ಥ ದಿಜಾ ಅಹುಂ;
ಏಕಜ್ಝಂ ಸನ್ನಿಪಾತಿಂಸು, ವೇಸ್ಸನ್ತರೇ ಪಯಾತಮ್ಹಿ;
ಸಿವೀನಂ ರಟ್ಠವಡ್ಢನೇ.
‘‘ಸಬ್ಬಮ್ಹಿ ತಂಅರಞ್ಞಮ್ಹಿ, ಯಾವನ್ತೇತ್ಥ ಮಿಗಾ ಅಹುಂ;
ನಾಸ್ಸು ಮಞ್ಜೂ ನಿಕೂಜಿಂಸು, ವೇಸ್ಸನ್ತರೇ ಪಯಾತಮ್ಹಿ;
ಸಿವೀನಂ ರಟ್ಠವಡ್ಢನೇ.
‘‘ಸಬ್ಬಮ್ಹಿ ತಂಅರಞ್ಞಮ್ಹಿ, ಯಾವನ್ತೇತ್ಥ ದಿಜಾ ಅಹುಂ;
ನಾಸ್ಸು ಮಞ್ಜೂ ನಿಕೂಜಿಂಸು, ವೇಸ್ಸನ್ತರೇ ಪಯಾತಮ್ಹಿ;
ಸಿವೀನಂ ರಟ್ಠವಡ್ಢನೇ.
‘‘ಪಟಿಯತ್ತೋ ¶ ರಾಜಮಗ್ಗೋ, ವಿಚಿತ್ತೋ ಪುಪ್ಫಸನ್ಥತೋ;
ವಸಿ ವೇಸ್ಸನ್ತರೋ ಯತ್ಥ, ಯಾವತಾವ ಜೇತುತ್ತರಾ.
‘‘ತತೋ ಸಟ್ಠಿಸಹಸ್ಸಾನಿ, ಯೋಧಿನೋ ಚಾರುದಸ್ಸನಾ;
ಸಮನ್ತಾ ಪರಿಕಿರಿಂಸು, ವೇಸ್ಸನ್ತರೇ ¶ ಪಯಾತಮ್ಹಿ;
ಸಿವೀನಂ ರಟ್ಠವಡ್ಢನೇ.
‘‘ಓರೋಧಾ ಚ ಕುಮಾರಾ ಚ, ವೇಸಿಯಾನಾ ಚ ಬ್ರಾಹ್ಮಣಾ;
ಸಮನ್ತಾ ಪರಿಕಿರಿಂಸು, ವೇಸ್ಸನ್ತರೇ ಪಯಾತಮ್ಹಿ;
ಸಿವೀನಂ ರಟ್ಠವಡ್ಢನೇ.
‘‘ಹತ್ಥಾರೋಹಾ ಅನೀಕಟ್ಠಾ, ರಥಿಕಾ ಪತ್ತಿಕಾರಕಾ;
ಸಮನ್ತಾ ಪರಿಕಿರಿಂಸು, ವೇಸ್ಸನ್ತರೇ ಪಯಾತಮ್ಹಿ;
ಸಿವೀನಂ ರಟ್ಠವಡ್ಢನೇ.
‘‘ಸಮಾಗತಾ ಜಾನಪದಾ, ನೇಗಮಾ ಚ ಸಮಾಗತಾ;
ಸಮನ್ತಾ ಪರಿಕಿರಿಂಸು, ವೇಸ್ಸನ್ತರೇ ಪಯಾತಮ್ಹಿ;
ಸಿವೀನಂ ರಟ್ಠವಡ್ಢನೇ.
‘‘ಕರೋಟಿಯಾ ¶ ಚಮ್ಮಧರಾ, ಇಲ್ಲೀಹತ್ಥಾ [ಇನ್ದಿಹತ್ಥಾ (ಸ್ಯಾ. ಕ.), ಖಗ್ಗಹತ್ಥಾ (ಸೀ. ಪೀ.)] ಸುವಮ್ಮಿನೋ;
ಪುರತೋ ಪಟಿಪಜ್ಜಿಂಸು, ವೇಸ್ಸನ್ತರೇ ಪಯಾತಮ್ಹಿ;
ಸಿವೀನಂ ರಟ್ಠವಡ್ಢನೇ.
‘‘ತೇ ಪಾವಿಸುಂ ಪುರಂ ರಮ್ಮಂ, ಮಹಾಪಾಕಾರತೋರಣಂ;
ಉಪೇತಂ ಅನ್ನಪಾನೇಹಿ, ನಚ್ಚಗೀತೇಹಿ ಚೂಭಯಂ.
‘‘ವಿತ್ತಾ ಜಾನಪದಾ ಆಸುಂ, ನೇಗಮಾ ಚ ಸಮಾಗತಾ;
ಅನುಪ್ಪತ್ತೇ ಕುಮಾರಮ್ಹಿ, ಸಿವೀನಂ ರಟ್ಠವಡ್ಢನೇ.
‘‘ಚೇಲುಕ್ಖೇಪೋ ಅವತ್ತಿತ್ಥ, ಆಗತೇ ಧನದಾಯಕೇ;
ನನ್ದಿಂ ಪವೇಸಿ [ನನ್ದಿ-ಪ್ಪವೇಸಿ (ಸೀ. ಸ್ಯಾ. ಪೀ.)] ನಗರೇ, ಬನ್ಧನಾ ಮೋಕ್ಖೋ ಅಘೋಸಥ.
‘‘ಜಾತರೂಪಮಯಂ ¶ ¶ ವಸ್ಸಂ, ದೇವೋ ಪಾವಸ್ಸಿ ತಾವದೇ;
ವೇಸ್ಸನ್ತರೇ ಪವಿಟ್ಠಮ್ಹಿ, ಸಿವೀನಂ ರಟ್ಠವಡ್ಢನೇ.
‘‘ತತೋ ವೇಸ್ಸನ್ತರೋ ರಾಜಾ, ದಾನಂ ದತ್ವಾನ ಖತ್ತಿಯೋ;
ಕಾಯಸ್ಸ ಭೇದಾ ಸಪ್ಪಞ್ಞೋ, ಸಗ್ಗಂ ಸೋ ಉಪಪಜ್ಜಥಾ’’ತಿ.
ವೇಸ್ಸನ್ತರಜಾತಕಂ ದಸಮಂ.
ಮಹಾನಿಪಾತ ನಿಟ್ಠಿತಾ.
ಜಾತಕಪಾಳಿ ನಿಟ್ಠಿತಾ.