📜

ನಮೋ ತಸ್ಸ ಭಗವತೋ ಅರಹತೋ ಸಮ್ಮಾಸಮ್ಬುದ್ಧಸ್ಸ

ವಿನಯವಿನಿಚ್ಛಯೋ

ಗನ್ಥಾರಮ್ಭಕಥಾ

೧.

ವನ್ದಿತ್ವಾ ¶ ¶ ಸಿರಸಾ ಸೇಟ್ಠಂ, ಬುದ್ಧಮಪ್ಪಟಿಪುಗ್ಗಲಂ;

ಭವಾಭಾವಕರಂ ಧಮ್ಮಂ, ಗಣಞ್ಚೇವ ನಿರಙ್ಗಣಂ.

೨.

ಭಿಕ್ಖೂನಂ ಭಿಕ್ಖುನೀನಞ್ಚ, ಹಿತತ್ಥಾಯ ಸಮಾಹಿತೋ;

ಪವಕ್ಖಾಮಿ ಸಮಾಸೇನ, ವಿನಯಸ್ಸವಿನಿಚ್ಛಯಂ.

೩.

ಅನಾಕುಲಮಸಂಕಿಣ್ಣಂ, ಮಧುರತ್ಥಪದಕ್ಕಮಂ;

ಪಟುಭಾವಕರಂ ಏತಂ, ಪರಮಂ ವಿನಯಕ್ಕಮೇ.

೪.

ಅಪಾರಂ ಓತರನ್ತಾನಂ, ಸಾರಂ ವಿನಯಸಾಗರಂ;

ಭಿಕ್ಖೂನಂ ಭಿಕ್ಖುನೀನಞ್ಚ, ನಾವಾಭೂತಂ ಮನೋರಮಂ.

೫.

ತಸ್ಮಾ ವಿನಯನೂಪಾಯಂ, ವಿನಯಸ್ಸವಿನಿಚ್ಛಯಂ;

ಅವಿಕ್ಖಿತ್ತೇನ ಚಿತ್ತೇನ, ವದತೋ ಮೇ ನಿಬೋಧಥ.

ಭಿಕ್ಖುವಿಭಙ್ಗೋ

ಪಾರಾಜಿಕಕಥಾ

ಪಠಮಪಾರಾಜಿಕಕಥಾ

೬.

ತಿವಿಧೇ ¶ ¶ ತಿಲಮತ್ತಮ್ಪಿ, ಮಗ್ಗೇ ಸೇವನಚೇತನೋ;

ಅಙ್ಗಜಾತಂ ಪವೇಸೇನ್ತೋ, ಅಲ್ಲೋಕಾಸೇ ಪರಾಜಿತೋ.

೭.

ಪವೇಸನಂ ಪವಿಟ್ಠಂ ವಾ, ಠಿತಮುದ್ಧರಣಮ್ಪಿ ವಾ;

ಸಸಿಕ್ಖೋ ಸಾದಿಯನ್ತೋ ಸೋ, ಠಪೇತ್ವಾ ಕಿರಿಯಂ ಚುತೋ.

೮.

ಸನ್ಥತೇನಙ್ಗಜಾತೇನ, ಸನ್ಥತಂ ವಾ ಅಸನ್ಥತಂ;

ಮಗ್ಗಂ ಪನ ಪವೇಸೇನ್ತೋ, ತಥೇವಾಸನ್ಥತೇನ ಚ.

೯.

ಉಪಾದಿನ್ನೇನುಪಾದಿನ್ನೇ, ಅನುಪಾದಿನ್ನಕೇನ ವಾ;

ಘಟ್ಟಿತೇ ಅನುಪಾದಿನ್ನೇ, ಸಚೇ ಸಾದಿಯತೇತ್ಥ ಸೋ.

೧೦.

ಹೋತಿ ಪಾರಾಜಿಕಕ್ಖೇತ್ತೇ, ಪವಿಟ್ಠೇ ತು ಪರಾಜಿತೋ;

ಖೇತ್ತೇ ಥುಲ್ಲಚ್ಚಯಂ ತಸ್ಸ, ದುಕ್ಕಟಞ್ಚ ವಿನಿದ್ದಿಸೇ.

೧೧.

ಮತೇ ಅಕ್ಖಾಯಿತೇ ಚಾಪಿ, ಯೇಭುಯ್ಯಕ್ಖಾಯಿತೇಪಿ ಚ;

ಮೇಥುನಂ ಪಟಿಸೇವನ್ತೋ, ಹೋತಿ ಪಾರಾಜಿಕೋ ನರೋ.

೧೨.

ಯೇಭುಯ್ಯಕ್ಖಾಯಿತೇ ಚಾಪಿ, ಉಪಡ್ಢಕ್ಖಾಯಿತೇಪಿ ಚ;

ಹೋತಿ ಥುಲ್ಲಚ್ಚಯಾಪತ್ತಿ, ಸೇಸೇ ಆಪತ್ತಿ ದುಕ್ಕಟಂ.

೧೩.

ನಿಮಿತ್ತಮತ್ತಂ ಸೇಸೇತ್ವಾ, ಖಾಯಿತೇಪಿ ಸರೀರಕೇ;

ನಿಮಿತ್ತೇ ಮೇಥುನಂ ತಸ್ಮಿಂ, ಸೇವತೋಪಿ ಪರಾಜಯೋ.

೧೪.

ಉದ್ಧುಮಾತಾದಿಸಮ್ಪತ್ತೇ, ಸಬ್ಬತ್ಥಾಪಿ ಚ ದುಕ್ಕಟಂ;

ಖಾಯಿತಾಕ್ಖಾಯಿತಂ ನಾಮ, ಸಬ್ಬಂ ಮತಸರೀರಕೇ.

೧೫.

ಛಿನ್ದಿತ್ವಾ ಪನ ತಚ್ಛೇತ್ವಾ, ನಿಮಿತ್ತುಪ್ಪಾಟಿತೇ ಪನ;

ವಣಸಙ್ಖೇಪತೋ ತಸ್ಮಿಂ, ಸೇವಂ ಥುಲ್ಲಚ್ಚಯಂ ಫುಸೇ.

೧೬.

ತತೋ ¶ ¶ ಮೇಥುನರಾಗೇನ, ಪತಿತಾಯ ನಿಮಿತ್ತತೋ;

ತಾಯಂ ಉಪಕ್ಕಮನ್ತಸ್ಸ, ದುಕ್ಕಟಂ ಮಂಸಪೇಸಿಯಂ.

೧೭.

ನಖಪಿಟ್ಠಿಪ್ಪಮಾಣೇಪಿ, ಮಂಸೇ ನ್ಹಾರುಮ್ಹಿ ವಾ ಸತಿ;

ಮೇಥುನಂ ಪಟಿಸೇವನ್ತೋ, ಜೀವಮಾನೇ ಪರಾಜಿತೋ.

೧೮.

ಕಣ್ಣಚ್ಛಿದ್ದಕ್ಖಿನಾಸಾಸು, ವತ್ಥಿಕೋಸೇ ವಣೇಸು ವಾ;

ಅಙ್ಗಜಾತಂ ಪವೇಸೇನ್ತೋ, ರಾಗಾ ಥುಲ್ಲಚ್ಚಯಂ ಫುಸೇ.

೧೯.

ಅವಸೇಸಸರೀರಸ್ಮಿಂ, ಉಪಕಚ್ಛೂರುಕಾದಿಸು;

ವಸಾ ಮೇಥುನರಾಗಸ್ಸ, ಸೇವಮಾನಸ್ಸ ದುಕ್ಕಟಂ.

೨೦.

ಅಸ್ಸಗೋಮಹಿಸಾದೀನಂ, ಓಟ್ಠಗದ್ರಭದನ್ತಿನಂ;

ನಾಸಾಸು ವತ್ಥಿಕೋಸೇಸು, ಸೇವಂ ಥುಲ್ಲಚ್ಚಯಂ ಫುಸೇ.

೨೧.

ತಥಾ ಸಬ್ಬತಿರಚ್ಛಾನಂ, ಅಕ್ಖಿಕಣ್ಣವಣೇಸುಪಿ;

ಅವಸೇಸಸರೀರೇಸು, ಸೇವಮಾನಸ್ಸ ದುಕ್ಕಟಂ.

೨೨.

ತೇಸಂ ಅಲ್ಲಸರೀರೇಸು, ಮತಾನಂ ಸೇವತೋ ಪನ;

ತಿವಿಧಾಪಿ ಸಿಯಾಪತ್ತಿ, ಖೇತ್ತಸ್ಮಿಂ ತಿವಿಧೇ ಸತಿ.

೨೩.

ಬಹಿ ಮೇಥುನರಾಗೇನ, ನಿಮಿತ್ತಂ ಇತ್ಥಿಯಾ ಪನ;

ನಿಮಿತ್ತೇನ ಛುಪನ್ತಸ್ಸ, ತಸ್ಸ ಥುಲ್ಲಚ್ಚಯಂ ಸಿಯಾ.

೨೪.

ಕಾಯಸಂಸಗ್ಗರಾಗೇನ, ನಿಮಿತ್ತೇನ ಮುಖೇನ ವಾ;

ನಿಮಿತ್ತಂ ಇತ್ಥಿಯಾ ತಸ್ಸ, ಛುಪತೋ ಗರುಕಂ ಸಿಯಾ.

೨೫.

ತಥೇವೋಭಯರಾಗೇನ, ನಿಮಿತ್ತಂ ಪುರಿಸಸ್ಸಪಿ;

ನಿಮಿತ್ತೇನ ಛುಪನ್ತಸ್ಸ, ಹೋತಿ ಆಪತ್ತಿ ದುಕ್ಕಟಂ.

೨೬.

ನಿಮಿತ್ತೇನ ನಿಮಿತ್ತಂ ತು, ತಿರಚ್ಛಾನಗತಿತ್ಥಿಯಾ;

ಥುಲ್ಲಚ್ಚಯಂ ಛುಪನ್ತಸ್ಸ, ಹೋತಿ ಮೇಥುನರಾಗತೋ.

೨೭.

ಕಾಯಸಂಸಗ್ಗರಾಗೇನ, ತಿರಚ್ಛಾನಗತಿತ್ಥಿಯಾ;

ನಿಮಿತ್ತೇನ ನಿಮಿತ್ತಸ್ಸ, ಛುಪನೇ ದುಕ್ಕಟಂ ಮತಂ.

೨೮.

ಅಙ್ಗಜಾತಂ ಪವೇಸೇತ್ವಾ, ತಮಾವಟ್ಟಕತೇ ಮುಖೇ;

ತತ್ಥಾಕಾಸಗತಂ ಕತ್ವಾ, ನೀಹರನ್ತಸ್ಸ ದುಕ್ಕಟಂ.

೨೯.

ತಥಾ ¶ ಚತೂಹಿ ಪಸ್ಸೇಹಿ, ಇತ್ಥಿಯಾ ಹೇಟ್ಠಿಮತ್ತಲಂ;

ಅಛುಪನ್ತಂ ಪವೇಸೇತ್ವಾ, ನೀಹರನ್ತಸ್ಸ ದುಕ್ಕಟಂ.

೩೦.

ಉಪ್ಪಾಟಿತೋಟ್ಠಮಂಸೇಸು ¶ , ಬಹಿ ನಿಕ್ಖನ್ತಕೇಸು ವಾ;

ದನ್ತೇಸು ವಾಯಮನ್ತಸ್ಸ, ತಸ್ಸ ಥುಲ್ಲಚ್ಚಯಂ ಸಿಯಾ.

೩೧.

ಅಟ್ಠಿಸಙ್ಘಟ್ಟನಂ ಕತ್ವಾ, ಮಗ್ಗೇ ದುವಿಧರಾಗತೋ;

ಸುಕ್ಕೇ ಮುತ್ತೇಪಿ ವಾಮುತ್ತೇ, ವಾಯಮನ್ತಸ್ಸ ದುಕ್ಕಟಂ.

೩೨.

ಇತ್ಥಿಂ ಮೇಥುನರಾಗೇನ, ಆಲಿಙ್ಗನ್ತಸ್ಸ ದುಕ್ಕಟಂ;

ಹತ್ಥಗ್ಗಾಹಪರಾಮಾಸ-ಚುಮ್ಬನಾದೀಸ್ವಯಂ ನಯೋ.

೩೩.

ಅಪದೇ ಅಹಯೋ ಮಚ್ಛಾ, ಕಪೋತಾ ದ್ವಿಪದೇಪಿ ಚ;

ಗೋಧಾ ಚತುಪ್ಪದೇ ಹೇಟ್ಠಾ, ವತ್ಥು ಪಾರಾಜಿಕಸ್ಸಿಮೇ.

೩೪.

ಸೇವೇತುಕಾಮತಾಚಿತ್ತಂ, ಮಗ್ಗೇ ಮಗ್ಗಪ್ಪವೇಸನಂ;

ಇದಮಙ್ಗದ್ವಯಂ ವುತ್ತಂ, ಪಠಮನ್ತಿಮವತ್ಥುನೋ.

೩೫.

ದುಕ್ಕಟಂ ಪಠಮಸ್ಸೇವ, ಸಾಮನ್ತಮಿತಿ ವಣ್ಣಿತಂ;

ಸೇಸಾನಂ ಪನ ತಿಣ್ಣಮ್ಪಿ, ಥುಲ್ಲಚ್ಚಯಮುದೀರಿತಂ.

೩೬.

‘‘ಅನಾಪತ್ತೀ’’ತಿ ಞಾತಬ್ಬಂ, ಅಜಾನನ್ತಸ್ಸ ಭಿಕ್ಖುನೋ;

ತಥೇವಾಸಾದಿಯನ್ತಸ್ಸ, ಜಾನನ್ತಸ್ಸಾದಿಕಮ್ಮಿನೋ.

೩೭.

ವಿನಯೇ ಅನಯೂಪರಮೇ ಪರಮೇ;

ಸುಜನಸ್ಸ ಸುಖಾನಯನೇ ನಯನೇ;

ಪಟು ಹೋತಿ ಪಧಾನರತೋ ನ ರತೋ;

ಇಧ ಯೋ ಪನ ಸಾರಮತೇ ರಮತೇ.

೩೮.

ಇಮಂ ಹಿತವಿಭಾವನಂ ಭಾವನಂ;

ಅವೇದಿ ಸುರಸಮ್ಭವಂ ಸಮ್ಭವಂ;

ಸ ಮಾರಬಳಿಸಾಸನೇ ಸಾಸನೇ;

ಸಮೋ ಭವತುಪಾಲಿನಾ ಪಾಲಿನಾ.

ಇತಿ ವಿನಯವಿನಿಚ್ಛಯೇ ಪಠಮಪಾರಾಜಿಕಕಥಾ ನಿಟ್ಠಿತಾ.

ದುತಿಯಪಾರಾಜಿಕಕಥಾ

೩೯.

ಆದಿಯನ್ತೋ ¶ ಹರನ್ತೋವ-ಹರನ್ತೋ ಇರಿಯಾಪಥಂ;

ವಿಕೋಪೇನ್ತೋ ತಥಾ ಠಾನಾ, ಚಾವೇನ್ತೋಪಿ ಪರಾಜಿತೋ.

೪೦.

ತತ್ಥ ¶ ನಾನೇಕಭಣ್ಡಾನಂ, ಪಞ್ಚಕಾನಂ ವಸಾ ಪನ;

ಅವಹಾರಾ ದಸೇವೇತೇ, ವಿಞ್ಞಾತಬ್ಬಾ ವಿಭಾವಿನಾ.

೪೧.

ಸಾಹತ್ಥಾಣತ್ತಿಕೋ ಚೇವ, ನಿಸ್ಸಗ್ಗೋ ಅತ್ಥಸಾಧಕೋ;

ಧುರನಿಕ್ಖೇಪನಞ್ಚಾತಿ, ಇದಂ ಸಾಹತ್ಥಪಞ್ಚಕಂ.

೪೨.

ಪುಬ್ಬಸಹಪಯೋಗೋ ಚ, ಸಂವಿದಾಹರಣಮ್ಪಿ ಚ;

ಸಙ್ಕೇತಕಮ್ಮಂ ನೇಮಿತ್ತಂ, ಪುಬ್ಬಯೋಗಾದಿಪಞ್ಚಕಂ.

೪೩.

ಥೇಯ್ಯಪಸಯ್ಹಪರಿಕಪ್ಪ-ಪಟಿಚ್ಛನ್ನಕುಸಾದಿಕಾ;

ಅವಹಾರಾ ಇಮೇ ಪಞ್ಚ, ವೇದಿತಬ್ಬಾವ ವಿಞ್ಞುನಾ.

೪೪.

ವತ್ಥುಕಾಲಗ್ಘದೇಸೇ ಚ, ಪರಿಭೋಗಞ್ಚ ಪಞ್ಚಪಿ;

ಞತ್ವಾ ಏತಾನಿ ಕಾತಬ್ಬೋ, ಪಣ್ಡಿತೇನ ವಿನಿಚ್ಛಯೋ.

೪೫.

ದುತಿಯಂ ವಾಪಿ ಕುದ್ದಾಲಂ, ಪಿಟಕಂ ಪರಿಯೇಸತೋ;

ಗಚ್ಛತೋ ಥೇಯ್ಯಚಿತ್ತೇನ, ದುಕ್ಕಟಂ ಪುಬ್ಬಯೋಗತೋ.

೪೬.

ತತ್ಥಜಾತಕಕಟ್ಠಂ ವಾ, ಲತಂ ವಾ ಛಿನ್ದತೋ ಪನ;

ದುಕ್ಕಟಂ ಉಭಯತ್ಥಾಪಿ, ವುತ್ತಂ ಸಹಪಯೋಗತೋ.

೪೭.

ಪಥವಿಂ ಖಣತೋ ವಾಪಿ, ಬ್ಯೂಹತೋ ಪಂಸುಮೇವ ವಾ;

ಆಮಸನ್ತಸ್ಸ ವಾ ಕುಮ್ಭಿಂ, ಹೋತಿ ಆಪತ್ತಿ ದುಕ್ಕಟಂ.

೪೮.

ಮುಖೇ ಪಾಸಂ ಪವೇಸೇತ್ವಾ, ಖಾಣುಕೇ ಬದ್ಧಕುಮ್ಭಿಯಾ;

ಬನ್ಧನಾನಂ ವಸಾ ಞೇಯ್ಯೋ, ಠಾನಭೇದೋ ವಿಜಾನತಾ.

೪೯.

ದ್ವೇ ಠಾನಾನಿ ಪನೇಕಸ್ಮಿಂ, ಖಾಣುಕೇ ಬದ್ಧಕುಮ್ಭಿಯಾ;

ವಲಯಂ ರುಕ್ಖಮೂಲಸ್ಮಿಂ, ಪವೇಸೇತ್ವಾ ಕತಾಯ ವಾ.

೫೦.

ಉದ್ಧರನ್ತಸ್ಸ ಖಾಣುಂ ವಾ, ಛಿನ್ದತೋ ಸಙ್ಖಲಿಮ್ಪಿ ವಾ;

ಥುಲ್ಲಚ್ಚಯಂ ತತೋ ಕುಮ್ಭಿಂ, ಠಾನಾ ಚಾವೇತಿ ಚೇ ಚುತೋ.

೫೧.

ಪಠಮಂ ¶ ಪನ ಕುಮ್ಭಿಂ ವಾ, ಉದ್ಧರಿತ್ವಾ ತಥಾ ಪುನ;

ಠಾನಾ ಚಾವೇತಿ ಖಾಣುಂ ವಾ, ಸಙ್ಖಲಿಂ ವಾಪಿ ಸೋ ನಯೋ.

೫೨.

ಇತೋ ಚಿತೋ ಚ ಘಂಸನ್ತೋ, ಮೂಲೇ ಸಾರೇತಿ ರಕ್ಖತಿ;

ವಲಯಂ ಖೇಗತಂ ತತ್ಥ, ಕರೋನ್ತೋವ ಪರಾಜಿತೋ.

೫೩.

ಜಾತಂ ಛಿನ್ದತಿ ಚೇ ರುಕ್ಖಂ, ದುಕ್ಕಟಂ ಕುಮ್ಭಿಮತ್ಥಕೇ;

ಸಮೀಪೇ ಛಿನ್ದತೋ ತಸ್ಸ, ಪಾಚಿತ್ತಿಯಮತತ್ಥಜಂ.

೫೪.

ಅನ್ತೋಕುಮ್ಭಿಗತಂ ¶ ಭಣ್ಡಂ, ಫನ್ದಾಪೇತಿ ಸಚೇ ಪನ;

ಅಪಬ್ಯೂಹೇತಿ ತತ್ಥೇವ, ತಸ್ಸ ಥುಲ್ಲಚ್ಚಯಂ ಸಿಯಾ.

೫೫.

ಹರನ್ತೋ ಕುಮ್ಭಿಯಾ ಭಣ್ಡಂ, ಮುಟ್ಠಿಂ ಛಿನ್ದತಿ ಅತ್ತನೋ;

ಭಾಜನೇ ವಾ ಗತಂ ಕತ್ವಾ, ಹೋತಿ ಭಿಕ್ಖು ಪರಾಜಿತೋ.

೫೬.

ಹಾರಂ ವಾ ಪನ ಪಾಮಙ್ಗಂ, ಸುತ್ತಾರುಳ್ಹಂ ತು ಕುಮ್ಭಿಯಾ;

ಫನ್ದಾಪೇತಿ ಯಥಾವತ್ಥುಂ, ಠಾನಾ ಚಾವೇತಿ ಚೇ ಚುತೋ.

೫೭.

ಸಪ್ಪಿಆದೀಸು ಯಂ ಕಿಞ್ಚಿ, ಪಿವತೋ ಪಾದಪೂರಣಂ;

ಏಕೇನೇವ ಪಯೋಗೇನ, ಪೀತಮತ್ತೇ ಪರಾಜಯೋ.

೫೮.

ಕತ್ವಾವ ಧುರನಿಕ್ಖೇಪಂ, ಪಿವನ್ತಸ್ಸ ಪುನಪ್ಪುನಂ;

ಸಕಲಮ್ಪಿ ಚ ತಂ ಕುಮ್ಭಿಂ, ಪಿವತೋ ನ ಪರಾಜಯೋ.

೫೯.

ಸಚೇ ಖಿಪತಿ ಯಂ ಕಿಞ್ಚಿ, ಭಣ್ಡಕಂ ತೇಲಕುಮ್ಭಿಯಂ;

ತಂ ಪಾದಗ್ಘನಕಂ ತೇಲಂ, ಧುವಂ ಪಿವತಿ ತಾವದೇ.

೬೦.

ಹತ್ಥತೋ ಮುತ್ತಮತ್ತೇವ, ಥೇಯ್ಯಚಿತ್ತೋ ವಿನಸ್ಸತಿ;

ಆವಿಞ್ಜೇತ್ವಾಪಿ ವಾ ಕುಮ್ಭಿಂ, ತೇಲಂ ಗಾಳೇತಿ ಚೇ ತಥಾ.

೬೧.

ತೇಲಸ್ಸಾಕಿರಣಂ ಞತ್ವಾ, ಖಿತ್ತಂ ರಿತ್ತಾಯ ಕುಮ್ಭಿಯಾ;

ಪೀತಂ ತೇಲಞ್ಚ ತಂ ಭಣ್ಡಂ, ಉದ್ಧರನ್ತೋವ ಧಂಸಿತೋ.

೬೨.

ತತ್ಥೇವ ಭಿನ್ದತೋ ತೇಲಂ, ಛಡ್ಡೇನ್ತಸ್ಸ ತಥೇವ ಚ;

ಝಾಪೇನ್ತಸ್ಸ ಅಭೋಗಂ ವಾ, ಕರೋನ್ತಸ್ಸ ಚ ದುಕ್ಕಟಂ.

ಭೂಮಟ್ಠಕಥಾ.

೬೩.

ಠಪಿತಂ ¶ ಪತ್ಥರಿತ್ವಾ ಚ, ಸಾಟಕತ್ಥರಣಾದಿಕಂ;

ವೇಠೇತ್ವಾ ಉದ್ಧರನ್ತಸ್ಸ, ಮುತ್ತೇ ಠಾನಾ ಪರಾಭವೋ.

೬೪.

ಓರಿಮನ್ತೇನ ವಾ ಫುಟ್ಠ-ಮೋಕಾಸಂ ಪಾರಿಮನ್ತತೋ;

ಪಾರಾಜಿಕಮತಿಕ್ಕನ್ತೇ, ಕಡ್ಢತೋ ಉಜುಕಮ್ಪಿ ವಾ.

ಥಲಟ್ಠಕಥಾ.

೬೫.

ಪುರತೋ ಮುಖತುಣ್ಡಞ್ಚ, ಕಲಾಪಗ್ಗಞ್ಚ ಪಚ್ಛತೋ;

ದ್ವೀಸು ಪಸ್ಸೇಸು ಪಕ್ಖನ್ತೋ, ಹೇಟ್ಠಾ ಪಾದನಖಾ ತಥಾ.

೬೬.

ಉದ್ಧಞ್ಚಾಪಿ ¶ ಸಿಖಗ್ಗನ್ತಿ, ಗಗನೇ ಗಚ್ಛತೋ ಪನ;

ಮೋರಸ್ಸ ಛ ಪರಿಚ್ಛೇದಾ, ವೇದಿತಬ್ಬಾ ವಿಭಾವಿನಾ.

೬೭.

ಭಿಕ್ಖು ‘‘ಸಸ್ಸಾಮಿಕಂ ಮೋರಂ, ಗಹೇಸ್ಸಾಮೀ’’ತಿ ಖೇಗತಂ;

ಹತ್ಥಂ ವಾಪಿ ಪಸಾರೇತಿ, ಪುರತೋ ವಾಸ್ಸ ತಿಟ್ಠತಿ.

೬೮.

ಮೋರೋಪಿ ಗಗನೇ ಪಕ್ಖೇ, ಚಾರೇತಿ ನ ಚ ಗಚ್ಛತಿ;

ದುಕ್ಕಟಂ ಗಮನಚ್ಛೇದೇ, ಆಮಸನ್ತಸ್ಸ ಚೇವ ತಂ.

೬೯.

ಠಾನಾ ಮೋರಮಮೋಚೇನ್ತೋ, ಫನ್ದಾಪೇತಿ ಸಚೇ ಪನ;

ಏವಂ ಫನ್ದಾಪನೇ ತಸ್ಸ, ಥುಲ್ಲಚ್ಚಯಮುದೀರಿತಂ.

೭೦.

ಅಗ್ಗಹೇತ್ವಾ ಗಹೇತ್ವಾ ವಾ, ಹತ್ಥೇನ ಪನ ಅತ್ತನೋ;

ಠಾನಾ ಚಾವೇತಿ ಚೇ ಮೋರಂ, ಸಯಂ ಠಾನಾ ಚುತೋ ಸಿಯಾ.

೭೧.

ಫುಟ್ಠೋಕಾಸಂ ಮುಖಗ್ಗೇನ, ಕಲಾಪಗ್ಗೇನ ವಾ ಪನ;

ಕಲಾಪಗ್ಗೇನ ವಾ ಫುಟ್ಠಂ, ಮುಖತುಣ್ಡೇನ ಭಿಕ್ಖು ಚೇ.

೭೨.

ಅತಿಕ್ಕಾಮೇಯ್ಯ ಯೋ ಮೋರಂ, ಠಾನಾ ಚಾವೇತಿ ನಾಮ ಸೋ;

ಏಸೇವ ಚ ನಯೋ ಪಾದ-ಸಿಖಾಪಕ್ಖೇಸು ದೀಪಿತೋ.

೭೩.

ಗಗನೇ ಪನ ಗಚ್ಛನ್ತೋ, ಕರೇ ಮೋರೋ ನಿಲೀಯತಿ;

ತಂ ಕರೇನೇವ ಚಾರೇನ್ತೋ, ಫನ್ದಾಪೇತೀತಿ ವುಚ್ಚತಿ.

೭೪.

ಸಚೇ ¶ ಗಣ್ಹಾತಿ ತಂ ಮೋರಂ, ಇತರೇನ ಕರೇನ ಸೋ;

ಚಾವಿತತ್ತಾ ಪನ ಠಾನಾ, ಭಿಕ್ಖು ಠಾನಾ ಚುತೋ ಸಿಯಾ.

೭೫.

ಇತರಂ ಪನ ಮೋರಸ್ಸ, ಉಪನೇತಿ ಸಚೇ ಕರಂ;

ನ ದೋಸೋ ತತ್ಥ ಉಡ್ಡೇತ್ವಾ, ಸಯಮೇವ ನಿಲೀಯತಿ.

೭೬.

ದಿಸ್ವಾ ಅಙ್ಗೇ ನಿಲೀನಂ ತಂ, ಥೇಯ್ಯಚಿತ್ತೇನ ಗಚ್ಛತೋ;

ಪಾದೇ ಥುಲ್ಲಚ್ಚಯಂ ಹೋತಿ, ದುತಿಯೇ ಚ ಪರಾಜಯೋ.

೭೭.

ಭೂಮಿಯಂ ಠಿತಮೋರಸ್ಸ, ತೀಣಿ ಠಾನಾನಿ ಪಣ್ಡಿತೋ;

ಪಾದಾನಞ್ಚ ಕಲಾಪಸ್ಸ, ವಸೇನ ಪರಿದೀಪಯೇ.

೭೮.

ತತೋ ಕೇಸಗ್ಗಮತ್ತಮ್ಪಿ, ಮೋರಂ ಪಥವಿತೋ ಪನ;

ಹೋತಿ ಪಾರಾಜಿಕಂ ತಸ್ಸ, ಉಕ್ಖಿಪನ್ತಸ್ಸ ಭಿಕ್ಖುನೋ.

೭೯.

ಛಿಜ್ಜಮಾನಂ ಸುವಣ್ಣಾದಿಂ, ಪತ್ತೇ ಪತತಿ ಚೇ ಪನ;

ಹತ್ಥೇನ ಉದ್ಧರನ್ತಸ್ಸ, ತಸ್ಸ ಪಾರಾಜಿಕಂ ಸಿಯಾ.

೮೦.

ಸಚೇ ¶ ಅನುದ್ಧರಿತ್ವಾವ, ಥೇಯ್ಯಚಿತ್ತೇನ ಗಚ್ಛತಿ;

ದುತಿಯೇ ಪದವಾರಸ್ಮಿಂ, ಪಾರಾಜಿಕಮುದೀರಯೇ.

೮೧.

ಏಸೇವ ಚ ನಯೋ ಞೇಯ್ಯೋ, ಹತ್ಥೇ ವತ್ಥೇವ ಮತ್ಥಕೇ;

ತಂ ತಂ ತಸ್ಸ ಭವೇ ಠಾನಂ, ಯತ್ಥ ಯತ್ಥ ಪತಿಟ್ಠಿತಂ.

ಆಕಾಸಟ್ಠಕಥಾ.

೮೨.

ಥೇಯ್ಯಚಿತ್ತೇನ ಯಂ ಕಿಞ್ಚಿ, ಮಞ್ಚಪೀಠಾದಿಸುಟ್ಠಿತಂ;

ಆಮಾಸಮ್ಪಿ ಅನಾಮಾಸಂ, ಆಮಸನ್ತಸ್ಸ ದುಕ್ಕಟಂ.

೮೩.

ಸಂಹರಿತ್ವಾ ಸಚೇ ವಂಸೇ, ಠಪಿತಂ ಹೋತಿ ಚೀವರಂ;

ಕತ್ವಾ ಪುನೋರತೋ ಭೋಗಂ, ತಥಾ ಅನ್ತಞ್ಚ ಪಾರತೋ.

೮೪.

ಚೀವರೇನ ಫುಟ್ಠೋಕಾಸೋ, ಠಾನಂ ತಸ್ಸ ಪವುಚ್ಚತಿ;

ನ ತು ಚೀವರವಂಸೋ ಸೋ, ಹೋತೀತಿ ಸಕಲೋ ಮತೋ.

೮೫.

ಓರಿಮನ್ತೇನ ¶ ಓಕಾಸಂ, ಫುಟ್ಠಂ ತಮಿತರೇನ ವಾ;

ಇತರೇನಪಿ ವಾ ಫುಟ್ಠಂ, ಓರಿಮನ್ತೇನ ವಾ ಪುನ.

೮೬.

ದಕ್ಖಿಣನ್ತೇನ ಫುಟ್ಠಂ ವಾ, ವಾಮನ್ತೇನಿತರೇನ ವಾ;

ವಾಮನ್ತೇನ ಫುಟ್ಠಟ್ಠಾನಂ, ಅತಿಕ್ಕಾಮಯತೋ ಚುತಿ.

೮೭.

ಉದ್ಧಂ ವಾ ಉಕ್ಖಿಪನ್ತಸ್ಸ, ಚೀವರಂ ಪನ ವಂಸತೋ;

ಕೇಸಗ್ಗಮತ್ತೇ ಉಕ್ಖಿತ್ತೇ, ತಸ್ಸ ಪಾರಾಜಿಕಂ ಭವೇ.

೮೮.

ರಜ್ಜುಕೇನ ಚ ಬನ್ಧಿತ್ವಾ, ಠಪಿತಂ ಪನ ಚೀವರಂ;

ಥುಲ್ಲಚ್ಚಯಂ ವಿಮೋಚೇನ್ತೋ, ಮುತ್ತೇ ಪಾರಾಜಿಕಂ ಫುಸೇ.

೮೯.

ವೇಠೇತ್ವಾ ಠಪಿತಂ ವಂಸೇ, ನಿಬ್ಬೇಠೇನ್ತಸ್ಸ ಭಿಕ್ಖುನೋ;

ವಲಯಂ ಛಿನ್ದತೋ ವಾಪಿ, ಮೋಚೇನ್ತಸ್ಸಪ್ಯಯಂ ನಯೋ.

೯೦.

ಚೀವರಸ್ಸ ಪಸಾರೇತ್ವಾ, ಠಪಿತಸ್ಸ ಹಿ ವಂಸಕೇ;

ಸಂಹರಿತ್ವಾ ತು ನಿಕ್ಖಿತ್ತೇ, ಚೀವರೇ ವಿಯ ನಿಚ್ಛಯೋ.

೯೧.

ಸಿಕ್ಕಾಯ ಪಕ್ಖಿಪಿತ್ವಾ ಯಂ, ಲಗ್ಗಿತಂ ಹೋತಿ ಭಣ್ಡಕಂ;

ಸಿಕ್ಕಾತೋ ತಂ ಹರನ್ತೋ ವಾ, ಸಹ ಸಿಕ್ಕಾಯ ವಾ ಚುತೋ.

೯೨.

ಕುನ್ತಾದಿಂ ನಾಗದನ್ತೇಸು, ಠಿತೇಸು ಪಟಿಪಾಟಿಯಾ;

ಅಗ್ಗೇ ವಾ ಪನ ಬುನ್ದೇ ವಾ, ಗಹೇತ್ವಾ ಪರಿಕಡ್ಢತೋ.

೯೩.

ಪಾರಾಜಿಕಂ ¶ ಫುಟ್ಠೋಕಾಸಂ, ಅತಿಕ್ಕಾಮಯತೋ ಸಿಯಾ;

ಉಜುಕಂ ಉಕ್ಖಿಪನ್ತಸ್ಸ, ಕೇಸಗ್ಗೇನ ಪರಾಜಯೋ.

೯೪.

ಪಾಕಾರಾಭಿಮುಖೋ ಠತ್ವಾ, ಆಕಡ್ಢತಿ ಸಚೇ ಪನ;

ಓರಿಮನ್ತಫುಟ್ಠೋಕಾಸ-ಮಿತರನ್ತಚ್ಚಯೇ ಚುತೋ.

೯೫.

ತಥೇವ ಪರತೋ ತಸ್ಸ, ಪೇಲ್ಲೇನ್ತಸ್ಸಾಪಿ ಭಿಕ್ಖುನೋ;

ಭಿತ್ತಿಂ ಪನ ಚ ನಿಸ್ಸಾಯ, ಠಪಿತೇಪಿ ಅಯಂ ನಯೋ.

೯೬.

ಚಾಲೇನ್ತಸ್ಸ ಚ ತಾಲಸ್ಸ, ಫಲಂ ವತ್ಥು ಹಿ ಪೂರತಿ;

ಯೇನಸ್ಸ ಬನ್ಧನಾ ಮುತ್ತೇ, ತಸ್ಮಿಂ ಪಾರಾಜಿಕಂ ಭವೇ.

೯೭.

ಪಿಣ್ಡಿಂ ¶ ಛಿನ್ದತಿ ತಾಲಸ್ಸ, ಸಚೇ ಪಾರಾಜಿಕಂ ಸಿಯಾ;

ಏಸೇವ ಚ ನಯೋ ಸೇಸ-ರುಕ್ಖಪುಪ್ಫಫಲೇಸುಪಿ.

ವೇಹಾಸಟ್ಠಕಥಾ.

೯೮.

ಗಚ್ಛತೋ ಹಿ ನಿಧಿಟ್ಠಾನಂ, ಪದವಾರೇನ ದುಕ್ಕಟಂ;

ಉದಕೇ ಪನ ಗಮ್ಭೀರೇ, ತಥಾ ನಿಮುಜ್ಜನಾದಿಸು.

೯೯.

ತತ್ಥಜಾತಕಪುಪ್ಫೇಸು, ಯೇನ ಪುಪ್ಫೇನ ಪೂರತಿ;

ವತ್ಥು ತಂ ಛಿನ್ದತೋ ಪುಪ್ಫಂ, ತಸ್ಸ ಪಾರಾಜಿಕಂ ವದೇ.

೧೦೦.

ಏಕನಾಳಸ್ಸ ವಾ ಪಸ್ಸೇ, ವಾಕೋ ಉಪ್ಪಲಜಾತಿಯಾ;

ನ ಛಿಜ್ಜತಿ ತತೋ ಯಾವ, ತಾವ ನಂ ಪರಿರಕ್ಖತಿ.

೧೦೧.

ಸಾಮಿಕೇಹೇವ ಪುಪ್ಫೇಸು, ಛಿನ್ದಿತ್ವಾ ಠಪಿತೇಸುಪಿ;

ಪುಬ್ಬೇ ವುತ್ತನಯೇನೇವ, ವೇದಿತಬ್ಬೋ ವಿನಿಚ್ಛಯೋ.

೧೦೨.

ಭಾರಬದ್ಧಾನಿ ಪುಪ್ಫಾನಿ, ಛಸ್ವಾಕಾರೇಸು ಕೇನಚಿ;

ಆಕಾರೇನ ಸಚೇ ತಾನಿ, ಠಾನಾ ಚಾವೇತಿ ನಸ್ಸತಿ.

೧೦೩.

ಠಪಿತಂ ಪನ ಪುಪ್ಫಾನಂ, ಕಲಾಪಂ ಜಲಪಿಟ್ಠಿಯಂ;

ಚಾಲೇತ್ವಾ ಉದಕಂ ಪುಪ್ಫ-ಟ್ಠಾನಾ ಚಾವೇತಿ ಚೇ ಚುತೋ.

೧೦೪.

ಪರಿಕಪ್ಪೇತಿ ಚೇ ‘‘ಏತ್ಥ, ಗಹೇಸ್ಸಾಮೀ’’ತಿ ರಕ್ಖತಿ;

ಉದ್ಧರನ್ತೋ ಗತಟ್ಠಾನಾ, ಭಟ್ಠೋ ನಾಮ ಪವುಚ್ಚತಿ.

೧೦೫.

ಅಚ್ಚುಗ್ಗತಸ್ಸ ತಂ ಠಾನಂ, ಜಲತೋ ಸಕಲಂ ಜಲಂ;

ಉಪ್ಪಾಟೇತ್ವಾ ತತೋ ಪುಪ್ಫಂ, ಉಜುಮುದ್ಧರತೋ ಪನ.

೧೦೬.

ನಾಳನ್ತೇ ¶ ಜಲತೋ ಮುತ್ತ-ಮತ್ತೇ ಪಾರಾಜಿಕಂ ಭವೇ;

ಅಮುತ್ತೇ ಜಲತೋ ತಸ್ಮಿಂ, ಥುಲ್ಲಚ್ಚಯಮುದೀರಿತಂ.

೧೦೭.

ಪುಪ್ಫೇ ಗಹೇತ್ವಾ ನಾಮೇತ್ವಾ, ಉಪ್ಪಾಟೇತಿ ಸಚೇ ಪನ;

ನ ತಸ್ಸ ಉದಕಂ ಠಾನಂ, ನಟ್ಠೋ ಉಪ್ಪಾಟಿತಕ್ಖಣೇ.

೧೦೮.

ಯೋ ¶ ಹಿ ಸಸ್ಸಾಮಿಕೇ ಮಚ್ಛೇ, ಥೇಯ್ಯಚಿತ್ತೇನ ಗಣ್ಹತಿ;

ಬಳಿಸೇನಪಿ ಜಾಲೇನ, ಹತ್ಥೇನ ಕುಮಿನೇನ ವಾ.

೧೦೯.

ತಸ್ಸೇವಂ ಗಣ್ಹತೋ ವತ್ಥು, ಯೇನ ಮಚ್ಛೇನ ಪೂರತಿ;

ತಸ್ಮಿಂ ಉದ್ಧಟಮತ್ತಸ್ಮಿಂ, ಜಲಾ ಹೋತಿ ಪರಾಜಯೋ.

೧೧೦.

ಠಾನಂ ಸಲಿಲಜಾನಞ್ಹಿ, ಕೇವಲಂ ಸಕಲಂ ಜಲಂ;

ಸಲಿಲಟ್ಠಂ ವಿಮೋಚೇನ್ತೋ, ಜಲಾ ಪಾರಾಜಿಕೋ ಭವೇ.

೧೧೧.

ನೀರತೋ ಉಪ್ಪತಿತ್ವಾ ಯೋ, ತೀರೇ ಪತತಿ ವಾರಿಜೋ;

ಗಣ್ಹತೋ ತಂ ಪನಾಪತ್ತಿಂ, ಭಣ್ಡಗ್ಘೇನ ವಿನಿದ್ದಿಸೇ.

೧೧೨.

ಮಾರಣತ್ಥಾಯ ಮಚ್ಛಾನಂ, ತಳಾಕೇ ನದಿಯಾಪಿ ವಾ;

ನಿನ್ನೇ ಮಚ್ಛವಿಸಂ ನಾಮ, ಪಕ್ಖಿಪಿತ್ವಾ ಗತೇ ಪನ.

೧೧೩.

ಪಚ್ಛಾ ಮಚ್ಛವಿಸಂ ಮಚ್ಛಾ, ಖಾದಿತ್ವಾ ಪಿಲವನ್ತಿ ಚೇ;

ಪಾರಾಜಿಕಂ ಮತೇ ಮಚ್ಛೇ, ಥೇಯ್ಯಚಿತ್ತೇನ ಗಣ್ಹತೋ.

೧೧೪.

ಪಂಸುಕೂಲಿಕಸಞ್ಞಾಯ, ನ ದೋಸೋ ಕೋಚಿ ಗಣ್ಹತೋ;

ಸಾಮಿಕೇಸ್ವಾಹರನ್ತೇಸು, ಭಣ್ಡದೇಯ್ಯಮುದೀರಿತಂ.

೧೧೫.

ಗಹೇತ್ವಾ ಸಾಮಿಕಾ ಮಚ್ಛೇ, ಸಚೇ ಯನ್ತಿ ನಿರಾಲಯಾ;

ಗಣ್ಹತೋ ಪನ ತೇ ಸೇಸೇ, ಥೇಯ್ಯಚಿತ್ತೇನ ದುಕ್ಕಟಂ.

೧೧೬.

ಅಮತೇಸು ಅನಾಪತ್ತಿಂ, ವದನ್ತಿ ವಿನಯಞ್ಞುನೋ;

ಏಸೇವ ಚ ನಯೋ ಸೇಸೇ, ಕಚ್ಛಪಾದಿಮ್ಹಿ ವಾರಿಜೇ.

ಉದಕಟ್ಠಕಥಾ.

೧೧೭.

‘‘ನಾವಂ ನಾವಟ್ಠಂ ವಾ ಭಣ್ಡಂ, ಥೇನೇತ್ವಾ ಗಣ್ಹಿಸ್ಸಾಮೀ’’ತಿ;

ಪಾದುದ್ಧಾರೇ ದೋಸಾ ವುತ್ತಾ, ಭಿಕ್ಖುಸ್ಸೇವಂ ಗಚ್ಛನ್ತಸ್ಸ.

೧೧೮.

ಬದ್ಧಾಯ ¶ ನಾವಾಯ ಹಿ ಚಣ್ಡಸೋತೇ;

ಠಾನಂ ಮತಂ ಬನ್ಧನಮೇಕಮೇವ;

ಭಿಕ್ಖುಸ್ಸ ¶ ತಸ್ಮಿಂ ಮುತ್ತಮತ್ತೇ;

ಪಾರಾಜಿಕಂ ತಸ್ಸ ವದನ್ತಿ ಧೀರಾ.

೧೧೯.

ನಿಚ್ಚಲೇ ಉದಕೇ ನಾವ-ಮಬನ್ಧನಮವಟ್ಠಿತಂ;

ಪುರತೋ ಪಚ್ಛತೋ ವಾಪಿ, ಪಸ್ಸತೋ ವಾಪಿ ಕಡ್ಢತೋ.

೧೨೦.

ಏಕೇನನ್ತೇನ ಸಮ್ಫುಟ್ಠ-ಮೋಕಾಸಮಿತರೇನ ತಂ;

ಅತಿಕ್ಕಾಮಯತೋ ನಾವಂ, ತಸ್ಸ ಪಾರಾಜಿಕಂ ಸಿಯಾ.

೧೨೧. ತಥಾ –

ಉದ್ಧಂ ಕೇಸಗ್ಗಮತ್ತಮ್ಪಿ, ಉದಕಮ್ಹಾ ವಿಮೋಚಿತೇ;

ಅಧೋನಾವಾತಲಂ ತೇನ, ಫುಟ್ಠಞ್ಚ ಮುಖವಟ್ಟಿಯಾ.

೧೨೨.

ಬನ್ಧಿತ್ವಾ ಪನ ಯಾ ತೀರೇ, ಠಪಿತಾ ನಿಚ್ಚಲೇ ಜಲೇ;

ಬನ್ಧನಞ್ಚ ಠಿತೋಕಾಸೋ, ಠಾನಂ ತಸ್ಸಾ ದ್ವಿಧಾ ಮತಂ.

೧೨೩.

ಹೋತಿ ಥುಲ್ಲಚ್ಚಯಂ ಪುಬ್ಬಂ, ಬನ್ಧನಸ್ಸ ವಿಮೋಚನೇ;

ಪಚ್ಛಾ ಕೇನಚುಪಾಯೇನ, ಠಾನಾ ಚಾವೇತಿ ಚೇ ಚುತೋ.

೧೨೪.

ಚಾವೇತ್ವಾ ಪಠಮಂ ಠಾನಾ, ಪಚ್ಛಾ ಬನ್ಧನಮೋಚನೇ;

ಏಸೇವ ಚ ನಯೋ ವುತ್ತೋ, ಥೇಯ್ಯಚಿತ್ತಸ್ಸ ಭಿಕ್ಖುನೋ.

೧೨೫.

ಉಸ್ಸಾರೇತ್ವಾ ನಿಕುಜ್ಜಿತ್ವಾ, ಠಪಿತಾಯ ಥಲೇ ಪನ;

ಫುಟ್ಠೋಕಾಸೋವ ಹಿ ಠಾನಂ, ನಾವಾಯ ಮುಖವಟ್ಟಿಯಾ.

೧೨೬.

ಞೇಯ್ಯೋ ಠಾನಪರಿಚ್ಛೇದೋ;

ಆಕಾರೇಹೇವ ಪಞ್ಚಹಿ;

ಯತೋ ಕುತೋಚಿ ಚಾವೇನ್ತೋ;

ಹೋತಿ ಪಾರಾಜಿಕೋ ನರೋ.

೧೨೭.

ಏಸೇವ ಚ ನಯೋ ಞೇಯ್ಯೋ, ನಾವಾಯುಕ್ಕುಜ್ಜಿತಾಯಪಿ;

ಠಪಿತಾಯಪಿ ನಾವಾಯ, ಘಟಿಕಾನಂ ತಥೂಪರಿ.

೧೨೮.

ಥೇಯ್ಯಾ ¶ ತಿತ್ಥೇ ಠಿತಂ ನಾವಂ, ಆರುಹಿತ್ವಾ ಸಚೇ ಪನ;

ಅರಿತ್ತೇನ ಫಿಯೇನಾಪಿ, ಪಾಜೇನ್ತಸ್ಸ ಪರಾಜಯೋ.

೧೨೯.

ಸಚೇ ಛತ್ತಂ ಪಣಾಮೇತ್ವಾ, ಉಸ್ಸಾಪೇತ್ವಾವ ಚೀವರಂ;

ಲಙ್ಕಾರಸದಿಸಂ ಕತ್ವಾ, ಗಣ್ಹಾಪೇತಿ ಸಮೀರಣಂ.

೧೩೦.

ಆಗಮ್ಮ ¶ ಬಲವಾ ವಾತೋ, ನಾವಂ ಹರತಿ ಚೇ ಪನ;

ವಾತೇನೇವ ಹಟಾ ನಾವಾ, ನ ದೋಸೋ ಕೋಚಿ ವಿಜ್ಜತಿ.

೧೩೧.

ಸಯಮೇವ ಚ ಯಂ ಕಿಞ್ಚಿ, ಗಾಮತಿತ್ಥಮುಪಾಗತಂ;

ಅಚಾವೇನ್ತೋವ ತಂ ಠಾನಾ, ಕಿಣಿತ್ವಾ ಚೇ ಪಲಾಯತಿ.

೧೩೨.

ಅವಹಾರೋ ನ ಭಿಕ್ಖುಸ್ಸ, ಭಣ್ಡದೇಯ್ಯಮುದೀರಿತಂ;

ಸಯಮೇವ ಚ ಗಚ್ಛನ್ತಿಂ, ಠಾನಾ ಚಾವೇತಿ ಚೇ ಚುತೋ.

ನಾವಟ್ಠಕಥಾ.

೧೩೩.

ಯಾನಂ ನಾಮ ರಥೋ ವಯ್ಹಂ, ಸಕಟಂ ಸನ್ದಮಾನಿಕಾ;

ಯಾನಂ ಅವಹರಿಸ್ಸಾಮಿ, ಯಾನಟ್ಠಮಿತಿ ವಾ ಪನ.

೧೩೪.

ಗಚ್ಛತೋ ದುಕ್ಕಟಂ ವುತ್ತಂ, ದುತಿಯಂ ಪರಿಯೇಸತೋ;

ಠಾನಾ ಚಾವನಯೋಗಸ್ಮಿಂ, ವಿಜ್ಜಮಾನೇ ಪರಾಜಯೋ.

೧೩೫.

ಯಾನಸ್ಸ ದುಕಯುತ್ತಸ್ಸ, ದಸ ಠಾನಾನಿ ದೀಪಯೇ;

ಯಾನಂ ಪಾಜಯತೋ ತಸ್ಸ, ನಿಸೀದಿತ್ವಾ ಧುರೇ ಪನ.

೧೩೬.

ಥುಲ್ಲಚ್ಚಯಂ ತು ಗೋಣಾನಂ, ಪಾದುದ್ಧಾರೇ ವಿನಿದ್ದಿಸೇ;

ಚಕ್ಕಾನಞ್ಹಿ ಠಿತೋಕಾಸ-ಮತಿಕ್ಕನ್ತೇ ಪರಾಭವೋ.

೧೩೭.

ಅಯುತ್ತಕಸ್ಸಾಪಿ ಚ ಯಾನಕಸ್ಸ, ಧುರೇನುಪತ್ಥಮ್ಭನಿಯಂ ಠಿತಸ್ಸ;

ವಸೇನುಪತ್ಥಮ್ಭನಿಚಕ್ಕಕಾನಂ, ಠಾನಾನಿ ತೀಣೇವ ಭವನ್ತಿ ತಸ್ಸ.

೧೩೮.

ತಥಾ ಧುರೇನ ದಾರೂನಂ, ಉಪರಿಟ್ಠಪಿತಸ್ಸ ಚ;

ಭೂಮಿಯಮ್ಪಿ ಧುರೇನೇವ, ತಥೇವ ಠಪಿತಸ್ಸ ಚ.

೧೩೯.

ಪುರತೋ ¶ ಪಚ್ಛತೋ ವಾಪಿ, ಠಾನಾ ಚಾವೇತಿ ಚೇ ಪನ;

ಥುಲ್ಲಚ್ಚಯಂ ತು ತಿಣ್ಣಮ್ಪಿ, ಠಾನಾ ಚಾವೇ ಪರಾಜಯೋ.

೧೪೦.

ಅಪನೇತ್ವಾನ ಚಕ್ಕಾನಿ, ಅಕ್ಖಾನಂ ಸೀಸಕೇಹಿ ತು;

ಠಿತಸ್ಸೂಪರಿ ದಾರೂನಂ, ಠಾನಾನಿ ದ್ವೇ ವಿನಿದ್ದಿಸೇ.

೧೪೧.

ಕಡ್ಢನ್ತೋ ಉಕ್ಖಿಪನ್ತೋ ವಾ, ಫುಟ್ಠೋಕಾಸಚ್ಚಯೇ ಚುತೋ;

ಠಪಿತಸ್ಸ ಪನಞ್ಞಸ್ಸ, ಭೂಮಿಯಂ ಯಸ್ಸ ಕಸ್ಸಚಿ.

೧೪೨.

ಅಕ್ಖುದ್ಧೀನಂ ಧುರಸ್ಸಾತಿ, ಪಞ್ಚ ಠಾನಾನಿ ದೀಪಯೇ;

ಉದ್ಧೀಸು ವಾ ಗಹೇತ್ವಾ ತಂ, ಠಾನಾ ಚಾವೇತಿ ಚೇ ಚುತೋ.

೧೪೩.

ಠಪಿತಸ್ಸ ¶ ಹಿ ಚಕ್ಕಸ್ಸ, ನಾಭಿಯಾ ಪನ ಭೂಮಿಯಂ;

ಏಕಮೇವ ಸಿಯಾ ಠಾನಂ, ಪರಿಚ್ಛೇದೋಪಿ ಪಞ್ಚಧಾ.

೧೪೪.

ಫುಸಿತ್ವಾ ಯಂ ಠಿತಂ ಭೂಮಿಂ, ನೇಮಿಪಸ್ಸೇನ ನಾಭಿಯಾ;

ಠಾನಾನಿ ದ್ವೇ ಭವನ್ತಸ್ಸ, ನಟ್ಠೋ ತೇಸಮತಿಕ್ಕಮೇ.

೧೪೫.

ದಿಸ್ವಾ ಯಾನಮನಾರಕ್ಖಂ, ಪಟಿಪನ್ನಂ ಮಹಾಪಥೇ;

ಆರುಹಿತ್ವಾ ಅಚೋದೇತ್ವಾ, ಕಿಣಿತ್ವಾ ಯಾತಿ ವಟ್ಟತಿ.

ಯಾನಟ್ಠಕಥಾ.

೧೪೬.

ಸೀಸಕ್ಖನ್ಧಕಟೋಲಮ್ಬ-ವಸಾ ಭಾರೋ ಚತುಬ್ಬಿಧೋ;

ತತ್ಥ ಸೀಸಗತಂ ಭಾರಂ, ಆಮಸನ್ತಸ್ಸ ದುಕ್ಕಟಂ.

೧೪೭.

ಇತೋ ಚಿತೋ ಚ ಘಂಸನ್ತೋ, ಥೇಯ್ಯಚಿತ್ತೇನ ಯೋ ಪನ;

ಸಿರಸ್ಮಿಂಯೇವ ಸಾರೇತಿ, ತಸ್ಸ ಥುಲ್ಲಚ್ಚಯಂ ಸಿಯಾ.

೧೪೮.

ಖನ್ಧಂ ಓರೋಪಿತೇ ಭಾರೇ, ತಸ್ಸ ಪಾರಾಜಿಕಂ ಮತಂ;

ಸೀಸತೋ ಕೇಸಮತ್ತಮ್ಪಿ, ಮೋಚೇನ್ತೋಪಿ ಪರಾಜಿತೋ.

೧೪೯.

ಭಾರಂ ಪಥವಿಯಂ ಕಿಞ್ಚಿ, ಠಪೇತ್ವಾ ಸುದ್ಧಮಾನಸೋ;

ಪಚ್ಛಾ ತಂ ಥೇಯ್ಯಚಿತ್ತೇನ, ಉದ್ಧರನ್ತೋ ಪರಾಜಿತೋ.೫೨೨

೧೫೦.

ಏತ್ಥ ¶ ವುತ್ತನಯೇನೇವ, ಸೇಸೇಸುಪಿ ಅಸೇಸತೋ;

ಭಾರೇಸು ಮತಿಸಾರೇನ, ವೇದಿತಬ್ಬೋ ವಿನಿಚ್ಛಯೋ.

ಭಾರಟ್ಠಕಥಾ.

೧೫೧.

ದುಕ್ಕಟಂ ಮುನಿನಾ ವುತ್ತಂ, ಆರಾಮಂ ಅಭಿಯುಞ್ಜತೋ;

ಪರಾಜೇತಿ ಪರಂ ಧಮ್ಮಂ, ಚರನ್ತೋ ಚೇ ಪರಾಜಿತೋ.೫೨೨

೧೫೨.

ವಿಮತಿಂ ಜನಯನ್ತಸ್ಸ, ತಸ್ಸ ಥುಲ್ಲಚ್ಚಯಂ ಸಿಯಾ;

ಪರಜ್ಜತಿ ಸಯಂ ಧಮ್ಮಂ, ಚರನ್ತೋ ಯೋಪಿ ತಸ್ಸ ಚ.

೧೫೩.

ಸಾಮಿನೋ ಧುರನಿಕ್ಖೇಪೇ, ‘‘ನ ದಸ್ಸಾಮೀ’’ತಿ ಚತ್ತನೋ;

ಪಾರಾಜಿಕಂ ಭವೇ ತಸ್ಸ, ಸಬ್ಬೇಸಂ ಕೂಟಸಕ್ಖಿನಂ.

ಆರಾಮಟ್ಠಕಥಾ.

೧೫೪.

ವಿಹಾರಂ ¶ ಸಙ್ಘಿಕಂ ಕಿಞ್ಚಿ, ಅಚ್ಛಿನ್ದಿತ್ವಾನ ಗಣ್ಹಿತುಂ;

ಸಬ್ಬೇಸಂ ಧುರನಿಕ್ಖೇಪಾ-ಭಾವತೋವ ನ ಸಿಜ್ಝತಿ.

ವಿಹಾರಟ್ಠಕಥಾ.

೧೫೫.

ಸೀಸಾನಿ ಸಾಲಿಆದೀನಂ, ನಿರುಮ್ಭಿತ್ವಾನ ಗಣ್ಹತೋ;

ಅಸಿತೇನ ಚ ಲಾಯಿತ್ವಾ, ಛಿನ್ದಿತ್ವಾ ವಾ ಕರೇನ ಚ.

೧೫೬.

ಯಸ್ಮಿಂ ಬೀಜೇಪಿ ವಾ ವತ್ಥು, ಸೀಸೇ ಪೂರೇತಿ ಮುಟ್ಠಿಯಂ;

ಬನ್ಧನಾ ಮೋಚಿತೇ ತಸ್ಮಿಂ, ತಸ್ಸ ಪಾರಾಜಿಕಂ ಭವೇ.

೧೫೭.

ಅಚ್ಛಿನ್ನೋ ಪನ ದಣ್ಡೋ ವಾ, ತಚೋ ವಾ ಅಪ್ಪಮತ್ತಕೋ;

ವೀಹಿನಾಳಮ್ಪಿ ವಾ ದೀಘಂ, ಅನಿಕ್ಖನ್ತೋವ ರಕ್ಖತಿ.

೧೫೮.

ಸಚೇ ¶ ಸೋ ಪರಿಕಪ್ಪೇತಿ, ‘‘ಮದ್ದಿತ್ವಾ ಪನಿದಂ ಅಹಂ;

ಪಪ್ಫೋಟೇತ್ವಾ ಇತೋ ಸಾರಂ, ಗಣ್ಹಿಸ್ಸಾಮೀ’’ತಿ ರಕ್ಖತಿ.

೧೫೯.

ಮದ್ದನುದ್ಧರಣೇ ನತ್ಥಿ, ದೋಸೋ ಪಪ್ಫೋಟನೇಪಿ ವಾ;

ಅತ್ತನೋ ಭಾಜನಗತಂ, ಕರೋನ್ತಸ್ಸ ಪರಾಜಯೋ.

೧೬೦.

ಜಾನಂ ಕೇಸಗ್ಗಮತ್ತಮ್ಪಿ, ಪಥವಿಂ ಪರಸನ್ತಕಂ;

ಥೇಯ್ಯಚಿತ್ತೇನ ಚೇ ಖೀಲಂ, ಸಙ್ಕಾಮೇತಿ ಪರಾಜಯೋ.

೧೬೧.

ತಞ್ಚ ಖೋ ಸಾಮಿಕಾನಂ ತು, ಧುರನಿಕ್ಖೇಪನೇ ಸತಿ;

ಅನಗ್ಘಾ ಭೂಮಿ ನಾಮೇಸಾ, ತಸ್ಮಾ ಏವಮುದೀರಿತಂ.

೧೬೨.

ಗಹೇತಬ್ಬಾ ಸಚೇ ಹೋತಿ, ದ್ವೀಹಿ ಖೀಲೇಹಿ ಯಾ ಪನ;

ಆದೋ ಥುಲ್ಲಚ್ಚಯಂ ತೇಸು, ದುತಿಯೇವ ಪರಾಜಯೋ.

೧೬೩.

ಞಾಪೇತುಕಾಮೋ ಯೋ ಭಿಕ್ಖು, ‘‘ಮಮೇದಂ ಸನ್ತಕ’’ನ್ತಿ ಚ;

ರಜ್ಜುಂ ವಾಪಿ ಪಸಾರೇತಿ, ಯಟ್ಠಿಂ ಪಾತೇತಿ ದುಕ್ಕಟಂ.

೧೬೪.

ಯೇಹಿ ದ್ವೀಹಿ ಪಯೋಗೇಹಿ, ಅತ್ತನೋ ಸನ್ತಕಂ ಸಿಯಾ;

ಆದೋ ಥುಲ್ಲಚ್ಚಯಂ ತೇಸು, ದುತಿಯೇ ಚ ಪರಾಜಯೋ.

ಖೇತ್ತಟ್ಠಕಥಾ.

೧೬೫.

ಖೇತ್ತೇ ವುತ್ತನಯೇನೇವ, ವತ್ಥುಟ್ಠಸ್ಸ ವಿನಿಚ್ಛಯೋ;

ಗಾಮಟ್ಠೇಪಿ ಚ ವತ್ತಬ್ಬಂ, ಅಪುಬ್ಬಂ ನತ್ಥಿ ಕಿಞ್ಚಿಪಿ.

ವತ್ಥುಟ್ಠಗಾಮಟ್ಠಕಥಾ.

೧೬೬.

ತಿಣಂ ¶ ವಾ ಪನ ಪಣ್ಣಂ ವಾ, ಲತಂ ವಾ ಕಟ್ಠಮೇವ ವಾ;

ಭಣ್ಡಗ್ಘೇನೇವ ಕಾತಬ್ಬೋ, ಗಣ್ಹನ್ತೋ ತತ್ಥಜಾತಕಂ.

೧೬೭.

ಮಹಗ್ಘೇ ಪನ ರುಕ್ಖಸ್ಮಿಂ, ಛಿನ್ನಮತ್ತೇಪಿ ನಸ್ಸತಿ;

ತಚ್ಛೇತ್ವಾ ಠಪಿತೋ ರುಕ್ಖೋ, ಗಹೇತಬ್ಬೋ ನ ಕೋಚಿಪಿ.

೧೬೮.

ಛಿನ್ದಿತ್ವಾ ¶ ಠಪಿತಂ ಮೂಲೇ, ರುಕ್ಖಮದ್ಧಗತಂ ಪನ;

‘‘ಛಡ್ಡಿತೋ ಸಾಮಿಕೇಹೀ’’ತಿ, ಗಹೇತುಂ ಪನ ವಟ್ಟತಿ.

೧೬೯.

ಲಕ್ಖಣೇ ಛಲ್ಲಿಯೋನದ್ಧೇ, ನ ದೋಸೋ ಕೋಚಿ ಗಣ್ಹತೋ;

ಅಜ್ಝಾವುತ್ಥಂ ಕತಂ ವಾಪಿ, ವಿನಸ್ಸನ್ತಞ್ಚ ಗಣ್ಹತೋ.

೧೭೦.

ಯೋ ಚಾರಕ್ಖಟ್ಠಾನಂ ಪತ್ವಾ, ಕತ್ವಾ ಕಮ್ಮಟ್ಠಾನಾದೀನಿ;

ಚಿತ್ತೇ ಚಿನ್ತೇನ್ತೋ ವಾ ಅಞ್ಞಂ, ಭಣ್ಡದೇಯ್ಯಂ ಹೋತೇವಸ್ಸ.

೧೭೧.

ವರಾಹಬ್ಯಗ್ಘಚ್ಛತರಚ್ಛಕಾದಿತೋ;

ಉಪದ್ದವಾ ಮುಚ್ಚಿತುಕಾಮತಾಯ ಯೋ;

ತಥೇವ ತಂ ಠಾನಮತಿಕ್ಕಮೇತಿ ಚೇ;

ನ ಕೋಚಿ ದೋಸೋ ಪನ ಭಣ್ಡದೇಯ್ಯಕಂ.

೧೭೨.

ಇದಮಾರಕ್ಖಣಟ್ಠಾನಂ, ಗರುಕಂ ಸುಙ್ಕಘಾತತೋ;

ತಸ್ಮಾ ದುಕ್ಕಟಮುದ್ದಿಟ್ಠಂ, ತಮನೋಕ್ಕಮ್ಮ ಗಚ್ಛತೋ.

೧೭೩.

ಏತಂ ಪರಿಹರನ್ತಸ್ಸ, ಥೇಯ್ಯಚಿತ್ತೇನ ಸತ್ಥುನಾ;

ಪಾರಾಜಿಕಮನುದ್ದಿಟ್ಠಂ, ಆಕಾಸೇನಾಪಿ ಗಚ್ಛತೋ.

೧೭೪.

ತಸ್ಮಾ ಏತ್ಥ ವಿಸೇಸೇನ, ಸತಿಸಮ್ಪನ್ನಚೇತಸಾ;

ಅಪ್ಪಮತ್ತೇನ ಹೋತಬ್ಬಂ, ಪಿಯಸೀಲೇನ ಭಿಕ್ಖುನಾ.

ಅರಞ್ಞಟ್ಠಕಥಾ.

೧೭೫.

ತೋಯದುಲ್ಲಭಕಾಲಸ್ಮಿಂ, ಭಾಜನೇ ಗೋಪಿತಂ ಜಲಂ;

ಆವಿಞ್ಜಿತ್ವಾ ಪವೇಸೇತ್ವಾ, ಛಿದ್ದಂ ಕತ್ವಾಪಿ ವಾ ತಥಾ.

೧೭೬.

ವಾಪಿಯಂ ವಾ ತಳಾಕೇ ವಾ, ಭಾಜನಂ ಅತ್ತನೋ ಪನ;

ಗಣ್ಹನ್ತಸ್ಸ ಪವೇಸೇತ್ವಾ, ಭಣ್ಡಗ್ಘೇನ ವಿನಿದ್ದಿಸೇ.

೧೭೭.

ಛಿನ್ದತೋ ಮರಿಯಾದಂ ತು, ಅದಿನ್ನಾದಾನಪುಬ್ಬತೋ;

ಭೂತಗಾಮೇನ ಸದ್ಧಿಮ್ಪಿ, ದುಕ್ಕಟಂ ಪರಿದೀಪಿತಂ.

೧೭೮.

ಅನ್ತೋ ¶ ¶ ಠತ್ವಾ ಬಹಿ ಠತ್ವಾ, ಛಿನ್ದನ್ತೋ ಉಭಯತ್ಥಪಿ;

ಬಹಿಅನ್ತೇನ ಕಾತಬ್ಬೋ, ಅನ್ತೋಅನ್ತೇನ ಮಜ್ಝತೋ.

ಉದಕಕಥಾ.

೧೭೯.

ವಾರೇನ ಸಾಮಣೇರಾ ಯಂ, ದನ್ತಕಟ್ಠಮರಞ್ಞತೋ;

ಆನೇತ್ವಾಚರಿಯಾನಮ್ಪಿ, ಆಹರನ್ತಿ ಸಚೇ ಪನ.

೧೮೦.

ಛಿನ್ದಿತ್ವಾ ಯಾವ ಸಙ್ಘಸ್ಸ, ನ ನಿಯ್ಯಾದೇನ್ತಿ ತೇ ಪನ;

ಆಭತಂ ತಾವ ತಂ ಸಬ್ಬಂ, ತೇಸಮೇವ ಚ ಸನ್ತಕಂ.

೧೮೧.

ತಸ್ಮಾ ತಂ ಥೇಯ್ಯಚಿತ್ತೇನ, ಗಣ್ಹನ್ತಸ್ಸ ಚ ಭಿಕ್ಖುನೋ;

ಗರುಭಣ್ಡಞ್ಚ ಸಙ್ಘಸ್ಸ, ಭಣ್ಡಗ್ಘೇನ ಪರಾಭವೋ.

೧೮೨.

ಯದಾ ನಿಯ್ಯಾದಿತಂ ತೇಹಿ, ತತೋ ಪಟ್ಠಾಯ ಸಙ್ಘಿಕಂ;

ಗಣ್ಹನ್ತಸ್ಸಾಪಿ ಥೇಯ್ಯಾಯ, ಅವಹಾರೋ ನ ವಿಜ್ಜತಿ.

೧೮೩.

ಅರಕ್ಖತ್ತಾ ಯಥಾವುಡ್ಢ-ಮಭಾಜೇತಬ್ಬತೋಪಿ ಚ;

ಸಬ್ಬಸಾಧಾರಣತ್ತಾ ಚ, ಅಞ್ಞಂ ವಿಯ ನ ಹೋತಿದಂ.

ದನ್ತಕಟ್ಠಕಥಾ.

೧೮೪.

ಅಗ್ಗಿಂ ವಾ ದೇತಿ ಸತ್ಥೇನ, ಆಕೋಟೇತಿ ಸಮನ್ತತೋ;

ಆಕೋಟೇತಿ ವಿಸಂ ವಾಪಿ, ಮಣ್ಡೂಕಣ್ಟಕನಾಮಕಂ.

೧೮೫.

ಯೇನ ವಾ ತೇನ ವಾ ರುಕ್ಖೋ, ವಿನಸ್ಸತಿ ಚ ಡಯ್ಹತಿ;

ಸಬ್ಬತ್ಥ ಭಿಕ್ಖುನೋ ತಸ್ಸ, ಭಣ್ಡದೇಯ್ಯಂ ಪಕಾಸಿತಂ.

ವನಪ್ಪತಿಕಥಾ.

೧೮೬.

ಸೀಸತೋ ಕಣ್ಣತೋ ವಾಪಿ, ಗೀವತೋ ಹತ್ಥತೋಪಿ ವಾ;

ಛಿನ್ದಿತ್ವಾ ವಾಪಿ ಮೋಚೇತ್ವಾ, ಗಣ್ಹತೋ ಥೇಯ್ಯಚೇತಸಾ.

೧೮೭.

ಹೋತಿ ¶ ಮೋಚಿತಮತ್ತಸ್ಮಿಂ, ಸೀಸಾದೀಹಿ ಪರಾಜಯೋ;

ಥುಲ್ಲಚ್ಚಯಂ ಕರೋನ್ತಸ್ಸ, ಆಕಡ್ಢನವಿಕಡ್ಢನಂ.

೧೮೮.

ಹತ್ಥಾ ಅನೀಹರಿತ್ವಾವ, ವಲಯಂ ಕಟಕಮ್ಪಿ ವಾ;

ಅಗ್ಗಬಾಹುಞ್ಚ ಘಂಸನ್ತೋ, ಚಾರೇತಿ ಅಪರಾಪರಂ.

೧೮೯.

ತಮಾಕಾಸಗತಂ ¶ ಚೋರೋ, ಕರೋತಿ ಯದಿ ರಕ್ಖತಿ;

ಸವಿಞ್ಞಾಣಕತೋ ಮೂಲೇ, ವಲಯಂವ ನ ಹೋತಿದಂ.

೧೯೦.

ನಿವತ್ಥಂ ಪನ ವತ್ಥಂ ಯೋ, ಅಚ್ಛಿನ್ದತಿ ಪರಸ್ಸ ಚೇ;

ಪರೋಪಿ ಪನ ಲಜ್ಜಾಯ, ಸಹಸಾ ತಂ ನ ಮುಞ್ಚತಿ.

೧೯೧.

ಆಕಡ್ಢತಿ ಚ ಚೋರೋಪಿ, ಸೋ ಪರೋ ತಾವ ರಕ್ಖತಿ;

ಪರಸ್ಸ ಹತ್ಥತೋ ವತ್ಥೇ, ಮುತ್ತಮತ್ತೇ ಪರಾಜಯೋ.

೧೯೨.

ಸಭಣ್ಡಹಾರಕಂ ಭಣ್ಡಂ, ನೇನ್ತಸ್ಸ ಪಠಮೇ ಪದೇ;

ಥುಲ್ಲಚ್ಚಯಮತಿಕ್ಕನ್ತೇ, ದುತಿಯೇವ ಚುತೋ ಸಿಯಾ.

೧೯೩.

ಪಾತಾಪೇತಿ ಸಚೇ ಭಣ್ಡಂ, ತಜ್ಜೇತ್ವಾ ಥೇಯ್ಯಚೇತನೋ;

ಪರಸ್ಸ ಹತ್ಥತೋ ಭಣ್ಡೇ, ಮುತ್ತಮತ್ತೇ ಪರಾಜಯೋ.

೧೯೪.

ಅಥಾಪಿ ಪರಿಕಪ್ಪೇತ್ವಾ, ಪಾತಾಪೇತಿ ವ ಯೋ ಪನ;

ತಸ್ಸ ಪಾತಾಪನೇ ವುತ್ತಂ, ದುಕ್ಕಟಾಮಸನೇಪಿ ಚ.

೧೯೫.

ಫನ್ದಾಪೇತಿ ಯಥಾವತ್ಥುಂ, ಠಾನಾ ಚಾವೇತಿ ಚೇ ಚುತೋ;

‘‘ತಿಟ್ಠ ತಿಟ್ಠಾ’’ತಿ ವದತೋ, ನ ದೋಸೋ ಛಡ್ಡಿತೇಪಿ ಚ.

೧೯೬.

ಆಗನ್ತ್ವಾ ಥೇಯ್ಯಚಿತ್ತೇನ, ಪಚ್ಛಾ ತಂ ಗಣ್ಹತೋ ಸಿಯಾ;

ಪಾರಾಜಿಕಂ ತದುದ್ಧಾರೇ, ಸಾಲಯೇ ಸಾಮಿಕೇ ಗತೇ.

೧೯೭.

ಗಣ್ಹತೋ ಸಕಸಞ್ಞಾಯ, ಗಹಣೇ ಪನ ರಕ್ಖತಿ;

ಭಣ್ಡದೇಯ್ಯಂ ತಥಾ ಪಂಸು-ಕೂಲಸಞ್ಞಾಯ ಗಣ್ಹತೋ.

೧೯೮.

‘‘ತಿಟ್ಠ ¶ ತಿಟ್ಠಾ’’ತಿ ವುತ್ತೋ ಚ, ಛಡ್ಡೇತ್ವಾ ಪನ ಭಣ್ಡಕಂ;

ಕತ್ವಾವ ಧುರನಿಕ್ಖೇಪಂ, ಭೀತೋ ಚೋರಾ ಪಲಾಯತಿ.

೧೯೯.

ಗಣ್ಹತೋ ಥೇಯ್ಯಚಿತ್ತೇನ, ಉದ್ಧಾರೇ ದುಕ್ಕಟಂ ಪುನ;

ದಾತಬ್ಬಮಾಹರಾಪೇನ್ತೇ, ಅದೇನ್ತಸ್ಸ ಪರಾಜಯೋ.

೨೦೦.

‘‘ಕಸ್ಮಾ? ತಸ್ಸ ಪಯೋಗೇನ, ಛಡ್ಡಿತತ್ತಾ’’ತಿ ಸಾದರಂ;

ಮಹಾಅಟ್ಠಕಥಾಯಂ ತು, ವುತ್ತಮಞ್ಞಾಸು ನಾಗತಂ.

ಹರಣಕಥಾ.

೨೦೧.

ಸಮ್ಪಜಾನಮುಸಾವಾದಂ, ‘‘ನ ಗಣ್ಹಾಮೀ’’ತಿ ಭಾಸತೋ;

ಅದಿನ್ನಾದಾನಪುಬ್ಬತ್ತಾ, ದುಕ್ಕಟಂ ಹೋತಿ ಭಿಕ್ಖುನೋ.

೨೦೨.

‘‘ರಹೋ ¶ ಮಯಾ ಪನೇತಸ್ಸ, ಠಪಿತಂ ಕಿಂ ನು ದಸ್ಸತಿ’’;

ಇಚ್ಚೇವಂ ವಿಮತುಪ್ಪಾದೇ, ತಸ್ಸ ಥುಲ್ಲಚ್ಚಯಂ ಸಿಯಾ.

೨೦೩.

ತಸ್ಮಿಂ ದಾನೇ ನಿರುಸ್ಸಾಹೇ, ಪರೋ ಚೇ ನಿಕ್ಖಿಪೇ ಧುರಂ;

ಉಭಿನ್ನಂ ಧುರನಿಕ್ಖೇಪೇ, ಭಿಕ್ಖು ಹೋತಿ ಪರಾಜಿತೋ.

೨೦೪.

ಚಿತ್ತೇನಾದಾತುಕಾಮೋವ, ‘‘ದಸ್ಸಾಮೀ’’ತಿ ಮುಖೇನ ಚೇ;

ವದತೋ ಧುರನಿಕ್ಖೇಪೇ, ಸಾಮಿನೋ ಹಿ ಪರಾಜಯೋ.

ಉಪನಿಧಿಕಥಾ.

೨೦೫.

ಸುಙ್ಕಘಾತಸ್ಸ ಅನ್ತೋವ, ಠತ್ವಾ ಪಾತೇತಿ ಚೇ ಬಹಿ;

ಧುವಂ ಪತತಿ ಚೇ ಹತ್ಥಾ, ಮುತ್ತಮತ್ತೇ ಪರಾಜಯೋ.

೨೦೬.

ತಂ ರುಕ್ಖೇ ಖಾಣುಕೇ ವಾಪಿ, ಹುತ್ವಾ ಪಟಿಹತಂ ಪುನ;

ವಾತುಕ್ಖಿತ್ತಮ್ಪಿ ವಾ ಅನ್ತೋ, ಸಚೇ ಪತತಿ ರಕ್ಖತಿ.

೨೦೭.

ಪತಿತ್ವಾ ¶ ಭೂಮಿಯಂ ಪಚ್ಛಾ, ವಟ್ಟನ್ತಂ ಪನ ಭಣ್ಡಕಂ;

ಸಚೇ ಪವಿಸತ್ಯನ್ತೋವ, ತಸ್ಸ ಪಾರಾಜಿಕಂ ಸಿಯಾ.

೨೦೮.

ಠತ್ವಾ ಠತ್ವಾ ಪವಟ್ಟನ್ತಂ, ಪವಿಟ್ಠಂ ಚೇ ಪರಾಜಯೋ;

ಅತಿಟ್ಠಮಾನಂ ವಟ್ಟಿತ್ವಾ, ಪವಿಟ್ಠಂ ಪನ ರಕ್ಖತಿ.

೨೦೯.

ಇತಿ ವುತ್ತಂ ದಳ್ಹಂ ಕತ್ವಾ, ಕುರುನ್ದಟ್ಠಕಥಾದಿಸು;

ಸಾರತೋ ತಂ ಗಹೇತಬ್ಬಂ, ಯುತ್ತಂ ವಿಯ ಚ ದಿಸ್ಸತಿ.

೨೧೦.

ಸಯಂ ವಾ ಯದಿ ವಟ್ಟೇತಿ, ವಟ್ಟಾಪೇತಿ ಪರೇನ ವಾ;

ಅಟ್ಠತ್ವಾ ವಟ್ಟಮಾನಂ ತಂ, ಗತಂ ನಾಸಕರಂ ಸಿಯಾ.

೨೧೧.

ಠತ್ವಾ ಠತ್ವಾ ಸಚೇ ಅನ್ತೋ, ಬಹಿ ಗಚ್ಛತಿ ರಕ್ಖತಿ;

ಠಪಿತೇ ಸುದ್ಧಚಿತ್ತೇನ, ಸಯಂ ವಟ್ಟತಿ ವಟ್ಟತಿ.

೨೧೨.

ಗಚ್ಛನ್ತೇ ಪನ ಯಾನೇ ವಾ, ಗಜೇ ವಾ ತಂ ಠಪೇತಿ ಚೇ;

ಬಹಿ ನೀಹರಣತ್ಥಾಯ, ನಾವಹಾರೋಪಿ ನೀಹಟೇ.

೨೧೩.

ಠಪಿತೇ ಠಿತಯಾನೇ ವಾ, ಪಯೋಗೇನ ವಿನಾ ಗತೇ;

ಸತಿಪಿ ಥೇಯ್ಯಚಿತ್ತಸ್ಮಿಂ, ಅವಹಾರೋ ನ ವಿಜ್ಜತಿ.

೨೧೪.

ಸಚೇ ಪಾಜೇತಿ ತಂ ಯಾನಂ, ಠಪೇತ್ವಾ ಯಾನಕೇ ಮಣಿಂ;

ಸಿಯಾ ಪಾರಾಜಿಕಂ ತಸ್ಸ, ಸೀಮಾತಿಕ್ಕಮನೇ ಪನ.

೨೧೫.

ಸುಙ್ಕಟ್ಠಾನೇ ¶ ಮತಂ ಸುಙ್ಕಂ, ಗನ್ತುಂ ದತ್ವಾವ ವಟ್ಟತಿ;

ಸೇಸೋ ಇಧ ಕಥಾಮಗ್ಗೋ, ಅರಞ್ಞಟ್ಠಕಥಾಸಮೋ.

ಸುಙ್ಕಘಾತಕಥಾ.

೨೧೬.

ಅನ್ತೋಜಾತಂ ಧನಕ್ಕೀತಂ, ದಿನ್ನಂ ವಾ ಪನ ಕೇನಚಿ;

ದಾಸಂ ಕರಮರಾನೀತಂ, ಹರನ್ತಸ್ಸ ಪರಾಜಯೋ.

೨೧೭.

ಭುಜಿಸ್ಸಂ ವಾ ಹರನ್ತಸ್ಸ, ಮಾನುಸಂ ಮಾತರಾಪಿ ವಾ;

ಪಿತರಾಠಪಿತಂ ವಾಪಿ, ಅವಹಾರೋ ನ ವಿಜ್ಜತಿ.

೨೧೮.

ತಂ ¶ ಪಲಾಪೇತುಕಾಮೋವ, ಉಕ್ಖಿಪಿತ್ವಾ ಭುಜೇಹಿ ವಾ;

ತಂ ಠಿತಟ್ಠಾನತೋ ಕಿಞ್ಚಿ, ಸಙ್ಕಾಮೇತಿ ಪರಾಜಯೋ.

೨೧೯.

ತಜ್ಜೇತ್ವಾ ಪದಸಾ ದಾಸಂ, ನೇನ್ತಸ್ಸ ಪದವಾರತೋ;

ಹೋನ್ತಿ ಆಪತ್ತಿಯೋ ವುತ್ತಾ, ತಸ್ಸ ಥುಲ್ಲಚ್ಚಯಾದಯೋ.

೨೨೦.

ಹತ್ಥಾದೀಸು ಗಹೇತ್ವಾ ತಂ, ಕಡ್ಢತೋಪಿ ಪರಾಜಯೋ;

‘‘ಗಚ್ಛ ಯಾಹಿ ಪಲಾಯಾ’’ತಿ, ವದತೋಪಿ ಅಯಂ ನಯೋ.

೨೨೧.

ವೇಗಸಾವ ಪಲಾಯನ್ತಂ, ‘‘ಪಲಾಯಾ’’ತಿ ಚ ಭಾಸತೋ;

ಹೋತಿ ಪಾರಾಜಿಕೇನಸ್ಸ, ಅನಾಪತ್ತಿ ಹಿ ಭಿಕ್ಖುನೋ.

೨೨೨.

ಸಣಿಕಂ ಪನ ಗಚ್ಛನ್ತಂ, ಸಚೇ ವದತಿ ಸೋಪಿ ಚ;

ಸೀಘಂ ಗಚ್ಛತಿ ಚೇ ತಸ್ಸ, ವಚನೇನ ಪರಾಜಯೋ.

೨೨೩.

ಪಲಾಯಿತ್ವಾ ಸಚೇ ಅಞ್ಞಂ, ಗಾಮಂ ವಾ ನಿಗಮಮ್ಪಿ ವಾ;

ಗತಂ ದಿಸ್ವಾ ತತೋ ತಞ್ಚೇ, ಪಲಾಪೇತಿ ಪರಾಜಯೋ.

ಪಾಣಕಥಾ.

೨೨೪.

ಥೇಯ್ಯಾ ಸಪ್ಪಕರಣ್ಡಂ ಚೇ, ಪರಾಮಸತಿ ದುಕ್ಕಟಂ;

ಫನ್ದಾಪೇತಿ ಯಥಾವತ್ಥುಂ, ಠಾನತೋ ಚಾವನೇ ಚುತೋ.

೨೨೫.

ಉಗ್ಘಾಟೇತ್ವಾ ಕರಣ್ಡಂ ತು, ಸಪ್ಪಮುದ್ಧರತೋ ಪನ;

ಕರಣ್ಡತಲತೋ ಮುತ್ತೇ, ನಙ್ಗುಟ್ಠೇ ತು ಪರಾಜಯೋ.

೨೨೬.

ಘಂಸಿತ್ವಾ ಕಡ್ಢತೋ ಸಪ್ಪಂ, ನಙ್ಗುಟ್ಠೇ ಮುಖವಟ್ಟಿತೋ;

ತಸ್ಸ ಸಪ್ಪಕರಣ್ಡಸ್ಸ, ಮುತ್ತಮತ್ತೇ ಪರಾಜಯೋ.

೨೨೭.

ಕರಣ್ಡಂ ¶ ವಿವರಿತ್ವಾ ಚೇ, ಪಕ್ಕೋಸನ್ತಸ್ಸ ನಾಮತೋ;

ಸೋ ನಿಕ್ಖಮತಿ ಚೇ ಸಪ್ಪೋ, ತಸ್ಸ ಪಾರಾಜಿಕಂ ಸಿಯಾ.

೨೨೮.

ತಥಾ ಕತ್ವಾ ತು ಮಣ್ಡೂಕ-ಮೂಸಿಕಾನಂ ರವಮ್ಪಿ ವಾ;

ಪಕ್ಕೋಸನ್ತಸ್ಸ ನಾಮೇನ, ನಿಕ್ಖನ್ತೇಪಿ ಪರಾಜಯೋ.

೨೨೯.

ಮುಖಂ ¶ ಅವಿವರಿತ್ವಾವ, ಕರೋನ್ತಸ್ಸೇವಮೇವ ಚ;

ಯೇನ ಕೇನಚಿ ನಿಕ್ಖನ್ತೇ, ಸಪ್ಪೇ ಪಾರಾಜಿಕಂ ಸಿಯಾ.

೨೩೦.

ಮುಖೇ ವಿವರಿತೇ ಸಪ್ಪೋ, ಸಯಮೇವ ಪಲಾಯತಿ;

ನ ಪಕ್ಕೋಸತಿ ಚೇ ತಸ್ಸ, ಭಣ್ಡದೇಯ್ಯಮುದೀರಿತಂ.

ಅಪದಕಥಾ.

೨೩೧.

ಥೇಯ್ಯಚಿತ್ತೇನ ಯೋ ಹತ್ಥಿಂ, ಕರೋತಾಮಸನಾದಯೋ;

ಹೋನ್ತಿ ಆಪತ್ತಿಯೋ ತಸ್ಸ, ತಿವಿಧಾ ದುಕ್ಕಟಾದಯೋ.

೨೩೨.

ಸಾಲಾಯಂ ಠಿತಹತ್ಥಿಸ್ಸ, ಅನ್ತೋವತ್ಥಙ್ಗಣೇಸುಪಿ;

ಠಾನಂ ಸಾಲಾ ಚ ವತ್ಥು ಚ, ಅಙ್ಗಣಂ ಸಕಲಂ ಸಿಯಾ.

೨೩೩.

ಅಬದ್ಧಸ್ಸ ಹಿ ಬದ್ಧಸ್ಸ, ಠಿತಟ್ಠಾನಞ್ಚ ಬನ್ಧನಂ;

ತಸ್ಮಾ ತೇಸಂ ವಸಾ ಹತ್ಥಿಂ, ಹರತೋ ಕಾರಯೇ ಬುಧೋ.

೨೩೪.

ನಗರಸ್ಸ ಬಹಿದ್ಧಾ ತು, ಠಿತಸ್ಸ ಪನ ಹತ್ಥಿನೋ;

ಠಿತಟ್ಠಾನಂ ಭವೇ ಠಾನಂ, ಪದವಾರೇನ ಕಾರಯೇ.

೨೩೫.

ನಿಪನ್ನಸ್ಸ ಗಜಸ್ಸೇಕಂ, ಠಾನಂ ತಂ ಉಟ್ಠಪೇತಿ ಚೇ;

ತಸ್ಮಿಂ ಉಟ್ಠಿತಮತ್ತೇ ತು, ತಸ್ಸ ಪಾರಾಜಿಕಂ ಸಿಯಾ.

೨೩೬.

ಏಸೇವ ಚ ನಯೋ ಞೇಯ್ಯೋ, ತುರಙ್ಗಮಹಿಸಾದಿಸು;

ನತ್ಥಿ ಕಿಞ್ಚಿಪಿ ವತ್ತಬ್ಬಂ, ದ್ವಿಪದೇಪಿ ಬಹುಪ್ಪದೇ.

ಚತುಪ್ಪದಕಥಾ.

೨೩೭.

ಪರೇಸನ್ತಿ ವಿಜಾನಿತ್ವಾ, ಪರೇಸಂ ಸನ್ತಕಂ ಧನಂ;

ಗರುಕಂ ಥೇಯ್ಯಚಿತ್ತೇನ, ಠಾನಾ ಚಾವೇತಿ ಚೇ ಚುತೋ.

೨೩೮.

ಅನಾಪತ್ತಿ ಸಸಞ್ಞಿಸ್ಸ, ತಿರಚ್ಛಾನಪರಿಗ್ಗಹೇ;

ತಾವಕಾಲಿಕವಿಸ್ಸಾಸ-ಗ್ಗಾಹೇ ಪೇತಪರಿಗ್ಗಹೇ.

೨೩೯.

ಯೋ ¶ ¶ ಪನೇತ್ಥ ಚ ವತ್ತಬ್ಬೋ, ಪಾಳಿಮುತ್ತವಿನಿಚ್ಛಯೋ;

ತಂ ಮಯಂ ಪರತೋಯೇವ, ಭಣಿಸ್ಸಾಮ ಪಕಿಣ್ಣಕೇ.

೨೪೦.

ಪರಾಜಿತಾನೇಕಮಲೇನ ವುತ್ತಂ;

ಪಾರಾಜಿಕಂ ಯಂ ದುತಿಯಂ ಜಿನೇನ;

ವುತ್ತೋ ಸಮಾಸೇನ ಮಯಸ್ಸ ಚತ್ಥೋ;

ವತ್ತುಂ ಅಸೇಸೇನ ಹಿ ಕೋ ಸಮತ್ಥೋ.

ಇತಿ ವಿನಯವಿನಿಚ್ಛಯೇ ದುತಿಯಪಾರಾಜಿಕಕಥಾ ನಿಟ್ಠಿತಾ.

ತತಿಯಪಾರಾಜಿಕಕಥಾ

೨೪೧.

ಮನುಸ್ಸಜಾತಿಂ ಜಾನನ್ತೋ, ಜೀವಿತಾ ಯೋ ವಿಯೋಜಯೇ;

ನಿಕ್ಖಿಪೇಯ್ಯಸ್ಸ ಸತ್ಥಂ ವಾ, ವದೇಯ್ಯ ಮರಣೇ ಗುಣಂ.

೨೪೨.

ದೇಸೇಯ್ಯ ಮರಣೂಪಾಯಂ, ಹೋತಾಯಮ್ಪಿ ಪರಾಜಿತೋ;

ಅಸನ್ಧೇಯ್ಯೋವ ಸೋ ಞೇಯ್ಯೋ, ದ್ವೇಧಾ ಭಿನ್ನಸಿಲಾ ವಿಯ.

೨೪೩.

ವುತ್ತಾ ಪಾಣಾತಿಪಾತಸ್ಸ, ಪಯೋಗಾ ಛ ಮಹೇಸಿನಾ;

ಸಾಹತ್ಥಿಕೋ ತಥಾಣತ್ತಿ-ನಿಸ್ಸಗ್ಗಿಥಾವರಾದಯೋ.

೨೪೪.

ತತ್ಥ ಕಾಯೇನ ವಾ ಕಾಯ-ಪಟಿಬದ್ಧೇನ ವಾ ಸಯಂ;

ಮಾರೇನ್ತಸ್ಸ ಪರಂ ಘಾತೋ, ಅಯಂ ಸಾಹತ್ಥಿಕೋ ಮತೋ.

೨೪೫.

‘‘ಏವಂ ತ್ವಂ ಪಹರಿತ್ವಾ ತಂ, ಮಾರೇಹೀ’’ತಿ ಚ ಭಿಕ್ಖುನೋ;

ಪರಸ್ಸಾಣಾಪನಂ ನಾಮ, ಅಯಮಾಣತ್ತಿಕೋ ನಯೋ.

೨೪೬.

ದೂರಂ ಮಾರೇತುಕಾಮಸ್ಸ, ಉಸುಆದಿನಿಪಾತನಂ;

ಕಾಯೇನ ಪಟಿಬದ್ಧೇನ, ಅಯಂ ನಿಸ್ಸಗ್ಗಿಯೋ ವಿಧಿ.

೨೪೭.

ಅಸಞ್ಚಾರಿಮುಪಾಯೇನ, ಮಾರಣತ್ಥಂ ಪರಸ್ಸ ಚ;

ಓಪಾತಾದಿವಿಧಾನಂ ತು, ಪಯೋಗೋ ಥಾವರೋ ಅಯಂ.

೨೪೮.

ಪರಂ ¶ ¶ ಮಾರೇತುಕಾಮಸ್ಸ, ವಿಜ್ಜಾಯ ಜಪ್ಪನಂ ಪನ;

ಅಯಂ ವಿಜ್ಜಾಮಯೋ ನಾಮ, ಪಯೋಗೋ ಪಞ್ಚಮೋ ಮತೋ.

೨೪೯.

ಸಮತ್ಥಾ ಮಾರಣೇ ಯಾ ಚ, ಇದ್ಧಿ ಕಮ್ಮವಿಪಾಕಜಾ;

ಅಯಮಿದ್ಧಿಮಯೋ ನಾಮ, ಪಯೋಗೋ ಸಮುದೀರಿತೋ.

೨೫೦.

ಏಕೇಕೋ ದುವಿಧೋ ತತ್ಥ, ಹೋತೀತಿ ಪರಿದೀಪಿತೋ;

ಉದ್ದೇಸೋಪಿ ಅನುದ್ದೇಸೋ, ಭೇದೋ ತೇಸಮಯಂ ಪನ.

೨೫೧.

ಬಹುಸ್ವಪಿ ಯಮುದ್ದಿಸ್ಸ, ಪಹಾರಂ ದೇತಿ ಚೇ ಪನ;

ಮರಣೇನ ಚ ತಸ್ಸೇವ, ಕಮ್ಮುನಾ ತೇನ ಬಜ್ಝತಿ.

೨೫೨.

ಅನುದ್ದಿಸ್ಸ ಪಹಾರೇಪಿ, ಯಸ್ಸ ಕಸ್ಸಚಿ ದೇಹಿನೋ;

ಪಹಾರಪ್ಪಚ್ಚಯಾ ತಸ್ಸ, ಮರಣಂ ಚೇ ಪರಾಜಯೋ.

೨೫೩.

ಮತೇ ಪಹಟಮತ್ತೇ ವಾ, ಪಚ್ಛಾ ಮುಭಯಥಾಪಿ ಚ;

ಹನ್ತಾ ಪಹಟಮತ್ತಸ್ಮಿಂ, ಕಮ್ಮುನಾ ತೇನ ಬಜ್ಝತಿ.

೨೫೪.

ಏವಂ ಸಾಹತ್ಥಿಕೋ ಞೇಯ್ಯೋ, ತಥಾ ಆಣತ್ತಿಕೋಪಿ ಚ;

ಏತ್ತಾವತಾ ಸಮಾಸೇನ, ದ್ವೇ ಪಯೋಗಾ ಹಿ ದಸ್ಸಿತಾ.

೨೫೫.

ವತ್ಥು ಕಾಲೋ ಚ ದೇಸೋ ಚ, ಸತ್ಥಞ್ಚ ಇರಿಯಾಪಥೋ;

ಕರಣಸ್ಸ ವಿಸೇಸೋತಿ, ಛ ಆಣತ್ತಿನಿಯಾಮಕಾ.

೨೫೬.

ಮಾರೇತಬ್ಬೋ ಹಿ ಯೋ ತತ್ಥ, ಸೋ ‘‘ವತ್ಥೂ’’ತಿ ಪವುಚ್ಚತಿ;

ಪುಬ್ಬಣ್ಹಾದಿ ಸಿಯಾ ಕಾಲೋ, ಸತ್ತಾನಂ ಯೋಬ್ಬನಾದಿ ಚ.

೨೫೭.

ದೇಸೋ ಗಾಮಾದಿ ವಿಞ್ಞೇಯ್ಯೋ, ಸತ್ಥಂ ತಂ ಸತ್ತಮಾರಣಂ;

ಮಾರೇತಬ್ಬಸ್ಸ ಸತ್ತಸ್ಸ, ನಿಸಜ್ಜಾದಿರಿಯಾಪಥೋ.

೨೫೮.

ವಿಜ್ಝನಂ ಭೇದನಞ್ಚಾಪಿ, ಛೇದನಂ ತಾಳನಮ್ಪಿ ವಾ;

ಏವಮಾದಿವಿಧೋನೇಕೋ, ವಿಸೇಸೋ ಕರಣಸ್ಸ ತು.

೨೫೯.

‘‘ಯಂ ಮಾರೇಹೀ’’ತಿ ಆಣತ್ತೋ, ಅಞ್ಞಂ ಮಾರೇತಿ ಚೇ ತತೋ;

‘‘ಪುರತೋ ಪಹರಿತ್ವಾನ, ಮಾರೇಹೀ’’ತಿ ಚ ಭಾಸಿತೋ.

೨೬೦.

ಪಚ್ಛತೋ ¶ ಪಸ್ಸತೋ ವಾಪಿ, ಪಹರಿತ್ವಾನ ಮಾರಿತೇ;

ವತ್ಥಾಣತ್ತಿ ವಿಸಙ್ಕೇತಾ, ಮೂಲಟ್ಠೋ ಪನ ಮುಚ್ಚತಿ.

೨೬೧.

ವತ್ಥುಂ ತಂ ಅವಿರಜ್ಝಿತ್ವಾ, ಯಥಾಣತ್ತಿಞ್ಚ ಮಾರಿತೇ;

ಉಭಯೇಸಂ ಯಥಾಕಾಲಂ, ಕಮ್ಮಬದ್ಧೋ ಉದೀರಿತೋ.

೨೬೨.

ಆಣತ್ತೋ ¶ ‘‘ಅಜ್ಜ ಪುಬ್ಬಣ್ಹೇ, ಮಾರೇಹೀ’’ತಿ ಚ ಯೋ ಪನ;

ಸೋ ಚೇ ಮಾರೇತಿ ಸಾಯನ್ಹೇ, ಮೂಲಟ್ಠೋ ಪರಿಮುಚ್ಚತಿ.

೨೬೩.

ಆಣತ್ತಸ್ಸೇವ ಸೋ ವುತ್ತೋ;

ಕಮ್ಮಬದ್ಧೋ ಮಹೇಸಿನಾ;

ಕಾಲಸ್ಸ ಹಿ ವಿಸಙ್ಕೇತಾ;

ದೋಸೋ ನಾಣಾಪಕಸ್ಸ ಸೋ.

೨೬೪.

‘‘ಅಜ್ಜ ಮಾರೇಹಿ ಪುಬ್ಬಣ್ಹೇ, ಸ್ವೇವಾ’’ತಿ ಅನಿಯಾಮಿತೇ;

ಯದಾ ಕದಾಚಿ ಪುಬ್ಬಣ್ಹೇ, ವಿಸಙ್ಕೇತೋ ನ ಮಾರಿತೇ.

೨೬೫.

ಏತೇನೇವ ಉಪಾಯೇನ, ಕಾಲಭೇದೇಸು ಸಬ್ಬಸೋ;

ಸಙ್ಕೇತೋ ಚ ವಿಸಙ್ಕೇತೋ, ವೇದಿತಬ್ಬೋ ವಿಭಾವಿನಾ.

೨೬೬.

‘‘ಇಮಂ ಗಾಮೇ ಠಿತಂ ವೇರಿಂ, ಮಾರೇಹೀ’’ತಿ ಚ ಭಾಸಿತೋ;

ಸಚೇ ಸೋ ಪನ ಮಾರೇತಿ, ಠಿತಂ ತಂ ಯತ್ಥ ಕತ್ಥಚಿ.

೨೬೭.

ನತ್ಥಿ ತಸ್ಸ ವಿಸಙ್ಕೇತೋ, ಉಭೋ ಬಜ್ಝನ್ತಿ ಕಮ್ಮುನಾ;

‘‘ಗಾಮೇಯೇವಾ’’ತಿ ಆಣತ್ತೋ, ವನೇ ವಾ ಸಾವಧಾರಣಂ.

೨೬೮.

‘‘ವನೇಯೇವಾ’’ತಿ ವಾ ವುತ್ತೋ, ಗಾಮೇ ಮಾರೇತಿ ಚೇಪಿ ವಾ;

ವಿಸಙ್ಕೇತೋ ವಿಞ್ಞಾತಬ್ಬೋ, ಮೂಲಟ್ಠೋ ಪರಿಮುಚ್ಚತಿ.

೨೬೯.

ಏತೇನೇವ ಉಪಾಯೇನ, ಸಬ್ಬದೇಸೇಸು ಭೇದತೋ;

ಸಙ್ಕೇತೋ ಚ ವಿಸಙ್ಕೇತೋ, ವೇದಿತಬ್ಬೋವ ವಿಞ್ಞುನಾ.

೨೭೦.

‘‘ಸತ್ಥೇನ ಪನ ಮಾರೇಹಿ, ಆಣತ್ತೋ’’ತಿ ಚ ಕೇನಚಿ;

ಯೇನ ಕೇನಚಿ ಸತ್ಥೇನ, ವಿಸಙ್ಕೇತೋ ನ ಮಾರಿತೇ.

೨೭೧.

‘‘ಇಮಿನಾ ¶ ವಾಸಿನಾ ಹೀ’’ತಿ, ವುತ್ತೋ ಅಞ್ಞೇನ ವಾಸಿನಾ;

‘‘ಇಮಸ್ಸಾಸಿಸ್ಸ ವಾಪಿ ತ್ವಂ, ಧಾರಾಯೇತಾಯ ಮಾರಯ’’.

೨೭೨.

ಇತಿ ವುತ್ತೋ ಸಚೇ ವೇರಿಂ, ಧಾರಾಯ ಇತರಾಯ ವಾ;

ಥರುನಾ ವಾಪಿ ತುಣ್ಡೇನ, ವಿಸಙ್ಕೇತೋವ ಮಾರಿತೇ.

೨೭೩.

ಏತೇನೇವ ಉಪಾಯೇನ, ಸಬ್ಬಾವುಧಕಜಾತಿಸು;

ಸಙ್ಕೇತೋ ಚ ವಿಸಙ್ಕೇತೋ, ವೇದಿತಬ್ಬೋ ವಿಸೇಸತೋ.

೨೭೪.

‘‘ಗಚ್ಛನ್ತಮೇನಂ ಮಾರೇಹಿ’’, ಇತಿ ವುತ್ತೋ ಪರೇನ ಸೋ;

ಮಾರೇತಿ ನಂ ನಿಸಿನ್ನಂ ಚೇ, ವಿಸಙ್ಕೇತೋ ನ ವಿಜ್ಜತಿ.

೨೭೫.

‘‘ನಿಸಿನ್ನಂಯೇವ ¶ ಮಾರೇಹಿ’’, ‘‘ಗಚ್ಛನ್ತಂಯೇವ ವಾ’’ತಿ ಚ;

ವುತ್ತೋ ಮಾರೇತಿ ಗಚ್ಛನ್ತಂ, ನಿಸಿನ್ನಂ ವಾ ಯಥಾಕ್ಕಮಂ.

೨೭೬.

ವಿಸಙ್ಕೇತನ್ತಿ ಞಾತಬ್ಬಂ, ಭಿಕ್ಖುನಾ ವಿನಯಞ್ಞುನಾ;

ಏಸೇವ ಚ ನಯೋ ಞೇಯ್ಯೋ, ಸಬ್ಬಿರಿಯಾಪಥೇಸು ಚ.

೨೭೭.

‘‘ಮಾರೇಹೀ’’ತಿ ಚ ವಿಜ್ಝಿತ್ವಾ, ಆಣತ್ತೋ ಹಿ ಪರೇನ ಸೋ;

ವಿಜ್ಝಿತ್ವಾವ ತಮಾರೇತಿ, ವಿಸಙ್ಕೇತೋ ನ ವಿಜ್ಜತಿ.

೨೭೮.

‘‘ಮಾರೇಹೀ’’ತಿ ಚ ವಿಜ್ಝಿತ್ವಾ, ಆಣತ್ತೋ ಹಿ ಪರೇನ ಸೋ;

ಛಿನ್ದಿತ್ವಾ ಯದಿ ಮಾರೇತಿ, ವಿಸಙ್ಕೇತೋವ ಹೋತಿ ಸೋ.

೨೭೯.

ಏತೇನೇವ ಉಪಾಯೇನ, ಸಬ್ಬೇಸು ಕರಣೇಸುಪಿ;

ಸಙ್ಕೇತೇ ಚ ವಿಸಙ್ಕೇತೇ, ವೇದಿತಬ್ಬೋ ವಿನಿಚ್ಛಯೋ.

೨೮೦.

ದೀಘಂ ರಸ್ಸಂ ಕಿಸಂ ಥೂಲಂ, ಕಾಳಂ ಓದಾತಮೇವ ವಾ;

ಆಣತ್ತೋ ಅನಿಯಾಮೇತ್ವಾ, ಮಾರೇಹೀತಿ ಚ ಕೇನಚಿ.

೨೮೧.

ಸೋಪಿ ಯಂ ಕಿಞ್ಚಿ ಆಣತ್ತೋ, ಸಚೇ ಮಾರೇತಿ ತಾದಿಸಂ;

ನತ್ಥಿ ತತ್ಥ ವಿಸಙ್ಕೇತೋ, ಉಭಿನ್ನಮ್ಪಿ ಪರಾಜಯೋ.

೨೮೨.

ಮನುಸ್ಸಂ ಕಿಞ್ಚಿ ಉದ್ದಿಸ್ಸ, ಸಚೇ ಖಣತಿವಾಟಕಂ;

ಖಣನ್ತಸ್ಸ ಚ ಓಪಾತಂ, ಹೋತಿ ಆಪತ್ತಿ ದುಕ್ಕಟಂ.

೨೮೩.

ದುಕ್ಖಸ್ಸುಪ್ಪತ್ತಿಯಾ ¶ ತತ್ಥ, ತಸ್ಸ ಥುಲ್ಲಚ್ಚಯಂ ಸಿಯಾ;

ಪತಿತ್ವಾ ಚ ಮತೇ ತಸ್ಮಿಂ, ತಸ್ಸ ಪಾರಾಜಿಕಂ ಭವೇ.

೨೮೪.

ನಿಪತಿತ್ವಾ ಪನಞ್ಞಸ್ಮಿಂ, ಮತೇ ದೋಸೋ ನ ವಿಜ್ಜತಿ;

ಅನುದ್ದಿಸ್ಸಕಮೋಪಾತೋ, ಖತೋ ಹೋತಿ ಸಚೇ ಪನ.

೨೮೫.

‘‘ಪತಿತ್ವಾ ಏತ್ಥ ಯೋ ಕೋಚಿ, ಮರತೂ’’ತಿ ಹಿ ಯತ್ತಕಾ;

ಮರನ್ತಿ ನಿಪತಿತ್ವಾ ಚೇ, ದೋಸಾ ಹೋನ್ತಿಸ್ಸ ತತ್ತಕಾ.

೨೮೬.

ಆನನ್ತರಿಯವತ್ಥುಸ್ಮಿಂ, ಆನನ್ತರಿಯಕಂ ವದೇ;

ತಥಾ ಥುಲ್ಲಚ್ಚಯಾದೀನಂ, ಹೋನ್ತಿ ಥುಲ್ಲಚ್ಚಯಾದಯೋ.

೨೮೭.

ಪತಿತ್ವಾ ಗಬ್ಭಿನೀ ತಸ್ಮಿಂ, ಸಗಬ್ಭಾ ಚೇ ಮರಿಸ್ಸತಿ;

ಹೋನ್ತಿ ಪಾಣಾತಿಪಾತಾ ದ್ವೇ, ಏಕೋವೇಕೇಕಧಂಸನೇ.

೨೮೮.

ಅನುಬನ್ಧೇತ್ಥ ಚೋರೇಹಿ, ಪತಿತ್ವಾ ಚೇ ಮರಿಸ್ಸತಿ;

ಓಪಾತಖಣಕಸ್ಸೇವ, ಹೋತಿ ಪಾರಾಜಿಕಂ ಕಿರ.

೨೮೯.

ವೇರಿನೋ ¶ ತತ್ಥ ಪಾತೇತ್ವಾ, ಸಚೇ ಮಾರೇನ್ತಿ ವೇರಿನೋ;

ಪತಿತಂ ತತ್ಥ ಮಾರೇನ್ತಿ, ನೀಹರಿತ್ವಾ ಸಚೇ ಬಹಿ.

೨೯೦.

ನಿಬ್ಬತ್ತಿತ್ವಾ ಹಿ ಓಪಾತೇ, ಮತಾ ಚೇ ಓಪಪಾತಿಕಾ;

ಅಸಕ್ಕೋನ್ತಾ ಚ ನಿಕ್ಖನ್ತುಂ, ಸಬ್ಬತ್ಥ ಚ ಪರಾಜಯೋ.

೨೯೧.

ಯಕ್ಖಾದಯೋ ಪನುದ್ದಿಸ್ಸ, ಖಣನೇ ದುಕ್ಖಸಮ್ಭವೇ;

ದುಕ್ಕಟಂ ಮರಣೇ ವತ್ಥು-ವಸಾ ಥುಲ್ಲಚ್ಚಯಾದಯೋ.

೨೯೨.

ಮನುಸ್ಸೇಯೇವ ಉದ್ದಿಸ್ಸ, ಖತೇ ಓಪಾತಕೇ ಪನ;

ಅನಾಪತ್ತಿ ಪತಿತ್ವಾ ಹಿ, ಯಕ್ಖಾದೀಸು ಮತೇಸುಪಿ.

೨೯೩.

ತಥಾ ಯಕ್ಖಾದಯೋ ಪಾಣೇ, ಖತೇ ಉದ್ದಿಸ್ಸ ಭಿಕ್ಖುನಾ;

ನಿಪತಿತ್ವಾ ಮರನ್ತೇಸು, ಮನುಸ್ಸೇಸುಪ್ಯಯಂ ನಯೋ.

೨೯೪.

‘‘ಪಾಣಿನೋ ಏತ್ಥ ಬಜ್ಝಿತ್ವಾ, ಮರನ್ತೂ’’ತಿ ಅನುದ್ದಿಸಂ;

ಪಾಸಂ ಓಡ್ಡೇತಿ ಯೋ ತತ್ಥ, ಸಚೇ ಬಜ್ಝನ್ತಿ ಪಾಣಿನೋ.

೨೯೫.

ಹತ್ಥತೋ ಮುತ್ತಮತ್ತಸ್ಮಿಂ, ತಸ್ಸ ಪಾರಾಜಿಕಂ ಸಿಯಾ;

ಆನನ್ತರಿಯವತ್ಥುಸ್ಮಿಂ, ಆನನ್ತರಿಯಮೇವ ಚ.

೨೯೬.

ಉದ್ದಿಸ್ಸ ¶ ಹಿ ಕತೇ ಪಾಸೇ, ಯಂ ಪನುದ್ದಿಸ್ಸ ಓಡ್ಡಿತೋ;

ಬನ್ಧನೇಸು ತದಞ್ಞೇಸಂ, ಅನಾಪತ್ತಿ ಪಕಾಸಿತಾ.

೨೯೭.

ಮೂಲೇನ ವಾ ಮುಧಾ ವಾಪಿ, ದಿನ್ನೇ ಪಾಸೇ ಪರಸ್ಸ ಹಿ;

ಮೂಲಟ್ಠಸ್ಸೇವ ಹೋತೀತಿ, ಕಮ್ಮಬದ್ಧೋ ನಿಯಾಮಿತೋ.

೨೯೮.

ಯೇನ ಲದ್ಧೋ ಸಚೇ ಲೋಪಿ, ಪಾಸಮುಗ್ಗಳಿತಮ್ಪಿ ವಾ;

ಥಿರಂ ವಾಪಿ ಕರೋತೇವಂ, ಉಭಿನ್ನಂ ಕಮ್ಮಬನ್ಧನಂ.

೨೯೯.

ಯೋ ಪಾಸಂ ಉಗ್ಗಳಾಪೇತ್ವಾ, ಯಾತಿ ಪಾಪಭಯಾ ಸಚೇ;

ತಂ ದಿಸ್ವಾ ಪುನ ಅಞ್ಞೋಪಿ, ಸಣ್ಠಪೇತಿ ಹಿ ತತ್ಥ ಚ.

೩೦೦.

ಬದ್ಧಾ ಬದ್ಧಾ ಮರನ್ತಿ ಚೇ, ಮೂಲಟ್ಠೋ ನ ಚ ಮುಚ್ಚತಿ;

ಠಪೇತ್ವಾ ಗಹಿತಟ್ಠಾನೇ, ಪಾಸಯಟ್ಠಿಂ ವಿಮುಚ್ಚತಿ.

೩೦೧.

ಗೋಪೇತ್ವಾಪಿ ನ ಮೋಕ್ಖೋ ಹಿ, ಪಾಸಯಟ್ಠಿಂ ಸಯಂಕತಂ;

ತಮಞ್ಞೋ ಪುನ ಗಣ್ಹಿತ್ವಾ, ಸಣ್ಠಪೇತಿ ಸಚೇ ಪನ.

೩೦೨.

ತಪ್ಪಚ್ಚಯಾ ಮರನ್ತೇಸು, ಮೂಲಟ್ಠೋ ನ ಚ ಮುಚ್ಚತಿ;

ನಾಸೇತ್ವಾ ಸಬ್ಬಸೋ ವಾ ತಂ, ಝಾಪೇತ್ವಾ ವಾ ವಿಮುಚ್ಚತಿ.

೩೦೩.

ರೋಪೇನ್ತಸ್ಸ ¶ ಚ ಸೂಲಂ ವಾ, ಸಜ್ಜೇನ್ತಸ್ಸ ಅದೂಹಲಂ;

ಓಪಾತೇನ ಚ ಪಾಸೇನ, ಸದಿಸೋವ ವಿನಿಚ್ಛಯೋ.

೩೦೪.

ಅನಾಪತ್ತಿ ಅಸಞ್ಚಿಚ್ಚ, ಅಜಾನನ್ತಸ್ಸ ಭಿಕ್ಖುನೋ;

ತಥಾಮರಣಚಿತ್ತಸ್ಸ, ಮತೇಪ್ಯುಮ್ಮತ್ತಕಾದಿನೋ.

೩೦೫.

ಮನುಸ್ಸಪಾಣಿಮ್ಹಿ ಚ ಪಾಣಸಞ್ಞಿತಾ;

ಸಚಸ್ಸ ಚಿತ್ತಂ ಮರಣೂಪಸಂಹಿತಂ;

ಉಪಕ್ಕಮೋ ತೇನ ಚ ತಸ್ಸ ನಾಸೋ;

ಪಞ್ಚೇತ್ಥ ಅಙ್ಗಾನಿ ಮನುಸ್ಸಘಾತೇ.

ಇತಿ ವಿನಯವಿನಿಚ್ಛಯೇ ತತಿಯಪಾರಾಜಿಕಕಥಾ ನಿಟ್ಠಿತಾ.

ಚತುತ್ಥಪಾರಾಜಿಕಕಥಾ

೩೦೬.

ಅಸನ್ತಮತ್ತಸ್ಸಿತಮೇವ ¶ ಕತ್ವಾ;

ಭವಂ ಅಧಿಟ್ಠಾಯ ಚ ವತ್ತಮಾನಂ;

ಅಞ್ಞಾಪದೇಸಞ್ಚ ವಿನಾಧಿಮಾನಂ;

ಝಾನಾದಿಭೇದಂ ಸಮುದಾಚರೇಯ್ಯ.

೩೦೭.

ಕಾಯೇನ ವಾಚಾಯಪಿ ವಾ ತದತ್ಥೇ;

ಞಾತೇವ ವಿಞ್ಞತ್ತಿಪಥೇ ಅಭಬ್ಬೋ;

ಯಥೇವ ತಾಲೋ ಪನ ಮತ್ಥಕಸ್ಮಿಂ;

ಛಿನ್ನೋ ಅಭಬ್ಬೋ ಪುನ ರುಳ್ಹಿಭಾವೇ.

೩೦೮.

ಅಸನ್ತಮೇವತ್ತನಿ ಯೋ ಪರಸ್ಸ;

ದೀಪೇತಿ ಝಾನಾದಿಮನನ್ತರಂ ಸೋ;

ಜಾನಾತಿ ಚೇ ಹೋತಿ ಚುತೋ ಹಿ ನೋ ಚೇ;

ಜಾನಾತಿ ಥುಲ್ಲಚ್ಚಯಮಸ್ಸ ಹೋತಿ.

೩೦೯.

‘‘ಯೋ ¶ ತೇ ವಿಹಾರೇ ವಸತೀಧ ಭಿಕ್ಖು;

ಸೋ ಝಾನಲಾಭೀ’’ತಿ ಚ ದೀಪಿತೇ ಚೇ;

ಜಾನಾತಿ ಥುಲ್ಲಚ್ಚಯಮಸ್ಸ ನೋ ಚೇ;

ಜಾನಾತಿ ತಂ ದುಕ್ಕಟಮೇವ ಹೋತಿ.

೩೧೦.

ಅಸನ್ತಮೇವತ್ತನಿ ಧಮ್ಮಮೇತಂ;

ಅತ್ಥೀತಿ ಕತ್ವಾ ವದತೋಧಿಮಾನಾ;

ವುತ್ತೋ ಅನಾಪತ್ತಿನಯೋ ಪನೇವಂ;

ಅವತ್ತುಕಾಮಸ್ಸ ತಥಾದಿಕಸ್ಸ.

೩೧೧.

ಪಾಪಿಚ್ಛತಾ ತಸ್ಸ ಅಸನ್ತಭಾವೋ;

ಆರೋಚನಞ್ಚೇವ ಮನುಸ್ಸಕಸ್ಸ;

ನಞ್ಞಾಪದೇಸೇನ ತದೇವ ಞಾಣಂ;

ಪಞ್ಚೇತ್ಥ ಅಙ್ಗಾನಿ ವದನ್ತಿ ಧೀರಾ.

೩೧೨.

ಪಠಮೇ ದುತಿಯೇ ಚನ್ತೇ, ಪರಿಯಾಯೋ ನ ವಿಜ್ಜತಿ;

ದುತಿಯೇ ತತಿಯೇಯೇವ, ಆಣತ್ತಿ ನ ಪನೇತರೇ.

೩೧೩.

ಆದಿ ¶ ಮೇಕಸಮುಟ್ಠಾನಂ, ದುವಙ್ಗಂ ಕಾಯಚಿತ್ತತೋ;

ಸೇಸಾ ಚ ತಿಸಮುಟ್ಠಾನಾ, ತೇಸಮಙ್ಗಾನಿ ಸತ್ತ ತು.

೩೧೪.

ಸುಖೋಪೇಕ್ಖಾಯುತಂ ಆದಿ, ತತಿಯಂ ದುಕ್ಖವೇದನಂ;

ದುತಿಯಞ್ಚ ಚತುತ್ಥಞ್ಚ, ತಿವೇದನಮುದೀರಿತಂ.

೩೧೫.

ಪಠಮಸ್ಸಟ್ಠ ಚಿತ್ತಾನಿ, ತತಿಯಸ್ಸ ದುವೇ ಪನ;

ದುತಿಯಸ್ಸ ಚತುತ್ಥಸ್ಸ, ದಸ ಚಿತ್ತಾನಿ ಲಬ್ಭರೇ.

೩೧೬.

ತಸ್ಮಾ ಸಚಿತ್ತಕಂ ವುತ್ತಂ, ಸಬ್ಬಮೇತಂ ಚತುಬ್ಬಿಧಂ;

ಕ್ರಿಯಾ ಸಞ್ಞಾವಿಮೋಕ್ಖಞ್ಚ, ಲೋಕವಜ್ಜನ್ತಿ ದೀಪಿತಂ.

೩೧೭.

ಇದಮಾಪತ್ತಿಯಂಯೇವ, ವಿಧಾನಂ ಪನ ಯುಜ್ಜತಿ;

ತಸ್ಮಾ ಆಪತ್ತಿಯಂಯೇವ, ಗಹೇತಬ್ಬಂ ವಿಭಾವಿನಾ.

೩೧೮.

ಮುದುಪಿಟ್ಠಿ ಚ ಲಮ್ಬೀ ಚ, ಮುಖಗ್ಗಾಹೀ ನಿಸೀದಕೋ;

ಪಾರಾಜಿಕಾ ಇಮೇ ತೇಸಂ, ಚತ್ತಾರೋ ಅನುಲೋಮಿಕಾ.

೩೧೯.

ಭಿಕ್ಖುನೀನಞ್ಚ ಚತ್ತಾರಿ, ವಿಬ್ಭನ್ತಾ ಭಿಕ್ಖುನೀ ಸಯಂ;

ತಥಾ ಏಕಾದಸಾಭಬ್ಬಾ, ಸಬ್ಬೇತೇ ಚತುವೀಸತಿ.

೩೨೦.

ಇಮೇ ¶ ಪಾರಾಜಿಕಾ ವುತ್ತಾ, ಚತುವೀಸತಿ ಪುಗ್ಗಲಾ;

ಅಭಬ್ಬಾ ಭಿಕ್ಖುಭಾವಾಯ, ಸೀಸಚ್ಛಿನ್ನೋವ ಜೀವಿತುಂ.

೩೨೧.

ಪಣ್ಡಕೋ ಚ ತಿರಚ್ಛಾನೋ, ಉಭತೋಬ್ಯಞ್ಜನೋಪಿ ಚ;

ತಯೋ ವತ್ಥುವಿಪನ್ನಾ ಹಿ, ಅಹೇತುಪಟಿಸನ್ಧಿಕಾ.

೩೨೨.

ಪಞ್ಚಾನನ್ತರಿಕಾ ಥೇಯ್ಯ-ಸಂವಾಸೋಪಿ ಚ ದೂಸಕೋ;

ತಿತ್ಥಿಪಕ್ಕನ್ತಕೋ ಚೇತಿ, ಕ್ರಿಯಾನಟ್ಠಾ ಪನಟ್ಠ ತೇ.

೩೨೩.

ವಿನಿಚ್ಛಯೋ ಯೋ ಪನ ಸಾರಭೂತೋ;

ಪಾರಾಜಿಕಾನಂ ಕಥಿತೋ ಮಯಾಯಂ;

ತಸ್ಸಾನುಸಾರೇನ ಬುಧೇನ ಞಾತುಂ;

ಸಕ್ಕಾ ಹಿ ಸೇಸೋಪಿ ಅಸೇಸತೋವ.

೩೨೪.

ಪಿಟಕೇ ¶ ಪಟುಭಾವಕರೇ ಪರಮೇ;

ವಿನಯೇ ವಿವಿಧೇಹಿ ನಯೇಹಿ ಯುತೇ;

ಪರಮತ್ಥನಯಂ ಅಭಿಪತ್ಥಯತಾ;

ಪರಿಯಾಪುಣಿತಬ್ಬಮಯಂ ಸತತಂ.

ಇತಿ ವಿನಯವಿನಿಚ್ಛಯೇ ಚತುತ್ಥಪಾರಾಜಿಕಕಥಾ ನಿಟ್ಠಿತಾ.

ಸಙ್ಘಾದಿಸೇಸಕಥಾ

೩೨೫.

ಮೋಚೇತುಕಾಮತಾಚಿತ್ತಂ, ವಾಯಾಮೋ ಸುಕ್ಕಮೋಚನಂ;

ಅಞ್ಞತ್ರ ಸುಪಿನನ್ತೇನ, ಹೋತಿ ಸಙ್ಘಾದಿಸೇಸತಾ.

೩೨೬.

ಪರೇನುಪಕ್ಕಮಾಪೇತ್ವಾ, ಅಙ್ಗಜಾತಂ ಪನತ್ತನೋ;

ಸುಕ್ಕಂ ಯದಿ ವಿಮೋಚೇತಿ, ಗರುಕಂ ತಸ್ಸ ನಿದ್ದಿಸೇ.

೩೨೭.

ಸಞ್ಚಿಚ್ಚುಪಕ್ಕಮನ್ತಸ್ಸ, ಅಙ್ಗಜಾತಂ ಪನತ್ತನೋ;

ಥುಲ್ಲಚ್ಚಯಂ ಸಮುದ್ದಿಟ್ಠಂ, ಸಚೇ ಸುಕ್ಕಂ ನ ಮುಚ್ಚತಿ.

೩೨೮.

ಸಞ್ಚಿಚ್ಚುಪಕ್ಕಮನ್ತಸ್ಸ ¶ , ಆಕಾಸೇ ಕಮ್ಪನೇನಪಿ;

ಹೋತಿ ಥುಲ್ಲಚ್ಚಯಂ ತಸ್ಸ, ಯದಿ ಸುಕ್ಕಂ ನ ಮುಚ್ಚತಿ.

೩೨೯.

ವತ್ಥಿಂ ಕೀಳಾಯ ಪೂರೇತ್ವಾ, ಪಸ್ಸಾವೇತುಂ ನ ವಟ್ಟತಿ;

ನಿಮಿತ್ತಂ ಪನ ಹತ್ಥೇನ, ಕೀಳಾಪೇನ್ತಸ್ಸ ದುಕ್ಕಟಂ.

೩೩೦.

ತಿಸ್ಸನ್ನಂ ಪನ ಇತ್ಥೀನಂ, ನಿಮಿತ್ತಂ ರತ್ತಚೇತಸಾ;

ಪುರತೋ ಪಚ್ಛತೋ ವಾಪಿ, ಓಲೋಕೇನ್ತಸ್ಸ ದುಕ್ಕಟಂ.

೩೩೧.

ಏಕೇನೇಕಂ ಪಯೋಗೇನ, ದಿವಸಮ್ಪಿ ಚ ಪಸ್ಸತೋ;

ನಾಪತ್ತಿಯಾ ಭವೇ ಅಙ್ಗಂ, ಉಮ್ಮೀಲನನಿಮೀಲನಂ.

೩೩೨.

ಅಮೋಚನಾಧಿಪ್ಪಾಯಸ್ಸ, ಅನುಪಕ್ಕಮತೋಪಿ ಚ;

ಸುಪಿನನ್ತೇನ ಮುತ್ತಸ್ಮಿಂ, ಅನಾಪತ್ತಿ ಪಕಾಸಿತಾ.

ಸುಕ್ಕವಿಸಟ್ಠಿಕಥಾ.

೩೩೩.

ಆಮಸನ್ತೋ ¶ ಮನುಸ್ಸಿತ್ಥಿಂ, ಕಾಯಸಂಸಗ್ಗರಾಗತೋ;

‘‘ಮನುಸ್ಸಿತ್ಥೀ’’ತಿ ಸಞ್ಞಾಯ, ಹೋತಿ ಸಙ್ಘಾದಿಸೇಸಿಕೋ.

೩೩೪.

ಲೋಮೇನನ್ತಮಸೋ ಲೋಮಂ, ಫುಸನ್ತಸ್ಸಾಪಿ ಇತ್ಥಿಯಾ;

ಕಾಯಸಂಸಗ್ಗರಾಗೇನ, ಹೋತಿ ಆಪತ್ತಿ ಭಿಕ್ಖುನೋ.

೩೩೫.

ಇತ್ಥಿಯಾ ಯದಿ ಸಮ್ಫುಟ್ಠೋ, ಫಸ್ಸಂ ಸೇವನಚೇತನೋ;

ವಾಯಮಿತ್ವಾಧಿವಾಸೇತಿ, ಹೋತಿ ಸಙ್ಘಾದಿಸೇಸತಾ.

೩೩೬.

ಏಕೇನ ಪನ ಹತ್ಥೇನ, ಗಹೇತ್ವಾ ದುತಿಯೇನ ವಾ;

ತತ್ಥ ತತ್ಥ ಫುಸನ್ತಸ್ಸ, ಏಕಾವಾಪತ್ತಿ ದೀಪಿತಾ.

೩೩೭.

ಅಗ್ಗಹೇತ್ವಾ ಫುಸನ್ತಸ್ಸ, ಯಾವ ಪಾದಞ್ಚ ಸೀಸತೋ;

ಕಾಯಾ ಹತ್ಥಮಮೋಚೇತ್ವಾ, ಏಕಾವ ದಿವಸಮ್ಪಿ ಚ.

೩೩೮.

ಅಙ್ಗುಲೀನಂ ತು ಪಞ್ಚನ್ನಂ, ಗಹಣೇ ಏಕತೋ ಪನ;

ಏಕಾಯೇವ ಸಿಯಾಪತ್ತಿ, ನ ಹಿ ಕೋಟ್ಠಾಸತೋ ಸಿಯಾ.

೩೩೯.

ನಾನಿತ್ಥೀನಂ ಸಚೇ ಪಞ್ಚ, ಗಣ್ಹಾತ್ಯಙ್ಗುಲಿಯೋ ಪನ;

ಏಕತೋ ಪಞ್ಚ ಸಙ್ಘಾದಿ-ಸೇಸಾ ಹೋನ್ತಿಸ್ಸ ಭಿಕ್ಖುನೋ.

೩೪೦.

ಇತ್ಥಿಯಾ ವಿಮತಿಸ್ಸಾಪಿ, ಪಣ್ಡಕಾದಿಕಸಞ್ಞಿನೋ;

ಕಾಯೇನ ಇತ್ಥಿಯಾ ಕಾಯ-ಸಮ್ಬದ್ಧಂ ಫುಸತೋಪಿ ವಾ.

೩೪೧.

ಪಣ್ಡಕೇ ¶ ಯಕ್ಖಿಪೇತೀಸು, ತಸ್ಸ ಥುಲ್ಲಚ್ಚಯಂ ಸಿಯಾ;

ದುಕ್ಕಟಂ ಕಾಯಸಂಸಗ್ಗೇ, ತಿರಚ್ಛಾನಗತಿತ್ಥಿಯಾ.

೩೪೨.

ಭಿಕ್ಖುನೋ ಪಟಿಬದ್ಧೇನ, ಕಾಯೇನ ಪನ ಇತ್ಥಿಯಾ;

ಕಾಯೇನ ಪಟಿಬದ್ಧಞ್ಚ, ಫುಸನ್ತಸ್ಸಪಿ ದುಕ್ಕಟಂ.

೩೪೩.

ಇತ್ಥೀನಂ ಇತ್ಥಿರೂಪಞ್ಚ, ದಾರುಲೋಹಮಯಾದಿಕಂ;

ತಾಸಂ ವತ್ಥಮಲಙ್ಕಾರಂ, ಆಮಸನ್ತಸ್ಸ ದುಕ್ಕಟಂ.

೩೪೪.

ತತ್ಥಜಾತಫಲಂ ಖಜ್ಜಂ, ಮುಗ್ಗಾದಿಂ ತತ್ಥಜಾತಕಂ;

ಧಞ್ಞಾನಿ ಪನ ಸಬ್ಬಾನಿ, ಆಮಸನ್ತಸ್ಸ ದುಕ್ಕಟಂ.

೩೪೫.

ಸಬ್ಬಂ ¶ ಧಮನಸಙ್ಖಾದಿಂ, ಪಞ್ಚಙ್ಗತುರಿಯಮ್ಪಿ ಚ;

ರತನಾನಿ ಚ ಸಬ್ಬಾನಿ, ಆಮಸನ್ತಸ್ಸ ದುಕ್ಕಟಂ.

೩೪೬.

ಸಬ್ಬಮಾವುಧಭಣ್ಡಞ್ಚ, ಜಿಯಾ ಚ ಧನುದಣ್ಡಕೋ;

ಅನಾಮಾಸಮಿದಂ ಸಬ್ಬಂ, ಜಾಲಞ್ಚ ಸರವಾರಣಂ.

೩೪೭.

ಸುವಣ್ಣಪಟಿಬಿಮ್ಬಾದಿ, ಚೇತಿಯಂ ಆರಕೂಟಕಂ;

ಅನಾಮಾಸನ್ತಿ ನಿದ್ದಿಟ್ಠಂ, ಕುರುನ್ದಟ್ಠಕಥಾಯ ಹಿ.

೩೪೮.

ಸಬ್ಬಂ ಓನಹಿತುಂ ವಾಪಿ, ಓನಹಾಪೇತುಮೇವ ವಾ;

ವಾದಾಪೇತುಞ್ಚ ವಾದೇತುಂ, ವಾದಿತಂ ನ ಚ ವಟ್ಟತಿ.

೩೪೯.

‘‘ಕರಿಸ್ಸಾಮುಪಹಾರ’’ನ್ತಿ, ವುತ್ತೇನ ಪನ ಭಿಕ್ಖುನಾ;

ಪೂಜಾ ಬುದ್ಧಸ್ಸ ಕಾತಬ್ಬಾ, ವತ್ತಬ್ಬಾತಿ ಚ ವಿಞ್ಞುನಾ.

೩೫೦.

ಸಯಂ ಫುಸಿಯಮಾನಸ್ಸ, ಇತ್ಥಿಯಾ ಪನ ಧುತ್ತಿಯಾ;

ಅವಾಯಮಿತ್ವಾ ಕಾಯೇನ, ಫಸ್ಸಂ ಪಟಿವಿಜಾನತೋ.

೩೫೧.

ಅನಾಪತ್ತಿ ಅಸಞ್ಚಿಚ್ಚ, ಅಜಾನನ್ತಸ್ಸ ಭಿಕ್ಖುನೋ;

ಮೋಕ್ಖಾಧಿಪ್ಪಾಯಿನೋ ಚೇವ, ತಥಾ ಉಮ್ಮತ್ತಕಾದಿನೋ.

೩೫೨.

ಪಠಮೇನ ಸಮಾನಾವ, ಸಮುಟ್ಠಾನಾದಯೋ ಪನ;

ಕಾಯಸಂಸಗ್ಗರಾಗಸ್ಸ, ತಥಾ ಸುಕ್ಕವಿಸಟ್ಠಿಯಾ.

ಕಾಯಸಂಸಗ್ಗಕಥಾ.

೩೫೩.

ದುಟ್ಠುಲ್ಲವಾಚಸ್ಸಾದೇನ, ಇತ್ಥಿಯಾ ಇತ್ಥಿಸಞ್ಞಿನೋ;

ದ್ವಿನ್ನಞ್ಚ ಪನ ಮಗ್ಗಾನಂ, ವಣ್ಣಾವಣ್ಣವಸೇನ ಚ.

೩೫೪.

ಮೇಥುನಯಾಚನಾದೀಹಿ ¶ , ಓಭಾಸನ್ತಸ್ಸ ಭಿಕ್ಖುನೋ;

ವಿಞ್ಞುಂ ಅನ್ತಮಸೋ ಹತ್ಥ-ಮುದ್ದಾಯಪಿ ಗರುಂ ಸಿಯಾ.

೩೫೫.

‘‘ಸಿಖರಣೀಸಿ ¶ , ಸಮ್ಭಿನ್ನಾ, ಉಭತೋಬ್ಯಞ್ಜನಾ’’ತಿ ಚ;

ಅಕ್ಕೋಸವಚನೇನಾಪಿ, ಗರುಕಂ ತು ಸುಣನ್ತಿಯಾ.

೩೫೬.

ಪುನಪ್ಪುನೋಭಾಸನ್ತಸ್ಸ, ಏಕವಾಚಾಯ ವಾ ಬಹೂ;

ಗಣನಾಯ ಚ ವಾಚಾನಂ, ಇತ್ಥೀನಂ ಗರುಕಾ ಸಿಯುಂ.

೩೫೭.

ಸಾ ಚೇ ನಪ್ಪಟಿಜಾನಾತಿ, ತಸ್ಸ ಥುಲ್ಲಚ್ಚಯಂ ಸಿಯಾ;

ಆದಿಸ್ಸ ಭಣನೇ ಚಾಪಿ, ಉಬ್ಭಜಾಣುಮಧಕ್ಖಕಂ.

೩೫೮.

ಉಬ್ಭಕ್ಖಕಮಧೋಜಾಣು-ಮಣ್ಡಲಂ ಪನ ಉದ್ದಿಸಂ;

ವಣ್ಣಾದಿಭಣನೇ ಕಾಯ-ಪಟಿಬದ್ಧೇ ಚ ದುಕ್ಕಟಂ.

೩೫೯.

ಥುಲ್ಲಚ್ಚಯಂ ಭವೇ ತಸ್ಸ, ಪಣ್ಡಕೇ ಯಕ್ಖಿಪೇತಿಸು;

ಅಧಕ್ಖಕೋಬ್ಭಜಾಣುಮ್ಹಿ, ದುಕ್ಕಟಂ ಪಣ್ಡಕಾದಿಸು.

೩೬೦.

ಉಬ್ಭಕ್ಖಕಮಧೋಜಾಣು-ಮಣ್ಡಲೇಪಿ ಅಯಂ ನಯೋ;

ಸಬ್ಬತ್ಥ ದುಕ್ಕಟಂ ವುತ್ತಂ, ತಿರಚ್ಛಾನಗತಿತ್ಥಿಯಾ.

೩೬೧.

ಅತ್ಥಧಮ್ಮಪುರೇಕ್ಖಾರಂ, ಕತ್ವಾ ಓಭಾಸತೋಪಿ ಚ;

ವದತೋಪಿ ಅನಾಪತ್ತಿ, ಪುರಕ್ಖತ್ವಾನುಸಾಸನಿಂ.

೩೬೨.

ತಥಾ ಉಮ್ಮತ್ತಕಾದೀನಂ, ಸಮುಟ್ಠಾನಾದಯೋ ನಯಾ;

ಅದಿನ್ನಾದಾನತುಲ್ಯಾವ, ವೇದನೇತ್ಥ ದ್ವಿಧಾ ಮತಾ.

ದುಟ್ಠುಲ್ಲವಾಚಾಕಥಾ.

೩೬೩.

ವಣ್ಣಂ ಪನತ್ತನೋ ಕಾಮ-ಪಾರಿಚರಿಯಾಯ ಭಾಸತೋ;

ತಸ್ಮಿಂಯೇವ ಖಣೇ ಸಾ ಚೇ, ಜಾನಾತಿ ಗರುಕಂ ಸಿಯಾ.

೩೬೪.

ನೋ ಚೇ ಜಾನಾತಿ ಸಾ ಯಕ್ಖಿ-ಪೇತಿದೇವೀಸು ಪಣ್ಡಕೇ;

ಹೋತಿ ಥುಲ್ಲಚ್ಚಯಂ ತಸ್ಸ, ಸೇಸೇ ಆಪತ್ತಿ ದುಕ್ಕಟಂ.

೩೬೫.

ಚೀವರಾದೀಹಿ ಅಞ್ಞೇಹಿ, ವತ್ಥುಕಾಮೇಹಿ ಅತ್ತನೋ;

ನತ್ಥಿ ದೋಸೋ ಭಣನ್ತಸ್ಸ, ಪಾರಿಚರಿಯಾಯ ವಣ್ಣನಂ.

೩೬೬.

ಇತ್ಥಿಸಞ್ಞಾ ¶ ಮನುಸ್ಸಿತ್ಥೀ, ಪಾರಿಚರಿಯಾಯ ರಾಗಿತಾ;

ಓಭಾಸೋ ತೇನ ರಾಗೇನ, ಖಣೇ ತಸ್ಮಿಂ ವಿಜಾನನಂ.

೩೬೭.

ಪಞ್ಚಙ್ಗಾನಿ ¶ ಇಮಾನೇತ್ಥ, ವೇದಿತಬ್ಬಾನಿ ವಿಞ್ಞುನಾ;

ಸಮುಟ್ಠಾನಾದಯೋಪ್ಯಸ್ಸ, ಅನನ್ತರಸಮಾ ಮತಾ.

ಅತ್ತಕಾಮಪಾರಿಚರಿಯಕಥಾ.

೩೬೮.

ಪಟಿಗ್ಗಣ್ಹಾತಿ ಸನ್ದೇಸಂ, ಪುರಿಸಸ್ಸಿತ್ಥಿಯಾಪಿ ವಾ;

ವೀಮಂಸತಿ ಗರು ಹೋತಿ, ಪಚ್ಚಾಹರತಿ ಚೇ ಪನ.

೩೬೯.

‘‘ಯಸ್ಸಾ ಹಿ ಸನ್ತಿಕಂ ಗನ್ತ್ವಾ, ಆರೋಚೇಹೀ’’ತಿ ಪೇಸಿತೋ;

ತಮದಿಸ್ವಾ ತದಞ್ಞಸ್ಸ, ಅವಸ್ಸಾರೋಚಕಸ್ಸ ಸೋ.

೩೭೦.

‘‘ಆರೋಚೇಹೀ’’ತಿ ವತ್ವಾ ತಂ, ಪಚ್ಚಾಹರತಿ ಚೇ ಪನ;

ಭಿಕ್ಖು ಸಙ್ಘಾದಿಸೇಸಮ್ಹಾ, ಸಞ್ಚರಿತ್ತಾ ನ ಮುಚ್ಚತಿ.

೩೭೧.

‘‘ಮಾತರಾ ರಕ್ಖಿತಂ ಇತ್ಥಿಂ, ಗಚ್ಛ ಬ್ರೂಹೀ’’ತಿ ಪೇಸಿತೋ;

ಪಿತುರಕ್ಖಿತಮಞ್ಞಂ ವಾ, ವಿಸಙ್ಕೇತೋವ ಭಾಸತೋ.

೩೭೨.

ಪಟಿಗ್ಗಣ್ಹನತಾದೀಹಿ, ತೀಹಿ ಅಙ್ಗೇಹಿ ಸಂಯುತೇ;

ಸಞ್ಚರಿತ್ತೇ ಸಮಾಪನ್ನೇ, ಗರುಕಾಪತ್ತಿಮಾದಿಸೇ.

೩೭೩.

ದ್ವೀಹಿ ಥುಲ್ಲಚ್ಚಯಂ ವುತ್ತಂ, ಪಣ್ಡಕಾದೀಸು ತೀಹಿಪಿ;

ಏಕೇನೇವ ಚ ಸಬ್ಬತ್ಥ, ಹೋತಿ ಆಪತ್ತಿ ದುಕ್ಕಟಂ.

೩೭೪.

ಚೇತಿಯಸ್ಸ ಚ ಸಙ್ಘಸ್ಸ, ಗಿಲಾನಸ್ಸ ಚ ಭಿಕ್ಖುನೋ;

ಗಚ್ಛತೋ ಪನ ಕಿಚ್ಚೇನ, ಅನಾಪತ್ತಿ ಪಕಾಸಿತಾ.

೩೭೫.

ಮನುಸ್ಸತ್ತಂ ತಥಾ ತಸ್ಸಾ, ನನಾಲಂವಚನೀಯತಾ;

ಪಟಿಗ್ಗಣ್ಹನತಾದೀನಂ, ವಸಾ ಪಞ್ಚಙ್ಗಿಕಂ ಮತಂ.

೩೭೬.

ಇದಞ್ಹಿ ಛಸಮುಟ್ಠಾನಂ, ಅಚಿತ್ತಕಮುದೀರಿತಂ;

ಅಲಂವಚನೀಯತ್ತಂ ವಾ, ಪಣ್ಣತ್ತಿಂ ವಾ ಅಜಾನತೋ.

೩೭೭.

ಗಹೇತ್ವಾ ¶ ಸಾಸನಂ ಕಾಯ-ವಿಕಾರೇನೂಪಗಮ್ಮ ತಂ;

ವೀಮಂಸಿತ್ವಾ ಹರನ್ತಸ್ಸ, ಗರುಕಂ ಕಾಯತೋ ಸಿಯಾ.

೩೭೮.

ಸುತ್ವಾ ಯಥಾನಿಸಿನ್ನೋವ, ವಚನಂ ಇತ್ಥಿಯಾ ಪುನ;

ತಂ ತತ್ಥೇವಾಗತಸ್ಸೇವ, ಆರೋಚೇನ್ತಸ್ಸ ವಾಚತೋ.

೩೭೯.

ಅಜಾನನ್ತಸ್ಸ ಪಣ್ಣತ್ತಿಂ, ಕಾಯವಾಚಾಹಿ ತಂ ವಿಧಿಂ;

ಕರೋತೋ ಹರತೋ ವಾಪಿ, ಗರುಕಂ ಕಾಯವಾಚತೋ.

೩೮೦.

ಜಾನಿತ್ವಾಪಿ ¶ ಕರೋನ್ತಸ್ಸ, ಗರುಕಾಪತ್ತಿಯೋ ತಥಾ;

ಸಚಿತ್ತಕೇಹಿ ತೀಹೇವ, ಸಮುಟ್ಠಾನೇಹಿ ಜಾಯರೇ.

ಸಞ್ಚರಿತ್ತಕಥಾ.

೩೮೧.

ಸಯಂಯಾಚಿತಕೇಹೇವ, ಕುಟಿಕಂ ಅಪ್ಪಮಾಣಿಕಂ;

ಅತ್ತುದ್ದೇಸಂ ಕರೋನ್ತಸ್ಸ, ತಥಾದೇಸಿತವತ್ಥುಕಂ.

೩೮೨.

ಹೋನ್ತಿ ಸಙ್ಘಾದಿಸೇಸಾ ದ್ವೇ, ಸಾರಮ್ಭಾದೀಸು ದುಕ್ಕಟಂ;

ಸಚೇ ಏಕವಿಪನ್ನಾ ಸಾ, ಗರುಕಂ ಏಕಕಂ ಸಿಯಾ.

೩೮೩.

ಪುರಿಸಂ ಯಾಚಿತುಂ ಕಮ್ಮ-ಸಹಾಯತ್ಥಾಯ ವಟ್ಟತಿ;

ಮೂಲಚ್ಛೇಜ್ಜವಸೇನೇವ, ಯಾಚಮಾನಸ್ಸ ದುಕ್ಕಟಂ.

೩೮೪.

ಅವಜ್ಜಂ ಹತ್ಥಕಮ್ಮಮ್ಪಿ, ಯಾಚಿತುಂ ಪನ ವಟ್ಟತಿ;

ಹತ್ಥಕಮ್ಮಮ್ಪಿ ನಾಮೇತಂ, ಕಿಞ್ಚಿ ವತ್ಥು ನ ಹೋತಿ ಹಿ.

೩೮೫.

ಗೋಣಮಾಯಾಚಮಾನಸ್ಸ, ಠಪೇತ್ವಾ ಞಾತಕಾದಿಕೇ;

ದುಕ್ಕಟಂ ತಸ್ಸ ನಿದ್ದಿಟ್ಠಂ, ಮೂಲಚ್ಛೇಜ್ಜೇನ ತೇಸುಪಿ.

೩೮೬.

‘‘ಗೋಣಂ ದೇಮಾ’’ತಿ ವುತ್ತೇಪಿ, ಗಹೇತುಂ ನ ಚ ವಟ್ಟತಿ;

ಸಕಟಂ ದಾರುಭಣ್ಡತ್ತಾ, ಗಹೇತುಂ ಪನ ವಟ್ಟತಿ.

೩೮೭.

ವಾಸಿಫರಸುಕುದ್ದಾಲ-ಕುಠಾರಾದೀಸ್ವಯಂ ನಯೋ;

ಅನಜ್ಝಾವುತ್ಥಕಂ ಸಬ್ಬಂ, ಹರಾಪೇತುಮ್ಪಿ ವಟ್ಟತಿ.

೩೮೮.

ವಲ್ಲಿಆದಿಮ್ಹಿ ¶ ಸಬ್ಬಸ್ಮಿಂ, ಗರುಭಣ್ಡಪ್ಪಹೋನಕೇ;

ಪರೇಸಂ ಸನ್ತಕೇಯೇವ, ಹೋತಿ ಆಪತ್ತಿ ದುಕ್ಕಟಂ.

೩೮೯.

ಪಚ್ಚಯೇಸು ಹಿ ತೀಸ್ವೇವ, ವಿಞ್ಞತ್ತಿ ನ ಚ ವಟ್ಟತಿ;

ತತಿಯೇ ಪರಿಕಥೋಭಾಸ-ನಿಮಿತ್ತಾನಿ ಚ ಲಬ್ಭರೇ.

೩೯೦.

‘‘ಅದೇಸಿತೇ ಚ ವತ್ಥುಸ್ಮಿಂ, ಪಮಾಣೇನಾಧಿಕಂ ಕುಟಿಂ;

ಕರಿಸ್ಸಾಮೀ’’ತಿ ಚಿನ್ತೇತ್ವಾ, ಅರಞ್ಞಂ ಗಚ್ಛತೋಪಿ ಚ.

೩೯೧.

ಫರಸುಂ ವಾಪಿ ವಾಸಿಂ ವಾ, ನಿಸೇನ್ತಸ್ಸಾಪಿ ದುಕ್ಕಟಂ;

ಛಿನ್ದತೋ ದುಕ್ಕಟಂ ರುಕ್ಖಂ, ತಸ್ಸ ಪಾಚಿತ್ತಿಯಾ ಸಹ.

೩೯೨.

ಏವಂ ಪುಬ್ಬಪಯೋಗಸ್ಮಿಂ, ಕುಟಿಕಾರಕಭಿಕ್ಖುನೋ;

ಯಥಾಪಯೋಗಮಾಪತ್ತಿಂ, ವಿನಯಞ್ಞೂ ವಿನಿದ್ದಿಸೇ.

೩೯೩.

ಯಾ ¶ ಪನ ದ್ವೀಹಿ ಪಿಣ್ಡೇಹಿ, ನಿಟ್ಠಾನಂ ತು ಗಮಿಸ್ಸತಿ;

ಹೋತಿ ಥುಲ್ಲಚ್ಚಯಂ ತೇಸು, ಪಠಮೇ ದುತಿಯೇ ಗರು.

೩೯೪.

ಅನಾಪತ್ತಿ ಸಚಞ್ಞಸ್ಸ, ದೇತಿ ವಿಪ್ಪಕತಂ ಕುಟಿಂ;

ತಥಾ ಭೂಮಿಂ ಸಮಂ ಕತ್ವಾ, ಭಿನ್ದತೋಪಿ ಚ ತಂ ಕುಟಿಂ.

೩೯೫.

ಗುಹಂ ಲೇಣಂ ಕರೋನ್ತಸ್ಸ, ತಿಣಪಣ್ಣಚ್ಛದಮ್ಪಿ ವಾ;

ವಾಸಾಗಾರಂ ಠಪೇತ್ವಾನ, ಅಞ್ಞಸ್ಸತ್ಥಾಯ ವಾ ತಥಾ.

೩೯೬.

ದೇಸಾಪೇತ್ವಾವ ಭಿಕ್ಖೂಹಿ, ವತ್ಥುಂ ಪನ ಚ ಭಿಕ್ಖುನೋ;

ಕ್ರಿಯತೋವ ಸಮುಟ್ಠಾತಿ, ಕರೋತೋ ಅಪ್ಪಮಾಣಿಕಂ.

೩೯೭.

ಅದೇಸೇತ್ವಾ ಕರೋನ್ತಸ್ಸ, ತಂ ಕ್ರಿಯಾಕ್ರಿಯತೋ ಸಿಯಾ;

ಸಮುಟ್ಠಾನಾದಯೋ ಸೇಸಾ, ಸಞ್ಚರಿತ್ತಸಮಾ ಮತಾ.

ಕುಟಿಕಾರಸಿಕ್ಖಾಪದಕಥಾ.

೩೯೮.

ಅದೇಸೇತ್ವಾ ಸಚೇ ವತ್ಥುಂ, ಯೋ ಕರೇಯ್ಯ ಮಹಲ್ಲಕಂ;

ವಿಹಾರಂ ಅತ್ತವಾಸತ್ಥಂ, ಗರುಕಂ ತಸ್ಸ ನಿದ್ದಿಸೇ.

೩೯೯.

ಪಮಾಣಾತಿಕ್ಕಮೇನಾಪಿ ¶ , ದೋಸೋ ನತ್ಥಿ ಮಹಲ್ಲಕೇ;

ತಸ್ಮಾ ಕ್ರಿಯಸಮುಟ್ಠಾನಾ-ಭಾವಂ ಸಮುಪಲಕ್ಖಯೇ.

೪೦೦.

ಪಮಾಣನಿಯಮಾಭಾವಾ, ಏಕಸಙ್ಘಾದಿಸೇಸತಾ;

ಸಮುಟ್ಠಾನಾದಿಕಂ ಸೇಸಂ, ಅನನ್ತರಸಮಂ ಮತಂ.

ಮಹಲ್ಲಕಕಥಾ.

೪೦೧.

ಪಾರಾಜಿಕಾನಿ ವುತ್ತಾನಿ, ಚತುವೀಸತಿ ಸತ್ಥುನಾ;

ಭಿಕ್ಖುನೋ ಅನುರೂಪಾನಿ, ತೇಸು ಏಕೂನವೀಸತಿ.

೪೦೨.

ಅಮೂಲಕೇನ ಚೋದೇತಿ, ಹುತ್ವಾ ಚಾವನಚೇತನೋ;

ಸುದ್ಧಂ ವಾ ಯದಿ ವಾಸುದ್ಧಂ, ತೇಸು ಅಞ್ಞತರೇನ ಯೋ.

೪೦೩.

ಗರುಕಂ ತಸ್ಸ ಆಪತ್ತಿಂ, ಕತೋಕಾಸಮ್ಹಿ ನಿದ್ದಿಸೇ;

ತಥೇವ ಅಕತೋಕಾಸೇ, ದುಕ್ಕಟಾಪತ್ತಿಯಾ ಸಹ.

೪೦೪.

‘‘ಕೋಣ್ಠೋಸಿ ಚ ನಿಗಣ್ಠೋಸಿ;

ಸಾಮಣೇರೋಸಿ ತಾಪಸೋ;

ಗಹಟ್ಠೋಸಿ ¶ ತಥಾ ಜೇಟ್ಠ-;

ಬ್ಬತಿಕೋಸಿ ಉಪಾಸಕೋ.

೪೦೫.

ದುಸ್ಸೀಲೋ ಪಾಪಧಮ್ಮೋಸಿ, ಅನ್ತೋಪೂತಿ ಅವಸ್ಸುತೋ’’;

ಇಚ್ಚೇವಮ್ಪಿ ವದನ್ತಸ್ಸ, ಗರುಕಂ ತಸ್ಸ ನಿದ್ದಿಸೇ.

೪೦೬.

ಸಮ್ಮುಖಾ ಹತ್ಥಮುದ್ದಾಯ, ಚೋದೇನ್ತಸ್ಸಪಿ ತಙ್ಖಣೇ;

ತಂ ಚೇ ಪರೋ ವಿಜಾನಾತಿ, ಹೋತಿ ಆಪತ್ತಿ ಭಿಕ್ಖುನೋ.

೪೦೭.

ಗರುಕಂ ಸಮ್ಮುಖೇ ಠತ್ವಾ, ಚೋದಾಪೇನ್ತಸ್ಸ ಕೇನಚಿ;

ತಸ್ಸ ವಾಚಾಯ ವಾಚಾಯ, ಚೋದಾಪೇನ್ತಸ್ಸ ನಿದ್ದಿಸೇ.

೪೦೮.

ಅಥ ಸೋಪಿ ‘‘ಮಯಾ ದಿಟ್ಠಂ, ಸುತಂ ವಾ’’ತಿ ಚ ಭಾಸತಿ;

ತೇಸಂ ದ್ವಿನ್ನಮ್ಪಿ ಸಙ್ಘಾದಿ-ಸೇಸೋ ಹೋತಿ ನ ಸಂಸಯೋ.

೪೦೯.

ದೂತಂ ¶ ವಾ ಪನ ಪೇಸೇತ್ವಾ, ಪಣ್ಣಂ ವಾ ಪನ ಸಾಸನಂ;

ಚೋದಾಪೇನ್ತಸ್ಸ ಆಪತ್ತಿ, ನ ಹೋತೀತಿ ಪಕಾಸಿತಾ.

೪೧೦.

ತಥಾ ಸಙ್ಘಾದಿಸೇಸೇಹಿ, ವುತ್ತೇ ಚಾವನಸಞ್ಞಿನೋ;

ಹೋತಿ ಪಾಚಿತ್ತಿಯಾಪತ್ತಿ, ಸೇಸಾಪತ್ತೀಹಿ ದುಕ್ಕಟಂ.

೪೧೧.

ಅಕ್ಕೋಸನಾಧಿಪ್ಪಾಯಸ್ಸ, ಅಕತೋಕಾಸಮತ್ತನಾ;

ಸಹ ಪಾಚಿತ್ತಿಯೇನಸ್ಸ, ವದನ್ತಸ್ಸ ಚ ದುಕ್ಕಟಂ.

೪೧೨.

ಅಸಮ್ಮುಖಾ ವದನ್ತಸ್ಸ, ಆಪತ್ತೀಹಿಪಿ ಸತ್ತಹಿ;

ತಥಾ ಕಮ್ಮಂ ಕರೋನ್ತಸ್ಸ, ಹೋತಿ ಆಪತ್ತಿ ದುಕ್ಕಟಂ.

೪೧೩.

ನ ದೋಸುಮ್ಮತ್ತಕಾದೀನಂ, ಹೋತಿ ಪಞ್ಚಙ್ಗಸಂಯುತಂ;

ಉಪಸಮ್ಪನ್ನತಾ ತಸ್ಮಿಂ, ಪುಗ್ಗಲೇ ಸುದ್ಧಸಞ್ಞಿತಾ.

೪೧೪.

ಪಾರಾಜಿಕೇನ ಚೋದೇತಿ, ಯೇನ ತಸ್ಸ ಅಮೂಲತಾ;

ಸಮ್ಮುಖಾ ಚೋದನಾ ಚೇವ, ತಸ್ಸ ಚಾವನಸಞ್ಞಿನೋ.

೪೧೫.

ತಙ್ಖಣೇ ಜಾನನಞ್ಚೇವ, ಪಞ್ಚಙ್ಗಾನಿ ಭವನ್ತಿ ಹಿ;

ಇದಂ ತು ತಿಸಮುಟ್ಠಾನಂ, ಸಚಿತ್ತಂ ದುಕ್ಖವೇದನಂ.

ದುಟ್ಠದೋಸಕಥಾ.

೪೧೬.

ಲೇಸಮತ್ತಮುಪಾದಾಯ, ಭಿಕ್ಖುಮನ್ತಿಮವತ್ಥುನಾ;

ಚೋದೇಯ್ಯ ಗರುಕಾಪತ್ತಿ, ಸಚೇ ಚಾವನಚೇತನೋ.

೪೧೭.

ಚೋದೇತಿ ¶ ವಾ ತಥಾಸಞ್ಞೀ, ಚೋದಾಪೇತಿ ಪರೇನ ವಾ;

ಅನಾಪತ್ತಿ ಸಿಯಾ ಸೇಸೋ, ಅನನ್ತರಸಮೋ ಮತೋ.

ದುತಿಯದುಟ್ಠದೋಸಕಥಾ.

೪೧೮.

ಸಮಗ್ಗಸ್ಸ ಚ ಸಙ್ಘಸ್ಸ, ಭೇದತ್ಥಂ ವಾಯಮೇಯ್ಯ ಯೋ;

ಭೇದಹೇತುಂ ಗಹೇತ್ವಾ ವಾ, ತಿಟ್ಠೇಯ್ಯ ಪರಿದೀಪಯಂ.

೪೧೯.

ಸೋ ¶ ಹಿ ಭಿಕ್ಖೂಹಿ ವತ್ತಬ್ಬೋ, ‘‘ಭೇದತ್ಥಂ ಮಾ ಪರಕ್ಕಮ’’;

ಇತಿ ‘‘ಸಙ್ಘಸ್ಸ ಮಾ ತಿಟ್ಠ, ಗಹೇತ್ವಾ ಭೇದಕಾರಣಂ’’.

೪೨೦.

ವುಚ್ಚಮಾನೋ ಹಿ ತೇಹೇವ, ನಿಸ್ಸಜ್ಜೇಯ್ಯ ನ ಚೇವ ಯಂ;

ಸಮನುಭಾಸಿತಬ್ಬೋ ತಂ, ಅಚ್ಚಜಂ ಗರುಕಂ ಫುಸೇ.

೪೨೧.

ಪರಕ್ಕಮನ್ತಂ ಸಙ್ಘಸ್ಸ, ಭಿಕ್ಖುಂ ಭೇದಾಯ ಭಿಕ್ಖುನೋ;

ದಿಸ್ವಾ ಸುತ್ವಾ ಹಿ ಞತ್ವಾ ವಾ, ಅವದನ್ತಸ್ಸ ದುಕ್ಕಟಂ.

೪೨೨.

ಗನ್ತ್ವಾ ಚ ಪನ ವತ್ತಬ್ಬೋ, ಅದ್ಧಯೋಜನತಾದಿಕಂ;

ದೂರಮ್ಪಿ ಪನ ಗನ್ತಬ್ಬಂ, ಸಚೇ ಸಕ್ಕೋತಿ ತಾವದೇ.

೪೨೩.

ತಿಕ್ಖತ್ತುಂ ಪನ ವುತ್ತಸ್ಸ, ಅಪರಿಚ್ಚಜತೋಪಿ ತಂ;

ದೂತಂ ವಾ ಪನ ಪಣ್ಣಂ ವಾ, ಪೇಸತೋಪಿ ಚ ದುಕ್ಕಟಂ.

೪೨೪.

ಞತ್ತಿಯಾ ಪರಿಯೋಸಾನೇ, ದುಕ್ಕಟಂ ಪರಿದೀಪಿತಂ;

ಕಮ್ಮವಾಚಾಹಿ ಚ ದ್ವೀಹಿ, ಹೋತಿ ಥುಲ್ಲಚ್ಚಯಂ ದ್ವಯಂ.

೪೨೫.

ಯ್ಯ-ಕಾರೇ ಪನ ಸಮ್ಪತ್ತೇ, ಗರುಕೇಯೇವ ತಿಟ್ಠತಿ;

ಪಸ್ಸಮ್ಭನ್ತಿ ಹಿ ತಿಸ್ಸೋಪಿ, ಭಿಕ್ಖುನೋ ದುಕ್ಕಟಾದಯೋ.

೪೨೬.

ಅಕತೇ ಪನ ಕಮ್ಮಸ್ಮಿಂ, ಅಪರಿಚ್ಚಜತೋಪಿ ಚ;

ತಸ್ಸ ಸಙ್ಘಾದಿಸೇಸೇನ, ಅನಾಪತ್ತಿ ಪಕಾಸಿತಾ.

೪೨೭.

ಞತ್ತಿತೋ ಪನ ಪುಬ್ಬೇ ವಾ, ಪಚ್ಛಾ ವಾ ತಙ್ಖಣೇಪಿ ವಾ;

ಅಸಮ್ಪತ್ತೇ ಯ್ಯ-ಕಾರಸ್ಮಿಂ, ಪಟಿನಿಸ್ಸಜ್ಜತೋಪಿ ಚ.

೪೨೮.

ಪಟಿನಿಸ್ಸಜ್ಜತೋ ವಾಪಿ, ತಂ ವಾ ಸಮನುಭಾಸತೋ;

ತಥೇವುಮ್ಮತ್ತಕಾದೀನಂ, ಅನಾಪತ್ತಿ ಪಕಾಸಿತಾ.

೪೨೯.

ಯಞ್ಹಿ ಭಿಕ್ಖುಮನುದ್ದಿಸ್ಸ, ಮಚ್ಛಮಂಸಂ ಕತಂ ಭವೇ;

ಯಸ್ಮಿಞ್ಚ ನಿಬ್ಬೇಮತಿಕೋ, ತಂ ಸಬ್ಬಂ ತಸ್ಸ ವಟ್ಟತಿ.

೪೩೦.

ಸಮುದ್ದಿಸ್ಸ ¶ ಕತಂ ಞತ್ವಾ, ಭುಞ್ಜನ್ತಸ್ಸೇವ ದುಕ್ಕಟಂ;

ತಥಾ ಅಕಪ್ಪಿಯಂ ಮಂಸಂ, ಅಜಾನಿತ್ವಾಪಿ ಖಾದತೋ.

೪೩೧.

ಹತ್ಥುಸ್ಸಚ್ಛಮನುಸ್ಸಾನಂ ¶ , ಅಹಿಕುಕ್ಕುರದೀಪಿನಂ;

ಸೀಹಬ್ಯಗ್ಘತರಚ್ಛಾನಂ, ಮಂಸಂ ಹೋತಿ ಅಕಪ್ಪಿಯಂ.

೪೩೨.

ಥುಲ್ಲಚ್ಚಯಂ ಮನುಸ್ಸಾನಂ, ಮಂಸೇ ಸೇಸೇಸು ದುಕ್ಕಟಂ;

ಸಚಿತ್ತಕಂ ಸಮುದ್ದಿಸ್ಸ-ಕತಂ ಸೇಸಮಚಿತ್ತಕಂ.

೪೩೩.

ಪುಚ್ಛಿತ್ವಾಯೇವ ಮಂಸಾನಂ, ಭಿಕ್ಖೂನಂ ಗಹಣಂ ಪನ;

ಏತಂ ವತ್ತನ್ತಿ ವತ್ತಟ್ಠಾ, ವದನ್ತಿ ವಿನಯಞ್ಞುನೋ.

೪೩೪.

ಇದಮೇಕಸಮುಟ್ಠಾನಂ, ವುತ್ತಂ ಸಮನುಭಾಸನಂ;

ಕಾಯಕಮ್ಮಂ ವಚೀಕಮ್ಮಂ, ಅಕ್ರಿಯಂ ದುಕ್ಖವೇದನಂ.

ಸಙ್ಘಭೇದಕಥಾ.

೪೩೫.

ದುತಿಯೇ ಸಙ್ಘಭೇದಸ್ಮಿಂ, ವತ್ತಬ್ಬಂ ನತ್ಥಿ ಕಿಞ್ಚಿಪಿ;

ಸಮುಟ್ಠಾನಾದಯೋಪಿಸ್ಸ, ಪಠಮೇನ ಸಮಾ ಮತಾ.

ದುತಿಯಸಙ್ಘಭೇದಕಥಾ.

೪೩೬.

ಉದ್ದೇಸಪರಿಯಾಪನ್ನೇ, ಭಿಕ್ಖು ದುಬ್ಬಚಜಾತಿಕೋ;

ಅವಚನೀಯಮತ್ತಾನಂ, ಕರೋತಿ ಗರುಕಂ ಸಿಯಾ.

೪೩೭.

ದುಬ್ಬಚೇಪಿ ಪನೇತಸ್ಮಿಂ, ಸಙ್ಘಭೇದಕವಣ್ಣನೇ;

ಸಬ್ಬೋ ವುತ್ತನಯೇನೇವ, ವೇದಿತಬ್ಬೋ ವಿನಿಚ್ಛಯೋ.

ದುಬ್ಬಚಕಥಾ.

೪೩೮.

ಯೋ ಛನ್ದಗಾಮಿತಾದೀಹಿ, ಪಾಪೇನ್ತೋ ಕುಲದೂಸಕೋ.

ಕಮ್ಮೇ ಕರಿಯಮಾನೇ ತಂ, ಅಚ್ಚಜಂ ಗರುಕಂ ಫುಸೇ.

೪೩೯.

ಚುಣ್ಣಂ ಪಣ್ಣಂ ಫಲಂ ಪುಪ್ಫಂ, ವೇಳುಂ ಕಟ್ಠಞ್ಚ ಮತ್ತಿಕಂ;

ಕುಲಸಙ್ಗಹಣತ್ಥಾಯ, ಅತ್ತನೋ ವಾ ಪರಸ್ಸ ವಾ.

೪೪೦.

ಸನ್ತಕಂ ¶ ದದತೋ ಹೋತಿ, ಕುಲದೂಸನದುಕ್ಕಟಂ;

ಭಣ್ಡಗ್ಘೇನ ಚ ಕಾತಬ್ಬೋ, ಥೇಯ್ಯಾ ಸಙ್ಘಞ್ಞಸನ್ತಕೇ.

೪೪೧.

ಸಙ್ಘಿಕಂ ¶ ಗರುಭಣ್ಡಂ ವಾ, ಸೇನಾಸನನಿಯಾಮಿತಂ;

ಯೋಪಿಸ್ಸರವತಾಯೇವ, ದೇನ್ತೋ ಥುಲ್ಲಚ್ಚಯಂ ಫುಸೇ.

೪೪೨.

ಹರಿತ್ವಾ ವಾ ಹರಾಪೇತ್ವಾ, ಪಕ್ಕೋಸಿತ್ವಾಗತಸ್ಸ ವಾ;

ಕುಲಸಙ್ಗಹಣತ್ಥಾಯ, ಪುಪ್ಫಂ ದೇನ್ತಸ್ಸ ದುಕ್ಕಟಂ.

೪೪೩.

ಹರಿತ್ವಾ ವಾ ಹರಾಪೇತ್ವಾ, ಪಿತೂನಂ ಪನ ವಟ್ಟತಿ;

ದಾತುಂ ಪುಪ್ಫಂ ಪನಞ್ಞಸ್ಸ, ಆಗತಸ್ಸೇವ ಞಾತಿನೋ.

೪೪೪.

ತಞ್ಚ ಖೋ ವತ್ಥುಪೂಜತ್ಥಂ, ದಾತಬ್ಬಂ ನ ಪನಞ್ಞಥಾ;

ಸಿವಾದಿಪೂಜನತ್ಥಂ ವಾ, ಮಣ್ಡನತ್ಥಂ ನ ವಟ್ಟತಿ.

೪೪೫.

ಫಲಾದೀಸುಪಿ ಸೇಸೇಸು, ಭಿಕ್ಖುನಾ ವಿನಯಞ್ಞುನಾ;

ಪುಪ್ಫೇ ವುತ್ತನಯೇನೇವ, ವೇದಿತಬ್ಬೋ ವಿನಿಚ್ಛಯೋ.

೪೪೬.

ಪುಪ್ಫಾದಿಭಾಜನೇ ಕೋಚಿ, ಆಗಚ್ಛತಿ ಸಚೇ ಪನ;

ಸಮ್ಮತೇನಸ್ಸ ದಾತಬ್ಬಂ, ಞಾಪೇತ್ವಾ ಇತರೇನ ತು.

೪೪೭.

ಉಪಡ್ಢಭಾಗಂ ದಾತಬ್ಬಂ, ಇತಿ ವುತ್ತಂ ಕುರುನ್ದಿಯಂ;

‘‘ಥೋಕಂ ಥೋಕ’’ನ್ತಿ ನಿದ್ದಿಟ್ಠಂ, ಮಹಾಪಚ್ಚರಿಯಂ ಪನ.

೪೪೮.

ಗಿಲಾನಾನಂ ಮನುಸ್ಸಾನಂ, ದಾತಬ್ಬಂ ತು ಸಕಂ ಫಲಂ;

ಪರಿಬ್ಬಯವಿಹೀನಸ್ಸ, ಸಮ್ಪತ್ತಿಸ್ಸರಿಯಸ್ಸಪಿ.

೪೪೯.

ಸಙ್ಘಾರಾಮೇ ಯಥಾ ಯತ್ರ, ಸಙ್ಘೇನ ಕತಿಕಾ ಕತಾ;

ಫಲರುಕ್ಖಪರಿಚ್ಛೇದಂ, ಕತ್ವಾ ತತ್ರಾಗತಸ್ಸಪಿ.

೪೫೦.

ಫಲಂ ಯಥಾಪರಿಚ್ಛೇದಂ, ದದತೋ ಪನ ವಟ್ಟತಿ;

‘‘ದಸ್ಸೇತಬ್ಬಾಪಿ ವಾ ರುಕ್ಖಾ’’, ‘‘ಇತೋ ಗಣ್ಹ ಫಲ’’ನ್ತಿ ಚ.

೪೫೧.

ಸಯಂ ಖಣಿತ್ವಾ ಪಥವಿಂ, ಮಾಲಾಗಚ್ಛಾದಿರೋಪನೇ;

ಹೋತಿ ಪಾಚಿತ್ತಿಯೇನಸ್ಸ, ದುಕ್ಕಟಂ ಕುಲದೂಸನೇ.

೪೫೨.

ಅಕಪ್ಪಿಯೇನ ¶ ವಾಕ್ಯೇನ, ತಥಾ ರೋಪಾಪನೇಪಿ ಚ;

ಸಬ್ಬತ್ಥ ದುಕ್ಕಟಂ ವುತ್ತಂ, ಭಿಕ್ಖುನೋ ಕುಲದೂಸನೇ.

೪೫೩.

ರೋಪನೇ ದುಕ್ಕಟಂಯೇವ, ಹೋತಿ ಕಪ್ಪಿಯಭೂಮಿಯಂ;

ತಥಾ ರೋಪಾಪನೇ ವುತ್ತಂ, ಉಭಯತ್ಥ ಚ ಭಿಕ್ಖುನೋ.

೪೫೪.

ಸಕಿಂ ಆಣತ್ತಿಯಾ ತಸ್ಸ, ಬಹೂನಂ ರೋಪನೇ ಪನ;

ಸದುಕ್ಕಟಾ ತು ಪಾಚಿತ್ತಿ, ಸುದ್ಧಂ ವಾ ದುಕ್ಕಟಂ ಸಿಯಾ.

೪೫೫.

ಕಪ್ಪಿಯೇನೇವ ¶ ವಾಕ್ಯೇನ, ಉಭಯತ್ಥ ಚ ಭೂಮಿಯಾ;

ರೋಪನೇ ಪರಿಭೋಗತ್ಥಂ, ನ ದೋಸೋ ಕೋಚಿ ವಿಜ್ಜತಿ.

೪೫೬.

ಕಪ್ಪಿಯಭೂಮಿ ಚೇ ಹೋತಿ, ಸಯಂ ರೋಪೇತುಮೇವ ಚ;

ವಟ್ಟತೀತಿ ಚ ನಿದ್ದಿಟ್ಠಂ, ಮಹಾಪಚ್ಚರಿಯಂ ಪನ.

೪೫೭.

ಆರಾಮಾದೀನಮತ್ಥಾಯ, ಸಯಂ ಸಂರೋಪಿತಸ್ಸ ವಾ;

ವಟ್ಟತೇವ ಚ ಭಿಕ್ಖೂನಂ, ತಂ ಫಲಂ ಪರಿಭುಞ್ಜಿತುಂ.

೪೫೮.

ಸಿಞ್ಚನೇ ಪನ ಸಬ್ಬತ್ಥ, ಸಯಂ ಸಿಞ್ಚಾಪನೇಪಿ ಚ;

ಅಕಪ್ಪಿಯೋದಕೇನೇವ, ಹೋತಿ ಪಾಚಿತ್ತಿ ಭಿಕ್ಖುನೋ.

೪೫೯.

ಕುಲಸಙ್ಗಹಣತ್ಥಞ್ಚ, ಪರಿಭೋಗತ್ಥಮೇವ ವಾ;

ಸದ್ಧಿಂ ಪಾಚಿತ್ತಿಯೇನಸ್ಸ, ಸಿಞ್ಚತೋ ಹೋತಿ ದುಕ್ಕಟಂ.

೪೬೦.

ತೇಸಂಯೇವ ಪನತ್ಥಾಯ, ದ್ವಿನ್ನಂ ಕಪ್ಪಿಯವಾರಿನಾ;

ಸಿಞ್ಚನೇ ದುಕ್ಕಟಂ ವುತ್ತಂ, ತಥಾ ಸಿಞ್ಚಾಪನೇಪಿ ಚ.

೪೬೧.

ಕುಲಸಙ್ಗಹಣತ್ಥಾಯ, ಪುಪ್ಫಾನಂ ಓಚಿನಾಪನೇ;

ಸಯಮೋಚಿನನೇ ಚಾಪಿ, ಸಪಾಚಿತ್ತಿಯದುಕ್ಕಟಂ.

೪೬೨.

ಪುಪ್ಫಾನಂ ಗಣನಾಯಸ್ಸ, ಪುಪ್ಫಮೋಚಿನತೋ ಪನ;

ಹೋತಿ ಪಾಚಿತ್ತಿಯಾಪತ್ತಿ, ಕುಲತ್ಥಂ ಚೇ ಸದುಕ್ಕಟಾ.

೪೬೩.

ಗನ್ಥಿಮಂ ಗೋಪ್ಫಿಮಂ ನಾಮ, ವೇಧಿಮಂ ವೇಠಿಮಮ್ಪಿ ಚ;

ಪೂರಿಮಂ ವಾಯಿಮಂ ಚೇತಿ, ಛಬ್ಬಿಧೋ ಪುಪ್ಫಸಙ್ಗಹೋ.

೪೬೪.

ತತ್ಥ ¶ ದಣ್ಡೇನ ದಣ್ಡಂ ವಾ, ವಣ್ಟೇನಪಿ ಚ ವಣ್ಟಕಂ;

ಗನ್ಥಿತ್ವಾ ಕರಣಂ ಸಬ್ಬಂ, ‘‘ಗನ್ಥಿಮ’’ನ್ತಿ ಪವುಚ್ಚತಿ.

೪೬೫.

ಗೋಪ್ಫಿಮಂ ನಾಮ ಗೋಪ್ಫೇತ್ವಾ, ಸುತ್ತಾದೀಹಿ ಕರೀಯತಿ;

ಏಕತೋವಣ್ಟಿಕಾ ಮಾಲಾ, ಉಭತೋವಣ್ಟಿಕಾ ಚ ತಂ.

೪೬೬.

ವೇಧಿಮಂ ನಾಮ ವಿಜ್ಝಿತ್ವಾ, ಬುನ್ದೇಸು ಮಕುಲಾದಿಕಂ;

ಆವುತಾ ಸೂಚಿಆದೀಹಿ, ಮಾಲಾವಿಕತಿ ವುಚ್ಚತಿ.

೪೬೭.

ವೇಠಿಮಂ ನಾಮ ವೇಠೇತ್ವಾ, ಕತಂ ಮಾಲಾಗುಣೇಹಿ ವಾ;

ವಾಕಾದೀಹಿ ಚ ಬದ್ಧಂ ವಾ, ‘‘ವೇಠಿಮ’’ನ್ತಿ ಪವುಚ್ಚತಿ.

೪೬೮.

ಪೂರಿಮಂ ಪನ ದಟ್ಠಬ್ಬಂ, ಪುಪ್ಫಮಾಲಾಹಿ ಪೂರಣೇ;

ಬೋಧಿಂ ಪುಪ್ಫಪಟಾದೀನಂ, ಪರಿಕ್ಖೇಪೇಸು ಲಬ್ಭತಿ.

೪೬೯.

ವಾಯಿಮಂ ¶ ನಾಮ ದಟ್ಠಬ್ಬಂ, ಪುಪ್ಫರೂಪಪಟಾದಿಸು;

ಪುಪ್ಫಮಾಲಾಗುಣೇಹೇವ, ವಾಯಿತ್ವಾ ಕರಣೇ ಪನ.

೪೭೦.

ಸಬ್ಬಮೇತಂ ಸಯಂ ಕಾತುಂ, ಕಾರಾಪೇತುಂ ಪರೇಹಿ ವಾ;

ಭಿಕ್ಖೂನಂ ಭಿಕ್ಖುನೀನಞ್ಚ, ಬುದ್ಧಸ್ಸಪಿ ನ ವಟ್ಟತಿ.

೪೭೧.

ತಥಾ ಕಲಮ್ಬಕಂ ಕಾತುಂ, ಅಡ್ಢಚನ್ದಕಮೇವ ವಾ;

ಅಞ್ಞೇಹಿ ಪೂರಿತಂ ಪುಪ್ಫ-ಪಟಂ ವಾ ವಾಯಿತುಮ್ಪಿ ಚ.

೪೭೨.

ಪಿಟ್ಠಕಾಚಮಯಂ ದಾಮಂ, ಗೇಣ್ಡುಪುಪ್ಫಮಯಮ್ಪಿ ಚ;

ಖರಪತ್ತಮಯಂ ಮಾಲಂ, ಸಬ್ಬಂ ಕಾತುಂ ನ ವಟ್ಟತಿ.

೪೭೩.

ಕಣಿಕಾರಾದಿಪುಪ್ಫಾನಿ, ವಿತಾನೇ ಬದ್ಧಕಣ್ಟಕೇ;

ಹೀರಾದೀಹಿ ಪಟಾಕತ್ಥಂ, ವಿಜ್ಝನ್ತಸ್ಸಪಿ ದುಕ್ಕಟಂ.

೪೭೪.

ಕಣ್ಟಕಾದೀಹಿ ಭಿಕ್ಖುಸ್ಸ, ಏಕಪುಪ್ಫಮ್ಪಿ ವಿಜ್ಝಿತುಂ;

ಪುಪ್ಫೇಸುಯೇವ ವಾ ಪುಪ್ಫಂ, ಪವೇಸೇತುಂ ನ ವಟ್ಟತಿ.

೪೭೫.

ಅಸೋಕಪಿಣ್ಡಿಆದೀನಂ, ಅನ್ತರೇ ಧಮ್ಮರಜ್ಜುಯಾ;

ಪವೇಸೇನ್ತಸ್ಸ ಪುಪ್ಫಾನಿ, ನ ದೋಸೋ ಕೋಚಿ ವಿಜ್ಜತಿ.

೪೭೬.

ಠಪಿತೇಸು ¶ ಪವೇಸೇತ್ವಾ, ಕದಲಿಚ್ಛತ್ತಭಿತ್ತಿಸು;

ಕಣ್ಟಕೇಸುಪಿ ಪುಪ್ಫಾನಿ, ವಿಜ್ಝನ್ತಸ್ಸಪಿ ದುಕ್ಕಟಂ.

೪೭೭.

ಕಪ್ಪಿಯಂ ಪನ ವತ್ತಬ್ಬಂ, ವಚನಂ ವತ್ಥುಪೂಜನೇ;

ನಿಮಿತ್ತೋಭಾಸಪರಿಯಾ, ವಟ್ಟನ್ತೀತಿ ಪಕಾಸಿತಾ.

೪೭೮.

ನ ಕೇವಲಮಕತ್ತಬ್ಬಂ, ಕುಲದೂಸನಮೇವ ಚ;

ಅಥ ಖೋ ವೇಜ್ಜಕಮ್ಮಾದಿ, ನ ಕತ್ತಬ್ಬಂ ಕುದಾಚನಂ.

೪೭೯.

ಕಾತಬ್ಬಂ ಪನ ಭೇಸಜ್ಜಂ, ಪಞ್ಚನ್ನಂ ಸಹಧಮ್ಮಿನಂ;

ಕತ್ವಾಪ್ಯಕತವಿಞ್ಞತ್ತಿಂ, ಕಾ ಕಥಾ ಅತ್ತನೋ ಧನೇ.

೪೮೦.

ತಥಾ ಮಾತಾಪಿತೂನಮ್ಪಿ, ತದುಪಟ್ಠಾಕಜನ್ತುನೋ;

ಭಣ್ಡುಕಸ್ಸತ್ತನೋ ಚೇವ, ವೇಯ್ಯಾವಚ್ಚಕರಸ್ಸಪಿ.

೪೮೧.

ಜೇಟ್ಠಭಾತಾ ಕನಿಟ್ಠೋ ಚ, ತಥಾ ಭಗಿನಿಯೋ ದುವೇ;

ಚೂಳಮಾತಾ ಚೂಳಪಿತಾ, ಮಹಾಮಾತಾ ಮಹಾಪಿತಾ.

೪೮೨.

ಪಿತುಚ್ಛಾ ಮಾತುಲೋ ಚಾತಿ, ದಸಿಮೇ ಞಾತಯೋ ಮತಾ;

ಇಮೇಸಮ್ಪಿ ದಸನ್ನಞ್ಚ, ಕಾತುಂ ವಟ್ಟತಿ ಭಿಕ್ಖುನೋ.

೪೮೩.

ಸಚೇ ¶ ಭೇಸಜ್ಜಮೇತೇಸಂ, ನಪ್ಪಹೋತಿ ನ ಹೋತಿ ವಾ;

ಯಾಚನ್ತಿಪಿ ಚ ತಂ ಭಿಕ್ಖುಂ, ದಾತಬ್ಬಂ ತಾವಕಾಲಿಕಂ.

೪೮೪.

ಸಚೇ ತೇ ನ ಚ ಯಾಚನ್ತಿ, ದಾತಬ್ಬಂ ತಾವಕಾಲಿಕಂ;

ಆಭೋಗಂ ಪನ ಕತ್ವಾ ವಾ, ‘‘ದಸ್ಸನ್ತಿ ಪುನ ಮೇ ಇಮೇ’’.

೪೮೫.

ಏತೇಸಂ ತು ಕುಲಾ ಯಾವ, ಸತ್ತಮಾ ಕುಲದೂಸನಂ;

ಭೇಸಜ್ಜಕರಣಾಪತ್ತಿ, ವಿಞ್ಞತ್ತಿ ವಾ ನ ರೂಹತಿ.

೪೮೬.

ಭಾತುಜಾಯಾಪಿ ವಾ ಹೋತಿ, ಸಚೇ ಭಗಿನಿಸಾಮಿಕೋ;

ಸಚೇ ತೇ ಞಾತಕಾ ಹೋನ್ತಿ, ಕಾತುಂ ತೇಸಮ್ಪಿ ವಟ್ಟತಿ.

೪೮೭.

ಅಞ್ಞಾತಕಾ ಸಚೇ ಹೋನ್ತಿ, ಭಾತುನೋ ಅನುಜಾಯ ವಾ;

‘‘ತುಮ್ಹಾಕಂ ಜಗ್ಗನಟ್ಠಾನೇ, ದೇಥಾ’’ತಿ ಚ ವದೇ ಬುಧೋ.

೪೮೮.

ಅಥ ¶ ತೇಸಮ್ಪಿ ಪುತ್ತಾನಂ, ಕತ್ವಾ ದಾತಬ್ಬಮೇವ ವಾ;

‘‘ಮಾತಾಪಿತೂನಂ ತುಮ್ಹಾಕಂ, ದೇಥಾ’’ತಿ ವಿನಯಞ್ಞುನಾ.

೪೮೯.

ಅಞ್ಞೋಪಿ ಯೋ ಕೋಚಿ ಪನಿಸ್ಸರೋ ವಾ;

ಚೋರೋಪಿ ವಾ ಯುದ್ಧಪರಾಜಿತೋ ವಾ;

ಆಗನ್ತುಕೋ ಖೀಣಪರಿಬ್ಬಯೋ ವಾ;

ಅಕಲ್ಲಕೋ ಞಾತಿಜನುಜ್ಝಿತೋ ವಾ.

೪೯೦.

ಏತೇಸಂ ಪನ ಸಬ್ಬೇಸಂ, ಅಪಚ್ಚಾಸೀಸತಾ ಸತಾ;

ಕಾತಬ್ಬೋ ಪಟಿಸನ್ಥಾರೋ, ಭಿಕ್ಖುನಾ ಸಾಧುನಾಧುನಾ.

೪೯೧.

ಪರಿತ್ತೋದಕಸುತ್ತಾನಿ, ವುತ್ತೇ ದೇಥಾತಿ ಕೇನಚಿ;

ಜಲಂ ಹತ್ಥೇನ ಚಾಲೇತ್ವಾ, ಮದ್ದಿತ್ವಾ ಪನ ಸುತ್ತಕಂ.

೪೯೨.

ದಾತಬ್ಬಂ ಭಿಕ್ಖುನಾ ಕತ್ವಾ, ತೇಸಮೇವ ಚ ಸನ್ತಕಂ;

ಅತ್ತನೋ ಉದಕಂ ತೇಸಂ, ಸುತ್ತಂ ವಾ ದೇತಿ ದುಕ್ಕಟಂ.

೪೯೩.

ಅನಾಮಟ್ಠೋಪಿ ದಾತಬ್ಬೋ, ಪಿಣ್ಡಪಾತೋ ವಿಜಾನತಾ;

ದ್ವಿನ್ನಂ ಮಾತಾಪಿತೂನಮ್ಪಿ, ತದುಪಟ್ಠಾಯಕಸ್ಸ ಚ.

೪೯೪.

ಇಸ್ಸರಸ್ಸಾಪಿ ದಾತಬ್ಬೋ, ಚೋರದಾಮರಿಕಸ್ಸ ಚ;

ಭಣ್ಡುಕಸ್ಸತ್ತನೋ ಚೇವ, ವೇಯ್ಯಾವಚ್ಚಕರಸ್ಸಪಿ.

೪೯೫.

ದಾತುಂ ಪಣ್ಡುಪಲಾಸಸ್ಸ, ಥಾಲಕೇಪಿ ಚ ವಟ್ಟತಿ;

ಠಪೇತ್ವಾ ತಂ ಪನಞ್ಞಸ್ಸ, ಪಿತುನೋಪಿ ನ ವಟ್ಟತಿ.

೪೯೬.

ಗಿಹೀನಂ ¶ ಪನ ದೂತೇಯ್ಯಂ, ಜಙ್ಘಪೇಸನಿಯಮ್ಪಿ ಚ;

ಸತ್ಥುನಾ ದುಕ್ಕಟಂ ವುತ್ತಂ, ಕರೋನ್ತಸ್ಸ ಪದೇ ಪದೇ.

೪೯೭.

ಭಣ್ಡುಮಾತಾಪಿತೂನಮ್ಪಿ, ವೇಯ್ಯಾವಚ್ಚಕರಸ್ಸ ಚ;

ಸಾಸನಂ ಸಹಧಮ್ಮೀನಂ, ಹರಿತುಂ ಪನ ವಟ್ಟತಿ.

೪೯೮.

ಕುಲದೂಸನಕಮ್ಮೇನ, ಲದ್ಧಂ ಅಟ್ಠವಿಧೇನಪಿ;

ಪಞ್ಚನ್ನಂ ಸಹಧಮ್ಮೀನಂ, ನ ಚ ವಟ್ಟತಿ ಭುಞ್ಜಿತುಂ.

೪೯೯.

ಅಜ್ಝೋಹಾರೇಸು ¶ ಸಬ್ಬತ್ಥ, ದುಕ್ಕಟಂ ಪರಿದೀಪಿತಂ;

ಪರಿಭೋಗವಸೇನೇವ, ಸೇಸೇಸುಪಿ ಅಯಂ ನಯೋ.

೫೦೦.

ಕತ್ವಾ ರೂಪಿಯವೋಹಾರಂ, ಅಭೂತಾರೋಚನೇನ ಚ;

ಉಪ್ಪನ್ನಪಚ್ಚಯಾ ಸಬ್ಬೇ, ಸಮಾನಾತಿ ಪಕಾಸಿತಾ.

೫೦೧.

ವಿಞ್ಞತ್ತಿನುಪ್ಪದಾನಞ್ಚ, ವೇಜ್ಜಕಮ್ಮಮನೇಸನಂ;

ಪಾರಿಭಟುಕತಂ ಮುಗ್ಗ-ಸೂಪತಂ ವತ್ಥುವಿಜ್ಜಕಂ.

೫೦೨.

ಜಙ್ಘಪೇಸನಿಯಂ ದೂತ-ಕಮ್ಮಞ್ಚ ಕುಲದೂಸನಂ;

ಅಭೂತಾರೋಚನಂ ಬುದ್ಧ-ಪಟಿಕುಟ್ಠಂ ವಿವಜ್ಜಯೇ.

೫೦೩.

ನ ದೋಸುಮ್ಮತ್ತಕಾದೀನಂ, ಪಟಿನಿಸ್ಸಜ್ಜತೋಪಿ ತಂ;

ಸಮುಟ್ಠಾನಾದಿಕಂ ಸಬ್ಬಂ, ಸಙ್ಘಭೇದಸಮಂ ಮತಂ.

ಕುಲದೂಸನಕಥಾ.

೫೦೪.

ಜಾನಂ ಯಾವತಿಹಂ ಯೇನ, ಛಾದಿತಾಪತ್ತಿ ಭಿಕ್ಖುನಾ;

ಅಕಾಮಾ ಪರಿವತ್ಥಬ್ಬಂ, ತೇನ ತಾವತಿಹಂ ಪನ.

೫೦೫.

ಆಪತ್ತಿ ಚ ಅನುಕ್ಖಿತ್ತೋ, ಪಹು ಚಾನನ್ತರಾಯಿಕೋ;

ಚತುಸ್ವಪಿ ಚ ತಂಸಞ್ಞೀ, ತಸ್ಸ ಛಾದೇತುಕಾಮತಾ.

೫೦೬.

ಛಾದನನ್ತಿ ಪನೇತೇಹಿ, ದಸಹಙ್ಗೇಹಿ ಭಿಕ್ಖುನಾ;

ಛನ್ನಾ ನಾಮ ಸಿಯಾಪತ್ತಿ, ಅರುಣುಗ್ಗಮನೇನ ಸಾ.

ದ್ವೇ ಭಾಣವಾರಾ ನಿಟ್ಠಿತಾ.

೫೦೭.

ತಿವಿಧೋ ಪರಿವಾಸೋ ಹಿ, ತಿವಿಧಾಪೇತಚೇತಸಾ;

ಪಟಿಚ್ಛನ್ನೋ ಚ ಸುದ್ಧನ್ತೋ, ಸಮೋಧಾನೋತಿ ದೀಪಿತೋ.

೫೦೮.

ತತ್ರಾಯಂ ¶ ¶ ತು ಪಟಿಚ್ಛನ್ನ-ಪರಿವಾಸೋ ಪಕಾಸಿತೋ;

ಪಟಿಚ್ಛನ್ನಾಯ ದಾತಬ್ಬೋ, ವಸೇನಾಪತ್ತಿಯಾತಿ ಚ.

೫೦೯.

ವತ್ಥುಗೋತ್ತವಸೇನಾಪಿ, ನಾಮಾಪತ್ತಿವಸೇನ ವಾ;

ಕಮ್ಮವಾಚಾ ಹಿ ಕಾತಬ್ಬಾ, ದಾತಬ್ಬೋ ತಸ್ಸ ತೇನ ಚ.

೫೧೦.

‘‘ವತ್ತಂ ಸಮಾದಿಯಾಮೀ’’ತಿ, ‘‘ಪರಿವಾಸ’’ನ್ತಿ ವಾ ಪುನ;

ಸಮಾದಿಯಿತ್ವಾ ಸಙ್ಘಸ್ಸ, ಆರೋಚೇತಬ್ಬಮಾದಿತೋ.

೫೧೧.

ಪುನಪ್ಪುನಾಗತಾನಮ್ಪಿ, ಆರೋಚೇನ್ತೋವ ರತ್ತಿಯಾ;

ಛೇದಂ ವಾ ವತ್ತಭೇದಂ ವಾ, ಅಕತ್ವಾವ ಸದಾ ವಸೇ.

೫೧೨.

ಪರಿವಾಸೋ ವಿಸೋಧೇತುಂ, ನ ಸಕ್ಕಾ ತತ್ಥ ಚೇ ಪನ;

ನಿಕ್ಖಿಪಿತ್ವಾನ ತಂ ವತ್ತಂ, ವತ್ಥಬ್ಬಂ ತೇನ ಭಿಕ್ಖುನಾ.

೫೧೩.

ತತ್ಥೇವ ಸಙ್ಘಮಜ್ಝೇ ವಾ, ಪುಗ್ಗಲೇ ವಾಪಿ ನಿಕ್ಖಿಪೇ;

ನಿಕ್ಖಿಪಾಮೀತಿ ವತ್ತಂ ವಾ, ಪರಿವಾಸನ್ತಿ ವಾ ತಥಾ.

೫೧೪.

ಏವಮೇಕಪದೇನಾಪಿ, ಪದೇಹಿ ದ್ವೀಹಿ ವಾ ಪನ;

ವತ್ತಂ ನಿಕ್ಖಿಪಿತಬ್ಬಂ ತಂ, ಸಮಾದಾನೇಪ್ಯಯಂ ನಯೋ.

೫೧೫.

ನಿಕ್ಖಿತ್ತಕಾಲತೋ ಉದ್ಧಂ, ಪಕತತ್ತೋತಿ ವುಚ್ಚತಿ;

ಪುನ ಪಚ್ಚೂಸಕಾಲಸ್ಮಿಂ, ಸದ್ಧಿಮೇಕೇನ ಭಿಕ್ಖುನಾ.

೫೧೬.

ಪರಿಕ್ಖಿತ್ತವಿಹಾರಸ್ಸ, ದ್ವೇ ಪರಿಕ್ಖೇಪತೋ ಬಹಿ;

ಪರಿಕ್ಖೇಪಾರಹಟ್ಠಾನಾ, ಅಪರಿಕ್ಖಿತ್ತತೋ ಬಹಿ.

೫೧೭.

ಲೇಡ್ಡುಪಾತೇ ಅತಿಕ್ಕಮ್ಮ, ಓಕ್ಕಮಿತ್ವಾ ಚ ಮಗ್ಗತೋ;

ಗುಮ್ಬೇನ ವತಿಯಾ ವಾಪಿ, ಛನ್ನಟ್ಠಾನೇ ಠಿತೇನ ತು.

೫೧೮.

ತೇನ ಅನ್ತೋರುಣೇಯೇವ, ವತ್ತಮಾದಾಯ ವಿಞ್ಞುನಾ;

ಆರೋಚೇತ್ವಾರುಣೇ ತಸ್ಮಿಂ, ವುಟ್ಠಿತೇ ತಸ್ಸ ಸನ್ತಿಕೇ.

೫೧೯.

ನಿಕ್ಖಿಪಿತ್ವಾ ತತೋ ವತ್ತಂ, ಗನ್ತಬ್ಬಂ ತು ಯಥಾಸುಖಂ;

ಅನ್ತೋಯೇವಾರುಣೇ ಭಿಕ್ಖು, ಗತೋ ಚೇ ಯಸ್ಸ ಕಸ್ಸಚಿ.

೫೨೦.

ಆರೋಚೇತ್ವಾವ ¶ ತಂ ವತ್ತಂ, ನಿಕ್ಖಿಪೇ ಪುನ ಪಣ್ಡಿತೋ;

ಸೇಸಂ ಸಮುಚ್ಚಯಸ್ಸಟ್ಠ-ಕಥಾಯ ಚ ವಿಭಾವಯೇ.

೫೨೧.

ಆಪತ್ತೀನಞ್ಚ ರತ್ತೀನಂ, ಪರಿಚ್ಛೇದಂ ನ ಜಾನತಿ;

ಯೋ ತಸ್ಸ ಪನ ದಾತಬ್ಬೋ, ‘‘ಸುದ್ಧನ್ತೋ’’ತಿ ಪವುಚ್ಚತಿ.

೫೨೨.

ಏಸೇವ ¶ ಪರಿಸುದ್ಧೇಹಿ, ಸುದ್ಧನ್ತೋ ದುವಿಧೋ ಮತೋ;

ಚೂಳಸುದ್ಧನ್ತನಾಮೋ ಚ, ಮಹಾಸುದ್ಧನ್ತನಾಮಕೋ.

೫೨೩.

ದುವಿಧೋಪಿ ಅಯಂ ರತ್ತಿ-ಪರಿಚ್ಛೇದಂ ಅಜಾನತೋ;

ಏಕಚ್ಚಂ ಸಕಲಂ ವಾಪಿ, ದಾತಬ್ಬೋ ವಿಮತಿಸ್ಸ ವಾ.

೫೨೪.

ಇತರೋಪಿ ಸಮೋಧಾನ-ಪರಿವಾಸೋ ತಿಧಾ ಮತೋ;

ಸೋ ಓಧಾನಸಮೋಧಾನೋ, ಅಗ್ಘಮಿಸ್ಸಕಪುಬ್ಬಕೋ.

೫೨೫.

ಆಪಜ್ಜಿತ್ವಾನ್ತರಾಪತ್ತಿಂ, ಛಾದೇನ್ತಸ್ಸ ಹಿ ಭಿಕ್ಖುನೋ;

ದಿವಸೇ ಪರಿವುತ್ಥೇ ತು, ಓಧುನಿತ್ವಾ ಪದೀಯತೇ.

೫೨೬.

ಪುರಿಮಾಪತ್ತಿಯಾ ಮೂಲ-ದಿವಸೇ ತು ವಿನಿಚ್ಛಿತೇ;

ಪಚ್ಛಾ ಆಪನ್ನಮಾಪತ್ತಿಂ, ಸಮೋಧಾಯ ವಿಧಾನತೋ.

೫೨೭.

ಯಾಚಮಾನಸ್ಸ ಸಙ್ಘೇನ, ದಾತಬ್ಬೋ ಪನ ಭಿಕ್ಖುನೋ;

ಏಸೋಧಾನಸಮೋಧಾನ-ಪರಿವಾಸೋ ಪಕಾಸಿತೋ.

೫೨೮.

ತಥಾ ಸಮ್ಬಹುಲಾಸ್ವೇಕಾ, ದ್ವೇ ವಾ ಸಮ್ಬಹುಲಾಪಿ ವಾ;

ಯಾ ಯಾ ಚಿರಪಟಿಚ್ಛನ್ನಾ, ತಾಸಂ ಅಗ್ಘವಸೇನ ಹಿ.

೫೨೯.

ಆಪತ್ತೀನಂ ತತೋ ಊನ-ಪಟಿಚ್ಛನ್ನಾನಮೇವ ಯೋ;

ಸಮೋಧಾಯ ಪದಾತಬ್ಬೋ, ಪರಿವಾಸೋತಿ ವುಚ್ಚತಿ.

೫೩೦.

ನಾನಾವತ್ಥುಕಸಞ್ಞಾಯೋ, ಸಬ್ಬಾ ಆಪತ್ತಿಯೋ ಪನ;

ಸಬ್ಬಾತಾ ಏಕತೋ ಕತ್ವಾ, ದಾತಬ್ಬೋ ಮಿಸ್ಸಕೋ ಮತೋ.

೫೩೧.

ಪರಿವುತ್ಥಪರಿವಾಸಸ್ಸ, ಮಾನತ್ತಂ ದೇಯ್ಯಮುತ್ತರಿ;

ಛ ರತ್ತಿಯೋ ಪಟಿಚ್ಛನ್ನಾ-ಪಟಿಚ್ಛನ್ನವಸಾ ದುವೇ.

೫೩೨.

ತತ್ಥ ¶ ಯಾ ಅಪಟಿಚ್ಛನ್ನಾ, ಹೋತಿ ಆಪತ್ತಿ ಯಸ್ಸ ತು;

ತಸ್ಸ ದಾತಬ್ಬಮಾನತ್ತಂ, ಅಪಟಿಚ್ಛನ್ನನಾಮಕಂ.

೫೩೩.

ಯಸ್ಸಾಪತ್ತಿ ಪಟಿಚ್ಛನ್ನಾ, ಪರಿವಾಸಾವಸಾನಕೇ;

ತಸ್ಸ ದಾತಬ್ಬಮಾನತ್ತಂ, ‘‘ಪಟಿಚ್ಛನ್ನ’’ನ್ತಿ ವುಚ್ಚತಿ.

೫೩೪.

ಗನ್ತ್ವಾ ಚತೂಹಿ ಭಿಕ್ಖೂಹಿ, ಪಚ್ಚೂಸಸಮಯೇ ಸಹ;

ಪರಿವಾಸೇ ವಿನಿದ್ದಿಟ್ಠ-ಪ್ಪಕಾರಂ ದೇಸಮೇವ ಚ.

೫೩೫.

‘‘ವತ್ತಂ ಸಮಾದಿಯಾಮೀ’’ತಿ, ‘‘ಮಾನತ್ತ’’ಮಿತಿ ವಾ ಪನ;

ಆದಿಯಿತ್ವಾನ ತಂ ತೇಸಂ, ಆರೋಚೇತ್ವಾ ವಿಸಾರದೋ.

೫೩೬.

ನಿಕ್ಖಿಪೇ ¶ ಸನ್ತಿಕೇ ತೇಸಂ, ವತ್ತಂ ತೇಸು ಗತೇಸು ವಾ;

ಭಿಕ್ಖುಸ್ಸ ಪುಬ್ಬದಿಟ್ಠಸ್ಸ, ಆರೋಚೇತ್ವಾನ ನಿಕ್ಖಿಪೇ.

೫೩೭.

ತಸ್ಸ ದಾನವಿಧಾನಞ್ಚ, ರತ್ತಿಚ್ಛೇದಾದಿಕೋ ನಯೋ;

ಞೇಯ್ಯೋ ಸಮುಚ್ಚಯಸ್ಸಟ್ಠ-ಕಥಾಪಾಳಿವಸೇನ ತು.

೫೩೮.

ಪುನ ತಂ ಚಿಣ್ಣಮಾನತ್ತಂ, ಸಙ್ಘೋ ವೀಸತಿವಗ್ಗಿಕೋ;

ಅಬ್ಭೇಯ್ಯ ವಿಧಿನಾ ಭಿಕ್ಖು, ಪಕತತ್ತೋ ಪುನಬ್ಭಿತೋ.

೫೩೯.

ಛಾದೇನ್ತಿಯಾಪಿ ಆಪತ್ತಿಂ, ಪರಿವಾಸೋ ನ ವಿಜ್ಜತಿ;

ನ ಚ ಭಿಕ್ಖುನಿಯಾಪತ್ತಿ, ಅತ್ತನೋ ಛಾದಯನ್ತಿಯಾ.

೫೪೦.

ಛಾದೇತ್ವಾ ವಾಪಿ ಆಪತ್ತಿಂ, ಅಚ್ಛಾದೇತ್ವಾಪಿ ವಾ ಪನ;

ಕೇವಲಂ ಚರಿತಬ್ಬನ್ತಿ, ಪಕ್ಖಮಾನತ್ತಮೇವ ತು.

೫೪೧.

ವಿನಯನಯಮತಿಬುದ್ಧಿದೀಪನಂ;

ವಿನಯವಿನಿಚ್ಛಯಮೇತಮುತ್ತಮಂ;

ವಿವಿಧನಯನಯುತಂ ಉಪೇನ್ತಿ ಯೇ;

ವಿನಯನಯೇ ಪಟುತಂ ಉಪೇನ್ತಿ ತೇ.

ಇತಿ ವಿನಯವಿನಿಚ್ಛಯೇ ಸಙ್ಘಾದಿಸೇಸಕಥಾ ನಿಟ್ಠಿತಾ.

ಅನಿಯತಕಥಾ

೫೪೨.

ರಹೋ ¶ ನಿಸಜ್ಜಸ್ಸಾದೇನ, ಮಾತುಗಾಮಸ್ಸ ಸನ್ತಿಕಂ;

ಗನ್ತುಕಾಮೋ ನಿವಾಸೇತಿ, ಅಕ್ಖಿಂ ಅಞ್ಜೇತಿ ಭುಞ್ಜತಿ.

೫೪೩.

ಪಯೋಗೇ ಚ ಪಯೋಗೇ ಚ, ಹೋತಿ ಸಬ್ಬತ್ಥ ದುಕ್ಕಟಂ;

ಗಚ್ಛತೋ ಪದವಾರೇನ, ಗನ್ತ್ವಾ ಚಸ್ಸ ನಿಸೀದತೋ.

೫೪೪.

ನಿಸಜ್ಜಾಯ ಉಭಿನ್ನಮ್ಪಿ, ಪಯೋಗಗಣನಾಯ ಚ;

ಹೋತಿ ಪಾಚಿತ್ತಿಯಂ ತಸ್ಸ, ಬಹುಕಾನಿ ಬಹೂಸ್ವಪಿ.

೫೪೫.

ಸಮೀಪೇಪಿ ¶ ಠಿತೋ ಅನ್ಧೋ, ಅನ್ತೋದ್ವಾದಸಹತ್ಥಕೇ;

ನ ಕರೋತಿ ಅನಾಪತ್ತಿಂ, ಇತ್ಥೀನಂ ತು ಸತಮ್ಪಿ ಚ.

೫೪೬.

ಚಕ್ಖುಮಾಪಿ ನಿಪಜ್ಜಿತ್ವಾ, ನಿದ್ದಾಯನ್ತೋಪಿ ಕೇವಲಂ;

ದ್ವಾರೇ ಪಿಹಿತಗಬ್ಭಸ್ಸ, ನಿಸಿನ್ನೋಪಿ ನ ರಕ್ಖತಿ.

೫೪೭.

ಅನನ್ಧೇ ಸತಿ ವಿಞ್ಞುಸ್ಮಿಂ, ಠಿತಸ್ಸಾರಹಸಞ್ಞಿನೋ;

ನಿಸಜ್ಜಪಚ್ಚಯಾ ದೋಸೋ, ನತ್ಥಿ ವಿಕ್ಖಿತ್ತಚೇತಸೋ.

೫೪೮.

ನ ದೋಸುಮ್ಮತ್ತಕಾದೀನಂ, ಆಪತ್ತೀಹಿಪಿ ತೀಹಿಪಿ;

ಸಮುಟ್ಠಾನಾದಯೋ ತುಲ್ಯಾ, ಪಠಮನ್ತಿಮವತ್ಥುನಾ.

ಪಠಮಾನಿಯತಕಥಾ.

೫೪೯.

ಅನನ್ಧಾಬಧಿರೋ ವಿಞ್ಞೂ, ಇತ್ಥೀ ವಾ ಪುರಿಸೋಪಿ ವಾ;

ಅನ್ತೋದ್ವಾದಸಹತ್ಥಟ್ಠೋ, ಅನಾಪತ್ತಿಕರೋ ಸಿಯಾ.

೫೫೦.

ಅನ್ಧೋ ಅಬಧಿರೋ ವಾಪಿ, ಬಧಿರೋ ವಾಪಿ ಚಕ್ಖುಮಾ;

ನ ಕರೋತಿ ಅನಾಪತ್ತಿಂ, ತಿಸಮುಟ್ಠಾನಮೇವಿದಂ.

ದುತಿಯಾನಿಯತಕಥಾ.

ಇತಿ ವಿನಯವಿನಿಚ್ಛಯೇ ಅನಿಯತಕಥಾ ನಿಟ್ಠಿತಾ.

ನಿಸ್ಸಗ್ಗಿಯಕಥಾ

೫೫೧.

ಖೋಮಂ ¶ ಕಪ್ಪಾಸಕೋಸೇಯ್ಯಂ, ಸಾಣಂ ಭಙ್ಗಞ್ಚ ಕಮ್ಬಲಂ;

ಚೀವರಂ ಛಬ್ಬಿಧಂ ವುತ್ತಂ, ಜಾತಿತೋ ಪನ ಕಪ್ಪಿಯಂ.

೫೫೨.

ದುಕೂಲಞ್ಚೇವ ಪತ್ತುಣ್ಣಂ, ಚಿನಂ ಸೋಮಾರಪಟ್ಟಕಂ;

ಇದ್ಧಿಜಂ ದೇವದಿನ್ನಞ್ಚ, ತಸ್ಸೇತಂ ಅನುಲೋಮಿಕಂ.

೫೫೩.

ತಿಚೀವರಂ ಪರಿಕ್ಖಾರ-ಚೋಳಞ್ಚ ಮುಖಪುಞ್ಛನಂ;

ನಿಸೀದನಮಧಿಟ್ಠೇಯ್ಯ, ಪಚ್ಚತ್ಥರಣಮೇವ ಚ.

೫೫೪.

ಏಕಾಹಮ್ಪಿ ¶ ವಿನಾ ಭಿಕ್ಖು, ನ ವಸೇಯ್ಯ ತಿಚೀವರಂ;

ನ ವಸೇಯ್ಯ ತಥಾಧಿಟ್ಠಾ, ಚಾತುಮಾಸಂ ನಿಸೀದನಂ.

೫೫೫.

ರಜಿತ್ವಾ ಕಪ್ಪಿಯಂ ಬಿನ್ದುಂ, ದತ್ವಾ ತತ್ಥ ತಿಚೀವರಂ;

ಉಪಪನ್ನಂ ಪಮಾಣೇನ, ಅಧಿಟ್ಠಾತಬ್ಬಮೇವ ತಂ.

೫೫೬.

ಪಚ್ಛಿಮನ್ತೇನ ಸಙ್ಘಾಟಿ, ದೀಘಸೋ ಮುಟ್ಠಿಪಞ್ಚಕಾ;

ಮುಟ್ಠಿತ್ತಿಕಾ ಚ ತಿರಿಯಂ, ಉತ್ತಮನ್ತೇನ ಸಾ ಪನ.

೫೫೭.

ಸತ್ಥುನೋ ಚೀವರೂನಾಪಿ, ವಟ್ಟತೀತಿ ಪಕಾಸಿತಾ;

ಇದಮೇವುತ್ತರಾಸಙ್ಗೇ, ಪಮಾಣಂ ಪರಿದೀಪಿತಂ.

೫೫೮.

ಮುಟ್ಠಿಪಞ್ಚಕಂ ದೀಘನ್ತಂ, ಪಮಾಣಂ ತಿರಿಯನ್ತತೋ;

ಅಡ್ಢತೇಯ್ಯಂ ದ್ವಿಹತ್ಥಂ ವಾ, ಸೇಸೇ ಅನ್ತರವಾಸಕೇ.

೫೫೯.

ಅಹತಾಹತಕಪ್ಪಾನಂ, ಸಙ್ಘಾಟಿ ದಿಗುಣಾ ಮತಾ;

ಏಕಪಟ್ಟುತ್ತರಾಸಙ್ಗೋ, ಏವಮನ್ತರವಾಸಕೋ.

೫೬೦.

ಉತುದ್ಧಟಾನಂ ಪನ ಚೀವರಾನಂ;

ಸಙ್ಘಾಟಿ ಭಿಕ್ಖುಸ್ಸ ಚತುಗ್ಗುಣಾ ವಾ;

ದುವೇಪಿ ಸೇಸಾ ದಿಗುಣಾವ ವುತ್ತಾ;

ಯಥಾಸುಖಂ ವಟ್ಟತಿ ಪಂಸುಕೂಲಂ.

೫೬೧.

ತೀಣಿಪಿ ¶ ದ್ವೇಪಿ ಚೇಕಂ ವಾ, ಛಿನ್ದಿತಬ್ಬಂ ಪಹೋತಿ ಚೇ;

ಸಬ್ಬೇಸು ಅಪ್ಪಹೋನ್ತೇಸು, ದೇಯ್ಯಮನ್ವಾಧಿಕಮ್ಪಿ ವಾ.

೫೬೨.

ಅಚ್ಛಿನ್ನಂ ವಾ ಅನಾದಿನ್ನಂ, ಧಾರೇನ್ತಸ್ಸ ತಿಚೀವರಂ;

ಭಿಕ್ಖುನೋ ದುಕ್ಕಟಂ ವುತ್ತಂ, ದುಬ್ಭೋಗೇನ ಚ ಸೇವತೋ.

೫೬೩.

ಕುಸಿಂ ಅಡ್ಢಕುಸಿಞ್ಚಾಪಿ, ಮಣ್ಡಲಂ ಅಡ್ಢಮಣ್ಡಲಂ;

ವಿವಟ್ಟಂ ಅನುವಿವಟ್ಟಂ, ಬಾಹನ್ತಮ್ಪಿ ಚ ಭಿಕ್ಖುನೋ.

೫೬೪.

ದಸ್ಸೇತ್ವಾವ ವಿಧಿಂ ಸಬ್ಬಂ, ಪಞ್ಚಕಾದಿಪ್ಪಭೇದಕಂ;

ಛಿನ್ನಂ ಸಮಣಸಾರುಪ್ಪಂ, ಕಾತಬ್ಬಂ ತು ತಿಚೀವರಂ.

೫೬೫.

ದಾನೇನಚ್ಛಿಜ್ಜಗಾಹೇನ, ವಿಸ್ಸಾಸಗ್ಗಹಣೇನ ಚ;

ಹೀನಾಯಾವತ್ತನೇನಾಪಿ, ಸಿಕ್ಖಾಯ ಚ ಪಹಾನತೋ.

೫೬೬.

ಪಚ್ಚುದ್ಧಾರವಿನಾಸೇಹಿ, ಲಿಙ್ಗಸ್ಸ ಪರಿವತ್ತನಾ;

ಸಬ್ಬಂ ಭಿಜ್ಜತಿಧಿಟ್ಠಾನಂ, ಛಿದ್ದಭಾವೇ ತಿಚೀವರಂ.

೫೬೭.

ಕನಿಟ್ಠಸ್ಸಙ್ಗುಲಸ್ಸೇವ ¶ , ನಖಪಿಟ್ಠಿಪ್ಪಮಾಣಕಂ;

ವಿನಿವಿದ್ಧಂ ಪನಚ್ಛಿದ್ದ-ಮಧಿಟ್ಠಾನವಿನಾಸನಂ.

೫೬೮.

ಏಕೋ ತನ್ತುಪಿ ಅಚ್ಛಿನ್ನೋ, ಅಧಿಟ್ಠಾನಂ ನ ಭಿನ್ದತಿ;

ಸೇತಭಾವಂ ಕರೋನ್ತೇನ, ಧೋತಮ್ಪಿ ರಜಕೇನ ವಾ.

೫೬೯.

ಪಠಮಂ ಅಗ್ಗಳಂ ದತ್ವಾ, ಪಚ್ಛಾ ಛಿನ್ದತಿ ರಕ್ಖತಿ;

ಘಟೇತ್ವಾ ಕೋಟಿಯೋ ದ್ವೇ ವಾ, ಪಚ್ಛಾ ಛಿನ್ದತಿ ರಕ್ಖತಿ.

೫೭೦.

ಚತುರಟ್ಠಙ್ಗುಲಾ ಓರಂ, ಏಕದ್ವಿನ್ನಂ ತಿರೀಯತೋ;

ತಿಣ್ಣಮ್ಪಿ ದೀಘತೋ ಛಿದ್ದಂ, ಭಿನ್ದತೇವ ವಿದತ್ಥಿಯಾ.

೫೭೧.

ನಿಸೀದನಸ್ಸ ದೀಘೇನ, ಭವನ್ತಿ ದ್ವೇ ವಿದತ್ಥಿಯೋ;

ವಿತ್ಥಾರೇನ ದಿಯಡ್ಢಾ ಚ, ಸುಗತಸ್ಸ ವಿದತ್ಥಿಯಾ.

೫೭೨.

ಹೋನ್ತಿ ಕಣ್ಡುಪ್ಪಟಿಚ್ಛಾದಿ, ತಿರಿಯಂ ದ್ವೇ ವಿದತ್ಥಿಯೋ;

ದೀಘತೋಪಿ ಚತಸ್ಸೋವ, ಸುಗತಸ್ಸ ವಿದತ್ಥಿಯಾ.

೫೭೩.

ದೀಘತೋ ¶ ಸುಗತಸ್ಸೇವ, ಭವನ್ತಿ ಛ ವಿದತ್ಥಿಯೋ;

ವಿತ್ಥಾರೇನಡ್ಢತೇಯ್ಯಾವ, ಸಿಯಾ ವಸ್ಸಿಕಸಾಟಿಕಾ.

೫೭೪.

ಮುನಿನಾ ತೀಸು ಏತೇಸು, ಕರೋನ್ತಸ್ಸ ತದುತ್ತರಿಂ;

ಅಧಿಕಚ್ಛೇದನಂ ತಸ್ಸ, ಪಾಚಿತ್ತಿಯಮುದೀರಿತಂ.

೫೭೫.

ಮುಖಪುಞ್ಛನಚೋಳಸ್ಸ, ಪಚ್ಚತ್ಥರಣಕಸ್ಸ ವಾ;

ಪಮಾಣಂ ಅಪ್ಪಮಾಣೇನ, ನ ಚೇವ ಪರಿದೀಪಿತಂ.

೫೭೬.

ಸದಸಂ ಅದಸಂ ಸಬ್ಬಂ, ಪಚ್ಚತ್ಥರಣಚೀವರಂ;

ಮಹನ್ತಂ ಖುದ್ದಕಂ ಏಕ-ಮನೇಕಮ್ಪಿ ಚ ವಟ್ಟತಿ.

೫೭೭.

ಮುಖಪುಞ್ಛನಚೋಳೇಕಂ, ದ್ವೇಪಿ ವಟ್ಟನ್ತಿ ಸಬ್ಬಥಾ;

ಸದಸಂ ಅದಸಂ ವಾಪಿ, ಸದಸಂವ ನಿಸೀದನಂ.

೫೭೮.

ಅದಸಾ ರಜಿತಾಯೇವ, ವಟ್ಟತಾದಿನ್ನಕಪ್ಪಕಾ;

ವುತ್ತಾ ಕಣ್ಡುಪ್ಪಟಿಚ್ಛಾದಿ, ತಥಾ ವಸ್ಸಿಕಸಾಟಿಕಾ.

೫೭೯.

ಗಣನಂ ವಾ ಪಮಾಣಂ ವಾ, ನ ಪರಿಕ್ಖಾರಚೋಳಕೇ;

ಪಮಾಣಗಣನಾತೀತಿ, ಭಣನ್ತಿ ಪಕತಞ್ಞುನೋ.

೫೮೦.

ಸುಗತಟ್ಠಙ್ಗುಲಾಯಾಮಂ, ಚತುರಙ್ಗುಲವಿತ್ಥತಂ;

ವಿಕಪ್ಪನುಪಗಂ ಹೋತಿ, ಪಚ್ಛಿಮಂ ನಾಮ ಚೀವರಂ.

೫೮೧.

ಪರಿಸ್ಸಾವಪಟಂ ¶ ಪತ್ತ-ಪೋತ್ಥಕತ್ಥವಿಕಾದಿಕಂ;

ಅಧಿಟ್ಠೇಯ್ಯ ಪರಿಕ್ಖಾರ-ಚೋಳಂ ಪಚ್ಛಿಮಚೀವರಂ.

೫೮೨.

ಬಹೂನಿ ಏಕತೋ ಕತ್ವಾ, ಅಧಿಟ್ಠಾತುಮ್ಪಿ ವಟ್ಟತಿ;

ಮಾತುಆದೀನಮತ್ಥಾಯ, ಠಪಿತೇ ನತ್ಥಿ ದೋಸತಾ.

೫೮೩.

ವಸ್ಸಮಾಸೇ ಅಧಿಟ್ಠೇಯ್ಯ, ಚತುರೋ ವಸ್ಸಸಾಟಿಕಂ;

ಪುನ ಪಚ್ಚುದ್ಧರಿತ್ವಾ ತಂ, ವಿಕಪ್ಪೇಯ್ಯ ತತೋ ಪರಂ.

೫೮೪.

ತಾವ ಕಣ್ಡುಪ್ಪಟಿಚ್ಛಾದಿಂ, ಯಾವ ರೋಗೋ ನ ಸಮ್ಮತಿ;

ಅಧಿಟ್ಠಹಿತ್ವಾ ತತೋ ಉದ್ಧಂ, ಉದ್ಧರಿತ್ವಾ ವಿಕಪ್ಪಯೇ.

೫೮೫.

‘‘ಇಮಂ ಕಣ್ಡುಪ್ಪಟಿಚ್ಛಾದಿಂ, ಇಮಮನ್ತರವಾಸಕಂ;

ಅಧಿಟ್ಠಾಮೀ’’ತಿಧಿಟ್ಠೇಯ್ಯ, ಸೇಸೇಸುಪಿ ಅಯಂ ನಯೋ.

೫೮೬.

‘‘ಇಮಂ ¶ ಕಣ್ಡುಪ್ಪಟಿಚ್ಛಾದಿಂ, ಏತ’’ನ್ತಿ ಚ ಅಸಮ್ಮುಖೇ;

ವತ್ವಾ ಪಚ್ಚುದ್ಧರೇಯ್ಯೇವಂ, ಸೇಸೇಸುಪಿ ವಿಚಕ್ಖಣೋ.

೫೮೭.

ಆಭೋಗಂ ಮನಸಾ ಕತ್ವಾ, ಕಾಯೇನ ಫುಸನಾಕತಂ;

ವಚಸಾಧಿಟ್ಠಿತಞ್ಚಾತಿ, ಅಧಿಟ್ಠಾನಂ ದ್ವಿಧಾ ಮತಂ.

೫೮೮.

ಇತಿ ಸಬ್ಬಮಿದಂ ವುತ್ತಂ, ತೇಚೀವರಿಕಭಿಕ್ಖುನೋ;

ತಥಾ ವತ್ವಾವಧಿಟ್ಠೇಯ್ಯ, ತಂ ಪರಿಕ್ಖಾರಚೋಳಿಕೋ.

೫೮೯.

ತಿಚೀವರಂ ಪರಿಕ್ಖಾರ-ಚೋಳಂ ಕಾತುಮ್ಪಿ ವಟ್ಟತಿ;

ಏವಂ ಚುದೋಸಿತೇ ವುತ್ತೋ, ಪರಿಹಾರೋ ನಿರತ್ಥಕೋ.

೫೯೦.

ನ, ತೇಚೀವರಿಕಸ್ಸೇವ, ವುತ್ತತ್ತಾ ತತ್ಥ ಸತ್ಥುನಾ;

ತಂ ಪರಿಕ್ಖಾರಚೋಳಸ್ಸ, ತಸ್ಮಾ ಸಬ್ಬಮ್ಪಿ ವಟ್ಟತಿ.

೫೯೧.

‘‘ಅಧಿಟ್ಠೇತಿ ವಿಕಪ್ಪೇತಿ, ಅನಾಪತ್ತೀ’’ತಿ ಏತ್ಥ ಚ;

ಅಧಿಟ್ಠಾತಬ್ಬಕಸ್ಸೇವ, ವಿಕಪ್ಪನವಿಧಾನತೋ.

೫೯೨.

ಭಿಕ್ಖುಸ್ಸೇವಂ ಕರೋನ್ತಸ್ಸ, ನ ದೋಸೋ ಉಪಲಬ್ಭತಿ;

ಏವಞ್ಚ ನ ಸಿಯಾ ಕಸ್ಮಾ, ಮುಖಪುಞ್ಛನಕಾದಿಕಂ.

೫೯೩.

ಮುಖಪುಞ್ಛನಕಾದೀನಂ, ತೇಸಂ ಕಿಚ್ಚವಿಧಾನತೋ;

ಅಕಿಚ್ಚಸ್ಸಾಮಿಕಸ್ಸಸ್ಸ, ಅಧಿಟ್ಠಾನಂ ತು ಯುಜ್ಜತಿ.

೫೯೪.

ನಿಧಾನಮುಖಮೇತನ್ತಿ, ಮಹಾಪಚ್ಚರಿಯಂ ಪನ;

ವುತ್ತತ್ತಾ ಚ ನಿಸೇಧೇತುಂ, ನ ಸಕ್ಕಾ ವಿನಯಞ್ಞುನಾ.

೫೯೫.

ಚೀವರಂ ¶ ಪರಿಪುಣ್ಣನ್ತಿ, ನಿದಾನುಪ್ಪತ್ತಿತೋಪಿ ಚ;

ನಿಧಾನಮುಖಮೇತನ್ತಿ, ವೇದಿತಬ್ಬಂ ವಿಭಾವಿನಾ.

೫೯೬.

ಕುಸವಾಕಾದಿಚೀರಾನಿ, ಕಮ್ಬಲಂ ಕೇಸವಾಲಜಂ;

ಥುಲ್ಲಚ್ಚಯಂ ಧಾರಯತೋ-ಲೂಕಪಕ್ಖಾಜಿನಕ್ಖಿಪೇ.

೫೯೭.

ಕದಲೇರಕದುಸ್ಸೇಸು, ಅಕ್ಕದುಸ್ಸೇ ಚ ಪೋತ್ಥಕೇ;

ದುಕ್ಕಟಂ ತಿರಿಟೇ ವಾಪಿ, ವೇಠನೇ ಕಞ್ಚುಕೇಪಿ ಚ.

೫೯೮.

ಸಬ್ಬನೀಲಕಮಞ್ಜೇಟ್ಠ-ಕಣ್ಹಲೋಹಿತಪೀತಕೇ ¶ ;

ಮಹಾನಾಮಮಹಾರಙ್ಗ-ರತ್ತೇಸುಪಿ ಚ ದುಕ್ಕಟಂ.

೫೯೯.

ಅಚ್ಛಿನ್ನದಸಕೇ ದೀಘ-ಫಲಪುಪ್ಫದಸೇಸು ಚ;

ಅಚ್ಛಿನ್ನಚೀವರಸ್ಸೇತ್ಥ, ನತ್ಥಿ ಕಿಞ್ಚಿ ಅಕಪ್ಪಿಯಂ.

೬೦೦.

ಅಧಿಟ್ಠೇತಿ ವಿಕಪ್ಪೇತಿ, ವಿಸ್ಸಜ್ಜೇತಿ ವಿನಸ್ಸತಿ;

ಅನ್ತೋದಸಾಹಂ ವಿಸ್ಸಾಸೇ, ಅನಾಪತ್ತಿ ಪಕಾಸಿತಾ.

೬೦೧.

ಕಥಿನಂ ನಾಮ ನಾಮೇನ, ಸಮುಟ್ಠಾನಮಿದಂ ಪನ;

ಅಚಿತ್ತಮಕ್ರಿಯಂ ವುತ್ತಂ, ತಿಚಿತ್ತಞ್ಚ ತಿವೇದನಂ.

ಪಠಮಕಥಿನಕಥಾ.

೬೦೨.

ಗಾಮಾದೀಸು ಪದೇಸೇಸು, ತಿಪಞ್ಚಸು ತಿಚೀವರಂ;

ಠಪೇತ್ವಾ ಏಕರತ್ತಮ್ಪಿ, ಸಙ್ಘಸಮ್ಮುತಿಯಾ ವಿನಾ.

೬೦೩.

ಭಿಕ್ಖುನೋ ಪನ ತೇನಸ್ಸ, ವಿಪ್ಪವತ್ಥುಂ ನ ವಟ್ಟತಿ;

ಹೋತಿ ನಿಸ್ಸಗ್ಗಿಯಂ ವಿಪ್ಪ-ವಸತೋ ಅರುಣುಗ್ಗಮೇ.

೬೦೪.

ಚೀವರಂ ನಿಕ್ಖಿಪಿತ್ವಾನ, ನ್ಹಾಯನ್ತಸ್ಸೇವ ರತ್ತಿಯಂ;

ಅರುಣೇ ಉಟ್ಠಿತೇ ಕಿಂ ನು, ಕಾತಬ್ಬಂ ತೇನ ಭಿಕ್ಖುನಾ.

೬೦೫.

ದುಕ್ಕಟಂ ಮುನಿನಾ ವುತ್ತಂ, ನಿಸ್ಸಗ್ಗಿಯನಿವಾಸನೇ;

ತಬ್ಭಯಾ ಪನ ಸೋ ಭಿಕ್ಖು, ನಗ್ಗೋ ಗಚ್ಛತಿ ದುಕ್ಕಟಂ.

೬೦೬.

ಅಚ್ಛಿನ್ನಚೀವರಟ್ಠಾನೇ, ಠಿತತ್ತಾ ಪನ ಭಿಕ್ಖುನೋ;

ನ ತಸ್ಸಾಕಪ್ಪಿಯಂ ನಾಮ, ಚೀವರಂ ಅತ್ಥಿ ಕಿಞ್ಚಿಪಿ.

೬೦೭.

ನಿಗಾಸೇತ್ವಾ ಗಹೇತ್ವಾ ಚ, ಗನ್ತ್ವಾ ಭಿಕ್ಖುಸ್ಸ ಸನ್ತಿಕಂ;

ನಿಸ್ಸಜ್ಜಿತ್ವಾ ಪನಾಪತ್ತಿ, ದೇಸೇತಬ್ಬಾವ ವಿಞ್ಞುನಾ.

೬೦೮.

ಪರಸ್ಸ ¶ ನಿಸ್ಸಜ್ಜಿತ್ವಾ ತಂ, ದುಕ್ಕಟಂ ಪರಿಭುಞ್ಜತೋ;

ಪಯೋಗೇ ಚ ಪಯೋಗೇ ಚ, ಹೋತಿ ಪಾರುಪನಾದಿಸು.

೬೦೯.

ಅನಾಪತ್ತಿ ¶ ತಮಞ್ಞಸ್ಸ, ಭಿಕ್ಖುನೋ ಪರಿಭುಞ್ಜತೋ;

ಅದೇನ್ತಸ್ಸ ಚ ನಿಸ್ಸಟ್ಠಂ, ದುಕ್ಕಟಂ ಪರಿಯಾಪುತಂ.

೬೧೦.

ಥೇರೇ ಚ ದಹರೇ ಮಗ್ಗಂ, ಗಚ್ಛನ್ತೇಸು ಉಭೋಸುಪಿ;

ಪತ್ತಚೀವರಮಾದಾಯ, ಓಹೀನೇ ದಹರೇ ಪನ.

೬೧೧.

ಅಸಮ್ಪತ್ತೇ ಗರುಂ ತಸ್ಮಿಂ, ಉಗ್ಗಚ್ಛತ್ಯರುಣೋ ಯದಿ;

ಹೋತಿ ನಿಸ್ಸಗ್ಗಿಯಂ ವತ್ಥಂ, ನ ಪಸ್ಸಮ್ಭತಿ ನಿಸ್ಸಯೋ.

೬೧೨.

ಮುಹುತ್ತಂ ವಿಸ್ಸಮಿತ್ವಾನ, ಗಚ್ಛನ್ತೇ ದಹರೇ ಪನ;

ಹೋತಿ ನಿಸ್ಸಗ್ಗಿಯಂ ವತ್ಥಂ, ಪಸ್ಸಮ್ಭತಿ ಚ ನಿಸ್ಸಯೋ.

೬೧೩.

ಸುತಾ ಧಮ್ಮಕಥಾ ಯಸ್ಮಿಂ, ಉಗ್ಗಚ್ಛತ್ಯರುಣೋ ಯದಿ;

ಹೋತಿ ನಿಸ್ಸಗ್ಗಿಯಂ ವತ್ಥಂ, ಪಸ್ಸಮ್ಭತಿ ಚ ನಿಸ್ಸಯೋ.

೬೧೪.

ಪಚ್ಚುದ್ಧಾರೇ ಅನಾಪತ್ತಿ, ಲದ್ಧಸಮ್ಮುತಿಕಸ್ಸಪಿ;

ಅನ್ತೋಯೇವಾರುಣೇ ತಂ ವಾ, ವಿಸ್ಸಜ್ಜೇತಿ ವಿನಸ್ಸತಿ.

೬೧೫.

ಪಠಮೇನ ಸಮಾನಾವ, ಸಮುಟ್ಠಾನಾದಯೋ ನಯಾ;

ಅಪಚ್ಚುದ್ಧರಣಂ ಏತ್ಥ, ಅಕ್ರಿಯಾತಿ ವಿಸೇಸಿತಂ.

ದುತಿಯಕಥಿನಕಥಾ.

೬೧೬.

ಅಕಾಲಚೀವರಂ ಮಾಸ-ಪರಮಂ ನಿಕ್ಖಿಪೇ ಸತಿ;

ಪಚ್ಚಾಸಾಯ ತತೋ ಉದ್ಧಂ, ಠಪೇತುಂ ನ ಚ ವಟ್ಟತಿ.

೬೧೭.

ದಸಾಹಾತಿಕ್ಕಮೋಯೇವ;

ಪಠಮೇ ಕಥಿನೇ ಇಧ;

ಮಾಸಸ್ಸಾತಿಕ್ಕಮೋ ವುತ್ತೋ;

ಸೇಸೋ ತೇನ ಸಮೋ ಮತೋ.

ತತಿಯಕಥಿನಕಥಾ.

೬೧೮.

ಭಿಕ್ಖು ¶ ಭಿಕ್ಖುನಿಯಾ ಭುತ್ತಂ, ವತ್ಥಂ ಅಞ್ಞಾತಿಕಾಯ ಯೋ;

ಧೋವಾಪೇತಿ ರಜಾಪೇತಿ, ಆಕೋಟಾಪೇತಿ ಚೇ ತತೋ.

೬೧೯.

ತಸ್ಸ ¶ ನಿಸ್ಸಗ್ಗಿಯಾಪತ್ತಿ, ಪಠಮೇನ ಪಕಾಸಿತಾ;

ತಥಾ ಸೇಸೇಹಿ ಚ ದ್ವೀಹಿ, ದೀಪಿತಂ ದುಕ್ಕಟದ್ವಯಂ.

೬೨೦.

ಸಿಕ್ಖಮಾನಾಯ ವಾ ಹತ್ಥೇ, ಧೋವನತ್ಥಾಯ ದೇತಿ ಚೇ;

ಸಾ ಹುತ್ವಾ ಉಪಸಮ್ಪನ್ನಾ, ಪಚ್ಛಾ ಧೋವತಿ ಸೋ ನಯೋ.

೬೨೧.

ಸಾಮಣೇರನಿದ್ದೇಸೇಪಿ, ಲಿಙ್ಗಂ ಚೇ ಪರಿವತ್ತತಿ;

ಭಿಕ್ಖುನೀಸುಪಸಮ್ಪಜ್ಜ, ಧೋತೇ ನಿಸ್ಸಗ್ಗಿಯಂ ಸಿಯಾ.

೬೨೨.

ದಹರಾನಞ್ಚ ಭಿಕ್ಖೂನಂ, ಹತ್ಥೇ ವತ್ಥೇ ನಿಯ್ಯಾದಿತೇ;

ಪರಿವತ್ತಿತಲಿಙ್ಗೇಸು, ತೇಸುಪೇಸ ನಯೋ ಮತೋ.

೬೨೩.

ತಥಾ ಭಿಕ್ಖುನಿಯಾ ಹತ್ಥೇ, ದಿನ್ನೇ ‘‘ಧೋವಾ’’ತಿ ಚೀವರೇ;

ಪರಿವತ್ತೇ ತು ಲಿಙ್ಗಸ್ಮಿಂ, ಸಚೇ ಧೋವತಿ ವಟ್ಟತಿ.

೬೨೪.

‘‘ಧೋವಾ’’ತಿ ಭಿಕ್ಖುನೀ ವುತ್ತಾ, ಸಚೇ ಸಬ್ಬಂ ಕರೋತಿ ಸಾ;

ಧೋವನಪ್ಪಚ್ಚಯಾಯೇವ, ತಸ್ಸ ನಿಸ್ಸಗ್ಗಿಯಂ ಸಿಯಾ.

೬೨೫.

‘‘ಇಮಸ್ಮಿಂ ಚೀವರೇ ಸಬ್ಬಂ, ಕತ್ತಬ್ಬಂ ತ್ವಂ ಕರೋಹಿ’’ತಿ;

ಹೋತಿ ನಿಸ್ಸಗ್ಗಿಯಞ್ಚೇವ, ವದತೋ ದುಕ್ಕಟದ್ವಯಂ.

೬೨೬.

ಞಾತಿಕಾಞಾತಿಸಞ್ಞಿಸ್ಸ, ಪಚ್ಚತ್ಥರನಿಸೀದನಂ;

ಅಞ್ಞಸ್ಸ ಸನ್ತಕಂ ವಾಪಿ, ಧೋವಾಪೇನ್ತಸ್ಸ ದುಕ್ಕಟಂ.

೬೨೭.

ಏಕತೋಉಪಸಮ್ಪನ್ನಾ, ಭಿಕ್ಖುನೀನಂ ವಸೇನ ಯಾ;

ತಾಯ ಧೋವಾಪನೇ ವಾಪಿ, ಹೋತಿ ಆಪತ್ತಿ ದುಕ್ಕಟಂ.

೬೨೮.

ಅವುತ್ತಾ ಪರಿಭುತ್ತಂ ವಾ, ಅಞ್ಞಂ ವಾ ಯದಿ ಧೋವತಿ;

ನ ದೋಸೋ, ಸಞ್ಚರಿತ್ತೇನ, ಸಮುಟ್ಠಾನಾದಯೋ ಸಮಾ.

ಪುರಾಣಚೀವರಧೋವಾಪನಕಥಾ.

೬೨೯.

ವಿಕಪ್ಪನುಪಗಂ ¶ ಕಿಞ್ಚಿ, ಪಚ್ಛಿಮಂ ಪನ ಚೀವರಂ;

ಗಣ್ಹತೋ ಹೋತಿ ಆಪತ್ತಿ, ಠಪೇತ್ವಾ ಪಾರಿವತ್ತಕಂ.

೬೩೦.

ಪಯೋಗೇ ಗಹಣತ್ಥಾಯ, ದುಕ್ಕಟಂ ಪರಿಯಾಪುತಂ;

ತಸ್ಸ ನಿಸ್ಸಗ್ಗಿಯಾಪತ್ತಿ, ಗಹಣೇನ ಪಕಾಸಿತಾ.

೬೩೧.

ಸಚೇ ಅನುಪಸಮ್ಪನ್ನ-ಹತ್ಥೇ ಪೇಸೇತಿ ಚೀವರಂ;

ಅಞ್ಞತ್ರ ಪಾರಿವತ್ತಾಪಿ, ಗಹೇತುಂ ಪನ ವಟ್ಟತಿ.

೬೩೨.

ಞಾತಿಕಾಯಪಿ ¶ ಅಞ್ಞಾತಿ-ಸಞ್ಞಿಸ್ಸ ವಿಮತಿಸ್ಸ ವಾ;

ಏಕತೋಉಪಸಮ್ಪನ್ನ-ಹತ್ಥಾ ಗಣ್ಹಾತಿ ದುಕ್ಕಟಂ.

೬೩೩.

‘‘ದಸ್ಸಾಮೀ’’ತಿ ಚ ಆಭೋಗಂ, ಕತ್ವಾ ವಾ ಪಾರಿವತ್ತಕಂ;

ತಾವಕಾಲಿಕವಿಸ್ಸಾಸ-ಗ್ಗಾಹೇ ದೋಸೋ ನ ವಿಜ್ಜತಿ.

೬೩೪.

ಅಞ್ಞಂ ಪನ ಪರಿಕ್ಖಾರಂ, ನ ದೋಸೋ ಹೋತಿ ಗಣ್ಹತೋ;

ಸಞ್ಚರಿತ್ತಸಮುಟ್ಠಾನಂ, ಇದಂ ವುತ್ತಂ ಕ್ರಿಯಾಕ್ರಿಯಂ.

ಚೀವರಪಟಿಗ್ಗಹಣಕಥಾ.

೬೩೫.

ಚೀವರಂ ವಿಞ್ಞಾಪೇನ್ತಸ್ಸ, ಅಞ್ಞಾತಕಾಪ್ಪವಾರಿತಂ;

ಹೋತಿ ನಿಸ್ಸಗ್ಗಿಯಾಪತ್ತಿ, ಅಞ್ಞತ್ರ ಸಮಯಾ ಪನ.

೬೩೬.

ತಿಕಪಾಚಿತ್ತಿಯಂ ವುತ್ತಂ, ತಥೇವ ದ್ವಿಕದುಕ್ಕಟಂ;

ಞಾತಕೇಞಾತಿಸಞ್ಞಿಸ್ಸ, ತತ್ಥ ವೇಮತಿಕಸ್ಸ ಚ.

೬೩೭.

ಸಮಯೇ ವಿಞ್ಞಾಪೇನ್ತಸ್ಸ, ಞಾತಕೇ ವಾ ಪವಾರಿತೇ;

ಅಞ್ಞಸ್ಸತ್ಥಾಯ ವಾ ತಸ್ಸ, ಞಾತಕೇ ವಾ ಪವಾರಿತೇ.

೬೩೮.

ಅನಾಪತ್ತೀತಿ ಞಾತಬ್ಬಂ, ತಥಾ ಉಮ್ಮತ್ತಕಾದಿನೋ;

ಸಮುಟ್ಠಾನಾದಯೋ ಸಬ್ಬೇ, ಸಞ್ಚರಿತ್ತಸಮಾ ಮತಾ.

ಅಞ್ಞಾತಕವಿಞ್ಞತ್ತಿಕಥಾ.

೬೩೯.

ಅಪ್ಪವಾರಿತಮಞ್ಞಾತಿಂ ¶ , ಚೀವರಂ ತು ತದುತ್ತರಿಂ;

ಹೋತಿ ನಿಸ್ಸಗ್ಗಿಯಾಪತ್ತಿ, ವಿಞ್ಞಾಪೇನ್ತಸ್ಸ ಭಿಕ್ಖುನೋ.

೬೪೦.

ಯಸ್ಸ ತೀಣಿಪಿ ನಟ್ಠಾನಿ, ದ್ವೇ ವಾ ಏಕಮ್ಪಿ ವಾ ಪನ;

ದ್ವೇ ವಾ ಏಕಮ್ಪಿ ವಾ ತೇನ, ಸಾದಿತಬ್ಬಂ ನ ಕಿಞ್ಚಿಪಿ.

೬೪೧.

ಸೇಸಕಂ ಆಹರನ್ತಸ್ಸ, ದಿನ್ನೇ ನಚ್ಛಿನ್ನಕಾರಣಾ;

ಸನ್ತಕೇ ಞಾತಕಾದೀನಂ, ಅತ್ತನೋಪಿ ಧನೇನ ವಾ.

೬೪೨.

ಅನಾಪತ್ತೀತಿ ಞಾತಬ್ಬಂ, ತಥಾ ಉಮ್ಮತ್ತಕಾದಿನೋ;

ಸಮುಟ್ಠಾನಾದಯೋ ಸಬ್ಬೇ, ಸಞ್ಚರಿತ್ತಸಮಾ ಮತಾ.

ತತುತ್ತರಿಕಥಾ.

೬೪೩.

ಕಲ್ಯಾಣಕಮ್ಯತಾಹೇತು ¶ , ಆಪಜ್ಜತಿ ವಿಕಪ್ಪನಂ;

ಚೀವರೇ ಪನ ಯೋ ತಸ್ಸ, ಲಾಭಾ ನಿಸ್ಸಗ್ಗಿಯಂ ಭವೇ.

೬೪೪.

ಮಹಗ್ಘಂ ದಾತುಕಾಮಮ್ಹಿ, ಅಪ್ಪಗ್ಘಂ ವಿಞ್ಞಾಪೇತಿ ಯೋ;

ಸನ್ತಕೇ ಞಾತಕಾದೀನಂ, ಅನಾಪತ್ತಿ ಪಕಾಸಿತಾ.

೬೪೫.

ಞಾತಕೇಞ್ಞಾತಿಸಞ್ಞಿಸ್ಸ, ದುಕ್ಕಟಂ ವಿಮತಿಸ್ಸ ಚ;

ಸಞ್ಚರಿತ್ತಸಮಾ ವುತ್ತಾ, ಸಮುಟ್ಠಾನಾದಯೋ ನಯಾ.

ಪಠಮೋಪಕ್ಖಟಕಥಾ.

೬೪೬.

ದುತಿಯೋಪಕ್ಖಟೇ ಯಸ್ಮಾ, ವತ್ತಬ್ಬಂ ನತ್ಥಿ ಕಿಞ್ಚಿಪಿ;

ತಸ್ಮಾ ಅನನ್ತರೇನಸ್ಸ, ಸದಿಸೋವ ವಿನಿಚ್ಛಯೋ.

ದುತಿಯೋಪಕ್ಖಟಕಥಾ.

೬೪೭.

ರಞ್ಞಾ ವಾ ರಾಜಭೋಗ್ಗೇನ, ಭಿಕ್ಖುಮುದ್ದಿಸ್ಸಮಾಭತಂ;

ಅಕಪ್ಪಿಯಂ ಸುವಣ್ಣಾದಿಂ, ಗಹೇತುಂ ನ ಚ ವಟ್ಟತಿ.

೬೪೮.

ರಜತಂ ¶ ಜಾತರೂಪಂ ವಾ, ಅತ್ತನೋ ವಾ ಪರಸ್ಸ ವಾ;

ಅತ್ಥಾಯ ಗಣ್ಹಿತುಂ ಕಿಞ್ಚಿ, ದೀಯಮಾನಂ ನ ವಟ್ಟತಿ.

೬೪೯.

ಅಞ್ಞಸ್ಸತ್ಥಾಯ ನಿದ್ದಿಟ್ಠಂ, ಭಿಕ್ಖುನೋ ಪಟಿಗ್ಗಣ್ಹತೋ;

ದುಕ್ಕಟಂ ತಸ್ಸ ಹೋತೀತಿ, ಮಹಾಪಚ್ಚರಿಯಂ ಪನ.

೬೫೦.

ನೇತ್ವಾ ಅಕಪ್ಪಿಯಂ ಭಣ್ಡಂ, ಇತ್ಥಂ ಕೋಚಿ ಸಚೇ ವದೇ;

‘‘ಇದಂ ಸಙ್ಘಸ್ಸ ದಮ್ಮೀತಿ, ಪುಗ್ಗಲಸ್ಸ ಗಣಸ್ಸ ವಾ.

೬೫೧.

ಆರಾಮಂ ವಾ ವಿಹಾರಂ ವಾ, ಚೇತಿಯಂ ವಾ ಕರೋಹಿ’’ತಿ;

ನ ಚ ವಟ್ಟತಿ ತಂ ವತ್ಥುಂ, ಸಬ್ಬೇಸಂ ಸಮ್ಪಟಿಚ್ಛಿತುಂ.

೬೫೨.

ಅನಾಮಸಿತ್ವಾ ಸಙ್ಘಂ ವಾ, ಗಣಂ ವಾ ಪುಗ್ಗಲಮ್ಪಿ ವಾ;

‘‘ಚೇತಿಯಸ್ಸ ವಿಹಾರಸ್ಸ, ದೇಮಾ’’ತಿಪಿ ವದನ್ತಿ ಚೇ.

೬೫೩.

ತಂ ಹಿರಞ್ಞಂ ಸುವಣ್ಣಂ ವಾ, ನಿಸೇಧೇತುಂ ನ ವಟ್ಟತಿ;

ಆರಾಮಿಕಾನಂ ವತ್ತಬ್ಬಂ, ‘‘ವದನ್ತೇವಮಿಮೇ’’ತಿ ಚ.

೬೫೪.

ರಜತಂ ಜಾತರೂಪಂ ವಾ, ಸಙ್ಘಸ್ಸ ಪಟಿಗ್ಗಣ್ಹತೋ;

ಹೋತಿ ನಿಸ್ಸಗ್ಗಿಯಾಪತ್ತಿ, ಪರಿಭೋಗೇ ಚ ದುಕ್ಕಟಂ.

೬೫೫.

ತಳಾಕಸ್ಸ ¶ ಚ ಖೇತ್ತತ್ತಾ, ಸಸ್ಸುಪ್ಪತ್ತಿನಿದಾನತೋ;

ಗಹಣಂ ಪರಿಭೋಗೋ ವಾ, ನ ಚ ವಟ್ಟತಿ ಭಿಕ್ಖುನೋ.

೬೫೬.

‘‘ಚತ್ತಾರೋ ಪಚ್ಚಯೇ ಸಙ್ಘೋ, ಗಣೋ ವಾ ಪರಿಭುಞ್ಜತು’’;

ಇಚ್ಚೇವಂ ಪನ ವತ್ವಾ ಚೇ, ದೇತಿ ಸಬ್ಬಮ್ಪಿ ವಟ್ಟತಿ.

೬೫೭.

ಕಾರಾಪೇತಿ ಚ ಕೇದಾರೇ, ಛಿನ್ದಾಪೇತ್ವಾ ವನಂ ಪನ;

ಕೇದಾರೇಸು ಪುರಾಣೇಸು, ಅತಿರೇಕಮ್ಪಿ ಗಣ್ಹತಿ.

೬೫೮.

ಅಪರಿಚ್ಛಿನ್ನಭಾಗಸ್ಮಿಂ, ನವಸಸ್ಸೇಪಿ ‘‘ಏತ್ತಕಂ;

ಭಾಗಂ ದೇಥಾ’’ತಿ ವತ್ವಾ ಚೇ, ಉಟ್ಠಾಪೇತಿ ಕಹಾಪಣೇ.

೬೫೯.

ವತ್ವಾ ಅಕಪ್ಪಿಯಂ ವಾಚಂ, ‘‘ಕಸಥ ವಪಥಾ’’ತಿ ಚ;

ಉಪ್ಪಾದಿತಞ್ಚ ಸಬ್ಬೇಸಂ, ಹೋತಿ ಸಬ್ಬಮಕಪ್ಪಿಯಂ.

೬೬೦.

‘‘ಏತ್ತಕೋ ¶ ನಾಮ ಭಾಗೋತಿ, ಏತ್ತಿಕಾಯ ಚ ಭೂಮಿಯಾ’’;

ಪತಿಟ್ಠಾಪೇತಿ ಯೋ ಭೂಮಿಂ, ಅವತ್ವಾ ಕಸಥಾದಿಕಂ.

೬೬೧.

ಸಯಮೇವ ಪಮಾಣಸ್ಸ, ಜಾನನತ್ಥಂ ತು ಭೂಮಿಯಾ;

ರಜ್ಜುಯಾ ವಾಪಿ ದಣ್ಡೇನ, ಖೇತ್ತಂ ಮಿನಾತಿ ಯೋ ಪನ.

೬೬೨.

ಖಲೇ ವಾ ರಕ್ಖತಿ ಠತ್ವಾ, ಖಲತೋಪಿ ತತೋ ಪುನ;

ನೀಹರಾಪೇತಿ ವಾ ವೀಹೀ, ತಸ್ಸೇವೇತಮಕಪ್ಪಿಯಂ.

೬೬೩.

‘‘ಏತ್ತಕೇಹಿ ಚ ವೀಹೀಹಿ, ಇದಂ ಆಹರಥಾ’’ತಿ ಚ;

ಆಹರನ್ತಿ ಸಚೇ ವುತ್ತಾ, ತಸ್ಸೇವೇತಮಕಪ್ಪಿಯಂ.

೬೬೪.

‘‘ಏತ್ತಕೇನ ಹಿರಞ್ಞೇನ, ಇದಮಾಹರಥಾ’’ತಿ ಚ;

ಆಹರನ್ತಿ ಚ ಯಂ ವುತ್ತಾ, ಸಬ್ಬೇಸಂ ತಮಕಪ್ಪಿಯಂ.

೬೬೫.

ಪೇಸಕಾರಕದಾಸಂ ವಾ, ಅಞ್ಞಂ ವಾ ರಜಕಾದಿಸು;

ಆರಾಮಿಕಾನಂ ನಾಮೇನ, ದೇನ್ತೇ ವಟ್ಟತಿ ಗಣ್ಹಿತುಂ.

೬೬೬.

‘‘ಗಾವೋ ದೇಮಾ’’ತಿ ವುತ್ತೇಪಿ, ಗಹೇತುಂ ನ ಚ ವಟ್ಟತಿ;

ಪಞ್ಚಗೋರಸಭೋಗತ್ಥಂ, ವುತ್ತೇ ದೇಮಾತಿ ವಟ್ಟತಿ.

೬೬೭.

ಅಜಿಕಾದೀಸು ಏಸೇವ, ನಯೋ ಞೇಯ್ಯೋ ವಿಭಾವಿನಾ;

ಕಪ್ಪಿಯೇನ ಚ ವಾಕ್ಯೇನ, ಸಬ್ಬಂ ವಟ್ಟತಿ ಗಣ್ಹಿತುಂ.

೬೬೮.

ಹತ್ಥಿಂ ವಾ ಮಹಿಸಂ ಅಸ್ಸಂ, ಗೋಣಂ ಕುಕ್ಕುಟಸೂಕರಂ;

ದೇನ್ತೇಸು ಚ ಮನುಸ್ಸೇಸು, ನ ಚ ವಟ್ಟತಿ ಗಣ್ಹಿತುಂ.

೬೬೯.

ಪಟಿಸಿದ್ಧೇಪಿ ¶ ಸಙ್ಘಸ್ಸ, ದತ್ವಾ ಗಚ್ಛತಿ ಚೇ ಪನ;

ಮೂಲಂ ದತ್ವಾ ಚ ಸಙ್ಘಸ್ಸ, ಕೇಚಿ ಗಣ್ಹನ್ತಿ ವಟ್ಟತಿ.

೬೭೦.

‘‘ಖೇತ್ತಂ ವತ್ಥುಂ ತಳಾಕಂ ವಾ, ದೇಮ ಗೋಅಜಿಕಾದಿಕಂ;

ವಿಹಾರಸ್ಸಾ’’ತಿ ವುತ್ತೇಪಿ, ನಿಸೇಧೇತುಂ ನ ವಟ್ಟತಿ.

೬೭೧.

ತಿಕ್ಖತ್ತುಂ ಚೋದನಾ ವುತ್ತಾ, ಛಕ್ಖತ್ತುಂ ಠಾನಮಬ್ರವಿ;

ಯದಿ ಚೋದೇತಿಯೇವ ಛ, ಚೋದನಾ ದಿಗುಣಾ ಠಿತಿ.

೬೭೨.

ಅನಾಪತ್ತಿ ¶ ಅಚೋದೇತ್ವಾ, ಲದ್ಧೇ ಉಮ್ಮತ್ತಕಾದಿನೋ;

ಸಮುಟ್ಠಾನಾದಯೋ ಸಬ್ಬೇ, ಸಞ್ಚರಿತ್ತಸಮಾ ಮತಾ.

ರಾಜಸಿಕ್ಖಾಪದಕಥಾ.

ಚೀವರವಗ್ಗೋ ಪಠಮೋ.

೬೭೩.

ಏಕೇನಾಪಿ ಚ ಮಿಸ್ಸೇತ್ವಾ, ಸನ್ಥತಂ ಕೋಸಿಯಂಸುನಾ;

ಹೋತಿ ನಿಸ್ಸಗ್ಗಿಯಾಪತ್ತಿ, ಕಾರಾಪೇನ್ತಸ್ಸ ಭಿಕ್ಖುನೋ.

೬೭೪.

ಪರತ್ಥಾಯ ಕರೋನ್ತಸ್ಸ, ಕಾರಾಪೇನ್ತಸ್ಸ ಸನ್ಥತಂ;

ಅಞ್ಞೇನ ಚ ಕತಂ ಲದ್ಧಾ, ಸೇವಮಾನಸ್ಸ ದುಕ್ಕಟಂ.

೬೭೫.

ಅನಾಪತ್ತಿ ವಿತಾನಂ ವಾ, ಭೂಮತ್ಥರಣಮೇವ ವಾ;

ಭಿಸಿ ಬಿಬ್ಬೋಹನಂ ವಾಪಿ, ಕರೋನ್ತಸ್ಸಾದಿಕಮ್ಮಿನೋ.

ಕೋಸಿಯಕಥಾ.

೬೭೬.

ಕಾಳಕೇಳಕಲೋಮಾನಂ, ಸುದ್ಧಾನಂ ಸನ್ಥತಂ ಸಚೇ;

ಕರೇಯ್ಯಾಪತ್ತಿ ಹೋತಿಸ್ಸ, ಸೇಸಂ ತು ಪಠಮೂಪಮಂ.

ಸುದ್ಧಕಾಳಕಕಥಾ.

೬೭೭.

ಅನಾಪತ್ತಿ ತುಲಂ ವಾಪಿ, ಬಹುಂ ವಾ ಸಬ್ಬಮೇವ ವಾ;

ಕರೋನ್ತಸ್ಸ ಗಹೇತ್ವಾನ, ಓದಾತಂ ಕಪಿಲಮ್ಪಿ ವಾ.

೬೭೮.

ಅನುಕ್ಕಮೇನ ಏತಾನಿ, ಸನ್ಥತಾನಿ ಚ ತೀಣಿಪಿ;

ನಿಸ್ಸಜ್ಜಿತ್ವಾಪಿ ಲದ್ಧಾನಿ, ಸೇವಮಾನಸ್ಸ ದುಕ್ಕಟಂ.

೬೭೯.

ಸಮುಟ್ಠಾನಾದಯೋ ¶ ಸಬ್ಬೇ, ಸಞ್ಚರಿತ್ತಸಮಾ ಮತಾ;

ಇಮೇಸಂ ಪನ ತಿಣ್ಣಮ್ಪಿ, ತತಿಯಂ ತು ಕ್ರಿಯಾಕ್ರಿಯಂ.

ದ್ವೇಭಾಗಕಥಾ.

೬೮೦.

ಛನ್ನಂ ¶ ಓರೇನ ವಸ್ಸಾನಂ, ಕರೋನ್ತಸ್ಸ ಚ ಸನ್ಥತಂ;

ಹೋತಿ ನಿಸ್ಸಗ್ಗಿಯಾಪತ್ತಿ, ಠಪೇತ್ವಾ ಭಿಕ್ಖುಸಮ್ಮುತಿಂ.

೬೮೧.

ಅನಾಪತ್ತಿ ಪರತ್ಥಾಯ, ಕಾರಾಪೇತಿ ಕರೋತಿ ವಾ;

ಕತಂ ವಾ ಪನ ಅಞ್ಞೇನ, ಲಭಿತ್ವಾ ಪರಿಭುಞ್ಜತೋ.

೬೮೨.

ಛಬ್ಬಸ್ಸಾನಿ ಕರೋನ್ತಸ್ಸ, ತದುದ್ಧಮ್ಪಿ ಚ ಸನ್ಥತಂ;

ವಿತಾನೇ ಸಾಣಿಪಾಕಾರೇ, ನಿಸ್ಸಜ್ಜಿತ್ವಾ ಕತೇಪಿ ಚ.

ಛಬ್ಬಸ್ಸಕಥಾ.

೬೮೩.

ಅನಾಪತ್ತಿ ಅನಾದಾಯ, ಅಸನ್ತೇ ಸನ್ಥತೇ ಪನ;

ಅಞ್ಞಸ್ಸತ್ಥಾಯ ಕಾರೇತುಂ, ಕತಞ್ಚ ಪರಿಭುಞ್ಜಿತುಂ.

೬೮೪.

ಅನಾದಾನವಸೇನಸ್ಸ, ಸುಗತಸ್ಸ ವಿದತ್ಥಿಯಾ;

ಕರಣೇನ ಚ ಸತ್ಥಾರಾ, ವುತ್ತಮೇತಂ ಕ್ರಿಯಾಕ್ರಿಯಂ.

೬೮೫.

ಸಮುಟ್ಠಾನಾದಯೋ ಸಬ್ಬೇ, ಸಞ್ಚರಿತ್ತಸಮಾ ಮತಾ;

ಅನನ್ತರಸ್ಸಿಮಸ್ಸಾಪಿ, ವಿಸೇಸೋ ನುಪಲಬ್ಭತಿ.

ನಿಸೀದನಸನ್ಥತಕಥಾ.

೬೮೬.

ಗಚ್ಛನ್ತೇ ಪನ ಯಾನೇ ವಾ, ಹತ್ಥಿಅಸ್ಸಾದಿಕೇಸು ವಾ;

ಠಪೇತಿ ಯದಿ ಲೋಮಾನಿ, ಸಾಮಿಕಸ್ಸ ಅಜಾನತೋ.

೬೮೭.

ತಿಯೋಜನಮತೀತೇಸು, ತೇಸು ಆಪತ್ತಿ ಭಿಕ್ಖುನೋ;

ಅಗಚ್ಛನ್ತೇಸು ತೇಸ್ವೇವ, ಠಪಿತೇಸುಪ್ಯಯಂ ನಯೋ.

೬೮೮.

ಯಾನೇ ಪನ ಅಗಚ್ಛನ್ತೇ, ಅಸ್ಸೇ ವಾ ಹತ್ಥಿಪಿಟ್ಠಿಯಂ;

ಠಪೇತ್ವಾ ಅಭಿರೂಹಿತ್ವಾ, ಸಚೇ ಸಾರೇತಿ ವಟ್ಟತಿ.

೬೮೯.

ನ ವಟ್ಟತೀತಿ ನಿದ್ದಿಟ್ಠಂ, ಕುರುನ್ದಟ್ಠಕಥಾಯ ಹಿ;

ತಂ ಪನಞ್ಞಂ ಹರಾಪೇತಿ, ವಚನೇನ ವಿರುಜ್ಝತಿ.

೬೯೦.

ಕಣ್ಣಚ್ಛಿದ್ದೇಸು ¶ ¶ ಲೋಮಾನಿ, ಪಕ್ಖಿಪಿತ್ವಾಪಿ ಗಚ್ಛತೋ;

ಹೋತಿಯೇವ ಕಿರಾಪತ್ತಿ, ಲೋಮಾನಂ ಗಣನಾವಸಾ.

೬೯೧.

ಸುತ್ತಕೇನ ಚ ಬನ್ಧಿತ್ವಾ, ಠಪಿತಂ ಪನ ವಟ್ಟತಿ;

ವೇಣಿಂ ಕತ್ವಾ ಹರನ್ತಸ್ಸ, ಆಪತ್ತಿ ಪರಿದೀಪಿತಾ.

೬೯೨.

ಸುಙ್ಕಘಾತಂ ಅನುಪ್ಪತ್ವಾ, ಚೋರಾದೀಹಿ ಉಪದ್ದುತೋ;

ಯೋ ಚಞ್ಞವಿಹಿತೋ ವಾಪಿ, ಆಪತ್ತಿ ಯದಿ ಗಚ್ಛತಿ.

೬೯೩.

ತಿಯೋಜನಂ ಹರನ್ತಸ್ಸ, ಊನಕಂ ವಾ ತಿಯೋಜನಂ;

ತಥಾ ಪಚ್ಚಾಹರನ್ತಸ್ಸ, ತಾನಿಯೇವ ತಿಯೋಜನಂ.

೬೯೪.

ನಿವಾಸತ್ಥಾಯ ವಾ ಗನ್ತ್ವಾ, ಹರನ್ತಸ್ಸ ತತೋ ಪರಂ;

ಅಚ್ಛಿನ್ನಂ ವಾಪಿ ನಿಸ್ಸಟ್ಠಂ, ಲಭಿತ್ವಾ ಹರತೋಪಿ ಚ.

೬೯೫.

ಹರಾಪೇನ್ತಸ್ಸ ಅಞ್ಞೇನ, ಹರತೋ ಕತಭಣ್ಡಕಂ;

ತಥಾ ಉಮ್ಮತ್ತಕಾದೀನಂ, ಅನಾಪತ್ತಿ ಪಕಾಸಿತಾ.

೬೯೬.

ಇದಂ ಪನ ಸಮುಟ್ಠಾನಂ, ಕಾಯತೋ ಕಾಯಚಿತ್ತತೋ;

ಅಚಿತ್ತಂ ಕಾಯಕಮ್ಮಞ್ಚ, ತಿಚಿತ್ತಞ್ಚ ತಿವೇದನಂ.

ಏಳಕಲೋಮಕಥಾ.

೬೯೭.

ಸಮುಟ್ಠಾನಾದಿನಾ ಸದ್ಧಿಂ, ಲೋಮಧೋವಾಪನಮ್ಪಿ ಚ;

ಚೀವರಸ್ಸ ಪುರಾಣಸ್ಸ, ಧೋವಾಪನಸಮಂ ಮತಂ.

ಏಳಕಲೋಮಧೋವಾಪನಕಥಾ.

೬೯೮.

ಗಣ್ಹೇಯ್ಯ ವಾ ಗಣ್ಹಾಪೇಯ್ಯ, ರಜತಂ ಜಾತರೂಪಕಂ;

ನಿಸ್ಸಜ್ಜಿತ್ವಾ ಪನಾಪತ್ತಿ, ದೇಸೇತಬ್ಬಾವ ಭಿಕ್ಖುನಾ.

೬೯೯.

ರಜತಂ ಜಾತರೂಪಞ್ಚ, ಉಭಿನ್ನಂ ಮಾಸಕೋಪಿ ಚ;

ಏತಂ ಚತುಬ್ಬಿಧಂ ವತ್ಥು, ಹೋತಿ ನಿಸ್ಸಗ್ಗಿಯಾವಹಂ.

೭೦೦.

ಮುತ್ತಾ ¶ ಮಣಿ ಸಿಲಾ ಸಙ್ಖೋ, ಪವಾಳಂ ಲೋಹಿತಙ್ಕಕೋ;

ಮಸಾರಗಲ್ಲಂ ಧಞ್ಞಾನಿ, ಸತ್ತ ಗೋಮಹಿಸಾದಿಕಂ.

೭೦೧.

ಖೇತ್ತಂ ವತ್ಥುಂ ತಳಾಕಞ್ಚ, ದಾಸಿದಾಸಾದಿಕಂ ಪನ;

ದುಕ್ಕಟಸ್ಸೇವ ವತ್ಥೂನಿ, ದೀಪಿತಾನಿ ಮಹೇಸಿನಾ.

೭೦೨.

ಮುಗ್ಗಮಾಸಾದಿಕಂ ¶ ಸಬ್ಬಂ, ಸಪ್ಪಿಆದೀನಿ ತಣ್ಡುಲಾ;

ಸುತ್ತಂ ವತ್ಥಂ ಹಲಂ ಫಾಲಂ, ಕಪ್ಪಿಯಂ ಏವಮಾದಿಕಂ.

೭೦೩.

ತತ್ಥತ್ತನೋ ಪನತ್ಥಾಯ, ವತ್ಥುಂ ನಿಸ್ಸಗ್ಗಿಯಸ್ಸ ಹಿ;

ಸಮ್ಪಟಿಚ್ಛತಿ ಯೋ ಭಿಕ್ಖು, ತಸ್ಸ ನಿಸ್ಸಗ್ಗಿಯಂ ಸಿಯಾ.

೭೦೪.

ಸಙ್ಘಾದೀನಂ ತಮತ್ಥಾಯ, ಗಣ್ಹತೋ ದುಕ್ಕಟಂ ತಥಾ;

ದುಕ್ಕಟಸ್ಸ ಚ ವತ್ಥುಮ್ಪಿ, ಸಬ್ಬತ್ಥಾಯ ಚ ದುಕ್ಕಟಂ.

೭೦೫.

ಸಚೇ ಕಹಾಪಣಾದೀನಂ, ಸಹಸ್ಸಂ ಪಟಿಗಣ್ಹತಿ;

ವತ್ಥೂನಂ ಗಣನಾಯಸ್ಸ, ಆಪತ್ತಿಗಣನಾ ಸಿಯಾ.

೭೦೬.

ತಥಾ ಸಿಥಿಲಬದ್ಧೇಸು, ಥವಿಕಾದೀಸು ರೂಪತೋ;

ಆಪತ್ತಿಗಣನಾ ವುತ್ತಾ, ಮಹಾಪಚ್ಚರಿಯಂ ಪನ.

೭೦೭.

‘‘ಇದಂ ಅಯ್ಯಸ್ಸ ಹೋತೂ’’ತಿ, ವುತ್ತೇ ವಾ ಪನ ಕೇನಚಿ;

ಸಚೇ ಗಣ್ಹಿತುಕಾಮೋಪಿ, ನಿಸೇಧೇತಬ್ಬಮೇವ ಚ.

೭೦೮.

ಪಟಿಕ್ಖಿತ್ತೇಪಿ ತಂ ವತ್ಥುಂ, ಠಪೇತ್ವಾ ಯದಿ ಗಚ್ಛತಿ;

ತಥಾ ಗೋಪಾಯಿತಬ್ಬಂ ತಂ, ಯಥಾ ತಂ ನ ವಿನಸ್ಸತಿ.

೭೦೯.

‘‘ಆಹರೇದಮಿದಂ ಗಣ್ಹ, ಇದಂ ದೇಹೀಧ ನಿಕ್ಖಿಪ’’;

ಇಚ್ಚೇವಂ ಭಿಕ್ಖುನೋ ವತ್ತುಂ, ನ ವಟ್ಟತಿ ಅಕಪ್ಪಿಯಂ.

೭೧೦.

ಠಪೇತ್ವಾ ರೂಪಿಯಗ್ಗಾಹಂ, ನಿಸ್ಸಟ್ಠಪರಿವತ್ತಿತಂ;

ಸಬ್ಬೇಹಿ ಪರಿಭೋತ್ತಬ್ಬಂ, ಭಾಜೇತ್ವಾ ಸಪ್ಪಿಆದಿಕಂ.

೭೧೧.

ಅತ್ತನೋ ಪತ್ತಭಾಗಮ್ಪಿ, ಪಟಿಗ್ಗಾಹಕಭಿಕ್ಖುನೋ;

ಗಹೇತುಂ ಅಞ್ಞತೋ ಲದ್ಧಂ, ಭುಞ್ಜಿತುಂ ವಾ ನ ವಟ್ಟತಿ.

೭೧೨.

ಯಂ ¶ ಕಿಞ್ಚಿ ಪನ ಸಮ್ಭೂತಂ, ಪಚ್ಚಯಂ ವತ್ಥುತೋ ತತೋ;

ಭಿಕ್ಖುನೋ ಸೇವಮಾನಸ್ಸ, ಹೋತಿ ಆಪತ್ತಿ ದುಕ್ಕಟಂ.

೭೧೩.

ಅಜ್ಝಾರಾಮೇ ಅನಾಪತ್ತಿ, ತಮಜ್ಝಾವಸಥೇಪಿ ವಾ;

ಗಹೇತ್ವಾ ವಾ ಗಹಾಪೇತ್ವಾ, ನಿಕ್ಖಿಪನ್ತಸ್ಸ ಭಿಕ್ಖುನೋ.

೭೧೪.

ತಿಕಪಾಚಿತ್ತಿಯಂ ವುತ್ತಂ, ರೂಪಿಯನ್ತಿ ಅರೂಪಿಯೇ;

ಸಞ್ಞಿನೋ ವಿಮತಿಸ್ಸಾಪಿ, ಹೋತಿ ಆಪತ್ತಿ ದುಕ್ಕಟಂ.

೭೧೫.

ಸಮುಟ್ಠಾನಾದಯೋ ¶ ಸಬ್ಬೇ, ಸಞ್ಚರಿತ್ತಸಮಾ ಮತಾ;

ಕ್ರಿಯಾಕ್ರಿಯಮಿದಂ ವುತ್ತಂ, ಅಯಮೇವ ವಿಸೇಸತಾ.

ರೂಪಿಯಪಟಿಗ್ಗಹಣಕಥಾ.

೭೧೬.

ವತ್ಥುಂ ನಿಸ್ಸಗ್ಗಿಯಸ್ಸಾಪಿ, ವತ್ಥುಂ ವಾ ದುಕ್ಕಟಸ್ಸ ಚ;

ಕಪ್ಪಿಯಸ್ಸ ಚ ವತ್ಥುಂ ವಾ, ಯೋ ನಿಸ್ಸಗ್ಗಿಯವತ್ಥುನಾ.

೭೧೭.

ವತ್ಥುನಾ ದುಕ್ಕಟಸ್ಸಾಪಿ, ವತ್ಥುಂ ನಿಸ್ಸಗ್ಗಿಯಸ್ಸ ವಾ;

ಪರಿವತ್ತೇತಿ ಆಪತ್ತಿ, ಕಪ್ಪಿಯೇನ ಚ ವತ್ಥುನಾ.

೭೧೮.

ದುಕ್ಕಟಸ್ಸ ಚ ವತ್ಥುಂ ವಾ, ವತ್ಥುಂ ವಾ ಕಪ್ಪಿಯಸ್ಸ ಚ;

ವತ್ಥುನಾ ದುಕ್ಕಟಸ್ಸೇವ, ಪರಿವತ್ತೇತಿ ದುಕ್ಕಟಂ.

೭೧೯.

ವತ್ಥುನಾ ಕಪ್ಪಿಯಸ್ಸಾಪಿ, ತಥಾ ದುಕ್ಕಟವತ್ಥುಕಂ;

ಪರಿವತ್ತೇತಿ ಯೋ ತಸ್ಸ, ಹೋತಿ ಆಪತ್ತಿ ದುಕ್ಕಟಂ.

೭೨೦.

ವತ್ಥುನೋ ದುಕ್ಕಟಸ್ಸಾಪಿ, ತಥಾ ನಿಸ್ಸಗ್ಗಿಯಸ್ಸ ಚ;

ಗಹಣಂ ವಾರಿತಂ ಪುಬ್ಬೇ, ಇಮಿನಾ ಪರಿವತ್ತನಂ.

೭೨೧.

ರೂಪಿಯನ್ತಿ ಚ ಸಞ್ಞಿಸ್ಸ, ವಿಮತಿಸ್ಸ ಅರೂಪಿಯೇ;

ತೇನ ದ್ವೇ ದುಕ್ಕಟಾ ಹೋನ್ತಿ, ಚೇತಾಪೇನ್ತಸ್ಸ ರೂಪಿಯಂ.

೭೨೨.

ಅರೂಪಿಯನ್ತಿ ಸಞ್ಞಿಸ್ಸ, ಅನಾಪತ್ತಿ ಅರೂಪಿಯೇ;

‘‘ಇದಂ ಗಹೇತ್ವಾ ದೇಹೀ’’ತಿ, ವದತೋಪಿ ಚ ಪಞ್ಚಹಿ.

೭೨೩.

ಸೇಸಂ ¶ ಅನನ್ತರೇನೇವ, ಸಮುಟ್ಠಾನಾದಿಕಂ ಸಮಂ;

ಇದಂ ಕ್ರಿಯಸಮುಟ್ಠಾನಂ, ಅಯಮೇವ ವಿಸೇಸತಾ.

ರೂಪಿಯಸಂವೋಹಾರಕಥಾ.

೭೨೪.

ಕಪ್ಪಿಯಂ ಕಪ್ಪಿಯೇನೇವ, ಪರಿವತ್ತಯತೋ ಪನ;

ಹೋತಿ ನಿಸ್ಸಗ್ಗಿಯಾಪತ್ತಿ, ಠಪೇತ್ವಾ ಸಹಧಮ್ಮಿಕೇ.

೭೨೫.

ಅಕಪ್ಪಿಯಸ್ಸ ವತ್ಥುಸ್ಸ, ತೇನೇವ ಪರಿವತ್ತನಂ;

ನ ಗಚ್ಛತೀತಿ ನಿದ್ದಿಟ್ಠಂ, ಕಯವಿಕ್ಕಯಸಙ್ಗಹಂ.

೭೨೬.

ತಸ್ಮಾ ಮಾತಾಪಿತೂನಮ್ಪಿ, ವತ್ಥುಂ ಯಂ ಕಿಞ್ಚಿ ಕಪ್ಪಿಯಂ;

‘‘ಇಮಂ ದೇಹಿಮಿನಾ ಹೀ’’ತಿ, ವದತೋ ಪನ ದುಕ್ಕಟಂ.

೭೨೭.

ಸಕಂ ¶ ವಾ ದೇತಿ ಚೇ ಭಣ್ಡಂ, ಏವಂ ವತ್ವಾನ ಮಾತುಯಾ;

ಮಾತುಯಾ ವಾ ತಥಾ ಭಣ್ಡಂ, ಸಯಂ ಗಣ್ಹಾತಿ ದುಕ್ಕಟಂ.

೭೨೮.

ಸಹತ್ಥಂ ಪರಭಣ್ಡಸ್ಮಿಂ, ಪರಹತ್ಥಞ್ಚ ಅತ್ತನೋ;

ಭಣ್ಡಕೇ ಪನ ಸಮ್ಪತ್ತೇ, ನಿಸ್ಸಗ್ಗಿಯಮುದೀರಿತಂ.

೭೨೯.

‘‘ಗಹೇತ್ವಾ ವಾ ಇದಂ ನಾಮ, ಭುಞ್ಜಿತ್ವಾ ಓದನಂ ಇಮಂ;

ಇದಂ ನಾಮ ಕರೋಹೀ’’ತಿ, ವತ್ತುಂ ಪನ ನ ವಟ್ಟತಿ.

೭೩೦.

ವಿಘಾಸಾದಮಥಞ್ಞಂ ವಾ, ‘‘ಭುಞ್ಜಿತ್ವಾ ಓದನಂ ಇಮಂ;

ಛಲ್ಲಿಂ ವಾ ಪನ ವಲ್ಲಿಂ ವಾ, ಕಟ್ಠಂ ವಾ ದಾರುಮೇವ ವಾ.

೭೩೧.

ಆಹರಾ’’ತಿ ವದನ್ತಸ್ಸ, ವತ್ಥೂನಂ ಗಣನಾವಸಾ;

ಹೋನ್ತಿ ಆಪತ್ತಿಯೋ ತಸ್ಸ, ಭಿಕ್ಖುನೋ ಕಯವಿಕ್ಕಯೇ.

೭೩೨.

‘‘ಇಮಞ್ಚ ಯಾಗುಂ ಪಿವ ಭುಞ್ಜ ಭತ್ತಂ;

ಭುತ್ತೋಸಿ ಭುಞ್ಜಿಸ್ಸಸಿ ಭುಞ್ಜಸೀದಂ;

ಭತ್ತಂ, ಇಮಂ ನಾಮ ಕರೋಹಿ ಕಮ್ಮಂ’’;

ಇಚ್ಚೇವ ವತ್ತುಂ ಪನ ವಟ್ಟತೇವ.

೭೩೩.

ಭೂಮಿಯಾ ¶ ಸೋಧನೇ ವಾಪಿ, ಲಿಮ್ಪನೇ ವತ್ಥಧೋವನೇ;

ಏತ್ಥ ಕಿಞ್ಚಾಪಿ ನತ್ಥಞ್ಞಂ, ಭಣ್ಡಂ ನಿಸ್ಸಜ್ಜಿತಬ್ಬಕಂ.

೭೩೪.

ನಿಸ್ಸಗ್ಗಿಯೇ ಚ ವತ್ಥುಮ್ಹಿ, ನಟ್ಠೇ ಭುತ್ತೇಪಿ ವಾ ಯಥಾ;

ದೇಸೇತಬ್ಬಾವ ಆಪತ್ತಿ, ದೇಸೇತಬ್ಬಾ ತಥಾ ಅಯಂ.

೭೩೫.

‘‘ಇಮಿನಾವ ಇಮಂ ನಾಮ, ಗಹೇತ್ವಾ ದೇಹಿ ಮೇ’’ಇತಿ;

ಆಚಿಕ್ಖತಿ ಅನಾಪತ್ತಿ, ಠಪೇತ್ವಾ ಭಣ್ಡಸಾಮಿಕಂ.

೭೩೬.

‘‘ಇದಂ ಮಮತ್ಥಿ ಅತ್ಥೋ ಮೇ, ಇಮಿನಾ’’ತಿ ಚ ಭಾಸತೋ;

ಸೇಸಂ ಅನನ್ತರೇನೇವ, ಸಮುಟ್ಠಾನಾದಿಕಂ ಸಮಂ.

ಕಯವಿಕ್ಕಯಕಥಾ.

ಕೋಸಿಯವಗ್ಗೋ ದುತಿಯೋ.

೭೩೭.

ಮತ್ತಿಕಾಯೋಮಯಾ ಪತ್ತಾ, ಕಪ್ಪಿಯಾ ಜಾತಿತೋ ದುವೇ;

ತಯೋ ಪತ್ತಸ್ಸ ವಣ್ಣಾ ತು, ಉಕ್ಕಟ್ಠೋ ಮಜ್ಝಿಮೋಮಕೋ.

೭೩೮.

ದ್ವಿನ್ನಂ ¶ ತಣ್ಡುಲನಾಳೀನಂ, ಭತ್ತಂ ಮಗಧನಾಳಿಯಾ;

ಖಾದನಞ್ಚ ಚತುಬ್ಭಾಗಂ, ಬ್ಯಞ್ಜನಞ್ಚ ತದೂಪಿಯಂ.

೭೩೯.

ಉಕ್ಕಟ್ಠೋ ನಾಮ ಸೋ ಪತ್ತೋ, ಯೋ ತಂ ಸಬ್ಬಂ ತು ಗಣ್ಹತಿ;

ಮಜ್ಝಿಮೋ ತಸ್ಸುಪಡ್ಢೋ ಚ, ತದುಪಡ್ಢೋ ಚ ಓಮಕೋ.

೭೪೦.

ಉಕ್ಕಟ್ಠಸ್ಸ ಚ ಉಕ್ಕಟ್ಠೋ, ತಸ್ಸೇವೋಮಕಮಜ್ಝಿಮಾ;

ಏವಂ ಮಜ್ಝಿಮಓಮೇಸು, ನವ ಪತ್ತಾ ಭವನ್ತಿ ಹಿ.

೭೪೧.

ಉಕ್ಕಟ್ಠುಕ್ಕಟ್ಠಕೋ ತೇಸು, ಅಪತ್ತೋ ಓಮಕೋಮಕೋ;

ತಸ್ಮಾ ನಾಪಿ ಅಧಿಟ್ಠಾನಂ, ನ ಗಚ್ಛನ್ತಿ ವಿಕಪ್ಪನಂ.

೭೪೨.

ಸೇಸಂ ಸತ್ತವಿಧಂ ಪತ್ತಂ, ಪತ್ತಲಕ್ಖಣಸಂಯುತಂ;

ಅಧಿಟ್ಠಾಯ ವಿಕಪ್ಪೇತ್ವಾ, ಪರಿಭುಞ್ಜೇಯ್ಯ ಪಣ್ಡಿತೋ.

೭೪೩.

ದಸಾಹಪರಮಂ ¶ ಕಾಲಂ, ಧಾರೇಯ್ಯ ಅತಿರೇಕತೋ;

ಅತಿಕ್ಕಮಯತೋ ಪತ್ತಂ, ತಞ್ಹಿ ನಿಸ್ಸಗ್ಗಿಯಂ ಸಿಯಾ.

೭೪೪.

ಯಂ ಪತ್ತಂ ನ ವಿಕಪ್ಪೇತಿ, ಯಂ ನಾಧಿಟ್ಠೇತಿ ವಾ ಪನ;

ವಿನಯಞ್ಞೂಹಿ ಸೋ ಪತ್ತೋ, ಅತಿರೇಕೋತಿ ವಣ್ಣಿತೋ.

೭೪೫.

ವತ್ತಬ್ಬಂ ತು ‘‘ಇಮಂ ಪತ್ತಂ, ಅಧಿಟ್ಠಾಮೀ’’ತಿ ಸಮ್ಮುಖೇ;

‘‘ಏತಂ ಪತ್ತ’’ನ್ತಿ ದೂರಸ್ಮಿಂ, ಪಚ್ಚುದ್ಧಾರೇಪ್ಯಯಂ ನಯೋ.

೭೪೬.

ಆಭೋಗಂ ಮನಸಾ ಕತ್ವಾ, ಕತ್ವಾ ಕಾಯವಿಕಾರಕಂ;

ಕಾಯೇನಪಿ ಚ ಪತ್ತಸ್ಸ, ಅಧಿಟ್ಠಾನಂ ಪಕಾಸಿತಂ.

೭೪೭.

ಪತ್ತೋ ಜಹತಿಧಿಟ್ಠಾನಂ, ದಾನಭೇದಕನಾಸತೋ;

ವಿಬ್ಭಮುದ್ಧಾರಪಚ್ಚಕ್ಖ-ಪರಿವತ್ತನಗಾಹತೋ.

೭೪೮.

ಕಙ್ಗುಸಿತ್ಥಪ್ಪಮಾಣೇನ, ಖೇನಾಧಿಟ್ಠಾನಮುಜ್ಝತಿ;

ಪಿದಹಿತ್ವಾ ಅಧಿಟ್ಠೇಯ್ಯ, ಅಯೋಚುಣ್ಣೇನ ವಾಣಿಯಾ.

೭೪೯.

ಯೋ ಹಿ ನಿಸ್ಸಗ್ಗಿಯಂ ಪತ್ತಂ, ಅನಿಸ್ಸಜ್ಜೇವ ಭುಞ್ಜತಿ;

ದುಕ್ಕಟಂ ತಸ್ಸ ನಿದ್ದಿಟ್ಠಂ, ಭುತ್ವಾ ಧೋವನಧೋವನೇ.

೭೫೦.

ಸುವಣ್ಣಮಣಿಪತ್ತೋ ಚ, ವೇಳುರಿಯಫಲಿಕುಬ್ಭವೋ;

ಕಂಸಕಾಚಮಯೋ ಪತ್ತೋ, ತಿಪುಸೀಸಮಯೋಪಿ ಚ.

೭೫೧.

ತಥಾ ದಾರುಮಯೋ ಪತ್ತೋ, ತಮ್ಬಸಜ್ಝುಮಯೋಪಿ ಚ;

ಏಕಾದಸವಿಧೋ ಪತ್ತೋ, ವುತ್ತೋ ದುಕ್ಕಟವತ್ಥುಕೋ.

೭೫೨.

ಘಟಸೀಸಕಟಾಹೋ ¶ ಚ, ತುಮ್ಬಂ ಚಸ್ಸಾನುಲೋಮಿಕಂ;

ತಮ್ಬಲೋಹಮಯಂ ತತ್ಥ, ಥಾಲಕಂ ಪನ ವಟ್ಟತಿ.

೭೫೩.

ಫಲಿಕಕಾಚಕಂಸಾನಂ, ತಟ್ಟಿಕಾದೀನಿ ಕಾನಿಚಿ;

ಪುಗ್ಗಲಸ್ಸ ನ ವಟ್ಟನ್ತಿ, ವಟ್ಟನ್ತಿ ಗಿಹಿಸಙ್ಘಿಕಾ.

೭೫೪.

ಯಂ ಕಿಞ್ಚಿ ಸೋದಕಂ ಪತ್ತಂ, ಪಟಿಸಾಮೇಯ್ಯ ದುಕ್ಕಟಂ;

ಸಾಧುಕಂ ವೋದಕಂ ಕತ್ವಾ, ಪಟಿಸಾಮೇಯ್ಯ ಪಣ್ಡಿತೋ.

೭೫೫.

ಭಿಕ್ಖುನೋ ¶ ಸೋದಕಂ ಪತ್ತಂ, ಓತಾಪೇತುಂ ನ ವಟ್ಟತಿ;

ಉಣ್ಹೇ ನ ನಿದಹೇತಬ್ಬೋ, ನಿದಹನ್ತಸ್ಸ ದುಕ್ಕಟಂ.

೭೫೬.

ಮಿಡ್ಢನ್ತೇ ಪರಿಭಣ್ಡನ್ತೇ, ಠಪೇತುಂ ನ ಚ ವಟ್ಟತಿ;

ಮಿಡ್ಢಿಯಾ ಪರಿಭಣ್ಡೇ ವಾ, ವಿತ್ಥಿಣ್ಣೇ ಪನ ವಟ್ಟತಿ.

೭೫೭.

ದಾರುಆಧಾರಕೇ ಪತ್ತೇ, ದ್ವೇ ಠಪೇತುಮ್ಪಿ ವಟ್ಟತಿ;

ಅಯಮೇವ ನಯೋ ದಣ್ಡ-ಭೂಮಿಆಧಾರಕೇಸುಪಿ.

೭೫೮.

ತಟ್ಟಿಕಾಯಪಿ ಚೋಳೇ ವಾ, ಪೋತ್ಥಕೇ ಕಟಸಾರಕೇ;

ಪರಿಭಣ್ಡಕತಾಯಾಪಿ, ಭೂಮಿಯಂ ವಾಲುಕಾಸು ವಾ.

೭೫೯.

ತಥಾರೂಪಾಸು ಸುದ್ಧಾಸು, ಠಪೇತುಂ ಪನ ವಟ್ಟತಿ;

ಸರಜಾಯ ಠಪೇನ್ತಸ್ಸ, ದುಕ್ಕಟಂ ಖರಭೂಮಿಯಾ.

೭೬೦.

ದಣ್ಡೇ ವಾ ನಾಗದನ್ತೇ ವಾ, ಲಗ್ಗೇತುಮ್ಪಿ ನ ವಟ್ಟತಿ;

ಛತ್ತಙ್ಗಮಞ್ಚಪೀಠೇಸು, ಠಪೇನ್ತಸ್ಸ ಚ ದುಕ್ಕಟಂ.

೭೬೧.

ಅಟನೀಸು ಹಿ ಬನ್ಧಿತ್ವಾ, ಓಲಮ್ಬೇತುಮ್ಪಿ ವಟ್ಟತಿ;

ಬನ್ಧಿತ್ವಾ ಪನ ಮಞ್ಚಸ್ಸ, ಠಪೇತುಂಪರಿ ವಟ್ಟತಿ.

೭೬೨.

ಮಞ್ಚಪೀಠಟ್ಟಕೇ ಪತ್ತಂ, ಠಪೇತುಂ ಪನ ವಟ್ಟತಿ;

ಭತ್ತಪೂರೋಪಿ ವಾ ಛತ್ತೇ, ಠಪೇತುಂ ನ ಚ ವಟ್ಟತಿ.

ತಯೋ ಭಾಣವಾರಾ ನಿಟ್ಠಿತಾ.

೭೬೩.

ಕವಾಟಂ ನ ಪಣಾಮೇಯ್ಯ, ಪತ್ತಹತ್ಥೋ ಸಚೇ ಪನ;

ಯೇನ ಕೇನಚಿ ಅಙ್ಗೇನ, ಪಣಾಮೇಯ್ಯಸ್ಸ ದುಕ್ಕಟಂ.

೭೬೪.

ನ ನೀಹರೇಯ್ಯ ಪತ್ತೇನ, ಚಲಕಾನಟ್ಠಿಕಾನಿ ವಾ;

ಉಚ್ಛಿಟ್ಠಮುದಕಂ ವಾಪಿ, ನೀಹರನ್ತಸ್ಸ ದುಕ್ಕಟಂ.

೭೬೫.

ಪತ್ತಂ ¶ ಪಟಿಗ್ಗಹಂ ಕತ್ವಾ, ಧೋವಿತುಂ ಹತ್ಥಮೇವ ವಾ;

ಮುಖತೋ ನೀಹಟಂ ಪತ್ತೇ, ಠಪೇತುಂ ನ ಚ ವಟ್ಟತಿ.

೭೬೬.

ಅನಾಪತ್ತಿ ¶ ದಸಾಹಸ್ಸ, ಅನ್ತೋಯೇವ ಚ ಯೋ ಪನ;

ಅಧಿಟ್ಠೇತಿ ವಿಕಪ್ಪೇತಿ, ವಿಸ್ಸಜ್ಜೇತಿ ವಿನಸ್ಸತಿ.

೭೬೭.

ಪಠಮಸ್ಸ ಹಿ ಪತ್ತಸ್ಸ, ಪಠಮೇನ ಮಹೇಸಿನಾ;

ಸಮುಟ್ಠಾನಾದಯೋ ಸಬ್ಬೇ, ಕಥಿನೇನ ಸಮಾ ಮತಾ.

ಪಠಮಪತ್ತಕಥಾ.

೭೬೮.

ಪಞ್ಚಬನ್ಧನಊನಸ್ಮಿಂ, ಪತ್ತೇ ಸತಿ ಚ ಯೋ ಪನ;

ವಿಞ್ಞಾಪೇಯ್ಯ ನವಂ ಪತ್ತಂ, ತಸ್ಸ ನಿಸ್ಸಗ್ಗಿಯಂ ಸಿಯಾ.

೭೬೯.

ಬನ್ಧನಂ ಏಕಮುದ್ದಿಟ್ಠಂ, ದ್ವಙ್ಗುಲಾಯ ಚ ರಾಜಿಯಾ;

ಬನ್ಧನಾನಿ ಚ ಚತ್ತಾರಿ, ತಥಾಟ್ಠಙ್ಗುಲರಾಜಿಯಾ.

೭೭೦.

ಪಞ್ಚ ವಾ ರಾಜಿಯೋ ಯಸ್ಸ, ಏಕಾ ವಾಪಿ ದಸಙ್ಗುಲಾ;

ಅಪತ್ತೋ ನಾಮಯಂ ಪತ್ತೋ, ವಿಞ್ಞಾಪೇಯ್ಯ ತತೋ ಪರಂ.

೭೭೧.

ಅಯೋಪತ್ತೋ ಅನೇಕೇಹಿ, ಲೋಹಮಣ್ಡಲಕೇಹಿ ವಾ;

ಬದ್ಧೋ ವಟ್ಟತಿ ಮಟ್ಠೋ ಚೇ, ಅಯೋಚುಣ್ಣೇನ ವಾಣಿಯಾ.

೭೭೨.

ಪತ್ತಂ ಸಙ್ಘಸ್ಸ ನಿಸ್ಸಟ್ಠಂ, ತಸ್ಸ ನಿಸ್ಸಗ್ಗಿಯಂ ಪನ;

ಅನುಕಮ್ಪಾಯ ತಂ ತಸ್ಮಿಂ, ಅಗಣ್ಹನ್ತಸ್ಸ ದುಕ್ಕಟಂ.

೭೭೩.

ದೀಯಮಾನೇ ತು ಪತ್ತಸ್ಮಿಂ, ಯಸ್ಸ ಸೋ ನ ಚ ರುಚ್ಚತಿ;

ಅಪ್ಪಿಚ್ಛತಾಯ ವಾ ಪತ್ತಂ, ತಂ ನ ಗಣ್ಹಾತಿ ವಟ್ಟತಿ.

೭೭೪.

ಅಪತ್ತಸ್ಸ ತು ಭಿಕ್ಖುಸ್ಸ;

ನ ದಾತಬ್ಬೋತಿ ದೀಪಿತೋ;

ತತ್ಥ ಯೋ ಪತ್ತಪರಿಯನ್ತೋ;

ಸೋ ದೇಯ್ಯೋ ತಸ್ಸ ಭಿಕ್ಖುನೋ.

೭೭೫.

ಸಚೇ ಸೋ ತಂ ಜಿಗುಚ್ಛನ್ತೋ, ಅಪ್ಪದೇಸೇ ಠಪೇತಿ ವಾ;

ವಿಸ್ಸಜ್ಜೇತಿ ಅಭೋಗೇನ, ಪರಿಭುಞ್ಜತಿ ದುಕ್ಕಟಂ.

೭೭೬.

ನಟ್ಠೇ ¶ ಭಿನ್ನೇಪಿ ವಾ ಪತ್ತೇ, ಅನಾಪತ್ತಿ ಪಕಾಸಿತಾ;

ಅತ್ತನೋ ಞಾತಕಾದೀನಂ, ಗಣ್ಹತೋ ವಾ ಧನೇನ ವಾ.

೭೭೭.

ಸಞ್ಚರಿತ್ತಸಮುಟ್ಠಾನಂ ¶ , ಕ್ರಿಯಂ ಪಣ್ಣತ್ತಿವಜ್ಜಕಂ;

ಕಾಯಕಮ್ಮಂ ವಚೀಕಮ್ಮಂ, ತಿಚಿತ್ತಞ್ಚ ತಿವೇದನಂ.

ದುತಿಯಪತ್ತಕಥಾ.

೭೭೮.

ಸಪ್ಪಿಆದಿಂ ಪುರೇಭತ್ತಂ, ಭೇಸಜ್ಜಂ ಪಟಿಗಯ್ಹ ಹಿ;

ಸಾಮಿಸಮ್ಪಿ ಪುರೇಭತ್ತಂ, ಪರಿಭುಞ್ಜತಿ ವಟ್ಟತಿ.

೭೭೯.

ತತೋ ಪಟ್ಠಾಯ ಸತ್ತಾಹಂ, ತಂ ವಟ್ಟತಿ ನಿರಾಮಿಸಂ;

ಸತ್ತಾಹಾತಿಕ್ಕಮೇ ತಸ್ಸ, ನಿಸ್ಸಗ್ಗಿಯಮುದೀರಿತಂ.

೭೮೦.

ಪಚ್ಛಾಭತ್ತಮ್ಪಿ ಗಣ್ಹಿತ್ವಾ, ಕತ್ವಾ ಸನ್ನಿಧಿಕಾರಕಂ;

ಸಾಯತೋ ಪನ ಸತ್ತಾಹಂ, ವಟ್ಟತೇವ ನಿರಾಮಿಸಂ.

೭೮೧.

ಪುರೇಭತ್ತಮ್ಪಿ ಪಚ್ಛಾ ವಾ, ಸಯಮುಗ್ಗಹಿತಂ ಪನ;

ಸರೀರಭೋಗೇ ನೇತಬ್ಬಂ, ಸಾಯಿತುಂ ನ ಚ ವಟ್ಟತಿ.

೭೮೨.

ನವನೀತಂ ಪುರೇಭತ್ತಂ, ಭಿಕ್ಖುನಾ ಗಹಿತಂ ಸಚೇ;

ತಾಪೇತ್ವಾನುಪಸಮ್ಪನ್ನೋ, ದೇತಿ ವಟ್ಟತಿ ಸಾಮಿಸಂ.

೭೮೩.

ಸಯಂ ತಾಪೇತಿ ಚೇ ಭಿಕ್ಖು, ಸತ್ತಾಹಮ್ಪಿ ನಿರಾಮಿಸಂ;

ತಾಪನಂ ನವನೀತಸ್ಸ, ಸಾಮಪಾಕೋ ನ ಹೋತಿ ಸೋ.

೭೮೪.

ಪಚ್ಛಾಭತ್ತಂ ಗಹೇತ್ವಾ ಚೇ, ಯೇನ ಕೇನಚಿ ತಾಪಿತಂ;

ವಟ್ಟತೇವ ಚ ತಂ ಸಪ್ಪಿ, ಸತ್ತಾಹಮ್ಪಿ ನಿರಾಮಿಸಂ.

೭೮೫.

ಖೀರಂ ದಧಿಂ ಚಾಪಿ ಪಟಿಗ್ಗಹೇತ್ವಾ;

ಸಯಂ ಪುರೇಭತ್ತಮಥೋ ಕರೋತಿ;

ಸಪ್ಪಿಂ ಪುರೇಭತ್ತಕಮೇವ ತಸ್ಸ;

ನಿರಾಮಿಸಂ ವಟ್ಟತಿ ಭಿಕ್ಖುನೋ ತಂ.

೭೮೬.

ಪಚ್ಛಾಭತ್ತಕತೋ ಉದ್ಧಂ, ತಂ ನ ವಟ್ಟತಿ ಸಾಯಿತುಂ;

ಸವತ್ಥುಕಸ್ಸ ಸಪ್ಪಿಸ್ಸ, ಗಹಿತತ್ತಾವ ಭಿಕ್ಖುನೋ.

೭೮೭.

ಸತ್ತಾಹಾತಿಕ್ಕಮೇಪಿಸ್ಸ ¶ , ನ ದೋಸೋ ಕೋಚಿ ವಿಜ್ಜತಿ;

‘‘ಪಟಿಗ್ಗಹೇತ್ವಾ ತಾನೀ’’ತಿ, ವುತ್ತತ್ತಾ ಹಿ ಮಹೇಸಿನಾ.

೭೮೮.

ಯಥಾ ಕಪ್ಪಿಯಸಪ್ಪಿಮ್ಹಿ, ನಿಸ್ಸಗ್ಗಿಯಮುದೀರಿತಂ;

ತಥಾಕಪ್ಪಿಯಸಪ್ಪಿಮ್ಹಿ, ದುಕ್ಕಟಂ ಪರಿದೀಪಿತಂ.

೭೮೯.

ಸಬ್ಬಾಕಪ್ಪಿಯಮಂಸಾನಂ ¶ , ವಜ್ಜೇತ್ವಾ ಮಂಸಮೇವ ಚ;

ಖೀರಂ ದಧಿ ಚ ಸಪ್ಪಿ ಚ, ನವನೀತಞ್ಚ ವಟ್ಟತಿ.

೭೯೦.

‘‘ಯೇಸಂ ಕಪ್ಪತಿ ಮಂಸಞ್ಹಿ, ತೇಸಂ ಸಪ್ಪೀ’’ತಿ ಕಿಂ ಇದಂ?

ಪಣೀತಭೋಜನಸ್ಸಾಪಿ, ತಥಾ ಸತ್ತಾಹಕಾಲಿಕೇ.

೭೯೧.

ನಿಸ್ಸಗ್ಗಿಯಸ್ಸ ವತ್ಥೂನಂ, ಪರಿಚ್ಛೇದನಿಯಾಮನಂ;

ನ ಚಾಕಪ್ಪಿಯಮಂಸಾನಂ, ಸಪ್ಪಿಆದಿ ನಿವಾರಿತಂ.

೭೯೨.

ನವನೀತೇಪಿ ಸಪ್ಪಿಮ್ಹಿ, ಗಹಿತುಗ್ಗಹಿತಾದಿಕೇ;

ಸಬ್ಬೋ ವುತ್ತನಯೇನೇವ, ವೇದಿತಬ್ಬೋ ವಿನಿಚ್ಛಯೋ.

೭೯೩.

ತೇಲಭಿಕ್ಖಾಯ ಭಿಕ್ಖೂನಂ, ಪವಿಟ್ಠಾನಂ ಉಪಾಸಕಾ;

ತೇಲಂ ವಾ ನವನೀತಂ ವಾ, ಸಪ್ಪಿಂ ವಾ ಆಕಿರನ್ತಿ ಹಿ.

೭೯೪.

ಭತ್ತಸಿತ್ಥಾನಿ ವಾ ತತ್ಥ, ತಣ್ಡುಲಾ ವಾ ಭವನ್ತಿ ಚೇ;

ಆದಿಚ್ಚಪಕ್ಕಸಂಸಟ್ಠಂ, ಹೋತಿ ಸತ್ತಾಹಕಾಲಿಕಂ.

೭೯೫.

ತಿಲಸಾಸಪತೇಲಂ ವಾ, ಮಧುಕೇರಣ್ಡತೇಲಕಂ;

ಗಹಿತಂ ತು ಪುರೇಭತ್ತಂ, ಸಾಮಿಸಮ್ಪಿ ನಿರಾಮಿಸಂ.

೭೯೬.

ಪಚ್ಛಾಭತ್ತಕತೋ ಉದ್ಧಂ, ಸಾಯಿತಬ್ಬಂ ನಿರಾಮಿಸಂ;

ಸತ್ತಾಹಾತಿಕ್ಕಮೇ ತೇಸಂ, ವಸಾ ನಿಸ್ಸಗ್ಗಿಯಂ ಸಿಯಾ.

೭೯೭.

ಏರಣ್ಡಮಧುಕಟ್ಠೀನಿ, ಸಾಸಪಾದೀನಿ ಚತ್ತನಾ;

ಗಹೇತ್ವಾ ಕತತೇಲಮ್ಪಿ, ಹೋತಿ ಸತ್ತಾಹಕಾಲಿಕಂ.

೭೯೮.

ಯಾವಜೀವಿಕವತ್ಥುತ್ತಾ, ತೇಸಂ ತಿಣ್ಣಮ್ಪಿ ಭಿಕ್ಖುನೋ;

ಸವತ್ಥುಗಹಣೇ ತಸ್ಸ, ಕಾಚಾಪತ್ತಿ ನ ವಿಜ್ಜತಿ.

೭೯೯.

ಅತ್ತನಾ ¶ ಯಂ ಕತಂ ತೇಲಂ, ತಂ ವಟ್ಟತಿ ನಿರಾಮಿಸಂ;

ಸತ್ತಾಹಾತಿಕ್ಕಮೇನಸ್ಸ, ಹೋತಿ ನಿಸ್ಸಗ್ಗಿಯಂ ಪನ.

೮೦೦.

ದುಕ್ಕಟಂ ಸಾಸಪಾದೀನಂ, ತೇಲತ್ಥಾಯೇವ ಭಿಕ್ಖುನಾ;

ಗಹೇತ್ವಾ ಠಪಿತಾನಂ ತು, ಸತ್ತಾಹಾತಿಕ್ಕಮೇ ಸಿಯಾ.

೮೦೧.

ನಾಳಿಕೇರಕರಞ್ಜಾನಂ, ತೇಲಂ ಕುರುವಕಸ್ಸ ಚ;

ನಿಮ್ಬಕೋಸಮ್ಬಕಾನಞ್ಚ, ತೇಲಂ ಭಲ್ಲಾತಕಸ್ಸ ಚ.

೮೦೨.

ಇಚ್ಚೇವಮಾದಿಕಂ ಸಬ್ಬಂ, ಅವುತ್ತಂ ಪಾಳಿಯಂ ಪನ;

ಗಹೇತ್ವಾ ನಿಕ್ಖಿಪನ್ತಸ್ಸ, ದುಕ್ಕಟಂ ಸಮಯಚ್ಚಯೇ.

೮೦೩.

ಯಾವಕಾಲಿಕಭೇದಞ್ಚ ¶ , ಯಾವಜೀವಕಮೇವ ಚ;

ವಿದಿತ್ವಾ ಸೇಸಮೇತ್ಥಾಪಿ, ಸಪ್ಪಿನಾ ಸದಿಸೋ ನಯೋ.

೮೦೪.

ಅಚ್ಛಮಚ್ಛವರಾಹಾನಂ, ಸುಸುಕಾಗದ್ರಭಸ್ಸ ಚ;

ವಸಾನಂ ಪನ ಪಞ್ಚನ್ನಂ, ತೇಲಂ ಪಞ್ಚವಿಧಂ ಭವೇ.

೮೦೫.

ಸಬ್ಬಮೇವ ವಸಾತೇಲಂ, ಕಪ್ಪಿಯಾಕಪ್ಪಿಯಸ್ಸ ಚ;

ಮನುಸ್ಸಾನಂ ವಸಾತೇಲಂ, ಠಪೇತ್ವಾ ಪನ ವಟ್ಟತಿ.

೮೦೬.

ವಸಂ ಪಟಿಗ್ಗಹೇತ್ವಾನ, ಪುರೇಭತ್ತಂ ಪನತ್ತನಾ;

ಪಕ್ಕಂ ವಟ್ಟತಿ ಸಂಸಟ್ಠಂ, ಸತ್ತಾಹಮ್ಪಿ ನಿರಾಮಿಸಂ.

೮೦೭.

ಸಚೇ ಅನುಪಸಮ್ಪನ್ನೋ, ಕತ್ವಾ ತಂ ದೇತಿ ವಟ್ಟತಿ;

ಸಾಮಿಸಮ್ಪಿ ಪುರೇಭತ್ತಂ, ತತೋ ಉದ್ಧಂ ನಿರಾಮಿಸಂ.

೮೦೮.

ಪಟಿಗ್ಗಹೇತುಂ ಕಾತುಂ ವಾ, ಪಚ್ಛಾಭತ್ತಂ ನ ವಟ್ಟತಿ;

ಸೇಸೋ ವುತ್ತನಯೇನೇವ, ವೇದಿತಬ್ಬೋ ವಿಭಾವಿನಾ.

೮೦೯.

ಗಹಿತಞ್ಹಿ ಪುರೇಭತ್ತಂ, ಮಧುಂ ಮಧುಕರೀಕತಂ;

ವಟ್ಟತೇವ ಪುರೇಭತ್ತಂ, ಸಾಮಿಸಮ್ಪಿ ನಿರಾಮಿಸಂ.

೮೧೦.

ಪಚ್ಛಾಭತ್ತಕತೋ ¶ ಉದ್ಧಂ, ಸತ್ತಾಹಮ್ಪಿ ನಿರಾಮಿಸಂ;

ಸತ್ತಾಹಾತಿಕ್ಕಮೇ ದೋಸೋ, ವತ್ಥೂನಂ ಗಣನಾವಸಾ.

೮೧೧.

ಉಚ್ಛುಮ್ಹಾ ಪನ ನಿಬ್ಬತ್ತಂ, ಪಕ್ಕಾಪಕ್ಕಂ ಘನಾಘನಂ;

ರಸಾದಿ ಪನ ತಂ ಸಬ್ಬಂ, ‘‘ಫಾಣಿತ’’ನ್ತಿ ಪವುಚ್ಚತಿ.

೮೧೨.

ಫಾಣಿತಂ ತು ಪುರೇಭತ್ತಂ, ಗಹಿತಂ ಪನ ವಟ್ಟತಿ;

ಸಾಮಿಸಮ್ಪಿ ಪುರೇಭತ್ತಂ, ತತೋ ಉದ್ಧಂ ನಿರಾಮಿಸಂ.

೮೧೩.

ಅಸಂಸಟ್ಠೇನ ಉಚ್ಛುಸ್ಸ, ರಸೇನ ಕತಫಾಣಿತಂ;

ಗಹಿತೇನ ಪುರೇಭತ್ತಂ, ತದಹೇವ ನಿರಾಮಿಸಂ.

೮೧೪.

ಉಚ್ಛುಂ ಪಟಿಗ್ಗಹೇತ್ವಾನ, ಕತೇಪೇಸ ನಯೋ ಮತೋ;

ಪಚ್ಛಾಭತ್ತಕತೋ ಉದ್ಧಂ, ತಂ ನ ವಟ್ಟತಿ ಸಾಯಿತುಂ.

೮೧೫.

ಗಹಿತತ್ತಾ ಸವತ್ಥುಸ್ಸ, ಸತ್ತಾಹಾತಿಕ್ಕಮೇಪಿ ಚ;

ಹೋತಿ ತಸ್ಸ ಅನಾಪತ್ತಿ, ಪಚ್ಛಾಭತ್ತಂ ಕತೇಪಿ ಚ.

೮೧೬.

ಸಂಸಟ್ಠಞ್ಚ ಪುರೇಭತ್ತಂ, ಗಹಿತಂ ತಮುಪಾಸಕೋ;

ತದಹೇ ದೇತಿ ಚೇ ಕತ್ವಾ, ಸಾಮಿಸಮ್ಪಿ ಚ ವಟ್ಟತಿ.

೮೧೭.

ಸಂಸಟ್ಠೇನ ¶ ಪುರೇಭತ್ತಂ, ಗಹಿತೇನ ಸಯಂಕತಂ;

ಪಚ್ಛಾಭತ್ತಂ ಕತಞ್ಚಾಪಿ, ಸತ್ತಾಹಮ್ಪಿ ನಿರಾಮಿಸಂ.

೮೧೮.

ಕತಂ ಮಧುಕಪುಪ್ಫಾನಂ, ಫಾಣಿತಂ ಸೀತವಾರಿನಾ;

ಸಾಮಿಸಮ್ಪಿ ಪುರೇಭತ್ತಂ, ತತೋ ಉದ್ಧಂ ನಿರಾಮಿಸಂ.

೮೧೯.

ಸತ್ತಾಹಾತಿಕ್ಕಮೇಪಿಸ್ಸ, ದುಕ್ಕಟಂ ಪರಿದೀಪಿತಂ;

ಪಕ್ಖಿಪಿತ್ವಾ ಕತಂ ಖೀರಂ, ಹೋತಿ ತಂ ಯಾವಕಾಲಿಕಂ.

೮೨೦.

ಫಲಾನಂ ಪನ ಸಬ್ಬೇಸಂ, ಯಾವಕಾಲಿಕಸಞ್ಞಿನಂ;

ಯಾವಕಾಲಿಕಮಿಚ್ಚೇವ, ಫಾಣಿತಂ ಪರಿದೀಪಿತಂ.

೮೨೧.

ಪಚ್ಛಾಭತ್ತಮ್ಪಿ ಭಿಕ್ಖುಸ್ಸ, ಪಚ್ಚಯೇ ಸತಿ ಕೇವಲಂ;

ಕಾಲಿಕಾ ಪನ ವಟ್ಟನ್ತಿ, ಪುರೇಭತ್ತಂ ಯಥಾಸುಖಂ.

೮೨೨.

ಲಭಿತ್ವಾ ಪನ ನಿಸ್ಸಟ್ಠಂ, ತಂ ತು ಸತ್ತಾಹಕಾಲಿಕಂ;

ಅರುಆದೀನಿ ಮಕ್ಖೇತುಂ, ಸಾಯಿತುಂ ವಾ ನ ವಟ್ಟತಿ.

೮೨೩.

ಅಞ್ಞಸ್ಸ ¶ ಪನ ಭಿಕ್ಖುಸ್ಸ, ಕಾಯಭೋಗೇ ಚ ವಟ್ಟತಿ;

ಚಜಿತ್ವಾ ನಿರಪೇಕ್ಖೋವ, ಲಭಿತ್ವಾ ಪುನ ಸಾಯಿತುಂ.

೮೨೪.

ಅನಾಪತ್ತಿ ಅಧಿಟ್ಠೇತಿ, ವಿಸ್ಸಜ್ಜೇತಿ ವಿನಸ್ಸತಿ;

ಅಚ್ಛಿನ್ದಿತ್ವಾ ಚ ವಿಸ್ಸಾಸಂ, ಗಣ್ಹತುಮ್ಮತ್ತಕಾದಿನೋ.

೮೨೫.

ಸಮುಟ್ಠಾನಾದಯೋ ಸಬ್ಬೇ, ಕಥಿನೇನ ಸಮಾ ಮತಾ;

ಸದಾಕಥಿನಚಿತ್ತೇನ, ಪಠಮೇನೇವ ಸತ್ಥುನಾ.

ಭೇಸಜ್ಜಸಿಕ್ಖಾಪದಕಥಾ.

೮೨೬.

ಮಾಸೋ ಸೇಸೋತಿ ಗಿಮ್ಹಾನಂ, ಪರಿಯೇಸೇಯ್ಯ ಸಾಟಿಕಂ;

ಅದ್ಧಮಾಸೋವ ಸೇಸೋತಿ, ಕತ್ವಾ ಪರಿದಹೇ ಬುಧೋ.

೮೨೭.

ಕತ್ವಾ ಪನ ಸತುಪ್ಪಾದಂ, ವಸ್ಸಸಾಟಿಕಚೀವರಂ;

ನಿಪ್ಫಾದೇನ್ತಸ್ಸ ಭಿಕ್ಖುಸ್ಸ, ಸಮಯೇ ಪಿಟ್ಠಿಸಮ್ಮತೇ.

೮೨೮.

ಹೋತಿ ನಿಸ್ಸಗ್ಗಿಯಾಪತ್ತಿ, ಞಾತಕಾಞ್ಞಾತಕಾದಿನೋ;

ತೇಸುಯೇವ ಚ ವಿಞ್ಞತ್ತಿಂ, ಕತ್ವಾ ನಿಪ್ಫಾದನೇ ತಥಾ.

೮೨೯.

ಕತ್ವಾ ಪನ ಸತುಪ್ಪಾದಂ, ಸಮಯೇ ಕುಚ್ಛಿಸಞ್ಞಿತೇ;

ನಿಪ್ಫಾದೇನ್ತಸ್ಸ ಭಿಕ್ಖುಸ್ಸ, ವತ್ಥಮಞ್ಞಾತಕಾದಿನೋ.

೮೩೦.

ತಸ್ಸಾದಿನ್ನಕಪುಬ್ಬೇಸು ¶ , ವತ್ತಭೇದೇನ ದುಕ್ಕಟಂ;

ಕರೋತೋ ತತ್ರ ವಿಞ್ಞತ್ತಿಂ, ನಿಸ್ಸಗ್ಗಿಯಮುದೀರಿತಂ.

೮೩೧.

ಓವಸ್ಸಾಪೇತಿ ಚೇ ಕಾಯಂ, ನಗ್ಗೋ ಸತಿಪಿ ಚೀವರೇ;

ನ್ಹಾನಸ್ಸ ಪರಿಯೋಸಾನೇ, ದುಕ್ಕಟಂ ವಿವಟಙ್ಗಣೇ.

೮೩೨.

ಊನಕೇ ಪನ ಮಾಸಸ್ಮಿಂ, ಅತಿರೇಕೋತಿ ಸಞ್ಞಿನೋ;

ತತ್ಥ ವೇಮತಿಕಸ್ಸಾಪಿ, ಹೋತಿ ಆಪತ್ತಿ ದುಕ್ಕಟಂ.

೮೩೩.

ಅಚ್ಛಿನ್ನಚೀವರಸ್ಸಾಪಿ, ಅನಾಪತ್ತಾಪದಾಸುಪಿ;

ನ್ಹಾನಕೋಟ್ಠಕವಾಪೀಸು, ನ್ಹಾಯನ್ತಸ್ಸ ಚ ಭಿಕ್ಖುನೋ.

೮೩೪.

ಸಞ್ಚರಿತ್ತಸಮುಟ್ಠಾನಂ ¶ , ಕ್ರಿಯಂ ಪಣ್ಣತ್ತಿವಜ್ಜಕಂ;

ಕಾಯಕಮ್ಮಂ ವಚೀಕಮ್ಮಂ, ತಿಚಿತ್ತಞ್ಚ ತಿವೇದನಂ.

ವಸ್ಸಿಕಸಾಟಿಕಕಥಾ.

೮೩೫.

ಸಾಮಂ ತು ಚೀವರಂ ದತ್ವಾ, ಅಚ್ಛಿನ್ದನ್ತಸ್ಸ ತಂ ಪುನ;

ಸಕಸಞ್ಞಾಯ ಭಿಕ್ಖುಸ್ಸ, ತಸ್ಸ ನಿಸ್ಸಗ್ಗಿಯಂ ಸಿಯಾ.

೮೩೬.

ಏಕಾಯೇವ ಪನಾಪತ್ತಿ, ಏಕಮಚ್ಛಿನ್ದತೋ ಸಿಯಾ;

ಬಹೂನಿ ಏಕಬದ್ಧಾನಿ, ಅಚ್ಛಿನ್ದನ್ತಸ್ಸ ವಾ ತಥಾ.

೮೩೭.

ವಿಸುಂ ಠಿತಾನಿ ಏಕೇಕ-ಮಾಹರಾಪಯತೋ ಪನ;

ವತ್ಥಾನಂ ಗಣನಾಯಸ್ಸ, ಆಪತ್ತಿಗಣನಾ ಸಿಯಾ.

೮೩೮.

‘‘ಮಯಾ ದಿನ್ನಾನಿ ಸಬ್ಬಾನಿ, ಆಹರಾ’’ತಿ ಚ ಭಾಸತೋ;

ಏಕೇನ ವಚನೇನೇವ, ಹೋನ್ತಿ ಆಪತ್ತಿಯೋ ಬಹೂ.

೮೩೯.

ಆಣಾಪೇತಿ ಸಚೇ ಅಞ್ಞಂ, ಭಿಕ್ಖುಂ ಗಣ್ಹಾತಿ ಚೀವರಂ;

ಬಹೂನಿ ಗಣ್ಹತಾಣತ್ತೋ, ಏಕಂ ಪಾಚಿತ್ತಿಯಂ ಸಿಯಾ.

೮೪೦.

‘‘ಮಯಾ ದಿನ್ನಾನಿ ಸಬ್ಬಾನಿ, ಗಣ್ಹಾ’’ತಿ ವದತೋ ಪನ;

ಏಕಾಯಸ್ಸ ಚ ವಾಚಾಯ, ಹೋನ್ತಿ ಆಪತ್ತಿಯೋ ಬಹೂ.

೮೪೧.

‘‘ಸಙ್ಘಾಟಿಮುತ್ತರಾಸಙ್ಗಂ, ಗಣ್ಹ ಗಣ್ಹಾ’’ತಿ ಭಾಸತೋ;

ಹೋತಿ ವಾಚಾಯ ವಾಚಾಯ, ಆಣಾಪೇನ್ತಸ್ಸ ದುಕ್ಕಟಂ.

೮೪೨.

ವಿಕಪ್ಪನುಪಗಂ ಕಿಞ್ಚಿ, ಠಪೇತ್ವಾ ಪಚ್ಛಿಮಂ ಪರಂ;

ಅಞ್ಞಂ ಪನ ಪರಿಕ್ಖಾರಂ, ಛಿನ್ದಾಪೇನ್ತಸ್ಸ ದುಕ್ಕಟಂ.

೮೪೩.

ಠಪೇತ್ವಾ ¶ ಉಪಸಮ್ಪನ್ನಂ, ಅಞ್ಞೇಸಂ ಚೀವರಾದಿಕಂ;

ಅಚ್ಛಿನ್ದತೋಪಿ ಭಿಕ್ಖುಸ್ಸ, ಹೋತಿ ಆಪತ್ತಿ ದುಕ್ಕಟಂ.

೮೪೪.

ಏವಂ ಅನುಪಸಮ್ಪನ್ನೇ, ಉಪಸಮ್ಪನ್ನಸಞ್ಞಿನೋ;

ತತ್ಥ ವೇಮತಿಕಸ್ಸಾಪಿ, ಅಚ್ಛಿನ್ದನ್ತಸ್ಸ ದುಕ್ಕಟಂ.

೮೪೫.

ಸೋ ¶ ವಾ ದೇತಿ ಸಚೇ ತುಟ್ಠೋ, ದುಟ್ಠೋ ವಿಸ್ಸಾಸಮೇವ ವಾ;

ಗಣ್ಹತೋಪಿ ಅನಾಪತ್ತಿ, ತಥಾ ಉಮ್ಮತ್ತಕಾದಿನೋ.

೮೪೬.

ಅದಿನ್ನಾದಾನತುಲ್ಯಾವ, ಸಮುಟ್ಠಾನಾದಯೋ ನಯಾ;

ಅಞ್ಞತ್ರ ವೇದನಾಯೇತ್ಥ, ಹೋತಿ ಸಾ ದುಕ್ಖವೇದನಾ.

ಚೀವರಚ್ಛಿನ್ದನಕಥಾ.

೮೪೭.

ವಿಞ್ಞಾಪೇತ್ವಾ ಸಚೇ ಸುತ್ತಂ, ಛಬ್ಬಿಧಂ ಸಾನುಲೋಮಿಕಂ;

ಚೀವರಂ ತನ್ತವಾಯೇಹಿ, ವಾಯಾಪೇತಿ ನ ವಟ್ಟತಿ.

೮೪೮.

ಸಾಮಂ ವಿಞ್ಞಾಪಿತಂ ಸುತ್ತಂ, ಅಕಪ್ಪಿಯಮುದೀರಿತಂ;

ತನ್ತವಾಯೋಪಿ ವಿಞ್ಞತ್ತೋ, ತಥಾ ಅಞ್ಞಾತಕಾದಿಕೋ.

೮೪೯.

ವಿಞ್ಞತ್ತತನ್ತವಾಯೇನ, ಸುತ್ತೇನಾಕಪ್ಪಿಯೇನ ಚ;

ಚೀವರಂ ವಾಯಾಪೇನ್ತಸ್ಸ, ನಿಸ್ಸಗ್ಗಿಯಮುದೀರಿತಂ.

೮೫೦.

ವಿದತ್ಥಿಮತ್ತೇ ದೀಘೇನ, ಹತ್ಥಮತ್ತೇ ತಿರೀಯತೋ;

ವೀತೇ ನಿಸ್ಸಗ್ಗಿಯಂ ವುತ್ತಂ, ಫಲಕೇ ಫಲಕೇಪಿ ಚ.

೮೫೧.

ತೇನೇವ ಕಪ್ಪಿಯಂ ಸುತ್ತಂ, ವಾಯಾಪೇನ್ತಸ್ಸ ದುಕ್ಕಟಂ;

ತಥೇವ ತನ್ತವಾಯೇನ, ಕಪ್ಪಿಯೇನ ಅಕಪ್ಪಿಯಂ.

೮೫೨.

ಏಕನ್ತರಿಕತೋ ವಾಪಿ, ದೀಘತೋ ವಾ ತಿರೀಯತೋ;

ಕಪ್ಪಿಯಾಕಪ್ಪಿಯೇಹೇವ, ವೀತೇ ಸುತ್ತೇಹಿ ದುಕ್ಕಟಂ.

೮೫೩.

ಕಪ್ಪಿಯಾಕಪ್ಪಿಯೇಹೇವ, ತನ್ತವಾಯೇಹಿ ವೇ ಕತೇ;

ಕಪ್ಪಿಯಾಕಪ್ಪಿಯಂ ಸುತ್ತಂ, ಮಿಸ್ಸೇತ್ವಾ ತಸ್ಸ ದುಕ್ಕಟಂ.

೮೫೪.

ಸಚೇ ಅಕಪ್ಪಿಯಂ ಸುತ್ತಂ, ವಾರೇನೇವ ವಿನನ್ತಿ ತೇ;

ದಸ್ಸೇತ್ವಾವ ಪರಿಚ್ಛೇದಂ, ಅಕಪ್ಪಿಯವಿತೇ ಪನ.

೮೫೫.

ಪಾಚಿತ್ತಿಯಂ ಪಮಾಣಸ್ಮಿಂ, ತದೂನೇ ದುಕ್ಕಟಂ ಸಿಯಾ;

ಇತರೇನ ವಿತೇ ವತ್ಥೇ, ಉಭಯತ್ಥೇವ ದುಕ್ಕಟಂ.

೮೫೬.

ದ್ವೇಪಿ ¶ ¶ ವೇಮಂ ಗಹೇತ್ವಾ ವಾ, ಏಕತೋ ವಾ ವಿನನ್ತಿ ಚೇ;

ಫಲಕೇ ಫಲಕೇ ತಸ್ಸ, ದುಕ್ಕಟಂ ಪರಿದೀಪಿತಂ.

೮೫೭.

ಏತೇನೇವ ಉಪಾಯೇನ, ಭೇದೇ ಸಬ್ಬತ್ಥ ಸಾಧುಕಂ;

ಆಪತ್ತಿಭೇದೋ ವಿಞ್ಞೇಯ್ಯೋ, ವಿಞ್ಞುನಾ ವಿನಯಞ್ಞುನಾ.

೮೫೮.

ಕಪ್ಪಿಯೋ ತನ್ತವಾಯೋಪಿ, ಸಚೇ ಸುತ್ತಮ್ಪಿ ಕಪ್ಪಿಯಂ;

ಚೀವರಂ ವಾಯಾಪೇನ್ತಸ್ಸ, ಅನಾಪತ್ತಿ ಪಕಾಸಿತಾ.

೮೫೯.

ಅನಾಪತ್ತಿ ಪರಿಸ್ಸಾವೇ, ಆಯೋಗೇ ಅಂಸಬದ್ಧಕೇ;

ಸಮುಟ್ಠಾನಾದಯೋ ಸಬ್ಬೇ, ಸಞ್ಚರಿತ್ತಸಮಾ ಮತಾ.

ಸುತ್ತವಿಞ್ಞತ್ತಿಕಥಾ.

೮೬೦.

ಅಪ್ಪವಾರಿತಞಾತೀನಂ, ತನ್ತವಾಯೇ ಸಮೇಚ್ಚ ಚೇ;

ವಿಕಪ್ಪಂ ಚೀವರೇ ಭಿಕ್ಖು, ಆಪಜ್ಜತಿ ನ ವಟ್ಟತಿ.

೮೬೧.

ದೀಘಾಯತಪ್ಪಿತತ್ಥಾಯ, ಸುತ್ತವಡ್ಢನಕೇ ಕತೇ;

ಭಿಕ್ಖು ನಿಸ್ಸಗ್ಗಿಯಾಪತ್ತಿಂ, ಆಪಜ್ಜತಿ ನ ಸಂಸಯೋ.

೮೬೨.

ಭಿಕ್ಖುನೋ ಞಾತಕಾದೀನಂ, ತನ್ತವಾಯೇಸು ಅತ್ತನೋ;

ಧನೇನಞ್ಞಸ್ಸ ಚತ್ಥಾಯ, ಅನಾಪತ್ತಿಂ ವಿನಿದ್ದಿಸೇ.

೮೬೩.

ವಾಯಾಪೇನ್ತಸ್ಸ ಅಪ್ಪಗ್ಘಂ, ಮಹಗ್ಘಂ ಕತ್ತುಕಾಮಿನೋ;

ತಥಾ ಉಮ್ಮತ್ತಕಾದೀನಂ, ಸೇಸಂ ವುತ್ತಮನನ್ತರೇ.

ಪೇಸಕಾರಕಥಾ.

೮೬೪.

ವಸ್ಸಂವುಟ್ಠೇ ಯಮುದ್ದಿಸ್ಸ, ಭಿಕ್ಖೂ ದೀಯತಿ ಚೀವರಂ;

ಪವಾರಣಾಯ ಪುಬ್ಬೇವ, ತಂ ಹೋತಚ್ಚೇಕಚೀವರಂ.

೮೬೫.

ಪುರೇ ಪವಾರಣಾಯೇವ, ಭಾಜೇತ್ವಾ ಯದಿ ಗಯ್ಹತಿ;

ವಸ್ಸಚ್ಛೇದೋ ನ ಕಾತಬ್ಬೋ, ಸಙ್ಘಿಕಂ ತಂ ಕರೋತಿ ಚೇ.

೮೬೬.

ಅನಾಪತ್ತಿ ¶ ಅಧಿಟ್ಠೇತಿ, ಅನ್ತೋಸಮಯಮೇವ ತಂ;

ವಿಸ್ಸಜ್ಜೇತಿ ವಿಕಪ್ಪೇತಿ, ವಿನಸ್ಸತಿ ಚ ಡಯ್ಹತಿ.

೮೬೭.

ತಸ್ಸಚ್ಚಾಯಿಕವತ್ಥಸ್ಸ, ಕಥಿನೇ ತು ಅನತ್ಥತೇ;

ಪರಿಹಾರೇಕಮಾಸೋವ, ದಸಾಹಪರಮೋ ಮತೋ.

೮೬೮.

ಅತ್ಥತೇ ¶ ಕಥಿನೇ ತಸ್ಸ, ಪಞ್ಚ ಮಾಸಾ ಪಕಾಸಿತಾ;

ಪರಿಹಾರೋ ಮುನಿನ್ದೇನ, ದಸಾಹಪರಮಾ ಪನ.

೮೬೯.

ಸಮುಟ್ಠಾನಾದಯೋ ಸಬ್ಬೇ, ಕಥಿನೇನ ಸಮಾ ಮತಾ;

ಪಠಮೇನಾಕ್ರಿಯಾಚಿತ್ತಂ, ತಿಚಿತ್ತಞ್ಚ ತಿವೇದನಂ.

ಅಚ್ಚೇಕಚೀವರಕಥಾ.

೮೭೦.

ವಸಿತ್ವಾ ಪನ ಚೇ ಭಿಕ್ಖು, ಪುಬ್ಬಕತ್ತಿಕಪುಣ್ಣಮಂ;

ಠಪೇತ್ವಾ ಚೀವರಂ ಗಾಮೇ, ಪಚ್ಚಯೇ ಸತಿ ತಾದಿಸೇ.

೮೭೧.

ಛಾರತ್ತಪರಮಂ ತೇನ, ವಸಿತಬ್ಬಂ ವಿನಾ ತತೋ;

ಉತ್ತರಿಂ ವಸತೋ ದೋಸೋ, ವಿನಾ ಸಙ್ಘಸ್ಸ ಸಮ್ಮುತಿಂ.

೮೭೨.

ಕತ್ತಿಕೇಯೇವ ಮಾಸಸ್ಮಿಂ, ಪಠಮಾಯ ಪವಾರಿತೋ;

ಪಚ್ಛಿಮೇನ ಪಮಾಣೇನ, ಯುತ್ತೇ ಸಾಸಙ್ಕಸಮ್ಮತೇ.

೮೭೩.

ಸೇನಾಸನೇ ವಸನ್ತೋವ, ಠಪೇತುಂ ಏಕಚೀವರಂ;

ಚತುರಙ್ಗಸಮಾಯೋಗೇ, ಲಭತೀತಿ ಪಕಾಸಿತೋ.

೮೭೪.

ಯಂ ಗಾಮಂ ಗೋಚರಂ ಕತ್ವಾ, ಭಿಕ್ಖು ಆರಞ್ಞಕೇ ವಸೇ;

ತಸ್ಮಿಂ ಗಾಮೇ ಠಪೇತುಂ ತಂ, ಮಾಸಮೇಕಂ ತು ವಟ್ಟತಿ.

೮೭೫.

ಅಞ್ಞತ್ಥೇವ ವಸನ್ತಸ್ಸ, ಛಾರತ್ತಪರಮಂ ಮತಂ;

ಅಯಮಸ್ಸ ಅಧಿಪ್ಪಾಯೋ, ಪಟಿಚ್ಛನ್ನೋ ಪಕಾಸಿತೋ.

೮೭೬.

ಸೇನಾಸನಮಥಾಗನ್ತ್ವಾ, ಸತ್ತಮಂ ಅರುಣಂ ಪನ;

ಉಟ್ಠಾಪೇತುಂ ವಿದೂರತ್ತಾ, ಅಸಕ್ಕೋನ್ತಸ್ಸ ಭಿಕ್ಖುನೋ.

೮೭೭.

ಗಾಮಸೀಮಮ್ಪಿ ¶ ವಾ ಗನ್ತ್ವಾ, ವಸಿತ್ವಾ ಯತ್ಥ ಕತ್ಥಚಿ;

ಚೀವರಸ್ಸ ಪವತ್ತಿಂ ಸೋ, ಞತ್ವಾ ಗಚ್ಛತಿ ವಟ್ಟತಿ.

೮೭೮.

ಏವಞ್ಚಾಪಿ ಅಸಕ್ಕೋನ್ತೋ, ಞತ್ವಾ ತತ್ಥೇವ ಪಣ್ಡಿತೋ;

ಖಿಪ್ಪಂ ಪಚ್ಚುದ್ಧರೇ ಠಾನೇ, ಅತಿರೇಕೇ ಹಿ ತಿಟ್ಠತಿ.

೮೭೯.

ವಿಸ್ಸಜ್ಜೇತಿ ಅನಾಪತ್ತಿ, ವಿನಸ್ಸತಿ ಚ ಡಯ್ಹತಿ;

ಅಚ್ಛಿನ್ದನೇ ಚ ವಿಸ್ಸಾಸೇ, ಭಿಕ್ಖುಸಮ್ಮುತಿಯಾಪಿ ವಾ.

೮೮೦.

ಸಮುಟ್ಠಾನಾದಯೋ ¶ ಸಬ್ಬೇ, ಕಥಿನೇನ ಸಮಾ ಮತಾ;

ದುತಿಯೇನ, ಮುನಿನ್ದೇನ, ತೇನ ಸಾಸಙ್ಕಸಮ್ಮತೇ.

ಸಾಸಙ್ಕಕಥಾ.

೮೮೧.

ಜಾನಂ ಪರಿಣತಂ ಲಾಭಂ, ಭಿಕ್ಖುಸಙ್ಘಸ್ಸ ಯೋ ಪನ;

ಅತ್ತನೋ ಪರಿಣಾಮೇಯ್ಯ, ತಸ್ಸ ನಿಸ್ಸಗ್ಗಿಯಂ ಸಿಯಾ.

೮೮೨.

ಸಚೇ ‘‘ಅಞ್ಞಸ್ಸ ದೇಹೀ’’ತಿ, ಪರಿಣಾಮೇತಿ ಭಿಕ್ಖುನೋ;

ಸುದ್ಧಿಕಂ ಸುದ್ಧಚಿತ್ತೇನ, ಪಾಚಿತ್ತಿಯಮುದೀರಿತಂ.

೮೮೩.

ಚೀವರಂ ವಾ ಪರಸ್ಸೇಕ-ಮೇಕಂ ವಾ ಪನ ಅತ್ತನೋ;

ಪರಿಣಾಮೇಯ್ಯ ಚೇ ಸದ್ಧಿಂ, ದ್ವೇ ಪಾಚಿತ್ತಿಯೋ ಸಿಯುಂ.

೮೮೪.

ಸಙ್ಘಸ್ಸ ಪನ ಯಂ ದಿನ್ನಂ, ತಂ ಗಹೇತುಂ ನ ವಟ್ಟತಿ;

ಸಙ್ಘಸ್ಸೇವ ಪದಾತಬ್ಬೋ, ಅದೇನ್ತಸ್ಸ ಪರಾಜಯೋ.

೮೮೫.

ಚೇತಿಯಸ್ಸ ಚ ಸಙ್ಘಸ್ಸ, ಪುಗ್ಗಲಸ್ಸಪಿ ವಾ ಪನ;

ಅಞ್ಞಸ್ಸ ಪೋಣಮಞ್ಞಸ್ಸ, ಪರಿಣಾಮೇಯ್ಯ ದುಕ್ಕಟಂ.

೮೮೬.

ಯೋ ಪನನ್ತಮಸೋ ಭಿಕ್ಖು, ಸುನಖಸ್ಸಪಿ ಓಣತಂ;

ಸುನಖಸ್ಸ ಪನಞ್ಞಸ್ಸ, ಪರಿಣಾಮೇಯ್ಯ ದುಕ್ಕಟಂ.

೮೮೭.

ಇದಞ್ಹಿ ¶ ತಿಸಮುಟ್ಠಾನಂ, ಕ್ರಿಯಂ ಸಞ್ಞಾವಿಮೋಕ್ಖಕಂ;

ಕಾಯಕಮ್ಮಂ ವಚೀಕಮ್ಮಂ, ತಿಚಿತ್ತಞ್ಚ ತಿವೇದನಂ.

ಪರಿಣತಕಥಾ.

ಪತ್ತವಗ್ಗೋ ತತಿಯೋ.

೮೮೮.

ತೇನೇಕವತ್ಥುಗ್ಗತರಙ್ಗಮಾಲಂ;

ಸೀಲನ್ತಮಾಪತ್ತಿವಿಪತ್ತಿಗಾಹಂ;

ತರನ್ತಿ ಪಞ್ಞತ್ತಿಮಹಾಸಮುದ್ದಂ;

ವಿನಿಚ್ಛಯಂ ಯೇ ಪನಿಮಂ ತರನ್ತಿ.

ಇತಿ ವಿನಯವಿನಿಚ್ಛಯೇ ನಿಸ್ಸಗ್ಗಿಯಕಥಾ ನಿಟ್ಠಿತಾ.

ಪಾಚಿತ್ತಿಯಕಥಾ

೮೮೯.

ಸಮ್ಪಜಾನಮುಸಾವಾದೇ ¶ , ಪಾಚಿತ್ತಿಯಮುದೀರಿತಂ;

ದವಾ ರವಾ ಭಣನ್ತಸ್ಸ, ನ ದೋಸುಮ್ಮತ್ತಕಾದಿನೋ.

೮೯೦.

ಅಞ್ಞತ್ಥಾಪತ್ತಿಯೋ ಪಞ್ಚ, ಮುಸಾವಾದಸ್ಸ ಕಾರಣಾ;

ಸಮುಟ್ಠಾನಾದಯೋ ಸಬ್ಬೇ, ಅದಿನ್ನಾದಾನತುಲ್ಯಕಾ.

ಸಮ್ಪಜಾನಮುಸಾವಾದಕಥಾ.

೮೯೧.

ಜಾತಿಆದೀಸು ವುತ್ತೇಸು, ದಸಸ್ವಕ್ಕೋಸವತ್ಥುಸು;

ಭೂತೇನ ವಾ ಅಭೂತೇನ, ಯೇನ ಕೇನಚಿ ವತ್ಥುನಾ.

೮೯೨.

ಯಾಯ ಕಾಯಚಿ ಭಾಸಾಯ, ಹತ್ಥಮುದ್ದಾಯ ವಾ ಪನ;

ಪಾರಾಜಿಕಮನಾಪನ್ನಂ, ಭಿಕ್ಖುಮಾಪನ್ನಮೇವ ವಾ.

೮೯೩.

ಅಞ್ಞತ್ರಞ್ಞಾಪದೇಸೇನ, ಓಮಸನ್ತಸ್ಸ ಭಿಕ್ಖುನೋ;

ತತ್ಥ ಪಾಚಿತ್ತಿಯಾಪತ್ತಿ, ಸಮ್ಬುದ್ಧೇನ ಪಕಾಸಿತಾ.

೮೯೪.

ತೇಹೇವಞ್ಞಾಪದೇಸೇನ ¶ , ಪಾಳಿಮುತ್ತಪದೇಹಿಪಿ;

ಸಬ್ಬತ್ಥಾನುಪಸಮ್ಪನ್ನಂ, ಅಕ್ಕೋಸನ್ತಸ್ಸ ದುಕ್ಕಟಂ.

೮೯೫.

ಅನಕ್ಕೋಸಿತುಕಾಮಸ್ಸ, ಕೇವಲಂ ದವಕಮ್ಯತಾ;

ವದತೋ ಪನ ಸಬ್ಬತ್ಥ, ದುಬ್ಭಾಸಿತಮುದೀರಿತಂ.

೮೯೬.

ಪವಿಟ್ಠಾನುಪಸಮ್ಪನ್ನ-ಟ್ಠಾನೇ ಇಧ ಚ ಭಿಕ್ಖುನೀ;

ಅನಾಪತ್ತಿ ಪುರಕ್ಖತ್ವಾ, ಅತ್ಥಧಮ್ಮಾನುಸಾಸನಿಂ.

೮೯೭.

ವದತೋ ಪನ ಭಿಕ್ಖುಸ್ಸ, ಸಮುಟ್ಠಾನಾದಯೋ ನಯಾ;

ಅನನ್ತರಸಮಾ ವುತ್ತಾ, ದುಕ್ಖಾ ಹೋತೇತ್ಥ ವೇದನಾ.

ಓಮಸವಾದಕಥಾ.

೮೯೮.

ಆಪತ್ತಿ ಭಿಕ್ಖುಪೇಸುಞ್ಞೇ, ದುವಿಧಾಕಾರತೋ ಸಿಯಾ;

ಅತ್ತನೋ ಪಿಯಕಾಮಸ್ಸ, ಪರಭೇದತ್ಥಿನೋಪಿ ವಾ.

೮೯೯.

ಅಕ್ಕೋಸನ್ತಸ್ಸ ಪರಿಯಾಯ-ಪಾಳಿಮುತ್ತನಯೇಹಿ ಚ;

ವಚನಸ್ಸುಪಸಂಹಾರೇ, ಹೋತಿ ಆಪತ್ತಿ ದುಕ್ಕಟಂ.

೯೦೦.

ತಥಾ ¶ ಅನುಪಸಮ್ಪನ್ನ-ಅಕ್ಕೋಸಂ ಹರತೋಪಿ ಚ;

ಠಿತಾ ಅನುಪಸಮ್ಪನ್ನ-ಟ್ಠಾನೇ ಇಧ ಚ ಭಿಕ್ಖುನೀ.

೯೦೧.

ನ ಚೇವ ಪಿಯಕಾಮಸ್ಸ, ನ ಚ ಭೇದತ್ಥಿನೋಪಿ ವಾ;

ಪಾಪಾನಂ ಗರಹತ್ಥಾಯ, ವದನ್ತಸ್ಸ ಚ ಭಿಕ್ಖುನೋ.

೯೦೨.

ತಥಾ ಉಮ್ಮತ್ತಕಾದೀನಂ, ಅನಾಪತ್ತೀತಿ ದೀಪಿತಾ;

ಸಮುಟ್ಠಾನಾದಯೋ ಸಬ್ಬೇ, ಅದಿನ್ನಾದಾನಸಾದಿಸಾ.

ಪೇಸುಞ್ಞಕಥಾ.

೯೦೩.

ಠಪೇತ್ವಾ ಭಿಕ್ಖುನಿಂ ಭಿಕ್ಖುಂ, ಅಞ್ಞೇನ ಪಿಟಕತ್ತಯಂ;

ಧಮ್ಮಂ ಸಹ ಭಣನ್ತಸ್ಸ, ತಸ್ಸ ಪಾಚಿತ್ತಿಯಂ ಸಿಯಾ.

೯೦೪.

ರಾಜೋವಾದಾದಯೋ ¶ ವುತ್ತಾ, ಮಹಾಪಚ್ಚರಿಯಾದಿಸು;

ಅನಾರುಳ್ಹೇಸು ಸಙ್ಗೀತಿಂ, ಆಪತ್ತಿಜನಕಾತಿ ಹಿ.

೯೦೫.

ದುಕ್ಕಟಂ ಹೋತಿ ಭಿಕ್ಖುಸ್ಮಿಂ, ತಥಾ ಭಿಕ್ಖುನಿಯಾಪಿ ಚ;

ಭಿಕ್ಖುಸ್ಸಾನುಪಸಮ್ಪನ್ನ-ಸಞ್ಞಿನೋ ವಿಮತಿಸ್ಸ ವಾ.

೯೦೬.

ಏಕತೋ ಉದ್ದಿಸಾಪೇತಿ, ಸಜ್ಝಾಯಂ ವಾ ಕರೋತಿ ಯೋ;

ಭಣನ್ತಂ ಪಗುಣಂ ಗನ್ಥಂ, ಓಪಾತೇತಿ ಚ ಯೋ ಪನ.

೯೦೭.

ತಸ್ಸ ಚಾನುಪಸಮ್ಪನ್ನ-ಸನ್ತಿಕೇ ಗಣ್ಹತೋಪಿ ಚ;

ಉದ್ದೇಸಂ ತು ಅನಾಪತ್ತಿ, ಭಣನೇ ತೇನ ಏಕತೋ.

೯೦೮.

ವಾಚತೋ ಚ ಸಮುಟ್ಠಾತಿ, ವಾಚಾಚಿತ್ತದ್ವಯಾಪಿ ಚ;

ಸಮುಟ್ಠಾನಮಿದಂ ವುತ್ತಂ, ಪದಸೋಧಮ್ಮಸಞ್ಞಿತಂ.

ಪದಸೋಧಮ್ಮಕಥಾ.

೯೦೯.

ಸಬ್ಬಚ್ಛನ್ನಪರಿಚ್ಛನ್ನೇ, ನಿಪಜ್ಜೇಯ್ಯ ಸಚೇ ಪನ;

ಯೇಭುಯ್ಯೇನ ಪರಿಚ್ಛನ್ನೇ, ಛನ್ನೇ ಸೇನಾಸನೇಪಿ ವಾ.

೯೧೦.

ತಿಸ್ಸನ್ನಂ ಪನ ರತ್ತೀನಂ, ಉದ್ಧಂ ಯೋ ಪನ ರತ್ತಿಯಂ;

ಠಪೇತ್ವಾ ಭಿಕ್ಖುಂ ಅಞ್ಞೇನ, ತಸ್ಸ ಪಾಚಿತ್ತಿಯಂ ಸಿಯಾ.

೯೧೧.

ವತ್ಥುಂ ಯಂ ಪನ ನಿದ್ದಿಟ್ಠಂ, ಮೇಥುನಸ್ಸ ಪಹೋನಕಂ;

ಆಪತ್ಯನ್ತಮಸೋ ತೇನ, ತಿರಚ್ಛಾನಗತೇನಪಿ.

೯೧೨.

ನಿಪನ್ನೇ ¶ ಉಪಸಮ್ಪನ್ನೇ, ಇತರೋ ಚೇ ನಿಪಜ್ಜತಿ;

ಇತರಸ್ಮಿಂ ನಿಪನ್ನೇ ವಾ, ಸಚೇ ಭಿಕ್ಖು ನಿಪಜ್ಜತಿ.

೯೧೩.

ಉಭಿನ್ನಂ ಉಟ್ಠಹಿತ್ವಾ ವಾ, ನಿಪಜ್ಜನಪಯೋಗತೋ;

ಆಪತ್ತಾನುಪಸಮ್ಪನ್ನ-ಗಣನಾಯಪಿ ವಾ ಸಿಯಾ.

೯೧೪.

ಸಚೇ ಪಿಧಾಯ ವಾ ಗಬ್ಭಂ, ನಿಪಜ್ಜತಿಪಿಧಾಯ ವಾ;

ಆಪತ್ತತ್ಥಙ್ಗತೇ ಸೂರಿಯೇ, ಚತುತ್ಥದಿವಸೇ ಸಿಯಾ.

೯೧೫.

ದಿಯಡ್ಢಹತ್ಥುಬ್ಬೇಧೇನ ¶ , ಪಾಕಾರಚಯನಾದಿನಾ;

ಪರಿಕ್ಖಿತ್ತಮ್ಪಿ ತಂ ಸಬ್ಬಂ, ಪರಿಕ್ಖಿತ್ತನ್ತಿ ವುಚ್ಚತಿ.

೯೧೬.

ಭಿಕ್ಖುಸ್ಸನ್ತಮಸೋ ದುಸ್ಸ-ಕುಟಿಯಂ ವಸತೋಪಿ ಚ;

ಸಹಸೇಯ್ಯಾಯ ಆಪತ್ತಿ, ಹೋತೀತಿ ಪರಿದೀಪಿತೋ.

೯೧೭.

ಸಬ್ಬಚ್ಛನ್ನಪರಿಚ್ಛನ್ನ-ಯೇಭುಯ್ಯಾದಿಪ್ಪಭೇದತೋ;

ಸತ್ತ ಪಾಚಿತ್ತಿಯಾನೇತ್ಥ, ದಟ್ಠಬ್ಬಾನಿ ಸುಬುದ್ಧಿನಾ.

೯೧೮.

ಅಡ್ಢಚ್ಛನ್ನಪರಿಚ್ಛನ್ನೇ, ದುಕ್ಕಟಂ ಪರಿದೀಪಿತಂ;

ಸಬ್ಬಚೂಳಪರಿಚ್ಛನ್ನ-ಛನ್ನಾದೀಹಿಪಿ ಪಞ್ಚಧಾ.

೯೧೯.

ಅನಾಪತ್ತಿ ದಿರತ್ತಂ ವಾ, ತಿರತ್ತಂ ವಸತೋ ಸಹ;

ಅರುಣಸ್ಸ ಪುರೇಯೇವ, ತತಿಯಾಯ ಚ ರತ್ತಿಯಾ.

೯೨೦.

ನಿಕ್ಖಮಿತ್ವಾ ವಸನ್ತಸ್ಸ, ಪುನ ಸದ್ಧಿಞ್ಚ ಭಿಕ್ಖುನೋ;

ತಥಾ ಸಬ್ಬಪರಿಚ್ಛನ್ನ-ಸಬ್ಬಚ್ಛನ್ನಾದಿಕೇಪಿ ಚ.

೯೨೧.

ಏವಂ ಅನುಪಸಮ್ಪನ್ನೇ, ನಿಪನ್ನೇಪಿ ನಿಸೀದತೋ;

ಸೇಸಾ ಏಳಕಲೋಮೇನ, ಸಮುಟ್ಠಾನಾದಯೋ ಸಮಾ.

ಸಹಸೇಯ್ಯಕಥಾ.

೯೨೨.

ಸಚೇ ತದಹುಜಾತಾಯ, ಅಪಿ ಯೋ ಮಾನುಸಿತ್ಥಿಯಾ;

ಸಹಸೇಯ್ಯಂ ಪಕಪ್ಪೇಯ್ಯ, ತಸ್ಸ ಪಾಚಿತ್ತಿಯಂ ಸಿಯಾ.

೯೨೩.

ದಿಸ್ಸಮಾನಕರೂಪಾಯ, ಯಕ್ಖಿಯಾ ಪೇತಿಯಾ ಸಹ;

ರತ್ತಿಯಂ ಯೋ ನಿಪಜ್ಜೇಯ್ಯ, ದೇವಿಯಾ ಪಣ್ಡಕೇನ ವಾ.

೯೨೪.

ಮೇಥುನವತ್ಥುಭೂತಾಯ, ತಿರಚ್ಛಾನಗತಿತ್ಥಿಯಾ;

ವತ್ಥೂನಂ ಗಣನಾಯಸ್ಸ, ಹೋತಿ ಆಪತ್ತಿ ದುಕ್ಕಟಂ.

೯೨೫.

ಇಧೇಕದಿವಸೇನೇವ ¶ , ಆಪತ್ತಿ ಪರಿದೀಪಿತಾ;

ಸೇಸೋ ಅನನ್ತರೇ ವುತ್ತ-ಸದಿಸೋವ ವಿನಿಚ್ಛಯೋ.

ದುತಿಯಸಹಸೇಯ್ಯಕಥಾ.

೯೨೬.

ಉದ್ಧಂ ¶ ಛಪ್ಪಞ್ಚವಾಚಾಹಿ, ವಿಞ್ಞುಂ ಪುರಿಸವಿಗ್ಗಹಂ;

ವಿನಾ ಧಮ್ಮಂ ಭಣನ್ತಸ್ಸ, ಹೋತಿ ಪಾಚಿತ್ತಿ ಇತ್ಥಿಯಾ.

೯೨೭.

ಗಾಥಾಪಾದೋ ಪನೇಕೋವ, ಏಕವಾಚಾತಿ ಸಞ್ಞಿತೋ;

ಪದಸೋಧಮ್ಮಂ ನಿದ್ದಿಟ್ಠಂ, ಧಮ್ಮಮಟ್ಠಕಥಮ್ಪಿ ವಾ.

೯೨೮.

ಛನ್ನಂ ಉಪರಿ ವಾಚಾನಂ, ಪದಾದೀನಂ ವಸಾ ಪನ;

ದೇಸೇನ್ತಸ್ಸ ಸಿಯಾಪತ್ತಿ, ಪದಾದಿಗಣನಾಯ ಚ.

೯೨೯.

ನಿಮ್ಮಿನಿತ್ವಾ ಠಿತೇನಾಪಿ, ಸದ್ಧಿಂ ಪುರಿಸವಿಗ್ಗಹಂ;

ಯಕ್ಖೇನಪಿ ಚ ಪೇತೇನ, ತಿರಚ್ಛಾನಗತೇನಪಿ.

೯೩೦.

ಠಿತಸ್ಸ ಮಾತುಗಾಮಸ್ಸ, ಧಮ್ಮಂ ಯೋ ಪನ ಭಾಸತಿ;

ಛನ್ನಂ ಉಪರಿ ವಾಚಾನಂ, ತಸ್ಸ ಪಾಚಿತ್ತಿಯಂ ಸಿಯಾ.

೯೩೧.

ಪುರಿಸೇ ಇತ್ಥಿಸಞ್ಞಿಸ್ಸ, ವಿಮತಿಸ್ಸ ಚ ಪಣ್ಡಕೇ;

ಉತ್ತರಿ ಛಹಿ ವಾಚಾಹಿ, ವದತೋ ಹೋತಿ ದುಕ್ಕಟಂ.

೯೩೨.

ಇತ್ಥಿರೂಪಂ ಗಹೇತ್ವಾನ, ಠಿತಾನಂ ಭಾಸತೋಪಿ ಚ;

ದುಕ್ಕಟಂ ಯಕ್ಖಿಪೇತೀನಂ, ತಿರಚ್ಛಾನಗತಿತ್ಥಿಯಾ.

೯೩೩.

ಪುರಿಸೇ ಸತಿ ವಿಞ್ಞುಸ್ಮಿಂ, ಸಯಂ ಉಟ್ಠಾಯ ವಾ ಪುನ;

ದೇಸೇನ್ತಸ್ಸ ನಿಸೀದಿತ್ವಾ, ಮಾತುಗಾಮಸ್ಸ ವಾ ತಥಾ.

೯೩೪.

ಅಞ್ಞಿಸ್ಸಾ ಪುನ ಅಞ್ಞಿಸ್ಸಾ, ಇತ್ಥಿಯಾ ಭಣತೋಪಿ ಚ;

ಛಹಿ ಪಞ್ಚಹಿ ವಾಚಾಹಿ, ಅನಾಪತ್ತಿ ಪಕಾಸಿತಾ.

೯೩೫.

ಪದಸೋಧಮ್ಮತುಲ್ಯಾವ, ಸಮುಟ್ಠಾನಾದಯೋ ಮತಾ;

ಅಯಮೇವ ವಿಸೇಸೋತಿ, ಕ್ರಿಯಾಕ್ರಿಯಮಿದಂ ಪನ.

ಧಮ್ಮದೇಸನಾಕಥಾ.

೯೩೬.

ಮಹಗ್ಗತಂ ಪಣೀತಂ ವಾ, ಆರೋಚೇನ್ತಸ್ಸ ಭಿಕ್ಖುನೋ;

ಠಪೇತ್ವಾ ಭಿಕ್ಖುನಿಂ ಭಿಕ್ಖುಂ, ಭೂತೇ ಪಾಚಿತ್ತಿಯಂ ಸಿಯಾ.

೯೩೭.

ನೋ ¶ ¶ ಚೇ ಜಾನಾತಿ ಸೋ ವುತ್ತಂ, ಆರೋಚೇನ್ತಸ್ಸ ಭಿಕ್ಖುನೋ;

ಪರಿಯಾಯವಚನೇ ಚಸ್ಸ, ಹೋತಿ ಆಪತ್ತಿ ದುಕ್ಕಟಂ.

೯೩೮.

ಅನಾಪತ್ತಿ ತಥಾರೂಪೇ, ಕಾರಣೇ ಸತಿ ಭಾಸತೋ;

ಸಬ್ಬಸ್ಸಪಿ ಚ ಸೀಲಾದಿಂ, ವದತೋ ಆದಿಕಮ್ಮಿನೋ.

೯೩೯.

ಉಮ್ಮತ್ತಕಪದಂ ಏತ್ಥ, ನ ವುತ್ತಂ ತದಸಮ್ಭವಾ;

ಭೂತಾರೋಚನಕಂ ನಾಮ, ಸಮುಟ್ಠಾನಮಿದಂ ಮತಂ.

೯೪೦.

ಕಾಯತೋ ವಾಚತೋ ಕಾಯ-ವಾಚತೋ ಚ ತಿಧಾ ಸಿಯಾ;

ಕುಸಲಾಬ್ಯಾಕತೇಹೇವ, ದ್ವಿಚಿತ್ತಞ್ಚ ದ್ವಿವೇದನಂ.

ಭೂತಾರೋಚನಕಥಾ.

೯೪೧.

ಆಪತ್ತಿಂ ಪನ ದುಟ್ಠುಲ್ಲಂ, ಆರೋಚೇನ್ತಸ್ಸ ಭಿಕ್ಖುನೋ;

ಆಪತ್ತಾನುಪಸಮ್ಪನ್ನೇ, ಠಪೇತ್ವಾ ಭಿಕ್ಖುಸಮ್ಮುತಿಂ.

೯೪೨.

ಸಙ್ಘಾದಿಸೇಸಮಾಪನ್ನೋ, ಮೋಚೇತ್ವಾ ಅಸುಚಿಂ ಅಯಂ;

ಘಟೇತ್ವಾ ವತ್ಥುನಾಪತ್ತಿಂ, ವದನ್ತಸ್ಸೇವ ವಜ್ಜತಾ.

೯೪೩.

ಇಧ ಸಙ್ಘಾದಿಸೇಸಾವ, ದುಟ್ಠುಲ್ಲಾಪತ್ತಿಯೋ ಮತಾ;

ತಸ್ಮಾ ಸುದ್ಧಸ್ಸ ದುಟ್ಠುಲ್ಲಂ, ವದಂ ಪಾಚಿತ್ತಿಯಂ ಫುಸೇ.

೯೪೪.

ಅದುಟ್ಠುಲ್ಲಾಯ ದುಟ್ಠುಲ್ಲ-ಸಞ್ಞಿನೋ ವಿಮತಿಸ್ಸ ವಾ;

ಆಪತ್ತಿಯೋಪಿ ವಾ ಸೇಸಾ, ಆರೋಚೇನ್ತಸ್ಸ ದುಕ್ಕಟಂ.

೯೪೫.

ತಥಾ ಅನುಪಸಮ್ಪನ್ನೇ, ದುಟ್ಠುಲ್ಲಂ ಪಞ್ಚಧಾ ಮತಂ;

ಅಜ್ಝಾಚಾರಮದುಟ್ಠುಲ್ಲಂ, ಆರೋಚೇತುಂ ನ ವಟ್ಟತಿ.

೯೪೬.

ವತ್ಥುಂ ವಾ ಪನ ಆಪತ್ತಿಂ, ಆರೋಚೇನ್ತಸ್ಸ ಕೇವಲಂ;

ಅನಾಪತ್ತೀತಿ ಞಾತಬ್ಬಂ, ಭಿಕ್ಖುಸಮ್ಮುತಿಯಾ ತಥಾ.

೯೪೭.

ಏವಮುಮ್ಮತ್ತಕಾದೀನಂ, ಸಮುಟ್ಠಾನಾದಯೋ ನಯಾ;

ಅದಿನ್ನಾದಾನತುಲ್ಯಾವ, ವೇದನಾ ದುಕ್ಖವೇದನಾ.

ದುಟ್ಠುಲ್ಲಾರೋಚನಕಥಾ.

೯೪೮.

ಖಣೇಯ್ಯ ¶ ವಾ ಖಣಾಪೇಯ್ಯ, ಪಥವಿಂ ಯೋ ಅಕಪ್ಪಿಯಂ;

ಭೇದಾಪೇಯ್ಯ ಚ ಭಿನ್ದೇಯ್ಯ, ತಸ್ಸ ಪಾಚಿತ್ತಿಯಂ ಸಿಯಾ.

೯೪೯.

ಸಯಮೇವ ¶ ಖಣನ್ತಸ್ಸ, ಪಥವಿಂ ಪನ ಭಿಕ್ಖುನೋ;

ಪಹಾರಸ್ಮಿಂ ಪಹಾರಸ್ಮಿಂ, ಪಾಚಿತ್ತಿಯಮುದೀರಿತಂ.

೯೫೦.

ಆಣಾಪೇನ್ತಸ್ಸ ಏಕಾವ, ದಿವಸಂ ಖಣತೋಪಿ ಚ;

ಪುನಪ್ಪುನಾಣಾಪೇನ್ತಸ್ಸ, ವಾಚತೋ ವಾಚತೋ ಸಿಯಾ.

೯೫೧.

‘‘ಖಣ ಪೋಕ್ಖರಣಿಂ ವಾಪಿಂ, ಆವಾಟಂ ಖಣ ಕೂಪಕಂ’’;

ಇಚ್ಚೇವಂ ತು ವದನ್ತಸ್ಸ, ಕೋಚಿ ದೋಸೋ ನ ವಿಜ್ಜತಿ.

೯೫೨.

‘‘ಇಮಂ ಖಣ ಚ ಓಕಾಸಂ, ಇಧ ಪೋಕ್ಖರಣಿಂ ಖಣ;

ಇಮಸ್ಮಿಂ ಖಣ ಓಕಾಸೇ’’, ವತ್ತುಮೇವಂ ನ ವಟ್ಟತಿ.

೯೫೩.

‘‘ಕನ್ದಂ ಖಣ ಕುರುನ್ದಂ ವಾ, ಥೂಣಂ ಖಣ ಚ ಖಾಣುಕಂ;

ಮೂಲಂ ಖಣ ಚ ತಾಲಂ ವಾ’’, ಏವಂ ವದತಿ ವಟ್ಟತಿ.

೯೫೪.

‘‘ಇಮಂ ಮೂಲಂ ಇಮಂ ವಲ್ಲಿಂ, ಇಮಂ ತಾಲಂ ಇಮಂ ನಳಂ;

ಖಣಾ’’ತಿ ನಿಯಮೇತ್ವಾನ, ವತ್ತುಂ ಪನ ನ ವಟ್ಟತಿ.

೯೫೫.

ಉಸ್ಸಿಞ್ಚಿತುಂ ಸಚೇ ಸಕ್ಕಾ, ಘಟೇಹಿ ತನುಕದ್ದಮೋ;

ಭಿಕ್ಖುನಾ ಅಪನೇತಬ್ಬೋ, ಬಹಲಂ ನ ಚ ವಟ್ಟತಿ.

೯೫೬.

ಭಿಜ್ಜಿತ್ವಾ ನದಿಯಾದೀನಂ, ಪತಿತಂ ತೋಯಸನ್ತಿಕೇ;

ತಟಂ ವಟ್ಠಂ ವಿಕೋಪೇತುಂ, ಚಾತುಮಾಸಮ್ಪಿ ವಟ್ಟತಿ.

೯೫೭.

ಸಚೇ ಪತತಿ ತೋಯಸ್ಮಿಂ, ದೇವೇ ವುಟ್ಠೇಪಿ ವಟ್ಟತಿ;

ಚಾತುಮಾಸಮತಿಕ್ಕನ್ತೇ, ತೋಯೇ ದೇವೋ ಹಿ ವಸ್ಸತಿ.

೯೫೮.

ಪಾಸಾಣಪಿಟ್ಠಿಯಂ ಸೋಣ್ಡಿಂ, ಖಣನ್ತಿ ಯದಿ ತತ್ಥ ತು;

ರಜಂ ಪತತಿ ಚೇ ಪುಬ್ಬಂ, ಪಚ್ಛಾ ದೇವೋಭಿವಸ್ಸತಿ.

೯೫೯.

ಸೋಧೇತುಂ ಭಿನ್ದಿತುಂ ಅನ್ತೋ-ಚಾತುಮಾಸಂ ತು ವಟ್ಟತಿ;

ಚಾತುಮಾಸಕತೋ ಉದ್ಧಂ, ವಿಕೋಪೇತುಂ ನ ವಟ್ಟತಿ.

೯೬೦.

ವಾರಿನಾ ¶ ಪಠಮಂ ಪುಣ್ಣೇ, ಪಚ್ಛಾ ಪತತಿ ಚೇ ರಜಂ;

ತಂ ವಟ್ಟತಿ ವಿಕೋಪೇತುಂ, ತೋಯೇ ದೇವೋ ಹಿ ವಸ್ಸತಿ.

೯೬೧.

ಅಲ್ಲೀಯತಿ ಫುಸಾಯನ್ತೇ, ಪಿಟ್ಠಿಪಾಸಾಣಕೇ ರಜಂ;

ಚಾತುಮಾಸಚ್ಚಯೇ ತಮ್ಪಿ, ವಿಕೋಪೇತುಂ ನ ವಟ್ಟತಿ.

೯೬೨.

ಸಚೇ ಅಕತಪಬ್ಭಾರೇ, ವಮ್ಮಿಕೋ ಪನ ಉಟ್ಠಿತೋ;

ಯಥಾಸುಖಂ ವಿಕೋಪೇಯ್ಯ, ಚಾತುಮಾಸಚ್ಚಯೇಪಿ ಚ.

೯೬೩.

ಅಬ್ಭೋಕಾಸೇ ¶ ಸಚೇ ವಟ್ಠೋ, ಚಾತುಮಾಸಂ ತು ವಟ್ಟತಿ;

ರುಕ್ಖೇ ಉಪಚಿಕಾದೀನಂ, ಮತ್ತಿಕಾಯಪಿ ಸೋ ನಯೋ.

೯೬೪.

ಮೂಸಿಕುಕ್ಕರ ಗೋಕಣ್ಟ-ಗಣ್ಡುಪ್ಪಾದಮಲೇಸುಪಿ;

ಅಯಮೇವ ನಯೋ ವುತ್ತೋ, ಅಸಮ್ಬದ್ಧೇಸು ಭೂಮಿಯಾ.

೯೬೫.

ತೇಹೇವ ಸದಿಸಾ ಹೋನ್ತಿ, ಕಸಿನಙ್ಗಲಮತ್ತಿಕಾ;

ಅಚ್ಛಿನ್ನಾ ಭೂಮಿಸಮ್ಬನ್ಧಾ, ಸಾ ಜಾತಪಥವೀ ಸಿಯಾ.

೯೬೬.

ಸೇನಾಸನಮ್ಪಿ ಅಚ್ಛನ್ನಂ, ವಿನಟ್ಠಛದನಮ್ಪಿ ವಾ;

ಚಾತುಮಾಸಕತೋ ಉದ್ಧಂ, ಓವಟ್ಠಂ ನ ವಿಕೋಪಯೇ.

೯೬೭.

ತತೋ ‘‘ಗೋಪಾನಸಿಂ ಭಿತ್ತಿಂ, ಥಮ್ಭಂ ವಾ ಪದರತ್ಥರಂ;

ಗಣ್ಹಿಸ್ಸಾಮೀ’’ತಿ ಸಞ್ಞಾಯ, ಗಹೇತುಂ ಪನ ವಟ್ಟತಿ.

೯೬೮.

ಗಣ್ಹನ್ತಸ್ಸಿಟ್ಠಕಾದೀನಿ, ಸಚೇ ಪತತಿ ಮತ್ತಿಕಾ;

ಅನಾಪತ್ತಿ ಸಿಯಾಪತ್ತಿ, ಮತ್ತಿಕಂ ಯದಿ ಗಣ್ಹತಿ.

೯೬೯.

ಅತಿನ್ತೋ ಮತ್ತಿಕಾಪುಞ್ಜೋ, ಅನ್ತೋಗೇಹೇ ಸಚೇ ಸಿಯಾ;

ಅನೋವಟ್ಠೋ ಚ ಭಿಕ್ಖೂನಂ, ಸಬ್ಬದಾ ಹೋತಿ ಕಪ್ಪಿಯೋ.

೯೭೦.

ವುಟ್ಠೇ ಪುನ ಚ ಗೇಹಸ್ಮಿಂ, ಗೇಹಂ ಛಾದೇನ್ತಿ ತಂ ಸಚೇ;

ಚಾತುಮಾಸಚ್ಚಯೇ ಸಬ್ಬೋ, ತಿನ್ತೋ ಹೋತಿ ಅಕಪ್ಪಿಯೋ.

೯೭೧.

ಯತ್ತಕಂ ತತ್ಥ ತಿನ್ತಂ ತು, ತತ್ತಕಂ ಹೋತ್ಯಕಪ್ಪಿಯಂ;

ಅತಿನ್ತಂ ತತ್ಥ ಯಂ ಯಂ ತು, ತಂ ತಂ ಹೋತಿ ಹಿ ಕಪ್ಪಿಯಂ.

೯೭೨.

ತೇಮಿತೋ ¶ ವಾರಿನಾ ಸೋ ಚೇ, ಏಕಾಬದ್ಧೋವ ಭೂಮಿಯಾ;

ಪಥವೀ ಚೇವ ಸಾ ಜಾತಾ, ನ ವಟ್ಟತಿ ತತೋ ಪರಂ.

೯೭೩.

ಅಬ್ಭೋಕಾಸೇ ಚ ಪಾಕಾರೋ, ಓವಟ್ಠೋ ಮತ್ತಿಕಾಮಯೋ;

ಚಾತುಮಾಸಚ್ಚಯೇ ‘‘ಜಾತಾ, ಪಥವೀ’’ತಿ ಪವುಚ್ಚತಿ.

೯೭೪.

ತತ್ಥ ಲಗ್ಗಂ ರಜಂ ಸಣ್ಹಂ, ಅಘಂಸನ್ತೋವ ಮತ್ತಸೋ;

ಛುಪಿತ್ವಾ ಅಲ್ಲಹತ್ಥೇನ, ಸಚೇ ಗಣ್ಹಾತಿ ವಟ್ಟತಿ.

೯೭೫.

ಸಚೇ ಇಟ್ಠಕಪಾಕಾರೋ, ಯೇಭುಯ್ಯಕಥಲೇ ಪನ;

ಠಾನೇ ತಿಟ್ಠತಿ ಸೋ ತಸ್ಮಾ, ವಿಕೋಪೇಯ್ಯ ಯಥಾಸುಖಂ.

೯೭೬.

ಅಬ್ಭೋಕಾಸೇ ಠಿತಂ ಥಮ್ಭಂ, ಚಾಲೇತ್ವಾ ಪನಿತೋ ಚಿತೋ;

ಪಥವಿಂ ತು ವಿಕೋಪೇತ್ವಾ, ಗಹೇತುಂ ನ ಚ ವಟ್ಟತಿ.

೯೭೭.

ಅಞ್ಞಮ್ಪಿ ¶ ಸುಕ್ಖರುಕ್ಖಂ ವಾ, ಖಾಣುಕಂ ವಾಪಿ ಗಣ್ಹತೋ;

ಅಯಮೇವ ನಯೋ ದೋಸೋ, ಉಜುಮುದ್ಧರತೋ ನ ಚ.

೯೭೮.

ಪಾಸಾಣಂ ಯದಿ ವಾ ರುಕ್ಖಂ, ಉಚ್ಚಾಲೇತ್ವಾ ಪವಟ್ಟತಿ;

ನ ದೋಸೋ ಸುದ್ಧಚಿತ್ತಸ್ಸ, ಸಚೇ ಪಥವಿ ಭಿಜ್ಜತಿ.

೯೭೯.

ಫಾಲೇನ್ತಾನಮ್ಪಿ ದಾರೂನಿ, ಸಾಖಾದೀನಿ ಚ ಕಡ್ಢತೋ;

ಅಯಮೇವ ನಯೋ ವುತ್ತೋ, ಭೂಮಿಯಂ ಸುದ್ಧಚೇತಸೋ.

೯೮೦.

ಕಣ್ಟಕಂ ಸೂಚಿಮಟ್ಠಿಂ ವಾ, ಖಿಲಂ ವಾ ಭೂಮಿಯಂ ಪನ;

ಆಕೋಟೇತುಂ ಪವೇಸೇತುಂ, ಭಿಕ್ಖುನೋ ನ ಚ ವಟ್ಟತಿ.

೯೮೧.

‘‘ಅಹಂ ಪಸ್ಸಾವಧಾರಾಯ, ಭಿನ್ದಿಸ್ಸಾಮೀ’’ತಿ ಮೇದಿನಿಂ;

ಭಿಕ್ಖುಸ್ಸ ಪನ ಪಸ್ಸಾವ-ಮೇವಂ ಕಾತುಂ ನ ವಟ್ಟತಿ.

೯೮೨.

ಅನಾಪತ್ತಿ ಕರೋನ್ತಸ್ಸ, ಸಚೇ ಭಿಜ್ಜತಿ ಮೇದಿನೀ;

ಸಮಜ್ಜತೋ ಸಮಂ ಕಾತುಂ, ಘಂಸಿತುಂ ನ ಚ ವಟ್ಟತಿ.

೯೮೩.

ಪಾದಙ್ಗುಟ್ಠೇನ ವಾ ಭೂಮಿಂ, ಲಿಖಿತುಮ್ಪಿ ನ ವಟ್ಟತಿ;

ಭಿನ್ದನ್ತೇನ ಚ ಪಾದೇಹಿ, ತಥಾ ಚಙ್ಕಮಿತುಮ್ಪಿ ವಾ.

೯೮೪.

ಪಥವಿಂ ಅಲ್ಲಹತ್ಥೇನ, ಛುಪಿತ್ವಾ ಸುಖುಮಂ ರಜಂ;

ಅಘಂಸನ್ತೋ ಗಹೇತ್ವಾ ಚೇ, ಹತ್ಥಂ ಧೋವತಿ ವಟ್ಟತಿ.

೯೮೫.

ಸಯಂ ¶ ದಹತಿ ಚೇ ಭೂಮಿಂ, ದಹಾಪೇತಿ ಪರೇಹಿ ವಾ;

ಆಪತ್ತನ್ತಮಸೋ ಪತ್ತಂ, ದಹನ್ತಸ್ಸಾಪಿ ಭಿಕ್ಖುನೋ.

೯೮೬.

ಠಾನೇಸು ಯತ್ತಕೇಸ್ವಗ್ಗಿಂ, ದೇತಿ ದಾಪೇತಿ ವಾ ಪನ;

ತತ್ತಕಾನೇವ ಭಿಕ್ಖುಸ್ಸ, ಹೋನ್ತಿ ಪಾಚಿತ್ತಿಯಾನಿಪಿ.

೯೮೭.

ಠಪೇತುಂ ಭಿಕ್ಖುನೋ ಅಗ್ಗಿಂ, ಭೂಮಿಯಂ ನ ಚ ವಟ್ಟತಿ;

ಕಪಾಲೇ ಪತ್ತಪಚನೇ, ಠಪೇತುಂ ಪನ ವಟ್ಟತಿ.

೯೮೮.

ಅಗ್ಗಿಂ ಉಪರಿ ದಾರೂನಂ, ಠಪೇತುಂ ನ ಚ ವಟ್ಟತಿ;

ದಹನ್ತೋ ತಾನಿ ಗನ್ತ್ವಾ ಸೋ, ಭೂಮಿಂ ದಹತಿ ಚೇ ಪನ.

೯೮೯.

ಏಸೇವ ಚ ನಯೋ ವುತ್ತೋ, ಇಟ್ಠಕಾವಾಸಕಾದಿಸು;

ಠಪೇತುಂ ಇಟ್ಠಕಾದೀನಂ, ಮತ್ಥಕೇಸ್ವೇವ ವಟ್ಟತಿ.

೯೯೦.

ಕಸ್ಮಾ ಪನಾತಿ ಚೇ? ತೇಸ-ಮನುಪಾದಾನಭಾವತೋ;

ಖಾಣುಕೇ ಸುಕ್ಖರುಕ್ಖೇ ವಾ, ಅಗ್ಗಿಂ ದಾತುಂ ನ ವಟ್ಟತಿ.

೯೯೧.

ಅನಾಪತ್ತಿ ¶ ತಿಣುಕ್ಕಂ ತು, ಗಹೇತ್ವಾ ಪನ ಗಚ್ಛತೋ;

ಡಯ್ಹಮಾನೇ ತು ಹತ್ಥಸ್ಮಿಂ, ಸಚೇ ಪಾತೇತಿ ಭೂಮಿಯಂ.

೯೯೨.

ಪುನ ತಂ ಪತಿತಟ್ಠಾನೇ, ದತ್ವಾ ತಸ್ಸ ಪನಿನ್ಧನಂ;

ಅಗ್ಗಿಂ ವಟ್ಟತಿ ಕಾತುನ್ತಿ, ಮಹಾಪಚ್ಚರಿಯಂ ರುತಂ.

೯೯೩.

ತಸ್ಸಾಪಥವಿಯಂಯೇವ, ಪಥವೀತಿ ಚ ಸಞ್ಞಿನೋ;

ವಿಮತಿಸ್ಸುಭಯತ್ಥಾಪಿ, ದುಕ್ಕಟಂ ಪರಿಯಾಪುತಂ.

೯೯೪.

ಅನಾಪತ್ತಿ ‘‘ಇಮಂ ಜಾನ, ಇಮಮಾಹರ ದೇಹಿ’’ತಿ;

ವದನ್ತಸ್ಸ, ಸಚಿತ್ತಞ್ಚ, ತಿಸಮುಟ್ಠಾನಮೇವ ಚ.

ಪಥವೀಖಣನಕಥಾ.

ಮುಸಾವಾದವಗ್ಗೋ ಪಠಮೋ.

೯೯೫.

ಭವನ್ತಸ್ಸ ¶ ಚ ಭೂತಸ್ಸ, ಭೂತಗಾಮಸ್ಸ ಭಿಕ್ಖುನೋ;

ಪಾತಬ್ಯತಾನಿಮಿತ್ತಂ ತು, ಪಾಚಿತ್ತಿಯಮುದೀರಿತಂ.

೯೯೬.

ಉದಕಟ್ಠೋ ಥಲಟ್ಠೋತಿ, ದುವಿಧೋ ಹೋತಿ ಸೋ ಪನ;

ತಿಲಬೀಜಾದಿಕೋ ತತ್ಥ, ಸಪಣ್ಣೋಪಿ ಅಪಣ್ಣಕೋ.

೯೯೭.

ಉದಕಟ್ಠೋತಿ ವಿಞ್ಞೇಯ್ಯೋ, ಸಬ್ಬೋ ಸೇವಾಲಜಾತಿಕೋ;

ವಿಕೋಪೇನ್ತಸ್ಸ ತಂ ಸಬ್ಬಂ, ತಸ್ಸ ಪಾಚಿತ್ತಿಯಂ ಸಿಯಾ.

೯೯೮.

ವಿಯೂಹಿತ್ವಾ ತು ಹತ್ಥೇನ, ನ್ಹಾಯಿತುಂ ಪನ ವಟ್ಟತಿ;

ಹೋತಿ ತಸ್ಸ ಚ ಸಬ್ಬಮ್ಪಿ, ಠಾನಞ್ಹಿ ಸಕಲಂ ಜಲಂ.

೯೯೯.

ಉದಕೇನ ವಿನಾ ಚೇಚ್ಚ, ತಂ ಪನುದ್ಧರಿತುಂ ಜಲಾ;

ನ ಚ ವಟ್ಟತಿ ಭಿಕ್ಖುಸ್ಸ, ಠಾನಸಙ್ಕಮನಞ್ಹಿ ತಂ.

೧೦೦೦.

ಉದಕೇನುಕ್ಖಿಪಿತ್ವಾ ತಂ, ಪಕ್ಖಿಪನ್ತಸ್ಸ ವಾರಿಸು;

ವಟ್ಟತೀತಿ ಚ ನಿದ್ದಿಟ್ಠಂ, ಸಬ್ಬಅಟ್ಠಕಥಾಸುಪಿ.

೧೦೦೧.

ಜಲೇ ವಲ್ಲಿತಿಣಾದೀನಿ, ಉದ್ಧರನ್ತಸ್ಸ ತೋಯತೋ;

ವಿಕೋಪೇನ್ತಸ್ಸ ವಾ ತತ್ಥ, ಹೋತಿ ಪಾಚಿತ್ತಿ ಭಿಕ್ಖುನೋ.

೧೦೦೨.

ಪರೇಹುಪ್ಪಾಟಿತಾನೇತ್ಥ, ವಿಕೋಪೇನ್ತಸ್ಸ ದುಕ್ಕಟಂ;

ಗಚ್ಛನ್ತಿ ಹಿ ಯತೋ ತಾನಿ, ಬೀಜಗಾಮೇನ ಸಙ್ಗಹಂ.

೧೦೦೩.

ಥಲಟ್ಠೇ ¶ ಛಿನ್ನರುಕ್ಖಾನಂ, ಠಿತೋ ಹರಿತಖಾಣುಕೋ;

ಉದ್ಧಂ ವಡ್ಢನಕೋ ತಸ್ಸ, ಭೂತಗಾಮೇನ ಸಙ್ಗಹೋ.

೧೦೦೪.

ನಾಳಿಕೇರಾದಿಕಾನಮ್ಪಿ, ಖಾಣು ಉದ್ಧಂ ನ ವಡ್ಢತಿ;

ತಸ್ಮಾ ತಸ್ಸ ಕತೋ ಹೋತಿ, ಬೀಜಗಾಮೇನ ಸಙ್ಗಹೋ.

೧೦೦೫.

ತಥಾ ಕದಲಿಯಾ ಖಾಣು, ಫಲಿತಾಯ ಪಕಾಸಿತೋ;

ಅಫಲಿತಾಯ ಯೋ ಖಾಣು, ಭೂತಗಾಮೇನ ಸೋ ಮತೋ.

೧೦೦೬.

ಫಲಿತಾ ಕದಲೀ ಯಾವ, ನೀಲಪಣ್ಣಾ ಚ ತಾವ ಸಾ;

ನಳವೇಳುತಿಣಾದೀನ-ಮಯಮೇವ ವಿನಿಚ್ಛಯೋ.

೧೦೦೭.

ಅಗ್ಗತೋ ¶ ಪನ ಪಟ್ಠಾಯ, ಯದಾಯಂ ವೇಳು ಸುಸ್ಸತಿ;

ತದಾ ಸಙ್ಗಹಿತೋ ಹೋತಿ, ಬೀಜಗಾಮೇನ ನಾಮಸೋ.

೧೦೦೮.

ಇನ್ದಸಾಲಾದಿರುಕ್ಖಾನಂ, ಬೀಜಗಾಮೇನ ಸಙ್ಗಹೋ;

ಛಿನ್ದಿತ್ವಾ ಠಪಿತಾನಂ ತು, ವಿಞ್ಞೇಯ್ಯೋ ವಿನಯಞ್ಞುನಾ.

೧೦೦೯.

ಮಣ್ಡಪಾದೀನಮತ್ಥಾಯ, ನಿಕ್ಖಣನ್ತಿ ಚ ತೇ ಸಚೇ;

ನಿಗ್ಗತೇ ಮೂಲಪಣ್ಣಸ್ಮಿಂ, ಭೂತಗಾಮೇನ ಸಙ್ಗಹೋ.

೧೦೧೦.

ಮೂಲಮತ್ತೇಪಿ ವಾ ಯೇಸಂ, ಪಣ್ಣಮತ್ತೇಪಿ ವಾ ಪನ;

ನಿಗ್ಗತೇಪಿ ಕತೋ ತೇಸಂ, ಬೀಜಗಾಮೇನ ಸಙ್ಗಹೋ.

೧೦೧೧.

ಸಕನ್ದಾ ಪನ ತಾಲಟ್ಠಿ, ಬೀಜಗಾಮೋತಿ ವುಚ್ಚತಿ;

ಪತ್ತವಟ್ಟಿ ಯದಾ ನೀಲಾ, ನಿಗ್ಗಚ್ಛತಿ ತದಾ ನ ಚ.

೧೦೧೨.

ನಾಳಿಕೇರತಚಂ ಭಿತ್ವಾ, ದನ್ತಸೂಚೀವ ಅಙ್ಕುರೋ;

ನಿಗ್ಗಚ್ಛತಿ ತದಾ ಸೋಪಿ, ಬೀಜಗಾಮೋತಿ ವುಚ್ಚತಿ.

೧೦೧೩.

ಮಿಗಸಿಙ್ಗಸಮಾನಾಯ, ಸತಿಯಾ ಪತ್ತವಟ್ಟಿಯಾ;

ಅನಿಗ್ಗತೇಪಿ ಮೂಲಸ್ಮಿಂ, ಭೂತಗಾಮೋತಿ ವುಚ್ಚತಿ.

೧೦೧೪.

ನ ಹೋನ್ತಿ ಹರಿತಾ ಯಾವ, ವೀಹಿಆದೀನಮಙ್ಕುರಾ;

ನಿಗ್ಗತೇಸುಪಿ ಪಣ್ಣೇಸು, ಬೀಜಗಾಮೇನ ಸಙ್ಗಹೋ.

ಚತ್ತಾರೋ ಭಾಣವಾರಾ ನಿಟ್ಠಿತಾ.

೧೦೧೫.

ಅಮ್ಬಜಮ್ಬುಟ್ಠಿಕಾದೀನ-ಮೇಸೇವ ಚ ವಿನಿಚ್ಛಯೋ;

ವನ್ದಾಕಾ ವಾಪಿ ಅಞ್ಞಂ ವಾ, ರುಕ್ಖೇ ಜಾಯತಿ ಯಂ ಪನ.

೧೦೧೬.

ರುಕ್ಖೋವಸ್ಸ ¶ ಸಿಯಾ ಠಾನಂ, ವಿಕೋಪೇತುಂ ನ ವಟ್ಟತಿ;

ಅಮೂಲವಲ್ಲಿಆದೀನ-ಮಯಮೇವ ವಿನಿಚ್ಛಯೋ.

೧೦೧೭.

ಪಾಕಾರಾದೀಸು ಸೇವಾಲೋ, ಅಗ್ಗಬೀಜನ್ತಿ ವುಚ್ಚತಿ;

ಯಾವ ದ್ವೇ ತೀಣಿ ಪತ್ತಾನಿ, ನ ಸಞ್ಜಾಯನ್ತಿ ತಾವ ಸೋ.

೧೦೧೮.

ಪತ್ತೇಸು ಪನ ಜಾತೇಸು, ವತ್ಥು ಪಾಚಿತ್ತಿಯಸ್ಸ ಸೋ;

ಘಂಸಿತ್ವಾ ಪನ ತಂ ತಸ್ಮಾ, ಅಪನೇತುಂ ನ ವಟ್ಟತಿ.

೧೦೧೯.

ಸೇವಾಲೇ ¶ ಬಹಿ ಪಾನೀಯ-ಘಟಾದೀನಂ ತು ದುಕ್ಕಟಂ;

ಅಬ್ಬೋಹಾರೋವ ಸೋ ಅನ್ತೋ, ಪೂವಾದೀಸುಪಿ ಕಣ್ಣಕಂ.

೧೦೨೦.

ಪಾಸಾಣದದ್ದುಸೇವಾಲ-ಸೇಲೇಯ್ಯಪ್ಪಭುತೀನಿ ಚ;

ಹೋನ್ತಿ ದುಕ್ಕಟವತ್ಥೂನಿ, ಅಪತ್ತಾನೀತಿ ನಿದ್ದಿಸೇ.

೧೦೨೧.

ಪುಪ್ಫಿತಂ ತು ಅಹಿಚ್ಛತ್ತಂ, ಅಬ್ಬೋಹಾರಿಕತಂ ಗತಂ;

ಸಚೇ ತಂ ಮಕುಳಂ ಹೋತಿ, ಹೋತಿ ದುಕ್ಕಟವತ್ಥುಕಂ.

೧೦೨೨.

ರುಕ್ಖೇ ತಚಂ ವಿಕೋಪೇತ್ವಾ, ತಥಾ ಪಪ್ಪಟಿಕಮ್ಪಿ ಚ;

ನಿಯ್ಯಾಸಮ್ಪಿ ಪನಲ್ಲಸ್ಮಿಂ, ಗಹೇತುಂ ನ ಚ ವಟ್ಟತಿ.

೧೦೨೩.

ನುಹಿಆದೀಸು ರುಕ್ಖೇಸು, ತಾಲಪಣ್ಣಾದಿಕೇಸು ವಾ;

ಲಿಖತೋ ತತ್ಥಜಾತೇಸು, ಪಾಚಿತ್ತಿಯಮುದೀರಯೇ.

೧೦೨೪.

ಪುಪ್ಫಂ ಪಣ್ಡುಪಲಾಸಂ ವಾ, ಫಲಂ ವಾ ಪಕ್ಕಮೇವ ವಾ;

ಪಾತೇನ್ತಸ್ಸ ಚ ಚಾಲೇತ್ವಾ, ಪಾಚಿತ್ತಿಯಮುದೀರಿತಂ.

೧೦೨೫.

ನಾಮೇತ್ವಾ ಫಲಿನಿಂ ಸಾಖಂ, ದಾತುಂ ವಟ್ಟತಿ ಗಣ್ಹತೋ;

ಸಯಂ ಖಾದಿತುಕಾಮೋ ಚೇ, ದಾತುಮೇವಂ ನ ವಟ್ಟತಿ.

೧೦೨೬.

ಉಕ್ಖಿಪಿತ್ವಾ ಪರಂ ಕಞ್ಚಿ, ಗಾಹಾಪೇತುಮ್ಪಿ ವಟ್ಟತಿ;

ಪುಪ್ಫಾನಿ ಓಚಿನನ್ತೇಸು, ಅಯಮೇವ ವಿನಿಚ್ಛಯೋ.

೧೦೨೭.

ಯೇಸಂ ರುಹತಿ ರುಕ್ಖಾನಂ, ಸಾಖಾ ತೇಸಮ್ಪಿ ಸಾಖಿನಂ;

ಕಪ್ಪಿಯಂ ತಮಕಾರೇತ್ವಾ, ವಿಕೋಪೇನ್ತಸ್ಸ ದುಕ್ಕಟಂ.

೧೦೨೮.

ಅಯಮೇವ ನಯೋ ಅಲ್ಲ-ಸಿಙ್ಗಿವೇರಾದಿಕೇಸುಪಿ;

ದುಕ್ಕಟಂ ಬೀಜಗಾಮೇಸು, ನಿದ್ದಿಟ್ಠತ್ತಾ ಮಹೇಸಿನಾ.

೧೦೨೯.

‘‘ರುಕ್ಖಂ ಛಿನ್ದ ಲತಂ ಛಿನ್ದ, ಕನ್ದಂ ಮೂಲಮ್ಪಿ ಉದ್ಧರ;

ಉಪ್ಪಾಟೇಹೀ’’ತಿ ವತ್ತುಮ್ಪಿ, ವಟ್ಟತೇವಾನಿಯಾಮತೋ.

೧೦೩೦.

‘‘ಅಮ್ಬಂ ¶ ಜಮ್ಬುಮ್ಪಿ ನಿಮ್ಬಂ ವಾ, ಛಿನ್ದ ಭಿನ್ದುದ್ಧರಾ’’ತಿ ವಾ;

ಗಹೇತ್ವಾ ಪನ ನಾಮಮ್ಪಿ, ವಟ್ಟತೇವಾನಿಯಾಮತೋ.

೧೦೩೧.

‘‘ಇಮಂ ¶ ರುಕ್ಖಂ ಇಮಂ ವಲ್ಲಿಂ, ಇಮಂ ಛಲ್ಲಿಂ ಇಮಂ ಲತಂ;

ಛಿನ್ದ ಭಿನ್ದಾ’’ತಿ ವಾ ವತ್ತುಂ, ನಿಯಮೇತ್ವಾ ನ ವಟ್ಟತಿ.

೧೦೩೨.

ಪೂರೇತ್ವಾ ಉಚ್ಛುಖಣ್ಡಾನಂ, ಪಚ್ಛಿಯೋ ಆಹರನ್ತಿ ಚೇ;

ಸಬ್ಬಮೇವ ಕತಂ ಹೋತಿ, ಏಕಸ್ಮಿಂ ಕಪ್ಪಿಯೇ ಕತೇ.

೧೦೩೩.

ಏಕತೋ ಪನ ಬದ್ಧಾನಿ, ಉಚ್ಛುದಾರೂನಿ ಹೋನ್ತಿ ಚೇ;

ಕಪ್ಪಿಯಂ ಕರೋನ್ತೋ ಪನ, ದಾರುಂ ವಿಜ್ಝತಿ ವಟ್ಟತಿ.

೧೦೩೪.

ವಲ್ಲಿಯಾ ರಜ್ಜುಯಾ ವಾಪಿ, ಯಾಯ ಬದ್ಧಾನಿ ತಾನಿ ಹಿ;

ಭಾಜನೇನ ಸಮಾನತ್ತಾ, ತಂ ವಿಜ್ಝತಿ ನ ವಟ್ಟತಿ.

೧೦೩೫.

ಭತ್ತಂ ಮರಿಚಪಕ್ಕೇಹಿ, ಮಿಸ್ಸೇತ್ವಾ ಆಹರನ್ತಿ ಚೇ;

ಏಕಸಿತ್ಥೇಪಿ ಭತ್ತಸ್ಸ, ಸಚೇ ವಿಜ್ಝತಿ ವಟ್ಟತಿ.

೧೦೩೬.

ಅಯಮೇವ ನಯೋ ವುತ್ತೋ, ತಿಲತಣ್ಡುಲಕಾದಿಸು;

ಏಕಾಬದ್ಧೇ ಕಪಿತ್ಥೇಪಿ, ಕಟಾಹೇ ಕಪ್ಪಿಯಂ ಕರೇ.

೧೦೩೭.

ಕಟಾಹಂ ಯದಿ ಮುಞ್ಚಿತ್ವಾ, ಅನ್ತೋ ಚರತಿ ಮಿಞ್ಜಕಂ;

ಭಿನ್ದಾಪೇತ್ವಾ ಕಪಿತ್ಥಂ ತಂ, ಕಾರೇತಬ್ಬಂ ತು ಕಪ್ಪಿಯಂ.

೧೦೩೮.

ಅಭೂತಗಾಮಬೀಜೇಸು, ಭೂತಗಾಮಾದಿಸಞ್ಞಿನೋ;

ತತ್ಥ ವೇಮತಿಕಸ್ಸಾಪಿ, ಹೋತಿ ಆಪತ್ತಿ ದುಕ್ಕಟಂ.

೧೦೩೯.

ಅತಥಾಸಞ್ಞಿನೋ ತತ್ಥ, ಅಸಞ್ಚಿಚ್ಚಾಸತಿಸ್ಸ ಚ;

ಉಮ್ಮತ್ತಕಾದಿಕಾನಞ್ಚ, ಅನಾಪತ್ತಿ ಪಕಾಸಿತಾ.

೧೦೪೦.

ಇದಞ್ಚ ತಿಸಮುಟ್ಠಾನಂ, ಕ್ರಿಯಂ ಸಞ್ಞಾವಿಮೋಕ್ಖಕಂ;

ಕಾಯಕಮ್ಮಂ ವಚೀಕಮ್ಮಂ, ತಿಚಿತ್ತಞ್ಚ ತಿವೇದನಂ.

ಭೂತಗಾಮಕಥಾ.

೧೦೪೧.

ಕತೇ ಸಙ್ಘೇನ ಕಮ್ಮಸ್ಮಿಂ, ಅಞ್ಞವಾದವಿಹೇಸಕೇ;

ತಥಾ ಪುನ ಕರೋನ್ತಸ್ಸ, ಹೋತಿ ಪಾಚಿತ್ತಿಯದ್ವಯಂ.

೧೦೪೨.

ತಿಕಪಾಚಿತ್ತಿಯಂ ¶ ಧಮ್ಮೇ, ಅಧಮ್ಮೇ ತಿಕದುಕ್ಕಟಂ;

ಕಮ್ಮೇ ಅರೋಪಿತೇ ಚೇವಂ, ವದನ್ತಸ್ಸ ಚ ದುಕ್ಕಟಂ.

೧೦೪೩.

ಆಪತ್ತಿಂ ¶ ವಾಪಿ ಆಪನ್ನಂ, ಅಜಾನನ್ತಸ್ಸ, ‘‘ಭಣ್ಡನಂ;

ಭವಿಸ್ಸತೀ’’ತಿ ಸಞ್ಞಿಸ್ಸ, ಗಿಲಾನಸ್ಸ ನ ದೋಸತಾ.

೧೦೪೪.

ಅದಿನ್ನಾದಾನತುಲ್ಯಾವ, ಸಮುಟ್ಠಾನಾದಯೋ ನಯಾ;

ಕ್ರಿಯಾಕ್ರಿಯಮಿದಂ ವುತ್ತಂ, ವೇದನಾ ದುಕ್ಖವೇದನಾ.

ಅಞ್ಞವಾದಕಥಾ.

೧೦೪೫.

ಅಯಸಂ ಕತ್ತುಕಾಮೋವ, ಸಮ್ಮತಸ್ಸ ಹಿ ಭಿಕ್ಖುನೋ;

ವದನ್ತೋ ಉಪಸಮ್ಪನ್ನೇ, ಉಜ್ಝಾಪೇತಿ ಚ ಖೀಯತಿ.

೧೦೪೬.

ತಸ್ಮಿಂ ವತ್ಥುದ್ವಯೇ ತಸ್ಸ, ಹೋತಿ ಪಾಚಿತ್ತಿಯದ್ವಯಂ;

ತಿಕಪಾಚಿತ್ತಿಯಂ ಧಮ್ಮೇ, ಅಧಮ್ಮೇ ತಿಕದುಕ್ಕಟಂ.

೧೦೪೭.

ಅವಣ್ಣಂನುಪಸಮ್ಪನ್ನ-ಸನ್ತಿಕೇ ಪನ ಭಿಕ್ಖುನೋ;

ಅಸಮ್ಮತಸ್ಸ ಭಿಕ್ಖುಸ್ಸ, ಭಾಸತೋ ಯಸ್ಸ ಕಸ್ಸಚಿ.

೧೦೪೮.

ಸಾಮಣೇರಸ್ಸ ವಾ ವಣ್ಣಂ, ಸಮ್ಮತಾಸಮ್ಮತಸ್ಸಪಿ;

ವದತೋ ದುಕ್ಕಟಂ ಹೋತಿ, ಯಸ್ಸ ಕಸ್ಸಚಿ ಸನ್ತಿಕೇ.

೧೦೪೯.

ಛನ್ದಾದೀನಂ ವಸೇನೇವ, ಕರೋನ್ತಂ ಭಣತೋ ಪನ;

ಅನಾಪತ್ತಿ ಕ್ರಿಯಾಸೇಸ-ಮನನ್ತರಸಮಂ ಮತಂ.

ಉಜ್ಝಾಪನಕಥಾ.

೧೦೫೦.

ಅಜ್ಝೋಕಾಸೇ ತು ಮಞ್ಚಾದಿಂ, ಅತ್ತನೋ ವಾ ಪರಸ್ಸ ವಾ;

ಅತ್ಥಾಯ ಸನ್ಥರಾಪೇತ್ವಾ, ಸನ್ಥರಿತ್ವಾಪಿ ವಾ ಪನ.

೧೦೫೧.

ನೇವುದ್ಧರೇಯ್ಯ ಸಙ್ಘಸ್ಸ, ಉದ್ಧರಾಪೇಯ್ಯ ವಾ ನ ತಂ;

ಪಕ್ಕಮನ್ತೋ ಸಚೇ ತಸ್ಸ, ಹೋತಿ ಪಾಚಿತ್ತಿ ಭಿಕ್ಖುನೋ.

೧೦೫೨.

ವಸ್ಸಿಕೇ ¶ ಚತುರೋ ಮಾಸೇ, ಸಚೇ ದೇವೋ ನ ವಸ್ಸತಿ;

ಅಜ್ಝೋಕಾಸೇ ತಥಾ ಚಾಪಿ, ಠಪೇತುಂ ನ ಚ ವಟ್ಟತಿ.

೧೦೫೩.

ಯತ್ಥ ವಸ್ಸತಿ ಹೇಮನ್ತೇ, ಚತ್ತಾರೋ ಅಪರೇಪಿ ಚ;

ಠಪೇತುಂ ತತ್ಥ ಮಞ್ಚಾದಿಂ, ಅಟ್ಠ ಮಾಸೇ ನ ವಟ್ಟತಿ.

೧೦೫೪.

ಕಾಕಾದೀನಂ ನಿವಾಸಸ್ಮಿಂ, ರುಕ್ಖಮೂಲೇ ಕದಾಚಿಪಿ;

ಮಞ್ಚಾದಿಂ ಪನ ಸಙ್ಘಸ್ಸ, ಠಪೇತುಂ ನ ಚ ವಟ್ಟತಿ.

೧೦೫೫.

ಅಞ್ಞಸ್ಸತ್ಥಾಯ ¶ ಯಂ ಕಿಞ್ಚಿ, ಸನ್ಥತಂ ಯದಿ ಸಙ್ಘಿಕಂ;

ಯತ್ಥ ಕತ್ಥಚಿ ವಾ ಠಾನೇ, ಯೇನ ಕೇನಚಿ ಭಿಕ್ಖುನಾ.

೧೦೫೬.

ಯಾವ ಸೋ ನ ನಿಸೀದೇಯ್ಯ, ‘‘ಗಚ್ಛಾ’’ತಿ ನ ವದೇಯ್ಯ ವಾ;

ತಾವ ಸನ್ಥಾರಕಸ್ಸೇವ, ಭಾರೋ ತನ್ತಿ ಪವುಚ್ಚತಿ.

೧೦೫೭.

ಸಚೇ ತಂ ಸಾಮಣೇರೇನ, ಸನ್ಥರಾಪೇತಿ ಸನ್ಥತಂ;

ಸನ್ಥರಾಪಿತಭಿಕ್ಖುಸ್ಸ, ಪಲಿಬೋಧೋತಿ ದೀಪಿತೋ.

೧೦೫೮.

ಸನ್ಥತಂ ಭಿಕ್ಖುನಾ ತಂ ಚೇ, ಭಾರೋ ತಸ್ಸೇವ ತಾವ ತಂ;

ಯಾವ ಆಣಾಪಕೋ ತತ್ಥ, ಆಗನ್ತ್ವಾ ನ ನಿಸೀದತಿ.

೧೦೫೯.

ಭಿಕ್ಖುಂ ವಾ ಸಾಮಣೇರಂ ವಾ, ಆರಾಮಿಕಮುಪಾಸಕಂ;

ಅನಾಪುಚ್ಛಾ ನಿಯ್ಯಾತೇತ್ವಾ, ಸಙ್ಘಿಕಂ ಸಯನಾಸನಂ.

೧೦೬೦.

ಲೇಡ್ಡುಪ್ಪಾತಮತಿಕ್ಕಮ್ಮ, ಗಚ್ಛತೋ ಪಠಮೇ ಪದೇ;

ದುಕ್ಕಟಂ, ದುತಿಯೇ ವಾರೇ, ಪಾಚಿತ್ತಿಯಮುದೀರಿತಂ.

೧೦೬೧.

ಠತ್ವಾ ಭೋಜನಸಾಲಾಯಂ, ವತ್ವಾ ಯೋ ಸಾಮಣೇರಕಂ;

ಅಸುಕಸ್ಮಿಂ ದಿವಾಟ್ಠಾನೇ, ಪಞ್ಞಾಪೇಹೀತಿ ಮಞ್ಚಕಂ.

೧೦೬೨.

ನಿಕ್ಖಮಿತ್ವಾ ಸಚೇ ತಸ್ಮಾ, ಠಾನಾ ಅಞ್ಞತ್ಥ ಗಚ್ಛತಿ;

ಪಾದುದ್ಧಾರೇನ ಸೋ ಭಿಕ್ಖು, ಕಾರೇತಬ್ಬೋತಿ ದೀಪಿತೋ.

೧೦೬೩.

ತಿಕಪಾಚಿತ್ತಿಯಂ ವುತ್ತಂ, ತಿಕಾತೀತೇನ ಸತ್ಥುನಾ;

ತಥಾ ಪುಗ್ಗಲಿಕೇ ತೇನ, ದೀಪಿತಂ ತಿಕದುಕ್ಕಟಂ.

೧೦೬೪.

ಚಿಮಿಲಿಂ ತಟ್ಟಿಕಂ ಚಮ್ಮಂ, ಫಲಕಂ ಪಾದಪುಞ್ಛನಿಂ;

ಭೂಮತ್ಥರಣಕಂ ವಾಪಿ, ಉತ್ತರತ್ಥರಣಮ್ಪಿ ವಾ.

೧೦೬೫.

ದಾರುಮತ್ತಿಕಭಣ್ಡಾನಿ ¶ , ಪತ್ತಾಧಾರಕಮೇವ ವಾ;

ಅಬ್ಭೋಕಾಸೇ ಠಪೇತ್ವಾ ತಂ, ಗಚ್ಛತೋ ಹೋತಿ ದುಕ್ಕಟಂ.

೧೦೬೬.

ಸಚೇ ಆರಞ್ಞಕೇನಾಪಿ, ಅನೋವಸ್ಸೇ ಚ ನೋ ಸತಿ;

ಲಗ್ಗೇತ್ವಾ ಪನ ರುಕ್ಖಸ್ಮಿಂ, ಗನ್ತಬ್ಬಂ ತು ಯಥಾಸುಖಂ.

೧೦೬೭.

ಯಥಾ ಉಪಚಿಕಾದೀಹಿ, ನ ಖಜ್ಜತಿ ನ ಲುಜ್ಜತಿ;

ತಥಾ ಕತ್ವಾಪಿ ತಂ ಸಬ್ಬಂ, ಗನ್ತುಂ ಪನ ಚ ವಟ್ಟತಿ.

೧೦೬೮.

ಅನಾಪತ್ತುದ್ಧರಾಪೇತ್ವಾ, ಆಪುಚ್ಛಿತ್ವಾಪಿ ಗಚ್ಛತೋ;

ಅತ್ತನೋ ಸನ್ತಕೇ ರುದ್ಧೇ, ಆಪದಾಸುಪಿ ಭಿಕ್ಖುನೋ.

೧೦೬೯.

ಸಮುಟ್ಠಾನಾದಯೋ ¶ ಸಬ್ಬೇ, ಕಥಿನೇನ ಸಮಾ ಮತಾ;

ಕ್ರಿಯಾಕ್ರಿಯಮಿದಂ ವುತ್ತ-ಮಯಮೇವ ವಿಸೇಸತಾ.

ಪಠಮಸೇನಾಸನಕಥಾ.

೧೦೭೦.

ಭಿಸಿಚಿಮಿಲಿಕಾ ಭೂಮ-ತ್ಥರಣಂ ಉತ್ತರತ್ಥರಂ;

ತಟ್ಟಿಕಾ ಚಮ್ಮಖಣ್ಡೋ ಚ, ಪಚ್ಚತ್ಥರನಿಸೀದನಂ.

೧೦೭೧.

ಸನ್ಥಾರೋ ತಿಣಪಣ್ಣಾನಂ, ಸೇಯ್ಯಾ ದಸವಿಧಾ ಸಿಯಾ;

ಸಬ್ಬಚ್ಛನ್ನಪರಿಚ್ಛನ್ನೇ, ವಿಹಾರೇ ಭಿಕ್ಖು ಯೋ ಪನ.

೧೦೭೨.

ಏತಂ ದಸವಿಧಂ ಸೇಯ್ಯಂ, ಸನ್ಥರಿತ್ವಾಪಿ ವಾ ಸಯಂ;

ಅನುದ್ಧರಿತ್ವಾನಾಪುಚ್ಛಾ, ಅತಿಕ್ಕಮತಿ ತಂ ಸಚೇ.

೧೦೭೩.

ಆರಾಮಸ್ಸೂಪಚಾರಂ ವಾ, ಪರಿಕ್ಖೇಪಂ ಪನಸ್ಸ ವಾ;

ಪಠಮೇ ದುಕ್ಕಟಂ ಪಾದೇ, ಪಾಚಿತ್ತಿ ದುತಿಯೇ ಸಿಯಾ.

೧೦೭೪.

ಸೇನಾಸನಸ್ಸ ಸೇಯ್ಯಾಯ, ಉಭಯೇಸಂ ವಿನಾಸತೋ;

ಗಚ್ಛತೋ ಸನ್ಥರಿತ್ವನ್ತೋ-ಗಬ್ಭೇ ಪಾಚಿತ್ತಿ ವಣ್ಣಿತಾ.

೧೦೭೫.

ಉಪಚಾರೇ ವಿಹಾರಸ್ಸ, ದುಕ್ಕಟಂ ಮಣ್ಡಪಾದಿಕೇ;

ಗಚ್ಛತೋ ಸನ್ಥರಿತ್ವಾ ವಾ, ಸೇಯ್ಯಾಮತ್ತಂ ವಿನಾಸತೋ.

೧೦೭೬.

ತಿಕಪಾಚಿತ್ತಿಯಂ ¶ ವುತ್ತಂ, ಸಙ್ಘಿಕೇ ದಸವತ್ಥುಕೇ;

ತಥಾ ಪುಗ್ಗಲಿಕೇ ತಸ್ಸ, ದೀಪಿತಂ ತಿಕದುಕ್ಕಟಂ.

೧೦೭೭.

ಅನಾಪತ್ತುದ್ಧರಿತ್ವಾ ವಾ, ಆಪುಚ್ಛಂ ವಾಪಿ ಗಚ್ಛತೋ;

ಪಲಿಬುದ್ಧೇಪಿ ವಾಞ್ಞೇನ, ಅತ್ತನೋ ಸನ್ತಕೇಪಿ ವಾ.

೧೦೭೮.

ಸಾಪೇಕ್ಖೋವ ಚ ಗನ್ತ್ವಾ ತಂ, ತತ್ಥ ಠತ್ವಾಪಿ ಪುಚ್ಛತಿ;

ಸಮುಟ್ಠಾನಾದಯೋ ಸಬ್ಬೇ, ಅನನ್ತರಸಮಾ ಮತಾ.

ದುತಿಯಸೇನಾಸನಕಥಾ.

೧೦೭೯.

ಯೋ ಪುಬ್ಬುಪಗತಂ ಭಿಕ್ಖುಂ, ಜಾನಂ ಅನುಪಖಜ್ಜ ಚ;

ಕಪ್ಪೇಯ್ಯ ಸಙ್ಘಿಕಾವಾಸೇ, ಸೇಯ್ಯಂ ಪಾಚಿತ್ತಿಯಸ್ಸ ಚೇ.

೧೦೮೦.

ಪಾದಧೋವನಪಾಸಾಣಾ, ಪವಿಸನ್ತಸ್ಸ ಭಿಕ್ಖುನೋ;

ಯಾವ ತಂ ಮಞ್ಚಪೀಠಂ ವಾ, ನಿಕ್ಖಮನ್ತಸ್ಸ ವಾ ಪನ.

೧೦೮೧.

ಮಞ್ಚಪೀಠಕತೋ ¶ ಯಾವ, ಪಸ್ಸಾವಟ್ಠಾನಮೇವ ತು;

ಏತ್ಥನ್ತರೇ ಇದಂ ಠಾನಂ, ಉಪಚಾರೋತಿ ವುಚ್ಚತಿ.

೧೦೮೨.

ತತ್ಥ ಬಾಧೇತುಕಾಮಸ್ಸ, ಉಪಚಾರೇ ತು ಭಿಕ್ಖುನೋ;

ದಸಸ್ವಞ್ಞತರಂ ಸೇಯ್ಯಂ, ಸನ್ಥರನ್ತಸ್ಸ ದುಕ್ಕಟಂ.

೧೦೮೩.

ನಿಸೀದನ್ತಸ್ಸ ವಾ ತತ್ಥ, ನಿಪಜ್ಜನ್ತಸ್ಸ ವಾ ಪನ;

ತಥಾ ದ್ವೇಪಿ ಕರೋನ್ತಸ್ಸ, ಹೋತಿ ಪಾಚಿತ್ತಿಯದ್ವಯಂ.

೧೦೮೪.

ಪುನಪ್ಪುನಂ ಕರೋನ್ತಸ್ಸ, ಪಯೋಗಗಣನಾವಸಾ;

ತಿಕಪಾಚಿತ್ತಿಯಂ ವುತ್ತಂ, ಪುಗ್ಗಲೇ ತಿಕದುಕ್ಕಟಂ.

೧೦೮೫.

ವುತ್ತೂಪಚಾರಂ ಮುಞ್ಚಿತ್ವಾ, ಸೇಯ್ಯಂ ಸನ್ಥರತೋಪಿ ವಾ;

ವಿಹಾರಸ್ಸೂಪಚಾರೇ ವಾ, ಅಜ್ಝೋಕಾಸೇಪಿ ವಾ ಪನ.

೧೦೮೬.

ಸನ್ಥರಾಪಯತೋ ವಾಪಿ, ತತ್ಥ ತಸ್ಸ ನಿಸೀದತೋ;

ಸಬ್ಬತ್ಥ ದುಕ್ಕಟಂ ವುತ್ತಂ, ನಿವಾಸೋ ಚ ನಿವಾರಿತೋ.

೧೦೮೭.

ಅನಾಪತ್ತಿ ¶ ಗಿಲಾನಸ್ಸ, ಸೀತಾದುಪ್ಪೀಳಿತಸ್ಸ ವಾ;

ಆಪದಾಸುಪಿ ಭಿಕ್ಖುಸ್ಸ, ತಥಾ ಉಮ್ಮತ್ತಕಾದಿನೋ.

೧೦೮೮.

ಸಮುಟ್ಠಾನಾದಯೋ ಸಬ್ಬೇ, ಪಠಮನ್ತಿಮವತ್ಥುನಾ;

ಸದಿಸಾತಿ ಚ ವಿಞ್ಞೇಯ್ಯಾ, ಹೋತೀದಂ ದುಕ್ಖವೇದನಂ.

ಅನುಪಖಜ್ಜಕಥಾ.

೧೦೮೯.

ವಿಹಾರಾ ಸಙ್ಘಿಕಾ ಭಿಕ್ಖುಂ, ನಿಕ್ಕಡ್ಢೇಯ್ಯ ಸಚೇ ಪನ;

ನಿಕ್ಕಡ್ಢಾಪೇಯ್ಯ ವಾ ಕುದ್ಧೋ, ತಸ್ಸ ಪಾಚಿತ್ತಿಯಂ ಸಿಯಾ.

೧೦೯೦.

ಬಹುಭೂಮಾಪಿ ಪಾಸಾದಾ, ಪಯೋಗೇನೇಕಕೇನ ಯೋ;

ನಿಕ್ಕಡ್ಢೇತಿ ಸಚೇ ತಸ್ಸ, ಏಕಾ ಪಾಚಿತ್ತಿ ದೀಪಿತಾ.

೧೦೯೧.

ಠಪೇತ್ವಾ ಚ ಠಪೇತ್ವಾ ಚ, ನಿಕ್ಕಡ್ಢನ್ತಸ್ಸ ಅನ್ತರಾ;

ದ್ವಾರಾನಂ ಗಣನಾಯಸ್ಸ, ಹೋನ್ತಿ ಪಾಚಿತ್ತಿಯೋ ಪನ.

೧೦೯೨.

‘‘ನಿಕ್ಖಮಾ’’ತಿ ವದನ್ತಸ್ಸ, ವಾಚಾಯಪಿ ಅಯಂ ನಯೋ;

ಆಣತ್ತಿಯಾ ಖಣೇಯೇವ, ಆಣಾಪೇನ್ತಸ್ಸ ದುಕ್ಕಟಂ.

೧೦೯೩.

ಸಚೇ ಸೋ ಸಕಿಮಾಣತ್ತೋ, ದ್ವಾರೇಪಿ ಬಹುಕೇ ಪನ;

ಅತಿಕ್ಕಾಮೇತಿ ಏಕಾವ, ಬಹುಕಾನಿ ಬಹೂನಿ ಚೇ.

೧೦೯೪.

ತಸ್ಸೂಪಟ್ಠಾನಸಾಲಾದಿ-ವಿಹಾರಸ್ಸೂಪಚಾರತೋ ¶ ;

ಕಾಯೇನಪಿ ಚ ವಾಚಾಯ, ತಥಾ ನಿಕ್ಕಡ್ಢನೇಪಿ ಚ.

೧೦೯೫.

ವಿಹಾರಸ್ಸೂಪಚಾರಾ ವಾ, ವಿಹಾರಾ ವಾಪಿ ಚೇತರಂ;

ನಿಕ್ಕಡ್ಢನ್ತಸ್ಸ ಸಬ್ಬೇಸಂ, ಪರಿಕ್ಖಾರಮ್ಪಿ ದುಕ್ಕಟಂ.

೧೦೯೬.

ಅಸಮ್ಬದ್ಧೇಸು ಭಿಕ್ಖುಸ್ಸ, ಪರಿಕ್ಖಾರೇಸು ಪಣ್ಡಿತೋ;

ವತ್ಥೂನಂ ಗಣನಾಯಸ್ಸ, ದುಕ್ಕಟಂ ಪರಿದೀಪಯೇ.

೧೦೯೭.

ಅನ್ತೇವಾಸಿಮಲಜ್ಜಿಂ ವಾ, ತಥಾ ಸದ್ಧಿವಿಹಾರಿಕಂ;

ನಿಕ್ಕಡ್ಢನ್ತಸ್ಸ ಉಮ್ಮತ್ತಂ, ಸಯಂ ಉಮ್ಮತ್ತಕಸ್ಸ ಚ.

೧೦೯೮.

ಅತ್ತನೋ ¶ ವಸನಟ್ಠಾನಾ, ತಥಾ ವಿಸ್ಸಾಸಿಕಸ್ಸ ವಾ;

ಪರಿಕ್ಖಾರಞ್ಚ ವಾ ತೇಸಂ, ಅನಾಪತ್ತಿ ಪಕಾಸಿತಾ.

೧೦೯೯.

ಸಙ್ಘಾರಾಮಾಪಿ ಸಬ್ಬಸ್ಮಾ, ತಥಾ ಕಲಹಕಾರಕಂ;

ಇದಂ ತು ತಿಸಮುಟ್ಠಾನಂ, ವೇದನಾ ದುಕ್ಖವೇದನಾ.

ನಿಕ್ಕಡ್ಢನಕಥಾ.

೧೧೦೦.

ಮಜ್ಝಿಮಾಸೀಸಘಟ್ಟಾಯ, ವೇಹಾಸಕುಟಿಯೂಪರಿ;

ಆಹಚ್ಚಪಾದಕೇ ಮಞ್ಚೇ, ಪೀಠೇ ವಾ ಪನ ಭಿಕ್ಖುನೋ.

೧೧೦೧.

ನಿಸೀದನ್ತಸ್ಸ ವಾ ತಸ್ಮಿಂ, ನಿಪಜ್ಜನ್ತಸ್ಸ ವಾ ಪನ;

ಪಯೋಗಗಣನಾಯೇವ, ತಸ್ಸ ಪಾಚಿತ್ತಿಯೋ ಸಿಯುಂ.

೧೧೦೨.

ತಿಕಪಾಚಿತ್ತಿಯಂ ವುತ್ತಂ, ಪುಗ್ಗಲೇ ತಿಕದುಕ್ಕಟಂ;

ಹೇಟ್ಠಾ ಅಪರಿಭೋಗೇ ವಾ, ಸೀಸಘಟ್ಟಾಯ ವಾ ಪನ.

೧೧೦೩.

ಅವೇಹಾಸವಿಹಾರೇ ವಾ, ಅತ್ತನೋ ಸನ್ತಕೇಪಿ ವಾ;

ವಿಸ್ಸಾಸಿಕವಿಹಾರೇ ವಾ, ನ ದೋಸುಮ್ಮತ್ತಕಾದಿನೋ.

೧೧೦೪.

ಯತ್ಥ ಪಟಾಣಿ ವಾ ದಿನ್ನಾ, ತತ್ಥ ಠತ್ವಾ ಲಗೇತಿ ವಾ;

ಇದಮೇಳಕಲೋಮೇನ, ಸಮುಟ್ಠಾನಂ ಸಮಂ ಮತಂ.

ವೇಹಾಸಕುಟಿಕಥಾ.

೧೧೦೫.

ಯಾವ ದ್ವಾರಸ್ಸ ಕೋಸಮ್ಹಾ, ಅಗ್ಗಳಟ್ಠಪನಾಯ ತು;

ಭಿಕ್ಖುನಾ ಲಿಮ್ಪಿತಬ್ಬಂ ವಾ, ಲೇಪಾಪೇತಬ್ಬಮೇವ ವಾ.

೧೧೦೬.

ಞೇಯ್ಯೋ ¶ ಆಲೋಕಸನ್ಧೀನಂ, ಪರಿಕಮ್ಮೇಪ್ಯಯಂ ನಯೋ;

ಛದನಸ್ಸ ದ್ವತ್ತಿಪರಿಯಾಯಂ, ಠಿತೇನ ಹರಿತೇ ಪನ.

೧೧೦೭.

ಅಧಿಟ್ಠೇಯ್ಯಂ ತತೋ ಉದ್ಧಂ, ಅಧಿಟ್ಠೇತಿ ಸಚೇ ಪನ;

ತಸ್ಸ ಪಾಚಿತ್ತಿಯಂ ಹೋತಿ, ದುಕ್ಕಟಂ ತತ್ಥ ತಿಟ್ಠತೋ.

೧೧೦೮.

ಪಿಟ್ಠಿವಂಸೇ ¶ ಠಿತೋ ಕೋಚಿ, ಛದನಸ್ಸ ಮುಖವಟ್ಟಿಯಾ;

ಯಸ್ಮಿಂ ಠಾನೇ ಠಿತಂ ಭಿಕ್ಖುಂ, ಓಲೋಕೇನ್ತೋ ನ ಪಸ್ಸತಿ.

೧೧೦೯.

ತಸ್ಮಿಂ ಠಾನೇ ಪನ ಠಾತುಂ, ನೇವ ಭಿಕ್ಖುಸ್ಸ ವಟ್ಟತಿ;

ವಿಹಾರಸ್ಸ ಪತನ್ತಸ್ಸ, ಪತನೋಕಾಸತೋ ಹಿ ತಂ.

೧೧೧೦.

ಊನಕದ್ವತ್ತಿಪರಿಯಾಯೇ, ಅತಿರೇಕೋತಿ ಸಞ್ಞಿನೋ;

ತತ್ಥ ವೇಮತಿಕಸ್ಸಾಪಿ, ಹೋತಿ ಆಪತ್ತಿ ದುಕ್ಕಟಂ.

೧೧೧೧.

ನ ದೋಸೋ ದ್ವತ್ತಿಪರಿಯಾಯೇ, ಲೇಣೇ ತಿಣಕುಟೀಸು ವಾ;

ಸಮುಟ್ಠಾನಾದಯೋ ಸಬ್ಬೇ, ಸಞ್ಚರಿತ್ತಸಮಾ ಮತಾ.

ದ್ವತ್ತಿಪರಿಯಾಯಕಥಾ.

೧೧೧೨.

ಜಾನಂ ಸಪ್ಪಾಣಕಂ ತೋಯಂ, ತಿಣಂ ವಾ ಮತ್ತಿಕಮ್ಪಿ ವಾ;

ಯದಿ ಸಿಞ್ಚೇಯ್ಯ ಪಾಚಿತ್ತಿ, ಸಿಞ್ಚಾಪೇಯ್ಯ ಪರೇಹಿ ವಾ.

೧೧೧೩.

ಅಚ್ಛಿನ್ದಿತ್ವಾ ಸಚೇ ಧಾರಂ, ಮತ್ತಿಕಂ ಸಿಞ್ಚತೋ ಪನ;

ಏಕಸ್ಮಿಮ್ಪಿ ಘಟೇ ಏಕಾ, ಪಾಚಿತ್ತಿ ಪರಿದೀಪಿತಾ.

೧೧೧೪.

ವಿಚ್ಛಿನ್ದತಿ ಸಚೇ ಧಾರಂ, ಪಯೋಗಗಣನಾವಸಾ;

ಸಮ್ಮುಖಮ್ಪಿ ಕರೋನ್ತಸ್ಸ, ಮಾತಿಕಂ ಸನ್ದಮಾನಕಂ.

೧೧೧೫.

ಏಕಾವ ಚೇ ಸಿಯಾಪತ್ತಿ, ದಿವಸಮ್ಪಿ ಚ ಸನ್ದತು;

ಬನ್ಧತೋ ತತ್ಥ ತತ್ಥಸ್ಸ, ಪಯೋಗಗಣನಾ ಸಿಯಾ.

೧೧೧೬.

ಸಚೇ ಸಕಟಪುಣ್ಣಮ್ಪಿ, ಮತ್ತಿಕಂ ತಿಣಮೇವ ವಾ;

ಉದಕೇ ಪಕ್ಖಿಪನ್ತಸ್ಸ, ಏಕಾ ಪಾಚಿತ್ತಿ ಏಕತೋ.

೧೧೧೭.

ಏಕೇಕಂ ಪಕ್ಖಿಪನ್ತಸ್ಸ, ಪಯೋಗಗಣನಾಯ ಚೇ;

ಖಯಂ ವಾ ಆವಿಲತ್ತಂ ವಾ, ಜಲಂ ಗಚ್ಛತಿ ತಾದಿಸೇ.

೧೧೧೮.

‘‘ಸಿಞ್ಚಾಹೀ’’ತಿ ವದನ್ತಸ್ಸ, ಹೋತಿ ಆಪತ್ತಿ ದುಕ್ಕಟಂ;

ಏಕಾಯಾಣತ್ತಿಯಾ ಏಕಾ, ದಿವಸಮ್ಪಿ ಚ ಸಿಞ್ಚತೋ.

೧೧೧೯.

ಅಪ್ಪಾಣೇ ¶ ¶ ಉದಕೇ ಸುದ್ಧೇ, ಸಪ್ಪಾಣಮಿತಿ ಸಞ್ಞಿನೋ;

ಸಬ್ಬತ್ಥ ವಿಮತಿಸ್ಸಾಪಿ, ಹೋತಿ ಆಪತ್ತಿ ದುಕ್ಕಟಂ.

೧೧೨೦.

ಸಬ್ಬತ್ಥಾಪಾಣಸಞ್ಞಿಸ್ಸ, ಅಸಞ್ಚಿಚ್ಚಾಸತಿಸ್ಸ ವಾ;

ಅಜಾನತೋ ಅನಾಪತ್ತಿ, ತಥಾ ಉಮ್ಮತ್ತಕಾದಿನೋ.

೧೧೨೧.

ಸಪ್ಪಾಣಕತ್ತಂ ತೋಯಸ್ಸ, ಸಪ್ಪಾಣನ್ತಿ ವಿಜಾನನಂ;

ವಿನಾ ವಧಕಚಿತ್ತೇನ, ತಿಣಾದೀನಂ ನಿಸೇಚನಂ.

೧೧೨೨.

ಚತ್ತಾರೇವಸ್ಸ ಅಙ್ಗಾನಿ, ನಿದ್ದಿಟ್ಠಾನಿ ಮಹೇಸಿನಾ;

ಅದಿನ್ನಾದಾನತುಲ್ಯಾವ, ಸಮುಟ್ಠಾನಾದಯೋ ನಯಾ.

೧೧೨೩.

ಇದಂ ಪಣ್ಣತ್ತಿವಜ್ಜಞ್ಚ, ತಿಚಿತ್ತಞ್ಚಾತಿ ದೀಪಿತಂ;

ಇದಮೇವೇತ್ಥ ನಿದ್ದಿಟ್ಠಂ, ತಸ್ಸ ಚಸ್ಸ ವಿಸೇಸನಂ.

ಸಪ್ಪಾಣಕಕಥಾ.

ಸೇನಾಸನವಗ್ಗೋ ದುತಿಯೋ.

೧೧೨೪.

ಭಿಕ್ಖುಸ್ಸಾಟ್ಠಙ್ಗಯುತ್ತಸ್ಸ, ಭಿಕ್ಖುನೋವಾದಸಮ್ಮುತಿ;

ಇಧ ಞತ್ತಿಚತುತ್ಥೇನ, ಅನುಞ್ಞಾತಾ ಮಹೇಸಿನಾ.

೧೧೨೫.

ಯೋ ತಾಯಾಸಮ್ಮತೋ ಭಿಕ್ಖು, ಗರುಧಮ್ಮೇಹಿ ಅಟ್ಠಹಿ;

ಏಕಂ ಸಮ್ಬಹುಲಾ ವಾಪಿ, ಭಿಕ್ಖುನಿಸಙ್ಘಮೇವ ವಾ.

೧೧೨೬.

ಓಸಾರೇನ್ತೋವ ತೇ ಧಮ್ಮೇ, ಓವದೇಯ್ಯ ಸಚೇ ಪನ;

ಓವಾದಪರಿಯೋಸಾನೇ, ತಸ್ಸ ಪಾಚಿತ್ತಿಯಂ ಸಿಯಾ.

೧೧೨೭.

ಅಞ್ಞೇನ ಪನ ಧಮ್ಮೇನ, ಓವದನ್ತಸ್ಸ ದುಕ್ಕಟಂ;

ಏಕತೋಉಪಸಮ್ಪನ್ನಂ, ಗರುಧಮ್ಮೇಹಿ ವಾ ತಥಾ.

೧೧೨೮.

ಭಿಕ್ಖೂನಂ ಸನ್ತಿಕೇಯೇವ, ಉಪಸಮ್ಪನ್ನಭಿಕ್ಖುನಿಂ;

ತಥಾ, ಲಿಙ್ಗವಿಪಲ್ಲಾಸೇ, ಪಾಚಿತ್ತೇವ ಪಕಾಸಿತಾ.

೧೧೨೯.

ಸಮ್ಮತಸ್ಸಾಪಿ ¶ ಭಿಕ್ಖುಸ್ಸ, ದುಕ್ಕಟಂ ಸಮುದೀರಿತಂ;

ಓವಾದಂ ಅನಿಯಾದೇತ್ವಾ, ಧಮ್ಮೇನಞ್ಞೇನ ಭಾಸತೋ.

೧೧೩೦.

‘‘ಸಮಗ್ಗಮ್ಹಾ’’ತಿ ವುತ್ತೇಪಿ, ಅಞ್ಞೇನೋವದತೋ ತಥಾ;

‘‘ವಗ್ಗಮ್ಹಾ’’ತಿ ಚ ವುತ್ತೇಪಿ, ಗರುಧಮ್ಮೇಹಿ ದುಕ್ಕಟಂ.

೧೧೩೧.

ಅಗಣ್ಹನ್ತಸ್ಸ ¶ ಓವಾದಂ, ಅಪಚ್ಚಾಹರತೋಪಿ ತಂ;

ಠಪೇತ್ವಾ ದುಕ್ಕಟಂ ಬಾಲಂ, ಗಿಲಾನಂ ಗಮಿಕಂ ಸಿಯಾ.

೧೧೩೨.

ಅಧಮ್ಮೇ ಪನ ಕಮ್ಮಸ್ಮಿಂ, ಅಧಮ್ಮನ್ತಿ ಚ ಸಞ್ಞಿನೋ;

ವಗ್ಗೇ ಭಿಕ್ಖುನಿಸಙ್ಘಸ್ಮಿಂ, ತಿಕಪಾಚಿತ್ತಿಯಂ ಸಿಯಾ.

೧೧೩೩.

ತಥಾ ವೇಮತಿಕಸ್ಸಾಪಿ, ಧಮ್ಮಕಮ್ಮನ್ತಿ ಸಞ್ಞಿನೋ;

ನವ ಪಾಚಿತ್ತಿಯೋ ವುತ್ತಾ, ಸಮಗ್ಗೇಪಿ ಚ ತತ್ತಕಾ.

೧೧೩೪.

ನವಕಾನಂ ವಸಾ ದ್ವಿನ್ನಂ, ಅಟ್ಠಾರಸ ಭವನ್ತಿ ತಾ;

ದುಕ್ಕಟಂ ಧಮ್ಮಕಮ್ಮೇಪಿ, ಸತ್ತರಸವಿಧಂ ಸಿಯಾ.

೧೧೩೫.

‘‘ಓಸಾರೇಹೀ’’ತಿ ವುತ್ತೋ ವಾ, ಪಞ್ಹಂ ಪುಟ್ಠೋ ಕಥೇತಿ ವಾ;

ಸಿಕ್ಖಮಾನಾಯ ವಾ ನೇವ, ದೋಸೋ ಉಮ್ಮತ್ತಕಾದಿನೋ.

೧೧೩೬.

ವಾಚುಗ್ಗತಾವ ಕಾತಬ್ಬಾ, ಪಗುಣಾ ದ್ವೇಪಿ ಮಾತಿಕಾ;

ಸುತ್ತನ್ತತೋ ಚ ಚತ್ತಾರೋ, ಭಾಣವಾರಾ ಪಕಾಸಿತಾ.

೧೧೩೭.

ಏಕೋ ಪರಿಕಥತ್ಥಾಯ, ಕಥಾಮಗ್ಗೋ ಪಕಾಸಿತೋ;

ಮಙ್ಗಲಾಮಙ್ಗಲತ್ಥಾಯ, ತಿಸ್ಸೋಯೇವಾನುಮೋದನಾ.

೧೧೩೮.

ಉಪೋಸಥಾದಿಅತ್ಥಾಯ, ಕಮ್ಮಾಕಮ್ಮವಿನಿಚ್ಛಯೋ;

ಕಮ್ಮಟ್ಠಾನಂ ತಥಾ ಏಕಂ, ಉತ್ತಮತ್ಥಸ್ಸ ಪಾಪಕಂ.

೧೧೩೯.

ಏತ್ತಕಂ ಉಗ್ಗಹೇತ್ವಾನ, ಪಞ್ಚವಸ್ಸೋ ಬಹುಸ್ಸುತೋ;

ಮುಞ್ಚಿತ್ವಾ ನಿಸ್ಸಯಂ ಕಾಮಂ, ವಸಿತುಂ ಲಭತಿಸ್ಸರೋ.

೧೧೪೦.

ವಾಚುಗ್ಗತಾ ವಿಭಙ್ಗಾ ದ್ವೇ, ಪಗುಣಾ ಬ್ಯಞ್ಜನಾದಿತೋ;

ಚತೂಸ್ವಪಿ ನಿಕಾಯೇಸು, ಏಕೋ ವಾ ಪೋತ್ಥಕೋಪಿ ಚ.

೧೧೪೧.

ಕಮ್ಮಾಕಮ್ಮಞ್ಚ ವತ್ತಾನಿ, ಉಗ್ಗಹೇತಬ್ಬಮೇತ್ತಕಂ;

ಸಬ್ಬನ್ತಿಮಪರಿಚ್ಛೇದೋ, ದಸವಸ್ಸೋ ಸಚೇ ಪನ.

೧೧೪೨.

ಬಹುಸ್ಸುತೋ ¶ ದಿಸಾಮೋಕ್ಖೋ, ಯೇನಕಾಮಂಗಮೋ ಸಿಯಾ;

ಪರಿಸಂ ಲಭತೇ ಕಾಮಂ, ಉಪಟ್ಠಾಪೇತುಮಿಸ್ಸರೋ.

೧೧೪೩.

ಯಸ್ಸ ಸಾಟ್ಠಕಥಂ ಸಬ್ಬಂ, ವಾಚುಗ್ಗಂ ಪಿಟಕತ್ತಯಂ;

ಸೋಯಂ ಬಹುಸ್ಸುತೋ ನಾಮ, ಭಿಕ್ಖುನೋವಾದಕೋ ಸಿಯಾ.

೧೧೪೪.

ಅಸ್ಸಾಸಮ್ಮತತಾದೀನಿ ¶ , ತೀಣಿ ಅಙ್ಗಾನಿ ದೀಪಯೇ;

ಪದಸೋಧಮ್ಮತುಲ್ಯಾವ, ಸಮುಟ್ಠಾನಾದಯೋ ನಯಾ.

ಓವಾದಕಥಾ.

೧೧೪೫.

ಪಾಚಿತ್ತಿ ಗರುಧಮ್ಮೇಹಿ, ಧಮ್ಮೇನಞ್ಞೇನ ವಾ ಪನ;

ಹೋತ್ಯತ್ಥಙ್ಗತೇ ಸೂರಿಯೇ, ಓವದನ್ತಸ್ಸ ಭಿಕ್ಖುನಿಂ.

೧೧೪೬.

ತಿಕಪಾಚಿತ್ತಿಯಂ ವುತ್ತಂ, ಸಮ್ಮತಸ್ಸಾಪಿ ಭಿಕ್ಖುನೋ;

ಏಕತೋಉಪಸಮ್ಪನ್ನಂ, ಓವದನ್ತಸ್ಸ ದುಕ್ಕಟಂ.

೧೧೪೭.

ತಥಾನತ್ಥಙ್ಗತೇ ಸೂರಿಯೇ, ಗತೇ ಅತ್ಥನ್ತಿ ಸಞ್ಞಿನೋ;

ತತ್ಥ ವೇಮತಿಕಸ್ಸಾಪಿ, ಹೋತಿ ಆಪತ್ತಿ ದುಕ್ಕಟಂ.

೧೧೪೮.

ಉದ್ದೇಸಾದಿನಯೇನಸ್ಸ, ಅನಾಪತ್ತಿ ಪಕಾಸಿತಾ;

ಅನನ್ತರಸಮಾ ಸೇಸಾ, ಸಮುಟ್ಠಾನಾದಯೋ ನಯಾ.

ಅತ್ಥಙ್ಗತಸೂರಿಯಕಥಾ.

೧೧೪೯.

ಭಿಕ್ಖುನಿಂ ಓವದನ್ತಸ್ಸ, ಗನ್ತ್ವಾ ಭಿಕ್ಖುನುಪಸ್ಸಯಂ;

ಗರುಧಮ್ಮೇಹಿ ಅಞ್ಞತ್ರ, ಕಾಲಾ ಪಾಚಿತ್ತಿಯಂ ಸಿಯಾ.

೧೧೫೦.

ಸಚೇ ಅಸಮ್ಮತೋ ಹೋತಿ, ಹೋತಿ ಪಾಚಿತ್ತಿಯದ್ವಯಂ;

ಅತ್ಥಙ್ಗತೇ ಚ ಸೂರಿಯೇ, ಸಚೇ ವದತಿ ತೀಣಿಪಿ.

೧೧೫೧.

ಅಞ್ಞೇನ ಪನ ಧಮ್ಮೇನ, ವದತೋ ದುಕ್ಕಟದ್ವಯಂ;

ಏಕಂ ಪಾಚಿತ್ತಿಯಂ ಹೋತಿ, ಭಿಕ್ಖುನೋ ರತ್ತಿಹೇತುಕಂ.

೧೧೫೨.

ಸಮ್ಮತಸ್ಸಾಪಿ ಭಿಕ್ಖುಸ್ಸ, ಹೋತಿ ಪಾಚಿತ್ತಿಯದ್ವಯಂ;

ಗರುಧಮ್ಮನಿದಾನಸ್ಸ, ಸಮ್ಮತತ್ತಾ ಅಭಾವತೋ.

೧೧೫೩.

ತಸ್ಸೇವಞ್ಞೇನ ¶ ಧಮ್ಮೇನ, ಓವದನ್ತಸ್ಸ ದುಕ್ಕಟಂ;

ಸಮ್ಮತತ್ತಾ ಅನಾಪತ್ತಿ, ಏಕಾ ಪಾಚಿತ್ತಿ ರತ್ತಿಯಂ.

೧೧೫೪.

ತಿಕಪಾಚಿತ್ತಿಯಂ ವುತ್ತಂ, ದುಕ್ಕಟಂ ಇತರದ್ವಯೇ;

ಏಕತೋಉಪಸಮ್ಪನ್ನಂ, ಓವದನ್ತಸ್ಸ ದುಕ್ಕಟಂ.

೧೧೫೫.

ತಥಾ ಅಞ್ಞೇನ ಧಮ್ಮೇನ, ಗನ್ತ್ವಾ ಭಿಕ್ಖುನುಪಸ್ಸಯಂ;

ಸಮುಟ್ಠಾನಾದಯೋ ಸಬ್ಬೇ, ಕಥಿನೇನ ಸಮಾ ಮತಾ.

ಭಿಕ್ಖುನುಪಸ್ಸಯಕಥಾ.

೧೧೫೬.

ಚೀವರಾದೀನಮತ್ಥಾಯ ¶ , ಓವದನ್ತೀತಿ ಭಿಕ್ಖುನಿಂ;

ವದತೋ ಸಮ್ಮತೇ ಭಿಕ್ಖು, ತಸ್ಸ ಪಾಚಿತ್ತಿಯಂ ಸಿಯಾ.

೧೧೫೭.

ತಿಕಪಾಚಿತ್ತಿಯಂ ವುತ್ತಂ, ತಥೇವ ತಿಕದುಕ್ಕಟಂ;

ಸಙ್ಘೇನಾಸಮ್ಮತಂ ಭಿಕ್ಖುಂ, ವದನ್ತಸ್ಸ ಚ ದುಕ್ಕಟಂ.

೧೧೫೮.

ತಥೇವಾನುಪಸಮ್ಪನ್ನಂ, ಸಮ್ಮತಂ ವಾ ಅಸಮ್ಮತಂ;

ನ ದೋಸೋ ಆಮಿಸತ್ಥಾಯ, ಓವದನ್ತಸ್ಸ ಭಾಸತೋ.

೧೧೫೯.

ತಥಾ ಉಮ್ಮತ್ತಕಾದೀನಂ, ಅನಾಪತ್ತಿ ಪಕಾಸಿತಾ;

ಇದಞ್ಹಿ ತಿಸಮುಟ್ಠಾನಂ, ವೇದನಾ ದುಕ್ಖವೇದನಾ.

ಆಮಿಸಕಥಾ.

೧೧೬೦.

ಸಚೇ ಭಿಕ್ಖುನಿಯಾ ಭಿಕ್ಖು, ದದೇಯ್ಯ ಪನ ಚೀವರಂ;

ಅಞ್ಞಾತಿಕಾಯ ಪಾಚಿತ್ತಿ, ಠಪೇತ್ವಾ ಪಾರಿವತ್ತಕಂ.

೧೧೬೧.

ಚೀವರಸ್ಸ ಪಟಿಗ್ಗಾಹ-ಸಿಕ್ಖಾಪದಸಮೋ ನಯೋ;

ಅವಸೇಸೋ ಮತೋ ಸದ್ಧಿಂ, ಸಮುಟ್ಠಾನಾದಿನಾ ಪನ.

೧೧೬೨.

ತತ್ಥ ಭಿಕ್ಖುನಿಯಾ ದಿನ್ನಂ, ಚೀವರಂ ಇಧ ಭಿಕ್ಖುನಾ;

ತತ್ಥ ನಿಸ್ಸಗ್ಗಿಯಂ ಸುದ್ಧ-ಪಾಚಿತ್ತಿ ಇಧ ಸೂಚಿತಾ.

ಚೀವರದಾನಕಥಾ.

೧೧೬೩.

ಚೀವರಂ ¶ ಯೋ ಹಿ ಸಿಬ್ಬೇಯ್ಯ, ಸಿಬ್ಬಾಪೇಯ್ಯ ಪರೇನ ವಾ;

ಅಞ್ಞಾತಿಕಾಯ ಪಾಚಿತ್ತಿ, ಹೋತಿ ಭಿಕ್ಖುನಿಯಾ ಪನ.

೧೧೬೪.

ಯಂ ವಾ ನಿವಾಸಿತುಂ ಸಕ್ಕಾ, ಯಂ ವಾ ಪಾರುಪನೂಪಗಂ;

ಚೀವರನ್ತಿ ಅಧಿಪ್ಪೇತೋ, ಇದಮೇತ್ಥ ಮಹೇಸಿನಾ.

೧೧೬೫.

ಸಯಂ ಸೂಚಿಂ ಪವೇಸೇತ್ವಾ, ಸಿಬ್ಬನ್ತಸ್ಸ ಚ ಭಿಕ್ಖುನೋ;

ಸೂಚಿನೀಹರಣೇ ತಸ್ಸ, ಪಾಚಿತ್ತಿಯಮುದೀರಿತಂ.

೧೧೬೬.

ಸತಕ್ಖತ್ತುಮ್ಪಿ ವಿಜ್ಝಿತ್ವಾ, ಸಕಿಂ ನೀಹರತೋ ಪನ;

ಏಕಂ ಪಾಚಿತ್ತಿಯಂ ವುತ್ತಂ, ಪಯೋಗಸ್ಸ ವಸಾ ಬಹೂ.

೧೧೬೭.

‘‘ಸಿಬ್ಬಾ’’ತಿ ಪನ ಆಣತ್ತೋ, ಅವಿಸೇಸೇನ ಭಿಕ್ಖುನಾ;

ನಿಟ್ಠಾಪೇತಿ ಸಚೇ ಸಬ್ಬಂ, ಏಕಂ ಪಾಚಿತ್ತಿಯಂ ಸಿಯಾ.

೧೧೬೮.

‘‘ಯಮೇತ್ಥ ¶ ಚೀವರೇ ಕಮ್ಮಂ, ಭಾರೋ ಸಬ್ಬಂ ತವಾ’’ತಿ ಹಿ;

ಆಣತ್ತೋ ಭಿಕ್ಖುನಾ ಸಬ್ಬಂ, ನಿಟ್ಠಾಪೇತಿ ಸಚೇ ಪನ.

೧೧೬೯.

ಭಿಕ್ಖುಸ್ಸಾಣಾಪಕಸ್ಸೇವ, ಏಕಾಯಾಣತ್ತಿಯಾ ಪನ;

ಹೋನ್ತಿ ಪಾಚಿತ್ತಿಯಾಪತ್ತಿ, ಅನೇಕಾರಾಪಥೇ ಪಥೇ.

೧೧೭೦.

ಪುನಪ್ಪುನಾಣಾಪೇನ್ತಸ್ಸ, ಅನೇಕಾಣತ್ತಿಯಂ ಪನ;

ಕಾ ಹಿ ನಾಮ ಕಥಾ ಅತ್ಥಿ? ತಿಕಪಾಚಿತ್ತಿಯಂ ಸಿಯಾ.

೧೧೭೧.

ಞಾತಿಕಾಯ ಚ ಅಞ್ಞಾತಿ-ಸಞ್ಞಿಸ್ಸ ವಿಮತಿಸ್ಸ ವಾ;

ಏಕತೋಉಪಸಮ್ಪನ್ನ-ಚೀವರೇ ದುಕ್ಕಟಂ ಸಿಯಾ.

೧೧೭೨.

ಠಪೇತ್ವಾ ಚೀವರಂ ಅಞ್ಞಂ, ಪರಿಕ್ಖಾರಞ್ಚ ಸಿಬ್ಬತೋ;

ಅನಾಪತ್ತಿ ವಿನಿದ್ದಿಟ್ಠಾ, ಸಿಕ್ಖಮಾನಾದಿಕಾಯಪಿ.

೧೧೭೩.

ಸಞ್ಚರಿತ್ತಸಮುಟ್ಠಾನಂ, ಕ್ರಿಯಂ ಪಣ್ಣತ್ತಿವಜ್ಜಕಂ;

ಕಾಯಕಮ್ಮಂ ವಚೀಕಮ್ಮಂ, ತಿಚಿತ್ತಞ್ಚ ತಿವೇದನಂ.

ಚೀವರಸಿಬ್ಬನಕಥಾ.

೧೧೭೪.

ಭಿಕ್ಖು ¶ ಭಿಕ್ಖುನಿಯಾ ಸದ್ಧಿಂ, ಸಂವಿಧಾಯ ಪನೇಕತೋ;

ಪಟಿಪಜ್ಜೇಯ್ಯ ಮಗ್ಗಂ ಚೇ, ಅಞ್ಞತ್ರ ಸಮಯಾ ಇಧ.

೧೧೭೫.

ಗಾಮನ್ತರೋಕ್ಕಮೇ ವಾಪಿ, ಅದ್ಧಯೋಜನತಿಕ್ಕಮೇ;

ಅಗಾಮಕೇ ಅರಞ್ಞೇ ವಾ, ಹೋತಿ ಆಪತ್ತಿ ಭಿಕ್ಖುನೋ.

೧೧೭೬.

ಏತ್ಥಾಕಪ್ಪಿಯಭೂಮಟ್ಠೋ, ಸಂವಿಧಾನಂ ಕರೋತಿ ಯೋ;

ಸಂವಿಧಾನನಿಮಿತ್ತಂ ತು, ದುಕ್ಕಟಂ ತಸ್ಸ ದೀಪಿತಂ.

೧೧೭೭.

ಸಂವಿಧಾನಂ ಕರೋನ್ತಸ್ಸ, ಠತ್ವಾ ಕಪ್ಪಿಯಭೂಮಿಯಂ;

ಸಂವಿಧಾನನಿಮಿತ್ತಂ ತು, ನ ವದನ್ತಸ್ಸ ದುಕ್ಕಟಂ.

೧೧೭೮.

ಉಭಯತ್ಥಾಪಿ ಪಾಚಿತ್ತಿ, ಗಚ್ಛನ್ತಸ್ಸೇವ ಭಿಕ್ಖುನೋ;

ಅನನ್ತರಸ್ಸ ಗಾಮಸ್ಸ, ಉಪಚಾರೋಕ್ಕಮೇ ಸಿಯಾ.

೧೧೭೯.

ತತ್ರಾಪಿ ಪಠಮೇ ಪಾದೇ, ದುಕ್ಕಟಂ ಸಮುದೀರಿತಂ;

ದುತಿಯೇ ಪದವಾರಸ್ಮಿಂ, ಪಾಚಿತ್ತಿಯಮುದೀರಿತಂ.

೧೧೮೦.

ಅನ್ತರಾ ಸಂವಿಧಾನೇಪಿ, ಭಿಕ್ಖುನೋ ದುಕ್ಕಟಂ ಸಿಯಾ;

ದ್ವಾರಮಗ್ಗವಿಸಙ್ಕೇತೇ, ಸತಿ ಚಾಪತ್ತಿ ವುಚ್ಚತಿ.

೧೧೮೧.

ಅಸಂವಿದಹಿತೇ ¶ ಕಾಲೇ, ವಿದಹಿತೋತಿ ಸಞ್ಞಿನೋ;

ಭಿಕ್ಖುಸ್ಸೇವ ವಿಧಾನಸ್ಮಿಂ, ಹೋತಿ ಆಪತ್ತಿ ದುಕ್ಕಟಂ.

೧೧೮೨.

ಸಮಯೇ ವಿದಹಿತ್ವಾ ವಾ, ವಿಸಙ್ಕೇತೇನ ಗಚ್ಛತೋ;

ಆಪದಾಸು ಅನಾಪತ್ತಿ, ತಥಾ ಉಮ್ಮತ್ತಕಾದಿನೋ.

೧೧೮೩.

ಇದಂ ಚತುಸಮುಟ್ಠಾನಂ, ಕಾಯತೋ ಕಾಯವಾಚತೋ;

ಕಾಯಚಿತ್ತಾ ಸಮುಟ್ಠಾತಿ, ಕಾಯವಾಚಾದಿಕತ್ತಯಾ.

ಸಂವಿಧಾನಕಥಾ.

೧೧೮೪.

ಏಕಮುಜ್ಜವನಿಂ ನಾವಂ, ತಥಾ ಓಜವನಿಮ್ಪಿ ವಾ;

ಅಭಿರೂಹೇಯ್ಯ ಪಾಚಿತ್ತಿ, ಸದ್ಧಿಂ ಭಿಕ್ಖುನಿಯಾ ಸಚೇ.

೧೧೮೫.

ಸಗಾಮತೀರಪಸ್ಸೇನ ¶ , ಗಾಮನ್ತರವಸೇನ ವಾ;

ಅಗಾಮತೀರಪಸ್ಸೇನ, ಗಮನೇ ಅದ್ಧಯೋಜನೇ.

೧೧೮೬.

ತಥಾ ಯೋಜನವಿತ್ಥಿಣ್ಣ-ನದೀಮಜ್ಝೇನ ಗಚ್ಛತೋ;

ಅದ್ಧಯೋಜನಸಙ್ಖಾಯ, ಹೋನ್ತಿ ಪಾಚಿತ್ತಿಯೋ ಪನ.

೧೧೮೭.

ಯಥಾಸುಖಂ ಸಮುದ್ದಸ್ಮಿಂ, ಸಬ್ಬಅಟ್ಠಕಥಾಸು ಹಿ;

ನದಿಯಂಯೇವ ಆಪತ್ತಿ, ನ ಸಮುದ್ದೇ ವಿಚಾರಿತಾ.

೧೧೮೮.

ತಿತ್ಥಸಮ್ಪಾದನತ್ಥಾಯ, ಉದ್ಧಂ ವಾ ನದಿಯಾ ಅಧೋ;

ಸಚೇ ಹರನ್ತಿ ತಂಯುತ್ತಾ, ಅನಾಪತ್ತಿ ಪಕಾಸಿತಾ.

೧೧೮೯.

ತಥಾ ಸಂವಿದಹಿತ್ವಾ ವಾ, ತಿರಿಯಂ ತರಣಾಯ ವಾ;

ಆಪದಾಸು ವಿಸೇಸೋ ಹಿ, ಅನನ್ತರಸಮೋ ಮತೋ.

ನಾವಾಭಿರುಹನಕಥಾ.

೧೧೯೦.

ಞತ್ವಾ ಭಿಕ್ಖುನಿಯಾ ಭತ್ತಂ, ಭುಞ್ಜತೋ ಪರಿಪಾಚಿತಂ;

ಹಿತ್ವಾ ಗಿಹಿಸಮಾರಮ್ಭಂ, ಹೋತಿ ಪಾಚಿತ್ತಿ ಭಿಕ್ಖುನೋ.

೧೧೯೧.

ಭೋಜನಂ ಪಞ್ಚಧಾ ವುತ್ತಂ, ಗಹಣೇ ತಸ್ಸ ದುಕ್ಕಟಂ;

ಅಜ್ಝೋಹಾರೇಸು ಸಬ್ಬೇಸು, ತಸ್ಸ ಪಾಚಿತ್ತಿಯೋ ಸಿಯುಂ.

೧೧೯೨.

ಸನ್ತಕಂ ಞಾತಕಾದೀನಂ, ಗಿಹಿಸಮ್ಪಾದಿತಮ್ಪಿ ವಾ;

ವಿನಾ ಭಿಕ್ಖುನಿಯಾ ದೋಸೋ, ಭುಞ್ಜತೋ ಪರಿಪಾಚಿತಂ.

೧೧೯೩.

ಪರಿಪಾಚಿತಸಞ್ಞಿಸ್ಸ ¶ , ಭಿಕ್ಖುಸ್ಸಾಪರಿಪಾಚಿತೇ;

ಉಭೋಸು ವಿಮತಿಸ್ಸಾಪಿ, ಹೋತಿ ಸಬ್ಬತ್ಥ ದುಕ್ಕಟಂ.

೧೧೯೪.

ಏಕತೋಉಪಸಮ್ಪನ್ನ-ಪರಿಪಾಚಿತಭೋಜನಂ;

ಅಜ್ಝೋಹಾರವಸೇನೇವ, ದುಕ್ಕಟಂ ಪರಿಭುಞ್ಜತೋ.

೧೧೯೫.

ಅಞ್ಞಂ ವಾ ಪನ ಯಂ ಕಿಞ್ಚಿ, ಠಪೇತ್ವಾ ಪಞ್ಚಭೋಜನಂ;

ಭುಞ್ಜನ್ತಸ್ಸ ಅನಾಪತ್ತಿ, ಯಾಗುಖಜ್ಜಫಲಾದಿಕಂ.

೧೧೯೬.

ಸಮುಟ್ಠಾನಾದಯೋ ¶ ತುಲ್ಯಾ, ಪಠಮನ್ತಿಮವತ್ಥುನಾ;

ಇದಂ ಪಣ್ಣತ್ತಿವಜ್ಜಂ ತು, ತಿಚಿತ್ತಞ್ಚ ತಿವೇದನಂ.

ಪರಿಪಾಚಿತಕಥಾ.

೧೧೯೭.

ದುತಿಯಾನಿಯತೇನೇವ, ದಸಮಂ ಸದಿಸಂ ಮತಂ;

ಇದಂ ಸಿಕ್ಖಾಪದಂ ಸಬ್ಬಂ, ಸಮುಟ್ಠಾನನಯಾದಿನಾ.

ರಹೋನಿಸಜ್ಜಕಥಾ.

ಭಿಕ್ಖುನಿವಗ್ಗೋ ತತಿಯೋ.

೧೧೯೮.

ಏಕೋ ಆವಸಥೋ ಪಿಣ್ಡೋ, ಅಗಿಲಾನೇನ ಭಿಕ್ಖುನಾ;

ಭುಞ್ಜಿತಬ್ಬೋ ತತೋ ಉದ್ಧಂ, ಪಾಚಿತ್ತಿ ಪರಿಭುಞ್ಜತೋ.

೧೧೯೯.

ಅನೋದಿಸ್ಸೇವ ಪಞ್ಞತ್ತೇ, ಯಾವದತ್ಥೇವ ಭಿಕ್ಖುನಾ;

ಭುಞ್ಜಿತಬ್ಬಂ ಸಕಿಂ ತತ್ಥ, ತತೋ ಉದ್ಧಂ ನ ವಟ್ಟತಿ.

೧೨೦೦.

ದುತಿಯೇ ದಿವಸೇ ತತ್ಥ, ಗಹಣೇ ದುಕ್ಕಟಂ ಮತಂ;

ಅಜ್ಝೋಹಾರೇಸು ಸಬ್ಬೇಸು, ತಸ್ಸ ಪಾಚಿತ್ತಿಯೋ ಮತಾ.

೧೨೦೧.

ಕುಲೇನೇಕೇನ ಪಞ್ಞತ್ತೇ, ಸಹ ನಾನಾಕುಲೇಹಿ ವಾ;

ನಾನೇಕಟ್ಠಾನಭೇದೇಸು, ಏಕಭಾಗೋವ ವಟ್ಟತಿ.

೧೨೦೨.

ನಾನಾಟ್ಠಾನೇಸು ಪಞ್ಞತ್ತೋ, ಯೋ ಚ, ನಾನಾಕುಲೇಹಿ ವಾ;

ಭುಞ್ಜತೋ ಪನ ಸಬ್ಬತ್ಥ, ನ ದೋಸೋ ಪಟಿಪಾಟಿಯಾ.

೧೨೦೩.

ಪಟಿಪಾಟಿಮಸೇಸೇನ, ಖೇಪೇತ್ವಾ ಪುನ ಭುಞ್ಜತೋ;

ಆದಿತೋ ಪನ ಪಟ್ಠಾಯ, ನ ಚ ಕಪ್ಪತಿ ಭಿಕ್ಖುನೋ.

೧೨೦೪.

ಅನಾಪತ್ತಿ ¶ ಗಿಲಾನಸ್ಸ, ಆಗಚ್ಛನ್ತಸ್ಸ ಗಚ್ಛತೋ;

ಓದಿಸ್ಸಪಿ ಚ ಪಞ್ಞತ್ತೇ, ಪರಿತ್ತೇ ಭುಞ್ಜತೋ ಸಕಿಂ.

೧೨೦೫.

ಯಾಗುಆದೀನಿ ¶ ನಿಚ್ಚಮ್ಪಿ, ಭುಞ್ಜಿತುಂ ಪನ ವಟ್ಟತಿ;

ಸೇಸಮೇಳಕಲೋಮೇನ, ಸಮುಟ್ಠಾನಾದಿಕಂ ಸಮಂ.

ಆವಸಥಕಥಾ.

೧೨೦೬.

ಅಞ್ಞತ್ರ ಸಮಯಾ ವುತ್ತಾ, ಪಾಚಿತ್ತಿ ಗಣಭೋಜನೇ;

ಗಣೋತಿ ಪನ ನಿದ್ದಿಟ್ಠಾ, ಚತ್ತಾರೋ ವಾ ತತುತ್ತರಿಂ.

೧೨೦೭.

ಯಂ ನಿಮನ್ತನತೋ ವಾಪಿ, ಲದ್ಧಂ ವಿಞ್ಞತ್ತಿತೋಪಿ ವಾ;

ಭೋಜನಂ ಪನ ಪಞ್ಚನ್ನಂ, ಹೋತಿ ಅಞ್ಞತರಂ ಇಧ.

೧೨೦೮.

ಭೋಜನಾನಮ್ಪಿ ಪಞ್ಚನ್ನಂ, ಗಹೇತ್ವಾ ನಾಮಮೇವ ತು;

ನಿಮನ್ತೇತಿ ಸಚೇ ಭಿಕ್ಖೂ, ಚತ್ತಾರೋ ಬಹುಕೇಪಿ ವಾ.

೧೨೦೯.

‘‘ಓದನಂ ಭೋಜನಂ ಭತ್ತಂ, ಸಮ್ಪಟಿಚ್ಛಥ ಗಣ್ಹಥ’’;

ಇತಿ ವೇವಚನೇಹೇವ, ಅಥ ಭಾಸನ್ತರೇನ ವಾ.

೧೨೧೦.

ತತೋ ತಸ್ಸ ಚ ತೇ ಭಿಕ್ಖೂ, ಸಾದಿಯಿತ್ವಾ ನಿಮನ್ತನಂ;

ಏಕತೋ ನಾನತೋ ವಾ ಚೇ, ಗನ್ತ್ವಾ ಗಣ್ಹನ್ತಿ ಏಕತೋ.

೧೨೧೧.

ಸಬ್ಬೇಸಂ ಹೋತಿ ಪಾಚಿತ್ತಿ, ಗಣಭೋಜನಕಾರಣಾ;

ಏಕತೋ ಗಹಣಂ ಏತ್ಥ, ಗಣಭೋಜನಕಾರಣಂ.

೧೨೧೨.

ಏಕತೋ ನಾನತೋ ವಾಪಿ, ಗಮನಂ ಭೋಜನಮ್ಪಿ ವಾ;

ಕಾರಣನ್ತಿ ನ ತಂ ವಿಞ್ಞೂ, ಭಣನ್ತಿ ಗಣಭೋಜನೇ.

೧೨೧೩.

ಸಚೇಪಿ ಓದನಾದೀನಂ, ಗಹೇತ್ವಾ ನಾಮಮೇವ ವಾ;

ಏಕತೋ ನಾನತೋ ವಾಪಿ, ವಿಞ್ಞಾಪೇತ್ವಾ ಮನುಸ್ಸಕೇ.

೧೨೧೪.

ನಾನತೋ ವೇಕತೋ ಗನ್ತ್ವಾ, ಸಚೇ ಗಣ್ಹನ್ತಿ ಏಕತೋ;

ಏವಮ್ಪಿ ಪನ ಹೋತೀತಿ, ವಣ್ಣಿತಂ ಗಣಭೋಜನಂ.

೧೨೧೫.

ದುವಿಧಸ್ಸಾಪಿ ಏತಸ್ಸ, ಪಟಿಗ್ಗಹಣಕಾರಣಾ;

ದುಕ್ಕಟಂ ಹೋತಿ ಪಾಚಿತ್ತಿ, ಅಜ್ಝೋಹಾರೇಸು ದೀಪಿತಾ.

೧೨೧೬.

ಸಮಯೇಸು ¶ ಅನಾಪತ್ತಿ, ಸತ್ತಸ್ವಪಿ ಪಕಾಸಿತಾ;

ಗಹೇತ್ವಾ ಏಕತೋ ದ್ವಿನ್ನಂ, ತಿಣ್ಣಂ ವಾ ಭುಞ್ಜತಂ ತಥಾ.

೧೨೧೭.

ಮುನಿನಾನುಪಸಮ್ಪನ್ನ-ಚಾರಿಪತ್ತಾನಿಮನ್ತಿತಾ ¶ ;

ಚತುತ್ಥೇ ಏಕತೋ ಕತ್ವಾಪಿ, ಗಣಭೇದೋ ಪಕಾಸಿತೋ.

೧೨೧೮.

ನೇವ ಸಮಯಲದ್ಧಾನಂ, ವಸೇನಪಿ ಹಿ ಸಬ್ಬಸೋ;

ಗಣಭೇದೋ ಪನಾಪತ್ತಿ, ವೇದಿತಬ್ಬಾ ವಿಭಾವಿನಾ.

೧೨೧೯.

ಭೋಜನಾನಞ್ಚ ಪಞ್ಚನ್ನಂ, ವಸೇನ ಗಣಭೋಜನೇ;

ನತ್ಥೇವ ಚ ವಿಸಙ್ಕೇತಂ, ಯಾಗುಆದೀಸು ತಂ ಸಿಯಾ.

೧೨೨೦.

ಗಣಭೋಜನಸಞ್ಞಿಸ್ಸ, ಭಿಕ್ಖುಸ್ಸಾಗಣಭೋಜನೇ;

ತತ್ಥ ವೇಮತಿಕಸ್ಸಾಪಿ, ಹೋತಿ ಆಪತ್ತಿ ದುಕ್ಕಟಂ.

೧೨೨೧.

ಭೋಜನಾನಿ ಚ ಪಞ್ಚೇವ, ಠಪೇತ್ವಾ ಯಾಗುಆದಿಸು;

ಅನಾಪತ್ತೀತಿ ಞಾತಬ್ಬಾ, ನಿಚ್ಚಭತ್ತಾದಿಕೇಸುಪಿ.

೧೨೨೨.

ತಥಾ ಉಮ್ಮತ್ತಕಾದೀನಂ, ಸಮುಟ್ಠಾನಾದಿನಾ ಪನ;

ಇದಂ ಏಳಕಲೋಮೇನ, ಸದಿಸನ್ತಿ ಪಕಾಸಿತಂ.

ಗಣಭೋಜನಕಥಾ.

೧೨೨೩.

ಬಹೂಹಿ ಯೋ ಭಿಕ್ಖು ಮನುಸ್ಸಕೇಹಿ;

ನಿಮನ್ತಿತೋ ಪಞ್ಚಹಿ ಭೋಜನೇಹಿ;

ಹಿತ್ವಾ ಸಚೇ ಪುಬ್ಬನಿಮನ್ತನಾಯ;

ವಿಕಪ್ಪನಂ ಪಞ್ಚಸು ಯಸ್ಸ ಕಸ್ಸ.

೧೨೨೪.

ಪಚ್ಛಾ ನಿಮನ್ತಿತಂ ಭತ್ತಂ, ತಥಾ ಉಪ್ಪಟಿಪಾಟಿಯಾ;

ಭುಞ್ಜತೋ ಏಕಸಿತ್ಥಮ್ಪಿ, ತಸ್ಸ ಪಾಚಿತ್ತಿಯಂ ಸಿಯಾ.

೧೨೨೫.

ಭೋಜನಾನಂ ತು ಪಞ್ಚನ್ನಂ, ಯೇನ ಕೇನ ನಿಮನ್ತಿತೋ;

ತಂ ಠಪೇತ್ವಾ ಸಚೇ ಅಞ್ಞಂ, ಭೋಜನಂ ಪರಿಭುಞ್ಜತಿ.

೧೨೨೬.

ತೇಸಮೇವ ¶ ಚ ಪಞ್ಚನ್ನಂ, ಭೋಜನಾನಂ ಮಹೇಸಿನಾ;

ಏತಂ ಪರಮ್ಪರಂ ನಾಮ, ಭೋಜನಂ ಪರಿದೀಪಿತಂ.

೧೨೨೭.

ಯತ್ಥ ಖೀರಂ ರಸಂ ವಾಪಿ, ಆಕಿರನ್ತಿ ಸಚೇ ಪನ;

ಯೇನ ಅಜ್ಝೋತ್ಥಟಂ ಭತ್ತಂ, ಸಬ್ಬಮೇಕರಸಂ ಸಿಯಾ.

೧೨೨೮.

ಕೋಟಿತೋ ಪನ ಪಟ್ಠಾಯ, ಸಂಸಟ್ಠಂ ಪರಿಭುಞ್ಜತೋ;

ಅನಾಪತ್ತೀತಿ ನಿದ್ದಿಟ್ಠಂ, ಮಹಾಪಚ್ಚರಿಯಂ ಪನ.

೧೨೨೯.

ಪರಮ್ಪರನ್ತಿ ¶ ಸಞ್ಞಾಯ, ಅಪರಮ್ಪರಭೋಜನೇ;

ತತ್ಥ ವೇಮತಿಕಸ್ಸಾಪಿ, ದುಕ್ಕಟಂ ಪರಿಭುಞ್ಜತೋ.

೧೨೩೦.

ಸಕಲೇನಪಿ ಗಾಮೇನ, ಪೂಗೇನ ನಿಗಮೇನ ವಾ;

ನಿಮನ್ತಿತಸ್ಸ ವಾ ನಿಚ್ಚ-ಭತ್ತೇ ದೋಸೋ ನ ವಿಜ್ಜತಿ.

೧೨೩೧.

ಸಮುಟ್ಠಾನಾದಯೋ ಸಬ್ಬೇ, ಕಥಿನೇನಾದಿನಾ ಸಮಾ;

ಕ್ರಿಯಾಕ್ರಿಯಮಿದಂ ವುತ್ತಂ, ಭೋಜನಞ್ಚಾವಿಕಪ್ಪನಂ.

ಪರಮ್ಪರಭೋಜನಕಥಾ.

೧೨೩೨.

ಪೂವಾ ಪಹೇಣಕತ್ಥಾಯ, ಪಟಿಯತ್ತಾ ಸಚೇ ಪನ;

ಪಾಥೇಯ್ಯತ್ಥಾಯ ಮನ್ಥಾ ವಾ, ಯೇ ಹಿ ತತ್ಥ ಚ ಭಿಕ್ಖುನಾ.

೧೨೩೩.

ದ್ವತ್ತಿಪತ್ತಾ ಗಹೇತಬ್ಬಾ, ಪೂರಾ ಪೂವೇಹಿ ಸತ್ತುಹಿ;

ತತೋ ಚೇ ಉತ್ತರಿಂ ತಸ್ಸ, ಹೋತಿ ಪಾಚಿತ್ತಿ ಗಣ್ಹತೋ.

೧೨೩೪.

ಗಹೇತ್ವಾ ನಿಕ್ಖಮನ್ತೇನ, ‘‘ದ್ವತ್ತಿಪತ್ತಾ ಮಯಾ ಇಧ;

ಗಹಿತಾ ಪನ ಪೂವಾ’’ತಿ, ಭಿಕ್ಖುಂ ದಿಸ್ವಾ ವದೇ ಬುಧೋ.

೧೨೩೫.

‘‘ಮಾ ಖೋ ತ್ವಂ ಪಟಿಗಣ್ಹಾ’’ತಿ, ಅವದನ್ತಸ್ಸ ದುಕ್ಕಟಂ;

ಗಣ್ಹತೋಪಿ ಚ ತಂ ಸುತ್ವಾ, ಹೋತಿ ಆಪತ್ತಿ ದುಕ್ಕಟಂ.

೧೨೩೬.

ಊನಕದ್ವತ್ತಿಪತ್ತೇಸು, ಅತಿರೇಕೋತಿ ಸಞ್ಞಿನೋ;

ತತ್ಥ ವೇಮತಿಕಸ್ಸಾಪಿ, ಹೋತಿ ಆಪತ್ತಿ ದುಕ್ಕಟಂ.

೧೨೩೭.

ಯೇನ ¶ ತತ್ಥ ತಯೋ ಲದ್ಧಾ, ಪತ್ತಪೂರಾ ತತೋ ಪನ;

ದ್ವೇ ಸಙ್ಘಸ್ಸ ಪದಾತಬ್ಬಾ, ದ್ವೇ ಚೇ ಏಕೋ, ನ ಏಕತೋ.

೧೨೩೮.

ಅಪಹೇಣಕಪಾಥೇಯ್ಯಂ, ಅವಸೇಸಮ್ಪಿ ವಾ ತತೋ;

ಸನ್ತಕಂ ಞಾತಕಾದೀನಂ, ದೇನ್ತಾನಮ್ಪಿ ತದೂನಕಂ.

೧೨೩೯.

ಗಣ್ಹತೋಪಿ ಅನಾಪತ್ತಿ, ತಥಾ ಉಮ್ಮತ್ತಕಾದಿನೋ;

ಸಮುಟ್ಠಾನಾದಯೋ ಸಬ್ಬೇ, ಸಞ್ಚರಿತ್ತಸಮಾ ಮತಾ.

ಕಾಣಮಾತುಕಥಾ.

೧೨೪೦.

ಅಞ್ಞೇನ ಪನ ಪಞ್ಚನ್ನಂ, ಭೋಜನಾನಂ ಪವಾರಿತೋ;

ಪಾಚಿತ್ತಿನತಿರಿತ್ತಂ ಚೇ, ಪುನ ಭುಞ್ಜತಿ ಭೋಜನಂ.

೧೨೪೧.

ಅಸನಂ ¶ ಭೋಜನಞ್ಚೇವ, ಹತ್ಥಪಾಸಾಭಿಹಾರತಾ;

ಕಾಯವಾಚಾಪಟಿಕ್ಖೇಪೋ, ಪಞ್ಚಙ್ಗೇಹಿ ಪವಾರಣಾ.

೧೨೪೨.

ಓದನೋ ಸತ್ತು ಕುಮ್ಮಾಸೋ, ಮಚ್ಛೋ ಮಂಸನ್ತಿ ಸಬ್ಬಸೋ;

ನಿಪ್ಪಪಞ್ಚೇನ ನಿದ್ದಿಟ್ಠಂ, ಭೋಜನಂ ಪಞ್ಚಧಾ ಮತಂ.

೧೨೪೩.

ಓದನೋ ತತ್ಥ ಸತ್ತನ್ನಂ, ಧಞ್ಞಾನಂ ಓದನೋ ಮತೋ;

ಭಜ್ಜಿತಾನಂ ತು ಧಞ್ಞಾನಂ, ಚುಣ್ಣಂ ‘‘ಸತ್ತೂ’’ತಿ ವುಚ್ಚತಿ.

೧೨೪೪.

ಕುಮ್ಮಾಸೋ ಯವಕುಮ್ಮಾಸೋ, ಮಚ್ಛೋ ವುಚ್ಚತಿ ಓದಕೋ;

ಮಂಸಮ್ಪಿ ಕಪ್ಪಿಯಮಂಸಂ, ಅಯಮೇತ್ಥ ವಿನಿಚ್ಛಯೋ.

೧೨೪೫.

ಸಾಲಿ ವೀಹಿ ಯವೋ ಕಙ್ಗು, ವರಕೋ ಗೋಧುಮೋ ತಥಾ;

ಕುದ್ರೂಸಕೋತಿ ಸತ್ತೇತೇ, ಧಞ್ಞಾ ಧಞ್ಞೇನ ದೇಸಿತಾ.

೧೨೪೬.

ಸಾಮಾಕಾದಿತಿಣಂ ಸಬ್ಬಂ, ಕುದ್ರೂಸೇನೇವ ದೀಪಿತಂ;

ನೀವಾರೋ ಸಾಲಿಯಂ ವುತ್ತೋ, ವರಕೇ ವರಕಚೋರಕೋ.

೧೨೪೭.

ಸತ್ತನ್ನಂ ಪನ ಧಞ್ಞಾನಂ, ಓದನೋ ಯಾಗು ವಾ ಪನ;

ಅಙ್ಗಸಮ್ಪತ್ತಿಯಾ ಯುತ್ತಾ, ಸಞ್ಜನೇತಿ ಪವಾರಣಂ.

೧೨೪೮.

ಹತ್ಥೇನ ¶ ಗಹಿತೋಕಾಸೇ, ಓಧಿಂ ದಸ್ಸೇತಿ ಯಾ ಪನ;

ಯಾಗುಸಾ ಇಧ ಸಬ್ಬಾಪಿ, ಓದನೋತಿ ಪವುಚ್ಚತಿ.

೧೨೪೯.

ಅಬ್ಭುಣ್ಹಾ ಪನ ಯಾ ಯಾಗು, ಉದ್ಧನೋರೋಪಿತಾ ತನು;

ಸಚೇ ಓಧಿಂ ನ ದಸ್ಸೇತಿ, ನ ಜನೇತಿ ಪವಾರಣಂ.

೧೨೫೦.

ಪುನ ಸಾ ಸೀತಲೀಭೂತಾ, ಘನಭಾವಂ ಗತಾ ಸಚೇ;

ಓಧಿಂ ದಸ್ಸೇತಿ ಸೋ ಪುಬ್ಬೇ, ತನುಭಾವೋ ನ ರಕ್ಖತಿ.

೧೨೫೧.

ತಕ್ಕಧಞ್ಞರಸಾದೀನಿ, ಆರೋಪೇತ್ವಾ ಬಹೂನಿಪಿ;

ಫಲಪಣ್ಣಕಳೀರಾನಿ, ಪಕ್ಖಿಪಿತ್ವಾನ ತತ್ಥ ಚ.

೧೨೫೨.

ತಣ್ಡುಲೇ ಮುಟ್ಠಿಮತ್ತೇಪಿ, ಪಕ್ಖಿಪಿತ್ವಾ ಪಚನ್ತಿ ಚೇ;

ಓಧಿಂ ಪನ ಚ ದಸ್ಸೇತಿ, ಸಞ್ಜನೇತಿ ಪವಾರಣಂ.

೧೨೫೩.

ರಸೇ ಧಞ್ಞರಸೇ ಖೀರೇ, ವಾಕಿರಿತ್ವಾನ ಓದನಂ;

‘‘ಯಾಗುಂ ಗಣ್ಹಥ, ಯಾಗು’’ನ್ತಿ, ವತ್ವಾ ದೇನ್ತಿ ಸಚೇ ಪನ.

೧೨೫೪.

ಕಿಞ್ಚಾಪಿ ತನುಕಾ ಹೋತಿ, ಸಞ್ಜನೇತಿ ಪವಾರಣಂ;

ತಂ ಪಚಿತ್ವಾ ಸಚೇ ದೇನ್ತಿ, ಯಾಗುಸಙ್ಗಹಿತಾ ಪನ.

೧೨೫೫.

ಛುಪನ್ತಿ ¶ ಮಚ್ಛಮಂಸಂ ವಾ, ತನುಕಾಯಪಿ ಯಾಗುಯಾ;

ಸಚೇ ಸಾಸಪಮತ್ತಮ್ಪಿ, ಪಞ್ಞಾಯತಿ ಪವಾರಣಂ.

೧೨೫೬.

ಮಚ್ಛಮಂಸರಸೋ ಸುದ್ಧೋ, ಸಂಸತ್ತೋ ರಸಯಾಗು ವಾ;

ನ ಚಾಕಪ್ಪಿಯಮಂಸಂ ವಾ, ಸಞ್ಜನೇತಿ ಪವಾರಣಂ.

೧೨೫೭.

ಠಪೇತ್ವಾ ವುತ್ತಧಞ್ಞಾನಂ, ಓದನಂ ಪನ ಸಬ್ಬಸೋ;

ವೇಳುತಣ್ಡುಲಕಾದೀನಂ, ನ ಪವಾರೇತಿ ಓದನೋ.

೧೨೫೮.

ಪುಥುಕಾ ವಾ ತತೋ ತಾಹಿ, ಕತಭತ್ತಮ್ಪಿ ಸತ್ತುಪಿ;

ಸುದ್ಧಾ ನ ಪನ ಪೂವಾ ವಾ, ಪವಾರೇನ್ತಿ ಕದಾಚಿಪಿ.

೧೨೫೯.

ಖರಪಾಕೇನ ಭಟ್ಠಾನಂ, ವೀಹೀನಂ ತಣ್ಡುಲೇ ಪನ;

ಕೋಟ್ಟೇತ್ವಾ ದೇನ್ತಿ ತಂ ಚುಣ್ಣಂ, ಸತ್ತುಸಙ್ಗಹಿತಂ ಮತಂ.

೧೨೬೦.

ಭಜ್ಜಿತಾನಂ ¶ ತು ವೀಹೀನಂ, ನ ಪವಾರೇನ್ತಿ ತಣ್ಡುಲಾ;

ತೇಸಂ ಪನ ಚ ಯಂ ಚುಣ್ಣಂ, ತಂ ಜನೇತಿ ಪವಾರಣಂ.

೧೨೬೧.

ಖರಪಾಕೇನ ಭಟ್ಠಾನಂ, ವೀಹೀನಂ ಕುಣ್ಡಕಮ್ಪಿ ಚ;

ಸತ್ತುನಂ ಮೋದಕೋ ವಾಪಿ, ಸಞ್ಜನೇತಿ ಪವಾರಣಂ.

೧೨೬೨.

ಸಮಪಾಕೇನ ಭಟ್ಠಾನಂ, ಸುಕ್ಖಾನಂ ಆತಪೇನ ಚ;

ಕುಣ್ಡಕಂ ಪನ ವೀಹೀನಂ, ನ ಜನೇತಿ ಪವಾರಣಂ.

೧೨೬೩.

ಲಾಜಾ ವಾ ಪನ ತೇಹೇವ, ಕತಭತ್ತಮ್ಪಿ ಸತ್ತು ವಾ;

ಖಜ್ಜಕಂ ಪನ ಸುದ್ಧಂ ವಾ, ನ ಜನೇತಿ ಪವಾರಣಂ.

೧೨೬೪.

ಪೂರಿತಂ ಮಚ್ಛಮಂಸೇಹಿ, ತಂ ಜನೇತಿ ಪವಾರಣಂ;

ಯಂ ಕಿಞ್ಚಿ ಭಜ್ಜಿತಂ ಪಿಟ್ಠಂ, ನ ಪವಾರೇತಿ ಸುದ್ಧಕಂ.

೧೨೬೫.

ಯವೇಹಿ ಕತಕುಮ್ಮಾಸೋ, ಪವಾರೇತಿ, ನ ಚಾಪರೋ;

ಮಚ್ಛಮಂಸೇಸು ವತ್ತಬ್ಬಂ, ಪಾಕಟತ್ತಾ ನ ವಿಜ್ಜತಿ.

೧೨೬೬.

ಖಾದನ್ತೋ ಕಪ್ಪಿಯಂ ಮಂಸಂ, ನಿಸೇಧೇತಿ ಅಕಪ್ಪಿಯಂ;

ನ ಸೋ ತೇನ ಪವಾರೇತಿ, ಅವತ್ಥುತ್ತಾತಿ ದೀಪಿತಂ.

೧೨೬೭.

ತಥೇವಾಕಪ್ಪಿಯಂ ಮಂಸಂ, ಖಾದನ್ತೋ ಕಪ್ಪಿಯಂ ಸಚೇ;

ನಿಸೇಧೇತಿ ಪವಾರೇತಿ, ವತ್ಥುಕತ್ತಾತಿ ವಣ್ಣಿತಂ.

೧೨೬೮.

ಮಂಸಂ ಪನ ಚ ಖಾದನ್ತೋ, ಕಪ್ಪಿಯಂ ವಾ ಅಕಪ್ಪಿಯಂ;

ಪವಾರೇತಿ ನಿಸೇಧೇತಿ, ಕಿಞ್ಚಿ ಕಪ್ಪಿಯಭೋಜನಂ.

೧೨೬೯.

ಸಚೇ ¶ ಅಕಪ್ಪಿಯಂ ಮಂಸಂ, ಖಾದನ್ತೋವ ಅಕಪ್ಪಿಯಂ;

ನಿಸೇಧಂ ನ ಪವಾರೇತಿ, ತಥಾ ಅಞ್ಞಂ ಅಕಪ್ಪಿಯಂ.

೧೨೭೦.

ಸಚೇ ಅಜ್ಝೋಹಟಂ ಹೋತಿ, ಸಿತ್ಥಮೇಕಮ್ಪಿ ಭಿಕ್ಖುನಾ;

ಪತ್ತೇ ಹತ್ಥೇ ಮುಖೇ ವಾಪಿ, ಭೋಜನಂ ಪನ ವಿಜ್ಜತಿ.

೧೨೭೧.

ಪವಾರಣಪಹೋನಂ ಚೇ, ಪಟಿಕ್ಖಿಪತಿ ಭೋಜನಂ;

ಪವಾರೇತಿ ಸಚೇ ನತ್ಥಿ, ನ ಪವಾರೇತಿ ಕತ್ಥಚಿ.

೧೨೭೨.

ಗಿಲಿತ್ವಾ ಚ ಮುಖೇ ಭತ್ತಂ, ಸೇಸಮಾದಾಯ ಗಚ್ಛತಿ;

ಅನ್ತರಾ ಚ ನಿಸೇಧೇನ್ತೋ, ನ ಪವಾರೇತಿ ಭೋಜನಂ.

೧೨೭೩.

ಮುಖೇ ¶ ಚ ಭತ್ತಂ ಗಿಲಿತಞ್ಚ ಹತ್ಥೇ;

ಭತ್ತಂ ತು ಅಞ್ಞಸ್ಸ ಚ ದಾತುಕಾಮೋ;

ಪತ್ತೇ ಚ ಭತ್ತಂ ಪುನ ದಾತುಕಾಮೋ;

ಪಟಿಕ್ಖಿಪನ್ತೋ ನ ಪವಾರಿತೋ ಸೋ.

೧೨೭೪.

ಅಸನಸ್ಸ ಉಪಚ್ಛೇದಾ, ನ ಪವಾರೇತಿ ಸೋತಿ ಹಿ;

ಕಥಯನ್ತಿ ಮಹಾಪಞ್ಞಾ, ಕಾರಣಾಕಾರಣಞ್ಞುನೋ.

೧೨೭೫.

ಗಣ್ಹತೋ ಪಚ್ಛಿಮಂ ಅಙ್ಗಂ, ದದತೋ ಪುರಿಮಂ ಪನ;

ಉಭಿನ್ನಂ ಅಡ್ಢತೇಯ್ಯಂ ಚೇ, ವಿನಾ ಹತ್ಥಂ ಪಸಾರಿತಂ.

೧೨೭೬.

ತಸ್ಮಿಂ ಅಭಿಹಟಂ ಠಾನೇ, ಪವಾರಣಪಹೋನಕಂ;

ತಾದಿಸಂ ಭುಞ್ಜಮಾನೋವ, ನಿಸೇಧೇತಿ ಪವಾರಿತೋ.

೧೨೭೭.

ಹತ್ಥೇ ಆಧಾರಕೇ ವಾಪಿ, ಪತ್ತಂ ಊರೂಸು ವಾ ಠಿತಂ;

ಆಹರಿತ್ವಾ ಸಚೇ ಭಿಕ್ಖು, ‘‘ಭತ್ತಂ ಗಣ್ಹಾ’’ತಿ ಭಾಸತಿ.

೧೨೭೮.

ಅನನ್ತರೇ ನಿಸಿನ್ನೋವ, ತಂ ಪಟಿಕ್ಖಿಪತೋ ಪನ;

ಅಭಿಹಾರಸ್ಸ ಚಾಭಾವಾ, ನತ್ಥಿ ತಸ್ಸ ಪವಾರಣಾ.

೧೨೭೯.

ಭತ್ತಪಚ್ಛಿಂ ಪಣಾಮೇತ್ವಾ, ಠಪೇತ್ವಾ ಪುರತೋ ‘‘ಇದಂ;

ಗಣ್ಹಾಹೀ’’ತಿ ಚ ವುತ್ತೇಪಿ, ಅಯಮೇವ ವಿನಿಚ್ಛಯೋ.

೧೨೮೦.

ಅನನ್ತರಸ್ಸ ಭಿಕ್ಖುಸ್ಸ, ದೀಯಮಾನೇ ಪನೇತರೋ;

ಪಿದಹನ್ತೋ ಸಕಂ ಪತ್ತಂ, ಹತ್ಥೇಹಿ ನ ಪವಾರಿತೋ.

೧೨೮೧.

ಕಾಯೇನಾಭಿಹಟಂ ಭತ್ತಂ, ಪಟಿಕ್ಖಿಪತಿ ಯೋ ಪನ;

ಕಾಯೇನ ವಾಪಿ ವಾಚಾಯ, ಹೋತಿ ಕಸ್ಸ ಪವಾರಣಾ.

೧೨೮೨.

ಏಕೋ ¶ ಅಭಿಹಟೇ ಭತ್ತೇ, ಪವಾರಣಭಯಾ ಪನ;

‘‘ಆಕಿರಾಕಿರ ಕೋಟ್ಟೇತ್ವಾ, ಕೋಟ್ಟೇತ್ವಾ ಪೂರಯಾ’’ತಿ ಚ.

೧೨೮೩.

ಸಚೇ ವದತಿ ತಸ್ಸಾಪಿ, ನ ಪನತ್ಥಿ ಪವಾರಣಾ;

ಇಚ್ಚೇವಾಹ ಮಹಾಥೇರೋ, ಮಹಾಪದುಮನಾಮಕೋ.

೧೨೮೪.

ಸಮಂಸಞ್ಹಿ ¶ ರಸಂ ನೇತ್ವಾ, ಗಣ್ಹಥಾತಿ ರಸಂ ವದೇ;

ತಂ ಸುತ್ವಾ ಚ ನಿಸೇಧೇನ್ತೋ, ನೇವ ಹೋತಿ ಪವಾರಿತೋ.

೧೨೮೫.

‘‘ಗಣ್ಹ ಮಚ್ಛರಸಂ ಸಾರಂ, ಗಣ್ಹ ಮಂಸರಸ’’ನ್ತಿ ವಾ;

‘‘ಇದಂ ಗಣ್ಹಾ’’ತಿ ವಾ ವುತ್ತೇ, ಪಟಿಕ್ಖೇಪೇ ಪವಾರಣಾ.

೧೨೮೬.

ಸಚೇ ಮಂಸಂ ವಿಸುಂ ಕತ್ವಾ, ‘‘ಗಣ್ಹ ಮಂಸರಸ’’ನ್ತಿ ವಾ;

ವದೇಯ್ಯತ್ಥಿ ಚ ಮಂಸಂ ಚೇ, ಪಟಿಕ್ಖೇಪೇ ಪವಾರಣಾ.

೧೨೮೭.

ಓದನೇನ ಚ ಪುಚ್ಛನ್ತಂ, ‘‘ಮುಹುತ್ತಂ ಆಗಮೇಹಿ’’ತಿ;

ಗಹಣತ್ಥಂ ಠಪೇನ್ತಸ್ಸ, ನೇವ ತಸ್ಸ ಪವಾರಣಾ.

೧೨೮೮.

ಕಳೀರಪನಸಾದೀಹಿ, ಮಿಸ್ಸಕಂ ಮಚ್ಛಮಂಸಕಂ;

‘‘ಕಳೀರಸೂಪಕಂ ಗಣ್ಹ, ಪನಸಬ್ಯಞ್ಜನ’’ನ್ತಿ ವಾ.

೧೨೮೯.

ವದನ್ತಿ ಚೇ ಪಟಿಕ್ಖೇಪೇ, ನೇವ ಹೋತಿ ಪವಾರಣಾ;

ಅಪವಾರಣಹೇತೂನಂ, ನಾಮೇನ ಪನ ವುತ್ತತೋ.

೧೨೯೦.

‘‘ಮಚ್ಛಸೂಪ’’ನ್ತಿ ವಾ ವುತ್ತೇ, ‘‘ಮಂಸಸೂಪ’’ನ್ತಿ ವಾ ಪನ;

‘‘ಇದಂ ಗಣ್ಹಾ’’ತಿ ವಾ ವುತ್ತೇ, ಹೋತಿಯೇವ ಪವಾರಣಾ.

೧೨೯೧.

ಏಸೇವ ಚ ನಯೋ ವುತ್ತೋ, ಞೇಯ್ಯೋ ಮಂಸಕರಮ್ಬಕೇ;

ಸಬ್ಬೇಸು ಮಚ್ಛಮಂಸೇಹಿ, ಮಿಸ್ಸಕೇಸು ಅಯಂ ನಯೋ.

೧೨೯೨.

ಭತ್ತಸಮ್ಮಿಸ್ಸಿತಂ ಯಾಗುಂ, ಆಹರಿತ್ವಾ ಸಚೇ ಪನ;

‘‘ಯಾಗುಂ ಗಣ್ಹಾ’’ತಿ ವುತ್ತಸ್ಮಿಂ, ನ ಪವಾರೇತಿ ವಾರಯಂ.

೧೨೯೩.

‘‘ಭತ್ತಂ ಗಣ್ಹಾ’’ತಿ ವುತ್ತೇ ತು, ಪವಾರೇತಿ ಪಟಿಕ್ಖಿಪಂ;

ಯೇನ ವಾಪುಚ್ಛಿತೋ ತಸ್ಸ, ಅತ್ಥಿತಾಯಾತಿ ಕಾರಣಂ.

೧೨೯೪.

‘‘ಯಾಗುಮಿಸ್ಸಕಂ ಗಣ್ಹಾ’’ತಿ, ವುತ್ತೇ ತತ್ಥ ಚ ಯಾಗು ಚೇ;

ಸಮಾ ಬಹುತರಾ ವಾ ಸಾ, ನ ಪವಾರೇತಿ ಸೋ ಕಿರ.

೧೨೯೫.

ಮನ್ದಾ ಯಾಗು, ಬಹುಂ ಭತ್ತಂ, ಸಚೇ ಹೋತಿ ಪವಾರಣಾ;

ಇದಂ ಸಬ್ಬತ್ಥ ನಿದ್ದಿಟ್ಠಂ, ಕಾರಣಂ ಪನ ದುದ್ದಸಂ.

೧೨೯೬.

ರಸಂ ¶ ಬಹುರಸೇ ಭತ್ತೇ, ಖೀರಂ ವಾ ಬಹುಖೀರಕೇ;

ಗಣ್ಹಥಾತಿ ವಿಸುಂ ಕತ್ವಾ, ದೇತಿ ನತ್ಥಿ ಪವಾರಣಾ.

೧೨೯೭.

ಗಚ್ಛನ್ತೇನೇವ ¶ ಭೋತ್ತಬ್ಬಂ, ಗಚ್ಛನ್ತೋ ಚೇ ಪವಾರಿತೋ;

ಭುಞ್ಜಿತಬ್ಬಂ ಠಿತೇನೇವ, ಠತ್ವಾ ಯದಿ ಪವಾರಿತೋ.

೧೨೯೮.

ಉದಕಂ ವಾಪಿ ಪತ್ವಾ ಸೋ, ಸಚೇ ತಿಟ್ಠತಿ ಕದ್ದಮಂ;

ಅತಿರಿತ್ತಂ ತು ಕಾರೇತ್ವಾ, ಭುಞ್ಜಿತಬ್ಬಂ ತತೋ ಪುನ.

೧೨೯೯.

ಪೀಠಕೇ ಯೋ ನಿಸೀದಿತ್ವಾ, ಪವಾರೇತಿ ಸಚೇ ಪನ;

ಆಸನಂ ಅವಿಚಾಲೇತ್ವಾ, ಭುಞ್ಜಿತಬ್ಬಂ ಯಥಾಸುಖಂ.

೧೩೦೦.

ಸಚೇ ಮಞ್ಚೇ ನಿಸೀದಿತ್ವಾ, ಪವಾರೇತಿ ತತೋ ಪನ;

ಇತೋ ಸಂಸರಿತುಂ ಏತ್ತೋ, ಈಸಕಮ್ಪಿ ನ ಲಬ್ಭತಿ.

೧೩೦೧.

ತೇನ ಮಞ್ಚೇನ ನಂ ಸದ್ಧಿಂ, ವಟ್ಟತಞ್ಞತ್ರ ನೇನ್ತಿ ಚೇ;

ಏವಂ ಸಬ್ಬತ್ಥ ಞಾತಬ್ಬಂ, ವಿಞ್ಞುನಾ ವಿನಯಞ್ಞುನಾ.

೧೩೦೨.

ನಿಪಜ್ಜಿತ್ವಾವ ಭೋತ್ತಬ್ಬಂ, ನಿಪನ್ನೋ ಚೇ ಪವಾರಿತೋ;

ವಾರೇತುಕ್ಕುಟಿಕೋ ಹುತ್ವಾ, ಭುಞ್ಜಿತಬ್ಬಂ ತಥೇವ ಚ.

೧೩೦೩.

ಅಥಾಲಮೇತಂ ಸಬ್ಬನ್ತಿ, ವತ್ತಬ್ಬಂ ತೇನ ಭಿಕ್ಖುನಾ;

ಅತಿರಿತ್ತಂ ಕರೋನ್ತೇನ, ಓನಮೇತ್ವಾನ ಭಾಜನಂ.

೧೩೦೪.

ಕಪ್ಪಿಯಂ ಪನ ಕಾತಬ್ಬಂ, ನ ಪತ್ತೇಯೇವ ಕೇವಲಂ;

ಪಚ್ಛಿಯಂ ಯದಿ ವಾ ಕುಣ್ಡೇ, ಕಾತುಂ ವಟ್ಟತಿ ಭಾಜನೇ.

೧೩೦೫.

ಪವಾರಿತಾನಂ ಅಪವಾರಿತಾನಂ;

ಅಞ್ಞೇಸಮೇತಂ ಪನ ವಟ್ಟತೇವ;

ಯೇನಾತಿರಿತ್ತಂ ತು ಕತಂ ಠಪೇತ್ವಾ;

ತಮೇವ ಚೇಕಂ ಪರಿಭುಞ್ಜಿತಬ್ಬಂ.

೧೩೦೬.

ಕಪ್ಪಿಯಂ ಪನ ಕಾರೇತ್ವಾ, ಭುಞ್ಜನ್ತಸ್ಸೇವ ಭಿಕ್ಖುನೋ;

ಬ್ಯಞ್ಜನಂ ವಾಪಿ ಯಂ ಕಿಞ್ಚಿ, ಪತ್ತೇ ತಸ್ಸಾಕಿರನ್ತಿ ಚೇ.

೧೩೦೭.

ಅತಿರಿತ್ತಂ ತು ಕಾರೇತ್ವಾ, ಭುಞ್ಜಿತಬ್ಬಂ ತಥಾ ಪುನ;

ಯೇನ ತಂ ಅಕತಂ ಯಂ ವಾ, ಕಾತಬ್ಬಂ ತೇನ ತಂ ವಿಸುಂ.

೧೩೦೮.

ಕತಂ ¶ ಅಕಪ್ಪಿಯಾದೀಹಿ, ಅತಿರಿತ್ತಂ ತು ಸತ್ತಹಿ;

ನ ಗಿಲಾನಾತಿರಿತ್ತಞ್ಚ, ತಂ ಹೋತಿನತಿರಿತ್ತಕಂ.

೧೩೦೯.

ಯೋಪಿ ¶ ಪಾತೋವ ಏಕಮ್ಪಿ, ಸಿತ್ಥಂ ಭುತ್ವಾ ನಿಸೀದತಿ;

ಉಪಕಟ್ಠೂಪನೀತಮ್ಪಿ, ಕಾತುಂ ಲಭತಿ ಕಪ್ಪಿಯಂ.

೧೩೧೦.

ಆಹಾರತ್ಥಾಯ ಯಾಮಾದಿ-ಕಾಲಿಕಂ ಪಟಿಗಣ್ಹತೋ;

ಅನಾಮಿಸಂ ತಮೇವಸ್ಸ, ದುಕ್ಕಟಂ ಪರಿಭುಞ್ಜತೋ.

೧೩೧೧.

ತಥಾ ಅನತಿರಿತ್ತನ್ತಿ, ಸಞ್ಞಿನೋ ಅತಿರಿತ್ತಕೇ;

ತತ್ಥ ವೇಮತಿಕಸ್ಸಾಪಿ, ದುಕ್ಕಟಂ ಪರಿದೀಪಿತಂ.

೧೩೧೨.

ಅನಾಪತ್ತಾತಿರಿತ್ತಂ ತು, ಕಾರಾಪೇತ್ವಾನ ಭುಞ್ಜತೋ;

ಗಿಲಾನಸ್ಸಾತಿರಿತ್ತಂ ವಾ, ತಥಾ ಉಮ್ಮತ್ತಕಾದಿನೋ.

೧೩೧೩.

ಸಮುಟ್ಠಾನಾದಯೋ ಸಬ್ಬೇ, ಕಥಿನೇನ ಸಮಾ ಮತಾ;

ಕಪ್ಪಿಯಾಕರಣಞ್ಚೇವ, ಭೋಜನಞ್ಚ ಕ್ರಿಯಾಕ್ರಿಯಂ.

ಪಠಮಪವಾರಣಕಥಾ.

೧೩೧೪.

ಯೋ ಪನಾನತಿರಿತ್ತೇನ, ಪವಾರೇಯ್ಯ ಪವಾರಿತಂ;

ಜಾನಂ ಆಸಾದನಾಪೇಕ್ಖೋ, ಭುತ್ತೇ ಪಾಚಿತ್ತಿ ತಸ್ಸ ತು.

೧೩೧೫.

ದುಕ್ಕಟಂ ಅಭಿಹಾರೇ ಚ, ಗಹಣೇ ಇತರಸ್ಸ ಹಿ;

ಅಜ್ಝೋಹಾರಪಯೋಗೇಸು, ಸಬ್ಬೇಸುಪಿ ಚ ದುಕ್ಕಟಂ.

೧೩೧೬.

ಭೋಜನಸ್ಸಾವಸಾನಸ್ಮಿಂ, ಪಾಚಿತ್ತಿ ಪರಿದೀಪಿತಾ;

ಅಭಿಹಾರಕಭಿಕ್ಖುಸ್ಸ, ಸಬ್ಬಂ ತಸ್ಸೇವ ದಸ್ಸಿತಂ.

೧೩೧೭.

ಪವಾರಿತೋತಿ ಸಞ್ಞಿಸ್ಸ, ಭಿಕ್ಖುಸ್ಮಿಂ ಅಪವಾರಿತೇ;

ವಿಮತಿಸ್ಸುಭಯತ್ಥಾಪಿ, ದುಕ್ಕಟಂ ಪರಿದೀಪಿತಂ.

೧೩೧೮.

ಅನಾಪತ್ತಾತಿರಿತ್ತಂ ವಾ, ಕಾರಾಪೇತ್ವಾವ ದೇತಿ ಚೇ;

ಗಿಲಾನಸ್ಸಾವಸೇಸಂ ವಾ, ಅಞ್ಞಸ್ಸತ್ಥಾಯ ದೇತಿ ವಾ.

೧೩೧೯.

ಸೇಸಂ ¶ ಸಬ್ಬಮಸೇಸೇನ, ಅನನ್ತರಸಮಂ ಮತಂ;

ಓಮಸವಾದತುಲ್ಯಾವ, ಸಮುಟ್ಠಾನಾದಯೋ ನಯಾ.

ದುತಿಯಪವಾರಣಕಥಾ.

೧೩೨೦.

ಖಾದನೀಯಂ ವಾ ಭೋಜನೀಯಂ ವಾ;

ಕಿಞ್ಚಿ ವಿಕಾಲೇ ಯೋ ಪನ ಭಿಕ್ಖು;

ಖಾದತಿ ¶ ಭುಞ್ಜತಿ ವಾಪಿ ಚ ತಂ;

ಸೋ ಜಿನವುತ್ತಂ ದೋಸಮುಪೇತಿ.

೧೩೨೧.

ಯಮಾಮಿಸಗತಞ್ಚೇತ್ಥ, ವನಮೂಲಫಲಾದಿಕಂ;

ಕಾಲಿಕೇಸ್ವಸಮ್ಮೋಹತ್ಥಂ, ವೇದಿತಬ್ಬಮಿದಂ ಪನ.

೧೩೨೨.

ಮೂಲಂ ಕನ್ದಂ ಮುಳಾಲಞ್ಚ, ಮತ್ಥಕಂ ಖನ್ಧಕಂ ತಚಂ;

ಪತ್ತಂ ಪುಪ್ಫಂ ಫಲಂ ಅಟ್ಠಿ, ಪಿಟ್ಠಂ ನಿಯ್ಯಾಸಮೇವ ಚ.

೧೩೨೩.

ಮೂಲಖಾದನೀಯಾದೀನಂ, ಮುಖಮತ್ತನಿದಸ್ಸನಂ;

ಭಿಕ್ಖೂನಂ ಪಾಟವತ್ಥಾಯ, ನಾಮತ್ಥೇಸು ನಿಬೋಧಥ.

೧೩೨೪.

ಮೂಲಕಂ ಖಾರಕಞ್ಚೇವ, ವತ್ಥುಲಂ ತಣ್ಡುಲೇಯ್ಯಕಂ;

ತಮ್ಬಕಂ ಜಜ್ಝರಿಕಞ್ಚ, ಚಚ್ಚು ವಜಕಲೀಪಿ ಚ.

೧೩೨೫.

ಮೂಲಾನಿ ಏವಮಾದೀನಂ, ಸಾಕಾನಂ ಆಮಿಸೇ ಪನ;

ಸಙ್ಗಹಂ ಇಧ ಗಚ್ಛನ್ತಿ, ಆಹಾರತ್ಥಂ ಫರನ್ತಿ ಹಿ.

೧೩೨೬.

ಛಡ್ಡೇನ್ತಿ ಜರಟ್ಠಂ ಛೇತ್ವಾ, ಯಂ ತಂ ವಜಕಲಿಸ್ಸ ತು;

ತಂ ಯಾವಜೀವಿಕಂ ವುತ್ತಂ, ಸೇಸಾನಂ ಯಾವಕಾಲಿಕಂ.

೧೩೨೭.

ಹಲಿದ್ದಿ ಸಿಙ್ಗಿವೇರಞ್ಚ, ವಚತ್ತಂ ಅತಿವಿಸಂ ವಚಂ;

ಉಸೀರಂ ಭದ್ದಮುತ್ತಞ್ಚ, ತಥಾ ಕಟುಕರೋಹಿಣೀ.

೧೩೨೮.

ಇಚ್ಚೇವಮಾದಿಕಂ ಅಞ್ಞಂ, ಪಞ್ಚಮೂಲಾದಿಕಂ ಬಹು;

ನಾನಪ್ಪಕಾರಕಂ ಮೂಲಂ, ವಿಞ್ಞೇಯ್ಯಂ ಯಾವಜೀವಿಕಂ.

೧೩೨೯.

ಮಸಾಲುಪಿಣ್ಡಲಾದೀನಂ ¶ , ವಲ್ಲೀನಂ ಆಲುವಸ್ಸ ಚ;

ಕನ್ದೋ ಉಪ್ಪಲಜಾತೀನಂ, ತಥಾ ಪದುಮಜಾತಿಯಾ.

೧೩೩೦.

ಕದಲೀಸಿಗ್ಗುತಾಲಾನಂ, ಮಾಲುವಸ್ಸ ಚ ವೇಳುಯಾ;

ಸತಾವರಿ ಕಸೇರೂನಂ, ಕನ್ದೋ ಅಮ್ಬಾಟಕಸ್ಸ ಚ.

೧೩೩೧.

ಇಚ್ಚೇವಮಾದಯೋ ಕನ್ದಾ;

ದಸ್ಸಿತಾ ಯಾವಕಾಲಿಕಾ;

ಧೋತೋ ಸೋ ಆಮಿಸೇ ವುತ್ತೋ;

ಕನ್ದೋ ಯೋ ಖೀರವಲ್ಲಿಯಾ.

೧೩೩೨.

ಅಧೋತೋ ಲಸುಣಞ್ಚೇವ, ಖೀರಕಾಕೋಲಿಆದಯೋ;

ಕನ್ದಾ ವಾಕ್ಯಪಥಾತೀತಾ, ವಿಞ್ಞೇಯ್ಯಾ ಯಾವಜೀವಿಕಾ.

೧೩೩೩.

ಪುಣ್ಡರೀಕಮುಳಾಲಞ್ಚ ¶ , ಮುಳಾಲಂ ಪದುಮಸ್ಸ ಚ;

ಏವಮಾದಿಮನೇಕಮ್ಪಿ, ಮುಳಾಲಂ ಯಾವಕಾಲಿಕಂ.

೧೩೩೪.

ತಾಲಹಿನ್ತಾಲಕುನ್ತಾಲ-ನಾಳಿಕೇರಾದಿಸಮ್ಭವಂ;

ಹಲಿದ್ದಿಸಿಙ್ಗಿವೇರಾನಂ, ಮುಳಾಲಂ ಯಾವಜೀವಿಕಂ.

೧೩೩೫.

ತಾಲಹಿನ್ತಾಲಕುನ್ತಾಲ-ಕಳೀರೋ ಕೇತಕಸ್ಸ ಚ;

ಕದಲೀನಾಳಿಕೇರಾನಂ, ಮತ್ಥಕಂ ಮೂಲಕಸ್ಸ ಚ.

೧೩೩೬.

ಖಜ್ಜುರೇರಕವೇತ್ತಾನಂ, ಉಚ್ಛುವೇಳುನಳಾದಿನಂ;

ಸತ್ತನ್ನಂ ಪನ ಧಞ್ಞಾನಂ, ಕಳೀರೋ ಸಾಸಪಸ್ಸ ಚ.

೧೩೩೭.

ಇಚ್ಚೇವಮಾದಯೋನೇಕೇ, ಮತ್ಥಕಾ ಯಾವಕಾಲಿಕಾ;

ಅಞ್ಞೇ ಹಲಿದ್ದಿಆದೀನಂ, ಮತ್ಥಕಾ ಯಾವಜೀವಿಕಾ.

೧೩೩೮.

ತಾಲಕುನ್ತಾಲಕಾದೀನಂ, ಛಿನ್ದಿತ್ವಾ ಪಾತಿತೋ ಪನ;

ಗತೋ ಜರಟ್ಠಬುನ್ದೋ ಸೋ, ಸಙ್ಗಹಂ ಯಾವಜೀವಿಕೇ.

೧೩೩೯.

ಖನ್ಧಖಾದನೀಯಂ ನಾಮ, ಉಚ್ಛುಖನ್ಧೋ ಪಕಾಸಿತೋ;

ಸಾಲಕಲ್ಯಾಣಿಯಾ ಖನ್ಧೋ, ತಥಾ ಪಥವಿಯಂ ಗತೋ.

೧೩೪೦.

ಏವಮುಪ್ಪಲಜಾತೀನಂ, ದಣ್ಡಕೋ ಯಾವಕಾಲಿಕೋ;

ಪಣ್ಣದಣ್ಡುಪ್ಪಲಾದೀನಂ, ಸಬ್ಬೋ ಪದುಮಜಾತಿಯಾ.

೧೩೪೧.

ಯಾವಜೀವಿಕಸಙ್ಖಾತಾ ¶ , ಕರಮದ್ದಾದಿದಣ್ಡಕಾ;

ತಚೇಸುಚ್ಛುತಚೋವೇಕೋ, ಸರಸೋ ಯಾವಕಾಲಿಕೋ.

೧೩೪೨.

ಮೂಲಕಂ ಖಾರಕೋ ಚಚ್ಚು, ತಮ್ಬಕೋ ತಣ್ಡುಲೇಯ್ಯಕೋ;

ವತ್ಥುಲೋ ಚೀನಮುಗ್ಗೋ ಚ, ಉಮ್ಮಾ ವಜಕಲೀ ತಥಾ.

೧೩೪೩.

ಜಜ್ಝರೀ ಕಾಸಮದ್ದೋ ಚ, ಸೇಲ್ಲು ಸಿಗ್ಗು ಚ ನಾಳಿಕಾ;

ವರುಣೋ ಅಗ್ಗಿಮನ್ಥೋ ಚ, ಜೀವನ್ತೀ ಸುನಿಸನ್ನಕೋ.

೧೩೪೪.

ರಾಜಮಾಸೋ ಚ ಮಾಸೋ ಚ, ನಿಪ್ಫಾವೋ ಮಿಗಪುಪ್ಫಿಕಾ;

ವಣ್ಟಕೋ ಭೂಮಿಲೋಣೀತಿ, ಏವಮಾದಿಮನೇಕಕಂ.

೧೩೪೫.

ಪತ್ತಖಾದನೀಯಂ ನಾಮ, ಕಥಿತಂ ಯಾವಕಾಲಿಕಂ;

ಇತರಾ ಚ ಮಹಾಲೋಣಿ, ದೀಪಿತಾ ಯಾವಜೀವಿಕಾ.

೧೩೪೬.

ಯಾವಕಾಲಿಕಮಿಚ್ಚೇವ, ಕಥಿತಂ ಅಮ್ಬಪಲ್ಲವಂ;

ನಿಮ್ಬಸ್ಸ ಕುಟಜಸ್ಸಾಪಿ, ಪಣ್ಣಂ ಸುಲಸಿಯಾಪಿ ಚ.

೧೩೪೭.

ಕಪ್ಪಾಸಿಕಪಟೋಲಾನಂ ¶ , ತೇಸಂ ಪುಪ್ಫಫಲಾನಿ ಚ;

ಫಣಿಜ್ಜಕಜ್ಜುಕಾನಞ್ಚ, ಪಣ್ಣಂ ತಂ ಯಾವಜೀವಿಕಂ.

೧೩೪೮.

ಅಟ್ಠನ್ನಂ ಮೂಲಕಾದೀನಂ, ಪುಪ್ಫಂ ನಿಪ್ಫಾವಕಸ್ಸ ಚ;

ತಥಾ ಪುಪ್ಫಂ ಕರೀರಸ್ಸ, ಪುಪ್ಫಂ ವರುಣಕಸ್ಸ ಚ.

೧೩೪೯.

ಪುಪ್ಫಂ ಕಸೇರುಕಸ್ಸಾಪಿ, ಜೀವನ್ತೀ ಸಿಗ್ಗುಪುಪ್ಫಕಂ;

ಪದುಮುಪ್ಪಲಜಾತೀನಂ, ಪುಪ್ಫಾನಂ ಕಣ್ಣಿಕಾಪಿ ಚ.

೧೩೫೦.

ನಾಳಿಕೇರಸ್ಸ ತಾಲಸ್ಸ, ತರುಣಂ ಕೇತಕಸ್ಸ ಚ;

ಇಚ್ಚೇವಮಾದಿಕಂ ಪುಪ್ಫ-ಮನೇಕಂ ಯಾವಕಾಲಿಕಂ.

೧೩೫೧.

ಯಾವಕಾಲಿಕಪುಪ್ಫಾನಿ, ಠಪೇತ್ವಾ ಪನ ಸೇಸಕಂ;

ಯಾವಜೀವಿಕಪುಪ್ಫನ್ತಿ, ದೀಪಯೇ ಸಬ್ಬಮೇವ ಚ.

೧೩೫೨.

ತಿಲಕಮಕುಲಸಾಲಮಲ್ಲಿಕಾನಂ ¶ ;

ಕಕುಧಕಪಿತ್ಥಕಕುನ್ದಕಳೀನಂ;

ಕುರವಕಕರವೀರಪಾಟಲೀನಂ;

ಕುಸುಮಮಿದಂ ಪನ ಯಾವಜೀವಿಕಂ.

೧೩೫೩.

ಅಮ್ಬಮ್ಬಾಟಕಜಮ್ಬೂನಂ, ಫಲಞ್ಚ ಪನಸಸ್ಸ ಚ;

ಮಾತುಲುಙ್ಗಕಪಿತ್ಥಾನಂ, ಫಲಂ ತಿನ್ತಿಣಿಕಸ್ಸ ಚ.

೧೩೫೪.

ತಾಲಸ್ಸ ನಾಳಿಕೇರಸ್ಸ, ಫಲಂ ಖಜ್ಜೂರಿಯಾಪಿ ಚ;

ಲಬುಜಸ್ಸ ಚ ಚೋಚಸ್ಸ, ಮೋಚಸ್ಸ ಮಧುಕಸ್ಸ ಚ.

೧೩೫೫.

ಬದರಸ್ಸ ಕರಮದ್ದಸ್ಸ, ಫಲಂ ವಾತಿಙ್ಗಣಸ್ಸ ಚ;

ಕುಮ್ಭಣ್ಡತಿಪುಸಾನಞ್ಚ, ಫಲಂ ಏಳಾಲುಕಸ್ಸ ಚ.

೧೩೫೬.

ರಾಜಾಯತನಫಲಂ ಪುಸ್ಸ-ಫಲಂ ತಿಮ್ಬರುಕಸ್ಸ ಚ;

ಏವಮಾದಿಮನೇಕಮ್ಪಿ, ಫಲಂ ತಂ ಯಾವಕಾಲಿಕಂ.

೧೩೫೭.

ತಿಫಲಂ ಪಿಪ್ಫಲೀ ಜಾತಿ-ಫಲಞ್ಚ ಕಟುಕಪ್ಫಲಂ;

ಗೋಟ್ಠಫಲಂ ಬಿಲಙ್ಗಞ್ಚ, ತಕ್ಕೋಲಮರಿಚಾನಿ ಚ.

೧೩೫೮.

ಏವಮಾದೀನಿ ವುತ್ತಾನಿ, ಅವುತ್ತಾನಿ ಚ ಪಾಳಿಯಂ;

ಫಲಾನಿ ಪನ ಗಚ್ಛನ್ತಿ, ಯಾವಜೀವಿಕಸಙ್ಗಹಂ.

೧೩೫೯.

ಪನಸಮ್ಬಾಟಕಟ್ಠೀನಿ, ಸಾಲಟ್ಠಿ ಲಬುಜಟ್ಠಿ ಚ;

ಚಿಞ್ಚಾಬಿಮ್ಬಫಲಟ್ಠೀನಿ, ಪೋಕ್ಖರಟ್ಠಿ ಚ ಸಬ್ಬಸೋ.

೧೩೬೦.

ಖಜ್ಜೂರಿಕೇತಕಾದೀನಂ ¶ , ತಥಾ ತಾಲಫಲಟ್ಠಿ ಚ;

ಏವಮಾದೀನಿ ಗಚ್ಛನ್ತಿ, ಯಾವಕಾಲಿಕಸಙ್ಗಹಂ.

೧೩೬೧.

ಪುನ್ನಾಗಮಧುಕಟ್ಠೀನಿ, ಸೇಲ್ಲಟ್ಠಿ ತಿಫಲಟ್ಠಿ ಚ;

ಏವಮಾದೀನಿ ಅಟ್ಠೀನಿ, ನಿದ್ದಿಟ್ಠಾನಿ ಅನಾಮಿಸೇ.

೧೩೬೨.

ಸತ್ತನ್ನಂ ಪನ ಧಞ್ಞಾನಂ, ಅಪರಣ್ಣಾನಮೇವ ಚ;

ಪಿಟ್ಠಂ ಪನಸಸಾಲಾನಂ, ಲಬುಜಮ್ಬಾಟಕಸ್ಸ ಚ.

೧೩೬೩.

ತಾಲಪಿಟ್ಠಂ ¶ ತಥಾ ಧೋತಂ, ಪಿಟ್ಠಂ ಯಂ ಖೀರವಲ್ಲಿಯಾ;

ಏವಮಾದಿಮನೇಕಮ್ಪಿ, ಕಥಿತಂ ಯಾವಕಾಲಿಕಂ.

೧೩೬೪.

ಅಧೋತಂ ತಾಲಪಿಟ್ಠಞ್ಚ, ಪಿಟ್ಠಂ ಯಂ ಖೀರವಲ್ಲಿಯಾ;

ಅಸ್ಸಗನ್ಧಾದಿಪಿಟ್ಠಞ್ಚ, ಹೋತಿ ತಂ ಯಾವಜೀವಿಕಂ.

೧೩೬೫.

ನಿಯ್ಯಾಸೋ ಉಚ್ಛುನಿಬ್ಬತ್ತೋ, ಏಕೋ ಸತ್ತಾಹಕಾಲಿಕೋ;

ಅವಸೇಸೋ ಚ ಹಿಙ್ಗಾದಿ, ನಿಯ್ಯಾಸೋ ಯಾವಜೀವಿಕೋ.

೧೩೬೬.

ಮೂಲಾದೀಸು ಮಯಾ ಕಿಞ್ಚಿ, ಮುಖಮತ್ತಂ ನಿದಸ್ಸಿತಂ;

ಏತಸ್ಸೇವಾನುಸಾರೇನ, ಸೇಸೋ ಞೇಯ್ಯೋ ವಿಭಾವಿನಾ.

೧೩೬೭.

‘‘ಭುಞ್ಜಿಸ್ಸಾಮಿ ವಿಕಾಲೇ’’ತಿ, ಆಮಿಸಂ ಪಟಿಗಣ್ಹತೋ;

ಕಾಲೇ ವಿಕಾಲಸಞ್ಞಿಸ್ಸ, ಕಾಲೇ ವೇಮತಿಕಸ್ಸ ಚ.

೧೩೬೮.

ದುಕ್ಕಟಂ, ಕಾಲಸಞ್ಞಿಸ್ಸ, ಅನಾಪತ್ತಿ ಪಕಾಸಿತಾ;

ಇದಂ ಏಳಕಲೋಮೇನ, ಸಮುಟ್ಠಾನಾದಿನಾ ಸಮಂ.

ವಿಕಾಲಭೋಜನಕಥಾ.

೧೩೬೯.

ಭೋಜನಂ ಸನ್ನಿಧಿಂ ಕತ್ವಾ, ಖಾದನಂ ವಾಪಿ ಯೋ ಪನ;

ಭುಞ್ಜೇಯ್ಯ ವಾಪಿ ಖಾದೇಯ್ಯ, ತಸ್ಸ ಪಾಚಿತ್ತಿಯಂ ಸಿಯಾ.

೧೩೭೦.

ಭಿಕ್ಖು ಯಂ ಸಾಮಣೇರಾನಂ, ಪರಿಚ್ಚಜತ್ಯನಾಲಯೋ;

ನಿದಹಿತ್ವಾ ಸಚೇ ತಸ್ಸ, ದೇನ್ತಿ ತಂ ಪುನ ವಟ್ಟತಿ.

೧೩೭೧.

ಸಯಂ ಪಟಿಗ್ಗಹೇತ್ವಾನ, ಅಪರಿಚ್ಚತ್ತಮೇವ ಯಂ;

ದುತಿಯೇ ದಿವಸೇ ತಸ್ಸ, ನಿಹಿತಂ ತಂ ನ ವಟ್ಟತಿ.

೧೩೭೨.

ತತೋ ಅಜ್ಝೋಹರನ್ತಸ್ಸ, ಏಕಸಿತ್ಥಮ್ಪಿ ಭಿಕ್ಖುನೋ;

ಪಾಚಿತ್ತಿ ಕಥಿತಾ ಸುದ್ಧಾ, ಸುದ್ಧಚಿತ್ತೇನ ತಾದಿನಾ.

೧೩೭೩.

ಅಕಪ್ಪಿಯೇಸು ¶ ಮಂಸೇಸು, ಮನುಸ್ಸಸ್ಸೇವ ಮಂಸಕೇ;

ಥುಲ್ಲಚ್ಚಯೇನ ಪಾಚಿತ್ತಿ, ದುಕ್ಕಟೇನ ಸಹೇತರೇ.

೧೩೭೪.

ಯಾಮಕಾಲಿಕಸಙ್ಖಾತಂ ¶ , ಪಾಚಿತ್ತಿ ಪರಿಭುಞ್ಜತೋ;

ದುಕ್ಕಟಾಪತ್ತಿಯಾ ಸದ್ಧಿಂ, ಆಹಾರತ್ಥಾಯ ಭುಞ್ಜತೋ.

೧೩೭೫.

ಸಚೇ ಪವಾರಿತೋ ಹುತ್ವಾ, ಅನ್ನಂ ಅನತಿರಿತ್ತಕಂ;

ಭುಞ್ಜತೋ ಪಕತಂ ತಸ್ಸ, ಹೋತಿ ಪಾಚಿತ್ತಿಯದ್ವಯಂ.

೧೩೭೬.

ಥುಲ್ಲಚ್ಚಯೇನ ಸದ್ಧಿಂ ದ್ವೇ, ಮಂಸೇ ಮಾನುಸಕೇ ಸಿಯುಂ;

ಸೇಸೇ ಅಕಪ್ಪಿಯೇ ಮಂಸೇ, ದುಕ್ಕಟೇನ ಸಹ ದ್ವಯಂ.

೧೩೭೭.

ಯಾಮಕಾಲಿಕಸಙ್ಖಾತಂ, ಭುಞ್ಜತೋ ಸತಿ ಪಚ್ಚಯೇ;

ಸಾಮಿಸೇನ ಮುಖೇನ ದ್ವೇ, ಏಕಮೇವ ನಿರಾಮಿಸಂ.

೧೩೭೮.

ತಮೇವಜ್ಝೋಹರನ್ತಸ್ಸ, ಆಹಾರತ್ಥಾಯ ಕೇವಲಂ;

ದ್ವೀಸು ತೇಸು ವಿಕಪ್ಪೇಸು, ದುಕ್ಕಟಂ ಪನ ವಡ್ಢತಿ.

೧೩೭೯.

ವಿಕಾಲೇ ಭುಞ್ಜತೋ ಸುದ್ಧಂ, ಸನ್ನಿಧಿಪಚ್ಚಯಾಪಿ ಚ;

ವಿಕಾಲಭೋಜನಾ ಚೇವ, ಹೋತಿ ಪಾಚಿತ್ತಿಯದ್ವಯಂ.

೧೩೮೦.

ಮಂಸೇ ಥುಲ್ಲಚ್ಚಯಞ್ಚೇವ, ದುಕ್ಕಟಮ್ಪಿ ಚ ವಡ್ಢತಿ;

ಮನುಸ್ಸಮಂಸೇ ಸೇಸೇ ಚ, ಯಥಾನುಕ್ಕಮತೋ ದ್ವಯಂ.

೧೩೮೧.

ನತ್ಥೇವಾನತಿರಿತ್ತಮ್ಪಿ, ವಿಕಾಲೇ ಪರಿಭುಞ್ಜತೋ;

ದೋಸೋ ಸಬ್ಬವಿಕಪ್ಪೇಸು, ಭಿಕ್ಖುನೋ ತನ್ನಿಮಿತ್ತಕೋ.

೧೩೮೨.

ವಿಕಾಲಪಚ್ಚಯಾ ವಾಪಿ, ನ ದೋಸೋ ಯಾಮಕಾಲಿಕೇ;

ಸತ್ತಾಹಕಾಲಿಕಂ ಯಾವ-ಜೀವಿಕಂ ಪಟಿಗಣ್ಹತೋ.

೧೩೮೩.

ಆಹಾರಸ್ಸೇವ ಅತ್ಥಾಯ, ಗಹಣೇ ದುವಿಧಸ್ಸ ತು;

ಅಜ್ಝೋಹಾರಪಯೋಗೇಸು, ದುಕ್ಕಟಂ ತು ನಿರಾಮಿಸೇ.

೧೩೮೪.

ಅಥ ಆಮಿಸಸಂಸಟ್ಠಂ, ಗಹೇತ್ವಾ ಠಪಿತಂ ಸಚೇ;

ಪುನ ಅಜ್ಝೋಹರನ್ತಸ್ಸ, ಪಾಚಿತ್ತೇವ ಪಕಾಸಿತಾ.

೧೩೮೫.

ಕಾಲೋ ಯಾಮೋ ಚ ಸತ್ತಾಹಂ, ಇತಿ ಕಾಲತ್ತಯಂ ಇದಂ;

ಅತಿಕ್ಕಮಯತೋ ದೋಸೋ, ಕಾಲಂ ತಂ ತಂ ತು ಕಾಲಿಕಂ.

೧೩೮೬.

ಅತ್ತನಾ ತೀಣಿ ಸಮ್ಭಿನ್ನ-ರಸಾನಿ ಇತರಾನಿ ಹಿ;

ಸಭಾವಮುಪನೇತೇವ, ಯಾವಕಾಲಿಕಮತ್ತನೋ.

೧೩೮೭.

ಏವಮೇವ ¶ ¶ ಚ ಸೇಸೇಸು, ಕಾಲಿಕೇಸು ವಿನಿದ್ದಿಸೇ;

ಇಮೇಸು ಪನ ಸಬ್ಬೇಸು, ಕಾಲಿಕೇಸು ಚತೂಸ್ವಪಿ.

೧೩೮೮.

ಕಾಲಿಕದ್ವಯಮಾದಿಮ್ಹಿ, ಅನ್ತೋವುತ್ಥಞ್ಚ ಸನ್ನಿಧಿ;

ಉಭಯಮ್ಪಿ ನ ಹೋತೇವ, ಪಚ್ಛಿಮಂ ಕಾಲಿಕದ್ವಯಂ.

೧೩೮೯.

ಅಕಪ್ಪಿಯಾಯ ಕುಟಿಯಾ, ವುತ್ಥೇನನ್ತದ್ವಯೇನ ತಂ;

ಗಹಿತಂ ತದಹೇ ವಾಪಿ, ದ್ವಯಂ ಪುಬ್ಬಂ ನ ವಟ್ಟತಿ.

೧೩೯೦.

ಮುಖಸನ್ನಿಧಿ ನಾಮಾಯಂ, ಅನ್ತೋವುತ್ಥಂ ನ ಕಪ್ಪತಿ;

ಇತಿ ವುತ್ತಂ ದಳ್ಹಂ ಕತ್ವಾ, ಮಹಾಪಚ್ಚರಿಯಂ ಪನ.

೧೩೯೧.

ನ ದೋಸೋ ನಿದಹಿತ್ವಾಪಿ, ಪಠಮಂ ಕಾಲಿಕತ್ತಯಂ;

ತಂ ತಂ ಸಕಂ ಸಕಂ ಕಾಲ-ಮನತಿಕ್ಕಮ್ಮ ಭುಞ್ಜತೋ.

೧೩೯೨.

ತಥಾ ಉಮ್ಮತ್ತಕಾದೀನಂ, ಅನಾಪತ್ತಿ ಪಕಾಸಿತಾ;

ಸಮಮೇಳಕಲೋಮೇನ, ಸಮುಟ್ಠಾನಾದಿನಾ ಇದಂ.

ಸನ್ನಿಧಿಕಾರಕಥಾ.

೧೩೯೩.

ಭೋಜನಾನಿ ಪಣೀತಾನಿ, ಅಗಿಲಾನೋ ಪನತ್ತನೋ;

ಅತ್ಥಾಯ ವಿಞ್ಞಾಪೇತ್ವಾನ, ಪಾಚಿತ್ತಿ ಪರಿಭುಞ್ಜತೋ.

೧೩೯೪.

‘‘ಸಪ್ಪಿನಾ ದೇಹಿ ಭತ್ತಂ ಮೇ, ಸಸಪ್ಪಿಂ ಸಪ್ಪಿಮಿಸ್ಸಕಂ;

ಸಪ್ಪಿಭತ್ತಞ್ಚ ದೇಹೀ’’ತಿ, ವಿಞ್ಞಾಪೇನ್ತಸ್ಸ ದುಕ್ಕಟಂ.

೧೩೯೫.

ವಿಞ್ಞಾಪೇತ್ವಾ ತಥಾ ತಂ ಚೇ, ದುಕ್ಕಟಂ ಪಟಿಗಣ್ಹತೋ;

ಪುನ ಅಜ್ಝೋಹರನ್ತಸ್ಸ, ಪಾಚಿತ್ತಿ ಪರಿಯಾಪುತಾ.

೧೩೯೬.

ಸುದ್ಧಾನಿ ಸಪ್ಪಿಆದೀನಿ, ವಿಞ್ಞಾಪೇತ್ವಾನ ಭುಞ್ಜತೋ;

ಸೇಖಿಯೇಸುಪಿ ವಿಞ್ಞತ್ತಿ, ದುಕ್ಕಟಂ ಪರಿದೀಪಯೇ.

೧೩೯೭.

ತಸ್ಮಾ ಪಣೀತಸಂಸಟ್ಠಂ, ವಿಞ್ಞಾಪೇತ್ವಾವ ಭುಞ್ಜತೋ;

ಸತ್ತಧಞ್ಞಮಯಂ ಭತ್ತಂ, ಪಾಚಿತ್ತಿಯಮುದೀರಯೇ.

೧೩೯೮.

ಸಚೇ ¶ ‘‘ಗೋಸಪ್ಪಿನಾ ಮಯ್ಹಂ, ದೇಹಿ ಭತ್ತ’’ನ್ತಿ ಯಾಚಿತೋ;

ಅಜಿಯಾ ಸಪ್ಪಿಆದೀಹಿ, ವಿಸಙ್ಕೇತಂ ದದಾತಿ ಚೇ.

೧೩೯೯.

‘‘ಸಪ್ಪಿನಾ ದೇಹಿ’’ ವುತ್ತೋ ಚೇ, ನವನೀತಾದಿಕೇಸುಪಿ;

ದೇತಿ ಅಞ್ಞತರೇನಸ್ಸ, ವಿಸಙ್ಕೇತನ್ತಿ ದೀಪಿತಂ.

೧೪೦೦.

ಯೇನ ¶ ಯೇನ ಹಿ ವಿಞ್ಞತ್ತಂ, ತಸ್ಮಿಂ ಮೂಲೇಪಿ ತಸ್ಸ ವಾ;

ಲದ್ಧೇಪಿ ಪನ ತಂ ಲದ್ಧಂ, ಹೋತಿಯೇವ ನ ಅಞ್ಞಥಾ.

೧೪೦೧.

ಠಪೇತ್ವಾ ಸಪ್ಪಿಆದೀನಿ, ಆಗತಾನಿ ಹಿ ಪಾಳಿಯಂ;

ಅಞ್ಞೇಹಿ ವಿಞ್ಞಾಪೇನ್ತಸ್ಸ, ಹೋತಿ ಆಪತ್ತಿ ದುಕ್ಕಟಂ.

೧೪೦೨.

ಸಬ್ಬೇಹಿ ಸಪ್ಪಿಆದೀಹಿ, ವಿಞ್ಞಾಪೇತ್ವಾವ ಏಕತೋ;

ಭುಞ್ಜತೇಕರಸಂ ಕತ್ವಾ, ನವ ಪಾಚಿತ್ತಿಯೋ ಮತಾ.

೧೪೦೩.

ಅಕಪ್ಪಿಯೇನ ವುತ್ತೇಪಿ, ಸಪ್ಪಿನಾ ದೇತಿ ತೇನ ಚೇ;

ಗಹಣೇ ಪರಿಭೋಗೇಪಿ, ದುಕ್ಕಟಂ ಪರಿದೀಪಿತಂ.

೧೪೦೪.

ಗಿಲಾನಸ್ಸ ಗಿಲಾನೋತಿ, ಸಞ್ಞಿನೋ ವಿಮತಿಸ್ಸ ವಾ;

ದುಕ್ಕಟಂ ಮುನಿನಾ ವುತ್ತಂ, ಅನಾಪತ್ತಿ ಪಕಾಸಿತಾ.

೧೪೦೫.

ಗಿಲಾನಕಾಲೇ ವಿಞ್ಞತ್ತ-ಮಗಿಲಾನಸ್ಸ ಭುಞ್ಜತೋ;

ಗಿಲಾನಸ್ಸಾವಸೇಸಂ ವಾ, ಞಾತಕಾದೀನಮೇವ ವಾ.

೧೪೦೬.

ಇದಂ ಚತುಸಮುಟ್ಠಾನಂ, ಕಾಯತೋ ಕಾಯವಾಚತೋ;

ಕಾಯಚಿತ್ತಾ ತಥಾ ಕಾಯ-ವಾಚಾಚಿತ್ತತ್ತಯಾಪಿ ಚ.

ಪಣೀತಭೋಜನಕಥಾ.

೧೪೦೭.

ಅದಿನ್ನಞ್ಹಿ ಮುಖದ್ವಾರಂ, ಆಹಾರಂ ಆಹರೇಯ್ಯ ಯೋ;

ದನ್ತಪೋನೋದಕಂ ಹಿತ್ವಾ, ತಸ್ಸ ಪಾಚಿತ್ತಿಯಂ ಸಿಯಾ.

೧೪೦೮.

ಹತ್ಥಪಾಸೋಭಿನೀಹಾರೋ, ಮಜ್ಝಿಮುಚ್ಚಾರಣಕ್ಖಮೋ;

ಮನುಸ್ಸೋ ವಾಮನುಸ್ಸೋ ವಾ, ದೇತಿ ಕಾಯಾದಿನಾ ತಿಧಾ.

೧೪೦೯.

ಪಟಿಗ್ಗಣ್ಹಾತಿ ¶ ತಂ ಭಿಕ್ಖು, ದೀಯಮಾನಂ ಸಚೇ ದ್ವಿಧಾ;

ಏವಂ ಪಞ್ಚಙ್ಗಸಂಯೋಗೇ, ಗಹಣಂ ತಸ್ಸ ರೂಹತಿ.

೧೪೧೦.

ದಾಯಕೋ ಗಗನಟ್ಠೋ ಚೇ, ಭೂಮಟ್ಠೋ ಚೇತರೋ ಸಿಯಾ;

ಭೂಮಟ್ಠಸ್ಸ ಚ ಸೀಸೇನ, ಗಗನಟ್ಠಸ್ಸ ದೇಹಿನೋ.

೧೪೧೧.

ಯಮಾಸನ್ನತರಂ ಅಙ್ಗಂ, ಓರಿಮನ್ತೇನ ತಸ್ಸ ತು;

ದಾತುಂ ವಾಪಿ ಗಹೇತುಂ ವಾ, ವಿನಾ ಹತ್ಥಂ ಪಸಾರಿತಂ.

೧೪೧೨.

ಹತ್ಥಪಾಸೋ ಮಿನೇತಬ್ಬೋ, ನಗಟ್ಠಾದೀಸ್ವಯಂ ನಯೋ;

ಏವರೂಪೇ ಪನ ಠಾನೇ, ಠತ್ವಾ ಚೇ ದೇತಿ ವಟ್ಟತಿ.

೧೪೧೩.

ಪಕ್ಖೀ ¶ ವಾ ಮುಖತುಣ್ಡೇನ, ಹತ್ಥೀ ಸೋಣ್ಡಾಯ ವಾ ಪನ;

ಸಚೇ ಯಂ ಕಿಞ್ಚಿ ಪುಪ್ಫಂ ವಾ, ಫಲಂ ವಾ ದೇತಿ ವಟ್ಟತಿ.

೧೪೧೪.

ಭತ್ತಬ್ಯಞ್ಜನಪುಣ್ಣಾನಿ, ಭಾಜನಾನಿ ಬಹೂನಿಪಿ;

ಸೀಸೇನಾದಾಯ ಭಿಕ್ಖುಸ್ಸ, ಗನ್ತ್ವಾ ಕಸ್ಸಚಿ ಸನ್ತಿಕಂ.

೧೪೧೫.

ಈಸಕಂ ಪನ ಓನತ್ವಾ, ‘‘ಗಣ್ಹಾ’’ತಿ ಯದಿ ಭಾಸತಿ;

ತೇನ ಹತ್ಥಂ ಪಸಾರೇತ್ವಾ, ಹೇಟ್ಠಿಮಂ ಪನ ಭಾಜನಂ.

೧೪೧೬.

ಪಟಿಚ್ಛಿತಬ್ಬಂ ತಂ ಏಕ- ದೇಸೇನಾಪಿ ಚ ಭಿಕ್ಖುನಾ;

ಹೋನ್ತಿ ಏತ್ತಾವತಾ ತಾನಿ, ಗಹಿತಾನೇವ ಸಬ್ಬಸೋ.

೧೪೧೭.

ತತೋ ಪಟ್ಠಾಯ ತಂ ಸಬ್ಬಂ, ಓರೋಪೇತ್ವಾ ಯಥಾಸುಖಂ;

ಉಗ್ಘಾಟೇತ್ವಾ ತತೋ ಇಟ್ಠಂ, ಗಹೇತುಂ ಪನ ವಟ್ಟತಿ.

೧೪೧೮.

ಪಚ್ಛಿಆದಿಮ್ಹಿ ವತ್ತಬ್ಬ-ಮತ್ಥಿ ಕಿಂ ಏಕಭಾಜನೇ;

ಕಾಜಭತ್ತಂ ಹರನ್ತೋ ಚೇ, ಓನತ್ವಾ ದೇತಿ ವಟ್ಟತಿ.

೧೪೧೯.

ತಿಂಸಹತ್ಥೋ ಸಿಯಾ ವೇಳು, ಅನ್ತೇಸು ಚ ದುವೇ ಘಟಾ;

ಸಪ್ಪಿನೋ, ಗಹಿತೇಕಸ್ಮಿಂ, ಸಬ್ಬಂ ಗಹಿತಮೇವ ತಂ.

೧೪೨೦.

ಬಹುಪತ್ತಾ ಚ ಮಞ್ಚೇ ವಾ, ಪೀಠೇ ವಾ ಕಟಸಾರಕೇ;

ಠಪಿತಾ ದಾಯಕೋ ಹತ್ಥ-ಪಾಸೇ ಠತ್ವಾನ ದೇತಿ ಚೇ.

೧೪೨೧.

ಪಟಿಗ್ಗಹಣಸಞ್ಞಾಯ, ಮಞ್ಚಾದೀನಿ ಸಚೇ ಪನ;

ನಿಸೀದತಿ ಫುಸಿತ್ವಾ ಯೋ, ಯಞ್ಚ ಪತ್ತೇಸು ದೀಯತಿ.

೧೪೨೨.

ಗಹಿತಂ ¶ ತೇನ ತಂ ಸಬ್ಬಂ, ಹೋತಿಯೇವ ನ ಸಂಸಯೋ;

ಪಟಿಗ್ಗಹೇಸ್ಸಾಮಿಚ್ಚೇವ, ಮಞ್ಚಾದೀನಿ ಸಚೇ ಪನ.

೧೪೨೩.

ಗಹಿತಂ ಹೋತಿ ತಂ ಸಬ್ಬಂ, ಆರುಹಿತ್ವಾ ನಿಸೀದತಿ;

ಆಹಚ್ಚ ಕುಚ್ಛಿಯಾ ಕುಚ್ಛಿಂ, ಠಿತಾ ಪತ್ತಾ ಹಿ ಭೂಮಿಯಂ.

೧೪೨೪.

ಯಂ ಯಂ ಅಙ್ಗುಲಿಯಾ ವಾಪಿ, ಫುಸಿತ್ವಾ ಸೂಚಿಯಾಪಿ ವಾ;

ನಿಸಿನ್ನೋ ತತ್ಥ ತತ್ಥೇವ, ದೀಯಮಾನಂ ತು ವಟ್ಟತಿ.

೧೪೨೫.

ಕಟಸಾರೇ ಮಹನ್ತಸ್ಮಿಂ, ತಥಾ ಹತ್ಥತ್ಥರಾದಿಸು;

ಗಣ್ಹತೋ ಹತ್ಥಪಾಸಸ್ಮಿಂ, ವಿಜ್ಜಮಾನೇ ತು ವಟ್ಟತಿ.

೧೪೨೬.

ತತ್ಥಜಾತಕಪಣ್ಣೇಸು, ಗಹೇತುಂ ನ ಚ ವಟ್ಟತಿ;

ನ ಪನೇತಾನಿ ಕಾಯೇನ, ಪಟಿಬದ್ಧಾನಿ ಹೋನ್ತಿ ಹಿ.

೧೪೨೭.

ಅಸಂಹಾರಿಮಪಾಸಾಣೇ ¶ , ಫಲಕೇ ವಾಪಿ ತಾದಿಸೇ;

ಖಾಣುಬದ್ಧೇಪಿ ವಾ ಮಞ್ಚೇ, ಗಹಣಂ ನೇವ ರೂಹತಿ.

೧೪೨೮.

ತಿನ್ತಿಣಿಕಾದಿಪಣ್ಣೇಸು, ಭೂಮಿಯಂ ಪತ್ಥಟೇಸು ವಾ;

ಧಾರೇತುಮಸಮತ್ಥತ್ತಾ, ಗಹಣಂ ನ ಚ ರೂಹತಿ.

೧೪೨೯.

ಹತ್ಥಪಾಸಮತಿಕ್ಕಮ್ಮ, ದೀಘದಣ್ಡೇನ ದೇತಿ ಚೇ;

ವತ್ತಬ್ಬೋ ಭಿಕ್ಖುನಾಗನ್ತ್ವಾ, ದೇಹೀತಿ ಪರಿವೇಸಕೋ.

೧೪೩೦.

ಸಚೇ ಪತ್ತೇ ರಜೋ ಹೋತಿ, ಧೋವಿತಬ್ಬೋ ಜಲೇ ಸತಿ;

ತಸ್ಮಿಂ ಅಸತಿ ಪುಞ್ಛಿತ್ವಾ, ಗಹೇತಬ್ಬೋ ಅಸೇಸತೋ.

೧೪೩೧.

ಪಿಣ್ಡಾಯ ವಿಚರನ್ತಸ್ಸ, ರಜಂ ಪತತಿ ಚೇ ಪನ;

ಭಿಕ್ಖಾ ಪಟಿಗ್ಗಹೇತ್ವಾವ, ಗಹೇತಬ್ಬಾ ವಿಜಾನತಾ.

೧೪೩೨.

ಅಪ್ಪಟಿಗ್ಗಹಿತೇ ಭಿಕ್ಖುಂ, ಗಣ್ಹತೋ ಪನ ದುಕ್ಕಟಂ;

ಪಟಿಗ್ಗಹೇತ್ವಾನಾಪತ್ತಿ, ಪಚ್ಛಾ ತಂ ಪರಿಭುಞ್ಜತೋ.

೧೪೩೩.

‘‘ಪಟಿಗ್ಗಹೇತ್ವಾ ದೇಥಾ’’ತಿ, ವುತ್ತೇ ತಂ ವಚನಂ ಪನ;

ಅಸುತ್ವಾನಾದಿಯಿತ್ವಾ ವಾ, ದೇನ್ತಿ ಚೇ ನತ್ಥಿ ದುಕ್ಕಟಂ.

೧೪೩೪.

ಪಚ್ಛಾ ಪಟಿಗ್ಗಹೇತ್ವಾವ, ಗಹೇತಬ್ಬಂ ವಿಜಾನತಾ;

ಸಚೇ ರಜಂ ನಿಪಾತೇತಿ, ಮಹಾವಾತೋ ತತೋ ತತೋ.

೧೪೩೫.

ನ ¶ ಸಕ್ಕಾ ಚ ಸಿಯಾ ಭಿಕ್ಖಂ, ಗಹೇತುಂ ಯದಿ ಭಿಕ್ಖುನಾ;

ಅಞ್ಞಸ್ಸ ದಾತುಕಾಮೇನ, ಗಹೇತುಂ ಪನ ವಟ್ಟತಿ.

೧೪೩೬.

ಸಾಮಣೇರಸ್ಸ ತಂ ದತ್ವಾ, ದಿನ್ನಂ ವಾ ತೇನ ತಂ ಪುನ;

ತಸ್ಸ ವಿಸ್ಸಾಸತೋ ವಾಪಿ, ಭುಞ್ಜಿತುಂ ಪನ ವಟ್ಟತಿ.

೧೪೩೭.

ಭಿಕ್ಖಾಚಾರೇ ಸಚೇ ಭತ್ತಂ, ಸರಜಂ ದೇತಿ ಭಿಕ್ಖುನೋ;

‘‘ಪಟಿಗ್ಗಹೇತ್ವಾ ಭಿಕ್ಖಂ ತ್ವಂ, ಗಣ್ಹ ವಾ ಭುಞ್ಜ ವಾ’’ತಿ ಚ.

೧೪೩೮.

ವತ್ತಬ್ಬೋ ಸೋ ತಥಾ ತೇನ, ಕತ್ತಬ್ಬಞ್ಚೇವ ಭಿಕ್ಖುನಾ;

ರಜಂ ಉಪರಿ ಭತ್ತಸ್ಸ, ತಸ್ಸುಪ್ಲವತಿ ಚೇ ಪನ.

೧೪೩೯.

ಕಞ್ಜಿಕಂ ತು ಪವಾಹೇತ್ವಾ, ಭುಞ್ಜಿತಬ್ಬಂ ಯಥಾಸುಖಂ;

ಅನ್ತೋ ಪಟಿಗ್ಗಹೇತಬ್ಬಂ, ಪವಿಟ್ಠಂ ತು ಸಚೇ ಪನ.

೧೪೪೦.

ಪತಿತಂ ಸುಕ್ಖಭತ್ತೇ ಚೇ, ಅಪನೀಯಾವ ತಂ ರಜಂ;

ಸುಖುಮಂ ಚೇ ಸಭತ್ತಮ್ಪಿ, ಭುಞ್ಜಿತಬ್ಬಂ ಯಥಾಸುಖಂ.

೧೪೪೧.

ಉಳುಙ್ಕೇನಾಹರಿತ್ವಾಪಿ ¶ , ದೇನ್ತಸ್ಸ ಪಠಮಂ ಪನ;

ಥೇವೋ ಉಳುಙ್ಕತೋ ಪತ್ತೇ, ಸಚೇ ಪತತಿ ವಟ್ಟತಿ.

೧೪೪೨.

ಭತ್ತೇ ಆಕಿರಮಾನೇ ತು, ಚರುಕೇನ ತತೋ ಪನ;

ಮಸಿ ವಾ ಛಾರಿಕಾ ವಾಪಿ, ಸಚೇ ಪತತಿ ಭಾಜನೇ.

೧೪೪೩.

ತಸ್ಸ ಚಾಭಿಹಟತ್ತಾಪಿ, ನ ದೋಸೋ ಉಪಲಬ್ಭತಿ;

ಅನನ್ತರಸ್ಸ ಭಿಕ್ಖುಸ್ಸ, ದೀಯಮಾನಂ ತು ಪತ್ತತೋ.

೧೪೪೪.

ಉಪ್ಪಭಿತ್ವಾ ಸಚೇ ಪತ್ತೇ, ಇತರಸ್ಸ ಚ ಭಿಕ್ಖುನೋ;

ಪತತಿ ವಟ್ಟತೇವಾಯಂ, ಪಟಿಗ್ಗಹಿತಮೇವ ತಂ.

೧೪೪೫.

ಪಾಯಾಸಸ್ಸ ಚ ಪೂರೇತ್ವಾ, ಪತ್ತಂ ಚೇ ದೇನ್ತಿ ಭಿಕ್ಖುನೋ;

ಉಣ್ಹತ್ತಾ ಪನ ತಂ ಹೇಟ್ಠಾ, ಗಹೇತುಂ ನ ಚ ಸಕ್ಕತಿ.

೧೪೪೬.

ವಟ್ಟತೀತಿ ಚ ನಿದ್ದಿಟ್ಠಂ, ಗಹೇತುಂ ಮುಖವಟ್ಟಿಯಂ;

ನ ಸಕ್ಕಾ ಚೇ ಗಹೇತಬ್ಬೋ, ತಥಾ ಆಧಾರಕೇನಪಿ.

೧೪೪೭.

ಸಚೇ ¶ ಆಸನಸಾಲಾಯಂ, ಗಹೇತ್ವಾ ಪತ್ತಮತ್ತನೋ;

ನಿದ್ದಾಯತಿ ನಿಸಿನ್ನೋವ, ದೀಯಮಾನಂ ನ ಜಾನತಿ.

೧೪೪೮.

ನೇವಾಹರಿಯಮಾನಂ ವಾ, ಅಪ್ಪಟಿಗ್ಗಹಿತಮೇವ ತಂ;

ಆಭೋಗಂ ಪನ ಕತ್ವಾ ಚೇ, ನಿಸಿನ್ನೋ ಹೋತಿ ವಟ್ಟತಿ.

೧೪೪೯.

ಸಚೇ ಹತ್ಥೇನ ಮುಞ್ಚಿತ್ವಾ, ಪತ್ತಂ ಆಧಾರಕಮ್ಪಿ ವಾ;

ಪೇಲ್ಲೇತ್ವಾ ಪನ ಪಾದೇನ, ನಿದ್ದಾಯತಿ ಹಿ ವಟ್ಟತಿ.

೧೪೫೦.

ಪಾದೇನಾಧಾರಕಂ ಅಕ್ಕ-ಮಿತ್ವಾಪಿ ಪಟಿಗಣ್ಹತೋ;

ಜಾಗರಸ್ಸಾಪಿ ಹೋತೇವ, ಗಹಣಸ್ಮಿಂ ಅನಾದರೋ.

೧೪೫೧.

ತಸ್ಮಾ ತಂ ನ ಚ ಕಾತಬ್ಬಂ, ಭಿಕ್ಖುನಾ ವಿನಯಞ್ಞುನಾ;

ಯಂ ದೀಯಮಾನಂ ಪತತಿ, ಗಹೇತುಂ ತಂ ತು ವಟ್ಟತಿ.

೧೪೫೨.

ಭುಞ್ಜನ್ತಾನಞ್ಚ ದನ್ತಾ ವಾ, ಖೀಯನ್ತಿಪಿ ನಖಾಪಿ ವಾ;

ತಥಾ ಪತ್ತಸ್ಸ ವಣ್ಣೋ ವಾ, ಅಬ್ಬೋಹಾರನಯೋ ಅಯಂ.

೧೪೫೩.

ಸತ್ಥಕೇನುಚ್ಛುಆದೀನಿ, ಫಾಲೇನ್ತಾನಂ ಸಚೇ ಮಲಂ;

ಪಞ್ಞಾಯತಿ ಹಿ ತಂ ತೇಸು, ಸಿಯಾ ನವಸಮುಟ್ಠಿತಂ.

೧೪೫೪.

ಪಟಿಗ್ಗಹೇತ್ವಾ ತಂ ಪಚ್ಛಾ, ಖಾದಿತಬ್ಬಂ ತು ಭಿಕ್ಖುನಾ;

ನ ಪಞ್ಞಾಯತಿ ಚೇ ತಸ್ಮಿಂ, ಮಲಂ ವಟ್ಟತಿ ಖಾದಿತುಂ.

೧೪೫೫.

ಪಿಸನ್ತಾನಮ್ಪಿ ¶ ಭೇಸಜ್ಜಂ, ಕೋಟ್ಟೇನ್ತಾನಮ್ಪಿ ವಾ ತಥಾ;

ನಿಸದೋದುಕ್ಖಲಾದೀನಂ, ಖೀಯನೇಪಿ ಅಯಂ ನಯೋ.

೧೪೫೬.

ಭೇಸಜ್ಜತ್ಥಾಯ ತಾಪೇತ್ವಾ, ವಾಸಿಂ ಖೀರೇ ಖಿಪನ್ತಿ ಚೇ;

ಉಟ್ಠೇತಿ ನೀಲಿಕಾ ತತ್ಥ, ಸತ್ಥಕೇ ವಿಯ ನಿಚ್ಛಯೋ.

೧೪೫೭.

ಸಚೇ ಆಮಕತಕ್ಕೇ ವಾ, ಖೀರೇ ವಾ ಪಕ್ಖಿಪನ್ತಿ ತಂ;

ಸಾಮಪಾಕನಿಮಿತ್ತಮ್ಹಾ, ನ ತು ಮುಚ್ಚತಿ ದುಕ್ಕಟಾ.

೧೪೫೮.

ಪಿಣ್ಡಾಯ ವಿಚರನ್ತಸ್ಸ, ವಸ್ಸಕಾಲೇಸು ಭಿಕ್ಖುನೋ;

ಪತ್ತೇ ಪತತಿ ಚೇ ತೋಯಂ, ಕಿಲಿಟ್ಠಂ ಕಾಯವತ್ಥತೋ.

೧೪೫೯.

ಪಚ್ಛಾ ಪಟಿಗ್ಗಹೇತ್ವಾ ತಂ, ಭುಞ್ಜಿತಬ್ಬಂ ಯಥಾಸುಖಂ;

ಏಸೇವ ಚ ನಯೋ ವುತ್ತೋ, ರುಕ್ಖಮೂಲೇಪಿ ಭುಞ್ಜತೋ.

೧೪೬೦.

ಸತ್ತಾಹಂ ¶ ಪನ ವಸ್ಸನ್ತೇ, ದೇವೇ ಸುದ್ಧಂ ಜಲಂ ಸಚೇ;

ಅಬ್ಭೋಕಾಸೇಪಿ ವಾ ಪತ್ತೇ, ತೋಯಂ ಪತತಿ ವಟ್ಟತಿ.

೧೪೬೧.

ಓದನಂ ಪನ ದೇನ್ತೇನ, ಸಾಮಣೇರಸ್ಸ ಭಿಕ್ಖುನಾ;

ದಾತಬ್ಬೋ ಅಚ್ಛುಪನ್ತೇನ, ತಸ್ಸ ಪತ್ತಗತೋದನಂ.

೧೪೬೨.

ಪಟಿಗ್ಗಹೇತ್ವಾ ವಾ ಪತ್ತಂ, ದಾತಬ್ಬೋ ತಸ್ಸ ಓದನೋ;

ಛುಪಿತ್ವಾ ದೇತಿ ಚೇ ಭತ್ತಂ, ತಂ ಪನುಗ್ಗಹಿತಂ ಸಿಯಾ.

೧೪೬೩.

ಅಞ್ಞಸ್ಸ ದಾತುಕಾಮೇನ, ಪರಿಚ್ಚತ್ತಂ ಸಚೇ ಪನ;

ಯಾವ ಹತ್ಥಗತಂ ತಾವ, ಪಟಿಗ್ಗಹಿತಮೇವ ತಂ.

೧೪೬೪.

‘‘ಗಣ್ಹಾ’’ತಿ ನಿರಪೇಕ್ಖೋವ, ಪತ್ತಮಾಧಾರಕೇ ಠಿತಂ;

ಸಚೇ ವದತಿ ಪಚ್ಛಾ ತಂ, ಪಟಿಗ್ಗಣ್ಹೇಯ್ಯ ಪಣ್ಡಿತೋ.