📜
នមោ តស្ស ភគវតោ អរហតោ សម្មាសម្ពុទ្ធស្ស
សុត្តវន្ទនា
ធម្មត្ថ ¶ ទេសនា វេធ,
ចតុគម្ភីរ ទុទ្ទសំ;
ធម្មំ លោកស្ស ទេសេន្តំ,
ធម្មរាជំ នមាមហំ;
ពុទ្ធោ ¶ បច្ចេកពុទ្ធោ ច,
អរហា ចក្កវត្តីតិ;
ថូបាថូបារហំ វន្ទេ,
ចតុថូបារហេសុ តំ;
បេតសេយ្យោ ¶ កាមភោគី,
សីហសេយ្យោ តថាគតោ;
សយន្តំ ចតុសេយ្យេសុ,
ចតុត្ថេន នមេ ជិនំ;
អណ្ឌជា ជលាពុជា ច;
សំសេទជោ បបាតិកា;
ចតុយោនិ បរិច្ឆេទ,
ញាណវន្តំ នមេ ជិនំ;
សុតពុទ្ធោនុពុទ្ធោ ¶ ច,
បច្ចេកោ ជិនពុទ្ធោតិ;
ចតុត្ថំ ចតុពុទ្ធេសុ,
វន្ទាមិ លោកនាយកំ;
រាហុគ្គំ ¶ អត្តភាគីនំ,
មន្ធាតា កាមភោគីនំ;
មារោ អធិបតេយ្យានំ,
ពុទ្ធោ លោកេ សទេវកេ;
ចតុអគ្គ បញ្ញត្តីនំ,
អគ្គបត្តំ នមេ ជិនំ.
ទានំ ¶ បិយកថា អត្ថ,
ចរិយា សទិសត្តតា;
ចតុសង្គហ វត្ថូហិ,
អសង្ខិយេសុ ជាតិសុ;
លោកស្ស សង្គហេតារំ,
វន្ទាមិ លោកនាយកំ;
លោភោ ទោសោ ច មោហោតិ,
អន្តោ បច្ចត្ថិកេ តយោ;
ទុជ្ជយេ ¶ សព្ពវេរីហិ,
សញ្ជិតំបិ សុធិំ នមេ;
ជាតិ បុញ្ញ មហត្តានិ,
គុណមហត្តមុត្តមំ;
តិមហត្ថេហិ សម្បន្នំ,
វន្ទាមិ លោកនាយកំ;
ហេតុ ¶ ផល សម្បទាយោ,
សត្តុបការសម្បទា;
តិសម្បទាហិ សម្បន្នំ,
វន្ទាមិ លោកនាយកំ.
ញាណប្បហានានុភាវ,
សុរូបការសម្បទា;
ចតុផល សម្បទាហិ,
តំ សម្បន្នំ នមេ ជិនំ.
អាសយោ ¶ ច បយោគោតិ,
សត្តុបការ សម្បទា;
ទុវិធា យស្ស សម្បន្នា,
សម្មា មំ បាតុ សោ ជិនោ.
មហោសធេ វេស្សន្តរេ,
បច្ឆិមភវិកេ តថា;
តិជាតីសុ នមេ វាចំ,
ភាសេន្តំ ជាយនក្ខណេ.
នេមិម្ហិ ¶ សាធិនេ ចេវ,
មន្ធាតរិ ច គុត្តិលេ;
ចតូសុ មនុជត្តេន,
ទេវលោកំ គតំ នមេ.
សង្ខារោ រូបវិការោ,
លក្ខណំ វាននិស្សដំ;
និព្ពានំ ¶ បញ្ញត្តិចេតិ,
បញ្ច ញេយ្យន្តគុំ នមេ.
បុត្ត ទារ បរិច្ចាគា,
រជ្ជង្គំ ជីវ ចាគីតិ;
បញ្ច មហាបរិច្ចាគេ,
ករំ សុទុក្ករេ នមេ.
រូបញ្ច ¶ វេទនា សញ្ញា,
សង្ខារា វិញ្ញាណន្តិមេ;
បញ្ចក្ខន្ធេ បរិជានំ,
តិបរិញ្ញាហិ តំ នមេ.
មនុស្ស ទេវ គតិយោ,
បេតោ ច និរយោ តថា;
តិរច្ឆានោតិ បញ្ចេតា,
ឆិន្ទន្តំ គតិយោ នមេ;
ទេវបុត្តោ ¶ កិលេសោ ច,
អភិសង្ខារ មារកោ;
ខន្ធោ មច្ចូតិ បញ្ចេតេ,
មារេ វិជិតវំ នមេ.
បុរេភត្តំ បច្ឆាភត្តំ,
បុរិមញ្ចេវ មជ្ឈិមំ;
បច្ឆិមន្តិ សទា បញ្ច,
ពុទ្ធកិច្ចំ ករំ នមេ.
រូបា ¶ សទ្ទា គន្ធា រសា,
ផោដ្ឋព្ពា ច មនោរមា;
បញ្ច កាមគុណេ ហិត្វា,
ខេឡំវ និគ្គតំ នមេ.
រាគសល្លំ ¶ ទោសសល្លំ,
មោហា មានោ ច ទិដ្ឋីតិ;
វន្ទេ វជ្ជាតិវជ្ជន្តំ,
បញ្ចសល្លបនូទនំ.
ទីឃោ មជ្ឈិម សំយុត្តា,
អង្គុត្តរោ ច ខុទ្ទកោ;
ឥតិ បញ្ច និកាយេហិ,
សុវិនេន្តំ បជំ នមេ.
ឥស្សរិយំ ¶ យសោ ធម្មោ,
កាមោ សិរី បយត្តីតិ;
ភគ្យេហិ ឆហិ សម្បន្នំ,
វន្ទាមិ លោកនាយកំ.
បិយាបិយំ ¶ ភូតាភូតំ,
អត្ថានត្ថំ យថារហំ;
មិស្សា ឆសុ សុវាចំវ,
ភាសន្តំ អត្ថកំ នមេ.
អលសោ ច បមាទោ ច,
អនុដ្ឋានំ អសំយមោ;
និទ្ទា តន្តីតិ ឆិទ្ទេហិ,
ឆហិ មុត្តំ សទា នមេ.
មហាករុណាសមាបត្តិ ¶ ,
យមកប្បាដិហារិយំ;
អាសយានុសយេ ញាណំ,
ឥន្ទ្រិយាន បរោបរេ;
សព្ពញ្ញុតា នាវរណំ,
ឆា សាធារណិកំ នមេ.
កាមច្ឆន្ទោ ¶ ច ព្យាបាទោ,
ថិនមិទ្ធញ្ច សំសយោ;
អវិជ្ជុទ្ធច្ច កុក្កុច្ចំ,
ឆវិនីវរណំ នមេ.
ឥទ្ធិវិធំ ទិព្ពសោតំ,
បរចិត្ត វិជាននា;
បុព្ពេនិវាសានុស្សតិ ¶ ,
ទិព្ពចក្ខាសវក្ខយោ;
ឆឡភិញ្ញាហិ សម្បន្នំ,
វន្ទាមិ បុរិសុត្តមំ.
នីល បីតា ច ឱទាតា,
មញ្ជិដ្ឋា ច បភស្សរា;
លោហិតាតិ ឆ រំសីហី,
វិជ្ជោតន្តំ សទា នមេ.
អស្សាទាទីនវោ ¶ ចេវ,
និស្សរណផលំ តថា;
ឧបាយាណត្តីតិ ឆធា,
សទ្ធម្មទេសកំ នមេ.
រាគោ ¶ ទោសោ ច មោហោ ច,
វិតក្កចរិយា តថា;
សទ្ធា ពុទ្ធីតិ ភាជេន្តំ,
តា ឆឡេចរិយា នមេ.
រជតំ កនកំ មុត្តា,
មណិ វេឡុរិយានិ ច;
វជិរញ្ច បវាឡន្តិ,
សេដ្ឋិ សត្តធនោ វិយ.
សទ្ធាសីលំ សុតំចាគោ,
ហិរី ឱត្តប្បិយំ ធនំ,
បញ្ញាធនន្តិ សម្ពុទ្ធំ,
វន្ទេ សត្តមហាធនំ.
ចក្កំ ¶ ហត្ថិ អស្សោ មណិ,
គហបតិត្ថិយោ តថា;
សុបរិណាយកោចាតិ,
សត្តរតនោ ចក្កវត្តីវ.
សតិ ធម្មវិចយោ ច,
តថេវ វីរិយំ បីតិ;
បស្សទ្ធិ ¶ សមាធុបេក្ខា,
សទ្ធម្ម ចក្កវត្តិកំ;
សត្ត ពោជ្ឈង្គរតនំ,
នមាមិ បុរិសុត្តមំ.
យុគន្ធរោ ¶ ឦសធរោ,
ករវីកោ សុទស្សនោ;
នេមិន្ធរោ វិនតកោ,
អស្សកណ្ណោ មហានគេ;
សត្តេតេ ហត្ថរូបំវ,
សម្បស្សន្តំ ជិនំ នមេ.
កណ្ណមុណ្ឌោ អនោតត្តោ,
កុណាលោ រថការកោ;
សីហប្បបាត ឆទ្ទន្តា,
មន្ទាកិនី មហាសរេ;
សត្តេតេ ¶ សព្ពថា បស្សំ,
ទិដ្ឋេវ បាតិកំ នមេ.
មនុស្សត្តំ លិង្គសម្បត្តិ,
ហេតុ សត្ថារទស្សនំ;
បព្ពជ្ជា គុណសម្បត្តិ,
អធិការោ ច ឆន្ទតា;
អដ្ឋធម្ម សមោធានា,
ភិនីហារន្តគុំ នមេ.
វិសដ្ឋំ ¶ មញ្ជុ វិញ្ញេយ្យំ,
សវនីយាវិសារិណា;
គម្ភីរោ ពិន្ទុនិន្នាទោ,
អដ្ឋង្គិកសរំ នមេ.
ចត្តារិ ¶ រូបឈានានិ,
តថេវារូបឈានានិ;
តា សមាបត្តិយោ អដ្ឋ,
សេវន្តំ រុចិយា នមេ.
អណិមា លង្ឃិមា កម្មំ,
មហិមា បត្តិមា តថា;
ឦសិតា ¶ វសិតា ចេវ,
យត្ថកាមាវសាយិតា;
អដ្ឋិស្សរិយ បុណ្ណត្តា,
ឥស្សរាតិស្សរំ នមេ.
មនោមយិទ្ធិញាណញ្ច ¶ ,
ឆឡភិញ្ញា វិបស្សនា;
អដ្ឋវិជ្ជាហិ សម្បន្នំ,
វន្ទេ តិលោកកេតុកំ.
ជាតិ ជរា រុជា កាលោ,
ចតុរាបាយទុក្ខាតិ;
អដ្ឋ សំវេគវត្ថូនិ,
ភាសន្តំ វិវិធំ នមេ.
សុត្តង្គំ ¶ វេយ្យាករណំ,
គេយ្យំ គាថា ច ជាតកំ;
អព្ភូតធម្ម វេទល្លា,
ឧទានមិតិ វុត្តកំ;
នវង្គំ សព្ពលោកស្ស,
ទទន្តំ សាសនំ នមេ.
យា ¶ សមាបត្តិយោ អដ្ឋ,
និរោធោ ចាតិ តេ នវ,
អនុបុព្ពវិហារេ តំ,
សេវន្តំ រុចិយា នមេ.
ឯកត្តញ្ចេវ នានត្តំ,
កាយសញ្ញីហិ យោគតោ,
ចត្តារោ តថារុប្បា ច,
អសញ្ញីចាតិ តេ នវ,
សត្តវាសេ វិភជិត្វា,
បកាសេន្តំ នមេ ជិនំ.
សេយ្យស្ស ¶ សទិសោ សេយ្យោ,
ហីនោតិ តិវិធោ វិធោ,
តថា សទិសហីនានំ,
នវវិធេ នុទំ នមេ.
អនត្ថំ ¶ មេ ចរតិ ច,
តថា ចរិ ចរិស្សតិ,
មិត្តស្ស អរិនោត្វត្ថំ,
នវាឃាតេ ជហំ នមេ.
ទានំ សីលញ្ច និក្ខមំ,
បញ្ញា វីរិយបញ្ចមំ,
ខន្តី ¶ សច្ចមធិដ្ឋានំ,
មេត្តុបេក្ខាតិ តាទស,
បូរេត្វា បារមី វន្ទេ,
សម្មាសម្ពោធិមជ្ឈវំ;
កាឡាវកញ្ច គង្គេយ្យំ,
បណ្ឌរំ តម្ព បិង្គលំ,
គន្ធ មង្គល ហេមញ្ច,
ឧបោសថ ឆទ្ទន្តិមេ.
ធារេតិ ទសបោសានំ,
នាគោ កាឡាវកោ ពលំ;
សហស្សកោដិបោសានំ ¶ ;
ឆទ្ទន្តោវារនុត្តមោ.
ទស សហស្សកោដីនំ,
បោសានំ ពលធារណំ;
ឆទ្ទន្តានំ ទសន្នញ្ច,
ទសកាយពលំ នមេ.
ឋានាឋានេ ¶ វិបាកេ ច,
មគ្គេ សព្ពត្ថគាមិនំ;
នានាធាតូសុ លោកេសុ,
អធិមុត្តិម្ហិ បាណិនំ;
បរោបរិយត្តេ ញាណំ,
ឥន្ទ្រិយានញ្ច បាណិនំ;
ឈានាទីសុ ញាណំ បុព្ពេ,
និវាសេ ទិព្ពចក្ខុ ច;
អាសវក្ខយញាណន្តិ,
ទសពលញាណំ នមេ.
មូលគន្ធោ ¶ សារោ ផេគ្គុ,
តចោ បបដិកោ រសោ;
បត្តំ បុប្ផំ ផលញ្ចេវ,
គន្ធគន្ធោតិ សំវរំ;
សុគន្ធំ ទសគន្ធេហិ,
វិលិម្បន្តំ សទា នមេ.
សមាធិ ¶ ញាណវិប្ផារា,
អធិដ្ឋានំ វិកុព្ពនា;
មនោមយារិយា ឥទ្ធិ,
តថា កម្មវិបាកជា.
វិជ្ជាមយា បុញ្ញវតោ;
បយោគ បច្ចយិទ្ធិតិ;
អគ្គបត្ត ទសិទ្ធីនំ,
បាដិហេរំ ករំ នមេ.
មុត្តា ¶ មណិ វេឡុរិយំ,
សង្ខោ សល្លោ បវាឡកំ;
សុវណ្ណំ រជតំ លោហិ,
តង្កោ មសារគល្លន្តិ;
ទសធា ¶ រតនេហិគ្គំ,
ភោគិំ បញ្ញាមណិំ នមេ.
សិថិលំ ធនិតំ ទីឃំ,
រស្សញ្ច គរុកំ លហុ;
និគ្គហិតំ វិមុត្តញ្ច,
សម្ពន្ធញ្ច វវត្ថិតំ;
វិវរន្តំ នមេ ធម្មំ,
ទសព្យញ្ជនភេទិតំ.
បសាទោជោ ¶ មធុរតា,
សមតា សុខុមាលតា;
សិលេសោទារតា កន្តិ,
អត្ថព្យត្តិ សមាធយោ;
ទស សទ្ទគុណោបេតំ,
ធម្មំ បាតុ ករំ នមេ.
លោភោ ¶ ទោសោ មោហោ មានោ,
ឧទ្ធច្ចំ ទិដ្ឋិ សំសយោ;
អហិរិកមនោត្តប្បំ,
ថិនន្តិ សព្ព ទាហកេ;
កិលេសេ ទស តេ សទ្ធិំ,
វាសនាយ ជហំ នមេ.
សតេរា ¶ ទណ្ឌមណិកា,
មច្ឆវិលោលគគ្គរា;
សុក្ខាសនិ កបិសិសា,
វិចក្កា សញ្ញ កុក្កុដា;
នវាសនីហិ ផាលេន្តំ,
តិព្ពំ បញ្ញាសនិំ នមេ.
រោទនា ¶ កោធាវុធោ ច,
ឧជ្ឈន្តិស្សរិយំ តថា;
បដិសង្ខានំ,
ខន្តិ អដ្ឋពលេសុ តំ;
បថវីសទិសំ វន្ទេ,
អដ្ឋមេន វិនាយកំ.
កាមរោគោ ¶ ច បដិឃោ,
មានោ ទិដ្ឋិ ច សំសយោ;
ភវរាគោ អវិជ្ជាតិ,
សត្តានុសយិនំ នមេ.
តិត្ថិយាបកតិមហាសាវកា,
អគ្គសាវកា បច្ចេកពុទ្ធសម្ពុទ្ធា;
វិសិដ្ឋំ ¶ សព្ពថា ឆសុ,
បុព្ពេ និវាស វិញ្ញូសុ;
តិលោកមកុដំ នមេ.
ពុទ្ធចក្ខុ សមន្តា ច,
ញាណំ យំ ទិព្ពចក្ខុ ច;
ធម្មោតិ បញ្ច ចក្ខូហិ,
ទស្សាវិំ មារជិំ នមេ.
ខុទ្ទកា ¶ ខណិកា ឱក្កន្តិកា ច,
ផរណា តថា ឧព្ពេគា;
បញ្ច បីតីហិ បិនេន្តំ,
រុចិយា ច នមាមហំ.
ទុក្ខំ សមុទយសច្ចំ,
និរោធោ មគ្គសច្ចកំ;
ចតុសច្ចមភិជានំ ¶ ,
ចតុកិច្ចេហិ តំ នមេ.
បីឡនា សង្ខតត្ថោ ច,
តបោ វិបរិណាមនា;
ទុក្ខសច្ចំ ចតុក្កេហិ,
វិភត្តាវិំ មុនិំ នមេ.
អាយូហនំ ¶ និទានញ្ច,
សំយោគោ បលិពោធនំ;
ចតុក្កេហិ សមុទយំ,
វិភត្តាវិំ មុនិំ នមេ.
និស្សរណញ្ច វិវេកោ,
អសង្ខតាមតំ តថា;
និរោធញ្ច ចតុក្កេហិ,
វិភត្តាវិំ មុនិំ នមេ.
និយ្យានិកោ ¶ ច ហេត្វត្ថោ,
ទស្សនាធិបតេយ្យកំ;
មគ្គសច្ចំ ចតុក្កេហិ,
វិភត្តាវិំ មុនិំ នមេ.
សត្ថកោ ¶ ច អសម្មោហោ,
សប្បាយោ ចេវ គោចរោ;
ចតុសម្បជញ្ញា វិនា,
ភាវិំ នមេ តថាគតំ.
បហិនាខិល ទុក្ខាហំ,
ភវសាគរ បារគុំ;
វន្ទេ សារគុណោបេតំ,
តេនម្ហិ ភវបារគោ.
រូបារូបវិលាសគ្គ ¶ ,
រូបាចិន្តេយ្យ សំយុត្តំ;
វន្ទេ សារគុណោបេតំ,
តេនម្ហាតុលរូបវា.
ឥទ្ធិ ¶ ឥទ្ធិ វិលាសគ្គ,
ឥទ្ធិ ចិន្តេយ្យ សំយុត្តំ;
វន្ទេ សារគុណេបេតំ,
តេនម្ហា តុលឥទ្ធិមា.
វាចា វាចា វិលាសគ្គ,
វាចា ចិន្តេយ្យ សំយុត្តំ;
វន្ទេ សារគុណោបេតំ,
តេនម្ហា តុលវាចកោ.
ញាណ ¶ ញាណ វិលាសគ្គ,
ញាណាចិន្តេយ្យ សំយុត្តំ;
វន្ទេ សារគុណោបេតំ,
តេនម្ហា តុលញាណវា.
សជ្ឈំ ហេមញ្ច រតនំ,
គេហំ វត្ថញ្ច ភោជនំ;
តទញ្ញេបិ ¶ យថាចិត្តំ,
មាបេយ្យាហំ នមេ ជិនំ.
សជ្ឈំ ហេមញ្ច រតនំ,
គេហំ វត្ថញ្ច ភោជនំ;
តទញ្ញេបិ យថាចិត្តំ,
មាបេយ្យំ កម្មជិទ្ធិយា.
សត្តពោជ្ឈង្គ ¶ រតនោ,
សទ្ធាទិរតនោ មុនិ;
សតិប្បភុតិរតនោ,
វន្ទេ តំ បុរិសុត្តមំ.
ចក្កាទិសត្តរតនំ,
មុត្តាទិរតនំ សុភំ;
វត្ថប្បភុតិរតនំ,
ឆន្ទក្ខណេ លភាមហំ.
សម្បុណ្ណចិត្តសង្កប្បោ ¶ ,
យថាកង្ខិតមាបកោ,
កេនចិនភិភូតោ យោ,
សព្ពាភិភូ នមេ ជិនំ.
សម្បុណ្ណចិត្តសង្កប្បោ ¶ ,
យថាកង្ខិតមាបកោ,
កេនចិនភិភូតម្ហិ,
សព្ពាភិភូ ភវេ ភវេ.
ទស ឆទ្ទន្តរាជាវ,
ទស កាយពលោ មុនិ;
ទស ញាណព្ពលោតុល្យោ,
វន្ទេ តំ សមណុត្តមំ.
អតិកាយជវោ ¶ ពុទ្ធោ,
រញ្ញាជវនហំសតោ;
កា កថា ញាណវេគស្ស,
វន្ទេ តំ សមណុត្តមំ.
ឆទ្ទន្តនាគរាជាវ,
ភវេ ភវេ មហព្ពលោ;
រាជាជវនហំសោវ,
បរមគ្គជវោ ភវេ.
ឧទកា ¶ កាសចារី ច,
មហិនិមុជ្ជកោ ជិនោ;
មាបកោ ច យថា ចិត្តំ,
វន្ទេ តំ ញេយ្យបារគុំ.
ឧទកា កាសចារី ច,
មហិនិមុជ្ជកោ ភវេ;
មាបកោ ច យថាចិត្តំ,
ភវសោ កម្មជិទ្ធិយា.
គាមេ ¶ វនេ ច សព្ពត្ថ,
ទេវេហិ មនុស្សេហិ ច;
អាភតានន្តលាភស្ស,
សទា យស្ស មហេសិនោ;
បត្តលាភគ្គតំ លោកំ,
តំ វន្ទេ មុនិបុង្គវំ.
គាមេ ¶ វនេ ច សព្ពត្ថ,
ទេវេហិ មនុស្សេហិ ច;
អាភតា នន្តលាភោ មេ,
សទា ហោតុ ភវាភវេ.
បុញ្ញស្សិមស្ស តេជេន,
យថា ចិត្តំ សមិជ្ឈតុ;
សព្ពិច្ឆា ¶ សព្ពចិន្តា ច,
ខិប្បំ មេ ជាតិជាតិយំ.
នត្ថីតិ វចនំ ទុក្ខំ,
ទេហីតិ វចនំ តថា;
តស្មា នត្ថីតិ ទេហីតិ,
មា មេ ហោតុ ភវាភវេ.
សព្ពំ ¶ បរវសំ ទុក្ខំ,
សព្ពមិស្សរិយំ សុខំ;
សព្ពំ បរវសមត្ថុ,
សព្ពមិស្សរិយំ ភវេ.
វិតក្កេន្តោ ភជ្ជកាយោ,
សព្ពាវុធ វារណោ ច;
ឆទ្ទន្ត វារណពលោ,
ភវេយ្យំ ជាតិជា តិយំ.
សុភលក្ខណសម្បន្នោ ¶ ,
សុវណ្ណវណ្ណវា ភវេ;
ព្រហ្មស្សរោ ករវិក,
ភាណី ច ជាតិជាតិយំ.
ភូរិមបញ្ញោ សិប្បានំ,
សព្ពេសំ កុសលោ ភវេ;
វិសជ្ជេតុំ សមត្ថោវ,
សព្ពបុច្ឆានំ ឋានសោ.
វេរាធំសីយ ¶ ភោគា ច,
អនន្តាខីណ ភោគវា;
អនន្តាភជ្ជ បរិសោ,
ភវសោ បាបុណេ សិវំ.
មា ¶ នស្សេយ្យំ បសយ្ហេយ្យំ,
ឧស្សុក្កេហិ ប្យហំ សហ;
បញ្ចវេរេហិ កោដីហិ,
ភណ្ឌំ វា អកាតុកាមិតំ.
មេឃំ វាតញ្ច រតនំ,
ធញ្ញំ វត្ថញ្ច ភោជនំ;
សព្ពិច្ឆិតំ តទញ្ញម្បិ,
មាបេយ្យំ កម្មជិទ្ធិយា.
បុញ្ញេនេតេន ¶ និព្ពានំ,
សន្តំ បប្បោមិ តាវតា;
ភវេយ្យំ សព្ពជាតីសុ,
ចតុសម្បត្តិយា សទា;
ចតុចក្កេន សម្បន្នោ,
សទ្ធម្មេហិ ច សត្តហិ.
សម្មាទិដ្ឋិ ¶ វសុបេតេ,
កុលម្ហិ សេដ្ឋសម្មតេ,
សព្ពសក្កត សំសុទ្ធេ;
ភវេ តិហេតុសន្ធិកោ.
ឃាសច្ឆាទនំ ភោគញ្ច,
នេវ ហត្ថេន កាតុន,
ភុញ្ជេយ្យមិទ្ធិយាត្វេវ,
មាបេត្វា យាវទត្ថកំ.
មនុស្សានំ ¶ អតិក្កម្ម,
ទេវានំ វិយ ភោជនំ,
វត្ថំ ភោគោ ច មេ ហោន្តុ,
បរិវារាតិសុន្ទរា.
ទសាសុត្តំបិ មេ ភោគំ,
បញ្ចវេរា ភវេ ភវេ;
មាគណ្ហេយ្យុញ្ច នស្សេយ្យុំ,
អសោកោ ភោគហេតុមេ.
សព្ពង្គសុភ ¶ សម្បន្នោ,
សិង្គីនិក្ខ សវណ្ណ វា;
ពាត្តិំស លក្ខណូបេតោ,
អតប្បន រូប វា ភវេ.
កាយោ ចន្ទនគន្ធោ ច,
មុខំ ឧប្បលគន្ធិកំ;
អដ្ឋង្គិកោ ¶ ករវិក,
មញ្ជូឃោសោ ច មេ ហោតុ.
តិក្ខ គម្ភីរ បញ្ញោ ច,
ហាសាតិជវបញ្ញវា,
ភូរិ និព្ពេធ បញ្ញោ ច;
សព្ពបញ្ហវិសជ្ជនោ.
អន្តោ ¶ សោឡសវស្សស្ស,
តិបេដកធរោ ភវេ;
សព្ពកម្មេសុ សិប្បេសុ,
វិជ្ជាឋានេសុ បារគូ.