📜
នមោ តស្ស ភគវតោ អរហតោ សម្មាសម្ពុទ្ធស្ស
ជិនាលង្ការ
បណាមទីបនីគាថា
យោ លោកត្ថាយ ពុទ្ធោ ធនសុតភរិយាអង្គជីវេ ចជិត្វា បូរេត្វា អារមិយោ តិទសមនុបមេ ពោធិបក្ខីយធម្មេ,
បត្វា ពោធិំ វិសុទ្ធំ សកលគុណទទំ សេដ្ឋភូតោ តិលោកេ,
កត្វា ទុក្ខស្ស អន្តំ កតសុភជនតំ ទុក្ខតោ មោចយិត្ថ.
នត្វានាហំ ជិនន្តំ សមុបចិតសុភំ សព្ពលោកេកពន្ធុំ,
នាហុ យេនបិ តុល្យោ កុសលមហិមតោ ឧត្តមោ ភូតលោកេ តស្សេវាយំ ឧវិម្ហំ សុវិបុលមមលំ ពោធិសម្ភារភូតំ,
ហេតុំ ហេត្វានុរូបំ សុគតគតផលំ ភាសតោ មេ សុណាថ.
យោគាវចរសម្បត្តិទីបនីគាថា
ជាតោ យោ នវមេ ខណេ សុតធរោ សីលេន សុទ្ធិន្ទ្រិយោ សំសារំ អយតោ ភវក្កយករំ ទិស្វា សិវំ ខេមតោ,
តំ សម្បាបកមគ្គទេសកមុនិំ សម្បូជយន្តោ តតោ ឧទ្ធានុស្សតិភាវនាទិកមតោ សម្បាទយេ តំ សិវំ.
វត្ថុវិសោធនីគាថា
ពុទ្ធោតិ កោ ពុទ្ធគុណោ តិ កោ សោ,
អចិន្តយាទិត្តមុបាគតោ យោ;
អនញ្ញសាធារណភូតមត្ថំ,
អកាសិ កិំ សោ កិមវោច ពុទ្ធោ.
វិសុទ្ធខន្ធសន្តានោ ពុទ្ធោតិ និយមោ កតោ,
ខន្ធសន្តានសុទ្ធី តុ គុណោតិ និយមោ កតោ.
អកាសិ កិច្ចានិ ទិនេសុ បញ្ច,
បសាទយញ្ចិទ្ធិពលេន សេន;
ជនានសេសំ ចរិយានុកូលំ,
ញត្វានវោចានុសយប្បហានំ.
អនញ្ញសាធារណទីបនីគាថា
អព្ភុគ្គតា យស្ស គុណា អនន្តា,
តិពុទ្ធខេត្តេកទិវាករោតិ;
ជានាតិ សោ លោកមិមំ បរញ្ច,
សចេតនញ្ចេវ អចេតនញ្ច;
សកស្ស សន្តានគតំ បរេសំ,
ព្យតីតមប្បត្តកមត្រភូតំ.
អនន្តសត្តេសុ ច លោកធាតុសុ,
ឯកោវ សព្ពេបិ សមា ន តេន;
ទិសាសុ បុព្ពាទិសុ ចក្កវាឡា,
សហស្សសង្ខាយបិ អប្បមេយ្យា;
យេ តេសុ ទេវា មនុជា ច ព្រហ្មា,
ឯកត្ថ សង្គម្ម ហិ មន្តយន្តា.
អនាទិកាលាគតនាមរូបិនំ,
យថាសកំ ហេតុផលត្តវុត្តិនំ;
តព្ភាវភាវិត្តមសម្ភុណន្តា,
នានាវិបល្លាសមនុបវិដ្ឋា.
កម្មប្បវត្តិញ្ច ផលប្បវត្តិំ,
ឯកត្តនានត្តនិរីហធម្មតំ;
វិញ្ញត្តិសន្តានឃនេន ឆន្នតោ,
សិវញ្ជសំ នោ ភណិតុំ សមត្ថា.
ឯកោ វ សោ សន្តិករោ បភង្ករោ,
សង្ខាយ ញេយ្យានិ អសេសិតានិ;
តេសញ្ហិ មជ្ឈេ បរមាសម្ភីវទំ,
សិវញ្ជសំ ទីបយិតុំ សមត្ថោ.
សោ គោតមោ សក្យសុតោ មុនិន្ទោ,
សព្ពស្ស លោកស្ស បទីបភូតោ;
អនន្តសត្តេ ភវពន្ធនម្ហា,
មោចេសិ ការុញ្ញផលានុបេក្ខី.
អភិនីហារទីបនីគាថា
វទេថ តស្សីធ អនប្បកំ គុណំ,
ន តេន តុល្យោ បរមោ ច វិជ្ជតិ;
កិំ តំ គុណំ តំ សទិសេន ទិន្នំ,
សយំកតំ កិន្នុ អធិច្ចលទ្ធំ.
នាធិច្ចលទ្ធំ ន ច បុព្ពពុទ្ធា,
ព្រហ្មាទិនំ សម្មុតិយា ពហូនំ;
សយំកតេនេវ អនោបមេន,
ទានាទិនា លទ្ធមិទំ វិបាកំ.
ឥតោ ចតុន្នំ អសង្ខិយានំ,
សតំសហស្សានធិកានមត្ថកេ;
កប្បេ អតីតម្ហិ សុមេធតាបសោ,
វេហាយសំ គច្ឆតិ ឥទ្ធិយា តទា.
ទិបង្ករោ នាម ជិនោ សសង្ឃោ,
រម្មំ បុរំ យាតិ វិរោចមានោ;
មនុស្សទេវេហិភិបូជិយន្តោ,
សហស្សរំសិ វិយ ភាណុមា នភេ.
តស្សញ្ជសំ កាតុពហុស្សហានំ,
ពុទ្ធោតិ សុត្វា សុមនោ បតីតោ;
មមជ្ជ ទេហំ បនិមស្ស ទត្វា,
ពុទ្ធោ អហំ ហេស្សមនាគតេទិសោ.
តស្មិញ្ជសេ កន្ទរតម្ហិ បង្កេ,
កត្វាន សេតុំ សយិ សោ សទេហំ;
ពុទ្ធោ អយំ គច្ឆតុ បិដ្ឋិយា មមំ,
ពោធិស្សចេ ហេស្សតិ មេ អនាគតេ.
ឧស្សីសកំ យាតិ ជិនោ ហិ តស្ស,
អជ្ឈាសយោ សិជ្ឈតិមស្សនាគតេ;
ញត្វាន ព្យាកាសិ អសេសតោ ហិ,
ពុទ្ធោ អយំ ហេស្សតិនាគតេសុ.
សុត្វាន បត្តោ វ មហាភិសេកំ,
លទ្ធំ វ ពោធិំ សមនុស្សរន្តោ;
បូជេត្វា យាតេ មុនិទេវមានុសេ,
ឧដ្ឋាយ សោ សម្មសិ បារមី ទស.
ទឡ្ហំ គហេត្វា សមតិំសបារមី,
សិក្ខត្តយញ្ចស្ស ជិនស្ស សន្តិកេ;
កាតុំ សមត្ថោ បិ ភវស្ស បារំ,
សត្តេសុ ការុញ្ញពលា ភវំ គតោ.
ឧប្បន្នុប្បន្នកេ សោ ជិនវរមតុលេ បូជយិត្វា អសេសំ ពុទ្ធោ ឯសោ ហិ ឱសោ ភវតិ និយមតោ ព្យាកតោ តេហិ តេហិ តេសំ តេសំ ជិនានំ អចនមនុបមំ បូជយិត្វា សិរេន,
តំ តំ ទុក្ខំ សហិត្វា សកលគុណទទំ បារមី បូរយិត្ថ.
ពោធិសម្ភារទីបនីគាថា
សោ ទុក្ខខិន្នជនទស្សនទុក្ខខិន្នោ,
ការុញ្ញមេវ ជនតាយ អកាសិ និច្ចំ;
តេសំ ហិ មោចនមុបាយមិទន្តិ ញត្វា,
តាទីបរាធមបិ អត្តនិ រោបយី សោ.
ទានាទិនេកវរបារមិសាគរេសុ,
ឱគាឡ្ហតាយបិ បទុដ្ឋជនេន ទិន្នំ;
ទុក្ខំ តថា អតិមហន្តតរម្បិ កិញ្ចិ,
នាញ្ញាសិ សត្តហិតមេវេអ គវេសយន្តោ.
ឆេត្វាន សីសំ ហិ សកំ ទទន្តោ,
មំសំ បចិត្វាន សកំ ទទន្តោ;
សោ ចត្តគត្តោ បណិធានកាលេ,
ទុដ្ឋស្ស កិំ ទុស្សតិ ឆេទនេន.
ឯវំ អនន្តមបិ ជាតិសតេសុ ទុក្ខំ,
បត្វាន សត្តហិតមេវ គវេសយន្តោ;
ទីបង្ករេ គហិតសីលសមាធិបញ្ញំ,
បាលេសិ យាវ សកពោធិតលេ សុនិដ្ឋោ.
យទាភិនីហារមកា សុមេធោ,
យទា ច មទ្ទិំ អទទា សិវិន្ទោ;
ឯត្ថន្តរេ ជាតិសុ កិញ្ចិបេកំ,
និរត្ថកំ នោ អគមាសិ តស្ស.
មហាសមុទ្ទេ ជលពិន្ទុតោបិ,
តទន្ត្រេ ជាតិ អនប្បកា វ;
និរន្តរំ បូរិតបារមីនំ,
កថំ បមាណំ ឧបមា កុហិំ វា.
យោ មគ្គបស្សេ មធុរម្ពពីជំ,
ឆាយាផលត្ថាយ មហាជនានំ;
រោបេសិ តស្មិំ ហិ ខណេវ តេន,
ឆាយាផលេ បុញ្ញមលទ្ធមុទ្ធំ.
តថេវ សំសារបថេ ជនានំ,
ហិតាយ អត្តនមភិរោបិតក្ខណេ;
សិទ្ធំ វ បុញ្ញូបរិ តស្ស តស្មិំ,
ធនង្គជីវំ បិ ហរន្តិ យេ យេ.
សោ សាគរេ ជលធិកំ រុហិរំ អទាសិ,
ភូមាបរាជិយ សមំសមទាសិ ទានំ;
មេរុប្បមាណមធិកញ្ច សមោឡិសីសំ,
ខេ តារកាធិកតរំ នយនំ អទាសិ.
គព្ភោក្កន្តិទីបនីគាថា
គម្ភីរបានទានាទិសាគរេសុ ហិ ថាមសា;
តរន្តោ មទ្ទិទានេន និដ្ឋាបេត្វាន បារមី.
វសន្តោ តុសីតេ កាយេ ពោធិបរិបាកមាគម្ម;
អាយាចនាយ ច ទេវានំ មាតុគព្ភមុបាគមិ.
សតោ ច សម្បជានោ ច មាតុកុច្ឆិម្ហិ ឱក្កមិ;
តស្ស ឱក្កន្តិយំ សព្ពា ទសសហស្សី បកម្បិត្ថ.
តតោ បុព្ពនិមិត្តានិ ទ្វត្តិំសានិ តទា សិយុំ;
តុដ្ឋហដ្ឋា វ សា មាតា បុត្តំ បស្សតិ កុច្ឆិយំ.
វិជាយនមង្គលទីបនីគាថា
សា បុណ្ណគព្ភា ទសមាសតោ បរំ,
គន្ត្វាន ផុល្លំ វរលុម្ពិនីវនំ;
ឋិតា គហេត្វា វរសាលសាខំ,
វិជាយិ តំ បុត្តវរំ សុខេន.
តទា សហស្សីទសលោកធាតុសុ,
ទេវា ច នាគា អសុរា ច យក្ខា;
នានាទិសា មង្គលចក្កវាឡំ,
សុមង្គលំ មង្គលមាគមិំសុ.
អនេកសាខញ្ច សហស្សមណ្ឌលំ,
ឆត្តំ មរូ ធារយុមន្តលិក្ខេ;
សុវណ្ណទណ្ឌា វិបតន្តិ ចាមរា,
ខជ្ជិំសុ ភេរី ច នទិំសុ សង្ខា.
មលេនកេនាបិ អនូបលិត្តោ,
ឋិតោ វ បាទានិ បសារយន្តោ;
កថី វ ធម្មាសនតោតរន្តោ,
ជាតោ យថាទិច្ចវរោ នភម្ហា.
ខីណាសវា ព្រហ្មគណោបគន្ត្វា,
សុវណ្ណជាលេន បដិគ្គហេសុំ;
តតោ ច ទេវាជិនចម្មកេន,
តតោ ទុកូលេន ច តំ មនុស្សា.
តេសំ បិ ហត្ថា វរភូមិយំ ឋិតោ,
ទិសា វិលោកេសិ សព្ពា សមន្តតោ;
វទិំសុ ទេវា បិ ច ព្រហ្មកាយិកា,
តយា សមោ កត្ថចិ នត្ថិ ឧត្តរោ.
គន្ត្វាន ឧត្តរំ សត្ត បទវារេហិ វិក្កមោ,
សីហនាទំ នទី តេសំ ទេវតានំ ហិ សាវយំ.
តតោ បុត្តំ គហេត្វាន គតា មាតា សកង្ឃរំ,
មាតា សត្តមិយំ គន្ត្វា ទេអបុត្តត្តមាគមិ.
តេ ព្រហ្មណា បញ្ចមិយំ សុភុត្តា,
នាមំ គហេតុំ វរលក្ខណានិ;
ទិស្វាន ឯកង្គុលិមុក្ខិបិំសុ,
ពុទ្ធោ អយំ ហេស្សតិ វីតរាគោ.
ជិណ្ណញ្ច ទិស្វា ព្យាធិកំ មតញ្ច,
អវ្ហាយិតំ បព្ពជិតញ្ច ទិស្វា;
ឱហាយ បព្ពជ្ជមុបេតិ កាមេ,
ពុទ្ធោ អយំ ហេស្សតិ វីតរាគោ.
អគារិយសម្បត្តិទីបនីគាថា
កាលក្កមេន ចន្ទោ វ វឌ្ឍន្តោ វឌ្ឍិតេ កុលេ,
បុញ្ញោទយេនុទេន្តោ សោ ភាណុមា វិយ អម្ពរេ.
សិទ្ធថកោ ហិ សិទ្ធត្ថោ លទ្ធា ទេវិំ យសោធរំ,
ចត្តាលីសសហស្សេហិ បូរិត្ថីហិ បុរក្ខិតោ.
រម្មសុរម្មសុភេសុ ឃរេសុ,
តិណ្ណមុតូនមនុច្ឆវិកេសុ;
ទិព្ពសុខំ វិយ ភុញ្ជិ សុខំ សោ,
អច្ឆរិយព្ភុតរាជវិភូតិំ.
នេក្ខម្មជ្ឈាសយទីបនីយមកគាថា
នមោ តស្ស យតោ មហិមតោ យស្ស តមោ ន
ទិស្វា និមិត្តានិ មទច្ឆិទានិ,
ថីនំ វិរូបានិ រតច្ឆិទានិ;
បាបានិ កម្មានិ សុខច្ឆិទានិ,
លទ្ធានិ ញាណានិ ភវច្ឆិទានិ.
បទិត្តគេហា វិយ ភេរវំ រវំ,
រវំ សម្មុដ្ឋាយ គតោ មហេសិ;
មហេសិមោលោកិយបុត្តមត្តនោ,
តនោសិ នោ បេមមហោឃមត្តនោ.
ឧម្មារឧម្មារគតុទ្ធរិត្វា,
បទំ បទំ យាតនរាសភស្ស;
អលំ អលំការតរេន គន្តុំ,
មតី មតីវេតិមនង្គភង្គេ.
ឧម្មារឧម្មារគតោ មហេសិ,
អនង្គភង្គំ សមចិន្តយិត្ថ;
កិំ មេ ជរាមច្ចុមុខេ ឋិតស្ស,
ន មេ វសេ កាមវសេ ឋិតស្ស.
កាមេន កាមេន ន សាធ្យមោក្ខំ,
មានេន មានេន មមត្ថិ កិញ្ចិ;
មារោ សសេនោ ហិ អវារណីយោ,
យន្តេន ឧច្ឆុំ វិយ មទ្ទតី មំ.
អាទិត្តមុយាតបយាតមូនំ,
អតាណាលេណាសរណេ ជនេ តេ;
ទិស្វាន ទិស្វាន សិវំ មយា តេ,
កាមេន កាមេន កថំ វិនេយ្យ.
វិជ្ជាវិជ្ជាយ ចុតញ្ចុបេតំ,
អសារសារូបគតញ្ជនំ ជនំ;
វិជ្ជាយវិជ្ជាយ យុតោ ចុតោហំ,
បហោមិ តារេតុមសង្គហោ គតោ.
មគ្គន្តិ នោ ទិដ្ឋិគតាបវគ្គំ,
អគ្គា តិ តេវាហុ ជនា សមគ្គា;
នគ្គំ អហោ មោហតមស្ស វគ្គំ,
វគ្គំ ហនិស្សាមិ តមគ្គមគ្គា.
បសេយ្ហការេន អសេយ្ហទុក្ខំ,
ជនា ជនេន្តីហ ជនានមេវ;
បសេយ្ហការេនា អសេយ្ហទុក្ខំ,
បាបំ ន ជានន្តិ តតោ និទានំ.
តេ ឱឃយោគាសវសំកិលេសា,
តមេវ នាសេន្តិ តតោ សមុដ្ឋិតា;
ឯកន្តិកំ ជាតិ ជរា ច មច្ចុ,
និរន្តរំ តំ ព្យសនញ្ចនេកំ.
ចីរំ កិលេសានសមុជ្ជលន្តំ,
ទិស្វាន សត្តានុសយំ សយម្ភូ;
សាធេមិ ពោធិំ វិនយាមិ សត្តេ,
បច្ឆាបិ បស្សាមិ សុតំ សុតន្តំ.
តំ ទិព្ពចក្កំ ខុរចក្កមាលំ,
រជ្ជំ សសារជ្ជសមជ្ជមជ្ជំ;
តេ ពន្ធវា ពន្ធនមាគតា បរេ,
សុតោ បសូតោយមនង្គទូតោ.
សមុជ្ជលន្តំ វសតី សតីសិរី,
សិរីសបាគារមិទំ មហាវិសំ;
ទទ្ទល្លមានា យុវតី វតីមា,
សកណ្ដកាយេវ សមញ្ជសញ្ជសេ.
យស្សា វិរាជិតសិរី សិរិយាបិ នត្ថិ,
តស្សាវលោកិយ ន តិត្តិវសានមត្ថិ;
គច្ឆាមិ ហន្ទ តវនង្គ សិរប្បភេទំ,
មត្តេភកុម្ភុបរិ សីហវិលាសគាមិំ.
ភោ ភោ អនង្គសុចិរ បិ បនុណ្ណពាណ,
ពាណានិ សំហរ បនុណ្ណមិតោ និរោធ;
រោធេន ចាបទគតោ មនសោ ន សោច,
សោចំ តវប្បនវលោកិយ យាមិ សន្តិំ.
រតី រតី កាមគុណេ វិវេកេ,
អលំ អលន្តេវ វិចិន្តយន្តោ;
មនំ មនង្គាលយសម្បទាលយំ,
តហិំ តហិំ ទិដ្ឋពាលា វ បក្កមិ.
បាទុទ្ធារវិម្ហយទីបនីគាថា
យាវញ្ចយំ រវិ ចរត្យចលេន រុទ្ធេ,
យាវញ្ច ចក្ករតនញ្ច បយាតិ លោកេ;
តាវិស្សរោ នភចរោ ជិតចាតុរន្តោ,
ហិត្វា កថំ នុ បទមុទ្ធរិ សោ និរាសោ.
ទីបេ មហា ច ចតុរាធិកទ្វេសហស្សេ,
តត្រាបិ សេដ្ឋភជិតំ វរជម្ពុទីបំ;
ភូនាភិកំ កបិលវត្ថុបុរំ សុរម្មំ,
ហិត្វា កថំ នុ បទមុទ្ធរិ សោ និរាសោ.
ញាតីនសីតិ កុលតោ ហិ សហស្ស សាក្យេ,
ហត្ថិស្សធញ្ញធនិនោ វិជិតារិសង្ឃេ;
គោត្តេន គោតមភវំ បិតរញ្ជនគ្គំ,
ហិត្វា កថំ នុ បទមុទ្ធរិ សោ និរាសោ.
រម្មំ សុរម្មវសតិំ រតនុជ្ជលន្តំ,
គិម្ហេបិ វិម្ហយករំ សុរមន្ទិរាភំ;
ឧស្សាបិតទ្ធជបដាកសិតាតបត្តំ,
ហិត្វា កថំ នុ បទមុទ្ធរិ សោ និរាសោ.
សបោក្ខរា បោក្ខរណី ចតស្សោ,
សុបុប្ផិតា មន្ទិរតោ សមន្តា;
កោកា នទន្តូបរិ កោកនាទេ,
ហិត្វា កថំ នុ បទមុទ្ធរិ សោ និរាសោ.
សរេ សរោជេ រុទិតាឡិបាឡិ,
សមន្តតោ បស្សតិ បញ្ជរញ្ជសា;
ទិស្វារវិន្ទានិ មុខារវិន្ទំ
នាថស្ស លជ្ជា វិយ សំកុជន្តិ.
មធុរា មធុរាភិរុតា,
ចរិតា បទុមេ បទុមេឡិគណា;
វសតិំ អធុនា មធុនា,
អករុំ ជហិតំ កិមិទំ បតិនា.
តម្ហា រសំ មធុករា ភវនំ ហរិត្វា,
និន្នាទិនោ សមធុរំ មធុរំ ករោន្តិ;
នាទេន នាទមតិរិច្ចុបវីណយន្តិ,
នច្ចន្តិ តា សុរបុរេ វណិតា វ តាវ.
សញ្ចោទិតា បីណបយោធរាធរា,
វិរាជិតានង្គជមេខលាខលា;
សុរង្គណា វង្គជផស្សទា សទា,
រមា រមាបេន្តិ វរង្គទាគទា.
ករាតិរត្តា រតិរត្តរាមា,
តាឡេន្តិ តាឡាវចរេ សមន្តា;
នច្ចុគ្គតានេកសហស្សហត្ថា,
សក្កោបិ កិំ សក្យសមោតិ ចោទយុំ.
វិសាលនេត្តា ហសុលា សុមជ្ឈា,
និម្ពត្ថនី វិម្ហយគីតសទ្ទា;
អលង្កតា មល្លធរា សុវត្ថា,
នច្ចន្តិ តាឡាវចរេហិ ឃុដ្ឋា.
យាសំ ហិ លោកេ ឧបមា នត្ថិ,
តាសំ ហិ ផស្សេសុ កថាវកាសា;
តំ តាទិសំ កាមរតិំនុភោន្តោ,
ហិត្វា កថំ នុ បទមុទ្ធរិ សោ និរាសោ.
បាទេបាទេ វលយវិរវាមេខលាវីណានាទា,
គីតំគីតំ បតិរតិករំ គាយតី គាយតី សា;
ហត្ថេហត្ថេ វលយចលិតា សម្ភមំ សម្ភមន្តិ,
ទិស្វាទិស្វា ឥតិ រតិករំ យាតិ ហាហា កិមីហា.
អបុនរាវត្តិគមនទីបនីយមកគាថា
អនន្តកាលោបចិតេន តេន,
បុញ្ញេន និព្ពត្តវិមានយានេ;
តស្មិំ ទិនេ ជាតសុតំ បជាបតិំ,
ហិត្វា គតោ សោ សុគតោ គតោ វ.
តំ ជីវមានំ បិតរញ្ច មាតរំ,
តេ ញាតកេ តាទិសិយោ ច ឥត្ថិយោ;
តេ តាទិសេ រម្មករេ និកេតេ,
ហិត្វា គតោ សោ សុគតោ គតោ វ.
ខោមញ្ច បត្តុណ្ណទុកូលចីនំ,
សកាសិកំ សាធុសុគន្ធវាសិតំ;
និវាសិតោ សោភតិ វាសវោ វ,
ហិត្វា គតោ សោ សុគតោ គតោ វ.
វិធិប្បកាសា និធិយោ ចតស្សោ,
សមុគ្គតា ភូតធរា វសុន្ធរា;
សត្តាវសត្តាវសុធា សុធាសា,
ហិត្វា គតោ សោ សុគតោ គតោ វ.
សុវណ្ណថាលេ សតរាជិកេ សុភេ,
សាធុំ សុគន្ធំ សុចិសាលិភោជនំ;
ភុត្វា សវាសីហិ វិលាសិនីហិ,
ហិត្វា គត សោ សុគតោ គតោ វ.
មនុញ្ញគន្ធេន អសុញ្ញគន្ធោ,
សុគន្ធគន្ធេន វិលិត្តគត្តោ;
សុគន្ធវាតេន សុវិជ្ជិតង្គោ,
ហិត្វា គតោ សោ សុគតោ គតោ វ.
សុលក្ខណេ ហេវភិលក្ខិតង្គោ,
បសាធិតោ ទេវបសាធនេន;
វិរោចមានោ សមរាជិនីហិ,
ហិត្វា គតោ សោ សុគតោ គតោ វ.
នានាសនានិ សយនានិ និវេសនានិ,
ភាភានិភានិ រតនាករសន្និភានិ;
តត្រុស្សិតានិ រតនទ្ធជភូសិតានិ,
ហិត្វា វ តានិ ហិមពិន្ទុសមានិ តានិ.
នានាវិធេហិ រតនេហិ សមុជ្ជលេហិ,
នារីហិ និច្ចមុបគាយិតហម្មិយេហិ;
រជ្ជេហិ ចក្ករតនាទិវិភូសិតេហិ,
យាតោ តតោ ហិ មហិតោ បុរិសស្សរេហិ.
ទ្វិបាទព្យាសយមកគាថា
យសោធរំ បីណបយោធរាធរំ,
អនង្គរង្គទ្ធជភូតមង្គំ;
ទេវច្ឆរាវុជ្ជលិតំ បតិព្ពតំ,
ហិត្វា គតោ សោ សុគតោ វ នូន.
សភាវនិច្ឆន្ទមតិំ បភាវតិំ,
ភត្តោ កុសោ សំហរិ ភត្តកាជំ;
តាយាភិរូបំ បិ យសោធរំ វរំ,
ហិត្វា គតោ សោ សុគតោ វ នូន.
បុរេ បុរេ សញ្ចរិ ខគ្គហត្ថោ,
វរំ បរិត្ថីនំ អនិត្ថិគន្ធោ;
សិរិញ្ច រិញ្ចាបិ ន រិញ្ចិ នារិំ,
ហិត្វានិមន្ទានិ គតោ តថាគតោ.
ហរិត្តចោ រាគពលេន ទេវិយា,
អវត្ថលិង្គេន ន លិង្គនុស្សរិ;
អសេវិ កាមំ តមិទានិ កាមំ,
ហិត្វា គតោ សោ សុគតោ វ នូន.
អបមេយ្យកប្បេសុ វិវេកសេវី,
ហិត្វា គតោ រជ្ជសិរិំ វរិត្ថិំ;
អណុំ កលិំ វណ្ណយិ តំ បុរាណំ,
វត្ថម្ហិ ឆិទ្ទំ វិយ តុន្នការោ.
តថាតិ មន្ត្វាន ឥទានិនង្គោ,
យសោធរំ បគ្គហិតោ ធជំ វ;
មត្តោ ជិតោម្ហី តិ បមត្តពន្ធុ,
ន បស្សិ ញាណាសនិបាតមន្តរំ.
ទិស្វាន ទុក្ខានលសម្ភវំភវំ,
កត្វា តទុប្បាទកនង្គភង្គំ;
យសោធរំ បីណបយោធរាធរំ,
ហិត្វា គតោ ពុទ្ធពលប្បទំ បទំ.
អនន្តសត្តានមនន្តកាលេ,
មនង្គហេត្វាន ជិតោ អនង្គោ;
បរាជិតោ នូន ហិ ឯកកស្ស,
តថាគតោ សោ ន បុនាគតោ វ.
ទិស្វាន ញាណាសនិបាតមន្តរំ,
តថាគតោ សោ ន បុនាគតោ វ;
តថាគតោ សោ ន បុនាគតោ វ,
ទិស្វានញាណាសនិបាតមន្តរំ.
តិបាទព្យាសយមកគាថា
តថាគតច្ឆេរមហោសិ តស្ស,
តថា ហិមារោបិតទាហសន្តិំ;
តថា ហិ មារោ បិ តទាហ សន្តិំ,
តថា ហិ មារោបិ តទា ហសន្តិំ.
បាទព្យាសមហាយមកគាថា
សកាមទាតា វិនយាមនតគូ,
សកាមទាតា វិនយាមនន្តគូ;
សកាមទាតា វិនយាមនន្តគូ,
សកាមទាតា វិនយាមនន្តគូ.
អព្យាបេតាទ្យន្តយមកគាថា
រវេរវេរោរភិមារភេរវេ,
រវេរវេរិវ ភេរវេ រវេ;
រវេ រវេ សូទិតគារវេ រវេ,
រវេរវេទេសិ ជិនោរវេ រវេ.
បដិលោមយមកគាថា
លោកាយាតតយា កាលោ វិសេសំ ន ន សំសេវិ,
វិសេសំ ន ន សំសេវិ លោកា យាតតយា កាលោ.
រាជរាជយសោបេតវិសេសំ រចិតំ មយា,
យាមតំ ចិរសំសេវិតបេសោ យជរាជរា.
ឯកឋានិកាទិយមកគាថា
អាកង្ខក្ខាកង្ខង្គ កង្ខាគង្គាខាគហក,
កង្ខាគាហកកង្ខាឃ ហា ហា កង្ខា កហំ កហំ.
អប្បគព្ភោ អបគព្ភោ អមោហោ មា បមោហកោ,
មគ្គមុខំ មោខមាហ មាហា មោហមូហក្ខមំ.
បាបាបាបភវំ បស្សំ បាបាបភវុគ្គតោ,
បាបាបាបភវាសង្គា បាបាបាបភវាគតោ.
កុសលាកុសលំ បស្សំ កុសលាកុសលំ ចជិ,
កុសលាកុសលាសង្គ កុសលាកុសលា ចុតោ.
អក្ខរុត្តរិកយមកគាថា
នោនានិនោ ននូនានិ ននេនានិ ននានិនោ,
នុន្នានេនានិ នូន ន នាននំ នាននេន នោ.
សារេ សុរាសុរេ សារី រសសារសរិស្សរោ,
រសសាររសេ សារិ សុរាសុរសរស្សិរេ.
ទេវានំ នន្ទនោ ទេវោ ទេវទេវ ន នន្ទិ នោ,
វេទទីនេន វេទន វេទិ វេទន វេទិនោ.
ទេវាសនេ និសិន្នោ សោ ទេវទេវោ សសាសនេ,
និសិន្នានំ សទេវានំ ទេសេសិ ទស្សនាសនំ.
បហេឡិគាថា
ទសនាវគតោ សញ្ញោ អន្ធស្ស តមទោ រវិ,
អដ្ឋមាបុណ្ណសង្កប្បោ បាត្វនញ្ញមនញ្ញិវ.
ព្យាបេតាទិយមកគាថា
ឯកន្តមេវ សបរត្ថបរោ មហេសិ,
ឯកន្តមេវ ទសបារមិតាពលេន;
ឯកន្តមេវ ហតមារពលេន តេន,
ឯកន្តមេវ សុវិសុទ្ធមលត្ថ ពោធិំ.
មហាបធានទីបនីគាថា
ឱរោហិតោតោហិតបាបធម្មោ,
ឆន្នេន ស ឆន្នហយេន គន្ត្វា;
អនោមតីរម្ហិ អនោមសត្តោ,
អនោមបព្ពជ្ជមុបាគតោ សោ.
និរាមិសំ បីតិសុខំ អនូបមំ,
អនូបិយេ អម្ពវនេ អលត្ថ;
សរូបសោភាយ វិរូបសោភំ,
សរាជិកំ រាជគហំ ករិត្ថ.
តតោ អឡារ ឩទកតាបសានំ,
ឈានេនសន្តុដ្ឋមនោ វិហាយ;
មហាបធានាយ ឧរុវេលភូមិំ,
គតោ សិខប្បត្តមកាសិ ទុក្ករំ.
ន កាមតោ នេវតិទុក្ករម្ហិ,
សព្ពញ្ញុតា សិជ្ឈតិ មជ្ឈិមាយ;
ញត្វាន តំ បុព្ពគុណោបលទ្ធំ,
ធម្មំ សមានេតុមគា សុពោធិំ.
មារបរាជយទីបនីគាថា
តិពុទ្ធខេត្តម្ហិ តិសេតឆត្តំ,
លទ្ធាន លោកាធិបតី ភវេយ្យ;
គន្ត្វាន ពោធិម្ហិបរាជិតាសនេ,
យុទ្ធាយ មារេនចលោ និសីទិ.
ទត្វាន មំសំ រជ្ជំ បិតា សុទ្ធោទនោ តទា,
នមស្សមានោ សិរសា សេតឆត្តេន បូជយិ.
សយំ នារាយនពលោ អភិញ្ញាពលបារគូ,
ជេតុំ សព្ពស្ស លោកស្ស ពោធិមណ្ឌំឧបាគមិ.
តទា វសវត្តីរាជា ឆកាមវចរិស្សរោ,
សសេនាវាហនោ ពោធិមណ្ឌំ យុទ្ធាយុបាគមិ.
ឯថ គណ្ហថ ពន្ធថ ឆដ្ដេថ ចេដកំ ឥមំ,
មនុស្សកលលេ ជាតោ កិមិហន្តិ ន មញ្ញតិ.
ជលន្តំ នវវិធំ វស្សំ វស្សាបេតិ អនប្បកំ,
ធូមន្ធការំ កត្វាន បាតេសិ អសិនំ ពហុំ.
ចក្កាវុធំ ខិបេន្តោ បិ នាសក្ខិ កិញ្ចិ កាតវេ,
គហេតព្ពំ ហិ គហណំ អបស្សន្តោ ឥតិព្រវិ.
សិទ្ធត្ថ កស្មា អាសិ នុ អាសនេ មម សន្តកេ,
ឧដ្ឋេហិ អាសនា នោ ចេ ផាលេមិ ហទយំ តវ.
សបាទមូលេ កីឡន្តំ បស្សន្តោ តរុណំ សុតំ,
បិតា វុទិក្ខិ តំ មារំ មេត្តាយន្តោ ទយបរោ.
តទា សោ អសម្ភិវាចំ សីហនាទំ នទី មុនិ,
ន ជានាតិ សយំ មយ្ហំ ទាសភាវបិយំ ខឡោ.
យេន កេនចិ កម្មេន ជាតោ ទេវបុរេ វរេ,
សកំ គតិំ អជានន្តោ លោកជេដ្ឋោតិ មញ្ញតិ.
អនន្តលោកខាតុម្ហិ សត្តានំ ហិ កតំ សុភំ,
មយ្ហេកបារមិយា បិ កលំ នគ្ឃតិ សោឡសិំ.
តិរច្ឆានោ សសោ ហុត្វា ទិស្វា យាចកមាគតំ,
បចិត្វាន សកំ មំសំ បតិឥឱគ្គិម្ហិ ទាតវេ.
ឯវំ អនន្តកាលេសុ កតំ ទុក្ករការិកំ,
កោ ហិ នាម ករេយ្យញ្ញោ អនុម្មត្តោ សចេតនោ.
ឯវំ អនន្តបុញ្ញេហិ សិទ្ធំ ទេហមិមំ បន,
យថាភុតំ អជានន្តោ មនុស្សោសី តិ មញ្ញតិ.
នាហំ មនុស្សោមនុស្សោ ន ព្រហ្មា ន ច ទេវតា,
ជរាមរណំ លោកស្ស ទស្សេតុំ បនិធាគតោ.
អនុបលិត្តោ លោកេន ជាតោនន្តជិនោ អហំ,
ពុទ្ធោ ពោធិតលេ ហុត្វា តារេមិ ជនតំ ពហុំ.
សមន្តា ធជិនំ ទិស្វា យុទ្ធំ មារំ សវាហនំ,
យុទ្ធាយ បច្ចុគច្ឆាមិ មា មំ ឋានា អចាវយិ.
យន្តេ តំ នប្បសហតិ សេនំ លោកោ សទេវកោ,
តន្តេ បញ្ញាយ គច្ឆាមិ អាមំ បត្តំ វ អស្មនា.
ឥច្ឆន្តោ សាសបេ គព្ភេ ចង្កមាមិ ឥតោ ចិតោ,
ឥច្ឆន្តោ លោកធាតុម្ហិ អត្តភាវេន ឆាទយិ.
ឯតេ សព្ពេ គហេត្វាន ចុណ្ណេតុំ អច្ឆរាយបិ,
អត្ថិ ថាមំ ពលំ មយ្ហំ បាណឃាតោ ន វដ្ដតិ.
ឥមស្ស គណ្ឌុប្បាទស្ស អាយុធេន ពលេន កិំ,
មយ្ហំ ហិ តេន បាបេន សល្លាបោ បិ ន យុជ្ជតិ.
បល្លង្កំ មម ភាវាយ កិមត្ថញ្ញេន សក្ខិនា,
កម្បិតា មទ្ទិយា ទានា សក្ខិ ហោតិ អយំ មហី.
ឥតិ វត្វា ទក្ខិណំ ពាហុំ បថវិយា បណមយិ,
តទា កម្បិត្ថ បថវី មហាឃោសោ អជាយថ.
បថវីឃោសេន អាកាសេ គជ្ជន្តោ អសនិ ផលិ,
តស្មិំ មជ្ឈេ គតោ មារោ សបរិសោ ភយតជ្ជិតោ.
មហាវាតសមុទ្ធតភស្មំ វ វិកិរិយ្យថ,
មហាឃោសោ អជាយិត្ថ សិទ្ធតស្ស ជយោ ឥតិ.
អភិសម្ពោធិទីបនីគាថា
បុរតោ គច្ឆតិ ចន្ទោ រជតចក្កំ វ អម្ពរេ,
សហស្សរំសិ សុរិយោ បច្ឆិមេនុបគច្ឆតិ.
មជ្ឈេ ពោធិទុមច្ឆត្តេ បល្លង្កេ អប្បរាជិតេ,
បល្លង្កេន និសីទិត្វា ធម្មំ សម្មសតេ មុនិ.
សក្កោ តស្មិំ ខណេ សង្ខំ ធមន្តោ អភិធាវតិ,
ព្រហ្មា តិយោជនំ ឆត្តំ ធារេតិ មុនិមុទ្ធនិ.
មណិតាលវណ្ដំ តុសីតោ សុយាមោ វាឡពីជនិំ,
នានាមង្គលភណ្ឌានិ គហិតោ សេសទេវតា.
ឯវំ ទសសហស្សម្ហិ សក្កោ ព្រហ្មា ច ទេវតា,
សង្ខាទីនី ធមន្តា ច ចក្កវាឡម្ហិ បូរយុំ.
មង្គលានិ គហេត្វាន តិដ្ឋន្តិ កាចិ ទេវតា,
ធជមាល គហេត្វាន តថា បុណ្ណឃដាទយោ.
តត្ថ នច្ចន្តិ គាយន្តិ សេឡេន្តិ វាទយន្តិ ច,
ទេវា ទសសហស្សម្ហិ តុដ្ឋហដ្ឋា បមោទិតា.
ធម្មាមតរសស្សាទំ លភិស្សាមស្ស សន្តិកេ,
នយនាមតរសស្សាទំ បាដិហារិយញ្ច បស្សិតុំ.
ជារមរណកន្តារា សោកោបាយាសសល្លតោ,
មោចេសិ កាមបាសម្ហា ទេសេន្តោ អមតំ បទំ.
ឥតិ តុដ្ឋេហិ ទេវេហិ បូជិយន្តោ នរាសភោ,
កិញ្ចិ បូជំ អចិន្តេន្តោ ចិន្តេន្តោ ធម្មមុត្តមំ.
សព្ពត្ថសាធិតោ សន្តោ សិទ្ធត្ថោ អប្បរាជិតោ,
ចក្កវាឡសិលាសាណិបាការេហិ មនោរមេ.
តារាមណិខចិតាកាសវិតានេ ចន្ទទីបកេ,
មានារតមបជ្ជោតេ មាលាគន្ធាទិបូជិតេ.
ទិព្ពេហិ ឆណភេរីហិ ឃុដ្ឋេ មង្គលគីតិយា,
ចក្កវាឡេ សុប្បាសាទេ ពោធិមណ្ឌមហាតលេ.
ពោធិរុក្ខមណិច្ឆត្តេ បល្លង្កេ អប្បរាជិតេ,
និស្សិន្នោ បឋមេ យាមេ បុរិមំ ជាតិមនុស្សរិ.
នមរូបាមនុប្បត្តិ សុទិដ្ឋា ហោតិ តេនិធា,
សក្កាតទិដ្ឋិ តេនស្ស បហីនា ហោតិ សព្ពសោ.
តតោ ហិ ទុតិយេ យាមេ យថាយម្មុបគេ សរិ,
សុទិដ្ឋំ ហោតិ តេនស្ស កម្មក្លេសេហិ សម្ភវំ.
កង្ខាវិតរណី នាម ញាណន្តំ សមុបាគតំ,
តេនសេស បហីយិត្ថ កង្ខា សោឡសធា ឋិតា.
តតោ សោ តតិយេ យាមេ ទ្វាទសង្គេ អសេសតោ,
សោ បដិច្ចសមុប្បាទេ ញាណមោតារយី មុនិ.
អវិជ្ជវាទ្យានុលោមេន ជរាទិបដិលោមតោ,
សម្មសន្តោ យថាភូតំ ញាណទស្សនមាគមិ.
កប្បកោដិសតេនាបិ អប្បមេយ្យេសុ ជាតិសុ,
លោភំ អសេសទានេន វិនាសេន្តោ បុនប្បុនំ.
សីលេន ខន្តិមេត្តាយ កោខទោសំ និវារេសិ,
បញ្ញាយ មោហំ ឆេត្វាន មិច្ឆាទិដ្ឋិ តថេវ ច.
គរូបសេវនាទីហិ វិចិកិច្ឆំ វិនោទយំ,
មានុទ្ធច្ចំ វិនោទេន្តោ កុលេ ជេដ្ឋោបចាយិនា.
នេក្ខម្មេន វិនាសេន្តោ កាមរាគំ បុនប្បុនំ,
សច្ចេន វិសំវាទំ កោសជ្ជំ វីរិយេន ច.
ឯវំ ទានាទិនា តំ តំ កិលេសង្គំ វិនោទយំ,
សុវឌ្ឍិតា មហាបញ្ញា កថំ សន្តិំ ន រូហតិ.
សុទុក្ករំ ករិត្វាន ទានាទិបច្ចយំ បុរេ,
ន កិញ្ចិ ភវសម្បត្តិំ បត្ថេសិ ពោធិមុត្តមំ.
បណិធានម្ហា បដ្ឋាយ កតំ បុញ្ញញ្ច បត្ថនំ,
ឯក្កត្ថ ទានិ សម្បត្តិំ ទេតិ ពោធិំ អសំសយំ.
តតោ សោ សព្ពសង្ខារេ អនិច្ចទុក្ខនត្តតោ,
សម្មសន្តោនុលោមេន និព្ពានំ សមុបាគមិ.
សវាសនេ កិលេសេ សោ ឈាបេន្តោនុមត្តំ បិ ច,
អរហត្តប្បត្តិយា សុទ្ធោ ពុទ្ធោ ពោធិតលេ អហុ.
បត្តោ វិមេត្តិំ វរសេតឆត្តំ,
សោ បីតិវេគេន ឧទានុទីរយិ;
ឆេត្វាន មារេ វិជិតារិសង្ឃោ,
តិពុទ្ធខេត្តេកទិវាករោ អហុ.
រាជាធិរាជា វរមេវមាសិ,
តិឆត្តធារិ វរធម្មរាជា;
មហាសហស្សំ បិ ច លោកធាតុំ,
សរេន វិញ្ញាបយិតុំ សមត្ថោ.
ពុទ្ធោ លោកាលោកេ លោកេ,
ជាតោ សត្តោ កោនុម្មត្តោ;
សុទ្ធំ ពុទ្ធំ ឱឃា តិណ្ណំ,
សទ្ធោ បញ្ញោ កោ នោ វន្ទេ.
ភជិតំ ចជិតំ បវនំ ភវនំ,
ជហិតំ គហិតំ សមលំ អមលំ;
សុគតំ អគតំ សុគតិំ អគតិំ,
នមិតំ អមិតំ នមតិំ សុមតិំ.
ធម្មចក្កបវត្តនទីបនីគាថា
សម្មាសម្ពោធិញានំ ហតសកលមលំ សុទ្ធតោ ចាតិសុទ្ធំ,
អទ្ធា លទ្ធា សុលទ្ធំ វតមិតិ សតតំ ចិន្តយន្តោ សុពោធិំ;
សត្តាហំ សត្តមេវំ វិវិធផលសុខំ វិតិនាមេសិ កាលំ,
ព្រហ្មេនាយាចិតោ សោ ឥសិបតនវនេ វត្តយី ធម្មចក្កំ.
បាដិហារិយទីបនីគាថា
ព្រហ្មស្ស សទ្ទំ ករវីកភាណិំ,
យថិច្ឆិតំ សាវយិតុំ សមត្ថំ;
សច្ចំ បិយំ ភូតហិតំ វទន្តំ,
ន បូជយេ កោ ហិ នរោ សចេតនោ.
ឥទ្ធិ ច អាទេសនានុសាសនី,
បាដិហីរេ ភគវា វសី អហុ;
កត្វាន អច្ឆេរសុបាដិហីរំ,
ទេសេសិ ធម្មំ អនុកម្បិមំ បជំ.
នវគុណទីបនីគាថា
ឯវំ ហិ ពុទ្ធត្តមុបាគតោ សោ,
ទេសេសិ ធម្មំ សនរាមរានំ;
នានានយេហីភិសមេសិ សត្តេ,
តស្មា ហិ ឈាតោ តិភវេសុ នាថោ.
អទ្ធា លទ្ធា ធម្មាលោកំ,
ទិដ្ឋា បត្តា ញាតា សច្ចំ;
តិញ្ញារាគាទោសមោហា,
ថោមេសុំ តេ ទេវា ព្រហ្មា.
មុនិរាជវរោ នររាជវរោ,
ទិវិទេវវរោ សុចិព្រហ្មវរោ;
សកបាបហរោ បរបាបហរោ,
សកវុឌ្ឍិករោ បរវុឌ្ឍិករោ.
សនរាមរុព្រហ្មគណេភិ រុតា,
អរហាទិគុណា វិបុលា វិមលា;
នវធា វសុធាគគណេ,
សកលេ តិទិវេ តិភវេ វិសដា.
យេ បិស្ស តេ ភគវតោ ច អចិន្តិយាទី,
សុទ្ធាតិសុទ្ធតរពុទ្ធគុណា ហិ សព្ពេ;
សង្ខេបតោ នវវិធេសុ បទេសុ ខិត្តា,
វក្ខាមិ ទានិ អរហាទិគុណេ អហំ បិ.
យោ ចីធ ជាតោ អរហំ និរាសោ,
សម្មាភិសម្ពុទ្ធសមន្តចក្ខុ;
សម្បន្នវិជ្ជាចរណោឃតិណ្ណោ,
សម្មាគតោ សោ សុគតោ គតោ វ.
អវេទិ សោ លោកមិមំ បរញ្ច,
អមុត្តរោ សារថិទម្មសត្តេ;
សទេវកានំ វរសត្ថុកិច្ចំ,
អកាសិ ពុទ្ធោ ភគវា វិសុទ្ធោ.
គុណទីបនីគាថា
ន តស្ស អទិដ្ឋនមិធត្ថិ កិញ្ចិ,
អតោ អវិញ្ញាតមជានិតព្ពំ;
សព្ពំ អភិញ្ញាសិ យទត្ថិ ញេយ្យំ,
តថាគតោ តេន សមន្តចក្ខុ.
ឥតិ មហិតមនន្តាកិត្តិសម្ភារសារំ,
សកលទសសហស្សីលោកធាតុម្ហិ និច្ចំ;
ឧបចិតសុភហេតុបយុតានន្តកាលំ,
តទិហ សុគតពោធិសាធុកំ ចិន្តនីយំ;
តក្កព្យាករណញ្ច ធម្មវិនយំ សុត្វា បិ យោ បញ្ញវា,
តេនាយំ សុចិសារភូតវចនំ វិញ្ញាយតេ កេវលំ;
ហេតុញ្ចាបិ ផលេន តេន សផលំ សម្បស្សមានោ តតោ ពោធិំ សទ្ទហតេវ តស្ស មហតាវាយមតោ សម្ភវំ.
យោ សទ្ទហន្តោ បន តស្ស ពោធិំ,
វុត្តានុសារេន គុណេរហាទី;
កថេតិ ចិន្តេន្តិ ច សោ មុហុត្តំ,
ឱហាយ បាបានិ ឧបេតិ សន្តិំ.
សទ្ធេយ្យា តេ ចិន្តេយ្យា តេ,
វន្ទេយ្យា តេ បូជេយ្យាតេ;
ពុទ្ធោលោកាលោកេ លោកេ,
ជាតេ នេតំ បត្ថេន្តេន.
បូជានិធានទីបនីគាថា
តសមា ហិ ជាតោវរកម្ហិ តស្ស,
អាយត្តកេ មង្គលចក្កវាឡេ;
ភូតេហិ វត្ថូហិ មនោរមេហិ,
បូជេមិ តំ បូជិត្បូជិតំ បុរេ.
សោហំ អជ្ជ បនេតស្មិំ ចក្កវាឡម្ហិ បុប្ផិតេ,
ថលជេ ជលជេ វាបិ សុគន្ធេ ច អគន្ធកេ.
មនុស្សេសុ អនេកត្ថ តឡាកុយ្យានវាបិសុ,
បវនេ ហិមវន្តស្មិំ តត្ថ សត្ត មហាសរេ.
បរិត្តទីបេ ទ្វិសហស្សេ មហាទីបេ សុបុប្ផិតេ,
សត្តបរិភណ្ឌសេលេសុ សិនេរុបព្ពតុត្តមេ.
កុមុទុប្បលកាទីនិ នាគានំ ភវនេសុបិ,
បាដលាទីនិ បុប្ផានិ អសុរានំ ហិ អាលយេ.
កោវិឡារាទិកានិ តុ ទេវតានំ ហិ អាលយេ,
ឯវមាទី អនេកត្ថ បុប្ផិតេ ធរណីរុហេ.
ចម្បកា សលលា និម្ពា នាគបុន្នាគកេតកា,
វស្សិកា មល្លិកា សាលា កោវិឡារា ច បាដលិ.
ឥន្ទីវរា អសោកា ច កណិការា ច មកុលា,
បទុមា បុណ្ឌរិកា ច សោគន្ធិកុមុទុប្បលា.
ឯតេ ចញ្ញេ ច រុក្ខា ច វល្លិយោ ចាបិ បុប្ផិតា,
សុគន្ធា សុខសម្ផស្សា នានាវណ្ណនិភា សុភា.
វិចិត្រា នីលានេកានិ បីតា លោហិតកានិ ច,
កាឡា សេតា ច មញ្ជដ្ឋ នេកវណ្ណា សុបុប្ផិតា.
សោភតេ បព្ពតេ ហេដ្ឋា សរេហិ វនរាជិហិ,
សន្ទមានាហិ គង្គាហិ ហិមវា រតនាករោ.
បត្តកិញ្ជក្ខរេណូហិ ឱកិណ្ណំ ហោតិ តំ វនំ,
ភមរា បុប្ផគន្ធេហិ សមន្តា អភិនាទិតា.
អថេត្ត សកុណា សន្តិ ទិជា មញ្ជុស្សរា សុភា,
កូជន្តមុបកូជន្តិ ឧតុសម្បុប្ផិតេ ទុមេ.
និច្ឆរានំ និបាតេន បព្ពតា អភិនាទិតា,
បញ្ចង្គិកានិ តូរិយានិ ទិព្ពានិ វិយ សុយ្យរេ.
តត្ថ នច្ចន្តិ តស្មិំ ជលន្តគ្គិសិខូបមា,
តស្មិំ ហិ កិន្នរា កិច្ចំ បទីបេន ករីយតិ.
មុត្តាជាលាវ ទិស្សន្តិ និច្ឆរានំ ហិ បាតកា,
បជ្ជលន្តា វ តិដ្ឋន្តិ មណិវេឡុរិយាទយោ.
កាឡានុសារិ តគ្គរំ កប្បូរំ ហរិចន្ទនំ,
សកុណានំ ហិ សទ្ទេន មយូរានំ ហិ កេកយា.
ភមរានំ ហិ និន្នាទា កោញ្ចនាទេន ហត្ថិនំ,
វិជម្ភិតេន វាឡានំ កិន្នរានំ ហិ គីតិយា;
បព្ពតានំ ហិ ឱភាសា មណីនំ ជោតិយាបិ ច,
វិចិត្រព្ភវិតានេហិ ទុមានំ បុប្ផធូបិយា;
ឯវំ សព្ពង្គសម្បន្នំ កិំ សិយា នន្ទនំ វនំ.
ឯវំ សុសម្ផុល្លវនំ ហិ យំ យំ,
តហិំ តហិំ បុប្ផិតបុប្ផិតំ សុភំ;
មាលំ សុសទ្ទញ្ច មនុញ្ញគន្ធំ,
បូជេមិ តំ បូជិតបូជិតំ បុរា.
នាគលោកេ មនុស្សេ ច ទេវេ ព្រហ្មេ ច យំ សិយា,
សាមុទ្ទិកំ ភូមិគតំ អាកាសដ្ឋញ្ច យំ ធមំ.
រជតំ ជាតរូបញ្ច មុត្តា វេឡុរិយា មណិ,
មសារគល្លំ ផលិកំ លោហិតង្គំ បវាឡកំ.
យោ សោ អនន្តកប្បេសុ បូរេត្វា ទសបារមី,
ពុទ្ធោ ពោធេសិ សត្តានំ តស្ស បូជេមិ តំ ធនំ.
ខោមំ កោសេយ្យំ កប្បាសំ សាណំ ភង្គញ្ច កម្ពលំ,
ទុកូលានិ ច ទិព្ពានិ ទុស្សានិ វិវិធានិ តេ.
អនន្តវត្ថទានេន ហិរោត្តប្បាទិសំវរំ,
យស្ស សិទ្ធំ សិយា តស្ស ទុស្សានិ បុជយាមហំ.
បវនេ ជាតរុក្ខានំ នានាផលរសុត្តមំ,
អម្ពា កបិដ្ឋា បន្សា ចោចមោចាទិនប្បកា.
តស្មិំ គន្ធរសំ ឱជំ ពុទ្ធសេដ្ឋស្ស បូជិតំ,
វន្ទាមិ សិរសា និច្ចំ វិប្បសន្នេន ចេតសា.
បូជេមិ បឋមំ តស្ស បណិធានំ អចិន្តិយំ,
ចក្កវាឡម្ហិ សព្ពេហិ វិជ្ជមានេហិ វត្ថុហិ.
ទសន្នំ បារមីនន្តុ បូរិតដ្ឋានមុត្តមំ,
តតោ សាលវនេ រម្មេ ជាតដ្ឋានំ ចរិមកំ.
ឆព្ពសានិ បធានស្មិំ ករណំ ទុក្ករការិកំ,
អប្បរាជិតបល្លង្កំ ពុទ្ធំ ពុទ្ធគុណំ នមេ.
ចុទ្ទស ពុទ្ធញាណានិ អដ្ឋរ្ស អាវេណិកំ,
បូជេមិ ទសពលញាណំ ចតុវេសារជ្ជមុត្តមំ.
អាសយានុសយញាណំ ឥន្ទ្រិយានំ បរោបរំ,
យមកបាដិហីរញ្ច ញាណំ សព្ពញ្ញុតំ បិ ច.
មហាករុណាបត្តិញាណំ អនាវរណ្មិតិ ច,
ឆ អសាធារណានេតេ ញត្វាន បូជយាមហំ.
តតោ ច សត្តសត្តាហេ ធម្មសម្មសិតំ នមេ,
ព្រហ្មុនា យាចិតដ្ឋានំ ធម្មំ ទេសយិតុំ វរំ.
ឥសិបតនេ មិគទាយេ ធម្មចក្កបវត្តនំ,
តតោ វេឡុវនារាមេ វសិតឋានញ្ច បូជយេ.
តតោ ជេតវនំ រម្មំ ចិរវុត្ថំ មហេសិនា,
អសាធារណមញ្ញេសំ យមកបាដិហរិយំ.
បារិច្ឆត្តកមូលម្ហិ អភិធម្មញ្ច ទេសនំ,
សង្កស្សនគរទ្វារេ ទេវោរោហណកំ បិ ច.
តតោ ច ហិមវន្តស្មិំ មហាសមយទេសនំ,
វុត្តានេតានិ ឋានានិ នត្វាន បុជយាមហំ.
ចតុរាសីតិសហស្សេហិ ធម្មក្ខន្ធេហិ សង្គហំ,
បិដកត្តយំ យថាវុត្តវិធិនា បូជយាមហំ.
មារស្ស អត្តនោ អាយុសង្ខារោសជ្ជនំ នមេ,
កុសិនារាយ មល្លានំ យមកសាលមន្តរេ.
បណិធានម្ហិ បដ្ឋាយ កតំ កិច្ចំ អសេសតោ,
និដ្ឋបេត្វាន សោ សព្ពំ បរិនិព្ពាយិនាសវោ.
ឯវំ និព្ពាយមានស្ស កតកិច្ចស្ស តាទិនោ,
ចិរគតា មហាករុណា ន និព្ពាយិត្ថ កិញ្ចិបិ.
ស្វាយំ ធម្មោ វិនយោ ច ទេសិតោ សាធុកំ មយា,
មមច្ចយេន សោ សត្ថា ធាតុ ចាបិ សរីរជា.
អប្បរាជិតបល្លង្កំ ពោធិរុក្ខញ្ច ឧត្តមំ,
មមច្ចយេន សត្ថា តិ អនុជានិ មហាមុនិ.
មម ឋនេ ឋបេត្វាន ធាតុពោធិញ្ច បូជិតំ,
អនុជានាមិ តុម្ហាកំ សាធនត្ថំ សិវញ្ជសំ.
តស្មា ហិ តស្ស សទ្ធម្មំ ឧគ្គណ្ហិត្វា យថាតថំ,
យោ ទេសេតិ សម្ពុទ្ធោ តិ នត្វាន បូជយាមហំ.
តស្មា សាសបមត្តំ បិ ជិនធាតុំ អសេសិយ,
វិត្ថិន្នចក្កវាឡម្ហិ នត្វាន បូជយាមហំ.
បរម្បរាភតានំ ហិ ឥមម្ហា ពោទ្ធិរុក្ខតោ,
សព្ពេសំ ពោធិរុក្ខានំ នត្វាន បូជយាមហំ.
យំ យំ បរិភុញ្ជិ ភគវា បត្តចីវរមាទិកំ,
សព្ពំ បរិភោគធាតុំ នត្វាន បូជយាមហំ.
យត្ថ កត្ថចិ សយិតោ អាសិន្នោ ចង្កមេបិ វា,
បាទលញ្ឆន្កំ កត្វា ឋិតោ នត្វាន បូជយេ.
ន សញ្ជានន្តិ យេ ពុទ្ធំ ឯវរូបោ តិ ញាត្វេ,
កតំ តំ បដិមំ សព្ពំ នត្វាន បូជយាមហំ.
ឯវំ ពុទ្ធញ្ច ធម្មញ្ច សង្ឃញ្ច អនុត្តរំ,
ចក្កវាឡម្ហិ សព្ពេហិ វត្ថូហិ បូជយាមហំ.
បត្ថនាទីបនីគាថា
អស្មិំ ច បុព្ពេបិ ច អត្តភាវេ,
សព្ពេហិ បុញ្ញេហិ មយា កតេហិ;
បូជាវិធានេហិ ច សញ្ញមេហិ,
ភវេ ភវេ បេមនិយោ ភវេយ្យំ.
សទ្ធា ហិរោត្តប្បពហុស្សុតត្តំ,
បរក្កមោ ចេវ សតិស្សមាធិ;
និព្ពេធភាគី វជិរូបមាតិ,
បញ្ញា ច មេ សិជ្ឈតុ យាវ ពោធិំ.
រាគញ្ច ទោសញ្ច បហាយ មោហំ,
ទិដ្ឋិញ្ច មានំ វិចិកិច្ឆិតញ្ច;
មច្ឆេរេឥស្សាមលវិប្បហីនោ,
អនុទ្ធតោ អច្ចបលោ ភវេយ្យំ.
ភវេយ្យហំ កេនចិ នប្បសេយ្ហោ,
ភោគោ ច ទិន្នេហិ បដេហិ;
ភោគោ ច កាយោ ច មមេស លទ្ធោ,
បរូបការាយ ភវេយ្យំ នូន.
ធម្មេនា មាលាបិតរោ ភរេយ្យំ,
វុឌ្ឍបចាយី ច ពហូបការី;
ញាតីសុ មិត្តេសុ សបត្តកេសុ,
វុឌ្ឍិំ ករេយ្យំ ហិតមត្តនោ ច.
មេត្តេយ្យនាថំ ឧបសង្កមិត្វា,
តស្សត្តភាវំ អភិបូជយិត្វា;
លទ្ធាន វេយ្យាករណំ អនូនំ,
ពុទ្ធោ អយំ ហេស្សតិនាគតេសុ.
លោកេន កេនាបិ អនុបលិត្តោ,
ទានេ រតោ សីលគុណេ សុសាណ្ឋិតោ;
នេក្ខម្មភាគិ វរញាណលាភី,
ភវេយ្យហំ ថាមពលុបបន្នោ.
សីសំ សមំសមំ មម ហត្ថបាទេ,
សំឆិនទមានេបិ ករេយ្យខន្តិំ;
សច្ចេ ឋិតោ កាលុមធិដ្ឋិតេ វ,
មេត្តាយុបេក្ខាយ យុតោ ភវេយ្យំ.
មហាបរិច្ចាគំ កត្វា បញ្ច,
សម្ពោធិមគ្គំ អវិរាធយន្តោ;
ឆេត្វា កិលេសេ ចិតបញ្ចមារោ,
ពុទ្ធោ ភវិស្សាមិ អនាគតេសុ.