📜
នមោ តស្ស ភគវតោ អរហតោ សម្មាសម្ពុទ្ធស្ស
កមលាញ្ជលិ
កមលាសន កមលាបតិ បមថាធិប វជិរា,
យុធទានវ មនុជោរគ ភុជគាសន បតិនំ;
មកុដាហិត មនិទីធិតិ ភមរាវលិ ភជិតំ,
បណមា’មហំ អនឃំ មុនិ ចរណាមល កមលំ.
កមលាលយ សទិ’សង្កិត កលមង្គល រុចិរំ,
ជុតិរញ្ជិតំ អភិនិជ្ជិត សុភកញ្ចន នលិនំ;
ជនិតា ចិរ សមយេ និជ បិតុ ភូបតិ នមិតំ,
បណមា’មហំ អនឃំ មុនិ ចរណាមល កមលំ.
សរណាគត រជនីបតិ ទិនសេខរ នមិតំ,
ភជិតាខិល ជនបាវនំ អភិកង្ខិត សុខទំ;
វសុធាតល សយមុគ្គត សរសីរុហ មហិតំ,
បណមា’មហំ អនឃំ មុនិ ចរណាមល កមលំ.
ទិរទាសន តរុបន្តិក ឃដិតាសនំ អភយំ,
វិជយាសន សមធិដ្ឋិត ចតុរង្គិក វិរិយំ;
ធរមានក សុរិយេហនិ វិជិតន្តក ធជិនិំ,
បណមា’មហំ អភិបាតិត នមុចិទ្ធជ វិភវំ.
សទយោទិត បិយភារតិ វិជិតន្តក សមរំ,
ទសបារមិ ពលកម្បិត សធរាធរ ធរនិំ;
គិរិមេខល វរវារន សិរសានត ចរណំ,
បណមា’មហំ អភិនន្ទិត សនរាមរ ភុវនំ.
និខិលាសវ វិគមេ’នតិវិមលីកត ហទយំ,
តទនន្តរ វិទិតាខិល មតិគោចរ វិសយំ;
វិសយីកត ភុវនត្តយំ អតិលោកិយ ចរិតំ,
បណមា’មហំ អបរាជិតំ អរហំ មុនិំ អសមំ.
មុទុភារតិ មធុបាសិត នលិនោបម វទនំ,
រុចិរាយត នលិនីទល និភ លោចន យុគលំ;
ឧទយោទិត រវិមណ្ឌល ជលិតាមល និដិលំ,
បណមា’មហ អកុតោភយំ អនឃំ មុនិ បមុខំ.
អសិតម្ពុទ រុចិកុញ្ចិត មុទុ កុន្តល លលិតំ,
ភុវនោទរ វិតតាមិត ជុតិសញ្ចយ ជលិតំ;
មទមោទិត ទិរទោបម គតិវិព្ភម រុចិរំ,
បណមា’មហំ អមតន្ទទ មុនិបុង្គវំ អសមំ.
ករុណារស បរិភាវិត សវណាមត វចនំ,
វិរុទាវលិ សតឃោសិត យសបូរិត ភុវនំ;
សុមនោហរ វរលក្ខណ សិរិសញ្ចយ សទនំ,
បណមា’មហំ ឧទិតាមល សសិមណ្ឌល វទនំ.
វិនយារហ ជនមានស កុមុទាករ សសិនំ,
តសិនាបគ បរិសោសន សតទីធិតិ តុលិតំ;
តមនាសវ មុនិសេវិតំ អបលោកិត សុខទំ,
បណមា’មហំ អនិកេតនំ អខិលាគតិ វិគតំ.
សហិតាខិល ភយភេរវំ អភយាគត សរនំ,
អជរាមរ សុខទាយកំ អនិរាកត ករុណំ;
តមុបាសក ជនសេវិត សុបតិដ្ឋិត ចរណំ,
បណមា’មហំ អហិតាបហំ អនឃុត្តម ចរណំ.
ករុណាមត រសបុរិត វីមលាខិល ហទយំ,
វិហិតាមិត ជនតាហិតំ អនុកម្បិត ភុវនំ;
ភុវនេ សុតំ អវនីបតិ សត សេវិត ចរណំ,
បណមា’មហំ អនឃំ មុនិំ អឃនាសន ចតុរំ.
អរតីរតិ បរិបីលិត យតិមានស ទមនំ,
និជសាសន វិនិវារិត បុថុតិត្ថិយ សមណំ;
បរវាទិក ជនតាកត បរិភាសិត ខមនំ,
បណមា’មហំ អតិទេវត វរ គោតម សមណំ.
សរណាគត ភយនាសន វជិរាលយ បណិភំ,
ភវសាគរ បតិតាមិត ជនតារន និរតំ;
សិរសាវហំ អមលញ្ជលិ បុដបង្កជ មកុលំ,
បណមា’មហំ អខិលលាយ វិគតំ មុនិំ អតុលំ.
វិមលីកត ជនមានស វិគតាសវ ភគវំ,
ភវបារគ វិភវាមត សុខទាយក សតតំ;
បរមាទរ គរុគារវ វិនតំ ជិន បយតំ,
បទបង្កជ រជសា មម សមលង្កុរុ សិរសំ.
បវនាហត ទុមបល្លវំ ឥវ នារត ចបលំ,
ភវលាលស មលិនីកតំ អជិតិន្ទ្រិយ និវហំ;
ចិរ សញ្ចិត ទុរិតាហតំ អនិវារិត តិមិសំ,
វិមលីកុរុ ករុណាភរ សុតរំ មម ហទយំ.
អទយេ ទយំ អនយេ នយំ អបិ យោ គុណំ អគុណេ,
អហិតេ ហិតំ អករោ ក្វចិទ អបិ កេនចិ នកតំ;
សទយេ ជិន សុនយេ គុណសទនេ តយិ និតរំ,
សុហិតេ ហិតចរិតេ’នឃ រមតេ មម ហទយំ.
ភវសង្កដ បតិតេនបិ ភវតា ចិរ ចរិតំ,
វិសមេ សម ចរណំ ខលុ ទសបារមិ ភរណំ;
សរតោ’ហនិ សរតោ និសិ សុបិនេនបិ សតតំ,
រមតេ ជិន សុមតេ ត្វយិ សទយំ មម ហទយំ.
អតិទុទ្ទទំ អទទី ភវំ អតិទុក្ករំ អករី;
អតិទុក្ខមំ អខមី វត ករុណានិធិ’រសមោ,
ឥតិ តេ គុណំ អនឃំ មុនិ សរតោ មម ហទយំ,
រមតេ’ហនិ រមតេ និសិ រមតេ ត្វយិ សតតំ.
អតិទុច្ចរំ អចរី ភវំ អតិទុទ្ទមំ អទមី,
អតិទុទ្ទយំ អទយី វត សទយាបរ ហទយោ;
ឥតិ តេ គុណំ អនឃំ មុនិ សរតោ មម ហទយំ,
រមតេ’ហនិ រមតេ និសិ រមតេ ត្វយិ សតតំ.
អតិទុគ្គមំ អគមី ភវំ អតិទុជ្ជយំ អជយី,
អតិទុស្សហំ អសហី វត សមុបេក្ខិត មនសោ;
ឥតិ តេ គុណំ អនឃំ មុនិ សរតោ មម ហទយំ,
រមតេ’ហនិ រមតេ និសិ រមតេ ត្វយិ សតតំ.
អតិទារុន បលយានល សទិសានល ជលិតេ,
និរយេ វិនិបតិតោ ចិរំ អឃតាបិត មនសោ;
ន សរិំ សកិទ អបិ តេ បិត ភជិតុំ បទនលិនំ,
ខម គោតម នរសារថិ តមិទំ មម ខលិតំ.
តិរិយគ្គត-គតិយំ ចិរំ អនវដ្ឋិត ចរិតោ,
អតិនិដ្ឋុរ វធតជ្ជិត ភយកម្បិត ហទយោ;
ន សរិំ សកិទបិ តេ បិត ភជិតុំ បទនលិនំ,
ខម គោតម បុរិសុត្តម តមិទំ មម ខលិតំ.
បរិទេវន និរតោ ចិរំ អថ បេត្តិយ វិសយេ,
សុជិឃច្ឆិត សុបិបាសិត បរិសោសិត ជឋរេ;
ន សរិំ សកិទបិ តេ បិត ភជិតុំ បទនលិនំ,
ខម គោតម ទិបទុត្តម តមិទំ មម ខលិតំ.
វិវសោ ភុសំ អឃទូសិត មនសាសុរ វិសយេ,
ជនិតោ ឃនតិមិរេ ចិរំ អតិទុក្ខិត ហទយោ;
ន សរិំ សកិទបិ តេ បិត ភជិតុំ បទនលិនំ,
ខម គោតម វសិសត្តម តមិទំ មម ខលិតំ.
មនសា ចិរ វិហិតំ សរំ អតិកិព្ពិស ចរិតំ,
សមថេនថ សុវិរាជិយ តំ អសញ្ញិតំ ឧបគោ;
ន សរិំ សកិទ អបិ តេ បិត ភជិតុំ បទ នលិនំ,
ខម គោតម វសិបុង្គវ តមិទំ មម ខលិតំ.
វិជិគុច្ឆិយ ទុរិតំ និជ វបុសា កតំ អមិតំ,
តនុ វជ្ជិតំ ឧបគោ ភវំ ឥហ ភាវិត សមថោ;
ន សរិំ សកិទបិ តេ បិត ភជិតុំ បទនលិនំ,
ខម គោតម យតិកុញ្ជរ តមិទំ មម ខលិតំ.
រតនត្តយ រហិតេ ភុស ពហុលីកត ទុរិតេ,
ជនិតោ បរវិសយេ ពុធជន និន្ទិយ ចរិតេ;
ន សរិំ សកិទបិ តេ បិត ភជិតុំ បទនលិនំ,
ខម គោតម ករុណានិធិ តមិទំ មម ខលិតំ.
ជនិតោ យទិ មនុជេសុបិ វិកលិន្ទ្រិយ និវហោ,
តនុនា ករចរណាទិហិ វិកតេ’និហ ទុខិតោ;
ន សរិំ សកិទបិ តេ បិត ភជិតុំ បទនលិនំ,
ខម គោតម មតិសាគរ តមិទំ មម ខលិតំ.
វិធិនាហិត មតិភាវន រហិតោ តមបិហិតោ,
វិសទេសុបិ កុសលាទិសុ តថទស្សន វិមុខោ;
ន សរិំ សកិទបិ តេ បិត ភជិតុំ បទនលិនំ,
ខម គោតម នរកេសរិ តមិទំ មម ខលិតំ.
សុចិរេនបិ ភុវិ ទុល្លភំ អសមំ ខណំ អលភំ,
សនរាមរ ជនតាហិត សុខទំ មុនិ ជននំ;
ន សរិំ សកិទបិ តេ បិត ភជិតុំ បទនលិនំ,
ខម គោតម វទតំវរ តមិទំ មម ខលិតំ.
និសិតាយុធ វធសជ្ជិត ខឡនិទ្ទយ ហទយោ,
បរហិំសន រុចិ ភិំសន យមសោទរ សទិសោ;
ន សរិំ សកិទបិ តេ បិត ភជិតុំ បទនលិនំ,
ខម គោតម មុនិសត្តម តមិទំ មម ខលិតំ.
បរសន្តក ហរណេ កតមតិ ពញ្ចន ពហុលោ,
ឃរសន្ធិក បរិបន្ថិក សហសាកតិ និរតោ;
ន សរិំ សកិទបិ តេ បិត ភជិតុំ បទនលិនំ,
ខម គោតម មុនិបុង្គវ តមិទំ មម ខលិតំ.
នវយោព្ពន មទគព្ពិត បរិមុច្ឆិត ហទយោ,
សុចិសជ្ជន វិជិគុច្ឆិយ បរទារិក និរតោ;
ន សរិំ សកិទបិ តេ បិត ភជិតុំ បទនលិនំ,
ខម គោតម ករុណាភរ តមិទំ មម ខលិតំ.
មទិរាសវរត នាគរជន សន្តត ភជិតោ,
គរុគារវ ហិរិទូរិត តិរិយគ្គត ចរិតោ;
ន សរិំ សកិទបិ តេ បិត ភជិតុំ បទនលិនំ,
ខម គោតម វិហតាសវ តមិទំ មម ខលិតំ.
សបិតាមហ បបិតាមហ និចិតំ ធនំ អមិតំ,
បិតុសញ្ចិតមបិ នាសិយ កិតវោ ហតវិភវោ;
ន សរិំ សកិទបិ តេ បិត ភជិតុំ បទនលិនំ,
ខម គោតម វិជិតន្តក តមិទំ មម ខលិតំ.
វិតថាលិក វចនោ បរបិយសុញ្ញត ករណោ,
ផរុសំ ភណំ អតិនិប្ផល ពហុភាសន និបុណោ;
ន សរិំ សកិទបិ តេ បិត ភជិតុំ បទនលិនំ,
ខម គោតម ភុវនេសុត តមិទំ មម ខលិតំ.
បរសម្បទំ អភិឈាយន និរន្តរ ទុខិតោ,
នភិរជ្ឈន បរមោ ក្វចិ ផលទស្សន រហិតោ;
ន សរិំ សកិទបិ តេ បិត ភជិតុំ បទនលិនំ,
ខម គោតម គុណសាគរ តមិទំ មម ខលិតំ.
ភវតោ ភវំ អបរាបរំ អយតាចិរំ ឥតិ មេ,
វបុសា អថ វចសាបិ ច មនសា កតំ អមិតំ;
ខម គោតម ទុរិតាបហ ទុរិតំ ពហុវិហិតំ,
ទទ មេ សិវបទំ អច្ចុតំ អមតំ ភវវិគតំ.
តិមិរាវុត កុណបាកុល វិជិគុច្ឆិយ បវនេ,
ជនិកាសុចិ ជឋរេ ពហុ កិមិសន្តតិ សទនេ;
អសយិំ ភវគហណេ ចរំ អហំ អប្បដិសរណេ,
សរនំ ភវ ភគវំ មម ភវនីរធិ តរណេ.
ពហិ និក្ខមំ អសកិំ ភគតិរិយំ បថ បតិតោ,
អគទង្ករ កត សល្លក សតខណ្ឌិត ករណោ;
អមរិំ ភវគហណេ ចរំ អហំ អប្បដិសរណេ,
សរណំ ភវ ភគវំ មម ភវនីរធិ តរនេ.
បតិតោ ពហិ រតិបិល្លក តនុរាមយ មថិតោ,
វទិតុំ កិមុ វិទិតុម្បិ ច ន សហំ មតិរហិតោ;
អមរិំ ភវគហណេ ចរំ អហំ អប្បដិសរណេ,
សរណំ ភវ ភគវំ មម ភវនីរធិ តរណេ.
ជនិតោ យទិ សុខិតោ ជនទយិតោ បិយជនកោ,
បុថុកោ ពហុវិធ-កីលននិរតោ គទគហិតោ;
អមរិំ ភវគហណេ ចរំ អហំ អប្បដិសរណេ,
សរណំ ភវ ភគវំ មម ភវនីរធិ តរណេ.
តរុនោបិ ហិ ឃរពន្ធន គថិតោមិត វិភវោ,
សហសា គទគហិតោ បិយភរិយាសុត វិយុតោ;
អមរិំ ភវគហណេ ចរំ អហំ អប្បដិសរណេ,
សរណំ ភវ ភគវំ មម ភវនីរធិ តរណេ.
អជរំ តនុំ អភិមញ្ញិយ នវយោព្ពន វសិកោ,
ជរសា បរិមថិតោ បរំ អននុដ្ឋិត កុសលោ;
អមរិំ ភវគហណេ ចរំ អហំ អប្បដិសរណេ,
សរណំ ភវ ភគវំ មម ភវនីរធិ តរណេ.
និរុជោ ធុវំ អរុជំ តនុំ អភិមញ្ញិយ សមទោ,
កុសលាសយ វិមុខោ ភុសំ អវសោ គទនិហតោ;
អមរិំ ភវគហណេ ចរំ អហំ អប្បដិសរណេ,
សរណំ ភវ ភគវំ មម ភវនីរធិ តរណេ.
បវិចិន្តិយ សកជីវិតំ អមរំ ធុវំ អនិឃំ,
ឥតិ ជីវិតមទគព្ពិត មតិរុជ្ឈិត កុសលោ;
អមរិំ ភវគហណេ ចរំ អហំ អប្បដិសរណេ,
សរណំ ភវ ភគវំ មម ភវនីរធិ តរណេ.
បរហិំសន ធនមោសន បរទារិក និរតោ,
ធរនីបតិ គហិតោ ពហុ វធពន្ធន និហតោ;
អមរិំ ភវគហណេ ចរំ អហំ អប្បដិសរណេ,
សរណំ ភវ ភគវំ មម ភវនីរធិ តរណេ.
នរកោទក បតិតោ គិរិតរុមត្ថក គលិតោ,
មិគវាឡក គហិតោ វិសធរ ជាតិហិ ឌសិតោ;
អមរិំ ភវគហណេ ចរំ អហំ អប្បដិសរណេ,
សរណំ ភវ ភគវំ មម ភវនីរធិ តរណេ.
អភិចារក វិធិកោបិត និសិចារក គហិតោ,
សវិសោទន សហសាទន បភុតីហិ ច ខលិតោ;
អមរិំ ភវគហណេ ចរំ អហំ អប្បដិសរណេ,
សរណំ ភវ ភគវំ មម ភវនីរធិ តរណេ.
សយមេវច សជនោបរិ កុបិតោ មតិវិយុតោ,
សវិសាទន គលកន្តន បភុតាមិត ខលិតោ;
អមរិំ ភវគហណេ ចរំ អហំ អប្បដិសរណេ,
សរណំ ភវ ភគវំ មម ភវនីរធិ តរណេ.
បិតុបូជន និរតាសយ សុខិតោ បិតុទយិតោ,
មរណេនច បិតុនោ ភុសំ អនុសោចន និរតោ;
បរុទិំ ចិរំ អតិទុស្សហ កសិរេ ភវគហណេ,
សរណំ ភវ ភគវំ មម ភវនីរធិ តរណេ.
សមុបដ្ឋិយ ជនិកំ និជំ អភិវាទន បរមោ,
មរណេនច ជនិកាយនុសរិតា គុណមហិមំ;
បរុទិំ ចិរំ អតិទុស្សហ កសិរេ ភវគហណេ,
សរណំ ភវ ភគវំ មម ភវនីរធិ តរណេ.
គុរុទេវត បតិមានន បរមោ បិយសុវចោ,
សមុបាសិតចរណោ គុរុមរណេនតិទុខិតោ;
បរុទិំ ចិរំ អតិទុស្សហ កសិរេ ភវគហណេ,
សរណំ ភវ ភគវំ មម ភវនីរធិ តរណេ.
ឃរមេធិតំ ឧបគោមិតវិភវោ រតិពហុលោ,
មរណេ បិយភរិយាសុតទុហិតូ’នតិករុណំ;
បរុទិំ ចិរំ អតិទុស្សហ កសិរេ ភវគហណេ,
សរណំ ភវ ភគវំ មម ភវនីរធិ តរណេ.
បិយបុព្ពជ សហជានុជ ភគិណិទ្វយ មរណេ,
និជ ពន្ធវ-សខ-សិស្សក មរណេ ប្យតិករុណំ;
បរុទិំ ចិរំ អតិទុស្សហ កសិរេ ភវគហណេ,
សរណំ ភវ ភគវំ មម ភវនីរធិ តរណេ.
ជគតីបតិ គហណា រិបុជនតក្ករ ហរណា,
សរិតោទក វហណា បុថុជលិតានល ទហណា;
បរុទិំ ហតវិភវោ ចិរមិហ ទុគ្គតិគហណេ,
សរណំ ភវ ភគវំ មម ភវនីរធិ តរណេ.
អតិទុគ្គម វិសមាកុល ភវសង្កដ បតិតេ,
ព្យសនំ ចិរមិតិ ទុស្សហំ អនុភូយបិ វិមិតំ;
ន ជហេ សុខលវវញ្ចិតហទយោ ភវតសិនំ,
តមបាកុរុ ករុណានិធិ តសិនំ មម កសិណំ.
ជននាវធិ មរណំ វិយ មរណាវធិ ជននំ,
ឧភយេនបិ ភយមេវហិ ភវតោ មម និយតំ;
សិវមេវច ជននាវធិ មរណាវធិ រហិតំ,
ទទ មេ សិវំ អមតន្ទទ តំ អនាសវ ភគវំ.
ចិរទិក្ខិតមបិ មេ មនំ អនិវារិត តសិនំ,
ភវតោ ភវ រតិបីលិតំ អហហោ កលិឃដិតំ!
តមតោ បិត ភយតោ មមមវ មេ ភវ សរណំ,
ភគវំ បដិសរណំ មម ភវនីរធិ តរណំ.