📜
នមោ តស្ស ភគវតោ អរហតោ សម្មាសម្ពុទ្ធស្ស
បជ្ជមធុ
អានន្ទ រញ្ញ រតនាទិ មហា យតិន្ទ,
និច្ចប្បពុទ្ធ បទុមប្បិយ សេវិនង្គី;
ពុទ្ធប្បិយេន ឃន ពុទ្ធ គុណប្បិយេន,
ថេរាលិនា រចិត បជ្ជមធុំ បិពន្តុ.
ឧណ្ណាបបុណ្ណសសិមណ្ទលតោ គលិត្វា,
បាទម្ពុជង្គុលិ ទលដ្ឋ សុធា លវានំ;
បន្តីវ សត្ថុ នខបន្តិ បជាវិសេសំ,
បីណេតុ សុទ្ធ សុខិតម្មណ តុណ្ឌបីតា.
ខិត្តាយ មាររិបុនា បរិវត្យ សត្ថុ,
បាទស្សយា ជិត ទិសាយ សិតត្តលាយ;
យា ជេតិ កញ្ចន សរាវលិយា សិរិំ សា,
ទេតន្គិនំ រណជយង្គុលិបន្តិកន្តា.
សោវណ្ណ វណ្ណ សុខុមច្ឆវិ សោម្ម កុម្ម,
បិដ្ឋីវ បិដ្ឋិ កមតុន្នតិ ភាតិ យេសំ;
តេសុប្បតិដ្ឋិតសុកោមលទីឃបណ្ហិ,
បាទា ជិនស្ស បទទន្តុ បទំ ជនស្ស.
អច្ឆេរ បង្កជសិរំ សិរិយា សកាយ,
យេ មទ្ទិនោ វិយ ចរន្តិ សរោជ សីសេ;
សញ្ចុម្ពិតា វិយ ច តានិ បរាគ រាគា,
តេ នីរជា មុនិបទា បទទន្តុ លក្ខិំ.
អគាមិ កាល ជន មង្គល ភត្តុ ភាវំ,
វ្យាកត្តុមត្រ កុសលេនិវ និម្មិតានិ;
យាត្រាសុមដ្ឋសតមង្គលក្ខណានិ,
សាធេតុ នំ បទយុគំ ជយមង្គលានិ.
សស្សេវិជន្តុវរសន្តិបុរប្បវេសេ,
និច្ចំ សុសជ្ជ ឋបិតានិវ មង្គលាយ;
យេ តេ ទធន្តិ កលមង្គលលក្ខណានិ,
វត្តន្តុ តេ ជិនបទា ជយមង្គលាយ.
សព្ពេភិភូយ សបទេសុ និបាតនស្ស,
សញ្ញាណកំ វិយ យទស្សិតសព្ពលោកោ;
បាទាត្យធោកតតិលោកសិរោវរា បិ,
លោកំ បុណន្តុ ជយមង្គលការណានិ.
លោកត្តយេកសរណត្តវិភាវនាយ,
សជ្ជោ វ តិដ្ឋតិ យហិំ សុវិភត្តលោកោ;
តំ សព្ពលោកបដិពិម្ពិតទប្បណាភំ,
បាទទ្វយំ ជនសុសជ្ជនហេតុ ហោតុ.
លោកុត្តរាយ សិរិយាធិគមាយ សុដ្ឋុ,
រជន្តិ យត្ថ ទិគុណានិវ បាតុ ភូតា;
ចក្កាសនាភិសហនេមិសហស្សរានិ,
ត្យង្ឃី ទិសន្តុ សកលិស្សរិយំ ជនស្ស.
យត្រុល្លសន្តិ ទុវិធានិវ បាតូ ភូតា,
ធម្មស្សសព្ពភុវនស្ស ច ឥស្សរត្តេ;
ចក្កានិ ចក្កសទិសានិ សុទស្សនស្ស,
តានជ្ជ ជន្តុ សរណា ចរណានិ ហោន្តុ.
សត្តេសុ វច្ឆតុ សិរី សិរិវច្ឆកេន,
សោវត្ថិ សោត្ថិមនុតិដ្ឋតុ បុគ្គលេសុ;
នន្ទិំ ជនានមនុវត្តតុ នន្ទិវត្តី,
សីសានលំកុរុតុ បាទវតំសកោ បិ.
ភទ្ទាយ បីឋមុបគច្ឆតុ ភទ្ទបីឋំ,
វុទ្ធិំ ជនានមនុវត្តតុ វទ្ធមានំ;
បុណ្ណត្តមង្គិមនុកុព្ពតុ បុណ្ណកុម្ភោ,
បាតិ ច បាតុ សតតំ ជនតំ អបាយា.
សេតាតបត្តមបនេតមឃាតបេ តំ,
ខគ្គោ វិឆិន្ទតុ សទា ទុរិតារិវគ្គេ;
សំក្លេសទាហមបនេតុ សតាលវណ្ដ,
សំវីជនី កុមតិមក្ខិកមោរហត្ថោ.
អាកឌ្ឍនោ ជនវិលោចនមត្តនិន្នំ,
វារេតុ សព្ពគតិវារនមង្កុសោ សោ;
បាទម្ពុជស្សិរិវិលាសនិកេតនំ វ,
បាសាទលខណមុបេតុ មនោបសាទំ.
បាណីនមត្តភជតំ វរបុណ្ណបត្តំ,
សម្មា ទទាតុ បទនិស្សិតបុណ្ណបត្តោ;
បាទេសុ ជន្តុ មនពន្ធនទាមភូតំ,
ទាមំ ទមេតុ វិមលំ ជនតម្មនានិ.
ឧណ្ហីសកុប្បលមណីបទុមេហិ បាទា,
សស្សេវិជន្តុករណានិ វិភូសយន្តុ;
សន្នេត្តនាវុបគតានមនគ្ឃកានិ,
ពោជ្ឈង្គសត្តរតនានិ ទទេ សមុទ្ទោ.
ឧត្តុង្គ និច្ចលគុងា ជិតតាយ និច្ចំ,
សេវីវ បាទសិរិ និច្ច សមុព្ពហំ វ;
អត្រាបិ សក្កភវនុព្ពហណេ និយុត្តោ,
បាទដ្ឋមេរុ ភវតំ ភវតំ វិភូត្យា.
សោ ចក្កវាឡសិខរី ប្យវតំ សមន្តា,
សព្ពូបសគ្គវិសរាជនតំ សមគ្គំ;
ទីបា បុថូបិ ចតុរោ ទ្វិសហស្ស ខុទ្ទា,
ធារេន្ត្វបាយបតមានមទត្វ ជន្តុំ.
សូរោ បពោធយតុ ជន្តុ សរោរុហានិ,
ចន្ទោ បសាទ កុមុទានិ មនោទហេសុ;
នក្ខត្តជាតមខិលំ សុភតាយ ហោតុ,
ចក្កំ ធជំ រិបុជយាយ ជយទ្ធជាយ.
ជេតុំ សសំសទ-សុទស្សន-ចក្កវត្តិ,
ចក្កានុគន្តលលិតំ យហិមាវហេយ្យ;
ចក្កាណុវត្តិ បរិសាវត-ចក្កវត្តិ,
នំវត្តតំ បទយុគំ ជនតា ហិតាយ.
បុជេតុមាគត វតា វជិរាសនដ្ឋ,
មិន្ទេន ឆឌ្ឌិត មហាវិជយុត្តរាខ្យំ;
សំខំ បវិដ្ឋមិវ មារភយា បទាធោ,
បាទដ្ឋសំខមិហ វត្តតុ សន្តិយា វោ.
សោវណ្ណមច្ឆយុគលំ សិវភត្ត ភោគេ,
ឥច្ឆា ពហូបករណំ ភវតំ ជនានំ;
កុម្ភីលធិគ្គហិតតោ វ បទុត្ថចិត្តា,
បាទម្ពុជាករ វិគាហិ តុ នោបហោន្តុ.
សត្តាបគា ជនមនោជ មលេ ជហន្តុ,
សំក្លេសទាហមបនេន្តុ ទហា ច សត្ត;
សេលា ច សត្ត វិទធន្តុ ជនស្ស តានំ,
លោកប្បសិទ្ធិជននេ ភវតំ បតាកា.
បាដង្កិ សន្តិ គមនេ ភវតូបការា,
ទាហេត្តនេសុ ជហតំ បទចាមរំ តំ;
សល្លោកលោចនមហុស្សវ-ឧស្សិតំ វ,
វត្តេយ្យ តោរណមនុត្តរមង្គលាយ.
យស្មិំ មិគិន្ទ គត ភីតិ ពលាវ ទឌ្ឍ,
ទានា នតា សិរវិទារណ បីឡិតាវ;
នាលាគិរី ករិវរោ គិរិមេខលោ ច,
តំ សីហវិក្កមបទំ ហនតា ឃទន្តិំ.
បាបាហិនោ ហនតុ បាទសុវណ្ណរាជា,
វ្យគ្ឃាធិបោ កលិជនេ អទតំ អសេសំ;
វាលាហ-អស្សបតិ សម្បតិតុំ អទត្វា,
បាយេសុ បាបយតុ សន្តិបុរម្បជាយោ.
ឆទ្ទន្ត ទន្តិ លលិតំ គលិតំ រុសម្ហា,
លុទ្ទេត្ត ទុព្ភិនិ ទិសេ អចលំ ទធានោ;
បាទដ្ឋហត្ថិបតិ សម្បតិ ជន្តុតាសេ,
តាសេតុ ហាសមបរន្ទិសតំ សតានំ.
សព្ពង្គិនោ ចរណុបោសថ ហត្ថិរាជា,
បាបេតុ សព្ពចតុទីបិករជ្ជលក្ខិំ;
កិត្តីវ បាទបរិចារិកតា និយុត្តា,
កេលសសេលបដិមា ហិតមាចរេយ្យ.
សាមិស្ស ហំសសមយេ ទហបាសពទ្ធ,
មាសីន វេសគមកោ វិយ បាទហំសោ;
និគ្ឃោស គន្តិជិតតោ វិយ មូគបក្ខោ,
យារេតុ សព្ព ជនតា ភវគន្តុកត្តំ.
ឱហាយ ទិព្ពសរសិំ ខិលលោក សព្ព,
រម្មង្ឃិវាបិមវគាហិតវាវ បាទេ;
ឯរាវណោ ករិវរោ មនសាភិរុឡ្ហេ,
ជន្តុំ បុរិន្ទទបុរំ នយតំ វ សីឃំ.
ហិត្វា សកម្ភវនមង្ឃិនិសេវនត្ថ,
មាគម្ម រម្ម តរតាយិហ និស្សិតោ វ;
បាលេត្វ មូនិ បទវាបិតរង្គភង្គិ,
មន្គី ករោន្តតនុវាសុកិ នាគរាជា.
នាថស្ស កញ្ចនសិខាវលជាតិលីល,
មាវិករំ វ បទនិស្សិតមោររាជា;
តំ ធម្មទេសនរវេនិវ លុទ្ទកស្ស,
លោកស្ស បាបផណិនោ ហនតំ អសេសំ.
សំសារសាគរគតេ សធនេ ជនេ តេ,
នេតម្បទេ កលចតុម្មុខហេមនាវា;
និព្ពាណបដ្ដនវរំ ភរុកច្ឆកន្តំ,
សុប្បារបណ្ឌិត គតា វិយ អាសុនាវា.
សម្ពោធិ ញាណ បរិបាចយតោ មុនិស្ស,
ភត្តោ យថា ហិមវតទ្ទិ សមាធិហេតុ;
ឯវម្មនេន ភជតំ ហិមវទ្ទិបាទេ,
សម្ពោធិញាណ បរិបាចនហេតុ ហោតុ.
ទឡ្ហំ បរាជិតតយា មុនិនា សរេន,
សុញ្ញស្សរោបគត បញ្ជរ ពន្ធនោវ;
សោ បាទបញ្ជរគតោ ករវីកបក្ខី,
សព្ពេសមប្បីយាវចញ្ជហតា ភវន្តំ.
តេ ចក្កវាក មករា អបិ កោញ្ច ជីវំ,
ជីវាទិ បក្ខិវិសរា សរសីវ ភុត្តំ;
វេស្សន្តរេន ចរណម្ពុជិ និព្ភជន្តា,
ជន្តុ តហិំ វិយ បទេ សុរមេន្តុ និច្ចំ.
តំ ចន្ទកិន្នរគតិំវ គតស្ស ពោធិ,
សត្តស្ស តស្ស សបជាបតិកស្ស ភាវំ;
សំសូចយន្ត បទ កិន្នរ កិន្នរី វេ,
សាមគ្គិមគ្គ បដិ បត្តិសុ បាបយន្តុ.
សំរាជធានិមុសភោ វហតគ្គ ភារំ,
បីតិប្បយោ បជនយេយ្យ សវច្ឆធេនុ;
សស្សេវិនោ អភិរមេន្តុ ឆកាមសគ្គា,
ធារេន្តុ ឈាយិមិហ សោឡស ធាតុធាមា.
សុត្វា ជិនស្ស ករវីក សរម្មនុញ្ញំ,
អញ្ញោញ្ញ ភីតិរហិតា អបិ បច្ចនីកា;
ហិត្វា គតិំ វិយ ឋិតា បទសត្តរូបា,
សព្ពំ ភវស្សិត ជនានគតិំ ហនន្តុ.
សោវណ្ណ កាហឡ យុគោ បមមិន្ទិរាយ,
សន្នីរបុប្ផ មុកុលោបមមុស្សវាយ;
និច្ចំ សុសជ្ជ ឋបិតំ មុនិ តិដ្ឋតន្តេ,
ជង្ឃាទ្វយំ ជនវិលោចន មង្គលាយ.
លខ្យា វិលាស មុកុរទ្វយ សន្និកាសំ,
តាឌង្ក មណ្ឌន វិឌម្ពកមំសុ សណ្ឌំ;
ជានុទ្វយំ លឡិត សាគរ ពុព្ពលាភំ,
ហោតំ ជគត្តយ និជត្ត វិភូសិតុន្តេ.
ឆទ្ទន្តិ ទិន្ន វរទន្ត យុគោបមានា,
តំ ហត្ថិ សោណ្ឌ កម បុណ្ណ គុណា តវោរូ;
លីល បយោធិ សិរិ កេឡិ សុវណ្ណរម្ភា,
ខន្ធាវ ទេន្តុ បរិបុណ្ណ គុនេ ជនានាំ.
ជង្ឃក្ខ កទ្វ្យ សមប្បិត ចិត្តបាទ,
ចក្កទ្វយី មនមនោជហយោ មុនេ តេ;
សោនី រថោ សិរិវហោ មនសា ភិរុឡ្ហំ,
លោកត្តយំ សិវបុរំ លហុ បាបយាតុ.
រម្មោរ បាកដ តដាក តដា សវន្ត,
រោមាវលី ជល បនាលិក កោដិកដ្ឋា;
នាភី គភីរ សរសី សិរិ កេឡិតា តេ,
សស្សេវិនំ វ្យសន ឃម្មមលំ សមេតុ.
កន្តិច្ឆដា លុឡិត រូប បយោធិ នាភិ,
អាវដ្ដ វដ្ដិត និមុជ្ជិត សព្ពលោកោ;
សោភគ្គ តោយ និវហំ វិសសោ បិវិត្វា,
លោកុត្តរាទិ សុខ មុច្ឆិតតំ បយាតុ.
គម្ភីរ ចិត្តរហទំ បរិបូរយិត្វា,
តំ សន្ទមាន ករុណម្ពុ បវាហ តុល្យា;
រោមាលិវល្លិហរិ នាភិ សុភាលវាលា,
ទេតំ លហុំ សិវផលំ ភជតំ មុនេ តេ.
ចារូរ សារិផលកោ កុដិលគ្គ លោម,
បន្តី វិភត្តិ សហិតោ សិរិ កេឡិ សជ្ជោ;
សគ្គាបវគ្គ សុខ ជូតក កេឡិ ហេតុ,
ហោតំ តិលោក សុខ ជូតក សោណ្ឌកានំ.
គម្ភីរ ចិត្ត រហទោ ទរ គាហមាន,
មេត្តាទយា ករិ វធូ ករ សន្និ កាសា;
សព្ពង្គិនំ សិវផលំ តនុ ទេវ រុក្ខេ,
សាខា សខា តវ ភុជា ភជតំ ទទន្តុ.
និហារ ពិន្ទុ សហិតគ្គទលោប សោភិ,
ព្យាលម្ព រត្ត បទុមទ្វយ ភង្គិ ភាជា;
បាបារិសីសលុនតេនិវ រត្ត រត្តា,
រត្តា ករា តវ ភវុម្ភុវិ មង្គលាយ.
រុបស្សិរី ចរិត ចង្កម វិព្ភមា តេ,
បិដ្ឋី យថា កលល មុទ្ធនិ សេតុ ភូតា;
ឯវំ ភវណ្ណវ សមុត្តរណាយ សេតុ,
ហោតម្មហាកនក សំកម សន្និកាសា.
សទ្ធម្ម ទេសន មនោហរ ភេរិនាទ,
សំចារណេ សិវបុរំ វិសិតុំ ជនានំ;
គីវា សុវណ្ណមយ ចារុ មុតិង្គ ភេរិ,
ភាវម្ភជា ភវតុ ភូត វិភូតិយា តេ.
លខី និវាស វទនម្ពុជ មត្ត និន្ន,
មាកឌ្ឍយំ ជន វិលោចន ចញ្ចរីកេ;
សោរព្ភ ធម្ម មករន្ទ និសន្ទមានំ,
បិណេតុ តេន សរសេន សភា ជនេ តេ.
លខី សមារុហិត វត្តរថេ រថង្គ,
ទ្វន្ទានុ ការិ មិគ រាជ កបោល លីលំ;
តាទង្ក មណ្ឌលយុគំ វិយ កណ្ណភាជំ,
គណ្ឌត្ថលទ្វ្យមលំកុរុតំ ជនត្តេ.
លាវណ្ណ មណ្ណវ បវាឡ លតា ទ្វយាភំ,
តន្ទេហ ទេវ តរុ បល្លវ កន្តេ មន្តំ;
វត្តារវិន្ទ មករន្ទ បរាជិសោភំ,
រត្តាធរទ្វយមធោ កុរុតំ ជនាឃំ.
ឧណ្ណា សកុន្តិគត មត្ថក នត្ថុ កូប,
សុព្ភូ លការ សហិតោដ្ឋ បវាឡ នាវា;
គត្តុត្តររណ្ណវ គតា តវ ជន្តុកានំ,
ហោតំ ភវណ្ណវ សមុត្តរនយ នាថ.
ឥសំ វិកាស បទុមោទរ កេសរាលិ,
លីលា វិនទ្ធ រុចិរា តវ ទន្ត បន្តិ;
វានី វធូ ធរិត មាលតិ មាល្យ តុល្យា,
តស្សំ ជានស្ស មនរញ្ជន មាចរេយ្យ.
សទ្ធម្ម និជ្ឈរ សុរត្ត សិលាតលាភា,
ជិវ្ហា វចី នដ វធូ កល រង្គ ភូតា;
សទ្ធម្ម សេដ្ឋ តរណី និហិតប្បិយា តេ,
សំសារ សាគរ សមុត្តរណាយ ហោតុ.
ទន្តំសុ កញ្ចុកីត រត្តធរោ បធានេ,
ជិវ្ហា សុរត្ត សយនេ មុខ មន្ទិរដ្ឋេ;
អាមោក្ខ មុត្តិ វធុយា សយិតាយ តុយ្ហំ,
កុព្ពន្តុ សំគម មលំ ជន សោតុ កាមិ.
ឧណ្ណា តថាភិនវ បត្ត វរាភិ រាមា,
លីលោល្លសន្ត ភមុកទ្វយ នីល បត្តា;
ឃានោរុ ចារុ កទលី វទនា លវាលា,
តុយ្ហំ បវត្តតុ ចិរំ ជន មង្គលាយ.
ពាលត្ថលី ហរិ សិលាតល បិដ្ឋិកដ្ឋ,
ភូវល្លរិទ្វយ មយូរ យុគស្ស តុយ្ហំ;
បញ្ចប្បភា រុចិរ បិច្ឆ យុគស្សិរីកំ,
នេត្តទ្វយំ មនសិ បុញ្ឆតុ បាបធូលិំ.
ឥន្ទីវរាន្តគត ភិង្គិក បន្តិ ភង្គិ,
បញម្ពុជស្សរតតេ វិយ គច្ឆបន្តី;
នេត្តម្ពុជស្សិរិ តិរោករណីវ តុយ្ហំ,
បម្ហាវលី សិរិគតេហ តិរោ ករោន្តុ.
វត្តុល្លសម្ពុជ វិលោចន ហំស តុណ្ឌ,
កញ្ជំសុ បិញ្ជរ មុលាល លតា ទ្វ្យាភំ;
ទោលាទ្វយំវ សវណទ្វ្យមត្ត លក្ខ្យា,
ហោតំ តវជ្ជ ជនតា មតិចារហេតុ.
វម្មីក មត្ថក សយានក ភូរិទត្ត,
ភោគិន្ទ ភោគវលិ វិព្ភមមា វហន្តិ;
ឃានោបរិដ្ឋិតមុនេ តវ តុណ្ណមុណ្ណា,
តគ្គាហិនោ វិយ ជនស្ស ទទាតុ វិត្តំ.
រូបិន្ទិរាយ វិជយេ ខិល លោក រូបំ,
ឃាណោរុ ចារុ បរិឃោបរិ ពទ្ធ សិទ្ធា;
នីលាភ វាត វិលុថន្ត វយទ្ធជាភា,
តិដ្ឋន្តុ សជ្ជ ទុរិតារិ ជយាយ តេ ភូ.
ឧណ្ណស្សិតោបល និវេសិត ពុន្ទ សន្ធិ,
ឃាណោរុ បិណ្ឌកមឃា តប រុន្ធិតុន្តេ;
ហោតម្មុខម្ពុជ សិរី សិរសុស្សិតាភំ,
ភូ នីល បដ្ដិក លលាត សុវណ្ណ ឆត្តំ.
រុបង្ក វេទន វិលោចន ពាន ទិដ្ឋី,
ធារា និសាន មណិវដ្ដ សិរី សិរោ តេ;
សិទ្ធា មតោសធ កតញ្ជន បុញ្ជ លក្ខី,
ហោតំ ជនស្ស នយនាមយ នាសនាយ.
សក្ខន្ធ ពាហុយុគ តោរន មជ្ឈ គីវា,
ធរប្បិតស្សិរិឃតោ បរិ មុស្សវាយ;
នីលុប្បលាវ ឋបិតា សវិភត្តិ កន្តេ,
កេសា ភវន្តុ ភុវនត្តយ មង្គលាយ.
ហេមគ្ឃិយេ ឋបិត នីល សិលា កបាលេ,
បជ្ជោត ជាល លលិតំ មុនិ សារយន្តី;
រូបស្សិរី សិរសិ ភូសិត ហេម មាលា,
ការា ករោតុ សុភគំ តវ កេតុ មាលា.
ភ្យាមប្បភាលិ តវ កញ្ចន មោរ កាលេ,
សុរោទយេ វិតត ចន្ទក ចក្កលក្ខី;
មេឃាវនទ្ធ សិខរុន្នត ហេម សេលា,
យន្តិន្ទចាប វិកតីវ ទទាតុ សោភំ.
បដ្ឋាយ តេ បណិធិតោ សុចិ ទាន សីល,
នេក្ខម្ម បញ្ញ វិរិយក្ខម សច្ចធិដ្ឋា;
មេត្តា ឧបេក្ខិតិ ឥមេ ទស បូរតោវ,
បូរេន្តុ បារមិ គុណា ជនតានមត្តេ.
បត្តុត្តរុត្តរទសា បណិធាន ពីជា,
ចេតោរធរាយ ករុណា ជល សេខ វុទ្ធា;
សព្ពញ្ញុ ញាណ ផលទា សតិ វាដ គុត្តា,
តំ សម្ផលន្ទិសតុ បារមិតា លតា តេ.
អាពោធិ បុណ្ណមិ បទិដ្ឋ ទិនាទិតោ តេ,
សម្ភារ កាល សិត បក្ខ កមាភិ វុទ្ធោ;
សម្បុណ្ណ បារមិ គុណាមតរំសិ តំវ,
សព្ពង្គិ កុន្ទ កុមុទានិ បពោធយេយ្យ.
អាបច្ឆិមព្ភវ សិវប្ផល លាភ ទានា,
ទានប្បពន្ធមបិទាន ផលប្បភន្ទំ;
សំវឌ្ឍយិ ត្វំ អភិបត្ថនតោ យថេវំ,
ជន្តុត្តរុត្តរ ផលំ ខលុ សម្ភុនន្តុ.
អារម្ភតោប្បភុតិ យាវ តវគ្គមគ្គា,
វិក្ខាលិត ឃកលុសំ សុចិ សីល តោយំ;
មេត្តា ទយា មធុរ សីតលតាយុបេតំ,
សោធេតុ ត្វំវ ភវ និស្សិត ជន្តុ មេតំ.
អាបច្ចិមត្តមភិនិក្ខមនាភិយោគា,
បដ្ឋាយ តម្បភវតោ បរិបុណ្ណ គេហា;
ត្វំ សព្ព ជាតិ គហតោ អបិ និក្ខមិត្ថោ,
ឯវំ ជនា ភវ ទុខា ខលុ និក្ខមន្តុ.
ឯកគ្គតោ បល តលេ និសិតា ចិរន្ធិ,
ធារា សុចិត្តុ សុតលេ សតិ ទណ្ឌ ពទ្ធេ;
និព្ពិជ្ឈិ លក្ខណ ធនុដ្ឋិតិ សន្តិ លក្ខំ,
ខិត្តា តយោនមនុ វិជ្ឈតុ ជន្តុ ខិត្តា.
ត្វំ បារមី ជល និធិំ ចតុរិហ ពាហុ,
សត្តីហិ សុត្តរិ ចិរំ ជនកោវ សិន្ធុំ;
សម្បន្ន វិក្កម ផលោសិ យថា ចសោវ,
ឯវំ ជនា វិរិយតប្ផលមេ ធយន្តុ.
សត្ត បរធ ទហនេសុ ចិរំ សុធន្តំ,
ខន្តី សុវណ្ណ កត រូប សមន្តិមត្តា;
សព្ពា បរាធមសហិ ត្វំអសយ្ហមេវំ,
សព្ពេ ជនាបិ ខមនេន ភជន្តុ សន្តិំ.
លក្ខាធិកំ ចតុរ សំខិយ កប្ប កាលំ,
សច្ចេន សុដ្ឋុ បរិភាវិត វាចិនោ តេ;
វាចាយ សច្ច ផុសិតាយ សមេន្តិ ជន្តុ,
ឯវំ វិសុទ្ធ វចនា ជនតា ភវន្តុ.
អាទិន្ន ធម្ម មហិយត្ថិរ សុប្បតិដ្ឋា,
ធិដ្ឋាន បារមិ មហា វជិរទ្ទិ តុយ្ហំ;
សត្តេន កេន បិ យថាហិ អភេជ្ជ នេជ្ជោ,
ឯវំ ជនាបិ កុសលេសុ អធិដ្ឋ ហន្តុ.
ត្វំ សព្ព សត្ត ចិរភាវិត មេត្ត ចិត្ត,
តោយេហិ សំសមិត កោធ មហា ហុតាសោ;
លោកុត្តរំ តទិតរំ ហិតមាវហិត្ថោ,
ឯវំ ជនេសុ ជនតា ហិតមាវហន្តូ.
មិត្តោបការ បដិបក្ខ ជនាបការេ,
ត្វំ និព្ពិការ មនសោ ចិរភាវនាយ;
បត្តោសិលាភ បភុតដ្ដុសុ និព្ពិការំ,
ឯវំ ជនានុនយ កោប នុទា ភវន្តុ.
សម្បន្ន ហេតុ វិភវោ តុសិតេ វិមានំ,
យុត្តំ គុណេហិ នវភិប្បទវី វិមានំ;
ត្វំ វាធិបរមិធិរោហិនិយា តិលោកោ,
អារោហតុ ភយ សុខំ បទវី វិមានំ.
ត្វំវេរហំសិ សមពុជ្ឈិ យថាច សម្មា,
សម្បន្ន វិជ្ជ ចរណោ សុគតោសិ ហោន្តុ;
លោកំ វិទោ បុរិសទម្មសុសារថី សិ,
សត្ថាសិ ពុជ្ឈិ ភគវា សិ តថេវ ជន្តុ.
សច្ចិត្ត ភូ និទហិតំ ជនតាយ តុយ្ហំ,
កល្យាណវណ្ណរតនណ្ណវជាតិភិន្នំ;
ទុក្ខគ្គិ ចោរ ជលុបទ្ទុតជាតិ គេហេ,
តស្សា សុខំ ភវតុ ជីវិតុមាបទាយ.
វាចា វិចិត្ត វរ តន្តុ គតង្គិ កណ្ឋេ,
ស្វា មុត្ត សគ្គុណ មហា រតនា វលី តេ;
វេវណ្ណិ យត្តនិ ភវំ សកលម្បហាយ,
ហោតញ្ជនស្ស សិរិ សង្គម មង្គលាយ.
តំ សគ្គុណត្ថវ ទហដ្ឋ សុតិប្បនាលិ,
និស្សន្ទមាន គុណនីរ និបាន តិន្តេ;
ខេត្តេត្ត សញ្ញិនិ ជនា កត លោម ហំស,
ពីជង្កុរី កុសល សស្ស ផលំ លភន្តុ.
អាបាយិកប្បភុតិ ទុក្ខ និទាឃ កាល,
សន្តាបិតា និខិល លោក មនោ កទម្ពា;
តំ វង្ណ មេឃ ផុសនា ហសនង្កុរេហិ,
ឥទ្ធា ភវន្តុ មតិ វល្លរិ វេល្លីតា តេ.
ហេតុទ្ទសា ផលទសា សមវដ្ឋិតំ តំ,
សព្ពត្ថ សត្ត ហិតមាវហណេន សិទ្ធំ;
ចិន្តាបថាតិគនុភាវ វិភាវនន្តេ,
ភូតានមត្ថុ ចរិតព្ភុតមត្ថ សិធ្យា.
អង្គារកាសុមភិលង្ឃិយ ទាន កាលេ,
ភត្តត្តនោ បទ បដិច្ឆក បង្កជា ច;
យាតក្ខណេ តវ បទេ ធដមុដ្ឋហិត្វា,
បង្កេរុហាំ សិវ មធុំ សរតំ ទទន្តុ.
សច្ចេន មច្ឆ បតិ វស្សិត វស្សធារា,
សត្តេ ទយាយ តវ វស្សិត វស្សធារា;
គិម្ហេ ជនស្ស សមយិំសុ យថា តថាតា,
ធមម្ពុវុដ្ឋិវ សមេន្តុ កិលេស ទាហេ.
ឆទ្ទន្ត នាគ បតិនា ខមតា បរាធំ,
ឆេត្វា ករេ ឋបិត ទន្តវរាវ លុទ្ទំ;
លោកេ ហិតាយ ឋបិតា តវ ទន្ត ធាតុ,
សេដ្ឋា ជនំ សិវ បុរំ លហុ បាបយន្តុ.
តំ តេមិយាខ្យ យតិនោស្សម មាលកម្ហិ,
ឱកិណ្ណ មុត្ត កនកា វុជ វិប្បកិណ្ណា;
ការុញ្ញ វារិទ ចុតោ ទក ពិន្ទុ ពន្ធូ,
ធាតុ សមេន្តុ តវ ជន្តុសុ ទុក្ខទាហេ.
រដ្ឋស្ស អត្ថ ចរណាយ អសម្មុខស្ស,
រាមេន ទិន្ន តិណ សំខត បាទុកាវ;
ភុត្តា តយា ចិរមសម្មុខ នាគតស្ស,
លោកស្ស អត្ថមនុ តិដ្ឋតុ បត្ត ធាតុ.
វុត្តោ ជនានមុបទិស្ស វរាហ រញ្ញា,
សត្ថិំ សហស្ស សរទំ វិយ ញាយ ធម្មោ;
អាទេយ្យ ហេយ្យមុបទិស្ស តយា បវុត្តោ,
ធម្មោ បវត្តតុ ចិរំ ជនតា ហិតាយ.
មារារិ មទ្ទន ហិតាធិគមំ ករោតា,
ភត្តោ តយា វរ មហា ជយ ពោធិ រាជា;
សគ្គា បវវគ្គ ហិតហេតុ ជនស្ស ហន្ត្វា,
សព្ពន្តរាយមិហ តិដ្ឋតុ សុដ្ឋុ សជ្ជោ.
សាមោទ វណ្ណ ភជនី គុណ មញ្ជរីយំ,
ចរិយា លតា វិកសិតា តវ សប្ផលង្គំ;
ឱកិណ្ណ ចិត្ត មធុបេ រស បីណយន្តិ,
សម្ភាវិតា ភុវិ បវត្តតុ មត្ថកេហិ.
សម្ពុទ្ធ សេលវលយន្តរ ជាននវ្ហា,
នោត្តត្តតោ តិបថគា យតិ សាគរដ្ឋា;
ធម្មា បគា សុតិ វសេ តរិតេ បុណន្តិ,
សម្ភារ សស្សមិហ វត្តតុ បចយន្តិ.
បញ្ញាណ កូប សិត បគ្គហ វាយុ គាហី,
សទ្ធា លការ សហិតា សតិ បោត វាហា;
សម្បាបយាតុ ភវ សាគរ បារ តីរ,
សប្បត្តនំ វរធនេ បតិ បត្តិ នាវា.
ពោជ្ឈង្គ សត្ត រតនាករ ធម្ម ខន្ធ,
គម្ភីរ នីរ ចយ សាសន សាគរោ សំ;
សោ សីល្យនន្ត តនុ វេដិថ ញាណ មន្ថ,
សេលេន មន្ថិតវតំ ទិសតា មតំ វេ.
វុត្តេន តេន វិធិនា វិធិនា តតោ តំ,
លទ្ធា នុភូតមមតំ ខិល ទោស នាសំ;
អច្ចន្ត រោគ ជរតា មរណា ភិ ភូតំ,
ភូតំ ករោតុ អមរំ អជរំ អរោគំ.
សទ្ធម្ម រាជ រវិនិគ្គត ធម្មរំសិ,
ផុល្លោ ធុតង្គទល សំវរ កេសរាលិ;
សង្ឃារវិន្ទ និករោ សមធុំ សមាធិ,
សក្កិណ្ណិកោ ទិសតុ សាសន វាបិ ជតោ.
អានន្ទ រញ្ញ រតនាទិ មហា យតិន្ទ,
និច្ចប្បពុទ្ធ បទុមប្បិយ សេវិនង្គី;
ពុទ្ធប្បិយេន ឃន ពុទ្ធ គុណប្បិយេន,
ថេរាលិនា រចិត បជ្ជមធុំ បិពន្តុ.
ឥត្ថំ រូប គុណានុកិត្តនវសា តំ តំ ហិតា សិំ សតោ,
វត្ថានុស្សតិ វត្តិត ឥហ យថា សត្តេសុ មេត្តា ច មេ;
ឯវំ តាភិ ភវន្ត រុត្តរ តរា វត្តន្តុ តា ពោធិ មេ,
សំយោគោច ធនេហិ សន្តិហិ ភវេ កល្យាន មិត្តេហិ ច.