អញ្ញ > វំស-គន្ថ-សង្គហោ

១. តត្ថ ច នវដ្ឋានាគតសាសនវំសកថាមគ្គោ ឯវំ វេទិតព្ពោ. អម្ហាកញ្ហិ ភគវា សម្មាសម្ពុទ្ធោ វេនេយ្យានំ ហិតត្ថាយ ហត្ថគតំ សុខំ អនាទិយិត្វា ទីបង្ករស្ស ភគវតោ បាទមូលេ ព្យាករណំ នាម មញ្ជូសក បុប្ផំ បិលន្ធិត្វា កប្បសតសហស្សាធិកានិ ចត្តារិ អសខ្យេ យានិ អនេកាសុ ជាតីសុ អត្តនោ ខេទំ អនបេក្ខិត្វា សមតិំសបារមិយោ ¶ បូរេត្វា វេស្សន្តរត្តភាវតោ ចវិត្វា តុសិតបុរេ ទេវសុខំ អនុភវិ.

តទា ទេវេហិ ឧយ្យោជិយមានោ ហុត្វា កបិលវត្ថុម្ហិ ហោសមតរញ្ញា បភុតិ អសម្ភិន្នាត្តិយវំសិកស្ស សុទ្ធោ ធនស្សនាម មហារញ្ញោ អគ្គមហេសិយា អសម្ភិន្នាត្តិយវំ សិកាយ មាយាយ កុច្ឆីស្មិំ អាសាឡិមាសស្ស បុណ្ណមិយំ គុរុវារេ បដិសន្ធិំ គហេត្វា អសមាសច្ចយេន វេសាខមាសស្ស បុណ្ណមិយំ សុក្កវារេ វិជាយិត្វា សោឡសវស្សិកកាលេ រជ្ជសម្បត្តិំ បត្វា ឯកូនតិំសវស្សានិ អតិក្កមិត្វា មង្គលឧយ្យានំ និក្ខមនកាលេ ទេវេហិ ទស្សិតានិ ចត្តារិ និមិត្តានិ បស្សិត្វា សំវេគំ អាបជ្ជិត្វា មហាភិនិក្ខមនំ និក្ខមិត្វា អនោមាយនាម នទិយា តីរេ ភមរ វណ្ណសន្និភានិ កេសានិ ឆិន្ទិត្វា ទេវទត្តិយកាសាវំ បដិច្ឆាទេត្វា នេ រញ្ជរាយនាម នទិយា តីរេ វេសាខមាសស្ស បុណ្ណមិយំ បច្ចូសកាលេ សុជាតាយនាម សេដ្ឋិធីតាយ ទិន្នំ បាយាសំ ឯកូនបណ្ណាសវារេន បរិភុញ្ជិត្វា បុរិមិកានំ សម្មាសម្ពុទ្ធានំ ធម្មតាយ សុវណ្ណបាតិំ នទិយំ ឱតារេត្វា មហាពោធិមណ្ឌំ ឧបសង្កមិត្វា អបរាជិតបល្លង្កេ និសីទិត្វា អនមតគ្គសំ សារតោ បដ្ឋាយ អត្តានំ ឆាយា វិយ អនុយន្តានំ អនេកសតកិលេសវេរីនំ សីសំ ចតូហិ មគ្គសត្ថេហិ ឆិន្ទិត្វា តិលោកគ្គមហាធម្មរាជត្តំ បត្វា បញ្ចតាលីសវស្សានំ តេសុ តេសុ ឋានេសុ តេសំ តេសំ សត្តានំ មហាករុណាសមាបត្តិជាលំ បត្ថារេត្វា ទេសនាញាណំ វិជម្ភេត្វា ធម្មំ ទេសេត្វា សាសនំ បតិដ្ឋាបេសិ. បតិដ្ឋាបេត្វា ច បន អសីតិវស្សាយុកកាលេ វិជ្ជោតយិត្វា និព្ពាយនប្ប ទាបជាលំ វិយ អនុបាទិសេសនិព្ពានធាតុយា បរិនិព្ពាយិ. មច្ចុ ធម្មស្ស ច នាម តីសុ លោកេសុ អតិមមាយិតព្ពោ ឯស, អតិគរុកាតព្ពោ ឯស, អតិភាយិតព្ពោ ឯសាតិ វិជាននសភាវោ នត្ថិ. ភគវន្តំយេវ តាវ តិលោកគ្គបុគ្គលំ អាទាយ ¶ គច្ឆតិ, កិំមង្គំ បន អម្ហេ យេវា តេវា, អហោវតអច្ឆរិយា សង្ខារធម្មោតិ. ហោន្តិ ចេត្ថ–

សត្តាហបរិនិព្ពុតេ ច ភគវតិ អាយស្មា មហាកស្សបោ តិយឌ្ឍសតាធិកេហិ សហស្សមត្តេហិ ភិក្ខូហិ សទ្ធិ បាវាតោ កុសីនារាយំ អាគច្ឆន្តោ អន្តរាមគ្គេ ភគវា សម្មាសម្ពុទ្ធោ បរិនិព្ពុតោតិ សុត្វា អវីតសោក ភិក្ខូ រោទន្តេ ទិស្វា វុទ្ធបព្ពជិតោ សុភទ្ទានាម ភិក្ខុ ឯវំ វទតិ– មា អាវុសោ បរិទេវិត្ថ, នត្ថេត្ថ សោចិតព្ពោនាមកោចិ, បុព្ពេ មយំ ភវាម សមណេន គេ,ភមេន ឧបទ្ទុតា– ឥទំ ករោថ ឥទំ តុម្ហាកំ កប្បតិ, មា ឥទំ ករិត្ថ ន ឥទំ តុម្ហាកំ កប្បតីតិ, សេយ្យថាបិ ឥណសាធិកេន ទាសោតិ, ឥទានិ បន មយំ យំ យំ ឥច្ឆាម, តំ តំ សក្កា កាតុំ, យំ យំ បន ន ឥច្ឆាម,តំ តំ សក្កា អកាតុន្តិ. តំ សុត្វា ឦទិសំ បន វេរីបុគ្គលំ បដិច្ច សម្មាសម្ពុទ្ធស្ស ភគវតោ សាសនំ ខិប្បំ អន្តរធារេយ្យ, ឥទានិ សុវណ្ណក្ខន្ធសទិសោ សរីរោ សំវិជ្ជមានោ ¶ យេវ ទុក្ខេន និប្ផាទិតេ សាសនេ មហាភយំ ឧប្បជ្ជិ ច, ឦទិសោ បុគ្គលោ អញ្ញំ ឦទិសំ បុគ្គលំ សហាយំ លភិត្វា វុទ្ធិមាបជ្ជន្តោ ហាបេតុំ សក្កុណេយ្យ មញ្ញេតិ ចិត្តក្ខេទំ បត្វា ធម្មសំវេគំ លភិត្វា ឥមំ ភិក្ខុំ ឥធេវ សេតវត្ថំ និវាសាបេត្វា សរីរេ ភស្មេន វិកិរិត្វា ពហិទ្ធា ករិស្សាមីតិ ចិន្តេសិ.

តទា អាយស្មតោ មហាកស្សបត្ថេរស្ស ឯតទហោសិ,– ឥទានិ សមណស្ស គោតមស្ស សរីរំ សំវិជ្ជមានំយេវ បរិសា វិវាទំ ករោន្តីតិ មនុស្សា ឧបវទិស្សន្តិតិ. តតោ បច្ឆា ឥមំ វិតក្កំ វូបសមេត្វា ខមិត្វា សម្មាសម្ពុទ្ធោ ភគវា បរិនិព្ពាយមានោបិ តេន បន ទេសិតោ ធម្មោ សំវិជ្ជតិ, តេន ទេសិតស្ស ធម្មស្ស ថិរំ បតិដ្ឋាបនត្ថាយ សង្គាយិយមានំ ឦទិសេហិ បុគ្គលេហិ សាសនំ ន អន្តរធាយិស្សតិ, ចិរំ ឋស្សតិ យេវាតិ មនសិករិត្វា ភគវតោ ទិន្នបំសុ កូលចីវរាទិវសេន ធម្មានុគ្គហំ អនុស្សរិត្វា ភគវតោ បរិនិព្ពានតោ តតិយេ មាសេ អាសាឡិមាសស្ស បុណ្ណមិតោ បញ្ចមេ ទិវសេ រាជគហេ សត្តបណ្ណិគុហាយំ អាជាតសត្តុំនាម រាជានំ និស្សាយ បញ្ចហិ អរហន្ត សតេហិ សទ្ធិំ សត្តមាសេហិ បឋមំ សង្គាយនំ អកាសិ.

តទា អដ្ឋចត្តាលីសាធិកសតកលិយុគំ អនវសេសតោ អបនេត្វា កលិយុគេន សាសនំ សមំ កត្វា ឋបេសិ. យទា បន អជាតសត្តុ រញ្ញោ រជ្ជំ បត្វា អដ្ឋវស្សានិ អហេសុំ, តទា មរម្មរដ្ឋេ តង្កោសង្គត្វបុរេ ជម្ពុទីបធជស្សនាម រញ្ញោ រជ្ជំ បត្វា អតិរេកបញ្ចវស្សានិ អហេសុន្តិ.

ឥមិស្សញ្ច បឋមសង្គីតិយំ អាយស្មា មហាកស្សបោ អាយស្មា ឧបាលិ អាយស្មា អានន្ទោ អាយស្មា អនុរុទ្ធោ ចាតិ ឯវមាទយោ បញ្ចសតប្បមាណា មហាថេរា បឋមំ សង្គាយិត្វា សាសនំ អនុគ្គហេសុំ. ឯវំ ¶ សុភទ្ទស្ស ទុដ្ឋបព្ពជិតស្ស ទុដ្ឋវចនំ សាសនស្ស អនុគ្គហេ ការណំនាម អហោសិ. សុភទ្ទោ ច នាម ទុដ្ឋបព្ពជិតោ អាតុមានគរវាសី អហោសិ កប្បកកុលិកោ. សោ យទា ភគវា អាតុមានគរំ គច្ឆតិ, តទា អត្តេនោ បុត្តេ ទ្វេ សាមណេរេ កប្បកកម្មំ ការាបេត្វា លទ្ធេហិ តណ្ឌុលតេលាទីហិ វត្ថូហិ យាគុំ បចិត្វា សសង្ឃស្ស ពុទ្ធស្ស អទាសិ. ភគវា បន តានិ អប្បដិគ្គហេត្វា ការណំ បុច្ឆិត្វា វិគរហិត្វា អកប្បិយសមាទានទុក្កដាបត្តិំ កប្បកបុព្ពស្ស ភិក្ខុស្ស ខុរធារណទុក្កដាបត្តិញ្ច បញ្ញាបេសិ. តំ ការណំ បដិច្ច វេរំ ពន្ធិត្វា សាសនំ វិទ្ធំសិតុកាមតាយ តត្តកអយោគុឡំ គិលិត្វា ឧគ្គីរន្តោ វិយ ឦទិសទុដ្ឋវចនំ វទីតិ.

អជាតសត្តុរាជា ច តុម្ហាកំ ធម្មចក្កំ ហោតុ, មម អាណាចក្កំ បវត្តិស្សាមិ, វិស្សដ្ឋា ហុត្វា សង្គាយន្តូតិ អនុគ្គហេសិ. តេនេស បឋមំ សាសនានុគ្គហោ រាជាតិ វេទិតព្ពោ, មហាកស្សបាទីនញ្ច អរហន្តានំ បញ្ចសតានំ សិសាបរម្បរា អនេកា ហោន្តិ, គណនបថំ វីតិវត្តា. យមេត្ថ ឥតោ បរំ វត្តព្ពំ, តំ អដ្ឋកថាយំ វុត្តនយេន វេទិតព្ពំ. តេ បន មហាថេរា សង្គាយិត្វា បរិនិព្ពាយិំសូតិ. ហោន្តិ ចេត្ថ–

តតោ បរំ វស្សសតំ តេសំ សិស្សបរម្បរា សាសនំ ធារេត្វា អាគមំសុ. អថានុក្កមេន គច្ឆន្តេសុ រត្តិទិវេសុ វស្សសតបរិនិព្ពុតេ ភគវតិ វេសាលិកា វជ្ជិបុត្តកា ភិក្ខូ វេសាលិយំ កប្បតិ សិង្គិលោណកប្បា, កប្បតិ ទ្វង្គុលកប្បោ, កប្បតិ គាមន្តរកប្បោ, កប្បតិ អាវាសកប្បោ, កប្បតិ អនុមតិកប្បោ, កប្បតិ អាចិណ្ណកប្បោ, កប្បតិ អាមថិតកប្បោ, កប្បតិ ជឡោគិំ បាតុំ, កប្បតិ អទសកំ និសីទនំ, កប្បតិ ជាតរូបរជតន្តិ ឥមានិ ទសវត្ថូនិ ទីបេសុំ.

តេសំ សុសុនាគបុត្តោ កាឡាសោកោនាម រាជា បក្ខោ អហោសិ. តេន ខោ បន សមយេន អាយស្មា យសោ កាកណ្ឌកបុត្តោ វជ្ជីសុ ចារិកំ ចរមានោ វេសាលិកា កិរ វជ្ជិបុត្តកា ភិក្ខូ វេសាលិយំ ទសវត្ថូនិ ទិបេន្តីតិ សុត្វា ន ខោ បនេតំ ប្បតិរូបំ, យ្វាហំ ទសពលស្ស សាសនវិបត្តិំ សុត្វា អប្បោស្សុក្កោ ភវេយ្យំ, សន្ធាហំ អធម្មវាទិនោ និគ្គហេត្វា ធម្មំ ទីបេស្សាមីតិ ចិន្តយន្តោ យេន វេសាលី, តទវសរិ. តទា អាយស្មា មហាយសោ រេវតសព្ពកាមិអាទីហិ សត្តសតេហិ អរហន្តេហិ សទ្ធិំ សង្គាយិស្សាមីតិ វេសាលិយំ វាលុការាមំ អាគច្ឆិ. វជ្ជិបុត្តកាច ភិក្ខូ ឧបារម្ភចិត្តា កាឡាសោកំនាម រាជានំ ឧបសង្កមិត្វា មយំ ខោ មហារាជ ឥមស្មិំ មហាវនារាមេ គន្ធកុដិំ រក្ខិត្វា វស្សាម, ឥទានិ មហារាជ អធម្មវាទិនោ អញ្ញេ ភិក្ខូ វិលុម្បិតុកាមា វិទ្ធំសិតុកាមា អាគតាតិ អារោចេសុំ. កាឡាសោកោ ¶ ច មហារាជា អាគន្តុកានំ ភិក្ខូនំ អប្បវិសនត្ថាយ និវារេថាតិ អមច្ចេ បេសេសិ. អមច្ចាច និវារេតុំ គច្ឆន្តា ទេវតានំ អានុភាវេន ភិក្ខូ ន បស្សន្តិ. តទហេវ ច រត្តិភាគេ កាឡាសោកមហារាជា លោហកុម្ភីនិរយេ បតនាការេន សុបិនំ បស្សិ. តស្ស រញ្ញោ ភគិនិ នន្ទានាម ថេរី អាកាសេន អាគច្ឆន្តិ ធម្មវាទិនោ មហាថេរេ និគ្គណ្ហិត្វា អធម្មវាទីនំ ភិក្ខូនំ បគ្គហណេ ទោសពហុលតំ បកាសេត្វា សាសនស្ស បគ្គហណត្ថាយ ឱវាទំ អកាសិ.

កាឡាសោករាជា ច សំវេគប្បត្តោ ហុត្វា អាយស្មន្តានំ មហាយសត្ថេរាទីនំ ខមាបេត្វា អជាតសត្តុរាជា វិយ សង្គាយនេ បគ្គហំ អកាសិ.

មហាយសត្ថេរាទយោ ច កាឡាសោកំ រាជានំ និស្សាយ វាលុការាមេ វជ្ជិបុត្តកានំ ភិក្ខូនំ បកាសិតានិ អធម្មវត្ថូនិ ភិន្ទិត្វា អដ្ឋតិ មាសេហិ ទុតិយសង្គាយនំ អកំសុ.

តទា ច មជ្ឈិមទេសេ បាតលិបុត្តនគរេ សុសុនាគរញ្ញោ បុត្តភូតស្ស កាឡាសោករញ្ញោ អតិសេកំ បត្វា ទសវស្សានិ អហេសុំ. បរម្មរដ្ឋេ បន សិរិខេត្តនគរេ ទ្វត្តគោង្កស្សនាម រញ្ញោ អភិសិត្តកាលតោ បុរេ ឯកវស្សំ អហោសិ. ជិនសាសនំ បន វស្សសតំ អហោសិ.

ឥមិស្សញ្ច ទុតិយសង្គីតិយំ មហាយស រេវត សព្ពកាមិប្បមុខា សត្តសតប្បមាណា មហាថេរា ទុតិយំ សង្ខាយិត្វា ទុតិយំ សាសនំ បគ្គហេសុំ.

អាយស្មា មហាយសត្ថេរោចនាម បញ្ចហិ ឯតទគ្គឡានេ ហិ ភគវតា ថោមិតស្ស អានន្ទត្ថេរស្ស សទ្ធិវិហារិកោ អហោសិ. វជ្ជិបុត្តកានំ ភិក្ខូនំ អធម្មវត្ថុទីបនំ ទុតិយសង្គីតិយំ ការណមេវ. កាឡាសោករាជាច បគេវ អធម្មវាទីភិក្ខូនំ សហាយោបិ សមានោ បុន ធម្មវាទិភិក្ខូនំ សហាយោ ¶ ហុត្វា អនុគ្គហំ អកាសិ. តស្មា ទុតិយសាសនបគ្គហោ រាជាតិ វេទិតព្ពោ.

ទុតិយសង្គីតិយំ បន មហាយសត្ថេរ រេវត សព្ពកាមិប្បមុខានំ សត្តសតានំ មហាថេរានំ សិស្សបរម្បរា អនេកា ហោន្តិ, គណនបថំ វីតិវត្តា. យមេត្ថ ឥតោ បរំ វត្តព្ព, តំ អដ្ឋកថាយំ វុត្តនយេន វេទិតព្ពំ. តេ បន មហាថេរា ទុតិយំ សង្គាយិត្វា បរិនិព្ពាយិំសូតិ. ហោន្តិ ចេត្ថ–

តតោ បរំ អដ្ឋតិំសាធិកានិ ទ្វេវស្សសតានិ សម្មាសព្ពុទ្ធស្ស ភគវតោ សាសនំ និរាកុលំ អហោសិ និរព្ពុទំ. អដ្ឋតិំសាធិកេ បន ទ្វិវស្សសតេ សម្បត្តេ បាដលិបុត្ត នគរេ ¶ សិរិធម្មាសោកស្សនាម រញ្ញោ កាលេ និគ្រោធសាមណេរំ បដិច្ច ពុទ្ធសាសនេ បសីទិត្វា ភិក្ខុសង្ឃស្ស លាភសក្ការំ ពាហុល្លំ អហោសិ. តទា សដ្ឋិសហស្សមត្តា តិត្ថិយា លាភសក្ការំ អបេក្ខិត្វា អបព្ពជិតាបិ បព្ពជិតាវិយ ហុត្វា ឧបាសថបវារណាទិកម្មេសុ បវិសន្តិ, សេយ្យថាបិនាម ហំសានំ មជ្ឈេ ពកា, យថា ច គុន្នំ មជ្ឈេ គវជា, យថា ច សិន្ធវានំ មជ្ឈេ គទ្រភាតិ.

តទា ភិក្ខុសង្ឃោ ឥទានិ អបរិសុទ្ធា បរិសាតិ មនសិ ករិត្វា ឧបោសថំ ន អកាសិ. សាសនេ អព្ពុទំ ហុត្វា សត្តវស្សានិ ឧបោសថបវារណានិ ឆិជ្ជន្តិ. សិរិធម្មាសោ កោ ច រាជា តំ សុត្វា តំ អធិករណំ វូបសមេហិ ឧបោសថំ ការាបេហីតិ ឯកំ អមច្ចំ បេសេសិ. អមច្ចោ ច ភិក្ខូ ឧបោសថំ អកត្តុកាមេ កិំ ករិស្សាមីតិ រាជានំ បដិបុច្ឆិតុំ អវិសហតាយ សយំ មូឡោ ហុត្វា អញ្ញេន មូឡេន មន្ថេត្វា សចេ ភិក្ខុសង្ឃោ ឧបោសថំ ន ករេយ្យ, ភិក្ខុសង្ឃំ ឃាតេតុកាមោ មហារាជាតិ សយំ មូឡោ ហុត្វា មូឡស្ស សន្តិកា មូឡវចនំ សុត្វា វិហារំ គន្ត្វា ឧបោសថំ អកត្តុកាមំ ភិក្ខុសង្ឃំ ឃាតេសិ.

រាជា ច តំ សុត្វា អយំ ពាលោ មយា អនាណត្តោវ ហុត្វា ឦទិសំ លុទ្ទកម្មំ អកាសិ, អហំ បាបកម្មតោ មុច្ចិស្សាមិវា មាវាតិ ទ្វឡកជាតោ ហុត្វា មហាមោគ្គលិបុត្ត តិស្សត្ថេរំ គង្គាយ បតិសោតតោ អានេត្វា តំ ការណំ ថេរំ បុច្ឆិ. ថេរោ ច ទីបកតិត្តិរជាតកេន អចេតនតាយ បាបកម្មតោ មោចេស្សសិតិ វិស្សជ្ជេសិ, សត្តាហម្បិ តិត្ថិយានំ វាទំ សិរិធម្មាសោករញ្ញោ សិក្ខាបេសិ, វាទេន វាទំ តុលយិត្វា សដ្ឋិសហស្សមត្តេ តិត្ថិយេ សាសនពាហិរំ អកាសិ. តទា បន ឧបោសថំ អកាសិ. ភគវតា វុត្តនិយាមេនេវ កថាវត្ថុញ្ច ភិក្ខុសង្ឃមជ្ឈេ ព្យាកាសិ ¶ . អសោការាមេ ច សហស្សមត្តា មហាថេរា នវហិ មាសេហិ សង្គាយិំសុំ.

តទា មជ្ឈិមទេសេ បាដលិបុត្តនគរេ សិរិធម្មាសោករញ្ញោ រជ្ជំ បត្វា អដ្ឋារសវស្សានិ អហេសុំ. មរម្មរដ្ឋេ បន សិរិខេត្តនគរេ រម្ពោង្កស្សនាម រញ្ញោ រជ្ជំ បត្វា ទ្វាទស វស្សានិ អហេសុន្តិ.

ឥមិស្សញ្ច តតិយសង្គីតិយំ មហាមោគ្គលិបុត្តតិស្សត្ថេរោនាម ទុតិយសង្គាយកេហិ មហាថេរេហិ ព្រហ្មលោ កំ គន្ត្វា សាសនស្ស បគ្គហណត្ថំ តិស្សនាម មហាព្រហ្មានំ អាយាចិត និយាមេន តតោ ចវិត្វា ឥធ មោគ្គលិយានាម ព្រាហ្មណិយា កុច្ឆិម្ហិ និព្ពត្តសត្តោ.

លាភសក្ការំ អបេក្ខិត្វា សដ្ឋិសហស្សមតានំ តិត្ថិយានំ សមណាលយំ កត្វា ឧបោសថបវារណាទីសុ កម្មេសុ បវេសនំ បរិសាយ អសុទ្ធត្តា សត្តវស្សានិ ឧបោសថស្ស អករណញ្ច សាសនស្ស បគ្គហណេ ការណមេវ. មហាមោគ្គលិបុត្តតិស្ស មជ្ឈន្តិក មហារេវប្បមុខា មហាថេរា តតិយំ សង្គាយិត្វា តតិយំ សាសនំ បគ្គហេសុំ.

សិរិធម្មាសោករាជា ច តិត្ថិយានំ វាទំ សល្លក្ខេត្វា តិត្ថិយេ ពហិសាសនករណាទីហិ សាសនស្ស បគ្គហោ រាជាតិ វេទិតព្ពោ. មហាមោគ្គលិបុត្តតិស្ស មជ្ឈិន្តិក មហារេវប្បមុខានំ សហស្សមត្តានំ មហាថេរានំ សិស្សបរម្បរា អនេកា ហោន្តិ, គណនបថំ វីតិវត្តា. យមេត្ថ ឥតោ បរំ វត្តព្ពំ, តំ អដ្ឋកថាយំ វុត្តនយេន វេទិតព្ពំ. តេ បន មហាថេរា តតិយំ សង្គាយិត្វា បរិនិព្ពាយិំសូតិ. ហោន្តិ ចេត្ថ–

តតោ បរំ កត្ថ សម្មាសម្ពុទ្ធស្ស ភគវតោ សាសនំ សុដ្ឋុ បតិដ្ឋហិស្សតីតិ វិមំសិត្វា មហាមោគ្គលិបុត្តតិស្សត្ថេរោ បច្ចន្តទេសេ ជិនសាសនស្ស សុប្បតិដ្ឋិយមានភាវំ បស្សិត្វា នវដ្ឋានានិ ជិនសាសនស្ស បតិដ្ឋាបនត្ថាយ វិសុំ វិសុំ មហាថេរេ បេសេសិ. សេយ្យថិទំ. មហាមហិន្ទត្ថេរំ សីហឡទីបំ បេសេសិ-ត្វំ ឯតំ ទីបំ គន្ត្វា តត្ថ សាសនំ បតិដ្ឋបេហីតិ, សោណត្ថេរំ ឧត្តរត្ថេរញ្ចសុវណ្ណភូមិំ, មហារក្ខិតត្ថេរំ យោនកលោកំ, រក្ខិតត្ថេរំ វនវាសីរដ្ឋំ, យោនកធម្មរក្ខិតត្ថេរំ អបរន្តរដ្ឋំ, មជ្ឈន្តិ កត្ថេរំ កស្មីរគន្ធា ររដ្ឋំ, មហារេវត្ថេរំ មហិំសកមណ្ឌលំ, មហាធម្មរក្ខិតត្ថេរំ មហារដ្ឋំ, មជ្ឈិមត្ថេរំ ចីនរដ្ឋន្តិ. តត្ថ ច ឧបសម្បទបហោនកេន សង្ឃេន សទ្ធិំ បេសេសិ. តេ ច មហាថេរា វិសុំ វិសុំ គន្ត្វា សាសនំ តត្ថ តត្ថ បតិដ្ឋាបេសុំ. បតិដ្ឋាបេត្វា ច តេសុ តេសុ ឋានេសុ ភិក្ខូនំ កាសាវបជ្ជោតេន វិជ្ជោតមានា អព្ភហិមធូរជោរាហុសង្ខាតេហិ វិមត្តោ វិយ និសានាថោ ជិនសាសនំ អនន្តរាយំ ហុត្វា បតិដ្ឋាសិ.

តេសុ បន នវសុ ឋានេសុ សុវណ្ណភូមិនាម អធុនា សុធម្មនគរមេវ. កស្មា បនេតំ វិញ្ញាយតីតិ ចេ. មគ្គានុមានតោ ឋានានុមានតោ ¶ វា. កថំ មគ្គានុមានតោ. ឥតោ កិរ សុវណ្ណភូមិ សត្តមត្តានិ យោជនសតានិ ហោន្តិ, ឯកេន វាតេ ន គច្ឆន្តី នាវា សត្តហិ អហោរត្តេហិ គច្ឆតិ, អថេកស្មិំ សមយេ ឯវំ គច្ឆន្តិ នាវា សត្តាហម្បិ នទិយា វដ្ដមច្ឆ បិដ្ឋេ នេវ គតាតិ អដ្ឋកថាយំ វុត្តេន សីហឡទីបតោ សុវណ្ណភូមិំ គតមគ្គប្បមាណេន សុខម្មបុរតោ សីហឡទីបំ គតមគ្គប្បមាណំ សមេតិ. សុធម្មេ បុរតោ កិរ ហិ ហិំសឡទីបំ សត្តមត្តានិ យោជនសតានិ ហោន្តិ, ឧជុំ វាយុអាគមនកាលេ គច្ឆន្តិ វាយុនាវា សត្តហិ អហោរត្តេហិ សម្បាបុណាតិ. ឯវំមគ្គានុមានតោ វិញ្ញាយតិ.

កថំ ឋានានុមានតោ. សុវណ្ណភូមិ កិរ មហាសមុទ្ទសមីបេ តិដ្ឋតិ, នានាវេរជ្ជកានម្បិ វាណិជានំ ឧបសង្កមនដ្ឋានភូតំ មហាតិត្ថំ ហោតិ. តេនេវ មហាជនកកុមារាទយោ ចម្បានគរាទិតោ សំវោហារត្ថាយ នាវាយ សុវណ្ណភូមិំ អាគមំសូតិ. សុធម្មបុរម្បិ អធុនា មហាសមុទ្ទសមីបេយេវ តិដ្ឋតិ. ឯវំ ឋានានុមាសតោ វិញ្ញាយតីតិ.

អបរេ បន សុវណ្ណភូមិនាម ហរិភុញ្ជរដ្ឋំយេវ, តត្ថ សុ វណ្ណស្ស ពាហុល្លត្តាតិ វទន្តិ. អញ្ញេ បន សិយាមរដ្ឋំយេវាតិ វទន្តិ. តំ សព្ពំ វិមំសិតព្ពំ.

អបរន្តំ នាម វិសុំ ឯករដ្ឋមេវាតិ អបរេ វទន្តិ. អញ្ញេ បន អបរន្តំនាម សុនាបរន្តរដ្ឋមេវាតិ វទន្តិ. តំ យុត្តមេវ. កស្មា អបរន្តំ នាម សុនាបរន្តរដ្ឋមេវាតិ វិញ្ញាយតីតិ ចេ. អដ្ឋកថាសុ ទ្វីហិ នាមេហិ វុត្តត្តា. ឧបរិបណ្ណាសអដ្ឋកថាយញ្ហិ សឡាយតនសំយុត្តដ្ឋកថាយញ្ច អដ្ឋកថាចរិយេហិ សុនាបរន្តរដ្ឋេ កោណ្ឌធានត្ថេរេន សលាកាទានាធិការេ លទ្ធេតទគ្គដ្ឋានតំ ទស្សន្តេហិ អបរន្តរដ្ឋំ សុន សទ្ទេន យោជេត្វា វុត្តំ. ធម្មបទដ្ឋកថាយំ បន អង្គុត្តរដ្ឋកថាយញ្ច តមេវ រដ្ឋំ វិនា សុនសទ្ទេន វុត្តំ. សុនសទ្ទោ ចេត្ថ បុត្តបរិយាយោ. មន្ធាតុរញ្ញោ ជេដ្ឋបុត្តោ ចតុទ្ទីបវាសិ នោ ¶ បក្កោសិត្វា តេសំ វិសុំ វិសុំ និវាសដ្ឋានំ និយ្យាទេសិ. តត្ថ ឧត្តរទីបវាសីនំ ឋានំ កុរុរដ្ឋំនាម, បុព្ពទីបវាសីនំ បន វេទេហរដ្ឋំនាម, បច្ឆិមទីបវាសីនំ អបរន្តំ នាម. ភត្តបច្ឆិមទីបេ ជាតត្តា តេ សុនសទ្ទេន វុត្តា. តត្រ ជាតាបិ ហិ តេសំ បុត្តាតិវា សុនាតិវា វុត្តា, យថា វជ្ជិបុត្តកា ភិក្ខូតិ. វត្តិច្ឆាវសេន វា វាចាសិលិដ្ឋវសេន ច ឥទមេវ សុនសទ្ទេន វិសេសេត្វា វោហរន្តីតិ ទដ្ឋព្ពំ.

យោនករដ្ឋំនាម យវនមនុស្សានំ និវាសដ្ឋានមេវ, យំជង្គមង្ឃឥតិ វុច្ចតិ.

វនវាសីរដ្ឋំនាម សិរិខេត្តនគរដ្ឋានមោ. កេចិ បន វនវាសីរដ្ឋំនាម ឯកំ រដ្ឋមេវ, ន សិរិខេត្តនគរដ្ឋានន្តិ វទន្តិ. តំ ន សុន្ទរំ. សិរិខេត្តនគរដ្ឋានមេវ ហិ វនវាសីរដ្ឋំ នាម. កស្មា បនេតំ វិញ្ញាយតីតិចេ. ឥមស្ស អម្ហាកំ រញ្ញោ ភាតិករញ្ញោ កាលេ សិរិខេត្តនគរេ គុម្ភេហិ បដិច្ឆាទិតេ ឯកស្មិំ បថវិបុញ្ជេ អន្តោ និម្មុជ្ជិត្វា ឋិតំ បោរាណិកំ ឯកំ លោហមយពុទ្ធបដិបិព្ពំ បដិលភិ, តស្ស ច បល្លង្កេ ឥទំ វនវាសីរដ្ឋវាសីនំ បូជនត្ថាយាតិអាទិនា បោរាណលេខនំ ទិស្សតិ, តស្មា យេវេតំ វិញ្ញាយតីតិ.

កស្មីរគន្ធាររដ្ឋំនាម កស្មីររដ្ឋំ គន្ធាររដ្ឋញ្ច. តានិ បន រដ្ឋានិ ឯកាពទ្ធានិ ហុត្វា តិដ្ឋន្តិ. តេនេវ មជ្ឈន្តិ កត្ថេរំ ឯកំ ទ្វីសុ រដ្ឋេសុ បេសេសិ. ជនបទត្តា បន នបុំសកេកត្តំ ភវតិ. តទា បន ឯកស្ស រញ្ញោ អាណាយ បតិដ្ឋានវិសយត្តា ឯកត្តវចនេន អដ្ឋកថាយំ វុត្តន្តិបិ វទន្តិ.

មហិំសកមណ្ឌលំនាម អន្ធករដ្ឋំ, យំ យក្ខបុររដ្ឋន្តិ វុច្ចតិ.

មហារដ្ឋំនាម មហានគររដ្ឋំ. អាធុនា ហិ មហារដ្ឋមេវ ន គរសទ្ទេន យោជេត្វា មហានគររដ្ឋន្តិ វោហរន្តីតិ. សិយាមរដ្ឋន្តិបិ វទន្តិ អាចរិយា.

ចិនរដ្ឋំនាម ¶ ហិមវន្តេន ឯកាពទ្ធំ ហុត្វា ឋិតំ ចីនរដ្ឋំ យេ វាតិ.

ឥទំ សាសនស្ស នវសុ ឋានេសុ វិសុំ វិសុំ បតិដ្ឋានំ.

ឥទានិ អាទិតោ បដ្ឋាយ ថេរបរម្បរកថា វត្តព្ពា. សម្មាសម្ពុទ្ធស្ស ហិ ភគវតោ សទ្ធិវិហារិកោ ឧបាលិត្ថេ រោ,តស្ស សិស្សោ ទាសកត្ថេរោ, តស្ស សិស្សោ សោណកត្ថេរោ, តស្ស សិស្សោ សិគ្គវត្ថេរោ ចន្ទវជ្ជិត្ថេ រោ ច, តេសំ សិស្សោ មោគ្គលិបុត្តតិស្សត្ថេរោតិ ឥមេ បញ្ចមហាថេរា សាសនវំសេ អាទិភូតា អាចរិយបរម្បរានាម. តេសញ្ហិ សិស្សបរម្បរភូតា ថេរបរម្បរា យាវជ្ជតនា ន ឧបច្ឆិន្ធន្តិ. អាចរិយបរម្បរាយ ច លជ្ជិភិក្ខូ យេវ បវេសេត្វា កថេតព្ពា នោ អលជ្ជិភិក្ខូ. អលជ្ជីភិក្ខូ នាម ហិ ពហុស្សុតាបិ សមានា លាភគរុលោកគរុអាទិហិ ធម្មតន្តិ នាសេត្វា សាសនវរេ មហាភយំ ឧប្បាទេន្តីតិ. សាសនរក្ខនកម្មំនាម ហិ លជ្ជីនំយេវ វិសយោ នោ អលជ្ជីនំ. តេនាហុ បោរាណា ថេរា, អនាគតេ សាសនំ កោ នាម រក្ខិស្សតីតិ អនុបេក្ខិត្វា អនាគតេ សាសនំ លជ្ជិនោ រក្ខិស្សន្តិ, លជ្ជិនោ រក្ខិស្សន្តិ, លជ្ជិនោ រក្ខិស្សន្តីតិ តិក្ខាត្តុំ វាចំ និច្ឆារេសុំ. ឯវំ មជ្ឈិមទេសេបិ អលជ្ជីបុគ្គលា ពហុ សន្តីតិ វេទិតព្ពា.

បរិនិព្ពានតោ ហិ ភគវតោ វស្សសតានំ ឧបរិ បុព្ពេ វុត្តនយេនេវ វជ្ជិបុត្តកា ភិក្ខូ អធម្មវត្ថូនិ ទីបេត្វា បឋមសង្គីតិកាលេ ពហិកតេហិ បាបភិក្ខូហិ សទ្ធិំ មន្តេត្វា សហាយំ គវេសេត្វា មហាសង្គីតិវោហារេន មហាថេរា វិយ សង្គីតិំ អកំសុ. កត្វា ច វិសុំ គណា អហេសុំ. អហោវត ឥទំ ហាសិតព្ពកម្មំ, សេយ្យថាបិ នាម ជរសិង្គាលោ ចតុបទសាមញ្ញេន មានំ ជប្បេត្វា អត្តានំ សីហំ វិយ មញ្ញិត្វា សីហោ វិយ សីហនាទំ នទីតិ. តេ បាវចនំ យថា ភូតំ ¶ អជានិត្វា សទ្ទច្ឆាយាមត្តេន យថាភូតំ អត្ថំ នាម សិំសុ. កិញ្ចិ បាវចនម្បី អបនេសុំ. តញ្ច សកគណេយេវ ហោតិ, ន ធម្មវាទីគណេ. ធម្មវិនយំ វិកោបេត្វា យថិច្ឆិត វសេនេវ ចរិំសុ. អយំ បន មហាសង្គីតិនាម ឯកោ អធម្មវាទីគណោ.

តតោ បច្ឆា កាលំ អតិក្កន្តេ តតោយេវ អញ្ញមញ្ញំ វាទតោ ភិជ្ជិត្វា គោកុលិកោនាម ឯកោ គណោ ឯកព្យោហារោនាម ឯកោតិ ទ្វេ គណា ភិជ្ជិំសុ. តតោ បច្ឆា គោកុលិកគណគណតោយេវ អញ្ញមញ្ញំ ភិជ្ជិត្វា ពហុស្សុតិកោនាម ឯកោ គណោ បញ្ញត្តិវាទោនាម ឯកោតិ ទ្វេ គណា ភិជ្ជិំសុ. បុនបិ តេហិយេវ គណេហិ ចេតិយវាទោនាម ឯកោ គណោ ភិជ្ជិ.

តតោ បច្ឆា ចិរកាលំ អតិក្កន្តេ ធម្មវាទីគណេហិ វិសភាគគណំ បវិសិត្វា មហិំសាសកោនាម ឯកោគណោ វជ្ជិបុត្តកោនាម ឯកោតិ ទ្វេ គណា ភិជ្ជិំសុ. តតោ បច្ឆាបិ វជ្ជិបុត្តកគណតោយេវ អញ្ញមញ្ញំ ភិជ្ជិត្វា ធម្មុត្តរិកោនាម ឯកោ គណោ, ភទ្ទយានិកោនាម ឯកោ, ឆន្នាគារិកោនាម ឯកោ, សមុតិកោនាម ឯកោតិ ចត្តារោ គណា ភិជ្ជិំសុ.

បុនបិ មហិំសាសកគណតោ អញ្ញមញ្ញំ ភិជ្ជិត្វា សព្ពត្ថិវាទោនាម ឯកោ គណោ, ធម្មគុត្តិកោនាម ឯកោ, កស្សបិយោនាម ឯកោ, សង្កន្តិកោនាម ឯកោ, សុត្តវាទោ នាម ឯកោតិ បញ្ច គណា ភិជ្ជិំសុ.

ឯវំ មជ្ឈិមទេសេ ទុតិយសង្គីតិំ សង្គាយន្តានំ មហាថេរានំ ធម្មវាទីថេរវាទគណតោ វិសុំ វិសុំ ភិជ្ជមានា អធម្មវាទីគណា សត្តរស អហេសុំ. តេ ច អធម្មវាទីគណា សាសនេ ថេរបរម្បរាយ អនន្តោ គធា. តេ ហិ សាសនេ ឧបការា ន ហោន្តិ, ថេរបរម្បរាយ ច បវេសេត្វា គណ្ហិតុំ ន សក្កា, យថា ហំសគណេ ពកោ, យថា ច គោ គណេ ¶ គវជោ, យថា ច សុវណ្ណគណេ ហារកុដោតិ.

មហាកស្សបត្ថេរាទិតោ បន អាគតា ថេរបរម្បរា ឧបាលិ ទាសកោ ចេវាតិអាទិនា បរិវារខន្ធកេ សមន្តបាសាទិកដ្ឋកថាយញ្ច អាគតនយេនេវ វេទិតព្ពា.

ឧបាលិត្ថេរាទីនំ បរិសុទ្ធាចារាទីនិ អនុមានេត្វា យាវ មោគ្គលិបុត្តតិស្សត្ថេរា, តាវ តេសំ ថេរានំ បរិសុទ្ធា ចារាទីនីតិ សក្កា ញាតុំ, សេយ្យថាបិ នទិយា ឧបរិសោតេ មេឃវស្សានិ អនុមានេត្វា អធោសោតេ នទិយា ឧទកស្ស ពាហុល្លភាវោ វិញ្ញាតុំ សក្កាតិ អយំ ការណានុមាននយោ នាម.

យាវ បន មោគ្គលិបុត្តតិស្សត្ថេរា, តាវ ថេរានំ បរិសុទ្ធាចារាទីនិ អនុមានេត្វា ឧបាលិត្ថេរស្ស បរិសុទ្ធាចារាទីនីតិ សក្កា ញាតុំ, សេយ្យថាបិ នាម ឧបរិធូមំ បស្សិត្វា អនុមានេត្វា អគ្គិ អត្ថីតិ សក្កា ញាតុន្តិ អយំ ផលានុមានន យោ នាម.

អទិភូតស្ស បន ឧបាលិត្ថេរស្ស អវសានភូតស្ស ច មោគ្គលិបុត្តតិស្សត្ថេរស្ស បរិសុទ្ធាចារាទីនិ អនុមានេត្វា មជ្ឈេ ទាសកសោណសិគ្គវាទីនំ ថេរានំ បរិសុទ្ធាចារាទីនិតិ សក្កា ញាតុំ, សេយ្យថាបិ នាម សិលាបដ្ដស្ស ឱរភាគេ បារភាគេ ច មិគបទវឡញ្ជនំ ទិស្វា អនុមានេត្វា មជ្ឈេ អបាកដំ បទវឡញ្ចនំ អត្ថីតិ សក្កា ញាតុន្តិ អយំ មិគបទវឡញ្ជន នយោ នាម.

ឯវំ តីហិ នយេហិ អយំ ថេរវាទគណោ ធម្មវាទីលជ្ជិបេសលោតិ វេទិតព្ពោ. ឯវមុបរិបិ នយោ នេតព្ពោ. ថេរបរម្បរា ច យាវ បោត្ថការុឡា បរិវារខន្ធកេ សមន្ត បាសាទិកាយញ្ច តតោ មហិន្ទោ ឥដ្ដិយោតិអាទិនា វុត្ត នយេន វេទិតព្ពាតិ.

ឥតិ សាសនវំសេ នវដ្ឋានាគតសាសនវំសកថាមគ្គោ

២. ឥទានិ ¶ សីហឡទីបសាសនកថាមគ្គំ វត្តុំ ឱកាសោ អនុប្បត្តោ, តស្មា តំ វក្ខាមិ.

សីហឡទីបញ្ហិ សាសនស្ស បតិដ្ឋានភូតត្តា ចេតិយគព្ភសទិសំ ហោតិ. សម្មាសម្ពុទ្ធោ កិរ សីហឡទីបំ ធរមានកាលេបិ តិក្ខត្តុំ អគមាសិ. បឋមំ យក្ខានំ ទមនត្ថំ ឯកកោវ គន្ត្វា យក្ខេ ទមេត្វា មយិ បរិនិព្ពុតេ សីហឡទីបេ សាសនំ បតិដ្ឋហិស្សតីតិ តម្ពបណ្ណិទីបេ អារក្ខំ ករោន្តោ តិក្ខត្តុំ ទីបំ អាវិញ្ឆិ. ទុតិយំ មាតុលភាគិនេយ្យានំ នាគរា ជូនំ ទមនត្ថាយ ឯកកោវ គន្ត្វា តេ ទមេត្វា អគមាសិ. តតិយំ បញ្ចភិក្ខុសតបរិវារោ គន្ត្វា មហាចេតិយដ្ឋានេ ច ថូបារាមចេតិយដ្ឋានេ ច មហាពោធិបតិដ្ឋិតដ្ឋានេ ច មហិយង្គណចេតិយដ្ឋានេ ច មុទិង្គណចេតិយដ្ឋានេ ច ទីឃវាបិ ចេតិយដ្ឋានេ ច កល្យាណិយចេតិយដ្ឋានេ ច និរោធសមាបត្តិំ សមាបជ្ជិត្វា និសីទិ.

តទា ច បន សាសនំ ឱគាហេត្វាន តាវ តិដ្ឋតិ. បច្ឆា បន យថាវុត្តត្ថេរបរម្បរាយ សមភិនិវិដ្ឋេន មហាមោគ្គលិបុត្តតិស្សត្ថេរេន បេសិតោ មហិន្ទត្ថេរោ ជិនចក្កេ បញ្ចតិំសាធិកេ ទ្វិសតេ សម្បត្តេ ទុតិយកត្តិកមាសេ ឥដ្ដិយេន ឧត្តិយេន សម្ពុលេន ភទ្ទសាលេន ចាតិ ឯតេហិ ថេរេហិ សទ្ធិំ សីហឡទីបំ អគមាសិ. សោណុត្តរត្ថេរាទយោ ជិនចក្កេ បញ្ចតិំសាធិកេ ទ្វិសតេ សម្បត្តេ ទុតិយកត្តិកមាសេយេវ សាសនស្ស បតិដ្ឋាបនត្ថាយ អត្តនោ អត្តនោ សម្បត្តភារភូតំ តំ តំ ឋានំ អគមំសុ.

មហាមហិន្ទត្ថេរោ បន សត្តមាសានិ អាគមេត្វា ជិនចក្កេ ឆត្តិំសាធិកេ ទ្វិសតេ សម្បត្តេ ជេដ្ឋមាសស្ស បុណ្ណមិយំ សីហឡទីបំ សាសនស្ស បតិដ្ឋាបនត្ថាយ អគមាសិ. តេនេវ តេសុ នវសុ ឋានេសុ សីហឡទីបំ ឆត្តិំសាធិកេ ទ្វិស តេ ¶ អគមាសិ. អញ្ញានិ បន អដ្ឋ ឋានានិ បញ្ចតិំសាធិកទ្វិសតេយេវ អគមាសីតិ វិសុំវ វត្ថបេតព្ពោ.

កស្មា បន មហាមហិន្ទត្ថេរោ សត្តមាសានិ អាគមេត្វា សព្ពបច្ឆា សីហឡទីបំ គច្ឆតីតិ. សីហឡទីបេ មុដភិវោ នាម រាជា ជរាទុព្ពលោ អហោតិ, សាសនំ បគ្គហេតុំ អសមត្ថោ, តស្ស បន បុត្តោ ទេវានំ បិយ តិស្សោ នាម រាជកុមារោ ទហរោ សាសនំ បគ្គហេតុំ សមត្ថោ ភវិស្សតិ, សោ ច ទេវានំ វិយតិស្សោ រជ្ជំ តាវ លភតុ វេទិស្សកគិរិនគរេ មាតុយា សទ្ធិំ ញាតកេ តាវ បស្សាមីតិ អបេក្ខិត្វា សត្តមាសានិ អាគមេត្វា ឆត្តិំសាធិកទ្វិសតេយេវ ជិនចក្កេ មហាមហិន្ទត្ថេរោ សីហឡទីបំ គច្ឆតីតិ វេទិតព្ពំ.

មហាមហិន្ទត្ថេរោ ច ឥដ្ដិយាទីហិ ថេរេហិ ចតូហិ ភាគិនេយ្យេន សុមនសាមណេរេន ភណ្ឌុកេន នាម ឧបាសកេ ន ចាតិ ឯតេហិ សទ្ធិំ ឆត្តិំសាធិកេ ទ្វិសតេ ជិនចក្កេ ជេដ្ឋមាសបុណ្ណមិយំ សុវណ្ណហំសា វិយ ជេដ្ឋមាសេ នភំ ឧគ្គន្ត្វា អាកាសមគ្គេន អនុរាធបុរស្ស បុរត្ថិមទិសាភាគេ មិស្ស កបព្ពតកូដេ បតិដ្ឋាសិ.

ជេដ្ឋមាសស្ស ច បុណ្ណមិយំ លង្កាទីបេ ជេដ្ឋមូលនក្ខត្តសភា ហុត្វា មនុស្សា ឆណំ អកំសុ. តេនេវាហ សារត្ថទីបនិយំ នាម វិនយឌីកាយំ, ជេដ្ឋមាសស្ស បុណ្ណមិយំ ជេដ្ឋនក្ខត្តំ មូលនក្ខត្តំ វា ហោតីតិ. តត្ថ ច បុណ្ណមិនក្ខត្តំ រាជមត្តន្តេ បុណ្ណមិនក្ខត្តវិចារណនយេន វុត្តន្តិ ទដ្ឋព្ពំ.

ទេវានំ បិយ តិស្សោ ច រាជា នក្ខត្តំ នាម ឃោសាបេត្វា ឆណំ ការេថាតិ អមច្ចេ អាណាបេត្វា ចត្តាលី សបុរិសសហស្សបរិវារោ នគរម្ហា និក្ខមិត្វា យេន មិស្ស កបព្ពតោ, តេន បាយាសិ មិគវំ កីឡិតុកាមោ. អថ តស្មិំ បព្ពតេ អធិវត្ថា ឯកា ទេវតា មិគរូបេន រាជានំ ផលោភេត្វា បក្កោសិត្វា ថេរស្ស អភិមុខំ អកាសិ.

ថេរោ ¶ រាជានំ អាគច្ឆន្តំ ទិស្វា មមំយេវ រាជា បស្សតុ មា ឥតរេតិ អធិដ្ឋហិត្វា តិស្ស តិស្ស ឥតោ ឯហីតិ អាហ. រាជា តំ សុត្វា ចិន្តេសិ, ឥមស្មិំ ទីបេ ជាតោ សកលោបិ មនុស្សោ មំ តិស្សោតិ នាមំ គហេត្វា អាលបិតុំ សមត្ថោ នាម នត្ថិ, អយំ បន ភិន្នភិន្នបដធរោ ភណ្ឌុកាសាវ វសនោ មំ នាមេន អាលបតិ, កោ នុខោ អយំ ភវិស្សតិ, មនុស្សោ វា អមនុស្សោ វាតិ. ថេរោ អាហ,–

សមណា មយំ មហារាជ, ធម្មរាជស្ស សាវកា;

តវេវ អនុកម្បាយ, ជម្ពុទីបា ឥធាគតាតិ.

តទា ច ទេវានំ បិយតិស្សោ រាជា អសោករញ្ញា បេសិតេន អភិសេកេន ឯកមាសាភិសិត្តោ អហោសិ. វិសាខបុណ្ណមាយំ ហិស្ស អភិសេកមកំសុ. សោ ច អសោករញ្ញា បេសិតេ ធម្មបណ្ណាការេ រតនត្តយគុណប្បដិសំយុត្តំ សាសនប្បវត្តិំ អចិរសុតំ អនុស្សរមានោ តំ ថេរស្ស សមណា មយំ មហារាជ, ធម្មរាជស្ស សាវកាតិ វចនំ សុត្វា អយ្យា នុខោ អាគតាតិ តាវទេវ អាវុធំ និក្ខិបិត្វា ឯកមន្តំ និសីទិ សម្មោទនីយំ កថំ កថយមានោ. យថាហ,–

អាវុធំ និក្ខិបិត្វាន, ឯកមន្តំ ឧបាវិសិ;

និសជ្ជ រាជា សម្មោទិ, ពហុំ អត្ថូបសញ្ហិតន្តិ.

សម្មោទនីយំ កថញ្ច កុរុមានេយេវ តស្មិំ តានិបិ ចត្តាលីសបុរិសសហស្សានិ អាគន្ត្វា សម្បរិវារេសុំ. តទាថេរោ ឥតរេបិ ឆ ជនេ ទស្សេសិ. រាជា ទិស្វា ឥមេ កទា អាគតាតិ អាហ. មយា សទ្ធិំយេវ មហារាជាតិ. ឥទានិ បន ជម្ពុទីបេ អញ្ញេបិ ឯវរូបា សមណា សន្តីតិ. សន្តិ ¶ មហារាជ ឯតរហិជម្ពុទីបោ កាលាវបជ្ជោតោ ឥសិវាតបដិវាតោ, តស្មិំ–

តេវិជ្ជា ឥទ្ធិបត្តា ច, ចេតោបរិយកោវិទា;

ខីណាសវា អរហន្តោ, ពហូ ពុទ្ធស្ស សាវកាតិ.

ភន្តេ កេន អាគតត្ថាតិ. នេវ មហារាជ ឧទកេន, ន ថលេនាតិ. រាជា អាកាសេន អាគតាតិ អញ្ញាសិ. ថេរោ អត្ថិ នុខោ រញ្ញោ បស្សាវេយ្យត្តិកន្តិ វីមំសនត្ថាយ អាសន្នំ អម្ពរុក្ខំ អារព្ភ បញ្ហំ បុច្ឆិ, –

កិន្នាមោ មហារាជ អយំ រុក្ខោតិ. អម្ពរុក្ខោ នាម ភន្តេតិ. ឥមំ បន មហារាជ អម្ពំ មុញ្ចិត្វា អញ្ញោ អម្ពោ អត្ថិ វា នត្ថិ វាតិ. អត្ថិ ភន្តេ អញ្ញេបិ ពហូ អម្ពរុក្ខាតិ. ឥមញ្ច អម្ពំ តេ ច អម្ពេ មុញ្ចិត្វា អត្ថិ នុខោ មហារាជ អញ្ញេ រុក្ខាតិ. អត្ថិ ភន្តេ, តេ បន ន អម្ពរុក្ខាតិ. អញ្ញេ ច អម្ពេ អនម្ពេ ច មុញ្ចិត្វា អត្ថិ បន អញ្ញោ រុក្ខោតិ. អយមេវ ភន្តេ អម្ព រុក្ខោតិ. សាធុ មហារាជ បណ្ឌិតោសីតិ.

អត្ថិ បន មហារាជ តេ ញាតកាតិ. អត្ថិ ភន្តេ ពហូជនាតិ. តេ មុញ្ចិត្វា កេចិ អញ្ញាតកាបិ អត្ថិ មហារាជាតិ. អញ្ញាតកា ភន្តេ ញាតកេហិ ពហុតរាតិ. តវញាតកេ ច អញ្ញាតកេ ច មុញ្ចិត្វា អត្ថញ្ញោ កោចិ មហារាជាតិ. អហមេវ ភន្តេតិ. សាធុ មហារាជ អត្តា នាម អត្តនោ នេវ ញាតកោ ន អញ្ញាតកោតិ.

អថ ថេរោ បណ្ឌិតោ រាជា សក្ខិស្សតិ ធម្មំ អញ្ញាតុន្តិ ចូឡហត្ថិបទោបមសុត្តំ កថេសិ. កថាបរិយោសានេ រាជា តីសុ សរណេសុ បតិដ្ឋហិ សទ្ធិំ ចត្តាលីសាយ បាណសហស្សេហីតិ. តតោ បរំ យំ យំ វត្តព្ពំ, តំ តំ សមន្តបាសាទិកាទីសុ វុត្តនយេន វេទិតព្ពំ.

ឥច្ចេវំ សីហឡទីបេ សាសនានុគ្គហណ មហិន្ទត្ថេរតោ អាគតា ¶ សិស្សបរម្បរា ពហូ ហោន្តិ, គណនបថំ វីតិ វត្តា. កថំ. មហាមហិន្ទត្ថេរស្ស សិស្សោ អរិដ្ឋោ នាម ថេរោ, តស្ស សិស្សោ តិស្សទត្តោ, តស្ស សិស្សោ កាឡសុមនោ, តស្ស សិស្សោ ទីឃោ, តស្ស សិស្សោ ទីឃ សុមនោ, តស្ស សិស្សោ កាឡសុមនោ, តស្ស សិស្សោ នាគោ, តស្ស សិស្សោ ពុទ្ធរក្ខិតោ, តស្ស សិស្សោ តិស្សោ, តស្ស សិស្សោ រេវោ, តស្ស សិស្សោ សុមនោ, តស្ស សិស្សោ ចូឡនាគោ, តស្ស សិស្សោ ធម្មបាលិ ឯតា, តស្ស សិស្សោ ខេមោ, តស្ស សិស្សោ ឧបលិស្សោ, តស្ស សិស្សោ ផុស្សទេវោ, តស្ស សិស្សោ សុមនោ, តស្ស សិស្សោ មហាបទុមោ, តស្ស សិស្សោ មហាសីវោ, តស្ស សិស្សោ ឧបាលិ, តស្ស សិស្សោ មហានាគោ, តស្ស សិស្សោ អភយោ, តស្ស សិស្សោ តិស្សោ, តស្ស សិស្សោ សុមនោ, តស្ស សិស្សោ ចូឡាភយោ, តស្ស សិស្សោ តិស្សោ, តស្ស សិស្សោ ចូឡទេវោ, តស្ស សិស្សោ សីវោតិ. អយំ យាវ បោត្ថការុឡសង្ខាតា ចតុត្ថសង្គីតិកា, តាវ ថេរបរម្បរាតិ ទដ្ឋព្ពា.

វុត្តញ្ហេតំ អដ្ឋកថាយំ,– យាវជ្ជភនា តេសំយេវ អន្តេវាសិកបរម្បរភូតាយ អាចរិយបរម្បរាយ អាភតន្តិតិ វេទិតព្ពន្តិ.

ឯវំ តេសំ សិស្សបរម្បរភូតា អាចរិយបរម្បរា យាវជ្ជតនា សាសនេ បាកដា ហុត្វា អាគច្ឆន្តីតិ វេទិតព្ព.

សាសនេ វិនយធរេហិ នាម តិលក្ខណសម្បន្នេហិ ភវិតព្ពំ. តីណិ ហិ វិនយធរស្ស លក្ខណានិ ឥច្ឆិ តព្ពានិ. កតមានិ តីណិ. សុត្តញ្ចស្ស ស្វាគតំ ហោតិ សុប្បវត្តិ សុវិនិច្ឆិតំ សុត្តតោ អនុព្យញ្ជនតោតិ ឥទមេកំ លក្ខណំ, វិនយេ ខោ បន ឋិតោ ហោតិ អសំហីរោតិ ឥទំ ទុតិយំ, អាចរិយបរម្បរា ខោ បនស្ស សុគ្គហិតា ហោតិ សុមនសិកតា សុបធារិតាតិ ឥទំ តតិយំ.

តត្ថ ¶ អាចរិយបរម្បរា ខោ បនស្ស សុគ្គហិតា ហោតីតិ ថេរបរម្បរា វំសបរម្បរា ចស្ស សុដ្ឋុគហិតា ហោតិ. សុមនសិកតាតិ សុដ្ឋុ មនសិកតា, អាវជ្ជិតមត្តេ ញជ្ជលិ តប្បទីបោ វិយ ហោតិ.

សុបធារិតាតិ សុដ្ឋុ ឧបធារិតា, បុព្ពាបរានុសន្ធិតោ អត្ថតោ ការណតោ ច ឧប ធារិតា. អត្តនោ មតិំ បហាយ អាចរិយសុទ្ធិយា វត្តា ហោតិ, មយ្ហំ អាចរិយោ អសុកាចរិយស្ស សន្តិកេ ឧគ្គណ្ហិ, សោ អសុកស្សាតិ ឯវំ សព្ពំ អាចរិយបរម្បរំ ថេរ វាទង្គំ អាហរិត្វា យាវ ឧបាលិត្ថេរោ សម្មាសម្ពុទ្ធស្ស សន្តិកេ ឧគ្គណ្ហីតិ បាបេត្វា ឋបេតិ. តតោបិ អាហរិត្វា ឧបាលិត្ថេរោ សម្មាសម្ពុទ្ធស្ស សន្តិកេ ឧគ្គណ្ហិ, ទាសកត្ថេរោ អត្តនោ ឧបជ្ឈាយស្ស ឧបាលិត្ថេរស្ស, សោណកត្ថេរោ អត្តនោ ឧបជ្ឈាយស្ស ទោសកត្ថេរស្ស, សិគ្គវត្ថេរោ អត្តនោ ឧបជ្ឈាយស្ស សោណកត្ថេរស្ស, មោគ្គលិបុត្តតិស្សត្ថេរោ អត្តនោ ឧបជ្ឈាយស្ស សិគ្គវត្ថេរស្ស ចណ្ឌ វជ្ជិត្ថេរស្ស ចាតិ ឯវំ សព្ពំ អាចរិយបរម្បរំ ថេរវាទង្គំ អាហរិត្វា អត្តនោ អាចរិយំ បាបេត្វា ឋបេតិ. ឯវំ ឧគ្គហិតា ហិ អាចរិយបរម្បរា សុគ្គហិតា ហោតិ.

ឯវំ អសក្កោន្តេន បន ទ្វេ តយោ បរិវដ្ដា ឧគ្គហេតព្ពា. សព្ពបច្ឆិមេន ហិ នយេន យថា អាចរិយោ ច អាចរិយាចរិយោ ច បាឡិញ្ច បរិបុញ្ឆញ្ច វទន្តិ, តថា ញាតុំ វត្តតីតិ.

យថា វុត្តត្ថេរបរម្បរា បន ភគវតោ ធរមានកាលតោ បដ្ឋាយ យាវ បោត្ថការុឡា មុខបាឋេនេវ បិដកត្តយំ ធារេសុំ, បរិបុណ្ណំ បន កត្វា បោត្ថកេ លិខិត្វា ន ឋបេន្តិ. ឯវំ មហាថេរា ទុក្ករកម្មំ កត្វា សាសនំ បគ្គណ្ហិំសុ. តត្រិទំ វត្ថុ,–

សីហឡទីបេ កិរ ចណ្ឌាលតិស្សភយេន សង្ខុព្ភិត្វា ទេវោ ¶ ច អវស្សិត្វា ទុព្ភិក្ខភយំ ឧប្បជ្ជិ. តទា អក្កោ ទេវានមិន្ទោ អាគន្ត្វា តុម្ហេ ភន្តេ បិដកំ ធារេតុំ ន សក្ខិស្សថ, នាវំ បន អារូហិត្វា ជម្ពុទីបំ គច្ឆថ, សចេ នាវា អប្បហោនកា ភវេយ្យ, កដ្ឋេន វា វេឡុនា វា តរថ, អភយត្ថាយ បន មយំ រក្ខិស្សាមាតិ អាហ.

តទា សដ្ឋិមត្តា ភិក្ខូ សមុទ្ទតីរំ គន្ត្វា បុន ឯតទហោសិ,– មយំ ជម្ពុទីបំ ន គច្ឆិស្សាម, ឥធេវ វសិត្វា តេបិដកំ ធារិស្សាមាតិ. តតោ បច្ឆា នាវា តិត្ថតោ និវត្តិត្វា សីហឡទីបេកទេសំ មលយជនបទំ គន្ត្វា មូលផលាទីហិយេវ យាបេត្វា សជ្ឈាយំ អកំសុ. ឆាតកភយេន អតិបីឡិតា ហុត្វា ឯវម្បិ កាតុំ អសក្កោន្តោ វាឡុកតលេ ឧរំ ឋបេត្វា សីសេន សីសំ អភិមុខំ កត្វា វាចំ អនិច្ឆារេត្វា មនសាយេវ អកំសុ. ឯវំ ទ្វាទសវស្សានិ សទ្ធិំ អដ្ឋកថាយ តេបិដកំ រក្ខិត្វា សាសនំ អនុគ្គហេសុំ.

ទ្វាទសវស្សេសុ បន អតិក្កន្តេសុ តំ ភយំ វូបសមិត្វា បុព្ពេ ជម្ពុទីបំ គច្ឆន្តា សត្តភិក្ខុសតា អាគន្ត្វា សីហឡទីបេកទេសំ រាមជនបទេ មណ្ឌលារាមវិហារំ អាបជ្ជិំសុ. តេបិ សដ្ឋិមត្តា ភិក្ខូ តមេវ វិហារំ គន្ត្វា អញ្ញមញ្ញំ សម្មន្តេត្វា សជ្ឈាយិំសុ. តទា អញ្ញមញ្ញំ សមេន្តិ, ន វិរុជ្ឈន្តិ, គង្គាទកេន វិយ យមុនោទកំ សំសន្ទេន្តិ. ឯវំ បិដកត្តយំ មុខបាឋេនេវ ធារេត្វា មហាថេរា ទុក្ករកម្មំ ករោន្តីតិ វេទិតព្ពា.

យម្បិ បរិយត្តិំ ឯកបទមត្តម្បិ អវិរជ្ឈិត្វា ធារេន្តិ, តំ ទុក្ករកម្មមេវ.

សីហឡទីបេ កិរ បុនព្ពសុកស្ស នាម កុដុម្ពិកស្ស បុត្តោ តិស្សត្ថេរោ ពុទ្ធវចនំ ឧគ្គណ្ហិត្វា ឥមំ ជម្ពុទីបំ អាគន្ត្វា យោនកធម្មរក្ខិតត្ថេរស្ស សន្តិកេ ពុទ្ធវចនំ ឧគ្គណ្ហិត្វា គច្ឆន្តោ នាវំ អភិរូហនតិត្ថេ ឯកស្មិំ បទេ ឧប្បន្នកង្ខោ យោជនសតមគ្គំ និវត្តិត្វា អាចរិយស្ស សន្តិកំ អាគច្ឆន្តោ ¶ អន្តរាមគ្គេ ឯកស្ស កុដុម្ពិកស្ស បញ្ហំ កថេសិ. សោ បសីទិត្វា សតសហស្សគ្ឃនកំ កម្បលំ អទាសិ. សោបិ តំ អាហរិត្វា អាចរិយស្ស អទាសិ. ថេរោ វា សិយា កោដ្ដេត្វា និសីទនដ្ឋានេ បរិភណ្ឌំ ការេសិ. កិមត្ថាយាតិ. បច្ឆិមាយ ជនតាយ អនុគ្គហត្ថាយ. ឯវំ កិរស្ស អហោសិ,– អម្ហាកំ គតមគ្គំ អាវជ្ជិត្វា អនាគតេ សព្រហ្មចារិនោ បដិបត្តិំ បូរេតព្ពំ មញ្ញិស្សន្តីតិ. តិស្សត្ថេរោបិ អាចរិយស្ស សន្តិកេ កង្ខំ ឆិន្ទិត្វា សីហឡទីបមេវ សកដ្ឋានំ អាគមាសីតិ. ឥច្ចេវំ បរិយត្តិំ ឯកបទមត្តម្បិ អវិរជ្ឈិត្វា ធារណម្បិ ទុក្ករកម្មមេវាតិ ទដ្ឋព្ពំ.

យម្បិ យេភុយ្យេន បគុណំ ន ករោន្តិ, តស្ស អនន្តរធានត្ថាយ អសម្មោសត្ថាយ ឧគ្គហធារណាទិវសេន រក្ខនម្បិ ករោន្តិ, តំ ទុក្ករកម្មមេវ.

សីហឡទីបេយេវ កិរ មហាភយេ ឯកស្សេវ ភិក្ខុនោ មហានិទ្ទេសោ បគុណោ អហោសិ. អថ ចតុនិកាយិកតិស្សត្ថេរស្ស ឧបជ្ឈាយោ មហាតិបិដកត្ថេរោ នាម មហារក្ខិតត្ថេរំអាហ,– អាវុសោ មហារក្ខិត អសុកស្ស សន្តិកេ មហានិទ្ទេសំ គណ្ហាហីតិ. បាបោកិរាយំ ភន្តេ ន គណ្ហាមីតិ. គណ្ហាវុសោ អហំ តេ សន្តិកេ និសីទិស្សាមីតិ. សាធុ ភន្តេ តុម្ហេសុ និសិន្នេសុ គណ្ហិស្សាមីតិ បដ្ឋបត្វា រត្តិន្ទិវំ និរន្តរំ បរិយាបុណន្តោ ឱសានទិវសេ ហេដ្ឋាមញ្ចេ ឥត្ថិំ ទិស្វា ភន្តេ សុតំយេវ មេ បុព្ពេ, សចាហំ ឯវំ ជានេយ្យំ, ន ឦទិសស្ស សន្តិកេ ធម្មំ បរិយាបុណេយ្យន្តិ អាហ. តស្ស បន សន្តិកេ ពហូ មហាថេរា ឧគ្គណ្ហិត្វា មហានិទ្ទេសំ បតិដ្ឋាបេសុំ. ឯវំ យំ យេភុយ្យេន បគុណំ ន ករោន្តិ, តស្ស អនន្តរធានត្ថាយ អសម្មោសត្តាយ ឧគ្គហធារណាទិវសេន រក្ខនម្បិ ទុក្ករកម្មំ យេវាតិ ទដ្ឋព្ពំ.

ឥច្ចេវំ ភគវតោ ធរមានកាលតោ បភុតិ ចិរកាលំ យថាវុត្តមហាថេរបរម្បរា បរិយត្តិំ មុខបាឋេនេវ ធារេសុំ ¶ . អហោវត បោរាណិកានំ មហាថេរានំ សតិបញ្ញាសមាធិវេបុល្លតាយ ហិ តេ មុខបាឋេនេវ ធារេតុ សក្កាតិ. មុខបាឋេនេវ បោរាណកត្ថេរានំ បរិយត្តិធារណំ បញ្ចនវុតាធិកានិ ចតុសតានិ អហោសិ.

ភគវតោ បរិនិព្ពានតោ មហាវំសសារត្ថសង្គហេសុ អាគតនយេន ជិនចក្កេ បណ្ណាស្សាធិកេ ចតុសតេ សម្បត្តេ តម្ពបណ្ណិទីបេ រាជូនំ អដ្ឋារសមកោ’សទ្ធាតិស្សស្ស នាម រញ្ញោ បុត្តោ វដ្ដគាមណិ នាម រាជា រជ្ជំ បត្វា ឆវស្សកាលេ អនាគតេ សត្តា ហីនសតិបញ្ញាសមាធិកា ហុត្វា ន សក្ខិស្សន្តិ មុខបាឋេន ធារេតុន្តិ ឧបបរិក្ខិត្វា បុព្ពេ វុត្តេហិ មហាថេរេហិ អនុបុព្ពេន អាគតា បញ្ចមត្តា មហាថេរសតា វដ្ដគាមណិរាជានំ និស្សាយ តម្ពបណ្ណិទីបេកទេសេ មលយជនបទេ អាលោកលេណេ អដ្ឋកថាយ សហបិដកត្តយំ បោត្ថកេ អារោបេសុំ.

តញ្ច យថាវុត្តសង្គីតិយោ ឧបនិធាយ ចតុត្ថសង្គីតិយេវ នាមាតិ វេទិតព្ពា. វុត្តញ្ហេតំ សារត្ថទីបនិយំ នាម វិនយដីកាយំ,– ចតុត្ថសង្គីតិសទិសា ហិ បោត្ថការោហសង្គីតីតិ.

សីហឡទីបេ បន វដ្ដគាមណិរាជា មរម្មរដ្ឋេ សិរិខេត្តនគរេ ឯកោ នាម កុក្កុដសីសរាជា ច ឯកកាលេន រជ្ជំ ការេសិ. អមរបុរមាបកស្ស រញ្ញោ កាលេ សីហឡទីបភិក្ខុហិ ឥធ បេសិតសន្ទេសកថាយំ បន តេត្តិំសាធិកចតុសតេ សម្បត្តេ បោត្ថការុឡំ អកំសូតិ អាគតំ. វុត្តញ្ហេតំ តត្ថ,– តេត្តិំសាធិកចតុវស្សសតបរិមាណកាលន្តិ.

ឥទំ សីហឡទីបេ យាវ បោត្ថការុឡ្ហា

អថាបរំ ¶ ជម្ពុទីបេ សីហឡទីបេ ច ភិក្ខូ វិសុំ វិសុំ គណវសេន ភិជ្ជិំសុ, យថា អនោតត្តទហតោ និក្ខមននទិយា គង្គាយមុនាទិវសេន ភិជ្ជន្តីតិ. តត្ថ ជម្ពុទីបេ គណានំ ភិជ្ជមានតំ ឧបរិយេវ វក្ខាម.

សីហឡទីបេ បន គណានំ ភិជ្ជមានតា ឯវំ ទដ្ឋព្ពា. កថំ. សីហឡទីបេ ហិ សាសនស្ស បតិដ្ឋមានកាលតោ អដ្ឋារសាធិ កទ្វិវស្សសតេ សម្បត្តេ វដ្ដគាមណិរញ្ញា ការាវិតេ អភយគិរិវិហារេ បរិវារខន្ធកំ បាឋតោ ច អត្ថតោ ច វិបល្លាសំ កត្វា មហាវិហារវាសិគណតោ បុថុ ហុត្វា ឯកោ គណោ ភិជ្ជិ, សោ អភយគិរិវាសិគណោ នាម, ធម្មរុចិគណោតិ ច តស្សេវ នាមំ.

អភយគិរិវាសិគណស្ស ភិជ្ជមានតោ ទ្វេចត្តាលីសាធិកតិវស្សសតេ សម្បត្តេ មហាសេនេន នាម រញ្ញា ការាបិតេ ជេតវនវិហារេ ភិក្ខូ ឧភតោវិសង្គបាឋេ វិបរីតវសេន អភិសង្ខរិត្វា អភយគិរិវាសិគណតោ វិសុំ ឯកោ គណោ អហោសិ, សោ ជេតវនវាសិគណោ នាម, សាគលិយគណោតិ ច តស្សេវ នាមំ.

ជេតវន វាសិគណស្ស ភិជ្ជមានកាលតោ ឯកបញ្ញាសវស្សាធិកានំ តិណ្ណំ វស្សសតានំ ឧបរិ កុរុន្ទវាសិនោ ច កោលម្ពវាសិនោ ច ភិក្ខូ ភាគិនេយ្យំ ទាឋាបតិំ នាម រាជានំ និស្សាយ ឧភតោវិភង្គបរិវារខន្ធកបាឋេ វិបរីតវសេន អភិសង្ខរិត្វា វុត្តេហិ ទ្វីហិ គណេហិ វិសុំ ហុត្វា មហាវិហារ វាសិគណ្ហត្តមំ តុលយិត្វា ឧបធារេត្វា មហាវិហារនាមំ គហេត្វា ឯកោ គណោ ភិជ្ជិ. ឯវំ សីហឡទីបេ មហាមហិន្ទត្ថេរាទីនំ វំសភូតេន មហាវិហារវាសិ គណេន សទ្ធិំ ចត្តារោ គណា ភិជ្ជិំសុ.

តត្ថ មហាវិហារវាសិ គណោយេវ ឯកោ ធម្មវាទី អហោសិ, សេសា បន អធម្មវាទិនោ. តេ ច តយោ អធម្មវាទិនោ គណា ភូតត្ថំ បហាយ អភូតត្ថេន ធម្មំ អគរុំ កត្វា ចរិំសូតិ ¶ វចនតោ សីហឡទីបេ អធម្មវាទិនោ តយោបិ អលជ្ជិនោ គណា បរិមណ្ឌលសុប្បដិច្ឆន្នាទិសិក្ខាបទានិ អនាទិយិត្វា វិចរិំសុ. តតោ បដ្ឋាយ សាសនេ ឯកច្ចានំ ភិក្ខូនំ នានប្បការវសេន និវាសនបារុបនាទីនិ ទិស្សន្តិតិ វេទិតព្ពំ.

អធម្មវាទិគណានំ ភិជ្ជមានកាលតោ សត្តវីសាធិកានំ បញ្ចសតានំ វស្សានញ្ច ឧបរិ សិរិសង្ឃពោធិ នាម រាជា មហាវិហារ គណស្ស បក្ខោ ហុត្វា អធម្មវាទិនា តយោ គណេ និគ្គហិត្វា ជិនសាសនំ បគ្គហេសិ. សោ ច សិរិសង្ឃ ពោធិរាជា អម្ហាកំ មរម្មរដ្ឋេ អរិមន្ទននគរេ អនុរុទ្ធេន នាម រញ្ញា សមកាលវសេន រជ្ជសម្បត្តិំ អនុភវិ.

តតោ បច្ឆា សីហឡទីបេ វោហារកតិស្សស្ស នាម រញ្ញោ កាលេ កបិលេន នាម អមច្ចេន សទ្ធិំ មន្តេត្វា មហាវិហារ វាសិនោ ភិក្ខូ និស្សាយ អធម្មវាទិគណេ និគ្គណ្ហិត្វា ជិនសាសនំ បគ្គណ្ហាតិ.

តតោ បច្ឆា ច គោដ្ឋាភយស្ស នាម រញ្ញោ កាលេ អភយគិរិ វាសិនោ ភិក្ខូ បរសមុទ្ទំ បព្ពាជេត្វា មហាវិហារ វាសិនោ ភិក្ខូ និស្សាយ សាសនំ វិសោធយិ.

តតោ បច្ឆាបិ គោដ្ឋាភយរញ្ញោ បុត្តភូតស្ស មហាសេនស្ស នាម រញ្ញោ កាលេ អភយគិរិវាសីនំ ភិក្ខូនំ អព្ភន្តរេ សង្ឃមិត្តោ នាម ឯកោ ភិក្ខុ រញ្ញោ បធានាចរិយោ ហុត្វា មហាមហិន្ទត្ថេរាទីនំ អរហន្តានំ និវាសដ្ឋានភូតំ មហាវិហារារាមំ វិនស្សិតុំ មហាសេនរញ្ញា មន្តេត្វា អារភិ. តទា នវវស្សានិ មហាវិហារេ ភិក្ខុ សញ្ញោ អហោសិ. អហោវត មហាថេរានំ មហិទ្ធិកានំ និវាសដ្ឋានំ អលជ្ជិនោ ភិក្ខូ វិនស្សាបេសុំ, សុវណ្ណហំស្សានំ និវាសដ្ឋានំ កាកា វិយាតិ.

ជេតវនវាសីនញ្ច ភិក្ខូនំ អព្ភន្តរេ ឯកោ តិស្សោ នាម ភិក្ខុ តេនេវ រញ្ញា មន្តេត្វា មហាវិហារេ សីមំ សមូហនិ ¶ . អឆេកត្តា បន តេសំ សីមសមូហនកម្មំ ន សម្បជ្ជីតិ. អហោវត ទុស្សីលានំ បាបកានំ កម្មំ អច្ឆរិយំ, សេយ្យថាបិ នាម សាខមិគោ អគ្គគ្ឃោ កាសិវត្ថំ មហគ្ឃំ ភិន្នតិ, ឯវមេវ ភិន្ទិតព្ពវត្ថុនា ភេទកបុគ្គលោ អតិវិយ ទូរោ អហោសីតិ. ភវន្តិ ចេត្ថ, –

យថា សាខមិគោ បាបោ, អប្បគ្ឃោយេវ កាសិកំ;

មហគ្ឃំ កច្ច ភិន្នំភិន្នំ, មហុស្សាហេន ឆិន្ទតិ.

ឯវំ អធម្មវាទី បាបោ, ធម្មវាទិគណំ សុភំ;

មហុស្សាហេន ភិន្ទយិ, អហោ អច្ឆរិយោ អយំ.

អារកា ទូរតោ អាសុំ, ភិន្ទិតព្ពេហិ ភេទកា;

ភូមិតោវ ភវគ្គន្តោ, អហោ កម្មំ អជានតន្តិ.

ឥច្ចេវំ អធម្មវាទិគណានំ ពលវតាយ ធម្មវាទិគណោ បរិហាយតិ. យថា ហិ គិជ្ឈសកុណស្ស បក្ខវាតេន សុវណ្ណហំសា បកតិយា ឋាតុំ ន សក្កោន្តិ, ឯវមេវ អធម្មវាទីនំ ពលវតាយ ធម្មវាទី បរិហាយតិ. ព្យគ្ឃវនេ វិយ សុវណ្ណមិគោ និល្លយិត្វា គោចរំ គណ្ហាតិ, យថារុចិវសេន ធម្មំ ចរិតុំ ឱកាសំ ន លភិ.

សីហឡទីបេ សាសនស្ស បតិដ្ឋានតោ ទ្វិសត្តតាធិកានំ ចតុសតានំ វស្សសហស្សានញ្ច ឧបរិ សម្មាសម្ពុទ្ធស្ស បរិនិព្ពានតោ អដ្ឋសត្តសតាធិកានំ វស្សសហស្សានំ ឧបរិ មហារាជា នាម ភូបាលោ រជ្ជំ ការេសិ. សោ បន រាជា ញទុម្ពរគិរិវាសិកស្សបត្ថេរគ្គមុខា មហាវិហារវាសិនោ ភិក្ខូ តមេវ រាជានំ និស្សាយ សាសនេ មលំ វិសោធេសុំ, យថា ហេរញ្ញិកោ ហិរញ្ញេ មលន្តិ.

មហាវិហារវាសិគណតោ អញ្ញេ អធម្មវាទិនា ឧប្បព្ពា ជេត្វា ¶ វិសោធេសុំ. សោ ច មហារាជា អម្ហាកំ មរម្មរដ្ឋេ អរិមទ្ទននគរេ នរបតិចញ្ញិសូនា នាម រញ្ញា សមកាល វសេន រជ្ជំ ការេសីតិ វេទិតព្ពោ.

តតោ បច្ឆា វិ វិជយពាហុរាជានំ បរក្កមពាហុរាជានញ្ច និស្សាយ មហាវិហារ វាសិនោ ភិក្ខូ សាសនំ បរិសុទ្ធំ អកំសុ, អធម្មវាទិនោ សព្ពេបិ ឧប្បព្ពាជេត្វា មហាវិហារវាសិគណោយេវ ឯកោ បតិដ្ឋហិ, យថា អព្ភាទិឧបក្កិលេសមលេហិ វិមុត្តោ និសានាថោតិ.

សិរិសង្ឃពោធិរាជា វោហារិកតិស្សរាជា គោដ្ឋាភយរាជាតិ ឯតេ រាជានោ សាសនំ វិសោធេន្តោបិ សព្ពេន សព្ពំ អធម្មវាទិគណានំ អវិនស្សនតោ សាសនំ បរិសុទ្ធំ ន តាវ អហោសិ. សិរិសង្ឃពោធិរញ្ញោ មហារញ្ញោ វិជយពាហុរញ្ញោ បរក្កមពាហុរញ្ញោតិ ឯតេសំយេវ រាជូនំ កាលេ សព្ពេន សព្ពំ អធម្មវាទីនំ វិនស្សនតោ សាសនំ បរិសុទ្ធំ អហោសិ. តទា បន អធម្មវាទិនា សីសម្បិ ឧដ្ឋហិតុំ ន សក្កា, យថា អរុណុគ្គេ កោសិយាតិ.

អបរភាគេ បន ចិរំ កាលំ អតិក្កន្តេ មិច្ឆាទិដ្ឋិកានំ វិជាតិយានំ ភយេន លង្កាទីបេ សាសនំ ឱសក្កិត្វា គណបូរណមត្តស្សបិ ភិក្ខុសង្ឃស្ស អវិជ្ជមានតាយ មហាវិជយពាហុរញ្ញោ កាលេ រាមញ្ញទេសតោ សង្ឃំ អានេត្វា សាសនំ បតិដ្ឋាបេសិ.

តតោ បច្ឆា ច វិមលធម្មសូរិយស្ស នាម រញ្ញោ កាលេ រក្ខាបុររដ្ឋតោ សង្ឃំ អានេត្វា សាសនំ បតិដ្ឋាបេសិ. តតោ បច្ឆា ច វិមលស្ស នាម រញ្ញោ កាលេ តតោយេវ សង្ឃំ អានេត្វា សាសនំ បតិដ្ឋាបេសិ. តតោ បច្ឆា ច កិត្តិស្សិរិរាជសីហស្ស នាម រញ្ញោ កាលេ ស្យាមរដ្ឋតោ សង្ឃំ អានេត្វា តថេវ អកាសីតិ.

អយំ សីហឡទីបេ សាសនស្ស ឱសក្កនកថា.

តតោ ¶ បច្ឆា ជិនសាសនេ នវុតាធិកេ អដ្ឋវស្សសតេ សម្បត្តេ ពុទ្ធទាសស្ស នាម រញ្ញោ កាលេ ឯកោ ធម្ម កថិកត្ថេរោ ឋបេត្វា វិនយបិដកំ អភិធម្មបិដកញ្ច អវសេសំ សុត្តន្តបិដកំ សីហឡភាសាយ បរិវត្តិត្វា អភិសង្ខរិត្វា ឋបេសិ. តញ្ច ការណំ ចូឡវំសេ វុត្តំ.

តស្ស កិរ ពុទ្ធទាសស្ស រញ្ញោ បុត្តា អសីតិមត្តា អសីតិមហាសាវកានំ នាមេនេវ វោហារិតា អហេសុំ. តេសុ បុត្តេសុ សារិបុត្តត្ថេរស្ស នាមេន វោហារិតោ ឯកោ ឧបតិស្សោ នាម រាជកុមារោ បិតរិ ទេវង្គតេ ទ្វេចត្តាលីសវស្សានិ រជ្ជំ ករេសិ.

តតោ បច្ឆា កនិដ្ឋោ មហានាមោ នាម រាជកុមារោ ទ្វាវីសវស្សានិ រជ្ជំ ការេសិ. តស្ស រញ្ញោ កាលេ ជិន ចក្កេ តេត្តិំសាធិកនវសតវស្សេ សីហឡទីបេ ឆសដ្ឋិមត្តានំ រាជូនំ បូរណកាលេ ពុទ្ធឃោសោ នាម ថេរោ សីហឡទីបំ គន្ត្វា សីហឡភាសាយ លិខិតេ អដ្ឋកថាគន្ថេ មាគធភាសាយ បរិវត្តិត្វា លិខិ.

សោ បន មហានាម រាជា អម្ហាកំ មរម្មរដ្ឋេ សិរិបច្ចយនគរេ សវិលញ្ញិក្រោវិ នាមកេន រញ្ញា សមកាលោ ហុត្វា រជ្ជំ ការេសិ. បរិត្តនិទ្ទានេ បន ព្រូមវិ?ថី? នាមកេន រញ្ញា សមកាលោ ហុត្វា រជ្ជំ ការេសីតិ វុត្តំ. តំ ន យុជ្ជតិយេវ.

សីហឡទីបេ បន កិត្តិស្សិរិមេឃោ នាម រាជា ហុត្វា នវមេ វស្សេ តស្មិំយេវ ទីបេ រាជូនំ ទ្វាសដ្ឋិមត្តានំ បូរណកាលេ ជិនចក្កេ តិំសាធិកេ អដ្ឋសតវស្សេ ជម្ពុទីបេ កលិង្គបុរតោ កុហសិវស្ស នាម រញ្ញោ ជាមាតា ទន្តកុមារោ ហេមមាលំ នាម រាជធីតំ គហេត្វា ទាឋាធាតុំ ថេនេត្វា នវាយ តរិត្វា សីហឡទីបំ អគមាសិ. ជិនចក្កេ តិំសាធិកអដ្ឋវស្សសតេ ជេដ្ឋតិស្សរាជា នវវស្សានិ រជ្ជំ ការេសិ.

ពុទ្ធទាសរាជា ¶ ឯកូនតិំសតិ វស្សានិ ឧបលិស្សរាជា ចទ្វិចត្តាលីសវស្សានិ មហានាមរាជា ទ្វាវីសវស្សានីតិ សព្ពានិ សម្បិណ្ឌិត្វា ជិនសាសនំ ទ្វត្តិំសាធិកនវវស្សសតប្បមាណំ ហោតិ.

តស្មិញ្ច កាលេ យទា ទ្វីហិ វស្សេហិ ឩនំ អហោសិ, តទា មហានាមរញ្ញោ កាលេ តិំសាធិកនវវស្សសតមត្តេ សាសនេ ពុទ្ធឃោសោ នាម ថេរោ លង្កាទីបំ អគមាសិ.

អមរបុរមាបកស្ស រញ្ញោ កាលេ សីហឡទីបិកេហិ ភិក្ខូហិ បេសិតសន្នេសបណ្ណេ បន ឆបណ្ណាសាធិកនវវស្សសតាតិក្កន្តេ សូតិ វុត្តំ.

ឯត្ថ ឋត្វា ពុទ្ធឃោសត្ថេរស្ស អដ្ឋុប្បត្តិំសង្ខេបមត្តំ វក្ខាម. កថំ. សីហឡភាសក្ខរេហិ បរិវត្តិតំ បរិយត្តិសាសនំ មាគធសាសក្ខរេន កោ នាម បុគ្គលោ បរិវត្តិតុំ សក្ខិស្សតីតិ មហាថេរា និមន្តយិត្វា តាវតិំសភវនំ គន្ត្វា ឃោសំ ទេវបុត្តំ ទិស្វា សទ្ធិំ សក្កេន ទេវានមិន្ទេន តំ យាចិត្វា ពោធិរុក្ខសមីបេ ឃោសគាមេ កេសស្ស នាម ព្រាហ្មណស្ស កេសិយា នាម ព្រាហ្មណិយា កុច្ឆិម្ហិ បដិសន្ធិំ គណ្ហាបេសុំ. ខាទថ ភោន្តោ បិវថ ភោន្តោតិអាទិនា ព្រាហ្មណានំ អញ្ញមញ្ញំ ឃោសកាលេ វិជាយនត្តា ឃោសោតិ នាមំ អកាសិ. សត្តវស្សិកកាលេ សោ តិណ្ណំ វេទានំ បារគូ អហោសិ.

អថ ខោ ឯកេន អរហន្តេន សទ្ធិំ វេទកថំ សល្លបន្តោ តំ កថំ និដ្ឋាបេត្វា កុសលា ធម្មា អកុសលា ធម្មា អព្យាកតា ធម្មាតិអាទិនា បរមត្ថវេទំ នាម ពុទ្ធមន្តំ បុច្ឆិ. តទា សោ សុត្វា ឧគ្គណ្ហិតុកាមោ ហុត្វា តស្ស អរហន្តស្ស សន្តិកេ បព្ពជិត្វា ទេវសិកំ ទេវសិកំ បិដកត្តយំ សដ្ឋិមត្តេហិ បទសហស្សេហិ សជ្ឈាយំ អកាសិ, វាចុគ្គតំ អកាសិ. ឯកមាសេនេវ តិណ្ណំ បិដកានំ បារគូ អហោសិ.

តតោ ¶ បច្ចា រហោ ឯកកោវ និសិន្នស្ស ឯតទហោសិ,– ពុទ្ធភាសិតេ បិដកត្តយេ មម វា បញ្ញា អធិកា, ឧទាហុ ឧបជ្ឈាយស្ស វាតិ. តំ ការណំ ញត្វា ឧបជ្ឈាចរិយោ និគ្គហំ កត្វា ឱវទិ. សោ សំវេគប្បត្តោ ហុត្វា ខមាបេតុំ វន្ទិ. ឧបជ្ឈាចរិយោ ត្វំ អាវុសោ សីហឡទីបំ គន្ត្វា បិដកត្តយំ សីហឡស្សាសក្ខរេន លិខិតំ មាគធភាសក្ខរេន លិខាហិ, ឯវំ សតិ អហំ ខមិស្សាមីតិ អាហ.

ពុទ្ធឃោសោ ច បិតរំ មិច្ឆាទិដ្ឋិភាវតោ មោចេត្វា អាចរិយស្ស វចនំ សិរសា បដិគ្គហេត្វា បិដកត្តយំ លិខិតុំ សីហឡទីបំ នាវាយ អគមាសិ. តទា សមុទ្ទមជ្ឈេ តីហិ ទិវសេហិ តរន្តេ ពុទ្ធទត្តត្ថេរោ ច សីហឡទីបតោ នាវាយ អាគច្ឆន្តោ អន្តរាមគ្គេ ទេវាន អានុភាវេន អញ្ញមញ្ញំ បស្សិត្វា ការណំ បុច្ឆិត្វា ជានិ. ជានិត្វា ច ពុទ្ធទត្តត្ថេរោ ឯវមាហ,- មយា អាវុសោ កតោ ជិនាលង្ការោ អប្បស្សារោតិ មញ្ញិត្វា បិដកត្តយំ បរិវត្តិតុំ លិខិតុំ ឱកាសំ នាទាសុំ, ត្វំ បន បិដកត្តយំ សំវណ្ណេហីតិ វត្វា អត្តនោ សក្កេន ទេវានមិន្ទេន ទិន្នំ ហរិតកិផលំ អយោមយលេខន ទណ្ឌំ និសិតសិលញ្ច ពុទ្ធឃោសត្ថេរស្ស អទាសិ. ឯវំ តេសំ ទ្វិន្នំ ថេរានំ អញ្ញមញ្ញំ សល្លបន្តានំយេវ នាវា សយមេវ អបនេត្វា គច្ឆិំសុ.

ពុទ្ធឃោសត្ថេរោ ច សីហឡទីបំ បត្វា បឋមំ សង្ឃបាលត្ថេរំ បស្សិត្វា បិដកត្តយំ មាគធភាសក្ខរេន បរិវត្តេតុំ អាគតោម្ហីតិ ការណំ អារោចេត្វា សីហឡភិក្ខូ ច សីលេ បតិដ្ឋាយាតិអាទិគាថំ និយ្យាទេត្វា ឥមិស្សា គាថាយ អត្ថំ បិដកត្តយំ អាលោលេត្វា សំវណ្ណេហីតិ ឧយ្យោជេសុំ, តស្មិំយេវ ទិវសេ សាយន្ហកាលតោ បដ្ឋាយ យថាវុត្តគាថំ បមុខំ កត្វា វិសុទ្ធិមគ្គំ អកាសិ. កត្វា តំ កម្មំ និប្ផាទេត្វា តស្ស ញាណប្បភវំ វីមំសេតុកាមោ ទេវានមិន្ទោ តញ្ច គន្ថំ អន្តរធាបេសិ. បុនាបិ ថេរោ អកាសិ ¶ . តថេវ ទេវានមិន្ទោ អន្តរធាបេសិ. បុនាបិ ថេរោ អកាសិ. ឯវំ តិក្ខត្តុំ ការាបេត្វា បុព្ពគន្ថេបិ ទស្សេសិ. តិណ្ណម្បិ គន្ថានំ អញ្ញមញ្ញំ ឯកបទមត្តេនបិ វិសេសតា នត្ថិ សង្ឃបាលត្ថេរោ ច តំ អារាធយិត្វា បិដកត្តយំ និយ្យាទេសិ. ឯវំ វិសុទ្ធិមគ្គេ សង្ឃបាលត្ថេរស្ស យាចនំ អារព្ភ វិសុទ្ធិមគ្គោ កតោតិ អាគតំ. ពុទ្ធឃោសុប្បត្តិកថាយំ បន សង្ឃរាជត្ថេរស្ស អាយាចនំ អារព្ភាតិ អាគតំ.

អយំ ពុទ្ធឃោសុប្បត្តិកថាយំ អាគតនយេន ទស្សិតពុទ្ធឃោសុប្បត្តិកថាសង្ខេបោ.

ចូឡវំសេ បនេវំ អាគតោ. ពុទ្ធឃោសត្ថេរោ នាម មហាពោធិរុក្ខសមីបេ ឯកស្មិំ ព្រាហ្មណគាមេ វិជាតោ តិណ្ណម្បិ វេទានំ បារគូ អហោសិ តេសុ តេសុ វាទេសុ ច អតិឆេកោ. សោ អញ្ញេហិ ច សទ្ធិំ បុច្ឆាព្យាករណកម្មំ កត្តុកាមោ ជម្ពុនីបតលេ អាហិណ្ឌន្តោ ឯកំ វិហារំ បត្វា តស្មិំ វា អាគន្តុកភាវេន និសីទិ. តស្មិញ្ច វិហារេ រេវតោ នាម ថេរោ វសិ. តេន ថេរេន សទ្ធិំ ភល្លបន្តោ សោ ព្រាហ្មណមាណវោ តីសុ វេទេសុ អលោលេត្វា បញ្ហំ បុច្ឆិ. បុច្ឆិតំ បុច្ឆិតំ ថេរោ ព្យាកាសិ. ថេរស្ស បន បុច្ឆិតំ បញ្ហំ មាណវោ ន សក្កា ព្យាកាតុំ. អថ មាណវោ បុច្ឆិ,–កោ នាមាយំ ភន្តេ មន្តោតិ. ពុទ្ធមន្តោ នាមាយន្តិ វុត្តេ ឧគ្គណ្ហិតុកាមោ ហុត្វា ថេរស្ស សន្តិកេ បព្ពជិត្វា បិដកត្តយំ ឧគ្គណ្ហិ. អចិរនេវ តិណ្ណម្បិ បិដកានំ បារគូ អហោសិ. ពុទ្ធស្សេវ ឃោសោ យស្ស អត្ថីតិ ពុទ្ធឃោសោតិ នាមេន បាកដោ អហោសិ.

ពុទ្ធឃោសោ ច អាយស្មតោ រេវតស្ស សន្តិកេ និសីទន្តោ ញាណោទយំ នាម គន្ថំ អដ្ឋស្សាលិនិញ្ច នាម គន្ថំ អកាសិ. តតោ បច្ឆា បរិត្តដ្ឋកថំ កត្តុកាមោ ហុត្វា អារភិ. តទា អាចរិយោ ឯវមាហ,– ជម្ពុទីបេ បន អាវុសោ បាឡិមត្តំយេវ អត្ថិ, អដ្ឋកថា បន នត្ថិ, អាចរិយវាទោ ច ¶ ភិន្នោ ហុត្វា អត្ថិ, តេនេវ មហាមហិន្ធត្ថេរេន អានិតា អដ្ឋកថា តីសុ ច សង្គីតីសុ អារុឡោ បាឡិយោ សារិបុត្តត្ថេរាទីហិ ទេសិតោ កថាមគ្គោ សីហឡទីបេ អត្ថិ, ត្វំ គន្ត្វា មាគធភាសក្ខរេន លិខេហីតិ ឧយ្យោជិយមានោ ពុទ្ធឃោសត្ថេរោ សីហឡទីបំ គន្ត្វា អនុរាធបុរេ មហាវិហារំ បវិសិត្វា សង្ឃបាលត្ថេរស្ស សន្តិកេ សទ្ធិំ សីហឡដ្ឋកថាយ ថេរវាទេ សុត្វា អដ្ឋកថំ ករិស្សមីតិ អារោចេសិ. សីហឡភិក្ខូ ច បុព្ពេ វុត្តនយេនេវ សីលេ បតិដ្ឋាយាតិអាទិ គាថា និយ្យាទេសុំ. ពុទ្ធឃោសោ ច សទ្ធិំ អដ្ឋកថាយ បិដកត្តយំ សង្ខិបិត្វា វិសុទ្ធិមគ្គំ អកាសិ.

បុព្ពេ វុត្តនយេនេវ សក្កោ អន្តរធាបេត្វា តិក្ខត្តុំ ការាបេសិ. សង្ឃបាលត្ថេរោបិ អរាធយិត្វា បិដកត្តយំ និយ្យាទេសីតិ.

កិញ្ចាបិ នានា គន្ថេសុ នានាការេហិ ពុទ្ធឃោសុប្បត្តិ អាគតា, តថាបិ ពុទ្ធឃោសត្ថេរស្ស សីហឡទីបំ គន្ត្វា បិដកត្តយស្ស លិខនំ អដ្ឋកថានញ្ច ករណមេវ បមាណន្តិ មនោកិលិដ្ឋំ ន ឧប្បាទេតព្ពន្តិ. ពុទ្ធឃោសត្ថេរោ វិកដត្តយំ លិខិត្វា ជម្ពុទីបំ បច្ចាគមាសិ.

ឥច្ចេវំ បាឡិភាសាយ បរិយត្តិំ បរិវត្តិត្វា បច្ឆា អាចរិយបរម្បរសិស្សានុសិស្សវសេន សីហឡទីបេ ជិនចក្កំ មជ្ឈន្តិ កំសុមាសី វិយ អតិទិព្ពតិ, អនេកកោដិប្បមាណេហិ សោតាបន្នសកទាគាមិអនាគាមិអរហន្តេហិ លង្កាទីបំ អតិសោភតិ, សព្ពបាលិផុល្លេន តិយោជនិកបារិច្ឆត្តករុក្ខេន តាវតិំសភវនំ វិយ សតបត្តបទុមាទីហិ មហាបោក្ខរណី វិយ តេសុ តេសុ ឋានេសុ មគ្គមហាមគ្គអាបកឃរទ្វារតិត្ថវនបព្ពតគុហមន្ទិរវិហារសាលាទីសុ អលទ្ធមគ្គផលដ្ឋានំ នាម កិញ្ចិ នត្ថិ, ថោកំ អាគមេត្វា បិណ្ឌាយ បតិដ្ឋមានបទេសេបិ មគ្គផលានិ លភិំសុយេវ.

មគ្គផលានិ សច្ឆិករោន្តានំ បុគ្គលានំ ពាហុល្លតាយ អយំ ¶ បុថុជ្ជនោ អយំ បុថុជ្ជនោតិ អង្គុលិំ បសារេត្វា ទស្សេតព្ពោ ហោតិ. ឯកស្មិំ កាលេ សីហឡទីបេ បុថុជ្ជន ភិក្ខុ នាម នត្ថិ. តថា ហិ វុត្តំ វិភង្គដ្ឋកថាយំ, ឯកវារំ បុថុជ្ជនភិក្ខុ នាម នត្ថីតិ.

អភិញ្ញាលាភីនំ កិរ មហិទ្ធិកានំ គមនាគមនវសេន សូរិយោស្សាសំ អលភិត្វា ធញ្ញកោដ្ដកា មាតុគាមា ធញ្ញកោដ្ដិតុំ ឱកាសំ ន លភិំសុ.

ទេវលោកតោ សុមនសាមណេរោ ទក្ខិណក្ខកំ សីហឡទីបំ អនេត្វា តស្ស បាដិហារិយំ ទស្សនវសេន ឧទ្ធកពិន្ធូហិ តិយោជនសតំ សកលម្បិ លង្កាទីបំ ព្យាបត្វា ភគវតា បរិភុត្តចេតិយង្គណំ វិយ ហុត្វា នវាយ គច្ឆន្តា មហាសមុទ្ទេ ឧទកតោ នាឡិកេរមត្តម្បិ ទិស្វា សកលង្កាទីបំ បូជេន្តិ, មហាមហិន្ទត្ថេរស្ស សន្តិកេ អរិដ្ឋត្ថេរេន សទ្ធិំ បញ្ចមត្តា ភិក្ខុសតា បឋមំ តាវ វិនយបិដកំ ឧគ្គណ្ហិំសូតិ ឥមេហិ ការណេហិ លង្កាទីបំ ជិនចក្កស្ស បតិដ្ឋានំ ហុត្វា វរទីបន្តិ នាមំ បដិលភិ.

សីហឡទីបេយេវ បិដកត្តយំ បោត្ថការុឡវសេន បតិដ្ឋាបេត្វា តតោ បច្ឆា ចោរនាគស្ស នាម រញ្ញោ កាលេ សកលលង្កាទីបំ ទុព្ភិក្ខភយេន បីឡេត្វា បិដកត្តយំ ធារេន្តា ភិក្ខូ ជម្ពុទីបំ អាគមំសុ. អនាគន្ត្វា តត្ថេវ ឋិតាបិ ភិក្ខូ ឆាតកភយេន បីឡេត្វា ឧទរបដលំ ពន្ធិត្វា កុច្ឆិំ វាលុករាសិម្ហិ ឋបេត្វា បិដកត្តយំ ធារេសុំ.

កុដ កណ្ណតិស្សស្ស រញ្ញោ កាលេយេវ ទុព្ភិក្ខភយំ វូបសមិត្វា ជម្ពុទីបតោ ភិក្ខូ បុន គន្ត្វា សីហឡទីបេ ឋិតេហិ ភិក្ខូហិ សទ្ធិំ មហាវិហារេ បិដកត្តយំ អវិរោធាបេត្វា សមសមំ កត្វា ឋបេសុំ. ឋបេត្វា ច បន សីហឡទីបេយេវ សុដ្ឋុ ធារេសុំ.

តត្ថេវ អដ្ឋកថាយោ ពុទ្ធឃោសត្ថេរោ មាគធភាសាយ បរិវត្តេត្វា វិរចិ. បច្ឆា ច យេភុយ្យេន តត្ថេវ អដ្ឋកថាដីកាអនុមធុលក្ខណគណ្ឋិគន្ថន្តរានិ ¶ អកំសុ. បុន សាសនំ នភេ រវិន្ទុវ បាកដន្តិ.

តត្ថ ពុទ្ធវំសដ្ឋកថំ ពុទ្ធទត្តត្ថេរេ អកាសិ. ឥតិវុត្តោទានចរិយាបិដកថេរាថេរីវិមានវត្ថុបេតវត្ថុនេត្តិអដ្ឋកថាយោ អាចរិយធម្មបាលត្ថេរោ អកាសិ. សោ ច អាចរិយធម្មបាលត្ថេរោ សីហឡទីបស្ស សមីបេ ទមិលរដ្ឋេ ពទរតិត្ថម្ហិ និវាសិតត្តា សីហឡទីបេយេវ សង្គហេត្វា វត្តព្ពោ.

បដិសម្ភិទាមគ្គដ្ឋកថំ មហានាមោ នាម ថេរោ អាកាសិ. មហានិទ្ទេសដ្ឋកថំ ឧបសេនោ នាម ថេរោ អកាសិ. អភិធម្មដីកំ បន អានន្ទត្ថេរោ អកាសិ. សា ច សព្ពាសំ ដីកានំ អាទិភូតត្តា មូលដីកាតិ បាកដា.

វិសុទ្ធិមគ្គស្ស មហាដីកំ ទីឃនិកាយដ្ឋកថាយ ដីកំ មជ្ឈិមនិកាយដ្ឋកថាយ ដីកំ សំយុត្តនិកាយដ្ឋកថាយ ដីកញ្ហាតិ ឥមាយោ អាចរិយធម្មបាលត្ថេរោ អកាសិ.

សារត្ថទីបនិំ នាម វិនយដីកំ អង្គុត្តរនិកាយដីកញ្ច បរក្កមពាហុរញ្ញា យាចិតោ សារិបុត្តត្ថេរោ អកាសិ. វិមតិវិនោទនិំ នាម វិនយដីកំ ទមិលរដ្ឋវាសិកស្សបត្ថេរោ អកាសិ.

អនុដីកំ បន អាចរិយធម្មបាលត្ថេរោ. សា ច មូលដីកាយ អនុត្តានត្ថានិ ឧត្តានានិ សំវណ្ណិតត្តា អនុដីកា តិវុច្ចតិ.

វិសុទ្ធិមគ្គស្ស ចូឡដីកំ មខុទីបនិញ្ច អញ្ញេតរា ថេរា អកំសុ. សា ច មូលដីកាយ អត្ថាវសេសាតិ ច អនុត្តានត្ថាតិ ច កត្វា មូលដីកាយ សទ្ធិំ សំសន្ទិត្វា កតត្តា មធុរ សត្តា ច មធុទីបនិន្តិ វុច្ចតិ. មោហវិច្ឆេទនិំ បន លក្ខណគន្ថំ កស្សបត្ថេរោ អកាសិ.

អាភិធម្មាវតារំ បន រុបារូបវិភាគំ វិនយវិនិច្ឆយញ្ច ពុទ្ធ ទត្តត្ថេរោ. វិនយសង្គហំ សារិបុត្តត្ថេរោ. ខុទ្ទសិក្ខំ ធម្មសិរិត្ថេរោ ¶ . បរមត្ថវិនិច្ឆយំ នាមរូបបរិច្ឆេទំ អភិធម្មត្ថសង្គញ្ច អនុរុទ្ធត្ថេរោ. សច្ចសង្ខេបំ ធម្មបាលត្ថេរោ. ខេមំ ខេមត្ថេរោ. តេ ច សង្ខេបតោ សំវណ្ណិតត្តា សុខេន ច លក្ខណិយត្តា លក្ខណគន្ថាតិ វុច្ចន្តិ.

តេសំ បន សំវណ្ណនាសុ អភិធម្មត្ថសង្គហស្ស បោរាណដីកំ នវវិមលពុទ្ធិត្ថេរោ អកាសិ. សច្ចំសង្ខេបនាមរូបបរិច្ឆេទខេមាអភិធម្មាវតារានំ បោរាណដីកំ វាចិស្សរមហាសាមិត្ថេរោ. បរមត្ថវិនិច្ឆយស្ស បោរាណដីកំ មហាពោធិត្ថេរោ.

អភិធមត្ថសង្គហាភិធម្មាវតារាភិនវ ដីកាយោ សុមង្គលសាមិត្ថេរោ. សច្ចសង្ខេបាភិនវដីកំ អរញ្ញវាសិត្ថេរោ. នាមរូបបរិច្ឆេទាភិនវដីកំ មហាសាមិត្ថេរោ. បរមត្ថវិនិច្ឆយាភិនវដីកំ អញ្ញតរត្ថេរោ. វិនយវិនិច្ឆយដីកំ រេវតត្ថេរោ. ខុទ្ទសិក្ខាយ បុរាណដីកំ មហាយសត្ថេរោ. តាយយេវ អភិនវដីកំ សង្ឃរក្ខិតត្ថេរោតិ.

វជិរពុទ្ធិំ នាម វិនយគណ្ឋិបទត្ថំ វជិរពុទ្ធិត្ថេរោ. ចូឡគណ្ឋិំ មជ្ឈិមគណ្ឋិំ មហាគណ្ឋិញ្ច សីហឡទីបវាសិនោ ថេរា. តេ ច បទក្កមេន អសំវណ្ណេត្វា អនុត្តានត្ថាយេវ សំវណ្ណិតត្តា គណ្ឋិបទត្ថាតិ វុច្ចន្តិ.

អភិធានប្បទីបិកំ បន មហាមោគ្គលានត្ថេរោ. អត្ថព្យក្ខានំ ចូឡពុទ្ធត្ថេរោ. វុត្តោទយំ សម្ពន្ធចិន្តនំ សុពោធាលង្ការញ្ច សង្ឃរក្ខិតត្ថេរោ. ព្យាករណំ មោគ្គលានត្ថេរោ.

មហាវំសំ ចូឡវំសំ ទីបវំសំ ថូបវំសំ ពោធិវំសំ ធាតុវំ សញ្ច សីហឡទីបវាសិនោ ថេរា. ទាឋាធាតុវំសំ បន ធម្មកិត្តិត្ថេរោ អកាសិ. ឯតេ ច បាឡិមុត្តកវសេន វុត្តត្តា គន្ថន្តរាតិ វុច្ចន្តិ.

ឥច្ចេវំ ពុទ្ធឃោសាទយោ ថេរ វរា យថាពលំ យថាសត្តិំ បរិយត្តិំ សាសនំ ឧបត្ថម្ភេត្វា ពហូហិ មូលេហិ ពហុហិសាខាហិ ពហូហិ ច វិដបេហិ ឧបត្ថម្ភិយមានោ វេបុល្លមា បជ្ជមានោ ¶ មហានិគ្រោធរុក្ខោ វិយ ថិរំ ហុត្វា ចិរកាលំ តិដ្ឋតីតិ វេទិតព្ពំ.

ឥទំ សីហឡទីបេ បោត្ថការុឡ្ហតោ បច្ឆា សាសនស្ស បតិដ្ឋានំ.

ឯតេបិ ច មហាថេរោ, យថាសត្តិំ យថាពលំ;

អដ្ឋកថាទយោ កត្វា, មច្ចុមុខំ ឧបាគមុំ.

សេយ្យថាបិ ច លោកស្មិំ, ឱភាសិត្វាន ចន្ទិមា;

អាវហិត្វាន សត្តានំ, ហិតំ អត្ថំវ គច្ឆតិ.

ឯវមេវ មហាថេរា, ញាណោភាសេហិ ភាសិយ;

អាវហិត្វាន សត្តានំ, ហិតំ អត្ថំវ គច្ឆតិ.

ឥតិ សាសនវំសេ សីហឡទីបិកសាសនវំសកថាមគ្គោ

៣. សុវណ្ណភូមិសាសនវំសកថាមគ្គោ

៣. ឥទានិ យថាឋបិតមាតិកាវសេន សុវណ្ណភូមិ រដ្ឋេ សាសនវំសកថាមគ្គស្ស វត្ថុំ ឱកាសោ អនុប្បត្ថោ, តស្មា សុវណ្ណភូមិរដ្ឋសាសនវំសកថាមគ្គំ អារភិស្សាមិ.

តត្ថ សុវណ្ណភូមីតិ តីសុ រាមញ្ញរដ្ឋេសុ ឯកស្ស នាមំ. តីណិហិ រាមញ្ញរដ្ឋានិ ហោន្តិ ហំសាវតីមុត្តិមសុវណ្ណភូមិវសេន ឯកទេសេន សព្ពម្បិ រាមញ្ញរដ្ឋំ គហេតព្ពំ. តត្ថ បន ឧក្កលាបជនបទេ តបុស្សភល្លិកេ អាទិំ កត្វា ភគវតោ អភិសម្ពុជ្ឈិត្វា សត្តសត្តាហេសុ អតិក្កន្តេសុយេវ អាសាឡ្ហិមាសស្ស ជុណ្ហបក្ខបញ្ចមទិវសតោ បដ្ឋាយ រាមញ្ញរដ្ឋេ សាសនំ បតិដ្ឋតិ.

ឥទំ រាមញ្ញរដ្ឋេ បឋមំ សាសនស្ស បតិដ្ឋានំ.

ភគវតោ ¶ អភិសម្ពុទ្ធកាលតោ បុព្ពេយេវ អបរណ្ណករដ្ឋេ សុភិន្ននគរេ តិស្សរញ្ញោ កាលេ ឯកស្ស អមច្ចស្ស តិស្សោ ជយោ ចាតិ ទ្វេបុត្តា អហេសុំ. តេ គិហិភាវេ សំវេគំ លភិត្វា មហាសមុទ្ទស្ស សមីបេ គជ្ជគិរិម្ហិ នាម បព្ពតេ ឥត្ថុសិបព្ពំ បព្ពជិត្វា និសីទិសុំ. តទា នាគិយា វិជ្ជាធរោ សន្តវំ កត្វា ទ្វេ អណ្ឌានិ វិជាយិត្វា សា នាគី លជ្ជាយ តានិ វិជហិត្វា គច្ឆិ.

តទា ជេដ្ឋោ តិស្សកុមារោ តានិ លភិត្វា កនិដ្ឋេន សទ្ធិំ វិភជិត្វា ឯកំ ឯកស្ស សន្តិកេ ឋបេសិ. កាលេ អតិក្កន្តេ តេហិ អណ្ឌេហិ ទ្វេ មនុស្សា វិជាយិំសុ. តេ ទស វស្សវយេ សម្បត្តេ កនិដ្ឋស្ស អណ្ឌតោ វិជាយនទហរោ កាលំ កត្វា មជ្ឈិមទេសេ មិថិលនគរេ គវំបតិ នាម កុមារោ ឧបជ្ជិ. សោ សត្តវស្សិកកាលេ ពុទ្ធស្ស ភគវតោ សន្តិកេ និយ្យាទេត្វា បព្ពាជេត្វា អចិរេនេវ អរហា អហោសិ.

ជេដ្ឋស្ស បន អណ្ឌតោ វិជាយនទហរោ ទ្វាទសវស្សិកកាលេ សក្កោ ទេវានមិន្ទោ អាគន្ត្វា រាមញ្ញរដ្ឋេ សុធម្មបុរំ នាម នគរំ មាបេត្វា សីហរាជាតិ នាមេន តត្ថ រជ្ជំ ការាបេសិ. សិលាលោនេ បន សិរិមាសោកោតិ នាមេនាតិ វុត្តំ. គវំបតិត្ថេរោ ច អត្តនា មាតរំ ទដ្ឋុកាមោ មិថិលនគរតោ អាគន្តុំ អារភិ. តទា ទិព្ពចក្ខុនា មាតុយា កាលង្កតភាវំ ញត្វា ឥទានិ មេ មាតា កុហិំ ឧប្បជ្ជតីតិ អាវជ្ជន្តោ ពាហុល្លេន នេសាទកេវដ្ដានំ និវាសនដ្ឋានភូតេ ទេសេ ឧប្បជ្ជតីតិ ញត្វា សចាហំ គន្ត្វា ន ឱវាទេយ្យំ, មាតា មេ អបាយគមនិយំ អបុញ្ញំ វិចិនិត្វា ចតូសុ អបាយេសុ ឧប្បជ្ជេយ្យាតិ ចិន្តេត្វា ភគវន្តំ យាចិត្វា រាមញ្ញរដ្ឋំ វេហាសមគ្គេន អាគច្ឆិ. រាមញ្ញរដ្ឋេ សុធម្មបរំ បត្វា អត្តនោ ¶ ភាតុនា សីហរាជេន សទ្ធិំ រដ្ឋវាសីនំ ធម្មំ ទេសេត្វា បញ្ចសុ សីលេសុ បតិដ្ឋាបេសិ.

អថ សីហរាជា អាហ, លោកេសុ ភន្តេ ត្វមសិ អគ្គតរោ បុគ្គលោតិ. ន មហារាជ អហំ អគ្គតរោ, តីសុ បន ភវេសុ សព្ពេសំ សត្តានំ មកុដសង្កាសោ គោតមោ នាម មយ្ហំ សត្ថា អត្ថិ, ឥទានិ មជ្ឈិមទេសំ រាជគហំ បដិវសតីតិ. ឯវំ បន ភន្តេ សតិ តុម្ហាកំ អាចរិយំ មយំ ទដ្ឋុំ អរហាម វា នោ វាតិ បុច្ឆិ. គវំបតិត្ថេរោច អាម មហារាជ អរហថ ភគវន្តំ ទដ្ឋុំ, អហំ យាចិត្វា អាគច្ឆាមីតិ វត្វា ភគវន្តំ យាចិ. ភគវា ច អភិសម្ពុជ្ឈិត្វា អដ្ឋមេ វស្សេ សទ្ធិំ អនេកសតភិក្ខូហិ រាមញ្ញរដ្ឋេ សុខម្មបុរំ អាកាសេន អាគមាសិ. រាជវំសេ បញ្ចហិ ភិក្ខុសតេហិ អាគមាសីតិ វុត្តំ. សិលាលេខនេ បន វីសតិសហស្សមត្តេហិ ភិក្ខូហីតិ វុត្តំ. ឯត្ថ ច យស្មា ភគវា សបរិសោយេវ អាគច្ឆិ, ន ឯកកោតិ ឯត្តកមេវ ឥច្ឆិតព្ពំ, តស្មា នានា វាទតំ បដិច្ច ចិត្តស្សាកុលិតា ន ឧប្បាទេតព្ពាតិ.

អថ អាគន្ត្វា រតនមណ្ឌបេ និសីទិត្វា សរាជិកានំ រដ្ឋវាសីនំ អមតរសំ អទាសិ. តីសុ សរណេសុ បញ្ចសុ ច សីលេសុ បតិដ្ឋាបេសិ. អថ ភគវា ទស្សនត្ថាយ អាគតានំ ឆន្នំ តាបសានំ ឆ កេសធាតុយោ បូជនត្ថាយ អទាសិ. តតោ បច្ឆាសត្តតិំសវស្សានិ បូរេត្វា បរិនិព្ពានកាលេបិ ភគវតោ អធិដ្ឋានានុរូបេន ចិតកដ្ឋានតោ តេត្តិំស ទន្តេ គហេត្វា គវំបតិត្ថេរោ សុធម្មបុរំ អានេត្វា សីហរញ្ញោ ទត្វា តេត្តិំសចេតិយានិ បតិដ្ឋាបេសិ. ឯវំ ភគវតោ បរិនិព្ពានតោ អដ្ឋមេយេវ វស្សេ គវំបតិត្ថេរោ រាមញ្ញ រដ្ឋេ សុធម្មបុរេ សាសនំ បតិដ្ឋាបេសិ.

ឥទំ រាមញ្ញរដ្ឋេ ទុតិយំ សាសនស្ស បតិដ្ឋានំ.

ភគវតោ ¶ បរិនិព្ពុតបញ្ចតិំសាធិកានំ ទ្វិន្នំ សតានំ ឧបរិសុវណ្ណភូមិំ នាម រាមញ្ញរដ្ឋំ អាគន្ត្វា សោណត្ថេរោ ឧត្តរត្ថេរោចាតិ ទ្វេ ថេរា បញ្ចវគ្គកម្មារហេហិ ភិក្ខូហិ សទ្ធិំ សាសនំ បតិដ្ឋាបេសុំ. តេ ច ថេរា មហាមោគ្គលិបុត្តតិស្សត្ថេរស្ស សទ្ធិវិហារិកាតិ អដ្ឋកថាយំ អាគតា.

តបុស្សភល្លិកេ គវំបតិត្ថេរញ្ច បដិច្ច សាសនំ តាវ បតិដ្ឋហិ. តញ្ច ន សព្ពេន សព្ពំ ឱគាហេត្វា យេ យេ បន សទ្ធា បសន្នា, តេ តេ អត្តនោ ឥច្ឆាវសេនេវ សាសនំ បសីទិំសុ. បច្ឆា បន សោណុត្តរត្ថេរា មហុស្សាហេន អាចរិយ អាណត្តិយា សាសនស្ស បតិដ្ឋាបនត្ថាយ ឧស្សុក្កំ អាបន្នា បតិដ្ឋាបេសុំ. តេន អដ្ឋកថាយំ ឯតំ រដ្ឋំ គន្ត្វា ឯត្ថ សាសនំ បតិដ្ឋាបេហីតិ ការិតបច្ចយវសេន អាណត្តិវិភត្តិវសេនច វុត្តំ.

តទា បន សុវណ្ណភូមិរដ្ឋេ សុធម្មបុរេ សិរិមាសោកោ នាម រាជា រជ្ជំ ការេសិ. តញ្ច សុធម្មបុរំ នាម កេលាសបព្ពតមុទ្ធនិ ទក្ខិណាយ អនុទិសាយ បុព្ពឌ្ឍភាគេន បព្ពតមុទ្ធនិ អបរឌ្ឍភាគេន ភូមិតលេ តិដ្ឋតិ. តំយេវ គុឡបាចកានំ មស្សានំ គេហសទិសានិ គេហានិ យេភុយ្យេន, តេនេវ គោឡមិត្តិក នាមេនាបិ វោហារិយតិ. តស្ស បន នគរស្ស មហាសមុទ្ទសមីបេ ឋិតត្តា ទកយក្ខិនី សព្ពទា អាគន្ត្វា រាជគេហេ ជាតេ ជាតេ កុមារេ ខាទិ.

សោណុត្តរត្ថេរានំ សម្បត្តទិវសយេវ រាជគេហេ ឯកំ បុត្តំ វិជាយិ. ទកយក្ខិនីច ខាទិស្សាមីតិ សហ បញ្ចហិ យក្ខិនិសតេហិ អាគតា. តំ ទិស្វា មនុស្សា ភាយិត្វា មហាវិរវំ រវន្តិ. តទា ថេរា ភយានកំ សីហសីសវសេន ឯកសីសសរីរទ្វយសម្ពន្ធសណ្ឋានំ មនុសីហរូបំ មាបេត្វា ទស្សេត្វា តំ យក្ខិនិំ សបរិសំ បលាបេសុំ.

ថេរា ច បុន យក្ខិនិយា អនាគមនត្ថាយ បរិត្តំ អកំសុតស្មិញ្ច សមាគមេ អាគតានំ មនុស្សានំ ព្រហ្មជាលសុត្តំ អទេសយ្យុំ ¶ . សដ្ឋិមត្តសហស្សា សោតាបន្នាទិបរាយនា អហេសុំ. កុលទារកានំ អឌ្ឍុឌ្ឍានិ សហស្សានិ បព្ពជិំសុ. កុលធីតានំ បន ទិឃឌ្ឍសហស្សំ. រាជកុមារានំ បញ្ចសតាធិកសហស្សមត្តំ បព្ពជិំសុ. អវសេសាបិ មនុស្សា សរណេ បតិដ្ឋហិំសុ. ឯវំ សោ តត្ថ សាសនំ បតិដ្ឋាបេសីតិ. វុត្តញ្ច អដ្ឋកថាយំ,–

សុវណ្ណភូមិំ គន្ត្វាន, សោណុត្តរា មហិទ្ធិកា;

បិសាចេ និទ្ធមិត្វាន, ព្រហ្មជាលេ មទេសិសុន្តិ.

តតោ បដ្ឋាយ រាជកុមារានំ សោណុត្តរនាមេហិយេវ នាមំ អកំសុ. អវសេសទ្វារកានម្បិ រក្ខសភយតោ វិមោចនត្ថំ តាលបត្តភុជបត្តេសុ ថេរេហិ មាបិតំ មនុសីហរូបំ ទស្សេត្វា មត្ថកេ ឋបេសុំ. មនុស្សាច សិលាមយំ មនុសីហរូបំ កត្វា សុធម្មបុរស្ស ឯសន្នេ បទេសេ ឋបេសុំ. តំ យាវជ្ជតនា អត្ថីតិ. ឥច្ចេវំ ភគវតោ បរិនិព្ពានតោ បញ្ចតិំសាធិកេ ទ្វិវស្សសតេ សម្បត្តេ សោណុត្តរត្ថេរា អាគន្ត្វា សាសនំ បតិដ្ឋាបេត្វា សាសនំ បតិដ្ឋាបេត្វា អនុគ្គហំ អកំសូតិ.

ឥទំ រាមញ្ញរដ្ឋេ តតិយំ សាសនស្ស បតិដ្ឋានំ.

តតោ បច្ឆា ឆសតាធិកេ សហស្សេ សម្បត្តេ បុព្ពេ វុត្តេហិ តីហិ ការណេហិ សាសនស្ស ឧប្បត្តិដ្ឋានភូតំ រាមញ្ញរដ្ឋំ ទាមរិកចោរភយេន បជ្ជររោគភយេន សាសនបច្ចត្ថិកភយេនចាតិ តីហិ ភយេហិ អាកុលិតំ អហោសិ. តទា ច តត្ថ សាសនំ ទុព្ពលំ អហោសិ, យថា ឧទកេ មន្ទេ តត្រជាតំ ឧប្បលំ ឧប្បលំ ទុព្ពលន្តិ. តត្ថ ភិក្ខូបិ សាសនំ យថា កាមំ បូរេតុំ ន សក្កា.

សូរិយកុមារស្ស នាម មនោហរិរញ្ញោ បន កាលេ សាសនំ អតិវិយ ទុព្ពលំ អហោសិ. ជិនចក្កេ ឯកឆសតាធិកេ វស្សសហស្សេ សម្បត្តេ កលិយុគេច ឯកូនវីសតាធិកេ ¶ ចតុវស្សសតេ សម្បត្តេ អរិមទ្ទននគរេ អនុរុទ្ធា នាម រាជា តតោ សហ បិដកេន ភិក្ខុសង្ឃំ អានេសិ.

តតោ បច្ឆា ជិនចក្កេ នវាធិកេ សត្តសតេ សហស្សេ ច សម្បត្តេ លង្កាទីបេ សិរិសង្ឃពោធិបរក្កមពាហុមហារាជា សាសនំ សោធេសិ.

តតោ ឆន្នំ វស្សានំ ឧបរិ កលិយុគេ ទ្វត្តិំសាធិកេ បញ្ចសតេ សម្បត្តេ ឧត្តរាជីវោ នាម ថេរោ សាសនេ បាកដោ អហោសិ.

សោ បន រាមញ្ញរដ្ឋវាសិនោ អរិយាវំសត្ថេរស្ស សទ្ធិវិហារិកោ. អរិយាវំសត្ថេរោ បន កប្បុង្គនគរវាសិនោ មហាកាឡត្ថេរស្ស សទ្ធិវិហារិកោ. មហាកាឡត្ថេរោ បន សុធម្មបុរវាសិនោ ប្រានទស្សិត្ថេរស្ស សទ្ធិវិហារិកោ. អយំ បន ឧត្តរាជីវឆប្បទត្ថេរានំ វំសទីបនត្ថំ វុត្តា.

សោ បន ប្រានទស្សិត្ថេរោ លោកិយាភិញ្ញាយោ លភិត្វា និច្ចំ អភិណ្ហំ បាតោវ មគធរដ្ឋេ ឧរុវេលនិគមេ មហាពោធិំ គន្ត្វា មហាពោធិយង្គណំ សម្មជ្ជិត្វា បុន អាគន្ត្វា សុធម្មបុរេ បិណ្ឌាយ ចរិ. ឥទំ ថេរស្ស និពទ្ធវត្តុំ. អយញ្ច អត្ថោ សុធម្មបុរតោ មគធរដ្ឋំ គន្ត្វា ឧរុវេលនិគមេ វាណិជកម្មំ ករោន្តា តទាការំ បស្សិត្វា បច្ចាគមនកាលេ សុធម្មបុរ វាសីនំ កថេសុំ, តស្មា វិញ្ញាយតិ.

តស្មិញ្ច កាលេ ឧត្តរាជីវត្ថេរោ បរិបុណ្ណវីសតិវស្សេន ឆប្បទេន នាម សាមណេរេន សទ្ធិំ សីហឡទីបំ គច្ឆិ. សីហឡទីបវាសិនោ ច ភិក្ខូ មយំ មហាមហិន្ទត្ថេរស្ស វំសិកា ភវាម, តុម្ហេបិ សោណុត្តរត្ថេរានំ វំសិកា ភវថ, តស្មា មយំ ឯកវំសិកា ភវាម សមាន វាទិកាតិ វត្វា ឆប្បទសាមណេរស្ស ឧបសម្បទកម្មំ អកំសុ. តតោ បច្ឆា ចេតិយ វន្ទនាទីនិ កម្មានិ និដ្ឋាបេត្វា ឧត្តរាជីវត្ថេរោ សទ្ធិំ ភិក្ខុសង្ខេន អរិមទ្ទននគរំ បច្ចាគមាហិ.

ឆប្បទស្ស បន ឯតទហោសិ,- សចាហំ អាចរិយេន សហ ជម្ពុទីបំ ¶ គច្ឆេយ្យំ, ពហូហិ ញាតិពលិពោធេហិ បរិយត្តុគ្គហណេ អន្តរាយោ ភវេយ្យ, តេន ហិ សីហឡទីបេយេវ វសិត្វា បរិយត្តិមុគ្គហេត្វា បច្ចាគមិស្សាមីតិ.

តតោ អាចរិយស្ស ឱកាសំ យាចិត្វា សីហឡទីបេយេវ បដិវសិ. សីហឡទីបេ វសិត្វា យាវ លទ្ធត្ថេរសម្មុតិកា បរិយត្តិំ បរិយាបុណិត្វា បុន ជម្ពុទីបំ បច្ចាគន្តុកាមោ អហោសិ. អថ តស្ស ឯតទហោសិ,– អហំ ឯកកោវ គច្ឆន្តោ សចេ មម អាចរិយោ នត្ថិ, សចេបិ ជម្ពុទីបវាសិនា ភិក្ខុសង្ឃេន សទ្ធិំ វិនយកម្មំ កាតុំ ន ឥច្ឆេយ្យំ, ឯវំ សតិ វិសុំ កម្មំ កាតុំ ន សក្កូណេយ្យំ, តស្មា បិដកធរេហិ ចតូហិ ថេរេហិ សទ្ធិំ គច្ចេយ្យំ, ឥច្ចេតំ កុសលន្តិ.

ឯវំ បន ចិន្តេត្វា តាមលិត្តិគាមវាសិនា សិវលិត្ថេរេន កម្ពោជរញ្ញោ បុត្តភូតេន តាមលិន្ទត្ថេរេន កិញ្ចិបុរវាសិនា អានន្ទត្ថេរេន រាហុលត្ថេរេនចាតិ ឥមេហិ ចតូហិ ថេរេហិ សទ្ធិំ នាវាយ បច្ចាគច្ឆិ. តេ ច ថេរា បិដកធរា អហេសុំ ទក្ខា ថាមសម្បន្នា ច. តេសុ វិសេសតោ រាហុលត្ថេរោ ថាមសម្បន្នោ. កុសិមនគរំ សម្បត្តកាលេ ឧបកដ្ឋវស្សូបគមនកាលោ ហុត្វា អរិមទ្ទននគរេ អាចរិយស្ស សន្តិកំ អសម្បាបុណិត្វា កុសិមនគរយេវ វស្សំ ឧបគមិំសុ. តេសំ វស្សូបគមនវិហារវត្ថុ អារាមបាការោ ច កុសិមនគរស្ស ទក្ខិណទិសាសាគេ យាវជ្ជតនា អត្ថិ.

វស្សំវុដ្ឋកាលេ បន មហាបវារណាយ បវារេត្វា តេ បញ្ច ថេរា អរិមទ្ទននគរំ អគមំសុ. ឧត្តរាជីវត្ថេរោច អរិមទ្ទននគរ វាសីហិ ភិក្ខូហិ វិសុំ ហុត្វា សង្ឃកម្មានិ អកាសិ. កិញ្ចាបិ ចេត្ថ ឧត្តរាជីវត្ថេរាទយោ សីហឡទីបតោ បច្ចាគន្ត្វា អរិមទ្ទននគរេ វសិត្វា សាសនំ អនុគ្គហេសុំ, រាមញ្ញរដ្ឋេ បន ជាតត្តា បុព្ពេ ច តត្ថ និវាសត្តា ឥធ ទស្សិតាតិ ទដ្ឋព្ពា.

តស្មិញ្ច ¶ កាលេ ទលនគរេ បទីបជេយ្យគាមេ ជាតោ សារិបុត្តោ នាម មហល្លកស្សមណេរោ ឯកោ អរិមទ្ទននគរំ គន្ត្វា អានន្ទត្ថេរស្ស សន្តិកេ ឧបសម្បជ្ជិត្វា បរិយត្តិ បរិយបុណិ. សោ ពហុស្សុតោ អហោសិ ទក្ខោ ថាមសម្បន្នោ ច. តមត្ថំ សុត្វា នរបតិចញ្ញិសូរាជា ចិន្តេសិ,- សចេសោ អង្គបច្ចង្គសម្បន្នោ ភវេយ្យ, អាចរិយំ កត្វា ឋបេស្សាមិ អនុគ្គហេស្សាមីតិ. រាជា ឯវំ ចិន្តេត្វា រាជបុរិសេ បេសេត្វា វីមំសាបេសិ. រាជបុរិសា ច តស្ស ឆិន្នបាទង្គុដ្ឋគ្គតំ បស្សិត្វា តមត្ថំ រញ្ញោ អារោចេសុំ. រាជា តំ សុត្វា ឯវំ វិកលង្គបច្ចង្គោ ភវេយ្យ, បធានាចរិយដ្ឋានេ ឋបេតុំ ន យុត្តោតិ កត្វា បធានាចរិយភាវំ ន អកាសិ. បូជាសក្កា រមត្តេនេវ អនុគ្គហំ អកាសិ. ឯកស្មិញ្ច កាលេ ធម្មវិលាសោតិ លញ្ឆំ ទត្វា រាមញ្ញរដ្ឋេ សាសនំ សោធេត្វា បរិសុទ្ធំ ករោហីតិ រាមញ្ញរដ្ឋំ បេសេសិ.

សោច រាមញ្ញរដ្ឋំ គន្ត្វា ទលនគរេ ពហុនំ ភិក្ខូនំ ធម្ម វិនយំ វាចេត្វា សាសនំ បគ្គហេសិ. តត្ថ ច រាមញ្ញមនុស្សា តស្ស ធម្មវិលាសត្ថេរស្ស សិស្សានុសិស្សា សីហឡភិក្ខុ គណាតិ វោហារន្តិ. ឥច្ចេវំ សីហឡទីបិកស្ស អានន្ទត្ថេរស្ស សិស្សំ ធម្មវិលាសំ បដិច្ច រាមញ្ញរដ្ឋេ សីហឡទីបតោ សាសនស្ស អាគតមគ្គោតិ.

ឥទំ រាមញ្ញរដ្ឋេ ចតុត្ថំ សាសនស្ស បតិដ្ឋានំ.

តស្មិញ្ច កាលេ មុត្តិមនគរេ អគ្គមហេសិយា អាចរិយា ពុទ្ធវំសត្ថេរមហានាគត្ថេរា សីហឡទីបំ គន្ត្វា មហាហារវាសិគណវំសភូតានំ ភិក្ខូនំ សន្តិកេ បុន សិក្ខំ គណ្ហិត្វា មុត្តិមនគរំ បច្ចាគន្ត្វា មុត្តិមនគរវាសីតិ ភិក្ខូហិ វិសុំ ហុត្វា សង្ឃកម្មានិ កត្វា សាសនំ បគ្គហេសុំ. តេច ថេរេ ¶ បដិច្ច រាមញ្ញរដ្ឋេ បុន សីហឡទីបតោ សាសនំ អាគតន្តិ.

ឥទំ រាមញ្ញរដ្ឋេ បញ្ចមំ សាសនស្ស បតិដ្ឋានំ.

តតោ បច្ឆាច មុត្តិមនគរេ សេតិភិន្ទស្ស រញ្ញោ មាតុយា អាចរិយោ មេធង្ករោ នាម ថេរោ សីហឡទីបំ គន្ត្វា សីហឡទីបេ អរញ្ញវាសីនំ មហាថេរានំ សន្តិកេ បុន សិក្ខំ គហេត្វា បរិយត្តិំ បរិយាបុណិត្វា សុវណ្ណរជតមយេ តិបុសីសច្ឆន្នេ សេតិភិន្ទស្ស រញ្ញោ មាតុយា ការាវិតេ វិហារេ និសិទិត្វា សាសនំ អនុគ្គហេសិ. លោកទីបកសារញ្ច នាម គន្ថំ អកាសិ. អថាបរិម្បិ មុត្តិមនគរេយេវ សុវណ្ណសោភណោ នាម ថេរោ សីហឡទីបំ គន្ត្វា មហាវិហារវាសិគណវំសភូតានំ ថេរានំ សន្តិកេ បុន សិក្ខំ គហេត្វា មុត្តិមនគរមេវ បច្ចាគច្ឆិ.

សោ បន ថេរោ អរញ្ញេយេវ វសិ. ធុតង្គធរោ ច អហោសិ អប្បិច្ឆោ សន្តុដ្ឋោ លជ្ជី កុក្កុច្ចកោ សិក្ខា កាមោ ទក្ខោ ថាមសម្បន្នោ ច. សីហឡទីបេ កលម្ពុម្ហិ នាម ជាតស្សរេ ឧទកុក្ខេបសីមាយំ អតិរេកបញ្ចវគ្គេន វនរតនំ នាម សង្ឃរាជំ ឧបជ្ឈាយំ កត្វា រាហុលភទ្ទំ នាម វិជយពាហុរញ្ញោ អាចរិយភូតំ ថេរំ កម្មវាចាចរិយំ កត្វា ឧបសម្បជ្ជិ. សោច ថេរោ បុនាគន្ត្វា មុត្តិមនគរេយេវ វសិត្វា គណំ វឌ្ឍេត្វា សាសនំ អនុគ្គហេសិ. ឯតេ ច ទ្វេ ថេរេ បដិច្ច រាមញ្ញរដ្ឋេ សីហឡទីបតោ សាសនំ អាគតំ.

ឥទំ រាមញ្ញរដ្ឋេ ឆដ្ឋំ សាសនស្ស បតិដ្ឋានំ.

តតោ បច្ឆា សាសនវសេន ទ្វិវស្សាធិកេ ទ្វិសហស្សេ កលិយុគតោ ឯកាសីតិកេ សម្បត្តេ ហំសាវតីនគរេ សិរិបរមមហាធម្មរាជាតិ ¶ លទ្ធនាមោ ធម្មចេតិយរាជា កុសិមមណ្ឌលេ ហំសាវតីមណ្ឌលេ មុត្តិមមណ្ឌលេ ច រដ្ឋវាសិនោ សបជំវិយ ធម្មេន សមេន រក្ខិត្វា រជ្ជំ ការេសិ. សោ ច រាជា តីសុ បិដកេសុ ចតូសុ ច វេទេសុ ព្យាករណច្ឆន្ទាលង្ការាទីសុ ច ឆេកោ សិក្ខិតនានាសិប្បោ នានាភាសាសុ ច បសុតោ សទ្ធាសីលាទិគុណោបេតោ កុមុទកុន្ទសរទចន្ទិកាសមានសិតបជបតិភូតោ ច សាសនេ ច អតិប្បសន្នោ អហោសិ.

ឯកស្មិំ កាលេ សោ ចិន្តេសិ, ភគវតោ សាសនំ នាម បព្ពជ្ជឧបសម្បទតាវេន សម្ពន្ធំ, ឧបសម្បទភាវោ ច សីមបរិសវត្ថុ ញត្តិកម្មវាចាសម្បត្តីហិ សម្ពន្ធោតិ. ឯវញ្ច បន ចិន្តេត្វា សីមវិនិច្ឆយំ តស្សំ វណ្ណនំ វិនយសង្គហំ តស្សំវណ្ណនំ សីមាលង្ការ សីមសង្គហញ្ច សទ្ទតោ អត្ថតោ ច បុនប្បុនំ ឧបបរិក្ខិត្វា អញ្ញមញ្ញំ សំសន្ទិត្វា បុព្ពាបរំ តុលយិត្វា ភគវតោ អធិប្បាយោ ឦទិសោ គន្ថការានំ អធិប្បាយោ ឦទិសោតិ បស្សិត្វា អម្ហាកំ រាមញ្ញរដ្ឋេ ពទ្ធនទីសមុទ្ទជាតេស្សរាទយោ សីមាយោ ពហុកាបិ សមានា អយំ បរិសុទ្ធាតិ វវត្ថបេតុំ ទុក្ករំ, ឯវំ សតិ សីមបរិសាបរិសុទ្ធា ភវិតុំ ទុក្ករាតិ បដិភាតិ.

តតោ បច្ឆា រាមញ្ញរដ្ឋេ តិបិដកធរព្យត្តប្បដិពលត្ថេរេហិ មន្តេត្វា រញ្ញោ បដិភានានុរូបំ សីមបរិសា បរិសុទ្ធា ភវិតុំ ទុក្ករាតិ ថេរា វិនិច្ឆនិំសុ.

អថ រាជា ឯវម្បិ ចិន្តេសិ,– អហោវត សម្មាសម្ពុទ្ធស្ស សាសនំ បញ្ចវស្សសហស្សានិ បតិដ្ឋតិស្សតីតិ គន្ថេសុ វុត្តោបិ សមានោ អភិសម្ពុទ្ធតោ ចតុសដ្ឋាធិកទ្វិសហស្សមត្តេនេវ កាលេន សាសនេ មលំ ហុត្វា ឧបសម្បទកម្មេ កង្ខាដ្ឋានំ តាវ ឧប្បជ្ជិ, កថំ បន បញ្ចវស្សសហស្សានិ សាសនស្ស បតិដ្ឋានំ ភវិស្សតីតិ. ឯវំ ធម្មសំវេគំ ឧប្បាទេត្វា បុនាបិ ឯវំ ចិន្តេសិ,- ឯវំ ឯត្តកំ សាសនេ មលំ ទិស្សមានោបិ ¶ សមានោ ឧបសម្បទកម្មេ កង្ខាដ្ឋានំ ទិស្សមានោបិ សមានោ បរិសុទ្ធត្ថាយ អនារភិត្វា មាទិសោ អប្បោស្សុក្កោ មជ្ឈត្តោ និសីទិតុំ អយុត្តោ, ឯវញ្ហិ សតិ ភគវតិ សទ្ធោ បសន្នោម្ហីតិ វត្តព្ពតំ អនាបជ្ជេយ្យំ, តស្មា សាសនំ និម្មលំ កាតុំ អារភិស្សាមីតិ.

កុតោ នុខោ ទានិ សាសនំ អាហរិត្វា ថិរំ បតិដ្ឋា បេយ្យន្តិ អាវជ្ជន្តោ ឯវំ ចិន្តេសិ,- ភគវតោ កិរ បរិនិព្ពានតោ ឆត្តិំសាធិកេ ទ្វិសតេ សម្បត្តេ មហាមោគ្គលិ បុត្តតិស្សត្ថេរោ មហាមហិន្ទត្ថេរំ បេសេត្វា សីហឡទីបេ សាសនំ បតិដ្ឋាបេសិ, តទា ទេវានំ បិយតិស្សរាជា មហាវិហារំ ការាបេត្វា អទាសិ, សាសនវរញ្ច ឯកាសិតាធិកានិ ទ្វិវស្សសតានិ វិមលំ ហុត្វា បតិដ្ឋហិ, ភិក្ខុសង្ឃោបិ មហាវិហារ វាសិគណវសេន ឯកតោវ អដ្ឋាសិ, តតោ បច្ឆា អភយគិរិវាសិជេ តវនវាសិវសេន ទ្វេធា ហុត្វា ភិជ្ជិ, ជិនចក្កេ អដ្ឋសត្តសតាធិកេ សហស្សេ សម្បត្តេ សិរិសង្ឃពោធិបរក្កមពាហុមហារាជា ឧទុម្ពរគិរិវាសិ មហាកស្សបត្ថេរប្បមុខំ មហាវិហារ វាសិគណំ អនុគ្គហេត្វា យថាវុត្តេ ទ្វេគណេ វិសោធេសិ, សាសនំ និម្មលំ អកាសិ, តតោ បច្ឆា វិជយពាហុបរក្កមពាហុរាជូនំ ទ្វិន្នំ កាលេបិ សាសនំ និម្មលំ ហុត្វាយេវ អដ្ឋាសិ, តេនេវ ព្យត្តប្បដិពលភិក្ខូ អាយាចិត្វា សីហឡទីបំ គន្ត្វា បុន សិក្ខំ គណ្ហា បេស្សាមិ, តេសំ បន បរម្បរវសេន បវត្តានំ ភិក្ខូនំ វសេន អម្ហាកំ រាមញ្ញរដ្ឋេ សាសនំ និម្មលំ ហុត្វា បតិដ្ឋហិស្សតីតិ. ឯវំ បន ចិន្តេត្វា មោគ្គលានត្ថេរំ សោមត្ថេរញ្ច សីហឡទីបំ គមនត្ថាយ យាចិ. ថេរាច សាសនប្បដិយត្តកម្មមិទន្តិ មនសិករិត្វា បដិញ្ញំ អកំសុ.

រាជា ច ទាឋាធាតុបូជនត្ថាយ ភិក្ខុសង្ឃស្ស បូជនត្ថាយ ភូវនេកពាហុរញ្ញោ បណ្ណាការត្ថាយ ទេយ្យធម្មបណ្ណាការវត្ថូនិ បដិយាទេត្វា ចិត្រទូតំ រាមទូតន្តិ ឥមេ ទ្វេ អមច្ចេ ទ្វីសុ នាវាសុ នាយកដ្ឋានេ ឋបេត្វា កលិយុគេ សត្តតិំសាធិកេ អដ្ឋវស្សសតេ សម្បត្តេ មាឃមាសស្ស បុណ្ណមិតោ ឯកាទសមិយំ សូរវារេ ចិត្រទូតំ សទ្ធិំ មោគ្គលានត្ថេរប្បមុខេហិ ភិក្ខូហិ ឯកាយ នាវាយ គមាបេសិ. ផគ្គុណមាសស្ស អដ្ឋមិយំ សីហឡទីបេ កលម្ពុតិត្ថំ បាយាសិ.

រាមទូតំ បន តស្មិំយេវ វស្សេ មាឃមាសស្ស បុណ្ណមិតោ ទ្វាទសមិយំ ចន្ទវារេ សទ្ធិំ សោមត្ថេរប្បមុខេហិ ភិក្ខូហិ ឯកាយ នាវាយ គមាបេសិ. ឧជុកំ បន វាតំ អលភិត្វា ចិត្រមាសស្ស ជុណ្ហបក្ខនវមិយំ សីហឡទីបេ វល្លិគាមំ បាយាសិ.

តតោ បច្ឆា តេបិ ទ្វេ អមច្ចា ទ្វីសុ នាវាសុ អាភតានិ ទាតព្ពបណ្ណាការវត្ថូនិ សន្ទេសបណ្ណានិ ច ភូវនេកពាហុរញ្ញោ ភិក្ខូសង្ឃស្ស ច អទាសិ. រញ្ញា បេសិតភិក្ខូនញ្ច សន្ទេសបណ្ណេ កថិតនិយាមេនេវ កល្យាណិយំ នាម នទិយំ ឧទកុក្ខេបសីមាយំ សាមណេរភូមិយំ បតិដ្ឋាបេត្វា បុន ឧបសម្បទកម្មំ អកំសុ.

ឧបសម្បជ្ជិត្វា ច ភូវនេកពាហុរាជា នានាប្បការេ ភិក្ខូនំ សារុប្បេ បរិក្ខារេ ទត្វា ឥទំ បន អាមិសទានំ យាវ ជីវិតបរិយោសានាយេវ បរិភុញ្ជិតព្ពំ ភវិស្សតិ, នាមលញ្ឆំ បន ន ជីរិស្សតីតិ កត្វា រាមទូតស្ស នាវាយ បខានភូតស្ស សោមត្ថេរស្ស សិរិសង្ឃពោធិសាមីតិ នាមំ អទាសិ. អវសេសានំ បន ទសន្នំ ថេរានំ កិត្តិសិរិមេឃសាមិ បរក្កមពាហុសាមិ ពុទ្ធឃោសសាមិ សីហឡទីបវិសុទ្ធសាមិ គុណរតនធរសាមី ជិនាលង្ការសាមិ រតនមាលិសាមិ សទ្ធម្មតេជសាមិ ធម្មរាមសាមិ ភូវនេកពាហុសាមីតិ នាមានិ អទាសិ.

ចិត្រទូតស្ស ¶ នាវាយ បខានភូតស្ស មោគ្គលានត្ថេរស្ស ធម្មកិត្តិលោកគរុសាមីតិ នាមំ អទាសិ. អវសេសានំ បន សិរិវនរតនសាមិ មង្គលត្ថេរស្សាមិ កល្យាណតិស្សស្សាមិ ចន្ទគិរិសាមិ សិរិទន្តធាតុសាមិ វនវាសិតិស្សសាមិ រតនលង្ការសាមិ មហាទេវសាមិ ឧទុម្ពរគិរិសាមិ ចូឡាភយតិស្សសាមីតិ នាមានិ អទាសិ. ពាវីសតិយា បន បច្ឆា សមណានំ នាមំ ន អទាសិ. អភិនវសិក្ខំ បន សព្ពេសំយេវ អទាសិ.

តតោ បច្ឆា ចេតិយបូជនាទីនិ កត្វា តំតំកិច្ចំ និប្ផាទេត្វា បុន អាគមំសុ. ភូវនេកពាហុរាជា ចិត្រទូតំ ឯវមាហ, រាមាធិបតិរញ្ញោ បណ្ណាការំ បដិទាតុំ ឥច្ឆាមិ, បដិទូតញ្ច បេសេតុំ តាវ ត្វំ អាគមេហីតិ. ឯវំ បន វត្វា បច្ឆា អាគមនកាលេ ចណ្ឌវាតភយេន មហាសមុទ្ទមជ្ឈេ នាវា អវគច្ឆតិ. តេន សីហឡរញ្ញា បេសិតនាវាយ សព្ពេ សន្និបតិត្វា អារុហិត្វា អាគច្ឆន្តា តីណិ ទិវសានិ អតិក្កមិត្វា បុន ចណ្ឌវាតភយេន អគម្ភីរដ្ឋានេ សិលាយ ឃដ្ដេត្វា លគ្គិត្វា គន្តុំ អសក្កុណិត្វា ឯកំ ឧឡុម្បំ ពន្ធិត្វា ជង្ឃេនេវ អគមំសុ. សីហឡរញ្ញោ ច ទូតោ បណ្ណាការំ ទត្វា បច្ចាគមាសិ. ភិក្ខូសុ ច ភិក្ខូ អន្តរាមគ្គេយេវ មច្ចុ អាទាយ គច្ឆតិ. អហោ អនិច្ចា វត សង្ខារាតិ. ហោន្តិ ចេត្ថ,–

ឥមេសំ បន អារទ្ធំ, ន កិច្ចំ យាវ និដ្ឋិតំ;

ន តាវ អាទិយិស្សន្តិ, មច្ចុ នត្ថិ អាបេក្ខនា.

និក្ការុណិកោ ហិ ឯស, ពលក្ការេន អាទិយ;

រោទមានំវ ញាតីនំ អនិច្ឆន្តំវ គច្ឆតីតិ.

រាមាធិបតិរាជាច តេសំ ភិក្ខូនំ បត្តកាលេ ហំសាវតីនគរស្ស បច្ឆិមស្មិំ ទិសាភាគេ នរសូរេន នាម អមច្ចេន បរិភុត្តេ គាមខេត្តេ បាឡិអដ្ឋកថាឡីកាទយោ បុនប្បុនំ បស្សិត្វា ឧបបរិក្ខិត្វា សីមសមូហនសីមសម្មុតិកម្មានិ ការបេសិ. សីហឡទីបេ ភគវតា ន្ហាយិតបុព្ពាយ កល្យាណិយា នាម នទិយំ ឧទកុក្ខេបសីមំ កត្វា តត្ថ មហាវិហារវាសីនំ ភិក្ខូនំ សន្តិកេ ឧបលទ្ធឧបសម្បទភាវេហិ ភិក្ខូហិ កតត្តា កល្យាណីសីមាតិ សមញ្ញំ អកាសិ. ឥច្ចេវំ រាមាធិបតិរាជា បត្តលង្កេ ភិក្ខូ និស្សាយ សាសនំ សុដ្ឋុ បតិដ្ឋិតំ អកាសិ. កលិយុគស្ស អដ្ឋតិំសាធិកអដ្ឋវស្សសតកាលតោ យាវ ឯកចត្តាលីសាធិកអដ្ឋវស្សសតា តេសំ ភិក្ខូនំ វំសេ អសីតិមត្តា គណបាមោក្ខត្ថេរា អហេសុំ. តេសំ សិស្សជាតានិ បន ឆព្ពិសាធិកានិ ទ្វិសតានិ ចតុសហស្សានិ ទសសហស្សានិ អហេសុំ. ឯវំ ភគវតោ សាសនំ រាមញ្ញរដ្ឋេ វុឌ្ឍិំ រាមញ្ញរដ្ឋេ វុឌ្ឍិំ វិរូឡិំ វេបុល្លមាបជ្ជិតិ.

ឥទំ រាមញ្ញរដ្ឋេ សត្តមំ សាសនស្ស បតិដ្ឋានំ.

យទា បន អរិមទ្ទននគរេ អនុរុទ្ធោ នាម រាជា សុធម្មបុរំ សរាជិកំ អភិភវិត្វា វិទ្ធំសិ, តទា រាមញ្ញរដ្ឋំ រាជសុញ្ញំ ហុត្វា បតិដ្ឋហិ. រាមញ្ញរដ្ឋេ មុត្តិមនគរេ សោណុត្តរវំសោ ឯកោ គណោ, សិវលិវំសោ ឯកោ, តាមលិន្ទវំសោ ឯកោ, អានន្ទវំសោ ឯកោ, ពុទ្ធវំសោ ឯកោ, មហានាគវំសោ ឯកោតិ ឆគ្គណា វិសុំ វិសុំ ហុត្វា អដ្ឋំសុ នានាសំវាសកា នានានិកាយា.

ធម្មចេតិយរញ្ញា បន ការាបិតសាសនម្បិ អភិជ្ជមានំ ហុត្វា អដ្ឋាសិ. សមានសំវាសោ ឯកនិកាយោយេវ អហោសិ. ហំសាវតីមុត្តិមសុវសេន តីណិបិ រាមញ្ញរដ្ឋានិ សុនាបរន្ត សង្ខាតេន ឯកាពទ្ធានិ ហុត្វា តិដ្ឋន្តិ. បុព្ពេច មរម្មរដ្ឋិន្ទរាជូនំ អាណាបវត្តនដ្ឋានានិ អហេសុំ ¶ . តស្មា មរម្មរដ្ឋតោ ឯកច្ចេ ភិក្ខូ រាមញ្ញរដ្ឋំ គន្ត្វា កល្យាណីសីមាយំ បុន សិក្ខំ គណ្ហិំសុ. ធម្មចេតិយរញ្ញាការាវិតសាសនំ សកលំ មរម្មរដ្ឋម្បិ ព្យាបេត្វា ឱគាហេត្វា តិដ្ឋតិ.

រាមញ្ញរដ្ឋេ សោណុត្តរត្ថេរានំ សាសនំ បតិដ្ឋាបិតកាលតោ បដ្ឋាយ យាវ សុធម្មបុរេ មនោហរិរញ្ញា អរហន្តានំ សំវិជ្ជមានតា វេទិតព្ពា. តតោ បច្ឆា បន ឧត្តរា ជីវារិយាវំសមហាកាឡប្រានទស្សិត្ថេរានំ កាលេ លោកិយជ្ឈានាភិញ្ញាលាភិយោយេវ សំវិជ្ជំសូតិ. អធុនា បន តីសុបិ រាមញ្ញរដ្ឋេសុ ធម្មចេតិយរញ្ញា ការាវិតសាសនំយេវ តិដ្ឋតិ. ឯត្ថច ហេតុផលសម្ពន្ធវសេន អាទិអន្តវសេនេ ច សាសនវំសំ បញ្ញាយ តុលយិត្វា អាទិតោវ ទស្សិតេហិ តីហិ នយេហិ យថាបវេណី ឃដ្ដិយតិ, តថា គណ្ហេយ្យាតិ. អយញ្ច សាសនវំសោ លជ្ជិបេសលសិក្ខាកាមានំយេវ វសេន វុត្តោ, នាលជ្ជីនំ វសេនាតិ ទដ្ឋព្ពោ.

តាយ ច ថេរបរម្បរាយ មុត្តិមនគរវាសិមេធង្ករត្ថេរោ លោកទីបកសារំ នាម គន្ថំ អកាសិ. ហំសាវតីនគរវាសី បន អានន្ទត្ថេរោ មធុសារត្ថទីបនិំ នាម អភិធម្មដីកាយ សំវណ្ណនំ, ហំសាវតីនគរវាសីយេវ ធម្មពុទ្ធត្ថេរោ កវិស្សារំ នាម ឆន្ទោវណ្ណនំ, ហំសាវតីនគរវាសីយេវ សទ្ធម្មាលង្ការត្ថេរោ បដ្ឋានសារទីបនិំ នាម បករណំ, តថេវ អញ្ញតរោ ថេរោ អផេគ្គុសារំ នាម គន្ថំ អកាសិ. ឯវំ អនេកប្បការានំ គន្ថការានំ មហាថេរានំ វសនដ្ឋានំ ហុត្វា សាសនំ ឱគាហេត្វា វិរូឡដ្ឋានំអហោសីតិ.

ឥតិ សាសនវំសេ សុវណ្ណភូមិសាសនវំសកថាមគ្គា នាម

៤. ឥទានិ បន យោនករដ្ឋេ សាសនស្សុប្បត្តិំ កថេស្សាមិ ¶ . ភគវា ហិ វេនេយ្យហិតាវហោ យោនករដ្ឋេ មមសាសនំ ចិរកាលំ បភិដ្ឋហិស្សតីតិ អាបេក្ខិត្វា សទ្ធិំ ភិក្ខុ សង្ឃេន ទេសចារិកំ អាហិណ្ឌន្តោ លភុញ្ជំ នាម នគរំ អគមាសិ. តទា ឯកោ នេសាទោ ហរិផលំ ទត្វា តំ បរិភុញ្ជិត្វា ហរិពីជេ ខិបិតេ បថវិយំ អបតិត្វា អាកាសេយេវ បតិដ្ឋាសិ. តំ ទិស្វា សិតំ បត្វាកាសិ. តមត្ថំ ទិស្វា អានន្ទត្ថេរោ បុច្ឆិ. អនាគតេ ខោ អានន្ទ ឥមស្មិំ ឋានេ មម ធាតុចេតិយំ បតិដ្ឋហិស្សតិ, សាសនំ វិរូឡមាបជ្ជិស្សតីតិ ព្យាកាសិ. ភគវតា បន ហរិផលស្ស ភុញ្ជិតដ្ឋានត្តាហរិភុញ្ជោតិ តស្ស រដ្ឋស្ស នាមំ អហោសិ. ទ្វិន្នំ តាបសានំ ឋបិតំ ជលសុត្តិកំ បដិច្ច យោនកានំ ភាសាយ លភុញ្ជោតិ នាមំ អហោសិ.

តទា តត្ថ មបិន្នាយ នាម ឯកិស្សា មាតិកាយ សមីបេ និសិន្នោ ឯកោ លវកុលិកជេដ្ឋកោ អត្តនោ បុត្តំ សត្តវស្សិកំ ភគវតោ និយ្យាទេត្វា បព្ពាជេសិ. កម្មដ្ឋានានុយោគវសេន អចិរេនេវ អរហត្តំ បាបុណិ. សត្តវស្សិ កស្សច សាមណេរស្ស អរហត្តំ សច្ឆិកតដ្ឋានតំ បដិច្ច យោនកភាសាយ ឯតំ ឋានំ ចង្គមង្ឃ ឥតិ វុច្ចតិ. ចិរកាល វសេន ជង្គមង្ឃ ឥតិ វុច្ចតិ. តតោ បដ្ឋាយយេវ យោនករដ្ឋេ សាសនំ បតិដ្ឋាតីតិ.

ឥទំ យោនករដ្ឋេ បឋមំ សាសនស្ស បតិដ្ឋានំ.

សាសនេ បន បញ្ចតិំសាធិកេ ទ្វិវស្សសតេ សម្បត្តេ មហារក្ខិតត្ថេរោ យោនករដ្ឋំ គន្ត្វា កម្ពោជខេមាវរ ហរិភុញ្ជាយុទ្ធយាទីសុ អនេកេសុ រដ្ឋេសុ សាសនំ បតិដ្ឋាបេតិ. តានិ ហិ សព្ពានិ រដ្ឋានិ សង្គហេត្វា ទស្សេន្តេហិ អដ្ឋកថាចរិយេហិ យោនកលោកន្តិ ឱកាសកាលោកវាចកេន សាមញ្ញសទ្ទេន វុត្តំ. បកតិ ហេសា គន្ថការានំ យេន ¶ កេនចាការេន អត្ថន្តរស្ស វិញ្ញាបនាតិ.

មហារក្ខិតត្ថេរោ ច សទ្ធិំ បញ្ចហិ ភិក្ខូហិ បាដលិបុត្តតោ អនិលបថមគ្គេន យោនកលោកំ អាគន្ត្វា កាឡការាមសុត្តេន យោនកេ បសាទេសិ. សត្តតិសហស្សាធិកបាណសតសហស្សំ មគ្គផលាលង្ការំ អទាសិ. សន្តិកេ ចស្ស ទសសហស្សានិ បព្ពជិំសុ. ឯវំ សោ តត្ថសាសនំ បតិដ្ឋាបេសិ. តថា ច វុត្តំ អដ្ឋកថាយំ,–

យោនករដ្ឋំ តទា គន្ត្វា, សោ មហារក្ខិតោ ឥសិ;

កាឡការាមសុត្តេន, តេ បសាទេសិ យោនកេតិ.

តតោ បដ្ឋាយ តេសំ សិស្សបរម្បរា ពហូ ហោន្តិ, គណនបថំ វីតិវត្តា.

ឥទំ យោនករដ្ឋេ មហារក្ខិតត្ថេរាទយោ បដិច្ច

យោនករដ្ឋេ លកុន្ននគរេ ជិនចក្កេ បញ្ចវស្សសតេ មណិមយំ ពុទ្ធប្បដិមំ មាបេត្វា វិសុកម្មទេវបុត្តោ នាគសេនត្ថេរស្ស អទាសិ. នាគេសេនត្ថេរោ ច តស្មិំ បដិមម្ហិ ធាតុ អាគន្ត្វា បតិដ្ឋាតូតិ អធិដ្ឋាសិ. អធិដ្ឋានវសេនេវ សត្តធាតុយោ អាគន្ត្វា តត្ថ បតិដ្ឋហិត្វា បាដិហារិយំ ទស្សេសុន្តិ រាជវំសេ វុត្តំ.

តញ្ច វចនំ មម បរិនិព្ពានតោ បញ្ចវស្សសតេ អតិក្កន្តេ ឯតេ ឧប្បជ្ជិស្សន្តីតិ មិលិន្ទបញ្ហាយំ វុត្តវចនេន កាលបរិមាណវសេន ច សមេតិ. យោនករដ្ឋេ មិលិន្ទរញ្ញោ កាលេ ជិនចក្កេ បញ្ចវស្សសតេយេវ នាគសេនត្ថេរំ បដិស្ស ជិនចក្កំ វិរូឡំ ហុត្វា បតិដ្ឋាសិ.

ឥទំ យោនករដ្ឋេ នាគសេនត្ថេរំ បដិច្ច តតិយំ

កលិយុគេ ¶ បញ្ចសដ្ឋិវស្សេលភុញ្ជនគរតោ សង្កមិត្វា ក្យុង្គរនគរេ មាបិកស្ស ពញ្ញាចោមង្គរ នាមកស្ស រញ្ញោ កាលេ មជ្ឈិមទេសតោ កស្សបត្ថេរោ បញ្ចហិ ថេរេហិ សទ្ធិំ អាគច្ឆិ.

តទា សោ រាជា វិហារំ កត្វា តេសំ អទាសិ. សីហឡទីបតោ ច ធាតុយោ អានេត្វា ឯកោ ថេរោ អាគច្ឆិ. ធាតុតោ បាដិហារិយំ ទិស្វា បសីទិត្វា លភុញ្ជចេតិយ និធានំ អកាសិ. តេ ច ថេរេ បដិច្ច យោនករដ្ឋេ សាសន វំសោ អាគតោ.

ឥទំ យោនករដ្ឋេ ចតុត្ថំ សាសនស្ស បតិដ្ឋានំ.

កលិយុគេ ទ្វាសដ្ឋាធិកេ សត្តសតេ សម្បត្ថេ ចិនរដ្ឋិន្ទោ រាជា អភិភវិត្វា សកលម្បិ យោនករដ្ឋំ សង្ខុព្ភិតំ ហោតិ. តទា មហាធម្មគម្ភីរត្ថេរោ មហាមេធង្ករត្ថេ រោចាតិ ទ្វេ ថេរោ យោនករដ្ឋតោ សទ្ធិំ ពហូហិ ភិក្ខូហិ សីហឡទីបំ អគមំសុ. តទា ច សីហឡទីបេ ទុព្ភិក្ខភយេន អភិភូតោ ហុត្វា តតោ ស្យាមរដ្ឋេ សោក្កតយនគរំ បុន អគមំសុ.

តតោ បច្ឆា លកុន្ននគរំ គន្ត្វា សាសនំ បគ្គណ្ហន្តានំ លជ្ជិបេសលានំ ភិក្ខូនំ សន្តិកេ បុន សិក្ខំ គណ្ហិំសុ. តេ ច ថេរោ ស្យាមរដ្ឋេ យោនករដ្ឋេ ច សព្ពត្ថ សាសនំ បតិដ្ឋាបេសុន្តិ.

ឥទំ យោនករដ្ឋេ បត្តលង្កេ ទ្វេ ថេរេ បដិច្ច បញ្ចមំ

កលិយុគេ បញ្ចវីសាធិកេ អដ្ឋវស្សសតេ សម្បត្តេ សិរិសទ្ធម្មលោកបតិចក្កវត្តិរាជា លភុញ្ជចេតិយំ បុន មហន្តំ កត្វា ¶ តស្ស ចេតិយស្ស សមីបេ ចត្តារោ វិហារេ ការាបេត្វា មហាមេធង្ករត្ថេរស្ស សារិបុត្តត្ថេរស្ស ច អទាសិ. តទាបិ តេ ទ្វេ ថេរា សាសនំ បរិសុទ្ធំ កត្វា បតិដ្ឋាបេសុន្តិ.

ឥទំ យោនករដ្ឋេ មហាមេធង្ករសារិបុត្តត្ថេរេ

បដិច្ច ឆដ្ឋំ សាសនស្ស បតិដ្ឋានំ.

កលិយុគេ តេចត្តាលីសាធិកេ នវវស្សសតេ សម្បត្តេ ហំសាវតីនគរេ អនេកសេតិភិន្ទោ នាម រាជា យោនករដ្ឋំ អភិភវិត្វា អត្តនោ ហត្ថគតំ កត្វា ពលិ ភុញ្ជនត្ថាយ ជេដ្ឋបុត្តស្ស អនុរុទ្ធស្ស នាម រាជកុមារស្ស ទត្វា ពហូហិ អមច្ចេហិ សទ្ធិំ តត្ថ គន្ត្វា អនុរាជតាវេន រជ្ជំ ការាបេសិ. សាសនញ្ច វិសោធាបេតុំ សទ្ធម្មចក្កសាមិត្ថេរំ តេន សទ្ធិំ បហិណិ.

អនេកសេតិភិន្នោ កិរ រាជា យោនករដ្ឋំ វិជយកាលេ បឋមំ សាសនស្ស បតិដ្ឋានភូតមិទន្តិ កត្វា តំរដ្ឋវាសិនោ ករមរានីតភាវេន ន អគ្គហេសីតិ.

យថាវុត្តត្ថេរវំសេសុ ច ឯកោ លកុន្ននគរេ អរញ្ញវាសី ថេរោ តត្ថ នគរេ អជ្ជ អសុកស្មិំ ឋានេ ឯកោ មតោតិ គិហីនំ កថេត្វា យថាកថិតំ ភូតំ ហុត្វា អយំ អភិញ្ញាលាភីតិ បាកដោ អហោសិ.

តស្មិំយេវ ច នគរេ មហាមង្គលោ នាម ថេរោ អនេកសេតិភិន្ទស្ស រញ្ញោ យុជ្ឈិតុំ អាគតកាលេ អនេកសេតិភិន្ទោ រាជា មំ បក្កោសិស្សតិ, សមានជាតិកំ ទូតំ បេស្សេស្សតីតិ បក្កោសិតកាលតោ បឋមមេវវទិ. យថាវុត្តនិយាមេនេវ បក្កោសនតោ អយំ អភិញ្ញា លាភីតិ កិត្តិ ឃោសោ អហោសិ.

តត្ថ នគរេ ញាណវិលាសត្ថេរោ សង្ខ្យាបកាសកំ នាម ¶ បករណំ អកាសិ. តំឡីកំ បន បត្តលង្កត្ថេរស្ស វិហារេ វសន្តោ សិរិមង្គលោនាម ថេរោ អកាសិ.

វិសុទ្ធិមគ្គទីបនិំ បន សំញ្ញ្វត្តអរញ្ញវាសី ឧត្តរារាមោ នាម ឯកោ ថេរោ. មង្គលទីបនិំ សិរិមង្គលត្ថេរោ. ឧប្បាតសន្តិំ អញ្ញតរោ ថេរោ. តំ កិរ ឧប្បាតសន្តិំ សជ្ឈាយិត្វា ចីនរញ្ញោ សេនំ អជិនីតិ. ឥច្ចេវំ យោនករដ្ឋេ អភិញ្ញាលាភីនំ គន្ថការានញ្ច ថេរានំ អានុភាវេន ជិនសាសនំ បរិសុទ្ធំ ហុត្វា បតិដ្ឋាតិ. ឯវំ ហេតុផលសម្ពន្ធវសេន អាទិ អន្ត សម្ពន្ធវសេន ច យថាវុត្តេហិ តីហិ នយេហិ ថេរបរម្បរា ឃដ្ដេត្វា គហេតព្ពា.

ឥតិ សាសនវំសេ យោនករដ្ឋសាសនវំសកថា

៥. នវវាសីរដ្ឋសាសនវំសកថាមគ្គោ

៥. ឥទានិ វនវាសីរដ្ឋេ សិរិខេត្តនគរសាសនវំសំ វក្ខាមិ. ជិនចក្កេ ហិ ឯកាធិកេ វស្សសតេ សម្បត្តេ ជដិលោ សក្កោ នាគោ គរុឡោ កុម្ភណ្ឌោ ចន្ទី បរមីស្វរោចាតិ ឥមេ សត្ត សិរិខេត្តំ នាម នគរំ មាបេសុំ. តត្ថ ទ្វត្តបោង្កោ នាម រាជា រជ្ជំ ការេសិ. តស្ស កិរ តីណិ អក្ខីនិ សន្តីតិ. តទា ភគវតោ សាវកា អរហន្តា តិសហស្សមត្តា តត្ថ វសិំសុ. សោ រាជា តេសំ អរហន្តានំ ទេវសិកំ ចតូហិ បច្ចយេហិ ឧបត្ថម្ភិ. ឆ សរីរធាតុយោ ច ឯកេកំ ឯកេកស្មិំ និទហិត្វា ឆ ចេតិឥយានិ ការាបេសិ. ទក្ខិណពាហុំ បន និទហិត្វា ឯកម្បិ ចេតិយំ ការាបេសិ.

ឧណ្ហីសធាតុំ បន កង្គរន្នគរតោ អានេត្វា ឯកម្បិ ចេតិយំ ការាបេសិ. តំ បន តាវ ន និដ្ឋិតំ. បច្ឆា អនុរុទ្ធរាជា គហេត្វា អរិមទ្ទននគរំ អានេត្វា ចញ្ញិង្ខុ នាម ចេតិយេ និធានំ ¶ អកាសិ. តស្មា រក្ខិតត្ថេរស្ស អាគមនតោ បុព្ពេបិ សាសនំ បតិដ្ឋាសីតិ ទដ្ឋព្ពំ. តតោ បច្ឆា សាសនំ ទុព្ពលំ ហុត្វា អដ្ឋាសិ.

ឥទំ វនវាសីរដ្ឋេ បឋមំ សាសនស្ស បតិដ្ឋានំ.

មហាមោគ្គលិបុត្តតិស្សត្ថេរេន បន បេសិតោ រក្ខិតត្ថេរោ វនវាសីរដ្ឋំ គន្ត្វា អាកាសេ ឋត្វា អនមតគ្គបរិយាយកថាយ វនវាសិកេ បសាទេសិ. កថាបរិយោសានេ បនស្ស សដ្ឋិសហស្សានំ ធម្មាភិសមយោ អហោសិ. សត្តតិសហស្សមត្តា បព្ពជិំសុ. បញ្ចវិហារសតានិ បតិដ្ឋាបេសុំ. ឯវំ សោ តត្ថ សាសនំ បតិដ្ឋាបេសិ. តេនេវ អដ្ឋ កថាយំ –

ឯវំ វនវាសីរដ្ឋេ បុព្ពេយេវ សាសនំ ឱគាហេត្វា បតិដ្ឋហិ. ន បន តាវ សកលំ ព្យាបេត្វា បតិដ្ឋហិ.

ឥទំ តាវ វនវាសីរដ្ឋេ សិរិខេត្តនគរេ ទុតិយំ

ជិនចក្កេ បន តេត្តិំសាធិកេ ចតុវស្សសតេ កុក្កុដ សីសោ នាម ឯកោ រាជា រជ្ជំ ការេសិ. តស្ស រញ្ញោ កាលេ ភគវតោ សាវកា អរហន្តា បញ្ចសតមត្តា អហេសុំ. តេសម្បិ សោ រាជា ទេវសិកំ ចតូហិ បច្ចយេហិ ឧបត្ថម្ភេសិ. សោតាបន្នសកទាគាមិអនាគាមិនោ បន គណនបថំ ¶ វីតិវត្តា អហេសុំ.

ឥទំ វនវាសីរដ្ឋេ សិរិខេត្តនគរេ បរម្បរាភតវសេន

ឥច្ចេវំ វនវាសីរដ្ឋេ អនេកសតេហិ អរហន្តត្ថេរេហិ សាសនំ បុណ្ណិន្ទុសង្កាសំ ហុត្វា អតិវិយ វិជ្ជោតេសិ. សាសនិក គន្ថការា បន មហាថេរា តត្ថ ន សន្ទិស្សន្តិ. អរហន្តត្ថេរា បន រាជូនំ អាយាចនំ អារព្ភ ធម្មសត្ថំ ឯកំ វិរចយិំសូតិ បោរាណា វទន្តីតិ. ឥច្ចេវំ–

ឥតិ សាសនវំសេ វនវាសីរដ្ឋសាសនវំសកថាមគ្គោ

៦. អបរន្តរដ្ឋសាសនវំសកថាមគ្គោ

៦. ឥទានិ បន មរម្មមណ្ឌលេ អបរន្តរដ្ឋេ សាសនវំសំ វក្ខាមិ. អម្ហាកញ្ហិ មរម្មរដ្ឋេ សុប្បាទកតិត្ថេ វាណិជគាមេ វសន្តេ ចូឡបុណ្ណ មហាបុណ្ណេទ្វេ ភាតិកេ បដិច្ច ភគវតោ ធរមានស្សេវ អតិរេកវីសតិវស្សកាលតោ បភុតិ សាសនំ បតិដ្ឋាសិ. ន បន តាវ ព្យាបេត្វា បតិដ្ឋាសិ. តេនេវ បុន សាសនស្ស បតិដ្ឋាបនត្ថាយ មហាមោគ្គលិបុត្តតិស្សត្ថេរោ ¶ យោនកធម្មរក្ខិតត្ថេរំ បេសេសីតិ.

ភគវា បន លោហិតចន្ទនវិហារំ បដិគ្គហេត្វា សត្តសត្តាហានិ និសីទិត្វា សមាគតានំ ទេវមនុស្សានំ ធម្មរសំ អទាសិ. សត្តាហេសុ ច ឯកស្មិំ អហុ ចតុរាសីតិបាណសហស្សានំ ធម្មាភិសមយោ អហោសិ. បញ្ចសតមត្តេហិ ច បាសាទេហិ អាគច្ឆន្តោ អន្តរាមគ្គេ សច្ចពន្ធបព្ពតេ និសិន្នស្ស សច្ចពន្ធស្ស នាម ឥសិនោ ធម្មំ ទេសេត្វា ឆហិ អភិញ្ញាហិ សទ្ធិំ អរហត្តំ បាបេសិ. វាណិជគាមេ ច ឥសិទិន្នសេដ្ឋិ អាទីនម្បិ ធម្មរសំ បាយេសិ. ឥច្ចេវំ សច្ចពន្ធឥសិទិន្នមហាបុណ្ណាទយោ បដិច្ច អម្ហាកំ មរម្មមណ្ឌលេ សាសនំ បតិដ្ឋាសិ.

ឥទំ មរម្មមណ្ឌលេ អបរន្តរដ្ឋេ បឋមំ សាសនស្ស

ភគវតោ បរិនិព្ពុតតោ បញ្ចតិំសាធិកេ ទ្វិវស្សសតេ សម្បត្តេ តតិយសង្គីតិំ សង្គាយិត្វា អវសានេ មហាមោគ្គលិបុត្តតិស្សត្ថេរោ អត្តនោ សទ្ធិវិហារិកំ យោនកធម្មរក្ខិតត្ថេរំ សទ្ធិំ ចតូហិ ភិក្ខូហិ អបរន្តរដ្ឋំ បេសេសិ. អបរន្តរដ្ឋញ្ច នាម អម្ហាកំ មរម្មមណ្ឌលេ សុនាបរន្តរដ្ឋមេវ. តមត្ថំ បន ហេដ្ឋា អវោចុម្ហា.

យោនកធម្មរក្ខិតត្ថេរោបិ អបរន្តរដ្ឋំ អាគន្ត្វា អគ្គិក្ខន្ធោបមសុត្តេន រដ្ឋវាសីនំ បសាទេសិ. សត្តតិមត្តានំ បាណសហស្សានំ ធម្មរសំ បាយេសិ. រដ្ឋវាសិនោ ច ពហវោ សាសនេ បព្ពជិំសុ. រាជកុលតោបិ សហស្សមត្តា បព្ពជិំសុ. ឥត្ថីនំ បន អតិរេកសដ្ឋិសហស្សមត្តា បព្ពជិំសុ. តញ្ច ន អគ្គិក្ខន្ធោបមសុត្តន្តំ សុត្វា បព្ពជន្តីនំ ឥត្ថីនំ វសេន វុត្តំ, អថ ខោ អាទិតោ បដ្ឋាយ យាវចិរកាលា សាសនំ បសីទិត្វា បព្ពជន្តីនំ ឥត្ថីនំ វសេន វុត្តន្តិ ទដ្ឋព្ពំ. កស្មាតិ ចេ, ឥត្ថីនំ ភិក្ខុនីនំ សន្តិកេយេវ បព្ពជិតុំ យុត្តត្តា យោនកធម្មរក្ខិតត្ថេរេន ¶ ច សទ្ធិំ ភិក្ខុនីនំ អនាគតត្តា. ឯវំ ចិរកាលំ អតិក្កមិត្វា បច្ឆា ភិក្ខុនិយោ អាគន្ត្វា តាសំ សន្តិកេ បព្ពជិតានំ វសេន វុត្តន្តិ ទដ្ឋព្ពំ. សីហឡទីបេ អនុឡាទេវិយោ បព្ពជិតកាលេ មហាមហិន្ទត្ថេរស្ស សង្ឃមិត្តាថេរិយា បក្កោសនតា ឥធ ញាបកាតិ. ឯវំ យោនកធម្មរក្ខិតត្ថេរំ បដិច្ច អបរន្តរដ្ឋេ សត្តានំ ពហុបការោ អហោសិ. តេនេវដ្ឋកថាយំ–

អបរន្តំ វិគាហិត្វា, យោនកោ ធម្មរក្ខិតោ;

អគ្គិក្ខន្ធូបមេនេត្ថ, បសាទេសិ ជនេ ពហូតិ.

តត្ថាយំ អធិប្បាយ វិសេសោ គហេតព្ពោ. កថំ. អគ្គិក្ខន្ធោបមសុត្តន្តំ នាម ភិក្ខូនំ បដិបត្តិវសេន វុត្តំ, តំ ភិក្ខូនំយេវ ទេសេតុំ វដ្ដតិ, ថេរោបិ តត្ថ តំ ទេសេសិ, តស្មា បុណ្ណសច្ចពន្ធាទយោ បដិច្ច ភគវតោ ធរមានស្ស វីសតិវស្សកាលេយេវ សាសនំ អបរន្តរដ្ឋេ បតិដ្ឋហិត្វា កស្មិញ្ចិ កស្មិញ្ចិ ឋានេ ភិក្ខូនំ សំវិជ្ជមានត្តា តេសំ ភិក្ខូនំ សង្គហេត្វា ទេសេតុំ បច្ឆា អាគតានញ្ច ភិក្ខូនំ បរិសុទ្ធាចារតំ វិញ្ញាបេតុំ អគ្គិក្ខន្ធោបមសុត្តំ ថេរោ ទេសេសីតិ. ឯវញ្ច សតិ អរិមទ្ទននគរេ សមណកុត្តកានំ សំវិជ្ជមានភាវំ វក្ខមានេន វចនេន សមេតិ.

ឥទំ មរម្មមណ្ឌលេ អបរន្តរដ្ឋេ ទុតិយំ

យស្មា បន ពុទ្ធេ, ភគវា បុណ្ណត្ថេរស្ស យាចនមារព្ភ អបរន្តរដ្ឋំ អាគន្ត្វា វាណិជេ ហិ ការិតេ ចន្ទនវិហារេ វសិត្វា ឯកស្មិំ សមយេ អានន្ទេន បច្ឆាសមណេន តម្ពទីបរដ្ឋម្បិ ទេសចារិកំ អាហិណ្ឌិ. អាហិណ្ឌិត្វា អរិមទ្ទននគរដ្ឋានសមីបំ បត្វា បព្ពតមុទ្ធនិ ឋត្វា អនាគតេ ខោ អានន្ទ ឥមស្មិំ បទេសេ សម្មុតិ នាម រាជា អរិមទ្ទនំ នាម នគរំ មាបេស្សតិ ¶ , តស្មិញ្ច នគរេ មម សាសនំ វិរូឡំ ហុត្វា បតិដ្ឋហិស្សតីតិ ព្យាកាសិ. អយមត្ថោ បោរាណវេទបាត្ថកេសុ វុត្តោ.

យោនកធម្មរក្ខិតត្ថេរោ ច អបរន្តរដ្ឋំ អាគន្ត្វា តម្ពទីបរដ្ឋម្បិ អាហិណ្ឌិត្វា តម្ពទីបរដ្ឋវាសីនម្បិ ធម្មរសំ បាយេសិយេវ. អយមត្ថោ ខត្តិយកុលតោ ឯវ បុរិសសហស្សានិ បព្ពជិំសូតិ អដ្ឋកថាយំ វុត្តត្តា វិញ្ញាយតិ. តទា ហិ អបរន្តរដ្ឋេ ខត្តិយោ នត្ថិ, តម្ពទីបរដ្ឋិន្ទោយេវ តំ អនុសាសេត្វា អតិ វសតិ, ខត្តិយេ ច អាសន្តេ កុតោ ខត្តិយកុលានិ ភវិស្សន្តិ, តេនេវ តម្ពទីបរដ្ឋតោ បុរិសសហស្សានិ បព្ពជិំសូតិ វិញ្ញាតព្ពំ. តស្មា តម្ពទីបិកសាសនវំសម្បិ ឥធ វត្តុំ យុជ្ជតិ.

តេនិទានិ តម្ពទីបិកាសាសនវំសំ បវក្ខាមិ. អម្ហាកញ្ហិ មរម្មមណ្ឌលេ តម្ពទីបរដ្ឋេ អរិមទ្ទននគរេ សម្មុតិរាជា នាម ភូបាលោ រជ្ជំ ករេសិ. តតោ បដ្ឋាយ យាវ អនុរុទ្ធរញ្ញា សមថិ នាមកេ ទេសេ និសិន្នានំ តិំសមត្តានំ សមណកុត្តកានំ សដ្ឋិសហស្សមត្តានំ សិស្សានំ ឱវាទំ ទត្វា ចរិំសុ.

តេសំ បន សមណកុត្តកានំ អយំ វាទោ,- សចេ យោ បាណាតិបាតំ ករេយ្យ, សោ ឦទិសំ បរិត្តំ ភណន្តោ តម្ហា បាបកម្មា បរិមុច្ចេយ្យ, សចេ បន យោ មាតាបិតរំ ហន្ត្វា អនន្តរិយកម្មតោ បរិមុច្ចិតុកាមោ ភវេយ្យ, ឦទិសំ បរិត្តំ ភណេយ្យ, សចេបិ បុត្តធិតានំ អាវាហវិវាហកម្មំ កត្តុកាមោ ភវេយ្យ, អាចរិយានំ បឋមំ និយ្យាទេត្វា អាវាហវិវាហកម្មំ កាតព្ពំ, យោ ឥទំ ចារិត្តំ អតិក្កមេយ្យ, ពហុ អបុញ្ញំ បសវេយ្យាតិ ឯវមាទីហិ មិច្ឆាវាទេហិ អត្តនោ អត្តនោ ឧបគតានំ ឱវាទំ អទំសុ. តមត្ថំ សុត្វា អនុរុទ្ធរាជា បរិចិតបុញ្ញោ តេសំ វាទំ ន រុចិ. អយំ តេសំ មិច្ឆាវាទោតិ.

តទា ¶ ច អរិមទ្ទននគរេ អរហន្តោ នាម ថេរោ អាគន្ត្វា សាសនំ បតិដ្ឋាបេសិ. អយំ អរហន្តត្ថេរស្ស អដ្ឋុប្បត្តិ,– រាជវំសាគតបរិត្តនិទានាគតសាសនប្បវេណិយាគតវសេន តិវិធា ហោតិ.

តត្ថាយំ រាជវំសាគតដ្ឋុប្បត្តិ,– តទា ហិ សុនាបរន្តតម្ពទីបរដ្ឋេសុ សព្ពេន សព្ពំ សព្ពទា ថិរំ សាសនំ ន តាវ បតិដ្ឋាសិ. តេនេវ ភគវតោ ព្យាកតនិយាមេន សាសនំ បតិដ្ឋាបេស្សាមាតិ ចិន្តេត្វា មហាថេរា សក្កស្ស ទេវានមិន្ទស្ស សន្តិកំ គន្ត្វា សាសនំ អនុគ្គហិតុំ សមត្ថំ បុគ្គលំ ទេហីតិ យាចិំសុ. សក្កោច ទេវានមិន្ទោ តាវតិំសភវនេ ឯកំ ទេវបុត្តំ យាចិត្វា ឯកិស្សា ព្រាហ្មណិយា កុច្ឆិម្ហិ បដិសន្ធិំ គណ្ហាបេសិ. ទសមាសច្ចយេន វិជាយនកាលេ សីលពុទ្ធិ នាម ថេរោ អនុរក្ខិត្វា វយេ សម្បត្តេ បព្ពាជេសិ. តីសុ បិដកេសុ អតិវិយ ឆេកោ ហុត្វា អរហត្តំ បាបុណិ. អរហន្តោតិ នាមេន បាកដោ អហោសិ.

សោច ថេរោ មរម្មមណ្ឌលេ ជិនសាសនំ វិជ្ជោតាបេតុំ អរិមទ្ទននគរំ អាគន្ត្វា នគរតោ អវិទូរេ ឯកស្មិំ អរញ្ញេ និសីទិ. តទា សក្កោ ទេវានមិន្ទោ ឯកំ នេសាទំ បលោភេត្វា តស្ស ថេរំ ទស្សេសិ. អថ នេសាទស្ស ឯតទហោសិ,– អយំ បន អមនុស្សោ យក្ខោ ភវេយ្យ, សចេ បន មនុស្សោ ភវេយ្យ, ឯវំ សតិ មិលក្ខុជាតិកោ ភវេយ្យាតិ. ឯវំ បន ចិន្តេត្វា រញ្ញោ ទស្សនត្ថាយ នគរំ អានេសិ. ថេរោ ច អដ្ឋបរិក្ខារេ គហេត្វា អនុគច្ឆិ. នេសាទា ច ថេរំ អានេត្វា រញ្ញោ ទស្សេសិ.

រាជា ទិស្វា សន្តិន្ទ្រិយោ អយំ, ន មិលក្ខុជាតិកោ, ឥមស្ស អព្ភន្តរេ សារធម្មោ អត្ថិ មញ្ញេតិ លទ្ធសូរិយោភាសំវិយ បទុមំ ផុល្លចិត្តំ ហុត្វា វីមំសេតុកាមោ ថេរំ អាហ,– អត្តនោ សារុប្បំ អាសនំ ញត្វា និសីទាហីតិ.

ថេរោ ច រាជបល្លង្កំ អារុហិត្វា នសីទិ. រាជា ច អយំ អគ្គាសនេ ¶ និសីទិ, អវស្សំ អគ្គបុគ្គលោ ភវេយ្យាតិ ចិន្តេត្វា ត្វំ កស្ស ញាតិ, កស្ស ភិស្សោ, កុតោ អាគតោសីតិ បុច្ឆិ. ថេរោ ច ឯវមាហ,– លោកស្មិំ យោ នវគុណសម្បន្នោ ភគវា សម្មាសម្ពុទ្ធោ, តស្សាហំ ញាតិ, សោភគវាយេវ មមាចរិយោ, ភិក្ខុសង្ឃស្ស និសិន្នដ្ឋានតោ អាគតោម្ហីតិ.

រាជា ច សោមនស្សប្បត្តោ ហុត្វា អាហ, តវ អាចរិយេន ទេសិតំ ធម្មំ ឯកទេសតោ ទេសេហីតិ. អថ យថា សិរិធម្មាសោករញ្ញោ និគ្រោធសាមណេរេន អប្បមាទធម្មោ ទេសិតោ, ឯវំ អប្បមាទធម្មំយេវ ថេរោ ទេសេសិ.

រាជា ច បុន អាហ,– កុហិំ ទានិ សម្មាសម្ពុទ្ធោ និសីទតិ, តេន បន ទេសិតោ ធម្មោ កតិប្បមាណោ, តស្ស សាវកា បន កតិប្បមាណា, តុម្ហាទិសា អញ្ញេ អត្ថិ វា មា វាតិ. ឥទានិ អម្ហាកំ អាចរិយោ សម្មាសម្ពុទ្ធោ បរិនិព្ពុតោ, ធាតុយោយេវ ឥទានិ អត្ថិ, តេន បន ទេសិតោ ធម្មោ ចតុរាសីតិធម្មក្ខន្ធសហស្សប្បមាណោ, សុធម្មបុរេ បិដកត្តយំ យុគឡវសេន តិំសវិធា អត្ថិ, មយា អញ្ញោ បរមត្ថ សម្មុតិវសេន ទុវិធោបិ សង្ឃោ អត្ថីតិ.

តំ សុត្វា រាជា ភិយ្យោសោមត្តាយ បសន្នោ ហុត្វា បុន អារោចេសិ,– មម ភន្តេ ឥមស្មិំ បច្ចក្ខេ នត្ថិ តយា អញ្ញោ នាថោ, អជ្ជភគ្គេ បាណុបេតំ មំ ឧបាសកោតិ ធារេហិ, តវ ឱវាទំ អហំ សិរសា បដិគ្គណ្ហិស្សាមីតិ.

តតោ បច្ឆា អរញ្ញកង្គារហេ ឋានេ វិហារំ ការាបេត្វា អទាសិ. សមណកុត្តកានម្បិ វាទំ ភិន្ទិ, យថា បន សុវណ្ណបាតិំ លភិត្វា សុវណ្ណភាជនំ លភិត្វា មត្តិកាភាជនន្តិ. សកលេបិ ច រដ្ឋេ សមណកុត្តកានំ វាទំ ជហាបេសិ. តស្មិញ្ច កាលេ សមណកុត្តកា ហីនលាភា ហុត្វា ថេរស្ស ឧបនាហំ ពន្ធិំសុ. តេ បន សមណកុត្តកា អរញ្ញេ និស្សាមិកាវិយ ¶ កោលេយកា សុនខា អនាថា ហុត្វា កាយិកចេតសិកទុក្ខំ លភិំសុ.

រាជា ច តមត្ថំ ញត្វា យថា សមណកុត្តកា នាភិភវន្តិ, តថា អារក្ខំ ឋបេសិ. តេ ច សមណកុត្តកេ សេតវត្ថំ និវាសាបេត្វា អាវុធគាហយោធភាវេន រាជកម្មេ និយោជាបេសិ. ថេរោ ច សាសនេ បសន្នេ ជនេ បព្ពាជេត្វា ឧបសម្បាទេត្វា សាសនំ វិសោធាបេសិ. រាជា ច ឥមស្មិំ រដ្ឋេ បោរាណិកា រាជានោ សមណកុត្តកានំ វាទំ គហេត្វា រជ្ជំ ការេសុំ, សចេ ហិ បន តេសំ អនត្ថករជ្ជំ បុន គណ្ហាបេតុំ សក្កុណេយ្យំ, ឯវំ សតិ អហំ តេសំ អនត្ថករជ្ជំ អបនេត្វា សាត្ថករជ្ជំ គណ្ហាបេតុមិច្ឆាមីតិ អនុសោចីតិ.

អយំ បន បរិត្តនិទានាគតដ្ឋុប្បត្តិ, –

សីហឡទីបេ កិរ វិប្បវាសីនគរេ និសិន្នោ ឯកោ ភិក្ខុឧបទ្វារាវតីនគរំ គន្ត្វា បរិយត្តិំ ឧគ្គណ្ហិ. តតោ បច្ឆា សុធម្ម បុរំ គន្ត្វា បរិយត្តិំ ឧគ្គណ្ហិ. តស្មិញ្ច កាលេ សិរិខេត្តនគរេ បាដលិរុក្ខេ ឯកោ គន្ថោ អត្ថីតិ សុត្វា សុធម្មបុរតោ សិរិខេត្តនគរំ អគមាសិ. អន្តរាមគ្គេ លុទ្ធកោ ថេរំ បស្សិត្វា អយំ យក្ខោតិ មញ្ញិត្វា គហេត្វា អនុរុទ្ធរញ្ញោ ទស្សេសិ.

តទា រាជា ថេរំ បុច្ឆិ,– កោ បន ត្វន្តិ. អហំ មហារាជ គោភមស្ស សាវកោតិ. បុន រាជា បុច្ឆិ,–តិណ្ណំ បន រតនានំ កីទិសោតិ. ថេរោ អាហ,– មហោសធបណ្ឌិតោវិយ មហារាជ ពុទ្ធោ ទដ្ឋព្ពោ, ឧមង្គោវិយ ធម្មោ, វិទេហសេនា វិយ សង្ឃោតិ. ឯវំ ឧបមាហិ បកាសិតោ រាជា បុន បុច្ឆិ,–កិំ នុខោ ឥមេ គោតមស្ស សាវកាតិ. ន ខោ មហារាជ ឥមេ គោតមស្ស សាវកា, ឥមេ បន អម្ហេហិ វិសភាគា សមណកុត្តកាយេ វាតិ. ឯវំ វុត្តេ តតោ បដ្ឋាយ តេ សមណកុត្តកេ វិជហិ, តិណំ វិយ នាតិមញ្ញិ. បាដលិរុក្ខសុ សិរតោបិ ¶ លទ្ធំ តេសំ គន្ថំ លទ្ធដ្ឋានេយេវ អគ្គិនា ឈាបេសិ. តម្បិ ឋានំ យាវជ្ជតនា អគ្គិឈាបនថលន្តិ បាកដន្តិ.

ថេរោ ច វិមាន វត្ថុំ រញ្ញោ ទេសេសិ. រាជា ច បសីទិត្វា សិរិខេត្តនគរតោ អរិមទ្ទននគរំ បច្ចាគមនកាលេ អានេសិ.

ឥទំ បន បាដលិសុសិរេ លទ្ធគន្ថស្ស ការណំ,- តេសញ្ហិ សមណកុត្តកានំ អព្ភន្តរេ ឯកោ ឧបាយច្ឆេកោ សមណកុត្តកោ អត្តនោ វាទានុរូបំ គន្ថំ កត្វា សិរិខេត្តនគរេ ទ្វត្តិំសរតនក្ខន្ធស្ស បាដលិរុក្ខស្ស សុសិរេ បវេសេត្វា បុនប្បុនំ ឧទកេន តេមេត្វា មត្តិកាយ លិម្បេត្វា បុន តចំ ឧប្បាទេត្វា ឧដ្ឋាបេសិ. តទា មយំ សុបិនេ បាដលិរុក្ខេ សារគន្ថោ អត្ថព្យញ្ជនសម្បន្នោ ឯកោ អត្ថីតិឥ បស្សាមាតិ កោលាហលំ ឧប្បាទេសុំ. តំ សុត្វា រាជា សិរិខេត្តនគរំ គន្ត្វា តំ បាដលិរុក្ខំ ភិន្ទិត្វា គវេសេន្តោ តំ គន្ថំ លភិ. គន្ថេ បន សកវាទវសេន សមណកុត្តកសាមញ្ញតា ឦទិសាយេវ, ឯតេ គោតមាសាវកា ហោន្តិឥ, ឯតេសំយេវ អាចារោ សគ្គមគ្គបថភូតោតិ ឯវមាទីហិ ការណេហិ វុត្តំ. រាជា ច បសីទិត្វា សមណកុត្តកានំ ពហូនិ ទាតព្ពានិ អទាសិ. តតោ បច្ឆា ថេរស្ស ធម្មកថំ សុត្វា តំ អគ្គិនា ឈាបេសីតិ ឯវំ សមណកុត្តកានំ វចនំ សុត្វា សិរិខេត្តនគរំ គន្ត្វា អរិមទ្ទននគរំ បច្ចាគច្ឆន្តោ ថេរំ អានេសីតិ ទដ្ឋព្ពំ. អរិមទ្ទននគរំ សម្បត្តកាលេ ជេតវនំ នាម វិហារំ ការាបេត្វា អទាសិ. ថេរោ ច តត្ថ សាសានំ វិសោធេត្វា និសីទិ. រាជា ទេវសិកំ ឧទកំ អានេត្វា អគ្គមហេសី បន ទេវសិកំយេវ បិណ្ឌបាតំ អានេត្វា ភោជេសិ. ឧប្បន្នកង្ខា កាលេបិ តំតំកង្ខាដ្ឋានំ បុច្ឆីតិ.

អយំ បន សាសនប្បវេណិយាគតដ្ឋុប្បត្តិ,–

សុធម្មបុរេ ហិ សមាបត្តិលាភី អនោមទស្សី នាម ថេរោ ¶ សោណុត្តរត្ថេរានំ វំសានុរុក្ខណវសេន សទ្ធិំ បញ្ចហិ ភិក្ខុ សតេហិ និសីទិ. តស្ស បន បធានសិស្សោ អធិសីលោនាម, តស្ស បធានសិស្សោ ប្រានទស្សី នាម, តស្ស បធានសិស្សោ កាឡោ នាម, តស្ស បធានសិស្សោ អរហន្តោ នាម, តស្ស បធានសិស្សោ អរិយវំសោ នាមាតិ.

ឥទញ្ច វចនំ-កោ បនេស ឧត្តរាជីវមហាថេរោតិ. អយញ្ហិ ថេរោ រាមញ្ញទេសិយបុត្តោ អរិយវំសត្ថេរស្ស សិស្សោ. អរិយវំសត្ថេរោ បន កប្បុង្គនគរវាសី មហាកាឡត្ថេរស្ស សិស្សោ. សោ បន សុធម្មនគរវាសិនោ ប្រានទស្សី មហាថេរស្ស សិស្សោតិ កល្យាណី សិលាលេខនេ វុត្តវចនេន ន សមេតិ. ឯវម្បិ សតិ យថិច្ឆិត អធិប្បាយោ ន នស្សតីតិ ទដ្ឋព្ពំ.

ឯវំ នានាចរិយានំ វាទោ នានាការេន ទិស្សមានោបិ អរហន្តត្ថេរស្ស អរិមទ្ទននគរេ សាសនំ អនុគ្គហេត្វា បតិដ្ឋានតាយេវេត្ថ បមាណន្តិ កត្វា នាវមញ្ញិតព្ពោ. សព្ពេសញ្ហិ អាចរិយានំ វាទេបិ អរហន្តត្ថេរោ អរិមទ្ទននគរំ អាគន្ត្វា សាសនំ បតិដ្ឋាបេសីតិ អត្ថោ ឥច្ឆិតព្ពោយេវាតិ.

អរហន្តត្ថេរោ បន មូលនាមេន ធម្មទស្សីតិ បាកដោ សុធម្មបុរវាសី សីលពុទ្ធិត្ថេរស្ស សិស្សោតិ ទដ្ឋព្ពោ. សោ ច ថេរោ បុព្ពេវ បព្ពជ្ជកាលតោ ចតូសុ វេទេសុ សិក្ខិតសិប្បោ. បព្ពជិត្វា បន សាឡកថំ បិដកត្តយំ ឧគ្គណ្ហិត្វា បារំ គន្ត្វា សព្ពត្ថ បាកដោ. សោក្កតយនគរំ អនេត្វា មនុស្សា បូជេន្តិ. តត្ថ ទសវស្សានិ វសិត្វា បុន សុធម្មបុរំ អាគន្ត្វា អរញ្ញវាសំ សមាទិយិ.

តតោ បច្ឆា ជិនចក្កេ ឯកសដ្ឋាធិកេ បញ្ចសតេ សហស្សេច សម្បត្តេ កលិយុគេ ឯកូនាសីតាធិកេ តិសតេ សម្បត្តេ អនុរុទ្ធរាជា រជ្ជំ បាបុណិ. តទា អរិមទ្ទននគរេ សមណកុត្តកា ¶ មយំ គោតមសាវកាតិ វត្វា តិំសតិំសវគ្គា ហុត្វា និសីទិំសុ. វគ្គវសេន កិរ សហស្សមត្តាតិ. អនុរុទ្ធរាជា ច តេសំ សមណកុត្តកានំ អាគារិយាព្រហ្មចរិយាទីនិ សុត្វា ន បសីទិ. ឯវម្បិ បវេណិយា អាគភត្តា ន បជហិ. អរហន្តំ បន ថេរំ បស្សិត្វា តតោ បដ្ឋាយ តេសំ សមណកុត្តកានំ និពទ្ធវត្តានិ ភិន្ទិត្វា សាសនេ បសីទិ.

ឥទំ មរម្មមណ្ឌលេ តម្ពទីបរដ្ឋេ អរិមទ្ទននគរេ អរហន្តំ.

នាម ថេរំ បដិច្ច តតិយំ សាសនស្ស បតិដ្ឋានំ.

តស្មិញ្ច កាលេ អរហន្តត្ថេរោ អនុរុទ្ធរាជានំ អាហ,-តីសុ សាសនេសុ បរិយត្តិសាសនេ តិដ្ឋន្តេយេវ បដិបត្តិ សាសនំ តិដ្ឋតិ, បដិបត្តិសាសនេ តិដ្ឋន្តេយេវ បដិវេធសាសនំ តិដ្ឋតិ, យថា ហិ គុន្នំ សតេបិ សហស្សេបិ វិជ្ជមានេ បវេណិប,លិកាយ ធេនុយា អសតិ សោ វំសោ សាបវេណី ន ឃឡីយតិឥ, ឯវមេវំ ធុតង្គធរានំ ភិក្ខូនំ សតេបិ សហស្សេបិ វិជ្ជមានេ បរិយត្តិយា អន្តរហិតាយ បដិវេធោ នាម ន ហោតិ, យថា បន និមិកុម្ភិយោ ជាននត្ថាយ បាសាណ បិដ្ឋេ អក្ខរេសុ ឋបិតេសុ យាវ អក្ខរានិ ធរន្តិ, តាវ និធិកុម្ភិយោ នដ្ឋា នាម ន ហោន្តិ, ឯវមេវំ បរិយត្តិយា ធរមានាយ សាសនំ អនន្តរហិតំ នាម ហោតិ, យថា ច មហតោ តឡាកស្ស បាឡិយា ថិរាយ ឧទកំ ន ឋស្សតីតិ ន វត្តព្ពំ, ឧទកេ សតិ បទុមាទីនិ បុប្ផានិ ន បុប្ផិស្សន្តីតិ ន វត្តព្ពំ, ឯវមេវំ មហាតឡាកស្ស ថិរបាឡិសទិសេ តេបិដកេ ពុទ្ធវចនេ សតិ ឧទកសទិសា បដិបត្តិបូរកា កុលបុត្តា នត្ថីតិ ន វត្តព្ពំ, តេសុ សតិ បទុមាទិបុប្ផសទិសោ បដិវេធោ នត្ថីតិ ន វត្តព្ពំ, ឯវំ ឯកន្តតោ បរិយត្តិមេវ បមាណំ, តស្មា អន្តមសោ ទ្វីសុ បាតិមោក្ខសុ វត្តមានេសុបិ សាសនំ អនន្តរហិតមេវ, បរិយត្តិយា អន្តរហិតាយ សុប្បដិបន្នស្សាបិ ធម្មាភិសមយោ នត្ថិ, អនន្តរហិតាយ ឯវ ធម្មាភិសមយោ អត្ថិ ¶ , ឥទានិបិ អម្ហាកំ បរិយត្តិសាសនំ បរិបុណ្ណំ នត្ថិ, សរីរធាតុយោ ច នត្ថិ, តស្មា យត្ថ បរិយត្តិសាសនំ សរីរធាតុយោ ច អត្ថិ, តត្ថ បណ្ណាការេន សទ្ធិំ ទូតំ បេសេត្វា អានេតព្ពា, ឯវំ សតិ អម្ហាកំ រដ្ឋេ ជិនសាសនំ ចិរកាលំ បតិដ្ឋហិស្សតីតិ.

ឯវំ បន ភន្តេ សតិ កត្ថ យាចិស្សាមាតិ. សុវណ្ណភូមិរដ្ឋេ មហារាជ សុធម្មបុរេ តីហិ វារេហិ បិដកត្តយំ លិខិត្វា ឋបេសិ, សរីរធាតុយោ ច ពហូ តត្ថ អត្ថីតិ. រាជា ឯវំ ភន្តេតិ បដិគ្គណ្ហិត្វា ពហូ បណ្ណាការេ បដិយាទេត្វា រាជលេខនំ លិខិត្វា អដ្ឋង្គសមន្នាគតំ ឯកំ អមច្ចំ ទូតំ កត្វា បេសេសិ.

សុធម្មបុរិន្ទោ មនោហរិ នាម រាជាបិ មច្ឆេរចិត្តោ ហុត្វា តុម្ហាទិសានំ មិច្ឆាទិដ្ឋីនំ ឋានេ បិដកត្តយំ សរីរធាតុយោ ច បហិណិតុំ ន យុត្តា, តិលោកគ្គស្ស ហិ សម្មាសម្ពុទ្ធស្ស សាសនំ សម្មាទិដ្ឋីនំ ឋានេយេវ បតិដ្ឋហិស្សតិ, យថា នាម កេសរសីហរាជស្ស វសា សុវណ្ណបាតិយំយេវ, ន មត្តិកាភាជនេតិ.

ទូតា បច្ចាគន្ត្វា អនុរុទ្ធរញ្ញោ តមត្ថំ អារោចេសុំ. តំ សុត្វា អនុរុទ្ធរាជា កុជ្ឈិ, តត្តកកបាលេ បក្ខិត្តតិលំវិយ តដ តដាយិ.

អថ រាជា នទីមគ្គេន នាវានំ អសីតិសតសហស្សេហិ នាវិកានំ យោធានំ អដ្ឋកោដីហិ សេនំ ព្យូហិត្វា ថលមគ្គេន សទ្ធិំ ចតូហិ មហាយោធនាយកេហិ ហត្ថីនំ អសីតិ សហស្សេហិ អស្សានំ នវុតិឥសតសហស្សេហិ យោធានំ អសីតិកោដិយា សេនំ ព្យូហិត្វា សយមេវ យុជ្ឈិតុំ សុធម្មបរំ គច្ឆិ.

តំ សុត្វា មនោហរិរាជា សីតតសិតោ ហុត្វា អត្តនោ ¶ ពហូ យោធេ សំវិទហិត្វា សុធម្មបុរយេវ បដិសេនំ កត្វា និសីទិ.

អថ អថព្ពណវេទេ អាគតប្បយោគវសេន បុនប្បុនំ វាយមន្តាបិ នគរមូលំ ឧបសង្កមិតុំ ន សក្កា. តទា រាជា វេទញ្ញុនោ បុច្ឆិ,–កស្មា បនេត្ថ នគរមូលំ ឧបសង្កមិតុំ ន សក្កោមាតិ. វេទញ្ញុនោ អាហំសុ,-អថព្ពណវេទវិធានំ មហារាជ អត្ថិ មញ្ញេតិ. អថ រាជា បថវិយំ និទហិត្វា មតកឡេវរំ ឧទ្ធរិត្វា មហាសមុទ្ទេ ខិបេសិ.

ឯកំ កិរ មនុស្សំ ហិន្ទុកុលំ ជេង្គុនាមកំ កីដំ ខាទាបេត្វា តំ មារេត្វា ហត្ថបាទាទីនិ អង្គបច្ចង្គានិ គហេត្វា ឆិន្នឆិន្នានិ កត្វា នគរស្ស សាមន្តា បថវិយំ នទហិត្វា ឋបេសិ. តទា បន នគរំ ឧបសង្កមិតុំ សក្កា. នគរញ្ច បវិសិត្វា អនុរុទ្ធរាជា មនោហរិរាជានំ ជីវគ្គាហំ គណ្ហិ. សុធម្មបុរេ បោរាណិកានំ រាជូនំ បវេណីអាគតវសេន រតនមយមញ្ជូសាយំ ឋបេត្វា បូជិតំ សហធាតូហិ បិដកត្តយំ គហេត្វា មនោហរិរញ្ញោ សន្តកានំ ទ្វត្តិំសហត្ថីនំ បិដ្ឋិយំ អារោបេត្វា អានេសិ.

អរិមទ្ទននគរំ បន បត្វា ធាតុយោ រតនមយមញ្ជូសាយំ ឋបេត្វា សិរិសយនគព្ភេ រតនមញ្ចេ សីសោបទេសស្ស សមីបេ ឋបេសិ. បិដកត្តយម្បិ រតនមយេ បាសាទេ ឋបេត្វា ភិក្ខុសង្ឃស្ស ឧគ្គហធារណាទិអត្ថាយ និយ្យាទេសិ. តតោ កិរ អានីតំ បិដកត្តយំ ឧគ្គណ្ហន្តានំ អរិយានំ សហស្សមត្តំ អហោសីតិ.

សុធម្មនគរំ វិជយិត្វា បិដកេន សទ្ធិំ ភិក្ខុសង្ឃំ អានេត្វា សាសនស្ស បតិដ្ឋាបនំ ជិនចក្កេ ឯកាធិកេ ឆសតេ វស្សសហស្សេ កលិយុគេ ច សោឡសាធិកេ ចតុសតេ សម្បត្តេតិ សិលាលេខនេសុ វុត្តំ.

អនុរុទ្ធរញ្ញោ កាលេ បុញ្ញានុភាវេន តិឥណ្ណំ រតនានំ បរិបុណ្ណត្តា ¶ បុណ្ណគាមោតិ សមញ្ញា អហោសិ. ចិរកាលំ អតិក្កន្តេ ណ្ណការំ លោបវសេន មការស្ស ច និគ្គហិត វសេន បុគមីតិ មរម្មភាសាយ វោហារីយតីតិ អនាគតវំសរាជវំសេសុ វុត្តំ.

អនុរុទ្ធរាជាយេវ ចត្តារោ មហាយោធេ សីហឡទីបំ បេសេត្វា តតោបិ បិដកត្តយំ អានេសិ. សីហឡទីបតោ អានីតបិដកត្តយេន សុធម្មបុរតោ អានីតបិដកត្តយំ អញ្ញមញ្ញំ យោជេត្វា សំសន្ទេត្វា អរហន្តត្ថេរោ វីមំសេសិ. តទា គង្គាទកេនវិយ យមុនោទកំ អញ្ញមញ្ញំ អនូនំ អនធិកំ អហោសិ. តេហិ បិដកេហិ អញ្ញានិបិ វឌ្ឍេត្វា តិបិដកគព្ភេ ឋបេត្វា បូជេសិ. តេសុ តេសុ ឋានេសុបិ បតិដ្ឋាបេសិ.

មនោហរិរាជានម្បិ ម្រង្កបា នាម ទេសេ ឧបដ្ឋាកេហិ សហ ឋបេសិ. តស្ស ច កិរ រញ្ញោ មុខំ វិរវិត្វា កថំ សល្លាបេន្តស្ស មុខតោ ឱភាសោ បជ្ជលិត្វា និក្ខមិ. សោ កទាចិ កទាចិ អនុរុទ្ធរញ្ញោ សន្តិកំ អាគន្ត្វា គារវវសេន វន្ទនាទីនិ អកាសិ. តទា អនុរុទ្ធរញ្ញោ លោមហំសោ ឧប្បជ្ជិ ឧព្ពិគ្គោ ច. តស្មា តស្ស រញ្ញោ និត្ថេជត្ថាយ ពុទ្ធរូបស្ស ចេតិយស្ស ភត្តំ បូជេត្វា តំ គហេត្វា មនោហរិរញ្ញោ ភាជេសិ. តទា តស្ស តទានុភាវោ អន្តរធាយិ. មនោហរិរាជា សំវេគំ អាបជ្ជិត្វា សំសារេ សំសរន្តោ យាវ និព្ពានំ ន បាបុណាមិ, តាវ បរវសេ នានុវត្តេយ្យន្តិ បត្ថនំ អកាសិ. សុធម្មបុរតោ អាភតំ អត្តនោ សន្តកំ មនោមយ មណិំ ឯកស្ស សេដ្ឋិនោ សន្តិកេ វិក្កិណិត្វា លទ្ធមូលេន បញ្ចវាហរជតេន អភុជិតបល្លង្កវសេន ឯកំ មហន្តំ ពុទ្ធ ពិម្ពំ បរិនិព្ពានាការេន ឯកន្តិ ទ្វេ ពុទ្ធប្បដិពិម្ពានិ ការាបេសិ. យាវជ្ជតនា តានិ សន្តីតិ. ឥច្ចេវំ អនុរុទ្ធរាជា សុធម្មបុរតោ ¶ សីហឡទីបតោ ច សាសនំ អានេត្វា អរិមទ្ទននគរេ បតិដ្ឋាបេសីតិ.

ឥទំ អម្ហាកំ មរម្មមណ្ឌលេ តម្ពទីបរដ្ឋេ អរិមទ្ទននគរេ

អនុរុទ្ធរាជានំ បដិច្ច ចតុត្ថំ សាសនស្ស បតិដ្ឋានំ.

ឧត្តរាជីវត្ថេរោបិ សោណុត្តរានំ វំសតោ សាសនំ គហេត្វា សុធម្មបុរតោ អរិមទ្ទននគរំ អាគន្ត្វា សាសនំ បតិដ្ឋាបេសិ.

ឥទំ អម្ហាកំ មរម្មមណ្ឌលេ តម្ពទីបរដ្ឋេ អរិមទ្ទននគរេ ឧត្តរាជីវត្ថេរំ បដិច្ច បញ្ចមំ សាសនស្ស បតិដ្ឋានំ.

ឧត្តរាជីវត្ថេរស្ស សីហឡទីបំ គតកាលេ តេន សទ្ធិំ គតំ ឆប្បទំ នាម សាមណេរំ សីហឡទីបេយេវ សីហឡទីបិកា បព្ពជិំសុ. បព្ពជិត្វា ច ឆប្បទសាមណេរោ បរិយត្តិំ ឧគ្គណ្ហិត្វា ទសវស្សំ តត្ថ វសិត្វា អរិមទ្ទននគរំ បច្ចាគច្ឆិ. សិវលិត្ថេរញ្ច តាមលិន្ទត្ថេរញ្ច អានន្ទត្ថេរញ្ច រាហុលត្ថេ រញ្ច អនេសិ. តេ បន ថេរា តិបិដកធរា ហោន្តិ ព្យត្តា ទក្ខា ច. អយញ្ចត្ថោ វិត្ថារេន ហេដ្ឋា វុត្តោ.

អរិមទ្ទននគរំ បត្វា អរិមទ្ទន វាសីហិ ភិក្ខូហិ សទ្ធិំ វិនយកម្មានិ អកត្វា បុថុ ហុត្វា និសីទិំសុ. នរបតិរាជា ច តេសុ ថេរេសុ អតិវិយ បសីទិ. ឯរាវតីនទិយំ ឧឡុម្បំ ពន្ធិត្វា តត្ថេវ ឧបសម្បទកម្មំ ការាបេសិ. ចិរកាលំ អតិក្កមិត្វា សោ គណោ វុឌ្ឍិ ហុត្វា ឧប្បជ្ជិ.

នរបតិរាជា ច តេ ថេរេ សទ្ធិំ សង្ឃេន និមន្តេត្វា មហាទានំ អទាសិ. តទា ឆណេ អាកប្បសម្បន្នំ រូបសោភគ្គប្បក្កំ ឯកំ នាដកិត្តិំ ទិស្វា រាហុលត្ថេរោ បដិពទ្ធចិត្តោ លេបេ លគ្គិតវានរោវិយ កទ្ទមេ លគ្គិតមាតង្គោវិយ ច កាម គុណលេបកទ្ទមេសុ លគ្គិតោ សាសនេ វិរមិត្វា ហី នាយាវត្តីតុំ អារភិ. មរណន្តិ ករោគេន អភិភូតោ វិយ ¶ អតេកិច្ឆោ ហុត្វា សេសត្ថេរេសុ ឱវាទំ ទិន្នេសុ បិនាទិយិ. តទា សេសត្ថេរា តំ ឯវមាហំសុ,-មា ត្វំ ឯកំ តំ បដិច្ច សព្ពេបិ អម្ហេ លជ្ជាបេតុំ ន អរហសិ, មា ឥធ ហីនាយា វត្តេហិ, មល្លារុទីបំ គន្ត្វា យថារុចិំ ករោហីតិ បេសេសុំ. រាហុលត្ថេរោ ច កុសិមតិត្ថតោ នាវំ អារុយ្ហ មល្លារុទីបំ អគមាសិ. មល្លារុទីបំ បត្តកាលេ មល្លារុរាជា វិនយំ ជានិតុកាមោ សហ ដីកាយ ខុទ្ទសិក្ខាបករណំ តស្ស សន្តិកេ ឧគ្គណ្ហិត្វា ឯកបត្តមត្តំ មណិំ អទាសិ. សោច តំ លភិត្វា ហីនាយាវត្តីតិ. ហោន្តិ ចេត្ថ,-

អតិទូរេវ ហោតព្ពំ, ភិក្ខុនា នាម ឥត្ថិភិ;

ឥត្ថិយោ នាម ភិក្ខូនំ, ភវន្តិ ឥធ វេរិនោ.

តាវ តិដ្ឋន្តុ ទុប្បញ្ញា, មយំ បោរាណិកាបិ ច;

មហាបញ្ញា វិនាសំ, បត្តា ហរិតចាទយោ.

តស្មា ហិ បណ្ឌិតោ ភិក្ខុ, អន្តមសោវ ឥត្ថិភិ;

វិស្សាសំ ន ករេ លោកេ, រាគោ ច ទុប្បវារិតោតិ.

សេសេសុ ច ថេរេសុ ឆប្បទោ នាម ថេរោ បឋមំ កាលង្កតោ. សិវលិតាមលិន្ទានន្ទត្ថេរាយេវ តយោ បរិយត្តិឧគ្គហណធារណាទិវសេន សាសនំ ឧបត្ថម្ភេត្វា អរិមទ្ទននគរេ និសីទិំសុ. ឯកស្មិញ្ច កាលេ រាជា តេសំ តិណ្ណំ ថេរានំ ឯកេកំ ហត្ថិំ អទាសិ. សិវលិតាមលិន្ទត្ថេរា បដិគ្គហេត្វា វនេ វិស្សជ្ជាបេសុំ. អានន្ទត្ថេរោ បន កិញ្ចិបុរនគរំ បហិណិត្វា ញាតកានំ ទេហីតិ កុសិមតិត្ថំ គន្ត្វា នាវំ អារោបេសិ. តំ ការណំ ញត្វា សិវលិតាមលិន្ទត្ថេរាតំ ឯវមាហំសុ,– មយំ បន អាវុសោ ហត្ថីនំ សុខត្ថាយ វនេ វិស្សជ្ជេម,ត្វំ បន អធម្មិកំ ករោសីតិ. កិន្នាម ភន្តេ ញាភកានំ សង្គហោ ន វដ្ដតិ, ននុ ញាតកានញ្ច សង្គហោតិ ភគវតា វុត្តន្តិ.

ថេរា ¶ អាហំសុ,-សចេ ត្វំ អម្ហាកំ វចនំ នករេយ្យាសិ,ភវ ឥច្ឆានុរូបំ ករោហិ, មយំ បន តយា សទ្ធិំ សំវាសំ ន ករិស្សាមាតិ វិសុំ និសីទិំសុ.

តតោ បដ្ឋាយ ទ្វេ គណា ភិជ្ជិំសុ. តតោ បច្ឆាកាលេ អតិក្កន្តេ តាមលិន្ទត្ថេរោ ពហុស្សុតានំ ព្យត្តិពលានំ សិស្សានំ អនុគ្គហត្ថាយ គហដ្ឋានំ សន្តិកេ អយំ ពហុស្សុតោ អយំ មហាបញ្ញោតិ ឯវមាទិនា វចីវិញ្ញត្តិំ សមុដ្ឋាបេតិ, ឯវំ កតេ កុលបុត្តា សុលភបច្ចយវសេន សាសនស្ស ហិតំ អាវហិភុំសក្ខិស្សន្តីតិ កត្វា. តំ ការណំ សុត្វា សិវលិត្ថេរោ ឯវមាហ,- កស្មា ត្វំ វចីវិញ្ញត្តិំ សមុដ្ឋាបេត្វា ពុទ្ធប្បដិកុច្ឆិតំ កម្មំ ករោសីតិ. ភគវតា អត្តនោ អត្ថាយយេវ វចីវិញ្ញត្តិំ បដិក្ខិត្តា, អហំ បន បរេសំយេវ អត្ថាយ វចីវិញ្ញត្តិំសមុដ្ឋាបេមិ, នាត្តនោ អត្ថាយ, សាសនស្ស ហិ វេបុល្លត្ថាយ ឯវំ វចីវិញ្ញត្តិំសមុដ្ឋាបេមិ. សិវលិត្ថេរោបិ ន ត្វំ មម វចនំ ករោសិ, យំ យំ ត្វំ ឥច្ឆសិ, តំ តំ ករោហិ, អហំ បន តយា សទ្ធិំ សំវាសំ នករិស្សាមីតិ វិសុំ ហុត្វា សទ្ធិំ សកបក្ខេន និសីទិ. តតោ បដ្ឋាយ តយោ គណា ភិជ្ជិំសុ.

ឯវំ អរិមទ្ទននគរេ អរហន្តត្ថេរស្ស ឯកោ វំសោ, សិវលិត្ថេរស្ស ឯកោ, តាមលិន្ទត្ថេរស្ស ឯកោ, អានន្ទត្ថេរស្ស ឯកោតិ ចត្តារោ គណា អហេសុំ.

តេសុ អរហន្តត្ថេរគណោ សុធម្មបុរតោ បឋមំ អាគតត្តា បុរិមគណោតិ វោហារិយតិ, អញ្ញេ បន បច្ឆា អាគតត្តា បច្ឆាគណាតិ.

សិវលិត្ថេរោ អរិមទ្ទននគរេ យាវីជីវំ សាសនំ បគ្គណ្ហិត្វា កលិយុគេ នវុតាធិកេ បញ្ចវស្សសតេ កាលេ កាលមកាសិ.

អានន្ទត្ថេរោ បន អរិមទ្ទននគរេយេវ ចតុចត្តាលីស វស្សានិ ¶ សាសនំ បគ្គណ្ហិត្វា ឆនវុតាធិកេ បញ្ចវស្សសតេ កាលេ កាលមកាសិ.

តាមលិន្ទត្ថេរោបិ យាវជីវំ សាសនំ បគ្គណ្ហិត្វា អដ្ឋន វុតាធិកេ បញ្ចវស្សសតេ កាលេ កាលមកាសីតិ. អហោ សង្ខារសភាវោតិ.

សេយ្យថាជគរស្សេវ, នាភិយា ចក្កមណ្ឌលេ;

លគ្គោ សសោ សមិត្វាបិ, ទិសំ គច្ឆតិ តំ មុខំ.

តថេវ សព្ពសត្តាបិ, មច្ចុចក្កេសុ លគ្គិតា;

យាវជីវម្បិ ធាវិត្វា, មច្ចុមុខំ ឧបាគមុន្តិ.

ឥច្ចេវំ អរិមទ្ទនបុរេ អរហន្តេហិ ច គន្ថការេហិ ច បុថុជ្ជនេហិ ជិនសាសនំ នភេ ចន្ទោវិយ វិជ្ជោតតិ.

តត្ថ ហិ យទា អនុរុទ្ធរាជា សុធម្មបុរតោ សាសនំ អានេសិ, តទា អរហន្តា ឆសតសហស្សមត្តា អាគតា, សោតាបន្នសកទាគាមិអនាគាមិនោ បន គណនបថំ វីតិ វត្តាតិ.

ឆត្តគុហិន្ទស្ស នាម រញ្ញោ កាលេបិ ហិមវន្តេ គន្ធមាទនបព្ពតតោ អដ្ឋ អរហន្តា បិណ្ឌាយ រាជគេហំ អាគមំសុ. រាជា ច បត្តំ គហេត្វា បិណ្ឌបាតេន ភោជេត្វា ឥទានិ កុតោ អាគតត្ថាភិ បុច្ឆិ. ហិមវន្តេ មហារាជ គន្ធ មាទនបព្ពតតោតិ. អថ រាជា អតិប្បសន្នោ ហុត្វា ឥធ តេមាសំ វស្សំ ឧបគច្ឆថាតិ យាចិត្វា វិហារំ ការាបេត្វា អទាសិ. តេមាសម្បិ អន្តោគេហេ និមន្តេត្វា បិណ្ឌបាតេន ភោជេសិ.

ឯកំ សមយំ អរហន្តានំ គន្ធមាទនបព្ពតេ នន្ទមូលគុហំ វិយ ឯកំ គុហំ មាបេត្វា ទស្សេហីតិ យាចិ. តេ ច អរហន្តា នន្ទមូលគុហំវិយ ឯកំ គុហំ ឥទ្ធិយា មាបេត្វា ទស្សេសុំ ¶ . រាជា ច តាយ គុហាយ សទិសំ ឯកំ គុហំ ការាបេសិ. នន្ទមូលគុហាការេន បន កតត្តា នន្ទាតិ នាមម្បិ អកាសិ. ឥច្ចេវំ ឆត្តគុហិន្ទស្ស រញ្ញោ កាលេ គន្ធមាទនបព្ពតេ នន្ទមូលគុហតោ អាគន្ត្វា អរហន្តា សាសនំ បតិដ្ឋាបេសុំ.

អរហន្តភាវោ ច នាមេស យថាភូតំ ជានិតុំ ទុក្ករោ, អនុបសម្បន្នានំ ឧត្តរិមនុស្សធម្មទស្សនស្ស បដិក្ខិត្តត្តា, អរហត្តំ វា បត្វាបិ វាសនាយ អប្បជហិតត្តា. អរហាបិ ហិ សមានោ អហំ អរហាតិ អនុបសម្បន្នានំ កថេតុំ ន វដ្ដតិ, អរហត្តំ បត្វាបិ ឯកច្ចោ វាសនំ បជហិតុំ ន សក្កា, បិលិន្ទវច្ឆត្ថេរវត្ថុចេត្ថ ញាបកំ. ឯវំ លោកេ អរហន្ត ភាវោ ជានិតុំ ទុក្ករោ. តេនេវ មហាកស្សបត្ថេរស្ស ឧបដ្ឋាកោ ឯកោ ភិក្ខុ អត្តនោ ឧបជ្ឈាយស្ស មហាកស្សបត្ថេរស្ស សន្តិកេ វសិត្វាបិ តស្ស អរហន្ត ភាវំ ន ជានិ.

មហាកស្សបត្ថេរញ្ហិ ឯកេន សទ្ធិវិហារិកេន សទ្ធិំ អរញ្ញវិហារតោ គាមំ បិណ្ឌាយ ចរន្តំ អន្តរាមគ្គេ បត្តា ទិបរិក្ខារេ គហេត្វា បច្ឆា គច្ឆន្តោយេវ ឯកោសទ្ធិ វិហារិកោ ឯវមាហ,–លោកស្មិំ ភន្តេ អរហា អរហាតិ បាកដោ, សុតមត្តោវាហំ ភវាមិ, ន កទាចិ ទិដ្ឋបុព្ពោតិ. តំ សុត្វា ថេរោ បច្ឆា បរិវត្តត្វា ឱលោកេន្តោ បរិក្ខារេ អាវុសោ គហេត្វា អរហន្តស្ស បច្ឆាគច្ឆន្តោយេវ អរហន្តភាវំ ន ជានាតីតិ អាហាតិ.

អរិមទ្ទននគរេបិ សីលពុទ្ធិបោល្លោង្កសុមេធត្ថេរាទយោបិ អរហន្តាយេវ អហេសុំ. នរបតិរាជា ហិ ខណិត្តិ បាទបព្ពតំ គន្ត្វា បច្ចាគមនកាលេ អន្តរាមគ្គេ ឯកិស្សា មាតិកាយ មណោភាសំ ទិស្វា ឥធ បុញ្ញំ ការេតុកាមោ សក្កោ ទស្សេតិ មញ្ញេតិ មនសិករិត្វា ចេតិយំ ការាបេស្សាមីតិ ¶ តត្ថ រដ្ឋវាសីតិ សមំ ភូមិភាគំ ការាបេសិ.

អថ ឯកោ សីលពុទ្ធិ នាម ថេរោ ឯវមាហ,– បុញ្ញំ មហារាជ ករិស្សមីតិ ឥទំ ភូមិបរិកម្មំ ការាបេសិ, ឯវំ ការាបេន្តស្ស តេ អបុញ្ញំយេវ ភវតិ, នោបុញ្ញន្តិ វត្វា ពហូ សត្តា មា កិលមន្តូតិ មនសិកត្វា រញ្ញោ ទណ្ឌកម្មេន តជ្ជនត្ថាយ រញ្ញា ទិន្នំ បិណ្ឌបាតំ នភុញ្ជិ. រាជា ច សចេ ត្វំ មយា ទិន្នំ បិណ្ឌបាតំ អភុញ្ជិតុកាមោ ភវេយ្យាសិ, មម វិជិតេ វសន្តោយេវ ត្វំ មម បិណ្ឌបាតា ន មុច្ចេយ្យាសិ, រដ្ឋវាសីហិបិ ទិន្នបិណ្ឌបាតោ មយ្ហមេវ សន្តកោ, ននុ នាម មម បិណ្ឌបាតំយេវ ត្វំ ភុញ្ជសីតិ អាហ.

សីលពុទ្ធិត្ថេរោបិ សចេ អហំ ឯវំ ភវេយ្យាមិ, សីហឡទីបំ គន្ត្វា វសិស្សាមីតិ ចិន្តេត្វា អរញ្ញេ វសិ.

អថ តមត្ថំ ជានិត្វា នគរទ្វារេ អារក្ខោ ឯកោ យក្ខោ រញ្ញោ អាគតកាលេ អភិមុខំ ឋិតោវ ភយានករូបំ និសីទិ. អថ នានាវិជ្ជាកម្មេហិ អបនេន្តោបិ ន សក្កា អបនេតុំ.

អថ រាជា និមិត្តបាឋកេ បក្កោសាបេត្វា បុច្ឆិ,-កេន ការណេន អយំ យក្ខោ ឥធ និសិន្នោតិ. ត្វំ មហារាជ សីលពុទ្ធិត្ថេរំ អគារវវសេន បុព្ពេ កថេសិ, យក្ខាបិ ថេរេ អតិវិយ បសន្នាតិ អម្ហេហិ សុតបុព្ពា, តំ បដិច្ច យក្ខោ ភយានករូបំ ទស្សេត្វា និសិន្នោ ភវិស្សតីតិ អាហ.

រាជាបិ អមច្ចេ អាណាបេសិ ថេរំ បក្កាសថាតិ. ថេរោ នាគច្ឆិ. សីហឡទីបំយេវ គមិស្សាមីតិ អារភិ. តមត្ថំ សុត្វា រាជា ឯកំ ចតុរង្គបច្ចយំ នាម អមច្ចំ បក្កោសាបេត្វា ត្វំ គន្ត្វា ថេរំ បក្កោសាហីតិ បេសេសិ. ចតុរង្គបច្ចយោ ច ឆេកតាយ ឯកំ សុវណ្ណមយំ ពុទ្ធប្បដិពិម្ពំ នាវាយ ឋបេត្វា មហាសមុទ្ទតិត្ថំ អគមាសិ. អថ ថេរំ សម្បាបុណិត្វា ¶ ឥទានិ ឥធ ភគវា សម្មាសម្ពុទ្ធោ អគមាសិ, សីលពុទ្ធិត្ថេរោ ភគវតោ សម្មាសម្ពុទ្ធស្ស ទស្សនត្ថាយ អាគច្ឆតូតិ ទូតំ បេសេសិ. ថេរោបិ ភគវតោ សម្មាសម្ពុទ្ធស្ស ទស្សនត្ថាយ អាគច្ឆតូតិ វចនំ បដិក្ខិបិតុំ ពុទ្ធគារវវសេន អវិសហតាយ អាគច្ឆីតិ.

បោរាណិកានំវ ថេរានំ, ពុទ្ធេ សគារវំ ឥធ;

បណ្ឌិតោ គារវំ ពុទ្ធេ, ករេ បសន្នចេតសាតិ.

នាវំ អភិរូហិត្វា ថេរោ ភគវតោ សម្មាសម្ពុទ្ធស្ស វន្ទនាមានបូជាសក្ការទីនិ អកាសិ. ថេរស្ស ឯវំ វន្ទនាមានបូជាសក្ការាទីនិ ករោន្តស្សេវ វេគេន នាវំ អានេត្វា គច្ឆិ. អថ ចតុរង្គបច្ចយោ ឯវមាហ,– ឥទានិ ភន្តេ តុម្ហាកំ អាចរិយស្ស សម្មាសម្ពុទ្ធស្ស សាសនំ បគ្គណ្ហិតុំ យុត្តោតិ. រាជា ច អមច្ចេហិ បរិវារិតោ បច្ចុគ្គច្ឆិ. នាវាយ ថេរស្ស ហត្ថេ គហេត្វា រាជគេហំ អានេសិ. ទ្វារំ បត្តកាលេ យក្ខោ បថវិយំ និសីទិត្វា ថេរំ វន្ទិ.

រាជា រាជគេហំ បត្វា ថេរំ នានាភោជនេហិ ភោជេសិ. ឯវញ្ច អវោច,–អជ្ជតគ្គេ ភន្តេ ត្វមសិ មមាចរិយោ, ភគវតោវ ឱវាទំ សិរសា បដិគ្គហេត្វា អនុវត្តិស្សាមាតិ អត្តនោ បញ្ចបុត្តេបិ ថេរស្ស អទាសិ. តេ ច បញ្ចកុមារា ថេរេន សទ្ធិំ អនុវត្តិំសុ. ថេរោ តេ បក្កោសេត្វា វិហារំ អគមាសិ. អន្តរាមគ្គេ កប្បិយបថវិយំ បញ្ច បរិមណ្ឌលាការានិ លិខិត្វា តេសំ រាជកុមារានំ ទស្សេត្វា និវត្តាបេសិ. រាជកុមារា បដិនិវត្តិត្វា តំ ការណំ រញ្ញោ អារោចេសុំ. រាជា ច តុម្ហាកំ បុញ្ញំ ការាបនត្ថាយ ទស្សេតីតិ វត្វា តុលាវសេន តេហិ រាជកុមារេហិ សុវណ្ណំ សមំ កត្វា តេន សុវណ្ណេន មូលំ កត្វា ភគវតោ ធរមានកាលេ ¶ បស្សេនទិកោសលរញ្ញា ការាបិតំ ចន្ទនប្បដិពិម្ពំវិយ វិសុំ វិសុំ បដិពិម្ពំ ការាបេសិ.

តេសំ និធានដ្ឋានភូតានិ បញ្ច ចេតិយានិបិ សក្កោ កម្ម វិធាយកោ ហុត្វា បតិដ្ឋាបេសិ. ឯត្ថ ច បុព្ពេ រញ្ញា បសីទិត្វា ថេរស្ស រាជកុមារា ទិន្នា, មូលំ រតនត្តយស្ស ទត្វា បុន រាជកុមារេ ភូជិស្សេ ការេតុកាមតាយ ថេរោ ឯវំ សញ្ញំ អទាសីតិ ទដ្ឋព្ពំ.

សោ ច សីលពុទ្ធិត្ថេរោ អរហន្តគណវំសោតិ ទដ្ឋព្ពោ.

អរិមទ្ទននគរេយេវ នរបតិ រញ្ញោ កាលេ កស្សបោ នាម ថេរោ ទេសចារិកំ ចរមានោ បោល្លោង្កនាមកំ ទេសំ, តទវសរិ. អថ ទ្វេ មហល្លកបោល្លោង្កា មនុស្សា ថេរេ អតិប្បសន្នតាយ ទ្វេ បុត្តេ ឧបដ្ឋាកត្ថាយ និយ្យាទេសុំ.

បោល្លោង្កមនុស្សានំ អតិប្បសន្នតំ បដិច្ច ថេរោបិ បោល្លោង្កត្ថេរោតិ វោហារិយតិ. យទា ច បន សោ ថេរោ សីហឡទីបំ គន្តុកាមោ អហោសិ, តទា សក្កោ ទេវានមិន្ទោ ព្យគ្ឃរូបំ មាបេត្វា បិដ្ឋិយា យាវ មហាសមុទ្ទតីរំ អានេសិ. មហាសមុទ្ទតីរំ បន បត្វា នាវំ អភិរូហិត្វា វាណិជេហិ សទ្ធិំ តរិ.

មហាសមុទ្ទមជ្ឈេ បន បត្វា សា នាវា ន គច្ឆិ, និច្ចលាវ អដ្ឋាសិ. អថ វាណិជា មន្តេសុំ,-អម្ហាកំ នាវាយ អលក្ខី បាបជនោ អត្ថិ មញ្ញេតិ. ឯវំ បន មន្តេត្វា សលាកាទានំ អកំសុ. យាវ តតិយម្បិ ថេរស្សេវ ហត្ថេ សលាកា បុព្ពេ កតកម្មវិបាកវសេន និបតិ. ឥទំ បន ថេរស្ស បុព្ពេ កតកម្មំ,-ថេរោ ហិ តតោ អត្តភាវតោ សត្តមេ ភវេ ឯកស្មិំ គាមេ កុលទារកោ ហុត្វា កីឡនត្ថាយ ឯកំ សុនខំ នទិយំ ឱតារេត្វា ឧទកេ កីឡមាបេសិ. ឯវំ កីឡមន្តំ សុនខំ សយមេវ ឧរេន ឧគ្គហេត្វា តីរំ អានេសីតិ ឯវំ ¶ បុព្ពេ កតកម្មវិបាកវសេន ថេរស្សេវ ហត្ថេ សលាកា និបតិ.

តទា វាណិជា ឧទកបិដ្ឋេ ខិបិំសុ. អថ សក្កោ ទេវានមិន្ទោ កុម្ភីលរូបំ មាបេត្វា បិដ្ឋិយំ អារោបេត្វា អានេសិ. ថេរោ យក្ខទីបំ បត្វា អន្ធចក្ខុកានំ យក្ខានំ មេត្តានុភាវេន ចក្ខុំ លភាបេសិ. យក្ខា ច ថេរស្ស គុណំ ញត្វា ទ្វេ យក្ខភាតិកេ អទំសុ. ថេរោ ច សីហឡទីបំ គន្ត្វា មហាចេតិយរូបំ លោហបាសាទរូបំ សរីរធាតុំ មហាពោធិពិជានិ ច អានេត្វា បច្ចាគមាសីតិ.

សុមេធត្ថេរោ ច ហលង្កស្ស នាម នគរស្ស ទក្ខិណទិសាភាគេ ម្ហត្តិបាមេ បុរត្ថិមាយ អនុទិសាយ ទិន្ននាមិកេ វិហារេ វសិ. ឋានស្ស បន នាមវសេន ថេរស្សោបិ ទិន្នវិហារោ ត្វេវ នាមំ អហោសិ. សោបិ ថេរោ បំសុកូលិកោ លជ្ជីបេសលោ សិក្ខាកាមោ ឈានលាភី អរហាយេវ. សោ ហិ ទេវសិកំ ទេវសិកំ អដ្ឋនវយោជនប្បមាណេ បាទចេតិយំ គន្ត្វា វន្ទិ. ចេតិយង្គណវត្តញ្ច អកាសិ. តតោ អាគន្ត្វា ម្ហត្តិគាមេ បិណ្ឌាយ ចរិ. ឥទំ ថេរស្ស និពទ្ធវត្តំ.

អបរានិបិ វត្ថូនិ ពហូនិ សន្តិ, សព្ពានិ បន តានិ វិត្ថារេត្វា វត្តព្ពានិបិ គន្ថបារវភយេន ន វក្ខាម. សព្ពានិបិ ហិ វុច្ចមានានិ អយំ សាសនវំសប្បទីបិកា អតិប្បបញ្ចា ភវិស្សតិ.

សម្មាសម្ពុទ្ធស្ស ហិ បរិនិព្ពានតោ យាវជ្ជតនា ថេរានំ បរម្បរវសេន សង្ឃដ្ដេត្វា អានយនមេវេត្ថ អធិប្បេតំ. យថាវុត្តានិ បន វត្ថូនិ អធុនា អភិញ្ញាលាភីនំ បុគ្គលានំ អខេត្តភាវេន បសង្គញាណប្បដិពាហណត្ថំ អរិមទ្ទននគរេ ច ពហូនំ អភិញ្ញាលាភីនំ បុគ្គលានំ និវាសដ្ឋានតា ទស្សនត្ថំ វុត្តានិ. វុត្តញ្ចេតំ ភិក្ខុនីខន្ធកដ្ឋកថាយំ,–

បដិសម្ភិទាបត្តេហិ វស្សសហស្សំ សុក្ខវិបស្សកេហិ វស្សសហស្សំ ¶ អនាគាមីហិ វស្សសហស្សំ សកទាគាមីហិ វស្សសហស្សំ សោតាបន្នេហិ វស្សសហស្សន្តិ ឯវំ បញ្ចវស្សសហស្សានិ បដិវេធធម្មោ ឋស្សតីតិ.

ទីឃនិកាយដ្ឋកថាយំ បន សំយុត្តនិកាយដ្ឋកថាយញ្ច បដិសម្ភិទាបត្តេហិ វស្សសហស្សំ ឆឡាភិញ្ញេហិ វស្សសហស្សំ តេវិជ្ជេហិ វស្សសហស្សំ សុក្ខវិបស្សកេហិ វស្សសហស្សំ បាតិមោក្ខេន វស្សសហស្សន្តិ វុត្តំ.

អង្គុត្តរនិកាយដ្ឋកថាយំ បន វិភង្គកថាយញ្ច ពុទ្ធានំ បរិនិព្ពានតោ វស្សសហស្សមេវ បដិសម្ភិទា និព្ពត្តេតុំ សក្កោន្តិ, តតោ បរំ ឆ អភិញ្ញា, តតោបិ អសក្កោន្តា តិស្សោ វិជ្ជា និព្ពត្តិំសុ. គច្ឆន្តេ កាលេ តាបិ និព្ពត្តេតុំ អសក្កោន្តា សុក្ខវិបស្សកា ហោន្តិ. ឯតេនេវ នយេន អនាគាមិនោ សកទាគាមិនោ សោតាបន្នាតិ វុត្តំ.

ឯវំ នានានយេហិ អដ្ឋកថាយបិ អាគតត្តា អធុនា លោកេ អរិយបុគ្គលា ភវិតុំ ន សក្កាតិ ន វត្តព្ពំ. អរិយានមេវ ខេត្តស្ស អធុនាបិ សម្ភវតោ, សចេ អារទ្ធវិបស្សកោ ភវេយ្យ សោ អរហា ភវិតុំ សក្កាយេវាតិ និដ្ឋមេត្ថាវគន្តព្ពំ. អដ្ឋកថាសុ បន នានាភាណកត្ថេរានំ នានាវាទវសេន វុត្តន្តិ ទដ្ឋព្ពំ. ឯត្តកេនេវ បន នានាការេន វាទោ ភិន្នោបិ សាសនំ ភិជ្ជតិយេវ. សាសនស្ស អភិន្នំយេវ ហិ ឯត្ថ បមាណន្តិ.

ឯវំ មរម្មមណ្ឌលេ អរិមទ្ទននគរេ អនេកេហិ អរហន្តសតេហិ សាសនំ វិជ្ជោតតិ. ភគវតោ បន បរិនិព្ពានតោ តិំសាធិកានំ នវវស្សសតានំ ឧបរិ បរម្មរដ្ឋេ សេញិលញ្ញិក្រោធិនាមេន រញ្ញា សមកាលវសេន សីហឡទីបេ រជ្ជំ បត្តស្ស មហានាមរញ្ញោ កាលេ ពុទ្ធឃោសពុទ្ធទត្តត្ថេរេហិ បភុតិ តេតេមហាថេរា តេតេគន្ថេ អកំសុ.

តតោ បច្ឆា សតិសមាធិបញ្ញាមន្ទវសេន សុខាវពោធនត្ថំ ¶ ដីកាយោ អកំសុ. អរិមទ្ទននគរេ ជិនចក្កេសត្តនវុតាធិកេ ឆសតេ សហស្សេ ច សម្បត្តេ តិណ្ណំ បិដកានំ មូលភូតេសុ សទ្ទនយេសុ សោតារានំ ឆេកត្ថាយ មហាសមុទ្ទេវិយ អានន្ទោ នាម មហាមច្ឆោ តីសុ បិដកេសុ សាដ្ឋកថេសុ វិលោលេត្វា អគ្គវំសោ នាម ថេរោ សទ្ទនីតិប្បករណំ អកាសិ. អរិមទ្ទននគរេ ហិ ឧត្តរាជីវត្ថេរាទីនំ សីហឡទីបំ គមនតោ បុព្ពេយេវ តយោ មហាថេរា បរិយត្តិវិសារទា, មហាអគ្គបណ្ឌិតោ, តស្ស សទ្ធិវិហារិកោ ទុតិយអគ្គបណ្ឌិតោ, តស្ស ភាគិនេយ្យោ តតិយអគ្គបណ្ឌិតោតិ. តតិយអគ្គបណ្ឌិតោ បន អគ្គវំសោតិបិ វោហារិយតិ.

តស្មិញ្ច កាលេ អរិមទ្ទននគរវាសិនោ សទ្ទកោវិទា ពហវោ សន្តីតិ យាវ លង្កាទីបា កិត្តិឃោសោ បត្ថរិ. តស្មា សីហឡទីបិកា សទ្ទកោវិទា វីមំសេតុកាមា ហុត្វា អរិមទ្ទននគរំ អាគមំសុ. តទា អរិមទ្ទននគរវាសិនោ ភិក្ខូ សទ្ទនីតិប្បករណំ ទស្សេសុ.

សីហឡទីបិកា ច តំ ទិស្វា ឧបធារេន្តា សទ្ទវិសយេ អយំ គន្ថោវិយ សីហឡទីបេ គន្ថោ ឥត្ថិ, ឥមស្មិំ បករណេ អាគតវិនិច្ឆយម្បិ សកលំ ន ជានិម្ហាតិ នានាប្បការេហិ ថោមេសុន្តិ យាវជ្ជភនា កថាមគ្គោ ន ឧបច្ឆិន្នោតិ.

អរិមទ្ទននគរេ សីហឡទីបំ គន្ត្វា បច្ចាគតោ ឆប្បទោ នាម សទ្ធម្មជោតិបាលត្ថេរោ សទ្ទនយេ ឆេកតាយ សុត្តនិទ្ទេសំ អកាសិ. បរមត្ថធម្មេ ច ឆេកតាយ សង្ខេបវណ្ណនំ នាមចារទីបកញ្ច. វិនយេ ឆេកតាយ វិនយគូឡត្ថទីបនិំ សីមាលង្ការញ្ច អកាសិ. អត្តនា កថានំ គន្ថានំ និគមេ សទ្ធម្ម ជោតិបាលោតិ មូលនាមេន វុត្តំ. កុសិមនគរេ បន ឆប្បទ គាមេ ជាតត្តា ឋានស្ស នាមេន ឆប្បទោតិ បាកដោ.

កុខននគរេ បន ឆប្បទោតិ វោហារិតោបិ ឯកោ ថេរោ អត្ថិ. សោ អលជ្ជី ទុស្សីលោ. ឯកច្ចេ បន នាមសាមញ្ញលេសមត្តេន បត្តលង្កំ សីលវន្តំ បេសលំ សិក្ខាកាមំ ឆប្បទត្ថេរំ អលជ្ជិទុស្សីលភាវេន ឧបវទន្តិ, យថា នាម សាមញ្ញលេសមត្តេន មល្លបុត្តំ អាយស្មន្តំ ទព្ពំ អសមាចារេនាតិ.

អរិមទ្ទននគរយេវ អលោង្គចញ្ញិសូនាមកស្ស រញ្ញោ កាលេ មហាវិមលពុទ្ធិត្ថេរោ ចូឡវិមលពុទ្ធិត្ថេរោតិ ទ្វេ ថេរា បរិយត្តិវិសារទា អហេសុំ. តេសុ មហាវិមលពុទ្ធិត្ថេរោ កច្ចាយនស្ស សំវណ្ណនំ ន្យាសគន្ថមកាសិ.

កេចិ បន សីហឡទីបវាសី វិមលពុទ្ធិត្ថេរោ តមកាសីតិ វទន្តិ. ចូឡវិមលពុទ្ធិត្ថេរោ បន វុត្តោទយស្ស បោរាណដីកមកាសិ. ឆន្ទោសារត្ថវិកាសិនិំ សទ្ធម្មញាណត្ថេរោ អកាសិ. វចនត្ថជោតិំ បន វេបុល្លត្ថេរោ អកាសិ. ន្យាសគន្ថស្សបោរាណដីកំ នរបតិរញ្ញោ កាលេ ឯកោ អមច្ចោ អកាសិ.

សោ ហិ រញ្ញោ ឯកំ ឱរោធំ បដិច្ច ជាតំ ឯកំ ធីតរំ ទិស្វា វានរោវិយ លេបេ លគ្គិតោ តិស្សំ បដិពន្ធចិត្តោ ហុត្វា លគ្គិ. តមត្ថំ ជានិត្វា រាជា ឯវមាហ,– សចេ ឯតំ ឥច្ឆេយ្យាសិ, ឯកំ គន្ថំ បរិបុណ្ណវិនិច្ឆយំ គូឡត្ថំ ករោហិ, សចេ ត្វំ តាទិសំ គន្ថំ កាតុំ សក្កុណេយ្យាសិ, ឯតំ លភិស្សសីតិ. អថ សោ ន្យាសស្ស សំវណ្ណនំ បោរាណដីកំ អកាសិ.

តតោ បច្ឆា ហីនាយាវត្តិត្វា ធីតរំ ទត្វា រជ្ជុគ្គាហាមច្ចដ្ឋានេ ឋបេសិ, យំ មរម្មវោហារេន សំប្យង្គឥតិ វុច្ចតិ. តេន បន កតត្តា សោបិ គន្ថោ តំ នាមេន វុច្ចតិ. ការិកំ តស្សា ច សំវណ្ណនំ ឆត្តគុហិន្ទស្ស នាម រញ្ញោ កាលេធម្មសេនាបតិត្ថេរោ អកាសិ. តេន កិរ ការបិតេ នន្ទគុហាយ សមីបេ នន្ទវិហារេ និសីទិត្វា អកាសិ.

តស្មិញ្ចកាលេ ¶ គន្ថមាទនបព្ពតេ នន្ទមូលគុហតោ អរហន្តា អាគន្ត្វា តស្មិំ វិហារេ វស្សំ ឧបគច្ឆិំសុ. តេសំ សម្មុខេ កតត្តា តេ ច គន្ថា បណ្ឌិតេហិ សារតោ បច្ចេតព្ពាតិ អាចរិយា វទន្តិ.

វាច្ចវាចកំ បន ធម្មទស្សី នាម សាមណេរោ អកាសិ.

សទ្ទត្ថភេទចិន្តំ បន អរិមទ្ទននគរសមីបេ ឋិតស្ស ខណិត្តិបាទបព្ពតស្ស សមីបេ ឯកស្មិំ គាមេ វសន្តោ សទ្ធម្មសិរិ នាម ថេរោ អកាសិ. សោយេវ ថេរោ ព្រហជំ នាម វេទសត្ថម្បិ មរម្មភាសាយ បរិវត្តេសិ.

ឯកក្ខរកោសំ បន សទ្ធម្មកិត្តិត្ថេរោ អកាសិ. សោ ហិ កលិយុគេ សត្តាសីតាធិកេ អដ្ឋសតេ សម្បត្តេ មិច្ឆា ទិដ្ឋិកានំ ជលុមសញ្ញិតានំ កុលានំ ភយេន សកលេបិ តម្ពទីបរដ្ឋេ សាសនោភាសោ មិលាយតិ. ពហូនិបិ បោត្ថកានិ អគ្គិភយេន នស្សេសុំ.

តទា តំ បវត្តិំ បស្សិត្វា សចេ បរិយត្តិធម្មោវិនស្សេយ្យ, បដិបត្តិធម្មោបិ នស្សិស្សតិ, បដិបត្តិធម្មេ នស្សន្តេ កុតោ បដិវេធធម្មោ ភវិស្សតីតិ សំវេគំ អបជ្ជិត្វា ឥមំ គន្ថំ អកាសីតិ តដ្ដិកាយំ វុត្តំ.

មុខមត្តសារំ សាគរត្ថេរោ អកាសិ.

កលិយុគេ ឯកាសីតាធិកេ បញ្ចសតេ សម្បត្តេ ឯកំ ទហរបុត្តំ កាលង្កតំ បដិច្ច សំវេគំ អាបជ្ជិត្វា បច្ចេកពុទ្ធត្តំ បត្ថយន្តស្ស ជេយ្យសិង្ខនាមកស្ស រញ្ញោ បុត្តោ ក្យច្វានាមកោ រាជា រជ្ជំ ការេសិ. ធម្មរាជាតិបិ នាមលញ្ឆំ បដិគ្គណ្ហិ. តីសុ បន បិដកេសុ យថាភូតំ វិជានកតាយ មរម្មវោហារេន ក្យច្វាតិ វោហារិយតិ.

សោ ច កិរ រាជា បាឡិអដ្ឋកថាដីកាគន្ថន្តរេសុ អតិឆេកតាយ បិដកត្តយេ សាកច្ឆមត្តម្បិ កាតុំ សមត្ថោ ¶ នាម នត្ថីតិ ឧគ្គហិតតិបិដកោ ហុត្វា ភិក្ខុសង្ឃម្បិ ទិវសេ សត្តហិ វារេហិ គន្ថំ វាចេតិ.

ខណិត្តិបាទបព្ពតស្ស សមីបេបិ ឯកំ តឡាកំ ការាបេត្វា តត្ថ រាជាគារំ ការាបេត្វា តត្ថ និសីទិត្វា គន្ថំ វាចេតិ. សព្ពានិ បន រាជូនំ កិច្ចានិ បុត្តស្សេវ ឧបរាជស្ស និយ្យាទេសិ. គន្ថំ ឧគ្គណ្ហន្តានំ ឱរោធានមត្ថាយ សង្ខេបតោ សទ្ទពិន្ទុំ នាម បករណំ បរមត្ថពិន្ទុញ្ច នាម បករណំ អកាសិ. តស្ស ហិ ចិត្តំ បរិយត្តិយំយេវ រមតិ. អញ្ញំ បន រាជកិច្ចំ សុណិតុម្បិ ន ឥច្ឆិ. អនុរុទ្ធរាជា អនាគតេ អហំ រាជា ភវេយ្យាមិ, តទាយេវ ឥមានិ តាឡិពីជានិ ឧដ្ឋហន្តូតិ អធិដ្ឋហិត្វា រោបេសិ. តានិ តស្ស រញ្ញោ កាលេ ឧដ្ឋហិំសុ. តេនេវ អនុរុទ្ធរាជាយេវាយន្តិ រដ្ឋវាសិនោ សញ្ជានិំសុ. សម្មុតិរាជា ហិ អនុរុទ្ធរាជា ក្យច្វារាជាតិ ឥមេ តយោ ឯកសន្តានាតិ វទន្តិ.

សោ រាជា ឯកម្បិ ចេតិយំ អកាសិ, ន តំ និដ្ឋំ អគមាសិ, បរិយត្តិយំយេវ បរិចារកត្តាតិ រាជវំសេ អាគតំ. លោកសម្មុតិវសេន កក្ខឡទិនេ ឥដ្ឋកានិ ការាបេត្វា តស្មិំយេវ ទិនេ ភូមិសមំ កត្វា តស្មិំយេវ ទិនេ អញ្ញម្បិ សព្ពំ ការាបេសិ. តេន មរម្មវោហារេន ប្រស្សទា ចេតិយន្តិ យាវជ្ជភនា បាកដំ.

តស្ស រញ្ញោ ឯកា ធិភា វិភត្យត្ថំ នាម គន្ថំ អកាសីតិ.

បុព្ពេ កិរ អរិមទ្ទននគរេ ឧគ្គហធារណាទិវសេន សាសនំ អតិវិយ វិរូឡមាបជ្ជិ. អរិមទ្ទននគរេយេវ ហិ ឯកោ វុឌ្ឍបព្ពជិតោ ភិក្ខុ គន្ថំ លិខិតុំ សិលាលេខនទណ្ឌេន ឥច្ឆន្តោ រាជគេហំ បាវិសិ. រាជា កេន អាគតោសីតិ បុច្ឆិ. គន្ថំ លិខិតុំ សិលាលេខនទណ្ឌេន ឥច្ឆន្តោ អាគតោ ម្ហីតិ. ឯវំ មហល្លកោ ត្វំ គន្ថំ មហុស្សាហេន បរិយាបុណន្តោបិ ¶ គន្ថេសុ ឆេកស្ស ឱកាសំ ន បស្សាមិ, សចេ ហិមុសលោ អង្កុរំ ឧដ្ឋាបេត្វា រូហេយ្យ, ឯវំ សតិ ត្វំ គន្ថេសុ ឆេកតំ អាបជ្ជេយ្យាសីតិ អាហ.

តតោ បច្ឆា វិហារំ គន្ត្វា ទេវសិកំ ទេវសិកំ ឯកទន្តកដ្ឋប្បមាណត្តំ លេខនំ ឧគ្គហេត្វា កច្ចាយនអភិធម្មេត្ថសង្គហប្បករណំ អាទិំ កត្វា អាចរិយស្ស សន្តិកេ ឧគ្គណ្ហិ. សោ អចិរេនេវ គន្ថេសុ ឆេកតំ បត្វា មុសលេ ជម្ពុរុក្ខង្កុរំ ពន្ធិត្វា ឧស្សាបេត្វា រាជគេហំ បាវិសិ.

អថ តំ រាជា បុច្ឆិ,-កេនអាគតោសីតិ. អយំ មហារជ មុសលោ អង្កុរំ ឧដ្ឋាបេត្វា រូហតីតិ អាចិក្ខិតុំ អាគតោម្ហីតិ វុត្តេ រាជា ឯតស្ស គន្ថេសុ ឆេកតំ បត្តោម្ហីតិ វុត្តំ ហោតីតិ ជានាសិ. តំ សច្ចំ វា អលិកំ វាតិ វីមំសនត្ថាយ មហាថេរានំ សន្តិកំ បហិណិ. មហាថេរាបិ គូឡដ្ឋានំ បុច្ឆិំសុ. សោបិ បុច្ឆិតំ បុច្ឆិតំ ព្យាកាសិ.

អថ សោ ភិក្ខុ មហាថេរេ ឯវមាហ,-តុម្ហេ ភន្តេ មំ ពហូ បុច្ឆថ, អហម្បិ តុម្ហេ បុច្ឆិតុំ ឥច្ឆាមិ, ឱកាសំ ទេថាតិ យាចិត្វា អញ្ញសមានចេតសិកន្តិ ឯត្ថ អញ្ញសទ្ទស្ស អវធ្យាបេក្ខត្តា អវធិបទំ ឧទ្ធរិត្វា ទស្សេថាតិ បុច្ឆិ. មហាថេរាបិ បុព្ពេ អមនសិកតត្តា សីឃំ វិស្សជ្ជិតុំ ន សក្ខិំសុ. រាជា តមត្ថំ សុត្វា តុដ្ឋចិត្តោ ហុត្វា ទិសា បាមោក្ខនមេន អាចរិយដ្ឋានេ ឋបេសិ. សោ បន ភិក្ខុ អគន្ថការកោបិ គន្ថការកោវិយ បច្ឆិមានំ ជនតានំ ទិន្នោបទេសវសេន ឧបការំ កត្វា សាសនេ ឧប្បជ្ជីតិ. ហោន្តិ ចេត្ថ,–

អហំ មហល្លកោ ហោមិ, ទុប្បញ្ញោ បរិយត្តិកំ;

ឧគ្គហំ មហុស្សាហេន, ន សក្ខិស្សាមិ ជានិតុំ.

បុព្ពេ កិរ អរិមទ្ទននគរេ មាតុគាមាបិ គន្ថំ ឧគ្គណ្ហិំសុ. យេភុយ្យេន ឧគ្គហធារណាទិវសេន បរិយត្តិសាសនំ បគ្គហេសុំ. មាតុគាមា ហិ អញ្ញមញ្ញំ បស្សន្តា តុម្ហេ កិត្តកំ គន្ថំ ឧគ្គណ្ហថ, កិត្តកំ គន្ថំ វាចុគ្គតំ ករោថាតិ បុច្ឆិ សុន្តិ.

ឯកោ កិរ មាតុគាមោ ឯកំ មាតុគា,មំ បុច្ឆិ,-ត្វំ ឥទានិ កិត្តកំ គន្ថំ វាចុគ្គតំ ករោសីតិ. អហំ បន ឥទានិ ទហរបុត្តេហិ ពលិពោធត្តា ព្យាកុលំ បត្វា ពហុំ គន្ថំ វាចុគ្គតំ កាតុំ នសក្កា,សមន្តមហាបដ្ឋានេ បន កុសលត្តិកមត្តំវ វាចុគ្គតំ ករោមីតិ អាហាតិ.

ឥទម្បិ អរិមទ្ទននគរវាសីនំ មាតុគាមានម្បិ បរិយត្តុគ្គហណេ ឯកំ វត្ថុ,–

ឯកំ កិរ ភិក្ខុំ បិណ្ឌាយ ចរន្តំ ឯកា ទ្វាទសវស្សិកា ទហរិត្ថី បុច្ឆិ,-កិន្នាមោសិ ត្វំ ភន្តេតិ. ខេមានាមាហន្តិ. កថញ្ហិ ភន្តេ បុមាវ សមានោ ឥត្ថិលិង្គេន នាមំ អកាសីតិ អាហ. អថ អន្តោគេហេ និសិន្នា មាតា សុត្វា ធីតរំ អាហ,-ត្វំ រាជាទិគណស្ស លក្ខណំ ន ជានាសីតិ. អាម ជានាមិ, អយំ បន ខេមសទ្ទោ ន រាជាទិគណបក្ខំ ភជតីតិ. អថ ¶ មាតា ឯវមាហ,-អយំ បន ខេមសទ្ទោ ឯកទេសេនេវ រាជាទិគណបក្ខំ ភជតីតិ.

អយំ បនេត្ថ ធីតុ អធិប្បាយោ,-ន រាជាទិសទ្ទោ កទាចិ រាជោតិ បច្ចត្តវចនវសេន ឱការន្តោ ទិស្សតិ វិនា ទេវរាជោតិអាទិសមាសវិសយំ, ខេមសទ្ទោ បន កត្ថចិ ខេមោតិ ច ខេមន្តិ ច លិង្គន្តរវសេន រូបន្តរំ ទិស្សតិ, តេនេវ ខេមសទ្ទោ ន រាជាទិគណោតិ វេទិតព្ពោតិ.

អយំ បន មាតុ អធិប្បាយោ,-ខេមសទ្ទោ អភិធេយ្យលិង្គត្តា តិលិង្គកោ,យទា បន សញ្ញាសទ្ទាធិការេ បច្ចត្តវចនវសេន ខេមាតិ អាការន្តោ ទិស្សតិ, តទា ឯកទេសេន ខេមសទ្ទោ រាជាទិគណបក្ខំ ភជតីតិ.

អរិមទ្ទននគរេ កិរ ឯកស្ស កុដុម្ពិកស្ស ឯកោ បុត្តោ ទ្វេ ធីតរោ អហេសុំ. ឯកស្មិញ្ច កាលេ ឃម្មាភិភូតត្តា គេហស្ស ឧបរិតលេ នហាយិត្វា និសីទិ. អថ ឯកា ទាសី គេហស្ស ហេដ្ឋា ឋត្វា កិញ្ចិ កម្មំ ករោន្តី តស្ស កុដុម្ពិកស្ស គុយ្ហដ្ឋានំ ឱលោកេសិ. តមត្ថំ ជានិត្វា កុដុម្ពិកោ សាខំ ឱលោកេសីតិ ឯកំ វាក្យំ ពន្ធិត្វា បុត្តស្ស ទស្សេសិ,ឥមស្ស អត្ថយោជនំ ករោហីតិ. អថ បុត្តោ អត្ថយោជនំ អកាសិ,-សាខំ រុក្ខសាខំ ឱលេកេសិ ឧទិក្ខតីតិ. អថ បច្ឆា ឯកាយ ធីតុយា ទស្សេសិ, ឥមស្ស អត្ថយោជនំ ករោហីតិ. សាបិ អត្ថយោជនំ អកាសិ,- សា សុនខោ ខំ អាកាសំ ឱលោកេសិ ឧទិក្ខតីតិ. អថ បច្ឆា ឯកាយ ធីតុយា ទស្សេសិ, ឥមស្ស អត្ថ យោជនំ ករោហីតិ. សាបិ អត្ថយោជនំ អកាសិ,-សា ឥត្ថី ខំ អង្គជាតំ ឱលោកេសិ មុខំ ឧទ្ធំ កត្វា ឱលោកេសីតិ.

ឯកោ កិរ សាមណេរោ រតនបូរវាសី អរិមទ្ទននគរេ មាតុគាមាបិ ¶ សទ្ទនយេសុ អតិកោវិទាតិ សុត្វា អហំ តត្ថ គន្ត្វា ជានិស្សាមីតិ អរិមទ្ទននគរំ គតោ. អថ អន្តរាមគ្គេ អរិមទ្ទននគរស្ស សមីបេ ឯកំ ទហរិត្ថិំ កប្បាសវត្ថុំ រក្ខិត្វា និសិន្នំ បស្សិ. អថ សាមណេរោ តស្សា សន្តិកំ មគ្គបុច្ឆនត្ថាយ គច្ឆិ. អថ ទហរិត្ថី សាមណេរំ បុច្ឆិ,-កុតោ អាគតោសីតិ.

សាមណេរោ អាហ,-រតនបូរតោ អហំ អាគច្ឆតីតិ. កុហិំ គតោសីតិ វុត្តេ អរិមទ្ទននគរំ គច្ឆតីតិ អាហ. អថ ទហរិត្ថី ឯវមាហ,-ត្វំ ភន្តេ សទ្ទយោគវិនិច្ឆយំ អនុបធារេត្វា កថេសិ, អម្ហយោគដ្ឋានេ ហិ ត្វំ នាម យោគសទ្ទេន យោជេត្វា កថេសិ, ននុ បណ្ឌិតានំ វចនេន នាម បរិបុណ្ណត្ថេន អវិរុទ្ធសទ្ទនយេន បុណ្ណិន្ទុសង្កាសេន ភវិតព្ពន្តិ. អថ សាមណេរោ ខេត្តវត្ថូនិ រក្ខន្តី ទុគ្គតា ទហរិត្ថីបិ តាវ សទ្ទនយកោវិទា ហោតិ, កិមង្គំ បន ភោគសម្បន្នា មហល្លកិត្ថិយោតិ លជ្ជិត្វា តតោយេវ បដិនិវត្តិត្វា បច្ចាគមាសីតិ.

ឥទំ មរម្មមណ្ឌលេ តម្ពទីបរដ្ឋេ អរិមទ្ទននគរេ ថេរបរម្បរវសេន សាសនស្ស បតិដ្ឋានំ.

ឥទានិ មរម្មមណ្ឌលេយេវ ជេយ្យវឌ្ឍនរដ្ឋេ កេតុមតីនគរេ សាសនវំសំ វក្ខាមិ.

កលិយុគេ ហិ ទ្វិសត្តតាធិកេ អដ្ឋវស្សសតេ សម្បត្តេ ជេយ្យវឌ្ឍនរដ្ឋេ កេតុមតីនគរេ មហាសិរិជេយ្យសូរោ នាម រាជា រជ្ជំ ការេសិ. ឯកំ អតិឆេកំ ទេវនាគ នាមកំ ឯកំ ហត្ថិំ និស្សាយ វិជិតំ វិត្ថារមកាសិ. តស្ស បន រញ្ញោ កាលេ កលិយុគេ ទ្វិនវុតាធិកេ អដ្ឋវស្សសតេ សម្បត្តេ មហាបរក្កមោ នាម ថេរោ សីហឡទីបតោ នាវាយ អាគន្ត្វា កេតុមតីនគរំ សម្បត្តោ. រាជា ច ទ្វារា វតីនគរស្ស ¶ ទក្ខិណទិសាភាគេ មហាវិហារំ ការាបេត្វា តស្ស អទាសិ និច្ចភត្តម្បិ. តស្មិញ្ច វិហារេ សីមំ សម្មន្និត្វា តិស្សំ សីមាយំ តុលាវសេន អត្តនា សមំ កត្វា លោហមយពុទ្ធប្បដិពិម្ពំ ការាបេសិ. តញ្ច ពុទ្ធប្បដិពិម្ពិំ សម្បត្តលង្កាទីបន្តិ នាមេន បាកដំ អហោសិ.

តស្ស រញ្ញោ កាលេ សុរាមេរយសិក្ខាបទំ បដិច្ច វិបាទោ អហោសិ. កថំ. ពីជតោ បដ្ឋាយាតិ សម្ភារេ បដិយា ទេត្វា ចាដិយំ បក្ខិត្តកាលតោ បដ្ឋាយ តាលនាលិកេរាទីនំ បុប្ផរសោ បុប្ផតោ គលិតាភិនវកាលតោ បដ្ឋាយ ច ន បាតព្ពោតិ កង្ខាវិតរណីដីកាទីសុ វុត្តវចនេ អធិប្បាយំ វិបល្លាសតោ គហេត្វា តាលនាលិកេរាទីនំ រសោ គលិតាភិនវតោ បដ្ឋាយ បិវិតុំ ន វដ្ដតីតិ ឯកច្ចេ វទន្តិ. ឯកច្ចេ បន ឯវំ វទន្តិ,–តាលនាលិកេរាទីនំ រសោ គលិតាភិនវកាលេ បិវិតុំ វដ្ដតីតិ.

តត្ថ បុព្ពបក្ខេ អាចរិយានំ អយមធិប្បាយោ,–

ពីជតោ បដ្ឋាយាតិ ឯត្ថ សម្ភារេ បដិយាទេត្វា ចាដិយំ បក្ខិត្តកាលតោ បដ្ឋាយ ន បាតព្ពោ. តាលនាលិកេរាទីនំ បុប្ផរសោ ច គលិតាភិនវកាលតោយេវ ន បាតព្ពោតិ.

អយំ បន អបរបក្ខេ អាចរិយានមធិប្បាយោ,–

ពីជតោ បដ្ឋាយាតិ ឯត្ថ សម្ភារេ បដិយាទេត្វា ចាដិយំ បក្ខិត្តកាលតោ បដ្ឋាយ ន បាតព្ពោ. តាលនាលិកេរាទីនំ សម្ភារេហិ បដិយាទិតោ បុប្ផរសោ បុប្ផតោ គលិតាភិនវកាលតោ ន បាតព្ពោតិ.

ឯវំ តាលនាលិកេរាទីនំ រសោ គលិតាភិនវកាលតោ បដ្ឋាយ បាតុំ វដ្ដតិ ន វដ្ដតីតិ វិវាទំ ករោន្តានំ មជ្ឈេ និសីទិត្វា សម្បត្តលង្កោ មហាបរក្កមត្ថេរោ តាទិសោ បិវិតុំ វដ្ដតីតិ វិនិច្ឆិន្ទិ, សុរាវិនិច្ឆយញ្ច នាម គន្ថំ អកាសិ ¶ . ឯវំ កេតុមតីនគរំ មាបេន្តំ មហាសិរិជេយ្យសូរំ នាម រាជានំ និស្សាយ កេតុមតិយំ សាសនំ បតិដ្ឋហិ.

ឥទំ មរម្មមណ្ឌលេយេវ កេតុមតីនគរេ

ឥទានិ មរម្មមណ្ឌលេ តម្ពទីបរដ្ឋេយេវ ខន្ធបុរសាសនវំសំ វក្ខាមិ.

កលិយុគេ ហិ ចតុសដ្ឋាធិកេ ឆវស្សសតេ តយោ ភាតិកា កិត្តិតរនាមកំ រាជានំ រជ្ជតោ ចាវេត្វា ខន្ធបុរនគរេ រជ្ជំ ការេសុំ. តទា កិត្តិតរនាមកស្ស រញ្ញោ ឯកោ បុត្តោ ចីនរដ្ឋិន្ទរាជានំ យាចិត្វា ពហូហិ សេនង្គេហិ ខន្ធបុរនគរំ សម្បរិវារេត្វា អដ្ឋាសិ. អថ តីសុ បិដកេសុ ឆេកំ ឯកំ មហាថេរំ បក្កោសេត្វា មន្តេសុំ. ថេរោ ឯវមាហ,– ជនបទាយត្តមិទំ កម្មំ សមណានំ ន កប្បតិ វិចារេតុំ, អហម្បិ សមណោ, នាដកេហិ បន សទ្ធិំ មន្តេថាតិ. អថ នាដកេ បក្កោសេត្វា មន្តេសុំ. នាដកាបិ សចេ ការណំ នត្ថិ, ឯវំ សតិ ផលំ ន ភវេយ្យ, សចេ បូតិ នត្ថិ, មក្ខិកា ន សន្និបតេយ្យុន្តិ គីតំ គាយិត្វា ឧទកេ កីឡន្តិ.

អថ តេច តយោ ភាតិកា តំ សុត្វា កិត្តិតរនាមកំ រាជានំ ពន្ធនាគារតោ គហេត្វា មារេត្វា ឥទានិ យំ រជ្ជេ ឋបយិស្សាមាតិ ចិន្តេត្វា តុម្ហេ គច្ឆថ, អយំ តស្ស សីសោ, ឥទានិ ឯស បរលោកំ គតោតិ សីសំ ទស្សេសុំ. អថ ចីនរដ្ឋសេនាយោបិ ឥទានិ រាជវំសិកោ នត្ថិ, តេ នហិ យុជ្ឈិតុំ ន ឥច្ឆាម, យំ រជ្ជេ ឋបយិស្សាមាតិ កត្វា មយំ អាគតា, ឥទានិ សោ នត្ថីតិ វត្វា និវត្តេត្វា អគមំសុ.

សោ ច ថេរោ នាដកេហិ សទ្ធិំ មន្តេថាតិ ឯត្តកមេវ វុត្តត្តា ភិក្ខុភាវតោ ន មោចេតីតិ ទដ្ឋព្ពំ. វុត្តញ្ចេតំ,–

បរិយាយោច អាណត្តិ, តតិយេ ទុតិយេ បន;

អាណត្តិយេវ សេសេសុ, ទ្វយមេតំ ន លព្ភតីតិ.

តស្មិំ បន ខន្ធបុរេ អរិមទ្ទននគរេ អរហន្តគណវំសិកា ឆប្បទគណវំសិកា អានន្ទ គណវំសិកា ច ថេរា ពហវោ វសន្តិ. តេហិ បន កតគន្ថោ នាម កោចិ នត្ថីតិ.

ឥទំ ខន្ធបុរេ សាសនស្ស បតិដ្ឋានំ.

ឥទានិ មរម្មមណ្ឌលេ តម្ពទីបរេដ្ឋេយេវ វិជយបុរេ សាសនវំសំ វក្ខាមិ.

កលិយុគេ ហិ ចតុសត្តតាធិកេ ឆវស្សសតេ សីហសូរោ នាម រាជា វិជយបុរំ មាបេសិ. តតោ បច្ឆា ទ្វីសុ សំវច្ឆរេសុ អតិក្កន្តេសុ ចមុំនទិយំ មតសេតិភំ ឯកំ លភិត្វា ឯកសេតិភិន្នោតិ តស្ស នាមំ បាកដំ អហោសិ. តស្ស រញ្ញោ កាលេ វិជយបុរេ សីលវន្តា លជ្ជីបេសលា ភិក្ខូ ពហវោ នត្ថិ. អរិមទ្ទននគរតោ អនុរុទ្ធរាជកាលេ រាជភយេន និលីយិត្វា អវសេសា សមណកុត្តកាយេវ ពហវោ អត្ថិ. បច្ឆា ចូឡអរហន្តត្ថេរទិព្ពចក្ខុត្ថេរានំ អាគតកាលេយេវ លជ្ជីបេសលា ភិក្ខូ ពលវន្តា ហុត្វា គណំ វឌ្ឍាបេសុំ. រាជា ច ទិព្ពចក្ខុត្ថេរំ អន្តេបុរំ បវេសេត្វា ទេវសិកំ បិណ្ឌបាតេន ភោជេសិ. អនុរុទ្ធរញ្ញា តម្ពុលមញ្ជូសាយំ ឋបេត្វា បូជិតា សត្ត ធាតុយោ លភិត្វា តាសំ បញ្ចធាតុយោ ចញ្ញិង្ខុចេតិយេ និធានំ អកាសិ. អវសេសា បន ទ្វេ ធាតុយោ បុញ្ញស្ស នាម អមច្ចស្ស បូជនត្ថាយ និយ្យាទេសិ. សោច អមច្ចោ ជេយ្យបុរេ បុញ្ញចេតិយេ និធានំ អកាសិ.

តទា ច កិរ សមណកុត្តកា គហដ្ឋាវិយ រាជរាជមហាមត្តានំ ¶ សន្តិកេ ឧបដ្ឋានំ អកំសុ. កលិយុគេ ចតុអសីតាធិកេ ឆវស្សសតេ សម្បត្តេ សីសសូររញ្ញោ ជេដ្ឋ បុត្តោ ឧជនោ នាម រាជា រជ្ជំ ការេសិ. សោ បន អវបង្ក្យា នាមកេ ទេសេ ចម្បកកដ្ឋមយេ សត្តវិហារេ ការាបេសិ. ទ្វិ វស្សាធិកេ សត្តវស្សសតេ កាលេ តេ វិហារា និដ្ឋំ អគមំសុ.

តេសុ វិហារេសុ ចម្បកំ នាម បធានវិហារំ អមច្ចបុត្តស្ស សុធម្មមហាសាមិត្ថេរស្ស អទាសិ. សោ បន ថេរោ អរិមទ្ទននគរេ អរហន្តត្ថេរស្ស វំសិកោតិ ទដ្ឋព្ពោ.

វេឡូវនំ នាម បរិវារវិហារំ បន អាភិធម្មិកស្ស ញាណធជស្ស នាម ថេរស្ស អទាសិ. សោបិ អរហន្តត្ថេរស្ស វំសិកោ.

ជេតវនំ នាម បរិវារវិហារំ បន សកលវិនយបិដកំ វាចុគ្គតំ ករោន្តស្ស គុណារាមត្ថេរស្ស អទាសិ. សោ បន ថេរោ អរិមទ្ទននគរេយេវ អានន្ទត្ថេរស្ស វំសិកោ.

កុលវិហារំ នាម បរិវារវិហារំ អាទិច្ចរំសិនោ នាម ថេរស្ស អទាសិ. សោបិ អានន្ទត្ថេរស្ស វំសិកោយេវ.

សុវណ្ណវិហារំ នាម បរិវារវិហារំ សុធម្មាលង្ការស្ស នាម ថេរស្ស អទាសិ. សោបិ អានន្ទត្ថេរវំសិកោយេវ.

នីចគេហំ នាម បរិវារវិហារំ វរបត្តស្ស នាម ថេរស្ស អទាសិ. សោ បន សុធម្មមហាសាមិត្ថេរស្ស អន្តេវាសិកោ.

ទក្ខិណកោដិំ នាម បរិវារវិហារំ សិរិបុញ្ញវាសិនោ នាម ថេរស្ស អទាសិ. សោបិ សុធម្មមហាសាមិត្ថេរស្ស អន្តេវាសិកោតិ.

តេសំ វិហារានំ ឯសន្នដ្ឋានេ រាជា សយមេវ ហត្ថេន គហេត្វា មហាពោធិរុក្ខំ រោបេសិ. តេសំ វិហារានំ បដិ ជគ្គនត្ថាយ ពហូនិបិ ខេត្តវត្ថូនិ អទាសិ អារាមគោបក កុលានិ ច.

តេសំ ¶ បន ថេរានំ សុធម្មបុរារិមទ្ទនបុរភិក្ខុវំសិកត្តាលជ្ជិបេសលតា វិញ្ញាតព្ពា. តេនេវ វិជយបុរេ សាសនំ អតិវិយ បរិសុទ្ធំ អហោសីតិ ទដ្ឋព្ពំ.

តេសម្បិ សិស្សបរម្បរា អនេកសហស្សប្បមាណា អហេសុំ. ឯវំ លជ្ជីបេសលានំយោ ភិក្ខូនំ សន្តិកា កេចិ សទ្ធិវិហារិកា កីដាគិរិម្ហិ អស្សជិបុនព្ពសុកាវិយ អលជ្ជី ទុស្សីលា ឧប្បជ្ជិំសុ, សេយ្យថាបិ នាម មធុរម្ពរុក្ខតោ អម្ពិលផលន្តិ. តេ បន ពហុអនាចារំ ចរិំសុយេវ. ឥទំ បន តេសំ មូលឧប្បត្តិ ទស្សនំ.

រាជា ហិ តទា តេសំ វិហារានំ បដិជគ្គនត្ថាយ ពហូនិ ខេត្តវត្ថូនិ អទាសិ. តេសុ ខេត្តវត្ថូសុ ពលិវិចារណត្ថាយ សុធម្មមហាសាមិត្ថេរោ ឯកច្ចេ ភិក្ខូ អារក្ខណដ្ឋានេ ឋបេសិ. អារក្ខណភិក្ខូ បន ធម្មានុលោមវសេន កស្សកានំ ឱវាទាបេសិ, ខេត្តវត្ថុសាមិភាគម្បិ បដិគ្គណ្ហាបេសិ. តស្មិញ្ច កាលេ ខេត្តវត្ថូនិ បដិច្ច ភិក្ខូ វិវាទំ អកំសុ. អថ តំ វិវាទំ សុត្វា សាសនធរត្ថេរោ ច ទ្វេ បរក្កមត្ថេរា ច តតោ និក្ខមិំសុ. និក្ខមិត្វា សាសនធរត្ថេរោ ខណិត្តិ បាទបព្ពតេ និសីទិ. ទ្វេ បរក្កមត្ថេរា ច ចង្គកិង្គបព្ពតកន្ទរេ និសីទិំសុ. តេសញ្ហិ និវាសដ្ឋានត្តា យាវជ្ជតនា តំ ឋានំ បរក្កមដ្ឋានន្តិ បាកដំ អហោសិ. តេ បន ថេរា ឯកចារាតិ វោហារិំសុ. អវសេសា បន ភិក្ខូ គាមវាសីពហុចារាតិ វោហារិំសុ. តតោ បដ្ឋាយ អរញ្ញវាសីគាមវាសីវសេន វិសុំ គណា ហោន្តិ. វិហារស្ស និន្នានំ ខេត្តវត្ថូនំ ពលិប្បដិគ្គាហកភិក្ខូនម្បិ សង្ឃជាតិសមញ្ញា អហោសិ.

កលិយុគេ ចតុវស្សាធិកេ សត្តសតេ ឧជនស្ស រញ្ញោ ធរមានស្សេវ កនិដ្ឋភាតិកោ ក្យេច្វា នាម រាជា កុមារោ រជ្ជំ គណ្ហិ.

អយំ បន តស្ស អដ្ឋុប្បត្តិ,– ឧជនោ នាម រាជា ត្វំ សមុទ្ទមជ្ឈំ ¶ នាម គាមំ គន្ត្វា តត្ថ និសីទិត្វា តត្រុប្បាទពលិំ ភុញ្ជាហីតិ និយ្យាទេសិ. សោ បន រាជកុមារោ លុទ្ទកម្មេសុយេវ អភិរម្មណសីលោ. ឯកស្មិំ សមយេ បិគវំ គន្ត្វា បច្ចាគតកាលេ រត្តិយំ សុបិនំ បស្សិ,– សក្កោ ទេវានមិន្ទោ អាគន្ត្វា ឧបោសថសីលំ សមាទិយាហិ, ឯវំ សតិ អចិរេនេវ សេតិភេ លភិស្សសតីតិ វត្វា តាវតិំសភវនំ បុន គតោតិ.

សោច រាជកុមារោ តតោ បដ្ឋាយ ឧបោសថសីលំ សមាទិយិ. បច្ឆា កាលេបិ អត្តនោ ហត្ថេ គុថេន កិលិន្នំ ភវតីតិ បុន សុបិនំ បស្សិ. សោ អចិរេនេវ បញ្ច សេតិភេ លភិ. អថ ឯកោ អមច្ចោ គន្ត្វា រញ្ញោ តមត្ថំ អារោចេសិ. រាជា តុដ្ឋចិត្តោ ហុត្វា មម កិរ ភោន្តោ កនិដ្ឋភាតិកោ បញ្ច សេតិភេ លភីតិ រាជបុរិសានំ មជ្ឈេ សំវណ្ណេសិ. អមច្ចោ បុន រាជកុមារស្ស សន្តិកំ គន្ត្វា តមត្ថំ អារោចេសិ. រាជកុមារោបិ មម ភាតិកោ រាជា អកថិតបុព្ពំ វាចាបេយ្យំ វទតីតិ អារាធយិត្វា បុន គន្ត្វា តមត្ថំ រញ្ញោ អារោចាបេសិ. រាជាបិ តថេវ វទតីតិ. តំ សុត្វា រាជកុមារោ ភិយ្យោសោ បសីទិ.

កស្មា បន ឧជនោ រាជា កិត្តិតរំ នាម រាជកុមារំ កនិដ្ឋវោហារេន ន វទតីតិ. ឯកសេតិភិន្ទោ ហិ រាជា អបរស្ស រញ្ញោ ទេវិំ គព្ភិនិំ អានេត្វា អគ្គមហេសិដ្ឋានេ ឋបេសិ, ឋបេត្វា អចិរេនេវ ឧជនំ វិជាយិ, តេនេវ ន ឧជនោ ឯកសេតិភិន្ទស្ស បុត្តោ, កិត្តិតរោ នាម រាជកុមារោយេវ ឯកសេតិភិន្ទស្ស បុត្តោ, តស្មា តំ ការណំ បដិច្ច សោ តំ កនិដ្ឋវោហារេន ន វទតីតិ.

កនិដ្ឋោ បញ្ចសេតិភេ លភតីតិ សុត្វា រាជា ភាយិត្វា កនិដ្ឋស្ស រជ្ជំ ឧបនិយ្យាទេសិ. រាជា រាជគេហស្ស បច្ឆិមទ្វារេន និក្ខមិ. កនិដ្ឋោ បុរិមទ្វារេន បាវិសិ. បញ្ចន្នំ បន សេតិភានំ លទ្ធត្តា បញ្ចសេតិភិន្ទោតិ បាកដោ. មូលនាមំ បនស្ស ¶ សីហសូរោតិ ទដ្ឋព្ពំ. តស្ស រញ្ញោ កាលេ ពហូ អលជ្ជិនោ គាមសាមន្ត វិហារេ វសិត្វា អនេកវិធំ អានាចារំ ចរិំសុ. សុធម្មបុរអរិមទ្ទនបុរតោ បរម្បរវសេន អាគតា ភិក្ខូបិ ពហូ លជ្ជិនោ សិក្ខាកាមា សន្តិ.

អថ តស្ស រញ្ញោ ភត្តំ បរិភុញ្ជនកាលេ ឯកោ សមណកុត្តកោ អដ្ឋ បរិក្ខារេ គហេត្វា អាគន្ត្វា រញ្ញោ សម្មុខេ អដ្ឋាសិ. កិមត្ថាយ អាគតោសីតិ បុច្ឆិតេ បិណ្ឌបាតត្ថាយ អាគតោម្ហីតិ អាហ. អថ រាជា សយំ ភុញ្ជិស្សាមីតិ អារភិត្វាបិ អតិប្បសន្នតាយ បន សុវណ្ណបាតិយា បដិយាទិតំ សកលម្បិ ភត្តំ អទាសិ. អថ រាជា ឯវំ ចិន្តេសិ,– អយំ ភិក្ខុ បិណ្ឌបាតត្ថាយ ឧបមជ្ឈន្តិ កយេវ អាគន្ត្វា អដ្ឋាសិ, ន សោ បុថុជ្ជនភិក្ខុ, អថ ខោ អភិញ្ញាលាភី អរហា ភវេយ្យ, មម បុញ្ញត្ថាយ អាគតោ ភវេយ្យ មំ អនុកម្បំ ឧបាទាយាតិ.

ឯវំ បន ចិន្តេត្វា ឯកំ រាជបុរិសំ អាណាបេសិ តស្ស បច្ឆា អនុគន្ត្វា ឱលោកេតុំ. សោ បន សមណកុត្តកោ សយំ អលជ្ជិភូតត្តាវ អត្តនោ ភរិយា បច្ចុគ្គន្ត្វា បត្តំ គណ្ហិ. តំ ទិស្វា រាជបុរិសោ រញ្ញោ សន្តិកំ គន្ត្វា បឋមមេវ ឯវំ ចិន្តេសិ,– សចេ យថាភូតំ អារោចេយ្យំ, រញ្ញោ បសាទោ វិនស្សេយ្យ, ឯវំ បន អនារោចេត្វា យថា រញ្ញោ បស្សាទោ ភិយ្យោសោមត្តាយ ភវេយ្យ, មយ្ហម្បិ លាភោ ឧប្បជ្ជេយ្យ, សមណកុត្តកោបិ រាជបរាធតោ វិមុច្ចេយ្យ, ឯវំ អារោចេស្សាមីតិ. ឯវំ បន ចិន្តេត្វា អហំ មហារាជ តំ អនុគន្ត្វា ឱលោកេសិ, អថ មម ឯវំ ឱលោកេន្តស្សវ អន្តរធាយីតិ អារោចេសិ. រាជា ភិយ្យោសោមត្តាយ បសីទិត្វា ហត្ថំ បសារេត្វា យថាហំ មញ្ញមិ, តថា អវិរជ្ឈនមេវតន្តិ តិក្ខត្តុំ វាចំ និច្ឆារេសិ, រាជបុរិសស្ស ច ទាតព្ពំ អទាសិ.

តស្មិំយេវ ទិវសេ ឯកោ អមច្ចោ រញ្ញោ បណ្ណាការត្ថាយ ¶ វេលាហកំ នាម ឯកំ តុរង្គមំ អទាសិ. អថ រាជា មម បុញ្ញានុភាវេន ឯស លទ្ធោតិ សម្បហំសិ. តំ បន តុរង្គមំ អារោហិត្វា ឯកំ ហត្ថារោហំ បាជាបេសិ. អថ មហាជនស្ស ឱលោកេន្តស្ស ហត្ថារោហស្ស សីសេវេដ្ឋនទុស្សំយេវ បស្សិត្វា អាកាសេ បក្ខន្ធោ ពកោវិយ បញ្ញាយតិ. សោ បន តុរង្គមោ បាតោវ វិជយបុរតោ គច្ឆន្តោ បព្ពតព្ភន្តរនគរំ សាយន្ហសមយេ បាបុណិ. អព្ភ វិជព្ភនអស្សោតិបិ នាមំ អកាសិ.

ឥច្ចេវំ សមណកុត្តកា ទារម្បិ បោសេសុំ, បគេវ ឥតរំ អនាចារំ. តេនេវ តេ សមណកុត្តកា រញ្ញោ មល្លរង្គម្បិ បវិសិត្វា មល្លំ យុជ្ឈេសុំ. តេសុ បន សមណកុត្តកេសុ ឱវិចង្គាខុំសង្ឃជោ នាម សមណកុត្តកោ មល្លកម្មេ អតិវិយ ឆេកោ អធិកោ. សោ កិរ សំវច្ឆរេ សំវច្ឆរេ រញ្ញោ មល្លរង្គេ ជយិត្វា បន្នរស វា វីសតិ វា អស្សេ បដិលភីតិ.

រតនបូរនគរេ មល្លកម្មេ អតិឆេកោ អធិកោ ឯកោ កម្ពោជកុលោ អត្ថិ. សោ រតនបូរនគរេ ជេយ្យបុរនគរ ច អត្តនា សមថាមំ មល្លបុរិសំ អសភិត្វា វិជយ បុរំ អាគន្ត្វា ចម្បកវិហារស្ស ទ្វារសមីបេ មល្លសភាមណ្ឌបេ បវិសិត្វា មល្លកម្មំ កាតុំ ឥច្ឆាមីតិ រញ្ញោ អារោចេសិ. អថ រាជា តំ សង្ឃជំ អាមន្តេត្វា ឯវមាហ,- ឥទានិ ភោ ត្វំ ឥមិនា សទ្ធិំ មល្លយុទ្ធំ កាតុំ សក្ខិស្សសីតិ. អាមមហារាជ បុព្ពេ អហំ ទហរេ ហុត្វា កីឡនត្ថាយយេវ មល្លកម្មំ អកាសិំ, ឥទានិ បន ឯកូនសត្តតិវស្សោ អហំ ឥតោ បច្ឆា មល្លយុទ្ធំ កាតុំ សក្ខិស្សាមិ វា មា វាតិ ន ជានាមិ, ឥទានិ បរបក្ខំ មល្លបុរិសំ មល្លកម្មេន មារេស្សាមីតិ វទតិ.

អថ រាជូនំ មល្លកម្មំ នាម កីឡនត្ថាយយេវ ភវតិ, មា មារេតុំ ឧស្សាហំ ករោហីតិ វត្វា អញ្ញមញ្ញំ មល្លយុទ្ធំ ការាបេសិ ¶ . សបរិសស្ស រញ្ញោ ឱលោកេន្តស្សេវ តេ មល្លាការេន នច្ចិត្វា អញ្ញមញ្ញំ សមីបំ ឧបគច្ឆិំសុ. អថ សង្ឃជោ មល្លោ កម្ពោជមល្លស្ស បាទេន បហរណាការំ ទស្សេត្វា ទក្ខិណហត្ថមុដ្ឋិនា កបាលេ បហារំ អទាសិ. អថ កម្ពោជមល្លស្ស មុខំ បច្ឆតោ អហោសិ. តទា សបរិសោ រាជា ឦទិសា បន វិមុខតោ មរណមេវ សេយ្យោ ឥទានិ បន ឥមំ បស្សិតុំ ន វិសហាមីតិ វទតិ. បុន សង្ឃជោ វាមហត្ថ មុដ្ឋិនា បហារំ អទាសិ. អថ កម្ពោជមល្លស្ស មុខំ បរិវដ្ដេត្វា យថា បុព្ពេ, តថា បតិដ្ឋាសិ.

តស្មិញ្ច កាលេ សបរិសោ ខត្តិយោ តំ អច្ឆរិយំ ទិស្វា ទ្វេ អស្សេ តិំសមត្តានិ វត្តានិ សតកហាបណញ្ច អទាសីតិ. ឥទញ្ច វចនំ បោរាណបោត្ថកេសុ អាគតត្តា សាធុជនានញ្ច សំវេជនិយដ្ឋានត្តា វុត្តំ. ឋបេត្វា ហិ សំវេគលាភំ នត្ថិ អញ្ញំ កិញ្ចិ បយោជនន្តិ.

កលិយុគេ តេរសាធិកេ សត្តវស្សសតេ វិជយបុរេយេវ តស្ស បុត្តោ កិត្តិតរនាមកោ រាជា រជ្ជំ ការេសិ. វិតរា សទិសនាមវសេនេវ សីហសូរោតិ នាមំ បដិគ្គណ្ហិ. បិតុ រញ្ញោ កាលេ លទ្ធេសុ បញ្ចសុ សេតិហេសុ ចតុន្នំយេវ អវសេសត្តា ចតុសេតិភិន្ទោតិ នាមំ បាកដំ. តេនេ វាហ អភិធានប្បទីបិកាដីកាយំ ចតុសេតិភិន្ទោតិ. តស្ស រញ្ញោ កាលេ ចតុរង្គពលោ នាម មហាអមច្ចោ គន្ថកោវិទោ អភិធានប្បទីបិកាសំ វណ្ណនំ អកាសិ. សោ បន សកលព្យាករណវនាសង្គញាណាចារី អហោសិ.

ឯកស្មិញ្ច សមយេ រាជា ឯកំ មហន្តំ វិហារំ ការាបេត្វា អសុករញ្ញា អយំ វិហារោ ការាបិតោ, ឥមស្មិំ វិហារេ សីលវន្តាយេវ និសីទន្តូតិ កោលាហលំ ឧប្បាទេសិ. អថ សាចញ្ញិនាមគាមវាសី ឯកោ ថេរោ អាគន្ត្វា និសីទិ.

អយំ ¶ បន តស្ស ថេរស្ស អដ្ឋុប្បត្តិ,–

សាចញ្ញិគាមេ កិរ ឯកោ គហបតិ អត្តនោ បុត្តំ សិប្បុគ្គហណត្ថាយ វិហារេ ឯកស្ស ភិក្ខុស្ស សន្តិកេ និយ្យាទេសិ. បុត្តស្ស បន វិហារំ អគន្តុកាមស្ស តជ្ជនត្ថាយ សកណ្ដកគច្ឆស្ស ឧបរិ ខិបតិ. សោ ច ទហរោ និក្ខមិត្វា គេហំ អនាគត្វា វិហារេយេវ និសីទិ. មាតាបិតូនំ សន្តិកំ អនាគន្ត្វា ថោកំ ថោកំ ទូរំ គន្ត្វា សាមណេរ ភូមិតោ ឧបសម្បទភូមិំ បត្វា អរិមទ្ទននគរំ គច្ឆិ. អតិបញ្ញវន្តតាយ បន បត្តប្បត្តដ្ឋានេ មហាថេរោ សង្គណ្ហិំសុ. តេនេវេស សកលមរម្មរដ្ឋេ បាកដោ អហោសិ. អថ មាតាបិតរោ បុត្តស្ស អាគមនំ អបេក្ខិត្វាយេវ និសីទិំសុ. តមត្ថំ បន សុត្វា ឯស អម្ហាកំ បុត្តោ ភវិស្សតិ វា នោ វាតិ វីមំសិតុកាមោ បិតា អនុគច្ឆិ. អរិមទ្ទននគរេ តំ សម្បាបុណិត្វា ឧបដ្ឋបេត្វា និសីទិ. សោបិ ភិក្ខុ យថាឧបដ្ឋានេនេវ សន្តប្បេត្វា គន្ថំ ឧគ្គណ្ហិ. អបរស្មិំ បន កាលេសោ ភិក្ខុ អជ្ជ សូបោ អប្បលោណោតិអាទិនា បុនប្បុនំ ភណតិ.

អថ បិតា ឯវមាហ,- ន បុព្ពេ បិយបុត្តក តយា ឦទិសំ វចនំ កថិតំ, ឥទានិ បន ត្វំ អភិណ្ហំ ឦទិសំ វចនំ ឆណសិ, ការណមេត្ថ កិន្តិ បុច្ឆិ. បុព្ពេ គន្ថេសុ ឆេកត្តំ អប្បត្វា គន្ថេសុ ឆេកត្ថំ ព្យាបន្នចិត្តតាយ ន វុត្តំ, ឥទានិ បន មយា ឥច្ឆិតោ អត្ថោ មត្ថកំ បត្តោ, តស្មា កាយពលបរិគ្គហណត្ថាយ មយា ឦទិសំ វចនំ វុត្តន្តិ វទតិ. តំ វចនំ សុត្វា បិតា មាតុយា សន្តិកំ គមនត្ថាយ ឱកាសំ យាចិត្វា បិតរា សទ្ធិំ សកដ្ឋានំ អាគច្ឆន្តោ វិជយបុរំ ចេតិយវន្ទនត្ថាយ បាវិសិ.

តទា រញ្ញា វុត្តវចនំ សុត្វា តស្មិំ វិហារេ អរុហិត្វា និសីទិ ¶ . អារក្ខបុរិសា ច តំ ភិក្ខុំ វិហារេ និសិន្នំ ទិស្វា តមត្ថំ រញ្ញោ អារោចេសុំ. រាជា ច ចតុរង្គពលំ អមច្ចំ អាណេបេសិ,-គន្ត្វា តស្ស ភិក្ខុស្ស ញាណថាមំ ឧបធារេហីតិ. ចតុរង្គពលោ ច គន្ត្វា តំ ភិក្ខុំ គូឡគូឡដ្ឋានំ បុច្ឆិ. សោបិ បុច្ឆិតំ បុច្ឆិតំ វិស្សជ្ជេសិ. ចតុរង្គពលោ ច តមត្ថំ រញ្ញោ អារោចេសិ. រាជា តុដ្ឋចិត្តោ ហុត្វា តំ វិហារំ តស្ស ភិក្ខុស្ស អទាសិ. តស្ស បន ភិក្ខុស្ស ទហរកាលេ សកណ្ដកគច្ឆេ បិតុនោ ខិបនំ បដិច្ច កណ្ឌកខិបត្ថេរោតិ សមញ្ញា អហោសិ, មូលនាមំ បនស្ស នាគិតោតិ. សោតស្មិំ វិហារេ និសីទិត្វា សទ្ទសារត្ថជលិនិំ នាម គន្ថំ អកាសិ. តស្ស កិរ ថេរស្ស កាលេ តស្មិំ នគរេ អារទ្ធ វិបស្សនាធុរា មហល្លកា ភិក្ខូ សហស្សមត្តា អហេសុំ. អារទ្ធគន្ថធុរា បន ទហរភិក្ខូ គណនបថំ វីតិវត្តា.

តស្ស បន បិតរម្បិ សេដ្ឋិដ្ឋានេ ឋបេសិ. តេនេវ តំ គាមំ សេដ្ឋិគាមោតិ នាមេន វោហរិំសុ.

កច្ចាយនវណ្ណនំ បន វិជយបុរេយេវ អភយគិរិបព្ពតេ និសិន្នោ មហាវិជិតាបី នាម ថេរោ អកាសិ. វាចកោ បទេសម្បិ សោយេវ អកាសិ. សទ្ទវុត្តិំ បន សទ្ធម្មគុរុត្ថេរោ អកាសិ.

ឥច្ចេវំ វិជយបុរេ អនេកេហិ គន្ថការេហិ សាសនំ វិបុលំ អហោសិ.

កលិយុគេ បន បញ្ចាសីតាធិកេ ឆវស្សសតេ សម្បត្តេ អសង្ខយាចោយោន្នាមកោ រាជា ជេយ្យបុរនគរំ មាបេត្វា តត្ថ រជ្ជំ ការេសិ. តត្ថ បន រាជូនំ កាលេ ថេរេហិ កតគន្ថោ នាម នត្ថិ.

កលិយុគេ ឆព្ពិសាធិកេ សត្តវស្សសតេ វេសាខមាសេ ជេយ្យបុរនគរំ វិនស្សិ. តស្មិំយេវ សំវច្ឆរេ ជេដ្ឋមាសេ វិជយបុរំ វិនស្សិ. តស្មិំយេវ សំវច្ឆរេ ផគ្គុនមាសេ សត្វិវរាជា ¶ រតនបូរំ នាម នគរំ មាបេត្វា រជ្ជំ ការេសីតិ.

ឥទំ វិជយបុរជេយ្យបុរេសុ សាសនស្ស បតិដ្ឋានំ.

ឥទានិ មរម្មមណ្ឌលេ តម្ពនីបរដ្ឋេយេវ រតនបូរនគរេ សាសនវំសំ វក្ខាមិ.

កលិយុគេ ហិ អដ្ឋាសីតាធិកេ សត្តវស្សសតេ នរបតិរញ្ញោ ធិតាយ សទ្ធិំ អលោង្គចញ្ញិសូរញ្ញោ បុត្តោ អានន្ទសូរិយោ នាម សន្ថវំ កត្វា ឯកំ (សិទ្ធិកំ នាម បុត្តំ វិជាយិ. សោ វយេ សម្បត្តេ រជ្ជសម្បត្តិំ លភិ. តតោ បភុតិ យាវ ម្រេនចោទិឃា រញ្ញា អរិមទ្ទននគរេ រជ្ជំ អកំសុ). តតោ បច្ឆា សិរិសុធម្មរាជាធិបតីតិ លទ្ធនាមោ សត្វិវរាជា រតនបូរនគរេ រជ្ជំ ការេសិ. តស្ស រញ្ញោ កាលេ កលិយុគេ ឯកនវុតាធិកេ សត្តវស្សសតេ សម្បត្តេ លង្កាទីបតោ សិរិសទ្ធម្មាលង្ការត្ថេរោ សីហឡមហាសាមិត្ថេរោចាតិ ឥមេ ទ្វេ ថេរា បញ្ច សរីរធាតុយោ អានេត្វា នាវាយ កុសិមតិត្ថំ បាបុណិត្វា រាមញ្ញរដ្ឋេ ពញ្ញារនិ នាមេន រញ្ញា និវារិតា អនិសីទិស្វា តតោ សោយេវ រាជា ថេរេ យាវ សិរិខេត្តនគរា បហិណិ. តមត្ថំ ញត្វា រតនបូរិន្ទោ រាជា ចត្តាលីសាយ នាវាហិ យាវ សិរិខេត្តនគរំ បច្ចុគ្គន្ត្វា អានេសិ. អានេត្វា ច មហានវគាមំ បត្តកាលេ សហ ឱរោធេហិ អមច្ចេហិ ច សយមេវ រាជា បច្ចុគ្គច្ឆិ. រតនបូរំ ប្បន បត្តកាលេ មហាបថវី ចលិ, បដិនាទញ្ច នទិ. តទា រាជា សម្មាសម្ពុទ្ធស្ស តិលោកគ្គស្ស សាសនំ បគ្គណ្ហិស្សាមីតិ ចិន្តេត្វា សរីរធាតុំ អានេត្វា ឥធ បត្តកាលេ អយំ មហាបថវី ចលតិ, បដិនាទញ្ច នទតិ, ឥទំ ¶ អម្ហាកំ រដ្ឋេ ជិនសាសនស្ស ចិរកាលំ បតិដ្ឋានភាវេ បុព្ពនិមិត្តន្តិ សយមេវ និមិត្តបាឋំ អកាសិ.

តាវ តិដ្ឋតុ ជីវមានស្ស សម្មាសម្ពុទ្ធស្ស អានុភាវោ, អហោវត សរីរធាតុយាយេវ អនុភាវោតិ ពហុរដ្ឋ វាសិនោ បសិទិំសុ. ហោន្តិ ចេត្ថ, –

សរីរធាតុយា តាវ, មហន្តោច្ឆរិយោ ហោតិ;

កា កថា បន ពុទ្ធស្ស, ជីវមានស្ស សេដ្ឋស្ស.

ឯវំ អនុស្សរិត្វាន, ឧប្បាទេយ្យ បសាទកំ;

ពុទ្ធគុណេសុ ពាហុល្លំ, គារវញ្ចំ ករេ ជនោតិ.

កលិយុគេ ទ្វេនវុតាធិកេ សត្តវស្សសតេ តា បញ្ច ធាតុយោ និទហិត្វា ជេយ្យបុរនគរតោ បច្ឆិមទិសាភាគេ សមភូមិភាគេ ចេតិយំ បតិដ្ឋាបេសិ. តញ្ច ចេតិយំ រតនចេតិយន្តិ បញ្ញាបេសិ, ហត្ថិរូបពាហុល្លតាយ បន អនេកិភិន្ទោតិ បាកដំ ហោតិ. តីហិ សិរិគព្ភេហិ សត្តហិ ទ្វារេហី ច អលង្កតំ នាម មហាវិហារំ ការាបេត្វា ទ្វិន្នំ សីហឡទីបិកត្ថេរានំ អទាសិ. តតោ បច្ឆា តេសុ មហន្តត្ថេរោ សកវិហារសមីបេ បព្ពតមុទ្ធនិ អត្តនោ សិស្សេបិ អប្បវេសេត្វា លជ្ជីបេសលពហុស្សុតសិក្ខាកាមេហិ សព្ពេហិ តីហិ ថេរេហិ សទ្ធិំ សីមំ សម្មន្នតិ. ឥច្ចេវំ សីមសម្មុតិបរិយត្តិវាចនាទិកម្មេហិ មរម្មរដ្ឋេ សាសនំ វិរូឡំ កត្វា បតិដ្ឋាបេសិ.

ឥទំ មរម្មមណ្ឌលេ រតនបូរនគរេ សីហឡទីបិកេ

ទ្វេ ថេរេ បដិច្ច បឋមំ សាសនស្ស បតិដ្ឋានំ.

កលិយុគេ ឆព្ពីសាធិកេ សត្តវស្សសតេ សម្បត្តេ ផគ្គុនមាសេ សត្វវរាជា រតនបូរនគរំ មាបេសិ. តស្ស រញ្ញោ ¶ កាលេ ជេយ្យបុរនគរេ ឯកា បូបិកា ឥត្ថី អលជ្ជិនោ ឯកស្ស ភិក្ខុស្ស សន្តិកេ ធនំ ឧបនិទហិ. អបរភាគេសា តំ ធនំ យាចិ. អថ សោ ភិក្ខុ តវ ធនំ អហំ ន បដិគ្គណ្ហាមីតិ មុសា ភណតិ. ឯវំ វិវាទំ កត្វា តំ ការណំ រញ្ញោ អារោចេសិ. រាជា បក្កោសាបេត្វា សយមេវ តំ ភិក្ខុំ បុច្ឆិ,-ត្វំ ភន្តេ តស្សា ឥត្ថិយា ធនំ បដិគ្គណ្ហាសិ វា មា វាតិ. អហំ មហារាជ សមណោ អលិកំ ភណិតុំ ន វដ្ដតិ, ន បដិគ្គណ្ហាមីតិ វទតិ. តំ ការណំ រាជា ច បុនប្បុនំ បុច្ឆិត្វា វីមំសន្តោ ភិក្ខុស្ស កេរាដិកភាវំ ជានិត្វា តំ សមណោ សមានោ ភគវតោ បញ្ញត្តំ សិក្ខាបទំ អក្កមិត្វា មុសា ភណតីតិ កុជ្ឈិត្វា សយមេវ អបរាធានុរូបំ សីយំ ឆិន្ទិត្វា រាជគេហតោ ហេដ្ឋា ខិបិ.

តញ្ច ការណំ សកលមរម្មរដ្ឋេ បាកដំ. អលជ្ជីភិក្ខូបិ អញ្ញេ បាបកម្មំ កាតុំ ន វិសហិំសុ. រញ្ញា ភាយិត្វាយេវ សិក្ខាបទំ ន អក្កមេសុំ.

កលិយុគេ តិំសាធិកេ សត្តវស្សសតេ សម្បត្តេ មង្គក្រិច្វាចោង្ក នាម រាជា រជ្ជំ ការេសិ. សោ បន រាជា រដ្ឋវាសីនំ សុខត្ថាយ និមិត្តំ គហេត្វា តាលវណ្ដំ គហេត្វា រាជគេហំ បដិគ្គណ្ហិ. សោ ច រាជា សក្ករាជេ បញ្ចចត្តាលីសាធិកេ សត្តវស្សសតេ សម្បត្តេ ចញ្ញិង្ខុំ នាម ចេតិយំ បតិដ្ឋាបេសិ. យង្គរនាមកស្ស សិលាបព្ពតស្ស សមីបេ បោរាណិកំ ឯកំ ចេតិយំ នទីឧទកំ ភិន្ទិ. តទា សករណ្ឌកា បញ្ច ធាតុយោ ឧទកេ និម្មុជ្ជន្តិយោ ឯរាបថោ នាម នាគោ គហេត្វា បច្ឆា ចញ្ញិង្ខុំ នាម ចេតិយំ បតិដ្ឋាបេស្សាមីតិ រញ្ញា អារទ្ធកាលេយេវ ទាឋានាគស្ស នាម ថេរស្ស សហ ករណ្ឌកេន បញ្ច ធាតុយោ និយ្យាទេសិ. សោ ច ថេរោ រញ្ញោ អទាសិ. រាជា ទ្វេ ធាតុយោ មុដ្ឋោចេតិយេ និធានំ អកាសិ. តិស្សោ បន ចញ្ញិង្ខុំ ចេតិយេតិ បោរាណបោត្ថកេសុ វុត្តំ.

សោ ¶ រាជា កុមារកាលេ សិក្ខាបកស្ស អាចរិយស្ស សេតច្ឆត្តំ ទត្វា សង្ឃនាយកដ្ឋានំ និយ្យាទេសិ. ខេមាចារោ នាម ឯកោ ថេរោ រត្តិភាគេ មជ្ឈន្តិកកាលេ ចេតិយង្គណេ ឱលម្ពេត្វា ឋបិតំ ភេរិំ អនេកវារំ បហរិ. អថ រាជា រាជគេហតោយេវ សុត្វា យថាឋបិតន្តិយាមវសេន វិហារេ កោចិ ភិក្ខុ កាលំ កតោ ភវេយ្យាតិ មញ្ញិត្វា វិហារំ គន្ត្វា បុច្ឆាហីតិ ទូតំ បេសេសិ. ទូតោ វិហារំ គន្ត្វា ការណំ បុច្ឆិ. ភិក្ខូ ច ឯវមាហំសុ,- ន អម្ហេសុ កាលង្កតភិក្ខុ នាម អត្ថិ, អថ ខោ សក្កោ ទេវានមិន្ទោ ឥទានិ កាលង្កតោតិ ពហូនំ មនុស្សានំ ញាបនត្ថាយ ភេរិំ បហរិម្ហាតិ. បុន រាជា ភិក្ខូ បក្កោសាបេត្វា បុច្ឆិ,-កស្មា បន ភន្តេ តុម្ហេ សក្កស្ស ទេវានមិន្ទស្ស កាលង្កតភាវំ ជានាថាតិ. អថ ភិក្ខូ ឯវមាហំសុ,-ភគលតោ បរិនិព្ពានកាលេ សាសនំ រក្ខិស្សាមីតិ សក្កោ ទេវានមិន្ទោ បដិញ្ញំ កត្វាបិ ឥទានិ សាសនេ វសន្តានំ អម្ហាកំ អនុបាលនកម្មំ នាម កិញ្ចិ ន អកាសិ, សចេ បន សក្កោ ទេវានមិន្ទោ ជីវមានោ ភវេយ្យ, សម្មាសម្ពុទ្ធស្ស សន្តិកេ បដិញ្ញំ ទឡំ កត្វា ឥទានិ អប្បោស្សុក្កោ ន ភវេយ្យ. ឥទានិ បន សក្កស្ស ទេវានមិន្ទស្ស អារក្ខណកម្មំ នាម កិញ្ចិ ន ទិស្សតិ, តស្មា ឥទានិ សក្កោ ទេវានមិន្ទោ កាលង្កតោតិ ជានិម្ហាតិ.

រាជា តំ សុត្វា ខេមាចារត្ថេរស្ស បសីទិត្វា វិហារំ ការាបេត្វា អទាសិ. សោ ច ថេរោ សុធម្មបុរវាសីនំ សីហឡវំសិកានំ មហាថេរានំ វំសេ ភវតិ លជ្ជី បេសលោ ហោតីតិ.

រតនបូរនគរេយេវ អធិករញ្ញោ កាលេ រតនបូរនគរស្ស ទក្ខិណទិសាភាគេ មហាសេតុំ ការាបេសិ. តស្ស ¶ បន អាចរិយោ សង្ឃរាជា លជ្ជីបក្ខំ ន ភជតិ. តេនេវ ថេរបរម្បរាយ ឯស ន សង្គហិតព្ពោ.

តស្ស រញ្ញោ កាលេ ឆសដ្ឋាធិកេ សត្តវស្សសតេ កលិយុគេ រាជាធិរាជា នាម រាមញ្ញរដ្ឋិន្ទោ ភូបាលោតិ សហស្សប្បមាណាសុ នាវាសុ សដ្ឋិសតសហស្សេហិ យោធេហិ សទ្ធិំ នទីមគ្គេន យុជ្ឈនត្ថាយ រតនបូរាភិមុខំ អាគតោ.

អថ អធិករាជា ពហវោ អមច្ចេច ភិក្ខូ ច សន្និបាតាបេត្វា មន្តេសិ,-ឥទានិ រាមញ្ញរដ្ឋិនោ រាជា យុជ្ឈនត្ថាយ ឥធ អាគច្ឆតិ, យុទ្ធំ អកត្វា កេនុបាយេន តំ បដិនិវត្តាបេតុំ សក្ខិស្សាមាតិ. អថ សព្ពេ កិញ្ចិ អកថេត្វា តុណ្ហីភាវេនេវ និសីទិំសុ.

អថ ជាតវស្សេន ឯកត្តិំសវស្សិកោ ឧបសម្បទាវសេន បន ឯកាទសវស្សិកោ ឯកោ ភិក្ខុ ឯវមាហ,-ឯកោ បន រាមញ្ញរដ្ឋិន្ទោ រាជាធិរាជា តាវ តិដ្ឋតុ, សចេ សកលេបិ ជម្ពុទីបេ សព្ពេ រាជានោ អាគច្ឆេយ្យុំ, ឯវម្បិ កថាសល្លាបេនេវ យុទ្ធំ អកត្វា បដិនិវត្តាបេសុំ សក្កោមីតិ.

អថ អធិករាជា តុដ្ឋចិត្តោ ហុត្វា អាហ,- យថា ភន្តេ ត្វំ សក្កោសិ រាជាធិរាជំ យថាសល្លាបេន បដិនិ វត្ថាបេតុំ, តថា ករោហីតិ.

អថ សោ ភិក្ខុ មេត្តាសន្ទេសបណ្ណំ បេសេត្វា ឱកាសំ យាចិ តស្ស រាជាធិរាជស្ស សន្តិកំ បវិសិតុកាមោ. រាជាធិរាជា ច តស្ស ភិក្ខុស្ស មេត្តាសន្ទេសបណ្ណំ បស្សិត្វា តំ ភិក្ខុំ សីង្ឃំ អានេថាតិ ទូតំ បេសេសិ. ទូតោ អានេត្វា រញ្ញោ ទស្សេសិ. អថ សោ ភិក្ខុ រាជាធិរាជំ ធម្មទេសនាយ ឱវាទំ ទត្វា សកដ្ឋានំ បដិនិវត្តាបេសិ. អយញ្ច ¶ ភិក្ខុ អរិមទ្ទននគរេ ចតូសុ គណេសុ អរហន្តគណវំសោ សិក្ខាកាមោ លជ្ជី បេសលោ. អរិមទ្ទននគរេ ចាគហេ នាម ទេសេ បន ជាតត្តា ចាគ្រុហិ ភិក្ខូតិ វោហារិយតិ.

កលិយុគេ អដ្ឋាសីតាធិកេ សត្តវស្សសតេ សម្បត្តេ មិញ្ញ្ហង្គ ធម្មរាជា រតនបូរេយេវ រជ្ជំ សម្បត្តោ. តស្ស រញ្ញោ កាលេ សីហឡទីបតោ ទ្វេ មហាថេរា រតនបូរំ អាគន្ត្វា សាសនំ អនុគ្គហេត្វា និសីទិំសុ.

តទា កលិយុគេ អដ្ឋសតេ សម្បុណ្ណេ បោរាណកំ កលិយុគំ អបនេត្វា អភិនវំ ឋបេតុំ ឱកាសោ អនុប្បត្តោ. អថ ចាគ្រិហិ ថេរោ ច រាជវិហារវាសិត្ថេរោ ច ឯវមាហំសុ,- អបនីតព្ពកាលេ មហារាជ សម្បត្តេ អនបនេតុំ ន វដ្ដតីតិ.

អថ រាជា បុន ឯវមាហ,-អបនីតព្ពេ សម្បត្តេ អនបនេត្វា អជ្ឈុបេក្ខិត្វា វសន្តស្ស កោ ទោសោតិ. សចេ អបនីតព្ពេ សម្បត្តេ អនបនេត្វា អជ្ឈុបេក្ខិត្វា និសីទេយ្យ, រដ្ឋវាសីនំ ទុក្ខំ ភវិស្សតីតិ វេទសត្ថេសុ អាគតំ, សក្ករាជំ អបនេន្តោបិ រាជា តស្មិំយេវ វស្សេ ទិវង្គតោ ភវេយ្យាតិ អាហំសុ.

អថ រាជា សត្តានំ សុខំ លភីយមានតំ ជានន្តោយេវ មាទិសោ អត្តនោ ភយំ អបេក្ខិត្វា អបនីតព្ពំ អនបនេត្វា និសីទិតុំ ន វដ្ដតិ, កម្មំ ខីយិត្វាបិ មម អគុណំ លោកេ បត្ថរិត្វា បតិដ្ឋហិស្សតីតិ មនសិករិត្វា សក្ករាជេ អដ្ឋវស្សសតេ សម្បុណ្ណេ ពស្យុឆិទ្រមុនិសខ្យំ អបនេត្វា ចម្មាវសេសំ ឋបេសិ. អថ មហាមណ្ឌបំ ការាបេត្វា មហាឆណំ កត្វា មហាទានម្បិ អទាសិ.

ចាគ្រិហិថេរោ រាជវិហារ វាសិត្ថេរោចាតិ អរិមទ្ទន នគរេ ¶ អរហន្តគណាំសិកោ លជ្ជី បេសលោ សិក្ខាកាមោ.

ឦទិសំ បន វចនំ សាសនប្បដិយត្តត្តា ច រដ្ឋវាសិកាយត្តត្តា ច ធម្មានុលោមវសេន វុត្តំ.

កលិយុគេ ចតុវស្សាធិកេ អដ្ឋសតេ មហានរបតិ រាជា រតនបូរនគរេ រជ្ជំ ការេសិ. សោ ច រាជា ថូបារាមចេតិយំ ការាបេសិ. តស្ស បន អាចរិយោ មហាសាមិត្ថេរោ នាម. សោ បន ថេរោ សីហឡទីបំ គន្ត្វា សីហឡិន្ទស្ស រញ្ញោ អាចរិយស្ស សារិបុត្តត្ថេរស្ស សន្តិកេ សិក្ខំ គហេត្វា បច្ចាគតត្ថេរវំសិកោតិ ទដ្ឋព្ពោ. តស្ស រញ្ញោ កាលេ រតនបូរនគរេ មហាអរិយវំសោ នាម ឯកោ ថេរោ អត្ថិ. សោ បន បរិយត្តិវិសារទោ អរិមទ្ទននគរេ ឆប្បទគណតោ អាគតវំសិកោ.

ឯកស្មិំ សមយេ ជេយ្យបុរនគរំ គន្ត្វា រេង្គ ឥតិ បាកដស្ស មហាថេរស្ស សន្តិកេ សទ្ទនយំ ឧគ្គណ្ហិត្វា និសីទិ. សោ បន កិរ មហាថេរោ អញ្ញេហិ សទ្ធិំ យំវា តំវា កថំ អសល្លបិតុកាមតាយ មុខេ ឧទកំ ឋបេត្វា យេភុយ្យេន និសីទតិ. តេនេវេស មរម្មវោហារេន រេង្គុ ឥតិ បាកដោ អហោសិ.

សោ កិរ អរិយវំសត្ថេរោ រេង្គុំ ថេរស្ស សន្តិកំ គន្ថំ វាចាបេតុ ឱកាសំ យាចិស្សាមីតិ ឧបគច្ឆន្តោបិ កថាសល្លាបំ អកត្វា ទ្វេ អហានិ វត្តំ បរិបូរេត្វាយេវ បច្ចាគច្ឆិ. តតិយទិវសេ បន ចម្មខណ្ឌំ អាកោដុនត្តា សទ្ទំ សុត្វា មុខតោ ឧទកំ ឧគ្គិរិត្វា ការណំ បុច្ឆិ. គន្ថំ ឧគ្គហណត្ថាយ អាគតភាវំ អារោចេសិ.

អថ ថេរោ ឯវមាហ,-អហំ អាវុសោ ទិវសេ ទិវវសេ តិក្ខត្តុំ គន្ថំ វាចេមិ, មជ្ឈន្តិ កាតិក្កមកាលេបិ បញ្ញចេតិយំ គន្ត្វា ចេតិយង្គណេ សម្មជ្ជនកិច្ចំ ករោមិ, ឱកាសំ ¶ ន លភាមិ, ឯវម្បិ ត្វំ ពហូគន្ថេ ឧគ្គហេត្វាបិ អាចរិយេហិ ទិន្នោបទេសំ អលភិត្វា បុន មម សន្តិកំ អាគច្ឆសិ, តស្មាយង្គណេ សម្មជ្ជនវត្តំ តាវកាលិកំ វិកោបេត្វា គន្ថុគ្គហណត្ថាយ ឱកាសំ ទស្សាមីតិ វត្វា អភិធម្មត្ថវិសាវិនិំ នាម លក្ខណដីកំ ឧគ្គណ្ហាបេសិ. នានានយេហិ ឧបទេសំ ទត្វា វាចេសិ. វាចេត្វា ច តតិយទិវសេ អាចរិយស្ស សន្តិកំ នាគច្ឆិ. មហាថេរោបិ ការណំ អកល្លតាយ អនាគតោ ភវេយ្យាតិ មញ្ញិត្វា បុច្ឆនត្ថាយ ភិក្ខូ បេសេសិ.

អរិយវំសត្ថេរោច អាចរិយស្ស សន្តិកំ គមិស្សាមីតិ អាគតោ, អន្តរាមគ្គេយេវ ទូតភិក្ខូ បស្សិត្វា តេហិ សទ្ធិំ មហាថេរស្ស សន្តិកំ អាគមំសុ. អាចរិយស្ស សន្តិកំ បត្វា អាចរិយា អរិយវំសត្ថេរំ បុច្ឆិ,-កស្មា បន ត្វំ ន ឧគ្គហណត្ថាយ អាគតោសីតិ. អហំ ភន្តេ តុម្ហេហិ ទិន្នោបទេសំ និស្សាយ ឥទានិ សព្ពំ នយំ ជានាមីតិ. អថ អាចរិយោ អាហ, យំ បន គន្ថំ និស្សាយ ត្វំ ឆេកតំ បត្តោសិ, តស្ស សំវណ្ណនំ កត្វា ឧបការំ ករោហីតិ. អថ អរិយវំសត្ថេរោ អាចរិយស្ស វចនំ សិរសា បដិគ្គហេត្វា អភិធម្មត្ថវិភាវិនិយា មណិសារមញ្ជូសំ នាម អនុសំវណ្ណនំ អកាសិ. និដ្ឋិតនិដ្ឋិតបាឡំ ឧបោសថទិវសេ ឧបោសថទិវសេ បុញ្ញចេតិយស្ស ចេតិយង្គណេ ភិក្ខុសង្ឃំ សន្និបាតាបេត្វា ភិក្ខុសង្ឃស្ស មជ្ឈេ វាចាបេត្វា សុណាបេសិ,- សចេ កោចិ ទោសោ អត្ថិ, តំ វទថាតិ.

អថ អរិមទ្ទននគរតោ ចេតិយវន្ទនត្ថាយ ឯកោ ភិក្ខុ អាគន្ត្វា បរិសកោដិយំ សុណិត្វា និសីទិ. អថ សោ ភិក្ខុ ទ្វេ វារំ ឯឯឥតិ សទ្ទំ អកាសិ. តំ ឋានំ សល្លក្ខេត្វា ឋបេសិ. និវាសនដ្ឋានញ្ច បុច្ឆិ. អរិយវំសត្ថេរោបិ សកវិហារំ បត្វា តស្មិំ ឋានេ ឧបធារោន្តោ ឯកស្មិំ ឋានេ ឯកស្ស អត្ថស្ស ទ្វិក្ខត្តុំ វុត្តត្តា បុនរុត្តិទោសោ ទិស្សតិ, ឯកស្មិំ ¶ ឋានេ ឥមំ គន្ថន្តិ បុល្លិង្គរូបេន វត្តព្ពដ្ឋានេ ឥទំ គន្ថន្តិ នបុំសកលិង្គេន វុត្តត្តា លិង្គវិរោធិទោសោ ទិស្សតិ.

អថ តំ បុគ្គលំ បក្កោសាបេត្វា ឯវមាហ,-អហំ អាវុសោ ឥមំ គន្ថំ មហុស្សាហេន ករោមិ, តញ្ច វិវេកកាលេ រត្តិភាគេយេវ បោត្ថកំ បត្ថរិត្វា លិខាមិ, ឯវំ មហុស្សាហេន ករោន្តម្បិ ត្វំ អរុច្ចនាការេន សទ្ទំ ករោសិ, កីទិសំ បន ទោសំ សុត្វា ឯវំ ករោសីតិ បុច្ឆិ. អថ សោ ភិក្ខុ ឯវមាហ,- តយោ ភន្តេ មហុស្សាហេន កតេ គន្ថេ ទោសវសេន ពហុវត្តព្ពដ្ឋានំ នត្ថិ, សទ្ទតោចេវ អត្ថតោ ច បរិបុណ្ណោយេវេស គន្ថោ, អថ ខោ បន ឯកស្មិំ ឋានេ ឯកស្ស អត្ថស្ស ទ្វិក្ខត្តុំ វុត្តត្តា បុរនុត្តិទោសោ ទិស្សតិ, ឯកស្មិំ បន ឥមំ គន្ថន្តិ បុល្លិង្គេន វត្តព្ពដ្ឋានេ ឥទំ គន្ថន្តិ នបុំសកលិង្គេន វុត្តត្តា លិង្គវិរោធិទោសោ ទិស្សតិ, ឯវំ ឯត្តកំយេវ ទោសំ ទិស្វា ឦទិសំ អរុច្ចនាការំ ទស្សេមីតិ.

អថ អរិយវំសត្ថេរោ តុដ្ឋចិត្តោ ហុត្វា អត្តនោ សរីរបារុបិតំ ទុបដ្ដចីវរំ ឥមិនាហំ តវ ញាណំ បូជេមីតិ វត្វា អទាសិ. បច្ឆាកាលេ អធិករាជា តមត្ថំ សុត្វា នាម លញ្ឆំ អទាសិ.

សោ ច អរិយវំសត្ថេរោ មណិទីបំ នាម គន្ថំ គន្ថា ភរណញ្ចេវ ជាតកវិសោធនញ្ច បាឡិភាសាយ អកាសិ. អនុដីកាយ បន អត្ថយោជនំ មរម្មភាសាយ អកាសិ.

ឯកំ សមយំ អធិករាជា វិហារំ គន្ត្វា ធម្មំ សុណិ. ថេរោ ធម្មំ ទេសេត្វា និដ្ឋិតកាលេ យានពលិំ សុខត្ថាយ យាចិ. រាជា អទត្វា នាវំ អភិរូហិត្វា បច្ចាគច្ឆិ. អន្តរាមគ្គេ នាវាយ ផិយំ ឯកោ សំសុមារោ មុខេន គណ្ហិត្វា និច្ចលំ កត្វា ឋបេសិ. ថេរេន យាចិតំ យានពលិំ ទទាមីតិ មហាសទ្ទំ កត្វា រាជបុរិសេ តិក្ខត្តុំ និច្ឆារេសិ. អថ សំសុមារោ នាវំ មុញ្ចិត្វា គច្ឆិ. ឯកស្មិញ្ច កាលេ រាជា វិហារំ និក្ខមិ. អថ ¶ ឯកោ ហត្ថិនី វិហារសមីបេ ពន្ធិត្វា ឋបេសិ. សា ពោធិរុក្ខសាខំ ឆិន្ទិត្វា ខាទិ. សា តត្ថេវ ភូមិយំ បតិ. អថ ថេរោ សច្ចកិរិយំ កត្វា មេត្តាភាវនំ ភាវេត្វា មេត្តោទកេន ភិញ្ចិ. តំ ខណញ្ញេវ សា ឧដ្ឋហិ. រាជា ច តំ អច្ឆរិយំ ទិស្វា តស្សា អគ្ឃនកមូលំ ទត្វា វិហារតោ នទី តិត្ថំ គមនមគ្គេ សិលាបដ្ដំ ចិនិត្វា សេតុំ អកាសីតិ.

សទ្ធម្មកិត្តិត្ថេរោ បន អរិយវំសត្ថេរស្ស សទ្ធិវិហារិកោ ជេតវនវិហារវាសី. តេ បន ថេរា ឆប្បទគណវំសិកាតិ ទដ្ឋព្ពា.

កលិយុគេ ទ្វេចត្តាលីសាធិកេ អដ្ឋវស្សសតេ សម្បត្តេ រតនបូរនគរេយេវ សិរិសុធម្មរាជាធិបតិ នាម ទុតិយាធិករាជា រជ្ជំ ការេសិ. តស្មិញ្ច កាលេ បព្ពតព្ភន្តរនគរតោ មហាសីលវំសោ នាម ថេរោ បញ្ចចត្តាលីសាធិកេ អដ្ឋវស្សសតេ សម្បត្តេ សុមេធកថំ កព្យាលង្ការវសេន ពន្ធិត្វា ពុទ្ធាលង្ការញ្ច នាម កព្យាលង្ការំ បព្ពតព្ភន្តរប្បដិសំយុត្តញ្ចេវ កព្យាលង្ការំ ពន្ធិត្វា តេ គហេត្វា រតនបូរនគរំ អាគច្ឆិ.

អថ រាជា ថូបារាមចេតិយស្ស ឯសន្នដ្ឋានេ រតនវិមានវិហារេ និសីទាបេសិ. សោ ច ថេរោ តត្ថ សោតារានំ បរិយត្តិំ វាចេត្វា និសីទិ. សោ ច ថេរោ តត្ថ និសិន្នានំ ថេរានំ អដ្ឋមកោ ហោតិ. សោ ច មហាសីលវំសត្ថេរោ កលិយុគស្ស បន្នរសាធិកេ អដ្ឋវស្សសតេ ជាតោ. តិំសវស្សកាលេ រតនបូរនគរំ អាគតោតិ បោរាណបោត្ថកេសុ វុត្តំ. សោ បន ថេរោ នេត្តិបាឡិយា អត្ថ យោជនំ មរម្មភាសាយ អកាសិ បារាយនវត្ថុញ្ច.

រតនបូរនគរេយេវ រដ្ឋសារោ នាម ឯកោ ថេរោ អត្ថិ, មហាសីលវំសត្ថេរេន សមញ្ញាណថាមោ. សោ បន រតនបូរនគរេយេវ ¶ កលិយុគស្ស តិំសាធិកេ អដ្ឋវស្សសតេ កាលេ ជាតោ. ភូរិទត្តជាតកំ ហត្ថិបាលជាតកំ សំវរជាតកញ្ច កព្យាលង្ការវសេន ពន្ធិ អញ្ញញ្ច អនេកវិធំ កព្យាលង្ការំ. តេ បន ទ្វេ ថេរា កព្យាលង្ការកា រកាតិ ថេរបរម្បរាយ បវេសេត្វា ន គណេន្តិ បោរាណា.

ឯត្ថ ច កិញ្ចាបិ សមណានំ ឧបោសថិកានញ្ច កព្យាលង្ការំ ពន្ធិតុំ វាចេតុំ វា កប្បាកប្បវិចារណំ វត្តុំ ឱកាសោ លទ្ធោ, សាសនវំសំ បន វត្តុំ ឱកាសស្ស អតិវិត្ថារោវសេសត្តា តំ អវត្វា អជ្ឈុបេក្ខិស្សាម. ឧបោសថវិនិច្ឆយេ បន នច្ចគីតាទិសិក្ខាបទស្ស វិសយេ វិត្ថារេន មយំ អវោចុម្ហា.

កលិយុគស្ស គតេ តេសដ្ឋាធិកេ អដ្ឋវស្សសតេ រតនបូរនគរេយេវ សិរិត្រិភវនាទិត្យនរបតិបវរមហាធម្ម រាជាធិបតិរាជា រជ្ជំ ការេសិ. តស្ស រញ្ញោ កាលេតិសាសនធជោ នាម ភិក្ខុ សទ្ធម្មកិត្តិត្ថេរស្ស សន្តិកេ គន្ថំ ឧគ្គណ្ហិ. អថ អរិមទ្ទននគរតោ ឯកោ មហាថេរោសោតុនំ វាចិត្វា រតនបូរនគរេ និសីទិស្សាមីតិ អាគតោ. អថ សទ្ធម្មកិត្តិត្ថេរស្ស គន្ថំ វាចេន្តស្សេវ វិហារស្ស ហេដ្ឋា និសីទិត្វា សោ មហាថេរោ សទ្ទំ សុណិត្វា ឯវំ ចិន្តេសិ,-ឯតស្ស សន្តិកេ អហំ នវកដ្ឋានេ ឋត្វា ថោកំ គន្ថំ ឧគ្គណ្ហិស្សាមីតិ. អថ សោ មហាថេរោ សទ្ធម្មកិត្តិត្ថេរស្ស សន្តិកំ បវិសិត្វា គន្ថំ វាចាបេតុំ ឱកាសំ យាចិ. អថ សទ្ធម្មកិត្តិត្ថេរោ វស្សបមាណំ បុច្ឆិត្វា ត្វំ ភន្តេ មយា វុឌ្ឍតរោសីតិ អាហ. អហំ តយា វុឌ្ឍតរោបិ សមានោ នវកដ្ឋានេ ឋត្វា គន្ថំ ឧគ្គណ្ហិស្សាមីតិ អាហ. អថ សទ្ធម្មកិត្តិត្ថេរោ តស្ស គន្ថំ វាចេសិ. អតិបសីទិត្វា បន តំ មហាថេរំ មហាសាធុជ្ជនោតិ នាមេន វោហារតិ.

អថ ¶ បច្ឆា មរម្មរដ្ឋំ កលិយុគស្ស បញ្ចាសីតាធិកអដ្ឋសតកាលតោ បដ្ឋាយ យាវ អដ្ឋាសីតាធិកអដ្ឋសតវស្សកាលំ នានាភយេហិ សង្ខុព្ភិតំ អហោសិ. តទា កម្ពោជរដ្ឋតោ សិហនិស្វា នាម ភិន្នកុតោ អាគន្ត្វា រតន បូរនគរេ រជ្ជំ គណ្ហិ. អថ សោ ឯវំ ចិន្តេសិ,- ភិក្ខូ អទារា អបុត្តិកា ហុត្វា បុន សិស្សេ បោសេត្វា បរិវារំ គវេសន្តិ, សចេ ភិក្ខូ បរិវារំ វិចិនិត្វា រាជភាវំ គណ្ហេយ្យុំ, ឯវំ សតិ រជ្ជំ គហេតុំ សក្ខិស្សន្តិ, ឥទានេវ ភិក្ខូ គហេត្វា មារេតុំ វដ្ដតីតិ. ឯវំ បន ចិន្តេត្វា តោវិសីលូ នាមកេ ខេត្តវនេ ពហូ មណ្ឌបេ ការាបេត្វា គោមហិសកុក្កុដសូករាទយោ មារាបេត្វា ភិក្ខូ ភោជេស្សាមីតិ វត្វា ជេយ្យបុរវិជយបុររតនបូរនគរេសុ សព្ពេ មហាថេរេ ពហូហិ អន្តេវាសិកេហិ សទ្ធិំ បក្កោសាបេត្វា តេសុ មណ្ឌបេសុ និសីទាបេត្វា ហត្ថិអស្សាទិសេនង្គេហិ បរិវារេត្វា មារេសិ. តទា កិរ តិសហស្សប្បមាណា ភិក្ខូ មរិំសូតិ. ភិក្ខូ ច មារេត្វា ពហូបិ បោត្ថកេ អគ្គិនា ឈាបេសិ, ចេតិយានិបិ ភេទាបេសិ. អហោវត បាបជនស្ស បាបកម្មន្តិ. ហោន្តិ ចេត្ថ,-

សាសនំ នាម រាជានំ, និស្សាយ តិដ្ឋតេ ឥធ;

មិច្ឆាទិដ្ឋិករាជានោ, សាសនំ ទូសេន្តិ សត្ថុនោ.

សម្មាទិដ្ឋី ច រាជានោ, បគ្គណ្ហន្តេវ សាសនំ;

ឯវញ្ច សតិ អាកាសេ, ឧលូរាជាវ ទិព្ពតីតិ.

អថ កលិយុគេ ឯកវស្សាធិកេ នវវស្សសតេ សម្បត្តេ អាកាសេ ពហូហិ តារកាហិ ធូមា និក្ខមិំសុ. ចញ្ញិង្ខុចេតិយេបិ ពុទ្ធប្បដិពិម្ពស្ស អក្ខិកូបតោ ឧទកធារានេត្តជលានិវិយ និក្ខមិំសូតិ រាជវំសេ វុត្តំ.

អថ ¶ សទ្ធម្មកិត្តិត្ថេរោ សទ្ធិំ មហាសាធុជ្ជនតិសាយ នធជត្ថេរេហិ កេតុមតីនគរំ អគមាសិ. រដ្ឋសារត្ថេរោបិ សិរិខេត្តនគរំ សយមេវ អគមាសីតិ បោរាណបោត្ថកេសុ វុត្តំ. តំ បន រាជវំសេ សិរិខេត្តនគរិន្ទោ សត្វ វរាជា តំ អានេសីតិ វុត្តវចនេន ន សមេតិ.

សទ្ធម្មកិត្តិត្ថេរោបិ កេតុមតីនគរេ កាលង្កតោ. តតោ បច្ឆា ថោកំ កាលំ អតិក្កមិត្វា មហាសាធុជ្ជនត្ថេរោ តត្ថេវ កាលមកាសិ.

តិសាសនធជត្ថេរោ បន កលិយុគេ ទ្វាទសាធិកេ នវវស្សសតេ សម្បត្តេ ហំសាវតីនគរេ អនេកសេតិភិន្ទស្ស រញ្ញោ កាលេ កេតុមតីនគរតោ ហំសាវតីនគរំ អគមាសិ.

តតោ បច្ឆា តិចត្តាលីសវស្សិកោ ហុត្វា កលិយុគេ តេរសាធិកេ នវវស្សសតេ មិង្ឃ ព្រហ្មនរបតិរញ្ញោកាលេ បុន ជេយ្យបុរនគរំ សម្បត្តោ ហុត្វា ជេតវនវិហារសមីបេ ឯកិស្សំ គុហាយំ ទិសីទិ. មហាអរិយវំសគណិកស្ស ជេតវនត្ថេរស្ស សន្តិកេ ឧបសង្កមិ.

តស្មិញ្ច កាលេ ជេតវនត្ថេរោ គិលានោ ហុត្វា មយិ កាលង្កតេ មម ឋានំ អធុនា ហំសាវតីនគរតោ អាគតោ តិសាសនធជោ នាម ថេរោ បរិគ្គណ្ហិតុំ សមត្ថោ ភវិស្សតិ, តស្ស និយ្យាទេស្សាមីតិ ចិន្តេសិ. តស្មិំ ខណេ តិសាសនធជត្ថេរោ បុរិមយាមេ សុបិនំ មស្សិ,– មតកឡេវរំ សមីបំ អាគច្ឆតីតិ, មជ្ឈិមយាមេ បន តំ មតកឡេវរំ គុហាយំ បវិសតីតិ, បច្ឆិមយាមេ មតកឡេវរស្ស មំសំ សត្ថេន ឆិន្ទតីតិ. អថ សុបិនំ បស្សិតភាវំ អត្តនោ សមីបេ សយន្តស្ស ឯកស្ស សាមណេរស្ស អារោចេសិ. អារោចេត្វា ច បរិត្តំ ភណេត្វា និសីទន្តស្សេវ ជេតវនត្ថេរោ តំ បក្កោសិត្វា ជេតវនវិហារំ តស្ស និយ្យាទេសិ. តិសាសនធជត្ថេរោ ច ជេតវនវិហារេ និសីទិត្វា ¶ គន្ថំ វាចេត្វា និសីទិ. មិង្ឃ ព្រហ្មនរបតិរាជា ច តស្ស អនុគ្គហិតំ អកាសិ.

បច្ឆា កលិយុគេ សោឡសាធិកេ នវវស្សសតេ សម្បត្តេ ហំសាវតីនគរិន្ទោ អនេកសេតិភិន្ទោ នាម រាជា រតនបូរនគរំ វិជយិត្វា ឯកំ វិហារំ ការាបេត្វា តស្ស អទាសិ.

សោ ច តិសាសនធជត្ថេរោ អរិមទ្ទននគរេ អរហន្ត គណវំសិកោតិ ទដ្ឋព្ពោ.

តស្ស បន សិស្សា អនេកសតប្បមាណា លជ្ជិនោ អហេសុំ. តេសុ បន សិស្សេសុ វរពាហុត្ថេរោ ភូមិនិខានេន គរវាសិត្ថេរោ មហារដ្ឋគាមវាសិនោ តយោ មហាថេរាតិ ឥមេ បញ្ច ថេរា វិសេសតោ បរិយត្តិកោវិទាតិ.

តិសាសនធជត្ថេរោ ច មហល្លកកាលេ អនាបាន សតិកម្មដ្ឋានំ គហេត្វា អរញ្ញំ បវិសិត្វា វិវេកដ្ឋានំ គណ្ហិ. តទា ជេតវនគណាទយោ អរហន្ត គណវំសាយេវ. អបរភាគេយេវ តេសំ សិស្សានុសិស្សបរម្បរាសុ កេចិ ភិក្ខូ សិរច្ឆាទនំ នានាវណ្ណប្បដិមណ្ឌិតញ្ច តាលវណ្ដំ គហេត្វា អាចារវិការំ អាបជ្ជិំសុ.

កលិយុគេ ឯកវស្សាធិកេ សហស្សេ សម្បត្តេ ឧក្កំសិកោ នាម រាជា វិហារំ ការាបេត្វា តិសាសនធជត្ថេរស្ស សិស្សភូតស្ស វរពាហុត្ថេរស្ស សិស្សភូតស្ស មហារតនាករស្ស នាម ថេរស្ស អទាសិ.

សោ ច មហារតនាករត្ថេរោ ឧក្កំសិករញ្ញោ សិរិសុធម្មរាជាមហាធិបតីតិ នាមលញ្ឆំ ឆន្ទាលង្ការសទ្ទនេត្តិ នយេហិ អលង្ករិត្វា ទស្សិតំ រជិន្ទរាជនាមាភិធេយ្យាទីបនិំ នាម គន្ថំ អកាសិ.

តញ្ច គន្ថំ បរិវិសោធនត្ថាយ តិរោបព្ពតាភិធេយ្យស្ស មហាថេរស្ស និយ្យាទេសិ. តិសាសនធជត្ថេរស្ស សិស្សភូតេសុ ¶ មហារដ្ឋគាមវាសីសុ តីសុ ភាតិកត្ថេរេសុ ជេដ្ឋោ តិំសគុហាសុវសន្តោ បរិយត្តិំ វាចេត្វា និសីទិ. សត្វវរាជា ច តស្មិំ ថេរេ អតិវិយ បសន្នោ អហោសិ. ញ្ញោង្ករមិ នាមកស្ស រញ្ញោ កាលេបិ ចូឡបិតា ឯកំ វិហារំ ការាបេត្វា តស្សេវ អទាសិ. ឧក្កំសិករញ្ញោ កាលេបិ មង្គវំនាមកេ បព្ពតេ វិហារំ ការាបេត្វា តស្សេវ អទាសិ.

តេសុ មហារដ្ឋគាមវាសិត្ថេរេសុ មជ្ឈិមត្ថេរោបិ តិសាសនធជត្ថេរស្ស ជេដ្ឋភាតិកត្ថេរស្ស ច និវាសដ្ឋានភូតេ ជេតវនវិហារេយេវ គន្ថំ វាចេត្វា និសីទិ. កនិដ្ឋត្ថេរោបិ តេសំ និវាសដ្ឋានភូតេសុយេវ វិហារេសុ គន្ថំ វាចេត្វា និសីទិ. ឯត្ថ ច តិសាសនធជត្ថេរោ នាម លជ្ជិអលជ្ជិវសេន ទុព្ពិធោ. យថាវុត្តត្ថេរោ បន លជ្ជីយេ វាតិ ទដ្ឋព្ពោ. អលជ្ជី បន ឥមស្មិំ ថេរបរម្បរាទស្សនេ ន ឥច្ឆិ តព្ពោ. អលជ្ជីភូតស្ស បន តិសាសនធជត្ថេរស្ស វត្ថុំ ឥធ អវត្វា អជ្ឈុបេក្ខិស្សាម, បយោជនាភាវា គន្ថស្ស ច បបញ្ចូបគមនត្តាតិ.

យោគិរង្គ នាមកស្ស រញ្ញោ កាលេ ជេយ្យបុរេ សុវណ្ណគុហវាសី មហាថេរោ ទក្ខិណារាមវិហារវាសី មហាថេរោ ចតុភូមិកវិហារវាសី មហាថេរោ តោង្គភីលូ វិហារវាសី មហាថេរោ ច តិសាសនធជមហាថេរស្ស សទ្ធិវិហារិកាយេវ. តេសំ បន វត្ថុម្បិ គន្ថវិត្ថារភយេន ន វទាម. លជ្ជិគណវំសិកា ឯតេតិ វិជាននមេវ ហេត្ថ បមាណន្តិ.

កលិយុគេ ឯកសដ្ឋាធិកេ នវវស្សសតេ សម្បត្តេ ផគ្គុនមាសស្ស ជុណ្ហបក្ខទុតិយទិវសេ សុក្កវារេ រតនបូរនគរំ ទុតិយំ មាបេត្វា ញ្ញោគីរង្គ នាម រាជា រជ្ជំ ការេសិ. សីហសូរធម្មរាជាតិបិ នាមលញ្ឆំ បដិគ្គណ្ហិ. តោចភីលូ វិហារវាសីមហាថេរំ ¶ ឧទ្ទិស្ស ចតុភូមិកវិហារំ ការាបេសិ. ចត្តារិ មហាមុនិចេតិយានិបិ ការាបេសិ. វិហារ ចេតិយេសុ អនិដ្ឋិតេសុយេវ សិន្នីនគរំ និក្ខមិត្វា តត្ថ វេរំ វូបសមាបេត្វា បច្ចាគតកាលេ សង្ខារសភាវំ អនតិក្កមនតោ ទិវង្គតោ អហោសិ. អហោវត សង្ខារធម្មាតិ. ហោន្តិ ចេត្ថ,–

សេយ្យថា វាណិជានំវ, ឃរគោឡិករូបកំ;

តំតំទិសំ ភមិត្វាវ, សីសំ ឋបេតិ ឧត្តរំ;

ឯវំ លោកម្ហិ សត្តា ច, សន្ធិចុតីនមន្តរេ;

យថា តថា ភមិត្វាវ, អន្តេ ឋបេន្តិ សន្តនុន្តិ;

កលិយុគេ សត្តសដ្ឋាធិកេ នវវស្សសតេ ផគ្គុនមាសស្ស កាឡបក្ខតេរសមិយំ តស្ស ជេដ្ឋបុត្តោ បិតុ សន្តកំ រជ្ជំ គណ្ហិ. មហាធម្មរាជាតិ នាមលញ្ឆម្បិ បដិគ្គណ្ហិ. បិតុ កាលេ អនិដ្ឋិតានិ ចេតិយានិ បុន ការាបេសិ. ចតុភូមិកវិហារញ្ច និដ្ឋំ គមាបេត្វា តោវិភីលូ មហាថេរស្ស បរលោកំ គន្ត្វា អវិជ្ជមានតាយ ចតុភូមិកវិហារវាសី មហាថេរស្ស ទស្សាមីតិ អន្តេបុរំ បក្កោសាបេសិ. ថេរោ ទ្វេ វារានិ បក្កោសិយមានោបិ នាគច្ឆិ. តតិយ វារេ បន ពហូ សទ្ធិវិហារិកា អន្តេបុរំ គន្ត្វា បវិសថ, ន ហិ សក្កា រញ្ញា បក្កោសិតេ បដិក្ខិបិតុន្តិ អាហំសុ.

អថ ថេរោ ឯវមាហ,- អហំ អាវុសោ រដ្ឋបីឡនបិណ្ឌបាតំ ភុញ្ជិតុំ ន ឥច្ឆាមិ, ឯវម្បិ សចេ តុម្ហេ ឥច្ឆថ រញ្ញោ សន្តិកំ គន្តុំ, ឯវំ សតិ ឥទានិ រញ្ញោ សន្តិកំ អហំ គមិស្សាមីតិ អន្តេបុរំ បាវិសិ. បវិសិត្វា រញ្ញា សទ្ធិំ សល្លាបំ កត្វា អយំ វិហារោ អរញ្ញវាសីនំ ភិក្ខូនំ អសប្បាយោតិ បដិក្ខិបិ. ឯវំ បន ភន្តេ សតិ តស្មិំ វិហារេ និសីទិយមានំ ថេរំ ឧបទិស្សថាតិ ¶ . ខណិត្តិបាទវិហារវាសី មហារាជ ថេរោ បរិយត្តិវិស្សារទោ សិក្ខាកាមោ, តស្ស ទាតុំ វដ្ដតីតិ. អថ រាជា តស្ស វិហារំ អទាសិ. មហាសង្ឃនាថោតិ នាមលញ្ឆម្បិ អទាសិ. សោ តត្ថ បរិយត្តិំ វាចេត្វា និសីទិ.

តស្ស បន វិហារស្ស បរិវារភូតេសុ ចត្តាលីសាយ វិហារេសុ ឧត្តរាយ អនុទិសាយ ឯកស្មិំ វិហារេ វសន្តោ វរាភិសង្ឃនាថោ នាម ថេរោ មណិកុណ្ឌលវត្ថុំ មរម្មភាសាយ អកាសិ. បច្ឆិមាយ អនុទិសាយ ឯកស្មិំ វិហារេ វសន្តោ ឯកោ ថេរោ សត្តរាជធម្មវត្ថុំ អកាសិ.

តស្មិញ្ច កាលេ ភាមអង្ក្យោ អាចារអង្ក្យោតិ ទ្វិន្នំ ភិក្ខូនញ្ច លោកធម្មេសុ ឆេកតាយ ទ្វេ វិហារេ កត្វា អទាសិ. តេ បន ទ្វេ ថេរា វេទសត្ថកោវិទា, បរិយត្តិបដិបត្តីសុ បន មន្ទា, រាមញ្ញរដ្ឋតោ អាគតា. តេ បន ថេរបរម្បរាយ ន គណន្តិ បោរាណា.

កលិយុគេ តិសត្តតាធិកេ នវវស្សសតេ សម្បត្តេ មហាមុនិចេតិយស្ស បុរត្ថិមទិសាភាគេ ចត្តារោ វិហារេ ការាបេត្វា ចតុន្នំ ថេរានំ អទាសិ. តេ ច ថេរា តត្ថ និសីទិត្វា សាសនំ បគ្គណ្ហិំសុ.

តស្មិំយេវ កាលេ ពទរវនវាសី នាម ឯកោបិ ថេរោ អត្ថិ. សោបិ បរិយត្តិវិសារទោ ឆប្បទវំសិកោ. សោ ច ថេរោ យាវជីវំ យថាពលំ សាសនំ បគ្គណ្ហិត្វា ទុតិយភវេ ចលង្គនគរេ ឯកិស្សា ឥត្ថិយា កុច្ឆិម្ហិ បដិសន្ធិំ គណ្ហិ. ទសមាសច្ចយេន កលិយុគេ ចត្តាលីសាធិកេ នវវស្សសតេ សម្បត្តេ ពុធវារេ វិជាយិត្វា តេរសវស្សិកកាលេ សាសនេ បព្ពជិត្វា បរិយត្តិំ ឧគ្គណ្ហិ. សិរិខេត្តនគរិន្ទោ រាជា សិរិខេត្តនគរំ អានេត្វា សិរិខេត្តនគរេ សាមណេរោតិ នាមេន បាកដោ ហុត្វា កលិយុគេ ចតុបណ្ណាសាធិកេ ¶ នវវស្សសតេ សម្បត្តេ បន្នរសវស្សិកកាលេ វេស្សន្តរជាភកំ កព្យាលង្ការវសេន ពន្ធិ. បរិបុណ្ណវីសតិវស្សកាលេ សិរិខេត្តនគរេយេវ សិរិខេត្តនគរិន្ទោ វេរវិជយោ នាម រាជា អនុគ្គហេត្វា ឧបសម្បទភូមិយំ បតិដ្ឋាតិ. បច្ឆិមបក្ខាធិកោ នាម រាជា សិរិខេត្តនគរំ អត្តនោ ហត្ថគតំ អកាសិ. តស្មិញ្ច កាលេ តំ ថេរំ អានេត្វា រតនបូរនគរេ វសាបេសិ. សូរកិត្តិ នាម រញ្ញោ កនិដ្ឋភាតិកោ ឯរាវតីនទីតីរេ ចតុភូមិកវិហារំ ការាបេត្វា តស្ស ថេរស្ស អទាសិ. រាជា ច តិបិដកាលង្ការោតិ នាមលញ្ឆំ អទាសិ.

កលិយុគេ វស្សសហស្សេ សម្បត្តេ ផគ្គុនមាសស្ស បុណ្ណមិយំ សដ្ឋិវស្សិកោ ហុត្វា តិរិយបព្ពតំ គន្ត្វា អរញ្ញវាសំ វសិ. ទ្វេ វស្សាធិកេ វស្សសហស្សេ រាជា តស្មិំ វិហារំ ការាបេត្វា តស្សេវ ថេរស្ស អទាសិ. សោ បន តិបិដកាលង្ការត្ថេរោ សិរិខេត្តនគរេ នវង្គកន្ទរេ បត្តលង្កស្ស អតុលវំសត្ថេរស្ស វំសិកោ. សិរិខេត្តនគរេ នវង្គកន្ទរេ សុវណ្ណវិហារេ វសន្តស្ស ថេរស្ស កិត្តិឃោសោ សព្ពត្ថ បត្ថរិ. ជេយ្យបុរេ ឯរាវតីនទីតីរេ ចតុភូមិកវិហារេ វសនកាលេ អដ្ឋសាលិនិយា អាទិតោ វីសតិ គាថានំ សំវណ្ណនំ អកាសិ. សូរកិត្តិនាមកស្ស កនិដ្ឋភាតិកស្ស យាចនមារព្ភ យសវឌ្ឍនវត្ថុញ្ច អកាសិ. តិរិយបព្ពតេ វសនកាលេ វិនយាលង្ការដីកំ អកាសិ. បច្ឆិមបក្ខាធិករញ្ញោ កាលេ មហាសង្ឃនាថត្ថេរំ សង្ឃរាជភាវេ ឋបេសិ. សោ ច សង្ឃរាជា អតិវិយ បរិយត្តិ វិសារទោ. តស្មិញ្ច កាលេ រតនបូរនគរេបិ អរិយាលង្ការត្ថរោ នាម ឯកោ អត្ថិ. សោ បន តិបិដកាលង្ការត្ថេរេន សមញ្ញាណថាមោ. វយសាបិ សមានវស្សិកា.

តេសុ តិបិដកាលង្ការត្ថេរោ គន្ថន្តរពហុស្សុតដ្ឋានេ ¶ អធិកោ, អរិយាលង្ការត្ថេរោ បន ធាតុបច្ចយវិភាគដ្ឋានេ អធិកោតិ ទដ្ឋព្ពោ. បច្ឆា បន ឧក្កំសិករញ្ញោកាលេ តេបិ ទ្វេ ថេរា រញ្ញោ អាចរិយា ហុត្វា សាសនំ បគ្គណ្ហិំសុ. តេសុ អរិយាលង្ការត្ថេរោ អបរភាគេ កាលង្ករិត្វា តស្ស ថេរស្ស សទ្ធិវិហារិកស្ស ទុតិយារិយាលង្ការត្ថេរស្ស រាជមណិចូឡចេតិយស្ស សមីបេ ទក្ខិណវនារាមំ នាម វិហារំ ការាបេត្វា អទាសិ.

ឧក្កំសិកោ នាម រាជា បន សាសនេ ពហុប្បការោ. សោ ច កលិយុគេ ឆនវុតាធិកេ នវវស្សសតេ រជ្ជំ បត្តោ. រជ្ជំ បន បត្វា សិរិធម្មាសោករាជាវិយ ចត្តារិ វស្សានិ អតិក្កមិត្វា មុទ្ធាភិសេកំ បដិគ្គហេត្វា សិរិសុធម្ម រាជាមហាធិបតីតិ នាមលញ្ឆម្បិ បដិគ្គណ្ហិ. ឯកស្មិំ បន សមយេ ហំសាវតីនគរំ គន្ត្វា តត្ថ និសីទិ. អថ រាមញ្ញរដ្ឋវាសិនោ ឯវមាហំសុ,- មរម្មិកភិក្ខូ នាម បរិយត្តិកោវិទា វេទសត្ថញ្ញុនោ នត្ថីតិ. តំ សុត្វា រាជា ចតុភូមិកវិហារវាសិត្ថេរស្ស សន្តិកំ សាសនំ បេសេសិ,-តិំសវស្សិកា ចត្តាលីសវស្សិកា វា បរិយត្តិកោវិទា វេទសត្ថញ្ញុនោ ភិក្ខូ រាមញ្ញរដ្ឋំ មម សន្តិកំ បេសេថាតិ. អថ ចតុភូមិ កវិហារវាសិត្ថេរោ តិបិដកាលង្ការំ តិលោកាលង្ការំ តិសាសនាលង្ការញ្ច សទ្ធិំ តិំសមត្ថេហិ ភិក្ខូហិ បេសេសិ. ហំសាវតីនគរំ បន បត្វា មោធោចេតិយស្ស បុរត្ថិមភាគេ វិហារេ ការាបេត្វា តេសំ អទាសិ.

ឧបោសថទិវសេសុ សុធម្មសាលាយំ រាមញ្ញរដ្ឋវាសិនោ បរិយត្តិកោវិទេ វេទសត្ថញ្ញុនោ សន្និបាតាបេត្វា តេហិ តីហិ ថេរេហិ សទ្ធិំ កថាសល្លាបំ ការាបេសិ. អថ រាមញ្ញរដ្ឋវាសិនោ ភិក្ខូ ឯវមាហំសុ,– បុព្ពេ បន មយំ មរម្មរដ្ឋេ បរិយត្តិកោវិទា វេទសត្តញ្ញុនោ នត្ថីតិ មញ្ញាម, ឥទានិ មរម្មរដ្ឋវាសិនោ អតិវិយ បរិយត្តិ កោវិទា ¶ វេទសត្ថញ្ញុនោតិ. អបរភាគេ កលិយុគេ ឆនវុតាធិកេ នវវស្សសតេ សម្បត្តេ រាជា រតនបូរនគរំ បច្ចាគច្ឆិ.

តេបិ ថេរា បច្ចាគន្តុកាមា រាមញ្ញរដ្ឋេ បធានភូតស្ស តិលោកគរូតិ នាមធេយ្យស្ស មហាថេរស្ស សន្តិកំ វន្ទនត្ថាយ អគមំសុ.

តទា តិលោកគរុត្ថេរោបិ តេហិ សទ្ធិំ សល្លាបំ កត្វា ឯវមាហ,-តុម្ហេសុ បន តិបិដកាលង្ការត្ថេរោ បឋមំ អាវាសវិហារំ លភិស្សតីតិ. កស្មា បន ភន្តេ ឯវម វោចាតិ វុត្តេ អយំ បន បិណ្ឌាយ ចរន្តោបិ អន្តរាមគ្គេ វេឡុវេត្តាទីនិ លភិត្វា គហេត្វា វិហារេ បដិសង្ខរណំ អកាសិ, តស្មាហំ ឯវំ វទាមិ, លោកេ វិហារេ បដិសង្ខរណសីលា ភិក្ខូ សីឃមេវ អាវាសវិហារំ លភន្តីតិ ហិ បោរាណត្ថេរា អាហំសូតិ អាហ.

តេបិ រតនបូរនគរំ បច្ចាគច្ឆិំសុ. តិលោកគរុត្ថេរស្ស វចនានុរូបមេវ តិបិដកាលង្ការត្ថេរោ សព្ពបឋមំ អាវាសវិហារំ លភីតិ.

កលិយុគេ បន នវវស្សាធិកេ វស្សសហស្សេ សម្បត្តេ រញ្ញោ កនិដ្ឋោ កាលមកាសិ. អថំ រញ្ញោ បុត្តោ ឧច្ចនគរភោជកោ ពាលជនេហិ សន្ថវំ កត្វា តេសំ វចនំ អាទិយិត្វា បច្ចូសកាលេ បិតរំ ឃាតេតុកាមោ អន្តេបុរំ សហសា បាវិសិ.

រាជាវ អនគ្ឃំ មុទ្ទិកំ គហេត្វា នន្ទជេយ្យេន នាម អមច្ចេន រាជយោធេន នាម អមច្ចេនច សទ្ធិំ អញ្ញតរវេសេន នគរតោ និក្ខមិត្វា រជតវាលុកនទិំ សម្បត្តោ.

តស្មិញ្ច កាលេ ឯកោ សាមណេរោ មាតាបិតូនំ គេហេ បិណ្ឌបាតំ អានេស្សាមីតិ ខុទ្ទកនាវាយ នទិយំ អាគច្ឆិ. អថ ¶ តំ សាមណេរំ ទិស្វា រាជា ឯវមាហ,- អម្ហេ ភន្តេ បរតីរំ នាវាយ អានេហីតិ. សាមណេរោ ច អាហ,-សចេ ឧបាសក តុម្ហេ បរតីរំ អានេយ្យំ, ភត្តកាលំ អតិក្កមេយ្យន្តិ. អថ រាជា អម្ហេយេវ សីឃំ អានេហិ, ឥមំ មុទ្ទិកំ ទស្សាមីតិ អស្សាសេត្វា អានេតុំ ឱកាសំ យាចិ. អថ សាមណេរោ ការុញ្ញប្បត្តំ វចនំ សុត្វា បរតីរំ អានេសិ.

អថ ចតុភូមិកវិហារំ បត្វា តស្មិំ វិហារេ ថេរស្ស សព្ពម្បិ ការណំ អារោចេត្វា ឯវមាហ,-សចេ ភន្តេ អម្ហេ គណ្ហិតុំ អាគច្ឆយ្យ, តេ និវារេថាតិ. ថេរោច មយំ មហារាជ សមណា ន សក្កា ឯវំ និវារេតុំ, ឯវម្បិ ឯកោ ឧបាយោ អត្ថិ,-និសិន្នវិហារវាសិត្ថេរោ បន គិហិកម្មេសុ អតិវិយ ឆេកោ, តំ បក្កោសេត្វា ការណំ ចិន្តេតុំ យុត្តន្តិ. អថ តំ បក្កោសេត្វា តមត្ថំ អារោចេត្វា រាជា ឥទមវោ ច,- សចេ ភន្តេ អម្ហេ គណ្ហិតុំ អាគច្ឆេយ្យុំ, អថ កេនចិទេវ ឧបាយេន តេ និវារេថាតិ. អថ សោ ថេរោ ឯវមាហ,-តេន ហិ មហារាជ មា កិញ្ចិ សោចិ មាភាយិ វិហារមជ្ឈេ សិរិគព្ភំ បវិសិត្វា និសីទថាតិ វត្វា បិណ្ឌាយ អចរន្តេ ភិក្ខុសាមណេរេ សន្និបាតាបេត្វា វិសុំ វិសុំ ទណ្ឌហត្ថា ហុត្វា ឯកស្សបិ បុរិសស្ស វិហារំ បវិសិតុំ ឱកាសំ មា ទេថាតិ វត្វា សេនំវិយ ព្យូហេសិ. សាមន្តវិហារេសុបិ វសន្តេ ភិក្ខុសាមណេរេ បក្កោសិ. តទា កិរ អាគន្ត្វា សន្និបាតានំ ភិក្ខុសាមណេរានំ អតិរេកសហស្សមត្តំ អហោសិ. ថេរោ តេ វិហារេ ទ្វារកោដ្ឋកេសុ អាគតមគ្គេ ច វិសុំ វិសុំ ទណ្ឌហត្ថា ហុត្វា អារក្ខណត្ថាយ ឋបេសិ, យថា វឌ្ឍកី សូករោ ព្យគ្ឃស្ស និវារណត្ថាយ វិសុំ វិសុំ សូករេ សំវិធាយ ឋបេសីតិ. អថ បុត្តស្ស យោធាបិ រាជានំ គហេតុំ ន សក្កា, ភិក្ខុ សាមណេរានំ ¶ គារវវសេន ពលក្ការេន មារេត្វា បវិសិតុំ ន វិសហន្តិ, ភិក្ខុ សាមណេរានំ ពាហុល្លតាយ ច.

តស្មិំយេវ សំវច្ឆរេ អស្សយុជមាសស្ស កាឡបក្ខបញ្ចមិតោ យាវ កត្តិកមាសស្ស កាឡបក្ខបញ្ចមី វិហារេយេវ រាជា និលីយិត្វា និសីទិ. អថ អន្តេបុរវាសិកា អមច្ចា បុត្តំ អបនេត្វា រាជានំ អានេត្វា រជ្ជេ ឋបេសុំ. រាជា ច បុន រជ្ជំ បត្វា វិហារេ និសិន្នកាលេ មា ភាយិ មហារាជ ត្វំ ជិនេស្សតីតិ រញ្ញោ អារោចេន្តស្ស វេទសត្ថញ្ញុនោ ឯកស្ស ភិក្ខុស្ស ចញ្ញិង្ខុចេតិយស្ស ឯសន្នដ្ឋានេ ឯកំ វិហារំ ការាបេត្វា អទាសិ. ធម្មនន្ទរាជគុរូតិ នាមលញ្ឆម្បិ អទាសិ. តស្ស បន វិជាតដ្ឋានភូតំ គាមំ និស្សាយ មរម្មវោហារេន ‘យេ នេ នា សេ យាំ វ’ ឥតិ សមញ្ញា អហោសិ.

រាជា ច បុន រជ្ជំ បត្វា តស្មិំយេវ សំវច្ឆរេ កត្តិកមាសស្ស កាឡបក្ខចុទ្ទសមិយំ សព្ពេបិ មហាថេរេ និមន្តេត្វា រាជគេហំ បវេសេត្វា បិណ្ឌបាតេន ភោជេសិ. អថ រាជា ឯវមាហ,-ចតុភូមិកវិហារវាសិត្ថេរោ សម្បរាយិកត្ថាវហោ អាចរិយោ, និសិន្នវិហារវាសិត្ថេរោ បន ទិដ្ឋធម្មិកត្ថាវហោតិ ឯវំ រាជាវំសេ វុត្តំ. បោរាណបោត្ថកេសុ បន ចតុភូមិកវិហារ វាសិត្ថេរោ ឯកន្តសមណោ អាចរិយោ, និសិន្នវិហារវាសិត្ថេរោ បន យោធារហោ យោធកម្មេ ឆេកោតិ រាជា អហាតិ វុត្តំ. រាជា កិរ សម្បរាយិកត្ថំ អនុបេក្ខិត្វា ទិន្នកាលេ និសិន្នវិហារត្ថេរស្ស ន អទាសិ, កទាចិ កទាចិ បន ទិដ្ឋធម្មិកត្ថំ អនុប្បេក្ខិត្វា តស្ស វិសុំ អទាសីតិ. ឯត្ថ ច យស្មា និសិន្នវិហារ វាសិត្ថេរោ រញ្ញោ ភីយេហិ និវារណត្ថាយ អារក្ខំ អកាសិ, ន បរេសំ វិហេឋនត្ថាយ, អាណត្តិកប្បយោគា ច ន ទិស្សតិ, តស្មា នត្ថិ អាបត្តិទោសោ. សទ្ធាតិស្សរញ្ញោ ភយេហិ ¶ និវារណត្ថំ អរហន្តេហិ ថេរេហិ កតប្បយោគោវិយ ទដ្ឋព្ពោ.

ចតុភូមិកវិហារ វាសិត្ថេរោ បន ខណិត្តិបាទគាមេ ជាតោ, អរិមទ្ទនបុរេ អរហន្តត្ថេរគណប្បភវោ, យត្ថ កត្ថចិ គន្ត្វា អញ្ញេសំ ភិក្ខូនំ អាចារំ យថាភូតំ ជានិត្វា តេហិ ចតុបច្ចយសម្ភោគោ ន កភបុព្ពោ, អន្តមសោ ឧទកម្បិ ន បិវិតបុព្ពោ, តំតំដ្ឋានម្បិ ចម្មខណ្ឌំ គហេត្វាយេវ គមនសីលោ. ឧក្កំសិករាជា បន សិរិខេត្តនគរេ ទ្វត្តបោង្ករញ្ញា ការាវិតចេតិយសណ្ឋានំ គហេត្វា រាជមណិចូឡំ នាម ចេតិយំ អកាសិ. តំ បន ចេតិយំ បរិមណ្ឌលតោ តិហត្ថសតប្បមាណំ, ឧព្ពេធតោបិ ឯត្តកមេវ. តស្ស បន ចេតិយស្ស ចតូសុ បស្សេសុ ចត្តារោ វិហារេបិ ការាបេសិ, បុរត្ថិមបស្សេ បុព្ពវនារាមោ នាម វិហារោ, ទក្ខិណបស្សេ បន ទក្ខិណវនារាមោ នាម, បច្ឆិមបស្សេ បច្ឆិមវនារាមោ នាម, ឧត្តរបស្សេ ឧត្តរវនារាមោ នាម. តេសុ ចតូសុ វិហារេសុ ឧត្តរវនារាមោ នាម វិហារោ អសនិបាភគ្គិនា ឌយ្ហិត្វា វិនស្សិ. អវសេសេ បន តយោ វិហារេ បរិយត្តិកោវិទានំ តិណ្ណំ មហាថេរានំ អទាសិ. នាម លញ្ឆម្បិ តេសំ អទាសិ. បច្ឆិមស្ស រញ្ញោ កាលេយេវ ឧត្តរបស្សេ វិហារំ ការាបេសិ.

តស្មិំ បន ចេតិយេ ឆត្តំ អនារោបេត្វាយេវ សោ រាជា ទិវង្គតោ. តេសុ បន ចតូសុ វិហារេសុ និសិន្នានំ ថេរានំ ទក្ខិណវនារាមវិហារវាសីមហាថេរោ កច្ចាយនគន្ថស្ស អត្ថំ ឆព្ពិធេហិ សំវណ្ណនានយេហិ អលង្ករិត្វា មរម្មភាសាយ សំវណ្ណេសិ. បច្ឆិមវនារាមវិហារ វាសិត្ថេរោ បន ន្យាសស្ស សំវណ្ណនំ ឆហិ នយេហិ អលង្ករិត្វា អកាសិ.

កលិយុគេ បន ទសវស្សាធិកេ សហស្សេ សម្បត្តេ តស្ស ¶ រញ្ញោ បុត្តោ សិរិនន្ទសុធម្មរាជាបវរាធីបតិ រជ្ជំ ការេសិ. បិតុនោ រាជគេហំ ភិន្ទិត្វា វិហារំ ការាបេត្វា តិលោកាលង្ការស្ស នាម មហាថេរស្ស អទាសិ. តិលោកាលង្ការត្ថេរោ ច នាម តិបិដកាលង្ការត្ថេរេន សមញ្ញាណថាមស្ស អរិយាលង្ការត្ថេរស្ស សិស្សោតិ ទដ្ឋព្ពោ. អយញ្ចត្ថោ ហេដ្ឋា ទស្សិតោ. ជេយ្យបុរេ ចតុភូមិកអតុលវិហារំ ការាបេត្វា ទាដ្ឋានាគរាជគុរុត្ថេរស្ស អទាសិ. សោ ច ថេរោ និរុត្តិសារមញ្ជូសំ នាម ន្យាសសំវណ្ណនំ អកាសី.

កលិយុគេ ទ្វាទសាធិកេ វស្សសហស្សេ សម្បត្តេ ផគ្គុនមាសេ សោតាបន្នា នាម អារក្ខទេវតា អញ្ញត្ថ គមិស្សាមាតិ អាហំសូតិ នគរា សុបិនំ បស្សន្តា ហុត្វា ពហូសន្និបតិត្វា ទេវបូជំ អកំសុ. ទេវតានំ បន សង្កមនំ នាម នត្ថិ, បុព្ពនិមិត្តមេវតន្តិ ទដ្ឋព្ពំ.

តស្មិញ្ច កាលេ ចិនរញ្ញោ យោធា អាគន្ត្វា មរម្មរដ្ឋំ ទូសេសុំ. សាសនំ អព្ភប្បដិច្ឆន្នោ វិយ ចន្ទោ ទុព្ពលំ អហោសិ.

កលិយុគេ តេវីសាធិកេ វស្សសហស្សេ សម្បត្តេ តស្ស រញ្ញោ កនិដ្ឋោ មហាបវរធម្មរាជាលោកាធិបតិ នាម រាជា រជ្ជំ ការេសិ. តស្មិញ្ច កាលេ លោកសង្កេតវសេន បុញ្ញំ មន្ទំ ភវិស្សតីតិ វេទសត្ថញ្ញូហិ អារោចិតត្តា លោកសង្កេតវសេនេវ អភិនវបុញ្ញុប្បាទនត្ថំ ខន្ធវារគេហំ ការាបេត្វា តាវកាលិកវសេន សង្កមិត្វា និសីទិ. តតោ អបរភាគេ ឧត្តរគេហំ ភិន្ទិត្វា តស្មិំយេវ ឋានេ វិហារំ ការាបេត្វា ឯកស្ស មហាថេរស្ស អទាសិ.

ទក្ខិណគេហំ បន នគរស្ស បុរត្ថិមទិសាភាគេ វិហារំ ការាបេត្វា អគ្គណម្មាលង្ការត្ថេរស្ស អទាសិ. សោ ច ថេរោ កច្ចាយនគន្ថស្សចេវ អភិធម្មត្ថសង្គហស្ស ច មាតិកាធាតុកថាយមកបដ្ឋានានញ្ច ¶ អត្ថំ មរម្មភាសាយ យោជេសិ.

ឧបរាជា ច មហាសេតុនោ បមុខេ ឋានេ សោវណ្ណមយវិហារំ ការាបេត្វា ឧត្តរគេហវិហារ វាសិត្ថេរស្ស អន្តេវាសិកស្ស ជិនារាមត្ថេរស្ស អទាសិ. តស្មិំយេវ ឋានេ នានារតនវិចិត្រំ វិហារំ ការាបេត្វា តស្សេវ ថេរស្ស អន្តេវាសិកស្ស គុណគន្ធត្ថេរស្ស អទាសិ.

សោ បន ថេរោ ‘ឆិន វ្ឌិន’ គាមេ វិជាតោ. វយេ បន សម្បត្តេ រតនបូរនគរំ គន្ត្វា បរិយត្តិំ ឧគ្គណ្ហិត្វា តតោ បុន និវត្តិត្វា ពទុននគរេ ពទរគាមេ និសីទិត្វា បច្ឆា ‘ឆិន វ្ឌិន’ គាមេ ចតូហិ បច្ចយេហិ កិលមថោ ហុត្វា វសតិ. តស្មិញ្ច កាលេ គាមេ មោក្ខស្ស នាម បុរិសស្ស សន្តិកេ ឯកំ អនគ្ឃំ មណិំ រាជា លភិត្វា អតិវ មមាយិ. ‘ឆិន វ្ឌិន’ មោក្ខមណីតិ បាកដោ អហោសិ.

អថ ឧត្តរគេហវិហារវាសិត្ថេរោ អាហ,- ‘ឆិន វ្ឌិន’ គាមកេ ន មណិយេវ អនគ្ឃំ, អថ ខោ ឯកោបិ ថេរោ គុណគន្ធោ នាម បរិយត្តិកោវិទោ អនគ្ឃោយេវាតិ.

អថ តំ សុត្វា រាជា តំ បក្កោសេត្វា ចតូហិ បច្ចយេហិ ឧបត្ថម្ភេត្វា បូជំ អកាសិ.

សហស្សោរោធគាមេ គុណសារោ នាម ថេរោ បលិណគាមេ សុជាតោ នាម ថេរោ ច គុណគន្ធត្ថេរស្ស សិស្សាយេវ អហេសុំ.

ឯកស្មិញ្ច កាលេ តិរិយបព្ពតវិហារវាសីមហាថេរោ ភិក្ខុសង្ឃមជ្ឈេ អគ្គធម្មាលង្ការត្ថេរំ កីឡនវសេន ឯវមាហ,- អម្ហេសុ អាវុសោ អន្តរធារយមានេសុ ត្វំ លោកេ ឯកោ គន្ថកោវិទត្ថេរោ ភវិស្សសិ មញ្ញេតិ. អថ អគ្គធម្មាលង្ការោ ច ឯវមាហ,-តុម្ហេសុ ភន្តេ អន្តរធារយមានេសុ មយំ គន្ថកោវិទាន ភវេយ្យាមកោ នាម ¶ បុគ្គលោ លោកេ គន្ថកោវិទោ ភវិស្សតីតិ. បោរាណបោត្ថកេសុ បន អរិយាលង្ការត្ថេរោ ននុ បនិទានិ មយំ គន្ថកោវិទា ន តាវ ភវាមាតិ ឯវមាហាតិ វុត្តំ. សោ អគ្គធម្មាលង្ការត្ថេរោយេវ រញ្ញា យាចិតោ រាជវំស. សង្ខេបម្បិ អកាសិ. សោ ប្បន ថេរោ អមច្ចបុត្តោ.

ឯកស្មិញ្ច កាលេ ហីនាយាវត្តកោ ឯកោ មហាអមច្ចោ រញ្ញោ សន្តិកា អត្តនា ឧបលទ្ធបរិភោគំ សព្ពំ គហេត្វា វិហារំ អាគន្ត្វា អគ្គធម្មាលង្ការត្ថេរេន សទ្ធិំ សល្លាបំ អកាសិ. សល្លាបំ បន កត្វា សព្ពំ បរិភោគំ ថេរស្ស ទស្សេត្វា សចេ ភន្តេ ត្វំ គិហិ ភវេយ្យាសិ, ឯត្តកំ បរិភោគំ លភិស្សតីតិ អាហ. ថេរោបិ ឯវមាហ,-តុម្ហាកំ បន ឯត្តកោ បរិភោគោ អម្ហាកំ សមណានំ វច្ចកុដិំ អសុភភាវនំ ភាវេត្វា បវិសន្តានំ បុញ្ញំ កលំ នាគ្ឃតិ សោឡសិន្តិ. កិញ្ចាបិ ឥទញ្ច បន វចនំ សាសនវំសេ អប្បធានំ ហោតិ, បុព្ពាចរិយសីហេហិ បន វុត្ត វចនំ យាវ អបាណកោដិកា សរិតព្ពមេវាតិ មនសិករោន្តេន វុត្តន្តិ.

កលិយុគេ បន ចតុត្តិំសាធិកេ វស្សសហស្សេ សម្បត្តេ តស្ស បុត្តោ នរាវរោ នាម រាជា រជ្ជំ ការេសិ. មហាសីហសូរធម្មរាជាតិ នាមលញ្ឆំ បដិគ្គណ្ហិ. តស្ស រញ្ញោ កាលេ ‘សី ខោំ’ ចេតិយស្ស សមីបេ ជេតវនវិហារេ គន្ថំ ឧគ្គណ្ហន្តោ ឯកោ ទហរភិក្ខុ គន្ថឆេកោបិ សមានោ ពាលកាលេ ពាលចិត្តេន អាកុលិតោ ហុត្វា វច្ចកូបេ វាតាតបេហិ ពហិសុក្ខភាវេន បដិច្ឆាទិតេ ទណ្ឌេន អាលុលិត្វា ទុគ្គន្ធោវិយ ចិត្តសន្តានេ បរិយត្តិវាតាតបេហិ ពហិសុក្ខភាវេន បដិច្ឆាទិតេ កេនចិទេវ រូបារម្មណាទិនា អាលុលិត្វា កិលេសសត្តិសង្ខាតោ ទុគ្គន្ធោ វាយិត្វា ហីនាយាវត្តិស្សាមីតិ ចិន្តេត្វា គិហិវត្ថានិ គហេត្វា សទ្ធិំ សហាយភិក្ខុហិ នទីតិត្ថំ អគមាសិ. អន្តរាមគ្គេ ¶ តាវ ភិក្ខុភាវេនេវ ចេតិយំ វន្ទិស្សាមីតិ គិហិវត្ថានិ សហាយកានំ ហត្ថេ ឋបេត្វា ចេតិយប្បមុខេ លេណំ បវិសិត្វា វន្ទិត្វា និសីទិ. អថ ឯកា ទហរិត្ថី ចេតិយង្គណំ អាគន្ត្វា ពហិ លេណំ និសីទិស្វា ឧទកំ សិញ្ចិត្វា បត្ថនំ អកាសិ,-ឥមិនា បុញ្ញកម្មេន សព្ពេហិ អបាយាទិនុក្ខេហិ មោចេយ្យាមិ, ភវេ ភវេ ច ហីនាយាវត្តកស្ស បុរិសស្ស បាទចារិកា ន ភវេយ្យាមីតិ.

អថ តំ សុត្វា ទហរភិក្ខុ ឯវំ ចិន្តេសិ,-ឥទានិ អហំហីនាយាវត្តិស្សាមីតិ ចិន្តេត្វា អាគតោ, អយម្បិ ទហរិត្ថី ហីនាយាវត្តកស្ស បុរិសស្ស បាទចារិកា ន ភវេយ្យា មីតិ បត្ថនំ អកាសិ, ឥទានិ តំ ទហរិត្ថិំ ការណំ បុច្ឆិស្សាមីតិ. ឯវំ បន ចិន្តេត្វា ពហិ លេណំ និក្ខមិត្វា តំ ទហរិត្ថិំការណំ បុច្ឆិ,-កស្មា បន ត្វំ ហីនាយាវត្តកស្ស បុរិសស្ស បាទចារិកា ន ភវេយ្យាមីតិ បត្ថនំ ករោសីតិ. ហីនាយាវត្តកស្ស ភន្តេ បុរិសស្ស បាទចារិកា ន ភវេយ្យាមីតិ វុត្តវចនំ ពាលបុរិសស្ស បាទចារិកា ន ភវេយ្យាមីតិ វុត្តវចនេន នានា ន ហោតិ, សទិសត្ថកមេវាតិ ននុ ហីនាយា វត្តកោ ពាលោយេវ នាម, សចេ បន ភន្តេ ហីនាយាវត្តកោ ពាលោ នាម ន ភវេយ្យ, កោ នាម លោកេ ពាលោ ភវេយ្យ, ភិក្ខុ នាម ហិ បរេហិ ទិន្នំ ចីវរបិណ្ឌបាតសេនាសនំ បរិភុញ្ជិត្វា សុខំ វសតិ, សចេ គន្ថំ ឧគ្គណ្ហិតុ កាមោ ភវេយ្យ, យថាកាមំយេវ គន្ថំ ឧគ្គណ្ហិតុំ ឱកាសំ លភតិ, ឯវំ បន អហុត្វា អលសិកោយេវ ភុញ្ជិត្វា សយិត្វា និសីទិតុំ ឥច្ឆេយ្យ, ឯវម្បិ យថាកាមំ ភុញ្ជិតុំ សយិតុំ ឱកាសំ លភតិ, ឯវម្បិ សមានោ បរស្ស ទាសោ ភវិស្សាមិ, ទារស្ស កិំករោ ភវិស្សាមីតិ អកថេន្តោបិ កថេន្តោវិយ ហុត្វា ហីនាយាវត្តេយ្យ, សោ លោកេ អញ្ញេហិ ពាលេហិ អធិកោ ពាលោតិ អហំ មញ្ញាមិ, សចេ បន ពាលតរស្ស ភរិយា ភវេយ្យ, អហំ ពាលតរី ភវេយ្យន្តិ ¶ វុត្តេ សោ ទហរភិក្ខុ សំវេគំ អាបជ្ជិត្វា ពហិនគរទ្វារំ និក្ខមិត្វា វានរគណេន វិនា ឈាយន្តោវិយ វានរោ ឈាយិត្វា និសីទិ.

អថ សហាយកា អាគន្ត្វា គិហិវត្ថានិ គណ្ហាហីតិ បក្កោសិំសុ. តស្មិំ កាលេ សោ ទហរភិក្ខុ អាគច្ឆថ ភវន្តោតិ វត្វា សព្ពំ ការណំ តេសំ អាចិក្ខិត្វា ឥទានិ បន ភវន្តោ ហីនាយាវត្តេហីតិ សចេ យោ កោចិ អាគន្ត្វា មម សីសំ មុគ្គរេន បហារេយ្យ, ឯវំ សន្តេបិ ហីនាយាវត្តិតុំ ន ឥច្ឆាមិ, ឥតោ បដ្ឋាយ យាវ ជីវិតបរិយន្តា ហីនាយាវត្តិតុំ មនសាបិ ន ចិន្តយិស្សាមីតិ វត្វា ឯរាវតីនំទិំ តរិត្វា ជេយ្យបុរំ អគមាសិ. តទា កិរ ទហរិត្ថី ទេវលាភវយ្យ, ន មនុស្សិត្ថីតិ វទន្តិ បណ្ឌិតាតិ.

ជេយ្យបុរំ បន បត្វា បរិយត្តិកោវិទានំ មហាថេរានំ សន្តិកេ នយំ គហេត្វា បុញ្ញចេតិយស្ស ទក្ខិណទិសាភាគេ ឯកស្មិំ វិហារេ និសីទិ. បរិយត្តិំ វាចេត្វា អថ កមេន តំតំទិសាហិ ភិក្ខុសាមណេរា អាគន្ត្វា តស្ស សន្តិកេ បរិយត្តិំ ឧគ្គណ្ហិំសុ. អាវាសំ បន អលភិត្វា កេចិ ភិក្ខុសាមណេរា ឆត្តានិបិ ឆាទិត្វា និសីទិំសុ.

ឯកស្មិំ កាលេ រាជា និក្ខមិត្វា បុញ្ញចេតិយំ វន្ទិស្សាមីតិ ចេតិយង្គណំ បាវិសិ. អថ ឆត្តានិ ឆាទេត្វា និសិន្នេ ភិក្ខូ ទិស្វា គុហាយ សទ្ធិំ វិហារំ ការាបេត្វា តស្ស ភិក្ខុស្ស អទាសិ. តិលោកគរូតិបិ នាមលញ្ឆំ អទាសិ. សុខវោហារត្ថំ បន កការលោបំ កត្វា តិលោគរូតិ វោហរិំសុ.

តស្ស បន សទ្ធិវិហារិកោ សត្តវស្សិកោ តេជោទីបោ នាម ភិក្ខុ បរិត្តដីកំ អកាសិ. អបរភាគេ បន តិលោកាលង្ការោតិ នាមលញ្ឆំ អទាសិ. ឯវំ តេជេទីបោ នាម ភិក្ខុ នរាវររញ្ញោ កាលេ បរិត្តដីកំ អកាសីតិ ទដ្ឋព្ពំ. កេចិ បន បច្ឆិមបក្ខាធិករញ្ញោ កាលេតិ វទន្តិ.

ឯកស្មិំ ¶ បន កាលេ តិរិយបព្ពតវិហារវាសីមហាថេរោ បាទចេតិយំ វន្ទនត្ថាយ គន្ត្វា បច្ចាគតកាលេ កុខននគរេ សុវណ្ណគុហាយំ ជម្ពុធជត្ថេរស្ស សន្តិកំ បវិសិត្វា តេន សទ្ធិំ សល្លាបំ អកាសិ. តេ ច មហាថេរា អញ្ញមញ្ញំ បស្សិត្វា សល្លបិត្វា អតិវិយ បមោទិំសុ. លោកស្មិញ្ហិ ពាលោ ពាលេន បណ្ឌិតោ បណ្ឌិតេន សទ្ធិំ អតិវិយ បមោទតីតិ. តេ ច ទ្វេ ថេរា សមានវស្សិកា. តិរិយបព្ពតវិហារ វាសីមហាថេរោ តេន សទ្ធិំ សល្លាបំ កត្វា បច្ចាគច្ឆិ. ជម្ពុធជត្ថេរោ ច មគ្គំ អចិក្ខិតុំ អនុគច្ឆិ. អថ តិរិយបព្ពតវិហារវាសីមហាថេរោ ជម្ពុធជត្ថេរំ អាហ,- អហំ ភន្តេ រាជវល្លភោ ហោមិ រាជគុរុ,ត្វំយេវ មម បុរតោ គច្ឆាហីតិ. អថ ជម្ពុធជត្ថេរោបិ តិរិយបព្ពតវិហារវាសិត្ថេរំ អាហ,-ត្វំ ភន្តេ រាជវល្លភោ ភវសិរាជគុរុ, លោកេ រាជគុរុ នាម បធានភាវេ ឋិតោ, តស្មា ត្វំយេវ មម បុរតោ គច្ឆាហីតិ. ឯត្ថ ច ទ្វេបិ មហាថេរា អញ្ញមញ្ញំ គារវវសេន លោកវត្តំ អបេក្ខិត្វា ឯវមាហំសូតិ ទដ្ឋព្ពំ. តិរិយបព្ពតវិហារវាសីមហាថេរោបិ រតនបូរនគរំ បត្វា រាជវំសបព្ពតំ គន្ត្វា អរញ្ញវាសំ វសិ.

អថ ឧក្កំសិករាជា កនិដ្ឋេន សូរកិត្តិនាមេន សទ្ធិំ មន្តេសិ,-សចេ ត្វំ វនេ ថេរំ បឋមំ បស្សសិ, ត្វំយេវ វិហារំ ការាបេត្វា ថេរស្ស ទទាហិ, សចេ បនាហំ បឋមំ បស្សេយ្យ, អហំ វិហារំ ការាបេត្វា ទទាមីតិ.

អថ កនិដ្ឋា បឋមំ បស្សិត្វា តិរិយបព្ពតកន្ទរេ ជេតវនំ នាម វិហារំ ការាបេត្វា អទាសិ. ឥទញ្ច វចនំ សាធុជ្ជនានំ គុណំ ឯវការំ បីតិសោមនស្សំ ឧប្បជ្ជិ, តេន បុញ្ញកម្មេន តេន បីតិសោមនស្សេន សត្តក្ខត្តុំ ទេវរជ្ជសម្បត្តិំ សត្តក្ខត្តុំ មនុស្សរជ្ជសម្បត្តិំ បដិលភីតិ វុត្តត្តា សាធុជ្ជនានំ គុណំ អនុស្សរិត្វា បុញ្ញវិសេសលាភត្ថាយ វុត្តំ.

តិរិយបព្ពតវិហារវាសីមហាថេរោ ច ជម្ពុធជត្ថេរស្ស ¶ គុណំ ឧក្កំសិករញ្ញោ អារោចេសិ. រាជា ច អតិវិយ បសីទិត្វា ជម្ពុធជោតិ មូលនាមេ ទីបសទ្ទេន យោជេត្វា ជម្ពុទីបធជោតិ នាមលញ្ឆំ អទាសិ.

ជម្ពុធជត្ថេរោ ច នាម ធម្មនន្ទត្ថេរស្ស សទ្ធិវិហារិកា. ធម្មនន្ទត្ថេរោ ច ជោតិបុញ្ញត្ថេរស្ស សទ្ធិវិហារិកោ. តេ ច ថេរា អរហន្តគណវំសិកា.

ជម្ពុធជត្ថេរោ បន វិនយបាឡិយា អដ្ឋកថាយ ច អត្ថ យោជនំ មរម្មភាសាយ អកាសិ. មណិរតនោ នាម បន ថេរោ អដ្ឋសាលិនីសម្មោហវិនោទនីកង្ខាវិតរណីអដ្ឋកថានំ អភិធម្មត្ថវិភាវនីសង្ខបវណ្ណនាឡីកានញ្ច អត្ថំ មរម្ម ភាសាយ យោជេសិ.

មូលាវាសគាមេ ច បុព្ពារាមវិហារវាសិត្ថេរោ គូឡត្ថ ទីបនិំ នាម គន្ថំ វិសុទ្ធិមគ្គគណ្ឋិបទត្ថញ្ច មូលភាសាយ អកាសិ, នេត្តិបាឡិយា ច អត្ថំ មរម្មភាសាយ យោជេសិ. សោ បន ថេរោ បុព្ពេ គាមវាសី ហុត្វា សីសវេឋនតាលបត្តានិ គហេត្វា អាចរិយប្បវេណីវសេន វិនយវិលោមាចារំ ចរិ. បច្ឆា បន តំ អាចារំ វិស្សជ្ជិត្វា អរញ្ញវាសំ វសិ. សោបិ ថេរោ គម្ភីរញាណិកោ សទ្ទត្ថនយេសុ អតិវិយ ឆេកោ.

កលិយុគេ បន បញ្ចតិំសាធិកេ វស្សសហស្សេ សម្បត្តេ កនិដ្ឋោ សិរិបវរមហាធម្មរាជា នាម ភូបាលោ រជ្ជំ ការេសិ. ទព្ពិមុខជាតស្សរេ បន គេហំ ការាបេត្វា និសីទនតោ ទព្ពិមុខជាតស្សរោតិ នាមំ បាកដំ អហោសិ. តស្មិំ បន ជាតស្សរេ ជេយ្យភូមិកិត្តិំ នាម វិហារំ ការាបេត្វា សិរិសទ្ធម្មបាលត្ថេរស្ស អទាសិ. ពហូនម្បិ គាមវាសី អរញ្ញវាសី ភិក្ខូនំ អនុគ្គហំ អកាសិ. រតនបូរនគរស្មិញ្ហិ ទសសុ ‘ញ្យ្ौំ យាំ’ រាជាំសេសុ ប្បច្ឆិមា បញ្ច រាជានោ អវិចិនិត្វាយេវ អលជ្ជីលជ្ជីមិស្សកវសេន សាសនំ បគ្គណ្ហិំសុ. តទា ¶ ជិនសាសនំ អព្ភន្តរេ ចន្ទោវិយ អតិបរិសុទ្ធំ ន អហោសិ. ឯវម្បិ លជ្ជិនោ អត្តនោ អត្តនោ វំសានុរក្ខណវសេន ធម្មំ បូរេតុំ អនិវារិតត្តា លជ្ជីគណវំសោ ន ឆិជ្ជតិ. តថា អលជ្ជិនោបិ អត្តនោ អត្តនោ អាចរិយប្បវេណីវសេន វិចរិំសុ, តេន អលជ្ជីគណវំសោបិ ន ឆិជ្ជតីតិ ទដ្ឋព្ពំ. តស្ស រញ្ញោ កាលេ ទេវចក្កោភាសោ នាម ឯកោ ថេរោ អត្ថិ, វេទសត្ថញ្ញូ បិដកេសុ បន មន្ទោតិ.

កលិយុគេ បន អដ្ឋតិំសាធិកេ វស្សសហស្សេ សម្បត្តេ វេសាខមាសស្ស កាឡបក្ខអដ្ឋមិតោ បដ្ឋាយ លោកសង្កេតវសេន ឧប្បជ្ជមានំ ភយំ និវារេតុំ នវគុហាយំ តេន ទេវចក្កោភាសត្ថេរេន កថិតនិយាមេន បឋមំ មរម្មិកភិក្ខូ បដ្ឋានប្បករណំ វាចាបេសិ. តតោ បច្ឆា ជេដ្ឋមាសស្ស ជុណ្ហបក្ខបាដិបទទិវសតោ រាមញ្ញរដ្ឋវាសិកេ ភិក្ខូ បដ្ឋានប្បករណំ វាចាបេសិ. មហាឆណញ្ច ការាបេសិ. រដ្ឋវាសិនោបិ ពហុបូជាសក្ការំ ការាបេសិ. តស្ស កិរ រញ្ញោ កាលេ បោត្ថកំ អដ្ឋិភល្លិករុក្ខនិយ្យាសេហិ បរិមដ្ឋំ កត្វា មនោសិលាយ លិខិត្វា សុវណ្ណេន លិម្បេត្វា បិដកំ បតិដ្ឋាបេសិ. តតោ បដ្ឋាយ យាវជ្ជតនា ឥទំ បោត្ថកកម្មំ មរម្មរដ្ឋេ អកំសូតិ.

កលិយុគេ សដ្ឋាធិកេ វស្សសហស្សេ សម្បត្តេ (អស្សយុជមាសស្ស កាឡបក្ខឆដ្ឋមិយំ អង្គារវារេ) តស្ស បុត្តោ រជ្ជំ ការេសិ. សិរិហាសីហសូរសុធម្មរាជាតិ នាមលញ្ឆម្បិ បដិគ្គណ្ហិ. បិតុ រញ្ញោ គេហដ្ឋានេ ចេតិយំ ការាបេសិ. តស្ស បន មារជេយ្យរតនន្តិ សមញ្ញា អហោសិ. តស្ស បន រញ្ញោ កាលេ សល្លាវតិយា នាម នទិយា បច្ឆិមភាគេ តុន្ននាមកេ គាមេ គុណាភិលង្ការោ នាម ថេរោ សាមណេរានំ គាមគ្គវេសនកាលេ ឯកំសំ ឧត្តរាសង្គំ ការាបេត្វា ¶ សីសវេឋនតាលបត្តានិ បន ន គណ្ហាបេត្វា តាលវណ្ដមេវ គណ្ហាបេសិ. ឯកោ គណោ ហុត្វា សបរិវារេន សទ្ធិំ តុន្នគាមេ និសីទិ. តុន្នគណោតិ តស្ស សមញ្ញា អហោសិ. សោ បន ថេរោ បាឡិអដ្ឋកថាដីកាគន្ថន្តរេសុ អធិប្បាយំ យថាភូតំ ន ជានាតិ, អភិធម្មបិដកំយេវ សិស្សានំ វាចេត្វា និសីទិ.

តស្មិញ្ច កាលេ កេតុមតីនគរេ និសិន្នា ពទ្ធន្នា ពុទ្ធង្កុរត្ថេរ ចិត្តត្ថេរា, ទីបយង្គនគរេ ឧឡុគាមេ និសិន្នោ សុនន្ទត្ថេរោ, តលុប្បនគរេ ជេយ្យពហុអន្ធគាមេ កល្យាណត្ថេរោតិ ឥមេ ចត្តារោ ថេរា សាមណេរានំ គាមប្បវេសនកាលេ ឯកំសំ ឧត្តរាសង្គំ អការាបេត្វា សីសវេឋនតាលបត្តានិ អគ្គណ្ហាបេត្វា ចីវរំ បារុបាបេត្វា តាលវណ្ដំ គណ្ហាបេត្វា សកលកគណំ ឱវាទំ កត្វា និសីទិំសុ. តេ បន ថេរា បាឡិអដ្ឋកថាដីកាគន្ថន្តរេសុ អធិប្បាយំ យថាភូភំ ជានិំសុ, តីសុបិ បិដកេសុ កោវិទា អហេសុំ. ឥច្ចេវំ សិរិមហាសីហសូរសុធម្មរញ្ញោ កាលេ បារុបនភិក្ខូហិ នានា ហុត្វា វិរូបំ អាបជ្ជិត្វា ឯកំសិកគណោ នាម វិសុំ ភិជ្ជិ, យថា បន អយមលំ អយតោ ឧដ្ឋហិត្វា វិសទិសំ ហុត្វា វិរុទ្ធំ ហោតីតិ. ឯវំ ភិជ្ជមានាបិ គណា រាជា បមាទោ អនុស្សុក្កោ ហុត្វា អត្តនោ អត្តនោ រុចិវសេនេវ ចរិត្វា និសីទិំសុ.

តេសុ ច ទ្វីសុ គណេសុ បារុបនគណេ ថេរា បាឡិអដ្ឋកថាដីកាគន្ថន្តរេសុ នីតត្ថវសេន វុត្តំ វចនំ និស្សាយ និក្កង្ខា និទ្ទោសាវ ហុត្វា និសីទិំសុ. ឯកំសិកគណេ បន ថេរា អត្តនោ អត្តនោ វាទោ ន បាឡិយំ ន ច អដ្ឋកថាសុ នេវ ដីកាសុ នាបិ គន្ថន្តេរេសុ ទិស្សតិ, ឥមមត្ថំ អជានន្តា ឥទមេវ សច្ចំ មោឃមញ្ញន្តិ វត្វា កេចិ បន សកសកសិស្សានំ ឱវាទំ អទំសុ. ឯវរូបាបិ សិស្សា ឱវាទំ បដិគ្គណ្ហិំសុ.

កេចិ បន បាឡិយាទីសុ សកវាទស្ស អនាគតភាវំ ញត្វាយេវ ¶ អបរិសុទ្ធចិត្តា ហុត្វា សម្មាសម្ពុទ្ធស្ស ភគវតោ មុខំ អនោលោកេត្វា សម្មាសម្ពុទ្ធស្សេវ ភគវតោ គុណំ អនុស្សរិត្វា សកវាទេ អាកាសេ បសារិត ហត្ថោវិយ អប្បតិដ្ឋានោតិ ជានិត្វាយេវ អម្ហាកំ វាទោ សម្បត្តលង្កស្ស សទ្ធម្មចារិត្ថេរស្ស វំសប្បភវោតិ អនិស្សាយភូភម្បិ និស្សយំ អកំសុ. អភូតេន មហាថេរំ សីលវន្តំ អព្ភាចិក្ខិំសុ. ផ្យសីនាមកេ គាមេ ទិដ្ឋធម្មិកសម្បរាយិ កត្ថំ អនបេក្ខន្តស្ស ហីនាយាវត្តកស្ស ទុស្សីលស្ស ឧបាសកស្ស លញ្ជំ ទត្វា អម្ហាកំ វាទានុរូបំ ឯកំ គន្ថំ ករោហីតិ ឧយ្យោជេត្វា អនាគតេ អនុភវិយមានទុក្ខតោ អភាយិត្វា និស្សយំ គវេសិំសូតិ.

តស្មិំញ្ច កាលេ និគ្រោធបាឡិសុវណ្ណវិហារវាសិត្ថេរោ គាមវាសីភិក្ខុ គណំ សមិតិំ កត្វា តស្ស នាយកោ ហុត្វា សីសវេឋនំ អធារេន្តា អមង្គលភិក្ខូ សាសនេ មាតិដ្ឋន្តូតិ អរញ្ញវាសីនំ ភិក្ខូនំ គន្ថំ វិកោបេត្វា តតោ តតោ បព្ពជេសុំ. អថ ហត្ថិសាលគាមស្ស បុរត្ថិមាយ អនុទិសាយ សេដ្ឋិតឡាកស្ស ទក្ខិណាយ អនុទិសាយ វិហារេ និសិន្នេ អតិរេកបណ្ណាសភិក្ខូបិ បព្ពាជេស្សាមាសិ ចិន្តេត្វា គាមវាសីភិក្ខូ សន្នហិត្វា អគមាសិ. អថ រាជា តមត្ថំ សុត្វា គាមវាសីគណោបិ ឯកោ, អរញ្ញវាសីគណោបិ ឯកោ, គាមវាសីភិក្ខូ អរញ្ញវាសីភិក្ខូ វិហេឋេសុំ ន សក្កា, សកសកវាទវសេន សកសកដ្ឋានេ និសីទិ តព្ពន្តិ រាជលេខនំ បេសេសិ. អថ អរញ្ញវាសីភិក្ខូ សុខំ វសិតុំ ឱកាសំ លភិំសុ.

កលិយុគេ ឆសត្តតាធិកេ វស្សសហស្សេ សម្បត្តេ តស្ស រញ្ញោ បុត្តោ មហាសីហសូរធម្មរាជាធិរាជា នាម រជ្ជំ ការេសិ. សោយេវ សូរជ្ជរាជាតិ ច សេតិភិន្ទោតិ ច វោហារិយតិ.

តស្ស ¶ រញ្ញោ កាលេ សុវណ្ណយានោលោកនគាមវាសីឧក្កំសមាលំ នាម ថេរំ អន្តោយុធនាយកោ ឯកោ អមច្ចោ អានេត្វា រតនបូរនគរំ បត្វា សុវណ្ណកុក្កុដាចលេ វិហារំ ការាបេត្វា ឋបេសិ.

សោ បាឡិអដ្ឋកថាដីកាគន្ថន្តរេសុ អតិវិយ ឆេកោ. វណ្ណពោធនំ នាម លិខននយញ្ច អកាសិ. តស្ស គាមស្ស រាជូហិ ទិន្នវសេន ចេតិយជគ្គនកម្មេ យុត្តកុលត្តា បន រញ្ញោ អាចរិយដ្ឋានេ អដ្ឋបេត្វា អន្តោយុធនាយ កស្សេវ បូជនត្ថាយ និយ្យាទេសិ. តស្សាបិ រញ្ញោ កាលេ សាមណេរេហិ គាមប្បវសនកាលេ បារុបេត្វា បវិសិតព្ពន្តិ ឯកច្ចេ វទិំសុ. ឯកច្ចេ បន ឯកំសំ ឧត្តរាសង្គំ កត្វា បវិសិតព្ពន្តិ វទិំសុ. ឯវំ អញ្ញមញ្ញំ កលហំ អកំសុ.

តត្ថ ឧក្កំសមាលានាមកោ ថេរោ បារុបនគណេ បធានោ ហុត្វា នានាគន្ថេសុ បារុបនវត្តមេវ អាគតន្តិ បកាសិំសុ. ឯកំសិកគណេ បន តិរិយបព្ពតវិហារវាសីមហាថេរា អាចរិយប្បវេណីទស្សនវសេន បារុបនវាទំ បដិក្ខិបិំសុ.

អថ រាជា ច ផលិកខចិតវិហារវាសិត្ថេរំ មេឃុច្ចនវិហារវាសិត្ថេរំ សុហត្ថត្ថេរំ ពុទ្ធង្កុរត្ថេរញ្ចាតិ ឥមេ ចត្តារោ ថេរេ វិនយវិនិច្ឆកដ្ឋានេ ឋបេត្វា ទ្វេ បក្ខា អត្តនោ អត្តនោ វាទំ ទស្សេន្តូតិ អាហ.

តេ ច ចត្តារោ ថេរា បាឡិអដ្ឋកថាដីកាគន្ថន្តរេសុ អកោវិទា. តេសញ្ហិ ឋបេត្វា រាជវល្លភមត្តំ អញ្ញោ កោចិ គុណវិសេសោ នត្ថិ រាជគុរុភាវត្ថាយ, យថា ព្យគ្ឃា រុក្ខគច្ឆលតាទិប្បដិច្ឆន្នេ ទុគ្គដ្ឋានេ និសិន្នេ មិគេ ខុទ្ទកត្តា ទុព្ពលេបិ គណ្ហេតុំ ន សក្កោន្តិ, ឯវមេវ តេ ឯកំសិកត្ថេរេ ¶ រាជានំ និស្សាយ ឋិតេ គន្ថេសុ អនាគតត្តា ទុព្ពលេបិ វាទវសេន អភិភវិតុំ ន សក្ខិំសុ. តេនេវ បរសេនាយ ពលវតំ ជានិត្វា និបច្ចការំ ទស្សេត្វា វេរំ សមេត្វា និសិន្នោ បណ្ឌិតយោធោវិយ វាទំ និដ្ឋំ អប្បាបេត្វាយេវ បារុបនគណា និសីទិំសូតិ.

កលិយុគេ បន បញ្ចនវុតាធិកេ វស្សសហស្សេ សម្បត្តេ តស្ស បុត្តោ មហារាជាធិបតិ នាម រជ្ជំ ការេសិ. បច្ឆា បន កាលេ តេរសាធិកេ សតេ វស្សសហស្សេ ច សម្បត្តេ រាមញ្ញរដ្ឋិនោ រាជា តំ អភិភវិត្វាវ អនីតត្តា បត្តហំសាវតីតិ បាកដំ អហោសិ.

តស្ស រញ្ញោ កាលេ កុខននគរេ ជាលយុត្ត គាមតោ ញាណវរំ នាម ថេរំ អានេត្វា អាចរិយដ្ឋានេ ឋបេសិ. សោ បន ថេរោ បាឡិអដ្ឋកថាដីកាគន្ថន្តរេសុ អតិវិយ ឆេកោ. សុធម្មសភាយំ បរិយត្តិវាចកានំ សោតារានំ អត្ថាយ អភិធម្មត្ថសង្គហប្បករណស្ស គណ្ឋិបទត្ថំ បឋមំ អកាសិ. តតោ បច្ឆា អដ្ឋសាលិនិយំ គណ្ឋិបទត្ថំ សុរាវិនិច្ឆយញ្ច អកាសិ. តតោ បច្ឆា តេន រញ្ញា យាចិតោ អភិធានប្បដីបិកាយ អត្ថំ មរម្មភាសាយ យោជេសិ. រញ្ញោ នាមលញ្ឆំ ឆន្ទោលង្ការសទ្ទនេត្តិវិទគ្គទណ្ឌីព្យញ្ជីននយេហិ អលង្ករិត្វា រាជាធិរាជនាមត្ថប្បកាសិនិំ នាម គន្ថម្បិ អកាសិ.

រាជា ហត្ថិសាលនាមកេ ទេសេ ការាបិតគេហំ ភិន្ទិត្វា សតប្បមាណេ វិហារេ ការាបេត្វា សព្ពេសម្បិ វិហារានំ កិត្តិជេយ្យវាសដ្ឋាបនន្តិ នាមានិ បញ្ញាបេត្វា តស្សេវ ថេរស្ស អទាសិ. វិហារនាមេនេវ ច ថេរស្សាបិ តំសមញ្ញា អហោសិ.

តស្មិញ្ច កាលេ អក្យករញ្ញោ បិតុរញ្ញោ ច កាលេ តេសំ ¶ ទ្វិន្នំ គណានំ វិវាទវសេន អវិប្បកតវចនំ បុន វិវាទស្ស វូបសមនត្ថាយ អត្តនោ អត្តនោ វាទំ កថាបេសិ. បារុបនគណេ សោ ថេរោ បធានោ ហុត្វា ឯកំសិកគណេ បន បាសំសត្ថេរោ បធានោ ហុត្វា យថាយុទ្ធំ អកាសិ. អថ រាជា អតិវិយ រាជវល្លភំ ជេយ្យភូមិសុវណ្ណវិហារវាសិត្ថេរំ តេសំ វាទស្ស វិនិច្ឆិន្ទនត្ថាយ វិនយចរេដ្ឋានេ ឋបេសិ.

កិញ្ចាបិ សោ បន ថេរោ បាឡិអដ្ឋកថាដីកាគន្ថន្តរេសុ ថោកំយេវ ជានកត្តា បរិយត្តិកោវិទេសុ អព្ពោហារិកោយេវ អហោសិ, រាជវល្លភត្តា បន រាជា យថាភូតំ អជានិត្វា វិនយធរដ្ឋានេ ឋបេសិ. យថា បន អយំ បុរត្ថិមទិសា, អយំ បន បច្ឆិមទិសាភិ ឯវមាទិនា ទិសាវវត្ថានមត្តំយេវ កាតុំ សមត្ថំ នង្គលកោដិយា សំវឌ្ឍន្តំ បរិសុំ រាជាគារេ ធម្មវិនិច្ឆកាមបច្ចដ្ឋានេ ឋបេតិ, ឯវមេវ រាជា អយំ ឦទិសោ អយំ ឦទិសោតិ អជានិត្វា វិនយធរដ្ឋានេ ឋបិតត្តា សោ ជេយ្យភូមិសុវណ្ណវិហារវាសិត្ថេរោ តេសំ ទ្វិន្នំ បក្ខានំ ទ្វីសុ វាទេសុ អយំ ភូតោ អយំ អភូតោតិ វត្តុំ ន សក្កា, អទ្វារឃរេ បវិដ្ឋកាលេវិយ តទា អហោសិ. សេយ្យថាបិ នាម មហិសោ អត្តនោ សមីបេ ឋត្វា ទេវគីតំ គាយិត្វា ទេវវីណំ វាទេន្តស្ស ទេវគន្ធព្ពស្ស វេឡុសលាកំ បហរន្តស្ស ច គាមទារកស្ស សទ្ទេសុ កិញ្ចិ វិសេសំ ន ជានាតិ, ឯវមិទំ សម្បទំ ទដ្ឋព្ពំ. អថ រាជា មម វិជិតេ យេយេភិក្ខូ យំយំឥច្ឆន្តិ, តេតេភិក្ខូ តំតំចរិត្វា យថាកម្មំ និសីទន្តូតិ រាជលេខនំ ឋបេសិ. តេសំ វិវាទោ តទា ន វូបសមិ.

អបរភាគេ តេរសាធិកេ សតេ សហស្សេ ច សម្បត្តេ រតនបូរនគរំ វិនស្សិ.

តតោ បច្ឆា ទុតិយេ សំវច្ឆរេ រតនសិខនគរមាបកោ រាជា រាមញ្ញរដ្ឋិន្ទស្ស រញ្ញោ សេនំ យវខេត្តតោ ចាតកសកុណំវិយ ¶ អត្តនោ បុញ្ញនុភាវេន មរម្មរដ្ឋតោ នីហរិត្វា សកលម្បិ រាមញ្ញរដ្ឋំ អត្តនោ ហត្ថគតំ កត្វា រជ្ជំ ការេសិ.

តស្មិញ្ច កាលេ សកលមរម្មរដ្ឋវាសីនំ ចិត្តំ បសាទេសិ, យថា នាម សូរិយាតបេន មិលាយន្តានំ កុមុទានំ អនោតត្តោទកេន សិញ្ចិត្វា ហរិតត្តំ បាបេតិ, ឯវមេវ រាមញ្ញរដ្ឋិន្ទស្ស សេនាពលាតបេហិ ទុក្ខប្បត្តានំ មរម្មរដ្ឋវាសីនំ គហដ្ឋានញ្ចេវ ភិក្ខូនញ្ច អត្តនោ បុញ្ញានោតត្តោទកេន ឆិញ្ចិត្វា កាយិកចេតសិកវសេន ទុវិធម្បិ សុខំ ឧប្បាទេសិ.

សកលមរម្មរដ្ឋវាសិនោ ច អយំ អម្ហាកំ រាជា ពោធិសត្តោតិ វោហារិំសុ. អថ ឯកស្មិំ មាសេ ចតូសុ ឧបោសថទិវសេសុ ភិក្ខុសង្ឃំ និមន្តេត្វា អន្តេបុរេ បវេសេត្វា បិណ្ឌបាតេន ភោជេសិ. រាជោរោធាមច្ចេហិ សទ្ធិំ ឧបោសថំ ឧបវសិ. សព្ពេសម្បិ រាជោរោធាមច្ចានំ គុណត្តយបាឋំ សហ អត្ថយោជនានយេន វាចគ្គតំ ការាបេសិ.

អថ ពេលុវគាមវាសីយសត្ថេរំ អនេត្វា អត្តនោ អាចរិយដ្ឋានេ ឋបេសិ. មហាអតុលយសធម្មរាជគុរូតិ នាមលញ្ឆម្បិ អទាសិ. តតោ បដ្ឋាយ បន អតុលត្ថេរោតិ នាមេន បាកដោ អហោសិ. តស្មិញ្ច កាលេ បារុបនគណបក្ខាបលិណគាមវាសីសុជាតត្ថេរាទយោ សាមណេរានំ គាមប្បវេសនកាលេ ចីវរំ បារុបិត្វា បវិសិតព្ពន្តិ អក្ខរំ លិខិត្វា រញ្ញោ សន្តិកំ សន្ទេសបណ្ណំ បវេសេតិ.

អថ ឯកំសិកគណបក្ខាបិ អតុលត្ថេរាទយោ បុព្ពេសំ រាជូនំ កាលេ អធិករណំ វូបសមិ, ឥទានិ វូបសមិតកម្មំ បុន ន ឧប្បាទេតព្ពន្តិ លេខនំ លិខិត្វា រញ្ញោ សន្តិកំ បេសេសិ.

អថ រាជា ទ្វិន្នំ បក្ខានំ សកសកវាទំ កថេតុកាមោបិ ¶ ឥទានិ រាជប្បដិសំយុត្តំ កម្មំ ពហុ អត្ថិ, តិដ្ឋសុ តាវ សាសនប្បដិសំយុត្តំ កម្មំ, រាជប្បដិសំយុត្តមេវ កម្មំ បឋមំ អារភិស្សាមិ, បច្ឆា សាសនប្បដិសំយុត្តំ កម្មំ ករិស្សាមីតិ រាជលេខនំ ឋបេសិ. អបរភាគេ បន រាជា ឯវំ អាណំ ឋបេសិ,-ឥទានិ មម វិជិតេ សព្ពេបិ ភិក្ខូ មម អាចរិយស្ស មតិំ អនុវត្តិត្វា ចរន្តូតិ.

អថ បារុបនគណភិក្ខូបិ ឯកំសិកគណំ អនុវត្តេសុំ រញ្ញោ អាណាវសេន. សហស្សោរោធគាមេ បន ទ្វេ មហាថេរា អត្តនោ បរិសំ បារុបនវសេនេវ គាមប្បវេសនវត្តំ បរិបូរិតព្ពន្តិ ឱវទិត្វា និសីទិំសុ.

តទា រញ្ញោ អាចរិយោ យសត្ថេរោ តមត្ថំ សុត្វាតេ បក្កោសាបេសិ. តេ ច អាគន្ត្វា នគរំ សម្បត្តកាលេ ឯកោ ឧបាសកោ បសន្នោ ហុត្វា តេសំ ថេរានំ បិណ្ឌបាតេន ឧបដ្ឋហិ. អថ អតុលត្ថេរោ តេ មហាថេរេ ទូរដ្ឋានតោ វាលុកំ អានេត្វា តស្ស ឧបាសកស្ស គេហសមីបេ ឱកិរាបេសិ. ឥទំ វិនយធម្មស្ស អននុលោមវសេន ចរន្តានំ ទណ្ឌកម្មន្តិ កោលាហលម្បិ ឧប្បាទេសិ. អថ តេសំ វាលុកំ អាហរន្តានំយេវ អញ្ញមញ្ញំ សល្លបេសុំ,-ឥទានិ ភន្តេ វិនយធម្មានុលោមវសេន អាចរន្តានំ អម្ហាកំ ឦទិសំ កម្មំ អសារុប្បំ, អហោ អច្ឆរិយធម្មោ លោកោតិ ឯកោ ថេរោ អាហ. អថ បន ឯកោ ថេរោ ឯវមាហ,-ឥទានិ អាវុសោ លោកបាលា ទេវា ឦទិសំ អធម្មកម្មំ ទិស្វាយេវ អជ្ឈុបេក្ខិត្វា អប្បោស្សុកា និសីទិតុំ ន សក្កា, ឥទានិ លោកបាលា ទេវា បមជ្ជិត្វា និសីទន្តិ មញ្ញេតិ.

តស្មិំយេវ ខណេ វេគេន មេឃោ ឧដ្ឋហិត្វា អតុលត្ថេរស្ស វិហារេ រាជគេហេ ច ឯកក្ខណេ អសនិយោ និបតិំសុ. ឯវំ សមានោបិ សោ ថេរោ អតិមានថទ្ធតាយ សតិំ ន លភិ.

បុន ¶ រាជា ឥទានិ មម វិជិតេ សព្ពេបិ ភិក្ខូ មម អាចរិយស្ស មតិំ អនុវត្តន្តិ វា មា វាតិ អមច្ចេ បុច្ឆិ. អមច្ចាបិ ឯវំ រញ្ញោ អារោចេសុំ,-ឥទានិ មហារាជ កុខននគរេ នីបគាមេ និសិន្នោ ឯកោ មហាថេរោ មុនិន្ទឃោសោ នាម អត្ថិ, សោ បារុបនវសេន អត្តនោ បរិសំ ឱវាទេត្វា ពហុគុណំ ឧប្បាទេត្វា និសីទតីតិ.

អថ រាជា ឯវមាហ,-តំ បក្កោសេត្វា សុធម្មសសាយំ មហាថេរេ សន្និបាភាបេត្វា តស្ស ថេរស្ស វិនយ បណ្ណត្តិំ យថាភូតំ អជានន្តស្ស យថាភូតំ សភាវំ ទស្សេត្វា ឱវាទេន្តូតិ.

អថ អមច្ចា តថា អកំសុ. មហាថេរា ច សុធម្មសស្សយំ សន្និបតិត្វា តំ បក្កោសេត្វា ឱវទិំសុ. តេសុ បន មហាថេរេសុ ឯកោ ថេរោ ភូបាលស្ស សង្ឃរញ្ញោ ច មុខំ ឱលោកេត្វា ភគវតោ បន សម្មាសម្ពុទ្ធស្ស មុខំ អនោលោកេត្វា មុនិន្ទឃោសត្ថេរំ ឯវមាហ,- ឥទានិ អាវុសោ ឥមស្មិំ មរម្មរដ្ឋេ សព្ពេបិ ភិក្ខូ ភូបាលស្ស សង្ឃស្ស រញ្ញោ ច អាណំ អនុវត្តិត្វា ឯកំសិកាយេវ អហេសុំ, ត្វំយេវ ឯកោ សទ្ធិំ បរិសាយ បារុបនវត្ថំ ចរិត្វា និសីទសិ, កស្មា បន ត្វំ មានថទ្ធោ ហុត្វា ឦទិសំ អនាចារំ អវិជហិត្វា តិដ្ឋសីតិ.

អថ មុនិន្ទឃោសត្ថេរោ តស្ស ថេរស្ស មុខំ ឧជុកំ ឱលោកេត្វា ឯវមាហ,- ត្វំ លជ្ជីបេសលោ សិក្ខាកាមោតិ បុព្ពេ មយា សុតបុព្ពោ, ឦទិសោ បន បុគ្គលោ ឦទិសំ វចនំ វត្តុនំ យុត្តោ,ឦទិសស្ស ហិ បុគ្គលស្ស ឦទិសំ វចនំ អស្សារុប្បំ, សចេ ត្វំ អយំ អប្បបុញ្ញោ និត្តេជោ អនាថោតិ មំ មញ្ញិត្វា អគារវវសេន វត្តុំ ឥច្ឆេយ្យាសិ, ឯវំ សន្តេបិ មមាចរិយស្ស មុខំ ឱលោកេត្វា មមាចរិយស្ស គុណំ ជានិត្វា តស្ស សិស្សោយន្តិ អនុស្សរិត្វា ឦទិសំ វចនំ អធម្មិកំ វត្តុំ ន សក្កាតិ.

អថ ¶ សោ ថេរោ តំ បុច្ឆិ,-កោ បន តវាចរិយោតិ. អថ សុខម្មសភាយំ ឋបិតំ ពុទ្ធរូបំ វទ្ទិត្វា អយំ មមាចរិយោតិ អាហ. មមាសរិយោតិ វត្វា បន ភិក្ខុសង្ឃមជ្ឈេ ឧដ្ឋហិត្វា ឯកំសំ ឧត្តរាសង្គំ កត្វា ឧក្កុដិកំ និសីទិត្វា អញ្ជលិំ បគ្គហេត្វា អហំ ភន្តេ យាវ ជីវិតបរិយោសានា មម ជីវិតំយេវ បរិច្ចជិស្សាមិ, ភគវតោ បនតិ លោកគ្គស្ស សិក្ខាបទំ ន វិជហិស្សាមីតិ អារោចេសិ.

អថ រាជា តមត្ថំ សុត្វា មានថទ្ធោ ឯសោ មម វិជិតេ និសីទាបេតុំ វដ្ដតិ, រដ្ឋន្តរំ បព្ពាជេតព្ពោតិ រាជាណាយ រដ្ឋន្តរំ បេសេសិ.

រាជបុរិសា ច តំ បក្កោសេត្វា រដ្ឋន្តរំ អានេសិ. ពហង្គំ នាម ទេសំ បត្វា ពហង្គនាយកោ បុរិសោ រាជបុរិសានំ លញ្ជំ ទត្វា ឯវមាហ,- អយំ បន ភោន្តោ មរម្មរដ្ឋស្ស បរិយន្តប្បទេសោ, ឥធេវ ឋបេត្វា តុម្ហេ និវត្តថាតិ.

រាជ បុរិសាបិ លញ្ជំ គហេត្វា តត្ថេវ ឋបេត្វា និវត្តិំសុ. ថេរោបិ ចតូហិ ទិសាហិ អាគតានំ ភិក្ខុសាមណេរានំ បារុបនវសេន ឱវាទំ ទត្វា បរិយត្តិំ វាចេត្វា តត្ថ និសីទិ. អភិធម្មត្ថសង្គហគន្ថស្ស អត្ថយោជនម្បិ មរម្មភាសាយ អកាសិ.

អបរភាគេ រាជា តមត្ថំ សុត្វា ឥទានិ សោ ថេរោ មម វិជិតបរិយន្តេយេវ និសីទិត្វា អម្ហេហិ អនិច្ឆិតំ និវារិតំ កម្មំ កត្វា និសីទិ, តំ បក្កោសថាតិ អាហ.

រាជទូតា ច តត្ថ គន្ត្វា បក្កោសិំសុ. ថេរោ ច ឥទានិ មំ រាជា មារេតុកាមោតិ មញ្ញិត្វា សិក្ខំ បច្ចក្ខិត្វា គិហិវត្ថំ និវាសេត្វា តេហិ សទ្ធិំ អាគច្ឆិ. នគរំ បន អាគន្ត្វា បត្តកាលេ រញ្ញោ សន្តិកំ អានេសិ.

អថ រាជា ឯវមាហ,-ត្វំ ភិក្ខុ ហុត្វា គណំ វឌ្ឍាបេត្វា និសីទសីតិ មយា សុតំ, កស្មា បនិទានិ គិហិ ភវសីតិ. សចេ ¶ ត្វំ មហារាជ មំ មារេតុកាមោ បក្កោសេយ្យាសិ, ឯវំ សតិ យទិ សិក្ខំ អប្បច្ចក្ខាយ ឋិតំ មំ មារេយ្យាសិ, តវ ភារិយំ កម្មំ ភវិស្សតីតិ មនសិករិត្វា តវ កម្មស្ស អភារិយត្ថាយ សិក្ខំ បច្ចក្ខិត្វា អាគតោម្ហិ, សចេ មំ មារេតុកាមោសិ, មារេហីហិ. រាជា ច តំ ពន្ធនាគារេ ឋបេត្វា ស្យាមរដ្ឋំ យុជ្ឈនត្ថាយគច្ឆិ. យជ្ឈនត្ថាយ បន គន្ត្វា បច្ចាគតកាលេ អន្តរាមគ្គេវ ទិវង្គតោ អហោសីតិ.

កលិយុគេ បន ទ្វាវីសាធិកេ វស្សសតេ សហស្សេ ច សម្បត្តេ តស្ស ជេដ្ឋបុត្តោ សិរិបវរមហាធម្មរាជា នាម រជ្ជំ ការេសិ. រតនសិខនគរតោ សង្កមេត្វា ជេយ្យបុរំ ទុតិយំ មាបិតត្តា ជេយ្យបុរមាបេកោ រាជាតិបិ តស្ស សមញ្ញា អហោសិ. តស្មិញ្ច កាលេ មហាបព្ពតព្ភន្តរនគរវាសិំ ញាណត្ថេរំ អានេត្វា អាចរិយដ្ឋានេ ឋបេសិ. សោកិរ ថេរោ គម្ភីរបញ្ញោ ឯកស្មិំ ទិវសេ នវ វា ទស វា ភាណវារេ វាចុគ្គតំ កាតុំ សមត្ថោ អហោសិ. អភិនវោបសម្បន្នកាលេយេវ បទវិភាគគន្ថំ ន្យាសសំ វណ្ណនំ យមកសំវណ្ណនំ មហាបដ្ឋានសំវណ្ណនញ្ច មរម្មភាសាយ អកាសិ. រាជា មហាភូមិរម្មណិយវិហារំ នាម ការាបេត្វា តស្សេវ អទាសិ. ញាណាលង្ការមហាធម្មរាជគុរូ តិបិ នាមលញ្ឆំ អទាសិ.

តស្មិញ្ច កាលេ បារុបនគណេ ថេរា ឯវំ ចិន្តេសុំ,- ឥទានិ បន អម្ហាកំ បក្ខិកោ ថេរោ រញ្ញោ អាចរិយោ អហោសិ, ឥទានិ មយំ បតិដ្ឋានំ លភាមាតិ. ឯវំ បន ចិន្តេត្វា សាមណេរានំ គាមប្បវេសនកាលេ ចីវរំ បារុបេត្វា បវិសិតព្ពន្តិ សន្ទេសបណ្ណំ រញ្ញោ សន្តិកំ បវេសេសិ. អថ អតុលត្ថេរោ បុព្ពេ វុត្តនយេន វូបសមិតំ កម្មមិទន្តិ សន្ទេសបណ្ណំ រញ្ញោ សន្តិកំ បវេសេសិ. តេនេវ អញ្ញមញ្ញំ បដិវចនវសេន ទស្សេតុំ ឱកាសំ ន លភិំសូតិ.

តតោ បច្ឆា កលិយុគេ បញ្ចវីសវស្សាធិកេ សតេ សហស្សេ ¶ ច សម្បត្តេ តស្ស រញ្ញោ សិរិបវរសុធម្មមហារាជិន្ទាធិបតិ នាម រជ្ជំ ការេសិ. រតនបូរំ បន តតិយំ មាបកត្តា រតនបូរមាបកោតិ ឯកស្ស បន ឆទ្ទន្តនាគរាជស្ស សាមិភូតត្តា សេតិភិន្ទោតិ ច សមញ្ញា អហោសិ. ចរច្ច គាមវាសីចន្ទាវរំ នាម ថេរំ អានេត្វា អត្តនោ អាចរិយដ្ឋានេ ឋបេសិ. សូមិកិត្តិអតុលំ នាម វិហារំ ការាបេត្វា តស្ស អទាសិ. ជម្ពុទីបអនន្តធជមហាធម្មរាជគុរូតិបិ នាមលញ្ឆំ អទាសិ. តស្ស រញ្ញោ កាលេ ឯកច្ចេ មនុស្សា ទិដ្ឋិវិបល្លាសា អហេសុំ, តេបិ បក្កោសាបេត្វា សម្មាទិដ្ឋិំ គណ្ហាបេសិ. តស្ស បន រញ្ញោ កាលេ ឯកំសិកគណំ អភិភវិតុំ ឱកាសំ ន លភិំសូតិ.

តតោ បច្ឆា កលិយុគេ អដ្ឋតិំសាធិកេ វស្សសតេ សហស្សេ ច សម្បត្តេ តស្ស រញ្ញោ បុត្តោ មហាធម្មេ រាជាធិរាជា នាម រជ្ជំ ការេសិ. នគរស្ស ទក្ខិណទិសាភាគេ បញ្ចភូមិកវិហារំ ការាបេត្វា ជេយ្យភូមិវាសាតុលនាមេន បញ្ញាបេត្វា មារាវដ្ដនស្ស នាម ថេរស្ស អទាសិ. គុណមុនិន្ទាភិសាសនធជមហាធម្មរាជាធិរាជគុរូតិបិ នាមលញ្ឆំ អទាសិ.

តស្មិញ្ច កាលេ នន្ទមាលោ នាម ថេរោ ចលង្គនគរស្ស បុរត្ថិមទិសាភាគេ វិហារេ និសីទិត្វា ពហូនំ ភិក្ខុសាមណេរានំ គន្ថំ វាចេសិ. សាមណេរានំ គាមប្បវេសនកាលេ បារុបនវត្តមេវ បរិបូរេត្វា បវិសិតព្ពំ, ឯកំសិកវត្តំ បន នេវ បាឡិយំ ន អដ្ឋកថាយំ ន ច ដីកាសុ នាបិ គន្ថន្តរេសុ ទិស្សតិ, ន ធម្មានុលោមន្តិ ឱវាទំ អភិណ្ហំ អទាសិ. បាឡិអដ្ឋកថាទីសុ អាគតវិនិច្ឆយំ ទស្សេត្វា ឯកម្បិគន្ថំ អកាសិ.

អថ ឯកំសិកគណិកា ភិក្ខូ តំ គន្ថំ រញ្ញោ សន្តិកំ បវេសិំសុ ទោសាវិករណត្ថាយ. តស្មិញ្ច កាលេ រាជា ឯវរូបំ សុបិនំ បស្សិ, -សក្កោ ហិ ទេវរាជា សេតវត្ថំ និវាសេត្វា ¶ សេតាលង្ការេហិ អលង្ករិត្វា សេតកុសុមានិ បិលន្ទិត្វា រញ្ញោ សន្តិកំ អាគន្ត្វា ឯវមាហ,- អបរន្តរដ្ឋេហិ មហារាជ នម្បទានទីតីរេ បាទចេតិយេ ពហូនិ តិណានិ ឧដ្ឋហិត្វា អញ្ញមញ្ញំ មូលេន មូលំ ខន្ធេន ខន្ធំ បត្តេន បត្តំ សម្បន្ធិត្វា បដិច្ឆាទេត្វា ឋិតានិ, តានិ បន បុព្ពរាជូហិ យថាភូតំ អជានន្តេហិ អវិសោធិតានិ, ឥទានិ បន តយា យថាភូតំ ជានន្តេន បរិសុទ្ធំ កត្តុកាមេន វិសោធិតព្ពានិ, តត្ថច ឯកោ ភិក្ខុ អាគន្ត្វា ឧបទេសនយំ ទស្សតីតិ.

ឯវំ បន សុបិនំ បស្សិត្វា នន្ទមាលំ នាម ថេរំ បក្កោសាបេត្វា រតនបូរនគរស្ស ឯសន្នដ្ឋានេ ឧទកកីឡនត្ថាយ ការាបិតេ រាជគេហេ វសាបេសិ.

អថ ថេរោ សាមណេរានំ គាមប្បវេសនកាលេ បារុបនវសេន បវិសិតព្ពន្តិ បាឡិអដ្ឋកថាដីកាគន្ថន្តរេហិ រាជានំ ជានាបេសិ, យថា មហាមោគ្គលិបុត្តតិស្សត្ថេរោ សិរិធម្មាសោករាជានំ សម្មាវាទន្តិ. អថ រាជា បរិចិត បារមីបុញ្ញសម្ភារោ មហាញាណោ ជានាសិ,-បារុបនវាទោយេវ បាឡិអដ្ឋកថាដីកាគន្ថន្តរេសុ អាគតោ, ឯកំសិកវាទោ បន តេសុ កត្ថចិបិ ន អាគតោតិ. ឯវំ បន ជានិត្វា រញ្ញោ គេហេ ទ្វេ បក្ខេ ថេរេ សន្និបាតាបេត្វា អត្តនោ អត្តនោ វាទំ កថាបេសិ.

អថ ឯកំសិកត្ថេរោ ឯវមាហំសុ,-តុម្ហាកំ បារុបនវាទោ កត្ថ អាគតោតិ. តទា បារុបនត្ថេរា បរិមណ្ឌលំ បារុបិស្សាមីតិអាទិនា នយេន បាឡិអដ្ឋកថាដីកាគន្ថន្តរេសុ បារុបនវាទោ អាគតោតិ អាហំសុ. តតោ បច្ឆា បារុបនត្ថេរា ឯវមាហំសុ,-តុម្ហាកំ បន ឯកំសិកវាទោ កត្ថ អាគតោតិ. តទា តេ ឯកំសិកត្ថេរា អទ្វារឃរំ បវិដ្ឋកាលោវិយ រត្តិភាគេ មហាវនមគ្គេ គមនកាលោវិយ ច ហុត្វា កិញ្ចិ វត្តុំ ន សក្កា. មុខំ នាម កថនត្ថាយ ភុញ្ជនត្ថាយ ហោតីតិ ¶ វុត្តត្តា យំ វា តំ វា វទន្តាបិ រាជានំ អារាធេតុំ ន សក្ខិំសុ.

រាជា ច ថេរំ និស្សាយ វិនយេ កោសល្លតាយ បាឡិយំ ឦទិសោយេវ អាគតោ, អដ្ឋកថាទីសុ ឦទិសោយេវាតិ វត្វា តុម្ហាកំ ឯកំសិកវាទោ បាឡិអដ្ឋកថាដីកាគន្ថន្តរេសុ ន ទិស្សតិ, ឯវម្បិ សមានា កស្មា ឦទិសំ វត្តំ អកំសូតិ បុច្ឆិ. អថ តេ ឯកំសិកត្ថេរា ចតុហត្ថគព្ភេ សហោឌ្ឌេន គហិតចោរាវិយ មនុស្សេហិ គតិតកាកាវិយ ច កិញ្ចិ វត្តុំ អសក្កុណេយ្យតាយ សព្ពទិសាសុ ឱលោកេត្វាយេវ អម្ហាកំ ចារិត្តំ បាឡិអាទីសុ ន ទិដ្ឋបុព្ពំ, អថ ខោ បន អាចរិយប្បវេណីវសេនេវ ចរិម្ហាតិ វត្វា បរាជយំ បត្វា បារុបនបក្ខេយេវ បវិសិំសូតិ. រាជា ច ឥតោ បដ្ឋាយ ភិក្ខូ បារុបនវត្តមេវ ការាបេតុំ សាមណេរានំ ឱវទន្តូតិ រាជាណំ ឋបេសិ. តតោ បដ្ឋាយ ឯកំសិកបក្ខាថេរា អរុណុគ្គមនកាលេ កោសិយាវិយ សីសំ ឧដ្ឋហិតុម្បិ ន សក្កាតិ.

សោកសរភូមហាចេតិយស្ស បុរត្ថិមទិសាភាគេ ទ្វីហិ បាសាទេហិ អលង្កតំ ចតុភូមិកំ ភូមិកិត្តិវិរាមំ នាម វិហារំ ការាបេត្វា នន្ទមាលត្ថេរស្ស អទាសិ, នរិន្ទាភិធជមហាធម្មរាជាធិរាជគុរូតិ នាមលញ្ឆម្បិ អទាសិ. សោ បន ថេរោ ឆប្បទវំសិកោតិ ទដ្ឋព្ពោ. អភិនវោបសម្បន្នកាលេយេវ វិនយវិនិច្ឆយស្ស សុត្តសង្គហស្ស មហាវគ្គដ្ឋកថាយ ច អត្ថយោជនំ មរម្មភាសាយ អកាសិ, សាសនសុទ្ធិទីបិកំ នាម គន្ថម្បិ អកាសីតិ.

តតោ បច្ឆា កលិយុគេ តេចត្តាលីសាធិកេ វស្សសតេ សហស្សេ ច សម្បត្តេ ផគ្គុនមាសស្ស កាឡបក្ខបន្ន រសមិយំ រតនសិខមាបកស្ស រញ្ញោ មជ្ឈិមបុត្តោ រជ្ជំ ការេសិ ¶ .

តទា រាជា ឯវំ ចិន្តេសិ,-ឯកំសិកបារុបនវសេន ឧប្បន្នោ វិវាទោ បុព្ពេសំ រាជូនំ កាលេ វូបសមិតុំ ន សក្កា, សិរិបវរសុធម្មមហារាជិន្ទាធិបតិនោ កាលេបិ រាជគេហេ សន្និបាតាបេត្វា រញ្ញោ សម្មុខេ កថាបិតត្តា វិស្សដ្ឋេន កថេតុំ ឱកាសស្ស អលទ្ធត្តា យថាកាមំ វត្តុំ អវិសហត្តា បរាជយោ អហោសីតិ លេសំ ឱឌ្ឌតុំ ឱកាសោ ភវេយ្យមយ្ហំ បន កាលេ ឦទិសំ អកត្វា តេសំ តេសំ ថេរានំ វិហារេ ទូតំ បេសេត្វា សកសកវាទំ កថា បេស្សាមិ, ឯវញ្ហិ សតិ តេតេថេរា វិស្សដ្ឋា ហុត្វា កថេស្សន្តីតិ.

ឯវំ បន ចិន្តេត្វា អន្តោយុធនាយកំ អមច្ចំ បធានំ កត្វា តេសំ តេសំ ថេរានំ សន្តិកំ គន្ត្វា អារោចាបេសិ,-សកសកវាទំ វិស្សដ្ឋា ហុត្វា វទថាតិ. អថ ឯកំសិកគណិកា ថេរា អម្ហេហិ វុត្តវចនំ បាឡិអាទីសុ ន ទិស្សតិ, អថ ខោ បន អាចរិយប្បវេណីវសេនេវ មយំ ចរិម្ហាតិ អនុជានិំសុ.

មហារាជា ច ឯវំ ថេរានំ អនុជាននេ សតិ កិញ្ចិ កត្តព្ពំ នត្ថិ, ឥទានិ បរិមណ្ឌលសុប្បដិច្ឆន្នសិក្ខាបទានិ អវិកោបេត្វា សាមណេរា គាមំ បវិសន្តូតិ រាជលេខនំ តត្ថ តត្ថ បេសេសិ.

អបរភាគេ បន សហស្សោរោធគាមតោ ឧបសម្បទា វស្សេន សត្តវស្សិកំ ញាណំ នាម ភិក្ខុំ អានេត្វា អន្តោយុធវិហារំ នាម ការាបេត្វា តស្ស អទាសិ, ញាណាភិសាសនធជមហាធម្មរាជគុរូតិ នាមលញ្ឆម្បិ អទាសិ. អថ រញ្ញា យាចិតោ រាជាភិសេកគន្ថំ បរិសោធេត្វា មរម្មភាសាយ អត្ថំ យោជេសិ.

អបរភាគេ ភគវា ធរមានោយេវ អាគន្ត្វា ចតុន្នំ យក្ខានំ ទមេត្វា តេហិ ទិន្នំ មំសោទនំ បដិគ្គហេត្វា បព្ពតសាមន្តទេសំ ¶ គន្ត្វា បរិភុញ្ជិត្វា តំ ឋានំ ឱលោកេត្វា សិតំ បាត្វាកាសិ. អថ អានន្ទត្ថេរោ ការណំ បុច្ឆិ. អនាគតេ ខោ អានន្ទ ឥមស្មិំ ទេសេ មហានគរំ ភវិស្សតិ, ចត្តារោ ច ឥមេ យក្ខា តស្មិំ នគរេ រាជានោ ភវិស្សន្តីតិ ព្យាកាសិ.

យថាព្យាកតនិយាមេនេវ កលិយុគេ ចតុចត្តាលីសាធិកេ វស្សសតេ សហស្សេ ច សម្បត្តេ មាឃមាសស្ស កាឡបក្ខទ្វាទសមិយំ អង្គារវារេ ឧត្តរផគ្គុនីនក្ខត្តេន យោគេ អមរបុរំ នាម មហារាជដ្ឋានីនគរំ មាបេសិ.

សិរិបរវិជយានន្តយសត្រិភវនាទិត្យាធិបតិបណ្ឌិតមហាធម្មរាជាធិរាជាតិ នាមលញ្ឆម្បិ បដិគ្គណ្ហិ.

អគ្គមហេសិយា ការាបិតំ ជេយ្យភូមិវិហារកិត្តិនាមកំ វិហារំ គុណាភិលង្ការសទ្ធម្មមហាធម្មរាជាធិរាជគុរុត្ថេរស្ស អទាសិ, យោ ‘មេ ឱ សយាឌោ’ ឥតិ វុច្ចតិ.

កន្នីនគរភោជកាយ រាជកញ្ញាយ ការាបិតំ វិហាររមណីយវិរាមំ នាម វិហារំ គុណមុនិន្ទាធិបតិ មហាធម្មរាជាធិរាជគុរុត្ថេរស្ស អទាសិ, យោ ‘មាំ លេ សយាឌោ’ ឥតិ វុច្ចតិ.

ឧបរញ្ញោ ទេវិយា ការាបិតំ មង្គលាវិរាមំ នាម វិហារំ តិបិដកសទ្ធម្មសាមិមហាធម្មរាជាធិរាជគុរុត្ថេរស្ស អទាសិ, យោ ‘សោំ ឋា សយាឌោ’ ឥតិ វុច្ចតិ.

មជ្ឈិមគេហវាសិទេវិយា ការាបិតំ មង្គលាវាសាតុលំ នាម វិហារំ ញាណជម្ពុទីបអនន្តធជមហាធម្មរាជាធិរាជគុរុត្ថេរស្ស អទាសិ, យោ ‘មេំ ជ្វា សយាឌោ’ ឥតិ វុច្ចតិ.

ឥមេ ប្បន ចត្តារោ មហាថេរេ សង្ឃរាជដ្ឋានេ ឋបេសិ.

ឧត្តរគេហវាសិទេវិយា ការាបិតំ មង្គលភូមិកិត្តិំ នាម ¶ វិហារំ កវិន្ទាភិសទ្ធម្មធរធជមហាធម្មរាជគុរុត្ថេរស្ស អទាសិ, យោ ‘ញ្យោំ កាំ សយាឌោ’ ឥតិ វុច្ចតិ.

សិរិខេត្តនគរភោជកេន រាជកុមារេន ការាបិតំ អតុលភូមិវាសំ នាម វិហារំ កវិន្ទាភិសទ្ធម្មបវរមហាធម្ម រាជគុរុត្ថេរស្ស អទាសិ, យោ ‘ស្វេ ដោំ សយាឌោ’ ឥតិ វុច្ចតិ.

អន្តោអមច្ចេន ឯកេន ការាបិតំ វិហារំ ញាណាលង្ការសទ្ធម្មធជមហាធម្មរាជគុរុត្ថេរស្ស អទាសិ, យោ ‘សេំ ដេ សយាឌោ’ ឥតិ វុច្ចតិ.

វាមពលនាយកេនាមច្ចេន ការាបិតំ វិហារំ បរមសិរិវំសធជមហាធម្មរាជគុរុត្ថេរស្ស អទាសិ, យោ ‘មេ ឋី សយាឌោ’ ឥតិ វុច្ចតិ.

ធម្មវិនិច្ឆកេន ឯកេនាមច្ចេន ការាបិតំ វិហារំ កវិន្ទ សារធជមហាធម្មរាជាធិរាជគុរុត្ថេរស្ស អទាសិ, យោ ‘លោកា ម្ហាំ កេំ សយាឌោ’ ឥតិ វុច្ចតិ.

ឥច្ចេវំ បរិយត្តិកោវិទានំ អនេកានំ មហាថេរានំ សទ្ធិំ នាមលញ្ឆេន វិហារំ ទត្វា អនុគ្គហំ អកាសិ. យស្មា បន សព្ពេសំ ថេរានំ នាមំ ឧទ្ធរិត្វា វិសុំ វិសុំ កថិតេ អយំ សាសនវំសប្បទីបិកកថា អតិប្បបញ្ចា ភវិស្សតិ, តស្មា ឥធ អជ្ឈុបេក្ខិត្វា វត្តព្ពមេវ វក្ខាមាតិ.

បច្ឆាភាគេ ចត្តារោ មហាថេរា រាជាទុព្ពលតាយ យថាកាមំ សាសនំ វិសោធេតុំ សក្ខិស្សន្តីតិ មញ្ញិត្វា បុន អដ្ឋ ថេរេ ឯតេហិ ចតូហិ មហាថេរេហិ សទ្ធិំ សាសនំ វិសោធាបេតុំ សង្ឃនាយកដ្ឋានេ ឋបេសិ. សេយ្យថិទំ, កវិន្ទាភិសទ្ធម្មបវរមហាធម្មរាជគុរុត្ថេរោ, តិបិដកាលង្ការធជមហាធម្មរាជគុរុត្ថេរោ, ចក្កិន្ទាភិធជមហាធម្មរាជគុរុត្ថេរា, បរមសិរិវំសធជមហាធម្មរាជគុរុត្ថេរោ, ជនិន្ទាភិបវរមហាធម្មរាជគុរុត្ថេរោ, មហាញាណាភិធជមហាធម្មរាជគុរុត្ថេរោ ¶ , ញាណាលង្ការសទ្ធម្មធជមហាធម្មរាជគុរុថេរោ, ញាណាភិសាសនធជមហាធម្មរាជគុរុត្ថេរោតិ.

អថ អរហាបិ សមានោ និស្សយមុច្ចកង្គវិកលោ វិនានិស្សយាចរិយេន វសិតុំ ន វដ្ដតីតិ ជានិត្វា និស្សយា ចរិយប្បហោនកានំ ថេរានំ និស្សយង្គានិ និស្សយមុច្ចការហានំ និស្សយមុច្ចកង្គានិ បរិបូរាបេត្វា និស្សិតកានំ និស្សយំ គណ្ហិត្វាវ និសីទាបេសិ.

តតោ បច្ឆា កលិយុគេ បញ្ញាសាធិកេ វស្សសតេ សហស្សេវ សម្បត្តេ ញាណាភិសាសនធជមហាធម្មរាជគុរុត្ថេរំយេវ ឯកំ សង្ឃរាជដ្ឋានេ ឋបេសិ. តតោ បដ្ឋាយ សោយេវ ឯកោ សង្ឃនាយកោ ហុត្វា សាសនំ វិសោធយិ.

តតោ បច្ឆា ឯកបណ្ណាសាធិកេ វស្សសតេ សហស្សេ ច សម្បត្តេ ផគ្គុនមាសេ មហាមុនិចេតិយស្ស ទក្ខិណទិសាភាគេ ទ្វីហិ ឥដ្ឋកមយេហិ បាការេហិ បរិក្ខិត្តំ បញ្ចភូមិកំ អសោការាមេ រតនភូមិកិត្តិំ នាម វិហារំ អតិមហន្តំ ការាបេត្វា ញាណាភិសាសនធជមហាធម្មរាជគុរុត្ថេរស្ស អទាសិ. ញាណាភិវំសធម្មសេនាបតិមហាធម្មរាជាធិរាជគុរូតិ នាមលញ្ឆម្បិ បុន អទាសិ. តតោ អញ្ញានិ ជេយ្យភូមិវិហារកិត្តិមង្គលវិរាមាទយោ អនេកេបិ វិហារេ តស្សេវ អទាសិ.

សោ បន តេសុ វិហារេសុ វារេន និសីទិត្វា បរិយត្តិំ វាចេសិ. ឧភតោវិភង្គានិបិ វាចុគ្គតំ អកាសិ. និច្ចំយេវ ឯកាសនិកធុជង្គំ សមាទិយិ.

សោ បន ថេរោ ឧបសម្បទាវស្សេន បញ្ចវស្សិកោ ហុត្វា បុព្ពេវ សង្ឃរាជភាវតោ បេដកាលង្ការ នាម នេត្តិសំវណ្ណនំ អភិនវដីកំ អកាសិ. អដ្ឋវស្សិឥកកាលេ សង្ឃរាជា អហោសិ. សង្ឃរាជា ហុត្វា សាធុជ្ជនវិលាសិនិំ នាម ¶ ទីឃនិកាយដីកំ អកាសិ. អរិយវំសាលង្ការំ នាម គន្ថញ្ច អកាសិ. មហាធម្មរញ្ញា យាចិតោ ជាតកដ្ឋកថាយ អត្ថយោជនំ ចតុសាមណេរវត្ថុំ រាជោវាទវត្ថុំ តិគុម្ភថោមនំ ឆទ្ទន្តនាគរាជុប្បត្តិកថំ រាជាធិរាជ វិលាសិនិំ នាម គន្ថញ្ចាតិ ឯវមាទយោបិ អកាសិ.

កលិយុគេ បន ទ្វាសដ្ឋាធិកេ វស្សសតេ សហស្សេ ច សម្បត្តេ សីហឡទីបតោ អម្បគហបតិស្សោ, មហាទម្បោ, កោច្ឆ គោធោ, ព្រាហ្មណវត្តោ, ភោគហវត្តោ, វាតុរគម្មោតិ ឥមេ ឆ សាមណេរា ទស ធាតុយោ ធម្មបណ្ណា ការត្ថាយ អានេត្វា អមរបុរំ នាម មហារាជដ្ឋានីនគរំ អាគតា សទ្ធិំ ឯកេន ឧបាសកេន.

អថ ញាណាភិវំសធម្មសេនាបតិមហាធម្មរាជាធិរាជគុរុនា សង្ឃរញ្ញា ឧបជ្ឈាយេន កវិន្ទាភិសទ្ធម្មធរធជមហាធម្មរាជគុរុត្ថេរេន ជនិន្ទាភិធជមហាធម្មរាជគុរុត្ថេរេន មុនិន្ទឃោសមហាធម្មរាជគុរុត្ថេរេនាតិ ឯវមាទីហិ រាជគុរុត្ថេ រេហិ កម្មវាចរិយេហិ ហត្ថិរជ្ជុសុវណ្ណគុហសីមាយំ ឧបសម្បទកម្មំ ការាបេសិ, ឧបាសកញ្ច សាមណេរភូមិយំ បតិដ្ឋាបេសិ, តតោ បច្ឆា ច អនេកវារំ អាគតានំ ភិក្ខូនំ បុន សិក្ខំ គណ្ហាបេសិ, សាមណេរានញ្ច ឧបសម្បទកម្មំ ការាបេសិ, ឧបាសកានញ្ច បព្ពជ្ជកម្មន្តិ.

អបរភាគេ បន កលិយុគេ ឆចត្តាលីសាធិកេ វស្សសតេ សហស្សេ ច សម្បត្តេ បិតុរញ្ញោ អាចរិយបុព្ពោ អតុលោ នាម ថេរោ ចីវរបដលំ ឧបរិសង្ឃាដិំ កត្វា ឧរពន្ធនវត្ថំ ពន្ធិតព្ពន្តិ ចូឡគណ្ឋិបទេ វុត្តត្តា សាមណេរានំ គាមប្បវសេនកាលេ ឯកំសំ ឧត្តរាសង្គំ កត្វា ឧរពន្ធនវត្ថំ ពន្ធិត្វាយេវ បវិសិតព្ពន្តិ ទឡំ កត្វា រញ្ញោ សន្តិកំ លេខនំ បវេសេសិ.

អថ រាជា តំ សុត្វា មហាថេរេ សុធម្មសភាយំ សន្និបាតាបេត្វា ¶ អតុលត្ថេរេន សទ្ធិំ សាកច្ឆំ ការាបេសិ. អថ អតុលត្ថេរោ ចីវរបដលំ ឧបរិសង្ឃាដិំ កត្វា ឧរពន្ធនវត្ថំ ពន្ធិតព្ពន្តិ ចូឡគណ្ឋិបទេ អាគតបាឋំ ទស្សេត្វា សាមណេរានំ គាមប្បវេសនកាលេ ឯកំសំ ឧត្តរាសង្គំ កត្វា ឧរពន្ធនវត្ថំ ពន្ធិត្វា បវិសិតព្ពន្តិ អាហ.

អថ មហាថេរា តំ បុច្ឆិំសុ,-ឦទិសោ អធិប្បាយោ អញ្ញត្ថ ទិស្សតិ វា មា វាតិ. អថ អតុលត្ថេរោ ឯវមាហ,-អញ្ញត្ថ បន ឦទិសោ អធិប្បាយោ ន ទិស្សតីតិ. ឯវំ ហោតុ, អយំ គន្ថោ កេន កតោតិ. សីហឡទីបេ អនុរាធបុរស្ស ទក្ខិណទិសាភាគេ បោក្កន្តិ គាមេ អរហន្តេន មោគ្គលានត្ថេរេនាតិ. អយមត្ថោ កថំ ជានិតព្ពោតិ. បិដកត្តយលក្ខណគន្ថេ អាគតត្តាតិ. អយញ្ច បិដកត្តយ លក្ខណគន្ថោ កុតោ លទ្ធោតិ. ពុទ្ធឃោសត្ថេរេន កិរ សីហឡទីបតោ អានីតត្តា តតោ, អយញ្ហិ គន្ថោ សីហឡទីបតោ អត្តនា អានីតេសុ គន្ថេសុ អសុកោ គន្ថោ អសុកេន ថេរេន កតោតិ វិញ្ញាបនត្ថាយ ពុទ្ធឃោសត្ថេរេន កតោ, ឥទានាយំ គន្ថោ អម្ហាកំ ហត្ថេ សំវិជ្ជតីតិ. សចេ ឥទានាយំ គន្ថោ តុម្ហាកំ ហត្ថេ សំវិជ្ជតិ, អម្ហាកំ ទស្សេហីតិ. បស្សថាវុសោ អយមម្ហាកំ ហត្ថេ គន្ថោតិ ទស្សេសិ. អថ មហាថេរេហិ សង្ឃរាជប្បមុខេហិ តស្មិំ គន្ថេ បស្សិតេ វិនយគណ្ឋិបទំ សីហឡទីបេ បរក្កមពាហុរញ្ញោ កាលេ មោគ្គលានត្ថេរោ អកាសីតិ អាគតំ, ន ចូឡគណ្ឋិបទំ សីហឡទីបេ អនុរាធបុរស្សទក្ខិណទិសាភាគេ បោក្កន្តិគាមេ អរហា មោគ្គលានត្ថេរោ អកាសីតិ.

អថ ថេរា ឯវមាហំសុ,-កស្មា បន បិដកត្តយលក្ខណគន្ថេ អនាគតម្បិ អាគតំវិយ កត្វា មុសា វទថ, ន នុ តុម្ហាកម្បិ ឯកំសិកភិក្ខូនំ មុសាវាទសិក្ខាបទំ អត្ថីតិ. អថ អតុលត្ថេរោ ឧត្តរិំ វត្តុំ អសក្កុណេយ្យត្តា លុទ្ទកស្ស ¶ វាកុរេ ពន្ធមិគោវិយ ផន្ទមានោ ហុត្វា អដ្ឋាសិ, សហោឌ្ឌេន គហិតោវិយ ចោរោ សហមុសាវាទកម្មេន សោ ថេរោ គហិតោ អហោសីតិ.

ឥទំ ឥមស្ស អត្ថស្ស អាវិភាវត្ថាយ វត្ថុ, –

ឥមស្មិំ កិរ រដ្ឋេ ឯកោ ជនបទវាសីបុរិសោ កេនចិទេវ ករណីយេន អមរបុរំ នាម មហារាជដ្ឋានីនគរំ អាគច្ឆិ. អាគន្ត្វា ច បច្ចាគតកាលេ អន្តរាមគ្គេ បាថេយ្យំ ខយំ អហោសិ. អថស្ស ឯតទហោសិ,- ឥទានិ មម បាថេយ្យំ ខយំ អហោសិ, ឥមស្មិំ កិរ រដ្ឋេ សហស្សោរោធគាមេ លទ្ធវរោ នាម មហាសេដ្ឋិ សព្ពត្ថ ភូតលេ អតិវិយ បាកដោ. តស្សាហំ ញាតីតិ វញ្ចេត្វា កថេស្សាមិ, ឯវំ សតិ តេន មហាសេដ្ឋិនា មិត្តសន្ថវំ កាតុំ តេតេគាមិកា មនុស្សា មម ពហុ លាភំ ទស្សន្តិ, តទា បាថេយ្យេន អកិច្ឆោ ភវិស្សាមីតិ. ឯវំ បន ចិន្តេត្វា អន្តរាមគ្គេ សម្បត្តសម្បត្តគាមេសុ មហាភោគានំ គេហំ វិចិនេត្វា មហាភោគានំ សន្តិកំ បវិសិត្វា កថាសល្លាបំ អកាសិ.

អថ តេតេគាមិកា ត្វំ កុតោ អាគតោ, កុហិំ គមិស្សសិ, កស្ស ញាតិ,កោ វា ត្វន្តិ បុច្ឆិំសុ. អមរបូរមហារាជដ្ឋានីនគរតោ អាគតោ, សហស្សោរោធគាមំ គមិស្សាមិ, សហស្សោរោធគាមេ លទ្ធវរស្ស នាម មហាសេដ្ឋិនោ ជាមាតា ធនវឌ្ឍកោ នាមាហន្តិ អាហ.

អថ តេតេគាមិកា លទ្ធវរេន មហាសេដ្ឋិនា មិត្តសន្ថវំ កាតុំ នានាភោជនេហិ ភោជេសុំ. អញ្ញេហិបិ ពហូហិ បណ្ណាការេហិ សង្គហំ អកំសុ. ឥមិនាវ នយេន សម្បត្ត សម្បត្តគាមេសុ វញ្ចេត្វា អត្តនោ គុណំ កថេត្វា អទ្ធាន មគ្គំ តរិ. បច្ឆា បន សហស្សោរោធគាមំ សម្បត្តោ. សោ សហស្សោរោធគាមំ ន សម្បត្តបុព្ពោ. លទ្ធវរោ មហាសេដ្ឋិ តេន ន ទិដ្ឋបុព្ពោ. សហស្សោរោធគាមំ សម្បត្តេយេវ អយំ កិំ នាម គាមោតិ អបុច្ឆិត្វាយេវ តស្មិំ គាមេ មហាភោគតរស្ស ¶ មហាគេហំ វិចិនន្តោ តស្សេវ លទ្ធវរស្ស សេដ្ឋិនោ មហន្តំ គេហំ បស្សិត្វា លទ្ធវរស្ស សេដ្ឋិនោ សន្តិកំ បវិសិត្វា តេន សទ្ធិំ កថាសល្លាបំ អកាសិ.

អថ មហាសេដ្ឋិ តំ បុច្ឆិ,-ត្វំ កុតោ អាគតោ, កុហិំ គមិស្សសិ, កស្ស ញាតិ,កោ ត្វន្តិ. អមរបុរមហារាជដ្ឋានីនគរតោ សាមិ អាគតោ, សហស្សោរោធគាមំ គមិស្សាមិ, សហស្សោរោធគាមេ លទ្ធវរស្ស នាម មហាសេដ្ឋិនោ ជាមាតា, ធនវឌ្ឍកោ នាមាហន្តិ អាហ.

អថ មហាសេដ្ឋិ តស្ស មុខំ ឧជុំ ឱលោកេត្វា អយំ មាណវ សហស្សោរោធគាមោយេវ, អហម្បិ លទ្ធវរោ នាម មហាសេដ្ឋិ, មម ធីតរោ សន្តិ, តាបិ សស្សាមិកាយេវ ហោន្តិ, ឥទានិ តា សកសកស្សាមិកានំយេវ សន្តិកេ វសន្តិ, ន ត្វំ កទាចិ មយា ទិដ្ឋបុព្ពោ, កេន ការណេន កុតោ អាគន្ត្វា មម ជាមាតា ភវសីតិ បុច្ឆិ.

អថ សោ ម្មនុស្សេហិ អនុពន្ធិយមានោវិយ មិគោ សកលម្បិ កាយំ ផន្ទាបេត្វា កិញ្ចិ វត្តព្ពំ វចនំ អជានិត្វា អលទ្ធប្បតិដ្ឋានតាយ ឯវំ សតិ កុតោ អាគតោ, កុហិំ គមិស្សាមិ, កស្ស ញាតិ, កោ វា អហន្តិ ឥទានិ ន ជានាមិ, សព្ពទិសា សម្មុយ្ហាមិ, ខមាហិ មម អបរាធំ, ឥតោ បដ្ឋាយ យាវ ជីវិតបរិយោសានា ន វញ្ចេស្សាមិ, វញ្ចេតុំ ន វិសហាមិ, ឥទានិ អតិវិយ ភាយាមិ, មា កិញ្ចិ ទណ្ឌកម្មំ ករោហីតិ វត្វា វេគេន ឧដ្ឋហិត្វា បលាយីតិ.

ឥច្ចេវំ អតុលត្ថេរោ ទុម្មុខោ ហុត្វា យំវាតំវា មុខារូឡំ វិលបិត្វា សង្ឃមជ្ឈេ និសីទិ.

តតោ បច្ឆា ខលិត្វា កទ្ទមេ បតិតំ បុរិសំ បុន ឧបរិ អក្កមន្តាវិយ បុន មហាថេរា ឯវំ បុច្ឆិំសុ,-ឥទំ ភន្តេ តវ ចូឡគណ្ឋិបទំ នាម តីសុ វិនយមហាដីកាសុ សាធកវសេន ទស្សិតំ ¶ ចូឡគណ្ឋិបទំ ឧទាហុ អបរន្តិ. តីសុ វិនយមហាដីកាសុ សាធកវសេន ទស្សិតំ ចូឡគណ្ឋិបទំយេវ ឥទន្តិ. ឯវំសតិ កស្មា តវ ចូឡគណ្ឋិបទេយេវ វុត្តញ្ហិ វជិរពុទ្ធិដីកាយំ, វុត្តញ្ហិ សារត្ថទីបនីដីកាយំ, តថា ហិ វុត្តំ វិមតិ វិនោទនីដីកាយន្តិ តាសំ វិនយមហាដីកានំ បច្ឆា ហុត្វា តិស្សោ វិនយមហាដីកាយោ សាធកវសេន ទស្សិតាតិ. ឯវំ បន បុច្ឆន្តោ សោ មយា បុព្ពេ វុត្តំ តីសុ វិនយមហាដីកាសុ សាធកវសេន ទស្សិតំ ចូឡគណ្ឋិបទំយេវ ឥទន្តិ វចនំ សច្ចមេវាតិ មុខាសុញ្ញត្ថាយ បុនប្បុនំ វទិ.

ឥទញ្ច ឥមស្ស អត្ថស្ស អាវិភាវត្ថាយ វត្ថុ, –

ឯកោ កិរ បុរិសោ ឯកេន សហាយេន សទ្ធិំ បុត្តទារបោសនត្ថាយ រញ្ញោ ភតិំ គហេត្វា យុទ្ធកម្មំ កាតុំ សង្គាមំ គច្ឆតិ. អថ បរសេនាយ យុជ្ឈិត្វា បរសេនា អភិភវិត្វា សព្ពេ មនុស្សា អត្តនោ អត្តនោ អភិមុខដ្ឋានំ បលាយិំសុ. អថ សោបិ បុរិសោ តេន សហាយេន សទ្ធិំ អត្តនោ អភិមុខដ្ឋានំ បលាយិ. តោកំ បលាយិត្វា អន្តរាមគ្គេ បរសេនាហិ បហរិតទណ្ឌេន មុច្ឆិតោ ហុត្វា សោ បុរិសោ តេន សទ្ធិំ គន្តុំ ន សក្កា, អន្តមសោ និសីទិតុម្បិ ន សក្កា.

អថ សហាយស្ស ឯតទហោសិ,-ឥទានិ អយំ អតិវិយ ពាឡគិលានោ ហោតិ មរណាសន្នោ, សចាហំ តស្ស ឧបដ្ឋហិត្វា ឥធេវ និសីទេយ្យំ, វេរិនោ អាគន្ត្វា មំ គណ្ហិស្សន្តីតិ. ឯវំ បន ចិន្តេត្វា គិលានស្ស សន្តកានិ កហាបណវត្ថាទីនិ គហេត្វា តំ តត្ថេវ ឋបេត្វា គច្ឆតិ. សកដ្ឋានសមីបំ បន បត្តស្ស តស្ស ឯតទហោសិ,- សចេ តំ អន្តរាមគ្គេ ឋបេត្វា អាគច្ឆាមីតិ វទេយ្យំ, តស្ស ញាតកា មម ឧបរិ ទោសំ រោបេស្សន្តិ, ឥទានិ សោ មរិត្វា អហំ ឯកកោវ អាគច្ឆាមីតិ វទិស្សាមីតិ. សកដ្ឋានំ បន បត្វា តស្ស ភរិយា តស្ស សន្តិកំ អាគន្ត្វា មយ្ហំ បន សាមិកោ ¶ កុហិំ គតោ, កត្ថ ឋបេត្វា ត្វំ ឯកកោវ អាគច្ឆសីតិ បុច្ឆិ. តវ អយ្យេ សាមិកោ បរេសំ អាវុធេន បហរិត្វា កាលង្កតោ, ឥមានិ តវ សាមិកស្ស សន្តកានីតិ វត្វា កហាបណវត្ថាទីនិ ទត្វា មា សោចិ មា បរិទេវិ, ឥទានិ មតកភត្តំ ទត្វា បុញ្ញភាគំយេវ ភាជេហីតិ សមស្សាសេសិ. អថ សា តានិ គហេត្វា រោទិត្វា មតកភត្តំ ទត្វា បុញ្ញភាគំ ភាជេសិ.

អបរភាគេ បន ថោកំ កាលំ អតិក្កន្តេ គិលានា វុដ្ឋិតោ សកគេហំ អាគច្ឆតិ. ភរិយាបិ តំ ន សទ្ទហិ. អហំ ន កាលង្កតោ, គិលានំយេវ មំ ឋបេត្វា សោ មម សន្តកានិ គហេត្វា គតោ, សចេ មំ ត្វំ ន សទ្ទហសិ, អហំ អន្តោគព្ភេ និលីយិត្វា និសីទិស្សាមិ, តំ បក្កោសេត្វា បុច្ឆាហីតិ អាហ.

អថ សា តំ បក្កោសេត្វា ពហិ គព្ភេ និសីទិត្វា បុច្ឆិ,-មម សាមិ សាមិកោ កាលង្កតោតិ តំ សច្ចំ វា អលិកំ វាតិ. សច្ចមេវេតំ, យំ តវ សាមិកោ កាលង្កតោតិ.

អថ សោ បុរិសោ ពហិ គព្ភំ និក្ខមិត្វា អង្គុលិំ បសារេត្វា ន ឥទានិ ភោសម្ម អហំ កិញ្ចិ មត្តោបិ មរាមិ, កស្មា បន អមរន្តំយេវ មំ មតោ ឯសោតិ វទេសីតិ. អថ កិញ្ចិ វត្តព្ពស្ស ការណស្ស អទិស្សនតោ មុខាសុញ្ញត្ថាយ អង្គុលិំ បសារេត្វា ឧជុំ ឱលោកេត្វា ឥទានិ ត្វំ ឥធ អាគន្តុំ សមត្ថោបិ មតោយេវ, មតោតិ មយា វុត្ត វចនំ សច្ចំយេវ, នាហំ កិញ្ចិ អលិកំ វទាមីតិ អាហ. ឯវំ សោ បុនប្បុនំ វទន្តោបិ ជីវមានកស្ស សំវិជ្ជមានត្តា បច្ចក្ខេយេវ ច តស្ស ឋិតត្តា កោចិបិ តស្ស វចនំ ន សទ្ទហិ, បរាជយំយេវ សោ បត្តោតិ.

ឥច្ចេវំ ¶ អតុលត្ថេរោ មុខាសុញ្ញត្ថាយ វទន្តោបិ កោចិ ន សទ្ទហិ, បរាជយំយេវ សោ បត្តោតិ.

អយំ អតុលត្ថេរស្ស ទុតិយោ បរាជយោ.

បុនបិ សេយ្យថាបិ លុទ្ទកោ កុញ្ជរំ ទិស្វា ឯកេន វារេន ឧសុនា វិជ្ឈិត្វា បតន្តម្បិ កុញ្ជរំ បុន អនុដ្ឋាហនត្ថាយ កតិបយវារេហិ ឧសូហិ វិជ្ឈតិ, ឯវមេវ ឯកវារេនេវ បរាជយំ បត្តំ បន វាទស្ស អនុក្ខិបនត្ថាយ កតិបយវារេហិ បរាជយំ បាបេតុំ បារុបនវាទិនោ មហាថេរា ឯវមាហំសុ,- តវ ចូឡគណ្ឋិបទេយេវ សាមណេរានំ បរិមណ្ឌលសុប្បដិច្ឆន្នាទីនិ វត្តានិ អភិន្ទិត្វាយេវ បវិសិតព្ពោតិ បុព្ពេ វត្វា ចីវរបដលឧបរិសង្ឃាដិំ កត្វា ឧរពន្ធនវត្ថំ ពន្ធិតព្ពន្តិ បន វុត្តំ, កស្មា បន បុព្ពេន អបរំ អសំសន្ទិត្វា វុត្តំ, តុម្ហាកំ វាទេ បដិសរណភូតានំ បាឡិអដ្ឋកថាដីកាគន្ថន្តរានំ នត្ថិតាយ អម្ហាកំ បដិសរណភូតំ ចូឡគណ្ឋិបទន្តិ វទថ, តុម្ហាកំ បដិសរណភូតា ចូឡគណ្ឋិបទតោយេវ ភយំ ឧប្បជ្ជតីតិ វត្វា សហ និលីយនដ្ឋានេន គហិតំ ចោរំ វិយ សហ និស្សយេន អធម្មវាទិនោ គណ្ហិំសុ.

ឥទំ ឥមស្ស អត្ថស្ស អវិភាវត្ថាយ វត្ថុ, –

អតីតេ កិរ ពារាណសិតោ អវិទូរេ នទីតីរេ គាមកេ បាដលិ នាម នដមច្ចោ វសតិ. សោ ឯកស្មិំ ឧស្សវ ទិវសេ ភរិយមាទាយ ពារាណសិំ បវិសិត្វា នច្ចិត្វា វីណំ វាទិត្វា គាយិត្វា ធនំ លភិត្វា ឧស្សវបរិយោសានេ ពហុ សុរាភត្តំ គាហាបេត្វា អត្តនោ គាមំ គច្ឆន្តោ នទីតីរំ បត្វា នវោទកំ អាគច្ឆន្តំ ទិស្វា ភត្តំ ភុញ្ជន្តោ សុរំ វិវន្តោ និសីទិត្វា មត្តោ ហុត្វា អត្តនោ ពលំ អជានន្តោ មហាវីណំ គីវាយ ពន្ធិត្វា នទិំ ឱតរិត្វា គមិស្សាមីតិ ភរិយំ ហត្ថេ គហេត្វា នទិំ ឱតរិ. វីណាឆិទ្ទេហិ ឧទកំ ¶ បាវិសិ. អថ នំ សា បីណា ឧទកេ ឱសីទាបេសិ. ភរិយា បនស្ស ឱសីទនភាវំ ញត្វា តំ វិស្សជ្ជិត្វា ឧត្តរិត្វា នទីតីរេ អដ្ឋាសិ. នដបាដលិ សកិំ ឧម្មុជ្ជតិ, សកិំ និម្មុជ្ជតិ, ឧទកំ បវិសិត្វា ឧទ្ធុមាតឧទរោ អហោសិ. អថស្ស ភរិយា ចិន្តេសិ,-មយ្ហំ សាមិកោ ឥទានិ មរិស្សតិ, ឯកំ គីតំ យាចិត្វា បរិសមជ្ឈេ តំ គាយន្តី ជីវិតំ កប្បេស្សាមីតិ ចិន្តេត្វា សាមិ ត្វំ ឧទកេ និម្មុជ្ជសិ, ឯកំ មេ គីតំ ទេហិ, តេន ជីវិតំ កប្បេស្សាមីតិ វត្វា–

ពហុស្សុតំ ចិត្តកថំ, គង្គា វហតិ បាដលិំ;

វុយ្ហមានកំ ភទ្ទន្តេ, ឯកំ មេ ទេហិ គាថកន្តិ.

អថ នំ នដបាដលិ ភទ្ទេ កថំ តវ គីតំ ទស្សាមិ, ឥទានិ មហាជនស្ស បតិសរណភូតំ ឧទកំ មំ មារេតីតិ វត្វា–

យេន សិញ្ចន្តិ ទុក្ខិតំ, យេន សិញ្ចន្តិ អាតុរំ;

តស្ស មជ្ឈេ មរិស្សាមិ, ជាតំ សរណតោ ភយន្តិ.

អថ អតុលត្ថេរោ អត្តនោ បតិសរណភូតា ចូឡគណ្ឋិបទតោ ភយំ ឧប្បជ្ជិត្វា កិញ្ចិ វត្តព្ពំ អជានិត្វា អធោមុខោ ហុត្វា បរាជាយំ បត្តោតិ.

អយំ អតុលត្ថេរស្ស តតិយោ បរាជយោ.

អថ រាជា តេសំ ទ្វិន្នំ បក្ខានំ វចនំ សុត្វា ចូឡគណ្ឋិបទស្ស បុព្ពាបរវិរោធិទោសហិ អាកុលត្តា សុត្តសុត្តានុលោមាទីសុ អប្បវិដ្ឋត្តា អាគមសុទ្ធិយា ច អភាវតោ បរោវស្សសតំ ចិរំ ឋិតស្ស គេហស្សវិយ អតិទុព្ពលវសេន អថិរតំ ជានិត្វា ឥទានិ សាសនំ បរិសុទ្ធំ ភវិស្សតីតិ សោមនស្សប្បត្តោ ហុត្វា មម វិជិតេ សព្ពេបិ ភិក្ខូ បារុបនវសេន សមានវាទិកា ហោន្តូតិ អាណំ ឋបេសិ. តតោ ¶ បដ្ឋាយ យាវជ្ជតនា សកលេបិ មរម្មរដ្ឋេ បារុបនវសេន សមានវាទិកា ភវន្តីតិ.

អយមេត្ថ សង្ខេបោ,-តេសញ្ហិ ទ្វិន្នំ បក្ខានំ សន្និបតិត្វា វចនប្បដិវចន វសេន វិវាទកថា វិត្ថារេន វុច្ចមានា ឆបញ្ចសាណវារមត្តម្បិ បត្វា និដ្ឋំ ន បាបុណេយ្យ. យស្មា បន សព្ពំ អនវសេសេត្វា វុច្ចមានំ អយំ សាសនវំសប្បដីបិកា អតិប្បបញ្ចា ភវិស្សតិ, តស្មា ឯត្ថ ឥច្ឆិតមត្តមេវ ទស្សយិត្វា អជ្ឈុបេក្ខាមាតិ.

ញាណាភិវំសធម្មសេនាបតិមហាធម្មរាជាធិរាជ គុរុ បន សង្ឃរាជា មហាថេរោ សីហឡទីបេ អមរបុរនិកាយិកានំ ភិក្ខូនំ អាទិភូតោ អាចរិយោ ពហូបការោ. អមរបុរនិកាយោតិ តត្ថេរប្បភវោតិ.

កលិយុគេ បន ឯកាសីតាធិកេ វស្សសតេ សហស្សេ ច សម្បត្តេ តស្ស រញ្ញោ នត្តា សិរិត្រិភវនាទិត្យបវរបណ្ឌិតមហាធម្មរាជាធិរាជា នាម រជ្ជំ ការេសិ. សោ បន អមរបុរតោ សង្កមិត្វា រតនបូរំ ចតុត្ថំ មាបេសិ. តស្ស រញ្ញោ កាលេ គុណមុនិន្ទាធិបតិមហាធម្មរាជាធិរាជគុរុត្ថេរស្ស សីស្សំ សជីវគាមវាសិំ សីលាចារំ នាម ថេរំ អរញ្ញវាសីនំ ភិក្ខូនំ បាមោក្ខដ្ឋានេ ឋបេសិ. រាជាគារនាមកេ ទេសេ វិហារំ ការាបេត្វា តស្សេវ អទាសិ.

កលិយុគេ ឯកាសីតាធិកេ វស្សសតេ សហស្សេ ច សម្បត្តេ ចលង្គបុរតោ បញ្ញាសីហំ នាម ថេរំ អានេត្វា អសោការាមេ រតនភូមិកិត្តិវិហារេ បតិដ្ឋាបេសិ, មុនិន្ទាភិសិរិសទ្ធម្មធជមហាធម្មរាជាធិរាជគុរូតិ នាមលញ្ឆម្បិ អទាសិ.

កលិយុគេ ចតូសីសាធិកេ វស្សសតេ សហស្សេ ច សម្បត្តេ មុនិន្ទាភិវំសធម្មសេនាបតិមហាធម្មរាជាធិរាជគុរូតិ នាមលញ្ឆំ ទត្វា មហាជេយ្យភូមិវិហាររម្មណីយំ នាម វិហារំ ¶ ទត្វា តំយេវ មហាថេរំ សង្ឃរាជដ្ឋានេ ឋបេសិ.

ឯកស្មិញ្ច សមយេ មហាថេរេ រាជា បុច្ឆិ,-ចតស្សោ ទាឋា នាម ចត្តាលីសាយ ទន្តេសុ អន្តោគធា វា, ឧទាហុ ចត្តាលីសាយ ទន្តេហិ វិសុំ ភូតាតិ បុច្ឆិ.

អថ ឯកច្ចេ ថេរា ឯវមាហំសុ,-ចតស្សោ ទាឋា នាម ចត្តាលីសាយ ទន្តេសុ អន្តោគធាតិ. ឯកច្ចេ បន ចតស្សោ ទាឋា នាម ចត្តាលីសាយ ទន្តេហិ វិសុំ ភូតាតិ អាហំសុ. អថ រាជា គន្ថំ អាហរថាតិ អាហ. អថ អន្តោគធវាទិកា ថេរា គន្ថំ អាហរិំសុ,- អញ្ញេសំ បរិបុណ្ណទន្តានម្បិ ទ្វត្តិំសទន្តា ហោន្តិ, ឥមស្ស បន ចត្តាលីសំ ភវិស្សន្តីតិ ច.

ទន្តាតិ បរិបុណ្ណទន្តស្ស ទ្វត្តិំសទន្តដ្ឋិកានិ. តេបិ វណ្ណតោ សេតា, សណ្ឋានតោ អនេកសណ្ឋានា. តេសញ្ហិ ហេដ្ឋិមាយ តាវ ទន្តបាឡិយា មជ្ឈេ ចត្តារោ ទន្តា មត្តិកាបិណ្ឌេ បដិបាដិយា ឋបិតអាលាពុពីជសណ្ឋានា, តេសំ ឧភោសុ បស្សេសុ ឯកេកោ ឯកមូលកោ ឯកកោដិកោ មល្លិកមកុឡសណ្ឋានោ, តតោ ឯកេកោ ទ្វិមូលកោ ទ្វិកោដិកោ យានកឧបត្ថម្ផិនិសណ្ឋានោ, តតោ ទ្វេ ទ្វេ តិមូលកា តិកោដិកា, តតោ ទ្វេ ទ្វេ ចតុមូលកា ចតុកោដិកាតិ. ឧបរិមាយ ទន្តបាឡិយាបិ ឯសេវ នយោតិ ច.

តស្ស កិរ ឧត្តរោដ្ឋអប្បកតាយ តិរិយំ ផាលេត្វា អបនីតទ្ធំវិយ ខាយតិ, ចត្តារោ ទន្តេ ទ្វេ ច ទាឋា ន ឆាទេតិ, តេន នំ ឱដ្ឋទ្ធោតិ វោហរន្តីតិ ច.

តត្ថ តស្សាតិ លិច្ឆវិនោ នាម រាជកុមារស្ស, ឧត្តរោដ្ឋអប្បកតាយាតិ ឧបរិ ឱដ្ឋស្ស អប្បកតាយ. អបនីតទ្ធំ វិយាតិ ឧបរិ ឱដ្ឋស្ស ឧបឌ្ឍភាគំ អបនីតំ វិយ ខាយតីតិ អត្ថោ. ន ឆាទេតីតិ ឧបរិ ឱដ្ឋស្ស ឧបឌ្ឍភាគេ បន ន បដិច្ឆាទេតិ. តេនាហិ យេន ចត្តារោ ទន្តេ ទ្វេ ច ទាឋា ន ឆាទេតិ, តេន នំ លិច្ឆវីរាជកុមារំ ឱដ្ឋទ្ធោតិ វោហរន្តីតិ ¶ . ឯវំ អន្តោគធវាទេហិ ថេរេហិ គន្ថំ អាហរិត្វា ទស្សិតេ សព្ពេបិ តស្មិំ វាទេ បតិដ្ឋហិំសូតិ.

ឯកស្មិញ្ច កាលេ រាជា មន្តិនិំ អមច្ចំ បុច្ឆិ,-បុព្ពរាជូហិ វិហារស្ស ចេតិយស្ស វា ទិន្នានិ ខេត្តវត្ថុអាទីនិ បច្ឆិមរាជូនំ កាលេ យថាទិន្នំ តានិ បតិដ្ឋហន្តិ វា មា វាតិ.

អថ មន្តិនិអាមច្ចោ ឯវំ កថេសិ,- សង្ឃិកាយ ភូមិយា បុគ្គលិកានិ ពីជានិ រោបយន្តិ, ភាគំ ទត្វា បរិភុញ្ជិតព្ពានីតិ ទសកោដ្ឋាសេ កត្វា ឯកោ កោដ្ឋាសោ ភូមិស្សាមិកានំ ទាតព្ពោតិ ច វិនយបាឡិអដ្ឋកថាសុ វុត្តត្តា បុព្ពេ ឯកេន រញ្ញា ទិន្នានិ ខេត្តវត្ថុអាទីនិ បច្ឆា ឯកស្ស រញ្ញោ កាលេ យថាទិន្នំ ឋិតានិ. ឯត្ថ ហិ សង្ឃិកាយ ភូមិយាតិ វុត្តត្តា លាភសីមាយំវិយ ពលិំយេវ អទត្វា សហ ភូមិយា ទិន្នត្តា បវេណីវសេន សង្ឃិកា ភូមិ អត្ថីតិ វិញ្ញាយតិ. ឯត្ថច បដិគ្គាហកេសុ មតេសុ តទញ្ញោ ចតុទ្ទិសសង្ឃោ អនាគតសង្ឃោ ច ឥស្សរោ, តស្ស សន្តកោ, តេន វិចារេតព្ពោតិ.

ចេតិយ បទីបត្ថាយ បដិសង្ខារណត្ថាយ វា ទិឥន្នអារាមោបិ ជគ្គិតព្ពោ, វេត្តនំ អត្វាបិ ជគ្គាបេតព្ពោតិ ចេតិយេ ឆត្តំ វា វេទិកំ វា ជិណ្ណំ វា បដិសង្ខរោន្តេន សុធាកម្មាទីនិ វា ករោន្តេន ចេតិយស្ស ឧបនិក្ខេបតោ ការេតព្ពន្តិ ច អដ្ឋកថាយំ វុត្តត្តា បុព្ពរាជូហិ ចេតិយស្ស ទិន្នានិ ខេត្តវត្ថុអាទីនិ បច្ឆិមរាជូនំ កាលេបិ ចេតិយសន្តកសាវេនេវ ឋិតានីតិ វេទិតព្ពានិ.

អថាបរម្បិ បុច្ឆិ,- កទា កស្ស រញ្ញោ កាលេ អាទិំ កត្វា ខេត្តវត្ថុអាទីនិ វិហារស្ស ចេត្យស្ស វា ទិន្នានីតិ.

អថ មន្តិនមច្ចោ ឯវមាហ,-បុរិមកប្បេសុ បុរិមានំ រាជូនំ កាលេបិ វិហារស្ស ចេតិយស្ស វា ទិន្នានីតិ វេទិតព្ពានិ, តេនេវ សុជាតស្ស នាម ភគវតោ អម្ហាកំ ពោធិសត្តោ ¶ ចក្កវត្តិរាជា សទ្ធិំ សត្តហិ រតនេហិ ទ្វិសហស្សេ ខុទ្ទកទីបេ ចត្តារោ មហាទីបេ ច អទាសិ, រដ្ឋវាសិនោ ច អារាមគោបកកិច្ចំ ការាបេសីតិ គន្ថេសុ អាគតំ, តស្មា ចិរកាលតោយេវ បដ្ឋាយ បុព្ពរាជូហិ ខេត្តវត្ថុអាទិនិ ទិន្នានីតិ វេទិតព្ពានិ.

រាជវំសេសុបិ ភគវតោ បរិនិព្ពានតោ វស្សសតានំ ឧបរិ សិរិខេត្តនគរេ ឯកាយ អាបូបិកាយ បញ្ចករីស មត្តំ ខេត្តំ ឯកស្ស ថេរស្ស ទិន្នំ, តំ ទ្វត្តបោង្កោ នាម រាជា វិលុម្បិត្វា គណ្ហិ. អថ បហារឃណ្ដភេរិយោ បហរិតាបិ សទ្ទំ ន អកំសុ. រញ្ញោ កុន្តចក្កម្បិ យថា បុព្ពេ, តថា បេសិតដ្ឋានំ ន គច្ឆិ. អថ តំ ការណំ ញត្វា អាបូបិកាយ យថាទិន្នមេវ ថេរស្ស និយ្យាទេសីតិ.

កលិយុគេ បន នវនវុតាធិកេ វស្សសតេ សហស្សេ ច សម្បត្តេ តស្ស កនិដ្ឋោ សិរិបវរាទិត្យលោកាបេតិ វិជយមហាធម្មរាជាធិរានា រជ្ជំ ការេសិ, សោ បន រាជា រតនបូរតោ សង្កមិត្វា អមរបុរំ ទុតិយំ មាបេសិ. តស្ស រញ្ញោ រជ្ជំ បត្តសំវច្ឆរេយេវ ជេដ្ឋមាសស្ស ជុណ្ហបក្ខបញ្ចមិយំ រតនបូរនគរេ មារវិជយរតនសុធម្មាយ នាម បិដកសាលាយ សូរិយវំសស្ស នាម ថេរស្ស បរិសមជ្ឈេ រាជលេខនំ វាចាបេត្វា សង្ឃរជ្ជំ និយ្យាទេសិ. សូរិយវំសាភិសិរិបវរាលង្ការធម្មសេនាបតិមហាធម្មរាជាធិរាជគុរូតិ នា មលញ្ឆម្បិ អទាសិ.

សោ បន ថេរោ កលិយុគេ បញ្ចវីសាធិកេ វស្សសតេ សហស្សេ ច សម្បត្តេ មិគសិរមាសស្ស ជុណ្ហបក្ខសត្តមិយំ សុត្តវារេ វាលុកវាបិគាមេ បដិសន្ធិយា វិជាតោតិសត្តតិវយំ សម្បត្តេ សង្ឃរជ្ជំ បត្តោ សន្តិន្ទ្រិយោ ខន្តី ធម្មោ សិក្ខាកាមោ បរិយត្តិវិហារទោ តិបិដកាលង្ការមហាធម្មរាជគុរុត្ថេរស្ស សិស្សោ. សោ បន កលិយុគេ បន្នរសាធិកេ ¶ ទ្វិវស្សសតេ សហស្សេច សម្បត្តេ តស្ស រញ្ញោ កាលេយេវ មច្ចុវសំ បត្តោ.

អថ រាជា អនេកសហស្សេហិ បាសាទេហិ អភូតបុព្ពេហិ អច្ឆរិយកម្មេហិ សរីរឈាបនកិច្ចំ អកាសិ. អថ កលិយុគេ សេឡសាធិកេ វស្សសតេ សហស្សេច សម្បត្តេ តស្ស មហាថេរស្ស សិស្សំ ញេយ្យធម្មំ នាម ថេរំ បុន សង្ឃរាជដ្ឋានេ ឋបេសិ. បឋមំ ញេយ្យធម្មាលង្ការធម្ម សេនាបតិមហាធម្មរាជាធិរាជគុរូតិ នាមលញ្ឆំ អទាសិ. តតោ បច្ឆា ទុតិយំ ញេយ្យធម្មាភិវំសសិរិបវរាលង្ការធម្មសេនាបតិមហាធម្មរាជាធិរាជ- គុរូតិ នាមលញ្ឆំ អទាសិ.

សោ បន ថេរោ កលិយុគេ ឯកសដ្ឋាធិកេ វស្សសតេ សហស្សេច ទេវសូរគាមេ បដិសន្ធិយា វិជាតោ ហុត្វា អសីតាធិកេ វស្សសតេ សហស្សេច បឋមអាសាឡិមាសស្ស ជុណ្ហបក្ខចុទ្ទសមិយំ ឧបសម្បទភូមិំ បត្តោ.

តស្ស រញ្ញោ កាលេ កលិយុគេ នវនវុតាធិកេ វស្សសតេ សហស្សេច សម្បត្តេ សីហឡទីបតោ បញ្ញាតិស្សោ នាម ថេរោ សទ្ធិំ សុនន្ទេន នាម ភិក្ខុនា ឥន្ទសារេន នាម សាមណេរេន ឯកេន ឧបាសកេន ឯកេន ទារកេនច អមរបុរំ នាម នគរំ សម្បត្តោ. អថ សង្ឃរាជា តេសំ បច្ចយានុគ្គហេន ធម្មានុគ្គហេច អនុគ្គហេសិ. តេសុ អបរភាគេ កលិយុគេ ទ្វិវស្សាធិកេ ទ្វិសតេ វស្សសហស្សេច សម្បត្តេ បញ្ញាតិស្សត្ថេរោ ជររោគេន អភិភូតត្តា សង្ខារធម្មានំ សភាវំ អនតិវត្តត្តា កាលមកាសិ. តស្ស បុន សិក្ខំ គណ្ហិស្សាមីតិ បរិវិតក្កោ មត្ថកំ អប្បត្តោ ហុត្វា វិនស្សយិ. តេនាហភគវា, –

អចិន្តិតម្បិ ¶ ភវតិ, ចិន្តិ តម្បិ វិនស្សតិ;

ន ហិ ចិន្តាមយា ភោគា, ឥត្ថិយា បុរិសស្ស វាតិ.

ឥមស្មិំ បន លោកេ បណ្ឌិតោ បុញ្ញំ កត្តុកាមោ អភិត្ថរេវ ករេយ្យ. កោ នាម ជញ្ញា អជ្ជេ វា សុវេ វា បរសុវេ វា មរណំ ភវិស្សភីតិ. តេនាហ ភគវា, –

អភិត្ថរេថ កល្យាណេ, បាបា ចិត្តំ និវារយេ;

ទន្ទញ្ហិ ករតោ បុញ្ញំ, បាបស្មិំ រមតី មនោតិ.

អថ មហារាជា តស្ស សរីរឈាបនកិច្ចំ ពហូហិ សាធុកីឡនសភាយេហិ អកាសិ. តតោ បច្ឆា សុនន្ទស្ស នាម ភិក្ខុស្ស បុន សិក្ខំ អទាសិ. សាមណេរំ បន ឧបសម្បទភូមិយំ បតិដ្ឋាបេសិ. ទារកញ្ច សាមណេរភូមិយន្តិ.

តេ បន មហារាជា កលិយុគេ តិវស្សាធិកេ ទ្វិសតេ សហស្សេច សម្បត្តេ មាឃមាសេ ពហូហិ បច្ចយេហិ ឧបត្ថម្ភេត្វា តានិតានិ សព្ពានិ កម្មានិ តីរេត្វា កុសិមនគរជេដ្ឋស្ស ឯកស្ស អមច្ចស្ស ភារំ កត្វា តស្សេវ សព្ពានិ កិច្ចានិ និយ្យាទេត្វា សីហឡទីបំ បហិណីតិ.

សង្ឃរាជាមហាថេរោ បន សាសនស្ស ចិរដ្ឋិតត្ថាយ សោតារានំ សុខប្បដិពោធនត្ថាយ នានាគន្ថេហិ បាឋំ វិសោធេត្វា សទ្ធម្មប្បជ្ជោតិកាយ នាម មហានិទ្ទេសដ្ឋកថាយ អត្ថយោជនំ មរម្មភាសាយ អកាសិ. ពហូនំ សិស្សានំ បរិយត្តិវាចនវសេន ជិនសាសនស្ស អនុគ្គហំ អកាសីតិ.

អបរភាគេ កលិយុគេ អដ្ឋវស្សាធិកេ ទ្វិសកេ សហស្សេច សម្បត្តេ មិគសិរមាសស្ស ជុណ្ហបក្ខអដ្ឋមិយំ តស្ស បុត្តោ សីរិបវរាទិត្យវិជយានន្តយសមហាធម្មរាជាធិរាជា នាម រជ្ជំ ការេសិ. តទា សូរិយវំសាភិសិរិបវរាលង្ការធម្មសេនាបតិមហាធម្មរាជាធិរាជគុរុ- មហាថេរស្ស សិស្សំ បញ្ញាជោតាភិធជមហាធម្មរាជាធិរាជគុរុត្ថេរំ ¶ សង្ឃរាជដ្ឋានេ ឋបេសិ.

សោបិ សីលវា បរិយត្តិកោវិទោ សិក្ខាកាមោ លជ្ជីបេសលោ. អង្គុត្តរនិកាយបាឡិយា តទដ្ឋកថាយច អត្ថ យោជនំ មរម្មភាសាយ អកាសិ.

តស្ស រញ្ញោ កាលេ ញេយ្យធម្មាភិវំសសិរិបវរាលង្ការធម្មសេនាបតិមហាធម្មរាជាធិរាជ- គុរុត្ថេរោ សទ្ធម្មវិលាសិនិយា នាម បដិសម្ភិទាមគ្គដ្ឋកថាយ អត្ថយោជនំ មរម្មភាសាយ អកាសិ.

មណិជោតសទ្ធម្មាលង្ការមហាធម្មរាជាធិរាជគុរុត្ថេរោសំយុត្ត- និកាយបាឡិយា តទដ្ឋកថាយច អត្ថយោជនំ មរម្មភាសាយ អកាសិ.

មេធាភិវំសសទ្ធម្មធជមហាធម្មរាជាធិរាជគុរុត្ថេរោ ទីឃនិកាយបាឡិយា តទដ្ឋកថាយច អត្ថយោជនំ មរម្មភាសាយ អកាសិ.

ញេយ្យធម្មាភិវំសសិរិបវរាលង្ការធម្មសេនាបតិមហា ធម្មរាជាធិរាជគុរុត្ថេរស្ស សិស្សោ ឧបសម្បទាវសេន បញ្ចវស្សិកោ បញ្ញាសាមិ នាមាហំ សទ្ទត្ថភេទចិន្តានាមកស្សគន្ថស្ស គណ្ឋិបទត្ថវណ្ណនំ មរម្មភាសាយ អកាសិំ. ទសវស្សិកកាលេ បន អភិធានប្បទីបិកាសំវណ្ណនាយ អត្ថយោជនំ មរម្មភាសាយ អកាសិំ. តស្សាច បាឋំ ពហូហិ គន្ថេហិ សំសទ្ទិត្វា វិសោធេសិន្តិ.

អបរភាគេ សក្ករាជេ ចុទ្ទសាធិកេ ទ្វិសតេ សហស្សេច សម្បត្តេ អយំ អម្ហាកំ ធម្មិកោ រាជា អនេកសតជាតីសុ ឧបចិតបុញ្ញានុភាវេន ជិនសាសនស្ស បគ្គណ្ហនត្ថាយ សម្មាទេវលោកបាលេហិ ឧយ្យោជិយនោវិយរជ្ជសម្បត្តិំ បដិលភិ. ទសពលស្សសាសនំ បគ្គណ្ហិតុកាមស្ស ធម្មរាជស្ស មនោរថោ មត្ថកំ បត្តោ អហោសិ. មរិយាទំ ភិន្ទិត្វា ទិន្នកតមគ្គំវិយ ឧទកំ លទ្ធោកាសតាយ សទ្ធា មហោឃោ ¶ អវត្ថរិត្វា តិដ្ឋតិ. ចត្តារិច វស្សានិ អតិក្កមិត្វា ពេសាខមាសេ បញ្ចកកុធភណ្ឌាទីហិ អនេកេហិ រាជភោគ្គភណ្ឌេហិ បរិវារេត្វា ឧទុម្ពរភទ្ទបិដ្ឋេ សទ្ធិំ មហេសិយា អភិសេកំ បត្តោ. តេនាវោចុម្ហា នាគរាជុប្បត្តិកថាយំ,-

មហាបុញ្ញោវ រាជាយំ, កដ្ឋដឃេវ អាគតេ;

សក្ករាជេ ហិ សម្បត្តិំ, បត្វា ទានេ រតោ វតេ.

តទា ចត្តារិ វស្សានិ, អតិក្កមិត្វា វិសាធិកេ;

សទ្ធិំ មហេសិយា សេកំ, បត្តោ ហុត្វា មហាតលេ.

ជិនចក្កញ្ច ជោតេសិ, មហាសោកាទយោ យថា;

អលជ្ជិនោច និគ្គយ្ហ, បគ្គហេត្វាន លជ្ជិនោ.

រដ្ឋេច ទានសីលេសុ, ភាវនាយាភិយុញ្ចយេ;

តទា យស្មា អលជ្ជិនោ និគ្គហិតព្ពបុគ្គលេ អវីចិនរកេ និក្ខិបន្តោវិយ និគ្គហកម្មំ អកាសិ, តស្មា តេ អលទ្ធោកាសា និលីយន្តិ, យថា អរុណុគ្គមនកាលេ កោសិយាតិ. តេនាវោចុម្ហា នាគរាជុប្បត្តិកថាយំ,-

តទា បន ជិនចក្កំ, នភេ ចន្ទោវ បាកដំ;

អលជ្ជិនោ និលីយន្តិ, អរុណុគ្គេវ កោសិយាតិ.

យស្មាច លជ្ជិនោ បគ្គហិតព្ពបុគ្គលេ ភវគ្គេឧក្ខិបន្តោវិយ បគ្គហកម្មំ ករោតិ, តស្មា តេ លទ្ធោកាសា ឧដ្ឋិតសីសា និរាសង្កា ហុត្វា តិដ្ឋន្តិ, យថា ចន្ទិមសូរិយាលោកានំ បដិលទ្ធកាលេ អាទិកប្បិកាតិ. តេនាវោចុម្ហា, –

តទាបិច ¶ ជិនចក្កំ, ខេ ភាណុមាវ បាកដំ;

លជ្ជិនោបិ ឧដ្ឋហន្តិ, ឱភាលទ្ធេវ កប្បិកាតិ.

តេបិដកម្បិ នវង្គំ ពុទ្ធវចនំ ចិរដ្ឋិតិកំ កត្តុកាមោ បរិយត្តិវិស្សរទេហិ មហាថេរេហិ វិសោធាបេត្វា លេខកានំ ភតិំ ទត្វា កណ្ឋជមុទ្ធជាទិវិធានំ សិថិលធនិតាទិវិធានញ្ច បុនប្បុនំ វិចារេត្វា អន្តមសោ បរិច្ឆេទលេខមត្តម្បិ អវិរាធេត្វា អន្តេបុរំ បវិសេត្វា សុវណ្ណមយេសុ លោហមយេសុច បោត្ថកេសុ លិខាបេសិ. ញាណថាមសម្បន្នេច ភិក្ខូ វិចិនេត្វា យថាពលំ វិនយបិដកំ វិសុំ វិសុំ ធារេតិ វាចុគ្គតំ ការាបេតិ. អគ្គមហេសិំ អាទិំ កត្វា សកល ឱរោធាទយោ ពហូ រាជសេវកា អមច្ចាទយោ នាគរិកេច យថាពលំ សុត្តន្តបិដកំ អភិធម្មបិដកញ្ច វិសុំ វិសុំ ឯកេកសុត្តមាតិកាបទភាជនីចិត្តវារាទិវសេន វិភាជេត្វា ធារេតិ វាចុគ្គតំ ការាបេតិ. សយញ្ច អនត្តលក្ខណាទិកំ អនេកវិធំ សុត្តំ ទេវសិកំ សជ្ឈាយំ ករោតិ. ជិនសាសនស្ស ចិរដ្ឋិតត្ថាយសកលវិជិតេច អរញ្ញវាសីនំ ភិក្ខូនំ អស្សមស្ស សមន្តតោ បញ្ចធនុសតប្បមាណេ ឋានេថលទកចរានំ សព្ពេសំ សត្តានំ អភយំ អទាសិ. បរិយត្តិ វិសារទានញ្ច ថេរានុថេរានំ មាតាបិតាទយោ ញាតកេ សព្ពរាជកិច្ចតោ ពលិកម្មតោច មោចាបេត្វា យថាសុខំ វសាបេតិ. ឯកាហេនេវាបិ សហស្សមត្តេ កុលបុត្តេ បព្ពជូបសម្បទភូមីសុ បតិដ្ឋាបេត្វា សាសនំ បគ្គណ្ហិ. អញ្ញានិបិ ពហូនិ បុញ្ញកម្មានិ ករោតិ. កត្វាច វិវដ្ដមេវ បត្ថេតិ, នោ វដ្ដំ. អញ្ញេច ឱរោធាទយោ តុម្ហេ យានិ កានិចិ បុញ្ញកម្មានិ កត្វា វិវដ្ដមេវ បត្ថេត, មា វដ្ដន្តិ អភិណ្ហំ ឱវទតិ. អនិច្ចលក្ខណាទិសំយុត្តាយ ធម្មកថាយ និច្ចំ ឱវទតិ. សយម្បិ សមថវិបស្សនាសុ និច្ចារទ្ធំ អកាសិ. រាជូនំ បន រដ្ឋសាមិកានំ ធម្មតាយ កិច្ចពាហុល្លតាយ កទាចិ កទាចិ ឱកាសំ ន លភតិ កម្មដ្ឋានមនុយុញ្ជិតុំ, ឯវម្បិ សមានោ សរីរមលបរិជគ្គនកាលេបិ កម្មដ្ឋានមនុយុញ្ជតិយេវ, ន មោឃវសេន កាលំ ខេបេតិ. លោកេ ហិ អមង្គលសម្មតានិបិ មនុស្សសីសកបាលដ្ឋិអាទីនិ សុសាសនតោ អានេត្វា ទន្តកដ្ឋាទីនិ វា តំសទិសានិ ការាបេត្វា អត្តនោ សមីបេ ឋបេត្វា អដ្ឋិកាទិភាវនាមយបុញ្ញំ វិចិនាតិ.

តទា បន អម្ហាកំ អាចរិយវរំ បរិយត្តិវិសារទំ តិក្ខ ជវនគច្ឆិរាទិញាណោបេតំ វិចិត្រធម្មទេសនាកថំ សកល មរម្មិកភិក្ខូនំ ឱនមិតដ្ឋានភូតំ វុទ្ធាបចាយិំ រូបសោភគ្គបត្តំ យុត្តវាទិកំ ញេយ្យធម្មាភិមុនិវរញាណកិត្តិសិរិធជធម្មសេនាបតិ- មហាធម្មរាជាធិរាជគុរូតិ តតិយំ លទ្ធលញ្ឆំ តំ ភិក្ខុសង្ឃានំ សកលរដ្ឋវាសីនំ បាមោក្ខភាវេ បតិដ្ឋាបេសិ អសោកមហារាជាវិយ មហាមោគ្គលិបុត្តតិស្សត្ថេរំ. តេនាវោចុម្ហា នាគរាជុប្បត្តិកថាយំ,–

តទាច ភិក្ខុសង្ឃានំ, ថេរំ បាមោក្ខភាវកេ;

ញេយ្យាទិលទ្ធលញ្ឆំ តំ, បតិដ្ឋាបេសិ សាធុកន្តិ.

តទាច អម្ហាកំ ធម្មិកមហារាជា សក្ករាជេ ឯកូនវីសតាធិកេ សហស្សេ ទ្វិសតេច សម្បត្តេ មន្តលាខ្យាតាចលស្ស សមីបេ សុភូមិលក្ខណោបេតំ ឯកនិបាតតិត្ថមិវ ពហុជននយនវិហង្គានំ សព្ពនគរាលង្ការេហិ បរិក្ខិត្តំ មនុស្សានំ ចក្ខុលោលតាជនកំ នានារតនេហិ សម្បុណ្ណំ នានា វេរជ្ជវាណិជានំ បុដភេទនដ្ឋានភូតំ រតនបុណ្ណនាមកំ មហារាជដ្ឋានិកំ មាបេសិ, មន្ធាតុវិយ រាជគហំ, សុទស្សនោ វិយច កុសាវតីនគរន្តិ. តេនាវោចុម្ហា នាគរាជុប្បត្តិកថាយំ,–

តទា កដ្ឋដឈេ សម្បត្តេ, មន្តលាខ្យាចលស្សច;

ឯរាវតីតិ នាមាយ, មាបេសិ សមីបេ នគរំ.

សុភូមិលក្ខណោបេតំ ¶ , រតនបុណ្ណនាមកំ;

រាជគហំវ មន្ធាតុ, អកិរម្មណិយំ សុភន្តិ.

សេយ្យថាបិ នាម លោកេ អាលោកត្ថិកានំ សត្តានំ បីតិសោមនស្សំ ឧប្បាទេន្តោ ឧបករោន្តោ ឧទយបព្ពតតោ សហស្សរំសី ទិវាករោ ឧដ្ឋហតិ, ឯវមេវំ មរម្មរដ្ឋិកានំ លជ្ជីបេសលានំ សិក្ខាកាមានំ ភិក្ខូនំ គិហីនញ្ច បីតិសោមនស្សំ ឧប្បាទេន្តោ ឧបការោន្តោ អយំ ធម្មិកោរាជា ឥមស្មិំ មរម្មរដ្ឋេ ឧប្បជ្ជតិ.

ឥមញ្ច ធម្មិករាជានំ និស្សាយ មរម្មរដ្ឋេ សម្មាសម្ពុទ្ធស្ស សាសនំ អតិវិយ ជោតេតិ. វុឌ្ឍិំ វិរូឡិំ វេបុល្លំ អាបជ្ជតិ.

សាសនញ្ច នាមេតំ រាជានំ និស្សាយ តិដ្ឋតីតិ. អយំ ធម្មិករាជាយេវ ន សាសនស្សូបការោ ធម្មចារី ធម្មមានី, អបិច ខោ ធម្មិករាជានំ និស្សិតាបិ សព្ពរដ្ឋវាសិកា សាសនស្សូបការាយេវ ធម្មចារិនោ ធម្មមានិនោ រាជានុគតា ហុត្វា. តេនេវាហ មហាពោធិជាតកាទីសុ, –

គវញ្ចេ តរមានានំ, ឧជុំ គច្ឆតិ បុង្គវោ;

សព្ពា គាវី ឧជុំ យន្តិ, នេត្តេ ឧជុំ គតេ សតិ.

ឯវមេវ មនុស្សេសុ, យោ ហោតិ សេដ្ឋសម្មតោ;

សោ ចេបិ ធម្មំ ចរតិ, បគេវ ឥតរា បជា;

សព្ពរដ្ឋំ សុខំ សេតិ, រាជា ចេ ហោតិ ធម្មិកោតិ.

វិសេសតោ បន ទុតិយំ អមរបុរំ មាបេន្តស្ស មហាធម្មរញ្ញោ អគ្គមហេសិយា អជ្ជវមទ្ទវសោហជ្ជាទិគុណយុត្តាយ ធិតា អម្ហាកំ រញ្ញោ អគ្គមហេសី សម្មាចារិនី បតិព្ពតា. សព្ពនារីនំ អគ្គភាវំ បត្តាបិ សមានា កាមគុណសង្ខាតេន សុរាមទេន អប្បមជ្ជិត្វា បុញ្ញកម្មេសុ អប្បមាទវសេន និច្ចារទ្ធវីរិយា ហោតិ. និច្ចំ បរិយត្តិយា ឧគ្គហណំ អកាសិ. វេទបារគូច ¶ អហោសិ. សម្មាសម្ពុទ្ធសាសនេ អតិវិយ បសន្នា អញ្ញាបិ ឱរោធាទយោ មហាធម្មរញ្ញោ ឱវាទេ ឋត្វា ធម្មំ ចរិំសុ. សាសនំ បសីទិំសុយេវ. ឧបរាជាបិ មហាធម្មរាជស្ស ឯកមាតាបីតិកោ មហាធម្មរាជិច្ឆាយ អវិរោធេត្វាយេវ សកលរដ្ឋវាសីនំ គិហីនំ ភិក្ខូនញ្ច អត្ថហិតមាវហតិ, សេយ្យថាបិ ចក្កវត្តិរញ្ញោ សន្តិកេ ជេដ្ឋបុត្តោ ថាមជវសម្បន្នោ អតិសូរោ ឧដ្ឋានវីរិយោ. អញ្ញេបិ អមច្ចា អនេកសហស្សប្បមាណា មហាធម្មរញ្ញា លទ្ធេសុ លទ្ធេសុ ឋានន្តរេសុ ឋិតា មហាធម្មរញ្ញោ តំ តំ កិច្ចមាវហន្តិ បុញ្ញកម្មេសុ អភិរមន្តិ. សកលរដ្ឋវាសិនោច មនុស្សា ទានសីលភាវនាសុយេវ ចិត្តំ ឋបេន្តិ. ភិក្ខូច សង្ឃរាជប្បមុខាទយោ ថេរនវមជ្ឈិមា គន្ថធុរវិបស្សនាធុរេសុ អភិយុញ្ជន្តិ.

ឯវមេកស្ស សាធុជ្ជនស្ស គុណំ មហន្តេន ឧស្សាហេន កថេន្តោបិ ទុក្ករំតាវ និដ្ឋំ បាបេតុំ, ភគវតោ បន តិលោកគ្គស្ស អនេកសហស្សបារមិតានុភាវេន បវត្តំ គុណំ កោ នាម បុគ្គលោ សក្ខិស្សតិ និដ្ឋំ បាបេត្វា កថេតុន្តិ. ឯវំ មហាធម្មរាជស្សច អគ្គមហេសិយាចេវ ឧបរាជាទីនញ្ច គុណេ វិស្សដ្ឋេន វិត្ថារតោ កថិយមានេ ឥមិស្សា សាសនវំសប្បទីបិកាយ អនេកសតភាណវារមត្តម្បិ បត្វា បរិយន្តោ ន បញ្ញាយេយ្យ, យស្មាច អតិប្បបញ្ចា ភវេយ្យ, តស្មា សង្ខេបេនេវាយំ កថិតា សាធុជ្ជនានំ មហាបុញ្ញមយាយ បីតិយា អនុមោទនត្ថាយ. ឥទញ្ហិ សុណន្តេហិ សាធុជ្ជនេហិ អនុមោទិតព្ពំ,- អសុកស្មិំ កិរ កាលេ អសុកស្មិំ រដ្ឋេ អសុកោ នាម រាជា សាសនំ បគ្គណ្ហិត្វា វុឌ្ឍិំ វិរូឡិំ វេបុល្លមាបជ្ជិ, សេយ្យថាបិ នាម រុក្ខោ ភូមោទកានំ និស្សាយ វុឌ្ឍិំ វិរូឡិំ វេបុល្លមាបជ្ជីតិ.

ឥមស្ស រញ្ញោ កាលេ ញេយ្យធម្មាភិមុនិវរញ្ញាណកិត្តិ សិរិធជធម្មសេនាបតិមហាធម្មរាជាធិរាជគុរុ នាម សង្ឃរាជា ¶ មហាថេរោ រញ្ញា អភិយាចិតោ សុរាជមគ្គទីបនិំ នាម គន្ថំ អកាសិ. មជ្ឈិមនិកាយដ្ឋកថាយ អត្ថំ សិស្សានំ វាចេត្វា យថាវាចិតនិយាមេន អត្ថយោជនានយំ បោត្ថកេ អារោបាបេសិ.

មេធាភិវំសសទ្ធម្មធជមហាធម្មរាជាធិរាជគុរុ នាម មហាថេរោ ជាតកបាឡិយា អត្ថយោជនានយំ មរម្មភាសាយ អកាសិ.

សង្ឃរាជស្ស សិស្សោ បញ្ញាសាមិសិរិកវិធជមហាធម្មរាជាធិរាជគុរូតិ រញ្ញា លទ្ធនាមលញ្ឆោ សោយេវាហំ ធម្ម រញ្ញា អគ្គមហេសិយាច អភិយាចិតោ សីលកថំ នាម គន្ថំ ឧបាយកថំ នាម គន្ថញ្ច អកាសិំ. រញ្ញោ អាចរិយភូតេន ទិសាបាមោក្ខេន នាម ឧបាសកេន អភិយាចិតោ សោយេវាតំ អក្ខរវិសោធនិំ នាម គន្ថំ អាបត្តិវិនិច្ឆយំ នាម គន្ថញ្ច. តថា សង្ឃរញ្ញា ចោទិតោ សោយេ វាហំ នាគរាជុប្បតិកថំ វោហារត្ថភេទញ្ច វិវាទវិនិច្ឆយញ្ច អកាសិំ. តថា បញ្ចជម្ពុគាមភោជកេន លេខកាមច្ចេន ទ្វីហិច អារោចនលេខកាមច្ចេហិ អភិយាចិតោ សោ យេវាហំ រាជសេវកទីបនិំ នាម គន្ថំ អកាសិំ. តថា ទីឃនាវានគរភោជកេន មហាអមច្ចេន អភិយាចិតោ សោយេវាហំ និរយកថាទីបកំ នាម គន្ថំ អកាសិំ. តថា សិលាលេឌ្ឌុកនាមកេន ឧបាសកេន អភិយាចិតោ សោយេវាហំ ឧបោសថវិនិច្ឆយំ នាម គន្ថំ អកាសិំ. តថា ពហូហិ សោតុជនេហិ អភិយាចិតោ សោយេវាហំ សទ្ទនីតិយា សំវណ្ណនំ បាឡិភាសាយ អកាសិន្តិ.

ឯកស្មិញ្ច សមយេ កលិយុគេ វីសាធិកេ ទ្វិសតេ សហស្សេច សម្បត្តេ រញ្ញោ ឯតទហោសិ,- ឥទានិ ពុទ្ធស្ស ភគវតោ សាសនេ កេសញ្ចិ ភិក្ខូនំ សាមណេរានញ្ច កុលទូសនាទិអសារុប្បកម្មេហិ ឧប្បាទិតា ចត្តារោ បច្ចយា ពហូ ទិស្សន្តិ ¶ , កេចិបិ អលជ្ជី បុគ្គលា ជាតរូបាទិនិស្សគ្គិយវត្ថុម្បិសាទិយន្តិ, កេចិបិ វិនា បច្ចយំ វិកាលេ តម្ពុលំ ខាទន្តិ, សន្និធិញ្ច កត្វា ធូមានិច បិវន្តិ, អគិលានា ហុត្វា សឧបាហនា គាមំ បវិសន្តិ, ឆត្តំ ធារេន្តិ, អញ្ញេបិ អវិនយានុលោមាចារេ ចរន្តិ, ឥទានិ ភិក្ខូនំ សាមណេរានញ្ច ពុទ្ធស្ស សម្មុខេ ពុទ្ធំ សក្ខិំ កត្វា ឥមេ អនាចារេ ន ចរិស្សាមាតិ បដិញ្ញំ ការាបេត្វា ភគវតោ សិក្ខាបទានិ រក្ខាបេតុំ វដ្ដតិ, ឯវញ្ច សតិ ភិក្ខូ សាមណេរាច មយំ ពុទ្ធស្ស សម្មុខេ ឯវំ បដិញ្ញំ ករោម, បដិញ្ញញ្ច កត្វា វិការំ អាបជ្ជន្តានំ អម្ហាកំ ឥមស្មិំយេវ អត្តភាវេ ឥមស្មិំយេវ បច្ចក្ខេ កិញ្ចិ ភយំ ឧប្បជ្ជេយ្យាតិ បច្ចក្ខភយំ អបេក្ខិត្វា តេ សិក្ខាបទំ រក្ខិស្សន្តីតិ. ឯវំ បន ចិន្តេត្វា ភិក្ខូនំ សាមណេរានញ្ច ឯវំ បដិញ្ញំ ការាបេតុំ យុជ្ជតិ វា មា វាតិ មយំ ន ជានាម, ឥទានិ សង្ឃរាជាទយោ មហាថេរេ សន្និបាតាបេត្វា បុច្ឆិស្សាមីតិ បុន ចិន្តេសិ.

អថ សព្ពេបិ មហាថេរេ សង្ឃរាជស្ស វិហារេ សន្និបាតាបេត្វា ឥមំ ការណំ បុច្ឆថាតិ អមច្ចេ អាណាបេសិ. អថ អមច្ចា មហាថេរេ សន្និបាតាបេត្វា បុច្ឆិំសុ,-ឥទានិ ភន្តេ សាសនេ ភិក្ខូនំ សាមណេរានញ្ច អវិនយានុលោមាចារានិ ទិស្វា ពុទ្ធស្ស សម្មុខេ ពុទ្ធំ សក្ខិំ កត្វា រាជា យថា ឥមេ អនាចារេ ន ចរិស្សាមាតិ បដិញ្ញំ ការាបេត្វា ភគវតោ សិក្ខាបទានិ រក្ខាបេតុំ ឥច្ឆតិ, តថា ការាបេតុំ យុជ្ជតិ វា មា វាតិ.

អថ សង្ឃរាជប្បមុខាទយោ មហាថេរា ឯវមាហំសុ,- យស្មា សាសនស្ស បរិសុទ្ធភាវំ ឥច្ឆន្តោ ឯវំ ករោតិ, តស្មា តថា ការាបេតុំ យុជ្ជតីតិ.

បណ្ឌិតាភិធជមុនិន្ទឃោសមហាធម្មរាជគុរុត្ថេរាទយោ បន កតិបយត្ថេរា ឯវមាហំសុ, – ឥទានិ ភិក្ខូ នាម សទ្ធាពលាទីនំ ¶ ថោកតាយ ភគវតោ អាណាសង្ខាតំ សចិត្តកាចិត្តកាបត្តិឥំ អាបជ្ជិត្វា ភគវតាយេវ អនុញ្ញាតេហិ ទេសនាវុដ្ឋានកម្មេហិ បដិករិត្វា សីលំ បរិសុទ្ធំ កត្វា លជ្ជីបេសលភាវំ ករោន្តិ, ន កទាចិ អាបត្តិំ អនាបជ្ជិត្វា, តស្មា ភគវតា បដិក្ខិត្តំ កម្មំ សញ្ចិច្ចន វីតិក្កមិស្សាមាតិ ពុទ្ធស្ស សម្មុខេ បដិញ្ញាករណំ អតិភារិយំ ហោតិ, សចេបិ បុព្ពេ បដិញ្ញំ កត្វា បច្ឆា វិសំវាទេយ្យ, ឯវំ សតិ បដិស្សវវិសំវាទេ សុទ្ធចិត្តស្ស ទុក្កដំ បដិស្សវក្ខណេឯវ បាចិត្តិ ឥតរស្សចាតិ វចនតោ តំ តំ អាបត្តិំ បដិស្សវវិសំវាទនទុក្កបេត្តិយា សហេវ អាបជ្ជេយ្យ, អថ បដិញ្ញាករណតោយេវ អាបត្តិពហុលតា ភវេយ្យ, យថា បន រោគំ វូបសមិតុំ អសប្បាយភេសជ្ជំ បដិសេវតិ, អថស្ស រោគោ អវូបសមិត្វា អតិក្កមេយ្យ, ឯវំ អាបត្តិំ អនាបជ្ជិតុកាមោ ពុទ្ធស្ស សម្មុខេ បដិញ្ញំ ករោតិ, អថស្ស អាបត្តិពហុលាយេវ ភវេយ្យាតិ, កិញ្ច ភិយ្យោ អភយទស្សាវិនោ ភិក្ខូ អនេកសតពុទ្ធស្ស សម្មុខេ អនេកសតវារានិបិ បដិញ្ញំ កត្វា សិក្ខាបទំ វីតិក្កមិតុំ វិសហិស្សន្តិយេវាតិ.

អថ សង្ឃរាជា មហាថេរោ អត្តនោ សិស្សំ បញ្ញាសាមិសិរិកវិធជមហាធម្មរាជាធិរាជគុរុំ នាម មំ ឧយ្យោជេសិ, តស្ស ថេរស្ស វចនេ បដិវចនំ ទាតុំ.

អថាហំ ឯវំ វទាមិ,- ទ្វេ បុគ្គលា អភព្ពា សញ្ចិច្ច អាបត្តិំ អាបជ្ជិតុំ ភិក្ខូច ភិក្ខុនិយោច អរិយា បុគ្គលា, ទ្វេ បុគ្គលា សព្ពា សញ្ចិច្ច អាបត្តិំ អាបជ្ជិតុំ ភិក្ខូច ភិក្ខុនិយោច បុថុជ្ជនាតិ បរិវារបាឡិយំ វុត្តត្តា អរិយបុគ្គលានំវិយ បុថុជ្ជនានំ វិស្សដ្ឋេន បដិញ្ញំ កាតុំ ន វដ្ដតីតិ មនសិករិត្វា បុថុជ្ជនភិក្ខូនំ បដិញ្ញាករណំ អតិភារិយន្តិ វេទេយ្យចេ, សព្ពេហិបិ អរិយបុថុជ្ជនេហិ ភិក្ខូហិ ឧបសម្បទាមាឡកេ អាទិតោវ ¶ ចត្តារិ អករណីយានិ អាចិក្ខិតព្ពានីតិ វុត្តេសុ ចតូសុ អករណីយេសុ អន្តមសោ តិណសលាកំ ឧបាទាយ យោ ភិក្ខុ បាទំ វា បាទារហំ វា អតិរេកបាទំ វា អទិន្នំ ថេយ្យសង្ខាតំ អាទិយតិ, អស្សមណោ ហោតិ អសក្យបុត្តិយោតិ, អន្តមសោ កុន្តកិបិល្លិកំ ឧបាទាយ យោ ភិក្ខុ សញ្ចិច្ច មនុស្សវិគ្គហំ ជីវិតំ វោរោបេសិ, អន្តមសោ គព្ភបាតនំ ឧបាទាយ អស្សមណោ ហោតិ អសក្យបុត្តិយោតិ, អន្តមសោ សុញ្ញាគារេ អភិរមាមីតិ យោ ភិក្ខុបាបិច្ឆោ ឥច្ឆាបកតោ អសន្តំ អភូតំ ឧត្តរិមនុស្សធម្មំ ឧល្លបតិ, អស្សមណោ ហោតិ អសក្យបុត្តិយោតិច ឧបជ្ឈាចរិយេន ឱវទិយមានេហិ អភិនវោបសម្បន្នេហិ អាម ភន្តេតិ បដិញ្ញាកថាយេវ. សាមណេរេហិបិ បព្ពជ្ជក្ខណេយេវ ឧបជ្ឈាយស្ស សន្តិកេ បាណាតិបាតាវេរមណិសិក្ខាបទំ សមាទិយាមីតិអាទិនា បឋមំ បដិញ្ញា កតាយេវ. តថា ភិក្ខូហិ តំតំអាបត្តិំ អាបជ្ជិត្វា ទេសនាយ បដិករណកាលេ សាធុ សុដ្ឋុ ភន្តេ សំវរិស្សាមីតិ អភិណ្ហំ បដិញ្ញា កតាយេវ. សាមណេរេហិបិ ឧបជ្ឈាចរិយស្ស សន្តិកេ សិក្ខាគ្គហណកាលេបិ បាណាតិបាតាវេរ មណិសិក្ខាបទំ សមាទិយាមីតិអាទិនា អភិណ្ហំ បដិញ្ញា កតាយេវ. តាហិ បន បដិញ្ញាហិ អភាយិត្វា ឥតោយេវ ភាយាមីតិ វុត្តវចនំ អច្ឆរិយំវិយ ហុត្វា ខាយតិ. ឥមាយ ហិ បដិញ្ញាយ តាសំ បដិញ្ញានំ វិសេសតា ន ទិស្សតីតិ.

អយំ បនេត្ថ សន្និដ្ឋានត្ថោ,- បដិស្សវទុក្កដាបត្តិ នាម សាវត្ថិយំ បស្សេនទិកោសលរញ្ញា ឥមស្មិំ វិហារេ វស្សំ ឧបគច្ឆាហីតិ អាយាចិតេ សាធូតិ បដិជានិត្វា លាភពហុលតំ បដិច្ច អន្តរាមគ្គេ អញ្ញស្មិំ វិហារេ វស្សំ ឧបគន្ត្វា បដិស្សវវិសំវាទនបច្ចយា ឧបនន្ទំ នាម ភិក្ខុំ អារព្ភ បញ្ញត្តា. សមន្តបាសាទិកញ្ច នាម វិនយដ្ឋកថាយ វស្សូបនាយិកក្ខន្ធកវណ្ណនាយំ ¶ បដិស្សវេច អាបត្តិ ទុក្កដស្សាតិ ឯត្ថ ន កេវលំ ឥមំ តេមាសំ ឥធ វស្សំ វសថាតិ ឯតស្សេវ បដិស្សវេ អាបត្តិ, ឥមំ តេមាសំ ភិក្ខំ គណ្ហថ, ឧភោបិ មយំ វស្សំ វសិស្សាម, ឯកតោ ឧទ្ទិស្សាបេស្សាមាតិ ឯវមាទិនាបិ តស្ស តស្ស បដិស្សវេ ទុក្កដំ, តញ្ច ខោ បឋមំ សុទ្ធចិត្តស្ស បច្ឆា វិសំវាទនបច្ចយា, បឋមម្បិ អសុទ្ធ ចិត្តស្ស បន បដិស្សវេ បាចិត្តិយន្តិ វុត្តំ.

ឥច្ចេវំ ភិក្ខូនំ អញ្ញមញ្ញំ ទាយកេហិច សទ្ធិំ បដិជានិត្វា វិសំវាទនបច្ចយា អញ្ញេសំ អត្ថហិតភេទេយេវ ទុក្កដាបត្តិ វុត្តា, ន អត្តនោ ឥច្ឆាវសេន សយមេវ អហំ ភុញ្ជិស្សាមិ សយិស្សាមីតិ ឯវមាទិនា វត្វា យថាវុត្តានុរូបំ អកត្វា វិសំវាទនេតិ. សចេ បន ភិក្ខុសាមណេរានំ បឋមមេវ អាម ភន្តេតិអាទិនា បដិញ្ញំ កត្វា បច្ឆា កេនចិទេវ ករណីយេន តំតំអាបត្តិំ អាបជ្ជន្តោ សហ បដិស្សវវិសំវាទេន ទុក្កដាបត្តិយា អាបជ្ជេយ្យ, ឯវំ សតិ តត្ថ តត្ថ សិក្ខាបទេសុ ទ្វេ ទ្វេ អាបត្តិយោ បញ្ញាបេយ្យ, ន ច ឯវម្បិ បញ្ញត្តា, តេនេវ បដិស្សវទុក្កដាបត្តិ នាម បរេសំ សន្តិកេ បរេសំ មតិំ គហេត្វា បដិជានិត្វា វិសំវាទនដ្ឋានេយេវ បញ្ញត្តាតិ ទដ្ឋព្ពា.

ឥទានិ រាជា សាសនស្ស សុទ្ធិំ ឥច្ឆន្តោ ឥមិនា ឧបាយេន ភិក្ខុសាមណេរានំ សីលំ សំវរាបេន្តោ បច្ចក្ខសម្បរាយិកភយំ អនុបេក្ខិត្វា សំវរំ អាបជ្ជេយ្យុន្តិ ចិន្តេត្វា ពុទ្ធស្ស សម្មុខេ បដិញ្ញំ ការាបិតត្តា ន កោចិ ទោសោ ទិស្សតិ. ភិក្ខុសាមណេរានម្បិ ភិយ្យោសោមត្តាយសីលំ សំវរិត្វា សីលបរិសុទ្ធិ ភវេយ្យាតិ. អថ រាជា សព្ពេសំ ភិក្ខុសាមណេរានំ ពុទ្ធស្ស សម្មុខេ បដិញ្ញំ ការាបេត្វា សីលំ រក្ខាបេសីតិ.

ឥច្ចេវំ ឥមស្ស រញ្ញោ កាលេ បុព្ពេ អលជ្ជិនោបិ សមានា ភយំ អនុបេក្ខិត្វា យេភុយ្យេន លជ្ជិនោវ ភវន្តីតិ.

ពុទ្ធស្ស ¶ ភគវតោ បរិនិព្ពានតោ តិសតាធិកានំ ទ្វិវស្សសហស្សានំ ឧបរិ នវុតិមេ សំវច្ឆរេ ពហិនទីតីរេ គាមសីមតោ បដ្ឋាយ យាវ អន្តោឧទកុក្ខេបា, តាវ កម្មំ ករោន្តានំ ភិក្ខូនំ សុខេន គមនត្ថាយ គហដ្ឋា គាមសីមាយ ឧទកុក្ខេបសីមំ សម្ពន្ធិត្វា សេតុំ អកំសុ.

អថ តត្ថ ញាណាលង្ការសុមនមហាធម្មរាជគុរុគណា ចរិយនាមកោ ថេរោ ឧបសម្បទាទិវិនយកម្មានិ កតិបយ វស្សេសុ អកាសិ.

ធីរានន្ទត្ថេរោ បន តត្ថ សង្ករទោសោ ហោតីតិ កម្មំ កាតុំ ន ឥច្ឆតិ. តថា បដ្ឋាយ យេ យេ ញាណាលង្ការសុមនមហាធម្មរាជគុរុគណាចរិយស្ស មតិំ រុច្ចន្តិ, តេ តេ តស្ស បក្ខិកា ភវន្តិ. យេ យេ បន ធីរានន្ទត្ថេរស្សមតិំ រុច្ចន្តិ, តេតេ តស្ស បក្ខិកា ភវន្តិ. ឯវំលង្កាទីបេ អមរបុរនិកាយិកា ភិក្ខូ. ទ្វេធា ភិន្ទិត្វា តិដ្ឋន្តិ.

អថ ធីរានន្ទបក្ខេ ភិក្ខុ តប្បក្ខិកស្ស សីលក្ខន្ធត្ថេរស្ស សិស្សេ ធម្មក្ខន្ធវនរតនភិក្ខូ អម្ហាកំ ជម្ពុទីបេ រតនបុណ្ណនគរំ បេសេសុំ សង្ឃរាជមហាថេរស្ស សន្តិកេ ឱវាទស្ស បដិគ្គាហណត្ថាយ. តេ ច កលិយុគេ អដ្ឋារសាធិកេ ទ្វិវស្សសតេ សហស្សេច សម្បត្តេ កត្តិកមាសស្ស ជុណ្ហបក្ខអដ្ឋមិយំ សីហឡទីបតោ និក្ខមិត្វា អាគច្ឆន្តា ឯកូនវីសាធិកេ ទ្វិវស្សសតេ សហស្សេច សម្បត្តេ ផគ្គុនមាសស្ស ជុណ្ហបក្ខសត្តមិយំ រតនបុណ្ណនគរំ សម្បត្តា.

អថ ធម្មរាជា សង្ឃរាជស្ស អារាមេ ចតុភូមិកំ វិហារំ ការាបេត្វា តត្ថ តេ វសាបេសិ. ចតូហិ បច្ចយេហិច សង្គហំ អកាសិ. សង្ឃរាជាច តេសំ ទ្វិន្នំ បក្ខិកានំ វចនំ សុត្វា ពហូហិ គន្ថេហិ សំសន្ទិត្វា វិវាទំ វិនិច្ឆិន្ទិ. តាទិសេ ឋានេ សង្ករទោសស្ស អត្ថិភាវំ បកាសេត្វា សន្ទេសបណ្ណម្បិ តេសំ អទាសិ.

មហាធម្មរាជាច ¶ តេសំ បុន សិក្ខំ សង្ឃរាជស្ស សន្តិកេ គណ្ហាបេត្វា បិដកត្តយបោត្ថកាទីនិ ទាតព្ពវត្ថូនិ ទត្វា តស្មិំយេវ សំវច្ឆរេ បឋមអាសាឡិមាសស្ស កាឡបក្ខទសមិយំ នាវាយ តេ បេសេសិ.

តតោ បច្ឆាច ញាណាលង្ការសុមនមហាធម្មរាជគុរុគណាចរិយបក្ខេ ភិក្ខូបិ តប្បក្ខិកស្ស បញ្ញាមោលិត្ថេរស្ស សិស្សេ វិមលជោតិធម្មនន្ទភិក្ខូ បេសេសុំ សទ្ធិំ អរិយាលង្ការេន នាម សាមណេរេន ចតូហិច ឧបាសកេហិ. តេច កលិយុគេ វីសាធិកេ ទ្វិសតេ សហស្សេច សម្បត្តេ កត្តិកមាសស្ស ជុណ្ហបក្ខបញ្ចមិយំ សម្បត្តា.

តទាបិ សង្ឃរាជស្ស អារាមេយេវ ឯកំ វិហារំ ការាបេត្វា តេ វសាបេសិ. ចតូហិ បច្ចយេហិច សង្គហំ អកាសិ. សង្ឃរាជាបិ បុន វិនិច្ឆយំ អទាសិ យថាវុត្តនយេន. ធម្មរាជា តេសម្បិ ភិក្ខូនំ សង្ឃរាជស្ស សន្តិកេ បុន សិក្ខំ គណ្ហាបេត្វា សាមណេរញ្ច ឧបសម្បាទេត្វា ចតូហិ បច្ចយេហិ សង្គហំ កត្វា បហិណិ.

តតោ បច្ឆាច កលិយុគេ ពាវីសាធិកេ ទ្វិវស្សសតេ សហស្សេច សម្បត្តេ មាឃមាសស្ស កាឡបក្ខឯកាទសមិយំ សីហឡទីបតោយេវ ទ្វេ ភិក្ខូ តយោ សាមណេរា ចត្តារោ ឧបាសកា សរជតសុវណ្ណករណ្ឌកំ សរជតសុវណ្ណចេតិយទាតុំ ហត្ថិទន្តមយំ ពុទ្ធរូបំ មហាពោធិបត្តានិ មហាពោធិតចំ មហាពោធិបតិដ្ឋានសូមិំ សីហឡទក្ខិណសាខាពោធិបត្តានិ ទុតិយសត្តាហអនិមិសដ្ឋានភូមិញ្ច ធម្មបណ្ណាការត្ថាយ គហេត្វា រតនបុណ្ណំ នាម មហារាជដ្ឋានីនគរំ សម្បត្តា. តេសម្បិ ធម្មរាជា ចតូហិ បច្ចយេហិ សង្គហំ កត្វា សង្ឃរញ្ញោ អារាមេ វសាបេសិ. ភិក្ខុនញ្ច បុន សិក្ខំ គណ្ហាបេសិ. សាមណេរានញ្ច ឧបសម្បទកម្មំ គហដ្ឋានញ្ច បព្ពជ្ជកម្មំ គណ្ហាបេសិ.

ឥច្ចេវំ មរម្មរដ្ឋេ ភគវតោ បរិនិព្ពានតោ បដ្ឋាយ យាវជ្ជតនា ¶ សាសនស្ស ថេរបរម្បរវសេន បតិដ្ឋានតា វេទិតព្ពា.

ឥច្ចេវំ មរម្មមណ្ឌលេ អរិមទ្ទនបុរេ អរហន្តត្ថេរគណោ ឧត្តរាជីវត្ថេរឆប្បទត្ថេរគណោ សិវលិត្ថេរគណោ អានន្ទត្ថេរគណោ តាមលិន្ទត្ថេរគណោតិ បញ្ច គណា អហេសុំ.

ឥទានិ អរិមទ្ទននគរេ បញ្ចគណតោ បដ្ឋាយ វិជយបុរជេយ្យបុររតនបូរេសុ ថេរបរម្បរវសេន សាសនស្ស អនុក្កមេន អាគតភាវំ ទស្សយិស្សាមិ. សិរិខេត្តនគរេ ហិ ‘សោ យាំ នោំ’ នាម រាជា បរក្កមវំសិកស្ស សារទស្សិត្ថេរស្ស អន្តេវាសិកំ សទ្ធម្មដ្ឋិតិត្ថេរំ អត្តនោ អាចរិយំ កត្វា បូជេសិ.

កលិយុគស្ស ចតុវស្សាធិកអដ្ឋសតកាលេ សិរិខេត្តនគរតោ អាគន្ត្វា សោ រតនបូរេ រជ្ជំ ការេសិ. អថ អត្តនោ បុត្តំ អនេកិភំ នាម រាជកុមារំ មហារាជ នាមេន សិរិខេត្តនគរំ ភុញ្ជាបេសិ. ទក្ខិណទិសាភាគេ ‘កូ វ្ឋេ ដ-យោ មោ’ នគរំ, បច្ឆិមទិសាភាគេ ‘ផោ ខោំ’ នាម ឋានំ, ឧត្តរទិសាភាគេ ‘ម លោំ’ នគរំ, បុរត្ថិមទិសាភាគេ ‘កោំ ខោំ’ នាម ឋានំ, ឯត្ថន្តរេ និសិន្នានំ គិហីនំ មម បុត្តស្ស អាណា បវត្តតុ, ភិក្ខូនំ មមាចរិយស្ស សទ្ធម្មដ្ឋិតិត្ថេរស្ស អាណា បវត្តតូតិ និយ្យាទេសិ.

តស្សច សទ្ធម្មដ្ឋិតិត្ថេរស្ស អរិយវំសត្ថេរោ មហាសាមិត្ថេរោតិ ទ្វេ សិស្សា អហេសុំ. តេសុ មហាសាមិត្ថេរោ បុព្ពេ វុត្តនយេន សាសនវំសំ អានេស្សាមីតិ សីហឡទីបំ គន្ត្វា សីហឡទីបតោ សទ្ធិំ បញ្ចហិ ភិក្ខូហិ សទ្ធម្មចារិំ នាម ថេរំ អានេត្វា អភិនវសិក្ខំ គណ្ហិត្វា សិរិខេត្តនគរេ សីហឡទីបវំសិកំ សាសនំ វឌ្ឍាបេត្វា និសីទិ. តស្ស មហាសារិត្ថេរស្ស សិស្សោ អតុលវំសោ នាម ថេរោ ចតូសុ ទិសាសុ អហិណ្ឌិត្វា បរិយត្តិំ ឧគ្គណ្ហិត្វា សិរិខេត្តនគរេយេវ ¶ តម្ពុលភុញ្ជមាតិកាសមីបេ សាសនំ បគ្គណ្ហិត្វា និសីទិ. តស្ស អតុលវំសត្ថេរស្ស សិស្សោ រតនរំសី នាម ថេរោច បរិយត្តិវេសារជ្ជំ បត្វា សិរិខេត្តនគរេយេវ សាសនំ បគ្គណ្ហិត្វា និសីទិ. តស្សច រតនរំ សិត្ថេរស្ស សិស្សោ សត្វវធម្មរាជស្ស អាចរិយោ អភិសង្កេតោ នាម ថេរោ បរិយត្តិវេសារជ្ជំ បត្វា សិរិខេត្តនគរយេវ សាសនំ បគ្គណ្ហិត្វា និសីទិ. តស្ស បន សិស្សោ មុនិន្ទឃោសោ នាម ថេរោ អត្ថិ. កលិយុគេ សត្តតាធិកេ នវសតេ សម្បត្តេ បច្ឆិមបក្ខាធិករាជា សិរិខេត្តនគរំ អភិភវិត្វា នន្ទយោធេន នាម អមច្ចេន សទ្ធិំ តំ មុនិន្ទឃោសត្ថេរំ អានេត្វា រតនបូរេ បតិដ្ឋាបេសិ.

សោ កិរ បច្ឆិមបក្ខាធិករាជា ឯវំ កថេសិ,- អហំ សិរិខេត្តនគរំ លភិត្វា ឯកំយេវ ភិក្ខុំ ឯកំយេវ គិហិំ លភាមីតិ.

សោ បន ថេរោ សាមណេរនាមេន មុនិន្ទឃោសោ នាម. ឧបសម្បន្នកាលេ បន មាតុលភូតស្ស ថេរស្ស នាមេន ឧបាលិ នាម. ទិន្ននាមេន បន តិបិដកាលង្ការោ នាម. តិរិយបព្ពតវិហារេ បន វាសត្តា ឋាននាមេន តិរិយបព្ពតត្ថេរោ នាម.

សោ កិរ ឯរាវតីនទីតីរេ ចតុភូមិកវិហារេ បឋមំ និសីទិត្វា បច្ឆា កលិយុគស្ស វស្សសហស្សេ កាលេសដ្ឋិវស្សាយុកោ ហុត្វា តិរិយបព្ពតវិហារេ និសីទិ. សាមណេរកាលេ សោ ជលុមស្យាមភយេន រតនបូរតោ និក្ខមិត្វា កេតុមតីនគរំ បត្វា តត្ថ តិសាសនធជត្ថេរស្ស សិស្សភូតស្ស ធម្មរាជគុរុត្ថេរស្ស សន្តិកេ គន្ថំ ឧគ្គណ្ហិំ. បាឡិអដ្ឋកថាដីកាសុ អតិឆេកតាយ ទហរកាលេយេវច វេស្សន្តរជាតកំ កព្យាលង្ការេន ពន្ធិត្វា កថនតោ អតិវិយ បាកដោ អហោសិ. តស្ស បន ¶ ថេរស្ស សិស្សោ ឧច្ចនគរវាសី មហាតិស្សត្ថេរោតិ សង្គិរជនបទេ អរញ្ញវាសំ វសិត្វា បរិយត្តិំ វាចេត្វា សាសនំ បគ្គណ្ហិ. តស្ស បន សិស្សោ រេមិនគាមេ គាមវាសី ចន្ទត្ថេរោ នាម. តស្ស សិស្សោ តំគាមវាសី គុណសិរិត្ថេរោ នាម. តស្ស សិស្សោ តំគាមវាសី កល្យាណធជត្ថរោ នាម. សោ បន ថេរោ បទុមនគរេ សហស្សោរោធពោធោទធិគាមេសុ បរិយត្តិំ វាចេត្វា និសីទិ. តស្ស សិស្សោ ពោធោទធិគាមវាសិនោ ឥន្ទោភាសកល្យាណចក្កវិមលាចារត្ថេរា សហស្សោរោធគាមវាសិនោ គុណសារចន្ទសារត្ថេរា វំតុមគាមវាសី វរឯសិត្ថេរោ កន្និនគរេ ជររាជគាម វាសី គុណសិរិត្ថេរោចាតិ ឥមេ ថេរា កល្យាណធជត្ថេរស្ស សន្តិកេ បុន សិក្ខំ គហេត្វា បរិយត្តិំ ឧគ្គណ្ហិត្វា កោវិទា អហេសុំ.

តស្សេវ កល្យាណធជត្ថេរស្ស សិស្សោ សង្គិរជនបទេ សមិវនគាមេ និសិន្នោ ធម្មធរោ នាម ថេរោ មហល្លកកាលេ បទុមនគរេ កុសុមមូលគាមេ និសីទិត្វា គន្ថំ វាចេត្វា សាសនំ បគ្គណ្ហិ.

តេសុ គុណសិរិត្ថេរោ អមរបុរមាបកស្ស រញ្ញោ កាលេ គុណាភិលង្ការសទ្ធម្មមហារាជាធិរាជគុរូតិ នាមលញ្ឆំ គណ្ហិត្វា ជេយ្យភូមិវាសកិត្តិវិហារេ បដិវសិ.

តស្ស បន ថេរស្ស សិស្សោ ញាណាភិវំសធម្មសេនាបតិមហាធម្មរាជាគុរុ នាម មហាថេរោ. តស្សេវ រញ្ញោ កាលេ សង្ឃរាជា អហោសិ. សោ បន ថេរោ សីហឡទីបេ អមរបុរនិកាយិកានំ បភវោ. គុណាភិលង្ការសទ្ធម្មមហាធម្មរាជាធិរាជគុរុត្ថេរស្សេវ សិស្សោ តិបិដកាលង្ការមហាធម្មរាជគុរុ នាម ថេរោ. តស្ស សិស្សោ សូរិយវំសាភិសិរិបវរាលង្ការធម្មសេនាបតិ មហាធម្មរាជាធិរាជគុរុ នាម ថេរោ អមរបុរទុតិយមាបកស្ស រញ្ញោ កាលេ ¶ សង្ឃរាជា អហោសិ. តស្ស បន សិស្សោ ញេយ្យ ធម្មាភិវំសមុនិវរញាណកិត្តិសិរិបវរាលង្ការធម្មសេនាបតិ- មហាធម្មរាជាធិរាជគុរុ មហាថេរោ ទុតិយំ អមរបុរមាបកស្ស រតនបុណ្ណមាបកស្សច រញ្ញោ កាលេសុ សង្ឃ រាជា អហោសិ. សោ បន ញាណាភិវំសធម្មសេនាបតិមហាធម្មរាជាធិរាជគុរុត្ថេរស្ស សង្ឃរញ្ញោ សិស្សោបិ វរឯសិត្ថេរស្ស សិស្សោច អហោសិ.

អយំ សីហឡទីបតោ សព្ពបច្ឆិមាគតេហិ សទ្ធម្មចារីមហាសាមិត្ថេរេហិ យាវ អម្ហាកំ អាចរិយា ថេរបរម្បរា ទស្សនកថា.

អយម្បិ អបរា ថេរបរម្បរា វេទិតព្ពា. ឆប្បទត្ថេរវំសិកោ សទ្ធម្មកិត្តិ នាម ថេរោ ជេយ្យបុរំ អាគន្ត្វា ចតុទីបភូមិដ្ឋានេ និសីទិត្វា មហាអរិយវំសត្ថេរស្ស សន្តិកេ បរិយត្តិំ ឧគ្គណ្ហិត្វា តតោ បច្ឆា ជេតវនវិហារំ សង្កមិត្វា តត្ថ និសីទិត្វា បរិយត្តិំ វាចេត្វា សាសនំ បគ្គណ្ហិ.

តស្ស សទ្ធម្មកិត្តិត្ថេរស្ស សិស្សោ តិសាសនធជោ នាម. តស្ស សិស្សោ ធម្មរាជគុរុ នាម. តស្ស សិស្សោ មុនិន្ទឃោសោ នាម. តស្ស សិស្សោ មហាតិស្សោ នាម. តស្ស សិស្សោ ចន្ទបញ្ញោ នាម. តស្ស សិស្សោ គុណសិរិ នាម. តស្ស សិស្សោ ញាណធជោ នាម. តស្ស សិស្សោ ធម្មធរោ នាម. តស្ស សិស្សោ ឥន្ទោភាសោ នាម. តតោ បដ្ឋាយ កល្យាណចក្ក វិមលាចារ គុណសារ ចន្ទសារ វរឯសី គុណសិរិ ញាណាភិវំស ញេយ្យធម្មាភិវំសត្ថេរានំ វសេន សាសនវំសោ វេទិតព្ពោតិ.

អយំ បត្តលង្កស្ស ឆប្បទត្ថេរស្ស សិស្សភូតា សទ្ធម្មកិត្តិត្ថេរតោ បដ្ឋាយ ថេរបរម្បរទស្សនកថា.

ឥទំ រតនបុណ្ណនគរេ សាសនស្ស បតិដ្ឋានំ.

ឯវំ អបរន្តរដ្ឋសង្ខាតេន ឯកទេសេន សកលម្បិ មរម្មរដ្ឋំ ¶ គហេត្វា សាសនវំសោ ទស្សេតព្ពោ. ភគវាបិ ហិ អបរន្តរដ្ឋេ ចន្ទនវិហារេ វសិត្វា តម្ពទីបរដ្ឋេ តំតំទេសម្បិ ឥទ្ធិយា ចរិត្វា សត្តានំ ធម្មំ ទេសេសិយេវាតិ.

ឥតិ សាសនវំសេ អបរន្តរដ្ឋសាសនវំសកថាមគ្គោ

៧. កស្មិរគន្ធាររដ្ឋសាសនវំសកថាមគ្គោ

៧. ឥទានិ យថាវុត្តមាតិកាវសេន កស្មីរវន្ធាររដ្ឋសាសនវំសកថាមគ្គំ វត្តុំ ឱកាសោ អនុប្បត្តោ, តស្មា តំ វក្ខាមិ.

តតិយសង្គីតាវសានេ ហិ មហាមោគ្គលិបុត្តតិស្សត្ថេរោ មជ្ឈន្តិ កត្ថេរំ កស្មីរគន្ធាររដ្ឋំ បេសេសិ,-ត្វំ ឯតំ រដ្ឋំ គន្ត្វា ឯត្ថ សាសនំ បភិដ្ឋាបេហីតិ. ឯត្ថ ច កស្មីរគន្ធាររដ្ឋំ នាម ចីនរដ្ឋសមីបេ តិដ្ឋតិ. តេនេវ ហិ អធុនា កស្មីរគន្ធាររដ្ឋវាសិនោ ចិនរដ្ឋវាសិនោច មនុស្សា អរវាឡស្ស នាម នាគរាជស្ស ឧប្បជ្ជនកាលតោ បដ្ឋាយ យាវជ្ជតនា នាគរូបំ កត្វា មានេន្តិ បូជេន្តិ សក្ករោន្តិ, វត្ថភាជនាទីសុបិ នាគរូបមេវ តេ យេភុយ្យេន ករោន្តីតិ.

សោច មជ្ឈន្តិកត្ថេរោបិ ចតូហិ ភិក្ខូហិ សទ្ធិំ អត្ថ បញ្ចមោ ហុត្វា បាដលិបុត្តតោ វេហាសំ អព្ភុគ្គន្ត្វា ហិមវតិ អរវាឡទហស្ស ឧបរិ ឱតរិ. តេន ខោ បន សមយេន កស្មីរគន្ធាររដ្ឋេ សស្សបាកសមយេ អរវាឡោ នាម នាគរាជា អរវាឡទហេ និសីទិត្វា ករកវស្សំ នាម វស្សាបេត្វា សស្សំ ហរាបេត្វា មហាសមុទ្ទំ បាបេសិ. តេរោច អរវាឡទហស្ស ឧបរិ ឱតរិត្វា អរវាឡទហបិដ្ឋិកំ ចង្កមតិបិ តិដ្ឋតិបិ និសីទតិបិ សេយ្យម្បិ កប្បេតិ. នាគមាណវកា តំ ទិស្វា អរវាឡស្ស នាគរាជស្ស អារោចេសុំ, - មហារាជ ឯកោ ឆិន្នភិន្នបដធរោ ភណ្ឌុកាសាវវសនោ អម្ហាកំ ឧទកំ ទូសេតីតិ. តទា បន ថេរោ អត្តានំយេវ ¶ នាគានំ ទស្សេតិ. នគរាជា តាវទេវ កោធាភិភូតោ និក្ខមិត្វា ថេរំ ទិស្វា មក្ខំ អស្សហមានោ អន្តលិក្ខេ អនេកានិ ភិំសនកានិ និម្មិនិ. តតោ តតោ ភុសាវាតា វាយន្តិ, រុក្ខា ឆិជ្ជន្តិ, បព្ពតកូដា បតន្តិ មេឃាគជ្ជន្តិ, វិជ្ជុំលតា និច្ឆរន្តិ, អសនិយោ ផលន្តិ, ភិន្នំ វិយ គគនំ ឧទកំ បគ្ឃរតិ, ភយានករូបា នាគកុមារា សន្និបតន្តិ, សយម្បិ ធូមាយតិ បជ្ជលតិ, បហរណវុដ្ឋិយោ វិស្សជ្ជេតិ, កោ អយំមុណ្ឌកោ ឆិន្នភិន្នបដធរោតិអាទីហិ ផរុសវចនេហិ ថេរំ សន្តជ្ជេតិ, ឯថ គណ្ហថ ហនថ និទ្ធមថ ឥមំ សមណន្តិ នាគពលំ អាណាបេសិ.

ថេរោ សព្ពំ តំ ភិំសនកំ អត្តនោ ឥទ្ធិពលេន បដិពាហិត្វា នាគរាជានំ អាហ,–

សទេវកោបិ ចេ លោកោ, អាគន្ត្វា តាសយេយ្យ មំ;

ន មេ បដិពលោ អស្ស, ជនេតុំ ភយភេរវំ.

សចេបិ ត្វំ មហិំ សព្ព, សសមុទ្ទំ សបព្ពតំ;

ឧក្ខិបិត្វា មហានាគ, ខិបេយ្យាសិ មមូបរិ.

នេវ មេ សក្កុណេយ្យាសិ, ជនេតុំ ភយភេរវំ;

អញ្ញទត្ថុ តវេវស្ស, វិឃាតោ ឧរគាធិបាតិ.

ឯវំ វុត្តេ នាគរាជា វិហតានុភាវោ និប្ផលវាយាមោ ទុក្ខី ទុម្មនោ អហោសិ.

តំ ថេរោ តង្ខណានុរូបាយ ធម្មិយា កថាយ សន្ទស្សេត្វា សមាទបេត្វា សមុត្តេជេត្វា សម្បហំសេត្វា តីសុ សរណេសុ បញ្ចសុច សីលេសុ បតិដ្ឋាបេសិ សទ្ធិំ ចតុរាសីតិយា នាគសហស្សេហិ. អញ្ញេបិ ពហូ ហិមវន្តវាសិនោ យក្ខាច គន្ធព្ពាច កុម្ភណ្ឌាច ថេរស្ស ធម្មកថំ សុត្វា សរណេសុច សីលេសុច បតិដ្ឋហិំសុ. បញ្ចកោបិ យក្ខោ សទ្ធិំ ភរិយាយ យក្ខិនិយា បញ្ចហិច បុត្តសតេហិ បឋមេ ¶ ផលេ បតិដ្ឋិតោ. អថាយស្មា មជ្ឈន្តិ កត្ថេរោ សព្ពេនាគយក្ខរក្ខសេ អាមន្តេត្វា ឯវមាហ,-

មាទានិ កោធំ ជនយិត្ថ, ឥតោ ឧទ្ធំ យថា បុរេ;

សស្សឃាតញ្ច មា កត្ថ, សុខកាមា ហិ បាណិនោ;

ករោថ មេត្តំ សត្តេសុ, វសន្តុ មនុជា សុខន្តិ.

តេ សព្ពេបិ សាធុ ភន្តេតិ ថេរស្ស វចនំ បដិស្សុណិត្វា យថានុសិដ្ឋំ បដិបជ្ជិំសុ. តំ ទិវសមេវ នាគរាជស្ស បូជាសមយោ ហោតិ. អថ នាគរាជា អត្តនោ រតនមយំ បល្លង្កំ អាហរាបេត្វា ថេរស្ស បញ្ញបេសិ. និសីទិ ថេរោ បល្លង្កេ. នាគរាជាបិ ថេរំ ពីជយមានោ សមីបេ អដ្ឋាសិ. តស្មិំ ខណេ កស្មីរគន្ធាររដ្ឋវាសិនោ អាគន្ត្វា ថេរំ ទិស្វា អម្ហាកំ នាគរាជតោបិ ថេរោ មហិទ្ធិកតរោតិ ថេរមេវ វន្ទិត្វា និសិន្នា. ថេរោ តេសំ អាសិវិសោបមសុត្តំ កថេសិ. សុត្តបរិយោសានេ អសីតិយាបាណសហស្សានំ ធម្មាភិសមយោ អហោសិ. កុលសតសហស្សញ្ច បព្ពជិ. តតោ បភុតិ ច កស្មីរគន្ធារោ យាវជ្ជេតនា កាសាវបជ្ជោតា ឥសិវាតបដិវាតាឯវ.

គន្ត្វា កស្មីរគន្ធារំ, ឥសិ មជ្ឈន្តិកោ តទា;

ទុដ្ឋំ នាគំ បសាទេត្វា, មោចេសិ ពន្ធនា ពហូតិ.

អធុនា បន កស្មីរគន្ធាររដ្ឋេ សាសនស្ស អត្ថង្គតស្សវិយ សូរិយស្ស ឱភាសោ ន បញ្ញាយតិ, តស្មា តត្ថ សាសនស្ស បតិដ្ឋានេ វិត្ថារេន វត្តព្ពកិច្ចំ នត្ថីតិ.

ឥតិ សាសនវំសេ កស្មីរគន្ធាររដ្ឋសាសនវំសកថាមគ្គោ

៨. មហិំសករដ្ឋស្សាសនវំសកថាមគ្គោ

៨. ឥទានិ ¶ យថាវុត្តមាតិកាវសេន មហិំសករដ្ឋសាសនវំសកថាមគ្គំ វត្តុំ ឱកាសោ អនុប្បត្តោ, តស្មា តំ វក្ខាមិ.

តតិយសង្គីតាវសានេ ហិ មហាមោគ្គលិបុត្តតិស្សត្ថេរោ មហារេវត្ថេរំ មហិំសកមណ្ឌលំ បេសេសិ,- ត្វំ ឯតំ រដ្ឋំ គន្ត្វា ឯត្ថ សាសនំ បតិដ្ឋាបេហីតិ.

សោច អត្តបញ្ចមោ ហុត្វា មហិំសកមណ្ឌលំ អគមាសិ បច្ចន្តិមេសុ ជនបទេសុ បញ្ចវគ្គោ គណោ អលំ ឧបសម្បទកម្មាយាតិ មញ្ញមានោ. ថេរោ មហិំសកមណ្ឌលំ គន្ត្វា ទេវទូតសុត្តំ កថេសិ. សុត្តបរិយោសានេ ចត្តាលីសបាណសហស្សានិ ធម្មចក្ខុំ ប្បដិលភិំសុ. ចត្តាលីសំយេវ បាណសហស្សានិ បព្ពជិំសុ.

គន្ត្វាន រដ្ឋំ មហិំសំ, មហារេវោ មហិទ្ធិកោ;

ចោទេត្វា ទេវទូតេហិ, មោចេសិ ពន្ធនា ពហូតិ.

អធុនា បន តត្ថ សាសនស្ស អព្ភេហិវិយ បដិច្ឆន្នស្ស សូរិយស្ស ឱកាសោ ទុព្ពលោ ហុត្វា បញ្ញាយតិ.

ឥតិ សាសនវំសេ មហិំសករដ្ឋសាសនវំសកថាមគ្គោ

៩. ឥតោ បរំ មហារដ្ឋសាសនវំសកថាមគ្គំ កថយិស្សាមិ យថាវុត្តមាតិកាវសេន.

តតិយសង្គីតាវសានេ ហិ មហាមោគ្គលិបុត្តតិស្សត្ថេរោ មហាធម្មរក្ខិត្ថេរំ មហារដ្ឋំ បេសេសិ,-ត្វំ ឯតំ រដ្ឋំ គន្ត្វា ឯត្ថ សាសនំ បតិដ្ឋាបេសីតិ.

មហាធម្មរក្ខិតត្ថេរោច អត្តបញ្ចមោ ហុត្វា មហារដ្ឋំ គន្ត្វា មហានារទកស្សបជាតកកថាយ មហារដ្ឋកេ បសាទេត្វា ¶ ចតុរាសីតិបាណសហស្សានិ មគ្គផលេសុ បតិដ្ឋាបេសិ. តេរសសហស្សានិ បព្ពជិំសុ. ឯវំ សោ តត្ថ សាសនំ បតិដ្ឋាបេសិ.

មហារដ្ឋំ ឥសិ គន្ត្វា, សោ មហា ធម្មរក្ខិតោ;

ជាតកំ កថយិត្វាន, បសាទេសិ មហាជនន្តិ.

តត្ថ កិរ មនុស្សា បុព្ពេ អគ្គិហុតាទិមិច្ឆាកម្មំ យេភុយ្យេន អកំសុ. តេនេវ ថេរោ មហានារទកស្សបជាតកកថំ ទេសេសិ. តតោ បដ្ឋាយ តត្ថ មនុស្សា ជាតក កថំ យេភុយ្យេន សោតុំ អតិវិយ ឥច្ឆន្តិ. ភិក្ខូច យេភុយ្យេន គហដ្ឋានំ ជាតកកថំយេវ ទេសេន្តិ. វិសេសតោ បន វស្សន្តរជាតកកថំ តេ មនុស្សា ពហូហិ ទាតព្ពវត្ថូហិ បូជេត្វា សុណន្តិ.

តញ្ច មហារដ្ឋំ នាម ស្យាមរដ្ឋសមីបេ ឋិតំ, តេនេវ ស្យាមរដ្ឋវាសិនោបិ ភិក្ខូ គហដ្ឋាច យេភុយ្យេន សោតុំ ឥច្ឆន្តីតិ. មហាធម្មរក្ខិតត្ថេរោបិ មហារដ្ឋវាសីហិ សទ្ធិំ សកលស្យាមរដ្ឋវាសីនំ ធម្មំ ទេសេសិ, អមតរសំ បាយេសិ, យថា យោនកធម្មរក្ខិតត្ថេរោ អបរន្តរដ្ឋំ គន្ត្វា សកលមរម្មរដ្ឋវាសីនន្តិ.

យំ បន យោនករដ្ឋសាសនវំសកថាយំ វុត្តំ, តម្បិ សព្ពំ ឯត្ថាបិ ទដ្ឋព្ពំយេវ, តេហិ តស្ស ឯកសទិសត្តេន ឋិតត្តាតិ. តថា ហិ នាគសេនត្ថេរោបិ យោនករដ្ឋេ វសិត្វា ស្យាមរដ្ឋាទីសុបិ សាសនំ បតិដ្ឋាបេសិ. យោនករដ្ឋវាសិនោ មហាធម្មគម្ភីរត្ថេរមហាមេធង្ករត្ថេរាច សទ្ធិំ ពហូហិ ភិក្ខូហិ សីហឡទីបំ គន្ត្វា តតោ បុនាគន្ត្វា ស្យាមរដ្ឋេ សោក្កតយនគរំ បត្វា តត្ថ និសីទិត្វា សាសនំ បគ្គណ្ហិត្វា បច្ឆា លកុន្ននគរេ និសីទិត្វា សាសនំ បគ្គណ្ហិ. ឯវំ យោនករដ្ឋេ សាសនំ ឋិតំ ស្យាមាទីសុបិ ឋិតំយេវាតិ ទដ្ឋព្ពំ.

ពុទ្ធស្ស ភគវតោ បរិនិព្ពានតោ ទ្វិសតាធិកានំ ទ្វិន្នំ វស្សសហស្សានំ ¶ ឧបរិ នវុតិមេ វស្ស សីហឡទីបេ រជ្ជំ បត្តស្ស កិត្តិស្សិរិរាជសីហមហារាជស្ស អភិសេកតោ តតិយេ វស្សេ តេនេវ កិត្តិស្សិរិរាជសីហមហារញ្ញា បហិតបណ្ណាការសាសនំ អាគម្ម សរាមាធិបតិធម្មិកមហារាជាធិរាជេនាណត្តេហិ លង្កាទីបំ អាគតេហិ ឧបាលិត្ថេ រាទីហិ បតិដ្ឋាបិតោ វំសោ ឧបាលិវំសោតិ បាកដោ. សោច ទុវិធោ បុព្ពារាមវិហារវាសីអភយគិរិវិហារវាសីវសេនាតិ. ឯវំ មហានគរយោនកល្យាមរដ្ឋេសុ សាសនំ ថិរំ ហុត្វា តិដ្ឋតីតិ វេទិតព្ពន្តិ.

ឥតិ សាសនវំសេ មហារដ្ឋសាសនវំសកថាមគ្គោ នាម

១០. តតោ បរំ បវក្ខាមិ ចីនរដ្ឋសាសនវំសកថាមគ្គំ យថាដ្ឋវិតមាតិកាវសេន.

តតិយសង្គីតាវសានេ ហិ មហាមោគ្គលិបុត្តតិស្សត្ថេរោ មជ្ឈិមត្ថេរំ ចិនរដ្ឋំ បេសេសិ,-ត្វំ ឯតំ រដ្ឋំ គន្ត្វា ឯត្ថ សាសនំ បតិដ្ឋាបេហីតិ.

មជ្ឈិមត្ថេរោច កស្សបគោត្តរេន អឡករេវត្ថេរេន ទុន្ទភិយត្ថេរេន មហារេវត្ថេរេនច សទ្ធិំ ហិមវន្តប្បទេសេ បញ្ចចីនរដ្ឋំ គន្ត្វា ធម្មចក្កប្បវត្តនសុត្តន្តកថាយតំ ទេសំ បសាទេត្វា អសីតិបាណកោដិយោ មគ្គផលរតនានិ បដិលាភេសិ. បញ្ចបិច តេ ថេរា បញ្ចរដ្ឋានិ បសាទេសុំ. ឯកមេកស្ស សន្តិកេ សហស្សមត្តា បព្ពជិំសុ. ឯវំ តេ តត្ថ សាសនំ បតិដ្ឋាបេសុំ.

គន្ត្វា មជ្ឈិមត្ថេរោ, ហិមវន្តំ បសាទយិ;

យក្ខសេនំ បកាសេន្តោ, ធម្មចក្កប្បវត្តនន្តិ.

តត្ថ កិរ មនុស្សា យេភុយ្យេន ចន្ទីបរមីស្វារានំ យក្ខានំ បូជំ ¶ ករោន្តិ. តេនេវ តេ បញ្ច ថេរា តេសំ យក្ខសេនំ បកាសយិត្វា ធម្មំ ទេសេសុំ. កស្មីរគន្ធាររដ្ឋំ បន កទាចិ កទាចិ ចីនរដ្ឋិន្ទស្ស វិជិតំ ហោតិ, កទាចិ កទាចិ បន វិសុំ ហោតិ. តទា បន វិសុំយេវ អហោសីតិ ទដ្ឋព្ពំ.

ចីរនដ្ឋេ បន ភគវតោ សាសនំ ទុព្ពលំយេវ ហុត្វា អដ្ឋាសិ, ន ថិរំ ហុត្វា. តេនេវ ឥទានិ តត្ថ កត្ថចិយេវ សាសនំ ឆាយាមត្តំវ បញ្ញាយតិ, វាតវេគេន វិកិណ្ណអព្ភំវិយ តិដ្ឋតីតិ.

ឥតិ សាសនវំសេ ចីនរដ្ឋសាសនវំសកថាមគ្គោ នាម

ឯវំ សព្ពេន សព្ពំ សាសនវំសកថាមគ្គោ និដ្ឋិតោ.

លង្កាគតេន សន្តេន, ចិត្រញាណេន ភិក្ខុនា;

សរណង្ករនាមេន, សទ្ធម្មដ្ឋិតិកាមិនា.

ទូរតោយេវ ទីបម្ហា, សុមង្គលេន ជោតិនា;

វិសុទ្ធសីលិនាចេវ, ទីបន្តរដ្ឋភិក្ខុនា.

អញ្ញេហិចាភិយាចិតោ, បញ្ញាសាមីតិ នាមកោ;

អកាសិំ សុដ្ឋុកំ គន្ថំ, សាសនវំសប្បទីបិកំ.

ទ្វិសតេច សហស្សេច, តេវីសាធិកេ គតេ;

បុណ្ណាយំ មិគសីរស្ស, និដ្ឋំ គតាវ សព្ពសោ.

កោចិ ឯត្ថេវ ទោសោ ចេ, បញ្ញាយតិ សុចិត្តកា;

តំ ខមន្តុ ច សុទ្ធិយា, គណ្ហន្តុ យុត្តិកំ ហវេតិ.