អញ្ញ > សង្គាយន-បុច្ឆ វិស្សជ្ជនា

បុច្ឆា – សាធុ ¶ សាធុ អាវុសោ មយម្បិ ទានិ តតោយេវ បដ្ឋាយ សំគាយិតុំ បុព្ពកិច្ចានិ សមារភាម…, តេនាវុសោ ភគវតា ជានតា បស្សតា អរហតា សម្មាសម្ពុទ្ធេន ព្រហ្មជាលសុត្តំ កត្ថ ភាសិតំ.

វិស្សជ្ជនា – អន្តរា ច ភន្តេ រាជគហំ អន្តរា ច នាឡន្ទំ អម្ពលដ្ឋិកាយំ រាជាគារកេ ភាសិតំ.

បុច្ឆា – កំ ¶ អាវុសោ អារព្ភ ភាសិតំ.

វិស្សជ្ជនា – សុប្បិយញ្ច ភន្តេ បរិព្ពាជកំ ព្រហ្មទត្តញ្ច មាណវំ អារព្ភ ភាសិតំ.

បុច្ឆា – កិស្មិំ អាវុសោ វត្ថុស្មិំ ភាសិតំ.

វិស្សជ្ជនា – វណ្ណាវណ្ណេ ភន្តេ, សុប្បិយោ ហិ ភន្តេ អនេកបរិយាយេន ពុទ្ធស្ស អវណ្ណំ ភាសតិ ធម្មស្ស អវណ្ណំ ភាសតិ សង្ឃស្ស អវណ្ណំ ភាសតិ, សុប្បិយស្ស បន បរិព្ពាជកស្ស អន្តេវាសី ព្រហ្មទត្តោ មាណវោ អនេកបរិយាយេន ពុទ្ធស្ស វណ្ណំ ភាសតិ ធម្មស្ស វណ្ណំ ភាសតិ សង្ឃស្ស វណ្ណំ ភាសតិ, តស្មិំ ភន្តេ វត្ថុស្មិំ ភាសិតំ.

បុច្ឆា – កតិ ¶ អាវុសោ តត្ថ អនុសន្ធយោ.

វិស្សជ្ជនា – តយោ ភន្តេ តត្ថ អនុសន្ធយោ, ឯកោ អវណ្ណានុសន្ធិ, ទ្វេ វណ្ណានុសន្ធិយោ.

បុច្ឆា – តត្ថាវុសោ បឋមេ អនុសន្ធិម្ហិ កថំ ភគវតា ភាសិតំ, តំ សំខេបតោ កថេហិ.

វិស្សជ្ជនា – បឋមេ ភន្តេ អនុសន្ធិម្ហិ អវណ្ណេ មនោបទោសំ និវារេត្វា, តត្ថ ច អាទីនវំ ទស្សេត្វា, តត្ថ បដិបជ្ជិតព្ពាការោ ភគវតា ភាសិតោ.

មមំ ¶ វា ភិក្ខវេ បរេ អវណ្ណំ ភាសេយ្យុំ, ធម្មស្ស វា អវណ្ណំ ភាសេយ្យុំ សង្ឃស្ស វា អវណ្ណំ ភាសេយ្យុំ, តត្រ តុម្ហេហិ ន អាឃាតោ អប្បច្ចយោ ន ចេតសោ អនភិរទ្ធិ ករណីយា…

បុច្ឆា – សាធុ ¶ សាធុ អាវុសោ, សាធុ ខោ ភគវា អត្តនា បរមុក្កំ សាគតខន្តីគុណសមន្នាគតោ អត្តនោ សាវកភូតេ អម្ហេបិ តត្ថ សមាទាបេសិ, អត្តនា ច លោកធម្មេសុ អនិញ្ជនសភាវោ អម្ហាកម្បិ តថត្តាយ ឱវាទមទាសិ, ទុតិយេបនាវុសោ អនុសន្ធិម្ហិ កថំ ភគវតា ភាសិតំ, តម្បិ សំខេបតោ បកាសេហិ.

វិស្សជ្ជនា – ទុតិយេ បន ភន្តេ អនុសន្ធិម្ហិ វណ្ណេ ចេតសោ ឧប្បិលាវិតត្តំ និសេធេត្វា, តត្ថ ច អាទីនវំ ទស្សេត្វា, តត្ថ ច បដិបជ្ជនាការំ ទស្សេត្វា, បុថុជ្ជនស្ស វណ្ណភូមិភូតានិ តីណិ សីលានិ វិត្ថារតោ ភគវតា ភាសិតានិ.

មមំ ¶ វា ភិក្ខវេ បរេ វណ្ណំ ភាសេយ្យុំ, ធម្មស្ស វា វណ្ណំ ភាសេយ្យុំ, សង្ឃស្ស វា វណ្ណំ ភាសេយ្យុំ, តត្រ តុម្ហេហិ ន អានន្ទោ ន សោមនស្សំ ន ចេតសោ អភិរទ្ធិ ករណីយា –

បុច្ឆា – សាធុ ¶ សាធុ អាវុសោ, សាធុ ខោ ភគវា អត្តនា បរមុក្កំសគតសុបរិសុទ្ធសីលសមន្នាគតោ, តំ អត្តនោ សុបរិសុទ្ធសីលំ ទស្សេត្វា បរេបិ តត្ថ និយោជេសិ, តតិយេ បនាវុសោ អនុសន្ធិម្ហិ កថំ ភគវតា ភាសិតំ, តំ សំខេបតោ បកាសេហិ.

វិស្សជ្ជនា – តតិយេ បន ភន្តេ អនុសន្ធិម្ហិ ទ្វាសដ្ឋិ ទិដ្ឋិយោ សព្ពញ្ញុត ញាណេន វិត្ថារតោ វិភជិត្វា, តាសញ្ច ឆ ផស្សាយតនបទដ្ឋានភាវំ វិភាវេត្វា, មិច្ឆាទិដ្ឋិគតិកាធិដ្ឋា នញ្ច វដ្ដំ កថេត្វា, យុត្តយោគភិក្ខុអធិដ្ឋានញ្ច វិវដ្ដំ កថេត្វា, មិច្ឆាទិដ្ឋិគតិកស្ស ទេសនាជាលតោ អវិមុត្តភាវំ ¶ ទេសនាជាលតោ វិមុត្តស្ស នត្ថិកភាវញ្ច វិភាវេត្វា, អត្តនោ ច កត្ថចិ អបរិយាបន្នភាវំ ទស្សេត្វា, ឧបាទិសេសនិព្ពានធាតុំ បាបេត្វា ទេសនា ភគវតា និដ្ឋាបិតា.

ឧច្ឆិន្នភាវនេត្តិកោ ¶ ភិក្ខវេ តថាគតស្ស កាយោ តិដ្ឋតិ, យាវស្ស កាយោ ឋស្សតិ តាវ នំ ទក្ខន្តិ ទេវមនុស្សា, កាយស្ស ភេទា ឧទ្ធំ ជីវិតបរិយាទានា ន នំ ទក្ខន្តិ ទេវមនុស្សា.

បុច្ឆា – សាធុ ¶ សាធុ អាវុសោ, សាធុ ខោ ភគវា អត្តនា ទ្វាសដ្ឋិ ទិដ្ឋិយោ ច ឆ ផស្សាយតនានិ ច ទ្វាទស បដិច្ចសមុប្បាទង្គានិ ច សព្ពសោ បរិជានិត្វា តេសំ បរិជាននត្ថាយ បរេសម្បិ តថត្តាយ ធម្មំ បកាសេតិ, សុត្តញ្ច នាម អាវុសោ ចតុន្នំ សុត្តនិក្ខេបានំ អញ្ញតរវសេនេវ និក្ខិត្តំ, តស្មា តេសុ ឥទំ សុត្តំ កតរេន សុត្តនិក្ខេបេន ភគវតា និក្ខិត្តំ.

វិស្សជ្ជនា – ចតូសុ ភន្តេ សុត្តនិក្ខេបេសុ អដ្ឋុប្បត្តិនិក្ខេបន ឥទំ សុត្តំ និក្ខិត្តំ.

វិស្សជ្ជនា – ភគវតោ ភន្តេ វចនំ អរហតោ សម្មាសម្ពុទ្ធស្ស.

វិស្សជ្ជនា – បរម្បរាយ ភន្តេ អាភតំ.

បុច្ឆា – អត្ថិ នុ ខោ អាវុសោ ឯត្ថ កោចិ វិរទ្ធទោសា, យេន បច្ឆិមា ជនា មិច្ឆាអត្ថំ គណ្ហេយ្យុំ.

បុច្ឆា – តេនាវុសោ ¶ ភគវតា…បេ… សម្មាសម្ពុទ្ធេន សាមញ្ញផលសុត្តំ កត្ថ ភាសិតំ.

វិស្សជ្ជនា – រាជគហេ ភន្តេ ជីវកស្ស កោមារភច្ចស្ស អម្ពវនេ ភាសិតំ.

បុច្ឆា – កេនាវុសោ សទ្ធិំ ភគវតា ភាសិតំ.

វិស្សជ្ជនា – រញ្ញា ភន្តេ មាគធេន អជាតសត្តុនា វេទេហិបុត្តេន សទ្ធិំ ភាសិតំ.

បុច្ឆា – តំ ¶ បនាវុសោ សុត្តំ ចតុន្នំ សុត្តនិក្ខេបានំ កតរេន សុត្តនិក្ខេបេន ភគវតា និក្ខិត្តំ.

វិស្សជ្ជនា – ចតុន្នំ ភន្តេ សុត្តនិក្ខេបានំ បុច្ឆាវសិកេន សុត្តនិក្ខេបេន និក្ខិតំ ភគវតា.

បុច្ឆា – សា បនាវុសោ បុច្ឆា កេនាការេន សមុប្បន្នា.

វិស្សជ្ជនា – រាជា ភន្តេ មាគធោ អជាសត្តុ វេទេហិបុត្តោ តទហុបោសថេ បន្នរសេ កោមុទិយា ចាតុមាសិនិយា បុណ្ណាយ បុណ្ណមាយ រត្តិយា យេន ភគវា តេនុបសំកមិ, ឧបសំកមិត្វា ភគវន្តំ ទិដ្ឋេវ ធម្មេ សំទិដ្ឋិកំ សាមញ្ញផលំ បុច្ឆិ, ឯវំ ខោ សា ភន្តេ បុច្ឆា ឧប្បន្នា.

រម្មណីយា ¶ វត ភោ ទោសិនា រត្តិ, អភិរូបា វត ភោ ទោសិនា រត្តិ, ទស្សនីយា វត ភោ ទោសិនា រត្តិ, បាសាទិកា វត ភោ ទោសិនា រត្តិ, លក្ខញ្ញា វត ភោ ទោសិនា រត្តិ….

កំ នុខ្វជ្ជ សមណំ វា ព្រាហ្មណំ វា បយិរុបាសេយ្យាម….

យំ ¶ នោ បយិរុបសតោ ចិត្តំ បសីទេយ្យ….

ត្វំ បន សម្ម ជីវក កិំ តុណ្ហីសិ –

អយំ ¶ ទេវ អម្ហាកំ ភគវា អរហំ សម្មាសម្ពុទ្ធោ អម្ហាកំ អម្ពវនេ វិហរតិ.

តំ ខោ បន ភគវន្តំ ឯវំ កល្យាណោ កិត្តិសទ្ទោ អព្ភុគ្គតោ ‘‘ឥតិបិ សោ ភគវា អរហំ សម្មាសម្ពុទ្ធោ វិជ្ជាចរណសម្បន្នោ សុគតោ លោកវិទូ អនុត្តរោបុរិសទម្មសារថិ សត្ថាទេវមនុស្សានំ ពុទ្ធោ ភគវា’’តិ.

តំ ទេវោ ភគវន្តំ បយិរុបាសតុ, អប្បេវនាម ទេវស្ស ភគវន្តំ បយិរុបាសតោ ចិត្តំ បសីទេយ្យ.

តេន ហិ សម្ម ជីវក ហត្ថិយានានិ កប្បាបេហិ.

កប្បិតានិ ¶ ខោ តេ ទេវ ហត្ថិយានានិ, យស្ស ទានិ កាលំ មញ្ញសិ.

កិច្ចិ មំ សម្ម ជីវក ន វញ្ចេសិ, កច្ចិ មំ សម្ម ជីវក ន បលម្ភេសិ….

មា ភាយិ មហារាជ, មា ភាយិ មហារាជ….

ន តំ ទេវ វញ្ចេមិ, ន តំ ទេវ បលម្ភាមិ….

ឯសោ ¶ មហារាជ ភគវា, ឯសោ មហារាជ ភគវា មជ្ឈិមំ ថម្ភំ និស្សាយ បុរត្ថាភិមុខោ និសិន្នោ បុរក្ខតោ ភិក្ខុសង្ឃស្ស….

ឥមិនា មេ ឧបសមេន ឧទយភទ្ទោ កុមារោ សមន្នាគតោ ហោតុ…

បុច្ឆេយ្យាមហំ ភន្តេ ភគវន្តំ កិញ្ចិទេវ ទេសំ សចេ មេ ភគវា ឱកាសំ ករោតិ បញ្ហស្ស វេយ្យាករណាយ.

យថា ¶ នុ ខោ ឥមានិ ភន្តេ បុថុសិប្បាយតនានិ, សេយ្យថិទំ, ហត្ថារោហា អស្សារោហា រថិកា ធនុគ្គហា ចេលកា ចលកា បិណ្ឌទាយកា (បេយ្យាល) គណកា មុទ្ទិកា, អញ្ញានិបិ ឯវំ គតិកានិ បុថុសិប្បាយតនានិ, តេ តេន សិប្បេន សន្ទិដ្ឋិកំ សិប្បផលំ ជីវន្តិ, តេ តេន អត្តានំ សុខេន្តិ បីណេន្តិ, មាតាបិតរោ សុខេន្តិ, បីណេន្តិ, បុត្តទារំ សុខេន្តិ បីណេន្តិ, មិត្តាមច្ចេ សុខេន្តិ បីណេន្តិ សមណព្រាហ្មណេសុ ឧទ្ធគ្គិកំ ទក្ខិណំ បតិដ្ឋបេន្តិ សោវគ្គិកំ សុខវិបាកំ សគ្គសំវត្តនិកំ, សក្កា នុ ខោ ភន្តេ ឯវមេវ ទិដ្ឋេវ ធម្មេ សន្ទិដ្ឋិកំ សាមញ្ញផលំ បញ្ញបេតុំ.

បុច្ឆា – តទា ¶ អាវុសោ កថំ ភគវតា រាជា អជាតសត្តុ វេទេហិ បុត្តោ បដិបុច្ឆិតោ កថញ្ច តេន ភគវតោ អារោចិតំ.

វិស្សជ្ជនា – ‘‘អភិជានាសិ នោ ត្វំ មហារាជ ឥមំ បញ្ហំ អញ្ញេ សមណព្រាហ្មណេ បុច្ឆិតាតិ, អភិជានាមហំ ភន្តេ អញ្ញេ សមណព្រាហ្មណេ បុច្ឆិតាតិ, យថាកថំ បន តេ មហារាជ ព្យាករិំសុ, សចេ តេ អគរុ, ភាសស្សូតិ ន ខោ មេ ភន្តេ គរុ, យត្ថស្ស ភគវា និសិន្នោ ភវន្តរូបោ វាតិ, តេនេហិ មហារាជ ភាសស្សូ’’តិ, ឯវំ ខោ ភន្តេ តទា ភគវតា រាជា មាគធោ អជាតសត្តុ វេទេហិ បុត្តោ បដិបុច្ឆិតោ, ឯវំ ខោ ភន្តេ តេន តទា ភគវតោ អារោចិតំ.

បុច្ឆា – កថញ្ចាវុសោ ¶ បូរណកស្សបស្ស សន្តិកេ បុច្ឆាវិស្សជ្ជនា អហោសិ.

វិស្សជ្ជនា – ឯកមិទំ ភន្តេ សមយំ រាជា មាគធោ អជាតសត្តុ វេទេហិបុត្តោ យេន បូរណោ កស្សបោ តេនុបសង្កមិ, ឧបសង្កមិត្វា បូរណំ កស្សបំ សន្ទិដ្ឋិកំ សាមញ្ញផលំ បុច្ឆិ, អថ ខោ ភន្តេ បូរណោ កស្សបោ ករោតោ ខោ មហារាជ ការយតោ, ឆិន្ទតោ ឆេទាបយតោ, បចតោ បាចាបយតោ, សោចយតោ សោចាបយតោ (បេយ្យាល) ករោតោ ន ករីយតិ បាបំ ត្យាទិនា រញ្ញោ មាគធស្ស អជាតសត្តុស្ស វេទេហិបុត្តស្ស សំទិដ្ឋិ កំ សាមញ្ញផលំ បុដ្ឋោ សមានោ អកិរិយំ ព្យាកាសិ, ឯវំ ខោ ភន្តេ បូរណស្ស កស្សបស្ស សន្តិកេ បុច្ឆាវិស្សជ្ជនា អហោសិ.

និស្សិរិកោ ¶ វត អាវុសោ បូរណស្ស កស្សបស្ស វាទោ អនត្ថសំហិតោ ជិគុច្ឆនីយោ អតិវិយ ភយានកោ, យេ តស្ស វចនំ សោតព្ពំ សទ្ធាតព្ពំ មញ្ញេយ្យុំ, តេសំ តំ អស្ស ទីឃរត្តំ អហិតាយ ទុក្ខាយ, ឯត្តកេនេវ អជ្ជ មយំ បុច្ឆាវិស្សជ្ជនំ ថបេស្សាម.

បុច្ឆា – បុរិមទិវសេ អាវុសោ មយា សាមញ្ញផលសុត្តស្ស និទានបរិយាបន្នានិ បុច្ឆិតព្ពដ្ឋានានិ កានិចិ កានិចិ បុច្ឆិតានិ, តយា ច សុដ្ឋុ វិស្សជ្ជិតានិ, អជ្ជ បន យថានុប្បត្តមក្ខលិគោសាយ វាទតោ បដ្ឋាយ បុច្ឆិស្សាមិ, មក្ខលិ បន អាវុសោ

គោសាលោ ¶ រញ្ញា មាគធេន អជាតសត្តុនា វេទេហិបុត្តេន សន្ទិដ្ឋិកំ សាមញ្ញផលំ បុដ្ឋោ កថំ ព្យាកាសិ.

វិស្សជ្ជនា – ឯកមិទំ ភន្តេ សមយំ រាជា មាគធោ អជាតសត្តុ វេទេហិបុត្តោ យេន មក្ខលិគោសាលោ តេនុបសំកមិ, ឧបសំកមិត្វា មក្ខលិំ គោសាលំ សន្ទិដ្ឋិកំ សាមញ្ញផលំ បុច្ឆិ, អថ ខោ ភន្តេ មក្ខលិគោសាលោ រាជានំ មាគធំ អជាតសត្តុំ វេទេហិបុត្តំ ឯតទវោច ‘‘នត្ថិ មហារាជ ហេតុ នត្ថិ បច្ចយោ សត្តានំ សំកិលេសាយ, អហេតូ អបច្ចយា សត្តា សំកិលិស្សន្តិ. នត្ថិ មហារាជ ហេតុ នត្ថិ បច្ចយោ សត្តានំ វិសុទ្ធិយា, អហេតូ អបច្ចយា សត្តា វិសុជ្ឈន្តិ, (បេយ្យាល) ចុល្លាសីតិ មហាកប្បិនោ សតសហស្សានិ, យានិ ពាលេ ច បណ្ឌិតេ ច សន្ធាវិត្វា សំសរិត្វា ទុក្ខស្សន្តំ ករិស្សន្តិ, តត្ថ នត្ថិ ‘ឥមិនាហំ សីលេន វា វតេន វា តបេន វា ព្រហ្មចរិយេន វា អបរិបក្កំ វា កម្មំ បរិបាចេស្សាមិ, បរិបក្កំ វា កម្មំ ផុស្ស ផុស្ស ព្យន្តិំ ករិស្សាមី’តិ ហេវំ នត្ថិ. ទោណមិតេ សុខទុក្ខេ, បរិយន្តកតេ សំសារេ នត្ថិ ហាយនវឌ្ឍនេ, នត្ថិ ឧក្កំសាវកំសេ. សេយ្យថាបិ នាម សុត្តបុដ្ឋេ ខិត្តេ និព្ពេឋិយមានមេវ បលេតិ, ឯវមេវ ពាលេ ច បណ្ឌិតេ ច សន្ធាវិត្វា សំសរិត្វា ទុក្ខស្សន្តំ ករិស្សន្តី’’តិ, ឥត្ថំ ខោ ភន្តេ រញ្ញោ មាគធស្ស អជាតសត្តុស្ស វេទេហិបុត្តស្ស មក្ខលិគោសាលោ សន្ទិដ្ឋិកំ សាមញ្ញផលំ បុដ្ឋោ សមានោ សំសារសុទ្ធិំ ព្យាកាសិ.

អយម្បិ ¶ អាវុសោ វាទោ និស្សិរិកោយេវ អនត្ថសំហិតោ ជិគុច្ឆនីយោ អតិ វិយ ភយានកោ, យេ តស្ស វចនំ សោតព្ពំ សទ្ធាតព្ពំ មញ្ញេយ្យុំ, តេសំ តំ អស្ស ទីឃរត្តំ អហិតាយ ទុក្ខាយ.

បុច្ឆា – អថាបរម្បិ ¶ បុច្ឆាមិ, អជិតោ បន អាវុសោ កេសកម្ពលោ រញ្ញា មាគធេន អជាតសត្តុនា វេទេហិបុត្តេន សន្ទិដ្ឋិកំ សាមញ្ញផលំ បុដ្ឋោ កថំ ព្យាកាសិ.

វិស្សជ្ជនា – ឯកមិទំ ភន្តេ សមយំ រាជា មាគធោ អជាតសត្តុ វេទេហិបុត្តោ យេន អជិតោ កេសកម្ពលោ តេនុបសង្កមិ, ឧបសង្កមិត្វា អជិតំ កេសកម្ពលំ សន្ទិដ្ឋិកំ សាមញ្ញផលំ បុច្ឆិ, អថ ខោ ភន្តេ អជិតោ កេសកម្ពលោ រាជានំ មាគធំ អជាតសត្តុំ វេទេហិបុត្តំ ឯតទវោច ‘‘នត្ថិ មហារាជ ទិន្នំ, នត្ថិ យិដ្ឋំ, នត្ថិ ហុតំ, នត្ថិ សុកតទុក្កដានំ កម្មានំ ផលំ វិបាកោ, នត្ថិ អយំ លោកោ, នត្ថិ បរោ លោកោ, នត្ថិ មាតា, នត្ថិ បិតា, នត្ថិ សត្តា ឱបបាតិកា, នត្ថិ លោកេ សមណព្រាហ្មណា សម្មគ្គតា សម្មាបដិបន្នា, យេ ឥមញ្ច លោកំ បរញ្ច លោកំ សយំ អភិញ្ញា សច្ឆិកត្វា បវេទេន្តិ. (បេយ្យាល) ពាលេ ច បណ្ឌិតេ ច កាយស្ស ភេទា ឧច្ឆិជ្ជន្តិ វិនស្សន្តី’’តិ. ឥត្ថំ ខោ ភន្តេ រញ្ញោ មាគធស្ស អជាតសត្តុស្ស វេទេហិបុត្តស្ស អជិតោ កេសកម្ពលោ ¶ សន្ទិដ្ឋិកំ សាមញ្ញផលំ បុដ្ឋោ សមានោ ឧច្ឆេទំ ព្យាកាសិ.

អយម្បិ ¶ ខោ អាវុសោ និស្សិរិកោយេវ, អនត្ថសំហិតោ ជិគុច្ឆនីយោ អតិ វិយ ភយានកោ, យេ តស្ស វចនំ សោតព្ពំ សទ្ធាតព្ពំ មញ្ញេយ្យុំ, តេសំ តំ អស្ស ទីឃរត្តំ អហិតាយ ទុក្ខាយ.

បុច្ឆា – អថាបរម្បិ ¶ បុច្ឆាមិ, បកុធោ បន អាវុសោ កច្ចាយនោ រញ្ញា មាគធេន អជាតសត្តុនា វេទេហិបុត្តេន សន្ទិដ្ឋិកំ សាមញ្ញផលំ បុដ្ឋោ កថំ ព្យាកាសិ.

វិស្សជ្ជនា – ឯកមិទំ ភន្តេ សមយំ រាជា មាគធោ អជាតសត្តុ វេទេហិបុត្តោ យេន បកុធោ កច្ចាយនោ តេនុបសង្កមិ, ឧបសង្កមិត្វា បកុធំ កច្ចាយនំ សន្ទិដ្ឋិកំ សាមញ្ញផលំ បុច្ឆិ, អថ ខោ ភន្តេ បកុធោ កច្ចាយនោ រាជានំ មាគធំ អជាសត្តុំ វេទេហិបុត្តំ ឯតទវោច ‘‘សត្តិមេ មហារាជ កាយា អកដា អកដវិធា អនិម្មិតា អនិម្មាតា វញ្ចា កូដដ្ឋា ឯសិកដ្ឋាយិតា, តេ ន ឥញ្ជន្តិ, ន វិបរិណាមេន្តិ, ន អញ្ញមញ្ញំ ព្យាពាធេន្តិ, នាលំ អញ្ញមញ្ញស្ស សុខាយ វា ទុក្ខាយ វា សុខទុក្ខាយ វា. កតមេ សត្ត, បថវីកាយោ, អាបោកាយោ, តេជោកាយោ ¶ វាយោកាយោ, សុខេ, ទុក្ខេ, ជីវេ សត្តមេ. ឥមេ សត្តកាយា អកដា អកដវិធា អនិម្មិតា អនិម្មាតា វញ្ច្យា កូដដ្ឋា ឯសិកដ្ឋាយិតា, តេ ន ឥញ្ជន្តិ, ន វិបរិណាមេន្តិ, ន អញ្ញមញ្ញំ ព្យាពាធេន្តិ, នាលំ អញ្ញមញ្ញស្ស សុខាយ វា ទុក្ខាយ វា សុខទុក្ខាយ វា. តត្ថ នត្ថិ ហន្តា វា ឃាតេតា វា, សោតា វា សាវេតា វា, វិញ្ញាតា វា វិញ្ញាបេតា វា, យោបិ តិណ្ហេន សត្ថេន សីសំ ឆិន្ទតិ, ន កោចិ កិញ្ចិ ជិវិតា វោរោបេតិ, សត្តន្នំត្វេវ កាយានមន្តរេន សត្ថំ វិវរមនុបតតី’’តិ. ឥត្ថំ ខោ ភន្តេ រញ្ញោ មាគធស្ស អជាតសត្តុស្ស វេទេហិបុត្តស្ស បកុធោ កច្ចាយនោ សាមញ្ញផលំ បុដ្ឋោ សមានោ អញ្ញេន អញ្ញំ ព្យាកាសិ.

អយម្បិ ¶ ខោ អាវុសោ វាទោ បុរិមវាទោវិយ និស្សិរិកោយេវ អនត្ថសំហិតោ ជិគុច្ឆនីយោ អតិវិយ ភយានកោ.

បុច្ឆា – អថាបរម្បិ បុច្ឆាមិ, និគណ្ឋោ បនាវុសោ នាដបុត្តោ រញ្ញា មាគធេន អជាតសត្តុនា វេទេហិបុត្តេន សន្ទិដ្ឋិកំ សាមញ្ញផលំ បុដ្ឋោ កថំ ព្យាកាសិ.

វិស្សជ្ជនា – ឯកមិទំ ភន្តេ សមយំ រាជា មាគធោ អជាតសត្តុ វេទេហិបុត្តោ យេន និគណ្ឋោ នាដបុត្តោ តេនុបសំកមិ, ឧបសំកមិត្វា និគណ្ឋំ នាដបុត្តំ សន្ទិដ្ឋិកំ សាមញ្ញផលំ បុច្ឆិ, អថ ខោ និគណ្ឋោ នាដបុត្តោ រាជានំ មាគធំ អជាតសត្តុំ វេទេហិបុត្តំ ឯតទវោច, ‘‘ឥធ មហារាជ និគណ្ឋោ ចាតុយាមសំវរសំវុតោ ហោតិ, កថញ្ច មហារាជ

និគណ្ឋោ ¶ ចាតុយាមសំវរសំវុតោ ហោតិ, ឥធ មហារាជ និគណ្ឋោ សព្ពវារិវារិតោ ច ហោតិ, សព្ពវារិយុត្តោ ច, សព្ពវារិធុតោ ច, សព្ពវារិផុដោ ច. ឯវំ ខោ មហារាជ និគណ្ឋោ ចាតុយាមសំវរសំវុតោ ហោតិ, យតោ ខោ មហារាជ និគណ្ឋោ ឯវំ ចាតុយាមសំវរសំវុតោ ហោតិ. អយំ វុច្ចតិ មហារាជ និគណ្ឋោ គតត្តោ ច យតត្តោ ច ឋិតត្តោ ចា’’តិ. ឥត្ថំ ខោ ភន្តេ រញ្ញោ មាគធស្ស អជាតសត្តុស្ស វេទេហិបុត្តស្ស និគណ្ឋោ នាដបុត្តោ សន្ទិដ្ឋិកំ សាមញ្ញផលំ បុដ្ឋោ សមានោ ចាតុយាមសំវរំ ព្យាកាសិ.

ឯតស្ស ¶ បនាវុសោ វាទេ កោចិ សាសនានុលោមវាទោ អត្ថិ, អសុទ្ធលទ្ធិតាយ បន ឯសោបិ វាទោ ជិគុច្ឆនីយោយេវ, សេយ្យថាបិ ភោជនំ គូថមិស្សំ គារយ្ហោយេវ អារកា បរិវជ្ជិតព្ពោយេវ, សេយ្យថាបិ វិសសំសដ្ឋោ អាបានីយកំសោ.

បុច្ឆា – អថាបរម្បិ ¶ បុច្ឆាមិ, សញ្ចយោ បនាវុសោ ពេលដ្ឋបុត្តោ សន្ទិដ្ឋិកំ សាមញ្ញផលំ បុដ្ឋោ កថំ ព្យាកាសិ.

វិស្សជ្ជនា – ឯកមិទំ ភន្តេ សមយំ រាជា មាគធោ អជាតសត្តុ វេទេហិបុត្តោ យេន សញ្ចយោ ពេលដ្ឋបុត្តោ តេនុបសង្កមិ, ឧបសង្កមិត្វា សញ្ចយំ ពេលដ្ឋបុត្តំ ឯតទវោច, ‘‘យថា នុ ខោ ឥមានិ ភោ សញ្ចយ បុថុសិប្បាយតនានិ, សេយ្យថិទំ, ហត្ថារោហា អស្សរោហា…បេ… សក្កា នុ ខោ ភោ សញ្ចយ ឯវមេវ ទិដ្ឋេវ ធម្មេ សន្ទិដ្ឋិកំ សាមញ្ញផលំ បញ្ញបេតុ’’ន្តិ, ឯវំ វុត្តេ ភន្តេ សញ្ចយោ ពេលដ្ឋបុត្តោ រាជានំ មាគធំ អជាតសត្តុំ វេទេហិបុត្តំ ឯតទវោច.

‘‘អត្ថិ បរោលោកោតិ ឥតិ ចេ មំ បុច្ឆសិ, អត្ថិ បរោ លោកោតិ ឥតិ ចេ មេ អស្ស, អត្ថិ បរោ

លោកោតិ ¶ ឥតិ តេ នំ ព្យាករេយ្យំ, ឯវន្តិបិ មេ នោ, តថាតិបិ មេ នោ, អញ្ញថាតិបិ មេ នោ, នោតិបិ មេ នោ, នោ នោតិបិ មេ នោ…បេ… នេវ ហោតិ ន ន ហោតិ តថាគតោ បរំ មរណាតិ ឥតិ ចេ មំ បុច្ឆសិ, នេវ ហោតិ ន ន ហោតិ តថាគតោ បរំ មរណាតិ ឥតិ ចេ មេ អស្ស, នេវ ហោតិ ន ន ហោតិ តថាគតោ បរំ មរណាតិ ឥតិ តេ នំ ព្យាករេយ្យំ, ឯវន្តិបិ មេ នោ, តថាតិបិ មេ នោ, អញ្ញថាតិបិ មេ នោ, នោតិបិ មេ នោ, នោ នោតិបិ មេ នោ’’តិ. ឥត្ថំ ខោ ភន្តេ រញ្ញោ មាគធស្ស អជាតសត្តុស្ស វេទេហិបុត្តស្ស សញ្ចយោ ពេលដ្ឋបុត្តោ សន្ទិដ្ឋិកំ សាមញ្ញផលំ បុដ្ឋោ សមានោ វិក្ខេបំ ព្យាកាសិ.

សព្ពេបិ ¶ អាវុសោ ឯតេ ឆន្នំ សត្ថារានំ វាទា និស្សិរិកាយេវ ជិគុច្ឆនីយាយេវ អនត្ថសំហិតាយេវ, ពាលានំ ភិយ្យោសោ មត្តាយ សម្មោហាយ សំវត្តន្តិ អនត្ថាយ.

អជ្ជ ¶ បន អាវុសោ កាលោ អតិក្កន្តោ, ស្វេយេវ ភគវតា វុត្តំ បណីតំ បសដ្ឋំ សន្ទិដ្ឋិកផលំ បុច្ឆាម.

បុច្ឆា – បុរិមទិវសេសុ អាវុសោ សាមញ្ញផលសុត្តស្ស បុព្ពភាគេ យាវ ឆសត្ថារមិច្ឆាវាទបរិយោសានំ បុច្ឆនវិស្សជ្ជនំ អម្ហេហិ កតំ, អជ្ជ បន យថានុប្បត្តំ ភគវតា ទេសិតសាមញ្ញផលសុត្តាធិការេ បុច្ឆាវិស្សជ្ជនំ ករិស្សាម. ភគវា បន អាវុសោ រញ្ញា មាគធេន អជាតសត្តុនា វេទេហិបុត្តេន សន្ទិដ្ឋិកំ សាមញ្ញផលំ បុដ្ឋោ កថំ ព្យាកាសិ.

វិស្សជ្ជនា – ភគវា ភន្តេ តិធា វិភជិត្វា រញ្ញោ មាគធស្ស អជាតសត្តុស្ស វេទេហិបុត្តស្ស សន្ទិដ្ឋិកំ សាមញ្ញផលំ បុដ្ឋោ ព្យាកាសិ.

បុច្ឆា – កថញ្ចាវុសោ ¶ ភគវា រញ្ញោ មាគធស្ស អជាតសត្តុនោ វេទេហិបុត្តស្ស បឋមំ សន្ទិដ្ឋិកំ សាមញ្ញផលំ ទេសេសិ.

វិស្សជ្ជនា – ទាសំ ភន្តេ បព្ពជិតំ ឧបមាភាវេន និទ្ទិសិត្វា រញ្ញោ មាគធស្ស អជាតសត្តុស្ស វេទេហិបុត្តស្ស ភគវា បឋមំ សន្ទិដ្ឋិកំ សាមញ្ញផលំ ទេសេសិ.

សោហំ ¶ ភន្តេ ភគវន្តម្បិ បុច្ឆាមិ, យថា នុ ខោ ឥមានិ ភន្តេ បុថុសិប្បាយតនានិ សេយ្យថិទំ…បេ… សក្កា នុ ខោ ភន្តេ ឯវ មេវ ទិដ្ឋេវ ធម្មេ សន្ទិដ្ឋិកំ សាមញ្ញផលំ បញ្ញបេតុំ –

អច្ឆរិយំ ¶ អាវុសោ អព្ភុតំ អាវុសោ, យាវ ស្វាខាតស្ស ពុទ្ធសាសនស្ស មហិទ្ធិកតា មហានុភាវតា, យត្រហិ នាម ទាសោបិ និហីនជច្ចោ ឯវំ ស្វាខាតេ ពុទ្ធសាសនេ បព្ពជិត្វា អត្តនោ ឥស្សរភូតេន រញ្ញាបិ វន្ទនីយត្តំ គរុករណីយត្តំ បាបុណិស្សតិ, សុបញ្ញត្តមេតំ ភគវតា បឋមំ សន្ទិដ្ឋិកផលំ.

បុច្ឆា – កថំ ¶ បនាវុសោ ភគវា រញ្ញោ មាគធស្ស អជាតសត្តុនោ វេទេហិបុត្តស្ស ទុតិយំ សន្ទិដ្ឋិកំ សាមញ្ញផលំ ទេសេសិ.

វិស្សជ្ជនា – កស្សកំ ភន្តេ បព្ពជិតំ ឧបមាភាវេន ទស្សេត្វា ភគវា រញ្ញោ មាគធស្ស អជាតសត្តុស្ស វេទេហិបុត្តស្ស សន្ទិដ្ឋិកំ សាមញ្ញផលំ ទេសេសិ.

អច្ឆរិយំ ¶ អាវុសោ អព្ភុតំ អាវុសោ, យាវ ពុទ្ធសាសនស្ស ស្វាខាតតា មហិទ្ធិកតា មហានុភាវតា, យត្រហិ នាម កស្ស កោបិ គុណរហិតោ ឯវំ ស្វាខាតេ ពុទ្ធសាសនេ បព្ពជិត្វា រដ្ឋធិបតិនា មនុស្សលោកេ ទេវភូតេន រញ្ញាបិ គរុករណីយតំ វន្ទនីយតំ បាបុណិស្សតិ, សុបញ្ញត្តមេតំ អាវុសោ ភគវតា ទុតិយំ សន្ទិដ្ឋិកផលំ.

បុច្ឆា – កថញ្ចា ¶ បនាវុសោ ភគវា បុរិមេហិ សន្ទិដ្ឋិកសាមញ្ញផលេហិ អភិក្កន្តតរញ្ច បណីតតរញ្ច សន្ទិដ្ឋិកំ សាមញ្ញផលំ រញ្ញោ ទេសេសិ.

វិស្សជ្ជនា – ភគវា ភន្តេ ពុទ្ធុប្បាទតោ បដ្ឋាយ កុលបុត្តស្ស បព្ពជិត ភាវំ, តស្ស ច សីលសម្បទំ, តស្ស ច ឥន្ទ្រិយេសុ គុត្តទ្វារតំ, អរិយញ្ចសតិសម្បជញ្ញំ, អរិយញ្ច សន្តុដ្ឋិំ, បញ្ចន្នញ្ច នីវរណានំ បហានំ, ចត្តារិ ច ឈានានិ, អដ្ឋ ច វិជ្ជាយោ, តាហិ តាហិ ឧបមាហិ វិត្ថារតោ វិភជិត្វា រញ្ញោ មាគធស្ស អជាតសត្តុស្ស វេទេហិបុត្តស្ស សន្ទិដ្ឋិកំ សាមញ្ញផលំ បុរិមេហិ សន្ទិដ្ឋិកេហិ សាមញ្ញផលេហិ អភិក្កន្តតរញ្ច បណីតតរញ្ច ទេសេសិ.

សក្កា ¶ បន ភន្តេ ទិដ្ឋេវ ធម្មេ សន្ទិដ្ឋិកំ សាមញ្ញផលំ, បុរិមេហិ សន្ទិដ្ឋិកេហិ សាមញ្ញផលេហិ អភិក្កន្តតរញ្ច បណីតតរញ្ច បញ្ញបេតុំ.

សក្កា មហារាជា, តេន ហិ មហារាជ សុណោហិ សាធុកំ មនសិករោហិ ភាសិស្សាមិ.

បុច្ឆា – កថញ្ច ¶ បនាវុសោ ភិក្ខុ សីលសម្បន្នោ ហោតិ, កថញ្ច ភគវា រញ្ញោ មាគធស្ស អជាតសត្តុនោ វេទេហិបុត្តស្ស ចូឡសីលំ វិភជិត្វា ទេសេសិ.

វិស្សជ្ជនា – ‘‘កថញ្ច ¶ មហារាជ ភិក្ខុ សីលសម្បន្នោ ហោតិ. ឥធ មហារាជ ភិក្ខុ បាណាតិបាតំ បហាយ បាណាតិបាតា បដិវិរតោ ហោតិ និហិតទណ្ឌោ និហិតសត្ថោ លជ្ជី ទយាបន្នោ, សព្ពបាណភូតហិតានុកម្បី វិហរតិ. ឥទម្បិស្ស ហោតិ សីលស្មិំ’’ ឯវមាទិនា ភន្តេ ភគវា រញ្ញោ មាគធស្ស អជាតសត្តុស្ស វេទេហិបុត្តស្ស ឆព្ពីសតិយា អាការេហិ ចូឡសីលំ វិភជិត្វា ទេសេសិ.

សាធុ ¶ សាធុ អាវុសោ, សាធុ សាធុ អាវុសោ យំ ភិក្ខុ ឯវំ ស្វាខាតេ ពុទ្ធសាសនេ សទ្ធាបព្ពាជិតោ ឥមិនា ច ចូឡសីលេន សមន្នាគតោ វិហរេយ្យ.

សុវេ យថានុប្បត្តដ្ឋានតោ បដ្ឋាយ បុច្ឆាវិស្សជ្ជនំ ករិស្សាម.

បុច្ឆា – កថំ បនាវុសោ រញ្ញោ មាគធស្ស អជាតសត្តុនោ វេទេហិបុត្តស្ស មជ្ឈិមសីលញ្ច មហាសីលញ្ច វិភជិត្វា ទេសេសិ.

វិស្សជ្ជនា – ‘‘យថា វា បនេកេ ភោន្តោ សមណព្រាហ្មណា សទ្ធាទេយ្យានិ ភោជនានិ ភុញ្ជិត្វា តេ ឯវរូបំ ពីជគាមភូតគាមសមារម្ភំ អនុយុត្តា វិហរន្តិ. សេយ្យថិទំ. មូលពីជំ ខន្ធពីជំ ផឡុពីជំ អគ្គពីជំ ពីជពីជមេវ បញ្ចមំ, ឥតិ ឯវរូបា ពីជគាមភូតគាមសមារម្ភា បដិវិរតោ ហោតិ. ឥទម្បិស្ស ហោតិ សីលស្មិំ’’ ឯវមាទិនា ភន្តេ ភគវា រញ្ញោ មាគធស្ស អជាតសត្តុស្ស វេទេហិបុត្តស្ស មជ្ឈិមសីលញ្ច មហាសីលញ្ច វិត្ថារតោ វិភជិត្វា ទេសេសិ.

សាធុ ¶ សាធុ អាវុសោ, សាធុ ខោ អាវុសោ យំ ភិក្ខុ ឯវំ ស្វាខាតេ ពុទ្ធសាសនេ សទ្ធាបព្ពជិតោ ឯវំ អរិយេន សីលេន សមន្នាគតោ វិហរេយ្យ.

បុច្ឆា – កថំ បនាវុសោ អរិយំ ឥន្ទ្រិយសំវរញ្ច អរិយំ សតិសម្បជញ្ញញ្ច អរិយំ សន្តោសញ្ច ភគវា រញ្ញោ មាគធស្ស អជាតសត្តុស្ស វិភជិត្វា ទេសេសិ.

វិស្សជ្ជនា – ឥធ មហារាជ ភិក្ខុ ចក្ខុនា រូបំ ទិស្វា ន និមិត្តគ្គាហី ហោតិ ននុព្យញ្ជនគ្គាហី, យត្វាធិករណមេនំ ចក្ខុន្ទ្រិយំ អសំវុតំ វិហរន្តំ អភិជ្ឈាទោមនស្សា បាបកា អកុសលា ធម្មា អន្វាស្សវេយ្យុំ, តស្ស សំវរាយ បដិបជ្ជតិ, រក្ខតិ ចក្ខុន្ទ្រិយំ, ចក្ខុន្ទ្រិយេ សំវរំ អាបជ្ជតិ, ឯវមាទិនា ច.

ឥធ មហារាជ ភិក្ខុ សតិសម្បជញ្ញេន សមន្នាគតោ ហោតិ, អភិក្កន្តេ បដិក្កន្តេ សម្បជនការី ហោតិ,

អាលោកិតេ ¶ វិលោកិតេ សម្បជានការី ហោតិ, សមិញ្ជិតេ បសារិតេ សម្បជានការី ហោតិ, សង្ឃាដិបត្តចីវរធារណេ សម្បជានការី ហោតិ, អសិតេ បីតេ ខាយិតេ សាយិតេ សម្បជានការី ហោតិ, ឧច្ចារបស្សាវកម្មេ សម្បជានការី ហោតិ, គតេ ឋិតេ និសិន្នេ សុត្តេ ជាគរិតេ ភាសិតេ តុណ្ហីភាវេ សម្បជានការី ហោតិ, ឯវំ ខោ មហារាជ ភិក្ខុ សតិសម្បជញ្ញេន សមន្នាគតោ ហោតិ.

កថញ្ច មហារាជ ភិក្ខុ សន្តុដ្ឋោ ហោតិ, ឥធ មហារាជ ភិក្ខុ សន្តុដ្ឋោ ហោតិ កាយបរិហារិកេន ចីវរេន កុច្ឆិបរិហារិកេន បិណ្ឌបាតេន.

ឯវមាទិនា ភន្តេ ភគវា រញ្ញោ មាគធស្ស អជាតសត្តុស្ស វេទេហិបុត្តស្ស អរិយញ្ច ឥន្ទ្រិយេសុគុត្តទ្វារតំ អរិយញ្ច សតិសម្បជញ្ញំ អរិយញ្ច សន្តោសំ វិភជិត្វា ទេសេសិ.

សាធុ ¶ សាធុ អាវុសោ, សាធុ ខោ អាវុសោ យំ ភិក្ខុ ឯវំ ស្វាខាតេ ពុទ្ធសាសនេ សទ្ធាបព្ពជិតោ ឥមិនា ច អរិយេន ឥន្ទ្រិយសំវរេន សមន្នាគតោ, ឥមិនា ច អរិយេន សតិសម្បជញ្ញេន

សមន្នាគតោ ¶ , ឥមាយ ច អរិយាយ សន្តុដ្ឋិយា សមន្នាគតោ វិហរេយ្យ.

បុច្ឆា – កថំ បនាវុសោ ភគវា រញ្ញោ មាគធស្ស អជាតសត្តុស្ស វេទេហិបុត្តស្ស នីវរណបហានំ វិភជិត្វា ទេសេសិ.

វិស្សជ្ជនា – សោ ឯវំ អរិយេន សីលក្ខន្ធេន សមន្នាគតោ, អរិយេន ឥន្ទ្រិយសំវរេន សមន្នាគតោ, អរិយេន សតិសម្បជញ្ញេន សមន្នាគតោ, អរិយាយ សន្តុដ្ឋិយា សមន្នាគតោ, វិវិត្តំ សេនាសនំ ភជតិ អរញ្ញំ រុក្ខមូលំ បព្ពតំ កន្ទរំ គិរិគុហំ សុសានំ វនបត្តំ អព្ភោកាសំ បលាលបុញ្ជំ. សោ បច្ឆាភត្តំ បិណ្ឌបាតបដិក្កន្តោ និសីទតិ បល្លង្កំ អាភុញ្ជិត្វា ឧជុំ កាយំ បណិធាយ បរិមុខំ សតិំ ឧបដ្ឋបេត្វា. សោ អភិជ្ឈំ លោកេ បហាយ វិគតាភិជ្ឈេន ចេតសា វិហរតិ…បេ… តស្សិមេ បញ្ច នីវរណេ បហីនេ អត្តនិ សមនុបស្សតោ បាមោជ្ជំ ជាយតិ, បមុទិតស្ស បីតិ ជាយតិ, បីតិមនស្ស កាយោ បស្សម្ភតិ, បស្សទ្ធកាយោ ¶ សុខំ វេទេហិ, សុខិនោ ចិត្តំ សមាធិយតិ. ឯវំ ខោ ភន្តេ ភគវា រញ្ញោ មាគធស្ស អជាតសត្តុស្ស វេទេហិបុត្តស្ស នីវរណប្បហានំ វិភជិត្វា វិត្ថារតោ ទេសេសិ.

សាធុ ¶ សាធុ អាវុសោ, សាធុ ខោ អាវុសោ យំ ភិក្ខុ ឯវំ ស្វាខាតេ ពុទ្ធសាសនេ សទ្ធាបព្ពជិតោ ឯវំ បញ្ចនីវរណេ បជហិត្វា តេហិ ចិត្តំ វិសោធេត្វា វិហរេយ្យ.

បុច្ឆា – កថញ្ចាវុសោ ¶ ភគវា រញ្ញោ មាគធស្ស អជាតសត្តុស្ស វេទេហិបុត្តស្ស បឋមំ សន្ទិដ្ឋិកំ សាមញ្ញផលំ ទេសេសិ, បុរិមេហិ សន្ទិដ្ឋិកេហិ សាមញ្ញផលេហិ អភិក្កន្តតរញ្ច បណីតតរញ្ច.

វិស្សជ្ជនា – សោ វិវិច្ចេវ កាមេហិ វិវិច្ច អកុសលេហិ ធម្មេហិ សវិតក្កំ សវិចារំ វិវេកជំ បីតិសុខំ បឋមំ ឈានំ ឧបសម្បជ្ជ វិហរតិ…បេ… ឥទម្បិ ខោ មហារាជ សន្ទិដ្ឋិកំ សាមញ្ញផលំ បុរិមេហិ សន្ទិដ្ឋិកេហិ សាមញ្ញផលេហិ អភិក្កន្តតរញ្ច

បណីតតរញ្ច ¶ . ឯវំ ខោ ភន្តេ ភគវា រញ្ញោ មាគធស្ស អជាតសត្តុស្ស វេទេហិបុត្តស្ស បឋមំ សន្ទិដ្ឋិកំ សាមញ្ញផលំ បុរិមេហិ សន្ទិដ្ឋិកេហិ សាមញ្ញផលេហិ អភិក្កន្តតរញ្ច បណីតតរញ្ច ទេសេសិ.

សាធុ ¶ សាធុ អាវុសោ, សាធុ ខោ អាវុសោ យំ ភិក្ខុ ឯវំ ស្វាខាតេ ពុទ្ធសាសនសង្ខាតេ ធម្មវិនយេ បព្ពជិត្វា ឯវំ បឋមំ ឈានំ

ឧបសម្បជ្ជ ¶ វិវេកជេន បីតិសុខេន អត្តនោ កាយំ អភិសន្ទេយ្យ បរិសន្ទេយ្យ បរិបូរេយ្យ.

បុច្ឆា – កថញ្ចាវុសោ ¶ ភគវា ទុតិយញ្ច តតិយញ្ច ចតុត្ថញ្ច សន្ទិដ្ឋិកំ សាមញ្ញផលំ ទេសេសិ, បុរិមេហិ សន្ទិដ្ឋិកេហិ សាមញ្ញផលេហិ អភិក្កន្តតរញ្ច បណីតតរញ្ច.

វិស្សជ្ជនា – បុន ច បរំ មហារាជ ភិក្ខុ វិតក្កវិចារានំ វូបសមា អជ្ឈត្តំ សម្បសាទនំ ចេតសោ ឯកោទិភាវំ អវិតក្កំ អវិចារំ សមាធិជំ បីតិសុខំ ទុតិយំឈានំ ឧបសម្បជ្ជ វិហរតិ ឯវមាទិនា ភន្តេ ភគវា រញ្ញោ មាគធស្ស អជាតសត្តុស្ស វេទេហិបុត្តស្ស ទុតិយញ្ច តតិយញ្ច ចតុត្ថញ្ច សន្ទិដ្ឋិកំ សាមញ្ញផលំ បុរិមេហិ សន្ទិដ្ឋិកេហិ សាមញ្ញផលេហិ អភិក្កន្តតរញ្ច បណីតតរញ្ច ទេសេសិ.

សាធុ ¶ សាធុ អាវុសោ, សាធុ ខោ អាវុសោ យំ ភិក្ខុ ឯវំ ស្វាខាតេ ពុទ្ធសាសនសង្ខាតេ ធម្មវិនយេ សទ្ធាបព្ពជិតោ ឯវំ ទុតិយឈានញ្ច តតិយឈានញ្ច ចតុត្ថឈានញ្ច ឧបសម្បជ្ជ តេហិ ឈានសុខេហិ អត្តនោ កាយំ អភិសន្ទេត្វា បរិសន្ទេត្វា បរិបូរេត្វា វិហរេយ្យ.

បុច្ឆា – កថញ្ច ¶ បនាវុសោ ភគវា រញ្ញោ មាគធស្ស អជាតសត្តុស្ស វេទេហិបុត្តស្ស អបរម្បិ សន្ទិដ្ឋិកំ សាមញ្ញផលំ ទេសេសិ, បុរិមេហិ សន្ទិដ្ឋិកេហិ សាមញ្ញផលេហិ អភិក្កន្តតរញ្ច បណីតតរញ្ច.

វិស្សជ្ជនា – សោ ឯវំ សមាហិតេ ចិត្តេ បរិសុទ្ធេ បរិយោទាតេ អនង្គណេ វិគតូបក្កិលេសេ មុទុភូតេ កម្មនិយេ ឋិតេ អានញ្ជប្បត្តេ ញាណទស្សនាយ ចិត្តំ អភិនីហរតិ អភិនិន្នាមេតិ, សោ ឯវំ បជានាតិ ‘‘អយំ ខោ មេ កាយោ រូបី ចាតុមហាភូតិកោ មាតាបេត្តិកសម្ភវោ ឱទនកុម្មាសូបចយោ អនិច្ចុច្ឆាទនបរិមទ្ទនភេទនវិទ្ធំសនធម្មោ, ឥទញ្ច បន មេ វិញ្ញាណំ ឯត្ថ សិតំ ឯត្ថ បដិពន្ធន្តិ…បេ… ឥទម្បិ ខោ មហារាជ សន្ទិដ្ឋិកំ សាមញ្ញផលំ បុរិមេហិ សន្ទិដ្ឋិកេហិ សាមញ្ញផលេហិ អភិក្កន្តតរញ្ច បណីតតរញ្ច. ឯវំ ខោ ភន្តេ ភគវា រញ្ញោ មាគធស្ស អជាតសត្តុស្ស វេទេហិបុត្តស្ស អបរម្បិ សន្ទិដ្ឋិកំ សាមញ្ញផលំ បុរិមេហិ សន្ទិដ្ឋិកេហិ សាមញ្ញផលេហិ អភិក្កន្តតរញ្ច បណីតតរញ្ច ទេសេសិ.

សុញ្ញារំគា ¶ បវិដ្ឋស្ស, សន្តចិត្តស្ស ភិក្ខុនោ. អមានុសី រតី ហោតិ, សម្មាធម្មំ វិបស្សតោ.

សាធុ ¶ សាធុ អាវុសោ, សាធុ ខោ អាវុសោ យំ ភិក្ខុ ឯវំ ស្វាខាតេ ពុទ្ធសាសនសង្ខាតេ ធម្មវិនយេ សទ្ធាបព្ពជិតោ ឯវំ ញាណទស្សនំ ឧប្បាទេត្វា ឯវំ ញាណទស្សនេន សមន្នាគតោ ហុត្វា វិហរេយ្យ.

បុច្ឆា – កថញ្ចាវុសោ ¶ ភគវា អបរម្បិ សន្ទិដ្ឋិកំ សាមញ្ញផលំ ទេសេសិ, បុរិមេហិ សន្ទិដ្ឋិកេហិ សាមញ្ញផលេហិ អភិក្កន្តតរញ្ច បណីតតរញ្ច.

វិស្សជ្ជនា – សោ ឯវំ សមាហិតេ ចិត្តេ បរិសុទ្ធេ បរិយោទាតេ អនង្គណេ វិគតូបក្កិលេសេ មុទុភូតេ កម្មនិយេ ឋិតេ អានញ្ជប្បត្តេ មនោមយំ កាយំ អភិនិម្មានាយ ចិត្តំ អភិនីហរតិ អភិនិន្នាមេតិ, សោ ឥមម្ហា កាយា អញ្ញំ កាយំ អភិនិម្មិនាតិ រូបិំ មនោមយំ សព្ពង្គបច្ចង្គិំ អហីនិន្ទ្រិយំ ឯវមាទិនា ភន្តេ ភគវា រញ្ញោ មាគធស្ស អជាតសត្តុស្ស វេទេហិបុត្តស្ស អបរម្បិ សន្ទិដ្ឋិកំ សាមញ្ញផលំ បុរិមេហិ សន្ទិដ្ឋិកេហិ សាមញ្ញផលេហិ អភិក្កន្តតរញ្ច បណីតតរញ្ច ទេសេសិ.

សាធុ ¶ សាធុ អាវុសោ, សាធុ ខោ អាវុសោ យំ ភិក្ខុ ឯវំ ស្វាខាតេ ពុទ្ធសាសនសង្ខាតេ ធម្មវិនយេ សទ្ធាបព្ពជិតោ ឯវំ វិសេសេន មនោមយញាណេន សមន្នាគតោ វិហរេយ្យ.

បុច្ឆា – ភគវា ¶ អាវុសោ រញ្ញោ មាគធស្ស អជាតសត្តុស្ស វេទេហិបុត្តស្ស ឈានចតុក្កសង្ខាតញ្ច បឋម ទុតិយ វិជ្ជាសង្ខាតញ្ច សន្ទិដ្ឋិកំ សាមញ្ញផលំ ទស្សេត្វា, អបរំ កីទិសំ សំន្ទិដ្ឋិកំ សាមញ្ញផលំ ទេសេសិ, បុរិមេហិ សន្ទិដ្ឋិកេហិ សាមញ្ញផលេហិ អភិក្កន្តតរញ្ច បណីតតរញ្ច.

វិស្សជ្ជនា – សោ ឯវំ សមាហិតេ ចិត្តេ បរិសុទ្ធេ បរិយោទាតេ អនង្គណេ វិគតូបក្កិលេសេ មុទុភូតេ កម្មនិយេ ឋិតេ អានញ្ជប្បត្តេ ឥទ្ធិវិធាយ ចិត្តំ អភិនីហរតិ អភិនិន្នាមេតិ, សោ អនេកវិហិតំ ឥទ្ធិវិធំ បច្ចនុភោតិ, ឯកោបិ ហុត្វា ពហុធា ហោតិ, ពហុធាបិ ហុត្វា ឯកោ ហោតិ…បេ… ឥទម្បិ ខោ មហារាជ សន្ទិដ្ឋិកំ សាមញ្ញផលំ បុរិមេហិ សន្ទិដ្ឋិកេហិ សាមញ្ញផលេហិ អភិក្កន្តតរញ្ច បណីតតរញ្ចាតិ. ឥត្ថំ ខោ ភន្តេ ភគវា រញ្ញោ មាគធស្ស អជាតសត្តុស្ស វេទេហិបុត្តស្ស អបរម្បិ សន្ទិដ្ឋិកំ សាមញ្ញផលំ បុរិមេហិ សន្ទិដ្ឋិកេហិ សាមញ្ញផលេហិ អភិក្កន្តតរញ្ច បណីតតរញ្ច ទេសេសិ.

អច្ឆរិយំ ¶ អាវុសោ អព្ភុតំ អាវុសោ, យាវ ពុទ្ធសាសនស្ស ស្វាខាតតា, យត្រហិ នាម ឯវំ ស្វាខាតេ ពុទ្ធសាសនេ បព្ពជិត្វា សាវកោបិ សម្មាបដិបន្នោ ឯវំ មហិទ្ធិកំ ឯវំ មហានុភាវំ ឥទ្ធិវិធញាណម្បិ បច្ចនុភោស្សតិ.

បុច្ឆា – កថំ ¶ បនាវុសោ ភគវា អបរម្បិ សន្ទិដ្ឋិកំ សាមញ្ញផលំ ទេសេសិ, បុរិមេហិ សន្ទិដ្ឋិកេហិ សាមញ្ញផលេហិ អភិក្កន្តតរញ្ច បណីតតរញ្ច.

វិស្សជ្ជនា – សោ ឯវំ សមាហិតេ ចិត្តេ បរិសុទ្ធេ បរិយោទាតេ អនង្គណេ វិគតូបក្កិលេសេ មុទុភូតេ កម្មនិយេ ឋិតេ អានញ្ជប្បត្តេ ទិព្ពាយ សោតធាតុយា ចិត្តំ អភិនីហរតិ អភិនិន្នាមេតិ, សោ ទិព្ពាយ សោតធាតុយា វិសុទ្ធាយ អតិក្កន្ត មានុសិកាយ ឧភោ សទ្ទេ សុណាតិ ទិព្ពេ ច មានុសេ ច យេ ទូរេ សន្តិកេ ច…បេ… ឥទម្បិ ខោ មហារាជ សន្ទិដ្ឋិកំ សាមញ្ញផលំ បុរិមេហិ សន្ទិដ្ឋិកេហិ សាមញ្ញផលេហិ អភិក្កន្តតរញ្ច បណីតតរញ្ច. ឯវំ ខោ ភន្តេ ភគវា រញ្ញោ មាគធស្ស អជាតសត្តុស្ស វេទេហិបុត្តស្ស អបរម្បិ សន្ទិដ្ឋិកំ សាមញ្ញផលំ បុរិមេហិ សន្ទិដ្ឋិកេហិ សាមញ្ញផលេហិ អភិក្កន្តតរញ្ច បណីតតរញ្ច ទេសេសិ.

អច្ឆរិយំ ¶ អាវុសោ, អព្ភុតំ អាវុសោ, យាវ ពុទ្ធសាសនស្ស ស្វាខាតតា, យត្រហិ នាម ឯវំ ស្វាខាតេ ពុទ្ធសាសនេ សទ្ធាបព្ពជិតោ សម្មាបដិបន្នោ សាវកោបិ ឯវំ វិសេសំ ទិព្ពសោតញាណំ បដិលភិស្សតិ.

បុច្ឆា – កថំ បនាវុសោ ភគវា អបរម្បិ សន្ទិដ្ឋិកំ សាមញ្ញផលំ ទេសេសិ, បុរិមេហិ សន្ទិដ្ឋិកេហិ សាមញ្ញផលេហិ អភិក្កន្តតរញ្ច បណីតតរញ្ច.

វិស្សជ្ជនា – សោ ឯវំ សមាហិតេ ចិត្តេ បរិសុទ្ធេ បរិយោទាតេ. អនង្គណេ វិគតូបក្កិលេសេ មុទុភូតេ កម្មនិយេ ឋិតេ

អានញ្ជប្បត្តេ ¶ ចេតោបរិយញាណាយ ចិត្តំ អភិនីហរតិ អភិនិន្នាមេតិ, សោ បរសត្តានំ បរបុគ្គលានំ ចេតសា ចេតោ បរិច្ច បជានាតិ, សរាគំ វា ចិត្តំ សរាគំ ចិត្តន្តិ បជានាតិ, វីតរាគំ វា ចិត្តំ វីតរាគំ ចិត្តន្តិ បជានាតិ…បេ… ឥទម្បិ ខោ មហារាជ សន្ទិដ្ឋិកំ សាមញ្ញផលំ បុរិមេហិ សន្ទិដ្ឋិកេហិ សាមញ្ញផលេហិ អភិក្កន្តតរញ្ច បណីតតរញ្ច. ឯវំ ខោ ភន្តេ ភគវា រញ្ញោ មាគធស្ស អជាតសត្តុស្ស វេទេហិបុត្តស្ស អបរម្បិ សន្ទិដ្ឋិកំ សាមញ្ញផលំ បុរិមេហិ សន្ទិដ្ឋិកេហិ សាមញ្ញផលេហិ អភិក្កន្តតរញ្ច បណីតតរញ្ច ទេសេសិ.

អច្ឆរិយំ ¶ អាវុសោ, អព្ភុតំ អាវុសោ, យាវ ពុទ្ធសាសនស្ស ស្វាខាតតា, យត្រហិ នាម ឯវំ ស្វាខាតេ ពុទ្ធសាសនេ បព្ពជិតោ សម្មាបដិបន្នោ សាវកោបិ ឯវំ វិសេសំ ចេតោបរិយញាណំ បដិលភិស្សតិ.

វិស្សជ្ជនា – សោ ឯវំ សមាហិតេ ចិត្តេ បរិសុទ្ធេ បរិយោទាតេ អនង្គណេ វិគតូបក្កិលេសេ មុទុភូតេ កម្មនិយេ ឋិតេ អានញ្ជប្បត្តេ បុព្ពេនិវាសានុស្សតិញាណាយ ចិត្តំ អភិនីហរតិ អភិនិន្នាមេតិ, សោ អនេកវិហិតំ បុព្ពេនិវាសំ អនុស្សរតិ, សេយ្យថិទំ, ឯកម្បិជាតិំ ទ្វេបិ ជាតិយោ…បេ… ឥទម្បិ ខោ មហារាជ សន្ទិដ្ឋិកំ សាមញ្ញផលំ បុរិមេហិ សន្ទិដ្ឋិកេហិ សាមញ្ញផលេហិ អភិក្កន្តតរញ្ច បណីតតរញ្ច. ឯវំ ខោ ភន្តេ ភគវា រញ្ញោ មាគធស្ស អជាតសត្តុស្ស វេទេហិបុត្តស្ស អបរម្បិ សន្ទិដ្ឋិកំ សាមញ្ញផលំ បុរិមេហិ សន្ទិដ្ឋិកេហិ សាមញ្ញផលេហិ អភិក្កន្តតរញ្ច បណីតតរញ្ច ទេសេសិ.

អច្ឆរិយំ ¶ អាវុសោ, អព្ភុតំ អាវុសោ, យាវ ពុទ្ធសាសនស្ស ស្វាខាតតា, យត្រហិ នាម ឯវំ ស្វាខាតេ ពុទ្ធសាសនេ បព្ពជិត្វា សាវកោបិ សម្មាបដិបន្នោ ឯវំ វិសេសំ បុព្ពេនិវាសញាណំ បដិលភិស្សតិ.

បុច្ឆា – កថញ្ច បនាវុសោ ភគវា សន្ទិដ្ឋិកំ សាមញ្ញផលំ ទេសេសិ, បុរិមេហិ សន្ទិដ្ឋិកេហិ សាមញ្ញផលេហិ អភិក្កន្តតរញ្ច បណីតតរញ្ច.

វិស្សជ្ជនា – សោ ឯវំ សមាហិតេ ចិត្តេ បរិសុទ្ធេ បរិយោទាតេ អនង្គណេ វិគតូបក្កិលេសេ មុទុភូតេ កម្មនិយេ ឋិតេ អានេញ្ជប្បត្តេ សត្តានំ ចុតូបបាតញាណាយ ចិត្តំ អភិនីហរតិ ¶ អភិនិន្នាមេតិ, សោ ទិព្ពេន ចក្ខុនា វិសុទ្ធេន អតិក្កន្តមានុសកេន សត្តេ បស្សតិ ចវមានេ ឧបបជ្ជមានេ ហីនេ បណីតេ សុវណ្ណេ ទុព្ពណ្ណេ សុគតេ ទុគ្គតេ យថាកម្មុបគេ សត្តេ បជានាតិ…បេ… ឥទម្បិ ខោ មហារាជ សន្ទិដ្ឋិកំ សាមញ្ញផលំ បុរិមេហិ សន្ទិដ្ឋិកេហិ សាមញ្ញផលេហិ អភិក្កន្តតរញ្ច បណីតតរញ្ច. ឥត្ថំ ខោ ភន្តេ ភគវា រញ្ញោ មាគធស្ស អជាតសត្តុស្ស វេទេហិបុត្តស្ស អបរម្បិ សន្ទិដ្ឋិកំ សាមញ្ញផលំ បុរិមេហិ សន្ទិដ្ឋិកេហិ សាមញ្ញផលេហិ អភិក្កន្តតរញ្ច បណីតតរញ្ច ទេសេសិ.

អច្ឆរិយំ ¶ អាវុសោ, អព្ភុតំ អាវុសោ, យាវ ពុទ្ធសាសនស្ស ស្វាខាតតា, យត្រហិ នាម ឯវំ ស្វាខាតេ ពុទ្ធសាសនេ បព្ពជិតោ សាវកោបិ សម្មាបដិបន្នោ ឯវំ វិសេសំ ទិព្ពចក្ខុញាណំ បដិលភិស្សតិ.

បុច្ឆា – កថំ ¶ បនាវុសោ ភគវា បរិយោសានេ ឧត្តរិតរំ សាមញ្ញផលំ ទេសេសិ.

វិស្សជ្ជនា – សោ ឯវំ សមាហិតេ ចិត្តេ បរិសុទ្ធេ បរិយោទាតេ អនង្គណេ វិគតូបក្កិលេសេ មុទុភូតេ កម្មនិយេ ឋិតេ អានេញ្ជប្បត្តេ អាសវានំ ខយញាណាយ ចិត្តំ អភិនីហរតិ អភិនិន្នាមេតិ…បេ… ឥទំ ខោ មហារាជ សន្ទិដ្ឋិកំ សាមញ្ញផលំ បុរិមេហិ សន្ទិដ្ឋិកេហិ សាមញ្ញផលេហិ អភិក្កន្តតរញ្ច បណីតតរញ្ច. ឥមស្មា ច បន មហារាជ សន្ទិដ្ឋិកា សាមញ្ញផលា អញ្ញំ សន្ទិដ្ឋិកំ សាមញ្ញផលំ ឧត្តរិតរំ វា បណីតតរំ វា នត្ថីតិ. ឥត្ថំ ខោ ភន្តេ ភគវា រញ្ញោ មាគធស្ស អជាតសត្តុស្ស វេទេហិបុត្តស្ស បរិយោសានំ សន្ទិដ្ឋិកំ សាមញ្ញផលំ បុរិមេហិ សន្ទិដ្ឋិកេហិ សាមញ្ញផលេហិ អភិក្កន្តតរញ្ច បណីតតរញ្ច ទេសេសិ.

សាធុ ¶ សាធុ អាវុសោ, សាធុ ខោ អាវុសោ, យំ ភិក្ខុ ពុទ្ធសាសនេ សទ្ធាបព្ពជិតោ ឯវំ ស្វាខាតេ ធម្មវិនយេ សម្មាបដិបន្នោ អាសវក្ខយញាណំ បាបុណិត្វា ទុក្ខស្សន្តំ ករោតិ.

បុច្ឆា – កថំ ¶ បនាវុសោ រាជា មាគធោ អជាតសត្តុ វេទេហិបុត្តោ ឥមិស្សា ទេសនាយ បរិយោសានេ ភគវតិ ច ទេសនាយញ្ច បសន្នោ បសន្នាការំ អកាសិ, កីទិសញ្ច អានិសំសំ បដិលភិ.

វិស្សជ្ជនា – ឯវំ វុត្តេ ភន្តេ មាគធោ អជាតសត្តុ វេទេហិបុត្តោ ភគវន្តំ ឯតទវោច, អភិក្កន្តំ ភន្តេ, អភិក្កន្តំ ភន្តេ, សេយ្យថាបិ ភន្តេ និក្កុជ្ជិតំ វា ឧក្កុជ្ជេយ្យ, បដិច្ឆន្នំ វា វិវរេយ្យ…បេ… អជ្ជតគ្គេ បាណ្ណុបេតំ សរណំ គតន្តិ, អយញ្ហិ ភន្តេ រាជា បិតុមារិតកាលតោ បដ្ឋាយ នេវ រត្តិំ ន ទិវា និទ្ទំ បដិលភតិ, សត្ថារំ បន ឧបសង្កមិត្វា ឥមាយ មធុរាយ ឱជវន្តិយា ធម្មទេសនាយ សុតកាលតោ បដ្ឋាយ និទ្ទំ បដិលភតិ, តិណ្ណំ រតនានំ មហាសក្ការមកាសិ, បុថុជ្ជនិកាយ សទ្ធាយ សមន្នាគតោ នាម ឥមិនា រញ្ញា សទិសោ នាហោសិ, អនាគតេ បន វិជិតាវី នាម បច្ចេកពុទ្ធោ ហុត្វា បរិនិព្ពាយិស្សតិ. ឯវំ ខោ ភន្តេ រាជា មាគធោ អជាតសត្តុ វេទេហិបុត្តោ ¶ ទេសនាបរិយោសានេ បសន្នោ បសន្នាការមកាសិ, ឥទិសញ្ច ភន្តេ មហានិសំសំ បដិលភិ.

បុច្ឆា – តេនាវុសោ ¶ ភគវា ជានតា អរហតា បស្សតា សម្មាសម្ពុទ្ធេន អម្ពដ្ឋំ ដាម សុត្តំ កត្ថ កំ អារព្ភ ភាសិតំ.

វិស្សជ្ជនា – កោសលេសុ ភន្តេ ជនបទេ ឥច្ឆានង្គលេ នាម កោសលានំ ព្រាហ្មណគាមេ អម្ពដ្ឋំ នាម មាណវំ ព្រាហ្មណស្ស បោក្ខរសាតិស្ស អន្តេវាសិំ អារព្ភ ភាសិតំ.

បុច្ឆា – សោណទណ្ឌំ ¶ បនាវុសោ សុត្តំ ភគវតា កត្ថ កំ អារព្ភ ភាសិតំ.

វិស្សជ្ជនា – អង្គេសុ ភន្តេ ជនបទេ ចម្បាយំ សោណទណ្ឌំ ព្រាហ្មណំ អារព្ភ ភាសិតំ.

បុច្ឆា – កូដទន្តំ ¶ បនាវុសោ សុត្តំ ភគវតា កត្ថ កំ អារព្ភ ភាសិតំ.

វិស្សជ្ជនា – មគធេសុ ភន្តេ ខាណុមតេ នាម ព្រាហ្មណគាមេ កូដទន្ត ព្រាហ្មណំ អារព្ភ ភាសិតំ.

បុច្ឆា – មហាលិំ ¶ បនាវុសោ សុត្តំ ភគវតា កត្ថ កំ អារព្ភ ភាសិតំ.

វិស្សជ្ជនា – វេសាលិយំ ភន្តេ ឱដ្ឋទ្ធំ នាម លិច្ឆវិំ អារព្ភ ភាសិតំ.

បុច្ឆា – ជាលិយំ ¶ បនាវុសោ សុត្តំ ភគវតា កត្ថ កំ អារព្ភ ភាសិតំ.

វិស្សជ្ជនា – កោសម្ពិយំ ភន្តេ ទ្វេ បព្ពជិតេ អារព្ភ ភាសិតំ.

បុច្ឆា – មហាសីហនាទំ ¶ បនាវុសោ សុត្តំ ភគវតា កត្ថ កំ អារព្ភ ភាសិតំ.

វិស្សជ្ជនា – ឧរុញ្ញាយំ ភន្តេ កណ្ណកថលេ អចេលំ កស្សបំ អារព្ភ ភាសិតំ.

បុច្ឆា – បោដ្ឋបាទំ ¶ បនាវុសោ សុត្តំ ភគវតា កត្ថ កំ អារព្ភ ភាសិតំ.

វិស្សជ្ជនា – សាវត្ថិយំ ភន្តេ បោដ្ឋបាទញ្ច បរិព្ពាជកំ ចិត្តញ្ច ហត្ថិសារិបុត្តំ អារព្ភ ភាសិតំ.

បុច្ឆា – សុភសុត្តំ ¶ បនាវុសោ កត្ថ កំ អារព្ភ កេន ភាសិតំ.

វិស្សជ្ជនា – សាវត្ថិយំ ភន្តេ អាយស្មតា អានន្ទេន ធម្មភណ្ឌាគារិកេន សុភំ មាណវំ តោទេយ្យបុត្តំ អារព្ភ ភាសិតំ.

បុច្ឆា – កេវដ្ដំ ¶ បនាវុសោ សុត្តំ ភគវតា កត្ថ កំ អារព្ភ ភាសិតំ.

វិស្សជ្ជនា – នាឡន្ទា យំ ភន្តេ កេវដ្ដំ គហបតិបុត្តំ អារព្ភ ភាសិតំ.

បុច្ឆា – លោហិច្ចសុត្ត ¶ បនាវុសោ ភគវតា កត្ថ កំ អារព្ភ ភាសិតំ.

វិស្សជ្ជនា – កោសលេសុ ភន្តេ ជនបទេ សាលវតិកាយំ លោហិច្ចំ ព្រាហ្មណំ អារព្ភ ភាសិតំ.

បុច្ឆា – តេវិជ្ជសុត្តំ ¶ បនាវុសោ ភគវតា កត្ថ កំ អារព្ភ ភាសិតំ.

វិស្សជ្ជនា – កោសលេសុ ភន្តេ មនសាកដេ នាម កោសលានំ ព្រាហ្មណគាមេ វាសេដ្ឋំ ភារទ្វាជំ មាណវំ អារព្ភ ភាសិតំ.

បុច្ឆា – តេន ¶ អាវុសោ ភគវតា ជានតា បស្សតា អរហតា សម្មាសម្ពុទ្ធេន មហាបទានសុត្តំ ទីឃនិកាយេ មហាវគ្គេ បោរាណកេហិ សង្គិតិការេហិ បឋមំ សង្គិតំ ភគវតា កត្ថ កំ អារព្ភ កិស្មិំ វត្ថុស្មិំ ភាសិតំ.

វិស្សជ្ជនា – សាវត្ថិយំ ភន្តេ សម្ពហុលេ ភិក្ខូ អារព្ភ ភាសិតំ, សម្ពហុលានំ ភន្តេ ភិក្ខូនំ បច្ឆាភត្តំ បិណ្ឌបាតបដិក្កន្តានំ មណ្ឌលមាឡេ សន្និសិន្នានំ សន្និបតិតានំ បុព្ពេនិវាសបដិសំយុត្តា ធម្មីកថា ឧទបាទិ, ឥតិបិ បុព្ពេនិវាសោ ឥតិបិ បុព្ពេនិវាសោតិ, តស្មិំ ភន្តេ វត្ថុស្មិំ ភាសិតំ.

បុច្ឆា – មហានិទានសុត្តំ ¶ បនាវុសោ ភគវតា កត្ថ កំ អារព្ភ កិស្មិំ វត្ថុស្មិំ ភាសិតំ.

វិស្សជ្ជនា – កុរូសុ ភន្តេ កម្មាសធម្មេ នាម កុរូនំ និគមេ អាយស្មន្តំ អានន្ទំ អារព្ភ ភាសិតំ, អាយស្មា ភន្តេ អានន្ទោ ភគវន្តំ ឧបសង្កមិត្វា ឯតទវោច ‘‘អច្ឆរិយំ ភន្តេ, អព្ភុតំ ភន្តេ, យាវ គម្ភីរោចាយំ ភន្តេ បដិច្ចសមុប្បាទោ

គម្ភីរាវភាសោ ¶ ច, អថ ច បន មេ ឧត្តានកុត្តានកោ វិយ ខាយតី’’តិ, តស្មិំ ភន្តេ វត្ថុស្មិំ ភាសិតំ.

បុច្ឆា – មហាបរិនិព្ពានសុត្តំ ¶ បនាវុសោ ពហុអនុសន្ធិកំ, ពហុទេសនា សង្គហំ, ពុទ្ធស្ស ភគវតោ បរិនិព្ពានាសន្នវស្សេ បវត្តអដ្ឋុប្បត្តិទីបកវចនបពន្ធភូតំ, តស្មា តំ អន្តរាភេទវសេន វិភជ្ជ បរិច្ឆិជ្ជ បរិច្ឆិជ្ជ បុច្ឆិស្សាមិ, តត្ថាវុសោ ភគវតា បឋមំ

រាជូនំ ¶ អបរិហានិយធម្មទេសនា កត្ថ កំ អារព្ភ កិស្មិំ វត្ថុស្មិំ ភាសិតា.

វិស្សជ្ជនា – រាជគហេ ភន្តេ វស្សការំ ព្រាហ្មណំ មគធមហាមត្តំ អារព្ភ ភាសិតា, វស្សការោ ភន្តេ ព្រាហ្មណោ មគធមហាមត្តោ ភគវន្តំ ឧបសង្កមិត្វា ឯតទវោច ‘‘រាជា ភោ គោតម មាគធោ អជាតសត្តុ វេទេហិបុត្តោ វជ្ជី អភិយាតុកាមោ សោ ឯវមាហ អហំ ហិមេ វជ្ជី ឯវំ មហិទ្ធិកេ ឯវំ មហានុភាវេ ឧច្ឆេច្ឆាមិ វជ្ជី វិនាសេស្សាមិ វជ្ជី អនយព្យសនំ អាបាទេស្សាមី វជ្ជី’’តិ តស្មិំ ភន្តេ វត្ថុស្មិំ ភាសិតា.

បុច្ឆា – ភិក្ខូនំ ¶ បនាវុសោ អបរិហានិយធម្មទេសនា ភគវតា កត្ថ កិស្មិំ វត្ថុស្មិំ ភាសិតា.

វិស្សជ្ជនា – តស្មិំយេវ ភន្តេ រាជគហេ តស្មិំយេវ វត្ថុស្មិំ ភាសិតា.

បុច្ឆា – ធម្មាទាសោ ¶ អាវុសោ ធម្មបរិយាយោ ភគវតា កត្ថ កំ អារព្ភ កិស្មិំ វត្ថុស្មិំ ភាសិតោ.

វិស្សជ្ជនា – នាតិកេ ភន្តេ គិញ្ជកាវសថេ អាយស្មន្តំ អានន្ទ អារព្ភ ភាសិតោ, អាយស្មា ភន្តេ អានន្ទោ ភគវន្តំ ឧបសង្កមិត្វា នាតិកិយានំ ទ្វាទសន្នំ បុគ្គលានំ គតិអភិសម្បរាយំ បុច្ឆិ, តស្មិំ ភន្តេ វត្ថុស្មិំ ភាសិតោ.

បុច្ឆា – អត្តទីបធម្មទេសនា ¶ បនាវុសោ ភគវតា កត្ថ កំ អារព្ភ កិស្មិំ វត្ថុស្មិំ ភាសិតា.

វិស្សជ្ជនា – វេសាលិយំ ភន្តេ វេឡុវគាមកេ អាយស្មន្តំ អានន្ទំ អារព្ភ ភាសិតា, អាយស្មា ភន្តេ អានន្ទោ ភគវតោ គិលានវុដ្ឋិតស្ស អចិរវុដ្ឋិតស្ស គេលញ្ញា ភគវតោ គេលញ្ញេន អត្តនោ ខេទបត្តការណំ អារោចេសិ, តស្មិំ ភន្តេ វត្ថុស្មិំ ភាសិតា.

‘‘តស្មាតិហានន្ទ ¶ អត្តទីបា វិហរថ អត្តសរណា អនញ្ញសរណា’’.

បុច្ឆា – ភគវតា អាវុសោ បុរិម ទុតិយទិវសេ បុច្ឆិតវិស្សជ្ជិតក្កមេន អត្តទីបធម្មទេសនញ្ច អញ្ញានិ ច ធម្មទេសនានិ កថេត្វា បរិនិដ្ឋិត សព្ពពុទ្ធកិច្ចេន អាយុសង្ខារោ កត្ថ ឱស្សដ្ឋោ.

វិស្សជ្ជនា – វេសាលិយំ ភន្តេ ចាបាលេ ចេតិយេ មារេន បាបិមតា យាចិតោ ភគវា សតេន សម្បជានេន អាយុសង្ខារោ ឱស្សដ្ឋោ.

‘‘បរិនិព្ពាតុ ¶ ទានិ ភន្តេ ភគវា, បរិនិព្ពាតុ សុគតោ, បរិនិព្ពាន កាលោ ទានិ ភន្តេ ភគវតោ.

អប្បោសុក្កោ ត្វំ បាបិម ហោតិ, ន ចិរំ តថាគតស្ស បរិនិព្ពានំ ភវិស្សតិ, ឥតោ តិណ្ណំ មាសានំ អច្ចយេន តថាគតោ បរិនិព្ពាយិស្សតិ.

បុច្ឆា – ចតុមហាបទេសធម្មទេសនា ¶ បនាវុសោ ភគវតា កត្ថ ភាសិតា.

វិស្សជ្ជនា – ភោគនគរេ ភន្តេ អានន្ទេ ចេតិយេ ភាសិតា.

បរិបក្កោ ¶ វយោ មយ្ហំ, បរិត្តំ មម ជីវិតំ. បហាយ វោ គមិស្សាមិ, កតំ មេ សរណមត្តនោ.

បុច្ឆា – ចតុសំវេជនីយកថា ¶ បនាវុសោ ភគវតា កត្ថ កំ អារព្ភ កិស្មិំ វត្ថុស្មិំ ភាសិតា.

វិស្សជ្ជនា – កុសិនារាយំ ភន្តេ អាយស្មន្តំ អានន្ទំ អារព្ភ ភាសិតា, អាយស្មា ភន្តេ អានន្ទោ ភគវន្តំ ឯតទវោច ‘‘បុព្ពេ ភន្តេ ទិសាសុ វស្សំវុដ្ឋា ភិក្ខូ អាគច្ឆន្តិ តថាគតំ ទស្សនាយ, តេ មយំ លភាម មនោភាវនីយេ ភិក្ខូ ទស្សនាយ, លភាម បយិរុបាសនាយ. ភគវតោ បន មយំ ភន្តេ អច្ចយេន ន លភិស្សាម មនោភាវនីយេ ភិក្ខូ ទស្សនាយ, ន លភិស្សាម បយិរុបាសនាយា’’តិ, តស្មិំ ភន្តេ វត្ថុស្មិំ ភាសិតា.

យេហិ ¶ កេចិ អានន្ទ ចេតិយចារិកំ អាហិណ្ឌន្តា បសន្នចិត្តា កាលំ ករិស្សន្តិ, សព្ពេតេ កាយស្ស ភេទា បរំ មរណា សុគតិំ សគ្គំ លោកំ ឧបបជ្ជិស្សន្តិ ហុ –

បុច្ឆា – កថញ្ចាវុសោ ¶ ភគវា ភិក្ខូនំ មាតុគាមេសុ បដិបជ្ជិតព្ពវត្តំ កថេសិ.

វិស្សជ្ជនា – អទស្សនំ អានន្ទាតិ ច អនាលាបោ អានន្ទាតិ ច សតិ អានន្ទ ឧបដ្ឋព្ពេតព្ពាតិ ច ឯវំ ខោ ភន្តេ ភគវា មាតុគាមេសុ បដិបជ្ជិតព្ពាការំ កថេសិ.

បុច្ឆា – មហាសុទស្សនសុត្តំ ¶ បនាវុសោ ភគវតា កត្ថ កំ អារព្ភ កិស្មិំ វត្ថុស្មិំ ភាសិតំ.

វិស្សជ្ជនា – តិស្សំយេវ ភន្តេ កុសិនារាយំ អាយស្មន្តំ អានន្ទំ អារព្ភ ភាសិតំ, អាយស្មា ភន្តេ អានន្ទោ ភគវន្តំ ឯតទវោច ‘‘មា ភន្តេ ភគវា ឥមស្មិំ ខុទ្ទកនគរកេ

ឧជ្ជង្គលនគរកេ ¶ សាខានគរកេ បរិនិព្ពាយិ. សន្តិ ភន្តេ អញ្ញានិ មហានគរានិ. សេយ្យថិទំ, ចម្បា, រាជគហំ, សាវត្ថី, សាកេតំ, កោសម្ពី, ពារាណសី, ឯត្ថ ភគវា បរិនិព្ពាយតុ, ឯត្ថ ពហូ ខត្តិយមហាសាលា ព្រាហ្មណ មហាសាលា គហបតិ មហាសាលា តថាគតេ អភិប្បសន្នា. តេ តថាគតស្ស សរីរបូជំ ករិស្សន្តី’’តិ, តស្មិំ ភន្តេ វត្ថុស្មិំ ភាសិតំ.

បុច្ឆា – ភគវា ¶ អាវុសោ បុរិមទិវសេ បុច្ឆិត វិស្សជ្ជិតក្កមេន មហាសុទស្សន សុត្តន្តំ ទេសេត្វា សុភទ្ទំនាម បរិព្ពាជកំ ពុទ្ធវេនេយ្យេសុ បច្ឆិមសាវកភូតំ កថំ វិនេសិ.

វិស្សជ្ជនា – យស្មិំ ខោ សុភទ្ទ ធម្មវិនយេ អរិយោ អដ្ឋង្គិកោ មគ្គោ ន ឧបលព្ភតិ, សមណោបិ តត្ថ ន ឧបលព្ភតិ, ទុតិយោបិ តត្ថ សមណោ ន ឧបលព្ភតិ, តតិយោបិ តត្ថ សមណោ ន ឧបលព្ភតិ, ចតុត្ថោបិ តត្ថ សមណោ ន ឧបលព្ភតិ (បេយ្យាល). ឥមេ ច សុភទ្ទ ភិក្ខូ សម្មា វិហរេយ្យុំ, អសុញ្ញោ លោកោ អរហន្តេហិ អស្ស, ឯវំ ខោ ភន្តេ ភគវា សុភទ្ទំ បរិព្ពាជកំ ពុទ្ធវេនេយ្យេសុ បច្ឆិមំ សក្ខិសាវកំ វិនេសិ.

បុច្ឆា – បច្ឆិមេ ¶ បនាវុសោ កាលេ ភគវា អាយស្មតោ អានន្ទស្ស កីទិសំ វចនំ កថេត្វា, កថញ្ច ភិក្ខូ បវារេត្វា, កីទិសញ្ច ភិក្ខូនំ វចនំ អាមន្តេត្វា, កថញ្ច អនុបាទិសេសាយ និព្ពានធាតុយា បរិនិព្ពាយិ.

វិស្សជ្ជនា – ភគវា ភន្តេ បច្ឆិមេ កាលេ អាយស្មតោ អានន្ទស្ស សិយា ខោ បនានន្ទ តុម្ហាកំ ឯវមស្ស អតីតសត្ថុកំ បាវចនំ នត្ថិ នោ សត្ថាតិ ឯវមាទិកំ វចនំ កថេត្វា, សិយា ខោ បន ភិក្ខវេ ឯកភិក្ខុស្សាបិ កង្ខា វា វិមតិ វា ពុទ្ធេ វា ធម្មេ វា សង្ឃេ វា មគ្គេ វា បដិបទាយ វាតិ ឯវមាទិនា ភិក្ខូ បវារេត្វា, ហន្ទទានិ ភិក្ខវេ អាមន្តយាមិ វោ, វយធម្មា សង្ខារា អប្បមាទេន សម្បាទេថាតិ បច្ឆិមញ្ច ឱវាទវចនំ ភិក្ខូនំ អាមន្តេត្វា, នវ អនុបុព្ពសមាបត្តិយោ អនុលោមំ បដិលោមំ សមាបជ្ជិត្វា, ចតុត្ថជ្ឈានា វុដ្ឋហិត្វា សមនន្តរា អនុបាទិសេសាយ និព្ពានធាតុយា បរិនិព្ពាយិ.

នាវុសោ ¶ អានន្ទ ភគវា បរិនិព្ពុតោ, សញ្ញាវេទយិត និរោធំ សមាបន្នោ.

បុច្ឆា – មហាសុទស្សនសុត្តំ ¶ បនាវុសោ បុរិមទិវសេ បុច្ឆិតញ្ច វិស្សជ្ជិតញ្ច, ជនវសភសុត្តំ បនាវុសោ ភគវតា កត្ថ កំ អារព្ភ កិស្មិំ វត្ថុស្មិំ ភាសិតំ.

វិស្សជ្ជនា – នាតិកេ ភន្តេ គិញ្ជកាវសថេ អាយស្មន្តំ អានន្ទំ អារព្ភ ភាសិតំ, អាយស្មា ភន្តេ អានន្ទោ មាគធកេ បរិចារកេ អារព្ភ ភគវតោ សម្មុខា បរិកថំ កថេសិ, តស្មិំ ភន្តេ វត្ថុស្មិំ ភាសិតំ.

បុច្ឆា – មហាគោវិន្ទសុត្តំ ¶ បនាវុសោ ភគវតា កត្ថ ភាសិតំ.

វិស្សជ្ជនា – រាជគហេ ភន្តេ ភាសិតំ.

បុច្ឆា – មហាសមយសុត្តំ ¶ បនាវុសោ ភគវតា កត្ថ ភាសិតំ.

វិស្សជ្ជនា – សក្កេសុ ភន្តេ កបិលវត្ថុស្មិំ ភាសិតំ.

បុច្ឆា – សក្កបញ្ហសុត្តំ ¶ បនាវុសោ ភគវតា កត្ថ កំ អារព្ភ កិស្មិំ វត្ថុស្មិំ ភាសិតំ.

វិស្សជ្ជនា – មគធេសុ ភន្តេ បាចីនតោ រាជគហស្ស អម្ពសណ្ឌា នាម ព្រាហ្មណគាមោ, តស្សុត្តរតោ វេទិយកេ បព្ពតេ ឥន្ទសាលគុហាយំ សក្កំ ទេវានមិន្ទំ អារព្ភ ភាសិតំ, សក្កោ ភន្តេ ទេវានមិន្ទោ ភគវន្តំ ឧបសង្កមិត្វា បញ្ហំ បុច្ឆិ, តស្មិំ ភន្តេ វត្ថុស្មិំ ភាសិតំ.

បុច្ឆា – មហាសតិបដ្ឋានសុត្តំ ¶ បនាវុសោ ភគវតា កត្ថ ភាសិតំ.

វិស្សជ្ជនា – កុរូសុ ភន្តេ កម្មាសធម្មេ នាម កុរូនំ និគមេ ភាសិតំ.

បុច្ឆា – បាយាសិ ¶ សុត្តំ បនាវុសោ កត្ថ កំ អារព្ភ កិស្មិំ វត្ថុស្មិំ កេន ភាសិតំ.

វិស្សជ្ជនា – កោសលេសុ ភន្តេ សេតព្យានាម កោសលានំ នគរំ ឧត្តរេន សេតព្យំ សិំសបាវនេ អាយស្មតា កុមារកស្សបេន បាយាសិំ រាជញ្ញំ អារព្ភ ភាសិតំ, បាយាសិស្ស ភន្តេ រាជញ្ញស្ស ឯវរូបំ បាបកំ ទិដ្ឋិគតំ ឧប្បន្នំ ហោតិ, ឥតិបិ នត្ថិ បរោលោកោ នត្ថិ សត្តា ឱបបាតិកា នត្ថិ សុកតទុក្កដានំ កម្មានំ ផលំ វិបាកោតិ, តស្មិំ ភន្តេ វត្ថុស្មិំ ភាសិតំ.

បុច្ឆា – តត្ថាវុសោ ¶ បាយាសិស្ស រាជញ្ញស្ស ទិដ្ឋិបកាសនាច អាយស្មតោ កុមារកស្សបត្ថេរស្ស ទិដ្ឋិវិនិវេដ្ឋនកថា ច អនេកវារំ អាគតា, តត្ថាវុសោ បឋមំ បាយាសិ រាជញ្ញោ អត្តនោ ទិដ្ឋិំ កថំ បកាសេសិ, កថញ្ចាយស្មា កុមារកស្សបោ តំ មិច្ឆាទិដ្ឋិំ វិនិវេឋេសិ.

វិស្សជ្ជនា – បាយាសិ ភន្តេ រាជញ្ញោ អាយស្មន្តំ កុមារកស្សបំ ឧបសង្កមិត្វា ឯតទវោច ‘‘អហញ្ហិ ភោ កស្សប ឯវំ វាទី ឯវំ ទិដ្ឋី ឥតិបិ នត្ថិ បរោលោកោ, នត្ថិ សត្តា ឱបបាតិកា, នត្ថិ សុកតទុក្កដានំ កម្មានំ ផលំ វិបាកោ’’កិ, ឯវំ ខោ ភន្តេ បាយាសិរាជញ្ញោ អត្តនោ មិច្ឆាទិដ្ឋិំ អាយស្មតោ កុមារកស្សបស្ស សន្តិកេ បកាសេសិ. អាយស្មា ច កុមារកស្សបោ សក្ខិការណំ ចន្ទិមសូរិយឧបមំ ទស្សេត្វា បាយាសិស្ស រាជញ្ញស្ស តំ បាបកំ ទិដ្ឋិគតំ វិនិវេឋេសិ.

សាធុ ¶ សាធុ អាវុសោ, សាធុ ខោ អាវុសោ អាយស្មា កុមារកស្សបោ បាយាសិស្ស រាជញ្ញស្ស មិច្ឆាទិដ្ឋិកស្ស សទ្ធម្មវិមុខិភូតស្ស បច្ចក្ខតោ បរលោកំ ទស្សេត្វា តំ មិច្ឆាទិដ្ឋិំ វិនិវេឋេសិ.

បុច្ឆា – អថ បនាវុសោ បាយាសិរាជញ្ញោ ទុតិយម្បិ កីទិសំ សាធកបរិយាយំ ទស្សេត្វា អត្តនោ វាទំ បតិដ្ឋាបេសិ, កថញ្ចាយស្មា កុមារកស្សបោ តំ មិច្ឆាវាទំ សហធម្មេន សុនិគ្គហំ និគ្គហេត្វា ធម្មវាទំ បតិដ្ឋាបេសិ.

វិស្សជ្ជនា – ទុតិយេ បន ភន្តេ បាយាសិរាជញ្ញោ អត្តនោ មិត្តាមច្ចេ ញាតិសាលោហិតេ ទុច្ចរិតសមង្គិនោ កាលំកតេ សាធកបរិយាយំ ទស្សេត្វា អត្តនោ មិច្ឆាវាទំ បតិដ្ឋាបេសិ ¶ , អាយស្មា ច កុមារកស្សបោ ចោរឧបមាយ តំ មិច្ឆាវាទំ សហធម្មេន សុនិគ្គហំ និគ្គហេត្វា ធម្មវាទំ បតិដ្ឋាបេសិ.

សាធុ ¶ សាធុ អាវុសោ, សាធុ ខោ អាវុសោ យំ អាយស្មា កុមារកស្សបោ ឧប្បន្នំ បរប្បវាទំ សហធម្មេន សុនិគ្គហំ និគ្គហេត្វា ធម្មវាទំ បតិដ្ឋាបេសិ.

បុច្ឆា – អថ បនាវុសោ បាយាសិរាជញ្ញោ តតិយម្បិ កីទិសំ សាធក បរិយាយំ ទស្សេត្វា អត្តនោវាទំ បតិដ្ឋាបេសិ, កថញ្ចាយស្មា កុមារកស្សបោ តំ មិច្ឆាវាទំ សហធម្មេន សុនិគ្គហ និគ្គហេត្វា ធម្មវាទំ បតិដ្ឋាបេសិ.

វិស្សជ្ជនា – តតិយម្បន ¶ ភន្តេ បាយាសិរាជញ្ញោ អត្តនោ មិត្តាមច្ចេ ញាតិសាលោហិតេ សុចរិតសមង្គិនោ កាលំកតេ ទស្សេត្វា អត្តនោ មិច្ឆាវាទំ បតិដ្ឋាបេសិ, អាយស្មា ច កុមារកស្សបោ គូថកូបេ បតបុរិសោបមាយ តំ មិច្ឆាវាទំ សហធម្មេន សុនិគ្គហិតំ និគ្គហេត្វា ធម្មវាទំ បតិដ្ឋាបេសិ.

បុច្ឆា – អាយស្មតា អាវុសោ កុមារកស្សបេន បុរិមទិវសេ បុច្ឆិតវិស្សជ្ជិតក្កមេន គូថកូបបុរិសឧបមាយ មិច្ឆាវាទំ បដិក្ខិបិត្វា ធម្មវាទេ បតិដ្ឋាបិយមានេ បិយាសិរាជញ្ញោ

ចតុត្ថំ ¶ វា បញ្ចមំ វា កីទិសំ សាធកបរិយាយំ ទស្សេត្វា អត្តនោវាទំ បតិដ្ឋាបេសិ, កថញ្ចាយស្មា កុមារកស្សបោ សហធម្មេន តំ មិច្ឆាវាទំ បដិក្ខិបិត្វា ធម្មវាទំ បតិដ្ឋាបេសិ.

វិស្សជ្ជនា – បាយាសិ ភន្តេ រាជញ្ញោ អាយស្មតា កុមារកស្សបេន គូថកូបេ និមុគ្គបុរិសោ បមាយ មិច្ឆាវាទំ សុនិគ្គហិតំ និគ្គហេត្វា ធម្មវាទេ បតិដ្ឋាបិតេ ចតុត្ថំ វា បញ្ចមំ វា អត្តនោ មិត្តាមច្ចេ ញាតិសាលោហិតេ សមាទិន្ន បញ្ចសីលេ សាធកបរិយាយំ ទស្សេត្វា អត្តនោ មិច្ឆាវាទំ បតិដ្ឋាបេសិ. អាយស្មា ច កុមារកស្សបោ តាវតិំសទេវោបមាយ ច ជច្ចន្ធោបមាយ ចាតិ ទ្វីហិ ឧបមាហិ តំ បាបកំ ទិដ្ឋិគតំ សហធម្មេន សុនិគ្គហិតំ និគ្គហេត្វា, ធម្មវាទំ បតិដ្ឋាបេសិ.

សាធុ ¶ សាធុ អាវុសោ, សាធុ ខោ អាវុសោ យំ កុមារកស្សបោ បាយាសិស្ស រាជញ្ញស្ស ទ្វេ ឧបមាយោ ទស្សេត្វា ឧប្បន្នំ បាបកំ មិច្ឆាវាទំ សហធម្មេន សនិគ្គហំ និគ្គហេត្វា ធម្មវាទំ បតិដ្ឋាបេសិ.

បុច្ឆា – អថ បនាវុសោ បាយាសិរាជញ្ញោ ឆដ្ឋំបិ កីទិសំ សាធកបរិយាយំ ទស្សេត្វា អត្តនោ វាទំ បតិដ្ឋាបេសិ, កថញ្ចាយស្មា កុមារកស្សបោ សហធម្មេន តំ មិច្ឆាវាទំ សុនិគ្គហំ និគ្គហេត្វា ធម្មវាទំ បតិដ្ឋាបេសិ.

វិស្សជ្ជនា – ឆដ្ឋំ បន ភន្តេ បាយាសិរាជញ្ញោ សីលវន្តេ សមណព្រាហ្មណេ កល្យាណធម្មេ ជីវិតុកាមេ អមរិតុកាមេ

សុខកាមេ ¶ ទុក្ខបដិកូលេ សាធកបរិយាយំ ទស្សេត្វា អត្តនោ វាទំ បតិដ្ឋាបេសិ, អាយស្មាច កុមារកស្សបោ គព្ភិនី ឧបមាយ តំ មិច្ឆាវាទំ សហធម្មេន សុនិគ្គហិតំ និគ្គហេត្វា ធម្មវាទំ បតិដ្ឋាបេសិ.

សាធុ ¶ សាធុ អាវុសោ, សាធុ ខោ អាវុសោ យំ អាយស្មា កុមារកស្សបោ គព្ភិនីឧបមំ ទស្សេត្វា តំ មិច្ឆាវាទំ បដិក្ខិបិត្វា ធម្មវាទំ បតិដ្ឋាបេសិ.

បុច្ឆា – អថ បនាវុសោ បាយាសិរាជញ្ញោ សត្តមំបិ កីទិសំ សាធកបរិយាយំ ទស្សេត្វា អត្តនោ វាទំ បតិដ្ឋាបេសិ, កថញ្ចាយស្មា កុមារកស្សបោ តំ មិច្ឆាវាទំ សហធម្មេន សុនិគ្គហំ និគ្គហេត្វា ធម្មវាទំ បតិដ្ឋាបេសិ.

វិស្សជ្ជនា – សត្តមំ បន ភន្តេ បាយាសិរាជញ្ញោ កុព្ភិយំ បក្ខិបិត្វា មារិតបុរិសំ សាធកបរិយាយំ ទស្សេត្វា អត្តនោ វាទំ បតិដ្ឋាបេសិ, អាយស្មាច កុមារកស្សបោ សុបិនកូបមាយ តំ មិច្ឆាវាទំ សហធម្មេន សុនិគ្គហិតំ និគ្គហេត្វា ធម្មវាទំ បតិដ្ឋាបេសិ.

សាធុ ¶ សាធុ អាវុសោ, សាធុ ខោ អាវុសោ យំ អាយស្មា កុមារកស្សបោ សុបិនកូបមំ ទស្សេត្វា ឧប្បន្នំ មិច្ឆាវាទំ សហធម្មេន សុនិគ្គហំ និគ្គហេត្វា ធម្មវាទំ បតិដ្ឋាបេសិ.

បុច្ឆា – អថ ¶ បនាវុសោ បាយាសិរាជញ្ញោ អដ្ឋមម្បិ នវមម្បិ កថេតព្ពំ កថេត្វា ទសមំ កីទិសំ សាធកបរិយាយំ ទស្សេត្វា អត្តនោ វាទំ បតិដ្ឋាបេសិ, កថញ្ចាយស្មា កុមារកស្សបោ សហធម្មេន តំ មិច្ឆាវាទំ បដិនិស្សជ្ជាបេសិ.

វិស្សជ្ជនា – អដ្ឋមម្បិ ភន្តេ នវមម្បិ បាយាសិរាជញ្ញោ យំ វា តំ វា បរិយាយំ ទស្សេត្វា អត្តនោ វាទំ បតិដ្ឋាបេសិ, ទសមំ បន ភន្តេ បាយាសិរាជញ្ញោ ឆវិអាទីនិ ឆិន្ទិត្វា មារិតបុរិសំ សាធកបរិយាយំ ទស្សេត្វា អត្តនោ វាទំ បតិដ្ឋាបេសិ, អាយស្មា ច កុមារកស្សបោ អគ្គិកជដិលោបមាយ តំ មិច្ឆាវាទំ សហធម្មេន សុនិគ្គហិតំ និគ្គហេត្វា ធម្មវាទំ បតិដ្ឋាបេសិ.

បដិនិស្សជ្ជេតំ ¶ រាជញ្ញ បាបកំ ទិដ្ឋិគតំ. បដិនិស្សជ្ជេតំ រាជញ្ញ បាបកំ ទិដ្ឋិគតំ.

សាធុ ¶ សាធុ អាវុសោ, សាធុ ខោ អាវុសោ យំ អាយស្មា កុមារកស្សបោ ឱបាយិកំ ឧបមំ ទស្សេត្វា តំ បាបិកំ មិច្ឆាទិដ្ឋិំ បដិនិស្សជ្ជាបេសិ, យំ តស្ស ភវេយ្យ ទីឃរត្តំ ហិតាយ សុខាយ.

បុច្ឆា – អាយស្មតា អាវុសោ កុមារកស្សបេន បុរិមទិវសេ បុច្ឆិតវិស្សជ្ជិតាការេន បាយាសិស្ស រាជញ្ញស្ស អគ្គិកជដិលោបមំ ទស្សេត្វា តស្មិំ បាបកេ ទិដ្ឋិគតេ បដិនិស្សជ្ជាបិតេ សោ តាវ ថេរស្ស វចនំ អនាទិយិត្វា កីទិសញ្ច បច្ចនីកកថំ កថេសិ, កថញ្ច ថេរោ ករុណាសីតលហទយោ ហុត្វា អបរម្បិ ឧបមំ ទស្សេត្វា តំ បាបកំ ទិដ្ឋិគតំ បដិនិស្សជ្ជាបេសិ.

វិស្សជ្ជនា – បាយាសិ ភន្តេ រាជញ្ញោ អាយស្មតា កុមារកស្សបេន អគ្គិកជដិលោបមំ ទស្សេត្វា តំ បាបកំ ទិដ្ឋិគតំ បដិនិស្សជ្ជាបិតេ កិញ្ចាបិ ភវំ កស្សបោ ឯវមាហ, អថ ខោ នេវាហំ សក្កោមិ ឥទំ បាបកំ ទិដ្ឋិគតំ បដិនិស្សជ្ជិតុន្តិ ឯវមាទិកំ បច្ចនីកកថំ កថេសិ, ថេរោ ច ភន្តេ កុមារកស្សបោ ទ្វេ សត្ថវាហោបមំ ទស្សេត្វា តំ បាបកំ មិច្ឆាវាទំ បដិនិស្សជ្ជាបេសិ.

សាធុ ¶ សាធុ អាវុសោ, សាធុ ខោ អាវុសោ យំ អាយស្មា កុមារកស្សបោ បាយាសិស្ស រាជញ្ញស្ស ទ្វេ សត្ថវាហោបមម្បិ ទស្សេត្វា តំ បាបកំ ទិដ្ឋិគតំ បដិនិស្សជ្ជាបេសិ, តញ្ហិ តស្ស ច តទនុយាយីនញ្ច ភវេយ្យ ទីឃរត្តំ ហិតាយ សុខាយ.

បុច្ឆា – ឯវំ ¶ បនាវុសោ អាយស្មតា កុមារកស្សបេន យថា វុត្តាហិ ពហូហិ ឧបមាហិ ច អបរាហិ គូថភារិកអក្ខធុត្តកោបមាហិ ច តស្មិំ បាបកេ ទិដ្ឋិគតេ វិស្សជ្ជាបិតេ សោ តាវ ថេរស្ស វចនំ អនាទិយិត្វាវ បច្ឆិមបដិក្ខេបវសេន កីទិសំ បច្ចនីកកថំ កថេសិ, កថញ្ច ថេរោ ករុណាសីតលហទយោ ហុត្វា បច្ឆិមម្បិ ឧបមំ ទស្សេត្វា តំ បាបកំ ទិដ្ឋិគតំ បដិនិស្សជ្ជាបេសិ.

វិស្សជ្ជនា – បាយាសិ ភន្តេ រាជញ្ញោ ឯវំ ថេរេន នានាឧបមាហិ តស្មិំ បាបកេ ទិដ្ឋិគតេ បដិនិស្សជ្ជាបិតេបិ បុរិមនយេនេវ ថេរស្ស បច្ចនីកកថំ កថេសិ, ថេរោបិ ច ភន្តេ បច្ឆិមំ សាណភារិកូបមំ ទស្សេត្វា ករុណាសីតលហទយោ តំ បាបកំ ទិដ្ឋិគតំ បដិនិស្សជ្ជាបេសិ.

សាធុ ¶ សាធុ អាវុសោ, សាធុ ខោ អាវុសោ យំ អាយស្មា កុមារកស្សបោ បាយាសិស្ស រាជញ្ញស្ស សាណភារិកោបមម្បិ ទស្សេត្វា តំ បាបកំ ទិដ្ឋិគតំ បដិនិស្សជ្ជាបេសិ, តញ្ហិ តស្ស ច តទនុយាយីនញ្ច ភវេយ្យ ទីឃរត្តំ ហិតាយ សុខាយ.

បុច្ឆា – ឥមាយ ¶ បនាវុសោ បច្ឆិមិកាយ សាណភារិកោបមាយ ទស្សិតាយ បាយាសិរាជញ្ញោ ថេរស្ស ធម្មទេសនានុភាវេន ឥមស្មិំ ធម្មវិនយេ បសន្នោ ហុត្វា កីទិសំ បសន្នាការមកាសិ, កថញ្ច អាយស្មន្តំ កុមារកស្សបំ អនុសាសនិំ យាចិ, កថញ្ចាយស្មា កុមារកស្សបោ អនុសាសិ.

វិស្សជ្ជនា – ឥមាយ ច បន ភន្តេ ឧបមាយ ទស្សិតាយ បាយាសិ រាជញ្ញោ ‘‘បុរិមេនេវ អហំ ឱបម្មេន ភោតោ កស្សបស្ស អត្តមនោ អភិរទ្ធោ ឯវមាទិនា ភន្តេ បាយាសិរាជញ្ញោ ឥមស្មិំ ធម្មវិនយេ អាយស្មតោ កុមារកស្សបស្ស ធម្មទេសនាយ បសន្នោ បសន្នាការមកាសិ. ឥច្ឆាមិ ចាហំ ភោ កស្សប មហាយញ្ញំ យជិតុំ, អនុសាសតុ មំ ភវំ កស្សបោ យំ មមស្ស ទីឃរត្តំ ហិតាយ សុខាយាតិ បាយាសិ រាជញ្ញោ អាយស្មន្តំ កុមារកស្សបំ អនុសាសនិំ យាចិ, អាយស្មា ច ភន្តេ កុមារកស្សបោ ទុក្ខេត្តេ ទុព្ភូមេ បវុត្តពីជោបមាយ ទុស្សីលេសុ ទិន្នទានស្ស ន មហប្ផលភាវំ ទស្សេត្វា សុខេត្តេ សុភូមេ បវុត្តពីជោបមាយ សីលវន្តេសុ ទិន្នទានស្ស មហប្ផលភាវំ ទស្សេត្វា បាយាសិំ រាជញ្ញមនុសាសិ.

បុច្ឆា – កថញ្ចាវុសោ ¶ បាយាសិរាជញ្ញោ ទានំ អទាសិ, កថញ្ចស្ស សម្បរាយោ អហោសិ.

វិស្សជ្ជនា – បាយាសិ ភន្តេ រាជញ្ញោ អសក្កច្ចំ ទានមទាសិ, អសហត្ថា ទានមទាសិ, អចិត្តីកតំ ទានមទាសិ, អបវិទ្ធំ ទានមទាសិ, សោ អសក្កច្ចំ ទានំ ទត្វា អសហត្ថា ទានំ ទត្វា អចិត្តីកតំ ទានំ ទត្វា អបវិទ្ធំ ទានំ ទត្វា កាយស្សភេទា បរំ មរណា ចាតុមហារាជិកានំ ទេវានំ សហព្យតំ ឧបបជ្ជិ សុញ្ញំ សេរីសកំ វិមានំ.

បុច្ឆា – តេនាវុសោ ¶ ភគវតា ជានតា បស្សតា អរហតា សម្មាសម្ពុទ្ធេន បាថិយវគ្គេ បឋមំ បាថិយសុត្តំ កត្ថ កំ អារព្ភ កិស្មិំ វត្ថុស្មិំ ភាសិតំ.

វិស្សជ្ជនា – មល្លេសុ ភន្តេ អនុបិយេ នាម មល្លានំ និគមេ ភគ្គវគោត្តំ បរិព្ពាជកំ អារព្ភ ភាសិតំ, ភគ្គវគោត្តោ ភន្តេ បរិព្ពាជកោ ភគវន្តំ ឯតទវោច ‘‘បុរិមានិ ភន្តេ ទិវសានិ បុរិមតរានិ សុនក្ខត្តោ លិច្ឆវិបុត្តោ យេនាហំ តេនុបសង្កមិ, ឧបសង្កមិត្វា មំ ឯតទវោច ‘‘បច្ចក្ខាតោ ទានិ មយា ភគ្គវ ភគវា, ន ទានាហំ ភគវន្តំ ឧទ្ទិស្ស វិហរាមី’តិ, កច្ចេ តំ ភន្តេ តថេវ, យថា សុនក្ខត្តោ, លិច្ឆវិបុត្តោ អវចា’’តិ, តស្មិំ ភន្តេ វត្ថុស្មិំ ភាសិតំ.

បុច្ឆា – ឧទុម្ពរិកសុត្តំ ¶ បនាវុសោ ភគវតា កត្ថ កំ អារព្ភ កិស្មិំ វត្ថុស្មិំ ភាសិតំ.

វិស្សជ្ជនា – រាជគហេ ភន្តេ និគ្រោធំ បរិព្ពាជកំ អារព្ភ ភាសិតំ, និគ្រោធោ ភន្តេ បរិព្ពាជកោ ភគវតោ បរម្មុខា ភគវន្តំយេវ អារព្ភ អនេកវិហិតំ អភូតកថំ កថេសិ, តស្មិំ វត្ថុស្មិំ ភាសិតំ.

បុច្ឆា – ចក្កវត្តិសុត្តំ បនាវុសោ ភគវតា កត្ថ កំ អារព្ភ កិស្មិំ វត្ថុស្មិំ ភាសិតំ.

វិស្សជ្ជនា – មគធេសុ ភន្តេ មាតុលាយំ សម្ពហុលេ ភិក្ខូ អារព្ភ អត្តជ្ឈាសយេន សុត្តនិក្ខេបេន ភគវតា ភាសិតំ.

បុច្ឆា – អគ្គញ្ញសុត្តំ បនាវុសោ ភគវតា កត្ថ កំ អារព្ភ កិស្មិំ វត្ថុស្មិំ ភាសិតំ.

វិស្សជ្ជនា – សាវត្ថិយំ ភន្តេ បុព្ពារាមេ មិគារមាតុបាសាទេ វាសេដ្ឋំ បព្ពជិតំ អារព្ភ ភាសិតំ, ព្រាហ្មណា ភន្តេ វាសេដ្ឋ ភារទ្វាជេ បព្ពជិតេ អក្កោសន្តិ បរិភាសន្តិ អត្តរូបាយ

បរិភាសាយ ¶ បរិបុណ្ណាយ នោ អបរិបុណ្ណាយ, តស្មិំ ភន្តេ វត្ថុស្មិំ ភាសិតំ.

បុច្ឆា – សម្បសាទនីយ សុត្តំ បនាវុសោ កត្ថ កេន ភាសិតំ.

វិស្សជ្ជនា – នាឡន្ទាយំ ភន្តេ បាវារិកម្ពវនេ អាយស្មតា សារិបុត្តេន ភាសិតំ.

បុច្ឆា – បាសាទិកសុត្តំ បនាវុសោ ភគវតា កត្ថ កំ អារព្ភ កិស្មិំ វត្ថុស្មិំ ភាសិតំ.

វិស្សជ្ជនា – សក្កេសុ ភន្តេ វេធញ្ញានាម សក្យានំ អម្ពវនេ បាសាទេ ចុន្ទំ សមណុទ្ទេសំ អារព្ភ ភាសិតំ, ចុន្ទោ ភន្តេ សមណុទ្ទេសោ បាវាយំ និគណ្ឋស្ស នាដបុត្តស្ស កាលំ កិរិយាយ ភិន្នានំ និគណ្ឋានំ ទ្វេធិកជាតានំ ភណ្ឌនជាតានំ កលហជាតានំ វិវាទាបន្នានំ អញ្ញមញ្ញំ មុខសត្តីហិ វិតុជ្ជនការណំ អាយស្មតោ អានន្ទស្ស អារោចេសិ, អាយស្មា ច ភន្តេ អានន្ទោ ភគវតោ ឯតមត្ថំ អារោចេសិ, តស្មិំ ភន្តេ វត្ថុស្មិំ ភាសិតំ.

បុច្ឆា – លក្ខណសុត្តំ ¶ បនាវុសោ ភគវតា កត្ថ ភាសិតំ.

វិស្សជ្ជនា – សាវត្ថិយំ ភន្តេ ជេតវនមហាវិហារេ ភាសិតំ.

បុច្ឆា – សិង្គាលសុត្តំ បនាវុសោ ភគវតា កត្ថ កំ អារព្ភ កិស្មិំ វត្ថុស្មិំ ភាសិតំ.

វិស្សជ្ជនា – រាជគហេ ភន្តេ សិង្គាលំ គហបតិបុត្តំ អារព្ភ ភាសិតំ, សិង្គាលោ ភន្តេ គហបតិបុត្តោ កាលស្សេវ ឧដ្ឋាយ រាជគហា និក្ខមិត្វា អល្លវត្ថោ អល្លកេសោ បញ្ជលិកោ បុថុទិសា នមស្សតិ បុរត្ថិមំ ទិសំ ទក្ខិណំ ទិសំ បច្ឆិមំ ទិសំ ឧត្តរំ ទិសំ ហេដ្ឋិមំ ទិសំ ឧបរិមំ ទិសំ, តស្មិំ ភន្តេ វត្ថុស្មិំ ភាសិតំ.

បុច្ឆា – អាដានាដិយសុត្តំ ¶ បនាវុសោ ភគវតា កត្ថ កិស្មិំ វត្ថុស្មិំ ភាសិតំ.

វិស្សជ្ជនា – រាជគហេ ¶ ភន្តេ គិជ្ឈកូដេ បព្ពតេ ភាសិតំ, ភគវតិ ភន្តេ រាជគហេ វិហរតិ ចត្តារោ មហារាជានោ ចតុទ្ទិសំ រក្ខំ ឋបេត្វា ចតុទ្ទិសំ គុម្ពំ ឋបេត្វា ចតុទ្ទិសំ ឱវរណំ ឋបេត្វា កេវលកប្បំ គិជ្ឈកូដបព្ពតំ ឱភាសេត្វា យេន ភគវា តេនុបសង្កមិំសុ, ឧបសង្កមិត្វា ភគវន្តំ អភិវាទេត្វា ឯកមន្តំ និសីទិំសុ, ឯកមន្តំ និសិន្នោ ខោ ភន្តេ វេស្សវណោ មហារាជា អាដានាដិយំ រក្ខំ ភគវតោ អារោចេសិ ភិក្ខូនំ ភិក្ខុនីនំ ឧបាសកានំ ឧបាសិកានំ ផាសុវិហារាយ, តស្មិំ ភន្តេ វត្ថុស្មិំ ភាសិតំ.

បុច្ឆា – សង្គីតិ ¶ សុត្តំ បនាវុសោ កត្ថ កេន ភាសិតំ.

វិស្សជ្ជនា – បាវាយំ ភន្តេ អាយស្មតា សារិបុត្តេន ភាសិតំ.

បុច្ឆា – ទសុត្តរសុត្តំ បនាវុសោ កត្ថ កេន ភាសិតំ.

វិស្សជ្ជនា – ទសុត្តរសុត្តំ ភន្តេ ចម្បាយំ គគ្គរាយ បោក្ខរណិយា តីរេ អាយស្មតា សារិបុត្តេន ភាសិតំ.

បុច្ឆា – កេ ¶ អាវុសោ សិក្ខន្តិ.

វិស្សជ្ជនា – សេក្ខា ច ភន្តេ បុថុជ្ជនកល្យាណកា ច សិក្ខន្តិ.

បុច្ឆា – កេ អាវុសោ សិក្ខិតសិក្ខា.

វិស្សជ្ជនា – អរហន្តោ ភន្តេ សិក្ខិតសិក្ខា.

វិស្សជ្ជនា – ភគវតោ ភន្តេ វចនំ អរហតោ សម្មាសម្ពុទ្ធស្ស.

វិស្សជ្ជនា – បរម្បរាយ ភន្តេ អាភតំ.