អញ្ញ > សង្គាយន-បុច្ឆ វិស្សជ្ជនា

វិស្សជ្ជនា – ឧក្កដ្ឋាយំ ភន្តេ បញ្ចសតេ ព្រាហ្មណកុលា បព្ពជិតេ អារព្ភ ភាសិតំ, បញ្ចសតា ភន្តេ ព្រាហ្មណកុលា បព្ពជិតា ¶ ភិក្ខូ បរិយត្តិំ និស្សាយ មានំ ឧប្បាទេសុំ, តស្មិំ ភន្តេ វត្ថុស្មិំ ភាសិតំ.

បុច្ឆា – តំ បនាវុសោ សុត្តំ ភគវតា កតិហិ វារេហិ កតិហិ ច អន្តោគធបទេហិ វិភជិត្វា ភាសិតំ.

វិស្សជ្ជនា – តំ ¶ បន ភន្តេ មូលបរិយាយសុត្តំ ភគវតា អដ្ឋហិ ច វារេហិ ចតុវីសតិយា ច អន្តោគធបទេហិ វិភជិត្វា ទេសិតំ.

បុច្ឆា – ទុតិយំ បនាវុសោ សព្ពាសវសុត្តំ ភគវតា កត្ថ កំ អារព្ភ ភាសិតំ.

វិស្សជ្ជនា – សព្ពាសវសុត្តំ បន ភន្តេ ភគវតា សាវត្ថិយំ សម្ពហុលេ ភិក្ខូ អារព្ភ ភាសិតំ.

បុច្ឆា – តត្ថាវុសោ ¶ ភគវតា អាសវា កតិហិ បការេហិ វិភជិត្វា ទស្សិតា.

វិស្សជ្ជនា – សត្តហិ ភន្តេ បការេហិ វិភជិត្វា អាសវា ភគវតា បកាសិតា.

បុច្ឆា – ធម្មទាយាទសុត្តំ ¶ បនាវុសោ ភគវតា កត្ថ កំ អារព្ភ កិស្មិំ វត្ថុស្មិំ ភាសិតំ.

វិស្សជ្ជនា – សាវត្ថិយំ ភន្តេ សម្ពហុលេ ភិក្ខូ អារព្ភ ភាសិតំ, ភគវតោ ច ភន្តេ ភិក្ខុសង្ឃស្ស ច តទា មហាលាភសក្ការោ ឧទបាទិ, តស្មិំ ភន្តេ វត្ថុស្មិំ ភាសិតំ.

បុច្ឆា – តត្ថាវុសោ ¶ ទ្វេ អនុសន្ធយោ, តេសុ បឋមេ អនុសន្ធិម្ហិ កថំ ភគវតា ភិក្ខូនំ ឱវាទោ ទិន្នោ.

វិស្សជ្ជនា – បឋមេ ភន្តេ អនុសន្ធិម្ហិ ធម្មទាយាទា មេ ភិក្ខវេ ភវថ មា អាមិសទាយាទា, អត្ថិ មេ តុម្ហេសុ អនុកម្បា, កិន្តិ មេ សាវកា ធម្មទាយាទា ភវេយ្យុំ នោ អាមិសទាយាទាតិ ឯវមាទិនា ភគវតា ភិក្ខូនំ ឱវាទោ ទិន្នោ.

ធម្មទាយាទា ¶ មេ ភិក្ខវេ ភវថ មា អាមិសទាយាទា, អត្ថិ មេ តុម្ហេសុ អនុកម្បា កិន្តិ មេ សាវកា ធម្មទាយាទា ភវេយ្យុំ, នោ អាមិសទាយាទា.

បុច្ឆា – ទុតិយេ ¶ បនាវុសោ អនុសន្ធិម្ហិ អាយស្មតា សារិបុត្តត្ថេរេន ធម្មសេនាបតិនា កីទិសី ធម្មទេសនា វិភជិត្វា បកាសិតា.

វិស្សជ្ជនា – ទុតិយេ បន ភន្តេ អនុសន្ធិម្ហិ អាយស្មតា សារិបុត្តត្ថេរេន ធម្មសេនាបតិនា សត្ថុ បវិវិត្តស្ស វិហរតោ សាវកានំ វិវេកំ អននុសិក្ខតំ តីហិ ឋានេហិ គារយុតំ, អនុសិក្ខន្តានញ្ច តីហិ ឋានេហិ បាសំសតំ, សោឡស ច បាបកេ ធម្មេ តេសញ្ច បហានាយ មជ្ឈិមា បដិបទា វិភជិត្វា បកាសិតា.

បុច្ឆា – ភយភេរវសុត្តំ ¶ បនាវុសោ ភគវតា កត្ថ កំ អារព្ភ កិស្មិំ វត្ថុស្មិំ ភាសិតំ.

វិស្សជ្ជនា – សាវត្ថិយំ ភន្តេ ជាណុស្សោណិំ ព្រាហ្មណំ អារព្ភ ភាសិតំ, ជាណុស្សោណិ ភន្តេ ព្រាហ្មណោ ភគវន្តំ ឧបសង្កមិត្វា ឯតទវោច ‘‘យេ មេ ភោ គោតម កុលបុត្តា ភវន្តំ គោតមំ ឧទ្ទិស្ស សទ្ធា អគារស្មា អនគារិយំ បព្ពជិតា, ភវំ តេសំ គោតមោ បុព្ពង្គមោ, ភវំ

តេសំ ¶ គោតមោ ពហុការោ, ភវំ តេសំ គោតមោ សមាទបេតា, ភោតោ ច បន គោតមស្ស សា ជនតា ទិដ្ឋានុគតិំ អាបជ្ជតី’’តិ, តស្មិំ ភន្តេ វត្ថុស្មិំ ភាសិតំ.

បុច្ឆា – អនង្គណសុត្តំ ¶ បនាវុសោ កត្ថ កំ អារព្ភ កេន ភាសិតំ.

វិស្សជ្ជនា – សាវត្ថិយំ ភន្តេ សម្ពហុលេ ភិក្ខូ អារព្ភ អាយស្មតា សារិបុត្តត្ថេរេន ធម្មសេនាបតិនា ភាសិតំ.

បុច្ឆា – អាកង្ខេយ្យសុត្តំ បនាវុសោ ភគវតា កត្ថ កំ អារព្ភ ភាសិតំ.

វិស្សជ្ជនា – សាវត្ថិយំ ភន្តេ សម្ពហុលេ ភិក្ខូ អារព្ភ ភាសិតំ.

បុច្ឆា – វត្ថសុត្តំ ¶ បនាវុសោ ភគវតា កត្ថ កំ អារព្ភ ភាសិតំ.

វិស្សជ្ជនា – សាវត្ថិយំ ភន្តេ សម្ពហុលេ ភិក្ខូ អារព្ភ ភាសិតំ.

បុច្ឆា – សល្លេខសុត្តំ ¶ បនាវុសោ ភគវតា កត្ថ កំ អារព្ភ កិស្មិំ វត្ថុស្មិំ ភាសិតំ.

វិស្សជ្ជនា – សាវត្ថិយំ ភន្តេ អាយស្មន្តំ មហាចុន្ទំ អារព្ភ ភាសិតំ, អាយស្មា មហាចុន្ទោ ភន្តេ ភគវន្តំ ឧបសង្កមិត្វា ឯតទវោច ‘‘យា ឥមា ភន្តេ អនេកវិហិតា ទិដ្ឋិយោ លោកេ ឧប្បជ្ជន្តិ, អត្តវាទបដិសំយុត្តា វា លោកវាទបដិសំយុត្តា វា, អាទិមេវ នុ ខោ ភន្តេ ភិក្ខុនោ មនសិករោតោ ឯវមេតាសំ ទិដ្ឋីនំ បហានំ ហោតិ, ឯវមេតាសំ ទិដ្ឋីនំ បដិនិស្សគ្គោ ហោតី’’តិ, តស្មិំ ភន្តេ វត្ថុស្មិំ ភាសិតំ.

បុច្ឆា – តត្ថ ¶ ច អាវុសោ កតិ បរិយាយា កតិ ច អន្តោគធបទានិ ភគវតា វិភជិត្វា បកាសិតានិ.

វិស្សជ្ជនា – តត្ថ ភន្តេ បញ្ច បរិយាយា ចតុចត្តាលីស ច អន្តោគធបទានិ ភគវតា វិត្ថារេន ភាសិតានិ.

បុច្ឆា – សម្មាទិដ្ឋិសុត្តំ ¶ បនាវុសោ កត្ថ កំ អារព្ភ កេន ភាសិតំ.

វិស្សជ្ជនា – ភគវតោ ភន្តេ វចនំ អរហតោ សម្មាសម្ពុទ្ធស្ស.

វិស្សជ្ជនា – បរម្បរាយ ភន្តេ អាភតំ.

បុច្ឆា – មហាសតិបដ្ឋានសុត្តំ ¶ បនាវុសោ យោគាវចរានំ ពហុបការត្តា ទីឃនិកាយេ ច ឥធ ចាតិ ទ្វីសុ និកាយេសុ បោរាណកេហិ សំគីតិការេហិ ទ្វិក្ខត្តុំ សំគាយិត្វា វិត្ថារេន បតិដ្ឋាបិតំ, តំ អម្ហេហិ ទីឃនិកាយេ យថានុប្បត្តវសេន បុច្ឆិតញ្ច វិស្សជ្ជិតញ្ច. តថាបិ យោគាវចរានំ ពហុបការត្តាយេវ តំ ¶ ឥទានិបិ យថានុប្បត្តវសេន បុន បុច្ឆិស្សាមិ, តំ បនេតំ អាវុសោ មហាសតិបដ្ឋានសុត្តំ ភគវតា កត្ថ កំ អារព្ភ ភាសិតំ.

វិស្សជ្ជនា – កុរូសុ ភន្តេ កម្មាសធម្មេ នាម កុរូនំ និគមេ សម្ពហុលេ ភិក្ខូ អារព្ភ ភាសិតំ.

បុច្ឆា – កថញ្ចាវុសោ ¶ តត្ថ អានាបានស្សតិ កាយានុបស្សនា ភគវតា វិភជិត្វា បកាសិតា.

វិស្សជ្ជនា – ឥធ ភិក្ខវេ ភិក្ខុ អរញ្ញគតោ វា រុក្ខមូលគតោ វា សុញ្ញាគារគតោ វា និសីទតិ បល្លង្កំ អាភុជិត្វា ឧជុំ កាយំ បណិធាយ បរិមុខំ សតិំ ឧបដ្ឋបេត្វា សោ សតោវ អស្សសតិ, សតោវ បស្សសតិ, ទីឃំ វា អស្សសន្តោ ‘ទីឃំ អស្សសាមី’តិ បជានាតិ, ទីឃំ វា បស្សសន្តោ ‘ទីឃំ បស្សសាមី’តិ បជានាតិ, ឯវមាទិនា ភន្តេ តត្ថ អានាបានស្សតិ កាយានុបស្សនា ភគវតា វិភជិត្វា បកាសិតា.

បុច្ឆា – កថញ្ចាវុសោ ¶ តត្ថ ឥរិយាបថកាយានុបស្សនា ភគវតា វិភជិត្វា បកាសិតា.

វិស្សជ្ជនា – បុន ចបរំ ភិក្ខវេ ភិក្ខុ គច្ឆន្តោ វា គច្ឆាមីតិ បជានាតិ, ឋិតោ វា ឋិតោម្ហីតិ បជានាតិ, និសិន្នោ វា និសិន្នោម្ហីតិ បជានាតិ, សយានោ វា សយានោម្ហីតិ បជានាតិ, ឯវមាទិនា ភន្តេ ភគវតា ឥរិយាបថកាយានុបស្សនា ភាវនា វិភជិត្វា បកាសិតា.

បុច្ឆា – កថញ្ចាវុសោ ¶ តត្ថ សម្បជញ្ញកាយានុបស្សនា ភគវតា វិភជិត្វា បកាសិតា.

វិស្សជ្ជនា – បុន ចបរំ ភិក្ខវេ ភិក្ខុ អភិក្កន្តេ បដិក្កន្តេ សម្បជានការី ហោតិ, អាលោកិតេ វិលោកិតេ សម្បជានការី ហោតិ, សមិញ្ជិតេ បសារិតេ សម្បជានការី ហោតិ, សង្ឃាដិបត្តចីវរធារណេ សម្បជានការី ហោតិ, អសិតេ បីតេ ខាយិតេ សាយិតេ សម្បជានការី ហោតិ, ឧច្ចារបស្សាវកម្មេ សម្បជានការី ហោតិ, គតេ ឋិតេ និសិន្នេ សុត្តេ ជាគរិតេ ភាសិតេ តុណ្ហីភាវេ សម្បជានការី ហោតិ, ឯវមាទិនា ភន្តេ ភគវតា តត្ថ សម្បជញ្ញកាយានុបស្សនា វិភជិត្វា បកាសិតា.

បុច្ឆា – កថញ្ចាវុសោ ¶ តត្ថ បដិកូលមនសិការកាយានុបស្សនា ភគវតា វិភជិត្វា បកាសិតា.

វិស្សជ្ជនា – បុន ចបរំ ភិក្ខវេ ភិក្ខុ ឥមមេវ កាយំ ឧទ្ធំ បាទតលា អធោ កេសមត្ថកា តចបរិយន្តំ បូរំ នានប្បការស្ស អសុចិនោ បច្ចវេក្ខតិ អត្ថិ ឥមស្មិំ កាយេ កេសាលោមា នខា ទន្តា តចោ ឯវមាទិនា ភន្តេ តត្ថ ភគវតា បដិកូលមនសិការកាយានុបស្សនា វិភជិត្វា បកាសិតា.

បុច្ឆា – កថញ្ចាវុសោ ¶ តត្ថ ធាតុមនសិការកាយានុបស្សនា ភគវតា វិភជិត្វា បកាសិតា.

វិស្សជ្ជនា – បុន ចបរំ ភិក្ខវេ ភិក្ខុ ឥមមេវ កាយំ យថាឋិតំ យថាបណិហិតំ ធាតុសោ បច្ចវេក្ខតិ អត្ថិ ឥមស្មិំ កាយេ បថវីធាតុ អាបោធាតុ តេជោធាតុ វាយោធាតុ ឯវមាទិនា ភន្តេ ភគវតា ធាតុមនសិការកាយានុបស្សនា វិភជិត្វា បកាសិតា.

បុច្ឆា – កថញ្ចាវុសោ ¶ តត្ថ នវ សិវថិកកាយានុបស្សនា ភគវតា វិភជិត្វា បកាសិតា.

វិស្សជ្ជនា – បុន ចបរំ ភិក្ខវេ ភិក្ខុ សេយ្យថាបិ បស្សេយ្យ សរីរំ សិវថិកាយ ឆឌ្ឌិតំ ឯកាហមតំ វា ទ្វីហមតំ វា តីហមតំ វា ឧទ្ធុមាតកំ វិនីលកំ វិបុព្ពកជាតំ សោ ឥមមេវ កាយំ ឧបសំហរតិ ‘‘អយម្បិ ខោ កាយោ ឯវំធម្មោ ឯវំភាវី ឯវំអនតីតោ’’តិ ឯវមាទិនា ភន្តេ តត្ថ ភគវតា នវ សិវថិកកាយានុបស្សនា ភាវនា វិភជិត្វា បកាសិតា.

បុច្ឆា – កថញ្ចាវុសោ ¶ តត្ថ វេទនានុបស្សនា ភគវតា វិភជិត្វា ទេសិតា.

វិស្សជ្ជនា – ឥធ ភិក្ខវេ ភិក្ខុ សុខំ វា វេទនំ វេទយមានោ ‘‘សុខំ វេទនំ វេទយាមី’’តិ បជានាតិ, ទុក្ខំ វា វេទនំ វេទយមានោ ‘‘ទុក្ខ វេទនំ វេទយាមី’’តិ បជានាតិ, អទុក្ខមសុខំ វា វេទនំ វេទយមានោ ‘‘អទុក្ខមសុខំ វេទនំ វេទយាមី’’តិ បជានាតិ, ឯវមាទិនា ភន្តេ តត្ថ ភគវតា វេទនានុបស្សនា វិភជិត្វា បកាសិតា.

បុច្ឆា – កថញ្ចាវុសោ ¶ តត្ថ ចិត្តានុបស្សនា ភគវតា វិភជិត្វា ទេសិតា.

វិស្សជ្ជនា – ឥធ ភិក្ខវេ ភិក្ខុ សរាគំ វា ចិត្តំ ‘‘សរាគំ ចិត្ត’’ន្តិ បជានាតិ, វីតរាគំ វា ចិត្តំ ‘‘វីតរាគំ ចិត្ត’’ន្តិ បជានាតិ, សទោសំ វា វីតទោសំ វា សមោហំ វា វីតមោហំ វា សំខិត្តំ វា ចិត្តំ ‘‘សំខិត្តំ ចិត្ត’’ន្តិ បជានាតិ, វិក្ខិត្តំ វា ចិត្តំ ‘‘វិក្ខិត្តំ ចិត្ត’’ន្តិ បជានាតិ, ឯវមាទិនា តត្ថ ភគវតា ចិត្តានុបស្សនា វិភជិត្វា បកាសិតា.

បុច្ឆា – កថញ្ចាវុសោ ¶ តត្ថ ធម្មានុបស្សនា ភគវតា វិភជិត្វា ទេសិតា, តំ សង្ខេបមត្តេនេវ វិស្សជ្ជេហិ.

វិស្សជ្ជនា – ឥធ ភិក្ខវេ ភិក្ខុ ធម្មេសុ ធម្មានុបស្សី វិហរតិ, បញ្ចសុ នីវរណេសុ ឯវមាទិនា ភន្តេ តត្ថ ភគវតា បញ្ចហិ បព្ពេហិ ធម្មានុបស្សនា វិភជិត្វា បកាសិតា.

បុច្ឆា – ចូឡនសីហនាទសុត្តំ ¶ បនាវុសោ ភគវតា កត្ថ កំ អារព្ភ កិស្មិំ វត្ថុស្មិំ ភាសិតំ.

វិស្សជ្ជនា – សាវត្ថិយំ ភន្តេ បរិហីនលាភសក្ការេ នានាតិត្ថិយេ អារព្ភ ភាសិតំ, នានាតិត្ថិយា ភន្តេ បរិហីនលាភសក្ការា តេសុ តេសុ ឋានេសុ បរិទេវិំសុ, ចតស្សោ ច ភន្តេ បរិសា ភគវតោ ឯកមត្ថំ អារោចេសុំ, តស្មិំ ភន្តេ វត្ថុស្មិំ ភាសិតំ.

បុច្ឆា – តេនាវុសោ ¶ ភគវតា ជានតា បស្សតា អរហតា សម្មាសម្ពុទ្ធេន មហាសីហនាទសុត្តំ កត្ថ កំ អារព្ភ កិស្មិំ វត្ថុស្មិំ ភាសិតំ.

វិស្សជ្ជនា – វេសាលិយំ ភន្តេ សុនក្ខត្តំ លិច្ឆវិបុត្តំ អារព្ភ ភាសិតំ, សនុក្ខត្តោ ភន្តេ លិច្ឆវិបុត្តោ អចិរបក្កន្តោ ហោតិ ឥមស្មា ធម្មវិនយា, សោ វេសាលិយំ បរិសតិ ឯវំ វាចំ ភាសតិ ¶ ‘‘នត្ថិ សមណស្ស គោតមស្ស ឧត្តរិមនុស្សធម្មា អលមរិយញាណទស្សនវិសេសោ, តក្កបរិយាហតំ សមណោ គោតមោ ធម្មំ ទេសេតិ វីមំសានុចរិតំ សយំ បដិភានំ. យស្ស ច ខ្វាស្ស អត្ថាយ ធម្មោ ទេសិតោ, សោ និយ្យាតិ តក្ករស្ស សម្មា ទុក្ខក្ខយាយា’’តិ, ឯតមត្ថំ ភន្តេ អាយស្មា សារិបុត្តោ ភគវតោ អារោចេសិ, តស្មិំ ភន្តេ វត្ថុស្មិំ ភាសិតំ.

បុច្ឆា – កតិ ¶ បនាវុសោ តត្ថ ភគវតា តថាគតស្ស តថាគតពលានិ វិភជិត្វា បកាសិតានិ, យេហិ ពលេហិ សមន្នាគតោ តថាគតោ អាសភំ ឋានំ បដិជានាតិ, បរិសាសុ សីហនាទំ នទតិ, ព្រហ្មចក្កំ បវត្តេតិ.

វិស្សជ្ជនា – ទស ភន្តេ តថាគតស្ស តថាគតពលានិ ភគវតា វិភជិត្វា បកាសិតានិ, យេហិ ពលេហិ សមន្នាគតោ តថាគតោ អាសភំ ឋានំ បដិជានាតិ, បរិសាសុ សីហនាទំ នទតិ, ព្រហ្មចក្កំ បវត្តេតិ.

បុច្ឆា – កថញ្ចាវុសោ ¶ តត្ថ ភគវតា ចតុវេរជ្ជញាណានិ វិភជិត្វា បកាសិតានិ, យេហិ វេសារជ្ជេហិ សមន្នាគតោ តថាគតោ អាសភំ ឋានំ បដិជានាតិ, បរិសាសុ សីហនាទំ នទតិ, ព្រហ្មចក្កំ បវត្តេតិ.

វិស្សជ្ជនា – ខីណាសវស្ស តេ បដិជានតោ ឥមេ អាសវា អបរិក្ខីណាតិ តត្រ វត មំ សមណោ វា ព្រាហ្មណោ វា ទេវោ វា មារោ វា ព្រហ្មា វា កោចិ វា លោកស្មិំ សហធម្មេន បដិចោទេស្សតីតិ និមិត្តមេតំ សារិបុត្ត ន សមនុបស្សាមិ, ឯតមហំ សារិបុត្ត និមិត្តំ អសមនុបស្សន្តោ ខេមប្បត្តោ អភយប្បត្តោ វេសារជ្ជប្បត្តោ វិហរាមិ. ឯវមាទិនា ភន្តេ តត្ថ ចតុវេសារជ្ជញាណានិ ភគវតា វិត្ថារេន វិភជិត្វា បកាសិតានិ.

បុច្ឆា – កថញ្ចាវុសោ ¶ តត្ថ ភគវតា បញ្ចគតិបរិច្ឆេទញាណំ វិភជិត្វា បកាសិតំ.

វិស្សជ្ជនា – បញ្ច ខោ ឥមា សារិបុត្ត គតិយោ, កតមា បញ្ច, និរយោ តិរច្ឆានយោនិ បេត្តិវិសយោ មនុស្សា ទេវា, ឯវមាទិនា ភន្តេ ភគវតា តត្ថ បញ្ចគតិបរិច្ឆេទកញាណំ វិភជិត្វា បកាសិតំ.

បុច្ឆា – កថញ្ចាវុសោ ¶ តត្ថ តថាគតោ អត្តនោ បញ្ញាវេយ្យត្តិយា អបរិហានិំ បកាសេសិ.

វិស្សជ្ជនា – សន្តិ ខោ បន សារិបុត្ត ឯកេ សមណព្រាហ្មណា ឯវំវាទិនោ ឯវំទិដ្ឋិនោ យាវទេវាយំ ភវំ បុរិសោ ទហរោ ហោតិ, ឯវមាទិនា ភន្តេ តត្ថ តថាគតោ អត្តនោ បញ្ញាវេយ្យត្តិយា អបរិហានិំ បកាសេសិ.

បុច្ឆា – មហាទុក្ខក្ខន្ធសុត្តំ ¶ បនាវុសោ ភគវតា កត្ថ កំ អារព្ភ កិស្មិំ វត្ថុស្មិំ ភាសិតំ.

វិស្សជ្ជនា – សាវត្ថិយំ ភន្តេ អញ្ញតិត្ថិយេ អារព្ភ ភាសិតំ, សម្ពហុលា ភន្តេ អញ្ញតិត្ថិយា ភិក្ខូ ឯតទវោចុំ ‘‘សមណោ អាវុសោ គោតមោ កាមានំ បរិញ្ញំ បញ្ញបេតិ, មយម្បិ កាមានំ បរិញ្ញំ បញ្ញបេម, សមណោ អាវុសោ គោតមោ រូបានំ ¶ វេទនានំ បរិញ្ញំ បញ្ញបេតិ, មយម្បិ រូបានំ វេទនានំ បរិញ្ញំ បញ្ញបេម, ឥធ នោ អាវុសោ កោ វិសេសោ, កោ អធិប្បយាសោ, កិំ នានាករណំ សមណស្ស វា គោតមស្ស អម្ហាកំ វា យទិទំ ធម្មទេសនាយ វា ធម្មទេសនំ អនុសាសនិយា វា អនុសាសនិ’’ន្តិ, ឯតមត្ថំ ភិក្ខូ ភគវតោ អារោចេសុំ, តស្មិំ ភន្តេ វត្ថុស្មិំ ភាសិតំ.

បុច្ឆា – ចូឡទុក្ខក្ខន្ធសុត្តំ ¶ បនាវុសោ ភគវតា កត្ថ កំ អារព្ភ កិស្មិំ វត្ថុស្មិំ ភាសិតំ.

វិស្សជ្ជនា – សក្កេសុ ភន្តេ កបិលវត្ថុស្មិំ មហានាមំ សក្កំ អារព្ភ ភាសិតំ, មហានាមោ ភន្តេ សក្កោ ភគវន្តំ ឧបសង្កមិត្វា ឯតទវោច ‘‘ទីឃរត្តាហំ ភន្តេ ភគវតា ឯវំ ធម្មំ ទេសិតំ អាជានាមិ ‘លោភោ ចិត្តស្ស ឧបក្កិលេសោ, ទោសោ ចិត្តស្ស ឧបក្កិលេសោ, មោហោ ចិត្តស្ស ឧបក្កិលេសោ’តិ, ឯវញ្ចាហំ ភន្តេ ភគវតា ធម្មំ ទេសិតំ អាជានាមិ ‘លោភោ ចិត្តស្ស ឧបក្កិលេសោ, ទោសោ ចិត្តស្ស ឧបក្កិលេសោ, មោហោ ចិត្តស្ស ឧបក្កិលេសោ’តិ. អថ ច បន មេ ឯកទា លោភធម្មាបិ ចិត្តំ បរិយាទាយ តិដ្ឋន្តិ, ទោសធម្មាបិ ចិត្តំ បរិយាទាយ តិដ្ឋន្តិ, មោហធម្មាបិ ចិត្តំ បរិយាទាយ តិដ្ឋន្តិ, តស្ស មយ្ហំ ភន្តេ ឯវំ ហោតិ ‘កោ សុ នាម មេ ធម្មោ អជ្ឈត្តំ អប្បហិនោ ¶ , យេន មេ ឯកទា លោភធម្មាបិ ចិត្តំ បរិយាទាយ តិដ្ឋន្តិ, ទោសធម្មាបិ ចិត្តំ បរិយាទាយ តិដ្ឋន្តិ, មោហធម្មាបិ ចិត្តំ បរិយាទាយ តិដ្ឋន្តី’តិ’’, តស្មិំ ភន្តេ វត្ថុស្មិំ ភាសិតំ.

បុច្ឆា – អនុមានសុត្តំ ¶ បនាវុសោ កត្ថ កំ អារព្ភ កេន ភាសិតំ.

វិស្សជ្ជនា – ភគ្គេសុ ភន្តេ សុសុមារគិរេ ភេសកឡាវនេ អាយស្មតា មហាមោគ្គល្លានត្ថេរេន សម្ពហុលេ ភិក្ខូ អារព្ភ ភាសិតំ.

បុច្ឆា – ចេតោខិលសុត្តំ ¶ បនាវុសោ ភគវតា កត្ថ កំ អារព្ភ ភាសិតំ.

វិស្សជ្ជនា – សាវត្ថិយំ ភន្តេ សម្ពហុលេ ភិក្ខូ អារព្ភ ភាសិតំ.

បុច្ឆា – វនបត្ថសុត្តំ ¶ បនាវុសោ ភគវតា កត្ថ កំ អារព្ភ ភាសិតំ.

វិស្សជ្ជនា – សាវត្ថិយំ ភន្តេ សម្ពហុលេ ភិក្ខូ អារព្ភ ភាសិតំ.

បុច្ឆា – មធុបិណ្ឌិកសុត្តំ បនាវុសោ ភគវតា កត្ថ កំ អារព្ភ កិស្មិំ វត្ថុស្មិំ ភាសិតំ.

វិស្សជ្ជនា – សក្កេសុ ភន្តេ ទណ្ឌបាណិំ សក្កំ អារព្ភ ភាសិតំ, ទណ្ឌបាណិ ភន្តេ សក្កោ ភគវន្តំ ឧបសង្កមិត្វា ឯតទវោច ‘‘កិំ វាទី សមណោ កិមក្ខាយី’’តិ, តស្មិំ ភន្តេ វត្ថុស្មិំ ភាសិតំ.

បុច្ឆា – ទ្វេធាវិតក្កសុត្តំ ¶ បនាវុសោ ភគវតា កត្ថ កំ អារព្ភ ភាសិតំ.

វិស្សជ្ជនា – សាវត្ថិយំ ភន្តេ សម្ពហុលេ ភិក្ខូ អារព្ភ ភាសិតំ.

បុច្ឆា – វិតក្កសណ្ឋានសុត្តំ ¶ បនាវុសោ ភគវតា កត្ថ កំ អារព្ភ ភាសិតំ.

វិស្សជ្ជនា – សាវត្ថិយំ ភន្តេ សម្ពហុលេ ភិក្ខូ អារព្ភ ភាសិតំ.

បុច្ឆា – តេនាវុសោ ¶ ភគវតា…បេ… សម្មាសម្ពុទ្ធេន កកចូបមសុត្តំ កត្ថ កំ អារព្ភ កិស្មិំ វត្ថុស្មិំ ភាសិតំ.

វិស្សជ្ជនា – សាវត្ថិយំ ភន្តេ អាយស្មន្តំ មោឡិយផគ្គុនំ អារព្ភ ភាសិតំ, អាយស្មា ភន្តេ មោឡិយផគ្គុនោ ភិក្ខុនីហិ សទ្ធិំ ¶ អតិវេលំ សំសដ្ឋោ វិហរតិ, តស្មិំ ភន្តេ វត្ថុស្មិំ ភាសិតំ.

បុច្ឆា – អថ ¶ ខោ អាវុសោ អាយស្មតោ មោឡិយផគ្គុនស្ស តំ ភគវតោ ឱវាទំ សុត្វា កថំ ចិត្តំ ឧប្បន្នំ, កថញ្ជ ភគវា ឧត្តរិ ភិក្ខូន ឱវាទមទាសិ.

វិស្សជ្ជនា – អថ ខោ ភន្តេ មោឡិយផគ្គុនស្ស ភគវតោ ឥមំ ឱវាទំ សុត្វា ភិក្ខុនិសំសគ្គតោ ឱរមិស្សាមិ វិរមិស្សាមីតិបិ ចិត្តំ ន ឧប្បន្នំ, អសំវរមេវ ភន្តេ ចិត្តំ ឧប្បន្នំ, ភគវា ច ភន្តេ អារាធយិំសុ វត មេ ភិក្ខវេ ភិក្ខូ ឯកំ សមយំ ចិត្តំ, ឯវមាទិនា ឧត្តរិ ភិក្ខូនំ ឱវាទមទាសិ.

ឧភតោ ¶ ទណ្ឌកេន ចេបិ ភិក្ខវេ កកចេន ចោរា ឱចរកា អង្គមង្គានិ ឱកន្តេយ្យុំ.

បុច្ឆា – អលគទ្ទូបមសុត្តំ ¶ បនាវុសោ ភគវតា កត្ថ កំ អារព្ភ កិស្មិំ វត្ថុស្មិំ ភាសិតំ.

វិស្សជ្ជនា – សាវត្ថិយំ ភន្តេ អរិដ្ឋំ ភិក្ខុំ គទ្ធពាធិបុព្ពំ អារព្ភ ភាសិតំ, អរិដ្ឋស្ស ភន្តេ ភិក្ខុនោ គទ្ធពាធិបុព្ពស្ស ឯវរូបំ បាបកំ ទិដ្ឋិគតំ ឧប្បន្នំ ‘‘តថាហំ ភគវតា ធម្មំ ទេសិតំ អាជាទាមិ, យថា យេមេ អន្តរាយិកា ធម្មា វុត្តា ភគវតា, តេ បដិសេវតោ នាលំ អន្តរាយាយា’’តិ, តស្មិំ ភន្តេ វត្ថុស្មិំ ភាសិតំ.

បុច្ឆា – អថ ¶ ខោ អាវុសោ អាយស្មតោ អរិដ្ឋស្ស គទ្ធពាធិបុព្ពស្ស កថំ ចេតសោ បរិវិតក្កោ ឧទបាទិ, កថញ្ច ភគវា ឧត្តរិ ភិក្ខុនំ ធម្មទេសនំ បវត្តេសិ.

វិស្សជ្ជនា – អថ ខោ ភន្តេ អរិដ្ឋស្ស ភិក្ខុនោ គទ្ធពាធិបុព្ពស្ស ‘‘កិញ្ចាបិ មំ ភគវា មោឃបុរិសវាទេន វទេសិ, ន ខោ បន មេ មគ្គផលានំ ឧបនិស្សយោ ន ហោតិ, ស្វាហំ អារភិត្វា ឃដ្ដេត្វា មគ្គផលានិ និព្ពត្តេស្សាមី’’តិ, ឯវំ ខោ ភន្តេ ចេតសោ បរិវិតក្កោ ឧទបាទិ, ភគវា ច ភន្តេ ទុប្បញ្ញស្ស អលគទ្ទូបមំ ទស្សេត្វា អលគទ្ទូបមំ បរិយត្តិញ្ច ទស្សេត្វា បញ្ញវតោ អលគទ្ទូបមាយ ច កុល្លូបមាយ ច បញ្ញវតោ និស្សរណបរិយត្តិំ ទស្សេត្វា ឆ ច ទិដ្ឋិដ្ឋានានិ, តេសញ្ច ឆន្នំ ទិដ្ឋិដ្ឋានានំ វិនិវេឋនាការំ ទស្សេត្វា បរិយោសានេ ច ខន្ធកម្មដ្ឋានំ អរហត្តនិកូដេន ទស្សេត្វា ឧត្តរិ ភិក្ខូនំ ធម្មកថំ បវត្តេសិ.

បុច្ឆា – ធម្មិកសុត្តំ ¶ បនាវុសោ ភគវតា កត្ថ កំ អារព្ភ កិស្មិំ វត្ថុស្មិំ ភាសិតំ.

វិស្សជ្ជនា – សាវត្ថិយំ ភន្តេ អាយស្មន្តំ កុមារកស្សបំ អារព្ភ ភាសិតំ. អាយស្មា ភន្តេ កុមារកស្សបោ ភគវន្តំ ឧបសង្កមិត្វា វម្មិកបញ្ហំ បុច្ឆិ, តស្មិំ ភន្តេ វត្ថុស្មិំ ភាសិតំ.

បុច្ឆា – រថវិនីតសុត្តំ ¶ បនាវុសោ កត្ថ កេន ភាសិតំ.

វិស្សជ្ជនា – សាវត្ថិយំ ភន្តេ អាយស្មតា ច សារិបុត្តត្ថេរេន ធម្មសេនាបតិនា អាយស្មតា ច បុណ្ណេន មន្តាណិបុត្តេន អញ្ញមញ្ញំ បុច្ឆាវិស្សជ្ជនវសេន ភាសិតំ.

បុច្ឆា – និវាបសុត្តំ បនាវុសោ ភគវតា កត្ថ កំ អារព្ភ ភាសិតំ.

វិស្សជ្ជនា – សាវត្ថិយំ ភន្តេ សម្ពហុលេ ភិក្ខូ អារព្ភ ភាសិតំ.

បុច្ឆា – ឥមស្មិំ ¶ អាវុសោ សុត្តេ កោ និវាបោ កោ នេវាបិកោ កា នេវាបិកបរិសា កា មិគជាតា កថញ្ចេតិស្សា ឧបមាយ អត្ថោ ទដ្ឋព្ពោ.

វិស្សជ្ជនា – ឥមស្មិំ ភន្តេ សុត្តេ និវាបោតិ ខោ ភន្តេ បញ្ចន្នេតំ កាមគុណានំ អធិវចនំ, នេវាបិកោតិ ខោ ភន្តេ មារស្សេតំ បាបិមតោ អធិវចនំ, នេវាបិកបរិសាតិ ខោ ភន្តេ មារបរិសាយេតំ អធិវចនំ, មិគជាតាតិ ខោ ភន្តេ សមណព្រាហ្មណានមេតំ អធិវចនំ, ឥមស្មិំ ភន្តេ សុត្តេ ឯតស្ស អត្ថោ ឯវំ ទដ្ឋព្ពោ.

បុច្ឆា – កេនាវុសោ ¶ ភគវតា…បេ… សម្មាសម្ពុទ្ធេន បាសរាសិសុត្តំ កត្ថ កំ អារព្ភ កិស្មិំ វត្ថុស្មិំ ភាសិតំ.

វិស្សជ្ជនា – សាវត្ថិយំ ភន្តេ សម្ពហុលេ ភិក្ខូ អារព្ភ ភាសិតំ, សម្ពហុលា ភន្តេ ភិក្ខូ រម្មកស្ស ព្រាហ្មណស្ស អស្សមេ ភគវន្តំ អារព្ភ ធម្មិយា កថាយ សន្និសីទិំសុ, តស្មិំ ភន្តេ វត្ថុស្មិំ ភាសិតំ.

បុច្ឆា – អថ ¶ ខោ អាវុសោ តេសំ សម្ពហុលានំ ភិក្ខូនំ ធម្មិយា កថាយ សន្និសិន្នានំ កីទិសំ ធម្មកថំ កថេសិ.

វិស្សជ្ជនា – សាធុ ភិក្ខវេ ឯតំ ខោ ភិក្ខវេ តុម្ហាកំ បតិរូបំ កុលបុត្តានំ សទ្ធា អគារស្មា អនគារិយំ បព្ពជិតានំ, យំ តុម្ហេ ធម្មិយា កថាយ សន្និសីទេយ្យាថ, សន្និបតិតានំ វោ ភិក្ខវេ ទ្វយំ ករណីយំ ធម្មី វា កថា អរិយោ វា តុណ្ហីភាវោ. ទ្វេមា ភិក្ខវេ បរិយេសនា អរិយា ច បរិយេសនា អនរិយា ច បរិយេសនា. ឯវមាទិនា ភន្តេ ភគវា សន្និបតិតានំ តេសំ ភិក្ខូនំ អរិយបរិយេសនញ្ច អនរិយបរិយេសនញ្ច វិភជិត្វា ទេសេសិ.

បុច្ឆា – កថញ្ចាវុសោ ¶ ភគវា អត្តនាបិ អនរិយបរិយេសនំ បហាយ អរិយបរិយេសនាយ បរិយេសិតភាវំ បកាសេសិ.

វិស្សជ្ជនា – អហម្បិ សុទំ ភិក្ខវេ បុព្ពេវ សម្ពោធា អនភិសម្ពុទ្ធោ ពោធិសត្តោវ សមានោ អត្តនា ជាតិធម្មោ សមានោ ជាតិធម្មំយេវ បរិយេសាមិ, អត្តនា ជរាធម្មោ ព្យាធិធម្មោ មរណធម្មោ សោកធម្មោ សំកិលេសធម្មោ សមានោ សំកិលេសធម្មំយេវ បរិយេសាមិ. ឯវមាទិនា ភន្តេ ភគវា អត្តនាបិ អនរិយបរិយេសនំ បហាយ អរិយបរិយេសនាយ បរិយេសិតភាវំ បកាសេសិ.

បុច្ឆា – ឯវំ ¶ បឋមាភិសម្ពុទ្ធស្ស អាវុសោ ភគវតោ អជបាលនិគ្រោធរុក្ខមូលេ និសិន្នស្ស ធម្មទេសនាយ កតសន្និដ្ឋានស្ស កីទិសោ

ចេតសោ ¶ បរិវិតក្កោ ឧទបាទិ, កថញ្ច ធម្មទេសនាយ ចារិកា អហោសិ, កថញ្ច បឋមា ធម្មទេសនា អហោសិ.

វិស្សជ្ជនា – ‘‘កស្ស នុ ខោ អហំ បឋមំ ធម្មំ ទេសេយ្យំ, កោ ឥមំ ធម្មំ ខិប្បមេវ អាជានិស្សតី’’តិ ឯវំ ខោ ភន្តេ ភគវតោ បឋមាភិសម្ពុទ្ធស្ស អជបាលនិគ្រោធមូលេ ធម្មទេសនាយ កតសន្និដ្ឋានស្ស បរិវិតក្កោ ឧទបាទិ, អថ ភន្តេ ភគវា ឧរុវេលាយំ យថាភិរន្តំ វិហរិត្វា យេន ពារាណសី, តេន បទសាយេវ ចារិកំ បក្កាមិ ធម្មទេសនាយ, ទ្វេមេ ភិក្ខវេ អន្តា បព្ពជិតេន ន សេវិតព្ពា, កតមេ ទ្វេ, យោ ចាយំ កាមេសុ កាមសុខល្លិកានុយោគោ ហីនោ គាម្មោ បោថុជ្ជនិកោ អនរិយោ អនត្តសំហិតោ, ឯវមាទិនា ភន្តេ ភគវតោ បឋមា ធម្មទេសនា អហោសិ.

សព្ពញ្ជហោ តណ្ហាក្ខយេ វិមុត្តោ,

បុច្ឆា – កថញ្ចាវុសោ ¶ ភគវា បាសរាសិឧបមាយ តំ ទេសនំ បរិនិដ្ឋាបេសិ.

វិស្សជ្ជនា – បញ្ចិមេ ភិក្ខវេ កាមគុណា, កតមេ បញ្ច, ចក្ខុវិញ្ញេយ្យា រូបា ឥដ្ឋា កន្តា មនាបា បិយរូបា កាមូបសំហិតា រជនីយា. សោតវិញ្ញេយ្យា សទ្ទា. ឃានវិញ្ញេយ្យា គន្ធា. ជិវ្ហាវិញ្ញេយ្យា រសា. កាយវិញ្ញេយ្យា ផោដ្ឋព្ពា ឥដ្ឋា កន្តា មនាបា បិយរូបា កាមូបសំហិតា រជនីយា. ឥមេ ខោ ភិក្ខវេ បញ្ច កាមគុណា. យេ ហិ កេចិ ភិក្ខវេ សមណា វា ព្រាហ្មណា វា ឥមេ កាមគុណេ គថិតា មុច្ឆិតា អជ្ឈោបន្នា អនាទីនវទស្សាវិនោ អនិស្សរណបញ្ញា បរិភុញ្ជន្តិ, តេ ឯវមស្សុ វេទិតព្ពា ‘‘អនយមាបន្នា ព្យាសនមាបន្នា យថាកាមករណីយា បាបិមតោ’’, ឯវមាទិនា ភន្តេ ភគវា បាសរាសិឧបមាយ ធម្មទេសនំ បរិនិដ្ឋាបេសិ.

បុច្ឆា – តេនាវុសោ ¶ ជានតា…បេ… សម្មាសម្ពុទ្ធេន ចូឡហត្ថិបទោបមសុត្តំ កត្ថ កំ អារព្ភ កិស្មិំ វត្ថុស្មិំ ភាសិតំ.

វិស្សជ្ជនា – សាវត្ថិយំ ភន្តេ ជាណុស្សោណិំ ព្រាហ្មណំ អារព្ភ ភាសិតំ. ជាណុស្សោណិ ភន្តេ ព្រាហ្មណោ ភគវន្តំ ឧបសង្កមិត្វា យាវតកោ អហោសិ បិលោតិកេន បរិព្ពាជកេន សទ្ធិំ កថាសល្លាបោ, តំ សព្ពំ ភគវតោ អារោចេសិ, តស្មិំ ភន្តេ វត្ថុស្មិំ ភាសិតំ.

បុច្ឆា – កថញ្ចាវុសោ ¶ ភគវា ហត្ថិបទោបមំ វិត្ថារេន បរិបូរេត្វា ទេសេសិ.

វិស្សជ្ជនា – ‘‘ន ខោ ព្រាហ្មណ ឯត្តាវតា ហត្ថិបទោបមោ វិត្ថារេន បរិបូរោ ហោតិ, អបិ ច ព្រាហ្មណ យថា ហត្ថិបទោបមោ វិត្ថារេន បរិបូរោ ហោតិ, តំ សុណាហិ សាធុកំ មនសិករោហិ ភាសិស្សាមី’’តិ, ឯវមាទិនា ភន្តេ ភគវា ហត្ថិបទោបមំ បរិបូរេត្វា ព្រាហ្មណស្ស ជាណុស្សោណិស្ស ទេសេសិ.

បុច្ឆា – មហាហត្ថិបទោបមសុត្តំ ¶ បនាវុសោ កត្ថ កំ អារព្ភ កេន ភាសិតំ.

បុច្ឆា – មហាសារោបមសុត្តំ ¶ បនាវុសោ ភគវតា កត្ថ កំ អារព្ភ កិស្មិំ វត្ថុស្មិំ ភាសិតំ.

វិស្សជ្ជនា – រាជគហេ ភន្តេ ទេវទត្តំ អារព្ភ ភាសិតំ, ទេវទត្តោ ភន្តេ សង្ឃំ ភិន្ទិត្វា រុហិរុប្បាទកម្មំ កត្វា អចិរបក្កន្តោ ហោតិ, តស្មិំ ភន្តេ វត្ថុស្មិំ ភាសិតំ.

បុច្ឆា – ចូឡសារោបមសុត្តំ ¶ បនាវុសោ ភគវតា កត្ថ កំ អារព្ភ កិស្មិំ វត្ថុស្មិំ ភាសិតំ.

វិស្សជ្ជនា – សាវត្ថិយំ ភន្តេ បិង្គលកោច្ឆំ ព្រាហ្មណំ អារព្ភ ភាសិតំ, បិង្គលកោច្ឆោ ភន្តេ ព្រាហ្មណោ ភគវន្តំ ឧបសង្កមិត្វា បញ្ហំ បុច្ឆិ, តស្មិំ ភន្តេ វត្ថុស្មិំ ភាសិតំ.

បុច្ឆា – ចូឡគោសិង្គសុត្តំ ¶ បនាវុសោ ភគវតា កត្ថ កេន សទ្ធិំ ភាសិតំ.

វិស្សជ្ជនា – នាភិកេ ភន្តេ គោសិង្គសាលវនទាយេ អាយស្មតា អនុរុទ្ធត្ថេរេន សទ្ធិំ ភាសិតំ.

បុច្ឆា – មហាគោសិង្គសុត្តំ បនាវុសោ ភគវតា កត្ថ កេន សទ្ធិំ ភាសិតំ.

វិស្សជ្ជនា – គោសិង្គសាលវនទាយេ ភន្តេ អាយស្មតា ច សារិបុត្តត្ថេរេន ធម្មសេនាបតិនា អាយស្មតា ច មហាមោគ្គល្លានត្ថេរេន សទ្ធិំ ភាសិតំ.

បុច្ឆា – មហាគោបាលកសុត្តំ ¶ បនាវុសោ ភគវតា កត្ថ កំ អារព្ភ ភាសិតំ.

វិស្សជ្ជនា – សាវត្ថិយំ ភន្តេ សម្ពហុលេ ភិក្ខូ អារព្ភ ភាសិតំ.

បុច្ឆា – ចូឡគោបាលកសុត្តំ ¶ បនាវុសោ ភគវតា កត្ថ កំ អារព្ភ ភាសិតំ.

វិស្សជ្ជនា – វជ្ជីសុ ភន្តេ ឧក្កចេលាយំ គង្គាយ នទិយា តីរេ សម្ពហុលេ ភិក្ខូ អារព្ភ ភាសិតំ.

បុច្ឆា – តេនាវុសោ ¶ ជានតា…បេ… សម្មាសម្ពុទ្ធេន ចូឡសច្ចកសុត្តំ កត្ថ កំ អារព្ភ កិស្មិំ វត្ថុស្មិំ ភាសិតំ.

វិស្សជ្ជនា – វេសាលិយំ ភន្តេ សច្ចកំ និគណ្ឋបុត្តំ អារព្ភ ភាសិតំ, សច្ចកោ និគណ្ឋបុត្តោ មហតិយា លិច្ឆវិបរិសាយ សទ្ធិំ យេន ភគវា តេនុបសង្កមិ, ឧបសង្កមិត្វា ភគវន្តំ ឯតទវោច ‘‘កថំ បន ភវំ គោតមោ សាវកេ វិនេតិ, កថំ ភាគា ច បន ភោតោ គោតមស្ស សាវកេសុ អនុសាសនី ពហុលា បវត្តតី’’តិ, អថ ភន្តេ ភគវតា អនិច្ចវាទេ ច អនត្តវាទេ ច បកាសិតេ សច្ចកោ និគណ្ឋបុត្តោ បថវីឧបមំ ទស្សេត្វា អត្តនោ អត្តវាទំ បកាសេសិ, តស្មិំ ភន្តេ វត្ថុស្មិំ ភាសិតំ.

បុច្ឆា – ឯវំ ¶ អាវុសោ សច្ចកេន និគណ្ឋបុត្តេន មហាបថវីឧបមំ ទស្សេត្វា អត្តវាទេ បកាសិតេ កថំ ភគវា តំ អត្តវាទំ បុន បតិដ្ឋាបេត្វា សមនុយុញ្ជិ សមនុគាហិ សមនុភាសិ.

វិស្សជ្ជនា – ‘‘ននុ ត្វំ អគ្គិវេស្សន ឯវំ វទេសិ, រូបំ មេ អត្តា, វេទនា មេ អត្តា, សញ្ញា មេ អត្តា, សង្ខារា មេ អត្តា, វិញ្ញាណំ មេ អត្តា’’តិ, ឯវំ ខោ ភន្តេ ភគវា សច្ចកំ និគណ្ឋបុត្តំ តំ អត្តវាទំ បតិដ្ឋាបេសិ. បតិដ្ឋាបេត្វា ច បន ភន្តេ ភគវា ‘‘តេន ហិ អគ្គិវេស្សន តញ្ញេវេត្ថ បដិបុច្ឆិស្សាមិ, យថា តេ ខមេយ្យ, តថា តំ ព្យាករេយ្យាសី’’តិ ឯវមាទិនា ភន្តេ ភគវា សច្ចកំ និគណ្ឋបុត្តំ សមនុយុញ្ជិ សមនុគាហិ សមនុភាសិ.

បុច្ឆា – ឯវំ ¶ ខោ អាវុសោ សច្ចកេ និគណ្ឋបុត្តេ តុណ្ហីភូតេ អធោមុខេ បជ្ឈាយន្តេ អប្បដិភានេ និសិន្នេ ទុម្មុខោ នាម លិច្ឆវិបុត្តោ ភគវន្តំ កិំ វចនំ អវោច.

វិស្សជ្ជនា – ឯវំ ភន្តេ សច្ចកេ និគណ្ឋបុត្តេ តុណ្ហីភូតេ មង្កុភូតេ បត្តក្ខន្ធេ អធោមុខេ បជ្ឈាយន្តេ អប្បដិភានេ ទុម្មុខោ លិច្ឆវិបុត្តោ ¶ ភគវន្តំ ឯតទវោច ‘‘ឧបមា មំ ភគវា បដិភាតី’’តិ.

បុច្ឆា – អថ ¶ ខោ អាវុសោ សច្ចកោ និគណ្ឋបុត្តោ ភគវន្តំ កីទិសំ បញ្ហំ បុច្ឆិ, កថញ្ច តំ ភគវា ព្យាកាសិ.

វិស្សជ្ជនា – អថ ខោ ភន្តេ សច្ចកោ និគណ្ឋបុត្តោ ទុម្មុខំ លិច្ឆវិំ អបសាទេត្វា ភគវន្តំ សេខញ្ច អសេខញ្ច បញ្ហំ បុច្ឆិ, ភគវា ច ភន្តេ ‘‘ឥធ អគ្គិវេស្សន មម សាវកោ យំ កិញ្ចិ រូបំ អតីតានាគតបច្ចុប្បន្នំ អជ្ឈត្តំ វា ពហិទ្ធា វា ឱឡារិកំ វា សុខុមំ វា ហីនំ វា បណីតំ វា យំ ទូរេ សន្តិកេ វា’’ ឯវមាទិនា សេខញ្ច អសេខញ្ច បុគ្គលំ វិភជិត្វា ព្យាកាសិ.

ពុទ្ធោ ¶ សោ ភគវា ពោធាយ ធម្មំ ទេសេតិ.

ទន្តោ សោ ភគវា ទមថាយ ធម្មំ ទេសេតិ.

សន្តោ សោ ភគវា សមថាយ ធម្មំ ទេសេតិ.

តិណ្ណោ សោ ភគវា តរណាយ ធម្មំ ទេសេតិ.

បរិនិព្ពុតោ សោ ភគវា បរិនិព្ពានាយ ធម្មំ ទេសេតិ.

បុច្ឆា – មហាសច្ចកសុត្តំ ¶ បនាវុសោ ភគវតា កត្ថ កំ អារព្ភ កិស្មិំ វត្ថុស្មិំ ភាសិតំ.

វិស្សជ្ជនា – វេសាលិយំ ភន្តេ សច្ចកំយេវ និគណ្ឋបុត្តំ អារព្ភ ភាសិតំ. សច្ចកោ ភន្តេ និគណ្ឋបុត្តោ អបរទិវសេ ភគវន្តំ ឧបសង្កមិត្វា ភគវតោ សាវកេ អាសជ្ជ ភាវនាទ្វយបដិសំយុត្តំ វាចំ ភាសតិ, តស្មិំ ភន្តេ វត្ថុស្មិំ ភាសិតំ.

បុច្ឆា – កថញ្ចាវុសោ ¶ ភគវា សច្ចកំ និគណ្ឋបុត្តំ បដិបុច្ឆិត្វា ភាវនាទ្វយំ វិភជ្ជ កថេសិ.

វិស្សជ្ជនា – អថ ខោ ភន្តេ ភគវា ‘‘កិន្តិ បន តេ អគ្គិវេស្សន កាយភាវនា សុតា’’តិ ឯវមាទិនា សច្ចកំ និគណ្ឋបុត្តំ បដិបុច្ឆិត្វា, កថញ្ច អគ្គិវេស្សន អភាវិតកាយោ ច ហោតិ អភាវិតចិត្តោ ច ឯវមាទិនា ភាវនាទ្វយំ វិភជិត្វា ព្យាកាសិ.

បុច្ឆា – អថ ¶ ខោ អាវុសោ សច្ចកោ និគណ្ឋបុត្តោ ភគវន្តំ កិំ វចនំ អវោច, កថញ្ច ភគវា បធានកាលេ អត្តនាអនុភូតបុព្ពា បរមុក្កំសគតា សុខទុក្ខវេទនាយោ បកាសេសិ, យាបិ ភគវតោ ចិត្តំ ន បរិយាទាយ អដ្ឋំសុ.

វិស្សជ្ជនា – អថ ខោ ភន្តេ សច្ចកោ និគណ្ឋបុត្តោ ភគវន្តំ ឯតទវោច ‘‘ន ហិ នូន ភោតោ គោតមស្ស ឧប្បជ្ជតិ, តថា រូបា សុខាវេទនា, យថារូបា ឧប្បន្នា សុខាវេទនា ចិត្តំ បរិយាទាយ តិដ្ឋេយ្យ, ន ហិ នូន ភោតោ គោតមស្ស ឧប្បជ្ជតិ តថារូបា ទុក្ខា វេទនា, យថារូបា ឧប្បន្នា ទុក្ខា វេទនា ចិត្តំ បរិយាទាយ តិដ្ឋេយ្យា’’តិ អថ ខោ ភគវា ‘‘កិញ្ហិ នោ សិយា អគ្គិវេស្សន, ឥធ មេ ¶ អគ្គិវេស្សេន បុព្ពេវ សម្ពោធា អនភិសម្ពុទ្ធស្ស ពោធិសត្តស្សេវ សតោ ឯតទហោសិ, ឯវមាទិនា ភន្តេ ភគវា បធានកាលេ អត្តនានុភូតបុព្ពា បរមុក្កំសគតា សុខទុក្ខវេទនាយោ វិត្ថារេន, យាបិ ភគវតោ ចិត្តំ ន បរិយាទាយ អដ្ឋំសុ.

បុច្ឆា – តេនាវុសោ ¶ ភគវតា ជានតា…បេ… សម្មាសម្ពុទ្ធេន ចូឡតណ្ហាសង្ខយសុត្តំ កត្ថ កំ អារព្ភ កិស្មិំ វត្ថុស្មិំ ភាសិតំ.

វិស្សជ្ជនា – សាវត្ថិយំ ភន្តេ សក្កំ ទេវានមិន្ទំ អារព្ភ ភាសិតំ. សក្កោ ភន្តេ ទេវានមិន្ទោ ភគវន្តំ ឧបសង្កមិត្វា ឯតទវោច ‘‘កិត្តាវតានុខោ ភន្តេ ភិក្ខុ សំខិត្តេន តណ្ហាសង្ខយវិមុត្តោ ហោតិ អច្ចន្តនិដ្ឋោ អច្ចន្តយោគក្ខេមិ ¶ អច្ចន្តព្រហ្មចារី អច្ចន្តបរិយោសានោ សេដ្ឋោ ទេវមនុស្សាន’’ន្តិ. តស្មិំ ភន្តេ វត្ថុស្មិំ ភាសិតំ.

កិត្តាវតា ¶ នុ ខោ ភន្តេ ភិក្ខុ សំខិត្តេន តណ្ហាសង្ខយវិមុត្តោ ហោតិ អច្ចន្តនិដ្ឋោ អច្ចន្តយោគក្ខេមី អច្ចន្តព្រហ្មចារី អច្ចន្តបរិយាសានោ សេដ្ឋោ ទេវមនុស្សានំ –

បុច្ឆា – មហាតណ្ហាសង្ខយសុត្តំ បនាវុសោ ភគវតា កត្ថ កំ អារព្ភ កិស្មិំ វត្ថុស្មិំ ភាសិតំ.

វិស្សជ្ជនា – សាវត្ថិយំ ភន្តេ សាតិំ ភិក្ខុំ កេវដ្ដបុត្តំ អារព្ភ ភាសិតំ. សាតិស្ស ភន្តេ ភិក្ខុនោ កេវដ្ដបុត្តស្ស ឯវរូបំ បាបកំ ទិដ្ឋិគតំ ឧប្បន្នំ ហោតិ ‘‘តថាហំ ភគវតា ធម្មំ ទេសិតំ អាជានាមិ, យថា តទេវិទំ វិញ្ញាណំ សន្ធាវតិ ¶ សំសរតិ អនញ្ញ’’ន្តិ. តស្មិំ ភន្តេ វត្ថុស្មិំ ភាសិតំ.

បុច្ឆា – អថ ¶ ខោ អាវុសោ ភគវា កថំ ភិក្ខូ អាមន្តេត្វា ច បដិបុច្ឆិត្វា ច អនត្តភាវទីបិកំ ធម្មកថំ កថេសិ.

វិស្សជ្ជនា – អថ ភន្តេ ភគវា ភិក្ខូ ‘‘តំ កិំ មញ្ញថ ភិក្ខវេ, អបិនាយំ សាតិ ភិក្ខុ កេវដ្ដបុត្តោ ឧស្មីកតោបិ ឥស្មិំ ធម្មវិនយេ’’តិ អាមន្តេត្វា, តុម្ហេបិ មេ ភិក្ខវេ ឯវំ ធម្មំ ទេសិតំ អាជានាថត្យាទិនា ភិក្ខូ បដិបុច្ឆិត្វា ច យំ យទេវ ភិក្ខវេ បច្ចយំ បដិច្ច ឧប្បជ្ជតិ វិញ្ញាណំ, តេន តេនេវ វិញ្ញាណំ ត្វេវ សង្ខ្យំ គច្ឆតិ, ចក្ខុញ្ច បដិច្ច រូបេ ¶ ច ឧប្បជ្ជតិ វិញ្ញាណំ ចក្ខុវិញ្ញាណំ ត្វេវ សង្ខ្យំ គច្ឆតិ, ឯវមាទិនា ភន្តេ អនត្តតាទីបិកំ ធម្មិំ កថំ កថេសិ.

បុច្ឆា – មហាអស្សបុរសុត្តំ ¶ បនាវុសោ ភគវតា កត្ថ កំ អារព្ភ កិស្មិំ វត្ថុស្មិំ ភាសិតំ.

វិស្សជ្ជនា – អង្គេសុ ភន្តេ អស្សបុរេ នាម អង្គានំ និគមេ ពហូ មនុស្សេ សទ្ធេ បសន្នេ អារព្ព្ភ ភាសិតំ. ពហូ ភន្តេ មនុស្សា សទ្ធា បសន្នា ភិក្ខុសង្ឃំ សក្កច្ចំ ឧបដ្ឋហិំសុ, សព្ពកាលញ្ច រតនត្តយបដិសំយុត្តំ វណ្ណកថំយេវ កថយិំសុ. តស្មិំ ភន្តេ វត្ថុស្មិំ ភាសិតំ.

បុច្ឆា – កតមេ ¶ អាវុសោ តត្ថ ភគវតា ធម្មា សមណករណា ច ព្រាហ្មណករណា ច ឧត្តរុត្តរិ បណីតបណីតា ទេសិតា.

វិស្សជ្ជនា – ហិរោត្តប្បា ¶ បរិសុទ្ធកាយសមាចារោ បរិសុទ្ធវចីសមាចារោ បរិសុទ្ធមនោសមាចារោ បរិសុទ្ធាជីវោ ឥន្ទ្រិយេសុ គុត្តទ្វារតា ភោជនេមត្តញ្ញុតា ជាគរិយានុយោគោ សតិសម្បជញ្ញំ នីវរណប្បហានំ ចត្តារិ ច ឈានានិ តិស្សោ ច វិជ្ជា ឥមេ ខោ ភន្តេ តត្ថ ភគវតា សមណករណា ច ព្រាហ្មណករណា ច ឧត្តរុត្តរិ បណីតបណីតា ធម្មា ទេសិតា.

បុច្ឆា – ចូឡអស្សបុរសុត្តំ ¶ បនាវុសោ ភគវតា កត្ត កំ អារព្ភ ភាសិតំ.

វិស្សជ្ជនា – តស្មិំយេវ ភន្តេ អស្សបុរេ និគមេ តេយេវ មនុស្សេ សទ្ធេ បសន្នេ អារព្ភ ភាសិតំ, តស្មិំយេវ ភន្តេ វត្ថុស្មិំ ភាសិតំ.

បុច្ឆា – កថញ្ចាវុសោ ¶ តត្ថ ភគវតា សមណសាមីចិប្បដិបទា ច អស្សមណសាមីចិប្បដិបទា ច វិភជិត្វា ទេសិតា.

វិស្សជ្ជនា – ‘‘កថញ្ច ភិក្ខវេ ភិក្ខុ ន សមណសាមីចិប្បដិបទំ បដិបន្នោ ហោតិ, យស្ស កស្សចិ ភិក្ខវេ ភិក្ខុនោ អភិជ្ឈាលុស្ស អភិជ្ឈា អប្បហីនា ហោតិ, ព្យាបន្នចិត្តស្ស ព្យាបាទោ អប្បហីនោ ហោតី’’តិ ឯវមាទិនា ច. កថញ្ច ភិក្ខវេ ភិក្ខុ សមណសាមីចិប្បដិបទំ បដិបន្នោ ហោតិ, យស្ស កស្សចិ ភិក្ខវេ ភិក្ខុនោ អភិជ្ឈាលុស្ស អភិជ្ឈា បហីនា ហោតិ, ព្យាបន្នចិត្តស្ស ព្យាបាទោ បហីនោ ហោតិ ឯវមាទិនា ច ភន្តេ ភគវតា តត្ថ សមណសាមីចិប្បដិបទា ច អស្សមណសាមីចិប្បដិបទា ច វិត្ថារេន វិភជិត្វា ទេសិតា.

បុច្ឆា – សាលេយ្យកសុត្តំ ¶ បនាវុសោ ភគវតា កត្ថ កំ អារព្ភ កិស្មិំ វត្ថុស្មិំ ភាសិតំ.

វិស្សជ្ជនា – កោសលេសុ ភន្តេ សាលាយំ នាម ព្រាហ្មណគាមេ សាលេយ្យកេ ព្រាហ្មណគហបតិកេ អារព្ភ ភាសិតំ. សាលេយ្យកា ភន្តេ ព្រាហ្មណគហបតិកា ភគវន្តំ ឧបសង្កមិត្វា ឯតទវោចុំ ‘‘កោ នុ ខោ ភោ គោតម ហេតុ កោ បច្ចយោ, យេន មិធេកច្ចេ សត្តា កាយស្ស ភេទា បរំ មរណា អបាយំ ទុគ្គតិំ វិនិបាតំ និរយំ ឧបបជ្ជន្តិ, កោ បន ភោ គោតម ហេតុ កោ បច្ចយោ, យេន មិធេកច្ចេ សត្តា កាយស្ស ភេទា បរំ មរណា សុគតិំ សគ្គំ លោកំ ឧបបជ្ជន្តី’’តិ. តស្មិំ ភន្តេ វត្ថុស្មិំ ភាសិតំ.

បុច្ឆា – វេរញ្ជកសុត្តំ ¶ បនាវុសោ ភគវតា កត្ថ កំ អារព្ភ កិស្មិំ វត្ថុស្មិំ ភាសិតំ.

វិស្សជ្ជនា – សាវត្ថិយំ ភន្តេ វេរញ្ជកេ ព្រាហ្មណគហបតិកេ អារព្ភ ភាសិតំ. វេរញ្ជកា ភន្តេ ព្រាហ្មណគហបតិកា ភគវន្តំ ឧបសង្កមិត្វា ឯតទវោចុំ ‘‘កោ នុ ខោ ភោ គោតម ហេតុ កោ បច្ចយោ, យេន មិធេកច្ចេ សត្តា កាយស្ស ភេទា បរំ មរណា អបាយំ ទុគ្គតិំ វិនិបាតំ និរយំ ឧបបជ្ជន្តិ, កោ បន ភោ គោតម ហេតុ កោ បច្ចយោ, យេន មិធេកច្ចេ សត្តា កាយស្ស ភេទា បរំ មរណា សុគតិំ សគ្គំ លោកំ ឧបបជ្ជន្តី’’តិ. តស្មិំ ភន្តេ វត្ថុស្មិំ ភាសិតំ.

បុច្ឆា – មហាវេទល្លសុត្តំ បនាវុសោ កត្ថ កេន ភាសិតំ.

វិស្សជ្ជនា – សាវត្ថិយំ ភន្តេ អាយស្មតា មហាកោដ្ឋិកេន បុដ្ឋេន អាយស្មតា សារិបុត្តត្ថេរេន ធម្មសេនាបតិនា ភាសិតំ.

បុច្ឆា – ចូឡវេទល្លសុត្តំ ¶ បនាវុសោ កត្ថ កេន ភាសិតំ.

វិស្សជ្ជនា – រាជគហេ ភន្តេ វិសាខេន ឧបាសកេន បុដ្ឋាយ ធម្មទិន្នាយ ថេរិយា ភាសិតំ.

បុច្ឆា – ចូឡធម្មសមាទានសុត្តំ ¶ បនាវុសោ ភគវតា កត្ថ កំ អារព្ភ ភាសិតំ.

វិស្សជ្ជនា – សាវត្ថិយំ ភន្តេ សម្ពហុលេ ភិក្ខូ អារព្ភ ភាសិតំ.

បុច្ឆា – មហាធម្មសមាទានសុត្តំ បនាវុសោ ភគវតា កត្ថ កំ អារព្ភ ភាសិតំ.

វិស្សជ្ជនា – សាវត្ថិយំ ភន្តេ សម្ពហុលេ ភិក្ខូ អារព្ភ ភាសិតំ.

បុច្ឆា – វីមំសកសុត្តំ ¶ បនាវុសោ ភគវតា កត្ថ កំ អារព្ភ ភាសិតំ.

វិស្សជ្ជនា – សាវត្ថិយំ ភន្តេ សម្ពហុលេ ភិក្ខូ អារព្ភ ភាសិតំ.

បុច្ឆា – កោសម្ពិយសុត្តំ បនាវុសោ កត្ថ កំ អារព្ភ កិស្មិំ វត្ថុស្មិំ ភាសិតំ.

វិស្សជ្ជនា – កោសម្ពិយំ ភន្តេ កោសម្ពិកេ ភិក្ខូ អារព្ភ ភាសិតំ. កោសម្ពិកា ភន្តេ ភិក្ខូ ភណ្ឌនជាតា កលហជាតា វិវាទាបន្នា ¶ អញ្ញមញ្ញំ មុខសត្តីហិ វិតុទន្តា វិហរន្តិ. តស្មិំ ភន្តេ វត្ថុស្មិំ ភាសិតំ.

បុច្ឆា – ព្រហ្មនិមន្តនិកសុត្តំ បនាវុសោ ភគវតា កត្ថ កំ អារព្ភ កិស្មិំ វត្ថុស្មិំ ភាសិតំ.

វិស្សជ្ជនា – សាវត្ថិយំ ភន្តេ សម្ពហុលេ ភិក្ខូ អារព្ភ ភាសិតំ.

បុច្ឆា – មារតជ្ជនីយសុត្តំ ¶ បនាវុសោ កត្ថ កំ អារព្ភ កិស្មិំ វត្ថុស្មិំ កេន ភាសិតំ.

វិស្សជ្ជនា – សក្កេសុ ភន្តេ សុសុមារគិរេ ភេសកឡាវនេ មិគទាយេ អាយស្មតា មហាមោគ្គល្លានេន មារំ បាបិមន្តំ អារព្ភ ភាសិតំ. មារោ ភន្តេ បាបិមា អាយស្មតោ មហាមោគ្គល្លានស្ស កុច្ឆិគតោ ហោតិ កោដ្ឋមនុបវិដ្ឋោ. តស្មិំ ភន្តេ វត្ថុស្មិំ ភាសិតំ.

បុច្ឆា – តេនាវុសោ ¶ ជានតា…បេ… សម្មាសម្ពុទ្ធេន កន្ទរកសុត្តំ កត្ថ កំ អារព្ភ កិស្មិំ វត្ថុស្មិំ ភាសិតំ.

វិស្សជ្ជនា – ចម្បាយំ ភន្តេ គគ្គរាយ បោក្ខរណិយា តីរេ បេស្សញ្ច ហត្ថារោហបុត្តំ កន្ទរកញ្ច បរិព្ពាជកំ អារព្ភ ភាសិតំ, កន្ទរកោ ភន្តេ បរិព្ពាជកោ ភគវតោ ច ភិក្ខុសង្ឃស្ស ច វណ្ណំ អភាសិ, បេស្សោ ច ភន្តេ ហត្ថារោហបុត្តោ ភគវតោ ច ធម្មទេសនាយ ច វណ្ណំ អភាសិ. តស្មិំ ភន្តេ វត្ថុស្មិំ ភាសិតំ.

បុច្ឆា – ឯវំ ¶ ខោ អាវុសោ កន្ទរកេន បរិព្ពាជកេន ភគវតោ ច ភិក្ខុសង្ឃស្ស ច អភិប្បសន្នេន វណ្ណេ ភាសិតេ កថំ ភគវា តំ សមនុជានិត្វា ធម្មទេសនារម្ភំ អារភិ, កថញ្ច បេស្សោ ហត្ថារោហបុត្តោ ភគវតោ ច ធម្មទេសនាយ ច វណ្ណំ អភាសិ ¶ , កថញ្ច បេស្សស្ស ហត្ថារោហបុត្តស្ស អជ្ឈាសយានុរូបំ ធម្មំ ទេសេសិ.

វិស្សជ្ជនា – ឯវំ ខោ ភន្តេ កន្ទរកេន បរិព្ពាជកេន ភគវតោ ច ភិក្ខុសង្ឃស្ស ច អភិប្បសន្នេន វណ្ណេ ភាសិតេ ‘‘ឯវមេតំ កន្ទរក ឯវមេតំ កន្ទរក’’ ឯវមាទិនា ភគវា តំ សមនុជានិត្វា ‘‘សន្តិ ហិ កន្ទរក ភិក្ខូ ឥមស្មិំ ភិក្ខុសង្ឃេ អរហន្តោ ខីណាសវា វុសិតវន្តោ កតករណីយា ឱហិតភារា អនុប្បត្តសទត្ថា បរិក្ខីណភវសំយោជនា សម្មទញ្ញា វិមុត្តា’’តិ ឯវមាទិនា ធម្មទេសនំ សមារភិ. អថ ខោ ភន្តេ បេស្សោ ហត្ថារោហបុត្តោ ‘‘អច្ឆរិយំ ភន្តេ អព្ភុតំ ភន្តេ យាវ សុបញ្ញត្តា ចិមេ ភន្តេ ភគវតា ចត្តារោ សតិបដ្ឋានា សត្តានំ វិសុទ្ធិយា សោកបរិទេវានំ សមតិក្កមាយ ទុក្ខទោមនស្សានំ អត្ថង្គមាយ ញាយស្ស អធិគមាយ និព្ពានស្ស សច្ឆិកិរិយាយា’’តិ ឯវមាទិនា ភគវតោ ច ធម្មទេសនាយ វណ្ណំ អភាសិ, ភគវាបិ ភន្តេ ‘‘គហនញ្ហេតំ បេស្ស យទិទំ មនុស្សា, ឧត្តានកញ្ហេតំ បេស្ស យទិទំ បសវោ’’តិអាទិនា បេស្សស្ស ហត្ថារោហបុត្តស្ស អជ្ឈាសយានុរូបំ ធម្មកថំ ទេសេសិ.

បុច្ឆា – តំ ¶ បនាវុសោ ធម្មទេសនំ សុត្វា បេស្សស្ស ហត្ថារោហបុត្តស្ស កីទិសោ អានិសំសោ អធិគតោ, កថញ្ច ភគវា តំ បុគ្គលចតុក្កទេសនំ សំខិត្តេន ភាសិតំ, ភិក្ខូនំ វិត្ថារេន វិភជិត្វា ទេសេសិ.

វិស្សជ្ជនា – តំ ខោ បន ភន្តេ ធម្មំ សុត្វា បេស្សស្ស ហត្ថារោហបុត្តស្ស ទ្វេ អានិសំសា អធិគតា សង្ឃេ ច បសាទោ សតិបដ្ឋានបរិគ្គហណូបាយោ ¶ ច អភិនវោ. ភគវា ច ភន្តេ តំ បុគ្គលចតុក្កទេសនំ ភិក្ខូហិ យាចិតោ ‘‘កតមោ ច ភិក្ខវេ បុគ្គលោ អត្តបរិតាបនានុយោគមនុយុត្តោ’’តិអាទិនា សំខិត្តេន ភាសិតំ, វិត្ថារេន អត្ថំ អវិភត្តំ. វិត្ថារេន វិភជិត្វា ទេសេសិ.

បុច្ឆា – អដ្ឋកនាគរសុត្តំ ¶ បនាវុសោ កត្ថ កំ អារព្ភ កិស្មិំ វត្ថុស្មិំ កេន ភាសិតំ.

វិស្សជ្ជនា – វេសាលិយំ ភន្តេ វេឡុវគាមកេ គហបតិំ អដ្ឋកនាគរំ អារព្ភ អាយស្មតា អានន្ទត្ថេរេន ធម្មភណ្ឌាគារិកេន ភាសិតំ. ទសមោ ភន្តេ គហបតិ អដ្ឋកនាគរោ អាយស្មន្តំ អានន្ទំ ឧបសង្កមិត្វា ឯតទវោច ‘‘អត្ថិ នុ ខោ ភន្តេ អានន្ទ តេន ភគវតា ជានតា បស្សតា អរហតា សម្មាសម្ពុទ្ធេន ឯកធម្មោ អក្ខាតោ, យត្ថ ភិក្ខុនោ អប្បមត្តស្ស អាតាបិនោ បហិតត្តស្ស វិហរតោ អវិមុត្តញ្ចេវ ចិត្តំ វិមុច្ចតិ, អបរិក្ខិណា ច អាសវា បរិក្ខយំ គច្ឆន្តិ, អននុប្បត្តញ្ច អនុត្តរំ យោគក្ខេមំ អនុបាបុណាតី’’តិ, តស្មិំ ភន្តេ វត្ថុស្មិំ ភាសិតំ.

បុច្ឆា – សេខសុត្តំ ¶ បនាវុសោ កត្ថ កំ អារព្ភ កិស្មិំ វត្ថុស្មិំ កេន ភាសិតំ.

វិស្សជ្ជនា – សក្កេសុ ភន្តេ កបិលវត្ថុស្មិំ សន្ថាគារេ អាយស្មតា អានន្ទត្ថេរេន ធម្មភណ្ឌាគារិកេន កាបិលវត្ថវេ សក្យេ អារព្ភ ភាសិតំ. ភគវា ភន្តេ កាបិលវត្ថវេ សក្យេ ពហុទេវរត្តិំ ធម្មិយា កថាយ សន្ទស្សេត្វា សមាទបេត្វា សមុត្តេជេត្វា សម្បហំសេត្វា អាយស្មន្តំ អានន្ទំ អាមន្តេសិ ‘‘បដិភាតុ តំ អានន្ទ កាបិលវត្ថវានំ សក្យានំ សេខោ បាដិបទោ, បិដ្ឋិ មេ អាគិលាយតិ, តមហំ អាយមិស្សាមី’’តិ. តស្មិំ ភន្តេ វត្ថុស្មិំ ភាសិតំ.

បុច្ឆា – បោតលិយសុត្តំ ¶ បនាវុសោ ភគវតា កត្ថ កំ អារព្ភ កិស្មិំ វត្ថុស្មិំ ភាសិតំ.

វិស្សជ្ជនា – អង្គុត្តរាបេសុ ភន្តេ អាបណេ នាម អង្គុត្តរាបានំ និគមេ បោតលិយំ គហបតិំ បដិក្ខិត្តសព្ពកម្មន្តំ អារព្ភ ភាសិតំ. បោតលិយោ ភន្តេ គហបតិ បដិក្ខិត្តសព្ពកម្មន្តោ យេន ភគវា តេនុបសង្កមិ, ឧបសង្កមន្តោ ភគវតា គហបតិវាទេន សមុទាចរិយមានោ កុបិតោ អនត្តមនោ ភគវន្តំ ឯតទវោច ‘‘តយិទំ ភោ គោតម នច្ឆន្នំ តយិទំ នប្បតិរូបំ, យំ មំ ត្វំ គហបតិវាទេន សមុទាចរសី’’តិ. តស្មិំ ភន្តេ វត្ថុស្មិំ ភាសិតំ.

បុច្ឆា – កថញ្ចាវុសោ ¶ ភគវា កាមានំ អាទីនវំ វិត្ថារេន បកាសេត្វា អរិយស្ស វិនយេ វោហារសមុច្ឆេទំ ទស្សេសិ.

វិស្សជ្ជនា – អថ ភន្តេ ភគវា អរិយស្ស វិនយេ វោហារសមុច្ឆេទាយ អដ្ឋ ធម្មេ វិភជិត្វា ‘‘សេយ្យថាបិ គហបតិ កុក្កុរោ ជិឃច្ឆាទុព្ពល្យបរេតោ គោឃាតកសូនំ បច្ចុបដ្ឋិតោ អស្ស’’ ឯវមាទិនា កាមេសុ អាទីនវំ ទស្សេត្វា បរិយោសានេ តីហិ វិជ្ជាហិ អរិយស្ស វិនយេ វោហារសមុច្ឆេទំ សព្ពេនសព្ពំ សព្ពថាសព្ពំ វោហារសមុច្ឆេទំ វិត្ថារេន វិភជិត្វា ទេសេសិ.

បុច្ឆា – តេនាវុសោ ¶ ភគវតា…បេ… សម្មាសម្ពុទ្ធេន ជីវកសុត្តំ កត្ថ កំ អារព្ភ កិស្មិំ វត្ថុស្មិំ ភាសិតំ.

វិស្សជ្ជនា – រាជគហេ ¶ ភន្តេ ជីវកំ កោមារភច្ចំ អារព្ភ ភាសិតំ. ជីវកោ ភន្តេ កោមារភច្ចោ ភគវន្តំ ឧបសង្កមិត្វា ឯតទវោច ‘‘សុតំ មេតំ ភន្តេ សមណំ គោតមំ ឧទ្ទិស្ស បាណំ អារភន្តិ, តំ សមណោ គោតមោ ជានំ ឧទ្ទិស្ស កតំ មំសំ បរិភុញ្ជតិ បដិច្ច កម្មន្តិ. យេ តេ ភន្តេ ឯវមាហំសុ ‘សមណំ គោតមំ ឧទ្ទិស្ស បាណំ អារភន្តិ, តំ សមណោ គោតមោ ជានំ ឧទ្ទិស្ស កតំ មំសំ បរិភុញ្ជតិ បដិច្ច កម្ម’ន្តិ, កច្ចិ តេ ភន្តេ ភគវតោ វុត្តវាទិនោ ន ច ភគវន្តំ អភូតេន អព្ភាចិក្ខន្តិ, ធម្មស្ស ចានុធម្មំ ព្យាករោន្តិ, ន ច កោចិ សហធម្មិកោ វាទានុវាទោ គារយ្ហំ ឋានំ អាគច្ឆតី’’តិ. តស្មិំ ភន្តេ វត្ថុស្មិំ ភាសិតំ.

បុច្ឆា – ឧបាលិសុត្តំ ¶ បនាវុសោ ភគវតា កត្ថ កំ អារព្ភ កិស្មិំ វត្ថុស្មិំ ភាសិតំ.

វិស្សជ្ជនា – នាឡន្ទាយំ ភន្តេ ឧបាលិំ គហបតិំ អារព្ភ ភាសិតំ. ឧបាលិ ភន្តេ គហបតិ ភគវន្តំ ឧបសង្កមិត្វា ឯតទវោច ‘‘អាគមា នុខ្វិធ ភន្តេ ទីឃតបស្សី និគណ្ឋោ’’តិ, ឯវមាទិនា ច ភន្តេ ឧបាលិ គហបតិ ភគវតោ បដិសន្ធារំ កត្វា អត្តនោ អាចរិយស្ស និគណ្ឋស្ស នាដបុត្តស្ស វាទំ បកាសេសិ, វាទំ វណ្ណេសិ. តស្មិំ ភន្តេ វត្ថុស្មិំ ភាសិតំ.

បុច្ឆា – អថ ¶ ខោ អាវុសោ ភគវា ឧបាលិំ គហបតិំ តស្មិំ វាទេ កថំ សមនុយុញ្ជី សមនុគាហី សមនុភាសី, កថញ្ចស្ស ឧបាយំ ទស្សេត្វា យថាភូតំ អត្ថំ ញាបេសិ.

វិស្សជ្ជនា – អថ ខោ ភន្តេ ភគវា ឧបាលិំ គហបតិំ ‘‘សចេ ខោ ត្វំ គហបតិ សច្ចេ បតិដ្ឋាយ មន្តេយ្យាសិ, សិយា នោ ឯត្ថ កថាសល្លាបោ’’តិ ឧបាលិំ គហបតិំ កថំ សមុដ្ឋាបេត្វា ‘‘តំ ¶ កិំមញ្ញសិ គហបតិ, ឥធស្ស និគណ្ឋោ អាពាធិកោ ទុក្ខិតោ ពាញ្ហគិលានោ សីតោទកបរិក្ខិត្តោ ឧណ្ហោទកបដិសេវី, សោ សីតោទកំ អលភមានោ កាលង្ករេយ្យា’’តិ ឯវមាទិនា ភន្តេ ភគវា ចត្តារោ ឧបាយេ ទស្សេត្វា ឧបាលិំ គហបតិំ យថាភូតមត្ថំ ញាបេសិ.

បុច្ឆា – ឯវំ ¶ ខោ អាវុសោ ឧបាលិ គហបតិ ភគវតា សញ្ញាបិតោ ឥមស្មិំ ធម្មវិនយេ បសន្នោ កីទិសំ បសន្នាការំ អកាសិ, កថញ្ច ភគវា តំ បុន អនុសាសិត្វា ឧត្តរិ វិនេសិ.

វិស្សជ្ជនា – ‘‘បុរិមេនេវាហំ ភន្តេ ឱបម្មេន ភគវតោ អត្តមនោ អភិរទ្ធោ, អបិចាហំ ឥមានិ ភគវតោ វិចិត្រានិ បញ្ហបដិភានានិ សោតុកាមោ, ឯវាហំ ភគវន្តំ បច្ចនីកំ កាតព្ពំ អមញ្ញិស្ស’’ន្តិ, ឯវមាទិនា ភន្តេ ឧបាលិ គហបតិ ភគវតា វិញ្ញាបិតោ ឥមស្មិំ ធម្មវិនយេ បសន្នោ បសន្នាការំ អកាសិ. តត្ថ ភគវា ច ភន្តេ ‘‘អនុវិច្ចការំ ខោ គហបតិ ករោហិ, អនុវិច្ចការោ តុម្ហាទិសានំ ញាតមនុស្សានំ សាធុ ហោតី’’តិ ឯវមាទិនា បុន អនុសាសិត្វា ឧត្តរិ យាវ ធម្មចក្ខុបដិលាភា វិនេសិ.

បុច្ឆា – កថញ្ចាវុសោ ¶ និគណ្ឋស្ស នាដបុត្តស្ស ឧបាលិស្ស គហបតិស្ស និវេសនំ គន្ត្វា អាវីមំសនា ច ឧបាលិស្ស គហបតិស្ស បច្ចុត្តរា កថា ច អហោសិ.

វិស្សជ្ជនា – ‘‘ឧម្មត្តោសិ ត្វំ គហបតិ ទត្តោសិ ត្វំ គហបតី’’តិ ឯវមាទិនា ភន្តេ និគណ្ឋស្ស នាដបុត្តស្ស ឧបាលិស្ស គហបតិស្ស និវេសនំ គន្ត្វា វីមំសា ច ‘‘ភទ្ទិកា ភន្តេ អាវដ្ដនីមាយា កល្យាណី ភន្តេ អាវដ្ដនីមាយាតិ’’ ឯវមាទិនា ឧបាលិស្ស គហបតិស្ស បច្ចុត្តរកថា ច អហោសិ.

បុច្ឆា – កុក្កុរវតិកសុត្តំ ¶ បនាវុសោ ភគវតា កត្ថ កំ អារព្ភ កិស្មិំ វត្ថុស្មិំ ភាសិតំ.

វិស្សជ្ជនា – កោលិយេសុ ភន្តេ ហលិទ្ទវសនេ នាម កោលិយានំ និគមេ បុណ្ណញ្ច កោលិយបុត្តំ គោវតិកំ អចេលញ្ច សេនិយំ កុក្កុរវតិកំ អារព្ភ ភាសិតំ. បុណ្ណោ ភន្តេ កោលិយ បុត្តោ គោវតិកោ ភគវន្តំ ឯតទវោច ‘‘អយំ ភន្តេ អចេលោ សេនិយោ កុក្កុរវតិកោ ទុក្ករការកោ ឆមានិក្ខិត្តំ ភោជនំ ភុញ្ជតិ, តស្ស តំ កុក្កុរវតំ ទីឃរត្តំ សមត្តំ សមាទិន្នំ, តស្ស កា គតិ, កោ អភិសម្បរាយោ’’តិ, តស្មិំ ភន្តេ វត្ថុស្មិំ ភាសិតំ.

បុច្ឆា – តេនាវុសោ ¶ ជានតា…បេ… សម្មាសម្ពុទ្ធេន អភយរាជកុមារសុត្តំ កត្ថ កំ អារព្ភ កិស្មិំ វត្ថុស្មិំ ភាសិតំ.

វិស្សជ្ជនា – រាជគហេ មេ ភន្តេ អភយំ រាជកុមារំ អារព្ភ ភាសិតំ. អភយោ ភន្តេ រាជកុមារោ ភគវន្តំ ឧបសង្កមិត្វា ឯតទវោច ‘‘ភាសេយ្យ នុ ខោ ភន្តេ តថាគតោ តំ វាចំ, យា សា វាចា បរេសំ អប្បិយា អមនាបា’’តិ, តស្មិំ ភន្តេ វត្ថុស្មិំ ភាសិតំ.

បុច្ឆា – ពហុវេទនីយសុត្តំ ¶ បនាវុសោ ភគវតា កត្ថ កំ អារព្ភ កិស្មិំ វត្ថុស្មិំ ភាសិតំ.

វិស្សជ្ជនា – សាវត្ថិយំ ភន្តេ អាយស្មន្តញ្ច ឧទាយិំ បញ្ចកង្គញ្ច ថបតិំ អារព្ភ ភាសិតំ, បញ្ចកង្គោ ភន្តេ ថបតិ អាយស្មន្តំ ឧទាយិំ ឧបសង្កមិត្វា វេទនំ បុច្ឆិ, អាយស្មា ភន្តេ ឧទាយី បញ្ចកង្គំ ថបតិំ ឯតទវោច ‘‘តិស្សោ ខោ ថបតិ វេទនា វុត្តា ភគវតា សុខា វេទនា ទុក្ខា វេទនា អទុក្ខមសុខា វេទនា’’តិ. ឯវំ វុត្តេ ភន្តេ បញ្ចកង្គោ ថបតិ អាយស្មន្តំ ឧទាយិំ ឯតទវោច ‘‘ន ខោ ភន្តេ ឧទាយិ តិស្សោ វេទនា វុត្តា ភគវតា, ទ្វេ វេទនា វុត្តា ភគវតា សុខា វេទនា ទុក្ខា វេទនា, យាយំ ភន្តេ អទុក្ខមសុខា វេទនា, សន្តស្មិំ ឯសា បណីតេ សុខេ វុត្តា ភគវតា’’តិ. នេវ អសក្ខិ ខោ ភន្តេ អាយស្មា ឧទាយី បញ្ចកង្គំ ថបតិំ សញ្ញាបេតុំ, ន បន អសក្ខិ បញ្ចកង្គោ ថបតិ អាយស្មន្តំ ឧទាយិំ សញ្ញាបេតុំ. អស្សោសិ ខោ អាយស្មា អានន្ទោ អាយស្មតោ ឧទាយិស្ស បញ្ចកង្គេន ថបតិនា សទ្ធិំ ឥមំ កថាសល្លាបំ, អថ ខោ ភន្តេ អាយស្មា អានន្ទោ យាវតកោ អហោសិ ¶ អាយស្មតោ ឧទាយិស្ស បញ្ចកង្គេន ថបតិនា សទ្ធិំ កថាសល្លាបោ, តំ សព្ពំ ភគវតោ អារោចេសិ. តស្មិំ ភន្តេ វត្ថុស្មិំ ភាសិតំ.

បុច្ឆា – អបណ្ណកសុត្តំ បនាវុសោ ភគវតា កត្ថ កំ អារព្ភ កិស្មិំ វត្ថុស្មិំ ភាសិតំ.

វិស្សជ្ជនា – កោសលេសុ ភន្តេ សាលាយំ នាម កោសលានំ ព្រាហ្មណគាមេ សាលេយ្យកេ ព្រាហ្មណគហបតិកេ អារព្ភ ភាសិតំ. សម្ពហុលា ភន្តេ អញ្ញតិត្ថិយា សាលេយ្យកានំ ¶ ព្រាហ្មណគហបតិកានំ អត្តនោ អត្តនោ មិច្ឆាទិដ្ឋិយោ បដិគ្គណ្ហាបេសុំ ឧគ្គណ្ហាបេសុំ. តេ បន ភន្តេ សាលេយ្យកា ព្រាហ្មណគហបតិកា ឯកទិដ្ឋិយម្បិ បតិដ្ឋាតុំ ន សក្ខិំសុ. តស្មិំ ភន្តេ វត្ថុស្មិំ ភាសិតំ.

បុច្ឆា – តត្រ ¶ អាវុសោ ភគវតា បឋមំ មិច្ឆាវាទោ ច សម្មាវាទោ ច កថំ វិភជិត្វា បកាសិតោ.

វិស្សជ្ជនា – តត្រ ភន្តេ ភគវតា ‘‘សន្តិ គហបតយោ ឯកេ សមណព្រាហ្មណា ឯវំវាទិនោ ឯវំទិដ្ឋិនោ នត្ថិ ទិន្នំ នត្ថិ យិដ្ឋំ នត្ថិ ហុតំ នត្ថិ សុកតទុក្កដានំ កម្មានំ ផលំ វិបាកោ’’តិ ឯវមាទិនា បឋមំ មិច្ឆាវាទោ ច សម្មាវាទោ ច វិភជិត្វា បកាសិតោ.

បុច្ឆា – តត្ថ ¶ អាវុសោ ភគវតា មិច្ឆាវាទីនញ្ច ទោសោ សម្មាវាទីនញ្ច គុណោ កថំ វិចារេត្វា បកាសិតោ.

វិស្សជ្ជនា – តត្ថ ភន្តេ ភគវតា ‘‘តត្រ គហបតយោ យេតេ សមណព្រាហ្មណា ឯវំវាទិនោ ឯវំទិដ្ឋិនោ នត្ថិ ទិន្នំ នត្ថិ យិដ្ឋំ នត្ថិ ហុតំ នត្ថិ សុកតទុក្កដានំ កម្មានំ ផលំ វិបាកោ’’តិ ឯវមាទិនា ភន្តេ មិច្ឆាវាទីនញ្ច ទោសោ សម្មាវាទីនញ្ច គុណោ ភគវតា វិចារេត្វា បកាសិតោ.

បុច្ឆា – កថញ្ចាវុសោ ¶ តត្ថ ភគវតា វិញ្ញុនោ បុរិសបុគ្គលស្ស បដិសញ្ចិក្ខណា បកាសិតា.

វិស្សជ្ជនា – តត្រ ¶ គហបតយោ វិញ្ញូ បុរិសោ ឥតិ បដិសញ្ចិក្ខតីតិ ឯវមាទិនា ភន្តេ តត្ថ ភគវតា វិញ្ញុនោ បុរិសបុគ្គលស្ស បដិសញ្ចិក្ខណា បកាសិតា.

បុច្ឆា – កថញ្ចាវុសោ ¶ ភគវតា អញ្ញេសុបិ មិច្ឆាវាទសម្មាវាទេសុ អបណ្ណកបដិបទា វិចារេត្វា បកាសិតា, តំ សង្ខេបតោ កថេសិ.

វិស្សជ្ជនា – យថេវ ភន្តេ បឋមេ វាទេ, ឯវមេវ ខោ ភន្តេ អកិរិយវាទាទីសុ ចតូសុ ច មិច្ឆាវាទេសុ ទោសំ កិរិយវាទាទីសុ ច ចតូសុ សម្មាវាទេសុ គុណំ, តត្ថ ច វិញ្ញុនោ បុរិសស្ស បដិសញ្ចិក្ខណាការំ ទស្សេត្វា ភគវតា អបណ្ណកបដិបទា បកាសិតា.

បុច្ឆា – អម្ពលដ្ឋិករាហុលោវាទសុត្តំ ¶ បនាវុសោ ភគវតា កត្ថ កំ អារព្ភ ភាសិតំ.

វិស្សជ្ជនា – រាជគហេ ភន្តេ អាយស្មន្តំ រាហុលំ អារព្ភ ភាសិតំ.

បុច្ឆា – មហារាហុលោវាទសុត្តំ ¶ បនាវុសោ ភគវតា កត្ថ កំ អារព្ភ កិស្មិំ វត្ថុស្មិំ ភាសិតំ.

វិស្សជ្ជនា – សាវត្ថិយំ ភន្តេ អាយស្មន្តំ រាហុលំ អារព្ភ ភាសិតំ. អាយស្មា ភន្តេ រាហុលោ ភគវតោ ចេវ អត្តនោ ច អត្តភាវសម្បត្តិំ និស្សាយ គេហស្សិតំ ឆន្ទរាគំ ឧប្បាទេសិ. តស្មិំ ភន្តេ វត្ថុស្មិំ ភាសិតំ.

បុច្ឆា – ចូឡមាលុក្យសុត្តំ ¶ បនាវុសោ ភគវតា កត្ថ កំ អារព្ភ កិស្មិំ វត្ថុស្មិំ ភាសិតំ.

វិស្សជ្ជនា – សាវត្ថិយំ ភន្តេ អាយស្មន្តំ មាលុក្យបុត្តំ អារព្ភ ភាសិតំ. អាយស្មា ភន្តេ មាលុក្យបុត្តោ អត្តនោ បវិវិត្តស្ស រហោគតស្ស បដិសល្លីនស្ស ចេតសោ បរិវិតក្កំ ភគវតោ អារោចេសិ. តស្មិំ ភន្តេ វត្ថុស្មិំ ភាសិតំ.

បុច្ឆា – មហាមាលុក្យសុត្តំ ¶ បនាវុសោ ភគវតា កត្ថ កំ អារព្ភ កិស្មិំ វត្ថុស្មិំ ភាសិតំ.

វិស្សជ្ជនា – តស្មិំយេវ ភន្តេ សាវត្ថិយំ អាយស្មន្តំ មហាមាលុក្យបុត្តំ អារព្ភ ភាសិតំ.

បុច្ឆា – តេនាវុសោ ¶ ភគវតា…បេ… សម្មាសម្ពុទ្ធេន ភទ្ទាលិសុត្តំ កត្ថ កំ អារព្ភ កិស្មិំ វត្ថុស្មិំ ភាសិតំ.

វិស្សជ្ជនា – សាវត្ថិយំ ភន្តេ អាយស្មន្តំ ភទ្ទាលិំ អារព្ភ ភាសិតំ. អាយស្មា ភន្តេ ភទ្ទាលិ ភគវតា សិក្ខាបទេ បញ្ញាបិយមានេ ភិក្ខុសង្ឃេ សិក្ខំ សមាទិយមានេ អនុស្សាហំ បវេទេសិ. តស្មិំ ភន្តេ វត្ថុស្មិំ ភាសិតំ.

អច្ចយោ ¶ មំ ភន្តេ អច្ចគមា យថាពាលំ យថាមូឡ្ហំ យថាអកុសលំ, យោហំ ភគវតា សិក្ខាបទេ បញ្ញាបិយមានេ ភិក្ខុសង្ឃេ សិក្ខំ សមាទិយមានេ អនុស្សាហំ បវេទេសិំ, តស្ស មេ ភន្តេ ភគវា អច្ចយំ អច្ចយតោ បដិគ្គណ្ហាតុ អាយតិំ សំវរាយ –

បុច្ឆា – អថ ¶ ខោ អាវុសោ អាយស្មា ភទ្ទាលិ ភគវន្តំ កីទិសំ បញ្ហំ បុច្ឆិ, កថញ្ចស្ស ភគវា តំ វិភជិត្វា ព្យាកាសិ.

វិស្សជ្ជនា – អថ ខោ ភន្តេ អាយស្មា ភទ្ទាលិ ‘‘កោ នុ ខោ ភន្តេ ហេតុ, កោ បច្ចយោ, យេន មិធេកច្ចំ ភិក្ខុំ បសយុ បសយុ ការណំ ករោន្តី’’តិ ឯវមាទិនា ភគវន្តំ បញ្ហំ អបុច្ឆិ. ភគវា ច ភន្តេ ‘‘ឥធ ភទ្ទាលិ ឯកច្ចោ ភិក្ខុ អភិណ្ហាបត្តិកោ ហោតិ, អាបត្តិពហុលោ’’ ឯវមាទិនា អាយស្មតោ ភទ្ទាលិស្ស វិភជិត្វា ព្យាកាសិ.

បុច្ឆា – តទាបិ ¶ ខោ អាវុសោ អាយស្មា ភទ្ទាលិ បុនបិ ភគវន្តំ កីទិសំ បញ្ហំ បុច្ឆិ, កថញ្ចស្ស ភគវា តម្បិ វិភជិត្វា ព្យាកាសិ.

វិស្សជ្ជនា – តទាបិ ភន្តេ អាយស្មា ភទ្ទាលិ ‘‘កោ នុ ខោ ភន្តេ ហេតុ, កោ បច្ចយោ, យេន បុព្ពេ អប្បតរានិ ចេវ សិក្ខាបទានិ អហេសុំ, ពហុតរា ច ភិក្ខូ អញ្ញាយ សណ្ឌហិំសុ. កោ បន ភន្តេ ហេតុ, កោ បច្ចយោ យេន ឯតរហិ ពហុតរានិ ចេវ សិក្ខាបទានិ ហោន្តិ អប្បតរា ច ភិក្ខូ អញ្ញាយ សណ្ឌហន្តី’’តិ ភគវន្តំ បុនបិ បញ្ហំ អបុច្ឆិ. ភគវា ច ភន្តេ ‘‘ឯវមេតំ ភទ្ទាលិ ហោតិ, សត្តេសុ ហាយមានេសុ សទ្ធម្មេ អន្តរធាយមានេ ពហុតរានិ ហោន្តិ អប្បតរា ច ភិក្ខូ អញ្ញាយ សណ្ឌហន្តី’’តិ, ឯវមាទិនា អាយស្មតោ ភទ្ទាលិស្ស វិភជិត្វា វិភជិត្វា ព្យាកតា.

បុច្ឆា – លដុកិកោបមសុត្តំ ¶ បនាវុសោ ភគវតា កត្ថ កំ អារព្ភ កិស្មិំ វត្ថុស្មិំ ភាសិតំ.

វិស្សជ្ជនា – អង្គុត្តរាបេសុ ភន្តេ អាបណេ នាម អង្គុត្តរាបានំ និគមេ អាយស្មន្តំ ឧទាយិំ អារព្ភ ភាសិតំ. អាយស្មា ភន្តេ ឧទាយី ភគវន្តំ ឧបសង្កមិត្វា ឯតទវោច ‘‘ឥធ មយ្ហំ ភន្តេ រហោគតស្ស បដិសល្លីនស្ស ឯវំ ចេតសោ បរិវិតក្កោ ឧទបាទិ ‘‘ពហូនំ វត នោ ភគវា ទុក្ខធម្មានំ អបហត្តា, ពហូនំ វត នោ ភគវា សុខធម្មានំ ឧបហត្តា, ពហូនំ វត នោ ភគវា អកុសលានំ ធម្មានំ អបហត្តា, ពហូនំ វត នោ ភគវា កុសលានំ ធម្មានំ ឧបហត្តា’តិ’’. តស្មិំ ភន្តេ វត្ថុស្មិំ ភាសិតំ.

បុច្ឆា – អថ ¶ ខោ អាវុសោ ភគវា កីទិសី ឧបមាយោ ទស្សេត្វា ភិក្ខូនំ ឱវាទំ អទាសិ.

វិស្សជ្ជនា – អថ ខោ ភន្តេ ភគវា លដុកិកោបមំ ហត្ថិនាគោបមំ ទលិទ្ទបុរិសោបមំ គហបតិកោបមន្តិ ចតស្សោ ឧបមាយោ ទស្សេត្វា ភិក្ខូនំ ឱវាទមទាសិ.

បុច្ឆា – ឯវញ្ចាវុសោ ¶ ភគវា ចតូហិ ឧបមាហិ ភិក្ខូនំ ឱវាទំ ទត្វា កថំ ឧត្តរិ ធម្មទេសនំ បវឌ្ឍេសិ.

វិស្សជ្ជនា – ឯវំ ខោ ភន្តេ ភគវា ចតូហិ ឧបមាហិ ភិក្ខូនំ ឱវាទំ ទត្វា ‘‘ចត្តារោ មេ ឧទាយិ បុគ្គលា សន្តោ សំវិជ្ជមានា លោកស្មិំ’’ន្តិ ឯវមាទិនា ឧត្តរិ ភិក្ខូនំ ធម្មកថំ បវឌ្ឍេសិ.

បុច្ឆា – ចាតុមសុត្តំ ¶ បនាវុសោ ភគវតា កត្ថ កំ អារព្ភ កិស្មិំ វត្ថុស្មិំ ភាសិតំ.

វិស្សជ្ជនា – ចាតុមាយំ ភន្តេ អាយស្មន្តានំ សារិបុត្តមោគ្គលានត្ថេរានំ សទ្ធិវិហារិកេ អធុនា បព្ពជិតេ សម្ពហុលេ ភិក្ខូ អារព្ភ ភាសិតំ. សារិបុត្តមោគ្គល្លានប្បមុខានិ ភន្តេ បញ្ចមត្តានិ ភិក្ខុសតានិ ចាតុមំ អនុប្បត្តានិ ហោន្តិ ភគវន្តំ ទស្សនាយ, តេ ច អាគន្តុកា ភិក្ខូ នេវាសិកេហិ ភិក្ខូហិ សទ្ធិំ បដិសម្មោទមានា សេនាសនានិ បញ្ញាបយមានា បត្តចីវរានិ បដិសាមយមានា ឧច្ចាសទ្ទា មហាសទ្ទា អហេសុំ. តស្មិំ ភន្តេ វត្ថុស្មិំ ភាសិតំ.

បុច្ឆា – កថញ្ចាវុសោ ¶ តត្ថ ភគវា ភិក្ខូនំ ឱវាទំ អទាសិ.

វិស្សជ្ជនា – ចត្តារិមានិ ភិក្ខវេ ភយានិ ឧទកោរោហន្តេ បាតិកង្ខិតព្ពានីតិ ឯវមាទិនា ភន្តេ ភគវា តត្ថ ភិក្ខូនំ ឱវាទំ អទាសិ.

បុច្ឆា – នឡកបានសុត្តំ ¶ បនាវុសោ ភគវតា កត្ថ កំ អារព្ភ ភាសិតំ.

វិស្សជ្ជនា – នឡកបានេ ភន្តេ អនុរុទ្ធត្ថេរប្បមុខេ សម្ពហុលេ អភិញ្ញាតេ អភិញ្ញាតេ កុលបុត្តេ អារព្ភ ភាសិតំ.

បុច្ឆា – គោលិយានិសុត្តំ ¶ បនាវុសោ កត្ថ កំ អារព្ភ កិស្មិំ វត្ថុស្មិំ កេន ភាសិតំ.

វិស្សជ្ជនា – រាជគហេ ភន្តេ អាយស្មន្តំ គោលិយានិំ អារព្ភ អាយស្មតា សារិបុត្តត្ថេរេន ធម្មសេនាបតិនា ភាសិតំ. អាយស្មា ភន្តេ គោលិយានិ អារញ្ញិកោ បទសមាចារោ សង្ឃមជ្ឈេ ឱសដោ ហោតិ កេនចិទេវ ករណីយេន, តស្មិំ ភន្តេ វត្ថុស្មិំ ភាសិតំ.

បុច្ឆា – តេនាវុសោ ¶ ភគវតា…បេ… សម្មាសម្ពុទ្ធេន កីដាគិរិសុត្តំ កត្ថ កំ អារព្ភ កិស្មិំ វត្ថុស្មិំ ភាសិតំ.

វិស្សជ្ជនា – កាសីសុ ភន្តេ កីដាគិរិស្មិំ កាសីនំ និគមេ អស្សជិបុនព្ពសុកេ ភិក្ខូ អារព្ភ ភាសិតំ. អស្សជិបុនព្ពសុកា ភន្តេ ភិក្ខូ ភិក្ខូហិ សហធម្មិកំ វុច្ចមានា ឯវមាហំសុ ‘‘មយំ ខោ អាវុសោ សាយញ្ចេវ ភុញ្ជាម បាតោ ច ទិវា ច វិកាលេ, តេ មយំ សាយញ្ចេវ ភុញ្ជមានា បាតោ ច ទិវា ច វិកាលេ អប្បាពាធតញ្ច សញ្ជានាម អប្បាតង្កតញ្ច លហុដ្ឋានញ្ច ពលញ្ច ផាសុវិហារញ្ច, តេ មយំ កិំ សន្ទិដ្ឋិកំ ហិត្វា កាលិកំ អនុធាវិស្សាម, សាយញ្ចេវ មយំ ភុញ្ជិស្សាម បាតោ ច ទិវា ច វិកាលេ’’តិ. តស្មិំ ភន្តេ វត្ថុស្មិំ ភាសិតំ.

បុច្ឆា – តេវិជ្ជវច្ឆសុត្តំ ¶ បនាវុសោ ភគវតា កត្ថ កំ អារព្ភ កិស្មិំ វត្ថុស្មិំ ភាសិតំ.

វិស្សជ្ជនា – វេសាលិយំ ភន្តេ វច្ឆគោត្តំ បរិព្ពាជកំ អារព្ភ ភាសិតំ. វច្ឆគោត្តោ ភន្តេ បរិព្ពាជកោ ភគវន្តំ ឯតទវោច ‘‘សុតំ មេ ភន្តេ សមណោ គោតមោ សព្ពញ្ញូ សព្ពទស្សាវី អបរិសេសំ ញាណទស្សនំ បដិជានាតិ, ចរតោ ច មេ តិដ្ឋតោ ច សុត្តស្ស ច ជាគរស្ស ច សតតំ សមិតំ ញាណទស្សនំ បច្ចុបដ្ឋិត’’ន្តិ. យេ តេ ភន្តេ ឯវមាហំសុ ‘‘សមណោ គោតមោ សព្ពញ្ញូ សព្ពទស្សាវី អបរិសេសំ ញាណទស្សនំ បដិជានាតិ, ចរតោ ច មេ តិដ្ឋតោ ច សុត្តស្ស ច ជាគរស្ស ច សតតំ សមិតំ ញាណទស្សនំ បច្ចុបដ្ឋិត’’ន្តិ. កច្ចិ តេ ភន្តេ ភគវតោ វុត្តវាទិនោ, ន ច ភគវន្តំ អភូតេន អព្ភាចិក្ខន្តិ, ធម្មស្ស ចានុធម្មំ ព្យាករោន្តិ, ន ច កោចិ សហធម្មិកោ វាទានុវាទោ គារយ្ហំ ឋានំ អាគច្ឆតី’’តិ. តស្មិំ ភន្តេ វត្ថុស្មិំ ភាសិតំ.

បុច្ឆា – អគ្គិវច្ឆសុត្តំ ¶ បនាវុសោ កត្ថ កំ អារព្ភ កិស្មិំ វត្ថុស្មិំ ភាសិតំ.

វិស្សជ្ជនា – សាវត្ថិយំ ភន្តេ វច្ឆគោត្តំ បរិព្ពាជកំ ភាសិតំ. វច្ឆគោត្តោ ភន្តេ បរិព្ពាជកោ ភគវន្តំ ឧបសង្កមិត្វា ‘‘កិំ នុ ខោ ភោ គោតម ‘សស្សតោ លោកោ ឥទមេវ សច្ចំ មោឃមញ្ញ’ន្តិ ឯវំទិដ្ឋិ ភវំ គោតមោ’’តិ ឯវមាទិកំ បញ្ហំ អបុច្ឆិ. តស្មិំ ភន្តេ វត្ថុស្មិំ ភាសិតំ.

បុច្ឆា – មហាវច្ឆសុត្តំ បនាវុសោ ភគវតា កត្ថ កំ អារព្ភ កិស្មិំ វត្ថុស្មិំ ភាសិតំ.

វិស្សជ្ជនា – រាជគហេ ភន្តេ វច្ឆគោត្តំយេវ បរិព្ពាជកំ អារព្ភ ភាសិតំ. វច្ឆគោត្តោ ភន្តេ បរិព្ពាជកោ ភគវន្តំ ឧបសង្កមិត្វា ¶ ឯតទវោច ‘‘ទីឃរត្តាហំ ភោតា គោតមេន សហកថី, សាធុ មេ ភវំ គោតមោ សំខិត្តេន កុសលាកុសលំ ទេសេតូ’’តិ. តស្មិំ ភន្តេ វត្ថុស្មិំ ភាសិតំ.

បុច្ឆា – ឯវំ ¶ វុត្តេ ខោ អាវុសោ វច្ឆគោត្តោ បរិព្ពាជកោ ឥមស្មិំ ធម្មវិនយេ បសន្នោ ហុត្វា កីទិសំ បសន្នាការំ អកាសិ, កថញ្ចស្ស ធម្មាភិសមយោ អហោសិ.

វិស្សជ្ជនា – ឯវំ វុត្តេ ភន្តេ វច្ឆគោត្តោ បរិព្ពាជកោ ‘‘សចេ ហិ ភោ គោតម ឥមំ ធម្មំ ភវំយេវ គោតមោ អារាធកោ អភវិស្ស, នោ ច ខោ ភិក្ខូ អារាធកា អភវិស្សំសុ, ឯវមិទំ ព្រហ្មចរិយំ អបរិបូរំ អភវិស្ស តេនង្គេនា’’តិ ឯវមាទិនា ឥមស្មិំ ធម្មវិនយេ បសន្នោ បសន្នាការមកាសិ. យាវ អរហត្តញ្ចស្ស ធម្មាភិសមយោ អហោសិ.

បុច្ឆា – ទីឃនខសុត្តំ ¶ បនាវុសោ ភគវតា កត្ថ កំ អារព្ភ កិស្មិំ វត្ថុស្មិំ ភាសិតំ.

វិស្សជ្ជនា – រាជគហេ ភន្តេ ទីឃនខំ បរិព្ពាជកំ អារព្ភ ភាសិតំ. ទីឃនខោ ភន្តេ បរិព្ពាជកោ ភគវន្តំ ឧបសង្កមិត្វា ឯតទវោច ‘‘អហញ្ហិ ភោ គោតម ឯវំវាទី ឯវំទិដ្ឋិ សព្ពំ មេ នក្ខមតី’’តិ. តស្មិំ ភន្តេ វត្ថុស្មិំ ភាសិតំ.

បុច្ឆា – ឥមស្មិំ ¶ ច បនាវុសោ វេយ្យាករណស្មិំ ភញ្ញមានេ កេសំ បុគ្គលានំ វិសេសាធិគមោ អហោសិ.

វិស្សជ្ជនា – ឥមស្មិញ្ច បន ភន្តេ វេយ្យាករណស្មិំ ភញ្ញមានេ អាយស្មតោ សារិបុត្តស្ស អនុបាទាយ អាសវេហិ ចិត្តំ វិមុច្ចិ, ទីឃនខស្ស បន បរិព្ពាជកស្ស តស្មិំយេវ អាសនេ វិរជំ វីតមលំ ធម្មចក្ខុំ ឧទបាទិ យំកិញ្ចិ សមុទយធម្មំ, សព្ពំ តំ និរោធធម្ម’’ន្តិ.

បុច្ឆា – មាគណ្ឌិយសុត្តំ ¶ បនាវុសោ ភគវតា កត្ថ កំ អារព្ភ កិស្មិំ វត្ថុស្មិំ ភាសិតំ.

វិស្សជ្ជនា – កុរូសុ ភន្តេ កម្មាសធម្មេ នាម កុរូនំ និគមេ ភារទ្វាជ គោត្តស្ស ព្រាហ្មណស្ស អគ្យាគារេ តិណសន្ថារកេ មាគណ្ឌិយំ បរិព្ពាជកំ អារព្ភ ភាសិតំ. មាគណ្ឌិយោ ភន្តេ បរិព្ពាជកោ ភគវន្តំ ‘‘ភូនហុ សមណោ គោតមោ’’តិ វទេសិ, តស្មិំ ភន្តេ វដ្ឋុស្មិំ ភាសិតំ.

បុច្ឆា – កថញ្ចាវុសោ ¶ ភគវា តត្ថ មាគណ្ឌិយស្ស បរិព្ពាជកស្ស សមនុយុញ្ជិត្វា សមនុយុញ្ជិត្វា ធម្មំ ទេសេសិ.

វិស្សជ្ជនា – ‘‘ចក្ខុំ ខោ មាគណ្ឌិយ រូបារតំ រូបសម្មុទិតំ, តំ តថាគតស្ស ទន្តំ គុត្តំ រក្ខិតំ សំវុតំ, តស្ស ច សំវរាយ ធម្មំ ទេសេតី’’តិ ឯវមាទិនា ភន្តេ តត្ថ ភគវា មាគណ្ឌិយស្ស បរិព្ពាជកស្ស សមនុយុញ្ជិត្វា សមនុយុញ្ជិត្វា ធម្មំ ទេសេសិ.

បុច្ឆា – ឯវំ ¶ ខោ អាវុសោ មាគណ្ឌិយេន បរិព្ពាជកេន ‘‘នកិញ្ចិ ភោ គោតមា’’តិ យថាភូតំ បដិស្សុតេ កថំ ភគវា អត្តនោបិ ន កិញ្ចិ កេនចិបិ វត្តព្ពតំ បកាសេសិ.

វិស្សជ្ជនា – ឯវំ ខោ ភន្តេ មាគណ្ឌិយេន បរិព្ពាជកេន នកិញ្ចិ ភោគោតមាតិ យថាភូតំ បដិស្សុតេ ‘‘អហំ ខោ បន មាគណ្ឌិយ បុព្ពេ អគារិយភូតោ សមានោ បញ្ចហិ កាមគុណេហិ សមប្បិតោ សមង្គីភូតោ បរិចារេសិំ ចក្ខុវិញ្ញេយ្យហិ រូបេហិ ឥដ្ឋេហិ មនាបេហិ បិយរូបេហិ កាមូបសំហិតេហិ រជនីយេហី’’តិ ឯវមាទិនា ភគវា អត្តនោបិ ន កិញ្ចិ កេនចិបិ វត្តព្ពតំ បកាសេសិ.

បុច្ឆា – ឥមស្មិំ ¶ សុត្តេ បរិយោសានបុច្ឆំ បុច្ឆិស្សាមិ ឥមញ្ច បនាវុសោ ធម្មទេសនំ សុត្វា មាគណ្ឌិយោ បរិព្ពាជកោ ឥមស្មិំ ធម្មវិនយេ បសន្នោ ហុត្វា កីទិសំ បសន្នាការមកាសិ.

វិស្សជ្ជនា – ឥមំ ¶ ច បន ភន្តេ ធម្មទេសនំ សុត្វា មាគណ្ឌិយោ បរិព្ពាជកោ ‘អភិក្កន្តំ ភោ គោតម អភិក្កន្តំ ភោ គោតមា’’តិ ឯវមាទិនា ឥមស្មិំ ធម្មវិនយេ បសន្នោ បសន្នាការមកាសិ.

បុច្ឆា – សន្ទកសុត្តំ បនាវុសោ កត្ថ កំ អារព្ភ កិស្មិំ វត្ថុស្មិំ កេន ភាសិតំ.

វិស្សជ្ជនា – កោសម្ពិយំ ¶ ភន្តេ សន្ទកំ បរិព្ពាជកំ អារព្ភ អាយស្មតា អានន្ទត្ថេរេន ធម្មភណ្ឌាគារិកេន ភាសិតំ. សន្ទកោ ភន្តេ បរិព្ពាជកោ អាយស្មន្តំ អានន្ទំ ឯតទវោច ‘‘សាធុវត ភវន្តំយេវ អានន្ទំ បដិភាតុ សកេ អាចរិយ កេ ធម្មិកថា’’តិ, តស្មិំ ភន្តេ វត្ថុស្មិំ ភាសិតំ.

បុច្ឆា – កថញ្ចាវុសោ ¶ តត្ថ ចត្តារោ អព្រហ្មចរិយវាសា អាយស្មតា អានន្ទត្ថេរេន ធម្មភណ្ឌាគារិកេន វិចារេត្វា បកាសិតា.

វិស្សជ្ជនា – ឥធ សន្ទក ឯកច្ចោ សត្ថា ឯវំវាទី ហោតិ ឯវំទិដ្ឋិ នត្ថិ ទិន្នំ, នត្ថិ យិដ្ឋំ, នត្ថិ ហុតំ, នត្ថិ សុកតទុក្កដានំ កម្មានំ ផលំវិបាកោ, នត្ថិ អយំលោកោ, នត្ថិ បរោលោកោ, នត្ថិ មាតា, នត្ថិ បិតា, នត្ថិ សត្តា ឱបបាតិកាតិ

ឯវមាទិនា ¶ ភន្តេ តត្ថ អាយស្មតា អានន្ទត្ថេរេន ធម្មភណ្ឌាគារិកេន ចត្តារោ អព្រហ្មចរិយវាសា វិចារេត្វា បកាសិតា.

បុច្ឆា – កថញ្ចាវុសោ ¶ តត្ថ ចត្តារិ អនស្សាសិកានិ ព្រហ្មចរិយានិ អាយស្មតា អានន្ទត្ថេរេន ធម្មភណ្ឌាគារិកេន វិចារេត្វា បកាសិតានិ.

វិស្សជ្ជនា – ឥធ ¶ សន្ទក ឯកច្ចោ សត្ថា សព្ពញ្ញូ សព្ពទស្សាវី អបរិសេសំ ញាណទស្សនំ បដិជានាតិ ‘‘ចរតោ ច មេ តិដ្ឋតោ ច សុត្តស្ស ច ជាគរស្ស ច សតតំ សមិតំ ញាណទស្សនំ បច្ចុបដ្ឋិត’’ន្តិ ឯវមាទិនា ភន្តេ តត្ថ អាយស្មតា អានន្ទត្ថេរេន ធម្មភណ្ឌាគារិកេន ចត្តារិ អនស្សាសិកានិ ព្រហ្មចរិយានិ វិភជិត្វា បកាសិតានិ.

¶ ខោ អាវុសោ សន្ទកោ បរិព្ពាជកោ អាយស្មន្តំ អានន្ទត្ថេរំ កថំ បុច្ឆិ, តថញ្ចស្សាយស្មានន្ទត្ថេរោ ព្យាកាសិ.

វិស្សជ្ជនា – អថ ខោ ភន្តេ សន្ទកោ បរិព្ពាជកោ ‘‘សោ បន ភោ អានន្ទ សត្ថា កិំវាទី កិំ អក្ខាយី’’តិ ឯវមាទិនា អាយស្មន្តំ អានន្ទត្ថេរំ បុច្ឆិ, អាយស្មា ច ភន្តេ អានន្ទត្ថេរោ ‘‘ឥធ សន្ទក តថាគតោ លោកេ ឧប្បជ្ជតិ អរហំ សម្មាសម្ពុទ្ធោ វិជ្ជាចរណសម្បន្នោ’’តិ ឯវមាទិនា សន្ទកស្ស បរិព្ពាជកស្ស វិភជិត្វា វិភជិត្វា ព្យាកាសិ.

បុច្ឆា – ឥមញ្ច ¶ បនាវុសោ ធម្មទេសនំ សុត្វា សន្ទកោ បរិព្ពាជកោ ឥមស្មិំ ធម្មវិនយេ បសន្នោ កីទិសំ បសន្នាការមកាសិ.

វិស្សជ្ជនា – ឥមញ្ច ¶ ភន្តេ ធម្មទេសនំ សុត្វា សន្ទកោ បរិព្ពាជកោ ‘‘អច្ឆរិយំ ភោ អានន្ទ, អព្ភុតំ ភោ អានន្ទ, ន ច នាម សធម្មោក្កំសនា ភវិស្សតិ, ន បរធម្មវម្ភនា, អាយតនេ ច ធម្មទេសនា, តាវ ពហុកា ច និយ្យាតារោ បញ្ញាយិស្សន្តី’’តិ ឯវមាទិនា ឥមស្មិំ ធម្មវិនយេ បសន្នោ បសន្នាការមកាសិ.

បុច្ឆា – មហាសកុលុទាយិសុត្តំ ¶ បនាវុសោ ភគវតា កត្ថ កំ អារព្ភ កិស្មិំ វត្ថុស្មិំ ភាសិតំ.

វិស្សជ្ជនា – រាជគហេ ភន្តេ សកុលុទាយិំ បរិព្ពាជកំ អារព្ភ ភាសិតំ. សកុលុទាយី ភន្តេ បរិព្ពាជកោ បុរិមានិ ទិវសានិ បុរិមតរានិ កោតូហលសាលាយំ នានាតិត្ថិយានំ សមណព្រាហ្មណានំ យាវតកោ អហោសិ ភគវន្តញ្ច ឆ ច សត្ថារោ អារព្ភ កថាសល្លាបោ, តំ សព្ពំ ភគវតោ អារោចេសិ. តស្មិំ ភន្តេ វត្ថុស្មិំ ភាសិតំ.

បុច្ឆា – សមណមុណ្ឌិកសុត្តំ ¶ បនាវុសោ ភគវតា កត្ថ កំ អារព្ភ កិស្មិំ វត្ថុស្មិំ ភាសិតំ.

វិស្សជ្ជនា – សាវត្ថិយំ ភន្តេ ឧគ្គាហមាន បរិព្ពាជកំ សមណមុណ្ឌិកាបុត្តំ អារព្ភ ភាសិតំ. ឧគ្គាហមានោ ភន្តេ បរិព្ពាជកោ សមណមុណ្ឌិកាបុត្តោ បញ្ចកង្គំ តបតិំ ឯតទវោច ‘‘ចតូហិ ខោ អហំ គហបតិ ធម្មេហិ សមន្នាគតំ បុរិសបុគ្គលំ បញ្ញបេមិ សម្បន្នកុសលំ បរមកុសលំ ឧត្តមបត្តិបត្តំ សមណំ អយោជ្ឈ’’ន្តិ, តស្មិំ ភន្តេ វត្ថុស្មិំ ភាសិតំ.

បុច្ឆា – ចូឡសកុលុទាយីសុត្តំ ¶ បនាវុសោ ភគវតា កត្ថ កំ អារព្ភ កិស្មិំ វត្ថុស្មិំ ភាសិតំ.

វិស្សជ្ជនា – រាជគហេ ¶ ភន្តេ សកុលុទាយិំ បរិព្ពាជកំ អារព្ភ ភាសិតំ, សកុលុទាយី ភន្តេ បរិព្ពាជកោ ភគវន្តំ ឯតទវោច ‘‘យទាហំ ភន្តេ ឥមំ បរិសំ អនុបសង្កន្តោ ហោមិ, អថាយំ បរិសា អនេកវិហិតំ តិរច្ឆានកថំ កថេន្តិ និសិន្នា ហោតិ. យទា ច ខោ អហំ ភន្តេ ឥមំ បរិសំ ឧបសង្កមន្តោ ហោមិ, អថាយំ បរិសា មមញ្ញេវ មុខំ ឧល្លោកេន្តី និសិន្នា ហោតិ ‘យំ នោ សមណោ ឧទាយី ធម្មំ ភាសិស្សតិ, តំ សោស្សាមា’តិ, យទា បន ភន្តេ ភគវា ឥមំ បរិសំ ឧបសង្កន្តោ ហោតិ, អថាហញ្ចេវ អយញ្ច បរិសា ភគវតោ មុខំ ឧល្លោកេន្តា និសិន្នា ហោម យំ នោ ភគវា ធម្មំ ភាសិស្សតិ, តំ សោស្សាមា’’តិ, តស្មិំ ភន្តេ វត្ថុស្មិំ ភាសិតំ.

បុច្ឆា – វេខនសសុត្តំ ¶ បនាវុសោ ភគវតា កត្ថ កំ អារព្ភ កិស្មិំ វត្ថុស្មិំ ភាសិតំ.

វិស្សជ្ជនា – សាវត្ថិយំ ភន្តេ វេខនសំ បរិព្ពាជកំ អារព្ភ ភាសិតំ, វេខនសោ ភន្តេ បរិព្ពាជកោ ភគវតោ សន្តិកេ ឧទានំ ឧទានេសិ ‘‘អយំ បរមោ វណ្ណោ អយំ បរមោ វណ្ណោ’’តិ, តស្មិំ ភន្តេ វត្ថុស្មិំ ភាសិតំ.

បុច្ឆា – ឃដិការសុត្តំ ¶ បនាវុសោ ភគវតា កត្ថ កំ អារព្ភ កិស្មិំ វត្ថុស្មិំ ភាសិតំ.

វិស្សជ្ជនា – កោសលេសុ ភន្តេ ឃដិការស្ស កុម្ភការស្ស ឃរវត្ថុបទេសេ អាយស្មន្តំ អានន្ទំ អារព្ភ ភាសិតំ. ភគវា ភន្តេ តស្មិំ ភូមិបទេសេ សិតំ បាត្វាកាសិ, អាយស្មា ច អានន្ទោ ភគវន្តំ ឯតទវោច ‘‘កោ នុ ខោ ភន្តេ ហេតុ កោ បច្ចយោ ភគវតោ សិតស្ស បាតុកម្មាយ, ន អការណេន តថាគតា សិតំ បាតុករោន្តី’’តិ, តស្មិំ ភន្តេ វត្ថុស្មិំ ភាសិតំ.

បុច្ឆា – រដ្ឋបាលសុត្តំ ¶ បនាវុសោ កត្ថ កំ អារព្ភ កិស្មិំ វត្ថុស្មិំ កេន ភាសិតំ.

វិស្សជ្ជនា – កុរូសុ ភន្តេ រាជានំ កោរព្យំ អារព្ភ អាយស្មតា រដ្ឋបាលត្ថេរេន ភាសិតំ. រាជា ភន្តេ កោរព្យោ អាយស្មន្តំ រដ្ឋបាលំ ឯតទវោច ‘‘ចត្តារិមានិ ភោ រដ្ឋបាល បារិជុញ្ញានិ, យេហិ បារិជុញ្ញេហិ សមន្នាគតា ឥធេកច្ចេ កេសមស្សុំ ឱហារេត្វា កាសាយានិ វត្ថានិ អច្ឆាទេត្វា អគារស្មា អនាគារិយំ បព្ពជន្តី’’តិ ឯវមាទិកំ វចនំ អវោច, តស្មិំ ភន្តេ វត្ថុស្មិំ ភាសិតំ.

បុច្ឆា – អថ ¶ ខោ អាវុសោ អាយស្មា រដ្ឋបាលត្ថេរោ រញ្ញោ កោរព្យស្ស កថំ បឋមំ ធម្មុទ្ទេសំ វិត្ថារេត្វា បកាសេសិ.

វិស្សជ្ជនា – អថ ខោ ភន្តេ អាយស្មា រដ្ឋបាលត្ថេរោ ‘‘តំ កិំ មញ្ញសិ មហារាជ ត្វំ វីសតិវស្សុទ្ទេសិកោបិ បណ្ណវីសតិវស្សុទ្ទេសិកោបិ ហត្ថិស្មិម្បិ កតាវី អស្សស្មិម្បិ កតាវី រថស្មិម្បិ កតាវី ធនុស្មិម្បិ កតាវី ថរុស្មិម្បិ កតាវី ឩរុពលី ពាហុពលី អលមត្តោ សង្គាមាវចរោ’’តិ ឯវមាទិនា បឋមំ ធម្មុទ្ទេសំ វិត្ថារេត្វា បកាសេសិ.

បុច្ឆា – កថំ ¶ បនាវុសោ អាយស្មា រដ្ឋបាលត្ថេរោ រញ្ញោ កោរព្យស្ស ទុតិយម្បិ ធម្មុទ្ទេសំ វិត្ថារេត្វា បកាសេសិ.

វិស្សជ្ជនា – ‘‘តំ ¶ កិំ មញ្ញសិ មហារាជ, អត្ថិ តេ កោចិ អនុសាយិកោ អាពាធោ’’តិ ឯវមាទិនា ភន្តេ អាយស្មា រដ្ឋបាលោ រញ្ញោ កោរព្យស្ស ទុតិយំ ធម្មុទ្ទេសំ វិត្ថារេត្វា បកាសេសិ.

បុច្ឆា – កថំ ¶ បនាវុសោ អាយស្មា រដ្ឋបាលត្ថេរោ រញ្ញោ កោរព្យស្ស តតិយម្បិ ធម្មុទ្ទេសំ វិត្ថារេត្វា បកាសេសិ.

វិស្សជ្ជនា – ‘‘តំ ¶ កិំ មញ្ញសិ មហារាជ, យថា ត្វំ ឯតរហិ បញ្ចហិ កាមគុណេហិ សមប្បិតោ សមង្គីភូតោ បរិចារេសិ, លច្ឆសិ ត្វំ បរត្ថាបិ ឯវមេវាហំ ឥមេហេវ បញ្ចហិ កាមគុណេហិ សមប្បិតោ សមង្គីភូតោ បរិចារេមី’’តិ ឯវមាទិនា ភន្តេ អាយស្មា រដ្ឋបាលោ រញ្ញោ កោរព្យស្ស តតិយំ ធម្មុទ្ទេសំ វិត្ថារេត្វា បកាសេសិ.

បុច្ឆា – ចតុត្ថម្បិ ¶ ខោ អាវុសោ ធម្មុទ្ទេសំ អាយស្មា រដ្ឋបាលត្ថេរោ រញ្ញោ កោរព្យស្ស កថំ វិត្ថារេត្វា បកាសេសិ.

វិស្សជ្ជនា – ‘‘តំ កិំ មញ្ញសិ មហារាជ, ផីតំ កុរុំ អជ្ឈាវសសី’’តិ ឯវមាទិនា ភន្តេ អាយស្មា រដ្ឋបាលត្ថេរោ រញ្ញោ កោរព្យស្ស ចតុត្ថំ ធម្មុទ្ទេសំ វិត្ថារេត្វា បកាសេសិ.

បុច្ឆា – មឃទេវសុត្តំ ¶ បនាវុសោ ភគវតា កត្ថ កំ អារព្ភ កិស្មិំ វត្ថុស្មិំ ភាសិតំ.

វិស្សជ្ជនា – មិថិលាយំ ភន្តេ មឃទេវអម្ពវនេ អាយស្មន្តំ អានន្ទំ អារព្ភ ភាសិតំ. ភគវា ភន្តេ អញ្ញតរស្មិំ បទេសេ សិតំ បាត្វាកាសិ, អាយស្មា អានន្ទោ ភគវន្តំ ឯតទវោច ‘‘កោ នុ ខោ ភន្តេ កោ បច្ចយោ ភគវតោ សិតស្ស បាតុកម្មាយ, ន អការណេន តថាគតា សិតំ បាតុករោន្តី’’តិ, តស្មិំ ភន្តេ វត្ថុស្មិំ ភាសិតំ.

បុច្ឆា – មធុរសុត្តំ ¶ បនាវុសោ កត្ថ កំ អារព្ភ កិស្មិំ វត្ថុស្មិំ កេន ភាសិតំ.

វិស្សជ្ជនា – មធុរាយំ ភន្តេ រាជានំ មាធុរំ អវន្តិបុត្តំ អារព្ភ អាយស្មតា មហាកច្ចានត្ថេរេន ភាសិតំ, រាជា ភន្តេ មាធុរោ អវន្តិបុត្តោ អាយស្មន្តំ មហាកច្ចានំ ឯតទវោច ‘‘ព្រហ្មណា ភោ កច្ចាន ឯវមាហំសុ ព្រាហ្មណោវ សេដ្ឋោ វណ្ណោ, ហីនោ អញ្ញោ វណ្ណោ. ព្រាហ្មណោវ សុក្កោ វណ្ណោ, កណ្ហោ អញ្ញោ វណ្ណោ. ព្រាហ្មណាវ សុជ្ឈន្តិ ¶ , នោ អព្រាហ្មណា. ព្រាហ្មណាវ ព្រហ្មុនោ បុត្តា ឱរសា មុខតោ ជាតា ព្រហ្មជា ព្រហ្មនិម្មិតា ព្រហ្មទាយាទាតិ. ឥធ ភវំ កច្ចានោ កិមក្ខាយី’’តិ. តស្មិំ ភន្តេ វត្ថុស្មិំ ភាសិតំ.

បុច្ឆា – ពោធិរាជកុមារសុត្តំ ¶ បនាវុសោ ភគវតា កត្ថ កំ អារព្ភ កិស្មិំ វត្ថុស្មិំ ភាសិតំ.

វិស្សជ្ជនា – ភគ្គេសុ ភន្តេ សុសុមារគិរេ ពោធិំ រាជកុមារំ អារព្ភ ភាសិតំ. ពោធិ ភន្តេ រាជកុមារោ ភគវន្តំ ឯតទវោច ‘‘មយំ ខោ ភន្តេ ឯវំ ហោតិ. ន ខោ សុខេន សុខំ អធិគន្តព្ពំ, ទុក្ខេន ខោ សុខំ អធិគន្តព្ព’’ន្តិ, តស្មិំ ភន្តេ វត្ថុស្មិំ ភាសិតំ.

បុច្ឆា – ឯវំ ¶ វុត្តេ ខោ អាវុសោ ពោធិ រាជកុមារោ ភគវន្តំ កថំ បុច្ឆិ, កថញ្ចស្ស ភគវា ព្យាកាសិ.

វិស្សជ្ជនា – ឯវំ វុត្តេ ភន្តេ ពោធិរាជកុមារោ ភគវន្តំ ឯតទវោច ‘‘កីវ ចិរេន នុ ខោ ភន្តេ ភិក្ខុ តថាគតំ វិនាយកំ លភមានោ យស្សត្ថាយ កុលបុត្តា សម្មទេវ អគារស្មា អនគារិយំ បព្ពជន្តិ, តទនុត្តរំ ព្រហ្មចរិយបរិយោសានំ ទិដ្ឋេវ ធម្មេ សយំ អភិញ្ញា សច្ឆិកត្វា ឧបសម្បជ្ជ វិហរេយ្យា’’តិ, ភគវា ច ភន្តេ ‘‘តេន ហិ រាជកុមារ តំយេវេត្ថ បដិបុច្ឆិស្សាមិ, យថា តេ ខមេយ្យ, តថា នំ ព្យាករេយ្យាសី’’តិ, ឯវមាទិនា វិភជិត្វា ព្យាកាសិ.

បុច្ឆា – ឥមញ្ច ¶ បនាវុសោ ធម្មទេសនំ សុត្វា ពោធិរាជកុមារោ ឥមិស្សំ ធម្មទេសនាយំ បសន្នោ កីទិសំ បសន្នាការមកាសិ.

វិស្សជ្ជនា – ឥមញ្ច បន ភន្តេ ធម្មទេសនំ សុត្វា ពោធិរាជកុមារោ ‘‘អហោ ពុទ្ធោ អហោ ធម្មោ អហោ ធម្មស្ស ស្វាក្ខាតតា, យត្រ ហិ នាម សាយមនុសិដ្ឋោ, បាតោ វិសេសំ អធិគមិស្សតិ, បាតមនុសិដ្ឋោ សាយំ វិសេសំ អធិគមិស្សតី’’តិ ឯវមាទិនា ឥមិស្សំ ធម្មទេសនាយំ បសន្នោ បសន្នាការមកាសិ.

បុច្ឆា – អង្គុលិមាលសុត្តំ ¶ បនាវុសោ ភគវតា កត្ថ កំ អារព្ភ កិស្មិំ វត្ថុស្មិំ ភាសិតំ.

វិស្សជ្ជនា – សាវត្ថិយំ ភន្តេ អាយស្មន្តំ អង្គុលិមាលត្ថេរំ អារព្ភ ភាសិតំ. អាយស្មា ភន្តេ អង្គុលិមាលត្ថេរោ ភគវន្តំ ឯតទវោច ‘‘ឥធាហំ ភន្តេ បុព្ពណ្ហសមយំ និវាសេត្វា បត្តចីវរមាទាយ សាវត្ថិំ បិណ្ឌាយ បាវិសិំ, អទ្ទសំ ខោ អហំ ភន្តេ សាវត្ថិយំ សបទានំ បិណ្ឌាយ ចរមានោ អញ្ញតរំ ឥត្ថិំ មូឡ្ហគព្ភំ វិឃាតគព្ភំ ទិស្វាន មយ្ហំ ឯតទហោសិ ‘‘កិលិស្សន្តិ វត ភោ សត្តា, កិលិស្សន្តិ វត ភោ សត្តា’’តិ, តស្មិំ ភន្តេ វត្ថុស្មិំ ភាសិតំ.

បុច្ឆា – បិយជាតិកសុត្តំ ¶ បនាវុសោ ភគវតា កត្ថ កំ អារព្ភ កិស្មិំ វត្ថុស្មិំ ភាសិតំ.

វិស្សជ្ជនា – សាវត្ថិយំ ភន្តេ អញ្ញតរំ គហបតិំ អារព្ភ ភាសិតំ, សាវត្ថិយំ ភន្តេ អញ្ញតរស្ស គហបតិស្ស ឯកបុត្តកោ បិយោ មនាបោ កាលង្កតោ ហោតិ, តស្ស កាលំ កិរិយាយ នេវ កម្មន្តា បដិភន្តិ, ន ភត្តំ បដិភាតិ, សោ អាឡាហនំ គន្ត្វា កន្ទតិ ‘‘កហំ ឯកបុត្តក កហំ ឯកបុត្តកា’’តិ, តស្មិំ ភន្តេ វត្ថុស្មិំ ភាសិតំ.

បុច្ឆា – ពាហិតិក ¶ សុត្តំ បនាវុសោ កត្ថ កំ អារព្ភ កិស្មិំ វត្ថុស្មិំ កេន ភាសិតំ.

វិស្សជ្ជនា – សាវត្ថិយំ ភន្តេ រាជានំ បសេនទិំ កោសលំ អារព្ភ អាយស្មតា អានន្ទត្ថេរេន ធម្មភណ្ឌាគារិកេន ភាសិតំ. រាជា ភន្តេ បសេនទិ កោសលោ អាយស្មន្តំ អានន្ទំ ឯតទវោច ‘‘កិំ នុ ខោ ភន្តេ អានន្ទ សោភគវា តថារូបំ កាយសមាចារំ សមាចរេយ្យ, យ្វស្ស កាយសមាចារោ ឱបារម្ភោ សមណេហិ ព្រាហ្មណេហី’’តិ, តស្មិំ ភន្តេ វត្ថុស្មិំ ភាសិតំ.

បុច្ឆា – ធម្មចេតិយសុត្តំ ¶ បនាវុសោ ភគវតា កត្ថ កេន សទ្ធិំ ភាសិតំ.

វិស្សជ្ជនា – សក្កេសុ ភន្តេ មេទាឡុបេ នាម សក្យានំ និគមេ រញ្ញា បសេនទិនា កោសលេន សទ្ធិំ ភាសិតំ.

បុច្ឆា – កណ្ណកត្ថលសុត្តំ ¶ បនាវុសោ ភគវតា កត្ថ កេន សទ្ធិំ ភាសិតំ.

វិស្សជ្ជនា – ឧរុញ្ញាយំ ភន្តេ កណ្ណកត្ថលេ មិគទាយេ រញ្ញា បសេនទិនា កោសលេន សទ្ធិំ ភាសិតំ.

បុច្ឆា – តេនាវុសោ ភគវតា…បេ… សម្មាសម្ពុទ្ធេន ព្រហ្មាយុសុត្តំ កត្ថ កំ អារព្ភ កិស្មិំ វត្ថុស្មិំ ភាសិតំ.

វិស្សជ្ជនា – វិទេហេសុ ¶ ភន្តេ មិថិលាយំ មឃទេវអម្ពវនេ ព្រហ្មាយុំ ព្រាហ្មណំ អារព្ភ ភាសិតំ. ព្រហ្មាយុ ភន្តេ ព្រាហ្មណោ ភគវន្តំ ឧបសង្កមិត្វា អដ្ឋបញ្ហានិ បុច្ឆិ, តស្មិំ ភន្តេ វត្ថុស្មិំ ភាសិតំ.

បុច្ឆា – តត្ថ ¶ អាវុសោ ឧត្តរោ មាណវោ កថំ ភគវតោ ទ្វត្តិំសមហាបុរិសលក្ខណេហិ សមន្នាគតតំ អត្តនោ អាចរិយស្ស ព្រហ្មាយុស្ស ព្រាហ្មណស្ស សម្បដិវេទេសិ.

វិស្សជ្ជនា – តត្ថ ភន្តេ ឧត្តរោ មាណវោ ‘‘សុប្បតិដ្ឋិតបាទោ ខោ បន សោ ភវំ គោតមោ, ឥទម្បិ តស្ស ភោតោ គោតមស្ស មហាបុរិសស្ស មហាបុរិសលក្ខណំ ភវតី’’តិ ឯវមាទិនា ភគវតោ ទ្វត្តិំសមហាបុរិសលក្ខណេហិ សមន្នាគតតំ អត្តនោ អាចរិយស្ស ព្រហ្មាយុស្ស ព្រាហ្មណស្ស សម្បដិវេទេសិ.

បុច្ឆា – អបរម្បិ ¶ អាវុសោ ឧត្តរោ មាណវោ ភគវតោ គមនកាលេ កីទិសំ បាសាទិកំ អាការំ ទិស្វា ច សល្លក្ខេត្វា ច អត្តនោ អាចរិយស្ស ព្រហ្មាយុស្ស ព្រាហ្មណស្ស សម្បដិវេទេសិ.

វិស្សជ្ជនា – អបរម្បិ ភន្តេ ឧត្តរោ មាណវោ ភគវតោ គមនកាលេ បឋមំ ទក្ខិណំ បាទុទ្ធរណាទិកំ អាការំ ទិស្វា ច សល្លក្ខេត្វា ច អត្តនោ អាចរិយស្ស ព្រហ្មាយុស្ស ព្រាហ្មណស្ស សម្បដិវេទេសិ.

បុច្ឆា – អបរម្បិ ¶ អាវុសោ ឧត្តរោ មាណវោ ភគវតោ អន្តរឃរំ បវិសនកាលេ កីទិសំ បាសាទិកំ អាការំ ទិស្វា ច សល្លក្ខេត្វា ច អត្តនោ អាចរិយស្ស ព្រហ្មាយុស្ស ព្រាហ្មណស្ស សម្បដិវេទេសិ.

វិស្សជ្ជនា – អបរម្បិ ភន្តេ ឧត្តរោ មាណវោ ភគវតោ អន្តរឃរំ បវិសនកាលេ ន កាយស្ស ឧន្នមនាទិកំ បាសាទិកំ ទិស្វា ច សល្លក្ខេត្វា ច អត្តនោ អាចរិយស្ស ព្រហ្មាយុស្ស ព្រាហ្មណស្ស សម្បដិវេទេសិ.

បុច្ឆា – អបរម្បិ ¶ អាវុសោ ឧត្តរោ មាណវោ ភគវតោ ភោជនកាលេ កីទិសំ បាសាទិកំ អាការំ ទិស្វា ច សល្លក្ខេត្វា ច អត្តនោ អាចរិយស្ស ព្រហ្មាយុស្ស ព្រាហ្មណស្ស សម្បដិវេទេសិ.

វិស្សជ្ជនា – អបរម្បិ ភន្តេ ឧត្តរោ មាណវោ ភគវតោ ភោជនកាលេ បត្តោទកាទិកំ បដិគ្គហណាទិកាលេ ន បត្តស្ស ឧន្នមនាទិកំ ភគវតោ បាសាទិកំ អាការំ ទិស្វា ច សល្លក្ខេត្វា ច អត្តនោ អាចរិយស្ស ព្រហ្មាយុស្ស ព្រាហ្មណស្ស សម្បដិវេទេសិ.

បុច្ឆា – អបរម្បិ ¶ អាវុសោ ឧត្តរោ មាណវោ ភគវតោ ភុត្តាវិកាលេ កីទិសំ បាសាទិកំ អាការំ ទិស្វា ច សល្លក្ខេត្វា ច អត្តនោ អាចរិយស្ស ព្រហ្មាយុស្ស ព្រាហ្មណស្ស សម្បដិវេទេសិ.

វិស្សជ្ជនា – អបរម្បិ ភន្តេ ឧត្តរោ មាណវោ ភគវតោ ភុត្តាវិកាលេ បត្តោទនាទិកំ បដិគ្គណ្ហាទិកាលេ ន បត្តស្ស ឧន្នមនាទិកំ បាសាទិកំ អាការំ ទិស្វា ច សល្លក្ខេត្វា ច អត្តនោ អាចរិយស្ស ព្រហ្មាយុស្ស ព្រាហ្មណស្ស សម្បដិវេទេសិ.

បុច្ឆា – អបរម្បិ ¶ អាវុសោ ឧត្តរោ មាណវោ ភគវតោ ចីវរធារណេ ច អារាមគតកាលេ ច ធម្មទេសនាកាលេ ច សព្ពឥរិយាបថេសុ ច កីទិសំ បាសាទិកំ អាការំ ទិស្វា ច សល្លក្ខេត្វា ច អត្តនោ អាចរិយស្ស ព្រហ្មាយុស្ស ព្រាហ្មណស្ស សម្បដិវេទេសិ.

វិស្សជ្ជនា – អបរម្បិ ¶ ភន្តេ ឧត្តរោ មាណវោ ភគវតោ ចីវរធារណកាលេ ច អារាមគតកាលេ ច សព្ពេសុ ច ឥរិយាបថេសុ ន អច្ចុក្កដ្ឋាទិកំ បាសាទិកំ អាការំ ទិស្វា ច សល្លក្ខេត្វា ច អត្តនោ អាចរិយស្ស ព្រហ្មាយុស្ស ព្រាហ្មណស្ស សម្បដិវេទេសិ.

បុច្ឆា – កថញ្ចាវុសោ ¶ ព្រហ្មាយុ ព្រហ្មណោ ភគវន្តំ បុច្ឆិ, កថញ្ចស្ស ភគវា ព្យាកាសិ.

វិស្សជ្ជនា – ‘‘កថំ ខោ ព្រាហ្មណោ ហោតិ, កថំ ភវតិ វេទគូ. តេវិជ្ជោ ភោ កថំ ហោតិ, សោត្តិយោ កិន្តិ វុច្ចតិ. អរហំ ភោ កថំ ហោតិ, កថំ ភវតិ កេវលី. មុនិ ច ភោ កថំ ហោតិ, ពុទ្ធោ កិន្តិ បវុច្ចតី’’តិ – ឯវំ ខោ ភន្តេ ព្រហ្មាយុ ព្រាហ្មណោ ភគវន្តំ បញ្ហំ អបុច្ឆិ. ភគវា ភន្តេ–

‘‘បុព្ពេនិវាសំ យោ វេទិ, សគ្គាបាយញ្ច បស្សតិ;

អថោ ជាតិក្ខយំ បត្តោ, អភិញ្ញាវោសិតោ មុនិ;

ចិត្តំ វិសុទ្ធំ ជានាតិ, មុត្តំ រាគេហិ សព្ពសោ;

បហីនជាតិមរណោ, ព្រហ្មចរិយស្ស កេវលី;

បារគូ សព្ពធម្មានំ, ពុទ្ធោ តាទី បវុច្ចតី’’តិ –

ឯវំ ខោ ភន្តេ ភគវា ព្រហ្មាយុស្ស ព្រាហ្មណស្ស វិភជិត្វា ព្យាកាសិ.

បុច្ឆា – ឥមញ្ច ¶ បនាវុសោ ភគវតោ ព្យាករណំ សុត្វា ព្រហ្មាយុ ព្រាហ្មណោ ភគវតិ កីទិសំ និបច្ចការំ អកាសិ, កថញ្ចស្ស ភគវា បុនបិ អនុបុព្ពិំ ធម្មកថំ កថេសិ.

វិស្សជ្ជនា – ឥមញ្ច ¶ បន ភន្តេ ភគវតោ ព្យាករណំ សុត្វា ព្រហ្មាយុ ព្រាហ្មណោ ឧដ្ឋាយាសនា ឯកំសំ ឧត្តរាសង្គំ ករិត្វា ភគវតោ បាទេសុ សិរសា និបតិត្វា ភគវតោ បាទានិ មុខេន ច បរិចុម្ពតិ, បាណីហិ ច បរិសម្ពាហតិ, នាមញ្ច សាវេតិ ‘‘ព្រហ្មាយុ អហំ ភោ គោតម ព្រាហ្មណោ, ព្រហ្មាយុ អហំ ភោ គោតម ព្រាហ្មណោ’’តិ, ឯវំ បរមនិបច្ចការំ អកាសិ, ភគវា ច ភន្តេ ទានកថំ សីលកថំ សគ្គកថំ កាមានំ អាទីនវំ ឱការំ សំកិលេសំ នេក្ខម្មេ អានិសំសំ បកាសេសិ, ឯវំ ខោ ភន្តេ ព្រហ្មាយុស្ស ព្រាហ្មណស្ស ភគវា អនុបុព្ពិំ កថំ កថេសិ.

បុច្ឆា – ឥមញ្ច ¶ បនាវុសោ ទម្មទេសនំ សុត្វា ព្រហ្មាយុស្ស ព្រាហ្មណស្ស កីទិសោ ធម្មាភិសមយោ អហោសិ.

វិស្សជ្ជនា – ឥមញ្ច ¶ បន ភន្តេ ធម្មទេសនំ សុត្វា ព្រហ្មាយុស្ស ព្រាហ្មណស្ស តស្មិំយេវ អាសនេ វិរជំ វីតមលំ ធម្មចក្ខុំ ឧទបាទិ ‘‘យំកិញ្ចិ សមុទយធម្មំ សព្ពំ តំ និរោធធម្ម’’ន្តិ.

បុច្ឆា – សេលសុត្តំ បនាវុសោ ភគវតា កត្ថ កំ អារព្ភ កិស្មិំ វត្ថុស្មិំ ភាសិតំ.

វិស្សជ្ជនា – អង្គុត្តរាបេសុ ភន្តេ អាបណេ នាម អង្គុត្តរាបានំ និគមេសេលំ ព្រាហ្មណំ អារព្ភ ភាសិតំ. សេលោ ភន្តេ ព្រាហ្មណោ សបរិសោ ភគវន្តំ ឧបសង្កមិត្វា ភគវន្តំ សម្មុខា សារុប្បាហិ គាថាហិ អភិត្ថវិ, តស្មិំ ភន្តេ វត្ថុស្មិំ ភាសិតំ.

បរិបុណ្ណកាយោ ¶ សុរុចិ, សុជាតោ ចារុទស្សនោ;

សុវណ្ណវណ្ណោសិ ភគវា, សុសុក្កទាឋោសិ វីរិយវា;

នរស្ស ហិ សុជាតស្ស, យេ ភវន្តិ វិយញ្ចនា;

សព្ពេ តេ តវ កាយស្មិំ, មហាបុរិសលក្ខណា.

បុច្ឆា – អស្សលាយនសុត្តំ បនាវុសោ ភគវតា កត្ថ កំ អារព្ភ កិស្មិំ វត្ថុស្មិំ ភាសិតំ.

វិស្សជ្ជនា – សាវត្ថិយំ ភន្តេ អស្សលាយនំ មាណវំ អារព្ភ ភាសិតំ, អស្សលាយនោ ភន្តេ មាណវោ មហតា ព្រាហ្មណគណេន សទ្ធិំ ភគវន្តំ ឧបសង្កមិត្វា ឯតទវោច ‘‘ព្រាហ្មណា ភោ គោតម ឯវមាហំសុ ‘ព្រាហ្មណោវ សេដ្ឋោ វណ្ណោ, ហីនោ អញ្ញោ វណ្ណោ. ព្រាហ្មណោវ សុក្កោ វណ្ណោ, កណ្ហោ ¶ អញ្ញោ វណ្ណោ. ព្រាហ្មណាវ សុជ្ឈន្តិ, នោ អព្រាហ្មណា. ព្រាហ្មណាវ ព្រហ្មុនោ បុត្តា ឱរសា មុខតោ ជាតា ព្រហ្មជា ព្រហ្មនិម្មិតា ព្រហ្មទាយាទា’តិ, ឥធ ភវំ គោតមោ កិមាហា’’តិ, តស្មិំ ភន្តេ វត្ថុស្មិំ ភាសិតំ.

បុច្ឆា – ឃោដមុខសុត្តំ ¶ បនាវុសោ កត្ថ កំ អារព្ភ កិស្មិំ វត្ថុស្មិំ កេន ភាសិតំ.

វិស្សជ្ជនា – ពារាណសិយំ ភន្តេ ខេមិយម្ពវនេ ឃោដមុខំ ព្រាហ្មណំ អារព្ភ អាយស្មតា ឧទេនេន ភាសិតំ. ឃោដមុខោ ភន្តេ ព្រាហ្មណោ អាយស្មន្តំ ឧទេនំ ចង្កមន្តំ អនុចង្កមមានោ ឯវមាហ ‘‘អម្ភោ សមណ នត្ថិ ធម្មិកោ បរិព្ពជោ, ឯវំ មេ ឯត្ថ ហោតិ, តញ្ច ខោ ភវន្តរូបានំ វា អទស្សនា, យោ វា បនេត្ថ ធម្មា’’តិ, តស្មិំ ភន្តេ វត្ថុស្មិំ ភាសិតំ.

បុច្ឆា – តេនាវុសោ ¶ ភគវតា…បេ… សម្មាសម្ពុទ្ធេន ចង្កីសុត្តំ កត្ថ កំ អារព្ភ កិស្មិំ វត្ថុស្មិំ ភាសិតំ.

វិស្សជ្ជនា – កោសលេសុ ភន្តេ ឱបាសាទេ នាម កោសលានំ និគមេ កាបដិកំ មាណវំ អារព្ភ ភាសិតំ, កាបដិកោ ភន្តេ មាណវោ ភគវន្តំ ឯតទវោច ‘‘យទិទំ ភោ គោតម ព្រាហ្មណានំ បោរាណំ មន្តបទំ ឥតិហិតិហបរម្បរាយ បិដកសម្បទាយ, តត្ថ ច ព្រាហ្មណា ឯកំសេន និដ្ឋំ គច្ឆន្តិ ‘ឥទមេវ សច្ចំ មោឃមញ្ញ’ន្តិ, ឥធ ភវំ គោតមោ កិមាហា’’តិ, តស្មិំ ភន្តេ វត្ថុស្មិំ ភាសិតំ.

បុច្ឆា – ឯសុការីសុត្តំ ¶ បនាវុសោ ភគវតា កត្ថ កំ អារព្ភ កិស្មិំ វត្ថុស្មិំ ភាសិតំ.

វិស្សជ្ជនា – សាវត្ថិយំ ភន្តេ ឯសុការិំ ព្រាហ្មណំ អារព្ភ ភាសិតំ, ឯសុការី ភន្តេ ព្រាហ្មណោ ភគវន្តំ ឧបសង្កមិត្វា ឯតទវោច ‘‘ព្រាហ្មណា ភោ គោតម ចតស្សោ បារិចរិយា បញ្ញបេន្តិ, ព្រាហ្មណស្ស បារិចរិយំ បញ្ញបេន្តិ, ខត្តិយស្ស បារិចរិយំ បញ្ញបេន្តិ, វេស្សស្ស បារិចរិយំ បញ្ញបេន្តិ, សុទ្ទស្ស បារិចរិយំ បញ្ញបេន្តី’’តិ, តស្មិំ ភន្តេ វត្ថុស្មិំ ភាសិតំ.

បុច្ឆា – ធនញ្ជានិសុត្តំ ¶ បនាវុសោ កត្ថ កំ អារព្ភ កិស្មិំ វត្ថុស្មិំ កេន ភាសិតំ.

វិស្សជ្ជនា – រាជគហេ ភន្តេ ធនញ្ជានិំ ព្រាហ្មណំ អារព្ភ អាយស្មតា សារិបុត្តត្ថេរេន ធម្មសេនាបតិនា ភាសិតំ, ធនញ្ជានិ ភន្តេ ព្រាហ្មណោ បមាទវិហារំ វិហាសិ, តស្មិំ ភន្តេ វត្ថុស្មិំ ភាសិតំ.

បុច្ឆា – អថ ¶ ខោ អាវុសោ អាយស្មា សារិបុត្តត្ថេរោ ធម្មសេនាបតិ កថំ ធនញ្ជានិំ ព្រាហ្មណំ បុច្ឆិ, កថញ្ច សោ អាយស្មតោ សារិបុត្តត្ថេរស្ស ធម្មសេនាបតិស្ស អារោចេសិ.

វិស្សជ្ជនា – ‘‘កច្ចាសិ ធនញ្ជានិ អប្បមត្តោ’’តិ, ឯវំ ខោ ភន្តេ អាយស្មា សារិបុត្តត្ថេរោ ធម្មសេនាបតិ ធនញ្ជានិំ ព្រាហ្មណំ បុច្ឆិ, ធនញ្ជានិ ច ភន្តេ ព្រាហ្មណោ ‘‘កុតោ ភោ សារិបុត្ត អម្ហាកំ អប្បមាទោ, យេសំ នោ មាតាបិតរោ បោសេតព្ពា’’តិ, ឯវមាទិនា អាយស្មតោ សារិបុត្តស្ស ធម្មសេនាបតិស្ស អារោចេសិ.

បុច្ឆា – ឯវំ ¶ វុត្តេ ខោ អាវុសោ អាយស្មា សារិបុត្តត្ថេរោ ធម្មសេនាបតិ ធនញ្ជានិស្ស ព្រាហ្មណស្ស កីទិសំ ធម្មកថំ កថេសិ.

វិស្សជ្ជនា – ឯវំ វុត្តេ ភន្តេ អាយស្មា សារិបុត្តត្ថេរោ ធម្មសេនាបតិ ‘‘តំ កិំ មញ្ញសិ ធនញ្ជានិ, ឥធេកច្ចោ មាតាបិតូនំ ហេតុ អធម្មចារី វិសមចារី អស្ស, តមេនំ អធម្មចរិយា វិសមចរិយាហេតុ និរយំ និរយបាលា ឧបកឌ្ឍេយ្យុ’’ន្តិ, ឯវមាទិនា ធនញ្ជានិស្ស ព្រាហ្មណស្ស ធម្មកថំ កថេសិ.

បុច្ឆា – បុន ¶ បិ អាវុសោ អាយស្មា សារិបុត្តត្ថេរោ ធម្មសេនាបតិ កថំ ធនញ្ជានិស្ស ព្រាហ្មណស្ស អបរេនបិ បរិយាយេន អនុសាសនិំ អទាសិ.

វិស្សជ្ជនា – បុនបិ ភន្តេ អាយស្មា សារិបុត្តត្ថេរោ ធម្មសេនាបតិ ‘‘តំ កិំ មញ្ញសិ ធនញ្ជានិ, យោ វា មាតាបិតូនំ ហេតុ អធម្មចារី វិសមចារី អស្ស, យោ វា មាតាបិតូនំ ហេតុ ធម្មចារី សមចារី អស្ស, កតមំ សេយ្យោ’’តិ, ឯវមាទិនា ធនញ្ជានិស្ស ព្រាហ្មណស្ស អបរេនបិ បរិយាយេន ឱវាទមទាសិ.

បុច្ឆា – អបរភាគេ ¶ បិ អាវុសោ អាយស្មា សារិបុត្តត្ថេរោ ធម្មសេនាបតិ កថំ ធនញ្ជានិស្ស ព្រាហ្មណស្ស មរណសមយេ ធម្មកថំ កថេសិ, កថញ្ចស្ស អភិសម្បរាយោ អហោសិ.

វិស្សជ្ជនា – អបរភាគេ ¶ បិ ភន្តេ អាយស្មា សារិបុត្តត្ថេរោ ធម្មសេនាបតិ ធនញ្ជានិស្ស ព្រាហ្មណស្ស មរណសមយេបិ ចត្តារោ ព្រហ្មវិហារេ ទេសេសិ, ធនញ្ជានិ ច ភន្តេ ព្រាហ្មណោ កាយស្ស ភេទា បរំ មរណា ព្រហ្មលោកូបគោ អហោសិ.

បុច្ឆា – វាសេដ្ឋសុត្តំ ¶ បនាវុសោ ភគវតា កត្ថ កំ អារព្ភ កិស្មិំ វត្ថុស្មិំ ភាសិតំ.

វិស្សជ្ជនា – ឥច្ឆានង្គលេ ភន្តេ វាសេដ្ឋំ មាណវំ អារព្ភ ភាសិតំ. វាសេដ្ឋោ ភន្តេ មាណវោ ភគវន្តំ គាថាហិ អជ្ឈភាសិ –

‘‘អនុញ្ញាតបដិញ្ញាតា, តេវិជ្ជា មយមស្មុភោ;

អហំ បោក្ខរសាតិស្ស, តារុក្ខស្សាយំ មាណវោ.

តេវិជ្ជានំ យទក្ខាតំ, តត្រ កេវលិនេស្មសេ;

បទកស្មា វេយ្យាករណា, ជប្បេ អាចរិយសាទិសា;

តេសំ នោ ជាតិវាទស្មិំ, វិវាទោ អត្ថិ គោតម.

ជាតិយា ព្រាហ្មណោ ហោតិ, ភារទ្វាជោ ឥតិ ភាសតិ;

អហញ្ច កម្មុនា ព្រូមិ, ឯវំ ជានាហិ ចក្ខុម.

តេន សក្កោម ញាបេតុំ, អញ្ញំមញ្ញំ មយំ ឧភោ;

ភវន្តំ បុដ្ឋុមាគមា, សម្ពុទ្ធំ ឥតិ វិស្សុតំ.

ចន្ទំ យថា ខយាតីតំ, បេច្ច បញ្ជលិកា ជនា;

វន្ទនា នមស្សន្តិ, ឯវំ លោកស្មិំ គោតមំ.

ចក្ខុំ ¶ លោកេ សមុប្បន្នំ, មយំ បុច្ឆាម គោតមំ;

ជាតិយា ព្រាហ្មណោ ហោតិ, ឧទាហុ ភវតិ កម្មុនា;

អជានតំ នោ បព្រូហិ, យថា ជានេមុ ព្រាហ្មណន្តិ.

តស្មិំ ភន្តេ វត្ថុស្មិំ ភាសិតំ.

បុច្ឆា – សុភសុត្តំ ¶ បនាវុសោ ភគវតា កត្ថ កំ អារព្ភ កិស្មិំ វត្ថុស្មិំ ភាសិតំ.

វិស្សជ្ជនា – សាវត្ថិយំ ភន្តេ សុភំ មាណវំ តោទេយ្យបុត្តំ អារព្ភ ភាសិតំ. សុភោ ភន្តេ មាណវោ តោទេយ្យបុត្តោ ភគវន្តំ ឧបសង្កមិត្វា ឯតទវោច ‘‘ព្រាហ្មណា ភោ គោតម ឯវមាហំសុ’ គហដ្ឋោ អារាធកោ ហោតិ ញាយំ ធម្មំ កុសលំ, ន បព្ពជិតោ អារាធកោ ហោតិ ញាយំ ធម្មំ កុសលន្តិ, ឥធ ភវំ គោតមោ កិមាហា’’តិ, តស្មិំ ភន្តេ វត្ថុស្មិំ ភាសិតំ.

បុច្ឆា – បុន ¶ បិ អាវុសោ សុភោ មាណវោ តោទេយ្យបុត្តោ កថំ ភគវន្តំ បុច្ឆិ, កថញ្ច ភគវា វិភជ្ជ ព្យាកាសិ.

វិស្សជ្ជនា – ‘‘ព្រាហ្មណា ភោ គោតម ឯវមាហំសុ ‘មហដ្ឋមិទំ មហាកិច្ចំ មហាធិករណំ មហាសមារម្ភំ, ឃរាវាសកម្មដ្ឋានំ មហប្ផលំ ហោតិ. អប្បដ្ឋមិទំ អប្បកិច្ចំ អប្បាធិករណំ អប្បសមារម្ភំ, បព្ពជ្ជា កម្មដ្ឋានំ អប្បផលំ ហោតី’តិ. ឥធ ភវំ គោតមោ កិមាហា’’តិ. ឯវំ ខោ ភន្តេ សុភោ មាណវោ តោទេយ្យបុត្តោ បុនបិ ភគវន្តំ បុច្ឆិ. ភគវា ច ភន្តេ ‘‘ឯត្ថាបិ ខោ អហំ មាណវ វិភជ្ជវាទា, នាហមេត្ថ ឯកំសវាទោតិ’’ ឯវមាទិនា វិភជ្ជ ព្យាកាសិ.

បុច្ឆា – សង្គារវសុត្តំ ¶ បនាវុសោ ភគវតា កត្ថ កំ អារព្ភ កិស្មិំ វត្ថុស្មិំ ភាសិតំ.

វិស្សជ្ជនា – កោសលេសុ ភន្តេ ចញ្ចលិកប្បេ នាម គាមេ សង្គារវំ មាណវំ អារព្ភ ភាសិតំ, សង្គារវោ ភន្តេ មាណវោ ភគវន្តំ ឯតទវោច ‘‘សន្តិ ខោ ភោ គោតម ឯកេ សមណព្រាហ្មណា ទិដ្ឋធម្មាភិញ្ញាវោសានបារមិប្បត្តា អាទិព្រហ្មចរិយំ បដិជានន្តិ. តត្រ ភោ គោតម យេ តេ សមណព្រាហ្មណា ទិដ្ឋធម្មាភិញ្ញាវោសានបារមិប្បត្តា អាទិព្រហ្មចរិយំ បដិជានន្តិ, តេសំ ភវំ គោតមោ កតមោ’’តិ, តស្មិំ ភន្តេ វត្ថុស្មិំ ភាសិតំ.

បុច្ឆា – តេនាវុសោ ¶ ភគវតា ជានតា បស្សតា អរហតា សម្មាសម្ពុទ្ធេន ទេវទហសុត្តំ កត្ថ កំ អារព្ភ ភាសិតំ.

វិស្សជ្ជនា – សក្កេសុ ភន្តេ ទេវទហេ នាម សក្យានំ និគមេ សម្ម ហុលេ ភិក្ខូ អារព្ភ ភាសិតំ.

បុច្ឆា – បញ្ចត្តយសុត្តំ បនាវុសោ ភគវតា កត្ថ កំ អារព្ភ ភាសិតំ.

វិស្សជ្ជនា – សាវត្ថិយំ ភន្តេ សម្ពហុលេ ភិក្ខូ អារព្ភ ភាសិតំ.

បុច្ឆា – កិន្តិសុត្តំ ¶ បនាវុសោ ភគវតា កត្ថ កំ អារព្ភ ភាសិតំ.

វិស្សជ្ជនា – បិសិនារាយំ ភន្តេ ពលិហរណេ នាម វនសណ្ឌេ សម្ពហុលេ ភិក្ខូ អារព្ភ ភាសិតំ.

បុច្ឆា – តត្ថ ¶ អាវុសោ ភគវា កថំ បឋមំ ភិក្ខូ បដិបុច្ឆិត្វា ឱវាទមទាសិ, យោ ពហុជនស្ស អត្ថាយ ហិតាយ សុខាយ សំវត្តតិ.

វិស្សជ្ជនា – តត្ថ ភន្តេ ភគវា ‘‘កិន្តិ វោ ភិក្ខវេ មយិ ហោតិ, ចីវរហេតុ វា សមណោ គោតមោ ធម្មំ ទេសេតិ, បិណ្ឌបាតហេតុ វា, សេនាសនហេតុ វា, ឥតិភវាភវហេតុ វា សមណោ គោតមោ ធម្មំ ទេសេតី’’តិ ភិក្ខូ បុច្ឆិត្វា ‘‘តស្មាតិហ ភិក្ខវេ យេ វោ មយា ធម្មា អភិញ្ញា ទេសិតា. សេយ្យថិទំ, ចត្តារោ សតិបដ្ឋានា ចត្តារោ សម្មប្បធានា ចត្តារោ ឥទ្ធិបាទា បញ្ចិន្ទ្រិយានិ បញ្ច ពលានិ សត្ត ពោជ្ឈង្គា អរិយោ អដ្ឋង្គិកោ មគ្គោ. តត្ថ សព្ពេហេវ សមគ្គេហិ សម្មោទមានេហិ អវិវទមានេហិ សិក្ខិតព្ពំ’’ ឯវមាទិនា ភន្តេ ភិក្ខូនំ ឱវាទមទាសិ.

បុច្ឆា – កថញ្ចាវុសោ ¶ ភគវា តត្ថ ទុតិយម្បិ ភិក្ខូនំ ឱវាទំ អទាសិ. យោ ពហុជនស្ស អត្ថាយ ហិតាយ សុខាយ សំវត្តតិ.

វិស្សជ្ជនា – តត្ថ ភន្តេ ភគវា ‘‘តេសញ្ច វោ ភិក្ខវេ សមគ្គានំ សម្មោទមានានំ អវិវទមានានំ សិក្ខតំ សិយា អញ្ញតរស្ស ភិក្ខុនោ អាបត្តិ, សិយា វីតិក្កមោ. តត្រ ភិក្ខវេ ន ចោទនាយ តរិតព្ពំ បុគ្គលោ ឧបបរិក្ខិតព្ពោ’’តិ ឯវមាទិនា ភិក្ខូនំ ទុតិយម្បិ ឱវាទមទាសិ.

បុច្ឆា – កថញ្ចាវុសោ ¶ ភគវា តត្ថ តតិយម្បិ ភិក្ខូនំ ឱវាទំ អទាសិ, យោ ពហុជនស្ស អត្ថាយ ហិតាយ សុខាយ សំវត្តតិ.

វិស្សជ្ជនា – ‘‘តេសញ្ច វោ ភិក្ខវេ សមគ្គានំ សម្មោទមានានំ អវិវទមានានំ សិក្ខតំ អញ្ញមញ្ញស្ស វចីសំហារោ ឧប្បជ្ជេយ្យ ទិដ្ឋិបឡាសោ ចេតសោ អាឃាតោ អប្បច្ចយោ អនភិរទ្ធី’’តិ ឯវមាទិនា ភន្តេ ភគវា តត្ថ តតិយម្បិ ភិក្ខូនំ ឱវាទមទាសិ.

បុច្ឆា – តេនាវុសោ ¶ ភិក្ខុនា ឯវំ សត្ថុ ឱវាទានុសាសនិការិនា អាយស្មា នុ តេ ភិក្ខុ អកុសលា វុដ្ឋាបេត្វា កុសលេ បតិដ្ឋាបេតីតិ បរេហិ បុដ្ឋេន កថំ សម្មា ព្យាករមានេន ព្យាកាតព្ពំ.

វិស្សជ្ជនា – ‘‘ឥធាហំ អាវុសោ យេន ភគវា តេនុបសង្កមិំ, តស្ស មេ ភគវា ធម្មំ ទេសេសិ, តាហំ ធម្មំ សុត្វា តេសំ ភិក្ខូនំ អភាសិំ, តំ តេ ភិក្ខូ ធម្មំ សុត្វា អកុសលា វុដ្ឋហិំសុ កុសលេ បតិដ្ឋហិំសូ’’តិ. ឯវំ ខោ ភន្តេ តេន ភិក្ខុនា ឯវំ សត្ថុ ឱវាទានុសាសនិការិនា បរេហិ បុដ្ឋេន សម្មា ព្យាករមានេន ព្យាកាតព្ពំ.

បុច្ឆា – សាមគាមសុត្តំ ¶ បនាវុសោ ភគវតា កត្ថ កំ អារព្ភ កិស្មិំ វត្ថុស្មិំ ភាសិតំ.

វិស្សជ្ជនា – សក្កេសុ ភន្តេ សាមគាមេ នាម សក្យានំ និគមេ អាយស្មន្តញ្ច អានន្ទំ អាយស្មន្តញ្ច ចុន្ទំ អារព្ភ ភាសិតំ, អាយស្មា ច ភន្តេ អានន្ទោ អាយស្មា ច ចុន្ទោ យេន ភគវា តេនុបសង្កមិសុ, ឧបសង្កមិត្វា ភគវន្តំ អភិវាទេត្វា ឯកមន្តំ និសីទិំសុ, ឯកមន្តំ និសិន្នោ ខោ អាយស្មា អានន្ទោ ភគវន្តំ ឯតទវោច ‘‘អយំ ភន្តេ ចុន្ទោ សមណុទ្ទេសោ ឯវមាហ ‘និគណ្ឋោ ភន្តេ នាដបុត្តោ បាវាយំ អធុនា កាលង្កតោ, តស្ស កាលង្កិរិយាយ ភិន្នា និគណ្ឋា ទ្វេធិកជាតា ភណ្ឌនជាតា កលហជាតា វិវាទាបន្នា អញ្ញមញ្ញំ មុខសត្តីហិ វិតុទន្តា វិហរន្តិ…បេ… ¶ ភិន្នថូបេ អប្បដិសរណេ’តិ. តស្ស មយ្ហំ ភន្តេ ឯវំ ហោតិ ‘មាហេវ ភគវតោ អច្ចយេន សង្ឃេ វិវាទោ ឧប្បជ្ជិ, ស្វាស្ស វិវាទោ ពហុជនអហិតាយ ពហុជនអសុខាយ ពហុនោ ជនស្ស អនត្ថាយ អហិតាយ ទុក្ខាយ ទេវមនុស្សាន’ន្តិ’’. តស្មិំ ភន្តេ វត្ថុស្មិំ ភាសិតំ.

បុច្ឆា – សុនក្ខត្តសុត្តំ ¶ បនាវុសោ ភគវតា កត្ថ កំ អារព្ភ កិស្មិំ វត្ថុស្មិំ ភាសិតំ.

វិស្សជ្ជនា – វេសាលិយំ ភន្តេ សុនក្ខត្តំ លិច្ឆវិបុត្តំ អារព្ភ ភាសិតំ, សុនក្ខត្តោ ភន្តេ លិច្ឆវិបុត្តោ ភគវន្តំ ឧបសង្កមិត្វា ឯតទវោច ‘‘សុតំ មេតំ ភន្តេ សម្ពហុលេហិ កិរ ភិក្ខូហិ ភគវតោ សន្តិកេ អញ្ញា ព្យាកតា ខីណា ជាតិ, វុសិតំ ព្រហ្មចរិយំ, កតំ ករណីយំ, នាបរំ ឥត្ថត្តាយាតិ បជានាមាតិ. កច្ចិ តេ ភន្តេ ភិក្ខូ សម្មទេវ អញ្ញំ ព្យាកំសុ, ឧទាហុ សន្តេត្ថេកច្ចេ ភិក្ខូ អធិមានេន អញ្ញំ ព្យាកំសូ’’តិ, តស្មិំ ភន្តេ វត្ថុស្មិំ ភាសិតំ.

បុច្ឆា – អានេញ្ជសប្បាយសុត្តំ ¶ បនាវុសោ ភគវតា កត្ថ កំ អារព្ភ កិស្មិំ វត្ថុស្មិំ ភាសិតំ.

បុច្ឆា – គណកមោគ្គល្លានសុត្តំ ¶ បនាវុសោ ភគវតា កត្ថ កំ អារព្ភ កិស្មិំ វត្ថុស្មិំ ភាសិតំ.

វិស្សជ្ជនា – សាវត្ថិយំ ភន្តេ គណកមោគ្គល្លានំ ព្រាហ្មណំ អារព្ភ ភាសិតំ, គណកមោគ្គល្លានោ ភន្តេ ព្រាហ្មណោ ភគវន្តំ ឧបសង្កមិត្វា ឯតទវោច ‘‘សេយ្យាថាបិ ភោ គោតម ឥមស្ស មិគារមាតុបាសាទស្ស ទិស្សតិ អនុបុព្ពសិក្ខា អនុបុព្ពកិរិយា អនុបុព្ពបដិបទា យទិទំ យាវ បច្ឆិមសោបានកឡេវរា…បេ… សក្កា នុខោ ភោ គោតម ឥមស្មិម្បិ ធម្មវិនយេ ឯវមេវ អនុបុព្ពសិក្ខា អនុបុព្ពកិរិយា អនុបុព្ពបដិបទា បញ្ញបេតុ’’ន្តិ, តស្មិំ ភន្តេ វត្ថុស្មិំ ភាសិតំ.

បុច្ឆា – ឯវំ ¶ វុត្តេ ខោ អាវុសោ គណកមោគ្គល្លានោ ព្រាហ្មណោ ភគវន្តំ កិំ អវោច, កថញ្ចស្ស ភគវា ព្យាកាសិ.

វិស្សជ្ជនា – ឯវំ វុត្តេ ភន្តេ គណកមោគ្គល្លានោ ព្រាហ្មណោ ភគវន្តំ ឯតទវោច ‘‘កិំ នុ ខោ ភោតោ គោតមស្ស សាវកា ភោតា គោតមេន ឯវំ ឱវទីយមានា ឯវំ អនុសាសីយមានា សព្ពេ អច្ចន្តំ និដ្ឋំ និព្ពានំ អារោធេន្តិ, ឧទាហុ ឯកច្ចេ នារាធេន្តី’’តិ, ភគវា ច ភន្តេ ‘‘អប្បេកច្ចេ ខោ ព្រាហ្មណ មម សាវកា មយា ឯវំ ឱវទីយមានា ឯវំ អនុសាសីយមានា អច្ចន្តំ និដ្ឋំ និព្ពានំ អារាធេន្តិ, ឯកច្ចេ នារាធេន្តី’’តិ ឯវមាទិនា គណកមោគ្គល្លានស្ស ព្រាហ្មណស្ស ព្យាកាសិ.

បុច្ឆា – ឥមញ្ច ¶ បនាវុសោ ធម្មទេសនំ សុត្វា គណកោ មោគ្គល្លានោ ឥមស្មិំ ធម្មវិនយេ បសន្នោ កីទិសំ បសន្នាការមកាសិ.

វិស្សជ្ជនា – ឥមញ្ច បន ភន្តេ ធម្មទេសនំ សុត្វា គណកមោគ្គល្លានោ ព្រាហ្មណោ ‘‘យេ មេ ភោ គោតម បុគ្គលា អសទ្ធា ជីវិកត្ថា ន សទ្ធា អគារស្មា អនគារិយំ បព្ពជិតា’’តិ ឯវមាទិនា ឥមស្មិំ ធម្មវិនយេ បសន្នោ បសន្នាការមកាសិ.

បុច្ឆា – គោបកមោគ្គល្លានសុត្តំ ¶ បនាវុសោ កត្ថ កំ អារព្ភ កិស្មិំ វត្ថុស្មិំ កេន ភាសិតំ.

វិស្សជ្ជនា – រាជគហេ ភន្តេ គោបកមោគ្គល្លានំ ព្រាហ្មណំ អារព្ភ អាយស្មតា អានន្ទត្ថេរេន ធម្មភណ្ឌាគារិកេន ភាសិតំ, គោបកមោគ្គល្លានោ ភន្តេ ព្រាហ្មណោ អាយស្មន្តំ អានន្ទំ ឯតទវោច ‘‘អត្ថិ នុ ខោ ភោ អានន្ទ ឯកភិក្ខុបិ តេហិ ធម្មេហិ សព្ពេន សព្ពំ សព្ពថា សព្ពំ សមន្នាគតោ, យេហិ ធម្មេហិ សមន្នាគតោ សោ ភវំ គោតមោ អហោសិ អរហំ សម្មាសម្ពុទ្ធោ’’តិ, តស្មិំ ភន្តេ វត្ថុស្មិំ ភាសិតំ.

បុច្ឆា – កថញ្ចាវុសោ ¶ តត្ថ អាយស្មតា អានន្ទត្ថេរេន ធម្មភណ្ឌាគារិកេន ភិក្ខុនោ បសាទនីយា ធម្មា បកាសិតា, យេ តេន ភគវតា ជានតា បស្សតា អរហតា សម្មាសម្ពុទ្ធេន អក្ខាតា. យេហិ ច សមន្នាគតំ ភិក្ខុំ អញ្ញេ ភិក្ខូ សក្ករេយ្យុំ គរុំ ករេយ្យុំ មានេយ្យុំ បូជេយ្យុំ សក្កត្វា គរុំ កត្វា ឧបនិស្សាយ វិហរេយ្យុំ.

វិស្សជ្ជនា – ឥធ ព្រាហ្មណ ភិក្ខុ សីលវា ហោតិ, បាតិមោក្ខសំវរសំវុតោ វិហរតិ អាចារគោចរសម្បន្នោ អណុមត្តេសុ វជ្ជេសុ ភយទស្សាវី, សមាទាយ សិក្ខតិ សិក្ខាបទេសុ, ពហុស្សុតោ ហោតិ សុតធរោ សុតសន្និចយោ, យេមេ ធម្មា អាទិកល្យាណា មជ្ឈេកល្យាណា បរិយោសានកល្យាណា សាត្ថំ សព្យញ្ជនំ កេវលបរិបុណ្ណំ បរិសុទ្ធំ ព្រហ្មចរិយំ អភិវទន្តិ, តថារូបស្ស ធម្មា ពហុស្សុតា ហោន្តិ ធាតា វចសា បរិចិតា មនសានុបេក្ខិតា ទិដ្ឋិយា សុប្បដិវិទ្ធាតិ ឯវមាទិនា ភន្តេ តត្ថ អាយស្មតា អានន្ទត្ថេរេន ធម្មភណ្ឌាគារិកេន ទស បសាទនីយា ធម្មា បកាសិតា. យេ តេន ភគតា ជានតា បស្សតា អរហតា សម្មាសម្ពុទ្ធេន អក្ខាតា, យេហិ សមន្នាគតំ ភិក្ខុំ ឯតរហិ ភិក្ខូ សក្ករេយ្យុំ គរុំ ករេយ្យុំ មានេយ្យុំ បូជេយ្យុំ សក្កត្វា គរុំ កត្វា ឧបនិស្សាយ វិហរេយ្យុំ.

បុច្ឆា – ឯវំ ¶ វុត្តេ ខោ អាវុសោ វស្សការោ ព្រាហ្មណោ មគធមហាមត្តោ កីទិសំ បសំសាវចនំ កថេសិ, កថញ្ចស្ស អាយស្មា អានន្ទត្ថេរោ ធម្មភណ្ឌាគារិកោ តំ វចនំ បដិសោធេត្វា បកាសេសិ.

វិស្សជ្ជនា – ឯវំ ¶ វុត្តេ វស្សការោ ព្រាហ្មណោ មគធមហាមត្តោ ឧបនន្ទំ សេនាបតិំ អាមន្តេសិ ‘‘តំ កិំ មញ្ញសិ ភវំ សេនាបតិ, យទិ មេ ភោន្តោ សក្កាតព្ពំ សក្ករោន្តិ, គរុំ កាតព្ពំ គរុំ ករោន្តិ, មានេតព្ពំ មានេន្តិ, បូជេតព្ពំ បូជេន្តី’’តិ ឯវមាទិកំ បសំសាវចនំ កថេសិ, អាយស្មា ច ភន្តេ អានន្ទោ ‘‘ន ច ខោ ព្រាហ្មណ សោ ភគវា សព្ពំ ឈានំ វណ្ណេសិ, នបិ សោ ភគវា សព្ពំ ឈានំ ន វណ្ណេសី’’តិ ឯវមាទិនា តំ វចនំ បដិសោធេត្វា បកាសេសិ.

បុច្ឆា – មហាបុណ្ណមសុត្តំ ¶ បនាវុសោ ភគវតា កត្ថ កំ អារព្ភ កិស្មិំ វត្ថុស្មិំ ភាសិតំ.

វិស្សជ្ជនា – សាវត្ថិយំ ភន្តេ អញ្ញតរំ សដ្ឋិមត្តានំ បធានីយភិក្ខូនំ សង្ឃត្ថេរំ ភិក្ខុំ អារព្ភ ភាសិតំ, អញ្ញតរោ ភន្តេ

សដ្ឋិមត្តានំ ¶ បធានីយភិក្ខូនំ សង្ឃត្ថេរោ ភិក្ខុ ឧដ្ឋាយាសនា ឯកំសំ ចីវរំ កត្វា យេន ភគវា តេនញ្ជលិំ បណាមេត្វា ភគវន្តំ ឯតទវោច ‘‘បុច្ឆេយ្យាហំ ភន្តេ ភគវន្តំ កិញ្ចិទេវ ទេសំ, សចេ មេ ភគវា ឱកាសំ ករោតិ បញ្ហស្ស វេយ្យាករណាយា’’តិ, តស្មិំ ភន្តេ វត្ថុស្មិំ ភាសិតំ.

បុច្ឆា – ចូឡបុណ្ណមសុត្តំ ¶ បនាវុសោ ភគវតា កត្ថ កំ អារព្ភ ភាសិតំ.

វិស្សជ្ជនា – សាវត្ថិយំ ភន្តេ សម្ពហុលេ ភិក្ខូ អារព្ភ ភាសិតំ.

បុច្ឆា – កថញ្ចាវុសោ ¶ តត្ថ ភគវតា អសប្បុរិសអង្គានិ វិភជិត្វា បកាសិតានិ.

វិស្សជ្ជនា – អសប្បុរិសោ ភិក្ខវេ អស្សទ្ធម្មសមន្នាគតោ ហោតិ, អសប្បុរិសភត្តិ ហោតិ, អសប្បុរិសចិន្តី ហោតិ, អសប្បុរិសមន្តី ហោតិ, អសប្បុរិសវាចោ ហោតិ, អសប្បុរិសកម្មន្តោ ហោតិ, អសប្បុរិសទិដ្ឋិ ហោតិ, អសប្បុរិសទានំ ទេតីតិ ឯវមាទិនា ភន្តេ តត្ថ ភគវតា អដ្ឋ អសប្បុរិសអង្គានិ វិភជិត្វា បកាសិតានិ.

បុច្ឆា – កថំ ¶ បនាវុសោ ភគវតា តត្ថ សប្បុរិសអង្គានិ វិភជិត្វា បកាសិតានិ.

វិស្សជ្ជនា – សប្បុរិសោ ភិក្ខវេ សទ្ធម្មសមន្នាគតោ ហោតិ, សប្បុរិសភត្តិ ហោតិ, សប្បុរិសចិន្តី ហោតិ, សប្បុរិសមន្តី ហោតិ, សប្បុរិសវាចោ ហោតិ, សប្បុរិសកម្មន្តោ ហោតិ, សប្បុរិសទិដ្ឋិ ហោតិ, សប្បុរិសទានំ ទេតីតិ ឯវមាទិនា ភន្តេ ភគវតា តត្ថ អដ្ឋវិធានិ សប្បុរិសង្គានិ វិភជិត្វា បកាសិតានិ.

បុច្ឆា – អនុបទសុត្តំ ¶ បនាវុសោ ភគវតា កត្ថ កំ អារព្ភ កិស្មិំ វត្ថុស្មិំ ភាសិតំ.

វិស្សជ្ជនា – សាវត្ថិយំ ភន្តេ សម្ពហុលេ ភិក្ខូ អារព្ភ ភាសិតំ, សម្ពហុលា ភន្តេ ភិក្ខូ អាយស្មតោ សារិបុត្តស្ស ធម្មសេនាបតិស្ស សភាគា តស្មិំ សមយេ សន្និបតិំសុ, តស្មិំ ភន្តេ វត្ថុស្មិំ ភាសិតំ.

បុច្ឆា – កថញ្ចាវុសោ ¶ តត្ថ ភគវតា អាយស្មតោ សារិបុត្តស្ស ធម្មសេនាបតិស្ស អនុបទធម្មវិបស្សនា វិត្ថារេន វិភជិត្វា បកាសិតា.

វិស្សជ្ជនា – បណ្ឌិតោ ភិក្ខវេ សារិបុត្តោ មហាបញ្ញោ ភិក្ខវេ សារិបុត្តោ បុថុបញ្ញោ ភិក្ខវេ សារិបុត្តោ ហាសបញ្ញោ ¶ ភិក្ខវេ សារិបុត្តោ តិក្ខបញ្ញោ ភិក្ខវេ សារិបុត្តោ ជវនបញ្ញោ ភិក្ខវេ សារិបុត្តោ និព្ពេធិកបញ្ញោ ភិក្ខវេ សារិបុត្តោ សារិបុត្តោ ភិក្ខវេ អឌ្ឍមាសំ អនុបទធម្មវិបស្សនំ វិបស្សតីតិ ឯវមាទិនា ភន្តេ តត្ថ ភគវតា អាយស្មតោ សារិបុត្តស្ស ធម្មសេនាបតិស្ស អនុបទធម្មវិបស្សនា វិត្ថារេន បកាសិតា.

បុច្ឆា – តេនាវុសោ…បេ… ¶ សម្មាសម្ពុទ្ធេន ឆព្ពិសោធនសុត្តំ កត្ថ កំ អារព្ភ ភាសិតំ.

វិស្សជ្ជនា – សាវត្ថិយំ ភន្តេ សម្ពហុលេ ភិក្ខូ អារព្ភ ភាសិតំ.

បុច្ឆា – សប្បុរិសសុត្តំ ¶ បនាវុសោ ភគវតា កត្ថ កំ អារព្ភ ភាសិតំ.

វិស្សជ្ជនា – សាវត្ថិយំ ភន្តេ សម្ពហុលេ ភិក្ខូ អារព្ភ ភាសិតំ.

បុច្ឆា – សេវិតព្ពាសេវិតព្ពសុត្តំ ¶ បនាវុសោ ភគវតា កត្ថ កំ អារព្ភ កេន សទ្ធិំ ភាសិតំ.

វិស្សជ្ជនា – សាវត្ថិយំ ភន្តេ សម្ពហុលេ ភិក្ខូ អារព្ភ អាយស្មតា សារិបុត្តត្ថេរេន ធម្មសេនាបតិនា សទ្ធិំ ភាសិតំ.

បុច្ឆា – ពហុធាតុកសុត្តំ ¶ បនាវុសោ កត្ថ កំ អារព្ភ ភាសិតំ.

វិស្សជ្ជនា – សាវត្ថិយំ ភន្តេ សម្ពហុលេ ភិក្ខូ អារព្ភ ភាសិតំ.

បុច្ឆា – ឥសិគិលិសុត្តំ បនាវុសោ ភគវតា កត្ថ កំ អារព្ភ ភាសិតំ.

វិស្សជ្ជនា – រាជគហេ ភន្តេ ឥសិគិលិស្មិំ បព្ពតេ សម្ពហុលេ ភិក្ខូ អារព្ភ ភាសិតំ.

បុច្ឆា – មហាចត្តារីសកសុត្តំ ¶ បនាវុសោ ភគវតា កត្ថ កំ អារព្ភ ភាសិតំ.

វិស្សជ្ជនា – សាវត្ថិយំ ភន្តេ សម្ពហុលេ ភិក្ខូ អារព្ភ ភាសិតំ.

បុច្ឆា – អានាបានស្សតិសុត្តំ ¶ បនាវុសោ ភគវតា កត្ថ កំ អារព្ភ កិស្មិំ វត្ថុស្មិំ ភាសិតំ.

វិស្សជ្ជនា – សាវត្ថិយំ ភន្តេ សម្ពហុលេ ភិក្ខូ អារព្ភ ភាសិតំ, ថេរា ភន្តេ ភិក្ខូ នវេ ភិក្ខូ ឱវទន្តិ អនុសាសន្តិ, អប្បេកច្ចេ ថេរា ភិក្ខូ ទសបិ ភិក្ខូ ឱវទន្តិ អនុសាសន្តិ, អប្បេកច្ចេ ថេរា ភិក្ខូ វីសម្បិ ភិក្ខូ ឱវទន្តិ អនុសាសន្តិ, អប្បេកច្ចេ ថេរា ភិក្ខូ តិំសម្បិ ភិក្ខូ ឱវទន្តិ អនុសាសន្តិ, អប្បេកច្ចេ ថេរា ភិក្ខូ ចត្តារីសម្បិ ភិក្ខូ ឱវទន្តិ អនុសាសន្តិ, តេ ច ភន្តេ នវា ភិក្ខូ ថេរេហិ ភិក្ខូហិ ឱវទិយមានា អនុសាសិយមានា ឧឡារំ បុព្ពេនាបរំ វិសេសំ ជានន្តិ, តស្មិំ ភន្តេ វត្ថុស្មិំ ភាសិតំ.

បុច្ឆា – កាយគតាសតិសុត្តំ បនាវុសោ ភគវតា កត្ថ កំ អារព្ភ កិស្មិំ វត្ថុស្មិំ ភាសិតំ.

វិស្សជ្ជនា – សាវត្ថិយំ ភន្តេ សម្ពហុលេ ភិក្ខូ អារព្ភ ភាសិតំ, សម្ពហុលានំ ភន្តេ ភិក្ខូនំ បច្ឆាភត្តំ បិណ្ឌបាតបដិក្កន្តានំ ឧបដ្ឋានសាលាយំ សន្និសិន្នានំ សន្និបតិតានំ អយមន្តរកថា ឧទបាទិ ‘‘អច្ឆរិយំ អាវុសោ, អព្ភុតំ អាវុសោ, យាវញ្ចិទំ តេន ភគវតា ជានតា បស្សតា អរហតា សម្មាសម្ពុទ្ធេន កាយគតាសតិ ភាវិតា ពហុលីកតា មហប្ផលា វុត្តា មហានិសំសា’’តិ, តស្មិំ ភន្តេ វត្ថុស្មិំ ភាសិតំ.

បុច្ឆា – សង្ខារូបបត្តិសុត្តំ ¶ បនាវុសោ ភគវតា កត្ថ កំ អារព្ភ ភាសិតំ.

វិស្សជ្ជនា – សាវត្ថិយំ ភន្តេ សម្ពហុលេ ភិក្ខូ អារព្ភ ភាសិតំ.

បុច្ឆា – កថញ្ចាវុសោ តត្ថ ភគវតា សង្ខារូបបត្តិយោ វិភជិត្វា បកាសិតា.

វិស្សជ្ជនា – ឥធ ភិក្ខវេ ភិក្ខុ សទ្ធាយ សមន្នាគតោ ហោតិ, សីលេន សមន្នាគតោ ហោតិ, សុតេន សមន្នាគតោ ហោតិ, ចាគេន សមន្នាគតោ ហោតិ, បញ្ញាយ សមន្នាគតោ ហោតិ, តស្ស ឯវំ ហោតិ ‘‘អហោ វតាហំ កាយស្ស ភេទា បរំ មរណា ខត្តិយមហាសាលានំ សហព្យតំ ឧបបជ្ជេយ្យ’’ន្តិ ឯវមាទិនា ភន្តេ តត្ថ ភគវតា សង្ខារូបបត្តិយោ វិភជិត្វា បកាសិតា.

បុច្ឆា – ចូឡសុញ្ញតសុត្តំ ¶ បនាវុសោ ភគវតា កត្ថ កំ អារព្ភ កិស្មិំ វត្ថុស្មិំ ភាសិតំ.

វិស្សជ្ជនា – សាវត្ថិយំ ភន្តេ អាយស្មន្តំ អានន្ទំ អារព្ភ ភាសិតំ, អាយស្មា ភន្តេ អានន្ទោ សាយន្ហសមយំ បដិសល្លានា វុដ្ឋិតោ ភគវន្តំ ឯតទវោច ‘‘ឯកមិទំ ភន្តេ សមយំ ភគវា សក្កេសុ វិហរតិ នគរកំ នាម សក្យានំ និគមោ, តត្ថ មេ ភន្តេ ភគវតោ សម្មុខា សុតំ, សម្មុខា បដិគ្គហិតំ, សុញ្ញតាវិហារេនាហំ អានន្ទ ឯតរហិ ពហុលំ វិហរាមីតិ កច្ចិ មេតំ ភន្តេ សុស្សុតំ សុគ្គហិតំ សុមនសិកតំ សូបធារិត’’ន្តិ, តស្មិំ ភន្តេ វត្ថុស្មិំ ភាសិតំ.

បុច្ឆា – មហាសុញ្ញតសុត្តំ ¶ បនាវុតោ ភគវតា កត្ថ កំ អារព្ភ កិស្មិំ វត្ថុស្មិំ ភាសិតំ.

វិស្សជ្ជនា – សក្កេសុ ភន្តេ កបិលវត្ថុស្មិំ អាយស្មន្តំ អានន្ទំ អារព្ភ ភាសិតំ, អាយស្មា ភន្តេ អានន្ទោ សម្ពហុលេហិ ភិក្ខូហិ សទ្ធិំ ឃដាយ សក្កស្ស វិហារេ ចីវរកម្មំ ករោតិ, តស្មិំ ភន្តេ វត្ថុស្មិំ ភាសិតំ.

បុច្ឆា – អច្ឆរិយអព្ភុតសុត្តំ ¶ បនាវុសោ ភគវតា កត្ថ កំ អារព្ភ កិស្មិំ វត្ថុស្មិំ កេន សទ្ធិំ ភាសិតំ.

វិស្សជ្ជនា – សាវត្ថិយំ ភន្តេ សម្ពហុលេ ភិក្ខូ អារព្ភ អាយស្មតា អានន្ទត្ថេរេន ធម្មភណ្ឌាគារិកេន សទ្ធិំ ភាសិតំ. សម្ពហុលានំ ភន្តេ ភិក្ខូនំ បច្ឆាភត្តំ បិណ្ឌបាតបដិក្កន្តានំ ឧបដ្ឋានសាលាយំ សន្និសិន្នានំ សន្និបតិតានំ អយមន្តរកថា ឧទបាទិ ‘‘អច្ឆរិយំ អាវុសោ, អព្ភុតំ អាវុសោ តថាគតស្ស មហិទ្ធិកតា មហានុភាវតា. យត្រ ហិ នាម តថាគតោ អតីតេ ពុទ្ធេ បរិនិព្ពុតេ ឆិន្នបបញ្ចេ ឆិន្នវដុមេ បរិយាទិន្នវដ្ដេ សព្ពទុក្ខវីតិវត្តេ ជានិស្សតិ. ឯវំជច្ចា តេ ភគវន្តោ អហេសុំ ឥតិបិ, ឯវំនាមា តេ ភគវន្តោ អហេសុំ ឥតិបិ, ឯវំគោត្តា តេ ភគវន្តោ អហេសុំ ឥតិបិ, ឯវំសីលា តេ ភគវន្តោ អហេសុំ ឥតិបិ, ឯវំធម្មា តេ ភគវន្តោ អហេសុំ ឥតិបិ, ឯវំបញ្ញា ¶ តេ ភគវន្តោ អហេសុំ ឥតិបិ, ឯវំវិហារី តេ ភគវន្តោ អហេសុំ ឥតិបិ, ឯវំវិមុត្តា តេ ភគវន្តោ អហេសុំ ឥតិបី’’តិ, តស្មិំ ភន្តេ វត្ថុស្មិំ ភាសិតំ.

បុច្ឆា – ពាកុលសុត្តំ ¶ បនាវុសោ កត្ថ កំ អារព្ភ កេន ភាសិតំ.

វិស្សជ្ជនា – រាជគហេ ភន្តេ អចេលំ កស្សបំ អារព្ភ អាយស្មតា ពាកុលត្ថេរេន ភាសិតំ.

បុច្ឆា – ទន្តភូមិសុត្តំ បនាវុសោ ភគវតា កត្ថ កំ អារព្ភ កិស្មិំ វត្ថុស្មិំ ភាសិតំ.

វិស្សជ្ជនា – រាជគហេ ភន្តេ ជយសេនំ រាជកុមារំ អារព្ភ ភាសិតំ. ជយសេនោ ភន្តេ រាជកុមារោ អចិរវតំ សមណុទ្ទេសំ ឧបសង្កមិត្វា ឯតទវោច ‘‘សុតំ មេតំ ភោ អគ្គិវេស្សន ឥធ ភិក្ខុ អប្បមត្តោ អាតាបី បហិតត្តោ វិហរន្តោ ផុសេយ្យ ¶ ចិត្តស្ស ឯកគ្គត’’ន្តិ, តស្មិំ ភន្តេ វត្ថុស្មិំ ភាសិតំ.

បុច្ឆា – កថញ្ចាវុសោ ¶ តត្ថ ភគវតា អចិរវតស្ស សមណុទ្ទេសស្ស សមស្សាសេត្វា ធម្មទេសនានយោ បកាសិតោ.

វិស្សជ្ជនា – តំ កុតេត្ថ អគ្គិវេស្សន លព្ភា, យំ តំ នេក្ខម្មេន ញាតព្ពំ នេក្ខម្មេន ទដ្ឋព្ពំ នេក្ខម្មេន បត្តព្ពំ នេក្ខម្មេន សច្ឆិកាតព្ពំ, តំ វត ជយសេនោ រាជកុមារោ កាមមជ្ឈេ វសន្តោ កាមេ បរិភុញ្ជន្តោ កាមវិតក្កេហិ ខជ្ជមានោ កាមបរិឡាហេន បរិឌយ្ហមានោ កាមបរិយោសនាយ ឧស្សុកោ ឧស្សតិ វា ទក្ខតិ វា សច្ឆិ វា ករិស្សតីតិ នេតំ ឋានំ វិជ្ជតីតិ ឯវំ ខោ ភន្តេ ភគវតោ អចិរវតស្ស សមណុទ្ទេសស្ស សមស្សាសេត្វា, សេយ្យថាបិស្សុ អគ្គិវេស្សន ទ្វេ ហត្ថិទម្មា វា អស្សទម្មាវា គោទម្មា វា សុទន្តា សុវិនីតាតិ ឯវមាទិនា ភន្តេ ភគវតា អចិរវតស្ស សមណុទ្ទេសស្ស ទេសនានយោ បកាសិតោ.

បុច្ឆា – កថញ្ចាវុសោ ¶ តត្ថ ភគវា ទ្វេ ឧបមាយោ ទស្សេត្វា តតុត្តរិ ធម្មទេសនំ បវឌ្ឍេតិ.

វិស្សជ្ជនា – សេយ្យថាបិ អគ្គិវេស្សន រាជាខត្តិយោ មុទ្ធាវសិត្តោ នាគវនិកំ អាមន្តេតីតិ ឯវមាទិនា ភន្តេ ភគវា ឧត្តរិបិ ធម្មទេសនំ បវឌ្ឍេសិ.

បុច្ឆា – តេនាវុសោ…បេ… ¶ សម្មាសម្ពុទ្ធេន ភូមិជសុត្តំ កត្ថ កំ អារព្ភ កិស្មិំ វត្ថុស្មិំ ភាសិតំ.

វិស្សជ្ជនា – រាជគហេ ភន្តេ ជយសេនំ រាជកុមារំ អារព្ភ ភាសិតំ, ជយសេនោ ភន្តេ រាជកុមារោ អាយស្មន្តំ ភូមិជំ ឯតទវោច ‘‘សន្តិ ភោ ភូមិជ ឯកេ សមណព្រាហ្មណា ឯវំវាទិនោ ឯវំទិដ្ឋិនោ ‘អាសញ្ចេបិ ករិត្វា ព្រហ្មចរិយំ ចរន្តិ, អភព្ពា ផលស្ស អធិគមាយ. អនាសញ្ចេបិ ករិត្វា ព្រហ្មចរិយំ ចរន្តិ, អភព្ពា ផលស្ស អធិគមាយ. អាសញ្ច អនាសញ្ចេបិ ករិត្វា ព្រហ្មចរិយំ ចរន្តិ, អភព្ពា ផលស្ស អធិគមាយ ¶ . នេវាសំ នានាសញ្ចេបិ ករិត្វា ព្រហ្មចរិយំ ចរន្តិ, អាភព្ពា ផលស្ស អធិគមាយា’តិ. ឥធ ភោតោ ភូមិជស្ស សត្ថា កិំវាទី កិមក្ខាយី’’តិ តស្មិំ ភន្តេ វត្ថុស្មិំ ភាសិតំ.

បុច្ឆា – កថញ្ចាវុសោ ¶ តត្ថ ភគវតា អាយស្មតោ ភូមិជត្ថេរស្ស តំ ព្យាករណំ សមនុជានិត្វា តតុត្តរិ ធម្មទេសនានយោ បរិបូរេត្វា បកាសិតោ.

វិស្សជ្ជនា – តគ្ឃ ត្វំ ភូមិជ ឯវំ បុដ្ឋោ ឯវំ ព្យាករមានោ វុត្តវាទី ចេវ មេ ហោសិ, ន ច មំ អភូតេន អព្ភាចិក្ខសិ, ឯវមាទិនា ភន្តេ ភគវតា អាយស្មតោ ភូមិជស្ស តំ វចនំ សមនុជានិត្វា ‘‘យេហិ កេហិចិ ភូមិជ សមណា វា ព្រាហ្មណា វា មិច្ឆាទិដ្ឋិនោ មិច្ឆាសង្កប្បា មិច្ឆាវាចា មិច្ឆាកម្មន្តា មិច្ឆាអាជីវា មិច្ឆាវាយាមា មិច្ឆាសតី មិច្ឆាសមាធិនោ, តេ អាសញ្ចេបិ ករិត្វា ព្រហ្មចរិយំ ចរន្តិ, អភព្ពា ផលស្ស អធិគមាយា’’តិ ឯវមាទិនា ភន្តេ ភគវតា អាយស្មតោ ភូមិជស្ស ឧត្តរិ ទេសនានយោ បរិបូរេត្វា បកាសិតោ.

បុច្ឆា – អនុរុទ្ធសុត្តំ ¶ បនាវុសោ កត្ថ កំ អារព្ភ កិស្មិំ វត្ថុស្មិំ កេន ភាសិតំ.

វិស្សជ្ជនា – សាវត្ថិយំ ភន្តេ បញ្ចកង្គំ ថបតិំ អារព្ភ អាយស្មតា អនុរុទ្ធត្ថេរេន ភាសិតំ, បញ្ចកង្គោ ភន្តេ ថបតិ អាយស្មន្តំ អនុរុទ្ធំ ឯតទវោច ‘‘ឥធ មំ ភន្តេ ថេរា ភិក្ខូ ឧបសង្កមិត្វា ឯវមាហំសុ ‘អប្បមាណំ គហបតិ ចេតោវិមុត្តិំ ភាវេហី’តិ, ឯកច្ចេ ថេរា ឯវមាហំសុ ‘មហគ្គតំ គហបតិ ចេតោវិមុត្តិំ ភាវេហី’’តិ, យា ចាយំ ភន្តេ អប្បមាណា ចេតោវិមុត្តិ យា ច មហគ្គតា ចេតោវិមុត្តិ, ឥមេ ធម្មា នានត្ថា ចេវ នានាព្យញ្ជនា ច, ឧទាហុ ឯកត្ថា ព្យញ្ជនមេវ នានន្តិ’’ តស្មិំ ភន្តេ វត្ថុស្មិំ ភាសិតំ.

បុច្ឆា – ឧបក្កិលេសសុត្តំ ¶ បនាវុសោ ភគវតា កត្ថ កំ អារព្ភ ភាសិតំ.

វិស្សជ្ជនា – បាចីនវំសទាយេ ភន្តេ អាយស្មន្តំ អនុរុទ្ធត្ថេរំ អារព្ភ ភាសិតំ.

បុច្ឆា – ពាលបណ្ឌិតសុត្តំ ¶ បនាវុសោ ភគវតា កត្ថ កំ អារព្ភ ភាសិតំ.

វិស្សជ្ជនា – សាវត្ថិយំ ភន្តេ សម្ពហុលេ ភិក្ខូ អារព្ភ ភាសិតំ.

បុច្ឆា – កថញ្ចាវុសោ តត្ថ ភគវតា ពាលស្ស ពាលលក្ខណានិ ច ពាលស្ស ទិដ្ឋេវ ធម្មេ ទុក្ខទោមនស្សប្បដិសំវេទនា ច បកាសិតា.

វិស្សជ្ជនា – តីណិមានិ ភិក្ខវេ ពាលស្ស ពាលលក្ខណានិ ពាលនិមិត្តានិ ពាលាបទានានិ. កតមានិ តីណិ. ឥធ ភិក្ខវេ ពាលោ ទុច្ចិន្តិតចិន្តី ¶ ច ហោតិ ទុព្ភាសិតភាសី ច ទុក្កដកម្មការី ចាតិ ឯវមាទិនា ភន្តេ តត្ថ ភគវតា ពាលស្ស ពាលលក្ខណានិ ច ពាលស្ស ទិដ្ឋេវ ធម្មេ ទុក្ខទោមនស្សប្បដិសំវេទនា ច បកាសិតា.

បុច្ឆា – កថញ្ចាវុសោ ¶ តត្ថ ភគវតា ពាលស្ស សម្បរាយោ ច តត្ថ និរយេ ពាលស្ស ទុក្ខទោមនស្សបដិសំវេទនា ច បកាសិតា.

វិស្សជ្ជនា – ស ខោ សោ ភិក្ខវេ ពាលោ កាយេន ទុច្ចរិតំ ចរិត្វា វាចាយ ទុច្ចរិតំ ចរិត្វា មនសា ទុច្ចរិតំ ចរិត្វា កាយស្ស ភេទាបរំ មរណា អបាយំ ទុគ្គតិំ វិនិបាតំ និរយំ ឧបបជ្ជតីតិ ឯវមាទិនា ភន្តេ តត្ថ ភគវតា ពាលស្ស សម្បរាយោ ច តត្ថ ច ពាលស្ស និរយេ ទុក្ខទោមនស្សប្បដិសំវេទនា បកាសិតា.

បុច្ឆា – កថញ្ចាវុសោ ¶ តត្ថ ភគវតា ពាលស្ស តិរច្ឆានយោនិយំ ទុក្ខទោមនស្សបដិសំវេទនា បកាសិតា.

វិស្សជ្ជនា – សន្តិ ភិក្ខវេ តិរច្ឆានគតា បាណា តិណភក្ខា តេ អល្លានិបិ តិណានិ សុក្ខានិបិ តិណានិ ទន្តុល្លេហកំ ខាទន្តីតិ ឯវមាទិនា ភន្តេ តត្ថ ភគវតា ពាលស្ស តិរច្ឆានយោនិយំ ទុក្ខទោមនស្សប្បដិសំវេទនា បកាសិតា.

បុច្ឆា – កថញ្ចាវុសោ ¶ តត្ថ ភគវតា ពាលេន សកិំ វិនិបាតគតេន បុន មនុស្សត្តទុល្លភតា បកាសិតា.

វិស្សជ្ជនា – សេយ្យថាបិ ភិក្ខវេ បុរិសោ ឯកច្ឆិគ្គលំ យុគំ មហាសមុទ្ទេ បក្ខិបេយ្យ, តមេនំ បុរត្ថិមោ វាតោ បច្ឆិមេន សំហរេយ្យាតិ ឯវមាទិនា ភន្តេ តត្ថ ភគវតា ពាលេន សកិំ វិនិបាតគតេន បុន មនុស្សត្តស្ស ទុល្លភតា បកាសិតា.

បុច្ឆា – កថញ្ចាវុសោ ¶ តត្ថ ភគវតា ពាលស្ស កទាចិ ករហចិ ទីឃស្ស អទ្ធុនោ អច្ចយេន មនុស្សត្តំ អាគតស្សបិ ទុក្ខពហុលតា បកាសិតា.

វិស្សជ្ជនា – ស ខោ សោ ភិក្ខវេ ពាលោ សចេ កទាចិ ករហចិ ទីឃស្ស អទ្ធុនោ អច្ចយេន មនុស្សត្តំ អាគច្ឆតីតិ ឯវមាទិនា ភន្តេ តត្ថ ភគវតា ពាលស្ស កទាចិ ករហចិ ទីឃស្ស អទ្ធុនោ អច្ចយេន មនុស្សត្តំ អាគតស្សបិ ទុក្ខពហុលតា បកាសិតា.

បុច្ឆា – កថញ្ចាវុសោ ¶ តត្ថ ភគវតា បណ្ឌិតស្ស បណ្ឌិតលក្ខណានិ ច បណ្ឌិតស្ស ទិដ្ឋេវ ធម្មេ សុខសោមនស្សប្បដិសំវេទនា ច បកាសិតា.

វិស្សជ្ជនា – តីណិមានិ ភិក្ខវេ បណ្ឌិតស្ស បណ្ឌិតលក្ខណានិ បណ្ឌិតនិមិត្តានិ បណ្ឌិតាបទានានិ. កតមានិ តីណិ. ឥធ ភិក្ខវេ បណ្ឌិតោ សុចិន្តិតចិន្តី ច ហោតិ សុភាសិតភាសី ច សុកតកម្មការី ចាតិ ឯវមាទិនា ភន្តេ តត្ថ ភគវតា

បណ្ឌិតស្ស ¶ បណ្ឌិតលក្ខណានិ ច ទិដ្ឋេវ ធម្មេ បណ្ឌិតស្ស សុខសោមនស្សបដិសំវេទនា ច បកាសិតា.

បុច្ឆា – កថញ្ចាវុសោ ¶ តត្ថ ភគវតា បណ្ឌិតស្ស សម្បរាយោ ច តត្ថ សគ្គេ សុខសោមនស្សប្បដិសំវេទនា ច បកាសិតា.

វិស្សជ្ជនា – ស ខោ សោ ភិក្ខវេ បណ្ឌិតោ កាយេន សុចរិតំ ចរិត្វា វាចាយ មនសា សុចរិតំ ចរិត្វា កាយស្ស ភេទា បរំ មរណា សុគតិំ សគ្គំ លោកំ ឧបបជ្ជតីតិ ឯវមាទិនា ភន្តេ តត្ថ ភគវតា បណ្ឌិតស្ស សម្បរាយោ ច សគ្គេ ច បណ្ឌិតស្ស សុខសោមនស្សប្បនិសំវេទនា បកាសិតា.

បុច្ឆា – កថញ្ចាវុសោ ¶ តត្ថ ភគវតា បណ្ឌិតស្ស កទាចិ ករហចិ ទីឃស្ស អទ្ធុនោ អច្ចយេន មនុស្សត្តំ អាគតស្សបិ សុខពហុលតា បកាសិតា.

វិស្សជ្ជនា – ស ខោ សោ ភិក្ខវេ បណ្ឌិតោ សចេ កទាចិ ករហចិ ទីឃស្ស អទ្ធុនោ អច្ចយេន មនុស្សត្តំ អាគច្ឆតិ, យានិ តានិ ឧច្ចាកុលានិ ខត្តិយមហាសាលកុលំ វា ព្រាហ្មណមហាសាលកុលំ វា គហបតិមហាសាលកុលំ វា តថារូបេ កុលេ បច្ចាជាយតីតិ ឯវមាទិនា ភន្តេ តត្ថ ភគវតា បណ្ឌិតស្ស កទាចិ ករហចិ ទីឃស្ស អទ្ធុនោ អច្ចយេន មនុស្សត្តំ អាគតស្សបិ សុខពហុលតា បកាសិតា.

បុច្ឆា – តេនាវុសោ ¶ ជានតា បស្សតា…បេ… សម្មាសម្ពុទ្ធេន ចូឡកម្មវិភង្គសុត្តំ កត្ថ កំ អារព្ភ កិស្មិំ វត្ថុស្មិំ ភាសិតំ.

វិស្សជ្ជនា – សាវត្ថិយំ ភន្តេ សុភំ មាណវំ តោទេយ្យបុត្តំ អារព្ភ ភាសិតំ. សុភោ ភន្តេ មាណវោ តោទេយ្យបុត្តោ ភគវន្តំ ឧបសង្កមិត្វា ឯតទវោច ‘‘កោ នុ ខោ ភោ គោតម ហេតុ កោ បច្ចយោ, យេន មនុស្សានំយេវ សតំ មនុស្សភូតានំ ទិស្សន្តិ ហីនប្បណីតតា. ទិស្សន្តិ ហិ ភោ គោតម មនុស្សា អប្បាយុកា, ទិស្សន្តិ ទីឃាយុកា. ទិស្សន្តិ ពវ្ហាពាធា, ទិស្សន្តិ អប្បាពាធា. ទិស្សន្តិ ទុព្ពណ្ណា, ទិស្សន្តិ វណ្ណវន្តោ. ទិស្សន្តិ អប្បេសក្ខា, ទិស្សន្តិ មហេសក្ខា. ទិស្សន្តិ អប្បភោគា, ទិស្សន្តិ មហាភោគា. ទិស្សន្តិ នីចកុលីនា, ទិស្សន្តិ ឧច្ចាកុលីនា. ទិស្សន្តិ ទុប្បញ្ញា, ទិស្សន្តិ បញ្ញវន្តោ. កោ នុ ខោ ភោ គោតម ហេតុ កោ បច្ចយោ, យេន មនុស្សានំយេវ សតំ មនុស្សភូតានំ ទិស្សន្តិ ហីនប្បណីតតា’’តិ តស្មិំ ភន្តេ វត្ថុស្មិំ ភាសិតំ.

បុច្ឆា – កថញ្ចាវុសោ ¶ តត្ថ ភគវតា សត្តានំ ទីឃាយុកអប្បាយុកសំវត្តនកកម្មានិ វិភជិត្វា បកាសិតានិ.

វិស្សជ្ជនា – ឥធ មាណវ ឯកច្ចោ ឥត្ថី វា បុរិសោ វា បាណាតិបាតី ហោតិ, លុទ្ទោ លោហិតបាណិ ហតបហតេ និវិដ្ឋោ អទយាបន្នោ បាណភូតេសូតិ ឯវមាទិនា ភន្តេ តត្ថ ភគវតា អប្បាយុកទីឃាយុកសំវត្តនកានិ កម្មានិ វិភជិត្វា បកាសិតានិ.

បុច្ឆា – កថញ្ចាវុសោ ¶ តត្ថ ភគវតា សត្តានំ អប្បាពាធពវ្ហាពាធសំវត្តនកកម្មានិ វិភជិត្វា បកាសិតានិ.

វិស្សជ្ជនា – ឥធ ¶ មាណវ ឯកច្ចោ ឥត្ថី វា បុរិសោ វា សត្តានំ វិហេដ្ឋកជាតិកោ ហោតិ បាណិនា វា លេឌ្ឌុនាវា ទណ្ឌេនវា សត្ថេន វាតិ ឯវមាទិនា ភន្តេ តត្ថ ភគវតា សត្តានំ អប្បាពាធពវ្ហាពាធសំវត្តនកកម្មានិ វិភជិត្វា បកាសិតានិ.

បុច្ឆា – កថញ្ចាវុសោ ¶ តត្ថ ភគវតា សត្តានំ សុវណ្ណទុព្ពណ្ណសំវត្តនកកម្មានិ វិភជិត្វា បកាសិតានិ.

វិស្សជ្ជនា – ឥធ មាណវ ឯកច្ចោ ឥត្ថី វា បុរិសោ វា កោធនោ ហោតិ ឧបាយាសពហុលោ, អប្បម្បិ វុត្តោ សមានោ អភិសជ្ជតិ កុប្បតិ ព្យាបជ្ជតិ បតិដ្ឋិយតិ, កោបញ្ច ទោសញ្ច អប្បច្ចយញ្ច បាតុករោតីតិ ឯវមាទិនា ភន្តេ តត្ថ ភគវតា សត្តានំ សុវណ្ណទុព្ពណ្ណសំវត្តនកកម្មានិ វិភជិត្វា បកាសិតានិ.

បុច្ឆា – កថញ្ចាវុសោ ¶ តត្ថ ភគវតា សត្តានំ មហេសក្ខ អប្បេសក្ខសំវត្តនកកម្មានិ វិភជិត្វា បកាសិតានិ.

វិស្សជ្ជនា – ឥធ មាណវ ឯកច្ចោ ឥត្ថី វា បុរិសោ វា ឥស្សាមនកោ ហោតិ, បរលាភសក្ការ គរុការ មាននវន្ទន បូជាសុ ឥស្សតិ ឧបទុស្សតិ ឥស្សំ ពន្ធតីតិ ឯវមាទិនា ភន្តេ តត្ថ ភគវតា សត្តានំ អប្បេសក្ខមហេសក្ខសំវត្តនកានិ កម្មានិ វិភជិត្វា បកាសិតានិ.

បុច្ឆា – កថញ្ចាវុសោ ¶ តត្ថ ភគវតា មហាភោគអប្បភោគសំវត្តនកកម្មានិ វិភជិត្វា បកាសិតានិ.

វិស្សជ្ជនា – ឥធ មាណវ ឯកច្ចោ ឥត្ថី វា បុរិសោ វា ន ទាតា ហោតិ, សមណស្ស វា ព្រាហ្មណស្ស វា អន្នំ បានំ វត្តំ យានំ មាលាគន្ធ វិលេបនំ សេយ្យវសថបទីបេយ្យន្តិ ឯវមាទិនា ភន្តេ តត្ថ ភគវតា មហាភោគអប្បភោគសំវត្តនកកម្មានិ វិភជិត្វា បកាសិតានិ.

បុច្ឆា – កថញ្ចាវុសោ ¶ តត្ថ ភគវតា សត្តានំ ឧច្ចាកុលីន នីចកុលីនសំវត្តនកកម្មានិ វិភជិត្វា បកាសិតានិ.

វិស្សជ្ជនា – ឥធ មាណវ ឯកច្ចោ ឥត្ថី វា បុរិសោ វា ថទ្ធោ ហោតិ អតិមានិ អភិវាទេតព្ពំ ន អភិវាទេតិ, បច្ចុដ្ឋាតព្ពំ ន បច្ចុដ្ឋេតិ, អាសនារហស្ស ន អាសនំ ទេតិ, មគ្គារហស្ស ន មគ្គំ ទេតិ, សក្កាតព្ពំ ន សក្ករោតិ, គរុកាតព្ពំ ន គរុករោតិ, មានេតព្ពំ មានេតិ, បូជេតព្ពំ ន បូជេតីតិ ឯវមាទិនា ភន្តេ តត្ថ ភគវតា សត្តានំ ឧច្ចាកុលីន នីចកុលីនសំវត្តនកកម្មានិ វិភជិត្វា បកាសិតានិ.

បុច្ឆា – កថញ្ចាវុសោ ¶ តត្ថ ភគវតា សត្តានំ មហាបញ្ញទុប្បញ្ញសំវត្តនកកម្មានិ វិភជិត្វា បកាសិតានិ.

វិស្សជ្ជនា – ឥធ មាណវ ឯកច្ចោ ឥត្ថី វា បុរិសោ វា សមណំ វា ព្រាហ្មណំ វា ឧបសង្កមិត្វា ន បរិបុច្ឆិតា ហោតិ ‘‘កិំ ភន្តេ កុសលំ, កិំ អកុសលំ. កិំ សាវជ្ជំ, កិំ អនវជ្ជំ. កិំ សេវិតព្ពំ, កិំ ន សេវិតព្ពំ. កិំ មេ ករីយមានំ ទីឃរត្តំ អហិតាយ ទុក្ខាយ ហោតិ, កិំ វា បន មេ ករីយមានំ ¶ ទីឃរត្តំ ហិតាយ សុខាយ ហោតី’’តិ ឯវមាទិនា ភន្តេ តត្ថ ភគវតា សត្តានំ មហាបញ្ញទុប្បញ្ញសំវត្តនកកម្មានិ វិភជិត្វា បកាសិតានិ.

បុច្ឆា – ឥន្ទ្រិយភាវនាសុត្តំ ¶ បនាវុសោ ភគវតា កត្ថ កំ អារព្ភ កិស្មិំ វត្ថុស្មិំ ភាសិតំ.

វិស្សជ្ជនា – គជង្គលាយំ ភន្តេ ឧត្តរំ នាម មាណវំ បារាសិវិយន្តេវាសិំ អារព្ភ ភាសិតំ, ឧត្តរោ ភន្តេ មាណវោ បារាសិវិយន្តេវាសី ភគវតា បុដ្ឋោ ភគវន្តំ ឯតទវោច ‘‘ឥធ ភោ គោតម ចក្ខុនា រូបំ ន បស្សតិ, សោតេន សទ្ទំ ន សុណាតិ. ឯវំ ខោ ភោ គោតម ទេសេតិ បារាសិវិយោ ព្រាហ្មណោ សាវកានំ ឥន្ទ្រិយភាវន’’ន្តិ. តស្មិំ ភន្តេ វត្ថុស្មិំ ភាសិតំ.