📜

នមោ តស្ស ភគវតោ អរហតោ សម្មាសម្ពុទ្ធស្ស

នីតិមញ្ជរី

១.

កុលក្ខយេ វិនស្សន្តិ,

កុលធម្មា សនន្តនា;

ធម្មេ នដ្ឋេ កុលំ សព្ពំ,

អធម្មោ អភិភូ ខលំ.

២.

អធម្មាភិភវា ទន្តា,

បទុស្សន្តិ កុលិត្ថិយោ;

ថីសុ ទុដ្ឋា ស្វ ធម្មេន,

ជាយតេ វណ្ណសង្ករោ.

៣.

បិយំ ភាសេ គុណគ្គាហោ,

សូរោ សិយា វិកន្តនោ;

ទាតា ចន្ទសមា នារី,

ទិដ្ឋំ ទិដ្ឋំ នហាសយេ.

៤.

កុតោត្ថិ កុមិត្តេ សច្ចំ,

កុទារេ រតិវឌ្ឍនំ;

កុទេសម្ហិ មនោ រម្មំ,

កុរាជេ ភោគសម្បទំ.

សង្កេតេវ អមិត្តស្មិំ,

មិត្តស្មិំ បិ នវិស្សសេ;

អភយា ភយ មុប្បន្នំ,

អបិ មូលានិ កន្តតិ.

អទិដ្ឋោវ បរោ សេយ្យោ,

ទុម្មិត្តោ នោ វិស្សាសិកោ.

អគ្គិហោមផលំ វេទោ,

សត្ថំសីលផលំ មតំ;

រតិបុត្តផលំ នារី,

ទានភុត្តិផលំ ធនំ.

អសច្ចំ សាហសំ មាយា,

មូឡ្ហត្ត ម តិលោភតា;

អសោចំ និទ្ទយត្តញ្ច,

ថីនំ ទោសា សភាវជា.

ជាយាយ ភត្តុនោ ភារោ,

សិស្សេន គុរុនោ កតោ;

អមច្ចកេហិ រាជស្ស,

បិតរានំ និជេនច.

៥.

ឧយ្យមេន ហិ សិជ្ឈន្តិ,

កម្មានិ ន មនោរថា;

ន ហិ សុត្តស្ស សីហស្ស,

បវីសន្តិ មុខេ មិគា.

អតិសីតំ អតិឧណ្ហំ,

អតិសាយមិទំ អហុ;

ឥតិ វិសដ្ឋកម្មន្តេ,

ខណា អច្ចេន្តិ មាណវេ.

អាទានស្ស បទានស្ស,

កត្តព្ពស្ស ច កម្មុនោ;

ខិប្បំ អកយ្យមានស្ស,

កាលេ បិវតិ សម្បទំ.

នាទព្ពេ និហិតា កាចិ,

ក្រិយា ផលវតី ភវេ;

នព្យាបារសតេនាបិ,

សុកោវ បាឋតេ ពកោ.

យោ ទន្ធកាលេ តរតិ,

តរណីយេ ច ទន្ធយេ;

សុក្ខបណ្ណំ វ អក្កម្ម,

អត្ថំ ភញ្ជតិ អត្តនោ.

៦.

យំ ទទាតិ យំ ភុញ្ជតិ,

តទេវ ធនិនោ ធនំ;

អញ្ញេ មតស្ស កីឡន្តិ,

ទារេហិបិ ធនេហិបិ.

ទានោបភោគហីនេន,

ធនេន ធនិនោ សុខំ;

កោ វិសេសោ ទលិទ្ទស្ស,

អធិកំ ធនរក្ខណំ.

និជសោខ្យំ និរុន្ធន្តោ,

នីចភោគោ មិតម្បចោ;

ធនំ សញ្ចយតេ យោ សោ,

បរភារវហោ បសុ.

យំ ឧស្សុកា សង្ខរោន្តិ,

អលក្ខិកា ពហុំ ធនំ;

សិប្បវន្តោ អសិប្បាវា,

លក្ខិ វា តានិ ភុញ្ជតិ.

៧.

សម្បត្យំ មហតំ ចិត្តំ,

ភវេ ឧប្បលេ កោមលំ;

វិបត្យំច មហាសេល,

សិលាសង្ឃាតកក្កសំ.

៨.

អសម្ភព្យគុណំ ថុត្វា,

ខេទោ មុធាវ ជាយតេ;

អវ្ហាយំ ចន្ទ មុ ល្លោក្យ,

នចន្ទោត មុ បាគមី.

៩.

សច្ចំ មុខម្ហិ ធារេយ្យ,

កណ្ណេ សុតំ ភុជេ ជយំ;

ហទយម្ហិ ខមំ វីរំ,

លោកាទាសំច លោចនេ.

សទ្ទមត្តំ នផន្ទេយ្យ,

អញ្ញត្វា សទ្ទការណំ;

សទ្ទហេតុំ បរិញ្ញាយ,

បមោទោ វា ភយោ តថា.

សព្ពសុត ម ធីយេយ្យ,

ហីនមុក្កដ្ឋមជ្ឈិមំ.

១០.

ទុន្នារិយា កុលំ សុទ្ធំ,

បុត្តោ នស្សតិ លាលនា;

សមិទ្ធិ អនយា ពន្ធុ,

បវាសា មទនា ហិរី.

លាលយេ បញ្ចវស្សានិ,

ទសវស្សានិ តាលយេ;

បត្តេតុ សោឡសេវស្សេ,

បុត្តំ មិត្តំវ អាចរេ.

លាលនេ ពហវោ ទោសា,

លាលនេ ពហវោ គុណា.

បាបា និវារយតិ យោជយតេ ហិតាយ,

គុយ្ហានិ គូហតិ គុណំ បកដីករោតិ;

អាបត្តិកញ្ច នជហាតិ ទទាតិ កាលេ,

សម្មិត្ត លក្ខណមិទំ បវទន្តិ សន្តោ.

១១.

ទុជ្ជនោ ជីយតេ យុត្យា,

និគ្គហេន នធីមតា;

និបាត្យតេ មហារុក្ខោ,

តស្សមីប ខតិក្ខយា.

វនេ មិគាច លុទ្ធានំ,

ទុជ្ជនានញ្ច សជ្ជនា;

អការណវេរី ហោន្តិ,

តិណភក្ខា សុបេសលា.

បាទលគ្គំ ករដ្ឋេន,

កណ្ឌកេនេវ កណ្ឌកំ.

ពាលំ នបស្សេ នសុណេ,

នចពាលេន សំវសេ;

ពាលេនាល្លាបសល្លាបំ,

នករេ នចរោចយេ.

១២.

ឧប កត្តុំ យថា ខុទ្ទោ,

សមត្ថោ នតថាមហា;

កូបោ ហិ ហន្តិ បិបាសំ,

នតុ បាយោ មហម្ពុធិ.

១៣.

អាទានស្ស បទានស្ស,

កត្តព្ពស្សច កម្មុនោ;

ខិប្បំ អករមានស្ស,

កាលោ ភក្ខតិ តំ រសំ.

នក្ខត្តំ បដិមានេន្តំ,

អត្ថោ ពាលំ ឧបជ្ឈគា;

អត្ថោ អត្ថស្ស នក្ខត្តំ,

កិំ ករិស្សន្តិ តារកា.

អជរាមរោវ បញ្ញោ,

វិជ្ជមត្ថញ្ច ចិន្តយេ;

គហិតោវិយ កេសេសុ,

មច្ចុនា ធម្មមាចរេ.

១៤.

វជ្ជា គុរូច មន្តីច,

តយោ រដ្ឋាភិសង្ខតា;

ជីវីត ទក្ខ កោសានំ,

វឌ្ឍនា នាសនាច តេ.

១៥.

ថិរេន កម្មំ វឌ្ឍតិ,

អថិរេន តុរេន នោ;

ផលន្តិ សមយេ រុក្ខា,

សិត្តាបិ ពហុវារិនា.

វាយាមេថេវ បុរិសោ,

ននិព្ពិន្ទេយ្យ បណ្ឌិតោ.

បយតនោ តាទិសោ នេវ,

កយ្យោ យេន ផលំ នហិ;

សេលគ្គេ កូបខណនា,

កថំ តោយសមាគមោ.

ញាណង្កុសេន សម្មគ្គំ,

និយ្យត្យុស្សាហកុញ្ជរោ.

អសមេក្ខិតកម្មន្តំ,

តុរិតាភិ និបាតិនំ;

តានិកម្មានិ តប្បេន្តិ,

ឧណ្ហំ វ ជ្ឈោហិតំ មុខេ.

១៦.

ឆទ្ទោសា បុរិសេនេហ,

ហាតព្ពា ភូតិមិច្ឆន្តា;

និទ្ទា មជ្ជំ ភយំ កោធោ,

អាលស្យំ ទីឃសុត្តតា.

ន ទិវា សុប្បសីលេន,

រត្តិមុដ្ឋានទេស្សិនា;

និច្ចសោណ្ឌេន មត្តេន,

សក្កា អាវសិតុំ ឃរំ.

អភេតព្ពម្ហិ ភាយន្តិ,

ភាយិតព្ពេ នភាយរេ;

ភយាភយ វិមុឡ្ហា តេ,

ជិម្ហានុគា ឧជុញ្ជហា.

យស្ស មនុស្សភូតស្ស,

នត្ថិ ភោគាច សិប្បកំ;

កិំ ផលំ តស្ស មានុស្សំ,

ទ្វិបាទដ្ឋោ ហិ សោ មិគោ.

១៧.

នានោបាយោវ កត្តព្ពោ,

សចេ ភវេយ្យ អត្តនោ;

អត្ថសិទ្ធិ យថាកាមំ,

ឧបាយោ ហិ ហិតញ្ជសោ.

លញ្ជទានពាលិសេន,

កូដឌ្ឌការធីវរា;

វិនិច្ឆយមហាមច្ឆំ,

ឱដ្ដេន្តិ លោភសាគរេ.

យស្សេតេ ចតុរោ ធម្មា,

វានរិន្ទ យថាតវ;

សច្ចំ ធម្មោ ធីតិ ចាគោ,

ទិដ្ឋំ សោ អតិវត្តតិ.

១៨.

វិទ្វាច រតនំ នារី,

វីណា សាត្ថំ គិរំមហី;

គុណវិសេស មាគម្ម,

គុណានិ អគុណានិច.

ធនវា ពលវា លោកេ,

ធនា ភវតិ បណ្ឌិតោ.

សុមនេ និស្សិតោ កីដោ,

និគ្គុណោ ហីនកោ សយំ;

តំ បុប្ផេហិ មណ្ឌេន្តានំ,

រញ្ញំ សិរោបិ រោហតិ.

អលក្ខិកេហិ សញ្ចីតា,

ធនភោគាច ចិន្តិតា;

លក្ខិកស្ស ភវន្តេតេ,

លក្ខិវា សុដ្ឋុភុញ្ជតិ.

ខត្តិយោ សេដ្ឋោ ជនេ តស្មិំ,

យោ គោត្តបដិសារិនោ;

វិជ្ជាចរណសម្បន្នោ,

សោ សេដ្ឋោ ទេវមានុសេ.

វិសាបិ អមតំ គណ្ហេ,

គូថតោ មណិមុត្តមំ;

កណ្ដកបាទបា បុប្ផំ,

ថិរតំ ទុក្កុលា វរំ.

ធនិស្សរាទិគុណោម្មិ -

វេគេន វាហិតា បជា.

១៩.

យស្ស ត្ថិ សតតំ មេត្តា,

សព្ពលោកសុវល្លភា;

កូបាយតេ សមុទ្ទោបិ,

អគ្គិ តស្ស ជលាយតេ.

២០.

សក្ខរាយតិ មេរូបិ,

វិសភក្ខោ សុធាយតេ;

សសាយតេ មិគរាជ,

ព្យាលោ មាលាគុណាយតេ;

ទោលាយតេ ឆមាចាលោ,

នានាវុធា តិណាយរេ.

២១.

សមេវ សតិ ឧស្សាហេ,

សុខវាហោ ហិតង្ករោ;

ឩនេ-ធិកេ តថា នោហិ,

មជ្ឈគោ សាធុ សព្ពទា.

សាធុ ខោ បណ្ឌិតោនាម,

នត្វេវ អតិបណ្ឌិតោ.