📜

នមោ តស្ស ភគវតោ អរហតោ សម្មាសម្ពុទ្ធស្ស

សុត្តន្តនីតិ

១.

បរា ភវន្តំ បុរិសំ,

មយំ បុច្ឆាម គោតមំ;

ភវន្តំ បុដ្ឋុ មាគម្ម,

កិំ បរាភវតោ មុខំ.

២.

សុវិជានោ ភវំហោតិ,

ទុវិជានោ បរាភវោ;

ធម្មកាមោ ភវំ ហោតិ,

ធម្មទេស្សី បរាភវោ.

៣.

ឥតិហេ តំ វិជានាម,

បថមោ សោ បរាភវោ;

ទុតីយំ ភគវា ព្រូហិ,

កិំ បរាភវតោ មុខំ.

៤.

អសន្តស្ស បិយោ ហោតិ,

សន្តេ ន កុរុតេ បិយំ;

អសតំ ធម្មំ រោចេតិ,

តំ បរាភវតោ មុខំ.

កម្មាបរាធសត្តានំ,

វិនាសេ បច្ចុបដ្ឋិតេ;

អនយោ នយរូបេន,

ពុទ្ធិមាកម្យ តិដ្ឋតិ.

៥.

និទ្ទាសីលី សភាសីលី,

អនុដ្ឋាតា ច យោ នរោ;

អលសោ កោធបញ្ញាណោ,

តំ បរាភវតោ មុខំ.

៦.

យោ មាតរំ បិតរំ វា,

ជិណ្ណកំ គតយោព្ពនំ;

បហុសន្តោ ន ភរតិ,

តំ បរាភវតោ មុខំ.

៧.

យោ ព្រាហ្មណំ សមណំ វា,

អញ្ញំ វាបិ វណិព្ពកំ;

មុសាវាទេន វញ្ចេតិ,

តំ បរាភវតោ មុខំ.

៨.

បហុតវិត្តោ បុរិសោ,

សហិរញ្ញោ សភោជនោ;

ឯកោ ភុញ្ជតិ សាទូនិ,

តំ បរាភវតោ មុខំ.

៩.

ជាតិថទ្ធោ ធនថទ្ធោ,

គោត្តថទ្ធោ ច យោ នរោ;

សញាតិំ អតិមញ្ញេតិ,

តំ បរាភវតោ មុខំ.

១០.

ឥត្ថិធុត្តោ សុរាធុត្តោ,

អក្ខធុត្តោ ច យោ នរោ;

លទ្ធំលទ្ធំ វិនាសេតិ,

តំ បរាភវតោ មុខំ.

ន ពាឡ្ហំ ឥត្ថិំ គច្ឆេយ្យ,

សម្បស្សំ តេជសង្ខយំ;

កាសំ សាសំ ទរំ ពាល្យំ,

ខីណមេទោ និគច្ឆតិ.

(ក)

មាយាចេតា មរីចី ច,

សោកោ រោគោ ឧបទ្ទវោ;

ខរា ច ពន្ធនាចេតា,

មច្ចុបាសោ គុហាសយោ.

(ខ)

ពលវន្តោ ទុព្ពលា ហោន្តិ,

ថាមវន្តោបិ ហាយរេ;

ចក្ខុមា អន្ធកា ហោន្តិ,

មាតុគាមវសំគតា.

(គ)

គុណវន្តោ និគ្គុណា ហោន្តិ,

បញ្ញវន្តោបិ ហាយរេ;

បមុត្តា ពន្ធនា សេន្តិ,

មាតុគាមវសំគតា.

(ឃ)

យសំ កិត្តិំ ធិតិំ សូរំ;

ពាហុស្សច្ចំ បជាននំ;

ហាបយន្តិ បមត្តស្ស;

កដ្ឋបុញ្ចំវ បាវកោ.

១១.

សេហិ ទារេហិ សន្តុដ្ឋោ,

វេសិយាសុ បទុស្សតិ;

ទុស្សតិ បរទារេសុ,

តំ បរាភវតោ មុខំ.

(ក)

មយញ្ច ភរិយំ នាតិក្កមាម,

អម្ហេច ភរិយា នាតិក្កមន្តិ;

អញ្ញត្រ តាហិ ព្រហ្មចរិយំ ចរាម,

តស្មា ហិ អម្ហំ ទហរា ន មិយ្យរេ.

(ខ)

ឯតាសុ ជាយរេ សុត្តមាសុ,

មេធាវិនោ ហោន្តិ បហុតបញ្ញា;

ពហុស្សុតា ថេរគុណា ច ហោន្តិ,

តស្មា ហិ អម្ហំ ទហរា ន មិយ្យរេ.

១២.

អតីតយោព្ពនោ បោសោ,

អានេតិ តិម្ពរុត្ថនិំ;

តស្ស ឥស្សា ន សុបតិ,

តំ បរាភវតោ មុខំ.

(ក)

ន ទុក្ខំ អហិនា ទដ្ឋំ,

ន ទុក្ខំ សត្តិយា ហតំ;

តញ្ច ទុក្ខញ្ច តិព្ពញ្ច,

យំ បស្សេ ជិណ្ណកំ បតិំ.

(ខ)

នត្ថិ ខិដ្ដា នត្ថិ រតិ,

ជិណ្ណេន បតិនា សហ;

នត្ថិ អល្លាបសល្លាបោ,

ជគ្ឃិតុំបិ ន សោភតិ.

(គ)

យទា ច ទហរោ ទហរី,

មន្តយិំសុ រហោគតា;

សព្ពេ សោកា វិនស្សន្តិ,

យេកេចិ ហទយស្សិតា.

១៣.

ឥត្ថិំ សោណ្ឌិំ វិកិរណិំ,

បុរិសំ វាបិ តាទិសំ;

ឥស្សរិយស្មិំ ថបេតិ,

តំ បរាភវតោ មុខំ.

១៤.

អប្បភោគោ មហាតណ្ហោ,

ខត្តិយេ ជាយតេ កុលេ;

សោ ច រជ្ជំ បត្ថយតិ,

តំ បរាភវតោ មុខំ.

‘‘សុវិជានោ ភវំហោតិ,

ទុវិជានោ បរាភវោ’’;

អប្បភោគោ មហាតណ្ហោ.

១៥.

ឯតេ បរាភវេ លោកេ,

បណ្ឌិតោ សមវេក្ខិយ;

អរិយោ ទស្សនសម្បន្នោ,

ស លោកំ ភជតេ សិវំ.

វសលសុត្ត

១.

កោធនោ ឧបនាហីច,

បាបមក្ខី ច យោ នរោ;

វិបន្នទិដ្ឋី មាយាវី,

តំ ជញ្ញា វសលោ ឥតិ.

២.

ឯកជំ វា ទ្វិជំ វាបិ,

យោធ បាណំ វិហិំសតិ;

យស្ស បាណេ ទយា នត្ថិ,

តំ ជញ្ញា វសលោ ឥតិ.

៣.

យោ ហន្តិ ឧបរុន្ធតិ,

គាមានិ និគមានិ ច;

និគ្គាហកោ សមញ្ញាតោ,

តំ ជញ្ញា វសលោ ឥតិ.

៤.

គាមេ វា យទិ វា រញ្ញេ,

យំ បរេសំ មមាយិតំ;

ថេយ្យា អទិន្នំ អាទេតិ,

តំ ជញ្ញា វសលោ ឥតិ.

៥.

យោ ហវេ ឥណមាទាយ,

វុច្ចមានោ បលាយតិ;

ន ហិ តេ ឥណមត្ថីតិ,

តំ ជញ្ញា វសលោ ឥតិ.

៦.

យោធ កិញ្ចិក្ខកម្យតា,

បថស្មិំ វជតំ ជនំ;

ហន្ត្វា កិញ្ចិក្ខ មាទេតិ;

តំ ជញ្ញា វសលោ ឥតិ.

៧.

យោ អត្តហេតុ បរហេតុ,

ធនហេតុ ច យោ នរោ;

សក្ខិបុដ្ឋោ មុសាព្រូតិ,

តំ ជញ្ញា វសលោ ឥតិ.

៨.

យោ ញាតីនំ សខីនំ វា,

ទារេសុ បដិទិស្សតិ;

សហសា សម្បិយេន វា,

តំ ជញ្ញា វសលោ ឥតិ.

៩.

យោ ៤ មាតរំ បិតរំ វា,

ជិណ្ណកំ គតយោព្ពនំ;

បហុសន្តោ ន ភរតិ,

តំ ជញ្ញា វសលោ ឥតិ.

១០.

យោ មាតរំ បិតរំ វា,

ភាតរំ ភគិនិំ សស្សុំ;

ហន្តិ រោសេតិ វាចាយ,

តំ ជញ្ញា វសលោ ឥតិ.

១១.

យោ អត្ថំ បុច្ឆិតោ សន្តោ,

អនត្ថ មនុសាសតិ;

បដិច្ឆន្នេន មន្តេតិ,

តំ ជញ្ញា វសលោ ឥតិ.

១២.

យោ កត្វា បាបកំ កម្មំ,

មាមំ ជញ្ញាតិ ឥច្ឆតិ;

យោ បដិច្ឆន្នកម្មន្តោ,

តំ ជញ្ញា វសលោ ឥតិ.

១៣.

យោ វេ បរកុលំ គន្ត្វា,

ភុត្វាន សុចិភោជនំ;

អាគតំ នប្បដិបូជេតិ,

តំ ជញ្ញា វសលោ ឥតិ.

១៤.

យោ សមណំ វា ព្រាហ្មណំ,

អញ្ញំ វាបិ វណិព្ពកំ;

មុសាវាទេន វញ្ចេតិ,

តំ ជញ្ញា វសលោ ឥតិ.

១៥.

យោ សមណំ វា ព្រាហ្មណំ,

ភត្តកាលេ ឧបដ្ឋិតំ;

រោសេតិ វា ន ច ទេតិ,

តំ ជញ្ញា វសលោ ឥតិ.

១៦.

អសន្តំ យោធ បព្រូតិ,

មោហេន បលិគុណ្ឋិតោ;

កិញ្ចនំ និជិគីសានោ,

តំ ជញ្ញា វសលោ ឥតិ.

១៧.

យោចត្តានំ សមុក្កំសេ,

បរេច មវជានាតិ;

និហីនោ សេន មានេន,

តំ ជញ្ញា វសលោ ឥតិ.

១៨.

រោសកោ កទរីយោ ច,

បាបិច្ឆោ មច្ឆរី សឋោ;

អហិរីកោ អនោត្តប្បី,

តំ ជញ្ញា វសលោ ឥតិ.

១៩.

យោ ពុទ្ធំ បរិភាសតិ,

អថវា តស្ស សាវកំ;

បរិព្ពជំ គហដ្ឋំ វា,

តំ ជញ្ញា វសលោ ឥតិ.

អដ្ឋហិ ភិក្ខវេ អង្គេហិ សម្បន្នាគតស្ស ឧបាសកស្ស បត្តោ និកុជ្ជិតព្ពោ. ភិក្ខូនំ អលាភាយ បរិសក្កតិ, ភិក្ខូនំ អនត្ថាយ បរិសក្កតិ, ភិក្ខូនំ អនាវាសាយ បរិសក្កតិ, ភិក្ខូនំ អក្កោសតិ បរិភាសតិ, ភិក្ខូភិក្ខូហិ ភេទេតិ, ពុទ្ធស្ស អវណ្ណំ ភាសតិ, ធម្មស្ស អវណ្ណំ ភាសតិ, សង្ឃស្ស អវណ្ណំ ភាសតិ, អនុជានាមិ ភិក្ខវេ ឥមេហិ អដ្ឋហិ អង្គេហិ សម្បន្នាគតស្ស ឧបាសកស្ស បត្តំ និកុជ្ជិតុំ.

២០.

យោ អនរហំ សន្តោ,

អរហាតិ បដិជានាតិ;

ចោរោ សព្រហ្មកេ លោកេ,

តំ ជញ្ញា វសលោ ឥតិ.

២១.

ឯតេ ខោ វសលា វុត្តា,

មយា យេ តេ បកាសិតា;

ន ជច្ចា វសលោ ហោតិ,

ន ជច្ចា ហោតិ ព្រាហ្មណោ.

២២.

កម្មុនា វសលោ ហោតិ,

កម្មុនា ហោតិ ព្រាហ្មណោ.

២៣.

តទមិនាបិ ជានាថ,

យថាហេតំ និទស្សនំ;

ចណ្ឌាលបុត្តោ សោបាកោ,

មាតង្គោ ឥតិ វិស្សុតោ.

២៤.

សោ យសំ បរមំ បត្តោ,

មាតង្គោ យំ សុទុល្លភំ;

អាគច្ឆុំ តស្សុបដ្ឋានំ,

ខត្តិយា ព្រាហ្មណា ពហូ.

២៥.

សោ ទេវយានំ អភិរុយ្ហ,

វិរជំ សោ មហាបថំ;

កាមរាគំ វិរាជេត្វា,

ព្រហ្មលោកូបគោ អហុ.

គិរិំ នខេន ខណសិ,

អយោ ទន្តេភិ ខាទសិ;

ជាតវេទំ បទហសិ,

យោ ឥសិំ បរិភាសតិ.

អាវេលិតំ បិដ្ឋិតោ ឧត្តមង្គំ,

ពាហុំ បសារេតិ អកម្បណេយ្យំ;

សេតានិ អក្ខីនិ យថា មតស្ស,

កោ មេ ឥមំ បុត្តមកាសិ ឯវំ.