📜

នមោ តស្ស ភគវតោ អរហតោ សម្មាសម្ពុទ្ធស្ស

សូរស្សតីនីតិ

បឋមោ ភាគោ

បណាមគាថា

១.

មុខម្ហា ភគវន្តស្ស,

សុគន្ធកមលា សុភា;

សញ្ជាតំ ឧត្តមំ វាណិំ,

វន្ទាមិ វិត្តមានសា.

២.

សមជ្ឈិដ្ឋោ រចិស្សាមិ,

ទក្ខេន រាជមន្តិនា;

នាមេន សន្តេន,

នីតិំ លោកហិតាវហំ;

សាលង្ការំ សោបទេសំ,

នាមេនាហំ ស្វរស្សតិំ.

៣.

បេក្ខន្ត្វិមំ នីតិំ សន្តា,

មញ្ជូសរុក្ខសន្និភំ;

នានោបទេសសំបុណ្ណំ,

សទត្ថកុសលា សទា.

សូរស្សតីនីតិ

១.

កតញ្ញុតា ច សច្ចញ្ច,

លោកសារា ហិ តេ ទុវេ;

លោកាបិ តេហិ តិដ្ឋន្តិ,

រដ្ឋំ អកំសុ ឥស្សរំ.

២.

កាកាច ទុជ្ជនា លោកេ,

មលីភូតាវ សព្ពទា;

ឥដ្ឋំ គុណំ នាសយន្តិ,

តេ វេ លោកស្ស វេរិនោ.

មិគានំ សិង្គាលោ អន្តោ,

បក្ខីនំ បន វាយសោ.

អការណវេរី ហោន្តិ,

មច្ឆានំ ធីវរា យថា;

គុណីនំ សជ្ជនានញ្ច,

ទុជ្ជនា និច្ចវេរិនោ.

៣.

សិរិំ ភោន្តោ សុបោសេថ,

សិរិ មូលា ហិ សម្បទា;

សិរិយ ឥធ ជោតន្តិ,

សិរី សា សព្ពសិទ្ធិកា.

៤.

មុសា តមោករា លោកេ,

សច្ចំ មីទិតិការកំ;

មុសាតមេន ទុក្ខន្តិ,

សច្ចាភាយ សុខន្តិវេ.

សុវិជានំ សិង្គាលានំ,

សកុណានញ្ច វស្សិតំ;

មនុស្សវស្សិតំ រាជ,

ទុព្ពិជានតរំ តតោ.

៥.

កប្បគ្គិសទិសា ឥស្សា,

ឈាបេតិ សព្ពសម្បទំ;

មុទិតា កប្បមេឃោវ,

រោបេតិ សព្ពសម្បទំ.

៦.

យថា អសន្ថិរា ថម្ភា,

ថុសរាសិម្ហិ ឧស្សិតា;

តថេវ កបិចិត្តានំ,

កម្មន្តា ចញ្ចលង្គតា.

ហលិទ្ទិរាគំ កបិចិត្តំ;

បុរិសំ រាគវិរាគិនំ,

ឯទិសំ តាត មាសេវិ;

និម្មនុស្សម្បិ ចេ សិយា.

៧. [ក]

បុប្ផចុម្ពិ ចិត្តបត្តី,

សកវណ្ណេន មជ្ជិតោ;

វិក្កមី បុប្ផតោ បុប្ផំ,

នស្សាគារំ ន សង្គមោ.

[ខ]

កិប្បិលិកា ទុព្ពណ្ណាបិ,

សមគ្គាច បរក្កមា;

មា ហោថ បុប្ផចុម្ពីវ,

ហោថ វោ បចិកា យថា.

១.

យេ មរន្តិ កីឡន្តា តេ,

ស្វានា អញ្ញោញ្ញមោទិតា;

ទិស្វាន ឆដ្ដិតំ ភត្តំ,

សីឃវេរី វិហិំសរេ.

២.

តថេកេបិ ជនា ទានិ,

សមគ្គា ញ្ញោញ្ញមោទិតា;

ធនហេតុ វិហិំសន្តិ,

ធីរត្ថុ សីឃវេរិកា.

៩.

វសន្តេ ហេមន្តេ គិម្ហេ;

នេវ តាលា វិសេសិនោ;

ថិរចិត្តា ជនា សន្តា;

សុខទុក្ខេសុ និច្ចលា.

១០.

យថា បវដ្ដមានម្ហិ,

សុដ្ឋុ តិដ្ឋតិ គេណ្ឋុកេ;

អប្បវដ្ដេ ភូម្យំ សេតិ,

តថេវ គេណ្ឋុកោ ជនោ.

១១.

អគ្ឃាបេតុំ នសក្កោន្តិ,

កាលញ្ហិ កាលិកា ជនា;

វជិរាទិញ្ច សក្កោន្តិ,

តេន កាលោ អនគ្ឃិកោ.

១២. [ក]

អសនោ ហិ ទីឃទ្ធានោ,

សារសារោ សុគន្ធិកោ;

និគ្គន្ធោ ត្វេវ និស្សារោ,

ទីឃទ្ធានោបិ សិម្ពលី.

[ខ]

តថេវេកេ ជនា លោកេ,

ទីឃទ្ធានា សុសារកា;

និស្សារា កេចិ ផេគ្គូវ,

ទីឃទ្ធានាបិ គោយថា.

១៣.

ឧបការោ ចាបការោ,

យស្មិំ គច្ឆតិ នដ្ឋតំ;

បាសាណហទយស្សស្ស,

ជីវតីត្យា ភិធាមុធា.

បសាទោ និប្ផលោ យស្ស,

កោបោចាបិ និរត្ថកោ;

ន តំ សង្គន្តុ មិច្ឆេយ្យ,

ថីបុមាវ នបុំសកំ.

១៤.

ឧបចារោ ហិ កាតព្ពោ,

ន យាវ សោហទំ ភវេ;

ឧបចារោ សុមិត្តម្ហិ,

មាយា ច ហោតិ កោដិលំ.

១៥.

កមេន អគ្គតោ ឧច្ឆុ,

រសោ សាទុតរោ យថា;

តថេវ សុមិត្តោ លោកេ,

ទុម្មិត្តោ បន នេទិសោ.

១៦.

សោការាតិ បរិត្តាណំ,

វិស្សាសបីតិភាជនំ;

រតនាភិរតនំ ឥច្ឆេ,

សុមិត្តំ អក្ខរត្តយំ.

១៧.

ទម្បតីនំ សុមិត្តានំ,

មុខំ អញ្ញោញ្ញទប្បណំ,

សុខេ សុខំ ទុក្ខេ ទុក្ខំ,

បដិច្ឆាយេវ ទប្បណេ.

កថំ នុ តាសំ ហទយំ,

សុខរាវត ឥត្ថិយោ;

យាសាមិកេ ទុក្ខិតម្ហិ,

សុខមិច្ឆន្តិ អត្តនោ.

១៨.

និវាតញ្ច បុរេ កត្វា,

មានំ កត្វាន បច្ឆតោ;

សកត្ថំ ធារយេ ធីរោ,

អត្ថភញ្ជោ ហិ មុឡ្ហតា.

១៩.

បុរេចារំ សតិំ កត្វា,

សទ្ធំ ករេយ្យ បច្ឆតោ;

តុរំ ន សទ្ទហេ ធីរោ,

សីឃសទ្ធោ ហិ មន្ទកោ.

២០.

វនេ ០.០០៩៩ ពហូនិ កដ្ឋានិ;

ទុល្លភំ រត្តចន្ទនំ;

តថា ជនា ពហូ លោកេ;

បុមា ជញ្ញោ សុទុល្លភោ.

២១.

តិណកដ្ឋបលាសេហិ;

សុក្ខេហិ ទយ្ហតេ វនំ;

ឯតាទីហិ អសារេហិ;

លោកោ ជនេហិ ទយ្ហតេ.

២២.

អន្តោវស្សេ តិមាសម្ហិ,

បុញ្ញកម្មេន មោទិតា;

សុខំ វសិំសុ បោរាណា,

ពុទ្ធសាសនមាមកា.

២៣.

មិគមទេន ឯកេន,

តំ វនំ សុរភិគន្ធិកំ;

តថា ជនេន តំ រដ្ឋំ,

គុណិនា ហិ សិរីមតា.

សរីរំ ខណវិទ្ធំសី,

កប្បន្តដ្ឋាយិនោ គុណា.

២៤.

ខរានំ សីហព្យគ្ឃានំ,

សង្គមោ នោ ហិសព្ពទា;

តថេវ ព្យគ្ឃចិត្តានំ,

សជាតិកា ខយោនតា.

២៥.

សក សាធុបិ នោ សាធូ,

យោ ចេញ្ញ ទុដ្ឋការកោ;

ពហូនំ សាធូ បាយេន,

ស វេ សាធូតិ វុច្ចតេ.

២៦.

ពហូទកេ សមុទ្ទេបិ,

ជលំ នត្ថេវ បាតវេ;

ខុទ្ទកេ ខតកូបម្ហិ,

សាទុំ អត្ថិ ពហុំ ទកំ.

២៧.

មា សីឃំ វិវរេយ្យាថ,

និន្ទិតុញ្ច បសំសិតុំ;

មុខញ្ហិ វោ កថាទ្វារំ,

និរុន្ធេយ្យាថ សព្ពទា.

២៨.

មា សីឃំ វិវរេយ្យាថ,

ចក្ខុំ វោ ទស្សិតុំ បិយំ;

សណិកញ្ហិ បិយលាភំ,

ធនលាភំ តុរំ ករេ.

២៩.

អនារម្ភោ ហិ កម្មានំ,

បឋមំ ពុទ្ធិលក្ខណំ;

និដ្ឋង្គតំ អារទ្ធស្ស,

ទុតិយំ ពុទ្ធិលក្ខណំ.

អសមេក្ខិតកម្មន្តំ,

តុរិតាភិនិបាតិនំ;

សានិ កម្មានិ តប្បេន្តិ,

ឧណ្ហំ វជ្ឈោហដំ មុខេ.

៣០.

អផលានិ ទុរន្តានិ,

ជនតា និន្ទិតានិ ច;

អសក្យានិ ច កម្មានិ,

នារភេថ វិចក្ខណោ.

៣១.

អតិវិរោធភីតានំ,

សង្កិតានំ បទេ បទេ;

បរប្បវាទតាសានំ,

ទូរតោ យន្តិ សម្បទា.

សទ្ទមត្តំ ន ភេតព្ពំ,

លោកោ សទ្ទស្ស គោចរោ;

យោ ច សទ្ទបរិត្តាសោ,

វនេ ភន្តមិគោ ហិ សោ.

៣២.

ទ្វិន្នំ តណ្ឌុលថូសានំ,

វិសេសោ សុដ្ឋុ ខាយតិ;

រន្ធិតោបិ សិនិទ្ធោ នោ,

ថុសោ វិរសផារុសោ;

តណ្ឌុលំ សិនិទ្ធំ រសំ,

ឯវំ លោកេបិ ញាយតេ.

៣៣.

ឯរណ្ឌំ និស្សិតា វល្លិ,

រុហតេ កិំ យថាពលំ;

មហាសាលំ សុនិស្សាយ,

រុហតេ ព្រហតំ គតា.

៣៤.

មេត្តា ហិ សីមសម្ភេទា,

បក្ខបាត វិឃាតិកា;

បក្ខបាតេន ទុក្ខន្តិ,

និប្បក្ខោ វសតេ សុខំ.

៣៥.

នរា បញ្ញា ច លង្ការា,

យថាឋានេ និយុជ្ជរេ;

នោ ហិ ចូឡាមណិ បាទេ,

បាទុកា ច សិរោបរិ.

ឧក្កុដ្ឋេ សូរ មិច្ឆន្តិ;

មន្តីសុ អកុតូហលំ;

វិយញ្ច អន្នបានម្ហិ;

អត្ថេ ជាតេ ច បណ្ឌិតំ.

៣៦.

បមាទោ ហិ តមោ លោកេ,

កាលោ ចោរោ ភយានកោ;

កាយគេហំ ពហុឆិទ្ទំ,

កាលចោរស្ស ចោរិតំ.

៣៧.

ចញ្ចលោ កាលទាសោ ហិ,

ធីតិមា កាលឥស្សរោ;

កាលិស្សរោ រដ្ឋិស្សរំ,

អតិវត្តតិ សព្ពសោ.

៣៨.

វិលុប្បន្តិ ៨ ធនំ ឯកេ,

កាលមេកេ អនេក្ខកា;

តេសុ កាលវិលោបាវ,

ភយានកា តិកក្ខឡា.

៣៩.

រញ្ញា រដ្ឋហិតំ កត្តា,

រញ្ញោ ហិតំ ជនេហិ វេ;

ទេស្សោ អត្តហិតំ ទស្សី,

គារយ្ហោ កិន្នុ ការកោ.

អត្តទត្ថំ បរត្ថេន;

ពហុនាបិ ន ហាបយេ.

៤០.

យស្ស ឧបការោ ទិន្នោ,

ឧបការំ ទទេ បុន;

តតោ បការំ និច្ឆេយ្យ,

កតញ្ញូ ទុល្លភោ ឥធ.

សច្ចំ កិរេវ មាហំសុ,

នរា ឯកច្ចិយា ឥធ;

កដ្ឋំ និប្លវិតំ សេយ្យោ,

នត្វេវេ កច្ចិយោ នរោ.

៤១.

ការុកោ សកបញ្ញាយ,

មហគ្ឃំ ទារុកំ ករេ;

តថា ជនោបិ អត្តានំ,

មហគ្ឃោ លោកមានិតោ.

៤២.

អប្បគ្ឃោ ហិ អយោ ហេមំ,

មហគ្ឃំ ឆិន្ទតេ យថា;

និគ្គុណោ សគុណំ លោកេ,

អលក្ខីច សិរិំ តថា.

សូរស្សតីនីតិ

ទុតិយោ ភាគោ

១.

ធនស្ស ទុព្ពិធំ កិច្ចំ,

បាបេតិ ឧណ្ណតំ ធនិំ;

អធនិំ ឱណតំ លោកេ,

សញ្ចិនេ តេន តំ ធនំ.

២.

វដ្ដតេ សតតំ សីឃំ,

កាលចក្កំ អវារិតំ;

តេន ឃដី ទិនំ មាសោ,

វស្សោ ភវត្យ ចីរតោ.

៣.

សត្តុនា ន ហិ សន្ធេយ្យ,

ឯកទា សោ ភយំ ករោ;

សុតត្តមបិ បានីយំ,

សមយតេ នុ បាវកំ.

៤.

វិជហំ បកតិំ យោ ហិ,

វិកតិំ បុន គច្ឆតិ;

សភាវេន អាការេន,

វិប្បល្លាសំ ស គច្ឆតិ;

សំសុមារ គតា គោធា,

យថា ថី បុមវេសិកា.

៥.

បក្ខំ លទ្ធាន ឧឌ្ឌេន្តិ,

ឧបចិកា ហិ វម្មិកា;

និក្ខន្តា មរណំ យន្តិ,

ឧប្បតា និប្បតំ គតា.

៦.

សព្ពំបិយស្ស ទជ្ជេយ្យ,

និស្សេសំ បិយមានសំ;

សទ្ធាចិត្តំ តុ នោ វិញ្ញូ,

សទ្ធាយិកោ បក្ខលិតោ.

៧.

សក្កោតិ លង្ឃិតុំ ព្យាមំ,

មហុស្សាហេន យោ ហិ សោ;

តទឌ្ឍំ អនុស្សាហេន,

នោស្សាហោ តេសុ ថោមិតោ;

មហុស្សាហោ ទុក្ខោ លោកេ,

អនុស្សាហោ សទា សុខោ.

៨.

ទុក្ខមំ អក្ខមន្តោ យោ,

បិដ្ឋិការីច ទុក្ករំ,

កទា លភេយ្យ សោ លោកេ,

សុខមំ សុករំ មុធា;

បច្ចក្ខញ្ហិ សោ ករេយ្យ,

ទុក្ខមញ្ចាបិ ទុក្ករំ.

៩.

អនគ្ឃោ មនុស្សោ លោកេ,

តោសនាបោសនាទិនា;

តេន សោ មហគ្ឃំ កម្មំ,

ករេ លោកហិតាយុតំ.

១០.

វាតេន នប្បភិជ្ជន្តិ,

និន្នា វេឡូ កសា នឡា;

យថាវាតំ នគច្ឆន្តិ,

តថា ចរេ ជនេ កទា.

១១.

បុរតោ ច បច្ឆតោ ចេ,

និស្សយោ នត្ថិ បស្សតោ;

អធិកំ វីរិយំ ហោតិ,

អត្តនាថោ តទា ភវេ.

១២.

ខណំ អាខុពិលំ សីហោ,

បាសាណសកលាកុលំ;

បប្បោតិ នខភង្គំវា,

ផលំវា មូសិកោ ភវេ.

១៣.

មគ្គមុឡ្ហា ជនា អន្ធា,

អមគ្គា មគ្គសញ្ញិនោ;

តថេវ ទុប្បញ្ញា មុឡ្ហា,

តថត្ថំ នាវ ពុជ្ឈរេ.

១៤.

បិយរូបំ វីររូបំ,

ទុវិធា រូបសម្បទា,

នារិំ ឥច្ឆេ បិយរូបិំ,

បុរិសំ វីររូបកំ.

១៥.

បជ្ជលន្តិ ហិ ខជ្ជោតា,

បក្ខចាលនកម្មុនា;

កុសិតា សុបិតា នេតេ,

តថា ជនាបិ កម្មិកា.

១៦.

កុម្មសង្កោចមោបម្យ,

និគ្គហមបិ សំខមេ;

បត្តកាលេ តុ នីតិញ្ញោ,

កណ្ហសប្បោវ ឧដ្ឋហេ.

១៧.

ភក្ខសេសំ នខាទន្តិ,

សីហា ឧន្នតចេតសា;

បរំបិ នបណាមេន្តិ,

វុទ្ធិកាមា តថា ចរេ.

១៨.

ន វ វស្សោ សមុប្បន្នោ,

ខីណោ បុរាណហាយនោ;

នវវស្សេ នវា មេត្តា,

ភាវិតព្ពា ហិតេសិនា.

១៩.

សន្តាបយន្តិ កមយាប្យភុជំ ន រោគា,

ទុម្មន្តិនំ កមុបយន្តិ ន នីតិទោសា;

កំ ស្រី ន មានយតិ កំ ន ច ហន្តិ មច្ចុ,

កំ ថីកតា ន វិសយា បរិបីឡយន្តិ.

(វសន្តតិលកាគាថា.)

២០.

(ក) ព្យាមមត្តេន ទណ្ឌេន,

យោលុម្ព្យ ឧទកំ មិនេ;

អគម្ភីរំ គម្ភីរំវា,

អគាធេ មញ្ញិ គម្ភីរំ.

(ខ)

តថា មន្ទោ សញ្ញាណេន,

អគាធេ មញ្ញិ បណ្ឌិតំ;

សមាសមំ ន ជានាតិ,

ពហ្វប្បំ តិក្ខមន្ទតំ.

២១.

ទុដ្ឋកម្មេ សង្គមន្តិ,

ឆេកកម្មេ ច នោ ឥធ;

មច្ចុំ វហន្តិ សីសេន,

តេ មុឡ្ហា មុឡ្ហសង្គមា.

២២.

ទុវិធោ សង្គមោ លោកេ,

ឧជុកោ កុដិលោ ភវេ;

ឧជុកោវ បសំសេយ្យោ,

នោហ្យញ្ញោ សាជសង្គមោ.

តេ ឥមិនា ឧបាយេន សមគ្គា សម្មោទមានា មហា ភិត្តិបិដ្ឋិកាយ វសន្តិ. (មហោសធជាតក អដ្ឋកថា)

២៣.

យូថិកា បុប្ផតេ នោហិ,

សិញ្ចិតាបិ បុនប្បុនំ;

បុប្ផតេ សម្បត្តេ កាលេ,

ឯវំ ធារេថ វីរិយំ.

២៤.

ធនុច្ចយោ ធនក្ខេបោ,

ទុវិធា ហិ ធនាកតិ;

ធនុច្ចយេ នយោ អត្ថិ,

ធនក្ខេបម្ហិ នោ ឥធ.

២៥.

អមាតា បិតរសំ វឌ្ឍំ,

ជូតការញ្ច ចញ្ចលំ;

នាលបេយ្យ វិសេសញ្ញូ,

យទិច្ឆេ សិទ្ធិ មត្តនោ.

ហលិទ្ទិរាគំ កបិចិត្តំ,

បុរិសំ រាគវិរាគិនំ;

ឯទិសំ តាត មាសេវិ,

និម្មនុស្សំបិ ចេ សិយា.

២៦.

គុណា គុណញ្ញូសុ គុណា ភវន្តិ,

តេ និគ្គុណំ បត្វា ភវន្តិ ទោសា;

អាសាទ្យតោយា បភវន្តិ នជ្ជោ,

សមុទ្រមាសជ្ជ ភវន្ត្យបេយ្យា.

(ឧបជាតិគាថា)

២៧.

សិលារូបំ និម្មិនន្តិ,

កោដ្ដេត្វាន បុនប្បុនំ;

កោដ្ដកោវ តថា ពាលា,

សាធុំ ឱវជ្ជ និម្មិតា.

ចាណក្យនីតិលា គាថា

លាលនេ ពហវោ ទោសា,

តាឡនេ ពហវោ គុណា;

តស្មា បុត្តញ្ច សិស្សញ្ច,

តាឡយេ ន ច លាលយេ.

២៨.

អតីតស្ស ហិ មិត្តស្ស,

យោ ចេ ទោសំ បកាសយេ;

សោ ហវេ បច្ចុប្បន្នស្ស,

ទោសំ ភាសេតិ ញាយតិ.

២៩.

លតាវិយ សេវកា តេ,

យេ និស្សយំ បលម្ពរេ;

និស្សយស្ស វិនាសេន,

ភូម្យំ សេន្តិ អនាថកា.

៣០.

ទោសសិង្គេហិ វិជ្ឈន្តោ,

មានខូរេហិ អក្កមំ;

ភយំ ករោតិ លោកម្ហិ,

គោវ ពាលោ វិហិំសកោ.

៣១.

អាទោ ឧបរិ លោកោយំ,

ឧជុលេខាយ តិដ្ឋតិ;

មុសាវាតេហិ តំលោកំ,

និបាតេសិ អនជ្ជវំ.

៣២.

សុឃដំ កុម្ភការេន,

នារហោ បរិភុញ្ជិតុំ;

តថូបមាយ វេក្ខេយ្យ,

សកម្មបរកម្មនិ.

៣៣.

អនន្តរំសី សូរោបិ,

នសក្កោតិ ឃនំ តមំ;

វិជ្ឈិតុំ រំសិយា លោកេ,

តថា មទនមោហិតា;

នសក្កោន្តិ មទំ ភេត្វា,

បញ្ញាភាយ បភាសិតុំ.

៣៤.

ខេទវេរំ ទលិទ្ទម្ហិ,

ភោគិម្ហិ រោគុបទ្ទវំ;

ទេស្សវេរញ្ច អាណិម្ហិ,

បស្សេ លោកស្ស វេរិតំ.

៣៥.

សំលទ្ធេន សុភោគេន,

ជីវំ សុទ្ធំ ករេ និជំ;

សេដ្ឋោ សោ តេន ជីវេន,

ជេគុច្ឆោ មលជីវិកោ.

៣៦.

វជិរ បុប្ផរាគានំ,

វិសេសំ យោ នពុជ្ឈតិ;

កថញ្ហិ សោ វិក្កីណេយ្យ,

កីណេយ្យ វា យថាតថំ.

៣៧.

កិប្បីលិ កោបិ ចិន្តេត្វា,

បព្ពតំ ភេត្តុ មុស្សហំ;

អពលា តនុមជ្ឈត្តា,

ចិន្តា ហស្យាវ សា មុធា.

៣៨.

ជាតមត្តំ ន យោ សត្តុំ,

រោគញ្ចូបសមំ នយេ;

មហាពលោបិ តេនេវ,

វុទ្ធិំបត្វា ស ហញ្ញតេ.

៣៩.

សជីវមំសភក្ខេហិ,

សទាឋីហិ មុខេហិ ភោ;

ពិឡារព្យគ្ឃសីហានំ,

និហីនានិ អនេកធា;

តិក្ខានិ ខរវាទានិ,

មនុស្សានំ មុខានិ វេ.

៤០.

វិលុប្បន្តា វិធាវន្តិ,

សជីវវុត្តិកម្មុនា;

ជនា តេន វិហញ្ញន្តិ,

ចរន្តិ ធម្មវេមុខា.

៤១.

សុលភំ លោកិយំ លោកេ,

សាសនីយំវ ទុល្លភំ;

ទុល្លភំ តំ វមញ្ញន្តោ,

ឯសោ ពាលតមោ ភវេ.

៤២.

យោ បតិត្ថ អគ្យាវាដំ,

មោហា តំ ឧបការិតុំ;

អញ្ញោរោហិ តទា វាដំ,

ទុតីយោ មុឡ្ហមុឡ្ហកោ.

៤៣.

ព្យគ្ឃោ អាវុធវិទ្ធោ ហិ,

អកា ទុដ្ឋានិ និន្នទំ;

តថេវ សាធុសត្ថេន,

វិទ្ធោ ពាលោ បកុប្បិតោ.

៤៤.

បិវន្តិ លោហិតំ ឌំសា,

អន្តោ តុណ្ឌេន មក្ខិកា;

ពហិទ្ធា បរិវារេន្តិ,

ជនោ តេន ឌំសាយយេ.

៤៥.

អធនស្ស ខណោ អប្បោ,

សទ្ធម្មោ អប្បកាលិនោ;

អប្បកោ តេន យុញ្ជេយ្យុំ,

ខណំ ពហុំ លភេតវេ.