ອຎ຺ຎ > ເລຑີ ສຍາໂຑ ຄນ຺ຖ-ສງ຺ຄໂຫ > ປຏ຺ຐານຸທ຺ເທສ ທີປນີປາຐ

ກຕເມ ຘມ຺ມາ ເຫຕຸປຈ຺ຈຍສ຺ສ ປຈ຺ຈຍຸປ຺ປນ຺ນາ. ໂລຠ ສຫຊາຕາ ຈິຕ຺ຕເຈຕສິກາ ຘມ຺ມາ ຈ ຣູປກລາປາຘມ຺ມາ ຈ ໂທສສຫ ຊາຕາ ໂມຫສຫຊາຕາ ອໂລຠສຫຊາຕາ ອໂທສສຫ ຊາຕາ ອໂມຫສຫຊາຕາ ຈິຕ຺ຕເຈຕສິກາ ຘມ຺ມາ ຈ ຣູປກລາປາ ຘມ຺ມາ ຈ ເຫຕຸປຈ຺ຈຍໂຕ ອຸປ຺ປນ຺ນາ ເຫຕຸປຈ຺ຈຍຸປ຺ປນ຺ນາ ຘມ຺ມາ.

ສຫຊາຕຣູປກລາປາ ນາມ ສເຫຕຸກປຏິສນ຺ຘິກ຺ຂເຓ ກມ຺ມຊຣູປານິ ຈ ປວຕ຺ຕິກາເລ ສເຫຕຸກຈິຕ຺ຕຊຣູປານິ ຈ. ຕຕ຺ຖ ປຏິສນ຺ຘິກ຺ຂໂຓ ນາມ ປຏິສນ຺ຘິຈິຕ຺ຕສ຺ສ ອຸປ຺ປາທກ຺ຂໂຓ. ປວຕ຺ຕິກາໂລ ນາມ ປຏິສນ຺ຘິຈິຕ຺ຕສ຺ສ ຐິຕິກ຺ຂຓໂຕ ປຏ຺ຐາຍ ຍາວ ຈຸຕິກາລໍ ວຸຈ຺ຈຕິ.

ເກນຏ຺ເຐນ ເຫຕຸ, ເກນຏ຺ເຐນ ປຈ຺ຈໂຍຕິ. ມູລຏ຺ເຐນ ເຫຕຸ, ອຸປກາຣກຏ຺ເຐນ ປຈ຺ຈໂຍຕິ. ຕຕ຺ຖ ມູລຍມເກ ວຸຕ຺ຕານໍ ໂລຠາທີນໍ ມູລຘມ຺ມານໍ ມູລຠາໂວ ມູລຏ຺ໂຐ ນາມ. ໂສ ມູລຏ຺ໂຐ ມູລຍມກທີປນິຍໍ ອມ຺ເຫຫິ ຣຸກ຺ໂຂປມາຍ ທີປິໂຕເຍວ.

ອປິ ຈ ເອໂກ ປຸຣິໂສ ເອກິສ຺ສໍ ອິຕ຺ຖິຍໍ ປຏິພທ຺ຘ ຈິຕ຺ໂຕ ໂຫຕິ. ໂສ ຍາວ ຕໍ ຈິຕ຺ຕໍ ນ ຊຫຕິ, ຕາວ ຕໍ ອິຕ຺ຖິໍ ອາຣພ຺ຠ ຕສ຺ສ ປຸຣິສສ຺ສ ໂລຠສຫຊາຕານິ ກາຍວຈີມໂນກມ຺ມານິ ຈ ໂລຠສມຸຏ຺ຐິຕານິ ຈິຕ຺ຕຊຣູປານິ ຈ ຈິຣກາລໍປິ ປວຕ຺ຕນ຺ຕິ. ສພ຺ພານິ ຈ ຕານິ ຈິຕ຺ຕເຈຕສິກຣູປານິ ຕສ຺ສໍ ອິຕ຺ຖິຍໍ ຣຊ຺ຊນໂລຠມູລການິ ໂຫນ຺ຕິ. ໂສ ໂລໂຠ ເຕສໍ ມູລຏ຺ເຐນ ເຫຕຸ ຈ, ອຸປກາຣກຏ຺ເຐນ ປຈ຺ຈໂຍ ຈ. ຕສ຺ມາ ເຫຕຸປຈ຺ຈໂຍ. ເອສ ນໂຍ ເສສານິ ຣຊ຺ຊນີຍວຕ຺ຖູນິ ອາຣພ຺ຠຣຊ຺ຊນວເສນ ອຸປ຺ປນ຺ເນສຸ ໂລເຠສຸ, ທຸສ຺ສນີຍວຕ຺ຖູນິ ອາຣພ຺ຠ ທຸສ຺ສນວເສນ ອຸປ຺ປນ຺ເນສຸ ໂທເສສຸ, ມຸຍ຺ຫນີຍວຕ຺ຖູນິ ອາຣພ຺ຠ ມຸຍ຺ຫນວເສນ ອຸປ຺ປນ຺ເນສຸ ໂມເຫສຸ ຈ.

ຕຕ຺ຖ ¶ ຍຖາ ຣຸກ຺ຂສ຺ສ ມູລານິ ສຍໍ ອນ຺ໂຕປຖວິຍໍ ສຸຏ຺ຐຸ ປຕິຏ຺ຐຫິຕ຺ວາ ປຖວິຣສຎ຺ຈ ອາໂປຣສຎ຺ຈ ຄເຫຕ຺ວາ ຕໍ ຣຸກ຺ຂໍ ຍາວ ອຄ຺ຄາ ອຠິຫຣນ຺ຕິ, ເຕນ ຣຸກ຺ໂຂ ຈິຣກາລໍ ວຑ຺ຒມາໂນ ຕິຏ຺ຐຕິ. ຕຖາ ໂລໂຠ ຈ ຕສ຺ມິໍ ຕສ຺ມິໍ ວຕ຺ຖຸມ຺ຫິ ຣຊ຺ຊນວເສນ ສຸຏ຺ຐຸ ປຕິຏ຺ຐຫິຕ຺ວາ ຕສ຺ສ ຕສ຺ສ ວຕ຺ຖຸສ຺ສ ປິຍຣູປຣສຎ຺ຈ ສາຕຣູປຣສຎ຺ຈ ຄເຫຕ຺ວາ ສມ຺ປຍຸຕ຺ຕຘມ຺ເມ ຍາວ ກາຍວຈີວີຕິກ຺ກມາ ອຠິຫຣຕິ, ກາຍ ວີຕິກ຺ກມໍ ວາ ວຈີວີຕິກ຺ກມໍ ວາ ປາເປຕິ. ຕຖາ ໂທໂສ ຈ ທຸສ຺ສນ ວເສນ ອປ຺ປິຍຣູປຣສຎ຺ຈ ອສາຕຣູປຣສຎ຺ຈ ຄເຫຕ຺ວາ, ໂມໂຫ ຈ ມຸຍ຺ຫນວເສນ ນານາຣມ຺ມເຓສຸ ນິຣຕ຺ຖກຈິຕ຺ຕາຈາຣຣສໍ ວຑ຺ເຒຕ຺ວາຕິ ວຕ຺ຕພ຺ພໍ. ເອວໍ ອຠິຫຣນ຺ຕາ ຕໂຍ ຘມ຺ມາ ຣຊ຺ຊນີຍາທີສຸ ວຕ຺ຖູສຸ ສມ຺ປຍຸຕ຺ຕຘມ຺ເມ ໂມທມາເນ ປໂມທມາເນ ກໂຣນ຺ໂຕ ວິຍ ຈິຣ ກາລໍ ປວຕ຺ເຕນ຺ຕິ. ສມ຺ປຍຸຕ຺ຕຘມ຺ມາ ຈ ຕຖາ ປວຕ຺ຕນ຺ຕິ. ສມ຺ປຍຸຕ຺ຕ ຘມ຺ເມສຸ ຈ ຕຖາ ປວຕ຺ຕມາເນສຸ ສຫຊາຕຣູປກລາປາປິ ຕຖາ ປວຕ຺ຕນ຺ຕິເຍວ. ຕຕ຺ຖ ສມ຺ປຍຸຕ຺ຕຘມ຺ເມ ອຠິຫຣຕີຕິ ທ຺ເວ ປິຍຣູປ ສາຕຣູປຣເສ ສມ຺ປຍຸຕ຺ຕຘມ຺ມານໍ ສນ຺ຕິກໍ ປາເປຕີຕິ ອຕ຺ໂຖ.

ສຸກ຺ກປກ຺ເຂ ໂສ ປຸຣິໂສ ຍທາກາເມສຸ ອາທີນວໍ ປສ຺ສຕິ, ຕທາ ໂສ ຕໍ ຈິຕ຺ຕໍຊຫຕິ, ຕໍ ອິຕ຺ຖິໍ ອາຣພ຺ຠ ອໂລໂຠ ສຎ຺ຊາ ຍຕິ. ປຸພ຺ເພ ຍສ຺ມິໍ ກາເລ ຕໍ ອິຕ຺ຖິໍ ອາຣພ຺ຠ ໂລຠມູລການິ ອສຸທ຺ຘານິ ກາຍວຈີມໂນກມ຺ມານິ ວຕ຺ຕນ຺ຕິ. ອິທານິ ຕສ຺ມິໍ ກາເລປິ ອໂລຠມູລການິ ສຸທ຺ຘານິ ກາຍວຈີມໂນກມ຺ມານິ ວຕ຺ຕນ຺ຕິ. ປພ຺ພຊິຕ ສີລສໍວຣານິ ວາ ຌານປຣິກມ຺ມານິ ວາ ອປ຺ປນາຌານານິ ວາ ວຕ຺ຕນ຺ຕິ. ໂສ ອໂລໂຠ ເຕສໍ ມູລຏ຺ເຐນ ເຫຕຸ ຈ ໂຫຕິ, ອຸປກາຣກຏ຺ເຐນ ປຈ຺ຈໂຍຈ. ຕສ຺ມາ ເຫຕຸປຈ຺ຈໂຍ. ເອສ ນໂຍ ເສເສສຸ ໂລຠ ປຏິປກ຺ເຂສຸ ອໂລເຠສຸ, ໂທສປຏິປກ຺ເຂສຸ ອໂທເສສຸ, ໂມຫ ປຏິປກ຺ເຂສຸ ອໂມເຫສຸ ຈ.

ຕຕ຺ຖ ຣຸກ຺ຂມູລານິ ວິຍ ອໂລໂຠ ໂລຠເນຍ຺ຍວຕ຺ຖູສຸ ໂລຠໍ ປຫາຍ ໂລຠວິເວກສຸຂຣສໍ ວຑ຺ເຒຕ຺ວາ ເຕນ ສຸເຂນ ສມ຺ປຍຸຕ຺ຕຘມ຺ເມ ໂມທມາເນ ປໂມທມາເນ ກໂຣນ຺ໂຕ ວິຍ ຍາວ ຌານສມາປຕ຺ຕິສຸຂາ ວາ ຍາວ ມຄ຺ຄຜລສຸຂາ ວາ ວຑ຺ຒາເປຕິ. ຕຖາ ອໂທໂສ ຈ ໂທສເນຍ຺ຍວຕ຺ຖູສຸ ໂທສວິເວກສຸຂຣສໍ ວຑ຺ເຒຕ຺ວາ, ອໂມໂຫ ຈ ໂມຫເນຍ຺ຍວຕ຺ຖູສຸ ໂມຫວິເວກສຸຂຣສໍ ວຑ຺ເຒຕ຺ວາຕິ ວຕ຺ຕພ຺ພໍ. ເອວໍ ວຑ຺ຒາເປນ຺ຕາ ຕໂຍ ຘມ຺ມາ ກຸສເລສຸ ຘມ຺ເມສຸ ສມ຺ປຍຸຕ຺ຕຘມ຺ເມ ໂມທມາເນ ປໂມທມາເນ ກໂຣນ຺ໂຕ ວິຍ ຈິຣ ກາລໍປິ ປວຕ຺ເຕນ຺ຕິ. ສມ຺ປຍຸຕ຺ຕຘມ຺ມາ ຈ ຕຖາ ປວຕ຺ຕນ຺ຕິ. ສມ຺ປຍຸຕ຺ຕ ຘມ຺ເມສຸ ຈ ຕຖາ ປວຕ຺ຕມາເນສຸ ສຫຊາຕຣູປກລາປາປິ ຕຖາ ປວຕ຺ຕນ຺ຕິເຍວ.

ຕຕ຺ຖ ¶ ໂລຠວິເວກສຸຂຣສນ຺ຕິ ວິວິຈ຺ຈນໍ ວິຄມນໍ ວິເວໂກ. ໂລຠສ຺ສ ວິເວໂກ ໂລຠວິເວໂກ. ໂລຠວິເວເກ ສຸຂໍ ໂລຠວິເວກສຸຂໍ. ໂລຠວິເວກໍ ປຏິຈ຺ຈ ອຸປ຺ປນ຺ນສຸຂນ຺ຕິ ວຸຕ຺ຕໍ ໂຫຕິ. ຕເທວ ຣໂສ ໂລຠວິເວກສຸຂຣໂສຕິ ສມາໂສ. ອຍໍ ອຠິຘມ຺ເມ ປຏ຺ຐານນໂຍ.

ຫຕ຺ຕນ຺ຕນໂຍ ປນ ອວິຊ຺ຊາສງ຺ຂາໂຕ ໂມໂຫ ຈ ຕຓ຺ຫາສງ຺ຂາໂຕ ໂລໂຠ ຈາຕິ ທ຺ເວ ຘມ຺ມາ ສພ຺ເພສໍປິ ວຏ຺ຏທຸກ຺ຂຘມ຺ມານໍ ມູລານິ ໂຫນ຺ຕິ. ໂທໂສ ປນ ໂລຠສ຺ສ ນິສ຺ສນ຺ທຠູຕໍ ປາປມູລໍ ໂຫຕິ. ວິຊ຺ຊາສງ຺ຂາໂຕ ອໂມໂຫ ຈ ນິກ຺ຂມຘາຕຸສງ຺ຂາໂຕ ອໂລໂຠ ຈາຕິ ທ຺ເວ ຘມ຺ມາ ວິວຏ຺ຏຘມ຺ມານໍ ມູລານິ ໂຫນ຺ຕິ. ອໂທໂສ ປນ ອໂລຠສ຺ສ ນິສ຺ສນ຺ທຠູຕໍ ກລ຺ຍາຓມູລໍ ໂຫຕິ. ເອວໍ ຉພ຺ພິຘານິ ມູລານິ ສຫຊາຕານໍປິ ອສຫຊາຕານໍປິ ນາມຣູປຘມ຺ມານໍ ປຈ຺ຈຍາ ໂຫນ຺ຕີຕິ. ອຍໍ ສຸຕ຺ຕນ຺ເຕສຸ ນໂຍ. ເຫຕຸປຈ຺ຈຍທີປນາ ນິຏ຺ຐິຕາ.

ກຕໂມ ອາຣມ຺ມຓປຈ຺ຈໂຍ. ສພ຺ເພປິ ຈິຕ຺ຕເຈຕສິກາ ຘມ຺ມາ ສພ຺ເພປິ ຣູປຘມ຺ມາ ສພ຺ພໍປິ ນິພ຺ພານໍ ສພ຺ພາປິ ປຎ຺ຎຕ຺ຕິໂຍ ອາຣມ຺ມຓ ປຈ຺ຈໂຍ. ນ ຫິ ໂສ ນາມ ເອໂກປິ ຘມ຺ໂມ ອຕ຺ຖິ, ໂຍ ຈິຕ຺ຕ ເຈຕສິການໍ ອາຣມ຺ມຓໍ ນ ໂຫຕິ. ສງ຺ເຂປໂຕ ປນ ອາຣມ຺ມຓໍ ຉພ຺ພິຘໍ ໂຫຕິ ຣູປາຣມ຺ມຓໍ ສທ຺ທາຣມ຺ມຓໍ ຄນ຺ຘາຣມ຺ມຓໍ ຣສາຣມ຺ມຓໍ ໂຜຏ຺ຐພ຺ພາຣມ຺ມຓໍ ຘມ຺ມາຣມ຺ມຓນ຺ຕິ.

ກຕເມ ຘມ຺ມາ ອາຣມ຺ມຓປຈ຺ຈຍສ຺ສ ປຈ຺ຈຍຸປ຺ປນ຺ນາ. ສພ຺ເພປິ ຈິຕ຺ຕ ເຈຕສິກາຘມ຺ມາ ອາຣມ຺ມຓປຈ຺ຈຍສ຺ສ ປຈ຺ຈຍຸປ຺ປນ຺ນາ. ນ ຫິ ກິຎ຺ຈິ ຈິຕ຺ຕໍ ນາມ ອຕ຺ຖິ, ຍໍ ຈິຕ຺ຕໍ ຠູເຕນ ວາ ອຠູເຕນ ວາ ອາຣມ຺ມເຓນ ວິນາ ປວຕ຺ຕຕິ.

ຕຕ຺ຖ ປຈ຺ຈຸປ຺ປນ຺ນໍ ຣູປາຣມ຺ມຓໍ ທຸວິຘສ຺ສ ຈກ຺ຂຸວິຎ຺ຎາຓຈິຕ຺ຕສ຺ສ ອາຣມ຺ມຓປຈ຺ຈໂຍ. ປຈ຺ຈຸປ຺ປນ຺ນໍ ສທ຺ທາຣມ຺ມຓໍ ທຸວິຘສ຺ສ ໂສຕວິຎ຺ຎາຓ ຈິຕ຺ຕສ຺ສ. ປຈ຺ຈຸປ຺ປນ຺ນໍ ຄນ຺ຘາຣມ຺ມຓໍ ທຸວິຘສ຺ສ ຆານວິຎ຺ຎາຓຈິຕ຺ຕສ຺ສ. ປຈ຺ຈຸປ຺ປນ຺ນໍ ຣສາຣມ຺ມຓໍ ທຸວິຘສ຺ສ ຊິວ຺ຫາວິຎ຺ຎາຓຈິຕ຺ຕສ຺ສ. ປຈ຺ຈຸປ຺ປນ຺ນໍ ຕິວິຘໍ ໂຜຏ຺ຐພ຺ພາຣມ຺ມຓໍ ທຸວິຘສ຺ສ ກາຍວິຎ຺ຎາຓຈິຕ຺ຕສ຺ສ. ປຈ຺ຈຸປ຺ປນ຺ນານິ ຕານິ ປຎ຺ຈາຣມ຺ມຓານິ ຕິວິຘສ຺ສ ມໂນຘາຕຸຈິຕ຺ຕສ຺ສ ອາຣມ຺ມຓປຈ຺ຈໂຍ. ສພ຺ພານິ ຕານິ ອຕີຕານາຄຕປຈ຺ຈຸປ຺ປນ຺ນານິ ປຎ຺ຈາຣມ຺ມຓານິ ວາ ສພ຺ພານິ ເຕກາລິການິ ກາລວິມຸຕ຺ຕານິ ຘມ຺ມາຣມ຺ມຓານິ ວາ ຉ ສຕ຺ຕຕິວິຘານໍ ມໂນວິຎ຺ຎາຓຈິຕ຺ຕານໍ ຍຖາຣຫໍ ອາຣມ຺ມຓປຈ຺ຈໂຍ.

ເກນຏ຺ເຐນ ອາຣມ຺ມຓໍ, ເກນຏ຺ເຐນ ປຈ຺ຈໂຍຕິ. ຈິຕ຺ຕ ເຈຕສິເກຫິ ອາລມ຺ພິຕພ຺ພຏ຺ເຐນ ອາຣມ຺ມຓໍ, ອຸປກາຣກຏ຺ເຐນ ປຈ຺ຈໂຍຕິ.

ອາລມ຺ພິຕພ຺ພຏ຺ເຐນາຕິ ¶ ເຈຕ຺ຖ ອາລມ຺ພຓກິຣິຍາ ນາມ ຈິຕ຺ຕ ເຈຕສິການໍ ອາຣມ຺ມຓຄ຺ຄຫຓກິຣິຍາ, ອາຣມ຺ມຓຸປາທານ ກິຣິຍາ.

ຍຖາ ຫິ ໂລເກ ອໂຍຘາຕຸໍ ກາເມຕິ ອິຈ຺ຉຕີຕິ ອຕ຺ເຖນ ອໂຍກນ຺ຕໂກ ນາມ ໂລຫຘາຕຸວິເສໂສ ອຕ຺ຖິ. ໂສ ອໂຍຂນ຺ຘສມີປໍ ສມ຺ປຕ຺ໂຕ ຕໍ ອໂຍຂນ຺ຘໍ ກາເມນ຺ໂຕ ວິຍ ອິຈ຺ຉນ຺ໂຕ ວິຍ ອໂຍຂນ຺ຘາຠິມຸໂຂ ຈຎ຺ຈລຕິ. ສຍໍ ວາ ຕໍ ອໂຍຂນ຺ຘໍ ອຸປຄຈ຺ຉຕິ. ອໂຍຂນ຺ຘໍ ວາ ອຕ຺ຕາຠິມຸຂໍ ອາກຑ຺ຒຕິ, ອໂຍຂນ຺ໂຘ ຕທຠິມຸໂຂ ຈຎ຺ຈລຕິ, ຕໍ ວາ ອຸປຄຈ຺ຉຕິ. ອຍໍ ອໂຍກນ຺ຕກສ຺ສ ອາລມ຺ພຓກິຣິຍາ ນາມ. ເອວເມວ ຈິຕ຺ຕເຈຕສິການໍ ອາຣມ຺ມເຓສຸ ອາລມ຺ພຓກິຣິຍາ ທຏ຺ຐພ຺ພາ. ນ ເກວລໍ ອາຣມ຺ມເຓສຸ ອາລມ຺ພຓ ມຕ຺ຕໍ ໂຫຕິ. ອຖ ໂຂ ຈິຕ຺ຕເຈຕສິກາ ຘມ຺ມາ ສຕ຺ຕສນ຺ຕາເນ ອຸປ຺ປຊ຺ຊມານາ ຉສຸ ທ຺ວາເຣສຸ ອາຣມ຺ມຓານໍ ອາປາຕາຄມເນ ເອວ ຂເຓ ຂເຓ ອຸປ຺ປຊ຺ຊນ຺ຕິ. ອຸປ຺ປຊ຺ຊິຕ຺ວາ ຈ ຂເຓ ຂເຓ ນິຣຸຊ຺ຌນ຺ຕິ.

ຍຖາ ຕໍ ເຠຣິຕເລ ເຠຣິສທ຺ທາ ອຸປ຺ປຊ຺ຊມານາ ຕຕ຺ຖ ຕຕ຺ຖ ຫຕ຺ເຖນ ປຫຣຓກາເລ ເອວ ຂເຓ ຂເຓ ອຸປ຺ປຊ຺ຊນ຺ຕິ, ອຸປ຺ປຊ຺ຊິຕ຺ວາ ຈ ຂເຓ ຂເຓ ນິຣຸຊ຺ຌນ຺ຕິ. ວີຓາສທ຺ທາ ອຸປ຺ປຊ຺ຊມານາ ວີຓາຕນ຺ຕີສຸ ຕຕ຺ຖ ຕຕ຺ຖ ວີຓາທນ຺ຕເກນ ປຫຣຓກາເລ ເອວ ຂເຓ ຂເຓ ອຸປ຺ປຊ຺ຊນ຺ຕິ, ອຸປ຺ປຊ຺ຊິຕ຺ວາ ຈ ຂເຓ ຂເຓ ນິຣຸຊ຺ຌນ຺ຕີຕິ. ນິທ຺ທາຍນ຺ຕສ຺ສ ຠວງ຺ຄຈິຕ຺ຕປ຺ປວຕ຺ຕິ ກາເລປິ ປຸພ຺ພຠເວ ມຣຓາສນ຺ນກາເລ ຉສຸ ທ຺ວາເຣສຸ ອາປາຕ ມາຄຕານິ ກມ຺ມ ກມ຺ມນິມິຕ຺ຕ ຄຕິນິມິຕ຺ຕານິ ເອວ ຠວງ຺ຄຈິຕ຺ຕານໍ ອາຣມ຺ມຓປຈ຺ຈໂຍຕິ. ອາຣມ຺ມຓປຈ຺ຈຍທີປນາ ນິຏ຺ຐິຕາ.

ທຸວິໂຘ ອຘິປຕິປຈ຺ຈໂຍ ອາຣມ຺ມຓາຘິປຕິປຈ຺ຈໂຍ ສຫ ຊາຕາຘິປຕິປຈ຺ຈໂຍ ຈ. ຕຕ຺ຖ ກຕໂມ ອາຣມ຺ມຓາຘິປຕິປຈ຺ຈໂຍ. ອາຣມ຺ມຓປຈ຺ຈເຍ ວຸຕ຺ເຕສຸ ອາຣມ຺ມເຓສຸ ຍານິ ອາຣມ຺ມຓານິ ອຕິອິຏ຺ຐານິ ໂຫນ຺ຕິ ອຕິກນ຺ຕານິ ອຕິມນາປານິ ຄຣຸກຕານິ. ຕານິ ອາຣມ຺ມຓານິ ອາຣມ຺ມຓາຘິປຕິປຈ຺ຈໂຍ. ຕຕ຺ຖ ອຕິອິຏ຺ຐານີຕິ ສຠາວໂຕ ອິຏ຺ຐານິ ວາ ໂຫນ຺ຕຸ ອນິຏ຺ຐານິ ວາ, ເຕນ ເຕນ ປຸຄ຺ຄເລນ ອຕິອິຈ຺ຉິຕານິ ອາຣມ຺ມຓານິ ອິຘ ອຕິອິຏ຺ຐານິ ນາມ.

ຕານິ ປນ ຘມ຺ມໂຕ ທ຺ເວ ໂທສມູລຈິຕ຺ຕຸປ຺ປາເທ ຈ ທ຺ເວ ໂມມູຫ ຈິຕ຺ຕຸປ຺ປາເທ ຈ ທຸກ຺ຂສຫຄຕກາຍວິຎ຺ຎາຓຈິຕ຺ຕຸປ຺ປາເທ ຈ ຐເປຕ຺ວາ ອວເສສານິ ສພ຺ພານິ ກາມາວຈຣຈິຕ຺ຕເຈຕສິການິ ຈ ຣູປາຣູປ ໂລກຸຕ຺ຕຣຈິຕ຺ຕເຈຕສິການິ ຈ ສພ຺ພານິ ອຕິອິຏ຺ຐຣູປານິ ຈ ໂຫນ຺ຕິ.

ເຕສຸປິ ¶ ກາມາຣມ຺ມຓານິ ຄຣຸໍ ກໂຣນ຺ຕສ຺ເສວ ອາຣມ຺ມຓາ ຘິປຕິປຈ຺ຈໂຍ. ຄຣຸໍ ອກໂຣນ຺ຕສ຺ສ ອາຣມ຺ມຓາຘິປຕິປຈ຺ຈໂຍ ນ ໂຫຕິ. ຌານລາຠິໂນ ປນ ອຕ຺ຕນາ ປຏິລທ຺ຘານິ ມຫຄ຺ຄຕຌານານິ ອຣິຍສາວກາ ຈ ອຕ຺ຕນາ ປຏິລທ຺ເຘ ໂລກຸຕ຺ຕຣຘມ຺ເມ ຄຣຸໍ ອກໂຣນ຺ຕາ ນາມ ນຕ຺ຖິ.

ກຕເມ ຘມ຺ມາ ຕສ຺ສ ປຈ຺ຈຍສ຺ສ ປຈ຺ຈຍຸປ຺ປນ຺ນາ. ອຏ຺ຐ ໂລຠ ມູລຈິຕ຺ຕານິ ອຏ຺ຐ ກາມາວຈຣກຸສລຈິຕ຺ຕານິ ຈຕ຺ຕາຣິ ກາມາວຈຣ ຎາຓສມ຺ປຍຸຕ຺ຕກິຣິຍຈິຕ຺ຕານິ ອຏ຺ຐ ໂລກຸຕ຺ຕຣຈິຕ຺ຕານິ ຕສ຺ສ ປຈ຺ຈຍສ຺ສ ປຈ຺ຈຍຸປ຺ປນ຺ນາ.

ຕຕ຺ຖ ໂລກິຍານິ ຉຬາຣມ຺ມຓານິ ໂລຠມູລຈິຕ຺ຕານໍ ປຈ຺ຈໂຍ. ສຕ຺ຕຣສ ໂລກິຍກຸສລານິ ຈຕຸນ຺ນໍ ຎາຓວິປ຺ປຍຸຕ຺ຕ ກຸສລານໍ. ຕານິ ກຸສລານິເຈວ ເຫຏ຺ຐິມມຄ຺ຄຜລານິ ຈ ນິພ຺ພານຎ຺ຈ ຈຕຸນ຺ນໍ ຎາຓສມ຺ປຍຸຕ຺ຕກຸສລານໍ. ອຣຫຕ຺ຕມຄ຺ຄຜລານິ ຈ ນິພ຺ພານຎ຺ຈ ຈຕຸນ຺ນໍ ຎາຓສມ຺ປຍຸຕ຺ຕກິຣິຍານໍ. ນິພ຺ພານໍ ອຏ຺ຐນ຺ນໍ ໂລກຸຕ຺ຕຣ ຈິຕ຺ຕານນ຺ຕິ.

ເກນຏ຺ເຐນ ອາຣມ຺ມຓໍ, ເກນຏ຺ເຐນ ອຘິປຕິ. ອາລມ຺ພິ ຕພ຺ພຏ຺ເຐນ ອາຣມ຺ມຓໍ, ອາຘິປຈ຺ຈຏ຺ເຐນ ອຘິປຕິ. ໂກ ອາຘິປຈ຺ຈຏ຺ໂຐ. ອຕ຺ຕານໍ ຄຣຸໍ ກຕ຺ວາ ປວຕ຺ເຕສຸ ຈິຕ຺ຕເຈຕສິເກສຸ ອິສ຺ສຣຠາໂວ ອາຘິປຈ຺ຈຏ຺ໂຐ. ໂລເກ ສາມິກາ ວິຍ ອາຣມ຺ມຓາຘິປຕິປຈ຺ຈຍ ຘມ຺ມາ ທຏ຺ຐພ຺ພາ, ທາສາ ວິຍ ປຈ຺ຈຍຸປ຺ປນ຺ນຘມ຺ມາ ທຏ຺ຐພ຺ພາ.

ສຸຕໂສມຊາຕເກ ຣາຊາ ໂປຣິສາໂທ ມນຸສ຺ສມໍສໍ ຄຣຸໍ ກໂຣນ຺ໂຕ ມນຸສ຺ສມໍສເຫຕຸ ຣຊ຺ຊໍ ປຫາຍ ອຣຎ຺ເຎ ວິຈຣຕິ. ຕຕ຺ຖ ມນຸສ຺ສມໍເສ ຄນ຺ຘຣສ ຘມ຺ມາ ອາຣມ຺ມຓາຘິປຕິປຈ຺ຈໂຍ. ຣຎ຺ໂຎ ໂປຣິສາທສ຺ສ ໂລຠມູລຈິຕ຺ຕໍ ປຈ຺ຈຍຸປ຺ປນ຺ນຘມ຺ໂມ. ຣາຊາ ສຸຕ ໂສໂມ ສຈ຺ຈຘມ຺ມໍ ຄຣຸໍ ກຕ຺ວາ ສຈ຺ຈຘມ຺ມເຫຕຸ ຣຊ຺ຊສມ຺ປຕ຺ຕິຎ຺ຈ ຎາຕິ ສງ຺ຆຎ຺ຈ ອຕ຺ຕໂນ ຊີວິຕຎ຺ຈ ຉຏ຺ເຏຕ຺ວາ ປຸນ ຣຎ຺ໂຎ ໂປຣິສາທສ຺ສ ຫຕ຺ຖໍ ອຸປຄໂຕ. ຕຕ຺ຖ ສຈ຺ຈຘມ຺ໂມ ອາຣມ຺ມຓາຘິປຕິປຈ຺ຈໂຍ. ຣຎ຺ໂຎ ສຸຕໂສມສ຺ສ ກຸສລຈິຕ຺ຕໍ ປຈ຺ຈຍຸປ຺ປນ຺ນຘມ຺ໂມ. ເອສນໂຍ ສພ຺ເພສຸ ຄຣຸກເຕສຸ ອາຣມ຺ມເຓສຸ.

ກຕໂມ ສຫຊາຕາຘິປຕິປຈ຺ຈໂຍ. ອຘິປຕິຠາວໍ ປຕ຺ຕາ ຈຕ຺ຕາໂຣ ຘມ຺ມາ ອຘິປຕິປຈ຺ຈໂຍ, ຉນ຺ໂທ ຈິຕ຺ຕໍ ວີຣິຍໍ ວີມໍສາ.

ກຕເມ ຘມ຺ມາ ຕສ຺ສ ປຈ຺ຈຍສ຺ສ ປຈ຺ຈຍຸປ຺ປນ຺ນາ. ອຘິປຕິ ສມ຺ປຍຸຕ຺ຕາ ຈິຕ຺ຕເຈຕສິກາ ຈ ອຘິປຕິສມຸຏ຺ຐິຕາ ຈິຕ຺ຕຊຣູປຘມ຺ມາ ຈ ຕສ຺ສ ປຈ຺ຈຍສ຺ສ ປຈ຺ຈຍຸປ຺ປນ຺ນາ.

ເກນຏ຺ເຐນ ສຫຊາໂຕ, ເກນຏ຺ເຐນ ອຘິປຕິ.

ສຫຸປ຺ປາທນຏ຺ເຐນ ສຫຊາໂຕ, ສຫຊາຕານໍ ຘມ຺ມານໍ ອຠິຠວນຏ຺ເຐນ ອຘິປຕິ. ຕຕ຺ຖ ສຫຸປ຺ປາທນຏ຺ເຐນາຕິ ¶ ໂຍ ຘມ຺ໂມ ສຍໍ ອຸປ຺ປຊ຺ຊມາໂນ ອຕ຺ຕນາ ສຫຊາຕຘມ຺ເມ ຈ ອຕ຺ຕນາ ສເຫວ ອຸປ຺ປາເທຕິ, ຕສ຺ສ ອຕ຺ຕນາ ສຫຊາຕຘມ຺ມານໍ ສຫຸປ຺ປາທນຏ຺ເຐນ.

ອຠິຠວນຏ຺ເຐນາຕິ ອຊ຺ໂຌຕ຺ຖຣຓຏ຺ເຐນ. ຍຖາ ຣາຊາ ຈກ຺ກວຕ຺ຕິ ອຕ຺ຕໂນ ປຸຎ຺ຎິທ຺ຘິຍາ ສກລທີປວາສິໂນ ອຠິຠວນ຺ໂຕ ອຊ຺ໂຌຕ຺ຖຣນ຺ໂຕ ອຕ຺ຕໂນ ວເສ ວຕ຺ຕາເປຕິ, ສກລທີປວາສິໂນ ຈ ຕສ຺ສ ວເສ ວຕ຺ຕນ຺ຕິ. ຕຖາ ອຘິປຕິຏ຺ຐານປຕ຺ຕາ ອິເມ ຈຕ຺ຕາໂຣ ຘມ຺ມາ ອຕ຺ຕໂນ ອຕ຺ຕໂນ ວິສເຍ ສຫຊາຕຘມ຺ເມ ອຠິຠວນ຺ຕາ ອຊ຺ໂຌຕ຺ຖຣນ຺ຕາ ອຕ຺ຕໂນ ວເສ ວຕ຺ຕາເປນ຺ຕິ, ສຫຊາຕຘມ຺ມາ ຈ ເຕສໍ ວເສ ວຕ຺ຕນ຺ຕິ. ຍຖາ ວາ ສິລາຖມ຺ເຠ ປຖວິຘາຕຸ ອຸທກກ຺ຂນ຺ເຘ ອາໂປຘາຕຸ ອຄ຺ຄິກ຺ຂນ຺ເຘ ເຕໂຊຘາຕຸ ວາຕກ຺ຂນ຺ເຘ ວາໂຍຘາຕຸ ອຕ຺ຕນາ ສຫຊາຕາ ຕິສ຺ໂສ ຘາຕຸໂຍ ອຠິຠວນ຺ຕາ ອຊ຺ໂຌຕ຺ຖຣນ຺ຕາ ອຕ຺ຕໂນ ຄຕິໍ ຄມາເປນ຺ຕິ, ສຫຊາຕຘາຕຸໂຍ ຈ ຕາສໍ ຄຕິໍ ຄຈ຺ຉນ຺ຕິ, ເອວເມວ ອຘິປຕິຏ຺ຐານປຕ຺ຕາ ອິເມ ຈຕ຺ຕາໂຣ ຘມ຺ມາ ອຕ຺ຕໂນ ພເລນ ສຫຊາຕຘມ຺ເມ ອຕ຺ຕໂນ ຄຕິໍ ຄມາເປນ຺ຕິ, ສຫຊາຕຘມ຺ມາ ຈ ເຕສໍ ຄຕິໍ ຄຈ຺ຉນ຺ຕິ, ເອວໍ ສຫຊາຕຘມ຺ມານໍ ອຠິຠວນຏ຺ເຐນ.

ເອຕ຺ຖ ວເທຍ຺ຍຸໍ, ຍທິ ສຫຊາຕຘມ຺ມານໍ ອຠິຠວນຏ຺ເຐນ ອຘິປຕິນາມ ສິຍາ. ເອວໍ ສຕິ ຕິຏ຺ຐຕຸ ຉນ຺ໂທ, ໂລໂຠ ເອວ ອຘິປຕິນາມ ສິຍາ, ໂສ ຫິ ຉນ຺ທໂຕປິ ພລວຕໂຣ ຫຸຕ຺ວາ ສຫ ຊາຕຘມ຺ເມ ອຠິຠວນ຺ໂຕ ປວຕ຺ຕຕີຕິ. ວຸຈ຺ຈເຕ, ພາລປຸຖຸຊ຺ຊເນສຸ ເອວ ໂລໂຠ ຉນ຺ທໂຕ ພລວຕໂຣ ໂຫຕິ, ປຓ຺ຑິເຕສຸ ປນ ຉນ຺ໂທ ເອວ ໂລຠໂຕ ພລວຕໂຣ ຫຸຕ຺ວາ ສຫຊາຕຘມ຺ເມ ອຠິ ຠວນ຺ໂຕ ປວຕ຺ຕຕິ. ສເຈ ຫິ ໂລໂຠ ເອວ ຉນ຺ທໂຕ ພລວຕໂຣ ສິຍາ, ກຖໍ ອິເມ ສຕ຺ຕາ ໂລຠສ຺ສ ຫຕ຺ຖຄຕາ ຠວສມ຺ປຕ຺ຕິ ໂຠຄສມ຺ມຕ຺ຕິໂຍ ຉຏ຺ເຏຕ຺ວາ ເນກ຺ຂມ຺ມຘມ຺ເມ ປູເຣຕ຺ວາ ວຏ຺ຏທຸກ຺ຂໂຕ ນິສ຺ສເຣຍ຺ຍຸໍ. ຍສ຺ມາ ປນ ຉນ຺ໂທ ເອວ ໂລຠໂຕ ພລວຕໂຣ ໂຫຕິ, ຕສ຺ມາ ອິເມ ສຕ຺ຕາ ໂລຠສ຺ສ ຫຕ຺ຖຄຕາ ຠວສມ຺ປຕ຺ຕິ ໂຠຄສມ຺ປຕ຺ຕິໂຍ ຉຏ຺ເຏຕ຺ວາ ເນກ຺ຂມ຺ມຘມ຺ເມ ປູເຣຕ຺ວາ ວຏ຺ຏທຸກ຺ຂໂຕ ນິສ຺ສຣນ຺ຕິ. ຕສ຺ມາ ຉນ຺ໂທ ເອວ ໂລຠໂຕ ພລວຕໂຣ ໂຫຕິ, ຉນ຺ໂທ ເອວ ອຘິປຕິ, ນ ໂລໂຠຕິ. ເອສ ນໂຍ ໂທສາທີສຸປີຕິ.

ຕຕ຺ຖ ໂລເກ ມຫນ຺ເຕສຸ ສຸທຸກ຺ກເຣສຸ ປຸຣິສກມ຺ເມສຸ ປຈ຺ຈຸປຏ຺ຐິເຕສຸ ອິເມ ຈຕ຺ຕາໂຣ ຘມ຺ມາ ກມ຺ມສິທ຺ຘິຍາ ສໍວຕ຺ຕນ຺ຕິ. ກຖໍ.

ຫີນຈ຺ຉນ຺ທາ ພຫຸຊ຺ຊນາ ມຫນ຺ຕານິ ສຸທຸກ຺ກຣານິ ປຸຣິສກມ຺ມານິ ທິສ຺ວາ ນິວຕ຺ຕຈ຺ຉນ຺ທາ ໂຫນ຺ຕິ. ກາຕຸໍ ນ ອິຈ຺ຉນ຺ຕິ, ອມ຺ຫາກໍ ອວິສໂຍຕິ ນິຣເປກ຺ຂາ ຐເປນ຺ຕິ. ຉນ຺ທາຘິໂກ ປນ ຕາທິສານິ ປຸຣິສກມ຺ມານິ ທິສ຺ວາ ອຸຄ຺ຄຕຈ຺ຉນ຺ໂທ ໂຫຕິ, ອຕິວິຍ ¶ ກາຕຸໍ ອິຈ຺ຉຕິ, ມມ ວິສໂຍ ເອໂສຕິ ອຘິຏ຺ຐານໍ ຄຈ຺ຉຕິ. ໂສ ຉນ຺ເທນ ອຠິກຑ຺ຒິໂຕ ຍາວ ຕໍ ກມ຺ມໍ ນ ສິຊ຺ຌຕິ, ຕາວ ອນ຺ຕຣາ ຕໍ ກມ຺ມໍ ຉຏ຺ເຏຕຸໍ ນ ສກ຺ໂກຕິ. ເອວຎ຺ຈ ສຕິ ອຕິມຫນ຺ຕໍປິ ຕໍ ກມ຺ມໍ ເອກສ຺ມິໍ ກາເລ ສິທ຺ຘໍ ຠວິສ຺ສຕິ.

ຫີນວີຣິຍາ ຈ ພຫຸຊ຺ຊນາ ຕາທິສານິ ກມ຺ມານິ ທິສ຺ວາ ນິວຕ຺ຕ ວີຣິຍາ ໂຫນ຺ຕິ, ອິທໍ ເມ ກມ຺ມໍ ກໂຣນ຺ຕສ຺ສ ພຫຸໍ ກາຍທຸກ຺ຂໍ ວາ ເຈໂຕທຸກ຺ຂໍ ວາ ຠວິສ຺ສຕີຕິ ນິວຕ຺ຕນ຺ຕິ. ວີຣິຍາຘິໂກ ປນ ຕາທິສານິ ປຸຣິສກມ຺ມານິ ທິສ຺ວາ ອຸຄ຺ຄຕວີຣິໂຍ ໂຫຕິ, ອິທາເນວ ອຸຏ຺ຐຫິຕ຺ວາ ກາຕຸໍ ອິຈ຺ຉຕິ. ໂສ ຈິຣກາລໍປິ ຕໍ ກມ຺ມໍ ກໂຣນ຺ໂຕ ພຫຸໍ ກາຍທຸກ຺ຂໍ ວາ ເຈໂຕທຸກ຺ຂໍ ວາ ອນຸຠວນ຺ໂຕປິ ຕສ຺ມິໍ ວີຣິຍ ກມ຺ເມ ນນິພ຺ພິນ຺ທຕິ, ມຫນ຺ເຕນ ກມ຺ມວີຣິເຍນ ວິນາ ຠວິຕຸໍ ນ ສກ຺ໂກຕິ, ຕາທິເສນ ວີຣິເຍນ ຣຕ຺ຕິທິວໍ ເຂເປນ຺ໂຕ ຈິຕ຺ຕສຸຂໍ ວິນ຺ທຕິ. ເອວຎ຺ຈ ສຕິ ອຕິມຫນ຺ຕໍປິ ຕໍ ກມ຺ມໍ ເອກສ຺ມິໍ ກາເລ ສິທ຺ຘໍ ຠວິສ຺ສຕິ.

ຫີນຈິຕ຺ຕາ ຈ ພຫຸຊ຺ຊນາ ຕາທິສານິ ກມ຺ມານິ ທິສ຺ວາ ນິວຕ຺ຕຈິຕ຺ຕາ ໂຫນ຺ຕິ. ປຸນ ອາຣມ຺ມຓໍປິ ນ ກໂຣນ຺ຕິ. ຈິຕ຺ຕາຘິໂກ ປນ ຕາທິສານິ ກມ຺ມານິ ທິສ຺ວາ ອຸຄ຺ຄຕຈິຕ຺ໂຕ ໂຫຕິ, ຈິຕ຺ຕໍ ວິໂນເທຕຸໍປິ ນ ສກ຺ໂກຕິ, ນິຈ຺ຈກາລໍ ຕຕ຺ຖ ນິພນ຺ຘຈິຕ຺ໂຕ ໂຫຕິ. ໂສ ຈິຕ຺ຕວສິໂກ ຫຸຕ຺ວາ ຈິຣກາລໍປິ ຕໍ ກມ຺ມໍ ກໂຣນ຺ໂຕ ພຫຸໍ ກາຍທຸກ຺ຂໍວາປີຕິອາທິນາ ຉນ຺ທາຘິປຕິນເຍນ ວຕ຺ຕພ຺ພໍ.

ມນ຺ທປຎ຺ຎາ ຈ ພຫຸຊ຺ຊນາ ຕາທິສານິ ກມ຺ມານິ ທິສ຺ວາ ນິວຕ຺ຕປຎ຺ຎາ ໂຫນ຺ຕິ, ກມ຺ມານໍ ອາທິມ຺ປິ ນ ປສ຺ສນ຺ຕິ, ອນ຺ຕປິ ນ ປສ຺ສນ຺ຕິ, ອນ຺ຘກາເຣ ປວິສນ຺ຕາ ວິຍ ໂຫນ຺ຕິ, ຕານິ ກມ຺ມານິ ກາຕຸໍ ຈິຕ຺ຕໍປິ ນ ນມຕິ. ປຎ຺ຎາຘິໂກ ປນ ຕາທິສານິ ກມ຺ມານິ ທິສ຺ວາ ອຸຄ຺ຄຕປຎ຺ໂຎ ໂຫຕິ, ກມ຺ມານໍ ອາທິໍປິ ປສ຺ສຕິ, ອນ຺ຕໍປິ ປສ຺ສຕິ, ຜລໍປິ ປສ຺ສຕິ, ອານິສໍສໍປິ ປສ຺ສຕິ. ສຸເຂນ ກມ຺ມສິທ຺ຘິຍາ ນານາອຸປາຍໍປິ ປສ຺ສຕິ. ໂສ ຈິຣກາລໍປິ ຕໍ ກມ຺ມໍ ກໂຣນ຺ໂຕຕິອາທິນາ ວີຣິຍາຘິປຕິນເຍນ ວຕ຺ຕພ຺ພໍ. ອິຘ ປນ ມຫຕິຍາ ກມ຺ມວີມໍສາຍາຕິ ຈ ຕາທິສິຍາ ກມ຺ມ ວີມໍສາຍາຕິ ຈ ວຕ຺ຕພ຺ພໍ.

ເອວໍ ໂລເກ ມຫນ຺ເຕສຸ ສຸທຸກ຺ກເຣສຸ ປຸຣິສກມ຺ເມສຸ ປຈ຺ຈຸປຏ຺ຐິເຕສຸ ອິເມ ຈຕ຺ຕາໂຣ ຘມ຺ມາ ກມ຺ມສິທ຺ຘິຍາ ສໍວຕ຺ຕນ຺ຕິ. ອິເມສຎ຺ຈ ຈຕຸນ຺ນໍ ອຘິປຕີນໍ ວິຊ຺ຊມານຕ຺ຕາ ໂລເກ ປຸຣິສວິເສສາ ນາມ ທິສ຺ສນ຺ຕິ, ສພ຺ພຎ຺ຎຸພຸທ຺ຘາ ນາມ ທິສ຺ສນ຺ຕິ, ສພ຺ພຎ຺ຎຸໂພຘິສຕ຺ຕາ ນາມ ທິສ຺ສນ຺ຕິ, ປຈ຺ເຈກພຸທ຺ຘາ ນາມ ທິສ຺ສນ຺ຕິ, ປຈ຺ເຈກໂພຘິສຕ຺ຕານາມ ທິສ຺ສນ຺ຕິ, ອຄ຺ຄສາວການາມ ມຫາສາວກາ ນາມ ສາວກໂພຘິສຕ຺ຕາ ນາມ ທິສ຺ສນ຺ຕິ. ໂລເກປິ ເອວຣູປານໍ ປຸຣິສວິເສສານໍ ວເສນ ສຕ຺ຕ ໂລກສ຺ສ ອຕ຺ຖາຍ ຫິຕາຍ ສຸຂາຍ ປຎ຺ຎາສິປ຺ປວິເສສາ ຈ ປຣິໂຠຄວຕ຺ຖຸວິເສສາ ຈ ທິສ຺ສນ຺ຕີຕິ. ອຘິປຕິປຈ຺ຈຍທີປນາ ນິຏ຺ຐິຕາ.

ກຕໂມ ¶ ອນນ຺ຕຣປຈ຺ຈໂຍ. ອນນ຺ຕເຣ ຂເຓ ນິຣຸທ຺ໂຘ ຈິຕ຺ຕ ເຈຕສິກຘມ຺ມສມູໂຫ ອນນ຺ຕຣປຈ຺ຈໂຍ.

ກຕໂມ ຘມ຺ໂມ ອນນ຺ຕຣປຈ຺ຈຍສ຺ສ ປຈ຺ຈຍຸປ຺ປນ຺ໂນ. ປຈ຺ຉິເມ ອນນ຺ຕເຣ ເອວ ຂເຓ ອຸປ຺ປນ຺ໂນ ຈິຕ຺ຕເຈຕສິກຘມ຺ມສມູໂຫ ຕສ຺ສ ປຈ຺ຈຍສ຺ສ ປຈ຺ຈຍຸປ຺ປນ຺ໂນ.

ເອກສ຺ມິໍ ຠເວ ປຏິສນ຺ຘິຈິຕ຺ຕໍ ປຐມຠວງ຺ຄຈິຕ຺ຕສ຺ສ ອນນ຺ຕຣ ປຈ຺ຈໂຍ, ປຐມ ຠວງ຺ຄຈິຕ຺ຕໍ ທຸຕິຍຠວງ຺ຄຈິຕ຺ຕສ຺ສ ອນນ຺ຕຣປຈ຺ຈໂຍຕິອາທິນາ ວຕ຺ຕພ຺ໂພ.

ຍທາ ປນ ຘມ຺ມຍມເກ ສຸທ຺ຘາວາສານໍ ທຸຕິເຍ ອກຸສເລ ຈິຕ຺ເຕ ວຕ຺ຕມາເນຕິ ວຸຕ຺ຕນເຍນ ຕສ຺ສ ສຕ຺ຕສ຺ສ ອຕ຺ຕໂນ ອຠິນວໍ ອຕ຺ຕຠາວໍ ອາຣພ຺ຠ ເອຕໍ ມມ ເອໂສຫມສ຺ມິ ເອໂສ ເມ ອຕ຺ຕາຕິ ປວຕ຺ຕໍ ຠວນິກນ຺ຕິກ ຕຓ຺ຫາສຫຄຕຈິຕ຺ຕໍ ອຸປ຺ປຊ຺ຊຕິ. ຕທາ ປຐມໍ ທ຺ວິກ຺ຂຕ຺ຕຸໍ ຠວງ຺ຄໍ ຈລຕິ. ຕໂຕ ມໂນທ຺ວາຣາວຊ຺ຊນຈິຕ຺ຕໍ ອຸປ຺ປຊ຺ຊຕິ. ຕໂຕ ສຕ຺ຕ ຠວນິກນ຺ຕິກຊວນານິ ອຸປ຺ປຊ຺ຊນ຺ຕິ. ຕໂຕ ປຣໍ ຠວງ຺ຄວາໂຣ.

ອປິ ຈ ໂສ ສຕ຺ໂຕ ຕທາ ປຈ຺ຈຸປ຺ປນ຺ນຠເວ ກິຎ຺ຈິ ນ ຊານາຕິ, ປຸພ຺ພຠເວ ອຕ຺ຕນາ ອນຸຠູຕໍ ອາຣມ຺ມຓໍ ອນຸສ຺ສຣມາໂນ ອຈ຺ຉຕິ. ວຕ຺ຖຸສ຺ສ ປນ ອຕິທຸພ຺ພລຕ຺ຕາ ຕຎ຺ຈ ອາຣມ຺ມຓໍ ອປຣິພ຺ຍຕ຺ຕເມວ ໂຫຕິ. ຕໍ ອາຣພ຺ຠ ອຸທ຺ຘຈ຺ຈສຫຄຕຈິຕ຺ຕເມວ ພຫຸລໍ ປວຕ຺ຕຕິ.

ຍທາ ຄພ຺ໂຠ ໂຖກໍ ວຑ຺ຒມາໂນ ໂຫຕິ ອຕິເຣກທ຺ເວມາສໍ ຄໂຕ, ຕທາ ຈກ຺ຂາທີນິ ອິນ຺ທ຺ຣິຍານິ ປຣິປຸຓ຺ຓານິ ໂຫນ຺ຕິ. ເອວໍ ສນ຺ເຕປິ ມາຕຸຄພ຺ເຠ ອາໂລກາທີນໍ ປຈ຺ຈຍານໍ ອຠາວໂຕ ຈກ຺ຂຸວິຎ຺ຎາຓາທີນິ ຈຕ຺ຕາຣິ ວິຎ຺ຎາຓານິ ນຸປ຺ປຊ຺ຊນ຺ຕິ, ກາຍວິຎ຺ຎາຓມໂນວິຎ຺ຎາຓານິ ເອວ ອຸປ຺ປຊ຺ຊນ຺ຕິ. ໂສ ສຕ຺ໂຕ ມາຕຸຍາ ອິຣິຍາປຖປຣິວຕ຺ຕນາທີສຸ ພຫູນິ ທຸກ຺ຂໂທມນສ຺ສານິ ປຈ຺ຈນຸໂຠຕິ. ວິຊາຍນກາເລ ປນ ຠຸສໍ ທຸກ຺ຂໍ ນິຄຈ຺ຉຕິເຍວ. ວິຊາຍິຕ຺ວາປິ ຍາວ ວຕ຺ຖຸຣູປານິ ມຸທູນິ ໂຫນ຺ຕິ, ປຣິປາກໍ ນ ຄຈ຺ຉນ຺ຕິ, ຕາວ ໂສ ອຕິມນ຺ທຣູໂປ ອຸຕ຺ຕານເສຍ຺ຍໂກ ຫຸຕ຺ວາ ອຈ຺ຉຕິ. ນ ກິຎ຺ຈິ ປຈ຺ຈຸປ຺ປນ຺ນໍ ອາຣມ຺ມຓໍ ສລ຺ລກ຺ເຂຕິ. ເຍຠຸຍ຺ເຍນ ປຸຣິມ ຠວານຸສາຣີ ເອວ ຕສ຺ສ ວິຎ຺ຎາຓໍ ໂຫຕິ. ສເຈ ໂສ ນິຣຍ ຠວໂຕ ອາຄໂຕ ໂຫຕິ, ໂສ ວິຣູປມຸຂພຫຸໂລ ໂຫຕິ. ປຸຣິມານິ ນິຣຍາຣມ຺ມຓານິ ອາຣພ຺ຠ ຂເຓ ຂເຓ ວິຣູປມຸຂມສ຺ສ ປຎ຺ຎາຍຕິ. ອຖ ເທວໂລກໂຕ ອາຄໂຕ ໂຫຕິ, ທິພ຺ພານິ ອາຣມ຺ມຓານິ ອາຣພ຺ຠ ວິປ຺ປສນ຺ນມຸຂພຫຸໂລ ໂຫຕິ, ຂເຓ ຂເຓ ມິຫິຕມຸຂມສ຺ສ ປຎ຺ຎາຍຕິ.

ຍທາ ປນ ວຕ຺ຖຸຣູປານິ ຕິກ຺ຂານິ ໂຫນ຺ຕິ, ປຣິປາກໍ ຄຈ຺ຉນ຺ຕິ. ວິຎ຺ຎາຓານິ ຈສ຺ສ ສຸວິສທານິ ປວຕ຺ຕນ຺ຕິ. ຕທາ ອມນ຺ທຣູໂປ ຫຸຕ຺ວາ ກີຬນ຺ໂຕ ລີຬນ຺ໂຕ ໂມທນ຺ໂຕ ¶ ປໂມທນ຺ໂຕ ອຈ຺ຉຕິ. ປຈ຺ຈຸປ຺ປນ຺ເນ ອາຣມ຺ມຓານິ ສລ຺ລກ຺ເຂຕິ. ມາຕຸຠາສໍ ສລ຺ລກ຺ເຂຕິ. ອິຘ ໂລການຸສາຣີ ວິຎ຺ຎາຓມສ຺ສ ພຫຸລໍ ປວຕ຺ຕຕິ. ປຸຣິມຊາຕິໍ ປມຸສ຺ສຕິ.

ກິໍ ປນ ສພ຺ໂພປິ ສຕ຺ໂຕ ອິມສ຺ມິໍ ຐາເນ ເອວ ປຸຣິມໍ ຊາຕິໍ ປມຸສ຺ສຕີຕິ ເຈ. ນ ສພ຺ໂພປິ ສຕ຺ໂຕ ອິມສ຺ມິໍ ຐາເນ ເອວ ປມຸສ຺ສຕິ. ໂກຈິ ອຕິເຣກຕຣໍ ຄມ຺ຠວາສທຸກ຺ເຂນ ປຣິປີຬິໂຕ ຄພ຺ເຠ ເອວ ປມຸສ຺ສຕິ. ໂກຈິ ວິຊາຍນກາເລ, ໂກຈິ ອິມສ຺ມິໍ ຐາເນ ປມຸສ຺ສຕິ. ໂກຈິ ອິໂຕປຣມ຺ປິ ທຫຣກາເລ ນ ປມຸສ຺ສຕິ. ວຸຑ຺ຒກາເລ ເອວ ປມຸສ຺ສຕິ. ໂກຈິ ຍາວຊີວໍປິ ນ ປມຸສ຺ສຕິ. ທ຺ເວ ຕໂຍ ຠເວ ອນຸສ຺ສຣນ຺ໂຕປິ ອຕ຺ຖິເຍວ. ອິເມ ຊາຕິສ຺ສຣສຕ຺ຕາ ນາມ ໂຫນ຺ຕິ.

ຕຕ຺ຖ ວິຊາຍນກາລໂຕ ປຏ຺ຐາຍ ຉທ຺ວາຣິກວີຖິຈິຕ຺ຕານິ ປວຕ຺ຕນ຺ຕິ. ປຈ຺ຈຸປ຺ປນ຺ນາຣມ຺ມຓໍ ສລ຺ລກ຺ຂຓໂຕ ປຏ຺ຐາຍ ຉທ຺ວາຣິກວີຖິ ຈິຕ຺ຕານິ ປຣິປຸຓ຺ຓານິ ປວຕ຺ຕນ຺ຕິ. ສພ຺ພຕ຺ຖປິ ປຸຣິມໍ ປຸຣິມໍ ອນນ຺ຕເຣ ນິຣຸທ຺ຘໍ ຈິຕ຺ຕໍ ປຈ຺ຉິມສ຺ສ ປຈ຺ຉິມສ຺ສ ອນນ຺ຕເຣ ອຸປ຺ປນ຺ນສ຺ສ ຈິຕ຺ຕສ຺ສ ອນນ຺ຕຣ ປຈ຺ຈໂຍ ໂຫຕິ. ອຍຎ຺ຈ ອນນ຺ຕຣປຈ຺ຈໂຍ ນາມ ອນມຕຄ຺ເຄ ສໍສາເຣ ເອກສ຺ສ ສຕ຺ຕສ຺ສ ເອກປ຺ປພນ຺ໂຘ ເອວ ໂຫຕິ. ຍທາ ສຕ຺ໂຕ ອຣຫຕ຺ຕ ມຄ຺ຄໍ ລຠິຕ຺ວາ ຂນ຺ຘປຣິນິພ຺ພານໍ ປາປຸຓາຕິ, ຕທາ ເອວ ໂສ ປພນ຺ໂຘ ຉິຊ຺ຊຕິ.

ເກນຏ຺ເຐນ ອນນ຺ຕໂຣ, ເກນຏ຺ເຐນ ປຈ຺ຈໂຍຕິ. ອຕ຺ຕໂນ ອນນ຺ຕເຣ ອຕ຺ຕສທິສສ຺ສ ຘມ຺ມນ຺ຕຣສ຺ສ ອຸປ຺ປາທນຏ຺ເຐນ ອນນ຺ຕໂຣ, ອຸປກາຣກຏ຺ເຐນ ປຈ຺ຈໂຍ. ຕຕ຺ຖ ອຕ຺ຕສທິສສ຺ສາຕິ ສາຣມ຺ມຓ ຠາເວນ ອຕ຺ຕນາ ສທິສສ຺ສ. ສາຣມ຺ມຓຠາເວນາຕິ ຈ ໂຍ ຘມ຺ໂມ ອາຣມ຺ມເຓນ ວິນາ ນ ປວຕ຺ຕຕິ, ໂສ ສາຣມ຺ມໂຓ ນາມ, ເອວໍ ສາຣມ຺ມຓຠາເວນ. ຘມ຺ມນ຺ຕຣສ຺ສ ອຸປ຺ປາທນຏ຺ເຐນາຕິ ປຸຣິມສ຺ມິໍ ຈິຕ຺ເຕ ນິຣຸທ຺ເຘປິ ຕສ຺ສ ຈິນ຺ຕນກິຣິຍາເວໂຄ ນ ວູປສມ຺ມຕິ, ປຈ຺ຉິມໍ ຈິຕ຺ຕໍ ອຸປ຺ປາເທຕ຺ວາ ເອວ ວູປສມ຺ມຕິ, ເອວໍ ປຈ຺ຉິມສ຺ສ ຘມ຺ມນ຺ຕຣສ຺ສ ອຸປ຺ປາທນຏ຺ເຐນ.

ຕຕ຺ຖ ປຸຣິມາ ປຸຣິມາ ມາຕຸປຣມ຺ປຣາ ວິຍ ອນນ຺ຕຣປຈ຺ຈຍປຣມ຺ປຣາ ທຏ຺ຐພ຺ພາ. ປຈ຺ຉິມາ ປຈ຺ຉິມາ ຘີຕຸປຣມ຺ປຣາ ວິຍ ຕສ຺ສ ປຈ຺ຈຍຸປ຺ປນ຺ນປຣມ຺ປຣາ ທຏ຺ຐພ຺ພາ. ເອວໍ ສນ຺ເຕ ອຣຫນ຺ຕານໍ ສພ຺ພປຈ຺ຉິມໍ ປຣິນິພ຺ພານຈິຕ຺ຕມ຺ປິ ປຸນ ປຏິສນ຺ຘິຈິຕ຺ຕສງ຺ຂາຕໍ ຘມ຺ມນ຺ຕຣໍ ອຸປ຺ປາເທຍ຺ຍາຕິ. ນ ອຸປ຺ປາເທຍ຺ຍ. ກສ຺ມາ, ຕທາ ກມ຺ມກິເລສເວຄານໍ ສພ຺ພໂສ ປຏິປ຺ປສ຺ສທ຺ຘິຠາເວນ ອຈ຺ຈນ຺ຕສນ຺ຕຕຣຕ຺ຕາ ຕສ຺ສ ຈິຕ຺ຕສ຺ສາຕິ. ອນນ຺ຕຣປຈ຺ຈຍ ທີປນາ ນິຏ຺ຐິຕາ.

ປຈ຺ຈຍຘມ຺ມວິຠາໂຄ ¶ ຈ ປຈ຺ຈຍຸປ຺ປນ຺ນຘມ຺ມວິຠາໂຄ ຈ ອນນ຺ຕປຈ຺ຈຍ ສທິໂສ.

ເກນຏ຺ເຐນ ສມນນ຺ຕໂຣຕິ. ສຸຏ຺ຐຸ ອນນ຺ຕຣຏ຺ເຐນ ສມນນ຺ຕໂຣ. ຍຖາ ສິລາຖມ຺ຠາທີສຸ ຣູປກລາປາ ເອກາພທ຺ຘາ ສມານາປິ ຣູປ ຘມ຺ມຠາເວນ ສຓ຺ຐານ ຊາຕິກຕ຺ຕາ ມຊ຺ເຌ ປຣິຈ຺ເຉທຣູປສຫິຕາ ເອວ ໂຫນ຺ຕິ. ທ຺ວິນ຺ນໍ ຣູປກລາປານໍ ມຊ຺ເຌ ອນ຺ຕຣໍ ນາມ ວິວຣໍ ນາມ ອຕ຺ຖິເຍວ. ນ ຕຖາ ປຸຣິມປຈ຺ຉິມານໍ ທ຺ວິນ຺ນໍ ຈິຕ຺ຕເຈຕສິກ ກລາປານໍ ມຊ຺ເຌ. ເຕ ປນ ອຣູປຘມ຺ມຠາເວນ ອສຓ຺ຐານ ຊາຕິກຕ຺ຕາ ມຊ຺ເຌ ປຣິຈ຺ເຉທຘມ຺ມສ຺ສ ນາມ ກສ຺ສຈິ ອາກາສວິວຣສ຺ສ ອຠາວໂຕ ສພ຺ພໂສ ອນ຺ຕຣ ຣຫິຕາ ເອວ ໂຫນ຺ຕິ. ໂລກສ຺ສປິ ທ຺ວິນ຺ນໍ ກລາປານໍ ອນ຺ຕຣໍ ນາມ ນ ທິສ຺ສຕິ. ຕໂຕ ອິເມ ສຕ຺ຕາ ຈິຕ຺ຕໍ ນາມ ນິຈ຺ຈໍ ຘຸວໍ ຖາວຣໍ ອວິປຣິຓາມຘມ຺ມນ຺ຕິ ເອວໍ ຈິຕ຺ເຕ ນິຈ຺ຈສຎ຺ຎິໂນ ໂຫນ຺ຕິ. ເອວໍ ສຸຏ຺ຐຸ ອນນ຺ຕຣຏ຺ເຐນ ສມນນ຺ຕໂຣ. ອນນ຺ຕຣຏ຺ເຐນາຕິ ຈ ອຕ຺ຕໂນ ອນນ຺ຕເຣ ອຕ຺ຕສທິສສ຺ສ ຘມ຺ມນ຺ຕຣສ຺ສ ອຸປ຺ປາທນຏ຺ເຐນາຕິ ປຸພ຺ເພ ວຸຕ຺ຕເມວ.

ເອວໍ ສນ຺ເຕ ນິໂຣຘສມາປຕ຺ຕິກາເລ ປຸຣິມຈິຕ຺ຕໍ ນາມ ເນວ ສຎ຺ຎານາສຎ຺ຎາຍຕນຈິຕ຺ຕໍ, ປຈ຺ຉິມຈິຕ຺ຕໍ ນາມ ອຣິຍຜລຈິຕ຺ຕໍ, ທ຺ວິນ຺ນໍ ຈິຕ຺ຕານໍ ອນ຺ຕເຣ ເອກຣຕ຺ຕິທິວມ຺ປິ ທ຺ເວຣຕ຺ຕິທິວານິປິ.ລ. ສຕ຺ຕຣຕ຺ຕິທິວານິປິ ອຈິຕ຺ຕໂກ ໂຫຕິ. ອສຎ຺ຎສຕ຺ຕຠູມິຍໍປິ ປຸຣິເມ ກາມຠເວ ຈຸຕິຈິຕ຺ຕໍ ປຸຣິມຈິຕ຺ຕໍ ນາມ. ປຈ຺ຉິເມ ກາມຠເວ ປຏິສນ຺ຘິຈິຕ຺ຕໍ ປຈ຺ຉິມຈິຕ຺ຕໍ ນາມ, ທ຺ວິນ຺ນໍ ຈິຕ຺ຕານໍ ອນ຺ຕເຣ ອສຎ຺ຎສຕ຺ຕຠເວ ປຎ຺ຈກປ຺ປສຕານິ ປຸຄ຺ຄໂລ ອຈິຕ຺ຕໂກ ຕິຏ຺ຐຕິ. ຕຕ຺ຖ ທ຺ເວ ປຸຣິມຈິຕ຺ຕານິ ອຕ຺ຕໂນ ອນນ຺ຕເຣ ອຕ຺ຕສທິສສ຺ສ ຘມ຺ມນ຺ຕຣສ຺ສ ອຸປ຺ປາທນປຈ຺ຈຍສຕ຺ຕິຣຫິຕານິ ໂຫນ຺ຕີຕິ. ນ ໂຫນ຺ຕິ. ມຫນ຺ເຕຫິ ປນ ຠາວນາປຓິຘິພເລຫິ ປຏິພາຫິຕຕ຺ຕາ ປຸຣິມຈິຕ຺ຕານິ ຈ ນິຣຸຊ຺ຌມານານິ ອນນ຺ຕເຣ ຘມ຺ມນ຺ຕຣສ຺ສ ອຸປ຺ປາທນ ສຕ຺ຕິສຫິຕານິ ເອວ ນິຣຸຊ຺ຌນ຺ຕິ. ປຈ຺ຉິມຈິຕ຺ຕານິ ຈ ອຸປ຺ປຊ຺ຊມານານິ ຕສ຺ມິໍ ຂເຓ ເອກາພທ຺ຘຠາເວນ ອນຸປ຺ປຊ຺ຊິຕ຺ວາ ຈິຣກາເລ ເອວ ອຸປ຺ປຊ຺ຊນ຺ຕິ. ນ ຈ ເອຕ຺ຕກມຕ຺ເຕນ ປຸຣິມຈິຕ຺ຕານໍ ອນນ຺ຕເຣ ຘມ຺ມນ຺ຕຣສ຺ສ ອຸປ຺ປາທນ ສຕ຺ຕິນາມ ນຕ຺ຖີຕິ ຈ, ເຕ ອນນ຺ຕຣປຈ຺ຈຍຘມ຺ມາ ນາມ ນ ໂຫນ຺ຕີຕິ ຈ ສກ຺ກາ ວຕ຺ຕຸໍ. ຍຖາ ຕໍ ຣຎ຺ໂຎ ໂຍຘາ ນາມ ອຕ຺ຖິ, ກທາຈິ ຣາຊາ ກາລໍ ຎຕ຺ວາ ຕຸມ຺ເຫ ອິທານິ ມາຍຸຊ຺ຌຖ, ຍຸທ຺ຘກາໂລ ນ ໂຫຕິ, ອສຸກສ຺ມິໍ ກາເລ ເອວ ຍຸຊ຺ຌຖາຕິ ວເທຍ຺ຍ. ເຕ ຈ ຕທາ ອຍຸຊ຺ຌມານາ ວິຈເຣຍ຺ຍຸໍ. ເອວໍ ສນ຺ເຕປິ ເຕສໍ ຍຸຊ຺ຌນສຕ຺ຕິ ນາມ ນຕ຺ຖີຕິ ຈ, ເຕ ໂຍຘາ ນາມ ນ ໂຫນ຺ຕີຕິ ຈ ນ ສກ຺ກາ ວຕ຺ຕຸນ຺ຕິ.

ເອຕ຺ຖ ວເທຍ຺ຍຸໍ, ອິມສ຺ມິໍ ປຈ຺ຈເຍ ເຕ ປນ ອຣູປຘມ຺ມຠາເວນ ອສຓ຺ຐານ ຊາຕິກຕ຺ຕາ ມຊ຺ເຌປຣິຈ຺ເຉທຘມ຺ມສ຺ສ ນາມ ກສ຺ສຈິ ອຠາວໂຕ ສພ຺ພໂສ ອນ຺ຕຣຣຫິຕາ ¶ ເອວ ໂຫນ຺ຕີຕິ ວຸຕ຺ຕໍ. ເອວໍ ສນ຺ເຕ ປຸພ຺ເພ ອາຣມ຺ມຓ ປຈ຺ຈເຍ ເຠຣິສທ຺ທວີຓາສທ຺ໂທປມາຫິ ໂຍ ຈິຕ຺ຕານໍ ຂເຓ ຂເຓ ອຸປ຺ປາໂທ ຈ ນິໂຣໂຘ ຈ ວຸຕ຺ໂຕ, ໂສ ອມ຺ເຫຫິ ກຖໍ ປຈ຺ເຈຕພ຺ໂພຕິ. ອຎ຺ຎມຎ຺ຎວິຣຸທ຺ຘານໍ ນານາຈິຕ຺ຕານໍ ຂຓມຕ຺ເຕປິ ປຸພ຺ພາປຣ ປຣິວຕ຺ຕນສ຺ສ ໂລເກ ປຎ຺ຎາຍນໂຕ. ອຍມຕ຺ໂຖ ປຸພ຺ເພ ຈິຕ຺ຕ ຍມກທີປນິຍໍ ວິຕ຺ຖາຣໂຕ ວຸຕ຺ໂຕເຍວາຕິ. ສມນນ຺ຕຣປຈ຺ຈຍ ທີປນາ ນິຏ຺ຐິຕາ.

ປຈ຺ຈຍຘມ຺ມວິຠາໂຄ ຈ ປຈ຺ຈຍຸປ຺ປນ຺ນຘມ຺ມວິຠາໂຄຈ ວຸຈ຺ຈຕິ. ເອກໂຕ ອຸປ຺ປນ຺ນາ ສພ຺ເພປິ ຈິຕ຺ຕເຈຕສິກາ ຘມ຺ມາ ອຎ຺ຎມຎ຺ຎໍ ສຫຊາຕ ປຈ຺ຈຍາ ຈ ໂຫນ຺ຕິ ສຫຊາຕປຈ຺ຈຍຸປ຺ປນ຺ນາ ຈ. ປຏິສນ຺ຘິນາມກ຺ຂນ຺ຘາ ຈ ປຏິສນ຺ຘິສຫຊາຕໍ ຫທຍວຕ຺ຖຸ ຈ ອຎ຺ຎມຎ຺ຎໍ ສຫຊາຕປຈ຺ຈຍາ ຈ ໂຫນ຺ຕິ ສຫຊາຕປຈ຺ຈຍຸປ຺ປນ຺ນາ ຈ. ສພ຺ພານິ ມຫາຠູຕານິປິ ອຎ຺ຎມຎ຺ຎໍ ສຫຊາຕປຈ຺ຈຍາ ຈ ໂຫນ຺ຕິ ປຈ຺ຈຍຸປ຺ປນ຺ນຘມ຺ມາ ຈ. ປຏິສນ຺ຘິຈິຕ຺ຕສ຺ສ ອຸປ຺ປາທກ຺ຂເຓ ສພ຺ພານິ ກມ຺ມຊຣູປານິ ຈ ປວຕ຺ຕິກາເລ ຕສ຺ສ ຕສ຺ສ ຈິຕ຺ຕສ຺ສ ອຸປ຺ປາທກ຺ຂເຓ ເຕນ ເຕນ ຈິຕ຺ເຕນ ຊາຕານິ ສພ຺ພານິ ຈິຕ຺ຕຊຣູປານິ ຈ ສຫຊາຕຈິຕ຺ຕສ຺ສ ປຈ຺ຈຍຸປ຺ປນ຺ນານິ ນາມ. ສພ຺ພານິ ອຸປາທາຣູປານິ ສຫຊາຕມຫາຠູຕານໍ ປຈ຺ຈຍຸປ຺ປນ຺ນານິ ນາມ.

ເກນຏ຺ເຐນ ສຫຊາໂຕ, ເກນຏ຺ເຐນ ປຈ຺ຈໂຍ. ສຫ ຊານນຏ຺ເຐນ ສຫຊາໂຕ, ອຸປກາຣກຏ຺ເຐນ ປຈ຺ຈໂຍ. ຕຕ຺ຖ ສຫຊານນຏ຺ເຐນາຕິ ໂຍ ຘມ຺ໂມ ຊາຍມາໂນ ອຕ຺ຕໂນ ປຈ຺ຈຍຸປ຺ປນ຺ເນຫິ ຘມ຺ເມຫິ ສເຫວ ສຍຎ຺ຈ ຊາຍຕິ ອຸປ຺ປຊ຺ຊຕິ, ອຕ຺ຕໂນ ປຈ຺ຈຍຸປ຺ປນ຺ເນ ຈ ຘມ຺ເມ ອຕ຺ຕນາ ສເຫວ ຊເນຕິ ອຸປ຺ປາເທຕິ, ຕສ຺ສ ໂສ ອຕ຺ໂຖ ສຫຊານນຏ຺ໂຐ ນາມ.

ຍຖາ ສູຣິໂຍ ນາມ ອຸທຍນ຺ໂຕ ສູຣິຍາຕເປ ຈ ສູຣິຍາ ໂລເກ ຈ ອຕ຺ຕນາ ສເຫວ ຊນຍນ຺ໂຕ ອຸເທຕິ. ຍຖາ ຈ ປທີໂປ ນາມ ຊລນ຺ໂຕ ປທີປາຕເປ ຈ ປທີປາໂລເກ ຈ ອຕ຺ຕນາ ສເຫວ ຊນຍນ຺ໂຕ ຊລຕິ. ເອວເມວໍ ອຍໍ ປຈ຺ຈຍຘມ຺ໂມ ອຸປ຺ປຊ຺ຊມາໂນ ອຕ຺ຕໂນ ປຈ຺ຈຍຸປ຺ປນ຺ນຘມ຺ເມ ອຕ຺ຕນາ ສເຫວ ອຸປ຺ປາເທຕິ. ຕຕ຺ຖ ສູຣິໂຍ ວິຍ ເອກເມໂກ ນາມ ຘມ຺ໂມ, ສູຣິຍາຕປາ ວິຍ ຕໍສມ຺ປຍຸຕ຺ຕຘມ຺ມາ, ສູຣິຍາໂລກາ ວິຍ ສຫຊາຕຣູປຘມ຺ມາ. ຕຖາ ສູຣິໂຍ ວິຍ ເອກເມໂກ ມຫາຠູຕຣູປຘມ຺ໂມ, ສູຣິຍາຕປາ ວິຍ ສຫຊາຕມຫາຠູຕຘມ຺ມາ, ສູຣິຍາໂລກາ ວິຍ ສຫຊາຕອຸປາທາຣູປຘມ຺ມາ, ເອສ ນໂຍ ປທີປຸປມາຍປີຕິ. ສຫຊາຕປຈ຺ຈຍທີປນາ ນິຏ຺ຐິຕາ.

ສຫຊາຕປຈ຺ຈເຍ ¶ ວິຠຕ຺ເຕສຸ ຘມ຺ເມສຸ ໂຍ ໂຍ ປຈ຺ຈຍ ຘມ຺ໂມຕິ ວຸຕ຺ໂຕ, ໂສ ໂສ ເອວ ອິຘ ປຈ຺ຈຍຘມ຺ໂມ ເຈວ ປຈ຺ຈຍຸປ຺ປນ຺ນ ຘມ຺ໂມ ຈ ໂຫຕິ. ສພ຺ເພປິ ຈິຕ຺ຕເຈຕສິກາ ຘມ຺ມາ ອຎ຺ຎມຎ຺ຎສ຺ສ ປຈ຺ຈຍຘມ຺ມາ ຈ ໂຫນ຺ຕິ ອຎ຺ຎມຎ຺ຎສ຺ສ ປຈ຺ຈຍຸປ຺ປນ຺ນຘມ຺ມາ. ສຫຊາຕາ ຈຕ຺ຕາໂຣ ມຫາຠູຕາ ອຎ຺ຎມຎ຺ຎສ຺ສ ປຈ຺ຈຍຘມ຺ມາ ຈ ໂຫນ຺ຕິ ອຎ຺ຎມຎ຺ຎສ຺ສ ປຈ຺ຈຍຸປ຺ປນ຺ນຘມ຺ມາ ຈ. ປຏິສນ຺ຘິນາມກ຺ຂນ຺ຘາ ຈ ປຏິສນ຺ຘິ ສຫຊາຕໍ ຫທຍວຕ຺ຖຸຣູປຎ຺ຈ ອຎ຺ຎມຎ຺ຎສ຺ສ ປຈ຺ຈຍຘມ຺ມາ ຈ ໂຫນ຺ຕິ ອຎ຺ຎມຎ຺ຎສ຺ສ ປຈ຺ຈຍຸປ຺ປນ຺ນຘມ຺ມາ ຈ. ອຕ຺ໂຖ ສຸວິຎ຺ເຎຍ຺ໂຍເຍວ.

ຍຖາ ອຎ຺ຎມຎ຺ຎໍ ນິສ຺ສາຍ ອຸສ຺ສາປິຕາ ຕໂຍ ທຓ຺ຑາ ອຎ຺ຎມຎ຺ຎສ຺ສ ນິສ຺ສຍາ ຈ ໂຫນ຺ຕິ, ອຎ຺ຎມຎ຺ຎໍ ນິສ຺ສິຕາ ຈ. ເຕສຸ ເອກເມກສ຺ມິໍ ອຸສ຺ສິເຕ ສພ຺ເພ ອຸສ຺ສິຕາ ໂຫນ຺ຕິ, ເອກເມກສ຺ມິໍ ປຕນ຺ເຕ ສພ຺ເພ ປຕນ຺ຕິ. ເອວໍ ອຎ຺ຎມຎ຺ຎຘມ຺ມາ ຈ ທຏ຺ຐພ຺ພາ.

ເອຕ຺ຖ ວເທຍ຺ຍຸໍ, ສພ຺ເພ ເຈຕສິກາ ຘມ຺ມາ ຈິຕ຺ຕປຈ຺ຈຍໍ ອລຠ ມານາ ອຸປ຺ປຊ຺ຊິຕຸໍ ນ ສກ຺ໂກນ຺ຕີຕິ ຍຸຕ຺ຕໍ. ກສ຺ມາ. ຜຸສນາທີນໍ ເຈຕສິກ ກິຈ຺ຈານໍ ວິຊານນກິຈ຺ຈປຸພ຺ພງ຺ຄມຕ຺ຕາ, ມໂນປຸພ຺ພງ຺ຄມາຕິ ຫິ ວຸຕ຺ຕໍ. ຈິຕ຺ຕໍ ປນ ເຈຕສິກປຈ຺ຈຍໍ ອລຠມານໍ ອຸປ຺ປຊ຺ຊິຕຸໍ ນ ສກ຺ໂກຕີຕິ ນ ຍຸຊ຺ເຊຍ຺ຍາຕິ. ວຸຈ຺ຈເຕ, ເຈຕສິກຘມ຺ມາ ນາມ ຈິຕ຺ຕສ຺ສ ສຫາຍງ຺ຄານິ ໂຫນ຺ຕິ. ຕສ຺ມາ ເຕຫິ ວິນາ ຈິຕ຺ຕມ຺ປິ ອຸປ຺ປຊ຺ຊິຕຸໍ ນ ສກ຺ໂກຕິເຍວ. ເອເສວ ນໂຍ ຈຕູສຸ ມຫາຠູເຕສຸປີຕິ. ອຸປາທາຣູປານິ ປນ ມຫາຠູຕານໍ ນິສ຺ສນ຺ທມຕ຺ຕຕ຺ຕາ ສຫາຍງ຺ຄານິ ນ ໂຫນ຺ຕີຕິ. ນນຸ ອາຫາຣຣູປຎ຺ຈ ຊີວິຕຣູປຎ຺ຈ ປຈ຺ຈຍວິເສສຕ຺ຕາ ສຫາຍງ຺ຄໍ ໂຫຕີຕິ. ວຸຈ຺ຈເຕ, ຐິຕິຍາ ເອວ ສຫາຍງ຺ຄໍ ໂຫຕິ. ນ ອຸປ຺ປາເທ. ອິຘ ປນ ອຸປ຺ປາເທ ສຫາຍງ຺ຄໍ ອຘິປ຺ເປຕນ຺ຕິ. ອຎ຺ຎມຎ຺ຎປຈ຺ຈຍທີປນາ ນິຏ຺ຐິຕາ.

ຕິວິໂຘ ນິສ຺ສຍປຈ຺ຈໂຍ, ສຫຊາຕນິສ຺ສໂຍ ວຕ຺ຖຸ ປຸເຣຊາຕນິສ຺ສໂຍ ວຕ຺ຖາຣມ຺ມຓປຸເຣຊາຕນິສ຺ສໂຍ.

ຕຕ຺ຖ ກຕໂມ ສຫຊາຕນິສ຺ສໂຍ. ສພ຺ໂພ ສຫຊາຕ ປຈ຺ຈໂຍ ສຫຊາຕນິສ຺ສໂຍ. ຕສ຺ມາ ຕຕ຺ຖ ປຈ຺ຈຍວິຠາໂຄ ຈ ປຈ຺ຈຍຸປ຺ປນ຺ນວິຠາໂຄ ຈ ສຫຊາຕປຈ຺ຈເຍ ວຸຕ຺ຕນເຍນ ເວທິຕພ຺ໂພ.

ກຕໂມ ປນ ວຕ຺ຖຸປຸເຣຊາຕນິສ຺ສໂຍ. ຉ ວຕ຺ຖູນິ ຈກ຺ຂຸ ວຕ຺ຖຸ ໂສຕວຕ຺ຖຸ ຆານວຕ຺ຖຸ ຊິວ຺ຫາວຕ຺ຖຸ ກາຍວຕ຺ຖຸ ຫທຍວຕ຺ຖຸ. ອິມານິ ຉວຕ຺ຖູນິ ປວຕ຺ຕິກາເລ ສຕ຺ຕານໍ ວິຎ຺ຎາຓຘາຕູນໍ ວຕ຺ຖຸປຸເຣ ຊາຕນິສ຺ສໂຍ.

ວຕ຺ຖຸຣູປເມວ ¶ ປຸເຣຊາຕໍ ຫຸຕ຺ວາ ນິສ຺ສໂຍ ວຕ຺ຖຸປຸເຣຊາຕ ນິສ຺ສໂຍ. ຕຕ຺ຖ ຈິຕ຺ຕເຈຕສິການໍ ນິສ຺ສຍຏ຺ຐານຏ຺ເຐນ ວຕ຺ຖຸ ນາມ. ປຸເຣຊາຕນ຺ຕິ ອຕ຺ຕໂນ ອຕ຺ຕໂນ ປຈ຺ຈຍຸປ຺ປນ຺ນສ຺ສ ຘມ຺ມສ຺ສ ອຸປ຺ປຕ຺ຕິກ຺ຂຓໂຕ ປຸຣິເມ ຂເຓ ຊາຕໍ.

ຕຕ຺ຖ ປຏິສນ຺ຘິຈິຕ຺ຕໍ ຕທາ ປຸເຣຊາຕສ຺ສ ວຕ຺ຖຸຣູປສ຺ສ ອຠາວໂຕ ອຕ຺ຕນາ ສຫຸປ຺ປນ຺ນເມວ ຫທຍວຕ຺ຖຸຣູປໍ ນິສ຺ສາຍ ອຸປ຺ປຊ຺ຊຕິ. ປຐມ ຠວງ຺ຄຈິຕ຺ຕໍ ປນ ປຏິສນ຺ຘິຈິຕ຺ເຕນ ສຫຸປ຺ປນ຺ນຫທຍ ວຕ຺ຖຸຣູປໍ ນິສ຺ສາຍ ອຸປ຺ປຊ຺ຊຕິ. ທຸຕິຍຠວງ຺ຄຈິຕ຺ຕໍ ປຐມຠວງ຺ຄຈິຕ຺ເຕນ ສຫຸປ຺ປນ຺ນໍ ນິສ຺ສາຍ ອຸປ຺ປຊ຺ຊຕິ. ເອວໍ ຕຕິຍຠວງ຺ຄຈິຕ຺ຕໍ ທຸຕິຍ ຠວງ຺ຄຈິຕ຺ເຕນ ສຫຸປ຺ປນ຺ນນ຺ຕິອາທິນາ ຍາວມຣຓາສນ຺ນກາລາ ທ຺ວິນ຺ນໍ ມໂນຘາຕຸມໂນວິຎ຺ຎາຓຘາຕູນໍ ວຕ຺ຖຸປຸເຣຊາຕນິສ຺ສໂຍ ເວທິຕພ຺ໂພ.

ຍຖາ ວີຓາສທ຺ທາ ນາມ ວີຓາຕນ຺ຕີສຸ ວີຓາທຓ຺ຑເກຫິ ປຫຣຓເວເຄນ ເອວ ຊາຍນ຺ຕິ, ໂນ ອຎ຺ຎຖາ. ຕຖາ ປຎ຺ຈວິຎ຺ຎາຓານິ ນາມ ປຎ຺ຈວຕ຺ຖຸສງ຺ຂາເຕສຸ ປຎ຺ຈທ຺ວາເຣສຸ ປຎ຺ຈນ຺ນໍ ອາຣມ຺ມຓານໍ ອາປາຕາ ຄມນເວເຄນ ເອວ ຊາຍນ຺ຕິ, ໂນ ອຎ຺ຎຖາ.

ອາປາຕາຄມນຎ຺ຈ ເຕສໍ ທ຺ວາຣາຣມ຺ມຓານໍ ຐິຕິປຕ຺ຕກາເລ ເອວ ໂຫຕິ. ອາປາຕາຄມນປຈ຺ຈຍາ ຈ ທ຺ວິກ຺ຂຕ຺ຕຸໍ ຠວງ຺ຄໍ ຈລຕິ. ຠວງ຺ຄຈລນ ປຈ຺ຈຍາ ຈ ອາວຊ຺ຊນໍ ອຸປ຺ປຊ຺ຊຕິ. ອາວຊ຺ຊນປຈ຺ຈຍາ ຈ ຕານິ ປຎ຺ຈວິຎ຺ຎາຓານິ ອຸປ຺ປຊ຺ຊນ຺ຕິ. ຕສ຺ມາ ຈກ຺ຂາທີນິ ປຎ຺ຈວຕ຺ຖູນິ ປຸເຣ ອຕີຕຠວງ຺ຄຈິຕ຺ຕສ຺ສ ອຸປ຺ປາທກ຺ຂເຓ ອຸປ຺ປນ຺ນານິ ເອວ ປຎ຺ຈວິຎ຺ຎາຓຘາຕູນໍ ວຕ຺ຖຸປຸເຣຊາຕປຈ຺ຈຍາ ໂຫນ຺ຕິ.

ມຣຓາສນ຺ນກາເລ ປນ ສພ຺ພານິ ຉ ວຕ຺ຖູນິ ຈຸຕິຈິຕ຺ຕໂຕ ປຸເຣ ສຕ຺ຕຣສມສ຺ສ ຠວງ຺ຄຈິຕ຺ຕສ຺ສ ອຸປ຺ປາທກ຺ຂເຓ ເອວ ອຸປ຺ປຊ຺ຊນ຺ຕິ, ຕໂຕ ປຣໍ ນ ອຸປ຺ປຊ຺ຊນ຺ຕິ. ຕສ຺ມາ ມຣຓາສນ຺ນກາເລ ຠວງ຺ຄຈິຕ຺ຕານິ ຈ ສພ຺ພານິ ຉທ຺ວາຣິກວີຖິຈິຕ຺ຕານິ ຈ ຈຸຕິຈິຕ຺ຕຎ຺ຈ ປຸເຣຕຣໍ ອຸປ຺ປນ຺ນານິ ຕານິເຍວ ອຕ຺ຕໂນ ອຕ຺ຕໂນ ວຕ຺ຖູນິ ນິສ຺ສາຍ ອຸປ຺ປຊ຺ຊນ຺ຕິ. ອຍໍ ວຕ຺ຖຸປຸເຣຊາຕ ນິສ຺ສໂຍ.

ກຕໂມ ປນ ວຕ຺ຖາຣມ຺ມຓປຸເຣຊາຕນິສ຺ສໂຍ. ຍທາ ອຕ຺ຕໂນ ອຊ຺ຌຕ຺ຕໍ ວຕ຺ຖຸຣູປໍ ອາຣພ຺ຠ ຍໍ ຣູປໍ ນິສ຺ສາຍ ມມ ມໂນວິຎ຺ຎາຓໍ ວຕ຺ຕຕິ, ເອຕໍ ມມ ເອໂສ ຫມສ຺ມິ ເອໂສ ເມ ອຕ຺ຕາຕິ ເອວໍ ຕຓ຺ຫາມານ ທິຏ຺ຐີຫິ ຄຫຓວເສນ ວາ ເອຕໍ ອນິຈ຺ຈໍ ເອຕໍ ທຸກ຺ຂໍ ເອຕໍ ອນຕ຺ຕາຕິ ເອວໍ ສມ຺ມສນວເສນ ວາ ອາວຊ຺ຊນາທີນິ ມໂນທ຺ວາຣິກວີຖິ ຈິຕ຺ຕານິ ປວຕ຺ຕນ຺ຕິ. ຕທາ ຕໍ ຕໍ ວຕ຺ຖຸຣູປໍ ປຈ຺ເຈກໍ ເຕສໍ ນິສ຺ສຍວຕ຺ຖຸ ຈ ໂຫຕິ ເຕສໍ ອາຣມ຺ມຓຎ຺ຈ. ຕສ຺ມາ ຕໍ ຕໍ ຫທຍຣູປໍ ຕສ຺ສ ຕສ຺ສ ຈິຕ຺ຕຸປ຺ປາທສ຺ສ ວຕ຺ຖາຣມ຺ມຓປຸເຣຊາຕປຈ຺ຈໂຍ ໂຫຕິ. ອຍໍ ວຕ຺ຖາຣມ຺ມຓ ປຸເຣຊາຕນິສ຺ສໂຍ. ເອວໍ ນິສ຺ສຍປຈ຺ຈໂຍ ຕິວິໂຘ ໂຫຕິ.

ອິຘ ¶ ສຸຕ຺ຕນ຺ຕນິສ຺ສໂຍປິ ວຕ຺ຕພ຺ໂພ. ອິເມ ມນຸສ຺ສາ ວາ ຕິຣຈ຺ຉານຄຕາ ວາ ຣຸກ຺ຂາທໂຍ ວາ ມຫາປຖວິຍໍ ປຕິຏ຺ຐິຕາ, ມຫາ ປຖວີ ຈ ເຫຏ຺ຐາ ມຫາອຸທກກ຺ຂນ຺ເຘ, ມຫາອຸທກກ຺ຂນ຺ໂຘ ຈ ເຫຏ຺ຐາ ມຫາວາຕກ຺ຂນ຺ເຘ, ມຫາວາຕກ຺ຂນ຺ໂຘ ຈ ເຫຏ຺ຐາ ອຊຏາກາເສ, ມນຸສ຺ສາ ເຄເຫສຸ, ຠິກ຺ຂູ ວິຫາເຣສຸ, ເທວາ ທິພ຺ພວິມາເນສູຕິອາທິນາ ສພ຺ພໍ ໂລກປ຺ປວຕ຺ຕິໍ ຎຕ຺ວາ ນິສ຺ສຍປຈ຺ຈໂຍ ເວທິຕພ຺ໂພ. ນິສ຺ສຍປຈ຺ຈຍທີປນາ ນິຏ຺ຐິຕາ.

ຕິວິໂຘ ອຸປນິສ຺ສຍປຈ຺ຈໂຍ, ອາຣມ຺ມຓູປນິສ຺ສໂຍ ອນນ຺ຕຣູປນິສ຺ສໂຍ ປກຕູປນິສ຺ສໂຍ. ຕຕ຺ຖ ອາຣມ຺ມຓູປ ນິສ຺ສໂຍ ອາຣມ຺ມຓາຘິປຕິປຈ຺ຈຍສທິໂສ, ອນນ຺ຕຣູປນິສ຺ສໂຍ ອນນ຺ຕຣປຈ຺ຈຍສທິໂສ.

ກຕໂມ ປກຕູປນິສ຺ສໂຍ. ສພ຺ເພປິ ອຕີຕານາຄຕ ປຈ຺ຈຸປ຺ປນ຺ນາ ອຊ຺ຌຕ຺ຕພຫິທ຺ຘາຠູຕາ ຈິຕ຺ຕເຈຕສິກຣູປຘມ຺ມາ ຈ ນິພ຺ພານຎ຺ຈ ປຎ຺ຎຕ຺ຕິ ຈ ສພ຺ເພສໍ ປຈ຺ຈຸປ຺ປນ຺ນານໍ ຈິຕ຺ຕເຈຕສິການໍ ຘມ຺ມານໍ ຍຖາຣຫໍ ປກຕູປນິສ຺ສໂຍ.

ຕຕ຺ຖ ອຕີໂຕ ປຣິນິພ຺ພຸໂຕ ອມ຺ຫາກໍ ພຸທ຺ໂຘ ຈ ຘມ຺ໂມ ຈ ອຣິຍສາວກສງ຺ໂຆ ຈ ສມ຺ມຸຕິສງ຺ຆປຣມ຺ປຣາ ຈ ອມ຺ຫາກໍ ປຈ຺ຉິມ ຊນານໍ ກຸສລຸປ຺ປຕ຺ຕິຍາ ປກຕູປນິສ຺ສຍປຈ຺ຈໂຍ. ຕຖາ ໂລເກ ອຕີຕາ ກາລງ຺ກຕາ ມາຕາປິຕໂຣ ຈ ອາຈຣິຍາ ຈ ປຓ຺ຑິຕສມຓພ຺ຣາຫ຺ມຓາ ຈ ປາກຏາ ນານາຕິຕ຺ຖາຈຣິຍາ ຈ ມຫິທ຺ຘິກາ ມຫານຸຠາວາ ໂປຣາຓກຣາຊາໂນ ຈ ປຈ຺ຉິມການໍ ຊນານໍ ກຸສລຸປ຺ປຕ຺ຕິຍາ ວາ ອກຸສລຸປ຺ປຕ຺ຕິຍາ ວາ ສຸຂທຸກ຺ຂຸປ຺ປຕ຺ຕິຍາ ວາ ປກຕູປນິສ຺ສໂຍ. ຕຖາ ຫິ ເຕ ປຈ຺ຉິມການໍ ຊນານໍ ອຕ຺ຖາຍ ນານາສທ຺ຘມ຺ມປຎ຺ຎຕ຺ຕິໂຍ ວາ ນານາອສທ຺ຘມ຺ມປຎ຺ຎຕ຺ຕິໂຍ ວາ ນານາໂລກູປກຣຓານິ ວາ ປຸເຣ ປຏ຺ຐເປສຸໍ. ປຈ຺ຉິມຊນາ ຈ ເຕຫິ ປຏ຺ຐປິເຕສຸ ທານສີລາທິຘມ຺ເມສຸ ວາ ໂລກຈາຣິຕ຺ຕ ກຸລໂຄຕ຺ຕຈາຣິຕ຺ຕ ຘມ຺ເມສຸ ວາ ນານາທິຏ຺ຐິວາເທສຸ ວາ ນານາກມ຺ມາຍຕນສິປ຺ປາຍຕນ ວິຊ຺ຊາຐາເນສຸ ວາ ຍຖາປຏ຺ຐປິເຕສຸ ຄາມນິຄມນຄຣເຂຕ຺ຕວຕ຺ຖຸ ຕຬາກໂປກ຺ຂຣຓິອາວາຏາທີສຸ ວາ ເຄຫຣຖສກຏນາວາ ສມ຺ໂປຕສມ຺ພນ຺ຘາທີສຸ ວາ ຊາຕຣູປຣຊຕມຓິມຸຕ຺ຕາທີສຸ ວາ ທາຍຊ຺ຊໍ ປຏິປຊ຺ຊນ຺ຕາ ໂລເກ ວຑ຺ຒນ຺ຕິ.

ອນາຄໂຕປິ ເມຕ຺ເຕຍ຺ໂຍ ນາມ ພຸທ຺ໂຘ ຈ ຕສ຺ສ ຘມ຺ໂມ ຈ ຕສ຺ສ ສງ຺ໂຆ ຈ ເອຕຣຫິ ພຫຸຊ຺ຊນານໍ ປາຣມິປຸຎ຺ຎປ຺ປວຕ຺ຕິຍາ ປກຕູປນິສ຺ສຍປຈ຺ຈໂຍ. ຕຖາ ອິມສ຺ມິໍ ຠເວ ຈ ປຈ຺ຉິເມ ກາເລ ປຏິລຠິສ຺ສມານາ ອິສ຺ສຣິຍຏ຺ຐານຘນຘຎ຺ຎສມ຺ປຕ຺ຕິໂຍ ປຸຣິເມ ກາເລ ຐິຕານໍ ມຫາຊນານໍ ນານາຠິສງ຺ຂາຣຸປ຺ປຕ຺ຕິຍາ ປກຕູປນິສ຺ສຍ ປຈ຺ຈໂຍ. ອນາຄຕຠເວ ຈ ອນຸຠວິສ຺ສມານາ ຠວສມ຺ປຕ຺ຕິ ໂຠຄ ສມ຺ປຕ຺ຕິໂຍ ¶ ມຄ຺ຄຜລນິພ຺ພານສມ຺ປຕ຺ຕິໂຍ ຈ ເອຕຣຫິ ປຈ຺ຈຸປ຺ປນ຺ນຠເວ ຐິຕານໍ ທານສີລາທິປຸຎ຺ຎກິຣິຍຸປ຺ປຕ຺ຕິຍາ ປກຕູປນິສ຺ສຍປຈ຺ຈໂຍ. ຍຖາ ຫິ ໂລເກ ເຫມນ຺ເຕ ກາເລ ຘຎ຺ຎປ຺ຜລານິ ລຠິສ຺ສາມາຕິ ວສ຺ສິເກ ກາເລ ກສ຺ສນວປ຺ປນກມ຺ມານິ ອາຣຠນ຺ຕິ, ກມ຺ເມ ສິທ຺ເຘ ຕໍ ຕໍ ຘນໍ ລຠິສ຺ສາມາຕິ ປຸພ຺ພຠາເຄ ຕໍ ຕໍ ວີຣິຍກມ຺ມໍ ວາ ຕໍ ຕໍ ປຎ຺ຎາກມ຺ມໍ ວາ ອາຣຠນ຺ຕິ. ຕຕ຺ຖ ຘຎ຺ຎປ຺ຜລປ຺ປຏິລາໂຠ ຈ ຕໍ ຕໍ ຘນປ຺ປຏິ ລາໂຠຈ ຕໍ ຕໍ ກມ຺ມາຣມ຺ຠສ຺ສ ອນາຄຕປກຕູປນິສ຺ສຍປຈ຺ຈໂຍ ຕໍ ຕໍ ກມ຺ມາຣມ຺ໂຠ ຈ ຘຎ຺ຎປ຺ຜລປ຺ປຏິລາຠສ຺ສ ຈ ຕໍ ຕໍ ຘນປ຺ປຏິ ລາຠສ຺ສ ຈ ອຕີຕປກຕູປນິສ຺ສຍປຈ຺ຈໂຍ. ເອວເມວ ປຈ຺ຉິເມ ອນາຄເຕ ກາເລ ນານາກມ຺ມປ຺ຜລານິ ສມ຺ປສ຺ສນ຺ຕາ ປຕ຺ຖຍນ຺ຕາ ມຫາຊນາ ປຸຣິເມ ປຈ຺ຈຸປ຺ປນ຺ເນ ກາເລ ນານາປຸຎ຺ຎກມ຺ມານິ ອາຣຠນ຺ຕິ. ຕຕ຺ຖ ປຸຎ຺ຎປ຺ຜລານິ ປຸຎ຺ຎກມ຺ມານໍ ອນາຄຕປກຕູປນິສ຺ສຍປຈ຺ຈໂຍ. ປຸຎ຺ຎກມ຺ມານິ ປຸຎ຺ຎປ຺ຜລານໍ ອຕີຕປກຕູປນິສ຺ສຍປຈ຺ຈໂຍ. ຕສ຺ມາ ອນາຄຕປກຕູປນິສ຺ສໂຍປິ ອຕີຕປກຕູປນິສ຺ສໂຍ ວິຍ ອຕິມຫນ຺ໂຕ ປຈ຺ຈໂຍ ໂຫຕິ.

ປຈ຺ຈຸປ຺ປນ຺ນາ ພຸທ຺ຘາໂຍ ປຈ຺ຈຍາ ປຈ຺ຈຸປ຺ປນ຺ນານໍ ມນຸສ຺ສເທວພ຺ຣຫ຺ມານໍ ປຈ຺ຈຸປ຺ປນ຺ນາ ມາຕາປິຕໂຣ ປຈ຺ຈຸປ຺ປນ຺ນານໍ ປຸຕ຺ຕຘີຕາທີນໍ ປຈ຺ຈຸປ຺ປນ຺ນປກຕູປ ນິສ຺ສໂຍ ນາມ. ໂສ ສຸປາກໂຏເຍວ.

ອຊ຺ຌຕ຺ຕຠູຕາ ປກຕູປນິສ຺ສຍຘມ຺ມາ ນາມ ພຸທ຺ຘາທີສຸ ສວິຎ຺ຎາຓກສນ຺ຕາເນສຸ ອຸປ຺ປນ຺ນາ ປຈ຺ຈຍຘມ຺ມາ. ພຫິທ຺ຘາຠູຕາ ປກຕູປນິສ຺ສຍຘມ຺ມາ ນາມ ສຕ຺ຕານໍ ປຕິຏ຺ຐານຠູຕາ ປຖວິປພ຺ພຕນທີ ສມຸທ຺ທາທໂຍ ເຕສໍ ເຕສໍ ສຕ຺ຕານໍ ພຫູປກາຣາ ອຣຎ຺ຎວນຣຸກ຺ຂ ຕິຓປຸພ຺ພຓ຺ຓາປຣຓ຺ຓາທໂຍ ຈນ຺ທສູຣິຍຄຫນກ຺ຂຕ຺ຕາທໂຍ ວສ຺ໂສທກອຄ຺ຄິວາຕສີຕອຸຓ຺ຫາທໂຍ ຈ ສພ຺ເພປິ ເຕ ສຕ຺ຕານໍ ກຸສລຸປ຺ປຕ຺ຕິຍາ ວາ ອກຸສລຸປ຺ປຕ຺ຕິຍາ ວາ ສຸຂຸປ຺ປຕ຺ຕິຍາ ວາ ທຸກ຺ຂຸປ຺ປຕ຺ຕິຍາ ວາ ພລວປຈ຺ຈຍາ ໂຫນ຺ຕິ.

ອິເມ ຊນາ ທິຏ຺ເຐວ ຘມ຺ເມ ປຣິນິພ຺ພາຍິສ຺ສາມາຕິ ໂພຘິປກ຺ຂິຍ ຘມ຺ເມ ວາ ຠາເວນ຺ຕິ, ອນາຄເຕ ພຸທ຺ຘກາເລ ປຣິນິພ຺ພາຍິສ຺ສາມາຕິ ປາຣມີຘມ຺ເມ ວາ ປຣິປູເຣນ຺ຕິ. ຕຕ຺ຖ ນິພ຺ພານໍ ເຕສໍ ຘມ຺ມານໍ ອຸປ຺ປຕ຺ຕິຍາ ພລວປຈ຺ຈໂຍ ໂຫຕິ.

ໂລເກ ນານາໂວຫາຣຠູຕາ ນາມປຎ຺ຎຕ຺ຕິໂຍ ຈ ພຸທ຺ຘ ສາສເນ ຕິປິຏກປຣິຍຕ຺ຕິຘມ຺ມຠູຕາ ນາມປຎ຺ຎຕ຺ຕິໂຍ ຈ ເຕສໍ ເຕສໍ ອຕ຺ຖານໍ ຊານນຕ຺ຖາຍ ພລວປຈ຺ຈໂຍ.

ຕຕ຺ຖ ສງ຺ຂຕຘມ຺ມາ ນາມ ປຈ຺ຈເຍ ສຕິ ອຸປ຺ປຊ຺ຊນ຺ຕິ, ອສຕິ ນຸປ຺ປຊ຺ຊນ຺ຕິ. ອຸປ຺ປຊ຺ຊິຕ຺ວາປິ ປຈ຺ຈເຍ ສຕິ ຕິຏ຺ຐນ຺ຕິ, ອສຕິ ນ ຕິຏ຺ຐນ຺ຕິ. ຕສ຺ມາ ເຕສໍ ອຸປ຺ປຕ຺ຕິຍາ ວາ ຐິຕິຍາ ວາ ປຈ຺ຈໂຍ ນາມ ອິຈ຺ຉິຕພ຺ໂພ. ນິພ຺ພານໍ ປນ ປຎ຺ຎຕ຺ຕິ ຈ ອສງ຺ຂຕຘມ຺ມາ ໂຫນ຺ຕິ ¶ ອຊາຕິຘມ຺ມາ ອນຸປ຺ປາທຘມ຺ມາ ນິຈ຺ຈ ຘມ຺ມາ ຘຸວຘມ຺ມາ. ຕສ຺ມາ ເຕສໍ ອຸປ຺ປາທາຍ ວາ ຐິຕິຍາ ວາ ປຈ຺ຈໂຍ ນາມ ນຕ຺ຖີຕິ.

ກຸສໂລ ກຸສລສ຺ສ ອຸປນິສ຺ສໂຍ. ສທ຺ຘໍ ອຸປນິສ຺ສາຍ ທານໍ ເທຕິ, ສີລໍ ສມາທິຍຕີຕິອາທິນາ ສຸປາກໂຏ. ຕຖາ ຣາຄໍ ອຸປນິສ຺ສາຍ ປາຓໍ ຫນຕິ, ອທິນ຺ນໍ ອາທິຍຕີຕິອາທິນາ ສປ຺ປາຍໍ ອຸຕຸໍ ສປ຺ປາຍໍ ໂຠຊນໍ ອຸປນິສ຺ສາຍ ກາຍິກໍ ສຸຂໍ ປຈ຺ຈນຸໂຠຕີຕິອາທິນາ ຈ ອກຸສໂລ ອກຸສລສ຺ສ, ອພ຺ຍາກໂຕ ອພ຺ຍາກຕສ຺ສ ອຸປນິສ຺ສໂຍປິ ສຸປາກໂຏ.

ກຸສໂລ ປນ ອກຸສລສ຺ສປິ ພລວູປນິສ຺ສໂຍ. ທານໍ ທຕ຺ວາ ເຕນ ທາເນນ ອຕ຺ຕານໍ ອຸກ຺ກໍເສຕິ, ປຣໍ ວມ຺ເຠຕິ. ຕຖາ ສີລ ສມ຺ປນ຺ໂນ ຫຸຕ຺ວາ ສມາຘິສມ຺ປນ຺ໂນ ຫຸຕ຺ວາ ປຎ຺ຎາສມ຺ປນ຺ໂນ ຫຸຕ຺ວາ ອຕ຺ຕານໍ ອຸກ຺ກໍເສຕິ, ປຣໍ ວມ຺ເຠຕິ.

ກຸສໂລ ອພ຺ຍາກຕສ຺ສປິ ພລວູປນິສ຺ສໂຍ. ສພ຺ພານິ ຈຕຸຠູມິກກຸສລກມ຺ມານິ ວາ ກມ຺ມປຣິວາຣານິ ກຸສລານິ ວາ ກາລນ຺ຕເຣ ຈຕຸຠູມິການໍ ວິປາກາພ຺ຍາກຕານໍ ພລວູປນິສ຺ສໂຍ. ທານປາຣມິໍ ປູເຣນ຺ຕາ ປູຣຓກາເລ ພຫຸໍ ກາຍິກທຸກ຺ຂໍ ປຈ຺ຈນຸຠວນ຺ຕິ. ຕຖາ ສີລປາຣມິໍ ນິກ຺ຂມປາຣມິໍ ປຎ຺ຎາປາຣມິໍ ວີຣິຍປາຣມິໍ ຂນ຺ຕິປາຣມິໍ ສຈ຺ຈປາຣມິໍ ອຘິຏ຺ຐານປາຣມິໍ ເມຕ຺ຕາປາຣມິໍ ອຸເປກ຺ຂາ ປາຣມິໍ. ເອເສວ ນໂຍ ຌານຠາວນາ ມຄ຺ຄຠາວນາສຸປິ.

ອກຸສໂລ ກຸສລສ຺ສປິ ພລວູປນິສ຺ສໂຍ. ອິເຘກຈ຺ໂຈ ປາປໍ ກຕ຺ວາ ປຈ຺ຉາ ວິປ຺ປຏິສາຣີ ຫຸຕ຺ວາ ຕສ຺ສ ປາປສ຺ສ ປຫານາຍ ທານສີລຌານມຄ຺ຄກຸສລານິ ສມ຺ປາເທຕິ. ຕໍ ປາປໍ ເຕສໍ ກຸສລານໍ ພລວູປນິສ຺ສໂຍ.

ອກຸສໂລ ອພ຺ຍາກຕສ຺ສປິ ພລວູປນິສ຺ສໂຍ. ອິຘ ພຫູ ຊນາ ທຸຈ຺ຈຣິຕານິ ກຕ຺ວາ ຈຕູສຸ ອປາເຍສຸ ປຕິຕ຺ວາ ອປາຍທຸກ຺ຂໍ ປຈ຺ຈນຸຠວນ຺ຕິ. ທິຏ຺ຐຘມ຺ເມປິ ເກຈິ ອຕ຺ຕໂນ ວາ ປຣສ຺ສ ວາ ທຸຈ຺ຈຣິຕກມ຺ມ ປຈ຺ຈຍາ ພຫຸໍ ທຸກ຺ຂໍ ປຈ຺ຈນຸຠວນ຺ຕິ. ເກຈິ ທຸຈ຺ຈຣິຕກມ຺ເມນ ຘນໍ ລຠິຕ຺ວາ ສຸຂໍ ປຈ຺ຈນຸຠວນ຺ຕິ. ພຫຸຊ຺ຊນາ ຣາຄມູລກໍ ພຫຸໍ ທຸກ຺ຂໍ ປຈ຺ຈນຸຠວນ຺ຕິ, ໂທສມູລກໍ ທິຏ຺ຐິມູລກໍ ມານມູລກນ຺ຕິ.

ອພ຺ຍາກໂຕ ກຸສລສ຺ສປິ ພລວູປນິສ຺ສໂຍ. ຘນ ສມ຺ປຕ຺ຕິຍາ ທານໍ ເທຕິ, ສີລໍ ປູເຣຕິ, ປຎ຺ຎໍ ປູເຣຕິ, ຠາວນາສປ຺ປາຍໍ ອາວາສໍ ວາ ເລຓໍ ວາ ຄຸຫໍວາ ຣຸກ຺ຂໍ ວາ ອຣຎ຺ຎໍ ວາ ປພ຺ພຕໍ ວາ ໂຄຈຣຄາມໍ ວາ ອຸຕຸສປ຺ປາຍໍ ວາ ອາຫາຣສປ຺ປາຍໍ ວາ ລຠິຕ຺ວາ ຕໍ ຕໍ ຠາວນໍ ຠາເວຕິ.

ອພ຺ຍາກໂຕ ອກຸສລສ຺ສປິ ພລວູປນິສ຺ສໂຍ. ໂລເກ ຈກ຺ຂຸສມ຺ປທໍ ນິສ຺ສາຍ ພຫູນິ ທສ຺ສນມູລານິ ອກຸສລານິ ອຸປ຺ປຊ຺ຊນ຺ຕິ. ເອສ ນໂຍ ໂສຕສມ຺ປທາທີສຸ ¶ . ຕຖາ ຫຕ຺ຖສມ຺ປທໍ ປາທສມ຺ປທໍ ສຕ຺ຖສມ຺ປທໍ ອາວຸຘສມ຺ປທນ຺ຕິອາທິນາປິ ວຕ຺ຕພ຺ໂພ. ເອວໍ ອຸປນິສ຺ສໂຍ ຕິວິໂຘ ໂຫຕິ.

ອິຘ ສຸຕ຺ຕນ຺ຕູປນິສ຺ສໂຍປິ ວຕ຺ຕພ຺ໂພ. ກລ຺ຍາຓມິຕ຺ຕໍ ອຸປ ນິສ຺ສາຍ ປາປມິຕ຺ຕໍ ອຸປນິສ຺ສາຍ ຄາມໍ ອຸປນິສ຺ສາຍ ອຣຎ຺ຎໍ ອຸປນິສ຺ສາຍາຕິອາທິນາ ພຫູສຸ ຐາເນສຸ ອາຄໂຕ. ອປິ ຈ ປຎ຺ຈນິຍາມຘມ຺ມາ ສຕ຺ຕໂລກ ສງ຺ຂາຣໂລກ ໂອກາສໂລກ ສງ຺ຂາຕານໍ ຕິຓ຺ຓໍ ໂລການໍ ອວິຈ຺ຉິນ຺ນປ຺ປວຕ຺ຕິຍາ ພລວປຈ຺ຈຍາ ໂຫນ຺ຕິ. ອຍຎ຺ຈ ອຕ຺ໂຖ ນິຍາມທີປນິຍໍ ອມ຺ເຫຫິ ວິຕ຺ຖາຣໂຕ ທີປິໂຕຕິ.

ເກນຏ຺ເຐນ ອາຣມ຺ມຓູປນິສ຺ສໂຍຕິ. ອຘິປຕິຠູຕໍ ອາຣມ຺ມຓເມວ ອາຣມ຺ມຓິກຘມ຺ມານໍ ພລວນິສ຺ສຍຏ຺ເຐນ ອາຣມ຺ມຓູປ ນິສ຺ສໂຍ.

ເກນຏ຺ເຐນ ອນນ຺ຕຣູປນິສ຺ສໂຍຕິ. ປຸຣິມໍ ອນນ຺ຕຣຈິຕ຺ຕເມວ ປຈ຺ຉິມສ຺ສ ອນນ຺ຕຣຈິຕ຺ຕສ຺ສ ອຸປ຺ປຊ຺ຊນຕ຺ຖາຍ ພລວນິສ຺ສຍຏ຺ເຐນ ອນນ຺ຕຣູປນິສ຺ສໂຍ. ມາຕາ ວິຍ ປຸຣິມຈິຕ຺ຕໍ, ປຸຕ຺ໂຕ ວິຍ ປຈ຺ຉິມຈິຕ຺ຕໍ. ຍຖາ ມາຕາ ອຕ຺ຕໂນ ອນນ຺ຕເຣ ປຸຕ຺ຕສ຺ສ ອຸປ຺ປຊ຺ຊນຕ຺ຖາຍ ພລວູປ ນິສ຺ສໂຍ ໂຫຕິ, ຕຖາ ປຸຣິມຈິຕ຺ຕໍ ປຈ຺ຉິມຈິຕ຺ຕສ຺ສ ອຸປ຺ປຊ຺ຊນຕ຺ຖາຍາຕິ.

ເກນຏ຺ເຐນ ປກຕູປນິສ຺ສໂຍຕິ. ປກຕິຍາວ ໂລເກ ປຓ຺ຑິຕານໍ ປາກໂຏ ອຸປນິສ຺ສໂຍ ປກຕູປນິສ຺ສໂຍ.

ເອຕ຺ຖ ຈ ອນນ຺ຕຣູປນິສ຺ສຍານຸຠາໂວ ອນນ຺ຕຣຈິຕ຺ເຕ ເອວ ຜຣຕິ. ປກຕູປນິສ຺ສຍານຸຠາໂວ ປນ ທູເຣປິ ຜຣຕິເຍວ. ຕຖາ ຫິ ອິມສ຺ມິໍ ຠເວ ປຸຣິເມສຸ ທິວເສສຸ ວາ ມາເສສຸ ວາ ສໍວຈ຺ຉເຣສຸ ວາ ທິຏ຺ຐສຸຕຆາຍິຕສາຍິຕຜຸສິຕວິຎ຺ຎາຕານິ ອາຣມ຺ມຓານິ ປຈ຺ຉາຕຖາຣູເປ ປຈ຺ຈເຍ ສຕິ ວສ຺ສສເຕປິ ມໂນທ຺ວາເຣ ອາປາຕໍ ອາຄຈ຺ຉນ຺ຕິ. ອິທໍ ນາມ ປຸພ຺ເພ ມຍາ ທິຏ຺ຐໍ ສຸຕນ຺ຕິອາທິນາ ສຕ຺ຕາ ອນຸສ຺ສຣນ຺ຕິ. ໂອປປາຕິກສຕ຺ຕາ ປນ ປຸຣິມຠວໍປິ ອນຸສ຺ສຣນ຺ຕິ. ຕຖາ ມນຸສ຺ເສສຸປິ ອປ຺ເປກຈ຺ເຈ ຊາຕິສ຺ສຣສຎ຺ຎາລາຠິໂນ. ຕຖາ ປຸພ຺ເພ ອເນກສຕສຫສ຺ເສສຸ ທິຏ຺ຐາທີສຸ ວຕ຺ຖູສຸ ປຈ຺ຉາ ເອກສ຺ມິໍ ຂເຓ ເອກໍ ວຕ຺ຖຸໍ ທິສ຺ວາ ວາ ສຸຕ຺ວາ ວາ ຕສ຺ມິໍ ເອວ ຂເຓ ພຫູສຸປິ ເຕສຸ ມໂນວິຎ຺ຎາຓສນ຺ຕານໍ ຜຣມານໍ ປວຕ຺ຕຕີຕິ. ອຸປນິສ຺ສຍປຈ຺ຈຍ ທີປນາ ນິຏ຺ຐິຕາ.

ຕິວິໂຘ ປຸເຣຊາຕປຈ຺ຈໂຍ. ວຕ຺ຖຸປຸເຣຊາຕປຈ຺ຈໂຍ ຈ ອາຣມ຺ມຓປຸເຣຊາຕປຈ຺ຈໂຍ ຈ ວຕ຺ຖາຣມ຺ມຓປຸເຣຊາຕປຈ຺ຈໂຍ ຈ.

ຕຕ຺ຖ ¶ ວຕ຺ຖຸປຸເຣຊາໂຕ ຈ ວຕ຺ຖາຣມ຺ມຓປຸເຣຊາໂຕ ຈ ປຸພ຺ເພ ນິສ຺ສຍປຈ຺ຈເຍ ນິສ຺ສຍນາເມນ ວຸຕ຺ຕາ ເອວ.

ອາຣມ຺ມຓປຸເຣຊາໂຕ ນາມ ປຈ຺ຈຸປ຺ປນ຺ນານິ ອຏ຺ຐາຣສນິປ຺ຜນ຺ນຣູປານິ ເອວ. ເຕສຸປິ ປຈ຺ຈຸປ຺ປນ຺ນານິ ຣູປສທ຺ທາທີນິ ປຎ຺ຈາຣມ຺ມຓານິ ປຎ຺ຈນ຺ນໍ ປຎ຺ຈວິຎ຺ຎາຓ ວີຖິຈິຕ຺ຕານໍ ນິຍມໂຕ ອາຣມ຺ມຓປຸເຣຊາຕປຈ຺ຈຍາ ໂຫນ຺ຕິ. ຍຖາ ຫິ ວີຓາສທ຺ທາ ນາມ ວີຓາຕນ຺ຕີສຸ ວີຓາທຓ຺ຑເກນ ປຫຣຓ ປຈ຺ຈຍາ ເອວ ອຸປ຺ປຊ຺ຊນ຺ຕິ. ເອວຎ຺ຈ ສຕິ ເຕ ສທ຺ທາ ປຸເຣຊາຕາຫິ ວີຓາຕນ຺ຕິ ວີຓາທຓ຺ຑເກຫິ ວິນາ ອຸປ຺ປຊ຺ຊິຕຸໍ ນ ສກ຺ໂກນ຺ຕິ. ເອວເມວໍ ປຎ຺ຈ ວິຎ຺ຎາຓ ວີຖິຈິຕ຺ຕານິປິ ປຎ຺ຈສຸ ວຕ຺ຖຸທ຺ວາເຣສຸ ປຎ຺ຈນ຺ນໍ ອາຣມ຺ມຓານໍ ອາປາຕາຄມນ ປຈ຺ຈຍາ ເອວ ອຸປ຺ປຊ຺ຊນ຺ຕິ. ອາປາຕາຄມນຎ຺ຈ ເຕສໍ ທ຺ວິນ຺ນໍ ຐິຕິປຕ຺ຕກາເລ ເອວ ໂຫຕິ. ນ ເກວລຎ຺ຈ ຕສ຺ມິໍ ກາເລ ຕານິ ປຎ຺ຈາຣມ຺ມຓານິ ເຕສຸ ປຎ຺ຈວຕ຺ຖູສຸ ເອວ ອາປາຕມາຄຈ຺ຉນ຺ຕິ. ອຖ ໂຂ ຠວງ຺ຄມໂນທ຺ວາເຣປິ ອາປາຕໍ ອາຄຈ຺ຉນ຺ຕິເຍວ. ຕສ຺ມິໍ ອາປາຕຄມນຕ຺ຕາ ເອວ ຕໍ ຠວງ຺ຄມ຺ປິ ທ຺ວິກ຺ຂຕ຺ຕຸໍ ຈລິຕ຺ວາ ອຸປຈ຺ຉິຊ຺ຊຕິ, ຠວງ຺ຄຸປຈ຺ເຉເທ ເອວ ຕານິ ວີຖິຈິຕ຺ຕານິ ອຸປ຺ປຊ຺ຊນ຺ຕິ. ເອວຎ຺ຈ ສຕິ ຕານິ ວີຖິຈິຕ຺ຕານິ ປຸເຣຊາເຕຫິ ວຕ຺ຖຸ ທ຺ວາຣາຣມ຺ມເຓຫິ ວິນາ ອຸປ຺ປຊ຺ຊິຕຸໍ ນ ສກ຺ໂກນ຺ຕີຕິ. ຕານິ ປນ ສພ຺ພານິປິ ອຏ຺ຐາຣສນິປ຺ຜນ຺ນຣູປານິ ນິຣຸທ຺ຘານິ ຫຸຕ຺ວາ ອຕີຕານິປິ ໂຫນ຺ຕິ, ອນຸປ຺ປນ຺ນານິ ຫຸຕ຺ວາ ອນາຄຕານິປິ ໂຫນ຺ຕິ. ອຸປ຺ປນ຺ນານິ ຫຸຕ຺ວາ ປຈ຺ຈຸປ຺ປນ຺ນານິປິ ໂຫນ຺ຕິ. ສພ຺ພານິປິ ມໂນວິຎ຺ຎາຓວີຖິຈິຕ຺ຕານໍ ອາຣມ຺ມຓານິ ໂຫນ຺ຕິ. ເຕສຸ ປຈ຺ຈຸປ຺ປນ຺ນານິ ເອວ ເຕສໍ ອາຣມ຺ມຓປຸເຣຊາຕປຈ຺ຈຍາ ໂຫນ຺ຕິ. ຍທາ ທູເຣ ວາ ປຏິຈ຺ຉນ຺ເນ ວາ ຐິຕໍ ຕໍ ຕໍ ອາຣມ຺ມຓວຕ຺ຖຸໍ ມນສາ ເອວ ອາຣມ຺ມຓໍ ກໂຣຕິ, ຕທາ ຕໍ ຕໍ ວຕ຺ຖຸ ສເຈ ຕຕ຺ຖ ຕຕ຺ຖ ວິຊ຺ຊມານໍ ໂຫຕິ, ປຈ຺ຈຸປ຺ປນ຺ນໍ ນາມ ໂຫຕິ. ປຸເຣຊາຕປຈ຺ຈຍທີປນາ ນິຏ຺ຐິຕາ.

ປຈ຺ຉິມໍ ປຈ຺ຉິມໍ ປຈ຺ຈຸປ຺ປນ຺ນໍ ຈິຕ຺ຕໍ ປຸເຣຊາຕສ຺ສ ປຈ຺ຈຸປ຺ປນ຺ນສ຺ສ ຈຕຸ ສມຸຏ຺ຐານິກສ຺ສ ຣູປກາຍສ຺ສ ວຸຑ຺ຒິວິຣຸຬ຺ຫິຍາ ປຈ຺ຉາຊາຕປຈ຺ຈໂຍ. ຍຖາ ຕໍ ປຈ຺ຉິມວສ຺ເສສຸ ອນຸວສ຺ສໍ ວສ຺ສມານານິ ວສ຺ໂສທການິ ປຸຣິມວສ຺ເສສຸ ຊາຕານໍ ຣຸກ຺ຂໂປຕການໍ ວຸຑ຺ຒິວິຣຸຬ຺ຫິຍາ ປຈ຺ຉາຊາຕ ປຈ຺ຈຍາ ໂຫນ຺ຕີຕິ.

ຕຕ຺ຖ ປຈ຺ຉິມໍ ປຈ຺ຉິມໍ ຈິຕ຺ຕນ຺ຕິ ປຐມຠວງ຺ຄໂຕ ປຏ຺ຐາຍ ຍາວ ຈຸຕິ ຈິຕ຺ຕາ ສພ຺ພໍ ຈິຕ຺ຕໍ ວຸຈ຺ຈຕິ. ປຸເຣຊາຕສ຺ສາຕິ ປຏິສນ຺ຘິຈິຕ຺ເຕນ ສຫຸປ຺ປນ຺ນໍ ກມ຺ມຊຣູປກາຍໍ ອາທິໍ ກຕ຺ວາ ອຊ຺ຌຕ຺ຕສນ຺ຕານປຣິຍາປນ຺ໂນ ສພ຺ໂພ ຈຕຸສມຸຏ຺ຐານິກຣູປກາໂຍ ວຸຈ຺ຈຕິ.

ປຏິສນ຺ຘິຈິຕ຺ເຕນ ສຫຸປ຺ປນ຺ນສ຺ສ ກມ຺ມຊຣູປກາຍສ຺ສ ປຐມ ຠວງ຺ຄາທີນິ ປນ຺ນຣສຠວງ຺ຄຈິຕ຺ຕານິ ປຈ຺ຉາຊາຕປຈ຺ຈຍາ ໂຫນ຺ຕິ. ປຏິສນ຺ຘິ ຈິຕ຺ຕໍ ປນ ເຕນ ກາເຍນ ສຫຸປ຺ປນ຺ນຕ຺ຕາ ¶ ປຈ຺ຉຊາຕໍ ນ ໂຫຕິ. ໂສຬສມຠວງ຺ຄຈິຕ຺ຕຎ຺ຈ ຕສ຺ສ ກາຍສ຺ສ ຠິຊ຺ຊນກ຺ເຂຕ຺ເຕ ອຸປ຺ປນ຺ນຕ຺ຕາ ປຈ຺ຈໂຍ ນ ໂຫຕິ. ຕສ຺ມາ ປນ຺ນຣສຠວງ຺ຄຈິຕ຺ຕານີຕິ ວຸຕ຺ຕໍ.

ປຏິສນ຺ຘິຈິຕ຺ຕສ຺ສ ຐິຕິກ຺ຂເຓ ປນ ທ຺ເວ ຣູປກາຍາ ອຸປ຺ປຊ຺ຊນ຺ຕິ ກມ຺ມຊຣູປກາໂຍ ຈ ອຸຕຸຊຣູປກາໂຍຈ. ຕຖາ ຠງ຺ຄກ຺ຂເຓປິ. ປຐມຠວງ຺ຄສ຺ສ ອຸປ຺ປາທກ຺ຂເຓ ປນ ຕໂຍ ຣູປກາຍາ ອຸປ຺ປຊ຺ຊນ຺ຕິ ກມ຺ມຊຣູປກາໂຍ ຈ ອຸຕຸຊຣູປກາໂຍ ຈ ຈິຕ຺ຕຊຣູປກາໂຍ ຈ. ຍທາ ພຫິທ຺ຘາຫາຣປ຺ຜຣຓໍ ລຠິຕ຺ວາ ອຊ຺ຌຕ຺ຕາຫາໂຣ ອາຫາຣຊຣູປກາຍໍ ຊເນຕິ, ຕໂຕ ປຏ຺ຐາຍ ຈຕຸສມຸຏ຺ຐານິກາ ຈຕ຺ຕາໂຣ ຣູປກາຍາ ທີປ ຊາລາ ວິຍ ປວຕ຺ຕນ຺ຕິ. ເຕ ອຸປ຺ປາທກ຺ຂຓໍ ອຕິກ຺ກມ຺ມ ຍາວ ຐິຕິຠາເວນ ຘຣນ຺ຕິ, ຕາວ ປນ຺ນຣສຈິຕ຺ຕານິ ເຕສໍ ກາຍານໍ ປຈ຺ຉາຊາຕປຈ຺ຈຍາ ໂຫນ຺ຕິເຍວ.

ວຸຑ຺ຒິວິຣຸຬ຺ຫິຍາຕິ ຈຕຸສມຸຏ຺ຐານິກຣູປສນ຺ຕຕິຍາ ອຸປຣູປຣິ ວຸຑ຺ຒິຍາ ຈ ວິຣຸຬ຺ຫິຍາ ຈ. ຕຖາຫິ ປຸຣິມາ ປຸຣິມາ ຈຕ຺ຕາໂຣ ຣູປກາຍາ ສເຈ ປຈ຺ຉາຊາຕ ປຈ຺ຈຍໍ ປຸນປ຺ປຸນໍ ລຠນ຺ຕິ, ເອວໍ ສຕິ ເຕ ນິຣຸຊ຺ຌນ຺ຕາປິ ປຈ຺ຉາຣູປສນ຺ຕຕິປຣມ຺ປຣານໍ ວຸຑ຺ຒິຍາ ຈ ວິຣຸຬ຺ຫິຍາ ຈ ເວປຸລ຺ລາຍ ຈ ພລວ ປຈ຺ຈຍາ ຫຸຕ຺ວາ ນິຣຸຊ຺ຌນ຺ຕີຕິ. ປຈ຺ຉາຊາຕປຈ຺ຈຍທີປນາ ນິຏ຺ຐິຕາ.

ທ຺ວາທສ ອກຸສລຈິຕ຺ຕານິ ສຕ຺ຕຣສ ໂລກິຍກຸສລ ຈິຕ຺ຕານິ ອາວຊ຺ຊນທ຺ວຍວຊ຺ຊິຕານິ ອຏ຺ຐາຣສກິຣິຍຈິຕ຺ຕານີຕິ ສຕ຺ຕ ຈຕ຺ຕາລີສໍ ໂລກິຍຊວນຈິຕ຺ຕານິ ອາເສວນປຈ຺ຈໂຍ. ເຕສຸ ນິຣນ຺ຕຣປ຺ປວຕ຺ຕໍ ຊວນສນ຺ຕຕິໍ ປຕ຺ວາ ປຸຣິມໍ ປຸຣິມໍ ຊວນຈິຕ຺ຕໍ ອາເສວນ ປຈ຺ຈໂຍ. ຈຕູຫິ ມຄ຺ຄຈິຕ຺ເຕຫິ ປຈ຺ຉິມໍ ປຈ຺ຉິມໍ ຈິຕ຺ຕໍ ອາເສວນປຈ຺ຈຍຸປ຺ປນ຺ນໍ.

ເກນຏ຺ເຐນ ອາເສວນນ຺ຕິ. ອຸປຣູປຣິປຄຸຓຠາວວຑ຺ຒນຕ຺ຖໍຖາມ ພລວຑ຺ຒນຕ຺ຖຎ຺ຈ ປຣິວາສຄ຺ຄາຫາປນຏ຺ເຐນ.

ຕຕ຺ຖ ປຄຸຓຠາໂວຕິ ປຸນປ຺ປຸນໍ ສຊ຺ຌາຍິຕສ຺ສ ປາຬິປາຐສ຺ສ ສຸເຂນ ປວຕ຺ຕນໍ ວິຍ ຊວນຏ຺ຐານຊວນກິຈ຺ຈສງ຺ຂາເຕ ຐານກິຈ຺ຈວິເສເສ ປຈ຺ຉິມ ປຈ຺ຉິມຈິຕ຺ຕສ຺ສ ສຸເຂນ ປວຕ຺ຕນໍ. ປຣິວາໂສ ນາມ ໂກເສຍ຺ຍວຕ຺ຖໍ ປຸນປ຺ປຸນໍ ສຸຄນ຺ເຘນ ປຣິວາສນໍ ວິຍ ຈິຕ຺ຕສນ຺ຕາເນ ປຸນປ຺ປຸນ຺ນໍ ຣຊ຺ຊນທຸສ຺ສນາທິນາ ວາ ອຣຊ຺ຊນ ອທຸສ຺ສນາທິນາ ວາ ປຣິວາສນໍ. ປຸຣິມສ຺ມິໍ ຊວນຈິຕ຺ເຕ ນິຣຸທ຺ເຘປິ ຕສ຺ສ ຊວນເວໂຄ ນ ນິຣຸຊ຺ຌຕິ, ປຈ຺ຉິມໍ ຈິຕ຺ຕສນ຺ຕານໍ ຜຣມາໂນ ປວຕ຺ຕຕິເຍວ. ຕສ຺ມາ ປຈ຺ຉິມໍ ປຈ຺ຉິມໍ ຊວນຈິຕ຺ຕໍ ອຸປ຺ປຊ຺ຊມານໍ ເຕນ ເວເຄນ ປຄ຺ຄຫິຕໍ ພລວຕຣໍ ຫຸຕ຺ວາ ອຸປ຺ປຊ຺ຊຕິ. ເອວໍ ¶ ປຸຣິມຈິຕ຺ຕໍ ອຕ຺ຕໂນ ປຣິວາສໍ ປຈ຺ຉິມຈິຕ຺ຕໍ ຄຓ຺ຫາເປຕິ. ປຈ຺ຉິມຎ຺ຈ ຈິຕ຺ຕໍ ປຸຣິມສ຺ສ ຈິຕ຺ຕສ຺ສ ປຣິວາສໍ ຄເຫຕ຺ວາ ປວຕ຺ຕຕິ. ເອວໍ ສນ຺ເຕປິ ໂສ ອາເສວນເວໂຄ ປກຕິຍາ ສຕ຺ຕຫິ ຈິຕ຺ຕວາເຣຫິ ປຣິກ຺ຂຍໍ ຄຈ຺ຉຕິ, ຕໂຕ ປຣໍ ຕທາຣມ຺ມຓວິປາກ ຈິຕ຺ຕໍ ວາ ອຸປ຺ປຊ຺ຊຕິ, ຠວງ຺ຄ ຈິຕ຺ຕວາໂຣ ວາ ປວຕ຺ຕຕິ.

ອິຘ ສຸຕ຺ຕນ຺ຕາເສວນປຈ຺ຈໂຍປິ ວຕ຺ຕພ຺ໂພ. ສຕິປຏ຺ຐານໍ ຠາເວຕິ, ສມ຺ມປ຺ປຘານໍ ຠາເວຕິ, ສຕິສມ຺ໂພຊ຺ຌງ຺ຄໍ ຠາເວຕິ, ຘມ຺ມ ວິຈຍສມ຺ໂພຊ຺ຌງ຺ຄໍ ຠາເວຕິ, ສມ຺ມາທິຏ຺ຐິໍ ຠາເວຕິ, ສມ຺ມາສງ຺ກປ຺ປໍ ຠາເວຕີຕິອາທິນາ ພຫູສຸ ຐາເນສຸ ວຸຕ຺ໂຕ. ຕຕ຺ຖ ຠາເວຕີຕິ ເອກໍປິ ທິວສໍ ຠາເວຕິ, ສຕ຺ຕປິ ທິວສານິ ຠາເວຕິ, ເອກໍປິ ມາສໍ ຠາເວຕິ, ສຕ຺ຕປິ ມາສານິ ຠາເວຕິ, ເອກໍປິ ສໍວຈ຺ຉຣໍ ຠາເວຕິ, ສຕ຺ຕປິ ສໍວຈ຺ຉຣານິ ຠາເວຕີຕິ ອຕ຺ໂຖ.

ປຸຣິມປຸຣິເມສຸ ຠເວສຸ ອາເສວິຕານິ ຠາວິຕານິ ພຫຸລີ ກຕານິ ກຸສລານິ ວາ ອກຸສລານິ ວາ ປຈ຺ຉິມປຈ຺ຉິເມສຸ ຠເວສຸ ພລວຕຣານໍ ກຸສລານໍ ວາ ອກຸສລານໍ ວາ ອຸປ຺ປຕ຺ຕິຍາ ອາເສວນ ປຈ຺ຈໂຍ.

ກາລນ຺ຕເຣ ວາ ຠວນ຺ຕເຣ ວາ ຕາທິສານໍ ກຸສລາກຸສລານໍ ອຸປ຺ປຕ຺ຕິຍາ ປຈ຺ຈໂຍ ອຸປນິສ຺ສຍປຈ຺ຈໂຍ ນາມ. ເຕສໍເຍວ ພລວຕຣຕ຺ຖາຍ ປຈ຺ຈໂຍ ອາເສວນປຈ຺ຈໂຍ ນາມ.

ໂລເກປິ ມຫນ຺ເຕສຸ ຈິຕ຺ຕຠາວນາກມ຺ເມສຸ ວາຈາ ຠາວນາກມ຺ເມສຸ ກາຍຠາວນາກມ຺ເມສຸ ອງ຺ຄປຈ຺ຈງ຺ຄຠາວນາກມ຺ເມສຸ ກມ຺ມາຍຕນສິປ຺ປາຍຕນວິຊ຺ຊາຐາເນສຸ ຈ ອາເສວນາ ຠາວນາ ພຫຸລີກມ຺ມານໍ ນິສ຺ສນ຺ທຄຸຓາ ນາມ ສນ຺ທິສ຺ສນ຺ຕິເຍວ.

ສພ຺ເພສໍ ຂຓິກຘມ຺ມານໍ ມຊ຺ເຌ ເອວຣູປສ຺ສ ອາເສວນ ປຈ຺ຈຍສ຺ສ ວິຊ຺ຊມານຕ຺ຕາ ປຸຣິສພລປຸຣິສຖາມານໍ ອຸປຣູປຣິ ວຑ຺ຒນ ວເສນ ຈິຣກາລໍ ປວຕ຺ຕິຕານິ ປຸຣິສກມ຺ມານິ ນິປ຺ຜຕ຺ຕິໍ ປາປຸຓນ຺ຕິ, ສພ຺ພຎ຺ຎຸພຸທ຺ຘຠາວໍປິ ຄຈ຺ຉນ຺ຕິ. ອາເສວນປຈ຺ຈຍທີປນາ ນິຏ຺ຐິຕາ.

ທຸວິໂຘ ກມ຺ມປຈ຺ຈໂຍ ສຫຊາຕກມ຺ມປຈ຺ຈໂຍ ນານາກ຺ຂຓິກ ກມ຺ມປຈ຺ຈໂຍ.

ຕຕ຺ຖ ຂຓຕ຺ຕຍສມງ຺ຄິ ຠູຕາ ສພ຺ພາປິ ກຸສລາກຸສລາ ພ຺ຍາກຕເຈຕນາ ສຫຊາຕກມ຺ມ ປຈ຺ຈໂຍ. ເຈຕນາສມ຺ປຍຸຕ຺ຕາ ສພ຺ເພປິ ຈິຕ຺ຕເຈຕສິກາ ຘມ຺ມາຈ ປຏິສນ຺ຘິຈິຕ຺ເຕນ ສຫຸປ຺ປນ຺ນາ ກມ຺ມຊຣູປຘມ຺ມາ ຈ ປວຕ຺ຕິກາເລ ສພ຺ເພປິ ຈິຕ຺ຕຊຣູປຘມ຺ມາ ຈ ຕສ຺ສ ປຈ຺ຈຍສ຺ສ ປຈ຺ຈຍຸປ຺ປນ຺ນາ.

ອຕີຕາ ¶ ກຸສລາກຸສລເຈຕນາ ນານາກ຺ຂຓິກກມ຺ມ ປຈ຺ຈໂຍ. ພາຕ຺ຕິໍສວິຘາ ໂລກິຍວິປາກ ຈິຕ຺ຕເຈຕສິກາ ຘມ຺ມາ ຈ ສພ຺ເພ ກມ຺ມຊຣູປຘມ຺ມາ ຈ ຕສ຺ສ ປຈ຺ຈຍສ຺ສ ປຈ຺ຈຍຸປ຺ປນ຺ນາ.

ເກນຏ຺ເຐນ ກມ຺ມນ຺ຕິ. ກິຣິຍາວິເສສຏ຺ເຐນ ກມ຺ມໍ. ເຈຕນາ ຫິ ກິຣິຍາ ວິເສໂສ ໂຫຕິ ສພ຺ພກມ຺ເມສຸ ເຊຏ຺ຐກຕ຺ຕາ. ຕາ ຫິ ສພ຺ເພສຸ ກາຍວຈີມໂນກມ຺ເມສຸ ປຈ຺ຈຸປຏ຺ຐິເຕສຸ ຕສ຺ສ ຕສ຺ສ ກມ຺ມສ຺ສ ນິປ຺ຜຕ຺ຕຕ຺ຖາຍ ສມ຺ປຍຸຕ຺ຕຘມ຺ເມ ເຈເຕຕິ ກປ຺ເປຕິ ສໍວິທຫຕິ, ເອກໂຕ ອຸຏ຺ຐາເປຕິ, ຕສ຺ມາ ສພ຺ພກມ຺ເມສຸ ເຊຏ຺ຐກາ ໂຫຕິ. ອິຕິ ກິຣິຍາວິເສສຏ຺ເຐນ ກມ຺ມໍ ນາມ. ກໂຣນ຺ຕິ ເອເຕນາຕິ ວາ ກມ຺ມໍ. ກິໍ ກໂຣນ຺ຕິ. ກາຍິກກິຣິຍໍປິ ກໂຣນ຺ຕິ, ວາຈສິກກິຣິຍໍປິ ກໂຣນ຺ຕິ, ມານສິກກິຣິຍໍປິ ກໂຣນ຺ຕິ. ຕຕ຺ຖ ກາຍິກກິຣິຍາ ນາມ ຄມນຐານ ນິສຊ຺ຊາທໂຍ ອຠິກ຺ກມນປຏິກ຺ກມນາທໂຍ ອນ຺ຕມໂສ ອກ຺ຂິທລານໍ ອຸກ຺ຂິປນນິກ຺ຂິປນານິປິ. ວາຈສິກກິຣິຍາ ນາມ ວາຈາປວຕ຺ຕນກິຣິຍາ. ມານສິກກິຣິຍາ ນາມ ສຸຈິນ຺ຕິຕ ທຸຈິນ຺ຕິຕກິຣິຍາ, ອນ຺ຕມໂສ ປຎ຺ຈ ວິຎ຺ຎາຓານໍ ທສ຺ສນກິຈ຺ຈສວນກິຈ຺ຈາທີນິປິ. ສພ຺ພາປິ ອິມາ ກິຣິຍາໂຍ ເອຕາຍ ເຈຕນາຍ ສຕ຺ຕາ ກໂຣນ຺ຕິ, ສໍວິທຫນ຺ຕິ, ຕສ຺ມາ ສາ ເຈຕນາ ກມ຺ມໍ ນາມ.

ອຕ຺ຕໂນ ປຈ຺ຈຍຸປ຺ປນ຺ເນນ ສຫ ຊາຍຕີຕິ ສຫຊາຕໍ. ສຫຊາຕຎ຺ຈ ຕໍ ກມ຺ມຎ຺ຈາຕິ ສຫຊາຕກມ຺ມໍ. ສຫຊາຕກມ຺ມໍ ຫຸຕ຺ວາ ປຈ຺ຈໂຍ ສຫຊາຕກມ຺ມ ປຈ຺ຈໂຍ. ສຫຊາຕກມ຺ມຠາເວນ ປຈ຺ຈໂຍຕິ ວຸຕ຺ຕໍ ໂຫຕິ.

ອຎ຺ໂຎ ກມ຺ມສ຺ສ ອຸປ຺ປຕ຺ຕິກ຺ຂໂຓ ອຎ຺ໂຎ ວິປາກສ຺ສ ອຸປ຺ປຕ຺ຕິກ຺ຂໂຓຕິ ເອວໍ ວິສຸໍ ວິສຸໍ ອຸປ຺ປຕ຺ຕິກ຺ຂໂຓ ເອຕສ຺ສາຕິ ນານາກ຺ຂຓິກໍ. ນານາກ຺ຂຓິກຎ຺ຈ ຕໍ ກມ຺ມຎ຺ຈາຕິ ນານາກ຺ຂຓິກກມ຺ມໍ. ນານາກ຺ຂຓິກກມ຺ມໍ ຫຸຕ຺ວາ ປຈ຺ຈໂຍ ນານາກ຺ຂຓິກກມ຺ມປຈ຺ຈໂຍ. ນານາກ຺ຂຓິກກມ຺ມປຈ຺ຈຍຠາເວນ ປຈ຺ຈໂຍຕິ ວຸຕ຺ຕໍ ໂຫຕິ. ອຣິຍມຄ຺ຄສມ຺ປຍຸຕ຺ຕາ ເຈຕນາ ອຕ຺ຕໂນ ນິຣຸທ຺ຘານນ຺ຕເຣ ເອວ ອຣິຍຜລວິປາກໍ ຊເນຕິ, ສາປິ ນານາກ຺ຂຓິກາ ເອວ ໂຫຕິ.

ເອຕ຺ຖ ຈ ເອກາ ທານກຸສລເຈຕນາ ອຕ຺ຕນາ ສຫຊາຕານໍ ຈິຕ຺ຕເຈຕສິການຎ຺ຈ ກາຍິກວາຈສິກກິຣິຍາຠູຕານໍ ຈິຕ຺ຕຊຣູປານຎ຺ຈ ສຫຊາຕກມ຺ມປຈ຺ຈໂຍ. ຕາຍ ເຈຕນາຍ ອາຍຕິໍ ກາລນ຺ຕເຣ ອຸປ຺ປຊ຺ຊມານສ຺ສ ວິປາກກ຺ຂນ຺ຘສ຺ສ ຈ ກມ຺ມຊຣູປກ຺ຂນ຺ຘສ຺ສ ຈ ນານາກ຺ຂຓິກ ກມ຺ມປຈ຺ຈໂຍ. ເອວໍ ເອກາ ກມ຺ມປຖປຕ຺ຕາ ສຸຈຣິຕທຸຈ຺ຈຣິຕເຈຕນາ ທ຺ວີສຸ ກາເລສຸທ຺ວິນ຺ນໍ ປຈ຺ຈຍຸປ຺ປນ຺ນານໍ ທ຺ວີຫິ ປຈ຺ຈຍສຕ຺ຕີຫິ ປຈ຺ຈໂຍ ໂຫຕີຕິ.

ເອຕ຺ຖ ຈ ນານາກ຺ຂຓິກກມ຺ມປຈ຺ຈເຍ ກມ຺ມນ຺ຕິ ກິຣິຍາວິເສໂສ. ໂສ ປນ ເຈຕນາຍ ນິຣຸທ຺ຘາຍປິ ອນິຣຸຊ຺ຌິຕ຺ວາ ຕໍ ຈິຕ຺ຕສນ຺ຕານໍ ອນຸຄຈ຺ຉຕິເຍວ. ຍທາ ¶ ວິປຈ຺ຈິຕຸໍ ໂອກາສໍ ລຠຕິ, ຕທາ ໂສ ກິຣິຍາ ວິເສໂສ ຈຸຕິນນ຺ຕເຣ ເອໂກ ອຕ຺ຕຠາໂວ ຫຸຕ຺ວາ ວິປຈ຺ຈຕິ ປາຕຸຠວຕິ. ໂອກາສໍ ປນ ອລຠມານາ ຠວສຕໍປິ ຠວສຫສ຺ສໍປິ ຠວສຕສຫສ຺ສໍປິ ຕໍ ສນ຺ຕານໍ ອນຸຄຈ຺ຉຕິເຍວ. ມຫຄ຺ຄຕກມ຺ມໍ ປນ ລທ຺ໂຘກາເສ ສຕິ ທຸຕິຍຠເວ ພ຺ຣຫ຺ມໂລເກ ເອໂກ ພ຺ຣຫ຺ມຕ຺ຕຠາໂວ ຫຸຕ຺ວາ ວິປຈ຺ຈຕິ ປາຕຸຠວຕິ. ສຸປຣິປກ຺ກກມ຺ມຕ຺ຕາ ປນ ທຸຕິຍຠເວເຍວ ຂີຍຕິ, ຕໂຕ ປຣໍ ນານຸຄຈ຺ຉຕີຕິ. ກມ຺ມປຈ຺ຈຍທີປນາ ນິຏ຺ຐິຕາ.

ຉຕ຺ຕິໍສວິຘາ ວິປາກຠູຕາ ສຫຊາຕຈິຕ຺ຕເຈຕສິກາ ຘມ຺ມາ ວິປາກ ປຈ຺ຈໂຍ. ເຕເຍວ ອຎ຺ຎມຎ຺ຎຎ຺ຈ ປຏິສນ຺ຘິກ຺ຂເຓ ກມ຺ມຊຣູປານິ ຈ ປວຕ຺ຕິກ຺ຂເຓ ວິປາກ ຈິຕ຺ຕຊາຕານິ ຈິຕ຺ຕຊຣູປານິ ຈ ວິປາກປຈ຺ຈຍຸປ຺ປນ຺ນາ.

ເກນຏ຺ເຐນ ວິປາໂກຕິ. ວິປຈ຺ຈນຏ຺ເຐນ ວິປາໂກ. ວິປຈ຺ຈນໍ ນາມ ມຸທຸຕຣຸຓຠາວໍ ອຕິກ຺ກມ຺ມ ວິປກ຺ກຠາວໍ ອາປຊ຺ຊນໍ. ກສ຺ສ ປນ ຘມ຺ມສ຺ສ ມຸທຸຕຣຸຓຠາໂວ, ກສ຺ສ ວິປກ຺ກຠາໂວຕິ. ນານາກ຺ຂຓິກກມ຺ມປຈ຺ຈຍ ສງ຺ຂາຕສ຺ສ ອຕີຕກມ຺ມສ຺ສ ມຸທຸຕຣຸຓຠາໂວ, ຕສ຺ເສວ ກມ຺ມສ຺ສ ວິປກ຺ກຠາໂວ.

ຕຕ຺ຖ ເອກສ຺ສ ກມ຺ມສ຺ສ ຈຕສ຺ໂສ ອວຕ຺ຖາໂຍ ໂຫນ຺ຕິ ເຈຕນາ ວຕ຺ຖາ ກມ຺ມາວຕ຺ຖາ ນິມິຕ຺ຕາວຕ຺ຖາ ວິປາກາວຕ຺ຖາຕິ.

ຕຕ຺ຖ ຕາຍ ເຈຕນາຍ ນິຣຸທ຺ຘາຍປິ ຕສ຺ສາ ກິຣິຍາ ວິເສໂສ ນ ນິຣຸຊ຺ຌຕິ, ຕໍ ຈິຕ຺ຕສນ຺ຕານໍ ອນຸຄຈ຺ຉຕິເຍວ. ອຍໍ ກມ຺ມາວຕ຺ຖາ ນາມ.

ນິມິຕ຺ຕາວຕ຺ຖາຕິ ຕໍ ກມ຺ມໍ ຍທາ ວິປຈ຺ຈິຕຸໍ ໂອກາສໍ ລຠຕິ, ຕທາ ມຣຓາສນ຺ນກາເລ ຕສ຺ສ ປຸຄ຺ຄລສ຺ສ ຕເມວ ກມ຺ມໍ ວາ ປຈ຺ຈຸປຏ຺ຐາຕິ, ໂສ ປຸຄ຺ຄໂລ ຕທາ ທານໍ ເທນ຺ໂຕ ວິຍ ສີລໍ ຣກ຺ຂນ຺ໂຕ ວິຍ ປາຓຆາຕໍ ວາ ກໂຣນ຺ໂຕ ວິຍ ໂຫຕິ. ກມ຺ມນິມິຕ຺ຕໍ ວາ ປຈ຺ຈຸປຏ຺ຐາຕິ, ທານ ວຕ຺ຖຸອາທິກໍ ວາ ສຕ຺ຖາທິກໍ ວາ ອຎ຺ຎໍ ວາປິ ປຸພ຺ເພ ຕສ຺ສ ກມ຺ມສ຺ສ ອຸປກຣຓຠູຕໍ ອາຣມ຺ມຓໍ ຕທາ ຕສ຺ສ ປຸຄ຺ຄລສ຺ສ ຫຕ຺ຖຄຕໍ ວິຍ ໂຫຕິ. ຄຕິນິມິຕ຺ຕໍ ວາ ປຈ຺ຈຸປຏ຺ຐາຕິ, ທິພ຺ພວິມານາທິກໍ ວາ ນິຣຍຄ຺ຄິຊາລາທິກໍ ວາ ອຸປ຺ປຊ຺ຊມານຠເວ ອຸປລຠິຕພ຺ພໍ ວາ ອນຸຠວິຕພ຺ພໍ ວາ ອາຣມ຺ມຓໍ ຕທາ ທິສ຺ສມານໍ ໂຫຕິ. ອຍໍ ນິມິຕ຺ຕາ ວຕ຺ຖາ ນາມ.

ວິປາກາວຕ຺ຖາຕິ ສເຈ ໂສ ປຸຄ຺ຄໂລ ຕຖາ ປຈ຺ຈຸປຏ຺ຐິຕໍ ຕໍ ກມ຺ມໍ ວາ ກມ຺ມນິມິຕ຺ຕໍ ວາ ຄຕິນິມິຕ຺ຕໍ ວາ ເອກໍ ອາຣມ຺ມຓໍ ອມຸຎ຺ຈມາໂນ ມຣຕິ, ຕທາ ຕໍ ກມ຺ມໍ ຕສ຺ມິໍຠເວ ວິປຈ຺ຈຕິ, ຕໍ ກມ຺ມໍ ຕສ຺ມິໍຠເວ ເອໂກ ອຕ຺ຕຠາໂວ ຫຸຕ຺ວາ ປາຕຸຠວຕິ ¶ . ຕຕ຺ຖ ປຸຣິມາສຸ ຕີສຸ ອວຕ຺ຖາສຸ ຕໍ ກມ຺ມໍ ມຸທຸຕຣຸຓຠູຕໍ ໂຫຕິ, ປຈ຺ຉິມໍ ປນ ວິປາກາວຕ຺ຖໍ ປຕ຺ວາ ວິປກ຺ກຠູຕໍ ໂຫຕິ. ເຕນ ວຸຕ຺ຕໍ ວິປຈ຺ຈນໍ ນາມ ມຸທຸຕຣຸຓຠາວໍ ອຕິກ຺ກມ຺ມ ວິປກ຺ກຠາວໍ ອາປຊ຺ຊນນ຺ຕິ. ເອວໍ ວິປກ຺ກຠາວໍ ອາປນ຺ໂນ ຈິຕ຺ຕ ເຈຕສິກຘມ຺ມສມູໂຫ ວິປາໂກ ນາມ.

ຕຕ຺ຖ ຍຖາ ອມ຺ພປ຺ຜລານິ ນາມ ຍທາ ວິປກ຺ກຠາວໍ ອາປຊ຺ຊນ຺ຕິ, ຕທາ ສພ຺ພໂສ ສິນິທ຺ຘຣູປານິ ໂຫນ຺ຕິ. ເອວເມວໍ ວິປາກຘມ຺ມາ ນາມ ນິຣຸສ຺ສາຫາ ນິພ຺ຍາປາຣາ ຫຸຕ຺ວາ ສພ຺ພໂສ ສນ຺ຕຣູປາ ໂຫນ຺ຕິ. ເຕສໍ ສນ຺ຕຣູປຕ຺ຕາເຍວ ຠວງ຺ຄຈິຕ຺ຕານໍ ອາຣມ຺ມຓໍ ອວິຠູຕໍ ໂຫຕິ, ຠວງ຺ຄໂຕ ວຸຏ຺ຐານກາເລ ຕໍ ອາຣມ຺ມຓໍ ນ ຊານາຕິ. ຕຖາຫິ ຣຕ຺ຕິຍໍ ນິທ຺ທາຍນ຺ຕສ຺ສ ປຸຣິມຠເວ ມຣຓາສນ຺ນກາເລ ຍຖາຄຫິຕໍ ກມ຺ມາທິກໍ ອາຣມ຺ມຓໍ ອາຣພ຺ຠ ຠວງ຺ຄໂສຕໍ ປວຕ຺ຕມານໍປິ ຕສ຺ສ ຠວງ຺ຄໂສຕສ຺ສ ຕໍ ອາຣມ຺ມຓໍ ອາຣພ຺ຠ ອິທໍ ນາມ ເມ ປຸຣິມຠເວ ອາຣມ຺ມຓໍ ທິຏ຺ຐນ຺ຕິ ກສ຺ສຈິ ຊານນວີຖິຈິຕ຺ຕສ຺ສ ອຸປ຺ປຕ຺ຕິຍາ ປຈ຺ຈໂຍ ນ ໂຫຕິ. ໂສ ປຸຄ຺ຄໂລ ນິທ຺ທາຍນກາເລປິ ອຸຏ຺ຐານກາເລປິ ປຸຣິມຠວສິທ຺ຘໍ ຕໍ ນິມິຕ຺ຕໍ ນ ຊານາຕິ. ເອວໍ ນິຣຸສ຺ສາຫນິພ຺ຍາປາຣສນ຺ຕຣູປ ຠາເວນ ອຸປກາຣກຕາ ວິປາກປຈ຺ຈຍຕາ ນາມາຕິ. ວິປາກ ປຈ຺ຈຍທີປນາ ນິຏ຺ຐິຕາ.

ທຸວິໂຘ ອາຫາຣປຈ຺ຈໂຍ ຣູປາຫາຣປຈ຺ຈໂຍ ອຣູປາຫາຣ ປຈ຺ຈໂຍ.

ຕຕ຺ຖ ຣູປາຫາຣປຈ຺ຈໂຍ ນາມ ກພຬີກາຣາຫາຣສງ຺ຂາຕໍ ໂອຊ ຣູປໍ ວຸຈ຺ຈຕິ. ໂສ ຈ ອຊ຺ຌຕ຺ຕາຫາໂຣ ພຫິທ຺ຘາຫາໂຣຕິ ທຸວິໂຘ. ກພຬີກາຣາຫາຣຠກ຺ຂານໍ ສຕ຺ຕານໍ ສພ຺ເພປິ ຈຕຸສມຸຏ຺ຐານິກຣູປຘມ຺ມາ ຕສ຺ສ ທຸວິຘສ຺ສ ຣູປາຫາຣສ຺ສ ປຈ຺ຈຍຸປ຺ປນ຺ນາ.

ອຣູປາຫາໂຣ ປນ ຕິວິໂຘ ຜສ຺ສາຫາໂຣ ມໂນສຎ຺ເຈຕນາ ຫາໂຣ ວິຎ຺ຎາຓາຫາໂຣ ຈ. ຕໂຍເປເຕ ຘມ຺ມາ ສຫຊາຕານໍ ນາມຣູປຘມ຺ມານໍ ອາຫາຣປຈ຺ຈໂຍ ໂຫນ຺ຕິ. ສຫຊາຕາ ຈ ນາມຣູປ ຘມ຺ມາ ເຕສໍ ປຈ຺ຈຍຸປ຺ປນ຺ນາ.

ເກນຏ຺ເຐນ ອາຫາໂຣຕິ. ຠຸສໍ ຫຣຓຏ຺ເຐນ ອາຫາໂຣ. ຠຸສໍ ຫຣຓຏ຺ເຐນາຕິຈ ທຬ຺ຫໍ ປວຕ຺ຕາປນຏ຺ເຐນ, ຈິຣກາລໍ ຐິຕິຍາ ວຸຑ຺ຒິຍາ ວິຣຸຬ຺ຫິຍາ ເວປຸລ຺ລາຍ ອຸປຕ຺ຖມ຺ຠນຏ຺ເຐນາຕິ ວຸຕ຺ຕໍ ໂຫຕິ. ຊນນກິຈ຺ຈຍຸຕ຺ໂຕປິ ອາຫາໂຣ ອຸປຕ຺ຖມ຺ຠນກິຈ຺ຈປ຺ປຘາໂນ ໂຫຕີຕິ.

ຕຕ຺ຖ ທຸວິໂຘ ຣູປາຫາໂຣ ອຊ຺ຌຕ຺ຕສນ຺ຕາເນ ຈຕຸສມຸຏ຺ຐານິກໍ ຣູປກາຍໍ ອຸປພ຺ຣູຫຍນ຺ໂຕ ຠຸສໍ ຫຣຕິ, ທຬ຺ຫໍ ປວຕ຺ເຕຕິ, ຈິຣໍ ອທ຺ຘານໍ ຄເມຕິ, ຕໍ ຕໍ ອາຍຸກປ຺ປປຣິໂຍສານໍ ປາເປຕີຕິ ອາຫາໂຣ.

ຜສ຺ສາຫາໂຣ ¶ ອາຣມ຺ມເຓສຸ ອິຏ຺ຐານິຏ຺ຐຣສໍ ນີຫຣນ຺ໂຕ ສມ຺ປຍຸຕ຺ຕຘມ຺ເມ ຠຸສໍ ຫຣຕິ. ມໂນສຎ຺ເຈຕນາຫາໂຣ ກາຍວຈີ ມໂນກມ຺ເມສຸ ອຸສ຺ສາຫໍ ຊເນນ຺ໂຕ ສມ຺ປຍຸຕ຺ຕຘມ຺ເມ ຠຸສໍ ຫຣຕິ. ວິຎ຺ຎາຓາຫາໂຣ ອາຣມ຺ມຓວິຊານນຏ຺ເຐນ ປຸພ຺ພງ຺ຄມກິຈ຺ຈໍ ວຫນ຺ໂຕ ສມ຺ປຍຸຕ຺ຕຘມ຺ເມ ຠຸສໍ ຫຣຕິ, ທຬ຺ຫໍ ປວຕ຺ເຕຕິ, ຈິຣໍ ອທ຺ຘານໍ ຄເມຕີຕິ ອາຫາໂຣ. ສມ຺ປຍຸຕ຺ຕຘມ຺ເມ ຠຸສໍ ຫຣນ຺ໂຕ ສຫຊາຕຣູປຘມ຺ເມປິ ຠຸສໍ ຫຣຕິເຍວ.

ອິຘ ສຸຕ຺ຕນ຺ຕນໂຍປິ ວຕ຺ຕພ຺ໂພ. ຍຖາ ສກຸຓາ ນາມ ຈກ຺ຂູຫິ ທິສາວິທິສໍ ວິຠາເວຕ຺ວາ ປຕ຺ເຕຫິ ຣຸກ຺ຂໂຕ ຣຸກ຺ຂໍ ວນໂຕ ວນໍ ອາກາເສນ ປກ຺ຂນ຺ທິຕ຺ວາ ຕຸຓ຺ຑເກຫິ ຜລາຜລານິ ຕຸທິຕ຺ວາ ຍາວຊີວໍ ອຕ຺ຕານໍ ຍາເປນ຺ຕິ. ຕຖາ ອິເມ ສຕ຺ຕາ ຉຫິ ວິຎ຺ຎາເຓຫິ ອາຣມ຺ມຓານິ ວິຠາເວຕ຺ວາ ຉຫິ ມໂນສຎ຺ເຈຕນາຫາເຣຫິ ອາຣມ຺ມຓວຕ຺ຖຸປ຺ປຏິລາຠຕ຺ຖາຍ ອຸສ຺ສຸກ຺ກນໍ ກຕ຺ວາ ຉຫິ ຜສ຺ສາຫາເຣຫິ ອາຣມ຺ມເຓສຸ ຣສໍ ປາຕຸຠວນ຺ຕໍ ກຕ຺ວາ ສຸຂທຸກ຺ຂໍ ອນຸຠວນ຺ຕິ. ວິຎ຺ຎາເຓຫິ ວາ ອາຣມ຺ມຓານິ ວິຠາເວຕ຺ວາ ນາມຣູປ ສມ຺ປຕ຺ຕິໍ ສາເຘນ຺ຕິ. ຜສ຺ເສຫິ ອາຣມ຺ມເຓສຸ ຣສໍ ປາຕຸຠວນ຺ຕໍ ກຕ຺ວາ ອາຣມ຺ມຓຣສານຸຠວນໍ ເວທນໍ ສມ຺ປາເທຕ຺ວາ ຕຓ຺ຫາເວປຸລ຺ລໍ ອາປຊ຺ຊນ຺ຕິ. ເຈຕນາຫິ ຕຓ຺ຫາມູລການິ ນານາກມ຺ມານິ ປສເວຕ຺ວາ ຠວໂຕ ຠວໍ ສໍສຣນ຺ຕິ. ເອວໍ ອາຫາຣຘມ຺ມານໍ ມຫນ຺ຕໍ ອາຫາຣກິຈ຺ຈໍ ເວທິຕພ຺ພນ຺ຕິ. ອາຫາຣປຈ຺ຈຍທີປນາ ນິຏ຺ຐິຕາ.

ຕິວິໂຘ ອິນ຺ທ຺ຣິຍປຈ຺ຈໂຍ ສຫຊາຕິນ຺ທ຺ຣິຍປຈ຺ຈໂຍ ປຸເຣ ຊາຕິນ຺ທ຺ຣິຍປຈ຺ຈໂຍ ຣູປຊີວິຕິນ຺ທ຺ຣິຍປຈ຺ຈໂຍ.

ຕຕ຺ຖ ປນ຺ນຣສິນ຺ທ຺ຣິຍຘມ຺ມາ ສຫຊາຕິນ຺ທ຺ຣິຍປຈ຺ຈໂຍ ນາມ, ຊີວິຕິນ຺ທ຺ຣິຍໍ ມນິນ຺ທ຺ຣິຍໍ ສຸຂິນ຺ທ຺ຣິຍໍ ທຸກ຺ຂິນ຺ທ຺ຣິຍໍ ໂສມນສ຺ສິນ຺ທ຺ຣິຍໍ ໂທມນສ຺ສິນ຺ທ຺ຣິຍໍ ອຸເປກ຺ຂິນ຺ທ຺ຣິຍໍ ສທ຺ຘິນ຺ທ຺ຣິຍໍ ວີຣິຍິນ຺ທ຺ຣິຍໍ ສຕິນ຺ທ຺ຣິຍໍ ສມາຘິນ຺ທ຺ຣິຍໍ ປຎ຺ຎິນ຺ທ຺ຣິຍໍ ອນຎ຺ຎາຕຎ຺ຎສ຺ສາມີຕິນ຺ທ຺ຣິຍໍ ອຎ຺ຎິນ຺ທ຺ຣິຍໍ ອຎ຺ຎາຕາວິນ຺ທ຺ຣິຍນ຺ຕິ. ເຕຫິ ສຫຊາຕາ ຈິຕ຺ຕເຈຕສິກຘມ຺ມາ ຈ ຣູປຘມ຺ມາ ຈ ຕສ຺ສ ປຈ຺ຈຍຸປ຺ປນ຺ນາ.

ປຎ຺ຈິນ຺ທ຺ຣິຍຣູປານິ ປຸເຣຊາຕິນ຺ທ຺ຣິຍປຈ຺ຈໂຍ, ຈກ຺ຂຸນ຺ທ຺ຣິຍໍ ໂສຕິນ຺ທ຺ຣິຍໍ ຆານິນ຺ທ຺ຣິຍໍ ຊິວ຺ຫິນ຺ທ຺ຣິຍໍ ກາຍິນ຺ທ຺ຣິຍໍ. ປຎ຺ຈວິຎ຺ຎາຓຈິຕ຺ຕ ເຈຕສິກ ຘມ຺ມາ ຕສ຺ສ ປຈ຺ຈຍຸປ຺ປນ຺ນາ.

ເອກໍ ຣູປຊີວິຕິນ຺ທ຺ຣິຍໍ ຣູປຊີວິຕິນ຺ທ຺ຣິຍປຈ຺ຈໂຍ. ສພ຺ພານິ ກມ຺ມຊ ຣູປານິ ຊີວິຕຣູປວຊ຺ຊິຕານິ ຕສ຺ສ ປຈ຺ຈຍຸປ຺ປນ຺ນານິ.

ເກນຏ຺ເຐນ ອິນ຺ທ຺ຣິຍນ຺ຕິ. ອິສ຺ສຣິຍຏ຺ເຐນ ອິນ຺ທ຺ຣິຍໍ. ຕຕ຺ຖ ກຕ຺ຖ ອິສ຺ສຣິຍນ຺ຕິ. ອຕ຺ຕໂນ ອຕ຺ຕໂນ ປຈ຺ຈຍຸປ຺ປນ຺ເນສຸ ຘມ຺ເມສຸ ອິສ຺ສຣິຍໍ. ກສ຺ມິໍ ກສ຺ມິໍ ກິຈ຺ເຈ ອິສ຺ສຣິຍນ຺ຕິ ¶ . ອຕ຺ຕໂນ ອຕ຺ຕໂນ ກິຈ຺ເຈ ອິສ຺ສຣິຍໍ. ນາມຊີວິຕໍ ສມ຺ປຍຸຕ຺ຕຘມ຺ມານໍ ຊີວນກິຈ຺ເຈ ອິສ຺ສຣິຍໍ. ຊີວນກິຈ຺ເຈຕິ ອາຍຸວຑ຺ຒນກິຈ຺ເຈ, ສນ຺ຕຕິຐິຕິຍາ ຈິຣກາລຐິຕິກິຈ຺ເຈຕິ ອຕ຺ໂຖ. ມນິນ຺ທ຺ຣິຍໍ ອາຣມ຺ມຓຄ຺ຄຫຓກິຈ຺ເຈ ສມ຺ປຍຸຕ຺ຕຘມ຺ມານໍ ອິສ຺ສຣິຍໍ. ອວເສໂສ ອິນ຺ທ຺ຣິຍຏ຺ໂຐ ປຸພ຺ເພ ອິນ຺ທ຺ຣິຍຍມກທີປນິຍໍ ວຸຕ຺ໂຕເຍວ.

ເອຕ຺ຖ ວເທຍ຺ຍ, ທ຺ເວ ອິຕ຺ຖິນ຺ທ຺ຣິຍປຸຣິສິນ຺ທ຺ຣິຍຘມ຺ມາ ອິນ຺ທ຺ຣິຍຠູຕາ ສມານາປິ ກສ຺ມາ ອິນ຺ທ຺ຣິຍປຈ຺ຈເຍ ວິສຸໍ ນ ຄຫິຕາຕິ. ປຈ຺ຈຍກິຈ຺ຈສ຺ສ ອຠາວໂຕ. ຕິວິຘຎ຺ຫິ ປຈ຺ຈຍກິຈ຺ຈໍ ຊນນກິຈ຺ຈຎ຺ຈ ອຸປຕ຺ຖມ຺ຠນກິຈ຺ຈຎ຺ຈ ອນຸປາລນກິຈ຺ຈຎ຺ຈ. ຕຕ຺ຖ ໂຍ ປຈ຺ຈໂຍ ປຈ຺ຈຍຸປ຺ປນ຺ນຘມ຺ມສ຺ສ ອຸປ຺ປາທາຍ ປຈ຺ຈໂຍ ໂຫຕິ, ຍສ຺ມິໍ ອສຕິ ປຈ຺ຈຍຸປ຺ປນ຺ໂນ ຘມ຺ໂມ ນ ອຸປ຺ປຊ຺ຊຕິ, ຕສ຺ສ ປຈ຺ຈຍກິຈ຺ຈໍ ຊນນກິຈ຺ຈໍ ນາມ. ຍຖາ ອນນ຺ຕຣປຈ຺ຈໂຍ. ໂຍ ປຈ຺ຈໂຍ ປຈ຺ຈຍຸປ຺ປນ຺ນຘມ຺ມສ຺ສ ຐິຕິຍາ ຈ ວຸຑ຺ຒິຍາ ຈ ວິຣຸຬ຺ຫິຍາ ຈ ປຈ຺ຈໂຍ ໂຫຕິ, ຍສ຺ມິໍ ອສຕິ ປຈ຺ຈຍຸປ຺ປນ຺ໂນ ຘມ຺ໂມ ນ ຕິຏ຺ຐຕິ ນ ວຑ຺ຒຕິ ນ ວິຣູຫຕິ, ຕສ຺ສ ປຈ຺ຈຍກິຈ຺ຈໍ ອຸປຕ຺ຖມ຺ຠນກິຈ຺ຈໍ ນາມ. ຍຖາ ປຈ຺ຉາຊາຕປຈ຺ຈໂຍ. ໂຍ ປຈ຺ຈໂຍ ປຈ຺ຈຍຸປ຺ປນ຺ນສ຺ສ ຘມ຺ມສ຺ສ ປວຕ຺ຕິຍາ ປຈ຺ຈໂຍ ໂຫຕິ, ເຍນ ວິນາ ປຈ຺ຈຍຸປ຺ປນ຺ໂນ ຘມ຺ໂມ ຈິຣກາລໍ ນ ປວຕ຺ຕຕິ, ສນ຺ຕຕິ ຄມນໍ ຉິຊ຺ຊຕິ, ຕສ຺ສ ປຈ຺ຈຍ ກິຈ຺ຈໍ ອນຸປາລນກິຈ຺ຈໍ ນາມ. ຍຖາ ຣູປ ຊີວິຕິນ຺ທ຺ຣິຍປຈ຺ຈໂຍ. ເອເຕ ປນ ທ຺ເວ ອິນ຺ທ຺ຣິຍຘມ຺ມາ ເຕສຸ ຕີສຸ ປຈ຺ຈຍ ກິຈ຺ເຈສຸ ເອກກິຈ຺ຈໍປິ ນສາເຘນ຺ຕິ, ຕສ຺ມາ ເອເຕ ທ຺ເວ ຘມ຺ມາ ອິນ຺ທ຺ຣິຍ ປຈ຺ຈເຍ ວິສຸໍ ນ ຄຫິຕາຕິ.

ເອຕໍ ສນ຺ເຕ ເອເຕ ທ຺ເວ ຘມ຺ມາ ອິນ຺ທ຺ຣິຍາຕິປິ ນ ວຕ຺ຕພ຺ພາຕິ. ໂນ ນ ວຕ຺ຕພ຺ພາ. ກສ຺ມາ. ອິນ຺ທ຺ຣິຍກິຈ຺ຈສພ຺ຠາວໂຕຕິ. ກິໍ ປນ ເອເຕສໍ ອິນ຺ທ຺ຣິຍກິຈ຺ຈນ຺ຕິ. ລິງ຺ຄນິມິຕ຺ຕກຸຕ຺ຕອາກປ຺ເປສຸ ອິສ຺ສຣຕາ ອິນ຺ທ຺ຣິຍ ກິຈ຺ຈໍ. ຕຖາ ຫິ ຍສ຺ສ ປຸຄ຺ຄລສ຺ສ ປຏິສນ຺ຘິກ຺ຂເຓ ອິຕ຺ຖິນ຺ທ຺ຣິຍຣູປໍ ອຸປ຺ປຊ຺ຊຕິ, ຕສ຺ສ ສນ຺ຕາເນ ຈຕູຫິ ກມ຺ມາທີຫິ ປຈ຺ຈເຍຫິ ອຸປ຺ປນ຺ນາ ປຎ຺ຈກ຺ຂນ຺ຘ ຘມ຺ມາ ອິຕ຺ຖິຠາວາຍ ປຣິຓມນ຺ຕິ, ໂສ ອຕ຺ຕຠາໂວ ເອກນ຺ເຕນ ອິຕ຺ຖິລິງ຺ຄ ອິຕ຺ຖິນິມິຕ຺ຕ ອິຕ຺ຖິກຸຕ຺ຕ ອິຕ຺ຖາກປ຺ປຍຸຕ຺ໂຕ ໂຫຕິ, ໂນ ອຎ຺ຎຖາ. ນ ຈ ອິຕ຺ຖິນ຺ທ຺ຣິຍຣູປໍ ເຕ ປຎ຺ຈກ຺ຂນ຺ຘຘມ຺ເມ ຊເນຕິ, ນ ຈ ອຸປຕ຺ຖມ຺ຠຕິ, ນາປິ ອນຸປາເລຕິ, ອຖ ໂຂ ເຕ ຘມ຺ມາ ອຕ຺ຕໂນ ອຕ຺ຕໂນ ປຈ຺ຈເຍຫິ ອຸປ຺ປຊ຺ຊມານາ ເອວຎ຺ເຈວຎ຺ຈ ອຸປ຺ປຊ຺ຊນ຺ຕູຕິ ອາຓໍ ຐເປນ຺ຕໍ ວິຍ ເຕສຸ ອຕ຺ຕໂນ ອນຸຠາວໍ ປວຕ຺ເຕຕິ. ເຕ ຈ ຘມ຺ມາ ຕເຖວ ອຸປ຺ປຊ຺ຊນ຺ຕິ, ໂນ ອຎ຺ຎຖາຕິ. ອຍໍ ອິຕ຺ຖິນ຺ທ຺ຣິຍຣູປສ຺ສ ອິຕ຺ຖິລິງ຺ຄາທີສຸ ອິສ຺ສຣຕາ. ເອສ ນໂຍ ປຸຣິສິນ຺ທ຺ຣິຍຣູປສ຺ສ ປຸຣິສລິງ຺ຄາທີສຸ ອິສ຺ສຣຕາຍໍ. ເອວໍ ເອເຕ ທ຺ເວ ຘມ຺ມາ ລິງ຺ຄາທີສຸ ອິນ຺ທ຺ຣິຍກິຈ຺ຈ ສພ຺ຠາວໂຕ ອິນ຺ທ຺ຣິຍາ ນາມ ໂຫນ຺ຕີຕິ.

ຫທຍວຕ຺ຖຸຣູປໍ ປນ ທ຺ວິນ຺ນໍ ວິຎ຺ຎາຓຘາຕູນໍ ນິສ຺ສຍວຕ຺ຖຸກິຈ຺ຈໍ ສາຘຍມານໍປິ ຕາສຸ ອິນ຺ທ຺ຣິຍກິຈ຺ຈໍ ນ ສາເຘຕິ. ນ ຫິ ຠາວິຕ ຈິຕ຺ຕສ຺ສ ປຸຄ຺ຄລສ຺ສ ຫທຍຣູເປ ປສນ຺ເນວາ ¶ ອປ຺ປສນ຺ເນ ວາ ຊາເຕປິ ມໂນວິຎ຺ຎາຓຘາຕຸໂຍ ຕທນຸວຕ຺ຕິກາ ໂຫນ຺ຕີຕິ. ອິນ຺ທ຺ຣິຍ ປຈ຺ຈຍທີປນາ ນິຏ຺ຐິຕາ.

ສຕ຺ຕ ຌານງ຺ຄານິ ຌານປຈ຺ຈໂຍ, ວິຕກ຺ໂກ ວິຈາໂຣ ປີຕິ ໂສມນສ຺ສໍ ໂທມນສ຺ສໍ ອຸເປກ຺ຂາ ເອກຄ຺ຄຕາ. ເຕຫິ ສຫຊາຕາ ປຎ຺ຈວິຎ຺ຎາຓວຊ຺ຊິຕາ ຈິຕ຺ຕເຈຕສິກຘມ຺ມາ ຈ ຣູປຘມ຺ມາ ຈ ຕສ຺ສ ປຈ຺ຈຍຸປ຺ປນ຺ນາ.

ເກນຏ຺ເຐນ ຌານນ຺ຕິ. ອຸປນິຊ຺ຌາຍນຏ຺ເຐນ ຌານໍ. ອຸປນິຊ຺ຌາຍ ນຏ຺ເຐນາຕິ ຈ ມນສາ ອາຣມ຺ມຓໍ ອຸປຄນ຺ຕ຺ວາ ນິຊ຺ຌາຍນຏ຺ເຐນ ເປກ຺ຂນຏ຺ເຐນ. ຍຖາ ຫິ ອິສ຺ສາໂສ ທູເຣ ຐຕ຺ວາ ຂຸທ຺ທເກ ລກ຺ຂມຓ຺ຑເລ ສຣໍ ປເວເສນ຺ໂຕ ຫຕ຺ເຖຫິ ສຣໍ ອຸຊຸກຎ຺ຈ ນິຈ຺ຈລຎ຺ຈ ກຕ຺ວາ ມຓ຺ຑລຎ຺ຈ ວິຠູຕໍ ກຕ຺ວາ ຈກ຺ຂຸນາ ນິຊ຺ຌາຍນ຺ໂຕ ປເວເສຕິ. ເອວເມວ ອິເມຫິ ອງ຺ເຄຫິ ຈິຕ຺ຕໍ ອຸຊຸກຎ຺ຈ ນິຈ຺ຈລຎ຺ຈ ກຕ຺ວາ ອາຣມ຺ມຓຎ຺ຈ ວິຠູຕໍ ກຕ຺ວາ ນິຊ຺ຌາຍນ຺ໂຕ ປຸຄ຺ຄໂລ ອຸປນິຊ຺ຌາຍຕີຕິ ວຸຈ຺ຈຕິ. ເອວໍ ອຸປນິຊ຺ຌາຍິຕ຺ວາ ຍໍກິຎ຺ຈິ ກາຍກມ຺ມໍ ວາ ວຈີກມ຺ມໍ ວາ ມໂນກມ຺ມໍ ວາ ກໂຣນ຺ໂຕ ອວິຣຊ຺ຌມາໂນ ກໂຣຕິ.

ຕຕ຺ຖ ກາຍກມ຺ມໍ ນາມ ອຠິກ຺ກມປ຺ປຏິກ຺ກມາທິກໍ ວຸຈ຺ຈຕິ. ວຈີກມ຺ມໍ ນາມ ອກ຺ຂຣວຓ຺ຓປຣິປຸຓ຺ຓໍ ວຈີເຠທກຣຓໍ ວຸຈ຺ຈຕິ. ມໂນກມ຺ມໍ ນາມ ຍໍກິຎ຺ຈິ ມນສາ ອາຣມ຺ມຓວິຠາວນໍ ວຸຈ຺ຈຕິ. ທານກມ຺ມໍ ວາ ປາຓາຕິປາຕ ກມ຺ມໍ ວາ ອນຸຣູເປຫິ ຌານງ຺ເຄຫິ ວິນາ ທຸພ຺ພເລນ ຈິຕ຺ເຕນ ກາຕຸໍ ນ ສກ຺ກາ ໂຫຕິ. ເອສ ນໂຍ ເສເສສຸ ກຸສລາກຸສລ ກມ຺ເມສູຕິ.

ອຍຎ຺ຈ ອຕ຺ໂຖ ວິຕກ຺ກາທີນໍ ຌານງ຺ຄຘມ຺ມານໍ ວິສຸໍ ວິສຸໍ ສຠາວ ລກ຺ຂເຓຫິ ທີເປຕພ຺ໂພ. ສມ຺ປຍຸຕ຺ຕຘມ຺ເມ ອາຣມ຺ມຓາຠິນິໂຣປນ ລກ຺ຂໂຓ ວິຕກ຺ໂກ, ໂສ ຈິຕ຺ຕໍ ອາຣມ຺ມເຓ ທຬ຺ຫໍ ນິໂຍເຊຕິ. ອາຣມ຺ມຓານຸມຊ຺ຊນລກ຺ຂໂຓ ວິຈາໂຣ, ໂສ ຈິຕ຺ຕໍ ອາຣມ຺ມເຓ ທຬ຺ຫໍ ສໍໂຍເຊຕິ. ອາຣມ຺ມຓສມ຺ປິຍາຍນລກ຺ຂຓາປີຕິ, ສາ ຈິຕ຺ຕໍ ອາຣມ຺ມເຓ ປຣິຕຸຏ຺ຐໍ ກໂຣຕິ. ຕິສ຺ໂສປິ ເວທນາ ອາຣມ຺ມຓຣສານຸ ຠວນລກ຺ຂຓາ, ຕາປິ ຈິຕ຺ຕໍ ອາຣມ຺ມເຓ ອິຏ຺ຐານິຏ຺ຐມຊ຺ຌຕ຺ຕຣສານຸຠວນ ກິຈ຺ເຈນ ທຬ຺ຫປ຺ປຏິພທ຺ຘໍ ກໂຣນ຺ຕິ. ສມາຘານລກ຺ຂຓາ ເອກຄ຺ຄຕາ, ສາປິ ຈິຕ຺ຕໍ ອາຣມ຺ມເຓ ນິຈ຺ຈລໍ ກຕ຺ວາ ຐເປຕີຕິ. ຌານປຈ຺ຈຍທີປນາ ນິຏ຺ຐິຕາ.

ທ຺ວາທສ ມຄ຺ຄງ຺ຄານິ ມຄ຺ຄປຈ຺ຈໂຍ ສມ຺ມາທິຏ຺ຐິ ສມ຺ມາສງ຺ກປ຺ໂປ ສມ຺ມາ ວາຈາ ສມ຺ມາກມ຺ມນ຺ໂຕ ສມ຺ມາອາຊີໂວ ສມ຺ມາວາຍາໂມ ສມ຺ມາສຕິ ສມ຺ມາສມາຘິ ມິຈ຺ຉາທິຏ຺ຐິ ¶ ມິຈ຺ຉາສງ຺ກປ຺ໂປ ມິຈ຺ຉາວາຍາໂມ ມິຈ຺ຉາສມາຘິ. ເສສາ ມິຈ຺ຉາວາຈາ ມິຈ຺ຉາກມ຺ມນ຺ໂຕ ມິຈ຺ຉາອາຊີໂວຕິ ຕໂຍ ຘມ຺ມາ ວິສຸໍ ເຈຕສິກຘມ຺ມາ ນ ໂຫນ຺ຕິ. ມຸສາວາທາທິວເສນ ປວຕ຺ຕານໍ ຈຕຸນ຺ນໍ ອກຸສລຂນ຺ຘານໍ ນາມໍ. ຕສ຺ມາ ເຕ ມຄ຺ຄປຈ຺ຈເຍ ວິສຸໍ ນ ຄຫິຕາຕິ. ສພ຺ເພ ສເຫຕຸກາ ຈິຕ຺ຕ ເຈຕສິກຘມ຺ມາ ຈ ສເຫຕຸກຈິຕ຺ຕສຫ ຊາຕາ ຣູປຘມ຺ມາ ຈ ຕສ຺ສ ປຈ຺ຈຍຸປ຺ປນ຺ນາ.

ເກນຏ຺ເຐນ ມຄ຺ໂຄຕິ. ສຸຄຕິທຸຄ຺ຄຕິນິພ຺ພານ ທິສາເທສສມ຺ປາ ປນຏ຺ເຐນ ມຄ຺ໂຄ. ສມ຺ມາທິຏ຺ຐິອາທິການິ ຫິ ອຏ຺ຐ ສມ຺ມາມຄ຺ຄງ຺ຄານິ ສຸຄຕິ ທິສາເທສຎ຺ຈ ນິພ຺ພານທິສາເທສຎ຺ຈ ສມ຺ປາປນຕ຺ຖາຍ ສໍວຕ຺ຕນ຺ຕິ. ຈຕ຺ຕາຣິ ມິຈ຺ຉາມຄ຺ຄງ຺ຄານິ ທຸຄ຺ຄຕິທິສາເທສໍ ສມ຺ປາປນຕ຺ຖາຍ ສໍວຕ຺ຕນ຺ຕີຕິ.

ຕຕ຺ຖ ຌານປຈ຺ຈໂຍ ອາຣມ຺ມເຓ ຈິຕ຺ຕໍ ອຸຊຸໍ ກໂຣຕິ, ຖິຣໍ ກໂຣຕິ, ອປ຺ປນາປຕ຺ຕໍ ກໂຣຕິ. ອປ຺ປນາປຕ຺ຕໍ ນາມ ຄມ຺ຠີເຣ ອຸທເກ ປກ຺ຂິຕ຺ໂຕ ມຈ຺ໂຉວິຍ ກສິຓນິມິຕ຺ຕາທິເກ ນິມິຕ຺ຕາຣມ຺ມເຓ ອນຸປວິຏ຺ຐໍ ຈິຕ຺ຕໍ ປວຸຈ຺ຈຕິ. ມຄ຺ຄປຈ຺ຈໂຍ ວຏ຺ຏປເຖ ເຈຕນາກມ຺ມໍ ວິວຏ຺ຏປເຖ ຠາວນາກມ຺ມໍ ອຸຊຸໍ ກໂຣຕິ, ຖິຣໍ ກໂຣຕິ, ກມ຺ມປຖປຕ຺ຕໍ ກໂຣຕິ, ວຸທ຺ຘິໍ ວິຣຸຬ຺ຫິໍ ເວປຸລ຺ລໍ ກໂຣຕິ, ຠູມນ຺ຕຣປຕ຺ຕໍ ກໂຣຕິ. ອຍ ເມເຕສໍ ທ຺ວິນ຺ນໍ ປຈ຺ຈຍານໍ ວິເສໂສ.

ຕຕ຺ຖ ກມ຺ມປຖປຕ຺ຕໍ ນາມ ປາຓາຕິປາຕາທີນໍ ກຸສລາກຸສລ ກມ຺ມານໍ ອງ຺ຄປາຣິປູຣິຍາ ປຏິສນ຺ຘິຊນເນ ສມຕ຺ຖຠາວສງ຺ຂາຕໍ ກມ຺ມຄຕິໍ ປຕ຺ຕໍ ເຈຕນາກມ຺ມໍ. ຠູມນ຺ຕຣປຕ຺ຕໍ ນາມ ຠາວນານຸກ຺ກເມນ ກາມ ຠູມິໂຕ ປຏ຺ຐາຍ ຍາວ ໂລກຸຕ຺ຕຣຠູມິຍາ ເອກສ຺ມິໍອິຣິຍາປເຖປິ ອຸປຣູປຣິຠູມິໍ ປຕ຺ຕໍ ຠາວນາກມ຺ມໍ. ອຍຎ຺ຈ ອຕ຺ໂຖ ຌານປຈ຺ຈເຍ ວຸຕ຺ຕນເຍນ ສມ຺ມາທິຏ຺ຐິອາທິການໍ ມຄ຺ຄງ຺ຄຘມ຺ມານໍ ວິສຸໍ ວິສຸໍ ສຠາວ ລກ຺ຂເຓຫິ ທີເປຕພ຺ໂພຕິ. ມຄ຺ຄປຈ຺ຈຍທີປນາ ນິຏ຺ຐິຕາ.

ສມ຺ປຍຸຕ຺ຕປຈ຺ຈໂຍ ວິປ຺ປຍຸຕ຺ຕປຈ຺ຈໂຍຕິ ເອກໍ ທຸກ຺ກໍ. ອຕ຺ຖິ ປຈ຺ຈໂຍ ນຕ຺ຖິ ປຈ຺ຈໂຍຕິ ເອກໍ ທຸກ຺ກໍ. ວິຄຕປຈ຺ຈໂຍ ອວິຄຕ ປຈ຺ຈໂຍຕິ ເອກໍ ທຸກ຺ກໍ. ອິມານິ ຕີຓິ ປຈ຺ຈຍທຸກ຺ການິ ວິສຸໍ ປຈ຺ຈຍ ວິເສສານິ ນ ໂຫນ຺ຕິ. ປຸພ຺ເພ ອາຄເຕສຸ ປຈ຺ຈເຍສຸ ເກຈິ ປຈ຺ຈຍາ ອຕ຺ຕໂນ ປຈ຺ຈຍຸປ຺ປນ຺ເນຫິ ສມ຺ປຍຸຕ຺ຕາ ຫຸຕ຺ວາ ປຈ຺ຈຍຕ຺ຕໍ ຄຈ຺ຉນ຺ຕິ, ເກຈິ ວິປ຺ປຍຸຕ຺ຕາ ຫຸຕ຺ວາ, ເກຈິ ວິຊ຺ຊມານາ ຫຸຕ຺ວາ, ເກຈິ ອວິຊ຺ຊມານາ ຫຸຕ຺ວາ, ເກຈິ ວິຄຕາ ຫຸຕ຺ວາ, ເກຈິ ອວິຄຕາ ຫຸຕ຺ວາ ປຈ຺ຈຍຕ຺ຕໍ ຄຈ຺ຉນ຺ຕີຕິ ທສ຺ສນຕ຺ຖໍ ອິມານິ ຕີຓິ ປຈ຺ຈຍທຸກ຺ການິ ວຸຕ຺ຕານິ.

ເອຕ຺ຖ ¶ ຈ ອຕ຺ຖີຕິ ໂຂ ກຈ຺ຈານ ອຍເມໂກ ອນ຺ໂຕ, ນຕ຺ຖີຕິ ໂຂ ທຸຕິໂຍ ອນ຺ໂຕຕິ ເອວຣູເປສຸ ຐາເນສຸ ອຕ຺ຖິນຕ຺ຖິສທ຺ທາ ສສ຺ສຕຸຈ຺ເຉເທສຸປວຕ຺ຕນ຺ຕິ, ຕສ຺ມາ ເອວຣູປານໍ ອຕ຺ຖານໍ ນິວຕ຺ຕນຕ຺ຖໍ ປຸນ ວິຄຕທຸກ຺ກໍ ວຸຕ຺ຕໍ.

ສພ຺ເພປິ ສຫຊາຕາ ຈິຕ຺ຕເຈຕສິກາ ຘມ຺ມາ ອຎ຺ຎມຎ຺ຎສ຺ສ ປຈ຺ຈຍາ ເຈວ ໂຫນ຺ຕິ ປຈ຺ຈຍຸປ຺ປນ຺ນາ ຈ.

ເກນຏ຺ເຐນ ສມ຺ປຍຸຕ຺ໂຕ. ເອກຸປ຺ປາທຕາ ເອກນິໂຣຘຕາ ເອກວຕ຺ຖຸກຕາ ເອກາຣມ຺ມຓຕາຕິ ອິເມຫິ ຈຕູຫິ ສມ຺ປໂຍຄງ຺ເຄຫິ ສມນ຺ນາຄໂຕ ຫຸຕ຺ວາ ສໍຍຸຕ຺ໂຕ ເອກີຠາວໍ ຄໂຕຕິ ສມ຺ປຍຸຕ຺ໂຕ.

ຕຕ຺ຖ ເອກີຠາວໍ ຄໂຕຕິ ຈກ຺ຂຸວິຎ຺ຎາຓໍ ຜສ຺ສາທີຫິ ສຕ຺ຕຫິ ເຈຕສິເກຫິ ສຫ ເອກີຠາວໍ ຄຕໍ ໂຫຕິ, ທສ຺ສນນ຺ຕິ ເອກໍ ໂວຫາຣໍ ຄຈ຺ຉຕິ. ອຏ຺ຐ ຘມ຺ມາ ວິສຸໍ ວິສຸໍ ໂວຫາຣໍ ນ ຄຈ຺ຉນ຺ຕິ, ວິນິພ຺ຠຸຊ຺ຊິຕ຺ວາ ວິຎ຺ຎາຕຸໍ ນ ສກ຺ໂກຕິ. ເອສ ນໂຍ ເສເສສຸ ສພ຺ພຈິຕ຺ຕຸປ຺ປາເທສູຕິ. ສມ຺ປຍຸຕ຺ຕປຈ຺ຈຍທີປນາ ນິຏ຺ຐິຕາ.

ຈຕຸພ຺ພິໂຘ ວິປ຺ປຍຸຕ຺ຕປຈ຺ຈໂຍ, ສຫຊາໂຕ ວຕ຺ຖຸປຸເຣ ຊາໂຕ ວຕ຺ຖາຣມ຺ມຓປຸເຣຊາໂຕ ປຈ຺ຉາຊາໂຕຕິ.

ຕຕ຺ຖ ສຫຊາຕວິປ຺ປຍຸຕ຺ໂຕ ນາມ ທ຺ວິສຸ ສຫຊາຕປຈ຺ຈຍ ປຈ຺ຈຍຸປ຺ປນ຺ເນສຸ ນາມຣູເປສຸ ນາມໍ ວາ ຣູປສ຺ສ ຣູປໍ ວາ ນາມສ຺ສ ວິປ຺ປຍຸຕ຺ຕໍ ຫຸຕ຺ວາ ປຈ຺ຈໂຍ. ຕຕ຺ຖ ນາມນ຺ຕິ ປວຕ຺ຕິກາເລ ຈຕຸກ຺ຂນ຺ຘນາມໍ, ຣູປສ຺ສາຕິ ຈິຕ຺ຕຊຣູປສ຺ສ, ຣູປນ຺ຕິ ປຏິສນ຺ຘິກ຺ຂເຓ ຫທຍວຕ຺ຖຸຣູປໍ, ນາມສ຺ສາຕິ ປຏິສນ຺ຘິຈຕຸກ຺ຂນ຺ຘນາມສ຺ສ. ເສສາ ຕໂຍປິ ວິປ຺ປຍຸຕ຺ຕປຈ຺ຈຍາ ປຸພ຺ເພ ວິຠຕ຺ຕາ ເອວາຕິ. ວິປ຺ປຍຸຕ຺ຕປຈ຺ຈຍທີປນາ ນິຏ຺ຐິຕາ.

ສຕ຺ຕວິໂຘ ອຕ຺ຖິປຈ຺ຈໂຍ, ສຫຊາຕຕ຺ຖິປຈ຺ຈໂຍ ວຕ຺ຖຸປຸເຣ ຊາຕຕ຺ຖິ ປຈ຺ຈໂຍ ອາຣມ຺ມຓປຸເຣຊາຕຕ຺ຖິປຈ຺ຈໂຍ ວຕ຺ຖາຣມ຺ມຓປຸເຣ ຊາຕຕ຺ຖິປຈ຺ຈໂຍ ປຈ຺ຉາຊາຕຕ຺ຖິປຈ຺ຈໂຍ ຣູປາຫາຣຕ຺ຖິປຈ຺ຈໂຍ ຣູປ ຊີວິຕິນ຺ທ຺ຣິຍຕ຺ຖິປຈ຺ຈໂຍຕິ.

ຕຕ຺ຖ ສຫຊາຕປຈ຺ຈໂຍ ເອວ ສຫຊາຕຕ຺ຖິປຈ຺ຈໂຍ ນາມ. ເອສ ນໂຍ ເສເສສຸ ຉສຸ. ປຈ຺ຈຍປຈ຺ຈຍຸປ຺ປນ຺ນວິຠາໂຄປິ ເຫຏ຺ຐາ ຕຕ຺ຖ ຕຕ຺ຖ ວຸຕ຺ໂຕເຍວ.

ເກນຏ຺ເຐນ ¶ ອຕ຺ຖິປຈ຺ຈໂຍ. ສຍໍ ຂຓິກປຈ຺ຈຸປ຺ປນ຺ນຕາ ສງ຺ຂາເຕນ ອຕ຺ຖິຠາເວນ ປຈ຺ຈຸປ຺ປນ຺ນສ຺ສ ຘມ຺ມສ຺ສ ປຈ຺ຈໂຍ ອຕ຺ຖິປຈ຺ຈໂຍ. ອຕ຺ຖິປຈ຺ຈຍທີປນາ ນິຏ຺ຐິຕາ.

ສພ຺ໂພ ອນນ຺ຕຣປຈ຺ຈໂຍ ນຕ຺ຖິ ປຈ຺ຈໂຍ ນາມ. ຕຖາ ວິຄຕ ປຈ຺ຈໂຍ. ອວິຄຕປຈ຺ຈໂຍປິ ອຕ຺ຖິປຈ຺ຈເຍນ ສພ຺ພສທິໂສ. ອຕ຺ຖີຕິຈ ອວິຄໂຕຕິ ຈ ອຕ຺ຖໂຕ ເອກເມວ. ຕຖາ ນຕ຺ຖີຕິ ຈ ວິຄໂຕຕິຈ. ນຕ຺ຖິວິຄຕອວິຄຕປຈ຺ຈຍທີປນາ ນິຏ຺ຐິຕາ.

ປຈ຺ຈຍສຠາໂຄ ວຸຈ຺ຈເຕ. ປຎ຺ຈທສ ສຫຊາຕຊາຕິກາ ໂຫນ຺ຕິ, ຈຕ຺ຕາໂຣ ມຫາສຫຊາຕາ ຈຕ຺ຕາໂຣ ມຊ຺ຌິມສຫຊາຕາ ສຕ຺ຕ ຂຸທ຺ທກສຫຊາຕາ. ຕຕ຺ຖ ຈຕ຺ຕາໂຣ ມຫາສຫຊາຕາ ນາມ ສຫຊາໂຕ ສຫຊາຕນິສ຺ສໂຍ ສຫຊາຕຕ຺ຖິ ສຫຊາຕ ອວິຄໂຕ. ຈຕ຺ຕາໂຣ ມຊ຺ຌິມສຫຊາຕາ ນາມ ອຎ຺ຎມຎ຺ໂຎ ວິປາໂກ ສມ຺ປຍຸຕ຺ໂຕ ສຫຊາຕວິປ຺ປຍຸຕ຺ໂຕ. ສຕ຺ຕ ຂຸທ຺ທກສຫ ຊາຕາ ນາມ ເຫຕຸ ສຫຊາຕາຘິປຕິ ສຫຊາຕກມ຺ມໍ ສຫ ຊາຕາຫາໂຣ ສຫຊາຕິນ຺ທ຺ຣິຍໍ ຌານໍ ມຄ຺ໂຄ.

ຕໂຍ ຣູປາຫາຣາ, ຣູປາຫາໂຣ ຣູປາຫາຣຕ຺ຖິ ຣູປາຫາຣາ ວິຄໂຕ.

ຕີຓິ ຣູປຊີວິຕິນ຺ທ຺ຣິຍານິ, ຣູປຊີວິຕິນ຺ທ຺ຣິຍໍ ຣູປຊີວິຕິນ຺ທ຺ຣິຍຕ຺ຖິ ຣູປຊີວິຕິນ຺ທ຺ຣິຍາວິຄຕໍ.

ສຕ຺ຕຣສ ປຸເຣຊາຕຊາຕິກາ ໂຫນ຺ຕິ, ຉ ວຕ຺ຖຸປຸເຣຊາຕາ ຉ ອາຣມ຺ມຓປຸເຣຊາຕາ ປຎ຺ຈ ວຕ຺ຖາຣມ຺ມຓປຸເຣຊາຕາ. ຕຕ຺ຖ ຉ ວຕ຺ຖຸປຸເຣຊາຕາ ນາມ ວຕ຺ຖຸປຸເຣຊາໂຕ ວຕ຺ຖຸປຸເຣຊາຕນິສ຺ສໂຍ ວຕ຺ຖຸປຸເຣຊາຕິນ຺ທ຺ຣິຍໍ ວຕ຺ຖຸປຸເຣຊາຕວິປ຺ປຍຸຕ຺ຕໍ ວຕ຺ຖຸປຸເຣຊາຕຕ຺ຖິ ວຕ຺ຖຸ ປຸເຣຊາຕອວິຄໂຕ. ຉ ອາຣມ຺ມຓປຸເຣຊາຕາ ນາມ ອາຣມ຺ມຓ ປຸເຣຊາໂຕ ກິຎ຺ຈິອາຣມ຺ມຓໍ ໂກຈິ ອາຣມ຺ມຓາຘິປຕິ ໂກຈິ ອາຣມ຺ມຓູປນິສ຺ສໂສ ອາຣມ຺ມຓປຸເຣຊາຕຕ຺ຖິ ¶ ອາຣມ຺ມຓປຸເຣຊາຕ ອວິຄໂຕ. ກິຎ຺ຈິ ອາຣມ຺ມຓນ຺ຕິອາທີສຸ ກິຎ຺ຈິໂກຈິວຈເນຫິ ປຈ຺ຈຸປ຺ປນ຺ນໍ ນິປ຺ຜນ຺ນຣູປໍ ຄຍ຺ຫຕິ. ປຎ຺ຈ ວຕ຺ຖາຣມ຺ມຓປຸເຣຊາຕາ ນາມ ວຕ຺ຖາຣມ຺ມຓ ປຸເຣຊາໂຕ ວຕ຺ຖາຣມ຺ມຓປຸເຣຊາຕນິສ຺ສໂຍ ວຕ຺ຖາຣມ຺ມຓປຸເຣ ຊາຕ ວິປ຺ປຍຸຕ຺ໂຕ ວຕ຺ຖາຣມ຺ມຓປຸເຣຊາຕຕ຺ຖິ ວຕ຺ຖາຣມ຺ມຓປຸເຣຊາຕ ອວິຄໂຕ.

ຈຕ຺ຕາໂຣ ປຈ຺ຉາຊາຕຊາຕິກາ ໂຫນ຺ຕິ, ປຈ຺ຉາຊາໂຕ ປຈ຺ຉາຊາຕວິປ຺ປຍຸຕ຺ໂຕ ປຈ຺ຉາຊາຕຕ຺ຖິ ປຈ຺ຉາຊາຕອວິຄໂຕ.

ສຕ຺ຕ ອນນ຺ຕຣາ ໂຫນ຺ຕິ, ອນນ຺ຕໂຣ ສມນນ຺ຕໂຣ ອນນ຺ຕຣູປ ນິສ຺ສໂຍ ອາເສວນໍ ອນນ຺ຕຣກມ຺ມໍ ນຕ຺ຖິ ວິຄໂຕ. ເອຕ຺ຖ ຈ ອນນ຺ຕຣ ກມ຺ມໍ ນາມ ອຣິຍມຄ຺ຄເຈຕນາ, ສາ ອຕ຺ຕໂນ ອນນ຺ຕເຣ ອຣິຍຜລໍ ຊເນຕິ.

ປຎ຺ຈ ວິສຸໍ ປຈ຺ຈຍາ ໂຫນ຺ຕິ, ອວເສສໍ ອາຣມ຺ມຓໍ ອວເສໂສ ອາຣມ຺ມຓາຘິປຕິ ອວເສໂສ ອາຣມ຺ມຓູປ ນິສ຺ສໂຍ ສພ຺ໂພ ປກຕູປນິສ຺ສໂຍ ອວເສສໍ ນານາກ຺ຂຓິກ ກມ຺ມໍ. ອິຕິ ວິຕ຺ຖາຣໂຕ ປຏ຺ຐານປຈ຺ຈຍາ ຈຕຸປຎ຺ຎາສປ຺ປເຠທາ ໂຫນ຺ຕີຕິ.

ຕຕ຺ຖ ສພ຺ເພ ສຫຊາຕຊາຕິກາ ຈ ສພ຺ເພ ປຸເຣຊາຕ ຊາຕິກາ ສພ຺ເພ ປຈ຺ຉາຊາຕຊາຕິກາ ຣູປາຫາໂຣ ຣູປຊີວິຕິນ຺ທ຺ຣິຍນ຺ຕິ ອິເມ ປຈ຺ຈຸປ຺ປນ຺ນປຈ຺ຈຍາ ນາມ. ສພ຺ເພ ອນນ຺ຕຣຊາຕິກາ ສພ຺ພໍ ນານາກ຺ຂຓິກ ກມ຺ມນ຺ຕິ ອິເມ ອຕີຕປຈ຺ຈຍາ ນາມ. ອາຣມ຺ມຓໍ ປກຕູປນິສ຺ສໂຍຕິ ອິເມ ເຕກາລິກາ ຈ ນິພ຺ພານປຎ຺ຎຕ຺ຕີນໍ ວເສນ ກາລວິມຸຕ຺ຕາ ຈ ໂຫນ຺ຕິ.

ນິພ຺ພານຎ຺ຈ ປຎ຺ຎຕ຺ຕິ ຈາຕິ ອິເມ ທ຺ເວ ຘມ຺ມາ ອປ຺ປຈ຺ຈຍາ ນາມ ອສງ຺ຂຕາ ນາມ. ກສ຺ມາ. ອຊາຕິກຕ຺ຕາ. ເຍສຎ຺ຫິ ຊາຕິ ນາມ ອຕ຺ຖິ, ອຸປ຺ປາໂທ ນາມ ອຕ຺ຖິ. ເຕ ສປ຺ປຈ຺ຈຍານາມ ສງ຺ຂຕາ ນາມ ປຏິຈ຺ຈສມຸປ຺ປນ຺ນາ ນາມ. ອິເມ ທ຺ເວ ຘມ຺ມາ ອຊາຕິກຕ຺ຕາ ອນຸປ຺ປາທຕ຺ຕາ ອຊາຕິປຈ຺ຈຍຕ຺ຕາຈ ອປ຺ປຈ຺ຈຍາ ນາມ ອສງ຺ຂຕາ ນາມາຕິ.

ສປ຺ປຈ຺ຈເຍສຸ ຈ ຘມ຺ເມສຸ ສງ຺ຂເຕສຸ ເອໂກປິ ຘມ຺ໂມ ນິຈ຺ໂຈ ຘຸໂວ ສສ຺ສໂຕ ອວິປຣີຕຘມ຺ໂມ ນາມ ນຕ຺ຖິ. ອຖ ໂຂ ສພ຺ເພ ເຕ ຂຍຏ຺ເຐນ ອນິຈ຺ຈາ ເອວ ໂຫນ຺ຕິ. ກສ຺ມາ. ສຍຎ຺ຈ ປຈ຺ຈຍາຍຕ຺ຕວຸຕ຺ຕິ ກຕ຺ຕາ ປຈ຺ຈຍານຎ຺ຈ ອນິຈ຺ຈຘມ຺ມຕ຺ຕາ. ນນຸ ນິພ຺ພານຎ຺ຈ ປຎ຺ຎຕ຺ຕິ ຈ ປຈ຺ຈຍາ ໂຫນ຺ຕິ. ເຕ ຈ ນິຈ຺ຈາ ຘຸວາຕິ. ສຈ຺ຈໍ. ເກວເລນ ປນ ນິພ຺ພານປຈ຺ຈເຍນ ວາ ປຎ຺ຎຕ຺ຕິປຈ຺ຈເຍນ ວາ ອຸປ຺ປນ຺ໂນ ນາມ ນຕ຺ຖິ, ພຫູຫິ ປຈ຺ຈເຍຫິ ເອວ ອຸປ຺ປນ຺ໂນ, ເຕ ປນ ປຈ຺ຈຍາ ອນິຈ຺ຈາ ເອວ ອຘຸວາຕິ.

ເຍ ¶ ຈ ຘມ຺ມາ ອນິຈ຺ຈາ ໂຫນ຺ຕິ, ເຕ ນິຈ຺ຈກາລໍ ສຕ຺ເຕ ຕິວິເຘຫິ ທຸກ຺ຂທຓ຺ເຑຫິ ປຏິປ຺ປີເຬນ຺ຕິ ພາເຘນ຺ຕິ, ຕສ຺ມາ ເຕ ຘມ຺ມາ ຠຍຏ຺ເຐນ ທຸກ຺ຂາ ເອວ ໂຫນ຺ຕິ. ຕຕ຺ຖ ຕິວິຘາ ທຸກ຺ຂທຓ຺ຑາ ນາມ ທຸກ຺ຂທຸກ຺ຂຕາ ສງ຺ຂາຣ ທຸກ຺ຂຕາ ວິປຣິຓາມທຸກ຺ຂຕາ.

ເຍ ເກຈິ ອນິຈ຺ຈາ ເອວ ໂຫນ຺ຕິ, ເອກສ຺ມິໍ ອິຣິຍາປເຖປິ ປຸນປ຺ປຸນໍ ຠິຊ຺ຊນ຺ຕິ, ເຕ ກຖໍ ຍາວຊີວໍ ນິຈ຺ຈສຎ຺ຎິຕານໍ ສຕ຺ຕປຸຄ຺ຄລານໍ ອຕ຺ຕາ ນາມ ຠເວຍ຺ຍຸໍ, ສາຣາ ນາມ ຠເວຍ຺ຍຸໍ. ເຍ ຈ ທຸກ຺ຂາ ເອວ ໂຫນ຺ຕິ, ເຕ ກຖໍ ທຸກ຺ຂປ຺ປຏິກຸລານໍ ສຸຂກາມານໍ ສຕ຺ຕານໍ ອຕ຺ຕາ ນາມ ຠເວຍ຺ຍຸໍ, ສາຣາ ນາມ ຠເວຍ຺ຍຸໍ. ຕສ຺ມາ ເຕ ຘມ຺ມາ ອສາຣກຏ຺ເຐນ ອນຕ຺ຕາ ເອວ ໂຫນ຺ຕິ.

ອປິ ຈ ຍສ຺ມາ ອິມາຍ ຈຕຸວີສຕິຍາ ປຈ຺ຈຍເທສນາຍ ອິມມຕ຺ຖໍ ທສ຺ເສຕິ. ສພ຺ເພປິ ສງ຺ຂຕຘມ຺ມາ ນາມ ປຈ຺ຈຍາຍຕ຺ຕວຸຕ຺ຕິກາ ເອວ ໂຫນ຺ຕິ, ສຕ຺ຕານໍ ວສາຍຕ຺ຕວຸຕ຺ຕິກາ ນ ໂຫນ຺ຕິ. ປຈ຺ຈຍາຍຕ຺ຕ ວຸຕ຺ຕິເກສຸ ຈ ເຕສຸ ນ ເອໂກປິ ຘມ຺ໂມ ອປ຺ປເກນ ປຈ຺ຈເຍນ ອຸປ຺ປຊ຺ຊຕິ. ອຖ ໂຂ ພຫູຫິ ເອວ ປຈ຺ຈເຍຫິ ອຸປ຺ປຊ຺ຊຕີຕິ, ຕສ຺ມາ ອຍໍ ເທສນາ ຘມ຺ມານໍ ອນຕ຺ຕລກ຺ຂຓທີປເນ ມຕ຺ຖກປຕ຺ຕາ ໂຫຕີຕິ.

ປຈ຺ຈຍຆຏນານໂຍ ວຸຈ຺ຈເຕ. ເອເກກສ຺ມິໍ ປຈ຺ຈຍຸປ຺ປນ຺ເນ ພຫຸນ຺ນໍ ປຈ຺ຈຍານໍ ສໂມຘານໍ ປຈ຺ຈຍຆຏນາ ນາມ. ເຍນ ປນ ຘມ຺ມາ ສປ຺ປຈ຺ຈຍາ ສງ຺ຂຕາ ປຏິຈ຺ຈສມຸປ຺ປນ຺ນາຕິ ວຸຈ຺ຈນ຺ຕິ, ສພ຺ເພ ເຕ ຘມ຺ມາ ອຸປ຺ປາເທ ຈ ຐິຕິຍຎ຺ຈ ອິເມຫິ ຈຕຸວີສຕິຍາ ປຈ຺ຈເຍຫິ ສຫິຕຕ຺ຕາ ສປ຺ປຈ຺ຈຍາ ນາມ, ສປ຺ປຈ຺ຈຍຕ຺ຕາ ສງ຺ຂຕາ ນາມ, ສງ຺ຂຕຕ຺ຕາ ປຏິຈ຺ຈສມຸປ຺ປນ຺ນາ ນາມ. ກຕເມ ປນ ເຕ ຘມ຺ມາຕິ. ເອກວີສສຕຈິຕ຺ຕານິ ຈ ທ຺ວິປຎ຺ຎາສເຈຕສິການິ ຈ ອຏ຺ຐວີສຕິ ຣູປານິ ຈ.

ຕຕ຺ຖ ເອກວີສສຕຈິຕ຺ຕານິ ຘາຕຸວເສນ ສຕ຺ຕວິຘານິ ຠວນ຺ຕິ, ຈກ຺ຂຸ ວິຎ຺ຎາຓຘາຕຸ ໂສຕວິຎ຺ຎາຓຘາຕຸ ຆານວິຎ຺ຎາຓຘາຕຸ ຊິວ຺ຫາ ວິຎ຺ຎາຓຘາຕຸ ກາຍວິຎ຺ຎາຓຘາຕຸ ມໂນຘາຕຸ ມໂນວິຎ຺ຎາຓ ຘາຕູຕິ. ຕຕ຺ຖ ຈກ຺ຂຸວິຎ຺ຎາຓທ຺ວຍໍ ຈກ຺ຂຸວິຎ຺ຎາຓຘາຕຸ ນາມ. ໂສຕວິຎ຺ຎາຓທ຺ວຍໍ ໂສຕວິຎ຺ຎາຓຘາຕຸ ນາມ. ຆານວິຎ຺ຎາຓທ຺ວຍໍ ຆານວິຎ຺ຎາຓຘາຕຸ ນາມ. ຊິວ຺ຫາວິຎ຺ຎາຓທ຺ວຍໍ ຊິວ຺ຫາວິຎ຺ຎາຓຘາຕຸ ນາມ. ກາຍວິຎ຺ຎາຓທ຺ວຍໍ ກາຍວິຎ຺ຎາຓຘາຕຸ ¶ ນາມ. ປຎ຺ຈທ຺ວາຣາວຊ຺ຊນ ຈິຕ຺ຕຎ຺ຈ ສມ຺ປຏິຈ຺ຉນຈິຕ຺ຕທ຺ວຍຎ຺ຈ ມໂນຘາຕຸ ນາມ. ເສສານິ ອຏ຺ຐສຕໍ ຈິຕ຺ຕານິ ມໂນວິຎ຺ຎາຓຘາຕຸ ນາມ.

ທ຺ວິປຎ຺ຎາສເຈຕສິການິ ຈ ຣາສິວເສນ ຈຕຸພ຺ພິຘານິ ຠວນ຺ຕິ, ສຕ຺ຕ ສພ຺ພຈິຕ຺ຕິການິ ຈ ຉ ປກິຓ຺ຓການິ ຈ ຈຸທ຺ທສ ປາປານິຈ ປຎ຺ຈວີສຕິ ກລ຺ຍາຓານິ ຈ.

ຈຕຸວີສຕິປຈ຺ຈເຍສຸ ຈ ປນ຺ນຣສປຈ຺ຈຍາ ສພ຺ພຈິຕ຺ຕຸປ຺ປາທ ສາຘາຣຓາ ໂຫນ຺ຕິ, ອາຣມ຺ມຓຎ຺ຈ ອນນ຺ຕຣຎ຺ຈ ສມນນ຺ຕຣຎ຺ຈ ສຫ ຊາໂຕ ຈ ອຎ຺ຎມຎ຺ຎຎ຺ຈ ນິສ຺ສໂຍ ຈ ອຸປນິສ຺ສໂຍ ຈ ກມ຺ມຎ຺ຈ ອາຫາໂຣ ຈ ອິນ຺ທ຺ຣິຍຎ຺ຈ ສມ຺ປຍຸຕ຺ໂຕ ຈ ອຕ຺ຖິ ຈ ນຕ຺ຖິ ຈ ວິຄໂຕ ຈ ອວິຄໂຕ ຈ. ນ ຫິ ກິຎ຺ຈິ ຈິຕ຺ຕໍ ວາ ເຈຕສິກໍ ວາ ອາຣມ຺ມເຓນ ວິນາ ອຸປ຺ປນ຺ນໍ ນາມ ອຕ຺ຖິ. ຕຖາ ອນນ຺ຕຣາທີຫິ ຈ. ອຏ຺ຐປຈ຺ຈຍາ ເກສຎ຺ຈິ ຈິຕ຺ຕຸປ຺ປາທານໍ ປຈ຺ຈຍາ ສາຘາຣຓາ ໂຫນ຺ຕິ, ເຫຕຸ ຈ ອຘິປຕິ ຈ ປຸເຣ ຊາໂຕ ຈ ອາເສວນຎ຺ຈ ວິປາໂກ ຈ ຌານຎ຺ຈ ມຄ຺ໂຄ ຈ ວິປ຺ປຍຸຕ຺ໂຕ ຈ. ຕຕ຺ຖ ເຫຕຸ ສເຫຕຸກຈິຕ຺ຕຸປ຺ປາທານໍ ເອວ ສາຘາຣຓາ, ອຘິປຕິ ຈ ສາຘິປຕິຊວນານໍ ເອວ, ປຸເຣຊາໂຕ ຈ ເກສຎ຺ຈິ ຈິຕ຺ຕຸປ຺ປາທານໍ ເອວ, ອາເສວນຎ຺ຈ ກຸສລາກຸສລກິຣິຍຊວນານໍ ເອວ, ວິປາໂກ ຈ ວິປາກຈິຕ຺ຕຸປ຺ປາທານໍ ເອວ, ຌານຎ຺ຈ ມໂນຘາຕຸ ມໂນວິຎ຺ຎາຓຘາຕຸ ຈິຕ຺ຕຸປ຺ປາທານໍ ເອວ, ມຄ຺ໂຄ ຈ ສເຫຕຸກຈິຕ຺ຕຸປ຺ປາທານໍ ເອວ, ວິປ຺ປຍຸຕ຺ໂຕ ຈ ອຣູປໂລເກ ຈິຕ຺ຕຸປ຺ປາທານໍ ນຕ຺ຖິ, ເອໂກ ປຈ຺ຉາຊາໂຕ ຣູປຘມ຺ມານໍ ເອວ ວິສຸໍຠູໂຕ ໂຫຕິ.

ຕຕ຺ຣາຍໍ ທີປນາ. ສຕ຺ຕ ສພ຺ພຈິຕ຺ຕິການິ ເຈຕສິການິ ນາມ, ຜສ຺ໂສ ເວທນາ ສຎ຺ຎາ ເຈຕນາ ເອກຄ຺ຄຕາ ຊີວິຕໍ ມນສິກາໂຣ. ຕຕ຺ຖ ຈິຕ຺ຕໍ ອຘິປຕິຊາຕິກຎ຺ຈ ອາຫາຣປຈ຺ຈໂຍ ຈ ອິນ຺ທ຺ຣິຍປຈ຺ຈໂຍ ຈ. ຜສ຺ໂສ ອາຫາຣປຈ຺ຈໂຍ. ເວທນາ ອິນ຺ທ຺ຣິຍປຈ຺ຈໂຍ ຈ ຌານ ປຈ຺ຈໂຍ ຈ. ເຈຕນາ ກມ຺ມປຈ຺ຈໂຍ ຈ ອາຫາຣປຈ຺ຈໂຍ ຈ. ເອກຄ຺ຄຕາ ອິນ຺ທ຺ຣິຍປຈ຺ຈໂຍ ຈ ຌານ ປຈ຺ຈໂຍ ຈ ມຄ຺ຄປຈ຺ຈໂຍ ຈ. ຊີວິຕໍ ອິນ຺ທ຺ຣິຍປຈ຺ຈໂຍ. ເສສາ ທ຺ເວ ຘມ຺ມາ ວິເສສປຈ຺ຈຍາ ນ ໂຫນ຺ຕິ.

ຈກ຺ຂຸວິຎ຺ຎາເຓ ສຕ຺ຕ ສພ຺ພຈິຕ຺ຕິການິ ເຈຕສິການິ ລພ຺ຠນ຺ຕິ, ວິຎ຺ຎາເຓນ ສທ຺ຘິໍ ອຏ຺ຐ ນາມຘມ຺ມາ ໂຫນ຺ຕິ. ສພ຺ເພ ເຕ ຘມ຺ມາ ສຕ຺ຕຫິ ປຈ຺ຈເຍຫິ ອຎ຺ຎມຎ຺ຎສ຺ສ ປຈ຺ຈຍາ ໂຫນ຺ຕິ ຈຕູຫິ ມຫາສຫຊາເຕຫິ ຈ ວິປ຺ປຍຸຕ຺ຕວຊ຺ຊິເຕຫິ ຕີຫິ ມຊ຺ຌິມສຫຊາເຕຫິ ຈ. ເຕສ຺ເວວ ອຏ຺ຐສຸ ຘມ຺ເມສຸ ວິຎ຺ຎາຓໍ ເສສານໍ ສຕ຺ຕນ຺ນໍ ຘມ຺ມານໍ ອາຫາຣປຈ຺ຈເຍນ ຈ ອິນ຺ທ຺ຣິຍປຈ຺ຈເຍນ ຈ ປຈ຺ຈໂຍ ໂຫຕິ. ຜສ຺ໂສ ອາຫາຣປຈ຺ຈເຍນ, ເວທນາ ອິນ຺ທ຺ຣິຍປຈ຺ຈຍມຕ຺ເຕນ, ເຈຕນາ ກມ຺ມປຈ຺ຈເຍນ ຈ ອາຫາຣ ປຈ຺ຈເຍນ ຈ, ເອກຄ຺ຄຕາ ອິນ຺ທ຺ຣິຍປຈ຺ຈຍມຕ຺ເຕນ ¶ , ຊີວິຕໍ ເສສານໍ ສຕ຺ຕນ຺ນໍ ຘມ຺ມານໍ ອິນ຺ທ຺ຣິຍປຈ຺ຈເຍນ ປຈ຺ຈໂຍ ໂຫຕິ. ຈກ຺ຂຸວຕ຺ຖຸຣູປໍ ປນ ເຕສໍ ອຏ຺ຐນ຺ນໍ ຘມ຺ມານໍ ຉຫິ ວຕ຺ຖຸປຸເຣຊາເຕຫິ ຕສ຺ມິໍ ຈກ຺ຂຸວຕ຺ຖຸມ຺ຫິ ອາປາຕມາຄຕານິ ປຈ຺ຈຸປ຺ປນ຺ນານິ ຣູປາຣມ຺ມຓານິ ເຕສໍ ຈຕູຫິ ອາຣມ຺ມຓ ປຸເຣຊາເຕຫິ, ອນນ຺ຕຣນິຣຸທ຺ຘໍ ປຎ຺ຈທ຺ວາຣາວຊ຺ຊນຈິຕ຺ຕຎ຺ຈ ປຎ຺ຈຫິ ອນນ຺ຕເຣຫິ, ປຸພ຺ເພ ກຕໍ ກຸສລກມ຺ມໍ ວາ ອກຸສລກມ຺ມໍ ວາ ກຸສລວິປາການໍ ວາ ອກຸສລວິປາການໍ ວາ ເຕສໍ ນານາກ຺ຂຓິກກມ຺ມປຈ຺ຈເຍນ, ກມ຺ມ ສຫາຍຠູຕານິ ປຸຣິມຠເວ ອວິຊ຺ຊາຕຓ຺ຫູປາທານານິ ຈ ອິມສ຺ມິໍ ຠເວ ອາວາສປຸຄ຺ຄລອຸຕຸໂຠຊນາທໂຍ ຈ ເຕສໍ ອຏ຺ຐນ຺ນໍ ຘມ຺ມານໍ ປກຕູປນິສ຺ສຍປຈ຺ຈເຍນ ປຈ຺ຈຍາ ໂຫນ຺ຕິ. ອິມສ຺ມິໍ ຈິຕ຺ເຕ ເຫຕຸ ຈ ອຘິປຕິ ຈ ປຈ຺ຉາຊາໂຕ ຈ ອາເສວນຎ຺ຈ ຌານຎ຺ຈ ມຄ຺ໂຄຈາຕິ ຉປຈ຺ຈຍາ ນ ລພ຺ຠນ຺ຕິ, ອຏ຺ຐາຣສປຈ຺ຈຍາ ລພ຺ຠນ຺ຕິ. ຍຖາ ຈ ອິມສ຺ມິໍ ຈິຕ຺ເຕ, ຕຖາ ໂສຕວິຎ຺ຎາຓາທີສຸປິ ຉ ປຈ຺ຈຍາ ນ ລພ຺ຠນ຺ຕິ, ອຏ຺ຐາຣສປຈ຺ຈຍາ ລພ຺ຠນ຺ຕີຕິ.

ປຎ຺ຈວິຎ຺ຎາເຓສຸ ປຈ຺ຈຍຆຏນານໂຍ ນິຏ຺ຐິໂຕ.

ອເຫຕຸກ ຈິຕ຺ຕຸປ຺ປາເທສຸ ປຈ຺ຈຍຆຏນານໂຍ

ຉ ປກິຓ຺ຓການິ ເຈຕສິການິ ນາມ, ວິຕກ຺ໂກ ວິຈາໂຣ ອຘິໂມກ຺ໂຂ ວີຣິຍໍ ປີຕິ ຉນ຺ໂທ. ຕຕ຺ຖ ວິຕກ຺ໂກ ຌານປຈ຺ຈໂຍ ຈ ມຄ຺ຄປຈ຺ຈໂຍ ຈ. ວິຈາໂຣ ຌານປຈ຺ຈໂຍ. ວີຣິຍໍ ອຘິປຕິຊາຕິກຎ຺ຈ ອິນ຺ທ຺ຣິຍປຈ຺ຈໂຍ ຈ ມຄ຺ຄປຈ຺ຈໂຍ ຈ. ປີຕິ ຌານປຈ຺ຈໂຍ. ຉນ຺ໂທ ອຘິປຕິຊາຕິໂກ. ອຘິໂມກ຺ໂຂ ປນ ວິເສສປຈ຺ຈໂຍ ນ ໂຫຕິ.

ປຎ຺ຈທ຺ວາຣາວຊ຺ຊນຈິຕ຺ຕຎ຺ຈ ສມ຺ປຏິຈ຺ຉນຈິຕ຺ຕທ຺ວຍຎ຺ຈ ອຸເປກ຺ຂາສນ຺ຕີຣຓ ທ຺ວຍຎ຺ຈາຕິ ປຎ຺ຈສຸ ຈິຕ຺ເຕສຸ ທສ ເຈຕສິການິ ລພ຺ຠນ຺ຕິ, ສຕ຺ຕ ສພ຺ພ ຈິຕ຺ຕິການິ ຈ ປກິຓ຺ຓເກສຸ ວິຕກ຺ໂກ ຈ ວິຈາໂຣ ຈ ອຘິໂມກ຺ໂຂ ຈ. ວິຎ຺ຎາເຓນ ສທ຺ຘິໍ ປຈ຺ເຈກໍ ເອກາທສ ນາມຘມ຺ມາ ໂຫນ຺ຕິ. ອິເມສຸ ຈິຕ຺ເຕສຸ ຌານກິຈ຺ຈໍ ລພ຺ຠຕິ. ເວທນາ ຈ ເອກຄ຺ຄຕາ ຈ ວິຕກ຺ໂກ ຈ ວິຈາໂຣ ຈ ຌານປຈ຺ຈຍໍ ສາເຘນ຺ຕິ. ປຎ຺ຈທ຺ວາຣາວຊ຺ຊນຈິຕ຺ຕໍ ປນ ກິຣິຍຈິຕ຺ຕໍ ໂຫຕິ, ວິປາກປຈ຺ຈໂຍ ນຕ຺ຖິ. ນານາກ຺ຂຓິກກມ຺ມຎ຺ຈ ອຸປນິສ຺ສຍຏ຺ຐາເນ ຕິຏ຺ຐຕິ. ວິປາກປຈ຺ຈເຍນ ສທ຺ຘິໍ ຉ ປຈ຺ຈຍາ ນ ລພ຺ຠນ຺ຕິ. ຌານປຈ຺ຈເຍນ ສທ຺ຘິໍ ອຏ຺ຐາຣສປຈ຺ຈຍາ ລພ຺ຠນ຺ຕິ. ເສເສສຸ ຈຕູສຸ ວິປາກຈິຕ຺ເຕສຸ ປຎ຺ຈ ປຈ຺ຈຍາ ນ ລພ຺ຠນ຺ຕິ. ວິປາກປຈ຺ຈເຍນ ຈ ຌານປຈ຺ຈເຍນ ຈ ສທ຺ຘິໍ ເອກູນວີສຕິ ປຈ຺ຈຍາ ລພ຺ຠນ຺ຕິ.

ໂສມນສ຺ສສນ຺ຕີຣເຓ ປີຕິຍາ ສທ຺ຘິໍ ເອກາທສເຈຕສິກາ ຍຸຊ຺ຊນ຺ຕິ, ມໂນທ຺ວາຣາວຊ຺ຊນຈິຕ຺ເຕ ຈ ວີຣິເຍນ ສທ຺ຘິໍ ເອກາທສາຕິ ວິຎ຺ຎາເຓນ ສທ຺ຘິໍ ທ຺ວາທສ ¶ ນາມຘມ຺ມາ ໂຫນ຺ຕິ. ຫສິຕຸປ຺ປາທຈິຕ຺ເຕ ປນ ປີຕິຍາ ຈ ວີຣິເຍນ ຈ ສທ຺ຘິໍ ທ຺ວາທສ ເຈຕສິການິ ຍຸຊ຺ຊນ຺ຕິ. ວິຎ຺ຎາເຓນ ສທ຺ຘິໍ ເຕຣສ ນາມຘມ຺ມາ ໂຫນ຺ຕິ. ຕຕ຺ຖ ໂສມນສ຺ສສນ຺ຕີຣເຓ ຌານງ຺ເຄສຸ ປີຕິມຕ຺ຕໍ ອຘິກໍ ໂຫຕິ, ປຸພ຺ເພ ອຸເປກ຺ຂາສນ຺ຕີຣຓທ຺ວເຍ ວິຍ ປຎ຺ຈປຈ຺ຈຍາ ນ ລພ຺ຠນ຺ຕິ. ເອກູນວີສຕິປຈ຺ຈຍາ ລພ຺ຠນ຺ຕິ. ມໂນທ຺ວາຣາ ວຊ຺ຊນຈິຕ຺ເຕ ຈ ວີຣິຍມຕ຺ຕໍ ອຘິກໍ ໂຫຕິ, ຕຎ຺ຈ ອິນ຺ທ຺ຣິຍກິຈ຺ຈ ຌານ ກິຈ຺ຈານິສາເຘຕິ. ອຘິປຕິກິຈ຺ຈຎ຺ຈ ມຄ຺ຄກິຈ຺ຈຎ຺ຈ ນ ສາເຘຕິ. ກິຣິຍ ຈິຕ຺ຕຕ຺ຕາວິປາກປຈ຺ຈໂຍ ຈ ນຕ຺ຖິ. ປຸພ຺ເພ ປຎ຺ຈທ຺ວາຣາວຊ຺ຊນຈິຕ຺ເຕ ວິຍ ວິປາກ ປຈ຺ຈເຍນ ສທ຺ຘິໍ ຉ ປຈ຺ຈຍາ ນ ລພ຺ຠນ຺ຕິ. ຌານປຈ຺ຈເຍນ ສທ຺ຘິໍ ອຏ຺ຐຣສ ປຈ຺ຈຍາ ລພ຺ຠນ຺ຕິ. ຫສິຕຸປ຺ປາທຈິຕ຺ເຕປິ ກິຣິຍຈິຕ຺ຕຕ຺ຕາ ວິປາກປຈ຺ຈໂຍ ນຕ຺ຖິ, ຊວນຈິຕ຺ຕຕ຺ຕາ ປນ ອາເສວນໍ ອຕ຺ຖິ, ວິປາກປຈ຺ຈເຍນ ສທ຺ຘິໍ ປຎ຺ຈ ປຈ຺ຈຍາ ນ ລພ຺ຠນ຺ຕິ. ອາເສວນປຈ຺ຈເຍນ ສທ຺ຘິໍ ເອກູນວີສຕິ ປຈ຺ຈຍາ ລພ຺ຠນ຺ຕິ.

ອເຫຕຸກຈິຕ຺ຕຸປ຺ປາເທສຸ ປຈ຺ຈຍຆຏນານໂຍ ນິຏ຺ຐິໂຕ.

ອກຸສລຈິຕ຺ຕຸປ຺ປາເທສຸ ປຈ຺ຈຍຆຏນານໂຍ

ທ຺ວາທສ ອກຸສລຈິຕ຺ຕານິ, ທ຺ເວ ໂມຫມູລິການິ ອຏ຺ຐ ໂລຠ ມູລິການິ ທ຺ເວ ໂທສມູລິການິ. ຈຸທ຺ທສ ປາປເຈຕສິການິ ນາມ ໂມໂຫ ອຫິຣິກໍ ອໂນຕ຺ຕປ຺ປໍ ອຸທ຺ຘຈ຺ຈນ຺ຕິ ອິທໍ ໂມຫຈຕຸກ຺ກໍ ນາມ. ໂລໂຠ ທິຏ຺ຐິ ມາໂນຕິ ອິທໍ ໂລຠຕິກ຺ກໍ ນາມ. ໂທໂສ ອິສ຺ສາ ມຈ຺ຉຣິຍໍ ກຸກ຺ກຸຈ຺ຈນ຺ຕິ ອິທໍ ໂທສຈຕຸກ຺ກໍ ນາມ. ຖິນໍ ມິທ຺ຘໍ ວິຈິກິຈ຺ຉາຕິ ອິທໍ ວິສຸໍ ຕິກ຺ກໍ ນາມ.

ຕຕ຺ຖ ໂລໂຠ ໂທໂສ ໂມໂຫຕິ ຕໂຍ ມູລຘມ຺ມາ ເຫຕຸປຈ຺ຈຍາ, ທິຏ຺ຐິ ມຄ຺ຄປຈ຺ຈໂຍ, ເສສາ ທສຘມ຺ມາ ວິເສສປຈ຺ຈຍາ ນ ໂຫນ຺ຕິ.

ຕຕ຺ຖ ທ຺ເວ ໂມຫມູລິການິ ນາມ ວິຈິກິຈ຺ຉາສມ຺ປຍຸຕ຺ຕຈິຕ຺ຕໍ ອຸທ຺ຘຈ຺ຈ ສມ຺ປຍຸຕ຺ຕຈິຕ຺ຕໍ. ຕຕ຺ຖ ວິຈິກິຈ຺ຉາສມ຺ປຍຸຕ຺ຕຈິຕ຺ເຕ ປນ຺ນຣສ ເຈຕສິການິ ອຸປ຺ປຊ຺ຊນ຺ຕິ ສຕ຺ຕ ສພ຺ພຈິຕ຺ຕິການິ ຈ ວິຕກ຺ໂກ ວິຈາໂຣ ວີຣິຍນ຺ຕິ ຕີຓິ ປກິຓ຺ຓການິ ຈ ປາປເຈຕສິເກສຸ ໂມຫຈຕຸກ຺ກຎ຺ຈ ວິຈິກິຈ຺ຉາ ຈາຕິ, ຈິຕ຺ເຕນ ສທ຺ຘິໍ ໂສຬສ ນາມຘມ຺ມາ ໂຫນ຺ຕິ. ອິມສ຺ມິໍ ຈິຕ຺ເຕ ເຫຕຸ ປຈ຺ຈໂຍປິ ມຄ຺ຄປຈ຺ຈໂຍປິ ລພ຺ຠນ຺ຕິ. ຕຕ຺ຖ ໂມໂຫ ເຫຕຸປຈ຺ຈໂຍ, ວິຕກ຺ໂກ ຈ ວີຣິຍຎ຺ຈ ມຄ຺ຄປຈ຺ຈໂຍ, ເອກຄ຺ຄຕາ ປນ ວິຈິກິຈ຺ຉາຍ ທຸຏ຺ຐຕ຺ຕາ ອິມສ຺ມິໍ ຈິຕ຺ເຕ ອິນ຺ທ຺ຣິຍກິຈ຺ຈຎ຺ຈ ມຄ຺ຄກິຈ຺ຈຎ຺ຈ ນ ສາເຘຕິ, ຌານກິຈ຺ຈມຕ຺ຕໍ ສາເຘຕິ. ອຘິປຕິ ຈ ປຈ຺ຉາຊາໂຕ ວິປາໂກ ຈາຕິ ຕໂຍ ປຈ຺ຈຍານ ລພ຺ຠນ຺ຕິ, ເສສາ ເອກວີສຕິປຈ຺ຈຍາ ລພ຺ຠນ຺ຕິ. ອຸທ຺ຘຈ຺ຈສມ຺ປຍຸຕ຺ຕຈິຕ຺ເຕປິ ວິຈິກິຈ຺ຉໍ ປຫາຍ ອຘິໂມກ຺ເຂນ ສທ຺ຘິໍ ປນ຺ນຣເສວ ເຈຕສິການິ, ໂສຬເສວ ນາມຘມ຺ມາ ໂຫນ຺ຕິ ¶ . ອິມສ຺ມິໍ ຈິຕ຺ເຕ ເອກຄ຺ຄຕາ ອິນ຺ທ຺ຣິຍ ກິຈ຺ຈຎ຺ຈ ຌານກິຈ຺ຈຎ຺ຈ ມຄ຺ຄກິຈ຺ຈຎ຺ຈ ສາເຘຕິ, ຕໂຍ ປຈ຺ຈຍາ ນ ລພ຺ຠນ຺ຕິ, ເອກວີສຕິ ປຈ຺ຈຍາ ລພ຺ຠນ຺ຕິ.

ອຏ຺ຐສຸ ໂລຠມູລິກຈິຕ຺ເຕສຸ ປນ ສຕ຺ຕ ສພ຺ພຈິຕ຺ຕິການິ ຈ ຉ ປກິຓ຺ຓການິ ຈ ປາເປສຸ ໂມຫຈຕຸກ຺ກຎ຺ຈ ໂລຠຕິກ຺ກຎ຺ຈ ຖິນມິທ຺ຘຎ຺ຈາຕິ ທ຺ວາວີສຕິ ເຈຕສິການິ ອຸປ຺ປຊ຺ຊນ຺ຕິ. ເຕສຸ ໂລໂຠ ຈ ໂມໂຫຈາຕິ ທ຺ເວ ມູລານິ ເຫຕຸປຈ຺ຈໂຍ. ຉນ຺ໂທ ຈ ຈິຕ຺ຕຎ຺ຈ ວີຣິຍຎ຺ຈາຕິ ຕໂຍ ອຘິປຕິຊາຕິກາ ກທາຈິ ອຘິປຕິກິຈ຺ຈໍ ສາເຘນ຺ຕິ, ອາຣມ຺ມຓາຘິປຕິປິ ເອຕ຺ຖ ລພ຺ຠຕິ. ເຈຕນາ ກມ຺ມປຈ຺ຈໂຍ. ຕໂຍ ອາຫາຣາ ອາຫາຣປຈ຺ຈໂຍ. ຈິຕ຺ຕຎ຺ຈ ເວທນາ ຈ ເອກຄ຺ຄຕາ ຈ ຊີວິຕຎ຺ຈ ວີຣິຍຎ຺ຈາຕິ ປຎ຺ຈ ອິນ຺ທ຺ຣິຍຘມ຺ມາ ອິນ຺ທ຺ຣິຍປຈ຺ຈໂຍ. ວິຕກ຺ໂກ ຈ ວິຈາໂຣ ຈ ປີຕິ ຈ ເວທນາ ຈ ເອກຄ຺ຄຕາຈາຕິ ປຎ຺ຈ ຌານງ຺ຄານິ ຌານປຈ຺ຈໂຍ. ວິຕກ຺ໂກ ຈ ເອກຄ຺ຄຕາ ຈ ທິຏ຺ຐິ ຈ ວີຣິຍຎ຺ຈາຕິ ຈຕ຺ຕາຣິ ມຄ຺ຄງ຺ຄານິ ມຄ຺ຄປຈ຺ຈໂຍ. ປຈ຺ຉາຊາໂຕ ຈ ວິປາໂກ ຈາຕິ ທ຺ເວ ປຈ຺ຈຍາ ນ ລພ຺ຠນ຺ຕິ. ເສສາ ທ຺ວາວີສຕິ ປຈ຺ຈຍາ ລພ຺ຠນ຺ຕິ.

ທ຺ວີສຸ ໂທສມູລິກຈິຕ຺ເຕສຸ ປີຕິຎ຺ຈ ໂລຠຕິກ຺ກຎ຺ຈ ປຫາຍ ໂທສຈຕຸກ຺ເກນ ສທ຺ຘິໍ ທ຺ວາວີສຕິ ເອວ ເຈຕສິການິ, ໂທໂສ ຈ ໂມໂຫ ຈ ທ຺ເວ ມູລານິ, ຕໂຍ ອຘິປຕິ ຊາຕິກາ, ຕໂຍ ອາຫາຣາ, ປຎ຺ຈ ອິນ຺ທ຺ຣິຍານິ, ຈຕ຺ຕາຣິ ຌານງ຺ຄານິ, ຕີຓິ ມຄ຺ຄງ຺ຄານິ. ເອຕ຺ຖາປິ ທ຺ເວ ປຈ຺ຈຍາ ນ ລພ຺ຠນ຺ຕິ, ທ຺ວາວີສຕິ ປຈ຺ຈຍາ ລພ຺ຠນ຺ຕິ.

ອກຸສລຈິຕ຺ຕຸປ຺ປາເທສຸ ປຈ຺ຈຍຆຏນານໂຍ ນິຏ຺ຐິໂຕ.

ເອກນວຸຕິ ໂສຠຓຈິຕ຺ຕານິ ນາມ, ຈຕຸວີສຕິ ກາມ ໂສຠຓຈິຕ຺ຕານິ ປນ຺ນຣສ ຣູປຈິຕ຺ຕານິ ທ຺ວາທສ ອຣູປຈິຕ຺ຕານິ ຈຕ຺ຕາລີສ ໂລກຸຕ຺ຕຣຈິຕ຺ຕານິ. ຕຕ຺ຖ ຈຕຸວີສຕິ ກາມໂສຠຓ ຈິຕ຺ຕານິ ນາມ ອຏ຺ຐ ກາມກຸສລຈິຕ຺ຕານິ ອຏ຺ຐ ກາມໂສຠຓວິປາກ ຈິຕ຺ຕານິ ອຏ຺ຐ ກາມໂສຠຓກິຣິຍຈິຕ຺ຕານິ.

ປຎ຺ຈ ວີສຕິ ກລ຺ຍາຓເຈຕສິການິ ນາມ, ອໂລໂຠ ອໂທໂສ ອໂມໂຫເຈຕິ ຕີຓິ ກລ຺ຍາຓມູລິການິ ຈ ສທ຺ຘາ ຈ ສຕິ ຈ ຫິຣີ ຈ ໂອຕ຺ຕປ຺ປຎ຺ຈ ຕຕ຺ຣມຊ຺ຌຕ຺ຕຕາ ຈ ກາຍປສ຺ສທ຺ຘິ ຈ ຈິຕ຺ຕ ປສ຺ສທ຺ຘິ ຈ ກາຍລຫຸຕາ ຈ ຈິຕ຺ຕລຫຸຕາ ຈ ກາຍມຸທຸຕາ ຈ ຈິຕ຺ຕ ມຸທຸຕາ ຈ ກາຍກມ຺ມຎ຺ຎຕາ ຈ ຈິຕ຺ຕ ກມ຺ມຎ຺ຎຕາ ຈ ກາຍປາຄຸຎ຺ຎຕາ ຈ ຈິຕ຺ຕປາຄຸຎ຺ຎຕາ ຈ ກາຍຸຊຸກຕາ ຈ ຈິຕ຺ຕຸຊຸກຕາ ¶ ຈ ສມ຺ມາວາຈາ ສມ຺ມາກມ຺ມນ຺ໂຕ ສມ຺ມາອາຊີໂວຕິ ຕິສ຺ໂສ ວິຣຕິໂຍ ຈ ກຣຸຓາ ມຸທິຕາຕິ ທ຺ເວ ອປ຺ປມຎ຺ຎາໂຍ ຈ.

ຕຕ຺ຖ ຕີຓິ ກລ຺ຍາຓມູລານິ ເຫຕຸປຈ຺ຈໂຍ, ອໂມໂຫ ປນ ອຘິປຕິປຈ຺ຈເຍ ວີມໍສາຘິປຕິນາມ, ອິນ຺ທ຺ຣິຍປຈ຺ຈເຍ ປຎ຺ຎິນ຺ທ຺ຣິຍໍ ນາມ, ມຄ຺ຄປຈ຺ຈເຍ ສມ຺ມາທິຏ຺ຐິ ນາມ. ສທ຺ຘາ ອິນ຺ທ຺ຣິຍປຈ຺ຈເຍ ສທ຺ຘິນ຺ທ຺ຣິຍໍ ນາມ. ສຕິ ອິນ຺ທ຺ຣິຍປຈ຺ຈເຍ ສຕິນ຺ທ຺ຣິຍໍ ນາມ, ມຄ຺ຄປຈ຺ຈເຍ ສມ຺ມາສຕິ ນາມ. ຕິສ຺ໂສ ວິຣຕິໂຍ ມຄ຺ຄປຈ຺ຈໂຍ, ເສສາ ສຕ຺ຕຣສ ຘມ຺ມາ ວິເສສປຈ຺ຈຍາ ນ ໂຫນ຺ຕິ.

ອຏ຺ຐສຸ ກາມກຸສລຈິຕ຺ເຕສຸ ອຏ຺ຐຕິໍສ ເຈຕສິການິ ສງ຺ຄຍ຺ຫນ຺ຕິ, ສຕ຺ຕ ສພ຺ພຈິຕ຺ຕິການິ ຉ ປກິຓ຺ຓການິ ປຎ຺ຈວີສຕິ ກລ຺ຍາຓານິ. ເຕສຸ ຈ ປີຕິ ຈຕູສຸ ໂສມນສ຺ສິເກສຸ ເອວ, ອໂມໂຫ ຈຕູສຸ ຎາຓສມ຺ປຍຸຕ຺ເຕສຸ ເອວ, ຕິສ຺ໂສ ວິຣຕິໂຍ ສິກ຺ຂາປທສີລປູຣຓ ກາເລ ເອວ, ທ຺ເວ ອປ຺ປມຎ຺ຎາໂຍ ສຕ຺ເຕສຸ ກາຣຸຎ຺ຎໂມທນາກາເຣສຸ ເອວາຕິ. ອິເມສຸປິ ອຏ຺ຐສຸ ຈິຕ຺ເຕສຸ ທ຺ເວ ວາ ຕີຓິ ວາ ກລ຺ຍາຓມູລານິ ເຫຕຸປຈ຺ຈໂຍ, ຉນ຺ໂທ ຈ ຈິຕ຺ຕຎ຺ຈ ວີຣິຍຎ຺ຈ ວີມໍສາຈາຕິ ຈຕູສຸ ອຘິປຕິຊາຕິເກສຸ ເອກເມໂກວ ກທາຈິ ອຘິປຕິປຈ຺ຈໂຍ. ເຈຕນາ ກມ຺ມປຈ຺ຈໂຍ. ຕໂຍ ອາຫາຣາ ອາຫາຣປຈ຺ຈໂຍ. ຈິຕ຺ຕຎ຺ຈ ເວທນາ ຈ ເອກຄ຺ຄຕາ ຈ ຊີວິຕຎ຺ຈ ສທ຺ຘາ ຈ ສຕິ ຈ ວີຣິຍຎ຺ຈ ປຎ຺ຎາຈາຕິ ອຏ຺ຐ ອິນ຺ທ຺ຣິຍານິ ອິນ຺ທ຺ຣິຍປຈ຺ຈໂຍ. ວິຕກ຺ໂກ ຈ ວິຈາໂຣ ຈ ປີຕິ ຈ ເວທນາ ຈ ເອກຄ຺ຄຕາຈາຕິ ປຎ຺ຈຌານງ຺ຄານິ ຌານປຈ຺ຈໂຍ. ປຎ຺ຎາ ຈ ວິຕກ຺ໂກ ຈ ຕິສ຺ໂສ ວິຣຕິໂຍ ຈ ສຕິ ຈ ວີຣິຍຎ຺ຈ ເອກຄ຺ຄຕາຈາຕິ ອຏ຺ຐ ມຄ຺ຄງ຺ຄານິ ມຄ຺ຄປຈ຺ຈໂຍ. ອິເມສຸປິ ອຏ຺ຐສຸ ຈິຕ຺ເຕສຸ ປຈ຺ຉາຊາໂຕ ຈ ວິປາໂກຈາຕິ ທ຺ເວ ປຈ຺ຈຍາ ນ ລພ຺ຠນ຺ຕິ, ເສສາ ທ຺ວາວີສຕິປຈ຺ຈຍາ ລພ຺ຠນ຺ຕິ.

ອຏ຺ຐສຸ ກາມໂສຠຓກິຣິຍຈິຕ຺ເຕສຸ ຕິສ຺ໂສ ວິຣຕິໂຍ ນ ລພ຺ຠນ຺ຕິ, ກຸສເລສຸ ວິຍ ທ຺ເວ ປຈ຺ຈຍາ ນ ລພ຺ຠນ຺ຕິ, ທ຺ວາວີສຕິ ປຈ຺ຈຍາ ລພ຺ຠນ຺ຕິ.

ອຏ຺ຐສຸ ກາມໂສຠຓວິປາເກສຸ ຕິສ຺ໂສ ວິຣຕິໂຍ ຈ ທ຺ເວ ອປ຺ປມຎ຺ຎາໂຍ ຈ ນ ລພ຺ຠນ຺ຕິ. ອຘິປຕິປຈ຺ຈໂຍ ຈ ປຈ຺ຉາຊາໂຕ ຈ ອາເສວນຎ຺ຈາຕິ ຕໂຍ ປຈ຺ຈຍາ ນ ລພ຺ຠນ຺ຕິ, ເອກວີສຕິ ປຈ຺ຈຍາ ລພ຺ຠນ຺ຕິ.

ອຸປຣິ ຣູປາຣູປໂລກຸຕ຺ຕຣຈິຕ຺ເຕສຸປິ ທ຺ວາວີສຕິປຈ຺ຈຍໂຕ ອຕິເຣກໍ ນຕ຺ຖິ. ຕສ຺ມາ ຈຕູສຸ ຎາຓສມ຺ປຍຸຕ຺ຕກາມກຸສລ ຈິຕ຺ເຕສຸ ວິຍ ອິເມສຸ ປຈ຺ຈຍຆຏນາ ເວທິຕພ຺ພາ.

ເອວໍ ສນ຺ເຕ ກສ຺ມາ ຕານິ ຈິຕ຺ຕານິ ກາມຈິຕ຺ຕໂຕ ມຫນ຺ຕ ຕຣານິ ຈ ປຓີຕຕຣານິ ຈ ໂຫນ຺ຕີຕິ. ອາເສວນມຫນ຺ຕຕ຺ຕາ. ຕານິ ຫິ ຈິຕ຺ຕານິ ຠາວນາກມ຺ມວິເສເສຫິ ¶ ສິທ຺ຘານິ ໂຫນ຺ຕິ, ຕສ຺ມາ ເຕສຸ ອາເສວນປຈ຺ຈໂຍ ມຫນ຺ໂຕ ໂຫຕິ. ອາເສວນ ມຫນ຺ຕຕ຺ຕາ ຈ ອິນ຺ທ຺ຣິຍປຈ຺ຈໂຍປິ ຌານປຈ຺ຈໂຍປິ ມຄ຺ຄປຈ຺ຈໂຍປິ ອຎ຺ເຎປິ ວາ ເຕສໍ ປຈ຺ຈຍາ ມຫນ຺ຕາ ໂຫນ຺ຕິ. ປຈ຺ຈຍານໍ ອຸປຣູປຣິ ມຫນ຺ຕຕ຺ຕາ ຕານິ ຈິຕ຺ຕານິ ອຸປຣູປຣິ ຈ ກາມຈິຕ຺ຕໂຕ ມຫນ຺ຕຕຣານິ ຈ ປຓີຕຕຣານິ ຈ ໂຫນ຺ຕີຕິ.

ຈິຕ຺ຕຸປ຺ປາເທສຸ ປຈ຺ຈຍຆຏນານໂຍ ນິຏ຺ຐິໂຕ.

ຣູປກລາເປສຸ ປຈ຺ຈຍຆຏນານໂຍ ວຸຈ຺ຈເຕ. ອຏ຺ຐວີສຕິ ຣູປານິ ນາມ, ຈຕ຺ຕາຣິ ມຫາຠູຕານິ ປຖວີ ອາໂປ ເຕໂຊ ວາໂຍ. ປຎ຺ຈ ປສາທຣູປານິ ຈກ຺ຂຸ ໂສຕໍ ຆານໍ ຊິວ຺ຫາ ກາໂຍ. ປຎ຺ຈ ໂຄຈຣຣູປານິ ຣູປໍ ສທ຺ໂທ ຄນ຺ໂຘ ຣໂສ ໂຜຏ຺ຐພ຺ພໍ. ຕຕ຺ຖ ໂຜຏ຺ຐພ຺ພໍ ຕິວິຘໍ ປຖວີໂຜຏ຺ຐພ຺ພໍ ເຕໂຊໂຜຏ຺ຐພ຺ພໍ ວາໂຍໂຜຏ຺ຐພ຺ພໍ. ທ຺ເວ ຠາວຣູປານິ ອິຕ຺ຖິຠາວຣູປໍ ປຸມ຺ຠາວຣູປໍ. ເອກໍ ຊີວິຕຣູປໍ, ເອກໍ ຫທຍຣູປໍ. ເອກໍ ອາຫາຣຣູປໍ. ເອກໍ ອາກາສຘາຕຸຣູປໍ. ທ຺ເວ ວິຎ຺ຎຕ຺ຕິຣູປານິ ກາຍວິຎ຺ຎຕ຺ຕິຣູປໍ ວຈີວິຎ຺ຎຕ຺ຕິ ຣູປໍ. ຕີຓິ ວິກາຣຣູປານິ ລຫຸຕາ ມຸທຸຕາ ກມ຺ມຎ຺ຎຕາ. ຈຕ຺ຕາຣິ ລກ຺ຂຓຣູປານິ ອຸປຈໂຍ ສນ຺ຕຕິ ຊຣຕາ ອນິຈ຺ຈຕາ.

ຕຕ຺ຖ ຉ ຣູປຘມ຺ມາ ຣູປຘມ຺ມານໍ ປຈ຺ຈຍາ ໂຫນ຺ຕິ ຈຕ຺ຕາຣິ ມຫາຠູຕານິ ຈ ຊີວິຕຣູປຎ຺ຈ ອາຫາຣຣູປຎ຺ຈ. ຕຕ຺ຖ ຈຕ຺ຕາຣິ ມຫາ ຠູຕານິ ອຎ຺ຎມຎ຺ຎສ຺ສ ປຎ຺ຈຫິ ປຈ຺ຈເຍຫິ ປຈ຺ຈຍາ ໂຫນ຺ຕິ ສຫຊາເຕນ ຈ ອຎ຺ຎມຎ຺ເຎນ ຈ ນິສ຺ສເຍນ ຈ ອຕ຺ຖິຍາ ຈ ອວິຄເຕນຈ. ສຫຊາຕານໍ ອຸປາທາຣູປານໍ ອຎ຺ຎມຎ຺ຎວຊ຺ຊິເຕຫິ ຈຕູຫິ ປຈ຺ຈເຍຫິ ປຈ຺ຈຍາ ໂຫນ຺ຕິ. ຊີວິຕຣູປໍ ສຫຊາຕານໍ ກມ຺ມຊຣູປານໍ ອິນ຺ທ຺ຣິຍປຈ຺ຈເຍນ ປຈ຺ຈໂຍ. ອາຫາຣຣູປໍ ສຫຊາຕານຎ຺ຈ ອສຫຊາຕານຎ຺ຈ ສພ຺ເພສໍ ອຊ຺ຌຕ຺ຕຣູປຘມ຺ມານໍ ອາຫາຣປຈ຺ຈເຍນ ປຈ຺ຈໂຍ.

ຕຕ຺ເຖວ ເຕຣສ ຣູປຘມ຺ມາ ນາມຘມ຺ມານໍ ວິເສສປຈ຺ຈຍາ ໂຫນ຺ຕິ, ປຎ຺ຈປສາທຣູປານິ ຈ ສຕ຺ຕ ໂຄຈຣຣູປານິ ຈ ຫທຍວຕ຺ຖຸຣູປຎ຺ຈ. ຕຕ຺ຖ ປຎ຺ຈ ປສາທຣູປານິ ປຎ຺ຈນ຺ນໍ ວິຎ຺ຎາຓຘາຕູນໍ ມາຕໂຣ ວິຍ ປຸຕ຺ຕການໍ ວຕ຺ຖຸປຸເຣຊາເຕນ ຈ ວຕ຺ຖຸປຸເຣຊາຕິນ຺ທ຺ຣິເຍນ ຈ ວຕ຺ຖຸ ປຸເຣຊາຕວິປ຺ປຍຸຕ຺ເຕນ ຈ ປຈ຺ຈຍາ ໂຫນ຺ຕິ. ສຕ຺ຕ ໂຄຈຣຣູປານິ ປຎ຺ຈນ຺ນໍ ວິຎ຺ຎາຓຘາຕູນໍ ຕິສ຺ສນ຺ນໍ ມໂນຘາຕູນຎ຺ຈ ປິຕໂຣ ວິຍ ປຸຕ຺ຕການໍ ອາຣມ຺ມຓປຸເຣຊາເຕນ ປຈ຺ຈຍາ ໂຫນ຺ຕິ. ຫທຍວຕ຺ຖຸຣູປໍ ທ຺ວິນ຺ນໍ ມໂນຘາຕຸ ມໂນວິຎ຺ຎາຓຘາຕູນໍ ຣຸກ຺ໂຂ ວິຍ ຣຸກ຺ຂເທວຕານໍ ຍຖາຣຫໍ ¶ ປຏິສນ຺ຘິກ຺ຂເຓ ສຫຊາຕນິສ຺ສເຍນ ປວຕ຺ຕິກາເລ ວຕ຺ຖຸປຸເຣຊາເຕນ ຈ ວຕ຺ຖຸປຸເຣຊາຕວິປ຺ປຍຸຕ຺ເຕນ ຈ ປຈ຺ຈໂຍ ໂຫຕິ.

ເຕວີສຕິ ຣູປກລາປາ. ຕຕ຺ຖ ເອກາຍ ຣຊ຺ຊຸຍາ ພນ຺ຘິຕານໍ ເກສານໍ ເກສກລາໂປ ວິຍ ຕິຓານໍ ຕິຓກລາໂປ ວິຍ ເອເກນ ຊາຕິຣູເປນ ພນ຺ຘິຕານໍ ຣູປຘມ຺ມານໍ ກລາໂປ ປຣິປິຓ຺ຑິຣູປ ກລາໂປ ນາມ.

ຕຕ຺ຖ ຈຕ຺ຕາຣິ ມຫາຠູຕານິ ວຓ຺ໂຓ ຄນ຺ໂຘ ຣໂສ ໂອຊາຕິ ອິເມ ອຏ຺ຐ ຘມ຺ມາ ເອໂກ ສພ຺ພມູລກລາໂປ ນາມ, ສພ຺ພມູລຏ຺ຐກນ຺ຕິ ຈ ວຸຈ຺ຈຕິ.

ນວ ກມ຺ມຊຣູປກລາປາ, – ຊີວິຕນວກໍ ວຕ຺ຖຸທສກໍ ກາຍ ທສກໍ ອິຕ຺ຖິຠາວທສກໍ ປຸມ຺ຠາວທສກໍ ຈກ຺ຂຸທສກໍ ໂສຕທສກໍ ຆານທສກໍ ຊິວ຺ຫາທສກໍ. ຕຕ຺ຖ ສພ຺ພມູລຏ຺ຐກເມວຊີວິຕຣູເປນ ສຫ ຊີວິຕນວກໍ ນາມ. ເອຕເທວ ກມ຺ມຊກລາເປສຸ ມູລນວກໍ ໂຫຕິ. ມູລນວກເມວ ຍຖາກ຺ກມໍ ຫທຍວຕ຺ຖຸຣູປາທີຫິ ອຏ຺ຐຣູເປຫິ ສຫ ວຕ຺ຖຸທສກາທີນິ ອຏ຺ຐທສການິ ຠວຕິ. ຕຕ຺ຖ ຊີວິຕນວກຎ຺ຈ ກາຍທສກຎ຺ຈ ຠາວທສການິຈາຕິ ຈຕ຺ຕາໂຣ ກລາປາ ສກລ ກາເຍ ປວຕ຺ຕນ຺ຕິ. ຕຕ຺ຖ ຊີວິຕນວກນ຺ຕິ ປາຈກຄ຺ຄິ ຈ ກາຍຄ຺ຄິ ຈ ວຸຈ຺ຈຕິ. ປາຈກຄ຺ຄິ ນາມ ປາຈກເຕໂຊ ໂກຏ຺ຐາໂສ, ໂສ ອາມາສເຍ ປວຕ຺ຕິຕ຺ວາ ອສິຕປີຕຂາຍິຕສາຍິຕານິ ປຣິປາເຈຕິ. ກາຍຄ຺ຄິ ນາມ ສກລກາຍພ຺ຍາປໂກ ອຸສ຺ມາເຕໂຊ ໂກຏ຺ຐາໂສ, ໂສ ສກລ ກາເຍ ປວຕ຺ຕິຕ຺ວາ ປິຕ຺ຕເສມ຺ຫໂລຫິຕານິ ອປູຕີນິ ວິປ຺ປສນ຺ນານິ ກໂຣຕິ. ເຕສໍ ທ຺ວິນ຺ນໍ ວິສມວຸຕ຺ຕິຍາ ສຕິ ສຕ຺ຕາ ພຫ຺ວາພາຘາ ໂຫນ຺ຕິ, ສມວຸຕ຺ຕິຍາ ສຕິ ອປ຺ປາພາຘາ. ຕທຸຠຍໍ ຊີວິຕນວກໍ ສຕ຺ຕານໍ ອາຍຸໍ ສມ຺ປາເທຕິ. ວຓ຺ຓໍ ສມ຺ປາເທຕິ. ກາຍທສກໍ ສກລກາເຍ ສຸຂສມ຺ຜສ຺ສ ທຸກ຺ຂສມ຺ຜສ຺ສານິ ສມ຺ປາເທຕິ. ຠາວ ທສການິ ອິຕ຺ຖີນໍ ສພ຺ເພ ອິຕ຺ຖາກາເຣ ສມ຺ປາເທຕິ. ປຸຣິສານໍ ສພ຺ເພ ປຸຣິສາກາເຣ ສມ຺ປາເທຫິ. ເສສານິ ວຕ຺ຖຸທສກາທີນິ ປຎ຺ຈທສການິ ປເທສທສການິ ນາມ. ຕຕ຺ຖ ວຕ຺ຖຸທສກໍ ຫທຍໂກສພ຺ຠນ຺ຕເຣ ປວຕ຺ຕິຕ຺ວາ ສຕ຺ຕານໍ ນານາປກາຣານິ ສຸຈິນ຺ຕິຕທຸຈິນ຺ຕິຕານິ ສມ຺ປາເທຕິ. ຈກ຺ຂຸທສກາທີນິ ຈຕ຺ຕາຣິ ທສການິ ຈກ຺ຂຸຄຸຬ ກຓ຺ຓພິລ ນາສພິລ ຊິວ຺ຫາຕເລສຸ ປວຕ຺ຕິຕ຺ວາ ທສ຺ສນ ສວນ ຆາຍນ ສາຍນານິ ສມ຺ປາເທຕິ.

ອຏ຺ຐ ຈິຕ຺ຕຊຣູປກລາປາ, ສພ຺ພມູລຏ຺ຐກໍ ສທ຺ທນວກໍ ກາຍ ວິຎ຺ຎຕ຺ຕິນວກໍ ສທ຺ທວຈີວິຎ຺ຎຕ຺ຕິທສກນ຺ຕິ ຈຕ຺ຕາໂຣ ມູລກລາປາ ຈ ເຕເຍວ ລຫຸຕາ ມຸທຸຕາ ກມ຺ມຎ຺ຎຕາສງ຺ຂາເຕຫິ ຕີຫິ ວິກາຣ ຣູເປຫິ ສຫ ຈຕ຺ຕາໂຣ ສວິກາຣກລາປາ ຈ.

ຕຕ຺ຖ ¶ ສຣີຣຘາຕູນໍ ວິສມປ຺ປວຕ຺ຕິກາເລ ຄິລານສ຺ສ ມູລ ກລາປານິ ເອວ ປວຕ຺ຕນ຺ຕິ. ຕທາ ຫິ ຕສ຺ສ ສຣີຣຣູປານິ ຄຣູນິ ວາ ຖທ຺ຘານິ ວາ ອກມ຺ມຎ຺ຎານິ ວາ ໂຫນ຺ຕິ, ຍຖາຣຸຈິ ອິຣິຍປຖໍປິ ປວຕ຺ເຕຕຸໍ ອງ຺ຄ ປຈ຺ຈງ຺ຄານິປິ ຈາເລຕຸໍ ວຈນໍປິ ກເຖຕຸໍ ທຸກ຺ໂຂ ໂຫຕິ. ສຣີຣຘາຕູນໍ ສມປ຺ປວຕ຺ຕິກາເລ ປນ ອຄິລານສ຺ສ ຄຣຸຖທ຺ຘາທີນໍ ສຣີຣໂທສານໍ ອຠາວໂຕ ສວິກາຣາ ປວຕ຺ຕນ຺ຕິ. ເຕສຸ ຈ ຈິຕ຺ຕງ຺ຄວເສນ ກາຍງ຺ຄ ຈລເນ ທ຺ເວ ກາຍວິຎ຺ຎຕ຺ຕິກລາປາ ປວຕ຺ຕນ຺ຕິ. ຈິຕ຺ຕວເສເນວ ມຸຂໂຕ ວຈນສທ຺ທປ຺ປວຕ຺ຕິກາເລ ທ຺ເວ ວຈີວິຎ຺ຎຕ຺ຕິກລາປາ, ຈິຕ຺ຕວເສເນວ ອກ຺ຂຣວຓ຺ຓຣຫິຕານໍ ຫສນໂຣທນາທີນໍ ອວຈນສທ຺ທານໍ ມຸຂໂຕ ປວຕ຺ຕິກາເລ ທ຺ເວ ສທ຺ທກລາປາ, ເສສກາເລສຸ ທ຺ເວ ອາທິ ກລາປາ ປວຕ຺ຕນ຺ຕິ.

ຈຕ຺ຕາໂຣ ອຸຕຸຊຣູປກລາປາ, ສພ຺ພມູລຏ຺ຐກໍ ສທ຺ທນວກນ຺ຕິ ທ຺ເວ ມູລກລາປາ ຈ ທ຺ເວ ສວິກາຣກລາປາ ຈ. ຕຕ຺ຖ ອຍໍ ກາໂຍ ຍາວຊີວໍ ອິຣິຍາປຖໂສຕໍ ອນຸຄຈ຺ຉນ຺ໂຕ ຍາເປຕິ, ຕສ຺ມາ ອິຣິຍາປຖນານຕ຺ຕໍ ປຏິຈ຺ຈ ອິມສ຺ມິໍ ກາເຍ ຂເຓ ຂເຓ ຘາຕູນໍ ສມປ຺ປວຕ຺ຕິວິສມປ຺ປວຕ຺ຕິໂຍ ປຎ຺ຎາຍນ຺ຕິ. ຕຖາ ອຸຕຸນານຕ຺ຕໍ ປຏິຈ຺ຈ ອາຫາຣນານຕ຺ຕໍ ປຏິຈ຺ຈ ວາຕາຕປສປ຺ຜສ຺ສນານຕ຺ຕໍ ປຏິຈ຺ຈ ກາຍງ຺ຄ ປຣິຫາຣນານຕ຺ຕໍ ປຏິຈ຺ຈ ອຕ຺ຕູປກ຺ກມປຣູປກ຺ກມນານຕ຺ຕໍ ປຏິຈ຺ຈ. ຕຕ຺ຖ ວິສມປ຺ປວຕ຺ຕິກາເລ ທ຺ເວ ມູລກລາປາ ເອວ ປວຕ຺ຕນ຺ຕິ, ສມປ຺ປວຕ຺ຕິກາເລ ທ຺ເວ ສວິກາຣາ. ເຕສຸ ຈ ທ຺ເວ ສທ຺ທກລາປາ ຈິຕ຺ຕຊສທ຺ທໂຕ ປຣມ຺ປຣສທ຺ເທສຸ ຈ ອຎ຺ເຎສຸ ໂລເກ ນານປ຺ປກາຣສທ຺ເທສຸ ຈ ປວຕ຺ຕນ຺ຕິ.

ທ຺ເວ ອາຫາຣຊຣູປກລາປາ, – ສພ຺ພມູລຏ຺ຐກໍ ສວິກາຣນ຺ຕິ. ອິເມ ທ຺ເວ ກລາປາ ສປ຺ປາເຍນ ວາ ອສປ຺ປາເຍນ ວາ ອາຫາເຣນ ຊາຕານໍ ສມຣູປວິສມຣູປານໍ ວເສນ ເວທິຕພ຺ພາ.

ອາກາສຘາຕຸ ຈ ລກ຺ຂຓຣູປານິຈາຕິ ປຎ຺ຈຣູປານິ ກລາປ ມຸຕ຺ຕານິ ໂຫນ຺ຕິ. ເຕສຸ ອາກາສຘາຕຸ ກລາປານໍ ອນ຺ຕຣາ ປຣິຈ຺ເຉທ ມຕ຺ຕຕ຺ຕາ ກລາປມຸຕ຺ຕາ ໂຫຕິ. ລກ຺ຂຓຣູປານິ ສງ຺ຂຕຠູຕານໍ ຣູປ ກລາປານໍ ສງ຺ຂຕຠາວຊານນຕ຺ຖາຍ ລກ຺ຂຓມຕ຺ຕຕ຺ຕາ ກລາປ ມຸຕ຺ຕານິ.

ອິເມ ເຕວີສຕິ ກລາປາ ອຊ຺ຌຕ຺ຕສນ຺ຕາເນ ລພ຺ຠນ຺ຕິ. ພຫິທ຺ຘາ ສນ຺ຕາເນ ປນ ທ຺ເວ ອຸຕຸຊມູລກລາປາ ເອວ ລພ຺ຠນ຺ຕິ. ຕຕ຺ຖ ທ຺ເວ ຣູປ ສນ຺ຕານານິ ອຊ຺ຌຕ຺ຕສນ຺ຕານຎ຺ຈ ພຫິທ຺ຘາສນ຺ຕານຎ຺ຈ. ຕຕ຺ຖ ອຊ຺ຌຕ຺ຕສນ຺ຕານໍ ນາມ ສຕ຺ຕສນ຺ຕານໍ ວຸຈ຺ຈຕິ. ພຫິທ຺ຘາສນ຺ຕານໍ ນາມ ປຖວີປພ຺ພຕນທີສມຸທ຺ທ ຣຸກ຺ຂຕິຓາທີນິ ວຸຈ຺ຈຕິ. ຕຕ຺ຖ ອຊ຺ຌຕ຺ຕສນ຺ຕາເນ ອຏ຺ຐວີສຕິ ຣູປານິ ເຕວີສຕິ ຣູປກລາປານິ ລພ຺ຠນ຺ຕິ.

ຕຕ຺ຖ ¶ ປຏິສນ຺ຘິນາມຘມ຺ມາ ປຏິສນ຺ຘິກ຺ຂເຓ ກມ຺ມຊຣູປກລາປານໍ ຉຘາ ປຈ຺ຈຍາ ໂຫນ຺ຕິ ຈຕູຫິ ມຫາສຫຊາເຕຫິ ຈ ວິປາເກນ ຈ ວິປ຺ປຍຸຕ຺ເຕນ ຈ. ຫທຍວຕ຺ຖຸຣູປສ຺ສ ປນ ອຎ຺ຎມຎ຺ເຎນ ສຫ ສຕ຺ຕຘາ ປຈ຺ຈຍາ ໂຫນ຺ຕິ. ເຕສ຺ເວວ ນາມຘມ຺ເມສຸ ເຫຕຸຘມ຺ມາ ເຫຕຸຠາເວນ, ເຈຕນາ ກມ຺ມຠາເວນ, ອາຫາຣຘມ຺ມາ ອາຫາຣຠາເວນ, ອິນ຺ທ຺ຣິຍ ຘມ຺ມາ ອິນ຺ທ຺ຣິຍຠາເວນ, ຌານຘມ຺ມາ ຌານ ຠາເວນ, ມຄ຺ຄຘມ຺ມາ ມຄ຺ຄ ຠາເວນາຕິ ຍຖາຣຫໍ ຉຘາ ປຈ຺ຈຍາ ໂຫນ຺ຕິ. ອຕີຕານິ ປນ ກຸສລາກຸສລກມ຺ມານິ ເອກຘາວ ປຈ຺ຈຍາ ໂຫນ຺ຕິ ກມ຺ມປຈ຺ຈເຍນ, ປຐມຠວງ຺ຄາທິກາ ປຈ຺ຉາຊາຕາ ປວຕ຺ຕນາມຘມ຺ມາ ປຸເຣຊາຕານໍ ກມ຺ມຊຣູປ ກລາປານໍ ເອກຘາ ປຈ຺ຈຍາ ໂຫນ຺ຕິ ປຈ຺ຉາຊາເຕນ. ເອຕ຺ຖ ຈ ປຈ຺ຉາຊາຕ ວຈເນນ ຈຕ຺ຕາໂຣ ປຈ຺ຉາຊາຕຊາຕິກາ ປຈ຺ຈຍາ ຄຫິຕາ ໂຫນ຺ຕິ. ອຕີຕານິ ຈ ກມ຺ມານິ ເອກຘາວ ປຈ຺ຈຍາ ໂຫນ຺ຕິ. ເອວໍ ນາມຘມ຺ມາ ກມ຺ມຊຣູປກລາປານໍ ຍຖາຣຫໍ ຈຸທ຺ທສຫິ ປຈ຺ຈເຍຫິ ປຈ຺ຈຍາ ໂຫນ຺ຕິ. ອິຘ ທສປຈ຺ຈຍາ ນ ລພ຺ຠນ຺ຕິ ອາຣມ຺ມຓຎ຺ຈ ອຘິປຕິ ຈ ອນນ຺ຕຣຎ຺ຈ ສມນນ຺ຕຣຎ຺ຈ ອຸປນິສ຺ສໂຍ ຈ ປຸເຣຊາໂຕ ຈ ອາເສວນຎ຺ຈ ສມ຺ປຍຸຕ຺ໂຕ ຈ ນຕ຺ຖິ ຈ ວິຄໂຕ ຈ.

ປວຕ຺ຕິກາເລ ຣູປຊນກາ ນາມຘມ຺ມາ ອຕ຺ຕນາ ສຫຊາຕານໍ ຈິຕ຺ຕຊຣູປກລາປານໍ ປຎ຺ຈຘາ ປຈ຺ຈຍາ ໂຫນ຺ຕິ ຈຕູຫິ ມຫາສຫ ຊາເຕຫິ ຈ ວິປ຺ປຍຸຕ຺ເຕນ ຈ. ເຕສ຺ເວວ ນາມຘມ຺ເມສຸ ເຫຕຸຘມ຺ມາ ເຫຕຸຠາເວນ, ອຘິປຕິຘມ຺ມາ ອຘິປຕິຠາເວນ, ເຈຕນາ ກມ຺ມຠາເວນ, ວິປາກຘມ຺ມາ ວິປາກຠາເວນ, ອາຫາຣຘມ຺ມາ ອາຫາຣ ຠາເວນ, ອິນ຺ທ຺ຣິຍຘມ຺ມາ ອິນ຺ທ຺ຣິຍຠາເວນ, ຌານຘມ຺ມາ ຌານຠາເວນ, ມຄ຺ຄຘມ຺ມາ ມຄ຺ຄຠາເວນາຕິ ຍຖາຣຫໍ ອຏ຺ຐຘາ ປຈ຺ຈຍາ ໂຫນ຺ຕິ. ປຈ຺ຉາຊາຕາ ສພ຺ເພ ນາມຘມ຺ມາ ປຸເຣຊາຕານໍ ຈິຕ຺ຕຊຣູປກລາປານໍ ເອກຘາ ປຈ຺ຈຍາ ໂຫນ຺ຕິ ປຈ຺ຉາຊາເຕນ. ເອວໍ ນາມຘມ຺ມາ ຈິຕ຺ຕຊຣູປ ກລາປານໍ ຍຖາຣຫໍ ຈຸທ຺ທສຫິ ປຈ຺ຈເຍຫິ ປຈ຺ຈຍາ ໂຫນ຺ຕິ. ອິຘປິ ທສ ປຈ຺ຈຍາ ນ ລພ຺ຠນ຺ຕິ ອາຣມ຺ມຓຎ຺ຈ ອນນ຺ຕຣຎ຺ຈ ສມນນ຺ຕຣຎ຺ຈ ອຎ຺ຎມຎ຺ຎຎ຺ຈ ອຸປນິສ຺ສໂຍ ຈ ປຸເຣຊາໂຕ ຈ ອາເສວນຎ຺ຈ ສມ຺ປຍຸຕ຺ໂຕ ຈ ນຕ຺ຖິ ຈ ວິຄໂຕ ຈ.

ປຏິສນ຺ຘິຈິຕ຺ຕສ຺ສ ຐິຕິກາລໂຕ ປຏ຺ຐາຍ ປວຕ຺ຕິກາເລ ສພ຺ເພປິ ນາມຘມ຺ມາ ສພ຺ເພສໍ ອຸຕຸຊຣູປກລາປານຎ຺ຈ ອາຫາຣຊຣູປ ກລາປານຎ຺ຈ ເອກຘາ ປຈ຺ຈຍາ ໂຫນ຺ຕິ ປຈ຺ຉາຊາຕວເສນ. ເອຕ຺ຖປິ ປຈ຺ຉາຊາຕວຈເນນ ຈຕ຺ຕາໂຣ ປຈ຺ຉາຊາຕຊາຕິກາ ຄຫິຕາ ໂຫນ຺ຕິ, ເສສາ ວີສຕິ ປຈ຺ຈຍາ ນ ລພ຺ຠນ຺ຕິ.

ສພ຺ເພສຸ ປນ ເຕວີສຕິຍາ ຣູປກລາເປສຸຈຕ຺ຕາໂຣມຫາ ຠູຕາ ອຎ຺ຎມຎ຺ຎສ຺ສ ປຎ຺ຈຘາ ປຈ຺ຈຍາ ໂຫນ຺ຕິ ຈຕູຫິ ມຫາສຫ ຊາເຕຫິ ຈ ອຎ຺ຎມຎ຺ເຎນ ຈ, ສຫຊາຕານໍ ອຸປາທາຣູປານໍ ຈຕຸຘາ ປຈ຺ຈຍາ ໂຫນ຺ຕິ ຈຕູຫິ ມຫາສຫຊາເຕຫິ ¶ . ອາຫາຣຣູປໍ ສຫຊາຕານຎ຺ຈ ອສຫຊາຕານຎ຺ຈ ສພ຺ເພສໍ ອຊ຺ຌຕ຺ຕຣູປກລາປານໍ ອາຫາຣ ປຈ຺ຈເຍນ ປຈ຺ຈໂຍ ໂຫຕິ. ນວສຸ ກມ຺ມຊຣູປກລາເປສຸ ຊີວິຕຣູປໍ ສຫຊາຕານເມວ ຣູປານໍ ອິນ຺ທ຺ຣິຍປຈ຺ຈເຍນ ປຈ຺ຈໂຍ ໂຫຕິ. ເອວໍ ອຊ຺ຌຕ຺ຕຣູປຘມ຺ມາ ອຊ຺ຌຕ຺ຕຣູປຘມ຺ມານໍ ສຕ຺ຕຘາ ປຈ຺ຈຍາ ໂຫນ຺ຕິ. ພຫິທ຺ຘາ ຣູປຘມ຺ມາ ປນ ພຫິທ຺ຘາຠູຕານໍ ທ຺ວິນ຺ນໍ ອຸຕຸຊຣູປກລາປານໍ ປຎ຺ຈຘາ ປຈ຺ຈຍາ ໂຫນ຺ຕີຕິ.

ຣູປກລາເປສຸ ປຈ຺ຈຍຆຏນານໂຍ ນິຏ຺ຐິໂຕ.

ເອຕ຺ຖ ຈ ປຏ຺ຐານສທ຺ທສ຺ສ ອຕ຺ໂຖ ວຕ຺ຕພ຺ໂພ. ປຘານໍ ຐານນ຺ຕິ ປຏ຺ຐານໍ. ຕຕ຺ຖ ປຘານນ຺ຕິ ປມຸຂໍ, ຐານນ຺ຕິ ປຈ຺ຈໂຍ, ປມຸຂປຈ຺ຈໂຍ ມຸຂ຺ຍປຈ຺ຈໂຍ ເອກນ຺ຕປຈ຺ຈໂຍຕິ ວຸຕ຺ຕໍ ໂຫຕິ. ໂສ ຈ ເອກນ຺ຕ ປຈ຺ຈໂຍ ເອກນ຺ຕປຈ຺ຈຍຸປ຺ປນ຺ນໍ ປຏິຈ຺ຈ ວຕ຺ຕພ຺ໂພ.

ທຸວິຘຎ຺ຫິ ປຈ຺ຈຍຸປ຺ປນ຺ນໍ ມຸຂ຺ຍປຈ຺ຈຍຸປ຺ປນ຺ນໍ ນິສ຺ສນ຺ທປຈ຺ຈຍຸປ຺ປນ຺ນນ຺ຕິ. ຕຕ຺ຖ ມຸຂ຺ຍປຈ຺ຈຍຸປ຺ປນ຺ນໍ ນາມ ມູລປຈ຺ຈຍຸປ຺ປນ຺ນໍ, ນິສ຺ສນ຺ທປຈ຺ຈຍຸປ຺ປນ຺ນໍ ນາມ ປຣມ຺ປຣ ປຈ຺ຈຍຸປ຺ປນ຺ນໍ. ຕຕ຺ຖ ມູລປຈ຺ຈຍຸປ຺ປນ຺ນເມວ ເອກນ຺ຕປຈ຺ຈຍຸປ຺ປນ຺ນໍ ນາມ. ຕຎ຺ຫິ ອຕ຺ຕໂນ ປຈ຺ຈເຍ ສຕິ ເອກນ຺ເຕນ ອຸປ຺ປຊ຺ຊຕິເຍວ, ໂນ ນຸປ຺ປຊ຺ຊຕິ. ປຣມ຺ປຣປຈ຺ຈຍຸປ຺ປນ຺ນໍ ປນ ອເນກນ຺ຕປຈ຺ຈຍຸປ຺ປນ຺ນໍນາມ, ຕຎ຺ຫິ ຕສ຺ມິໍ ປຈ຺ຈເຍ ສຕິປິ ອຸປ຺ປຊ຺ຊຕິ ວາ, ນ ວາ ອຸປ຺ປຊ຺ຊຕິ. ຕຕ຺ຖ ເອກນ຺ຕປຈ຺ຈຍຸປ຺ປນ຺ນໍ ປຏິຈ຺ຈ ໂສ ປຈ຺ຈໂຍ ເອກນ຺ຕປຈ຺ຈໂຍ ນາມ. ໂສ ເອວ ອິມສ຺ມິໍ ມຫາປກຣເຓ ວຸຕ຺ໂຕ. ຕໂຕ ເອວ ອຍໍ ຈຕຸວີສຕິປຈ຺ຈຍຄໂຓ ຈ ອິມໍ ມຫາ ປກຣຓຎ຺ຈ ປຏ຺ຐານນ຺ຕິ ວຸຈ຺ຈຕິ.

ຕຕ຺ຖ ເອກສ຺ສ ປຸຣິສສ຺ສ ຘນຘຎ຺ຎຕ຺ຖາຍ ໂລໂຠ ອຸປ຺ປຊ຺ຊຕິ. ໂສ ໂລຠວເສນ ອຸຏ຺ຐາຍ ອຣຎ຺ຎໍ ຄນ຺ຕ຺ວາ ເອກສ຺ມິໍ ປເທເສ ເຂຕ຺ຕານິ ກໂຣຕິ, ວຕ຺ຖູນິ ກໂຣຕິ, ອຸຍ຺ຍານານິ ກໂຣຕິ. ເຕສຸ ສມ຺ປຊ຺ຊມາເນສຸ ໂສ ປຸຣິໂສ ພຫູນິ ຘນຘຎ຺ຎານິ ລຠິຕ຺ວາ ອຕ຺ຕນາ ຈ ປຣິຠຸຎ຺ຊຕິ, ປຸຕ຺ຕທາເຣ ຈ ໂປເສຕິ, ປຸຎ຺ຎານິ ຈ ກໂຣຕິ, ປຸຎ຺ຎຜລານິ ຈ ອາຍຕິໍ ປຈ຺ຈນຸຠວິສ຺ສຕິ. ຕຕ຺ຖ ໂລຠສຫ ຊາຕານິ ນາມຣູປານິ ມຸຂ຺ຍປຈ຺ຈຍຸປ຺ປນ຺ນານິ ນາມ. ຕໂຕ ປຣໍ ຍາວ ອາຍຕິໍ ຠເວສຸ ປຸຎ຺ຎຜລານິ ປຈ຺ຈນຸໂຠຕິ, ຕາວ ອຸປ຺ປນ຺ນານິ ປຣມ຺ປຣຜລານິ ຕສ຺ສ ໂລຠສ຺ສ ນິສ຺ສນ຺ທປຈ຺ຈຍຸປ຺ປນ຺ນານິ ນາມ. ເຕສຸ ທ຺ວີສຸ ປຈ຺ຈຍຸປ຺ປນ຺ເນສຸ ມຸຂ຺ຍປຈ຺ຈຍຸປ຺ປນ຺ນເມວ ປຏ຺ຐາເນ ວຸຕ຺ຕໍ. ນິສ຺ສນ຺ທປຈ຺ຈຍຸປ຺ປນ຺ນໍ ປນ ສຸຕ຺ຕນ຺ຕນເຍນ ກເຖຕພ຺ພໍ. ຕຕ຺ຖ ສຸຕ຺ຕນ຺ຕນໂຍ ນາມ ອິມສ຺ມິໍ ສຕິ ອິທໍ ໂຫຕິ, ອິມສ຺ສ ອຸປ຺ປາທາ ອິທໍ ອຸປ຺ປຊ຺ຊຕີຕິ ເອວຣູໂປ ປຈ຺ຈຍນໂຍ. ອປິ ຈ ໂລໂຠ ໂທໂສ ໂມໂຫຕິ ຕໂຍ ຘມ຺ມາ ສກລສ຺ສ ສຕ຺ຕໂລກສ຺ສປິ ສງ຺ຂາຣໂລກສ຺ສປິ ໂອກາສ ໂລກສ຺ສປິ ວິປຕ຺ຕິຍາ ມູລຏ຺ເຐນ ເຫຕູ ນາມ. ອໂລໂຠ ອໂທໂສ ອໂມໂຫຕິ ¶ ຕໂຍ ຘມ຺ມາ ສມ຺ປຕ຺ຕິຍາ ມູລຏ຺ເຐນ ເຫຕູນາມາຕິ ກເຖຕພ຺ພໍ. ເອສ ນໂຍ ສພ຺ເພສຸ ປຏ຺ຐານປຈ຺ຈເຍສຸ ຍຖາຣຫໍ ເວທິຕພ຺ໂພ. ເອວຎ຺ຈ ສຕິ ໂລເກ ສພ຺ພາ ໂລກປ຺ປວຕ຺ຕິໂຍ ອິເມສໍ ຈຕຸວີສຕິຍາ ປຈ຺ຈຍານໍ ມຸຂ຺ຍ ປຈ຺ຈຍຸປ຺ປນ຺ເນນ ສທ຺ຘິໍ ນິສ຺ສນ຺ທປຈ຺ຈຍຸປ຺ປນ຺ນາ ເອວ ໂຫນ຺ຕີຕິ ເວທິຕພ຺ໂພຕິ.

ເອຕ຺ຕາວຕາ ປຈ຺ຈຍານໍ ອຕ຺ຖທີປນາ ປຈ຺ຈຍານໍ ສຠາຄສງ຺ຄໂຫ ປຈ຺ຈຍານໍ ຆຏນານໂຍຕິ ຕີຫິ ກຓ຺ເຑຫິ ປຣິຈ຺ຉິນ຺ນາ ປຏ຺ຐານຸທ຺ເທສ ທີປນີ ນິຏ຺ຐິຕາ ໂຫຕິ.

ມ຺ຣມ຺ມຣຏ຺ເຐ ມ຺ौໍຊ຺ວານຄເຣ ເລຑີຕີອຣຎ຺ຎວິຫາຣວາສິນາ ມຫາ ເຖເຣນ ກຕາຍໍ ປຈ຺ຈຍຸທ຺ເທສທີປນີ.