📜
ນໂມ ຕສ຺ສ ຠຄວໂຕ ອຣຫໂຕ ສມ຺ມາສມ຺ພຸທ຺ຘສ຺ສ
ກມລາຎ຺ຊລິ
ກມລາສນ ກມລາປຕິ ປມຖາຘິປ ວຊິຣາ,
ຍຸຘທານວ ມນຸໂຊຣຄ ຠຸຊຄາສນ ປຕິນໍ;
ມກຸຏາຫິຕ ມນິທີຘິຕິ ຠມຣາວລິ ຠຊິຕໍ,
ປຓມາ’ມຫໍ ອນຆໍ ມຸນິ ຈຣຓາມລ ກມລໍ.
ກມລາລຍ ສທິ’ສງ຺ກິຕ ກລມງ຺ຄລ ຣຸຈິຣໍ,
ຊຸຕິຣຎ຺ຊິຕໍ ອຠິນິຊ຺ຊິຕ ສຸຠກຎ຺ຈນ ນລິນໍ;
ຊນິຕາ ຈິຣ ສມເຍ ນິຊ ປິຕຸ ຠູປຕິ ນມິຕໍ,
ປຓມາ’ມຫໍ ອນຆໍ ມຸນິ ຈຣຓາມລ ກມລໍ.
ສຣຓາຄຕ ຣຊນີປຕິ ທິນເສຂຣ ນມິຕໍ,
ຠຊິຕາຂິລ ຊນປາວນໍ ອຠິກງ຺ຂິຕ ສຸຂທໍ;
ວສຸຘາຕລ ສຍມຸຄ຺ຄຕ ສຣສີຣຸຫ ມຫິຕໍ,
ປຓມາ’ມຫໍ ອນຆໍ ມຸນິ ຈຣຓາມລ ກມລໍ.
ທິຣທາສນ ຕຣຸປນ຺ຕິກ ຆຏິຕາສນໍ ອຠຍໍ,
ວິຊຍາສນ ສມຘິຏ຺ຐິຕ ຈຕຸຣງ຺ຄິກ ວິຣິຍໍ;
ຘຣມານກ ສຸຣິເຍຫນິ ວິຊິຕນ຺ຕກ ຘຊິນິໍ,
ປຓມາ’ມຫໍ ອຠິປາຕິຕ ນມຸຈິທ຺ຘຊ ວິຠວໍ.
ສທໂຍທິຕ ປິຍຠາຣຕິ ວິຊິຕນ຺ຕກ ສມຣໍ,
ທສປາຣມິ ພລກມ຺ປິຕ ສຘຣາຘຣ ຘຣນິໍ;
ຄິຣິເມຂລ ວຣວາຣນ ສິຣສານຕ ຈຣຓໍ,
ປຓມາ’ມຫໍ ອຠິນນ຺ທິຕ ສນຣາມຣ ຠຸວນໍ.
ນິຂິລາສວ ວິຄເມ’ນຕິວິມລີກຕ ຫທຍໍ,
ຕທນນ຺ຕຣ ວິທິຕາຂິລ ມຕິໂຄຈຣ ວິສຍໍ;
ວິສຍີກຕ ຠຸວນຕ຺ຕຍໍ ອຕິໂລກິຍ ຈຣິຕໍ,
ປຓມາ’ມຫໍ ອປຣາຊິຕໍ ອຣຫໍ ມຸນິໍ ອສມໍ.
ມຸທຸຠາຣຕິ ມຘຸປາສິຕ ນລິໂນປມ ວທນໍ,
ຣຸຈິຣາຍຕ ນລິນີທລ ນິຠ ໂລຈນ ຍຸຄລໍ;
ອຸທໂຍທິຕ ຣວິມຓ຺ຑລ ຊລິຕາມລ ນິຏິລໍ,
ປຓມາ’ມຫ ອກຸໂຕຠຍໍ ອນຆໍ ມຸນິ ປມຸຂໍ.
ອສິຕມ຺ພຸທ ຣຸຈິກຸຎ຺ຈິຕ ມຸທຸ ກຸນ຺ຕລ ລລິຕໍ,
ຠຸວໂນທຣ ວິຕຕາມິຕ ຊຸຕິສຎ຺ຈຍ ຊລິຕໍ;
ມທໂມທິຕ ທິຣໂທປມ ຄຕິວິພ຺ຠມ ຣຸຈິຣໍ,
ປຓມາ’ມຫໍ ອມຕນ຺ທທ ມຸນິປຸງ຺ຄວໍ ອສມໍ.
ກຣຸຓາຣສ ປຣິຠາວິຕ ສວຓາມຕ ວຈນໍ,
ວິຣຸທາວລິ ສຕໂຆສິຕ ຍສປູຣິຕ ຠຸວນໍ;
ສຸມໂນຫຣ ວຣລກ຺ຂຓ ສິຣິສຎ຺ຈຍ ສທນໍ,
ປຓມາ’ມຫໍ ອຸທິຕາມລ ສສິມຓ຺ຑລ ວທນໍ.
ວິນຍາຣຫ ຊນມານສ ກຸມຸທາກຣ ສສິນໍ,
ຕສິນາປຄ ປຣິໂສສນ ສຕທີຘິຕິ ຕຸລິຕໍ;
ຕມນາສວ ມຸນິເສວິຕໍ ອປໂລກິຕ ສຸຂທໍ,
ປຓມາ’ມຫໍ ອນິເກຕນໍ ອຂິລາຄຕິ ວິຄຕໍ.
ສຫິຕາຂິລ ຠຍເຠຣວໍ ອຠຍາຄຕ ສຣນໍ,
ອຊຣາມຣ ສຸຂທາຍກໍ ອນິຣາກຕ ກຣຸຓໍ;
ຕມຸປາສກ ຊນເສວິຕ ສຸປຕິຏ຺ຐິຕ ຈຣຓໍ,
ປຓມາ’ມຫໍ ອຫິຕາປຫໍ ອນຆຸຕ຺ຕມ ຈຣຓໍ.
ກຣຸຓາມຕ ຣສປຸຣິຕ ວີມລາຂິລ ຫທຍໍ,
ວິຫິຕາມິຕ ຊນຕາຫິຕໍ ອນຸກມ຺ປິຕ ຠຸວນໍ;
ຠຸວເນ ສຸຕໍ ອວນີປຕິ ສຕ ເສວິຕ ຈຣຓໍ,
ປຓມາ’ມຫໍ ອນຆໍ ມຸນິໍ ອຆນາສນ ຈຕຸຣໍ.
ອຣຕີຣຕິ ປຣິປີລິຕ ຍຕິມານສ ທມນໍ,
ນິຊສາສນ ວິນິວາຣິຕ ປຸຖຸຕິຕ຺ຖິຍ ສມຓໍ;
ປຣວາທິກ ຊນຕາກຕ ປຣິຠາສິຕ ຂມນໍ,
ປຓມາ’ມຫໍ ອຕິເທວຕ ວຣ ໂຄຕມ ສມຓໍ.
ສຣຓາຄຕ ຠຍນາສນ ວຊິຣາລຍ ປຓິຠໍ,
ຠວສາຄຣ ປຕິຕາມິຕ ຊນຕາຣນ ນິຣຕໍ;
ສິຣສາວຫໍ ອມລຎ຺ຊລິ ປຸຏປງ຺ກຊ ມກຸລໍ,
ປຓມາ’ມຫໍ ອຂິລລາຍ ວິຄຕໍ ມຸນິໍ ອຕຸລໍ.
ວິມລີກຕ ຊນມານສ ວິຄຕາສວ ຠຄວໍ,
ຠວປາຣຄ ວິຠວາມຕ ສຸຂທາຍກ ສຕຕໍ;
ປຣມາທຣ ຄຣຸຄາຣວ ວິນຕໍ ຊິນ ປຍຕໍ,
ປທປງ຺ກຊ ຣຊສາ ມມ ສມລງ຺ກຸຣຸ ສິຣສໍ.
ປວນາຫຕ ທຸມປລ຺ລວໍ ອິວ ນາຣຕ ຈປລໍ,
ຠວລາລສ ມລິນີກຕໍ ອຊິຕິນ຺ທ຺ຣິຍ ນິວຫໍ;
ຈິຣ ສຎ຺ຈິຕ ທຸຣິຕາຫຕໍ ອນິວາຣິຕ ຕິມິສໍ,
ວິມລີກຸຣຸ ກຣຸຓາຠຣ ສຸຕຣໍ ມມ ຫທຍໍ.
ອທເຍ ທຍໍ ອນເຍ ນຍໍ ອປິ ໂຍ ຄຸຓໍ ອຄຸເຓ,
ອຫິເຕ ຫິຕໍ ອກໂຣ ກ຺ວຈິທ ອປິ ເກນຈິ ນກຕໍ;
ສທເຍ ຊິນ ສຸນເຍ ຄຸຓສທເນ ຕຍິ ນິຕຣໍ,
ສຸຫິເຕ ຫິຕຈຣິເຕ’ນຆ ຣມເຕ ມມ ຫທຍໍ.
ຠວສງ຺ກຏ ປຕິເຕນປິ ຠວຕາ ຈິຣ ຈຣິຕໍ,
ວິສເມ ສມ ຈຣຓໍ ຂລຸ ທສປາຣມິ ຠຣຓໍ;
ສຣໂຕ’ຫນິ ສຣໂຕ ນິສິ ສຸປິເນນປິ ສຕຕໍ,
ຣມເຕ ຊິນ ສຸມເຕ ຕ຺ວຍິ ສທຍໍ ມມ ຫທຍໍ.
ອຕິທຸທ຺ທທໍ ອທທີ ຠວໍ ອຕິທຸກ຺ກຣໍ ອກຣີ;
ອຕິທຸກ຺ຂມໍ ອຂມີ ວຕ ກຣຸຓານິຘິ’ຣສໂມ,
ອິຕິ ເຕ ຄຸຓໍ ອນຆໍ ມຸນິ ສຣໂຕ ມມ ຫທຍໍ,
ຣມເຕ’ຫນິ ຣມເຕ ນິສິ ຣມເຕ ຕ຺ວຍິ ສຕຕໍ.
ອຕິທຸຈ຺ຈຣໍ ອຈຣີ ຠວໍ ອຕິທຸທ຺ທມໍ ອທມີ,
ອຕິທຸທ຺ທຍໍ ອທຍີ ວຕ ສທຍາປຣ ຫທໂຍ;
ອິຕິ ເຕ ຄຸຓໍ ອນຆໍ ມຸນິ ສຣໂຕ ມມ ຫທຍໍ,
ຣມເຕ’ຫນິ ຣມເຕ ນິສິ ຣມເຕ ຕ຺ວຍິ ສຕຕໍ.
ອຕິທຸຄ຺ຄມໍ ອຄມີ ຠວໍ ອຕິທຸຊ຺ຊຍໍ ອຊຍີ,
ອຕິທຸສ຺ສຫໍ ອສຫີ ວຕ ສມຸເປກ຺ຂິຕ ມນໂສ;
ອິຕິ ເຕ ຄຸຓໍ ອນຆໍ ມຸນິ ສຣໂຕ ມມ ຫທຍໍ,
ຣມເຕ’ຫນິ ຣມເຕ ນິສິ ຣມເຕ ຕ຺ວຍິ ສຕຕໍ.
ອຕິທາຣຸນ ປລຍານລ ສທິສານລ ຊລິເຕ,
ນິຣເຍ ວິນິປຕິໂຕ ຈິຣໍ ອຆຕາປິຕ ມນໂສ;
ນ ສຣິໍ ສກິທ ອປິ ເຕ ປິຕ ຠຊິຕຸໍ ປທນລິນໍ,
ຂມ ໂຄຕມ ນຣສາຣຖິ ຕມິທໍ ມມ ຂລິຕໍ.
ຕິຣິຍຄ຺ຄຕ-ຄຕິຍໍ ຈິຣໍ ອນວຏ຺ຐິຕ ຈຣິໂຕ,
ອຕິນິຏ຺ຐຸຣ ວຘຕຊ຺ຊິຕ ຠຍກມ຺ປິຕ ຫທໂຍ;
ນ ສຣິໍ ສກິທປິ ເຕ ປິຕ ຠຊິຕຸໍ ປທນລິນໍ,
ຂມ ໂຄຕມ ປຸຣິສຸຕ຺ຕມ ຕມິທໍ ມມ ຂລິຕໍ.
ປຣິເທວນ ນິຣໂຕ ຈິຣໍ ອຖ ເປຕ຺ຕິຍ ວິສເຍ,
ສຸຊິຆຈ຺ຉິຕ ສຸປິປາສິຕ ປຣິໂສສິຕ ຊຐເຣ;
ນ ສຣິໍ ສກິທປິ ເຕ ປິຕ ຠຊິຕຸໍ ປທນລິນໍ,
ຂມ ໂຄຕມ ທິປທຸຕ຺ຕມ ຕມິທໍ ມມ ຂລິຕໍ.
ວິວໂສ ຠຸສໍ ອຆທູສິຕ ມນສາສຸຣ ວິສເຍ,
ຊນິໂຕ ຆນຕິມິເຣ ຈິຣໍ ອຕິທຸກ຺ຂິຕ ຫທໂຍ;
ນ ສຣິໍ ສກິທປິ ເຕ ປິຕ ຠຊິຕຸໍ ປທນລິນໍ,
ຂມ ໂຄຕມ ວສິສຕ຺ຕມ ຕມິທໍ ມມ ຂລິຕໍ.
ມນສາ ຈິຣ ວິຫິຕໍ ສຣໍ ອຕິກິພ຺ພິສ ຈຣິຕໍ,
ສມເຖນຖ ສຸວິຣາຊິຍ ຕໍ ອສຎ຺ຎິຕໍ ອຸປໂຄ;
ນ ສຣິໍ ສກິທ ອປິ ເຕ ປິຕ ຠຊິຕຸໍ ປທ ນລິນໍ,
ຂມ ໂຄຕມ ວສິປຸງ຺ຄວ ຕມິທໍ ມມ ຂລິຕໍ.
ວິຊິຄຸຈ຺ຉິຍ ທຸຣິຕໍ ນິຊ ວປຸສາ ກຕໍ ອມິຕໍ,
ຕນຸ ວຊ຺ຊິຕໍ ອຸປໂຄ ຠວໍ ອິຫ ຠາວິຕ ສມໂຖ;
ນ ສຣິໍ ສກິທປິ ເຕ ປິຕ ຠຊິຕຸໍ ປທນລິນໍ,
ຂມ ໂຄຕມ ຍຕິກຸຎ຺ຊຣ ຕມິທໍ ມມ ຂລິຕໍ.
ຣຕນຕ຺ຕຍ ຣຫິເຕ ຠຸສ ພຫຸລີກຕ ທຸຣິເຕ,
ຊນິໂຕ ປຣວິສເຍ ພຸຘຊນ ນິນ຺ທິຍ ຈຣິເຕ;
ນ ສຣິໍ ສກິທປິ ເຕ ປິຕ ຠຊິຕຸໍ ປທນລິນໍ,
ຂມ ໂຄຕມ ກຣຸຓານິຘິ ຕມິທໍ ມມ ຂລິຕໍ.
ຊນິໂຕ ຍທິ ມນຸເຊສຸປິ ວິກລິນ຺ທ຺ຣິຍ ນິວໂຫ,
ຕນຸນາ ກຣຈຣຓາທິຫິ ວິກເຕ’ນິຫ ທຸຂິໂຕ;
ນ ສຣິໍ ສກິທປິ ເຕ ປິຕ ຠຊິຕຸໍ ປທນລິນໍ,
ຂມ ໂຄຕມ ມຕິສາຄຣ ຕມິທໍ ມມ ຂລິຕໍ.
ວິຘິນາຫິຕ ມຕິຠາວນ ຣຫິໂຕ ຕມປິຫິໂຕ,
ວິສເທສຸປິ ກຸສລາທິສຸ ຕຖທສ຺ສນ ວິມຸໂຂ;
ນ ສຣິໍ ສກິທປິ ເຕ ປິຕ ຠຊິຕຸໍ ປທນລິນໍ,
ຂມ ໂຄຕມ ນຣເກສຣິ ຕມິທໍ ມມ ຂລິຕໍ.
ສຸຈິເຣນປິ ຠຸວິ ທຸລ຺ລຠໍ ອສມໍ ຂຓໍ ອລຠໍ,
ສນຣາມຣ ຊນຕາຫິຕ ສຸຂທໍ ມຸນິ ຊນນໍ;
ນ ສຣິໍ ສກິທປິ ເຕ ປິຕ ຠຊິຕຸໍ ປທນລິນໍ,
ຂມ ໂຄຕມ ວທຕໍວຣ ຕມິທໍ ມມ ຂລິຕໍ.
ນິສິຕາຍຸຘ ວຘສຊ຺ຊິຕ ຂຬນິທ຺ທຍ ຫທໂຍ,
ປຣຫິໍສນ ຣຸຈິ ຠິໍສນ ຍມໂສທຣ ສທິໂສ;
ນ ສຣິໍ ສກິທປິ ເຕ ປິຕ ຠຊິຕຸໍ ປທນລິນໍ,
ຂມ ໂຄຕມ ມຸນິສຕ຺ຕມ ຕມິທໍ ມມ ຂລິຕໍ.
ປຣສນ຺ຕກ ຫຣເຓ ກຕມຕິ ພຎ຺ຈນ ພຫຸໂລ,
ຆຣສນ຺ຘິກ ປຣິປນ຺ຖິກ ສຫສາກຕິ ນິຣໂຕ;
ນ ສຣິໍ ສກິທປິ ເຕ ປິຕ ຠຊິຕຸໍ ປທນລິນໍ,
ຂມ ໂຄຕມ ມຸນິປຸງ຺ຄວ ຕມິທໍ ມມ ຂລິຕໍ.
ນວໂຍພ຺ພນ ມທຄພ຺ພິຕ ປຣິມຸຈ຺ຉິຕ ຫທໂຍ,
ສຸຈິສຊ຺ຊນ ວິຊິຄຸຈ຺ຉິຍ ປຣທາຣິກ ນິຣໂຕ;
ນ ສຣິໍ ສກິທປິ ເຕ ປິຕ ຠຊິຕຸໍ ປທນລິນໍ,
ຂມ ໂຄຕມ ກຣຸຓາຠຣ ຕມິທໍ ມມ ຂລິຕໍ.
ມທິຣາສວຣຕ ນາຄຣຊນ ສນ຺ຕຕ ຠຊິໂຕ,
ຄຣຸຄາຣວ ຫິຣິທູຣິຕ ຕິຣິຍຄ຺ຄຕ ຈຣິໂຕ;
ນ ສຣິໍ ສກິທປິ ເຕ ປິຕ ຠຊິຕຸໍ ປທນລິນໍ,
ຂມ ໂຄຕມ ວິຫຕາສວ ຕມິທໍ ມມ ຂລິຕໍ.
ສປິຕາມຫ ປປິຕາມຫ ນິຈິຕໍ ຘນໍ ອມິຕໍ,
ປິຕຸສຎ຺ຈິຕມປິ ນາສິຍ ກິຕໂວ ຫຕວິຠໂວ;
ນ ສຣິໍ ສກິທປິ ເຕ ປິຕ ຠຊິຕຸໍ ປທນລິນໍ,
ຂມ ໂຄຕມ ວິຊິຕນ຺ຕກ ຕມິທໍ ມມ ຂລິຕໍ.
ວິຕຖາລິກ ວຈໂນ ປຣປິຍສຸຎ຺ຎຕ ກຣໂຓ,
ຜຣຸສໍ ຠຓໍ ອຕິນິປ຺ຜລ ພຫຸຠາສນ ນິປຸໂຓ;
ນ ສຣິໍ ສກິທປິ ເຕ ປິຕ ຠຊິຕຸໍ ປທນລິນໍ,
ຂມ ໂຄຕມ ຠຸວເນສຸຕ ຕມິທໍ ມມ ຂລິຕໍ.
ປຣສມ຺ປທໍ ອຠິຌາຍນ ນິຣນ຺ຕຣ ທຸຂິໂຕ,
ນຠິຣຊ຺ຌນ ປຣໂມ ກ຺ວຈິ ຜລທສ຺ສນ ຣຫິໂຕ;
ນ ສຣິໍ ສກິທປິ ເຕ ປິຕ ຠຊິຕຸໍ ປທນລິນໍ,
ຂມ ໂຄຕມ ຄຸຓສາຄຣ ຕມິທໍ ມມ ຂລິຕໍ.
ຠວໂຕ ຠວໍ ອປຣາປຣໍ ອຍຕາຈິຣໍ ອິຕິ ເມ,
ວປຸສາ ອຖ ວຈສາປິ ຈ ມນສາ ກຕໍ ອມິຕໍ;
ຂມ ໂຄຕມ ທຸຣິຕາປຫ ທຸຣິຕໍ ພຫຸວິຫິຕໍ,
ທທ ເມ ສິວປທໍ ອຈ຺ຈຸຕໍ ອມຕໍ ຠວວິຄຕໍ.
ຕິມິຣາວຸຕ ກຸຓປາກຸລ ວິຊິຄຸຈ຺ຉິຍ ປວເນ,
ຊນິກາສຸຈິ ຊຐເຣ ພຫຸ ກິມິສນ຺ຕຕິ ສທເນ;
ອສຍິໍ ຠວຄຫເຓ ຈຣໍ ອຫໍ ອປ຺ປຏິສຣເຓ,
ສຣນໍ ຠວ ຠຄວໍ ມມ ຠວນີຣຘິ ຕຣເຓ.
ພຫິ ນິກ຺ຂມໍ ອສກິໍ ຠຄຕິຣິຍໍ ປຖ ປຕິໂຕ,
ອຄທງ຺ກຣ ກຕ ສລ຺ລກ ສຕຂຓ຺ຑິຕ ກຣໂຓ;
ອມຣິໍ ຠວຄຫເຓ ຈຣໍ ອຫໍ ອປ຺ປຏິສຣເຓ,
ສຣຓໍ ຠວ ຠຄວໍ ມມ ຠວນີຣຘິ ຕຣເນ.
ປຕິໂຕ ພຫິ ຣຕິປິລ຺ລກ ຕນຸຣາມຍ ມຖິໂຕ,
ວທິຕຸໍ ກິມຸ ວິທິຕຸມ຺ປິ ຈ ນ ສຫໍ ມຕິຣຫິໂຕ;
ອມຣິໍ ຠວຄຫເຓ ຈຣໍ ອຫໍ ອປ຺ປຏິສຣເຓ,
ສຣຓໍ ຠວ ຠຄວໍ ມມ ຠວນີຣຘິ ຕຣເຓ.
ຊນິໂຕ ຍທິ ສຸຂິໂຕ ຊນທຍິໂຕ ປິຍຊນໂກ,
ປຸຖຸໂກ ພຫຸວິຘ-ກີລນນິຣໂຕ ຄທຄຫິໂຕ;
ອມຣິໍ ຠວຄຫເຓ ຈຣໍ ອຫໍ ອປ຺ປຏິສຣເຓ,
ສຣຓໍ ຠວ ຠຄວໍ ມມ ຠວນີຣຘິ ຕຣເຓ.
ຕຣຸໂນປິ ຫິ ຆຣພນ຺ຘນ ຄຖິໂຕມິຕ ວິຠໂວ,
ສຫສາ ຄທຄຫິໂຕ ປິຍຠຣິຍາສຸຕ ວິຍຸໂຕ;
ອມຣິໍ ຠວຄຫເຓ ຈຣໍ ອຫໍ ອປ຺ປຏິສຣເຓ,
ສຣຓໍ ຠວ ຠຄວໍ ມມ ຠວນີຣຘິ ຕຣເຓ.
ອຊຣໍ ຕນຸໍ ອຠິມຎ຺ຎິຍ ນວໂຍພ຺ພນ ວສິໂກ,
ຊຣສາ ປຣິມຖິໂຕ ປຣໍ ອນນຸຏ຺ຐິຕ ກຸສໂລ;
ອມຣິໍ ຠວຄຫເຓ ຈຣໍ ອຫໍ ອປ຺ປຏິສຣເຓ,
ສຣຓໍ ຠວ ຠຄວໍ ມມ ຠວນີຣຘິ ຕຣເຓ.
ນິຣຸໂຊ ຘຸວໍ ອຣຸຊໍ ຕນຸໍ ອຠິມຎ຺ຎິຍ ສມໂທ,
ກຸສລາສຍ ວິມຸໂຂ ຠຸສໍ ອວໂສ ຄທນິຫໂຕ;
ອມຣິໍ ຠວຄຫເຓ ຈຣໍ ອຫໍ ອປ຺ປຏິສຣເຓ,
ສຣຓໍ ຠວ ຠຄວໍ ມມ ຠວນີຣຘິ ຕຣເຓ.
ປວິຈິນ຺ຕິຍ ສກຊີວິຕໍ ອມຣໍ ຘຸວໍ ອນິຆໍ,
ອິຕິ ຊີວິຕມທຄພ຺ພິຕ ມຕິຣຸຊ຺ຌິຕ ກຸສໂລ;
ອມຣິໍ ຠວຄຫເຓ ຈຣໍ ອຫໍ ອປ຺ປຏິສຣເຓ,
ສຣຓໍ ຠວ ຠຄວໍ ມມ ຠວນີຣຘິ ຕຣເຓ.
ປຣຫິໍສນ ຘນໂມສນ ປຣທາຣິກ ນິຣໂຕ,
ຘຣນີປຕິ ຄຫິໂຕ ພຫຸ ວຘພນ຺ຘນ ນິຫໂຕ;
ອມຣິໍ ຠວຄຫເຓ ຈຣໍ ອຫໍ ອປ຺ປຏິສຣເຓ,
ສຣຓໍ ຠວ ຠຄວໍ ມມ ຠວນີຣຘິ ຕຣເຓ.
ນຣໂກທກ ປຕິໂຕ ຄິຣິຕຣຸມຕ຺ຖກ ຄລິໂຕ,
ມິຄວາຬກ ຄຫິໂຕ ວິສຘຣ ຊາຕິຫິ ຑສິໂຕ;
ອມຣິໍ ຠວຄຫເຓ ຈຣໍ ອຫໍ ອປ຺ປຏິສຣເຓ,
ສຣຓໍ ຠວ ຠຄວໍ ມມ ຠວນີຣຘິ ຕຣເຓ.
ອຠິຈາຣກ ວິຘິໂກປິຕ ນິສິຈາຣກ ຄຫິໂຕ,
ສວິໂສທນ ສຫສາທນ ປຠຸຕີຫິ ຈ ຂລິໂຕ;
ອມຣິໍ ຠວຄຫເຓ ຈຣໍ ອຫໍ ອປ຺ປຏິສຣເຓ,
ສຣຓໍ ຠວ ຠຄວໍ ມມ ຠວນີຣຘິ ຕຣເຓ.
ສຍເມວຈ ສຊໂນປຣິ ກຸປິໂຕ ມຕິວິຍຸໂຕ,
ສວິສາທນ ຄລກນ຺ຕນ ປຠຸຕາມິຕ ຂລິໂຕ;
ອມຣິໍ ຠວຄຫເຓ ຈຣໍ ອຫໍ ອປ຺ປຏິສຣເຓ,
ສຣຓໍ ຠວ ຠຄວໍ ມມ ຠວນີຣຘິ ຕຣເຓ.
ປິຕຸປູຊນ ນິຣຕາສຍ ສຸຂິໂຕ ປິຕຸທຍິໂຕ,
ມຣເຓນຈ ປິຕຸໂນ ຠຸສໍ ອນຸໂສຈນ ນິຣໂຕ;
ປຣຸທິໍ ຈິຣໍ ອຕິທຸສ຺ສຫ ກສິເຣ ຠວຄຫເຓ,
ສຣຓໍ ຠວ ຠຄວໍ ມມ ຠວນີຣຘິ ຕຣເຓ.
ສມຸປຏ຺ຐິຍ ຊນິກໍ ນິຊໍ ອຠິວາທນ ປຣໂມ,
ມຣເຓນຈ ຊນິກາຍນຸສຣິຕາ ຄຸຓມຫິມໍ;
ປຣຸທິໍ ຈິຣໍ ອຕິທຸສ຺ສຫ ກສິເຣ ຠວຄຫເຓ,
ສຣຓໍ ຠວ ຠຄວໍ ມມ ຠວນີຣຘິ ຕຣເຓ.
ຄຸຣຸເທວຕ ປຕິມານນ ປຣໂມ ປິຍສຸວໂຈ,
ສມຸປາສິຕຈຣໂຓ ຄຸຣຸມຣເຓນຕິທຸຂິໂຕ;
ປຣຸທິໍ ຈິຣໍ ອຕິທຸສ຺ສຫ ກສິເຣ ຠວຄຫເຓ,
ສຣຓໍ ຠວ ຠຄວໍ ມມ ຠວນີຣຘິ ຕຣເຓ.
ຆຣເມຘິຕໍ ອຸປໂຄມິຕວິຠໂວ ຣຕິພຫຸໂລ,
ມຣເຓ ປິຍຠຣິຍາສຸຕທຸຫິຕູ’ນຕິກຣຸຓໍ;
ປຣຸທິໍ ຈິຣໍ ອຕິທຸສ຺ສຫ ກສິເຣ ຠວຄຫເຓ,
ສຣຓໍ ຠວ ຠຄວໍ ມມ ຠວນີຣຘິ ຕຣເຓ.
ປິຍປຸພ຺ພຊ ສຫຊານຸຊ ຠຄິຓິທ຺ວຍ ມຣເຓ,
ນິຊ ພນ຺ຘວ-ສຂ-ສິສ຺ສກ ມຣເຓ ປ຺ຍຕິກຣຸຓໍ;
ປຣຸທິໍ ຈິຣໍ ອຕິທຸສ຺ສຫ ກສິເຣ ຠວຄຫເຓ,
ສຣຓໍ ຠວ ຠຄວໍ ມມ ຠວນີຣຘິ ຕຣເຓ.
ຊຄຕີປຕິ ຄຫຓາ ຣິປຸຊນຕກ຺ກຣ ຫຣຓາ,
ສຣິໂຕທກ ວຫຓາ ປຸຖຸຊລິຕານລ ທຫຓາ;
ປຣຸທິໍ ຫຕວິຠໂວ ຈິຣມິຫ ທຸຄ຺ຄຕິຄຫເຓ,
ສຣຓໍ ຠວ ຠຄວໍ ມມ ຠວນີຣຘິ ຕຣເຓ.
ອຕິທຸຄ຺ຄມ ວິສມາກຸລ ຠວສງ຺ກຏ ປຕິເຕ,
ພ຺ຍສນໍ ຈິຣມິຕິ ທຸສ຺ສຫໍ ອນຸຠູຍປິ ວິມິຕໍ;
ນ ຊເຫ ສຸຂລວວຎ຺ຈິຕຫທໂຍ ຠວຕສິນໍ,
ຕມປາກຸຣຸ ກຣຸຓານິຘິ ຕສິນໍ ມມ ກສິຓໍ.
ຊນນາວຘິ ມຣຓໍ ວິຍ ມຣຓາວຘິ ຊນນໍ,
ອຸຠເຍນປິ ຠຍເມວຫິ ຠວໂຕ ມມ ນິຍຕໍ;
ສິວເມວຈ ຊນນາວຘິ ມຣຓາວຘິ ຣຫິຕໍ,
ທທ ເມ ສິວໍ ອມຕນ຺ທທ ຕໍ ອນາສວ ຠຄວໍ.
ຈິຣທິກ຺ຂິຕມປິ ເມ ມນໍ ອນິວາຣິຕ ຕສິນໍ,
ຠວໂຕ ຠວ ຣຕິປີລິຕໍ ອຫໂຫ ກລິຆຏິຕໍ!
ຕມໂຕ ປິຕ ຠຍໂຕ ມມມວ ເມ ຠວ ສຣຓໍ,
ຠຄວໍ ປຏິສຣຓໍ ມມ ຠວນີຣຘິ ຕຣຓໍ.