📜

ນໂມ ຕສ຺ສ ຠຄວໂຕ ອຣຫໂຕ ສມ຺ມາສມ຺ພຸທ຺ຘສ຺ສ

ປຊ຺ຊມຘຸ

ອານນ຺ທ ຣຎ຺ຎ ຣຕນາທິ ມຫາ ຍຕິນ຺ທ,

ນິຈ຺ຈປ຺ປພຸທ຺ຘ ປທຸມປ຺ປິຍ ເສວິນງ຺ຄີ;

ພຸທ຺ຘປ຺ປິເຍນ ຆນ ພຸທ຺ຘ ຄຸຓປ຺ປິເຍນ,

ເຖຣາລິນາ ຣຈິຕ ປຊ຺ຊມຘຸໍ ປິພນ຺ຕຸ.

໑.

ອຸຓ຺ຓາປປຸຓ຺ຓສສິມຓ຺ທລໂຕ ຄລິຕ຺ວາ,

ປາທມ຺ພຸຊງ຺ຄຸລິ ທລຏ຺ຐ ສຸຘາ ລວານໍ;

ປນ຺ຕີວ ສຕ຺ຖຸ ນຂປນ຺ຕິ ປຊາວິເສສໍ,

ປີເຓຕຸ ສຸທ຺ຘ ສຸຂິຕມ຺ມຓ ຕຸຓ຺ຑປີຕາ.

໒.

ຂິຕ຺ຕາຍ ມາຣຣິປຸນາ ປຣິວຕ຺ຍ ສຕ຺ຖຸ,

ປາທສ຺ສຍາ ຊິຕ ທິສາຍ ສິຕຕ຺ຕລາຍ;

ຍາ ເຊຕິ ກຎ຺ຈນ ສຣາວລິຍາ ສິຣິໍ ສາ,

ເທຕນ຺ຄິນໍ ຣຓຊຍງ຺ຄຸລິປນ຺ຕິກນ຺ຕາ.

໓.

ໂສວຓ຺ຓ ວຓ຺ຓ ສຸຂຸມຈ຺ຉວິ ໂສມ຺ມ ກຸມ຺ມ,

ປິຏ຺ຐີວ ປິຏ຺ຐິ ກມຕຸນ຺ນຕິ ຠາຕິ ເຍສໍ;

ເຕສຸປ຺ປຕິຏ຺ຐິຕສຸໂກມລທີຆປຓ຺ຫິ,

ປາທາ ຊິນສ຺ສ ປທທນ຺ຕຸ ປທໍ ຊນສ຺ສ.

໔.

ອຈ຺ເຉຣ ປງ຺ກຊສິຣໍ ສິຣິຍາ ສກາຍ,

ເຍ ມທ຺ທິໂນ ວິຍ ຈຣນ຺ຕິ ສໂຣຊ ສີເສ;

ສຎ຺ຈຸມ຺ພິຕາ ວິຍ ຈ ຕານິ ປຣາຄ ຣາຄາ,

ເຕ ນີຣຊາ ມຸນິປທາ ປທທນ຺ຕຸ ລກ຺ຂິໍ.

໕.

ອຄາມິ ກາລ ຊນ ມງ຺ຄລ ຠຕ຺ຕຸ ຠາວໍ,

ວ຺ຍາກຕ຺ຕຸມຕ຺ຣ ກຸສເລນິວ ນິມ຺ມິຕານິ;

ຍາຕ຺ຣາສຸມຏ຺ຐສຕມງ຺ຄລກ຺ຂຓານິ,

ສາເຘຕຸ ນໍ ປທຍຸຄໍ ຊຍມງ຺ຄລານິ.

໖.

ສສ຺ເສວິຊນ຺ຕຸວຣສນ຺ຕິປຸຣປ຺ປເວເສ,

ນິຈ຺ຈໍ ສຸສຊ຺ຊ ຐປິຕານິວ ມງ຺ຄລາຍ;

ເຍ ເຕ ທຘນ຺ຕິ ກລມງ຺ຄລລກ຺ຂຓານິ,

ວຕ຺ຕນ຺ຕຸ ເຕ ຊິນປທາ ຊຍມງ຺ຄລາຍ.

໗.

ສພ຺ເພຠິຠູຍ ສປເທສຸ ນິປາຕນສ຺ສ,

ສຎ຺ຎາຓກໍ ວິຍ ຍທສ຺ສິຕສພ຺ພໂລໂກ;

ປາທາຕ຺ຍໂຘກຕຕິໂລກສິໂຣວຣາ ປິ,

ໂລກໍ ປຸຓນ຺ຕຸ ຊຍມງ຺ຄລກາຣຓານິ.

໘.

ໂລກຕ຺ຕເຍກສຣຓຕ຺ຕວິຠາວນາຍ,

ສຊ຺ໂຊ ວ ຕິຏ຺ຐຕິ ຍຫິໍ ສຸວິຠຕ຺ຕໂລໂກ;

ຕໍ ສພ຺ພໂລກປຏິພິມ຺ພິຕທປ຺ປຓາຠໍ,

ປາທທ຺ວຍໍ ຊນສຸສຊ຺ຊນເຫຕຸ ໂຫຕຸ.

໙.

ໂລກຸຕ຺ຕຣາຍ ສິຣິຍາຘິຄມາຍ ສຸຏ຺ຐຸ,

ຣຊນ຺ຕິ ຍຕ຺ຖ ທິຄຸຓານິວ ປາຕຸ ຠູຕາ;

ຈກ຺ກາສນາຠິສຫເນມິສຫສ຺ສຣານິ,

ຕ຺ຍງ຺ຆີ ທິສນ຺ຕຸ ສກລິສ຺ສຣິຍໍ ຊນສ຺ສ.

໑໐.

ຍຕ຺ຣຸລ຺ລສນ຺ຕິ ທຸວິຘານິວ ປາຕູ ຠູຕາ,

ຘມ຺ມສ຺ສສພ຺ພຠຸວນສ຺ສ ຈ ອິສ຺ສຣຕ຺ເຕ;

ຈກ຺ການິ ຈກ຺ກສທິສານິ ສຸທສ຺ສນສ຺ສ,

ຕານຊ຺ຊ ຊນ຺ຕຸ ສຣຓາ ຈຣຓານິ ໂຫນ຺ຕຸ.

໑໑.

ສຕ຺ເຕສຸ ວຈ຺ຉຕຸ ສິຣີ ສິຣິວຈ຺ຉເກນ,

ໂສວຕ຺ຖິ ໂສຕ຺ຖິມນຸຕິຏ຺ຐຕຸ ປຸຄ຺ຄເລສຸ;

ນນ຺ທິໍ ຊນານມນຸວຕ຺ຕຕຸ ນນ຺ທິວຕ຺ຕີ,

ສີສານລໍກຸຣຸຕຸ ປາທວຕໍສໂກ ປິ.

໑໒.

ຠທ຺ທາຍ ປີຐມຸປຄຈ຺ຉຕຸ ຠທ຺ທປີຐໍ,

ວຸທ຺ຘິໍ ຊນານມນຸວຕ຺ຕຕຸ ວທ຺ຘມານໍ;

ປຸຓ຺ຓຕ຺ຕມງ຺ຄິມນຸກຸພ຺ພຕຸ ປຸຓ຺ຓກຸມ຺ໂຠ,

ປາຕິ ຈ ປາຕຸ ສຕຕໍ ຊນຕໍ ອປາຍາ.

໑໓.

ເສຕາຕປຕ຺ຕມປເນຕມຆາຕເປ ຕໍ,

ຂຄ຺ໂຄ ວິຉິນ຺ທຕຸ ສທາ ທຸຣິຕາຣິວຄ຺ເຄ;

ສໍກ຺ເລສທາຫມປເນຕຸ ສຕາລວຓ຺ຏ,

ສໍວີຊນີ ກຸມຕິມກ຺ຂິກໂມຣຫຕ຺ໂຖ.

໑໔.

ອາກຑ຺ຒໂນ ຊນວິໂລຈນມຕ຺ຕນິນ຺ນໍ,

ວາເຣຕຸ ສພ຺ພຄຕິວາຣນມງ຺ກຸໂສ ໂສ;

ປາທມ຺ພຸຊສ຺ສິຣິວິລາສນິເກຕນໍ ວ,

ປາສາທລຂຓມຸເປຕຸ ມໂນປສາທໍ.

໑໕.

ປາຓີນມຕ຺ຕຠຊຕໍ ວຣປຸຓ຺ຓປຕ຺ຕໍ,

ສມ຺ມາ ທທາຕຸ ປທນິສ຺ສິຕປຸຓ຺ຓປຕ຺ໂຕ;

ປາເທສຸ ຊນ຺ຕຸ ມນພນ຺ຘນທາມຠູຕໍ,

ທາມໍ ທເມຕຸ ວິມລໍ ຊນຕມ຺ມນານິ.

໑໖.

ອຸຓ຺ຫີສກຸປ຺ປລມຓີປທຸເມຫິ ປາທາ,

ສສ຺ເສວິຊນ຺ຕຸກຣຓານິ ວິຠູສຍນ຺ຕຸ;

ສນ຺ເນຕ຺ຕນາວຸປຄຕານມນຄ຺ຆການິ,

ໂພຊ຺ຌງ຺ຄສຕ຺ຕຣຕນານິ ທເທ ສມຸທ຺ໂທ.

໑໗.

ອຸຕ຺ຕຸງ຺ຄ ນິຈ຺ຈລຄຸງາ ຊິຕຕາຍ ນິຈ຺ຈໍ,

ເສວີວ ປາທສິຣິ ນິຈ຺ຈ ສມຸພ຺ພຫໍ ວ;

ອຕ຺ຣາປິ ສກ຺ກຠວນຸພ຺ພຫເຓ ນິຍຸຕ຺ໂຕ,

ປາທຏ຺ຐເມຣຸ ຠວຕໍ ຠວຕໍ ວິຠູຕ຺ຍາ.

໑໘.

ໂສ ຈກ຺ກວາຬສິຂຣີ ປ຺ຍວຕໍ ສມນ຺ຕາ,

ສພ຺ພູປສຄ຺ຄວິສຣາຊນຕໍ ສມຄ຺ຄໍ;

ທີປາ ປຸຖູປິ ຈຕຸໂຣ ທ຺ວິສຫສ຺ສ ຂຸທ຺ທາ,

ຘາເຣນ຺ຕ຺ວປາຍປຕມານມທຕ຺ວ ຊນ຺ຕຸໍ.

໑໙.

ສູໂຣ ປໂພຘຍຕຸ ຊນ຺ຕຸ ສໂຣຣຸຫານິ,

ຈນ຺ໂທ ປສາທ ກຸມຸທານິ ມໂນທເຫສຸ;

ນກ຺ຂຕ຺ຕຊາຕມຂິລໍ ສຸຠຕາຍ ໂຫຕຸ,

ຈກ຺ກໍ ຘຊໍ ຣິປຸຊຍາຍ ຊຍທ຺ຘຊາຍ.

໒໐.

ເຊຕຸໍ ສສໍສທ-ສຸທສ຺ສນ-ຈກ຺ກວຕ຺ຕິ,

ຈກ຺ການຸຄນ຺ຕລລິຕໍ ຍຫິມາວເຫຍ຺ຍ;

ຈກ຺ກາຓຸວຕ຺ຕິ ປຣິສາວຕ-ຈກ຺ກວຕ຺ຕິ,

ນໍວຕ຺ຕຕໍ ປທຍຸຄໍ ຊນຕາ ຫິຕາຍ.

໒໑.

ປຸເຊຕຸມາຄຕ ວຕາ ວຊິຣາສນຏ຺ຐ,

ມິນ຺ເທນ ຉຑ຺ຑິຕ ມຫາວິຊຍຸຕ຺ຕຣາຂ຺ຍໍ;

ສໍຂໍ ປວິຏ຺ຐມິວ ມາຣຠຍາ ປທາໂຘ,

ປາທຏ຺ຐສໍຂມິຫ ວຕ຺ຕຕຸ ສນ຺ຕິຍາ ໂວ.

໒໒.

ໂສວຓ຺ຓມຈ຺ຉຍຸຄລໍ ສິວຠຕ຺ຕ ໂຠເຄ,

ອິຈ຺ຉາ ພຫູປກຣຓໍ ຠວຕໍ ຊນານໍ;

ກຸມ຺ຠີລຘິຄ຺ຄຫິຕໂຕ ວ ປທຸຕ຺ຖຈິຕ຺ຕາ,

ປາທມ຺ພຸຊາກຣ ວິຄາຫິ ຕຸ ໂນປໂຫນ຺ຕຸ.

໒໓.

ສຕ຺ຕາປຄາ ຊນມໂນຊ ມເລ ຊຫນ຺ຕຸ,

ສໍກ຺ເລສທາຫມປເນນ຺ຕຸ ທຫາ ຈ ສຕ຺ຕ;

ເສລາ ຈ ສຕ຺ຕ ວິທຘນ຺ຕຸ ຊນສ຺ສ ຕານໍ,

ໂລກປ຺ປສິທ຺ຘິຊນເນ ຠວຕໍ ປຕາກາ.

໒໔.

ປາຏງ຺ກິ ສນ຺ຕິ ຄມເນ ຠວຕູປກາຣາ,

ທາເຫຕ຺ຕເນສຸ ຊຫຕໍ ປທຈາມຣໍ ຕໍ;

ສລ຺ໂລກໂລຈນມຫຸສ຺ສວ-ອຸສ຺ສິຕໍ ວ,

ວຕ຺ເຕຍ຺ຍ ໂຕຣຓມນຸຕ຺ຕຣມງ຺ຄລາຍ.

໒໕.

ຍສ຺ມິໍ ມິຄິນ຺ທ ຄຕ ຠີຕິ ພລາວ ທຑ຺ຒ,

ທານາ ນຕາ ສິຣວິທາຣຓ ປີຬິຕາວ;

ນາລາຄິຣີ ກຣິວໂຣ ຄິຣິເມຂໂລ ຈ,

ຕໍ ສີຫວິກ຺ກມປທໍ ຫນຕາ ຆທນ຺ຕິໍ.

໒໖.

ປາປາຫິໂນ ຫນຕຸ ປາທສຸວຓ຺ຓຣາຊາ,

ວ຺ຍຄ຺ຆາຘິໂປ ກລິຊເນ ອທຕໍ ອເສສໍ;

ວາລາຫ-ອສ຺ສປຕິ ສມ຺ປຕິຕຸໍ ອທຕ຺ວາ,

ປາເຍສຸ ປາປຍຕຸ ສນ຺ຕິປຸຣມ຺ປຊາໂຍ.

໒໗.

ຉທ຺ທນ຺ຕ ທນ຺ຕິ ລລິຕໍ ຄລິຕໍ ຣຸສມ຺ຫາ,

ລຸທ຺ເທຕ຺ຕ ທຸພ຺ຠິນິ ທິເສ ອຈລໍ ທຘາໂນ;

ປາທຏ຺ຐຫຕ຺ຖິປຕິ ສມ຺ປຕິ ຊນ຺ຕຸຕາເສ,

ຕາເສຕຸ ຫາສມປຣນ຺ທິສຕໍ ສຕານໍ.

໒໘.

ສພ຺ພງ຺ຄິໂນ ຈຣຓຸໂປສຖ ຫຕ຺ຖິຣາຊາ,

ປາເປຕຸ ສພ຺ພຈຕຸທີປິກຣຊ຺ຊລກ຺ຂິໍ;

ກິຕ຺ຕີວ ປາທປຣິຈາຣິກຕາ ນິຍຸຕ຺ຕາ,

ເກລສເສລປຏິມາ ຫິຕມາຈເຣຍ຺ຍ.

໒໙.

ສາມິສ຺ສ ຫໍສສມເຍ ທຫປາສພທ຺ຘ,

ມາສີນ ເວສຄມໂກ ວິຍ ປາທຫໍໂສ;

ນິຄ຺ໂຆສ ຄນ຺ຕິຊິຕໂຕ ວິຍ ມູຄປກ຺ໂຂ,

ຍາເຣຕຸ ສພ຺ພ ຊນຕາ ຠວຄນ຺ຕຸກຕ຺ຕໍ.

໓໐.

ໂອຫາຍ ທິພ຺ພສຣສິໍ ຂິລໂລກ ສພ຺ພ,

ຣມ຺ມງ຺ຆິວາປິມວຄາຫິຕວາວ ປາເທ;

ເອຣາວໂຓ ກຣິວໂຣ ມນສາຠິຣຸຬ຺ເຫ,

ຊນ຺ຕຸໍ ປຸຣິນ຺ທທປຸຣໍ ນຍຕໍ ວ ສີຆໍ.

໓໑.

ຫິຕ຺ວາ ສກມ຺ຠວນມງ຺ຆິນິເສວນຕ຺ຖ,

ມາຄມ຺ມ ຣມ຺ມ ຕຣຕາຍິຫ ນິສ຺ສິໂຕ ວ;

ປາເລຕ຺ວ ມູນິ ປທວາປິຕຣງ຺ຄຠງ຺ຄິ,

ມນ຺ຄີ ກໂຣນ຺ຕຕນຸວາສຸກິ ນາຄຣາຊາ.

໓໒.

ນາຖສ຺ສ ກຎ຺ຈນສິຂາວລຊາຕິລີລ,

ມາວິກຣໍ ວ ປທນິສ຺ສິຕໂມຣຣາຊາ;

ຕໍ ຘມ຺ມເທສນຣເວນິວ ລຸທ຺ທກສ຺ສ,

ໂລກສ຺ສ ປາປຜຓິໂນ ຫນຕໍ ອເສສໍ.

໓໓.

ສໍສາຣສາຄຣຄເຕ ສຘເນ ຊເນ ເຕ,

ເນຕມ຺ປເທ ກລຈຕຸມ຺ມຸຂເຫມນາວາ;

ນິພ຺ພາຓປຏ຺ຏນວຣໍ ຠຣຸກຈ຺ຉກນ຺ຕໍ,

ສຸປ຺ປາຣປຓ຺ຑິຕ ຄຕາ ວິຍ ອາສຸນາວາ.

໓໔.

ສມ຺ໂພຘິ ຎາຓ ປຣິປາຈຍໂຕ ມຸນິສ຺ສ,

ຠຕ຺ໂຕ ຍຖາ ຫິມວຕທ຺ທິ ສມາຘິເຫຕຸ;

ເອວມ຺ມເນນ ຠຊຕໍ ຫິມວທ຺ທິປາເທ,

ສມ຺ໂພຘິຎາຓ ປຣິປາຈນເຫຕຸ ໂຫຕຸ.

໓໕.

ທຬ຺ຫໍ ປຣາຊິຕຕຍາ ມຸນິນາ ສເຣນ,

ສຸຎ຺ຎສ຺ສໂຣປຄຕ ປຎ຺ຊຣ ພນ຺ຘໂນວ;

ໂສ ປາທປຎ຺ຊຣຄໂຕ ກຣວີກປກ຺ຂີ,

ສພ຺ເພສມປ຺ປີຍາວຈຎ຺ຊຫຕາ ຠວນ຺ຕໍ.

໓໖.

ເຕ ຈກ຺ກວາກ ມກຣາ ອປິ ໂກຎ຺ຈ ຊີວໍ,

ຊີວາທິ ປກ຺ຂິວິສຣາ ສຣສີວ ຠຸຕ຺ຕໍ;

ເວສ຺ສນ຺ຕເຣນ ຈຣຓມ຺ພຸຊິ ນິພ຺ຠຊນ຺ຕາ,

ຊນ຺ຕຸ ຕຫິໍ ວິຍ ປເທ ສຸຣເມນ຺ຕຸ ນິຈ຺ຈໍ.

໓໗.

ຕໍ ຈນ຺ທກິນ຺ນຣຄຕິໍວ ຄຕສ຺ສ ໂພຘິ,

ສຕ຺ຕສ຺ສ ຕສ຺ສ ສປຊາປຕິກສ຺ສ ຠາວໍ;

ສໍສູຈຍນ຺ຕ ປທ ກິນ຺ນຣ ກິນ຺ນຣີ ເວ,

ສາມຄ຺ຄິມຄ຺ຄ ປຏິ ປຕ຺ຕິສຸ ປາປຍນ຺ຕຸ.

໓໘.

ສໍຣາຊຘານິມຸສໂຠ ວຫຕຄ຺ຄ ຠາຣໍ,

ປີຕິປ຺ປໂຍ ປຊນເຍຍ຺ຍ ສວຈ຺ຉເຘນຸ;

ສສ຺ເສວິໂນ ອຠິຣເມນ຺ຕຸ ຉກາມສຄ຺ຄາ,

ຘາເຣນ຺ຕຸ ຌາຍິມິຫ ໂສຬສ ຘາຕຸຘາມາ.

໓໙.

ສຸຕ຺ວາ ຊິນສ຺ສ ກຣວີກ ສຣມ຺ມນຸຎ຺ຎໍ,

ອຎ຺ໂຎຎ຺ຎ ຠີຕິຣຫິຕາ ອປິ ປຈ຺ຈນີກາ;

ຫິຕ຺ວາ ຄຕິໍ ວິຍ ຐິຕາ ປທສຕ຺ຕຣູປາ,

ສພ຺ພໍ ຠວສ຺ສິຕ ຊນານຄຕິໍ ຫນນ຺ຕຸ.

໔໐.

ໂສວຓ຺ຓ ກາຫຬ ຍຸໂຄ ປມມິນ຺ທິຣາຍ,

ສນ຺ນີຣປຸປ຺ຜ ມຸກຸໂລປມມຸສ຺ສວາຍ;

ນິຈ຺ຈໍ ສຸສຊ຺ຊ ຐປິຕໍ ມຸນິ ຕິຏ຺ຐຕນ຺ເຕ,

ຊງ຺ຆາທ຺ວຍໍ ຊນວິໂລຈນ ມງ຺ຄລາຍ.

໔໑.

ລຂ຺ຍາ ວິລາສ ມຸກຸຣທ຺ວຍ ສນ຺ນິກາສໍ,

ຕາຑງ຺ກ ມຓ຺ຑນ ວິຑມ຺ພກມໍສຸ ສຓ຺ຑໍ;

ຊານຸທ຺ວຍໍ ລຬິຕ ສາຄຣ ພຸພ຺ພລາຠໍ,

ໂຫຕໍ ຊຄຕ຺ຕຍ ນິຊຕ຺ຕ ວິຠູສິຕຸນ຺ເຕ.

໔໒.

ຉທ຺ທນ຺ຕິ ທິນ຺ນ ວຣທນ຺ຕ ຍຸໂຄປມານາ,

ຕໍ ຫຕ຺ຖິ ໂສຓ຺ຑ ກມ ປຸຓ຺ຓ ຄຸຓາ ຕໂວຣູ;

ລີລ ປໂຍຘິ ສິຣິ ເກຬິ ສຸວຓ຺ຓຣມ຺ຠາ,

ຂນ຺ຘາວ ເທນ຺ຕຸ ປຣິປຸຓ຺ຓ ຄຸເນ ຊນານາໍ.

໔໓.

ຊງ຺ຆກ຺ຂ ກທ຺ວ຺ຍ ສມປ຺ປິຕ ຈິຕ຺ຕປາທ,

ຈກ຺ກທ຺ວຍີ ມນມໂນຊຫໂຍ ມຸເນ ເຕ;

ໂສນີ ຣໂຖ ສິຣິວໂຫ ມນສາ ຠິຣຸຬ຺ຫໍ,

ໂລກຕ຺ຕຍໍ ສິວປຸຣໍ ລຫຸ ປາປຍາຕຸ.

໔໔.

ຣມ຺ໂມຣ ປາກຏ ຕຏາກ ຕຏາ ສວນ຺ຕ,

ໂຣມາວລີ ຊລ ປນາລິກ ໂກຏິກຏ຺ຐາ;

ນາຠີ ຄຠີຣ ສຣສີ ສິຣິ ເກຬິຕາ ເຕ,

ສສ຺ເສວິນໍ ວ຺ຍສນ ຆມ຺ມມລໍ ສເມຕຸ.

໔໕.

ກນ຺ຕິຈ຺ຉຏາ ລຸຬິຕ ຣູປ ປໂຍຘິ ນາຠິ,

ອາວຏ຺ຏ ວຏ຺ຏິຕ ນິມຸຊ຺ຊິຕ ສພ຺ພໂລໂກ;

ໂສຠຄ຺ຄ ໂຕຍ ນິວຫໍ ວິສໂສ ປິວິຕ຺ວາ,

ໂລກຸຕ຺ຕຣາທິ ສຸຂ ມຸຈ຺ຉິຕຕໍ ປຍາຕຸ.

໔໖.

ຄມ຺ຠີຣ ຈິຕ຺ຕຣຫທໍ ປຣິປູຣຍິຕ຺ວາ,

ຕໍ ສນ຺ທມານ ກຣຸຓມ຺ພຸ ປວາຫ ຕຸລ຺ຍາ;

ໂຣມາລິວລ຺ລິຫຣິ ນາຠິ ສຸຠາລວາລາ,

ເທຕໍ ລຫຸໍ ສິວຜລໍ ຠຊຕໍ ມຸເນ ເຕ.

໔໗.

ຈາຣູຣ ສາຣິຜລໂກ ກຸຏິລຄ຺ຄ ໂລມ,

ປນ຺ຕີ ວິຠຕ຺ຕິ ສຫິໂຕ ສິຣິ ເກຬິ ສຊ຺ໂຊ;

ສຄ຺ຄາປວຄ຺ຄ ສຸຂ ຊູຕກ ເກຬິ ເຫຕຸ,

ໂຫຕໍ ຕິໂລກ ສຸຂ ຊູຕກ ໂສຓ຺ຑການໍ.

໔໘.

ຄມ຺ຠີຣ ຈິຕ຺ຕ ຣຫໂທ ທຣ ຄາຫມານ,

ເມຕ຺ຕາທຍາ ກຣິ ວຘູ ກຣ ສນ຺ນິ ກາສາ;

ສພ຺ພງ຺ຄິນໍ ສິວຜລໍ ຕນຸ ເທວ ຣຸກ຺ເຂ,

ສາຂາ ສຂາ ຕວ ຠຸຊາ ຠຊຕໍ ທທນ຺ຕຸ.

໔໙.

ນິຫາຣ ພິນ຺ທຸ ສຫິຕຄ຺ຄທໂລປ ໂສຠິ,

ພ຺ຍາລມ຺ພ ຣຕ຺ຕ ປທຸມທ຺ວຍ ຠງ຺ຄິ ຠາຊາ;

ປາປາຣິສີສລຸນເຕນິວ ຣຕ຺ຕ ຣຕ຺ຕາ,

ຣຕ຺ຕາ ກຣາ ຕວ ຠວຸມ຺ຠຸວິ ມງ຺ຄລາຍ.

໕໐.

ຣຸປສ຺ສິຣີ ຈຣິຕ ຈງ຺ກມ ວິພ຺ຠມາ ເຕ,

ປິຏ຺ຐີ ຍຖາ ກລລ ມຸທ຺ຘນິ ເສຕຸ ຠູຕາ;

ເອວໍ ຠວຓ຺ຓວ ສມຸຕ຺ຕຣຓາຍ ເສຕຸ,

ໂຫຕມ຺ມຫາກນກ ສໍກມ ສນ຺ນິກາສາ.

໕໑.

ສທ຺ຘມ຺ມ ເທສນ ມໂນຫຣ ເຠຣິນາທ,

ສໍຈາຣເຓ ສິວປຸຣໍ ວິສິຕຸໍ ຊນານໍ;

ຄີວາ ສຸວຓ຺ຓມຍ ຈາຣຸ ມຸຕິງ຺ຄ ເຠຣິ,

ຠາວມ຺ຠຊາ ຠວຕຸ ຠູຕ ວິຠູຕິຍາ ເຕ.

໕໒.

ລຂີ ນິວາສ ວທນມ຺ພຸຊ ມຕ຺ຕ ນິນ຺ນ,

ມາກຑ຺ຒຍໍ ຊນ ວິໂລຈນ ຈຎ຺ຈຣີເກ;

ໂສຣພ຺ຠ ຘມ຺ມ ມກຣນ຺ທ ນິສນ຺ທມານໍ,

ປິເຓຕຸ ເຕນ ສຣເສນ ສຠາ ຊເນ ເຕ.

໕໓.

ລຂີ ສມາຣຸຫິຕ ວຕ຺ຕຣເຖ ຣຖງ຺ຄ,

ທ຺ວນ຺ທານຸ ກາຣິ ມິຄ ຣາຊ ກໂປລ ລີລໍ;

ຕາທງ຺ກ ມຓ຺ຑລຍຸຄໍ ວິຍ ກຓ຺ຓຠາຊໍ,

ຄຓ຺ຑຕ຺ຖລທ຺ວ຺ຍມລໍກຸຣຸຕໍ ຊນຕ຺ເຕ.

໕໔.

ລາວຓ຺ຓ ມຓ຺ຓວ ປວາຬ ລຕາ ທ຺ວຍາຠໍ,

ຕນ຺ເທຫ ເທວ ຕຣຸ ປລ຺ລວ ກນ຺ເຕ ມນ຺ຕໍ;

ວຕ຺ຕາຣວິນ຺ທ ມກຣນ຺ທ ປຣາຊິໂສຠໍ,

ຣຕ຺ຕາຘຣທ຺ວຍມໂຘ ກຸຣຸຕໍ ຊນາຆໍ.

໕໕.

ອຸຓ຺ຓາ ສກຸນ຺ຕິຄຕ ມຕ຺ຖກ ນຕ຺ຖຸ ກູປ,

ສຸພ຺ຠູ ລກາຣ ສຫິໂຕຏ຺ຐ ປວາຬ ນາວາ;

ຄຕ຺ຕຸຕ຺ຕຣຣຓ຺ຓວ ຄຕາ ຕວ ຊນ຺ຕຸການໍ,

ໂຫຕໍ ຠວຓ຺ຓວ ສມຸຕ຺ຕຣນຍ ນາຖ.

໕໖.

ອິສໍ ວິກາສ ປທຸໂມທຣ ເກສຣາລິ,

ລີລາ ວິນທ຺ຘ ຣຸຈິຣາ ຕວ ທນ຺ຕ ປນ຺ຕິ;

ວານີ ວຘູ ຘຣິຕ ມາລຕິ ມາລ຺ຍ ຕຸລ຺ຍາ,

ຕສ຺ສໍ ຊານສ຺ສ ມນຣຎ຺ຊນ ມາຈເຣຍ຺ຍ.

໕໗.

ສທ຺ຘມ຺ມ ນິຊ຺ຌຣ ສຸຣຕ຺ຕ ສິລາຕລາຠາ,

ຊິວ຺ຫາ ວຈີ ນຏ ວຘູ ກລ ຣງ຺ຄ ຠູຕາ;

ສທ຺ຘມ຺ມ ເສຏ຺ຐ ຕຣຓີ ນິຫິຕປ຺ປິຍາ ເຕ,

ສໍສາຣ ສາຄຣ ສມຸຕ຺ຕຣຓາຍ ໂຫຕຸ.

໕໘.

ທນ຺ຕໍສຸ ກຎ຺ຈຸກີຕ ຣຕ຺ຕຘໂຣ ປຘາເນ,

ຊິວ຺ຫາ ສຸຣຕ຺ຕ ສຍເນ ມຸຂ ມນ຺ທິຣຏ຺ເຐ;

ອາໂມກ຺ຂ ມຸຕ຺ຕິ ວຘຸຍາ ສຍິຕາຍ ຕຸຍ຺ຫໍ,

ກຸພ຺ພນ຺ຕຸ ສໍຄມ ມລໍ ຊນ ໂສຕຸ ກາມິ.

໕໙.

ອຸຓ຺ຓາ ຕຖາຠິນວ ປຕ຺ຕ ວຣາຠິ ຣາມາ,

ລີໂລລ຺ລສນ຺ຕ ຠມຸກທ຺ວຍ ນີລ ປຕ຺ຕາ;

ຆາໂນຣຸ ຈາຣຸ ກທລີ ວທນາ ລວາລາ,

ຕຸຍ຺ຫໍ ປວຕ຺ຕຕຸ ຈິຣໍ ຊນ ມງ຺ຄລາຍ.

໖໐.

ພາລຕ຺ຖລີ ຫຣິ ສິລາຕລ ປິຏ຺ຐິກຏ຺ຐ,

ຠູວລ຺ລຣິທ຺ວຍ ມຍູຣ ຍຸຄສ຺ສ ຕຸຍ຺ຫໍ;

ປຎ຺ຈປ຺ປຠາ ຣຸຈິຣ ປິຈ຺ຉ ຍຸຄສ຺ສິຣີກໍ,

ເນຕ຺ຕທ຺ວຍໍ ມນສິ ປຸຎ຺ຉຕຸ ປາປຘູລິໍ.

໖໑.

ອິນ຺ທີວຣານ຺ຕຄຕ ຠິງ຺ຄິກ ປນ຺ຕິ ຠງ຺ຄິ,

ປຎມ຺ພຸຊສ຺ສຣຕເຕ ວິຍ ຄຈ຺ຉປນ຺ຕີ;

ເນຕ຺ຕມ຺ພຸຊສ຺ສິຣິ ຕິໂຣກຣຓີວ ຕຸຍ຺ຫໍ,

ປມ຺ຫາວລີ ສິຣິຄເຕຫ ຕິໂຣ ກໂຣນ຺ຕຸ.

໖໒.

ວຕ຺ຕຸລ຺ລສມ຺ພຸຊ ວິໂລຈນ ຫໍສ ຕຸຓ຺ຑ,

ກຎ຺ຊໍສຸ ປິຎ຺ຊຣ ມຸລາລ ລຕາ ທ຺ວ຺ຍາຠໍ;

ໂທລາທ຺ວຍໍວ ສວຓທ຺ວ຺ຍມຕ຺ຕ ລກ຺ຂ຺ຍາ,

ໂຫຕໍ ຕວຊ຺ຊ ຊນຕາ ມຕິຈາຣເຫຕຸ.

໖໓.

ວມ຺ມີກ ມຕ຺ຖກ ສຍານກ ຠູຣິທຕ຺ຕ,

ໂຠຄິນ຺ທ ໂຠຄວລິ ວິພ຺ຠມມາ ວຫນ຺ຕິ;

ຆາໂນປຣິຏ຺ຐິຕມຸເນ ຕວ ຕຸຓ຺ຓມຸຓ຺ຓາ,

ຕຄ຺ຄາຫິໂນ ວິຍ ຊນສ຺ສ ທທາຕຸ ວິຕ຺ຕໍ.

໖໔.

ຣູປິນ຺ທິຣາຍ ວິຊເຍ ຂິລ ໂລກ ຣູປໍ,

ຆາໂຓຣຸ ຈາຣຸ ປຣິໂຆປຣິ ພທ຺ຘ ສິທ຺ຘາ;

ນີລາຠ ວາຕ ວິລຸຖນ຺ຕ ວຍທ຺ຘຊາຠາ,

ຕິຏ຺ຐນ຺ຕຸ ສຊ຺ຊ ທຸຣິຕາຣິ ຊຍາຍ ເຕ ຠູ.

໖໕.

ອຸຓ຺ຓສ຺ສິໂຕປລ ນິເວສິຕ ພຸນ຺ທ ສນ຺ຘິ,

ຆາໂຓຣຸ ປິຓ຺ຑກມຆາ ຕປ ຣຸນ຺ຘິຕຸນ຺ເຕ;

ໂຫຕມ຺ມຸຂມ຺ພຸຊ ສິຣີ ສິຣສຸສ຺ສິຕາຠໍ,

ຠູ ນີລ ປຏ຺ຏິກ ລລາຕ ສຸວຓ຺ຓ ຉຕ຺ຕໍ.

໖໖.

ຣຸປງ຺ກ ເວທນ ວິໂລຈນ ພານ ທິຏ຺ຐີ,

ຘາຣາ ນິສານ ມຓິວຏ຺ຏ ສິຣີ ສິໂຣ ເຕ;

ສິທ຺ຘາ ມໂຕສຘ ກຕຎ຺ຊນ ປຸຎ຺ຊ ລກ຺ຂີ,

ໂຫຕໍ ຊນສ຺ສ ນຍນາມຍ ນາສນາຍ.

໖໗.

ສກ຺ຂນ຺ຘ ພາຫຸຍຸຄ ໂຕຣນ ມຊ຺ຌ ຄີວາ,

ຘຣປ຺ປິຕສ຺ສິຣິຆໂຕ ປຣິ ມຸສ຺ສວາຍ;

ນີລຸປ຺ປລາວ ຐປິຕາ ສວິຠຕ຺ຕິ ກນ຺ເຕ,

ເກສາ ຠວນ຺ຕຸ ຠຸວນຕ຺ຕຍ ມງ຺ຄລາຍ.

໖໘.

ເຫມຄ຺ຆິເຍ ຐປິຕ ນີລ ສິລາ ກປາເລ,

ປຊ຺ໂຊຕ ຊາລ ລລິຕໍ ມຸນິ ສາຣຍນ຺ຕີ;

ຣູປສ຺ສິຣີ ສິຣສິ ຠູສິຕ ເຫມ ມາລາ,

ກາຣາ ກໂຣຕຸ ສຸຠຄໍ ຕວ ເກຕຸ ມາລາ.

໖໙.

ຠ຺ຍາມປ຺ປຠາລິ ຕວ ກຎ຺ຈນ ໂມຣ ກາເລ,

ສຸໂຣທເຍ ວິຕຕ ຈນ຺ທກ ຈກ຺ກລກ຺ຂີ;

ເມຆາວນທ຺ຘ ສິຂຣຸນ຺ນຕ ເຫມ ເສລາ,

ຍນ຺ຕິນ຺ທຈາປ ວິກຕີວ ທທາຕຸ ໂສຠໍ.

໗໐.

ປຏ຺ຐາຍ ເຕ ປຓິຘິໂຕ ສຸຈິ ທານ ສີລ,

ເນກ຺ຂມ຺ມ ປຎ຺ຎ ວິຣິຍກ຺ຂມ ສຈ຺ຈຘິຏ຺ຐາ;

ເມຕ຺ຕາ ອຸເປກ຺ຂິຕິ ອິເມ ທສ ປູຣໂຕວ,

ປູເຣນ຺ຕຸ ປາຣມິ ຄຸຓາ ຊນຕານມຕ຺ເຕ.

໗໑.

ປຕ຺ຕຸຕ຺ຕຣຸຕ຺ຕຣທສາ ປຓິຘານ ພີຊາ,

ເຈໂຕຣຘຣາຍ ກຣຸຓາ ຊລ ເສຂ ວຸທ຺ຘາ;

ສພ຺ພຎ຺ຎຸ ຎາຓ ຜລທາ ສຕິ ວາຏ ຄຸຕ຺ຕາ,

ຕໍ ສມ຺ຜລນ຺ທິສຕຸ ປາຣມິຕາ ລຕາ ເຕ.

໗໒.

ອາໂພຘິ ປຸຓ຺ຓມິ ປທິຏ຺ຐ ທິນາທິໂຕ ເຕ,

ສມ຺ຠາຣ ກາລ ສິຕ ປກ຺ຂ ກມາຠິ ວຸທ຺ໂຘ;

ສມ຺ປຸຓ຺ຓ ປາຣມິ ຄຸຓາມຕຣໍສິ ຕໍວ,

ສພ຺ພງ຺ຄິ ກຸນ຺ທ ກຸມຸທານິ ປໂພຘເຍຍ຺ຍ.

໗໓.

ອາປຈ຺ຉິມພ຺ຠວ ສິວປ຺ຜລ ລາຠ ທານາ,

ທານປ຺ປພນ຺ຘມປິທານ ຜລປ຺ປຠນ຺ທໍ;

ສໍວຑ຺ຒຍິ ຕ຺ວໍ ອຠິປຕ຺ຖນໂຕ ຍເຖວໍ,

ຊນ຺ຕຸຕ຺ຕຣຸຕ຺ຕຣ ຜລໍ ຂລຸ ສມ຺ຠຸນນ຺ຕຸ.

໗໔.

ອາຣມ຺ຠໂຕປ຺ປຠຸຕິ ຍາວ ຕວຄ຺ຄມຄ຺ຄາ,

ວິກ຺ຂາລິຕ ຆກລຸສໍ ສຸຈິ ສີລ ໂຕຍໍ;

ເມຕ຺ຕາ ທຍາ ມຘຸຣ ສີຕລຕາຍຸເປຕໍ,

ໂສເຘຕຸ ຕ຺ວໍວ ຠວ ນິສ຺ສິຕ ຊນ຺ຕຸ ເມຕໍ.

໗໕.

ອາປຈ຺ຈິມຕ຺ຕມຠິນິກ຺ຂມນາຠິໂຍຄາ,

ປຏ຺ຐາຍ ຕມ຺ປຠວໂຕ ປຣິປຸຓ຺ຓ ເຄຫາ;

ຕ຺ວໍ ສພ຺ພ ຊາຕິ ຄຫໂຕ ອປິ ນິກ຺ຂມິຕ຺ໂຖ,

ເອວໍ ຊນາ ຠວ ທຸຂາ ຂລຸ ນິກ຺ຂມນ຺ຕຸ.

໗໖.

ເອກຄ຺ຄໂຕ ປລ ຕເລ ນິສິຕາ ຈິຣນ຺ຘິ,

ຘາຣາ ສຸຈິຕ຺ຕຸ ສຸຕເລ ສຕິ ທຓ຺ຑ ພທ຺ເຘ;

ນິພ຺ພິຊ຺ຌິ ລກ຺ຂຓ ຘນຸຏ຺ຐິຕິ ສນ຺ຕິ ລກ຺ຂໍ,

ຂິຕ຺ຕາ ຕໂຍນມນຸ ວິຊ຺ຌຕຸ ຊນ຺ຕຸ ຂິຕ຺ຕາ.

໗໗.

ຕ຺ວໍ ປາຣມີ ຊລ ນິຘິໍ ຈຕຸຣິຫ ພາຫຸ,

ສຕ຺ຕີຫິ ສຸຕ຺ຕຣິ ຈິຣໍ ຊນໂກວ ສິນ຺ຘຸໍ;

ສມ຺ປນ຺ນ ວິກ຺ກມ ຜໂລສິ ຍຖາ ຈໂສວ,

ເອວໍ ຊນາ ວິຣິຍຕປ຺ຜລເມ ຘຍນ຺ຕຸ.

໗໘.

ສຕ຺ຕ ປຣຘ ທຫເນສຸ ຈິຣໍ ສຸຘນ຺ຕໍ,

ຂນ຺ຕີ ສຸວຓ຺ຓ ກຕ ຣູປ ສມນ຺ຕິມຕ຺ຕາ;

ສພ຺ພາ ປຣາຘມສຫິ ຕ຺ວໍອສຍ຺ຫເມວໍ,

ສພ຺ເພ ຊນາປິ ຂມເນນ ຠຊນ຺ຕຸ ສນ຺ຕິໍ.

໗໙.

ລກ຺ຂາຘິກໍ ຈຕຸຣ ສໍຂິຍ ກປ຺ປ ກາລໍ,

ສຈ຺ເຈນ ສຸຏ຺ຐຸ ປຣິຠາວິຕ ວາຈິໂນ ເຕ;

ວາຈາຍ ສຈ຺ຈ ຜຸສິຕາຍ ສເມນ຺ຕິ ຊນ຺ຕຸ,

ເອວໍ ວິສຸທ຺ຘ ວຈນາ ຊນຕາ ຠວນ຺ຕຸ.

໘໐.

ອາທິນ຺ນ ຘມ຺ມ ມຫິຍຕ຺ຖິຣ ສຸປ຺ປຕິຏ຺ຐາ,

ຘິຏ຺ຐານ ປາຣມິ ມຫາ ວຊິຣທ຺ທິ ຕຸຍ຺ຫໍ;

ສຕ຺ເຕນ ເກນ ປິ ຍຖາຫິ ອເຠຊ຺ຊ ເນຊ຺ໂຊ,

ເອວໍ ຊນາປິ ກຸສເລສຸ ອຘິຏ຺ຐ ຫນ຺ຕຸ.

໘໑.

ຕ຺ວໍ ສພ຺ພ ສຕ຺ຕ ຈິຣຠາວິຕ ເມຕ຺ຕ ຈິຕ຺ຕ,

ໂຕເຍຫິ ສໍສມິຕ ໂກຘ ມຫາ ຫຸຕາໂສ;

ໂລກຸຕ຺ຕຣໍ ຕທິຕຣໍ ຫິຕມາວຫິຕ຺ໂຖ,

ເອວໍ ຊເນສຸ ຊນຕາ ຫິຕມາວຫນ຺ຕູ.

໘໒.

ມິຕ຺ໂຕປກາຣ ປຏິປກ຺ຂ ຊນາປກາເຣ,

ຕ຺ວໍ ນິພ຺ພິກາຣ ມນໂສ ຈິຣຠາວນາຍ;

ປຕ຺ໂຕສິລາຠ ປຠຸຕຏ຺ຏຸສຸ ນິພ຺ພິກາຣໍ,

ເອວໍ ຊນານຸນຍ ໂກປ ນຸທາ ຠວນ຺ຕຸ.

໘໓.

ສມ຺ປນ຺ນ ເຫຕຸ ວິຠໂວ ຕຸສິເຕ ວິມານໍ,

ຍຸຕ຺ຕໍ ຄຸເຓຫິ ນວຠິປ຺ປທວີ ວິມານໍ;

ຕ຺ວໍ ວາຘິປຣມິຘິໂຣຫິນິຍາ ຕິໂລໂກ,

ອາໂຣຫຕຸ ຠຍ ສຸຂໍ ປທວີ ວິມານໍ.

໘໔.

ຕ຺ວໍເວຣຫໍສິ ສມພຸຊ຺ຌິ ຍຖາຈ ສມ຺ມາ,

ສມ຺ປນ຺ນ ວິຊ຺ຊ ຈຣໂຓ ສຸຄໂຕສິ ໂຫນ຺ຕຸ;

ໂລກໍ ວິໂທ ປຸຣິສທມ຺ມສຸສາຣຖີ ສິ,

ສຕ຺ຖາສິ ພຸຊ຺ຌິ ຠຄວາ ສິ ຕເຖວ ຊນ຺ຕຸ.

໘໕.

ສຈ຺ຈິຕ຺ຕ ຠູ ນິທຫິຕໍ ຊນຕາຍ ຕຸຍ຺ຫໍ,

ກລ຺ຍາຓວຓ຺ຓຣຕນຓ຺ຓວຊາຕິຠິນ຺ນໍ;

ທຸກ຺ຂຄ຺ຄິ ໂຈຣ ຊລຸປທ຺ທຸຕຊາຕິ ເຄເຫ,

ຕສ຺ສາ ສຸຂໍ ຠວຕຸ ຊີວິຕຸມາປທາຍ.

໘໖.

ວາຈາ ວິຈິຕ຺ຕ ວຣ ຕນ຺ຕຸ ຄຕງ຺ຄິ ກຓ຺ເຐ,

ສ຺ວາ ມຸຕ຺ຕ ສຄ຺ຄຸຓ ມຫາ ຣຕນາ ວລີ ເຕ;

ເວວຓ຺ຓິ ຍຕ຺ຕນິ ຠວໍ ສກລມ຺ປຫາຍ,

ໂຫຕຎ຺ຊນສ຺ສ ສິຣິ ສງ຺ຄມ ມງ຺ຄລາຍ.

໘໗.

ຕໍ ສຄ຺ຄຸຓຕ຺ຖວ ທຫຏ຺ຐ ສຸຕິປ຺ປນາລິ,

ນິສ຺ສນ຺ທມານ ຄຸຓນີຣ ນິປານ ຕິນ຺ເຕ;

ເຂຕ຺ເຕຕ຺ຕ ສຎ຺ຎິນິ ຊນາ ກຕ ໂລມ ຫໍສ,

ພີຊງ຺ກຸຣີ ກຸສລ ສສ຺ສ ຜລໍ ລຠນ຺ຕຸ.

໘໘.

ອາປາຍິກປ຺ປຠຸຕິ ທຸກ຺ຂ ນິທາຆ ກາລ,

ສນ຺ຕາປິຕາ ນິຂິລ ໂລກ ມໂນ ກທມ຺ພາ;

ຕໍ ວງ຺ຓ ເມຆ ຜຸສນາ ຫສນງ຺ກຸເຣຫິ,

ອິທ຺ຘາ ຠວນ຺ຕຸ ມຕິ ວລ຺ລຣິ ເວລ຺ລີຕາ ເຕ.

໘໙.

ເຫຕຸທ຺ທສາ ຜລທສາ ສມວຏ຺ຐິຕໍ ຕໍ,

ສພ຺ພຕ຺ຖ ສຕ຺ຕ ຫິຕມາວຫເຓນ ສິທ຺ຘໍ;

ຈິນ຺ຕາປຖາຕິຄນຸຠາວ ວິຠາວນນ຺ເຕ,

ຠູຕານມຕ຺ຖຸ ຈຣິຕພ຺ຠຸຕມຕ຺ຖ ສິຘ຺ຍາ.

໙໐.

ອງ຺ຄາຣກາສຸມຠິລງ຺ຆິຍ ທານ ກາເລ,

ຠຕ຺ຕຕ຺ຕໂນ ປທ ປຏິຈ຺ຉກ ປງ຺ກຊາ ຈ;

ຍາຕກ຺ຂເຓ ຕວ ປເທ ຘຏມຸຏ຺ຐຫິຕ຺ວາ,

ປງ຺ເກຣຸຫາໍ ສິວ ມຘຸໍ ສຣຕໍ ທທນ຺ຕຸ.

໙໑.

ສຈ຺ເຈນ ມຈ຺ຉ ປຕິ ວສ຺ສິຕ ວສ຺ສຘາຣາ,

ສຕ຺ເຕ ທຍາຍ ຕວ ວສ຺ສິຕ ວສ຺ສຘາຣາ;

ຄິມ຺ເຫ ຊນສ຺ສ ສມຍິໍສຸ ຍຖາ ຕຖາຕາ,

ຘມມ຺ພຸວຸຏ຺ຐິວ ສເມນ຺ຕຸ ກິເລສ ທາເຫ.

໙໒.

ຉທ຺ທນ຺ຕ ນາຄ ປຕິນາ ຂມຕາ ປຣາຘໍ,

ເຉຕ຺ວາ ກເຣ ຐປິຕ ທນ຺ຕວຣາວ ລຸທ຺ທໍ;

ໂລເກ ຫິຕາຍ ຐປິຕາ ຕວ ທນ຺ຕ ຘາຕຸ,

ເສຏ຺ຐາ ຊນໍ ສິວ ປຸຣໍ ລຫຸ ປາປຍນ຺ຕຸ.

໙໓.

ຕໍ ເຕມິຍາຂ຺ຍ ຍຕິໂນສ຺ສມ ມາລກມ຺ຫິ,

ໂອກິຓ຺ຓ ມຸຕ຺ຕ ກນກາ ວຸຊ ວິປ຺ປກິຓ຺ຓາ;

ກາຣຸຎ຺ຎ ວາຣິທ ຈຸໂຕ ທກ ພິນ຺ທຸ ພນ຺ຘູ,

ຘາຕຸ ສເມນ຺ຕຸ ຕວ ຊນ຺ຕຸສຸ ທຸກ຺ຂທາເຫ.

໙໔.

ຣຏ຺ຐສ຺ສ ອຕ຺ຖ ຈຣຓາຍ ອສມ຺ມຸຂສ຺ສ,

ຣາເມນ ທິນ຺ນ ຕິຓ ສໍຂຕ ປາທຸກາວ;

ຠຸຕ຺ຕາ ຕຍາ ຈິຣມສມ຺ມຸຂ ນາຄຕສ຺ສ,

ໂລກສ຺ສ ອຕ຺ຖມນຸ ຕິຏ຺ຐຕຸ ປຕ຺ຕ ຘາຕຸ.

໙໕.

ວຸຕ຺ໂຕ ຊນານມຸປທິສ຺ສ ວຣາຫ ຣຎ຺ຎາ,

ສຕ຺ຖິໍ ສຫສ຺ສ ສຣທໍ ວິຍ ຎາຍ ຘມ຺ໂມ;

ອາເທຍ຺ຍ ເຫຍ຺ຍມຸປທິສ຺ສ ຕຍາ ປວຸຕ຺ໂຕ,

ຘມ຺ໂມ ປວຕ຺ຕຕຸ ຈິຣໍ ຊນຕາ ຫິຕາຍ.

໙໖.

ມາຣາຣິ ມທ຺ທນ ຫິຕາຘິຄມໍ ກໂຣຕາ,

ຠຕ຺ໂຕ ຕຍາ ວຣ ມຫາ ຊຍ ໂພຘິ ຣາຊາ;

ສຄ຺ຄາ ປວວຄ຺ຄ ຫິຕເຫຕຸ ຊນສ຺ສ ຫນ຺ຕ຺ວາ,

ສພ຺ພນ຺ຕຣາຍມິຫ ຕິຏ຺ຐຕຸ ສຸຏ຺ຐຸ ສຊ຺ໂຊ.

໙໗.

ສາໂມທ ວຓ຺ຓ ຠຊນີ ຄຸຓ ມຎ຺ຊຣີຍໍ,

ຈຣິຍາ ລຕາ ວິກສິຕາ ຕວ ສປ຺ຜລງ຺ຄໍ;

ໂອກິຓ຺ຓ ຈິຕ຺ຕ ມຘຸເປ ຣສ ປີຓຍນ຺ຕິ,

ສມ຺ຠາວິຕາ ຠຸວິ ປວຕ຺ຕຕຸ ມຕ຺ຖເກຫິ.

໙໘.

ສມ຺ພຸທ຺ຘ ເສລວລຍນ຺ຕຣ ຊານນວ຺ຫາ,

ໂນຕ຺ຕຕ຺ຕໂຕ ຕິປຖຄາ ຍຕິ ສາຄຣຏ຺ຐາ;

ຘມ຺ມາ ປຄາ ສຸຕິ ວເສ ຕຣິເຕ ປຸຓນ຺ຕິ,

ສມ຺ຠາຣ ສສ຺ສມິຫ ວຕ຺ຕຕຸ ປຈຍນ຺ຕິ.

໙໙.

ປຎ຺ຎາຓ ກູປ ສິຕ ປຄ຺ຄຫ ວາຍຸ ຄາຫີ,

ສທ຺ຘາ ລກາຣ ສຫິຕາ ສຕິ ໂປຕ ວາຫາ;

ສມ຺ປາປຍາຕຸ ຠວ ສາຄຣ ປາຣ ຕີຣ,

ສປ຺ປຕ຺ຕນໍ ວຣຘເນ ປຕິ ປຕ຺ຕິ ນາວາ.

໑໐໐.

ໂພຊ຺ຌງ຺ຄ ສຕ຺ຕ ຣຕນາກຣ ຘມ຺ມ ຂນ຺ຘ,

ຄມ຺ຠີຣ ນີຣ ຈຍ ສາສນ ສາຄໂຣ ສໍ;

ໂສ ສີລ຺ຍນນ຺ຕ ຕນຸ ເວຏິຖ ຎາຓ ມນ຺ຖ,

ເສເລນ ມນ຺ຖິຕວຕໍ ທິສຕາ ມຕໍ ເວ.

໑໐໑.

ວຸຕ຺ເຕນ ເຕນ ວິຘິນາ ວິຘິນາ ຕໂຕ ຕໍ,

ລທ຺ຘາ ນຸຠູຕມມຕໍ ຂິລ ໂທສ ນາສໍ;

ອຈ຺ຈນ຺ຕ ໂຣຄ ຊຣຕາ ມຣຓາ ຠິ ຠູຕໍ,

ຠູຕໍ ກໂຣຕຸ ອມຣໍ ອຊຣໍ ອໂຣຄໍ.

໑໐໒.

ສທ຺ຘມ຺ມ ຣາຊ ຣວິນິຄ຺ຄຕ ຘມ຺ມຣໍສິ,

ຜຸລ຺ໂລ ຘຸຕງ຺ຄທລ ສໍວຣ ເກສຣາລິ;

ສງ຺ຆາຣວິນ຺ທ ນິກໂຣ ສມຘຸໍ ສມາຘິ,

ສກ຺ກິຓ຺ຓິໂກ ທິສຕຸ ສາສນ ວາປິ ຊໂຕ.

໑໐໓.

ອານນ຺ທ ຣຎ຺ຎ ຣຕນາທິ ມຫາ ຍຕິນ຺ທ,

ນິຈ຺ຈປ຺ປພຸທ຺ຘ ປທຸມປ຺ປິຍ ເສວິນງ຺ຄີ;

ພຸທ຺ຘປ຺ປິເຍນ ຆນ ພຸທ຺ຘ ຄຸຓປ຺ປິເຍນ,

ເຖຣາລິນາ ຣຈິຕ ປຊ຺ຊມຘຸໍ ປິພນ຺ຕຸ.

໑໐໔.

ອິຕ຺ຖໍ ຣູປ ຄຸຓານຸກິຕ຺ຕນວສາ ຕໍ ຕໍ ຫິຕາ ສິໍ ສໂຕ,

ວຕ຺ຖານຸສ຺ສຕິ ວຕ຺ຕິຕ ອິຫ ຍຖາ ສຕ຺ເຕສຸ ເມຕ຺ຕາ ຈ ເມ;

ເອວໍ ຕາຠິ ຠວນ຺ຕ ຣຸຕ຺ຕຣ ຕຣາ ວຕ຺ຕນ຺ຕຸ ຕາ ໂພຘິ ເມ,

ສໍໂຍໂຄຈ ຘເນຫິ ສນ຺ຕິຫິ ຠເວ ກລ຺ຍານ ມິຕ຺ເຕຫິ ຈ.