📜

ນໂມ ຕສ຺ສ ຠຄວໂຕ ອຣຫໂຕ ສມ຺ມາສມ຺ພຸທ຺ຘສ຺ສ

ນຣທກ຺ຂທີປນີ

ປາລິໂຕ ເຍວ ສທ຺ຘມ຺ໂມ,

ປາລິເຕນ ວເຣນ ຈ;

ປາລິເຕ ສຸຏ຺ຐຸ ຍໍ ສີລໍ,

ປາລິຕໍ ຘມ຺ມ-ສຸນ຺ທຣໍ.

ສມ຺ມາ ອາຣທ຺ຘໍ ສພ຺ພ-ສມ຺ປຕ຺ຕີນໍ,

ມູລໍ ໂຫຕີຕິ ທຏ຺ຐພ຺ພໍ.

ວີຣິຍາຣພ຺ໂຠ ຠິກ຺ຂເວ,

ມຫໂຕ ອຕ຺ຖາຍ ສໍວຕ຺ຕຕີຕິ.

ຕສ຺ມາ ວີຣິຍເມວ ກຕ຺ຕພ຺ພໍ,

ວີຣິຍວໂຕ ຫິ ອຈິນ຺ຕິຕໍປິ ໂຫຕິ.

ຍຖາ ຫິ ຕຈ຺ຉການໍ ສຸຕ຺ຕໍ,

ປມາຓໍ ໂຫຕິ;

ເອວ ເມຕມ຺ປິ ວິຎ຺ຎູນໍ.

ສຸວິຊາໂນ ຠວໍ ໂຫຕິ,

ທຸພ຺ພິຊາໂນ ປຣາຠໂວ;

ຘມ຺ມກາໂມ ຠວໍ ໂຫຕິ,

ຘມ຺ມເທສ຺ສີ ປຣາຠໂວ.

ອຍໍ ຘມ຺ມຕາຕິ ອຍໍ ສຠາໂວ,

ອຍໍ ນິຍາໂມຕິ ວຸຕ຺ຕໍ ໂຫຕິ.

ເຍ ຘມ຺ມາ ເຫຕຸປຠວາ,

ເຕສໍ ເຫຕຸໍ ຕຖາຄໂຕ.

ຣຕນຕ຺ຕຍໍ, ສນ຺ຕຕໍ, ອຫໍ ວນ຺ທາມິ;

ອາຈຣິຍໍ, ໂສ ອຫໍ, ນິຈ຺ຈໍ ນມາມິ;

‘‘ໂຫຕຸ ສພ຺ພໍ, ມງ຺ຄລໍ, ມມໍ ສພ຺ພຘິ’’.

ນຣທກ຺ຂທີປນີ

ນໂມ ຕສ຺ສ ຠຄວໂຕ ອຣຫໂຕ ສມ຺ມາສມ຺ພຸທ຺ຘສ຺ສ

ປຓາມ

ນຣທກ຺ຂທີປກສ຺ສ,

ນໂມ ສມນ຺ຕຈກ຺ຂຸໂນ;

ສໍສາຣາ ວິປ຺ປມຸຕ຺ຕສ຺ສ,

ສໍສາຣາ ວິປ຺ປມຸຕ຺ຕສ຺ສ,

ສ-ສທ຺ຘມ຺ມສ຺ສ ສງ຺ຆິໂນ.

ມຕ຺ຖນາ

໒.

ປາລິເຕຫິ ວຣຸຕ຺ຕມໍ,

ປາລິຕໍ ສີລ-ປາຣມິໍ;

ປາເລຕຸ ວຣສມ຺ພຸທ຺ໂຘ,

ປາລິຕໍ ຄນ຺ຖ-ກາຣຓໍ.

ອາສີສ

໓.

ພຫຸສ຺ສຸໂຕ ຈ ເມຘາວີ,

ສີເລສຸຈ ສມາຫິໂຕ;

ເຈໂຕສມຖານຸຍຸຕ຺ໂຕ,

ອປິ ມຸທ຺ຘນິ ຕິຏ຺ຐຕຸ.

ອຠິຍາຈກ

໔.

ຘມ຺ມ-ສງ຺ຆໍ ວນ຺ທິຕ຺ວານ,

ສພ຺ພ-ໂລກສ຺ສ ນາຍກໍ;

ຍາຈິໂຕ ຕິກກ຺ຣປ-ເຖເຣນ,

ມາຓເວນ ຈ ຘີມຕາ.

໕.

ອຸຕ຺ຕານເມວ ສງ຺ເຂປໍ,

ນານາ-ສຕ຺ຖ-ສຸຘາຣິຕໍ;

ນຣ-ທກ຺ຂໍ ລິຂິສ຺ສມິ,

ປສ຺ສນ຺ຕຸ ຘີຣ-ມາມກາ.

໖.

ໂກສຊ຺ຊໍ ຠຍໂຕ ທິສ຺ວາ,

ວີຣິຍຎ຺ຊາປິ ເຂມໂຕ;

ອາຣທ຺ຘວີຣິຍາ ໂຫຖ;

ເອສາ ພຸທ຺ຘານຸສາສນີ.

໗.

ວີຣິຍວາ ໂຂ ຠິກ຺ຂເວ ອຣິຍສາວໂກ,

ອກຸສລໍ ປຊຫຕິ, ກຸສລໍ ຠາເວຕິ;

ສາວຊ຺ຊໍ ປຊຫຕິ, ອນວຊ຺ຊໍ ຠາເວຕິ,

ສຸທ຺ຘມຕ຺ຕານໍ ປຣິຫຣຕີຕິ.

ວີຣິຍວໂຕ ກິໍ ນາມ ກມ຺ມໍ ນ ສິຊ຺ຌຕິ;

ປຸຣິສກາໂຣ ນາມ ນ ນສ຺ສຕິ,

ສຸເຂ ປຕິຏ຺ຐາເປຕີຕິ ຊານາມິ.

໘.

ຍຖາ ຂິຕ຺ຕໍ ນເຠ ເລຑ຺ຑຸ,

ຘຸວໍ ປຕຕິ ຠູມິຍໍ;

ຕເຖວ ພຸທ຺ຘ-ເສຏ຺ຐານໍ,

ວຈນໍ ຘຸວ-ສສ຺ສຕໍ.

໙.

ອ-ທ຺ເວຊ຺ຌວຈນາ ພຸທ຺ຘາ,

ອ-ໂມຆວຈນາ ຊິນາ.

໑໐.

ສຸສ຺ສຸສາ ລຠເຕ ປຎ຺ຎໍ,

ອຸຏ຺ຐາຕາ ວິນ຺ທເຕ ຘນໍ;

ຕສ຺ມາ ປາຬິໍ ຄຸຣຸໍ ກຕ຺ວາ,

ອິມໍ ປສ຺ສາຫິ ໂສຠຓໍ.

໑໑.

ສຸສ຺ສຸສາ ສຸຕ-ພຸທ຺ຘິນີ,

ສຸຕໍ ປຎ຺ຎາຍ ວຑ຺ຒນໍ;

ປຎ຺ຎາຍ ອຕ຺ຖໍ ຊານາຕິ,

ຎາໂຕ ອຕ຺ໂຖ ສຸຂາວໂຫ.

໑໒.

ສຕຕໍຊ຺ຌາຍນໍ ວາທ,

ປຣ-ຕນ຺ຕວໂລກນໍ;

ສພ຺ພິຊ຺ຊາເຈຣ-ເສວາຈ,

ພຸທ຺ຘິ-ມຕິ-ກໂຣ ຄຸໂຓ.

໑໓.

ອຕິ-ທີໂຆວ ນີໂຆ ຫິ,

ກຸສີໂຕ ຫີນ-ວີຣິໂຍ;

ຕສ຺ມາ ວີຣິຍໍ ກຕ຺ວານ,

ວິຊ຺ຊໍ ເອສນ຺ຕຸ ສາຘໂວ.

໑໔.

ສຸໂປຣິໂສ ຕາວ ສິປ຺ປໍ,

ອຸຄ຺ຄຓ຺ເຫຍ຺ຍ ປຣໍ ຘນໍ;

ຄເວເສຍ຺ຍ ຕໂຕ ມນ຺ຕໍ,

ກເຖຍ຺ຍ ສຈ຺ຈ-ຠາສິຕໍ.

໑໕.

ປຖມໍ ນ ປຣາຊເຍ ສິປ຺ປໍ,

ທຸຕີຍໍ ນ ປຣາຊເຍ ຘນໍ;

ຕຕີຍໍ ນ ປຣາຊເຍ ຘນໍ,

ຈຕຸຕ຺ຖມຕ຺ຖໍ ກິໍ ກຣິສ຺ສຕິ.

໑໖.

ໂສຠນ຺ຕິ ອ-ມິລາຕານິ,

ປຸປ຺ຜານິວ ປິລນ຺ຘິຕຸໍ;

ຕຖາ ໂສຠນ຺ຕິ ທາຣກາ,

ໂຍພ຺ພເນເຍວ ສິກ຺ຂິຕຸໍ.

໑໗.

ຕສ຺ມາ ຫເວ ຄຸຓາຘາຣໍ,

ປຎ຺ຎາ-ວຑ຺ຒນມຸຕ຺ຕມໍ;

ສິກ຺ເຂຍ຺ຍ ມຕິມາ ໂປໂສ,

ປຕ຺ເຖນ຺ໂຕ ຫິຕມຕ຺ຕໂນ.

໑໘.

ອລໍ ວາຍມິຕຸໍ ສິປ຺ເປ,

ອຕ຺ຖ-ກາເມນ ຊນ຺ຕຸນາ;

ກຕໍ ວິຊຎ຺ຎາ ວິຊ຺ຊາທິ,

ວໂຍ ເຕ ມາ ອຸປຊ຺ຌຄາ.

໑໙.

ວິຊ຺ຊໍ ສິກ຺ເຂ, ຈເຣ ສີລໍ,

ຘີເຣນ ສຫ ສໍວເສ;

ຘນາຈເຍ, ກເຣ ກມ຺ມໍ,

ປິຍໍ ວາຈຎ຺ຈ ສໍວເທ.

໒໐.

ນ ຕ຺ເວວ ສຸປິຕຸໍ ໂຫຕິ,

ຣຕ຺ຕິ ນກ຺ຂຕ຺ຕ-ມາລິນີ;

ປຏິຊຄ຺ຄິຕຸເມເວສາ,

ຣຕ຺ຕິ ໂຫຕິ ວິຊານຕໍ.

໒໑.

ອຸຏ຺ຐາຫຖ ນິສີທຖ,

ໂກ ອຕ຺ໂຖ ສຸປິເຕນ ໂວ;

ສາຘຸ ໂຂ ສິປ຺ປ-ວິຊ຺ຊາຫ຺ວາ,

ວິຊ຺ຊໍ ສິກ຺ຂຖ ສນ຺ຕຕໍ.

໒໒.

ອາຣພ຺ຠຖ ສທາ ປຸຕ຺ຕາ,

ພຫຸສ຺ສຸຕໍ ຄເວສິຕຸໍ;

ຍສ຺ມາ ໂລເກ ສິປ຺ປວນ຺ຕາ,

ສພ຺ພາ-ທິສາສຸ ປາກຏາ.

໒໓.

ສກ຺ຍຣູປໍ ປຸເຣ ສນ຺ຕໍ,

ມຍາ ສິປ຺ປໍ ນ ສິກ຺ຂິຕໍ;

ກິຈ຺ຉາ ວຸຕ຺ຕິ ອ-ສິປ຺ປສ຺ສ,

ອິຕິ ປຈ຺ຉາ ນຸຕປ຺ປຕິ.

໒໔.

ໂລກຕ຺ຖໍ ໂລກ-ກມ຺ມນ຺ຕໍ,

ອິຈ຺ຉນ຺ໂຕ ປຣິເຍສິຕຸໍ;

ນິຈ຺ຈເມວ ວີຣິຍຎ຺ຈ,

ອຕ຺ຖໍ ມນ຺ຕຎ຺ຊ ຈິນ຺ຕເຍ.

໒໕.

ຘນວາ ຄຸຓວາ ໂລເກ,

ສພ຺ພາ-ທິສາຍ ປາກໂຏ;

ສີລວາ ປຎ຺ຎວາ ມຈ຺ໂຈ,

ສພ຺ພ-ໂລເກຫິ ປູຊິໂຕ.

໒໖.

ສຊີວຕິ ຍໂສ ຍສ຺ສ,

ກິຕ຺ຕິ ຍສ຺ສ ສຊີວຕິ;

ຍສ-ກິຕ຺ຕິ ວິຫີນສ຺ສ,

ຊີວນ຺ໂຕປິ ມໂຕປມາ.

໒໗.

ສທ຺ຘີຘ ວິຕ຺ຕໍ ປຸຣິສສ຺ສ ເສຏ຺ຐໍ,

ຘມ຺ໂມ ສຸຈິຓ຺ໂຓ ສຸຂມາວຫາຕິ;

ສຈ຺ຈໍ ຫເວ ສາທຸຕຣໍ ຣສານໍ,

ປຎ຺ຎາຊີວິໍ ຊີວິຕມາຫຸ ເສຏ຺ຐນ຺ຕິ.

໒໘.

ສຕິມໂຕ ສທາ ຠທ຺ທໍ,

ສຕິມາ ສຸຂເມຘຕິ;

ສຕິມໂຕ ສຸເວ ເສຍ຺ໂຍ,

ເວຣາ ຈ ປຣິມຸຈ຺ຈຕິ.

໒໙.

ມາ ໂວ ຂຓໍ ວິຣາເຘຖ,

ຂຓາຕີຕາ ຫິ ໂສຈເຣ;

ສທຕ຺ເຖ ວາຍເມຍ຺ຍາຖ,

ຂໂຓ ໂວ ປຏິປາທິໂຕ.

໓໐.

ຍຖິຈ຺ຉິຕໍ ນ ປປ຺ໂປຕິ,

ອ-ຜິໂຍ ນາວິໂກຓ຺ຓເວ;

ຕເຖວາວີຣິໂຍເປຕ຺ຖ,

ຕສ຺ມາຣເຠຍ຺ຍ ສາສນໍ.

໓໑.

ວາຍເມເຖວ ປຸຣິໂສ,

ຍາວ ອຕ຺ຖສ຺ສ ນິປ຺ຜທາ;

ນິປ຺ຜນ຺ນໂສຠໂຓ ອຕ຺ໂຖ,

ຂນ຺ຕາ ຠິຍ຺ໂຍ ນ ວິຊ຺ຊຕິ.

໓໒.

ສເມວ ຎາຓ-ວາຍາເມ,

ສຸຂາວໂຫ ສຸ-ມງ຺ຄໂລ;

ຎຸເນຘິເກ ຕຖາ ໂນ ຫິ,

ທ຺ວເຍນ ສາຘຸ ສມ຺ປທາ.

໓໓.

ກາຍ-ກມ຺ມານິ ສິຊ຺ຌນ຺ຕິ,

ວຈີ-ກມ຺ມານິ ວີຣິຍໍ;

ນ ຫິ ກິຈ຺ຈານິ ຈິນ຺ຕາຫິ,

ກເຣຍ຺ຍາຖີຘ ວາຍມໍ.

໓໔.

ປຏິກຈ຺ເຈວ ກເຣຍ຺ຍ,

ຕໍ ຊຎ຺ຎາ ຫິຕມຕ຺ຕໂນ;

ນ ສາກຏິກຈິນ຺ຕາຍ,

ມນ຺ທາ ຘີໂຣ ປຣກ຺ກເມ.

໓໕.

ຖິເຣນ ສກ-ກມ຺ເມນ,

ວຑ຺ຒຕິເຍວ ສໍ ຜລໍ;

ອ-ຖິເຣນ ອລເສນ,

ກຣ-ກມ຺ມໍ ຜລຎ຺ຈ ໂນ.

໓໖.

ອາສີເສເຖວ ປຸຣິໂສ,

ນ ນິພ຺ພິນ຺ເທຍ຺ຍ ປຓ຺ຑິໂຕ;

ປສ຺ສາມິ ໂວຫໍ ອຕ຺ຕານໍ,

ຍຖາ ອິຈ຺ຉິໍ ຕຖາ ອຫຸ.

໓໗.

ອຓໂຓ ຎາຕີນໍ ໂຫຕິ,

ເທວານໍ ປິຕຸນຎ຺ຈ ໂສ;

ກຣໍ ປຸຣິສ-ກິຈ຺ຈານິ,

ນ ຈ ປຈ຺ຉານຸຕປ຺ປຕິ.

໓໘.

ຫິຍ຺ໂຍຕິ ຫິຍ຺ຍຕິ ໂປໂສ,

ກຣິສ຺ສາມິ ປເຣຕິ ໂຍ;

ອຊ຺ຊ ກຕ຺ຕພ຺ພ ກມ຺ມໍ ສ຺ເວ,

ໂສ ຕໂຕ ປຣິຫາຍຕິ.

໓໙.

ໂສ ອ-ປ຺ປມຕ຺ໂຕ ອ-ກຸທ຺ໂຘ,

ຕາຕ ກິຈ຺ຈານິ ກາຣຍ;

ວາຍາມສ຺ສຸ ສ-ກິຈ຺ເຈສຸ,

ນາລໂສ ວິນ຺ທເຕ ສຸຂໍ.

໔໐.

ຫີນ-ຊຈ຺ໂຈປິ ເຈ ໂຫຕິ,

ອຸຏ຺ຐາຕາ ຘິຕິມາ ນໂຣ;

ອາຈາຣ-ສີລ-ສມ຺ປນ຺ໂນ,

ນິເສ ອຄ຺ຄີວ ຠາສຕິ.

໔໑.

ໂຍ ປຸພ຺ເພ ກຣຓີຍານິ,

ປຈ຺ຉາ ໂສ ກາຕຸມິຈ຺ຉຕິ;

ວຣຸຓກຏ຺ຐຠຎ຺ໂຊວ,

ສ ປຈ຺ຉາ ອນຸຕປ຺ປຕິ.

໔໒.

ອຸຏ຺ຐານກາລມ຺ຫິ ອນຸຏ຺ຐຫາໂນ,

ຍຸວາ ພລີ ອາລສິຍໍ ອຸເປໂຕ;

ອ-ປຸຓ຺ຓສງ຺ກປ຺ປມໂນ ກຸສີໂຕ,

ປຎ຺ຎາຍ ມຄ຺ຄໍ ອລໂສ ນ ວິນ຺ທຕິ.

໔໓.

ທຸມ຺ເມໂຘ ປຸຣິໂສ ໂລເກ,

ກຸສີໂຕ ຫີນ-ວີຣິໂຍ;

ອປ຺ປສ຺ສຸໂຕ ອນາຈາໂຣ,

ປຣິຫາຍຕິ ວຸຑ຺ຒິຍາ.

໔໔.

ອປ຺ປສ຺ສຸຕາຍໍ ປຸຣິໂສ,

ພລີພທ຺ໂທວ ຊີຣຕິ;

ມໍສານິ ຕສ຺ສ ວຑ຺ຒນ຺ຕິ,

ປຎ຺ຎາ ຕສ຺ສ ນ ວຑ຺ຒຕິ.

໔໕.

ຍສ຺ສ ມນຸສ຺ສ-ຠູຕສ຺ສ,

ນຕ຺ຖິ ໂຠຄາ ຈ ສິປ຺ປກໍ;

ກິໍຜລໍ ຕສ຺ສ ມານຸສ຺ສໍ,

ທ຺ວິປາທຏ຺ໂຐ ຫິ ໂສ ມິໂຄ.

໔໖.

ໂຍ ຈ ວສ຺ສສຕໍ ຊີເວ,

ກຸສີໂຕ ຫີນ-ວີຣິໂຍ;

ເອກາຫໍ ຊີວິຕໍ ເສຍ຺ໂຍ,

ວີຣິຍາຣພ຺ຠໂຕ ທຬໍ.

໔໗.

ໂຍ ຈ ຘມ຺ມ-ວິຠງ຺ຄຎ຺ຎູ,

ກາລຸຏ຺ຐາຍີ ອ-ຕນ຺ທິໂຕ;

ອນຸຏ຺ຐຫຕິ ກາເລນ,

ຜລໍ ຕສ຺ສ ສມິຊ຺ຌຕິ.

໔໘.

ອ-ຈຣິຕ຺ວາ ພ຺ຣຫ຺ມຈຣິຍໍ,

ອ-ລທ຺ຘາ ໂຍພ຺ພເນ ຘນໍ;

ຊິຓ຺ຓໂກຎ຺ຈາວ ຌາຍນ຺ຕິ,

ຂີຓມຈ຺ເຉວ ປລ຺ລເລ.

໔໙.

ອ-ຈຣິຕ຺ວາ ພ຺ຣຫ຺ມຈຣິຍໍ,

ອ-ລທ຺ຘາ ໂຍພ຺ພເນ ຘນໍ;

ເສນ຺ຕ຺ຕິ ຈາປາຕິຂີຓາວ,

ປຸຣາຓານິ ອນຸຕ຺ຖຸນໍ.

໕໐.

ອປ຺ປເກນາປິ ເມຘາວີ,

ປາຠເຕນ ວິຈກ຺ຂໂຓ;

ສມຸຏ຺ຐາເປຕິ ອຕ຺ຕານໍ,

ອຓຸໍ ອຄ຺ຄິໍວ ສນ຺ຘມໍ.

໕໑.

ວາຍາເມເຖວ ປຸຣິໂສ,

ນ ນິພ຺ພິນ຺ເທຍ຺ຍ ປຓ຺ຑິໂຕ;

ວາຍາມສ຺ສ ຜລໍ ປສ຺ສ,

ຠຸຕ຺ຕາ ອມ຺ພາ ອນີຕິຫໍ.

໕໒.

ອນຸຏ຺ຐຫໍ ອ-ວາຍາມໍ,

ສຸຂໍ ຍຕ຺ຣາຘິ ຄຈ຺ຉຕິ;

ສຸວິຣ ຕຕ຺ຖ ຄຈ຺ຉາຫິ,

ມຎ຺ຈ ຕຕ຺ເຖວ ປາປຍ.

໕໓.

ຍຕ຺ຖາລໂສ ອນຸຏ຺ຐາຕາ,

ອຈ຺ຈນ຺ຕໍ ສຸຂເມຘຕິ;

ສຸວິຣ ຕຕ຺ຖ ຄຈ຺ຉາຫິ,

ມຎ຺ຈ ຕ຺ຕຕ຺ເຖວ ປາປຍ.

໕໔.

ອຘິປ຺ປາຍ-ຜລໍ ໂລເກ,

ຘີຕິມນ຺ຕ຺ຕສ຺ສ ສິຊ຺ຌຕິ;

ວີຣິຍເມວ ກຕ຺ຕພ຺ພໍ,

ເອຕໍ ພຸທ຺ເຘຫິ ວຓ຺ຓິຕໍ.

ປຎ຺ຎາ-ນິທ຺ເທສ

໕໕.

ປຎ຺ຎໍ ປຖມເມເສຫິ,

ປຎ຺ຎາ-ພລໍ ພຫຸຕ຺ຕມໍ;

ກຸລ-ປຸຕ຺ຕ ພລໍ ປຎ຺ຎາ,

ກິໍຫິນາມ ນ ສາຘ຺ຍຕິ.

໕໖.

ອເນກ-ສໍສຍຸຈ຺ເຉທິ,

ປໂຣກ຺ຂຕ຺ຖສ຺ສ ທສ຺ສກໍ;

ສພ຺ພສ຺ສ ໂລຈນໍ ສຕ຺ຖໍ,

ຍສ຺ສ ນຕ຺ຖ຺ຍນ຺ຘເມວ ໂສ.

໕໗.

ປຎ຺ຎາ ສຸຕໍ ວິນິຈ຺ຉິນ຺ທິ,

ກິຕ຺ຕິ-ສິໂລກ-ວຑ຺ຒນີ;

ປຎ຺ຎາສຫິໂຕ ນໂຣ ອິຘ,

ອປິ ສຸຂານິວິນ຺ທຕິ.

໕໘.

ສພ຺ພຎ຺ຎຸພຸທ຺ຘ-ປຈ຺ເຈກ,

ຈຕຸສຈ຺ຈ-ສຸຕາ ອິຕິ;

ຈຕຸ-ພຸທ຺ເຘສຸ ເອໂກວ,

ພຫຸສ຺ສຸໂຕ ນໂຣ ຠເວ.

໕໙.

ເລຂເຉໂກ ວາຈເຉໂກ,

ຄນ຺ຖເຉໂກ ສຸວາຈໂກ;

ວິຘາຍກເຉໂກ ສູໂຣ,

ນິທ຺ທຸກ຺ໂຂວ ສກມ຺ມນິ.

໖໐.

ປຎ຺ຎາ ຫິ ເສຏ຺ຐາ ກຸສລາ ວທນ຺ຕິ,

ນກ຺ຂຕ຺ຕ-ຣາຊາຣິວ ຕາຣການໍ;

ສີລໍ ສິຣີຈາປິ ສຕຎ຺ຈ ຘມ຺ໂມ,

ອນ຺ວາຍິກາ ປຎ຺ຎາວໂຕ ຠວນ຺ຕິ.

໖໑.

ເສເວຖ ພຸທ຺ເຘ ນິປຸເຓ ພຫຸສ຺ສຸຕ຺ເຕ,

ອຸຄ຺ຄາຫໂກ ຈ ປຣິປຸຈ຺ຉໂກ;

ສຸເຓຍ຺ຍ ສກ຺ກຈ຺ຈໍ ສຸຠາສິຕານິ,

ເອວໍ ກໂຣ ປຎ຺ຎວາ ໂຫຕິ ມຈ຺ໂຈ.

໖໒.

ວເຍນ ຍສ-ປຸຈ຺ຉາຫິ,

ຕິຏ຺ຐ-ວາເສນ ໂຍນິໂສ;

ສາກຈ຺ຉາ ສ຺ເນຫສໍເສວາ,

ປຕິຣູປ-ວາເສນຈ.

໖໓.

ເອຕານິ ອຏ຺ຐຐານານິ,

ພຸທ຺ຘິ-ວິສທ-ກາຣຓາ;

ເຍສໍ ເອຕານິ ສມ຺ໂຠນ຺ຕິ,

ເຕສໍ ພຸທ຺ຘິ ປຠິຊ຺ຊຕິ.

໖໔. ຈຕ຺ຕາໂຣເມ ຠິກ຺ຂເວ ຘມ຺ມາ ປຎ຺ຎາວຸທ຺ຘິຍາ ສໍວຕ຺ຕນ຺ຕິ. ກຕເມ ຈຕ຺ຕາໂຣ. ສປ຺ປຸຣິສສໍເສໂວ ສທ຺ຘມ຺ມສວນໍ ໂຍນິໂສ ມນສິກາໂຣ ຘມ຺ມານຸຘມ຺ມ-ປຏິປຕ຺ຕິ. ອິເມ ໂຂ ຠິກ຺ຂເວ ຈຕ຺ຕາໂຣ ຘມ຺ມາ ປຎ຺ຎາ-ວຸທ຺ຘິຍາ ສໍວຕ຺ຕນ຺ຕີຕ຺ຕິ.

໖໕.

ຈກ຺ຂຸປສາທ-ສມ຺ປນ຺ໂນ,

ອຈ຺ຉິມນ຺ຕຎ຺ຈ ປສ຺ສຕິ;

ອນ຺ຘໍ ກາຓໍ ສຸ-ປສ຺ສນ຺ຕໍ,

ອນ຺ໂຘ ສພ຺ພໍ ນ ປສ຺ສຕິ.

໖໖.

ປສ຺ສຕ຺ຕິ ປສ຺ໂສ ປສ຺ສນ຺ຕໍ,

ອ-ປສ຺ສນ຺ຕຎ຺ຈ ປສ຺ສຕິ;

ອ-ປສ຺ສນ຺ໂຕ ອ-ປສ຺ສນ຺ຕໍ,

ປສ຺ສນ຺ຕຎ຺ຈ ນ ປສ຺ສຕິ.

໖໗.

ປາກຏໍ ອ-ປຏິຈ຺ຉນ຺ນໍ,

ຣູປໍ ປສາທ-ຈກ຺ຂຸນາ;

ນາຎ຺ຎໍ ປສ຺ສຕ຺ຕິ ສພ຺ພໍປິ,

ຕຖໂຕ ຎາຓ-ຈກ຺ຂຸນາ.

໖໘.

ສຸຊນາສຸຊນາ ສພ຺ເພ,

ຄຸເຓນາປິ ວິເວກິໂນ;

ວິເວກໍ ນ ສມາຍນ຺ຕິ,

ອ-ວິເວກີຊນນ຺ຕິເກ.

໖໙.

ໂຍ ຈ ອຸປ຺ປຕິຕໍ ອຕ຺ຖໍ,

ນ ຂິປ຺ປມນຸພຸຊ຺ຌຕິ;

ອ-ມິຕ຺ຕວສມນ຺ເວຕິ,

ປຈ຺ຉາ ຈ ອນຸຕປ຺ປຕິ.

໗໐.

ເອວໍ ມຫິທ຺ຘິກາ ປຎ຺ຎາ,

ນິປຸຓາ ສາຘຸຈິນ຺ຕິນີ;

ທິຏ຺ຐຘມ຺ມ-ຫິຕຕ຺ຖາຍ,

ສມ຺ປຣາຍ-ສຸຂາຍ ວາ.

໗໑.

ຕໍ ພລານໍ ພລໍ ເສຏ຺ຐ,

ອຄ຺ຄ ປຎ຺ຎາພລໍ ພລໍ;

ປຎ຺ຎາພເລນຸປຕ຺ຖທ຺ໂຘ,

ເອຕ຺ຖໍ ວິນ຺ທຕິ ປຓ຺ຑິຕ຺ໂຕ.

໗໒.

ເຍນ ຎາເຓນ ພຸຊ຺ຌນ຺ຕິ,

ອຣິຍາ ກຕ-ກິຈ຺ຈຕໍ;

ຕໍ ຎາຓ-ຣຕນໍ ລທ຺ຘໍ,

ວາຍາເມຖ ຊິໂນຣສາ.

໗໓.

ປຎ຺ຎາຣຕນມາລສ຺ສ,

ນ ຈິຣໍ ວຕ຺ຕເຕ ຠໂວ;

ຂິປ຺ປໍ ທສ຺ເສຕິ ອມຕໍ,

ນ ຈ ໂສ ໂຣຈເຕ ຠເວ.

໗໔.

ປມາທມນຸຍຸຎ຺ຊນ຺ຕິ,

ພາລາ ທຸມ຺ເມຘິໂນ ຊນາ;

ອປ຺ປມາທຎ຺ຈ ເມຘາວີ,

ຘນໍ ເສຏ຺ຐໍວ ຣກ຺ຂຕິ.

໗໕.

ຘນ-ປຸຎ຺ຎ-ຘີ-ລາເຠນ,

ກາລໍ ຂິຍ຺ຍຕິ ປຓ຺ຑິໂຕ;

ກີຬເນນ ຈ ທຸມ຺ເມໂຘ,

ນິທ຺ທາຍ ກລເຫນ ວາ.

໗໖.

ປມາທໍ ອປ຺ປມາເທນ,

ຍທາ ນູທຕິ ປຓ຺ຑິໂຕ;

ປຎ຺ຎາປາສາທ-ມາຣຸຍ຺ຫ,

ອ-ໂສໂກ ໂສກິນິໍ ປຊໍ,

ປພ຺ພຕຏ຺ໂຐວ ຠູມຏ຺ເຐ,

ຘີໂຣ ພາເລ ອເວກ຺ຂຕິ.

໗໗.

ນຕ຺ຕິ ອຕ຺ຕສມໍ ເປມໍ,

ນຕ຺ຖິ ຘຎ຺ຎສມໍ ຘນໍ;

ນຕ຺ຖິ ປຎ຺ຎາສມາ ອາຠາ,

ວຸຏ຺ຐິ ເວ ປຣມາ ສຣາ.

໗໘.

ທິຏ຺ເຐ ຘມ຺ເມ ຈ ໂຍ ອຕ຺ໂຖ,

ໂຍ ຈຕ຺ໂຖ ສມ຺ປຣາຍິໂກ;

ອຕ຺ຖາຠິສມຍາ ຘີໂຣ,

ປຓ຺ຑິໂຕຕິ ປວຸຈ຺ຈຕິ.

໗໙.

ນ ເຕນ ປຓ຺ຑິໂຕ ໂຫຕິ,

ຍາວຕາ ພຫຸ ຠາສຕິ;

ເຂມີ ອ-ເວຣີ ອ-ຠໂຍ,

ປຓ຺ຑິໂຕຕ຺ຕິ ປວຸຈ຺ຈຕິ.

໘໐.

ຍມ຺ຫິ ສຈ຺ຈຎ຺ຈ ຘມ຺ໂມ ຈ,

ອ-ຫິໍສາ ສໍຍໂມ ທໂມ;

ສ ເວ ວນ຺ຕມໂລ ຘີໂຣ,

ເຖໂຣ ອິຕິ ປວຸຈ຺ຈຕ຺ຕິ.

໘໑.

ສກ-ຄຸຓໍ ສກ-ໂທສໍ,

ໂຍ ຊານາຕິ ສປຓ຺ຑິໂຕ;

ປຣ-ຄຸຓໍ ປຣ-ໂທສໍ,

ໂຍ ຊານາຕິ ສປຓ຺ຑິໂຕ.

໘໒.

ສຕິ-ວີຣິຍ-ປຎ຺ຎາຍ,

ໂຍ ກໂຣຕິ ອິຣິຍາປເຖ;

ໂສ ປຓ຺ຑິໂຕ ຫເວ ຠເວ,

ອຸຠຍຕ຺ຖ-ປຣິຄ຺ຄໂຫ.

໘໓.

ກຕຎ຺ຎູ ວິຊ຺ຊາ-ສມ຺ປນ຺ໂນ,

ຊາຕິມາ ຘນວາ ຫເວ;

ໂສ ວິຈາຣຓ-ສີໂລ ຈ,

ນິທ຺ທຸກ຺ໂຂ ປຓ຺ຑິໂຕ ຠເວ.

ສພ຺ເພ ກມ຺ມສ຺ສກາ ສຕ຺ຕາ,

ກມ຺ມໍ ສຕ຺ເຕ ວິຠຊ຺ຊຕິ.

໘໔.

ໂຍ ປສ຺ສຕິ ປຈ຺ຈກ຺ຂຕ຺ຖໍ,

ໂຍ ຈ ສໍສາຣຕ຺ຖໍ ເຕສຸ;

ປຈ຺ຉິໂມວ ປູຊນີໂຍ,

ອຸຠຍຕ຺ຖ-ສຸທິຏ຺ຐຕ຺ຕາ.

໘໕.

ອປ຺ເປນ ອນວຊ຺ເຊນ,

ສນ຺ຕຸຏ຺ໂຐ ສຸລເຠນ ຈ;

ມຕ຺ຕຎ຺ຎູ ສຸຠໂຣ ຫຸຕ຺ວາ,

ຈເຣຍ຺ຍ ປຓ຺ຑິໂຕ ນໂຣ.

໘໖.

ອຕ຺ຕານເມວ ປຖມໍ,

ປຕິຣູເປ ນິເວສເຍ;

ອຖຎ຺ຎມນຸສາເສຍ຺ຍ,

ນ ກິລິສ຺ເສຍ຺ຍ ປຓ຺ຑິໂຕ.

໘໗.

ອຸຕ຺ຕມ-ປຣິສາຍ ເວ,

ອຸຕ຺ຕ຺ຕມໍ ວາຈມຸຕ຺ຕໂມ;

ຠເຓຍ຺ຍາເຂປ-ວິຕ຺ຖາຣໍ,

ສາ ອນຄ຺ຆ຺ຍາ ໂລກຕ຺ຕເຍ.

໘໘.

ປຓ຺ຑິຕສ຺ສ ສຸຠາສິຕ຺ຕໍ,

ປຓ຺ຑິໂຕວ ສຸຊານິຍາ;

ທຸມ຺ເມໂຘ ຕໍ ນ ຊານາຕິ,

ຘີໂຣ ຘີຣໍ ມມາຍຕິ.

໘໙.

ເຍນ ເກນຈິ ວຓ຺ເຓນ,

ປໂຣ ລຠຕິ ຣູປ຺ປນໍ;

ອຕ຺ໂຖ ວາຈາຍ ເຈ ໂຫຕິ,

ຕໍ ນ ຠາເສຍ຺ຍ ປຓ຺ຑິໂຕ.

໙໐.

ຠຸຎ຺ຊນຕ຺ຖໍ ກຖນຕ຺ຖໍ,

ມຸຂໍ ໂຫຕີຕ຺ຕິ ໂນ ວເທ;

ຍໍວາ ຕໍວາ ມຸຂາຣຸຬ຺ຫໍ,

ວຈນໍ ປຓ຺ຑິໂຕ ນໂຣ.

໙໑.

ປຣ-ສຕ຺ຕິຕ຺ໂຕ ສ-ສຕ຺ຕິໍ,

ທຸຊ຺ຊາໂນ ຫິ ນໂຣ ມິເຕ;

ເຈ ຊາເນ ສກ-ສຕ຺ຕິໍຈ,

ກາ ກຖາ ປຣ-ສຕ຺ຕິຍາ.

໙໒.

ກຕ຺ຕ-ຄຸຓໍ ປເຣສໍ ໂຍ,

ປຏິກໂຣຕິ ປຓ຺ຑິໂຕ;

ຊານາຕິ ໂສ ອາຈິກ຺ຂຕິ,

ນ ພາໂລ ຄຸຓ-ມາມໂກ.

໙໓.

ປຠູຕໍ ເນວ ກາຕພ຺ພໍ,

ຠວິສ຺ສໍ ເນວ ຈິນ຺ຕເຍ;

ວຕ຺ຕມາເນນ ກາເລນ,

ວິຈຣນ຺ຕິ ວິຈກ຺ຂຓາ.

໙໔.

ຘມ຺ເມສຸ ສຕິ ອິຈ຺ຉິຕາ,

ຣເສສຸ ໂລຓມິຈ຺ຉິຕໍ;

ຣາຊ-ກິຈ຺ເຈສຸ ອມຈ຺ຈໍ,

ສພ຺ພ-ຐາເນສຸ ປຓ຺ຑິຕໍ.

໙໕.

ຂຕ຺ຕິໂຍ ເສຏ຺ໂຐ ຊເນ ຕສ຺ມິໍ,

ເຍ ໂຄຕ຺ຕປຏິສາຣິໂນ;

ວິຊ຺ຊາ-ຈຣຓ-ສມ຺ປນ຺ໂນ,

ໂສ ເສຏ຺ໂຐ ເທວ-ມານຸເສ.

໙໖.

ສມ຺ພຸທ຺ໂຘ ທ຺ວິປທໍ ເສຏ຺ໂຐ,

ອາຊານີໂຍ ຈຕຸປ຺ປທໍ;

ສຸສ຺ສຸສາ ເສຏ຺ຐາ ຠຣິຍານໍ,

ໂຍ ຈ ປຸຕ຺ຕານມສ຺ສໂວ.

໙໗.

ສາຕ຺ຖໂກ ຈ ອ-ສມ຺ໂມໂຫ,

ສປ຺ປາໂຍ ໂຄຈໂຣ ຕຖາ;

ຈຕ຺ຕາຣິມານິ ສິກ຺ເຂຍ຺ຍຸໍ,

ສມ຺ປຊຎ຺ຎາຠິວຑ຺ຒກາ.

໙໘.

ປຎ຺ຎຎ຺ຈ ໂຂ ອ-ສຸສ຺ສຸສໍ,

ນ ໂກຈິ ອຘິຄຈ຺ຉຕິ;

ພຫຸສ຺ສຸຕໍ ອນາຄມ຺ມ,

ຘມ຺ມຏ຺ຐໍ ອ-ວິນິພ຺ຠຊໍ.

໙໙.

ອຘິປ຺ປາໂຍ ສຸທຸພ຺ໂພໂຘ,

ຍສ຺ມາ ວິຊ຺ຊຕິ ປາຬິຍໍ;

ຕສ຺ມາ ອຸປຏ຺ຐຫໍ ຄຓ຺ເຫ,

ຄຣຸໍ ຄຣຸມຕໍ ວິທູ.

ຈາຣິຕ຺ຕ-ນິທ຺ເທສ

໑໐໐.

ອຕ຺ຕາ ຫິ ອຕ຺ຕໂນ ນາໂຖ,

ໂກ ຫິ ນາໂຖ ປໂຣ ສິຍາ;

ອຕ຺ຕນາ ຫິ ສຸທນ຺ເຕນ,

ນາຖໍ ລຠຕິ ທຸລ຺ລຠໍ.

໑໐໑.

ອຕ຺ຕານຎ຺ເຈ ປິຍໍ ຊຎ຺ຎາ,

ຣກ຺ເຂຍ຺ຍ ນໍ ສຸຣກ຺ຂິຕໍ;

ຕິຓ຺ຓມຎ຺ຎຕຣໍ ຍາມໍ,

ປຏິຊຄ຺ເຄຍ຺ຍ ປຓ຺ຑິໂຕ.

໑໐໒.

ອຕ຺ຕນາ ກຸຣຸເຕ ລກ຺ຂິໍ,

ອ-ລກ຺ຂິໍ ກຸຣຸເຕຕ຺ຕນາ;

ນ ຫິ ລກ຺ຂິໍ ອ-ລກ຺ຂິໍ ວາ,

ອຎ຺ໂຎ ອຎ຺ຎສ຺ສ ກາຣໂກ.

໑໐໓.

ນ ປີຬິຕາ ອຕ຺ຕ-ທຸກ຺ເຂນ ຘີຣາ,

ສຸຂປ຺ຜລໍ ກມ຺ມໍ ປຣິຈ຺ຈຊນ຺ຕິ;

ສມ຺ໂມຫິຕາວາປິ ສຸເຂນ ມຕ຺ຕາ,

ນ ປາປ-ກມ຺ມຎ຺ຈ ສມາຈຣນ຺ຕິ.

໑໐໔.

ໂຍ ເນວ ນິນ຺ທໍ ນປ຺ປສໍສໍ,

ອາທິຍຕິ ຄຣຫໍ ໂນປິ ປູຊໍ;

ສິຣີຈ ລກ຺ຂີຈ ອເປຕິ ຕມ຺ຫາ,

ອາໂປ ສຸວຸຏ຺ຐີວ ຍຖາ ຖລມ຺ຫາ.

໑໐໕.

ສາຘຸ ຘມ຺ມຣຸຈິ ຣາຊາ,

ສາຘຸ ປຎ຺ຎາຓວາ ນໂຣ;

ສາຘຸ ມິຕ຺ຕານມ-ທ຺ທຸພ຺ໂຠ,

ປາປສ຺ສ ອ-ກຣໍ ສຸຂໍ.

໑໐໖.

ກລ຺ຍາຓກາຣີ ກລ຺ຍາຓໍ,

ປາປກາຣີ ຈ ປາປກໍ;

ຍາທິສໍ ວປຕ຺ເຕ ພີຊໍ,

ຕາທິສໍ ວຫເຕ ຜລໍ.

໑໐໗.

ຊີວໍ ປຎ຺ຎາຍ ຣກ຺ເຂຍ຺ຍ,

ຘນໍ ກມ຺ເມນ ຣກ຺ຂເຍ;

ເອວໍ ຫ຺ຍໂຣໂຄ ສຸຂິໂຕ,

ໂປຣາຓກ-ວໂຈ ອິທໍ.

໑໐໘.

ອນຸປຸພ຺ເພນ ເມຘາວີ,

ໂຖກໍ ໂຖກໍ ຂເຓ ຂເຓ;

ກມ຺ມາໂຣ ຣຊຕສ຺ເສວ,

ນິທ຺ທເມ ມລມຕ຺ຕໂນ.

໑໐໙.

ວາຈານຸຣກ຺ຂີ ມນສາ ສຸສໍວຸໂຕ,

ກາເຍນ ຈ ນາກຸສລໍ ກຍິຣາ;

ເອເຕຕໂຍ ກມ຺ມປເຖວິໂສຘເຍ,

ອາຣາຘເຍ ມຄ຺ຄມິສິ-ປ຺ປເວທິຕໍ.

໑໑໐.

ອ-ສນ຺ເຕ ໂນປເສເວຍ຺ຍ,

ສນ຺ເຕ ເສເວຍ຺ຍ ປຓ຺ຑິໂຕ;

ອ-ສນ຺ໂຕ ນິຣຍໍ ຍນ຺ຕິ,

ສນ຺ໂຕ ປາເປນ຺ຕິ ສຸຄ຺ຄຕິໍ.

໑໑໑.

ອ-ກໂຣນ຺ໂຕປິ ເຈ ປາປໍ,

ກໂຣນ຺ຕໍ ມຸປເສວຕິ;

ສງ຺ກິໂຍ ໂຫຕິ ປາປສ຺ມິໍ,

ອ-ວຓ຺ໂຓ ຈສ຺ສ ຣູຫຕິ.

໑໑໒.

ສງ຺ຆາຄໂຕ ອນິຏ຺ເຐຫິ,

ອມ຺ໂພປິ ມຘຸຣປ຺ຜໂລ;

ຕິຕ຺ຕປຸພ຺ໂພວ ປາ ເອວ,

ມນຸສ຺ໂສ ຕຸ ສ-ຊີວໂກ.

໑໑໓.

ນິຫີນ-ເສວິໂຕ ໂປໂສ,

ນິຫີຍຕິ ຈ ສພ຺ພທາ;

ກທາຈິ ນ ຈ ຫາເຍຖ,

ຕຸລ຺ຍເສວີປິ ອຕ຺ຕນາ.

໑໑໔.

ວຓ຺ຓ-ຄນ຺ຘ-ຣໂສເປໂຕ,

ອມ຺ໂພຍໍ ອຫຸວາ ປຸເຣ;

ຕເມວ ປູຊໍ ລຠມາໂນ;

ເກນມ຺ໂພ ກຏຸກປ຺ຜໂລ.

໑໑໕.

ປຸຈິມນ຺ທ-ປຣິວາໂຣ,

ອມ຺ໂພ ເຕ ທຘິວາຫນ;

ມູລໍ ມູເລນ ສໍສຏ຺ຐໍ,

ສາຂາ ສາຂໍ ນິເສວເຣ;

ອສາຕ຺ຕ-ສນ຺ນິວາເສນ,

ເຕນມ຺ໂພ ກຏຸກປ຺ຜໂລ.

໑໑໖.

ປາໂມກ຺ຂ-ຠຊນໍ ຂິປ຺ປໍ,

ອຕ຺ຖ-ກາໂມ ສຸ-ວຸຑ຺ຒິຍໍ;

ຠເຊ ອຸຕ຺ຕຣິ ອຕ຺ຕນາ,

ຕສ຺ມາ ອຸເທຕິ ປຓ຺ຑິໂຕ.

໑໑໗.

ກາໂຈ ກຎ຺ຈນ-ສໍສຄ຺ຄາ,

ຘຕ຺ເຕ ມາຣ-ກຕິໍ ຊຸຕິໍ;

ຕຖາ ສໍສນ຺ນິຘາເນນ,

ມູຬ຺ໂຫ ຍາຕິ ປວີຓຕໍ.

໑໑໘.

ກີໂຏປິ ສຸມໂນ-ສງ຺ຄາ,

ອາໂຣຫຕິ ສຕໍ ສິໂຣ;

ອສ຺ມາປິ ຍາຕິ ເທວຕ຺ວໍ,

ມຫພ຺ຠິ ສຸປ຺ປຕິຏ຺ຐິໂຕ.

໑໑໙.

ສພ຺ຠິເຣວ ສມາເສຖ,

ສພ຺ຠິ ກຸພ຺ເພຖ ສນ຺ຘວໍ;

ສຕໍ ສທ຺ຘມ຺ມມຎ຺ຎາຍ,

ປຎ຺ຎໍ ລຠຕິ ນາຎ຺ຎໂຕ.

໑໒໐.

ສພ຺ຠິເຣວ ສມາເສຖ,

ສພ຺ຠິ ກຸພ຺ເພຖ ສນ຺ຘວໍ;

ສຕໍ ສທ຺ຘມ຺ມມຎ຺ຎາຍ,

ສພ຺ພ-ທຸກ຺ຂາ ປມຸຈ຺ຈຕ຺ຕິ.

໑໒໑.

ສກິໍເທວ ກຸລປຸຕ຺ຕ,

ສພ຺ຠິ ໂຫຕິ ສມາຄໂມ;

ສາ ນໍ ສງ຺ຄຕິ ປາເລຕິ,

ນາສພ຺ຠິ ພຫຸ ສງ຺ຄໂມ.

໑໒໒.

ເສຍ຺ໂຍ ອ-ມິຕ຺ໂຕ ເມຘາວີ,

ຍຎ຺ເຈ ພາລານຸກມ຺ປໂກ.

໑໒໓.

ສີລວນ຺ຕໍ ປຎ຺ຎວນ຺ຕໍ,

ທິວາ ນິສ຺ສຍ-ທາຍກໍ;

ພຫຸສ຺ສຸຕໍ ຄເວສນ຺ໂຕ,

ຠເຊຍ຺ຍ ອຕ຺ຖ-ມາມໂກ.

໑໒໔.

ປາປ-ມິຕ຺ເຕ ວິວຊ຺ເຊຕ຺ວາ,

ຠເຊຍ຺ຍຸຕ຺ຕມ-ປຸຄ຺ຄລໍ;

ໂອວາເທ ຈສ຺ສ ຕິຏ຺ເຐຍ຺ຍ,

ປຕ຺ເຖນ຺ໂຕ ອ-ຈລໍ ສຸຂໍ.

໑໒໕.

ນ ຠເຊ ປາປເກ ມິຕ຺ເຕ,

ນ ຠເຊ ປຸຣິສາຘເມ;

ຠເຊຖ ມິຕ຺ຕ຺ເຕ ກລ຺ຍາເຓ,

ຠເຊຖ ປຸຣິສຸຕ຺ຕເມ.

໑໒໖.

ອນວຊ຺ຊໍ ມຸຂມ຺ໂພຊ,

ມນວຊ຺ຊາ ຈ ຠາຣຕີ;

ອລງ຺ກຕາວ ໂສຠນ຺ເຕ,

ກິໍສຸ ເຕ ນິຣລງ຺ກຕາ.

໑໒໗.

ນ ຫິ ວຓ຺ເຓນ ສມ຺ປນ຺ນາ,

ມຎ຺ຊຸກາ ປິຍ-ທສ຺ສິນາ;

ຂຣາ ວາຈາ ປິຍາ ໂຫຕິ,

ອສ຺ມິໍ ໂລເກ ປຣມ຺ຫິ ຈ.

໑໒໘.

ນນຸ ປສ຺ສສິມໍ ກາຬິໍ,

ທຸພ຺ພຓ຺ຓໍ ຕິລກາຫຕໍ;

ໂກລິລໍ ສຓ຺ຫ-ວາເຈນ,

ພຫູນໍ ປາຓິນໍ ປິຍໍ.

໑໒໙.

ຕສ຺ມາ ສຂິລ-ວາຈາຍ,

ມນ຺ຕ-ຠາຓີ ອນຸທ຺ຘໂຕ;

ອຕ຺ຖໍ ຘມ຺ມຎ຺ຈ ທີເປຕິ,

ມຘຸຣໍ ຕສ຺ສ ຠາສິຕໍ.

໑໓໐.

ຕເມວ ວາຈໍ ຠາເສຍ຺ຍ,

ຍາ ສຕ຺ຕານໍ ນ ຕາປເຍ;

ປເຣ ຈ ນ ວິຫິໍເສຍ຺ຍ,

ສາ ເວ ວາຈາ ສຸຠາສິຕາ.

໑໓໑.

ປິຍໍ ວາຈໍວ ຠາເສຍ຺ຍ,

ຍາ ວາຈາ ປຏິນນ຺ທິຕາ;

ຍໍ ອນາທາຍ ປາປານິ;

ປເຣສໍ ຠາສເຕ ປິຍໍ.

໑໓໒.

ສຈ຺ຈໍ ເວ ອມຕາ ວາຈາ,

ເອສ ຘມ຺ໂມ ສນນ຺ຕໂນ;

ສຈ຺ເຈ ອຕ຺ເຖ ຈ ຘມ຺ເມ ຈ,

ອາຫຸ ສນ຺ໂຕ ປຕິຏ຺ຐິຕາ.

໑໓໓.

ສຸຠາສິຕຎ຺ຈ ຘມ຺ມຎ຺ຈ,

ປິຍຎ຺ຈ ສຈ຺ຈເມວ ຈ;

ຈຕຸ-ອງ຺ເຄຫິ ສມ຺ປນ຺ນໍ,

ວາຈໍ ຠາເສຍ຺ຍ ປຓ຺ຑິໂຕ.

໑໓໔.

ມນາປເມວ ຠາເສຍ຺ຍ,

ນາມນາປໍ ກຸທາຈນໍ;

ມນາປໍ ຠາສມານສ຺ສ,

ສິທ຺ຘໍ ປິໂຍສຘໍ ຠເວ.

໑໓໕.

ຍໍ ວເທຍ຺ຍ ຕໍ ກເຣຍ຺ຍ,

ຍໍ ນ ວເທ ນ ຕໍ ກເຣ;

ອ-ກໂຣນ຺ຕໍ ຠາສມານໍ,

ປຣິຊານນ຺ຕິ ປຓ຺ຑິຕາ.

໑໓໖.

ຣໂຫວາທໍ ນ ຠາເສຍ຺ຍ,

ນ ສມ຺ມຸຂາ ຂິຓໍ ຠເຓ;

ອ-ຕຣມາໂນວ ຠເຓຍ຺ຍ,

ຕຣມາໂນວ ໂນ ຠເຓ.

໑໓໗.

ມາໂວຈ ຜຣຸສໍ ກິຎ຺ຈິ,

ວຸຕ຺ຕາ ປຏິວເທຍ຺ຍຸໍ ຕໍ;

ທຸກ຺ຂາ ຫິ ສາຣມ຺ຠກຖາ,

ປຏິທຓ຺ຑາ ຜຸເສຍ຺ຍຸໍ ຕໍ.

໑໓໘.

ສກ-ຍຸຕ຺ຕໍ ກເຣ ກມ຺ມໍ,

ສກ-ຍຸຕ຺ຕໍ ວຈິໍ ຠເຓ;

ອ-ຍຸຕ຺ຕເກ ຘນໍ ນຏ຺ຐໍ,

ອ-ຍຸຕ຺ເຕ ຊີວິຕໍ ຂເຍ.

໑໓໙.

ເຍ ວຸຑ຺ຒມປຈາຍນ຺ຕິ,

ນຣາ ຘມ຺ມສ຺ສ ຘກາວິທາ;

ທິຏ຺ເຐ ຘມ຺ເມວ ປາສໍສາ,

ສມ຺ປຣາເຍ ຈ ສຸຄ຺ຄຕິໍ.

໑໔໐.

ໂປຣີ-ກຖໍ-ວ ຠາເສຍ຺ຍ,

ຍຸຕ຺ຕາ ກຖາ ຫິ ປູຣິໂນ;

ຠາຕິ-ມຕ຺ຕຎ຺ຈ ຠາຕາຕິ,

ປິຕຸ-ມຕ຺ຕໍ ປິຕາ ອິຕິ.

໑໔໑.

ທານຎ຺ຈ ປິຍ-ວຊ຺ຊຎ຺ຈ,

ອຕ຺ຖ-ຈຣິຍາ ຈ ຍາ ອິຘ;

ສມານຕ຺ຕຕາ ຘມ຺ເມສ,

ຕຕ຺ຖ ຕຕ຺ຖ ຍຖາຣຫໍ.

໑໔໒.

ສກິໍ ວທນ຺ຕິ ຣາຊາໂນ,

ສກິໍ ສມຓ-ພ຺ຣາຫ຺ມຓາ;

ສກິໍວ ປຸຣິສາ ໂລເກ,

ເອສຘມ຺ໂມ ສນນ຺ຕໂນ.

໑໔໓.

ເອກ-ວາຈໍວ ທ຺ເວວາຈໍ,

ຠເຓຍ຺ຍ ອນຸກມ຺ປໂກ;

ຕທຸຕ຺ຕຣິ ນ ຠາເສຍ຺ຍ,

ທາໂສວຍ຺ຍສ຺ສ ສນ຺ຕິເກ.

໑໔໔.

ຕສ຺ເສວ ເຕນ ປາປິໂຍ,

ໂຍ ກຸທ຺ຘໍ ປຏິກຸຊ຺ຌຕ຺ຕິ;

ກຸທ຺ຘໍ ອ-ປຏິກຸຊ຺ຌນ຺ໂຕ,

ສງ຺ຄາມໍ ເຊຕິ ທຸຊ຺ຊຍໍ.

໑໔໕.

ອຸຠິນ຺ນມຕ຺ຖໍ ຈຣຕິ,

ອຕ຺ຕໂນ ຈ ປຣສ຺ສ ຈ;

ປຣໍ ສໍກຸປິຕໍ ຎຕ຺ວາ,

ໂຍ ສໂຕ ອຸປສມ຺ມຕິ.

ອຕ຺ຕານໍ ຣກ຺ຂນ຺ໂຕ ປຣໍ ຣກ຺ຂຕິ,

ປຣໍ ຣກ຺ຂນ຺ໂຕ ອຕ຺ຕານໍ ຣກ຺ຂຕິ.

໑໔໖.

ສີລ-ສມາຘິ-ປຎ຺ຎານໍ,

ຂນ຺ຕີ ປຘານ-ກາຣຓໍ;

ສພ຺ເພປິ ກຸສລາ ຘມ຺ມາ,

ຂນ຺ຕ຺ຍາຍຕ຺ຕາວ ວຑ຺ຒເຣ.

໑໔໗.

ຂມາ-ຂຄ຺ຄ-ກເຣຕສ຺ສ,

ທຸຊ຺ຊໂນ ກິໍ ກຣິສ຺ສຕິ;

ອ-ຕິເຓ ປຕິໂຕ ວນ຺ຫິ,

ສຍເມວູປສມ຺ມຕິ.

໑໔໘.

ສຸສ຺ສຸສາ ສວຓຎ຺ເຈວ,

ຄຫຓໍ ຘາຣຓໍ ຕຖາ;

ອຸຫາໂປຫຕ຺ຖວິຎ຺ຎາຓໍ,

ຕຕ຺ວ-ຎ຺ຎາຓຎ຺ຈຘີຄຸຓໍ.

໑໔໙.

ຍສ຺ເສເຕ ຈຕຸໂຣ ຘມ຺ມາ,

ອຕ຺ຖິ ໂປເສສຸ ປຓ຺ຑິຕ;

ສຈ຺ຈໍ ຘມ຺ໂມ ຘີຕິ ຈາໂຄ,

ທິຏ຺ຐໍ ໂສ ອຕິວຕ຺ຕຕິ.

໑໕໐.

ເວຊ຺ໂຊ ປຸໂຣຫິໂຕ ມນ຺ຕີ,

ເວທຎ຺ໂຎຕ຺ຣ ຈຕຸຕ຺ຖໂກ;

ປຠາຕ-ກາເລ ທຏ຺ຐພ຺ພາ,

ນິຈ຺ຈໍ ສ຺ວ-ສີຣິມິຈ຺ຉຕາ.

໑໕໑.

ມິຕ຺ຕານໍ ສນ຺ຕິກໍ ຄຈ຺ເຉ,

ກາເລ ນ ຣຕ຺ຕິຍໍ ກິສໍ;

ເຈ ພຫຸໍ ຠິຊ຺ເຊ ຈິນິຕ຺ວາ,

ຕໍ ມິຕ຺ເຕສຸ ສມາກເຣ.

໑໕໒.

ນ ປເຣສໍ ວິໂລມານິ,

ນ ປເຣສໍ ກຕາກຕໍ;

ອຕ຺ຕໂນວ ອເວກ຺ເຂຍ຺ຍ,

ກຕານິ ອ-ກຕານິ ຈ.

໑໕໓.

ເທສ-ຊາຕິ-ປຸພ຺ເພ-ຈຣາ,

ອນຸ-ຈຣາ ຊໂນ ກເຣ;

ປເຣສໍ ເວຘກໍ ມາຍໍ,

ຕໍ ຊານິຕ຺ວາ ສຂໍ ກເຣ.

໑໕໔.

ປຣິຕ຺ຕໍ ທາຣຸມາຣຸຍ຺ຫ,

ຍຖາ ສີເທ ມຫຓ຺ຓເວ;

ເອວໍ ກຸສີຕມາຄມ຺ມ,

ສາຘຸ-ຊີວີປິ ສີທຕິ;

ຕສ຺ມາ ຕໍ ປຣິວຊ຺ເຊຍ຺ຍ,

ກຸສີຕໍ ຫີນ-ວີຣິຍໍ.

໑໕໕.

ອລສຎ຺ຈ ປມາໂທ ຈ,

ອນຸຏ຺ຐານໍ ອ-ສໍຍໂມ;

ນິທ຺ທາ ຕນ຺ທິ ຈ ເຕ ຉິທ຺ເທ,

ສພ຺ພໂສ ຕໍ ວິວຊ຺ຊເຍ.

໑໕໖.

ຈເຊຍ຺ຍ ທຸມ຺ມິຕ຺ຕໍ ພາລໍ,

ອາສີວິສໍວ ມາຓໂວ;

ຠຎ຺ເຊຍ຺ຍ ປາປກໍ ກມ຺ມໍ,

ນຬາຄາຣໍວ ກຸຎ຺ຊໂຣ.

໑໕໗.

ນ ຫິ ອຎ຺ຎຎ຺ຎ-ຈິຕ຺ຕານໍ,

ອິຕ຺ຖີນໍ ປຸຣິສານ ວາ;

ນານາວີກຕ຺ວາ ສໍສຄ຺ຄໍ,

ຕາທິສໍ ປິຈ ນາສ຺ມເສ.

໑໕໘.

ນາສ຺ມເສ ກຕ-ປາປມ຺ຫິ,

ນາສ຺ມເສ ອລິກ-ວາທິເນ;

ນາສ຺ມເຕ ອຕ຺ຕຕ຺ຖປຎ຺ຎມ຺ຫິ,

ອຕ຺ຕ-ສນ຺ເຕປິ ນາສ຺ມເຕ.

໑໕໙.

ຆຕາສນໍ ກຸຎ຺ຊຣໍ ກຓ຺ຫ-ສປ຺ປໍ,

ມຸທ຺ຘາ-ຠິສິຕ຺ຕໍ ປມທາ ຈ ສພ຺ພາ;

ເອເຕ ນໂຣ ນິຈ຺ຈສໂຕ ຠເຊຖ,

ເຕສໍ ຫເວ ທຸພ຺ພິທູ ສພ຺ພ-ຠາໂວ.

໑໖໐.

ອິຕ຺ຖີນໍ ທຸຊ຺ຊນານ-ຎ຺ຈ,

ວິສ຺ສາໂສ ໂນ-ປ ປຊ຺ຊເຕ;

ວິເສ ສິງ຺ຄິມ຺ຫິ ນທິຍໍ,

ໂຣເຄ ຣາຊ-ກຸລມ຺ຫິ ຈ.

໑໖໑.

ອິຕ຺ຖິ-ຘຸຕ຺ໂຕ ສຸຣາ-ຘຸຕ຺ໂຕ,

ອກ຺ຂ-ຘຸຕ຺ໂຕ ຈ ໂຍ ນໂຣ;

ລທ຺ຘໍ ລທ຺ຘໍ ວິນາເສຕິ,

ຕໍ ປຣາຠວໂຕ ມຸຂໍ.

໑໖໒.

ປາປ-ມິຕ຺ໂຕ ປາປ-ສໂຂ,

ປາປ-ອາຈາຣ ໂຄຈໂຣ;

ອສ຺ມາ ໂລກາ ປຣມ຺ຫາ ຈ,

ອຸຠຍາ ຘໍສເຕ ນໂຣ.

໑໖໓.

ມຈ຺ເຉເຣນ ຍສໍ ຫຕໍ,

ກຸປ຺ປເນນ ຄຸໂຓ ຫໂຕ;

ກູເຏນ ນສ຺ສເຕ ສຈ຺ຈໍ,

ຂຸທ຺ເທນ ຘມ຺ມ-ຣກ຺ຂນໍ.

໑໖໔.

ອກ຺ຂ-ເທວີ ຘນານິ ຈ,

ວິນາໂສ ໂຫຕິ ອາປທາ;

ຐິຕິ ຫຕາ ປມາໂທ ຈ,

ທ຺ວິຊໍ ຠິກ຺ຂຸຎ຺ຈ ນສ຺ສຕິ.

໑໖໕.

ເປສຸຎ຺ເຎນ ກຸລໍ ຫຕໍ,

ມາເນນ ຫິຕມຕ຺ຕໂນ;

ທຸຈ຺ຈຣິເຕນ ມານຸໂສ,

ທລິທ຺ທາຍາທໂຣ ຫໂຕ.

໑໖໖.

ອ-ມານນາ ຍຕ຺ຖ ສິຍາ,

ສນ຺ຕານໍປິ ວິມານນາ;

ຫີນ-ສມ຺ມານນາວາປິ,

ນ ຕຕ຺ຖ ວສຕິໍ ວເສ.

໑໖໗.

ຍຕ຺ຖາລໂສ ຈ ທກ຺ໂຂ ຈ,

ສູໂຣ ຠີຣຸ ຈ ປູຊິຍາ;

ນ ຕຕ຺ຖ ສນ຺ໂຕ ວສນ຺ຕິ,

ອ-ວິເສສ-ກເຣ ນເຣ.

໑໖໘.

ໂນ ເຈ ອສ຺ສ ສກາ-ພຸທ຺ຘິ,

ວິນໂຍ ວາ ສຸ-ສິກ຺ຂິໂຕ;

ວເນ ອນ຺ຘ-ມຫິໍໂສວ,

ຈເຣຍ຺ຍ ພຫຸໂກ ຊໂນ.

໑໖໙.

ຜລໍ ເວ ກທລິໍ ຫນ຺ຕິ,

ຜລໍ ເວຬຸໍ ຜລໍ ນຬໍ;

ສກ຺ກາໂຣ ກາ-ປຸຣິສໍ ຫນ຺ຕິ,

ຄພ຺ໂຠ ອສ຺ສຕຣິໍ ຍຖາ.

໑໗໐.

ວຊ຺ຊຎ຺ຈ ວຊ຺ຊໂຕ ຎຕ຺ວາ,

ອ-ວຊ຺ຊຎ຺ຈ ອ-ວຊ຺ຊໂຕ;

ສມ຺ມາທິຏ຺ຐິ-ສມາທານາ,

ສຕ຺ຕາ ຄຈ຺ຉນ຺ຕ຺ຕິ ສຸຄ຺ຄຕິໍ.

ຆຣາວາສ-ນິທ຺ເທສ

໑໗໑.

ທຸກ຺ຂໍ ຄຫພ຺ພຕໍ ສາຘຸ,

ສໍວິຠຊ຺ຊຎ຺ຈ ໂຠຊນໍ;

ອ-ຫາໂສ ອຕ຺ຖ-ໂລເຠສຸ,

ອຕ຺ຖ-ພ຺ຍາປຕ຺ຕິ ອພ຺ຍໂຖ.

໑໗໒.

ໂຍຘ ສີຕຎ຺ຈ ອຸຓ຺ຫຎ຺ຈ,

ຕິຓາ ຠິຍ຺ໂຍ ນ ມຎ຺ຎຕິ;

ກຣໍ ປຸຣິສ-ກິຈ຺ຈານິ,

ໂສ ສຸຂາ ນ ວິຫາຍຕິ.

໑໗໓.

ປຓ຺ຑິໂຕ ສີລ-ສມ຺ປນ຺ໂນ,

ສຓ຺ຫາ ຈ ປຏິຠານວາ;

ນິວາຕ-ວຸຕ຺ຕິ ອຕ຺ຖທ຺ໂຘ,

ຕາທິໂສ ລຠເຕ ຍສໍ.

໑໗໔.

ອຸຏ຺ຐານໂກ ອນລໂສ,

ອາປທາສຸ ນ ເວຘຕິ;

ອຈ຺ຉິນ຺ນວຸຕ຺ຕິ ເມຘາວີ,

ຕາທິໂສ ລຠເຕ ຍສໍ.

໑໗໕.

ສງ຺ຄາຫໂກ ມິຕ຺ຕ-ກໂຣ,

ວທຎ຺ຎູ ວີຕ຺ຕ-ມຈ຺ຉໂຣ;

ເນຕາ ວິ-ເນຕາ ອນຸ-ເນຕາ,

ຕາທິໂສ ລຠເຕ ຍສໍ.

໑໗໖.

ອຸຏ຺ຐານວໂກ ສຕີມໂຕ,

ສຸຈິ-ກມ຺ມສ຺ສ ນິສມ຺ມກາຣິໂນ;

ສຎ຺ຎຕສ຺ສ ຘມ຺ມ-ຊີວິໂນ,

ອ-ປ຺ປມຕ຺ຕສ຺ສ ຍໂສຠິ-ວຑ຺ຒຕິ.

໑໗໗.

ທ຺ເວວ ຕາຕ ປທາການິ,

ຍຕ຺ຖ ສພ຺ພໍ ປຕິຏ຺ຐິຕໍ;

ອ-ລທ຺ຘສ຺ສ ຈ ໂຍ ລາໂຠ,

ລທ຺ຘສ຺ສ ອນຸຣກ຺ຂຓາ.

໑໗໘.

ຈຕຸຘາ ວິຠເຊ ໂຠເຄ,

ປຓ຺ຑິໂຕ ຆຣມາວສໍ;

ເອເກນ ໂຠຄໍ ຠຸຎ຺ເຊຍ຺ຍ,

ທ຺ວີຫິ ກມ຺ມໍ ປໂຍຊເຍ;

ຈຕຸຕ຺ຖຎ຺ຈ ນິຘາເປຍ຺ຍ,

ອາປທາສຸ ຠວິສ຺ສຕິ.

໑໗໙.

ອຎ຺ຊນານໍ ຂຍໍ ທິສ຺ວາ,

ອຸປຈິການຎ຺ຈ ອາຈຍໍ;

ມຘູນຎ຺ຈ ສມາຫາຣໍ,

ປຓ຺ຑິຕ຺ໂຕ ຆຣມາວເສ.

໑໘໐.

ວິຠວໍ ຣກ຺ຂໂຕ ລທ຺ຘໍ,

ປຣິຫານິ ນ ວິຊ຺ຊຕິ;

ອາຣກ຺ຂມ຺ຫິ ອ-ສນ຺ຕມ຺ຫິ,

ລທ຺ຘໍ ລທ຺ຘໍ ວິນສ຺ສຕິ.

໑໘໑.

ປຎ຺ຎາ ນຕ຺ຖິ ຘນໍ ນຕ຺ຖິ,

ຍສ຺ສ ໂລເກ ນ ວິນ຺ທຕິ;

ປຸຕ຺ຕ-ທາຣາ ນ ປີຍນ຺ຕິ,

ຕສ຺ສ ມິຕ຺ຕໍ ສຸຂາວຫໍ.

໑໘໒.

ຈຕ຺ຕາໂຣ ຈ ເວທິຕພ຺ພາ,

ມິຕ຺ຕາ ເຈວ ສຸຫທາ ຈ;

ອຸປກາໂຣ ສຸຫໂທປິ,

ສມານ-ສຸຂ-ທຸກ຺ໂຂ ຈ;

ອຕ຺ຖກ຺ຂາຍີນຸກມ຺ປໂກ,

ຕຖາ ມິຕ຺ໂຕ ເວທິຕພ຺ໂພ.

໑໘໓.

ໂຠຄາ ນຏ຺ເຐນ ຊິຓ຺ເຓນ,

ອ-ມິເຕນ ຈ ໂຠຊເນ;

ນ ຕິຏ຺ຐນ຺ຕິ ຈິຣໍ ທິສ຺ວາ,

ຕໍ ປຓ຺ຑິໂຕ ຆເຣ ວເສ.

໑໘໔.

ອຕິ-ສີຕໍ ອຕິ-ອຸຓ຺ຫໍ,

ອຕິ-ສາຍມິທໍ ອຫຸ;

ອິຕິ ວິສ຺ສຏ຺ຐ-ກມ຺ມນ຺ເຕ,

ອຕ຺ຖາ ອຈ຺ເຈນ຺ຕິ ມາຓເວ.

໑໘໕.

ນ ທິວາ ສຸປ຺ປ-ສີເລນ,

ຣຕ຺ຕິນຏ຺ຐານເທສ຺ສິນາ;

ນິຈ຺ຈໍ ມຕ຺ເຕນ ໂສຓ຺ເຑນ,

ສກ຺ກາ ອາວສິຕຸໍ ຆຣໍ.

໑໘໖.

ຫນນ຺ຕິ ໂຠຄາ ທຸມ຺ເມຘໍ,

ໂນ ເຈ ປາຣ-ຄເວສິໂນ;

ໂຠຄ-ຕຓ຺ຫາຍ ທຸມ຺ເມໂຘ,

ຫນ຺ຕິ ອຎ຺ເຎວ ອຕ຺ຕນໍ.

໑໘໗.

ທຸຊ຺ຊີວິຕມຊີວິມ຺ຫາ,

ເຍສໍ ໂນ ນ ທທາມເສ;

ວິຊ຺ຊມາເນສຸ ໂຠເຄສຸ,

ທີປໍ ນາ ກມ຺ຫ ມຕ຺ຕໂນ.

໑໘໘.

ສຏ຺ຐິ-ວສ຺ສ-ສຫສ຺ສານິ,

ປຣິປຸຓ຺ຓານິ ສພ຺ພໂສ;

ນິຣເຍ ປຈ຺ຈມານານໍ,

ກທາ ອນ຺ໂຕ ຠວິສ຺ສຕິ.

໑໘໙.

ນຕ຺ຖິ ອນ຺ໂຕ ກຸໂຕ ອນ຺ໂຕ,

ນ ອນ຺ໂຕ ປຕິທິສ຺ສຕິ;

ຕທາ ຫິ ປກຕໍ ປາປໍ,

ມມ ຕຸຍ຺ຫຎ຺ເຈ ມາຣິສາ;

໑໙໐.

ໂສຫໍ ນູນ ອິໂຕ ຄນ຺ຕາ,

ໂຍນິ ລທ຺ຘານ ມານຸສໍ;

ວທຎ຺ຎູ ສີລ-ສມ຺ປນ຺ໂນ,

ກາຫາມິ ກຸສລໍ ພຫຸໍ.

໑໙໑.

ມາ ຄິຊ຺ເຌ ປຈ຺ຈເຍ ມຈ຺ໂຈ,

ພຫຸ-ໂທສາ ຫິ ປຈ຺ຈຍາ;

ຈຣນ຺ໂຕ ປຈ຺ຈເຍ ຎາຍາ,

ອຸຠຍຕ຺ຖາປິ ວຑ຺ຒຕິ.

໑໙໒.

ອ-ລທ຺ຘາ ວິຕ຺ຕໍ ຕປ຺ປຕິ,

ປຸພ຺ເພ ອ-ສມຸທານິຕໍ;

ນ ປຸພ຺ເພ ຘນເມສິສ຺ສໍ,

ອິຕິ ປຈ຺ຉານຸຕປ຺ປຕິ.

໑໙໓.

ກູຏເວທີ ປຸເຣ ອາສິໍ,

ປິສຸໂຓ ປິຏ຺ຐິ-ມໍສິໂກ;

ຈຓ຺ໂຑ ຈ ຜຣຸໂສ ຈາປິ,

ອິຕິ ປຈ຺ຉານຸຕປ຺ປຕິ.

໑໙໔.

ປາຓາຕິປາຕີ ປຸເຣ ອາສິໍ,

ລຸທ຺ໂທ ຈາປິ ອນຣິໂຍ;

ຠູຕານໍ ນານຸກມ຺ປິຍໍ,

ອິຕິ ປຈ຺ຉານຸຕປ຺ປຕິ.

໑໙໕.

ພຫູສຸ ວຕ ສນ຺ຕີສຸ,

ອນາປາທາສຸ ອິຕ຺ຖິສຸ;

ປຣ-ທາຣໍ ອເສວິສ຺ສໍ,

ອິຕິ ປຈ຺ຉານຸຕປ຺ປຕິ.

໑໙໖.

ພຫຸມ຺ຫິ ຕວ ສນ຺ຕມ຺ຫິ,

ອນ຺ນ-ປາເນ ອຸປຏ຺ຐິເຕ;

ນ ປຸພ຺ເພ ອທທໍ ທານໍ,

ອິຕິ ປຈ຺ຉານຸຕປ຺ປຕິ.

໑໙໗.

ມາຕຣໍ ປິຕຣຎ຺ຈາປິ,

ຊິຓ຺ຓກໍ ຄຕ-ໂຍພ຺ພນໍ;

ປຫຸ ສນ຺ໂຕ ນ ໂປສິສ຺ສໍ,

ອິຕິ ປຈ຺ຉານຸກປ຺ປຕິ.

໑໙໘.

ອາຈຣິຍມນຸສຕ຺ຖາຣໍ,

ສພ຺ພ-ກາມ-ຣສາຫຣໍ;

ປິຕຣໍ ອຕິມຎ຺ຎິສ຺ສໍ,

ອິຕິ ປຈ຺ຉານຸຕປ຺ປຕິ.

໑໙໙.

ສມເຓ ພ຺ຣາຫ຺ມເຓ ຈາປິ,

ສີລວນ຺ເຕ ພຫຸສ຺ສຸເຕ;

ນ ປຸພ຺ເພ ປຍິຣຸປາສິສ຺ສໍ,

ອິຕິ ປຈ຺ຉານຸຕປ຺ປຕິ.

໒໐໐.

ສາຘຸ ໂຫຕິ ຕໂປ ຈິຓ຺ໂຓ,

ສນ຺ໂຕ ຈ ປຍິຣຸປາສິໂຕ;

ນ ປຸພ຺ເພວ ຕໂປຈິຓ຺ໂຓ,

ອິຕິ ປຈ຺ຉານຸຕປ຺ປຕິ.

໒໐໑.

ໂຍ ຈ ເອຕານິ ຐານານິ,

ໂຍນິໂສ ປຏິປຊ຺ຊຕິ;

ກຣໍ ປຸຣິສ-ກິຈ຺ຈານິ,

ສ ປຈ຺ຉາ ນານຸຕປ຺ປຕິ.

໒໐໒.

ນ ສາຘາຣຓ-ທາຣສ຺ສ,

ນ ຠຸຎ຺ເຊ ສາຘຸເມກໂກ;

ນ ເສເວ ໂລກາຍຕິກໍ,

ເນຕໍ ປຎ຺ຎາຍ ວຑ຺ຒນໍ.

໒໐໓.

ສີລວາ ວຕ຺ຕ-ສມ຺ປນ຺ໂນ,

ອ-ປ຺ປມຕ຺ໂຕ ວິຈກ຺ຂໂຓ;

ນິວາຕ຺ຕ-ວຸຕ຺ຕິ ອຕ຺ຖທ຺ໂຘ,

ສຸຣໂຕ ສຂິໂຕ ມຸທຸ.

໒໐໔.

ສງ຺ຄເຫຕາ ຈ ມິຕ຺ຕານໍ,

ສໍວິຠາຄີ ວີຘານວາ;

ຕປ຺ເປຍ຺ຍ ອນ຺ນ-ປາເນນ,

ສທາ ສມຓ-ພ຺ຣາຫ຺ມເຓ.

໒໐໕.

ຘມ຺ມ-ກາໂມ ສຸຕາ-ຘາໂຣ,

ຠເວຍ຺ຍ ປຣິປຸຈ຺ຉໂກ;

ສກ຺ກຈ຺ຈໍ ປຍິຣຸປາເສຍ຺ຍ,

ສີລວນ຺ເຕ ພຫຸສ຺ສຸຕ຺ເຕ.

໒໐໖.

ຆຣມາວສມານສ຺ສ,

ຄຫຏ຺ຐສ຺ສ ສກໍ ຆຣໍ;

ເຂມາ ວຸຕ຺ຕິ ສິຍາ ເອວໍ,

ເອວໍ ນຸ ອສ຺ສ ສງ຺ຄໂຫ.

໒໐໗.

ອ-ພ຺ຍປຊ຺ໂຊ ສິຍາ ເອວໍ,

ສຈ຺ຈ-ວາທີ ຈ ມາຓໂວ;

ອສ຺ມາ ໂລກາ ປຣໍ ໂລກໍ,

ເອວໍ ເປຈ຺ຈ ນ ໂສຈຕິ.

໒໐໘.

ສຸຂາ ມຕ຺ເຕຍ຺ຍຕາ ໂລເກ,

ອໂຖ ເປຕ຺ເຕຍ຺ຍຕາ ສຸຂາ;

ສຸຂາ ສາມຎ຺ຎຕາ ໂລເກ,

ອໂຖ ພ຺ຣຫ຺ມຎ຺ຎຕາ ສຸຂາ.

໒໐໙.

ປຖວີ ເວຬຸກໍ ປຕ຺ຕໍ,

ຈກ຺ກວາຬໍ ສຸຈິປ຺ຜລໍ;

ສິເນຣຸ ວມ຺ມິໂກ ຂຸທ຺ໂທ,

ສມຸທ຺ໂທ ປາຕິໂກ ຍຖາ.

໒໑໐.

ພ຺ຣຫ຺ມາຕິ ມາຕາ-ປິຕໂຣ,

ປຸພ຺ພາຈຣິຍາຕິ ວຸຈ຺ຈເຣ;

ອາຫຸເນຍ຺ຍາ ຈ ປຸຕ຺ຕານໍ,

ປຊານມນຸກມ຺ປກາ.

໒໑໑.

ຕສ຺ມາ ຫິ ເນ ນມເສຍ຺ຍ,

ສກ຺ກເຣຍ຺ຍ ຈ ປຓ຺ຑິໂຕ;

ອນ຺ເນນ ອໂຖ ປາເນນ,

ວຕ຺ເຖນ ສຍເນນ ຈ.

ສາຘຸຊນ-ນິທ຺ເທສ

໒໑໒.

ກາຍ-ກມ຺ມໍ ສຸຈິ ເຕສໍ,

ວາຈາ-ກມ຺ມໍ ອນາວິລໍ;

ມໂນ-ກມ຺ມໍ ສຸຈິ-ສຸທ຺ຘໍ,

ຕາທິສາ ສຸຊນາ ນຣາ.

໒໑໓.

ເສຏ຺ຐ-ວິຕ຺ຕໍ ສຸຕໍ ປຎ຺ຎາ,

ສທ຺ຘນໍ ສຕ຺ຕຘາ ໂຫຕ຺ຕິ;

ສທ຺ຘາ ສີລໍ ສຸຕໍ ຈາໂຄ,

ປຎ຺ຎາ ເຈວ ຫິໂຣຕ຺ຕປ຺ປໍ.

໒໑໔.

ສທ຺ຘມ຺ມາປິ ຈ ສຕ຺ເຕວ,

ສທ຺ຘາ ຫິຣີ ຈ ໂອຕ຺ຕປ຺ປໍ;

ພາຫຸສ຺ສຈ຺ຈໍ ຘິໂຣ ເຈວ,

ສຕິ ປຎ຺ຎາ ຈ ອິຈ຺ເຈວໍ.

໒໑໕.

ຫິຣີ-ໂອຕ຺ຕປ຺ປ-ສມ຺ປນ຺ນາ,

ສຸກ຺ຕ຺ກ-ຘມ຺ມ-ສມາຫິຕາ;

ສນ຺ໂຕ ສປ຺ປຸຣິສາ ໂລເກ,

ເທວ-ຘມ຺ມາຕິ ວຸຈ຺ຈເຣ.

໒໑໖.

ສທ຺ໂຘ ຫິຣິມາ ໂອຕ຺ຕປ຺ປີ,

ວີໂຣ ປຎ຺ໂຎ ສ-ຄາຣໂວ;

ຠພ຺ໂພ ອາປຊ຺ຊິຕຸໍ ພຸທ຺ຘິໍ,

ວິຣູຬ຺ຫິຎ຺ຈ ວິປຸລ຺ລຕໍ.

໒໑໗.

ໂຍ ເວ ກຕຎ຺ຎູ ກຕ-ເວທິ ຘີໂຣ,

ກລ຺ຍາຓ-ມິຕ຺ໂຕ ທຬ຺ຫອ-ຠຕ຺ໂຕ ຈ ໂຫຕິ;

ທຸກ຺ຂິຕ຺ຕສ຺ສ ສກ຺ກຈ຺ຈໍ ກໂຣຕິ ກິຈ຺ຈໍ,

ຕຖາວິຘໍ ສປ຺ປຸຣິສໍ ວທນ຺ຕິ.

໒໑໘.

ມາຕາ-ເປຕ຺ຕິ-ຠຣໍ ຊນ຺ຕຸໍ,

ກຸເລ ເຊຏ຺ຐາປຈາຍິນໍ;

ສຓ຺ຫໍ ສຂິລ-ສມ຺ຠາສໍ,

ເປສຸເຓຍປ຺ປຫາຍິນໍ.

໒໑໙.

ມຈ຺ເຉຣ-ວິນເຍ ຍຸຕ຺ຕໍ,

ສຈ຺ຈໍ ໂກຘາຠິຕຸໍ ນຣໍ;

ຕໍ ເວ ເທວາ ຕາວຕິໍສາ,

ອາຫຸ ສປ຺ປຸຣິໂສ ອິຕິ.

໒໒໐.

ອ-ປ຺ປມາເທນ ມຆວາ,

ເທວານໍ ເສຏ຺ຐຕໍ ຄໂຕ;

ອ-ປ຺ປມາທໍ ປສໍສນ຺ຕິ,

ປມາໂທ ຄຣຫິໂຕ ສທາ.

໒໒໑.

ທານໍ ສີລໍ ປຣິຈ຺ຈາຄໍ,

ອາຊ຺ຊວໍ ມທ຺ທວໍ ຕປໍ;

ອ-ໂກຘໍ ອ-ວິຫິໍສຎ຺ຈ,

ຂນ຺ຕີຈ ອ-ວິໂຣຘນໍ.

໒໒໒.

ອິຈ຺ເຈເຕ ກຸສເລ ຘມ຺ເມ,

ຐິເຕ ປສ຺ສາມິ ອຕ຺ຕນິ;

ຕໂຕ ເມ ຊາຍເຕ ປີຕິ,

ໂສມນສ຺ສຎ຺ຈນປ຺ປກໍ.

໒໒໓.

ນນຸ ເຕເຍວ ສນ຺ຕາ ໂນ,

ສາຄຣາ ນ ກຸລາຈລາ;

ມນໍປິ ມຣິຍາທໍ ເຍ,

ສໍວຏ຺ເຏປິ ຊຫນ຺ຕິ ໂນ.

໒໒໔.

ນ ປຸປ຺ຜ-ຄນ຺ໂຘ ປຏິວາຕເມຕິ,

ນ ຈນ຺ທນໍ ຕຄ຺ຄຣ ມລ຺ລິກາ ວາ;

ສຕຎ຺ຈ ຄນ຺ໂຘ ປຏິວາຕເມຕິ,

ສພ຺ພາ ທິສາ ສປ຺ປຸຣິໂສ ປວາຍຕິ.

໒໒໕.

ເຕປິ ໂລກ-ຫິຕາ ສຕ຺ຕາ,

ສູຣິໂຍ ຈນ຺ທິມາ ອປິ;

ອຕ຺ຖໍ ປສ຺ສ ຄມິສ຺ສນ຺ຕິ,

ນິຍໂມ ເກນ ລງ຺ຆເຕ.

໒໒໖.

ສຕ຺ຖາ ເທວ-ມນຸສ຺ສານໍ,

ວສີ ໂສປິ ມຸນິສ຺ສໂຣ;

ຄໂຕວ ນິພ຺ພຸຕິໍ ສພ຺ເພ,

ສງ຺ຂາຣາ ນ ຫິ ສສ຺ສຕາ.

໒໒໗.

ກເຣຍ຺ຍ ກຸສລໍ ສພ຺ພໍ,

ສິວໍ ນິພ຺ພານມາວຫໍ;

ສເຣຍ຺ຍອ ອ-ນິຈ຺ຈໍ ຂນ຺ຘໍ,

ນິພ຺ພິທາ-ຎາຓ-ໂຄຈຣໍ.

໒໒໘.

ຍາຕານຸຍາຍີ ຈ ຠວາຫິ ມາຓວ,

ອລ຺ລຎ຺ຈ ປາຓິໍ ປຣິວຊ຺ຊຍສ຺ສຸ;

ມາ ຈສ຺ສຸ ມິຕ຺ເຕສຸ ກທາຈິ ທຸພ຺ຠິ,

ມາ ຈ ວສໍ ອ-ສຕີນໍ ຄຈ຺ຉ.

໒໒໙.

ອ-ສນ຺ຘວໍ ນາປິ ຈ ທິຏ຺ຐ-ປຸພ຺ພໍ,

ໂຍ ອາສເນນາປິ ນິມນ຺ຕເຍຍ຺ຍ;

ຕສ຺ເສວ ອຕ຺ຖໍ ປຸຣິໂສ ກເຣຍ຺ຍ,

ຍາຕານຸຍາຍີຕິຕມາຫຸປຓ຺ຑິຕາ.

໒໓໐.

ຍສ຺ເສກຣຕ຺ຕິປິ ຆເຣ ວເສຍ຺ຍ,

ຍຕ຺ຖນ຺ນ-ປານໍ ປຸຣິໂສ ລເຠຍ຺ຍ;

ນ ຕສ຺ສ ປາປໍ ມນສາປິ ຈິນ຺ເຕຍ຺ຍ,

ອ-ທຸພ຺ຠ-ປາຓິ ທຫເຕ ມິຕ຺ຕ-ທຸພ຺ໂຠ.

ຕຕີຍ ສາຘຸນຣ

໒໓໑.

ຍສ຺ສ ຣຸກ຺ຂສ຺ສ ຉາຍາຍ,

ນິສີເທຍ຺ຍ ສເຍຍ຺ຍ ວາ;

ນ ຕສ຺ສ ສາຂໍ ຠຎ຺ເຊຍ຺ຍ,

ມິຕ຺ຕ-ທຸພ຺ໂຠ ຫິ ປາປໂກ.

ຈຕຸຕ຺ຖ ສາຘຸນຣ

໒໓໒.

ປຸຓ຺ຓໍປິ ເຈ ມໍ ປຖວິໍ ຘເນນ,

ທຊ຺ຊິຕ຺ຖິຍາ ປຸຣິໂສ ສມ຺ມຕາຍ;

ສທ຺ຘາ ຂຓໍ ອຕິມຎ຺ເຎຍ຺ຍ ຕໍປິ,

ຕາສໍ ວສໍ ອ-ສຕີນໍ ນ ຄຈ຺ເຉ.

໒໓໓.

ເອວໍ ໂຂ ຍາຕໍ ອນຸຍາຍີ ໂຫຕິ,

ອລ຺ລຎ຺ຈ ປາຓິໍ ທຫເຕ ປຸເນວໍ;

ອ-ສຕີ ຈ ສາ ໂສ ປນ ມິຕ຺ຕໍ-ທຸພ຺ໂຠ,

ໂສ ຘມ຺ມິໂກ ໂຫຫິ ຊຫສ຺ສຸ ອ-ຘມ຺ມໍ.

ກາຍຂມນີຍ-ນິທ຺ເທສ

໒໓໔.

ອຠິວາທນ-ສີລິສ຺ສ,

ນິຈ຺ຈໍ ວຸຑ຺ຒາປຈາຍິໂນ;

ຈຕ຺ຕາໂຣ ຘມ຺ມາ ວຑ຺ຒນ຺ຕິ,

ອາຍຸ ວຓ຺ໂຓ ສຸຂໍ ພລໍ.

໒໓໕. ປຎ຺ຈິເມ ຠິກ຺ຂເວ ຘມ຺ມາ ອາຍຸສ຺ສາ, ກຕເມ ປຎ຺ຈ. ສປ຺ປາຍ-ກາຣີ ໂຫຕິ. ສປ຺ປາເຍຈ ມຕ຺ຕໍ ຊານາຕິ. ປຣິຓຕ຺ຕໂຠຊີ ຈ ໂຫຕິ. ກາລ-ຈາຣີ ຈ, ພ຺ຣຫ຺ມ-ຈາຣີຈ. ອິເມ ໂຂ ຠິກ຺ຂເວ ປຎ຺ຈ ຘມ຺ມາ ອາຍຸສ຺ສາຕິ.

໒໓໖. ປຎ຺ຈິເມ ຠິກ຺ຂເວ ຘມ຺ມາ ອາຍຸສ຺ສາ, ກຕເມ ປຎ຺ຈ. ສປ຺ປາຍ-ກາຣີ ໂຫຕິ. ສປ຺ປາເຍຈ ມຕ຺ຕໍ ຊານາຕິ. ປຣິຓຕໂຠຊີຈໂຫຕິ. ສີລວາຈ, ກລ຺ຍາຓ ມິຕ຺ໂຕຈ. ອິເມ ໂຂ ຠິກ຺ຂເວ ປຎ຺ຈ ຘມ຺ມາ ອາຍຸສ຺ສາຕິ.

໒໓໗.

ປຎ຺ຈ-ສີລໍ ສມາທາຍ,

ສມໍ ກຕ຺ວາ ທິເນ ທິເນ;

ສຕິມາ ປຎ຺ຎວາ ຫຸຕ຺ວາ,

ຈເຣ ສພ຺ພິຣິຍາປເຖ.

໒໓໘. ປຎ຺ຈິເມ ຠິກ຺ຂເວ ຈງ຺ກເມ ອານິສໍສາ, ກຕເມ ປຎ຺ຈ, ອທ຺ຘານກ຺ຂໂມ ໂຫຕິ. ປຘານກ຺ຂໂມ ໂຫຕິ. ອປ຺ປາພາໂຘ ໂຫຕິ. ອສິຕໍປີຕໍຂາຍິຕໍສາຍິຕໍ ສມ຺ມາ ປຣິຓາມໍ ຄຈ຺ຉຕິ. ຈງ຺ກມາຘິຄໂຕ ສມາຘິ ຈິຣຏ຺ຐິຕິໂກ ໂຫຕິ. ອິເມໂຂ ຠິກ຺ຂເວ ປຎ຺ຈ ຈງ຺ກເມ ອານິ ສໍສາຕິ.

໒໓໙.

ປຣິສ຺ສາວນ-ທານຎ຺ຈ,

ອາວາສ-ທານເມວ ຈ;

ຄິລານ-ວຕ຺ຖຸ-ທານຎ຺ຈ,

ທາຕພ຺ພໍ ມນຸຊາຘິປ.

໒໔໐.

ກາຕພ຺ພໍ ຊິຓ຺ຓກາວາສໍ,

ປຏິສງ຺ຂຣຓໍ ຕຖາ;

ປຎ຺ຈ-ສີລ-ສມາທານໍ,

ກຕ຺ວາ ຕໍ ສາຘຸ-ຣກ຺ຂິຕໍ;

ອຸໂປສໂຖປວາໂສ ຈ,

ກາຕພ຺ໂພໂປສເຖ ອິຕິ.

໒໔໑.

ອຕິ-ໂຠຕ຺ຕາ ໂຣຄ-ມູລໍ,

ອາຍຸກ຺ຂຍໍ ກໂຣຕິ ເວ;

ຕສ຺ມາ ຕໍ ອຕິ-ຠຸຕ຺ຕິໍວ,

ປຣິຫເຣຍ຺ຍ ປຓ຺ຑິໂຕ.

໒໔໒.

ອ-ຊິຓ຺ເຓ ໂຠຊນໍ ວິສໍ,

ທຸລ຺ລທ຺ເຘ ອ-ວິຈາຣເກ;

ຊິຓ຺ເຓ ສຸ-ລທ຺ເຘ ວິຈາເຣ,

ນ ວຊ຺ຊໍ ສພ຺ພ-ໂຠຊນໍ.

໒໔໓.

ຈຕ຺ຕາໂຣ ປຎ຺ຈ ອາໂລເປ,

ອາຠຸຕ຺ວາ ອຸທກໍ ປິເວ;

ອລໍ ຜາສຸ-ວິຫາຣາຍ;

ປຫິຕຕ຺ຕສ຺ສ ຠິກ຺ຂຸໂນ.

໒໔໔.

ມນຸຊສ຺ສ ສທາ ສຕິມໂຕ,

ມຕ຺ຕໍ ຊານໂຕ ລທ຺ຘ-ໂຠຊນໍ;

ຕນຸກສ຺ສ ຠວນ຺ຕິ ເວທນາ,

ສນິກໍ ຊີຣຕິ ອາຍຸ ປາລຍໍ.

໒໔໕.

ຄຣູນໍ ອຑ຺ຒ-ໂສຫິຈ຺ຈໍ,

ລຫູນໍ ນາຕິ-ກິຕ຺ຕິຍາ;

ມຕ຺ຕາ-ປມາຓໍ ນິທ຺ທິຏ຺ຐໍ,

ສຸຂໍ ຊີຣຕິ ຕາວຕາ.

໒໔໖.

ໂຕຍາຠາເວ ປິປາສຕ຺ຕາ,

ຂຓາ ປາເຓຫິ ມຸຈ຺ຈເຕ;

ຕສ຺ມາ ສພ຺ພາສຸວຕ຺ຖາສຸ,

ເທຍ຺ຍໍ ວາຣິໍ ປິປາສເຍ.

໒໔໗.

ສີໂຕທກໍ ປໂຍ ຂຸທ຺ທໍ,

ຆຕເມເກກໂສ ທ຺ວິໂສ;

ຕິສ຺ໂສ ສມຄ຺ຄມຖ ວາ,

ປເຄ ປິຕໍ ຍຸວຕ຺ຕທໍ.

໒໔໘.

ອນ຺ນໍ ພ຺ຣຫ຺ມາ ຣເສ ວິຓ຺ຫຸ,

ຠຸຕ຺ເຕ ເຈວ ມເຫສໂຣ;

ເອວໍ ຎຕ຺ວາຕຸ ໂຍ ຠຸຎ຺ເຊ,

ອນ຺ນ-ໂທສໍ ນ ລິມ຺ປເຕ.

໒໔໙.

ກຕ຺ຕິກສ຺ສນ຺ຕິໂມ ຠາໂຄ,

ຍໍ ຈາໂທ ມິຄ-ມາສໂຊ;

ຕາວຸໂຠ ຍມ-ທາຐາຂ຺ໂຍ,

ລຆ຺ວາຫາໂຣວ ຊີວຕິ.

໒໕໐.

ສຕ຺ຖານຸກຸລ-ຈຣິຍາ,

ຈິຕ຺ຕຎ຺ຎາວສວຕ຺ຕິນາ;

ພຸທ຺ຘິ-ຣກ຺ຂິລິຕຕ຺ເຖນ,

ປຣິປຸຓ຺ຓໍ ຣສາຍນໍ.

໒໕໐.

ອ-ຊາຕິຍາ ອ-ຊາຕານໍ,

ຊາຕານໍ ວິນິວຕ຺ຕິຍາ;

ໂຣຄານໍ ໂຍ ວິຘິ ທິຏ຺ໂຐ,

ຕໍ ສຸຂຕ຺ຖີ ສມາຈເຣ.

໒໕໒.

ອາໂຣຄ຺ຍໍ ປຣມາ ລາຠາ,

ສນ຺ຕຸຏ຺ຐິ ປຣມໍ ຘນໍ;

ວິສ຺ສາສາ ປຣມາ ຎາຕິ,

ນິພ຺ພານໍ ປຣມໍ ສຸຂໍ.

ປກິຓ຺ຓກ-ນິທ຺ເທສ

໒໕໓.

ກຸມຸທໍ ໂກ ປໂພຘຍິ,

ນາໂຖ ຣວິນ຺ທຸ ປຓ຺ຑິໂຕ;

ກມລໍ ໂກ ກຸມຸທໍ ໂກ,

ນຣປໍ ໂກ ປໂພຘຍິ.

໒໕໔.

ຈິຕ຺ເຕນ ນິຍ຺ຍຕິ ໂລໂກ,

ຈິຕ຺ເຕນ ປຣິກສ຺ສຕິ;

ຈິຕ຺ຕສ຺ສ ເອກ-ຘມ຺ມສ຺ສ,

ສພ຺ເພວ ວສມນ຺ວຄູ.

໒໕໕.

ສມໂຓ ຣາຊານຸຣາຊາ,

ເສນາປຕິ ມຫາ-ມຕ຺ໂຕ;

ຘມ຺ມຏ຺ໂຐ ປຓ຺ຑິໂຕ ທິສ຺ວາ,

ປຈ຺ຈກ຺ຂຕ຺ຖໍ ນ ກາຣິຍາ.

໒໕໖.

ທີໂປ ນວ-ທິສໍ ເຕໂຊ,

ນ ເຫຏ຺ຐາ ຈ ຕຖາ ສກໍ;

ປຣ-ວຊ຺ຊໍ ວິທູ ປສ຺ເສ,

ສກ-ວຊ຺ຊໍປິ ປສ຺ສຕຸ.

໒໕໗.

ສ-ຜລໍ ປຓ຺ຑິໂຕ ໂລເກ,

ສ-ກາຣຓໍ ວຈໍ ຠເຓ;

ອ-ກາຣຓໍຜລໍ ພາໂລ,

ອິທໍ ອຸຠຍ-ລກ຺ຂຓໍ.

໒໕໘.

ຕສ຺ສ ວາຈາຍ ຊາເນຍ຺ຍ,

ກຸຏິລໍ ພາລ-ປຓ຺ຑິຕໍ;

ວາຈາ-ຣູປໍ ມິຕ຺ຕໍ ກເຣ,

ວາຈາ-ຣູປໍ ຘຸວໍ ຊເຫ.

໒໕໙.

ທຸຈ຺ຈິນ຺ຕິຕສ຺ສ ຈິນ຺ຕາ ຈ,

ທຸພ຺ຠາສິຕສ຺ສ ຠາສນາ;

ທຸກ຺ກມ຺ມສ຺ສ ກຕຎ຺ຈາຕິ,

ເອຕໍ ພາລສ຺ສ ລກ຺ຂຓໍ.

໒໖໐.

ສຸ-ຈິນ຺ຕິຕສ຺ສ ຈິນ຺ຕາ ຈ,

ສຸ-ຠາສິຕສ຺ສ ຠາສນາ;

ສຸ-ກມ຺ມສ຺ສ ກຕຎ຺ຈາຕິ,

ເອຕໍ ຘີຣສ຺ສ ລກ຺ຂຓໍ.

໒໖໑.

ອ-ນຍໍ ນຍຕິ ທຸມ຺ເມໂຘ,

ອ-ຘຸຣາຍໍ ນິ-ຍຸຎ຺ຊຕິ;

ທຸນ຺ນໂຍ ເສຍ຺ຍໂສ ໂຫຕິ,

ສມ຺ມາ ວຸຕ຺ໂຕ ປກຸປ຺ປຕິ;

ວິນຍໍ ໂສ ນ ຊານາຕິ,

ສາຘຸ ຕສ຺ສ ອ-ທສ຺ສນໍ.

໒໖໒.

ນຍໍ ນຍຕິ ເມຘາວີ,

ອ-ຘຸຣາຍໍ ນ ຍຸຎ຺ຊຕິ;

ສຸ-ນໂຍ ເສຍ຺ຍໂສ ໂຫຕິ,

ສມ຺ມາ ວຸຕ຺ໂຕ ນ ກຸປ຺ປຕິ;

ວິນຍໍ ໂສ ປຊານາຕິ,

ສາຘຸ ເຕນ ສມາຄໂມ.

໒໖໓.

ອ-ນາຍກາ ວິນສ຺ສນ຺ຕິ,

ນສ຺ສນ຺ຕິ ພຫຸ-ນາຍກາ;

ຖີ-ນາຍກາ ວິນສ຺ສນ຺ຕິ,

ນສ຺ສນ຺ຕິ ສຸສຸ-ນາຍກາ.

໒໖໔.

ເຊຏ຺ໂຐ ກມ຺ເມສຸ ນີຈານໍ,

ຊານໍຊານໍວ ອາຈເຣ;

ອ-ຊາເນວໍ ກເຣ ຊານໍ,

ນີໂຈ ເອຕິ ຠຍໍ ປິຍໍ.

໒໖໕.

ກມ຺ມໍ ທຸຊ຺ຊນ-ສາຣຸປ຺ປໍ,

ທຸຘາ ສຸຊນ-ສາຣຸປ຺ປໍ;

ທຸຊ຺ຊນໍ ເຕສຸ ທຸກ຺ກມ຺ເມ,

ສຸ-ກມ຺ເມ ສຸຊນໍ ອິຈ຺ເຉ.

໒໖໖.

ປຓ຺ຑິໂຕ ເວຣີ ພາໂລ ຈ,

ທຸຊ຺ຊໂຍ ພາລ-ເວຣິໂຕ;

ປຓ຺ຑິຕໍ-ເວຣີ ປມາເທນ,

ນ ຕໍ ຊໂຍ ຫິ ສພ຺ພທາ.

໒໖໗.

ຄຸຍ຺ຫສ຺ສ ຫິ ຄຸຍ຺ຫເມວ ສາຘຸ,

ນ ຫິ ຄຸຍ຺ຫສ຺ສ ປສຕ຺ຖມາວິ-ກມ຺ມໍ;

ອ-ນິປ຺ຜນ຺ນຕາຍ ສເຫຍ຺ຍ ຘີໂຣ,

ນິປ຺ຜນ຺ນຕ຺ໂຖວ ຍຖາ-ສຸຂໍ ຠເຓຍ຺ຍ.

໒໖໘.

ຄຸຍ຺ຫມຕ຺ຖໍ ນ ວິວເຣຍ຺ຍ,

ຣກ຺ເຂຍ຺ຍ ນໍ ຍຖາ ນິຘິໍ;

ນ ຫີ ປາຕຸກໂຕ ສາຘຸ,

ຄຸຍ຺ໂຫ ອຕ຺ໂຖ ປຊານຕາ.

໒໖໙.

ຖິຍາ ຄຸຍ຺ຫໍ ນ ສໍເສຍ຺ຍ,

ອ-ມິຕ຺ຕສ຺ສ ຈ ປຓ຺ຑິໂຕ;

ໂຍ ຈາມິເສນ ສໍຫີໂຣ,

ຫທຍ-ຕ຺ເຖໂນ ຈ ໂຍ ນໂຣ.

໒໗໐.

ວິວິຈ຺ຈ ຠາເສຍ຺ຍ ທິວາ ຣຫສ຺ສໍ,

ຣຕ຺ຕິໍ ຄິຣໍ ນາຕິ-ເວລໍ ປມຸຎ຺ເຈ;

ອຸປສ຺ສຸຕິກາ ຫິ ສຸຓນ຺ຕິ ມນ຺ຕໍ,

ຕສ຺ມາ ຫິ ມນ຺ໂຕ ຂິປ຺ປມຸເປຕິ ເຠທໍ.

໒໗໑.

ນ ປກາສຕິ ຄຸຍ຺ຫໍ ໂຍ,

ໂສ ຄຸຍ຺ຫໍ ປຏິຄຸຍ຺ຫຕິ;

ຠເຍສຸ ນ ຊເຫ ກິຈ຺ເຈ,

ສຸ-ມິຕ຺ໂຕນຸຈໂຣ ຠເວ.

໒໗໒.

ກໂຣຕິ ທຸກ຺ກຣໍ ສາຘຸໍ,

ອຸຊຸໍ ຂມຕິ ທຸກ຺ຂມໍ;

ທຸທ຺ທທໍ ສາມໍ ທທາຕິ,

ໂຍ ສຸ-ມິຕ຺ໂຕ ຫເວ ຠເວ.

໒໗໓.

ປິຍ-ວາຈາ ສທາ ມິຕ຺ໂຕ,

ປິຍ-ວຕ຺ຖຸໍ ນ ຍາຈນາ;

ອິຈ຺ຉາຄເຕນ ທາເນນ,

ສຸ-ທຬ຺ໂຫ ສຸ-ປ຺ປິໂຍ ຫເວ;

ຕທງ຺ຄໂຕ ຈ ຫີເນນ,

ອ-ປ຺ປິໂຍ ຠິຊ຺ຊໂນ ຠເວ.

໒໗໔.

ເທຫີຕິ ຍາຈເນ ຫິຣີ,

ສິຣີ ຈ ກາຍ-ເທວຕາ;

ປລາຍນ຺ຕິ ສິຣິຈ຺ຉິໂຕ,

ນ ຍາເຈ ປຣ-ສນ຺ຕກໍ.

໒໗໕.

ສ຺ວາໂນ ລທ຺ຘານ ນິມ຺ມໍສໍ,

ອຏ຺ຐິໍ ຕຸຏ຺ໂຐ ປໂມທຕິ;

ສກນ຺ຕິກໍ ມິຄໍ ສີໂຫ,

ຫິຕ຺ວາ ຫຕ຺ຖິໍນຸຘາວຕິ.

໒໗໖.

ເອວໍ ຉນ຺ທານຸຣູເປນ,

ຊໂນ ອາສີສເຕ ຜລໍ;

ມຫາ ຉນ຺ທາ ມຫນ຺ຕໍວ,

ຫີນໍວ ຫີນ-ຉນ຺ທກາ.

໒໗໗.

ນານາ-ຉນ຺ທາ ມຫາຣາຊ,

ເອກາຄາເຣ ວສາມເສ;

ອຫໍ ຄາມ-ວຣໍ ອິຈ຺ເຉ,

ພ຺ຣາຫ຺ມຓີ ຈ ຄວໍ ສຕໍ.

໒໗໘.

ປຸຕ຺ໂຕ ຈ ອາຊຎ຺ຎ-ຣຖໍ,

ກຎ຺ຎາ ຈ ມຓິ-ກຸຓ຺ຑລໍ;

ຍາ ເຈສາ ປຸຓ຺ຓກາ ຊມ຺ມີ,

ອຸຊຸກ຺ຂລໍຠິ-ກງ຺ຂຕິ.

໒໗໙.

ຐານໍ ມິຕ຺ເຕ ຘເນ ກມ຺ເມ,

ສຕຸສ຺ສາເຫ ສຸ-ລພ຺ຠິຕໍ;

ຕໍ ທຬ຺ຫໍ ທຸກ຺ກຣໍ ກເຣ,

ປຎ຺ຎາ-ສຕິ-ສມາຘິນາ.

໒໘໐.

ເຠສຊ຺ເຊ ວິຫິເຕ ສຸທ຺ຘ,

ພຸທ຺ຘາທິ-ຣຕນຕ຺ຕເຍ;

ປສາທມາຈເຣ ນິຈ຺ຈໍ,

ສຊ຺ຊເນ ສ-ຄຸເຓປິ ຈ.

໒໘໑.

ຣາຊາ ຣຏ຺ເຐນ ຘາຕຸໂສ,

ພາໂລ ປາເປຫິ ທຸມ຺ມໂນ,

ອລງ຺ກາເຣນ ອິຕ຺ຖີປິ,

ກາເມຫິ ຈ ນ ຕປ຺ປຕິ.

໒໘໒.

ອປ຺ປິຈ຺ໂຉ ຈ ຘຸຕງ຺ເຄນ,

ອາຣທ຺ໂຘ ວີຣິເຍນ ຫິ;

ວິສາຣໂທ ປຣິສາຍ,

ປຣິຈ຺ຈາເຄນ ທາຍໂກ;

ສວເນນ ສຸ-ຘມ຺ມໍປິ,

ນ ຕປ຺ປຕິວ ປຓ຺ຑິໂຕ.

໒໘໓.

ເຊຏ຺ຐສ຺ສ ສິຕໍ ຫສິຕໍ,

ມຊ຺ຌສ຺ສ ມຘຸຣສ຺ສຣໍ;

ໂລເກ ອໍສ-ສິໂຣ-ກມ຺ປໍ,

ຊມ຺ມສ຺ສ ອປ-ຫສ຺ສິຕໍ;

ເອເຕສໍ ອຕິ-ຫສ຺ສິຕໍ,

ຫາໂສ ໂຫຕິ ຍຖາກ຺ກມໍ.

໒໘໔.

ນຕ຺ຖິ ທຸຏ຺ເຐ ນໂຍ ອຕ຺ຖິ,

ນ ຘມ຺ໂມ ນ ສຸ-ຠາສິຕໍ;

ນິກ຺ກມໍ ທຸຏ຺ເຐ ຍຸຎ຺ເຊຍ຺ຍ,

ໂສ ຫິ ສພ຺ຠິໍ ນ ຣຎ຺ຊຕິ.

໒໘໕.

ທຸລ຺ລຠໍ ປກຕິໍ ວາຈໍ,

ທຸລ຺ລໂຠ ເຂມໂກ ສຸໂຕ;

ທຸລ຺ລຠາ ສທິສີ ຊາຍາ,

ທຸລ຺ລໂຠ ສ-ຊໂນ ປິໂຍ.

໒໘໖.

ຘໂຊ ຣຖສ຺ສ ປຎ຺ຎາຓໍ,

ຘູໂມ ປຎ຺ຎາຓມຄ຺ຄິໂນ;

ຣາຊາ ຣຏ຺ຐສ຺ສ ປຎ຺ຎາຓໍ,

ຠຕ຺ຕາ ປຎ຺ຎາຓມິຕ຺ຖິຍາ.

໒໘໗.

ທຸນ຺ນາຣິຍາ ກຸລໍ ສຸທ຺ຘໍ,

ປຸຕ຺ໂຕ ນສ຺ສຕິ ລາລນາ;

ສມິທ຺ຘິ ອ-ນຍາ ພນ຺ຘຸ,

ປວາສາ ມທນາ ຫິຣີ.

໒໘໘.

ມາຕາ ປິຕາ ຈ ປຸຕ຺ຕານໍ,

ໂນວາເທ ພຫຸ-ສາສນ຺ນໍ;

ປຓ຺ຑິຕາ ມາຕໂຣ ອປ຺ປໍ,

ວເທຍ຺ຍຸໍ ວຊ຺ຊ-ທີປນໍ.

໒໘໙.

ລາຬເຍ ປຎ຺ຉ-ວສ຺ສານິ,

ທສ-ວສ຺ສານິ ຕາຬເຍ;

ປຕ຺ເຕ ຕຸ ໂສຬເສ ວສ຺ເສ,

ປຸຕ຺ຕໍ ມິຕ຺ຕໍວທາຈເຣ.

໒໙໐.

ລາລເນ ຘີຕຣໍ ໂທສາ,

ປາລເນ ພຫໂວ ຄຸຓາ;

ຘີຕຸຍາ ກິຣິຍໍ ນິຈ຺ຈໍ,

ປສ຺ສນ຺ຕຸ ສຸຏ຺ຐຸ ມາຕໂຣ.

ອິຕິ ປກິຓ຺ຓກ-ນິທ຺ເທໂສ ນາມ

ສຕ຺ຕມາ ປຣິຈ຺ເຉໂທ.

ສີລ-ນິທ຺ເທສ

໒໙໑.

ປມາທໍ ຠຍໂຕ ທິສ຺ວາ,

ອ-ປ຺ປມາທຎ຺ຈ ເຂມໂຕ;

ຠາເວຖ ອຏ຺ຐງ຺ຄິກໍ ມຄ຺ຄໍ,

ເອສາ ພຸທ຺ຘານຸສາສນີ.

໒໙໒.

ຫີເນນ ພ຺ຣຫ຺ມ-ຈຣິເຍນ,

ຂຕ຺ຕິເຍ ອຸປປຊ຺ຊຕິ;

ມຊ຺ຌິເມນ ຈ ເທວຕ຺ຕໍ,

ອຸຕ຺ຕເມນ ວິ-ສຸຊ຺ຌຕິ.

ກ.

ນຄເຣ ພນ຺ຘຸມຕິຍາ,

ພນ຺ຘຸມາ ນາມ ຂຕ຺ຕິໂຍ;

ທິວເສ ປຸຓ຺ຓມາຍ ໂສ,

ອຸປຄຈ຺ຉິ ອຸໂປສຖໍ.

ຂ.

ອຫໍ ເຕນ ສມເຍນ,

ຄຸມ຺ຠ-ທາສີ ອຫໍ ຕຫິໍ;

ທິສ຺ວາ ສ-ຣາຊກໍ ເສນໍ,

ເອວາຫໍ ຈິນ຺ຕຍິໍ ຕທາ.

ຄ.

ຣາຊາປິ ຣຊ຺ຊໍ ຉຏ຺ເຏຕ຺ວາ,

ອຸປຄຈ຺ຉິ ອຸໂປສຖໍ;

ສ-ຜລໍ ນູນ ຕໍ ກມ຺ມໍ,

ຊນ-ກາໂຍ ປໂມທິໂຕ.

ຆ.

ໂຍນິໂສ ປຈ຺ຈເວກ຺ຂິຕ຺ວາ,

ທຸຄ຺ຄຈ຺ຈຎ຺ຈ ທລິທ຺ທຕໍ;

ມານສໍ ສມ຺ປຫໍສິຕ຺ວາ,

ອຸປຄຈ຺ຉິມຸ ໂປສຖໍ.

ງ.

ອຫໍ ອຸໂປສຖໍ ກຕ຺ວາ,

ສມ຺ມາ-ສມ຺ພຸທ຺ຘສາສເນ;

ເຕນ ກມ຺ເມນ ສຸ-ກເຕນ,

ຕາວຕິໍສໍ ອຄຈ຺ຉຫໍ.

ຈ.

ຕຕ຺ຖ ເມ ສຸ-ກຕໍ ພ຺ຍມ຺ຫໍ,

ອຸພ຺ຠ-ໂຍຊນມຸຄ຺ຄຕໍ;

ກູຏາຄາຣ-ວຣູເປຕໍ,

ມຫາສນສຸ-ຠູສິຕໍ.

ຉ.

ອຈ຺ຉຣາ ສຕ-ສຫສ຺ສາ,

ອຸປຕິຏ຺ຐນ຺ຕິ ມໍ ສທາ;

ອຎ຺ເຎ ເທເວ ອຕິກ຺ກມ຺ມ,

ອຕິໂຣຈາມິ ສພ຺ພທາ.

ຊ.

ຈຕຸສຏ຺ຐິ-ເທວ-ຣາຊູນໍ,

ມເຫສິຕ຺ຕມກາຣຍິໍ;

ເຕສຏ຺ຐິ-ຈກ຺ກວຕ຺ຕິນໍ,

ມເຫສິຕ຺ຕມກາຣຍິໍ.

ຌ.

ສຸວຓ຺ຓ-ວຓາ ຫຸຕ຺ວານ,

ຠເວສຸ ສໍສຣາມຫໍ;

ສພ຺ພຕ຺ຖ ປວຣາ ໂຫມິ,

ອຸໂປສຖສ຺ສິທໍ ຜລໍ.

ຎ.

ຫຕ຺ຖິ-ຍານໍ ອສ຺ສ-ຍານໍ,

ຣຖ-ຍານຎ຺ຈ ສິວິກໍ;

ລຠາມິ ສພ຺ພເມຕມ຺ປິ,

ອຸໂປສຖສ຺ສິທໍ ຜລໍ.

ຏ.

ໂສຓ຺ຓ-ມຍໍ ຣູປິ-ມຍໍ,

ອໂຖປິ ຜລິກາ-ມຍໍ;

ໂລຫິຕງ຺ຄ-ມຍຎ຺ເຈວ,

ສພ຺ພໍ ປຏິລຠາມຫໍ.

ຐ.

ໂກເສຍ຺ຍ-ກມ຺ພລິຍານິ,

ໂຂມ-ກປ຺ປາສິການິ ຈ;

ມຫຄ຺ຆານິ ຈ ວຕ຺ຖານິ,

ສພ຺ພໍ ປຏິລຠາມຫໍ.

ຑ.

ອນ຺ນໍ ປານໍ ຂາທນີຍໍ,

ວຕ຺ຖໍ ເສນາສນານິ ຈ;

ສພ຺ພເມຕໍ ປຏິລເຠ,

ອຸໂປສຖສ຺ສິທໍ ຜລໍ.

ຒ.

ວຣ-ຄນ຺ຘຎ຺ຈ ມາລຎ຺ຈ,

ຈຸຓ຺ຓກຎ຺ຉ ວິເລປນໍ;

ສພ຺ພເມຕໍ ປຏິລເຠ,

ອຸໂປສຖສ຺ສິທໍ ຜລໍ.

ຓ.

ກູຏາຄາຣຎ຺ຈ ປາສາທໍ,

ມຓ຺ຑປໍ ຫມ຺ມິຍໍ ຄຸຫໍ;

ສພ຺ພເມຕໍ ປຏິລເຠ,

ອຸໂປສຖສ຺ສິທໍ ຜລໍ.

ຕ.

ຊາຕິຍາ ສຕ຺ຕ-ວສ຺ສາຫໍ,

ປພ຺ພຊິໍ ອນ-ຄາຣິຍໍ;

ອຑ຺ຒ-ມາເສ ອ-ສປ຺ປຕ຺ເຕ,

ອຣ ຫຕ຺ຕໍ ອປາປຸຓິໍ.

ຖ.

ກິເລສາ ຌາປິຕາ ມຍ຺ຫໍ,

ຠວາ ສພ຺ເພ ສມູຫຕາ;

ສພ຺ພາສວ-ປຣິກ຺ຂີຓາ,

ນຕ຺ຖິ ທານິ ປຸນ-ພ຺ຠໂວ.

ທ.

ເອກ-ນວຸຕິໂຕ ກປ຺ເປ,

ຍໍ ກມ຺ມມກຣິໍ ຕທາ;

ທຸຄ຺ຄຕິໍ ນາຠິຊານາມິ,

ອຸໂປສຖສ຺ສິທໍ ຜລໍ.

ຘ.

ສ຺ວາຄຕໍ ວຕ ເມ ອາສິ,

ມມ ພຸທ຺ຘສ຺ສ ສນ຺ຕິເກ;

ຕິສ຺ໂສ ວິຊ຺ຊາ ອນຸ-ປຕ຺ຕາ,

ກຕໍ ພຸທ຺ຘສ຺ສ ສາສນໍ.

ນ.

ປຏິສມ຺ຠິທາ ຈຕສ຺ໂສ,

ວິໂມກາປິ ຈ ອຏ຺ຐິເມ;

ຉຬາຠິຎ຺ຎາ ສຈ຺ຉິກຕາ,

ກຕໍ ພຸທ຺ຘສ຺ສ ສາສນໍ.

໒໙໓.

ຎາຕີນຎ຺ຈ ປິໂຍ ໂຫຕິ,

ມິຕ຺ເຕສຸ ຈ ວິໂຣຈຕິ;

ກາຍສ຺ສ ເຠທາ ສຸ-ຄຕິໍ,

ອຸປປຊ຺ຊຕິ ສີລວາ.

໒໙໔.

ນິພ຺ພານໍ ປຕ຺ຖຍນ຺ເຕນ ສມາທິນ຺ນໍ,

ປຎ຺ຈ-ສີລມ຺ປິ ອຘິ-ສີລໍ;

ທສ-ສີລມ຺ປິ ອຘິ-ສີລເມວ.

ກ.

ນຄເຣ ຈນ຺ທວຕິຍາ,

ຠຏໂກ ອາສຫໍ ຕທາ;

ປຣ-ກມ຺ມາຍເນ ຍຸຕ຺ໂຕ,

ປພ຺ພຊ຺ຊໍ ນ ລຠາມຫໍ.

ຂ.

ມຫນ຺ຘກາຣ-ປິຫິຕາ,

ຕິວິຘຄ຺ຄີຫິ ຑຍ຺ຫເຣ;

ເກນ ນຸໂຂ ອຸປາເຍນ,

ວິ-ສໍຍຸຕ຺ໂຕ ຠເວ ອຫໍ.

ຄ.

ເທຍ຺ຍຘມ຺ໂມ ຈ ເມ ນຕ຺ຖິ,

ຠຏໂກ ທຸກ຺ຂິໂຕ ອຫໍ;

ຍໍ ນູນາຫໍ ປຎ຺ຈ-ສີລໍ,

ຣກ຺ເຂຍ຺ຍໍ ປຣິປູຣຍໍ.

ຆ.

ອໂນມທສ຺ສິສ຺ສ ມຸນິໂນ,

ນິສໂຠ ນາມ ສາວໂກ;

ຕມຫໍ ອຸປສງ຺ກມ຺ມ,

ປຎ຺ຈ-ສິກ຺ຂາປທຄ຺ຄຫິໍ.

ງ.

ວສ຺ສ-ສຕ-ສຫສ຺ສານິ,

ອາຍຸ ວິຊ຺ຊຕິ ຕາວເທ;

ຕາວຕາ ປຎ຺ຈ-ສີລານິ,

ປຣິປຸຓ຺ຓານິ ໂຄປຍິໍ.

ຈ.

ມຈ຺ຈຸ-ກາລມ຺ຫິ ສມ຺ປຕ຺ເຕ,

ເທວາ ອສ຺ສາສຍນ຺ຕິ ມໍ;

ຣໂຖ ສຫສ຺ສ-ຍຸຕ຺ໂຕ ເຕ,

ມາຣິສສ຺ສ ອຸປຏ຺ຐິໂຕ.

ຉ.

ວຕ຺ຕນ຺ເຕ ຈຣິເມ ຈິຕ຺ເຕ,

ມມ ສີລໍ ອນຸສ຺ສຣິໍ;

ເຕນ ກມ຺ເມນ ສຸ-ກເຕນ,

ຕາວຕິໍສໍ ອຄຈ຺ຉຫໍ.

ຊ.

ຕິໍສຂຕ຺ຕຸຎ຺ຈ ເທວິນ຺ໂທ,

ເທວ-ຣຊ຺ຊມກາຣຍິໍ;

ທິພ຺ພ-ສຸຂໍ ອນຸຠວິໍ,

ອຈ຺ຉຣາຫິ ປຸຣກ຺ຂຕ຺ໂຕ.

ຌ.

ປຎ຺ຈ-ສຕ຺ຕຕິຂຕ຺ຕ຺ຕຸ-ຎ຺ຈ,

ຈກ຺ກວຕ຺ຕີ ອໂຫສຫໍ;

ປເທສ-ຣຊ຺ຊໍ ວິປຸລໍ,

ຄຓນາໂຕ ອ-ສງ຺ຂຍໍ.

ຎ.

ເທວ-ໂລກາ ຈວິຕ຺ວານ,

ສຸກ຺ກ-ມູເລນ ໂຈທິໂຕ;

ປຸເຣ ເວສາລິຍໍ ຊາໂຕ,

ມຫາ-ກຸເລ ສຸ-ອຑ຺ຒເກ.

ຏ.

ວສ຺ສູປນາຍິເກ ກາເລ,

ທິພ຺ພນ຺ເຕ ຊິນ-ສາສເນ;

ມາຕາ ຈ ເມ ປິຕາ ເຈວ,

ປຎ຺ຈ-ສິກ຺ຂາປທຄ຺ຄຫຸໍ.

ຐ.

ສຫ ສຸຕ຺ວານຫໍ ສີລໍ,

ມມ ສີລໍ ອນຸສ຺ສຣິໍ;

ເອກາສເນ ນິສີທິຕ຺ວາ,

ອຣຫຕ຺ຕມປາປຸຓິໍ.

ຑ.

ຊາຕິຍາ ປຎ຺ຈ-ວສ຺ເສນ,

ອຣຫຕ຺ຕມປາປຸຓິໍ;

ອຸປສມ຺ປາທຍິ ພຸທ຺ໂຘ,

ຄຸຓມຎ຺ຎາຍ ຈກ຺ຂຸມາ.

ຒ.

ປຣິປຸຓ຺ຓານິ ໂຄເປຕ຺ວາ,

ປຎ຺ຈ-ສິກ຺ຂາປທານຫໍ;

ອ-ປຣິເມຍ຺ຍິໂຕ ກປ຺ເປ,

ວິນິປາຕໍ ນ ຄຈ຺ຉຫໍ.

ຓ.

ສ຺ວາຫໍ ຍສມນຸຠວິໍ,

ເຕສໍ ສີລານ ວາຫສາ;

ກປ຺ປ-ໂກຏິປິ ກິຕ຺ເຕນ຺ໂຕ,

ກິຕ຺ຕເຍ ເອກ-ເທສກໍ.

ຕ.

ປຎ຺ຈ-ສີລານິ ໂຄເປຕ຺ວາ,

ຕໂຍ ເຫຕູ ລຠາມຫໍ;

ທີຆາຍຸໂກ ມຫາ-ໂຠໂຄ,

ຕິກ຺ຂ-ປຎ຺ໂຎ ຠວາມຫໍ.

ຖ.

ສໍກິຕ຺ເຕນ຺ໂຕ ຈ ສພ຺ເພສໍ,

ອຘິ-ມຕ຺ຕຎ຺ຈ ໂປຣິສໍ;

ຠວາຠເວ ສໍສຣິຕ຺ວາ,

ເອເຕ ຐາເນ ລຠມຫໍ.

ທ.

ອ-ປຣິເມຍ຺ຍ-ສີເລສຸ,

ວຕ຺ຕນ຺ຕາ ຊິນ-ສາວກາ;

ຠເວສຸ ຍທິ ຣຊ຺ເຊຍ຺ຍຸໍ,

ວິປາໂກ ກີທິໂສ ຠເວ.

ຘ.

ສຸ-ຈິຓ຺ຓໍ ເມ ປຎ຺ຈ-ສີລໍ,

ຠຏເກນ ຕປສ຺ສິນາ;

ເຕນ ສີເລນຫໍ ອຊ຺ຊ,

ໂມຈຍິໍ ສພ຺ພ-ພນ຺ຘນາ.

ນ.

ອ-ປຣິເມຍ຺ຍິໂຕ ກປ຺ເປ,

ປຎ຺ຈ-ສີລານິ ໂຄປຍິໍ;

ທຸຄ຺ຄຕິໍ ນາຠິຊານາມິ,

ປຎ຺ຈ-ສີລານິທໍ ຜລໍ.

ປ.

ປຏິສມ຺ຠິທາ ຈຕສ຺ໂສ,

ວິໂມກ຺ຂາປິ ຈ ອຏ຺ຐິເມ;

ຉຬາຠິຎ຺ຎາ ສຈ຺ຉິກຕາ,

ກຕໍ ພຸທ຺ຘສ຺ສ ສາສນໍ.

ກ.

ຕໍ ນມສ຺ສນ຺ຕິ ເຕ ວິຊ຺ຊາ,

ສພ຺ເພ ຠູມາ ຈ ຂຕ຺ຕິຍາ;

ຈຕ຺ຕາໂຣ ຈ ມຫາ-ຣາຊາ,

ຕິທສາ ຈ ຍສສ຺ສິໂນ;

ອຖ ໂກ ນາມ ໂສ ຍກ຺ໂຂ,

ຍໍ ຕ຺ວໍ ສກ຺ກ ນມສ຺ສສິ.

ຂ.

ມໍ ນມສ຺ສນ຺ຕິ ເຕ-ວິຊ຺ຊາ,

ສພ຺ເພ ຠູມາ ຈ ຂຕ຺ຕິຍາ;

ຈຕ຺ຕາໂຣ ຈ ມຫາ-ຣາຊາ,

ຕິທສາ ຈ ຍສສ຺ສິໂນ.

ຄ.

ອຫຎ຺ຈ ສີລ-ສມ຺ປນ຺ເນ,

ຈິຣຣຕ຺ຕ-ສມາຫິເຕ;

ສມ຺ມາ ປພ຺ພຊິເຕ ວນ຺ເທ,

ພ຺ຣຫ຺ມ-ຈຣິຍ ປຣາຍເນ.

ຆ.

ເຍ ຄຫຏ຺ຐາ ປຸຎ຺ຎ-ກຣາ,

ສີລວນ຺ໂຕ ອຸປາສກາ;

ຘມ຺ເມນ ທາຣໍ ໂປເສນ຺ຕິ,

ເຕ ນມສ຺ສາມິ ມາຕລິ.

ງ.

ເສຏ຺ຐາ ຫິ ກິຣ ໂລກສ຺ມິໍ,

ເຍ ຕ຺ວໍ ສກ຺ກ ນມສ຺ສສິ;

ອຫມ຺ປິ ເຕ ນມສ຺ສາມິ,

ເຍ ນມສ຺ສສິ ວາສວ.

໑.

ປາລິຕຕ຺ເຖຣນາເຄນ,

ວິສຸທ຺ຘາຣາມວາສິນາ;

ສຸຕິຈ຺ຉິຕານມຕ຺ຖາຍ,

ກຕາ ນຣທກ຺ຂທີປນີ.

໒.

ປຸພ຺ພາຈຣິຍ-ສີຫານໍ,

ອາລມ຺ພິຕ຺ວານ ນິສ຺ສຍໍ;

ປາລິໂຕ ນາມ ໂຍ ເຖໂຣ,

ອິມໍ ຄນ຺ຖ ສຸ-ເລຂນີ;

ສຸນ຺ທຣເມວ ປສ຺ສິຕຸໍ,

ຍຸຎ຺ເຊຍ຺ຍາຖີຘ ສາຘເວ.

‘‘ຉປ຺ປທິກາ’’.

໓.

ອິມໍ ຄນ຺ຖໍ ວາຈຸຄ຺ຄໂຕ,

ສເຈ ຠວສິ ມາຓວ;

ປຸຓ຺ນມາຍໍ ຍຖາ ຈນ຺ໂທ,

ອຕິ-ສຸທ຺ໂຘ ວິໂຣຈຕິ;

ຕເຖວ ຕ຺ວໍ ປຸຓ຺ຓ-ມໂນ,

ວິໂຣຈ ສິຣິຍາ ຘຸວໍ.

໔.

ສຸ-ນິຏ຺ຐິໂຕ ອຍໍ ຄນ຺ໂຖ,

ສກ຺ກຣາເຊ ທຌມ຺ຜິເຍ;

ໂປຏ຺ຐປາທມ຺ຫິ ສູຣມ຺ຫິ,

ກາລປກ຺ເຂ ຈຕຸທ຺ທສິໍ.

໕.

ສຎ຺ຈິເຕຕໍ ມຍາ ປຸຎ຺ຎໍ,

ຕໍ-ກມ຺ເມນ ວເຣນ ຈ;

ຈິຣໍ ຕິຏ຺ຐຕຸ ສທ຺ຘມ຺ໂມ,

ອ-ເວຣາ ໂຫນ຺ຕຸ ປາຓິໂນ.

໖.

ອິມໍ ຄນ຺ຖໍ ປສ຺ສິຕ຺ວານ,

ໂຫນ຺ຕຸ ສພ຺ເພປິ ຊນ຺ຕຸໂນ;

ສຸຂິຕາ ຘມ຺ມິກາ ຎາຓີ,

ຘມ຺ມໍ ປາເລຕຸ ປຕ຺ຖິໂວ.

໗.

ນິພ຺ພານໍ ປຕ຺ຖຍນ຺ເຕນ,

ສີລໍ ຣກ຺ຂນ຺ຕຸ ສຊ຺ຊນາ;

ຎຕ຺ວາ ຘມ຺ມໍ ສຸຂາວຫໍ,

ປາປຸຓນ຺ຕຸ ອນາສວໍ.

໘.

ອຏ຺ຐ-ກຓ຺ຑ-ມຓ຺ຑິຕາຍ,

ທກ຺ຂຍ ອຕ຺ຖ-ທີປໂກ;

ນຣ-ສາໂຣ ອຍໍ ຄນ຺ໂຖ,

ຈິຣ-ກາລໍ ປຕິຏ຺ຐຕຸ.

໙.

ຍາວຕາ ຈນ຺ທ-ສູຣິຍາ,

ນາຄຈ຺ເຉຍ຺ຍຸໍ ມຫີ-ຕເລ;

ປໂມທິຕາ ອິມໍ ຄນ຺ຖໍ,

ທິສ຺ສນ຺ຕຸ ນຍ-ໂກວິທາ.

໑໐.

ສມ຺ມາ ຉນ຺ເທນິມໍ ຄນ຺ຖ,

ວາເຈນ຺ຕາ ປຣິຍາປຸຓາ;

ປສນ຺ເນນານາຍາເສນ,

ປຕ຺ວາ ສຸເຂນ ໂກວິທໍ.

໑໑.

ຈນ຺ທາທິຈ຺ຈາວ ອາກາເສ,

ພຫຸສ຺ສຸເຕຫິ ສມ຺ປທາ;

ວິເສສ-ປຸຄ຺ຄລາ ຫຸຕ຺ວາ,

ປປ຺ໂປນ຺ຕຸ ອມຕໍ ປທໍ.

໑໒.

ອຸກ຺ກຏ຺ຐ-ຘມ຺ມ-ທາເນນ,

ປາປຸເຓຍ຺ຍມນຸຕ຺ຕຣໍ;

ລິງ຺ຄ-ສມ຺ປຕ຺ຕິ-ເມຘາວີ,

ຕກ຺ກີ-ປຎ຺ຎາ ສຸ-ເປສລີ.

ນຣທກ຺ຂ ໂຖມນາ ອາສີສ

໓. ຄາຖາ

໑.

ປາລິໂຕ ປາຬິຍາ ເຉໂກ,

ຕ຺ວໍສິ ຄມ຺ຠີຣ-ຎາຓວາ;

ປາລິຍາວ ປາລິຕສ຺ສ,

ທທາມິທານິ ໂຠ ອຫໍ.

໒.

ທກ຺ຂາວາເທສຸ ກຸສໂລ,

ປາລິໂຕ ສາສນນ຺ຘຣີ;

ປິຏເກສຸ ອຊ຺ໂຌຄາຍ຺ຫ,

ນຣທກ຺ຂໍຠິສງ຺ຂຣີ.

໓.

ສຸຕ-ຘເຣນ ຣຈິຕໍ,

ເອຕໍ ສາຣ-ຄເວສິໂນ;

ອຕນ຺ທິກາ ສຸ-ທກ຺ຂນ຺ຕຸ,

ອຄ຺ຄຄ຺ຄ-ສາສເນ ຣຕາ.

ນຣທກ຺ຂ ໂຖມນາ ອາສີສ

໒. ຄາຖາ

໑.

ຎຸໍ ປາລິໂຕຘ ຊາໂຕ ໂຍ,

ເຖໂຣ ໂສ ອພ຺ຠຸໂຕວ ຎຸໍ;

ຎຸໍ ມຫາ-ປາລິໂຕ ສນ຺ໂຕ,

ນິກາຍ-ປາລິໂຕ ຈ ຎຸໍ.

໒.

ຎຸໍ ນຣ-ທກ຺ຂ-ຄນ຺ຖໍ ຍໍ,

ໂສວກາ ນຣ-ທກ຺ຂ-ທໍ;

ນຣາ ທກ຺ຂນ຺ຕຸ ສມ຺ມາ ຈ,

ທກ຺ຂຕ຺ຕໍ ປາປຸຓນ຺ຕຸ ຎຸໍ.