📜

ນໂມ ຕສ຺ສ ຠຄວໂຕ ອຣຫໂຕ ສມ຺ມາສມ຺ພຸທ຺ຘສ຺ສ.

ຣສວາຫິນີ

ປຓາມາທິກຖາ

໑.

ສຕ຺ຖຸປ຺ປສຕ຺ຖຈຣຓໍ ສຣຓໍ ຊນານໍ,

ພ຺ຣຫ຺ມາທິໂມຬິ ມຓິຣໍສິ ສມາວຫນ຺ຕໍ,

ປງ຺ເກຣຸຫາຠມຸທຸໂກມລຈາຣຸວຓ຺ຓໍ;

ວນ຺ທາມິ ຈກ຺ກວຣລກ຺ຂຓມາທຘານໍ.

໒.

ສິທ຺ຘໍ ຊິເນນ ຈິຣກາລມຕນ຺ທິເຕນ,

ຍໍ ຠາວໂກ ສມຘິຄຈ຺ຉຕິ ເຂມມຄ຺ຄໍ;

ຍໍ ກປ຺ປຣຸກ຺ຂ ຣຸຈິທານ ມຓິວ ຠາຕິ,

ຕໍ ຘມ຺ມມຄ຺ຄ ມສມໍ ປຓມາມິ ນິຈ຺ຈໍ.

໓.

ສນ຺ຕິນ຺ທ຺ຣິຍໍ ສຸຄຕສູນຸວຣໍ ວິສຸທ຺ຘໍ,

ຍໍ ທກ຺ຂິເຓຍ຺ຍມຕທໍ ສຸຈິປຸຎ຺ຎເຂຕ຺ຕໍ;

ຕາເຓສິນໍ ສຣຓມຸຊ຺ຌິຕສພ຺ພທຸກ຺ຂໍ,

ວນ຺ທາມິ ສງ຺ຆ ມນຆໍ ສິຣສາ ມຫຄ຺ຆໍ.

໔.

ຍມ຺ປຕ຺ຕເມຕ຺ຖ ຣຕນຕ຺ຕຍໂຖມເນນ,

ປຸຎ຺ເຎນ ເຕນ ທຸຣິຕໍ ສກລໍ ປຓຸຊ຺ຊ,

ວກ຺ຂາມຫໍ ສຸມຘຸຣໍ ຣສວາຫິນິນ຺ຕໍ,

ໂຠ ໂຠ ສຸຓນ຺ຕຸ ສຸຊນາ ຠິມຸທາວຫາ ສາ.

໕.

ຕຕ຺ຖຕຕ຺ຖູປປນ຺ນານິ, ວຕ຺ຖູນິ ອຣຫາ ປຸເຣ;

ອຠາສຸໍ ທີປຠາສາຍ, ຐເປສຸໍ ຕໍ ປຸຣາຕນາ.

໖.

ມຫາວິຫາເຣ ຕງ຺ຄຸຕ຺ຕ, ວງ຺ກປຣິເວຓວາສິໂກ;

ຣຏ຺ຐປາໂລຕິ ນາເມນ, ສີລາຈາຣ ຄຸຓາກໂຣ.

໗.

ຫິຕາຍ ປຣິວຕ຺ເຕສິ, ປຊານໍ ປາຬິຠາສໂຕ;

ປຸນຣຸຕ຺ຕາທິໂທເສຫິ, ຕມາສິ ສພ຺ພມາກຸລໍ;

ອນາກຸລໍ ກຣິສ຺ສາມິ, ຕໍ ສຸຓາຖ ສມາຫິຕາ.

໘.

ວິຕຣາຄາ ປຸເຣ ໂວຈຸໍ, ຍສ຺ມາ ຕສ຺ມາ ຫິ ຠາສິຕໍ;

ເອຕມາທຣຓີຍຎ຺ຫິ, ສາຘຸ ສາຘູຫິ ສພ຺ພທາຕິ.

ຊມ຺ພຸທີປຸປ຺ປຕ຺ຕິ ວຕ຺ຖູນິ.

ຘມ຺ມໂສຓ຺ຑກວຄ຺ໂຄ

໑. ຘມ຺ມໂສຓ຺ຑກສ຺ສ ວຕ຺ຖຸມ຺ຫິ ອຍມານຸປຸພ຺ພີກຖາ

ຕຕ຺ຖ ເຕສໍ ວຕ຺ຖູນ ມຸປ຺ປຕ຺ຕິໂຍ ທ຺ວິຘາ ຠວນ຺ຕິ ຊມ຺ພຸທີເປ ສີຫຬທີເປຈາຕິ, ຕຕ຺ຖ ຊມ຺ພຸທີເປ ຕາຬີສ, ສີຫຬທີເປ ເຕສຏ຺ຐິ, ເຕສຸ ຕາວ ຊມ຺ພຸທີປຸປ຺ປຕ຺ຕິວຕ຺ຖູນິ ອາວິ ຠວິສ຺ສນ຺ຕິ, ຕໂຕປິ ຘມ຺ມໂສຓ຺ຑກສ຺ສ ວຕ຺ຖຸ ອາທິ, ກຖໍ, ອມ຺ຫາກໍ ກິຣ ຠຄວໂຕ ປຸພ຺ເພ ອິມສ຺ມິໍເຍວ ຠທ຺ທກປ຺ເປ ກສ຺ສໂປນາມ ສຕ຺ຖາ ໂລເກ ອຸທປາທິ, ຕສ຺ສ ໂຂ ປນ ຠຄວໂຕ ສາສນນ຺ຕຣຘານໂຕ ນ ຈິເຣເນວ ກາເລນ ອມ຺ຫາກໍ ໂພຘິສຕ຺ໂຕ ພາຣາຓສີຣຎ຺ໂຎ ອຄ຺ຄມເຫສິຍາ ກຸຈ຺ຉິສ຺ມິໍ ນິພ຺ພຕ຺ຕິ, ຕສ຺ສຸ ປ຺ປຕ຺ຕິ ກາລສມນນ຺ຕຣເມວ ສພ຺ພສຕ຺ຕານໍ ມນສິ ຘມ຺ມສຎ຺ຎາ ອຸທປາທິ, ຕສ຺ມາສ຺ສ ຘມ຺ມໂສຓ຺ໂຑຕິນາມ ມກໍສຸ, ໂສ ປເນໂສ ກຸມາໂຣ ມຫນ຺ເຕນ ປຣິວາເຣນ ວຑ຺ເຒນ຺ໂຕ ສພ຺ພສິປ຺ເປສຸ ນິປ຺ຜຕ຺ຕິໍ ປຕ຺ວາ ປິຕຣາ ອຸປຣຊ຺ເຊນ ປູຊິໂຕ ຫຸຕ຺ວາ ທານາທໂຍ ທສກຸສລກມ຺ມປເຖ ປູເຣນ຺ໂຕ ປິຕຸອຈ຺ຈເຍນາມຈ຺ເຈຫິ ຣຊ຺ເຊນາຠິສິຎ຺ຈິໂຕ ອໂຫສິ, ໂສ ປເນສ ຘມ຺ມໂສຓ຺ຑກມຫາຣາຊາ ເທວນຄຣສທິເສ ພາຣາຓສີນຄເຣ ຈກ຺ກວຕ຺ຕິສທິສໍ ພາຣາຓສີຣຊ຺ຊໍ ກາເຣນ຺ໂຕ ມາສທ຺ຘມາສຈ຺ຈເຍນ ສິຣິສຍນຄໂຕ ເອວໍ ຈິນ຺ເຕສິ, ມເມວໍ ຣຊ຺ຊສິຣິມນຸຠວນໍ ນ ໂສຠຕິ ຘມ຺ມວິໂຍເຄນ, ທິວາກຣ ວິຣຫິໂຕ ນໂຠ ວິຍາຕິອາທິນາ ນານາກາຣຓໍ ຈິນ຺ເຕສິ, ເຕເນຕ຺ຖ.

໑.

ປຸຎ຺ເຎນ ສີລາທິມເຍນ ປຸພ຺ເພ,

ກເຕນ ປຕ຺ໂຕສ຺ມິ ອຕນ຺ທິເຕນ,

ມສກ຺ກສາເຣ ວິຍ ເທວຣາຊາ;

ຣາຊຕ຺ຕມິທ຺ເຘ ປຸຣມຸຕ຺ຕມມ຺ຫິ.

໒.

ຣູເປນ ຫາຣີນຍນຸສ຺ສເວນ,

ສທ຺ເທນ ສມ຺ມາ ສວຓາມເຕນ,

ຄນ຺ເຘນ ຆານຸສ຺ສວໂສຠເນນ,

ຣສຎ຺ຎປຸຎ຺ເຎນ ຣເສນຈາປິ.

໓.

ຜສ຺ເສນ ຄຕ຺ຕສ຺ສ ສຸຜສ຺ສເທນ,

ສມິທ຺ຘິປຕ຺ໂຕສ຺ມິ ມຫິທ຺ຘິໂກຫໍ,

ເນເວຕ຺ຕເກເນວ ປມາທຠາວ,

ມາ ປຊ຺ຊິຕຸໍ ຍຸຕ຺ຕຣູປນ຺ຕິ ຎຕ຺ວາ.

໔.

ທສ຺ສາມິ ອງ຺ຄອປິ ຊີວິຕຎ຺ຈ,

ຘຎ຺ຎໍ ຘນໍ ຈາປິ ປສນ຺ນຈິຕ຺ໂຕ,

ໂສສ຺ສາມິ ຘມ຺ມໍ ສິວມາທຘານໍ,

ຊິເນຣິຕໍ ຊາຕິຊຣາປຫາຓໍ.

໕.

ນ ໂສຠຕິ ຍຖາກາສໍ, ຊລໍ ຘາມປຕິໍວິນາ,

ຣຊ຺ຊກຣຓໍ ຕຖາ ມຍ຺ຫໍ, ວິນາ ຘມ຺ມາ ນ ໂສຠຕິ.

໖.

ນ ໂສຠຕິ ຫຖາ ຣຕ຺ຕິ, ນິສານາຖໍ ວິນາ ສທາ,

ຣຊ຺ຊກຣຓໍ ຕຖາ ມຍ຺ຫໍ, ວິນາ ຘມ຺ມາ ນ ໂສຠຕິ.

໗.

ອລງ຺ກໂຕປິ ເຈ ຫຕ຺ຖີ, ວິນາ ທາຐາ ນ ໂສຠຕິ,

ຣຊ຺ຊກຣຓໍ ຕຖາ ມຍ຺ຫໍ, ວິນາ ຘມ຺ມາ ນ ໂສຠຕິ.

໘.

ຍຖາ ກລ຺ໂລລມາລີຍໍ,

ວິນາ ເວລາ ນ ໂສຠຕິ,

ຣຊ຺ຊກຣຓໍ ຕຖາ ມຍ຺ຫໍ,

ວິນາ ຘມ຺ມາ ນ ໂສຠຕິ.

໙.

ຍຖາ ສຸມຓ຺ຑິໂຕ ຣາຊາ,

ກຸປໂຏ ເນວ ໂສຠຕິ,

ຣຊ຺ຊກຣຓໍ ຕຖາ ມຍ຺ຫໍ,

ວິນາ ຘມ຺ມາ ນ ໂສຠຕິ.

໑໐.

ຘມ຺ມເມວ ສຸຓິສ຺ສາມິ, ຘມ຺ເມ ເມ ຣມຕີ ມໂນ,

ນ ຫິ ຘມ຺ມາ ປຣໍ ອຕ຺ຖິ, ຘມ຺ມມູລໍ ຕິສມ຺ປທນ຺ຕິ.

ເອວໍ ຈິນ຺ເຕຕ຺ວາ ປາໂຕວ ສິຣິຄພ຺ຠາ ນິກ຺ຂມ຺ມ ສຸສຊ຺ຊິເຕ ສມຸສ຺ສິຕເສຕຈ຺ຉຕ຺ເຕ ຣາຊປລ຺ເລງ຺ເກ ອມຈ຺ຈຄຓ ປຣິວຸໂຕ ນິສີທິ ເທວຣາຊາວິຍ ວິໂຣຈມາໂນ, ນິສິນ຺ໂນ ປນ ຣາຊາ ອມຈ຺ເຈ ເອວມາຫ, ໂຍ ປເນຕ຺ຖ ໂຠນ຺ໂຕ ພຸທ຺ຘຠາສິເຕສຸ ຘມ຺ເມສຸ ກິຎ຺ຈິຘມ຺ມໍ ຊານາຕິ, ໂສ ຠາສຕຸ, ໂສຕຸມິຈ຺ຉາມິຘມ຺ມນ຺ຕິ, ເຕ ສພ຺ເພປິ ມຍໍ ເທວ ນ ຊານາມາຕິ ອາຫໍສຸ, ຕໍ ສຸຕ຺ວາ ອ ນ ຕ຺ຕ ມ ໂນ ຣາຊາ ເອວໍ ຈິນ຺ເຕສິ, ຍນ຺ນູນາຫໍ ຫຕ຺ຖິກ຺ຂນ຺ເຘ ສຫສ຺ສໍ ຐເປຕ຺ວາ ນຄເຣ ເຠຣິໍຈຣາເປຍ຺ຍໍ, ຍໍ ອປ຺ເປວນາມ ໂກຈິ ຘນໂລເຠນ ຈາຕຸປ຺ປທິກາຍປິ ຄາຖາຍ ຘມ຺ມໍ ເທເສຍ຺ຍ. ຕໍ ເມ ທີຆຣຕ຺ຕໍ ຫິຕາຍ ສຸຂາຍ ຠວິສ຺ສຕີຕິ, ຕໂຕ ໂສ ຕຖາ ກຕ຺ວາປິ ຘມ຺ມເທສກໍ ອລຠນ຺ໂຕ ປຸນ ທ຺ວິສຫສ຺ສໍ ຕິຈຕຸປຎ຺ຈສຫສ຺ສນ຺ຕິຍາວໂກຏິປ຺ປໂກຏິໍທມ຺ມີຕິ, ຕໂຕ ຄາມ ນິຄມ ຊນປເທ, ຕໂຕ ເສຏ຺ຐິຏ຺ຐານໍ ເສນາປຕິ ອຸປຣາຊຏ຺ຐານາ ທໂຍປິ, ປຸນ ເສຕຈ຺ຉຕ຺ຕໍ ທມ຺ມິ, ຣາຊເວສໍ ປຫາຍ ອຕ຺ຕານໍ ທາສໍ ສາເວຕ຺ວາ ຘມ຺ມເທເສນ຺ຕສ຺ສ ທມ຺ມິຕິ ວຕ຺ວາ ເຠຣິ ຈຣາເປຕ຺ວາປິ ຘມ຺ມ ເທສກມລຠິຕ຺ວາ ສໍວິຄ຺ໂຄ ກິມ຺ເມ ຘມ຺ມວິໂຍເຄນ ຣຊ຺ເຊນາຕິ ອມຈ຺ຈານໍ ຣຊ຺ຊໍ ນີຍ຺ຍາເຕຕ຺ວາ ສທ຺ຘມ຺ມຄເວສໂກ ຘມ຺ມໂສຓ຺ຑກມຫາຣາຊາ ມຫາວນໍ ປາວິສິ ຄາມ ນິຄມ ຣາຊຘານິ ປຣມ຺ປຣາຍ, ເຕເນຕ຺ຖ.

໑໑.

ປຸເຣ ເຠຣິໍ ຈຣາເປຕ຺ວາ,

ຘມ຺ມໂສຓ຺ໂຑ ນຣາຘິໂປ;

ສທ຺ຘມ຺ມຊ຺ເຌສກໍ ສຕ຺ຖຸ,

ອລທ຺ຘາ ຘນໂກຏິຫິ.

໑໒.

ທາໂສ ໂຫມິ ປຫາຍາຫໍ,

ຣາຊຕ຺ຕໍ ເທສກສ຺ສ ເມ;

ອິຈ຺ຈາຫ ໂສ ມຫີປາໂລ,

ອໂຫ ຘມ຺ເມສຸ ໂລລຕາ.

໑໓.

ຣຊ຺ຊໍ ນີຍ຺ຍາຕຍິຕ຺ວານ, ອມຈ຺ຈານໍ ມໂນຣມໍ,

ວນໍ ປາວິສິ ໂສ ຣາຊາ, ຄເວສໍ ຘມ຺ມມຸຕ຺ຕມນ຺ຕິ.

ມຫາວນໍ ປວິຏ຺ຐກ຺ຂເຓ ປນ ມຫາສຕ຺ຕສ຺ສ ປຸຎ຺ຎເຕເຊນ ສກ຺ກສ຺ສາສນໍ ອຸຓ຺ຫາກາຣໍ ທສ຺ເສສິ, ອຖ ເທວຣາຊາ ຈິນ຺ເຕສິ ອກາມໍ ເມ ປຓ຺ຑຸກມ຺ພລ ສິລາສນໍ ອຸຓ຺ຫມໂຫສິ, ກິນ຺ນຸໂຂ ກາຣຓນ຺ຕິ ໂລກໍ ໂອໂລເກນ຺ໂຕ ສກ຺ໂກ ເທວຣາຊາ ຘມ຺ມໂສຓ຺ຑກ ມຫາຣາຊານໍ ສກລຊມ຺ພຸທີປໍ ວິຈິນິຕ຺ວາ ສທ຺ຘມ຺ມຊ຺ເຌສກໍ ອລຠິຕ຺ວາ ວນໍ ປວິຏ຺ຐຠາວໍ ອທ຺ທສ, ຘມ຺ມໂສຓ຺ຑກມຫາຣາຊາ ສທ຺ຘມ຺ມຕ຺ຖາຍ ຣຊ຺ຊ ຘນ ພນ຺ຘຸ ຊີວິຕມ຺ປິ ປຫາຍ ອຣຎ຺ຎໍ ປວິຏ຺ໂຐ, ນ ໂສ ວຕາຍໍ ໂຍວາ ໂສວາ ສຕ຺ໂຕ, ອິມສ຺ມິໍເຍວ ກປ຺ເປ ພຸທ຺ໂຘ ຠວິສ຺ສຕິ, ພຸທ຺ຘໂພຘິສຕ຺ໂຕ ຈາຍໍ ອຊ຺ເຊວ ມຫາຣຎ຺ຎໍ ປວິຏ຺ໂຐ ສທ຺ຘມ຺ມໍ ອລທ຺ຘາ ມຫາທຸກ຺ຂໍ ປາປຸເຓຍ຺ຍ, ນ ເຈຕໍ ຍຸຕ຺ຕໍ, ອຊ຺ຊ ມຍາ ຕຕ຺ຖ ຄນ຺ຖພ຺ພໍ ຘມ຺ມາມຕຣເສນ ຕມຠິສິຎ຺ຈິຕ຺ວາ ຣຊ຺ເຊ ປຫິຏ຺ຐາເປຕຸນ຺ຕິ ຈິນ຺ເຕຕ຺ວາ ອຕ຺ຕຠາວໍ ວິຊຫິຕ຺ວາ ຠຍານກໍ ມຫນ຺ຕໍ ຣກ຺ຂສເວສໍ ນິມ຺ມິຓິຕ຺ວາ ມຫາສຕ຺ຕາຠິມຸໂຂ ອວິທູເຣ ອຕ຺ຕານໍ ທສ຺ເສສິ, ເຕເນຕ຺ຖ.

໑໔.

ພ຺ຍຄ຺ຆຈ຺ຉສີຫມຫິໂສ ຣຄຫຕ຺ຖິທີປິ,

ມິຄາກຸລໍ ກຓ຺ຏກເສລຣຸກ຺ຂໍ;

ນຣານມິນ຺ໂທ ປວິສິຕ຺ວການນໍ,

ອິໂຕຈິໂຕ ວິພ຺ຠມິ ຘມ຺ມກາໂມ.

໑໕.

ຕສ຺ສານຸຠາເວນ ປຸຣິນ຺ທທສ຺ສ,

ສິລາສນໍ ອຸຓ຺ຫມໂຫສິ ກາມໍ;

ເຕເນວ ໂສ ໂລກມຸທິກ຺ຂມາໂນ,

ອທ຺ທກ຺ຂິ ຘີຣໍ ວິປິເນ ຈຣນ຺ຕໍ.

໑໖.

ມຍຊ຺ຊ ຕໍ ຘມ຺ມຣເສນ ສມ຺ມາ,

ສນ຺ຕປ຺ປຍິຕ຺ວາ ຄມນໍ ວຣນ຺ຕິ;

ມນ຺ຕ຺ວາ ສຸຠີມຎ຺ຊນກູຏວຓ຺ຓໍ,

ມຫາມຸຂໍ ນິຄ຺ຄຕ ຠີມທາຐໍ.

໑໗.

ທິຕ຺ຕຄ຺ຄິສງ຺ກາສ ວິສາລເນຕ຺ຕໍ,

ມຊ຺ເຌນ ຠຄ຺ຄໍ ຈິປິຏຄ຺ຄນາສໍ;

ຂຣຕມ຺ພທາຐິໍ ຆນມສ຺ສຸວນ຺ຕໍ,

ນີໂລທຣໍ ຄຊ຺ຊິຕຠີມໂຆສໍ.

໑໘.

ກໂຣຣຸຫໍ ຕິກ຺ຂສໂລຫິຕາຍຕໍ,

ວິສາລໂຘຕາຍຕຂຄ຺ຄຫຕ຺ຖໍ;

ຄທາຍຸເຘນງ຺ກິຕມຎ຺ຎພາຫຸໍ,

ທຏ຺ໂຐຏ຺ຐຠີມໍ ສວລີລລາຏໍ.

໑໙.

ມນຸສ຺ສມໍສາທນຣຕ຺ຕປານໍ,

ຠຍານກໍ ກກ຺ຂລຍກ຺ຂວຓ຺ຓໍ;

ສຸມາປຍິຕ຺ວານ ວນນ຺ຕຣສ຺ມິໍ,

ທສ຺ເສສິ ອຕ຺ຕໍ ສ ນຣາຘິປສ຺ສາຕິ.

ອຖ ມຫາສຕ຺ໂຕ ອຕ຺ຕໂນ ອວິທູເຣ ຐິຕໍ ຣກ຺ຂສໍ ອທ຺ທກ຺ຂິ, ຕໍ ທິສ຺ວານາສ຺ສ ຠຍໍວາ ຉມ຺ຠິຕຕ຺ຕໍວາ ຈິຕ຺ຖຸຕ຺ຣາສມຕ຺ຕໍວາ ນາໂຫສິ, ກິມຕ຺ຣ ຈິນ຺ເຕສິ, ອປິນາມ ເອວຣູໂປ ປິຣກ຺ຂໂສ ຘມ຺ມໍ ຊາເນຍ຺ຍ, ຍນ຺ນູນາຫໍ ຕສ຺ສ ສນ຺ຕິເກ ຘມ຺ມໍ ສຸຓິສ຺ສາມິ, ຕມ຺ເມ ທີຆຣຕ຺ຕໍ ຫິຕາຍ ສຸຂາຍ ຠວິສ຺ສຕີຕິ ຈິນ຺ເຕສິ. ຈິນ຺ເຕຕ຺ວາ ຈປນ ອຊ຺ຊ ມຍາ ຕມຸປສງ຺ກມ຺ມ ປຸຈ຺ຉິຕໍ ວຏ຺ຏຕີຕິ ຄນ຺ຕ຺ວາ ຣກ຺ຂເສນ ສທ຺ຘິໍ ສລ຺ລປນ຺ໂຕ ອາຫ.

໒໐.

ອສ຺ມິໍ ວນສ຺ມິໍ ຕຣຸສຓ຺ຑ ມຓ຺ຑິເຕ;

ສຸຜຸລ຺ລິຕາເນກລຕາກຸລາກຸເລ;

ອຘິຄ຺ຄຫີໂຕ ສິ ມຫານຸຠາວ,

ປຸຈ຺ຉາມິ ຕໍ ເທວ ວເທຫິ ກງ຺ຂໍ.

໒໑.

ຘມ຺ມໍ ຄເວສໍ ວນມາຄໂຕມ຺ຫິ,

ປຫາຍ ຣຊ຺ຊໍ ອປິ ຎາຕິສງ຺ຆໍ;

ຊານາສິ ເຈ ສມ຺ມ ວເທຫິ ມຍ຺ຫໍ,

ເອກມ຺ປິ ຄາຖໍ ສຸຄເຕນ ເທສິຕໍ.

ຕໂຕ ຍກ຺ໂຂ ອາຫ.

໒໒.

ຘມ຺ມໍ ປຊານາມຫເມກເທສໍ,

ຊິເນຣິຕໍ ສາຘຸຕຣໍ ຣສານໍ,

ເທເສມິ ເຈຫໍ ຕວ ຘມ຺ມ ມຄ຺ຄໍ,

ຕຸວຎ຺ຫິ ກິໍ ກາຫສິ ເທສກສ຺ສາຕິ.

ອຖ ມຫາສຕ຺ໂຕ ອາຫ.

໒໓.

ຣຊ຺ເຊ ຐິໂຕ ອສ຺ສມຫໍ ສເຈ ໂຠ,

ອນປ຺ປຣູປໍ ປກໂຣມິ ປູຊໍ;

ອິທານິ ເອໂກ ວນມຊ຺ຌປຕ຺ໂຕ,

ກໂຣມິ ກິໍ ເທຫມິມໍ ຐເປຕ຺ວາ.

໒໔.

ຍທິຈ຺ຉສິ ຕ຺ວໍ ມມ ມໍສໂລຫິຕໍ,

ກໂຣມຫໍ ສງ຺ຄຫມຊ຺ຊ ເຕນ,

ນ ຈຕ຺ຖິ ອຎ຺ຎໍ ຕວ ອຈ຺ຈນີຍໍ,

ເທເສຫິ ຘມ຺ມໍ ສຸຄຕ ປ຺ປສຕ຺ຖນ຺ຕິ.

ຕໂຕ ຍກ຺ໂຂ ອາຫ.

໒໕.

ຠຸຕ຺ວານ ມໍສໍ ສຸຫິໂຕວ ສນ຺ໂຕ,

ຫນ຺ຕ຺ວາ ປິປາສໍ ຣຸຘິຣໍ ປິວິຕ຺ວາ;

ຘມ຺ມໍ ກເຖຕຸໍ ປຠວາມິ ຕຸຍ຺ຫໍ,

ວຕ຺ຕຸໍ ນ ສກ຺ໂກມິ ຂຸທາປເຣໂຕຕິ.

ອຖ ມຫາສຕ຺ໂຕ ອາຫ.

໒໖.

ຠຸຕ຺ວາ ຕຸວໍ ມໍ ປຖມຎ຺ຫິ ຍກ຺ຂ,

ປຈ຺ຉາ ຕຸ ເທເສສ຺ສສິ ກສ຺ສ ຘມ຺ມໍ;

ຘມ຺ມສ຺ສ ມຍ຺ຫໍ ຕວ ມໍສລາຠໍ,

ຕ຺ວເມວ ຊານາຫິ ຍຖາ ຠເວຍ຺ຍາຕິ.

ເອວໍ ວຸຕ຺ເຕ ສກ຺ໂກ ເທວານມິນ຺ໂທ ສາຘຸ ມຫາຣາຊ ອຫເມວ ຍຸຕ຺ຕໍ ຊານາມີຕິ ວຕ຺ວາ ຕສ຺ສາວິທູເຣ ຕິຄາວຸຕຸພ຺ເພຘໍ ອຎ຺ຊນວຓ຺ຓໍ ມຫນ຺ຕໍ ປພ຺ພຕໍ ມາເປຕ຺ວາ ມຫາຣາຊ ອິມມາຣຸຍ຺ຫ ປພ຺ພຕມຸທ຺ຘນິຏ຺ຐິໂຕ ມມ ມຸເຂ ປຕຕຸ, ອຫໍ ປຕນ຺ຖສ຺ສ ເຕ ຘມ຺ມໍ ເທເສສ຺ສາມິ, ເອວໍ ສນ຺ເຕ ຕຸຍ຺ຫໍ ຘມ຺ມປຏິລາໂຠ, ມຍ຺ຫໍຈ ມໍສປຏິລາໂຠ ຠວິສ຺ສຕີຕິ. ຕໍ ສຸຕ຺ວາ ມຫາສຕ຺ໂຕ ອນມຕຄ຺ເຄ ສໍສາເຣ ສໍສຣໂຕ ເມ ສີຫພ຺ຍຄ຺ຆຈ຺ຉມຈ຺ຉກຈ຺ຉປວິຫງ຺ຄາທີນໍ ຠກ຺ຂຠູຕສ຺ສ ຊາຕີສຸ ປມາຓໍ ນຕ຺ຕິ, ອຊ຺ຊ ມຍາ ສມ຺ພຸທ຺ຘສ຺ສ ຘມ຺ມຕ຺ຖາຍ ຊີວິຕໍ ປຣິຈ຺ຈຊິຕຸໍ ວຏ຺ຏຕີຕິ ຈິນ຺ເຕຕ຺ວາ ເອວມາຫ.

໒໗.

ສໍສາຣວຏ຺ເຏສຸ ວິວຏ຺ຏມານາ,

ປປ຺ໂປນ຺ຕິ ທຸກ຺ຂໍ ຊນຕາ ອເນກາ;

ເອຕຎ຺ຫິ ໂຠ ອຕ຺ຕໂນ ວາ ປຣສ຺ສ,

ອຕ຺ຖາຍ ນາໂຫສິ ອໂຫສິ ຕຸຈ຺ຉໍ.

໒໘.

ຕ຺ວມທິນ຺ນຫາຣີ ຕິຈ ປາຣທາຣິໂກ,

ປາຓາຕິປາຕີສິ ມຸສາ ອຠາສິ;

ຕ຺ວ ມຊ຺ຊປາຍີຕິ ອກາສິ ໂທສໍ,

ປຄ຺ຄຍ຺ຫ ທຸກ຺ຂໍ ພຫຸໂສ ທທນ຺ຕິ.

໒໙.

ເອຕຎ຺ຫິ ໂຠ ອຕ຺ຕໂນ ວາ ປຣສ຺ສ,

ອຕ຺ຖາຍ ນາໂຫສິ ອໂຫສິ ຕຸຈ຺ຉໍ;

ຣຸກ຺ຂາ ປປາຕາ ປປຕິຕ຺ວເກຈິ,

ທຸພ຺ພນ຺ຘິຍາ ທຸຄ຺ຄວິສາທເນນ.

໓໐.

ພ຺ຍາຘີຫິ ນານາຂຣເວທນາຫິ,

ມຣນ຺ຕິ ສຕ຺ຕາ ອຸຕຸເວທນາຫິ;

ເອຕຎ຺ຫິ ໂຠ ອຕ຺ຕໂນ ວາ ປຣສ຺ສ,

ອຕ຺ຖາຍ ນາໂຫສິ ອໂຫສິ ຕຸຈ຺ຉໍ.

໓໑.

ພ຺ຍຄ຺ຆຈ຺ຉມຈ຺ໂຉ ຣຄກຸຈ຺ຉິຍຎ຺ຫິ,

ມຕສ຺ສ ເມ ນຕ຺ຖິ ປມາຓສງ຺ຂາ;

ເອຕຎ຺ຫິ ໂຠ ອຕ຺ຕໂນ ວາ ປຣສ຺ສ,

ອຕ຺ຖາຍ ນາໂຫສິ ອໂຫສິ ຕຸຈ຺ຉໍ.

໓໒.

ເອຕຊ຺ຊ ເມ ທຸຈ຺ຈ ຊ ມຕ຺ຕທານໍ,

ນ ໂຫຕິ ເທວິສ຺ສຣິຍາທິກາຍ;

ສພ຺ພຎ຺ຎຸຠາວໍ ປນ ປາປຸຓິຕ຺ວາ,

ສໍສາຣໂຕ ນິຕ຺ຕຣຓາຍ ສຕ຺ເຕ.

໓໓.

ຕ຺ວໍ ສມ຺ມ ມຍ຺ຫໍ ພຫຸໂສ ປກາຣີ,

ຕສ຺ມາ ຕເວຕໍ ວຈນໍ ກໂຣມິ;

ອສໍກິໂຕ ເທສຍ ມຍ຺ຫຘມ຺ມໍ,

ສມິຊ຺ຌເຕ ທານິ ມໂນຣໂຖ ເຕຕິ.

ເອວຎ຺ຈ ປນ ວຕ຺ວາ ມຫາສຕ຺ໂຕ ປພ຺ພຕມາຣຸຍ຺ຫ ຐິໂຕ ອາຫ, ອຫມຊ຺ຊ ຣຊ຺ເຊນ ສທ຺ຘິໍ ຊີວິຕຎ຺ຈ ສຣີຣມໍສຎ຺ຈ ສທ຺ຘມ຺ມຕ຺ຖາຍ ທມ຺ມີຕິ ໂສມນສ຺ສປ຺ປຕ຺ໂຕ ຫຸຕ຺ວາ ສມ຺ມ ຘມ຺ມໍ ເທເສຫີຕິ ວຕ຺ວາ ຕສ຺ມິໍ ມຫາທາຐໍ ມຫາມຸຂໍ ວິວຣິຕ຺ວາ ຐິເຕ ຕສ຺ສາຠິມຸໂຂ ອຸປປຕິ. ອຖ ສກ຺ໂກ ເທວານມິນ຺ໂທ ໂສມນສ຺ໂສ ອຈ຺ຉຣິຍປ຺ປຕ຺ໂຕ ອຕ຺ຕຠາວໍ ວິຊຫິຕ຺ວາ ອລງ຺ກຕທິພ຺ພຕ຺ຕຠາວໍ ມາເປຕ຺ວາ ອາກາເສ ຕຣຸຓສຸຣິໂຍ ວິຍ ໂອຠາສມາໂນ ອາກາສໂຕ ປຕນ຺ຕໍ ມຫາສຕ຺ຕໍ ອຸໂຠຫິ ຫຕ຺ເຖຫິ ທຬ຺ຫໍ ປຕິຄຓ຺ຫິຕ຺ວາ ເທວໂລກໍ ເນຕ຺ວາ ປຓ຺ຑຸກມ຺ພລ ສິລາສເນ ນິສີທາເປຕ຺ວາ ທິພ຺ພມເຍຫິ ຄນ຺ຘມາລາທີຫິ ປູເຊຕ຺ວາ ສຍໍ ຘມ຺ມໍ ສຸຕ຺ວາ ປສນ຺ໂນ ປສນ຺ນາກາຣໍ ກຕ຺ວາ ກສ຺ສປທສພເລນ ເທສິຕາຍ ອນິຈ຺ຈາທິປຣິທີປິກາຍ.

໓໔.

ອນິຈ຺ຈາວ ຕ ສງ຺ຂາຣາ, ອຸປ຺ປາທວຍຘມ຺ມິໂນ;

ອຸປ຺ປຊ຺ຊິຕ຺ວາ ນິຣຸຊ຺ຌນ຺ຕິ, ເຕສໍ ວູປສໂມ ສຸໂຂຕິ.

ຄາຖາຍ ຘມ຺ມເທສເນນ ຕສ຺ສ ມໂນຣຖໍ ມຕ຺ຖກໍ ປາເປຕ຺ວາ ເທວໂລເກ ມຫນ຺ຕໍ ສິຣິວິຠວໍ ທສ຺ເສຕ຺ວາ ອາເນຕ຺ວາ ສກຣຊ຺ເຊເຍວ ປຕິຏ຺ຐາເປຕ຺ວາ ອປ຺ປມຕ຺ໂຕ ໂຫຕິ ມຫາຣາຊາຕິ ໂອວທິຕ຺ວາ ເທວໂລກເມວ ອຄມາສີຕິ.

໓໕.

ອິຕິ ອມິຕສິຣິໍ ວາ ຊີວິຕໍ ວາປິ ສນ຺ໂຕ,

ນ ສຸມຣິຍ ປສຕ຺ຖໍ ຘມ຺ມເມວາ ຈຣນ຺ຕິ;

ຕນຸຕຣ ວິຠວານໍ ອປ຺ປມາຍູນມມ຺ໂຠ,

ອິຫ ກຸສລປມາໂທ ໂກ ນຸ ຕຸມ຺ຫາທິສານນ຺ຕິ.

ຘມ຺ມໂສຓ຺ຑກວຕ຺ຖຸໍ ປຐມໍ.

໒. ມິຄລຸທ຺ທກສ຺ສ ວຕ຺ຖຸມ຺ຫິ ອຍມານຸປຸພ຺ພິກຖາ

ອິໂຕ ກິຣ ເອກ ຕິໍສຕິເມ ກປ຺ເປ ສິຂີນາມ ສມ຺ມາສມ຺ພຸທ຺ໂຘ ສມຕິໍສ ປາຣມິໂຍ ປູເຣຕ຺ວາ ປຣມາຕິສມ຺ໂພຘິໍ ປຕ຺ວາ ສເທວກໍ ໂລກໍ ສໍສາຣກນ຺ຕາຣາ ອຸຕ຺ຕາເຣນ຺ໂຕ ຘມ຺ມຣຕນວສ຺ສໍ ວສ຺ສາເປນ຺ໂຕ ຘມ຺ມເຠຣິໍປຫຣນ຺ໂຕ ຘມ຺ມເກຕຸໍ ອຸສ຺ສາເປນ຺ໂຕ ເອກສ຺ມິໍ ສມເຍ ວິເວກ ມນຸພ຺ຣູຫນ຺ໂຕ ອຣຎ຺ຎາຍຕນໍ ປາວິສິ, ປວິສິຕ຺ວາ ຈປນ ສຸປຸປ຺ຜິຕນາຄປຸນ຺ນາຄາທິນານາຕຣຸສຓ຺ຑມຓ຺ຑິເຕ ສຸຜຸລ຺ລສຸມນມາລຕິປ຺ປຠຸຕິນານາລຕາກຸເລ ອເນກວິຘທິປທຈຕຸປ຺ປທສງ຺ຆນິເສວິເຕ ຣມຓີເຍ ສີຕລສິລາຕເລ ຈຕຸຄ຺ຄຸຓໍ ສງ຺ຆາຏິໍປຎ຺ຎເປຕ຺ວາ ນິສີທິ ຉພ຺ພຓ຺ຓຣໍສີຫິ ທິສໍ ປູຣຍນ຺ໂຕ, ຕທາ ຕຕ຺ຖ ເທວພ຺ຣຫ຺ມນາຄສຸປຓ຺ຓາທໂຍ ສນ຺ນິປຕິຕ຺ວາ ທິພ຺ພມເຍຫິ ຄນ຺ຘມາລາທີຫິ ຠຄວນ຺ຕໍ ປູຊຍມານາ ໂຖມຍມານາ ນມສ຺ສມານາ ອຏ຺ຐໍສຸ, ຕສ຺ມິໍ ປນສມາຄເມ ຠຄວາ ມຘຸຣສ຺ສຣໍ ນິຈ຺ຉາເຣນ຺ໂຕ ພ຺ຣຫ຺ມໂຆເສນ ຈຕຸສຈ຺ຈປຏິສໍຍຸຕ຺ຕໍ ຘມ຺ມໍ ເທເສຕິ ອມຕວສ຺ສໍ ວສ຺ສາເປນ຺ໂຕວິຍ. ຕທາ ເອໂກ ມິຄລຸທ຺ທໂກ ວນໍ ປວິຏ຺ໂຐ ມິຄສູກເຣ ຫນ຺ຕ຺ວາ ມໍສໍ ຂາທນ຺ໂຕ ຕໍ ຐານໍ ປຕ຺ວາ ອທ຺ທສ ຠຄວນ຺ຕໍ ຘມ຺ມໍ ເທເສນ຺ຕໍ. ທິສ຺ວາ ເອກມນ຺ຕໍ ຐິໂຕ ຘມ຺ມໍ ສຸຕ຺ວາ ຈິຕ຺ຕໍ ປສາເທຕ຺ວາ ຕໂຕ ຈຸໂຕ ເທວໂລເກ ນິພ຺ພຕ຺ຕິຕ຺ວາ ຉສຸ ກາມສຄ຺ເຄສຸ ມນຸສ຺ເສສຸຈ ອປຣາປຣໍ ອິສ຺ສຣິຍໍ ອນຸຠວນ຺ໂຕ ອິມສ຺ມິໍ ພຸທ຺ຘຸປ຺ປາເທ ສາວຕ຺ຖິຍໍ ກຸລເຄເຫ ນິພ຺ພຕ຺ຕິຕ຺ວາ ວິຎ຺ຎຸຕໍ ປຕ຺ໂຕ ຠຄວໂຕ ສາສເນ ປພ຺ພຊິຕ຺ວາ ເອກທິວສໍ ຘມ຺ມໍ ເທເສນ຺ຕສ຺ສ ຠຄວໂຕ ຈຕຸສຈ຺ຈປຕິ ສໍຍຸຕ຺ຕໍ ຘມ຺ມກຖໍ ສຸຕ຺ວາ ຈຕຸປຏິສມ຺ຠິທາຫິ ອຣຫຕ຺ຕໍ ປຕ຺ວາ ເອກທິວສໍ ຠິກ຺ຂຸສງ຺ຆມຊ຺ຌຄໂຕ ອຕ຺ຕໂນ ກຕກມ຺ມປ຺ປກາສເນນ ປີຕິວາຈມຸທາຫຣິ.

໑.

ເອ ກ ຕິໍ ເສ ອິໂຕ ກປ຺ເປ,

ໂລເກ ອຸປ຺ປຊ຺ຊິ ນາຍໂກ;

ປຕ຺ຕິໍສ ລກ຺ຂຓາຕິຓ຺ໂຓ,

ສມ຺ພຸທ຺ໂຘ ສ ສິຂີວ຺ຫໂຍ.

໒.

ຊລນ຺ໂຕ ທີປຣຸກ຺ໂຂວ, ສູຣິໂຍວ ນຠ ມຸຄ຺ຄໂຕ;

ເມຣຸຣາຊາວ ສມ຺ພຸທ຺ໂຘ, ຊເນສຄ຺ໂຄ ປຕາປວາ.

໓.

ປູເຣຕ຺ວາ ຘມ຺ມນາວາຍໍ, ສ ນາໂຖ ສກລໍ ປຊໍ;

ປຕິຏ຺ຐເປນ຺ໂຕ ສໍສາຣ, ກນ຺ຕາຣາ ສນ຺ຕິຠູມິຍໍ.

໔.

ຘມ຺ມເກຕຸໍ ສມຸສ຺ເສນ຺ໂຕ, ຫນນ຺ໂຕ ຘມ຺ມທຸນ຺ທຸຠິໍ;

ສຕ຺ເຕ ທຸກ຺ຂາ ປໂມເຈນ຺ໂຕ, ວສີ ຕຕ຺ຖ ຊິໂນ ວສີ.

໕.

ເອກສ຺ມິໍ ສມເຍ ນາໂຖ,

ໂລກປຊ຺ໂຊຕໂກ ຊິໂນ;

ວິເວກກາໂມ ສມ຺ພຸທ຺ໂຘ,

ສຸຣມ຺ມໍ ການນໍ ຄໂຕ.

໖.

ປຸນ຺ນາຄນາຄປູຄາທິ, ນານາປາທປສໍກຸລໍ;

ລຕາ ລິງ຺ຄິຕສາຂາຫິ, ສາ ໂມທກຸສຸມາຍຸຕໍ.

໗.

ກຸສຸມາ ໂມທສມ຺ມຕ຺ຕ, ຉປ຺ປທາລິ ນິເສວິຕໍ;

ນານາມິຄ ຄຓາກິຓ຺ຓໍ, ມຍູຣຄຓ ນຈ຺ຈິຕໍ.

໘.

ສີຕລຈ຺ໂຉທິກາສາຘຸ, ສຸປຕິຕ຺ຖຊລາສຍໍ;

ອາສາຣ ສາຣຘາຣາຫິ, ນິຊ຺ຌຣາສຕ ສໍກຸລໍ.

໙.

ຄນ຺ຕ຺ວານ ໂສ ມຫາຣຎ຺ຎໍ,

ສີຕລໍ ສິກຕາຕລໍ;

ສິລາຕເລ ນິສິນ຺ໂນສິ,

ວິສ຺ສຊ຺ເຊນ຺ໂຕ ຉຣໍສິໂຍ.

໑໐.

ເທວາ ຕຕ຺ຖ ສມາຄນ຺ຕ຺ວາ, ປູເຊສຸໍ ທ຺ວິປທຸຕ຺ຕມໍ;

ທິພ຺ເພຫິ ຄນ຺ຘມາລາຫິ, ນຈ຺ເຈຫິ ຕຸຣິເຍຫິຈ.

໑໑.

ເທວເທໂວ ຕທາ ເທວ, ສງ຺ຆມຊ຺ເຌ ນິສີທິຍ;

ຈຕຸສຈ຺ຈ ມເທເສສິ, ນິຈ຺ຉຣໍ ມຘຸຣໍ ຄິຣໍ.

໑໒.

ຕທາຫໍ ລຸທ຺ທໂກ ອາສິໍ, ມິຄສູກຣມາຣໂກ;

ມິຄມໍເສນ ຊິວາມິ, ເຕນ ໂປເສມິ ທາຣເກ [ໂປເສນ຺ໂຕປຸຕ຺ຕທາຣເກ ອິຕິກຕ຺ຖຈິ].

໑໓.

ຕທາຫໍ ມິຄວໍ ຍາໂຕ,

ສພາໂຓ ສສຣາສໂນ;

ອທ຺ທສໍ ວິຣຊໍ ພຸທ຺ຘໍ,

ເທວສງ຺ຆປຸຣກ຺ຂຕໍ.

໑໔.

ຈນ຺ທໍວ ຕາຣກາກິຓ຺ຓໍ, ເມຣຸໍວຓ຺ຓວມຊ຺ຌຄໍ;

ວິໂຣຈມານ ມາສີນໍ, ຈຕຸສຈ຺ຈປ຺ປກາສກໍ.

໑໕.

ເອກປສ຺ເສ ຐິໂຕ ຕຕ຺ຖ, ອສ຺ໂສສິໍ ຘມ຺ມມຸຕ຺ຕມໍ;

ຕຕ຺ຖ ຈິຕ຺ຕໍ ປສາເທຕ຺ວາ, ໂສມນສ຺ສໍ ປເວທຍິໍ.

໑໖.

ເອກຕິໍເສ ອິໂຕ ກປ຺ເປ,

ຍໍ ປຸຎ຺ຎໍ ປສຸຕໍ ມຍາ;

ເຕນາຫໍ ປຸຎ຺ຎກມ຺ເມນ,

ຊາໂຕສິໍ ເທວໂຍນິຍໍ.

໑໗.

ສມ຺ປຕ຺ຕິມນຸຠຸຕ຺ວານ, ຉກາມຄ຺ເຄ ປຣາປຣໍ;

ເທວສງ຺ຆປຣິພ຺ພູຬ຺ໂຫ, ວິມາເນ ຣຕນາມເຍ.

໑໘.

ມນຸສ຺ເສສຸຈ ຍໍ ອຄ຺ຄໍ, ຕສ຺ສ ຠາຄີ ຠວາມຫໍ;

ໂຠເຄ ເມ ອູນຕາ ນຕ຺ຖິ, ສທ຺ຘມ຺ມສວເຓ ຜລໍ.

໑໙.

ອິມສ຺ມິໍ ຠທ຺ທເກ ກປ຺ເປ,

ສາວຕ຺ຕິປຸຣມຸຕ຺ຕເມ;

ອຑ຺ເຒ ມຫທ຺ຘເນ ສາເລ,

ຊາໂຕຫໍ ອຸທິເຕ ກຸເລ.

໒໐.

ມຫຕາ ປຣິວາເຣນ, ປຕ຺ໂຕ ວຸທ຺ຘິໍຈ ວິຎ຺ຎຸຕໍ;

ຈາຣິກໍ ຈຣມາໂນຫໍ, ປຕ຺ໂຕ ເຊຕວນໍ ວຣໍ.

໒໑.

ອທ຺ທສໍ ສຫ ສິສ຺ເສຫິ, ນິສິນ຺ນໍ ສຸຄຕໍ ຕທາ;

ອສ຺ໂສສິໍ ມຘຸຣໍ ຘມ຺ມໍ, ຈຕຸສຈ຺ຈປ຺ປກາສກໍ.

໒໒.

ສຸຕ຺ວານ ມຘຸຣໍ ຘມ຺ມໍ, ປພ຺ພຊິຕ຺ວານ ສາສເນ;

ອ ຊຣາ ມຣໍ ສີຕິຠູຕໍ, ປຕ຺ໂຕ ນິພ຺ພາຓມຸຕ຺ຕມໍ.

໒໓.

ສຸຕໍ ເອກມຸຫຸຕ຺ຕໍ ເມ, ຕທາ ຘມ຺ມໍ ສຸເທສິຕໍ;

ເຕນມ຺ຫິ ຈຕຸຣາປາເຍ, ນ ຊາໂຕ ນ ກຸໂຕຠຍໍ.

໒໔.

ກຣມຸກ຺ຂິປ຺ປ ວກ຺ຂາມິ, ກໂຣເຖ ກຄິຣໍ ມມ;

ມໂມ ປມໍ ກຣິຕ຺ວານ, ຘມ຺ມໍ ສຸຓາຖ ສາຘຸກນ຺ຕິ.

ເອວຎ຺ຈ ປນ ວຕ຺ວາ ສຕ຺ເຕ ຘມ຺ມສວເຓ ນິໂຍເຊສີຕິ.

໒໕.

ອິຕິ ຕນຸຕຣກາລໍ ສາຘຸ ຘມ຺ມໍ ສຸຓິຕ຺ວາ,

ອຘິຄຕວິຠວານໍ ອານຸຠາວໍ ສຸຓິຕ຺ວາ;

ຠວວິຠວສຸຂໍ ໂຠ ປຕ຺ຖຍນ຺ຕາ ກຸສີຕໍ,

ຊຫຖ ສຸຓຖ ຘມ຺ມໍ ທຸລ຺ລຠໍ ທຸລ຺ລຠສ຺ສາຕິ.

ມິຄລຸທ຺ທກສ຺ສ ວຕ຺ຖຸໍ ທຸຕິຍໍ.

໓. ຕິຓ຺ຓໍຊນານໍ ວຕ຺ຖຸມ຺ຫິ ອຍມານຸປຸພ຺ພີກຖາ

ຊມ຺ພຸທີປສ຺ມິໍ ກິຣ ປຸພ຺ເພ ມຫານິທາໂຆ ອໂຫສິ, ຕທາ ນິທາຆສຸຣິເຍນ ສກິຣຓກຣາ ວາປິ ໂປກ຺ຂຣຓິ ນທີ ຄິຣິກນ຺ທຣນິຊ຺ຌຣາທີສຸ ອຸທກໍ ນິສ຺ເສສໍ ກຕ຺ວາ ປີຕມິວ ອຸທເກ ປຣິກ຺ຂີເຓ ມຈ຺ຉກຈ຺ຉປາທໂຍ ເຍຠຸຍ຺ເຍນ ວິນາສໍ ປຕ຺ຕາ. ອຖ ມຫາຣຎ຺ຎຠູມິຍໍ ຣຸກ຺ຂຕິຓລຠາທໂຍ ອຕີວ ມິລາຕາ ອເຫສຸໍ. ມິຄປກ຺ຂິໂນປິຆມ຺ມາຠິຕຕ຺ຕາ ປິປາສິໂຕ ມຣີຈິໍ ໂຕຍນ຺ຕິມຎ຺ຎມານາ ອິໂຕຈິໂຕຈ ຘາວນ຺ຕາ ມຫາທຸກ຺ຂປ຺ປຕ຺ຕາ ອເຫສຸໍ. ຕທາ ເອໂກ ສຸວໂປຕໂກ ປິປາສິໂຕ ຕຕ຺ຖ ຕຕ຺ຖ ປານີຍໍ ປຣິເຍສນ຺ໂຕ ມຫາຣຎ຺ເຎ ເອກສ຺ມິໍ ປູຕິປາທເປ ສຏ຺ຐິຣຕເນ ນຣກາວາເຏ ປານີຍຄນ຺ຘໍ ຆາຍິຕ຺ວາ ໂລເຠນ ປາຕຸໍ ໂອຕິຓ຺ໂຓ ອຕິປາເນນ ຠາໂຣ ຕຕ຺ເຖວ ປຕິຕ຺ວາ ອຸຄ຺ຄນ຺ຕຸໍ ນາສກ຺ຂິ. ອຖາປໂຣປິ ສປ຺ໂປຈ ມນຸສ຺ໂສຈາຕິ ທ຺ເວ ຊນາ ຕຕ຺ເຖວ ປຕິໍສຸ, ສປ຺ປານາມ ວິເວກໍ ລທ຺ຘາວ ອຕ຺ຕໍ ວິຊຫນ຺ຕິ. ຕສ຺ມາຍໍ ອລທ຺ຘາ ວິເວກຕ຺ຕໍ ອຸຄ຺ຄນ຺ຕຸໍ ນາສກ຺ຂິ. ອນາລມ຺ພຕ຺ຕາ ມນຸສ຺ໂສປິ. ເຕ ອຸຄ຺ຄນ຺ຕຸໍ ອສກ຺ໂກນ຺ຕາ ມຣຓຠຍຠີຕາ ອຎ຺ຎມຎ຺ຎ ມວິເຫເຐນ຺ຕາ ຕຕ຺ເຖວ ວສິໍສຸ. ອເຖໂກ ພຣາຓສີວາສິໂກ ມນຸສ຺ໂສ ວນໍ ປວິຏ຺ໂຐ ຕເຖວ ປານີຍໍ ປຣິເຍສມາໂນ ຕໍ ຐານໍ ປຕ຺ວາ ເຕ ຕໂຍປິ ທິສ຺ວາ ກມ຺ປມານຫທໂຍ ວລ຺ລິຍາ ປິຏກໍ ພນ຺ຘິຕ຺ວາ ສິກ຺ກາຍ ປກ຺ຂິປິຕ຺ວາ ໂອຕາເຣຕ຺ວາ ເຕ ຕໂຍປິ ອຸທ຺ຘຣິ, ອຖາເນນ ເຕ ອມ຺ຫາກໍ ຊີວິຕໍ ທິນ຺ນນ຺ຕິ ໂສມນສ຺ສາ ຕສ຺ເສວມາຫໍສຸ, ສາມິ ມຍໍ ຕຸມ຺ເຫ ນິສ຺ສາຍ ຊີວິຕໍ ລຠິມ຺ຫ, ຕຸມ຺ເຫ ອິໂຕ ປຏ຺ຐາຍ ອມ຺ຫາກໍ ສຫາໂຍ, ມຍມ຺ປິ ເຕ ສຫາຍາ, ອມ຺ຫາກໍ ວສນຏ຺ຐານານິ ອາຄນ຺ຕຸກາມາຕິ ວຕ຺ວາ ເຕສຸ ຕາວ ສຸວໂປຕໂກ ອາຫ, ສາມິ ພາຣາຓສິຍໍ ທກ຺ຂິຓທ຺ວາເຣ ມຫານິຄ຺ໂຣໂຘ ອຕ຺ຖິ, ຕຕ຺ຖາຫໍ ວສາມິ, ຕວ ຕຖາຣູເປ ກິຈ຺ເຈ ສຕິ ມມ ສນ຺ຕິກມາຄມ຺ມ ສຸວາຕິ ສທ຺ທໍກໂຣຫີຕິ ວຕ຺ວາ ເມຕ຺ຕິຖິຣໍ ກຕ຺ວາ ປກ຺ກາມິ, ສປ຺ໂປປິ ສມ຺ມາຫໍ ຕສ຺ເສວ ນິຄ຺ໂຣຘສ຺ສາ ວິທູເຣ ມຫນ຺ຕໍ ວມ຺ມິກໍ ອຕ຺ຖິ, ຕຕ຺ຖ ວສາມິ, ຕວຕ຺ເຖ ສຕິ ຕຕ຺ຖາຄນ຺ຕ຺ວາ ທີຆາຕິສທ຺ທໍ ກໂຣຫີຕິ ວຕ຺ວາ ຕເຖວປກ຺ກາມິ, ມນຸສ຺ໂສປິ ພາຣາຓສິຍໍ ອສຸກາຍນາມ ວີຖິຍາ ອສຸກເຄເຫ ວສາມິ, ຕວຕ຺ເຖ ສຕິ ມມ ສນ຺ຕິກໍ ອາຄຈ຺ຉາຕິ ວຕ຺ວາ ປກ຺ກາມິ, ອຖາ ປຣຠາເຄ ໂສ ອຸປກາຣໂກ ປຸຣິໂສ ອຕ຺ຕໂນ ກິຈ຺ເຈ ສຎ຺ຊາເຕ ມມ ສຫາຍານໍ ສນ຺ຕິກໍ ຄມິສ຺ສາມີຕິ ສງ຺ເກຕານຸສາເຣນ ຄນ຺ຕ຺ວາ ນິຄ຺ໂຣຘມູເລ ຐິໂຕ ສຸວສ຺ສ ສທ຺ທມກາສິ, ຕໍ ສຸຕ຺ວາ ສຸວໂປຕໂກ ເວເຄນາຄນ຺ຕ຺ວາ ເຕນ ສທ຺ຘິໍ ປຏິສມ຺ໂມທິຕ຺ວາສມ຺ມ ຈິເຣນາ ຄໂຕສິ, ອາຄຕກາຣຓໍ ເມ ອາຈິກ຺ຂາຕິ ອາຫ. ໂສປາຫ ສມ຺ມາຫໍ ຊີວິຕຸ ມສກ຺ໂກນ຺ໂຕ ປຸຕ຺ຕທາຣເກ ຎາຕີນໍ ປຏິປາເທຕ຺ວາ ຕວ ສນ຺ຕິກມາຄໂຕມ຺ຫິຕິ, ສຸວໂປຕໂກປິ ສາຘຸ ສມ຺ມ ຕຍາ ກຕໍ ມມ ສນ຺ຕິກມາຄຈ຺ຉນ຺ເຕນ, ຕຍາ ມມ ຊີວິຕໍ ທິນ຺ນໍ, ມຍາປິ ຕວ ຊີວນຸປາຍໍ ກາຕຸໍ ວຏ຺ຏຕິ, ຍາວາຫໍ ອາຄຈ຺ຉາມິ, ຕາເວຕ຺ຖ ໂຖກໍ ວິສ຺ສມາຕິ ວຕ຺ວາ ປກ຺ກາມິ ຊີວນຸປາຍໍ ປຣິເຍສມາໂນ, ຕສ຺ມິໍ ກິຣ ສມເຍ ພາຣາຓສີຣາຊາ ນຄຣໂຕ ນິກ຺ຂມ຺ມ ສຸສຊ຺ຊິຕຸຍ຺ຍານໍ ປວິສິຕ຺ວາ ສປຣິໂສ ກີຬິຕ຺ວາ ມຊ຺ຌນ຺ຕິກສມເຍ ສຸຜຸລ຺ລິຕໍ ປຎ຺ຈປທຸມສຎ຺ຉນ຺ວໍ ມງ຺ຄລໂປກ຺ຂຣຓິໍ ທິສ຺ວາ ນຫາຍິຕຸກາໂມ ສພ຺ພາຠຣຓານິ ໂອມຸຎ຺ຈິຕ຺ວາ ຣາຊປຸຣິເສ ປຏິປາເທຕ຺ວາ ນຫາຍິຕຸໍ ໂອຕຣິ, ຕທາ ສຸວໂປຕໂກ ຕໍ ຐານໍ ປຕ຺ໂຕ ສາຂນ຺ຕເຣ ນິລີໂນ ຣາຊປຸຣິສານໍ ປມາທໍ ທິສ຺ວາ ຣຎ຺ໂຎ ມຸຕ຺ຕາຫາຣໍ ຑສິຕ຺ວາ ອາກາສໍ ປກ຺ຂນ຺ທິຕ຺ວາ ເວເຄນາຄນ຺ຕ຺ວາ ອຕ຺ຕໂນ ສຫາຍສ຺ສ ທຕ຺ວາ ອປ຺ປມຕ຺ໂຕ ອິມໍ ວລຎ຺ເຊຫິ ສມ຺ມາຕິ ວຕ຺ວາ ອທາສິ, ຕໂຕ ໂສ ນໍ ຄເຫຕ຺ວາ ອິມໍ ກຸຫິໍ ປຏິສາເມສ຺ສາມີຕິ ຈິນ຺ໂຕນ຺ໂຕ ມເມໂກ ສຫາຍໂກ ອນ຺ໂຕນຄເຣ ວສຕິ, ຕສ຺ມິໍ ຐເປສ຺ສາມີຕິ ຈິນ຺ເຕຕ຺ວາ ຍຖາສງ຺ເກຕມຸປຄມ຺ມ ຕໍ ທິສ຺ວາ ປຏິສນ຺ຖາຣໍ ກຕ຺ວາ ສຸວໂປຕເກນ ກໂຕ ປກາຣໍ ປກາເສຕ຺ວາ ອິມໍ ມຸຕ຺ຕາຫາຣໍ ສາຘຸກໍ ຐເປຫີຕິ ວຕ຺ວາ ອທາສິ, ຕໍຂເຓ ຣາຊາ ນຫາຕ຺ວານຸລິຕ຺ໂຕ ອາຠຣຓານິ ປິລນ຺ເຘນ຺ໂຕ ມຸຕ຺ຕາຫາຣໍ ນາທ຺ທສ. ຕໂຕ ຣາຊປຸຣິສາ ອນ຺ໂຕຈ ພຫິຈ ປຣິຊເນ ອຸປປຣິກ຺ຂິຕ຺ວາ ມຸຕ຺ຕາຫາຣໍ ອປສ຺ສນ຺ຕາ ນຄເຣ ເຠຣິໍ ຈຣາເປສຸໍ, ໂຍ ມຸຕ຺ຕາຫາຣໍ ປສ຺ສຕິ, ຕສ຺ສ ຣາຊາ ມຫນ຺ຕໍ ຍສໍ ທສ຺ສຕີຕິ. ຕໍ ສຸຕ຺ວາ ໂສ ມິຕ຺ຕທູຠີ ເອວໍ ຈິນ຺ເຕສິ, ອຫໍຈມ຺ຫິ ທຸກ຺ຂິໂຕ, ຍນ຺ນູນາຫໍ ມຸຕ຺ຕາຫາຣໍ ຣຎ຺ໂຎ ທສ຺ເສຕ຺ວາ ສຸເຂນ ວເສຍ຺ຍໍ, ກິມ຺ເມ ເອເຕນາຕິ ເຕນ ກຕໍ ຕຖາຣູປໍ ອຸປກາຣໍ ອສລ຺ລກ຺ເຂນ຺ໂຕ ມຫາມິຕ຺ຕທູຠີ ປຸຣິໂສ ຣາຊປຸຣິເສ ອຸປສງ຺ກມ຺ມ ມຸຕ຺ຕຫາຣໍ ອຕ຺ຕໂນ ສນ຺ຕິເກ ຐປິຕຠາວໍ ກເຖສິ, ໂຠ ມມ ສນ຺ຕິເກ ເອໂກ ປຸຣິໂສ ມຸຕ຺ຕຫາຣໍ ຐເປສີຕິ. ເອວໍ ອສປ຺ປຸຣິສສໍສຄ຺ໂຄຕິ, ຕຖາຫິ.

໑.

ຍຖາ ສໍວຑ຺ຒິໂຕ ນິມ຺ໂພ, ມຘຸຂີໂຣ ທສິຎ຺ຈນາ;

ນ ຍາຕິ ມຘຸຣໍ ຕໍ ໂວ, ປກາຣ ມສຕໍ ກຕໍ.

໒.

ສີເສນຸ ທກ ມາທາຍ, ວຑ຺ຒິໂຕປິ ນຸຫີຕຣຸ;

ນ ຍາຕິ ມຘຸຣໍ ຕໍໂວ, ປກາຣມສຕໍ ກຕໍ.

໓.

ນິຈ຺ຈໍ ຂີໂຣທປາເນນ, ວຑ຺ຒິໂຕ ສິວິໂສ ຍຖາ;

ວິສໍວ ປຣິວຕ຺ເຕຕິ, ຕຖາ ນີໂຈປກາຣກໍ.

໔.

ຍຖາຕ຺ຕນາ ກໂຕ ອຄ຺ຄິ, ສີຕລໍ ນ ທເທ ຂລຸ;

ຕຖາ ນີເຈ ກຕໍ ກາຣໍ, ອຄ຺ຄີວ ທຫເຕ ຕນຸໍ.

໕.

ຕສ຺ມາ ອຸປປຣິກ຺ຂິຕ຺ວາ, ຫາວຠາເວນ ພຸທ຺ຘິຍາ;

ກາຕພ຺ພາ ເມຕ຺ຕິ ຊນ຺ຕູຫິ, ນາມິຕ຺ໂຕ ລຠເຕສຸຂນ຺ຕິ.

ອຖສ຺ສ ມິຕ຺ຕທຸຠິໂນ ວຈເນນ ຣາຊປຸຣິສາ ມຸຕ຺ຕາຫາຣໍຈຕໍຈ ຄເຫຕ຺ວາ ສຠຓ຺ຑກໍ ປຸຣິສໍ ທສ຺ເສສຸໍ. ອຖ ຣາຊາ ສຠຓ຺ຑກໍ ໂຈຣໍ ທິສ຺ວາ ກຸທ຺ໂຘ ອິມໍ ເນຕ຺ວາ ທກ຺ຂິຓທ຺ວາເຣ ຊີວສູເລ ອຸຕ຺ຕາເສຖາຕິ ອາຓາເປສິ, ຣາຊປຸຣິສາ ຕສ຺ສ ຣາຊາຓໍ ກໂຣນ຺ໂຕ ອຄມໍສຸ, ເຕຫິ ນີຍມາໂນ ປຸຣິໂສ ທກ຺ຂິຓທ຺ວາຣາ ນິກ຺ຂມ຺ມ ສປ຺ປສຫາຍໍ ສຣິຕ຺ວາ ອປ຺ເປວນາເມ ຕສ຺ສ ສນ຺ຕິກາ ກິຎ຺ຈິ ໂສຕ຺ຖິ ຠເວຍ຺ຍາຕິ ປຸພ຺ເພ ວຸຕ຺ຕສງ຺ເກຕາ ນຸສາເຣນ ວມ຺ມິກໍ ທິສ຺ວາ ສມ຺ມ ທີຆາຕິ ສທ຺ທມກາສິ, ໂສ ວມ຺ມິກາ ນິກ຺ຂມ຺ມຕໍ ຕຖາ ນິຍມານໍ ທິສ຺ວາ ສໍວິຄ຺ໂຄ ທຸກ຺ຂປ຺ປຕ຺ໂຕ ສຫາຍສ຺ສເມ ອຊ຺ຊ ອວສ຺ສເຍນ ອຸປຕ຺ຖມ຺ຠໍ ຠວິຕຸໍ ວຏ຺ຏຕີຕິ ຕໍ ສມສ຺ສາເສຕ຺ວາ ອຕ຺ຕຠາວໍ ວິຊຫິຕ຺ວາ ອຎ຺ຎຕຣເວເສນ ຣາຊປຸຣິເສ ອຸປສງ຺ກມ຺ມ ອິມໍ ປຸຣິສໍ ມຸຫຸຕ຺ຕໍມາ ມາເຣຖາຕິ ທຬ຺ຫໍ ວຕ຺ວາ ມຸຫຸຕ຺ເຕນ ຣຎ຺ໂຎ ອຄ຺ຄມເຫສິຍາ ວສນຏ຺ຐານໍ ຄນ຺ຕ຺ວາ ສປ຺ປວຓ຺ເຓນ ເທວິໍ ຑສິຕ຺ວາ ຕາຍ ວິເສນ ມຸຈ຺ຉິຕກາເລ ມນຸສ຺ສວຓ຺ເຓນ ວຊ຺ຌປ຺ປຕ຺ໂຕ ວິໂສສຘໍ ຊານາຕິຕີ ວຕ຺ວາ ຕໍຂເຓວ ສຫາຍສ຺ສ ສນ຺ຕິກໍ ຄນ຺ຕ຺ວາ ຣຎ຺ຎາ ຕວ ປກ຺ໂກ ສິຕກາເລ ຄນ຺ຕ຺ວາ ອຸທກປ຺ປສເຕນ ເທວິຍາ ສຣີເຣ ປຫຣິຕ຺ວາ ນິພ຺ພິສໍ ກຣາຫີຕິ ວຕ຺ວາ ປກ຺ກາມິ, ອຖ ຣາຊາ ວິສເວຊ຺ຊ ປຣິເຍສນ຺ໂຕ ຕໍ ປວຕ຺ຕິໍ ສຸຕ຺ວາ ວຊ຺ຌປ຺ປຕ຺ຕໍ ອາເນຖາຕິ ອາຓາເປຕ຺ວາ ເທວິຍາ ນິພ຺ພິສໍ ກໂຣຖາຕິ ອາຫ, ໂສ ນາຄຣາເຊນ ວຸຕ຺ຕນເຍນ ນິພ຺ພິສມກາສິ, ສາ ສຸຂິຕາ ອໂຣຄາ ອໂຫສິ, ຣາຊາ ຕໍ ທິສ຺ວາ ຕຸຏ຺ໂຐ ຕສ຺ສ ເຂຕ຺ຕວຕ຺ຖຸຍານວາຫນາທິທາເນນ ມຫາສກ຺ກາຣມກາສິ, ອຖ ໂສ ຣາຊານໍ ອຸປສງ຺ກມ຺ມ ອຕ຺ຕນາ ກຕໍ ສພ຺ພໍ ປກາເສສິ. ເຕນ ວຸຕ຺ຕໍ.

໖.

ເອກທາຫໍ ມຫາຣາຊ, ວນໍ ກມ຺ເມນ ເກນຈິ;

ຄໂຕທ຺ທສໍ ມຫາວາເຏ, ປຕິຕໍ ສຸວໂປຕກໍ.

໗.

ອໂຖ ຣຄໍ ມນຸສ຺ສໍຈ;

ທຸກ຺ຂປ຺ປຕ຺ເຕ ຂຸທາປເຣ;

ອຸກ຺ຂິປິໍ ກຣຸຓາຍາຫໍ;

ເຕ ເມ ໂວຈຸໍ ຕທາ ຕໂຍ.

໘.

ອທາສິ ຊີວມມ຺ຫາກໍ, ອຸປກາໂຣສິ ໂນ ຕຸວໍ;

ຕວ ກິຈ຺ເຈ ສມຸປ຺ປນ຺ເນ, ອມ຺ຫາກໍ ເອຫິ ສນ຺ຕິກໍ.

໙.

ເອວໍ ເຕຫິ ປວຸຕ຺ໂຕຫໍ, ອຄຎ຺ຉິໍ ສຸວສນ຺ຕິກໍ;

ເຕນ ກຕູປກາໂຣຫໍ, ມນຸສ຺ສສ຺ສາປິ ສນ຺ຕິກໍ.

໑໐.

ເຕນາຫໍ ມຣຓປ຺ປຕ຺ໂຕ, ອທ຺ທສໍ ອຸຣຄາຘິປໍ;

ໂສທາສິ ຊີວິຕໍ ມຍ຺ຫໍ, ອລຕ຺ຖໍ [ອລທ຺ຘ ອິຕິສພ຺ພຕ຺ຖ] ວິປຸລໍ ຘນໍ.

໑໑.

ສຸຊໂນ ນາວມນ຺ຕພ຺ໂພ, ຂຸທ຺ທໂກຕິ ນຣາຘິປ;

ສຸໂວຈ ອຸຣໂຄເຈເຕ, ມິຕ຺ຕຘມ຺ເມ ປຕິຏ຺ຐິຕາ.

໑໒.

ກາຣຓຎ຺ຎູ ມນຸສ຺ເສໂສ,

ອມ຺ເຫຫິ ສມຊາຕິໂກ;

ກຕູປກາໂຣ ເອວມ຺ປິ,

ທິໂສ ຊາໂຕ ນຣາຘໂມ.

໑໓.

ອກສ຺ມາ ເທວ ກຸປ຺ປນ຺ຕິ, ປສີທນ຺ຕິນິມິຕ຺ຕໂຕ;

ສີລໍ ເຫຕມສາຘູນໍ, ພາລານມວິຊານຕໍ.

໑໔.

ມນຸສ຺ສາປິ ມຫາຣາຊ, ເກຈິ ວິສ຺ສາສິຍາ ນ ເວ;

ຕິຣຈ຺ຉານາປິ ໂຫນ຺ເຕວ, ອຊິມ຺ຫມນສາສຐາຕິ.

ເອວໍ ໂສ ອຕ຺ຕໂນ ປວຕ຺ຕິໍ ກເຖສິ, ຣາຊາ ຕໍ ສຸຕ຺ວາ ປສນ຺ໂນ ອິມສ຺ສ ປຸຣິສສ຺ສ ມຫນ຺ຕໍ ເຄຫໍ ກຕ຺ວາ ມຫາປຣິຫາຣໍ ກໂຣຖາຕິ ອາຓາເປສິ, ໂສ ປນ ມມ ເຄຫໍ ນິຄ຺ໂຣຘສ຺ສ ຈ ວມ຺ມິກສ຺ສ ຈ ອນ຺ຕເຣ ກໂຣຖາຕິ ວຕ຺ວາ ຕຖາ ກາເຣຕ຺ວາ ຕຕ຺ຖ ວສນ຺ໂຕ ຣາຊູປຏ຺ຐານໍ ກໂຣນ຺ໂຕ ເຕຫິ ສຫາເຍຫິ ສທ຺ຘິໍ ສມ຺ໂມທມາໂນ ຍາວຊີວໍ ວສິຕ຺ວາ ອາຍຸ ປຣິໂຍສາເນ ເຕຫິ ສທ຺ຘິໍ ຍຖາກມ຺ມໍ ຄໂຕຕິ.

໑໕.

ອິຕິ ປຕິຕສຸຂມ຺ຫາ ອງ຺ຄໂຕ ວາ ຘນມ຺ຫາ,

ປຣມຕຣປຕິຏ຺ຐາ ໂຫນ຺ຕິ ມິຕ຺ຕາ ສຂານໍ;

ວິຣຫິຕສຂິນໍ ໂຠ ນຕ຺ຖິ ຍສ຺ມາຠິວຸທ຺ຘິ,

ຈິຓຸຖ ກຸສລຘມ຺ມໍ ມິຕ຺ຕວນ຺ຕາ ມຫນ຺ຕໍ.

ຕິຓ຺ຓໍ ຊນານໍ ວຕ຺ຖຸໍ ຕຕິຍໍ.

໔. ພຸທ຺ເຘນິຍາ ວຕ຺ຖຸມ຺ຫິ ອຍມານຸປຸພ຺ພີກຖາ

ຊມ຺ພຸທີເປ ກິຣ ປຸພ຺ເພ ປາຏລິປຸຕ຺ຕນຄເຣ ສຕ຺ຕາສີຕີໂກຏິນິຫິຕຘນໍ ເອກໍ ເສຏ຺ຐິກຸລໍ ອໂຫສິ, ຕສ຺ສ ປນ ເສຏ຺ຐິໂນ ເອກາເຍວ ຘີຕາ ອໂຫສິ ນາເມນ ພຸທ຺ເຘນິນາມ, ຕສ຺ສາ ສຕ຺ຕວສ຺ສິກກາເລ ມາຕາປິຕໂຣ ກາລມກໍສຸ, ຕສ຺ມິໍ ກຸເລ ສພ຺ພໍ ສາປເຕຍ຺ຍໍ ຕສ຺ສາເຍວ ອໂຫສິ, ສາ ກິຣ ອຠິຣູປາ ປາສາທິກາ ປຣມາຍ ວຓ຺ຓໂປກ຺ຂຣຕາຍ ສມນ຺ນາຄຕາ ເທວຈ຺ຉຣປຏິຠາຄາ ປິຍາຈ ອໂຫສິ ມນາປາ, ສທ຺ຘາ ປສນ຺ນາ ຣຕນຕ຺ຕຍມາມິກາ ປຏິວສຕິ, ຕສ຺ມິໍ ປນ ນຄເຣ ເສຏ຺ຐິເສນາປຕິອຸປຣາຊາທໂຍ ຕໍ ອຕ຺ຕໂນ ປາທປຣິຈາຣິກໍ ກາມຍມານາ ມນຸສ຺ເສ ເປເສສຸໍ ປຓ຺ຓາກາເຣຫິ ສທ຺ຘິໍ, ສາ ຕໍ ສຸຕ຺ວາ ຈິນ຺ເຕສິ, ມຍ຺ຫໍ ມາຕາປິຕໂຣ ສພ຺ພໍ ວິຠວໍ ປຫາຍ ມຕາ, ມຍາ ປນ ຕຖາ ອຄນ຺ຕພ຺ພໍ, ກິໍ ເມ ປຕິກຸເລນ, ເກວລໍ ວິຕ຺ຕວິນາສາຍ ຠວຕິ, ມຍາ ປນິ ມໍ ຘນໍ ພຸທ຺ຘສາສເນເຍວ ນິທຫິຕຸໍ ວຏ຺ຏຕີຕິ ຈິນ຺ເຕສິ, ຈິນ຺ເຕຕ຺ວາ ຈ ປນ ເຕສໍ ນ ມຍ຺ຫໍ ປຕິກຸເລນຕ຺ໂຖຕິ ປຏິກ຺ຂິປິ, ສາ ຕໂຕ ປຏ຺ຐາຍ ມຫາທານໍ ປວຕ຺ເຕນ຺ຕີ ສມຓພ຺ຣຫ຺ມເຓ ສນ຺ຕປ຺ເປສິ, ເຕເນຕ຺ຖ.

໑.

ຈຕຸທ຺ທິສາຍາຕຊິນຕ຺ຣຊານໍ,

ອາປານຠູຕໍ ຆຣມາສິ ຕສ຺ສາ;

ຍທິຈ຺ຉິຕ ປ຺ປຈ຺ຈຍລາຠ ເຫຕຸ,

ເທວທ຺ທຸໂມວາສິ ມຫານຸຠາໂວ.

໒.

ປຸປ຺ຜູປຫາຣາທິ ວິຕານລງ຺ກຕາ,

ປທີປ ປຎ຺ຎຕ຺ຕ ສຸຠາສນາວລີ;

ສຸຂາສນາສີນ ວສີຫິລງ຺ກຕາ,

ຕສ຺ສາສິ ຕສ຺ມິໍ ວຣທານສາລາ.

໓.

ສຸໂຘຕຫຕ຺ຖາ ສຸຈິປຸຎ຺ຎຈິຕ຺ຕາ,

ສທາທຣາ ຣກ຺ຂິຕປຎ຺ຈສີລາ;

ພຸທ຺ເຘນິນາມາ ກຣຸຓາ ຄຸຓຄ຺ຄາ,

ອທາ ມຫາທານວຣໍ ປສຕ຺ຖນ຺ຕິ.

ອຖາປຣຠາເຄ ເອໂກ ອສ຺ສວາຓິຊໂກ ອສ຺ສ-ວາຓິຊ຺ຊາຍ ປຸພ຺ພນ຺ຕາປຣນ຺ຕໍ ຄຈ຺ຉນ຺ໂຕ ອາຄມ຺ມ ອິມິສ຺ສາ ເຄເຫ ນິວາສໍ ຄຓ຺ຫິ, ອຖ ໂສ ວາຓິໂຊ ຕໍ ທິສ຺ວາ ຘີຕຸສິເນຫໍ ປຕິ ຏ຺ຐາ ເປ ຕ຺ວາ ຄນ຺ຘມາລວຕ຺ຖາລງ຺ກາຣາທີຫິ ຕສ຺ສາ ອຸປກາຣໂກ ຫຸຕ຺ວາ ຄມນກາເລ ອມ຺ມ ເອເຕສຸ ອສ຺ເສສຸ ຕວ ຣຸຈ຺ຈນກໍ ອສ຺ສໍ ຄຓ຺ຫາຫີຕິ ອາຫ, ສາປິ ອສ຺ເສ ໂອໂລເກຕ຺ວາ ເອກໍ ສິນ຺ຘວໂປຕກໍ ທິສ຺ວາ ເອຕໍ ເມ ເທຫີຕິ ອາຫ, ວາຓິໂຊ ອມ຺ມ ເອໂສ ສິນ຺ຘວໂປຕໂກ, ອປ຺ປມຕ຺ຕາ ຫຸຕ຺ວາ ປຏິຊຄ຺ຄາຫີຕິ ວຕ຺ວາ ຕໍ ປຏິປາເທຕ຺ວາ ອຄມາສິ. ສາປິ ຕໍ ປຏິຊຄ຺ຄມານາ ອາກາສຄາມິຠາວໍ ຎຕ຺ວາ ສມ຺ມາ ປຏິຊຄ຺ຄນ຺ຕີ ເອວໍ ຈິນ຺ເຕສິ, ປຸຎ຺ຎກຣຓສ຺ສ ເມ ສຫາໂຍ ລທ຺ໂຘຕິ, ອຄຕປຸພ຺ພາຈ ເມ ຠຄວໂຕ ສມາຣໍ ມາຣພລໍ ວິຘເມຕ຺ວາ ພຸທ຺ຘຠູຕສ຺ສ ຊຍມຫາໂພຘິຠູມິ, ຍນ຺ນູນາຫໍ ຕຕ຺ຖ ຄນ຺ຕ຺ວາ ຠຄວໂຕ ຊຍມຫາໂພຘິໍ ວນ຺ເທຍ຺ຍນ຺ຕິ ຈິນ຺ເຕຕ຺ວາ ພ ຫູ ຣຊຕສຸວຓ຺ຓມາລາທໂຍ ກາຣາເປຕ຺ວາ ເອກທິວສໍ ອສ຺ສ ມຠິຣຸຍ຺ຫ ອາກາເສນ ຄນ຺ຕ຺ວາ ໂພຘິມາລເກ ຐຕ຺ວາ ອາຄຈ຺ຉນ຺ຕຸອຍ຺ຍາ ສຸວຓ຺ຓມາລາ ປູເຊຕຸໍຕິ ອຸຄ຺ໂຆເສສິ. ເຕເນຕ຺ຖ.

໔.

ຍໂຕ ປຏ຺ຐາຍຫໍ ພຸທ຺ຘ, ສາສເນ ສຸທ຺ຘມານສາ;

ປສນ຺ນາ ເຕນ ສຈ຺ເຈນ, ມມານຸຄ຺ຄຫພຸທ຺ຘິຍາ.

໕.

ອາຄຈ຺ຉນ຺ຕຸ ນມສ຺ສນ຺ຕຸ, ໂພຘິໍ ປູເຊນ຺ຕຸ ສາຘຸກໍ;

ໂສຓ຺ຓມາລາຫິ ສມ຺ພຸທ຺ຘ, ປຸຕ຺ຕາ ອຣິຍສາວກາ.

໖.

ສຸຕ຺ວາ ຕໍ ວຈນໍ ອຍ຺ຍາ, ພຫູ ສີຫຬວາສິໂນ;

ອາຄມ຺ມ ນຠສາ ຕຕ຺ຖ, ວນ຺ທິໍ ສຸຈ ມຫິໍສຸຈາຕິ.

ຕໂຕ ປ຺ປຕຸຕິ ສາ ກຸມາຣິກາ ພຸທ຺ຘສາສເນ ອຕີວ ປສນ຺ນາ ນິຈ຺ຈເມວ ອສ຺ສ ມຠິຣຸຍ຺ຫ ອາຄນ຺ຕ຺ວາ ອຣິເຍຫິ ສທ຺ຘິໍ ມຫາໂພຘິໍ ສຸວຓ຺ຓມາລາຫິ ປູເຊຕ຺ວາ ຄຈ຺ຉຕິ, ອຖ ປາຏລິປຸຕ຺ຕນຄໂຣປວເນ ວນຈຣາ ຕສ຺ສາ ອຠິຓ຺ຫໍ ຄຈ຺ຉນ຺ຕິຍາ ຈ ອາຄຈ຺ຉນ຺ຕິຍາ ຈ ຣູປສມ຺ປຕ຺ຕິໍ ທິສ຺ວາ ຣຎ຺ໂຎ ກເຖສຸໍ. ມຫາຣາຊ ເອວຣູປາ ກຸມາຣິກາ ອສ຺ສ ມຠິຣຸຍ຺ຫ ອາຄນ຺ຕ຺ວາ ນິພທ຺ຘໍ ວນ຺ທິຕ຺ວາ ຄຈ຺ຉຕິ. ເທວສ຺ສານຸຣູປາ ອຄ຺ຄມເຫສີ ຠວິຕຸນ຺ຕິ, ຣາ ຊາ ຕໍ ສຸຕ຺ວາ ເຕນຫິ ຠເຓ ຄຓ຺ຫຖ ນໍ ກຸມາຣິໍ, ມມ ອຄ຺ຄມເຫສິໍ ກໂຣມີຕິ ປຸຣິເສ ປໂຍເຊສິ, ເຕນ ປຍຸຕ຺ຕປຸຣິສາ ໂພຘິປູຊໍ ກຕ຺ວາ ອາຄຈ຺ຉນ຺ຕິໍ ຄຓ຺ຫາມາຕິ ຕຕ຺ຖ ນິລີນາ ຄຫຓສຊ຺ຊາ ອຏ຺ຐໍສຸ, ຕທາ ສາ ກຸມາຣິກາ ອສ຺ສ ມຠິຣຸຍ຺ຫ ມຫາໂພຘິມຓ຺ຑໍ ຄນ຺ຕ຺ວາ ວີຕໂຣເຄຫິ ສທ຺ຘິໍ ປຸປ຺ຜປູຊໍ ກຕ຺ວາ ວນ຺ທິຕ຺ວາ ນິວຕ຺ຕິ, ອຖ ເຕສຸ ເອໂກ ຘມ຺ມຣກ຺ຂິຕ ຕ຺ເຖໂຣນາມ ຕສ຺ສາ ເອວ ມາຫ, ຠຄິນິ ຕໍ ອນ຺ຕຣາມຄ຺ເຄ ໂຈຣາ ຄຓ຺ຫິຕຸກາມາ ຐິຕາ, ອສຸກຏ຺ຐານໍ ປຕ຺ວາ ອປ຺ປມຕ຺ຕາ ສີຆໍ ຄຈ຺ຉາຕິ, ສາປິ ຄຈ຺ຉນ຺ຕີ ຕໍ ຐານໍ ປຕ຺ວາ ໂຈເຣຫິ ອນຸພນ຺ຘິຕາ ອສ຺ສສ຺ສ ປຓ຺ຫິຍາ ສຎ຺ຎໍ ທຕ຺ວາ ປກ຺ກາມິ, ໂຈຣາ ປຈ຺ຉໂຕ ປຈ຺ຉໂຕ ອນຸພນ຺ຘິໍສຸ. ອສ຺ໂສ ເວຄໍ ຊ ເນ ຕ຺ວາ ອາກາສ ມຸລ຺ລງ຺ຆິ, ກຸມາຣິກາ ເວຄໍ ສນ຺ຘາເຣຕຸໍ ອສກ຺ໂກນ຺ຕີ ອສ຺ສສ຺ສ ປິຏ຺ຐິໂຕ ປຣິຄລິຕ຺ວາ ປຕນ຺ຕີ ມຍາ ກຕູປກາຣໍ ສຣ ປຸຕ຺ຕາຕິ ອາຫ, ໂສ ປຕນ຺ຕິໍ ທິສ຺ວາ ເວເຄນາ ຄນ຺ຕ຺ວາ ປິຏ຺ຐິຍໍ ນິສີທາເປຕ຺ວາ ອາກາສໂຕ ເນຕ຺ວາ ສ ກ ຏ຺ຐາ ເນ ເຍວ ປຕິຏ຺ຐາເປສິ. ຕສ຺ມາ.

໗.

ຕິຣຈ຺ຉານຄຕາເປວໍ, ສຣນ຺ຕາ ອຸປກາຣກໍ;

ນ ຊຫນ຺ຕີຕິ ມນ຺ຕ຺ວານ, ກຕຎ຺ຎູ ໂຫນ຺ຕຸ ປາຓິໂນຕິ.

ຕໂຕ ສາ ກຸມາຣິກາ ສຕ຺ຕາ ສີຕິໂກຏິຘນໍ ພຸທ຺ຘສາສເນເຍວ ຈຊິຕ຺ວາ ຍາວຊີວໍ ສີລໍ ຣກ຺ຂິຕ຺ວາ ອຸໂປສຖກມ຺ມໍ ກ ຕ຺ວາ ຕ ໂຕ ຈຸຕາ ສຸຕ຺ຕ ປ຺ປພຸທ຺ໂຘ ວິຍ ເທວໂລເກ ນິພ຺ພຕ຺ຕີຕິ.

໘.

ອຕິຕຣຸຓວຍາ ໂຠ ມາຕຸຄາມາປິ ເອວໍ,

ວິວິຘກຸສລກມ຺ມໍ ກຕ຺ວ ສຄ຺ຄໍ ວຊນ຺ຕິ;

ກຸສລຜລມຫນ຺ຕໍ ມຎ຺ຎມານາ ຠວນ຺ຕາ,

ຠວຖ ກຖ ມຸເປກ຺ຂາ ທານມານາທິກມ຺ເມ.

ພຸທ຺ເຘນິຍາ ວຕ຺ຖຸໍ ຈຕຸຕ຺ຖໍ.

໕. ອຫິຕຸຓ຺ຑິກສ຺ສ ວຕ຺ຖຸມ຺ຫິ ອຍມານຸປຸພ຺ພີກຖາ

ອິມສ຺ມິໍ ກິຣ ຠທ຺ທກປ຺ປມ຺ຫິ ອມ຺ຫາກໍ ກິຣ ຠຄວໂຕ ປຸພ຺ເພ ກສ຺ສໂປນາມ ສຕ຺ຖາ ໂລເກ ອຸປ຺ປຊ຺ຊິຕ຺ວາ ສເທວກໍ ໂລກໍ ສໍສາຣສາຄຣາ ຕາເຣຕ຺ວາ ສພ຺ພພຸທ຺ຘກິຈ຺ຈານິ ນິຏ຺ຐເປຕ຺ວາ ອຕ຺ຖໍ ຄໂຕ ທິວສກໂຣວິຍ ເສຕພ຺ຍມ຺ຫິ ອນຸປາທິເສສາຍ ນິພ຺ພາຓຘາຕຸຍາ ປຣິນິພ຺ພາຍິ, ຕທາ ສກລຊມ຺ພຸທີປວາສິໂນ ມນຸສ຺ສາ ສນ຺ນິປຕິຕ຺ວາ ເອເກກໍ ສຸວຓ຺ຓິຏ຺ຐກໍ ໂກຏິອຄ຺ຆນກໍ ຣຕນວິຈິຕ຺ຕໍ ພຫິຈິນນຕ຺ຖາຍ ເອເກກໍ ອຑ຺ຒໂກຏິອຄ຺ຆນກໍ ອພ຺ຠນ຺ຕຣູປປູຣຓຕ຺ຖໍ ມໂນສິລາຍ ມຕ຺ຕິກາກິຈ຺ຈໍ ກໂຣນ຺ຕາ ໂຍຊນພ຺ເພຘໍ ຖູປໍ ກຕ຺ວາ ມຫນ຺ຕໍ ສກ຺ກາຣໍ ກໂຣນ຺ຕິ. ຕທາ ເອໂກ ອຫິຕຸຓ຺ຑິໂກ ຄາມນິຄມຣາຊຘານີສຸ ສປ຺ເປ ກີຬາເປຕ຺ວາ ຊີວິກໍ ກປ຺ເປນ຺ໂຕ ເອກໍ ຄາມກໍ ປຕ຺ວາ ຕຕ຺ຖ ສປ຺ເປ ກີຬາເປຕ຺ວາ ສນ຺ຕຸຏ຺ເຐຫິ ຄາມວາສີຫິ ທິນ຺ນວິວິໂຘປາຍໂນ ຂາທນີຍໂຠຊນີຍໍ ຂາ ທິ ຕ຺ວາ ຠຸຎ຺ຊິຕ຺ວາ ຕຕ຺ເຖວ ນິວາສໍ ຄເຫຕ຺ວາ ນິສີທິ. ຕສ຺ມິໍ ກິຣ ຄາມເກ ມນຸສ຺ສາ ເຍຠຸຍ຺ເຍນ ຣຕນຕ຺ຕຍມາມກາ. ຕສ຺ມາ ເຕ ຣຕ຺ຕິຠາເຄ ສຍນ຺ຕາ ‘‘ນໂມ ພຸທ຺ຘາຍາຕິ’’ ເອວມາທິໍ ວທນ຺ຕິ. ໂສ ປນ ອຫິຕຸຓ຺ຑິໂກ ມິຈ຺ຉາທິຏ຺ຐິໂກ ຕິຓ຺ຓໍ ຣຕນານໍ ຄຸຓໍ ນ ຊານາຕິ. ຕສ຺ມາ ເຕສໍ ຕໍ ວຈນໍ ສຸຕ຺ວາ ສຍມ຺ປິ ເກ ຬິໍ ກຸຣຸມາໂນ ປຣິຫາສວເສນ ‘‘ນໂມ ພຸທ຺ຘາຍາຕິ’’ ວທຕິ, ອເຖກທິວສໍ ໂສ ອຕ຺ຕໂນ ກີຬາປນສມຕ຺ຖໍ ເອກໍ ສປ຺ປໍ ຠຕ຺ຖ ຕຕ຺ຖ ປຣິເຍສມາໂນ ອາຫິຓ຺ຑຕິ. ຕທາ ເອໂກ ນາຄຣາຊາ ກສ຺ສປທສພລສ຺ສ ຖູ ປໍ ຄ ນ຺ຕ຺ວາ ວນ຺ທິຕ຺ວາ ເອກໍ ວມ຺ມິກໍ ປວິສຕິ. ຕໍ ທິ ສ຺ວາ ອຫິຕຸຓ຺ຑິໂກ ເວເຄນາ ຄນ຺ຕ຺ວາ ນາຄຣາຊໍ ຄຓ຺ຫິຕຸໍ ມນ຺ຕໍ ປຣິຊປິ, ໂສ ມນ຺ຕໍ ສຸຕ຺ວາ ກຸຊ຺ຌິຕ຺ວາ ຕໍ ມາເຣຕຸກາໂມ ອນຸພນ຺ຘິ, ຕໍ ທິ ສ຺ວາ ອຫິຕຸຓ຺ຑິໂກ ເວ ເຄ ນ ປລາຍນ຺ໂຕ ເອກສ຺ມິໍ ປາສາເຓ ປກ຺ຂລິຕ຺ວາ ປຕມາໂນ ປຸພ຺ເພວຸຕ຺ຕປຣິຫາສ ວຈນປຣິຈເຍນ ‘‘ນໂມ ພຸທ຺ຘາຍາຕິ’’ ວທນ຺ໂຕ ປຕິ. ຕສ຺ສ ຕໍ ວຈນໍ ອນຸພນ຺ຘນ຺ຕສ຺ສ ນາຄຣຎ຺ໂຎ ໂສຕປເຖ ອມຕໍວິຍ ປຕິ. ອຖ ໂສ ຣຕນຕ຺ຕຍຄາຣເວນ ຕສ຺ມິໍ ໂກຘໍ ນິພ຺ພາເປຕ຺ວາ ສມ຺ມ ມາ ຠາຍິ. ອຫໍ ຣຕນຕ຺ຕຍມນ຺ຕານຸຠາວປາເສນ ພທ຺ໂຘ. ຕສ຺ມາ ຕຸ ວໍ ຑສິຕຸໍ ມຍ຺ຫໍ ອນນຸຣູປໍ. ອຊ຺ຊ ຕ ຍິ ປສນ຺ໂນມ຺ຫິ, ປຓ຺ຓາກາຣໍ ເຕທມ຺ມິ, ຄຓ຺ຫາຕິ ຕີຓິ ສຸວຓ຺ຓປຸປ຺ຜານິ ອທາສິ. ເອວໍ ຣຕນຕ຺ຕຍໍ ນາມ ໂຆຣາສິວິສານມ຺ປິ ສປ຺ປານໍ ມນໍ ປີເຓຕິ. ໂຫນ຺ຕິ ເຈຕ຺ຖ.

໑.

ພຸທ຺ໂຘຕິ ວຈນໍ ເສຏ຺ຐໍ, ພຸທ຺ໂຘຕິ ປທ ມຸຕ຺ຕມໍ;

ນຕ຺ຖິ ເຕນ ສມໍ ໂລເກ, ອຎ຺ຎໍ ໂສຕຣສາຍນໍ.

໒.

ຘມ຺ໂມຕິວຈນໍ ເສຏ຺ຐໍ, ຘມ຺ໂມຕິ ປທມຸຕ຺ຕມໍ;

ນຕ຺ຖິ ເຕນ ສມໍ ໂລເກ, ອຎ຺ຎໍ ໂສຕຣສາຍນໍ.

໓.

ສງ຺ໂຆຕິ ວຈນໍ ເສຏ຺ຐໍ, ສງ຺ໂຆຕິ ປທມຸຕ຺ຕມໍ;

ນຕ຺ຖິ ເຕນ ສມໍ ໂລເກ, ອຎ຺ຎໍ ໂສຕຣສາຍນໍ.

໔.

ຕສ຺ສ ມຸຂໍ ມຸຂໍ ນາມ, ຍໍ ວຕ຺ຕຕິ ມຸເຂ ສທາ;

ທຸລ຺ລຠໍ ພຸທ຺ຘວຈນໍ, ສພ຺ພສມ຺ປຕ຺ຕິທາຍກໍ.

໕.

ຕສ຺ສ ມໂນ ມໂນ ນາມ, ຍໍ ເຈ ມນສິ ວຕ຺ຕຕິ;

ທຸລ຺ລຠໍ ພຸທ຺ຘວຈນໍ, ສພ຺ພສມ຺ປຕ຺ຕິທາຍກໍ.

໖.

ຕເມວ ກວຈໍ ເທເຫ, ຕເມວ ມຓິ ກາມໂທ;

ຕເມວ ສຸຣຠີ ເຘນຸ, ຕເມວ ສຸຣປາທໂປ.

໗.

ຕສ຺ເສວ ໂສຕໍ ໂສຕໍວ, ຍໍ ສຸຓາຕິ ຊໂນ ອຍໍ

ທຸລ຺ລຠໍ ພຸທ຺ຘວຈນໍ, ສພ຺ພສມ຺ປຕ຺ຕິທາຍກໍ.

໘.

ເອວໍ ວິໂຘ ຣໂຄ ໂຆໂຣ, ຫຬາຫຬວິໂສ ສທາ;

ພຸທ຺ໂຘຕິ ວຈນໍ ສຸຕ຺ວາ, ສນ຺ຕຸຏ຺ໂຐ ທາສິ ຊີວິຕໍ.

໙.

ໂສຓ຺ຓປຸປ຺ຜຕ຺ຕຍໍຈາປິ, ມຫຄ຺ຆໍ ພຫລໍ ອທາ;

ປສ຺ສ ພຸທ຺ໂຘຕິ ວາຈາຍ, ອານຸຠາວມຫນ຺ຕຕນ຺ຕິ.

ອຖ ນາຄຣາຊາ ຕສ຺ສ ຕານິ ສຸວຓ຺ຓປຸປ຺ຜານິ ທຕ຺ວາ ເອວມາຫ. ສມ຺ມ ເອເຕສຸ ເອກໍ ຕວ ປຸຎ຺ຎຕ຺ຕາຍ ເອກໍ ມມ ປຸຎ຺ຎຕ຺ຖາຍ ປູເຊຫິ. ອິຕເຣນ ຍາວຊີວໍ ສຸເຂນ ຊີວນ຺ໂຕ ປຸຕ຺ຕທາເຣ ໂປເສນ຺ໂຕ ທານາທີສຸ ອປ຺ປມຊ຺ຊນ຺ໂຕ ຊີວິກໍ ກປ຺ເປຫິ. ມາ ຫີນກມ຺ເມ ພ຺ຍວໂຏ ໂຫຫິ, ມິຈ຺ຉາທິຏ຺ຐິຎ຺ຈ ປຊຫາຕິ ໂອວທິຕ຺ວາ ປກ຺ກາມິ. ອຫິຕຸຓ຺ຑິໂກປິ ໂສມນສ຺ສປ຺ປຕ຺ໂຕ ເຕນ ວຸຕ຺ຕນເຍເນວ ທ຺ວິຫິ ປຸປ຺ເຜຫິ ເຈຕິຍໍ ປູເຊຕ຺ວາ ເອເກນ ສ ຫ ສ຺ສໍ ລຠິຕ຺ວາ ເຕ ນ ປຸຕ຺ຕທາເຣ ໂປເສນ຺ໂຕ ກປຓທ຺ຘິກວຓິພ຺ພກາທີນໍ ທານໍ ເທນ຺ໂຕ ອຫິຕຸຓ຺ຑິກກມ຺ມໍ ປຫາຫ ກຸສລເມວ ອຸປຈິນນ຺ໂຕ ອາຍຸປຣິໂຍສາເນ ສຄ຺ຄປຣາຍໂນ ອໂຫສິ.

໑໐.

ອິຕິ ອວິທິຕສຕ຺ໂຕ ກິຎ຺ຈິ ພຸທ຺ຘານຸຠາວໍ,

ລຠຕິ ຘນວິເສສໍ ຍສ຺ສ ນາມປ຺ປກາສາ;

ວິທິຕຊນນິກາໂຍ ກິນ຺ນຸ ຕສ຺ສານຸຠາວໍ,

ນ ລປຕິ ຊິນນາມໍ ກິຈ຺ຈ ມຎ຺ຎປ຺ປຫາຍາຕິ.

ອຫິຕຸຓ຺ຑິກສ຺ສ ວຕ຺ຖຸໍ ປຎ຺ຈມໍ.

໖. ສຣຓຕ຺ເຖຣສ຺ສ ວຕ຺ຖຸມ຺ຫິ ອຍມານຸປຸພ຺ພີກຖາ

ສາວຕ຺ຖິຍໍ ກິຣ ສຸມໂນ ນາເມ ໂກ ຄຫປຕິ ອໂຫສິ. ຕສ຺ສ ຠຣິຍາ ສຸຊມ຺ປຕິກາ ນາມ. ເຕ ອຄາຣໍ ອຊ຺ຌາວສນ຺ຕາ ອປຣຠາເຄ ປຸຕ຺ຕໍຈ ຘີຕຣໍຈ ລຠິໍສຸ. ອຖ ເຕສໍ ທຫຣກາເລເຍວ ມາຕາປິຕໂຣ ກາລໍ ກໂຣນ຺ຕາ ເຊຏ຺ຐກໍປກ຺ໂກສິຕ຺ວາ ມຍໍ ປຸຕ຺ຕ ຕຸວໍ ປຕິຣູເປ ຐາເນ ນິເວສິຕຸໍ ນາສກ຺ຂິມ຺ຫ, ຍໍ ໂນ ຆເຣ ວິຠວໍ, ສພ຺ພໍ ຕໍ ຄຓ຺ຫ. ອິມາຍຈ ເຕ ກຓິຏ຺ຐິກາຍ ວຸທ຺ຘິໍຕ຺ວເມວ ຊານາຫີຕິ ວຕ຺ວາ ເຊຏ຺ຐກສ຺ສ ຫຕ຺ເຖ ກຓິຏ຺ຐິກາຍ ຫຕ຺ຖໍ ຐເປຕ຺ວາ ກາລມກໍສຸ. ອຖ ໂສ ມາຕາປິຕຸນ຺ນໍ ອຈ຺ຈເຍນ ອາຬາຫນກິຈ຺ຈໍ ກຕ຺ວາ ວສນ຺ໂຕ ກາລນ຺ຕເຣນ ກຓິຏ຺ຐິກໍ ປຕິຣູເປນ ກຸເລນ ສມ຺ພນ຺ຘິຕ຺ວາ ສຍມ຺ປິ ທາຣປຣິຄ຺ຄຫມກາສິ. ອຖາປຣຠາເຄ ຕສ຺ສ ກຓິຏ຺ຐິກາ ຄພ຺ຠິນີ ຫຸຕ຺ວາ ເອກທິວສໍ ສາມິກໍ ອາຫ, ສາມິ ມມ ຠາຕຣໍ ທຏ຺ຐຸກາມາມ຺ຫີຕິ. ໂສປິ ສາຘຸ ຠທ຺ເທຕິ ອນຸຣູເປນ ປຓ຺ຓາກາເຣນ ຕາຍ ສທ຺ຘິໍ ນິກ຺ຂມິ. ຕທາ ປນ ຠຄວາ ສຸນິວຕ຺ໂຖ ສຸປາຣຸໂຕ ຠິກ຺ຂຸສງ຺ຆປຣິວຸໂສ ປິຓ຺ຑາຍ ນຄຣໍ ປາວິສິ ຉພ຺ພຓ຺ຓຆນພຸທ຺ຘຣໍສິໂຍ ວິສ຺ສຊ຺ເຊນ຺ໂຕ, ຕ ໂຕ ເຕ ຠຄວນ຺ຕໍ ທິສ຺ວາ ປສນ຺ນຈິຕ຺ຕາ ປຎ຺ຈປຕິຏ຺ຐິເຕນ ວນ຺ທິຕ຺ວາ ອຏ຺ຐໍສຸ, ອຖ ສຕ຺ຕາ ເຕສໍ ຊຍມ຺ປຕິການໍ ອຸປນິສ຺ສຍສມ຺ປຕ຺ຕິໍທິສ຺ວາ ເຕ ສຣເຓສຸຈ ສີເລສຸຈ ປຕິຏ຺ຐາເປຕ຺ວາ ເອວມາຫ, ກທາຈິ ໂວ ທຸກ຺ເຂ ອຸປ຺ປນ຺ເນ ຕຖາຄໂຕ ອນຸສ຺ສຣິຕພ຺ໂພຕິ. ຕຖາຫິ.

໑.

ຍໍກິຎ຺ຈິ ຠຍມຸປ຺ປນ຺ນໍ, ຣາຊໂຈຣາທິສມ຺ຠວໍ;

ຕທາ ສເຣຍ຺ຍ ສມ຺ພຸທ຺ຘໍ, ນິຈ຺ຉນ຺ໂຕຕ ທຸປທ຺ທວໍ.

໒.

ຍໍ ເວ ອຸປທ຺ທວໍ ໂຫຕິ, ຍກ຺ຂເປຕາ ທິສມ຺ຠວໍ;

ຕທາ ສເຣຍ຺ຍ ສມ຺ພຸທ຺ຘໍ, ນິຈ຺ຉນ຺ໂຕ ຕທຸປທ຺ທວໍ.

໓.

ສີຫພ຺ຍຄ຺ຆຕຣຈ຺ຉາທິ, ປຸຓ຺ຑຣີກາທິສມ຺ຠວໍ;

ຕທາ ສເຣຍ຺ຍ ສມ຺ພຸທ຺ຘໍ, ນິຈ຺ຉນ຺ໂຕ ຕທຸປທ຺ທວໍ.

໔.

ຍມາຕປຄ຺ຄິ ວາຕາທິ, ອຸທກາສນິສມ຺ຠວໍ;

ຕທາ ສເຣຍ຺ຍ ສມ຺ພຸທ຺ຘໍ, ນິຈ຺ຉນ຺ໂຕ ຕທຸປທ຺ທວໍ.

໕.

ປຊ຺ຊຣາທີຫິ ໂຣເຄຫິ, ວິສໂມ ຕຸຫິສມ຺ຠວໍ;

ຕທາ ສເຣຍ຺ຍ ສມ຺ພຸທ຺ຘໍ, ນິຈ຺ຉນ຺ໂຕ ຕທຸປທ຺ທວໍ.

໖.

ມຈ຺ຈຸນາ ເຈ ຍທາ ຍຸທ຺ຘໍ, ກເຣ ເຕນາປິ ຊນ຺ຕຸນາ;

ສຣິຕພ຺ໂພ ຕທາ ພຸທ຺ໂຘ, ປຕ຺ເຖນ຺ເຕນຕ຺ຕໂນ ຊຍນ຺ຕິ.

ຕໂຕ ເຕ ຠຄວໂຕ ວຈນໍ ປຏິນນ຺ທິຕ຺ວາ ວນ຺ທິຕ຺ວາ ອຄມໍສຸ. ອຖ ເຊຏ຺ຐໂກ ອາຄເຕ ເຕ ທິສ຺ວາ ຍຖານຸຣູປໍ ສກ຺ກາຣ ມກາສິ. ຕສ຺ສາ ສາມິໂກ ກຕິປາຫໍ ຕຕ຺ຖ ວສິຕ຺ວາ ຠຣິຍໍ ເຊຏ຺ຐກສ຺ສ ປຏິປາເທຕ຺ວາ ມມ ຄາເມ ກິຈ຺ຈໍ ອຕ຺ຖີຕິ ວຕ຺ວາ ປກ຺ກາມິ. ອຖສ຺ສາ ຠາຕາ ຠຣິຍໍ ປກ຺ໂກສິຕ຺ວາ ອາຫ ຠທ຺ເທ ອິມິສ຺ສາ ສພ຺ພໍ ກຕ຺ຕພ຺ພໍ ກໂຣຫີຕິ. ສາ ຕໂຕ ປຏ຺ຐາຍ ຕສ຺ສາ ອຸທກນ຺ນ ປານາ ທິນາ ເວຍ຺ຍາວຈ຺ຈໍ ກຸຣຸມານາ ເອຕິສ຺ສາ ຫຕ຺ຖປາທຄີວູປເຄສຸ ອາຠຣເຓສຸ ໂລຠໍ ອຸປ຺ປາເທຕ຺ວາ ຕໍ ວູປສເມຕຸໍ ອສກ຺ໂກນ຺ຕີ ອາຫາຣູ ປຈ຺ເຉທໍ ກຕ຺ວາ ຄິລານາວິຍ ມຎ຺ຈກໍ ອຸປຄູຫິຕ຺ວາ ນິປຕິ. ອຖ ໂສ ເຄຫໍ ຄນ຺ຕ຺ວາ ຕໍ ຕຖາ ສຍິຕໍ ທິສ຺ວາ ມຎ຺ຈເກ ນິສິນ຺ໂນ ກິໍ ຠທ຺ເທ ອຜາສຸກນ຺ຕິ ປຸຈ຺ຉິ, ສາ ຕຸຓ຺ຫີ ຫຸຕ຺ວາ ກຕິປຍວາເຣ ປຸຈ຺ຉິຕາ ນ ສກ຺ກາ ກເຖຕຸນ຺ຕິ ອາຫ. ປຸນ ສາມິເກນ ຄາຬ຺ຫໍ ນິພນ຺ຘິເຕ ສາ ຈິນ຺ເຕສິ, ອຸຊຸກໍ ມຍາ ຕສ຺ສາ ປິຬນ຺ຘນໍ ປຕ຺ເຖມີຕິ ວຸຕ຺ເຕ ນ ປ຺ປຕິຣຸປໍ, ຕສ຺ສາ ປຎ຺ຈມຘຸຣ ມໍສໍ ປຕ຺ເຖມີຕິ ວຸຕ຺ເຕ ຕໍ ມາເຣສ຺ສຕິ, ຕທາ ປິຬນ຺ຘນານິ ມຍ຺ຫເມວາຕິ, ຕໂຕ ສາມິ ຕວ ກຓິຏ຺ຐິກາຍ ປຎ຺ຈມຘຸຣມໍສໍ ປຕ຺ເຖມິ, ອລຠມານາຍ ເມ ຊີວິຕໍ ນຕ຺ຖີຕິ ອາຫ, ຕໍ ສຸຕ຺ວາ ໂສ ອເນກປຣິຍາເຍນ ມນຸສ຺ສມາຣຓໍ ນາມ ຠາຣິຍນ຺ຕິ ວຕ຺ວາ ນິວາເຣນ຺ໂຕປິ ນິວາເຣຕຸໍ ນາສກ຺ຂິ, ອຖ ຕາຍ ປຏິພທ຺ຘຈິຕ຺ໂຕ ກາມມຸຈ຺ຉິໂຕ ໂມຫມູຬ຺ໂຫ ຫຸຕ຺ວາ ສາຘຸ ລຠິສ຺ສສີຕິ ຕສ຺ສາ ວຈນໍ ສມ຺ປຏິຈ຺ຉິ. ຕຖາຫິ.

໗.

ຫາຍນ຺ຕິ ອິຘໂລກຕ຺ຖາ, ຫາຍນ຺ຕິ ປາຣໂລກິກາ;

ຫາຍນ຺ຕິ ມຫຕາ ອຕ຺ຖາ, ເຍ ອິຕ຺ຖີນໍ ວສງ຺ຄຕາ.

໘.

ເອສາ ມາຕາ ປິຕາ ເອໂສ, ຠຄິນີ ຠາຕໂຣ ອິເມ;

ຄຣຸຕພ຺ເພ ນ ຊານນ຺ຕິ, ເຍ ອິຕ຺ຖີນໍ ວສງ຺ຄຕາ.

໙.

ກາຣຓາກາຣຓນ຺ເຕຕໍ, ກຕ຺ຕພ຺ພໍວາ ນ ວາ ອິທໍ;

ກາມນ຺ຘຕ຺ຕາ ນ ຊານນ຺ຕິ, ເຍ ອິຕ຺ຖີນໍ ວສງ຺ຄຕາ.

໑໐.

ປາຓໍ ວາ ອຕິປາເຕນ຺ຕິ, ໂຫນ຺ຕິ ວາ ປາຣທາຣິກາ;

ຠາສນ຺ຕິ ອລິກໍ ວາຈໍ, ເຍ ອິຕ຺ຖີນໍ ວສງ຺ຄຕາ.

໑໑.

ສນ຺ຘິຈ຺ເຉທາທິກໍ ເຖຍ຺ຍໍ, ມຊ຺ຊປານໍຈ ເປສຸນໍ;

ກໂຣນ຺ຕິ ສາຫສໍ ສພ຺ພໍ, ເຍ ອິຕ຺ຖີນໍ ວສງ຺ຄຕາ.

໑໒.

ອໂຫ ອຈ຺ຉຣິຍໍ ໂລເກ, ສຣນ຺ຕານໍ ຠຍາ ວຫໍ;

ຠຣິຍາຍ ວສໍ ຄນ຺ຕ຺ວາ, ໂສທຣິໍຫນ຺ຕຸມິຈ຺ຉຕີຕິ.

ອຖ ໂສ ສາຫສິໂກ ປຸຣິໂສ ຠຄິນິ ເອວ ມາຫ, ເອຫິ ອມ຺ມ ອມ຺ຫາກໍ ມາຕາປິຕຸນ຺ນໍ ອິຓໍ ສາເຘສ຺ສາມ, ອປ຺ເປວນາມ ໂນ ທິສ຺ວາ ອິຓາຍິກາ ອິຓໍ ທສ຺ສນ຺ຕີຕິ, ຕໍ ສຸຕ຺ວາ ຕາຍ ສມ຺ປຏິຈ຺ຉິເຕ ສຸຂຍານເກ ນິສີທາເປຕ຺ວາ ອິຓາຍິການໍ ຄາມໍ ຄຈ຺ຉນ຺ໂຕ ວິຍ ມຫາອຏວິໍປຕ຺ວາ ຍານໍ ມຄ຺ຄາ ໂອກ຺ກມ຺ມ ຐເປຕ຺ວາ ວິຣວນ຺ຕິເມວ ນໍ ຫຕ຺ເຖ ຄເຫຕ຺ວາ ຉິນ຺ທິສ຺ສາມີຕິ ຈິນ຺ເຕຕ຺ວາ ເກເສ ຄເຫຕ຺ວາ ຠູມິຍໍ ປາເຕສິ, ຕສ຺ມິໍ ຂເຓ ຕສ຺ສາ ກມ຺ມຊວາຕາ ຈລິໍສຸ. ສາ ຠາຕຸລຊ຺ຊາຍ ສາມິ ກມ຺ມຊວາຕາ ເມ ຈລິໍສຸ, ຍາ ວາ ຫໍ ວິຊາຍາມິ, ຕາວ ອຸປຘາເຣຫີຕິ ວທນ຺ຕີປິ ອປເນຕຸໍ ອສກ຺ໂກນ຺ຕີ ປຸຕ຺ຕໍ ວິຊາຍິ, ອຖ ໂສ ຕໍ ສມີເປ ວຏຣຸກ຺ຂມູເລ ມາເຣສ຺ສາມີຕິ ຈິກຸເຣ ຄເຫຕ຺ວາ ອາກຑ຺ຒິ, ຕສ຺ມິໍ ກາເລ ສາ ສາມິ ຕວ ຠາຄິເນຍ຺ຍສ຺ສ ມຸຂໍ ໂອໂລເກຕ຺ວາ ຕສ຺ສ ສິເນເຫນາປິ ມໍ ນ ມາເຣຫີຕິ ວທນ຺ຕີ ຍາຈິ, ອຖ ໂສ ກກ຺ຂໂຬ ຕສ຺ສາ ຕໍ ກາຣຸຓິກວຈນໍ ອສຸຓນ຺ໂຕ ວິຍ ມາເຣຕຸໍ ອຸສ຺ສຫເຕວ, ຕໂຕ ສາ ກຸມາຣິກາ ອຕ຺ຕໂນ ອສຣຓາ ຈິນ຺ເຕສິ, ມມ ສທ຺ເທນາ ຄນ຺ຕ຺ວາ ໂຍ ໂກຈິ ມມ ຠາຕຸ ອນຍໍ ກເຣຍ຺ຍ, ຕໍ ນ ປ຺ປຕິຣູປນ຺ຕິ ຠາຕຸສິເນເຫນ ນິສ຺ສທ຺ທາ ອຕ຺ຕນາ ຄຕິຕສຣຓໍ ອາວຊ຺ຊມານາ ນິປຊ຺ຊິ, ອຖສ຺ສາ ຠາ ຕ ຣິ ເມຕ຺ຕານຸຠາເວນຈ ອນຸສ຺ສຣິຕສຣຓານຸຠາເວນຈ ຕສ຺ມິໍ ນິຄ຺ໂຣເຘ ອຘິວຕ຺ຖາ ເທວຕາ ເອວຣູໂປ ມາຕຸຄາໂມ ເອຕ຺ຖ ມາຣິຕາ ອຠວິສ຺ສາ, ອທ຺ຘາຫໍ ເທວສມາຄມໍ ປວິສິຕຸໍ ນ ລຠິສ຺ສາມີຕິ ຈິນ຺ເຕຕ຺ວາ ເອຕິສ຺ສາ ສາ ມິ ໂກ ວິຍ ຕໍ ຕ ຊ຺ເຊ ຕ຺ວາ ປລາເປຕ຺ວາ ຕ຺ວໍ ມາ ຠາຍີຕິ ສມສ຺ສາເສຕ຺ວາ ຍາ ນ ເກ ສ ປຸ ຕ຺ຕໍ ກຸມາຣິໍ ນິສີທາເປຕ຺ວາ ຕໍ ທິວສເມວ ສາວຕ຺ຖິມາຄມ຺ມ ອນ຺ໂຕນຄເຣ ສາ ລາ ຍ ນໍ ນິປຊ຺ຊາເປຕ຺ວາ ອນ຺ຕຣຘາຍິ. ຕຖາຫິ.

໑໓.

ສພ຺ພສມ຺ປຕ຺ຕິທາຕາຣໍ, ສພ຺ພໂລເກກນາຍກໍ;

ມນສາປິ ໂຍ ວິຠາເວຕິ, ຕໍ ເວ ປາເລນ຺ຕິ ເທວຕາ.

໑໔.

ມຸຫຸຕ຺ຕມ຺ປິຈ ໂຍ ເມຕ຺ຕໍ, ຠາເວຕິ ຍທິ ສາຘຸກໍ;

ຕໍ ເວ ປາເລນ຺ຕິ ເທວາປິ, ໂຕສຍນ຺ຕິ ອຸປາຍນາຕິ.

ຕໂຕ ຕສ຺ສາ ປນ ສາມິໂກ ນຄຣາ ນິກ຺ຂມ຺ມ ຄຈ຺ຉນ຺ໂຕ ອຕ຺ຕໂນ ຠຣິຍໍ ທິສ຺ວາ ຕ຺ວໍ ກທາ ອາຄຕາ, ເກນານີຕາສີຕິ ປຸຈ຺ຉິ. ສາ ເທວຕາຍ ອານີຕຠາວໍ ອຊານນ຺ຕີ ກິໍ ຕ຺ວໍ ຠຓສິ, ນນຸ ຕຍາ ອານີຕາມ຺ຫີຕິ, ໂສປິ ກິໍໂຠຕິ ຠຓສິ, ຕວ ຠາຕຸຄາເມ ທິຏ຺ຐກາລໂຕ ປ຺ປຕຸຕິ ອຊ຺ຊ ຈຕ຺ຕາໂຣ ມາສາ ຊາຕາ, ເອຕ຺ຕກໍ ກາລໍ ຕ຺ວໍ ນ ທິຏ຺ຐປຸພ຺ພາ, ກຖໍ ຕ຺ວໍ ມຍາ ສທ຺ຘິໍອາຄຕາຕິ ປຸຈ຺ຉິ. ສາ ຕໍ ສຸຕ຺ວາ ເຕນຫິ ມາຎ຺ຎສ຺ສ ອິມໍ ຣຫສ຺ສໍ ກເຖຫິ ສາມີຕິ ວຕ຺ວາ ຠາ ຕ ຣາ ອຕ຺ຕໂນ ກຕໍ ສພ຺ພໍ ວິຕ຺ຖາເຣນ ກເຖສິ. ຕໍ ສຸຕ຺ວາ ຕສ຺ສ ສາມິໂກ ສໍວິຄ຺ໂຄ ຠຍປ຺ປຕ຺ໂຕ ຫຸຕ຺ວາ ຕໍ ອຕ຺ຕໂນ ເຄຫໍ ປາເປສິ, ຕໂຕ ກຕິປາຫໍ ຕາຍ ວິສ຺ສມິເຕ ເຕ ອຸໂຠປິ ສຕ຺ຖາຣໍ ນິມນ຺ເຕຕ຺ວາ ມຫາທານໍ ທຕ຺ວາ ວນ຺ທິຕ຺ວາ ເອກມນ຺ເຕ ນິສີທິໍສຸ, ອຖ ສາ ຠຄວໂຕ ສຣຓສີລານຸຠາເວນ ອຕ຺ຕໂນ ຊີວິຕປຏິລາຠໍ ປກາເສຕ຺ວາ ອຕ຺ຕໂນ ປຸຕ຺ຕໍ ຠຄວນ຺ຕໍ ວນ຺ທາເປຕ຺ວາ ສຣໂຓຕິນາມມກໍສຸ, ສຕ຺ຖາ ເຕ ສໍ ອຊ຺ຌາສຍໍ ຎຕ຺ວາ ຕທນຸຣູປໍ ຘມ຺ມໍ ເທເສສິ, ເທສນາວສາເນ ອຸໂຠປິ ໂສຕາປນ຺ນາ ອເຫສຸໍ, ອຖສ຺ສາ ປຸຕ຺ໂຕ ສຣຓກຸມາໂຣ ວີສຕິເມ ວສ຺ເສ ພຸທ຺ຘສາສເນ ປພ຺ພຊິຕ຺ວາ ວິປສ຺ສນໍ ວຑ຺ເຒຕ຺ວາ ອຣຫຕ຺ຕໍ ປຕ຺ໂຕ ສຣຓຕ຺ເຖໂຣນາມ ປຎ຺ຎາຍີຕິ.

໑໕.

ຂຓມປິ ມນເສວໍ ເທວເທວໍ ສຣນ຺ຕາ,

ປຣມຕຣປຕິຏ຺ຐໍ ປາປຸຓນ຺ຕີຕິ ມນ຺ຕ຺ວາ;

ຠວຄຕິ ຄຸຓຣາສິໍ ຊານມານາ ຊນາ ໂຠ;

ຠຊຖ ສຣຓສີລໍ ສພ຺ພຖາ ສພ຺ພກາລນ຺ຕິ.

ສຣຓຕ຺ເຖຣສ຺ສ ວຕ຺ຖຸໍ ຉຏ຺ຐມໍ.

໗. ເວສ຺ສາມິຕ຺ຕາຍ ວຕ຺ຖຸມ຺ຫິ ອຍມານຸປຸພ຺ພີກຖາ

ຊມ຺ພຸທີເປ ກິຣ ໂກສມ຺ພິນຄເຣ ໂກສມ຺ພິຣຎ຺ໂຎ ເວສ຺ສາມິຕ຺ຕານາມ ອຄ຺ຄມເຫສີ ອໂຫສິ. ຕທາ ຠຄວາ ໂກສມ຺ພິຍໍ ປຏິວສຕິ ມຫຕາ ຠິກ຺ຂຸສງ຺ເຆນ ສທ຺ຘິໍ ຈາຣິກໍ ຈຣມາໂນ. ຕສ຺ມິໍ ສມເຍ ສາ ຣຎ຺ຎາ ສທ຺ຘິໍ ວິຫາຣໍ ຄນ຺ຕ຺ວາ ອໂນປມາຍ ພຸທ຺ຘລີຬາຍ ມຘຸເຣນ ສເຣນ ເທເສນ຺ຕສ຺ສ ຠຄວໂຕ ຘມ຺ມໍ ສຸຕ຺ວາ ປສນ຺ນາ ສຣເຓສຸ ປຕິຏ຺ຐາຍ ພຸທ຺ຘມາມິກາ ຫຸຕ຺ວາ ວິຫຣຕິ. ອຖາ ປຣຠາເຄ ຕສ຺ສ ຣຎ຺ໂຎ ຣຊ຺ຊຕ຺ຖາຍ ປຈ຺ຈນ຺ຕຣາຊາ ຍຸທ຺ຘສຊ຺ໂຊ ຣຊ຺ຊໍ ວາ ເທຕຸ, ຍຸທ຺ຘໍວາຕິ ປຓ຺ຓໍ ປຫິຓິ. ຕໍ ສຸຕ຺ວາ ຣາຊາ ມຫຕິຍາ ເສນາຍ ປຣິວຸໂຕ ຍຸທ຺ຘຠູມິໍ ຄຈ຺ຉນ຺ໂຕ ມເຫສິຍາ ສທ຺ຘິໍ ຄນ຺ຕ຺ວາ ຂນ຺ຘາວາຣໍ ນິວາເສຕ຺ວາ ຕສ຺ສາ ເອວມາຫ. ຠທ຺ເທ ສງ຺ຄາມສີເສ ຊຍປຣາຊໂຍ ນາມ ນ ສກ຺ກາ ວິຎ຺ຎາຕຸໍ. ສເຈ ເມ ປຣາຊໂຍ ອຠວິສ຺ສ, ປຸເຣຕຣເມວ ຣຕ຺ຕປຕາກໍ ອຸສ຺ສາເປສ຺ສາມິ, ເຕນ ອຠິຎ຺ຎາເຓນ ຕ຺ວໍ ໂກສມ຺ພິເມວ ຄຈ຺ຉາຫີຕິ ອນຸສາສິຕ຺ວາ ສງ຺ຄາມ ມຓ຺ຑລໍ ຄນ຺ຕ຺ວາ ມຫາຣຓໍ ກໂຣນ຺ໂຕ ອຕ຺ຕໂນ ປຣາຊຍຠາວໍ ຎຕ຺ວາ ມາຕຸຄາມໍ ສຣິຕ຺ວາ ຣຕ຺ຕທ຺ຘຊໍ ອຸສ຺ສາເປຕ຺ວາ ຍຸຊ຺ຌນ຺ໂຕ ຣເຓ ປຕິ. ອຖ ສາ ຣຕ຺ຕປຕາກໍ ທິສ຺ວາ ປຣາຊິໂຕ ນູນ ເມ ສາມິໂກຕິ ຠເຍນ ປລາຍິຕຸມາຣຠິ. ອຖ ຕໍ ໂຈຣຣຎ຺ໂຎ ມນຸສ຺ສາ ທິສ຺ວາ ນູນາຍໍ ຣຎ຺ໂຎ ອຄ຺ຄມເຫສີຕິ ຎຕ຺ວາ ອຕ຺ຕໂນ ຣາຊານໍ ທສ຺ເສສຸໍ, ຣາຊາ ຕໍ ທິສ຺ວາ ປຏິພທ຺ຘຈິຕ຺ໂຕ ມເມຕໍ ອຠິເສກໍ ກໂຣຖາຕິ ອມຈ຺ເຈ ອາຓາເປສິ. ອມຈ຺ຈາ ຕໍ ອຠິເສກຕ຺ຖາຍ ຍາຈິໍສຸ, ສາ ນ ເມ ຠເຓ ອຠິເສເກນຕ຺ໂຖຕິ ນ ອິຈ຺ຉິ. ອມຈ຺ຈາ ຕມຕ຺ຖໍ ຣຎ຺ໂຎ ອາໂຣເຈສຸໍ. ຣາຊາ ນໍ ປກ຺ໂກສາເປຕ຺ວາ ກສ຺ມາ ນ ອິຈ຺ຉສີຕິ ປຸຈ຺ຉິ. ສາ ເອວມາຫ.

໑.

ສຸໂຓຫິ ສາຘຸກໍ ເທວ, ຠາສມານາຍ ເມ ວໂຈ;

ຠຕ຺ຕາ ມຍ຺ຫໍ ມໂຕ ອຊ຺ຊ, ສພ຺ພສມ຺ປຕ຺ຕິທາຍໂກ.

໒.

ກຕ຺ວານ ໂສຠິເສກໍ ມໍ, ອຕ຺ຕໂນ ຫທຍໍ ວິຍ;

ປາເລຕິ ຕໍ ສຣນ຺ຕສ຺ສາ, ໂສກຄ຺ຄິ ທຫເຕ ມນໍ.

໓.

ມຫາຣາຊ ສຈຎ຺ຎສ຺ສ, ອສ຺ສ ມຄ຺ຄມເຫສິກາ;

ຕມ຺ຫາ ທຸກ຺ຂາ ນ ມຸຈ຺ຈາມິ, ເຕນາຫໍ ຕໍ ນ ປຕ຺ຖເຍ.

໔.

ໂສກຄ຺ຄິນາ ປທິຕ຺ຕາຫໍ, ໂສເກ ໂສກໍ ກຖໍ ຂິເປ;

ຊລນ຺ຕຄ຺ຄິມ຺ຫີ ໂກ ນາມ, ປລາລໍ ປກ຺ຂິເປ ພຸໂຘ.

໕.

ປິຍວິປ຺ປໂຍຄທຸກ຺ຂໍ, ຕໍ ຈິນ຺ຕຍນ຺ຕີ ປຸນປ຺ປຸນໍ;

ຕມ຺ຫາ ທຸກ຺ຂາ ນ ມຸຈ຺ຈາມິ, ຕສ຺ມາຫໍ ຕໍ ນ ປຕ຺ຖເຍຕິ.

ຕໍ ສຸຕ຺ວາ ຣາຊາ ໂກເຘນາຠິຠູໂຕ ສເຈ ນາຠິສິຎ຺ຈິສ຺ສສິ, ອຄ຺ຄິມ຺ຫິ ຕໍ ປກ຺ຂິປິສ຺ສາມີຕິ ວຕ຺ວາ ມຫນ຺ຕໍ ທາຣຸຈິຕກໍ ກາຣາເປຕ຺ວາ ອຄ຺ຄິໍ ທຕ຺ວາ ເອກປຊ຺ໂຊເຕ ຊາເຕ ເອຕ຺ຕ ປວິສາຕິ ອາຫ. ອຖ ສາ ຍາຈນ຺ຕີ ຣາຊານໍ ອາຫ.

໖.

ປາໂປ ນິປ຺ປາປິນໍ ຣາຊ, ປາຕນໍ ຂລຸ ປາວເກ;

ໂຫຕິ ປາປຜລໍ ຕສ຺ສ, ປຈ຺ຈຕ຺ເຕຈ ປຣຕ຺ຖຈ.

໗.

ປຸຣາຕເນຫິ ຠູປາລ, ສມຓພ຺ຣຫ຺ມເຓສຸຈ;

ມາຕາປິຕຸສຸ ພາເລສຸ, ໂຣເຄນາ ຕຸຣອິຕ຺ຖິສຸ;

ນປ຺ປສຕ຺ໂຖ ວໂຘ ເທວ, ຕສ຺ມາຫໍ ນ ວຘາຣຫາຕິ.

ຕໍ ສຸຕ຺ວາປິ ຣາຊາ ອສທ຺ທຫນ຺ໂຕ ມນຸສ຺ເສ ອາຓາເປສິ. ເອຕາຍ ຫຕ຺ຖປາເທ ຄເຫຕ຺ວາ ອຄ຺ຄິມ຺ຫິ ປກ຺ຂິປຖາຕິ ເຕ ຕຖາ ກຣິໍສຸ, ອຖ ສາ ອຄ຺ຄິມ຺ຫິ ປກ຺ຂິປມານາ ນຕ຺ເຖຕ຺ຖ ເມ ໂກຈິ ປຏິສຣໂຓຕິ ສຣຓເມວ ສຣຓໍ ກໂຣມີຕິ ຈິນ຺ເຕຕ຺ວາ ‘‘ພຸທ຺ຘໍ ສຣຓໍ ຄຈ຺ຉາມິ, ຘມ຺ມໍ ສຣຓໍ ຄຈ຺ຉາມິ, ສງ຺ຆໍ ສຣຓໍ ຄຈ຺ຉາມີຕິ’’ ວທນ຺ຕີ ມນສາຈ ອນຸສ຺ສຣນ຺ຕີ ອຄ຺ຄິມ຺ຫິ ປຕິ, ຕຖາວິໂຘປິ ອຄ຺ຄິ ຕສ຺ສາ ສຣີເຣ ໂລມກູປມຕ຺ຕມ຺ປິ ອຸຓ຺ຫາກາຣໍ ກາຕຸໍ ນາສກ຺ຂິ. ປທຸມຄພ຺ຠໍ ປວິຏ຺ຐາ ວິຍ ສີຕິຠູຕສຣີຣາ ອໂຫສິ. ຣາຊາ ຕໍ ອຈ຺ຉຣິຍໍ ທິສ຺ວາ ສໍວິຄ຺ໂຄ ໂລມຫຏ຺ຐຊາໂຕ ເວເຄນ ຕໍ ອຸປສງ຺ກມິຕ຺ວາ ອຸໂຠຫິ ຫຕ຺ເຖຫິ ປຄ຺ຄຍ຺ຫ ອຸເຣ ນິປຊ຺ຊາເປຕ຺ວາ ຣາຊາສເນ ນິສີທາເປຕ຺ວາ ອຎ຺ຊລິໍ ຄຄ຺ຄຍ຺ຫ ຐິໂຕ ກສ຺ມາ ເຕ ຕໍ ອຄ຺ຄິ ສຣີຣໍ ມາ ປຣິທຫີຕິ ປຸຈ຺ຉິ. ສາ ຕໍ ກາຣຓໍ ກເຖນ຺ຕີ ເອວ ມາຫ.

໘.

ມາຕາ ປິຕາຈ ຎາຕີຈ, ປຣິວາຣາຈ ໂສຫທາ;

ມນ຺ໂຕ ສຘາທໂຍຈາປິ, ມເຫສກ຺ຂາຈ ເທວຕາ.

໙.

ເອເຕຈ ຎ຺ເຎຈ ຠູປາລ, ສຕ຺ຕານໍ ຠຍ ມາຄເຕ;

ຣກ຺ຂິຕຸໍ ເນວ ສກ຺ໂກນ຺ຕິ, ຫິຕ຺ວານ ສຣຓຕ຺ຕຍໍ.

໑໐.

ອຄາຫໍ ພຸທ຺ຘໍ ສຣຓໍ, ພຸທ຺ໂຘ ເມ ສຣຓໍ ອິຕິ;

ເຕນ ເຕເຊນ ມໍ ຣາຊ, ຊລນ຺ໂຕ ອຄ຺ຄິ ໂນ ທຫິ.

໑໑.

ອຄາຫໍ ຘມ຺ມໍ ສຣຓໍ, ຘມ຺ໂມ ເມ ສຣຓໍ ອິຕິ;

ເຕນ ເຕເຊນ ມໍ ຣາຊ, ຊລນ຺ໂຕ ອຄ຺ຄິ ໂນ ທຫິ.

໑໒.

ອຄາຫໍ ສງ຺ຆໍ ສຣຓໍ, ສງ຺ໂຆ ເມ ສຣຓໍ ອິຕິ;

ເຕນ ເຕເຊນ ມໍ ຣາຊ, ຊລນ຺ໂຕ ອຄ຺ຄິ ໂນ ທຫິ.

໑໓.

ເອວໍ ມຫານຸຠາວນ຺ຕໍ, ປຈ຺ຈກ຺ຂໍ ເອຫິປສ຺ສິກໍ;

ນາໂນ ປທ຺ທວ ວິທ຺ຘໍສິໍ, ນານາສມ຺ປຕ຺ຕິທາຍກໍ.

໑໔.

ສຣຓຕ຺ຕຍຎ຺ຫິ ໂຍ ສຕ຺ໂຕ, ນ ສມາທາຍ ຄຓ຺ຫຕິ;

ອິຘວາ ປຣຕ຺ຖວາ ໂລເກ, ໂສ ສຸຂໍ ນານຸໂຠສ຺ສຕິ.

໑໕.

ສຣຓຕ຺ຕຍຎ຺ຫິ ໂຍ ສຕ຺ໂຕ, ສຸສມາທາຍ ຄຓ຺ຫຕິ;

ອິຘວາປຣຕ຺ຖວາ ໂລເກ, ໂສ ສຸຂາ ນ ວິຫາຍຕິ.

໑໖.

ຕສ຺ມາ ຕຸວມ຺ປິ ຠູປາລ, ຄຓ຺ຫາຫິ ສຣຓຕ຺ຕຍໍ;

ຕໍ ເຕ ຠວຕິ ສພ຺ພຕ຺ຖ, ຕາຓໍ ເລຓໍ ປຣາຍຓນ຺ຕິ.

ຕໍ ສຸຕ຺ວາ ຣາຊາ ອຕິວິຍ ປສນ຺ນມານໂສ ຕໍ ຂມາເປຕ຺ວາ ມຫນ຺ຕໍ ສກ຺ກາຣສມ຺ມານໍ ກຕ຺ວາ ອຊ຺ຊປ຺ປຏ຺ຐາຍ ຕ຺ວໍ ມມ ມາຕາຕິ ຕໍ ມາຕຸຏ຺ຐາເນ ຐເປຕ຺ວາ ສຣຓ ມຄມາສິ. ຕສ຺ມິໍ ສນ຺ນິປຕິຕ຺ວາ ຐິຕມຫາຊນາ ຕໍ ປາຏິຫາຣິຍໍ ທິສ຺ວາ ສຣເຓສຸຈ ສີເລສຸຈ ປຕິຏ຺ຐາຍ ທານາທີນິ ປຸຎ຺ຎກມ຺ມານິ ກຕ຺ວາ ຍຖາກມ຺ມໍ ຄຕາຕິ.

໑໗.

ອິຕິ ສຣຓວຣໍ ສາ ເກວລໍ ອຸຄ຺ຄເຫຕ຺ວາ,

ຊລິຕທຫນມຊ຺ເຌ ສີຕິຠາວໍ ອລຕ຺ຖ;

ປຣມສຣຓສີລໍ ປາລຍນ຺ຕາ ກຖໍ ໂວ,

ນ ລຠຖ ຠວໂຠຄໍ ນິພ຺ພຸຕິຎ຺ຈາປິ ອນ຺ເຕຕິ.

ເວສ຺ສາມິຕ຺ຕາປ ວຕ຺ຖຸໍ ສຕ຺ຕມໍ.

໘. ມຫາມນ຺ຘາຕຸວຕ຺ຖຸມ຺ຫິ ອຍມານຸປຸພ຺ພີກຖາ

ອິໂຕ ກິຣ ເອກນວຸຕິກປ຺ປມຕ຺ຖເກ ວິປສ຺ສີນາມ ສມ຺ມາສມ຺ພຸທ຺ໂຘ ໂລເກ ອຸປ຺ປຊ຺ຊິຕ຺ວາ ປວຕ຺ຕວຣຘມ຺ມຈກ຺ໂກ ສເທວເກຫິ ໂລເກຫິ ປູຊິຍມາໂນ ພນ຺ຘຸມຕີນຄເຣ ປຏິວສຕິ. ຕທາ ໂສ ມນ຺ຘາຕາ ຕສ຺ມິໍ ນຄເຣ ຕຸນ຺ນກາໂຣ ຫຸຕ຺ວາ ນິພ຺ພຕ຺ຕິ. ຕຸນ຺ນກາຣກມ຺ເມນ ຊີວິກໍ ກປ຺ເປນ຺ໂຕ ວິຫຣຕິ. ຕທາ ສກລນຄຣວາສິໂນ ພຸທ຺ຘປມຸຂໍ ຠິກ຺ຂຸສງ຺ຆໍ ນິມນ຺ເຕຕ຺ວາ ມຫາທານ ມທໍສຸ. ອຖ ໂສ ເອວໍ ຈິນ຺ເຕສິ, ສພ຺ເພປິເມ ນຄຣວາສິໂນ ທານໍ ທທນ຺ຕິ. ອຫເມໂກວ ເສໂສ ທຸຄ຺ຄຕຕ຺ຕາ, ຍຊ຺ຊາຫມຊ຺ຊ ພີຊໍ ນ ໂຣເປມິ, ອິມມ຺ຫາ ທຸກ຺ຂາ ນ ປຣິມຸຈ຺ຈິສ຺ສາມີຕິ. ໂສ ເວເຄນ ຕຸນ຺ນກາຣກມ຺ມໍ ປຣິເຍສິຕ຺ວາ ກິຎ຺ຈິມູລໍ ລຠິຕ຺ວາ ເຕນ ເອກສ຺ສາປິ ທານໍ ທາຕຸໍ ໂອກາສ ມລທ຺ຘາ ອາປຓໍ ຄນ຺ຕ຺ວາ ຣາຊມາສເກ ຄເຫຕ຺ວາ ຈງ຺ໂກຏກໍ ປູເຣຕ຺ວາ ອາທາຍ ພຸທ຺ຘປມຸຂສ຺ສ ຠິກ຺ຂຸສງ຺ຆສ຺ສ ຠຕ຺ຕຄ຺ຄໍ ຄນ຺ຕ຺ວາ ຐິໂຕ ເອວໍ ຈິນ຺ເຕສິ, ນຕ຺ຖິ ທານິ ໂອກາສໍ ເອກສ຺ສາປິ ຠິກ຺ຂຸໂນ ປຕ຺ເຕ ໂອກິຣິຕຸໍ, ອທ຺ຘາຫໍ ອິເມ ອາກາເສ ວິກິຣິສ຺ສາມີຕິ ອປ຺ເປວນາມ ປຕມານານໍ ເອກສ຺ສາປິ ຠິກ຺ຂຸໂນ ປຕ຺ເຕ ເອກມ຺ປິ ປເຕຍ຺ຍ, ຕໍ ເມ ຠວິສ຺ສຕິ ທີຆຣຕ຺ຕໍ ຫິຠາຍ ສຸຂາຍາຕິ ປສນ຺ນມານໂສ ອຸທ຺ຘໍ ຂິປິ, ຕ ໂຕ ປຕມານາ ເຕ ປຣິວາຣິກເທວຕານຎ຺ຈ ຠຄວໂຕ ອານຸຠາເວນຈ ພຫິ ອປຕິຕ຺ວາ ຠຄວນ຺ຕມາທິໍ ກຕ຺ວາ ສພ຺ເພສໍ ຠິກ຺ຂູນໍ ປຕ຺ເຕເຍວ ປຕິໍສຸ. ອຖ ໂສ ຕໍ ອຈ຺ຉຣິຍໍ ທິສ຺ວາ ປສນ຺ນມານໂສ ສິຣສິ ອຎ຺ຊລິໍ ປຄ຺ຄຍ຺ຫ ຐິໂຕ ເອວໍ ປຕ຺ຖນມກາສິ.

໑.

ອິມິນາ ເມ ອຘິກາເຣນ, ປສາເທນ ຍຕິສ຺ສເຣ;

ກາມໂຠຄີນຫໍ ອຄ຺ໂຄ, ຠເວຍ຺ຍໍ ຊາຕິຊາຕິຍໍ.

໒.

ປຫຣິຕ຺ວາ ຍທາ ປາຓິໍ, ໂອໂລເກມິ ນໂຠຕລໍ;

ສຕ຺ຕຣຕນສມ຺ປນ຺ນໍ, ວສ຺ສໍ ວສ຺ສຕຸ ສພ຺ພທາຕິ.

ໂສ ຕໂຕ ປຏ຺ຐາຍ ເທວມນຸສ຺ເສສຸ ສໍສຣນ຺ໂຕ ມຫນ຺ຕໍ ທິພ຺ພສມ຺ປຕ຺ຕິໍ ອນຸຠວິຕ຺ວາ ອິມສ຺ມິໍ ຠທ຺ທກປ຺ເປ ອາທິມ຺ຫິ ມຫາສມ຺ມໂຕ ນາມ ຣາຊາ ອໂຫສິ. ຕສ຺ສ ປຸຕ຺ໂຕ ໂຣໂຊ ນາມ. ຕສ຺ສ ປຸຕ຺ໂຕ ວຣໂຣໂຊ ນາມ, ຕສ຺ສ ປຸຕ຺ໂຕ ກລ຺ຍາໂຓ ນາມ, ຕສ຺ສ ປຸຕ຺ໂຕ ວຣກລ຺ຍາໂຓ ນາມ. ວຣກລ຺ຍາຓສ຺ສ ປຸຕ຺ໂຕ ອຸໂປສໂຖ ນາມ. ອຸໂປສຖສ຺ສ ປຸຕ຺ໂຕ ມນ຺ຘາຕາ ນາມ ຫຸຕ຺ວາ ນິພ຺ພຕ຺ຕິ. ໂສ ສຕ຺ຕຫິ ຣຕເນຫິ ຈຕູຫິ ຈ ອິທ຺ຘີຫິ ສມນ຺ນາຄໂຕ ຈກ຺ກວຕ຺ຕິຣຊ຺ຊໍ ກາເຣສິ, ຕສ຺ສ ວາມຫຕ຺ຖໍ ສມ຺ມິຎ຺ຊິຕ຺ວາ ທກ຺ຂິຓຫຕ຺ເຖນ ອປ຺ໂປຏ຺ຐິເຕ ອາກາສໂຕ ທິພ຺ພເມຆາ ວິຍ ຊຓ຺ຓຸປ຺ປມາຓໍ ສຕ຺ຕຣຕນວສ຺ສໍ ວສ຺ສຕິ. ເອວຣູໂປ ອຈ຺ຉຣິໂຍ ອໂຫສິ. ໂສ ຈຕຸຣາສີຕິວສ຺ສສຫສ຺ສານິ ກຸມາຣກີຬໍ ກີຬິ. ຈຕຸຣາສີຕິວສ຺ສສຫສ຺ສານິ ໂອປຣຊ຺ຊໍ ກາເຣສິ. ຈຕຸຣາສີຕິວສ຺ສສຫສ຺ສານິ ຈກ຺ກວຕ຺ຕິຣຊ຺ຊໍ ກາເຣສິ, ອາຍຸ ປນສ຺ສ ອສງ຺ຂ຺ເຍຍ຺ຍໍ ອໂຫສິ. ໂສ ເອກທິວສໍ ກາມຕຓ຺ຫໍ ປູເຣຕຸໍ ອສກ຺ໂກນ຺ໂຕ ອຸກ຺ກຓ຺ຐິຕາກາຣໍ ທສ຺ເສສິ, ອມຈ຺ຈາ ເທວ ກິນ຺ນໂຂ ອຸກ຺ກຓ຺ຐາ ສີຕິ ປຸຈ຺ຉິໍສຸ. ໂສ ຠເຓ ມຍ຺ຫໍ ປຸຎ຺ຎກມ຺ເມ ໂອໂລກິຍມາເນ ອິມໍ ຣຊ຺ຊໍ ນປ຺ປໂຫຕິ, ກຕຣນ຺ນຸ ໂຂ ຐານໍ ຣມຓີຍນ຺ຕິ. ເທວໂລໂກ ມຫາຣາຊາຕິ. ໂສ ຈກ຺ກຣຕນໍ ອພ຺ຠຸກ຺ກິຣິຕ຺ວາ ປຣິສາຍ ສທ຺ຘິໍ ຈາຕຸມຫາຣາຊິກເທວໂລກໍ ອຄມາສິ, ອຖສ຺ສ ຈຕ຺ຕາໂຣ ມຫາຣາຊາໂນ ທິພ຺ພມາລຄນ຺ຘ- ຫຕ຺ຖາ ເທວຄຓປຣິວຸຕາ ປຈ຺ຈຸຄ຺ຄມນໍ ກຕ຺ວາ ຕໍ ອາທາຍ ຈາຕຸມຫາຣາຊິກເທວໂລກໍ ຄນ຺ຕ຺ວາ ຣຊ຺ຊໍ ອທໍສຸ, ຕສ຺ສ ປຣິສາຍ ປຣິວຸຕສ຺ສ ຕສ຺ມິໍ ຣຊ຺ຊໍ ກໂຣນ຺ຕສ຺ສ ທີໂຆ ອທ຺ຘາ ວີຕິວຕ຺ໂຕ. ໂສ ຕຕ຺ຖປິ ຕຓ຺ຫໍ ປູເຣຕຸ ມສກ຺ໂກນ຺ໂຕ ອຸກ຺ກຓ຺ຐິຕາ ກາຣໍ ທສ຺ເສສິ. ຕໂຕ ຈຕ຺ຕາໂຣ ມຫາຣາຊາໂນ ກິນ຺ນຸໂຂ ມຫາຣາຊ ອຸກ຺ກຓ຺ຐິໂຕຕິ ປຸຈ຺ຉິໍສຸ. ອິມມ຺ຫາ ເທວໂລກາ ກຕຣນ຺ນຸ ໂຂ ຐານໍ ຣມຓີຍນ຺ຕິ, ເທວ ປເຣສໍ ອຸປຏ຺ຐາກມນຸສ຺ສສທິສາ ມຍໍ. ຕາວຕິໍສເທວໂລໂກ ອິໂຕ ສຕຄຸເຓນ ຣມຓີໂຍຕິ. ມນ຺ຘາຕາ ຈກ຺ກຣຕນໍ ອພ຺ຠຸກ຺ກິຣິຕ຺ວາ ອຕ຺ຕໂນ ປຣິສປຣິວຸໂຕ ຕາວຕິໍສາຠິມຸໂຂ ປາຍາສິ, ອຖສ຺ສ ສກ຺ໂກ ເທວຣາຊາ ທິພ຺ພມາລຄນ຺ຘຫຕ຺ໂຖ ເທວຄຓປຣິວຸໂຕ ປຈ຺ຈຸຄ຺ຄມນໍ ກຕ຺ວາ ຕໍ ຫຕ຺ເຖ ຄເຫຕ຺ວາ ອິໂຕ ເອຫິ ມຫາຣາຊາຕິ ອາຫ. ຕໂຕ ຣຎ຺ໂຎ ເທວຄຓປຣິວຸຕສ຺ສ ຄມນກາເລ ປຣິຓາຍກຣຕນໍ ຈກ຺ກຣຕນໍ ອາທາຍ ສທ຺ຘິໍປຣິສາຍ ມນຸສ຺ສປຖໍ ໂອຕຣິຕ຺ວາ ອຕ຺ຕໂນ ຆຣໍ ປາວິສິ. ສກ຺ໂກ ມນ຺ຘາຕຸໍ ສກ຺ກຠວນໍ ເນຕ຺ວາ ເທວຕາ ທ຺ເວ ໂກຏ຺ຐາເສ ກຕ຺ວາ ອຕ຺ຕໂນ ຣຊ຺ຊໍ ມຊ຺ເຌ ຠິນ຺ທິຕ຺ວາ ອທາສິ. ຕໂຕ ປຏ຺ຐາຍ ທ຺ເວປິ ຣາຊໂນ ຣຊ຺ຊໍ ກາເຣສຸໍ. ເອວໍ ກາເລ ຄຈ຺ຉນ຺ເຕ ສກ຺ໂກ ສຏ຺ຐິສຕສຫສ຺ສາຘິການິ ຕິສ຺ໂສຈ ວສ຺ສໂກຏິໂຍ ອາຍຸໍ ເຂເປຕ຺ວາ ຈວິ. ອຎ຺ໂຎ ສກ຺ໂກ ນິພ຺ພຕ຺ຕິ, ໂສປິ ຕເຖວ ເທວຣຊ຺ຊໍ ກາເຣຕ຺ວາ ອາຍຸກ຺ຂເຍນ ຈວິ, ເອເຕນຸ ປາເຍນ ຉຕ຺ຕິໍສ ສກ຺ກາ ຈວິໍສຸ, ມນ຺ຘາຕາ ປນ ມນຸສ຺ສປຣິຫາເຣນ ເທວຣຊ຺ຊໍ ກາເຣສິເຍວ, ຕສ຺ເສວໍ ກາເລ ຄຈ຺ຉນ຺ເຕ ຠີຍ຺ໂຍໂສ ມຕ຺ຕາຍ ກາມຕຓ຺ຫາ ອຸປ຺ປຊ຺ຊິ, ໂສ ກິມ຺ເມ ອຸປຑ຺ຒຣຊ຺ເຊນ. ສກ຺ກໍ ມາເຣຕ຺ວາ ເອກຣຊ຺ຊໍ ກຣິສ຺ສາມີຕິ ຈິນ຺ເຕສິ. ສກ຺ກໍ ປນ ມາເຣຕຸໍ ນ ສກ຺ກາ, ກາມຕຓ຺ຫາ ປເນສາ ວິປຕ຺ຕິມູລາ. ຕຖາຫິ.

໓.

ວຣມຕ຺ຣ ສຸຂນ຺ຕ຺ຍຕ຺ຣ, ອຕ຺ຣິຈ຺ຉາວິຫໂຕ ນໂຣ;

ອິຘວາ ປຣຕ຺ຖວາ ກິຎ຺ຈິ, ນ ສາຕໍ ວິນ຺ທເຕ ສທາ.

໔.

ຕຓ຺ຫາຍ ຊາຍເຕ ໂສໂກ,

ຕຓ຺ຫາຍ ຊາຍເຕ ຠຍໍ;

ຕຓ຺ຫາຍ ວິປ຺ປມຸຕ຺ຕສ຺ສ,

ນຕ຺ຖິ ໂສໂກ ກຸໂຕ ຠຍໍ.

໕.

ຕຓ຺ຫາທາໂສ ນໂຣ ເອຕ຺ຖ, ຣາຊໂຈຣາທິສມ຺ຠວໍ;

ຫຕ຺ຕຈ຺ເຉທາທິກໍ ທຸກ຺ຂໍ, ປາປຸຓາຕິ ວິຫຎ຺ຎຕິ.

໖.

ເຍນ ໂລເຠນ ຊາເຕນ, ສທາ ຊີຍນ຺ຕິ ປາຓິໂນ;

ເຂຕ຺ຕໍ ວຕ຺ຖຸໍ ຫິຣຎ຺ຎໍຈ, ຄວາສ຺ສໍ ທາສໂປຣິສໍ;

ສພ຺ພຕ຺ຖາເມນ ໂສ ໂລໂຠ, ປຫາຕພ຺ໂພວ ວິຎ຺ຎຸນາຕິ.

ຕໂຕ ອຕ຺ຣິຈ຺ຉາວິຫຕສ຺ສ ຕສ຺ສ ອາຍຸສງ຺ຂາໂຣ ປຣິຫາຍິ, ຊຣາ ສຣີຣໍ ປຫຣິ, ມນຸສ຺ສສຣີຣຎ຺ຫິ ນາມ ນ ເທວໂລເກຠິຊ຺ຊຕິ, ຕຖ ໂສ ເທວໂລກາ ຠສ຺ສິຕ຺ວາ ພນ຺ຘຸມຕີນຄຣຸຍ຺ຍານໍ ປາວິສິ, ອຸຍ຺ຍານປາໂລ ຕສ຺ສ ອາຄຕຠາວໍ ຣາຊກຸລໍ ນິເວເທສິ. ຣາຊາ ຣາຊກຸລາ ອາຄນ຺ຕ຺ວາ ອຸຍ຺ຍາເນເຍວ ອາສນໍ ປຎ຺ຎາເປສິ. ຕໂຕ ມນ຺ຘາຕາ ອຸຍ຺ຍາເນ ປຎ຺ຎຕ຺ຕວຣາສເນ ນິປນ຺ໂນ ອນຸຏ຺ຐານເສຍ຺ຍໍ ກປ຺ເປສິ. ຕໂຕ ອມຈ຺ຈາ ເທວ ຕຸມ຺ຫາກໍ ປຣໂຕ ກິນ຺ນຸ ກເຖສາມາຕິ ປຸຈ຺ຉິໍສຸ, ມມ ປຣໂຕ ຕຸມ຺ເຫ ອິມໍ ສາສນໍ ມຫາຊນສ຺ສ ກເຖຍ຺ຍາຖ, ມນ຺ຘາຕຸມຫາຣາຊາ ທ຺ວິສຫສ຺ສທີປປຣິວາເຣສຸ ຈຕູສຸ ມຫາທີເປສຸ ຈກ຺ກວຕ຺ຕິຣຊ຺ຊໍ ກາເຣຕ຺ວາ ຈາຕຸມຫາຣາຊິເກສຸ ຣຊ຺ຊໍ ກາເຣຕ຺ວາ ຉຕ຺ຕິໍສສກ຺ການໍ ອາຍຸປຣິມາເຓນ ເທວໂລເກ ຣຊ຺ຊໍ ກາເຣຕ຺ວາ ກາລມກາສີຕິ. ໂສ ເອວໍ ວຕ຺ວາ ກາລໍກຕ຺ວາ ຍຖາກມ຺ມໍ ຄໂຕຕິ ອິມມຕ຺ຖໍ ປກາເສຕຸໍ ຠຄວາ ຈຕຸມຫາປຣິສມຊ຺ເຌ ອິມາ ຄາຖາໂຍ ອາຫ.

໗.

ຍາວຕາ ຈນ຺ທິມສຸຣິຍາ, ປຣິຫຣນ຺ຕິ ທິສາ ຠນ຺ຕິ ວິໂຣຈນາ;

ສພ຺ເພວ ທາສາ ມນ຺ຘາຕາ, ເຍ ປາຓາ ປຖວິນິສ຺ສິຕາ.

໘.

ນ ກຫາປຓວສ຺ເສນ, ຕິຕ຺ຕິ ກາເມສຸ ວິຊ຺ຊຕິ;

ອປ຺ປສ຺ສທາ ທຸຂາ ກາມາ, ອິຕິ ວິຎ຺ຎາຍ ປຓ຺ຑິໂຕ.

໙.

ອປິ ທິພ຺ເພສຸ ກາເມສຸ, ຣຕິໍໂສ ນາຘິຄຈ຺ຉຕິ;

ຕຓ຺ຫາກ຺ຂຍຣໂຕ ໂຫຕິ, ສມ຺ມາສມ຺ພຸທ຺ຘສາວໂກຕິ.

ຕໍ ສຸຕ຺ວາ ພຫູ ໂສຕາປຕ຺ຕິຜລາທີນິ ປາປຸຓິໍສູຕິ.

໑໐.

ອິຕິ ຄຕິນິຍຕານໍ ໂພຘິຍາ ອຸຕ຺ຕມານໍ;

ສກວສມຸປເນຕ຺ວາ ເທຕິ ທຸກ຺ຂາຕິຕຓ຺ຫາ;

ອນິຍຕຄຕິການໍ ກາ ກຖາ ມາທິສານໍ;

ຊຫຖ ຕມິຕິ ມນ຺ຕ຺ວາ ໂຠ ຠຊວ຺ໂຫ ຕິວຕ຺ຖຸໍຕິ.

ມຫາມນ຺ຘາຕຸວຕ຺ຖຸໍ ອຏ຺ຐມໍ.

໙. ພຸທ຺ຘວມ຺ມວາຓິຊກວຕ຺ຖຸມ຺ຫິ ອຍມານຸປຸພ຺ພີກຖາ

ຊມ຺ພຸທີເປ ກິຣ ປາຏລິປຸຕ຺ຕນຄເຣ ພຸທ຺ຘວມ຺ໂມ ນາມ ວາຓິຊໂກ ອໂຫສິ ວາຓິຊກກມ຺ເມນ ຊີວມາໂນ. ໂສ ອປຣຠາເຄ ສຕ຺ຖວາເຫຫິ ສທ຺ຘິໍ ຄາມນິຄມຊນປທ ຣາຊຘານີສຸ ວາຓິຊ຺ຊໍ ປໂຍຊຍມາໂນ ວິຈຣຕິ, ຕສ຺ມິໍ ສມເຍ ຠຄວາເນກຠິກ຺ຂຸສຫສ຺ສປຣິວຸໂຕ ຊນປທຈາຣິກໍ ຈຣຕິ ພຫູ ເທວມນຸສ຺ເສ ສໍສາຣກນ຺ຕາຣາ ອຸຕ຺ຕາເຣນ຺ໂຕ. ຕທາ ໂສ ຠຄວນ຺ຕໍ ອທ຺ທສ ທ຺ວຕ຺ຕິໍສລກ຺ຂຓານຸພ຺ຍຎ຺ຊນປຕິມຓ຺ຑິຕໍ ຊລມານສຸວຓ຺ຓເມຣຸໍ ວິຍວິໂຣຈມານໍ ມຫາຠິກ຺ຂຸສງ຺ຆປຣິວຸຕໍ, ທິສ຺ວາ ປຣມປີຕິຍາ ຜຸຏສຣີໂຣ ອຎ຺ຊລິໍ ປຄ຺ຄຍ຺ຫ ຠຄວນ຺ຕໍ ອຸປສງ຺ກມິຕ຺ວາ ວນ຺ທິຕ຺ວາ ສາຍຓ຺ເຫ ຠຄວນ຺ຕໍ ຠຕ຺ເຕນ ນິມນ຺ເຕສິ ພຸທ຺ຘສາສເນ ອປຣິຈິຕຠາເວນ. ອຖສ຺ສ ຠຄວາ ວິກາລໂຠຊນາ ປຏິວິຣຕາ ຕຖາຄຕາຕິ ອາຫ. ອຖ ໂສ ຠຄວນ຺ຕໍ ວນ຺ທິຕ຺ວາ ກິໍ ຠນ຺ເຕ ຠຄວນ຺ຕາ ວິກາເລ ຠຸຎ຺ຊິສ຺ສນ຺ຕີຕິ, ອຖສ຺ສ ກຖໍ ປຏິຈ຺ຈ ຠຄວາ ອຏ຺ຐວິຘໍ ປານໍ ຕຖາຄຕານໍ ວິກາເລ ຠຸຎ຺ຊິຕຸໍ ກປ຺ປຕິ. ເສຍ຺ຍຖິທໍ, ອມ຺ພປານໍ ຊມ຺ພຸປານໍ ໂຈຈປານໍ ໂມຈປານໍ ຜາຣຸສກປານໍ ມຘຸປານໍ ມຸທ຺ທິກປານໍ ສາລູກປານນ຺ຕິ. ຕໍ ສຸຕ຺ວາ ວາຓິໂຊ ສຫສກ຺ກາຣາຣເສຫິ ມຸທ຺ທິກປານໍ ກຕ຺ວາ ພຸທ຺ຘປມຸຂສ຺ສ ຠິກ຺ຂຸສງ຺ຆສ຺ສ ອທາສິ, ສຠິກ຺ຂຸສງ຺ໂຆ ສຕ຺ຖາ ປຣິຠຸຕ຺ຕປານີຍຣໂສ ຕສ຺ສ ຘມ຺ມໍ ເທເສຕ຺ວາ ຊນປທຈາຣິກໍ ປກ຺ກາມິ. ໂສປິ ປສນ຺ນມານໂສ ຫຸຕ຺ວາ ນິວຕ຺ໂຕ ສທ຺ຘິໍ ວາຓິຊເກຫິ ເຕສຸ ເຕສຸ ຊນປເທສຸ ວາຓິຊ຺ຊໍ ປໂຍເຊນ຺ໂຕ ມຫາວຕ຺ຕນີຍໍນາມ ກນ຺ຕາຣໍ ປາປຸຓິ, ຕຕ຺ຕ ເຕສໍ ສພ຺ເພສຸເຍວ ສກເຏສຸ ປານີຍໍ ປຣິກ຺ຂຍມຄມາສິ. ຕຕ຺ຖ ສພ຺ພມນຸສ຺ສານໍຈ ພລີວທ຺ທານໍຈ ປານີຍໍ ນາໂຫສິ. ອຖ ໂສ ວາຓິໂຊ ປິປາສາຠິຠູໂຕ ເຕສຸ ເຕສຸ ສກເຏສຸ ປານີຍໍ ປຣິເຍສນ຺ໂຕ ວິຈຣຕິ. ອເຖກສ຺ມິໍ ສກເຏ ມນຸສ຺ສາ ຕໍ ທິສ຺ວາ ກາຣຸຎ຺ເຎນ ເອຕ຺ຖາຄຈ຺ຉ, ອິມສ຺ມິໍ ໂກຬມ຺ເພ ໂຖກໍ ປານີຍໍ ອຕ຺ຖິ ປິວາຕິ ວທິໍສຸ. ຕ ໂຕ ໂສ ຄນ຺ຕ຺ວາ ປານີຍໍ ປິວິ. ຕສ຺ສ ຕໍ ຣສໍ ມຸທ຺ທິກປານຣສສທິສໍ ອໂຫສິ, ປິວນ຺ໂຕວ ໂສ ເອວໍ ຈິນ຺ເຕສິ. ສມ຺ມາສມ຺ພຸທ຺ຘສ຺ສ ຕທາ ເມ ທິນ຺ນມຸທ຺ທິກປານສ຺ສ ນິສ຺ສນ຺ໂທ ອຊ຺ຊ ສມ຺ປຕ຺ໂຕ ຠວິສ຺ສຕີຕິ ອຈ຺ເຉຣພ຺ຠຸຕຈິຕ຺ໂຕ ໂສມນສ຺ສຊາໂຕ ຄນ຺ຕ຺ວາ ສຍເມວ ຈາຏິຍາ ປິຘານໍ ວິວຣິ. ສກລາປິ ສາ ຈາຏິ ມຸທ຺ທິກປາເນນ ປຣິປຸຓ຺ຓາ ອໂຫສິ. ຕໂຕ ໂສ ຣ ສວ ນ຺ຕໍ ໂອຊວນ຺ຕໍ ອປຣິກ຺ຂຍໍ ທິພ຺ພປານສທິສໍ ປານີຍໍ ທິສ຺ວາ ປຣມາຍ ປີຕິຍາ ຜຸຏສຣີໂຣ ອຸຄ຺ໂຆເສສິ ສພ຺ເພ ປານີຍໍ ປິວນ຺ຕູຕິ. ຕໍ ສຸຕ຺ວາ ສພ຺ເພ ສນ຺ນິປຕິຕ຺ວາ ປານີຍໍ ທິສ຺ວາ ອພ຺ຠຸຕຈິຕ຺ຕາ ຊາຕາ. ວາຓິໂຊ ເຕສໍ ມຊ຺ເຌ ພຸທ຺ຘານຸຠາວໍ ປກາເສນ຺ໂຕ ອາຫ.

໑.

ປສ຺ສເຖທໍ ຠວນ຺ໂຕ ໂຠ, ອານຸຠາວໍ ມເຫສິໂນ;

ອຈິນ຺ຕນີຍມຈ຺ເຉຣໍ, ສນ຺ທິຏ຺ຐິກ ມກາລິກໍ.

໒.

ປສນ຺ນມນສາ ພຸທ຺ເຘ, ທິນ຺ນໍ ປານີຍກໍ ມຍາ;

ວິປຈ຺ຈຕິ ອິທາເນວ, ຕໍ ທານໍ ມຸນິວາຫສາ.

໓.

ໂອຊວນ຺ຕໍ ສຸຂນ຺ນໍວ, ສີຕລໍ ມຘຸໂຣ ທກໍ;

ທິພ຺ພປານໍວ ເທວານໍ, ຊາຕມພ຺ຠຸຕມກ຺ຂຍໍ.

໔.

ສີລວນ຺ເຕສຸ ໂກ ນາມ, ນ ທເທຍ຺ຍ ວິຈກ຺ຂໂຓ;

ອິຘ ໂລເກ ປຣຕ຺ເຕຈ, ສຸຂທໍ ທານ ມຸຕ຺ຕມໍ.

໕.

ຍຖິ ຈ຺ຉິຕໍ ຄເຫຕ຺ວານ, ປິວນ຺ຕຸ ມຘຸໂຣ ທກໍ;

ຠາຊນານິຈ ປູເຣຕ຺ວາ, ຍນ຺ຕຸ ສພ຺ເພ ຍຖິຈ຺ຉິຕນ຺ຕິ.

ເອວຎ຺ຈ ປນ ວຕ຺ວາ ສພ຺ເພ ມນຸສ຺ເສຈ ພລີວທ຺ເທຈ ມຸທ຺ທິກຣເສເນວ ສນ຺ຕປ຺ເປສິ. ຕໂຕ ຕໂຕ ອາຄຕາປິ ປານີຍໍ ປິວນ຺ໂຕຈ ປານີຍໍ ອກ຺ຂຍໍ ອໂຫສິ. ຕໂຕ ວາຓິໂຊ ສຕ຺ຖວາເຫຫິ ສທ຺ຘິໍ ວາຓິຊ຺ຊໍ ປໂຍເຊຕ຺ວາ ສກນຄຣໍ ອາຄຈ຺ຉນ຺ໂຕ ຠຄວນ຺ຕໍ ປສ຺ສິຕ຺ວາ ຄມິສ຺ສາມີຕິ ເວຬຸວນໍ ຄນ຺ຕ຺ວາ ສຕ຺ຖາຣໍ ວນ຺ທິຕ຺ວາ ກຕານຸຎ຺ໂຎ ເອກມນ຺ເຕ ນິສີທິ. ສຕ຺ຖາປິ ເຕນ ສທ຺ຘິໍ ມຘຸຣປຏິສນ຺ຖາຣມກາສິ. ອຸປາສໂກປິ ຠນ຺ເຕ ຕຸມ຺ຫາກໍ ປາຏິຫາຣິຍໍ ທິສ຺ວາ ປສນ຺ໂນ ວນ຺ທິຕ຺ວາ ຄມິສ຺ສາມີຕິ ອາຄໂຕມ຺ຫິ, ເອວຎ຺ເຈ ວຎ຺ຈ ປາຏິຫາຣິຍນ຺ຕິ ວິຕ຺ຖາເຣນ ກເຖສິ. ອຖສ຺ສ ຠຄວາ ຘມ຺ມໍ ເທເສສິ. ໂສ ຘມ຺ມໍ ສຸຕ຺ວານ ສຕ຺ຖາຣໍ ສ຺ວາຕນາຍ ນິມນ຺ເຕຕ຺ວາ ມຫາທານໍ ທຕ຺ວາ ອຕ຺ຕໂນ ເຄຫເມວ ອຄມາສິ. ໂສ ຕໂຕ ປຏ຺ຐາຍ ທານາທີນິ ປຸຎ຺ຎານິ ກຕ຺ວາ ຕໂຕ ຈຸໂຕ ເທວໂລເກ ທ຺ວາທສໂຍຊນິເກ ກນກວິມາເນ ເທວຈ຺ຉຣາປຣິວຸໂຕ ເທວິສ຺ສຣິຍສມນ຺ນາຄໂຕ ນິພ຺ພຕ຺ຕິ. ຕສ຺ສ ປຸພ຺ພກມ຺ມປກາສນຕ຺ຖໍ ຕຕ຺ຖ ຕຕ຺ຖ ຣຕນຠາຊເນສຸ ທິພ຺ພມເຍຫິ ມຸທ຺ທິກປາເນຫິ ປຣິປຸຓ຺ຓໍ ອໂຫສິ. ປານີຍໍ ປິວິຕ຺ວາ ເທວາ ນຈ຺ຈນ຺ຕິ ວາເທນ຺ຕິ ກີຬນ຺ຕີຕິ.

໖.

ນ ວິປຸລຊິນສາຣໍ ຊານມາໂນ ຊເນວໍ,

ລຠຕິ ວິປຸລໂຠຄໍ ໂຕຍມຕ຺ຕສ຺ສ ທານາ;

ວິທິຕຄຸຓຄຓາ ໂຠ ຕີສຸ ວຕ຺ຖູສຸ ຕຸມ຺ເຫ,

ລຠຖ ຂລຸ ວິເສສໍ ສີລວນ຺ເຕສຸ ທານາຕິ.

ພຸທ຺ຘວມ຺ມວາຓິຊກສ຺ສ ວຕ຺ຖຸໍ ນວມໍ.

໑໐. ຣູປເທວິຍາ ວຕ຺ຖຸມ຺ຫິ ອຍມານຸປຸພ຺ພີກຖາ

ອຕີເຕ ກິຣ ວິປສ຺ສິສ຺ສ ຠຄວໂຕ ກາເລ ຕສ຺ມິໍ ນຄເຣ ເອກາ ຄາມທາຣິກາ ວິຫາເຣ ອາຫິຓ຺ຑນ຺ຕີ ເອກໍ ຄິລານຠິກ຺ຂຸໍ ທິສ຺ວາ ກມ຺ປມານຫທຍາ ອຸປສງ຺ກມິຕ຺ວາ ວນ຺ທິຕ຺ວາ ຠນ຺ເຕ ໂກເຕ ອາພາໂຘ ສຣີຣໍ ປີເຬຕີຕິ ປຸຈ຺ຉິ. ເຕນາປິ ຠຄິນິ ຂຣາພາໂຘ ເມ ປີເຬຕີຕິ ວຸຕ຺ເຕ ສາ ເຕນຫິ ຠນ຺ເຕ ອຫໍ ຕໍ ໂຣຄໍ ວູປສເມສ຺ສາມີຕິ ນິມນ຺ເຕຕ຺ວາ ເຄຫໍ ຄນ຺ຕ຺ວາ ຕໍ ປວຕ຺ຕິໍ ມາຕາປິຕຸນ຺ນໍ ກເຖຕ຺ວາ ເຕຫິ ອນຸຎ຺ຎາຕາ ປຸນ ທິວເສ ນານຄ຺ຄຣເສນ ເຠສຊ຺ຊາຫາຣໍ ສມ຺ປາເທສິ, ຕໂຕ ໂສ ຠິກ຺ຂຸ ປຸນທິວເສ ຈີວຣໍ ປາຣຸປິຕ຺ວາ ຠິກ຺ຂາຍ ຈຣນ຺ໂຕ ຕສ຺ສາ ເຄຫໍ ຄນ຺ຕ຺ວາ ອຏ຺ຐາສິ. ສາ ເຖຣໍ ອາຄຕໍ ທິສ຺ວາ ໂສມນສ຺ສຊາຕາ ປຕ຺ຕໍ ຄເຫຕ຺ວາ ອາສນໍ ປຎ຺ຎາເປຕ຺ວາ ອທາສິ. ຕຕ຺ຖ ນິສິນ຺ນໍ ຕໍ ອາຫາເຣນ ສາຘຸກໍ ປຣິວິສິຕ຺ວາ ສກ຺ກາຣ ມກາສິ. ອຖສ຺ສາ ສທ຺ຘາພເລນ ຠຸຕ຺ຕມຕ຺ເຕເຍວ ໂສ ອາພາໂຘ ວູປສມິ. ຕໂຕ ໂສ ວູປສນ຺ຕໂຣໂຄ ທຸຕິຍທິວເສ ຕສ຺ສາ ເຄຫໍ ນາ ຄມາສິ. ອຖ ສາ ວິຫາຣໍ ຄນ຺ຕ຺ວາ ຕໍ ວນ຺ທິຕ຺ວາ ກສ຺ມານາຄຕຕ຺ຖາຕິ ປຸຈ຺ຉິຕ຺ວາ ເຕນ ເມ ຠຄິນິ ພ຺ຍາຘິ ວູປສມິ, ຕສ຺ມາ ນາຄໂຕສ຺ມີຕິ ວຸຕ຺ເຕ ສາ ສາຘຸ ຠນ຺ເຕຕິ ໂສມນສ຺ສຊາຕາ ເຄຫເມວ ອຄມາສິ. ສາ ເຕນ ປຸຎ຺ຎກມ຺ເມນ ກາລໍ ກຕ຺ວາ ເທວໂລເກ ນິພ຺ພຕ຺ຕິ. ຕສ຺ສາ ຕຕ຺ຖ ທ຺ວາທສໂຍຊນິກໍ ກນກວິມານໍ ນິພ຺ພຕ຺ຕິ. ສາ ຕຕ຺ຖ ເທວິສ຺ສຣິຍໍ ອນຸຠວນ຺ຕີ ຉພຸທ຺ຘນ຺ຕຣໍ ເຂເປຕ຺ວາ ອມ຺ຫາກໍ ຠຄວໂຕ ກາເລ ຊມ຺ພຸທີເປ ເທວປຸຕ຺ຕນຄເຣ ອຸທິຈ຺ຈພ຺ຣຫ຺ມຓກຸເລ ເຊຏ຺ຐພ຺ຣາຫ຺ມຓສ຺ສ ຠຣິຍາຍ ກຸຈ຺ຉິມ຺ຫິ ປຏິສນ຺ຘິໍ ຄຓ຺ຫິ, ສາ ປຣິປາກ ມນ຺ວາຍ ມາຕຸກຸຈ຺ຉິໂຕ ນິກ຺ຂມິ. ຕສ຺ສາ ມາຕຸກຸຈ຺ຉິໂຕ ນິກ຺ຂນ຺ຕກາລໂຕ ປຏ຺ຐາຍ ທິວເສ ທິວເສ ອຏ຺ຐຏ຺ຐນາລິມຕ຺ຕໍ ຕຓ຺ຑຸລໍ ນິພ຺ພຕ຺ຕຕິ. ຕສ຺ສາ ຣູປສມ຺ປຕ຺ຕິໍ ທິສ຺ວາ ປສນ຺ນາ ມາຕາປິຕໂຣ ຣູປເທວີຕິ ນາມ ມກໍສຸ. ປຈ຺ຉາ ຕໍ ປຕິຣູເປນ ທາຣເກນ ນິໂຍເຊສຸໍ. ອຖສ຺ສາ ຕຓ຺ຑຸລ- ນາລິມຕ຺ຕໍ ຄເຫຕ຺ວາ ປຈິຕຸໍ ອາຣທ຺ເຘ ອິຈ຺ຉິຕິຈ຺ຉິຕມໍສາທິພ຺ຍຎ຺ຊນຎ຺ຊ ສປ຺ປິນວນີຕທຘິຂີຣາທິໂຄຣສຎ຺ຈ ຊີຣມຣິຈາທິກຏຸກຠຓ຺ຑຎ຺ຈ ກທລິປນສມຘຸຄຸຬາທິອຸປກຣຓຎ຺ຈ ຠາຊນານິ ປູເຣຕ຺ວາ ນິພ຺ພຕ຺ຕຕິ, ຕາຍ ຫຕ຺ເຖນ ຄຫິຕໍ ກິຎ຺ຈິ ຂາທນີຍໍ ໂຠຊນີຍໍວາ ປູຕິຠາວໍ ນ ຄຈ຺ຉຕິ, ຠຕ຺ຕຸກ຺ຂລິໍ ຄເຫຕ຺ວາ ສກລນຄຣວາສິໂນ ໂຠເຊນ຺ຕິຍາປິ ເອກກຏຈ຺ຉຸມຕ຺ຕໍ ຠຕ຺ຕໍ ຄຫິຕຏ຺ຐານໍ ນ ປຎ຺ຎາຍຕິ. ເອວໍ ອປຣິກ຺ຂຍປຸຎ຺ຎາ ອໂຫສິ, ສກລເທວປຸຕ຺ຕນຄເຣ ຈນ຺ທສຸຣິຍາວ ປາກຏາ ອໂຫສິ, ອຖ ສາ ປຎ຺ຈສຕຠິກ຺ຂູ ນິມນ຺ເຕຕ຺ວາ ນິຈ຺ຈໍ ສກນິເວສເນເຍວ ໂຠເຊຕິ, ຕທາ ເຕສໍ ອນ຺ຕເຣ ປຏິສມ຺ຠິທາປຕ຺ໂຕ ມຫາສງ຺ຆຣກ຺ຂິຕຕ຺ເຖໂຣນາມ ອິມິສ຺ສາ ປຸຎ຺ຎານຸຠາວໍ ທິພ຺ພຈກ຺ຂຸນາ ທິສ຺ວາ ນ ຊານາຕິ ເອສາ ອຕ຺ຖນາ ປຸພ຺ເພ ກຕກມ຺ມໍ. ຍນ຺ນູນາຫໍ ອສ຺ສາ ປກາເສຍ຺ຍນ຺ຕິ ເອກທິວສໍ ຕສ຺ສາ ນິເວສເນ ຠຸຎ຺ຊິຕ຺ວາ ອນຸໂມທນໍ ກໂຣນ຺ໂຕ ຊານາສິ ຠຄິນິ ຕຍາ ປຸພ຺ເພ ກຕກມ຺ມນ຺ຕິ ປຸຈ຺ຉິ, ນ ຊານາມິ ຠນ຺ເຕ. ໂສຕຸມິຈ຺ຉາມີຕິ, ອຖສ຺ສາ ໂສ ປຸພ຺ພກມ຺ມໍ ປກາເສນ຺ໂຕ.

໑.

ເອກນວຸເຕ ອິໂຕ ກປ຺ເປ,

ວິປສ຺ສີນາມ ນາຍໂກ;

ອໂຫສິ ໂລເກ ໂລເກກ,

ນາຍໂກ ຉິນ຺ນພນ຺ຘໂນ.

໒.

ຕທາ ຕສ຺ມິໍ ປຸເຣ ຣມ຺ເມ, ອາສິ ຕ຺ວໍ ຄາມທາຣິກາ;

ອາຫິຓ຺ຑນ຺ຕີ ວິຫາຣສ຺ມິໍ, ອທ຺ທກ຺ຂິ ຊິນສາວກໍ.

໓.

ໂຣຄາຕຸຣໍ ກິສໍ ປຓ຺ຑຸໍ, ອສ຺ສສນ຺ຕໍ ມຸຫຸໍ ມຸຫຸໍ;

ທິສ຺ວານ ກມ຺ປິຕາ ຈິຕ຺ຕາ, ນິມນ຺ເຕຕ຺ວານ ຕໍ ມຸນິໍ.

໔.

ເຠສຊ຺ຊຎ຺ເຈວ ຠຕ຺ຕຎ຺ຈ, ອທາ ຕ຺ວໍ ເຕນ ໂສ ຍຕິ;

ອພ຺ຍາພາໂຘ ອນີໂຆຈ, ອໂຫສິ ອນຸປທ຺ທໂວ.

໕.

ຕໂຕ ຕ຺ວໍ ເຕນ ກມ຺ເມນ, ສຸກເຕນ ຕໂຕ ຈຸຕາ;

ຊາຕາສິ ເທວໂລກສ຺ມິໍ, ສພ຺ພກາມສມິທ຺ຘິນີ.

໖.

ຕຕ຺ຖ ເຕ ປຸຎ຺ຎເຕເຊນ, ປາສາໂທ ຣຕນາມໂຍ;

ມຓິຖູປິສຕາກິຓ຺ໂຓ, ກູຏາຄາເຣຫິ ລງ຺ກໂຕ.

໗.

ເນກຄພ຺ຠສຕາກິຓ຺ໂຓ, ສຍນາສນມຓ຺ຑິໂຕ;

ອຈ຺ຉຣາສຕສໍກິຓ຺ໂຓ, ນຈ຺ຈຄີຕາທິສໍກຸໂລ.

໘.

ຣມ຺ຠາມ຺ພຊມ຺ພຸສນ຺ນີຣ, ປູຄປຸນ຺ນາຄປາຏລີ;

ນາຄາທິຕຣຸສຓ຺ເຑຫິ, ມຓ຺ຑິຕຸຍ຺ຍານປນ຺ຕິຫິ.

໙.

ປທຸມຸປ຺ປລກຬາຣ, ກຸນ຺ທການນມຓ຺ຑິເຕ;

ມຘຸມຕ຺ຕາລິປາລີຫິ, ສາຣສີສຣສໍກຸເລ.

໑໐.

ເທວປຸຕ຺ເຕຫິ ເນເກຫິ, ຕຖາ ເທວຈ຺ຉຣາຫິຈ;

ນິຈ຺ຈຸສ຺ສເວ ມຫາໂຠເຄ, ວິມາເນ ມນນນ຺ທເນ.

໑໑.

ຕ຺ວເມວໍ ເທວໂລກມ຺ຫິ, ວິນ຺ທມານາ ມຫາຍສໍ;

ອທ຺ຘານໍ ວີຕິນາເມຕ຺ວາ, ນິພ຺ພຸເຕ ໂຄຕເມ ຊິເນ.

໑໒.

ຊມ຺ພຸທີເປ ອິທານິ ຕ຺ວໍ, ນິພ຺ພຕ຺ຕາ ອຸທິເຕ ກຸເລ;

ປຸຎ຺ຎປຎ຺ຎາຄຸຓາວາສາ, ຣູເປນຄ຺ຄາ ປິຍໍວທາ.

໑໓.

ເອຕໍ ເຕ ເທວໂລກສ຺ມິໍ, ເທວິສ຺ສຣິຍມພ຺ຠຸຕໍ,

ອິມໍ ເຕ ອິຘ ໂລກສ຺ມິໍ, ສພ຺ພໍ ມານຸສິກໍ ສຸຂໍ.

໑໔.

ວິປສ຺ສິມຸນິໂນ ກາເລ, ຕ຺ວໍ ຕສ຺ເສກສ຺ສ ຠິກ຺ຂຸໂນ;

ອທາ ທານໍ ຄິລານສ຺ສ, ຕສ຺ສ ຕໍ ຜລມີທິສໍ.

໑໕.

ກາຕພ຺ພຎ຺ຫິ ສທາ ປຸຎ຺ຎໍ, ອິຈ຺ຉນ຺ເຕນ ສຸຂປ຺ປທໍ;

ຕສ຺ມາ ຕ຺ວໍ ສພ຺ພທາ ຠທ຺ເທ, ອຸສ຺ສຸກ຺ກາ ກຸສເລ ຠວາຕິ.

ເອວໍ ໂສ ຕສ຺ສ ປຸຣິມຕ຺ຕຠາເວ ກຕກມ຺ມໍ ປກາເສຕ຺ວາ ອິທານິ ປຸຎ຺ຎກມ຺ເມ ອປ຺ປມາທາ ຠວາຕິ ອນຸສາສິ. ສາ ເຖຣສ຺ສ ຘມ຺ມເທສນໍ ສຸຕ຺ວາ ປຣມໂສມນສ຺ສາ ຕໂຕ ປຏ຺ຐາຍ ທານາທີສຸ ນິຣຕາ ປຸຎ຺ຎານິ ກໂຣນ຺ຕີ ເຕເນວ ໂສມນສ຺ເສນ ໂສຕາປນ຺ນາ ອຣິຍສາວິກາ ອໂຫສີຕິ.

໑໖.

ອິຕິ ຕຣຸຓກຸມາຣີ ປຸຎ຺ຎກມ຺ເມສຸ ສາຣໍ,

ອວິທິຕຄຸຓມຕ຺ຕາ ທຕ຺ວ ຠິກ຺ຂຸສ຺ສ ທານໍ;

ທິວິມນຸຊສຸຂໍ ສາລຕ຺ຖ ຕຸມ຺ເຫ ຠວນ຺ຕາ,

ວິທິຕກຸສລປາກາ ກິໍ ນ ລພ຺ເຠຖ ສນ຺ຕິໍ.

ຣູປເທວິຍາ ວຕ຺ຖຸໍ ທສມໍ.

ຘມ຺ມໂສຓ຺ຑກວຄ຺ໂຄ ປຖໂມ.

ນນ຺ທິຍຣາຊວຄ຺ໂຄ

໑໑. ນນ຺ທິຍຣາຊສ຺ສ ວຕ຺ຖຸມ຺ຫິ ອຍມານຸປຸພ຺ພີກຖາ

ອິໂຕ ກິຣ ກປ຺ປສຕສຫສ຺ສມຕ຺ຖເກ ປທຸມຸຕ຺ຕໂຣ ນາມ ສຕ຺ຖາ ໂລເກ ອຸທປາທິ ສເທວກໍ ໂລກໍ ສໍສາຣກນ຺ຕາຣາ ອຸຕ຺ຕາເຣນ຺ໂຕ. ຕສ຺ມິໍ ກິຣ ສມເຍ ເອໂກ ກຸຏຸມ຺ພິໂກ ສຕ຺ຖຸ ຘມ຺ມເທສນໍ ສຸຕ຺ວາ ປສນ຺ນມານໂສ ພຸທ຺ຘປມຸຂໍ ຠິກ຺ຂຸສງ຺ຆໍ ນິມນ຺ເຕຕ຺ວາ ມຫາທານໍ ສຊ຺ເຊຕ຺ວາ ອຕ຺ຕໂນ ຠວນໍ ເທວຠວນມິວ ອລງ຺ກຣິຕ຺ວາ ພຸທ຺ຘາຣຫໍ ມຫາສນໍ ປຎ຺ຎາເປຕ຺ວາ ຄນ຺ຕ຺ວາ ຠຄວນ຺ຕໍ ຍາຈິ ກາໂລຍໍ ຠນ຺ເຕ ຠຄວໂຕ ຠຕ຺ຕຄ຺ຄສ຺ສ ອຸປສງ຺ກມນາຍາຕິ. ອຖ ຠຄວາ ຠິກ຺ຂຸສງ຺ຆປຣິວຸໂຕ ມຫຕາ ພຸທ຺ຘານຸຠາເວນ ຄນ຺ຕ຺ວາ ນິສີທິ ປຎ຺ຎຕ຺ຕວຣພຸທ຺ຘາສເນ, ຕໂຕ ກຸຏຸມ຺ພິໂກ ຫຏ຺ໂຐ ອຸທຄ຺ໂຄ ສປຣິໂສ ຠຄວນ຺ຕໍ ປຣິວິສຕິ ອເນເກຫິ ມຘຸຣນ຺ນປານາທີຫິ. ຕທາ ຕສ຺ສ ຠຄວໂຕ ສາສເນ ຘຸຕງ຺ຄຘຣານໍ ອຄ຺ໂຄ ວສຠຕ຺ເຖໂຣນາມ ມຫາສາວໂກ ສປທານວຕ຺ເຕນ ປິຓ຺ຑາຍ ຈຣມາໂນ ຕສ຺ສ ກຸຏຸມ຺ພິກສ຺ສ ເຄຫທ຺ວາເຣ ອຏ຺ຐາສິ, ອຖ ໂສ ເຖຣໍ ທິສ຺ວາ ຠນ຺ເຕ ສຕ຺ຖາ ອນ຺ໂຕເຄເຫ ນິສິນ຺ໂນ, ຕຸມ຺ເຫປິ ປວິສຖາຕິ ຍາຈິ, ເຖໂຣ ອປວິສິຕ຺ວາວ ອຄມາສິ, ກຸຏຸມ຺ພິໂກ ຠຄວນ຺ຕໍ ອຸປສງ຺ກມິຕ຺ວາ ຕມຕ຺ຕໍ ວຕ຺ວາ ກິໍ ຠນ຺ເຕ ສເທວເກ ໂລເກ ຠຄວຕາປິ ອຸຕ຺ຕຣິຕໂຣ ຄຸເຓນ ສໍວິຊ຺ຊຕີຕິ ອາຫ. ອຖສ຺ສ ສຕ຺ຖາ ປຸຕ຺ໂຕປມໍ ທສ຺ເສຕ຺ວາ ເຖຣສ຺ສ ຄຸເຓ ວຓ຺ເຓນ຺ໂຕ ເອວມາຫ.

໑.

ປາເລນ຺ຕິ ນິມ຺ມລໍ ກຕ຺ວາ, ປາຕິໂມກ຺ຂາທິສໍວຣໍ;

ສມາທິນ຺ນຘຸຕງ຺ຄາຈ, ອປ຺ປິຈ຺ຉາ ມຸນິສູນໂວ.

໒.

ນິຈ຺ຈ ມນ຺ຕກຍຸທ຺ຘມ຺ຫິ, ນທ຺ຘາ ໂຍຘາວ ທປ຺ປິຕາ;

ປຸຎ຺ຎານໍ ວຕ຺ຖຸຠູຕາ ເຕ, ເທວມານຸສກາ ທິນໍ.

໓.

ຘາເຣມຫໍ ວຓ຺ຓວນ຺ຕໍ, ສີເວຍ຺ຍມ຺ປິຈ ຈີວຣໍ;

ພຸທ຺ຘປຸຕ຺ຕາ ມຫານາຄາ ນ ຘາເຣນ຺ຕິ ຕຖາວິຘໍ.

໔.

ຘາເຣນ຺ຕິ ເຕ ປໍສຸກູລໍ, ສງ຺ຆາເຏຕ຺ວາ ປິໂລຕິເກ;

ວຓຈ຺ຉາທນໂຈລໍວ, ອິຈ຺ຉາໂລຠ ວິວຊ຺ຊິຕາ.

໕.

ສາທິຍາມິ ສທາ ຫມ຺ໂຠ, ອຸປາສກນິມນ຺ຕນໍ;

ເນວ ສາເທນ຺ຕິ ສມ຺ພຸທ຺ຘ, ປຸຕ຺ໂຕ ປາສກຍາຈນໍ.

໖.

ສປທາເນນ ຍໍ ລທ຺ຘໍ, ລູຂໍວາປິ ປຓີຕກໍ;

ເຕນ ຕຸສ຺ສນ຺ຕິ ເມ ປຸຕ຺ຕາ, ຣສເຄຘວິວຊ຺ຊິຕາ.

໗.

ນິປຊ຺ຊາມິ ອຫໍ ສາຘຸ, ສນ຺ຖເຕ ສຍເນ ສຸເຠ;

ນ ເຕ ເສຍ຺ຍໍ ປກປ຺ເປນ຺ຕິ, ສໍສາຣຠຍຠີຣຸກາ.

໘.

ຐານາ ສນຄມເນນ, ກປ຺ເປນ຺ຕິ ອິຣິຍາປຖໍ;

ເນກຠູມິສມາກິຓ຺ຓ, ປາສາເທສຸ ວສາມຫໍ.

໙.

ພຸທ຺ຘປຸຕ຺ຕາ ຕຖາຈ຺ຉນ຺ນໍ, ນ ກທາ ປວິສນ຺ຕິ ເຕ;

ຣຸກ຺ຂມູເລ ສຸສານສ຺ມິໍ, ອພ຺ໂຠກາເສ ຣມນ຺ຕິ ເຕ.

໑໐.

ຠາເວຕ຺ວາ ຠວນາສາຍ, ເຫຕຸໍ ຠາວນມຸຕ຺ຕມໍ;

ອຫໍ ຄາເມ ວສິສ຺ສາມິ, ປາເປນ຺ໂຕ ຊນຕໍ ສິວໍ.

໑໑.

ຣມນ຺ຕິ ມມ ປຸຕ຺ຕາ ເຕ, ປນ຺ຕເສນາສເນ ກກາ;

ເຕສໍ ມຫຕ຺ຕໂຣ ສນ຺ໂຕ, ເຖໂຣຍໍ ວສໂຠ ມຫາ;

ຘຸຕປາໂປ ຘຸຕງ຺ຄຄ຺ໂຄ, ຎາໂຕຍໍ ມມ ສາສເນຕິ.

ເອວໍ ຠຄວາ ຫຕ຺ຖໍ ອຸກ຺ຂິປິຕ຺ວາ ຈນ຺ທມຓ຺ຑເລ ປຫຣນ຺ໂຕ ວິຍ ເຖຣສ຺ສ ຄຸເຓ ປກາເສສິ, ຕໂຕ ໂສ ຕສ຺ສ ຄຸຓກຖໍ ສຸຕ຺ວາ ສຍມ຺ປິຕໍ ຐານນ຺ຕຣໍ ກາມຍມາໂນ ຍນ຺ນູນາຫໍ ອນາຄເຕ ອຎ຺ຎຕຣສ຺ສ ສມ຺ມາສມ຺ພຸທ຺ຘສ຺ສ ສາສເນ ຘຸຕງ຺ຄຘຣານໍ ອຄ຺ໂຄ ຠວິສ຺ສາມີຕິ ຕໍ ຐານນ຺ຕຣໍ ປຕ຺ເຖນ຺ໂຕ ຠຄວໂຕ ປາທມູເລ ນິປຊ຺ຊິ, ສຕ຺ຖາ ຕໍ ກາຣຓໍ ອຸປປຣິກ຺ຂິຕ຺ວາ ອິໂຕ ກປ຺ປສຕສຫສ຺ສມຕ຺ຖເກ ໂຄຕໂມ ນາມ ສຕ຺ຖາ ອຸປ຺ປຊ຺ຊິສ຺ສຕິ. ຕ຺ວໍ ຕທາ ຘຸຕງ຺ຄຘຣານໍ ອຄ຺ໂຄ ຫຸຕ຺ວາ ກສ຺ສ ໂປຕິ ປຎ຺ຎາຍິສ຺ສຕີຕິ ພ຺ຍາກຣຓ ມທາສິ. ຕໂຕ ປຏ຺ຐາຍ ໂສ ໂສມນສ຺ໂສ ປຸຎ຺ຎກມ຺ມໍ ກຕ຺ວາ ຕໂຕ ຈຸໂຕ ເທວມນຸສ຺ເສສຸ ເທວິສ຺ສຣິຍໍ ອນຸຠວນ຺ໂຕ ວິປສ຺ສີສມ຺ມາສມ຺ພຸທ຺ຘກາເລ ເອກສາຏໂກ ນາມ ພ຺ຣາຫ຺ມໂຓ ຫຸຕ຺ວາ ມຫາທານໍ ອທາສິ. ຕໂຕ ຈຸໂຕ ກສ຺ສປສມ຺ມາສມ຺ພຸທ຺ເຘ ປຣິນິພ຺ພຸເຕ ພາຣາຓສີນຄເຣ ພາຣາຓສີເສຏ຺ຐິ ຫຸຕ຺ວາ ນິພ຺ພຕ຺ໂຕ ທານາທີນິ ປຸຎ຺ຎານິ ກຕ຺ວາ ຕໂຕ ຈວິຕ຺ວາ ສໍສາເຣ ສໍສຣນ຺ໂຕ ທສວສ຺ສສຫສ຺ສາ ຍຸເກສຸ ມນຸສ຺ເສສຸ ພາຣາຓສິຍໍ ເອໂກ ກຸຏຸມ຺ພິໂກ ຫຸຕ຺ວາ ນິພ຺ພຕ຺ຕິ. ໂສ ປນາຍໍ ກຸຏຸມ຺ພິໂກ ອຣຎ຺ເຎ ຊງ຺ຆາວິຫາຣໍ ອນຸວິຈຣນ຺ໂຕ ປຈ຺ຈນ຺ຕິເມ ຊນປເທ ອຣຎ຺ຎາຍຕເນ ອຎ຺ຎຕຣໍ ປຈ຺ເຈກພຸທ຺ຘໍ ອທ຺ທສ. ໂສ ຈ ປຈ຺ເຈກພຸທ຺ໂຘ ຕຕ຺ຖ ຈີວຣກມ຺ມໍ ກໂຣນ຺ໂຕ ອນຸວາເຕ ອປ຺ປໂຫນ຺ເຕ ສໍຫຣິຕ຺ວາ ຐເປຕຸໍ ອາຣທ຺ໂຘ. ກຸຏຸມ຺ພິໂກ ຕໍ ທິສ຺ວາ ຠນ຺ເຕ ກິໍ ກໂຣຖາຕິ ປຸຈ຺ຉິ. ໂສ ປຈ຺ເຈກພຸທ຺ໂຘ ອປ຺ປິຈ຺ຉຕາຍ ເຕນ ປຸຏ຺ໂຐ ນ ກິຎ຺ຈິ ວຸຕ຺ໂຕ ໂຫຕິ. ໂສ ຈີວຣທຸສ຺ສໍ ນປ຺ປໂຫຕີຕິ ຎຕ຺ວາ ອຕ຺ຕໂນ ອຸຕ຺ຕຣສາຏກໍ ປຈ຺ເຈກພຸທ຺ຘສ຺ສ ປາທມູເລ ຐເປຕ຺ວາ ອຄມາສິ. ປຈ຺ເຈກພຸທ຺ໂຘ ຕໍ ຄເຫຕ຺ວາ ອນຸວາຕກໍ ອາໂຣເປນ຺ໂຕ ຈີວຣໍ ກຕ຺ວາ ປາຣຸປິ. ກຸຏຸມ຺ພິໂກ ຊີວິຕປຣິໂຍສາເນ ກາລໍ ກຕ຺ວາ ຕາວຕິໍສຠວເນ ນິພ຺ພຕ຺ຕິຕ຺ວາ ຕຕ຺ຖ ຍາວຕາຍຸກໍ ທິພ຺ພສມ຺ປຕ຺ຕິໍ ອນຸຠວິຕ຺ວາ ຕໂຕ ຈວິຕ຺ວາ ພາຣາຓສິໂຕ ຕິໂຍຊນມຕ຺ຕເກ ຐາເນ ອຎ຺ຎຕຣສ຺ມິໍ ນຄເຣ ນິພ຺ພຕ຺ຕິ, ຕສ຺ສ ມາຕາປິຕໂຣ ນນ຺ທິໂຍຕິ [ນນ຺ທີຕິນາມໍ ອິຕິສພ຺ພຕ຺ຖ] ນາມໍ ອກໍສຸ, ຕສ຺ສ ສຕ຺ຕ ຠາຕໂຣ ອເຫສຸໍ, ເສສາ ຉ ຠາຕໂຣ ນານາກມ຺ມນ຺ເຕສຸ ພ຺ຍາວຏາ ມາຕາປິຕຸນ຺ນໍ ໂປເສນ຺ຕິ. ນນ຺ທິໂຍ ປນ ອກມ຺ມສີໂລ ເຄເຫເຍວ ວສຕິ. ຕສ຺ມາ ຕສ຺ສ ເສສາ ກຸຊ຺ຌນ຺ຕິ. ມາຕາປິຕໂຣປິ ນນ຺ທິຍໍ ອາມນ຺ເຕຕ຺ວາ ໂອວທນ຺ຕິ. ໂສ ຕຸຓ຺ຫີ ໂຫເຕວ. ອຖາປຣສ຺ມິໍ ສມເຍ ຄາເມ ນກ຺ຂຕ຺ຕໍ ສງ຺ຆຸຏ຺ຐໍ, ຕທາ ໂສ ມາຕຣໍ ອາຫ. ອມ຺ມ ສາຏກໍ ເທຫິ, ນກ຺ຂຕ຺ຕໍ ກີຬິສ຺ສາມີຕິ, ສາ ໂຘຕ- ວຕ຺ຖໍ ນີຫຣິຕ຺ວາ ອທາສິ, ອມ຺ມ ຖູລໍ ອິທນ຺ຕິ, ສາ ອຎ຺ຎໍ ນີຫຣິຕ຺ວາ ອທາສິ, ຕມ຺ປິ ປຏິກ຺ຂິປິ. ອຖ ນໍ ມາຕາ ອາຫ. ຕາຕ ຍາທິເສ ມຍໍ ເຄເຫ ຊາຕາ, ນຕ຺ຖິ ອິໂຕ ສຸຂຸມຕຣສ຺ສ ປຏິລາຠາຍ ປຸຎ຺ຎນ຺ຕິ, ລຠນຏ຺ຐານໍ ຄມິສ຺ສາມິ ອມ຺ມາຕິ. ປຸຕ຺ຕ ອຫໍ ອຊ຺ເຊວ ຕວ ພາຣາຓສີນຄເຣ ຣຊ຺ຊປຏິລາຠໍ ອິຈ຺ຉາມີຕິ ອາຫ. ໂສ ສາຘຸ ອມ຺ມາຕິ ມາຕຣໍ ວນ຺ທິຕ຺ວາ ປທກ຺ຂິຓໍ ກຕ຺ວາ ປກ຺ກາມິ. ມາຕຸຍາ ປນສ຺ສ ເອວໍ ອໂຫສິ. ກຫໍ ໂສ ຄມິສ຺ສຕິ, ປຸພ຺ເພວິຍ ອິຘວາ ເອຕ຺ຖວາ ເຄເຫ ນິສີທິຕ຺ວາ ອາຄຈ຺ຉຕີຕິ, ໂສ ປນ ປຸຎ຺ຎນິຍາເມນ ໂຈທິຍມາໂນ ຄາມໂຕ ນິກ຺ຂມິຕ຺ວາ ພາຣາຓສິໍ ຄນ຺ຕ຺ວາ ເສນຄຸຕ຺ຕສ຺ສ ເຄເຫ ປຏິວສຕິ, ອເຖກທິວສໍ ໂສ ຕສ຺ສ ກມ຺ມກາເຣຫິ ສທ຺ຘິໍ ສລ຺ລປນ຺ໂຕ ນິສີທິຕ຺ວາ ປຈລາຍນ຺ໂຕ ສຸປິນໍ ອທ຺ທສ. ມຸເຂນ ອນ຺ຕໍ ນິກ຺ຂມິຕ຺ວາ ສກລຊມ຺ພຸທີເປ ປຕ຺ຖຣິຕ຺ວາ ອນ຺ໂຕກຸຈ຺ຉິເມວ ປາວິສິ. ປພຸທ຺ໂຘ ໂສ ຠີໂຕ ມຫາສທ຺ທມກາສິ. ອຖ ນໍ ມຫາເສນຄຸຕ຺ໂຕ ປຸຈ຺ຉິ. ນນ຺ທິໂຍ ສຸປິນໍ ອທ຺ທສນ຺ຕິ ອາຫ. ອຖ ເຕນ ກີທິສນ຺ຕິ ປຸຏ຺ໂຐ ກເຖສິ, ຕໂຕ ເສນຄຸຕ຺ໂຕ ຕໍ ອຕ຺ຕໂນ ກຸລູປຄໍ ປຣິພ຺ພາຊິກໍ ປຸຈ຺ຉິ ໂກ ຕສ຺ສ ວິປາໂກຕິ. ປຣິພ຺ພາຊິກາ ຍທິ ໂຠ ອິຕ຺ຖີ ປສ຺ສຕິ. ສຕ຺ຕທິວສພ຺ຠນ຺ຕເຣເຍວ ອຠິເສກໍ ລຠຕິ, ຍທິ ປຸຣິໂສ ປສ຺ສຕິ, ຕເຖວ ຣາຊາ ໂຫຕີຕິ ກເຖສິ. ເສນຄຸຕ຺ໂຕ ຕສ຺ສາ ຕໍ ກຖໍ ສຸຕ຺ວາ ອິມໍ ມມ ຎາຕິໍ ກໂຣມີຕິ ອຕ຺ຕໂນ ສຕ຺ຕ ຘີຕເຣ ປກ຺ໂກສິຕ຺ວາ ປຏິປາຏິຍາ ປຸຈ຺ຉິ. ນນ຺ທິຍສ຺ສ ສນ຺ຕິເກ ວສຖາຕິ, ເສສາ ສພ຺ພາ ນ ອິຈ຺ຉິໍສຸ, ນ ມຍໍ ຊານາມ ເອຕໍ ອຘຸນາຄຕໍ ກຸລວນ຺ຕໍ ວາ ທຸກ຺ກຸລວນ຺ຕໍວາຕິ. ອຖ ກຓິຏ຺ຐິກໍ ປຸຈ຺ຉິ. ສາ ຍສ຺ສ ມໍ ມາຕາປິຕໂຣ ທສ຺ສນ຺ຕິ. ເຕສໍ ວຈນໍ ນ ຠິນ຺ທິສ຺ສາມີຕິ ສມ຺ປຏິຈ຺ຉິ, ອຖ ເສນຄຸຕ຺ໂຕ ນນ຺ທິຍໍ ປກ຺ໂກສິຕ຺ວາ ອຕ຺ຕໂນ ຘີຕຣໍ ທຕ຺ວາ ຕສ຺ສ ມຫາສມ຺ປຕ຺ຕິ ມທາສິ. ຕໂຕ ສຕ຺ຕເມ ທິວເສ ນນ຺ທິໂຍ ຕຕ຺ຖ ຕຕ຺ຖ ອາຫິຓ຺ຑນ຺ໂຕ ຣຎ຺ໂຎ ມງ຺ຄລຸຍ຺ຍານໍ ປສ຺ສິສ຺ສາມີຕິ ຄນ຺ຕ຺ວາ ຘງ຺ຄລສິລາປຏ຺ເຏສສີສໍ ປາຣຸປິຕ຺ວາ ນິປຊ຺ຊິ, ໂສ ຈ ພາຣາຓສີຣຎ຺ໂຎ ກາລງ຺ກຕສ຺ສ ສຕ຺ຕໂມ ທິວໂສ ໂຫຕິ. ອມຈ຺ຈາຈ ປຸໂຣຫິໂຕຈ ຣຎ຺ໂຎ ສຣີຣກິຈ຺ຈໍ ກາເຣຕ຺ວາ ຣາຊງ຺ຄເຓ ນິສີທິຕ຺ວາ ມນ຺ຕຍິໍສຸ. ຣຎ຺ໂຎ ເອກາວ ຘີຕາ ອຕ຺ຖິ, ປຸຕ຺ໂຕ ປນສ຺ສ ນຕ຺ຖິ. ອຣາຊິກໍ ຣຊ຺ຊໍ ນ ຕິຏ຺ຐຕິ. ຜຸສ຺ສຣຖໍ ວິສ຺ສຊ຺ເຊສ຺ສາມາຕິ. ເຕ ກຸມຸທປຕ຺ຕວຓ຺ເຓ ຈຕ຺ຕາໂຣ ສິນ຺ຘເວ ໂຍເຊຕ຺ວາ ເສຕຈ຺ຉຕ຺ຕປມຸຂໍປຎ຺ຈວິຘຣາຊກກຸຘຠຓ຺ຑໍ ຣຖສ຺ມິໍເຍວ ຐເປຕ຺ວາ ຣຖໍ ວິສ຺ສຊ຺ເຊຕ຺ວາ ປຈ຺ຉໂຕ ຕຸຣິຍານິ ປຄ຺ຄຓ຺ຫາເປສຸໍ. ຣໂຖ ປາຈີທ຺ວາເຣນ ນິກ຺ຂມິຕ຺ວາ ອຸຍ຺ຍານາຠິມຸໂຂ ອໂຫສິ. ປຣິຈເຍນ ອຸຍ຺ຍານາຠິມຸໂຂ ຄຈ຺ຉຕິ. ນິວຕ຺ເຕມາຕິ ເກຈິ ອາຫໍສຸ. ປຸໂຣຫິໂຕ ມາ ນິວາຣຍິຕ຺ຖາຕິ ອາຫ. ຣໂຖ ກຸມາຣກໍ ປທກ຺ຂິຓໍ ກຕ຺ວາ ອາໂຣຫຓສຊ຺ໂຊ ຫຸຕ຺ວາ ອຏ຺ຐາສິ. ປຸໂຣຫິໂຕ ປາຣຸປຓກຓ຺ຓໍ ອປເນຕ຺ວາ ປາທຕລານິ ໂອໂລເກນ຺ໂຕ ຕິຏ຺ຐຕຸ ອຍໍ ທີໂປ. ທ຺ວິສຫສ຺ສທີປ ປຣິວາເຣສຸ ຈຕູສຸ ມຫາທີເປສຸ ເອກຣຊ຺ຊໍ ກາຕຸໍ ສມຕ຺ໂຖຕິວຕ຺ວາ ຕສ຺ສ ຘິຕິໍ ອຸປຘາເຣຕຸໍ ຕິກ຺ຂຕ຺ຕຸໍ ຕຸຣິຍານິ ປຄ຺ຄຓ຺ຫາເປສິ. ອຖ ກຸມາໂຣ ມຸຂໍ ວິວຣິຕ຺ວາ ໂອໂລເກຕ຺ວາ ເກນ ກາຣເຓນ ອາຄຕຕ຺ຖາຕິ ອາຫ, ເທວ ຕຸມ຺ຫາກໍ ຣຊ຺ຊໍ ປາປຸຓາຕີຕິ, ຣາຊາ ກຫນ຺ຕິ, ເທວຕ຺ຕໍ ຄໂຕ ສາມີຕິ, ກຕິ ທິວສາ ອຕິກ຺ກນ຺ຕາຕິ, ອຊ຺ຊ ສຕ຺ຕໂມ ທິວໂສຕິ. ປຸຕ຺ໂຕ ວາ ຘີຕາ ວາ ນຕ຺ຖີຕິ, ຘີຕາ ອຕ຺ຖິ ເທວ. ປຸຕ຺ໂຕ ນ ວິຊ຺ຊຕີຕິ, ເຕນຫິ ກຣິສ຺ສາມິ ຣຊ຺ຊນ຺ຕິ, ເຕ ຕາວເທວ ອຠິເສກມຓ຺ຑປໍ ກາເຣຕ຺ວາ ຣາຊຘີຕຣໍ ສພ຺ພາລງ຺ກາເຣຫິ ອລງ຺ກາຣິຕ຺ວາ ອຸຍ຺ຍານໍ ເນຕ຺ວາ ກຸມາຣສ຺ສ ອຠິເສກໍ ອກໍສຸ, ອຖສ຺ສ ກຕາຠິເສກສ຺ສ ສຕສຫສ຺ສຄ຺ຆນກໍ ວຕ຺ຖໍ ອາເນສຸໍ, ໂສ ກິມິທໍ ຕາຕາຕິ ອາຫ, ນິວາສນວຕ຺ຖໍ ເທວາຕິ, ນນຸ ຕາຕາ ຖູລໍຕິ, ມນຸສ຺ສານໍ ປຣິໂຠຄວຕ຺ເຖສຸ ອິໂຕ ສຸຂຸມຕຣໍ ນຕ຺ຖິ ເທວາຕິ, ຕຸມ຺ຫາກໍ ຣາຊາ ເອວຣູປໍ ນິວາເສສີຕິ, ອາມ ເທວາຕິ. ນ ມຎ຺ເຎ ປຸຎ຺ຎວາ ຕຸມ຺ຫາກໍ ຣາຊາຕິ ວຕ຺ວາ ຫນ຺ທ ສຸວຓ຺ຓຠິງ຺ກາຣໍ ອາຫຣຖ, ລຠິສ຺ສາມ ວຕ຺ຖນ຺ຕິ, ເຕ ສຸວຓ຺ຓຠິງ຺ກາຣໍ ອາຫຣິໍສຸ, ໂສ ອຸຏ຺ຐາຍ ຫຕ຺ເຖ ໂຘວິຕ຺ວາ ມຸຂໍ ວິກ຺ຂາເລຕ຺ວາ ຫຕ຺ເຖນ ອຸທກໍ ອາທາຍ ປຸຣຕ຺ຖິມທິສາຍ ອພ຺ຠຸກ຺ກິຣິ, ຕາວເທວ ຆນປຖວິໍ ຠິນ຺ທິຕ຺ວາ ໂສຬສກປ຺ປຣຸກ຺ຂາ ອຸຏ຺ຐຫິໍສຸ, ປຸນ ອຸທກໍ ຫຕ຺ເຖນ ຄເຫຕ຺ວາ ທກ຺ຂິຓໍ ປຈ຺ຉິມໍ ອຸຕ຺ຕຣນ຺ຕິ ເອວໍ ຈຕສ຺ໂສປິ ທິສາ ອພ຺ຠຸກ຺ກິຣິ, ສພ຺ພທິສາສຸ ໂສຬສ ໂສຬສ ຫຸຕ຺ວາ ຈຕຸສຏ຺ຐິກປ຺ປຣຸກ຺ຂາ ອຸຏ຺ຐຫິໍສຸ, ໂສ ເອກໍ ທິພ຺ພທຸສ຺ສໍ ນິວາເສຕ຺ວາ ເອກໍ ປາຣຸປິຕ຺ວາ ນນ຺ທິຍຣຎ຺ໂຎ ວິຊິເຕ ສຸຕ຺ຕກນ຺ຕິກາ ອິຕ຺ຖິໂຍ ມາ ສຸຕ຺ຕໍ ກນ຺ຕນ຺ຕູຕິ ເຠຣິໍ ຈຣາເປຖາຕິ ວຕ຺ວາ ຉຕ຺ຕໍ ອຸສ຺ສາເປຕ຺ວາ ອລງ຺ກຕປຏິຍຕ຺ໂຕ ຫຕ຺ຖິກ຺ຂນ຺ຘວຣຄໂຕ ນຄຣໍ ປວິສິຕ຺ວາ ປາສາທມຠິຣຸຍ຺ຫ ມຫາສມ຺ປຕ຺ຕິໍ ອນຸຠວິ. ອໂຫ ຕທາ ປຈ຺ເຈກພຸທ຺ຘສ຺ສ ທິນ຺ນານຸວາຕກສ຺ສ ວິປາໂກ. ເຕນາຫຸ ໂປຣາຓາ.

໑໒.

ຍຖາ ສາສປມຕ຺ຕມ຺ຫາ, ພີຊາ ນິຄ຺ໂຣຘປາທໂປ;

ຊາຍເຕ ສຕສາຂຑ຺ໂຒ, ມຫານີລມ຺ພຸໂທປໂມ.

໑໓.

ຕເຖວ ປຸຎ຺ຎກມ຺ມມ຺ຫາ, ອຓຸມ຺ຫາ ວິປຸລໍ ຜລໍ;

ໂຫຕີຕິ ອປ຺ປປຸຎ຺ຎນ຺ຕິ, ນາວມຎ຺ເຎຍ຺ຍ ປຓ຺ຑິໂຕຕິ.

ເອວໍ ຄຈ຺ຉນ຺ເຕ ກາເລ ເອກທິວສໍ ເທວີ ຣຎ຺ໂຎ ສມ຺ປຕ຺ຕິໍ ທິສ຺ວາ ອໂຫ ຕປສ຺ສີຕິ ກາຣຸຎ຺ຎາກາຣໍ ທສ຺ເສສິ. ກິມິທໍ ເທວີຕິ ຈ ປຸຏ຺ຐາ ອຕິມຫຕີ ເຕ ເທວ ສມ຺ປຕ຺ຕິ. ອຕີຕມທ຺ຘານໍ ກລ຺ຍາຓໍ ກຕຕ຺ຕາ. ອິທານິ ອນາຄຕສ຺ສຕ຺ຖາຍ ກຸສລໍ ກໂຣຖາຕິ ອາຫ. ກສ຺ສ ທສ຺ສາມ. ສີລວນ຺ຕາ ນຕ຺ຖີຕິ. ອສຸຎ຺ໂຎ ເທວ ຊມ຺ພຸທີໂປ ອຣຫນ຺ເຕຫິ, ຕຸມ຺ເຫ ທານໍ ສຊ຺ເຊຖ, ອຫໍ ອຣຫນ຺ເຕ ລຈ຺ຉາມີຕິ ອາຫ. ປຸນທິວເສ ຣາຊາ ມຫາຣຫໍ ທານໍ ສຊ຺ຊາເປສິ. ເທວີ ສເຈ ອິມິສ຺ສາ ທິສາຍ ອຣຫນ຺ໂຕ ອຕ຺ຖິ, ອິຘາ ຄນ຺ຕ຺ວາ ອມ຺ຫາກໍ ຠິກ຺ຂໍ ຄຓ຺ຫນ຺ຕູຕິ ອຸຕ຺ຕຣຫິມວນ຺ຕາຠິມຸຂີ ປຸປ຺ຜານິ ອຸທ຺ຘໍ ຂິປິຕ຺ວາ ອຸເຣນ ນິປຊ຺ຊິ. ອຖ ຕານິ ປຸປ຺ຜານິ ອາກາສໂຕ ຄນ຺ຕ຺ວາ ຫິມວນ຺ຕປເທເສ ວສນ຺ຕານໍ ປທຸມວຕິຍາ ປຸຕ຺ຕານໍ ປຎ຺ຈສຕານໍປຈ຺ເຈກພຸທ຺ຘານໍ ເຊຏ຺ຐກມຫາປທຸມປຈ຺ເຈກພຸທ຺ຘສ຺ສ ປາທມູເລ ປຕິໍສຸ. ຕຖາຫິ.

໑໔.

ອໂຫ ປສ຺ສຖ ໂຠ ທານິ, ວິມ຺ຫຍໍ ປຸຎ຺ຎກມ຺ມຸໂນ;

ອເຈຕນາປິ ປຸປ຺ຜານິ, ທູຕກິຈ຺ເຈສຸ ພ຺ຍາວຏາ.

໑໕.

ກຕ຺ຕຸກາເມນ ໂລກສ຺ມິໍ, ສກລໍ ອຕ຺ຕໂນ ວສໍ;

ສພ຺ພຕ຺ຖາເມນ ກຕ຺ຕພ຺ພໍ, ປຸຎ຺ຎໍ ປຎ຺ຎວຕາ ສທາຕິ.

ຕໂຕ ມຫາປທຸມປຈ຺ເຈກພຸທ຺ໂຘ ຕໍ ຎຕ຺ວາ ເສສຠາຕເຣ ອາມນ຺ເຕສິ. ມາຣິສາ ນນ຺ທິຍຣາຊາ ຕຸມ຺ເຫ ນິມນ຺ເຕສິ. ອຘິວາເສຖ ຕສ຺ສ ນິມນ຺ຕນນ຺ຕິ. ເຕ ອຘິວາເສຕ຺ວາ ຕາວເທວ ອາກາເສນາ ຄນ຺ຕ຺ວາ ອຸຕ຺ຕຣທ຺ວາເຣ ໂອຕຣິໍສຸ. ມນຸສ຺ສາ ປຎ຺ຈສຕາ ເທວ ປຈ຺ເຈກພຸທ຺ຘາ ອາຄຕາຕິ ຣຎ຺ໂຎ ອາໂຣເຈສຸໍ, ຣາຊາ ສທ຺ຘິໍ ເທວິຍາ ຄນ຺ຕ຺ວາ ວນ຺ທິຕ຺ວາ ປຕ຺ເຕ ຄເຫຕ຺ວາ ປຈ຺ເຈກພຸທ຺ເຘ ປາສາທໍ ອາໂຣເປຕ຺ວາ ຕຕ຺ຖ ເຕສໍ ທານໍ ທຕ຺ວາ ຠຕ຺ຕກິຈ຺ຈາວສາເນ ຣາຊາ ສງ຺ຆຕ຺ເຖຣສ຺ສ ເທວີ ສງ຺ຆນວກສ຺ສ ຈ ປາທມູເລ ນິປຊ຺ຊິຕ຺ວາ ອຍ຺ຍາ ປຈ຺ຈເຍຫິ ນ ກິລມິສ຺ສນ຺ຕຸ, ມຍໍ ປຸຎ຺ເຎນ ນ ຫາຍິສ຺ສາມ, ອມ຺ຫາກໍ ອິຘ ວາສາຍ ປຏິຎ຺ຎໍ ເທຖາຕິ ປຏິຎ຺ຎໍ ກາເຣຕ຺ວາ ອຸຍ຺ຍາເນ ນິວາສຏ຺ຐານາທໂຍ ກາເຣຕ຺ວາ ຍາວຊີວໍ ປຈ຺ຈກພຸທ຺ເຘ ອຸປຏ຺ຐຫິຕ຺ວາ ເຕສຸ ປຣິນິພ຺ພຸເຕສຸ ສາຘຸກີຬນໍ ກາເຣຕ຺ວາ ຈນ຺ທນາ ຄຣຸອາທີຫິ ສຣີຣກິຈ຺ຈໍ ກາເຣຕ຺ວາ ຘາຕຸໂຍ ຄເຫຕ຺ວາ ເຈຕິຍໍ ປຕິຏ຺ຐາເປຕ຺ວາ ເອວຣູປານມ຺ປິ ມຫານຸຠາວານໍ ມເຫສີນໍ ມຣຓໍ ຠວິສ຺ສຕິ, ກິມງ຺ຄໍ ປນ ມາທິສານນ຺ຕິ ສໍເວຄຊາໂຕ ເຊຏ຺ຐປຸຕ຺ຕໍ ຣຊ຺ເຊ ປຕິຏ຺ຐາເປຕ຺ວາ ສຍໍ ປພ຺ພຊໍ ປພ຺ພຊິ, ເທວີປິ ຣຎ຺ເຎ ປພ຺ພຊິເຕ ອຫໍ ກິໍກຣິສ຺ສາມີຕິ ປພ຺ພຊິຕ຺ວາ ທ຺ເວປິ ອຸຍ຺ຍາເນ ວສນ຺ຕາ ຌານາຠິຎ຺ຎໍ ນິພ຺ພຕ຺ເຕຕ຺ວາ ຌານສຸເຂນ ວີຕິນາເມນ຺ຕາ ອາຍຸປຣິໂຍສາເນ ພ຺ຣຫ຺ມໂລເກ ນິພ຺ພຕ຺ຕິໍສຸ. ເຕ ອມ຺ຫາກໍ ຠຄວໂຕ ກາເລ ພ຺ຣາຫ຺ມຓກຸເລ ນິພ຺ພຕ຺ຕິຕ຺ວາ ພຸທ຺ຘສາສເນ ປພ຺ພຊິໍສຸ, ຕທາ ນນ຺ທິຍຣາຊາ ຘຸຕງ຺ຄຘຣານໍ ອຄ຺ໂຄ ມຫາກສ຺ສປຕ຺ເຖໂຣນາມ ຫຸຕ຺ວາ ຈນ຺ໂທ ວິຍ ສຸຣິໂຍ ວິຍຈ ໂລເກ ປາກໂຏ ຫຸຕ຺ວາ ຠຄວຕິ ປຣິ- ນິພ຺ພຸເຕ ພຸທ຺ຘສາສນໍ ອຕິວິຍ ໂສເຠຕິ. ຠຣິຍາປິສ຺ສ ຠທ຺ທກາປິຬານີ ນາມ ອໂຫສີຕິ.

໑໖.

ທຕ຺ວາ ປຸເຣໂກ ວິປິເນ ຈຣນ຺ໂຕ,

ປຈ຺ເຈກພຸທ຺ຘສ຺ສນຸວາຕມຕ຺ຕໍ;

ກຕ຺ວາ ສຣຏ຺ຐໍ ກຸຣຸທີປໂສຠໍ,

ມຫານຸຠາໂວ ວສຸຘາ ຘິໂປສິ.

໑໗.

ຕຸມ຺ເຫຈ ໂຠນ຺ໂຕ ຂລຸ ສີລວນ຺ເຕ,

ທທາຖ ທານານິ ອນປ຺ປການິ;

ຕໍ ໂວ ປຕິຏ຺ຐາຈ ຠວນ຺ຕຣສ຺ມິໍ,

ຈິນ຺ຕາມຓິໍ ກປ຺ປຕຣຸໍວ ສາຣນ຺ຕິ.

ນນ຺ທິຍຣາຊສ຺ສ ວຕ຺ຖຸໍ ປຖມໍ.

໑໒. ອຎ຺ຎຕຣມນຸສ຺ສສ຺ສ ວຕ຺ຖຸມ຺ຫິ ອຍມານຸປຸພ຺ພີກຖາ

ອມ຺ຫາກໍ ຠຄວຕິ ປຣິນິພ຺ພຸເຕ ປາຏລິປຸຕ຺ຕສມີເປ ອຎ຺ຎຕຣສ຺ມິໍ ຄາເມ ອຎ຺ຎຕໂຣ ທຸຄ຺ຄຕມນຸສ຺ໂສ ວສຕິ, ໂສ ປເນກທິວສໍ ອຎ຺ຎຕຣໍ ຄາມໍ ຄຈ຺ຉນ຺ໂຕ ທ຺ເວ ສາຏເກ ນິວາເສຕ຺ວາ ມຫນ຺ຕໍ ອຏວິໍປາປຸຓິ, ຕເທວໍ ຄຈ຺ຉນ຺ຕໍ ທິສ຺ວາ ເອຕສ຺ສ ວຕ຺ຖໍ ຄຓ຺ຫິສ຺ສາມີຕິ ເອໂກ ໂຈໂຣ ອນຸພນ຺ຘິ, ໂສ ທູຣໂຕວ ອາຄຈ຺ຉນ຺ຕໍ ໂຈຣໍ ທິສ຺ວາ ຈິນ຺ເຕສິ, ອຫເມຕສ຺ມາ ປລາຍິຕຸໍ ວາ ເຕນ ສທ຺ຘິໍຍຸຊ຺ຌິຕຸໍ ວາ ນ ສກ຺ໂກມິ, ອຍມາຄນ຺ຕ຺ວາ ອວສ຺ສໍ ອນິຈ຺ຉນ຺ຕສ຺ສາປິ ເມ ວຕ຺ຖໍ ຄຓ຺ຫິສ຺ສຕິ. ມຍາປິສ຺ສ ນິຣຕ຺ຖເກນ ຫຣິຕຸໍ ນ ສກ຺ກາ, ທານວເສນສ຺ສ ທສ຺ສາມີຕິ ສນ຺ນິຏ຺ຐານ ມກາສິ, ອຖ ໂຈໂຣ ອາຄນ຺ຕ຺ວາ ວຕ຺ຖກໍ ປຣາມສິ, ອຖ ໂສ ປຸຣິໂສ ຈິຕ຺ຕໍ ປສາເທຕ຺ວາ ອິມໍ ມມ ວຕ຺ຖທານໍ ຠວໂຠຄສຸຂຕ຺ຖາຍ ປຈ຺ຈໂຍ ໂຫຕູຕິ ວຕ຺ຖໍ ທຕ຺ວາ ທຸຈ຺ຉາທິຕຕ຺ຕາ ມຫາມຄ຺ຄໍ ປຫາຍ ອຎ຺ເຎນ ຊງ຺ຆາມຄ຺ເຄນ ຄຈ຺ຉນ຺ໂຕ ອາສິວິເສນ ທຏ຺ໂຐ ກາລໍ ກຕ຺ວາ ຫິມວນ຺ຕປ຺ປເທເສ ທ຺ວາທສໂຍຊນິເກ ກນກວິມາເນ ເນກຈ຺ຉຣາສຫສ຺ສປຣິວຸໂຕ ນິພ຺ພຕ຺ຕິ. ວິມານໍ ປນສ຺ສ ປຣິວາເຣຕ຺ວາ ຕິໂຍຊນິເກ ຐາເນ ກປ຺ປຣຸກ຺ຂາ ນິພ຺ພຕ຺ຕິໍສຸ, ໂສ ມຫນ຺ຕໍ ທິພ຺ພສມ຺ປຕ຺ຕິໍ ທິສ຺ວາ ໂສມນສ຺ສໍ ປເວເທນ຺ໂຕ ອາຫ.

໑.

ປຣິຓາມິຕມຕ຺ເຕນ, ທານສ຺ສ ສກສນ຺ຕກໍ;

ທທາຕິ ວິປຸລໍ ໂຠຄໍ, ທິພ຺ພມິສ຺ສຣິຍໍ ວຣໍ.

໒.

ທ຺ວາທສໂຍຊນຸພ຺ເພຘໍ, ທຸທ຺ທິກ຺ຂໍ ຈກ຺ຂຸມູສນໍ;

ກູຏາ ຄາຣວຣຸເປຕໍ, ສພ຺ພໂສວຓ຺ຓຍໍ ສຸຠໍ.

໓.

ມມ ປຸຎ຺ເຎນ ນິພ຺ພຕ຺ຕໍ, ເນກຣາຄທ຺ຘຊາກຸລໍ,

ຕເຖວ ປຣິສຸທ຺ເຘຫິ, ວິຕາເນຫິ ຈ ລງ຺ກຕໍ.

໔.

ປາສາທປຣິຍນ຺ຕມ຺ຫິ, ທິພ຺ພວຕ຺ຖານິ ລມ຺ພເຣ;

ວາເຕຣິຕາ ເຕ ໂສຠນ຺ຕິ, ອວ຺ເຫນ຺ຕາວ ສຸຘາສິໂນ.

໕.

ປາສາທສ຺ສ ສມນ຺ຕາ ເມ, ຠູມິຠາເຄ ຕິໂຍຊເນ;

ອິຈ຺ຉິຕິຈ຺ຉິຕທາຕາໂຣ, ຊາຕາສຸໍ ສຸຣປາທປາ.

໖.

ຕຕ຺ຖ ນຈ຺ເຈຫິ ຄີເຕຫິ, ວາເທຫິ ຕຸຣິເຍຫິ ຈ;

ເນ ກຈ຺ຉຣາສຫສ຺ເສຫິ, ໂມທາມິ ຠວເນ ມມ.

໗.

ນ ສມ຺ມາ ທິນ຺ນວຕ຺ຖສ຺ສ, ອກ຺ເຂຕ຺ເຕ ຜລມີ ທິສໍ;

ເຂຕ຺ເຕ ສມ຺ມາ ທທນ຺ຕສ຺ສ, ໂກ ຜລໍ ວຓ຺ຓຍິສ຺ສຕີຕິ.

໘.

ເອວໍ ວິຘມ຺ປິ ກຸສລໍ ມນຸໂຊ ກຣິຕ຺ວາ,

ປປ຺ໂປຕິ ທິພ຺ພວິຠວໍ ມຸນິວຓ຺ຓນີຍໍ;

ມນ຺ຕ຺ວານ ໂຠ ທທຖ ທານວຣໍ ສຸສີເລ,

ສທ຺ຘາຍ ສຸທ຺ຘມນສາສ຺ສ ວິເສສຠາຄີຕິ.

ອຎ຺ຎຕຣມນຸສ຺ສສ຺ສ ວຕ຺ຖຸໍ ທຸຕິຍໍ.

໑໓. ວິສມໂລມກຸມາຣສ຺ສ ວຕ຺ຖຸມ຺ຫິ ອຍມານຸປຸພ຺ພີກຖາ

ອຕີເຕ ກິຣ ອິມສ຺ມິໍ ຊມ຺ພຸທີເປ ກສ຺ສໂປ ນາມ ສມ຺ມາສມ຺ພຸທ຺ໂຘ ປາຣມິໂຍ ປູເຣຕ຺ວາ ສພ຺ພຎ຺ຎຸຕໍ ປຕ຺ໂຕ ໂລກສ຺ສ ທຸກ຺ຂາປນຸໂທ ສຸຂາວໂຫ ປຏິວສຕິ ໂລກໍ ນິພ຺ພາຓມຫານຄຣວເຣ ປຣິປູເຣນ຺ໂຕ. ຕສ຺ມິໍ ສມເຍ ອຎ຺ຎຕໂຣ ປຸຣິໂສ ສຕ຺ຖຸ ຘມ຺ມເທສນໍ ສຸຕ຺ວາ ປສນ຺ໂນ ຠິກ຺ຂຸສງ຺ຆສ຺ສ ທານໍ ເທນ຺ໂຕ ສີລໍ ຣກ຺ຂນ຺ໂຕ ອຸໂປສຖກມ຺ມໍ ກໂຣນ຺ໂຕ ນານາວິຘານິ ປຸຎ຺ຎກມ຺ມານິ ກຕ຺ວາ ສຸຕ຺ຕປ຺ປພຸທ຺ໂຘວິຍ ຄນ຺ຕ຺ວາ ເທວໂລເກ ນິພ຺ພຕ຺ຕິ ສພ຺ພຣຕນມເຍ ທິພ຺ພວິຘາເນ ເທວຈ຺ຉຣາສຫສ຺ສປຣິວຸໂຕ. ຕຕ຺ຖ ຍາວຕາຍຸກໍ ຐຕ຺ວາ ຕໂຕ ຈຸໂຕ ອມ຺ຫາກໍ ຠຄວຕິ ປຣິນິພ຺ພຸເຕ ຊມ຺ພຸທີເປ ປາຏລິປຸຕ຺ຕນຄເຣ ອາຓາຈກ຺ກວຕ຺ຕິຘມ຺ມາໂສກມຫານຣິນ຺ທສ຺ສ ອຄ຺ຄມເຫສິຍາ ກຸຈ຺ຉິມ຺ຫິ ນິພ຺ພຕ຺ຕິ. ຕສ຺ສ ນາມໍ ກໂຣນ຺ໂຕ ສີເສ ໂລມໍ ວິສມໍ ຫຸຕ຺ວາ ຊາຕຕ຺ຖາ ວິສມໂລມກຸມາໂຣຕິ ສຎ຺ຊານິໍສຸ. ໂສ ກເມນ ວິຎ຺ຎຸຕໍ ປຕ຺ໂຕ ພລສມ຺ປນ຺ໂນ ອໂຫສິ. ມຫາຖາໂມ ອຠິຣູໂປຈ ອໂຫສິ. ທສ຺ສນີໂຍ ປາສາທິໂກ ຍສປຣິວາຣສມ຺ປນ຺ໂນ ປຏິວສຕິ. ຕໂຕ ອປເຣນ ສມເຍນ ຘມ຺ມາໂສກມຫານຣິນ຺ໂທ ຈຕຸຣາສີຕິສຫສ຺ສຣາຊປຣິວຸໂຕ ອນນ຺ຕພລວາຫໂນ ກີ ຬາ ປ ໂຣ ຫິມວນ຺ຕໍ ຄນ຺ຕ຺ວາ ຍຖາຠິຣນ຺ຕໍ ກີຬິຕ຺ວາ ອາຄຈ຺ຉນ຺ໂຕ ຈນ຺ທຠາຄໍ ນາມ ຄງ຺ຄໍ ສມ຺ປາປຸຓິ. ສາ ປນ ໂຍຊນວິຕ຺ຖຕາ ຕິຄາວຸຕຄມ຺ຠີຣາ ອໂຫສິ. ຕທາ ສາ ອຘຸນາຄເຕຫິ ໂອເຆຫິ ມຫາເຜຓສມາກຸລາ ພຫູມິໂຍ ອຸໂຠກູເລ ອຸຕ຺ຕຣນ຺ຕີ ມຫາເວຄາ [ມຫາເວຄາຄຈ຺ຉນ຺ຕີ ອິຕິສພ຺ພຕ຺ຖ] ຄຈ຺ຉນ຺ຕິ. ຕທາ ຣາຊາ ຄງ຺ຄໍ ທິສ຺ວາ ໂກ ນາເມຕ຺ຖ ປຸຣິໂສ ເອວໍວິຘໍ ມຫາຄງ຺ຄໍ ຕຣິຕຸໍ ສມຕ຺ໂຖ ຠວິສ຺ສຕີຕິ ອາຫ. ຕໍ ສຸຕ຺ວາ ວິສມໂລມ ກຸມາໂຣ ອາຄນ຺ຕ຺ວາ ວນ຺ທິຕ຺ວາ ອຫໍ ເທວ ຄງ຺ຄໍ ຕຣິຕ຺ວາ ຄນ຺ຕຸຎ຺ຈ ອາຄນ຺ຕຸຎ຺ຈ ສກ຺ໂກມີຕິ ອາຫ. ຣາຊາ ສາຘູຕິ ສມ຺ປຏິຈ຺ຉິ. ອຖ ກຸມາໂຣ ຄາຬ຺ຫໍ ນິວາເສຕ຺ວາ ມກຣທນ຺ຕິຍາ ເກເສ ພນ຺ຘິຕ຺ວາ ຄງ຺ຄາກູເລ ຐິໂຕ ອຏ຺ຐາຣສຫຕ຺ຖໍ ອພ຺ຠຸຄ຺ຄນ຺ຕ຺ວາ ອຸສຠມຕ຺ຕຏ຺ຐາເນ ປຕິຕ຺ວາ ຕຣິຕຸ ມາຣຠິ. ຕໂຕ ຈຓ຺ຑໂສຕໍ ຉິນ຺ທິຕ຺ວາ ຕຣນ຺ໂຕ ຄມນາ ຄມນກາເລ ຄຓ຺ຫນຕ຺ຖາຍ ອາຄເຕ ຈຓ຺ຑສຸໍສຸມາເຣ ປາຓິນາ ປຫຣິຕ຺ວາ ຈຸຓ຺ຓວິຈຸຓ຺ຓໍ ກໂຣນ຺ໂຕ ວີສສຕໍ ມາເຣຕ຺ວາ ອຸຕ຺ຕາເຣຕ຺ວາ ຕລມຸຄ຺ຄມ຺ມ ຣາຊານໍ ວນ຺ທິຕ຺ວາ ອຏ຺ຐາສິ. ຣາຊາ ຕໍ ກາຣຓໍ ທິສ຺ວາ ຠຍປ຺ປຕ຺ໂຕ ເອໂສ ໂຂ ມໍ ມາເຣຕ຺ວາ ຣຊ຺ຊມ຺ປິ ຄຫິຕຸໍ ສມຕ຺ໂຖ. ເອຕໍ ມາເຣຕຸໍ ວຏ຺ຏຕີຕິ ຈິນ຺ເຕຕ຺ວາ ນຄຣໍ ສມ຺ປຕ຺ໂຕ ກຸມາຣໍ ປກ຺ໂກສາເປຕ຺ວາ ອມຈ຺ເຈ ອາຫ. ອິມໍ ຠເຓ ພນ຺ຘນາຄາເຣ ກໂຣຖາຕິ. ເຕ ຕຖາ ກຣິໍສຸ, ອຖສ຺ສ ພນ຺ຘນາຄາເຣ ວສນ຺ຕສ຺ສ ຈຕ຺ຕາໂຣ ມາສາ ອຕິກ຺ກນ຺ຕາ. ຕໂຕ ຣາຊາ ຈຕຸມາສຈ຺ຈເຍນ ທີຆໂຕ ສຏ຺ຐິຫຕ຺ຖປ຺ປມາເຓ ສຏ຺ຐິເວຬຸກລາເປ ອາຫຣາເປຕ຺ວາ ຄຓ຺ຐິໂຍ ໂສຘາເປຕ຺ວາ ອນ຺ໂຕ ອໂຍສາຣໍ ປູເຣຕ຺ວາ ຣາຊງ຺ຄເຓ ຐປາເປຕ຺ວາ ວິສມໂລມກຸມາຣໍ ພນ຺ຘນາຄາຣໂຕ ອາຫາຣາເປຕ຺ວາ [ອາຓາເປຕ຺ວາ ອິຕິສພ຺ພຕ຺ຖ] ອມຈ຺ເຈ ເອວມາຫ. ຠເຓ ສ຺ວາຍໍ ກຸມາໂຣ ອິມິນາ ຂຄ຺ເຄນ ອິເມ ເວຬຸກລາເປ ຈຕຸຣງ຺ຄຸລໍ ກຕ຺ວາ ຉິນ຺ທຕຸ. ໂນ ເຈ ຉິນ຺ທິຕຸໍ ສກ຺ໂກຕິ. ຕໍ ມາເຣຖາຕິ ອາຫ, ຕໍ ສຸຕ຺ວາ ກຸມາໂຣ ອຫໍ ພນ຺ຘນາຄາເຣ ຈິ ຣ ວຸ ຕ຺ໂຖ ຊິຆຈ຺ຉາປີຬິໂຕ ອາຫາເຣນ ກິລມິໍ, ຍນ຺ນູນາຫໍ ອາຫາຣໍ ຠຸຎ຺ຈິຕ຺ວາ ຉິນ຺ເທຍ຺ຍນ຺ຕິ. ເຕ ນຕ຺ຖິ ທານິ ຕຸຍ຺ຫໍ ອາຫາຣນ຺ຕິ ອາຫໍສຸ. ເຕນຫິ ໂປກ຺ຂຣຓິຍາ ປານີຍໍ ປິວິສ຺ສາມີຕິ ອາຫ. ເຕ ສາຘູຕິ ໂປກ຺ຂຣຓິໍ ເນສຸໍ. ກຸມາໂຣ ໂປກ຺ຂຣຓິໍ ໂອຕຣິຕ຺ວາ ນຫາຍິຕ຺ວາ ນິມຸຄ຺ໂຄ ຍາວທຕ຺ຖໍ ກລລໍ ຠຸຎ຺ຈິຕ຺ວາ ປານີຍໍ ປິວິຕ຺ວາ ອຸຏ຺ຐາຍ ອສິປຕ຺ຕໍ ຄເຫຕ຺ວາ ມຫາຊນານໍ [ມຫາຊນານໍປສ຺ສນ຺ຕເມວ ອິຕິສພ຺ພຕ຺ຖ] ປສ຺ສນ຺ຕານເມວ ອຏ຺ຐາສີຕິຫຕ຺ຖຏ຺ຐານໍ ອາກາສໍ ອຸລ຺ລງ຺ຆິຕ຺ວາ ສພ຺ພເວຬຸກລາເປ ຈຕຸຣງ຺ຄຸລມຕ຺ເຕນ ຂຓ຺ຑາຂຓ຺ຑໍ ກຸຣຸມາໂນ ໂອຕຣິຕ຺ວາ ມູເລ ຖູລອຍສລາກໍ ປຕ຺ວາ ກິຓີຕິ ສທ຺ທໍ ສຸຕ຺ວາ ອສິປຕ຺ຕໍ ວິສ຺ສຊ຺ເຊຕ຺ວາ ໂຣທມາໂນ ອຏ຺ຐາສິ. ຕໂຕ ຣາຊປຸຣິເສຫິ ກິມຕ຺ຕໍ ໂຣທສີຕິ ວຸຕ຺ເຕ ເອຕ຺ຕການໍ ປຸຣິສານມນ຺ຕເຣ ມຍ຺ຫໍ ເອໂກປິ ສຸຫໂທ ນຕ຺ຕິ. ສເຈ ຠເວຍ຺ຍ, ອິເມສໍ ເວຬຸກລາປານມນ຺ຕເຣ ອໂຍ ສາຣໍ ອຕ຺ຖິຠາວໍ ກເຖຍ຺ຍ, ອຫໍ ປນ ຊານມາໂນ ອິເມ ເວຬຸ ກລາເປ ອງ຺ຄຸລງ຺ຄຸເລສຸ ຉິນ຺ເທຍ຺ຍນ຺ຕິ ອາຫ. ຕໂຕ ຣາຊາ ກຸມາເຣນ ກຕກມ຺ມໍ ໂອໂລເກຕ຺ວາ ປສນ຺ໂນ ອຸປຣາຊຏ຺ຐານໍ ພຫຸຎ຺ຈ ວິຠວໍ ທາເປສິ, ເອວມສ຺ສ ພລສມ຺ປຕ຺ຕິລາໂຠ ນາມ ນ ຊາຕິໂຄຕ຺ຕກຸລປເທສາທີນໍ ພລໍ. ນ ປາຓາຕິປາຕາທິທຸຈ຺ຈຣິຕານໍ ພລໍ. ກສ຺ເສຕໍ ພລນ຺ຕິ. ກສ຺ສປສມ຺ມາສມ຺ພຸທ຺ຘກາເລ ຠິກ຺ຂຸສງ຺ຆສ຺ສ ທິນ຺ນທານາທິສຸຈຣິຕກມ຺ມວິປາກໍ. ເຕນ ວຸຕ຺ຕໍ.

໑.

ກສ຺ສປສ຺ສ ມຸນິນ຺ທສ຺ສ, ກາເລ ອຎ຺ຎຕໂຣ ນໂຣ;

ສມ຺ພຸທ຺ຘມຸປສໍກມ຺ມ, ສຸຕ຺ວາ ຘມ຺ມໍ ສຸເທສິຕໍ.

໒.

ປຏິລທ຺ຘສທ຺ໂຘ ຫຸຕ຺ວາ, ສີລວນ຺ຕານ ຠິກ຺ຂຸນໍ;

ມຘຸຣນ຺ນປາເນ ປຈຸເຣ, ອທາສິ ສຸມໂນ ຕທາ.

໓.

ອທາສິ ຈີວເຣ ປຕ຺ເຕ, ຕເຖວ ກາຍພນ຺ຘເນ;

ອທາ ຂີຣສລາກຎ຺ຈ, ພຫູ ກຕ຺ຕຣຍຏ຺ຐິໂຍ.

໔.

ອທາ ສຸປສ຺ສຍໍ ທານໍ, ມຎ຺ຈປີຐາທິກໍ ຕຖາ;

ປາວາຣ ກມ຺ພລາທີນິ, ອທາ ສີຕນິວາຣເຓ.

໕.

ອທາ ເຠສຊ຺ຊທານານິ, ອາໂຣຄ຺ຍຕ຺ຖາຍ ຠິກ຺ຂຸນໍ;

ເອວໍ ນານາວິຘໍ ປຸຎ຺ຎໍ, ກຕ຺ວານ ຕິທິວໍ ຄໂຕ.

໖.

ຕຕ຺ຖ ທິພ຺ພວິມານມ຺ຫິ, ອຸປ຺ປນ຺ໂນ ໂສ ມຫິທ຺ຘິໂກ;

ເທວຈ຺ຉຣາປຣິວຸໂຕ, ເທວເສນາປຸຣກ຺ຂໂຕ.

໗.

ທິພ຺ເພຫິ ນຈ຺ຈຄີເຕຫິ, ທິພ຺ພວາທິຕຕນ຺ຕິຫິ;

ໂມທມາໂນ ອເນເກຫິ, ທິພ຺ພສມ຺ປຕ຺ຕິຍາ ສຫ.

໘.

ຍາວຕາຍຸໍ ຕຫິໍ ຐຕ຺ວາ, ຊມ຺ພຸທີເປ ມໂນຣເມ;

ປຸເຣ ປາຏລິປຸຕ຺ຕມ຺ຫິ, ຘມ຺ມາໂສກສ຺ສ ຣາຊິໂນ.

໙.

ປຸຕ຺ໂຕ ຫຸຕ຺ວານ ນິພ຺ພຕ຺ຕິ, ມຫາຖາໂມ ມຫາພໂລ;

ມຫາຍໂສ ມຫາໂຠໂຄ, ອາສິ ພຸທ຺ຘາທິມາມໂກ.

໑໐.

ກາຕພ຺ພໍ ກຸສລໍ ຕສ຺ມາ, ຠວສມ຺ປຕ຺ຕິ ມິຈ຺ຉຕາ;

ປາເລຕພ຺ພ ມໂຖ ສີລໍ, ຠາເວຕພ຺ພຎ຺ຈ ຠາວນນ຺ຕິ.

ຕໂຕ ກຸມາໂຣ ອຸປຣາຊຏ຺ຐານໍ ລຠິຕ຺ວາ ສມ຺ປຕ຺ຕິໍອນຸຠວມາໂນ ໂມຄ຺ຄລິປຸຕ຺ຕຕິສ຺ສຕ຺ເຖຣມາທິໍ ກຕ຺ວາ ມຫາຠິກ຺ຂຸສງ຺ຆສ຺ສ ຈີວຣປິຓ຺ຑປາຕເສນາສນຄິລານປຈ຺ຈຍທານາ ທິວເສນ ສກ຺ກາຣໍ ກຕ຺ວາ ສີລໍ ຣກ຺ຂິຕ຺ວາ ອຸໂປສຖກມ຺ມໍ ກຕ຺ວາ ອາຍຸປຣິໂຍສາເນ ຍຖາກມ຺ມໍ ຄໂຕຕິ.

໑໑.

ເອວໍວິຘໍ ສຸຈຣິຕໍ ສຸມໂນ ກຣິຕ຺ວາ,

ຠາຄິສ຺ສ ເນກວິຠວສ຺ສ ຠວາຠເວສຸ;

ຕຸມ຺ເຫປິ ໂຠ ສຸຈຣິຕໍ ວິຠວານຸຣູປໍ,

ກຕ຺ວານ ນິພ຺ພຸຕິປທໍ ກຣຄໍ ກໂຣຖາຕິ.

ວິສມໂລມກຸມາຣສ຺ສ ວຕ຺ຖຸໍ ຕຕິຍໍ.

໑໔. ກຎ຺ຈນເທວິຍາ ວຕ຺ຖຸມ຺ຫິ ອຍມານຸປຸພ຺ພີກຖາ

ຊມ຺ພຸທີເປ ກິຣ ເທວປຸຕ຺ຕນຄຣໍ ນາມ ທສ຺ສນີຍໍ ເອກໍ ນຄຣໍ ອໂຫສິ. ຕສ຺ມິໍ ສມເຍ ມນຸສ຺ສາ ເຍຠຸຍ຺ເຍນ ປຕ຺ຕມຫໍ ນາມ ປູຊໍ ກໂຣນ຺ຕິ, ຠຄວຕາ ປຣິຠຸຕ຺ຕປຕ຺ຕໍ ຄເຫຕ຺ວາ ກຕາເນກປູຊາວິຘານາ ອຸສ຺ສວໍ ກໂຣນ຺ຕິ. ຕໍ ປຕ຺ຕມຫນ຺ຕິ ວຸຈ຺ຈຕິ. ຕສ຺ມິໍ ສມເຍ ເທວປຸຕ຺ຕນຄເຣ ຣາຊາ ສພ຺ພຣຕນມຍໍ ຣຖໍ ສພ຺ພາລງ຺ກາເຣຫິ ອລງ຺ກາຣາເປຕ຺ວາ ກຸມຸທປຕ຺ຕວຓ຺ເຓ ຈຕ຺ຕາໂຣ ສິນ຺ຘເວ ໂຍເຊຕ຺ວາ ສຸສິກ຺ຂິຕສິປ຺ປາຈຣິເຍຫິ ສຕ຺ຕຣຕນປຣິນິຏ຺ຐິເຕ ອສີຕິຫຕ຺ຖເວຬຄ຺ເຄ ສຕ຺ຖຸນາ ປຣິຠຸຕ຺ຕໍ ເສລມຍປຕ຺ຕໍ ມຸຕ຺ຕາຊາລາທີຫິ ອລງ຺ກຣິຕ຺ວາ ເວຬຄ຺ຄໍ ອາໂຣເປຕ຺ວາ ເວຬຸໍ ຣເຖ ຐປາເປຕ຺ວາ ນຄຣໍ ເທວນຄຣໍ ວິຍ ອລງ຺ກຣິຕ຺ວາ ຘຊປຕາກາທໂຍ ອຸສ຺ສາເປຕ຺ວາ ໂຕຣຓຄ຺ຆ ກປນ຺ຕິໂຍຈ ປຸຓ຺ຓຆຏທີປມາລາທໂຍຈ ປຕິຏ຺ຐາເປຕ຺ວາ ອເນເກຫິ ປູຊາວິຘາເນຫິ ນຄຣໍ ປທກ຺ຂິຓໍ ກາເຣຕ຺ວາ ນຄຣມຊ຺ເຌ ສຸສຊ຺ຊິຕຣຕນມຓ຺ຑເປ ປຕ຺ຕຘາຕຸໍ ຐເປຕ຺ວາ ສຕ຺ຕເມ ທິວເສ ມຫາຘມ຺ມສວຓໍ ກາຣາເປສິ. ຕທາ ຕສ຺ມິໍ ຊນປເທ ພຫູ ມນຸສ຺ສາຈ ເທວຕາຈ ຍກ຺ຂຣກ຺ຂສນາຄສຸປຓ຺ຓາທໂຍຈ ມນຸສ຺ສເວເສນ ເຍຠຸຍ຺ເຍນ ຕໍ ສມາຄມໍ ໂອຕຣນ຺ຕິ, ເອວມຈ຺ຉຣິຍໍ ຕໍ ປູຊາວິຘານໍ ອໂຫສິ.

ຕທາ ເອໂກ ນາຄຣາຊາ ອຸຕ຺ຕມຣູປຘຣໍ ອຄຕປຸພ຺ພປຸຣິສໍ ເອກໍ ກຸມາຣິກໍ ຘມ຺ມປຣິສນ຺ຕເຣ ນິສິນ຺ນໍ ທິສ຺ວາ ຕສ຺ສາ ປຏິພທ຺ຘຈິຕ຺ໂຕ ອເນກາກາເຣຫິ ຕໍ ຍາ ຈິ ຕ຺ວາ ຕສ຺ສາ ອລທ຺ຘມາໂນ ກຸຊ຺ຌິຕ຺ວາ ນາສາວາຕໍ ວິສ຺ສຊ຺ເຊສິ ອິມໍ ມາເຣສ຺ສາມີຕິ. ຕໍ ຕສ຺ສາ ສທ຺ຘາພເລນ ກິຎ຺ຈິ ອຸປທ຺ທວໍ ກາຕຸໍ ສມຕ຺ໂຖ ນາໂຫສິ. ອຖສ຺ສາ ນາໂຄ ປາທໂຕ ປຏ຺ຐາຍ ຍາວສກລສຣີຣໍ ໂຠເຄນ ເວເຐຕ຺ວາ ສີເສ ຜຓໍ ກຕ຺ວາ ຠາຍາເປນ຺ໂຕ ອຏ຺ຐາສິ. ອນຎ຺ຎວິຫິຕາຍ ຕາຍ ຘມ຺ມສວຓພເລນ ອຓຸມຕ຺ຕມ຺ປິ ທຸກ຺ຂໍ ນາໂຫສິ. ປຠາຕາຍ ຣຕ຺ຕິຍາ ຕໍ ທິສ຺ວາ ມນຸສ຺ສາ ກິເມຕນ຺ຕິ ກາຣຓໍ ປຸຈ຺ຉິໍສຸ, ສາປິ ເຕສໍ ກເຖຕ຺ວາ ເອວໍ ສຈ຺ຈກິຣິຍມກາສິ. ຕຖາຫິ.

໑.

ພ຺ຣຫ຺ມຈາຣີ ອໂຫສາຫໍ, ສຎ຺ຊາຕາ ອິຘ ມານຸເສ;

ເຕນ ສຈ຺ເຈນ ມໍ ນາໂຄ, ຂິປ຺ປເມວ ປມຸຎ຺ຈຕຸ.

໒.

ກາມາຕຸຣສ຺ສ ນາຄສ຺ສ, ໂນກາສມກຣິໍຍໂຕ;

ເຕນ ສຈ຺ເຈນ ມໍ ນາໂຄ, ຂິປ຺ປເມວ ມຸຎ຺ຈຕຸ.

໓.

ວິສວາເຕນ ຂິຕ຺ຕສ຺ສ, ກຸປິຕສ຺ໂສຣຄສ຺ສຫໍ;

ອກຸທ຺ຘາ ເຕນ ສຈ຺ເຈນ, ໂສ ມໍ ຂິປ຺ປໍ ປມຸຎ຺ຈຕຸ.

໔.

ສທ຺ຘມ຺ມໍ ສຸຓມານາຫໍ, ຄຣຸຄາຣວຠຕ຺ຕິຍາ;

ອສ຺ໂສສິໍ ເຕນ ສຈ຺ເຈນ, ຂິປ຺ປໍ ນາໂຄ ປມຸຎ຺ຈຕຸ.

໕.

ອກ຺ຂຣໍວາ ປທໍວາປິ, ອວິນາເສຕ຺ວາວ ອາທິໂຕ;

ອສ຺ໂສສິໍ ເຕນ ສຈ຺ເຈນ, ຂິປ຺ປໍ ນາໂຄ ປມຸຎ຺ຈຕູຕິ.

ສຈ຺ຈກິຣິຍາວສາເນ ນາຄຣາຊາ ຕສ຺ສາ ອຕີວ ປສນ຺ໂນ ໂຠຄໍ ວິນິເວເຐຕ຺ວາ ຜຓສຕໍ ມາເປຕ຺ວາ ຕໍ ຜຓຄພ຺ເຠ ນິສີທາເປຕ຺ວາ ພຫູຫິ ນາຄມານວເກຫິ ສທ຺ຘິໍ ອຸທກປູຊໍ ນາມ ປູຊ ມກາສິ, ຕໍ ທິສ຺ວາ ພຫູ ນຄຣວາສິໂນ ອຈ຺ຉຣິຍພ຺ຠຸຕຊາຕາ ອຏ຺ຐາຣສໂກຏິຘເນນ ປູຊ ມກໍສຸ. ຕຖາຫິ.

໖.

ນຕ຺ຖິ ສທ຺ຘາສໂມ ໂລເກ, ສຸຫໂທ ສພ຺ພກາມໂທ;

ປສ຺ສຖສ຺ສາ ພລໍ ສທ຺ຘາ, ປູເຊນ຺ເຕວໍ ນໂຣ ຣຄາ.

໗.

ອິຘ ໂລເກວ ສາລຕ຺ຖ, ຠວໂຠຄ ມນປ຺ປກໍ;

ຕສ຺ມາ ສທ຺ເຘນ ກາຕພ຺ພໍ, ຣຕນຕ຺ຕຍຄາຣວນ຺ຕິ.

ອເຖວໍ ສາ ປຏິລທ຺ຘມຫາວິຠວາ ຍາວຊີວໍ ໂກມາຣິຍ ພ຺ຣຫ຺ມຈາຣິຓີ ຫຸຕ຺ວາ ອາຍຸປຣິໂຍສາເນ ກາລໍ ກຕ຺ວາ ຕສ຺ມິໍເຍວ ນຄເຣ ຣຎ຺ໂຎ ອຄ຺ຄມເຫສິຍາ ກຸຈ຺ຉິມ຺ຫິ ປຏິສນ຺ຘິໍ ຄຓ຺ຫິຕ຺ວາ ທສມາສຈ຺ຈເຍນ ມາຕຸກຸຈ຺ຉິໂຕ ນິກ຺ຂມິ. ນິກ຺ຂນ຺ຕທິວເສ ປນສ຺ສາ ສກລເທວປຸຕ຺ຕນຄເຣ ຣຕນວສ຺ສໍ ວສ຺ສິ. ເຕນສ຺ສາ ກຎ຺ຊນເທວີຕິ ນາມໍ ກຣິໍສຸ. ສມນ຺ຕປາສາທິກາ ອໂຫສິ. ອຠິຣູປາ ເທວຈ຺ຉຣປຏິຠາຄາ. ມຸຂໂຕ ອຸປ຺ປລຄນ຺ໂຘ ວາຍຕິ. ສຣີຣໂຕ ຈນ຺ທນຄນ຺ໂຘ ວາຍຕິ. ສກລສຣີຣໂຕ ພາລສຸຣິໂຍ ວິຍ ຣໍສິໂຍ ນິຈ຺ຉາເຣນ຺ຕີ ຈຕຸຣຕນຄພ຺ເຠ ປທີປກິຈ຺ຈໍ ນາມ ນຕ຺ຖິ. ສພ຺ໂພ ຄພ຺ໂຠ ສຣີຣາ ໂລເກນ ເອໂກ ຠາໂສ ໂຫຕິ, ຕສ຺ສາ ຣູປສມ຺ປຕ຺ຕິ ສກລຊມ຺ພຸທີເປ ປາກຏາ ອໂຫສິ. ຕໂຕ ສກລຊມ຺ພຸທີປວາສີ ຣາຊາໂນ ຕສ຺ສາ ອຕ຺ຖາຍ ປິຕຸຣຎ຺ໂຎ ປຓ຺ຓາກາຣານິ ປຫິຓິໍສຸ. ສາ ປນ ປຎ຺ຈກາເມ ອນນຸລິຕ຺ຕາ ປິຕຣໍ ອນຸຊານາເປຕ຺ວາ ຠິກ຺ຂຸນູ ປສ຺ສຍໍ ຄນ຺ຕ຺ວາ ປພ຺ພຊິຕ຺ວາ ວິປສ຺ສນໍ ວຑ຺ເຒຕ຺ວາ ສຫ ປຏິສມ຺ຠິທາຫິ ອຣຫຕ຺ຕໍ ປາປຸຓີຕິ.

໘.

ສຸຕ຺ວານ ສາທຣວເສນ ກຸມາຣິເກວໍ;

ຘມ຺ມຎ຺ຫິ ສີລມມລໍ ປຣິປາລຍນ຺ຕີ;

ລທ຺ຘານ ເນກວິຠວໍ ວິຠວໍ ປຍາຕາ,

ມາ ໂຠ ປມຊ຺ຊຖ ສທາ ກຸສລປ຺ປໂຍເຄຕິ.

ກຎ຺ຈນເທວິຍາ ວຕ຺ຖຸໍ ຈຕຸຕ຺ຖໍ.

໑໕. ພ຺ຍຄ຺ຆສ຺ສ ວຕ຺ຖຸມ຺ຫິ ອຍມານຸປຸພ຺ພີກຖາ

ຊມ຺ພຸທີເປ ຈູລຣຏ຺ຐາ ສນ຺ເນ ພາຣາຓສີນຄເຣ ເອກໍ ປໍສຸປພ຺ພຕໍ ວິນິວິຊ຺ຌິຕ຺ວາ ມຫາມຄ຺ໂຄ ໂຫຕິ, ຕຕ຺ຖ ເວມຊ຺ເຌ ເອໂກ ພ຺ຍຄ຺ໂຆ ອຕ຺ຕໂນ ອນ຺ຘປິຕຣໍ ປພ຺ພຕຄຸຫາຍໍ ກຕ຺ວາ ໂປເສນ຺ໂຕ ວສຕິ. ຕສ຺ເສວ ປພ຺ພຕສ຺ສ ວນທ຺ວາເຣ ຕຸຓ຺ຑິໂລ ນາມ ເອໂກ ສຸວໂປຕໂກ ຣຸກ຺ຂສ຺ມິໍ ວສຕິ. ເຕ ອຸໂຠປິ ອຎ຺ຎມຎ຺ຎໍ ປິຍສຫາຍາ ອເຫສຸໍ, ຕສ຺ມິໍ ສມເຍ ປຈ຺ຈນ຺ຕຄາມວາສີ ເອໂກ ມນຸສ຺ໂສ ອຕ຺ຕໂນ ມາຕຸຄາເມນ ສທ຺ຘິໍ ກລຫໍ ກຕ຺ວາ ພາຣາຓສິໍ ຄຈ຺ຉນ຺ໂຕ ຕໍ ວນທ຺ວາຣໍ ສມ຺ປາປຸຓິ. ອຖ ສຸວໂປຕໂກ ປຣິຫີນຕ຺ຕຠາວໍ ທຸກ຺ຂິຕໍ ຕໍ ທິສ຺ວາ ກມ຺ປມານຫທໂຍ ຕໍ ປກ຺ໂກສິຕ຺ວາ ໂຠ ກຸຫິໍ ຄຈ຺ຉສີຕິ ອາຫ, ເຕນ ປຣຂຓ຺ຑໍ ຄຈ຺ຉາມີຕິ ວຸຕ຺ເຕ ຕຸຓ຺ຑິໂລ ໂຠ ອິມສ຺ມິໍ ວນຂຓ຺ຑມຊ຺ເຌ ເອໂກ ພ຺ຍຄ຺ໂຆ ວສຕິ. ກກ຺ຂໂລ ຜຣຸໂສ ສມ຺ປຕ຺ຕສມ຺ປຕ຺ເຕ ມາເຣຕ຺ວາ ຂາທຕິ. ມາ ຕ຺ວໍ ເຕນ ຄຈ຺ຉາຕິ ອາຫ. ສ຺ວາຍໍ ທຸພ຺ຠໂຄ ມນຸສ຺ໂສ ຫິຕກາມສ຺ສ ຕສ຺ສ ວຈນໍ ອນາທິຍິຕ຺ວາ ຄຈ຺ຉາເມວາຕິ ອາຫ. ຕຸຓ຺ຑິໂລ ເຕນຫິ ສມ຺ມ ຍທິ ອນິວຕ຺ຕມາໂນ ຄຈ຺ຉສິ. ເອໂສ ພ຺ຍຄ຺ໂຆ ມມ ສຫາໂຍ. ເມ ວຈນໍ ຕວ ສນ຺ຕິກາ ສຸຕ຺ວາ ນ ຄຓ຺ຫາຕີຕິ. ຕສ຺ສ ຕໍ ອນາທິຍນ຺ໂຕ ໂສ ສຸວຣາເຊ ປທຸຏ຺ຐຈິຕ຺ໂຕ ມຸຄ຺ຄເຣນ ປຫຣິຕ຺ວາ ມາເຣຕ຺ວາ ອຣຓິໍ ອຄ຺ຄິໍ ກຕ຺ວາ ມໍສໍ ຂາທິ. ອສປ຺ປຸຣິສສໍສຄ຺ໂຄ ນາເມ ສ ອິຘ ໂລກປຣໂລເກສຸ ທຸກ຺ຂາວໂຫເຍວ. ຕຖາຫິ.

໑.

ມຍາ ກຕໍ ມຍ຺ຫມິທໍ, ອິຕິ ເວສ຺ສານຣໍ ນໂຣ;

ສມາລິງ຺ຄຕິ ສປ຺ເປໂມ, ທຫເຕວສ຺ສ ວິຄ຺ຄຫໍ.

໒.

ມຘຸຂີຣາທິທາເນນ, ເປມສາ ປຣິປາລິໂຕ;

ໂສຣໂຄ ກຸປິໂຕວສ຺ສ, ຑສເຕວສ຺ສ ວິຄ຺ຄຫໍ.

໓.

ເອວໍ ນິຫີນຊຈ຺ເຈນ, ປາເປນ ອກຕຎ຺ຎຸນາ;

ນຣາ ຘເມນ ທີເນນ, ກໂຕປິ ຂຓສງ຺ຄໂມ.

໔.

ອສາຘຸໂກ ອຍໍເຕວໍ, ຊານມາເນນ ຊນ຺ຕຸນາ;

ມຸຫຸຕ຺ຕມ຺ປິ ນ ກາຕພ຺ໂພ, ສງ຺ຄໂມ ໂສ ອນຕ຺ຖໂທຕິ.

ຕໂຕ ໂສ ອສປ຺ປຸຣິໂສ ມໍສໍ ຂາທິຕ຺ວາ ຄຈ຺ຉນ຺ໂຕ ວນຂຓ຺ຑມຊ຺ຌໍ ສມ຺ປາປຸຓິ. ອຖ ພ຺ຍຄ຺ໂຆ ຕໍ ທິສ຺ວາ ມຫານາທໍ ກໂຣນ຺ໂຕ ຄຫຓຕ຺ຖາຍ ອຸຏ຺ຐາສິ. ໂສ ພ຺ຍຄ຺ຆໍ ທິສ຺ວາ ຠຍປ຺ປຕ຺ໂຕ ຕຸຓ຺ຑິລສ຺ສ ວຈນໍ ສຣິຕ຺ວາ ອຫໍ ໂຠ ຕວ ສຫາຍຕຸຓ຺ຑິລສ຺ສ ສນ຺ຕິກາ ອາຄໂຕມ຺ຫີຕິ ອາຫ, ຕໍ ສຸຕ຺ວາ ພ຺ຍຄ຺ໂຆ ອຕ຺ຕມໂນ ເອຫິ ສມ຺ມາຕິ ຕໍ ປກ຺ໂກສິຕ຺ວາ ອຕ຺ຕໂນ ວສນຏ຺ຐານໍ ເນຕ຺ວາ ຂາທິຕພ຺ພາຫາເຣນ ຕໍ ສນ຺ຕປ຺ເປຕ຺ວາ ປິຕຸສນ຺ຕິເກ ນິສີທາເປຕ຺ວາ ປຸນ ວນຂຓ຺ຑ ມຄມາສິ. ອຖສ຺ສ ປິຕາ ປຸຕ຺ຕສ຺ສ ຄຕກາເລ ເຕນ ສທ຺ຘິໍ ສລ຺ລປນ຺ໂຕ ຕສ຺ສ ວຈນານຸສາເຣນ ຕຸຓ຺ຑິລໍ ມາເຣຕ຺ວາ ຂາທິຕຠາວໍ ອຎ຺ຎາສິ. ຕໂຕ ໂສ ປຸຕ຺ຕສ຺ສ ອາຄຕກາເລ ຕວ ສຫາໂຍ ເຕນ ມາຣິໂຕຕິ ອາຫ. ຕໍ ສຸຕ຺ວາ ພ຺ຍຄ຺ໂຆ ອນຕ຺ຕມໂນ ເວເຄນ ຕສ຺ສ ວສນຏ຺ຐານໍ ຄນ຺ຕ຺ວາ ສມ຺ມ ຕຸຓ຺ຑິລາຕິ ສທ຺ທໍ ກຕ຺ວາ ອປສ຺ສນ຺ໂຕ ລຸຎ຺ຈິຕປຕ຺ຕໍຈສ຺ສ ທິສ຺ວາ ນິສ຺ສໍສຍໍ ເຕນ ມາຣິໂຕ ເມ ສຫາໂຍຕິ ໂສຈນ຺ໂຕ ປຣິເທວນ຺ໂຕ ອາຄຎ຺ຉິ. ອຖ ໂສ ອສປ຺ປຸຣິໂສ ຕສ຺ມິໍ ຕຕ຺ຖ ຄເຕ ຕສ຺ສ ປິຕຣໍ ປາສາເຓນ ປຫຣິຕ຺ວາ ມາເຣຕ຺ວາ ພ຺ຍຄ຺ຆໍຈ ທານິ ມາເຣສ຺ສາມີຕິ ພ຺ຍຄ຺ຆາຄມນມຄ຺ຄໍ ໂອໂລເກນ຺ໂຕ ນິລີໂນ ອຏ຺ຐາສິ. ຕສ຺ມິໍ ຂເຓ ພ຺ຍຄ຺ໂຆປິ ອາຄຎ຺ຉິ. ໂສ ຕສ຺ສາ ຄຕກາເລ ຕສ຺ສ ເຕເຊນ ຠີໂຕ ຄນ຺ຕ຺ວາ ຊີວິຕໍ ເມ ສາມິ ເທຫີຕິ ປາທມູເລ ອຸເຣນ ນິປຊ຺ຊິ, ພ຺ຍຄ຺ໂຆ ປນ ເຕນ ກຕກມ຺ມໍ ທິສ຺ວາ ຕສ຺ມິໍ ຈິຕ຺ຕໍ ນິພ຺ພາເປຕ຺ວາ ມມ ສຫາຍສ຺ສ ສາສນມາທາຍາຄຕສ຺ສ ທຸພ຺ຠິຕຸໍ ນ ຍຸຕ຺ຕນ຺ຕິ ຈິນ຺ເຕນ຺ໂຕ ຕໍ ສມສ຺ສາເສຕ຺ວາ ຄຈ຺ຉ ສມ຺ມາຕິ ສຸຂໍ ເປເສສິ. ເອວຎ຺ຫິ ສປ຺ປຸຣິສສມາຄໂມ ນາມ ອິຘ ໂລກປຣໂລເກສຸ ສຸຂາວໂຫເຍວ, ວຸຕ຺ຕໍຫິ.

໕.

ສພ຺ຠິເຣວ ສມາເສຖ, ສພ຺ຠິ ກຸພ຺ເພຖ ສນ຺ຖວໍ;

ສພ຺ພຕ຺ຖ ສນ຺ຖໂວ ເຕນ, ເສຍ຺ໂຍ ໂຫຕິ ນ ປາປິໂຍ.

໖.

ສຸຂາວໂຫ ທຸກ຺ຂນຸໂທ, ສທາ ສພ຺ຠິ ສມາຄໂມ;

ຕສ຺ມາ ສປ຺ປຸຣິເສເຫວ, ສງ຺ຄໂມ ໂຫຕຸ ຊນ຺ຕຸນໍ.

ຕໂຕ ໂສ ພ຺ຍຄ຺ໂຆ ເຕນ ເມຕ຺ຕຈິຕ຺ຕານຸຠາເວນ ກາລໍ ກຕ຺ວາ ສຄ຺ເຄ ນິພ຺ພຕ຺ໂຕຕິ.

໗.

ເອວໍວິໂຘປິ ຜຣຸໂສ ປຣມໍສໂຠຊີ;

ພ຺ຍຄ຺ໂຆ ທຍາຍຸປຄໂຕ ສຸຄຕິໍ ສຸເມໂຘ;

ຕສ຺ມາ ກໂຣຖ ກຣຸຓໍ ສຕຕໍ ຊນານໍ,

ຕໍ ໂວ ທທາຕິ ວິຠວຎ຺ຈ ຠເວສຸ ໂຠຄນ຺ຕິ.

ພ຺ຍຄ຺ຆສ຺ສ ວຕ຺ຖຸໍ ປຎ຺ຈມໍ.

໑໖. ຜລກຂຓ຺ຑທິນ຺ນສ຺ສ ວຕ຺ຖຸມ຺ຫິ ອຍມານຸປຸພ຺ພີກຖາ

ສາວຕ຺ຖິຍໍ ກິເຣໂກ ມນຸສ຺ໂສ ອຸຕ຺ຕຣາປຖໍ ຄຈ຺ຉາມີຕິ ອທ຺ຘານມຄ຺ຄປຏິປນ຺ໂນ ຄິມ຺ຫານມາເສ ມຊ຺ຌຓ຺ເຫ ພຫລາຕເປນ ກິລນ຺ໂຕ ຫຸຕ຺ວາ ຣຸກ຺ຂຈ຺ຉາຍໍ ປວິສິຕ຺ວາ ຕມ຺ພຸລໍ ຂາທນ຺ໂຕ ຜລເກ ນິສີທິ. ອຖ ອຸຕ຺ຕຣາປເຖນາຄຈ຺ຉານ຺ໂຕ ເອໂກ ຕເຖວ ອາຕເປນ ກິລນ຺ໂຕ ອາຄນ຺ຕ຺ວາ ປຸຣິມສ຺ສ ສນ຺ຕິເກ ນິສີທິຕ຺ວາ ໂຠ ປານີຍໍ ອຕ຺ຖີຕິ ປຸຈ຺ຉິ. ອິຕໂຣ ປານີຍໍ ນຕ຺ຖີຕິ ອາຫ. ອຖສ຺ສ ໂສ ມຍ຺ຫມ຺ປິ ໂຠ ຕມ຺ພຸລໍ ເທຫິ ປິປາສິໂຕມ຺ຫິຕິ ວຕ຺ວາປິ ນ ລຠິ. ຈຕຸກຫາປເຓນ ເອກໍ ຕມ຺ພຸລປຓ຺ຓໍ ກິຓິຕ຺ວາ ລທ຺ໂຘ ຕຕ຺ເຖວ ນິສີທິຕ຺ວາ ຂາທິຕ຺ວາ ປິປາສໍ ວິໂນເທຕ຺ວາ ເຕນ ອຸປກາເຣນ ຕສ຺ສ ສິເນຫໍ ກຕ຺ວາ ອຕ຺ຕໂນ ຄມນຏ຺ຐານ ມຄມາສິ, ອຖາ ປຣຠາເຄ ໂສ ປຏ຺ຏນໍ ຄນ຺ຕ຺ວາ ນາວາຍ ວຓິຊ຺ຊຕ຺ຖາຍ ຄຈ຺ຉນ຺ໂຕ ສມຸທ຺ທມຊ຺ຌໍ ປາປຸຓິ. ຕໂຕ ສຕ຺ຕເມ ທິວເສ ນາວາ ຠິຊ຺ຊິ. ມນຸສ຺ສາ ມຈ຺ຉກຈ຺ຉປານໍ ຠກ຺ຂາ ຊາຕາ. ໂສ ເອວ ປຸຣິໂສ ອໂຣໂຄ ຫຸຕ຺ວາ ເອກໍ ຜລກຂຓ຺ຑໍ ອຸເຣ ກຕ຺ວາ ສມຸທ຺ທໍ ຕຣຕິ. ອເຖ ຕໂຣປິ ຕເຖວ ນາວາຍ ຠິນ຺ນາຍ ເສໂສ ຫຸຕ຺ວາ ສມຸທ຺ທໍ ຕຣນ຺ໂຕ ປຸຣິເມນ ສມາຄມິ. ອຖ ເຕ ສຕ຺ຕທິວສໍ ສມຸທ຺ເທ ຕຣນ຺ຕາ ອຎ຺ຎມຎ຺ຎໍ ສຎ຺ຊານິໍສຸ. ເຕສຸ ກຫາປເຓ ທຕ຺ວາ ຕມ຺ພຸລໍ ຄຫິໂຕ ເອກໍ ຜລກຂຓ຺ຑໍ ອຸເຣ ກຕ຺ວາ ຕຣຕິ. ອິຕຣສ຺ເສຕໍ ນຕ຺ຖິ. ອຖ ໂສ ກຫາປເຓ ຄເຫຕ຺ວາ ທິນ຺ນຕມ຺ພຸລມຕ຺ຕສ຺ໂສ ປກາຣໍ ສຣິຕ຺ວາ ອຕ຺ຕໂນ ຜລກຂຓ຺ຑໍ ຕສ຺ສ ອທາສິ. ໂສ ຕສ຺ມິໍ ສຍິຕ຺ວາ ຕຣນ຺ໂຕ ຕໍ ປຫາຍ ອຄມາສິ, ອປໂຣ ອນາຘາຣເກນ ຕຣນ຺ໂຕ ໂອສ຺ສຏ຺ຐວິຣິໂຍ ອຸທເກ ໂອສີທິຕຸມາຣຕິ. ຕສ຺ມິໍ ຂເຓ ສມຸທ຺ເທ ອຘິວຕ຺ຖາ ມຓິເມຂລາ ນາມ ເທວຘີຕາ ໂອສີທນ຺ຕໍ ຕໍ ທິສ຺ວາ ສປ຺ປຸຣິໂສຕິ ຕສ຺ສ ຄຸຓານຸສ຺ສຣນ຺ຕີ ເວເຄນາ ຄນ຺ຕ຺ວາ ຕໍ ອຕ຺ຕໂນ ອານຸຠາເວນ ສມຸທ຺ທຕີຣໍ ປາເປສິ. ອິຕຣໍປິ ສາ ເອຕສ຺ເສວ ຄຸຓານຸຠາເວນ ຕີຣໍ ປາເປສິ. ອຖ ຜລເກໂນຕິຓ຺ຓປຸຣິໂສ ຕໍ ທິສ຺ວາ ວິມ຺ຫິໂຕ ກຖໍ ປຸຣໂຕ ອໂຫສິ ສມ຺ມາຕິ ປຸຈ຺ຉິ. ໂສ ນ ຊານາມິ. ອປິຈ ໂຂ ສຸເຂເນວ ຕີຣໍ ປຕ຺ໂຕສ຺ມີຕິ ອາຫ. ອຖ ເທວຘີຕາ ທິສ຺ສມານກສຣີເຣເນວ ອຕ຺ຕນາ ອານີຕຠາວໍ ອາໂຣເຈນ຺ຕີ ອາຫ.

໑.

ໂຍ ມາຕຣໍ ປິຕຣໍວາ, ຘມ຺ເມນ ອິຘ ໂປສຕິ;

ຣກ຺ຂນ຺ຕິ ຕໍ ສທາ ເທວາ, ສມຸທ຺ເທ ວາ ຖເລປິ ວາ.

໒.

ໂຍ ເຈ ພຸທ຺ຘຎ຺ຈ ຘມ຺ມຎ຺ຈ, ສໍຆຎ຺ຈ ສຣຓໍ ຄໂຕ;

ຣກ຺ຂນ຺ຕິ ຕໍ ສທາ ເທວາ, ສມຸທ຺ເທ ວາ ຖເລປິ ວາ.

໓.

ປຎ຺ຈວິຘໍ ອຏ຺ຐວິຘໍ, ປາຕິໂມກ຺ຂຎ຺ຈ ສໍວຣໍ;

ປາເລຕິ ໂຍ ຕໍ ປາເລນ຺ຕິ, ເທວາ ສພ຺ພຕ຺ຖ ສພ຺ພທາ.

໔.

ກາເຍນ ວາຈາ ມນສາ, ສຸຈຣິຕ຺ຕໍ ຈຣຕີ ຘ ໂຍ;

ປາເລນ຺ຕິ ຕໍ ສທາ ເທວາ, ສມຸທ຺ເທ ວາ ຖເລປິ ວາ.

໕.

ໂຍ ສປ຺ປຸຣິສຘມ຺ເມສຸ, ຐິໂຕ ຘ ກຕເວທິໂກ;

ປາເລນ຺ຕິ ຕໍ ສທາ ເທວາ, ສມຸທ຺ເທ ວາ ຖເລປິ ວາ.

ຕໂຕ ໂສ ອາຫ.

໖.

ເນວ ທານໍ ອທາສາຫໍ, ນ ສີລໍ ປຣິປາລຍິໍ;

ເກນ ເມ ປຸຎ຺ຎກມ຺ເມນ, ມມໍ ຣກ຺ຂນ຺ຕິ ເທວຕາ;

ປຸຈ຺ຉາມິ ສໍສຍໍ ຕຸຍ຺ຫໍ, ຕໍ ເມ ອກ຺ຂາຫິ ເທວເຕຕິ.

ເທວຕາ ອາຫ.

໗.

ອຄາຘາ ປາຣເຄ ຠີເມ, ສາຄເຣ ທຸຣິຕາ ກເຣ;

ຠິນ຺ນນາໂວ ຕຣນ຺ໂຕ ຕ຺ວໍ, ຫທເຍ ກຕ຺ວາ ກລິງ຺ຄຣໍ.

໘.

ຐຕ຺ວາ ສປ຺ປຸຣິເສ ຘມ຺ເມ, ອຕ຺ຕານ ມນເວກ຺ຂິຍ;

ຂຓສນ຺ຖວສ຺ສ ປຸຣິສສ຺ສ, ອທາສິ ຜລກໍ ສກໍ.

໙.

ຕໍ ຕຸຍ຺ຫໍ ມິຕ຺ຕຘມ຺ມຎ຺ຈ, ທານຎ຺ຈ ຜລກສ຺ສ ເຕ;

ປຕິຏ຺ຐາສິ ສມຸທ຺ທສ຺ມິໍ, ເອວໍ ຊານາຫິ ມາຣິສາຕິ.

ເອວຎ຺ຈ ວຕ຺ວາ ສາ ເຕ ທິພ຺ພາຫາເຣນ ສນ຺ຕປ຺ເປຕ຺ວາ ທິພ຺ພວຕ຺ຖາລງ຺ກາເຣຫິ ອລງ຺ກຣິຕ຺ວາ ອຕ຺ຕໂນ ອານຸຠາເວນ ສາວຕ຺ຖິນຄເຣເຍວ ເຕ ປຕິຏ຺ຐາເປສິ. ຕໂຕ ປຏ຺ຐາຍ ຕເມວ ອາຣມ຺ມຓໍ ກຕ຺ວາ ເຕ ທານໍ ທທນ຺ຕາ ສີລໍ ຣກ຺ຂນ຺ຕາ ອຸໂປສຖກມ຺ມໍ ກໂຣນ຺ຕາ ອາຍຸປຣິໂຍສາເນ ສຄ຺ຄປຣາຍຓາ ອເຫສຸໍ.

໑໐.

ເອວໍ ປຣິຕ຺ຕກຸສເລນປິ ສາຄຣສ຺ມິໍ,

ສຕ຺ຕາ ລຠນ຺ຕິ ສຣຓໍ ຂລຸ ເທວຕາຫິ;

ຕຸມ຺ເຫປິ ສປ຺ປຸຣິສຕໍ ນ ວິນາສຍນ຺ຕາ,

ມາ ໂຠ ປມຊ຺ຊຖ ສທາ ກຸສລປ຺ປໂຍເຄຕິ.

ຜລກຂຓ຺ຑທິນ຺ນສ຺ສ ວຕ຺ຖຸໍ ຉຏ຺ຐມໍ.

໑໗. ໂຈຣສຫາຍສ຺ສ ວຕ຺ຖຸມ຺ຫິ ອຍມານຸປຸພ຺ພີກຖາ

ອມ຺ຫາກໍ ຠຄວຕິ ປຣິນິພ຺ພຸເຕ ຊມ຺ພຸທີເປ ເທວທຫນຄເຣ ເອໂກ ມນຸສ຺ໂສ ທຸກ຺ຂິໂຕ ຕຕ຺ຖ ຕຕ຺ຖ ວິຈຣນ຺ໂຕ ປຈ຺ຈນ຺ເຕ ອຎ຺ຎຕຣໍ ຄາມໍ ຄນ຺ຕ຺ວາ ຕຕ຺ຖ ເອກສ຺ມິໍ ກຸລເຄເຫ ນິວາສໍ ກປ຺ເປສິ. ຕຕ຺ຖ ມນຸສ຺ສາ ຕສ຺ສ ຍາຄຸຠຕ຺ຕໍ ທຕ຺ວາ ໂປເສສຸໍ, ຕໂຕ ໂສ ຕຕ຺ຖ ມນຸສ຺ເສຫິ ມິຕ຺ຕສນ຺ຖວໍ ກຕ຺ວາ ກຕິປາຫໍ ຕຕ຺ຖ ວສິຕ຺ວາ ອຎ຺ຎຏ຺ຐານໍ ຄນ຺ຕ຺ວາ ອປຣຠາເຄ ໂຈຣກມ຺ມໍ ກໂຣນ຺ໂຕ ຊີວິກໍ ກປ຺ເປຕິ. ອເຖກທິວສໍ ໂຈເຣນ຺ຕໍ ຕໍ ຣາຊປຸຣິສາ ຄເຫຕ຺ວາ ຣຎ຺ໂຎ ທສ຺ເສສຸໍ. ຣາຊາ ຕໍ ພນ຺ຘນາຄາເຣ ກໂຣຖາຕິ ອາຓາເປສິ, ເຕ ຕໍ ພນ຺ຘນາຄາຣໍ ເນຕ຺ວາ ສງ຺ຂລິກາຫິ ພນ຺ຘິຕ຺ວາ ອາຣກ຺ຂການໍ ປຏິປາເທຕ຺ວາ ອຄມໍສຸ, ພນ຺ຘນາຄາເຣ ວສນ຺ຕສ຺ສ ຕສ຺ສ ທ຺ວາທສສໍວຈ຺ຉຣານິ ອຕິກ຺ກນ຺ຕານິ. ຕໂຕ ອປຣຠາເຄ ຕສ຺ສ ປຸພ຺ພສຫາໂຍ ປຈ຺ຈນ຺ຕຄາມວາສີ ມນຸສ຺ໂສ ເກນຈິ ກມ຺ເມນ ເທວທຫ ມາຄໂຕ ຕຕ຺ຖ ຕຕ຺ຖ ອາຫິຓ຺ຑນ຺ໂຕ ພນ຺ຘນາຄາເຣ ພທ຺ຘໍ ຕໍ ອທ຺ທສ. ທິສ຺ວາ ຕສ຺ສ ຫທຍໍ ກມ຺ປິ, ໂສ ໂຣທິຕ຺ວາ ປຣິເທວິຕ຺ວາ ກິໍ ເຕ ມຍາ ກຕ຺ຕພ຺ພໍ ສມ຺ມາຕິ ປຸຈ຺ຉິ. ຕໂຕ ເຕນ ສມ຺ມ ພນ຺ຘນາຄາເຣ ວສນ຺ຕສ຺ສ ເມ ອິທານິ ທ຺ວາທສສໍວຈ຺ຉຣານິ ອຕິກ຺ກນ຺ຕານິ, ເອຕ຺ຕກໍ ກາລໍ ທຸພ຺ໂຠຊນາທິນາ ມຫາທຸກ຺ຂໍ ອນຸໂຠມິ. ຍາວາຫໍ ອາຫາຣໍ ປຣິເຍສິຕ຺ວາ ຠຸຎ຺ຊິຕ຺ວາ ອາຄມິສ຺ສາມິ. ຕາວ ມໍ ອິໂຕ ມຸຎ຺ຈນຸປາຍໍ ຊານາຫີຕິ ວຸຕ຺ເຕ ໂສ ສປ຺ປຸຣິໂສ.

໑.

ຣູເປນ ກິນ຺ຕຸ ຄຸຓສີລວິວຊ຺ຊິເຕນ,

ມິຈ຺ຉາລຍສ຺ສ ກິຕວສ຺ສ ຘິຍາ ກິມຕ຺ຖໍ;

ທານາ ທິຈາຄວິຄເຕນ ຘເນນ ກິໍ ວາ;

ມິຕ຺ເຕນ ກິໍ ພ຺ຍສນກາລປຣມ຺ມຸເຂນາຕິ.

ເອວຎ຺ຈ ປນ ວຕ຺ວາ ສາຘຸ ສມ຺ມ ກໂຣມິ ເຕ ວຈນນ຺ຕິ ອາຣກ຺ຂການໍ ສນ຺ຕິກໍ ຄນ຺ຕ຺ວາ ໂຠນ຺ໂຕ ຍາເວໂສ ຠຕ຺ຕໍ ຠຸຎ຺ຊິຕ຺ວາ ອາຄຈ຺ຉຕິ. ຕາວາຫໍ ຕສ຺ສ ປາຏິໂຠໂຄ ຠວິສ຺ສາມິ. ວິສ຺ສຊ຺ເຊຖ ນນ຺ຕິ ອາຫ, ເຕຫິ ນ ສກ຺ກາ ໂຠ ເອຕໍ ວິສ຺ສຊ຺ເຊຕຸໍ, ອປິ ຈ ໂຂ ຍາວາຍໍ ອາຄຈ຺ຉຕິ. ຕາວ ຕ຺ວໍ ອຍສງ຺ຂລິກາຍ ພທ຺ໂຘ ນິສີທິສ຺ສສິ, ເອວໍ ຕໍ ວິສ຺ສຊ຺ເຊສ຺ສາມ, ໂນ ເຈ ນ ສກ຺ກາຕິ ອາຫໍສຸ, ໂສ ເອວມ຺ປິ ໂຫຕຸ ສມ຺ມາຕິ ວຕ຺ວາ ຕສ຺ສ ປາທໂຕ ສງ຺ຂລິກໍ ມຸຎ຺ຈິຕ຺ວາ ອຕ຺ຕໂນ ປາເທ ກຕ຺ວາ ພນ຺ຘນາຄາຣໍ ປວິສິຕ຺ວາ ອິຕຣໍ ມຸຎ຺ຈາເປສິ. ໂສປິ ອສປ຺ປຸຣິໂສ ພນ຺ຘນາ ມຸຕ຺ໂຕ ນ ປຸນ ຕໍ ຐານ ມຄມາສິ, ອໂຫ ອກຕຎ຺ຎຸໂນ ປກຕິໍ ຎາຕຸໍ ຠາຣິຍໍ. ຍຖາຫ.

໒.

ວາຣິປູເຣ ຍຖາ ໂສພ຺ເຠ, ເນວນ຺ໂຕ ວິສມໍ ສມໍ;

ປຎ຺ຎາຍເຕວໍສາຘຸສ຺ສ, ຠາວໍ ມນສິ ສມ຺ຠວໍ.

໓.

ຠາສນ຺ຕິ ມຸຂໂຕ ເອກໍ, ຈິນ຺ເຕນ຺ຕິ ມນສາ ປຣໍ;

ກາເຍເນກໍ ກໂຣນ຺ເຕວໍ, ປກຕາຍມສາຘຸນໍ.

໔.

ເຕສໍ ໂຍ ຠາວມຎ຺ຎາສິ, ໂສວ ປຓ຺ຑິຕຊາຕິໂກ;

ພຫຸສ຺ສຸໂຕປິ ໂສເຍວ, ປຣຈິຕ຺ຕວິທູປິ ໂສ.

ອຖສ຺ສ ພນ຺ຘນາຄາເຣ ວສນ຺ຕສ຺ສ ທ຺ວາທສສໍວຈ຺ຉຣານິ ອຕິກ຺ກນ຺ຕານິ. ເອຕ຺ຕກໍ ກາລໍ ຊິຆຈ຺ຉາປີຬິເຕນ ເຕນ ອາຫາຣຕ຺ຕາຍ ປໂຣ ນ ຍາຈິຕປຸພ຺ໂພ, ອນຸຈ຺ຉິຏ຺ຐາຫາຣໍ ລຠນທິວສໂຕ ອລຠນທິວສາເຍວ ພຫຸຕຣາ ໂຫນ຺ຕິ, ອຖ ທ຺ວາທສສໍວຈ຺ຉຣາຕິກ຺ກເມ ຣຎ຺ໂຎ ປຸຕ຺ໂຕ ນິພ຺ພຕ຺ຕິ. ຕທາ ຣາຊາ ອຕ຺ຕໂນ ວິຊິເຕ ສພ຺ພພນ຺ຘນາຄາຣານິ ວິວຣາເປສິ. ອນ຺ຕມໂສ ມິຄປກ຺ຂິໂນປິ ພນ຺ຘນາ ມຸຎ຺ຈາເປສິ. ທ຺ວາເຣ ວິວຏມຕ຺ເຕເຍວ ພນ຺ຘນາຄາເຣ ມນຸສ຺ສາ ອິຈ຺ຉິຕິຈ຺ຉິຕຏ຺ຐານໍ ອຄມໍສຸ. ໂສ ປເນໂກວ ເຕຫິ ສທ຺ຘິໍ ອຄນ຺ຕ຺ວາ ໂອຫີຍິ. ອາຣກ຺ຂເກຫິ ຕ຺ວໍ ໂຠ ກສ຺ມາ ນ ຄຈ຺ຉສີຕິ ວຸຕ຺ເຕ ອຫໍ ໂຠ ປຎ຺ຎາຕຠາເວນ ອິທານິ ນ ຄມິສ຺ສາມິ. ອຕີວ ປຣິຫີນຄຕ຺ໂຕສ຺ມິ. ອນ຺ຘກາເຣ ຄມິສ຺ສາມີຕິ ວຕ຺ວາ ອນ຺ຘກາເຣ ອາຄເຕ ນິກ຺ຂມ຺ມ ອນ຺ໂຕນຄເຣ ວິສ຺ສາສິການໍ ອຠາເວນ ກຸໂຕ ອາຫາຣໍ ລຠິສ຺ສາມີຕິ ຈິນ຺ເຕນ຺ໂຕ ນິກ຺ຂມ຺ມ ຣຕ຺ຕນ຺ຘກາເຣ ອາມກສຸສານ ມຄມາສິ. ເອຕ຺ຖາຫາຣໍ ລຠິສ຺ສາມີຕິ. ຕຕ຺ຖ ໂສ ອຘຸນາ ນິກ຺ຂິຕ຺ຕມຕມນຸສ຺ສໍ ທິສ຺ວາ ມນຸສ຺ສຏ຺ຐິນາ ມໍສໍ ຉິນ຺ທິຕ຺ວາ ສີສກປາເລ ປກ຺ຂິປິຕ຺ວາ ຕີຫິ ມນຸສ຺ສສີເສຫິ ກຕອຸທ຺ຘເນ ຐເປຕ຺ວາ ຈິຕກໂຕ ໂອມຸກ຺ກອລາເຕຫິ ອຄ຺ຄິໍ ກຕ຺ວາ ສຸສານໍ ນິພ຺ພາປນຕ຺ຖາຍາ ຠຕອຸທເກນ ມນຸສ຺ສຏ຺ຐິນາ ອາໂລເລນ຺ໂຕ ມໍສໍ ປຈິຕ຺ວາ ໂອຕາເຣຕ຺ວາ ສາຂາຠງ຺ເຄນ ຫິຣິໂກປີຓໍ ປຏິຈ຺ຉາເທຕ຺ວາ ນິວຕ຺ຖປິໂລກິກໍ ວາຕາວຣຓໍ ກຕ຺ວານິສີທິ. ຕສ຺ມິໍ ຂເຓ ຕຕ຺ຖ ປິປ຺ປລີຣຸກ຺ເຂ ອຘິວຕ຺ຖາ ເທວຕາ ຕສ຺ສ ຕໍ ກິຣິຍໍ ທິສ຺ວາ ປຸຈ຺ຉິສ຺ສາມິ ຕາວ ນນ຺ຕິ ຕໍ ອຸປສງ຺ກມິຕ຺ວາ ເອວມາຫ. ໂຠ ຕ຺ວໍ ຆນຕຣຕິມິຣາກຸເລ ມຫາຣຕ຺ຕິຍໍ ຕຕ຺ຖ ຕຕ຺ຖ ວິກິຓ຺ຓນຣຏ຺ຐິສມາກິຓ຺ເຓ ໂສຓສິຄາລາທິກຸຓປາທກາກຸເລ ມນຸສ຺ສມໍສຠກ຺ຂຍກ຺ຂຣກ຺ຂສາກຸເລ ຕຕ຺ຖ ຕຕ຺ຖ ປຊ຺ຊລນ຺ຕາເນກຈິຕກຠຍານເກ ສຸສາເນ ມນຸສ຺ສມໍສໍ ປຈິຕ຺ວາ ກິໍກໂຣສີຕິ ປຸຈ຺ຉນ຺ຕີ ອາຫ.

໕.

ຣຕ຺ຕນ຺ຘກາເຣ ກຸຓປາທເກຫິ,

ສມາກຸເລ ສີວຖິກາຍ ມຊ຺ເຌ;

ມນຸສ຺ສມໍສໍ ປຈສີ ຘ ສີເສ,

ວເທຫິ ກິໍ ເຕນ ປໂຍຊນໍ ເຕຕິ.

ອຖ ໂສ ອາຫ.

໖.

ນ ຍາຄເຫຕຸ ນ ຈ ທານເຫຕຸ,

ສຸສານມຊ຺ຌມ຺ຫິ ປຈາມິ ມໍສໍ;

ຂຸທາສມໍ ນຕ຺ຖິ ນຣສ຺ສ ອຎ຺ຎໍ,

ຂຸທາວິນາສາຍ ປຈາມິມມ຺ໂຠຕິ.

ຕໂຕ ເທວຕາ ຕໍ ຕຖາ ໂຫຕຸ, ອິມິນາ ປິໂລຕິເກນ ວາຕາວຣຓໍ ກໂຣສິ. ກິມຕ຺ຖເມຕນ຺ຕິ ປຸຈ຺ຉນ຺ຕີ.

໗.

ນິວຕ຺ຖສາໂຂ ຫິຣິສໍວຣາຍ,

ປິໂລຕິກໍ ຕຕ຺ຖ ປສາຣຍນ຺ໂຕ;

ກໂຣສິ ວາຕາວຣຓຎ຺ຈ ສມ຺ມ,

ກິມຕ຺ຖເມຕໍ ວທ ປຸຈ຺ຉິໂຕ ເມຕິ.

ໂສ ຕສ຺ສາ ຈິກ຺ຂນ຺ໂຕ ອາຫ.

໘.

ສຸຠາ ສຸຠາມິສ຺ສິຕສີຕວາໂຕ,

ສຍໍ ອຈິຕ຺ໂຕວ ອຈິຕ຺ຕຠາວາ;

ເທຫໍ ຜຸສິຕ຺ວານ ອສາຘຸກສ຺ສ,

ອກຕຎ຺ຎຸໂນ ມິຕ຺ຕປຘໍສກສ຺ສ.

໙.

ສມາວຫນ຺ໂຕ ຍທິ ເມ ສຣີເຣ,

ຜຸສາຕິ [ຜຸສາຕິສາສງ຺ຄຕິມຊ຺ຊທານິ ອິຕິກຕ຺ຕຈິ] ຕໍ ວາຍຸ ມມາ ວິສິຕ຺ວາ;

ທຸກ຺ຂໍ ທທາຕີຕິ ວິສໍວ ຕໍ ໂຠ,

ປຣິວຊ຺ຊິຕຸໍ ພທ຺ຘມິມໍ ກຸເຈລນ຺ຕິ.

ເທວຕາ ອາຫ.

໑໐.

ກິ ມກາສິ ໂຠ ໂສ ກຕນາສໂກ ເຕ,

ຘນຎ຺ຈ ຘຎ຺ຎໍ ຕວ ນາສຍີ ຈ;

ມາຕາ ປິຕາ ພນ຺ຘໂວ ເຂຕ຺ຕ ວຕ຺ຖູ,

ວິນາສິຕາ ເຕນ ວເທຫິ ກິໍ ເຕຕິ.

ຕໂຕ ໂສ ອາຫ.

໑໑.

ຍໍ ຣາຊໂຕ ໂຫຕິ ຠຍໍ ມຫນ຺ຕໍ,

ສພ຺ພສ຺ສ ຫຣຓາທິວຘາທິກຎ຺ຈ;

ອກຕຎ຺ຎຸນາ ສປ຺ປຸຣິເສນ ໂຫຕິ,

ອາຣາວ ໂສ ໂຠ ປຣິວຊ຺ຊນີໂຍ.

໑໒.

ຍມຕ຺ຖິ ໂຈຣາຣິຠຍຎ຺ຫິ ໂລເກ,

ອໂຖ ທເກນາປິ ຈ ປາວເກນ;

ອກຕຎ຺ຎຸນາ ຕໍ ສກລມ຺ປິ ໂຫຕິ,

ອາຣາວ ໂສ ໂຠ ປຣິວຊ຺ຊນີໂຍ.

໑໓.

ປາຓາຕິປາຕມ຺ປິ ອທິນ຺ນທານໍ,

ປຣສ຺ສ ທາຣູປຄມໍ ມຸສາ ຈ;

ມຊ຺ຊສ຺ສ ປານໍ ກລຫຎ຺ຈ ເປສຸນໍ,

ສມ຺ຜໍ ຄິຣໍ ຘຸຕ຺ຕຊເນຫິ [ອກ຺ຂຘຸຕ຺ຕາທິໂຍຄໍ ອິຕິກຕ຺ຖຈິ] ໂຍຄໍ.

໑໔.

ສພ຺ພໍ ອນຕ຺ຖໍ ອສິວໍ ອນິຏ຺ຐໍ,

ອປາຍິກໍ [ອປາຍິກໍ ອິຕິກຕ຺ຖຈິ] ທຸກ຺ຂມນນ຺ຕ ມຎ຺ຎໍ;

ອກຕຎ຺ຎຸນາ ສປ຺ປຸຣິເສນ ໂຫຕິ;

ອາຣາວ ໂສ ໂຠ ປຣິວຊ຺ຊນີໂຍຕິ.

ວຕ຺ວາ ອຕ຺ຕນາ ອສປ຺ປຸຣິສສໍສຄ຺ເຄນານຸຠູຕໍ ສພ຺ພໍ ທຸກ຺ຂໍ ກເຖສິ, ຕໂຕ ເທວຕາ ອຫມ຺ປິ ໂຠ ສຕ຺ຖຸໂນ ມງ຺ຄລສຸຕ຺ຕເທສນາທິວເສ ອິມສ຺ມິໍເຍວ ຣຸກ຺ເຂ ນິສິນ຺ໂນ.

ອເສວນາ ຈ ພາລານໍ, ປຓ຺ຑິຕານຎ຺ຈ ເສວນາ;

ປູຊາ ຈ ປູຊນີຍ຺ຍານໍ, ເອຕໍ ມງ຺ຄລ ມຸຕ຺ຕມນ຺ຕິ.

ຄາຖາຍ ພາລສ຺ສ ໂທເສ ອສ຺ໂສສິໍຕິ ວຕ຺ວາ ຕສ຺ສ ປສນ຺ໂນ ຕໍ ອຕ຺ຕໂນ ວິມານໍ ເນຕ຺ວາ ນຫາເປຕ຺ວາ ທິພ຺ພວຕ຺ຖາລງ຺ກາເຣຫິ ອລງ຺ກຣິຕ຺ວາ ທິພ຺ພນ຺ນປານໍ ທຕ຺ວາ ມຫນ຺ຕໍ ສກ຺ກາຣສມ຺ມານໍ ກຕ຺ວາ ອຕ຺ຕໂນ ອານຸຠາເວນ ຕສ຺ມິໍ ນຄເຣ ຣຊ຺ເຊ ອຠິສິຎ຺ຈາເປສິ. ໂສ ຕຕ຺ຖ ຣຊ຺ຊໍ ກໂຣນ຺ໂຕ ທານາທີນິ ປຸຎ຺ຎານິ ກຕ຺ວາ ອາຍຸປຣິໂຍສາເນ ຍຖາກມ຺ມໍ ຄໂຕຕິ.

໑໕.

ເອວໍ ອສາຘຸຊນສງ຺ຄມສນ຺ນິວາສໍ,

ສຎ຺ຈຊ຺ຊ ສາຘຸສຸຈິສຊ຺ຊນສງ຺ຄເມນ;

ທານາທິ ເນກກຸສລໍ ປຣິປູຣຍນ຺ຕາ,

ສຄ຺ຄາ ປວຄ຺ຄວິຠວໍ ອຠິສມ຺ຠຸນາຖາຕິ.

ໂຈຣສຫາຍສ຺ສ ວຕ຺ຖຸໍ ສຕ຺ຕມໍ.

໑໘. ມຣຸຕ຺ຕພ຺ຣາຫ຺ມຓສ຺ສ ວຕ຺ຖຸມ຺ຫິ ອຍມານຸປຸພ຺ພີກຖາ

ຊມ຺ພຸທີເປ ຈນ຺ທຠາຄາ ນາມ ຄງ຺ຄາຕີເຣ ໂຫມຄາມໍ ນາມ ອຕ຺ຖິ. ຕສ຺ມິໍ ເອໂກ ມຣຸຕ຺ໂຕ ນາມ ພ຺ຣາຫ຺ມໂຓ ປຏິວສຕິ. ຕທາ ໂສ ໂວຫາຣຕ຺ຖາຍ ຕກ຺ກສີລໍ ຄນ຺ຕ຺ວາ ເຄຫໍ ອາຄຈ຺ຉນ຺ໂຕ ອນ຺ຕຣາມຄ຺ເຄ ເອກາຍ ສາລາຍ ກຸຏ຺ຐໂຣຄາ ຕຸຣໍ ສຸນຂໍ ທິສ຺ວາ ຕສ຺ມິໍ ກາຣຸຎ຺ເຎນ ນີລວລ຺ລິຕກ຺ກມ຺ພິເລນ ມທ຺ທິຕ຺ວາ ປາເຍສິ. ສຸນໂຂ ວູປສນ຺ຕໂຣໂຄ ປາກຕິໂກ ຫຸຕ຺ວາ ພ຺ຣາຫ຺ມເຓນ ອຕ຺ຕໂນ ກຕູປກາຣໍ ສລ຺ລກ຺ເຂນ຺ໂຕ ເຕເນວ ສທ຺ຘິໍ ອຄມາສິ. ອປຣຠາເຄ ພ຺ຣາຫ຺ມຓສ຺ສ ຠຣິຍາ ຄພ຺ຠໍ ປຏິລຠິ, ປຣິປຸຓ຺ຓຄພ຺ຠາຍ ຕາຍ ວິຊາຍນກາເລ ທາຣໂກ ຕິຣິຍມ຺ປຕິຕ຺ວາ ອນ຺ໂຕຄພ຺ເຠເຍວ ມໂຕ. ຕທາ ຕໍ ສຕ຺ເຖນ ຂຓ຺ຑາຂຓ຺ຑິກໍ ຉິນ຺ທິຕ຺ວາ ນີຫຣິໍສຸ, ອຖ ພ຺ຣາຫ຺ມໂຓ ຕໍ ທິສ຺ວາ ນິພ຺ພິນ຺ທຫທໂຍ ຆຣາວາສໍ ປຫາຍ ອິສິປພ຺ພຊ຺ຊໍ ປພ຺ພຊິຕ຺ວາ ອຣຎ຺ເຎ ວິຫຣຕິ. ອຖສ຺ສ ຠຣິຍາ ອຎ຺ເຎນ ສທ຺ຘິໍ ສໍວສນ຺ຕີ ອຍໍ ມໍ ປຫາຍ ປພ຺ພຊິໂຕຕິ ພ຺ຣາຫ຺ມເຓ ປທຸຏ຺ຐຈິຕ຺ຕາ ໂຠ ພ຺ຣາຫ຺ມຓໍ ມາເຣຫີຕິ ສາມິເກນ ສທ຺ຘິໍ ມນ຺ເຕສິ. ເຕສໍ ມນ຺ຕນໍ ສຸນໂຂ ສຸຕ຺ວາ ພ຺ຣາຫ຺ມເຓເນວ ສທ຺ຘິໍ ຈຣຕິ. ອເຖກທິວສໍ ຕສ຺ສາ ສາມິໂກ ຕາ ປ ສໍ ມາເຣສ຺ສາມີຕິ ຘນຸ ກລາປໍ ຄເຫຕ຺ວາ ນິກ຺ຂມິ, ຕທາ ຕາປໂສ ຜລາຜລຕ຺ຖາຍ ອຣຎ຺ຎໍ ຄໂຕ. ສຸ ນ ໂຂ ອສ຺ສເມເຍວ ໂອ ຫີ ຍິ. ປຸຣິໂສ ຕາປສສ຺ສາຄມນມຄ຺ຄໍ ໂອໂລເກນ຺ໂຕ ຄຈ຺ຉນ຺ຕເຣ ນິລີໂນ ອຈ຺ຉິ. ສຸນໂຂ ຕສ຺ສ ປມາທໍ ໂອໂລເກຕ຺ວາ ຘນຸໂນ ຄຸຓໍ ຂາທິຕ຺ວາ ຉິນ຺ທິ. ໂສ ປຸນ ຄຸຓໍ ປາກຕິກໍ ກຕ຺ວາ ອາໂຣເປສິ. ເອວໍ ໂສ ອາໂຣປິຕໍ ອາໂຣປິຕໍ ຂາທເຕວ, ອຖ ໂສ ປາປປຸຣິໂສ ຕາປສສ຺ສາຄມນໍ ຎຕ຺ວາ ຕໍ ມາເຣສ຺ສາມີຕິ ຘນຸນາ ສທ຺ຘິໍ ອຄມາສິ. ອຖສ຺ສ ສຸນໂຂ ປາເທ ຑສິຕ຺ວາ ປາເຕຕ຺ວາ ຕສ຺ສ ມຸຂໍ ຂາທິຕ຺ວາ ທຸພ຺ພລໍ ກຕ຺ວາ ຠຸງ຺ກາຣມກາສິ, ເອວຎ຺ຫິ ສປ຺ປຸຣິສາ ອຕ຺ຕໂນ ອຸປກາຣການໍ ປຈ຺ຈຸປກາຣໍ ກໂຣນ຺ຕິ. ວຸຕ຺ຕຎ຺ຫິ.

໑.

ອຸປກາຣໍ ກໂຣນ຺ໂຕ ໂສ, ສຸນໂຂ ກຕເວທິໂກ;

ສຕ຺ຕູປຆາຕກໍ ກຕ຺ວາ, ອິສິໂນ ທາສິ ຊີວິຕໍ.

໒.

ຕິຣຈ຺ຉານາປິ ຊານນ຺ຕິ, ຄຸຓມຕ຺ຕນິ ກຕໍ ສທາ;

ອິຕິ ອຸຕ຺ວານ ເມຘາວີ, ກຕຎ຺ຎູ ໂຫນ຺ຕຸ ປາຓິໂນຕິ.

ຕໂຕ ຕາປໂສ ສຸນຂສ຺ສ ສທ຺ເທນາ ຄນ຺ຕ຺ວາ ຕສ຺ສ ຕໍ ວິປ຺ປກາຣໍ ທິສ຺ວາ ກາຣຸຎ຺ເຎນ ປຏິຊິຄ຺ຄິຕ຺ວາ ວູປສນ຺ຕວຓໍ ພລປ຺ປຕ຺ຕໍ ໂປເສຕ຺ວາ ຕຕ຺ເຖວ ວສນ຺ໂຕ ຌານາຠິຎ຺ຎໍ ນິພ຺ພຕ຺ເຕຕ຺ວາ ອາຍຸປຣິໂຍສາເນ ພ຺ຣາຫ຺ມໂລກປຣາຍໂຓ ອໂຫສີຕິ.

໓.

ສຸຕ຺ວານ ສາຘຸ ສຸນເຂນ ກຕູປກາຣໍ,

ເມຕ຺ຕິໍທິສສ຺ສ ປກຕໍ ອິສິນາ ຈ ສຸຕ຺ວາ;

ສມ຺ມາ ກໂຣຖ ກຣຸຓຎ຺ຈ ປຣູປກາຣໍ,

ຕໍ ສພ຺ພທາ ຠວຕິ ໂວ ຠວໂຠຄເຫຕູຕິ.

ມຣຸຕ຺ຕພ຺ຣາຫ຺ມຓສ຺ສ ວຕ຺ຖຸໍ ອຏ຺ຐມໍ.

໑໙. ປານີຍທິນ຺ນສ຺ສ ວຕ຺ຖຸມ຺ຫິ ອຍມານຸປຸພ຺ພີກຖາ

ຊມ຺ພຸທີເປ ອຎ຺ຎຕຣສ຺ມິໍ ຊນປເທ ກິເຣ ໂກ ມນຸສ຺ໂສ ຣຏ຺ຐໂຕ ຣຏ຺ຐໍ ຊນປທໂຕ ຊນປທໍ ວິຈຣນ຺ໂຕ ອນຸກ຺ກເມນ ຈນ຺ທຠາຄານທີຕີຣໍ ປຕ຺ວາ ນາວໍ ອຠິຣຸຫິຕ຺ວາ ປຣຕີຣໍ ຄຈ຺ຉຕິ. ອຖາປຣາ ຄພ຺ຠິນິຕ຺ຖີ ຕາຍ ເອວ ນາວາຍ ຄຈ຺ຉຕິ, ອຖ ນາວາ ຄງ຺ຄາມຊ຺ຌປ຺ປຕ຺ຕກາເລ ຕສ຺ສາ ກມ຺ມຊວາຕາ ຈລິໍສຸ. ຕໂຕ ສາ ວິຊາຍິຕຸມສກ຺ໂກນ຺ຕີ ກິລນ຺ຕາ ປານີຍໍ ເມ ເທຖ, ປິປາສິຕາມ຺ຫິຕິ ມນຸສ຺ເສ ຍາຈິ. ເຕ ຕສ຺ສາ ວຈນໍ ອສຸຓນ຺ຕາ ວິຍ ປານີຍໍ ນາທໍສຸ, ອຖ ໂສ ຊານປທິໂກ ຕສ຺ສາ ກຣຸຓາຍນ຺ໂຕ [ກຣຸຓາຍປານີຍໍ, ກຣຸຓາຍນ຺ໂຕປານີຍໍ, ກຣຸຓາຍໂຕຍໍ ອິຕິຈກຕ຺ຖຈິ] ໂຕຍໍ ຄເຫຕ຺ວາ ມຸເຂ ອາສິຎ຺ຈິ, ຕສ຺ມິໍ ຂເຓ ສາ ລທ຺ຘສ຺ສາສາ ສຸເຂນ ທາຣກໍ ວິຊາຍິ, ອຖ ເຕ ຕີຣໍ ປຕ຺ວາ ກຕິປຍທິວເສນ ອຕ຺ຕໂນ ອຕ຺ຕໂນ ຐານໍ ປາປຸຓິໍສຸ. ອຖາປຣຠາເຄ ໂສ ຊານປທິໂກ ອຎ຺ຎຕຣກິຈ຺ຈໍ ປຏິຈ຺ຈ ຕສ຺ສາ ອິຕ຺ຖິຍາ ວສນນຄຣໍ ປຕ຺ວາ ຕຕ຺ຖ ຕຕ຺ຖ ອາຫິຓ຺ຑນ຺ໂຕ ນິວາສນຏ຺ຐານໍ ອລຠິຕ຺ວາ ນຄຣທ຺ວາເຣ ສາລໍ ຄນ຺ຕ຺ວາ ຕຕ຺ຖ ນິປຊ຺ຊິ. ຕສ຺ມິໍເຍວ ທິວເສ ໂຈຣາ ນຄຣໍ ປວິສິຕ຺ວາ ຣາຊເຄເຫ ສນ຺ຘິໍ ຉິນ຺ທິຕ຺ວາ ຘນສາຣໍ ຄເຫຕ຺ວາ ຄຈ຺ຉນ຺ຕາ ຣາຊປຸຣິເສຫິ ອນຸພນ຺ຘາ ຄນ຺ຕ຺ວາ ຕາເຍວ ສາລາຍ ຉຑ຺ເຑຕ຺ວາ ປລາຍິໍສຸ. ອຖ ຣາຊປຸຣິສາ ອາຄນ຺ຕ຺ວາ ໂຈເຣ ອປສ຺ສນ຺ຕາ ຕໍ ຊານປທິກໍ ທິສ຺ວາ ອຍໍ ໂຈໂຣຕິ ຄເຫຕ຺ວາ ປຈ຺ຉາພາຫໍ ຄາຬ຺ຫໍ ພນ຺ຘິຕ຺ວາ ປຸນ ທິວເສ ຣຎ຺ໂຎ ທສ຺ເສສຸໍ. ຣຎ຺ຎາ ກສ຺ມາ ຠເຓ ໂຈຣກມ຺ມ ມກາສີຕິ ປຸຈ຺ຉິໂຕ ນາຫໍ ເທວ ໂຈໂຣ, ອາຄນ຺ຕຸໂກມ຺ຫີຕິ ວຸຕ຺ເຕ ຣາຊາ ໂຈເຣ ປຣິເຍສິຕ຺ວາ ອລຠນ຺ໂຕ ອຍເມວ ໂຈໂຣ, ອິມໍ ມາເຣຖາຕິ ອາຓາເປສິ. ຣາຊປຸຣິເສຫິ ຕໍ ຄາຬ຺ຫໍ ພນ຺ຘິຕ຺ວາ ອາຆາຕນໍ ນີເຕ ສາ ອິຕ຺ຖີ ຕໍ ຕຖາ ນີຍມານໍ ທິສ຺ວາ ສຎ຺ຊານິຕ຺ວາ ກມ຺ປມານຫທຍາ ມຸຫຸຕ຺ເຕນ ຣຎ຺ໂຎ ສນ຺ຕິກໍ ຄນ຺ຕ຺ວາ ວນ຺ທິຕ຺ວາ ເທວ ເອໂສ ນ ໂຈໂຣ ອາຄນ຺ຕຸໂກ ມຸຎ຺ຈເຖຕໍ ເທວາຕິ ອາຫ. ຣາຊາ ຕສ຺ສາ ກຖໍ ອສທ຺ທຫນ຺ໂຕ ຍຊ຺ເຊຕໍ ໂມເຈຕຸ ມິຈ຺ຉສິ. ຕສ຺ສຄ຺ຆນກໍ ຘນໍ ທຕ຺ວາ ມຸຎ຺ຈາເປຫີຕິ, ສາ ສາມິ ມມ ເຄເຫ ຘນໍ ນຕ຺ຖິ. ອປິຈ ມມ ສຕ຺ຕປຸຕ຺ເຕຫິ ສທ຺ຘິໍ ມໍ ທາສິໍ ກໂຣຫິ, ເອຕໍ ມຸຎ຺ຈ ເທວາຕິ ອາຫ, ອຖ ຣາຊາ ຕ຺ວໍ ເອຕໍ ອຘຸນາຄໂຕຕິ ວທສິ. ເອຕໍ ນິສ຺ສາຍ ປຸຕ຺ເຕຫິ ສທ຺ຘິໍ ອຕ຺ຕານໍ ທາສຕ຺ຕໍ ສາເວສິ. ກິເມໂສ ເຕ ຎາຕິ ວາ, ອຸທາຫຸ ອຸປກາຣໂກຕິ ປຸຈ຺ຉນ຺ໂຕ ອາຫ.

໑.

ກິໍເຕ ໂຠຕິ ອຍໍ ໂປໂສ, ຕຸວໍ ປຸຈ຺ຉາມິ ສໍສຍໍ;

ຠາຕາ ວາ ເຕ ປິຕາ ໂຫຕິ, ປຕິ ວາ ເທວໂຣ ຕວ.

໒.

ຎາຕິ ສາໂລຫິໂຕ ກິນ຺ນຸ, ອຸທາຫຸ ອິຓທາຍໂກ;

ອໂຖປກາຣໂກ ກິນ຺ນຸ, ກສ຺ມາສ຺ສ ເທສິ ຊີວິຕໍຕິ.

ຕໂຕ ສາ ອາຫ.

໓.

ເອໂສ ເມ ປຸຣິໂສ ເທວ, ກຕປຸພ຺ໂພປກາຣໂກ;

ອຕາຓເມກິກໍ [ອຕ຺ຕານເມກິກໍ ອິຕິກຕ຺ຖຈິ] ເຈໂສ, ທຸກ຺ຂິຕໍ ມຣເຓ ຐິຕໍ.

໔.

ວິຊາຍິຕຸ ມສກ຺ໂກນ຺ຕິໍ, ຄພ຺ຠິນິໍ ທຸກ຺ຂເວທິນິໍ;

ໂຕເຍນ ມໍ ອຸປຏ຺ຐາສິ, ເຕນາຫໍ ສຸຂິຕາ ຕທາ.

໕.

ຠງ຺ຄກລ຺ໂລລມາລາຍ, ອຸຕ຺ຕຣນ຺ຕໍ ມຫຓ຺ຓວໍ;

ປຫາຍ ປາຕຸໍ ກູປສ຺ສ, ຍາຕິ ໂລໂກ ປິປາສິໂຕ.

໖.

ຕເຖວ ວິຊ຺ຊມາເນສຸ, ຊເນສຸ ມນຸຊາຘິປ,

ເອກສ຺ເສວ ມນສ຺ມິໍຫິ, ຄຸຓໍ ຕິຏ຺ຐຕິ ສາຘຸກໍ.

໗.

ປຫຕ຺ວານ ມຕໍ ຫຕ຺ຖິໍ, ມໍສຕ຺ຖີ ເກຈິ ຊນ຺ຕຸໂນ;

ອນຸພນ຺ຘນ຺ຕິ ມໍສຕ຺ຖໍ, ສສໍ ຘາວນ຺ຕ ເມກກໍ.

໘.

ຕເຖວ ວິຊ຺ຊມາເນສຸ, ຊເນສຸ ມນຸຊາຘິປ;

ຄຸຓວນ຺ຕ ມນຸພນ຺ຘນ຺ຕິ, ສປ຺ປຸຣິສໍ ກຕເວທິກໍ.

໙.

ຕສ຺ມາ ສປ຺ປຸຣິເສ ຘມ຺ເມ, ປຕິຏ຺ຐາສ຺ມິ ນຣາຘິປ;

ອນຸສ຺ສຣນ຺ຕິ ເອເຕນ, ກຕປຸພ຺ພູ ປກາຣກໍ.

໑໐.

ອຫຎ຺ຈ ມມ ປຸຕ຺ຕາ ຈ, ເອເຕນມ຺ຫ ສຸຂາປິຕາ;

ຊີວິຕມ຺ປິ ປຣິຈ຺ຈຊ຺ຊ, ມຸຈ຺ຈນີໂຍ ອຍໍ ມຍາຕິ.

ຕໂຕ ຣາຊາ ໂທວາຣິກໍ ປກ຺ໂກສິຕ຺ວາ ຕມ຺ປິ ປຸຈ຺ຉິຕ຺ວາ ອຘຸນາຄຕຠາວໍ ຎຕ຺ວາ ຕສ຺ສາ ສປ຺ປຸຣິສຘມ຺ເມ ສນ຺ຕຸຏ຺ໂຐ ເຕສໍ ອຸຠິນ຺ນມ຺ປິ ມຫນ຺ຕໍ ຍສໍ ອນຸປ຺ປທາສິ. ເຕ ລທ຺ຘຍສາ ຕ ໂຕ ປຏ຺ຐາຍ ທານາທີນິ ປຸຎ຺ຎກມ຺ມານິ ກຕ຺ວາ ສຄ຺ຄປຣາຍຓາ ອເຫສຸນ຺ຕິ.

໑໑.

ຘມ຺ເມ ປຕິຏ຺ຐິຕມນາ ອປິ ມາຕຸຄາມາ,

ເອວໍ ລຠນ຺ຕິ ວິຠວຎ຺ຈ ປສໍສນຎ຺ຈ;

ຘມ຺ມຎ຺ຈ ສາຘຸຈຣິຕໍ ມນສີກໂຣນ຺ໂຕ,

ຘມ຺ເມສຸ ວຕ຺ຕຖ ສທາ ສຸຈິສຊ຺ຊນາຕິ.

ປານີຍທິນ຺ນສ຺ສ ວຕ຺ຖຸໍ ນວມໍ.

໒໐. ສຫາຍສ຺ສ ປຣິຈ຺ຈຕ຺ຕຊີວິຕກສ຺ສ ວຕ຺ຖຸມ຺ຫິ ອຍມານຸປຸພ຺ພີກຖາ

ຠຄວຕິ ປຣິນິພ຺ພຸເຕ ສາວຕ຺ຖິຍໍ ໂສມພ຺ຣາຫ຺ມໂຓ ໂສມທຕ຺ຕພ຺ຣາຫ຺ມໂຓຕິ ທ຺ເວ ພ຺ຣາຫ຺ມຓາ ວສນ຺ຕິ. ຕຕ຺ຖ ໂສມທຕ຺ຕພ຺ຣາຫ຺ມເຓນ ສທ຺ຘິໍ ໂສມພ຺ຣາຫ຺ມໂຓ ເຍຠຸຍ຺ເຍນ ທູຕໍ ກີຬຕິ. ອເຖກທິວສໍ ໂສມທຕ຺ໂຕ ໂສມພ຺ຣາຫ຺ມຓໍ ເຕນ ປຣາເຊຕ຺ວາ ຕສ຺ສ ອຸຕ຺ຕຣາສງ຺ຄຎ຺ຈ ລຎ຺ຉນມຸທ຺ທິກຎ຺ຈ ຄເຫຕ຺ວາ ອຕ຺ຕໂນ ເຄຫໍ ຄຈ຺ຉນ຺ໂຕ ໂສມພ຺ຣາຫ຺ມຓສ຺ສ ເອຫິ ເຄຫໍ ຄຈ຺ຉາ- ມາຕິ ອາຫ. ຕໂຕ ໂສໂມ ນາຫໍ ສມ຺ມ ເອກສາຏໂກ ຫຸຕ຺ວາ ອນ຺ຕຣວີຖິໍ ໂອຕຣິຕຸໍ ສກ຺ໂກມິ. ຄມນໂຕ ເອຕ຺ເຖວ ເມ ຐານໍ ວຣຕຣນ຺ຕິ ອາຫ, ໂສມທຕ຺ເຕນ ເອວໍ ສຕິ ສມ຺ມ ອິມໍ ອຸຕ຺ຕຣາສງ຺ຄໍ ຄຓ຺ຫາຕິ ຕສ຺ສ ຕໍ ທຕ຺ວາ ອິທານິ ສມ຺ມ ເອຫີຕິ ວຸຕ຺ໂຕປິ ນາຄຈ຺ຉຕິ. ປຸນ ເຕນ ໂຠ ກສ຺ມາ ນາຄຈ຺ຉສີຕິ ປຸຏ຺ໂຐ ສມ຺ມ ມມ ຫຕ຺ເຖ ມຸທ຺ທິກໍ ອປສ຺ສນ຺ຕາ ເມ ປຸຕ຺ຕທາຣາທໂຍ ມຍາ ສທ຺ຘິໍ ກລຫໍ ກໂຣນ຺ຕີຕິ ອາຫ, ອຖ ໂສ ເອວໍ ສນ຺ເຕ ຍທາ ເຕ ປໂຫຕິ. ຕທາ ມຍ຺ຫໍ ເທຫີຕິ ມຸທ຺ທິກມ຺ປິ ທຕ຺ວາ ຕໍ ຄເຫຕ຺ວາ ເຄຫໍ ອຄມາສິ. ອຖ ເຕ ເອຕ຺ຕເກນ ສຫາຍາ ອເຫສຸໍ. ອປຣຠາເຄ ໂສມທຕ຺ຕພ຺ຣາຫ຺ມຓໍ ອຍໍ ປຣທາຣກມ຺ມໍ ອກາສີຕິ ມນຸສ຺ສາ ຄເຫຕ຺ວາ ຣຎ຺ໂຎ ທສ຺ເສສຸໍ. ຣາຊາ ຕສ຺ສ ຣູປສມ຺ປຕ຺ຕິໍ ທິສ຺ວາ ຣາຊາຓໍ ອກຕ຺ວາ ມາ ໂຠ ປຸນ ເອວມກາສີຕິ ໂອວທິຕ຺ວາ ວິສ຺ສຊ຺ເຊສິ. ຣາຊາ ນໍ ຍາວຕຕິຍວາຣໍ ໂອວທນ຺ໂຕ ວິສ຺ສຊ຺ເຊຕ຺ວາ ຈຕຸຕ຺ເຖວາເຣ ຄຈ຺ຉເຖຕໍ ອາຆາຕນໍ ເນຕ຺ວາ ມາເຣຖາຕິ ອາຓາເປສິ. ເອວໍ ປາປກມ຺ເມ ນິຣຕາ ອເນກາກາເຣນ ໂອວທນ຺ຕາປິ ນ ສກ຺ກາ ນິວາເຣຕຸໍ. ຕຖາຫິ.

໑.

ໂສຓາ ເຈວ ສິຄາລາ ຈ, ວາຍສາ ນີລມກ຺ຂິກາ;

ອິຈ຺ເຈເຕ ກຸຓເປ ສຕ຺ຕາ, ນ ສກ຺ກາ ເຕ ນິເສຘິຕຸໍ.

໒.

ຕຖາ ປາຓາຕິປາເຕສຸ, ປຣທາເຣ ສຸຣາຍ ຈ;

ມຸສາວາເທສຸ ເຖຍ຺ເຍສຸ, ສຕ຺ຕສຕ຺ຕາ ນ ວາຣິຍາຕິ.

ຕໂຕ ຣາຊປຸຣິສາ ຕໍ ພນ຺ຘິຕ຺ວາ ປກ຺ກມິໍສຸ. ຕທາ ໂສມພ຺ຣາຫ຺ມໂຓ ໂສມທຕ຺ຕໍ ຕຖາ ນີຍມານໍ ທິສ຺ວາ ກມ຺ປມານຫທໂຍ ຣາຊປຸຣິສານໍ ສນ຺ຕິກໍ ຄນ຺ຕ຺ວາ ອິມໍ ໂຠ ມຸຫຸຕ຺ຕໍ ມາ ມາເຣຖ. ຍາວ ຣາຊານໍ ຊານາເປສ຺ສາມີຕິ ວຕ຺ວາ ຣຎ຺ໂຎ ສນ຺ຕິກໍ ຄນ຺ຕ຺ວາ ວນ຺ທິຕ຺ວາ ຐິໂຕ ເທວ ມມ ຊີວິຕໍ ໂສມທຕ຺ຕສ຺ສ ພ຺ຣາຫ຺ມຓສ຺ສ ທສ຺ສາມິ. ເອຕໍ ມຸຎ຺ຈຖ. ຍທິ ມາເຣຕຸກາມາ, ມໍ ມາເຣຖາຕິ ອາຫ. ຣາຊາ ຕຸຓ຺ຫີ [ຕຸຏ຺ໂຐ ອິຕິກຕ຺ຖຈິ] ອໂຫສິ, ຣາຊປຸຣິສາ ໂສມທຕ຺ຕໍ ມຸຎ຺ຈິຕ຺ວາ ໂສມພ຺ຣາຫ຺ມຓໍ ອາຆາຕນໍ ເນຕ຺ວາ ມາເຣສຸໍ, ອໂຫ ກຕຎ຺ຎຸໂນ ກຕເວທິຕາ.

ໂຫຕິ ເຈຕ຺ຖ.

໓.

ກກູປກາຣ ມຕ຺ຕານໍ, ສຣນ຺ຕາ ເກຈິ ມານຸສາ;

ຊີວິຕໍ ເທນ຺ຕິ ໂສໂມວ, ໂສມທຕ຺ຕສ຺ສ ອຕ຺ຕໂນຕິ.

ໂສ ເຕນ ຊີວິຕທາເນນ ເທວໂລເກ ນິພ຺ພຕ຺ຕິຕ຺ວາ ມຫນ຺ເຕ ກນກວິມາເນ ເທວຈ຺ຉຣາສຫສ຺ສປຣິວຸໂຕ ທິພ຺ພສມ຺ປຕ຺ຕິມນຸໂຠນ຺ໂຕ ປຏິວສຕິ. ຕທາ ໂສມທຕ຺ຕພ຺ຣາຫ຺ມໂຓ ເອໂສ ມໍ ມຣຓປ຺ປຕ຺ຕໍ ໂມເຈສີຕິ ວຕ຺ວາ ຕສ຺ສຕ຺ຖາຍ ທານໍ ທຕ຺ວາ ປຕ຺ຕິໍ ອທາສິ. ຕາວເທວສ຺ສ ຕໂຕ ພຫຸຕຣໍ ເທວິສ຺ສຣິຍໍ ອໂຫສິ ເທວານຸຠາວຎ຺ຈ. ຕໂຕ ໂສ ໂສມເທໂວ ອຕ຺ຕໂນ ເທວິສ຺ສຣິຍໍ ໂອໂລເກນ຺ໂຕ ສຫາຍສ຺ສ ອຕ຺ຕໂນ ຊີວິຕທານໍ ອທ຺ທສ. ທິສ຺ວາ ອຕ຺ຕຠາວໍ ວິຊຫິຕ຺ວາ ມາຓວກວຓ຺ເຓນ ໂສມທຕ຺ຕພ຺ຣາຫ຺ມຓໍ ອຸປສງ຺ກມິຕ຺ວາ ປຏິສນ຺ຖາຣໍ ກຕ຺ວາ ອຕ຺ຕານໍ ເທວໂລເກ ນິພ຺ພຕ຺ຕຠາວໍ ປກາເສຕ຺ວາ ຕໍ ຄເຫຕ຺ວາ ອຕ຺ຕໂນ ອານຸຠາເວນ ເທວໂລກໍ ເນຕ຺ວາ ຍຖາກາມໍ ສມ຺ປຕ຺ຕິ ມນຸຠວາຕິ ວຕ຺ວາ ສຕ຺ຕາຫໍ ເທວສ຺ສຣິຍໍ ທຕ຺ວາ ສຕ຺ຕເມ ທິວເສ ເນຕ຺ວາ ຕສ຺ສ ເຄເຫເຍວ ປຕິຏ຺ຐາເປສິ. ຕຕ຺ຖ ຫິ ທິພ຺ພສມ຺ປຕ຺ຕິ ມນຸຠູຕສ຺ສ ມນຸສ຺ສສມ຺ປຕ຺ຕິ ປຏິກ຺ກຸລາ ໂຫຕິ. ຕໂຕ ໂສ ທິພ຺ພສມ຺ປຕ຺ຕິມນຸສ຺ສຣນ຺ໂຕ ກິໂສ ທຸພ຺ພໂລ ອຸປ຺ປຓ຺ຑຸປ຺ປຓ຺ຑຸກຊາໂຕ ອໂຫສິ. ອເຖກທິວສໍ ເທວປຸຕ຺ໂຕ ຕໍ ໂອໂລເກນ຺ໂຕ ຕຖາ ທຸກ຺ຂປ຺ປຕ຺ຕໍ ທິສ຺ວາ ນ ສກ຺ກາ ມນຸສ຺ເສນ ທິພ຺ພສມ຺ປຕ຺ຕິມນຸຠວິຕຸນ຺ຕິ ອິຈ຺ຉິຕິຈ຺ຉິຕສມ຺ປຕ຺ຕິທາຍກໍ ເອກໍ ຈິນ຺ຕາມຓິໍ ທຕ຺ວາ ຕສ຺ສ ຠຣິຍມ຺ປິ ອຕ຺ຕໂນ ອານຸຠາເວນ ຣູປວນ຺ຖໍ ຍສວນ຺ຕໍ ວຓ຺ຓວນ຺ຕໍ ອຕິກ຺ກນ຺ຕມນຸສ຺ສິຕ຺ຖິວຓ຺ຓໍ ອກາສິ, ອປຣຠາເຄ ເຕ ຊຍມ຺ປຕິກາ ປຈ຺ຈກ຺ຂໂຕ ທິຏ຺ຐທິພ຺ພສມ຺ປຕ຺ຕິວິຠວາ ທານໍ ທຕ຺ວາ ສີລໍ ຣກ຺ຂິຕ຺ວາ ສຫາຍເທວປຸຕ຺ຕສ຺ສ ສນ຺ຕິເກເຍວ ນິພ຺ພຕ຺ຕິໍສູຕິ.

໔.

ມນ຺ເທນ ນນ຺ທິຕມນາ ອຸປກາຣເກນ,

ປາຓມ຺ປິ ເທນ຺ຕິ ສຸຊນາ ອິຕິ ຈິນ຺ຕຍິຕ຺ວາ;

ມິຕ຺ຕທ຺ທຸ ມາ ຠວຖ ໂຠ ອຸປກາຣກສ຺ສ;

ປາສໍສິຍາ ຠວຖ ສາຘຸຊເນຫິ ນິຈ຺ຈໍຕິ.

ສຫາຍສ຺ສ ປຣິຈ຺ຈຕ຺ຕຊີວິຕກສ຺ສ ວຕ຺ຖຸໍ ທສມໍ.

ນນ຺ທິຍຣາຊວຄ຺ໂຄ ທຸຕິໂຍ.

ຍກ຺ຂວຎ຺ຈິຕວຄ຺ໂຄ

໒໑. ຍກ຺ຂວຎ຺ຈິຕ ວຕ຺ຖຸມ຺ຫິ ອຍມານຸປຸພ຺ພີກຖາ

ຠຄວຕິ ປຣິນິພ຺ພຸຕມ຺ຫິ ໂກສລຣຎ຺ໂຎ ກິຣ ຊນປເທ ຕຸຓ຺ຑຄາໂມນາມ ອໂຫສິ. ຕຕ຺ເຖໂກ ພຸທ຺ຘທາໂສ ນາມ ມນຸສ຺ໂສ ‘‘ຍາວຊີວໍ ພຸທ຺ຘໍ ສຣຓໍ ຄຈ຺ຉາມິ. ພຸທ຺ໂຘ ເມ ສຣຓໍ ຕາຓໍ ເລຓໍ ປຣາຍຓນ຺ຕິ’’ ເອວໍ ຊີວິຕປຣິຍນ຺ຕໍ ພຸທ຺ຘໍ ສຣຓໍ ຄໂຕ ປຏິວສຕິ, ຕສ຺ມິໍ ສມເຍ ເອໂກ ຊນປທວາສິໂກ ຕຕ຺ຖ ຕຕ຺ຖ ອາຫິຓ຺ຑນ຺ໂຕ ຕໍ ຕຸຓ຺ຑຄາມໍ ປຕ຺ວາ ຕສ຺ເສວ ຆເຣ ນິວາສໍ ກປ຺ເປສິ, ຕສ຺ສ ປນ ຊານປທິກສ຺ສ ສຣີເຣ ເອໂກ ຍກ຺ໂຂ ອາວິສິຕ຺ວາ ປີເຬຕິ, ຕທາ ຕສ຺ສ ຄາມສ຺ສ ປວິສນກາເລ ຍກ຺ໂຂ ພຸທ຺ຘທາໂສ ປາສກສ຺ສ ຄຸຓເຕເຊນ ຕສ຺ສ ເຄຫໍ ປວິສິຕຸໍ ອສກ຺ໂກນ຺ໂຕ ຕໍ ມຸຎ຺ຈິຕ຺ວາ ພຫິຄາເມ ສຕ຺ຕາຫໍ ອຏ຺ຐາສິ ຕສ຺ສາຄມນໍ ໂອໂລເກນ຺ໂຕ. ຕໂຕ ໂສ ຊານປທິໂກ ສຕ຺ຕທິວສໍ ຕຕ຺ຖ ວສິຕ຺ວາ ສຕ຺ຕເມ ທິວເສ ສກຣຏ຺ຐໍ ຄນ຺ຕຸກາໂມ ຄາມາ ນິກ຺ຂມິ. ອຖ ຕໍ ຕຖາ ນິກ຺ຂນ຺ຕໍ ທິສ຺ວາ ຍກ຺ໂຂ ອຄ຺ຄເຫສິ, ອຖ ໂສ ຕໍ ເອຕ຺ຕກໍ ກາລໍ ກຸຫິໍຄໂຕສີຕິ ປຸຈ຺ຉິ. ຍກ຺ໂຂ ໂຠ ຕວຕ຺ຖາຍ ເອຕ຺ຖ ວສນ຺ຕສ຺ສ ເມ ສຕ຺ຕາຫໍ ອຕິກ຺ກນ຺ຕນ຺ຕິ. ຕໂຕ ໂສ ໂກ ເຕ ມຍາ ອຕ຺ໂຖ, ກິໍ ເຕ ທມ຺ມີຕິ, ອຖ ຍກ຺ເຂນ ໂຠ ອຫໍ ຂຸທາຍ ປີຬິໂຕ ຠຕ຺ເຕນ ເມ ອຕ຺ໂຖຕິ ວຸຕ຺ໂຕ ໂສ ເອວໍ ສຕິ ກສ຺ມາ ມໍ ອນ຺ໂຕເຄເຫ ວສນ຺ຕໍ ນ ຄຓ຺ຫີຕິ ອາຫ. ຍກ຺ເຂນ ໂຠ ຕສ຺ມິໍ ຆເຣ ພຸທ຺ຘໍ ສຣຓໍ ຄໂຕ ເອໂກ ອຸປສໂກ ອຕ຺ຖິ, ຕສ຺ສ ສີລເຕເຊນ ເຄຫໍ ປວິສິຕຸມສກ຺ໂກນ຺ໂຕ ອຏ຺ຐາສິນ຺ຕິ ວຸຕ຺ໂຕ ຊານປທິໂກ ສຣຓໍ ນາມ ກິນ຺ຕິ ອຊານນ຺ໂຕ ກິນ຺ຕິ ວຕ຺ວາ ໂສ ສຣຓໍ ອຄ຺ຄເຫສີຕິ ຍກ຺ຂໍ ປຸຈ຺ຉິ. ຍກ຺ໂຂ ‘‘ພຸທ຺ຘໍ ສຣຓໍ ຄຈ຺ຉາມີ’’ຕິ ວຕ຺ວາ ສຣຓໍ ອຄ຺ຄເຫສີຕິ ອາຫ. ຕໍ ສຸຕ຺ວາ ຊານປທິໂກ ອິທານິ ອິມໍ ວຎ຺ເຈສ຺ສາມີຕິ ຈິນ຺ເຕຕ຺ວາ ເຕນຫິ ຍກ຺ຂ ອຫມ຺ປິ ພຸທ຺ຘໍ ສຣຓໍ ຄຈ຺ຉາມີຕິ ອາຫ. ເອວໍ ວຸຕ຺ຕມຕ຺ເຕເຍວ ຍກ຺ໂຂ ມຫາສທ຺ທໍ ກໂຣນ຺ໂຕ ຠ ເຍ ນ ຠມນ຺ໂຕ ປລາຍິ, ເອວໍ ສມ຺ມາສມ຺ພຸທ຺ຘສ຺ສ ສຣຓໍ ອິຘໂລເກ ຠໂຍ ປທ຺ທວ ນິວາຣຓຕ຺ຖໍ ໂຫຕິ, ປຣໂລເກ ສຄ຺ຄໂມກ຺ຂາວຫໍ. ຕຖາຫິ.

໑.

ພຸທ຺ໂຘຕິ ວຈນໍ ເອຕໍ, ອມນຸສ຺ສານໍ ຠຍາວຫໍ;

ພຸທ຺ຘຠຕ຺ຕິກຊນ຺ຕູນໍ, ສພ຺ພທາ ມຸທມາວຫໍ.

໒.

ສພ຺ໂພປທ຺ທວນາສາຍ, ປຈ຺ຈກ຺ຂທິພ຺ພໂມສຘໍ;

ທິພ຺ພມນ຺ຕໍ ມຫາເຕຊໍ, ມຫາຍນ຺ຕໍ ມຫພ຺ຠຸຕໍ.

໓.

ຕສ຺ມາ ໂສ ທາຣຸໂຓ ຍກ຺ໂຂ,

ທິສ຺ວາ ຕໍ ສຣເຓ ຐິຖໍ;

ອຸພ຺ພິຄ຺ໂຄ ຈ ຠຍປ຺ປຕ຺ໂຕ,

ໂລມຫຏ຺ໂຐ ຈ ຉມ຺ຠີໂຕ.

໔.

ຠມນ຺ໂຕ ຘາວິຕໍ ທິສ຺ວາ, ຕິມິໂຣວ ສຸຣິຍຸຄ຺ຄເຕ,

ສິມ຺ພລິຕູລຠຏ຺ຐໍວ, ຈຓ຺ຑວາເຕນ ຂຓ຺ຑິຕໍ.

໕.

ຍໍ ທຸກ຺ຂໍ ຣາຊໂຈຣາຣິ, ຍກ຺ຂເປຕາ ທິສມ຺ຠວໍ;

ນິຈ຺ຉນ຺ເຕນ ມນຸສ຺ເສນ, ຄນ຺ຕພ຺ພໍ ສຣຓຕ຺ຕຍໍຕິ.

ຕໂຕ ຊານປທິໂກ ສຣຓາຄມເນ ມຫາຄຸຓໍ ມຫານິສໍສໍ ໂອໂລເກຕ຺ວາ ພຸທ຺ເຘ ສຄາຣໂວ ສປ຺ເປໂມ ‘‘ຊີວິຕປຣິຍນ຺ຕໍ ພຸທ຺ຘໍ ສຣຓໍ ຄຈ຺ຉາມີ’’ຕິ ສຣຓໍ ຄນ຺ຕ຺ວາ ເຕເນວ ສຣຓາຄມນານຸຠາເວນ ຊີວິຕປຣິໂຍສາເນ ສຸຕ຺ຕປ຺ປພຸທ຺ໂຘວິຍ ເທວໂລເກ ນິພ຺ພຕ຺ຕີຕິ.

໖.

ທິສ຺ວານ ເອວໍ ສຣຓໍ ຄຕໍ ຕໍ,

ອເປນ຺ຕິ ຍກ຺ຂາປິ ມຫພ຺ຠເຍນ;

ປາເລຖ ສີລໍ ສຣຓຎ຺ຈ ຕສ຺ມາ,

ຊຫາຖ ທຸຣິຕໍ ສຸຄຕິໍ ຠຊວ຺ໂຫຕິ.

ຍກ຺ຂວຎ຺ຈິຕວຕ຺ຖຸໍ ປຖມໍ.

໒໒. ມິຈ຺ຉທິຏ຺ຐິກສ຺ສ ວຕ຺ຖຸມ຺ຫິ ອຍມານຸປຸພ຺ພີກຖາ

ຠຄວຕິ ຘຣມາເນ ຣາຊຄຫນຄເຣ ກິຣ ເອໂກ ພ຺ຣຫ຺ມຠຕ຺ຕິໂກ ມິຈ຺ຉາທິຏ຺ຐິໂກ ປຏິວສຕິ, ຕຕ຺ເຖວ ສມ຺ມາທິຏ຺ຐິໂກປິ. ເຕສໍ ອຸຠິນ຺ນມ຺ປິ ທ຺ເວ ປຸຕ຺ຕາ ອເຫສຸໍ. ເຕ ເອກໂຕ ກີຬນ຺ຕາ ວຑ຺ຒນ຺ຕິ. ອຖາປຣຠາເຄ ຄຸຬກີຬໍກີຬນ຺ຕານໍ ສມ຺ມາທິຏ຺ຐິກສ຺ສ ປຸຕ຺ໂຕ ‘‘ນໂມ ພຸທ຺ຘຍາ’’ຕິ ວຕ຺ວາ ຄຸຬ຺ຫໍ ຂິປນ຺ໂຕ ທິວເສ ທິວເສ ຊິນາຕິ. ມິຈ຺ຉາທິຏ຺ຐິກສ຺ສ ປຸຕ຺ໂຕ ‘‘ນໂມ ພ຺ຣຫ຺ມຸໂນ’’ຕິ ວຕ຺ວາ ຂິປນ຺ໂຕ ປຣາເຊຕິ, ຕໂຕ ມິຈ຺ຉາທິຏ຺ຐິກສ຺ສ ປຸຕ຺ໂຕ ນິຈ຺ຈໍ ຊິນນ຺ຕໍ ສມ຺ມາທິຏ຺ຐິກໍ ກຸມາຣໍ ທິສ຺ວາ ສມ຺ມ ຕ຺ວໍ ນິຈ຺ຈເມວ ຊິນາສິ, ກິໍ ວຕ຺ວາ ຄຸຬໍ ຂິປສີຕິ ປຸຈ຺ຉິ. ໂສຫໍ ສມ຺ມ ‘‘ນໂມ ພຸທ຺ຘາຍາ’’ຕິ ວຕ຺ວາ ຂິປາມີຕິ ອາຫ. ໂສປິ ຕໂຕ ປຏ຺ຐາຍ ‘‘ນໂມ ພຸທ຺ຘາຍາ’’ຕິ ວຕ຺ວາ ຂິປຕິ, ອຖ ເຕ ເຍຠຸຍ຺ເຍນ ທູເຕ ສມສມາວ ໂຫນ຺ຕິ. ອປຣຠາເຄ ມິຈ຺ຉາທິຏ຺ຐິກສ຺ສ ປຸຕ຺ໂຕ ປິຕຣາ ສທ຺ຘິໍ ທາຣູນມຕ຺ຖາຍ ວນໍ ຄນ຺ຕ຺ວາ ສກເຏນ ທາຣຸໍ ຄເຫຕ຺ວາ ອາຄຈ຺ຉນ຺ໂຕ ນຄຣທ຺ວາຣສມີເປ ສກຏໍ ວິສ຺ສຊ຺ເຊຕ຺ວາ ຕິເຓ ຂາທນຕ຺ຖາຍ ໂຄເຓ ວິສ຺ສຊ຺ເຊສິ, ໂຄຓາ ຕິຓໍ ຂາທນ຺ໂຕ ອຎ຺ເຎຫິ ໂຄຣູເປຫິ ສທ຺ຘິໍ ອນ຺ໂຕນຄຣໍ ປວິສິໍສຸ. ອຖສ຺ສ ປິຕາ ໂຄເຓ ປຣິເຍສນ຺ໂຕ ສກຏໍ ໂອໂລເກຫີຕິ ປຸຕ຺ຕໍ ນິວຕ຺ເຕຕ຺ວາ ນຄຣໍ ປວິຏ຺ໂຐ ອໂຫສິ, ອຖ ສາຍຓ຺ເຫ ຊາເຕ ມນຸສ຺ສາ ນຄຣທ຺ວາຣໍ ປິທຫິໍສຸ, ຕໂຕ ກຸມາໂຣ ພຫິນຄເຣ ທາຣຸສກຏສ຺ສ ເຫຏ຺ຐາ ສຍນ຺ໂຕ ນິທ຺ທູປຄໂຕ ອໂຫສິ. ອຖ ຕສ຺ສາ ຣຕ຺ຕິຍາ ສມ຺ມາທິຏ຺ຐິໂກ ຈ ມິຈ຺ຉາທິຏ຺ຐິໂກ ຈາຕິ ທ຺ເວ ຍກ຺ຂາ ໂຄຈຣໍ ປຣິເຍສມານາ ສກຏສ຺ສ ເຫຏ຺ຐາ ນິປນ຺ນໍ ກຸມາຣໍ ອທ຺ທສໍສຸ, ເຕສຸ ມິຈ຺ຉາທິຏ຺ຐິໂກ ອິມໍ ຂາທາມີຕິ ອາຫ. ອຖາປໂຣ ມາ ເອວ ມກາສິ, ‘‘ນໂມ ພຸທ຺ຘາຍາ’’ຕິ ວາຈໂກ ເອໂສຕິ, ຂາທາເມເວຕນ຺ຕິ ວຕ຺ວາ ອິຕເຣນ ຍາວຕຕິຍໍ ວາຣິຍມາໂນປິ ຄນ຺ຕ຺ວາ ຕສ຺ສ ປາເທ ຄເຫຕ຺ວາ ອາກຑ຺ຒິ. ຕສ຺ມິໍ ຂເຓ ທາຣໂກ ປຸພ຺ພປຣິຈເຍນ ‘‘ນໂມ ພຸທ຺ຘາຍາ’’ຕິ ອາຫ ຕໍ ສຸຕ຺ວາ ຍກ຺ໂຂ ຠຍປ຺ປຕ຺ໂຕ ໂລມຫຏ຺ໂຐ ຫຕ຺ຖໍ ວິສ຺ສຊ຺ເຊຕ຺ວາ ປຏິກ຺ກມ຺ມ ອຏ຺ຐາສິ. ອໂຫ ອຈ຺ຉຣິຍໍ ພຸທ຺ຘານຸຠາວໍ ອພ຺ຠຸຕໍ, ເອວໍ ອຕ຺ຕໍ ອນີຍ຺ຍາເຕຕ຺ວາ ປຣິຈເຍນ ‘‘ນໂມ ພຸທ຺ຘາຍາ’’ຕິ ວຸຕ຺ຕສ຺ສປິ ຠຍໍ ຉມ຺ຠິຕຕ຺ຕໍ ອຸປທ຺ທວໍ ວາ ນ ໂຫຕິ. ປເຄວ ອຕ຺ຕໍ ນີຍ຺ຍາເຕຕ຺ວາ ຍາວຊີວໍ ພຸທ຺ຘໍ ສຣຓໍ ຄຕສ຺ສາຕິ. ວຸຕ຺ຕຎ຺ຫິ.

໑.

ຍຖາປິ ສິຂິໂນ ນາທໍ, ຠຸຊງ຺ຄານໍ ຠຍາວຫໍ;

ເອວໍ ພຸທ຺ໂຘຕິ ວຈນໍ, ອມນຸສ຺ສານໍ ຠຍາວຫໍ.

໒.

ຍຖາ ມນ຺ຕສ຺ສ ຊປ຺ເປນ, ວິລຍໍ ຍາຕິ ກິພ຺ພິສໍ;

ເອວໍ ພຸທ຺ໂຘຕິ ວຈເນນ, ອປຍນ຺ຕິ [ປຫາຍນ຺ຕິ ອິຕິສພ຺ພຕ຺ຖ] ປິສາຈກາ.

໓.

ອຄ຺ຄິໍ ທິສ຺ວາ ຍຖາ ສິຕ຺ຖໍ, ທູຣໂຕວ ວິລີຍຕິ;

ທິສ຺ວາເນວໍ ສຣຓຄຕໍ, ເປຕາ ເປນ຺ຕິວ [ເປຕາເປນ຺ຕາວ ອິຕິກຕ຺ຖຈິ] ທູຣໂຕ.

໔.

ປວຣໍ ພຸທ຺ຘອິຈ຺ເຈຕ, ມກ຺ຂຣທ຺ວຍມພ຺ຠຸຕໍ;

ສພ຺ໂພ ປທ຺ທວນາສາຍ, ຖິຣປາກາຣ ມຸຄ຺ຄຕໍ.

໕.

ສຕ຺ຕຣຕນປາສາທໍ, ຕເມວ ວຊິຣໍ ຄຸຫໍ;

ຕເມວ ນາວໍ ທີປໍ ຕໍ, ຕເມວ ກວຈໍ ສຸຠໍ.

໖.

ຕເມວ ສິຣສິ ຠາສນ຺ຕໍ, ກິຣີຏໍ ຣຕນາມຍໍ;

ລລາເຏ ຕິລກໍ ຣມ຺ມໍ, ກປ຺ປູຣໍ ນຍນທ຺ວເຍ.

໗.

ຕາຑງ຺ກໍ ກຓ຺ຓຍຸຄເລ, ໂສຓ຺ຓມາລາ ຄເລ ສຸຠາ;

ເອກາວຬິ ຕາຣຫາຣ, ຠາຣາ ຊຕ຺ຕຸສຸ ລງ຺ກຕາ.

໘.

ອງ຺ຄທໍ ພາຫຸມູລສ຺ສ, ກຣຄ຺ເຄ ວລຍໍ ຕຖາ;

ອງ຺ຄຸລິສ຺ວງ຺ຄຸລິຍຎ຺ຈ, ຂຄ຺ຄໍ ມງ຺ຄລສມ຺ມຕໍ.

໙.

ໂສຓ຺ຓາ ຕປຕ຺ຕ ມຸຓ຺ຫີສໍ, ສພາຓໍວ ສຣາສນໍ;

ຕເມວ ສພ຺ພາລງ຺ກາຣໍ, ຕເມວ ທຸຣິຕາປຫໍ.

໑໐.

ຕສ຺ມາ ຫິ ປຓ຺ຑິໂຕ ໂປໂສ,

ໂລກໂລຈນສຕ຺ຖຸໂນ;

ສຣຓໍ ຕສ຺ສ ຄນ຺ເຕວ,

ຄຸຓນາມໍ ເອຫິປສ຺ສິກໍ.

໑໑.

ນໂມຕິ ວຈນໍ ປຸພ຺ພໍ, ພຸທ຺ຘາເຍຕິ ຄິຣໍ ຕທາ;

ສຸປນ຺ເຕນ ກຸມາເຣນ, ມິຈ຺ຉາທິຏ຺ຐິກສູນຸນາ.

໑໒.

ສຸຕ຺ວາ ວຸຕ຺ຕໍ ປິສາ ຈາປິ, ມນຸສ຺ສກຸຓເປ ຣຕາ;

ນ ຫິໍສນ຺ຕິ ອໂຫ ພຸທ຺ຘ, ຄຸຓສາຣມຫນ຺ຕຕາຕິ.

ອຖ ສມ຺ມາທິຏ຺ຐິກຍກ຺ໂຂ ມິຈ຺ຉາທິຏ຺ຐິກສ຺ສ ຍກ຺ຂສ຺ສ ເອວມາຫ, ອຍຸຕ຺ຕໍ ໂຠ ຕຍາ ກຕໍ. ພຸທ຺ຘຄຸເຓ ປຫາໂຣ ທິນ຺ໂນ, ທຓ຺ຑກມ຺ມໍ ຕຍາ ກາຕພ຺ພໍຕິ, ເຕນ ກິໍມຍາ ສມ຺ມ ກາຕພ຺ພນ຺ຕິ ວຸຕ຺ເຕ ພຸຠຸກ຺ຂິຕສ຺ສ ອາຫາຣໍ ເທຫີຕິ ອາຫ. ຕໂຕ ໂສ ສາຘູຕິ ວຕ຺ວາ ຍາວາຫໍ ອາຄຈ຺ຉາມິ, ຕ຺ວໍ ຕາເວຕ຺ຖ ວຈ຺ຉາຫີຕິ ວຕ຺ວາ ພິມ຺ພິສາຣຣຎ຺ໂຎ ກຎ຺ຈນຕຏ຺ຏເກ ວຑ຺ຒິຕໍ ຣສໂຠຊນໍ ອາຫຣິຕ຺ວາ ກຸມາຣສ຺ສ ປິຕຸວຓ຺ເຓນ ທາຣກໍ ໂຠເຊຕ຺ວາ ປຸນ ກຸມາເຣນ ວຸຕ຺ຕພຸທ຺ຘວຈນຎ຺ຈ ອຕ຺ຕນາ ກຕວາຍາມໍ ຈາຕິ ສພ຺ພໍ ຕຏ຺ຏເກ ລິຂິຕ຺ວາ ອິທໍ ຣຎ຺ໂຎເຍວ ປຎ຺ຎາຍຕູຕິ ອຘິຏ຺ຐາຍ ອຄມໍສຸ, ອຖ ປຠາຕາຍ ຣຕ຺ຕິຍາ ຣຎ຺ໂຎ ໂຠຊນກາເລ ຣາຊປຸຣິສາ ຕຕ຺ຖ ຕຏ຺ຏກໍ ອທິສ຺ວາ ນຄຣໍ ອຸປປຣິກ຺ຂນ຺ຕາ ສກເຏ ທາຣກຎ຺ຈ ຕຏ຺ຏກຎ຺ຈ ທິສ຺ວາ ຕຏ຺ຏເກນ ສທ຺ຘິໍ ຕໍ ຄເຫຕ຺ວາ ຣຎ຺ໂຎ ທສ຺ເສສຸໍ. ຣາຊາ ຕຏ຺ຏເກ ອກ຺ຂຣາທີນິ ທິສ຺ວາ ວາເຈຕ຺ວາ ຕສ຺ສ ຄຸເຓ ປສນ຺ໂນ ມຫນ຺ເຕນ ຍເສນ ສທ຺ຘິໍ ເສຏ຺ຐິຏ຺ຐານມທາສິ.

໑໓.

ຊິນສ຺ສ ນາມໍ ສຸປິເນນ ເປວໍ,

ນ ໂຫຕິ ຠີຕິໍ ລປເນນ ຍສ຺ມາ;

ຕສ຺ມາ ມຸນິນ຺ທໍ ສຕຕໍ ສຣາຖ,

ຄຸເຓ ສຣນ຺ຕາ ສຣຓຎ຺ຈ ຍາຖາຕິ.

ມິຈ຺ຉາທິຏ຺ຐິກສ຺ສ ວຕ຺ຖຸໍ ທຸຕິຍໍ.

໒໓. ປາທປີຐິກາຍ ວຕ຺ຖຸມ຺ຫິ ອຍມານຸປຸພ຺ພີກຖາ

ຊມ຺ພຸທີເປ ມຫາໂພຘິໂຕ ກິຣ ທກ຺ຂິຓປສ຺ເສ ເອຕໍ ປຈ຺ຈນ຺ຕນຄຣໍ ອໂຫສິ. ຕຕ຺ຖ ສທ຺ຘາສມ຺ປນ຺ໂນ ຣຕນຕ຺ຕຍມາມໂກ ເອໂກ ອຸປາສໂກ ປຏິວສຕິ. ຕທາ ເອໂກ ຂີຓາສໂວ ຠຄວຕາ ປຣິຠຸຕ຺ຕໍ ປາທປີຐໍ ຖວິກາຍ ປກ຺ຂິປິຕ຺ວາ ຄຕຄຕຏ຺ຐາເນ ປູເຊນ຺ໂຕ ອນຸກ຺ກເມນ ຕໍ ນຄຣໍ ສມ຺ປາປຸຓິຕ຺ວາ ສຸນິວຕ຺ໂຖ ສຸປາຣຸໂຕ ປຕ຺ຕໍ ຄເຫຕ຺ວາ ອນ຺ຕຣວີຖິໍ ປຏິປຊ຺ຊິ ຍຸຄມຕ຺ຕທໂສ ປພ຺ພຊ຺ຊາລີລາຍ ຊນໍ ປຣິໂຕເສນ຺ໂຕ. ອຖ ໂສ ອຸປາສໂກ ຕຖາ ຄຈ຺ຉນ຺ຕໍ ເຖຣໍ ທິສ຺ວາ ປສນ຺ນມານໂສ ອຸປຄນ຺ຕ຺ວາ ປຎ຺ຈປຕິຏ຺ຐິເຕນ ວນ຺ທິຕ຺ວາ ປຕ຺ຕໍ ຄເຫຕ຺ວາ ໂຠເຊຕ຺ວາ ນິພທ຺ຘໍ ມມ ເຄຫໍ ອາຄມນມິຈ຺ຉາມິ, ມມານຸກມ຺ປາຍ ເອຕ຺ເຖວ ວສຖ ສາມີຕິ ຍາຈິຕ຺ວາ ນຄຣາສນ຺ເນ ຣມຓີເຍ ວນສຓ຺ເຑ ນທີກູເລ ປຓ຺ຓສາລໍ ກຕ຺ວາ ເຖຣສ຺ສ ຕໍ ນີຍ຺ຍາເຕຕ຺ວາ ຈຕຸປຈ຺ຈເຍຫິ ປຏິຊຄ຺ຄນ຺ໂຕ ມາເນນ຺ໂຕ ປູເຊນ຺ໂຕ ວສຕິ. ເຖໂຣປິ ຕຕ຺ຖ ຜາສຸກຏ຺ຐາເນ ຠຄວຕາ ປຣິຠຸຕ຺ຕປາທປີຐຘາຕຸໍ ນິຘາຍ ວາລຸກາຫິ ຖູປໍ ກຕ຺ວາ ນິຈ຺ຈໍ ຄນ຺ຘຘູປທີປປຸປ຺ຜປູຊາທີຫິ ປູຊຍມາໂນ ວາສໍ ກປ຺ເປຕິ. ຕສ຺ມິໍ ສມເຍ ຕສ຺ໂສ ປາສກສ຺ສ ອນນ຺ຕຣເຄຫວາສິໂກ ເອໂກ ອິສ຺ສຣຠຕ຺ຕິໂກ ອຕ຺ຕໂນ ເທວຕໍ ນິພທ຺ຘໍ ນມສ຺ສຕິ. ຕໍ ທິສ຺ວາສ຺ສ ອຸປາສໂກ ພຸທ຺ຘຄຸເຓ ວຕ຺ວາ ອເຂຕ຺ເຕ ສມ຺ມ ມາ ວິຣິຍໍ ກໂຣຫິ. ປຊເຫຕໍ ທິຏ຺ຐິໍຕິ ອາຫ. ຕໂຕ ໂສ ເກຣາຏິໂກ ອິສ຺ສຣຠຕ຺ຕິໂກ ໂກ ເຕ ສຕ຺ຖຸ ຄຸຓານຸຠາໂວ, ອມ຺ຫາກໍ ອິສ຺ສຣສ຺ສ ຄຸໂຓວ ມຫນ຺ໂຕຕິ ວຕ຺ວາ ຕສ຺ສ ອຄຸຓໍ ຄຸຓນ຺ຕິ ກເຖນ຺ໂຕ ອາຫ.

໑.

ຕິປຸຣໍ ໂສ ວິນາເສສິ, ລລາຏນຍນຄ຺ຄິນາ;

ອສຸເຣຈ ວິນາເສສິ, ຕິສູເລນ ມຫິສ຺ສໂຣ.

໒.

ຊຏາກລາປມາວຕ຺ຕໍ, ນຈ຺ຈຕີ ທິນສນ຺ຘິຍໍ;

ວາເທຕິ ເຠຣິວີຓາທິໍ, ຄີຕໍຈາປິ ສ ຄາຍຕິ.

໓.

ຠຣິຍາໂຍ ຕສ຺ສ ຕິສ຺ໂສ, ຊຏາເຍກໍ ສມຸພ຺ພເຫ;

ເອກເມເກນ ປສ຺ເສນ, ປສ຺ສມາໂນ ຈເຣກກໍ.

໔.

ຫຕ຺ຖິຈມ຺ມມ຺ພຣຘໂຣ, ເຕເນວ ວາຣິຕາ ຕໂປ;

ອສາທິເສຫິ ປຸຕ຺ເຕຫິ, ຣູເປນ ຈ ສຸປາກໂຏ.

໕.

ຣຕິຍາ ຈ ມຘຸປາເນ ຈ, ພ຺ຍາວໂຏ ສພ຺ພທາ ຈ ໂສ;

ມນຸສ຺ສຏ຺ຐິຘໂຣ ສີສ, ກປາເລເນສ ຠຸຎ຺ຊກິ.

໖.

ນ ຊາໂຕ ນ ຠຍໍ ຕສ຺ສ, ມຣຓໍ ນຕ຺ຖິ ສສ຺ສໂຕ;

ອີທິໂສ ເມ ມຫາເທໂວ, ນຕ຺ຖຎ຺ຎສ຺ສີທິໂສ ຄຸໂຓຕິ.

ຕໍ ສຸຕ຺ວາ ອຸປາສໂກ ສມ຺ມ ຕຸຍ຺ຫໍ ອິສ຺ສຣສ຺ສ ເອເຕ ຄຸຓາ ນາມ ຕາວ ໂຫນ຺ຕຸ. ອຄຸຓາ ນາມ ກິຕ຺ຕກາ ໂຫນ຺ຕີຕິ ວຕ຺ວາ ຠຄວໂຕ ສກລຄຸເຓ ສໍຫຣິຕ຺ວາ ກເຖນ຺ໂຕ ອາຫ.

໗.

ໂລເກ ສພ຺ພສວນ຺ຕີນໍ, ອາຘາໂຣ ສາຄໂຣ ຍຖາ;

ສພ຺ເພສໍ ຄຸຓຣາສີນໍ, ອາຘາໂຣວ ຕຖາຄໂຕ.

໘.

ຈຣາຈຣານໍ ສພ຺ເພສໍ, ອາຘາຣາວ ຘຣາ ອຍໍ;

ຕຖາ ຄຸຓານໍ ສພ຺ເພສໍ, ອາຘາໂຣວ ຕຖາຄໂຕ.

໙.

ເອວໍ ສນ຺ໂຕ ວິຍຕ຺ໂຕຈ [ວິຍນ຺ໂຕ ອິຕິກຕ຺ຖຈິ], ເອວໍ ໂສ ກຣຸຓາປໂຣ;

ເອວ ມິທ຺ຘິວິຘາ ຕສ຺ສ, ເອວເມວໍ ຄຸຓາ ອິຕິ.

໑໐.

ພຸທ຺ໂຘປິ ສກ຺ໂກຕິ ນ ຍສ຺ສ ວຓ຺ເຓ,

ກປ຺ປມ຺ປິ ວຕ຺ວາ ຂຍຕໍ ຄເມຕຸໍ;

ປເຄວ ຈ ພ຺ຣຫ຺ມສຸຣາ ສຸເຣຫິ,

ວຕ຺ຕຸໍ ນ ຫານນ຺ຕຄຸຓສ຺ສ ວຓ຺ຓນ຺ຕິ.

ເອວໍ ວທນ຺ຕາ ປນ ເຕ ອຸໂຠປິ ອມ຺ຫາກໍ ເທໂວ ອຸຕ຺ຕໂມ ອມ຺ຫາກໍ ເທໂວ ອຸຕ຺ຕໂມຕິ ກລຫໍ ວຑ຺ເຒຕ຺ວາ ຣຎ຺ໂຎ ສນ຺ຕິກມຄມໍສຸ, ຣາຊາ ເຕສໍ ກຖໍ ສຸຕ຺ວາ ເຕນຫິ ຕຸມ຺ຫາກໍ ເທວຕານໍ ມຫນ຺ຕຠາວໍ ອິທ຺ຘິປາຏິຫາຣິເຍນ ຊານິສ຺ສາມ. ທສ຺ເສຖ ເຕຫິ ໂນ ອິທ຺ຘິໍຕິ ນຄເຣ ເຠຣິໍ ຈຣາເປສິ. ອິໂຕ ກິຣ ສຕ຺ຕາຫຈ຺ຈເຍນ ອິເມສໍ ທ຺ວິນ຺ນໍ ສຕ຺ຖາຣານໍ ປາຏິຫາຣິຍານິ ຠວິສ຺ສນ຺ຕິ. ສພ຺ເພ ສນ຺ນິປຕນ຺ຕູຕິ ຕໍ ສຸຕ຺ວາ ນານາທິສາສຸ ພຫູ ມນຸສ຺ສາ ສມາຄມິໍສຸ, ອຖ ມິຈ຺ຉາທິຏ຺ຐິກາ ອຊ຺ຊ ອມ຺ຫາກໍ ເທວສ຺ສ ອານຸຠາວໍ ປສ຺ສາມາຕິ ມຫນ຺ຕໍ ປູຊໍ ກໂຣນ຺ໂຕ ຕຕ຺ຖ ສາຣໍ ນາທ຺ທສໍສຸ, ສມ຺ມາທິຏ຺ຐິກາປິ ອຊ຺ຊ ອມ຺ຫາກໍ ຠຄວໂຕ ອານຸຠາວໍ ປສ຺ສິສ຺ສາມາຕິ ວາຬຸກາຖູປໍ ຄນ຺ຕ຺ວາ ຄນ຺ຘມາລາທີຫິ ປູເຊຕ຺ວາ ປທກ຺ຂິຓໍ ກຕ຺ວາ ອຎ຺ຊລິມ຺ປຄ຺ຄຍ຺ຫ ອຏ຺ຐໍສຸ. ອຖ ຣາຊາປິ ພລວາຫນປຣິວຸໂຕ ເອກມນ຺ເຕ ອຏ຺ຐາສິ. ນານາສມຍວາທິໂນປິ ອຊ຺ຊ ເຕສໍ ປາຏິຫາຣິຍໍ ປສ຺ສິສ຺ສາມາຕິ ມຎ຺ຈາຕິມຎ຺ຈໍ ກຕ຺ວາ ອຏ຺ຐໍສຸ. ເຕສໍ ສມາຄເມ ສມ຺ມາທິຏ຺ຐິກາ ວາຬຸກາຖູປ ມຠິມຸຂໍ ກຕ຺ວາ ອຎ຺ຊລິມ຺ປຄ຺ຄຍ຺ຫ ສາມິ ອມ຺ຫາກໍ ຠຄວາ ສພ຺ພພຸທ຺ຘກິຈ຺ຈານິ ນິຏ຺ຐາເປຕ຺ວາ ອນຸປາທິເສສາຍ ນິພ຺ພາຓຘາຕຸຍາ ປຣິນິພ຺ພາຍິ. ສາຣິປຸຕ຺ຕມຫາໂມຄ຺ຄລ຺ລານາທໂຍ ອສີຕິມຫາສາວກາປິ ປຣິນິພ຺ພາຍິໍສຸ, ນຕ຺ເຖຕ຺ຖ ອມ຺ຫາກໍ ອຎ຺ຎໍ ປຏິສຣຓນ຺ຕິ ວຕ຺ວາ ສຈ຺ຈກິຣິຍໍ ກໂຣນ຺ຕາ ອາຫໍສຸ.

໑໑.

ອາປາຓໂກຏິໍ ພຸທ຺ຘສ຺ສ, ສຣຓໍ ໂນ ຄຕາ ຍທິ;

ເຕນ ສຈ຺ເຈນ ຍໍ ຘາຕຸ, ທສ຺ເສຕຸ ປາຏິຫາຣິຍໍ.

໑໒.

ອາປາຓໂກຏິໍ ຘມ຺ມສ຺ສ, ສຣຓໍ ໂນ ຄຕາ ຍທິ;

ເຕນ ສຈ຺ເຈນ ຍໍ ຘາຕຸ, ທສ຺ເສຕຸ ປາຏິຫາຣິຍໍ.

໑໓.

ອາປາຓໂກຏິໍ ສງ຺ຆສ຺ສ, ສຣຓໍ ໂນ ຄຕາ ຍທິ;

ເຕນ ສຈ຺ເຈນ ຍໍ ຘາຕຸ, ທສ຺ເສຕຸ ປາຏິຫາຣິຍໍ.

໑໔.

ຣາມກາເລ ມຸນິນ຺ທສ຺ສ, ປາທຸກາ ຈາສິ ອພ຺ຠຸຕາ;

ເຕນ ສຈ຺ເຈນ ຍໍ ຘາຕຸ, ທສ຺ເສຕຸ ປາຏິຫາຣິຍໍ.

໑໕.

ຉທ຺ທນ຺ຕກາເລ ມຸນິໂນ, ທາຐາ ຉຣໍສິຣຎ຺ຊິຕາ;

ເຕນ ສຈ຺ເຈນຍໍ ຘາຕຸ, ນິຈ຺ຉາເຣຕຸ ຉ ຣໍສິໂຍ.

໑໖.

ຊາຕມຕ຺ໂຕ ຕທາ ພຸທ຺ໂຘ, ຐິໂຕ ປງ຺ກຊມຸທ຺ຘນິ;

ນິຈ຺ຉາເຣສາສຠິໍວາຈໍ, ອຄ຺ໂຄ ເສຏ຺ໂຐຕິອາທິນາ;

ເຕນ ສຈ຺ເຈນຍໍ ຘາຕຸ, ທສ຺ເສຕຸ ປາຏິຫາຣິຍໍ.

໑໗.

ນິມິຕ຺ເຕ ຈຕຸໂຣ ທິສ຺ວາ, ນິກ຺ຂນ຺ໂຕ ອຠິນິກ຺ຂມໍ;

ເຕນ ສຈ຺ເຈນ ຍໍ ຘາຕຸ, ທສ຺ເສຕຸ ປາຏິຫາຣິຍໍ.

໑໘.

ມາຣເສນໍ ປລາເປຕ຺ວາ, ນິສິນ຺ໂນ ພຸຊ຺ຌິ ໂພຘິຍໍ;

ເຕນ ສຈ຺ເຈນ ຍໍ ຘາຕຸ ທສ຺ເສຕຸ ປາຏິຫາຣິຍໍ.

໑໙.

ຘມ຺ມຈກ຺ກໍ ປວຕ຺ເຕສິ, ຊິໂນ ສິປຕເນ ຕທາ;

ເຕນ ສຈ຺ເຈນ ຍໍ ຘາຕຸ, ທສ຺ເສຕຸ ປາຏິຫາຣິຍໍ.

໒໐.

ນນ຺ໂທປນນ຺ທໂຠຄິນ຺ທໍ, ນາຄໍ ນາລາຄິຣິວ຺ຫຍໍ;

ອາຬວກາ ທໂຍ ຍກ຺ເຂ, ພ຺ຣຫ຺ມາໂນ ຈ ພກາ ທໂຍ.

໒໑.

ສຈ຺ຈກາທິນິຄຓ຺ເຐຈ, ກູຏທນ຺ຕາ ທໂຍ ທ຺ວິເຊ;

ທເມສິ ເຕນ ສຈ຺ເຈນ, ທສ຺ເສຕຸ ປາຏິຫາຣິຍໍຕິ.

ເອວຎ຺ຈ ປນ ວຕ຺ວາ ອຸປາສກາ ອມ຺ຫາກໍ ອນຸກມ຺ມໍ ປຏິຈ຺ຈ ມຫາຊນສ຺ສ ມິຈ຺ຉາທິຏ຺ຐິເຠທນຕ຺ຕໍ ປາຏິຫາຣິຍໍ ທສ຺ເສຖ ສາມີຕິ ອາຣາເຘສຸໍ. ອຖ ພຸທ຺ຘານຸຠາວຎ຺ຈ ເຖຣານຸຠາວຎ຺ຈ ອຸປາສການໍ ສຈ຺ຈກິຣິຍານຸຠາວຎ຺ຈ ປຏິຈ຺ຈ ວາຬຸກາຖູປໍ ທ຺ວິຘາ ຠິນ຺ທິຕ຺ວາ ປາທປີຐຘາຕຸ ອາກາສ ມພ຺ຠຸຄ຺ຄນ຺ຕ຺ວາ ຉພ຺ພຓ຺ຓຣໍສິໂຍ ວິສ຺ສຊ຺ເຊນ຺ຕີ ວິລາສມານາ ອຏ຺ຐາສິ. ອຖ ມຫາຊນາ ເຈລຸກ຺ເຂປສຫສ຺ສານິ ປວຕ຺ເຕນ຺ຕາ ສາຘຸກີຬ຺ຫໍ ກີຬນ຺ຕາ ມຫານາທໍ ປວຕ຺ເຕນ຺ຕາ ມຫນ຺ຕໍ ປູຊມກໍສຸ. ມິຈ຺ຉາທິຏ຺ຐິກາປິ ອິມໍ ອຈ຺ຉຣິຍໍ ທິສ຺ວາ ວິມ຺ຫິຕມານສາ ມິຈ຺ຉາທິຏ຺ຐິໍ ຠິນ຺ທິຕ຺ວາ ຣຕນຕ຺ຕຍປຣາຍຓາ ສຣຓ ມຄມໍສູຕິ.

໒໒.

ຜຸຏ຺ໂຐປິ ປາເທນ ຊິນສ຺ສ ເອວໍ,

ກລິງ຺ຄໂຣ ປາ ສິ ມຫານຸຠາໂວ;

ໂລເກກນາຖສ຺ສ ອນາສວສ຺ສ,

ມຫານຸຠາໂວ ຫິ ອຈິນ຺ຕນີໂຍຕິ.

ປາທປີຐິກາຍ ວຕ຺ຖຸໍ ຕຕິຍໍ.

໒໔. ອຸຕ຺ຕຣສາມເຓຣສ຺ສ ວຕ຺ຖຸມ຺ຫິ ອຍມານຸປຸພ຺ພີກຖາ

ໂສ ກິຣ ປຸຣິມພຸທ຺ເຘສຸ [ປຸຣິມພຸທ຺ເຘ ອິຕິສພ຺ພຕ຺ຖ] ກຕາຘິກາໂຣ ຕຕ຺ຖ ຕຕ຺ຖ ຠເວ ວິວຏ຺ຏູປນິສ຺ສຍໍ ປຸຎ຺ຎໍ ອຸປຈິນນ຺ໂຕ ສຸເມຘສ຺ສ ຠຄວໂຕ ກາເລ ວິຊ຺ຊາຘໂຣ ຫຸຕ຺ວາ ຫິມວຕິ ປຏິວສຕິ. ຕທາ ສຸເມໂຘ ນາມ ສມ຺ມາສມ຺ພຸທ຺ໂຘ ວິເວກ ມນຸພ຺ຣູຫນ຺ໂຕ ຫິມວນ຺ຕໍ ຄນ຺ຕ຺ວາ ຣມຓີເຍ ປເທເສ ປລ຺ລງ຺ກໍ ອາຠຸຊິຕ຺ວາ ນິສີທິ. ຕທາ ວິຊ຺ຊາຘໂຣ ອາກາເສນ ຄຈ຺ຉນ຺ໂຕ ຉພ຺ພຓ຺ຓຣໍສີຫິ ວິຣາຊມານໍ ຠຄວນ຺ຕໍ ທິສ຺ວາ ຕີຫິ ກຓິກາຣປຸປ຺ເຜຫິ ປູເຊສິ, ປຸປ຺ຜານິ ພຸທ຺ຘານຸຠາເວນ ສຕ຺ຖຸ ອຸປຣິ ຉຕ຺ຕາກາເຣນ ອຏ຺ຐໍສຸ, ໂສ ເຕນ ຠີຍ຺ໂຍໂສ ມຕ຺ຕາຍ ປສນ຺ນຈິຕ຺ໂຕ ຫຸຕ຺ວາ ອປຣຠາເຄ ກາລໍກຕ຺ວາ ຕາວຕິໍສຠວເນ ນິພ຺ພຕ຺ຕິຕ຺ວາ ອຸຬາຣໍ ທິພ຺ພສມ຺ປຕ຺ຕິມນຸຠວນ຺ໂຕ ຍາວຕາຍຸກໍ ຕຕ຺ຖ ຐຕ຺ວາ ຕໂຕ ຈຸໂຕ ເທວມນຸສ຺ເສສຸ ສໍສຣນ຺ໂຕ ອິມສ຺ມິໍ ພຸທ຺ຘຸປ຺ປາເທ ຣາຊຄຫນຄເຣ ພ຺ຣາຫ຺ມຓມຫາສາລສ຺ສ ປຸຕ຺ໂຕ ຫຸຕ຺ວາ ນິພ຺ພຕ຺ຕິ. ອຸຕ຺ຕໂຣຕິສ຺ສ ນາມໍ ອໂຫສິ. ໂສ ອຸຕ຺ຕມຣູປຘໂຣ ວິຎ຺ຎຸຕໍ ປຕ຺ໂຕ ພ຺ຣາຫ຺ມຓວິຊ຺ຊາສຸ ນິປ຺ຜຕ຺ຕິໍ ປຕ຺ວາ ຊາຕິຍາ ຣູເປນ ວິຊ຺ຊາຍ ສີລາຈາເຣນ ຈ ໂລກສ຺ສ ມຫນີໂຍ ຊາໂຕ, ຕສ຺ສ ຕໍ ປຎ຺ຎາສມ຺ປຕ຺ຕິໍທິສ຺ວາ ວສ຺ສກາໂຣ ມຄຘມຫາມຕ຺ໂຕ ອຕ຺ຕໂນ ຘີຕຣໍ ທາຕຸກາໂມ ຫຸຕ຺ວາ ອຕ຺ຕໂນ ອຘິປ຺ປາຍໍ ປເວເທສິ. ໂສ ນິສ຺ສຣຓຊ຺ຌາສຍຕາຍ ຕໍ ປຏິກ຺ຂິປິຕ຺ວາ ກາເລນກາລໍ ຘມ຺ມເສນາປຕິໍ ປຍິຣຸປາສນ຺ໂຕ ຕສ຺ສ ສນ຺ຕິເກ ຘມ຺ມໍ ສຸຕ຺ວາ ປຏິລທ຺ຘສທ຺ໂຘ ປພ຺ພຊິຕ຺ວາ ວຕ຺ຕສມ຺ປນ຺ໂນ ຫຸຕ຺ວາ ເຖຣໍ ອຸປຏ຺ຐຫຕິ. ເຕນ ຈ ສມເຍນ ເຖຣສ຺ສ ອຎ຺ຎຕໂຣ ອາພາໂຘ ອຸປ຺ປນ຺ໂນ ໂຫຕິ, ຕສ຺ສ ເຠສຊ຺ຊຕ຺ຖາຍ ອຸຕ຺ຕຣສາມເຓໂຣ ປາໂຕວ ປຕ຺ຕຈີວຣ ມາທາຍ ວິຫາຣໂຕ ນິກ຺ຂມ຺ມ ອນ຺ຕຣາມຄ຺ເຄ ຕຬາກສ຺ສ ຕີເຣ ປຕ຺ຕໍ ຐເປຕ຺ວາ ອຸທກສມີປໍ ຄນ຺ຕ຺ວາ ມຸຂໍ ໂຘວຕິ, ຕທາ ອຎ຺ຎຕໂຣ ອຸມ຺ມຄ຺ຄໂຈໂຣ ກຕກມ຺ໂມ ອາຣກ຺ຂປຸຣິເສຫິ ອນຸພທ຺ໂຘ ອຄ຺ຄທ຺ວາເຣເນວ ນຄຣໂຕ ນິກ຺ຂມິຕ຺ວາ ປລາຍນ຺ໂຕ ອຕ຺ຕນາ ຄຫິຕໍ ຣຕນຠຓ຺ຑິກໍ ສາມເຓຣສ຺ສ ປຕ຺ເຕ ປກ຺ຂິປິຕ຺ວາ ປລາຍິ. ໂສ ສາມເຓໂຣປິ ປຕ຺ຕສມີປໍ [ສຕ຺ຕຸສມີປໍ ອິຕິປິ ກຕ຺ຖຈິ] ອຸປຄໂຕ ໂຫຕິ, ໂຈຣໍ ອນຸພນ຺ຘນ຺ຕາ ຣາຊປຸຣິສາ ສາມເຓຣສ຺ສ ປຕ຺ເຕ ຠຓ຺ຑິກໍ ທິສ຺ວາ ອຍໍ ໂຈໂຣ, ອິມິນາ ໂຈຣິຍໍ ກຕນ຺ຕິ ສາມເຓຣໍ ປຈ຺ຉາພາຫໍ ພນ຺ຘິຕ຺ວາ ວສ຺ສກາຣສ຺ສ ພ຺ຣາຫ຺ມຓສ຺ສ ທສ຺ເສສຸໍ. ວສ຺ສກາໂຣ ຈ ຕທາ ຣຎ຺ໂຎ ວິນິຈ຺ຉເຍ ນິຍຸຕ຺ໂຕ ຫຸຕ຺ວາ ເຉຊ຺ຊເຠຊ຺ຊໍ ອນຸສາສຕິ. ໂສ ເອໂສ ປຸພ຺ເພ ມມ ວຈນໍ ນາທິຍິ. ສຸທ຺ຘປາສຓ຺ຑິເຍສຸ ປພ຺ພຊີຕິ ຈ ພທ຺ຘາຆາຕຕ຺ຕາ ຕໍ ກມ຺ມໍ ອໂສເຘຕ຺ວາວ ຊີວນ຺ຕເມເວຕໍ ສູເລ ອຸຕ຺ຕາເສຖາຕິ ອາຓາ ເປສິ, ຣາຊປຸຣິສາ ຕໍ ນິມ຺ພສູເລ ອຸຕ຺ຕາເສສຸໍ. ສາມເຓໂຣ ສູລຄ຺ເຄ ນິສິນ຺ໂນ ອຸປຊ຺ຌາຍສ຺ສ ເມ ໂກ ເຠສຊ຺ຊໍ ອາຫຣິສ຺ສຕີຕິ ສາຣິປຸຕ຺ຕຕ຺ເຖຣໍ ສຣິ. ຕໂຕ ເຖໂຣ ຕໍ ປວຕ຺ຕິໍ ຎຕ຺ວາ ສມ຺ມາສມ຺ພຸທ຺ຘສ຺ສ ກເຖສິ, ຠຄວາປິ ມຫາສາວກປຣິວຸໂຕ ຕສ຺ສ ຎາຓປຣິປາກໍ ໂອໂລເກຕ຺ວາ ຕໍ ຐານມຄມາສິ. ຕໂຕ ຠຄວໂຕ ນິກ຺ຂນ຺ຕຠາວາ ສກລນຄເຣ ໂກລາຫລໍ ອໂຫສິ, ມຫາຊນກາໂຍ ສນ຺ນິປຕິ. ອຖ ຠຄວາ ວິປ຺ຜຸຣນ຺ຕຫຕ຺ຖຕເລ ນຂມຓິມຍູຂສມ຺ຠິນ຺ນປີຕາຠາສຕາຍ ປຄ຺ຆຣນ຺ຕຊາຕິຫິງ຺ຄຸລກສຸວຓ຺ຓຣສຘາຣາວິຍ ຊາລາວຄຸຓ຺ຐິຕມຸທຸຕລຸນງ຺ຄຸລໍ ຫຕ຺ຖໍ ອຸຕ຺ຕຣສ຺ສ ສີເສ ຐເປຕ຺ວາ ອຸຕ຺ຕຣ ອິທໍ ເຕ ປຸພ຺ເພ ກຕປາປກມ຺ມສ຺ສ ຜລໍ ອຸປ຺ປນ຺ນໍ, ຕຕ຺ຖ ຕຍາ ປຈ຺ຈເວກ຺ຂຓພເລນ ອຘິວາສນາ ກາຕພ຺ພາຕິ ອາຫ. ເຕເນວ ອາຫ.

໑.

ອຕີເຕ ກິຣ ເອກສ຺ມິໍ, ຄາເມ ຕ຺ວ ມສິ ທາຣໂກ;

ທາເຣເກຫິ ສມາຄມ຺ມ, ກີຬນ຺ໂຕ ເກຬິມຓ຺ຑເລ.

໒.

ຄເຫຕ຺ວາ ສຸຂຸມໍ ສູກໍ, ຕທາ ຕ຺ວໍ ນິມ຺ພຊລ຺ລິຍາ;

ອຸຕ຺ຕາເສສິ ຕຕ຺ຖ ສູເລ, ຊີວມານກມກ຺ຂິກໍ.

໓.

ອປຣມ຺ປິ ເຕ ປາປກມ຺ມໍ, ປວກ຺ຂາມິ ສຸໂຓຫິ ເມ;

ໂອວທນ຺ຕິໍ ຫິເຕນ ຕ຺ວໍ, ອຕີເຕ ສກມາຕຣໍ.

໔.

ຊີວສູເລ ນິສີທາຕິ, ໂກເປນາຠິສປີ ຕຸວໍ;

ອິເມຫິ ທ຺ວີຫິ ປາເປຫິ, ສຣໍ ສໍສາຣສາຄເຣ.

໕.

ປຎ຺ຈຊາຕິສເຕ ອຈ຺ຉິ, ຊີວສູລມ຺ຫິ ນິມ຺ພເຊ;

ອຍໍ ເຕ ຈຣິມາ ຊາຕິ, ເອຕ຺ຖາປິຈ ວິປຈ຺ຈິ ໂສຕິ.

ເອວມາທິນາ ນເຍນ ຕສ຺ສ ອຊ຺ຌາສຍານຸຣູເປນ ຘມ຺ມໍ ເທເສສິ, ອຸຕ຺ຕໂຣ ອມຕາຠິເສກສທິເສນ ສຕ຺ຖຸໂນ ຫຕ຺ຖສມ຺ຜສ຺ສສຎ຺ຊາຕປສາທໂສມນສ຺ສຕາຍ ອຸຬາຣໍ ປີຕິປາໂມຊ຺ຊໍ ປຏິລຠິຕ຺ວາ ຍຖາປຣິຈິຕໍ ວິປສ຺ສນາມຄ຺ຄໍ ສມາຣູຬ຺ໂຫ ຎາຓສ຺ສ ປຣິປາກໍ ຄຕຕ຺ຕາ ສຕ຺ຖຸ ເທສນາວິລາເສນ ມຄ຺ຄປຏິປາຏິຍາ ສພ຺ພກິເລເສ ເຂເປຕ຺ວາ ຉຬຠິຎ຺ໂຎ ອໂຫສິ. ຘມ຺ມໍ ສຸຕ຺ວາ ຕຕ຺ຖ ສມາຄຕານໍ ເທວມນຸສ຺ສານໍ ຈຕຸຣາສີຕິປາຓສຫສ຺ສານໍ ຘມ຺ມາຠິສມໂຍ ອໂຫສີຕິ ວທນ຺ຕິ. ອຸຕ຺ຕໂຣ ປນ ຉຬຠິຎ຺ໂຎ ຫຸຕ຺ວາ ສູລໂຕ ອຸຏ຺ຐຫິຕ຺ວາ ອາກາເສ ຐຕ຺ວາ ປາຏິຫາຣິຍໍ ທສ຺ເສສິ. ມຫາຊນາ ອຈ຺ຉຣິຍພ຺ຠຸຕຈິຕ຺ຕາ ຊາຕາ ອເຫສຸໍ. ຕາວເທວສ຺ສ ວໂຓຣຸນ຺ຘິ, ໂສ ຠິກ຺ຂູຫິ ອາວຸໂສ ຕາທິສໍ ທຸກ຺ຂໍ ອນຸຠວນ຺ໂຕ ກຖໍ ຕ຺ວໍ ວິປສ຺ສນໍ ອນຸຍຸຎ຺ຊິຕຸໍ ສກ຺ຂີຕິ ປຸຏ຺ໂຐ ປເຄວ ເມ ອາວຸໂສ ສໍສາເຣ ອາທີນໂວ ສງ຺ຂາຣານຎ຺ຈ ສຠາໂວ ສຸທິຏ຺ໂຐ. ຕສ຺ມາຫໍ ຕາທິສໍ ທຸກ຺ຂໍ ອນຸຠວນ຺ໂຕປິ ອສກ຺ຂິໍ ວິປສ຺ສນໍ ວຑ຺ເຒຕ຺ວາ ວິເສສໍ ອຘິຄນ຺ຕຸໍຕິ ອາຫ. ອຖາປຣຠາເຄ ໂສ ຠິກ຺ຂຸສງ຺ຆມຊ຺ເຌ ອຕ຺ຕໂນ ປຸພ຺ພຈຣິຕາ ປທານໍ ປກາເສນ຺ໂຕ ອິມາ ຄາຖາ ອຠາສິ.

໖.

ສຸເມໂຘ ນາມ ສມ຺ພຸທ຺ໂຘ, ທ຺ວຕ຺ຕິໍສວຣລກ຺ຂໂຓ;

ວິເວກກາໂມ ສມ຺ພຸທ຺ໂຘ, ຫິມວນ຺ຕ ມຸປາຄມິ.

໗.

ອຊ຺ໂຌຄເຫຕ຺ວາ ຫິມວນ຺ຕໍ, ອຄ຺ໂຄ ກາຣຸຓິໂກ ມຸນິ;

ປລ຺ລງ຺ກໍ ອາຠຸຊິຕ຺ວານ, ນິສີທິ ປຸຣິສຸຕ຺ຕໂມ.

໘.

ວິຊ຺ຊາຘໂຣ ຕທາ ອາສິໍ, ອນ຺ຕລິກ຺ຂຈໂຣ ອຫໍ;

ຕິສູລໍ ສຸກຕໍ ຄຍ຺ຫ, ຄຈ຺ຉາມິ ອມ຺ພເຣ ຕທາ.

໙.

ປພ຺ພຕຄ຺ເຄ ຍຖາ ອຄ຺ຄິ, ປຸຓ຺ຓມາເສວ ຈນ຺ທິມາ;

ວນໍ ໂອຠາສເຕ ພຸທ຺ໂຘ, ສາລຣາຊາວ ຜຸລ຺ລິໂຕ.

໑໐.

ວນຄ຺ຄາ ນິກ຺ຂມິຕ຺ວານ, ພຸທ຺ຘຣໍສີ ວິຘາວເຣ;

ນລຄ຺ຄິວຓ຺ຓສງ຺ກາສາ, ທິສ຺ວາ ຈິຕ຺ຕໍ ປສາທຍິໍ.

໑໑.

ວິຈິນໍ ອທ຺ທສໍ ປຸປ຺ຜໍ, ກຓິກາຣໍ ເທວຄນ຺ຘິກໍ;

ຕີຓິ ປຸປ຺ຜານິ ອາທາຍ, ພຸທ຺ຘເສຏ຺ຐໍ ອປູຊຍິໍ.

໑໒.

ພຸທ຺ຘສ຺ສ ອານຸຠາເວນ, ຕີຓິ ປຸປ຺ຜານິ ເມ ຕທາ;

ອຸທ຺ຘວຓ຺ຏາ ອໂຘປຕ຺ຕາ, ຉາຍໍ ກຸພ຺ພນ຺ຕິ ສຕ຺ຖຸໂນ.

໑໓.

ເຕນ ກມ຺ເມນ ສຸກເຕນ, ເຈຕນາປຓິຘີຫິຈ;

ຊຫິຕ຺ວາ ມານຸສໍ ເທຫໍ, ຕາວຕິໍສມຄຎ຺ຉຫໍ.

໑໔.

ຕຕ຺ຖ ເມ ສຸກຕໍ ພ຺ຍມ຺ຫໍ, ກຓິກາຣີຕິ ຎາຍຕິ;

ສຏ຺ຐິໂຍຊນ ມຸພ຺ເພຘໍ, ຕິໍສໂຍຊນວິຕ຺ຖຕໍ.

໑໕.

ສຫສ຺ສຂຓ຺ຑໍ ສຕເຠຓ຺ຑຸ, ຘຊາລຸ ຫຣິຕາມຍໍ;

ສຕສຫສ຺ສານິ ພ຺ຍູຫານິ, ພ຺ຍມ຺ເຫ ປາຕຸຣຫໍສຸ ເມ.

໑໖.

ໂສຓ຺ຓມຍາ ມຓິມຍາ, ໂລຫິຕງ຺ກມຍາ ປິຈ;

ຜລິກາ ປິຈ ປລ຺ລງ຺ກາ, ຍທິຈ຺ຉກ ຍທິຈ຺ຉກາ.

໑໗.

ມຫາຣຫຎ຺ຈ ສຍນໍ, ຕູລິກໍ ວິກຕີຍກໍ;

ອຸທ຺ທໂລມິກເອກນ຺ຕໍ, ພິມ຺ໂພຫນສມາຍຸຕໍ.

໑໘.

ຠວນາ ນິກ຺ຂມິຕ຺ວານ, ຈຣນ຺ໂຕ ເທວຈາຣິກໍ;

ຍທາ ອິຈ຺ຉາມິ ຄມນໍ, ເທວສໍຆປຸຣກ຺ຂໂຕ.

໑໙.

ປຸປ຺ຜສ຺ສ ເຫຏ຺ຐາ ຕິຏ຺ຐາມິ, ອຸປຣິຈ຺ຉທນໍ ມມ;

ສມນ຺ຕາ ໂຍຊນສຕໍ, ກຓິກາເຣຫິ ຉາທິຕໍ.

໒໐.

ສຏ຺ຐິຕຸຣິຍສຫສ຺ສານິ, ສາຍໍ ປາຕໍ ອຸປຏ຺ຐຫຸໍ;

ປຣິວາເຣນ຺ຕິ ມໍ ນິຈ຺ຈໍ, ຣຕ຺ຕິນ຺ທິວມຕນ຺ທິຕາ.

໒໑.

ຕຕ຺ຖ ນຈ຺ເຈຫິ ຄີເຕຫິ, ຕາເລຫິ ວາທິເຕຫິ ຈ;

ຣມາມິ ຂິຑ຺ຑາຣຕິຍາ, ໂມທາມິ ກາມກາມຫໍ.

໒໒.

ຕຕ຺ຖ ຠຸຕ຺ວາ ຈ ປິຕ຺ວາ ຈ, ໂມທາມິ ຕິທເສ ຕທາ;

ນາຣີຄເຓຫິ ສຫິໂຕ, ໂມທາມິ ພ຺ຍມ຺ຫມຸຕ຺ຕເມ.

໒໓.

ສຕານໍ ປຎ຺ຈກ຺ຂຕ຺ຕຸຎ຺ຈ, ເທວຣຊ຺ຊ ມກາຣຍິໍ;

ສຕານໍ ຕີຓິກ຺ຂຕ຺ຕຸໍຈ, ຈກ຺ກວຕ຺ຕີ ອໂຫສຫໍ;

ປເທສຣຊ຺ຊໍ ວິປຸລໍ, ຄຓນາໂຕ ອສໍຂິຍໍ.

໒໔.

ຠວາຠເວ ສໍສຣນ຺ໂຕ, ມຫາໂຠຄໍ ລຠາມຫໍ;

ໂຠເຄ ເມ ອູນຕາ ນຕ຺ຖິ, ພຸທ຺ຘປູຊາຍິ ທໍ ຜລໍ.

໒໕.

ທ຺ເວ ເມ ຠເວ ສໍສຣາມິ, ເທວຕ຺ເຕ ອຖ ມານຸເສ;

ອຎ຺ຎໍ ຄຕິໍ ນ ຊານາມິ, ພຸທ຺ຘປູຊາຍິທໍ ຜລໍ.

໒໖.

ທ຺ເວ ເມ ກຸເລ ປຊານາມິ, ຂຕ຺ຕິເຍ ຈາປິ ພ຺ຣາຫ຺ມເຓ;

ນີເຈ ກຸເລ ນ ຊານາມິ, ພຸທ຺ຘປູຊາຍິທໍ ຜລໍ.

໒໗.

ຫຕ຺ຖິຍານໍ ອສ຺ສຍານໍ, ສິວິກໍ ສນ຺ທມານິກໍ;

ລຠາມິ ສພ຺ພເມເວ ຕໍ, ພຸທ຺ຘປູຊາຍິທໍ ຜລໍ.

໒໘.

ທາສີຄຓໍ ທາສຄຓໍ, ນາຣິໂຍ ຈ ອລງ຺ກຕາ;

ລຠາມິ ສພ຺ພ ເມເວ ຕໍ, ພຸທ຺ຘປູຊາຍິທໍ ຜລໍ.

໒໙.

ໂກເສຍ຺ຍກມ຺ພລິຍານິ, ໂຂມກປ຺ປາສິການິຈ;

ລຠາມິ ສພ຺ພເມເວຕໍ, ພຸທ຺ຘປູຊາຍິທໍ ຜລໍ.

໓໐.

ນວວຕ຺ຖໍ ນວຜລໍ, ນວຄ຺ຄຣສໂຠຊນໍ;

ລຠາມິ ສພ຺ພເມເວຕໍ, ພຸທ຺ຘປູຊາຍິທໍ ຜລໍ.

໓໑.

ອິມໍ ຂາທ ອິມໍ ຠຸຎ຺ຊ, ອິມມ຺ຫິ ສຍເນ ສຍ;

ລຠາມິ ສພ຺ພເມເວຕໍ, ພຸທ຺ຘປູຊາຍິທໍ ຜລໍ.

໓໒.

ສພ຺ພຕ຺ຖ ປູຊິໂຕ ໂຫມິ, ຍໂສ ອຈ຺ຈຸຄ຺ຄໂຕ ມມ;

ມເຫສກ຺ໂຂ ຆທາ ໂຫມິ, ອເຠຊ຺ຊປຣິໂສ ສທາ;

ຎາຕີນໍ ອຸຕ຺ຕໂມ ໂຫມິ, ພຸທ຺ຘປູຊາຍິທໍ ຜລໍ.

໓໓.

ສີຕໍ ອຸຓ຺ຫໍ ນ ຊານາມິ, ປຣິຬາໂຫ ນ ວິຊ຺ຊຕິ;

ອໂຖ ເຈຕສິກໍ ທຸກ຺ຂໍ, ຫທເຍ ເມ ນ ວິຊ຺ຊຕິ.

໓໔.

ສຸວຓ຺ຓວຓ຺ໂຓ ຫຸຕ຺ວານ, ສໍສຣາມິ ຠວາຠເວ;

ເວວຓ຺ຓິຍໍ ນ ຊານາມິ, ພຸທ຺ຘປູຊາຍິທໍ ຜລໍ.

໓໕.

ເທວໂລກາ ຈວິຕ຺ວານ, ສຸກ຺ກມູເລນ ໂຈທິໂຕ;

ສາວຕ຺ຖິຍໍ ປຸເຣ ຊາໂຕ, ມຫາສາເລ ສຸອຑ຺ຒເກ.

໓໖.

ປຎ຺ຈກາມຄຸເຓ ຫິຕ຺ວາ, ປພ຺ພຊິໍອນຄາຣິຍໍ;

ຊາຕິຍາ ສຕ຺ຕວສ຺ໂສຫໍ, ອຣຫຕ຺ຕມປາປຸຓິໍ.

໓໗.

ອຸປສມ຺ປາທຍີ ພຸທ຺ໂຘ, ຄຸຓມຎ຺ຎາຍ ຈກ຺ຂຸມາ;

ຕຣຸໂຓວ ປູຊນີໂຍ ຫໍ, ພຸທ຺ຘປູຊາຍິທໍ ຜລໍ.

໓໘.

ທິພ຺ພຈກ຺ຂຸໍ ວິສຸທ຺ຘໍ ເມ, ສມາຘິກຸສໂລ ອຫໍ;

ອຠິຎ຺ຎາປາຣມິປ຺ປຕ຺ໂຕ, ພຸທ຺ຘປູຊາຍິທໍ ຜລໍ.

໓໙.

ປຏິສມ຺ຠິທາ ອນຸປ຺ປຕ຺ໂຕ, ອິທ຺ຘິປາເທສຸ ໂກວິໂທ;

ສທ຺ຘມ຺ເມ ປາຣມິປ຺ປຕ຺ໂຕ, ພຸທ຺ຘປູຊາຍິທໍ ຜລໍ.

໔໐.

ຕິໍສກປ຺ປສຫສ຺ສມ຺ຫິ, ຍໍ ພຸທ຺ຘມຠິປູຊຍິໍ;

ທຸຄ຺ຄຕິໍ ນາຠິຊານາມິ, ພຸທ຺ຘປູຊາຍິທໍ ຜລໍ.

໔໑.

ກິເລສາ ຌາປິຕາ ມຍ຺ຫໍ, ຠວາ ສພ຺ເພ ສມູຫຕາ;

ນາໂຄວ ພນ຺ຘນໍ ເຉຕ຺ວາ, ວິຫຣາມິ ອນາສໂວ.

໔໒.

ສ຺ວາຄຕໍ ວຕ ເມ ອາສິ, ພຸທ຺ຘເສຏ຺ຐສ຺ສ ສນ຺ຕິກໍ;

ຕິສ຺ໂສ ວິຊ຺ຊາ ອນຸປ຺ປຕ຺ໂຕ, ກຕໍ ພຸທ຺ຘສ຺ສ ສາສນໍ.

໔໓.

ປຏິສມ຺ຠິທາ ຈຕສ຺ໂສ ຈ, ວິເມກ຺ຂາ ປິຈ ອຏ຺ຐິເມ;

ຉຬຠິຎ຺ຎາ ສຈ຺ຉິກຕາ, ກຕໍ ພຸທ຺ຘສ຺ສ ສາສນໍຕິ;

ຕໍ ສຸຕ຺ວາ ພຫູ ກຸສລກມ຺ມປຣາຍຓາ ອເຫສຸໍ.

໔໔.

ສເຫຕຸກາ ປຈ຺ຉິມິກາປິ ສຕ຺ຕາ,

ປາປໍ ນ ສກ຺ໂກນ຺ຕິ ຊຫາຕຸເມວໍ;

ອນິຈ຺ຉມາເນຫິ ຊເນຫິ ທຸກ຺ຂໍ,

ອາຣາວ ປາປໍ ປຣິວຊ຺ຊນີຍໍຕິ.

ອຸຕ຺ຕຣສາມເຓຣສ຺ສ ວຕ຺ຖຸໍ ຈຕຸຕ຺ຖໍ.

໒໕. ກວີຣປຏ຺ຏນ ວຕ຺ຖຸມ຺ຫິ ອຍມານຸປຸພ຺ພີກຖາ

ຊມ຺ພຸທີເປ ກິຣ ໂຈຬຣຏ຺ເຐ ກາວີຣປຏ຺ຏນໍ ນາມ ອໂຫສິ. ຕຕ຺ຖ ມາຫິສ຺ສຣິກາ ພຫູ ມິຈ຺ຉາທິຏ຺ຐິກາ ວສນ຺ຕິ. ຕຕ຺ເຖກສ຺ມິໍ ເທວາລເຍ ຈິຕ຺ຕກມ຺ມໍ ກໂຣນ຺ຕາ ເອກສ຺ມິໍ ຜລເກ ອິສ຺ສຣສ຺ສ ໂອນມິຕ຺ວາ ວນ຺ທນາກາຣໍ ຠຄວໂຕ ຣູປໍ ອກໍສຸ. ຕສ຺ມິໍ ສມເຍ ຕຕ຺ຖ ພຫູ ອຸປາສກາ ຕໍ ເທວກຸລໍ ຄນ຺ຕ຺ວາ ຕຕ຺ຖ ຕຕ຺ຖ ຈິຕ຺ຕກມ຺ມານິ ໂອໂລເກນ຺ຕາ ຕສ຺ມິໍ ຜລເກ ຕໍ ຈິຕ຺ຕກມ຺ມໍ ອທ຺ທສໍສຸ. ທິສ຺ວານ ເຕ ອໂຫ ອມ຺ເຫຫິ ອປສ຺ສິຕພ຺ພໍ ປສ຺ສິຕໍ. ສເທວເກ ໂລເກ ສມາຣເກ ສພ຺ຣຫ຺ມເກ ສສ຺ສມຓພ຺ຣາຫ຺ມຓິຍາສເທວມນຸສ຺ສາຍ ປຊາຍ ຈ ອປຣິມາເຓສຸ ຈກ຺ກວາເຬສຸ ຠຄວໂຕ ອຸຕ຺ຕຣິຕຣໍ ຐເປຕ຺ວາ ສມສໂມປິ ນຕ຺ຖິ. ສກເລຫິ ສຕ຺ຕນິກາເຍຫິ ວນ຺ທນີໂຍ ປູຊນີໂຍ ຠຄວາ. ອນນຸຣູປໍ ຕສ຺ສ ເອເຕຫິ ກຕໍຕິ ໂຣທນ຺ຕາ ປຣິເທວນ຺ຕາ ຣາຊທ຺ວາຣໍ ຄນ຺ຕ຺ວາ ອຸຄ຺ໂຆເສສຸໍ, ຕໍ ສຸຕ຺ວາ ຣາຊາ ເຕ ປກ຺ໂກສາເປຕ຺ວາ ກສ຺ມາ ຕຸມ຺ເຫ ອຸຄ຺ໂຆເສຖາຕິ ປຸຈ຺ຉິ, ເຕ ເອວ ມາຫໍສຸ. ເທວ ອມ຺ຫາກໍ ຠຄວາ ເທວາຕິເທໂວ ສກ຺ກາຕິສກ຺ໂກ ພ຺ຣຫ຺ມາຕິພ຺ຣຫ຺ມາ ເມຣຸວ ອຈໂລ ສາຄໂຣ ຄມ຺ຠີໂຣ ອາກາໂສວ ອນນ຺ໂຕ ປຖວີວ ປຕ຺ຖໂຏຕິອາທີຫິ ຠຄວໂຕ ຄຸຓໍ ວຓ຺ເຓສຸໍ. ເຕນ ວຸຕ຺ຕໍ ອປທາເນ.

໑.

ພຕ຺ຕິໍສລກ຺ຂຓຘໂຣ, ສຸນກ຺ຂຕ຺ໂຕວ ຈນ຺ທິມາ;

ອນຸພ຺ຍຎ຺ຊນສມ຺ປນ຺ໂນ, ສາລຣາຊາວ ຜຸລ຺ລິໂຕ.

໒.

ຣໍສິຊາລປຣິກ຺ຂິຕ຺ໂຕ, ທິຕ຺ໂຕວ ກນກາຈໂລ;

ພ຺ຍາມປ຺ປຠາປຣິວຸໂຕ, ສຕຣໍສິ ທິວາກໂຣ.

໓.

ໂສຓ຺ຓາ ນໂນ ຊິນວໂຣ, ສມຓີວ ສິລຸຈ຺ຈໂຍ;

ກຣຸຓາປຸຓ຺ຓຫທໂຍ, ວິວຏ຺ໂຏ ວິຍ ສາຄໂຣ.

໔.

ໂລກວິສ຺ສຸຕກິຕ຺ຕີວ, ສິເນຣຸວ ນຄຸຕ຺ຕໂມ;

ຍສສາ ວິຕໂຕ ຘີໂຣ, ອາກາສສທິໂສ ມຸນິ.

໕.

ອສງ຺ຄຈິຕ຺ໂຕ ສພ຺ພຕ຺ຖ, ອນິໂລ ວິຍ ນາຍໂກ;

ປຕິຏ຺ຐາ ສພ຺ພຠູຕານໍ, ມຫີວ ມຸນິສຸຕ຺ຕໂມ.

໖.

ອນູປລິຕ຺ໂຕ ໂລເກນ, ໂຕເຍນ ປທຸມໍ ຍຖາ;

ກຸວາທຄຈ຺ຉທຫໂນ, ອຄ຺ຄິກ຺ຂນ຺ໂຘວ ໂສຠຕິ.

໗.

ອຄໂທ ວິຍ ສພ຺ພຕ຺ຖ, ກິເລສວິສນາສໂກ;

ຄນ຺ຘມາທນເສໂລວ, ຄຸຓຄນ຺ຘວິຠູສິໂຕ.

໘.

ຄຸຓານໍ ອາກໂຣ ຘີໂຣ, ຣຕນານໍວ ສາຄໂຣ;

ສິນ຺ຘູວ ວນຣາຊີນໍ, ກິເລສມລຫາຣໂກ.

໙.

ວິຊຍີວ ມຫາໂຍໂຘ, ມາຣເສນປ຺ປມທ຺ທໂນ;

ຈກ຺ກວຕ຺ຕີວ ໂສ ຣາຊາ, ໂພຊ຺ຌງ຺ຄຣຕນິສ຺ສໂຣ.

໑໐.

ມຫາຠິສກ຺ກສງ຺ກາໂສ, ໂທສພ຺ຍາຘິຕິກິຈ຺ຉໂກ;

ສລ຺ລກຕ຺ໂຕ ຍຖາ ເວຊ຺ຊາ, ທິຏ຺ຐິຄຓ຺ຑວິຜາລໂກ.

໑໑.

ສຕ຺ຖາ ໂນ ຠຄວາ ເທວ, ມຫາພ຺ຣຫ຺ເມຫິ ວນ຺ທິໂຕ;

ເທວິນ຺ທສຸຣສິທ຺ເຘຫິ, ວນ຺ທນີໂຍ ສທາ ທຣາ.

໑໒.

ສພ຺ເພສຸ ຈກ຺ກວາເຬສຸ, ເຍ ອຄ຺ຄາ ເຍ ຈ ປູຊິຕາ;

ເຕສມຄ຺ໂຄ ມຫາຣາຊ, ຠຄວາ ໂນ ປຕາປວາຕິ.

ອຍຸຕ຺ຕໍ ເທວ ເທວກຸເລຫິ ກຕໍຕິ ອາຫໍສຸ. ຕໍ ສຸຕ຺ວາ ຣາຊາ ໂຠ ສພ຺ເພປິ ມນຸສ຺ສາ ອຕ຺ຕໂນ ອຕ຺ຕໂນ ເທວຕານໍ ມຫນ຺ຕຠາວໍ ກເຖນ຺ຕິ. ຕຸມ຺ຫາກໍ ປນ ສຕ຺ຖຸໂນ ມຫນ຺ຕຠາວໍ ກຖໍ ອມ຺ຫາກໍ ຊານາເປຖາຕິ, ອຸປາສກາ ນ ຄຣຸ ຕ຺ວໍ ມຫາຣາຊ ຜລກໍ ອາຫຣາເປຕ຺ວາ ສຸທ຺ຘວຕ຺ເຖນ ເວເຐຕ຺ວາ ຕໍ ອຕ຺ຕໂນ ມຸທ຺ທິກາຍ ລຎ຺ຉິຕ຺ວາ ສຸຣກ຺ຂິຕສຸໂຄປິເຕ ເອກສ຺ມິໍ ເທວກຸເລ ຐເປຕ຺ວາ ສຕ຺ຕາຫຈ຺ຈເຍນ ອາຫຣາເປຕ຺ວາ ຕໍ ໂອໂລເກຖ, ຕທາ ໂນ ສຕ຺ຖຸໂນ ມຫນ຺ຕານຸຠາວໍ ຊານາຖາຕິ ອາຫໍສຸ, ອຖ ຣາຊາ ເຕສໍ ວຸຕ຺ຕນິຍາເມເນວ ກາຣາເປຕ຺ວາ ອນ຺ໂຕເທວກຸເລ ຐເປຕ຺ວາ ສພ຺ພທ຺ວາຣານິ ປິທຫິຕ຺ວາ ລຎ຺ເຉຕ຺ວາ ຣກ຺ເຂຍ຺ຍາຖາຕິ ນິໂຍເຊສິ. ຕໂຕ ເຕ ອຸປາສກາ ສພ຺ເພ ສນ຺ນິປຕິຕ຺ວາ ສຕ຺ຕາຫໍ ທານໍ ເທນ຺ຕາ ສີລໍ ຣກ຺ຂນ຺ຕາ ອຸໂປສຖກມ຺ມໍ ກໂຣນ຺ຕາ ສພ຺ພສຕ຺ເຕສຸ ເມຕ຺ຕິໍ ຠາເວນ຺ຕາ ສພ຺ພສຕ຺ຕານໍ ອຕ຺ຕນາ ກຕປຸຎ຺ເຎສຸ ປຕ຺ຕິໍ ເທນ຺ຕາ ຕິຓ຺ຓໍ ຣຕນານໍ ປູຊໍ ກໂຣນ຺ຕາ ເອວໍ ອຸຄ຺ໂຆເສສຸໍ. ອມ຺ຫາກໍ ກຕກຸສລນິສ຺ສນ຺ເທນ ໂລເກ ມຫິທ຺ຘິກາ ມຫານຸຠາວາ ສພ຺ເພ ເທວາ ຈ ໂລກໍ ປາເລນ຺ຕາ ຈຕ຺ຕາໂຣ ມຫາຣາຊາໂນ ຈ ອມ຺ຫາກໍ ສຕ຺ຖຸໂນ ອຸປຏ຺ຐານາຍ [ອຸປຏ຺ຐາຍ ອິຕິສພ຺ພຕ຺ຖ] ຐິຕຠາວໍ ທສ຺ເສນ຺ຕູຕິ ສຈ຺ຈກິຣິຍໍ ອກໍສຸ. ອຖ ເຕສໍ ປຸຎ຺ຎານຸຠາເວນ ຕສ຺ມິໍ ຂເຓ ສກ຺ກສ຺ສ ເທວຣຎ຺ໂຎ ປຓ຺ຑຸກມ຺ພລສິລາສນໍ ອຸຓ຺ຫາກາຣໍ ທສ຺ເສສິ. ຕໂຕ ໂສ ມນຸສ຺ສໂລກໍ ໂອໂລເກນ຺ໂຕ ມິຈ຺ຉາທິຏ຺ຐີຫິ ກຕໍ ຕໍ ວິປ຺ປກາຣໍ ທິສ຺ວາ ສໍວິຄ຺ໂຄ ອາຄນ຺ຕ຺ວາ ອິສ຺ສຣໍ ຠຄວໂຕ ປາເທ ວນ຺ທິຕ຺ວາ ສຍິຕາກາຣໍ ກຕ຺ວາ ຕໍ ປວຕ຺ຕິໍ ອຸປາສການໍ ກເຖຕ຺ວາ ສກຏ຺ຐານເມວ ອຄມາສິ. ຕໂຕ ສຕ຺ຕເມ ທິວເສປາໂຕວ ເຕ ສພ຺ເພປິ ຣຎ຺ໂຎ ສນ຺ຕິກໍ ຄນ຺ຕ຺ວາ ວນ຺ທິຕ຺ວາ ເອວມາຫໍສຸ. ເທວ ອິສ຺ສໂຣ ອມ຺ຫາກໍ ຠຄວໂຕ ປາເທ ສິຣສາ ວນ຺ທິຕ຺ວາ ນິປນ຺ໂນຕິ. ອຖ ຣາຊາ ເຕສໍ ກຖໍ ສຸຕ຺ວາ ນຄເຣ ເຠຣິໍ ຈຣາເປຕ຺ວາ ມຫາຊເນ ສນ຺ນິປາເຕຕ຺ວາ ເຕຫິ ປຣິວຸໂຕ ເທວກຸລໍ ຄນ຺ຕ຺ວາ ລຎ຺ຉໍ ຠິນ຺ທາເປຕ຺ວາ ທ຺ວາຣໍ ວິວຣິຕ຺ວາ ຜລກໍ ອາຫຣາເປຕ຺ວາ ເວຐິຕສາຏເກ ໂມຈາເປສິ. ອຖ ຣາຊາ ຈ ມຫາຊໂນ ຈ ຕໍ ມຫນ຺ຕໍ ປາຏິຫາຣິຍໍ ທິສ຺ວາ ມິຈ຺ຉາທິຏ຺ຐິໍ ປຫາຍ ສພ຺ເພ ສຕ຺ຖຸໂນ ສຣຓ ມຄມໍສຸ. ອຖ ຣາຊາ ຕໍ ເທວກຸລໍ ຠິນ຺ທາເປຕ຺ວາ ມຫນ຺ຕໍ ຣມຓີຍໍ ວິຫາຣໍ ກາຣາເປຕ຺ວາ ຍາວຊີວໍ ປຸຎ຺ຎກມ຺ມໍ ກຕ຺ວາ ເທວໂລເກ ນິພ຺ພຕ຺ຕິ.

໑໓.

ອນພ຺ຠຸຕໍ ສຕ຺ຖຸ ຘຣີຍມາເນ,

ກໂຣນ຺ຕິ ທິສ຺ວາ ກຸສລານິ ອິທ຺ຘິໍ;

ເຍ ຕໍ ມຸນິນ຺ເທ ປຣິນິພ຺ພຸຕມ຺ຫິ,

ກໂຣນ຺ຕິ ປຸຎ຺ຎານິ ມຫພ຺ຠູຕໍ ເຍຕິ.

ກາວີຣປຏ຺ຏນວຕ຺ຖຸໍ ປຎ຺ຈມໍ.

໒໖. ໂຈຣຆາຕກວຕ຺ຖຸມ຺ຫິ ອຍມານຸປຸພ຺ພີກຖາ

ເອກສ຺ມິໍ ກິຣ ສມເຍ ອມ຺ຫາກໍ ຠຄວາ ສາວຕ຺ຖິຍໍ ອຸປນິສ຺ສາຍ ເຊຕວເນ ວິຫຣຕິ ຘມ຺ມເທສນາຍ ມຫາຊນສ຺ສ ສຄ຺ຄໂມກ຺ຂສມ຺ປທໍ ທທມາໂນ. ຕສ຺ມິໍສມເຍ ປຎ຺ຈສຕາ ໂຈຣາ ອຏວິໂຕ ນຄຣໍ ອາຄນ຺ຕ຺ວາ ຣຕ຺ຕິຠາເຄ ໂຈຣກມ຺ມໍ ກຕ຺ວາ ເຕນ ປຸຕ຺ຕທາເຣ ໂປເສນ຺ຕິ. ອເຖກທິວສໍ ໂຈຣາ ໂຈຣກມ຺ມຕ຺ຖາຍ ນຄຣໍ ປວິສນ຺ຕາ ນຄຣທ຺ວາເຣ ເອກໍ ທຸກ຺ຂິຕໍ ຊນປທມນຸສ຺ສໍ ປສ຺ສິຕ຺ວາ ຫມ຺ໂຠ ກຕ຺ຖ ວສຕີຕິ ປຸຈ຺ຉິໍສຸ, ໂສ ອຕ຺ຕຊນາ ຊນປທວາສິຠາວໍ ປກາເສສິ. ອຖສ຺ສ ເຕ ກສ຺ມາ ໂຠ ອິມິນາ ທຸກ຺ຂວາເສນ ວສິສ຺ສສິ, ເອຫິ ອມ຺ເຫຫິ ສທ຺ຘິໍ ໂຈຣກມ຺ມໍ ກໂຣນ຺ໂຕ ວຕ຺ຖາລງ຺ກາຣສມ຺ປນ຺ໂນ ປຸຕ຺ຕທາຣໍ ໂປເສຫິ. ອິມິນາ ກປຓວາເສນ ນ ວສາຕິ ອາຫໍສຸ. ໂສ ປນິເມ ຍຸຕ຺ຕໍ ກເຖນ຺ຕີຕິ ເຕສໍ ວຈນໍ ສມ຺ປຏິຈ຺ຉິ. ອຖ ເຕ ເອວໍ ສຕິ ອມ຺ເຫຫິ ສທ຺ຘິໍ ອາຄຈ຺ຉາຫີຕິ ວຕ຺ວາ ນໍ ຄເຫຕ຺ວາ ອນ຺ໂຕນຄຣໍ ປວິຏ຺ຐາ ຕຕ຺ຖ ຕຕ຺ຖ ວິລຸມ຺ປນ຺ຕາ ໂຈຣກມ຺ມໍ ອກໍສຸ. ຕທາ ຊານປທິໂກ ລທ຺ຘວິຠໂວ ອິມເມວ ວຣຕຣນ຺ຕິ ເຕຫິ ສທ຺ຘິໍ ໂຈຣກມ຺ມໍ ກໂຣນ຺ໂຕ ຊີວິກໍ ກປ຺ເປສິ, ອເຖກທິວສໍ ຣາຊປຸຣິສາ ກຕກມ຺ເມ ເຕ ສພ຺ເພວ ຄເຫຕ຺ວາ ປຈ຺ຉາພາຫໍ ຄາຬ຺ຫໍ ພນ຺ຘິຕ຺ວາ ໂກສລຣຎ຺ໂຎ ທສ຺ເສສຸໍ, ຣາຊາ ເຕ ທິສ຺ວາ ເອວມາຫ, ຠເຓ ຕຸມ຺ຫາກໍ ອນ຺ຕເຣ ໂຍ ເອເຕສໍ ມາເຣຕ຺ວາ ຊີວິຕກ຺ຂຍໍ ປາເປສ຺ສຕິ, ຕສ຺ສ ຊີວິຕທານໍ ທມ຺ມີຕິ, ຕໍ ສຸຕ຺ວາ ເຕ ໂຈຣາ ສພ຺ເພ ອຎ຺ຎມຎ຺ຎຎາຕິສຸຫທສມ຺ພນ຺ຘຠາເວນ ຕໍ ນ ອິຈ຺ຉິໍສຸ. ໂສ ປນ ຊນປທວາສີ ມນຸສ຺ໂສ ອຫເມເຕ ສພ຺ເພ ມາເຣສ຺ສາມີຕິ ຣຎ຺ໂຎ ວຕ຺ວາ ເຕນານຸຎ຺ຎາໂຕ ເຕ ສພ຺ເພ ມາເຣສິ. ຕໍ ທິສ຺ວາ ຕຸຏ຺ໂຐ ຣາຊາ ຕສ຺ສ ໂຈຣຆາຕກມ຺ມໍ ອທາສິ. ໂສ ໂຈເຣ ຈ ວຊ຺ຌປ຺ປຕ຺ເຕ ຈ ມາເຣນ຺ໂຕ ປຎ຺ຈວີສຕິວສ຺ສານິ ວສນ຺ໂຕ ອປຣຠາເຄ ມຫລ຺ລໂກ ອໂຫສິ. ອຖ ໂສ ມນ຺ທພລຕ຺ຕາ ກຕິປຍປຫາເຣນາປິ ໂຈຣໍ ມາເຣຕຸໍ ນ ສກ຺ໂກຕິ, ຣາຊາ ຕໍ ຎຕ຺ວາ ອຎ຺ຎສ຺ສ ໂຈຣຆາຕກມ຺ມໍ ອທາສິ. ອຖ ໂສ ໂຈຣຆາຕກມ຺ມາ [ໂຈຣຆາຕກມ຺ມ ອິຕິປິກຕ຺ຖຈິ] ປຣິຫີໂນ ອຕ຺ຕໂນ ເຄເຫ ວສຕິ. ຕທາ ອຎ຺ຎຕໂຣ ມນຸສ຺ໂສ ມນ຺ຕໍ ປຣິວຕ຺ເຕຕ຺ວາ ນາສາວາເຕນ ມນຸສ຺ສມາຣຓກມນ຺ຕໍ ຊານາຕິ. ຕຖາຫິ ຫຕ຺ຖປາທກຓ຺ຓນາສສີສາທີສຸ ຍໍກິຎ຺ຈິ ເຉຊ຺ຊເຠຊ຺ຊໍ ກຕ຺ຕຸກາໂມ ມນ຺ຕໍ ປຣິວຕ຺ເຕຕ຺ວາ ນາສາວາຕໍ ວິສ຺ສຊ຺ເຊຕິ. ຕໍ ຕໍ ຐານໍ ຉິຊ຺ຊຕິ ຠິຊ຺ຊຕິ, ເອວໍ ມຫານຸຠາໂວ ໂສ ມນ຺ໂຕ, ອຖ ໂສ ຕໍ ປຸຣິສໍ ອຸປຏ຺ຐຫິຕ຺ວາ ມນ຺ຕໍ ລຠິຕ຺ວາ ຣຎ຺ໂຎ ສາສນໍ ເປເສສິ. ອຫໍ ອິໂຕ ປຸພ຺ເພ ມຫລ຺ລກຕ຺ຕາ ໂຈຣານໍ ຫຕ຺ຖປາທາທໂຍ ທຸກ຺ເຂນ ເຉຊ຺ຊ ເຠຊ຺ຊໍ ກໂຣມິ, ມາເຣຕພ຺ເພປິ ທຸກ຺ເຂນ ມາເຣມິ. ອິທານິ ປນາຫໍ ຕຖາ ນ ກໂຣມິ, ມມ ມນ຺ຕານຸຠາເວນ ເຉຊ຺ຊເຠຊ຺ຊກມ຺ມໍ ກຣິສ຺ສາມີຕິ. ຣາຊາ ຕໍ ສາສນໍ ສຸຕ຺ວາ ສາຘູຕິ ຕໍ ປກ຺ໂກສາເປຕ຺ວາ ຐານນ຺ຕຣໍ ຕສ຺ເສວ ປາກຕິກ ມກາສິ. ໂສ ຕໂຕ ປຏ຺ຐາຍ ຕໍ ກມ຺ມໍ ກໂຣນ຺ໂຕ ປຸນ ປຎ຺ຈວສ຺ສານິ ອຕິກ຺ກາເມສິ. ໂສ ມຫລ຺ລໂກ ຂີຓາຍຸໂກ ທຸພ຺ພໂລ ມຣຓມຎ຺ຈປຣາຍໂຓ ຫຸຕ຺ວາ ມຣຓເວທນາທຸກ຺ເຂນ ມຫນ຺ເຕນ ຠຍານເກນ ສທ຺ເທນ ວິສ຺ສຣໍ ວິຣວນ຺ໂຕ ນິມີລິເຕນ ຈກ຺ຂຸນາ ຠຍານກໍ ນຣກຄ຺ຄິຊາລາປຊ຺ຊລນ຺ຕອຍກູຏມຸຄ຺ຄຣຘເຣ ນິຣຍປາເລ ຈ ປສ຺ສນ຺ໂຕ ນິປນ຺ໂນ ໂຫຕິ, ຕໂຕ ຕສ຺ສ ປຏິວິສ຺ສກເຄເຫ ມນຸສ຺ສາ ຕສ຺ສ ຠຍານກສທ຺ທສວເຓນ ເຄຫໍ ຉຏ຺ເຏຕ຺ວາ ປລາຍິໍສຸ. ຕສ຺ມິໍ ກິຣ ທິວເສ ມຫາສາຣິປຸຕ຺ຕຕ຺ເຖໂຣ ທິພ຺ພຈກ຺ຂຸນາ ໂລກໍ ໂອໂລເກນ຺ຕາ ຕໍ ໂຈຣຆາຕກໍ ຕທເຫວ ກາລໍກຕ຺ວາ ນິຣເຍ ນິພ຺ພຕ຺ຕມານໍ ທິສ຺ວາ ມຍິ ຕຕ຺ຖ ຄເຕ ປເນສ ມຍິ ປສາເທນ ສຄ຺ເຄ ນິພ຺ພຕ຺ຕຕີຕິ ຎຕ຺ວາ ອຊ຺ຊ ມຍາ ຕສ຺ສານຸຄ຺ຄຫໍ ກາຕຸໍ ວຏ຺ຏຕີຕິ ປຸພ຺ພຓ຺ຫສມຍໍ ນິວາເສຕ຺ວາ ຕສ຺ສ ຆຣທ຺ວາຣ ມຄມາສິ. ອຖ ໂສ ເຖຣໍ ທິສ຺ວາ ກຸທ຺ໂຘ ໂກເປນ ຕຏຕຏາຍມານເທໂຫ ອຊ຺ຊ ຕໍ ວິຊ຺ຌິຕ຺ວາ ຜາເລຕ຺ວາ ມາເຣສ຺ສາມີຕິ ນິປນ຺ໂນວ ມນ຺ຕໍ ປຣິວຕ຺ເຕຕ຺ວາ ນາສາວາຕໍ ວິສ຺ສຊ຺ເຊສິ, ເຖໂຣ ຕສ຺ມິໍ ຂເຓ ນິໂຣຘສມາປນ຺ໂນ ນິໂຣຘາ ວຸຏ຺ຐາຍ ສຸຣິໂຍ ວິຍ ວິໂຣຈມາໂນ ອຏ຺ຐາສິ, ອຖ ໂສ ເຖຣສ຺ສ ຕໂຍ ວາເຣ ຕເຖວ ກຕ຺ວາ ກິຎ຺ຈິ ກາຕຸໍ ອສກ຺ໂກນ຺ໂຕ ອຕິວິຍ ວິມ຺ຫິຕຈິຕ຺ໂຕ ເຖເຣ ຈິຕ຺ຕໍ ປສາເທຕ຺ວາ ອຕ຺ຕໂນ ປຏິຍຕ຺ຕໍ ປາຍສໍ ເຖຣສ຺ສ ທາເປສິ, ເຖໂຣ ມງ຺ຄລໍ ວຑ຺ເຒຕ຺ວາ ວິຫາຣເມວ ອຄມາສິ, ໂຈຣຆາຕໂກ ເຖຣສ຺ສ ທິນ຺ນທານໍ ອນຸສ຺ສຣນ຺ໂຕ ຕສ຺ມິໍ ຂເຓ ກາລໍ ກຕ຺ວາ ສຄ຺ເຄ ນິພ຺ພຕ຺ຕິ. ອໂຫ ວີຕຣາຄານໍ ພຸທ຺ຘປຸຕ຺ຕານໍ ອານຸຠາໂວ. ເອວໍ ນຣເກ ນິພ຺ພຕ຺ຕມາໂນປິສ຺ສ ພເລນ ສຄ຺ເຄ ນິພ຺ພຕ຺ໂຕຕິ. ຕຖາຫິ.

໑.

ທານໍ ຕາຓໍ ມນຸສ຺ສານໍ, ທານໍ ທຸຄ຺ຄຕິວາຣຓໍ;

ທານໍ ສຄ຺ຄສ຺ສ ໂສປານໍ, ທານໍ ສນ຺ຕິກຣໍ ປຣໍ.

໒.

ອິຈ຺ຉິຕິຈ຺ຉິຕທາເນນ, ທານໍ ຈິນ຺ຕາມຓີ ວິຍ;

ກປ຺ປຣຸກ຺ໂຂວ ສຕ຺ຕານໍ, ທານໍ ຠທ຺ທຆໂຏວິຍ.

໓.

ສີລວນ຺ຕສ຺ສ ທາເນນ, ຈກ຺ກວຕ຺ຕິສິຣິມ຺ປິ ຈ;

ລຠນ຺ຕິ ສກ຺ກສມ຺ປຕ຺ຕິໍ, ຕຖາ ໂລກຸຕ຺ຕຣໍ ສຸຂໍ.

໔.

ປາປກມ຺ເມສຸ ນິຣໂຕ, ຐິໂຕຍໍ ນຣກາຍເນ [ນຣກາວເນ ອິຕິປິກຕ຺ຖຈິ];

ສາຣິປຸຕ຺ຕສ຺ສ ເຖຣສ຺ສ, ປິຓ຺ຑປາຕສ຺ສ ວາຫສາ.

໕.

ອປາຍໍ ປຣິວຊ຺ເຊຕ຺ວາ, ເນກທຸກ຺ຂສມາກຸລໍ;

ເທວສງ຺ຆປຣິພ຺ພູຬ຺ໂຫ, ຄໂຕ ເທວປຸຣໍ ວຣໍ.

໖.

ຕສ຺ມາ ສຸເຂຕ຺ເຕ ສທ຺ຘາຍ, ເທຖ ທານານິ ກາມທໍ;

ທານໍ ເທນ຺ເຕຫິ ສີລມ຺ປິ, ປາລນີຍໍຕິສຸນ຺ທຣນ຺ຕິ [ປາລນໍຈາຕິສຸນ຺ທຣໍ ອິຕິປິກຕ຺ຖຈິ].

ອຖ ຠິກ຺ຂູ ຘມ຺ມສຠາຍໍ ສນ຺ນິປຕິຕ຺ວາ ນິສິນ຺ນາ ຠຄວນ຺ຕໍ ປຸຈ຺ຉິໍສຸ, ກິໍຠນ຺ເຕ ໂສ ປາໂປ ຈຕູສຸ ອປາເຍສຸ ກຕຣສ຺ມິໍ ນິພ຺ພຕ຺ໂຕຕິ. ອຖ ສຕ຺ຖາ ອຊ຺ເຊສ ຠິກ຺ຂເວ ສາຣິປຸຕ຺ຕສ຺ສ ທິນ຺ນທານານຸຠາເວນ ເທວໂລເກ ນິພ຺ພຕ຺ໂຕ, ຕສ຺ເສວ ນິສ຺ສນ຺ເທນ ອນາຄເຕ ປຈ຺ເຈກພຸທ຺ໂຘ ຠວິສ຺ສຕີຕິ ພ຺ຍາກາສີຕິ.

໗.

ໂຠ ສາຣິປຸຕ຺ເຕ ນິຫິຕປ຺ປທານໍ,

ຂເຓນ ປາເປຕິ ຫິ ສຄ຺ຄມຄ຺ຄໍ;

ຕສ຺ມາ ສຸເຂຕ຺ເຕສຸ ທທາຖ ທານໍ,

ກາມຕ຺ຖ ເຈ ສຄ຺ຄໂມກ຺ຂໍ ປຣຕ຺ຖ.

ໂຈຣຆາຕກວຕ຺ຖຸໍ ຉຏ຺ຐມໍ.

໒໗. ສທ຺ໂຘປາສກສ຺ສ ວຕ຺ຖຸມ຺ຫິ ອຍມານຸປຸພ຺ພີກຖາ

ອຕີເຕ ກິຣ ກສ຺ສປທສພລສ຺ສ ກາເລ ເອໂກ ປຸຣິໂສ ສທ຺ໂຘ ຣຕນຕ຺ຕເຍສຸ ປສນ຺ໂນ ອຸຈ຺ຉຸຍນ຺ຕກມ຺ເມນ ຊີວິກໍ ກປ຺ເປນ຺ໂຕ ປຏິວສຕິ. ອຖ ໂສ ເອກໍ ຄິລານຠິກ຺ຂຸໍ ທິສ຺ວາ ຕສ຺ສ ອຸຬຸງ຺ກມຕ຺ຕໍ ສປ຺ປິໍ ອທາສິ, ຕເຖເວກສ຺ສ ຠິກ຺ຂຸສ຺ສ ເອກໍ ຄຸຬປິຓ຺ຑໍ ອທາສິ, ອຖາປຣສ຺ມິໍທິວເສ ເອກໍ ຉາຕຊ຺ຌຕ຺ຕໍ ສຸນຂໍ ທິສ຺ວາ ຕສ຺ສ ຠຕ຺ຕປິຓ຺ເຑນ ສງ຺ຄຫ ມກາສິ, ອເຖກສ຺ສ ອິຓຏ຺ຐກສ຺ສ ເອກໍ ກຫາປຓໍ ອທາສິ, ອເຖກທິວສໍ ຘມ຺ມໍ ສຸຓມາໂນ ຘມ຺ມເທສກສ຺ສ ຠິກ຺ຂຸສ຺ສ ສາຏກໍ ປູເຊສິ, ໂສ ເອຕ຺ຕກໍ ປຸຎ຺ຎກມ຺ມໍ ກຕ຺ວາ ຠເວສຸ ຈຣມາໂນຫໍ ສມຸທ຺ທປພ຺ພຕາທີສຸປິ ຍໍ ຍໍ ອິຈ຺ຉາມິ. ຕໍ ຕໍ ສມິຊ຺ຌຕູຕິ ປຕ຺ຖນໍ ອກາສິ, ໂສ ອປຣຠາເຄ ກາລໍ ກຕ຺ວາ ເຕເຫວ ກຸສລມູເລຫິ ສຸຕ຺ຕປ຺ປພຸທ຺ໂຘ ວິຍ ເທວໂລເກ ນິພ຺ພຕ຺ຕິຕ຺ວາ ຕຕ຺ຖ ມຫນ຺ຕໍ ທິພ຺ພສມ຺ປຕ຺ຕິໍ ອນຸຠວິຕ຺ວາ ຕໂຕ ຈຸໂຕ ອມ຺ຫາກໍ ຠຄວໂຕ ກາເລ ສາວຕ຺ຖິຍໍ ມຫທ຺ຘເນ ມຫາສາລກຸເລ ນິພ຺ພຕ຺ຕິຕ຺ວາ ຕໂຕ ໂສ ວິຎ຺ຎຸຕໍ ປຕ຺ໂຕ ກາເລນ ກາລໍ ຘມ຺ມໍ ສຸຓນ຺ໂຕ ຆຣາວາເສ ອາທີນວໍ ປພ຺ພຊ຺ຊາຍ ຈ ອານິສໍສໍ ສຸຕ຺ວາ ປພ຺ພຊິໂຕ ນ ຈິເຣເນວ ອຣຫຕ຺ຕໍ ປາປຸຓິ. ໂສ ອປຣຠາເຄ ສຕ຺ຖາຣໍ ວນ຺ທິຕ຺ວາ ປຎ຺ຈສຕຠິກ຺ຂຸປຣິວາໂຣ ອຸຄ຺ຄນຄຣໍ ອຄມາສິ, ຕຕ຺ຖ ເສຏ຺ຐິໂນ ຠຣິຍາ ສທ຺ຘາ ອໂຫສິ ປສນ຺ນາ. ສາ ເຖຣໍ ປຎ຺ຈຫິ ຠິກ຺ຂຸສເຕຫິ ສທ຺ຘິໍ ຠິກ຺ຂາຍ ຈຣນ຺ຕໍ ທິສ຺ວາ ຕຸຣິຕຕຸຣິຕາ ຄນ຺ຕ຺ວາ ເຖຣສ຺ສ ປຕ຺ຕໍ ຄເຫຕ຺ວາ ສທ຺ຘິໍ ປຎ຺ຈສເຕຫິ ຠິກ຺ຂູຫິ ໂຠເຊຕ຺ວາ ເຖຣໍ ຕຕ຺ຖ ນິພທ຺ຘວາສຕ຺ຖໍ ຍາຈິຕ຺ວາ ປຎ຺ຈສຕກູຏາຄາຣານິ ກາຣາເປຕ຺ວາ ອລງ຺ກຣິຕ຺ວາ ປຎ຺ຈສຕຠິກ຺ຂູ ຕຕ຺ຖ ວາເສນ຺ຕີ ນິພທ຺ຘໍ ຈຕຸປຈ຺ຈເຍຫິ ອຸປຏ຺ຐານມກາສິ. ຕໂຕ ເຖໂຣ ຕໍ ປຎ຺ຈສຸ ສີເລສຸ ປຕິຏ຺ຐາເປຕ຺ວາ ຕຕ຺ຖ ຍຖາຠິຣນ຺ຕໍ ວິຫຣິຕ຺ວາ ອຎ຺ຎຕ຺ຕ ຄນ຺ຕຸກາໂມ ອນຸປຸພ຺ເພນ ປຏ຺ຏນຄາມໍ ອຄມາສິ, ຕຕ຺ຖ ວສິຕ຺ວາ ຕໂຕ ນາວໍ ອຠິຣຸຍ຺ຫ ປຎ຺ຈສຕຠິກ຺ຂູຫິ ປຣິວຸໂຕ ສມຸທ຺ທປິຏ຺ເຐນ ຄຈ຺ຉຕິ, ສມຸທ຺ທໍ ຕຣນ຺ຕສ຺ສ ຕສ຺ສ ສາຄຣມຊ຺ເຌ ອຸທຣວາໂຕ ສມຸຏ຺ຐຫິຕ຺ວາ ປີເຬຕິ, ຕໍ ທິສ຺ວາ ຠິກ຺ຂູ ຠນ຺ເຕ ອິທໍ ປຸພ຺ເພ ເກນ ວູປສເມສ຺ສຕີຕິ ປຸຈ຺ຉິໍສຸ, ເຖໂຣ ປຸພ຺ເພ ເມ ອາວຸໂສ ອຸລຸງ຺ກມຕ຺ເຕ ສປ຺ປິປີເຕ ໂຣໂຄ ວູປສມ຺ມຕີຕິ ອາຫ, ຠິກ຺ຂູ ຠນ຺ເຕ ສມຸທ຺ທປິຏ຺ເຐ ກຖໍ ສປ຺ປິໍ ລຠິສ຺ສາມ, ອຘິວາເສຖາຕິ ອາຫໍສຸ, ຕໍ ສຸຕ຺ວາ ເຖເຣນ [ເຖໂຣນໂນອາຍສ຺ມນ຺ຕາ ອິຕິສພ຺ພຕ຺ຖ] ນ ໂນ ອາຍສ຺ມນ຺ຕາ ສປ຺ປິ ທຸລ຺ລຠາ, ມມ ປຕ຺ຕໍ ຄເຫຕ຺ວາ ສມຸທ຺ໂທທກໍ ອຸທ຺ຘຣິຕ຺ວາ ອາເນຖາຕິ ວຸຕ຺ເຕ ຠິກ຺ຂູ ຕຖາ ອກໍສຸ. ອຸທ຺ຘຏມຕ຺ຕເມວ ຕໍອຸທກໍ ປຣິວຕ຺ເຕຕ຺ວາ ສປ຺ປິ ອໂຫສິ, ອຖ ຠິກ຺ຂູ ຕໍ ທິສ຺ວາ ອຈ຺ຉຣິຍພ຺ຠຸຕຈິຕ຺ຕາ ຊາຕາ ເຖຣສ຺ສ ສປ຺ປິໍ ອຸປນາເມສຸໍ, ເຖເຣນ ສປ຺ປິໂນ [ສປ຺ປິນາ ອິຕິສພ຺ພຕ຺ຖ] ປີຕມຕ຺ເຕ ໂສ ອາພາໂຘ ວູປສມິ, ອຖສ຺ສ ຠິກ຺ຂູຫິ ກິ ເມຕໍ ຠນ຺ເຕ ອຈ຺ຉຣິຍໍ, ນ ໂນ ອິໂຕ ປຸພ຺ເພ ເອວຣູປໍ ທິຏ຺ຐປຸພ຺ພໍຕິ ວຸຕ຺ເຕ ເຖໂຣ ເຕນຫິ ກຕປຸຎ຺ຎານໍ ປຸຎ຺ຎວິປາກໍ ປສ຺ສິສ຺ສຖາຕິ ວຕ຺ວາ ສມຸທ຺ທໍ ໂອໂລເກສິ ອິທໍ ສປ຺ປິ ໂຫຕູຕິ. ອຖສ຺ສ ຈກ຺ຂຸປເຖ ສມຸທ຺ເທ ສພ຺ໂພທກໍ ປຣິວຕ຺ເຕຕ຺ວາ ສປ຺ປິ ອໂຫສິ. ອຖສ຺ສ ຠິກ຺ຂູ ອພ຺ຠຸຕຈິຕ຺ຕາ ອຎ຺ຎມ຺ປິ ອີທິສໍ ປຸຎ຺ຎໍ ອຕ຺ຖິ ຠນ຺ເຕຕິ ປຸຈ຺ຉິໍສຸ, ຕໂຕ ເຖໂຣ ເຕນຫິ ປສ຺ສຖາຍສ຺ມນ຺ຕາ ມມ ປຸຎ຺ຎນ຺ຕິ ວຕ຺ວາ ສມນ຺ຕາ ຕຕ຺ຖ ຕຕ຺ຖ ຆນເສລປພ຺ພເຕ ໂອໂລເກສິ, ສພ຺ພານິ ຕານິ ຄຸຬປິຓ຺ຑານິ ອເຫສຸໍ, ຕໂຕ ຈກ຺ຂຸປເຖ ສມນ຺ຕາ ຠຕ຺ຕຠາຊນານິ ທສ຺ເສສິ ສພ຺ຍຎ຺ຊນໍ ໂສປກຣຓໍ. ຕໂຕ ຫິມວນ຺ຕໍ ໂອໂລເກສິ, ສພ຺ພໍ ຕໍ ສຸວຓ຺ຓມຍໍ ອໂຫສິ. ອຖາຠິມຸຂຏ຺ຐາເນ ມຫນ຺ຕໍ ວນສຓ຺ຑໍ ໂອໂລເກສິ, ສກລວນສຓ຺ຑໍນານາວິຣາຄວຕ຺ເຖຫິ ສຎ຺ຉນ຺ນໍ ອໂຫສິ, ຠິກ຺ຂູ ຕໍ ຕໍ ປາຏິຫາຣິຍໍ ທິສ຺ວາ ອຕີວ ວິມ຺ຫິຕາ ຠນ຺ເຕ ເກນ ເຕ ປຸຎ຺ຎກມ຺ເມນ ເອຕາທິສານິ ປາຏິຫາຣິຍານິ ຠວິສ຺ສນ຺ຕີຕິ ປຸຈ຺ຉິໍສຸ, ເຖໂຣ ກສ຺ສປທສພລສ຺ສ ກາເລ ອຕ຺ຕນາ ກຕໍ ສພ຺ພໍ ຕໍ ກຸສລໍ ປກາເສສິ. ເຕເນຕ຺ຖ.

໑.

ອິມສ຺ມິໍ ຠທ຺ທເກ ກປ຺ເປ, ກສ຺ສໂປ ນາມ ນາຍໂກ;

ສພ຺ພໂລກຫິຕຕ຺ຖາຍ, ໂລເກ ອຸປ຺ປຊ຺ຊິ ຈກ຺ຂຸມາ.

໒.

ຕທາຫໍ ອຸຈ຺ຉຸຍນ຺ຕມ຺ຫິ, ນິຍຸຕ຺ໂຕ ຄຸຬກາຣໂກ;

ເຕນ ກມ຺ເມນ ຊີວາມິ, ໂປເສນ຺ໂຕ ປຸຕ຺ຕທາຣເກ.

໓.

ກິລນ຺ຕິນ຺ທ຺ຣິຍມທ຺ທກ຺ຂິໍ, ຠິກ຺ຂຸໍ ໂຣຄາຕຸຣໍ ຕທາ;

ຠິກ຺ຂາຈາຣກວຕ຺ເຕນ, ຆຕຕ຺ຖໍ [ຆຕມຕ຺ຕມຸປາຄຕໍ ອິຕິສພ຺ພຕ຺ຖ] ສມຸປາຄຕໍ.

໔.

ອຸລຸງ຺ກມຕ຺ຕໍ ສປ຺ປິສ຺ສ, ອທທໍ ຕສ຺ສ ຠິກ຺ຂຸໂນ;

ສທ຺ທຫນ຺ໂຕ ທານຜລໍ, ທຍາຍຸ ທຄ຺ຄມານໂສ.

. ໕

ເຕນ ກມ຺ເມນ ສໍສາເຣ, ສໍສຣນ຺ໂຕ ຠວາຠເວ;

ຍຕ຺ຖິຈ຺ຉາມິ ຆຕໍ ຕຕ຺ຖ, ອຸປ຺ປຊ຺ຊຕິ ອນປ຺ປກໍ.

໖.

ອິຈ຺ຉາມຫໍ ສມຸທ຺ທສ຺ມິໍ, ຜລມ຺ປິ ຆຕມຕ຺ຕໂນ;

ຕໍ ຕໍ ສພ຺ພໍ ຆຕໍ ໂຫຕິ, ຆຕທານສ຺ສິທໍ ຜລໍ.

໗.

ສຸຓາຖ ມຍ຺ຫໍ ອຎ຺ຎມ຺ປິ, ປຸຎ຺ຎກມ຺ມໍ ມໂນຣມໍ;

ຕທາ ທິສ຺ວານຫໍ ຠິກ຺ຂຸໍ, ໂຣເຄນ ປຣິປີຬິຕໍ.

໘.

ຄຸຬປິຓ຺ຑໍ ຄເຫຕ຺ວານ, ປຕ຺ເຕ ຕສ຺ສ ສມາກິຣິໍ;

ເຕນ ໂສ ສຸຂິໂຕ ອາສິ, ໂຣຄໍ ພ຺ຍປຄຕໍ ຕທາ.

໙.

ເຕນ ເມ ຄຸຬທາເນນ, ສໍສຣໍ ເທວມານຸເສ;

ຍຕ຺ຖຕ຺ໂຖສ຺ມິ ຄຸເຬນາຫໍ, ຕຕ຺ຖ ຕໍ ສຸລຠໍ ມມ.

໑໐.

ເສລາຈ ວິປຸລາ ມຍ຺ຫໍ, ໂຫນ຺ຕິ ຈິຕ຺ຕານຸວຕ຺ຕກາ;

ມຫນ຺ຕຄຸຬປິຓ຺ຑາວ, ຄຸຬທາເນ ອິທໍ ຜລໍ.

໑໑.

ອຖາປິ ເມ ກຕໍ ປຸຎ຺ຎໍ, ສຸຓາຖ ສາຘຸ ຠິກ຺ຂໂວ;

ຉາຕຊ຺ຌຕ຺ຕໍ ຜນ຺ທມານໍ, ທິສ຺ວານ ສຸນຂໍ ຕທາ.

໑໒.

ຠຕ຺ຕປີຓ຺ເຑນ ສງ຺ຄຓ຺ຫິໍ, ຕມ຺ປິ ທານໍ ຜລາວຫໍ;

ຕໂຕ ປຏ຺ຐາຍ ນາໂຫສິ, ອນ຺ນປາເນນ ອູນຕາ.

໑໓.

ສຸລຠນ຺ນປາໂນ ສຸຂິໂຕ, ອໂຫສິໍຊາຕິຊາຕິຍໍ;

ອຊ຺ຊາປິ ຍທິ ອິຈ຺ຉາມິ, ໂຠຊເນນ ປໂຍຊນໍ.

໑໔.

ຈກ຺ຂຸປເຖ ສມນ຺ຕາ ເມ, ຊາຍນ຺ຕຸກ຺ຂລິໂຍ ພຫູ;

ອຖາປຣມ຺ປິ ກຸສລໍ, ອກາສິໍຕໍ ສຓາຖ ເມ.

໑໕.

ອິຓຏ຺ຐກສ຺ສ ໂປສສ຺ສ, ອທາເສກໍ ກຫາປຓໍ;

ເຕນ ເມ ປຸຎ຺ຎກມ຺ເມນ, ອໂນມຠວສມ຺ປທໍ.

໑໖.

ປຈຸຣໍ ຊາຕຣູປຎ຺ຈ, ລຠາມິ ຊາຕິຊາຕິຍໍ;

ສຈຊ຺ຊ ຘນກາໂມຫໍ, ຆນເສໂລປິ ປພ຺ພໂຕ;

ໂຫຕິ ເຫມມຍໍ ສພ຺ພໍ, ອິຓໂຕ ໂມຈເນ ຜລໍ.

໑໗.

ອຎ຺ຎມ຺ປິ ມມ ປຸຎ຺ຎໍ ໂຠ, ສຸຓາຖ ສຸຕິໂສຠນໍ;

ກສ຺ສປສ຺ສ ຠຄວໂຕ, ສາສເນກໍ ພຫຸສ຺ສຸຕໍ.

໑໘.

ເທເສນ຺ຕໍ ມຸນິໂນ ຘມ຺ມໍ, ສຸຕ຺ວາ ປີຓິຕມານໂສ;

ປູເຊສິໍສາຏກໍ ມຍ຺ຫໍ, ຘມ຺ມສ຺ສ ຘມ຺ມສາມິໂນ.

໑໙.

ເຕນາຫໍ ປຸຎ຺ຎກມ຺ເມນ, ສໍສຣໍ ເທວມານຸເສ;

ລຠາມິ ປຈຸຣໍ ວຕ຺ຖໍ, ຍໍ ໂລກສ຺ມິໍ ວຣໍ ປຣໍ.

໒໐.

ອິຈ຺ຉມາໂນ ສເຈ ອຊ຺ຊ [ຊານມາໂນປຫໍອຊ຺ຊ; ຊານຘາໂນຈຫໍອຊ຺ຊ ອິຕິກຕ຺ຖຈິ], ຫິມວນ຺ຕມ຺ປິ ປພ຺ພຕໍ;

ນານາວິຣາຄວຕ຺ເຖຫິ, ຉາທຍິສ຺ສໍ ສມນ຺ຕໂຕ.

໒໑.

ສເຈ ອິຈ຺ຉາມິ ອຊ຺ເຊວ, ວຕ຺ເຖນຈ຺ຉາທຍາ ມິເຕ;

ຊນ຺ຕໂວ ຈຕຸທີປສ຺ມິໍ, ວຕ຺ຖທານສ຺ສິທໍ ຜລໍ.

໒໒.

ເອເຕສໍ ປຸຎ຺ຎກມ຺ມານໍ, ວາຫສາ ກາມຠູມິຍໍ;

ສມ຺ປຕ຺ຕິ ມນຸຠຸຕ຺ວານ, ສາວຕ຺ຖິປຸຣ ມຸຕ຺ຕເມ.

໒໓.

ຊາໂຕ ກຸເລ ມຫາໂຠເຄ,

ວຸທ຺ຘິປ຺ປຕ຺ໂຕ ສຸເຂຘິໂຕ;

ຕສ຺ສ ຘມ຺ມໍ ສຸຓິຕ຺ວານ,

ປພ຺ພຊິຕ຺ວານ ສາສເນ.

໒໔.

ໂລກຸຕ຺ຕຣໍ ອຄ຺ຄຣສໍ, ຠຸຎ຺ຈນ຺ໂຕ ມຸນິວາຫສາ;

ກິເລເສ ປຊຫິຕ຺ວານ, ອຣຫຕ຺ຕມປາປຸຓິໍ.

໒໕.

ກຸສລໍ ນາ ວມນ຺ຕພ຺ພໍ, ຂຸທ຺ທກນ຺ຕິ ກທາຈິປິ;

ອນນ຺ຕຜລທໍ ໂຫຕິ, ນິພ຺ພາຓມ຺ປິ ທທາຕິ ຕໍ.

ອຖສ຺ສ ຘມ຺ມເທສນໍ ສຸຕ຺ວາ ຠິກ຺ຂູ ຈ ມຫາຊໂນ ຈ ທານາທິກຸສລກມ຺ມໍ ກຕ຺ວາ ເຍຠຸຍ຺ເຍນ ສຄ຺ຄປຣາຍຓາ ອເຫສຸໍຕິ.

໒໖.

ມໂນປສາເທນປິ ອປ຺ປປຸຎ຺ຎໍ,

ເອວໍ ມຫນ຺ຕໍ ຠວຕີຕິ ຎຕ຺ວາ;

ມາ ອປ຺ປປຸຎ຺ຎນ຺ຕິ ປມຊ຺ຊຖມ຺ໂຠ;

ສຣາຖ ເທວິໍ ອິຘ ລາຊທາຍິໍ.

ສທ຺ໂຘປາສກສ຺ສ ວຕ຺ຖຸໍ ສຕ຺ຕມໍ.

໒໘. ກປຓສ຺ສ ວຕ຺ຖຸມ຺ຫິ ອຍມານຸປຸພ຺ພີກຖາ

ອມ຺ຫາກໍ ຠຄວຕິ ປຣິນິພ຺ພຸເຕ ພາຣາຓສີນຄຣວາສີ ເອໂກ ທຸຄ຺ຄຕປຸຣິໂສ ປຣເຄເຫ ຠຕິໍກຕ຺ວາ ຊີວິກໍ ກປ຺ເປຕິ, ຕສ຺ມິໍ ສມເຍ ນຄຣວາສິໂນ ເຍຠຸຍ຺ເຍນ ຕສ຺ມິໍ ຕສ຺ມິໍ ຐາເນ ມຓ຺ຑປາທໂຍ ກາຣາເປຕ຺ວາ ມຫາທານໍ ເທນ຺ຕິ, ຕໍ ທິສ຺ວາ ທຸຄ຺ຄໂຕ ເອວໍ ຈິນ຺ເຕສິ, ອຫໍ ປຸພ຺ເພ ອກຕປຸຎ຺ຎຕ຺ຕາ ປຣເຄເຫ ຠຕິໍ ກຕ຺ວາ ກິຈ຺ເຉນ ກສິເຣນ ຊີວາມິ. ນິວາສນປາຣຸປນມ຺ປິ ວາສຏ຺ຐານມຕ຺ຕມ຺ມິ ທຸກ຺ຂໂຕ ລຠາມິ. ອິທານິ ພຸທ຺ຘຸປ຺ປາໂທ ວຕ຺ຕຕິ ຠິກ຺ຂຸສງ຺ໂຆປິ.

ສພ຺ເພ ອິເມ ທານໍ ທຕ຺ວາ ສຄ຺ຄມຄ຺ຄໍ ໂສເຘນ຺ຕິ. ມຍາປິ ທານໍ ທາຕຸໍ ວຏ຺ຏຕິ. ຕມ຺ເມ ທີຆຣຕ຺ຕໍ ຫິຕາຍ ສຸຂາຍ ຠວິສ຺ສຕິ. ອປິ ຈ ມຍ຺ຫໍ ຕຓ຺ຑຸລນາລິມຕ຺ຕມ຺ປິ ນຕ຺ຖິ, ອກຕວີຣິເຍນ ຕໍ ມຕ຺ຖກໍ ປາເປຕຸໍ ນ ສກ຺ກາ, ເອຕທຕ຺ຖາຍາຫໍ ອຸຍ຺ໂຍຄໍ ກຕ຺ວາ ທານໍ ທສ຺ສາມີຕິ ຈິນ຺ເຕຕ຺ວາ ຕໂຕ ປຏ຺ຐາຍ ຠຕິໍ ປຣິເຍສມາໂນ ຄນ຺ຕ຺ວາ ຕຕ຺ຖ ຕຕ຺ຖ ຠຕິໍ ກຕ຺ວາ ລທ຺ຘນິວາເປ ຈ ຠິກ຺ຂາຈຣິຍາຍ ລທ຺ຘຕິລຕຓ຺ຑຸລາທໂຍ ຈ ເອກຕ຺ຖ ສໍຫຣິຕ຺ວາ ມນຸສ຺ເສ ສມາທາເປຕ຺ວາ ຕສ຺ມິໍ ມຓ຺ຑປໍ ກາຣາເປຕ຺ວາ ວນກຸສມາທີຫິ ຕໍ ອລງ຺ກຣິຕ຺ວາ ຠິກ຺ຂູ ນິມນ຺ເຕຕ຺ວາ ມຓ຺ຑເປ ນິສີທາເປຕ຺ວາ ສພ຺ເພສໍ ປາຍສໍ [ປາຍາສໍ ອິຕິສພ຺ພຕ຺ຖ] ປຏິຍາເທຕ຺ວາ ໂຠເຊສິ. ອຖ ໂສ ມຣຓກາເລ ອຕ຺ຕນາ ກຕໍ ຕໍ ທານວຣໍ ອນຸສ຺ສຣິ. ໂສ ເຕນ ກຸສລກມ຺ເມນ ສຸຕ຺ຕປ຺ປພຸທ຺ໂຘ ວິຍ ເທວໂລເກ ນິພ຺ພຕ຺ຕິ. ຕສ຺ມິໍ ເຕນ ກຕປຸຎ຺ຎານຸຣູປໍ ມຫນ຺ຕໍ ກນກວິມານໍ ນິພ຺ພຕ຺ຕິ. ສມນ຺ຕາ ຕິຄາວຸຕຏ຺ຐາເນ ເທວຕາ ນານາ ວິຘານິ ຕຸຣິຍານິ ຄເຫຕ຺ວາ ອຸປຫາຣໍ ກໂຣນ຺ຕິ. ນິຈ຺ຈໍ ເທວຈ຺ຉຣາສຫສ຺ສານິ [ເທວຈ຺ຉຣາສຫສ຺ສໍ ອິຕິສພ຺ພຕ຺ຖ] ຕໍ ປຣິວາເຣຕ຺ວາ ຕິຏ຺ຐນ຺ຕິ. ເອວໍ ໂສ ມຫນ຺ຕໍ ສມ຺ປຕ຺ຕິໍ ອນຸຠວຕິ. ອເຖກທິວສໍ ສຸວຓ຺ຓເສລວິຫາຣວາສີ ມຫາສງ຺ຆຣກ຺ຂິຕຕ຺ເຖໂຣ ປຕ຺ຕປຏິສມ຺ຠິໂທ ເທວຈາຣິກໍ ຈຣມາໂນ ຕໍ ເທວປຸຕ຺ຕໍ ອນຸປມາຍ ເທວສມ຺ປຕ຺ຕິຍາ ວິໂຣຈມານໍ ທິສ຺ວາ ອຸປສງ຺ກມ຺ມ ຐິໂຕ ເຕນ ກຕກມ຺ມໍ ປຸຈ຺ຉິ. ໂສປິສ຺ສ ຍຖາຠູຕໍ ພ຺ຍາກາສິ, ເຕນຕ຺ຖ.

໑.

ສພ຺ພໂສວຓ຺ຓໂຍ ອາສິ, ປາສາໂທ ຣຕນາມໂຍ;

ໂສຓ຺ຓສິງ຺ຄສຕາກິຓ຺ໂຓ, ທຸທ຺ທິກ຺ໂຂ ຈ ປຠສ຺ສໂຣ.

໒.

ກູຏາຄາຣ ສຕາກິຓ຺ໂຓ, ໂສຓ຺ຓມາລາສມາກຸໂລ;

ມຸຕ຺ຕາກລາປາລມ຺ພນ຺ຕິ, ຕຕ຺ຖ ຕຕ຺ຖ ມໂນຣມາ.

໓.

ເນກຄພ຺ຠສຕາກິຓ຺ໂຓ, ສຍນາສນມຓ຺ຑິໂຕ;

ວິຠຕ຺ໂຕ ຠພ຺ພຠາເຄຫິ, ປຸຎ຺ຎວຑ຺ຒກິນາ ກໂຕ.

໔.

ນຈ຺ຈນ຺ຕິ ປມທາ ຕຕ຺ຖ, ເຠຣິມຓ຺ຑລມຊ຺ຌຄາ;

ຄາຍນ຺ຕິ ກາຈິ ກີຬນ຺ຕິ, ວາເທນ຺ຕິ ກາຈິ ຕນ຺ຕິໂຍ.

໕.

ຕໂຕ ຕິຄາວຸເຕ ຐາເນ, ປາສາທສ຺ສ ສມນ຺ຕໂຕ;

ສຫຈ຺ຉຣາ ເທວປຸຕ຺ຕາ, ຄເຫຕ຺ວາ ອາຕຕາທໂຍ.

໖.

ໂມທນ຺ຕິ ປຣິວາເຣຕ຺ວາ, ນຈ຺ຈຄີຕາທິນາ ສທາ;

ອຸລ຺ລງ຺ຆນ຺ຕິຈ ເສເລນ຺ຕິ, ສິລາຆນ຺ຕິ ສມນ຺ຕໂຕ.

໗.

ເອວໍ ມຫິທ຺ຘິໂກ ທານິ, ຕຸວໍ ວນ຺ໂທວ ຠາສຕິ;

ປຸຈ຺ຉາມິ ຕໍ ເທວປຸຕ຺ຕ, ກິໍ ກມ຺ມມກຣີ ປຸຣາ.

ເທວປຸຕ຺ໂຕ ອາຫ.

໘.

ອໂຫສິໍ ທຸຄ຺ຄໂຕ ປຸພ຺ເພ, ພາຣາຓສີປຸຣຸຕ຺ຕເມ;

ທານໍ ເທນ຺ຕິ ນຣາ ຕຕ຺ຖ, ນິມນ຺ເຕຕ຺ວານ ຠິກ຺ຂໂວ.

໙.

ຊີວນ຺ໂຕ ຠຕິຍາ ໂສຫໍ, ທານໍ ເທນ຺ເຕ ມຫາຊເນ;

ຕຸຏ຺ຐຫຏ຺ເຐ ປມຸທິເຕ, ເອວໍ ຈິນ຺ເຕສຫໍ ຕທາ.

໑໐.

ສມ຺ປນ຺ນວຕ຺ຖາລງ຺ກາຣາ, ທານໍ ເທນ຺ຕິ ອິເມ ຊນາ;

ປຣຕ຺ຖປິ ປຫຏ຺ຐາວ, ສມ຺ປຕ຺ຕິມນຸໂຠນ຺ຕິ ເຕ.

໑໑.

ພຸທ຺ຘຸປ຺ປາໂທ ອຍໍ ທານິ, ຘມ຺ໂມ ໂລເກ ປວຕ຺ຕຕິ;

ສຸສີລາ ທານິ ວຕ຺ຕນ຺ຕິ, ທກ຺ຂິເຓຍ຺ຍາ ຊິໂນຣສາ.

໑໒.

ອນາວຏ຺ຐິໂຕ [ອວຏ຺ຐິໂຕຈ; ອນ຺ຘຏ຺ຐິໂຕຈ ອິຕິປິກຕ຺ຕຈິ] ສໍສາໂຣ, ອປາຍາ ຂລຸ ປູຣິຕາ;

ກລ຺ຍາຓວິມຸຂາ ສຕ຺ຕາ, ກາມໍ ຄຈ຺ຉນ຺ຕິ ທຸຄ຺ຄຕິໍ.

໑໓.

ອິທານິ ທຸກ຺ຂິໂຕ ຫຸຕ຺ວາ, ຊີວາມິ ກສິເຣນຫໍ;

ທລິທ຺ໂທ ກປໂຓ ທີໂນ, ອປ຺ປໂຠໂຄ ອນາລໂຍ.

໑໔.

ອິທານິ ພີຊໍ ໂຣເປມິ, ສຸເຂຕ຺ເຕ ສາຘຸສມ຺ມເຕ;

ອປ຺ເປວນາມ ເຕນາຫໍ, ປຣຕ຺ຖ ສຸຂິໂຕ ສິຍາ.

໑໕.

ອິຕິ ຈິນ຺ຕິຍ ຠິກ຺ຂິຕ຺ວາ, ຠຕິໍ ກຕ຺ວານ ເນກຘາ;

ມຓ຺ຑປໍ ຕຕ຺ຖ ກາເຣຕ຺ວາ, ນິມນ຺ເຕຕ຺ວານ ຠິກ຺ຂໂວ.

໑໖.

ອາຍາເສນ ອທາສາຫໍ, ປາຍສໍ ອມຕາຍ ໂສ;

ເຕນ ກມ຺ມວິປາເກນ, ເທວໂລເກ ມໂນຣເມ.

໑໗.

ຊາໂຕມ຺ຫິ ທິພ຺ພກາເມຫິ, ໂມທມາໂນ ອເນກຘາ;

ທີຆາຍຸໂກ ວຓ຺ຓວນ຺ໂຕ, ເຕຊສ຺ສີຈ ອໂຫສຫນ຺ຕິ.

ເອວໍ ເທວປຸຕ຺ໂຕ ອຕ຺ຕນາ ກຕປຸຎ຺ຎກມ຺ມໍ ວິຕ຺ຕາເຣນ ກເຖສິ, ເຖໂຣປິ ມນຸສ຺ສໂລກໍ ອາຄນ຺ຕ຺ວາ ມນຸສ຺ສານໍ ອຕ຺ຕນາ ປຈ຺ຈກ຺ຂໂຕ ທິຏ຺ຐທິພ຺ພສມ຺ປຕ຺ຕິໍ ປກາເສສິ. ຕໍ ສຸຕ຺ວາ ມຫາຊໂນ ກຸສລກມ຺ມໍ ກຕ຺ວາ ເຍຠຸຍ຺ເຍນ ສຄ຺ເຄ ນິພ຺ພຕ຺ໂຕຕິ.

໑໘.

ອນາລໂຍ ທຸຄ຺ຄຕທີນໂກປິ,

ທານໍ ທທນ຺ໂຕ ຘິຄໂຕ ວິເສສໍ;

ສຄ຺ຄາ ປວຄ຺ຄໍ ຍທິ ປຕ຺ຖຍວ຺ໂຫ,

ຫນ຺ຕ຺ວານ ມຈ຺ເຉຣມລໍ ທທາຖາຕິ.

ກປຓສ຺ສ ວຕ຺ຖຸໍ ອຏ຺ຐມໍ.

໒໙. ເທວປຸຕ຺ຕສ຺ສ ວຕ຺ຖຸມ຺ຫິ ອຍມານຸປຸພ຺ພີກຖາ

ອິໂຕ ປຸພ຺ເພ ນາຣທສ຺ສ ກິຣ ສມ຺ມາສມ຺ພຸທ຺ຘສ຺ສ ກາເລ ອຍໍ ທີໂປ ອຎ຺ຎຕເຣນ ນາເມນ ປາກໂຏ ອໂຫສິ, ໂສ ປເນກສ຺ມິໍ ກາເລ ທຸພ຺ຠິກ຺ໂຂ ອໂຫສິ ທຸສ຺ສສ຺ໂສ, ມຫາຉາຕກຠຍໍ ສຕ຺ເຕ ປີເຬຕິ. ຕສ຺ມິໍ ສມເຍ ນາຣທສ຺ສ ຠຄວໂຕ ເອໂກ ສາສນິໂກ ສາວໂກ ອຎ຺ຎຕຣສ຺ມິໍ ຄາເມ ປິຓ຺ຑາຍ ຈຣິຕ຺ວາ ຍຖາ ໂຘຕປຕ຺ໂຕວ ນິກ຺ຂມິ. ອຖຎ຺ຎຕຣສ຺ມິໍ ເຄເຫ ມນຸສ຺ສາ ເອກໍ ຕຓ຺ຑຸລນາຬິໍໂປຏລິກາຍ ພນ຺ຘິຕ຺ວາ ອຸທເກ ປກ຺ຂິປິຕ຺ວາ ປຈິຕ຺ວາ ອຸທກໍ ຄເຫຕ຺ວາ ປິວນ຺ໂຕ ຊີວນ຺ຕິ, ຕທາ ເຖຣໍ ທິສ຺ວາ ວນ຺ທິຕ຺ວາ ປຕ຺ຕໍ ຄເຫຕ຺ວາ ເຕນ ຕຓ຺ຑຸເລນ ຠຕ຺ຕໍ ປຈິຕ຺ວາ ປຕ຺ເຕ ປກ຺ຂິປິຕ຺ວາ ເຖຣສ຺ສ ອທໍສຸ. ອຖ ເຕສໍ ສທ຺ຘາພເລນ ສາ ອຸກ຺ຂລິ ຠຕ຺ເຕນ ປຣິປຸຓ຺ຓາ ອໂຫສິ, ເຕ ຕໍ ອພ຺ຠຸຕໍ ທິສ຺ວາ ອຍ຺ຍສ຺ສ ທິນ຺ນທາເນ ວິປາໂກ ອຊ຺ເຊວ ໂນ ທິຏ຺ໂຐຕິ ໂສມນສ຺ສຊາຕາ ມຫາຊນໍ ສນ຺ນິປາເຕຕ຺ວາ ເຕ ຠຕ຺ຕໍ ໂຠເຊຕ຺ວາ ປຈ຺ຉາ ສຍໍ ຠຸຎ຺ຊິໍສຸ. ຠຕ຺ຕສ຺ສ ຄຫິຕຄຫິຕຏ຺ຐານໍ ປູຣເຕວ. ຕໂຕ ປຏ຺ຐາຍ ເຕ ສມ຺ປຕ຺ຕມຫາຊນສ຺ສ ທານໍ ທທນ຺ຕາ ອາຍຸປຣິໂຍສາເນ ເທວໂລເກ ນິພ຺ພຕ຺ຕິໍສຸ, ອຖ ໂສ ເຖໂຣ ຠຕ຺ຕໍ ອາທາຍ ຄນ຺ຕ຺ວາ ອຎ຺ຎຕຣສ຺ມິໍ ຣຸກ຺ຂມູເລ ນິສີທິຕ຺ວາ ຠຸຎ຺ຊິຕຸມາຣຕິ. ຕສ຺ມິໍ ກິຣ ຣຸກ຺ເຂ ນິພ຺ພຕ຺ໂຕ ເອໂກ ເທວປຸຕ຺ໂຕ ອາຫາເຣນ ກິລນ຺ໂຕ ຠຸຎ຺ຊມານໍ ເຖຣໍ ທິສ຺ວາ ອຕ຺ຕຠາວໍ ວິຊຫິຕ຺ວາ ມຫລ຺ລກເວເສນ ຕສ຺ສ ສມີເປ ອຏ຺ຐາສິ. ເຖໂຣ ອນາວຊ຺ຊິຕ຺ວາວ ຠຸຎ຺ຊຕິ. ເທວປຸຕ຺ໂຕ ຈຣິມາໂລປໍ ຐເປຕ຺ວາ ຠຸຕ຺ຕກາເລ ອຸກ຺ກາສິຕ຺ວາ ອຕ຺ຕານໍ ຐິຕຠາວໍ ຊານາເປສິ. ເຖໂຣ ຕໍ ທິສ຺ວາ ວິປ຺ປຏິສາຣິ ຫຸຕ຺ວາ ຈຣິມໍ ຠຕ຺ຖປິຓ຺ຑໍ ຕສ຺ສ ຫຕ຺ເຖ ຐເປສິ, ຕໂຕ ໂສ ຠຕ຺ຕປິຓ຺ຑໍ ຄເຫຕ຺ວາ ຐິໂຕ ຈິນ຺ເຕສິ. ອິໂຕ ກິຣ ມຍາ ປຸພ຺ເພ ສມຓພ຺ຣາຫ຺ມຓານໍ ວາ ກປຓທ຺ຘິການໍ ວາ ອນ຺ຕມໂສ ກາກສຸນຂາ ທີນມ຺ປິ ອາຫາຣໍ ອທິນ຺ນປຸພ຺ພໍ ຠວິສ຺ສຕິ, ເຕນວາຫໍ ເທໂວ ຫຸຕ຺ວາປິ ຠຕ຺ຕໍ ນ ລຠາມິ. ຫນ຺ທາຫໍ ອິມໍ ຠຕ຺ຕປິຓ຺ຑໍ ເຖຣສ຺ເສວ ທສ຺ສາມິ, ຕໍ ເມ ຠວິສ຺ສຕິ ທີຆຣຕ຺ຕໍ ຫິຕາຍ ສຸຂາຍ ຈາຕິ. ເອວຎ຺ຈ ປນ ຈິນ຺ເຕຕ຺ວາ ຠຕ຺ຕປິຓ຺ເຑ ອາສໍ ປຫາຍ ເຖຣໍ ອຸປສງ຺ກມ຺ມ ສາມິ ທາສສ຺ສ ໂວ ອລໍ ອິຘ ໂລເກນ ສງ຺ຄຫໍ. ປຣໂລເກນ ເມ ສງ຺ຄຫໍ ກໂຣຖາຕິ ວຕ຺ວາ ຕສ຺ສ ປຕ຺ເຕ ໂອກິຣິ. ອຖສ຺ສ ຠຕ຺ຖປິຓ຺ຑໍ [ຠຕ຺ຖປິຓ຺ຑໍ ອິຕິສພ຺ພຕ຺ຖ] ປຕ຺ເຕ ປຕິຕມຕ຺ເຕເຍວ ຕິຄາວຸຕຏ຺ຐາເນ ທິພ຺ພມຍານິ ຠຕ຺ຕຠາຊນານິປຎ຺ຎາຍິໍສຸ. ເທວປຸຕ຺ໂຕ ເຖຣໍ ປຎ຺ຈປຕິຏ຺ຐິເຕນ ວນ຺ທິຕ຺ວາ ຕໂຕ ທິພ຺ພໂຠຊນໍ ຄເຫຕ຺ວາ ປຖມໍ ທານໍ ທຕ຺ວາ ປຈ຺ຉາ ສຍໍ ຠຸຎ຺ຈິ. ຕໂຕ ເທປຸຕ຺ໂຕ ທຸຕິຍທິວສໂຕ ປຏ຺ຐາຍ ເຖຣສ຺ສ ຈ ສມ຺ປຕ຺ຕມຫາຊນສ຺ສ ຈ ມຫາທານໍ ເທນ຺ໂຕ ອາຍຸປຣິໂຍສາເນ ໐ ເທວໂລເກ ນິພ຺ພຕ຺ຕິຕ຺ວາ ຉສຸ ກາມສຄ຺ເຄສຸ ອປຣາປຣໍ ທິພ຺ພສມ຺ປຕ຺ຕິ ມນຸຠວມາໂນ ປທຸມຸຕ຺ຕຣສ຺ສ ຠຄວໂຕ ກາເລ ຕໂຕ ຈຸໂຕ ພາຣາຓສິຍໍ ອເນກວິຠວສ຺ສ ມິຈ຺ຉາທິຏ຺ຐິກສ຺ສ ກຸຏຸມ຺ພິກສ຺ສ ເຄເຫ ນິພ຺ພຕ຺ຕິ. ເທໂວຕິສ຺ສ ນາມໍ ອກໍສຸ. ອປຣຠາເຄ ວິຎ຺ຎຸຕໍ ປຕ຺ຕສ຺ສ ຕສ຺ສ ມາຕາປິຕໂຣ ກາລມກໍສຸ. ໂສວຓ຺ຓມຓິມຸຕ຺ຕາທິປູຣິຕໂກຏ຺ຐາຄາຣາທໂຍ ໂອໂລເກຕ຺ວາ ມມ ມາຕາປິຕໂຣ ມິຈ຺ຉາທິຏ຺ຐິກຕ຺ຕາ ອິໂຕ ທານາທິກິຎ຺ຈິກມ຺ມໍ ອກຣິຕ຺ວາ ປຣໂລກໍ ຄຈ຺ຉນ຺ຕາ ກາກຓິກມຕ຺ຕມ຺ປິ ອຄເຫຕ຺ວາ ຄຕາ, ອຫໍ ປນ ຕໍ ຄເຫຕ຺ວາວ ຄມິສ຺ສາມີຕິ ສນ຺ນິຏ຺ຐານໍ ກຕ຺ວາ ເຠຣິໍ ຈຣາເປຕ຺ວາ ກປຓທ຺ຘິກວນິພ຺ພເກ ສນ຺ນິປາເຕຕ຺ວາ ສຕ຺ຕາຫພ຺ຠນ຺ຕເຣ ສພ຺ພໍ ສາປເຕຍ຺ຍໍ ທານມຸເຂນ ທຕ຺ວາ ອຣຎ຺ຎໍ ປວິສິຕ຺ວາ ອິສິປ຺ປພ຺ພຊ຺ຊໍ ປພ຺ພຊິຕ຺ວາ ກສິຓປຣິກມ຺ມໍ ກຕ຺ວາ ປຎ຺ຈ ຠິຎ຺ຎາ ອຏ຺ຐ ສມາປຕ຺ຕິໂຍ ນິພ຺ພຕ຺ເຕຕ຺ວາ ອາກາສຈາຣີ ອໂຫສິ. ອຖ ຕສ຺ມິໍສມເຍ ປທຸມຸຕ຺ຕໂຣ ນາມ ຠຄວາ ຫໍສວຕີນຄເຣ ປຏິວສນ຺ໂຕ ເທວພ຺ຣຫ຺ມາທິປຣິວຸໂຕ ຈຕຸສຈ຺ຈປຏິສໍຍຸຕ຺ຕໍ ຘມ຺ມໍ ເທເສນ຺ໂຕ ນິສິນ຺ໂນ ໂຫຕິ, ຕທາ ໂສ ຕາປໂສ ອາກາເສນ ຄຈ຺ຉນ຺ໂຕ ມຫາຊນສມາຄມຎ຺ຈ ຠຄວໂຕ ສຣີຣໂຕ ນິກ຺ຂນ຺ຕຉພ຺ພຓ຺ຓຣໍສິໂຍ ຈ ທິສ຺ວາ ກິເມຕໍຕິ ວິມ຺ຫິໂຕ ອາກາສາ ໂອຕຣິຕ຺ວາ ມຫຕິຍາ ພຸທ຺ຘລີຬາຍ ນິສີທິຕ຺ວາ ຘມ຺ມໍ ເທເສນ຺ຕໍ ຠຄວນ຺ຕໍ ທິສ຺ວາ ປສນ຺ນມານໂສ ປຣິສນ຺ຕເຣ ນິສິນ຺ໂນ ຘມ຺ມໍ ສຸຕ຺ວາ ຠຄວນ຺ຕໍ ວນ຺ທິຕ຺ວາ ອຕ຺ຕໂນ ອສ຺ສມເມວ ອຄມາສິ. ອຖ ໂສ ຕຕ຺ຖ ຍາວຕາຍຸກໍ ຐຕ຺ວາ ອາຍຸປຣິໂຍສາເນ ຕາວຕິໍສຠວເນ ນິພ຺ພຕ຺ໂຕ ຕິໍສກປ຺ເປ ທິພ຺ພສມ຺ປຕ຺ຕິມນຸຠວນ຺ໂຕ ຉສຸ ກາມສຄ຺ເຄສຸ ອປຣາປຣິຍວເສນ ສໍສຣິ. ເອກປຎ຺ຎາສອຕ຺ຕຠາເວ ສກ຺ໂກ ເທວຣາຊາ ອໂຫສິ, ເອກກວີສຕິອຕ຺ຕຠາເວ ຈກ຺ກວຕ຺ຕິ ຫຸຕ຺ວາ ມນຸສ຺ສສມ຺ປຕ຺ຕິ ມນຸຠວິຕ຺ວາ ອິມສ຺ມິໍພຸທ຺ຘຸປ຺ປາເທ ຠຄວຕິ ປຣິນິພ຺ພຸເຕ ສາວຕ຺ຖິຍໍ ອຎ຺ຎຕຣສ຺ມິໍ ກຸລເຄເຫ ນິພ຺ພຕ຺ຕິຕ຺ວາ ສຕ຺ຕວສ຺ສິໂກ ເອກໍ ຠິກ຺ຂຸໍ ຘມ຺ມໍ ເທເສນ຺ຕໍ ອທ຺ທສ. ທິສ຺ວາ ຕໍ ອຸປສງ຺ກມິຕ຺ວາ ຘມ຺ມໍ ສຸຕ຺ວາ ອນິຈ຺ຈສຎ຺ຎໍ ປຏິລຠິຕ຺ວາ ຕຕ຺ຖ ນິສິນ຺ໂນວ ອຣຫຕ຺ຕໍ ປາປຸຓິ, ຕໂຕ ໂສ ປຕ຺ຕປຏິສມ຺ຠິໂທ ອຕ຺ຕນາ ກຕປຸຎ຺ຎກມ຺ມໍ ໂອໂລເກນ຺ໂຕ ຕໍ ປຸພ຺ພຈຣິຍໍ ຠິກ຺ຂູນໍ ມຊ຺ເຌ ປກາເສນ຺ໂຕ ອາຫ. ຕສ຺ມາ.

໑.

ນາຣໂທ ກິຣ ສມ຺ພຸທ຺ໂຘ, ປຸພ຺ເພ ອາສິ ນຣຸຕ຺ຕໂມ;

ໂລກໍ ທຸກ຺ຂາ ປໂມເຈນ຺ໂຕ, ທທນ຺ໂຕ ອມຕໍ ປທໍ.

໒.

ຕສ຺ມິໍ ຕຸ ສມເຍ ຕສ຺ສ, ສາວໂກ ຉິນ຺ນພນ຺ຘໂນ;

ຠິກ຺ຂິຕ຺ວາ ທີປເກ ລທ຺ຘ, ມາຫາຣໍ ປຣິຠຸຎ຺ຊິຕຸໍ.

໓.

ຣຸກ຺ຂມູລ ມຸປາ ຄຎ຺ຉິ, ຕຕ຺ຖາສິໍ ຣຸກ຺ຂເທວຕາ;

ພຸຠຸກ຺ຂິຕາ ອຸທິກ຺ຂນ຺ຕີ, ອຏ຺ຐາສິໍ ຕສ຺ສ ສນ຺ຕິເກ.

໔.

ອທາສິ ເມ ຠຕ຺ຕປິຓ຺ຑໍ, ກຣຸຓາປູຣິຕນ຺ຕໂຣ;

ຄເຫຕ຺ວານ ຐິໂຕ ປິຓ຺ຑໍ, ສຫມາໂນ ຂຸທໍ ຕທາ.

໕.

ອທິນ຺ນຕ຺ຕາ ມຍາ ປຸພ຺ເພ, ກິຎ຺ຈິ ທານໍ ສຸເປສເລ;

ຊິຆຈ຺ຉາປີຬິໂຕ ໂຫມິ, ຊາໂຕປິ ເທວໂຍນິຍໍ.

໖.

ອຊ຺ຊ ເຂຕ຺ຕໍ ສຸລທ຺ຘໍເມ, ເທຍ຺ຍຘມ຺ໂມປິ ວິຊ຺ຊຕິ;

ພີຊເມຕ຺ຖ ຈ ໂຣເປມິ, ຠວໂຕ ປຣິມຸຕ຺ຕິຍາ.

໗.

ອິຕິ ຈິນ຺ຕິຍ ວນ຺ທິຕ຺ວາ, ທາສສ຺ສ ສາມິ ໂວ ອລໍ;

ສງ຺ຄຫໍ ອິຘ ໂລກສ຺ມິໍ, ກໂຣຖ ປາຣໂລກິກໍ.

໘.

ອິຕິ ວຕ຺ວາ ອທາສາຫໍ, ຠຸຎ຺ຈິ ໂສປິ ທຍາປໂຣ;

ເຕນາຫໍ ປຸຎ຺ຎກມ຺ເມນ, ສຸຘນ຺ນມລຠິໍ ຂເຓ.

໙.

ຕໂຕ ຈຸໂຕ ຉເທເວສຸ, ວິນ຺ທນ຺ໂຕ ມຫຕິໍສິຣິໍ;

ຈິຣກາລໍ ວສິໍ ຕຕ຺ຖ, ເທວິທ຺ຘີຫິ ສມງ຺ຄິຕາ.

໑໐.

ສຕສຫສ຺ເສ ອິໂຕ ກປ຺ເປ, ປທຸມຸຕ຺ຕຣນາມໂກ;

ອຸປ຺ປຊ຺ຊິ ໂລກນາຍໂກ, ຘມ຺ມຣາຊາ ຕຖາຄໂຕ.

໑໑.

ມຫິທ຺ຘິໂກ ຕທາ ອາສິໍ, ຕາປໂສ ການເນ ວເນ;

ສມ຺ປຕ຺ຕປຎ຺ຈາ ຠິຎ຺ຎາໂຓ, ອາກາເສນ ຈຣາມຫໍ.

໑໒.

ຕທາ ກາເສນ ຄຈ຺ຉນ຺ໂຕ, ຣມ຺ເມ ຫໍສວຕີປຸເຣ;

ພຸທ຺ຘຣໍສິປຣິກ຺ຂິຕ຺ຕໍ, ເກຕຸມາລາວິລາສິຕໍ.

໑໓.

ເທວສງ຺ຆປຣິພ຺ພູຬ຺ຫໍ, ເທເສນ຺ຕໍ ອທ຺ທສໍ ຊິນໍ;

ໂສ ຕໍ ທິສ຺ວານ ນຠສາ, ຐິໂຕຫໍ ປຣິສນ຺ຕເຣ.

໑໔.

ຘມ຺ມໍ ສຸຕ຺ວາ ອຸທຄ຺ໂຄຫໍ, ກາລໍ ກຕ຺ວານ ສຕ຺ຖຸໂນ;

ຕໂຕ ຈຸໂຕ ປປນ຺ໂນສ຺ມິ, ຕາວຕິໍເສ ມໂນຣເມ.

໑໕.

ຕິໍສກປ຺ປສຫສ຺ສານິ, ຈຣນ຺ໂຕ ເທວມານຸເສ;

ທຸຄ຺ຄຕິໍ ນາຠິຊານາມິ, ລຠາມິ ວິປຸລໍ ສຸຂໍ.

໑໖.

ເອກປຎ຺ຎາສຕິກ຺ຂຕ຺ຕຸໍ, ເທວຣຊ຺ຊມກາຣຍິໍ;

ອເຖກວີສຕິກ຺ຂຕ຺ຕຸໍ, ຈກ຺ກວຕ຺ຕີ ອໂຫສຫໍ.

໑໗.

ປເທສຣຊ຺ຊໍ ກາສາຫໍ, ພຫຸກ຺ຂຕ຺ຕຸໍ ຕຫິໍ ຕຫິໍ;

ອິມສ຺ມິໍ ຠທ຺ທເກ ກປ຺ເປ, ນິພ຺ພຸເຕຕຸ [ນິພ຺ພຸເຕສຸ ອິຕິສພ຺ພຕ຺ຖ] ຕຖາຄເຕ.

໑໘.

ໂຈທິໂຕ ປຸຎ຺ຎກມ຺ເມນ, ສາວຕ຺ຖິປຸຣມຸຕ຺ຕເມ;

ອຸປ຺ປຊ຺ຊິຕ຺ວາ ກຸເລ ເສຏ຺ເຐ, ຊາຕິຍາ ສຕ຺ຕວສ຺ສິໂກ.

໑໙.

ສຸຕ຺ວາ ຘມ຺ມໍ ກເຖນ຺ຕສ຺ສ, ຠິກ຺ຂຸສ຺ສຎ຺ຎຕຣສ຺ສຫໍ;

ຠວສ຺ສນ຺ຕໍ ກຣິຕ຺ວານ, ອຣຫຕ຺ຕມປາປຸຓິໍ.

໒໐.

ສຸທິນ຺ນໍ ເມ ຕທາ ທານໍ, ສຸສ຺ສຸຕໍ ຘມ຺ມມຸຕ຺ຕມໍ;

ທຸກ຺ຂສ຺ສນ຺ຕໍ ອກາສາຫໍ, ຕສ຺ສ ກມ຺ມສ຺ສ ວາຫສາຕິ.

ເອວຎ຺ຈ ປນ ວຕ຺ວາ ພຫູ ຊເນ ກຸສລກມ຺ເມ ນິໂຍເຊສີຕິ.

໒໑.

ທາເນນເປວໍ ຈຣິມາຍ ປິຓ຺ຑິຍາ,

ສວຓາຍ ຘມ຺ມສ຺ສ ມຸຫຸຕ຺ຕເກນ;

ລຠນ຺ຕິ ສຕ຺ຕາ ຕິວິຘມ຺ປິ ສມ຺ປທໍ,

ຜລໍ ວເທ ໂກ ພຫຸທາຍກສ຺ສ ໂຠ.

ເທວປຸຕ຺ຕສ຺ສ ວຕ຺ຖຸໍ ນວມໍ.

໓໐. ສີວລິຕ຺ເຖຣສ຺ສ ວຕ຺ຖຸມ຺ຫິ ອຍມານຸປຸພ຺ພີກຖາ

ອິໂຕ ກິຣ ກປ຺ປສຕສຫສ຺ສມຕ຺ຖເກ ປທຸມຸຕ຺ຕໂຣ ນາມ ສຕ຺ຖາ ໂລເກ ອຸທປາທິ ຘມ຺ມເທສນາຍ ສຕ຺ເຕ ອມຕມຫານິພ຺ພາຓໍ ປາເປນ຺ໂຕ, ຕສ຺ມິໍ ສມເຍ ຠຄວາ ຫໍສາວຕິຍໍ ສຣາຊິກາຍ ປຣິສາຍ ມຊ຺ເຌ ເອກໍ ຠິກ຺ຂຸໍ ລາຠີນໍ ອຄ຺ຄຏ຺ຐາເນ ຐເປສິ. ຕທາ ຣາຊາ ຕໍ ທິສ຺ວາ ຕໍ ຐານໍ ກາມຍມາໂນ ພຸທ຺ຘປມຸຂສ຺ສ ສງ຺ຆສ຺ສ ມຫາທານໍ ທຕ຺ວາ ຠຄວໂຕ ປາທມູເລ ສິຣສາ ນິປຊ຺ຊິ, ຕທາສ຺ສ ຠຄວາ ອນາຄເຕ ໂຄຕມສ຺ສ ຠຄວໂຕ ສາສເນ ຕໍ ຐານໍ ລຠິສ຺ສສີຕິ ວຕ຺ວາ ພ຺ຍາກາສິ. ຕໍ ສຸຕ຺ວາ ມຸທິໂຕ ຣາຊາ ປຸຎ຺ຎານິ ກຕ຺ວາ ເທວໂລເກ ນິພ຺ພຕ຺ຕິ. ຕໂຕ ອປຣຠາເຄ ພາຣາຓສິຍໍ ເສຏ຺ຐິປຸຕ຺ໂຕ ຫຸຕ຺ວາ ປຈ຺ເຈກພຸທ຺ຘສຫສ຺ສໍ ຈຕຸປຈ຺ຈຍທາເນນ ຍາວຊີວໍ ປຏິຊຄ຺ຄິຕ຺ວາ ເທວໂລເກ ນິພ຺ພຕ຺ໂຕ ມຫນ຺ຕໍ ສມ຺ປຕ຺ຕິ ມນຸຠວິຕ຺ວາ ຕໂຕ ຈຸໂຕ ວິປສ຺ສິສ຺ສ ຠຄວໂຕ ກາເລ ພນ຺ຘຸມຕີນຄເຣ ອຎ຺ຎຕຣສ຺ມິໍ ກຸລເຄເຫ ນິພ຺ພຕ຺ຕິ. ໂສ ຕສ຺ມິໍ ສມເຍ ເສນຄຸຕ຺ຕຏ຺ຐາເນ ຐຕ຺ວາ ຣຎ຺ໂຎ ກມ຺ມໍ ກໂຣຕິ, ຕທາ ນຄຣວາສິໂນ ອຸປາສກຄຓາ ວິປສ຺ສີສມ຺ມາສມ຺ພຸທ຺ຘໍ ອຸປສງ຺ກມ຺ມ ວນ຺ທິຕ຺ວາ ຠຄວາ ຠນ຺ເຕ ສສາວໂກ ອມ຺ຫາກໍ ອນຸຄ຺ຄຫໍ ກໂຣຕູຕິ ສ຺ວາຕນາຍ ນິມນ຺ເຕຕ຺ວາ ມຫາທານໍ ທຕ຺ວາ ສພ຺ເພ ເອກຈ຺ຉນ຺ທາ ຠຄວນ຺ຕ ມຸທ຺ທິສ຺ສ ມຫາຣຫໍ ມຫາປຣິເວຓໍ ກາຣາເປຕ຺ວາ ປຣິເວຓມເຫ ມຫາທານໍ ທທນ຺ຕາ ທານຄ຺ເຄ ອສຸກໍ ນາມ ນຕ຺ຖີຕິ ນ ວຕ຺ຕພ຺ພນ຺ຕິ ວຕ຺ວາ ທານໍ ປຏິຍາເທຕ຺ວາ ທານຄ຺ຄໍ ໂອໂລເກນ຺ຕາ ນວທຘິຎ຺ຈ ປຏລມຘຸຎ຺ຈ ອປສ຺ສນ຺ຕາ ປຸຣິເສ ປກ຺ໂກສິຕ຺ວາ ສຫສ຺ສໍ ທຕ຺ວາ ທຘິມຘຸໍ ຂິປ຺ປໍ ປຣິເຍສິຕ຺ວາ ອາເນຖາຕິ ເປເສສຸໍ, ເຕ ສຫສ຺ສໍ ຄເຫຕ຺ວາ ທຘິມຘຸໍ ອຸປຘາເຣຕຸໍ ຕຕ຺ຖ ຕຕ຺ຖ ວິຈຣນ຺ຕາ ທ຺ວາຣນ຺ຕເຣ ອຏ຺ຐໍສຸ, ຕທາ ອຍໍ ເສນຄຸຕ຺ໂຕ ຣຎ຺ໂຎ ສຠຕ຺ຕໍ ທຘິມຘຸໍ ອາທາຍ ຄຈ຺ຉນ຺ໂຕ ມຫາທ຺ວາຣໍ ສມ຺ປາປຸຓິ, ອຖ ເຕ ທຘິມຘຸໍ ທິສ຺ວາ ໂຠ ກຫາປຓໍ ຄເຫຕ຺ວາ ອິມໍ ເທຫີຕິ ຍາຈິໍສຸ. ເຕນ [ເຕນທສ຺ສາມິ ອິຕິປິກຕ຺ຕຈິ] ນ ທສ຺ສາມີຕິ ວຸຕ຺ເຕ ຍາວສຫສ຺ສໍ ວຑ຺ເຒຕ຺ວາ ຍາຈິໍສຸ. ຕໂຕ ເສນຄຸຕ຺ໂຕ ອິມໍ ອປ຺ປຄ຺ຆໍ ສຫສ຺ເສນ ຍາຈຖ, ກິ ມເນນ ກໂຣຖາຕິ ປຸຈ຺ຉິ, ເຕຫິ ສມ຺ພຸທ຺ຘຕ຺ຖາຍາຕິ ວຸຕ຺ເຕ ເຕນຫິ ອຫເມວ ທສ຺ສາມີຕິ ຊີຣມຣິຈາທີຫິ ສກ຺ຂຣມຘຸຜາຓິຕາທໂຍ ໂຍເຊຕ຺ວາ ທານຄ຺ຄໍ ອຸປນາເມສິ. ຕໍ ສຕ຺ຖຸ ອານຸຠາເວນ ພຸທ຺ຘປມຸຂສ຺ສ ອຏ຺ຐສຏ຺ຐິຠິກ຺ຂຸສຕສຫສ຺ສສ຺ສ ປໂຫຓກໍ ອໂຫສິ. ຕໂຕ ໂສ ເຕນ ປຸຎ຺ຎກມ຺ເມນ ເທວມນຸສ຺ສໂລເກສຸ ສມ຺ປຕ຺ຕິ ມນຸຠວິຕ຺ວາ ອປຣຠາເຄ ອມ຺ຫາກໍ ຠຄວໂຕ ກາເລ ໂກລິຍນຄເຣ ມຫາລິລິຈ຺ຉວິຣຎ຺ໂຎ ອຸປນິສ຺ສາຍ ສຸປ຺ປິຍາຍ ນາມ ອຄ຺ຄມເຫສິຍາ ກຸຈ຺ຉິສ຺ມິໍ ປຏິສນ຺ຘິໍ ຄຓ຺ຫິ. ໂສ ສຕ຺ຕມາສສຕ຺ຕສໍວຈ຺ຉຣານິ ມາຕຸກຸຈ຺ຉິຍໍ ວສິຕ຺ວາ ສຕ຺ຕທິວສານິ ມູຬ຺ຫຄພ຺ໂຠ ທຸກ຺ຂມນຸຠວິ. ມາຕຸກຸຈ຺ຉິໂຕ ນິກ຺ຂມນ຺ຕສ຺ສ ຕສ຺ສ ມາຕາປິຕໂຣ ສີວລີຕິ ນາມ ມກໍສຸ. ເອວໍ ມຫາປຸຎ຺ຎສ຺ສ ເອຕ຺ຕກໍ ກາລໍ ມາຕຸກຸຈ຺ຉິມ຺ຫິ ທຸກ຺ຂານຸຠວນໍ ອຕ຺ຕນາວ ກເຕນ ປາປພເລນ ອໂຫສິ, ໂສ ກິຣ ອຕີເຕ ຣາຊາ ຫຸຕ຺ວາ ອຕ຺ຕໂນ ສປຕ຺ຕຣຎ຺ຎາ ສທ຺ຘິໍ ສງ຺ຄາເມນ຺ໂຕ ມາຕຣາ ສທ຺ຘິໍ ມນ຺ເຕສິ. ສາ ນຄຣໍ ຣຸນ຺ຘິຕ຺ວາ ອມິຕ຺ເຕ ຄຓ຺ຫິຕຸໍ ສກ຺ກາຕິ ອຸປາຍ ມທາສິ, ໂສປິ ຕສ຺ສາ ວຈເນນ ນຄຣໍ ຣຸນ຺ຘິຕ຺ວາ ສຕ຺ຕເມ ທິວເສ ອຄ຺ຄເຫສິ, ເຕນ ປາປກມ຺ມພເລນ ມາຕາປຸຕ຺ຕານໍ ເອວໍ ມຫນ຺ຕໍ ທຸກ຺ຂໍ ອໂຫສີຕິ. ຕໂຕ ສາ ປຸຕ຺ຕໍ ວິຊາຍນກາເລ ສຕ຺ຕເມ ທິວເສ ຠຄວນ຺ຕໍ ອນຸສ຺ສຣິຕ຺ວາ ສຸເຂນ ຠາຣໍ ມຸຎ຺ຈິ. ຕຸຏ຺ຐາ ສາ ສຕ຺ຕເມ ທິວເສ ພຸທ຺ຘປມຸຂສ຺ສ ຠິກ຺ຂຸສງ຺ຆສ຺ສ ມຫາທານໍ ອທາສິ, ອຖສ຺ສາ ປຸຕ຺ໂຕ ສຕ຺ຕວສ຺ສິກກາເລ ເຄຫາ ນິກ຺ຂມ຺ມ ສຕ຺ຖາຣໍ ທິສ຺ວາ ປພ຺ພຊ຺ຊໍ ຍາຈິ. ສຕ຺ຖາ ສາຣິປຸຕ຺ຕຕ຺ເຖຣສ຺ສ ນິໂຍເຊສິ, ຕໂຕ ສາຣິປຸຕ຺ຕຕ຺ເຖເຣນ ອຸປຊ຺ຌາເຍນ ໂມຄ຺ຄລ຺ລານມາຈຣິຍໍ ກຕ຺ວາ ປພ຺ພຊິ, ອຖ ໂສ ຂຸຣຄ຺ເຄເຍວ ອຣຫຕ຺ຕໍ ປຕ຺ວາ ພຸທ຺ຘສາສນໍ ໂສເຠສິ, ໂສ ປຸພ຺ເພ ກຕປຸຎ຺ຎານຸຠາເວນ ມຫາປຸຎ຺ໂຎ ອໂຫສິ ລາຠີນຎ຺ຈ ອຄ຺ໂຄ. ອເຖກສ຺ມິໍ ສມເຍ ຠຄວາ ເຣວຕຕ຺ເຖຣໍ ທສ຺ສນາຍ ຂທິຣວນວິຫາຣໍ ຄຈ຺ຉນ຺ໂຕ ຕິໍສຠິກ຺ຂຸສຫສ຺ເສຫິ ສທ຺ຘິໍ ຕິໍສໂຍຊນິກໍ ຉຏ຺ຏິຕກນ຺ຕາຣໍ ສມ຺ປາປຸຓິ ນິຣູທກໍ ອປ຺ປຠກ຺ຂໍ. ເຍຠຸຍ຺ເຍນ ເທວຕາ ສີວລິຕ຺ເຖເຣ ປສນ຺ນາ. ຕສ຺ມາ ຠຄວາ ສີວລິຕ຺ເຖຣໍ ປຸຣໂຕ ຈາຣິກໍ ກຕ຺ວາ ເທວຕາຫິ ກາຣາປິເຕ ວິຫາເຣ ວສນ຺ໂຕ ເທວຕາຫິ ສຊ຺ຊິຕທານໍ ປຣິຠຸຎ຺ຊນ຺ໂຕ ເຣວຕຕ຺ເຖຣໍ ສໍປາປຸຓິຕ຺ວາ ຄຕກມ຺ມໍ ນິຏ຺ຐາເປຕ຺ວາ ເຊຕວນມາຄມ຺ມ ລາຠີນໍ ອຄ຺ຄຏ຺ຐາເນ ຕໍ ຐເປສີຕິ. ເຕນ ວຸຕ຺ຕໍ ອປທາເນ.

໑.

ປທຸມຸຕ຺ຕໂຣ ນາມ ຊິໂນ, ສພ຺ພຘມ຺ເມສຸ ຈກ຺ຂຸມາ;

ອິໂຕ ສຕສຫສ຺ສມ຺ຫິ, ກປ຺ເປ ອຸປ຺ປຊ຺ຊິ ນາຍໂກ.

໒.

ສີລໍ ຕສ຺ສ ອສງ຺ຂ຺ເຍຍ຺ຍໍ, ສມາຘິ ວຊິຣູປໂມ [ວຊິຣູປມາ ອິຕິກຕ຺ຖຈິ];

ອສໍຂິຍໍ ຎາຓວຣໍ, ວິມຸຕ຺ຕິ ຈ ອໂນປມາ.

໓.

ມນຸຊາມຣນາຄານໍ, ພ຺ຣຫ຺ມານຎ຺ຈ ສມາຄເມ;

ສມຓພ຺ຣາຫ຺ມຓາກິຓ຺ເຓ, ຘມ຺ມໍ ເທເສຕິ ນາຍໂກ.

໔.

ສສາວກໍ ມຫາລາຠິໍ, ປຸຎ຺ຎວນ຺ຕໍ ຊຸຕິນ຺ຘຣໍ,

ຐເປສິ ເອຕທຄ຺ຄມ຺ຫິ, ປຣິສາສຸ ວິສາຣໂທ.

໕.

ຕທາຫໍ ຂຕ຺ຕິໂຍ ອາສິໍ, ປຸເຣ ຫໍສວຕີວ຺ຫເຍ [ຫໍສາວຕວ຺ຫເຍ ອິຕິສພ຺ພຕ຺ຖ];

ສຸຕ຺ວາ ຊິນສ຺ສ ຕໍ ວາກ຺ຍໍ, ສາວກສ຺ສ ຄຸຓໍ ພຫຸໍ.

໖.

ນິມນ຺ຕຍິຕ຺ວາ ສຕ຺ຕາຫໍ, ໂຠຊຍິຕ຺ວາ ສສາວກໍ;

ມຫາທານໍ ທທິຕ຺ວານ, ຕໍ ຐານມຠິປຕ຺ຖຍິໍ.

໗.

ຕທາ ມໍ ວິນຕໍ ປາເທ, ທິສ຺ວານ ປຸຣິສາສໂຠ;

ໂສ ສເຣນ ມຫາວີໂຣ, ອິມໍ ວຈນມພ຺ຣວີ.

໘.

ຕໂຕ ຊິນສ຺ສ ວຈນໍ, ໂສຕຸກາມາ ມຫາຊນາ;

ເທວທານວຄນ຺ຘພ຺ພາ, ພ຺ຣຫ຺ມາໂນຈ ມຫິທ຺ຘິກາ.

໙.

ສມຓພ຺ຣາຫ຺ມຓາ ຈາປິ, ນມສ຺ສິສຸໍ ກຕຎ຺ຊລີ;

ນໂມ ເຕ ປຸຣິສາຊຎ຺ຎ, ນໂມ ເຕ ປຸຣິສຸຕ຺ຕມ.

໑໐.

ຂຕ຺ຕິເຍນ ມຫາທານໍ, ທິນ຺ນໍ ສຕ຺ຕາຫກມ຺ປິ [ສຕ຺ຕາຫກໍປິໂຕ ອິຕິປິກຕ຺ຖຈິ] ໂນ;

ໂສຕຸກາມາ ຜລໍ ຕສ຺ສ, ພ຺ຍາກໂຣຫິ ມຫາມຸເນ.

໑໑.

ຕໂຕ ອໂວຈ ຠຄວາ, ສຸໂຓຖ ມມ ຠາສິຕໍ;

ອປ຺ປເມຍ຺ຍມ຺ຫິ ພຸທ຺ຘສ຺ມິໍ, ຄຸຓມ຺ຫິ ສຸປ຺ປຕິຏ຺ຐິຕາ.

໑໒.

ທກ຺ຂິຓາ ທາຍກໍ ປຕ຺ວາ, ອປ຺ປເມຍ຺ຍຜລາວຫາ;

ອປິ ເຈ ສ ມຫາໂຠໂຄ, ຐານໍ ປຕ຺ເຖຕິ ມຸຕ຺ຕມໍ.

໑໓.

ລາຠີ ວິປຸລລາຠີນໍ, ຍຖາ ຠິກ຺ຂຸ ສຸທສ຺ສໂນ;

ຕຖາຫໍປິ ຠເວຍ຺ຍນ຺ຕິ, ລຈ຺ຉເຕ ຕໍ ອນາຄເຕ.

໑໔.

ສຕສຫສ຺ສິໂຕ ກປ຺ເປ, ໂອກ຺ກາກກຸລສມ຺ຠໂວ;

ໂຄຕໂມນາມ ນາເມນ, ສຕ຺ຖາ ໂລເກ ຠວິສ຺ສຕິ.

໑໕.

ຕສ຺ສ ຘມ຺ເມສຸ ທາຍາໂທ, ໂອຣໂສ ຘມ຺ມນິມ຺ມິໂຕ;

ສີວລິ ນາມ ນາເມນ, ເຫສ຺ສຕິ ສຕ຺ຖຸສາວໂກ.

໑໖.

ເຕນ ກມ຺ເມນ ສຸກເຕນ, ເຈຕນາປຓິຘີຫິ ຈ;

ຊຫິຕ຺ວາ ມານຸສໍ ເທຫໍ, ຕາວຕິໍສູປໂຄ ອຫໍ.

໑໗.

ຕໂຕປຣສ຺ມິໍສມເຍ, ພາຣາຓສິປຸຣຸຕ຺ຕເມ;

ເສຏ຺ຐິປຸຕ຺ໂຕ ອຫໍ ອາສິໍ, ອຑ຺ຒປ຺ປຕ຺ໂຕ ມຫາຘໂນ.

໑໘.

ສຫສ຺ສມຕ຺ເຕ ປຈ຺ເຈກ, ນາຍເກ ຈ ນິມນ຺ຕິຍ;

ມຘຸເຣນນ຺ນປາເນນ, ສນ຺ຕປ຺ເປສິໍຕທາທໂຣ.

໑໙.

ຕໂຕ ຈຸໂຕ ຉກາມຄ຺ເຄ, ອນຸໂຠສິໍມຫາຍສໍ;

ເທວຈ຺ຉຣາປຣິວຸໂຕ, ປາສາເທ ຣຕນາມເຍ.

໒໐.

ເອວໍ ອຈິນ຺ຕິຍາ ພຸທ຺ຘາ, ພຸທ຺ຘຘມ຺ມາ ອຈິນ຺ຕິຍາ;

ອຈິນ຺ຕິເຍ ປສນ຺ນານໍ, ວິປາໂກປິ ອຈິນ຺ຕິໂຍ.

໒໑.

ເອກນວຸຕິໂຕ ກປ຺ເປ, ວິປສ຺ສີນາມ ນາຍໂກ;

ອຸປ຺ປຊ຺ຊິ ຈາຣຸນຍໂນ, ສພ຺ພຘມ຺ມວິປສ຺ສໂກ.

໒໒.

ຕທາຫໍ ພນ຺ຘຸມຕິຍາ, ກຸລສ຺ສຎ຺ຎຕຣສ຺ສ ຈ;

ທຍິໂຕ ປຕ຺ຖິໂຕ ປຸຕ຺ໂຕ, ອາສິໍ ກມ຺ມນ຺ຕພ຺ຍາວໂຏ.

໒໓.

ຕທາ ອຎ຺ຎຕໂຣ ປູໂຄ, ວິປສ຺ສິສ຺ສ ມເຫສິໂນ;

ປຣິເວຓໍ ອກາເຣສິ, ມຫນ຺ຕ ມິຕິ ວິສ຺ສຸຕໍ.

໒໔.

ນິຏ຺ຐິເຕ ຈ ມຫາທານໍ, ທທໍ ຂຊ຺ຊກສໍຍຸຕໍ;

ນວໍ ທຘິ ມຘຸຎ຺ເຈວ, ວິຈິນໍ ນ ຈ ມທ຺ທສ.

໒໕.

ຕທາຫໍ ຕໍ ຄເຫຕ຺ວານ, ນວໍ ທຘິ ມຘຸມ຺ປິຈ,

ກມ຺ມສາມິຆຣໍ ຄຈ຺ຉໍ, ຕເມນໍ [ຕເມສໍ ອິຕິສພ຺ພຕ຺ຖ] ທານ ມທ຺ທສໍ.

໒໖.

ສຫສ຺ສມ຺ປິ ຈ ທຕ຺ວານ, ນ ລຕິໍສຸ ຈ ຕໍ ທ຺ວຍໍ;

ຕໂຕ ເອວໍ ວິຈິນ຺ເຕສິໍ, ເນຕໍ ເຫສ຺ສຕິ ໂອຣກໍ.

໒໗.

ຍຖາ ອິເມ ຊນາ ສພ຺ເພ, ສກ຺ກໂຣນ຺ຕິ ຕຖາຄຕໍ;

ອຫມ຺ປິ ກາຣໍ ກສ຺ສາມິ, ສສງ຺ເຆ ໂລກນາຍເກ.

໒໘.

ຕທາຫເມວໍ ຈິນ຺ເຕຕ຺ວາ, ທຘິໍມຘຸຎ຺ຈ ເອກໂຕ;

ໂຍເຊຕ຺ວາ ໂລກນາຖສ຺ສ, ສສງ຺ຆສ຺ສ ອທາສຫໍ.

໒໙.

ເຕນ ກມ຺ເມນ ສຸກເຕນ, ເຈຕນາປຓິຘີຫິ ຈ;

ຊຫິຕ຺ວາ ມານຸສໍ ເທຫໍ, ຕາວຕິໍສ ມຄຎ຺ຉຫໍ.

໓໐.

ປຸນາຫໍ ພາຣາຓສິຍໍ, ຣາຊາ ຫຸຕ຺ວາ ມຫາຍໂສ;

ສຕ຺ຕຸກສ຺ສ ຕທາ ຣຸທ຺ໂຘ, ທ຺ວາຣໂຣຘໍ ອກາຣຍິໍ.

໓໑.

ຕໂຕ ສປຕ຺ຕິໂນ [ສມ຺ປຕ຺ຕິໂນ; ສປຕ຺ຕາໂນ ອິຕິຈກຕ຺ຖຈິ] ຣຸທ຺ຘາ, ເອກາຫໍ ຣກ຺ຂິຕາ ອຫຸໍ;

ຕໂຕ ຕສ຺ສ ວິປາເກນ, ປາປຸຓິໍ ນິຣຍໍ ຠຸສໍ.

໓໒.

ປຈ຺ຉິເມ ຈ ຠເວ ທານິ, ຊາໂຕຫໍ ໂກລິເຍ ປຸເຣ;

ສຸປ຺ປວາສາ ຈ ເມ ມາຕາ, ມຫາລິ ລິຈ຺ຉວີ ປິຕາ.

໓໓.

ຂຕ຺ຕິເຍ ປຸຎ຺ຎກມ຺ເມນ, ທ຺ວາຣໂຣຘສ຺ສ ວາຫສາ;

ສຕ຺ຕມາເສ ສຕ຺ຕວສ຺ເສ, ວສິໍກຸຈ຺ຉິມ຺ຫິ ທຸກ຺ຂິໂຕ.

໓໔.

ສຕ຺ຕາຫໍ ທ຺ວາຣມູຬ຺ໂຫຫໍ, ມຫາທຸກ຺ຂສມປ຺ປິໂຕ;

ມາຕາ ເມ ຉນ຺ທທາເນນ, ເອວ ມາສິ ສຸທຸກ຺ຂິຕາ.

໓໕.

ສຸວຕ຺ຖິໂຕຫໍ ນິກ຺ຂນ຺ໂຕ, ພຸທ຺ເຘນ ອນຸກມ຺ປິໂຕ;

ນິກ຺ຂນ຺ຕທິວເສເຍວ, ປພ຺ພຊິໍ ອນຄາຣິຍໍ.

໓໖.

ອຸປຊ຺ຌາ ສາຣິປຸຕ຺ໂຕ ເມ, ໂມຄ຺ຄລ຺ລາໂນ ມຫິທ຺ຘິໂກ;

ເກເສ ໂອໂຣປຍນ຺ໂຕ ເມ, ອນຸສາສິ ມຫາມຕິ.

໓໗.

ເກເສສຸ ຉິຊ຺ຊມາເນສຸ [ຉນ຺ນມເນສຸ ອິຕິປິກຕ຺ຖຈິ], ອຣຫຕ຺ຕມປາປຸຓີໍ;

ເທໂວ ນາຄາ ມນຸສ຺ສາ ຈ, ປຈ຺ຈຍານຸ ປເນນ຺ຕິ ເມ.

໓໘.

ປທຸມຸຕ຺ຕຣນາມຎ຺ຈ, ວິປສ຺ສິໍຈ ວິນາຍກໍ;

ສໍປູຊຍິໍ ປມຸທິໂຕ, ປຈ຺ຈເຍຫິ ວິເສສໂຕ.

໓໙.

ຕໂຕ ເຕສໍ ວິປາເກນ, ກມ຺ມານໍ ວິປຸລຸຕ຺ຕມໍ;

ລາຠໍ ລຠາມິ ສພ຺ພຕ຺ຖ, ວເນ ຄາເມ ຊເລ ຖເລ.

໔໐.

ເຣວຕໍ ທສ຺ສນຕ຺ຖາຍ, ຍທາ ຍາຕິ ວິນາຍໂກ;

ຕິໍສຠິກ຺ຂຸສຫສ຺ເສຫິ, ສຫ ໂລກຄ຺ຄນາຍໂກ.

໔໑.

ຕທາ ເທໂວ ປນີເຕຫິ [ປຓີເຕຫິ ອິຕິສພ຺ພຕ຺ຖ], ມມຕ຺ຖາຍ ມຫາມຕິ;

ປຈ຺ຈເຍຫິ ມຫາວີໂຣ, ສສງ຺ໂຆ ໂລກນາຍໂກ.

໔໒.

ອຸປຏ຺ຐິໂຕ ມຍາ ພຸທ຺ໂຘ, ຄນ຺ຕ຺ວາ ເຣວຕມທ຺ທສ;

ຕໂຕ ເຊຕວນໍ ຄນ຺ຕ຺ວາ, ເອຕທຄ຺ເຄ ຐເປສິມໍ.

໔໓.

ລາຠີນໍ ສີວລິ ອຄ຺ໂຄ, ມມ ສິສ຺ເສສຸ ຠິກ຺ຂໂວ;

ສພ຺ເພໂລກຫິໂຕ ສຕ຺ຖາ, ກິຕ຺ຕຍີ ປຣິສາສຸມໍ.

໔໔.

ກິເລສາ ຌາປິຕາ ມຍ຺ຫໍ, ຠວາ ສພ຺ເພ ສມູຫຕາ;

ນາໂຄວ ພນ຺ຘນໍ ເຉຕ຺ວາ, ວິຫຣາມິ ອນາສໂວ.

໔໕.

ສ຺ວາຄຕໍ ວຕ ເມ ອາສິ, ພຸທ຺ຘເສຏ຺ຐສ຺ສ ສນ຺ຕິກໍ;

ຕິສ຺ໂສ ວິຊ຺ຊາ ອນຸປ຺ປຕ຺ໂຕ, ກຕໍ ພຸທ຺ຘສ຺ສ ສາສນໍ.

໔໖.

ປຏິສມ຺ຠິທາ ຈຕສ຺ໂສປິ, ວິໂມກ຺ຂາ ປິຈ ອຏ຺ຐິເມ;

ຉຬຠິຎ຺ຎາ ສຈ຺ຉິກຕາ, ກຕໍ ພຸທ຺ຘສ຺ສ ສາສນນ຺ຕິ.

ອິຕ຺ຖໍ ສຸທໍ ອາຍສ຺ມາ ສີວລິຕ຺ເຖໂຣ ອິມາ ຄາຖາໂຍ ອຠາສິຕ຺ຖາຕິ.

໔໗.

ສຸຕ຺ວານ ເອຕໍ ຈຣິຕໍ ມຫພ຺ຠຸຕໍ,

ປຸຎ຺ຎານຸຠາວຎ຺ຈ ສິຣິໍ ສິຣີມຕໍ;

ຫິຕ຺ວາ ກຸສີຕໍ ກຸສລໍ ກໂຣຖ,

ກາມາຕ຺ຖ ກາມໍ ຠວໂຠຄນິພ຺ພຸຕິໍ.

ສີວລິຕ຺ເຖຣສ຺ສ ວຕ຺ຖຸໍ ທສມໍ.

ຍກ຺ຂວຎ຺ຈິຕວຄ຺ໂຄ ຕຕິໂຍ.

ມຫາເສນວຄ຺ໂຄ

໓໑. ມຫາເສນຣຎ຺ໂຎ ວຕ຺ຖຸມ຺ຫິ ອຍມານຸປຸພ຺ພີກຖາ

ຠຄວຕິ ປຣິນິພ຺ພຸເຕ ປາຏລິປຸຕ຺ຕນຄເຣ ມຫາເສໂນ ນາມ ຣາຊາ ຣຊ຺ຊໍ ກາເຣສິ ຘມ຺ມິໂກ ຘມ຺ມຣາຊາ. ໂສ ປນ ປິຕຸປິຕາມຫາທີນໍ ຘນຣາສິໍ ໂອໂລເກຕ຺ວາ ອິເມ ອິມໍ ສາປເຕຍ຺ຍໍ ປຫາຍ ມຈ຺ຈຸໂນ ມຸຂມຸປຄຕາ. ອໂຫ ສໍສາຣິການໍ ອຎ຺ຎາຓຕາ. ຘນໍ ຐເປຕ຺ວາ ອຕ຺ຕໂນ ວິນາສຎ຺ຈ ອຕ຺ຕານໍ ຐເປຕ຺ວາ ຘນວິນາສຎ຺ຈ ນ ຊານນ຺ຕີຕິ ສມ຺ປຕ຺ຕິຍາ ອຘິຄມຎ຺ຈ ວິນາສໍ ຈາຕິ ສພ຺ພໍ ຈິນ຺ເຕຕ຺ວາ ຘມ຺ມຎ຺ຈ ສຸຕ຺ວາ ປຏິລທ຺ຘສທ຺ໂຘ ທິວເສ ທິວເສ ທສສຫສ຺ສານໍ ຠິກ຺ຂູນໍ ມຘຸເຣນ ອນ຺ນປາເນນ ສນ຺ຕປ຺ເປນ຺ໂຕ ອເນການິ ປຸຎ຺ຎານິ ອຸປຈິນນ຺ໂຕ ເອກທິວສໍ ຣໂຫ ປຏິສລ຺ລິໂນ ເອວໍ ຈິນ຺ເຕສິ. ເອວໍ ຣາຊນິໂຍເຄນ ຊນສ຺ສ ປີຬນໍ ກຕ຺ວາ ທິນ຺ນທານໂຕ ສຫຕ຺ເຖນ ກມ຺ມໍ ກຕ຺ວາ ລທ຺ເຘນ ທິນ຺ນທານໍ ມຫປ຺ຜລໍ ມຫານິສໍສໍ ຠວິສ຺ສຕິ, ເອວໍ ມຍາ ກາຕພ຺ພນ຺ຕິ ໂສ ສຸຫທາ ມຈ຺ຈສ຺ສ ຣຊ຺ຊໍ ນີຍ຺ຍາເຕຕ຺ວາ ອຕ຺ຕໂນ ກຓິຏ຺ຐິກໍ ອາທາຍ ກິຎ຺ຈິ ອຊານາເປຕ຺ວາ ອຎ຺ຎຕຣເວເສນ ນຄຣາ ນິກ຺ຂມ຺ມ ອຸຕ຺ຕຣມຘຸຣໍ ນາມ ນຄຣໍ ອຄມາສິ, ຕຕ຺ຖ ມຫາວິຠໂວ ເອໂກ ເສຏ຺ຐິ ປຏິວສຕິ, ເຕ ເສຏ຺ຐິໂນ ສມີປ ມຸປຄມ຺ມ ຐິຕາ. ເຕນ ກິມຕ຺ຖາຍາຄຕາຕິ ວຸຕ຺ເຕ ຣາຊາ ຕວ ເຄເຫ ຠຕິຍາ ກມ຺ມໍ ກຣິສ຺ສາມີຕິ ວຕ຺ວາ ເຕນານຸຎ຺ຎາໂຕ ຕີຓິ ວສ຺ສານິ ກມ຺ມ ມກາສິ, ຕໂຕ ເອກທິວສໍ ເສຏ຺ຐິ ເຕ ທິສ຺ວາ ປກ຺ໂກສິຕ຺ວາ ອຕີວ ຕຸມ຺ເຫ ສຸຂຸມາລຕຣາ. ຕຖາປິ ອິມສ຺ມິໍ ເຄເຫ ກມ຺ມກຣເຓນ ຈິຣໍ ວສິຕ຺ຖ, ເອຕ຺ຕກໍ ກາລໍ ກິສ຺ມິຎ຺ຈິ ກມ຺ເມປິ ກຸສີຕຕ຺ຕໍ ນ ປຎ຺ຎາຍຕິ. ປເຄວ ອນາຈາຣມ຺ປິ, ຍາຄຸຠຕ຺ຕໍ ຐເປຕ຺ວາ ອຎ຺ຎໍ ອຸປກາຣມ຺ປິ ມມ ສນ຺ຕິກາ ນຕ຺ຖິ, ເກນຕ຺ເຖນ ກມ຺ມໍ ກໂຣຖາຕິ ປຸຈ຺ຉິ. ຣາຊາ ຕສ຺ສ ວຈນໍ ສຸຕ຺ວາ ອິມສ຺ມິໍ ຊນປເທ ສາລິໂນ ມນາປຠາໂວ ພຫຸໂສ ສູຍຕິ. ຕສ຺ມາ ສາລີນມຕ຺ຖາຍ ອິຘາ ຄຕມ຺ຫາຕິ ອາຫ, ຕໍ ສຸຕ຺ວາ ເຕສໍ ຕຸຏ຺ໂຐ ເສຏ຺ຐິ ສາລີນໍ ສກຏສຫສ຺ສໍ ອທາສິ, ຣາຊາ ສາລິໍລຠິຕ຺ວາ ເສຏ຺ຐິໂນ ເອວມາຫ, ໂຠ ອິມໍ ອມ຺ຫາກໍ ນຄຣໍ ປາເປຖາຕິ, ຕໍ ສຸຕ຺ວາ ເສຏ຺ຐິ ສາຘູຕິ ວຕ຺ວາ ສາລິປຣິປຸຓ຺ຓສກຏສຫສ຺ສໍ ຣຎ຺ໂຎ ນຄຣໍ ປາເປສິ, ຣາຊາ ນຄຣໍ ຄນ຺ຕ຺ວາ ເສຏ຺ຐິສ຺ສ ນານາວຓ຺ຓວຕ຺ຖຫິຣຎ຺ຎສຸວຓ຺ຓາທີຫິ ສກເຏ ປູເຣຕ຺ວາ ປຏິເປເສຕ຺ວາ ເມຕ຺ຕິໍ ຖິຣໍ ກຕ຺ວາ ອາຠຕວີຫໂຍ ຣາຊເຄເຫ ສນ຺ນິຈຍມກາສິ, ອຖ ຣາຊາ ກຕິປາຫຈ຺ຈເຍນ ມຸສລໍ ປຄ຺ຄຍ຺ຫ ສຫຕ຺ເຖເນວ ວີຫິໍ ໂກຏ຺ເຏຕິ, ໂກຏ຺ຏິຕໂກຏ຺ຏິຕໍ ກຓິຏ຺ຐິກາ ປປ຺ໂຜເຏຕິ. ເອວໍ ອຸໂຠປິ ຕຓ຺ຑຸລານໍ ມຫນ຺ຕໍ ຣາສິໍ ກຕ຺ວາ ທາຣູທກາທໂຍ ອາຫຣິຕ຺ວາ ອມ຺ພິລຠຕ຺ຕໍ ປຈິຕ຺ວາ ຣາຊເຄເຫ ປຎ຺ຈສຕອາສນານິ ປຎ຺ຎາເປຕ຺ວາ ກາລໍ ອຸຄ຺ໂຆເສສຸໍ, ອາຄຈ຺ຉນ຺ຕຸ ອຍ຺ຍາ ອນຸກມ຺ປໍ ອຸປາທາຍ ມມ ເຄເຫ ຠຸຎ຺ຊນ຺ຕູຕິ. ຕໍ ສຸຕ຺ວາ ປຎ຺ຈສຕາ ຠິກ຺ຂູ ອາກາເສນ ອາຄມິໍສຸ, ຣາຊາ ເຕ ຍາວທຕ຺ຖໍ ປຣິວິສິ, ຕໂຕ ເຕສໍ ອນ຺ຕເຣ ປິຍໍຄຸທີປວາສີ ເອໂກ ມຫາສິວຕ຺ເຖໂຣ ນາມ ຠຕ຺ຕໍ ຄເຫຕ຺ວາ ເອເຕ ມໍ ປສ຺ສນ຺ຕູຕິ ອຘິຏ຺ຐຫິຕ຺ວາ ອາກາເສນ ປິຍໍຄຸທີປໍ ຄນ຺ຕ຺ວາ ຠຕ຺ຕໍ ປຎ຺ຈສຕານໍ ຠິກ຺ຂູນໍ ທຕ຺ວາ ປຣິຠຸຎ຺ຈິ. ຕໍ ຕສ຺ສານຸຠາເວນ ສພ຺ເພສໍ ຍາວທຕ຺ຖໍ ອໂຫສິ. ເອວໍ ອປ຺ປເກນາປິ ເທຍ຺ຍຘມ຺ເມນ ສປ຺ປຸຣິສາ ທາຍການໍ ມນໍ ປສາເທຕ຺ວາ ປຕິຏ຺ຐໍ ກໂຣນ຺ຕີຕິ. ວຸຕ຺ຕຎ຺ຫິ.

໑.

ອປ຺ປເກນປິ ເມຘາວີ, ທາຍການໍ ມນໍ ປຕິ;

ສທ຺ຘໍ ວຑ຺ເຒນ຺ຕິ ຈນ຺ໂທວ, ຣໍສິນາ ຂີຣສາຄຣໍ.

໒.

ອຏ຺ຐາເນ ນ ນິໂຍເຊນ຺ຕາ, ກໂຣນ຺ຕາ ເນວ ສນ຺ນິຘິໍ;

ປຣິໂຠຄ ມກຕ຺ວານ, ເນວ ນາເສນ຺ຕິ ປຈ຺ຈຍໍ.

໓.

ນ ປາເປນ຺ຕາຈ ເຖຍ຺ຍສ຺ສ, ນ ກໂຣນ຺ຕາ ຕເຖວິຓໍ;

ວິຠຊນ຺ຕິ ສຸສີເລສຸ, ສຍໍ ຠຸຕ຺ວານ ສີລວາຕິ.

ອຖ ຣາຊາ ກຓິຏ຺ຐິກາຍ ສທ຺ຘິໍ ຖຕ຺ເຖວ ຐິໂຕ ປິຍໍຄຸທີເປ ປຣິຠຸຎ຺ຊນ຺ເຕ ປຎ຺ຈສຕຠິກ຺ຂູ ທິສ຺ວາ ຫຏ຺ໂຐ ອຸທຄ຺ໂຄ ອໂຫສິ. ອຖ ເຕ ອປຣຠາເຄ ອຕ຺ຕນາ ກຕໍ ທານວຣໍ ອນຸສ຺ສຣນ຺ຕາ ນ ຈິເຣເນວ ອຸໂຠປິ ໂສຕາປນ຺ນາ ອເຫສຸໍຕິ.

໔.

ນ ຄເຓນ຺ຕາຕ຺ຕໂນ ທຸກ຺ຂໍ, ວິຫາຍ ມຫຕິໍ ສິຣິໍ;

ອາຍຕິໍຠວມິຈ຺ຉນ຺ຕາ, ສຸຊເນວໍ ສຸເຠ ຣຕາ.

໕.

ອາຍາເສນ ກຕໍ ປຸຎ຺ຎໍ, ມຫນ຺ຕຜລທາຍກໍ;

ອິຕິ ມນ຺ຕ຺ວານ ເມຘາວີ, ສຫຕ຺ເຖເນວ ຕໍ ກເຣຕິ.

ມຫາເສນຣຎ຺ໂຎ ວຕ຺ຖຸໍ ປຖມໍ.

໓໒. ສຸວຓ຺ຓຕິລກາຍ ວຕ຺ຖຸມ຺ຫິ ອຍມານຸປຸພ຺ພີກຖາ

ລງ຺ກາທີເປ ກິຣ ອນຸຣາຘປຸຣນຄເຣ ເອໂກ ມາຕຸຄາໂມ [ເອກາມາຕຸຄາມາຕິວາ ເອກາມາຕຸຄາໂມຕິວາ ກຕ຺ຖຈິ] ສທ຺ຘາສມ຺ປນ຺ນາ ນິຈ຺ຈໍ ອຠຍຸຕ຺ຕຣເຈຕິເຍ ປຸປ຺ຜປູຊໍ ກໂຣຕິ, ອເຖກທິວສໍ ສາ ອຕ຺ຕໂນ ຘີຕຸຍາ ສທ຺ຘິໍ ຕສ຺ມິໍ ເຈຕິເຍ ປຸປ຺ຜປູຊນຕ຺ຖາຍ [ປຸປ຺ຜປູຊຕ຺ຖາຍ ອິຕິກຕ຺ຖຈິ] ຄນ຺ຕ຺ວາ ປຸປ຺ຜາສນສາລາຍ ອຸທກໍ ອປສ຺ສນ຺ຕີ ຘີຕຸ ຫຕ຺ເຖ ປຸປ຺ຜຈງ຺ໂຄຏກໍ ຐເປຕ຺ວາ ຆຏ ມາທາຍ ໂປກ຺ຂຣຓິໍ ອຄມາສິ, ຕໂຕ ສາ ທາຣິກາ ມາຕຣິ ອນາຄຕາຍເຍວ [ອນາຄເຕເຍວ ອິຕິສພ຺ພຕ຺ຖ] ອໂຘຕາສເນ ປຸປ຺ຜມຸຏ຺ຐິໍຄເຫຕ຺ວາ ມຓ຺ຑລໍ ກຕ຺ວາ ປູເຊຕ຺ວາ ເອວໍ ປຕ຺ຖນມກາສິ. ຕຖາ ຫິ.

໑.

ມຫາວີຣສ຺ສ ຘີຣສ຺ສ, ສຍມ຺ຠຸສ຺ສ ມເຫສິໂນ;

ຕິໂລກຄ຺ຄສ຺ສ ນາຖສ຺ສ, ຠຄວນ຺ຕສ຺ສ ສຕ຺ຖຸໂນ.

໒.

ຍ ມຫໍ ປູຊຍິໍ ປຸປ຺ຜໍ, ຕສ຺ສ ກມ຺ມສ຺ສ ວາຫສາ;

ຣູປີນໍ ປວຣາ ເຫສ຺ສໍ, ອາໂຣຫປຣິຓາຫວາ.

໓.

ມໍ ທິສ຺ວາ ປຸຣິສາ ສພ຺ເພ, ມຸຈ຺ຉນ຺ຕຸ ກາມມຸຈ຺ຉິຕາ;

ນິຈ຺ຉຣນ຺ຕຸ ສຣີຣາ ເມ, ຣໍສິມາລີວ ຣໍສິໂຍ.

໔.

ຫທຍງ຺ຄມາ ກຓ຺ຓສຸຂາ, ມຎ຺ຊຸຠາຓີ ສຸຠາ ມມ;

ກິນ຺ນຣານໍ ຍຖາ ວາຓີ, ເອວເມວ ປວຕ຺ຕຕູຕິ.

ອຖສ຺ສາ ມາຕາ ອາຄມ຺ມ ອໂຘຕາສເນ ປູຊິຕານິ ປຸປ຺ຜານິ ທິສ຺ວາ ກສ຺ມາ ຈຓ຺ຑາລີ ອໂຘຕາສເນ ຠຄວໂຕ ປຸປ຺ຜານິ ປູເຊສິ, ອຍຸຕ຺ຕໍ ຕຍາ ກຕນ຺ຕິ ອາຫ, ຕໍ ສຸຕ຺ວາ ສາ ມາຕຸຍາ ກຸຊ຺ຌິຕ຺ວາ ຕ຺ວໍ ຈຓ຺ຑາລີຕິ ອກ຺ໂກສິ, ສາ ເອຕ຺ຕກໍ ປຸຎ຺ຎາປຸຎ຺ຎໍ ກຕ຺ວາ ອປຣຠາເຄ ຕໂຕ ຈຸຕາ ຊມ຺ພຸທີເປ ອຸຕ຺ຕຣມຘຸຣາຍໍ ເອກສ຺ສ ຈຓ຺ຑາລຄນ຺ຘພ຺ພພ຺ຣາຫ຺ມຓສ຺ສ ຘີຕາ ຫຸຕ຺ວາ ນິພ຺ພຕ຺ຕິ, ອຸຕ຺ຕມຣູປຘຣາ ອໂຫສິ, ຕສ຺ສາ ສຣີຣໂຕ ເມຆມຸຂໂຕ ວິຊ຺ຊຸລ຺ລຕາວິຍ ຣໍສິໂຍ ນິຈ຺ຉຣນ຺ຕິ. ສມນ຺ຕາ ຈຕຸຫຕ຺ຖຏ຺ຐາເນ ສຣີຣປ຺ປຠາຍ ອນ຺ຘກາເຣ ວິຘມຕິ. ມຸຂໂຕ ອຸປ຺ປລຄນ຺ໂຘ ວາຍຕິ, ກາຍໂຕ ຈນ຺ທນຄນ຺ໂຘ, ຕສ຺ສາ ທ຺ວິນ຺ນໍ ຖນານ ມນ຺ຕເຣ ສຸວຓ຺ຓວຓ຺ຓໍ ເອກໍ ຕິລກໍ ອໂຫສິ, ເຕນ ພາລສຸຣິຍສ຺ສ ວິຍ ປຠາ ນິຈ຺ຉຣຕິ. ທິຏ຺ຐທິຏ຺ຐາ ເຍຠຸຍ຺ເຍນ ອຸມ຺ມຕ຺ຕາ ວິຍ ກາມມເທນ ວິສຎ຺ຎິໂນ ໂຫນ຺ຕິ, ອໂຫ ກຸສລາກຸສລານໍ ອານຸຠາໂວ. ຕຖາ ຫິ.

໕.

ເຍນ ສາ ໂກຘສາມາຕຸ, ຈຓ຺ຑາລີ ອິຕິ ຠາສິຕາ;

ເຕນ ສາ ອາສິ ຈຓ຺ຑາລີ, ເຊຄຸຈ຺ຉາ ຫີນຊາຕິກາ.

໖.

ສລ຺ລກ຺ເຂຕ຺ວານ ສມ຺ພຸທ຺ຘ, ຄຸຓໍ ປູເຊສິ ຍໍ ຕທາ;

ເຕນ ປຸຎ຺ຎານຸຠາເວນ, ສາ ຠິຣູປີ ມໂນຣມາ.

໗.

ເຍນ ເຍນ ປກາເຣນ, ປຸຎ຺ຎປາປານິ ໂຍ ກເຣ;

ຕສ຺ສ ຕສ຺ສານຸຣູເປນ, ໂມໂຣວ ລຠເຕ ຜລໍ.

໘.

ປາເປນ ຈ ຕິຣຈ຺ຉາເນ, ຊາຍນ຺ຕິ ກຸສເລນ ເຕ;

ວຓ຺ຓໂປກ຺ຂຣຕາ ໂຫຕິ, ໂມຣານໍ ກມ຺ມ ມີທິສນ຺ຕິ.

ຕໂຕ ຕສ຺ສາ ມາຕາປິຕໂຣ ສຸວຓ຺ຓຕິລກາຕິ ນາມ ມກໍສຸ. ຕສ຺ມິໍກິຣ ນຄເຣ ມນຸສ຺ສາ ຕສ຺ສາ ຣຸປທສ຺ສເນນຈ ສວເຓນຈ ສມ຺ປຕ຺ຕາປິ ຈຓ຺ຑາລຘີຕາ ອຍນ຺ຕິ ປຣິຠວຠເຍນ ອາວາຫໍ ນ ກໂຣນ຺ຕິ. ອຖ ຕສ຺ມິໍ ນຄເຣ ເຊຏ຺ຐຈຓ຺ຑາລພ຺ຣາຫ຺ມຓສ຺ສ ປຸຕ຺ໂຕ ເອຕມຕ຺ຖາຍ ຕສ຺ສາ ມາຕາປິຕຸນ຺ນໍ ສນ຺ຕິກໍ ວຕ຺ຖາຠຣຓຄນ຺ຘມາລາທໂຍ ເປເສສິ ສຸວຓ຺ຓຕິລກໍ ອມ຺ຫາກໍ ທທນ຺ຕູຕິ, ເຕ ຕໍ ປວຕ຺ຕິໍ ຕສ຺ສາ ອາໂຣເຈສຸໍ. ສາສ຺ສ ຊິຄຸຈ຺ຉນ຺ຕີ ປຣິຫາສ ມກາສິ. ຕໂຕ ພ຺ຣາຫ຺ມຓສ຺ສ ປຸຕ຺ໂຕ ລຊ຺ຊິໂຕ ຣຎ຺ໂຎ ສນ຺ຕິກໍ ຄນ຺ຕ຺ວາ ວີຓໍ ມຸຎ຺ເຈຕ຺ວາ ຄາຍມາໂນ ເອວມາຫ.

໙.

ລລນາ ນນານີ ຈລໂລຈນານີ,

ຕຣຸຓາ ຣຸຓານີ ຈລິຕາຘຣາຓີ;

ມນຸໂຊ ຫິ ໂຍ ເນຕ຺ຕປິຍໍ ກໂຣຕິ,

ສ ຕຸ ນີຈຊາຕິໍ ອປິ ໂນ ຊຫາຕິ.

ກິມິທນ຺ຕິ ຣຎ຺ຎາ ປຸຏ຺ໂຐ ອາຫ.

໑໐.

ສເມຕິ ກິໍ ເທວ ຉມາຍ ມຕ຺ຕິກາ,

ກທາຈິ ຈາມີກຣຊາຕິກາຍ;

ສິຄາລເຘນຸ ອປິ ນີຈຊາຕິກາ,

ສເມຕິ ກິໍສີຫວເຣນ ເທວາຕິ.

ເອວຎ຺ຈ ປນ ວຕ຺ວາ ເທວ ອິມສ຺ມິໍນຄເຣ ສຸວຓ຺ຓຕິລກາ ນາເມກາ ຈຓ຺ຑາລຘີຕາ ອຕ຺ຖິ, ສາ ສມານຊາຕິເກຫິ ເປສິຕປຓ຺ຓາກາຣໍ ນ ຄຓ຺ຫາຕິ, ກຸລວນ຺ເຕເຍວ ປຕ຺ເຖຕິ, ກທາ ນາມ ກາກີ ສຸວຓ຺ຓຫໍເສນ ສມາຄຈ຺ຉຕິ ເທວາຕິ. ຣາຊາ ຕໍ ສຸຕ຺ວາ ຕສ຺ສາ ປິຕຣໍ ປກ຺ໂກສາເປຕ຺ວາ ຕມຕ຺ຖໍ ວຕ຺ວາ ສຈ຺ຈໍ ຠເຓຕິ ປຸຈ຺ຉິ, ໂສປິ ສຈ຺ຈໍ ເທວ, ສາ ຊາຕິສມ຺ປນ຺ນເມວ ກາເມຕີຕິ ອາຫ. ຣາຊາ ເອວໍ ສຕິ ຠເຓ ປຎ຺ຈມຘຸຣນຄເຣ ອຸທ຺ທາຬພ຺ຣາຫ຺ມໂຓ ນາມ ອຕ຺ຖິ, ໂສ ຊາຕິສມ຺ປນ຺ໂນ ມາຕິໂຕຈ ປິຕິໂຕຈ ອນຸປກ຺ກຸຏ຺ໂຐ, ເຊຄຸຈ຺ຉາ ປຏິກ຺ກູລາ ເອຕາຕິ ມາຕຸຄາເມນ ສທ຺ຘິໍ ນ ສໍວສຕິ. ອຕ຺ຕໂນ ເຄຫໂຕ ຣາຊເຄຫໍ ຄຈ຺ຉນ຺ໂຕຈ ອາຄຈ຺ຉນ຺ໂຕ ຈ ໂສຬສຂີໂຣທກຆເຏຫິ ມຄ຺ເຄ ສິຎ຺ຈາເປສິ. ມາຕຸຄາເມ ທິສ຺ວາ ກາລກຓ຺ຓີ ມຍາ ທິຏ຺ຐາຕິ ຂີໂຣທເກນ ມຸຂໍ ໂຘວຕິ. ຕວ ຘີຕາ ສກ຺ໂກນ຺ຕີ ເຕນ ສທ຺ຘິໍ ສໍວສຕຸ, ເອຕມຕ຺ຖໍ ຕວ ຘີຕຣໍ ກເຖຫີຕິ ອາຫ, ໂສປິ ຕໍ ສຸຕ຺ວາ ເຄຫໍ ຄນ຺ຕ຺ວາ ຘີຕຣໍ ປກ຺ໂກສິຕ຺ວາ ຣຎ຺ຎາ ວຸຕ຺ຕນິຍາເມເນວ ຕສ຺ສາ ກເຖສິ. ຕາຍ ຕໍ ສຸຕ຺ວາ ສກ຺ໂກນ຺ຕີ ອຫໍ ອຸທ຺ທາຬພ຺ຣາຫ຺ມເຓນ ສທ຺ຘິໍ ວສິສ຺ສາມິ, ມາ ຕຸມ຺ເຫ ຈິນ຺ເຕຖ, ປປຎ຺ຈມ຺ປິ ມາ ກໂຣຖ, ປາໂຕວ ຄມິສ຺ສາມີຕິ ວຸຕ຺ເຕ ປິຕາ ປນສ຺ສາ ສາຘູຕິ ສຫສ຺ສຄ຺ຆນກຈິຕ຺ຕກມ຺ພລກຎ຺ຈຸເກນ ຘີຕຸ ສຣີຣໍ ປາຣຸປາເປຕ຺ວາ ວີຓາທິຕຸຣິຍຠຓ຺ຑານິ ຄາຫາເປຕ຺ວາ ຘີຕຸຍາ ສທ຺ຘິໍ ອທ຺ຘານມຄ຺ຄໍ ປຏິປຊ຺ຊິ. ຄຈ຺ຉນ຺ໂຕ ອນ຺ຕຣາມຄ຺ເຄ ອຎ຺ຎຕຣສ຺ມິໍ ນຄເຣ ຣຎ຺ໂຎ ຄນ຺ຘພ຺ພໍ ກໂຣນ຺ໂຕ ຘີຕຣໍ ປິຏ຺ຐິປສ຺ເສ ນິສີທາເປຕ຺ວາ ຄນ຺ຘພ຺ພມກາສິ. ອຖສ຺ສ ປິຏ຺ຐິປສ຺ສນິສິນ຺ນາ ສຸວຓ຺ຓຕິລກາ ນຍນໂກຏິຍາ ທິຏ຺ຐິໍ ປາເປນ຺ຕີ ສຣເສນ ຕໍ ໂອໂລເກຕ຺ວາ ປາຣຸຕກຎ຺ຈຸກໍ ກິຎ຺ຈິ ອປເນຕ຺ວາ ສຣີຣປ຺ປຠໍ ປຎ຺ຎາເປສິ, ຣາຊາ ປນສ຺ສາ ສຣີຣປ຺ປຠໍຈ ຣູປສມ຺ປທໍຈ ທິສ຺ວາ ກາມາຕຸໂຣ ວິຄຕສຎ຺ໂຎ ສມ຺ມູຬ຺ໂຫ ຫຸຕ຺ວາ ມຸຫຸຕ຺ເຕນ ປຏິລທ຺ຘສ຺ສາໂສ ຕສ຺ສາ ສສ຺ສາມິກາສ຺ສາມິກຠາວໍ ປຸຈ຺ຉິຕ຺ວາ ຈຓ຺ຑາລຘີຕາຕິ ສຸຕ຺ວາ ປຣິຠວຠເຍນ ຕໍ ອາເນຕຸ ມສກ຺ໂກນ຺ໂຕ ເອວຣູປໍ ວຓ຺ຓໂປກ຺ຂຣສມ຺ປນ຺ນໍ ອິຕ຺ຖິຣຕນໍ ອລຠນ຺ຕສ຺ສ ເມ ໂກ ອຕ຺ໂຖ ຊີວິເຕນາຕິ ໂສຈນ຺ໂຕ ປຣິເທວນ຺ໂຕ ກາມມຸຈ຺ຉິໂຕ ກຕ຺ຕພ຺ພາ ກຕ຺ຕພ຺ພໍ ອຊານນ຺ໂຕ ອສິໍ ຄເຫຕ຺ວາ ອຕ຺ຕໂນ ສີສໍ ສຍເມວ ຉິນ຺ທິຕ຺ວາ ກາລ ມກາສິ. ເອວເມວ ອນ຺ຕຣາມຄ຺ເຄ ປຎ຺ຈຣາຊາໂນ ຕສ຺ສາ ຣູປສມ຺ປຕ຺ຕິມທມຕ຺ຕາ ອສິນາ ຉິນ຺ນສີສາ ຊີວິຕກ຺ຂຍໍ ປາປຸຓິໍສຸ. ຕຖາ ຫິ ສຕ຺ຕາ ຫິຣຎ຺ຎສຸວຓ຺ຓທາສິທາສ ປຸຕ຺ຕທາຣາທີສຸ [ປຸຕ຺ຕທາຣາທີຫິ ອິຕິສພ຺ພຕ຺ຖ] ປິຍໍ ນິສ຺ສາຍ ກາເມນ ມຸຈ຺ຉິຕາ ອນຍພ຺ຍສນໍ ປາປຸຓນ຺ຕີຕິ. ວຸຕ຺ຕຎ຺ເຫຕໍ ຠຄວຕາ.

໑໑.

ປິຍໂຕ ຊາຍເຕ ໂສໂກ,

ປິຍໂຕ ຊາຍເຕ ຠຍໍ;

ປິຍໂຕ ວິປ຺ປມຸຕ຺ຕສ຺ສ,

ນຕ຺ຖິ ໂສໂກ ກຸໂຕ ຠຍໍ.

໑໒.

ເປມໂຕ ຊາຍເຕ ໂສໂກ,

ເປມໂຕ ຊາຍເຕ ຠຍໍ;

ເປມໂຕ ວິປ຺ປມຸຕ຺ຕສ຺ສ,

ນຕ຺ຖິ ໂສໂກ ກຸໂຕ ຠຍໍ.

໑໓.

ຣຕິຍາ ຊາຍເຕ ໂສໂກ,

ຣຕິຍາ ຊາຍເຕ ຠຍໍ;

ຣຕິຍາ ວິປ຺ປມຸຕ຺ຕສ຺ສ,

ນຕ຺ຖິ ໂສໂກ ກຸໂຕ ຠຍໍ.

໑໔.

ກາມໂຕ ຊາຍເຕ ໂສໂກ,

ກາມໂຕ ຊາຍເຕ ຠຍໍ;

ກາມໂຕ ວິປ຺ປມຸຕ຺ຕສ຺ສ,

ນຕ຺ຖິ ໂສໂກ ກຸໂຕ ຠຍໍ.

໑໕.

ຕຓ຺ຫາຍ ຊາຍເຕ ໂສໂກ,

ຕຓ຺ຫາຍ ຊາຍເຕ ຠຍໍ;

ຕຓ຺ຫາຍ ວິປ຺ປມຸຕ຺ຕສ຺ສ,

ນຕ຺ຖິ ໂສໂກ ກຸໂຕ ຠຍໍ.

ຕໂຕ ໂສ ອນຸກ຺ກເມນ ປຎ຺ຈມຘຸຣນຄຣໍ ຄນ຺ຕ຺ວາ ອຕ຺ຕໂນ ອາຄຕຠາວໍ ຣຎ຺ຎາ ກຖາເປຕ຺ວາ ເຕນ ອນຸຎ຺ຎາໂຕ ຄນ຺ຕ຺ວາ ຣາຊານໍ ອທ຺ທສ. ຕທາ ອຸທ຺ທາຬພ຺ຣາຫ຺ມໂຓ ຣຎ຺ໂຎ ອວິທູເຣ ກມ຺ພລຠທ຺ທປີເຐ ນິສິນ຺ໂນ ໂຫຕິ, ຄນ຺ຘພ຺ພພ຺ຣາຫ຺ມໂຓປິ ຘີຕຸຍາ ສທ຺ຘິໍ ຄນ຺ຘພ຺ພໍ ກຸຣຸມາໂນ ນິສີທິ. ຕສ຺ມິໍຂເຓ ປິຕຸ ປິຏ຺ຐິປສ຺ເສ ນິສິນ຺ນາ ສຸວຓ຺ຓຕິລກາ ອຸທ຺ທາຬພ຺ຣາຫ຺ມໂຓ ກຕໂມຕິ ປຸຈ຺ຉິຕ຺ວາ ເອຕສ຺ມິໍ ຠທ຺ທປີເຐ ນິສິນ຺ໂນໍ ເອໂສຕິ ສຸຕ຺ວາ ນິລາມລໂລຈເນຫິ ຕໍ ໂອໂລກນ຺ຕິ ທສນຣໍສິນາ ສມ຺ຠິນ຺ນສຸຣຕ຺ຕາຘເຣນ ມນ຺ທຫສິຕໍ ກໂຣນ຺ຕີ ຕໍ ໂອໂລເກຕ຺ວາ ປາຣຸຕກຎ຺ຈຸກໍ ອປເນຕ຺ວາ ສຣີຣປ຺ປຠໍ ວິສ຺ສຊ຺ເຊສິ. ຕໍ ທິສ຺ວາ ພ຺ຣາຫ຺ມໂຓ ອຸມ຺ມຕ຺ໂຕ ໂສເກນ ປຣິທຑ຺ຒຄຕ຺ໂຕ ອຸຓ຺ຫວາເຕນ ປູຣິຕມຸຂນາໂສ ອສ຺ສຸນາ ກິລິນ຺ນເນຕ຺ໂຕ ວິສຎ຺ຎີ ອໂຫສິ. ຕໂຕ ໂສ ມຸຫຸຕ຺ເຕນ ລທ຺ຘສ຺ສາໂສ ໂຣຄີວິຍ ຣຎ຺ໂຎ ສກາສາ ອປສຣນ຺ໂຕ ອຕ຺ຕໂນ ເຄຫໍ ຄນ຺ຕ຺ວາ ສຸຫເທ ປກ຺ໂກສິຕ຺ວາ ເຕສໍ ເອວມາຫ. ຠວນ຺ເຕຕ຺ຖ.

໑໖.

ໂຍ ອາປເທ ສມຸປ຺ປນ຺ເນ,

ອຸປຕິຏ຺ຐຕິ ສນ຺ຕິເກ;

ສຸຂທຸກ຺ເຂ ສໂມ ໂຫຕິ,

ໂສ ມິຕ຺ໂຕ ໂສຈ ຎາຕໂກ.

໑໗.

ໂຍ ຄຸຓໍ ຠາສເຕ ຍສ຺ສ, ອຄຸຓຎ຺ຈ ນິຄູຫຕິ;

ປຏິເສເຘຕ຺ຍ [ປຏິເສເຘຕິກຕ຺ຕພ຺ພາ ອິຕິສພ຺ພຕ຺ຖ] ກຕ຺ຕພ຺ພາ, ໂສ ມິຕ຺ໂຕ ໂສຈ ຎາຕໂກ.

໑໘.

ສຸວຓ຺ຓຕິລການາມ, ລລນາ ກາມລາລຍາ;

ນີລກ຺ຂິຈຓ຺ຑກຓ຺ເຑຫິ, ວິຂຓ຺ເຑສິ ມໂນ ມມ.

໑໙.

ຕສ຺ສາ ມຸຂມ຺ພຸເຊ ສຕ຺ຕາ, ມມ ເນຕ຺ຕມຘຸພ຺ພຕາ,

ອປ຺ປມ຺ປິນ ສຣນ຺ຕາມໍ, ຕຕ຺ເຖວາ ຠິຣມນ຺ຕິ ເຕ.

໒໐.

ສເຫວ ເຕຫິ ເມ ຈິຕ຺ຕໍ, ຄຕໍ ອຸລ຺ລໍຆິຍຸທ຺ຘໂຕ;

ລຊ຺ຊາຄມ຺ຠີຣປຣິຂໍ, ຘິຕິປາກາຣມຸຄ຺ຄຕໍ.

໒໑.

ສມ຺ມຸຍ຺ຫາມິ ປມຸຍ຺ຫາມິ, ສພ຺ພາ ມຸຍ຺ຫນ຺ຕິ ເມ ທິສາ;

ຕສ຺ສ ເມ ສຣຓໍ ໂຫຖ, ກໂຣຖ ມມ ສງ຺ຄຫນ຺ຕິ.

ຕໍ ສຸຕ຺ວາ ເຕ ເອວມາຫໍສຸ.

໒໒.

ຍໍ ຕ຺ວມາຈຣິຍ ປຕ຺ເຖສິ, ຈຓ຺ຑາລີ ສາ ອສງ຺ຄມາ;

ກິນ຺ນຸ ມີຬ຺ເຫນ ສໍໂຍໂຄ, ຈນ຺ທນສ຺ສ ກທາ ສິຍາ.

໒໓.

ອຄມ຺ມຄມນາ ຍາຕິ, ນຣານໍ ທູຣໂຕ ສິຣີ;

ກິຕ຺ຕິຈາຍຸ ພລໍ ພຸທ຺ຘິ, ອຍສໍຈ ສ ຄຈ຺ຉຕີຕິ.

ອຖ ເຕສໍ ພ຺ຣຫ຺ມໂຓ ອາຫ.

໒໔.

ນ ປຣິຈ຺ຈຊຕິ ໂລໂກຍໍ, ອເມຊ຺ເຌ ມຓິມຸຕ຺ຕມໍ;

ຖີຣຕນໍ ຍຸວາຓີ ຈ, ທຸກ຺ກຸລາ ອປິ ຄາຫິຍາຕິ.

ເອວຎ຺ຈ ປນ ວຕ຺ວາ ຕສ຺ສາ ສສ຺ສາມິກາສ຺ສາມິກຠາວໍ ຎຕ຺ວາ ອາເນຖາຕິ ອາຫ, ເຕ ຕຖາ ອກໍສຸ. ຕໂຕ ພ຺ຣາຫ຺ມໂຓ ຕາຍ ເຄຫໍ ອາຄຕກາລໂຕ ປຏ຺ຐາຍ ຈຕ຺ຕາໂຣ ມາເສ ຣຎ຺ໂຎ ອຸປຏ຺ຐານໍ ເນວ ອຄມາສິ. ຕສ຺ສ ປນ ພ຺ຣຫ຺ມຓສ຺ສ ສນ຺ຕິເກ ປຎ຺ຈສຕຣາຊກຸມາຣາ ນານາວິຘານິ ສິປ຺ປານິ ອຸຄ຺ຄຓ຺ຫນ຺ຕິ. ເຕ ຕໍ ກາຣຓໍ ຎຕ຺ວາ ສຸວຓ຺ຓຕິລກາຍ ວິຊ຺ຊມານາຍ ອມ຺ຫາກໍ ສິປ຺ປຸຄ຺ຄຫຓສ຺ສ ອນ຺ຕຣາໂຍ ຠວິສ຺ສຕິ, ເຍນ ເກນຈິ ອຸປາເຍນ ເອຕໍ ມາເຣຕຸໍ ວຏ຺ຏຕີຕິ, ຈິນ຺ເຕຕ຺ວາ ເຕ ຫຕ຺ຖາ ຈຣິຍໍ ປກ຺ໂກສິຕ຺ວາ ລຎ຺ຊໍ ທຕ຺ວາ ເອວມາຫໍສຸ, ຫຕ຺ຖິໍ ສຸຣາຍ ມຕ຺ຕໍ ກຕ຺ວາ ສຸວຓ຺ຓຕິລກໍ ມາເຣຫີຕິ. ຕໂຕ ເຕ ສພ຺ເພ ຣາຊງ຺ຄເຓ ສນ຺ນິປຕິຕ຺ວາ ທູຕໍ ປາເຫສຸໍ, ອາຈຣິຍໍ ທຏ຺ຐຸກາມມ຺ຫາຕິ. ຕໂຕ ພ຺ຣາຫ຺ມເຓນ ອາຄນ຺ຕ຺ວາ ນິສິນ຺ເນນ ປຏິສນ຺ຖາຣໍ ກຕ຺ວາ ອາຈຣິຍ ອາຈຣິຍານິໍ ປສ຺ສິຕຸກາມມ຺ຫາຕິ ອາຫໍສຸ. ອຖ ໂສ ສຸວຓ຺ຓຕິລກໍ ຄເຫຕ຺ວາ ອາຄຈ຺ຉຖາຕິ ມນຸສ຺ເສ ເປເສສິ. ເຕ ຕຖາ ກຣິໍສຸ, ອຖ ຕສ຺ສາ ວີຖິມຊ຺ຌໍ ສມ຺ປຕ຺ຕກາເລ ຫຕ຺ຖິໍ ວິສ຺ສຊ຺ຊາເປສຸໍ. ໂສ ໂສຓ຺ຑາຍ ຠູມິຍໍ ປຫຣນ຺ໂຕ [ປຫຣນ຺ໂຕອຸປຘາວິຕ຺ວາ ອິຕິກຕ຺ຖຈິ] ຄຈ຺ຉນ຺ໂຕ ອຸປຘາວິຕ຺ວາ ໂສຓ຺ເຑນ ຕໍ ອຸກ຺ຂິປິຕ຺ວາ ກຸມ຺ເຠ ນິສີທາເປສິ. ຕໂຕ ຣາຊາໂນ ຕຖາ ຕໍ ມາຣາເປຕຸ ມສກ຺ໂກນ຺ຕາ ປຸນ ທິວເສ ມນຸສ຺ເສ ປໂຍເຊຕ຺ວາ ຣຕ຺ຕິຍໍ ມາຣາເປສຸໍ. ພ຺ຣາຫ຺ມໂຓປິ ເອວຣູປໍ ອິຕ຺ຖິໍ ອລສິຕ຺ວາ ຊີວນໂຕ ມຕເມວ [ມຕໍເມເສຍ຺ໂຍ ອິຕິກຕ຺ຖຈິ] ເສຍ຺ໂຍຕິ ໂສຈນ຺ໂຕ ປຣິເທວນ຺ໂຕ ຣາຊງ຺ຄເຓ ທາຣຸຈິຕກໍ ກາຣາເປຕ຺ວາ ອຄ຺ຄິໍປວິສິຕ຺ວາ ມໂຕຕິ. ເອວໍ ມາຕຸຄາມວສງ຺ຄຕາ ມຫນ຺ຕໍ ອນຍພ຺ຍສນຎ຺ຈ ມຣຓຎ຺ຈ ປາປຸຓນ຺ຕີຕິ. ວຸຕ຺ຕຎ຺ເຫຕໍ ຠຄວຕາ.

໒໕.

ມາຍາເວສາ [ມາຍາເຈສາ ອິຕິກຕ຺ຖຈິ] ມຣີຈີວ,

ໂສໂກ ໂຣໂຄ ຈຸປທ຺ທໂວ;

ຂຣາວ ພນ຺ຘນາ ເຈສາ,

ມຈ຺ຈຸປາໂສ ຄຸຫາສໂຍ;

ຕາສຸ ໂຍ ວິສ຺ສເສ ໂປໂສ,

ໂສ ນເຣສຸ ນຣາຘໂມຕິ.

໒໖.

ອໂຍນິໂສ ສາ ປຸຣິມາຍ ຊາຕິຍາ,

ປຸຎ຺ຎໍ ກຣິຕ຺ວາ ອລຠີທິສໍ ຄຕິໍ;

ຘີສມ຺ປຍຸຕ຺ຕໍ [ຘິຕິສມ຺ປຍຸຕ຺ຕໍ ອິຕິກຕ຺ຖຈິ] ກຸສລໍ ກໂຣນ຺ຕາ,

ນິພ຺ພາຓເມວາຠິມຸຂໍ ກໂຣຖາຕິ.

ສຸວຓ຺ຓຕິລກາຍ ວຕ຺ຖຸໍ ທຸຕິຍໍ.

໓໓. ກປຓາຍ ວຕ຺ຖຸມ຺ຫິ ອຍມານຸປຸພ຺ພີກຖາ

ຠຄວຕິ ປຣິນິພ຺ພຸເຕ ຊມ຺ພຸທີເປ ຕຕ຺ຖ ຕຕ຺ຖ ຠິກ຺ຂຸຠິກ຺ຂຸຓິໂຍ ຈ ອຸປາສກອຸປາສິກາໂຍ ຈ ຊຍມຫາໂພຘິໍ ວນ຺ທິສ຺ສາມີຕິ ເຍຠຸຍ຺ເຍນ ຄນ຺ຕ຺ວາ ວນ຺ທນ຺ຕິ. ອຖາ ປຣຠາເຄ ພຫູ ຠິກ຺ຂູ ສງ຺ຄມ຺ມ ມຫາໂພຘິໍ ວນ຺ທນຕ຺ຖາຍ ຄຈ຺ຉນ຺ຕາ ອຎ຺ຎຕຣສ຺ມິໍ ຄາມເກ ຠິກ຺ຂາຍ ຈຣິຕ຺ວາ ອາສນສາລໍ ຄນ຺ຕ຺ວາ ກຕຠຕ຺ຕກິຈ຺ຈາ ໂຖກໍ ວິສ຺ສມິໍສຸ, ຕທາ ຕຕ຺ຖ ເອກາ ກປຓາ ທຸຄ຺ຄຕິຕ຺ຖີ ຕຖາ ນິສິນ຺ນຠິກ຺ຂູ ທິສ຺ວາ ອຸປສງ຺ກມິຕ຺ວາ ປຎ຺ຈປຕິຏ຺ຐິເຕນ ວນ຺ທິຕ຺ວາ ເອກມນ຺ເຕ ຐິຕາ ອຍ຺ຍາ ກຸຫິໍ ຄຈ຺ຉນ຺ຕີຕິ ປຸຈ຺ຉິ. ຠິກ຺ຂູ ຕໍ ສຸຕ຺ວາ ຊຍມຫາໂພຘິສ຺ສ ອານຸຠາວຎ຺ຈ ຕໍ ວນ຺ທນຕ຺ຖາຍ ອຕ຺ຕານໍ ຄມນຎ຺ຈ ກເຖນ຺ຕາ ເອວມາຫໍສຸ.

໑.

ຍຕ຺ຖາສີໂນ ຊິໂນ ເຊສິ, ສເສນໍ ມກຣທ຺ຘຊໍ;

ຫນ຺ຕ຺ວາ ກິເລສເສນຎ຺ຈ, ພຸທ຺ໂຘ ອາສິ ນິຣຸຕ຺ຕໂຣ.

໒.

ຍໍ ປູເຊສິ ມຫາວີໂຣ, ຐິໂຕ ປທ ມໂກປຍໍ;

ສຕ຺ຕຣຕ຺ຕິນ຺ທິວໍ ເນຕ຺ຕ, ນີລນີຣຊຣໍສິນາ.

໓.

ສຸຣາສຸຣນຣາທີນໍ, ເນຕ຺ຕາລິ ປາຬິປາຕນາ;

ເມຈກາກາຣປຕ຺ເຕຫິ, ສິຂຓ຺ຑີວິຍ ຠາຕິ ໂຍ.

໔.

ສຸຣປາທໂປວ ສຕ຺ຕານໍ, ຍໍ ຕິຏ຺ຐຕິ ມຫີຕເລ;

ອິຫ ໂລເກ ປຣຕ຺ເຕ ຈ, ທທນ຺ໂຕ ອິຈ຺ຉິຕິຈ຺ຉິຕໍ.

໕.

ຍສ຺ສ ປຸຣາຓປຓ຺ຓມ຺ປິ, ປຕິຕໍ ໂຍ ນໂຣ ອິຘ;

ປູເຊຕິ ຕສ຺ສ ໂສ ເທຕິ, ຠວໂຠຄໍ ມຫີຣຸໂຫ.

໖.

ຄນ຺ຘມາເລຫິ ສລິເລຫິ, ຍມຸປາສຕິ ສທາ ນໂຣ;

ອຊ຺ຌຕ຺ຕຎ຺ຈ ພຫິທ຺ຘາ ຈ, ທຸຣິຕໍ ໂສ ນິຫຎ຺ຎຕິ.

໗.

ໂຍ ເທຕິ ອິຫໂລກຕ຺ຖໍ,

ໂຍ ເທຕິ ປາຣໂລກິກໍ,

ສມ຺ປທໍ ຊຍໂພຘິໍຕໍ,

ໂຠຕິ ຄຈ຺ຉາມ ວນ຺ທິຕຸໍ.

ຕໍ ສຸຕ຺ວາ ອຸທຄ຺ຄາ ໂສມນສ຺ສຊາຕາ ຠິກ຺ຂູນໍ ເອວມາຫ. ອຫໍ ຠນ຺ເຕ ປຣກຸເລ ຠຕິຍາ ກມ຺ມໍ ກໂຣນ຺ຕີ ທຸກ຺ເຂນ ກສິເຣນ ຊີວິກໍ ກປ຺ເປມິ. ສ຺ວາຕນາຍ ເມ ຕຓ຺ຑຸລນາລິປິ [ຠຓ຺ຑຸລນາມ຺ປ ອິຕິສພ຺ພຕ຺ຖ] ນຕ຺ຖິ, ປເຄວ ອຎ຺ຎໍ ຘນໍ, ອິມໍ ວິນາ ອຎ຺ຎໍ ສາຏກມ຺ປິ ນຕ຺ຖິ, ກສ຺ມາ ປຸພ຺ເພ ອກຕປຸຎ຺ຎຕ຺ຕາ, ຕສ຺ມາ ອິມໍ ຠນ຺ເຕ ສາຏກໍ ມມານຸຄ຺ຄຫາຍ ໂພຘິມ຺ຫິ ຘຊໍ ພນ຺ຘຖາຕິ ຍາຈິຕ຺ວາ ສາຏກໍ ໂຘວິຕ຺ວາ ເຕສໍ ອທາສິ. ຠິກ຺ຂູປິ ຕສ຺ສານຸຄ຺ຄຫາຍ ຕໍ ຄເຫຕ຺ວາ ອຄມໍສຸ. ສາ ສາຏກໍ ທຕ຺ວາ ປີຕິປາໂມຊ຺ຊມານສາ ເຄຫໍ ຄນ຺ຕ຺ວາ ຕທເຫວ ຣຕ຺ຕິຍາ ມຊ຺ຌິມຍາເມ ສຕ຺ຖກວາເຕນ ອຸປຫຕາ ກາລໍ ກຕ຺ວາ ເຕສໍ ຠິກ຺ຂູນໍ ຄມນມຄ຺ເຄ ເອກສ຺ມິໍ ຣມຓີເຍ ວນສຓ຺ເຑ ຠຸມ຺ມເທວຕາ ຫຸຕ຺ວາ ນິພ຺ພຕ຺ຕີ, ອຖສ຺ສາ ປຸຎ຺ຎານຸຠາເວນ ຕິໂຍຊນິເກ ຐາເນ ທິພ຺ພກປ຺ປຣຸກ຺ຂາ ປາຕຸຣຫໍສຸ, ຕຕ຺ຕ ຕຕ຺ຕ ນານາວິຣາຄຘຊປຕາກາ ໂອລມ຺ພນ຺ຕິ. ເທວປຸຕ຺ຕາ ຈ ເທວຘີຕໂຣ ຈ ສພ຺ພາຠຣຓວິຠູສິຕາ ຕເຖວ ຘຊປຕາກາທໂຍ ຄເຫຕ຺ວາ ກີຬນ຺ຕິ. ນຈ຺ຈຄີຕາທິເນການິ ອຈ຺ຉຣິຍານິ ປໂຍເຊນ຺ຕິ. ອຖ ທຸຕິຍທິວເສ ເຕປິ ຠິກ຺ຂູ ໂພຘິມຓ຺ຑລໍ ຄຈ຺ຉນ຺ຕາ ສາຍຓ຺ເຫ ຕໍ ຐານໍ ປຕ຺ວາ ອຊ຺ຊ ອິມສ຺ມິໍ ວນສຓ຺ເຑ ວສິຕ຺ວາ ຄມິສ຺ສາມາຕິ ຕຕ຺ຖ ວາສໍ ອຸປຄມິໍສຸ, ຕໂຕ ເຕ ຣຕ຺ຕິຠາເຄ ນານາວຓ຺ຓຘເຊ ຈ ເທວຕາຫິ ປໂຍຊິຍມານາ ຄີຕວາທິຕາທໂຍ ຈ ຕິໂຍຊນຏ຺ຐາເນ ກປ຺ປຣຸກ຺ຂານິ ຈ ອິທໍ ສພ຺ພໍ ເທວິສ຺ສຣິຍໍ ຕສ຺ສານຸຠາເວນ ນິພ຺ພຕ຺ຕຠາວໍ ທິສ຺ວາ ວິມ຺ຫິຕມານສາ ເທວຘີຕຣໍ ອາມນ຺ເຕຕ຺ວາ ຕ຺ວໍ ເກນ ກມ຺ເມນ ອິຘ ນິພ຺ພຕ຺ຕາຕິ ປຸຈ຺ຉິໍສຸ. ສາ ຠິກ຺ຂູ ວນ຺ທິຕ຺ວາ ອຎ຺ຊລິໍ ປຄ຺ຄຍ຺ຫ ຐິຕາ ຠນ຺ເຕ ມໍ ນ ສຎ຺ຊານິຕ຺ຖາຕິ ອາຫ. ຠິກ຺ຂູຫິ ນ ມຍໍ ສຎ຺ຊານາມ ຠຄິນີຕິ ວຸຕ຺ເຕ ສາ ອຕ຺ຕໂນ ສຠາວໍ ກເຖນ຺ຕີ ເອວມາຫ.

໘.

ຫີຍ຺ໂຍ ອາສນສາລາຍ, ນິສີທິຕ຺ຖ ສມາຄຕາ;

ຕຸມ຺ຫກໍ ສນ຺ຕິກໍ ຄມ຺ມ, ຍາ ວຣາກີຠິວາທຍິ.

໙.

ຍາ ໂພຘິໍ ປູຊນຕ຺ຖາຍ, ວຕ຺ຖກໍ ປຏິປາທຍິ;

ສາຫໍ ຫີຍ຺ໂຍ ຈຸຕາ ອາສິໍ, ຣຕ຺ຕິຍໍ ພ຺ຍາຘິປີຬິຕາ.

໑໐.

ນານາສມ຺ປຕ຺ຕິສໍຍຸຕ຺ຕາ, ນານາຠູສນຠູສິຕາ;

ວິມາເນ ຣຕນາ ກິຓ຺ເຓ, ຊາຕາຫໍ ເອຕ຺ຖ ການເນ.

໑໑.

ຫີຍ຺ໂຍ ປສ຺ສິຕ຺ຖ ເມ ຄຕ຺ຕໍ, ຣໂຊຊລ຺ເລຫິ ສໍກຸລໍ;

ອຊ຺ຊ ປສ຺ສຖ ເມ ຄຕ຺ຕໍ, ວຓ຺ຓວນ຺ຕໍ ປຠສ຺ສຣໍ.

໑໒.

ຫີຍ຺ໂຍ ປສ຺ສິຕ຺ຖ ເມ ຠນ຺ເຕ, ນິວຕ຺ຖໍ ມລິນມ຺ພຣໍ;

ອຊ຺ຊ ປສ຺ສຖ ເມ ຠນ຺ເຕ, ທິພ຺ພມມ຺ພຣມຸຕ຺ຕມໍ.

໑໓.

ວິກິຓ຺ຓຜລິຕຄ຺ເຄຫິ, ເກເສຫິ ວິຣລາ ກຸລໍ;

ອູກາຄູຖປຏິກ຺ກູລໍ, ຫີຍ຺ໂຍ ອາສິສິຣໍ ມມ.

໑໔.

ອຊ຺ຊ ຕໍ ປຣິວຕ຺ຕິຕ຺ວາ, ມມ ປຸຎ຺ຎານຸຠາວໂຕ;

ສຸນີລມຸທຸຘມ຺ມິລ຺ລໍ, ກຸສຸມາ ຠຣຓຠູສິຕໍ.

໑໕.

ປຸຣາ ເມ ສກສີເສນ, ວຫິຕໍ ທາຣູ ທກາທິກໍ;

ປຸຎ຺ເຎນາຫໍ ອຊ຺ຊ ມາລາ, ຠາຣໍ ສີເສ ສມຸພ຺ພເຫ.

໑໖.

ຘຊຕ຺ຖາຍ ມຍາ ຫີຍ຺ໂຍ, ປທິນ຺ນໍ ຖູລສາຏກໍ;

ອຊ຺ຊ ນິພ຺ພຕ຺ຕິ ເມ ໂຠນ຺ໂຕ, ມຫນ຺ຕໍ ທິພ຺ພສມ຺ປທໍ.

໑໗.

ຊານມາເນນ ກຕ຺ຕພ຺ພໍ, ທານາທີສຸ ມຫປ຺ຜລໍ;

ເທວໂລເກ ມນຸສ຺ເສສຸ, ສຸຂທໍ ທານ ມຸຕ຺ຕມນ຺ຕິ.

ຕໍ ສຸຕ຺ວາ ສພ຺ເພ ຠິກ຺ຂູ ອຈ຺ຉຣິຍພ຺ຠຸຕຈິຕ຺ຕາ ອເຫສຸໍ. ສາ ເທວຕາ ຕສ຺ສາ ຣຕ຺ຕິຍາ ອຈ຺ຈເຍນ ຠິກ຺ຂູ ນິມນ຺ເຕຕ຺ວາ ທິພ຺ເພຫິ ຂຊ຺ຊໂຠຊ຺ເຊຫິ ສຫຕ຺ຖາ ສນ຺ຕປ຺ເປຕ຺ວາ ເຕຫິ ສທ຺ຘິໍ ອາຄຈ຺ຉນ຺ຕີ ອນ຺ຕຣາມຄ຺ເຄ ທານໍ ທທມານາ ມຫາໂພຘິໍ ຄນ຺ຕ຺ວາ ສພ຺ເພຫິ ຘຊປຕາກາ ທີຫິ ຈ ນານາວິຘວຓ຺ຓຄນ຺ຘສມ຺ປນ຺ນປຸປ຺ເຜຫິ ຈ ທີປຘູເປຫິ ຈ ໂພຘິໍ ປູເຊຕ຺ວາ ຠິກ຺ຂູນໍ ຈີວຣຕ຺ຖາຍ ທິພ຺ພວຕ຺ຖານິ ທຕ຺ວາ ອາຄມ຺ມ ຕສ຺ມິໍເຍວ ວນສຓ຺ເຑ ວສນ຺ຕີ ນານາວິຘານິ ປຸຎ຺ຎານິ ກຕ຺ວາ ຕາວຕິໍສຠວເນ ນິພ຺ພຕ຺ຕິ. ຠິກ຺ຂູປິ ຕໍ ອຈ຺ຉຣິຍໍ ຕຕ຺ຖ ຕຕ຺ຖ ປກາເສນ຺ຕາ ພຫູຊເນ ປຸຎ຺ຎກມ຺ເມ ນິໂຍເຊສຸໍຕິ.

໑໘.

ເອວໍ ວິຘາປິ ກປຓາ ຊິນສາສນມ຺ຫິ,

ກຕ຺ວາ ປສາທ ມຖ ຖູລກຸເຈລເກນ;

ປູເຊຕ຺ວ ທິພ຺ພວິຠວໍ ອລຠີຕິ ຎຕ຺ວາ,

ປູຊາປຣາ ຠວຖ ວຕ຺ຖຸສຸ ຕີສຸ ສມ຺ມາຕິ.

ກປຓາຍ ວຕ຺ຖຸໍ ຕຕິຍໍ.

໓໔. ອິນ຺ທຄຸຕ຺ຕຕ຺ເຖຣສ຺ສ ວຕ຺ຖຸມ຺ຫິ ອຍມານຸປຸພ຺ພີກຖາ

ອມ຺ຫາກໍ ຠຄວໂຕ ປຣິນິພ຺ພາຓໂຕ ໂອຣຠາເຄ ຊມ຺ພຸທີເປ ກິຣ ປາຏລິປຸຕ຺ຕໍ ນາມ ນຄຣໍ ອໂຫສິ. ຕຕ຺ຖ ຘມ຺ມາໂສໂກ ນາມ ມຫິທ຺ຘິໂກ ມຫານຸຠາໂວ ອາຓາຈກ຺ກວຕ຺ຕິ ຣາຊາ ຣຊ຺ຊໍ ກາເຣຕິ. ອຸທ຺ຘໍ ອາກາສໂຕ ເຫຏ຺ຐາ ປຖວິຍາ ໂຍຊນປ຺ປມາເຓ ສກລຊມ຺ພູທີເປ ຕສ຺ສ ອາຓາ ປວຕ຺ຕຕິ, ຕທາ ສກລຊມ຺ພຸທີປວາສິໂນ ຈ ຈຕຸຣາສີຕິ ນຄຣສຫສ຺ເສ ຣາຊາໂນ ຈ ອຕ຺ຕໂນ ອຕ຺ຕໂນ ພລວາຫເນ ຄເຫຕ຺ວາ ອາຄມ຺ມ ຘມ຺ມາໂສກມຫາຣຎ຺ໂຎ ອຸປຏ຺ຐານໍ ກໂຣນ຺ຕິ. ຕສ຺ມິໍ ສມເຍ ເທວປຸຕ຺ຕນຄເຣ ເທວປຸຕ຺ໂຕ ນາມ ມຫາຣາຊາ ອຕ຺ຕໂນ ພລວາຫນໍ ຄເຫຕ຺ວາ ຣຎ຺ໂຎ ອຸປຏ຺ຐານໍ ອຄມາສິ. ຘມ຺ມາໂສໂກ ເທວປຸຕ຺ຕມຫາຣາຊານໍ ທິສ຺ວາ ມຘຸຣປຏິສນ຺ຖາຣໍ ກຕ຺ວາ ຕຸມ຺ຫາກໍ ຣຏ຺ເຐ ພຫຸສ຺ສຸຕາ ອາຄຕາຄມາ ມຫາຄຸຓວນ຺ຕາ ອຍ຺ຍາ ອຕ຺ຖີຕິ ປຸຈ຺ຉິ. ຕໍ ສຸຕ຺ວາ ເທວປຸຕ຺ຕຣາຊາ ອຕ຺ຖິ ເທວ ຕສ຺ມິໍ ນຄເຣ ສີຫກຸມ຺ຠກໍ ນາມ ມຫາວິຫາຣໍ. ຕຕ຺ຖ ອເນກສຫສ຺ສຠິກ຺ຂູ ວິຫຣນ຺ຕິ ສີລວນ຺ຕາ ອປ຺ປິຈ຺ຉາ ສນ຺ຕຸຏ຺ຐາ ວິເວກກາມິໂນ. ເຕສຸ ສາຏ຺ຐກຖາຕິປິຏກຘໂຣ ອິນ຺ທຄຸຕ຺ຕຕ຺ເຖໂຣ ນາມ ເຕສໍ ປາໂມກ຺ໂຂ ອໂຫສິ. ໂສ ອເນກປຣິຍາເຍນ ສນຣາມຣານໍ ຠິກ຺ຂູນໍ ຘມ຺ມໍວຓ຺ເຓຕິ. ຄຸຓວາ ອຕ຺ຕໂນ ຄຸຓໍ ນິສ຺ສາຍ ໂລເກ ປາກໂຏຕິ. ຕໍ ສຸຕ຺ວາ ຣາຊາ ຕຸຏ຺ຐມານໂສ ເຖຣໍ ປສ຺ສິຕຸກາໂມ ຫຸຕ຺ວາ ສມ຺ມ ຕ຺ວເມວ ຄນ຺ຕ຺ວາ ເຖຣໍ ຍາຈິຕ຺ວາ ອິຘາ ເນຫີຕິ ອາຫ. ຕໍ ສຸຕ຺ວາ ເທວປຸຕ຺ຕຣາຊາ ອຕ຺ຕໂນ ຫຕ຺ຖສ຺ສພລວາຫນາ ທິມຫາ ເສນງ຺ຄປຣິວຸໂຕ ອິນ຺ທຄຸຕ຺ຕຕ຺ເຖຣສ຺ສ ສນ຺ຕິກໍ ຄນ຺ຕ຺ວາ ວນ຺ທິຕ຺ວາ ອຍ຺ຍ ອຍ຺ຍໍ ຘມ຺ມາໂສກມຫາຣາຊາ ທຏ຺ຐຸກາໂມຕິ ອາຫ. ເຖເຣນ ສາຘູຕິ ສມ຺ປຏິຈ຺ຉິເຕ ຣາຊາ ເຖເຣນ ສມ຺ປຏິຈ຺ຉິຕຠາວໍ ຘມ຺ມາໂສກມຫາຣາຊິໂນ ເປເສສິ. ຕໂຕ ຘມ຺ມາໂສກມຫາຣາຊາ ໂສມນສ຺ສປ຺ປຕ຺ໂຕ ອຕ຺ຕໂນ ອາຓາປວຕ຺ຕິຕຏ຺ຐາເນ ຣາຊູນໍ ສາສນໍ ເປເສສິ. ສພ຺ເພວ ເຖຣາຄມນມຄ຺ຄໍ ອລງ຺ກໂຣນ຺ຕູຕິ. ອຖ ເຕ ຣາຊາໂນ ຕຸຏ຺ຐປຫຏ຺ຐາ ອຕ຺ຕໂນ ອຕ຺ຕໂນ ນຄເຣ ເຠຣິໍ ຈຣາເປຕ຺ວາ ເທວປຸຕ຺ຕນຄຣໂຕ ຍາວ ປາຏລິປຸຕ຺ຕນຄຣໍ ເອຕ຺ຖນ຺ຕເຣ ປຎ຺ຈປຓ຺ຓາສໂຍຊນິກໍ ມຄ຺ຄໍ ວິສມໍ ສມໍ ກໂຣນ຺ໂຕ ເທວຕານໍ ທິພ຺ພວີຖິມິວ ອລງ຺ກຣິຕ຺ວາ ຘມ຺ມາໂສກມຫານຣິນ຺ທສ຺ສ ເອວໍ ສາສນໍ ເປເສສຸໍ. ຠວນ຺ເຕຕ຺ຖ.

໑.

ອິນ຺ທຄຸຕ຺ຕມຫາເຖຣ, ສາມິໂນ ຄມນາຍ ໂນ;

ມຄ຺ຄໍ ອລງ຺ກໂຣນ຺ຕູຕິ, ມຫາຣາເຊນ ເປສິຕໍ.

໒.

ຕໂຕ ເຕ ອປເນຕ຺ວານ, ປາສາຓກຓ຺ຏກາທິກໍ;

ວິສມໍ ສມໍ ກຣິຕ຺ວານ, ສມ຺ມຊ຺ຊິຕ຺ວານ ສາຘຸກໍ.

໓.

ໂຘຕມຸຕ຺ຕາ ສມາຠາສາ, ໂອກິຣິຕ຺ວານ ວາລຸກາ;

ອຸສ຺ສາປິຕາ ຕຕ຺ຖ ຕຕ຺ຖ, ທຸສ຺ສໂຕຣຓປນ຺ຕິໂຍ.

໔.

ກລໂຘຕເຫມຣມ຺ຠາທິ, ນານາໂຕຣຓປນ຺ຕິໂຍ;

ຕຖາ ປຸປ຺ຜມຍາ ເນກ, ໂຕຣຓູປຣິໂຕຣຓາ.

໕.

ເຕສຸ ເຕສຸຈ ຐາເນສຸ, ສງ຺ຂຕາ ກຸສຸມຄ຺ຆິກາ;

ຕເຖວ ຄນ຺ຘເຕເລຫິ, ທີປິຕາ ທີປປນ຺ຕິໂຍ.

໖.

ປທຸມຸປ຺ປລສນ຺ນີຣ, ປຸປ຺ຜປລ຺ລວ ລງ຺ກຕາ;

ຐປິຕາ ຆຏມາລາໂຍ, ປຸຓ຺ຓາ ໂສຄນ຺ຘວາຣິຫິ.

໗.

ນິລປີຕາ ທິສມ຺ຠິນ຺ນ, ປຕາກາຫິ ຘເຊຫິ ຈ;

ມຄ຺ຄສ຺ສ ອຸຠໂຕ ປສ຺ເສ, ວນມາສິ ສມາກຸລໍ.

໘.

ເກຕໂວ ອຸຄ຺ຄຕາ ຕຕ຺ຖ, ມນ຺ທມນ຺ທສມີຣຓາ;

ອວ຺ຫຍນ຺ຕາວ ໂສຠນ຺ຕິ, ພ຺ຣຫ຺ໂມຣຄສຸຣາທໂຍ.

໙.

ນາຄຈມ຺ປປຸນ຺ນາຄ, ເກຕກີວກຸລາທິຫິ;

ປທຸມຸປ຺ປລາ ທິຊລເຊຫິ, ມາລຕີ ກຸສຸມາ ທິຫິ.

໑໐.

ມາລາທາເມຫິ ເນເກຫິ, ມຄ຺ຄມາສິ ວິຈິຕ຺ຕກໍ;

ປຕ຺ຖຣິຕ຺ວາ ປາທປເຏ, ສິຕ຺ຕສມ຺ມຕ຺ຕຠູມິຍໍ.

໑໑.

ລາຊາທິປຎ຺ຈປຸປ຺ຜານິ, ວິກິຣິໍສຸ ມໂນຣມໍ;

ອລງ຺ກຣິຕ຺ວາ ຫຕ຺ຕສ຺ສາ, ກຸສຸມາ ຠຣຓາທິຫິ.

໑໒.

ມຄ຺ຄາລງ຺ກຣຓຕ຺ຖາຍ, ຐປິຕາສຸໍ ຕໂຕ ຕໂຕ;

ເຕສຸ ເຕສຸ ຈ ຐາເນສຸ, ເຠຣິມຓ຺ຑລມຊ຺ຌຄາ.

໑໓.

ນຈ຺ຈນ຺ຕິ ຈາຕຸຣາ ນາຣີ, ຣສຠາວນິຣນ຺ຕຣາ;

ກໍສວໍສາທິປຄ຺ຄຍ຺ຫ, ວຊ຺ເຊນ຺ຕາເນກຕນ຺ຕິໂຍ.

໑໔.

ຄາຍນ຺ຕິ ມຘຸຣໍ ຄີຕໍ, ຄາຍນ຺ເຕຕ຺ຖ ລຍານ຺ວິຕໍ;

ມຄ຺ໂຄໂສ ສາຘຸວາເທຫິ, ເຠຣິຕນ຺ຕິນເທຫິຈ.

໑໕.

ກຣີນໍ ໂກຎ຺ຈນາເທຫິ, ຫຍານໍ ເຫສິເຕຫິ ຈ;

ເນກວິຏງ຺ກສງ຺ເຆຫິ, ໂສ ກຣີຫິ ສມາກຸໂລ.

໑໖.

ມຄ຺ຄສ຺ສ ອຸຠໂຕ ປສ຺ເສ, ເທວກຎ຺ຎູປມາ ສຸຠາ;

ມາລາກລາເປ ປຄ຺ຄຍ຺ຫ, ຕິຏ຺ຐນ຺ຕິ ຕຸຏ຺ຐມານສາ.

໑໗.

ຕຖາ ປຸຓ຺ຓຆເຏ ຄຍ຺ຫ, ປທຸມຸປ຺ປລສໍກຸເລ,

ອຏ຺ຐມງ຺ຄລມຸຄ຺ຄຍ຺ຫ, ຕິຏ຺ຐນ຺ຕິ ປມທາ ຕຫິໍ.

໑໘.

ສີຕລູທກສມ຺ປນ຺ນ, ປປາຫິ ສມລງ຺ກຕາ;

ສິນານຕ຺ຖໍ ຂຕາ ອາສຸໍ, ໂປກ຺ຂຣຎ຺ໂຎ ຕຫິໍຕຫິໍ.

໑໙.

ຕຫິໍຕຫິໍກຕາ ອາສຸໍ, ທານສາລາ ມໂນຣມາ;

ນິຈິຕາສຸມເນການິ, ທາໂນປກຣຓາ ຕຫິໍ.

໒໐.

ເອວໍ ເນກວິຘາ ປູຊາ, ອມ຺ເຫຫິ ປຏິປາທິຕາ;

ຐເປຕ຺ວານ ມຫາຄງ຺ຄໍ, ຕໍ ຊານາຕຸ ມຫີປຕີຕິ.

ຕໍ ສຸຕ຺ວາ ອໂສກມຫາຣາຊາ ຄງ຺ຄໍ ອລງ຺ກໂຣຖາຕິ ໂສຬສຍກ຺ເຂ ເປເສສິ, ເຕ ສປຣິວາຣາ ຕຕ຺ຖ ຄນ຺ຕ຺ວາ ອຕ຺ຕໂນ ອານຸຠາເວນ ຄງ຺ຄາຍ ອນ຺ໂຕ ຕິຄາວຸຕຏ຺ຐາເນ ອຸທຸກ຺ຂລປາສາເຓ ຐເປສຸໍ. ຐເປຕ຺ວາ ຖມ຺ເຠ ອຸສ຺ສາເປຕ຺ວາ ຕຸລາສໍຆາເຏ ທຕ຺ວາ ຫິມວນ຺ຕໂຕ ຣຕ຺ຕຈນ຺ທນສາເຣ ອາຫຣິຕ຺ວາ ປທເຣ ສນ຺ຖຣິຕ຺ວາ ອເນເກຫິ ປູຊາວິຘາເນຫິ ອລງ຺ກຣິຕ຺ວາ ຣຎ຺ໂຎ ເອວໍ ສາສນໍ ເປເສສຸໍ. ຠວນ຺ເຕຕ຺ຖ.

໒໑.

ຍມຕ຺ຖາຍ ມຍໍ ສພ຺ເພ, ມຫາຣາເຊນ ເປສິຕາ;

ອມ຺ເຫຫິ ທານິ ຕໍ ສພ຺ພໍ, ກຕເມວ ສຸໂຓຖ ຕໍ.

໒໒.

ຄາວຸຕຕ຺ຕຍຄມ຺ຠີຣໍ, ຄງ຺ຄໍ ໂຍຊນວິຕ຺ຖຕໍ;

ຖມ຺ເຠ ປຕິຏ຺ຐເປຕ຺ວານ, ອນຄ຺ຆໍ ຣຕ຺ຕຈນ຺ທນໍ.

໒໓.

ຫິມວນ຺ຕໂຕ ຫຣິຕ຺ວານ, ເສຕຸໍ ຕຕ຺ຖ ສຸມາປິຕໍ;

ໂຕຣຓາ ຈ ອຸໂຠ ປສ຺ເສ, ຣຕເນຫິ ສຸນິມ຺ມິຕາ.

໒໔.

ປຸຓ຺ຓກຸມ຺ຠທ຺ຘຊາ ເຈວ, ປທີປາວລິໂຍ ຕຖາ;

ອຸໂຠ ປສ຺ເສສຸ ຣຕນານິ, ມາເປຕ຺ວາລມ຺ພນານິຈ.

໒໕.

ສຸວຓ຺ຓມຓິມຸຕ຺ຕາທິ, ທາເມຫິ ສມລງ຺ກຕາ;

ວາລຸກຕ຺ຖາຍ ໂອກິຓ຺ຓາ, ໂຘຕມຸຕ຺ຕາ ປຠສ຺ສຣາ.

໒໖.

ເຕສຸ ເຕສຸ ຈ ຐາເນສຸ, ຐປິຕາສຸໍ ມຫາມຓີ;

ນານາຣາຄວິຕາເນຫິ, ໂສຠິຕາ ເສຕຸໂນ ປຣິ.

໒໗.

ໂອລມ຺ພິຕາສຸໍ ຕຕ຺ເຖວ, ທິພ຺ພາທິກຸສຸມາທໂຍ;

ນິຏ຺ຐິຕໍ ອິຘ ກາຕພ຺ພ, ຍຸຕ຺ຕໍ ປູຊາວິຘິໍຕຸ ໂນ;

ເທໂວຕໍ ປຏິຊານາຕຸ, ອິຕິ ວຕ຺ວານ ເປສຍຸໍຕິ.

ຕມ຺ປິ ສຸຕ຺ວາ ອໂສໂກ ມຫາຣາຊາ ຕຸມ຺ເຫວ ເຖຣໍ ອິຘາເນຖາຕິ ເຕສໍເຍວ ສາສນໍ ປຏິເປເສສິ, ເຕ ສາຘູຕິ ອິນ຺ທຄຸຕ຺ຕຕ຺ເຖຣສ຺ສ ສນ຺ຕິກໍ ຄນ຺ຕ຺ວາ ວນ຺ທິຕ຺ວາ ຠນ຺ເຕ ປາຏລິປຸຕ຺ຕນຄຣສ຺ສ ຄມນາຍ ກາໂລຕິ ອາຫໍສຸ, ຕໂຕ ເຖໂຣ ສຏ຺ຐິສຫສ຺ສມຕ຺ເຕຫິ ຠິກ຺ຂຸສງ຺ເຆຫິ ປຣິວຸໂຕ ປຎ຺ຈປຓ຺ຓາສໂຍຊນມຄ຺ຄໍ ປຏິປຊ຺ຊິ. ອຖາປຣໍ ເທວປຸຕ຺ຕນຄຣວາສິໂນ ອເນກວິຘມາລາຄນ຺ຘວາສຈຸຓ຺ຓທ຺ຘຊປຕາກາທີຫິ ອເນເກຫິ ຕາລາວຈເຣຫິ ນຈ຺ຈຄີຕວາທິເຕຫິ ປູເຊຕ຺ວາ ອຄມໍສຸ. ອຖ ເຖໂຣ ມຫນ຺ເຕນ ປູຊາວິຘາເນນ ຊມ຺ພຸທີປວາສີຫິ ປູຊິຍມາໂນ ອນຸກ຺ກເມນ ຈນ຺ທຠາຄາຍ ຄງ຺ຄາຍ ເສຕຸໍ ປຕ຺ວາ ຕຕ຺ຖ ມຫນ຺ຕໍ ປູຊາວິຘານໍ ໂອໂລເກນ຺ໂຕ ເອວໍ ຈິນ຺ເຕສິ, ເອວໍ ອຸຬາຣໍ ປູຊາວິຘານໍ ອິທານິ ຊມ຺ພຸທີເປ ນາຎ຺ຎສ຺ສ ໂຫຕິ, ມຍ຺ຫເມເວຕໍ ກຕໍ. ອຫເມເວຕ຺ຕ ອຸຕ຺ຕໂມ ອປ຺ປຏິໂມຕິ ເອວໍ ເສຍ຺ຍສ຺ສ ເສຍ຺ໂຍຫມສ຺ມີຕິ ມານໍ ອຸປ຺ປາເທຕ຺ວາ ອຏ຺ຐາສິ. ຕສ຺ມິໍ ຂເຓ ເອໂກ ຂີຓາສວຕ຺ເຖໂຣ ຕໍ ມາເນນຸປຕ຺ຖທ຺ຘເຈຕສາ ຐິຕໍ ທິພ຺ພຈກ຺ຂຸນາ ທິສ຺ວາ ອຸປສງ຺ກມິຕ຺ວາ ວນ຺ທິຕ຺ວາ ເຖຣສ຺ສ ໂອວທນ຺ໂຕ ເອວມາຫ. ຕສ຺ມາ.

໒໘.

ມາ ມານສ຺ສ ວສີ ໂຫຖ, ມາໂນ ຠນ຺ເຕ ວສໍຄຕໍ [ມານໍຠນ຺ເຕວສີກຕໍ ອິຕິສພ຺ພຕ຺ຖ];

ອນຕ຺ຖໂທ ສທາ ໂຫຕິ, ປາເຕຕ຺ວານ ຠວາ ວເຏ.

໒໙.

ມາໂນ ປລາລິໂຕ ສຕ຺ໂຕ, ຕຓ຺ຫາປຏິຆສງ຺ຄໂຕ;

ມກ຺ກໂຏຣຄໂສຓາທິ, ຫຸຕ຺ວາ ຊາຍຕິ ຊາຕິສຸ.

໓໐.

ມາ ມານໍ ສາມິ ປູເຣຫິ, ອຕ຺ຕານໍ ປຣິໂສຘຍ;

ອປຣິສຸທ຺ຘາ ສໂຍ ຠິກ຺ຂຸ, ທາຍກໍ ນ ປຣິໂຕສຕິ.

໓໑.

ທທນ຺ຕານໍ ສຣນ຺ຕານໍ, ປູເຊນ຺ຕານໍ ສເຈ ຕຸວໍ;

ມຫປ຺ຜລໍ ມຫາຠູຕິໍ, ກາມຕ຺ຖ ໂຫຖ ນິພ຺ພຓາຕິ [ນິມ຺ມນາ ອິຕິກຕ຺ຕຈິ].

ຕໍ ສຸຕ຺ວາ ເຖໂຣ ສໍສາເຣ ນິພ຺ພິນ຺ໂທ ຕຕ຺ເຖວ ຐິໂຕ ຕິລກ຺ຂຓໍ ປຏ຺ຐເປຕ຺ວາ ກຣຊກາຍໍ ສມ຺ມສນ຺ໂຕ ສຫປຏິ ສມ຺ຠິທາຫິ ອຣຫຕ຺ຕໍ ປຕ຺ວາວ ນິກ຺ຂມິ. ຕໂຕ ຘມ຺ມາໂສກມຫາຣາຊາ ພລວາຫນປຣິວຸໂຕ ມຫນ຺ເຕນ ປູຊາວິຘາເນນ ປຏິມຄ຺ຄໍ ອາຄມ຺ມ ວນ຺ທິຕ຺ວາ ຕໂຕ ທິຄຸຓໍ ປູຊາສກ຺ກາຣໍ ກຸຣຸມາໂນ ມຫາຠິກ຺ຂຸສງ຺ເຆນ ສທ຺ຘິໍ ເຖຣໍ ອຕ຺ຕໂນ ນຄຣໍ ເນຕ຺ວາ ຕສ຺ສ ຘມ຺ມກຖໍ ສຸຕ຺ວາ ປສນ຺ນມານໂສ ປຎ຺ຈສີເລ ປຕິຏ຺ຐາຍ ມຫນ຺ຕໍ ວິຫາຣໍ ກາເຣຕ຺ວາ ເຖເຣນ ສຫາຄຕານໍ ສຏ຺ຐິສຫສ຺ສານໍ ຠິກ຺ຂູນໍ ຈຕຸປຈ຺ຈເຍຫິ ອຸປຏ຺ຐານ ມກາສິ, ອຖ ເຖໂຣ ສາຏ຺ຐກຖໍ ປິຏກຕ຺ຕຍໍ ປກາເສນ຺ໂຕ ຕສ຺ມິໍ ຈິຣໍ ວສິຕ຺ວາ ຕຕ຺ເຖວ ປຣິນິພ຺ພາຍິ. ຕໂຕ ຣາຊາ ສປຣິໂສ ຕສ຺ສ ສຣີຣນິກ຺ເຂປໍ ກາເຣຕ຺ວາ ຘາຕຸໂຍ ຄເຫຕ຺ວາ ມຫນ຺ຕໍ ເຈຕິຍໍ ກາຣາເປສີຕິ.

໓໒.

ປຸຣາຕນານໍ ຠຸວິ ປຸຎ຺ຎກມ຺ມິນໍ,

ຄຸຓານຸຠາເວນ ມເຫນ຺ຕິ ເອວໍ;

ສເທວກາ ນໍ ມນສີກໂຣນ຺ຕາ,

ປຸຎ຺ຎໍ ກໂຣຖາ ຍຕເນ ສທາ ທຣາຕິ.

ອິນ຺ທຄຸຕ຺ຕຕ຺ເຖຣສ຺ສ ວຕ຺ຖຸໍ ຈຕຸຕ຺ຖໍ.

໓໕. ສາຂມາລປູຊິກາຍ ວຕ຺ຖຸມ຺ຫິ ອຍມານຸປຸພ຺ພີກຖາ

ອມ຺ຫາກໍ ຠຄວາ ທສປາຣມິໂຍ ປູເຣຕ຺ວາ ອນຸກ຺ກເມນ ຕຸສິຕຠວເນ ນິພ຺ພຕ຺ໂຕ ເທເວຫິ ອາຣາຘິໂຕ ສກ຺ກຣາຊກຸເລ ປຏິສນ຺ຘິໍ ຄເຫຕ຺ວາ ມາຕຸກຸຈ຺ຉິໂຕ ນິກ຺ຂນ຺ໂຕ ອນຸກ຺ກເມນ ປຣມາຠິສມ຺ໂພຘິໍ ປຕ຺ວາ ຕໂຕ ປຏ຺ຐາຍ ປຎ຺ຈຈຕ຺ຕາລີສສໍວຈ຺ຉຣານິ ຐຕ຺ວາ ຈຕຸຣາສີຕິຘມ຺ມກ຺ຂນ຺ຘສຫສ຺ສານິ ເທເສຕ຺ວາ ຄຓນປຖມຕີເຕ ສຕ຺ເຕ ຠວກນ຺ຕາຣໂຕ ສນ຺ຕາເຣຕ຺ວາ ສພ຺ພພຸທ຺ຘກິຈ຺ຈານິ ນິຏ຺ຐາເປຕ຺ວາ ກຸສິນາຣາຍໍ ອຸປວຕ຺ຕເນ ມລ຺ລານໍ ສາລວເນ ຍມກສາລານ ມນ຺ຕເຣ ອຸຕ຺ຕຣສີສກໍ ປຎ຺ຎຕ຺ເຕ ມຎ຺ຈເກ ເວສາຂປຸຓ຺ຓທິວເສ ທກ຺ຂິເຓນ ປສ຺ເສນ ສໂຕ ສມ຺ປຊາໂນ ອນຸຏ຺ຐານເສຍ຺ຍາຍ ນິປນ຺ໂນ ປຈ຺ຉິມຍາເມ ຠິກ຺ຂູ ໂອວທິຕ຺ວາ ພລວປຈ຺ຈູ-ສ ສມເຍ ມຫາປຖວິໍກມ຺ເປນ຺ໂຕ ອນຸປາທິເສສາຍ ນິພ຺ພາຓຘາຕຸຍາ ປຣິນິພ຺ພາຍິ, ນິພ຺ພຸເຕ ປນ ຠຄວຕິ ໂລກນາເຖ ອານນ຺ທຕ຺ເຖໂຣ ມລ຺ລຣາຊູນໍ ເອຕໍ ປວຕ຺ຕິໍ ອາໂຣເຈສິ. ຕໂຕ ໂກສິນາຣກາ ຈ ເທວພ຺ຣຫ຺ມາທໂຍ ຈ ສນ຺ນິປຕິຕ຺ວາ ນຈ຺ຈຄີຕວາທິເຕຫິ ມາລາຄນ຺ຘາທີຫິ ຈ ສກ຺ກໂຣນ຺ຕາ ຄຣຸກໂຣນ຺ຕາ ມາເນນ຺ຕາ ປູເຊນ຺ຕາ ເຈລວິຕານາທໂຍ ກໂຣນ຺ຕາ ຠຄວໂຕ ສຣີຣໍ ນຄຣມຊ຺ເຌ ຍຕ຺ຖ ມກຸຏພນ຺ຘນໍ ນາມ ມລ຺ລານໍ ເຈຕິຍໍ, ຕຕ຺ຖ ເນຕ຺ວາ ຈກ຺ກວຕ຺ຕິສ຺ສ ສຣີຣໍ ວິຍ ອຫເຕນ ວຕ຺ເຖນ ເວເຐຕ຺ວາ ຕໂຕ ວິຫເຕນ ກປ຺ປາເສນ ເວເຐຕ຺ວາຕິ ເອວໍ ປຎ຺ຈທຸສ຺ສຍຸຄສເຕຫິ ເວເຐຕ຺ວາ ອາຍສາຍ ເຕລໂທຓິຍາ ປກ຺ຂິປິຕ຺ວາ ອຎ຺ຎິສ຺ສາຍ ອາຍສາຍ ໂທຓິຍາ ປຏິກຸຊ຺ຊິຕ຺ວາ ສພ຺ພຄນ຺ຘານໍ ຈິຕກໍ ກຣິຕ຺ວາ ຠຄວໂຕ ສຣີຣໍ ຈິຕກໍ ອາໂຣເປສຸໍ. ອຖ ມຫາກສ຺ສປຕ຺ເຖເຣນ ຠຄວໂຕ ປາເທ ສິຣສາ ວນ຺ທິເຕ ເທວຕານຸຠາເວນ ຈິຕໂກ ສມນ຺ຕາ ເອກປ຺ປຫາເຣເນວ ປຊ຺ຊລິ. ຠຄວໂຕ ປນ ສຣີເຣ ທຑ຺ເຒ ສຸມນມກຸຬສທິສາ ຘາຕຸໂຍ ອວສິສ຺ສິໍສຸ. ຕສ຺ມິໍ ກິຣ ສມເຍ ໂກສລຣຎ຺ໂຎ ຊນປເທ ອຎ຺ຎຕຣາ ຄາມວາສິກາ ອິຕ຺ຖີ ຠຄວຕິ ປຣິນິພ຺ພຸເຕ ສາຘຸກີຬ຺ຫໍ ອາຄຈ຺ຉມານາ ອນ຺ຕຣາມຄ຺ເຄ ອຕ຺ຕໂນ ສຣີເຣ ອຸປ຺ປນ຺ນວາຕໂຣເຄນ ອຸປທ຺ທຸຕາ ສາຘຸກີຬ຺ຫໍ ສມ຺ປາປຸຓິຕຸໍ ອສກ຺ໂກນ຺ຕີ ສຕ຺ຖຸ ອາຬາຫນໍ ຄນ຺ຕ຺ວາ ຠຄວໂຕ ຘາຕຸສຣີເຣ ຕີຓິ ສາຂປຸປ຺ຜານິ ປູເຊຕ຺ວາ ປສນ຺ນມານສາ ປຎ຺ຈປຕິຏ຺ຐິເຕນ ວນ຺ທິຕ຺ວາ ຄຕາ ຕາຍ ເອວ ຣຕ຺ຕິຍາ ມຊ຺ຌິມຍາເມ ກາລໍ ກຕ຺ວາ ຕາວຕິໍສຠວເນ ຕິໍສໂຍຊນິເກ ກນກວິມາເນ ນິພ຺ພຕ຺ຕິ. ຕສ຺ສາ ປຸພ຺ພກມ຺ມປກາສນຕ຺ຖໍ ຈກ຺ກມຕ຺ຕານິ ສາຂປຸປ຺ຜານິ ຕຕ຺ຕ ຕຕ຺ຖ ໂອລມ຺ພນ຺ຕິ. ເຕເຫວ ສພ຺ພໍ ວິມານໍ ເອໂກຠາສີ [ເອໂກຠາສິ ຕໂຕ ອິຕິສພ຺ພຕ຺ຖ] ອໂຫສິ. ຕໂຕ ສຸຄນ຺ຘກຣຓ຺ຑກໍ ວິຍ ຈ ອໂຫສິ, ສາ ປນ ອຕ຺ຕໂນ ໂສຠຄ຺ຄປ຺ປຕ຺ຕໍ ອຕ຺ຕຠາວຎ຺ຈ ວິມານສມ຺ປທຎ຺ຈ ປຣິວາຣສມ຺ປຕ຺ຕິໂຍ ຈ ທິສ຺ວາ ວິມ຺ຫິຕມານສາ ປຸພ຺ເພ ກເຕນ [ປຸພ຺ເພກິສ຺ສເມ. ປຸພ຺ເພກເຕນເມ ອິຕິຈກຕ຺ຖຈິ] ເກນ ເມ ປຸຎ຺ຎກມ຺ເມນາ ຍໍ ລທ຺ຘາຕິ ໂອໂລກນ຺ຕີ ຠຄວໂຕ ຘາຕຸສຣີຣສ຺ມິໍ ປູຊິຕານິ ຕີຓິ ສາຂປຸປ຺ຜານິ ທິສ຺ວາ ປສນ຺ນມານສາ ມຫາຈກ຺ກປ຺ປມາຓໍ ສາຂມາລໍ ຫຕ຺ເຖນ ຘາເຣນ຺ຕີ ຘາຕຸປູຊນຕ຺ຖາຍ ອຄມາສິ. ຕທາ ຕຕ຺ຖ ສນ຺ນິປຕິຕາ ມນຸສ຺ສາ ຕສ຺ສາ ຣູປສມ຺ປທຎ຺ຈ ຫຕ຺ເຕ ມຫນ຺ຕໍ ສາຂມາລຎ຺ຈ ທິສ຺ວາ ວິມ຺ຫິຕມານສາ ອມ຺ມ ຕ຺ວໍ ກຕ຺ຖ ວາສິກາ. ກຕ຺ຖ ປນິມໍ ປຸປ຺ຜໍ ປຏິລທ຺ຘນ຺ຕິ ປຸຈ຺ຉິໍສຸ, ຕໍ ສຸຕ຺ວາ ເທວຘີຕາ ອຕ຺ຕນາ ຠຄວໂຕ ຘາຕຸສຣີຣສ຺ສ ປູຊິຕສາຂມາລຕ຺ຕຍານຸຠາເວນ ປຏິລທ຺ຘສມ຺ປຕ຺ຕິໂຍ ຈ ທິພ຺ພວິມານຎ຺ຈ ປຸພ຺ເພ ມຕກເລວຣໍ ຈາຕິ ສພ຺ພໍ ເຕສໍ ທສ຺ເສຕ຺ວາ ຘມ຺ມເທສນາວສາເນ ອາຫ.

໑.

ສມາຄຕາ ຠວນ຺ຕາ ໂຠ, ປສ຺ສນ຺ຕຸ ມມ ສມ຺ປທໍ;

ກຕມປ຺ເປນ ກາເຣນ, ສມ຺ມາສມ຺ພຸທ຺ຘຘາຕຸຍາ.

໒.

ສາຂມາລານິ ຕີເຓວ, ຫີຍ຺ໂຍຫໍ ມຸນິຘາຕຸຍາ;

ປູຊຍິຕ຺ວານ ສນ຺ຕຸຏ຺ຐາ, ນິວຕ຺ຕາ ຕາຍ ຣຕ຺ຕິຍາ.

໓.

ມຣນ຺ຕີ ຂຣວາເຕນ, ຕມຫໍ ສຸຈຣິຕໍ ສຣິໍ;

ເຕນາຫໍ ປຸຎ຺ຎກມ຺ເມນ, ຕາວຕິໍສູປຄາອຫຸໍ.

໔.

ຕຕ຺ຖ ເມ ອາສິ ປາສາໂທ, ຕິໍສໂຍຊນມຸຄ຺ຄໂຕ;

ກູຏາຄາຣວຣາກິຓ຺ໂຓ, ສາຂມາລາຕິ [ສາຘມາໂລ ອິຕິປິກຕ຺ຖຈິ], ວິສ຺ສຸໂຕ.

໕.

ຍຖາ ສພ຺ພສຸຄນ຺ເຘຫິ, ກຣຓ຺ຑໍ ປຣິຠາວິຕໍ;

ຕຖາ ທິພ຺ພສຸຄນ຺ເຘຫິ, ຄນ຺ຘິຕໍ ຠວນໍ ມມ.

໖.

ຈກ຺ກມຕ຺ຕາ ສາຂປຸປ຺ຜາ, ຕຕ຺ຖ ຕຕ຺ຖູປລມ຺ພເຣ [ຕຕວຕ຺ຖຸປລພ຺ພເຣ ອິຕິປິກຕ຺ຖຈິ];

ທິພ຺ພຄນ຺ຘາ ປວາຍນ຺ຕິ, ມຘຸພ຺ພຠນິເສວິຕາ.

໗.

ຠສ຺ສນ຺ຕິ ເອກປຸປ຺ຜສ຺ມາ, ຕຸມ຺ພມຕ຺ຕາ ຫິ ເຣຓໂວ;

ເຕຫິ ປິຎ຺ຊຣິຕາ ເທວາ, ກີຬນ຺ຕິ ຈ ລລນ຺ຕິຈ.

໘.

ປີຬນ຺ຘິຕ຺ວານ ມາລາຘຍາ, ສຸທິພ຺ພາ ຠຣຓານິຈ;

ສຫຈ຺ຉຣາ ເທວປຸຕ຺ຕາ, ນຈ຺ຈຄີຕາທິພ຺ຍາວຏາ.

໙.

ປສ຺ສເຖມໍ ຠຸຊງ຺ຄາ ໂຠ, ສຕ຺ຕາ ໂມເຫນ ປາຣຸຕາ;

ຫີຍ຺ໂຍ ມຕໍ ປວິທ຺ຘໍ ເມ, ປູຕິຠູຕໍ ກເລວຣໍ.

໑໐.

ປຸຬເວຫິ ສມາກິຓ຺ຓໍ, ມກ຺ຂິກາຄຓກີຬິຕໍ;

ກາກໂສຓາທິສຕ຺ຕານ, ມາຫາຣໍ ກຸຓປາລຍໍ.

໑໑.

ປຕ຺ເຖນ຺ຕິ ປຸຣິສາ ປຸພ຺ເພ, ອເນໂກປາຍເນນ ຕໍ;

ທຏ຺ຐຸມ຺ປິທານິ ນິຈ຺ຉນ຺ຕິ, ຕຓ຺ຫາຍຎ຺ຎາຓຕາ ອໂຫ.

໑໒.

ໂລກປຊ຺ໂຊຕກສ຺ສາຫໍ, ວິມລສ຺ສ ຍສສ຺ສິໂນ;

ຘາຕຸໍ ຫີຍ຺ໂຍ ມຫິໍ ສມ຺ມາ, ອຊ຺ຊ ສຄ຺ເຄ ປຕິຏ຺ຐິຕາ.

໑໓.

ຫິຕ຺ວາເນ ຕາທິສໍ ກາຍໍ, ລທ຺ຘໍທານິ ມເມທິສໍ;

ທິພ຺ພຕ຺ຕຠາວໍ ໂສຠາຫິ, ຠາສມານ ມຸທິກ຺ຂຖ.

໑໔.

ຠາສມານາຍ ເມ ວາຈໍ, ສຸໂຓເຖຕ຺ຖ ສມາຄຕາ;

ນຕ຺ເຖວາກຕປຸຎ຺ຎສ຺ສ, ອຓຸມຕ຺ຕໍ ຠເວ ສຸຂໍ.

໑໕.

ພິນ຺ທຸມຕ຺ຕມ຺ປິ ໂຍ ປຸຎ຺ຎ, ພີຊໍ ໂຣເປຕິ ສາສເນ;

ນ ຫາ ນຕ຺ຖຜລໍ [ນຫປນນ຺ຕຜລໍ ອິຕິປິກຕ຺ຖຈິ] ໂຫຕິ, ຍາວ ນິພ຺ພາຓປຕ຺ຕິຍາຕິ.

ເອວໍ ສາ ເທວຕາ ອຕ຺ຕນາ ປຏິລທ຺ຘທິພ຺ພວິຠວໍ ທສ຺ເສຕ຺ວາ ຊນກາຍໍ ໂອວທິຕ຺ວາ ທິພ຺ພສາຂປຸປ຺ເຜຫິ ຊິນຘາຕຸໍ ປູເຊຕ຺ວາ ມນຸສ຺ສານໍ ປສ຺ສນ຺ຕານໍເຍວ ສທ຺ຘິໍ ວິມາເນນ ເທວໂລກເມວ ອຄມາສິ. ຕໍ ທິສ຺ວາ ມຫາຊໂນ ທານາທີນິ ປຸຎ຺ຎານິ ກຕ຺ວາ ເທວໂລກໍ ປູເຣສີຕິ.

໑໖.

ເອວຎ຺ຫິ ສາ ປຸປ຺ຜມຕ຺ເຕນ ຘາຕຸໍ,

ປູເຊຕ຺ວ ເທເວສຸ ອລຕ຺ຖ ຠູຕິໍ;

ຕຸມ຺ເຫປິ ໂຠນ຺ໂຕ ຕິທິເວສຸ ສາຕໍ,

ກາມຕ຺ຖ ເຈ ກຕ຺ຖ ປຸຎ຺ຎານິ ສາຘຸໍຕິ.

ສາຂມາລປູຊິກາຍ ວຕ຺ຖຸໍ ປຎ຺ຈມໍ.

໓໖. ໂມຣິຍພ຺ຣຫ຺ມຓສ຺ສ ວຕ຺ຖຸມ຺ຫິ ອຍມານຸປຸພ຺ພີກຖາ

ອມ຺ຫາກໍ ຠຄວຕິ ປຣິນິພ຺ພຸເຕ ມຄຘຣຏ຺ເຐ ມຈລໍ ນາມ ມຫາຄາມໍ ອໂຫສິ. ຕຕ຺ຖ ໂມຣິໂຍນາມ ພ຺ຣາຫ຺ມໂຓ ປຏິວສຕິ ສທ຺ໂຘ ປສນ຺ໂນ, ຕສ຺ສ ເສນານາເມ ກາ ຠຣິຍາ ອຕ຺ຖິ. ສາປິ ສທ຺ຘາ ປສນ຺ນາ ຣຕນຕ຺ຕເຍສຸ. ເຕ ອຸໂຠປິ ສມຄ຺ຄາ ສມ຺ໂມທມານາ ຠິກ຺ຂຸສງ຺ຆໍ ນິມນ຺ເຕຕ຺ວາ ນິຈ຺ຈໍ ທານໍ ປວຕ຺ເຕນ຺ຕາ ຈີວຣາທິຈຕຸປຈ຺ຈເຍຫິ ອຸປຏ຺ຐຫນ຺ຕາ ສີລໍ ຣກ຺ຂນ຺ຕາ ອຸໂປສຖກມ຺ມໍ ກໂຣນ຺ຕາ ທິວສໍ ວີຕິນາເມນ຺ຕິ. ອຖສ຺ສ ເຄເຫ ວິຠວໍ ເຍຠຸຍ຺ເຍນ ທານາທີສຸ ປຣິກ຺ຂຍມຄມາສິ. ຕໂຕ ພ຺ຣາຫ຺ມຓີ ສາມິ ໂນ ເຄເຫ ຘນໍ ປຣິກ຺ຂີຓໍ. ກຖໍ ທານໍ ປວຕ຺ເຕຍ຺ຍາມາຕິ ພ຺ຣາຫ຺ມຓສ຺ສ ອາໂຣເຈສິ, ຕໂຕ ພ຺ຣາຫ຺ມໂຓ ມາ ຠທ຺ເທ ຈິນ຺ເຕສິ. ເຍນເກນຈິ ອຸປາເຍນ ທານໍ ປຕິຏ຺ຐເປສ຺ສາມາຕິ ວຕ຺ວາ ຕສ຺ມິໍເຍວ ອຕ຺ຕໂນ ສອຸສ຺ສາຫຕໍ ປກາໂສນ຺ໂຕ ອາຫ.

໑.

ຊານມາໂນ ຫິ ໂລກສ຺ມິໍ, ທານສ຺ເສທໍ ຜລໍ ອິຕິ;

ນ ທຊ຺ຊາ ໂກ ສຸສີເລສຸ, ອປ຺ປມ຺ປິ ທິວສມ຺ປຕິ.

໒.

ສຄ຺ຄໂລກນິທານານິ, ທານານິ ມຕິມາ ອິຘ;

ໂກຫິນາມ ນໂຣ ໂລເກ, ນ ທເທຍ຺ຍ ຫິເຕ ຣໂຕຕິ.

ເອວຎ຺ຈ ປນ ວຕ຺ວາ ຠທ຺ເທ ວນໍ ປວິສິຕ຺ວາ ອເນກວິຘານິ ປຓ຺ຓານິ ຈ ຜລານິ ຈ ປຈ຺ຉິປູຣໍ ອາຫຣິຕ຺ວາ ວິກ຺ກິຓິຕ຺ວາປິ ທານໍ ນ ອຸປຈ຺ຉິນ຺ທິສ຺ສາມາຕິ ວຕ຺ວາ ຕໂຕ ປຏ຺ຐາຍ ວນໍ ຄນ຺ຕ຺ວາ ປຓ຺ຓານິ ຈ ຜລານິ ຈ ອາຫຣິຕ຺ວາ ວິກ຺ກິຓິຕ຺ວາ ທານໍ ເທນ຺ໂຕ ປຏິວສຕິ. ອເຖກທິວສໍ ພ຺ຣາຫ຺ມໂຓ ວນໍ ປວິຏ຺ໂຐ ປຓ຺ເຓຫິ ຈ ຜເລຫິ ຈ ປຈ຺ຉິໍ ປູເຣຕ຺ວາ ສີເສນາ ທາຍ ເຄຫໍ ອາຄຈ຺ຉນ຺ໂຕ ປຸປ຺ຜຜລປລ຺ລເວຫິ ວິນຕໍ ເນກຕຣຸຄຓນິຈິຕໍ ສມ຺ມຕ຺ຕາເນກຈາຕກຈຕຸປ຺ປທນິເສວິຕໍ ວິປ຺ປກິຓ຺ຓານນ຺ຕປຸປ຺ຜປຕ຺ຕກິຎ຺ຊກ຺ຂຈ຺ຉນ຺ນວາຬຸກາຕລໍ ສນ຺ທມານສີຕລາ ມລຊລປ຺ປວາຫໍ ອກທ຺ທມານິນ຺ນສຸປຕິຕ຺ເຕຫິ ສຸນ຺ທຣໍ ກນ຺ທຣໍ ທິສ຺ວາ ປຈ຺ຉິໍ ຕີເຣ ຐເປຕ຺ວາ ໂອຕິຓ຺ໂຓ ນຫາຍຕິ, ຕສ຺ມິໍ ຂເຓ ຕຕ຺ຖ ເອກສ຺ມິໍ ຣຸກ຺ເຂ ອຘິວຕ຺ໂຖ ເທວປຸຕ຺ໂຕ ຕໍ ຕຕ຺ຖ ນຫາຍນ຺ຕໍ ທິສ຺ວາ ກິນ຺ນຸ ໂຂ ເອສ ກລ຺ຍາຓຊ຺ຌາສໂຍ ວາ ອຸທາຫຸ ປາປຊ຺ຌາສໂຍ ສຕ຺ໂຕຕິ ທິພ຺ພຈກ຺ຂຸນາ ອຸປຘາຣນ຺ໂຕ ອຈ຺ຉຣິຍປຸຣິໂສ ເອໂສ ທຸຄ຺ຄໂຕປິ ຫຸຕ຺ວາ ອຕ຺ຕໂນ ທານປ຺ປເວຓິຍາ ອຸປຈ຺ຉິຊ຺ຊນຠເຍນ ວນໍ ຄນ຺ຕ຺ວາ ປຓ຺ຓານິ ຈ ຜລານິ ຈ ອາຫຣິຕ຺ວາ ທຸກ຺ເຂນ ກສິເຣນ ຊີວິກໍ ກປ຺ເປນ຺ໂຕ ທານຘມ຺ມໍ ນ ອຸປຈ຺ຉິນ຺ທຕີຕິ ຈິນ຺ເຕຕ຺ວາ ຕສ຺ສ ຄຸຓາທໂຍ ປຏິຈ຺ຈ ປຈ຺ຉິຍໍ ຐປິຕປຓ຺ຓານິ ຈ ຜລານິ ຈ ສພ຺ພານິ ສຸວຓ຺ຓານິ ໂຫນ຺ຕູຕິ ອຘິຏ຺ຐາສິ. ອຖສ຺ສານຸຠາເວນ ສພ຺ພໍ ສຸວຓ຺ຓໍ ອໂຫຠິ, ອຖ ໂສ ສຸວຓ຺ຓປຸຓ຺ຓປຈ຺ຉິຍໍ ອຸປຣິ ສຸວຓ຺ຓຣາສິມຕ຺ຖເກ ສພ຺ພກາມທທໍ ມຫນ຺ຕໍ ມຓິຣຕນໍ ຐເປຕ຺ວາ ອນ຺ຕຣຫິໂຕ ປຏິກ຺ກມ຺ມ ອຏ຺ຐາສິ, ຕໂຕ ພ຺ຣາຫ຺ມໂຓ ນຫາຕ຺ວາ ອຸຕ຺ຕິຓ຺ໂຓ ປຈ຺ຉິຍໍ ສມ຺ປຸຓ຺ຓສຸວຓ຺ຓວຓ຺ຓຣໍສິນາ ສມ຺ຠິນ຺ນວິຊ຺ໂຊຕມານມຓິຣຕນໍ ທິສ຺ວາ ກິເມຕໍຕິ ອາສງ຺ກິຕປຣິສງ຺ກິໂຕ ປຈ຺ຉິສມີປໍ ຄນ຺ຕ຺ວາ ຫຕ຺ຖໍ ປສາເຣຕຸໍ ອວິສຫນ຺ໂຕ ອຏ຺ຐາສິ. ຕໍ ທິສ຺ວາ ເທວປຸຕ຺ໂຕ ທິສ຺ສມານສຣີເຣນ ຐຕ຺ວາ ມາ ຕ຺ວໍ ຠາຍິ ພ຺ຣາຫ຺ມຓ. ມຍາ ເອຕານິ ນິມ຺ມິຕານິ, ຄເຫຕ຺ວາ ຄຈ຺ຉາຫີຕິ ອາຫ, ອຖ ພ຺ຣາຫ຺ມໂຓ ເທວປຸຕ຺ຕສ຺ສ ກຖໍ ສຸຕ຺ວາ ອຍໍ ເທວປຸຕ຺ໂຕ ອິມໍ ມຍາ ນິມ຺ມິຕໍ, ຄເຫຕ຺ວາ ຄຈ຺ຉາຕິ ວທຕິ. ກິນ຺ນຸ ໂຂ ໂສ ອຕ຺ຕໂນ ອານຸຠາເວນ ເທຕິ, ອຸທາຫຸ ມຍາ ກຕປຸຎ຺ເຎນາຕິ ປຸຈ຺ຉິສ຺ສາມິ ຕໍຕິ ປຎ຺ຊລິໂກວ ເທວປຸຕ຺ຕໍ ປຸຈ຺ຉນ຺ໂຕ ອາຫ.

໓.

ປຸຈ຺ຉາມິ ປຎ຺ຊລີ ທານິ, ເທວປຸຕ຺ຕ ມຫິທ຺ຘິກ;

ທທາສິ ເມ ສຸວຓ຺ຓຎ຺ຈ, ກາມທໍ ມຓິມຸຕ຺ຕມໍ.

໔.

ນາປິ ໂກ ໂນ ຕຸວໍ ຎາຕິ,

ນ ມິຕ຺ໂຕ ໂນປກາຣໂກ;

ກິໍ ຕ຺ວໍ ອຕ຺ຖວສໍ ທິສ຺ວາ,

ມມ ທຊ຺ຊາສິມໍ ຘນໍ.

໕.

ເກນ ຕເປນ ສີເລນ, ເກນາຈາຣຄຸເຓນ ຈ;

ເຍນ ທຊ຺ຊາສິ ເມ ເທວ, ກິໍ ເມ ສຸຈຣິຕໍ ຈິຕໍ.

໖.

ກິນ຺ນຸ ປຸຣາຕນໍ ກມ຺ມໍ, ເກນ ກມ຺ເມນ ທສ຺ສສິ;

ອຖວາ ຕວິທ຺ຘິຍາ ເທສິ, ຕໍ ເມ ອກ຺ຂາຫິ ປຸຈ຺ຉິໂຕຕິ.

ຕໂຕ ເທວປຸຕ຺ໂຕ ນ ໂຂ ປນາຫໍ ພ຺ຣາຫ຺ມຓ ເທໂວຕິ ປເຣສໍ ກິຎ຺ຈິ ທາຕຸໍ ສກ຺ໂກມິ, ຕຍາ ປຸພ຺ເພ ກຕສຸຈຣິຕານຸຠາເວນ ນິພ຺ພຕ຺ຕຕີຕິ ວຕ຺ວາ ທິພ຺ພຈກ຺ຂຸນາ ຕສ຺ສ ປຸພ຺ພກມ຺ມໍ ທິສ຺ວາ ຕສ຺ສ ປກາເສນ຺ໂຕ ອາຫ.

໗.

ກສ຺ສເປ ໂລກປຊ຺ໂຊເຕ, ສມ຺ພຸທ຺ເຘ ປຣິນິພ຺ພຸເຕ;

ສພ຺ພຕ຺ຖ ປຕ຺ຖຏໍ ອາສິ, ຕສ຺ສ ພຸທ຺ຘສ຺ສ ສາສນໍ.

໘.

ຕທາ ປຈ຺ຈນ຺ຕິເມ ຄາເມ, ຕ຺ວມາສິ ກຸລທາຣໂກ;

ສທ຺ໂຘ ອາສິ ປສນ຺ໂນ ຈ, ທາຍໂກ ກຸສເລ ຣໂຕ.

໙.

ຕທາ ປພ຺ພຊິໂຕ ເອໂກ, ຄຈ຺ຉນ຺ໂຕ ອນ຺ຕຣາປເຖ;

ໂຈເຣຫິ ອນຸພທ຺ໂຘສິ, ອຈ຺ຉິນ຺ນປຕ຺ຕຈີວໂຣ.

໑໐.

ສາຂາຠງ຺ຄໍ ນິວາເສຕ຺ວາ, ປາຣຸປິຕ຺ວາ ຕເຖວ ຕໍ;

ອນ຺ໂຕຄາມໍ ປວິຏ຺ໂຐສິ, ເອສມາໂນ ປິໂລຕິເກ.

໑໑.

ຕໂຕ ຕ຺ວໍ ຈຣມານໍ ຕໍ, ທິສ຺ວາ ກມ຺ປິຕມານໂສ;

ວຕ຺ຖຍຸຄໍ ອທາສິ ຕ຺ວໍ, ສທ຺ທຫໍ ທານໂຕ ຜລໍ.

໑໒.

ປຕ຺ໂຖທເນນ ຕໍ ຠິກ຺ຂຸໍ, ປຣິວິສິຕ຺ວາ ຍຖາພລໍ;

ເປເສສິ ອຠິວາເທຕ຺ວາ, ສທ຺ຘາຍ ສຸທ຺ຘມານໂສ.

໑໓.

ອິມໍ ຕ຺ວໍ ອກຣີ ປຸຎ຺ຎໍ, ຕຸຍ຺ເຫຕໍ ຈຣິຕໍ ອິມໍ;

ຕສ຺ສ ເຕ ປຸຎ຺ຎກມ຺ມສ຺ສ, ອມຸຂ຺ຍຜລ ມີທິສໍຕິ.

ເອວຎ຺ຈ ປນ ວຕ຺ວາ ອິທໍ ເຕ ພ຺ຣາຫ຺ມຓ ຘນໍ ຣາຊາທີຫິ ມຍາ ອນາຫຣຓີຍໍ ກຕໍ, ຕ຺ວໍ ອປຣິສງ຺ກນ຺ໂຕ ຄເຫຕ຺ວາ ຍຖາຘິປ຺ປາຍໍ ກໂຣຫິ, ອິມໍ ໂຂ ປນ ມຓິຣຕນໍ ອິຈ຺ຉິຕິຈ຺ຉິຕໍ ປສວຕິ, ເຕນາປິ ອານຸຠາເວນ ຕວ ທານໍ ອນຸປຈ຺ຉິນ຺ທນ຺ໂຕ ປຸຕ຺ຕທາຣາທໂຍ ໂປເສຫີຕິ ອນຸສາສິ, ຕໍ ສຸຕ຺ວາ ພ຺ຣາຫ຺ມໂຓ ເຕນ ວຸຕ຺ຕນິຍາເມເນວ ຠິກ຺ຂຸສງ຺ຆສ຺ສ ມຫາທານໍ ທທນ຺ໂຕ ສີລໍ ຣກ຺ຂນ຺ໂຕ ຈິຣໍ ວສິຕ຺ວາ ອປຣຠາເຄ ຕໂຕ ຈຸໂຕ ເທວໂລເກ ນິພ຺ພຕ຺ຕີຕິ.

໑໔.

ເອວໍ ນິຫີນາປີ ຘເນນ ສນ຺ໂຕ,

ທານນ຺ວຍໍ ເນວ ປຣິຈ຺ຈຊນ຺ຕິ;

ຕສ຺ມາ ຫິ ໂຠນ຺ໂຕ ສຕິ ເທຍ຺ຍຘມ຺ເມ,

ມາ ກຕ຺ຖ ທາເນສຸ ປມາທຠາວໍຕິ.

ໂມຣິຍພ຺ຣາຫ຺ມຓສ຺ສ ວຕ຺ຖຸໍ ຉຏ຺ຐມໍ.

໓໗. ປຸຕ຺ຕວຕ຺ຖຸມ຺ຫິ ອຍມານຸປຸພ຺ພີກຖາ

ເອກສ຺ມິໍ ກິຣ ສມເຍ ລງ຺ກາທີປວາສິໂນ ສຏ຺ຐິມຕ຺ຕາ ຠິກ຺ຂູ ຊຍມຫາໂພຘິໍ ວນ຺ທິຕຸກາມາ ເອກໂຕ ມນ຺ເຕຕ຺ວາ ມຫາຕິຕ຺ເຖນ ນາວໍ ອາຣຸຍ຺ຫ ຊມ຺ພຸທີປໍ ປຕ຺ວາ ຕາມລິຕ຺ຕິປຏ຺ເຐເນ [ຕມລິຕ຺ຕປຏ຺ຏເນ ອິຕິກຕ຺ຖຈິ] ໂອຕຣິຕ຺ວາ ອນຸກ຺ກເມນ ປາຏລິປຸຕ຺ຕນຄຣໍ ປາປຸຓິໍສຸ. ອຖ ຕສ຺ມິໍ ນຄເຣ ປິຓ຺ຑາຍ ຈຣນ຺ເຕ ເຕ ຠິກ຺ຂູ ເອໂກ ທຸຄ຺ຄຕມນຸສ຺ໂສ ທິສ຺ວາ ຈິເຣນ [ຈິເຣນາຫໍທິຏ຺ຐາ ອິຕິສພ຺ພຕ຺ຖ] ມຍາ ທິຏ຺ຐາ ພຸທ຺ຘປຸຕ຺ຕາຕິ ໂສມນສ຺ໂສ ຠຣິຍໍ ປກ຺ໂກສິຕ຺ວາ ຠທ຺ເທ ອິເມສໍ ອຍ຺ຍານໍ ທານໍ ທາຕຸກາໂມມ຺ຫິ, ປຸພ຺ເພ ໂນ ອກຕປຸຎ຺ຎຕ຺ຕາ ອິທານິ ທຸຄ຺ຄຕາ ຊາຕາ, ອິເມສຸ ປຸຎ຺ຎກ຺ເຂຕ຺ເຕສຸ ພີຊໍ ໂນ ເຈ ໂຣເປສ຺ສາມ, ປຸນປິ ເອວເມວ ຠວິສ຺ສາມາຕິ ວຕ຺ວາ ກິໍ ເມ ເຄເຫ ເທຍ຺ຍຘມ຺ມໍ ອຕ຺ຖີຕິ ປຸຈ຺ຉິ. ສາ ຕໍ ສຸຕ຺ວາ ຆເຣ ໂນ ສາມິ ອຍ຺ຍານໍ ກິຎ຺ຈິ ທາຕພ຺ພໍ ນ ປສ຺ສາມິ. ອປິ ຈ ມມ ປຸຕ຺ຕໍ ມາເຣຕ຺ວາ ທານໍ ທາຕຸໍ ສກ຺ກາຕິ. ໂສ ຕສ຺ສາ ກຖໍ ສຸຕ຺ວາ ຠທ຺ເທ ປຸຕ຺ຕໍ ມາເຣຕ຺ວາ ກິໍ ທານໍ ເທມາຕິ ອາຫ. ຕາຍ ຕໍ ສຸຕ຺ວາ ສາມິ ກິໍ ນ ຊານາສິ, ປຸຕ຺ເຕ ໂນ ມເຕ ສນ຺ທິຏ຺ຐສມ຺ຠຕ຺ຕາ ຎາຕິມິຕ຺ຕສຸຫຊ຺ຊາ ຈ ອມ຺ຫາກໍ ສນ຺ຕິກໍ ອາຄຈ຺ຉານ຺ຕາ ກິຎ຺ຈິ ປຓ຺ຓາກາຣໍ ຄເຫຕ຺ວາ ອາຄຈ຺ຉນ຺ຕິ. ມຍໍ ເຕນ ປຓ຺ຓາກາເຣນ ທານໍ ທສ຺ສາມາຕິ ວຸຕ຺ເຕ ອຸປາສໂກ ສາຘຸ ຕຖາ ກໂຣຫີຕິ ມາຕຸຍາ ເອວ ຠາຣມກາສິ, ສາ ປຸຕ຺ຕໍ ມາເຣຕຸໍ ອວິສຫນ຺ຕີ ອາຫ. ຕຖາ ຫິ.

໑.

ກິຈ຺ຉາ ລທ຺ຘໍ ປິຍໍ ປຸຕ຺ຕໍ, ອມ຺ມມ຺ມາຕິ ປິຍໍ ວທໍ;

ສຸນີລເນຕ຺ຕໍ ສຸຠມຸໍ, ໂກ ປກ຺ກມິຕຸມິຈ຺ຉຕິ.

໒.

ມາຕຣາ ມາຣິຍນ຺ໂຕປິ, ມາຕຣເມວ ໂຣທຕິ;

ມາເຣຕຸໍ ຕໍ ນ ສກ຺ໂກມິ, ຫທຍໍ ເມ ປເວຘຕີຕິ.

ເອວຎ຺ຈ ປນ ວຕ຺ວາ ອຫໍ ສາມິ ນ ສກ຺ໂກມິ ປຸຕ຺ຕໍ ມາເຣຕຸໍ. ຕ຺ວໍ ມາເຣຫີຕິ ປຸຕ຺ຕໍ ປິຕຸສນ຺ຕິກໍ ເປເສສິ. ອຖ ໂສປິ ຕໍ ມາເຣຕຸ ມສກ຺ໂກນ຺ໂຕ ເອວມາຫ. ວຸຕ຺ຕຎ຺ຫິ.

໓.

ຕາຍນ຺ຕິ ປິຕຸໂນ ທຸກ຺ຂໍ, ປຸຕ຺ຕາ ປຸຕ຺ຕາຕິ ກິຕ຺ຕິຕາ;

ປິຕຸ ທຸກ຺ຂໍ ສຸຂໍ ປຸຕ຺ຕາ, ທາຍາທາ ໂຫນ຺ຕິ ສພ຺ພທາ.

໔.

ຕສ຺ມາ ເມ ສທິສໍ ປຸຕ຺ຕໍ, ປິລ຺ລກໍ ມຎ຺ຊຸຠາສນໍ;

ນ ສກ຺ໂກມິ ອຫໍ ຠທ຺ເທ, ຊີວິຕາ ຕໍ ວິໂຍຊິຕຸໍ.

໕.

ອຍສຎ຺ຈ ອກິຕ຺ຕິຎ຺ຈ, ປປ຺ໂປຕິ ປຸຕ຺ຕຆາຕໂກ;

ປາຓາຕິປາຕກມ຺ມມ຺ປິ, ກາມໍ ໂສ ຜຸສເຕ ນໂຣຕິ.

ເອວຎ຺ຈ ປນ ວຕ຺ວາ ໂສ ຕ຺ວເມວ ຕວ ປຸຕ຺ຕໍ ມາເຣຫີຕິ ເປເສສິ, ເອວໍ ເຕນ ວຸຕ຺ເຕ ປຸຕ຺ຖສ຺ສ ມາຣປາຓູປາຍໍ ປຣິເຍສນ຺ຕາ ເອວມາຫໍສຸ, ອມ຺ເຫ ປນິມໍ ມາເຣຕຸໍ ນ ສກ຺ໂກມິ, ອມ຺ຫາກໍ ປຈ຺ຉາເຄເຫ ມຫນ຺ໂຕ ວມ຺ມິໂກ ອຕ຺ຖິ, ຕສ຺ມິໍ ເອໂກ ນາຄຣາຊາ ປຏິວສຕິ. ກຸມາຣໍ ຕຕ຺ຖ ເປເສສ຺ສາມ, ໂສ ຕໍ ຑສິຕ຺ວາ ມາເຣສ຺ສຕີຕິ. ອິຈ຺ເຈເຕ ເອໂສ ໂຂ ອຸປາໂຍ ເອວາຕິ ຈິນ຺ເຕຕ຺ວາ ກຸມາຣໍ ປກ຺ໂກສິຕ຺ວາ ອຎ຺ຈນາ ວລິວລຍາທີຫິ ມຓ຺ເຑຕ຺ວາ ຕສ຺ສ ຫຕ຺ເຖ ເຄຓ຺ຑຸໍ [ເຕຓ຺ຑຸໍ ອິຕິສພ຺ພຕ຺ຖ] ຐເປຕ຺ວາ ຕາຕ ປຈ຺ຉາເຄເຫ ວມ຺ມິກສມີປໍ ຄນ຺ຕ຺ວາ ກີຬາຕິ ເປເສສຸໍ. ຕໂຕ ທາຣໂກ ຄນ຺ຕ຺ວາ ເຄຓ຺ຑຸເກນ ກີຬນ຺ໂຕ ວມ຺ມິກພິເລ ເຄຓ຺ຑຸກໍ ປາເຕສິ. ອຖ ໂສ ເຄຓ຺ຑຸກໍ ຄຓ຺ຫິສ຺ສາມີຕິ ວມ຺ມິກສຸສິເຣ ຫຕ຺ຖໍ ປເວເສສິ. ຕໂຕ ສປ຺ໂປ ກຸຊ຺ຌິຕ຺ວາ ສຸສູຕິສທ຺ທໍ ກໂຣນ຺ໂຕ ມຫນ຺ຕໍ ຜຓໍ ກຕ຺ວາ ພິລໂຕ ສີສໍ ອຸກ຺ຂິປິຕ຺ວາ ໂອໂລເກນ຺ໂຕ ອຏ຺ຐາສິ ກຸມາຣສ຺ສ ຫຕ຺ຖໂຕ ປຣິຄລິຕປາສໍວິຍ. ອຖສ຺ສ ກຸມາໂຣ ກິຎ຺ຈິ ອຊານນ຺ໂຕ ສປ຺ປສ຺ສ ຄີວໍ ທຬ຺ຫໍ ຄຓ຺ຫິ. ອຖສ຺ສ ມາຕາປິຕຸນ຺ນໍ ສທ຺ຘາພເລນ ນາຄຣາຊາ ກຸມາຣສ຺ສ ກຣຕເລ ອຏ຺ຐໍສໍ ອິຈ຺ຉາທາຍກໍ ກຓ຺ຐມຓິຣຕນໍ ປາເຕສິ. ກຸມາຣສ຺ສ ມາຕາປິຕໂຣ ທ຺ວາຣໍ ນິສ຺ສາຍ ຐິຕາ ຕສ຺ສ ກິຣິຍໍ ໂອໂລເກນ຺ໂຕ ຕໍ ມຓິຣຕນໍ ທິສ຺ວາ ສີຆໍ ຄນ຺ຕ຺ວາ ປຸຕ຺ຕໍ ອຸກ຺ຂິປິຕ຺ວາ ຫຕ຺ຖໂຕ ມຓິຣຕນໍ ຄຓ຺ຫິໍສຸ. ຕໂຕ ເຕ ຕໍ ມຓິຣຕນໍ ປຣິສຸທ຺ຘາສເນ ຐເປຕ຺ວາ ອຸປຈາຣໍ ກຕ຺ວາ ອມ຺ຫາກໍ ອິທຎ຺ຈິທຎ຺ຈ ເທຖາຕິ ອພ຺ຠຸກ຺ກິຣິໍສຸ. ອຖ ເຕ ມຓິຣຕນານຸຠາເວນ ເຄຫທ຺ວາເຣ ມຫນ຺ຕໍ ມຓ຺ຑປໍ ກາເຣຕ຺ວາ ວິຕານາທິນາ ມຓ຺ຑປໍ ອລງ຺ກຣິຕ຺ວາ ຠິກ຺ຂູນໍ ອາສນານິ ປຎ຺ຎາເປຕ຺ວາ ເຕ ສຏ຺ຐິມຕ຺ເຕ ຠິກ຺ຂູ ນິສີທາເປຕ຺ວາ ມຫາທານໍ ອທໍສຸ. ຕໂຕ ນຄຣວາສິໂນ ມຓິຣຕນານຸຠາວໍ ສຸຕ຺ວາ ສນ຺ນິປຕິໍສຸ. ອຖ ເຕ ເຕສໍ ມຊ຺ເຌ ອຕ຺ຕໂນ ສທ຺ຘາພເລນ ມຓິຣຕນສ຺ສ ລາຠໍ ປກາເສຕ຺ວາ ອິມຎ຺ຫິ ທານຕ຺ຖາເຍວ ປຣິຈ຺ຈຊ຺ຊາມາຕິ ເອກສ຺ມິໍ ຐາເນ ປຕິຏ຺ຐາເປຕ຺ວາ ເຕນານຸຠາເວນ ຍາວຊີວໍ ທານໍ ທທນ຺ຕາ ສີລໍ ຣກ຺ຂນ຺ຕາ ອາຍຸປຣິໂຍສາເນ ເທວໂລເກ ນິພ຺ພຕ຺ຕິໍສູຕິ.

໖.

ເຉຕ຺ວານ ເປມໍ ອປິ ອຕ຺ຣເຊສຸ,

ທທນ຺ຕິ ທານໍ ອິຘ ມານຸເສວໍ;

ນ ທທາຕິ ໂກ ນາມ ນໂຣ ສມິທ຺ໂຘ,

ທານຎ຺ຫິ ທານສ຺ສ ຜລໍ ສຣນ຺ໂຕຕິ.

ປຸຕ຺ຕວຕ຺ຖຸໍ ສຕ຺ຕມໍ.

໓໘. ເຕຠາຕິກມຘຸວາຓິຊການໍ ວຕ຺ຖຸມ຺ຫິ ອຍມານຸປຸພ຺ພີກຖາ

ອຕີເຕ ກິຣ ພາຣາຓສິຍໍ ເຕ ຠາຕິກາ ເອກໂຕ ຫຸຕ຺ວາ ມຘຸໍ ວິກ຺ກິຓນ຺ຕາ ປຸຕ຺ຕທາເຣ ໂປເສນ຺ຕິ. ຕໂຕ ເຕສຸ ເອໂກ ປຈ຺ຈນ຺ຕໍ ຄນ຺ຕ຺ວາ ມລຍວາສີນໍ [ມລວາສີນໍ ອິຕິປິກຕ຺ຖຈິ] ຫຕ຺ຖໂຕ ມຘຸໍ ກິຓິຕ຺ວາ [ວກ຺ກິຓິຕ຺ວາ ອິຕິສພ຺ພຕ຺ຖ] ຄຓ຺ຫາຕິ, ເອໂກ ຄຫິຕຄຫິຕມຘຸໍ ນຄຣໍ ອາຫຣຕິ. ເອໂກ ເຕນ ອາຫຏາຫຏມຘູນິ ພາຣາຓສິຍໍ ນິສີທິຕ຺ວາ ວິກ຺ກິຓາຕິ. ຕສ຺ມິໍ ສມເຍ ຄນ຺ຘມາທນປພ຺ພເຕ ເອໂກ ປຈ຺ເຈກພຸທ຺ໂຘ ວຓໂຣເຄນາ ຕຸໂຣ ອໂຫສິ. ອຖຎ຺ຎຕໂຣ ປຈ຺ເຈກພຸທ຺ໂຘ ຕສ຺ສ ມຘຸນາ ຜາສຸ ຠວິສ຺ສຕີຕິ ຎຕ຺ວາ ຄນ຺ຘມາທນປພ຺ພເຕເຍວ ຐິໂຕ ຈີວຣໍ ປາຣຸປິຕ຺ວາ ອາກາເສນາ ຄນ຺ຕ຺ວາ ນຄຣທ຺ວາເຣ ໂອຕຣິຕ຺ວາ ກຕ຺ຖ ມຘຸໍ ລຠາມີຕິ [ລພ຺ຠຕິ ອິຕິສພ຺ພຕ຺ຖ] ໂອໂລເກນ຺ໂຕ ອຏ຺ຐາສີ, ຕທາ ຕສ຺ມິໍປຣກຸເລ ຠຕິໍ ກຕ຺ວາ ຊີວມານາ ເອກາ ເຈຏິກາ ຆຏມາທາຍ ອຸທກຕ຺ຖໍ ຕິຕ຺ຖໍ ຄຈ຺ຉນ຺ຕີ ມຄ຺ຄາ ໂອກ຺ກມ຺ມ ຆຏໍ ຐເປຕ຺ວາ ວນ຺ທິຕ຺ວາ ເອກມນ຺ຕໍ ອຏ຺ຐາສິ, ຕທາ ປຈ຺ເຈກພຸທ຺ໂຘ ຠຄິນີ ເອຕ຺ຖ ຠິກ຺ຂາຍ ຈຣນ຺ຕານໍ ກຕຣສ຺ມິໍ ຐາເນ ມຘຸ ລພ຺ຠຕີຕິ ປຸຈ຺ຉິ. ສາ ຕສ຺ສ ກຖໍ ສຸຕ຺ວາ ມຘຸອາປຓສ຺ສ ປຎ຺ຎາຍນຏ຺ຐາເນ ຐຕ຺ວາ ຫຕ຺ຖໍ ປສາເຣຕ຺ວາ ເອສ ຠນ຺ເຕ ມຘຸອາປໂຓຕິ ທສ຺ເສຕ຺ວາ ຍຊ຺ຊາຍໍ ປຈ຺ເຈກພຸທ຺ໂຘ ອາປຓໂຕ ມຘຸໍ ນ ລຠຕິ. ມມ ນິວຕ຺ຖວຕ຺ຖກໍ ທຕ຺ວາປິ ມຘຸໍ ທສ຺ສາມີຕິ ຈິນ຺ເຕຕ຺ວາ ໂອໂລເກນ຺ຕີ ຕຕ຺ເຖວ ອຏ຺ຐາສິ, ອຖ ປຈ຺ເຈກພຸທ຺ໂຘ ອນຸປຸພ຺ເພນ ວິຈຣນ຺ໂຕ [ຈຣນ຺ໂຕ ອິຕິປິກຕ຺ຖຈິ] ມຘຸອາປຓໍ ສມ຺ປາປຸຓິ, ຕໂຕ ກຸຏິມ຺ພິໂກ [ກຸຏິມ຺ພ ໂກ ອິຕິປິກຕ຺ຖຈິ] ຕໍ ທິສ຺ວາ ຫຕ຺ຖໂຕ ປຕ຺ຕໍ ຄເຫຕ຺ວາ ອາຘາຣເກ ຐເປຕ຺ວາ ມຘຸຆຏໍ ອາທາຍ ປຕ຺ຕສ຺ສ ອຸປນາເມນ຺ໂຕ ສຫສາ ນິກ຺ກຸຊ຺ຊິ. ຕໂຕ ມຘຸ ປຕ຺ຕໍ ປູເຣຕ຺ວາ ອຸຕ຺ຕຣນ຺ໂຕ ປຸນ ຠູມິຍໍ ປຄ຺ຆຣິ. ຕໍ ທິສ຺ວາ ໂສມນສ຺ໂສ ວາຓິໂຊ ເອວໍ ປຕ຺ຖນມກາສິ.

ວຸຕ຺ຕຎ຺ຫິ ມຫາວໍເສ.

໑.

ຕຕ຺ຖ ປຕ຺ຕສ຺ສ ພຸທ຺ຘສ຺ສ, ວາຓິໂຊ ໂສ ປສາທວາ;

ວິສ຺ສນ຺ທຍນ຺ໂຕ ມຸຂໂຕ, ປຕ຺ຕປູຣໍ ມຘຸໍ ອທາ.

໒.

ປຸຓ຺ຓຎ຺ຈ ອຸປ຺ປຕີຕຎ຺ຈ, ປຕິຕຎ຺ຈ ມຫີຕເລ;

ທິສ຺ວາ ມຘຸໍ ປສນ຺ໂນ ໂສ, ເອວໍ ປຓິທຫີ ຕທາ.

໓.

ຊມ຺ພຸທີເປ ເອກຣຊ຺ຊໍ, ທາເນນາເນນ ໂຫຕຸ ເມ;

ອາກາເສ ໂຍຊເນ ອາຓາ, ຠູມິຍໍ ໂຍຊເນປິຕິ.

ເອວຎ຺ຈ ປນ ວຕ຺ວາ ປຕ຺ຕໍ ອທາສິ, ປຈ຺ເຈກພຸທ຺ໂຘ ປຕ຺ຕໍ ປຏິຄ຺ຄເຫຕ຺ວາ ຕຕ຺ເຖວ ຐິໂຕ.

໔.

ອິຈ຺ຉິຕໍ ປຕ຺ຖິຕໍ ຕຸຍ຺ຫໍ, ຂິປ຺ປເມວ ສມິຊ຺ຌຕຸ;

ປູເຣນ຺ຕຸ ຈິຕ຺ຖສໍກປ຺ປາ, ຈນ຺ໂທ ປຓ຺ຓຣໂສ ຍຖາ.

໕.

ອິຈ຺ຉິຕໍ ປຕ຺ຖິຕໍ ຕຸຍ຺ຫໍ, ສພ຺ພເມວ ສມິຊ຺ຌຕຸ;

ປູເຣນ຺ຕຸ ຈິຕ຺ຕສໍກປ຺ປາ, ມຓິໂຊຕິຣໂສ ຍຖາຕິ.

ວຕ຺ວາ ມງ຺ຄລໍ ວຑ຺ເຒຕ຺ວາ ອຄມາສິ. ອຖນ຺ຕຣາມຄ຺ເຄ ຐິຕາ ຆຏເຈຏິກາ ປຈ຺ເຈກພຸທ຺ຘາຠິມຸຂໍ ຄນ຺ຕ຺ວາ ມຘຸໍ ລຠິຕ຺ຖ ຠນ຺ເຕຕິ ປຸຈ຺ຉິ. ເຕນ ລທ຺ຘໍ ຠຄິນີຕິ ວຸຕ຺ເຕ ກິໍ ວຕ຺ວາ ໂສ ອທາສີຕິ ປຸຈ຺ຉິ. ປຈ຺ເຈກພຸທ຺ໂຘ ສພ຺ພໍ ກເຖສິ. ສາ ຕໍ ສຸຕ຺ວາ ໂຖກໍ ຠນ຺ເຕ ອິເຘວ ໂຫຖ ທາສິຍາ ອນຸຄ຺ຄຫຕ຺ຖາຍາຕິ ສີຆໍ ເຄຫໍ ຄນ຺ຕ຺ວາ ນິວຕ຺ຖປິໂຬຕິກາ ອຕ຺ຕໂນ ສາຏກໍ ໂຘວິຕ຺ວາ ອາຫຣິຕ຺ວາ ຈຸມ຺ພຏກໍ ກຕ຺ວາ ປຈ຺ເຈກພຸທ຺ຘສ຺ສ ອທາສິ, ຍທາ ໂສ ຠນ຺ເຕ ມຘຸທາຍໂກ ສກລຊມ຺ພຸທີເປ ເອກຣຊ຺ຊໍ ກາເຣຕິ. ຕທາຫໍ ຕສ຺ສ ອຄ຺ຄມເຫສີ ຠເວຍ຺ຍໍຕິ ວຕ຺ວາ ປຕ຺ຖນໍ ກໂຣນ຺ຕີເອວມາຫ.

໖.

ຍທາ ເຕ ມຘຸໂທ ຠນ຺ເຕ, ຠູຠຸໂຊ ໂຫຕິ ຠູຕເລ;

ຕສ຺ສ ເຫສ຺ສໍ ຕທາ ຠນ຺ເຕ, ປິຍາ ອຄ຺ຄມເຫສິກາ.

໗.

ສຸຣູປາຈ ສຸວາຓີຈ, ສຸຍສາ ສຸພ຺ພຕາ ສຸຠາ;

ອສ຺ສໍ ຕສ຺ສ ປິຍາຈາຖ, ມນາປາ ອິຈ຺ຉທາ [ອິຈ຺ຉິທາ ອິຕິປິກຕ຺ຖຈິ] ສທາຕິ.

ຕສ຺ສາປິ ຕທາ ປຈ຺ເຈກພຸທ຺ໂຘ ຕເຖວ ໂຫຕູຕິ ມງ຺ຄລໍ ວຕ຺ວາ ອາກາເສນ ຄນ຺ຘມາທນເມວ ອຄມາສິ, ອຖາປຣຠາເຄ ເຕ ຕໂຍປິ ເອກໂຕ ຫຸຕ຺ວາ ມຘຸໂລກນໍ ກໂຣນ຺ຕາ ຕໍ ມຘຸຆຏໍ ກຸຫິໍຕິ ປຸຈ຺ຉິໍສຸ, ໂສ ເຕນຕ຺ຕນາ ກຕກມ຺ມໍ ວຕ຺ວາ ສເຈ ຕຸມ຺ເຫ ຕສ຺ມິໍ ປຕ຺ຕິໍ ອນຸໂມເທຍ຺ຍາຖ, ຕໍ ສາຘຸ. ໂນ ເຈ. ມຘຸອຄ຺ຆນກໍ ມມ ຫຕ຺ຖໂຕ ຄຓ຺ຫຖາຕິ ວຕ຺ວາ ເຕຫິ ຕໂຕ ນ ໂນ ອຕ຺ໂຖ [ນໂນຫຕ຺ໂຖ ອິຕິສພ຺ພຕ຺ຖ] ມຘຸນາ, ກີທິສສ຺ເສຕໍ ອທາສີຕິ ວຸຕ຺ເຕ ຕໍ ສຸຕ຺ວາ ອິຕໂຣ ປຈ຺ເຈກພຸທ຺ຘາ ນາເມ ເຕ ຄນ຺ຘມາທເນ ວສນ຺ຕິ ກາສາວໍ ປາຣຸປິຕ຺ວາ ກຸເລ ກຸເລ ຠິກ຺ຂໍ ຈຣນ຺ຕິ, ສນ຺ໂຕ ເອເຕ ສີລວນ຺ຕາຕິ ກເຖສິ, ອຖ ເຕສຸ ເຊຏ຺ໂຐ ພ຺ຣາຫ຺ມຓຈຓ຺ຑາລກາປິ ກາສາວໍ ປຣິທຫິຕ຺ວາ ຈຣນ຺ຕິ. ນູນາຍໍ ຈຓ຺ຑາລໂກຕິ ມຎ຺ຎາມີຕິ ອາຫ, ມຊ຺ຌິໂມ ກຸຊ຺ຌິຕ຺ວາ ຕວ ປຈ຺ເຈກພຸທ຺ຘໍ ປຣສມຸທ຺ເທ ຂິປາຫີຕິ ອໂວຈ, ອຖ ເຕສໍ ກຖໍ ສຸຕ຺ວາ ມຘຸທາຍໂກ ມາ ໂຠ ຕຸມ຺ເຫ ອຣິຍານໍ ມເຫສກ຺ຂານໍ ມຫານຸຠາວານໍ ປຈ຺ເຈກພຸທ຺ຘານໍ ຜຣຸສໍ ກເຖຖ. ນິຣຍທຸກ຺ຂາ ນ ຠາຍຖາຕິອາທິນາ ອເນກາ ກາເຣນ ນິວາເຣຕ຺ວາ ເຕສໍ ຄຸຓໍ ປກາເສສິ, ຕໍ ສຸຕ຺ວາ ເຕ ອຸໂຠປິ ສາຘູຕິ ປສນ຺ນາຈິຕ຺ຕາ ອນຸໂມທິໍສຸ, ອປຣຠາເຄ ເຕ ກາລໍ ກຕ຺ວາ ເທວມນຸສ຺ເສສຸ ສໍສຣນ຺ຕາ ຕຕ຺ຖ ຕຕ຺ຖ ມຫາສມ຺ປຕ຺ຕິໂຍ ອນຸຠວິຕ຺ວາ ອມ຺ຫາກໍ ສຕ຺ຖຸ ປຣິນິພ຺ພາຓໂຕ ທ຺ວິນ຺ນໍ ວສ຺ສສຕານໍ ອຈ຺ຈເຍນ ອຕ຺ຕໂນ ອຕ຺ຕໂນ ສມ຺ປຕ຺ຕຏ຺ຐາເນ ນິພ຺ພຕ຺ຕິໍສຸ. ເຕນ ວຸຕ຺ຕໍ.

໘.

ອໂສໂກ ມຘຸໂທ ສນ຺ຘິ, ມິຕ຺ຕາເທວີ ຕຸ ເຈຏິກາ;

ຈຓ຺ຑາລວາທີ ນິຄ຺ໂຣໂຘ, ຕິສ຺ໂສ ໂສ ປາຣວາທິໂກຕິ.

ເຕສຸ ຈຓ຺ຑາລວາທີ ເຊຏ຺ຐວາຓິໂຊ ພິນ຺ທຸສາຣຣຎ຺ໂຎ ເຊຏ຺ຐປຸຕ຺ຕສ຺ສ ສຸມນຣາຊກຸມາຣສ຺ສ ປຸຕ຺ໂຕ ຫຸຕ຺ວາ ນິພ຺ພຕ຺ຕິ. ຕສ຺ສາຍມານຸປຸພ຺ພີກຖາ. ພິນ຺ທຸສາຣຣຎ຺ໂຎ ກິຣ ທຸພ຺ພລກາເລເຍວ ອໂສກກຸມາໂຣ ອຕ຺ຕນາ ລທ຺ຘໍ ອຸຊ຺ເຊນິຍາ ຣຊ຺ຊໍ ປຫາຍ ອາຄນ຺ຕ຺ວາ ສພ຺ພນຄຣໍ ອຕ຺ຕໂນ ຫຕ຺ຖຄຕໍ ກຕ຺ວາ ສຸມນຣາຊກຸມາຣໍ ອຄ຺ຄເຫສິ. ຕໍ ທິວສເມວ ສຸມນສ຺ສ ຣາຊກຸມາຣສ຺ສ ສຸມນາ ນາມ ເທວີ ປຣິປຸຓ຺ຓຄພ຺ຠາ ອໂຫສິ. ສາ ອຎ຺ຎາຕກເວເສນ ນິກ຺ຂມິຕ຺ວາ ອວິທູເຣ ອຎ຺ຎຕຣໍ ຈຓ຺ຑາລຄາມໍ ສນ຺ຘາຍ ຄຈ຺ຉນ຺ຕີ ເຊຏ຺ຐກຈຓ຺ຑາລສ຺ສ ເຄຫໂຕ ອວິທູເຣ ນິຄ຺ໂຣໂຘ ອຕ຺ຖິ, ຕສ຺ມິໍ ຣຸກ຺ເຂ ອຘິວຕ຺ຖາຍ ເທວຕາຍ ອິໂຕ ເອຫິ ສຸມເນຕິ ວທນ຺ຕິຍາ ສທ຺ທໍ ສຸຕ຺ວາ ຕສ຺ສາ ສມີປໍ ຄຕາ, ເທວຕາ ອຕ຺ຕໂນ ອານຸຠາເວນ ເອກໍ ສາລໍ ນິມ຺ມິຓິຕ຺ວາ ເອຕ຺ຖ ວສາຫີຕິ ປາທາສິ. ສາ ຕໍ ສາລໍ ປາວິສິ, ຄຕທິວເສເຍວ ສາ ປຸຕ຺ຕໍ ວິຊາຍິ. ສາ ຕສ຺ສ ນິຄ຺ໂຣຘເທວຕາຍ ປຣິຄ຺ຄຫິຕຕ຺ຕາ ນິຄ຺ໂຣໂຘຕ຺ເວວ ນາມໍ ອກາສິ. ເຊຏ຺ຐກຈຓ຺ຑາໂລ ທິຏ຺ຐທິວສໂຕປ຺ປຠຸຕິ ຕໍ ອຕ຺ຕໂນ ສາມິຘີຕຣໍ ວິຍ ມຎ຺ຎມາໂນ ນິພທ຺ຘວຕ຺ຕໍ ປຏ຺ຐເປສິ. ຣາຊຘີຕາ ຕຕ຺ຖ ສຕ຺ຕວສ຺ສານິ ວສິ, ນິຄ຺ໂຣຘກຸມາໂຣປິ ສຕ຺ຕວສ຺ສິໂກ ຊາໂຕ, ຕທາ ມຫາວຣຸຓຕ຺ເຖໂຣ ນາມ ເອໂກ ອຣຫາ ທາຣກສ຺ສ ເຫຕຸສມ຺ປທໍ ທິສ຺ວາ ວິຫຣມາໂນ ສຕ຺ຕວສ຺ສິໂກ ທານິ ທາຣໂກ. ກາໂລ ນໍ ປພ຺ພາເຊຕຸໍຕິ ຈິນ຺ເຕຕ຺ວາ ຣາຊຘີຕາຍ ອາໂຣຈາເປຕ຺ວາ ນິຄ຺ໂຣຘກຸມາຣໍ ປພ຺ພາເຊສິ, ກຸມາໂຣ ຂຸຣຄ຺ເຄເຍວ ອຣຫຕ຺ຕໍ ປາປຸຓິ. ເຕນ ວຸຕ຺ຕໍ ມຫາວໍເສ.

໙.

ຕໍ ມຫາວຣຸໂຓ ເຖໂຣ, ຕທາ ທິສ຺ວາ ກຸມາຣກໍ;

ອຸປນິສ຺ສຍສມ຺ປນ຺ນໍ, ອຣຫາ ປຸຈ຺ຉິ ມາຕຣໍ;

ປພ຺ພາເຊສິ ຂຸຣຄ຺ເຄ ໂສ, ອຣຫຕ຺ຕມປາປຸຓີຕິ.

ໂສ ກິຣ ເອກທິວສໍ ປາໂຕວ ສຣີຣໍ ປຏິຊຄ຺ຄິຕ຺ວາ ອາຈຣິຍຸປຊ຺ຌາຍວຕ຺ຕໍ ກຕ຺ວາ ປຕ຺ຕຈີວຣ ມາທາຍ ມາຕຸອຸປາສິກາຍ ເຄຫທ຺ວາຣໍ ຄຈ຺ຉາມີຕິ ນິກ຺ຂມິ. ມາຕຸນິວາສຏ຺ຐານຎ຺ຈສ຺ສ ທກ຺ຂິຓທ຺ວາເຣນ ນຄຣໍ ປວິສິຕ຺ວາ ນຄຣມຊ຺ເຌນ ຄນ຺ຕ຺ວາ ປາຈີນທ຺ວາເຣນ ນິກ຺ຂມິຕ຺ວາ ຄນ຺ຕພ຺ພໍ ໂຫຕິ. ເຕນ ຈ ສມເຍນ ອໂສໂກ ຘມ຺ມຣາຊາ ປາຈີນທິສາຠິມຸໂຂ ສີຫປຎ຺ຊເຣ ຈງ຺ກມຕິ. ຕໍ ຂຓໍເຍວ ນິຄ຺ໂຣໂຘ ຣາຊງ຺ຄຓໍ ສມ຺ປາປຸຓິ ສນ຺ຕິນ຺ທ຺ຣິໂຍ ສນ຺ຕມານໂສ ຍຸຄມຕ຺ຕໍ ເປກ຺ຂມາໂນ, ເຕນ ວຸຕ຺ຕໍ ເອກທິວສໍ ສີຫປຎ຺ຊເຣ ຐິໂຕ ອທ຺ທສ ນິຄ຺ໂຣຘໍ ສາມເຓຣໍ ຣາຊງ຺ຄເຓນ ຄຈ຺ຉນ຺ຕໍ ທນ຺ຕໍ ຄຸຕ຺ຕໍ ສນ຺ຕິນ຺ທ຺ຣິຍໍ ອິຣິຍາປຖສມ຺ປນ຺ນນ຺ຕິ. ທິສ຺ວາ ປນສ຺ສ ເອຕທໂຫສິ. ອຍໍ ຊໂນ ສພ຺ໂພປິ ວິກ຺ຂິຕ຺ຕຈິຕ຺ໂຕ ຠນ຺ຕມິຄປຏິຠາໂຄ. ອຍໍ ປນ ທຫຣໂກ ອວິກ຺ຂິຕ຺ໂຕ ອຕິວິຍສ຺ສ ອາໂລກິຕວິໂລກິຕໍ ສມ຺ມິຎ຺ຊນປສາຣຓຎ຺ຈ ໂສຠຕິ. ອທ຺ຘາ ເອຕສ຺ສພ຺ຠນ຺ຕເຣ ໂລກຸຕ຺ຕຣຘມ຺ໂມ ຠວິສ຺ສຕີຕິ ຣຎ຺ໂຎ ສຫ ທສ຺ສເນເນວ ສາມເຓເຣ ຈິຕ຺ຕໍ ປສີທິ, ເປມໍ ສຓ຺ຐຫິ, ກສ຺ມາ. ປຸພ຺ເພ ກິຣ ປຸຎ຺ຎກຣຓກາເລ ຣຎ຺ໂຎ ເຊຏ຺ຐກຠາຕາ ວາຓິຊໂກຍໍ.

໑໐.

ປຸພ຺ເພວ [ປຸພ຺ເພນ ອິຕິກຕ຺ຖຈິ] ສນ຺ນິວາເສນ, ປຈ຺ຈຸປ຺ປນ຺ນຫິເຕນ ວາ;

ເອວໍ ຕໍ ຊາຍເຕ ເປມໍ, ອຸປ຺ປລໍວ ຍໂຖທເກຕິ.

ອຖ ຣາຊາ ສຎ຺ຊາຕເປໂມ ສພຫຸມາໂນ ສາມເຓຣໍ ປກ຺ໂກສຖາຕິ ອມຈ຺ເຈ ເປເສສິ, ເຕ ອຕິຈິຣາຍນ຺ຕີຕິ ປຸນ ທ຺ເວ ຕໂຍ ເປເສສິ ຕຸຣິຕໍ ອາຄຈ຺ຉຕູຕິ. ສາມເຓໂຣ ອຕ຺ຕໂນ ປກຕິຍາ ເອວ ອຄມາສິ. ຣາຊາ ປຕິຣູປາສນໍ ຎຕ຺ວາ ນິສີທຖາຕິ ອາຫ. ໂສ ອິໂຕຈິໂຕ ຈ ວິໂລເກຕ຺ວາ ນຕ຺ຖິ ທານິ ອຎ຺ໂຎ ຠິກ຺ຂູຕິ ສມຸສ຺ສິຕເສຕຈ຺ຉຕ຺ຕໍ ຣາຊປລ຺ລງ຺ກໍ ອຸປສງ຺ກມິຕ຺ວາ ປຕ຺ຕໍ ຄຓ຺ຫນຕ຺ຖາຍ ຣຎ຺ໂຎ ອາກາຣໍ ທສ຺ເສສິ. ຣາຊາ ຕໍ ປລ຺ລງ຺ກສມີປໍ ຄຈ຺ຉນ຺ຕໍ ເອວ ທິສ຺ວາ ຈິນ຺ເຕສິ ອຊ຺ເຊວ ທານິ ອຍໍ ສາມເຓໂຣ ອິມສ຺ສ ເຄຫສ຺ສ ສາມິໂກ ຠວິສ຺ສຕີຕິ, ສາມເຓໂຣ ຣຎ຺ໂຎ ຫຕ຺ເຖ ປຕ຺ຕໍ ທຕ຺ວາ ປລ຺ລງ຺ກໍ ອຠິຣຸຫິຕ຺ວາ ນິສີທິ. ຣາຊາ ອຕ຺ຕໂນ ອຕ຺ຖາຍ ສມ຺ປາທິຕໍ ສພ຺ພໍ ຍາຄຸຂຊ຺ຊກຠຕ຺ຕວິກຕິໍ ອຸປນາເມສິ. ສາມເຓໂຣ ອຕ຺ຕໂນ ຍາປນມຕ຺ຕເມວ ສມ຺ປຏິຈ຺ຉິ. ຠຕ຺ຕກິຈ຺ຈາວສາເນ ຣາຊາ ອາຫ ສຕ຺ຖາຣາ ຕຸມ຺ຫາກໍ ທິນ຺ນໂອວາທໍ ຊານາຖາຕິ. ຊານາມິ ມຫາຣາຊ ເອກເທເສນາຕິ. ຕາຕ ມຍ຺ຫມ຺ປີ ນໍ ກເຖຫີຕິ. ສາຘຸ ມຫາຣາຊາຕິ ຣຎ຺ໂຎ ອນຸຣູປໍ ຘມ຺ມປເອທ ອປ຺ປມາທວຄ຺ຄໍ ອນຸໂມທນຕ຺ຖາຍ ອຠາສິ. ຣາຊາ ປນ ອປ຺ປມາໂທ ອມຕປທໍ, ປມາໂທ ມຈ຺ຈຸໂນ ປທໍຕິ ສຸຕ຺ວາວ ອຎ຺ຎາຕໍ ຕາຕ, ປຣິໂຍສາເປຫີຕິ ອາຫ. ສາມເຓໂຣ ອນຸໂມທນາ ວສາເນ ທ຺ວຕ຺ຕິໍສຘຸວຠຕ຺ຕານິ [ທ຺ວິຕ຺ຕິໍສຘຸຣຠຕ຺ຕານິ ອິຕິສພ຺ພຕ຺ຖ] ລຠິຕ຺ວາ ປຸນ ທິວເສ ທ຺ວຕ຺ຕິໍສຠິກ຺ຂູ ຄເຫຕ຺ວາ ຣາຊນ຺ໂຕປຸຣໍ ປວິສິຕ຺ວາ ຠຕ຺ຕກິຈ຺ຈ ມກາສິ. ຣາຊາ ອຎ຺ເຎປິ ທ຺ວຕ຺ຕິໍສຠິກ຺ຂູ ຕຸມ຺ເຫຫິ ສທ຺ຘິໍສ຺ເວ ຠິກ຺ຂໍ ຄຓ຺ຫນ຺ຕູຕິ ເອເຕເນວ ອຸປາເຍນ ທິວເສ ທິວເສ ວຑ຺ຒາເປນ຺ໂຕ ສຏ຺ຐິສຫສ຺ສານໍ ພ຺ຣາຫ຺ມຓປຣິພ຺ພາຊການໍ ຠຕ຺ຕໍ ອຸປຈ຺ຉິນ຺ທິຕ຺ວາ ອນ຺ໂຕນິເວສເນ ສຏ຺ຐິສຫສ຺ສານໍ ຠິກ຺ຂູນໍ ນິຈ຺ຈຠຕ຺ຕໍ ປຏ຺ຐເປສິ ນິຄ຺ໂຣຘຕ຺ເຖຣຄເຕເນວ ປສາເທນ. ນິຄ຺ໂຣຘຕ຺ເຖໂຣປິ ຣາຊານໍ ສປຣິສໍ ຕີສຸ ສຣເຓສຸ ປຎ຺ຈສຸ ສີເລສຸ ປຕິຏ຺ຐາເປຕ຺ວາ ພຸທ຺ຘສາສເນ ໂປຖຸຊ຺ຊນິເກນ ປສາເທນ ອຈລປ຺ປສາທໍ ກຕ຺ວາ ປຕິຏ຺ຐາເປສິ. ຣາຊາປິ ອໂສກາຣາມໍ ນາມ ມຫາວິຫາຣໍ ກາຣາເປຕ຺ວາ ສຏ຺ຐິສຫສ຺ສານໍ ຠິກ຺ຂູນໍ ນິຈ຺ຈຠຕ຺ຕໍ ປຏ຺ຐເປສິ. ສກລຊມ຺ພຸທີເປ ຈຕຸຣາສີຕິຍາ ນຄຣສຫສ຺ເສສຸ ຈຕຸຣາສີຕິວິຫາຣສຫສ຺ສານິ ກາຣາເປສິ. ເຕນ ວຸຕ຺ຕໍ.

໑໑.

ຈຓ຺ຑາລວາທິໂທເສນ,

ຊາໂຕ ຈຓ຺ຑາລຄາມເກ;

ປຕ຺ຕານຸໂມທນາ ປາກາ,

ອາເສ ໂສ [ອເສໂສ ອິຕິປິກຕ຺ຖຈິ] ຫິ ອນາສໂວຕິ.

ອຍໍ ນິຄ຺ໂຣຘຕ຺ເຖຣສ຺ສ ກຖານໂຍ.

ມຘຸທາຍໂກ ປນ ວາຓິໂຊ ເທວໂລກໂຕ ຈວິຕ຺ວາ ປຸປ຺ຜປຸເຣ ຣາຊກຸເລ ອຸປ຺ປຊ຺ຊິຕ຺ວາ ປິຍທາໂສ ນາມ ກຸມາໂຣ ຫຸຕ຺ວາ ຉຕ຺ຕໍ ອຸສ຺ສາເປຕ຺ວາ ສກລຊມ຺ພຸທີເປ ເອກຣຊ຺ຊໍ ອກາສິ. ກຖໍ.

ພິນ຺ທຸສາຣຣາຊສ຺ສ ເອກສຕປຸຕ຺ຕາ ອເຫສຸໍ. ເຕ ສພ຺ເພ ອໂສໂກ ອຕ຺ຕນາ ສທ຺ຘິໍ ເອກມາຕິກໍ ຕິສ຺ສກຸມາຣໍ ຐເປຕ຺ວາ ຆາເຕສິ. ຆາເຕນ຺ໂຕ ຈຕ຺ຕາຣິ ວສ຺ສານິ ອນຠິສິຕ຺ໂຕວ ຣຊ຺ຊໍ ກາເຣຕ຺ວາ ຈຕຸນ຺ນໍ ວສ຺ສານໍ ອຈ຺ຈເຍນ ຕຖາຄຕສ຺ສ ປຣິນິພ຺ພາຓໂຕ ທ຺ວິນ຺ນໍ ວສ຺ສສຕນໍ ອຸປຣິ ອຏ຺ຐາຣສເມ ວສ຺ເສ ສກລຊມ຺ພຸທີເປ ເອກຣຊ຺ຊາຠິເສກໍ ປາປຸຓິ. ອຖ ຕໍ ສກລຊມ຺ພຸທີເປ ຈຕຸຣາສີຕິນຄຣສຫສ຺ເສ ຣາຊາໂນ ອາຄນ຺ຕ຺ວາ ອຸປຏ຺ຐຫິສ຺ສນ຺ຕິ. ຕິຓ຺ຓໍ ອຸຕູນໍ ອນຸຈ຺ຉວິກາ ຕໂຍ ປາສາທາ ອເຫສຸໍ. ເອໂກ ມຫາສປ຺ປິໂກ, ເອໂກ ໂມຣຄີໂວ, ເອໂກ ມງ຺ຄໂລ ນາມ, ເຕສຸ ເນກນາຏກສຫສ຺ສປຣິວຸໂຕ ປຏິວສຕິ. ຍາສ຺ສ ມຘຸອາປຓໍ ທສ຺ເສສິ, ສາ ອສນ຺ຘິມິຕ຺ຕາ ນາມ ເທວຈ຺ຉຣປຣິຠາຄາ ຣາຊຘີຕາ ຫຸຕ຺ວາ ສຏ຺ຐິສຫສ຺ສານໍ ອິຕ຺ຖີນໍ ເຊຏ຺ຐິກາ ຘມ຺ມາໂສກຣຎ຺ໂຎ ອຄ຺ຄມເຫສີ ອໂຫສິ. ອຠິເສການນ຺ຕຣໍ ຕສ຺ສ ອິມາ ຣາຊິທ຺ຘິໂຍ ອາຄຕາ, ປຖວິຍາ ຈ ເຫຏ຺ຐາ ໂຍຊນປ຺ປມາເຓ ອາຓາ ປວຕ຺ຕຕິ. ຕຖາ ອຸປຣິ ອາກາເສ. ອໂນຕຕ຺ຕທຫໂຕ ອຏ຺ຐຫິ ກາເຊຫິ ໂສຬສປານີຍຆເຏ ທິວເສ ທິວເສ ເທວຕາ ອາຫຣນ຺ຕິ. ຍໂຕ ສາສເນ ອຸປ຺ປນ຺ນສທ຺ໂຘ ຫຸຕ຺ວາ ອຏ຺ຐຆເຏ ຠິກ຺ຂຸສງ຺ຆສ຺ສ ອທາສິ. ທ຺ເວ ຆເຏ ສຏ຺ຐິມຕ຺ຕານໍ ເຕປິຏກຠິກ຺ຂູນໍ ທ຺ເວ ຆເຏ ອຄ຺ຄມເຫສິຍາ ອສນ຺ຘິມິຕ຺ຕາຍ. ຈຕ຺ຕາໂຣ ຆເຏ ອຕ຺ຕນາ ປຣິຠຸຎ຺ຈິ ເທວຕາ [ເທວຕາເອວໍ ອິຕິສພ຺ພຕ຺ຖ], ເອວ ຫິມວນ຺ຕໂຕ ນາຄລຕາທນ຺ຕກຏ຺ຐໍ ສິນິທ຺ຘໍ ມຸທຸກໍ ຣສວນ຺ຕໍ ທິວເສ ທິວເສ ອາຫຣນ຺ຕິ, ເຕນ ຣຎ຺ໂຎ ຈ ມເຫສິຍາ ຈ ໂສຬສນ຺ນໍ ນາຏກສຫສ຺ສານຎ຺ຈ ສຏ຺ຐິມຕ຺ຕານຎ຺ຈ ຠິກ຺ຂຸສຫສ຺ສານໍ ເທວສິກໍ ທນ຺ຕໂປຓກິຈ຺ຈໍ ນິປ຺ຜຊ຺ຊຕິ. ເທວສິກເມວສ຺ສ ເທວຕາ ອຄທາມລກໍ ອຄທຫຣີຏກໍ ສຸວຓ຺ຓວຓ຺ຓຎ຺ຈ ຄນ຺ຘຣສສມ຺ປນ຺ນໍ ອມ຺ພປກ຺ກໍ ອາຫຣນ຺ຕິ. ຉທ຺ທນ຺ຕທຫໂຕ ປຎ຺ຈວຓ຺ຓໍ ນິວາສນປາຣຸປນໍ ປີຕກວຓ຺ຓໍ ຫຕ຺ຖປຸຎ຺ຉນກປຏໍ [ຫຕ຺ຖປຸຈ຺ຉນກປຏ຺ຏໍ ອິຕິສພ຺ພຕ຺ຖ] ທິພ຺ພຎ຺ຈ ປານໍ ອາຫຣນ຺ຕິ. ເທວສິກເມວສ຺ສ ອນຸເລປນຄນ຺ຘໍ ປາຣຸປນຕ຺ຖາຍ ອສຸຕ຺ຕມຍິກໍ ສຸມນປຸປ຺ຜປຏໍ ມຫາຣຫຎ຺ຊ ອຎ຺ຊນໍ ນາຄຠວນໂຕ ນາຄຣາຊາໂນ ອາຫຣນ຺ຕິ. ຉທ຺ທນ຺ຕທຫໂຕເຍວ ອຸຏ຺ຐິຕສ຺ສ ສາລິໂນ ນວວາຫສຫສ຺ສນິ ທິວເສ ທິວເສ ສຸວາ ອາຫຣນ຺ຕິ. ເຕ ມູສິກາ ນິຕ຺ຖຸສການິ ກໂຣນ຺ຕິ. ເອໂກປິ ຂຓ຺ຑຕຓ຺ຑຸໂລ ນາໂຫສິ. ຣຎ຺ໂຎ ສພ຺ພຏ຺ຐາເນສຸ ອຍເມວ ຕຓ຺ຑຸໂລ ປຣິໂຠຄໍ ຄຈ຺ຉຕິ. ມຘຸມກ຺ຂິກາ ມຘຸໍ ກໂຣນ຺ຕິ. ກມ຺ມາຣສາລາສຸ ອຈ຺ຉາ ກູຏໍ ປຫຣນ຺ຕິ. ກຣວີກສກຸຓາ ອາຄນ຺ຕ຺ວາ ມຘຸຣສ຺ສຣໍ ວິກູເຊນ຺ຕາ ຣຎ຺ໂຎ ພລິກມ຺ມໍ ກໂຣນ຺ຕິ. ອິມາຫິ ອິທ຺ຘີຫິ ສມນ຺ນາຄໂຕ ຣາຊາ ເອກທິວສໍ ສຸວຓ຺ຓສງ຺ຂລິກພນ຺ຘນໍ ເປເສຕ຺ວາ ຈຕຸນ຺ນໍ ພຸທ຺ຘານໍ ອຘິຄຕຣູປທສ຺ສນໍ ກປ຺ປາ ຍຸກໍ ມຫາກາລນາຄຣາຊານໍ ອານຍິຕ຺ວາ ເສຕຈ຺ຉຕ຺ຕສ຺ສ ເຫຏ຺ຐາ ມຫາຣເຫ ປລ຺ລງ຺ເກ ນິສີທາເປຕ຺ວາ ອເນກສຕ ວຓ຺ເຓຫິ ຊລຊຖລຊປຸປ຺ເຜຫິ ສຸວຓ຺ຓປຸປ຺ເຜຫິ ຈ ປູຊໍ ກຕ຺ວາ ສພ຺ພາ ລງ຺ກາຣປຕິມຓ຺ຑິເຕຫິ ໂສຬສຫິ ນາຏກສຫສ຺ເສຫິ ສມນ຺ຕໂຕ ປຣິກ຺ຂິປິຕ຺ວາ ອນນ຺ຕຎາຓສ຺ສ ຕາວ ເມ ສທ຺ຘມ຺ມວຣຈກ຺ກວຕ຺ຕິໂນ ສມ຺ມາສມ຺ພຸທ຺ຘສ຺ສ [ສມ຺ມາສມ຺ພຸທ຺ຘຣູປໍ ອິຕິສພ຺ພຕ຺ຖ] ຣູປໍ ອິເມສໍ ອກ຺ຂີນໍ ອາປາຖໍ ກໂຣຫີຕິ ວຕ຺ວາ ເຕນ ນິມ຺ມິຕໍ ສກລສຣີເຣ ວິປ຺ປກິຓ຺ຓປຸຎ຺ຎປ຺ປຠາວນິພ຺ພຕ຺ຕາສີຕິ ອນຸພ຺ຍຎ຺ຊນປຕິມຓ຺ຑິຕ ທ຺ວຕ຺ຕິໍສ ມຫາປຸຣິສລກ຺ຂຓ ສສ຺ສິຣີກຕາຍ ວິກຈກມລຸປ຺ປລປຸຓ຺ຑຣີກປຕິມຓ຺ຑິຕມິວ ສລິລຕລໍ ຕາຣາຄຓຣໍສິຊາລວິສຣວິປ຺ຜຸຣິຕໂສຠາສມຸຊ຺ຊລມິວ ຄຄນຕລໍ ນີລປີຕໂລຫິຕາ ທິເຠທໍ ວິຈິຕ຺ຕວຓ຺ຓຣໍສິວິນທ຺ຘພ຺ຍາມປ຺ປຠາປຣິກ຺ເຂປວິລາສິຕາຍ ສຎ຺ຈ຺ຍາປ຺ປຠານຸຣາຄອິນ຺ທຘນຸວິຊ຺ຊຸລ຺ລຕາປຣິກ຺ຂິຕ຺ຕມິວ ກຓກຄິຣິສິຂຣໍ ນານາວິຣາຄວິມລເກຕຸມາລາສມຸຊ຺ຊລິຕຈາຣຸມຕ຺ຖກໂສຠນໍ ນຍນຣສາຍນມິວ ຈ ພ຺ຣຫ຺ມເທວມນຸຊນາຄຍກ຺ຂຄຓານໍ ພຸທ຺ຘຣູປໍ ປສ຺ສນ຺ໂຕ ສຕ຺ຕທິວສານິ ອກ຺ຂິປູຊໍ ນາມ ອກາສິ. ຣາຊາ ກິຣ ອຠິເສກໍ ປາປຸຓິຕ຺ວາ ຕີຓິເຍວ ສໍວຈ຺ຉຣານິ ພາຫິຣກປາສຓ຺ຑໍ ປຣິຄຓ຺ຫິ, ຈຕຸຕ຺ເຖ ສໍວຈ຺ຉເຣ ພຸທ຺ຘສາສເນ ປສີທິ, ຕສ຺ສ ປນ ປິຕາ ພິນ຺ທຸສາໂຣ ພ຺ຣາຫ຺ມຓຠຕ຺ໂຕ ອໂຫສິ. ໂສ ພ຺ຣາຫ຺ມຓານຎ຺ຈ ພ຺ຣາຫ຺ມຓຊາຕິປາສຓ຺ຑານໍ ປຓ຺ຑຣງ຺ຄປຣິພ຺ພາຊການຎ຺ຈ ສຏ຺ຐິສຫສ຺ສມຕ຺ຕານໍ ນິຈ຺ຈຠຕ຺ຕໍ ປຏ຺ຐເປສິ. ອໂສໂກປິ ປິຕຣາ ປວຕ຺ຕິຕໍ ທານໍ ອຕ຺ຕໂນ ອນ຺ໂຕປຸເຣ [ອນ຺ເຕປຸເຣ ອິຕິສພ຺ພຕ຺ຖ] ຕເຖວ ທທມາໂນ ເອກທິວສໍ ສີຫປຎ຺ຊເຣ ຐິໂຕ ເຕ ອຸປສມປຣິພາຫິເຣນ ອາຈາເຣນ ຠຸຎ຺ຊມາເນ ອສໍຍຕິນ຺ທ຺ຣິເຍ ອວິນີຕອິຣິຍາປເຖ ທິສ຺ວາ ຈິນ຺ເຕສິ, ອີທິສໍ ທານໍ ອຸປປຣິກ຺ຂິຕ຺ວາ ຍຸຕ຺ຕຏ຺ຐາເນ ທາຕຸໍ ວຏ຺ຏຕີຕິ. ເອວໍ ຈິນ຺ເຕຕ຺ວາ ອມຈ຺ເຈ ອາຫ, ຄຈ຺ຉຖ ຠເຓ ອຕ຺ຕໂນ ອຕ຺ຕໂນ ສາຘຸສມ຺ມເຕ ສມຓພ຺ຣາຫ຺ມເຓ ອນ຺ໂຕປຸຣໍ ອຠິຫຣຖ ທານໍ ທສ຺ສາມີຕິ, ອມຈ຺ຈາ ສາຘຸ ເທວາຕິ ຣຎ຺ໂຎ ປຏິສ຺ສຸຕ຺ວາ ເຕ ເຕ ປຓ຺ຑຣງ຺ຄປຣິພ຺ພາຊກາ ຊີວກ ນິຄຓ຺ຐາທໂຍ ອາເນຕ຺ວາ ອິເມ ມຫາຣາຊ ອມ຺ຫາກໍ ອຣຫນ຺ໂຕຕິ ອາຫໍສຸ, ອຖ ຣາຊາ ອນ຺ໂຕປຸເຣ ອຸຈ຺ຈາວຈານິ ອາສນານິ ປຎ຺ຎາເປຕ຺ວາ ອາຄຈ຺ຉນ຺ຕູຕິ ວຕ຺ວາ ອາຄຕາຄເຕ ອາຫ ອຕ຺ຕໂນ ອນຸຣູເປ ອາສເນ ນິສີທຖາຕິ, ເອກຈ຺ເຈ ຠທ຺ທປີຐເກສຸ ເອກຈ຺ເຈ ຜລກປີຐເກສຸ ນິສີທິໍສຸ, ຕໍ ທິສ຺ວາ ຣາຊາ ນຕ຺ຖິ ເອເຕສໍ ອນ຺ໂຕ ສາໂຣຕິ ຎຕ຺ວາ ເຕສໍ ອນຸຣູປໍ ຂາທນີຍໂຠຊນີຍໍ ທຕ຺ວາ ອຸຍ຺ໂຍເຊສິ. ເອວໍ ຄຈ຺ຉນ຺ເຕ ກາເລ ເອກທິວສໍ ສີຫປຎ຺ຊເຣ ຐິໂຕ ນິຄ຺ໂຣຘສາມເຓຣໍ ທິສ຺ວາ ຕສ຺ມິໍ ຄເຕນ ປສາເທນ ພຸທ຺ຘສາສເນ ປສນ຺ໂນ ສຏ຺ຐິສຫສ຺ສມຕ຺ເຕ ປາສຓ຺ຑິເຍ ອປເນຕ຺ວາ ສຏ຺ຐິສຫສ຺ສມຕ຺ເຕ ຠິກ຺ຂູ ໂຠເຊນ຺ໂຕ ພຸທ຺ຘສາສເນ ປສີທິຕ຺ວາ ອໂສກາຣາມໍ ກາເຣຕ຺ວາ ຕຕ຺ຖ ເຕ ວສາເປນ຺ໂຕ ເອກທິວສໍ ອໂສກາຣາເມ ສຏ຺ຐິສຫສ຺ສຠິກ຺ຂູນໍ ທານໍ ທຕ຺ວາ ເຕສໍ ມຊ຺ເຌ ນິສຊ຺ຊ ສງ຺ຆໍ ຈຕູຫິ ປຈ຺ຈເຍຫິ ປວາເຣຕ຺ວາ ອິມໍ ປຎ຺ຫໍ ປຸຈ຺ຉິ, ຠນ຺ເຕ ຠຄວຕາ ເທສິຕຘມ຺ໂມ ນາມ ກິຕ຺ຕໂກ ໂຫຕີຕິ, ມຫາຣາຊ ນວ ອງ຺ຄານິ, ຂນ຺ຘໂຕ ຈຕຸຣາສີຕິຘມ຺ມກ຺ຂນ຺ຘສຫສ຺ສານີຕິ. ຣາຊາ ຘມ຺ເມ ປສີທິຕ຺ວາ ເອເກກໍ ຘມ຺ມກ຺ຂນ຺ຘໍ ເອເກກວິຫາເຣນ ປູເຊສ຺ສາມີຕິ ເອກທິວສເມວ ຉນ຺ນວຸຕິໂກຏິຂນໍ ວິສ຺ສຊ຺ເຊຕ຺ວາ ອມຈ຺ເຈ ອາຓາເປສິ, ເອກເມກສ຺ມິໍ ນຄເຣ ເອກເມກໍ ວິຫາຣໍ ກາເຣນ຺ຕາ ຈຕຸຣາສີຕິຍາ ນຄຣສຫສ຺ເສສຸ ຈຕຸຣາສີຕິວິຫາຣສຫສ຺ສານິ ກາຣາເປຖາຕິ, ສຍຎ຺ຈ ອໂສກາຣາເມ ອໂສກມຫາວິຫາຣຕ຺ຖາຍ [ສຍໍຈອໂສກໂຫວິຫາຣຕ຺ຖາຍ ອິຕິປິກຕ຺ຖຈິ] ກມ຺ມໍ ປຏ຺ຐເປສິ, ສງ຺ໂຆ ອິນ຺ທຄຸຕ຺ຕຕ຺ເຖຣໍ ນາມ ມຫິທ຺ຘິກໍ ມຫານຸຠາວໍ ຂີຓາສວໍ ນວກມ຺ມາຘິຏ຺ຐາຍກໍ ອທາສິ, ເຖໂຣ ຍໍ ຍໍ ນ ນິຏ຺ຐາຕິ, ຕໍ ຕໍ ອຕ຺ຕໂນ ອານຸຠາເວນ ນິຏ຺ຐາເປສິ, ເອວໍປິຕີຫິ ສໍວຈ຺ຉເຣຫິ ວິຫາຣກມ຺ມໍ ນິຏ຺ຐາເປສິ, ເອກທິວສເມວ ສພ຺ພນຄເຣຫິ ປຓ຺ຓານິ ອາຄມິໍສຸ, ອມຈ຺ຈາ ຣຎ຺ໂຎ ອາໂຣເຈສຸໍ ນິຏ຺ຐິຕານິ ເທວ ຈຕຸຣາສີຕິມຫາວິຫາຣສຫສ຺ສານີຕິ. ອຖ ຣາຊາ ຠິກ຺ຂຸສງ຺ຆໍ ອຸປສງ຺ກມິຕ຺ວາ ຠນ຺ເຕ ມຍາ ຈຕຸຣາສີຕິວິຫາຣສຫສ຺ສານິ ກາຣິຕານິ, ຘາຕຸໂຍ ກຸໂຕ ລຈ຺ຉາມີຕິ ປຸຈ຺ຉິ, ມຫາຣາຊ ຘາຕຸນິຘານໍ ນາມ ອຕ຺ຖີຕິ ສຸໂຓມ, ນ ປນ ປຎ຺ຎາຍຕິ ອສຸກຏ຺ຐາເນຕິ. ຣາຊາ ຣາຊຄເຫ ເຈຕິຍໍ ຠິນ຺ທາເປຕ຺ວາ ຘາຕຸໍ ອປສ຺ສນ຺ໂຕ ປຏິປາກຕິກໍ ກາຣາເປຕ຺ວາ ຠິກ຺ຂຸຠິກ຺ຂຸຓິໂຍ ອຸປາສກອຸປາສິກາໂຍຕິ ຈຕສ຺ໂສ ປຣິສາ ຄເຫຕ຺ວາ ເວສາລິຍໍ ຄໂຕ. ຕຕ຺ຣາປິ ອລຠິຕ຺ວາ ກປິລວຕ຺ຖຸໍ ຄໂຕ, ຕຕ຺ຣາປິ ອລຠິຕ຺ວາ ຣາມຄາມໍ ຄໂຕ, ຣາມຄາເມ ນາຄາ ເຈຕິຍໍ ຠິນ຺ທິຕຸໍ ນາທໍສຸ. ເຈຕິເຍ ນິປຕິຕກຸທ຺ທາໂລ ຂຓ຺ຑາວຓ຺ຑໍ ໂຫຕິ, ເອວໍ ຕຕ຺ຣາປິ ອລຠິຕ຺ວາ ອລ຺ລກປ຺ປໍ ປາວໍ ກຸສິນາຣໍຕິ ສພ຺ພເຈຕິຍານິ ຠິນ຺ທິຕ຺ວາ ຘາຕຸໍ ອລຠິຕ຺ວາ ປຏິປາກຕິການິ ກຕ຺ວາ ຣາຊຄຫໍ ຄນ຺ຕ຺ວາ ຈຕສ຺ໂສ ປຣິສາ ສນ຺ນິປາຕາເປຕ຺ວາ ອຕ຺ຖິ ເກນຈິ ສຸຕປຸພ຺ພໍ ອສຸກຏ຺ຐາເນ ຘາຕຸນິຘານໍຕິ ປຸຈ຺ຉິ. ຕຕ຺ເຖໂກ ວີສໍວສ຺ສ ສຕິໂກ ເຖໂຣ ອສຸກຏ຺ຐາເນ ຘາຕຸນິຘານໍຕິ ນ ຊານາມິ, ມຍ຺ຫໍ ປນ ປິຕາມຫຕ຺ເຖໂຣ ມຍິ ສຕ຺ຕວສ຺ສິກາເລ ມາລາຈງ຺ໂຄຏກໍ ຄາຫາເປຕ຺ວາ ເອຫິ ສາມເຓຣ ອສຸກຄຈ຺ຉນ຺ຕເຣ ປາສາຓຖູໂປ ອຕ຺ຖິ. ຕຕ຺ຖ ຄຈ຺ຉາມາຕິ ຄນ຺ຕ຺ວາ ປູເຊຕ຺ວາ ອິມໍ ຐານໍ ອຸປຘາເຣຕຸໍ ວຏ຺ຏຕິ ສາມເຓຣາຕິ ອາຫ. ອຫໍ ເອຕເມວ ຊານາມິ ມຫາຣາຊາຕິ ອາຫ. ຣາຊາ ເອຕເທວ ຐານໍຕິ ວຕ຺ວາ ຄຈ຺ເຉ ຫຣາເປຕ຺ວາ ປາສາຓຖູປໍ ປໍສຸໍຈ ອປເນຕ຺ວາ ເຫຏ຺ຐາ ສຸຘາຠູມິໍ ອທ຺ທສ, ຕໂຕ ສຸຘາ ຈ ອິຏ຺ຐກາໂຍ ຈ ຫຣາເປຕ຺ວາ ອນຸປຸພ຺ເພນ ປຣິເວຓໍ ໂອຣຸຍ຺ຫ ສຕ຺ຕຣຕນວາລິກໍ ອສິຫຕ຺ຖານິ ຈ ກຏ຺ຐຣູປການິ ສມ຺ປຣິວຕ຺ຕນ຺ຕານິ ອທ຺ທສ, ໂສ ຍກ຺ຂທາສເກ ປກ຺ໂກສາເປຕ຺ວາ ພລິກມ຺ມໍ ກາຣາເປຕ຺ວາປິ ເນວ ອນ຺ຕໍ ປສ຺ສນ຺ໂຕ ເທວຕາ ນມສ຺ສມາໂນ ອຫໍ ອິມາ ຘາຕຸໂຍ ຄເຫຕ຺ວາ ຈຕຸຣາສີຕິວິຫາຣສຫສ຺ເສ ນິທຫິຕ຺ວາ ສກ຺ກາຣໍ ກໂຣມິ. ມາ ເມ ເທວຕາ ອນ຺ຕຣາຍໍ ກໂຣນ຺ຕູຕິ ອາຫ, ສກ຺ໂກ ເທວຣາຊາ ຈາຣິກໍ ຈຣນ຺ໂຕ ຕໍ ທິສ຺ວາ ວິສ຺ສກມ຺ມໍ ອາມນ຺ເຕຕ຺ວາ ຕາຕ ອໂສກຘມ຺ມຣາຊາ ຘາຕຸໂຍ ນີຫຣິສ຺ສາມີຕິ ປຣິເວຓໍ ໂອຕິຓ຺ໂຓ. ຄນ຺ຕ຺ວາ ກຏ຺ຐຣູປານິ ນີຫຣາເປຫີຕິ. ໂສ ປຎ຺ຈຈູລກຄາມທາຣກເວເສນ ຄນ຺ຕ຺ວາ ຣຎ຺ໂຎ ປຸຣໂຕ ຘນຸກຫຕ຺ໂຖ ຐຕ຺ວາ ຫາເຣມິ ມຫາຣາຊາຕິ ອາຫ, ຫຣ ຕາຕາຕິ ສຣໍ ຄເຫຕ຺ວາ ສນ຺ຘິມ຺ຫິເຍວ ວິຊ຺ຌິ, ສພ຺ພໍ ວິປ຺ປກິຣີຍິຕ຺ຖ, ອຖ ຣາຊາ ອາວິຎ຺ຊເນ [ອວິຎ຺ຈິເນ ອິຕິປິກຕ຺ຖຈິ] ພນ຺ຘກຸຎ຺ຈິກມຸທ຺ທິກໍ ຄຓ຺ຫິ, ມຓິກ຺ຂນ຺ຘໍ ປສ຺ສິຕ຺ວາ ອນາຄເຕ ທຬິທ຺ທຣາຊາໂນ ອິມໍ ມຓິໍ ຄເຫຕ຺ວາ ຘາຕູນໍ ສກ຺ກາຣໍ ກໂຣນ຺ຕູຕິ ປຓ຺ເຓ ອກ຺ຂຣານິ ທິສ຺ວາ ກຸຊ຺ຌິຕ຺ວາ ມາທິສານໍ ປນ ຣາຊູນໍ [ຣາຊານໍ ອິຕິສພ຺ພຕ຺ຖ] ທຬິທ຺ທຣາຊາຕິ ວຕ຺ຕຸໍ ອຍຸຕ຺ຕໍຕິ ປຸນປ຺ປຸນໍ ຆເຏຕ຺ວາ ທ຺ວາຣໍ ວິວຣິຕ຺ວາ ອນ຺ໂຕເຄຫໍ ປວິຏ຺ໂຐ ອຏ຺ຐາຣສວສ຺ສາຘິການໍ ທ຺ວິນ຺ນໍ ວສ຺ສສຕານໍ ອຸປຣິ ອາໂຣປິຕທີປາ ຕເຖວ ປຊ຺ຊລນ຺ຕິ, ນີລຸປ຺ປລປຸປ຺ຜານິ ຕໍຂຓໍເຍວ ອາຫຣິຕ຺ວາ ອາໂຣປິຕານິ ວິຍ ປຸປ຺ຜສນ຺ຖາໂຣ ຕໍ ຂຓໍ ສນ຺ຖໂຕ ວິຍ ຄນ຺ຘາ ຕໍ ມຸຫຸຕ຺ຕໍ ປິໍສິຕ຺ວາ ຐປິຕາ ວິຍ ອເຫສຸໍ. ຣາຊາ ສຸວຓ຺ຓປຏ຺ຏໍ ຄເຫຕ຺ວາ ອນາຄເຕ ປິຍທາໂສ ນາມ ກຸມາໂຣ ຉຕ຺ຕໍ ອຸສ຺ສາເປຕ຺ວາ ອໂສໂກ ນາມ ຘມ຺ມຣາຊາ ຠວິສ຺ສຕິ, ໂສ ອິມາ ຘາຕຸໂຍ ວິຕ຺ຖາຣິຕາ ກຣິສ຺ສຕີຕິ ວາເຈຕ຺ວາ ທິຏ຺ໂຐຫໍ ອຍ຺ເຍນ ມຫາກສ຺ສປຕ຺ເຖເຣນາຕິ ວຕ຺ວາ ວາມຫຕ຺ຖໍ ອາຠຸຊິຕ຺ວາ ທກ຺ຂິຓຫຕ຺ເຖນ ອປ຺ໂຜເຏສິ. ໂສ ຕສ຺ມິໍ ຐາເນ ປຣິຈຣຓກຘາຕຸມຕ຺ຕເມວ ຐເປຕ຺ວາ ເສສຘາຕຸໂຍ ສພ຺ພາ ຄເຫຕ຺ວາ ຘາຕຸຆຣໍ ປຸພ຺ເພ ປິຫິຕນເຍເນວ ປິທຫິຕ຺ວາ ສພ຺ພາ ຍຖາ ປກຕິຍາເຍວ ກາເຣຕ຺ວາ ອຸປຣິປາສາຓເຈຕິຍໍ ປຕິຏ຺ຐາເປຕ຺ວາ ຈຕຸຣາສີຕິຍາ ວິຫາຣສຫສ຺ເສສຸ ຘາຕຸໂຍ ປຕິຏ຺ຐາເປສິ. ອເຖກທິວສໍ ຣາຊາ ວິຫາຣໍ ຄນ຺ຕ຺ວາ ຠິກ຺ຂຸສໍຆໍ ວນ຺ທິຕ຺ວາ ເອກມນ຺ເຕ ນິສິນ຺ໂນ ຍທິ ຠນ຺ເຕ ຉນ຺ນວຸຕິໂກຏິຘນໍ ວິສ຺ສຊ຺ເຊຕ຺ວາ ຈຕຸຣາສີຕິວິຫາຣສຫສ຺ສານິສເຈຕິຍານິ ກາຣາເປຕ຺ວາປິ ອຫໍ ນ ທາຍາໂທ. ອຎ຺ໂຎ ໂກ ທາຍາໂທຕິ, ປຈ຺ຈຍທາຍໂກ ນາມ ຕ຺ວໍ ມຫາຣາຊ, ໂຍ ປນ ອຕ຺ຕໂນ ປຸຕ຺ຕຎ຺ຈ ຘີຕຣຎ຺ຈ ປພ຺ພາເຊຕິ, ອຍໍ ສາສເນ ທາຍາໂທ ນາມາຕິ ເອວໍ ວຸຕ຺ເຕ ອໂສໂກ ຣາຊາ ສາສເນ ທາຍາທຠາວໍ ປຕ຺ຖຍມາໂນ ອວິທູເຣ ຐິຕໍ ມຫິນ຺ທກຸມາຣໍ ທິສ຺ວາ ສກ຺ຂິສ຺ສສິ ຕາຕ ຕ຺ວໍ ປພ຺ພຊິຕຸໍຕິ ອາຫ. ກຸມາໂຣ ປກຕິຍາ ປພ຺ພຊິຕຸກາໂມ ຣຎ຺ໂຎ ວຈນໍ ສຸຕ຺ວາ ອຕິວິຍ ປາໂມຊ຺ຊຊາໂຕ ປຸພ຺ພຊາມິ [ປພ຺ພຊ຺ຊາມິ ອິຕິສພ຺ພຕ຺ຖ] ເທວ. ມໍ ປພ຺ພາເຊຕ຺ວາ ສາສເນ ທາຍາໂທ ໂຫຖາຕິ ອາຫ. ເຕນ ຈ ສມເຍນ ຣາຊຘີຕາ ສໍຆມິຕ຺ຕາປິ ຕສ຺ມິໍ ຐາເນ ຐິຕາ ໂຫຕິ. ຕໍ ທິສ຺ວາ ອາຫ ຕ຺ວມ຺ປິ ອມ຺ມ ປພ຺ພຊິຕຸໍ ສກ຺ຂິສ຺ສສີຕິ, ສາຘຸ ຕາຕາຕິ ສມ຺ປຏິຈ຺ຉິ. ຣາຊາ ປຸຕ຺ຕານໍ ມນໍ ລຠິຕ຺ວາ ປຫຏ຺ຐຈິຕ຺ໂຕ ຠິກ຺ຂຸສໍຆໍ ອຸປສງ຺ກມິຕ຺ວາ ຠນ຺ເຕ ອິເມ ທາຣເກ ປພ຺ພາເຊຕ຺ວາ ມໍ ສາສເນ ທາຍາທໍ ກໂຣຖາຕິ. ສງ຺ໂຆ ຣຎ຺ໂຎ ວຈນໍ ສມ຺ປຏິຈ຺ຉິຕ຺ວາ ກຸມາຣໍ ໂມຄ຺ຄລິປຸຕ຺ຕຕິສ຺ສຕ຺ເຖເຣນ ອຸປຊ຺ຌາເຍນ ມຫາເທວຕ຺ເຖເຣນ ອາຈຣິເຍນ ປພ຺ພຊາເປສິ [ປພ຺ພຊ຺ຊາເປສິ ອິຕິສພ຺ພຕ຺ຖ]. ມຊ຺ຌນ຺ຕິກຕ຺ເຖເຣນ ອາຈຣິເຍນ ອຸປສມ຺ປາເທສິ, ໂສ ອຸປສມ຺ປທາມາລເກເຍວ ສຫ ປຏິສມ຺ຠິທາຫິ ອຣຫຕ຺ຕໍ ປາປຸຓິ. ສງ຺ຆມິຕ຺ຕາຍປິ ຣາຊຘີຕາຍ ອາຈຣິຍາຓີ ອາຍຸປາລຕ຺ເຖຣີ ນາມ [ອຈາຣິຍາ ອາຍຸປາລຕ຺ເຖຣີນາມ ອິຕິສພ຺ພຕ຺ຖ]. ອຸປຊ຺ຌາຍາ ຘມ຺ມປາລຕ຺ເຖຣີ ນາມ ອໂຫສິ. ຣາຊາ ປນ ອເນກາກາເຣນ ພຸທ຺ຘສາສນໍ ໂສເຠຕ຺ວາ ໂມຄ຺ຄລິປຸຕ຺ຕຕິສ຺ສຕ຺ເຖຣສ຺ສ ສຫາເຍນ [ສຫຍ຺ເຍນ. ສາຫາຍ຺ເຍນ. ສາຫຍ຺ເຍນ ອິຕິປິກຕ຺ຖຈິ] ສຏ຺ຐິສຫສ຺ສມຕ຺ເຕ ທຸສ຺ສີເລ ຕິຕ຺ຖິເຍ ພຸທ຺ຘສາສນາ ອຸປ຺ປພ຺ພາເຊຕ຺ວາ ຕຕິຍຘມ຺ມສໍຄີຕິໍ ນິຏ຺ຐາເປສິ. ຕສ຺ມິໍ ກິຣ ສມາຄເມ ຠິກ຺ຂຸຠິກ຺ຂຸຓິໂຍ ກິຕ຺ຕກາຕິ [ກິຕ຺ຕການີຕິ ອິຕິສພ຺ພຕ຺ຖ], ວຸຕ຺ຕຎ຺ຫິ.

໑໒.

ຕສ຺ມິໍ ສມາຄເມ ອາສຸໍ, ອສີຕິຠິກ຺ຂຸໂກຏິໂຍ;

ອເຫສຸໍ ສຕສຫສ຺ສານິ, ເຕສຸ ຂີຓາສວາ ຍຕີ.

໑໓.

ນວຸຕິສຕສຫສ຺ສານິ, ອຫູ ຠິກ຺ຂຸຓິໂຍ ຕຫິໍ;

ຂີຓາສວາ ສິກ຺ຂຸຓິໂຍ, ສຫສ຺ສໍ ອາສຸ ຕາສຸ ຈາຕິ.

ເອວໍ ໂສ ອໂສໂກ ຘມ຺ມຣາຊາ ສກລຊມ຺ພຸທີເປ ອຄ຺ຄຣາຊາ ຫຸຕ຺ວາ ພຸທ຺ຘສາສນໍ ໂສເຠນ຺ໂຕ ວິຫາສິ. ອຍໍ ປເນຕ຺ຖ ສງ຺ເຂໂປ, ວິຕ຺ຖາໂຣ ປນ ມຫາວໍເສ ວຸຕ຺ໂຕຕິ. ວຸຕ຺ຕຎ຺ຫິ.

໑໔.

ສມ຺ປຸຓ຺ຓຕ຺ຕາ ອຍໍ ຕິສ຺ໂສ, ເຈຕນາໂຍ ມຘຸປ຺ປໂທ;

ສພ຺ພຕ຺ຖ ສພ຺ພທາ ສພ຺ພ, ສມ຺ປຕ຺ຕິມຠິສມ຺ຠຸຓີຕິ.

ມຊ຺ຌິໂມ ປນ ວາຓິໂຊ ອຕ຺ຕໂນ ປາຣວາທິໂທເສນ ປຣສມຸທ຺ເທ ລງ຺ກາຍໍ ນິພ຺ພຕ຺ຕິ. ຕສ຺ເສວໍ ກຖາປຏິປາຏິ ເວທິຕພ຺ພາ. ຕມ຺ພປຓ຺ຓິທີເປ ກິຣ ມຸຏສີໂວ ນາມ ຣາຊາ ສຏ຺ຐິວສ຺ສານິ ຣຊ຺ຊໍ ກາເຣສິ, ຕສ຺ສ ປຸຎ຺ຎປຎ຺ຎາຄຸໂຓເປຕາ ອຎ຺ຎມຎ຺ຎໍ ຫິເຕສິໂນ ທສ ປຸຕ຺ຕາ ອເຫສຸໍ. ທ຺ເວ ຈ ຘີຕໂຣ. ສພ຺ເພ ເຕ ສມຄ຺ຄາ ສມ຺ໂມທມານາ ວສນ຺ຕິ. ອຖາປຣສ຺ມິໍ ສມເຍ ອມຈ຺ຈາ ມຸຏສີວຣຎ຺ເຎ ກາລກເຕ ເທວານໍປິຍຕິສ຺ສກຸມາຣໍ ອຠິສິຎ຺ຈິໍສຸ, ອຠິເສກສມກາລເມວສ຺ສ ອເນການິ ອຈ຺ຉຣິຍານິ ອເຫສຸໍ. ຕານິ ປກາເສນ຺ຕາ ມຫາວໍສກຖາຈຣິຍາ ອາຫໍສຸ.

໑໕.

ເທວານໍປິຍຕິສ຺ໂສຕິ, ວິສ຺ສຸໂຕ ທຸຕິໂຍ ສຸໂຕ;

ເຕສຸ [ອໂຫສິມຸຏສີວສ຺ສ, ທສປຸຕ຺ເຕສຸປຸຎ຺ຎວາ ອິຕິກຕ຺ຖຈິ] ຠາຕຸສຸ ສພ຺ເພສຸ, ປຸຎ຺ຎປຎ຺ຎາຘິໂກ ອຫຸ.

໑໖.

ເທວານໍປິຍຕິສ຺ໂສ ໂສ, ຣາຊາສິ ປິຕຸອຈ຺ຈເຍ;

ຕສ຺ສາຠິເສເກນ ສມໍ, ພຫູນຈ຺ຉຣິຍານຫູ.

໑໗.

ລງ຺ກາທີປມ຺ຫິ ສກເລ, ນິຘໂຍ ຣຕນານິຈ;

ອນ຺ໂຕຐິຕານິ ອຸຄ຺ຄນ຺ຕ຺ວາ, ປຖວີຕລມາຣຸຫຸໍ.

໑໘.

ລງ຺ກາທີປສມີປມ຺ຫິ, ຠິນ຺ນນາວາ ຄຕານິ ຈ;

ຕຕ຺ຣ ຊາຕານິ ຈ ຖລໍ, ຣຕນານິ ສມາຣຸຫຸໍ.

໑໙.

ຉາຕປພ຺ພຕປາທມ຺ຫິ, ຕິສ຺ໂສ ຈ ເວຬຸຍຏ຺ຐິໂຍ;

ຊາຕາ ຣຖປໂຕເທນ, ສມານາ ປຣິມາຓໂຕ.

໒໐.

ຕາສຸ ເອກາ ລຕາຍຏ຺ຐິ, ຣຊຕາຠາ ຕຫິໍ ລຕາ;

ສຸວຓ຺ຓວຓ຺ຓາ ຣຸຈິຣາ; ທິສ຺ສນ຺ເຕຕາ ມໂນຣມາ.

໒໑.

ເອກາ ກຸສຸມຍຏ຺ຐີຕຸ; ກຸສຸມານິ ຕຫິໍປນ;

ນານານິ ນານາວຓ຺ຓານິ; ທິສ຺ສນ຺ເຕຕິຜຸຏານິ ຈ.

໒໒.

ເອກາ ສກຸຓຍຏ຺ຐີ ຕຸ, ຕຫິໍປກ຺ຂິມິຄາ ພຫູ;

ນານາ ຈ ນານາວຓ຺ຓາ ຈ, ສຊີວາວິຍ ທິສ຺ສເຣ.

໒໓.

ຫຍຄຊຣຖາ ມລກ຺ຍາ, ວລຍງ຺ຄຸລິເວຐກາ ເຈວ;

ກກຸຘຜລາ ປາກຕິກາ, ອິຈ຺ເຈ ຕາ ອຏ຺ຐ ຊາຕິຍາ.

໒໔.

ມຸຕ຺ຕາ ສມຸທ຺ທາ ອຸຄ຺ຄນ຺ຕ຺ວາ; ຕີເຣ ວຏ຺ຏິວິຍຏ຺ຐິຕາ;

ເທວານໍປິຍຕິສ຺ສສ຺ສ; ສພ຺ພໍ ປຸຎ຺ຎວິຊມ຺ຠິຕໍ.

໒໕.

ອິນ຺ທນີລໍ ເວຬຸຣິຍໍ, ໂລຫິຕງ຺ກມຓີ ຈິ ເມ;

ຣຕນານິ ປເນ ຕານິ, ມຸຕ຺ຕາ ຕາ ຕາຈ ຍຏ຺ຐິໂຍ;

ສຕ຺ຕາຫພ຺ຠນ຺ຕເຣເຍວ, ຣຎ຺ໂຎ ສນ຺ຕິກມາຫຣຸໍຕິ.

ເຕນ ຈ ສມເຍນ ເທວານໍປິຍຕິສ຺ສມຫາຣາຊາ ຈ ອໂສໂກ ຘມ຺ມຣາຊາ ຈ ອທ຺ທິຏ຺ຐສຫາຍາ ໂຫນ຺ຕິ. ຕສ຺ມາ ໂສ ເອຕານິ ຣຕນານິ ຈ ອຎ຺ຎານິ ພຫູນິ ອຸປາຍນານິ ມມ ສຫາຍສ຺ສ ເທຖາຕິ ຘມ຺ມາໂສກມຫານຣິນ຺ທສ຺ສ ປຓ຺ຓາກາຣຕ຺ຖາຍ ເປເສສິ. ໂສປິ ຕໍ ທິສ຺ວາ ປສີທິຕ຺ວາ ປຎ຺ຈຣາຊກກຸຘຠຓ຺ຑານິ ຈ ອຎ຺ຎຎ຺ຈ ພຫຸປຓ຺ຓາກາຣຎ຺ຈ ອຠິເສກຕ຺ຖາຍ ເປເສສິ. ມຍ຺ຫໍ ສຫາຍໍ ອຠິເສກໍ ກໂຣນ຺ຕູຕິ. ນ ເກວລຎ຺ເຈຕໍ ອາມິສປຓ຺ຓາກາຣໍ. ອິມໍ ກິຣ ຘມ຺ມປຓ຺ຓາກາຣມ຺ປິ ເປເສສິ.

໒໖.

ອຫໍ ພຸທ຺ຘໍຈ ຘມ຺ມໍຈ; ສໍຆໍຈ ສຣຓໍ ຄໂຕ;

ອຸປສກຕ຺ຕໍ ເວເທສິໍ; ສກ຺ຍປຸຕ຺ຕສ຺ສ ສາສເນ.

໒໗.

ອິເມສຸ ຕີສຸ ວຕ຺ຖູສຸ; ອຸຕ຺ຕເມສຸ ນຣຸຕ຺ຕມ;

ຈິຕ຺ຕໍ ປສາທຍິຕ຺ວານ, ສທ຺ຘາຍ ສຣຓໍ ວຊາຕິ.

ອມຈ຺ຈາ ປຸນ ລງ຺ກມາຄມ຺ມ ຣາຊານໍ ອຠິສິຎ຺ຈິໍສຸ, ເຕນ ໂຂ ປນ ສມເຍນ ໂມຄ຺ຄລິປຸຕ຺ຕຕິສ຺ສຕ຺ເຖໂຣ ກຕ຺ຖ ນຸໂຂ ອນາຄເຕ ສາສນໍ ສຸປ຺ປຕິຏ຺ຐິຕໍ ຠເວຍ຺ຍາຕິ ອຸປປຣິກ຺ຂນ຺ໂຕ ປຈ຺ຈນ຺ຕິເມ ສຸປ຺ປຕິຏ຺ຐິຕໍ ຠວິສ຺ສຕີຕິ ຎຕ຺ວາ ເຕ ເຕ ເຖເຣ ຕຕ຺ຖ ຕຕ຺ຖ ເປເສຕ຺ວາ ມຫາມຫິນ຺ທຕ຺ເຖຣໍ ຄນ຺ຕ຺ວາ ຕມ຺ພປຓ຺ຓິທີປໍ ປສາເທຫີຕິ ນິໂຍເຊສິ, ສກ຺ໂກ ຈ ເທວານມິນ຺ໂທ ມຫາມຫິນ຺ທຕ຺ເຖຣໍ ອຸປສໍກມິຕ຺ວາ ກາລກໂຕ ຠນ຺ເຕ ມຸຏສີໂວ ຣາຊາ. ອິທານິ ເທວານໍປິຍຕິສ຺ສມຫາຣາຊາ ຣຊ຺ຊໍ ກາເຣຕິ. ສມ຺ມາສມ຺ພຸທ຺ເຘນ ຈ ຕຸມ຺ເຫ ພ຺ຍາກຕາ ອນາຄເຕ ມຫິນ຺ໂທ ນາມ ຠິກ຺ຂຸ ຕມ຺ພປຓ຺ຓິທີປໍ ປສາເທສ຺ສຕີຕິ. ຕສ຺ມາ ຕິຫ ໂຂ ຠນ຺ເຕ ກາໂລ ທີປວຣໍ ຄມນາຍ, ອຫມ຺ປິ ສຫາໂຍ ຠວິສ຺ສາມີຕິ, ເຖໂຣ ຕສ຺ສ ວຈນໍ ສມ຺ປຏິຈ຺ຉິຕ຺ວາ ອຕ຺ຕສຕ຺ຕໂມ ເຈຕິຍປພ຺ພຕວິຫາຣໂຕ ເວຫາສໍ ອຸປ຺ປຕິຕ຺ວາ ອນຸຣາຘປຸຣສ຺ສ ປຸຣຕ຺ຖິມທິສາຍ ມິສ຺ສກປພ຺ພເຕ ປຕິຏ຺ຐຫິ, ອິມໍ ເອຕຣຫິ ເຈຕິຍປພ຺ພໂຕຕິປິ ສຎ຺ຊານນ຺ຕິ. ຕທາ ຕມ຺ພປຓ຺ຓິຍໍ ອຸສ຺ສວທິວໂສ ໂຫຕິ, ຣາຊາ ຉຓໍ ກໂຣຖາຕິ ອມຈ຺ເຈ ອາຓາເປຕ຺ວາ ຈຕ຺ຕາຬີສສຫສ຺ສປຸຣິເສຫິ ປຣິວາຣິໂຕ ນຄຣມ຺ຫາ ນິກ຺ຂມິຕ຺ວາ ມິສ຺ສກປພ຺ພຕໍ ປາຍາສິ ມິຄວໍ ກີຬິຕຸກາໂມ. ອຖ ຕສ຺ມິໍ ປພ຺ພເຕ ອຘິວຕ຺ຖາ ເອກາ ເທວຕາ ຣຎ຺ໂຎ ເຖເຣ ທສ຺ເສສ຺ສາມີຕິ ໂຣຫິຕມີຄວຓ຺ເຓນ ອວິທູເຣ ຕິຓປຓ຺ຓານິ ຂາທມານາ ວິຍ ຈຣຕິ, ຣາຊາ ອຍຸຕ຺ຕໍ ທານິ ປມຕ຺ຕໍ ວິຊ຺ຌິຕຸໍຕິ ຊິຍໍ ໂປເຐສິ, ມິໂຄ ອມ຺ພຕ຺ຖລມຄ຺ຄໍ ຄເຫຕ຺ວາ ປລາຍິຕຸໍ ອາຣຠິ, ຣາຊາ ຕໍ ອນຸພນ຺ຘນ຺ໂຕ ອມ຺ພຕ຺ຖລເມວ ອຠິຣຸຫິ, ມິໂຄປິ ເຖຣານໍ ອວິທູເຣ ອນ຺ຕຣຘາຍິ, ມຫິນ຺ທຕ຺ເຖໂຣ ຣາຊານໍ ອວິທູເຣ ອາຄຈ຺ຉນ຺ຕ ມໍເຍວ ຣາຊາ ປສ຺ສຕຸ, ມາ ອິຕເຣຕິ ອຘິຏ຺ຐຫິຕ຺ວາ ຕິສ຺ສ ຕິສ຺ສ ອິໂຕ ເອຫີຕິ ອາຫ, ຣາຊາ ຕໍ ສຸຕ຺ວາ ຈິນ຺ເຕສິ. ອິມສ຺ມິໍ ຕມ຺ພປຓ຺ຓິທີເປ ຊາໂຕ ມໍ ຕິສ຺ໂສຕິ ນາມໍ ຄເຫຕ຺ວາ ອາລປິຕຸໍ ສມຕ຺ໂຖ ນາມ ນຕ຺ຖິ. ອຍໍ ປນ ຉິນ຺ນຠິນ຺ນປຏຘໂຣ ຠຓ຺ຑຸກາສາວ ວສໂນ ມໍ ນາເມນາ ລປຕິ, ໂກ ນຸໂຂ ຍໍ ຠວິສ຺ສຕິ ມນຸສ຺ໂສ ອມນຸສ຺ໂສ ວາຕິ. ເຖໂຣ ອາຫ.

໒໘.

ສມຓາ ມຍໍ ມຫາຣາຊ, ຘມ຺ມຣາຊສ຺ສ ສາວກາ;

ຕເວວ ອນຸກມ຺ປາຍ, ຊມ຺ພຸທີປາ ອິຘາຄຕາຕິ.

ຣາຊາ ຘມ຺ມາໂສກນຣິນ຺ເທນ ເປສິຕສາສນານຸສາເຣນ ອນຸສ຺ສຣມາໂນ ອຍ຺ຍາ ນຸໂຂ ອາຄຕາຕິ ຕາວເທວ ອາຍຸຘໍ ນິກ຺ຂິປິຕ຺ວາ ເອກມນ຺ຕໍ ນິສີທິ ສມ຺ໂມທນີຍໍ ກຖໍ ກຖຍມາໂນ ສາຣຓີຍໍ [ສມ຺ໂມທນີຍໍ-ອິຕິສພ຺ພຕ຺ຖ] ກຖໍ ກຸຣຸມາໂນ. ຕສ຺ມິໍ ຕານິປິ ຈຕ຺ຕາຬີສປຸຣິສສຫສ຺ສານິ ອາຄນ຺ຕ຺ວາ ຕໍ ປຣິວາເຣສຸໍ, ຕທາ ເຖໂຣ ອິຕເຣປິ ຊເນ ທສ຺ເສສິ, ຣາຊາ ທິສ຺ວາ ອິເມ ກທາ ອາຄຕາຕິ ປຸຈ຺ຉິ, ມຍາ ສທ຺ຘິໍເຍວ ມຫາຣາຊາຕິ. ອິທານິ ປນ ຊມ຺ພຸທີເປ ອຎ຺ເຎປິ ເອວຣູປາ ສມຓາ ສນ຺ຕີຕິ. ມຫາຣາຊ ເອຕຣຫິ ຊມ຺ພຸທີໂປ ກາສາວປຊ຺ໂຊໂຕ ອິສິວາຕປຏິວາໂຕ, ຕສ຺ມິໍ.

໒໙.

ເຕວິຊ຺ຊາ ອິທ຺ຘິປ຺ປຕ຺ຕາ ຈ, ເຈໂຕປຣິຎ຺ຎໂກວິທາ;

ຂີຓາສວາ ອຣຫນ຺ໂຕ, ພຫູ ພຸທ຺ຘສ຺ສ ສາວກາຕິ.

ຣາຊາ ຕໍ ສຸຕ຺ວາ ປສນ຺ໂນ ອໂຫສິ, ອຖ ເຖໂຣ ຣຸກ຺ໂຂປມາທິນາ ຕສ຺ສ ປຎ຺ຎາເວຍ຺ຍຕ຺ຕິຍໍ ຎຕ຺ວາ ຘມ຺ມໍ ເທເສສິ ສນຣາມເຣຫິ ສາຘຸກາຣໍ ກາຣຍມາໂນ. ເຕນ ວຸຕ຺ຖໍ.

໓໐.

ປຓ຺ຑິໂຕຕິ ວິທິຕ຺ວານ, ຈຸລ຺ລຫຕ຺ຖິປໂທປມໍ;

ສຸຕ຺ຕນ຺ຕໍ ເທສຍີ ເຖໂຣ, ມຫີປສ຺ສ ມຫາມຕິ [ມຫີມຕີ ອິຕິປິກຕ຺ຖຈິ].

ເທສນາປຣິໂຍສາເນ ໂສ ສທ຺ຘິໍ ເຕຫິ ນເຣຫິ ຈຕ຺ຕາຬີສສຫສ຺ເສຫິ ສຣເຓສຸ ປຕິຏ຺ຐຫີຕິ. ອຖສ຺ສ ຣາຊາ ສ຺ເວ ຠນ຺ເຕ ມມ ເຄເຫ ຠິກ຺ຂໍ ຄຓ຺ຫາຖາຕິ ຍາຈິຕ຺ວາ ຄນ຺ຕ຺ວາ ນຄຣຎ຺ຈ ຣາຊເຄຫຎ຺ຈ ອລງ຺ກຣິຕ຺ວາ ເຖເຣ ນິສີທາເປຕ຺ວາ ປຓີເຕນາຫາເຣນ ປຣິວິສິຕ຺ວາ ອນຸຬາເທວິປ຺ປມຸຂາຫິ ປຎ຺ຈສຕອິຕ຺ຖີຫິ ສທ຺ຘິໍ ເອກມນ຺ຕໍ ນິສີທິ. ອຖ ເຖໂຣ ຘມ຺ມຣຕນ ວສ຺ສໍ ວສ຺ສາເປສິ. ຕໂຕ ຕາ ປຎ຺ຈສຕອິຕ຺ຖິໂຍ ໂສຕາປຕ຺ຕິຜລໍ ປາປຸຓິໍສຸ. ຕໂຕ ຫຕ຺ຖິສາລາຍໍ ສຫສ຺ສໍ, ນນ຺ທນວເນ ສຫສ຺ສໍຕິ ເອວໍ ທຸຕິຍທິວເສ ອຑ຺ຒເຕຍ຺ຍານິ ປາຓສຫສ຺ສານິ ໂສຕາປຕ຺ຕິຜເລ ປຕິຏ຺ຐາເປສິ. ຕຕິຍທິວເສ ອຑ຺ຒນວປ຺ປມາຓໍ ປາຓສຫສ຺ສໍຕິ ເອວໍ ອເນກສຕານໍ ອເນກສຫສ຺ສານໍ ອເນກສຕ ສຫສ຺ສານໍ ຘມ຺ມາ ມຕໍ ປາເຍສິ. ວຸຕ຺ຕຎ຺ຫິ.

໓໑.

ມຫາມຫິນ຺ທສຸຣິໂຍ, ລງ຺ກາເວຫາສມຊ຺ຌໂຄ;

ໂພຘເນຍ຺ຍມ຺ພຸເຊ ກາສິ, ວິກາສໍ ຘມ຺ມຣໍສິນາ.

໓໒.

ມຫາມຫິນ຺ທຈນ຺ໂທ ໂສ, ລງ຺ກາເວຫາສມຊ຺ຌໂຄ;

ໂພເຘສິ ຘມ຺ມຣໍສີຫິ, ເວເນຍ຺ຍກຸມຸທາກເຣ.

໓໓.

ມຫາມຫິນ຺ທເມໂຆ ໂສ, ວສ຺ສໍ ຘມ຺ມມ຺ພຸວຸຏ຺ຐິຍາ;

ສາຘູນໍ ຈິຕ຺ຕພີເຊສຸ, ຊເນສິ ກຸສລງ຺ກຸເຣຕິ.

ອຖ ຣາຊາ ສຸມນສາມເຓເຣນ ຘມ຺ມາໂສກສ຺ສ ຫຕ຺ຖໂຕ ສມ຺ມາສມ຺ພຸທ຺ຘປຣິຠຸຕ຺ຕປຕ຺ຕປູຣຘາຕຸໂຍ ຈ ສກ຺ກສ຺ສ ສນ຺ຕິກາ ທກ຺ຂິຓກ຺ຂກຘາຕຸໍຈ ອາຫຣາເປຕ຺ວາ [ອາຫາຣິຕ຺ວາ-ອິຕິສພ຺ພຕ຺ຖ] ເຈຕິຍປພ຺ພເຕ ຖູປໍ ອາທິໍກຕ຺ວາ ສກລລງ຺ກາທີເປ ໂຍຊເນ ໂຍຊເນ ຖູປານິ ກາເຣຕ຺ວາ ທກ຺ຂິຓກຘາຕຸໍ ນິທຫິຕ຺ວາ ຖູປາຣາມຖູປຎ຺ຈ ປຕິຏ຺ຐາເປສິ. ອຖ ສງ຺ຆມິຕ຺ຕາຍ ເຖຣິຍາ ອານີຕໍ ຊຍມຫາໂພຘິໂນ ທກ຺ຂິຓມຫາສາຂໍ ປຕິຏ຺ຐາເປຕ຺ວາ ປູຊໍ ກາເຣສິ. ສພ຺ໂພ ປເນຕ຺ຖ ກຖາວິຕ຺ຖໂຣ ມຫາວໍສໂຕ ເວທິຕພ຺ໂພ.

໓໔.

ປາຣວາທິກໂທເສນ, ຊາເຕວໍ ປຣສາຄເຣ;

ປຕ຺ຕານຸໂມທນາ ເອວໍ, ລງ຺ກາຍໍ ອາສິ ອິສ຺ສໂຣ.

໓໕.

ປາປມ຺ປິ ເອວໍ ຜລຕີຕິ ມນ຺ຕ຺ວາ,

ຎຕ຺ວານ ປຸຎ຺ຎສ຺ສ ຜລໍ ອິທນ຺ຕິ;

ໂຠ ໂຍນິໂສ ກຸພ຺ພຖ ປຸຎ຺ຎກມ຺ເມ,

ຄນ຺ຕ຺ວານ ເຍ ຍຕ຺ຖ ນ ໂສຈຍນ຺ຕີຕິ.

ເຕຠາຕິກມຘຸວາຓິຊການໍ ວຕ຺ຖຸໍ ອຏ຺ຐມໍ.

໓໙. ໂພຘິຣາຊຘີຕຸຍາ [ໂພຘິຣາຊຘີຕາຍ ອິຕິສພ຺ພຕ຺ຖ] ວຕ຺ຖຸມ຺ຫິ ອຍມານຸປຸພ຺ພີກຖາ

ຠຄວຕິ ປຣິນິພ຺ພຸເຕ ລງ຺ກາຍໍ ສາສເນ ສຸປ຺ປຕິຏ຺ຐິເຕ ຕຕ຺ຖ ຫກຸເຣຬີຕິ ເອໂກ ຄາໂມ ອໂຫສິ, ຕຕ຺ເຖກາ ທາຣິກາ ຄາມາທາຣິກາຫິ ສທ຺ຘິໍ ຕຕ຺ຖ ຕຕ຺ຖ ກີຬນ຺ຕີ ວິຫຣຕິ, ຕທາ ຄາມສມີເປ ມຫາໂສພ຺ຠໍ ໂຫຕິ. ຕຕ຺ເຖໂກ ມຣຸຕ຺ຖຣຸກ຺ໂຂ ສພ຺ພທາ ປາຬິຜຸລ຺ໂລວ ຕິຏ຺ຐຕິ. ມນຸສ຺ສາ ພຸທ຺ຘປູຊນຕ຺ຖໍ ປຸປ຺ຜານິ ວິຈິຓນ຺ຕາ ອຸທກໍ ໂອຄເຫຕ຺ວາ ຣຸກ຺ຂມຠິຣຸຍ຺ຫ ປຸປ຺ຜານິ ໂອຈິຓນ຺ຕິ, ກຸມາຣິກາ ເຕ ທິສ຺ວາ ມນຸສ຺ສາ ສຸເຂນ ຄນ຺ຕ຺ວາ ປຸປ຺ຜານິ ໂອຈິຓນ຺ຕູຕິ ເອກໍ ສຸກ຺ຂປາລິຠທ຺ທທຓ຺ຑກໍ ອາຫຣິຕ຺ວາ ເສຕຸໍ ກຕ຺ວາ ຐເປສິ, ຕໂຕ ປຏ຺ຐາຍ ມນຸສ຺ສາ ເຕນຄນ຺ຕ຺ວາ ປຸປ຺ຜານິ ໂອຈິຓນ຺ຕິ. ອຖ ສາ ຕໂຕ ຈຸຕາ ເຕເນວ ກຸສລກມ຺ເມນ ຊມ຺ພຸທີເປ ປາຏລິປຸຕ຺ຕນຄເຣ ໂສມທຕ຺ຕຣຎ຺ໂຎ ຘີຕາ ຫຸຕ຺ວາ ນິພ຺ພຕ຺ຕິ, ອຸຕ຺ຕມຣູປຘຣາ ເທວຈ຺ຉຣປຏິຠາຄາ ອໂຫສິ. ມາຕາປິຕໂຣ ປນສ຺ສາ ໂພຘິຣາຊກຸມາຣິກາຕິ ໂວຫຣິໍສຸ. ປຸພ຺ເພ ກຕເສຕຸອານຸຠາເວນ ຕສ຺ສາ ສຸວີຣໂກ ນາເມໂກ ອາກາສຄາມີ ສິນ຺ຘວໂປຕໂກ ນິພ຺ພຕ຺ຕິ. ຣາຊຘີຕຸຍາ ປນ ປິຕາ ພຸທ຺ຘມາມໂກ ຘມ຺ມມາມໂກ ສງ຺ຆມາມໂກ ຫຸຕ຺ວາ ມຫນ຺ຕໍ ປຸຎ຺ຎໍ ປສວນ຺ໂຕ ສິນ຺ຘວໂປຕກໍ ທິສ຺ວາ ປຸຎ຺ຎກຣຓສ຺ສ ເມ ສຫາໂຍ ລທ຺ໂຘຕິ ຕຸຏ຺ຐມານໂສ ອສ຺ສໍ ອຠິຣຸຫິຕ຺ວາ ທິວສສ຺ສ ຕິກ຺ຂຕ຺ຕຸໍ ຄນ຺ຕ຺ວາ ມຫາໂພຘິໍ ວນ຺ທຕິ. ຣາຊຘີຕາ ນໍ ທິສ຺ວາ ປິຕຸສນ຺ຕິກໍ ຄນ຺ຕ຺ວາ ອຠິຓ຺ຫໍ ຕາຕ ກຸຫິໍ ຄຈ຺ຉສີຕິ ປຸຈ຺ຉິ. ຣາຊາ ນ ກິຎ຺ຈິ ກເຖສິ, ອຖ ສາ ປຸນປ຺ປຸນໍ ປິຕຣໍ ນິພນ຺ຘນ຺ຕີ ປຸຈ຺ຉິ. ຕໂຕ ຣາຊາ ຕສ຺ສາວິ ກໂຣນ຺ໂຕ ເອວມາຫ.

໑.

ອມ຺ຫາກໍ ຠຄວາ ປຸພ຺ເພ, ປູເຣນ຺ໂຕ ທສປາຣມີ;

ອທາສິ ສີສຣຕ຺ຕກ຺ຂິ, ມໍສໍ ຊີວິຕເມວ ຈ.

໒.

ປຸຕ຺ຕທາເຣ ຈ ຣຊ຺ເຊ ຈ, ປຕ຺ວາ [ທຕ຺ວາ ອິຕິປິກຕ຺ຖຈິ] ປາຣມິມຕ຺ຖກໍ;

ອນປ຺ປກປ຺ປໂກຏີນໍ, ເຂເປຕ຺ວາ ກປິລວຸເຍ.

໓.

ສກ຺ກຣາຊກຸເລ ຊາໂຕ, ໂລເກ ອປ຺ປຏິປຸຄ຺ຄໂລ;

ສມ຺ປຕ຺ຕຈກ຺ກວຕ຺ຕິຕ຺ຕໍ, ປຫນ຺ຕ຺ວານ ນຣາຘິໂປ.

໔.

ທິສ຺ວາ ນິມິຕ຺ເຕ ຈຕຸໂຣ, ນິກ຺ຂມ຺ມ ອຠິນິກ຺ຂມໍ;

ໂພຘິມູລມຸປາຄມ຺ມ, ນິສິນ຺ໂນ ວຊິຣາສເນ.

໕.

ສຫສ຺ສພາຫຸໍ ມາເປຕ຺ວາ, ນານາຍຸຘສມາກຸລໍ [ນານາວຸຘສມາກຸລໍ-ອິຕິສພ຺ພຕ຺ຖ];

ມຫາຠີຕິກຣໍ ເວສໍ, ກາຬປພ຺ພຕສາທິສໍ.

໖.

ມາເປຕ຺ວານ ສມາຣຸຍ຺ຫ, ຄິຣິເມຂລວາຣຓໍ;

ມາຣເສນໍ ສມາເນຕ຺ວາ, ອາຄຕໍ ມກຣທ຺ຘຊໍ.

໗.

ປາຣມິຕາພເລນ ຕໍ, ມາຣເສນໍ ປລາປິຍ;

ຍຕ຺ຖາສີໂນ ກິເລສາຣິ, ສຫສ຺ສໍ ຆາຕຍີ ຊິໂນ.

໘.

ນຍນໍ ສຸຊລເສເກຫິ, ສຕ຺ຕາຫໍ ຊິນເສວິຕໍ;

ປູຊິຕໍ ເທວພ຺ຣຫ຺ເມຫິ, ສິທ຺ໂຘຣຄນຣາທິຫິ;

ວນ຺ທິຕຸໍ ຊຍໂພຘິໍຕໍ, ຄຈ຺ຉາມິ ສຕຕໍ ອຫໍ.

໙.

ອຸປາສຕິ ສທາ ຄນ຺ຕ຺ວາ, ໂຍ ນໂຣ ໂພຘິປາທປໍ;

ຄນ຺ໂຘທທີປຘູປາທິ, ນານາປູຊາຫິ ສາຘຸກໍ.

໑໐.

ສ ນໂຣ ນິຣາມໂຍ ໂຫຕິ, ປຈ຺ຈຕ຺ເຕ ຈ ປຣຕ຺ຖ ຈ;

ປູຊິໂຕ ມານິໂຕ ໂຫຕິ, ທີຆາຍຸ ພລວາ ສຸຂີ.

໑໑.

ຕທຕ຺ຖໍ ປຕ຺ຖຍນ຺ເຕນ, ອຕ຺ຖກາເມນ ຊນ຺ຕຸນາ;

ອຸປາສນີຍໍ ສທ຺ຘາຍ, ນິຈ຺ຈໍ ຕໍ ໂພຘິປາທປໍຕິ.

ຕໍ ສຸຕ຺ວາ ກຸມາຣິກາ ປີຕິຍາ ຜຸຏສຣີຣາ ປິຕຣໍ ວນ຺ທິຕ຺ວາ ອຫມ຺ປິ ຕາຕ ຄຈ຺ຉາມີຕິ ອາຫ. ຣາຊາ ປນສ຺ສາ ອຸປທ຺ທວຠເຍນ ຄມນໍ ນ ອິຈ຺ຉິ. ຕໂຕ ສາ ຍາວຕຕິຍໍ ປິຕຣໍ ຍາຈິຕ຺ວາ ຣຎ຺ຎາ ອນຸຎ຺ຎາຕາ. ຕໂຕ ປຏ຺ຐາຍ ປິຕຣາ ສທ຺ຘິໍ ສິນ຺ຘວມາຣຸຍ຺ຫ ໂພຘິໍ ວນ຺ທິຕຸໍ ສຕຕໍ ຄຈ຺ຉຕິ. ອຖາປຣຠາເຄ ຣາຊາ ມຣຓມຎ຺ເຈ ນິປນ຺ໂນ ຈິນ຺ເຕສິ. ຘີຕາ ເມ ນິຣນ຺ຕຣໍ ໂພຘິອຸປຏ຺ຐານໍຄຈ຺ຉຕິ, ເອຕິສ຺ສາ ອນາຄເຕ ຍໍກິຎ຺ຈິ ຠຍໍ ອຸປ຺ປຊ຺ຊມານໍ ຕໂຕ ອຸປ຺ປຊ຺ຊຕິ. ຕຕ຺ຖ ເມ ກິໍ ກາຕພ຺ພນ຺ຕິ. ຕໂຕ ສິນ຺ຘວໍ ປກ຺ໂກສາເປຕ຺ວາ ຕສ຺ສ ກຓ຺ຓມູເລ ມນ຺ເຕນ຺ໂຕ ເອວມາຫ, ຕາຕ ມມ ຘີຕາ ອຠິຓ຺ຫໍ ຕວ ສຫາຍໍ ກຕ຺ວາ ໂພຘິໍ ວນ຺ທິຕຸໍ ຄຈ຺ຉຕິ. ຕຕ຺ຖສ຺ສາ ຍໍກິຎ຺ຈິ ຠຍໍ ຠເວຍ຺ຍ. ຕໍ ນປ຺ປຕິຣູປໍ. ຕຕ຺ຖ ຄມນາຄມເນ ມມ ຘີຕຣໍ ຣກ຺ເຂຍ຺ຍາສີຕິ ຕສ຺ສ ຘີຕຣໍ ປຏິປາເທຕ຺ວາ ກາລມກາສິ. ຕໂຕ ຣາຊຘີຕາ ປິຕຸສຣີຣກິຈ຺ຈໍ ກາເຣຕ຺ວາ ທິວສສ຺ສ ຕິກ຺ຂຕ຺ຕຸໍ ອສ຺ສມຠິຣຸຍ຺ຫ ໂພຘິອຸປຏ຺ຐານໍ ຄຈ຺ຉຕິ. ມນຸສ຺ສາ ປນສ຺ສາ ຣູປສມ຺ປຕ຺ຕິໍ ທິສ຺ວາ ວິມ຺ຫິຕມານສາ ຣາຊາຣຫໍ ວຕ ໂນ ອິທໍ ປຓ຺ຓາກາຣໍ ທິຏ຺ຐໍ. ຄນ຺ຕ຺ວາ ຣຎ຺ໂຎ ອາຈິກ຺ຂິສ຺ສາມ. ອປ຺ເປວ ນາມ ຣາຊາ ໂສ ກິຎ຺ຈິ ໂນ ທເທຍ຺ຍາຕິ ຈິນ຺ເຕຕ຺ວາ ຣຎ຺ໂຎ ສນ຺ຕິກໍ ຄນ຺ຕ຺ວາ ວນ຺ທິຕ຺ວາ ຐິຕາ ເອວມາຫໍສຸ.

໑໒.

ໂພຘິມຓ຺ຑໍ ສມາຄມ຺ມ, ອຠິຓ຺ຫໍ ຕຸຏ຺ຐມານສາ;

ວນ຺ທນ຺ຕີ ຍາຕິ ກຎ຺ເຎກາ, ວິຊ຺ຊູວ ສິຣິຍາ ຊລໍ.

໑໓.

ນີລຘມ຺ປິລ຺ລຠາຣາ ສາ, ວິສາລາຍຕໂລຈນາ;

ໂສຓ຺ຓໂທລາຠສວຓາ, ສາມາ ສຸຠປໂຍຘຣາ.

໑໔.

ສຕຣໍສີຫິ ສມ຺ມິສ຺ສ, ສຎ຺ຈ຺ຍາມ຺ພຸທສມາຘຣາ;

ຕຸງ຺ຄນາສາ ນີລຠມຸ, ຫາສຠາສາ ມໂນຣມາ.

໑໕.

ອີທິສໍ ໂນ ມຫາຣາຊາ [ມຫາຣາຊທິຏ຺ຐປຸພ຺ພ ອິຕິປິກຕ຺ຖຈິ], ທິຏ຺ຐປຸພ຺ພໍ ກຸທາຈນໍ;

ເອຫິ ຕສ຺ສາ ສິຣິໍເທວ, ໂພຘິມຓ຺ຑມ຺ຫິ ທກ຺ຂສີຕິ.

ຕໍ ສຸຕ຺ວາ ຣາຊາ ສວຓສໍສຄ຺ເຄເນວ ຕາຍ ປຏິພທ຺ຘຈິຕ຺ໂຕ ຈຕຸຣງ຺ຄິນິໍເສນໍ ຄເຫຕ຺ວາ ຣາຊຘີຕຣໍ ໂພຘິວນ຺ທນຕ຺ຖາຍ ອາຄຕກາເລ ພຫິປາກາເຣ ເສນໍ ປຣິກ຺ຂິປາເປຕ຺ວາ ຄຓ຺ຫເຖຕນ຺ຕິ ມນຸສ຺ເສ ນິໂຍເຊສິ. ຕໂຕ ເສນາປິ ຕໍ ຄຫຓສຊ຺ຊາ ອຏ຺ຐາສິ. ຣາຊຘີຕາ ເຕ ທິສ຺ວາ ສີຆໍ ສິນ຺ຘວໍ ອຸປສງ຺ກມິຕ຺ວາ ຕສ຺ສ ປິຏ຺ຐິຍໍ ນິສິນ຺ນາ ປຓ຺ຫິຍາ ສຎ຺ຎໍ ອທາສິ. ໂສ ຕໍ ຄເຫຕ຺ວາ ເວເຄນ ອາກາສໍ ປກ຺ຂນ຺ທິ. ສາ ປນ ທຸນ຺ນິສິນ຺ນຠາເວນ ອສ຺ສສ຺ສ ເວຄໍ ສນ຺ຘາເຣຕຸມສກ຺ໂກນ຺ຕີ ອສ຺ສປິຏ຺ຐິໂຕ ປຣິຄລິ. ສິນ຺ຘໂວ ຣາຊຘີຕຣໍ ປຕມານໍ ທິສ຺ວາ ຣາໂຊວາທໍ ສຣມາໂນ ເວເຄນາຄນ຺ຕ຺ວາ ຕສ຺ສາ ເກເສ ຑໍສິຕ຺ວາ ອຸກ຺ຂິປິຕ຺ວາ ປຕມານາຍ ຕສ຺ສາ ປິຏ຺ຐິໍທຕ຺ວາ ນິສີທາເປຕ຺ວາ ອາກາເສນ ຕໍ ເນຕ຺ວາ ປາຏລິປຸຕ຺ຕນຄເຣເຍວ ປຕິຏ຺ຐາເປສິ [ປາຕລິປຸຕ຺ຕນຄເຣເຍວຕໍ ປວິຐາເປສິອິຕິປິກຕ຺ຖຈິ].

໑໖.

ຕິຣຈ຺ຉານຄຕາເປວໍ, ສຣນ຺ຕາ ອຸປກາຣກໍ;

ນ ຊຫນ຺ຕີຕິ ມນ຺ຕ຺ວານ, ກຕຎ຺ຎູ ໂຫນ຺ຕຸ [ໂຫນ຺ຕິປາຓິໂນ-ອິຕິປິກຕ຺ຖຈິ] ປາຓິໂນຕິ.

ຕໂຕ ປຏ຺ຐາຍ ສາ ປຸຎ຺ຎກມ຺ມໍ ກຕ຺ວາ ສຄ຺ຄປຣາຍນາ ອໂຫສີຕິ.

໑໗.

ໂຍ ຍໍ ທຸມິນ຺ທໍຍຕິນນ຺ທເນນ;

ສມ຺ປູຊິຕໍ ປູຊຍເຕ ສ ປຎ຺ໂຎ;

ສ ໂຠຄວາ ໂຫຕິ ອນີຕິໂກ ຈ,

ສພ຺ພຕ຺ຖ ໂສ ໂຫຕິ ປສຕ຺ຖຣູໂປ.

ໂພຘິຣາຊຘີຕຸຍາ ວຕ຺ຖຸໍ ນວມໍ.

໔໐. ກຸຓ຺ຑລິຍາ ວຕ຺ຖຸມ຺ຫິ ອຍມານຸປຸພ຺ພີກຖາ

ລງ຺ກາທີເປ ໂຣຫຓຊປເທ ມຫາຄາໂມ ນາມ ອໂຫສິ, ຕຕ຺ຖ ຕິສ຺ສວິຫາຣໍ ນາມ ອເນກສຕຠິກ຺ຂູຫິ ສມາກິຓ຺ຓໍ ອເນກປຣິເວຓປຕິມຓ຺ຑິຕໍ ວິຫາຣໍ ອໂຫສິ. ຕຕ຺ເຖໂກ ຕິສ຺ໂສ ນາມ ສາມເຓໂຣ ປຏິວສຕິ. ໂສ ເອກສ຺ມິໍສມເຍ ຊນປທຈາຣິກໍ ຈຣນ຺ໂຕ ປາສາຓວາປິຄາເມ ຠິກ຺ຂໍ ຈຣິຕ຺ວາ ຍາປນມຕ຺ຕໍ ຠຕ຺ຕໍ ສປ຺ປິນາ ສທ຺ຘິໍ ລຠິຕ຺ວາ ນິກ຺ຂມ຺ມ ຄາມທ຺ວາຣໍ ປຕ຺ວາ ມຫາຄາມາຠິມຸໂຂ ຄຈ຺ຉນ຺ໂຕ ມນຸສ຺ເສ ອຸທກຜາສຸກຏ຺ຐານໍ ປຸຈ຺ຉິ. ເຕຫິ ຠນ຺ເຕ ຕຸມ຺ຫາກໍ ອຠິມຸເຂ ອວິທູຣຏ຺ຐາເນ ກກຸພນ຺ທກນ຺ທຣໍ ນາມ ສນ຺ທມານສີຕໂລທກໍ ຘວລວາລຸກາຕລໍ ຕຕ຺ຖ ຕຸມ຺ເຫ ຄນ຺ຕ຺ວາ ນຫາຕ຺ວາ ສີຕລຈ຺ຉາຍາຍ ວາລຸກາຕເລ ນິສິນ຺ໂນ ຠຕ຺ຕກິຈ຺ຈໍ ກຕ຺ວາ ຄຈ຺ຉຖາຕິ ວຸຕ຺ເຕ ສາມເຓໂຣ ສາຘູຕິ ວຕ຺ວາ ຕຕ຺ຖ ຄນ຺ຕ຺ວາ ຜາສຸກຏ຺ຐາເນ ນິສິນ຺ໂນ ຠຕ຺ຕໍ ຠຸຎ຺ຊິຕຸມາຣຠິ. ຕທາ ເອເກນ ວນກມ຺ມິເກນ ສທ຺ຘິໍອຣຎ຺ຎໍ ຄຕາ ເອກາ ສຸນຂີ ຕສ຺ມິໍ ກນ຺ທເຣ ເອກສ຺ມິໍ ປພ຺ຠາຣຏ຺ຐາເນ ທາຣເກ ວິຊາຍິຕ຺ວາ ຉາຕຊ຺ຌຕ຺ຕາ ປເວຘມານຄຕ຺ຕາ ທາຣການໍ ສມີເປນິປນ຺ນາ ສາມເຓຣສ຺ສ ປຕ຺ເຕ ອາຫາຣຄນ຺ຘໍ ຆາຍິຕ຺ວາ ນິປນ຺ນຏ຺ຐານໂຕ ວຸຏ຺ຐາຍ ປເວຘມານາ ຕສ຺ສ ສມີປໍ ອາຄມ຺ມ ນງ຺ຄຸຏ຺ຐໍ ຈາເລນ຺ຕີ ອຏ຺ຐາສິ, ສາມເຓໂຣ ຕໍ ທິສ຺ວາ ກມ຺ປິຕມານໂສ ອຕ຺ຕໂນ ໂຠຊນຕ຺ຖາຍ ວຏ຺ຏິຕໍ ປຖມາໂລປໍ ຕສ຺ສາ ປຸຣໂຕ ຐເປສິ, ຕໂຕ ສາ ໂສມນສ຺ສາ ຕໍ ຠຸຎ຺ຊິ. ຕໍ ທິສ຺ວາ ຕຸຏ຺ໂຐ ປຸນປ຺ປຸນໍ ອາໂລປໍ ກໂຣນ຺ໂຕ ຕສ຺ສາ ຠຕ຺ຕໍ ທຕ຺ວາ ປຕ຺ຕໍ ໂຘວິຕ຺ວາ ຖວິກາຍ ປກ຺ຂິປິຕ຺ວາ ອຄມາສິ. ຕໂຕ ສາ ສຸນຂີ ສາມເຓຣຄເຕນ ປສາເທນ ຕໂຕ ຈຸຕາ ຊມ຺ພຸທີເປ ເທວປຸຕ຺ຕນຄເຣ ຣາຊານໍ ປຏິຈ຺ຈ ຕສ຺ສ ມເຫສິຍາ ກຸຈ຺ຉິມ຺ຫິ ປຏິສນ຺ຘິໍ ຄຓ຺ຫິຕ຺ວາ ທສມາສຈ຺ຈເຍນ ມາຕຸກຸຈ຺ຉິໂຕ ນິກ຺ຂມິ, ອຖສ຺ສາ ສິຂາມງ຺ຄລທິວເສ ສມ຺ປຕ຺ເຕ ມາຕາປິຕໂຣ ປນສ຺ສາ ກຸຓ຺ຑລາວຏ຺ຏເກສຕ຺ຕາ ກຸຓ຺ຑລາຕິ ນາມ ມກໍສຸ. ສາ ອນຸກ຺ກເມນ ໂສຬສວສ຺ສຸທ຺ເທສິກາ ອໂຫສິ, ຕສ຺ມິໍ ກິຣ ສມເຍ ຕິສ຺ໂສ ສາມເຓໂຣ ມຫາໂພຘິໍ ວນ຺ທິສ຺ສາມີຕິ ນາວໍ ອຠິຣຸຍ຺ຫ ຊມ຺ພຸທີປໍ ຄນ຺ຕ຺ວາ ອນຸປຸພ຺ເພນ ເທວປຸຕ຺ຕນຄຣໍ ປຕ຺ວາ ສຸນິວຕ຺ໂຖ ສຸປາຣຸໂຕ ຍຸຄມຕ຺ຕທໂສ ຠິກ຺ຂາຍ ຈຣນ຺ໂຕ ມຫາວີຖິໍ ສມ຺ປາປຸຓິ. ຣາຊຘີຕາ ສີຫປຎ຺ຊຣໍ ອຸຄ຺ຆາເຏຕ຺ວາ ອນ຺ຕຣວີຖິໍ ໂອໂລເກນ຺ຕີ ຠິກ຺ຂນ຺ຕໍ ສາມເຓຣໍ ທິສ຺ວາ ປຸພ຺ພສິເນຫໍ ປຏິລຠິ, ຕສ຺ມິໍຂເຓ ຕສ຺ສາ ຊາຕິສ຺ສຣຎາຓໍ ອໂຫສິ. ສາ ກິຣ ປຸພ຺ເພ ຠິກ຺ຂຸຓີ ຫຸຕ຺ວາ ປຓ຺ຓສູຈິຍາ ສທ຺ຘິໍ ໂປຕ຺ຖກຎ຺ຈ ປທີປິຍເຕລຎ຺ຈ ທຕ຺ວາ ຊາຕິສ຺ສຣາ ຠເວຍ຺ຍໍຕິ ປຕ຺ຖນໍ ຐເປສິ, ຕໂຕ ສາຊາຕິໍ ອນຸສ຺ສຣນ຺ຕີ ສາມເຓເຣນ ອຕ຺ຕໂນ ກຕູປກາຣໍ ທິຕ຺ວາ ໂສມນສ຺ສາ ນໍ ປກ຺ໂກສາເປຕ຺ວາ ຣາຊເຄເຫ ອາສນໍ ປຎ຺ຎາເປຕ຺ວາ ຕຕ຺ຖ ນິສິນ຺ນໍ ນານຄ຺ຄຣສ ໂຠຊເນນ ປຣິວິສິຕ຺ວາ ໂອນີຕປຕ຺ຕປາຓິໍ ສາມເຓຣໍ ອຸປສງ຺ກມິຕ຺ວາ ວນ຺ທິຕ຺ວາ ເອກມນ຺ຕໍ ນິສິນ຺ນາ ເຕນ ສທ຺ຘິໍ ສລ຺ລປນ຺ຕີ ເອວມາຫ.

໑.

ນ ສຎ຺ຊານາສິ ມໍ ຘີຣ, ປຸພ຺ເພຫໍ ຕວ ທາສິກາ;

ເຕນາຫໍ ສຸຂິຕາ ອາສິໍ, ຕສ຺ມາ ຕ຺ວມສິ ອິສ຺ສໂຣຕິ.

ຕໍ ສຸຕ຺ວາ ສາມເຓໂຣ ອາຫ.

໒.

ນຕ຺ຖິ ເມ ຕາທິສີ ທາສີ, ນ ສຎ຺ຊານາມິ ຕໍ ອຫໍ;

ກາສິ ຕ຺ວໍ ກສ຺ສ ວາ ຘີຕາ, ຕໍ ເມ ອກ຺ຂາຫິ ປຸຈ຺ຉິຕາຕິ.

ຕໂຕ ສາ ຕໍ ສາຣາເປນ຺ຕີ ອາຫ.

໓.

ສາຣາເປມິ ຕຸວໍ ອຊ຺ຊ, ຍຖາ ຊານາສິມໍ ອິເສ;

ພຸຊ຺ຌສ຺ສຸ ໂພຘິໂຕ ທານິ, ມຍາ ຊາຕິໍສຣນ຺ຕິຍາ.

໔.

ປາສາຓວາປິຄາມມ຺ຫິ, ຕມ຺ພປຓ຺ຓິມ຺ຫິ ໂຣຫເຓ;

ຠິກ຺ຂິຕ຺ວານ ຕຸວໍ ຠນ຺ເຕ, ຍທາ ກກຸພນ຺ທກນ຺ທເຣ.

໕.

ນິສີທິຕ຺ວານ ຕ຺ວໍ ຠຕ຺ຕໍ, ຠຸຕ຺ຕກາລໍ ສຣິສ຺ສສິ;

ຕທາຫໍ ສຸນຂີ ອາສິໍ, ວິຊາຕາ ລທ຺ຘໂຄຈຣາ.

໖.

ທາຣເກ ຂາທິຕຸໍ ມຍ຺ຫ, ມາສນ຺ນາ ຂຸທປີຬິຕາ;

ປເວຘມານສພ຺ພງ຺ຄາ, ອຏ຺ຐາສິໍ ຕວ ສນ຺ຕິເກ.

໗.

ທິສ຺ວາ ຕໍ ມໍ ຕທາ ຠນ຺ເຕ, ເວຘມານໍ ພຸຠຸກ຺ຂິຕໍ;

ຉິນ຺ນຠຕ຺ໂຕ ຕຸວໍ ຫຸຕ຺ວາ, ມມໍ ຠຕ຺ເຕນ ໂຕສຍີ.

໘.

ຕທາຫໍ ມຸທຸຈິຕ຺ເຕນ, ຈິຕ຺ຕໍ ຕຍິ ປສາທຍິໍ;

ເຕນາຫໍ ປຸຎ຺ຎກມ຺ເມນ, ທຸຕິເຍ ອຕ຺ຕສມ຺ຠເວ.

໙.

ອິຘ ຣາຊກຸເລ ຊາຕາ, ສພ຺ພກາມສມິທ຺ຘິນີ;

ຈິຕ຺ຕປ຺ປສາທມຕ຺ເຕນ, ໂລກນາຖສ຺ສ ສາສເນ.

໑໐.

ຕທຫຸປພ຺ພຊິຕສ຺ສາປິ, ອີທິສາ ໂຫນ຺ຕິ ສມ຺ປທາ;

ກີທິສໍ ໂຫຕິ ສມ຺ພຸທ຺ເຘ, ປສາເທນ ຜລໍ ອໂຫ.

໑໑.

ອຎ຺ຎານິ ປນ ກິຈ຺ຈານິ, ປຫາຍາຕ຺ຕຫິເຕ ຣໂຕ;

ອຕນ຺ທິໂຕ ທິວາຣຕ຺ຕິໍ, ສຣາຕຸ ຣຕນຕ຺ຕຍໍຕິ.

ເອວໍ ສາມເຓເຣນ ກຕູປກາຣໍ ສາຣາເປຕ຺ວາ ຠນ຺ເຕ ຕວ ທາສິຍາ ອນຸຄ຺ຄຫໍ ປຏິຈ຺ຈ ອິເຘວ ວສຖາຕິ ນິມນ຺ຕິຕ຺ວາ ເຕນ ສມ຺ປຏິຈ຺ຉິເຕ ມຫນ຺ຕໍ ວິຫາຣໍ ກາຣາເປຕ຺ວາ ສາມເຓຣໍ ອາທິໍ ກຕ຺ວາ ອເນກຠິກ຺ຂຸສເຕ ນິມນ຺ເຕຕ຺ວາ ວິຫາເຣ ວສາເປຕ຺ວາ ສຸລຠໍ ກຕ຺ວາ ຈຕຸປຈ຺ຈເຍຫິ ອຸປຏ຺ຐາສິ. ສາມເຓໂຣປິ ສຸນຂິຍາ ທິນ຺ນທານໍ ອນຸສ຺ສຣິຕ຺ວາ ຕຸຏ຺ໂຐ ພຸທ຺ຘານຸສ຺ສຕິໍ ມນສິກໂຣນ຺ໂຕ ນ ຈິເຣນວ ອຣຫຕ຺ຕໍ ປຕ຺ວາ ຕສ຺ມິໍເຍວ ວິຫາເຣ ວສນ຺ໂຕ ອາຍຸປຣິໂຍສາເນ ຕຕ຺ເຖວ ປຣິນິພ຺ພາຍີຕິ.

໑໒.

ຕິຍທ຺ເຘສຸ ຕິໂລກສ຺ມິໍ, ນຕ຺ຖິ ວຕ຺ຖຸຕ຺ຕຍໍ ວິນາ;

ສຕ຺ຕານ ມຎ຺ຎ ມິຈ຺ຉຕ຺ຖ, ທາຍກໍ ສຸຣປາທປໍ.

ກຸຓ຺ຑລິຍາ ວຕ຺ຖຸໍ ທສມໍ.

ມຫາເສນວຄ຺ໂຄ ຈຕຸຕ຺ໂຖ.

ເອຕ຺ຕາວຕາ ຊມ຺ພຸທີປຸປ຺ປຕ຺ຕິກຖາ ສມຕ຺ຕາ.