📜

ທາຐາວໍໂສ ¶

ນໂມ ຕສ຺ສ ຠຄວໂຕ ອຣຫໂຕ ສມ຺ມາສມ຺ພຸທ຺ຘສ຺ສ

໑.

ວິສາຣທໍ ວາທປຖາຕິ ວຕ຺ຕິນໍ,

ຕິໂລກປຊ຺ໂຊຕມສຍ຺ຫສາຫິນໍ;

ອເສສ ເຎຍ຺ຍາວຣຓປ຺ປຫາຍິນໍ,

ນມາມິ ສຕ຺ຖາຣມນນ຺ຕໂຄຈຣໍ.

໒. ¶

ຕິໂລກ ນາຖປ຺ປຠວໍ ຠຍາປຫໍ,

ວິສຸທ຺ຘວິຊ຺ຊາຈຣເຓຫິ ເສວິຕໍ;

ປປຎ຺ຈ ສໍໂຍຊນພນ຺ຘນຈ຺ຉິທໍ,

ນມາມິ ຘມ຺ມໍ ນິປຸຓໍ ສຸທຸທ຺ທສໍ.

໓.

ປສາທມຕ຺ເຕນ’ປິ ຍຕ຺ຖ ປາຓິໂນ,

ຜູສນ຺ຕິ ທຸກ຺ຂກ຺ຂຍມຈ຺ຈຸຕໍ ປທໍ;

ຕມາຫຸເຓຍ຺ຍໍ ສຸສມາຫິຕິນ຺ທ຺ຣິຍໍ,

ນມາມິ ສງ຺ຆໍ ມຸນິຣາຊສາວກໍ.

໔.

ວິຠຸສຍໍ ກາຬກນາຄຣນ຺ວ ຍໍ,

ປຣກ຺ກໂມ ກາຣຸຓິໂກ ຈມູປຕິ;

ຄເວສມາໂນ ຊິນສາສນສ຺ສ ໂຍ,

ວິຣູຬ຺ຫິມຕ຺ຖຎ຺ຈ ຊນສ຺ສ ປຕ຺ຖຍໍ.

໕. ¶

ສຸຘາມຍູຂາມລ ປຓ຺ຑຸວໍສຊໍ,

ວິຣູຬ຺ຫສທ຺ຘໍ ມຸນິຣາຊສາສເນ;

ປິຍໍ ວທໍ ນີຕິປຖານຸວຕ຺ຕິນິໍ,

ສທາ ປຊານໍ ຊນິກໍ’ວ ມາຕຣໍ.

໖.

ປິຍໍ ປຣກ຺ກນ຺ຕິຠຸຊສ຺ສ ຣາຊິໂນ,

ມເຫສິ ມຈ຺ຈຸນ຺ນຕຂຸທ຺ຘິສມ຺ປທໍ;

ວິຘາຍ ລີລາວຕິມິຈ຺ຉິຕຕ຺ຖທໍ,

ອເສສ ລງ຺ກາຕລຣຊ຺ຊລກ຺ຂິຍໍ.

໗.

ກຸມາຣມາຣາຘິຕສາຘຸມນ຺ຕິນໍ,

ມຫາທຍໍ ປຓ຺ຑຸນຣິນ຺ທ ວໍສຊໍ;

ວິຘາຍ ສທ຺ຘໍ ມຘຸຣິນ຺ທນາມກໍ,

ສຸສິກ຺ຂີຕໍ ປາວຈເນ ກລາສຸ ຈ.

໘. ¶

ນຣິນ຺ທສຸຎ຺ຎໍ ສຸຈິຣໍ ຕິສີຫຬໍ,

ອິຕິປ຺ປຕີຕໍ ອຍສໍ ອປານຸທິ;

ຈິຣໍ ປຓີເຕນ ຈ ຈິວຣາທິນາ,

ສຸສຎ຺ຎເຕ ສໍຍມິໂນ ອຕປ຺ປຍິ.

໙.

ຈິຣຏ຺ຐິຕິໍ ປາວຈນສ຺ສ ອິຈ຺ຉຕາ,

ກຕຎ຺ຎຸນາ ວິກ຺ກມ ພຸທ຺ທິສາລິນາ;

ສຕີມຕາ ຈນ຺ທິມ ພນ຺ຘຸກິຕ຺ຕິນາ,

ສຄາຣວໍ ເຕນ’ຠີຍາຈິໂຕ ອຫໍ.

໑໐.

ສເທສ ຠາສາຍ ກວີຫິ ສີຫເຬ,

ກຕມ຺ປິ ວໍສໍ ຊິນທນ຺ຕຘາຕຸຍາ;

ນິຣຸຕ຺ຕິຍາ ມາຄຘິກາຍ ວຸທ຺ຘິຍາ,

ກໂຣມິ ທີປນ຺ຕຣວາສິນໍ ອປິ.

໑໑. ¶

ຊີໂນ’ຍມິທ຺ເຘ ອມຣວ຺ຫເຍ ປຸເຣ,

ກທາຈິ ຫຸຕ຺ວານ ສຸເມຘນາມໂກ;

ສເວທເວທງ຺ຄວິຠາຄໂກວິໂທ,

ມຫທ຺ຘເນ ວິປ຺ປກຸລມ຺ຫິ ມາຓໂວ.

໑໒.

ອຫຎ຺ຫິ ຊາຕິພ຺ຍສເນນ ປີຬິໂຕ,

ຊຣາຠິຠຸໂຕ ມຣເຓນ ໂອຕ຺ຖໂຏ;

ສິວໍ ປທໍ ຊາຕິຊຣາທິນິສ຺ສຏໍ,

ຄເວສຍິສ຺ສໍ’ຕິ ຣໂຫ ວິຈິນ຺ຕິຍ.

໑໓.

ອເນກສງ຺ຂໍ ຘນຘຎ຺ຎສມ຺ປທໍ,

ປຕິຏ຺ຐເປຕ຺ວາ ກປເຓສິ ທຸຈ຺ຈຊໍ;

ອນປ຺ປເກ ເປມຠຣານຸພນ຺ຘິໂນ,

ວິຫາຍ ມິຕ຺ເຕ ຈ ສຸເຕຈ ພນ຺ຘເວ.

໑໔. ¶

ປຫາຍ ກາເມ ນິຂິເລ ມໂນຣເມ,

ຆຣາຠິນິກ຺ຂມ຺ມ ຫິມາຈລນ຺ຕິເກ;

ມຫີຘຣໍ ຘມ຺ມິກນາມ ວິສ຺ສຸຕໍ,

ອຸເປຈ຺ຈ ນານາຕຣຸຣາຊິຠຸສິຕໍ.

໑໕.

ມໂນນຸກູເລ ສຸຣຣາຊນິມ຺ມີເຕ,

ອສມ຺ມິຄານໍ ອຄຕິມ຺ຫິ ອສ຺ສເມ;

ນິວຕ຺ຕຈີໂຣ ອຊິນກ຺ຂິປໍ ວຫໍ,

ຊຏາຘໂຣ ຕາປສ ເວສມຄ຺ຄຫີ.

໑໖.

ສຸສຎ຺ຎຕຕ຺ໂຕປຣິວາຣິ ຕິນ຺ທ຺ຣິໂຍ,

ຜລາຜລາທີຫິ ປວຕ຺ຕຍໍ ຕນຸໍ;

ຄໂຕ ອຠິຎ຺ຄ຺ຎາສຸ ຈ ປາຣມິໍ ວສີ,

ຕຫິໍ ສມາປຕ຺ຕິ ສຸຂໍ ອວິນ຺ທິ ໂສ.

໑໗. ¶

ສຸສຊ຺ຊິເຕ ຣມ຺ມປຸຣາຘິວາສິນາ,

ມຫາຊເນນ’ຕ຺ຕມເນນ ອຎ຺ຊເສ;

ປຖປ຺ປເທເສ ອຠິຍນ຺ຕມຕ຺ຕໂນ,

ອນິຏ຺ຐິເຕເຍວ ສຸເມຘ ຕາປໂສ.

໑໘.

ອຄາຘເຎຍ຺ໂຍທຘີປາຣທສ຺ສິນໍ,

ຠວນ຺ຕຄຸໍ ນິພ຺ພນຖໍ ວິນາຍກໍ;

ອເນກຂີຓາສວລກ຺ຂເສວິຕໍ,

ກທາ ຈິ ທີປງ຺ກຣພຸທ຺ຘມທ຺ທສ.

໑໙.

ຕໂຕ ສສງ຺ຆສ຺ສ ຕິໂລກຠຕ຺ຕຸໂນ,

ປຣິຈ຺ຈຊິຕ຺ວານ ຕນຸມ຺ປິ ຊີວິຕໍ;

ປສາຣຍິຕ຺ວານ ຊຏາຊິນາທິກໍ,

ວິຘາຍ ເສຕຸໍ ຕນຸເມວ ປລ຺ລເລ.

໒໐. ¶

ອນກ຺ກມິຕ຺ວາ ກລລໍ ມຫາທເຍ,

ສຠິກ຺ຂຸໂກ ຄຈ຺ຈຕຸ ປິຏ຺ຐິຍາ ອິຕິ;

ອຘິຏ຺ຐຫິຕ຺ວານ ນິປນ຺ນໂກ ຕຫິໍ,

ອນາຖ ເມຕໍ ຕິຠວໍ ສເມກ຺ຂິຍ.

໒໑.

ທຍາຍ ສຎ຺ໂຈທິຕມານໂສ ຊເນ,

ຠວຓ຺ຓວາ ອຸທ຺ຘຣິຕຸໍ ທຸຂທ຺ທິເຕ;

ອກາສິ ສມ຺ໂພຘິປທສ຺ສ ປຕ຺ຕິຍາ,

ມຫາຠິນີຫາຣມຸທຄ຺ຄວິກ຺ກໂມ.

໒໒. ¶

ອໂຖ ວິທິຕ຺ວາ ວສິໂນ ຕມາສຍໍ,

ອທາສິ ໂສ ວ຺ຍາກຣຓໍ ມຫາມຸນິ;

ຕໂຕ ປຸຣໍ ຕມ຺ຫິ ຕຖາຄເຕ ຄເຕ,

ສຍໍວສີ ສມ຺ມສິ ປາຣມິຄຸເຓ.

໒໓.

ຕໂຕ ຈ ກປ຺ປານມລີນວິກ຺ກໂມ,

ອສໍຂິເຍ ໂສ ຈຕຸໂຣ ສລກ຺ຂເກ;

ຕຫິໍ ຕຫິໍ ຊາຕິສຸ ໂພຘິປາຈເນ,

ວິສຸທ຺ຘສມ຺ຠາຣຄຸເຓ ອປູຣຍິ;

ອຖາຠິຊາໂຕ ຕຸສິເຕ ມຫາຍໂສ,

ວິສຸທ຺ຘສມ຺ໂພຘິປໂທປລທ຺ຘິຍາ;

ອຸທິກ຺ຂມາໂນ ສມຍໍ ທຍາຘໂນ,

ຈິຣໍ ວິຠຸຕິໍ ອນຸໂຠສິ ສພ຺ພໂສ.

໒໕. ¶

ສຫສ຺ສສງ຺ຂາ ທສຈກ຺ກວາລໂຕ,

ສມາຄຕາເນກສຸຣາຘິປາທິຫິ;

ອຸທຄ຺ຄຸທຄ຺ເຄຫິ ຊິນຕ຺ຕປຕ຺ຕິຍາ,

ສຄາຣວໍ ໂສ ອຠິຄມ຺ມ ຍາຈິໂຕ.

໒໖.

ຕໂຕ ຈວິຕ຺ວາ ກປິຬວ຺ຫເຍ ປຸເຣ,

ສທາ ສໂຕ ສກ຺ຍກຸເລກເກຕຸໂນ;

ອໂຫສິ ສຸທ຺ໂຘທນຠຸມິຠຕ຺ຕຸໂນ,

ມຫາທິມາຍາຍ ມເຫສິຍາ ສຸໂຕ.

໒໗. ¶

ວິຊາຕມຕ຺ໂຕ’ວ ວສຸນ຺ຘຣາຍ ໂສ,

ປຕິຏ຺ຐຫິຕ຺ວານ ທິສາ ວິໂລກຍີ;

ຕທາ ອເຫສຸໍ ວິວຏງ຺ຄນາ ທິສາ,

ອປູຊຍຸໍ ຕຕ຺ຖ ຈ ເທວມານຸສາ.

໒໘.

ອາຘາຣຍຸໍ ອາຕປວາຣຓາທິກໍ,

ອທິສ຺ສມານາວ ນຠມ຺ຠິ ເທວຕາ;

ປທານິ ໂສ ສຕ຺ຕ ຈ ອຸຕ຺ຕຣາມຸໂຂ,

ອຸເປຈ຺ຈ ນິຈ຺ຉາຣຍິ ວາຈມາສຠິໍ.

໒໙.

ຍຖຕ຺ຖສິທ຺ຘຕ຺ຕກຸມາຣນາມໂກ,

ມຫພ຺ພໂລ ໂຍພ຺ພນຫາຣິວິຄ຺ຄໂຫ;

ອຸຕຸຕ຺ຕຍານຸຈ຺ຉວິເກສຸ ຕີສຸ ໂສ,

ນຸໂຠສິ ປາສາທວເຣສຸ ສມ຺ປທໍ.

໓໐. ¶

ກທາຈິ ອຸຍ຺ຍານປເຖ ຊຣາຫຕໍ,

ຕຖາຕຸຣໍ ກາລກຕຎ຺ຈ ສໍຍມິໍ;

ກເມນ ທິສ຺ວານ ວິຣຕ຺ຕມານໂສ,

ຠເວສຸ ໂສ ປພ຺ພຊິຕຸໍ ອກາມຍິ.

໓໑.

ສປຸປ຺ຜທີປາທີກເຣຫິ ຣຕ຺ຕິຍໍ,

ປຸຣກ຺ຂໂຕ ໂສ ຕິທິວາຘິວາສິຫິ;

ສຉນ຺ນໂກ ກນ຺ຕກວາຊິຍານໂຕ,

ຕໂຕ ມຫາກາຣຸຓິໂກ’ຠິນິກ຺ຂມິ.

໓໒.

ກເມນ ປຕ຺ວານ ອໂນມມາປຄໍ,

ສຸໂຘຕມຸຕ຺ຕາຜລຫາຣິເສກເຕ;

ປຕິຏ຺ຐຫິຕ຺ວາ ວຣໂມຬິພນ຺ຘນໍ,

ສິຕາສິລູນໍ ຄຄເນ ສມຸກ຺ຂິປີ.

໓໓. ¶

ປຏິຄ຺ຄເຫຕ຺ວາ ຕິທສານມິສ຺ສໂຣ,

ສຸວຓ຺ນຈງ຺ໂຄຏວເຣນ ຕໍ ຕທາ;

ຕິໂຍຊນໍ ນີລມຓີຫິ ເຈຕິຍໍ,

ອກາສິ ຈູຬາມຓິມຕ຺ຕໂນ ປຸເຣ.

໓໔.

ຕໂຕ ຆຏີກາຣສໂຣຊໂຍນິນາ,

ສມາຫຏໍ ຘາຣຍີ ຈີວຣາທິກໍ;

ອໂຖ ສກໍ ວຕ຺ຖຍຸຄໍ ນຠຕ຺ຖເລ,

ປສຕ຺ຖເວສຄ຺ຄຫໂຓ ສມຸກ຺ຂິປີ.

໓໕.

ປຏິຄ຺ຄເຫຕ຺ວານ ຕມມ຺ພຸຊາສໂນ,

ມຫິທ຺ຘິໂກ ຠຕ຺ຕິຠເຣນ ໂຈທິໂຕ;

ສເກ ຠເວ ທ຺ວາທສໂຍຊນໍ ອກາ,

ມຓີຫິ ນີລາທິຫິ ທຸສ຺ສເຈຕິຍໍ.

໓໖. ¶

ສຸສຎ຺ຎຕຕ຺ໂຕ ສຕິມາ ຊິຕິນ຺ທ຺ຣິໂຍ,

ວິນີຕເວໂສ ຣສເຄຘວຊ຺ຊິໂຕ;

ຉຫາຍນາເນວ ອໂນມວິກ຺ກໂມ,

ມຫາປຘານໍ ປທຫິຕ຺ຖ ທຸກ຺ກຣໍ.

໓໗.

ວິສາຂມາສສ຺ສຖ ປຸຓ຺ຓມາສິຍໍ,

ອຸເປຈ຺ຈ ມູລໍ ສຫຊາຍ ໂພຘິຍາ;

ຕິຓາສເນ ຈຸທ຺ທສຫຕ຺ຖສມ຺ມິເຕ,

ອຘິຏ຺ຐຫິຕ຺ວາ ວີຣິຍໍ ນິສຊ຺ຊິ ໂສ.

໓໘.

ອວຕ຺ຖຣນ຺ຕິໍ ວສຸຘໍຈ ອມ຺ພຣໍ,

ວິຣູປເວສຄ຺ຄຫເຓນ ຠິໍສນໍ;

ປກມ຺ປຍນ຺ໂຕ ສຘຣາຘຣໍ ມຫິໍ,

ຊິໂນ ປໂທເສ’ຊິນິ ມາຣວາຫິຓິໍ.

໓໙. ¶

ສຸຣາສຸຣພ຺ຣຫ຺ມຄເຓຫິ ສຊ຺ຊິເຕ,

ຊຄຕ຺ຕເຍ ປຸປ຺ຜມຍຄຆິກາທິນາ;

ປວຕ຺ຕມາເນ ສຸຣທຸນ຺ທຸຠິສ຺ສເຣ,

ອພຸຊ຺ຌິໂພຘິໍ ຣຊນີປຣິກ຺ຂເຍ.

໔໐.

ຕທາ ປກມ຺ປິໍສຸ ສເສລການນາ,

ສຫສ຺ສສໍຂາ ທສໂລກຘາຕຸໂຍ;

ອຄຎ຺ຊິ ໂສ ໂລຓປໂຍຘິ ສາຘຸຕໍ,

ມຫາວຠາໂສ ຠຸວເນສຸ ປຕ຺ຖຣີ.

໔໑.

ລຠິໍສຸ ອນ຺ຘາ ວິມເລ ວິໂລຈເນ,

ສຸຓິໍສຸ ສທ຺ເທ ພຘິຣາປິ ຊາຕິຍາ;

ລປິໍສຸ ມູຄາ ວຈເນນ ວຄ຺ຄຸນາ,

ຈຣິໍສຸ ເຂລໍ ປທສາ’ວ ປງ຺ຄຸລາ.

໔໒.

ຠວິໍສຸ ຂຸຊ຺ຊາ ອຸຊຸໂສມ຺ມວິຄ຺ຄຫາ,

ສິຂີ’ປິ ນິພ຺ພາຍິ ອວີຈິອາທິສຸ;

ອປາຄມຸໍ ພນ຺ຘນໂຕ’ປິ ຊນ຺ຕໂວ,

ຂຸທາທິກໍ ເປຕຠວາ ອປກ຺ກມີ.

໔໓. ¶

ສມິໍສຸ ໂຣຄວ຺ຍສນານິ ປາຓິນໍ,

ຠຍໍ ຕິຣຈ຺ຈານຄເຕ ນ ປີຬຍີ;

ຊນາ ອເຫສຸໍ ສຂິລາ ປິຍໍວທາ,

ປວຕ຺ຕຍຸໍ ໂກຎ຺ຈນທໍ ມຕງ຺ຄຊາ.

໔໔.

ຫຍາ ຈ ເຫສິໍສຸ ປຫຏ຺ຐມານສາ,

ນທິໍສຸ ສພ຺ພາ ສຍເມວ ທຸນ຺ທຸຠີ;

ຣວິໍສຸ ເທຫາຠຣຓານິ ປາຓິນໍ,

ທິສາ ປສີທິໍສຸ ສມາ ສມນ຺ຕໂຕ.

໔໕.

ປວາຍິ ມນ຺ໂທ ສຸຂສີຕມາຣຸໂຕ,

ປວສ຺ສິ ເມໂຆ’ປິ ອກາລສມ຺ພໂວ;

ຊຫິໍສຸ ອາກາສຄຕິໍ ວິຫງ຺ຄມາ,

ມຫິໍ ສມຸຠິຊ຺ຊຊລໍ ສມຸຏ຺ຐຫີ.

໔໖.

ອສນ຺ທມານາ’ວ ຐິຕາ ສວນ຺ຕິໂຍ,

ນເຠ ວິໂຣຈິໍສຸ ອເສສໂຊຕິໂຍ;

ຠວາ ອເຫສຸໍ ວິວຏາ ສມນ຺ຕໂຕ,

ຊນສ຺ສ ນາສຸໍ ວຈນູປປຕ຺ຕິໂຍ.

໔໗. ¶

ສເມກ຺ຂຕໍ ນາວຣຓາ ນຄາທໂຍ,

ປວາຍິ ຄນ຺ໂຘ ອປິ ທິພ຺ພສມ຺ມໂຕ;

ທຸມາ ອເຫສຸໍ ຜລປຸປ຺ຜ ຘາຣິໂນ,

ອໂຫສິ ຉນ຺ໂນ ກມເລຫິ ອຓ຺ຓໂວ.

໔໘.

ຖເລສຸ ໂຕເຍສຸ ຈ ປຸປ຺ຜມານກາ,

ວິຈິຕ຺ຕປຸປ຺ຜາ ວິກສິໍສຸ ສພ຺ພຖາ;

ນິຣນ຺ຕຣໍ ປຸປ຺ຜສຸຄນ຺ຘວຸຏ຺ຐິຍາ,

ອໂຫສິ ສພ຺ພໍ ວສຸຘມ຺ພຣນ຺ນຣໍ.

໔໙.

ນິສຊ຺ຊ ປລ຺ລງ຺ກວເຣ ຕຫິໍ ຊິໂນ,

ສຸຂໍ ສມາປຕ຺ຕິວິຫາຣສມ຺ຠວໍ;

ຕໂຕ’ນຸໂຠນ຺ໂຕ ສຸຈິຣາຠິປຕ຺ຖິຕໍ,

ທິນານິ ສຕ຺ເຕວ ອຕິກ຺ກມາປຍີ.

໕໐. ¶

ສມຸປ຺ປຕິຕ຺ວາ ຄຄຓງ຺ຄນໍ ຕໂຕ,

ປທສ຺ສຍິຕ຺ວາ ຍມກໍ ມຫາມຸນິ;

ສປາຏິຫີຣໍ ຕິທິວາຘິວາສິນໍ,

ຊິນຕ຺ຕເນ ສໍສຍິຕໍ ນິຣາກຣິ.

໕໑.

ອໂຖຕຣິຕ຺ວານ ຊຍາສນສ຺ສ ໂສ,

ຐິໂຕ’ວ ປຸພ຺ພຸຕ຺ຕຣກຓ຺ຓນິສ຺ສິໂຕ;

ທິນານິ ສຕ຺ຕານິມິເສນ ຈກ຺ຂຸນາ,

ຕມາສນໍ ໂພຘິຕຣຸໍຈ’ປູຊຍິ.

໕໒.

ອຖ’ນ຺ຕຣາເຬ ມຓິຈງ຺ກເມ ຊິໂນ,

ຐິຕປ຺ປເທສສ຺ສ ຈ ອາສນສ຺ສ ຈ;

ມຫາຣເຫ ເທວວຣາຠິນິມ຺ມິເຕ,

ທິນານິ ສຕ຺ເຕວ ອກາສິ ວງ຺ກມໍ.

໕໓. ¶

ຕໂຕ ທິສາຍໍ ອປຣາຍ ໂພຘິຍາ,

ອຸປາວິສິຕ຺ວາ ຣຕນາລເຍ ຊິໂນ;

ສມນ຺ຕປຏ຺ຐານນຍໍ ວິຈິນ຺ຕຍໍ,

ທິນານິ ສຕ຺ເຕວ ສວີຕິນາມຍິ.

໕໔.

ວິນິຄ຺ຄໂຕ ສຕ຺ຖຸສຣີຣໂຕ ຕທາ,

ຊຸຕິປ຺ປພນ຺ໂຘ ປຏິພນ຺ຘວຊ຺ຊິໂຕ;

ປມາຓສຸຎ຺ຎາສຸ ຈ ໂລກຘາຕຸສຸ,

ສມນ຺ຕໂຕ ອຸທ຺ຘມໂຘ ຈ ປຕ຺ຖຣີ.

໕໕.

ວຏສ຺ສ ມູເລ ອຊປາລສຎ຺ຎິໂນ,

ສຸຂໍ ຜຸສນ຺ໂຕ ປວິເວກສມ຺ຠວໍ;

ວິນາຍໂກ ສຕ຺ຕ ວິຫາສິ ວາສເຣ,

ອນນ຺ຕທສ຺ສີ ສຸຣຣາຊປູຊິໂຕ.

໕໖. ¶

ວິຫາສິ ມູເລ ມຸຈລິນ຺ທສາຂິໂນ,

ນິສຊ຺ຊ ໂຠຄາວລິມນ຺ທິໂຣທເຣ;

ວິກິຓ຺ຓປຸປ຺ເຜ ມຸຈລິນ຺ທໂຠຄິໂນ,

ສມາຘິນາ ວາສຣສຕ຺ຕກໍ ຊິໂນ.

໕໗.

ທຸເມ’ປິ ຣາຊາຍຕເນ ສມາຘິນາ,

ວິຫາສິ ຣຕ຺ຕິນ຺ທິວ ສຕ຺ຕກໍ ມຸນິ;

ສຫສ຺ສເນຕ຺ໂຕ ອຖ ທນ຺ຕໂປຓກໍ,

ມຸໂຂທກຎ຺ຈາປິ ອທາສິ ສຕ຺ຖຸໂນ.

໕໘.

ຕໂຕ ມຫາຣາຊວເຣຫິ ອາຠຕໍ,

ສິລາມຍໍ ປຕ຺ຕ ຈຕຸກ຺ກເມກກໍ;

ວິຘາຍ ມຕ຺ຖໍ ມຘຸປິຓ຺ຑິກໍ ຕຫິໍ,

ປຏິຄ຺ຄເຫຕ຺ວານ ສວາຓິຊາຫຏາ.

໕໙. ¶

ກຕນ຺ນກິຈ຺ໂຈ ສຣເຓສຸ ເຕ ອຸໂຠ,

ປຕິຏ຺ຐເປຕ຺ວານ ຕປສ຺ສຸຠລ຺ລິເກ;

ອທາສິ ເຕສໍ ອຠິປູຊິຕຸໍ ສກໍ,

ປຣາມສິຕ຺ວານ ສິຣໍ ສິໂຣຣຸເຫ.

໖໐.

ວຏສ຺ສມຸເລ ອຊປາລສຎ຺ຎິໂນ,

ສຫມ຺ປຕີພ຺ຣຫ຺ມວເຣນ ຍາຈິໂຕ;

ຊນສ຺ສ ກາຕຸໍ ວຣຘມ຺ມສງ຺ຄຫໍ,

ອຄຎ຺ຉິ ພາຣາຓສິເມກໂກ ມຸນິ.

໖໑. ¶

ຄນ຺ຕ຺ວາ ໂສ ຘມ຺ມຣາຊາ ວນມິສິປຕນໍ ສຎ຺ຎຕານໍ ນິເກຕໍ,

ປລ຺ລງ຺ກສ຺ມິໍ ນິສິນ຺ໂນ ຕຫິມວິຈລິຕຏ຺ຐານສມ຺ປາທິຕມ຺ຫິ;

ອາສາຬ຺ເຫ ປຸຓ຺ຓມາຍໍ ສິຕຣຸຈິຣຸຈິຍາ ໂຊຕິເຕ ຈກ຺ກວາເຬ,

ເທວພ຺ຣຫ຺ມາທິການໍ ທຸຣິຕມລຫຣໍ ວຕ຺ຕຍິ ຘມ຺ມຈກ຺ກໍ.

໖໒.

ສຸຕ຺ວາ ສທ຺ຘມ຺ມມຄ຺ຄໍ ຕິຠູວນກຸຫຣາໂຠຄວິຕ຺ຖາຣິກໍ ຕໍ,

ອຎ຺ຎາໂກຓ຺ຑຎ຺ຎນາມທ຺ວິຊມຸນິປມຸຂາຏ຺ຐາຣສພ຺ຣຫ຺ມໂກຏີ;

ອຎ຺ຎາສຸໍ ມຄ຺ຄຘມ຺ມໍ ປຣິມິຕຣຫິເຕ ຈກ຺ກວາເຬ ອຸຬາໂຣ,

ໂອຠາໂສ ປາຕຸຠຸໂຕ ສປທິ ພຫຸວິຘໍ ອາສິ ອຈ຺ເຉຣກຎ຺ຈ.

ປຐໂມ ປຣິຈ຺ເຉໂທ.

໖໓. ¶

ຕໂຕ ປຏ຺ຐາຍ ໂສ ສຕ຺ຖາ ວິເນນ຺ໂຕ ເທວມານຸເສ,

ໂພຘິໂຕ ຜຸສ຺ສມາສມ຺ຫິ ນວເມ ປຸຓ຺ຓມາສິຍໍ.

໖໔.

ລງ຺ກມາຄມ຺ມ ຄງ຺ຄາຍ ຕີເຣ ໂຍຊນວິຕ຺ຖເຕ,

ມຫານາຄວນຸຍ຺ຍາເນ ອາຍາເມນ ຕິໂຍຊເນ.

໖໕.

ຍກ຺ຂານໍ ສມິຕິໍ ຄນ຺ຕ຺ວາ ຐຕ຺ວານ ຄຄເນ ຕຫິໍ;

ວາຕນ຺ຘກາຣວຸຏ຺ຐິຫິ ກຕ຺ວາ ຍກ຺ເຂ ຠຍທ຺ທິເຕ.

໖໖.

ລທ຺ຘາຠເຍຫິ ຍກ຺ເຂຫິ ເຕຫິ ທິນ຺ນາຍ ຠຸມິຍາ;

ຈມ຺ມຂຓ຺ຑໍ ປສາເຣຕ຺ວາ ນິສີທິຕ຺ວານ ຕງ຺ຂເຓ.

໖໗.

ຈມ຺ມຂຓ຺ຑໍ ປທິຕ຺ຕຄ຺ຄິ ຊາລາມາລາສມາກຸລໍ;

ອິທ຺ຘິຍາ ວຑ຺ຒຍິຕ຺ວານ ຍາວ ສິນ຺ຘຸໍ ສມນ຺ຕໂຕ.

໖໘. ¶

ຊເວນ ສິນ຺ຘຸເວລາຍ ຣາສິຠຸເຕ ນິສາຈເຣ;

ຄິຣິທີປມິຘາເນຕ຺ວາ ປຕິຏ຺ຐາເປສິ ເຕ ຕຫິໍ.

໖໙.

ເທສຍິຕ຺ວາ ຊິໂນ ຘມ຺ມໍ ຕທາ ເທວສມາຄເມ;

ພຫຸນ຺ນໍ ປາຓໂກຏີນໍ ຘມ຺ມາຠິສມຍໍ ອກາ.

໗໐.

ມຫາສຸມນເທວສ຺ສ ເສເລ ສຸມນກູຏເກ;

ທຕ຺ວາ ນມສ຺ສິຕຸໍ ເກເສ ອຄາ ເຊຕວນໍ ຊິໂນ.

໗໑.

ປຕິຏ຺ຐເປຕ຺ວາ ເຕ ສຕ຺ຖຸ ນິສິນ຺ນາສນຠຸມິຍໍ;

ອິນ຺ທນີລມຍໍ ຖູປໍ ກຣິຕ຺ວາ ໂສ ອປູຊຍິ.

໗໒.

ນິສ຺ສາຍ ມຓິປລ຺ລງ຺ກໍ ປພ຺ພຕຓ຺ຓວວາສິໂນ;

ທິສ຺ວາ ຍຸທ຺ຘຕ຺ຖິເກ ນາເຄ ຈູໂຬທຣ ມໂຫທເຣ.

໗໓.

ໂພຘິໂຕ ປຎ຺ຈເມ ວສ຺ເສ ຈິຕ຺ຕມາເສ ມຫາມຸນິ;

ອຸໂປສເຖ ກາລປກ຺ເຂ ນາຄທີປມຸປາຄມີ.

໗໔. ¶

ຕທາ ສມິທ຺ຘິສຸມໂນ ເທໂວ ເຊຕວເນ ຐິຕໍ;

ອຕ຺ຕໂນ ຠວນໍເຍວ ຣາຊາຍຕນປາທປໍ.

໗໕.

ອິນ຺ທນີລທ຺ທິກູຏໍ’ວ ຄເຫຕ຺ວາຕຸຏ຺ຐມານໂສ;

ຘາຣຍິຕ຺ວາ ສຫາຄຎ຺ຉິ ຉຕ຺ຕໍ ກຕ຺ວານ ສຕ຺ຖຸໂນ.

໗໖.

ອຸຠິນ຺ນໍ ນາຄຣາຊູນໍ ວຕ຺ຕມາເນ ມຫາຫເວ;

ນິສິນ຺ໂນ ຄຄເນ ນາໂຖ ມາປຍິຕ຺ຖ ມຫາຕມໍ.

໗໗.

ອາໂລກໍ ທສ຺ສຍິຕ຺ວາຖ ອສ຺ສາເສຕ຺ວານ ໂຠຄິໂນ;

ສາມຄ຺ຄິກຣຓໍ ຘມ຺ມໍ ອຠາສິ ປຸຣິສາສໂຠ.

໗໘.

ອສີຕິໂກຏິໂຍ ນາຄາ ອຈລມ຺ພຸຘິວາສິໂນ;

ປຕິຏ຺ຐຫິໍສຸ ມຸທິຕາ ສີເລສຸ ສຣເຓສຸ ຈ.

໗໙. ¶

ທຕ຺ວານ ມຓິປລ຺ລງ຺ກໍ ສຕ຺ຖຸໂນ ຠຸຊຄາຘິປາ;

ຕຕ຺ຖາສີນໍ ມຫາວີຣໍ ອນ຺ນປາເນຫິ ຕປ຺ປຍຸໍ.

໘໐.

ປຕິຏ຺ຐເປຕ຺ວາ ໂສ ຕຕ຺ຖ ຣາຊາຍຕນປາທປໍ;

ປລ຺ລງ຺ກໍ ຕຎ຺ຈ ນາຄານໍ ອທາສິ ອຠິປູຊິຕຸໍ.

໘໑.

ໂພຘິໂຕ ອຏ຺ຐເມ ວສ຺ເສ ເວສາເຂ ປຸຓ຺ຓມາສິຍໍ;

ມຓິອກ຺ຂິກນາເມນ ນາຄິນ຺ເທນ ນິມນ຺ຕິໂຕ.

໘໒.

ນາຄຣາຊສ຺ສ ຕສ຺ເສວ ຠວນໍ ສາຘຸ ສຊ຺ຊີຕໍ;

ກລ຺ຍາຓິຍໍ ປຎ຺ຈຠິກ຺ຂູ ສເຕຫິ ສຫ ອາຄມິ.

໘໓.

ກລ຺ຍາຓິເຈຕິຍຏ຺ຐາເນ ກເຕ ຣຕນ ມຓ຺ຑເປ;

ມຫາຣຫມ຺ຫິ ປລ຺ລງ຺ເກ ອຸປາວິສິ ນຣາສໂຠ.

໘໔.

ທິພ຺ເພຫິ ຂຊ຺ຊໂຠຊ຺ເຊຫິ ສສງ຺ຆໍ ໂລກນາຍກໍ;

ສນ຺ຕປ຺ເປສິ ຜຓິນ຺ໂທ ໂສ ຠຸຊງ຺ເຄຫິ ປຸຣກ຺ຂໂຕ.

໘໕. ¶

ເທສຍິຕ຺ວານ ສທ຺ຘມ຺ມໍ ສຄ຺ຄໂມກ຺ຂສຸຂາວຫໍ;

ໂສ ສຕ຺ຖາ ສຸມເນ ກູເຏ ທສ຺ເສສິ ປທລຎ຺ຉນໍ.

໘໖.

ຕໂຕ ປພ຺ພຕປາທມ຺ຫິ ສສງ຺ໂຆ ໂສ ວິນາຍໂກ;

ທິວາວິຫາຣໍ ກຕ຺ວານ ທີຆວາປິໍ ອຸປາຄມິ.

໘໗.

ຖູປຏ຺ຐາເນ ຕຫິໍ ພຸທ຺ໂຘ ສສງ຺ໂຆ’ຠິນິສີທິຍ;

ສມາປຕ຺ຕິ ສມຸພຠຸຕໍ ອວິນ຺ທິ ອສມໍ ສຸຂໍ.

໘໘.

ມຫາໂພຘິຕຣຸຏ຺ຐາເນ ສມາຘິໍ ອປ຺ປຍິ ຊິໂນ;

ມຫາຖູປປ຺ປເທເສ ຈ ວິຫຣິຕ຺ຖ ສມາຘິນາ.

໘໙.

ຖູປາຣາມມ຺ຫິ ຖູປສ຺ສ ຐາເນ ຌານສຸເຂນ ໂສ;

ສຠິກ຺ຂຸສງ຺ໂຆ ສມ຺ພຸທ຺ໂຘ ມຸຫຸຕ຺ຕໍ ວີຕິນາມຍີ.

໙໐. ¶

ສິລາຖຸປປ຺ປເທສມ຺ຫິ ຐຕ຺ວາກາລາວິທູ ມຸນິ;

ເທເວ ສມນຸສາສິຕ຺ວາ ຕໂຕ ເຊຕວນໍ ອຄາ.

໙໑.

ອຄິທ຺ໂຘ ລາຠສກ຺ກາເຣ ອສຍ຺ຫມວມານນໍ;

ສຫນ຺ໂຕ ເກວລໍ ສພ຺ພ ໂລກນິຕ຺ຖຣຓຕ຺ຖິໂກ.

໙໒.

ສໍວຈ຺ຉຣານິ ຐຕ຺ວານ ຈຕ຺ຕາຬີສຎ຺ຈ ປຎ຺ຈ ຈ;

ເທສຍິຕ຺ວານ ສຸຕ຺ຕາທິ ນວງ຺ຄໍ ສຕ຺ຖຸສາສນໍ.

໙໓.

ຕາເຣຕ຺ວາ ຠວກນ຺ຕາຣາ ຊເນ ສງ຺ຂ຺ຍາຕິວຕ຺ຕິໂນ;

ພຸທ຺ຘກິຈ຺ຈານິ ສພ຺ພານິ ນິຏ຺ຐາເປຕ຺ວານ ຈກ຺ຂຸມາ.

໙໔. ¶

ກຸສິນາຣາປຸເຣ ຣຎ຺ຎໍ ມລ຺ລານມຸປວຕ຺ຕເນ;

ສາລວນມ຺ຫິ ຍມກສາລຣຸກ຺ຂານມນ຺ຕເຣ.

໙໕.

ມຫາຣເຫ ສຸປຎ຺ຎຕ຺ເຕ ມຎ຺ເຈ ອຸຕ຺ຕຣສີສກໍ;

ນິປນ຺ໂນ ສີຫເສຍ຺ຍາຍ ເວສາເຂ ປຸຓ຺ຓມາສິຍໍ.

໙໖.

ເທເສຕ຺ວາ ປຐເມ ຍາເມ ມລ຺ລານໍ ຘມ຺ມມຸຕ຺ຕມໍ;

ສຸຠທ຺ທໍ ມຊ຺ຌິເມ ຍາເມ ປາເປຕ຺ວາ ອມຕໍ ປທໍ.

໙໗.

ຠິກ຺ຂຸ ປຈ຺ຉິມຍາມມ຺ຫິ ຘມ຺ມກ຺ຂນ຺ເຘ ອເສສເກ;

ສງ຺ຄຍ຺ຫ ໂອວທິຕ຺ວານ ອປ຺ປມາທ ປເທນ ຈ.

໙໘.

ປຈ຺ຈຸສສມເຍ ຌານສມາປຕ຺ຕິວິຫາຣໂຕ;

ອຸຏ຺ຐາຍ ປຣິນິພ຺ພາຍິ ເສໂສປາທິວິວຊ຺ຊິໂຕ.

໙໙. ¶

ມຫີກມ຺ປາທໂຍ ອາສຸໍ ຕທາ ອຈ຺ຉຣິຍາວຫາ;

ປູຊາວິເສສາ ວຕ຺ຕິໍສຸ ເທວມານຸສກາ ພຫູ.

໑໐໐.

ປຣິນິພ຺ພາຓສຸຕ຺ຕນ຺ເຕ ວຸຕ຺ຕານຸກ຺ກມໂຕ ປນ;

ປູຊາວິເສໂສ ວິຎ຺ເຎຍ຺ໂຍ ອິຈ຺ຉນ຺ເຕຫິ ອເສສໂຕ.

໑໐໑.

ອຫເຕຫິ ຈ ວຕ຺ເຖຫິ ເວເຐຕ຺ວາ ປຐມໍ ຊິນໍ;

ເວຐຍິຕ຺ວານ ກປ຺ປາສປິຈຸນາ ວິຫເຕນ ຈ.

໑໐໒.

ເອວໍ ປຎ຺ຈສຕກ຺ຂຕ຺ຕຸໍ ເວຐຍິຕ຺ວານ ສາຘຸກໍ;

ປກ຺ຂິປິຕ຺ວາ ສຸວຓ຺ຓາຍ ເຕລປຸຓ຺ຓາຍ ໂທຓິຍາ.

໑໐໓.

ວີສໍຫຕ຺ຖສຕຸພ຺ເພຘໍ ຄນ຺ຘທາຣູຫິ ສງ຺ຂຕໍ;

ອາໂຣປຍິໍສຸ ຈິຕກໍ ມລ຺ລານໍ ປມຸຂາ ຕທາ.

໑໐໔.

ມຫາກສ຺ສປເຖເຣນ ຘມ຺ມຣາເຊ ອວນ຺ທິເຕ;

ຈິຕກໍ ມາ ຊລິຕ຺ຖາຕິ ເທວຘິຏ຺ຐານໂຕ ປນ.

໑໐໕. ¶

ປາໂມກ຺ຂາ ມລ຺ລຣາຊູນໍ ວາຍມນ຺ໂຕປ’ເນກຘາ;

ຈິຕກໍ ຕໍ ນ ສກ຺ຂິໍສຸ ຄາຫາເປຕຸໍ ຫຸຕາສນໍ.

໑໐໖.

ມຫາກສ຺ສປເຖເຣນ ອຘິຏ຺ຐາເນນ ອຕ຺ຕໂນ;

ວຕ຺ຖາທີນິ ມຫາໂທຓິໍ ຈິຕກຎ຺ຈ ມຫາຣຫໍ.

໑໐໗.

ທ຺ວິຘາ ກຕ຺ວານ ນິກ຺ຂມ຺ມ ສກສີເສ ປຕິຏ຺ຐິຕາ;

ວນ຺ທິຕາ ສຕ຺ຖຸໂນ ປາທາ ຍຖາຏ຺ຐາເນ ປຕິຏ຺ຐິຕາ.

໑໐໘.

ຕໂຕ ເທວານຸຠາເວນ ປຊ຺ຊລິຕ຺ຖ ຈິຕານໂລ;

ນ ມສິ ສຕ຺ຖຸເທຫສ຺ສ ທຑ຺ຒສ຺ສາສິ ນ ຉາຣິກາ.

໑໐໙.

ຘາຕຸໂຍ ອວສິສ຺ສິໍສຸ ມຸຕ຺ຕາຠາ ກຎ຺ຈນປ຺ປຠາ;

ອທິຏ຺ຐາເນນ ພຸທ຺ຘສ຺ສ ວິປ຺ປກິຓ຺ຓາ ອເນກຘາ.

໑໑໐. ¶

ອຸຓ຺ຫີສໍ ອກ຺ຂກາ ທ຺ເວ ຈ ຈຕສ຺ໂສ ທນ຺ຕຘາຕຸໂຍ;

ອິຈ຺ເຈຕາ ຘາຕຸໂຍ ສຕ຺ຕ ວິປ຺ປກິຓ຺ຓາ ນ ສຕ຺ຖຸໂນ.

໑໑໑.

ອາກາສໂຕ ປຕິຕ຺ວາປິ ອຸຄ຺ຄນ຺ຕ຺ວາປິ ມຫີຕລາ;

ສມນ຺ຕາ ຊລຘາຣາໂຍ ນິພ຺ພາເປສຸໍ ຈິຕານລໍ.

໑໑໒.

ເຖຣສ຺ສ ສາຣິປຸຕ຺ຕສ຺ສ ອນ຺ເຕວາສິ ມຫິທ຺ຘິໂກ;

ສຣຠຸນາມໂກ ເຖໂຣ ປຠິນ຺ນ ປຏິສມ຺ຠິໂທ.

໑໑໓.

ຄີວາຘາຕຸໍ ຄເຫຕ຺ວານ ຈິຕໂຕ ມຫິຍງ຺ຄເຓ;

ປຕິຏ຺ຐເປຕ຺ວາ ຖູປມ຺ຫິ ອກາ ກຎ຺ຈຸກເຈຕິຍໍ.

໑໑໔.

ເຂມວ຺ຫໂຍ ກາຣຸຓິໂກ ຂີຓສໍໂຍຊໂນ ມຸນິ;

ຈິຕກາ ໂຕ ຕໂຕ ວາມທາຐາຘາຕຸໍ ສມຄ຺ຄຫິ.

໑໑໕.

ອຏ຺ຐນ຺ນມຖ ຣາຊຸນໍ ຘາຕຸອຕ຺ຖາຍ ສຕ຺ຖຸໂນ;

ອຸປ຺ປນ຺ນໍ ວິຄ຺ຄຫໍ ໂທໂຓ ສເມຕ຺ວານ ທ຺ວິຊຸຕ຺ຕໂມ.

໑໑໖. ¶

ກຕ຺ວານ ອຏ຺ຐ ໂກຏ຺ຐາເສ ຠາເຊຕ຺ວາ ເສສຘາຕຸໂຍ;

ອທາສິ ອຏ຺ຐຣາຊູນໍ ຕໍ ຕໍ ນຄຣວາສິນໍ.

໑໑໗.

ຫຏ຺ຐຕຸຏ຺ຐາ ຄເຫຕ຺ວານ ຘາຕຸໂຍ ຕາ ນຣາຘິປາ;

ຄນ຺ຕ຺ວາ ສເກ ສເກ ຣຏ຺ເຐ ເຈຕິຍານິ ອກາຣຍຸໍ.

໑໑໘.

ເອກາ ທາຐາ ສຸຣິນ຺ເທນ ເອກາ ຄນ຺ຘາຣວາສິຫິ;

ເອກາ ຠຸຊງ຺ຄຣາຊູຫິ ອາສິ ສກ຺ກຕປູຊິຕາ.

໑໑໙.

ທນ຺ຕຘາຕຸໍ ຕໂຕ ເຂໂມ ອຕ຺ຕນາ ຄຫິຕໍ ອທາ;

ທນ຺ຕປຸເຣ ກລິງ຺ຄສ຺ສ ພ຺ຣຫ຺ມທຕ຺ຕສ຺ສ ຣາຊິໂນ.

໑໒໐.

ເທສຍິຕ຺ວານ ໂສ ຘມ຺ມໍ ເຠຕ຺ວາ ສພ຺ພາ ກຸທິຏ຺ຐິໂຍ;

ຣາຊານໍ ຕໍ ປສາເທສິ ອຄ຺ຄມ຺ຠີ ຣຕນຕ຺ຕເຍ.

໑໒໑. ¶

ອຊ຺ໂຌຄາຬ຺ໂຫ ມຸນິນ຺ທສ຺ສ ຘມ຺ມາມຕມຫຓ຺ຓວໍ;

ໂສ ນຣິນ຺ໂທປວາເຫສິ ມລໍ ມຈ຺ຉຣິຍາທິກໍ.

໑໒໒.

ປາວຸສ຺ສໂກ ຍຖາ ເມໂຆ ນານາ ຣຕນວສ຺ສໂຕ;

ທາຬິທ຺ທິຍນິທາຆໍ ໂສ ນິພ຺ພາເປສິ ນຣຸຕ຺ຕໂມ.

໑໒໓.

ສຸວຓ຺ຓຂຈິຕາລມ຺ພ ມຸຕ຺ຕາຊາເລຫິ ໂສຠິຕໍ;

ກູຏາຄາຣສຕາກີຓ຺ຓໍ ຕຣຸຓາທິຈ຺ຈສນ຺ນິຠໍ.

໑໒໔.

ນານາຣຕນໂສຠາຍ ທຸທິກ຺ຂໍ ຈກ຺ຂຸມູສນໍ;

ຍານໍ ສຄ຺ຄາປວຄ຺ຄສ຺ສ ປສາທາຕິສຍາວຫໍ.

໑໒໕.

ກາຣຍິຕ຺ວານ ໂສ ຣາຊາ ທາຐາຘາຕຸນິເວສນໍ;

ຘາຕຸປີຐຎ຺ຈ ຕຕ຺ເຖວ ກາເຣຕ຺ວາ ຣຕນຸຊ຺ຊລໍ.

໑໒໖.

ຕຫິໍ ສມປ຺ປຍິຕ຺ວານ ທາຐາຘາຕຸໍ ມເຫສິໂນ;

ປູຊາວຕ຺ຖູຫິ ປູເຊສິ ຣຕ຺ຕິນ຺ທິວມຕນ຺ທິໂຕ.

໑໒໗. ¶

ອິຕິ ໂສ ສຎ຺ຈິນິຕ຺ວານ ປຸຎ຺ຎສມ຺ຠາຣ ສມ຺ປທໍ;

ຊຫິຕ຺ວາ ມານຸສໍ ເທຫໍ ສຄ຺ຄກາຍມລງ຺ກຣິ.

໑໒໘.

ອນຸຊາໂຕ ຕໂຕ ຕສ຺ສ ກາສິຣາຊວ຺ຫໂຍ ສຸໂຕ;

ຣຊ຺ຊໍ ລທ຺ຘາ ອມຈ຺ຈານໍ ໂສກສລ຺ລມປານຸທີ.

໑໒໙.

ປຸປ຺ຜຄນ຺ຘາທິນາ ທນ຺ຕຘາຕຸໍ ຕມຠິປູຊິຍ;

ນິຈ຺ຈໍ ມຓິປ຺ປທີເປຫິ ໂຊຕຍິ ຘາຕຸມນ຺ທິຣໍ.

໑໓໐.

ອິຈ຺ເຈວມາທິໍ ໂສ ຣາຊາ ກຕ຺ວາ ກຸສລສຎ຺ຈຍໍ;

ຊຫິຕ຺ວານ ນິຊໍ ເທຫໍ ເທວິນ຺ທປຸຣມຊ຺ຌຄາ.

໑໓໑.

ສຸນນ຺ໂທ ນາມ ຣາຊິນ຺ໂທ ອານນ຺ທຊນໂນ ສຕໍ;

ຕສ຺ສ’ຕ຺ຣໂຊ ຕໂຕ ອາສິ ພຸທ຺ຘສາສນມາມໂກ.

໑໓໒.

ສມ຺ມາເນຕ຺ວານ ໂສ ທນ຺ຕຘາຕຸໍ ເຎຍ຺ຍນ຺ຕທສ຺ສິໂນ;

ມຫຕາ ຠຕ຺ຕິໂຍເຄນ ອຄາ ເທວສຫວ຺ຍຕໍ.

໑໓໓. ¶

ຕໂຕ ປຣຎ຺ຈ ອຎ຺ເຎ’ປິ ພຫໂວ ວສຸຘາຘິປາ;

ທນ຺ຕຘາຕຸໍ ມຸນິນ຺ທສ຺ສ ກເມນ ອຠິປູຊຍຸໍ.

໑໓໔.

ຄຸຫສີວວ຺ຫໂຍ ຣາຊາ ທຸຣຕິກ຺ກມ ສາສໂນ;

ຕໂຕ ຣຊ຺ຊສິຣິໍ ປຕ຺ວາ ອນຸຄຓ຺ຫິ ມຫາຊນໍ.

໑໓໕.

ສປຣຕ຺ຖານຠິຎ຺ເຎ ໂສ ລາຠສກ຺ກາຣໂລລຸເປ;

ມາຍາວິໂນ ອວິຊ຺ຊນ຺ເຘ ນິຄນ຺ເຐ ສມຸປຏ຺ຐຫິ.

໑໓໖.

ວສ຺ສາຣຕ຺ເຕ ຍຖາ ຈນ຺ໂທ ໂມຫກ຺ຂນ຺ເຘນ ອາວໂຏ;

ນາສກ຺ຂີ ຄຸຓຣໍສີຫິ ຊລິຕຸໍ ໂສ ນຣາສໂຠ.

໑໓໗.

ຘມ຺ມມຄ຺ຄາ ອເປເຕ’ປິ ປວິຏ຺ເຐ ທິຏ຺ຐິການນໍ;

ຕສ຺ມິໍ ສາຘຸປຖໍ ອຎ຺ເຎ ນາຕິວຕ຺ຕິໍສຸ ປາຓິໂນ

໑໓໘. ¶

ເຫມໂຕຣຓມາລາຫິ ຘເຊຫິ ກທລິຫິ ຈ;

ປຸປ຺ຜຄຆິເຍຫິ’ເນເກຫິ ສຊ຺ເຊຕ຺ວາ ນາຄຣາ ປຸຣໍ

໑໓໙.

ມງ຺ຄລຕ຺ຖຸຕິ ໂຆເສຫິ ນຈ຺ຈຄີຕາທິເກຫິ ຈ;

ເຫມຣູປິຍປຸປ຺ເຜຫິ ຄນ຺ຘຈຸຓ຺ຓາທິເກຫິ ຈ.

໑໔໐.

ປູເຊນ຺ຕາ ມຸນິຣາຊສ຺ສ ທາຐາຘາຕຸໍ ກຸທາຈນໍ;

ອກໍສຸ ເອກນິຄ຺ໂຆສໍ ສໍວຏ຺ຏມ຺ພຸຘິສນ຺ນິຠໍ.

໑໔໑.

ອຸຄ຺ຆາເຏຕ຺ວາ ນຣິນ຺ໂທ ໂສ ປາສາເທ ສິຫປຎ຺ຊຣໍ;

ປສ຺ສນ຺ໂຕ ຊນມທ຺ທກ຺ຂີ ປູຊາວິຘິປຣາຍຓໍ.

໑໔໒.

ອຖາມຈ຺ຈສຠາມເຊຕ຺ຘ ຣາຊາ ວິມ຺ຠີຕ ມານໂສ;

ໂກຕຸຫລາກຸໂລ ຫຸຕ຺ວາ ອິທໍ ວຈນມພ຺ຣວີ.

໑໔໓.

ອຈ຺ເຉຣກໍ ກິເມຕນ຺ນຸ ກີທິສໍ ປາຏິຫາຣິຍໍ;

ມເມຕໍ ນຄຣໍ ກສ຺ມາ ຉຓນິສ຺ສິຕກໍ ອິຕິ.

໑໔໔. ¶

ຕໂຕ ອມຈ຺ໂຈ ອາຈິກ຺ຂິ ເມຘາວີ ພຸທ຺ຘມາມໂກ;

ຣາຊິໂນ ຕສ຺ສ ສມ຺ພຸທ຺ຘານຸຠາວມວິຊານໂຕ.

໑໔໕.

ສພ຺ພາຠິຠຸສ຺ສພຸທ຺ທສ຺ສ ຕນ຺ຫາສງ຺ກຍທສ຺ສິໂນ;

ເອສາ ຘາຕຸ ມຫາຣາຊ ເຂມຕ຺ເຖເຣນ ອາຫຏາ.

໑໔໖.

ຕໍ ຘາຕຸໍ ປູຊຍິຕ຺ວານ ຣາຊາໂນ ປຸພ຺ພກາ ອິຘ;

ກລ຺ຍາຓມິຕ຺ເຕ ນິສ຺ສາຍ ເທວກາຍມຸປາຄມຸໍ.

໑໔໗.

ນາຄຣາປິ ອິເມ ສພ຺ເພ ສມ຺ປຣາຍ ສຸກຕ຺ຖິກາ;

ປູຊຍນ຺ຕິ ສມາຄມ຺ມ ຘາຕຸໍ ຕໍ ສຕ຺ຖຸໂນ ອິຕິ.

໑໔໘.

ຕສ຺ສາມຈ຺ຈສ຺ສ ໂສ ຣາຊາ ສຸຕ຺ວາ ຘມ຺ມໍ ສຸຠາສິຕໍ;

ທຸລ຺ລທ຺ຘີມລມຸຊ຺ຌິຕ຺ວາ ປສີທິ ຣຕນຕ຺ຕເຍ.

໑໔໙. ¶

ຘາຕຸປູຊໍ ກໂຣນ຺ໂຕ ໂສ ຣາຊາ ອຈ຺ຉຣິຍາ ວຫໍ;

ຕິຕ຺ຖິເຍ ທຸມ຺ມເນ’ກາສິ ສຸມເນ ເຈຕເຣ ຊເນ.

໑໕໐.

ອິເມ ອຫິຣິກາ ສພ຺ເພ ສທ຺ຘາທິຄຸຓວຊ຺ຊິຕາ;

ຖທ຺ຘາ ສຐາ ຈ ທຸປ຺ປຎ຺ຎາ ສຄ຺ຄໂມກ຺ຂວິພນ຺ຘກາ.

໑໕໑.

ອິຕິ ໂສ ຈິນ຺ຕຍິຕ຺ວານ ຄຸຫສີໂວ ນຣາຘິໂປ;

ປພ຺ພາເຊສິ ສກາ ຣຏ຺ຐາ ນິຄຓ຺ເຐ ເຕ ອເສສເກ.

໑໕໒.

ຕໂຕ ນິຄ຺ຓ຺ຐາ ສພ຺ເພ’ປິ ຆຕສິຕ຺ຕານລາ ຍຖາ;

ໂກຘຄ຺ຄິຊລິຕາ’ຄຎ຺ຉຸໍ ປຸຣໍ ປາຏລິປຸຕ຺ຕກໍ.

໑໕໓.

ຕຕ຺ຖ ຣາຊາ ມຫາເຕໂຊ ຊມ຺ພຸທີປສ຺ສ ອິສ຺ສໂຣ;

ປຓ຺ຑຸນາໂມ ຕທາ ອາສິ ອນນ຺ຕພລວາຫໂຓ.

໑໕໔. ¶

ໂກຘນ຺ຘາຖ ນິຄຓ຺ຐາ ເຕ ສພ຺ເພ ເປສຸຎ຺ຎກາຣກາ;

ອຸປສງ຺ກມ຺ມ ຣາຊານໍ ອິທໍ ວຈນມພ຺ຣວູໍ.

໑໕໕.

ສພ຺ພເທວມນຸສ຺ເສຫິ ວນ຺ທນີເຍ ມຫິທ຺ຘິເກ;

ສິວພ຺ຣຫ຺ມາທໂຍ ເທເວ ນິຈ຺ຈໍ ຕຸມ຺ເຫ ນມສ຺ສຖ.

໑໕໖.

ຕຸຍ຺ຫໍ ສາມນ຺ຕຠຸປາໂລ ຄຸຫສີໂວ ປນາຘຸນາ;

ນິນ຺ທນ຺ໂນ ຕາທິເສ ເທເວ ຉວຏ຺ຐິໍ ວນ຺ທເຕ ອິຕິ.

໑໕໗.

ສຸຕ຺ວານ ວຈນໍ ເຕສໍ ຣາຊາ ໂກຘວສານຸໂຄ;

ສູຣໍ ສາມນ຺ຕຠູປາລໍ ຈິຕ຺ຕຍານມຖ’ພ຺ຣວີ.

໑໕໘.

ກລິງ຺ຄຣຏ຺ຐໍ ຄນ຺ຕ຺ວານ ຄຸຫສີວມິຘານຍ;

ປູຊິຕໍ ຕໍ ຉວຏ຺ຐິຎ຺ຈ ເຕນ ຣຕ຺ຕິນ຺ທິວໍ ອິຕິ.

໑໕໙.

ຈິຕ຺ຕຍາໂນ ຕໂຕ ຣາຊາ ມຫຕິໍ ຈຕຸຣງ຺ຄິນິໍ;

ສນ຺ນຍຫິຕ຺ວາ ສກໍ ເສນໍ ປຸຣາ ຕມ຺ຫາຠິນິກ຺ຂມິ.

໑໖໐. ¶

ຄນ຺ຕ຺ວານ ໂສ ມຫີປາໂລ ເສນງ຺ເຄຫິ ປຸຣກ຺ຂໂຕ;

ທນ຺ຕປຸຣສ຺ສາວິທູເຣ ຂນ຺ຘາວາຣໍ ນິເວສຍິ.

໑໖໑.

ສຸຕ຺ວາ ອາຄມນໍ ຕສ຺ສ ກລິງ຺ໂຄ ໂສ ມຫິປຕິ;

ຄຊິນ຺ທປາຠຕາທິຫິ ຕໍ ໂຕເສສິ ນຣາຘິປໍ.

໑໖໒.

ຫິຕຊ຺ຌາສຍຕໍ ຎຕ຺ວາ ຄຸຫສີວສ຺ສ ຣາຊິໂນ;

ທນ຺ຕປຸຣໍ ຈິຕ຺ຕຍາໂນ ສທ຺ຘິໍ ເສນາຍ ປາວິສິ.

໑໖໓.

ປາກາຣໂຄປຸຣຏ຺ຏາລປາສາທຄຆິກຈິຕ຺ຕິຕໍ;

ທານສາລາຫິ ໂສ ຣາຊາ ສມິທ຺ຘໍ ປຸຣມທ຺ທສ.

໑໖໔.

ຕໂຕ ໂສ ສຸມໂນ ຄນ຺ຕ຺ວາ ປວິຏ຺ໂຐ ຣາຊມນ຺ທິຣໍ;

ຄຸຫສີວສ຺ສ ອາຈິກ຺ຂິ ປຓ຺ຑຸຣາຊສ຺ສ ສາສນໍ.

໑໖໕. ¶

ສຸຕ຺ວານ ສາສນໍ ຕສ຺ສ ທາຣຸຓໍ ທຸຣຕິກ຺ກມໍ;

ປສນ຺ນມຸຂວຓ຺ໂຓ’ວ ຈິຕ຺ຕຍານໍ ສມພ຺ຣວີ.

໑໖໖.

ສພ຺ພໂລກຫິຕຕ຺ຖາຍ ມໍສເນຕ຺ຕາທິທານໂຕ;

ອນປ຺ປກປ຺ເປ ສມ຺ຠາເຣ ສມ຺ຠຣິຕ຺ວາ ອຕນ຺ທິໂຕ.

໑໖໗.

ເຊຕ຺ວາ ນມຸຈິໂນ ເສນໍ ປຕ຺ວາ ສພ຺ພາສວກ຺ຂຍໍ;

ອນາວຣຓຎາເຓນ ສພ຺ພຘມ຺ເມສຸ ປາຣຄຸ.

໑໖໘.

ທິຏ຺ຐຘມ຺ມສຸກສ຺ສາທໍ ອຄເຓຕ຺ວານ ອຕ຺ຕໂນ;

ຘມ຺ມນາວາຍ ຕາເຣສິ ຊນຕໍ ໂຍ ຠວຓ຺ຓວາ.

໑໖໙.

ເທວາຕິເທວໍ ຕໍ ພຸທ຺ຘໍ ສຣຓໍ ສພ຺ພປາຓິນໍ;

ຊໂນ ຫິ ອວຊານນ຺ໂຕ ອທ຺ຘາ ໂສ ວຎ຺ຈິໂຕ ອິຕິ.

໑໗໐. ¶

ອິຈ຺ເຈວມາທິໍ ສຸຕ຺ວານ ໂສ ຣາຊາ ສຕ຺ຖຸວຓ຺ຓນໍ;

ອານນ຺ທສ຺ສຸປ຺ປພນ຺ເຘຫິ ປເວເທສິ ປສນ຺ນຕໍ.

໑໗໑.

ຄຸຫສີໂວ ປສນ຺ນໍ ຕໍ ຈິຕ຺ຕຍານໍ ອຸທິກ຺ຂິຍ;

ເຕນ ສທ຺ຘິໍ ມຫຄ຺ຆໍ ຕໍ ອຄມາ ຘາຕຸມນ຺ທິຣໍ.

໑໗໒.

ຫຣິຈນ຺ທນສມ຺ຠຸຕໍ ທ຺ວາຣພາຫາທິເກຫິ ຈ;

ປວາຬວາຬມາລາຫິ ລມ຺ພມຸຕ຺ຕາລຕາຫິ ຈ.

໑໗໓.

ອິນ຺ທນີລກວາເຏຫິ ມຓິກິງ຺ກິຓິກາຫິ ຈ;

ໂສວຓ຺ຓກຓ຺ຓມາລາຫິ ໂສຠິຕໍ ມຓິຖູປິກໍ.

໑໗໔.

ອຸຈ຺ຈໍ ເວລຸຣິຍຸພ຺ຠາສິ ຉທນໍ ມກຣາກຸລໍ;

ຘາຕຸມນ຺ທິຣມທ຺ທກ຺ຂິ ຣຕນຸຊ຺ຊລ ປີຐກໍ.

໑໗໕.

ຕໂຕ ເສຕາຕປຕ຺ຕສ຺ສ ເຫຏ຺ຐາ ຣຕນຈິຕ຺ຕິຕໍ;

ທິສ຺ວາ ຘາຕຸກຣນ຺ຑຎ຺ຈ ຕຸຏ຺ໂຐ ວິມ຺ຠຍມຊ຺ຌຄາ.

໑໗໖. ¶

ຕໂຕ ກລິງ຺ຄນາໂຖ ໂສ ວິວຣິຕ຺ວາ ກຣຓ຺ຑກໍ;

ມຫີຕເລ ນິຫນ຺ຕ຺ວານ ທກ຺ຂິຓໍ ຊານຸມຓ຺ຑລໍ.

໑໗໗.

ອຎ຺ຊລິໍ ປຄ຺ຄເຫຕ຺ວານ ຄຸເຓ ທສພລາທິເກ;

ສຣິຕ຺ວາ ພຸທ຺ຘເສຏ຺ຐສ຺ສ ອກາສິ ອຠິຍາຈນໍ.

໑໗໘.

ຄຓ຺ຑມ຺ພຣຸກ຺ຂມູລມ຺ຫິ ຕຍາ ຕິຕ຺ຖີຍມທ຺ທເນ;

ຍມກໍ ທສ຺ສຍນ຺ເຕນ ປາຏິຫາຣິຍມພ຺ຠຸຕໍ.

໑໗໙.

ປຸພ຺ພກາຍາທິນິກ຺ຂນ຺ຕຊລານລສມາກຸລໍ;

ຈກ຺ກວາຬງ຺ຄຓໍ ກຕ຺ວາ ຊນາ ສພ຺ເພ ປສາທິຕາ.

໑໘໐.

ເທເສຕ຺ວານ ຕໂຍ ມາເສ ອຠິຘມ຺ມໍ ສຸຘາສິນໍ;

ນຄຣໍ ໂອຕຣນ຺ເຕນ ສງ຺ກສ຺ສໍ ຕາວຕິໍສໂຕ.

໑໘໑. ¶

ຉຕ຺ຕວາມຣສງ຺ຂາທິຄາຫເກຫິ ອເນກຘາ;

ພ຺ຣຫ຺ມເທວາສຸຣາທີຫິ ປູຊິເຕນ ຕຍາ ປນ.

໑໘໒.

ຐຕ຺ວານ ມຓິໂສປາເຓ ວິສ຺ສກມ຺ມາຠິນິມ຺ມິເຕ;

ໂລກວິວຣຓໍ ນາມ ທສ຺ສິຕໍ ປາຏິຫາຣິຍໍ.

໑໘໓.

ຕຖາເນເກສຸ ຐາເນສຸ ມຸນິຣາຊ ຕຍາປຸນ;

ພຫູນິ ປາຏິຫິຣານິ ທສ຺ສິຕານິ ສຍມ຺ຠຸນາ.

໑໘໔.

ປາຏິຫາຣິຍມຊ຺ຊາປິ ສຄ຺ຄໂມກ຺ຂສຸຂາວຫໍ;

ປສ຺ສນ຺ຕານໍ ມນຸສ຺ສານໍ ທສ຺ສນີຍໍ ຕຍາ ອິຕິ.

໑໘໕. ¶

ອພ຺ຠຸຄ຺ຄນ຺ຕ຺ວາ ຄຄຓ ກຸຫຣໍ ຈນ຺ທເລຂາຠິຣາມາ,

ວິສ຺ສຊ຺ເຊນ຺ຕິ ຣຊຕ ຘວລາ ຣໍສິໂຍ ທນ຺ຕຘາຕຸ;

ຘູປາຍນ຺ຕິ ສປທິ ພຫຸຘາ ປຊ຺ຊລນ຺ຕີ ມຸຫຸຕ຺ຕໍ,

ນິພ຺ພາຍນ຺ຕີ ນຍນສຸຠຄໍ ປາຏິຫີຣໍ ອກາສິ.

໑໘໖.

ອຈ຺ເຉຣໍ ຕໍ ປຣມ ຣຸຈິຣໍ ຈິຕ຺ຕຍາໂນ ນຣິນ຺ໂທ,

ທິສ຺ວາ ຫຏ຺ໂຐ ຈິຣປຣິຈິຕໍ ທິຏ຺ຐິຊາລໍ ຊຫິຕ຺ວາ;

ຄນ຺ຕ຺ວາ ພຸທ຺ຘໍ ສຣຓມສມໍ ສພ຺ພເສຓີຫິ ສທ຺ຘິໍ,

ອຄ຺ຄໍ ປຸຎ຺ຎໍ ປສວິ ພຫຸຘາ ຘາຕຸສມ຺ມານນາຍ.

ທຸຕິໂຍ ປຣິຈ຺ເຉໂທ

໑໘໗. ¶

ຕໂຕ ກລິງ຺ຄາຘິປຕິສ຺ສ ຕສ຺ສໂສຈິຕ຺ຕຍາໂນປຣມປ຺ປຕີໂຕ;

ຕໍ ສາສນໍ ປຓ຺ຑຸນຣາຘິປສ຺ສ ຎາເປສິ ຘີໂຣ ທຸຣຕິກ຺ກມໍ’ຕິ.

໑໘໘.

ຣາຊາຕໂຕ ທນ຺ຕປຸຣໍ ຘເຊຫິ ປຸປ຺ເຜຫິ ຘູເປຫິ ຈ ໂຕຣເຓຫິ;

ອລງ຺ກຣິຕ຺ວານ ມຫາວິຕານ ນິວາຣິຕາທິຈ຺ຈມຣີຈິຊາລໍ.

໑໘໙.

ອສ຺ສຸປ຺ປພນ຺ຘາວຸຕໂລຈເນຫິ ປຸຣກ຺ຂໂຕ ເນຄມ ນາຄເຣຫິ;

ສມຸພ຺ພຫນ຺ໂຕ ສິຣສາ ນິເຊນ ມຫາຣຫໍ ຘາຕຸກຣຓ຺ຑກໍ ຕໍ.

໑໙໐.

ສມຸສ຺ສິໂຕທາຣ ສິຕາຕປຕ຺ຕໍ ສງ຺ໂຂທໂຣທາຕ ຕຸຣງ຺ຄຍຸຕ຺ຕໍ;

ຣຖໍ ນວາທິຈ຺ຈສມານວຓ຺ຓ ມາຣຸຍ຺ຫ ຈິຕ຺ຕຕ຺ຖຣຓາຠິຣາມໍ.

໑໙໑.

ອເນກສງ຺ເຂຫິ ພເລຫິ ສທ຺ຘິໍ ເວລາຕິວຕ຺ຕມ຺ພຸຘິສນ຺ນິເຠຫີ;

ນິວຕ຺ຕມານສ຺ສ ພຫຸຊ຺ຊນສ຺ສ ວິນາປິ ເທຫໍ ມນສານຸຍາໂຕ

໑໙໒. ¶

ສຸສນ຺ຖຕໍ ສພ຺ພຘິວາລຸກາຫິ ສຸສຊ຺ຊິຕໍ ປຸຓ຺ຓ ຆຏາທິເກຫິ;

ປຸປ຺ຜາຠິກິຓ຺ຓໍ ປຏິປຊ຺ຊິ ທີຆໍ ສຸວິຕ຺ຖຕໍ ປາຏລິປຸຕ຺ຕມຄ຺ຄໍ.

໑໙໓.

ກລິງ຺ຆນາໂຖ ກຸສຸມາທິເກຫິ ນຈ຺ເຈຫິ ຄີເຕຫິ ຈ ວາທິເຕຫິ;

ທິເນ ທິເນ ອທ຺ຘນິ ທນ຺ຕຘາຕຸໍ ປູເຊສິ ສທ຺ຘິໍ ວນເທວຕາຫິ.

໑໙໔.

ສຸທຸຄ຺ຄມໍ ສິນ຺ຘຸມຫີຘເຣຫິ ກເມນ ມທ຺ຘານມຕິກ຺ກມິຕ຺ວາ;

ອາທາຍ ຘາຕຸໍ ມນຸຊາຘິນາໂຖ ອຄາ ປຸຣໍ ປາຏລິ ປຸຕ຺ຕນາມໍ.

໑໙໕.

ຣາຊາຘິຣາໂຊ’ຖ ສຠາຍ ມຊ຺ເຌ ທິສ຺ວານ ຕໍ ວີຕຠຍໍ ວິສງ຺ກໍ;

ກລິງ຺ຄຣາຊໍ ປຏິຆາຠິຠຸໂຕ ອຠາສິ ເປສຸຎ຺ຎກເຣ ນິຄຓ຺ເຐ

໑໙໖.

ເທເວ ຊຫິຕ຺ວານ ນມສ຺ສນີເຍ ຉວຏ຺ຐິເມເຕນ ນມສ຺ສິຕໍ’ຕໍ;

ອງ຺ຄາຣຣາສິມ຺ຫິ ສໂຊຕິຠູເຕ ນິກ຺ຂິປ຺ປ ຂິປ຺ປໍ ທຫຖາຘຸເນຕິ.

໑໙໗. ¶

ປຫຏ຺ຐຈິຕ຺ຕາ’ວຕໂຕ ນິຄຓ຺ຐາຣາຊງ຺ຄເຓ ເຕ ມຫຕິໍ ຄຠີຣໍ;

ວີຕຈ຺ຈິກງ຺ຄາຣກ ຣາສິ ປຸຓ຺ຓໍ ອງ຺ຄາຣກາສຸໍ ອຠິສງ຺ຂຣິໍສຸ.

໑໙໘.

ສມນ຺ຕໂຕ ປຊ຺ຊລິຕາຍ ຕາຍ ສໂຊຕິຍາ ໂຣຣຸວເຠຣວາຍ;

ໂມຫນ຺ຘຠຸຕາ ອຖ ຕິຕ຺ຖິຍາ ເຕ ຕໍ ທນ຺ຕຘາຕຸໍ ອຠິນິກ຺ຂິປິໍສຸ.

໑໙໙.

ຕສ຺ສານຸຠາເວນ ຕມຄ຺ຄີຣາສິໍ ເຫຕ຺ວາ ສໂຣຊໍ ຣຖຈກ຺ກມຕ຺ຕໍ;

ສມນ຺ຕໂຕ ອຸຄ຺ຄຕເຣຓຸຊາລ ມຸຏ຺ຐາສິ ກິຎ຺ຊກ຺ຂ ຠຣາຠິຣາມໍ.

໒໐໐.

ຕສ຺ມິໍ ຂເຓ ປງ຺ກຊ ກຓ຺ຓິກາຍ ປຕິຏ຺ຐຫິຕ຺ວາ ຊິນທນ຺ຕຘາຕຸ;

ກຸນ຺ທາວທາຕາຫິ ປຠາຫິ ສພ຺ພາ ທິສາ ປຠາເສສິ ປຠສ຺ສຣາຫິ.

໒໐໑. ¶

ທິສ຺ວານ ຕໍ ອຈ຺ຉຣິຍໍ ມນຸສ຺ສາ ປສນ຺ນຈິຕ຺ຕາ ຣຕນາທິເກຫິ;

ສມ຺ປູຊຍິຕ຺ວາ ຊິນທນ຺ຕຘາຕຸໍ ສກໍ ສກໍ ທິຏ຺ຐິມໂວສ຺ສຊິໍສຸ.

໒໐໒.

ໂສ ປຓ຺ຑຸຣາຊາ ປນ ທິຏ຺ຐິຊາລໍ ຈິຣານຸພທ຺ຘໍ ອປຣິຈ຺ຈຊນ຺ໂຕ;

ປຕິຏ຺ຐເປຕ຺ວາ’ຘິກຣຎ຺ຎເມຕໍ ກຸເຏນ ຆາຕາປຍິ ທນ຺ຕຘາຕຸໍ.

໒໐໓.

ຕສ຺ສໍ ນິມຸຄ຺ຄາ’ຘິກຣຎ຺ຎເມສາ ອຸປຑ຺ຒຠາເຄ ນຈ ທິສ຺ສມານາ;

ປຸພ຺ພາຈລຏ຺ໂຐ’ວ ສຸຘາມຣີຈິ ໂຊເຕສິ ຣໍສີຫິ ທິສາ ສມນ຺ຕາ.

໒໐໔.

ທິສ຺ວານຸຠາວໍ ຊິນທນ຺ຕຘາຕຸ ຍາປຊ຺ຊິ ໂສ ວິມ຺ຠຍ ມຄ຺ຄຣາຊາ;

ເອໂກ’ຖ ອິສ຺ສາປສຸໂຕ ນິຄຓ຺ໂຐ ຕໍ ຣາຊຣາຊານມິທໍ ອໂວຈ.

໒໐໕.

ຣາມາທໂຍ ເທວ ຊນທ຺ທນສ຺ສ ນານາວຕາຣາ ຠຸວເນ ອເຫສຸໍ;

ຕສ຺ເສກເທໂສ’ຈ ອິທໍ ຉວຏ຺ຐິໂນເຈ’ນຸຠາໂວກຖມີທິໂສຕິ.

໒໐໖. ¶

ອທ຺ຘາ ມນຸສ຺ສຕ຺ຕມຸປາຄຕສ຺ສ ເທວສ຺ສ ປຈ຺ຉາ ຕິທິວໍ ຄຕສ຺ສ;

ເທເຫກເທໂສ ຐປິໂຕ ຫິຕຕ຺ຖເມຕນ຺ຕິ ສຈ຺ຈໍວຈນໍຠເວຍ຺ຍ.

໒໐໗.

ສໍວຓ຺ຓຍິຕ຺ວານ ຄຸເຓ ປຫູເຕ ນາຣາຍຓສ຺ສ’ສ຺ສມຫິທ຺ຘິກສ຺ສ;

ນິມຸຄ຺ຄເມຕ຺ຕາ’ຘິກຣຎ຺ຎເມຕໍສມ຺ປສ຺ສໂຕ ເມພຫິນີຫຣິຕ຺ວາ.

໒໐໘.

ສມ຺ປາທຍິຕ຺ວານ ມຫາຊນານໍ ມຸຂານິ ປງ຺ເກຣຸຫສຸນ຺ທຣານິ;

ຍຏິຈ຺ຉິຕໍ ຄຓ຺ຫຖ ວຕ຺ຖຸຊາຕໍ ອິຈ຺ຈາຫ ຣາຊາ ມຸຂເຣ ນິຄຓ຺ເຐ.

໒໐໙.

ເຕ ຕິຕ຺ຖິຍາ ວິຓຫຸສຸຣໍ ຄຸເຓຫິ ວິຈິຕ຺ຕ ຣູເປຫິ ອຠິຕ຺ຖວິຕ຺ວາ;

ໂຕເຍນ ສິຎ຺ຈິໍສຸ ສຐາ ຕຖາປິ ຐິຕປ຺ປເທສາ ນ ຈລິຕ຺ຖ ຘາຕຸ.

໒໑໐.

ຊິຄຸຈ຺ຉມາໂນ ອຖ ເຕ ນິຄຓ຺ເຐ ໂສ ຘາຕຸຍານີຫຣເຓ ອຸປາຍໍ;

ອນ຺ເວສມາໂນ ວສຸຘາຘິນາໂຖ ເຠຣິໍ ຈຣາເປສິ ສເກ ປຸຣມ຺ຫິ.

໒໑໑. ¶

ນິມຸຄ຺ຄເມຕ຺ຖາ’ຘິກຣຎ຺ຎມຊ຺ຊິ ໂຍ ຘາຕຸເມຕໍ ພຫິ ນີຫເຣຍ຺ຍ;

ລທ຺ຘານ ໂສ ອິສ຺ສຣິຍໍ ມຫນ຺ຕໍ ຣຎ຺ໂຎສກາສາສຸຂເມສ຺ສຕີຕິ

໒໑໒.

ສຸຕ຺ວາ ນ ຕໍ ເຠຣິຣວໍອຸຬາຣໍປຸຎຎ຺ຎຕ຺ຖິໂກພຸທ຺ຘພເລປສນ຺ໂນ;

ຕສ຺ມິໍ ປຸເຣ ເສຏ຺ຐິສຸໂຕ ສຸຠທ຺ໂທ ປາເວກ຺ຂິຣຎ຺ໂຎ ສມິຕິໍ ປຄພ຺ໂຠ.

໒໑໓.

ຕມຄ຺ຄຣາຊໍ ອຖ ໂສ ນມິຕ຺ວາ ສາມາຊິການໍ ຫທຍງ຺ຄມາຍ;

ຠາສາຍ ສພ຺ພຎ຺ຎຸຄຸຓປ຺ປຠາວໍ ວຓ຺ເຓສິ ສາຣຊ຺ຊວິມຸຕ຺ຕ ຈິຕ຺ໂຕ.

໒໑໔.

ຠຸມິໍ ກິຓິຕ຺ວາ ມຫຕາ ຘເນນ ມໂນຣມໍ ເຊຕວນໍ ວິຫາຣໍ;

ໂຍ ກາຣຍິຕ຺ວານ ຊິນສ຺ສ ທຕ຺ວາ ອຸປຏ຺ຐຫິ ຕໍ ຈຕຸປຈ຺ຈເຍຫິ.

໒໑໕. ¶

ອນາຖປິຓ຺ຑິປ຺ປທເສຏ຺ຐິເສຏ຺ໂຐໂສທິຏ຺ຐຘມ຺ໂມປປິຕາມໂຫເມ;

ຕິໂລກນາເຖ ມມ ຘມ຺ມຣາເຊ ຕຸມ຺ເຫ’ຘຸນາປສ຺ສຖຠຕ຺ຕິຠາຣໍ.

໒໑໖.

ອິຕ຺ຖໍ ນທິຕ຺ວານ ປຫູຕປເຎຎ຺ຎາ ກຕ຺ວານ ເອກໍສມຖຸຕ຺ຕຣີຍໍ;

ມຫີຕລໍ ທກ຺ຂິຓຊານຸເກນ ອາຫຈ຺ຈ ພທ຺ຘຎ຺ຊລິໂກ ອໂວຈ.

໒໑໗.

ຉທ຺ທນ຺ຕນາໂຄ ສວິເສນ ວິທ຺ໂຘ ສລ຺ເລນ ໂຍ ໂລຫິຕມກ຺ຂິ ຕງ຺ໂຄ;

ຉພ຺ພຓ຺ຓຣໍສີຫິ ສມຸຊ຺ຊລນ຺ເຕ ເຉຕ຺ວານ ລຸທ຺ທາຍ ອທາສິ ທນ຺ເຕ.

໒໑໘.

ສໂສ’ປິ ຫຸຕ຺ວານ ວິສຸທ຺ຘສີໂລ ອຊ຺ຌຕ຺ຕທານາຠິຣໂຕ ທ຺ວິຊາຍ;

ໂຍ’ທຊ຺ຊິເທຫມ຺ປິ ສກໍ ນິປຈ຺ຈ ອງ຺ຄາຣຣາສິມ຺ຫິ ພຸຠຸກ຺ຂິຕາຍ.

໒໑໙. ¶

ໂຍ ໂພຘິຍາ ພາຫິຣວຕ຺ຖຸທານາ ອຕິຕ຺ຕຣູໂປ ສິວິຣາຊ ເສຏ຺ໂຐ;

ອທາສິ ຈກ຺ຂູນິ ປຠສ຺ສຣານິ ທ຺ວິຊາຍ ຊິຓ຺ຓາຍ ອຈກ຺ຂຸກາຍ.

໒໒໐.

ໂຍຂນ຺ຕິວາທີ’ປິ ກລາພຸຣາເຊ ເຉທາປຍນ຺ເຕ’ປິ ສຫຕ຺ຖປາທໍ;

ປຣິປ຺ລຸຕງ຺ໂຄຣຸຘິເຣ ຕິຕິກ຺ຂິເມຕ຺ຕາຍມາໂນ ຍສທາຍເກ’ວ.

໒໒໑.

ໂຍ ຘມ຺ມປາໂລ ອປິ ສຕ຺ຕມາສ ຊາໂຕປທຸຏ຺ເຐ ຊນເກສກມ຺ຫິ;

ກາຣາປຍນ຺ເຕ ອສິມາລກມ຺ມໍ ຈິຕ຺ຕໍ ນ ທູເສສິ ປຕາປຣາເຊ.

໒໒໒.

ສາຂາມິໂຄ ໂຍ ອສຕາ ປຸເມນ ວເນ ປປາຕາ ສຍມຸທ຺ຘເຏນ;

ສິລາຍ ຠິນ຺ເນ’ປິ ສເກ ລລາເຏ ຕໍ ເຂມຠຸມິໍ ອນຍິຕ຺ຖມູຬ຺ຫໍ.

໒໒໓.

ຣຸຏ຺ເຐນ ມາເຣນ’ຠິນິມ຺ມິຕມ຺ປິ ອງ຺ຄາຣກາສຸໍ ຊລິຕໍ ວິຫິຊ຺ຊ;

ສມຸຏ຺ຐິເຕ ສຊ຺ຊຸມຫາຣວິນ຺ເທ ຐຕ຺ວານ ໂຍ ເສຏ຺ຐິ ອທາສິ ທານໍ.

໒໒໔. ¶

ມິເຄນ ເຍນາເປວິຊຎ຺ຎເມກໍ ຠີຕໍວຘາໂມຈຍິຕຸໍກຸຣງ຺ຄິໍ;

ອາຆາຕເນ ອຕ຺ຕສິຣໍຐເປຕ຺ວາປໂມຈິຕາ’ຎ຺ຎ຺ຎປິປາຓິສງ຺ຆາ.

໒໒໕.

ໂຍ ສຕ຺ຕວສ຺ໂສ ວິສິຂາຍ ປໍສຸ ກີຬາປໂຣ ສມ຺ຠວນາມໂກ’ປິ;

ສພ຺ພຎ຺ຎຸລີຬ຺ຫາຍ ນິຄຸຬ຺ຫປຎ຺ຫໍ ປຸຏ຺ໂຐ ວິຍາກາສິ ສຸຈີຣເຕນ.

໒໒໖.

ຫິຕ຺ວາ ນິກນ຺ຕິໍ ສກຊີວິເຕ’ປິ ພທ຺ຘາສກຸຈ຺ຉິມ຺ຫິ ຈ ເວຕ຺ຕວລ຺ລິໍ;

ສາຂາມິເຄ ເນກສຫສ຺ສສງ຺ເຂ ວຘາປໂມເຈສິ ກປິສ຺ສໂຣໂຍ.

໒໒໗.

ສນ຺ຕປ຺ປຍໍ ຘມ຺ມສຸຘາຣເສນ ໂຍ ມານຸເສ ຕຸຓ຺ຑິລສູກໂຣ’ປິ;

ອິສີ’ວ ກຕ຺ວາ ອຖ ຎາຍຄນ຺ຖໍ ນິຊໍ ປວຕ຺ເຕສິ ຈິຣາຍ ຘມ຺ມໍ.

໒໒໘. ¶

ປຈ຺ຈຕ຺ຖິກໍ ປຸຓ຺ຓກຍກ຺ຂມຸຄ຺ຄໍ ມຫິທ຺ຘິກໍ ກາມຄຸເຓສຸ ຄິທ຺ຘໍ;

ໂຍ ຕິກ຺ຂປຎ຺ໂຎວິຘຸຣາຠິຘາໂນທເມສິ ກາຬາຄິຣິມຕ຺ຕກມ຺ຫິ.

໒໒໙.

ກຸລາວສາຍິ ອວິຣູຬ຺ຫປກ຺ໂຂ ໂຍ ພຸທ຺ຘິມາ ວຏ຺ຏກໂປຕໂກ’ປິ;

ສຈ຺ເຈນ ທາວຄ຺ຄິມຠິຊ຺ຊລນ຺ຕໍ ວສ຺ເສນ ນິພ຺ພາປຍິ ວາຣິໂທ’ວ.

໒໓໐.

ໂຍ ມຈ຺ຉຣາຊາປິ ອວຸຏ຺ຐິກາເລທິສ຺ວານມຈ຺ເຉ ຕສິເຕກິລນ຺ເຕ;

ສຈ຺ເຈນວາກ຺ເຍນມໂຫຆປຸຓ຺ຓໍມຸຫຸຕ຺ຕມຕ຺ເຕນອກາສິຣຏ຺ຐໍ.

໒໓໑.

ວິຈິຕ຺ຕຫຕ຺ຖສ຺ສ ຣຖາທິການິ ວສຸນ຺ຘຣາ ກມ຺ປນ ກາຣຓານິ;

ປຸຕ຺ເຕ’ນຸຊາເຕ ສທິເສຈທາເຣໂຍ’ທຊ຺ຊິເວສ຺ສນ຺ຕຣຊາຕິຍມ຺ປິ.

໒໓໒. ¶

ພຸທ຺ໂຘ ຠວິຕ຺ວາ ອປິ ທິຏ຺ຐຘມ຺ມ ສຸຂານເປກ຺ໂຂ ກຣຸຓານຸວຕ຺ຕີ;

ສພ຺ພໍ ສຫນ຺ໂຕ ອວມານນາທິໍ ໂຍທຸກ຺ກຣໍ ໂລກຫິຕໍອກາສິ.

໒໓໓.

ພເລນ ສທ຺ຘິໍ ຈຕຸຣງ຺ຄິເກນ ອຠິທ຺ທວນ຺ຕໍ ອຕິຠິໍສເນນ;

ອເຊຍ຺ຍສຕ຺ຖໍ ປຣມິທ຺ຘິປຕ຺ຕໍ ທເມສິ ໂຍ ອາລວກມ຺ປີ ຍກ຺ຂໍ.

໒໓໔.

ເທຫາຠິນິກ຺ຂນ຺ຕ ຫຸຕາສນຈ຺ຈິ ມາລາກຸລໍ ພ຺ຣຫ຺ມຠວໍ ກຣິຕ຺ວາ;

ເຠຕ຺ວານ ທິຏ຺ຐິໍ ສຸຈິຣານຸພທ຺ຘໍ ທເມສິ ໂຍ ພ຺ຣຫ຺ມວຣໍ ມຸນິນ຺ໂທ.

໒໓໕.

ອຈ຺ຈງ຺ກຸສໍ ທານສຸໂຘຕ ຄຓ຺ຑໍ ນິປາຕິຕຏ຺ຐາລກ ໂຄປຸຣາທິໍ;

ຘາວນ຺ຕມຄ຺ເຄ ຘນປາລຫຕ຺ຖິໍ ທເມສິ ໂຍ ທາຣຸຓມນ຺ຕກໍ’ວ.

໒໓໖. ¶

ມນຸສ຺ສຣຕ຺ຕາຣຸຓປາຓິປາທມຸກ຺ຂິປ຺ປ ຂຄ຺ຄໍ ອນຸພນ຺ຘມານໍ;

ມຫາທໂຍ ທຸປ຺ປສຫໍ ປເຣຫິ ທເມສິ ໂຍ ອງ຺ຄຸລິມາລໂຈຣໍ.

໒໓໗.

ໂຍ ຘມ຺ມຣາຊາ ວິຊິຕາຣິສງ຺ໂຆ ປວຕ຺ຕຍນ຺ໂຕ ວຣຘມ຺ມຈກ຺ກໍ;

ສທ຺ຘມ຺ມ ສຎ຺ຎໍ ຣຕນາກຣຎ຺ຈ ໂອຄາຫຍີ ສໍ ປຣິສໍ ສມຄ຺ຄໍ.

໒໓໘.

ຕສ຺ເສວ ສທ຺ຘມ຺ມ ວຣາຘິປສ຺ສຕຖາຄຕສ຺ສ’ປ຺ປຏິປຸຄ຺ຄລສ຺ສ;

ອນນ຺ຕຎາຓສ຺ສ ວິສາຣທສ຺ສ ເອສາ ມຫາກາຣຸຓິກສ຺ສ ຘາຕຸ.

໒໓໙.

ອເນນ ສຈ຺ເຈນ ຊິນສ຺ສ ຘາຕຸ ຂິປ຺ປໍ ສມາຣຸຍ຺ຫ ນຠນ຺ຕຣາຬໍ;

ສຸຘໍສຸເລເຂວ ສມຸຊ຺ຊລນ຺ຕິ ກງ຺ຂໍ ວິໂນເທຕຸ ມຫາຊນສ຺ສ.

໒໔໐. ¶

ຕສ຺ມິໍ ຂເຓ ສາ ຊິນທນ຺ຕຘາຕຸ ນຠໍ ສມຸຄ຺ຄມ຺ມ ປຠາສຍນ຺ຕີ;

ສພ຺ພາ ທິສາ ໂອສຘິຕາຣກາ’ວ ຊນໍ ປສາເທສິ ວ຺ຕິຓ຺ຓກງ຺ຂໍ.

໒໔໑.

ອໂຖຕຣິຕ຺ວາ ຄຄນງ຺ຄຓມ຺ຫາ ສາ ມຕ຺ຖເກ ເສຏ຺ຐິສຸຕສ຺ສ ຕສ຺ສ;

ປຕິຏ຺ຐຫິຕ຺ວານ ສຸຘາຠິສິຕ຺ຕຄຕ຺ຕໍ’ວ ຕໍ ປີຓຍິ ຠຕ຺ຕິຕິນ຺ນໍ.

໒໔໒.

ທສ຺ວານ ຕໍ ອຈ຺ຉຣິຍໍ ນິຄຓ຺ຐາ ອິຈ຺ຈພ຺ຣວຸໍ ປຓ຺ຑຸນຣາຘິປໍ ຕໍ;

ວິຊ຺ຊາພລໍ ເສຏ຺ຐິສຸຕສ຺ສ ເອຕໍ ນ ຘາຕຸຍາ ເທວ ອຍມ຺ປຠາໂວ.

໒໔໓.

ນິສມ຺ມ ເຕສໍ ວຈນໍ ນຣິນ຺ໂທ ອິຈ຺ຈພ຺ຣວີ ເສຏ຺ຐິສຸຕໍ ສຸຠທ຺ທໍ;

ຍຖາ ຈ ເອເຕ ອຠິສທ຺ທເຫຍ຺ຍຸໍ ຕຖາວິຘໍ ທສ຺ສຍ ອິທ຺ຘິມຎ຺ຎໍ.

໒໔໔.

ຕໂຕ ສຸຠທ຺ໂທ ຕປນີຍປຕ຺ເຕ ສຸຄນ຺ຘິສີໂຕທກປູຣິຕມ຺ຫິ;

ວຑ຺ເຒສິ ຘາຕຸໍ ມຸນິປຸງ຺ຄວສ຺ສ ອນຸສ຺ສຣນ຺ໂຕ ຈຣິຕພ຺ຠຸຕານິ.

໒໔໕. ¶

ສາ ຣາຊຫໍ ສີ’ວ ວິຘາວມານາ ສຸຄນ຺ຘິໂຕຍມ຺ຫິ ປທກ຺ຂິເຓນ;

ອຸມ຺ມຸຊ຺ຊມານາ ຈ ນິມຸຊ຺ຊມານາ ຊເນ ປໂມທສ຺ສຸຘເຣ ອກາສິ.

໒໔໖.

ຕໂຕ ຈ ກາສຸໍ ວິສິຂາຍມຊ຺ເຌ ກຕ຺ວາ ຕຫິໍ ຘາຕຸມຠິກ຺ຂິປິຕ຺ວາ;

ປໍສູຫິ ສມ຺ມາ ອຠິປູຣຍິຕ຺ວາ ພຫູຫິ ມທ຺ທາປຍິ ກຸຎ຺ຊເຣຫິ.

໒໔໗.

ເຠຕ຺ວາ ມຫິໍອຸຏ຺ຐຫິ ຈກ຺ກມຕ຺ຕໍ ວິຣາຊມານໍ ມຓິກຓ຺ຓິກາຍ;

ປຠສ຺ສຣໍ ຣູປິຍເກສເຣຫິ ສໂຣຣຸຫໍ ກຎ຺ຈນປຕ຺ຕປາຬິໍ.

໒໔໘.

ປຕິຏ຺ຐຠິຕ຺ວານ ຕຫິໍ ສໂຣເຊ ມນ຺ທານິລາວຕ຺ຕິຕເຣຓຸ ຊາເລ;

ໂອຠາສຍນ຺ຕິ’ວ ທິສາ ປຠາຫິ ທິຏ຺ຐາ ມຸຫຸຕ຺ເຕນ ຊິນສ຺ສຘາຕຸ.

໒໔໙.

ຂິປິໍສຸ ວຕ຺ຖາຠຣຓານິ ມຈ຺ຈາ ປວສ຺ສຍຸໍ ປຸປ຺ຜມຍຎ຺ຈ ວສ຺ສໍ;

ອຸກ຺ກຸຏ຺ຐິສທ຺ເທຫິ ຈ ສຘຸກາຣນາເທຫິ ປຸຓ຺ຓໍ ນຄຣໍ ອກໍສຸ.

໒໕໐. ¶

ເຕ ຕິຕ຺ຖິຍາ ຕໍ ອຠິວຎ຺ຈນໍ’ຕິ ຣາຊາຘິຣາຊໍ ອຖ ສຎ຺ຎເປຕ຺ວາ;

ຊິຄຸຈ຺ຉນີເຍ ກຸຓປາທິເກຫິ ຂິປິໍສຸ ຘາຕຸໍ ປຣິຂາຍ ປິຏ຺ເຐ.

໒໕໑.

ຕສ຺ມິໍ ຂເຓ ປຎ຺ຈວິຘມ຺ພຸເຊຫິສຎ຺ຉາທິຕາຫໍສຄໂຓປຠຸຕ຺ຕາ;

ມຘຸພ຺ພຕາລີ ວິຣຸຕາຠິຣາມາ ອໂຫສິ ສາ ໂປກ຺ຂຣຓີ’ວ ນນ຺ທາ.

໒໕໒.

ຄຊາຘິປາ ໂກຎ຺ຎ຺ຈຣວໍ ຣວິໍສຸ ກຣິໍສຸ ເຫສານິນທໍ ຕຸຣງ຺ຄາ;

ອຸກ຺ກຸຏ຺ຐິນາທໍ ອກຣິໍສຸ ມຈ຺ຈາ ສຸວາທິຕາ ທຸນ຺ທຸຠິອາທໂຍ’ປິ.

໒໕໓.

ໂຖມິໍສຸ ມຈ຺ຈາ ຖຸຕິຄີຕເກຫິ ນຈ຺ຈິໍສຸ ໂອຕ຺ຕປ຺ປວິຠຸສນາ’ປິ;

ວຕ຺ຖານິ ສີເສ ຠມຍິໍສຸ ມຕ຺ຕາ ຠຸຊານິ ໂປເຐສຸມຸທຄ຺ຄຈິຕ຺ຕາ.

໒໕໔. ¶

ຘູເປຫິ ກາລາຄຣຸສມ຺ຠເວຫິ ຆນາວນທ຺ຘໍ’ວ ນຠໍ ອໂຫສິ;

ສມຸສ຺ສິຕາເນກຘຊາວລີຫິ ປຸຣໍ ຕທາ ວຕ຺ຖມຍໍ’ວ ອາສິ.

໒໕໕.

ທິສ຺ວາ ຕມຈ຺ເຉຣມຈິນ຺ຕນີຍໍ ອາໂມທິຕາມຈ຺ຈຄຓາ ສມຄ຺ຄາ;

ອຕ຺ເຖ ນິໂຍເຊຕຸ ມຸເປຈ຺ຈ ຕສ຺ສ ວທິໍສຸ ປຓ຺ຑຸສ຺ສ ນຣາຘິປສ຺ສ.

໒໕໖.

ທິສ຺ວານ ໂຍ ອີທິສກມ຺ປິ ຣາຊ ອິທ຺ຘານຸຠາວໍ ມຸນິປຸງ຺ຄວສ຺ສ;

ປສາທມຕ຺ຕມ຺ປິ ກເຣຍ຺ຍ ໂນເຈ ກິມຕ຺ຖິຍາ ຕສ຺ສ ຠເວຍ຺ຍ ປຎ຺ຎາ.

໒໕໗.

ປສາທນີເຍສຸ ຄຸເຓສຸ ຣາຊ ປສາທນໍ ສາຘຸຊນສ຺ສ ຘມ຺ໂມ;

ປຸປ຺ຜນ຺ຕິ ສພ຺ເພ ສຍເມວ ວນ຺ເທ ສມຸຄ຺ຄເຕ ໂກມຸທການນານິ.

໒໕໘. ¶

ວາຈາຍ ເຕສໍ ປນ ທຸມ຺ມຕີນໍ ມາ ສຄ຺ຄມຄ຺ຄໍ ປຊຫິຕ຺ຖ ຣາຊ;

ອນ຺ເຘ ຄເຫຕ຺ວາ ວິຈເຣຍ຺ຍ ໂກ ຫິ ອນ຺ເວສມາໂນ ສຸປຖໍ ອມູຬ຺ໂຫ.

໒໕໙.

ນຣາຘິປາ ກປ຺ປິຓ ພິມ຺ພິສາຣ ສຸທ຺ໂຘທນາທິ ອປິ ເຕຊວນ຺ຕາ;

ຕໍ ຘມ຺ມຣາຊໍ ສຣຓໍ ອຸເປຈ຺ຈ ປິວິໍສຸ ຘມ຺ມາມຕມາທເຣນ.

໒໖໐.

ສຫສ຺ສເນຕ຺ໂຕ ຕິທສາຘິໂປ’ປິ ຂີຓາຍຸໂກ ຂິຓຠວໍ ມຸນິນ຺ທໍ;

ອຸເປຈ຺ຈ ຘມ຺ມໍ ວິມລໍ ນິສມ຺ມ ອລຕ຺ຖ ອາຍຸໍ ອປິ ທິຏ຺ຐຘມ຺ໂມ.

໒໖໑.

ຕຸວມ຺ປິ ຕສ຺ມິໍ ຊິຕປຎ຺ຈມາເຣ ເທວາຕິເທເວ ວຣຘມ຺ມຣາເຊ;

ສຄ຺ຄາປວຄ຺ຄາຘິຄມາຍ ຂິປ຺ປໍ ຈິຕ຺ຕໍ ປສາເທຫິ ນຣາຘິຣາຊ.

໒໖໒. ¶

ສຸຕ຺ວານເຕສໍ ວຈນໍ ນຣິນ຺ໂທ ວິກິຓ຺ຓກງ຺ໂຂ ຣຕນຕ຺ຕຍມ຺ຫິ;

ເສນາປຕິໍ ອຕ຺ຖວຣໍ ອໂວຈ ປຫຏ຺ຐຠາໂວ ປຣິສາຍ ມຊ຺ເຌ.

໒໖໓.

ອສທ຺ທຫາໂນ ຣຕນຕ຺ຕຍສ຺ສ ຄຸເຓ ຠວຈ຺ເຉທນກາຣຓສ຺ສ;

ຈິຣາຍ ທຸລ຺ລທ຺ຘິປເຖ ຈຣນ຺ໂຕ ຐິໂຕ ສຣຊ຺ເຊ ອປິ ວຎ຺ຈິໂຕຫໍ.

໒໖໔.

ໂມເຫນ ຂຊ຺ໂຊປນກໍ ຘເມສິໍ ສີຕທ຺ທິໂຕ ຘຸມສິເຂ ຊລນ຺ເຕ;

ປິປາສິໂຕ ສິນ຺ຘຸຊລໍ ປຫາຍ ປິວິໍ ປມາເທນ ມຣີຈິໂຕຍໍ.

໒໖໕.

ປຣິຈ຺ຈຊິຕ຺ວາ ອມຕໍ ຈິຣາຍ ຊິວຕ຺ຖິໂກ ຕິກ຺ຂວິສໍ ອຂາທິໍ;

ວິຫາຍ’ຫໍ ຈມ຺ປກປຸປ຺ຜທາມໍ ອຘາຣຍິໍ ຊຕ຺ຕຸສຸ ນາຄຠາຣໍ.

໒໖໖. ¶

ຄນ຺ຕ຺ວານ ຂິປ຺ປໍ ປຣິຂາ ສມີປໍ ອາຣາຘຍິຕ຺ວາ ຊິນທນ຺ຕຘາຕຸໍ;

ອາເນຫິ ປູຊາວິຘິນາ ກຣິສ຺ສໍ ປຸຎ຺ຎານິ ສພ຺ພຕ຺ຖ ສຸຂາວຫານິ.

໒໖໗.

ຄນ຺ຕ຺ວາຕເຕໂສປຣິຂາສມີປໍ ເສນາຘິນາໂຖ ປຣມປ຺ປຕີໂຕ;

ຘາຕຸໍ ມຸນິນ຺ທສ຺ສ ນມສ຺ສມາໂນ ອຊ຺ເຌສິ ຣຎ຺ໂຎ ຫິຕມາ ຈຣນ຺ໂຕ

໒໖໘.

ຈິຣາຄຕໍ ທິຏ຺ຐິມລໍ ປຫາຍ ອລຕ຺ຖ ສທ຺ຘໍ ສຸຄເຕ ນຣິນ຺ໂທ;

ປາສາທມາຄມ຺ມ ປສາທມສ຺ສ ວຑ຺ເຒຫິ ຣຎ຺ໂຎ ຣຕນຕ຺ຕຍມ຺ຫິ.

໒໖໙.

ຕສ຺ມິໍ ຂເຓ ໂປກ຺ຂຣຓີ ວິຈິຕ຺ຕາ ຜຸລ຺ເລຫິ ໂສວຓ຺ຓສໂຣຣຸເຫຫິ;

ອລງ຺ກໂຣນ຺ຕີ ຄຄນໍ ອໂຫສິ ມນ຺ທາກິນີວາຠິນວາວຕາຣາ.

໒໗໐.

ຫໍສງ຺ຄເຓວາຖ ມຸນິນ຺ທຘາຕຸ ສາ ປງ຺ກຊາ ປງ຺ກຊໂມກ຺ກມນ຺ຕິ;

ກຸນ຺ທາວທາຕາຫິ ປຠາຫິ ສພ຺ພໍ ຂິໂຣທກຸຈ຺ຉິໍ’ວ ປຸຣໍ ອກາສິ.

໒໗໑. ¶

ຕໂຕ ສຸຣຕ຺ຕຎ຺ຊລິປງ຺ກຊມ຺ຫິ ປຕິຏ຺ຐຫິຕ຺ວານ ຈມຸປຕິສ຺ສ;

ສນ຺ທິສ຺ສມານາ ມຫຕາ ຊເນນ ມຫປ຺ຜລໍ ມານຸສກໍ ອກຕ຺ຖ.

໒໗໒.

ສຸຕ຺ວານ ວຸຕ຺ຕນ຺ຕມິມໍ ນຣິນ຺ໂທ ປຫຏ຺ຐຠາໂວປທສາ’ວ ຄນ຺ຕ຺ວາ;

ສໍສູຈຍນ຺ໂຕ ທິຄຸຓໍ ປສາທໍ ສຸວິມ຺ຫິໂຕປຎ຺ຊລິໂກອໂວຈ.

໒໗໓.

ໂວຫາຣທກ຺ຂາ ມນຸຊາ ມຸນິນ຺ທ ສງ຺ຆຏ຺ຏຍິຕ຺ວາ ນິກໂສປລມ຺ຫິ;

ກໂຣນ຺ຕິອຄ຺ຆໍ ວຣກຎ຺ຈນສ຺ສ ເອໂສຫິ ຘມ຺ໂມ ຈຣິໂຕປຸຣາໂຓ.

໒໗໔.

ມຓິໍ ປສຕ຺ຖາກຣສມ຺ຠວມ຺ປິ ຫຸຕາສກມ຺ເມຫຠີສງ຺ຂຣິຕ຺ວາ;

ປາເປນ຺ຕິຣາຊຎ຺ຎກິຣີຏໂກຏິໍ ວິຠຸສນຕ຺ຕໍ ວິທຸໂນມນຸສ຺ສາ.

໒໗໕. ¶

ວີມໍສນຕ຺ຖາຍ ຕວາຘຸນາປິ ມຍາ ກຕໍ ສພ຺ພມິທໍ ມຸນິນ຺ທ;

ອາຄຸໍ ມຫນ຺ຕໍ ຂມ ຠຸຣິປຎ຺ຎ ຂິປ຺ປໍ ມມາລງ຺ກຸຣຸ ອຸຕ຺ຕມງ຺ຄໍ.

໒໗໖.

ປຕິຏ຺ຐິຕາ ຕສ຺ສ ຕໂຕ ກິຣີເຏ ມຓິປ຺ປຠາ ຠາສິນິ ທນ຺ຕຘາຕຸ;

ອມຸຎ຺ຈິ ຣໍສີ ຘວລາ ປຊາສຸ ສິເນຫຊາຕາ ອິວ ຂີຣຘາຣາ.

໒໗໗.

ໂສ ທນ຺ຕຘາຕຸໍ ສິຣສາວຫນ຺ໂຕ ປທກ຺ຂິຓໍຕໍນຄຣໍ ກຣິຕ຺ວາ;

ສມ຺ປູຊຍນ຺ໂຕ ກຸສຸມາທິເກຫິ ສຸສຊ຺ຊິຕນ຺ເຕ ປຸຣມາຫຣິຕ຺ຖ.

໒໗໘.

ສມຸສ຺ສິໂຕທາຣສິຕາຕປຕ຺ເຕ ປລ຺ລງ຺ກເສຏ຺ເຐ ຣຕນຸຊ຺ຊລມ຺ຫິ;

ປຕິຏ຺ຐເປຕ຺ວານ ຊິນສ຺ສ ຘາຕຸໍ ປູເຊສິ ຣາຊາ ຣຕນາທິເກຫິ.

໒໗໙.

ພຸທ຺ຘາທິວຕ຺ຖຸຕ຺ຕຍເມວ ຣາຊາ ອາປາຓໂກຏິໍ ສຣຓໍ ອຸເປຈ຺ຈ;

ຫິຕ຺ວາ ວິຫິໍສໍ ກຣຸຓາຘິວາໂສ ອາຣາຘຍີ ສພ຺ພຊນໍ ຄຸເຓຫິ.

໒໘໐. ¶

ກາເຣສິ ນານາຣຕນປ຺ປຠາຫິ ສຫສ຺ສຣໍສີໍ’ວ ວິໂຣຈມານໍ;

ນຣາຘິໂປ ຠຕ຺ຕິຠຣານຸຣູປໍ ສຸຈິຕ຺ຕິຕໍ ຘາຕຸນິເວສນມ຺ປິ.

໒໘໑.

ວຑ຺ເຒສິ ໂສ ຘາຕຸຆຣມ຺ຫິ ຘາຕຸໍ ອລງ຺ກຣິຕ຺ວາ ສກລໍ ປຸຣມ຺ປິ;

ເສເສນ ປູຊາວິຘິນາ ອຕິຕ຺ໂຕ ປູເຊສິ ຣຏ຺ຐໍ ສຘນໍ ສໂຠຄ຺ຄໍ.

໒໘໒.

ອາມນ຺ຕຍິຕ຺ວາ ຄຸຫສີວຣາຊໍ ສມ຺ມານິຕໍ ອຕ຺ຕສມໍ ກຣິຕ຺ວາ;

ທານາທິກໍ ປຸຎ຺ຎມເນກຣູປໍ ສທ຺ຘາຘໂນ ສຎ຺ຈິຓິຣາຊເສຏ຺ໂຐ.

໒໘໓.

ຕໂຕ ໂສ ຠຸປາໂລ ກຸມຕິຊນສໍສຄ຺ຄມນຍໍ,

ນິຣາກຕ຺ວາ ມຄ຺ເຄ ສຸຄຕວຈນຸຊ຺ໂຊຕສຸຄເມ;

ປຘາວນ຺ໂຕ ສມ຺ມາ ສປຣຫິຕສມ຺ປຕ຺ຕິຈຕຸໂຣ,

ປສຕ຺ຖໍ ໂລກຕ຺ຖໍ ອຈຣິ ຈຣິຕາວຊ຺ຊິຕຊໂນ.

ຕຕິໂຍ ປຣິຈ຺ເຉໂທ.

໒໘໔. ¶

ຈຣຕິ ຘຣຓິ ປາເລ ຣາຊຘມ຺ເມສຸ ຕສ຺ມິໍ,

ສມຣຈຕຸຣເສໂນ ຂີຣຘາໂຣ ນຣິນ຺ໂທ;

ນິຊຠຸຊພລລີລາ’ຣາຕິທປ຺ປປ຺ປມາຖີ,

ວິຠວຊນິຕມາໂນ ຍຸທ຺ຘສຊ຺ໂຊ’ຠິຄຎ຺ຉິ.

໒໘໕.

ກຣິວຣມຖ ທິສ຺ວາ ໂສ ຄຸຫາທ຺ວາຣຍາຕໍ,

ປຏິຠຍຣຫິຕຕ຺ໂຕ ສີຫຣາຊາ’ວ ຣາຊາ;

ນິຊນຄຣສມີປາຍາຕເມຕໍ ນຣິນ຺ທໍ,

ອມິຕພລມມໂຫເຆໂນຕ຺ຖຣນ຺ຕາ’ຠິຍາຍິ.

໒໘໖.

ອຸທິຕພຫຬຘູລີປາຬິຣຸທ຺ຘນ຺ຕຬິກ຺ໂຂ,

ສມທວິວິຘໂຍຘາຣາວສໍຣມ຺ຠຠີເມ;

ນິສິຕສຣສຕາລີວສ຺ສຘາຣາກຣາເຬ,

ອຊິນິ ມຫຕິ ຍຸທ຺ເຘ ປຓ຺ຑຸໂກ ຂີຣຘາຣໍ.

໒໘໗. ¶

ອຖ ນຣປຕິເສຏ຺ໂຐ ສງ຺ຄເຫຕ຺ວານ ຣຏ຺ຐໍ,

ນິຊ ຕນຸຊ ວຣສ຺ມິໍ ຣຊ຺ຊຠາຣໍ ນິຘາຍ;

ສຸຄຕ ທສນ ຘາຕຸໍ ສມ຺ປຏິຈ຺ຉາປຍິຕ຺ວາ,

ປຫິຓິ ຈ ຄຸຫສີວໍ ສກ຺ກຣິຕ຺ວາ ສຣຏ຺ຐໍ.

໒໘໘.

ສຸວິຣມວນີປາໂລ ສຎ຺ຎມໍ ອຊ຺ຌຸເປໂຕ,

ວິວິຘ ວິຠວ ທານາຍາຈເກ ຕປ຺ປຍິຕ຺ວາ;

ຕິທສປຸຣ ສມາຊໍ ເທຫເຠທາ ປຍາໂຕ,

ກຸສລ ຜລມນປ຺ປໍ ປຕ຺ຖິຕໍ ປຈ຺ຈລຕ຺ຖ.

໒໘໙.

ນຣປຕິ ຄຸຫສີໂວ ຕໍ ມຸນິນ຺ທສ຺ສ ຘາຕຸໍ,

ສກປຸຣມຸປເນຕ຺ວາ ສາຘຸ ສມ຺ມານຍນ຺ໂຕ;

ສຸຄຕິ ຄມນ ມຄ຺ເຄ ປາຓິໂນ ໂຍຊຍນ຺ໂຕ,

ສຸຈຣິຕ ມຠິຣູປໍ ສຎ຺ຈິຓນ຺ໂຕ ວິຫາສິ.

໒໙໐. ¶

ອຄຓິຕມຫິມສ຺ສຸຊ຺ເຊ ນິຣຎ຺ໂຎ ຕນູໂຊ,

ປຸຣິມ ວຍສິ ເຍວາຣທ຺ຘສທ຺ຘາຠິໂຍໂຄ;

ທສພລ ຕນຸຘາຕຸໍ ປູຊິຕຸໍ ຕສ຺ສ ຣຎ຺ໂຎ,

ປຸຣວຣ ມຸປາຍາໂຕ ທນ຺ຕນາໂມ ກຸມາໂຣ.

໒໙໑.

ຄຸຓຊນິຕ ປສາທໍ ຕໍ ກລິງ຺ຄາຘິນາຖໍ,

ນິຂິລ ຄຸຓ ນິວາໂສ ໂສ ກຸມາໂຣ ກຣິຕ຺ວາ;

ວິວິຘ ມຫວິຘານໍ ສາຘຸສມ຺ປາທຍນ຺ໂຕ,

ອວສິ ສຸຄຕຘາຕຸໍ ອນ຺ວຫໍ ວນ຺ທມາໂນ.

໒໙໒.

ອຠວິ ຈ ຄຸຫສີວສ຺ສາວນີສສ຺ສ ຘິຕາ,

ວິກຈ ກຸວລຍກ຺ຂີ ຫໍສກນ຺ຕາຠິຍາຕາ;

ວທນ ຊິຕ ສໂຣຊາ ຫາຣິຘມ຺ມິລ຺ລຠາຣາ,

ກຸຈຠຣນມິຕງ຺ຄິ ເຫມ ມາລາຠິຘານາ.

໒໙໓. ¶

ອຂິລຄຸຓນິຘານໍ ພນ຺ຘຸຠາວານຸຣູປໍ,

ສຸວິມລກຸລຊາຕໍ ຕໍ ກຸມາຣໍ ວິທິຕ຺ວາ;

ນຣປຕິ ຄຸຫສີໂວ ອຕ຺ຕໂນ ຘີຕຣໍ ຕໍ,

ອທທິ ສພຫຸມານໍ ຣາຊປຸຕ຺ຕສ຺ສ ຕສ຺ສ.

໒໙໔.

ມນຸຊປຕິ ກຸມາຣໍ ຘາຕຸຣກ຺ຂາຘິກາເຣ,

ປຈຸຣປຣິຊນໍ ຕໍ ສພ຺ພຖາ ໂຍຊຍິຕ຺ວາ;

ຄວ ມຫິສ ສຫສ຺ສາທີຫິ ສມ຺ປີຓຍິຕ຺ວາ,

ສກ ວິຠວ ສຣິກ຺ເຂ ອິສ຺ສຣຕ຺ເຕ ຐເປສິ.

໒໙໕.

ສມຣຠຸວິ ວິນຏ຺ເຐ ຂີຣຘາເຣ ນຣິນ຺ເທ,

ມລຍວນມຸເປຕາ ຠາຄິເນຍ຺ຍາ ກຸມາຣາ;

ປພລ ມຕິ ມຫນ຺ຕໍ ສໍຫຣິຕ຺ວາ ພລຄ຺ຄໍ,

ອຸປປຸຣມຸປຄຎ຺ຉຸໍ ຘາຕຸຍາ ຄຓ຺ຫນຕ຺ຖໍ.

໒໙໖.

ອຖ ນຄຣສມີເປ ເຕ ນິເວສໍ ກຣິຕ຺ວາ,

ສວຓກຏຸກເມຕໍ ສາສນໍ ເປສຍິໍສຸ;

ສຸຄຕທສນຘາຕຸໍ ເທຫິ ວາ ຂິປ຺ປມມ຺ຫໍ,

ຍສສິຣິຊນນິໍ ວາ ກີຬ ສງ຺ຄາມເກຬິໍ.

໒໙໗. ¶

ສປທິ ຘຣຓິປາໂລ ສາສນໍ ຕໍ ສຸຓິຕ຺ວາ,

ອວທິ ຣຫສິ ວາຈໍ ຣາຊປຸຕ຺ຕສ຺ສ ຕສ຺ສ;

ນຫິ ສຕິ ມມ ເທເຫ ຘາຕຸມຎ຺ຎສ຺ສ ທສ຺ສໍ,

ອຫມປິ ຍທິ ເຊຕຸໍ ເນວ ເຕ ສກ຺ກຸເຓຍ຺ຍໍ.

໒໙໘.

ສຸຣນຣ ນມິຕໍ ຕໍ ທນ຺ຕຘາຕຸໍ ຄເຫຕ຺ວາ,

ຄຫິຕ ທິຊວິລາໂສ ສີຫຬໍ ຍາຫິ ທີປໍ;

ອິຕິ ວຈນມຸທາຣໍ ມາຕຸລສ຺ສາຖ ສຸຕ຺ວາ,

ຕມວຈ ຄຸຫສີວໍ ທນ຺ຕນາໂມ ກຸມາໂຣ.

໒໙໙.

ຕວຈ ມມຈ ໂກ ວາ ສີຫເຬ ພນ຺ຘຸຠູໂຕ,

ຊິນວຣຓສໂຣເຊ ຠຕ຺ຕິຍຸຕ຺ໂຕ ຈ ໂກວາ;

ຊລນີຘິປຣຕີເຣ ສີຫຬໍ ຂຸທ຺ທເທສໍ,

ກຖມຫມຕິເນສ຺ສໍ ທນ຺ຕຘາຕຸໍ ຊິນສ຺ສ.

໓໐໐. ¶

ຕມວທິ ຄຸຫສີໂວ ຠາຄິເນຍ຺ຍໍ ກຸມາຣໍ,

ທສພລຕນຸຘາຕຸ ສຓ຺ຐິຕາ ສີຫຬສ຺ມິໍ;

ຠວຠຍຫຕິທກ຺ໂຂ ວຕ຺ຕເຕ ສຕ຺ຖຸຘມ຺ໂມ,

ຄຓນປຖມຕີຕາ ຠິກ຺ຂໂວ ຈາວສິໍສຸ.

໓໐໑.

ມມ ຈ ປິຍສຫາໂຍ ໂສ ມຫາເສນ ຣາຊາ,

ຊິນຈຣຓສໂຣຊທ຺ວນ຺ທເສວາຠິຍຸຕ຺ໂຕ;

ສລິລມປິ ຈ ຜຸຏ຺ຐໍ ຘາຕຸຍາ ປຕ຺ຖຍນ຺ໂຕ,

ວິວິຘຣຕນຊາຕໍ ປາຠຕໍ ເປສຍິຕ຺ຖ.

໓໐໒.

ປຠວຕິ ມນຸຊິນ຺ໂທ ສພ຺ພທາ ພຸທ຺ຘິມາ ໂສ,

ສຸຄຕທສນຘາຕຸໍ ປູຊິຕຸໍ ປູຊເນຍ຺ຍໍ;

ປຣິຈິຕວິສຍມ຺ຫາ ວິປ຺ປວຸຕ຺ຖໍ ຠວນ຺ຕໍ,

ວິວິຘວິຠວທານາ ສາຘຸ ສງ຺ຄຓ຺ຫິຕຸຎ຺ຈ.

໓໐໓. ¶

ນິຊ ທຸຫິຕຸປຕິໍ ຕໍ ອິຕ຺ຖມາຣາຘຍິຕ຺ວາ,

ນຣປຕິ ຄຸຫສີໂວ ສງ຺ຄເຫຕ຺ວານ ເສນໍ;

ຣຓຘຣຓິມຸເປໂຕ ໂສ ກຸມາເຣຫິ ສທ຺ຘິໍ,

ມຣຓປຣວສຕ຺ຕໍ ອຊ຺ຌຄາ ຍຸຊ຺ຌມາໂນ.

໓໐໔.

ອຖ ນຣປຕິ ປຸຕ຺ໂຕ ທນ຺ຕນາໂມ ສຸຓິຕ຺ວາ,

ສວຓ ກຏຸກເມຕໍ ມາຕຸລສ຺ສປ຺ປວຕ຺ຕິໍ;

ຄຫິຕ ທິຊວິລາໂສ ທນ຺ຕຘາຕຸໍ ຄເຫຕ຺ວາ,

ຕຸຣິຕ ຕຸຣິຕ ຠູໂຕ ໂສ ປຸຣມ຺ຫາ ປຬາຍິ.

໓໐໕.

ສຣຠສ ມຸປຄນ຺ຕ຺ວາ ທກ຺ຂິຓໍ ຈາຖ ເທສໍ,

ອວິຈລິຕສຠາໂວ ອິທ຺ຘິຍາ ເທວຕານໍ;

ນທິມຕິມຫຕິໍ ໂສ ອຸຕ຺ຕຣິຕ຺ວານ ປຸຓ຺ຓໍ,

ນິທຫິ ທສນຘາຕຸໍ ວາລຸກາຣາສິມຊ຺ເຌ.

໓໐໖.

ປຸນ ປຸຣມຸປຄນ຺ຕ຺ວາ ຕໍ ຄຫີຕຎ຺ຎເວສໍ,

ຠຣິຍມປິ ຄເຫຕ຺ວາ ອາຄໂຕ ຕຕ຺ຖ ຂິປ຺ປໍ;

ສຸຄຕທສນຘາຕຸໍ ວາລຸກາຖຸປກຸຈ຺ຉິໍ,

ຐປິຕມຸປຈຣນ຺ໂຕ ອຈ຺ຉິ ຄຸມ຺ພນ຺ຕຣສ຺ມິໍ.

໓໐໗. ¶

ສປທິ ນຠສິ ເຖໂຣ ຄຈ຺ຉມາໂນ ປເນໂກ,

ວິວິຘກິຣຓຊາລໍ ວາລຸກາຣາສິຖູປາ;

ອວິຣຬິຕມຸເທນ຺ຕໍ ຘາຕຸຍາ ຕາຍ ທິສ຺ວາ,

ປຓມິ ສຸຄຕຘາຕຸໍ ໂອຕຣິຕ຺ວານ ຕຕ຺ຖ.

໓໐໘.

ມຸນິສຸຕມຖ ທິສ຺ວາ ຊມ຺ປຕີ ເຕ ປຕີຕາ,

ນິຊຄມນວິຘານໍ ສພ຺ພມາໂຣຈຍິໍສຸ;

ທສພລຕນຸໂຊ ໂສ ຘາຕຸຣກ຺ຂາ ນິຍຸຕ຺ໂຕ,

ປຣຫິຕນິຣຕຕ຺ໂຕ ເຕ ອຸໂຠ ອຊ຺ຌຠາສິ.

໓໐໙.

ທສພລຕນຸຘາຕຸໍ ສີຫຬໍ ເນຖ ຕຸມ຺ເຫ,

ອຄຓິຕ ຕນຸເຂທາ ວີຕສາຣຊ຺ຊເມຕໍ;

ອປິ ຈ ຄມນມຄ຺ເຄ ຊາຕມຕ຺ເຕ ວິຆາເຕ,

ສຣຖ ມມມເນໂກປທ຺ທວຈ຺ເຉທທກ຺ຂໍ.

໓໑໐. ¶

ອິຕິ ສຸຄຕນນູໂຊ ຊມ຺ປຕີນໍ ກເຖຕ຺ວາ,

ປຸນ’ປິ ຕທນຸຣູປໍ ເທສຍິຕ຺ວານ ຘມ຺ມໍ;

ປຸຖຸຕຣມປເນຕ຺ວາ ໂສກສລ຺ລຎ຺ຈ ຄາຬ຺ຫໍ,

ສກວສຕິມຸເປໂຕ ອນ຺ຕລິກ຺ເຂນ ຘີໂຣ.

໓໑໑.

ຠຸຊຄຠວນວາສີ ນິນ຺ນຄາຍາຖ ຕສ຺ສາ,

ຠຸຊຄປຕິ ມຫິທ຺ຘິ ປຓ຺ຑຸຫາຣາຠິຘາໂນ;

ສກປຸຣປວຣມ຺ຫາ ນິກ຺ຂມິຕ຺ວາ ຈຣນ຺ໂຕ,

ສມຸປຄມິ ຕທາ ຕໍ ຐານມິຈ຺ຉາວເສນ.

໓໑໒.

ວິມລປຸລິນຖູປາ ໂສ ສມຸຄ຺ຄຈ຺ຉມານໍ,

ສສິຣຸຈິຣມຣີຈິຊ຺ຊາລມາໂລກຍິຕ຺ວາ;

ຐິຕມຖ ມຸນິຘາຕຸໍ ວາລຸກາຣສິຄພ຺ເຠ,

ກິມິທມິຕິ ສກງ຺ຂໍ ເປກ຺ຂມາໂນ ອເວທິ.

໓໑໓. ¶

ສປທິ ສພຫຸມາໂນ ໂສ ອສນ຺ທິສ຺ສມາໂນ,

ຣຕນມຍກຣຓ຺ຑໍ ຘາຕຸຍຸຕ຺ຕໍ ຄິລິຕ຺ວາ;

ວິຕຕປຸຖຸລເທໂຫ ໂຠຄມາລາຫິ ຕຸງ຺ຄໍ,

ກຓກສິຂຣິຣາຊໍ ເວຐຍິຕ຺ວາ ສຍິຕ຺ຖ.

໓໑໔.

ສລິລນິຘິສມີປໍ ຊມ຺ປຕີ ຄນ຺ຕຸກາມາ,

ປຸລິນຕລຄຕໍ ຕໍ ທນ຺ຕຘາຕຸໍ ອທິສ຺ວາ;

ນຍນສລິລຘາຣໍ ໂສກຊາຕໍ ກິຣນ຺ຕາ,

ສຸຄຕສຸຕວຣໍ ຕໍ ຕງ຺ຂເຓ’ນຸສ຺ສຣິໍສຸ.

໓໑໕.

ອຖ ສຸຄຕສຸໂຕ ໂສ ຈິນ຺ຕິຕໍ ສໍວິທິຕ຺ວາ,

ອຄມິ ສວິຘເມສໍ ໂສກທິນານນານໍ;

ອສຸຓິ ຈ ຊິນຘາຕຸໍ ວາລຸກາຣາສິມຊ຺ເຌ,

ນີຫິຕມປິ ອທິຏ຺ຐໍ ປູຊິຕໍ ຊມ຺ປຕີຫິ.

໓໑໖.

ສຍິຕມຖ ຍຕີໂສ ທິພ຺ພຈກ຺ຂຸປ຺ປຠາວາ,

ຣຕນຄິຣິນິກຸຎ຺ເຊ ນາຄຣາຊໍ ອປສ຺ສິ;

ວິຫຄປຕິສຣີຣໍ ມາປຍິ ຕມ຺ມຸຫຸຕ຺ເຕ,

ວິຕຕປຸຖຸລປກ຺ເຂນ’ນ຺ຕຬິກ຺ຂໍ ຖເກນ຺ຕໍ.

໓໑໗. ¶

ຊລຘິມຕິຄຠີຣໍ ຕໍ ທ຺ວິຘາ ໂສ ກຣິຕ຺ວາ,

ປພລປວນເວເຄນ’ຕ຺ຕໂນ ປກ຺ຂເຊນ;

ສຣຠສ ມຫິຘາວໍ ຠີມສໍຣມ຺ຠໂຍຄາ,

ອຠິຄມິ ຠຸຊຄິນ຺ທໍ ເມຣຸປາເທ ນິປນ຺ນໍ.

໓໑໘.

ຊຫິຕຠຸຊຄເວໂສ ຕງ຺ຂເຓ ໂສ ຜຓິນ຺ໂທ,

ປຏິຠຍຈກິຕຕ຺ໂຕ ສໍຂິປິຕ຺ວານ ໂຠເຄ;

ສຣຠສ ມຸປຄນ຺ຕ຺ວາ ຕສ຺ສ ປາເທ ນມິຕ຺ວາ,

ວິນຍມຘຸຣມິຕ຺ຖໍ ຕໍ ມຸນີສໍ ອໂວຈ.

໓໑໙.

ສກລຊນຫິຕຕ຺ຖໍ ເອວ ຊາຍນ຺ຕິ ພຸທ຺ຘາ,

ຠວຕິ ຊນຫິຕຕ຺ຖໍ ຘາຕຸມຕ຺ຕສ຺ສ ປູຊາ;

ອຫມປິ ຊິນຘາຕຸໍ ປູຊຍິຕ຺ວາ ມຫຄ຺ຆໍ,

ກຸສລຜລມນປ຺ປໍ ສຎ຺ຈິຓິສ຺ສໍ’ຕິ ຄຓ຺ຫິໍ.

໓໒໐. ¶

ອຖ ມນຸຊຄຓານໍ ສຈ຺ຈໂພຘາຣຫານໍ,

ວສຕິຠວນເມສາ ນີຍ຺ຍເຕ ສີຫຬໍ ຕໍ;

ມຸນິວຣຕນຸຘາຕຸໍ ເຕນ ເທຫີຕິ ວຸຕ຺ໂຕ,

ຠຸຊຄປຕິ ກຣຓ຺ຑໍ ຘາຕຸຄພ຺ຠໍ ອທຊ຺ຊິ.

໓໒໑.

ວິຫຄປຕິຕນຸໍ ຕໍ ສໍຫຣິຕ຺ວານ ເຖໂຣ,

ຊລຈຣສຕຠີມາ ອຓ຺ຓວາ ອຸປ຺ປຕິຕ຺ວາ;

ສກລປຖວິຈກ຺ເກ ຣຊ຺ຊລກ຺ຂິໍ’ວ ຘາຕຸໍ,

ນຣປຕິຕນຸຊານໍ ຊມ຺ປຕີນໍ ອທາສິ.

໓໒໒.

ອິຕິ ກຕພຫຸກາເຣ ສໍຍມິນ຺ເທ ປຍາເຕ,

ສຸຄຕທສນຘາຕຸໍ ມຸທ຺ຘນາ ອຸພ຺ພຫນ຺ຕາ;

ມຫຕິ ວິປິນເທວາທີຫິ ມຄ຺ເຄ ປຍຸຕ຺ເຕ,

ວິວິຘມຫວິຘາເນ ເຕ ຕໂຕ ນິກ຺ຂມິໍສຸ.

໓໒໓. ¶

ມຸທຸສຸຣຠີສມີໂຣ ກຓ຺ຏກາທິວ຺ຍເປໂຕ,

ວິມລປຸລິນຫາຣີ ອາສີ ສພ຺ພຕ຺ຖ ມຄ຺ໂຄ;

ອຍນມຸປຄເຕ ເຕ ທນ຺ຕຘາຕຸປ຺ປຠາວາ,

ນິຄມນຄຣວາສີ ສາຘຸ ສມ຺ມານຍິໍສຸ.

໓໒໔.

ກຸສຸມສຸຣຠິຈຸຓ຺ຓາກິຓ຺ຓຫຕ຺ຖາຫິ ນິຈ຺ຈາ,

ສກຸຕຸກມນຸຍາຕາ ການເນ ເທວຕາຫີ;

ອຈລຄຫຓທຸຄ຺ຄໍ ເຂປຍິຕ຺ວານ ມຄ຺ຄໍ,

ອຄມຸມຕຸຣິຕາ ເຕ ປຏ຺ຏນໍ ຕາມລິຕ຺ຕິໍ.

໓໒໕.

ອຈລປທຣພທ຺ຘໍ ສຸຏ຺ຐິໂຕທາຣກູປໍ,

ອຸທິຕປຸຖຸລກາຣໍ ທກ຺ຂນີຍາມກຎ຺ຈ;

ສຍມຠິມຕລງ຺ກາຄາມິນິໍ ນາວເມເຕ,

ສປທິ ສມຸປຣູຬ຺ຫໍ ອທ຺ທສຸໍ ວາຓິເຊຫິ.

໓໒໖. ¶

ອຖ ທິຊປວຣາ ເຕ ສີຫຬໍ ຄນ຺ຕຸມິຈ຺ຉໍ,

ສຣຠສ ມຸປຄນ຺ຕ຺ວາ ນາວິກສ຺ສາວທິໍສຸ;

ສຸຕິສຸຂວຈສາ ໂສ ສາຘຸວຸຕ຺ເຕນ ເຈສໍ,

ປມຸທິຕຫທໂຍ ເຕ ນາວມາໂຣປຍິຕ຺ຖ.

໓໒໗.

ຊລນິຘິມຠິຣູຬ຺ເຫສ຺ເວສຸ ອາທາຍ ຘາຕຸໍ,

ສມຠວຸມຸປສນ຺ນາ ໂລລກລ຺ໂລລມາລາ;

ສມສຸຣຠິມນຸຎ຺ໂຎ ອຸຕ຺ຕໂຣ ວາຍິ ວາໂຕ,

ວິມລຣຸຈິຣໂສຠາ ສພ຺ພຖາ’ສຸໍ ທິສາ’ປິ.

໓໒໘.

ນຠສິ ອສິຕໂສເຠ ເວນເຕຍ຺ໂຍ’ວ ນາວາ,

ປພລປວນເວຄາ ສຕ຺ຕຕໍ ຘາວມານາ;

ນຍນວິສຍຠາວາຕີຕຕີຣາຈລາທິໍ,

ປວິສິ ຊລຘິມຊ຺ຌໍ ເຜຓປຸປ຺ຜາຠິກິຓ຺ຓໍ.

໓໒໙. ¶

ອຖ ອຠວິ ສມຸທ຺ໂທ ຠີມສໍວຏ຺ຏວາຕາ,

ຠີຫຕສິຂຣິກູຏາກາຣວີຈິປ຺ປພນ຺ໂຘ;

ສວນຠິທຸຣໂຆຣາຣາວຣຸນ຺ຘນ຺ຕລິກ຺ໂຂ,

ຠຍຈກິຕມນຸສ຺ສກ຺ກນ຺ທິໂຕ ສພ຺ພຣຕ຺ຕິໍ.

໓໓໐.

ອຸທຍສິຂຣິສີສໍ ນູຕນາທິຈ຺ຈພິມ຺ເພ,

ອຸປຄຕວຕິ ຕສ຺ສາ ຣຕ຺ຕິຍາ ອຈ຺ຈຍມ຺ຫິ;

ສລິລນິຘິຊລໍ ຕໍ ສນ຺ຕກລ຺ໂລລມາລໍ,

ອສິຕມຓິວິຈິຕ຺ຕໍ ໂກຏ຺ຏິມໍ’ວາວຠາສິ.

໓໓໑.

ອຖ ວິຕຕຜຓາລີ ຠິໍສນາ ເກຈິ ນາຄາ,

ສຸຣຠິກຸສຸມຫຕ຺ຖາ ເກຈິ ທິພ຺ພຕ຺ຕຠາວາ;

ຣຸຈິຣມຓິປທີເປ ເກຈິ ສນ຺ຘາຣຍນ຺ຕາ,

ນິຊສິຣສິ ກໂຣນ຺ຕາ ເກຈິ ກຓ຺ຑຸປ຺ປລານີ.

໓໓໒. ¶

ຜຸຏກຸມຸທກລາເປ ຊຕ຺ຕຸເນເກ ວຫນ຺ຕາ,

ກຓກກລສມາລາ ອຸກ຺ຂິປຕ຺ຕາ ຈ ເກຈິ;

ປວນຈລິຕເກຕຸຄ຺ຄາຫກາ ເກຈິ ເອເກ,

ຣຸຈິຣ ກຓກ ຈຸຓ຺ຓາປຸຓ຺ຓຈງ຺ໂຄຏຫຕ຺ຖາ.

໓໓໓.

ສລຬິຕຣມຓິຍໍ ເກຈິ ນຈ຺ຈໍ ກໂຣນ຺ຕາ,

ສລຍມຘຸຣຄີຕໍ ຄາຍມານາ’ວ ເກຈິ;

ປຈຸຣຕຸຣິຍຠຓ຺ເຑ ອາຫນນ຺ຕາ’ວ ເອເກ,

ມຸນິວຣຕນຸຘາຕຸໍ ປູຊິຕຸໍ ອຸຏ຺ຐຫິໍສຸ.

໓໓໔.

ຣຸຈິຣກຈກລາປາ ຣາຊກຎ຺ຎາຍ ຕສ຺ສາ,

ມຸນິວຣທສນໍ ຕໍ ນິຄ຺ຄເຕວິນ຺ທຸເລຂາ;

ອຸຊຸຣຊຕສລາກາ ສນ຺ນິເຠ ມຸຎ຺ຈິ ຣໍສີ.

໓໓໕. ¶

ອຕຸລິຕມນຸຠາວໍ ຘາຕຸຍາ ເປກ຺ຂຕໍ ຕໍ,

ປມຸທິຕຫທຍານໍ ຕງ຺ຂເຓ ປນ຺ນຄານໍ;

ປຏິຣວຫຣິຕານໍ ສາຘຸວາທາທິການໍ,

ຄຄນມປຣິຍນ຺ຕໍ’ວາສິ ວິຕ຺ຖາຣິຕານໍ.

໓໓໖.

ປວິສິ ສຸຄຕ ທາຐາຘາຕຸ ສາ ໂມຬິຄພ຺ຠໍ,

ປຸນ ຄຄນຕລມ຺ຫາ ໂອຕຣິຕ຺ວານ ຕສ຺ສາ;

ຜຓຘຣນິວຫາ ເຕ ຕໍ ຕຣິໍ ວາຣຍິຕ຺ວາ,

ມຫມກຣຸມຸທາຣໍ ສຕ຺ຕຣຕ຺ຕິນ຺ທິວໍຫິ.

໓໓໗.

ອຈລມິວ ວິມານໍ ອນ຺ຕລິກ຺ຂມ຺ຫິ ນາວໍ,

ຄຕິວິຣຫິຕມມ຺ໂຫຣາສິມຊ຺ຌມ຺ຫິ ທິສ຺ວາ;

ຠຍວິລຸລິຕຈິຕ຺ຕາ ຊມ຺ປຕີ ເຕ ສມຄ຺ຄາ,

ທສພລຕນຸຊໍ ຕໍ ອິທ຺ຘິມນ຺ຕໍ ສຣິໍສຸ.

໓໓໘.

ສປທິ ມຸນິສຸໂຕ ໂສ ຈິຕ຺ຕເມສໍ ວິທິຕ຺ວາ,

ນຠສິ ຊລຘຣາລີ ມທ຺ທມາໂນ’ຠິຄນ຺ຕ຺ວາ;

ວິຫຄປຕິສຣີຣໍ ມາປຍິຕ຺ວາ ມຫນ຺ຕໍ,

ຠຍຈກິຕຠຸຊງ຺ເຄ ເຕ ປຬາເປສິ ຂິປ຺ປໍ.

໓໓໙. ¶

ອິຕ຺ຖໍ ພຸທ຺ຘິສຸເຕ ຠຸຊງ຺ຄຊນິຕໍ ຠີຕິໍ ສເມຕ຺ວາ ຄເຕ,

ສາ ນາວາ ປວນາ ປກມ຺ປິຕຘຊາ ຕຸງ຺ຄໍ ຕຣງ຺ຄາວລິໍ;

ຠີນ຺ທນ຺ຕີ ຄຕິເວຄສາ ປຸຖຸຕຣໍ ເມຆາວລີສນ຺ນິຠໍ,

ລງ຺ກາປຏ຺ຏນໂມຕຣິຕ຺ຖ ສຫສາ ເຖຣສ຺ສ ຕສ຺ສິທ຺ຘິຍາ.

ຈຕຸຕ຺ໂຖ ປຣິຈ຺ເຉໂທ.

໓໔໐.

ສໍວຈ຺ຉຣມ຺ຫິ ນວມມ຺ຫິ ມຫາທິເສນ,

ປຸຕ຺ຕສ຺ສ ກິຕ຺ຕິສິຣິເມຆນຣາຘິປສ຺ສ;

ເຕ ຊມ຺ປຕີ ຕມຖ ປຏ຺ຏນໂມຕຣິຕ຺ວາ,

ເທວາລເຍ ປຏິວສິໍສຸ ມໂນຠິຣາເມ.

໓໔໑. ¶

ທິສ຺ວານ ເຕ ທ຺ວິຊວໂຣ ປຖິເກ ນິສາຍໍ,

ສນ຺ຕປ຺ປຍິຕ຺ຖ ມຘຸຣາສນປານເກຫິ;

ຣຕ຺ຕິກ຺ຂເຍ ຈ ອນຸຣາຘປຸຣສ຺ສ ມຄ຺ຄໍ,

ຉາຍາປຕີນມຖ ໂສ ອຠິເວທຍິຕ຺ຖ.

໓໔໒.

ອາທາຍ ເຕ ທສນຘາຕຸວຣໍ ຊິນສ຺ສ,

ສມ຺ມານິຕາ ທ຺ວິຊວເຣນ’ຖ ປຏ຺ຏນມ຺ຫາ;

ນິກ຺ຂມ຺ມ ທູຣຕຣມຄ຺ຄມຕິກ຺ກມິຕ຺ວາ,

ປທ຺ວາຣຄາມມນຸຣາຘປຸຣສ຺ສ’ຄຎ຺ຉຸໍ.

໓໔໓.

ຍໍ ຘມ຺ມິກໍ ນຣວຣໍ ອຠິຕກ຺ກຍິຕ຺ວາ,

ຊາຍາປຕີ ວິສຍເມຕມຸປາຄມິໍສຸ;

ຕໍ ວ຺ຍາຘິນາ ສມຸທິເຕນ ມຫາທິເສນ,

ລງ຺ກິສ຺ສຣໍສຸຈິຣກາລກຕໍ ສຸຓິໍສຸ.

໓໔໔.

ໂສເກນ ເຕ ສິຂຣິເນວ ສມຸຄ຺ຄເຕນ,

ອຊ຺ໂຌຕ຺ຖຏາ ພຫຸຕຣໍ ວິລປີໍສຸ ມຸຬ຺ຫາ;

ກາຍິໍສຸ ເຕສມຖ ມຸຈ຺ຉິຕມານສານໍ,

ສພ຺ພາ ທິສາ ຈ ວິທິສາ ຈ ຆນນ຺ຘກາຣາ

໓໔໕. ¶

ສຸຕ຺ວານ ກິຕ຺ຕິສິຣິເມຆນຣາຘິປສ຺ສ,

ຣຊ຺ເຊຐິຕສ຺ສ ຣຕນຕ຺ຕຍມາມກຕ຺ຕໍ;

ວສ຺ເສນ ນິພ຺ພຸຕມຫາທຫນາ’ວ ກຈ຺ຉາ,

ເຕ ຊມ຺ປຕີ ສມຠວຸໍ ຫຕໂສກຕາປາ.

໓໔໖.

ສຸຕ຺ວານ ເມຆຄິຣິນາມມຫາວິຫາເຣ,

ຠິກ຺ຂຸສ຺ສ ກສ຺ສຈິ ນຣາຘິປວລ຺ລຠຕ຺ຕໍ;

ຕສ຺ສ’ນ຺ຕິກໍ ສມຸປຄມ຺ມ ກຕາຕິເຖຍ຺ຍາ,

ຘາຕຸປ຺ປວຕ຺ຕິມວທິໍສຸ ອຸໂຠ ສເມຈ຺ຈ.

໓໔໗.

ສຸຕ຺ວານ ໂສ ມຸນິວໂຣ ທສນປ຺ປວຕ຺ຕິໍ,

ຫຏ຺ໂຐ ຍຖາມຕຣເສນ’ຫິສິຕ຺ຕຄຕ຺ໂຕ;

ເຄເຫ ສເກ ສປທິ ປຏ຺ຏວິຕານເກຫິ,

ວຑ຺ເຒສິ ຘາຕຸມມລໍ ສມລງ຺ກຕມ຺ຫິ.

໓໔໘. ¶

ເຕສຎ຺ຈ ຊານິປຕິການມຸຠິນ຺ນເມໂສ,

ກຕ຺ວານ ສງ຺ຄຫມຸຬາຣຕຣໍ ຍຖິຈ຺ຉໍ;

ວຸຕ຺ຕນ຺ຕເມຕມຠິເວທຍິຕຸໍ ປສຕ຺ຖໍ,

ລງ຺ກາຘິປສ຺ສ ສວິຘໍ ປຫິຓິຕ຺ຖ ຠິກ຺ຂຸໍ.

໓໔໙.

ຣາຊາ ວສນ຺ຕສມເຍ ສຫ ກາມິນີຫິ,

ອຸຍ຺ຍານເກຬິສຸຂ ເມກທິເນ’ນຸໂຠນ຺ໂຕ;

ອາຄຈ຺ຉມານມຖ ຕຕ຺ຖ ສຸທຸຣໂຕ’ຈ,

ຕໍ ວິປ຺ປສນ຺ນມຸຂວຓ຺ຓມປສ຺ສິ ຠິກ຺ຂຸໍ.

໓໕໐.

ໂສ ສໍຍມິ ສມຸປຄມ຺ມ ນຣາຘິປໍ ຕໍ,

ວຸຕ຺ຕນ຺ຕເມຕມຠິເວທຍິ ຕຸຏ຺ຐຈິຕ຺ໂຕ;

ສຸຕ຺ວານ ຕໍ ປຣມປີຕິຠຣໍ ວຫນ຺ໂຕ,

ສມ຺ປຕ຺ຕຈກ຺ກຣຕໂນ’ວ ອໂຫສິ ຣາຊາ.

໓໕໑. ¶

ລງ຺ກິສ຺ສໂຣ ທ຺ວິຊວຣາ ຊິນທນ຺ຕຘາຕຸ,

ມາທາຍ ຊານິປຕໂຍ ອຸຠເຍ ສເມຈ຺ຈ;

ເອສ຺ສນ຺ຕິ ລງ຺ກມຈິເຣນ ອິຕີຣິຕໍ ຕໍ,

ເນມິຕ຺ຕິກສ຺ສ ວຈນຎ຺ຈ ຕຖໍ ອມຎ຺ຎິ.

໓໕໒.

ຣາຊາ ຕໂຕ ມຫຕິຍາ ປຣິສາຍ ສທ຺ຘິໍ,

ຕສ຺ສານຸຣາຘນຄຣສ຺ສ ປຸຣຸຕ຺ຕຣາຍ;

ອາສາຍ ຕໍ ສປທິ ເມຆຄິຣິໍ ວິຫາຣໍ,

ສທ຺ໂຘ ອຄຎ຺ຉິ ປທສາ’ວ ປສນ຺ນຈິຕ຺ໂຕ.

໓໕໓.

ທິສ຺ວາ ຕໂຕ ສຸຄຕຘາຕຸມລພ຺ຠເນຍ຺ຍໍ,

ອານນ຺ທຊສ຺ສຸນິວເຫຫິ ຈ ຕາຣຫາຣໍ;

ສິຎ຺ຈໍ ວິຘາຍ ປຓິຘິໍ ພຫຸມານປຸພ຺ພໍ,

ໂຣມຎ຺ຈກຎ຺ຈຸກຘໂຣ ອິຕິ ຈິນ຺ຕຍິຕ຺ຖ.

໓໕໔. ¶

ໂສ’ຫໍ ອເນກຣຕນຸຊ຺ຊລໂມຬິຘາຣິໍ,

ປູເຊຍ຺ຍມຊ຺ຊ ຍທິ ທຸຈ຺ຈຊມຸຕ຺ຕມງ຺ຄໍ;

ໂລກຕ຺ຕເຍກສຣຓສ຺ສ ຕຖາຄຕສ຺ສ,

ໂນ ຘາຕຸຍາ ມຫມນຸຈ຺ຉວິກໍ ກເຣຍ຺ຍໍ.

໓໕໕.

ເອຕໍ ປຫູຕຣຕນໍ ສຘນໍ ສໂຠຄ຺ຄໍ,

ສມ຺ປູຊຍໍ ອປິ ຘຣາວລຍໍ ອເສສໍ;

ປູຊໍ ກໂຣມິ ຕທນຸຈ຺ຉວິກໍ ອຫໍ’ຕິ,

ຈິນ຺ເຕຍ຺ຍ ໂກຫິ ຠຸວເນສຸ ອມູຬ຺ຫຕິຕ຺ໂຕ.

໓໕໖.

ລງ຺ກາຘິປຈ຺ຈມິທມປ຺ປຕຣໍ ມມາສິ,

ພຸທ຺ໂຘ ຄຸເຓຫິ ວິວິເຘຫິ ປມາຓ ສຸຎ຺ໂຎ;

ໂສ’ຫໍ ປຣິຕ຺ຕວິຠໂວ ຕິຠເວກນາຖໍ,

ຕໍ ຕາທິສໍ ທສພລໍ ກຖມຈ຺ຈຍິສ຺ສໍ.

໓໕໗. ¶

ອິຕ຺ຖໍ ປຸນປ຺ປຸນ ຕເທວ ວິຈິນ຺ຕຍນ຺ໂຕ,

ອາປຊ຺ຊິ ໂສ ຘິຕິຍຸໂຕ’ປິ ວິສຎ຺ຎິຠາວໍ;

ສໍວີຊິໂຕ ສປທິ ຈາມຣມາຣຸເຕນ,

ຂິນ຺ເນນ ເສວກຊເນນ ອລຕ຺ຖ ສຎ຺ຎໍ.

໓໕໘.

ໂຖກມ຺ປິ ພີຊມຖ ວາ ອຠິໂຣປຍນ຺ຕາ,

ເມຘາວິໂນ ມຫຕິຍາ’ປິ ມສຸນ຺ຘຣາຍ;

ກາເລນ ປຕ຺ຕ ຕວ ປຸປ຺ຜຜລທິການິ,

ວິນ຺ທນ຺ຕິ ປຕ຺ຖິຕຜລານິ ອນປ຺ປການິ.

໓໕໙.

ເອວໍ ຄຸເຓຫິ ວິວິເຘຫິ’ປິ ອປ຺ປເມຍ຺ຍ,

ຘມ຺ມິສ຺ສຣມ຺ຫິ ມຫມປ຺ປຕຣມ຺ປິ ກຕ຺ວາ;

ກາລຈ຺ຈເຍນ ປຣິຓາມ ວິເສສຣມ຺ມໍ,

ສຄ຺ຄາປວຄ຺ຄສຸຂມປ຺ປຏິມໍ ລຠິສ຺ສໍ.

໓໖໐. ¶

ອິຕ຺ຖໍ ວິຈິນ຺ຕິຍ ປໂມທຠຣາຕິເຣກ,

ສມ຺ປຸຓ຺ຓຈນ຺ທິມສຣິກ຺ຂມຸໂຂ ນຣິນ຺ໂທ;

ສພ຺ພຎ຺ຎຸໂນ ທສນຘາຕຸວຣສ຺ສ ຕສ຺ສ,

ປູເຊສິ ສພ຺ພມປິ ສີຫຬທີປເມຕໍ.

໓໖໑.

ຠິກ຺ຂູ’ປິ ເຕປິຏກ ຊາຕກຠາຓກາທິ,

ຕກ຺ກຄມາທິ ກຸສລາ ອປິ ພຸທ຺ຘິມນ຺ໂຕ;

ວຕ຺ຖຸຕ຺ຕເຍກສຣຓາ ອປິ ໂປຣວຄ຺ຄາ,

ໂກຕຸຫລາ ສປທິ ສນ຺ນິປຕິໍສຸ ຕຕ຺ຖ.

໓໖໒.

ຣາຊາ ຕໂຕ ມຫຕິຍ ປຣິສາຍ ມຊ຺ເຌ,

ອິຈ຺ຈພ຺ຣຸວີ ມຸນິວໂຣ ຫິ ສຸສຸກ຺ກທາໂຐ;

ທາຐາ ຊິນສ຺ສ ຍທິ ໂອສຘິຕາຣກາ’ວ,

ເສຕາ ຠເວຍ຺ຍ ກິມຍໍ ມລິນາວຠາສາ.

໓໖໓. ¶

ຕສ຺ມິໍ ຂເຓ ທສນຘາຕຸ ມຸນິສ຺ສຣສ຺ສ,

ປກ຺ເຂ ປສາຣິຍ ທຸເວ ວິຍ ຣາຊຫໍສີ;

ວິຕ຺ຖາຣິຕໍ’ສຸນິ ວຫາ ຄຄນງ຺ຄນມ຺ຫິ,

ອາວຏ຺ຏໂຕ ຉວິ ຊເວນ ມຸຫຸຕ຺ຕມຕ຺ຕໍ.

໓໖໔.

ປຈ຺ຈຄ຺ຆມຕ຺ຖຣຓກໍ ສິຕມຕ຺ຖຣິຕ຺ວາ,

ຠທ຺ທາສນມ຺ຫິ ວິນິຘາຍ ມຸນິນ຺ທຘາຕຸໍ;

ຕໍ ຊາຕິປຸປ຺ຜນິກເຣນ ຖເກສິ ຣາຊາ,

ວສ຺ສຈ຺ຈຍມ຺ພຸຘຣກູຏສມປ຺ປເຠນ.

໓໖໕.

ອຸຄ຺ຄມ຺ມ ຂິປ຺ປມຖ ຘາຕຸ ມຸນິສ຺ສຣສ຺ສ,

ສາ ປຸປ຺ຜຣາສິສິຂຣມ຺ຫິ ປຕິຏ຺ຐຫິຕ຺ວາ;

ຣໍສີຫິ ທຸທ຺ຘຘວເລຫິ ວິໂຣຈມານາ,

ສມ຺ປສ຺ສຕໍ ອນິມິເສ ນຍເນ ອກາສິ.

໓໖໖. ¶

ຕໍ ຘາຕຸມາສນຄຕມ຺ຫິ ປຕິຏ຺ຐເປຕ຺ວາ,

ຂີໂຣທເອເຓປຏລປ຺ປຏິເມ ທຸກຸເຬ;

ຉາເທສິ ສາຏກສເຕຫິ ມຫາຣເຫຫິ,

ຠິຍ຺ໂຍ’ປິ ໂສ ອຸປປຣິກ຺ຂິຕຸກາມຕາຍ.

໓໖໗.

ອພ຺ຠຸຄ຺ຄຕາ ສປທິ ວຕ຺ຖສຕານິ ເຠຕ຺ວາ,

ເສຕມ຺ພຸໂທທຣວິນິຄ຺ຄຕຈນ຺ທິມາ’ວ;

ຐຕ຺ວານ ສາ ອຸປຣິ ເຕສມຠາສຍິຕ຺ຖ,

ຣໍສີຫິ ກຸນ຺ທວິສເທຫິ ທິສາ ສມນ຺ຕາ

໓໖໘.

ຕສ຺ມິໍ ຂເຓ ວສຸມຕີ ສຫ ຠູຘເຣຫິ,

ຄຊ຺ຊິຕ຺ຖ ສາຘຸວຈນໍ’ວ ສມຸຄ຺ຄິຣນ຺ຕີ;

ຕໍ ອພ຺ຠູຕໍ ວິຍ ສເມກ຺ຂິຕຸມມ຺ພຸຣາສິ,

ໂສ ນິຈ຺ຈໂລ ອຠວິ ສນ຺ຕຕຣງ຺ຄພາຫຸ.

໓໖໙. ¶

ມຕ຺ເຕຠກມ຺ປິຕສຸປຸປຜິຕສາລໂຕ’ວ,

ຠສ຺ສິໍສຸ ທິພ຺ພກຸສຸມານິ’ປິ ອນ຺ຕຬິກ຺ຂາ;

ນຈ຺ເຈສຸ ຈາຕຸຣິຍຍມຈ຺ຉຣິຍໍ ຊນສ຺ສ,

ສນ຺ທສ຺ສຍິໍສຸ ຄຄເນ ສຸຣສຸນ຺ທຣີ’ປິ.

໓໗໐.

ອານນ຺ທສຎ຺ຊນິຕຕາຣຣວາຠິຣາມໍ,

ຄາຍິໍສຸ ຄີຕມມຕາສນຄາຍກາ’ປິ;

ມຸຎ຺ຈິໍສຸ ທິພ຺ພຕຸຣິຍານິ’ປິ ວາທິຕານິ,

ຄມ຺ຠີຣມຸຈ຺ຈມຘຸຣໍ ທ຺ວິຄຸຓໍ ນິນາທໍ.

໓໗໑.

ສໍສິພ຺ພິຕໍ ຣຊຕຣຊ຺ຊຸສຕານຸກາຣີ,

ຘາຣາສເຕຫິ ວສຸຘມ຺ພຣມມ຺ພຸເທນ;

ສພ຺ພາ ທິສາ ຊລທກຸຏມຫຄຆິເຍສຸ,

ທິຕ຺ຕາຈິຣຊ຺ຊຸຕິປທີປສຕາວຠາສາ.

໓໗໒. ¶

ອາຘຸຍມານ ມລຍາວລ ການນນ຺ໂຕ,

ສມຖຸລ຺ລ ປຸປ຺ຜຊ ປຣາຄຫຣາຠິຫາຣິ;

ເສໂທທ ພິນ຺ທຸຄຓ ສໍຫຣຓປ຺ປວີໂຓ,

ມນ຺ທໍ ອວາສິ ສິສິໂຣ ອປິ ຄນ຺ຘວາໂຫ.

໓໗໓.

ຣາຊາ ຕມພ຺ຠຸຕມເວກ຺ຂິຍ ປາຏິຫີຣໍ,

ໂລກຸສ຺ສວໍ ພຫຸຕຣຎ຺ຈ ອທິຏ຺ຐປຸພ຺ພໍ;

ຈິປ຺ຜາຣິຕກ຺ຂິຍຸຄໂລ ປຣມປ຺ປໂມທາ,

ປູຊໍ ກຣິຕ຺ຖ ມຫຕິໍ ຣຕນາທິເກຫິ.

໓໗໔.

ໂສ ຘາຕຸມຕ຺ຕສິຣສາ’ຖ ສມຸພ຺ພຫນ຺ໂຕ,

ຐຕ຺ວາ ສມຸສ຺ສິຕ ສິຕາຕປວາຣຓມ຺ຫິ;

ຈິຕ຺ຕຕ຺ຖເຣ ຣຖວເຣ ສິຕວາຊິຍຸຕ຺ເຕ,

ລກ຺ຂິນິຘານນຸຣາຘປຸຣໍ ປເວກ຺ຂິ.

໓໗໕. ¶

ເທວິນ຺ທ ມນ຺ທິຣ ສເມ ສມລງ຺ກຕມ຺ຫິ,

ຣາຊາ ສກມ຺ຫິ ຠວເນ ອຕຸລານຸຠາໂວ;

ສີຫາສເນ ປຏິກ ໂກຊວ ສນ຺ຖຕມ຺ຫິ,

ຘາຕຸໍ ຐເປສິ ມຸນິໂນ ສສິຕາຕປຕ຺ເຕ.

໓໗໖.

ອນ຺ໂຕ’ວ ຠຸມິປຕິ ຘາຕຸຆຣໍ ມຫຄ຺ຆໍ,

ກຕ຺ວານ ຕຕ຺ຖ ວິນິຘາຍ ມຸນິນ຺ທຘາຕຸໍ;

ສມ຺ປູຊຍິຕ຺ຖ ວິວິເຘຫິ ອຸປາຍເນຫິ,

ຣຕ຺ຕີນ຺ທິວໍ ຕິທິວໂມກ຺ຂ ສຸຂາຠິກງ຺ຂີ.

໓໗໗.

ເຕສຎ຺ຈ ຊານິປຕິການມຸຠິນ຺ນເມວ,

ຕຸຏ຺ໂຐ ພຫູນິ ຣຕນາຠຣຓາທິການິ;

ຄາເມຈ ອິສ຺ສຣກຸເລກ ນີວາສຠຸເຕ,

ທຕ຺ວານ ສງ຺ຄຫມກາສິ ຕິສີຫຬິນ຺ໂທ.

໓໗໘. ¶

ສງ຺ຄມ຺ມ ຊານປທ ເນຄມ ນາຄຣາທີ,

ອຸກ຺ກຓ຺ຐິຕາ ສຸຄຕຘາຕຸມປສ຺ສມານາ;

ໂລກຸຕ຺ຕມສ຺ສ ຈຣິຕານິ ອຠິຕ຺ຖວນ຺ຕາ,

ອຸຄ຺ໂຆສຍິໍສຸ ຘຣຓີປຕິສນ຺ນິຘານິ;

ຘມ຺ມິສ຺ສໂຣ ສກລໂລກຫິຕາຍ ໂລເກ,

ຊາຍິຕ຺ຖ ສພ຺ພຊນຕາຫິຕມາຈຣິຕ຺ຖ;

ວິຕ຺ຖາຣິຕາ ພຫຸຊນສ຺ສ ຫິຕາຍ ຘາຕຸ,

ອິຈ຺ຉາມ ຘາຕຸມຠິປູຊຍິຕຸໍ ມຍມ຺ປິ.

໓໘໐.

ໂສ ສນ຺ນິປາຕິຍ ມຫີປຕິ ຠິກ຺ຂຸສງ຺ຆ,

ມາຣາມວາສິມນຸຣາຘປຸໂຣປກຓ຺ເຐ;

ອຊ຺ຌາສຍໍ ຕມຠິເວທຍິ ສຕ຺ຖຸຘາຕຸ,

ປູຊາຍ ສນ຺ນິປຕິຕສ຺ສ ມຫາຊນສ຺ສ.

໓໘໑. ¶

ເຖໂຣ ຕຫິໍ ມຫຕິ ຠິກ຺ຂຸຄເຓ ປເນໂກ,

ເມຘາພເລນ ອສໂມ ກຣຸຓາຘິວາໂສ;

ເອວໍ ຕິສີຫຬປຕິສ຺ສ ມຫາມຕິສ຺ສ,

ໂລກຕ຺ຖຈາຣຈຕຸຣສ຺ສ ນິເວທຍິຕ຺ຖ.

໓໘໒.

ໂຍ ອາຈເຣຍ຺ຍ ອນຸຊີວິຊນສ຺ສ ອຕ຺ຖໍ,

ເອໂສ ຠເວ’ນຸຈຣິໂຕ ມຫຕໍ ສຠາໂວ;

ຘາຕຸໍ ວສນ຺ຕສມເຍ ພຫິ ນີຫຣິຕ຺ວາ,

ທສ຺ເສຫິ ປຸຎ຺ຎມຠິປຕ຺ຖຍຕໍ ຊນານໍ.

໓໘໓.

ສຸຕ຺ວານ ສໍຍມິວຣສ຺ສ ສຸຠາສິຕານິ,

ປຸຈ຺ຉິຕ຺ຖ ໂສ ນຣວໂຣ ປຸນ ຠິກ຺ຂຸສງ຺ຆໍ;

ຘາຕຸໍ ນມສ຺ສິຕຸມເນນ ມຫາຊເນນ,

ຐານໍ ກິເມຕ຺ຖ ຣມຓີຍຕຣໍ ສິຍາ’ຕິ.

໓໘໔. ¶

ສພ຺ເພ’ປິ ເຕ ອຖ ນິກາຍ ນິວາສິ ຠິກ຺ຂູ,

ຐານໍ ສກໍ ສກມ ວຓ຺ຓຍຸມາທເຣນ;

ອຎ຺ໂຎຎ຺ຎຠິນ຺ນວຈເນສຸ ຈ ເຕສຸ ຣາຊາ,

ເນວາຠິນນ຺ທິ ນ ປຏິກ຺ຂິປິ ກິຎ຺ຈິວາກ຺ຍໍ.

໓໘໕.

ມຊ຺ຌຕ຺ຕຕານຸຄຕມານສຕາຍ ກິນ຺ຕຸ,

ຣາຊາ ອໂວ ຈ ປຸນ ຠິກ຺ຂຸຄຓສ຺ສ ມຊ຺ເຌ;

ອຕ຺ຕານຸຣູປມຍເມວ ມຸນິນ຺ທຘາຕຸ,

ຐານໍ ຂເຓນ ສຍເມວ ຄມິສ຺ສຕີຕິ.

໓໘໖.

ຣາຊາ ຕໂຕ ຠວນເມວ ສກໍ ອຸເປຈ຺ຈ,

ຘາຕຸປ຺ປຓາມມຠິປຕ຺ຖຍຕໍ ຊນານໍ;

ຂິປ຺ປໍມຸຂມ຺ພຸຊວນານີ ວິກາສຍນ຺ໂຕ,

ສຊ຺ເຊຕຸມາຫ ນຄຣຎ຺ຈ ວິຫາຣມຄ຺ຄໍ.

໓໘໗.

ສມ຺ມຊ຺ຊິຕາ ສລິລ ເສວນ ສນ຺ຕຘູລີ,

ຣຈ຺ຉາ ຕທາ’ສິ ປຸລິນຕ຺ຖຣຓາຠິຣາມາ;

ອຸສ຺ສາປິຕານິ ກຓກາທິວິຈິຕ຺ຕິຕານິ,

ວ຺ຍຄ຺ຆາທິ ຣູປຂຈິຕານິ ຈ ໂຕຣຓານິ.

໓໘໘. ¶

ຉາຍາ ນິວາຣິຕ ວິໂຣຈນ ຣໍສິຕາປາ,

ນຈ຺ຈໍ’ວ ທສ຺ສຍຕິ ວາຕຘູຕາ ຘຊາລິ;

ວີຖິ ວສນ຺ຕວນຣາຊິ ສມານວຓ຺ຓາ,

ຊາຕາ ສຸຊາຕກທລີຕຣຸມາລິກາຫິ.

໓໘໙.

ສໍສູຈຍນ຺ຕິ ຈ ສຕໍ ນວປຸຓ຺ຓກຸມ຺ຠາ,

ສຄ຺ຄາປວຄ຺ຄສຸຂມິຈ຺ຉິຕມິຊ຺ຌຕີຕິ;

ກປ຺ປຸຣສາຣຕຄຣາຄຣຸສມ຺ຠເວຫິ,

ຘູເປຫິ ທຸທ຺ທິນມໂຖ ສຸທິນໍ ອໂຫສິ.

໓໙໐.

ໂອລມ຺ພມານສິຕມຸຕ຺ຕກຊາລການິ,

ສຊ຺ຊາປິຕານິ ວິວິຘານິ ຈ ມຓ຺ຑປານິ;

ສມ຺ປາທິຕານິ ຈ ຕຫິໍ ກຸສຸມຄຆິການິ,

ອາໂມທ ລຸທ຺ຘ ມຘຸປາວລິ ກຸຊິຕານິ.

໓໙໑. ¶

ຄຈ຺ຉິໍສຸ ເກຈິ ຄຫິຕຸສ຺ສວ ເວສໂສຠາ,

ເອເກ ສມຸຄ຺ຄປຣິປຸຣິຕປຸປ຺ຜຫຕ຺ຖາ;

ອຎ຺ເຎ ຊນາ ສຸຣຠິຈຸຓ຺ຓຠຣໍ ວຫນ຺ຕາ,

ຕຕ຺ເຖຕເຣ ຘຕວິຈິຕ຺ຕມຫາຕປຕ຺ຕາ.

໓໙໒.

ລງ຺ກິສ຺ສໂຣ’ຖ ສສິປຓ຺ຑຣວາຊິຍຸຕ຺ເຕ,

ອຸຊ຺ໂຊຕິເຕ ຣຖວເຣ ຣຕນປ຺ປຠາຫິ;

ຘາຕຸໍ ຕິໂລກຕິລກສ຺ສ ປຕິຏ຺ຐເປຕ຺ວາ,

ເອຕໍ ອໂວຈ ວຈນໍ ປຓິປາຕປຸພ຺ພໍ.

໓໙໓.

ສມ຺ໂພຘິຍາ ອິວ ມຸນິສ຺ສຣ ໂພຘິມຓ຺ຑໍ,

ຄຓ຺ຑມ຺ພຣຸກ຺ຂມິວ ຕິຕ຺ຖິຍມທ຺ທນາຍ;

ຘມ຺ມຎ຺ຈ ສໍວິຠຊິຕຸໍ ມິຄທາຍມຊ຺ຊ,

ປູຊານຸຣູປມຸປຄຈ຺ຉ ສຍໍ ປເທສໍ.

໓໙໔. ¶

ຣາຊາ ຕໂຕ ສມຸຈິຕາຈຣເຓສຸ ທກ຺ໂຂ,

ວິສ຺ສຊ຺ຊິ ຜຸສ຺ສຣຖມຏ຺ຐິຕສາຣຖິໍ ຕໍ;

ປຈ຺ຉາ ສຍໍ ມຫຕິຍາ ປຣິສາຍ ສທ຺ຘິໍ,

ປູຊາວິເສສມສມໍ ອຄມາ ກໂຣນ຺ໂຕ.

໓໙໕.

ອຸກ຺ກຸຏ຺ຐິນາທວິສເຣນ ມຫາຊນສ຺ສ,

ເຫສາຣເວນ ວິສເຏນ ຕຸຣງ຺ຄມານໍ;

ເຠຣີຣເວນ ມຫຕາ ກຣິ ຄຊ຺ຊິເຕນ,

ອຸທ຺ທາມສາຄຣ ສມໍ ນຄຣໍ ອໂຫສິ.

໓໙໖.

ອາໂມທິຕາ ອຸຠຍວີຖິຄຕາ ກຸລິຕ຺ຖິ,

ວາຕາຍເນຫິ ກນກາຠຣເຓ ຂິປິໍສຸ;

ສພ຺ພຕ຺ຖກໍ ກຸສຸມວສ຺ສມວສ຺ສຍິໍສຸ,

ເຈລານິເຈວ ຠມຍິໍສຸນິຊຸຕ຺ຕມງ຺ເຄ.

໓໙໗. ¶

ປາຈີນໂຄປຸຣສມີປມຸປາຄຕມ຺ຫິ,

ຕສ຺ມິໍ ຣເຖ ຊລຘິປິຏ຺ຐິຄເຕ’ວ ໂປເຕ;

ຕຸຏ຺ຐາ ຕຫິໍ ຍຕິຄຓາ ມນຸຊາ ຈ ສພ຺ເພ,

ສມ຺ປຸຊຍິໍສຸ ວິວິເຘຫິ ອຸປາຍເນຫິ.

໓໙໘.

ກຕ຺ວາ ປທກ຺ຂິຓມໂຖ ປຸຣມຸຕ຺ຕເຣນ,

ທ຺ວາເຣນ ໂສ ຣຖວໂຣ ພຫິ ນິກ຺ຂມິຕ຺ວາ;

ຐາເນ ມຫິນ຺ທມິນຸຘມ຺ມກຖາປວິຕ຺ເຕ,

ອຏ຺ຐາສິ ຕິຕ຺ຖຄມິຕາ ອິວ ຠຓ຺ຑນາວາ.

໓໙໙.

ຐາເນ ຕຫິໍ ທສນຘາຕຸວຣໍ ຊິນສ຺ສ,

ລງ຺ກິສ຺ສໂຣ ຣຕນວິຕ຺ຕກຣຓ຺ຑຄພ຺ຠາ;

ສຎ຺ຌາຆນາ ອິວ ວິຘຸໍ ພຫິນີຫຣິຕ຺ວາ,

ທສ຺ເສສິ ຊານປທ ເນຄມ ນາຄຣານໍ.

໔໐໐. ¶

ຕສ຺ມິໍ ຊເນ ສປທິ ອາຠຣຓາທິວສ຺ສ,

ມຈ຺ຈນ຺ຕປີຕິຠຣິເຕ ອຠິວສ຺ສຍນ຺ເຕ;

ສານນ຺ທິວນ຺ທິຊນມງ຺ຄລຄີຕເກຫິ,

ສມ຺ປາທິເຕສຸ ມຸຂເຣສຸ ທິສາມຸເຂສຸ.

໔໐໑.

ຫຕ຺ຖາຣວິນ຺ທນິວເຫສຸ ມຫາຊນສ຺ສ,

ຈນ຺ໂທທເຍ’ຈ ມຸກຸລຕ຺ຕນມາຄເຕສຸ;

ພ຺ຣຫ຺ມາມຣາທິຊນິຕາມິຕ ສາຘຸວາເທ,

ຕາຣາປຖມ຺ຫິ ຠຸວໂນທຣ ໂມຕ຺ຖຣນ຺ເຕ.

໔໐໒.

ສາທນ຺ຕຘາຕຸ ສສິຂຓ຺ຑ ສມານວຓ຺ຓາ,

ຣໍສີຫິ ກຸນ຺ທ ນວຈນ຺ທນ ປຓ຺ຑເຣຫິ;

ປາສາທ ໂຄປຸຣ ສິລຸຈ຺ຈຍ ປາທປາທິໍ,

ນິທ຺ໂຘຕ ຣູປິຍມຍໍ’ວ ອກາ ຂເຓນ.

໔໐໓.

ຕໍ ປາຏິຫາຣິຍ ມຈິນ຺ຕິຍ ມຈ຺ຈຸຬາຣໍ,

ທິສ຺ວານ ເກ ຕຫີມເຫສຸ ມຫຏ຺ຐໂລມາ;

ເກວາ’ນຍຸໍ ສກສກາຠຣຓານິ ເຄຫໍ,

ເກວາ ນ ອຕ຺ຕປຏິລາຠມວຓ຺ຓຍິໍສຸ.

໔໐໔. ¶

ເກ ໂນຊຫິໍສຸ ສກທິຏ຺ຐິມລານຸພທ຺ຘໍ,

ເກ ວາ ນ ພຸທ຺ຘມຫິມໍ ອຠິປຕ຺ຖຍິໍສຸ;

ເກ ນາມ ມຈ຺ຉຣິຍປາສວສາ ອເຫສຸໍ,

ວຕ຺ຖຸຕ຺ຕຍຎ຺ຈ ສຣຓໍ ນຄມິໍສຸ ເກວາ.

໔໐໕.

ລງ຺ກິສ຺ສໂຣ’ປິ ນວລກ຺ຂ ປຣິພ຺ພເຍນ,

ສພ຺ພຎ຺ຎຸຘາຕຸມຕຸລໍ ອຠິປູຊຍິຕ຺ວາ;

ຕໍ ທນ຺ຕຘາຕຸຠວນໍ ປຸນ ວຑ຺ຒຍິຕ຺ວາ,

ອນ຺ເຕປຸຣມ຺ຫິ ປຏິວາສຣມຈ຺ຈຍິຕ຺ຖ.

໔໐໖.

ຘາຕຸໍ ວິຫາຣມຫຍຸຕ຺ຕຣເມວ ເນຕ຺ວາ,

ປູຊໍ ວິຘາຕຸມນຸວຈ຺ຉຣເມວຣູປໍ;

ຣາຊາ’ຖ ກິຕ຺ຕິສິຣິເມຆສມວ຺ຫໂຍ ໂສ,

ວາຣິຕ຺ຕເລຂ ມຠິເລຂຍິ ສຈ຺ຈສນ຺ໂຘ.

໔໐໗. ¶

ວາຣິຕ຺ຕເມຕມິຕເຣ’ປິ ປວຕ຺ຕຍນ຺ຕາ,

ເຕ ພຸທ຺ຘທາສປມຸຂາ ວສຸຘາຘິນາຖາ;

ສທ຺ຘາທຍາຘິກຄຸຓາຠຣຓາຠິຣາມາ,

ຕໍ ສກ຺ກຣິໍສຸ ພຫຸຘາ ຊິນທນ຺ຕຘາຕຸໍ.

໔໐໘.

ສຕ຺ຖາຣາ ສມ຺ຠຕຕ຺ຖໍ ປຸຣິມຕຣຠເວ ສມ຺ປຊານໍ ປຊານໍ,

ສມ຺ໂພຘິໍ ຕສ຺ສ ສພ຺ພາສວວິຄມກຣິໍ ສທ຺ທຫນ຺ໂຕ’ທຫນ຺ໂຕ;

ໂສຕໍ ຕສ຺ສ’ຄ຺ຄຘມ຺ເມ ນິປຸຓມຕິ ສຕໍ ສງ຺ຄເມສງ຺ຄເມສໍ,

ນິພ຺ພາຓໍ ສນ຺ຕມິຈ຺ເຉ ຕິຠວຠຍປຣິຈ຺ຈາຄເຫຕຸໍ ຄເຫຕຸໍ.

ປຎ຺ຈໂມ ປຣິຈ຺ເຉໂທ.

໔໐໙. ¶

ໂຍ ຈນ຺ທໂຄມິ ຣຈິເຕວຣສທ຺ທສຕ຺ເຖ,

ຏີກໍ ປສຕ຺ຖມກຣິຕ຺ຖ ຈ ປຎ຺ຈິກາຍ;

ພຸທ຺ຘປ຺ປຠາວຊນ ນິໍຈ ອກາ ສມນ຺ຕ,

ປາສາທິກາຍ ວິນຍຏ຺ຐກຖາຍ ຏີກໍ.

໔໑໐.

ອງ຺ຄຸຕ຺ຕຣາຄມວຣຏ຺ຐກຖາຍ ຏີກໍ,

ສມ຺ໂມຠວິພ຺ຠມ ວິຆາຕກຣິໍ ອກາສິ;

ອຕ຺ຖາຍ ສໍຍມິຄຓສ຺ສ ປຘານິກສ຺ສ,

ຄນ຺ຖໍ ອກາ ວິນຍສງ຺ຄຫນາມເຘຍ຺ຍໍ.

໔໑໑.

ສນ຺ຕິນ຺ທ຺ຣິຍສ຺ສປຏິປຕ຺ຕິ ປຣາຍຓສ຺ສ,

ສລ຺ເລຂ ວຸຕ຺ຕິ ນິຣຕສ຺ສ ສມາຫິຕສ຺ສ;

ອປ຺ປິຈ຺ຉຕາທິ ຄຸຓໂຍຄ ວິຠຸສນສ຺ສ,

ສມ຺ພຸທ຺ຘສາສນມໂຫທຍກາຣຓສ຺ສ.

໔໑໒. ¶

ສພ຺ເພສຸອາຈຣິຍຕໍ ປຣມໍ ຄຕສ຺ສ,

ສຕ຺ເຖສຸ ສພ຺ພສມຍນ຺ຕຣ ໂກວິທສ຺ສ;

ສິສ຺ເສນສາຣິຕນຸຊສ຺ສ ມຫາທິສາມິ.

໔໑໓.

ສຸທ຺ຘນ຺ວເຍນ ກຣຸຓາທິຄຸໂຓທເຍນ,

ຕກ຺ກາຄມາທິ ກຸສເລນ ວິສາຣເທນ;

ສພ຺ພຕ຺ຖ ປຕ຺ຖຏ ສຸຘາກຣຣໍສິຊາລ,

ສງ຺ກາສກິຕ຺ຕິວິສເຣນ ປຣິກ຺ຂເກນ.

໔໑໔. ¶

ສທ຺ຘາຘເນນ ສຂິເລນ ຈ ຘມ຺ມກິຕ຺ຕິ,

ນາເມນ ຣາຊຄຣຸນາ ຈຣິເຍນ ເອໂສ;

ໂສຕຸປ຺ປສາທຊນໂນ ຊິນທນ຺ຕຘາຕຸ,

ວໍໂສ ກໂຕ ນິຂິລທສ຺ສິປຠາວທີໂປ.

໔໑໕.

ຘມ຺ໂມ ປວຕ຺ຕຕຸ ຈິຣາຍ ມຸນິສ຺ສຣສ຺ສ,

ຘມ຺ເມ ຐິຕາ ວສຸມຕີປຕໂຍ ຠວນ຺ຕຸ;

ກາເລ ປວສ຺ສຕຸ ຆໂນ ນິຂິລາ ປຊາ’ປິ,

ອຎ຺ໂຎຎ຺ຎເມຕ຺ຕິປຏິລາຠສຸຂໍ ລຠນ຺ຕຸ.