📜

ເຕລກຏາຫຄາຖາ ¶

ນໂມ ຕສ຺ສ ຠຄວໂຕ ອຣຫໂຕ ສມ຺ມາສມ຺ພຸທ຺ຘສ຺ສ

໑.

ລໍກິສ຺ສໂຣ ຊຍຕຸ ວາຣຓຣາຊຄາມີ

ໂຠຄິນ຺ທໂຠຄ ຣຸຈິຣາຍຕ ປີຓ ພາຫຸ,

ສາຘຸປຈາຣນິຣໂຕ ຄຸຓສນ຺ນິວາໂສ

ຘມ຺ເມ ຐິໂຕ ວີຄຕໂກຘມທາວເລໂປ;

໒.

ໂຍ ສພ຺ພໂລກມຫິໂຕ ກຣຸຓາຘິວາໂສ

ໂມກ຺ຂາກໂຣ ຣວິກຸລມ຺ພຣ ປຸຓ຺ຓ ຈນ຺ໂທ,

ເຎຍ຺ໂຍທຘິໍ ສຸວິປຸລໍ ສກລໍ ວິພຸທ຺ໂຘ

ໂລກຸຕ຺ຕມໍ ນມຖ ຕໍ ສິຣສາ ມຸນິນ຺ທໍ;

໓.

ໂສປານມາລມມລໍ ຕິທສາລຍສ຺ສ

ສໍສາຣ ສາຄຣສມຸຕ຺ຕຣຓາຍ ເສຕຸໍ,

ສພ຺ພາຄຕີຠຍ ວິວຊ຺ຊິຕ ເຂມ ມຄ຺ຄໍ

ຘມ຺ມໍ ນມສ຺ສຖ ສທາ ມຸນິນາ ປຓີຕໍ;

໔. ¶

ເທຍ຺ຍໍ ຕທປ຺ປມປິ ຍຕ຺ຖ ປສນ຺ນ ຈິຕ຺ຕາ

ທຕ຺ວາ ນຣາ ຜລມຸຬາຣຕຣໍ ລຠນ຺ເຕ,

ຕໍ ສພ຺ພທາ ທສພເລນປິ ສຸປ຺ປສຕ຺ຖໍ

ສງ຺ຆໍ ນມສ຺ສຖ ສທາມິຕປຸຎ຺ຎເຂຕ຺ຕໍ;

໕.

ເຕໂຊ ພເລນ ມຫຕາ ຣຕນຕ຺ຕຍສ຺ສ

ໂລກຕ຺ຕຍໍ ສມຘິຄຈ຺ຉຕິ ເຍນ ໂມກ຺ຂໍ,

ຣກ຺ຂາ ນ ຈຕ຺ຖິ ຈ ສມາ ຣຕນຕ຺ຕຍສ຺ສ

ຕສ຺ມາ ສທາ ຠຊຖ ຕໍ ຣຕນຕ຺ຕຍໍ ໂຠ;

໖.

ລໍກິສ຺ສໂຣ ປຣຫິເຕກຣໂຕ ນິຣາໂສ

ຣຕ຺ຕິມ຺ປິ ຊາຄຣຣໂຕ ກຣຸຓາຘິວາໂສ,

ໂລກໍ ວິໂພຘຍຕິ ໂລກຫິຕາຍ ກາມໍ

ຘມ຺ມໍ ສມາຈຣຖ ຊາຄຣິຍານຸຍຸຕ຺ຕາ;

໗. ¶

ສຕ຺ໂຕປກາຣ ນິຣຕາ ກຸສເລ ສຫາຍາ

ໂຠ ທຸລ຺ລຠາ ຠຸວິ ນຣາ ວິຫຕປ຺ປມາທາ,

ລໍກາຘິປໍ ຄຸຓຘນໍ ກຸສເລ ສຫາຍໍ

ອາຄມ຺ມ ສໍຈຣຖ ຘມ຺ມມລໍ ປມາທໍ;

໘.

ຘມ຺ໂມ ຕິໂລກ ສຣໂຓ ປຣໂມ ຣສານໍ

ຘມ຺ໂມ ມຫຄ຺ຆຣຕໂນ ຣຕເນສຸ ໂລເກ,

ຘມ຺ໂມ ຠເວ ຕິຠວທຸກ຺ຂ ວິນາສເຫຕຸ

ຘມ຺ມໍ ສມາຈຣຖ ຊາຄຣິຍານຸຍຸຕ຺ຕາ;

໙.

ນິທ຺ທໍ ວິໂນທຍຖ ຠາວຍຖປ຺ປເມຍ຺ຍໍ

ທຸກ຺ຂໍ ອນິຈ຺ຈມ຺ປິ ເຈຫ ອນຕ຺ຕຕຎ຺ຈ,

ເທເຫ ຣຕິໍ ຊຫຖ ຊ ຊຊ຺ຊຣຠາຊນາໂຠ

ຘມ຺ມໍ ສມາຈຣຖ ຊາຄຣິຍານຸຍຸຕ຺ຕາ;

໑໐. ¶

ໂອກາສ ມຊ຺ຊ ມມ ນຕ຺ຖິ ສຸເວ ກຣິສ຺ສໍ

ຘມ຺ມໍ ອິຕີຫລສຕາ ກຸສລປ຺ປໂຍເຄ,

ນາ’ລໍ ຕິຍທ຺ຘສຸ ຕຖາ ຠຸວນຕ຺ຕເຍ ຈ

ກາມໍ ນ ຈຕ຺ຖິ ມນຸໂຊ ມຣຓາ ປມຸຕ຺ໂຕ;

໑໑.

ຂິຕ຺ໂຕ ຍຖາ ນຠສິ ເກນຈິເທວ ເລຑ຺ຑຸ

ຠູມິໍ ສມາປຕ຺ຕິ ຠາຣຕຍາ ຂເຓນ,

ຊາຕຕ຺ຕເມວ ຂລຸ ກາຣຓເມກມຕ຺ຣ

ໂລກໍ ສທາ ນນຸ ຘຸວໍ ມຣຓາຍ ຄນ຺ຕຸໍ;

໑໒.

ກາມໍ ນຣສ຺ສ ປຕໂຕ ຄິຣິມຸທ຺ຘນາໂຕ

ມຊ຺ເຌ ນ ກິຎ຺ຈິ ຠຍນິສ຺ສຣຓາຍ ເຫຕຸ,

ກາມໍ ວຊນ຺ຕິ ມຣຓໍ ຕິຠເວສຸ ສຕ຺ຕາ

ໂຠເຄ ຣຕິໍ ປຊຫຖາປິ ຈ ຊີວິເຕ ຈ;

໑໓. ¶

ກາມໍ ປຕນ຺ຕິ ມຫິຍາ ຂລຸ ວສ຺ສຘາຣາ

ວິຊ຺ຊຸລ຺ລຕາ ວິຕຕເມຆ ມຸຂາ ປມຸຕ຺ຕາ,

ເອວໍ ນຣາ ມຣຓຠີມ ປປາຕມຊ຺ເຌ

ກາມໍ ປຕນ຺ຕິ ນຫິ ໂກຈິ ຠເວສຸ ນິຈ຺ໂຈ;

໑໔.

ເວລາຕເຏ ປຏຸຕໂຣຣຸ ຕຣໍຄມາລາ

ນາສໍ ວຊນ຺ຕິ ສຕຕໍ ສລິລາລຍສ຺ສ,

ນາສໍ ຕຖາ ສມຸປຍນ຺ຕິ ນຣາມຣານໍ

ປາຓານິ ທາຣຸຓຕເຣ ມຣໂຓທຘິມ຺ຫິ;

໑໕.

ຣຸທ຺ໂຘປິ ໂສ ຣຖວຣສ຺ສຄຊາຘິເປຫິ

ໂຍເຘຫິ ຈາປິ ສພເລຫິ ຈ ສາຍຸເຘຫິ,

ໂລກໍ ວິວໍຈິຍ ສທາ ມຣຓູສໂຠ ໂສ

ກາມໍ ນິຫນ຺ຕິ ຠຸວນຕ຺ຕຍ ສາລິ ທຓ຺ຑໍ;

໑໖. ¶

ໂຠ ມາຣຸເຕນ ມຫຕາ ວິຫໂຕ ປທີໂປ

ຂິປ຺ປໍ ວິນາສ ມຸຂເມຕິ ມຫປ຺ປໂຠປິ,

ໂລເກ ຕຖາ ມຣຓຈຓ຺ຑ ສມີຣເຓນ

ຂິປ຺ປໍ ວິນສ຺ສຕິ ນຣາຍຸມຫາ ປທີໂປ;

໑໗

ຣາມຊ຺ຊຸນປ຺ປຠູຕິ ຠູປຕິ ປຸໍຄວາ ຈ

ສູຣາ ປຸເຣ ຣຓມຸເຂ ວິຊິຕາຣິ ສງ຺ຆາ,

ເຕປີຫ ຈຓ຺ຑ ມຣໂຓຆ ນິມຸຄ຺ຄເທຫາ

ນາສໍ ຄຕາ ຊຄຕິ ເກ ມຣຓາ ປມຸຕ຺ຕາ?

໑໘.

ລກ຺ຂີ ຈ ສາຄຣປຏາ ສຘຣາຘຣາ ຈ

ສມ຺ປຕ຺ຕິໂຍ ຈ ວິວິຘາ ອປິ ຣູປໂສຠາ,

ສພ຺ພາ ຈ ຕາ ອປິ ຈ ມິຕ຺ຕສຸຕາ ຈ ທາຣາ

ເກ ຈາປິ ກໍ ອນຸຄຕາ ມຣຓໍ ວຊນ຺ຕໍ?

໑໙. ¶

ພ຺ຣຫ຺ມາສຸຣາສຸຣຄຓາ ຈ ມຫານຸຠາວາ

ຄນ຺ຘພ຺ພກິນ຺ນຣມໂຫຣຄຣກ຺ຂສາ ຈ,

ເຕ ຈາ ປເຣ ຈ ມຣຓຄ຺ຄິສິຂາຍ ສພ຺ເພ

ອນ຺ເຕ ປຕນ຺ຕິ ສລຠາ ອິວ ຂີຓປຸຎ຺ຎາ;

໒໐.

ເຍ ສາຣິປຸຕ຺ຕປມຸຂາ ມຸນິສາວກາ ຈ

ສຸທ຺ຘາ ສທາສວນຸທາ ປຣມິທ຺ຘິປຕ຺ຕາ,

ເຕ ຈາປິ ມຈ຺ຈຸວຬຠາ ມຸຂ ສນ຺ນິມຸຄ຺ຄາ

ທີປານິວານລຫຕາ ຂຍຕໍ ອຸເປຕາ;

໒໑.

ພຸທ຺ຘາປິ ພຸທ຺ຘກມລາມລຈາຣຸເນຕ຺ຕາ

ພຕ຺ຕິໍສລກ຺ຂຓ ວິຣາຊິຕ ຣູປໂສຠາ,

ສພ຺ພາສຈກ຺ຂຍກຣາປິ ຈ ໂລກນາຖາ

ສມ຺ມທ຺ທິຕາ ມຣຓມຕ຺ຕມຫາຄເຊນ;

໒໒. ¶

ໂຣຄາຕຸເຣສຸ ກຣຸຓາ ນ ຊຣາຕຸເຣສຸ

ຂິຑ຺ຑາປເຣສຸ ສຸກຸມາຣກຸມາຣເກສຸ,

ໂລກໍ ສທາ ຫນຕິ ມຈ຺ຈຸ ມຫາຄຊິນ຺ໂທ

ທວານໂລ ວນມິວາວຣຕໍ ອເສສໍ;

໒໓.

ອາປຸຓ຺ຓຕາ ນ ສລິເລ ນ ຊລາສຍສ຺ສ

ກຏ຺ຐສ຺ສ ຈາປິ ພຫຸຕາ ນ ຫຸຕາສນສ຺ສ,

ຠຸຕ຺ວານ ໂສ ຕິຠູວນມ຺ປິ ຕຖາ ອເສສໍ

ໂຠ ນິທ຺ທໂຍ ນ ຂລຸ ປີຕິມຸເປຕິ ມຈ຺ຈຸ;

໒໔.

ໂຠ ໂມຫ ໂມຫິຕຕຍາ ວິວໂສ ອຘຎ຺ໂຎ

ໂລໂກ ປຕຕ຺ຍປິປິ ມຈ຺ຈຸມຸເຂ ສຸຠີເມ,

ໂຠເຄ ຣຕິໍ ສມຸປຍາຕິ ນິຫີນປຎ຺ໂຎ

ໂທລາ ຕຣງ຺ຄຈປເລ ສຸປິໂນປເມຍ຺ເຍ;

໒໕. ¶

ເອໂກປິ ມຈ຺ຈຸຣຠິຫນ຺ຕຸມລໍ ຕິໂລກໍ

ກິໍ ນິທ຺ທຍາ ອປິ ຊຣາມຣຓານຸຍາຍີ,

ໂກ ວາ ກເຣຍ຺ຍ ວິຠສຸເວສຸ ຈ ຊີວິຕາສໍ

ຊາໂຕ ນໂຣ ສຸປິນ ສໍຄມ ສນ຺ນິເຠສຸ;

໒໖.

ນິຈ຺ຈາຕຸຣໍ ຊຄທິທໍ ສຠຍໍ ສໂສກໍ

ທິສ຺ວາ ຈ ໂກຘມທໂມຫຊຣາຠິຠູຕໍ,

ອຸພ຺ເພຄມຕ຺ຕມປິ ຍສ຺ສ ນ ວິຊ຺ຊຕີ ເຈ

ໂສ ທາຣຸໂຓນ ມຣຓໍ ວຕ ຕໍ ຘິຣຕ຺ຖຸ!

ໂຠ ໂຠ ນ ປສ຺ສຖ ຊຣາສິຘຣຎ຺ຫິ ມຈ຺ຈຸ

ມາຫຎ຺ຎມານມຂິລໍ ສຕຕໍ ຕິໂລກໍ,

ກິໍ ນິທ຺ທຍາ ນຍຖ ວີຕຠຍາ ຕິຍາມໍ

ຘມ຺ມໍ ສທາ’ສວນຸທໍ ຈຣຖ’ປ຺ປມຕ຺ຕາ;

໒໘. ¶

ຠາເວຖ ໂຠ ມຣຓມາຣວິວຊ຺ຊນາຍ

ໂລເກ ສທາ ມຣຓ ສຎ຺ຎມິມໍ ຍຕຕ຺ຕາ,

ເອວຎ຺ຫິ ຠາວນຣຕສ຺ສ ນຣສ຺ສ ຕສ຺ສ

ຕຓ຺ຫາ ປຫີຍຕິ ສຣີຣຄຕາ ອເສສາ;

໒໙.

ຣູປໍ ຊຣາ ປິຍຕຣໍ ມລິນີກໂຣຕິ

ສພ຺ພໍ ພລໍ ຫຣຕິ ອຕ຺ຕນິ ໂຆຣໂຣໂຄ,

ນານູປໂຠຄ ປຣິຣກ຺ຂິຕ ມຕ຺ຕຠາວໍ

ໂຠ ມຈ຺ຈຸ ສໍຫຣຕິ ກິໍ ຜລມຕ຺ຕຠາເວ?

໓໐.

ກມ຺ມານິລາປຫຕໂຣຄຕຣໍຄຠໍເຄ

ສໍສາຣ ສາຄຣ ມຸເຂ ວິຕເຕ ວິປນ຺ນາ,

ມາ ມາປມາທມກຣິຕ຺ຖ ກໂຣຖ ໂມກ຺ຂໍ

ທຸກ຺ໂຂທໂຍ ນນຸ ປມາທມຍໍ ນຣານໍ;

໓໑. ¶

ໂຠຄາ ຈ ມິຕ຺ຕສຸຕໂປຣິສ ພນ຺ຘວາ ຈ

ນາຣີ ຈ ຊີວິຕສມາ ອປິ ເຂຕ຺ຕວຕ຺ຖຸ,

ສພ຺ພານິ ຕານິ ປຣໂລກມິໂຕ ວຊນ຺ຕໍ

ນານຸພ຺ພຊນ຺ຕິ ກຸສລາກຸສລໍວ ໂລເກ;

໓໒.

ໂຠ ວິຊ຺ຊຸຈໍຈລຕເຣ ຠວສາຄຣມ຺ຫິ

ຂິຕ຺ຕາ ປຸຣາ ກຕມຫາປວເນນ ເຕນ,

ກາມໍ ວິຠິຊ຺ຊຕິ ຂເຓນ ສຣີຣນາວາ

ຫຕ຺ເຖ ກໂຣຖ ປຣມໍ ຄຸຓຫຕ຺ຖສາຣໍ;

໓໓.

ນິຈ຺ຈໍ ວິຠິຊ຺ຊຕິຫ ອາມກ ຠາຊນໍວ

ສໍຣກ຺ຂິໂຕປິ ພຫຸຘາ ອິຫ ອຕ຺ຕຠາໂວ,

ຘມ຺ມໍ ສມາຈຣຖ ສຄ຺ຄປຕິປ຺ປຕິຏ຺ຐໍ

ຘມ຺ໂມ ສຸຈິຓ຺ຓມິຫເມວ ຜລໍ ທທາຕິ;

໓໔. ¶

ຣນ຺ຕ຺ວາ ສທາ ປິຍຕເຣ ທິວິ ເທວຣຊ຺ເຊ

ນມ຺ຫາ ຈວນ຺ຕິ ວິພຸຘາ ອປິ ຂີຓປຸຎ຺ຎາ,

ສພ຺ພໍ ສຸຂໍ ທິວິ ຠຸວີຫ ວິໂຍຄນິຏ຺ຐໍ

ໂກ ປຎ຺ຎວາ ຠວສຸເຂສຸ ຣຕິໍ ກເຣຍ຺ຍ?

໓໕.

ພຸທ຺ໂຘ ສສາວກຄໂຓ ຊຄເທກນາໂຖ

ຕາຣາວລີປຣິວຸໂຕປິ ຈ ປຸຓ຺ຓຈນ຺ໂທ,

ອິນ຺ໂທປິ ເທວມກຸຏໍກິຕ ປາທກຎ຺ໂຊ

ໂກ ເຜຓປິຓ຺ຑ-ນ-ສໂມ ຕິຠເວສຸ ຊາໂຕ?

໓໖.

ລີລາວຕໍສມປິ ໂຍພ຺ພນ ຣູປໂສຠໍ

ອຕ຺ຕູປມໍ ປິຍຊເນນ ຈ ສມ຺ປໂຍຄໍ,

ທິສ຺ວາປິ ວິຊ຺ຊຸຈປລໍ ກຸຣຸເຕ ປມາທໍ

ໂຠ ໂມຫໂມຫິຕຊໂນ ຠວຣາຄຣຕ຺ໂຕ;

໓໗. ¶

ປຸຕ຺ໂຕ ປິຕາ ຠວຕິ ມາຕຸ ປຕີຫ ປຸຕ຺ໂຕ

ນາຣີ ກທາຈິ ຊນນີ ຈ ປິຕາ ຈ ປຸຕ຺ໂຕ,

ເອວໍ ສທາ ວິປຣິວຕ຺ຕຕິ ຊີວໂລໂກ

ຈິຕ຺ເຕ ສທາຕິຈປເລ ຂລຸ ຊາຕິຣງ຺ເຄ;

໓໘.

ຣນ຺ຕ຺ວາ ປຸເຣ ວິວິຘຜຸລ຺ລລຕາກຸເລຫິ

ເທວາປິ ນນ຺ທນວເນ ສຸຣສຸນ຺ທຣີຫິ,

ເຕ ເວ’ກທາ ວິຕຕກຓ຺ຏກສໍກເຏສຸ

ໂຠ ໂກຏິສິມ຺ພລິວເນສຸ ຜຸສນ຺ຕິ ທຸກ຺ຂໍ;

໓໙.

ຠຸຕ຺ວາ ສຸຘນ຺ນມປິ ກຎ຺ຈນຠາຊເນສຸ

ສຄ຺ເຄ ປຸເຣ ສຸຣວຣາ ປຣມິທ຺ຘິປຕ຺ຕາ,

ເຕ ຈາປິ ປຊ຺ຊລິຕໂລຫຄຸລໍ ຄິລນ຺ຕິ

ກາມໍ ກທາຈິ ນຣກາລຍ ວາສຠູຕາ;

໔໐. ¶

ຠຸຕ຺ວາ ນຣິສ຺ສຣວຣາ ຈ ມຫິໍ ອເສສໍ

ເທວາຘິປາ ຈ ທິວິ ທິພ຺ພສຸຂໍ ສຸຣມ຺ມໍ,

ວາສໍ ກທາຈິ ຂຸຣສຎ຺ຈິຕຠູຕເລສຸ

ເຕ ວາ ມຫາຣຖຄຓານຸຄຕາ ທິວີຫ;

໔໑.

ເທວງ຺ຄນາ ລລິຕຠິນ຺ນຕຣງ຺ຄມາເລ

ຣງ຺ເຄ ມຫິສ຺ສຣຊຏາມກຸຏານຸຍາເຕ,

ຣນ຺ຕ຺ວາ ປຸເຣ ສຸຣວຣາ ປມທາສຫາຍາ

ເຕ ຈາປິ ໂຆຣຕຣເວຕຣຓິໍ ປຕນ຺ຕິ;

໔໒.

ຜຸລ຺ລານິ ປລ຺ລວລຕາຜລສໍກຸລານິ

ຣມ຺ມານິ ນນ຺ທນວນານິ ມໂນຣມານິ,

ທິພ຺ພຈ຺ຉຣາລລິຕປຸຓ຺ຓທຣີມຸຂານິ

ເກລາສເມຣຸສິຂຣານິ ຈ ຍນ຺ຕິ ນາສໍ;

໔໓. ¶

ໂທລາ’ນິລາ’ນລຕຣໍຄສມາ ຫິ ໂຠຄາ

ວິຊ຺ຊຸປ຺ປຠາຕິຈປລານິ ຈ ຊີວິຕານິ,

ມາຍາມຣີຈິຊລໂສມສມໍ ສຣີຣໍ

ໂກ ຊີວິເຕ ຈ ວິຠເວ ຈ ກເຣຍ຺ຍ ຣາຄໍ?

໔໔.

ກິໍ ທຸກ຺ຂມຕ຺ຖິ ນ ຠເວສຸ ຈ ທາຣຸເຓສຸ

ສຕ຺ໂຕປິ ຕສ຺ສ ວິວິຘສ຺ສ ນ ຠາຊໂນ ໂກ,

ຊາໂຕ ຍຖາ ມຣຓໂຣຄຊຣາຠິຠູໂຕ

ໂກ ສຊ຺ຊໂນ ຠວຣຕິໍ ປິຫເຍຍ຺ຍ’ພາໂລ?

໔໕.

ເກ ວາປິ ປຊ຺ຊລິຕໂລຫຄຸລໍ ຄິລນ຺ຕິ

ສກ຺ກາ ກຖຎ຺ຈິທປິ ປາຓິຕເລນ ຠີມໍ,

ທຸກ຺ໂຂທຍໍ ອສຸຈິນິສ຺ສວນໍ ອນນ຺ຕໍ

ໂກ ກາມເຍຖ ຂລຸ ເທຫມິມໍ ອພາໂລ?

໔໖. ¶

ໂລເກ ນ ມຈ຺ຈຸສມມຕ຺ຖິ ຠຍໍ ນຣານໍ

ນ ວ຺ຍາຘິທຸກ຺ຂສມມຕ຺ຖິ ຈ ກິໍຈິ ທຸກ຺ຂໍ,

ເອວໍ ວິຣູປກຣຓໍ ນ ຊຣາສມານໍ

ໂມເຫນ ໂຠ ຣຕິມຸເປຕິ ຕຖາປິ ເທເຫ;

໔໗.

ນິສ຺ສາຣໂຕ ນລກລີກທລີສມານໍ

ອຕ຺ຕານເມວ ປຣິຫຎ຺ຎຕິ ອຕ຺ຕເຫຕຸ,

ສມ຺ໂປສິໂຕປິ ກຸສຫາຍ ອິວາກຕຎ຺ຎູ

ກາໂຍ ນ ຍສ຺ສ ອນຸຄຈ຺ຉຕິ ກາລເກຣາ;

໔໘.

ຕໍ ເຜຓປິຓ຺ຑສທິສໍ ວິສສູລກປ຺ປໍ

ໂຕຍາ’ນິລາ’ນລມຫີອຸຣຄາຘິວາສໍ,

ຊິຓ຺ຓາລຍໍວ ປຣິທຸພ຺ພລມຕ຺ຕຠາວໍ

ທິສ຺ວາ ນໂຣ ກຖມຸເປຕິ ຣຕິໍ ສປຎ຺ໂຎ?

໔໙. ¶

ອາຍຸກ຺ຂຍໍ ສມຸປຍາຕິ ຂເຓ ຂເຓປິ

ອນ຺ເວຕິ ມຈ຺ຈຸ ຫນນາຍ ຊຣາສິປາຓີ,

ກາລໍ ຕຖາ ນ ປຣິວຕ຺ຕຕິ ຕໍ ອຕີຕໍ

ທຸກ຺ຂໍ ອິທໍ ນນຸ ຠເວສຸ ອຈິນ຺ຕນີຍໍ?

໕໐.

ອປ຺ປາຍຸກສ຺ສ ມຣຓໍ ສຸລຠໍ ຠເວສຸ

ທີຆາຍຸກສ຺ສ ຈ ຊຣາ ວ຺ຍສນໍ ຈ’ເນກໍ,

ເອວໍ ຠເວ ອຸຠຍໂຕປິ ຈ ທຸກ຺ຂເມວ

ຘມ຺ມໍ ສມາຈຣຖ ທຸກ຺ຂວິນາສນາຍ;

໕໑.

ທຸກ຺ຂຄ຺ຄິນາ ສຸມຫຕາ ປຣິປີຬິເຕສຸ

ໂລກຕ຺ຕຍສ຺ສ ວສໂຕ ຠວວາຣເກສຸ,

ສພ຺ພຕ຺ຕຕາ ສຸຈຣິຕສ຺ສ ປມາທກາໂລ

ໂຠ ໂຠ ນ ໂຫຕິ ປຣມໍ ກຸສລໍ ຈິຓາຖ;

໕໒. ¶

ອປ຺ປໍ ສຸຂໍ ຊລລວໍ ວິຍ ໂຠ ຕິຓຄ຺ເຄ

ທຸກ຺ຂນ຺ຕຸ ສາຄຣຊລໍ ວິຍ ສພ຺ພໂລເກ,

ສໍກປ຺ປນາ ຕທປິ ໂຫຕິ ສຠາວໂຕ ຫິ

ສພ຺ພໍ ຕິໂລກມປິ ເກວລທຸກ຺ຂເມວ;

໕໓.

ກາໂຍ ນ ຍສ຺ສ ອນຸຄຈ຺ຉຕິ ກາຍເຫຕຸ

ພາໂລ ອເນກວິຘມາຈຣຕີຫ ທຸກ຺ຂໍ,

ກາໂຍ ສທາ ກລິ ມລາກລິລຎ຺ຫິ ໂລເກ

ກາເຍ ຣໂຕ’ນວຣຕໍ ວ຺ຍສນໍ ປເຣຕິ

໕໔.

ມີຬ຺ຫາກຣໍ ກລິມລາກຣມາມຄນ຺ຘໍ

ສູຬາສິສລ຺ລວິສປນ຺ນຄໂຣຄຠູຕໍ,

ເທຫໍ ວິປສ຺ສຖ ຊຣາມຣຓາຘິວາສໍ

ຕຸຈ຺ຉໍ ສທາ ວິຄຕສາຣມິມໍ ວິນິນ຺ທ຺ຍໍ;

໕໕. ¶

ທຸກ຺ຂໍ ອນິຈ຺ຈມສຸຠໍ ວຕ ອຕ຺ຕຠາວໍ

ມາ ສໍກິເລສຍ ນ ວິຊ຺ຊຕິ ຊາຕຸ ນິຈ຺ໂຈ,

ອມ຺ໂຠ ນ ວິຊ຺ຊຕິ ຫິ ອປ຺ປມປີຫ ສາຣໍ

ສາຣໍ ສມາຈຣຖ ຘມ຺ມມລໍ ປມາທໍ;

໕໖.

ມາຍາມຣີຈິກທລີນລເຜຓປຸຎ຺ຊ-

ຄໍຄາຕຣງ຺ຄຊລພຸພ຺ພຸລສນ຺ນິເຠສຸ,

ຂນ຺ເຘສຸ ປຎ຺ຈສຸ ຉຬາຍຕເນສຸ ເຕສຸ

ອຕ຺ຕາ ນ ວິຊ຺ຊຕິ ຫິ ໂກ ນ ວເທຍ຺ຍ’ພາໂລ?

໕໗.

ວຎ຺ຌາສຸໂຕ ສສວິສາຓມເຍ ຣເຖ ຕຸ,

ຘາເວຍ຺ຍ ເຈ ຈິຣຕຣໍ ສຘຸຣໍ ຄເຫຕ຺ວາ,

ທີປຈ຺ຈິມາລມິວ ຕໍ ຂຓຠງ຺ຄຠູຕໍ

ອຕ຺ຕາຕິ ທຸພ຺ພລຕຣນ຺ຕຸ ວເທຍ຺ຍ ເທຫໍ;

໕໘. ¶

ພາໂລ ຍຖາ ສລິລພຸພ຺ພຸລຠາຊເນນ

ອາກຓ຺ຐໂຕ ວຕ ປິເພຍ຺ຍ ມຣີຈິໂຕຍໍ,

ອຕ຺ຕານິ ສາຣຣຫິຕໍ ກທລີສມານໍ

ໂມຫາ ຠເຓຍ຺ຍ ຂລຸ ເທຫມິມໍ ອນຕ຺ຕໍ;

໕໙.

ໂຍ’ທຸມ຺ພຣສ຺ສ ກຸສຸເມນ ມຣີຈິໂຕຍໍ

ວາສໍ ຍທິຈ຺ຉຕິ ສ ເຂທມຸເປຕິ ພາໂລ,

ອຕ຺ຕານເມວ ປຣິຫຎ຺ຎຕິ ອຕ຺ຕເຫຕຸ

ອຕ຺ຕາ ນ ວິຊ຺ຊຕິ ກທາຈິທປີຫ ເທເຫ;

໖໐.

ໂປໂສ ຍຖາ ຫິ ກທລີ ສຸວິນິພ຺ຠຸຊນ຺ໂຕ

ສາຣໍ ຕທປ຺ປມ຺ປິ ໂນປລເຠຍ຺ຍ ກາມໍ,

ຂນ຺ເຘສຸ ປໍຈສຸ ຉຬາຍຕເນສຸ ເຕສຸ

ສຸຎ຺ເຎສຸ ກິຎ຺ຈິທປິ ໂນປລເຠຍ຺ຍ ສາຣໍ;

໖໑. ¶

ສຸຕ຺ຕໍ ວິນາ ນ ປຏຠາວມິຫຕ຺ຖິ ກິໍຈິ

ເທຫໍ ວິນາ ນ ຂລຸ ໂກຈິ ມິຫຕ຺ຖິ ສຕ຺ໂຕ,

ເທໂຫ ສຠາວຣຫິໂຕ ຂຓຠໍຄຍຸຕ຺ໂຕ,

ໂກ ອຕ຺ຕເຫຕຸ ອປໂຣ ຠຸວິ ວິຊ຺ຊຕີຫ?

໖໒.

ທິສ຺ວາ ມຣີຈິສລິລຎ຺ຫິ ສຸທູຣໂຕ ໂຠ

ພາໂລ ມິໂຄ ສມຸປຘາວຕິ ໂຕຍສຎ຺ຎີ,

ເອວໍ ສຠາວຣຫິເຕ ວິປຣີຕສິທ຺ເຘ

ເທເຫ ປເຣຕິ ປຣິກປ຺ປນຍາ ຫິ ຣາຄໍ;

໖໓.

ເທເຫ ສຠາວຣຫິເຕ ປຣິກປ຺ປສິທ຺ເຘ

ອຕ຺ຕາ ນ ວິຊ຺ຊຕິ ຫິ ວິຊ຺ຊຸມິວນ຺ຕລິກ຺ເຂ,

ຠາເວຖ ຠາວນຣຕາ ວິຄຕປ຺ປມາທາ

ສພ຺ພາສວປ຺ປຫນນາຍ ອນຕ຺ຕສຎ຺ຎໍ;

໖໔. ¶

ລາລາກຣີສຣຸຘິຣສ຺ສຸວສານຸລິຕ຺ຕໍ

ເທຫໍ ອິມໍ ກລິມລາກລິລໍ ອສາຣໍ,

ສຕ຺ຕາ ສທາ ປຣິຫຣນ຺ຕິ ຊິຄຸຈ຺ຉນີຍໍ

ນານາສຸຈີຫິ ປຣິປຸຓ຺ຓຆຏໍ ຍເຖວ;

໖໕.

ຓຫາຕ຺ວາ ຊລຎ຺ຫິ ສກລໍ ຈຕຸສາຄຣສ຺ສ

ເມຣຸປ຺ປມາຓມປິ ຄນ຺ຘມນຸຕ຺ຕຣຎ຺ຈ,

ປປ຺ໂປຕິ ເນວ ມນຸໂຊ ຫິ ສຸຈິໍ ກທາຈິ

ກິໍ ໂຠ ວິປສ຺ສຖ ຄຸຓໍ ກິມຸ ອຕ຺ຕຠາເວ?

໖໖.

ເທໂຫ ສ ເອວ ວິວິຘາສຸຈິສນ຺ນິຘາໂນ

ເທໂຫ ສ ເອວ ວຘພນ຺ຘນໂຣຄຠູໂຕ,

ເທໂຫ ສ ເອວ ນວຘາ ປຣິຠິນ຺ນຄຓ຺ໂຑ

ເທຫໍ ວິນາ ຠຍກຣໍ ນ ສຸສານມຕ຺ຖິ;

໖໗. ¶

ອນ຺ໂຕຄຕໍ ຍທິວ ມຸຕ຺ຕກຣີສຠາໂຄ

ເທຫາ ພຫິໍ ອຕິຈເຣຍ຺ຍ ວິນິກ຺ຂມິຕ຺ວາ,

ມາຕາ ປິຕາ ວິກຣຸຓາ ຈ ວິນຏ຺ຐເປມາ

ກາມໍ ຠເວຍ຺ຍຸ ກິມຸ ພນ຺ຘຸສຸຕາ ຈ ທາຣາ?

໖໘.

ເທຫໍ ຍຖາ ນວມຸຂໍ ກິມິສງ຺ຆເຄຫໍ

ມໍສຏ຺ຐິເສທຣຸຘິຣາກລິລໍ ວິຄນ຺ຘໍ,

ໂປເສນ຺ຕິ ເຍ ວິວິຘປາປມິຫາຈຣິຕ຺ວາ

ເຕ ໂມຫິຕາ ມຣຓຘມ຺ມມໂຫ ວເຕວໍ!

໖໙.

ຄຓ຺ຑູປເມ ວິວິຘໂຣຄ ນິວາສຠູເຕ

ກາເຍ ສທາ ຣຸຘິຣມຸຕ຺ຕກຣີສປຸຓ຺ເຓ,

ໂຍ ເອຕ຺ຖ ນນ຺ທຕິ ນໂຣ ສສິຄາລຠກ຺ເຂ

ກາມຎ຺ຫິ ໂສຈຕິ ປຣຕ຺ຖ ສ ພາລພຸທ຺ຘິ;

໗໐. ¶

ໂຠ ເຜຓປິຓ຺ຑສທິໂສ ວິຍ ສາຣຫີໂນ

ມີຬ຺ຫາລໂຍ ວິຍ ສທາ ປຏິກູລຄນ຺ໂຘ,

ອາສີວິສາລຍນິໂຠ ສຠໂຍ ສທຸກ຺ໂຂ

ເທໂຫ ສທາ ສວຕິ ໂລຓຆໂຏວ ຠິນ຺ໂນ;

໗໑.

ຊາຕໍ ຍຖາ ນ ກມລໍ ຠຸວິ ນິນ຺ທນີຍໍ

ປງ຺ເກສຸ ໂຠ ອສຸຈິໂຕຍ ສມາກຸເລສຸ,

ຊາຕໍ ຕຖາ ປຣຫິຕມ຺ປິ ຈ ເທຫຠູຕໍ

ຕໍ ນິນ຺ທນີຍມິຫ ຊາຕຸ ນ ໂຫຕິ ໂລເກ;

໗໒.

ທ຺ວຕ຺ຕິໍສຠາຄປຣິປູຣຕໂຣ ວິເສໂສ

ກາໂຍ ຍຖາ ຫິ ນຣນາຣິ ຄຓສ຺ສ ໂລເກ,

ກາເຍສຸ ກິໍ ຜລມິຫຕ຺ຖິ ຈ ປຓ຺ຑິຕານໍ

ກາມໍ ຕເທວ ນນຸ ໂຫຕິ ປໂຣປກາຣໍ;

໗໓. ¶

ໂປໂສນ ປຓ຺ຑິຕຕເຣນ ຕຖາປິ ເທໂຫ

ສພ຺ພຕ຺ຕນາ ຈິຣຕຣໍ ປຣິປາລນີໂຍ,

ຘມ຺ມໍ ຈເຣຍ຺ຍ ສຸຈິຣໍ ຂລຸ ຊີວມາໂນ

ຘມ຺ເມ ຫເວ ມຓິວໂຣ ອິວ ກາມໂທ ໂຠ

໗໔.

ຂີເຣ ຍຖາ ສຸປຣິຠາວິຕໂມສຘມ຺ຫິ

ສ຺ເນເຫນ ໂອສຘພລໍ ປຣິຠາສເຕວ,

ຘມ຺ໂມ ຕຖາ ອິຫ ສມາຈຣິໂຕ ຫິ ໂລເກ

ຉາຍາວ ຍາຕິ ປຣໂລກ ມິໂຕ ວຊນ຺ຕໍ;

໗໕.

ກາຍສ຺ສ ໂຠ ວິຣຈິຕສ຺ສ ຍຖານຸກູລໍ

ຉາຍາ ວິຠາຕິ ຣຸຈິຣາມລທປ຺ປເຓ ຕຸ,

ກຕ຺ວາ ຕເຖວ ປຣມໍ ກຸສລໍ ປຣຕ຺ຖ

ສມ຺ຠູສິຕາ ອິວ ຠວນ຺ຕິ ຜເລນ ເຕນ;

໗໖. ¶

ເທເຫ ຕຖາ ວິວິຘທຸກ຺ຂ ນິວາສຠູເຕ

ໂມຫາ ປມາທວສຄາ ສຸຂສຎ຺ຎມູຬ຺ຫາ,

ຕິກ຺ເຂ ຍຖາ ຂຸຣມຸເຂ ມຘຸເລຫມາໂນ

ພາຬ຺ຫຎ຺ຈ ທຸກ຺ຂມນຸຄຈ຺ຉຕິ ຫີນປຎ຺ໂຎ;

໗໗.

ສໍກປ຺ປຣາຄວິຄເຕ ນິຣຕຕ຺ຕຠາເວ

ທຸກ຺ຂໍ ສທາ ສມຘິຄຈ຺ຉຕິ ອປ຺ປປຎ຺ໂຎ,

ມູຬ຺ຫສ຺ສ ເຈວ ສຸຂສຎ຺ຎມິຫຕ຺ຖິໂລເກ

ກິໍປກ຺ກເມວ ນນຸ ໂຫຕິ ວິຈາຣມາເນ;

໗໘.

ສພ຺ໂພປໂຠຄ ຘນຘຎ຺ຎວິເສສລາຠີ

ຣູເປນ ໂຠ ສ ມກຣທ຺ຘຊສນ຺ນິໂຠປິ,

ໂຍ ໂຍພ຺ພເນປິ ມຣຓໍ ລຠເຕ ອກາມໍ

ກາມໍ ປຣຕ຺ຖປຣປາຓຫໂຣ ນໂຣ ຫິ;

໗໙.

ໂສ ຍາຈໂກ ຠວຕິ ຠິນ຺ນກປາລຫຕ຺ໂຖ

ມຸຓ຺ໂຑ ຘິຄກ຺ຂຣສເຕຫິ ຈ ຕຊ຺ຊຍນ຺ໂຕ,

ຠິກ຺ຂໍ ສທາຣິຠວເນ ສກຸເຈລວາໂສ

ເທເຫ ປຣຕ຺ຖິ ປຣຈິຕ຺ຕຫໂຣ ນໂຣ ໂຍ;

໘໐. ¶

ອິຕ຺ຖີ ນມຸຎ຺ຈຕິ ສທາ ປຸນ ອິຕ຺ຖິຠາວາ

ນາຣີ ສທາ ຠວຕິ ໂສ ປຸຣິໂສ ປຣຕ຺ຖ,

ໂຍ ອາຈເຣຍ຺ຍ ປຣທາຣມລງ຺ຆນີຍໍ

ໂຆຣຎ຺ຈ ວິນ຺ທຕິ ສທາ ວ຺ຍສນຎ຺ຈ ເນກໍ;

໘໑.

ທີໂນ ວິຄນ຺ຘວທໂນ ຈ ຊໂຬ ອປຎ຺ໂຎ

ມູໂຄ ສທາ ຠວຕິ ອປ຺ປິຍທສ຺ສໂນ ຈ,

ປປ຺ໂປຕິ ທຸກ຺ຂມຕຸລຎ຺ຈ ມນຸສ຺ສຠູໂຕ

ວາຈໍ ມຸສາ ຠຓຕິ ໂຍ ຫິ ອປຎ຺ຎສຕ຺ໂຕ;

໘໒.

ອຸມ຺ມຕ຺ຕກາ ວິຄຕລຊ຺ຊຄຸຓາ ຠວນ຺ຕິ

ທີນາ ສທາ ວ຺ຍສນໂສກປຣາຍຓາ ຈ,

ຊາຕາ ຠເວສຸ ວິວິເຘສຸ ວິຣູປເທຫາ

ປີຕ຺ວາ ຫລາຫລວິສໍວ ສຸຣໍ ວິປຎ຺ຎາ;

໘໓.

ປາປານິ ເຍນ ອິຫ ອາຈຣິຕານິ ຍານິ

ໂຍ ວສ຺ສໂກຏິນຫຸຕານິ ອນປ຺ປການິ,

ລທ຺ຘານ ໂຆຣມຕຸລໍ ນຣເກສຸ ທຸກ຺ຂໍ

ປປ຺ໂປຕິ ເຈຕ຺ຖ ວິວິຘວ຺ຍສນຎ຺ຈ ເນກໍ;

໘໔. ¶

ໂລກຕ຺ຕເຍສຸ ສກເລສຸ ສມໍ ນ ກິໍຈິ

ໂລກສ຺ສ ສນ຺ຕິກຣຓໍ ຣຕນຕ຺ຕເຍນ,

ຕໍເຕຊສາ ສຸມຫຕາ ຊິຕສພ຺ພປາໂປ

ໂສຫໍ ສທາຘິຄຕສພ຺ພສຸໂຂ ຠເວຍ຺ຍໍ;

໘໕.

ໂລກຕ຺ຕເຍສຸ ສກເລສຸ ຈ ສພ຺ພສຕ຺ຕາ

ມິຕ຺ຕາ ຈ ມຊ຺ຌຣິປຸພນ຺ຘຸຊນາ ຈ ສພ຺ເພ,

ເຕ ສພ຺ພທາ ວິຄຕໂຣຄຠຍາ ວິໂສກາ

ສພ຺ພໍ ສຸຂໍ ອຘິຄຕາ ມຸທິຕາ ຠວນ຺ຕຸ;

໘໖.

ກາໂຍ ກຣີສຠຣິໂຕ ວິຍ ຠິນ຺ນກຸມ຺ໂຠ

ກາໂຍ ສທາ ກລິມລວ຺ຍສນາຘິວາໂສ,

ກາເຍ ວິຫຎ຺ຎຕິ ຈ ສພ຺ພສຸຂນ຺ຕິ ໂລໂກ

ກາໂຍ ສທາ ມຣຓໂຣຄຊຣາຘິວາໂສ;

໘໗. ¶

ໂສ ໂຍພ຺ພໂນຕິ ຖວິໂຣຕິ ຈ ພາລໂກຕິ

ສຕ຺ເຕ ນ ເປກ຺ຂຕິ ວິຫຎ຺ຎຕິເຣວ ມຈ຺ຈຸ,

ໂສຫໍ ຐິໂຕປິ ສຍິໂຕປິ ຈ ປກ຺ກມນ຺ໂຕ

ຄຈ຺ຉາມິ ມຈ຺ຈຸວທນໍ ນິຍຕໍ ຕຖາ ຫິ;

໘໘.

ເອວໍ ຍຖາ ວິຫິຕໂທສມິທໍ ສຣີຣໍ

ນິຈ຺ຈໍວ ຕຄ຺ຄຕມນາ ຫທເຍ ກໂຣຖ,

ເມຕ຺ຕໍ ປຣິຕ຺ຕມສຸຠໍ ມຣຓສ຺ສຕິຎ຺ຈ

ຠາເວຖ ຠາວນຣຕາ ສຕຕໍ ຍຕຕ຺ຕາ;

໘໙.

ທານາທິ ປຸຎ຺ຎກິຣິຍານິ ສຸຂຸທ຺ຣຍານິ

ກຕ຺ວາ ຈ ຕມ຺ຜລມເສສ ມິຫປ຺ປເມຍ຺ຍໍ,

ເທຍ຺ຍໍ ສທາ ປຣຫິຕາຍ ສຸຂາຍ ເຈວ

ກິມ຺ໂຠ ຕເທວ ນນຸ ຫຕ຺ຖຄຕຎ຺ຫິ ສາຣໍ?

໙໐.

ເຫຕຸໍ ວິນາ ນ ຠວຕີ ຫິ ຈ ກິໍຈິ ໂລເກ

ສທ຺ໂທວ ປາຓິຕລຆຏ຺ຏນເຫຕຸຊາໂຕ,

ເອວຎ຺ຈ ເຫຕຸຜລ ຠາວວິຠາຄຠິນ຺ໂນ

ໂລໂກ ອຸເທຕິ ຈ ວິນສ຺ສຕິ ຕິຏ຺ຐຕີ ຈ;

໙໑. ¶

ກມ຺ມສ຺ສ ກາຣຓາມຍຎ຺ຫິ ຍຖາ ອວິຊ຺ຊາ

ໂຠ ກມ຺ມນາ ສມຘິຄຈ຺ຉຕິ ຊາຕິເຠທໍ,

ຊາຕິໍ ປຏິຈ຺ຈ ຈ ຊຣາມຣຓາທິທຸກ຺ຂໍ

ສຕ຺ຕາ ສທາ ປຏິລຠນ຺ຕິ ອນາທິກາເລ;

໙໒.

ກມ຺ມໍ ຍຖາ ນ ຠວຕີຫ ຈ ໂມຫນາສາ

ກມ຺ມກ຺ຂຍາປິ ຈ ນ ໂຫຕິ ຠເວສຸ ຊາຕິ,

ຊາຕິກ຺ຂຍາ ອິຫ ຊຣາມຣຓາທິທຸກ຺ຂໍ

ສພ຺ພກ຺ຂໂຍ ຠວຕິ ທີເປວານິເລນ;

໙໓.

ໂຍ ປສ຺ສຕີຫ ສຕຕໍ ມຸນິຘມ຺ມກາຍໍ

ພຸທ຺ຘໍ ສ ປສ຺ສຕິ ນໂຣ ອິຕິ ໂສ ອໂວຈ,

ພຸທ຺ຘຎ຺ຈ ຘມ຺ມມມລຎ຺ຈ ຕິໂລກນາຖໍ

ສມ຺ປສ຺ສິຕຸໍ ວິຈິນຖາ’ປິ ຈ ຘມ຺ມຕໍ ໂຠ;

໙໔. ¶

ສລ຺ລໍວ ໂຠ ສຸນິສິຕໍ ຫທເຍ ນິມຸຄ຺ຄໍ

ໂທສຕ຺ຕຍໍ ວິວິຘປາປມເລນ ລິຕ຺ຕໍ,

ນານາວິຘພ຺ຍສນຠາຊນມປ຺ປສນ຺ນໍ

ປຎ຺ຎາມເຍນ ພລິເສນ ນິຣາກໂຣຖ;

໙໕.

ນາກມ຺ປຍນ຺ຕິ ສກລາປິ ຈ ໂລກຘມ຺ມາ

ຈິຕ຺ຕໍ ສທາປຄຕປາປກິເລສສລ຺ລໍ,

ຣູປາທໂຍ ຈ ວິວິຘາ ວິສຍາ ສມຄ຺ຄາ

ຜຸຏ຺ຐໍວ ເມຣຸສິຂຣໍ ມຫຕານິເລນ;

໙໖.

ສໍສາຣທຸກ຺ຂມຄເຓຍ຺ຍ ຍຖາ ມຸນິນ຺ໂທ

ຄມ຺ຠິຣປາຣມິຕ ສາຄຣມຸຕ຺ຕຣິຕ຺ວາ,

ເຎຍ຺ຍໍ ອໂພຘິ ນິປຸຓໍ ຫຕໂມຫຊາໂລ

ຕສ຺ມາ ສທາ ປຣຫິຕໍ ປຣມໍ ຈິຓາຖ;

໙໗.

ໂອຫາຍ ໂສ’ຘິຄຕໂມກ຺ຂສຸຂໍ ປເຣສໍ

ອຕ຺ຖາຍ ສໍຈຣິ ຠເວສຸ ມຫພ຺ຠເຍສຸ,

ເອວໍ ສທາ ປຣຫິຕໍ ປຸຣໂຕ ກຣິຕ຺ວາ

ຘມ຺ໂມ ມຍານຸຈຣິໂຕ ຊຄທຕ຺ຖເມວ;

໙໘. ¶

ລທ຺ຘານ ທຸລ຺ລຠຕຣຎ຺ຈ ມນຸສ຺ສໂຍນິໍ

ສພ຺ພໍ ປປຎ຺ຈຣຫິຕໍ ຂຓສມ຺ປທຎ຺ຈ,

ຎຕ຺ວານ ອາສວນຸເທກຫິຕຎ຺ຈ ຘມ຺ມໍ

ໂກ ປຎ຺ຎວາ ອນວຣໍ ນ ຠເຊຍ຺ຍ ຘມ຺ມໍ?

໙໙.

ລທ຺ຘານ ພຸທ຺ຘສມຍໍ ອຕິທຸລ຺ລຠໍຈ

ສທ຺ຘມ຺ມ ມຄ຺ຄມສມໍ ສິວທໍ ຕເຖວ,

ກລ຺ຍາຓມິຕ຺ຕປວເຣ ມຕິສມ຺ປທຎ຺ຈ

ໂກ ພຸທ຺ຘິມາ ອນວຣໍ ນ ຠເຊຍ຺ຍ ຘມ຺ມໍ?

໑໐໐.

ເອວມ຺ປິ ທຸລ຺ລຠຕຣໍ ວິຠເວ ສຸລທ຺ຘາ

ມຈ຺ເຉຣໂທສ ວິຣຕາ ອຸຠຍຕ຺ຖກາມາ,

ສທ຺ຘາທິຘມ຺ມສຫິຕາ ສຕຕປ຺ປມຕ຺ຕາ

ໂຠ! ໂຠ! ກໂຣຖ ອມຕາຘິຄມາຍ ປຸຎ຺ຎໍ;