ມູລ > ສຸຕ຺ຕປິຏກ > ຂຸທ຺ທກນິກາຍ

MMR Vol 0
VRI Vol 0
PTS Vol 0
THA Vol 0

Misc. Paragraph

ຂຸທ຺ທກນິກາເຍ

ຘມ຺ມປທປາຬິ

ນໂມ ຕສ຺ສ ຠຄວໂຕ ອຣຫໂຕ ສມ຺ມາສມ຺ພຸທ຺ຘສ຺ສ

ມໂນປຸພ຺ພງ຺ຄມາ ¶ ¶ ¶ ¶ ຘມ຺ມາ, ມໂນເສຏ຺ຐາ ມໂນມຍາ;

ມນສາ ເຈ ປທຸຏ຺ເຐນ, ຠາສຕິ ວາ ກໂຣຕິ ວາ;

ຕໂຕ ນໍ ທຸກ຺ຂມນ຺ເວຕິ, ຈກ຺ກໍວ ວຫໂຕ ປທໍ.

ມໂນປຸພ຺ພງ຺ຄມາ ຘມ຺ມາ, ມໂນເສຏ຺ຐາ ມໂນມຍາ;

ມນສາ ເຈ ປສນ຺ເນນ, ຠາສຕິ ວາ ກໂຣຕິ ວາ;

ຕໂຕ ນໍ ສຸຂມນ຺ເວຕິ, ຉາຍາວ ອນປາຍິນີ [ອນຸປາຍິນີ (ກ.)].

ອກ຺ໂກຈ຺ຉິ ¶ ມໍ ອວຘິ ມໍ, ອຊິນິ [ອຊິນີ (?)] ມໍ ອຫາສິ ເມ;

ເຍ ຈ ຕໍ ອຸປນຍ຺ຫນ຺ຕິ, ເວຣໍ ເຕສໍ ນ ສມ຺ມຕິ.

ອກ຺ໂກຈ຺ຉິ ມໍ ອວຘິ ມໍ, ອຊິນິ ມໍ ອຫາສິ ເມ;

ເຍ ຈ ຕໍ ນຸປນຍ຺ຫນ຺ຕິ, ເວຣໍ ເຕສູປສມ຺ມຕິ.

ນ ¶ ¶ ຫິ ເວເຣນ ເວຣານິ, ສມ຺ມນ຺ຕີຘ ກຸທາຈນໍ;

ອເວເຣນ ຈ ສມ຺ມນ຺ຕິ, ເອສ ຘມ຺ໂມ ສນນ຺ຕໂນ.

ປເຣ ¶ ຈ ນ ວິຊານນ຺ຕິ, ມຍເມຕ຺ຖ ຍມາມເສ;

ເຍ ຈ ຕຕ຺ຖ ວິຊານນ຺ຕິ, ຕໂຕ ສມ຺ມນ຺ຕິ ເມຘຄາ.

ສຸຠານຸປສ຺ສິໍ ວິຫຣນ຺ຕໍ, ອິນ຺ທ຺ຣິເຍສຸ ອສໍວຸຕໍ;

ໂຠຊນມ຺ຫິ ຈາມຕ຺ຕຎ຺ຎຸໍ, ກຸສີຕໍ ຫີນວີຣິຍໍ;

ຕໍ ເວ ປສຫຕິ ມາໂຣ, ວາໂຕ ຣຸກ຺ຂໍວ ທຸພ຺ພລໍ.

ອສຸຠານຸປສ຺ສິໍ ວິຫຣນ຺ຕໍ, ອິນ຺ທ຺ຣິເຍສຸ ສຸສໍວຸຕໍ;

ໂຠຊນມ຺ຫິ ຈ ມຕ຺ຕຎ຺ຎຸໍ, ສທ຺ຘໍ ອາຣທ຺ຘວີຣິຍໍ;

ຕໍ ເວ ນປ຺ປສຫຕິ ມາໂຣ, ວາໂຕ ເສລໍວ ປພ຺ພຕໍ.

ອນິກ຺ກສາໂວ ກາສາວໍ, ໂຍ ວຕ຺ຖໍ ປຣິທຫິສ຺ສຕິ;

ອເປໂຕ ທມສຈ຺ເຈນ, ນ ໂສ ກາສາວມຣຫຕິ.

ໂຍ ຈ ວນ຺ຕກສາວສ຺ສ, ສີເລສຸ ສຸສມາຫິໂຕ;

ອຸເປໂຕ ທມສຈ຺ເຈນ, ສ ເວ ກາສາວມຣຫຕິ.

ອສາເຣ ສາຣມຕິໂນ, ສາເຣ ຈາສາຣທສ຺ສິໂນ;

ເຕ ສາຣໍ ນາຘິຄຈ຺ຉນ຺ຕິ, ມິຈ຺ຉາສງ຺ກປ຺ປໂຄຈຣາ.

ສາຣຎ຺ຈ ¶ ສາຣໂຕ ຎຕ຺ວາ, ອສາຣຎ຺ຈ ອສາຣໂຕ;

ເຕ ສາຣໍ ອຘິຄຈ຺ຉນ຺ຕິ, ສມ຺ມາສງ຺ກປ຺ປໂຄຈຣາ.

ຍຖາ ອຄາຣໍ ທຸຈ຺ຉນ຺ນໍ, ວຸຏ຺ຐີ ສມຕິວິຊ຺ຌຕິ;

ເອວໍ ອຠາວິຕໍ ຈິຕ຺ຕໍ, ຣາໂຄ ສມຕິວິຊ຺ຌຕິ.

ຍຖາ ¶ ¶ ອຄາຣໍ ສຸຉນ຺ນໍ, ວຸຏ຺ຐີ ນ ສມຕິວິຊ຺ຌຕິ;

ເອວໍ ສຸຠາວິຕໍ ຈິຕ຺ຕໍ, ຣາໂຄ ນ ສມຕິວິຊ຺ຌຕິ.

ອິຘ ¶ ໂສຈຕິ ເປຈ຺ຈ ໂສຈຕິ, ປາປກາຣີ ອຸຠຍຕ຺ຖ ໂສຈຕິ;

ໂສ ໂສຈຕິ ໂສ ວິຫຎ຺ຎຕິ, ທິສ຺ວາ ກມ຺ມກິລິຏ຺ຐມຕ຺ຕໂນ.

ອິຘ ໂມທຕິ ເປຈ຺ຈ ໂມທຕິ, ກຕປຸຎ຺ໂຎ ອຸຠຍຕ຺ຖ ໂມທຕິ;

ໂສ ໂມທຕິ ໂສ ປໂມທຕິ, ທິສ຺ວາ ກມ຺ມວິສຸທ຺ຘິມຕ຺ຕໂນ.

ອິຘ ຕປ຺ປຕິ ເປຈ຺ຈ ຕປ຺ປຕິ, ປາປກາຣີ [ປາປກາຣິ (?)] ອຸຠຍຕ຺ຖ ຕປ຺ປຕິ;

‘‘ປາປໍ ເມ ກຕ’’ນ຺ຕິ ຕປ຺ປຕິ, ຠິຍ຺ໂຍ [ຠີໂຍ (ສີ.)] ຕປ຺ປຕິ ທຸຄ຺ຄຕິໍ ຄໂຕ.

ອິຘ ນນ຺ທຕິ ເປຈ຺ຈ ນນ຺ທຕິ, ກຕປຸຎ຺ໂຎ ອຸຠຍຕ຺ຖ ນນ຺ທຕິ;

‘‘ປຸຎ຺ຎໍ ເມ ກຕ’’ນ຺ຕິ ນນ຺ທຕິ, ຠິຍ຺ໂຍ ນນ຺ທຕິ ສຸຄ຺ຄຕິໍ ຄໂຕ.

ພຫຸມ຺ປິ ເຈ ສໍຫິຕ [ສຫິຕໍ (ສີ. ສ຺ຍາ. ກໍ. ປີ.)] ຠາສມາໂນ, ນ ຕກ຺ກໂຣ ໂຫຕິ ນໂຣ ປມຕ຺ໂຕ;

ໂຄໂປວ ¶ ຄາໂວ ຄຓຍໍ ປເຣສໍ, ນ ຠາຄວາ ສາມຎ຺ຎສ຺ສ ໂຫຕິ.

ອປ຺ປມ຺ປິ ເຈ ສໍຫິຕ ຠາສມາໂນ, ຘມ຺ມສ຺ສ ໂຫຕິ [ໂຫຕີ (ສີ. ປີ.)] ອນຸຘມ຺ມຈາຣີ;

ຣາຄຎ຺ຈ ໂທສຎ຺ຈ ປຫາຍ ໂມຫໍ, ສມ຺ມປ຺ປຊາໂນ ສຸວິມຸຕ຺ຕຈິຕ຺ໂຕ;

ອນຸປາທິຍາໂນ ອິຘ ວາ ຫຸຣໍ ວາ, ສ ຠາຄວາ ສາມຎ຺ຎສ຺ສ ໂຫຕິ.

ອປ຺ປມາໂທ ¶ ¶ ¶ ອມຕປທໍ [ອມຕໍ ປທໍ (ກ.)], ປມາໂທ ມຈ຺ຈຸໂນ ປທໍ;

ອປ຺ປມຕ຺ຕາ ນ ມີຍນ຺ຕິ, ເຍ ປມຕ຺ຕາ ຍຖາ ມຕາ.

ເອວໍ [ເອຕໍ (ສີ. ສ຺ຍາ. ກໍ. ປີ.)] ວິເສສໂຕ ຎຕ຺ວາ, ອປ຺ປມາທມ຺ຫິ ປຓ຺ຑິຕາ;

ອປ຺ປມາເທ ປໂມທນ຺ຕິ, ອຣິຍານໍ ໂຄຈເຣ ຣຕາ.

ເຕ ຌາຍິໂນ ສາຕຕິກາ, ນິຈ຺ຈໍ ທຬ຺ຫປຣກ຺ກມາ;

ຜຸສນ຺ຕິ ຘີຣາ ນິພ຺ພານໍ, ໂຍຄກ຺ເຂມໍ ອນຸຕ຺ຕຣໍ.

ອຸຏ຺ຐານວໂຕ ສຕີມໂຕ [ສຕິມໂຕ (ສີ. ສ຺ຍາ. ກ.)], ສຸຈິກມ຺ມສ຺ສ ນິສມ຺ມກາຣິໂນ;

ສຎ຺ຎຕສ຺ສ ຘມ຺ມຊີວິໂນ, ອປ຺ປມຕ຺ຕສ຺ສ [ອປມຕ຺ຕສ຺ສ (?)] ຍໂສຠິວຑ຺ຒຕິ.

ອຸຏ຺ຐາເນນປ຺ປມາເທນ ¶ , ສໍຍເມນ ທເມນ ຈ;

ທີປໍ ກຍິຣາຖ ເມຘາວີ, ຍໍ ໂອໂຆ ນາຠິກີຣຕິ.

ປມາທມນຸຍຸຎ຺ຊນ຺ຕິ, ພາລາ ທຸມ຺ເມຘິໂນ ຊນາ;

ອປ຺ປມາທຎ຺ຈ ເມຘາວີ, ຘນໍ ເສຏ຺ຐໍວ ຣກ຺ຂຕິ.

ມາ ປມາທມນຸຍຸຎ຺ເຊຖ, ມາ ກາມຣຕິສນ຺ຖວໍ [ສນ຺ຘວໍ (ກ)];

ອປ຺ປມຕ຺ໂຕ ຫິ ຌາຍນ຺ໂຕ, ປປ຺ໂປຕິ ວິປຸລໍ ສຸຂໍ.

ປມາທໍ ອປ຺ປມາເທນ, ຍທາ ນຸທຕິ ປຓ຺ຑິໂຕ;

ປຎ຺ຎາປາສາທມາຣຸຍ຺ຫ, ອໂສໂກ ໂສກິນິໍ ປຊໍ;

ປພ຺ພຕຏ຺ໂຐວ ຠູມຏ຺ເຐ [ຠຸມ຺ມຏ຺ເຐ (ສີ. ສ຺ຍາ.)], ຘີໂຣ ພາເລ ອເວກ຺ຂຕິ.

ອປ຺ປມຕ຺ໂຕ ¶ ¶ ປມຕ຺ເຕສຸ, ສຸຕ຺ເຕສຸ ພຫຸຊາຄໂຣ;

ອພລສ຺ສໍວ ¶ ສີຆສ຺ໂສ, ຫິຕ຺ວາ ຍາຕິ ສຸເມຘໂສ.

ອປ຺ປມາເທນ ມຆວາ, ເທວານໍ ເສຏ຺ຐຕໍ ຄໂຕ;

ອປ຺ປມາທໍ ປສໍສນ຺ຕິ, ປມາໂທ ຄຣຫິໂຕ ສທາ.

ອປ຺ປມາທຣໂຕ ຠິກ຺ຂຸ, ປມາເທ ຠຍທສ຺ສິ ວາ;

ສໍໂຍຊນໍ ອຓຸໍ ຖູລໍ, ຑຫໍ ອຄ຺ຄີວ ຄຈ຺ຉຕິ.

ອປ຺ປມາທຣໂຕ ຠິກ຺ຂຸ, ປມາເທ ຠຍທສ຺ສິ ວາ;

ອຠພ຺ໂພ ປຣິຫານາຍ, ນິພ຺ພານສ຺ເສວ ສນ຺ຕິເກ.

ອປ຺ປມາທວຄ຺ໂຄ ທຸຕິໂຍ ນິຏ຺ຐິໂຕ.

ຜນ຺ທນໍ ¶ ຈປລໍ ຈິຕ຺ຕໍ, ທູຣກ຺ຂໍ [ທຸຣກ຺ຂໍ (ສພ຺ພຕ຺ຖ)] ທຸນ຺ນິວາຣຍໍ;

ອຸຊຸໍ ກໂຣຕິ ເມຘາວີ, ອຸສຸກາໂຣວ ເຕຊນໍ.

ວາຣິໂຊວ ຖເລ ຂິຕ຺ໂຕ, ໂອກໂມກຕອຸພ຺ຠໂຕ;

ປຣິຜນ຺ທຕິທໍ ຈິຕ຺ຕໍ, ມາຣເຘຍ຺ຍໍ ປຫາຕເວ.

ທຸນ຺ນິຄ຺ຄຫສ຺ສ ລຫຸໂນ, ຍຕ຺ຖກາມນິປາຕິໂນ;

ຈິຕ຺ຕສ຺ສ ທມໂຖ ສາຘຸ, ຈິຕ຺ຕໍ ທນ຺ຕໍ ສຸຂາວຫໍ.

ສຸທຸທ຺ທສໍ ¶ ¶ ສຸນິປຸຓໍ, ຍຕ຺ຖກາມນິປາຕິນໍ;

ຈິຕ຺ຕໍ ຣກ຺ເຂຖ ເມຘາວີ, ຈິຕ຺ຕໍ ຄຸຕ຺ຕໍ ສຸຂາວຫໍ.

ທູຣງ຺ຄມໍ ເອກຈຣໍ [ເອກຈາຣໍ (ກ.)], ອສຣີຣໍ ຄຸຫາສຍໍ;

ເຍ ¶ ຈິຕ຺ຕໍ ສໍຍເມສ຺ສນ຺ຕິ, ໂມກ຺ຂນ຺ຕິ ມາຣພນ຺ຘນາ.

ອນວຏ຺ຐິຕຈິຕ຺ຕສ຺ສ, ສທ຺ຘມ຺ມໍ ອວິຊານໂຕ;

ປຣິປ຺ລວປສາທສ຺ສ, ປຎ຺ຎາ ນ ປຣິປູຣຕິ.

ອນວສ຺ສຸຕຈິຕ຺ຕສ຺ສ, ອນນ຺ວາຫຕເຈຕໂສ;

ປຸຎ຺ຎປາປປຫີນສ຺ສ, ນຕ຺ຖິ ຊາຄຣໂຕ ຠຍໍ.

ກຸມ຺ຠູປມໍ ກາຍມິມໍ ວິທິຕ຺ວາ, ນຄຣູປມໍ ຈິຕ຺ຕມິທໍ ຐເປຕ຺ວາ;

ໂຍເຘຖ ມາຣໍ ປຎ຺ຎາວຸເຘນ, ຊິຕຎ຺ຈ ຣກ຺ເຂ ອນິເວສໂນ ສິຍາ.

ອຈິຣໍ ¶ ວຕຍໍ ກາໂຍ, ປຖວິໍ ອຘິເສສ຺ສຕິ;

ຉຸທ຺ໂຘ ອເປຕວິຎ຺ຎາໂຓ, ນິຣຕ຺ຖໍວ ກລິງ຺ຄຣໍ.

ທິໂສ ທິສໍ ຍໍ ຕໍ ກຍິຣາ, ເວຣີ ວາ ປນ ເວຣິນໍ;

ມິຈ຺ຉາປຓິຫິຕໍ ຈິຕ຺ຕໍ, ປາປິໂຍ [ປາປິຍໍ (?)] ນໍ ຕໂຕ ກເຣ.

ນ ຕໍ ມາຕາ ປິຕາ ກຍິຣາ, ອຎ຺ເຎ ວາປິ ຈ ຎາຕກາ;

ສມ຺ມາປຓິຫິຕໍ ຈິຕ຺ຕໍ, ເສຍ຺ຍໂສ ນໍ ຕໂຕ ກເຣ.

ໂກ ¶ ¶ ¶ ອິມໍ [ໂກມໍ (ກ.)] ປຖວິໍ ວິເຈສ຺ສຕິ [ວິເຊສ຺ສຕິ (ສີ. ສ຺ຍາ. ປີ.)], ຍມໂລກຎ຺ຈ ອິມໍ ສເທວກໍ;

ໂກ ຘມ຺ມປທໍ ສຸເທສິຕໍ, ກຸສໂລ ປຸປ຺ຜມິວ ປເຈສ຺ສຕິ [ປຸປ຺ຜມິວປ຺ປເຈສ຺ສຕິ (ກ.)].

ເສໂຂ ປຖວິໍ ວິເຈສ຺ສຕິ, ຍມໂລກຎ຺ຈ ອິມໍ ສເທວກໍ;

ເສໂຂ ຘມ຺ມປທໍ ສຸເທສິຕໍ, ກຸສໂລ ປຸປ຺ຜມິວ ປເຈສ຺ສຕິ.

ເຜຓູປມໍ ¶ ກາຍມິມໍ ວິທິຕ຺ວາ, ມຣີຈິຘມ຺ມໍ ອຠິສມ຺ພຸຘາໂນ;

ເຉຕ຺ວານ ມາຣສ຺ສ ປປຸປ຺ຜການິ [ສປຸປ຺ຜການິ (ຏີກາ)], ອທສ຺ສນໍ ມຈ຺ຈຸຣາຊສ຺ສ ຄຈ຺ເຉ.

ປຸປ຺ຜານິ ເຫວ ປຈິນນ຺ຕໍ, ພ຺ຍາສຕ຺ຕມນສໍ [ພ຺ຍາສຕ຺ຕມານສໍ (ກ.)] ນຣໍ;

ສຸຕ຺ຕໍ ຄາມໍ ມໂຫໂຆວ, ມຈ຺ຈຸ ອາທາຍ ຄຈ຺ຉຕິ.

ປຸປ຺ຜານິ ເຫວ ປຈິນນ຺ຕໍ, ພ຺ຍາສຕ຺ຕມນສໍ ນຣໍ;

ອຕິຕ຺ຕຎ຺ເຎວ ກາເມສຸ, ອນ຺ຕໂກ ກຸຣຸເຕ ວສໍ.

ຍຖາປິ ຠມໂຣ ປຸປ຺ຜໍ, ວຓ຺ຓຄນ຺ຘມເຫຐຍໍ [ວຓ຺ຓຄນ຺ຘມໂປຐຍໍ (ກ.)];

ປເລຕິ ຣສມາທາຍ, ເອວໍ ຄາເມ ມຸນີ ຈເຣ.

ນ ປເຣສໍ ວິໂລມານິ, ນ ປເຣສໍ ກຕາກຕໍ;

ອຕ຺ຕໂນວ ອເວກ຺ເຂຍ຺ຍ, ກຕານິ ອກຕານິ ຈ.

ຍຖາປິ ¶ ¶ ຣຸຈິຣໍ ປຸປ຺ຜໍ, ວຓ຺ຓວນ຺ຕໍ ອຄນ຺ຘກໍ;

ເອວໍ ສຸຠາສິຕາ ວາຈາ, ອຜລາ ໂຫຕິ ອກຸພ຺ພໂຕ.

ຍຖາປິ ¶ ຣຸຈິຣໍ ປຸປ຺ຜໍ, ວຓ຺ຓວນ຺ຕໍ ສຸຄນ຺ຘກໍ [ສຄນ຺ຘກໍ (ສີ. ສ຺ຍາ. ກໍ. ປີ.)];

ເອວໍ ສຸຠາສິຕາ ວາຈາ, ສຜລາ ໂຫຕິ ກຸພ຺ພໂຕ [ສກຸພ຺ພໂຕ (ສີ. ປີ.), ປກຸພ຺ພໂຕ (ສີ. ອຏ຺ຐ.), ສຸກຸພ຺ພໂຕ (ສ຺ຍາ. ກໍ.)].

ຍຖາປິ ¶ ປຸປ຺ຜຣາສິມ຺ຫາ, ກຍິຣາ ມາລາຄຸເຓ ພຫູ;

ເອວໍ ຊາເຕນ ມຈ຺ເຈນ, ກຕ຺ຕພ຺ພໍ ກຸສລໍ ພຫຸໍ.

ນ ປຸປ຺ຜຄນ຺ໂຘ ປຏິວາຕເມຕິ, ນ ຈນ຺ທນໍ ຕຄຣມລ຺ລິກາ [ຕຄຣມລ຺ລິກາ (ສີ. ສ຺ຍາ. ກໍ. ປີ.)];

ສຕຎ຺ຈ ຄນ຺ໂຘ ປຏິວາຕເມຕິ, ສພ຺ພາ ທິສາ ສປ຺ປຸຣິໂສ ປວາຍຕິ.

ຈນ຺ທນໍ ຕຄຣໍ ວາປິ, ອຸປ຺ປລໍ ອຖ ວສ຺ສິກີ;

ເອເຕສໍ ຄນ຺ຘຊາຕານໍ, ສີລຄນ຺ໂຘ ອນຸຕ຺ຕໂຣ.

ອປ຺ປມຕ຺ໂຕ ອຍໍ ຄນ຺ໂຘ, ຍ຺ວາຍໍ ຕຄຣຈນ຺ທນໍ [ຍາຍໍ ຕຄຣຈນ຺ທນີ (ສີ. ສ຺ຍາ. ກໍ. ປີ.)];

ໂຍ ຈ ສີລວຕໍ ຄນ຺ໂຘ, ວາຕິ ເທເວສຸ ອຸຕ຺ຕໂມ.

ເຕສໍ ສມ຺ປນ຺ນສີລານໍ, ອປ຺ປມາທວິຫາຣິນໍ;

ສມ຺ມທຎ຺ຎາ ວິມຸຕ຺ຕານໍ, ມາໂຣ ມຄ຺ຄໍ ນ ວິນ຺ທຕິ.

ຍຖາ ສງ຺ກາຣຐານສ຺ມິໍ [ສງ຺ກາຣຘານສ຺ມິໍ (ສີ. ສ຺ຍາ. ກໍ. ປີ.)], ອຸຊ຺ຌິຕສ຺ມິໍ ມຫາປເຖ;

ປທຸມໍ ຕຕ຺ຖ ຊາເຍຖ, ສຸຈິຄນ຺ຘໍ ມໂນຣມໍ.

ເອວໍ ¶ ສງ຺ກາຣຠູເຕສຸ, ອນ຺ຘຠູເຕ [ອນ຺ຘີຠູເຕ (ກ.)] ປຸຖຸຊ຺ຊເນ;

ອຕິໂຣຈຕິ ປຎ຺ຎາຍ, ສມ຺ມາສມ຺ພຸທ຺ຘສາວໂກ.

ທີຆາ ¶ ¶ ¶ ຊາຄຣໂຕ ຣຕ຺ຕິ, ທີຆໍ ສນ຺ຕສ຺ສ ໂຍຊນໍ;

ທີໂຆ ພາລານໍ ສໍສາໂຣ, ສທ຺ຘມ຺ມໍ ອວິຊານຕໍ.

ຈຣຎ຺ເຈ ນາຘິຄຈ຺ເຉຍ຺ຍ, ເສຍ຺ຍໍ ສທິສມຕ຺ຕໂນ;

ເອກຈຣິຍໍ [ເອກຈຣິຍໍ (ກ.)] ທຬ຺ຫໍ ກຍິຣາ, ນຕ຺ຖິ ພາເລ ສຫາຍຕາ.

ປຸຕ຺ຕາ ມຕ຺ຖິ ຘນມ຺ມຕ຺ຖິ [ປຸຕ຺ຕມຕ຺ຖິ ຘນມຕ຺ຖິ (ກ.)], ອິຕິ ພາໂລ ວິຫຎ຺ຎຕິ;

ອຕ຺ຕາ ຫິ [ອຕ຺ຕາປິ (?)] ອຕ຺ຕໂນ ນຕ຺ຖິ, ກຸໂຕ ປຸຕ຺ຕາ ກຸໂຕ ຘນໍ.

ໂຍ ພາໂລ ມຎ຺ຎຕິ ພາລ຺ຍໍ, ປຓ຺ຑິໂຕ ວາປິ ເຕນ ໂສ;

ພາໂລ ຈ ປຓ຺ຑິຕມານີ, ສ ເວ ‘‘ພາໂລ’’ຕິ ວຸຈ຺ຈຕິ.

ຍາວຊີວມ຺ປິ ເຈ ພາໂລ, ປຓ຺ຑິຕໍ ປຍິຣຸປາສຕິ;

ນ ໂສ ຘມ຺ມໍ ວິຊານາຕິ, ທພ຺ພີ ສູປຣສໍ ຍຖາ.

ມຸຫຸຕ຺ຕມປິ ¶ ເຈ ວິຎ຺ຎູ, ປຓ຺ຑິຕໍ ປຍິຣຸປາສຕິ;

ຂິປ຺ປໍ ຘມ຺ມໍ ວິຊານາຕິ, ຊິວ຺ຫາ ສູປຣສໍ ຍຖາ.

ຈຣນ຺ຕິ ພາລາ ທຸມ຺ເມຘາ, ອມິຕ຺ເຕເນວ ອຕ຺ຕນາ;

ກໂຣນ຺ຕາ ປາປກໍ ກມ຺ມໍ, ຍໍ ໂຫຕິ ກຏຸກປ຺ຜລໍ.

ນ ¶ ຕໍ ກມ຺ມໍ ກຕໍ ສາຘຸ, ຍໍ ກຕ຺ວາ ອນຸຕປ຺ປຕິ;

ຍສ຺ສ ອສ຺ສຸມຸໂຂ ໂຣທໍ, ວິປາກໍ ປຏິເສວຕິ.

ຕຎ຺ຈ ¶ ກມ຺ມໍ ກຕໍ ສາຘຸ, ຍໍ ກຕ຺ວາ ນານຸຕປ຺ປຕິ;

ຍສ຺ສ ປຕີໂຕ ສຸມໂນ, ວິປາກໍ ປຏິເສວຕິ.

ມຘຸວາ ¶ [ມຘຸໍ ວາ (ທີ. ນິ. ຏີກາ ໑)] ມຎ຺ຎຕິ ພາໂລ, ຍາວ ປາປໍ ນ ປຈ຺ຈຕິ;

ຍທາ ຈ ປຈ຺ຈຕິ ປາປໍ, ພາໂລ [ອຖ ພາໂລ (ສີ. ສ຺ຍາ.) ອຖ (?)] ທຸກ຺ຂໍ ນິຄຈ຺ຉຕິ.

ມາເສ ມາເສ ກຸສຄ຺ເຄນ, ພາໂລ ຠຸຎ຺ເຊຍ຺ຍ ໂຠຊນໍ;

ນ ໂສ ສງ຺ຂາຕຘມ຺ມານໍ [ສງ຺ຂຕຘມ຺ມານໍ (ສີ. ປີ. ກ.)], ກລໍ ອຄ຺ຆຕິ ໂສຬສິໍ.

ນ ຫິ ປາປໍ ກຕໍ ກມ຺ມໍ, ສຊ຺ຊຸ ຂີຣໍວ ມຸຈ຺ຈຕິ;

ຑຫນ຺ຕໍ ພາລມນ຺ເວຕິ, ຠສ຺ມຈ຺ຉນ຺ໂນວ [ຠສ຺ມາຉນ຺ໂນວ (ສີ. ປີ. ກ.)] ປາວໂກ.

ຍາວເທວ ອນຕ຺ຖາຍ, ຎຕ຺ຕໍ [ຎາຕໍ (?)] ພາລສ຺ສ ຊາຍຕິ;

ຫນ຺ຕິ ພາລສ຺ສ ສຸກ຺ກໍສໍ, ມຸທ຺ຘມສ຺ສ ວິປາຕຍໍ.

ອສນ຺ຕໍ ¶ ຠາວນມິຈ຺ເຉຍ຺ຍ [ອສນ຺ຕໍ ຠາວມິຈ຺ເຉຍ຺ຍ (ສ຺ຍາ.), ອສນ຺ຕຠາວນມິຈ຺ເຉຍ຺ຍ (ກ.)], ປຸເຣກ຺ຂາຣຎ຺ຈ ຠິກ຺ຂຸສຸ;

ອາວາເສສຸ ຈ ອິສ຺ສຣິຍໍ, ປູຊາ ປຣກຸເລສຸ ຈ.

ມເມວ ¶ ກຕ ມຎ຺ຎນ຺ຕຸ, ຄິຫີປພ຺ພຊິຕາ ອຸໂຠ;

ມເມວາຕິວສາ ອສ຺ສຸ, ກິຈ຺ຈາກິຈ຺ເຈສຸ ກິສ຺ມິຈິ;

ອິຕິ ພາລສ຺ສ ສງ຺ກປ຺ໂປ, ອິຈ຺ຉາ ມາໂນ ຈ ວຑ຺ຒຕິ.

ອຎ຺ຎາ ຫິ ລາຠູປນິສາ, ອຎ຺ຎາ ນິພ຺ພານຄາມິນີ;

ເອວເມຕໍ ອຠິຎ຺ຎາຍ, ຠິກ຺ຂຸ ພຸທ຺ຘສ຺ສ ສາວໂກ;

ສກ຺ກາຣໍ ນາຠິນນ຺ເທຍ຺ຍ, ວິເວກມນຸພ຺ຣູຫເຍ.

ນິຘີນໍວ ¶ ¶ ປວຕ຺ຕາຣໍ, ຍໍ ປສ຺ເສ ວຊ຺ຊທສ຺ສິນໍ;

ນິຄ຺ຄຍ຺ຫວາທິໍ ເມຘາວິໍ, ຕາທິສໍ ປຓ຺ຑິຕໍ ຠເຊ;

ຕາທິສໍ ຠຊມານສ຺ສ, ເສຍ຺ໂຍ ໂຫຕິ ນ ປາປິໂຍ.

ໂອວເທຍ຺ຍານຸສາເສຍ຺ຍ, ອສພ຺ຠາ ຈ ນິວາຣເຍ;

ສຕຎ຺ຫິ ໂສ ປິໂຍ ໂຫຕິ, ອສຕໍ ໂຫຕິ ອປ຺ປິໂຍ.

ນ ຠເຊ ປາປເກ ມິຕ຺ເຕ, ນ ຠເຊ ປຸຣິສາຘເມ;

ຠເຊຖ ມິຕ຺ເຕ ກລ຺ຍາເຓ, ຠເຊຖ ປຸຣິສຸຕ຺ຕເມ.

ຘມ຺ມປີຕິ ¶ ສຸຂໍ ເສຕິ, ວິປ຺ປສນ຺ເນນ ເຈຕສາ;

ອຣິຍປ຺ປເວທິເຕ ຘມ຺ເມ, ສທາ ຣມຕິ ປຓ຺ຑິໂຕ.

ອຸທກຎ຺ຫິ ¶ ນຍນ຺ຕິ ເນຕ຺ຕິກາ, ອຸສຸກາຣາ ນມຍນ຺ຕິ [ທມຍນ຺ຕິ (ກ.)] ເຕຊນໍ;

ທາຣຸໍ ນມຍນ຺ຕິ ຕຈ຺ຉກາ, ອຕ຺ຕານໍ ທມຍນ຺ຕິ ປຓ຺ຑິຕາ.

ເສໂລ ຍຖາ ເອກຆໂນ [ເອກຄ຺ຆໂນ (ກ.)], ວາເຕນ ນ ສມີຣຕິ;

ເອວໍ ນິນ຺ທາປສໍສາສຸ, ນ ສມິຎ຺ຊນ຺ຕິ ປຓ຺ຑິຕາ.

ຍຖາປິ ຣຫໂທ ຄມ຺ຠີໂຣ, ວິປ຺ປສນ຺ໂນ ອນາວິໂລ;

ເອວໍ ຘມ຺ມານິ ສຸຕ຺ວານ, ວິປ຺ປສີທນ຺ຕິ ປຓ຺ຑິຕາ.

ສພ຺ພຕ຺ຖ ເວ ສປ຺ປຸຣິສາ ຈຊນ຺ຕິ, ນ ¶ ກາມກາມາ ລປຍນ຺ຕິ ສນ຺ໂຕ;

ສຸເຂນ ຜຸຏ຺ຐາ ອຖ ວາ ທຸເຂນ, ນ ອຸຈ຺ຈາວຈໍ [ໂນຈ຺ຈາວຈໍ (ສີ. ອຏ຺ຐ.)] ປຓ຺ຑິຕາ ທສ຺ສຍນ຺ຕິ.

ນ ¶ ອຕ຺ຕເຫຕຸ ນ ປຣສ຺ສ ເຫຕຸ, ນ ປຸຕ຺ຕມິຈ຺ເຉ ນ ຘນໍ ນ ຣຏ຺ຐໍ;

ນ ອິຈ຺ເຉຍ຺ຍ [ນຍິຈ຺ເຉ (ປີ.), ນິຈ຺ເຉ (?)] ອຘມ຺ເມນ ສມິທ຺ຘິມຕ຺ຕໂນ, ສ ສີລວາ ປຎ຺ຎວາ ຘມ຺ມິໂກ ສິຍາ.

ອປ຺ປກາ ເຕ ມນຸສ຺ເສສຸ, ເຍ ຊນາ ປາຣຄາມິໂນ;

ອຖາຍໍ ອິຕຣາ ປຊາ, ຕີຣເມວານຸຘາວຕິ.

ເຍ ¶ ຈ ໂຂ ສມ຺ມທກ຺ຂາເຕ, ຘມ຺ເມ ຘມ຺ມານຸວຕ຺ຕິໂນ;

ເຕ ຊນາ ປາຣເມສ຺ສນ຺ຕິ, ມຈ຺ຈຸເຘຍ຺ຍໍ ສຸທຸຕ຺ຕຣໍ.

ກຓ຺ຫໍ ¶ ຘມ຺ມໍ ວິປ຺ປຫາຍ, ສຸກ຺ກໍ ຠາເວຖ ປຓ຺ຑິໂຕ;

ໂອກາ ອໂນກມາຄມ຺ມ, ວິເວເກ ຍຕ຺ຖ ທູຣມໍ.

ຕຕ຺ຣາຠິຣຕິມິຈ຺ເຉຍ຺ຍ, ຫິຕ຺ວາ ກາເມ ອກິຎ຺ຈໂນ;

ປຣິໂຍທເປຍ຺ຍ [ປຣິໂຍທາເປຍ຺ຍ (?)] ອຕ຺ຕານໍ, ຈິຕ຺ຕກ຺ເລເສຫິ ປຓ຺ຑິໂຕ.

ເຍສໍ ສມ຺ໂພຘິຍງ຺ເຄສຸ, ສມ຺ມາ ຈິຕ຺ຕໍ ສຸຠາວິຕໍ;

ອາທານປຏິນິສ຺ສຄ຺ເຄ, ອນຸປາທາຍ ເຍ ຣຕາ;

ຂີຓາສວາ ຊຸຕິມນ຺ໂຕ, ເຕ ໂລເກ ປຣິນິພ຺ພຸຕາ.

ຄຕທ຺ຘິໂນ ¶ ວິໂສກສ຺ສ, ວິປ຺ປມຸຕ຺ຕສ຺ສ ສພ຺ພຘິ;

ສພ຺ພຄນ຺ຖປ຺ປຫີນສ຺ສ, ປຣິຬາໂຫ ນ ວິຊ຺ຊຕິ.

ອຸຍ຺ຍຸຎ຺ຊນ຺ຕິ ¶ ສຕີມນ຺ໂຕ, ນ ນິເກເຕ ຣມນ຺ຕິ ເຕ;

ຫໍສາວ ປລ຺ລລໍ ຫິຕ຺ວາ, ໂອກໂມກໍ ຊຫນ຺ຕິ ເຕ.

ເຍສໍ ¶ ສນ຺ນິຈໂຍ ນຕ຺ຖິ, ເຍ ປຣິຎ຺ຎາຕໂຠຊນາ;

ສຸຎ຺ຎໂຕ ອນິມິຕ຺ໂຕ ຈ, ວິໂມກ຺ໂຂ ເຍສໍ ໂຄຈໂຣ;

ອາກາເສ ວ ສກຸນ຺ຕານໍ [ສກຸຓານໍ (ກ.)], ຄຕິ ເຕສໍ ທຸຣນ຺ນຍາ.

ຍສ຺ສາສວາ ¶ ປຣິກ຺ຂີຓາ, ອາຫາເຣ ຈ ອນິສ຺ສິໂຕ;

ສຸຎ຺ຎໂຕ ອນິມິຕ຺ໂຕ ຈ, ວິໂມກ຺ໂຂ ຍສ຺ສ ໂຄຈໂຣ;

ອາກາເສ ວ ສກຸນ຺ຕານໍ, ປທໍ ຕສ຺ສ ທຸຣນ຺ນຍໍ.

ຍສ຺ສິນ຺ທ຺ຣິຍານິ ສມຖງ຺ຄຕານິ [ສມຖໍ ຄຕານິ (ສີ. ປີ.)], ອສ຺ສາ ຍຖາ ສາຣຖິນາ ສຸທນ຺ຕາ;

ປຫີນມານສ຺ສ ອນາສວສ຺ສ, ເທວາປິ ຕສ຺ສ ປິຫຍນ຺ຕິ ຕາທິໂນ.

ປຖວິສໂມ ໂນ ວິຣຸຊ຺ຌຕິ, ອິນ຺ທຂິລຸປໂມ [ອິນ຺ທຂີລູປໂມ (ສີ. ສ຺ຍາ. ກ.)] ຕາທິ ສຸພ຺ພໂຕ;

ຣຫໂທວ ອເປຕກທ຺ທໂມ, ສໍສາຣາ ນ ຠວນ຺ຕິ ຕາທິໂນ.

ສນ຺ຕໍ ¶ ຕສ຺ສ ມນໍ ໂຫຕິ, ສນ຺ຕາ ວາຈາ ຈ ກມ຺ມ ຈ;

ສມ຺ມທຎ຺ຎາ ວິມຸຕ຺ຕສ຺ສ, ອຸປສນ຺ຕສ຺ສ ຕາທິໂນ.

ອສ຺ສທ຺ໂຘ ອກຕຎ຺ຎູ ຈ, ສນ຺ຘິຈ຺ເຉໂທ ຈ ໂຍ ນໂຣ;

ຫຕາວກາໂສ ວນ຺ຕາໂສ, ສ ເວ ອຸຕ຺ຕມໂປຣິໂສ.

ຄາເມ ວາ ຍທິ ວາຣຎ຺ເຎ, ນິນ຺ເນ ວາ ຍທິ ວາ ຖເລ;

ຍຕ຺ຖ ອຣຫນ຺ໂຕ ວິຫຣນ຺ຕິ, ຕໍ ຠູມິຣາມເຓຍ຺ຍກໍ.

ຣມຓີຍານິ ¶ ¶ ອຣຎ຺ຎານິ, ຍຕ຺ຖ ນ ຣມຕີ ຊໂນ;

ວີຕຣາຄາ ຣມິສ຺ສນ຺ຕິ, ນ ເຕ ກາມຄເວສິໂນ.

ສຫສ຺ສມປິ ¶ ເຈ ວາຈາ, ອນຕ຺ຖປທສໍຫິຕາ;

ເອກໍ ອຕ຺ຖປທໍ ເສຍ຺ໂຍ, ຍໍ ສຸຕ຺ວາ ອຸປສມ຺ມຕິ.

ສຫສ຺ສມປິ ເຈ ຄາຖາ, ອນຕ຺ຖປທສໍຫິຕາ;

ເອກໍ ຄາຖາປທໍ ເສຍ຺ໂຍ, ຍໍ ສຸຕ຺ວາ ອຸປສມ຺ມຕິ.

ໂຍ ຈ ຄາຖາ ສຕໍ ຠາເສ, ອນຕ຺ຖປທສໍຫິຕາ [ອນຕ຺ຖປທສຎ຺ຫິຕໍ (ກ.) ວິເສສນໍ ເຫຕໍ ຄາຖາຕິປທສ຺ສ];

ເອກໍ ຘມ຺ມປທໍ ເສຍ຺ໂຍ, ຍໍ ສຸຕ຺ວາ ອຸປສມ຺ມຕິ.

ໂຍ ສຫສ຺ສໍ ສຫສ຺ເສນ, ສງ຺ຄາເມ ມານຸເສ ຊິເນ;

ເອກຎ຺ຈ ເຊຍ຺ຍມຕ຺ຕານໍ [ອຕ຺ຕານໍ (ສີ. ປີ.)], ສ ເວ ສງ຺ຄາມຊຸຕ຺ຕໂມ.

ອຕ຺ຕາ ¶ ຫເວ ຊິຕໍ ເສຍ຺ໂຍ, ຍາ ຈາຍໍ ອິຕຣາ ປຊາ;

ອຕ຺ຕທນ຺ຕສ຺ສ ໂປສສ຺ສ, ນິຈ຺ຈໍ ສຎ຺ຎຕຈາຣິໂນ.

ເນວ ເທໂວ ນ ຄນ຺ຘພ຺ໂພ, ນ ມາໂຣ ສຫ ພ຺ຣຫ຺ມຸນາ;

ຊິຕໍ ອປຊິຕໍ ກຍິຣາ, ຕຖາຣູປສ຺ສ ຊນ຺ຕຸໂນ.

ມາເສ ¶ ¶ ມາເສ ສຫສ຺ເສນ, ໂຍ ຍເຊຖ ສຕໍ ສມໍ;

ເອກຎ຺ຈ ຠາວິຕຕ຺ຕານໍ, ມຸຫຸຕ຺ຕມປິ ປູຊເຍ;

ສາເຍວ ປູຊນາ ເສຍ຺ໂຍ, ຍຎ຺ເຈ ວສ຺ສສຕໍ ຫຸຕໍ.

ໂຍ ຈ ວສ຺ສສຕໍ ຊນ຺ຕຸ, ອຄ຺ຄິໍ ປຣິຈເຣ ວເນ;

ເອກຎ຺ຈ ຠາວິຕຕ຺ຕານໍ, ມຸຫຸຕ຺ຕມປິ ປູຊເຍ;

ສາເຍວ ປູຊນາ ເສຍ຺ໂຍ, ຍຎ຺ເຈ ວສ຺ສສຕໍ ຫຸຕໍ.

ຍໍ ¶ ກິຎ຺ຈິ ຍິຏ຺ຐໍ ວ ຫຸຕໍ ວ [ຍິຏ຺ຐຎ຺ຈ ຫຸຕຎ຺ຈ (ກ.)] ໂລເກ, ສໍວຈ຺ຉຣໍ ຍເຊຖ ປຸຎ຺ຎເປກ຺ໂຂ;

ສພ຺ພມ຺ປິ ຕໍ ນ ຈຕຸຠາຄເມຕິ, ອຠິວາທນາ ອຸຊ຺ຊຸຄເຕສຸ ເສຍ຺ໂຍ.

ອຠິວາທນສີລິສ຺ສ, ນິຈ຺ຈໍ ວຸຑ຺ຒາປຈາຍິໂນ [ວທ຺ຘາປຈາຍິໂນ (ສີ. ປີ.)];

ຈຕ຺ຕາໂຣ ຘມ຺ມາ ວຑ຺ຒນ຺ຕິ, ອາຍຸ ວຓ຺ໂຓ ສຸຂໍ ພລໍ.

ໂຍ ຈ ວສ຺ສສຕໍ ຊີເວ, ທຸສ຺ສີໂລ ອສມາຫິໂຕ;

ເອກາຫໍ ຊີວິຕໍ ເສຍ຺ໂຍ, ສີລວນ຺ຕສ຺ສ ຌາຍິໂນ.

ໂຍ ຈ ວສ຺ສສຕໍ ຊີເວ, ທຸປ຺ປຎ຺ໂຎ ອສມາຫິໂຕ;

ເອກາຫໍ ຊີວິຕໍ ເສຍ຺ໂຍ, ປຎ຺ຎວນ຺ຕສ຺ສ ຌາຍິໂນ.

ໂຍ ¶ ຈ ວສ຺ສສຕໍ ຊີເວ, ກຸສີໂຕ ຫີນວີຣິໂຍ;

ເອກາຫໍ ຊີວິຕໍ ເສຍ຺ໂຍ, ວີຣິຍມາຣຠໂຕ ທຬ຺ຫໍ.

ໂຍ ¶ ຈ ວສ຺ສສຕໍ ຊີເວ, ອປສ຺ສໍ ອຸທຍພ຺ພຍໍ;

ເອກາຫໍ ຊີວິຕໍ ເສຍ຺ໂຍ, ປສ຺ສໂຕ ອຸທຍພ຺ພຍໍ.

ໂຍ ¶ ຈ ວສ຺ສສຕໍ ຊີເວ, ອປສ຺ສໍ ອມຕໍ ປທໍ;

ເອກາຫໍ ຊີວິຕໍ ເສຍ຺ໂຍ, ປສ຺ສໂຕ ອມຕໍ ປທໍ.

ໂຍ ຈ ວສ຺ສສຕໍ ຊີເວ, ອປສ຺ສໍ ຘມ຺ມມຸຕ຺ຕມໍ;

ເອກາຫໍ ຊີວິຕໍ ເສຍ຺ໂຍ, ປສ຺ສໂຕ ຘມ຺ມມຸຕ຺ຕມໍ.

ອຠິຕ຺ຖເຣຖ ¶ ກລ຺ຍາເຓ, ປາປາ ຈິຕ຺ຕໍ ນິວາຣເຍ;

ທນ຺ຘຎ຺ຫິ ກໂຣໂຕ ປຸຎ຺ຎໍ, ປາປສ຺ມິໍ ຣມຕີ ມໂນ.

ປາປຎ຺ເຈ ປຸຣິໂສ ກຍິຣາ, ນ ນໍ [ນ ຕໍ (ສີ. ປີ.)] ກຍິຣາ ປຸນປ຺ປຸນໍ;

ນ ຕມ຺ຫິ ຉນ຺ທໍ ກຍິຣາຖ, ທຸກ຺ໂຂ ປາປສ຺ສ ອຸຈ຺ຈໂຍ.

ປຸຎ຺ຎຎ຺ເຈ ປຸຣິໂສ ກຍິຣາ, ກຍິຣາ ນໍ [ກຍິຣາເຖຕໍ (ສີ. ສ຺ຍາ.), ກຍິຣາເຖນໍ (ປີ.)] ປຸນປ຺ປຸນໍ;

ຕມ຺ຫິ ຉນ຺ທໍ ກຍິຣາຖ, ສຸໂຂ ປຸຎ຺ຎສ຺ສ ອຸຈ຺ຈໂຍ.

ປາໂປປິ ¶ ປສ຺ສຕິ ຠທ຺ຣໍ, ຍາວ ປາປໍ ນ ປຈ຺ຈຕິ;

ຍທາ ຈ ປຈ຺ຈຕິ ປາປໍ, ອຖ ປາໂປ ປາປານິ [ອຖ ປາປານິ (?)] ປສ຺ສຕິ.

ຠທ຺ໂຣປິ ¶ ¶ ປສ຺ສຕິ ປາປໍ, ຍາວ ຠທ຺ຣໍ ນ ປຈ຺ຈຕິ;

ຍທາ ຈ ປຈ຺ຈຕິ ຠທ຺ຣໍ, ອຖ ຠທ຺ໂຣ ຠທ຺ຣານິ [ອຖ ຠທ຺ຣານິ (?)] ປສ຺ສຕິ.

ມາວມຎ຺ເຎຖ [ມາປ຺ປມຎ຺ເຎຖ (ສີ. ສ຺ຍາ. ປີ.)] ປາປສ຺ສ, ນ ມນ຺ຕໍ [ນ ມໍ ຕໍ (ສີ. ປີ.), ນ ມຕ຺ຕໍ (ສ຺ຍາ.)] ອາຄມິສ຺ສຕິ;

ອຸທພິນ຺ທຸນິປາເຕນ, ອຸທກຸມ຺ໂຠປິ ປູຣຕິ;

ພາໂລ ປູຣຕິ [ປູຣຕິ ພາໂລ (ສີ. ກ.), ອາປູຣຕິ ພາໂລ (ສ຺ຍາ.)] ປາປສ຺ສ, ໂຖກໍ ໂຖກມ຺ປິ [ໂຖກ ໂຖກມ຺ປິ (ສີ. ປີ.)] ອາຈິນໍ.

ມາວມຎ຺ເຎຖ ປຸຎ຺ຎສ຺ສ, ນ ມນ຺ຕໍ ອາຄມິສ຺ສຕິ;

ອຸທພິນ຺ທຸນິປາເຕນ, ອຸທກຸມ຺ໂຠປິ ປູຣຕິ;

ຘີໂຣ ປູຣຕິ ປຸຎ຺ຎສ຺ສ, ໂຖກໍ ໂຖກມ຺ປິ ອາຈິນໍ.

ວາຓິໂຊວ ຠຍໍ ມຄ຺ຄໍ, ອປ຺ປສຕ຺ໂຖ ມຫທ຺ຘໂນ;

ວິສໍ ຊີວິຕຸກາໂມວ, ປາປານິ ປຣິວຊ຺ຊເຍ.

ປາຓິມ຺ຫິ ¶ ເຈ ວໂຓ ນາສ຺ສ, ຫເຣຍ຺ຍ ປາຓິນາ ວິສໍ;

ນາພ຺ພຓໍ ວິສມນ຺ເວຕິ, ນຕ຺ຖິ ປາປໍ ອກຸພ຺ພໂຕ.

ໂຍ ¶ ອປ຺ປທຸຏ຺ຐສ຺ສ ນຣສ຺ສ ທຸສ຺ສຕິ, ສຸທ຺ຘສ຺ສ ໂປສສ຺ສ ອນງ຺ຄຓສ຺ສ;

ຕເມວ ພາລໍ ປຈ຺ເຈຕິ ປາປໍ, ສຸຂຸໂມ ຣໂຊ ປຏິວາຕໍວ ຂິຕ຺ໂຕ.

ຄພ຺ຠເມເກ ອຸປ຺ປຊ຺ຊນ຺ຕິ, ນິຣຍໍ ປາປກມ຺ມິໂນ;

ສຄ຺ຄໍ ສຸຄຕິໂນ ຍນ຺ຕິ, ປຣິນິພ຺ພນ຺ຕິ ອນາສວາ.

ນ ¶ ອນ຺ຕລິກ຺ເຂ ນ ສມຸທ຺ທມຊ຺ເຌ, ນ ປພ຺ພຕານໍ ວິວຣໍ ປວິສ຺ສ [ປວິສໍ (ສ຺ຍາ.)];

ນ ¶ ວິຊ຺ຊຕີ [ນ ວິຊ຺ຊຕິ (ກ. ສີ. ປີ. ກ.)] ໂສ ຊຄຕິປ຺ປເທໂສ, ຍຕ຺ຖຏ຺ຐິໂຕ [ຍຕ຺ຣຏ຺ຐິໂຕ (ສ຺ຍາ.)] ມຸຈ຺ເຈຍ຺ຍ ປາປກມ຺ມາ.

ນ ອນ຺ຕລິກ຺ເຂ ນ ສມຸທ຺ທມຊ຺ເຌ, ນ ປພ຺ພຕານໍ ວິວຣໍ ປວິສ຺ສ;

ນ ວິຊ຺ຊຕີ ໂສ ຊຄຕິປ຺ປເທໂສ, ຍຕ຺ຖຏ຺ຐິຕໍ [ຍຕ຺ຣຏ຺ຐິຕໍ (ສ຺ຍາ.)] ນປ຺ປສເຫຍ຺ຍ ມຈ຺ຈຸ.

ສພ຺ເພ ຕສນ຺ຕິ ທຓ຺ຑສ຺ສ, ສພ຺ເພ ຠາຍນ຺ຕິ ມຈ຺ຈຸໂນ;

ອຕ຺ຕານໍ ອຸປມໍ ກຕ຺ວາ, ນ ຫເນຍ຺ຍ ນ ຆາຕເຍ.

ສພ຺ເພ ¶ ຕສນ຺ຕິ ທຓ຺ຑສ຺ສ, ສພ຺ເພສໍ ຊີວິຕໍ ປິຍໍ;

ອຕ຺ຕານໍ ອຸປມໍ ກຕ຺ວາ, ນ ຫເນຍ຺ຍ ນ ຆາຕເຍ.

ສຸຂກາມານິ ¶ ຠູຕານິ, ໂຍ ທຓ຺ເຑນ ວິຫິໍສຕິ;

ອຕ຺ຕໂນ ສຸຂເມສາໂນ, ເປຈ຺ຈ ໂສ ນ ລຠເຕ ສຸຂໍ.

ສຸຂກາມານິ ¶ ຠູຕານິ, ໂຍ ທຓ຺ເຑນ ນ ຫິໍສຕິ;

ອຕ຺ຕໂນ ສຸຂເມສາໂນ, ເປຈ຺ຈ ໂສ ລຠເຕ ສຸຂໍ.

ມາໂວຈ ຜຣຸສໍ ກຎ຺ຈິ, ວຸຕ຺ຕາ ປຏິວເທຍ຺ຍຸ ຕໍ [ປຏິວເທຍ຺ຍຸໍ ຕໍ (ກ.)];

ທຸກ຺ຂາ ຫິ ສາຣມ຺ຠກຖາ, ປຏິທຓ຺ຑາ ຜຸເສຍ຺ຍຸ ຕໍ [ຜຸເສຍ຺ຍຸໍ ຕໍ (ກ.)].

ສເຈ ¶ ເນເຣສິ ອຕ຺ຕານໍ, ກໍໂສ ອຸປຫໂຕ ຍຖາ;

ເອສ ປຕ຺ໂຕສິ ນິພ຺ພານໍ, ສາຣມ຺ໂຠ ເຕ ນ ວິຊ຺ຊຕິ.

ຍຖາ ທຓ຺ເຑນ ໂຄປາໂລ, ຄາໂວ ປາເຊຕິ ໂຄຈຣໍ;

ເອວໍ ຊຣາ ຈ ມຈ຺ຈຸ ຈ, ອາຍຸໍ ປາເຊນ຺ຕິ ປາຓິນໍ.

ອຖ ປາປານິ ກມ຺ມານິ, ກຣໍ ພາໂລ ນ ພຸຊ຺ຌຕິ;

ເສຫິ ກມ຺ເມຫິ ທຸມ຺ເມໂຘ, ອຄ຺ຄິທຑ຺ໂຒວ ຕປ຺ປຕິ.

ໂຍ ທຓ຺ເຑນ ອທຓ຺ເຑສຸ, ອປ຺ປທຸຏ຺ເຐສຸ ທຸສ຺ສຕິ;

ທສນ຺ນມຎ຺ຎຕຣໍ ຐານໍ, ຂິປ຺ປເມວ ນິຄຈ຺ຉຕິ.

ເວທນໍ ¶ ຜຣຸສໍ ຊານິໍ, ສຣີຣສ຺ສ ຈ ເຠທນໍ [ສຣີຣສ຺ສ ປເຠທນໍ (ສ຺ຍາ.)];

ຄຣຸກໍ ວາປິ ອາພາຘໍ, ຈິຕ຺ຕກ຺ເຂປຎ຺ຈ [ຈິຕ຺ຕກ຺ເຂປໍ ວ (ສີ. ສ຺ຍາ. ປີ.)] ປາປຸເຓ.

ຣາຊໂຕ ວາ ອຸປສຄ຺ຄໍ [ອຸປສ຺ສຄ຺ຄໍ (ສີ. ປີ.)], ອພ຺ຠກ຺ຂານຎ຺ຈ [ອພ຺ຠກ຺ຂານໍ ວ (ສີ. ປີ.)] ທາຣຸຓໍ;

ປຣິກ຺ຂຍຎ຺ຈ [ປຣິກ຺ຂຍໍ ວ (ສີ. ສ຺ຍາ. ປີ.)] ຎາຕີນໍ, ໂຠຄານຎ຺ຈ [ໂຠຄານໍ ວ (ສີ. ສ຺ຍາ. ປີ.)] ປຠງ຺ຄຸຣໍ [ປຠງ຺ຄຸນໍ (ກ.)].

ອຖ ວາສ຺ສ ອຄາຣານິ, ອຄ຺ຄິ ຑຫຕິ [ຑຍ຺ຫຕິ (ກ.)] ປາວໂກ;

ກາຍສ຺ສ ເຠທາ ທຸປ຺ປຎ຺ໂຎ, ນິຣຍໍ ໂສປປຊ຺ຊຕິ [ໂສ ອຸປປຊ຺ຊຕິ (ສີ. ສ຺ຍາ.)].

ນ ¶ ¶ ນຄ຺ຄຈຣິຍາ ນ ຊຏາ ນ ປງ຺ກາ, ນານາສກາ ຖຓ຺ຑິລສາຍິກາ ວາ;

ຣໂຊຊລ຺ລໍ ອຸກ຺ກຸຏິກປ຺ປຘານໍ, ໂສເຘນ຺ຕິ ມຈ຺ຈໍ ອວິຕິຓ຺ຓກງ຺ຂໍ.

ອລງ຺ກໂຕ ເຈປິ ສມໍ ຈເຣຍ຺ຍ, ສນ຺ໂຕ ທນ຺ໂຕ ນິຍໂຕ ພ຺ຣຫ຺ມຈາຣີ;

ສພ຺ເພສຸ ¶ ຠູເຕສຸ ນິຘາຍ ທຓ຺ຑໍ, ໂສ ພ຺ຣາຫ຺ມໂຓ ໂສ ສມໂຓ ສ ຠິກ຺ຂຸ.

ຫິຣີນິເສໂຘ ປຸຣິໂສ, ໂກຈິ ໂລກສ຺ມິ ວິຊ຺ຊຕິ;

ໂຍ ນິທ຺ທໍ [ນິນ຺ທໍ (ສີ. ປີ.) ສໍ. ນິ. ໑.໑໘] ອປໂພເຘຕິ [ອປໂພຘຕິ (ສີ. ສ຺ຍາ. ປີ.)], ອສ຺ໂສ ຠທ຺ໂຣ ກສາມິວ.

ອສ຺ໂສ ¶ ຍຖາ ຠທ຺ໂຣ ກສານິວິຏ຺ໂຐ, ອາຕາປິໂນ ສໍເວຄິໂນ ຠວາຖ;

ສທ຺ຘາຍ ສີເລນ ຈ ວີຣິເຍນ ຈ, ສມາຘິນາ ຘມ຺ມວິນິຈ຺ຉເຍນ ຈ;

ສມ຺ປນ຺ນວິຊ຺ຊາຈຣຓາ ປຕິສ຺ສຕາ, ຊຫິສ຺ສຖ [ປຫສ຺ສຖ (ສີ. ສ຺ຍາ. ປີ.)] ທຸກ຺ຂມິທໍ ອນປ຺ປກໍ.

ອຸທກຎ຺ຫິ ນຍນ຺ຕິ ເນຕ຺ຕິກາ, ອຸສຸກາຣາ ນມຍນ຺ຕິ ເຕຊນໍ;

ທາຣຸໍ ນມຍນ຺ຕິ ຕຈ຺ຉກາ, ອຕ຺ຕານໍ ທມຍນ຺ຕິ ສຸພ຺ພຕາ.

ໂກ ¶ ¶ ນຸ ຫາໂສ [ກິນ຺ນຸ ຫາໂສ (ກ.)] ກິມານນ຺ໂທ, ນິຈ຺ຈໍ ປຊ຺ຊລິເຕ ສຕິ;

ອນ຺ຘກາເຣນ ໂອນທ຺ຘາ, ປທີປໍ ນ ຄເວສຖ.

ປສ຺ສ ຈິຕ຺ຕກຕໍ ພິມ຺ພໍ, ອຣຸກາຍໍ ສມຸສ຺ສິຕໍ;

ອາຕຸຣໍ ພຫຸສງ຺ກປ຺ປໍ, ຍສ຺ສ ນຕ຺ຖິ ຘຸວໍ ຐິຕິ.

ປຣິຊິຓ຺ຓມິທໍ ¶ ຣູປໍ, ໂຣຄນີຬໍ [ໂຣຄນິຑ຺ຒໍ (ສີ. ປີ.), ໂຣຄນິທ຺ຘໍ (ສ຺ຍາ.)] ປຠງ຺ຄຸຣໍ;

ຠິຊ຺ຊຕິ ປູຕິສນ຺ເທໂຫ, ມຣຓນ຺ຕຎ຺ຫິ ຊີວິຕໍ.

ຍານິມານິ ¶ ອປຕ຺ຖານິ [ຍານິມານິ ອປຕ຺ຖານິ (ສີ. ສ຺ຍາ. ປີ.), ຍານິມານິ’ປວິທ຺ຘານິ (?)], ອລາພູເນວ [ອລາປູເນວ (ສີ. ສ຺ຍາ. ປີ.)] ສາຣເທ;

ກາໂປຕການິ ອຏ຺ຐີນິ, ຕານິ ທິສ຺ວານ ກາ ຣຕິ.

ອຏ຺ຐີນໍ ນຄຣໍ ກຕໍ, ມໍສໂລຫິຕເລປນໍ;

ຍຕ຺ຖ ຊຣາ ຈ ມຈ຺ຈຸ ຈ, ມາໂນ ມກ຺ໂຂ ຈ ໂອຫິໂຕ.

ຊີຣນ຺ຕິ ເວ ຣາຊຣຖາ ສຸຈິຕ຺ຕາ, ອໂຖ ສຣີຣມ຺ປິ ຊຣໍ ອຸເປຕິ;

ສຕຎ຺ຈ ຘມ຺ໂມ ນ ຊຣໍ ອຸເປຕິ, ສນ຺ໂຕ ຫເວ ສພ຺ຠິ ປເວທຍນ຺ຕິ.

ອປ຺ປສ຺ສຸຕາຍໍ ປຸຣິໂສ, ພລິພທ຺ໂຘວ [ພລິວທ຺ໂທວ (ສີ. ສ຺ຍາ. ປີ.)] ຊີຣຕິ;

ມໍສານິ ຕສ຺ສ ວຑ຺ຒນ຺ຕິ, ປຎ຺ຎາ ຕສ຺ສ ນ ວຑ຺ຒຕິ.

ອເນກຊາຕິສໍສາຣໍ ¶ , ສນ຺ຘາວິສ຺ສໍ ອນິພ຺ພິສໍ;

ຄຫກາຣໍ [ຄຫກາຣກໍ (ສີ. ສ຺ຍາ. ປີ.)] ຄເວສນ຺ໂຕ, ທຸກ຺ຂາ ຊາຕິ ປຸນປ຺ປຸນໍ.

ຄຫກາຣກ ທິຏ຺ໂຐສິ, ປຸນ ເຄຫໍ ນ ກາຫສິ;

ສພ຺ພາ ¶ ເຕ ຜາສຸກາ ຠຄ຺ຄາ, ຄຫກູຏໍ ວິສງ຺ຂຕໍ;

ວິສງ຺ຂາຣຄຕໍ ຈິຕ຺ຕໍ, ຕຓ຺ຫານໍ ຂຍມຊ຺ຌຄາ.

ອຈຣິຕ຺ວາ ພ຺ຣຫ຺ມຈຣິຍໍ, ອລທ຺ຘາ ໂຍພ຺ພເນ ຘນໍ;

ຊິຓ຺ຓໂກຎ຺ຈາວ ຌາຍນ຺ຕິ, ຂີຓມຈ຺ເຉວ ປລ຺ລເລ.

ອຈຣິຕ຺ວາ ¶ ພ຺ຣຫ຺ມຈຣິຍໍ, ອລທ຺ຘາ ໂຍພ຺ພເນ ຘນໍ;

ເສນ຺ຕິ ຈາປາຕິຂີຓາວ, ປຸຣາຓານິ ອນຸຕ຺ຖຸນໍ.

ອຕ຺ຕານຎ຺ເຈ ¶ ປິຍໍ ຊຎ຺ຎາ, ຣກ຺ເຂຍ຺ຍ ນໍ ສຸຣກ຺ຂິຕໍ;

ຕິຓ຺ຓໍ ອຎ຺ຎຕຣໍ ຍາມໍ, ປຏິຊຄ຺ເຄຍ຺ຍ ປຓ຺ຑິໂຕ.

ອຕ຺ຕານເມວ ປຐມໍ, ປຕິຣູເປ ນິເວສເຍ;

ອຖຎ຺ຎມນຸສາເສຍ຺ຍ, ນ ກິລິສ຺ເສຍ຺ຍ ປຓ຺ຑິໂຕ.

ອຕ຺ຕານໍ ¶ ເຈ ຕຖາ ກຍິຣາ, ຍຖາຎ຺ຎມນຸສາສຕິ;

ສຸທນ຺ໂຕ ວຕ ທເມຖ, ອຕ຺ຕາ ຫິ ກິຣ ທຸທ຺ທໂມ.

ອຕ຺ຕາ ຫິ ອຕ຺ຕໂນ ນາໂຖ, ໂກ ຫິ ນາໂຖ ປໂຣ ສິຍາ;

ອຕ຺ຕນາ ຫິ ສຸທນ຺ເຕນ, ນາຖໍ ລຠຕິ ທຸລ຺ລຠໍ.

ອຕ຺ຕນາ ຫິ ກຕໍ ປາປໍ, ອຕ຺ຕຊໍ ອຕ຺ຕສມ຺ຠວໍ;

ອຠິມຕ຺ຖຕິ [ອຠິມນ຺ຕຕິ (ສີ. ປີ.)] ທຸມ຺ເມຘໍ, ວຊິຣໍ ວສ຺ມມຍໍ [ວຊິຣໍວ’ມ຺ຫມຍໍ (ສ຺ຍາ. ກ.)] ມຓິໍ.

ຍສ຺ສ ¶ ອຈ຺ຈນ຺ຕທຸສ຺ສີລ຺ຍໍ, ມາລຸວາ ສາລມິໂວຕ຺ຖຕໍ;

ກໂຣຕິ ໂສ ຕຖຕ຺ຕານໍ, ຍຖາ ນໍ ອິຈ຺ຉຕີ ທິໂສ.

ສຸກຣານິ ¶ ອສາຘູນິ, ອຕ຺ຕໂນ ອຫິຕານິ ຈ;

ຍໍ ເວ ຫິຕຎ຺ຈ ສາຘຸຎ຺ຈ, ຕໍ ເວ ປຣມທຸກ຺ກຣໍ.

ໂຍ ສາສນໍ ອຣຫຕໍ, ອຣິຍານໍ ຘມ຺ມຊີວິນໍ;

ປຏິກ຺ໂກສຕິ ທຸມ຺ເມໂຘ, ທິຏ຺ຐິໍ ນິສ຺ສາຍ ປາປິກໍ;

ຜລານິ ກຏ຺ຐກສ຺ເສວ, ອຕ຺ຕຆາຕາຍ [ອຕ຺ຕຆຎ຺ຎາຍ (ສີ. ສ຺ຍາ. ປີ.)] ຜລ຺ລຕິ.

ອຕ຺ຕນາ ¶ ຫິ [ອຕ຺ຕນາວ (ສີ. ສ຺ຍາ. ປີ.)] ກຕໍ ປາປໍ, ອຕ຺ຕນາ ສໍກິລິສ຺ສຕິ;

ອຕ຺ຕນາ ອກຕໍ ປາປໍ, ອຕ຺ຕນາວ ວິສຸຊ຺ຌຕິ;

ສຸທ຺ຘີ ອສຸທ຺ຘິ ປຈ຺ຈຕ຺ຕໍ, ນາຎ຺ໂຎ ອຎ຺ຎໍ [ນາຎ຺ຎມຎ຺ໂຎ(ສີ.)] ວິໂສຘເຍ.

ອຕ຺ຕທຕ຺ຖໍ ¶ ປຣຕ຺ເຖນ, ພຫຸນາປິ ນ ຫາປເຍ;

ອຕ຺ຕທຕ຺ຖມຠິຎ຺ຎາຍ, ສທຕ຺ຖປສຸໂຕ ສິຍາ.

ຫີນໍ ຘມ຺ມໍ ນ ເສເວຍ຺ຍ, ປມາເທນ ນ ສໍວເສ;

ມິຈ຺ຉາທິຏ຺ຐິໍ ນ ເສເວຍ຺ຍ, ນ ສິຍາ ໂລກວຑ຺ຒໂນ.

ອຸຕ຺ຕິຏ຺ເຐ ນປ຺ປມຊ຺ເຊຍ຺ຍ, ຘມ຺ມໍ ສຸຈຣິຕໍ ຈເຣ;

ຘມ຺ມຈາຣີ ສຸຂໍ ເສຕິ, ອສ຺ມິໍ ໂລເກ ປຣມ຺ຫິ ຈ.

ຘມ຺ມໍ ¶ ¶ ຈເຣ ສຸຈຣິຕໍ, ນ ນໍ ທຸຈ຺ຈຣິຕໍ ຈເຣ;

ຘມ຺ມຈາຣີ ສຸຂໍ ເສຕິ, ອສ຺ມິໍ ໂລເກ ປຣມ຺ຫິ ຈ.

ຍຖາ ປຸພ຺ພຸຬກໍ [ປຸພ຺ພຸຬກໍ (ສີ. ປີ.)] ປສ຺ເສ, ຍຖາ ປສ຺ເສ ມຣີຈິກໍ;

ເອວໍ ໂລກໍ ອເວກ຺ຂນ຺ຕໍ, ມຈ຺ຈຸຣາຊາ ນ ປສ຺ສຕິ.

ເອຖ ປສ຺ສຖິມໍ ໂລກໍ, ຈິຕ຺ຕໍ ຣາຊຣຖູປມໍ;

ຍຕ຺ຖ ພາລາ ວິສີທນ຺ຕິ, ນຕ຺ຖິ ສງ຺ໂຄ ວິຊານຕໍ.

ໂຍ ¶ ¶ ຈ ປຸພ຺ເພ ປມຊ຺ຊິຕ຺ວາ, ປຈ຺ຉາ ໂສ ນປ຺ປມຊ຺ຊຕິ;

ໂສມໍ ໂລກໍ ປຠາເສຕິ, ອພ຺ຠາ ມຸຕ຺ໂຕວ ຈນ຺ທິມາ.

ຍສ຺ສ ປາປໍ ກຕໍ ກມ຺ມໍ, ກຸສເລນ ປິຘີຍຕິ [ປິຕີຍຕິ (ສີ. ສ຺ຍາ. ປີ.)];

ໂສມໍ ໂລກໍ ປຠາເສຕິ, ອພ຺ຠາ ມຸຕ຺ໂຕວ ຈນ຺ທິມາ.

ອນ຺ຘຠູໂຕ [ອນ຺ຘີຠູໂຕ (ກ.)] ອຍໍ ໂລໂກ, ຕນຸເກຕ຺ຖ ວິປສ຺ສຕິ;

ສກຸໂຓ ຊາລມຸຕ຺ໂຕວ, ອປ຺ໂປ ສຄ຺ຄາຍ ຄຈ຺ຉຕິ.

ຫໍສາທິຈ຺ຈປເຖ ຍນ຺ຕິ, ອາກາເສ ຍນ຺ຕິ ອິທ຺ຘິຍາ;

ນີຍນ຺ຕິ ຘີຣາ ໂລກມ຺ຫາ, ເຊຕ຺ວາ ມາຣໍ ສວາຫິນິໍ [ສວາຫນໍ (ສ຺ຍາ. ກ.)].

ເອກໍ ຘມ຺ມໍ ອຕີຕສ຺ສ, ມຸສາວາທິສ຺ສ ຊນ຺ຕຸໂນ;

ວິຕິຓ຺ຓປຣໂລກສ຺ສ, ນຕ຺ຖິ ປາປໍ ອກາຣິຍໍ.

ນ ¶ ເວ ກທຣິຍາ ເທວໂລກໍ ວຊນ຺ຕິ, ພາລາ ຫເວ ນປ຺ປສໍສນ຺ຕິ ທານໍ;

ຘີໂຣ ຈ ທານໍ ອນຸໂມທມາໂນ, ເຕເນວ ¶ ໂສ ໂຫຕິ ສຸຂີ ປຣຕ຺ຖ.

ປຖພ຺ຍາ ເອກຣຊ຺ເຊນ, ສຄ຺ຄສ຺ສ ຄມເນນ ວາ;

ສພ຺ພໂລກາຘິປຈ຺ເຈນ, ໂສຕາປຕ຺ຕິຜລໍ ວຣໍ.

ຍສ຺ສ ¶ ¶ ຊິຕໍ ນາວຊີຍຕິ, ຊິຕໍ ຍສ຺ສ [ຊິຕມສ຺ສ (ສີ. ສ຺ຍາ. ປີ.), ຊິຕໍ ມສ຺ສ (ກ.)] ໂນ ຍາຕິ ໂກຈິ ໂລເກ;

ຕໍ ພຸທ຺ຘມນນ຺ຕໂຄຈຣໍ, ອປທໍ ເກນ ປເທນ ເນສ຺ສຖ.

ຍສ຺ສ ຊາລິນີ ວິສຕ຺ຕິກາ, ຕຓ຺ຫາ ນຕ຺ຖິ ກຸຫິຎ຺ຈິ ເນຕເວ;

ຕໍ ພຸທ຺ຘມນນ຺ຕໂຄຈຣໍ, ອປທໍ ເກນ ປເທນ ເນສ຺ສຖ.

ເຍ ຌານປສຸຕາ ຘີຣາ, ເນກ຺ຂມ຺ມູປສເມ ຣຕາ;

ເທວາປິ ເຕສໍ ປິຫຍນ຺ຕິ, ສມ຺ພຸທ຺ຘານໍ ສຕີມຕໍ.

ກິຈ຺ໂຉ ¶ ມນຸສ຺ສປຏິລາໂຠ, ກິຈ຺ຉໍ ມຈ຺ຈານ ຊີວິຕໍ;

ກິຈ຺ຉໍ ສທ຺ຘມ຺ມສ຺ສວນໍ, ກິຈ຺ໂຉ ພຸທ຺ຘານມຸປ຺ປາໂທ.

ສພ຺ພປາປສ຺ສ ອກຣຓໍ, ກຸສລສ຺ສ ອຸປສມ຺ປທາ [ກຸສລສ຺ສູປສມ຺ປທາ (ສ຺ຍາ.)];

ສຈິຕ຺ຕປຣິໂຍທປນໍ ¶ [ສຈິຕ຺ຕປຣິໂຍທາປນໍ (?)], ເອຕໍ ພຸທ຺ຘານ ສາສນໍ.

ຂນ຺ຕີ ປຣມໍ ຕໂປ ຕິຕິກ຺ຂາ, ນິພ຺ພານໍ [ນິພ຺ພາຓໍ (ກ. ສີ. ປີ.)] ປຣມໍ ວທນ຺ຕິ ພຸທ຺ຘາ;

ນ ຫິ ປພ຺ພຊິໂຕ ປຣູປຆາຕີ, ນ [ອຍໍ ນກາໂຣ ສີ. ສ຺ຍາ. ປີ. ປາຕ຺ຖເກສຸ ນ ທິສ຺ສຕິ] ສມໂຓ ໂຫຕິ ປຣໍ ວິເຫຐຍນ຺ໂຕ.

ອນູປວາໂທ ອນູປຆາໂຕ [ອນຸປວາໂທ ອນຸປຆາໂຕ (ສ຺ຍາ. ກ.)], ປາຕິໂມກ຺ເຂ ຈ ສໍວໂຣ;

ມຕ຺ຕຎ຺ຎຸຕາ ຈ ຠຕ຺ຕສ຺ມິໍ, ປນ຺ຕຎ຺ຈ ສຍນາສນໍ;

ອຘິຈິຕ຺ເຕ ຈ ອາໂຍໂຄ, ເອຕໍ ພຸທ຺ຘານ ສາສນໍ.

ນ ¶ ກຫາປຓວສ຺ເສນ, ຕິຕ຺ຕິ ກາເມສຸ ວິຊ຺ຊຕິ;

ອປ຺ປສ຺ສາທາ ທຸຂາ ກາມາ, ອິຕິ ວິຎ຺ຎາຍ ປຓ຺ຑິໂຕ.

ອປິ ¶ ທິພ຺ເພສຸ ກາເມສຸ, ຣຕິໍ ໂສ ນາຘິຄຈ຺ຉຕິ;

ຕຓ຺ຫກ຺ຂຍຣໂຕ ໂຫຕິ, ສມ຺ມາສມ຺ພຸທ຺ຘສາວໂກ.

ພຫຸໍ ເວ ສຣຓໍ ຍນ຺ຕິ, ປພ຺ພຕານິ ວນານິ ຈ;

ອາຣາມຣຸກ຺ຂເຈຕ຺ຍານິ, ມນຸສ຺ສາ ຠຍຕຊ຺ຊິຕາ.

ເນຕໍ ໂຂ ສຣຓໍ ເຂມໍ, ເນຕໍ ສຣຓມຸຕ຺ຕມໍ;

ເນຕໍ ສຣຓມາຄມ຺ມ, ສພ຺ພທຸກ຺ຂາ ປມຸຈ຺ຈຕິ.

ໂຍ ¶ ຈ ພຸທ຺ຘຎ຺ຈ ຘມ຺ມຎ຺ຈ, ສງ຺ຆຎ຺ຈ ສຣຓໍ ຄໂຕ;

ຈຕ຺ຕາຣິ ອຣິຍສຈ຺ຈານິ, ສມ຺ມປ຺ປຎ຺ຎາຍ ປສ຺ສຕິ.

ທຸກ຺ຂໍ ທຸກ຺ຂສມຸປ຺ປາທໍ, ທຸກ຺ຂສ຺ສ ຈ ອຕິກ຺ກມໍ;

ອຣິຍໍ ຈຏ຺ຐງ຺ຄິກໍ ມຄ຺ຄໍ, ທຸກ຺ຂູປສມຄາມິນໍ.

ເອຕໍ ¶ ໂຂ ສຣຓໍ ເຂມໍ, ເອຕໍ ສຣຓມຸຕ຺ຕມໍ;

ເອຕໍ ສຣຓມາຄມ຺ມ, ສພ຺ພທຸກ຺ຂາ ປມຸຈ຺ຈຕິ.

ທຸລ຺ລໂຠ ປຸຣິສາຊຎ຺ໂຎ, ນ ໂສ ສພ຺ພຕ຺ຖ ຊາຍຕິ;

ຍຕ຺ຖ ໂສ ຊາຍຕິ ຘີໂຣ, ຕໍ ກຸລໍ ສຸຂເມຘຕິ.

ສຸໂຂ ພຸທ຺ຘານມຸປ຺ປາໂທ, ສຸຂາ ສທ຺ຘມ຺ມເທສນາ;

ສຸຂາ ສງ຺ຆສ຺ສ ສາມຄ຺ຄີ, ສມຄ຺ຄານໍ ຕໂປ ສຸໂຂ.

ປູຊາຣເຫ ປູຊຍໂຕ, ພຸທ຺ເຘ ຍທິ ວ ສາວເກ;

ປປຎ຺ຈສມຕິກ຺ກນ຺ເຕ, ຕິຓ຺ຓໂສກປຣິທ຺ທເວ.

ເຕ ¶ ¶ ຕາທິເສ ປູຊຍໂຕ, ນິພ຺ພຸເຕ ອກຸໂຕຠເຍ;

ນ ສກ຺ກາ ປຸຎ຺ຎໍ ສງ຺ຂາຕຸໍ, ອິເມຕ຺ຕມປິ ເກນຈິ.

ພຸທ຺ຘວຄ຺ໂຄ ຈຸທ຺ທສໂມ ນິຏ຺ຐິໂຕ.

ສຸສຸຂໍ ¶ ວຕ ຊີວາມ, ເວຣິເນສຸ ອເວຣິໂນ;

ເວຣິເນສຸ ມນຸສ຺ເສສຸ, ວິຫຣາມ ອເວຣິໂນ.

ສຸສຸຂໍ ¶ ວຕ ຊີວາມ, ອາຕຸເຣສຸ ອນາຕຸຣາ;

ອາຕຸເຣສຸ ມນຸສ຺ເສສຸ, ວິຫຣາມ ອນາຕຸຣາ.

ສຸສຸຂໍ ວຕ ຊີວາມ, ອຸສ຺ສຸເກສຸ ອນຸສ຺ສຸກາ;

ອຸສ຺ສຸເກສຸ ¶ ມນສ຺ເສສຸ, ວິຫຣາມ ອນຸສ຺ສຸກາ.

ສຸສຸຂໍ ວຕ ຊີວາມ, ເຍສໍ ໂນ ນຕ຺ຖິ ກິຎ຺ຈນໍ;

ປີຕິຠກ຺ຂາ ຠວິສ຺ສາມ, ເທວາ ອາຠສ຺ສຣາ ຍຖາ.

ຊຍໍ ເວຣໍ ປສວຕິ, ທຸກ຺ຂໍ ເສຕິ ປຣາຊິໂຕ;

ອຸປສນ຺ໂຕ ສຸຂໍ ເສຕິ, ຫິຕ຺ວາ ຊຍປຣາຊຍໍ.

ນຕ຺ຖິ ຣາຄສໂມ ອຄ຺ຄິ, ນຕ຺ຖິ ໂທສສໂມ ກລິ;

ນຕ຺ຖິ ຂນ຺ຘສມາ [ຂນ຺ຘາທິສາ (ສີ. ສ຺ຍາ. ປີ. ຣູປສິທ຺ຘິຍາ ສເມຕິ)] ທຸກ຺ຂາ, ນຕ຺ຖິ ສນ຺ຕິປຣໍ ສຸຂໍ.

ຊິຆຈ຺ຉາປຣມາ ¶ ໂຣຄາ, ສງ຺ຂາຣປຣມາ [ສງ຺ກາຣາ ປຣມາ (ພຫູສຸ)] ທຸຂາ;

ເອຕໍ ຎຕ຺ວາ ຍຖາຠູຕໍ, ນິພ຺ພານໍ ປຣມໍ ສຸຂໍ.

ອາໂຣຄ຺ຍປຣມາ ລາຠາ, ສນ຺ຕຸຏ຺ຐິປຣມໍ ຘນໍ;

ວິສ຺ສາສປຣມາ ຎາຕິ [ວິສ຺ສາສປຣໂມ ຎາຕິ (ກ. ສີ.), ວິສ຺ສາສປຣມາ ຎາຕີ (ສີ. ອຏ຺ຐ.), ວິສ຺ສາສາ ປຣມາ ຎາຕິ (ກ.)], ນິພ຺ພານໍ ປຣມໍ [ນິພ຺ພາຓປຣມໍ (ກ. ສີ.)] ສຸຂໍ.

ປວິເວກຣສໍ ¶ ປິຕ຺ວາ [ປີຕ຺ວາ (ສີ. ສ຺ຍາ. ກໍ. ປີ.)], ຣສໍ ອຸປສມສ຺ສ ຈ;

ນິທ຺ທໂຣ ໂຫຕິ ນິປ຺ປາໂປ, ຘມ຺ມປີຕິຣສໍ ປິວໍ.

ສາຫຸ ¶ ທສ຺ສນມຣິຍານໍ, ສນ຺ນິວາໂສ ສທາ ສຸໂຂ;

ອທສ຺ສເນນ ພາລານໍ, ນິຈ຺ຈເມວ ສຸຂີ ສິຍາ.

ພາລສງ຺ຄຕຈາຣີ [ພາລສງ຺ຄຕິຈາຣີ (ກ.)] ຫິ, ທີຆມທ຺ຘານ ໂສຈຕິ;

ທຸກ຺ໂຂ ພາເລຫິ ສໍວາໂສ, ອມິຕ຺ເຕເນວ ສພ຺ພທາ;

ຘີໂຣ ຈ ສຸຂສໍວາໂສ, ຎາຕີນໍວ ສມາຄໂມ.

ຘີຣຎ຺ຈ ປຎ຺ຎຎ຺ຈ ພຫຸສ຺ສຸຕຎ຺ຈ, ໂຘຣຍ຺ຫສີລໍ ¶ ວຕວນ຺ຕມຣິຍໍ;

ຕໍ ຕາທິສໍ ສປ຺ປຸຣິສໍ ສຸເມຘໍ, ຠເຊຖ ນກ຺ຂຕ຺ຕປຖໍວ ຈນ຺ທິມາ [ຕສ຺ມາ ຫິ ຘີຣໍ ປຎ຺ຎຎ຺ຈ, ພຫຸສ຺ສຸຕຎ຺ຈ ໂຘຣຍ຺ຫໍ; ສີລໍ ຘຸຕວຕມຣິຍໍ, ຕໍ ຕາທິສໍ ສປ຺ປຸຣິສໍ; ສຸເມຘໍ ຠເຊຖ ນກ຺ຂຕ຺ຕປຖໍວ ຈນ຺ທິມາ; (ກ.)].

ອໂຍເຄ ¶ ຍຸຎ຺ຊມຕ຺ຕານໍ, ໂຍຄສ຺ມິຎ຺ຈ ອໂຍຊຍໍ;

ອຕ຺ຖໍ ຫິຕ຺ວາ ປິຍຄ຺ຄາຫີ, ປິເຫຕຕ຺ຕານຸໂຍຄິນໍ.

ມາ ¶ ປິເຍຫິ ສມາຄຎ຺ຉິ, ອປ຺ປິເຍຫິ ກຸທາຈນໍ;

ປິຍານໍ ອທສ຺ສນໍ ທຸກ຺ຂໍ, ອປ຺ປິຍານຎ຺ຈ ທສ຺ສນໍ.

ຕສ຺ມາ ປິຍໍ ນ ກຍິຣາຖ, ປິຍາປາໂຍ ຫິ ປາປໂກ;

ຄນ຺ຖາ ເຕສໍ ນ ວິຊ຺ຊນ຺ຕິ, ເຍສໍ ນຕ຺ຖິ ປິຍາປ຺ປິຍໍ.

ປິຍໂຕ ຊາຍຕີ ໂສໂກ, ປິຍໂຕ ຊາຍຕີ [ຊາຍເຕ (ກ.)] ຠຍໍ;

ປິຍໂຕ ວິປ຺ປມຸຕ຺ຕສ຺ສ, ນຕ຺ຖິ ໂສໂກ ກຸໂຕ ຠຍໍ.

ເປມໂຕ ¶ ຊາຍຕີ ໂສໂກ, ເປມໂຕ ຊາຍຕີ ຠຍໍ;

ເປມໂຕ ວິປ຺ປມຸຕ຺ຕສ຺ສ, ນຕ຺ຖິ ໂສໂກ ກຸໂຕ ຠຍໍ.

ຣຕິຍາ ຊາຍຕີ ໂສໂກ, ຣຕິຍາ ຊາຍຕີ ຠຍໍ;

ຣຕິຍາ ວິປ຺ປມຸຕ຺ຕສ຺ສ, ນຕ຺ຖິ ໂສໂກ ກຸໂຕ ຠຍໍ.

ກາມໂຕ ຊາຍຕີ ໂສໂກ, ກາມໂຕ ຊາຍຕີ ຠຍໍ;

ກາມໂຕ ¶ ວິປ຺ປມຸຕ຺ຕສ຺ສ, ນຕ຺ຖິ ໂສໂກ ກຸໂຕ ຠຍໍ.

ຕຓ຺ຫາຍ ຊາຍຕີ [ຊາຍເຕ (ກ.)] ໂສໂກ, ຕຓ຺ຫາຍ ຊາຍຕີ ຠຍໍ;

ຕຓ຺ຫາຍ ວິປ຺ປມຸຕ຺ຕສ຺ສ, ນຕ຺ຖິ ໂສໂກ ກຸໂຕ ຠຍໍ.

ສີລທສ຺ສນສມ຺ປນ຺ນໍ ¶ , ຘມ຺ມຏ຺ຐໍ ສຈ຺ຈເວທິນໍ;

ອຕ຺ຕໂນ ກມ຺ມ ກຸພ຺ພານໍ, ຕໍ ຊໂນ ກຸຣຸເຕ ປິຍໍ.

ຉນ຺ທຊາໂຕ ອນກ຺ຂາເຕ, ມນສາ ຈ ຜຸໂຏ ສິຍາ;

ກາເມສຸ ຈ ອປ຺ປຏິພທ຺ຘຈິຕ຺ໂຕ [ອປ຺ປຏິພນ຺ຘຈິຕ຺ໂຕ (ກ.)], ອຸທ຺ຘໍໂສໂຕຕິ ວຸຈ຺ຈຕິ.

ຈິຣປ຺ປວາສິໍ ປຸຣິສໍ, ທູຣໂຕ ໂສຕ຺ຖິມາຄຕໍ;

ຎາຕິມິຕ຺ຕາ ສຸຫຊ຺ຊາ ຈ, ອຠິນນ຺ທນ຺ຕິ ອາຄຕໍ.

ຕເຖວ ¶ ກຕປຸຎ຺ຎມ຺ປິ, ອສ຺ມາ ໂລກາ ປຣໍ ຄຕໍ;

ປຸຎ຺ຎານິ ປຏິຄຓ຺ຫນ຺ຕິ, ປິຍໍ ຎາຕີວ ອາຄຕໍ.

ໂກຘໍ ¶ ຊເຫ ວິປ຺ປຊເຫຍ຺ຍ ມານໍ, ສໍໂຍຊນໍ ສພ຺ພມຕິກ຺ກເມຍ຺ຍ;

ຕໍ ນາມຣູປສ຺ມິມສຊ຺ຊມານໍ, ອກິຎ຺ຈນໍ ນານຸປຕນ຺ຕິ ທຸກ຺ຂາ.

ໂຍ ເວ ອຸປ຺ປຕິຕໍ ໂກຘໍ, ຣຖໍ ຠນ຺ຕໍວ ວາຣເຍ [ຘາຣເຍ (ສີ. ສ຺ຍາ. ປີ.)];

ຕມຫໍ ¶ ສາຣຖິໍ ພ຺ຣູມິ, ຣສ຺ມິຄ຺ຄາໂຫ ອິຕໂຣ ຊໂນ.

ອກ຺ໂກເຘນ ຊິເນ ໂກຘໍ, ອສາຘຸໍ ສາຘຸນາ ຊິເນ;

ຊິເນ ກທຣິຍໍ ທາເນນ, ສຈ຺ເຈນາລິກວາທິນໍ.

ສຈ຺ຈໍ ຠເຓ ນ ກຸຊ຺ເຌຍ຺ຍ, ທຊ຺ຊາ ອປ຺ປມ຺ປິ [ທຊ຺ຊາ’ປ຺ປສ຺ມິມ຺ປິ (ສີ. ປີ.), ທຊ຺ຊາ ອປ຺ປສ຺ມິ (ສ຺ຍາ. ກ.)] ຍາຈິໂຕ;

ເອເຕຫິ ຕີຫິ ຐາເນຫິ, ຄຈ຺ເຉ ເທວານ ສນ຺ຕິເກ.

ອຫິໍສກາ ¶ ¶ ເຍ ມຸນໂຍ [ອຫິໍສກາຍາ ມຸນໂຍ (ກ.)], ນິຈ຺ຈໍ ກາເຍນ ສໍວຸຕາ;

ເຕ ຍນ຺ຕິ ອຈ຺ຈຸຕໍ ຐານໍ, ຍຕ຺ຖ ຄນ຺ຕ຺ວາ ນ ໂສຈເຣ.

ສທາ ຊາຄຣມານານໍ, ອໂຫຣຕ຺ຕານຸສິກ຺ຂິນໍ;

ນິພ຺ພານໍ ອຘິມຸຕ຺ຕານໍ, ອຕ຺ຖໍ ຄຈ຺ຉນ຺ຕິ ອາສວາ.

ໂປຣາຓເມຕໍ ¶ ອຕຸລ, ເນຕໍ ອຊ຺ຊຕນາມິວ;

ນິນ຺ທນ຺ຕິ ຕຸຓ຺ຫິມາສີນໍ, ນິນ຺ທນ຺ຕິ ພຫຸຠາຓິນໍ;

ມິຕຠາຓິມ຺ປິ ນິນ຺ທນ຺ຕິ, ນຕ຺ຖິ ໂລເກ ອນິນ຺ທິໂຕ.

ນ ຈາຫຸ ນ ຈ ຠວິສ຺ສຕິ, ນ ເຈຕຣຫິ ວິຊ຺ຊຕິ;

ເອກນ຺ຕໍ ນິນ຺ທິໂຕ ໂປໂສ, ເອກນ຺ຕໍ ວາ ປສໍສິໂຕ.

ຍໍ ເຈ ວິຎ຺ຎູ ປສໍສນ຺ຕິ, ອນຸວິຈ຺ຈ ສຸເວ ສຸເວ;

ອຈ຺ຉິທ຺ທວຸຕ຺ຕິໍ [ອຈ຺ຉິນ຺ນວຸຕ຺ຕິໍ (ກ.)] ເມຘາວິໍ, ປຎ຺ຎາສີລສມາຫິຕໍ.

ນິກ຺ຂໍ [ເນກ຺ຂໍ (ສີ. ສ຺ຍາ. ປີ.)] ຊມ຺ໂພນທສ຺ເສວ, ໂກ ຕໍ ນິນ຺ທິຕຸມຣຫຕິ;

ເທວາປິ ນໍ ປສໍສນ຺ຕິ, ພ຺ຣຫ຺ມຸນາປິ ປສໍສິໂຕ.

ກາຍປ຺ປໂກປໍ ຣກ຺ເຂຍ຺ຍ, ກາເຍນ ສໍວຸໂຕ ສິຍາ;

ກາຍທຸຈ຺ຈຣິຕໍ ຫິຕ຺ວາ, ກາເຍນ ສຸຈຣິຕໍ ຈເຣ.

ວຈີປໂກປໍ ¶ ຣກ຺ເຂຍ຺ຍ, ວາຈາຍ ສໍວຸໂຕ ສິຍາ;

ວຈີທຸຈ຺ຈຣິຕໍ ຫິຕ຺ວາ, ວາຈາຍ ສຸຈຣິຕໍ ຈເຣ.

ມໂນປໂກປໍ ຣກ຺ເຂຍ຺ຍ, ມນສາ ສໍວຸໂຕ ສິຍາ;

ມໂນທຸຈ຺ຈຣິຕໍ ຫິຕ຺ວາ, ມນສາ ສຸຈຣິຕໍ ຈເຣ.

ກາເຍນ ¶ ສໍວຸຕາ ຘີຣາ, ອໂຖ ວາຈາຍ ສໍວຸຕາ;

ມນສາ ສໍວຸຕາ ຘີຣາ, ເຕ ເວ ສຸປຣິສໍວຸຕາ.

ປຓ຺ຑຸປລາໂສວ ¶ ທານິສິ, ຍມປຸຣິສາປິ ຈ ເຕ [ຕໍ (ສີ. ສ຺ຍາ. ກໍ. ປີ.)] ອຸປຏ຺ຐິຕາ;

ອຸຍ຺ໂຍຄມຸເຂ ຈ ຕິຏ຺ຐສິ, ປາເຖຍ຺ຍມ຺ປິ ຈ ເຕ ນ ວິຊ຺ຊຕິ.

ໂສ ¶ ກໂຣຫິ ທີປມຕ຺ຕໂນ, ຂິປ຺ປໍ ວາຍມ ປຓ຺ຑິໂຕ ຠວ;

ນິທ຺ຘນ຺ຕມໂລ ອນງ຺ຄໂຓ, ທິພ຺ພໍ ອຣິຍຠູມິໍ ອຸເປຫິສິ [ທິພ຺ພໍ ອຣິຍຠູມິເມຫິສິ (ສີ. ສ຺ຍາ. ປີ.), ທິພ຺ພມຣິຍຠູມິໍ ອຸເປຫິສິ (?)].

ອຸປນີຕວໂຍ ຈ ທານິສິ, ສມ຺ປຍາໂຕສິ ¶ ຍມສ຺ສ ສນ຺ຕິເກ;

ວາໂສ [ວາໂສປິ ຈ (ພຫູສຸ)] ເຕ ນຕ຺ຖິ ອນ຺ຕຣາ, ປາເຖຍ຺ຍມ຺ປິ ຈ ເຕ ນ ວິຊ຺ຊຕິ.

ໂສ ກໂຣຫິ ທີປມຕ຺ຕໂນ, ຂິປ຺ປໍ ວາຍມ ປຓ຺ຑິໂຕ ຠວ;

ນິທ຺ຘນ຺ຕມໂລ ອນງ຺ຄໂຓ, ນ ປຸນໍ ຊາຕິຊຣໍ [ນ ປຸນ ຊາຕິຊຣໍ (ສີ. ສ຺ຍາ.), ນ ປຸນ ຊາຕິຊ຺ຊຣໍ (ກ.)] ອຸເປຫິສິ.

ອນຸປຸພ຺ເພນ ເມຘາວີ, ໂຖກໍ ໂຖກໍ ຂເຓ ຂເຓ;

ກມ຺ມາໂຣ ຣຊຕສ຺ເສວ, ນິທ຺ຘເມ ມລມຕ຺ຕໂນ.

ອຍສາວ ມລໍ ສມຸຏ຺ຐິຕໍ [ສມຸຏ຺ຐາຍ (ກ.)], ຕຕຸຏ຺ຐາຍ [ຕທຸຏ຺ຐາຍ (ສີ. ສ຺ຍາ. ປີ.)] ຕເມວ ຂາທຕິ;

ເອວໍ ອຕິໂຘນຈາຣິນໍ, ສານິ ກມ຺ມານິ [ສກກມ຺ມານິ (ສີ. ປີ.)] ນຍນ຺ຕິ ທຸຄ຺ຄຕິໍ.

ອສຊ຺ຌາຍມລາ ¶ ¶ ມນ຺ຕາ, ອນຸຏ຺ຐານມລາ ຆຣາ;

ມລໍ ວຓ຺ຓສ຺ສ ໂກສຊ຺ຊໍ, ປມາໂທ ຣກ຺ຂໂຕ ມລໍ.

ມລິຕ຺ຖິຍາ ທຸຈ຺ຈຣິຕໍ, ມຈ຺ເຉຣໍ ທທໂຕ ມລໍ;

ມລາ ເວ ປາປກາ ຘມ຺ມາ, ອສ຺ມິໍ ໂລເກ ປຣມ຺ຫິ ຈ.

ຕໂຕ ມລາ ມລຕຣໍ, ອວິຊ຺ຊາ ປຣມໍ ມລໍ;

ເອຕໍ ມລໍ ປຫນ຺ຕ຺ວານ, ນິມ຺ມລາ ໂຫຖ ຠິກ຺ຂໂວ.

ສຸຊີວໍ ¶ ອຫິຣິເກນ, ກາກສູເຣນ ຘໍສິນາ;

ປກ຺ຂນ຺ທິນາ ປຄພ຺ເຠນ, ສໍກິລິຏ຺ເຐນ ຊີວິຕໍ.

ຫິຣີມຕາ ¶ ຈ ທຸຊ຺ຊີວໍ, ນິຈ຺ຈໍ ສຸຈິຄເວສິນາ;

ອລີເນນາປ຺ປຄພ຺ເຠນ, ສຸທ຺ຘາຊີເວນ ປສ຺ສຕາ.

ໂຍ ປາຓມຕິປາເຕຕິ, ມຸສາວາທຎ຺ຈ ຠາສຕິ;

ໂລເກ ອທິນ຺ນມາທິຍຕິ, ປຣທາຣຎ຺ຈ ຄຈ຺ຉຕິ.

ສຸຣາເມຣຍປານຎ຺ຈ, ໂຍ ນໂຣ ອນຸຍຸຎ຺ຊຕິ;

ອິເຘວເມໂສ ໂລກສ຺ມິໍ, ມູລໍ ຂຓຕິ ອຕ຺ຕໂນ.

ເອວໍ ໂຠ ປຸຣິສ ຊານາຫິ, ປາປຘມ຺ມາ ອສຎ຺ຎຕາ;

ມາ ຕໍ ໂລໂຠ ອຘມ຺ໂມ ຈ, ຈິຣໍ ທຸກ຺ຂາຍ ຣນ຺ຘຍຸໍ.

ທທາຕິ ເວ ຍຖາສທ຺ຘໍ, ຍຖາປສາທນໍ [ຍຕ຺ຖ ປສາທນໍ (ກຕ຺ຖຈິ)] ຊໂນ;

ຕຕ຺ຖ ໂຍ ມງ຺ກຸ ຠວຕິ [ຕຕ຺ຖ ເຈ ມໍກຸ ໂຍ ໂຫຕິ (ສີ.), ຕຕ຺ຖ ໂຍ ມງ຺ກຸໂຕ ໂຫຕິ (ສ຺ຍາ.)], ປເຣສໍ ປານໂຠຊເນ;

ນ ໂສ ທິວາ ວາ ຣຕ຺ຕິໍ ວາ, ສມາຘິມຘິຄຈ຺ຉຕິ.

ຍສ຺ສ ¶ ¶ ເຈຕໍ ສມຸຈ຺ຉິນ຺ນໍ, ມູລຆຈ຺ຈໍ [ມູລຆຈ຺ຉໍ (ກ.)] ສມູຫຕໍ;

ສ ເວ ທິວາ ວາ ຣຕ຺ຕິໍ ວາ, ສມາຘິມຘິຄຈ຺ຉຕິ.

ນຕ຺ຖິ ຣາຄສໂມ ອຄ຺ຄິ, ນຕ຺ຖິ ໂທສສໂມ ຄໂຫ;

ນຕ຺ຖິ ໂມຫສມໍ ຊາລໍ, ນຕ຺ຖິ ຕຓ຺ຫາສມາ ນທີ.

ສຸທສ຺ສໍ ວຊ຺ຊມຎ຺ເຎສໍ, ອຕ຺ຕໂນ ປນ ທຸທ຺ທສໍ;

ປເຣສໍ ຫິ ໂສ ວຊ຺ຊານິ, ໂອປຸນາຕິ [ໂອຜຸນາຕິ (ກ.)] ຍຖາ ຠຸສໍ;

ອຕ຺ຕໂນ ປນ ຉາເທຕິ, ກລິໍວ ກິຕວາ ສໂຐ.

ປຣວຊ຺ຊານຸປສ຺ສິສ຺ສ ¶ , ¶ ນິຈ຺ຈໍ ອຸຊ຺ຌານສຎ຺ຎິໂນ;

ອາສວາ ຕສ຺ສ ວຑ຺ຒນ຺ຕິ, ອາຣາ ໂສ ອາສວກ຺ຂຍາ.

ອາກາເສວ ປທໍ ນຕ຺ຖິ, ສມໂຓ ນຕ຺ຖິ ພາຫິເຣ;

ປປຎ຺ຈາຠິຣຕາ ປຊາ, ນິປ຺ປປຎ຺ຈາ ຕຖາຄຕາ.

ອາກາເສວ ປທໍ ນຕ຺ຖິ, ສມໂຓ ນຕ຺ຖິ ພາຫິເຣ;

ສງ຺ຂາຣາ ສສ຺ສຕາ ນຕ຺ຖິ, ນຕ຺ຖິ ພຸທ຺ຘານມິຎ຺ຊິຕໍ.

ນ ¶ ເຕນ ໂຫຕິ ຘມ຺ມຏ຺ໂຐ, ເຍນຕ຺ຖໍ ສາຫສາ [ສຫສາ (ສີ. ສ຺ຍາ. ກ.)] ນເຍ;

ໂຍ ຈ ອຕ຺ຖໍ ອນຕ຺ຖຎ຺ຈ, ອຸໂຠ ນິຈ຺ເຉຍ຺ຍ ປຓ຺ຑິໂຕ.

ອສາຫເສນ ¶ ຘມ຺ເມນ, ສເມນ ນຍຕີ ປເຣ;

ຘມ຺ມສ຺ສ ຄຸຕ຺ໂຕ ເມຘາວີ, ‘‘ຘມ຺ມຏ຺ໂຐ’’ຕິ ປວຸຈ຺ຈຕິ.

ນ ເຕນ ປຓ຺ຑິໂຕ ໂຫຕິ, ຍາວຕາ ພຫຸ ຠາສຕິ;

ເຂມີ ອເວຣີ ອຠໂຍ, ‘‘ປຓ຺ຑິໂຕ’’ຕິ ປວຸຈ຺ຈຕິ.

ນ ຕາວຕາ ຘມ຺ມຘໂຣ, ຍາວຕາ ພຫຸ ຠາສຕິ;

ໂຍ ຈ ອປ຺ປມ຺ປິ ສຸຕ຺ວານ, ຘມ຺ມໍ ກາເຍນ ປສ຺ສຕິ;

ສ ເວ ຘມ຺ມຘໂຣ ໂຫຕິ, ໂຍ ຘມ຺ມໍ ນປ຺ປມຊ຺ຊຕິ.

ນ ¶ ເຕນ ເຖໂຣ ໂສ ໂຫຕິ [ເຖໂຣ ໂຫຕິ (ສີ. ສ຺ຍາ.)], ເຍນສ຺ສ ປລິຕໍ ສິໂຣ;

ປຣິປກ຺ໂກ ¶ ວໂຍ ຕສ຺ສ, ‘‘ໂມຆຊິຓ຺ໂຓ’’ຕິ ວຸຈ຺ຈຕິ.

ຍມ຺ຫິ ສຈ຺ຈຎ຺ຈ ຘມ຺ໂມ ຈ, ອຫິໍສາ ສໍຍໂມ ທໂມ;

ສ ເວ ວນ຺ຕມໂລ ຘີໂຣ, ‘‘ເຖໂຣ’’ ອິຕິ [ໂສ ເຖໂຣຕິ (ສ຺ຍາ. ກ.)] ປວຸຈ຺ຈຕິ.

ນ ວາກ຺ກຣຓມຕ຺ເຕນ, ວຓ຺ຓໂປກ຺ຂຣຕາຍ ວາ;

ສາຘຸຣູໂປ ນໂຣ ໂຫຕິ, ອິສ຺ສຸກີ ມຈ຺ຉຣີ ສໂຐ.

ຍສ຺ສ ເຈຕໍ ສມຸຈ຺ຉິນ຺ນໍ, ມູລຆຈ຺ຈໍ ສມູຫຕໍ;

ສ ວນ຺ຕໂທໂສ ເມຘາວີ, ‘‘ສາຘຸຣູໂປ’’ຕິ ວຸຈ຺ຈຕິ.

ນ ມຸຓ຺ຑເກນ ສມໂຓ, ອພ຺ພໂຕ ອລິກໍ ຠຓໍ;

ອິຈ຺ຉາໂລຠສມາປນ຺ໂນ, ສມໂຓ ກິໍ ຠວິສ຺ສຕິ.

ໂຍ ¶ ຈ ສເມຕິ ປາປານິ, ອຓຸໍ ຖູລານິ ສພ຺ພໂສ;

ສມິຕຕ຺ຕາ ຫິ ປາປານໍ, ‘‘ສມໂຓ’’ຕິ ປວຸຈ຺ຈຕິ.

ນ ¶ ເຕນ ຠິກ຺ຂຸ ໂສ ໂຫຕິ, ຍາວຕາ ຠິກ຺ຂເຕ ປເຣ;

ວິສ຺ສໍ ຘມ຺ມໍ ສມາທາຍ, ຠິກ຺ຂຸ ໂຫຕິ ນ ຕາວຕາ.

ໂຍຘ ປຸຎ຺ຎຎ຺ຈ ປາປຎ຺ຈ, ພາເຫຕ຺ວາ ພ຺ຣຫ຺ມຈຣິຍວາ [ພ຺ຣຫ຺ມຈຣິຍໍ (ກ.)];

ສງ຺ຂາຍ ໂລເກ ຈຣຕິ, ສ ເວ ‘‘ຠິກ຺ຂູ’’ຕິ ວຸຈ຺ຈຕິ.

ນ ໂມເນນ ມຸນີ ໂຫຕິ, ມູຬ຺ຫຣູໂປ ອວິທ຺ທສຸ;

ໂຍ ຈ ຕຸລໍວ ປຄ຺ຄຍ຺ຫ, ວຣມາທາຍ ປຓ຺ຑິໂຕ.

ປາປານິ ¶ ປຣິວຊ຺ເຊຕິ, ສ ມຸນີ ເຕນ ໂສ ມຸນິ;

ໂຍ ມຸນາຕິ ອຸໂຠ ໂລເກ, ‘‘ມຸນິ’’ ເຕນ ປວຸຈ຺ຈຕິ.

ນ ເຕນ ອຣິໂຍ ໂຫຕິ, ເຍນ ປາຓານິ ຫິໍສຕິ;

ອຫິໍສາ ¶ ສພ຺ພປາຓານໍ, ‘‘ອຣິໂຍ’’ຕິ ປວຸຈ຺ຈຕິ.

ນ ສີລພ຺ພຕມຕ຺ເຕນ, ພາຫຸສຈ຺ເຈນ ວາ ປນ;

ອຖ ວາ ສມາຘິລາເຠນ, ວິວິຕ຺ຕສຍເນນ ວາ.

ຜຸສາມິ ເນກ຺ຂມ຺ມສຸຂໍ, ອປຸຖຸຊ຺ຊນເສວິຕໍ;

ຠິກ຺ຂຸ ວິສ຺ສາສມາປາທິ, ອປ຺ປຕ຺ໂຕ ອາສວກ຺ຂຍໍ.

ຘມ຺ມຏ຺ຐວຄ຺ໂຄ ເອກູນວີສຕິໂມ ນິຏ຺ຐິໂຕ.

ມຄ຺ຄານຏ຺ຐງ຺ຄິໂກ ¶ ¶ ເສຏ຺ໂຐ, ສຈ຺ຈານໍ ຈຕຸໂຣ ປທາ;

ວິຣາໂຄ ເສຏ຺ໂຐ ຘມ຺ມານໍ, ທ຺ວິປທານຎ຺ຈ ຈກ຺ຂຸມາ.

ເອເສວ [ເອໂສວ (ສີ. ປີ.)] ມຄ຺ໂຄ ນຕ຺ຖຎ຺ໂຎ, ທສ຺ສນສ຺ສ ວິສຸທ຺ຘິຍາ;

ເອຕຎ຺ຫິ ຕຸມ຺ເຫ ປຏິປຊ຺ຊຖ, ມາຣສ຺ເສຕໍ ປໂມຫນໍ.

ເອຕຎ຺ຫິ ຕຸມ຺ເຫ ປຏິປນ຺ນາ, ທຸກ຺ຂສ຺ສນ຺ຕໍ ກຣິສ຺ສຖ;

ອກ຺ຂາໂຕ ໂວ [ອກ຺ຂາໂຕ ເວ (ສີ. ປີ.)] ມຍາ ມຄ຺ໂຄ, ອຎ຺ຎາຍ ສລ຺ລກນ຺ຕນໍ [ສລ຺ລສນ຺ຖນໍ (ສີ. ປີ.), ສລ຺ລສຕ຺ຖນໍ (ສ຺ຍາ.)].

ຕຸມ຺ເຫຫິ ກິຈ຺ຈມາຕປ຺ປໍ, ອກ຺ຂາຕາໂຣ ຕຖາຄຕາ;

ປຏິປນ຺ນາ ປໂມກ຺ຂນ຺ຕິ, ຌາຍິໂນ ມາຣພນ຺ຘນາ.

‘‘ສພ຺ເພ ¶ ສງ຺ຂາຣາ ອນິຈ຺ຈາ’’ຕິ, ຍທາ ປຎ຺ຎາຍ ປສ຺ສຕິ;

ອຖ ¶ ນິພ຺ພິນ຺ທຕິ ທຸກ຺ເຂ, ເອສ ມຄ຺ໂຄ ວິສຸທ຺ຘິຍາ.

‘‘ສພ຺ເພ ສງ຺ຂາຣາ ທຸກ຺ຂາ’’ຕິ, ຍທາ ປຎ຺ຎາຍ ປສ຺ສຕິ;

ອຖ ນິພ຺ພິນ຺ທຕິ ທຸກ຺ເຂ, ເອສ ມຄ຺ໂຄ ວິສຸທ຺ຘິຍາ.

‘‘ສພ຺ເພ ຘມ຺ມາ ອນຕ຺ຕາ’’ຕິ, ຍທາ ປຎ຺ຎາຍ ປສ຺ສຕິ;

ອຖ ນິພ຺ພິນ຺ທຕິ ທຸກ຺ເຂ, ເອສ ມຄ຺ໂຄ ວິສຸທ຺ຘິຍາ.

ອຸຏ຺ຐານກາລມ຺ຫິ ອນຸຏ຺ຐຫາໂນ, ຍຸວາ ພລີ ອາລສິຍໍ ອຸເປໂຕ;

ສໍສນ຺ນສງ຺ກປ຺ປມໂນ [ອສມ຺ປນ຺ນສງ຺ກປ຺ປມໂນ (ກ.)] ກຸສີໂຕ, ປຎ຺ຎາຍ ມຄ຺ຄໍ ອລໂສ ນ ວິນ຺ທຕິ.

ວາຈານຸຣກ຺ຂີ ¶ ¶ ມນສາ ສຸສໍວຸໂຕ, ກາເຍນ ຈ ນາກຸສລໍ ກຍິຣາ [ອກຸສລໍ ນ ກຍິຣາ (ສີ. ສ຺ຍາ. ກໍ. ປີ.)];

ເອເຕ ຕໂຍ ກມ຺ມປເຖ ວິໂສຘເຍ, ອາຣາຘເຍ ມຄ຺ຄມິສິປ຺ປເວທິຕໍ.

ໂຍຄາ ເວ ຊາຍຕີ [ຊາຍເຕ (ກຕ຺ຖຈິ)] ຠູຣິ, ອໂຍຄາ ຠູຣິສງ຺ຂໂຍ;

ເອຕໍ ທ຺ເວຘາປຖໍ ຎຕ຺ວາ, ຠວາຍ ວິຠວາຍ ຈ;

ຕຖາຕ຺ຕານໍ ນິເວເສຍ຺ຍ, ຍຖາ ຠູຣິ ປວຑ຺ຒຕິ.

ວນໍ ¶ ຉິນ຺ທຖ ມາ ຣຸກ຺ຂໍ, ວນໂຕ ຊາຍເຕ ຠຍໍ;

ເຉຕ຺ວາ ວນຎ຺ຈ ວນຖຎ຺ຈ, ນິພ຺ພນາ ໂຫຖ ຠິກ຺ຂໂວ.

ຍາວ ຫິ ວນໂຖ ນ ຉິຊ຺ຊຕິ, ອຓຸມຕ຺ໂຕປິ ນຣສ຺ສ ນາຣິສຸ;

ປຏິພທ຺ຘມໂນວ [ປຏິພນ຺ຘມໂນວ (ກ.)] ຕາວ ໂສ, ວຈ຺ໂຉ ຂີຣປໂກວ [ຂີຣປາໂນວ (ປີ.)] ມາຕຣິ.

ອຸຈ຺ຉິນ຺ທ ¶ ສິເນຫມຕ຺ຕໂນ ກຸມຸທໍ ສາຣທິກໍວ [ປາຓິນາ];

ສນ຺ຕິມຄ຺ຄເມວ ພ຺ຣູຫຍ, ນິພ຺ພານໍ ສຸຄເຕນ ເທສິຕໍ.

ອິຘ ວສ຺ສໍ ວສິສ຺ສາມິ, ອິຘ ເຫມນ຺ຕຄິມ຺ຫິສຸ;

ອິຕິ ພາໂລ ວິຈິນ຺ເຕຕິ, ອນ຺ຕຣາຍໍ ນ ພຸຊ຺ຌຕິ.

ຕໍ ປຸຕ຺ຕປສຸສມ຺ມຕ຺ຕໍ, ພ຺ຍາສຕ຺ຕມນສໍ ນຣໍ;

ສຸຕ຺ຕໍ ຄາມໍ ມໂຫໂຆວ, ມຈ຺ຈຸ ອາທາຍ ຄຈ຺ຉຕິ.

ນ ¶ ສນ຺ຕິ ປຸຕ຺ຕາ ຕາຓາຍ, ນ ປິຕາ ນາປິ ພນ຺ຘວາ;

ອນ຺ຕເກນາຘິປນ຺ນສ຺ສ, ນຕ຺ຖິ ຎາຕີສຸ ຕາຓຕາ.

ເອຕມຕ຺ຖວສໍ ຎຕ຺ວາ, ປຓ຺ຑິໂຕ ສີລສໍວຸໂຕ;

ນິພ຺ພານຄມນໍ ມຄ຺ຄໍ, ຂິປ຺ປເມວ ວິໂສຘເຍ.

ມຕ຺ຕາສຸຂປຣິຈ຺ຈາຄາ ¶ ¶ , ປສ຺ເສ ເຈ ວິປຸລໍ ສຸຂໍ;

ຈເຊ ມຕ຺ຕາສຸຂໍ ຘີໂຣ, ສມ຺ປສ຺ສໍ ວິປຸລໍ ສຸຂໍ.

ປຣທຸກ຺ຂູປຘາເນນ, ອຕ຺ຕໂນ [ໂຍ ອຕ຺ຕໂນ (ສ຺ຍາ. ປີ. ກ.)] ສຸຂມິຈ຺ຉຕິ;

ເວຣສໍສຄ຺ຄສໍສຏ຺ໂຐ, ເວຣາ ໂສ ນ ປຣິມຸຈ຺ຈຕິ.

ຍຎ຺ຫິ ¶ ກິຈ຺ຈໍ ອປວິທ຺ຘໍ [ຕທປວິທ຺ຘໍ (ສີ. ສ຺ຍາ.)], ອກິຈ຺ຈໍ ປນ ກຍິຣຕິ;

ອຸນ຺ນຬານໍ ປມຕ຺ຕານໍ, ເຕສໍ ວຑ຺ຒນ຺ຕິ ອາສວາ.

ເຍສຎ຺ຈ ສຸສມາຣທ຺ຘາ, ນິຈ຺ຈໍ ກາຍຄຕາ ສຕິ;

ອກິຈ຺ຈໍ ເຕ ນ ເສວນ຺ຕິ, ກິຈ຺ເຈ ສາຕຈ຺ຈກາຣິໂນ;

ສຕານໍ ສມ຺ປຊານານໍ, ອຕ຺ຖໍ ຄຈ຺ຉນ຺ຕິ ອາສວາ.

ມາຕຣໍ ¶ ປິຕຣໍ ຫນ຺ຕ຺ວາ, ຣາຊາໂນ ທ຺ເວ ຈ ຂຕ຺ຕິເຍ;

ຣຏ຺ຐໍ ສານຸຈຣໍ ຫນ຺ຕ຺ວາ, ອນີໂຆ ຍາຕິ ພ຺ຣາຫ຺ມໂຓ.

ມາຕຣໍ ປິຕຣໍ ຫນ຺ຕ຺ວາ, ຣາຊາໂນ ທ຺ເວ ຈ ໂສຕ຺ຖິເຍ;

ເວຍຄ຺ຆປຎ຺ຈມໍ ຫນ຺ຕ຺ວາ, ອນີໂຆ ຍາຕິ ພ຺ຣາຫ຺ມໂຓ.