ມູລ > ສຸຕ຺ຕປິຏກ > ຂຸທ຺ທກນິກາຍ

THA Vol 0
MMR Vol 0
VRI Vol 0
PTS Vol 0

Misc. Paragraph

ຂຸທ຺ທກນິກາເຍ

ເຖຣີຄາຖາປາຬິ

໕. ອຎ຺ຎຕຣາຕິສ຺ສາເຖຣີຄາຖາ

໑໒. ຘມ຺ມທິນ຺ນາເຖຣີຄາຖາ

໑໓.ວິສາຂາເຖຣີຄາຖາ

໑໔.ສຸມນາເຖຣີຄາຖາ

໑໕. ອຸຕ຺ຕຣາເຖຣີຄາຖາ

໑໖. ວຸຑ຺ຒປພ຺ພຊິຕສຸມນາເຖຣີຄາຖາ

໑໗. ຘມ຺ມາເຖຣີຄາຖາ

໑໘. ສງ຺ຆາເຖຣີຄາຖາ

໒. ທຸກນິປາໂຕ

໑. ອຠິຣູປນນ຺ທາເຖຣີຄາຖາ

໒. ເຊນ຺ຕາເຖຣີຄາຖາ

໓. ສຸມງ຺ຄລມາຕາເຖຣີຄາຖາ

໓. ອປຣາອຸຕ຺ຕມາເຖຣີຄາຖາ

໑. ຠທ຺ທາກາປິລານີເຖຣີຄາຖາ

໔. ສຸນ຺ທຣີນນ຺ທາເຖຣີຄາຖາ

໕. ນນ຺ທຸຕ຺ຕຣາເຖຣີຄາຖາ

໖. ມິຕ຺ຕາກາຬີເຖຣີຄາຖາ

໗. ສກຸລາເຖຣີຄາຖາ

໘. ໂສຓາເຖຣີຄາຖາ

໙. ຠທ຺ທາກຸຓ຺ຑລເກສາເຖຣີຄາຖາ

໑໐. ປຏາຈາຣາເຖຣີຄາຖາ

໑໑. ຕິໍສມຕ຺ຕາເຖຣີຄາຖາ

໑໒. ຈນ຺ທາເຖຣີຄາຖາ

໖. ຉກ຺ກນິປາໂຕ

໑. ປຎ຺ຈສຕມຕ຺ຕາເຖຣີຄາຖາ

໖. ມຫາປຊາປຕິໂຄຕມີເຖຣີຄາຖາ

໑. ອຸປ຺ປລວຓ຺ຓາເຖຣີຄາຖາ

໕. ສຸຠາກມ຺ມາຣຘີຕຸເຖຣີຄາຖາ

໑໔. ຕິໍສນິປາໂຕ

໑. ສຸຠາຊີວກມ຺ພວນິກາເຖຣີຄາຖາ

ນໂມ ຕສ຺ສ ຠຄວໂຕ ອຣຫໂຕ ສມ຺ມາສມ຺ພຸທ຺ຘສ຺ສ

‘‘ສຸຂໍ ¶ ¶ ¶ ¶ ສຸປາຫິ ເຖຣິເກ, ກຕ຺ວາ ໂຈເຬນ ປາຣຸຕາ;

ອຸປສນ຺ໂຕ ຫິ ເຕ ຣາໂຄ, ສຸກ຺ຂຑາກໍ ວ ກຸມ຺ຠິຍ’’ນ຺ຕິ.

ອິຕ຺ຖໍ ສຸທໍ ອຎ຺ຎຕຣາ ເຖຣີ ອປຎ຺ຎາຕາ ຠິກ຺ຂຸນີ ຄາຖໍ ອຠາສິຕ຺ຖາຕິ.

‘‘ມຸຕ຺ເຕ ¶ ມຸຈ຺ຈສ຺ສຸ ໂຍເຄຫິ, ຈນ຺ໂທ ຣາຫຸຄ຺ຄຫາ ອິວ;

ວິປ຺ປມຸຕ຺ເຕນ ຈິຕ຺ເຕນ, ອນຓາ ຠຸຎ຺ຊ ປິຓ຺ຑກ’’ນ຺ຕິ.

ອິຕ຺ຖໍ ສຸທໍ ຠຄວາ ມຸຕ຺ຕໍ ສິກ຺ຂມານໍ ອິມາຍ ຄາຖາຍ ອຠິຓ຺ຫໍ ໂອວທຕີຕິ.

‘‘ປຸຓ຺ເຓ ປູຣສ຺ສຸ ຘມ຺ເມຫິ, ຈນ຺ໂທ ປນ຺ນຣເສຣິວ;

ປຣິປຸຓ຺ຓາຍ ປຎ຺ຎາຍ, ຕໂມຂນ຺ຘໍ [ຕໂມກ຺ຂນ຺ຘໍ (ສີ. ສ຺ຍາ.)] ປທາລຍາ’’ຕິ.

ອິຕ຺ຖໍ ສຸທໍ ປຸຓ຺ຓາ ເຖຣີ ຄາຖໍ ອຠາສິຕ຺ຖາຕິ.

‘‘ຕິສ຺ເສ ສິກ຺ຂສ຺ສຸ ສິກ຺ຂາຍ, ມາ ຕໍ ໂຍຄາ ອຸປຈ຺ຈຄຸໍ;

ສພ຺ພໂຍຄວິສໍຍຸຕ຺ຕາ, ຈຣ ໂລເກ ອນາສວາ’’ຕິ.

‘‘ຕິສ຺ເສ ¶ ¶ ຍຸຎ຺ຊສ຺ສຸ ຘມ຺ເມຫິ, ຂໂຓ ຕໍ ມາ ອຸປຈ຺ຈຄາ;

ຂຓາຕີຕາ ຫິ ໂສຈນ຺ຕິ, ນິຣຍມ຺ຫິ ສມປ຺ປິຕາ’’ຕິ.

‘‘ຘີເຣ ¶ ນິໂຣຘໍ ຜຸເສຫິ [ຜຸສ຺ເສຫິ (ສີ.)], ສຎ຺ຎາວູປສມໍ ສຸຂໍ;

ອາຣາຘຍາຫິ ນິພ຺ພານໍ, ໂຍຄກ຺ເຂມມນຸຕ຺ຕຣ’’ນ຺ຕິ [ໂຍຄກ຺ເຂມໍ ອນຸຕ຺ຕຣນ຺ຕິ (ສີ. ສ຺ຍາ.)].

‘‘ວີຣາ ¶ ວີເຣຫິ [ຘີຣາ ຘີເຣຫິ (ກ.)] ຘມ຺ເມຫິ, ຠິກ຺ຂຸນີ ຠາວິຕິນ຺ທ຺ຣິຍາ;

ຘາເຣຫິ ອນ຺ຕິມໍ ເທຫໍ, ເຊຕ຺ວາ ມາຣໍ ສວາຫິນິ’’ນ຺ຕິ [ສວາຫນນ຺ຕິ (ກ.)].

‘‘ສທ຺ຘາຍ ປພ຺ພຊິຕ຺ວານ, ມິຕ຺ເຕ ມິຕ຺ຕຣຕາ ຠວ;

ຠາເວຫິ ກຸສເລ ຘມ຺ເມ, ໂຍຄກ຺ເຂມສ຺ສ ປຕ຺ຕິຍາ’’ຕິ.

‘‘ສທ຺ຘາຍ ປພ຺ພຊິຕ຺ວານ, ຠທ຺ເຣ ຠທ຺ຣຣຕາ ຠວ;

ຠາເວຫິ ກຸສເລ ຘມ຺ເມ, ໂຍຄກ຺ເຂມມນຸຕ຺ຕຣ’’ນ຺ຕິ.

‘‘ອຸປສເມ ຕເຣ ໂອຆໍ, ມຈ຺ຈຸເຘຍ຺ຍໍ ສຸທຸຕ຺ຕຣໍ;

ຘາເຣຫິ ອນ຺ຕິມໍ ເທຫໍ, ເຊຕ຺ວາ ມາຣໍ ສວາຫນ’’ນ຺ຕິ.

‘‘ສຸມຸຕ຺ຕາ ¶ ສາຘຸມຸຕ຺ຕາມ຺ຫິ, ຕີຫິ ຂຸຊ຺ເຊຫິ ມຸຕ຺ຕິຍາ;

ອຸທຸກ຺ຂເລນ ມຸສເລນ, ປຕິນາ ຂຸຊ຺ຊເກນ ຈ;

ມຸຕ຺ຕາມ຺ຫິ ¶ ຊາຕິມຣຓາ, ຠວເນຕ຺ຕິ ສມູຫຕາ’’ຕິ.

‘‘ຉນ຺ທຊາຕາ ອວສາຍີ, ມນສາ ຈ ຜຸຏາ [ຜຸຏ຺ຐາ (ສ຺ຍາ.), ຜຸຐາ (ສີ. ອຏ຺ຐ.)] ສິຍາ;

ກາເມສຸ ອປ຺ປຏິພທ຺ຘຈິຕ຺ຕາ [ອປ຺ປຏິພນ຺ຘຈິຕ຺ຕາ (ກ.)], ອຸທ຺ຘໍໂສຕາຕິ ວຸຈ຺ຈຕີ’’ຕິ [ອຸທ຺ຘໍໂສຕາ ວິມຸຈ຺ຈຕີຕິ (ສີ. ປີ.)].

‘‘ກໂຣຖ ¶ ພຸທ຺ຘສາສນໍ, ຍໍ ກຕ຺ວາ ນານຸຕປ຺ປຕິ;

ຂິປ຺ປໍ ປາທານິ ໂຘວິຕ຺ວາ, ເອກມນ຺ເຕ ນິສີທຖາ’’ຕິ.

‘‘ຘາຕຸໂຍ ທຸກ຺ຂໂຕ ທິສ຺ວາ, ມາ ຊາຕິໍ ປຸນຣາຄມິ;

ຠເວ ຉນ຺ທໍ ວິຣາເຊຕ຺ວາ, ອຸປສນ຺ຕາ ຈຣິສ຺ສສີ’’ຕິ.

‘‘ກາເຍນ ¶ ສໍວຸຕາ ອາສິໍ, ວາຈາຍ ອຸທ ເຈຕສາ;

ສມູລໍ ຕຓ຺ຫມພ຺ພຸຍ຺ຫ, ສີຕິຠູຕາມ຺ຫິ ນິພ຺ພຸຕາ’’ຕິ.

໑໖. ວຸຑ຺ຒປພ຺ພຊິຕສຸມນາເຖຣີຄາຖາ

‘‘ສຸຂໍ ຕ຺ວໍ ວຸຑ຺ຒິເກ ເສຫິ, ກຕ຺ວາ ໂຈເຬນ ປາຣູຕາ;

ອຸປສນ຺ໂຕ ຫິ ເຕ ຣາໂຄ, ສີຕິຠູຕາສິ ນິພ຺ພຸຕາ’’ຕິ.

‘‘ປິຓ຺ຑປາຕໍ ¶ ຈຣິຕ຺ວານ, ທຓ຺ຑໂມລຸພ຺ຠ ທຸພ຺ພລາ;

ເວຘມາເນຫິ ຄຕ຺ເຕຫິ, ຕຕ຺ເຖວ ນິປຕິໍ ຉມາ;

ທິສ຺ວາ ¶ ອາທີນວໍ ກາເຍ, ອຖ ຈິຕ຺ຕໍ ວິມຸຈ຺ຈິ ເມ’’ຕິ.

‘‘ຫິຕ຺ວາ ¶ ຆເຣ ປພ຺ພຊິຕ຺ວາ [ປພ຺ພຊິຕາ (ສີ. ອຏ຺ຐ.)], ຫິຕ຺ວາ ປຸຕ຺ຕໍ ປສຸໍ ປິຍໍ;

ຫິຕ຺ວາ ຣາຄຎ຺ຈ ໂທສຎ຺ຈ, ອວິຊ຺ຊຎ຺ຈ ວິຣາຊິຍ;

ສມູລໍ ຕຓ຺ຫມພ຺ພຸຍ຺ຫ, ອຸປສນ຺ຕາມ຺ຫິ ນິພ຺ພຸຕາ’’ຕິ.

[ອປ. ເຖຣີ ໒.໔.໑໕໗ ອປທາເນປິ] ‘‘ອາຕຸຣໍ ¶ ອສຸຈິໍ ປູຕິໍ, ປສ຺ສ ນນ຺ເທ ສມຸສ຺ສຍໍ;

ອສຸຠາຍ ຈິຕ຺ຕໍ ຠາເວຫິ, ເອກຄ຺ຄໍ ສຸສມາຫິຕໍ.

‘‘ອນິມິຕ຺ຕຎ຺ຈ ຠາເວຫິ, ມານານຸສຍມຸຊ຺ຊຫ;

ຕໂຕ ມານາຠິສມຍາ, ອຸປສນ຺ຕາ ຈຣິສ຺ສສີ’’ຕິ.

ອິຕ຺ຖໍ ສຸທໍ ຠຄວາ ອຠິຣູປນນ຺ທໍ ສິກ຺ຂມານໍ ອິມາຫິ ຄາຖາຫິ ອຠິຓ຺ຫໍ ໂອວທຕີຕິ [ອິຕ຺ຖໍ ສຸທໍ ຠຄວາ ອຠິຣູປນນ຺ທໍ ສິກ຺ຂມານໍ ອິມາຫິ ຄາຖາຫິ ອຠິຓ຺ຫໍ ໂອວທຕີຕິ (ກ.)].

‘‘ເຍ ອິເມ ສຕ຺ຕ ໂພຊ຺ຌງ຺ຄາ, ມຄ຺ຄາ ນິພ຺ພານປຕ຺ຕິຍາ;

ຠາວິຕາ ເຕ ມຍາ ສພ຺ເພ, ຍຖາ ພຸທ຺ເຘນ ເທສິຕາ.

‘‘ທິຏ຺ໂຐ ຫິ ເມ ໂສ ຠຄວາ, ອນ຺ຕິໂມຍໍ ສມຸສ຺ສໂຍ;

ວິກ຺ຂີໂຓ ຊາຕິສໍສາໂຣ, ນຕ຺ຖິ ທານິ ປຸນພ຺ຠໂວ’’ຕິ.

ອິຕ຺ຖໍ ສຸທໍ ເຊນ຺ຕາ ເຖຣີ ຄາຖາໂຍ ອຠາສິຕ຺ຖາຕິ.

‘‘ສຸມຸຕ຺ຕິກາ ¶ ¶ ¶ ສຸມຸຕ຺ຕິກາ [ສຸມຸຕ຺ຕິເກ ສຸມຸຕ຺ຕິເກ (ສີ.), ສຸມຸຕ຺ຕິເກ ສຸມຸຕ຺ຕິກາ (ສ຺ຍາ. ກ.)], ສາຘຸມຸຕ຺ຕິກາມ຺ຫິ ມຸສລສ຺ສ;

ອຫິຣິໂກ ເມ ຉຕ຺ຕກໍ ວາປິ, ອຸກ຺ຂລິກາ ເມ ເທຑ຺ຑຸຠໍ ວາຕິ.

‘‘ຣາຄຎ຺ຈ ອຫໍ ໂທສຎ຺ຈ, ຈິຈ຺ຈິຏິ ຈິຈ຺ຈິຏີຕິ ວິຫນາມິ;

ສາ ຣຸກ຺ຂມູລມຸປຄມ຺ມ, ອໂຫ ສຸຂນ຺ຕິ ສຸຂໂຕ ຌາຍາມີ’’ຕິ.

… ສຸມງ຺ຄລມາຕາ ເຖຣີ [ອຎ຺ຎຕຣາ ເຖຣີ ຠິກ຺ຂຸນີ ອປຎ຺ຎາຕາ (ສ຺ຍາ. ກ.)].

‘‘ຍາວ ກາສິຊນປໂທ, ສຸງ຺ໂກ ເມ ຕຕ຺ຖໂກ ອຫຸ;

ຕໍ ກຕ຺ວາ ເນຄໂມ ອຄ຺ຆໍ, ອຑ຺ເຒນຄ຺ຆໍ ຐເປສິ ມໍ.

‘‘ອຖ ¶ ນິພ຺ພິນ຺ທຫໍ ຣູເປ, ນິພ຺ພິນ຺ທຎ຺ຈ ວິຣຊ຺ຊຫໍ;

ມາ ປຸນ ຊາຕິສໍສາຣໍ, ສນ຺ຘາເວຍ຺ຍໍ ປຸນປ຺ປຸນໍ;

ຕິສ຺ໂສ ວິຊ຺ຊາ ສຈ຺ຉິກຕາ, ກຕໍ ພຸທ຺ຘສ຺ສ ສາສນ’’ນ຺ຕິ.

‘‘ກິຎ຺ຈາປິ ໂຂມ຺ຫິ ກິສິກາ, ຄິລານາ ພາຬ຺ຫທຸພ຺ພລາ;

ທຓ຺ຑໂມລຸພ຺ຠ ຄຈ຺ຉາມິ, ປພ຺ພຕໍ ອຠິຣູຫິຍ.

‘‘ສງ຺ຆາຏິໍ ນິກ຺ຂິປິຕ຺ວານ, ປຕ຺ຕກຎ຺ຈ ນິກຸຊ຺ຊິຍ;

ເສເລ ຂມ຺ເຠສິມຕ຺ຕານໍ, ຕໂມຂນ຺ຘໍ ປທາລິຍາ’’ຕິ.

‘‘ກິຎ຺ຈາປິ ໂຂມ຺ຫິ ທຸກ຺ຂິຕາ, ທຸພ຺ພລາ ຄຕໂຍພ຺ພນາ;

ທຓ຺ຑໂມລຸພ຺ຠ ຄຈ຺ຉາມິ, ປພ຺ພຕໍ ອຠິຣູຫິຍ.

‘‘ນິກ຺ຂິປິຕ຺ວານ ¶ ສງ຺ຆາຏິໍ, ປຕ຺ຕກຎ຺ຈ ນິກຸຊ຺ຊິຍ;

ນິສິນ຺ນາ ຈມ຺ຫິ ເສລມ຺ຫິ, ອຖ ຈິຕ຺ຕໍ ວິມຸຈ຺ຈິ ເມ;

ຕິສ຺ໂສ ¶ ວິຊ຺ຊາ ອນຸປ຺ປຕ຺ຕາ, ກຕໍ ພຸທ຺ຘສ຺ສ ສາສນ’’ນ຺ຕິ.

‘‘ຈາຕຸທ຺ທສິໍ ປຎ຺ຈທສິໍ, ຍາ ຈ ປກ຺ຂສ຺ສ ອຏ຺ຐມີ;

ປາຏິຫາຣິຍປກ຺ຂຎ຺ຈ, ອຏ຺ຐງ຺ຄສຸສມາຄຕໍ.

‘‘ອຸໂປສຖໍ ¶ ອຸປາຄຈ຺ຉິໍ, ເທວກາຍາຠິນນ຺ທິນີ;

ສາຊ຺ຊ ເອເກນ ຠຕ຺ເຕນ, ມຸຓ຺ຑາ ສງ຺ຆາຏິປາຣຸຕາ;

ເທວກາຍໍ ນ ປຕ຺ເຖຫໍ, ວິເນຍ຺ຍ ຫທເຍ ທຣ’’ນ຺ຕິ.

‘‘ອຸທ຺ຘໍ ປາທຕລາ ອມ຺ມ, ອໂຘ ເວ ເກສມຕ຺ຖກາ;

ປຈ຺ຈເວກ຺ຂສ຺ສຸມໍ ກາຍໍ, ອສຸຈິໍ ປູຕິຄນ຺ຘິກໍ.

‘‘ເອວໍ ¶ ວິຫຣມານາຍ, ສພ຺ໂພ ຣາໂຄ ສມູຫໂຕ;

ປຣິຬາໂຫ ສມຸຈ຺ຉິນ຺ໂນ, ສີຕິຠູຕາມ຺ຫິ ນິພ຺ພຸຕາ’’ຕິ.

‘‘ອຠເຍ ຠິທຸໂຣ ກາໂຍ, ຍຕ຺ຖ ສຕາ ປຸຖຸຊ຺ຊນາ;

ນິກ຺ຂິປິສ຺ສາມິມໍ ເທຫໍ, ສມ຺ປຊານາ ສຕີມຕີ.

‘‘ພຫູຫິ ທຸກ຺ຂຘມ຺ເມຫິ, ອປ຺ປມາທຣຕາຍ ເມ;

ຕຓ຺ຫກ຺ຂໂຍ ອນຸປ຺ປຕ຺ໂຕ, ກຕໍ ພຸທ຺ຘສ຺ສ ສາສນ’’ນ຺ຕິ.

‘‘ຈຕຸກ຺ຂຕ຺ຕຸໍ ¶ ¶ ປຎ຺ຈກ຺ຂຕ຺ຕຸໍ, ວິຫາຣາ ອຸປນິກ຺ຂມິໍ;

ອລທ຺ຘາ ເຈຕໂສ ສນ຺ຕິໍ, ຈິຕ຺ເຕ ອວສວຕ຺ຕິນີ;

ຕສ຺ສາ ເມ ອຏ຺ຐມີ ຣຕ຺ຕິ, ຍໂຕ ຕຓ຺ຫາ ສມູຫຕາ.

‘‘ພຫູຫິ ທຸກ຺ຂຘມ຺ເມຫິ, ອປ຺ປມາທຣຕາຍ ເມ;

ຕຓ຺ຫກ຺ຂໂຍ ອນຸປ຺ປຕ຺ໂຕ, ກຕໍ ພຸທ຺ຘສ຺ສ ສາສນ’’ນ຺ຕິ.

‘‘ປຓ຺ຓວີສຕິວສ຺ສານິ ¶ , ຍໂຕ ປພ຺ພຊິຕາຍ ເມ;

ນາຠິຊານາມິ ຈິຕ຺ຕສ຺ສ, ສມໍ ລທ຺ຘໍ ກຸທາຈນໍ.

‘‘ອລທ຺ຘາ ເຈຕໂສ ສນ຺ຕິໍ, ຈິຕ຺ເຕ ອວສວຕ຺ຕິນີ;

ຕໂຕ ສໍເວຄມາປາທິໍ, ສຣິຕ຺ວາ ຊິນສາສນໍ.

‘‘ພຫູຫິ ທຸກ຺ຂຘມ຺ເມຫິ, ອປ຺ປມາທຣຕາຍ ເມ;

ຕຓ຺ຫກ຺ຂໂຍ ອນຸປ຺ປຕ຺ໂຕ, ກຕໍ ພຸທ຺ຘສ຺ສ ສາສນໍ;

ອຊ຺ຊ ¶ ເມ ສຕ຺ຕມີ ຣຕ຺ຕິ, ຍໂຕ ຕຓ຺ຫາ ວິໂສສິຕາ’’ຕິ.

‘‘ຈຕຸກ຺ຂຕ຺ຕຸໍ ¶ ປຎ຺ຈກ຺ຂຕ຺ຕຸໍ, ວິຫາຣາ ອຸປນິກ຺ຂມິໍ;

ອລທ຺ຘາ ເຈຕໂສ ສນ຺ຕິໍ, ຈິຕ຺ເຕ ອວສວຕ຺ຕິນີ.

‘‘ສາ ¶ ຠິກ຺ຂຸນິໍ ອຸປຄຈ຺ຉິໍ, ຍາ ເມ ສທ຺ຘາຍິກາ ອຫຸ;

ສາ ເມ ຘມ຺ມມເທເສສິ, ຂນ຺ຘາຍຕນຘາຕຸໂຍ.

‘‘ຕສ຺ສາ ຘມ຺ມໍ ສຸຓິຕ຺ວານ, ຍຖາ ມໍ ອນຸສາສິ ສາ;

ສຕ຺ຕາຫໍ ເອກປລ຺ລງ຺ເກນ, ນິສີທິໍ ປີຕິສຸຂສມປ຺ປິຕາ [ນິສີທິໍ ສຸຂສມປ຺ປິຕາ (ສີ.)];

ອຏ຺ຐມິຍາ ປາເທ ປສາເຣສິໍ, ຕໂມຂນ຺ຘໍ ປທາລິຍາ’’ຕິ.

‘‘ເຍ ອິເມ ສຕ຺ຕ ໂພຊ຺ຌງ຺ຄາ, ມຄ຺ຄາ ນິພ຺ພານປຕ຺ຕິຍາ;

ຠາວິຕາ ເຕ ມຍາ ສພ຺ເພ, ຍຖາ ພຸທ຺ເຘນ ເທສິຕາ.

‘‘ສຸຎ຺ຎຕສ຺ສານິມິຕ຺ຕສ຺ສ, ລາຠິນີຫໍ ຍທິຈ຺ຉກໍ;

ໂອຣສາ ຘີຕາ ພຸທ຺ຘສ຺ສ, ນິພ຺ພານາຠິຣຕາ ສທາ.

‘‘ສພ຺ເພ ¶ ກາມາ ສມຸຈ຺ຉິນ຺ນາ, ເຍ ທິພ຺ພາ ເຍ ຈ ມານຸສາ;

ວິກ຺ຂີໂຓ ຊາຕິສໍສາໂຣ, ນຕ຺ຖິ ທານິ ປຸນພ຺ຠໂວ’’ຕິ.

‘‘ທິວາວິຫາຣາ ນິກ຺ຂມ຺ມ, ຄິຊ຺ຌກູຏມ຺ຫິ ປພ຺ພເຕ;

ນາຄໍ ໂອຄາຫມຸຕ຺ຕິຓ຺ຓໍ, ນທີຕີຣມ຺ຫິ ອທ຺ທສໍ.

‘‘ປຸຣິໂສ ອງ຺ກຸສມາທາຍ, ‘ເທຫິ ປາທ’ນ຺ຕິ ຍາຈຕິ;

ນາໂຄ ປສາຣຍີ ປາທໍ, ປຸຣິໂສ ນາຄມາຣຸຫິ.

‘‘ທິສ຺ວາ ¶ ອທນ຺ຕໍ ທມິຕໍ, ມນຸສ຺ສານໍ ວສໍ ຄຕໍ;

ຕໂຕ ຈິຕ຺ຕໍ ສມາເຘສິໍ, ຂລຸ ຕາຍ ວນໍ ຄຕາ’’ຕິ.

‘‘ອມ຺ມ ຊີວາຕິ ວນມ຺ຫິ ກນ຺ທສິ, ອຕ຺ຕານໍ ອຘິຄຈ຺ຉ ອຸພ຺ພິຣິ;

ຈຸລ຺ລາສີຕິສຫສ຺ສານິ [ຈູຬາສີຕິສຫສ຺ສານິ (ສີ.)], ສພ຺ພາ ຊີວສນາມິກາ;

ເອຕມ຺ຫາຬາຫເນ ທຑ຺ຒາ, ຕາສໍ ກມນຸໂສຈສິ.

‘‘ອພ຺ພຫີ ¶ ¶ [ອພ຺ພຸຕີ (ສ຺ຍາ.), ອພ຺ພຸຬ຺ຫໍ (ກ.)] ວຕ ເມ ສລ຺ລໍ, ທຸທ຺ທສໍ ຫທຍສ຺ສິຕໍ [ຫທຍນິສ຺ສິຕໍ (ສີ. ສ຺ຍາ.)];

ຍໍ ເມ ໂສກປເຣຕາຍ, ຘີຕຸໂສກໍ ພ຺ຍປານຸທິ.

‘‘ສາຊ຺ຊ ອພ຺ພູຬ຺ຫສລ຺ລາຫໍ, ນິຈ຺ຉາຕາ ປຣິນິພ຺ພຸຕາ;

ພຸທ຺ຘໍ ຘມ຺ມຎ຺ຈ ສງ຺ຆຎ຺ຈ, ອຸເປມິ ສຣຓໍ ມຸນິ’’ນ຺ຕິ.

‘‘ກິໍເມ ກຕາ ຣາຊຄເຫ ມນຸສ຺ສາ, ມຘຸໍ ປີຕາວ [ມຘຸປີຕາວ (ສີ.)] ອຈ຺ຉເຣ;

ເຍ ສຸກ຺ກໍ ນ ອຸປາສນ຺ຕິ, ເທເສນ຺ຕິໍ ພຸທ຺ຘສາສນໍ.

‘‘ຕຎ຺ຈ ອປ຺ປຏິວານີຍໍ, ອເສຈນກໂມຊວໍ;

ປິວນ຺ຕິ ມຎ຺ເຎ ສປ຺ປຎ຺ຎາ, ວລາຫກມິວທ຺ຘຄູ.

‘‘ສຸກ຺ກາ ¶ ສຸກ຺ເກຫິ ຘມ຺ເມຫິ, ວີຕຣາຄາ ສມາຫິຕາ;

ຘາເຣຕິ ອນ຺ຕິມໍ ເທຫໍ, ເຊຕ຺ວາ ມາຣໍ ສວາຫນ’’ນ຺ຕິ.

‘‘ນຕ຺ຖິ ນິສ຺ສຣຓໍ ໂລເກ, ກິໍ ວິເວເກນ ກາຫສິ;

ຠຸຎ຺ຊາຫິ ¶ ກາມຣຕິໂຍ, ມາຫຸ ປຈ຺ຉານຸຕາປິນີ’’.

‘‘ສຕ຺ຕິສູລູປມາ ກາມາ, ຂນ຺ຘາສໍ ອຘິກຸຏ຺ຏນາ;

ຍໍ ຕ຺ວໍ ‘ກາມຣຕິໍ’ ພ຺ຣູສິ, ‘ອຣຕີ’ ທານິ ສາ ມມ.

‘‘ສພ຺ພຕ຺ຖ ວິຫຕາ ນນ຺ທີ [ນນ຺ທິ (ສີ. ສ຺ຍາ.)], ຕໂມຂນ຺ໂຘ ປທາລິໂຕ;

ເອວໍ ຊານາຫິ ປາປິມ, ນິຫໂຕ ຕ຺ວມສິ ອນ຺ຕກາ’’ຕິ.

‘‘ຍໍ ຕໍ ອິສີຫິ ປຕ຺ຕພ຺ພໍ, ຐານໍ ທຸຣຠິສມ຺ຠວໍ;

ນ ຕໍ ທ຺ວງ຺ຄຸລປຎ຺ຎາຍ, ສກ຺ກາ ປປ຺ໂປຕຸມິຕ຺ຖິຍາ’’.

‘‘ອິຕ຺ຖິຠາໂວ ໂນ ກິໍ ກຍິຣາ, ຈິຕ຺ຕມ຺ຫິ ສຸສມາຫິເຕ;

ຎາຓມ຺ຫິ ວຕ຺ຕມານມ຺ຫິ, ສມ຺ມາ ຘມ຺ມໍ ວິປສ຺ສໂຕ.

‘‘ສພ຺ພຕ຺ຖ ¶ ¶ ວິຫຕາ ນນ຺ທີ, ຕໂມຂນ຺ໂຘ ປທາລິໂຕ;

ເອວໍ ຊານາຫິ ປາປິມ, ນິຫໂຕ ຕ຺ວມສິ ອນ຺ຕກາ’’ຕິ.

‘‘ປຸຕ຺ໂຕ ¶ ພຸທ຺ຘສ຺ສ ທາຍາໂທ, ກສ຺ສໂປ ສຸສມາຫິໂຕ;

ປຸພ຺ເພນິວາສໍ ໂຍເວທິ, ສຄ຺ຄາປາຍຎ຺ຈ ປສ຺ສຕິ.

‘‘ອໂຖ ¶ ຊາຕິກ຺ຂຍໍ ປຕ຺ໂຕ, ອຠິຎ຺ຎາໂວສິໂຕ ມຸນິ;

ເອຕາຫິ ຕີຫິ ວິຊ຺ຊາຫິ, ເຕວິຊ຺ໂຊ ໂຫຕິ ພ຺ຣາຫ຺ມໂຓ.

‘‘ຕເຖວ ຠທ຺ທາ ກາປິລານີ, ເຕວິຊ຺ຊາ ມຈ຺ຈຸຫາຍິນີ;

ຘາເຣຕິ ອນ຺ຕິມໍ ເທຫໍ, ເຊຕ຺ວາ ມາຣໍ ສວາຫນໍ.

‘‘ທິສ຺ວາ ອາທີນວໍ ໂລເກ, ອຸໂຠ ປພ຺ພຊິຕາ ມຍໍ;

ຕ຺ຍມ຺ຫ ຂີຓາສວາ ທນ຺ຕາ, ສີຕິຠູຕມ຺ຫ ນິພ຺ພຸຕາ’’ຕິ.

‘‘ປຓ຺ຓວີສຕິວສ຺ສານິ ¶ ¶ , ຍໂຕ ປພ຺ພຊິຕາ ອຫໍ;

ນາຈ຺ຉຣາສງ຺ຆາຕມຕ຺ຕມ຺ປິ, ຈິຕ຺ຕສ຺ສູປສມຊ຺ຌຄໍ.

‘‘ອລທ຺ຘາ ເຈຕໂສ ສນ຺ຕິໍ, ກາມຣາເຄນວສ຺ສຸຕາ;

ພາຫາ ປຄ຺ຄຍ຺ຫ ກນ຺ທນ຺ຕີ, ວິຫາຣໍ ປາວິສິໍ ອຫໍ.

‘‘ສາ ຠິກ຺ຂຸນິໍ ອຸປາຄຈ຺ຉິໍ, ຍາ ເມ ສທ຺ຘາຍິກາ ອຫຸ;

ສາ ເມ ຘມ຺ມມເທເສສິ, ຂນ຺ຘາຍຕນຘາຕຸໂຍ.

‘‘ຕສ຺ສາ ຘມ຺ມໍ ສຸຓິຕ຺ວານ, ເອກມນ຺ເຕ ອຸປາວິສິໍ;

ປຸພ຺ເພນິວາສໍ ຊານາມິ, ທິພ຺ພຈກ຺ຂຸ ວິໂສຘິຕໍ.

‘‘ເຈໂຕປຣິຈ຺ຈຎາຓຎ຺ຈ ¶ ¶ [ເຈໂຕປຣິຍຎາຓຎ຺ຈ (ກ.)], ໂສຕຘາຕຸ ວິໂສຘິຕາ;

ອິທ຺ຘີປິ ເມ ສຈ຺ຉິກຕາ, ປຕ຺ໂຕ ເມ ອາສວກ຺ຂໂຍ;

ຉຬຠິຎ຺ຎາ [ຉ ເມຠິຎ຺ຎາ (ສ຺ຍາ. ກ.)] ສຈ຺ຉິກຕາ, ກຕໍ ພຸທ຺ຘສ຺ສ ສາສນ’’ນ຺ຕິ.

‘‘ມຕ຺ຕາ ວຓ຺ເຓນ ຣູເປນ, ໂສຠຄ຺ເຄນ ຍເສນ ຈ;

ໂຍພ຺ພເນນ ຈຸປຕ຺ຖທ຺ຘາ, ອຎ຺ຎາສມຕິມຎ຺ຎິຫໍ.

‘‘ວິຠູເສຕ຺ວາ ອິມໍ ກາຍໍ, ສຸຈິຕ຺ຕໍ ພາລລາປນໍ;

ອຏ຺ຐາສິໍ ເວສິທ຺ວາຣມ຺ຫິ, ລຸທ຺ໂທ ປາສມິໂວຑ຺ຑິຍ.

‘‘ປິລນ຺ຘນໍ ວິທໍເສນ຺ຕີ, ຄຸຍ຺ຫໍ ປກາສິກໍ ພຫຸໍ;

ອກາສິໍ ວິວິຘໍ ມາຍໍ, ອຸຊ຺ຊຄ຺ຆນ຺ຕີ ພຫຸໍ ຊນໍ.

‘‘ສາຊ຺ຊ ປິຓ຺ຑໍ ຈຣິຕ຺ວານ, ມຸຓ຺ຑາ ສງ຺ຆາຏິປາຣຸຕາ;

ນິສິນ຺ນາ ຣຸກ຺ຂມູລມ຺ຫິ, ອວິຕກ຺ກສ຺ສ ລາຠິນີ.

‘‘ສພ຺ເພ ໂຍຄາ ສມຸຈ຺ຉິນ຺ນາ, ເຍ ທິພ຺ພາ ເຍ ຈ ມານຸສາ;

ເຂເປຕ຺ວາ ອາສເວ ສພ຺ເພ, ສີຕິຠູຕາມ຺ຫິ ນິພ຺ພຸຕາ’’ຕິ.

‘‘ອໂຍນິໂສ ¶ ¶ ມນສິກາຣາ, ກາມຣາເຄນ ອຏ຺ຏິຕາ;

ອໂຫສິໍ ອຸທ຺ຘຕາ ປຸພ຺ເພ, ຈິຕ຺ເຕ ອວສວຕ຺ຕິນີ.

‘‘ປຣິຍຸຏ຺ຐິຕາ ກ຺ເລເສຫິ, ສຸຠສຎ຺ຎານຸວຕ຺ຕິນີ;

ສມໍ ຈິຕ຺ຕສ຺ສ ນ ລຠິໍ, ຣາຄຈິຕ຺ຕວສານຸຄາ.

‘‘ກິສາ ¶ ປຓ຺ຑຸ ວິວຓ຺ຓາ ຈ, ສຕ຺ຕ ວສ຺ສານິ ຈາຣິຫໍ;

ນາຫໍ ທິວາ ວາ ຣຕ຺ຕິໍ ວາ, ສຸຂໍ ວິນ຺ທິໍ ສຸທຸກ຺ຂິຕາ.

‘‘ຕໂຕ ຣຊ຺ຊຸໍ ຄເຫຕ຺ວານ, ປາວິສິໍ ວນມນ຺ຕຣໍ;

ວຣໍ ເມ ອິຘ ອຸພ຺ພນ຺ຘໍ, ຍຎ຺ຈ ຫີນໍ ປຸນາຈເຣ.

‘‘ທຬ຺ຫປາສໍ [ທຬ຺ຫໍ ປາສໍ (ສີ.)] ກຣິຕ຺ວານ, ຣຸກ຺ຂສາຂາຍ ພນ຺ຘິຍ;

ປກ຺ຂິປິໍ ¶ ປາສໍ ຄີວາຍໍ, ອຖ ຈິຕ຺ຕໍ ວິມຸຈ຺ຈິ ເມ’’ຕິ.

‘‘ອາຕຸຣໍ ອສຸຈິໍ ປູຕິໍ, ປສ຺ສ ນນ຺ເທ ສມຸສ຺ສຍໍ;

ອສຸຠາຍ ຈິຕ຺ຕໍ ຠາເວຫິ, ເອກຄ຺ຄໍ ສຸສມາຫິຕໍ.

‘‘ຍຖາ ອິທໍ ຕຖາ ເອຕໍ, ຍຖາ ເອຕໍ ຕຖາ ອິທໍ;

ທຸຄ຺ຄນ຺ຘໍ ປູຕິກໍ ວາຕິ, ພາລານໍ ອຠິນນ຺ທິຕໍ.

‘‘ເອວເມຕໍ ອເວກ຺ຂນ຺ຕີ, ຣຕ຺ຕິນ຺ທິວມຕນ຺ທິຕາ;

ຕໂຕ ສກາຍ ປຎ຺ຎາຍ, ອຠິນິພ຺ພິຊ຺ຌ [ອຠິນິພ຺ພິຊ຺ຊ (ສີ. ສ຺ຍາ.)] ທກ຺ຂິສໍ.

‘‘ຕສ຺ສາ ເມ ອປ຺ປມຕ຺ຕາຍ, ວິຈິນນ຺ຕິຍາ ໂຍນິໂສ;

ຍຖາຠູຕໍ ອຍໍ ກາໂຍ, ທິຏ຺ໂຐ ສນ຺ຕຣພາຫິໂຣ.

‘‘ອຖ ນິພ຺ພິນ຺ທຫໍ ກາເຍ, ອຊ຺ຌຕ຺ຕຎ຺ຈ ວິຣຊ຺ຊຫໍ;

ອປ຺ປມຕ຺ຕາ ວິສໍຍຸຕ຺ຕາ, ອຸປສນ຺ຕາມ຺ຫິ ນິພ຺ພຸຕາ’’ຕິ.

‘‘ອຄ຺ຄິໍ ¶ ຈນ຺ທຎ຺ຈ ສູຣິຍຎ຺ຈ, ເທວຕາ ຈ ນມສ຺ສິຫໍ;

ນທີຕິຕ຺ຖານິ ຄນ຺ຕ຺ວານ, ອຸທກໍ ໂອຣຸຫາມິຫໍ.

‘‘ພຫູວຕສມາທານາ ¶ ¶ , ອຑ຺ຒໍ ສີສສ຺ສ ໂອລິຂິໍ;

ຉມາຍ ເສຍ຺ຍໍ ກປ຺ເປມິ, ຣຕ຺ຕິໍ ຠຕ຺ຕໍ ນ ຠຸຎ຺ຊຫໍ.

‘‘ວິຠູສາມຓ຺ຑນຣຕາ, ນ຺ຫາປນຸຈ຺ຉາທເນຫິ ຈ;

ອຸປກາສິໍ ອິມໍ ກາຍໍ, ກາມຣາເຄນ ອຏ຺ຏິຕາ.

‘‘ຕໂຕ ສທ຺ຘໍ ລຠິຕ຺ວານ, ປພ຺ພຊິໍ ອນຄາຣິຍໍ;

ທິສ຺ວາ ກາຍໍ ຍຖາຠູຕໍ, ກາມຣາໂຄ ສມູຫໂຕ.

‘‘ສພ຺ເພ ຠວາ ສມຸຈ຺ຉິນ຺ນາ, ອິຈ຺ຉາ ຈ ປຕ຺ຖນາປິ ຈ;

ສພ຺ພໂຍຄວິສໍຍຸຕ຺ຕາ, ສນ຺ຕິໍ ປາປຸຓິ ເຈຕໂສ’’ຕິ.

‘‘ສທ຺ຘາຍ ປພ຺ພຊິຕ຺ວານ, ອຄາຣສ຺ມານຄາຣິຍໍ;

ວິຈຣິໍຫໍ ເຕນ ເຕນ, ລາຠສກ຺ກາຣອຸສ຺ສຸກາ.

‘‘ຣິຎ຺ຈິຕ຺ວາ ¶ ປຣມໍ ອຕ຺ຖໍ, ຫີນມຕ຺ຖໍ ອເສວິຫໍ;

ກິເລສານໍ ວສໍ ຄນ຺ຕ຺ວາ, ສາມຎ຺ຎຕ຺ຖໍ ນ ພຸຊ຺ຌິຫໍ.

‘‘ຕສ຺ສາ ເມ ອຫຸ ສໍເວໂຄ, ນິສິນ຺ນາຍ ວິຫາຣເກ;

ອຸມ຺ມຄ຺ຄປຏິປນ຺ນາມ຺ຫິ, ຕຓ຺ຫາຍ ວສມາຄຕາ.

‘‘ອປ຺ປກໍ ຊີວິຕໍ ມຍ຺ຫໍ, ຊຣາ ພ຺ຍາຘິ ຈ ມທ຺ທຕິ;

ປຸຣາຍໍ ຠິຊ຺ຊຕິ [ຊຣາຍ ຠິຊ຺ຊເຕ (ສີ.)] ກາໂຍ, ນ ເມ ກາໂລ ປມຊ຺ຊິຕຸໍ.

‘‘ຍຖາຠູຕມເວກ຺ຂນ຺ຕີ, ຂນ຺ຘານໍ ອຸທຍພ຺ພຍໍ;

ວິມຸຕ຺ຕຈິຕ຺ຕາ ອຸຏ຺ຐາສິໍ, ກຕໍ ພຸທ຺ຘສ຺ສ ສາສນ’’ນ຺ຕິ.

‘‘ອຄາຣສ຺ມິໍ ¶ ¶ ວສນ຺ຕີຫໍ, ຘມ຺ມໍ ສຸຕ຺ວານ ຠິກ຺ຂຸໂນ;

ອທ຺ທສໍ ວິຣຊໍ ຘມ຺ມໍ, ນິພ຺ພານໍ ປທມຈ຺ຈຸຕໍ.

‘‘ສາຫໍ ປຸຕ຺ຕໍ ຘີຕຣຎ຺ຈ, ຘນຘຎ຺ຎຎ຺ຈ ຉຑ຺ຑິຍ;

ເກເສ ເຉທາປຍິຕ຺ວານ, ປພ຺ພຊິໍ ອນຄາຣິຍໍ.

‘‘ສິກ຺ຂມານາ ¶ ອຫໍ ສນ຺ຕີ, ຠາເວນ຺ຕີ ມຄ຺ຄມຎ຺ຊສໍ;

ປຫາສິໍ ຣາຄໂທສຎ຺ຈ, ຕເທກຏ຺ເຐ ຈ ອາສເວ.

‘‘ຠິກ຺ຂຸນີ ອຸປສມ຺ປຊ຺ຊ, ປຸພ຺ພຊາຕິມນຸສ຺ສຣິໍ;

ທິພ຺ພຈກ຺ຂຸ ວິໂສຘິຕໍ [ວິໂສຘິຕໍ ທິພ຺ພຈກ຺ຂຸ (ສີ.)], ວິມລໍ ສາຘຸຠາວິຕໍ.

‘‘ສງ຺ຂາເຣ ປຣໂຕ ທິສ຺ວາ, ເຫຕຸຊາເຕ ປໂລກິເຕ [ປໂລກິເນ (ກ.)];

ປຫາສິໍ ອາສເວ ສພ຺ເພ, ສີຕິຠູຕາມ຺ຫິ ນິພ຺ພຸຕາ’’ຕິ.

‘‘ທສ ປຸຕ຺ເຕ ວິຊາຍິຕ຺ວາ, ອສ຺ມິໍ ຣູປສມຸສ຺ສເຍ;

ຕໂຕຫໍ ທຸພ຺ພລາ ຊິຓ຺ຓາ, ຠິກ຺ຂຸນິໍ ອຸປສງ຺ກມິໍ.

‘‘ສາ ເມ ຘມ຺ມມເທເສສິ, ຂນ຺ຘາຍຕນຘາຕຸໂຍ;

ຕສ຺ສາ ຘມ຺ມໍ ສຸຓິຕ຺ວານ, ເກເສ ເຉຕ຺ວານ ປພ຺ພຊິໍ.

‘‘ຕສ຺ສາ ເມ ສິກ຺ຂມານາຍ, ທິພ຺ພຈກ຺ຂຸ ວິໂສຘິຕໍ;

ປຸພ຺ເພນິວາສໍ ຊານາມິ, ຍຕ຺ຖ ເມ ວຸສິຕໍ ປຸເຣ.

‘‘ອນິມິຕ຺ຕຎ຺ຈ ¶ ຠາເວມິ, ເອກຄ຺ຄາ ສຸສມາຫິຕາ;

ອນນ຺ຕຣາວິໂມກ຺ຂາສິໍ, ອນຸປາທາຍ ນິພ຺ພຸຕາ.

‘‘ປຎ຺ຈກ຺ຂນ຺ຘາ ປຣິຎ຺ຎາຕາ, ຕິຏ຺ຐນ຺ຕິ ຉິນ຺ນມູລກາ;

ຘິ ¶ ຕວຕ຺ຖຸ ຊເຣ ຊມ຺ເມ, ນຕ຺ຖິ ທານິ ປຸນພ຺ຠໂວ’’ຕິ.

‘‘ລູນເກສີ ¶ ປງ຺ກຘຣີ, ເອກສາຏີ ປຸເຣ ຈຣິໍ;

ອວຊ຺ເຊ ວຊ຺ຊມຕິນີ, ວຊ຺ເຊ ຈາວຊ຺ຊທສ຺ສິນີ.

‘‘ທິວາວິຫາຣາ ນິກ຺ຂມ຺ມ, ຄິຊ຺ຌກູຏມ຺ຫິ ປພ຺ພເຕ;

ອທ຺ທສໍ ວິຣຊໍ ພຸທ຺ຘໍ, ຠິກ຺ຂຸສງ຺ຆປຸຣກ຺ຂຕໍ.

‘‘ນິຫຈ຺ຈ ຊາຓຸໍ ວນ຺ທິຕ຺ວາ, ສມ຺ມຸຂາ ອຎ຺ຊລິໍ ອກໍ;

‘ເອຫິ ຠທ຺ເທ’ຕິ ມໍ ອວຈ, ສາ ເມ ອາສູປສມ຺ປທາ.

‘‘ຈິຓ຺ຓາ ¶ ອງ຺ຄາ ຈ ມຄຘາ, ວຊ຺ຊີ ກາສີ ຈ ໂກສລາ;

ອນຓາ ປຓ຺ຓາສວສ຺ສານິ, ຣຏ຺ຐປິຓ຺ຑໍ ອຠຸຎ຺ຊຫໍ.

‘‘ປຸຎ຺ຎໍ ວຕ ປສວິ ພຫຸໍ, ສປ຺ປຎ຺ໂຎ ວຕາຍໍ ອຸປາສໂກ;

ໂຍ ຠທ຺ທາຍ ຈີວຣໍ ອທາສິ, ວິປ຺ປມຸຕ຺ຕາຍ ສພ຺ພຄນ຺ເຖຫີ’’ຕິ.

‘‘ນງ຺ຄເລຫິ ກສໍ ເຂຕ຺ຕໍ, ພີຊານິ ປວປໍ ຉມາ;

ປຸຕ຺ຕທາຣານິ ໂປເສນ຺ຕາ, ຘນໍ ວິນ຺ທນ຺ຕິ ມາຓວາ.

‘‘ກິມຫໍ ສີລສມ຺ປນ຺ນາ, ສຕ຺ຖຸສາສນກາຣິກາ;

ນິພ຺ພານໍ ນາຘິຄຈ຺ຉາມິ, ອກຸສີຕາ ອນຸທ຺ຘຕາ.

‘‘ປາເທ ປກ຺ຂາລຍິຕ຺ວານ, ອຸທເກສຸ ກໂຣມຫໍ;

ປາໂທທກຎ຺ຈ ¶ ທິສ຺ວານ, ຖລໂຕ ນິນ຺ນມາຄຕໍ.

‘‘ຕໂຕ ຈິຕ຺ຕໍ ສມາເຘສິໍ, ອສ຺ສໍ ຠທ຺ຣໍວຊານິຍໍ;

ຕໂຕ ¶ ທີປໍ ຄເຫຕ຺ວານ, ວິຫາຣໍ ປາວິສິໍ ອຫໍ;

ເສຍ຺ຍໍ ໂອໂລກຍິຕ຺ວານ, ມຎ຺ຈກມ຺ຫິ ອຸປາວິສິໍ.

‘‘ຕໂຕ ສູຈິໍ ຄເຫຕ຺ວານ, ວຏ຺ຏິໍ ໂອກສ຺ສຍາມຫໍ;

ປທີປສ຺ເສວ ນິພ຺ພານໍ, ວິໂມກ຺ໂຂ ອຫຸ ເຈຕໂສ’’ຕິ.

‘‘‘ມຸສລານິ ¶ ຄເຫຕ຺ວານ, ຘຎ຺ຎໍ ໂກຏ຺ເຏນ຺ຕິ ມາຓວາ [ມານວາ (ສີ.)];

ປຸຕ຺ຕທາຣານິ ໂປເສນ຺ຕາ, ຘນໍ ວິນ຺ທນ຺ຕິ ມາຓວາ.

‘‘‘ກໂຣຖ ພຸທ຺ຘສາສນໍ, ຍໍ ກຕ຺ວາ ນານຸຕປ຺ປຕິ;

ຂິປ຺ປໍ ປາທານິ ໂຘວິຕ຺ວາ, ເອກມນ຺ເຕ ນິສີທຖ;

ເຈໂຕສມຖມນຸຍຸຕ຺ຕາ, ກໂຣຖ ພຸທ຺ຘສາສນໍ’.

‘‘ຕສ຺ສາ ຕາ [ຕໍ (ສີ.)] ວຈນໍ ສຸຕ຺ວາ, ປຏາຈາຣາຍ ສາສນໍ;

ປາເທ ປກ຺ຂາລຍິຕ຺ວານ, ເອກມນ຺ຕໍ ອຸປາວິສຸໍ;

ເຈໂຕສມຖມນຸຍຸຕ຺ຕາ, ອກໍສຸ ພຸທ຺ຘສາສນໍ.

‘‘ຣຕ຺ຕິຍາ ¶ ປຸຣິເມ ຍາເມ, ປຸພ຺ພຊາຕິມນຸສ຺ສຣຸໍ;

ຣຕ຺ຕິຍາ ມຊ຺ຌິເມ ຍາເມ, ທິພ຺ພຈກ຺ຂຸໍ ວິໂສຘຍຸໍ;

ຣຕ຺ຕິຍາ ປຈ຺ຉິເມ ຍາເມ, ຕໂມຂນ຺ຘໍ ປທາລຍຸໍ.

‘‘ອຸຏ຺ຐາຍ ປາເທ ວນ຺ທິໍສຸ, ‘ກຕາ ເຕ ອນຸສາສນີ;

ອິນ຺ທໍວ ¶ ເທວາ ຕິທສາ, ສງ຺ຄາເມ ອປຣາຊິຕໍ;

ປຸຣກ຺ຂຕ຺ວາ ວິຫສ຺ສາມ [ວິຫຣາມ (ສີ.), ວິຫຣິສ຺ສາມ (ສ຺ຍາ.)], ເຕວິຊ຺ຊາມ຺ຫ ອນາສວາ’’’ຕິ.

ອິຕ຺ຖໍ ສຸທໍ ຕິໍສມຕ຺ຕາ ເຖຣີ ຠິກ຺ຂຸນິໂຍ ປຏາຈາຣາຍ ສນ຺ຕິເກ ອຎ຺ຎໍ ພ຺ຍາກຣິໍສູຕິ.

‘‘ທຸຄ຺ຄຕາຫໍ ປຸເຣ ອາສິໍ, ວິຘວາ ຈ ອປຸຕ຺ຕິກາ;

ວິນາ ມິຕ຺ເຕຫິ ຎາຕີຫິ, ຠຕ຺ຕໂຈຬສ຺ສ ນາຘິຄໍ.

‘‘ປຕ຺ຕໍ ທຓ຺ຑຎ຺ຈ ຄຓ຺ຫິຕ຺ວາ, ຠິກ຺ຂມານາ ກຸລາ ກຸລໍ;

ສີຕຸຓ຺ເຫນ ຈ ຑຍ຺ຫນ຺ຕີ, ສຕ຺ຕ ວສ຺ສານິ ຈາຣິຫໍ.

‘‘ຠິກ຺ຂຸນິໍ ປຸນ ທິສ຺ວານ, ອນ຺ນປານສ຺ສ ລາຠິນິໍ;

ອຸປສງ຺ກມ຺ມ ອໂວຈໍ [ອໂວຈິໍ (ກ.)], ‘ປພ຺ພຊ຺ຊໍ ອນຄາຣິຍໍ’.

‘‘ສາ ¶ ຈ ມໍ ອນຸກມ຺ປາຍ, ປພ຺ພາເຊສິ ປຏາຈາຣາ;

ຕໂຕ ມໍ ໂອວທິຕ຺ວານ, ປຣມຕ຺ເຖ ນິໂຍຊຍິ.

‘‘ຕສ຺ສາຫໍ ¶ ວຈນໍ ສຸຕ຺ວາ, ອກາສິໍ ອນຸສາສນິໍ;

ອໂມໂຆ ອຍ຺ຍາໂຍວາໂທ, ເຕວິຊ຺ຊາມ຺ຫິ ອນາສວາ’’ຕິ.

‘‘ຍສ຺ສ ¶ ມຄ຺ຄໍ ນ ຊານາສິ, ອາຄຕສ຺ສ ຄຕສ຺ສ ວາ;

ຕໍ ¶ ກຸໂຕ ຈາຄຕໍ ສຕ຺ຕໍ [ສນ຺ຕໍ (ສີ.), ປຸຕ຺ຕໍ (ສ຺ຍາ.)], ‘ມມ ປຸຕ຺ໂຕ’ຕິ ໂຣທສິ.

‘‘ມຄ຺ຄຎ຺ຈ ໂຂສ຺ສ [ໂຂ’ຖ (ສ຺ຍາ. ກ.)] ຊານາສິ, ອາຄຕສ຺ສ ຄຕສ຺ສ ວາ;

ນ ນໍ ສມນຸໂສເຈສິ, ເອວໍຘມ຺ມາ ຫິ ປາຓິໂນ.

‘‘ອຍາຈິໂຕ ຕຕາຄຈ຺ຉິ, ນານຸຎ຺ຎາໂຕ [ອນນຸຎ຺ຎາໂຕ (ສີ. ສ຺ຍາ.)] ອິໂຕ ຄໂຕ;

ກຸໂຕຈິ ນູນ ອາຄນ຺ຕ຺ວາ, ວສິຕ຺ວາ ກຕິປາຫກໍ;

ອິໂຕປິ ອຎ຺ເຎນ ຄໂຕ, ຕໂຕປຎ຺ເຎນ ຄຈ຺ຉຕິ.

‘‘ເປໂຕ ມນຸສ຺ສຣູເປນ, ສໍສຣນ຺ໂຕ ຄມິສ຺ສຕິ;

ຍຖາຄໂຕ ຕຖາ ຄໂຕ, ກາ ຕຕ຺ຖ ປຣິເທວນາ’’.

‘‘ອພ຺ພຫີ [ອພ຺ພຸຍ຺ຫໍ (ສ຺ຍາ.)] ວຕ ເມ ສລ຺ລໍ, ທຸທ຺ທສໍ ຫທຍສ຺ສິຕໍ;

ຍາ ເມ ໂສກປເຣຕາຍ, ປຸຕ຺ຕໂສກໍ ພ຺ຍປານຸທິ.

‘‘ສາຊ຺ຊ ອພ຺ພູຬ຺ຫສລ຺ລາຫໍ, ນິຈ຺ຉາຕາ ປຣິນິພ຺ພຸຕາ;

ພຸທ຺ຘໍ ຘມ຺ມຎ຺ຈ ສງ຺ຆຎ຺ຈ, ອຸເປມິ ສຣຓໍ ມຸນິໍ’’.

ອິຕ຺ຖໍ ສຸທໍ ປຎ຺ຈສຕມຕ຺ຕາ ເຖຣີ ຠິກ຺ຂຸນິໂຍ…ເປ….

‘‘ປຸຕ຺ຕໂສເກນຫໍ ອຏ຺ຏາ, ຂິຕ຺ຕຈິຕ຺ຕາ ວິສຎ຺ຎິນີ;

ນຄ຺ຄາ ປກິຓ຺ຓເກສີ ຈ, ເຕນ ເຕນ ວິຈາຣິຫໍ.

‘‘ວີຖິ [ວສິໍ (ສີ.)] ສງ຺ກາຣກູເຏສຸ, ສຸສາເນ ຣຖິຍາສຸ ຈ;

ອຈຣິໍ ຕີຓິ ວສ຺ສານິ, ຂຸປ຺ປິປາສາສມປ຺ປິຕາ.

‘‘ອຖທ຺ທສາສິໍ ¶ ¶ ສຸຄຕໍ, ນຄຣໍ ມິຖິລໍ ປຕິ [ຄຕໍ (ກ.)];

ອທນ຺ຕານໍ ທເມຕາຣໍ, ສມ຺ພຸທ຺ຘມກຸໂຕຠຍໍ.

‘‘ສຈິຕ຺ຕໍ ¶ ປຏິລທ຺ຘານ, ວນ຺ທິຕ຺ວານ ອຸປາວິສິໍ;

ໂສ ເມ ຘມ຺ມມເທເສສິ, ອນຸກມ຺ປາຍ ໂຄຕໂມ.

‘‘ຕສ຺ສ ¶ ຘມ຺ມໍ ສຸຓິຕ຺ວານ, ປພ຺ພຊິໍ ອນຄາຣິຍໍ;

ຍຸຎ຺ຊນ຺ຕີ ສຕ຺ຖຸວຈເນ, ສຈ຺ຉາກາສິໍ ປທໍ ສິວໍ.

‘‘ສພ຺ເພ ໂສກາ ສມຸຈ຺ຉິນ຺ນາ, ປຫີນາ ເອຕທນ຺ຕິກາ;

ປຣິຎ຺ຎາຕາ ຫິ ເມ ວຕ຺ຖູ, ຍໂຕ ໂສການ ສມ຺ຠໂວ’’ຕິ.

‘‘ທຫຣາ ຕ຺ວໍ ຣູປວຕີ, ອຫມ຺ປິ ທຫໂຣ ຍຸວາ;

ປຎ຺ຈງ຺ຄິເກນ ຕຸຣິເຍນ [ຕູເຣນ (ກ.)], ເອຫິ ເຂເມ ຣມາມເສ’’.

‘‘ອິມິນາ ປູຕິກາເຍນ, ອາຕຸເຣນ ປຠງ຺ຄຸນາ;

ອຏ຺ຏິຍາມິ ຫຣາຍາມິ, ກາມຕຓ຺ຫາ ສມູຫຕາ.

‘‘ສຕ຺ຕິສູລູປມາ ກາມາ, ຂນ຺ຘາສໍ ອຘິກຸຏ຺ຏນາ;

ຍໍ ‘ຕ຺ວໍ ກາມຣຕິໍ’ ພ຺ຣູສິ, ‘ອຣຕີ’ ທານິ ສາ ມມ.

‘‘ສພ຺ພຕ຺ຖ ວິຫຕາ ນນ຺ທີ, ຕໂມຂນ຺ໂຘ ປທາລິໂຕ;

ເອວໍ ຊານາຫິ ປາປິມ, ນິຫໂຕ ຕ຺ວມສິ ອນ຺ຕກ.

‘‘ນກ຺ຂຕ຺ຕານິ ນມສ຺ສນ຺ຕາ, ອຄ຺ຄິໍ ປຣິຈຣໍ ວເນ;

ຍຖາຠຸຈ຺ຈມຊານນ຺ຕາ, ພາລາ ສຸທ຺ຘິມມຎ຺ຎຖ.

‘‘ອຫຎ຺ຈ ໂຂ ນມສ຺ສນ຺ຕີ, ສມ຺ພຸທ຺ຘໍ ປຸຣິສຸຕ຺ຕມໍ;

ປມຸຕ຺ຕາ [ປຣິມຸຕ຺ຕາ (ສີ. ສ຺ຍາ.)] ສພ຺ພທຸກ຺ເຂຫິ, ສຕ຺ຖຸສາສນກາຣິກາ’’ຕິ.

‘‘ອລງ຺ກຕາ ¶ ສຸວສນາ, ມາລິນີ ຈນ຺ທໂນກ຺ຂິຕາ;

ສພ຺ພາຠຣຓສຎ຺ຉນ຺ນາ, ທາສີຄຓປຸຣກ຺ຂຕາ.

‘‘ອນ຺ນໍ ¶ ປານຎ຺ຈ ອາທາຍ, ຂຊ຺ຊໍ ໂຠຊ຺ຊໍ ອນປ຺ປກໍ;

ເຄຫໂຕ ນິກ຺ຂມິຕ຺ວານ, ອຸຍ຺ຍານມຠິຫາຣຍິໍ.

‘‘ຕຕ຺ຖ ¶ ຣມິຕ຺ວາ ກີຬິຕ຺ວາ, ອາຄຈ຺ຉນ຺ຕີ ສກໍ ຆຣໍ;

ວິຫາຣໍ ທຏ຺ຐຸໍ ປາວິສິໍ, ສາເກເຕ ອຎ຺ຊນໍ ວນໍ.

‘‘ທິສ຺ວານ ¶ ໂລກປຊ຺ໂຊຕໍ, ວນ຺ທິຕ຺ວານ ອຸປາວິສິໍ;

ໂສ ເມ ຘມ຺ມມເທເສສິ, ອນຸກມ຺ປາຍ ຈກ຺ຂຸມາ.

‘‘ສຸຕ຺ວາ ຈ ໂຂ ມເຫສິສ຺ສ, ສຈ຺ຈໍ ສມ຺ປຏິວິຊ຺ຌຫໍ;

ຕຕ຺ເຖວ ວິຣຊໍ ຘມ຺ມໍ, ຜຸສຍິໍ ອມຕໍ ປທໍ.

‘‘ຕໂຕ ວິຎ຺ຎາຕສທ຺ຘມ຺ມາ, ປພ຺ພຊິໍ ອນຄາຣິຍໍ;

ຕິສ຺ໂສ ວິຊ຺ຊາ ອນຸປ຺ປຕ຺ຕາ, ອໂມຆໍ ພຸທ຺ຘສາສນ’’ນ຺ຕິ.

‘‘ອຸຈ຺ເຈ ກຸເລ ອຫໍ ຊາຕາ, ພຫຸວິຕ຺ເຕ ມຫທ຺ຘເນ;

ວຓ຺ຓຣູເປນ ສມ຺ປນ຺ນາ, ຘີຕາ ມຊ຺ຌສ຺ສ [ເມຆສ຺ສ (ສີ.), ເມຆິສ຺ສ (ສ຺ຍາ.)] ອຕ຺ຣຊາ.

‘‘ປຕ຺ຖິຕາ ຣາຊປຸຕ຺ເຕຫິ, ເສຏ຺ຐິປຸຕ຺ເຕຫິ ຄິຊ຺ຌິຕາ [ເສຏ຺ຐິປຸຕ຺ເຕຫິ ຠິຊ຺ຌິຕາ (ສີ.)];

ປິຕຸ ເມ ເປສຍີ ທູຕໍ, ເທຖ ມຍ຺ຫໍ ອໂນປມໍ.

‘‘ຍຕ຺ຕກໍ ຕຸລິຕາ ເອສາ, ຕຸຍ຺ຫໍ ຘີຕາ ອໂນປມາ;

ຕໂຕ ອຏ຺ຐຄຸຓໍ ທສ຺ສໍ, ຫິຣຎ຺ຎໍ ຣຕນານິ ຈ.

‘‘ສາຫໍ ¶ ທິສ຺ວານ ສມ຺ພຸທ຺ຘໍ, ໂລກເຊຏ຺ຐໍ ອນຸຕ຺ຕຣໍ;

ຕສ຺ສ ປາທານິ ວນ຺ທິຕ຺ວາ, ເອກມນ຺ຕໍ ອຸປາວິສິໍ.

‘‘ໂສ ເມ ຘມ຺ມມເທເສສິ, ອນຸກມ຺ປາຍ ໂຄຕໂມ;

ນິສິນ຺ນາ ອາສເນ ຕສ຺ມິໍ, ຜຸສຍິໍ ຕຕິຍໍ ຜລໍ.

‘‘ຕໂຕ ເກສານິ ເຉຕ຺ວານ, ປພ຺ພຊິໍ ອນຄາຣິຍໍ;

ອຊ຺ຊ ເມ ສຕ຺ຕມີ ຣຕ຺ຕິ, ຍໂຕ ຕຓ຺ຫາ ວິໂສສິຕາ’’ຕິ.

‘‘ພຸທ຺ຘ ¶ ວີຣ ນໂມ ຕ຺ຍຕ຺ຖຸ, ສພ຺ພສຕ຺ຕານມຸຕ຺ຕມ;

ໂຍ ມໍ ທຸກ຺ຂາ ປໂມເຈສິ, ອຎ຺ຎຎ຺ຈ ພຫຸກໍ ຊນໍ.

‘‘ສພ຺ພທຸກ຺ຂໍ ປຣິຎ຺ຎາຕໍ, ເຫຕຸຕຓ຺ຫາ ວິໂສສິຕາ;

ຠາວິໂຕ ອຏ຺ຐງ຺ຄິໂກ [ອຣິຍຏ຺ຐງ຺ຄິໂກ (ສີ. ກ.), ຠາວິຕຏ຺ຐງ຺ຄິໂກ (ສ຺ຍາ.)] ມຄ຺ໂຄ, ນິໂຣໂຘ ຜຸສິໂຕ ມຍາ.

‘‘ມາຕາ ¶ ¶ ປຸຕ຺ໂຕ ປິຕາ ຠາຕາ, ອຍ຺ຍກາ ຈ ປຸເຣ ອຫຸໍ;

ຍຖາຠຸຈ຺ຈມຊານນ຺ຕີ, ສໍສຣິໍຫໍ ອນິພ຺ພິສໍ.

‘‘ທິຏ຺ໂຐ ຫິ ເມ ໂສ ຠຄວາ, ອນ຺ຕິໂມຍໍ ສມຸສ຺ສໂຍ;

ວິກ຺ຂີໂຓ ຊາຕິສໍສາໂຣ, ນຕ຺ຖິ ທານິ ປຸນພ຺ຠໂວ.

‘‘ອາຣທ຺ຘວີຣິເຍ ປຫິຕຕ຺ເຕ, ນິຈ຺ຈໍ ທຬ຺ຫປຣກ຺ກເມ;

ສມຄ຺ເຄ ສາວເກ ປສ຺ເສ, ເອສາ ພຸທ຺ຘານ ວນ຺ທນາ.

‘‘ພຫູນໍ [ພຫຸນ຺ນໍ (ສີ. ສ຺ຍາ.)] ວຕ ອຕ຺ຖາຍ, ມາຍາ ຊນຍິ ໂຄຕມໍ;

ພ຺ຍາຘິມຣຓຕຸນ຺ນານໍ, ທຸກ຺ຂກ຺ຂນ຺ຘໍ ພ຺ຍປານຸທີ’’ຕິ.

‘‘ຄຸຕ຺ເຕ ¶ ຍທຕ຺ຖໍ ປພ຺ພຊ຺ຊາ, ຫິຕ຺ວາ ປຸຕ຺ຕໍ ວສຸໍ ປິຍໍ;

ຕເມວ ອນຸພ຺ຣູເຫຫິ, ມາ ຈິຕ຺ຕສ຺ສ ວສໍ ຄມິ.

‘‘ຈິຕ຺ເຕນ ວຎ຺ຈິຕາ ສຕ຺ຕາ, ມາຣສ຺ສ ວິສເຍ ຣຕາ;

ອເນກຊາຕິສໍສາຣໍ, ສນ຺ຘາວນ຺ຕິ ອວິທ຺ທສູ.

‘‘ກາມຈ຺ຉນ຺ທຎ຺ຈ ພ຺ຍາປາທໍ, ສກ຺ກາຍທິຏ຺ຐິເມວ ຈ;

ສີລພ຺ພຕປຣາມາສໍ, ວິຈິກິຈ຺ຉຎ຺ຈ ປຎ຺ຈມໍ.

‘‘ສໍໂຍຊນານິ ເອຕານິ, ປຊຫິຕ຺ວານ ຠິກ຺ຂຸນີ;

ໂອຣມ຺ຠາຄມນີຍານິ, ນຍິທໍ ປຸນເຣຫິສິ.

‘‘ຣາຄໍ ມານໍ ອວິຊ຺ຊຎ຺ຈ, ອຸທ຺ຘຈ຺ຈຎ຺ຈ ວິວຊ຺ຊິຍ;

ສໍໂຍຊນານິ ເຉຕ຺ວານ, ທຸກ຺ຂສ຺ສນ຺ຕໍ ກຣິສ຺ສສິ.

‘‘ເຂເປຕ຺ວາ ¶ ຊາຕິສໍສາຣໍ, ປຣິຎ຺ຎາຍ ປຸນພ຺ຠວໍ;

ທິຏ຺ເຐວ ຘມ຺ເມ ນິຈ຺ຉາຕາ, ອຸປສນ຺ຕາ ຈຣິສ຺ສຕີ’’ຕິ.

‘‘ຈຕຸກ຺ຂຕ຺ຕຸໍ ປຎ຺ຈກ຺ຂຕ຺ຕຸໍ, ວິຫາຣາ ອຸປນິກ຺ຂມິໍ;

ອລທ຺ຘາ ເຈຕໂສ ສນ຺ຕິໍ, ຈິຕ຺ເຕ ອວສວຕ຺ຕິນີ.

‘‘ຠິກ຺ຂຸນິໍ ¶ ອຸປສງ຺ກມ຺ມ, ສກ຺ກຈ຺ຈໍ ປຣິປຸຈ຺ຉຫໍ;

ສາ ເມ ຘມ຺ມມເທເສສິ, ຘາຕຸອາຍຕນານິ ຈ.

‘‘ຈຕ຺ຕາຣິ ¶ ອຣິຍສຈ຺ຈານິ, ອິນ຺ທ຺ຣິຍານິ ພລານິ ຈ;

ໂພຊ຺ຌງ຺ຄຏ຺ຐງ຺ຄິກໍ ມຄ຺ຄໍ, ອຸຕ຺ຕມຕ຺ຖສ຺ສ ປຕ຺ຕິຍາ.

‘‘ຕສ຺ສາຫໍ ¶ ວຈນໍ ສຸຕ຺ວາ, ກໂຣນ຺ຕີ ອນຸສາສນິໍ;

ຣຕ຺ຕິຍາ ປຸຣິເມ ຍາເມ, ປຸພ຺ພຊາຕິມນຸສ຺ສຣິໍ.

‘‘ຣຕ຺ຕິຍາ ມຊ຺ຌິເມ ຍາເມ, ທິພ຺ພຈກ຺ຂຸໍ ວິໂສຘຍິໍ;

ຣຕ຺ຕິຍາ ປຈ຺ຉິເມ ຍາເມ, ຕໂມຂນ຺ຘໍ ປທາລຍິໍ.

‘‘ປີຕິສຸເຂນ ຈ ກາຍໍ, ຜຣິຕ຺ວາ ວິຫຣິໍ ຕທາ;

ສຕ຺ຕມິຍາ ປາເທ ປສາເຣສິໍ, ຕໂມຂນ຺ຘໍ ປທາລິຍາ’’ຕິ.

‘‘‘ມຸສລານິ ¶ ຄເຫຕ຺ວານ, ຘຎ຺ຎໍ ໂກຏ຺ເຏນ຺ຕິ ມາຓວາ;

ປຸຕ຺ຕທາຣານິ ໂປເສນ຺ຕາ, ຘນໍ ວິນ຺ທນ຺ຕິ ມາຓວາ.

‘‘‘ຆເຏຖ ¶ ພຸທ຺ຘສາສເນ, ຍໍ ກຕ຺ວາ ນານຸຕປ຺ປຕິ;

ຂິປ຺ປໍ ປາທານິ ໂຘວິຕ຺ວາ, ເອກມນ຺ຕໍ ນິສີທຖ.

‘‘‘ຈິຕ຺ຕໍ ອຸປຏ຺ຐເປຕ຺ວານ, ເອກຄ຺ຄໍ ສຸສມາຫິຕໍ;

ປຈ຺ຈເວກ຺ຂຖ ສງ຺ຂາເຣ, ປຣໂຕ ໂນ ຈ ອຕ຺ຕໂຕ’.

‘‘ຕສ຺ສາຫໍ ວຈນໍ ສຸຕ຺ວາ, ປຏາຈາຣານຸສາສນິໍ;

ປາເທ ປກ຺ຂາລຍິຕ຺ວານ, ເອກມນ຺ເຕ ອຸປາວິສິໍ.

‘‘ຣຕ຺ຕິຍາ ¶ ປຸຣິເມ ຍາເມ, ປຸພ຺ພຊາຕິມນຸສ຺ສຣິໍ;

ຣຕ຺ຕິຍາ ມຊ຺ຌິເມ ຍາເມ, ທິພ຺ພຈກ຺ຂຸໍ ວິໂສຘຍິໍ.

‘‘ຣຕ຺ຕິຍາ ປຈ຺ຉິເມ ຍາເມ, ຕໂມກ຺ຂນ຺ຘໍ ປທາລຍິໍ;

ເຕວິຊ຺ຊາ ອຖ ວຸຏ຺ຐາສິໍ, ກຕາ ເຕ ອນຸສາສນີ.

‘‘ສກ຺ກໍວ ເທວາ ຕິທສາ, ສງ຺ຄາເມ ອປຣາຊິຕໍ;

ປຸຣກ຺ຂຕ຺ວາ ວິຫສ຺ສາມິ, ເຕວິຊ຺ຊາມ຺ຫິ ອນາສວາ’’.

‘‘ສຕິໍ ¶ ອຸປຏ຺ຐເປຕ຺ວານ, ຠິກ຺ຂຸນີ ຠາວິຕິນ຺ທ຺ຣິຍາ;

ປຏິວິຊ຺ຌິ ປທໍ ສນ຺ຕໍ, ສງ຺ຂາຣູປສມໍ ສຸຂໍ’’.

‘‘ກໍ ນຸ ອຸທ຺ທິສ຺ສ ມຸຓ຺ຑາສິ, ສມຓີ ວິຍ ທິສ຺ສສິ;

ນ ຈ ໂຣເຈສິ ປາສຓ຺ເຑ, ກິມິທໍ ຈຣສິ ໂມມຸຫາ’’.

‘‘ອິໂຕ ພຫິທ຺ຘາ ປາສຓ຺ຑາ, ທິຏ຺ຐິໂຍ ອຸປນິສ຺ສິຕາ;

ນ ເຕ ຘມ຺ມໍ ວິຊານນ຺ຕິ, ນ ເຕ ຘມ຺ມສ຺ສ ໂກວິທາ.

‘‘ອຕ຺ຖິ ສກ຺ຍກຸເລ ຊາໂຕ, ພຸທ຺ໂຘ ອປ຺ປຏິປຸຄ຺ຄໂລ;

ໂສ ເມ ຘມ຺ມມເທເສສິ, ທິຏ຺ຐີນໍ ສມຕິກ຺ກມໍ.

‘‘ທຸກ຺ຂໍ ¶ ທຸກ຺ຂສມຸປ຺ປາທໍ, ທຸກ຺ຂສ຺ສ ຈ ອຕິກ຺ກມໍ;

ອຣິຍໍ ຈຏ຺ຐງ຺ຄິກໍ ມຄ຺ຄໍ, ທຸກ຺ຂູປສມຄາມິນໍ.

‘‘ຕສ຺ສາຫໍ ວຈນໍ ສຸຕ຺ວາ, ວິຫຣິໍ ສາສເນ ຣຕາ;

ຕິສ຺ໂສ ວິຊ຺ຊາ ອນຸປ຺ປຕ຺ຕາ, ກຕໍ ພຸທ຺ຘສ຺ສ ສາສນໍ.

‘‘ສພ຺ພຕ຺ຖ ¶ ¶ ວິຫຕາ ນນ຺ທີ, ຕໂມຂນ຺ໂຘ ປທາລິໂຕ;

ເອວໍ ຊານາຫິ ປາປິມ, ນິຫໂຕ ຕ຺ວມສິ ອນ຺ຕກ’’.

‘‘ສຕິມຕີ ຈກ຺ຂຸມຕີ, ຠິກ຺ຂຸນີ ຠາວິຕິນ຺ທ຺ຣິຍາ;

ປຏິວິຊ຺ຌິໍ ປທໍ ສນ຺ຕໍ, ອກາປຸຣິສເສວິຕໍ’’.

‘‘ກິໍ ນຸ ຊາຕິໍ ນ ໂຣເຈສິ, ຊາໂຕ ກາມານິ ຠຸຎ຺ຊຕິ;

ຠຸຎ຺ຊາຫິ ກາມຣຕິໂຍ, ມາຫຸ ປຈ຺ຉານຸຕາປິນີ’’.

‘‘ຊາຕສ຺ສ ມຣຓໍ ໂຫຕິ, ຫຕ຺ຖປາທານ ເຉທນໍ;

ວຘພນ຺ຘປຣິກ຺ເລສໍ, ຊາໂຕ ທຸກ຺ຂໍ ນິຄຈ຺ຉຕິ.

‘‘ອຕ຺ຖິ ສກ຺ຍກຸເລ ຊາໂຕ, ສມ຺ພຸທ຺ໂຘ ອປຣາຊິໂຕ;

ໂສ ເມ ຘມ຺ມມເທເສສິ, ຊາຕິຍາ ສມຕິກ຺ກມໍ.

‘‘ທຸກ຺ຂໍ ທຸກ຺ຂສມຸປ຺ປາທໍ, ທຸກ຺ຂສ຺ສ ຈ ອຕິກ຺ກມໍ;

ອຣິຍໍ ຈຏ຺ຐງ຺ຄິກໍ ມຄ຺ຄໍ, ທຸກ຺ຂູປສມຄາມິນໍ.

‘‘ຕສ຺ສາຫໍ ວຈນໍ ສຸຕ຺ວາ, ວິຫຣິໍ ສາສເນ ຣຕາ;

ຕິສ຺ໂສ ວິຊ຺ຊາ ອນຸປ຺ປຕ຺ຕາ, ກຕໍ ພຸທ຺ຘສ຺ສ ສາສນໍ.

‘‘ສພ຺ພຕ຺ຖ ¶ ວິຫຕາ ນນ຺ທີ, ຕໂມຂນ຺ໂຘ ປທາລິໂຕ;

ເອວໍ ຊານາຫິ ປາປິມ, ນິຫໂຕ ຕ຺ວມສິ ອນ຺ຕກ’’.

‘‘ຠິກ຺ຂຸນີ ¶ ¶ ¶ ສີລສມ຺ປນ຺ນາ, ອິນ຺ທ຺ຣິເຍສຸ ສຸສໍວຸຕາ;

ອຘິຄຈ຺ເຉ ປທໍ ສນ຺ຕໍ, ອເສຈນກໂມຊວໍ’’.

‘‘ຕາວຕິໍສາ ຈ ຍາມາ ຈ, ຕຸສິຕາ ຈາປິ ເທວຕາ;

ນິມ຺ມານຣຕິໂນ ເທວາ, ເຍ ເທວາ ວສວຕ຺ຕິໂນ;

ຕຕ຺ຖ ຈິຕ຺ຕໍ ປຓີເຘຫິ, ຍຕ຺ຖ ເຕ ວຸສິຕໍ ປຸເຣ’’.

‘‘ຕາວຕິໍສາ ຈ ຍາມາ ຈ, ຕຸສິຕາ ຈາປິ ເທວຕາ;

ນິມ຺ມານຣຕິໂນ ເທວາ, ເຍ ເທວາ ວສວຕ຺ຕິໂນ.

‘‘ກາລໍ ກາລໍ ຠວາຠວໍ, ສກ຺ກາຍສ຺ມິໍ ປຸຣກ຺ຂຕາ;

ອວີຕິວຕ຺ຕາ ສກ຺ກາຍໍ, ຊາຕິມຣຓສາຣິໂນ.

‘‘ສພ຺ໂພ ອາທີປິໂຕ ໂລໂກ, ສພ຺ໂພ ໂລໂກ ປທີປິໂຕ;

ສພ຺ໂພ ປຊ຺ຊລິໂຕ ໂລໂກ, ສພ຺ໂພ ໂລໂກ ປກມ຺ປິໂຕ.

‘‘ອກມ຺ປິຍໍ ອຕຸລິຍໍ, ອປຸຖຸຊ຺ຊນເສວິຕໍ;

ພຸທ຺ໂຘ ຘມ຺ມມເທເສສິ, ຕຕ຺ຖ ເມ ນິຣໂຕ ມໂນ.

‘‘ຕສ຺ສາຫໍ ວຈນໍ ສຸຕ຺ວາ, ວິຫຣິໍ ສາສເນ ຣຕາ;

ຕິສ຺ໂສ ວິຊ຺ຊາ ອນຸປ຺ປຕ຺ຕາ, ກຕໍ ພຸທ຺ຘສ຺ສ ສາສນໍ.

‘‘ສພ຺ພຕ຺ຖ ວິຫຕາ ນນ຺ທີ, ຕໂມຂນ຺ໂຘ ປທາລິໂຕ;

ເອວໍ ຊານາຫິ ປາປິມ, ນິຫໂຕ ຕ຺ວມສິ ອນ຺ຕກ’’.

‘‘ມາ ¶ ¶ ¶ ສຸ ເຕ ວຑ຺ຒ ໂລກມ຺ຫິ, ວນໂຖ ອາຫຸ ກຸທາຈນໍ;

ມາ ປຸຕ຺ຕກ ປຸນປ຺ປຸນໍ, ອຫຸ ທຸກ຺ຂສ຺ສ ຠາຄິມາ.

‘‘ສຸຂຎ຺ຫິ ¶ ວຑ຺ຒ ມຸນໂຍ, ອເນຊາ ຉິນ຺ນສໍສຍາ;

ສີຕິຠູຕາ ທມປ຺ປຕ຺ຕາ, ວິຫຣນ຺ຕິ ອນາສວາ.

‘‘ເຕຫານຸຈິຓ຺ຓໍ ອິສີຠິ, ມຄ຺ຄໍ ທສ຺ສນປຕ຺ຕິຍາ;

ທຸກ຺ຂສ຺ສນ຺ຕກິຣິຍາຍ, ຕ຺ວໍ ວຑ຺ຒ ອນຸພ຺ຣູຫຍ’’.

‘‘ວິສາຣທາວ ຠຓສິ, ເອຕມຕ຺ຖໍ ຊເນຕ຺ຕິ ເມ;

ມຎ຺ຎາມິ ນູນ ມາມິເກ, ວນໂຖ ເຕ ນ ວິຊ຺ຊຕິ’’.

‘‘ເຍ ເກຈິ ວຑ຺ຒ ສງ຺ຂາຣາ, ຫີນາ ອຸກ຺ກຏ຺ຐມຊ຺ຌິມາ;

ອຓູປິ ອຓຸມຕ຺ໂຕປິ, ວນໂຖ ເມ ນ ວິຊ຺ຊຕິ.

‘‘ສພ຺ເພ ເມ ອາສວາ ຂີຓາ, ອປ຺ປມຕ຺ຕສ຺ສ ຌາຍໂຕ;

ຕິສ຺ໂສ ວິຊ຺ຊາ ອນຸປ຺ປຕ຺ຕາ, ກຕໍ ພຸທ຺ຘສ຺ສ ສາສນໍ’’.

‘‘ອຸຬາຣໍ ວຕ ເມ ມາຕາ, ປໂຕທໍ ສມວສ຺ສຣິ;

ປຣມຕ຺ຖສຎ຺ຫິຕາ ຄາຖາ, ຍຖາປິ ອນຸກມ຺ປິກາ.

‘‘ຕສ຺ສາຫໍ ວຈນໍ ສຸຕ຺ວາ, ອນຸສິຏ຺ຐິໍ ຊເນຕ຺ຕິຍາ;

ຘມ຺ມສໍເວຄມາປາທິໍ, ໂຍຄກ຺ເຂມສ຺ສ ປຕ຺ຕິຍາ.

‘‘ໂສຫໍ ປຘານປຫິຕຕ຺ໂຕ, ຣຕ຺ຕິນ຺ທິວມຕນ຺ທິໂຕ;

ມາຕຣາ ໂຈທິໂຕ ສນ຺ໂຕ, ອຜຸສິໍ ສນ຺ຕິມຸຕ຺ຕມໍ’’.

‘‘ກລ຺ຍາຓມິຕ຺ຕຕາ ¶ ¶ ¶ ມຸນິນາ, ໂລກໍ ອາທິສ຺ສ ວຓ຺ຓິຕາ;

ກລ຺ຍາຓມິຕ຺ເຕ ຠຊມາໂນ, ອປິ ພາໂລ ປຓ຺ຑິໂຕ ອສ຺ສ.

‘‘ຠຊິຕພ຺ພາ ສປ຺ປຸຣິສາ, ປຎ຺ຎາ ຕຖາ ວຑ຺ຒຕິ ຠຊນ຺ຕານໍ;

ຠຊມາໂນ ສປ຺ປຸຣິເສ, ສພ຺ເພຫິປິ ທຸກ຺ເຂຫິ ປມຸຈ຺ເຈຍ຺ຍ.

‘‘ທຸກ຺ຂຎ຺ຈ ວິຊາເນຍ຺ຍ, ທຸກ຺ຂສ຺ສ ຈ ສມຸທຍໍ ນິໂຣຘໍ;

ອຏ຺ຐງ຺ຄິກຎ຺ຈ ມຄ຺ຄໍ, ຈຕ຺ຕາຣິປິ ອຣິຍສຈ຺ຈານິ.

‘‘ທຸກ຺ໂຂ ¶ ອິຕ຺ຖິຠາໂວ, ອກ຺ຂາໂຕ ປຸຣິສທມ຺ມສາຣຖິນາ;

ສປຕ຺ຕິກມ຺ປິ ຫິ ທຸກ຺ຂໍ, ອປ຺ເປກຈ຺ຈາ ສກິໍ ວິຊາຕາໂຍ.

‘‘ຄລເກ ອປິ ກນ຺ຕນ຺ຕິ, ສຸຂຸມາລິນິໂຍ ວິສານິ ຂາທນ຺ຕິ;

ຊນມາຣກມຊ຺ຌຄຕາ, ອຸໂຠປິ ພ຺ຍສນານິ ອນຸໂຠນ຺ຕິ.

‘‘ອຸປວິຊຎ຺ຎາ ຄຈ຺ຉນ຺ຕີ, ອທ຺ທສາຫໍ ປຕິໍ ມຕໍ;

ປນ຺ຖມ຺ຫິ ວິຊາຍິຕ຺ວານ, ອປ຺ປຕ຺ຕາວ ສກໍ ຆຣໍ.

‘‘ທ຺ເວ ປຸຕ຺ຕາ ກາລກຕາ, ປຕີ ຈ ປນ຺ເຖ ມໂຕ ກປຓິກາຍ;

ມາຕາ ປິຕາ ຈ ຠາຕາ, ຑຍ຺ຫນ຺ຕິ ຈ ເອກຈິຕກາຍໍ.

‘‘ຂີຓກຸລີເນ ກປເຓ, ອນຸຠູຕໍ ເຕ ທຸຂໍ ອປຣິມາຓໍ;

ອສ຺ສູ ຈ ເຕ ປວຕ຺ຕໍ, ພຫູນິ ຈ ຊາຕິສຫສ຺ສານິ.

‘‘ວສິຕາ ສຸສານມຊ຺ເຌ, ອໂຖປິ ຂາທິຕານິ ປຸຕ຺ຕມໍສານິ;

ຫຕກຸລິກາ ¶ ສພ຺ພຄຣຫິຕາ, ມຕປຕິກາ ອມຕມຘິຄຈ຺ຉິໍ.

‘‘ຠາວິໂຕ ເມ ມຄ຺ໂຄ, ອຣິໂຍ ອຏ຺ຐງ຺ຄິໂກ ອມຕຄາມີ;

ນິພ຺ພານໍ ສຈ຺ຉິກຕໍ, ຘມ຺ມາທາສໍ ອເວກ຺ຂິໍຫໍ [ອເປກ຺ຂິຫໍ (ສີ.)].

‘‘ອຫມມ຺ຫິ ກນ຺ຕສລ຺ລາ, ໂອຫິຕຠາຣາ ກຕຎ຺ຫິ ກຣຓີຍໍ;

ກິສາ ໂຄຕມີ ເຖຣີ, ວິມຸຕ຺ຕຈິຕ຺ຕາ ອິມໍ ຠຓີ’’ຕິ.

‘‘ອຸໂຠ ¶ ¶ ມາຕາ ຈ ຘີຕາ ຈ, ມຍໍ ອາສຸໍ [ອາຠຸໍ (ສີ.)] ສປຕ຺ຕິໂຍ;

ຕສ຺ສາ ເມ ອຫຸ ສໍເວໂຄ, ອພ຺ຠຸໂຕ ໂລມຫໍສໂນ.

‘‘ຘິຣຕ຺ຖຸ ກາມາ ອສຸຈີ, ທຸຄ຺ຄນ຺ຘາ ພຫຸກຓ຺ຏກາ;

ຍຕ຺ຖ ມາຕາ ຈ ຘີຕາ ຈ, ສຠຣິຍາ ມຍໍ ອຫຸໍ.

‘‘ກາເມສ຺ວາທີນວໍ ¶ ທິສ຺ວາ, ເນກ຺ຂມ຺ມໍ ທຏ຺ຐຸ ເຂມໂຕ;

ສາ ປພ຺ພຊ຺ຊິໍ ຣາຊຄເຫ, ອຄາຣສ຺ມານຄາຣິຍໍ.

‘‘ປຸພ຺ເພນິວາສໍ ຊານາມິ, ທິພ຺ພຈກ຺ຂຸໍ ວິໂສຘິຕໍ;

ເຈໂຕປຣິຈ຺ຈຎາຓຎ຺ຈ, ໂສຕຘາຕຸ ວິໂສຘິຕາ.

‘‘ອິທ຺ຘີປິ ເມ ສຈ຺ຉິກຕາ, ປຕ຺ໂຕ ເມ ອາສວກ຺ຂໂຍ;

ຉຬຠິຎ຺ຎາ ສຈ຺ຉິກຕາ, ກຕໍ ພຸທ຺ຘສ຺ສ ສາສນໍ.

‘‘ອິທ຺ຘິຍາ ¶ ອຠິນິມ຺ມິຕ຺ວາ, ຈຕຸຣສ຺ສໍ ຣຖໍ ອຫໍ;

ພຸທ຺ຘສ຺ສ ປາເທ ວນ຺ທິຕ຺ວາ, ໂລກນາຖສ຺ສ ຕາທິໂນ’’ [ສິຣີມໂຕ (ສ຺ຍາ. ກ.)].

‘‘ສຸປຸປ຺ຜິຕຄ຺ຄໍ ອຸປຄມ຺ມ ປາທປໍ, ເອກາ ຕຸວໍ ຕິຏ຺ຐສິ ສາລມູເລ [ຣຸກ຺ຂມູເລ (ສ຺ຍາ. ກ.)];

ນ ຈາປິ ເຕ ທຸຕິໂຍ ອຕ຺ຖິ ໂກຈິ, ນ ຕ຺ວໍ ພາເລ ຠາຍສິ ຘຸຕ຺ຕການໍ’’.

‘‘ສຕໍ ສຫສ຺ສານິປິ ຘຸຕ຺ຕການໍ, ສມາຄຕາ ເອທິສກາ ຠເວຍ຺ຍຸໍ;

ໂລມໍ ນ ອິຎ຺ເຊ ນປິ ສມ຺ປເວເຘ, ກິໍ ເມ ຕຸວໍ ມາຣ ກຣິສ຺ສເສໂກ.

‘‘ເອສາ ອນ຺ຕຣຘາຍາມິ, ກຸຈ຺ຉິໍ ວາ ປວິສາມິ ເຕ;

ຠມຸກນ຺ຕເຣ ຕິຏ຺ຐາມິ, ຕິຏ຺ຐນ຺ຕິໍ ມໍ ນ ທກ຺ຂສິ.

‘‘ຈິຕ຺ຕມ຺ຫິ ¶ ວສີຠູຕາຫໍ, ອິທ຺ຘິປາທາ ສຸຠາວິຕາ;

ຉຬຠິຎ຺ຎາ ສຈ຺ຉິກຕາ, ກຕໍ ພຸທ຺ຘສ຺ສ ສາສນໍ.

‘‘ສຕ຺ຕິສູລູປມາ ກາມາ, ຂນ຺ຘາສໍ ອຘິກຸຏ຺ຏນາ;

ຍໍ ຕ຺ວໍ ‘ກາມຣຕິໍ’ ພ຺ຣູສິ, ‘ອຣຕີ’ ທານິ ສາ ມມ.

‘‘ສພ຺ພຕ຺ຖ ¶ ວິຫຕາ ນນ຺ທີ, ຕໂມຂນ຺ໂຘ ປທາລິໂຕ;

ເອວໍ ຊານາຫິ ປາປິມ, ນິຫໂຕ ຕ຺ວມສິ ອນ຺ຕກາ’’ຕິ.

‘‘ອຸທຫາຣີ ¶ ¶ ¶ ອຫໍ ສີເຕ [ອຸທກມາຫຣິໍ ສີເຕ (ສີ.)], ສທາ ອຸທກໂມຕຣິໍ;

ອຍ຺ຍານໍ ທຓ຺ຑຠຍຠີຕາ, ວາຈາໂທສຠຍຏ຺ຏິຕາ.

‘‘ກສ຺ສ ພ຺ຣາຫ຺ມຓ ຕ຺ວໍ ຠີໂຕ, ສທາ ອຸທກໂມຕຣິ;

ເວຘມາເນຫິ ຄຕ຺ເຕຫິ, ສີຕໍ ເວທຍເສ ຠຸສໍ’’.

ຊານນ຺ຕີ ວຕ ມໍ [ຊານນ຺ຕີ ຈ ຕຸວໍ (ກ.)] ໂຠຕິ, ປຸຓ຺ຓິເກ ປຣິປຸຈ຺ຉສິ;

ກໂຣນ຺ຕໍ ກຸສລໍ ກມ຺ມໍ, ຣຸນ຺ຘນ຺ຕໍ ກຕປາປກໍ.

‘‘ໂຍ ຈ ວຸຑ຺ໂຒ ທຫໂຣ ວາ, ປາປກມ຺ມໍ ປກຸພ຺ພຕິ;

ທກາຠິເສຈນາ ໂສປິ, ປາປກມ຺ມາ ປມຸຈ຺ຈຕິ’’.

‘‘ໂກ ນຸ ເຕ ອິທມກ຺ຂາສິ, ອຊານນ຺ຕສ຺ສ ອຊານໂກ;

ທກາຠິເສຈນາ ນາມ, ປາປກມ຺ມາ ປມຸຈ຺ຈຕິ.

‘‘ສຄ຺ຄໍ ນູນ ຄມິສ຺ສນ຺ຕິ, ສພ຺ເພ ມຓ຺ຑູກກຈ຺ຉປາ;

ນາຄາ [ນກ຺ກາ (ສີ.)] ຈ ສຸສຸມາຣາ ຈ, ເຍ ຈຎ຺ເຎ ອຸທເກ ຈຣາ.

‘‘ໂອຣພ຺ຠິກາ ສູກຣິກາ, ມຈ຺ຉິກາ ມິຄພນ຺ຘກາ;

ໂຈຣາ ຈ ວຊ຺ຌຆາຕາ ຈ, ເຍ ຈຎ຺ເຎ ປາປກມ຺ມິໂນ;

ທກາຠິເສຈນາ ເຕປິ, ປາປກມ຺ມາ ປມຸຈ຺ຈເຣ.

‘‘ສເຈ ອິມາ ນທິໂຍ ເຕ, ປາປໍ ປຸພ຺ເພ ກຕໍ ວຫຸໍ;

ປຸຎ຺ຎມ຺ປິມາ ¶ ວເຫຍ຺ຍຸໍ ເຕ, ເຕນ ຕ຺ວໍ ປຣິພາຫິໂຣ.

‘‘ຍສ຺ສ ¶ ພ຺ຣາຫ຺ມຓ ຕ຺ວໍ ຠີໂຕ, ສທາ ອຸທກໂມຕຣິ;

ຕເມວ ພ຺ຣຫ຺ເມ ມາ ກາສິ, ມາ ເຕ ສີຕໍ ຉວິໍ ຫເນ’’.

‘‘ກຸມ຺ມຄ຺ຄປຏິປນ຺ນໍ ມໍ, ອຣິຍມຄ຺ຄໍ ສມານຍິ;

ທກາຠິເສຈນາ ໂຠຕິ, ອິມໍ ສາຏໍ ທທາມິ ເຕ’’.

‘‘ຕຸຍ຺ເຫວ ສາຏໂກ ໂຫຕຸ, ນາຫມິຈ຺ຉາມິ ສາຏກໍ;

ສເຈ ຠາຍສິ ທຸກ຺ຂສ຺ສ, ສເຈ ເຕ ທຸກ຺ຂມປ຺ປິຍໍ.

‘‘ມາກາສິ ¶ ¶ ປາປກໍ ກມ຺ມໍ, ອາວິ ວາ ຍທິ ວາ ຣໂຫ;

ສເຈ ຈ ປາປກໍ ກມ຺ມໍ, ກຣິສ຺ສສິ ກໂຣສິ ວາ.

‘‘ນ ເຕ ທຸກ຺ຂາ ປມຸຕ຺ຍຕ຺ຖິ, ອຸເປຈ຺ຈາປິ [ອຸປ຺ປຈ຺ຈາປິ (ອຏ຺ຐ. ປາຐນ຺ຕຣໍ)] ປລາຍໂຕ;

ສເຈ ຠາຍສິ ທຸກ຺ຂສ຺ສ, ສເຈ ເຕ ທຸກ຺ຂມປ຺ປິຍໍ.

‘‘ອຸເປຫິ ສຣຓໍ ພຸທ຺ຘໍ, ຘມ຺ມໍ ສງ຺ຆຎ຺ຈ ຕາທິນໍ;

ສມາທິຍາຫິ ສີລານິ, ຕໍ ເຕ ອຕ຺ຖາຍ ເຫຫິຕິ’’.

‘‘ອຸເປມິ ສຣຓໍ ພຸທ຺ຘໍ, ຘມ຺ມໍ ສງ຺ຆຎ຺ຈ ຕາທິນໍ;

ສມາທິຍາມິ ສີລານິ, ຕໍ ເມ ອຕ຺ຖາຍ ເຫຫິຕິ.

‘‘ພ຺ຣຫ຺ມພນ຺ຘຸ ປຸເຣ ອາສິໍ, ອຊ຺ຊມ຺ຫິ ສຈ຺ຈພ຺ຣາຫ຺ມໂຓ;

ເຕວິຊ຺ໂຊ ເວທສມ຺ປນ຺ໂນ, ໂສຕ຺ຕິໂຍ ຈມ຺ຫິ ນ຺ຫາຕໂກ’’ຕິ.

‘‘ກາຬກາ ¶ ¶ ຠມຣວຓ຺ຓສາທິສາ, ເວລ຺ລິຕຄ຺ຄາ ມມ ມຸທ຺ຘຊາ ອຫຸໍ;

ເຕ ຊຣາຍ ສາຓວາກສາທິສາ, ສຈ຺ຈວາທິວຈນໍ ອນຎ຺ຎຖາ.

‘‘ວາສິໂຕວ ສຸຣຠີ ກຣຓ຺ຑໂກ, ປຸປ຺ຜປູຣ ມມ ອຸຕ຺ຕມງ຺ຄໂຊ [ອຸຕ຺ຕມງ຺ຄຠູໂຕ (ກ.)].

ຕໍ ຊຣາຍຖ ສໂລມຄນ຺ຘິກໍ, ສຈ຺ຈວາທິວຈນໍ ອນຎ຺ຎຖາ.

‘‘ການນໍວ ¶ ສຫິຕໍ ສຸໂຣປິຕໍ, ໂກຈ຺ຉສູຈິວິຈິຕຄ຺ຄໂສຠິຕໍ;

ຕໍ ຊຣາຍ ວິຣລໍ ຕຫິໍ ຕຫິໍ, ສຈ຺ຈວາທິວຈນໍ ອນຎ຺ຎຖາ.

‘‘ກຓ຺ຫຂນ຺ຘກສຸວຓ຺ຓມຓ຺ຑິຕໍ, ໂສຠເຕ ສຸເວຓີຫິລງ຺ກຕໍ;

ຕໍ ¶ ຊຣາຍ ຂລິຕໍ ສິຣໍ ກຕໍ, ສຈ຺ຈວາທິວຈນໍ ອນຎ຺ຎຖາ.

‘‘ຈິຕ຺ຕກາຣສຸກຕາວ ເລຂິກາ, ໂສຠເຣ ສຸ ຠມຸກາ ປຸເຣ ມມ;

ຕາ ¶ ຊຣາຍ ວລິຠິປ຺ປລມ຺ພິຕາ, ສຈ຺ຈວາທິວຈນໍ ອນຎ຺ຎຖາ.

‘‘ຠສ຺ສຣາ ສຸຣຸຈິຣາ ຍຖາ ມຓີ, ເນຕ຺ຕເຫສຸມຠິນີລມາຍຕາ;

ເຕ ຊຣາຍຠິຫຕາ ນ ໂສຠເຣ, ສຈ຺ຈວາທິວຈນໍ ອນຎ຺ຎຖາ.

‘‘ສຓ຺ຫຕຸງ຺ຄສທິສີ ¶ ຈ ນາສິກາ, ໂສຠເຕ ສຸ ອຠິໂຍພ຺ພນໍ ປຕິ;

ສາ ຊຣາຍ ອຸປກູລິຕາ ວິຍ, ສຈ຺ຈວາທິວຈນໍ ອນຎ຺ຎຖາ.

‘‘ກງ຺ກຓໍ ວ ສຸກຕໍ ສຸນິຏ຺ຐິຕໍ, ໂສຠເຣ ສຸ ມມ ກຓ຺ຓປາຬິໂຍ;

ຕາ ຊຣາຍ ວລິຠິປ຺ປລມ຺ພິຕາ, ສຈ຺ຈວາທິວຈນໍ ອນຎ຺ຎຖາ.

‘‘ປຕ຺ຕລີມກຸລວຓ຺ຓສາທິສາ, ໂສຠເຣ ສຸ ທນ຺ຕາ ປຸເຣ ມມ;

ເຕ ຊຣາຍ ຂຓ຺ຑິຕາ ຈາສິຕາ [ປີຕກາ (ສີ.)], ສຈ຺ຈວາທິວຈນໍ ອນຎ຺ຎຖາ.

‘‘ການນມ຺ຫິ ວນສຓ຺ຑຈາຣິນີ, ໂກກິລາວ ¶ ມຘຸຣໍ ນິກູຊິຫໍ;

ຕໍ ຊຣາຍ ຂລິຕໍ ຕຫິໍ ຕຫິໍ, ສຈ຺ຈວາທິວຈນໍ ອນຎ຺ຎຖາ.

‘‘ສຓ຺ຫກມ຺ພຸຣິວ ສຸປ຺ປມຊ຺ຊິຕາ, ໂສຠເຕ ສຸ ຄີວາ ປຸເຣ ມມ;

ສາ ຊຣາຍ ຠຄ຺ຄາ [ຠຎ຺ຊິຕາ (?)] ວິນາມິຕາ, ສຈ຺ຈວາທິວຈນໍ ອນຎ຺ຎຖາ.

‘‘ວຏ຺ຏປລິຆສທິໂສປມາ ¶ ອຸໂຠ, ໂສຠເຣ ສຸ ພາຫາ ປຸເຣ ມມ;

ຕາ ຊຣາຍ ຍຖ ປາຏລິພ຺ພລິຕາ [ຍຖາ ປາຏລິປ຺ປລິຕາ (ສີ. ສ຺ຍາ. ກ.)], ສຈ຺ຈວາທິວຈນໍ ອນຎ຺ຎຖາ.

‘‘ສຓ຺ຫມຸທ຺ທິກສຸວຓ຺ຓມຓ຺ຑິຕາ, ໂສຠເຣ ສຸ ຫຕ຺ຖາ ປຸເຣ ມມ;

ເຕ ຊຣາຍ ຍຖາ ມູລມູລິກາ, ສຈ຺ຈວາທິວຈນໍ ອນຎ຺ຎຖາ.

‘‘ປີນວຏ຺ຏສຫິຕຸຄ຺ຄຕາ ¶ ອຸໂຠ, ໂສຠເຣ [ໂສຠເຕ (ອຏ຺ຐ.)] ສຸ ຖນກາ ປຸເຣ ມມ;

ເຖວິກີວ ລມ຺ພນ຺ຕິ ໂນທກາ, ສຈ຺ຈວາທິວຈນໍ ¶ ອນຎ຺ຎຖາ.

‘‘ກຎ຺ຈນສ຺ສຜລກໍວ ສມ຺ມຏ຺ຐໍ, ໂສຠເຕ ສຸ ກາໂຍ ປຸເຣ ມມ;

ໂສ ວລີຫິ ສຸຂຸມາຫິ ໂອຕໂຕ, ສຈ຺ຈວາທິວຈນໍ ອນຎ຺ຎຖາ.

‘‘ນາຄໂຠຄສທິໂສປມາ ອຸໂຠ, ໂສຠເຣ ສຸ ອູຣູ ປຸເຣ ມມ;

ເຕ ຊຣາຍ ຍຖາ ເວຬຸນາຬິໂຍ, ສຈ຺ຈວາທິວຈນໍ ອນຎ຺ຎຖາ.

‘‘ສຓ຺ຫນູປຸຣສຸວຓ຺ຓມຓ຺ຑິຕາ ¶ , ໂສຠເຣ ສຸ ຊງ຺ຆາ ປຸເຣ ມມ;

ຕາ ຊຣາຍ ຕິລທຓ຺ຑກາຣິວ, ສຈ຺ຈວາທິວຈນໍ ອນຎ຺ຎຖາ.

‘‘ຕູລປຸຓ຺ຓສທິໂສປມາ ອຸໂຠ, ໂສຠເຣ ສຸ ປາທາ ປຸເຣ ມມ;

ເຕ ຊຣາຍ ຜຸຏິຕາ ວລີມຕາ, ສຈ຺ຈວາທິວຈນໍ ອນຎ຺ຎຖາ.

‘‘ເອທິໂສ ອຫຸ ອຍໍ ສມຸສ຺ສໂຍ, ຊຊ຺ຊໂຣ ພຫຸທຸກ຺ຂານມາລໂຍ;

ໂສປເລປປຕິໂຕ ¶ ຊຣາຆໂຣ, ສຈ຺ຈວາທິວຈນໍ ອນຎ຺ຎຖາ’’.

‘‘‘ສມຓາ’ຕິ ¶ ໂຠຕິ ສຸປິ [ໂຠຕິ ຕ຺ວໍ ສຍສິ (ສີ.), ໂຠຕິ ມໍ ວິປສ຺ສິ (ສ຺ຍາ.)], ‘ສມຓາ’ຕິ ປພຸຊ຺ຌສິ [ປຏິພຸຊ຺ຌສິ (ສີ. ສ຺ຍາ.)];

ສມຓາເນວ [ສມຓານເມວ (ສີ. ສ຺ຍາ.)] ກິຕ຺ເຕສິ, ສມຓີ ນູນ [ສມຓີ ນຸ (ກ.)] ຠວິສ຺ສສິ.

‘‘ວິປຸລໍ ¶ ອນ຺ນຎ຺ຈ ປານຎ຺ຈ, ສມຓານໍ ປເວຈ຺ຈສິ [ປຍຈ຺ຉສິ (ສີ.)];

ໂຣຫິນີ ທານິ ປຸຈ຺ຉາມິ, ເກນ ເຕ ສມຓາ ປິຍາ.

‘‘ອກມ຺ມກາມາ ອລສາ, ປຣທຕ຺ຕູປຊີວິໂນ;

ອາສໍສຸກາ ສາທຸກາມາ, ເກນ ເຕ ສມຓາ ປິຍາ’’.

‘‘ຈິຣສ຺ສໍ ວຕ ມໍ ຕາຕ, ສມຓານໍ ປຣິປຸຈ຺ຉສິ;

ເຕສໍ ເຕ ກິຕ຺ຕຍິສ຺ສາມິ, ປຎ຺ຎາສີລປຣກ຺ກມໍ.

‘‘ກມ຺ມກາມາ ອນລສາ, ກມ຺ມເສຏ຺ຐສ຺ສ ກາຣກາ;

ຣາຄໍ ໂທສໍ ປຊຫນ຺ຕິ, ເຕນ ເມ ສມຓາ ປິຍາ.

‘‘ຕີຓິ ປາປສ຺ສ ມູລານິ, ຘຸນນ຺ຕິ ສຸຈິກາຣິໂນ;

ສພ຺ພໍ ປາປໍ ປຫີເນສໍ, ເຕນ ເມ ສມຓາ ປິຍາ.

‘‘ກາຍກມ຺ມໍ ສຸຈິ ເນສໍ, ວຈີກມ຺ມຎ຺ຈ ຕາທິສໍ;

ມໂນກມ຺ມໍ ສຸຈິ ເນສໍ, ເຕນ ເມ ສມຓາ ປິຍາ.

‘‘ວິມລາ ສງ຺ຂມຸຕ຺ຕາວ, ສຸທ຺ຘາ ສນ຺ຕຣພາຫິຣາ;

ປຸຓ຺ຓາ ສຸກ຺ການ ຘມ຺ມານໍ [ສຸກ຺ເກຫິ ຘມ຺ເມຫິ (ສີ. ສ຺ຍາ. ອຏ຺ຐ.)], ເຕນ ເມ ສມຓາ ປິຍາ.

‘‘ພຫຸສ຺ສຸຕາ ຘມ຺ມຘຣາ, ອຣິຍາ ຘມ຺ມຊີວິໂນ;

ອຕ຺ຖໍ ຘມ຺ມຎ຺ຈ ເທເສນ຺ຕິ, ເຕນ ເມ ສມຓາ ປິຍາ.

‘‘ພຫຸສ຺ສຸຕາ ¶ ຘມ຺ມຘຣາ, ອຣິຍາ ຘມ຺ມຊີວິໂນ;

ເອກຄ຺ຄຈິຕ຺ຕາ ສຕິມນ຺ໂຕ, ເຕນ ເມ ສມຓາ ປິຍາ.

‘‘ທູຣງ຺ຄມາ ¶ ສຕິມນ຺ໂຕ, ມນ຺ຕຠາຓີ ອນຸທ຺ຘຕາ;

ທຸກ຺ຂສ຺ສນ຺ຕໍ ປຊານນ຺ຕິ, ເຕນ ເມ ສມຓາ ປິຍາ.

‘‘ຍສ຺ມາ ຄາມາ ປກ຺ກມນ຺ຕິ, ນ ວິໂລເກນ຺ຕິ ກິຎ຺ຈນໍ;

ອນເປກ຺ຂາວ ຄຈ຺ຉນ຺ຕິ, ເຕນ ເມ ສມຓາ ປິຍາ.

‘‘ນ ¶ ເຕສໍ ໂກຏ຺ເຐ ໂອເປນ຺ຕິ, ນ ກຸມ຺ຠິໍ ນ ຂໂຬປິຍໍ;

ປຣິນິຏ຺ຐິຕເມສານາ, ເຕນ ເມ ສມຓາ ປິຍາ.

‘‘ນ ເຕ ຫິຣຎ຺ຎໍ ຄຓ຺ຫນ຺ຕິ, ນ ສຸວຓ຺ຓໍ ນ ຣູປິຍໍ;

ປຈ຺ຈຸປ຺ປນ຺ເນນ ຍາເປນ຺ຕິ, ເຕນ ເມ ສມຓາ ປິຍາ.

‘‘ນານາກຸລາ ¶ ປພ຺ພຊິຕາ, ນານາຊນປເທຫິ ຈ;

ອຎ຺ຎມຎ຺ຎໍ ປິຍາຍນ຺ຕິ [ປິຫຍນ຺ຕິ (ກ.)], ເຕນ ເມ ສມຓາ ປິຍາ’’.

‘‘ອຕ຺ຖາຍ ວຕ ໂນ ໂຠຕິ, ກຸເລ ຊາຕາສິ ໂຣຫິນີ;

ສທ຺ຘາ ພຸທ຺ເຘ ຈ ຘມ຺ເມ ຈ, ສງ຺ເຆ ຈ ຕິພ຺ພຄາຣວາ.

‘‘ຕຸວໍ ເຫຕໍ ປຊານາສິ, ປຸຎ຺ຎກ຺ເຂຕ຺ຕໍ ອນຸຕ຺ຕຣໍ;

ອມ຺ຫມ຺ປິ ເອເຕ ສມຓາ, ປຏິຄຓ຺ຫນ຺ຕິ ທກ຺ຂິຓໍ’’.

‘‘ປຕິຏ຺ຐິໂຕ ເຫຕ຺ຖ ຍຎ຺ໂຎ, ວິປຸໂລ ໂນ ຠວິສ຺ສຕິ;

ສເຈ ຠາຍສິ ທຸກ຺ຂສ຺ສ, ສເຈ ເຕ ທຸກ຺ຂມປ຺ປິຍໍ.

‘‘ອຸເປຫິ ສຣຓໍ ພຸທ຺ຘໍ, ຘມ຺ມໍ ສງ຺ຆຎ຺ຈ ຕາທິນໍ;

ສມາທິຍາຫິ ສີລານິ, ຕໍ ເຕ ອຕ຺ຖາຍ ເຫຫິຕິ’’.

‘‘ອຸເປມິ ¶ ສຣຓໍ ພຸທ຺ຘໍ, ຘມ຺ມໍ ສງ຺ຆຎ຺ຈ ຕາທິນໍ;

ສມາທິຍາມິ ສີລານິ, ຕໍ ເມ ອຕ຺ຖາຍ ເຫຫິຕິ.

‘‘ພ຺ຣຫ຺ມພນ຺ຘຸ ປຸເຣ ອາສິໍ, ໂສ ອິທານິມ຺ຫິ ພ຺ຣາຫ຺ມໂຓ;

ເຕວິຊ຺ໂຊ ໂສຕ຺ຕິໂຍ ຈມ຺ຫິ, ເວທຄູ ຈມ຺ຫິ ນ຺ຫາຕໂກ’’.

‘‘ລຏ຺ຐິຫຕ຺ໂຖ ປຸເຣ ອາສິ, ໂສ ທານິ ມິຄລຸທ຺ທໂກ;

ອາສາຍ ປລິປາ ໂຆຣາ, ນາສກ຺ຂິ ປາຣເມຕເວ.

‘‘ສຸມຕ຺ຕໍ ມໍ ມຎ຺ຎມານາ, ຈາປາ ປຸຕ຺ຕມໂຕສຍິ;

ຈາປາຍ ພນ຺ຘນໍ ເຉຕ຺ວາ, ປພ຺ພຊິສ຺ສໍ ປຸໂນປຫໍ.

‘‘ມາ ¶ ເມ ກຸຊ຺ຌິ ມຫາວີຣ, ມາ ເມ ກຸຊ຺ຌິ ມຫາມຸນິ;

ນ ຫິ ໂກຘປເຣຕສ຺ສ, ສຸທ຺ຘິ ອຕ຺ຖິ ກຸໂຕ ຕໂປ.

‘‘ປກ຺ກມິສ຺ສຎ຺ຈ ¶ ນາຬາໂຕ, ໂກຘ ນາຬາຍ ວຈ຺ຉຕິ;

ພນ຺ຘນ຺ຕີ ອິຕ຺ຖິຣູເປນ, ສມເຓ ຘມ຺ມຊີວິໂນ’’ [ຘມ຺ມຊີວິເນ (ກ.)].

‘‘ເອຫິ ກາຬ ນິວຕ຺ຕສ຺ສຸ, ຠຸຎ຺ຊ ກາເມ ຍຖາ ປຸເຣ;

ອຫຎ຺ຈ ເຕ ວສີກຕາ, ເຍ ຈ ເມ ສນ຺ຕິ ຎາຕກາ’’.

‘‘ເອຕ຺ໂຕ ¶ ຈາເປ ຈຕຸພ຺ຠາຄໍ, ຍຖາ ຠາສສິ ຕ຺ວຎ຺ຈ ເມ;

ຕຍິ ຣຕ຺ຕສ຺ສ ໂປສສ຺ສ, ອຸຬາຣໍ ວຕ ຕໍ ສິຍາ’’.

‘‘ກາຬງ຺ຄິນິໍວ ຕກ຺ກາຣິໍ, ປຸປ຺ຜິຕໍ ຄິຣິມຸທ຺ຘນິ;

ຜຸລ຺ລໍ ທາລິມລຏ຺ຐິໍວ, ອນ຺ໂຕທີເປວ ປາຏລິໍ.

‘‘ຫຣິຈນ຺ທນລິຕ຺ຕງ຺ຄິໍ, ກາສິກຸຕ຺ຕມຘາຣິນິໍ;

ຕໍ ¶ ມໍ ຣູປວຕິໍ ສນ຺ຕິໍ, ກສ຺ສ ໂອຫາຍ ຄຈ຺ຉສິ’’.

‘‘ສາກຸນ຺ຕິໂກວ ສກຸຓິໍ [ສກຸຓໍ (ສ຺ຍາ.)], ຍຖາ ພນ຺ຘິຕຸມິຈ຺ຉຕິ;

ອາຫຣິເມນ ຣູເປນ, ນ ມໍ ຕ຺ວໍ ພາຘຍິສ຺ສສິ’’.

‘‘ອິມຎ຺ຈ ເມ ປຸຕ຺ຕຜລໍ, ກາຬ ອຸປ຺ປາທິຕໍ ຕຍາ;

ຕໍ ມໍ ປຸຕ຺ຕວຕິໍ ສນ຺ຕິໍ, ກສ຺ສ ໂອຫາຍ ຄຈ຺ຉສິ’’.

‘‘ຊຫນ຺ຕິ ປຸຕ຺ເຕ ສປ຺ປຎ຺ຎາ, ຕໂຕ ຎາຕີ ຕໂຕ ຘນໍ;

ປພ຺ພຊນ຺ຕິ ມຫາວີຣາ, ນາໂຄ ເຉຕ຺ວາວ ພນ຺ຘນໍ’’.

‘‘ອິທານິ ເຕ ອິມໍ ປຸຕ຺ຕໍ, ທຓ຺ເຑນ ຉຸຣິກາຍ ວາ;

ຠູມິຍໍ ວາ ນິສຸມ຺ຠິສ຺ສໍ [ນິສຸມ຺ເຠຍ຺ຍໍ (ສີ.)], ປຸຕ຺ຕໂສກາ ນ ຄຈ຺ຉສິ’’.

‘‘ສເຈ ປຸຕ຺ຕໍ ສິງ຺ຄາລານໍ, ກຸກ຺ກຸຣານໍ ປທາຫິສິ;

ນ ມໍ ປຸຕ຺ຕກຕ຺ເຕ ຊມ຺ມິ, ປຸນຣາວຕ຺ຕຍິສ຺ສສິ’’.

‘‘ຫນ຺ທ ໂຂ ທານິ ຠທ຺ທນ຺ເຕ, ກຸຫິໍ ກາຬ ຄມິສ຺ສສິ;

ກຕມໍ ¶ ຄາມນິຄມໍ, ນຄຣໍ ຣາຊຘານິໂຍ’’.

‘‘ອຫຸມ຺ຫ ປຸພ຺ເພ ຄຓິໂນ, ອສ຺ສມຓາ ສມຓມານິໂນ;

ຄາເມນ ຄາມໍ ວິຈຣິມ຺ຫ, ນຄເຣ ຣາຊຘານິໂຍ.

‘‘ເອໂສ ຫິ ຠຄວາ ພຸທ຺ໂຘ, ນທິໍ ເນຣຎ຺ຊຣໍ ປຕິ;

ສພ຺ພທຸກ຺ຂປ຺ປຫານາຍ, ຘມ຺ມໍ ເທເສຕິ ປາຓິນໍ;

ຕສ຺ສາຫໍ ສນ຺ຕິກໍ ຄຈ຺ຉໍ, ໂສ ເມ ສຕ຺ຖາ ຠວິສ຺ສຕິ’’.

‘‘ວນ຺ທນໍ ¶ ທານິ ວຊ຺ຊາສິ, ໂລກນາຖໍ ອນຸຕ຺ຕຣໍ;

ປທກ຺ຂິຓຎ຺ຈ ກຕ຺ວານ, ອາທິເສຍ຺ຍາສິ ທກ຺ຂິຓໍ’’.

‘‘ເອຕໍ ໂຂ ລພ຺ຠມມ຺ເຫຫິ, ຍຖາ ຠາສສິ ຕ຺ວຎ຺ຈ ເມ;

ວນ຺ທນໍ ທານິ ເຕ ວຊ຺ຊໍ, ໂລກນາຖໍ ອນຸຕ຺ຕຣໍ;

ປທກ຺ຂິຓຎ຺ຈ ¶ ກຕ຺ວານ, ອາທິສິສ຺ສາມິ ທກ຺ຂິຓໍ’’.

ຕໂຕ ¶ ຈ ກາໂຬ ປກ຺ກາມິ, ນທິໍ ເນຣຎ຺ຊຣໍ ປຕິ;

ໂສ ອທ຺ທສາສິ ສມ຺ພຸທ຺ຘໍ, ເທເສນ຺ຕໍ ອມຕໍ ປທໍ.

ທຸກ຺ຂໍ ທຸກ຺ຂສມຸປ຺ປາທໍ, ທຸກ຺ຂສ຺ສ ຈ ອຕິກ຺ກມໍ;

ອຣິຍໍ ຈຏ຺ຐງ຺ຄິກໍ ມຄ຺ຄໍ, ທຸກ຺ຂູປສມຄາມິນໍ.

ຕສ຺ສ ປາທານິ ວນ຺ທິຕ຺ວາ, ກຕ຺ວານ ນໍ [ກຕ຺ວານຫໍ (ສີ.)] ປທກ຺ຂິຓໍ;

ຈາປາຍ ອາທິສິຕ຺ວານ, ປພ຺ພຊິໍ ອນຄາຣິຍໍ;

ຕິສ຺ໂສ ວິຊ຺ຊາ ອນຸປ຺ປຕ຺ຕາ, ກຕໍ ພຸທ຺ຘສ຺ສ ສາສນໍ.

‘‘ເປຕານິ ໂຠຕິ ປຸຕ຺ຕານິ, ຂາທມານາ ຕຸວໍ ປຸເຣ;

ຕຸວໍ ທິວາ ຈ ຣຕ຺ໂຕ ຈ, ອຕີວ ປຣິຕປ຺ປສິ.

‘‘ສາຊ຺ຊ ສພ຺ພານິ ຂາທິຕ຺ວາ, ສຕປຸຕ຺ຕານິ [ສຕ຺ຕ ປຸຕ຺ຕານິ (ສ຺ຍາ.)] ພ຺ຣາຫ຺ມຓີ;

ວາເສຏ຺ຐິ ເກນ ວຓ຺ເຓນ, ນ ພາຬ຺ຫໍ ປຣິຕປ຺ປສິ’’.

‘‘ພຫູນິ ປຸຕ຺ຕສຕານິ, ຎາຕິສງ຺ຆສຕານິ ຈ;

ຂາທິຕານິ ອຕີຕໍເສ, ມມ ຕຸຍ຺ຫຎ຺ຈ ພ຺ຣາຫ຺ມຓ.

‘‘ສາຫໍ ນິສ຺ສຣຓໍ ຎຕ຺ວາ, ຊາຕິຍາ ມຣຓສ຺ສ ຈ;

ນ ¶ ໂສຈາມິ ນ ໂຣທາມິ, ນ ຈາປິ ປຣິຕປ຺ປຍິໍ’’.

‘‘ອພ຺ຠຸຕໍ ¶ ວຕ ວາເສຏ຺ຐິ, ວາຈໍ ຠາສສິ ເອທິສິໍ;

ກສ຺ສ ຕ຺ວໍ ຘມ຺ມມຎ຺ຎາຍ, ຄິຣໍ [ຖິຣໍ (ສີ.)] ຠາສສິ ເອທິສິໍ’’.

‘‘ເອສ ພ຺ຣາຫ຺ມຓ ສມ຺ພຸທ຺ໂຘ, ນຄຣໍ ມິຖິລໍ ປຕິ;

ສພ຺ພທຸກ຺ຂປ຺ປຫານາຍ, ຘມ຺ມໍ ເທເສສິ ປາຓິນໍ.

‘‘ຕສ຺ສ ພ຺ຣຫ຺ເມ [ພ຺ຣາຫ຺ມຓ (ສີ. ສ຺ຍາ.)] ອຣຫໂຕ, ຘມ຺ມໍ ສຸຕ຺ວາ ນິຣູປຘິໍ;

ຕຕ຺ຖ ວິຎ຺ຎາຕສທ຺ຘມ຺ມາ, ປຸຕ຺ຕໂສກໍ ພ຺ຍປານຸທິໍ’’.

‘‘ໂສ ¶ ອຫມ຺ປິ ຄມິສ຺ສາມິ, ນຄຣໍ ມິຖິລໍ ປຕິ;

ອປ຺ເປວ ມໍ ໂສ ຠຄວາ, ສພ຺ພທຸກ຺ຂາ ປໂມຈເຍ’’.

ອທ຺ທສ ¶ ພ຺ຣາຫ຺ມໂຓ ພຸທ຺ຘໍ, ວິປ຺ປມຸຕ຺ຕໍ ນິຣູປຘິໍ;

ສ຺ວສ຺ສ ຘມ຺ມມເທເສສິ, ມຸນິ ທຸກ຺ຂສ຺ສ ປາຣຄູ.

ທຸກ຺ຂໍ ທຸກ຺ຂສມຸປ຺ປາທໍ, ທຸກ຺ຂສ຺ສ ຈ ອຕິກ຺ກມໍ;

ອຣິຍໍ ຈຏ຺ຐງ຺ຄິກໍ ມຄ຺ຄໍ, ທຸກ຺ຂູປສມຄາມິນໍ.

ຕຕ຺ຖ ວິຎ຺ຎາຕສທ຺ຘມ຺ໂມ, ປພ຺ພຊ຺ຊໍ ສມໂຣຈຍິ;

ສຸຊາໂຕ ຕີຫິ ຣຕ຺ຕີຫິ, ຕິສ຺ໂສ ວິຊ຺ຊາ ອຜສ຺ສຍິ.

‘‘ເອຫິ ສາຣຖິ ຄຈ຺ຉາຫິ, ຣຖໍ ນິຍ຺ຍາທຍາຫິມໍ;

ອາໂຣຄ຺ຍໍ ພ຺ຣາຫ຺ມຓິໍ ວຊ຺ຊ [ວຊ຺ຊາ (ສີ.)], ‘ປພ຺ພຊິ [ປພ຺ພຊິໂຕ (ສີ.)] ທານິ ພ຺ຣາຫ຺ມໂຓ;

ສຸຊາໂຕ ຕີຫິ ຣຕ຺ຕີຫິ, ຕິສ຺ໂສ ວິຊ຺ຊາ ອຜສ຺ສຍິ’’’.

ຕໂຕ ຈ ຣຖມາທາຍ, ສຫສ຺ສຎ຺ຈາປິ ສາຣຖິ;

ອາໂຣຄ຺ຍໍ ¶ ພ຺ຣາຫ຺ມຓິໂວຈ, ‘‘ປພ຺ພຊິ ທານິ ພ຺ຣາຫ຺ມໂຓ;

ສຸຊາໂຕ ຕີຫິ ຣຕ຺ຕີຫິ, ຕິສ຺ໂສ ວິຊ຺ຊາ ອຜສ຺ສຍິ’’.

‘‘ເອຕຎ຺ຈາຫໍ ອສ຺ສຣຖໍ, ສຫສ຺ສຎ຺ຈາປິ ສາຣຖິ;

ເຕວິຊ຺ຊໍ ພ຺ຣາຫ຺ມຓໍ ສຸຕ຺ວາ [ຎຕ຺ວາ (ສີ.)], ປຸຓ຺ຓປຕ຺ຕໍ ທທາມິ ເຕ’’.

‘‘ຕຸຍ຺ເຫວ ໂຫຕ຺ວສ຺ສຣໂຖ, ສຫສ຺ສຎ຺ຈາປິ ພ຺ຣາຫ຺ມຓິ;

ອຫມ຺ປິ ປພ຺ພຊິສ຺ສາມິ, ວຣປຎ຺ຎສ຺ສ ສນ຺ຕິເກ’’.

‘‘ຫຕ຺ຖີ ¶ ຄວສ຺ສໍ ມຓິກຸຓ຺ຑລຎ຺ຈ, ຜີຕຎ຺ຈິມໍ ຄຫວິຠວໍ ປຫາຍ;

ປິຕາ ປພ຺ພຊິໂຕ ຕຸຍ຺ຫໍ, ຠຸຎ຺ຊ ໂຠຄານິ ສຸນ຺ທຣິ; ຕຸວໍ ທາຍາທິກາ ກຸເລ’’.

‘‘ຫຕ຺ຖີ ຄວສ຺ສໍ ມຓິກຸຓ຺ຑລຎ຺ຈ, ຣມ຺ມໍ ຈິມໍ ຄຫວິຠວໍ ປຫາຍ;

ປິຕາ ປພ຺ພຊິໂຕ ມຍ຺ຫໍ, ປຸຕ຺ຕໂສເກນ ອຏ຺ຏິໂຕ;

ອຫມ຺ປິ ປພ຺ພຊິສ຺ສາມິ, ຠາຕຸໂສເກນ ອຏ຺ຏິຕາ’’.

‘‘ໂສ ເຕ ອິຊ຺ຌຕຸ ສງ຺ກປ຺ໂປ, ຍໍ ຕ຺ວໍ ປຕ຺ເຖສິ ສຸນ຺ທຣີ;

ອຸຕ຺ຕິຏ຺ຐປິຓ຺ໂຑ ອຸຎ຺ໂຉ ຈ, ປໍສຸກູລຎ຺ຈ ຈີວຣໍ;

ເອຕານິ ອຠິສມ຺ໂຠນ຺ຕີ, ປຣໂລເກ ອນາສວາ’’.

‘‘ສິກ຺ຂມານາຍ ¶ ເມ ອຍ຺ເຍ, ທິພ຺ພຈກ຺ຂຸ ວິໂສຘິຕໍ;

ປຸພ຺ເພນິວາສໍ ຊານາມິ, ຍຕ຺ຖ ເມ ວຸສິຕໍ ປຸເຣ.

‘‘ຕຸວໍ ¶ ¶ ນິສ຺ສາຍ ກລ຺ຍາຓີ, ເຖຣີ ສງ຺ຆສ຺ສ ໂສຠເນ;

ຕິສ຺ໂສ ວິຊ຺ຊາ ອນຸປ຺ປຕ຺ຕາ, ກຕໍ ພຸທ຺ຘສ຺ສ ສາສນໍ.

‘‘ອນຸຊານາຫິ ເມ ອຍ຺ເຍ, ອິຈ຺ເຉ ສາວຕ຺ຖິ ຄນ຺ຕເວ;

ສີຫນາທໍ ນທິສ຺ສາມິ, ພຸທ຺ຘເສຏ຺ຐສ຺ສ ສນ຺ຕິເກ’’.

‘‘ປສ຺ສ ສຸນ຺ທຣິ ສຕ຺ຖາຣໍ, ເຫມວຓ຺ຓໍ ຫຣິຕ຺ຕຈໍ;

ອທນ຺ຕານໍ ທເມຕາຣໍ, ສມ຺ພຸທ຺ຘມກຸໂຕຠຍໍ’’.

‘‘ປສ຺ສ ສຸນ຺ທຣິມາຍນ຺ຕິໍ, ວິປ຺ປມຸຕ຺ຕໍ ນິຣູປຘິໍ;

ວີຕຣາຄໍ ວິສໍຍຸຕ຺ຕໍ, ກຕກິຈ຺ຈມນາສວໍ.

‘‘ພາຣາຓສີໂຕ ນິກ຺ຂມ຺ມ, ຕວ ສນ຺ຕິກມາຄຕາ;

ສາວິກາ ເຕ ມຫາວີຣ, ປາເທ ວນ຺ທຕິ ສຸນ຺ທຣີ’’.

‘‘ຕຸວໍ ພຸທ຺ໂຘ ຕຸວໍ ສຕ຺ຖາ, ຕຸຍ຺ຫໍ ຘີຕາມ຺ຫິ ພ຺ຣາຫ຺ມຓ;

ໂອຣສາ ມຸຂໂຕ ຊາຕາ, ກຕກິຈ຺ຈາ ອນາສວາ’’.

‘‘ຕສ຺ສາ ¶ ເຕ ສ຺ວາຄຕໍ ຠທ຺ເທ, ຕໂຕ [ອໂຖ (ກ.)] ເຕ ອທຸຣາຄຕໍ;

ເອວຎ຺ຫິ ທນ຺ຕາ ອາຍນ຺ຕິ, ສຕ຺ຖຸ ປາທານິ ວນ຺ທິກາ;

ວີຕຣາຄາ ວິສໍຍຸຕ຺ຕາ, ກຕກິຈ຺ຈາ ອນາສວາ’’.

‘‘ທຫຣາຫໍ ສຸທ຺ຘວສນາ, ຍໍ ປຸເຣ ຘມ຺ມມສ຺ສຸຓິໍ;

ຕສ຺ສາ ເມ ອປ຺ປມຕ຺ຕາຍ, ສຈ຺ຈາຠິສມໂຍ ອຫຸ.

‘‘ຕໂຕຫໍ ສພ຺ພກາເມສຸ, ຠຸສໍ ອຣຕິມຊ຺ຌຄໍ;

ສກ຺ກາຍສ຺ມິໍ ຠຍໍ ທິສ຺ວາ, ເນກ຺ຂມ຺ມເມວ [ເນກ຺ຂມ຺ມຎ຺ເຎວ (ສີ.), ເນກ຺ຂມ຺ມສ຺ເສວ (ສ຺ຍາ.)] ປີຫເຍ.

‘‘ຫິຕ຺ວານຫໍ ¶ ຎາຕິຄຓໍ, ທາສກມ຺ມກຣານິ ຈ;

ຄາມເຂຕ຺ຕານິ ຜີຕານິ, ຣມຓີເຍ ປໂມທິເຕ.

‘‘ປຫາຍຫໍ ¶ ປພ຺ພຊິຕາ, ສາປເຕຍ຺ຍມນປ຺ປກໍ;

ເອວໍ ສທ຺ຘາຍ ນິກ຺ຂມ຺ມ, ສທ຺ຘມ຺ເມ ສຸປ຺ປເວທິເຕ.

‘‘ເນຕໍ [ນ ເມຕໍ (ສີ. ສ຺ຍາ.)] ອສ຺ສ ປຕິຣູປໍ, ອາກິຎ຺ຈຎ຺ຎຎ຺ຫິ ປຕ຺ຖເຍ;

ໂຍ [ຍາ (ສ຺ຍາ.)] ຊາຕຣູປໍ ຣຊຕໍ, ຉຑ຺ເຑຕ຺ວາ [ຖເປຕ຺ວາ (ກ.)] ປຸນຣາຄເມ [ປຸນຣາຄເຫ (ກ.)].

‘‘ຣຊຕໍ ¶ ຊາຕຣູປໍ ວາ, ນ ໂພຘາຍ ນ ສນ຺ຕິຍາ;

ເນຕໍ ສມຓສາຣຸປ຺ປໍ, ນ ເອຕໍ ອຣິຍທ຺ຘນໍ.

‘‘ໂລຠນໍ ມທນຎ຺ເຈຕໍ, ໂມຫນໍ ຣຊວຑ຺ຒນໍ;

ສາສງ຺ກໍ ພຫຸອາຍາສໍ, ນຕ຺ຖິ ເຈຕ຺ຖ ຘຸວໍ ຐິຕິ.

‘‘ເອຕ຺ຖ ຣຕ຺ຕາ ປມຕ຺ຕາ ຈ, ສງ຺ກິລິຏ຺ຐມນາ ນຣາ;

ອຎ຺ຎມຎ຺ເຎນ ພ຺ຍາຣຸທ຺ຘາ, ປຸຖຸ ກຸພ຺ພນ຺ຕິ ເມຘຄໍ.

‘‘ວໂຘ ພນ຺ໂຘ ປຣິກ຺ເລໂສ, ຊານິ ໂສກປຣິທ຺ທໂວ;

ກາເມສຸ ອຘິປນ຺ນານໍ, ທິສ຺ສເຕ ພ຺ຍສນໍ ພຫຸໍ.

‘‘ຕໍ ມໍ ຎາຕີ ອມິຕ຺ຕາວ, ກິໍ ໂວ ກາເມສຸ ຍຸຎ຺ຊຖ;

ຊານາຖ ມໍ ປພ຺ພຊິຕໍ, ກາເມສຸ ຠຍທສ຺ສິນິໍ.

‘‘ນ ¶ ຫິຣຎ຺ຎສຸວຓ຺ເຓນ, ປຣິກ຺ຂີຍນ຺ຕິ ອາສວາ;

ອມິຕ຺ຕາ ວຘກາ ກາມາ, ສປຕ຺ຕາ ສລ຺ລພນ຺ຘນາ.

‘‘ຕໍ ¶ ມໍ ຎາຕີ ອມິຕ຺ຕາວ, ກິໍ ໂວ ກາເມສຸ ຍຸຎ຺ຊຖ;

ຊານາຖ ມໍ ປພ຺ພຊິຕໍ, ມຸຓ຺ຑໍ ສງ຺ຆາຏິປາຣຸຕໍ.

‘‘ອຸຕ຺ຕິຏ຺ຐປິຓ຺ໂຑ ອຸຎ຺ໂຉ ຈ, ປໍສຸກູລຎ຺ຈ ຈີວຣໍ;

ເອຕໍ ໂຂ ມມ ສາຣຸປ຺ປໍ, ອນຄາຣູປນິສ຺ສໂຍ.

‘‘ວນ຺ຕາ ມເຫສີຫິ ກາມາ, ເຍ ທິພ຺ພາ ເຍ ຈ ມານຸສາ;

ເຂມຏ຺ຐາເນ ວິມຸຕ຺ຕາ ເຕ, ປຕ຺ຕາ ເຕ ອຈລໍ ສຸຂໍ.

‘‘ມາຫໍ ກາເມຫິ ສງ຺ຄຈ຺ຉິໍ, ເຍສຸ ຕາຓໍ ນ ວິຊ຺ຊຕິ;

ອມິຕ຺ຕາ ວຘກາ ກາມາ, ອຄ຺ຄິກ຺ຂນ຺ຘູປມາ ທຸຂາ.

‘‘ປຣິປນ຺ໂຖ ¶ ເອສ ຠໂຍ, ສວິຆາໂຕ ສກຓ຺ຏໂກ;

ເຄໂຘ ສຸວິສໂມ ເຈໂສ [ເລໂປ (ສີ.)], ມຫນ຺ໂຕ ໂມຫນາມຸໂຂ.

‘‘ອຸປສຄ຺ໂຄ ຠີມຣູໂປ, ກາມາ ສປ຺ປສິຣູປມາ;

ເຍ ພາລາ ອຠິນນ຺ທນ຺ຕິ, ອນ຺ຘຠູຕາ ປຸຖຸຊ຺ຊນາ.

‘‘ກາມປງ຺ເກນ ສຕ຺ຕາ ຫິ, ພຫູ ໂລເກ ອວິທ຺ທສູ;

ປຣິຍນ຺ຕໍ ນ ຊານນ຺ຕິ, ຊາຕິຍາ ມຣຓສ຺ສ ຈ.

‘‘ທຸຄ຺ຄຕິຄມນໍ ມຄ຺ຄໍ, ມນຸສ຺ສາ ກາມເຫຕຸກໍ;

ພຫຸໍ ເວ ປຏິປຊ຺ຊນ຺ຕິ, ອຕ຺ຕໂນ ໂຣຄມາວຫໍ.

‘‘ເອວໍ ¶ ອມິຕ຺ຕຊນນາ, ຕາປນາ ສໍກິເລສິກາ;

ໂລກາມິສາ ພນ຺ຘນີຍາ, ກາມາ ມຣຓພນ຺ຘນາ [ຈຣຓພນ຺ຘນາ (ສີ.)].

‘‘ອຸມ຺ມາທນາ ¶ ອຸລ຺ລປນາ, ກາມາ ຈິຕ຺ຕປ຺ປມທ຺ທິໂນ;

ສຕ຺ຕານໍ ສງ຺ກິເລສາຍ, ຂິປ຺ປໍ [ຂິປໍ (ສີ.)] ມາເຣນ ໂອຑ຺ຑິຕໍ.

‘‘ອນນ຺ຕາທີນວາ ກາມາ, ພຫຸທຸກ຺ຂາ ມຫາວິສາ;

ອປ຺ປສ຺ສາທາ ¶ ຣຓກຣາ, ສຸກ຺ກປກ຺ຂວິໂສສນາ [ວິໂສສກາ (ສີ.)].

‘‘ສາຫໍ ເອຕາທິສໍ ກຕ຺ວາ, ພ຺ຍສນໍ ກາມເຫຕຸກໍ;

ນ ຕໍ ປຈ຺ຈາຄມິສ຺ສາມິ, ນິພ຺ພານາຠິຣຕາ ສທາ.

‘‘ຣຓໍ ກຣິຕ຺ວາ [ຕຣິຕ຺ວາ (ສີ.)] ກາມານໍ, ສີຕິຠາວາຠິກງ຺ຂິນີ;

ອປ຺ປມຕ຺ຕາ ວິຫສ຺ສາມິ, ສພ຺ພສໍໂຍຊນກ຺ຂເຍ.

‘‘ອໂສກໍ ວິຣຊໍ ເຂມໍ, ອຣິຍຏ຺ຐງ຺ຄິກໍ ອຸຊຸໍ;

ຕໍ ມຄ຺ຄໍ ອນຸຄຈ຺ຉາມິ, ເຍນ ຕິຓ຺ຓາ ມເຫສິໂນ’’.

ອິມໍ ປສ຺ສຖ ຘມ຺ມຏ຺ຐໍ, ສຸຠໍ ກມ຺ມາຣຘີຕຣໍ;

ອເນຊໍ ອຸປສມ຺ປຊ຺ຊ, ຣຸກ຺ຂມູລມ຺ຫິ ຌາຍຕິ.

ອຊ຺ຊຏ຺ຐມີ ປພ຺ພຊິຕາ, ສທ຺ຘາ ສທ຺ຘມ຺ມໂສຠນາ;

ວິນີຕຸປ຺ປລວຓ຺ຓາຍ, ເຕວິຊ຺ຊາ ມຈ຺ຈຸຫາຍິນີ.

ສາຍໍ ¶ ຠຸຊິສ຺ສາ ອນຓາ, ຠິກ຺ຂຸນີ ຠາວິຕິນ຺ທ຺ຣິຍາ;

ສພ຺ພໂຍຄວິສໍຍຸຕ຺ຕາ, ກຕກິຈ຺ຈາ ອນາສວາ.

ຕໍ ສກ຺ໂກ ເທວສງ຺ເຆນ, ອຸປສງ຺ກມ຺ມ ອິທ຺ຘິຍາ;

ນມສ຺ສຕິ ຠູຕປຕິ, ສຸຠໍ ກມ຺ມາຣຘີຕຣນ຺ຕິ.

ຊີວກມ຺ພວນໍ ¶ ¶ ¶ ຣມ຺ມໍ, ຄຈ຺ຉນ຺ຕິໍ ຠິກ຺ຂຸນິໍ ສຸຠໍ;

ຘຸຕ຺ຕໂກ ສນ຺ນິວາເຣສິ [ຕໍ ນິວາເຣສິ (ກ.)], ຕເມນໍ ອພ຺ຣວີ ສຸຠາ.

‘‘ກິໍ ເຕ ອປຣາຘິຕໍ ມຍາ, ຍໍ ມໍ ໂອວຣິຍານ ຕິຏ຺ຐສິ;

ນ ຫິ ປພ຺ພຊິຕາຍ ອາວຸໂສ, ປຸຣິໂສ ສມ຺ຜຸສນາຍ ກປ຺ປຕິ.

‘‘ຄຣຸເກ ມມ ສຕ຺ຖຸສາສເນ, ຍາ ສິກ຺ຂາ ສຸຄເຕນ ເທສິຕາ;

ປຣິສຸທ຺ຘປທໍ ¶ ອນງ຺ຄຓໍ, ກິໍ ມໍ ໂອວຣິຍານ ຕິຏ຺ຐສິ.

‘‘ອາວິລຈິຕ຺ໂຕ ອນາວິລໍ, ສຣໂຊ ວີຕຣຊໍ ອນງ຺ຄຓໍ;

ສພ຺ພຕ຺ຖ ວິມຸຕ຺ຕມານສໍ, ກິໍ ມໍ ໂອວຣິຍານ ຕິຏ຺ຐສິ’’.

‘‘ທຫຣາ ຈ ອປາປິກາ ຈສິ, ກິໍ ເຕ ປພ຺ພຊ຺ຊາ ກຣິສ຺ສຕິ;

ນິກ຺ຂິປ ກາສາຍຈີວຣໍ, ເອຫິ ຣມາມ ສຸປຸປ຺ຜິເຕ [ຣມາມເສ ປຸປ຺ຜິເຕ (ສີ. ສ຺ຍາ.)] ວເນ.

‘‘ມຘຸຣຎ຺ຈ ປວນ຺ຕິ ສພ຺ພໂສ, ກຸສຸມຣເຊນ ສມຸຏ຺ຐິຕາ ທຸມາ;

ປຐມວສນ຺ໂຕ ສຸໂຂ ອຸຕຸ, ເອຫິ ຣມາມ ສຸປຸປ຺ຜິເຕ ວເນ.

‘‘ກຸສຸມິຕສິຂຣາ ຈ ປາທປາ, ອຠິຄຊ຺ຊນ຺ຕິວ ມາລຸເຕຣິຕາ;

ກາ ຕຸຍ຺ຫໍ ຣຕິ ຠວິສ຺ສຕິ, ຍທິ ເອກາ ວນໂມຄຫິສ຺ສສິ [ວນໂມຕຣິສ຺ສສິ (ສີ.), ວນໂມຄາຫິສ຺ສສິ (ສ຺ຍາ. ກ.)].

‘‘ວາຬມິຄສງ຺ຆເສວິຕໍ ¶ , ກຸຎ຺ຊຣມຕ຺ຕກເຣຓຸໂລຬິຕໍ;

ອສຫາຍິກາ ຄນ຺ຕຸມິຈ຺ຉສິ, ຣຫິຕໍ ຠິໍສນກໍ ມຫາວນໍ.

‘‘ຕປນີຍກຕາວ ຘີຕິກາ, ວິຈຣສິ ຈິຕ຺ຕລເຕວ ອຈ຺ຉຣາ;

ກາສິກສຸຂຸເມຫິ ¶ ວຄ຺ຄຸຠິ, ໂສຠສີ ສຸວສເນຫິ ນູປເມ.

‘‘ອຫໍ ຕວ ວສານຸໂຄ ສິຍໍ, ຍທິ ວິຫເຣມເສ [ຍທິປິ ວິຫເຣສິ (ກ.)] ການນນ຺ຕເຣ;

ນ ຫິ ມຕ຺ຖິ ຕຍາ ປິຍຕ຺ຕໂຣ, ປາໂຓ ກິນ຺ນຣິມນ຺ທໂລຈເນ.

‘‘ຍທິ ເມ ວຈນໍ ກຣິສ຺ສສິ, ສຸຂິຕາ ເອຫິ ອຄາຣມາວສ;

ປາສາທນິວາຕວາສິນີ, ປຣິກມ຺ມໍ ເຕ ກໂຣນ຺ຕຸ ນາຣິໂຍ.

‘‘ກາສິກສຸຂຸມານິ ຘາຣຍ, ອຠິໂຣເປຫິ [ອຠິໂຣເຫຫິ (ສີ.)] ຈ ມາລວຓ຺ຓກໍ;

ກຎ຺ຈນມຓິມຸຕ຺ຕກໍ ¶ ພຫຸໍ, ວິວິຘໍ ອາຠຣຓໍ ກໂຣມິ ເຕ.

‘‘ສຸໂຘຕຣຊປຈ຺ຉທໍ ¶ ສຸຠໍ, ໂຄຓກຕູລິກສນ຺ຖຕໍ ນວໍ;

ອຠິຣຸຫ ສຍນໍ ມຫາຣຫໍ, ຈນ຺ທນມຓ຺ຑິຕສາຣຄນ຺ຘິກໍ;

‘‘ອຸປ຺ປລໍ ຈຸທກາ ສມຸຄ຺ຄຕໍ, ຍຖາ ຕໍ ອມນຸສ຺ສເສວິຕໍ;

ເອວໍ ຕ຺ວໍ ພ຺ຣຫ຺ມຈາຣິນີ, ສເກສງ຺ເຄສຸ ຊຣໍ ຄມິສ຺ສສິ’’.

‘‘ກິໍ ¶ ເຕ ອິຘ ສາຣສມ຺ມຕໍ, ກຸຓປປູຣມ຺ຫິ ສຸສານວຑ຺ຒເນ;

ເຠທນຘມ຺ເມ ກເຬວເຣ [ກເລວເຣ (ສີ. ກ.)], ຍໍ ທິສ຺ວາ ວິມໂນ ອຸທິກ຺ຂສິ’’.

‘‘ອກ຺ຂີນິ ຈ ຕຸຣິຍາຣິວ, ກິນ຺ນຣິຍາຣິວ ປພ຺ພຕນ຺ຕເຣ;

ຕວ ເມ ນຍນານິ ທກ຺ຂິຍ, ຠິຍ຺ໂຍ ກາມຣຕີ ປວຑ຺ຒຕິ.

‘‘ອຸປ຺ປລສິຂໂຣປມານິ ເຕ, ວິມເລ ຫາຏກສນ຺ນິເຠ ມຸເຂ;

ຕວ ເມ ນຍນານິ ທກ຺ຂິຍ [ນຍນານຸທິກ຺ຂິຍ (ສີ.)], ຠິຍ຺ໂຍ ກາມຄຸໂຓ ປວຑ຺ຒຕິ.

‘‘ອປິ ທູຣຄຕາ ສຣມ຺ຫເສ, ອາຍຕປມ຺ເຫ ວິສຸທ຺ຘທສ຺ສເນ;

ນ ¶ ຫິ ມຕ຺ຖິ ຕຍາ ປິຍຕ຺ຕຣາ, ນຍນາ ກິນ຺ນຣິມນ຺ທໂລຈເນ’’.

‘‘ອປເຖນ ປຍາຕຸມິຈ຺ຉສິ, ຈນ຺ທໍ ກີຬນກໍ ຄເວສສິ;

ເມຣຸໍ ລງ຺ເຆຕຸມິຈ຺ຉສິ, ໂຍ ຕ຺ວໍ ພຸທ຺ຘສຸຕໍ ມຄ຺ຄຍສິ.

‘‘ນຕ຺ຖິ ¶ ຫິ ໂລເກ ສເທວເກ, ຣາໂຄ ຍຕ຺ຖປິ ທານິ ເມ ສິຍາ;

ນປິ ນໍ ຊານາມິ ກີຣິໂສ, ອຖ ມຄ຺ເຄນ ຫໂຕ ສມູລໂກ.

‘‘ອິງ຺ຄາລກຸຍາວ [ອິງ຺ຆາຬຂຸຍາວ (ສ຺ຍາ.)] ອຸຊ຺ຌິໂຕ, ວິສປຕ຺ໂຕຣິວ ອຄ຺ຄິໂຕ ກໂຕ [ອຄ຺ຆໂຕ ຫໂຕ (ສີ.)];

ນປິ ນໍ ປສ຺ສາມິ ກີຣິໂສ, ອຖ ມຄ຺ເຄນ ຫໂຕ ສມູລໂກ.

‘‘ຍສ຺ສາ ¶ ສິຍາ ອປຈ຺ຈເວກ຺ຂິຕໍ, ສຕ຺ຖາ ວາ ອນຸປາສິໂຕ ສິຍາ;

ຕ຺ວໍ ຕາທິສິກໍ ປໂລຠຍ, ຊານນ຺ຕິໍ ໂສ ອິມໍ ວິຫຎ຺ຎສິ.

‘‘ມຍ຺ຫຎ຺ຫິ ອກ຺ກຸຏ຺ຐວນ຺ທິເຕ, ສຸຂທຸກ຺ເຂ ຈ ສຕີ ອຸປຏ຺ຐິຕາ;

ສງ຺ຂຕມສຸຠນ຺ຕິ ຊານິຍ, ສພ຺ພຕ຺ເຖວ ມໂນ ນ ລິມ຺ປຕິ.

‘‘ສາຫໍ ສຸຄຕສ຺ສ ສາວິກາ, ມຄ຺ຄຏ຺ຐງ຺ຄິກຍານຍາຍິນີ;

ອຸທ຺ຘຏສລ຺ລາ ອນາສວາ, ສຸຎ຺ຎາຄາຣຄຕາ ຣມາມຫໍ.

‘‘ທິຏ຺ຐາ ຫິ ມຍາ ສຸຈິຕ຺ຕິຕາ, ໂສມ຺ຠາ ທາຣຸກປິລ຺ລການິ ວາ;

ຕນ຺ຕີຫິ ຈ ຂີລເກຫິ ຈ, ວິນິພທ຺ຘາ ວິວິຘໍ ປນຈ຺ຈກາ.

‘‘ຕມ຺ຫຸທ຺ຘເຏ ຕນ຺ຕິຂີລເກ, ວິສ຺ສຏ຺ເຐ ວິກເລ ປຣິກ຺ຣິເຕ [ປຣິປກ຺ຂີເຕ (ສີ.), ປຣິປກ຺ກເຕ (ສ຺ຍາ.)];

ນ ວິນ຺ເທຍ຺ຍ ຂຓ຺ຑໂສ ກເຕ, ກິມ຺ຫິ ຕຕ຺ຖ ມນໍ ນິເວສເຍ.

‘‘ຕຖູປມາ ¶ ເທຫການິ ມໍ, ເຕຫິ ຘມ຺ເມຫິ ວິນາ ນ ວຕ຺ຕນ຺ຕິ;

ຘມ຺ເມຫິ ¶ ວິນາ ນ ວຕ຺ຕຕິ, ກິມ຺ຫິ ຕຕ຺ຖ ມນໍ ນິເວສເຍ.

‘‘ຍຖາ ຫຣິຕາເລນ ມກ຺ຂິຕໍ, ອທ຺ທສ ຈິຕ຺ຕິກໍ ຠິຕ຺ຕິຍາ ກຕໍ;

ຕມ຺ຫິ ¶ ເຕ ວິປຣີຕທສ຺ສນໍ, ສຎ຺ຎາ ມານຸສິກາ ນິຣຕ຺ຖິກາ.

‘‘ມາຍໍ ¶ ວິຍ ອຄ຺ຄໂຕ ກຕໍ, ສຸປິນນ຺ເຕວ ສຸວຓ຺ຓປາທປໍ;

ອຸປຄຈ຺ຉສິ ອນ຺ຘ ຣິຕ຺ຕກໍ, ຊນມຊ຺ເຌຣິວ ຣຸປ຺ປຣູປກໍ [ຣູປຣູປກໍ (ກ.)].

‘‘ວຏ຺ຏນິຣິວ ໂກຏໂຣຫິຕາ, ມຊ຺ເຌ ປຸພ຺ພຸຬກາ ສອສ຺ສຸກາ;

ປີຬໂກຬິກາ ເຈຕ຺ຖ ຊາຍຕິ, ວິວິຘາ ຈກ຺ຂຸວິຘາ ຈ ປິຓ຺ຑິຕາ’’.

ອຸປ຺ປາຏິຍ ຈາຣຸທສ຺ສນາ, ນ ຈ ປຊ຺ຊິຕ຺ຖ ອສງ຺ຄມານສາ;

‘‘ຫນ຺ທ ເຕ ຈກ຺ຂຸໍ ຫຣສ຺ສຸ ຕໍ’’, ຕສ຺ສ ນຣສ຺ສ ອທາສິ ຕາວເທ.

ຕສ຺ສ ຈ ວິຣມາສິ ຕາວເທ, ຣາໂຄ ຕຕ຺ຖ ຂມາປຍີ ຈ ນໍ;

‘‘ໂສຕ຺ຖິ ສິຍາ ພ຺ຣຫ຺ມຈາຣິນີ, ນ ປຸໂນ ເອທິສກໍ ຠວິສ຺ສຕິ’’.

‘‘ອາສາທິຍ [ອາຫນິຍ (ສ຺ຍາ. ກ.)] ເອທິສໍ ຊນໍ, ອຄ຺ຄິໍ ປຊ຺ຊລິຕໍ ວ ລິງ຺ຄິຍ;

ຄຓ຺ຫິຍ ອາສີວິສໍ ວິຍ, ອປິ ນຸ ໂສຕ຺ຖິ ສິຍາ ຂເມຫິ ໂນ’’.

ມຸຕ຺ຕາ ຈ ຕໂຕ ສາ ຠິກ຺ຂຸນີ, ອຄມີ ພຸທ຺ຘວຣສ຺ສ ສນ຺ຕິກໍ;

ປສ຺ສິຍ ວຣປຸຎ຺ຎລກ຺ຂຓໍ, ຈກ຺ຂຸ ອາສິ ຍຖາ ປຸຣາຓກນ຺ຕິ.

ນຄຣມ຺ຫິ ¶ ¶ ກຸສຸມນາເມ, ປາຏລິປຸຕ຺ຕມ຺ຫິ ປຖວິຍາ ມຓ຺ເຑ;

ສກ຺ຍກຸລກຸລີນາໂຍ, ທ຺ເວ ຠິກ຺ຂຸນິໂຍ ຫິ ຄຸຓວຕິໂຍ.

ອິສິທາສີ ¶ ຕຕ຺ຖ ເອກາ, ທຸຕິຍາ ໂພຘີຕິ ສີລສມ຺ປນ຺ນາ ຈ;

ຌານຊ຺ຌາຍນຣຕາໂຍ, ພຫຸສ຺ສຸຕາໂຍ ຘຸຕກິເລສາໂຍ.

ຕາ ¶ ປິຓ຺ຑາຍ ຈຣິຕ຺ວາ, ຠຕ຺ຕຕ຺ຖໍ [ຠຕ຺ຕຕ຺ຕໍ (ສີ.)] ກຣິຍ ໂຘຕປຕ຺ຕາໂຍ;

ຣຫິຕມ຺ຫິ ສຸຂນິສິນ຺ນາ, ອິມາ ຄິຣາ ອພ຺ຠຸທີເຣສຸໍ.

‘‘ປາສາທິກາສິ ອຍ຺ເຍ, ອິສິທາສິ ວໂຍປິ ເຕ ອປຣິຫີໂນ;

ກິໍ ທິສ຺ວານ ພ຺ຍາລິກໍ, ອຖາສິ ເນກ຺ຂມ຺ມມນຸຍຸຕ຺ຕາ’’.

ເອວມນຸຍຸຎ຺ຊິຍມານາ ສາ, ຣຫິເຕ ຘມ຺ມເທສນາກຸສລາ;

ອິສິທາສີ ວຈນມພ຺ຣວິ, ‘‘ສຸຓ ໂພຘິ ຍຖາມ຺ຫິ ປພ຺ພຊິຕາ.

‘‘ອຸຊ຺ເຊນິຍາ ປຸຣວເຣ, ມຍ຺ຫໍ ປິຕາ ສີລສໍວຸໂຕ ເສຏ຺ຐິ;

ຕສ຺ສມ຺ຫິ ເອກຘີຕາ, ປິຍາ ມນາປາ ຈ ທຍິຕາ ຈ.

‘‘ອຖ ເມ ສາເກຕໂຕ ວຣກາ, ອາຄຈ຺ຉຸມຸຕ຺ຕມກຸລີນາ;

ເສຏ຺ຐີ ປຫູຕຣຕໂນ, ຕສ຺ສ ມມໍ ສຸຓ຺ຫມທາສິ ຕາໂຕ.

‘‘ສສ຺ສຸຍາ ສສ຺ສຸຣສ຺ສ ຈ, ສາຍໍ ປາຕໍ ປຓາມມຸປຄມ຺ມ;

ສິຣສາ ກໂຣມິ ປາເທ, ວນ຺ທາມິ ຍຖາມ຺ຫິ ອນຸສິຏ຺ຐາ.

‘‘ຍາ ¶ ມຍ຺ຫໍ ສາມິກສ຺ສ, ຠຄິນິໂຍ ຠາຕຸໂນ ປຣິຊໂນ ວາ;

ຕເມກວຣກມ຺ປິ ທິສ຺ວາ, ອຸພ຺ພິຄ຺ຄາ ອາສນໍ ເທມິ.

‘‘ອນ຺ເນນ ຈ ປາເນນ ຈ, ຂຊ຺ເຊນ ຈ ຍຎ຺ຈ ຕຕ຺ຖ ສນ຺ນິຫິຕໍ;

ຉາເທມິ ອຸປນຍາມິ ຈ, ເທມິ ຈ ຍໍ ຍສ຺ສ ປຕິຣູປໍ.

‘‘ກາເລນ ອຸປຏ຺ຐຫິຕ຺ວາ [ອຸຏ຺ຐຫິຕ຺ວາ (ສ຺ຍາ. ກ.), ອຸປຏ຺ຐຫິຕຸໍ (?)], ຆຣໍ ສມຸປຄມາມິ ອຸມ຺ມາເຣ;

ໂຘວນ຺ຕີ ຫຕ຺ຖປາເທ, ປຎ຺ຊລິກາ ສາມິກມຸເປມິ.

‘‘ໂກຈ຺ຉໍ ປສາທໍ ອຎ຺ຊນິຎ຺ຈ, ອາທາສກຎ຺ຈ ຄຓ຺ຫິຕ຺ວາ;

ປຣິກມ຺ມກາຣິກາ ¶ ວິຍ, ສຍເມວ ປຕິໍ ວິຠູເສມິ.

‘‘ສຍເມວ ¶ ໂອທນໍ ສາຘຍາມິ, ສຍເມວ ຠາຊນໍ ໂຘວນ຺ຕີ;

ມາຕາວ ເອກປຸຕ຺ຕກໍ, ຕຖາ [ຕທາ (ສີ.)] ຠຕ຺ຕາຣໍ ປຣິຈຣາມິ.

‘‘ເອວໍ ມໍ ຠຕ຺ຕິກຕໍ, ອນຸຣຕ຺ຕໍ ກາຣິກໍ ນິຫຕມານໍ;

ອຸຏ຺ຐາຍິກໍ [ອຸຏ຺ຐາຫິກໍ (ກ.)] ອນລສໍ, ສີລວຕິໍ ທຸສ຺ສເຕ ຠຕ຺ຕາ.

‘‘ໂສ ມາຕຣຎ຺ຈ ປິຕຣຎ຺ຈ, ຠຓຕິ ‘ອາປຸຈ຺ຉຫໍ ຄມິສ຺ສາມິ;

ອິສິທາສິຍາ ນ ສຫ ວຈ຺ຉໍ, ເອກາຄາເຣຫໍ [ເອກຆເຣປ’ຫໍ (?)] ສຫ ວຕ຺ຖຸໍ’.

‘‘‘ມາ ເອວໍ ປຸຕ຺ຕ ອວຈ, ອິສິທາສີ ປຓ຺ຑິຕາ ປຣິພ຺ຍຕ຺ຕາ;

ອຸຏ຺ຐາຍິກາ ອນລສາ, ກິໍ ຕຸຍ຺ຫໍ ນ ໂຣຈເຕ ປຸຕ຺ຕ’.

‘‘‘ນ ¶ ຈ ເມ ຫິໍສຕິ ກິຎ຺ຈິ, ນ ຈຫໍ ອິສິທາສິຍາ ສຫ ວຈ຺ຉໍ;

ເທສ຺ສາວ ເມ ອລໍ ເມ, ອປຸຈ຺ຉາຫໍ [ອາປຸຈ຺ຉາຫໍ (ສ຺ຍາ.), ອາປຸຈ຺ຉຫໍ-ນາປຸຈ຺ຉຫໍ (?)] ຄມິສ຺ສາມິ’.

‘‘ຕສ຺ສ ວຈນໍ ສຸຓິຕ຺ວາ, ສສ຺ສຸ ສສຸໂຣ ຈ ມໍ ອປຸຈ຺ຉິໍສຸ;

‘ກິສ຺ສ [ກິໍສ (?)] ຕຍາ ອປຣທ຺ຘໍ, ຠຓ ວິສ຺ສຏ຺ຐາ ຍຖາຠູຕໍ’.

‘‘‘ນປິຫໍ ¶ ອປຣຊ຺ຌໍ ກິຎ຺ຈິ, ນປິ ຫິໍເສມິ ນ ຠຓາມິ ທຸພ຺ພຈນໍ;

ກິໍ ສກ຺ກາ ກາຕຸຍ຺ເຍ, ຍໍ ມໍ ວິທ຺ເທສ຺ສເຕ ຠຕ຺ຕາ’.

‘‘ເຕ ມໍ ປິຕຸຆຣໍ ປຏິນຍິໍສຸ, ວິມນາ ທຸເຂນ ອຘິຠູຕາ;

‘ປຸຕ຺ຕມນຸຣກ຺ຂມານາ, ຊິຕາມ຺ຫເສ ຣູປິນິໍ ລກ຺ຂິໍ’.

‘‘ອຖ ມໍ ອທາສິ ຕາໂຕ, ອຑ຺ຒສ຺ສ ຆຣມ຺ຫິ ທຸຕິຍກຸລິກສ຺ສ;

ຕໂຕ ອຸປຑ຺ຒສຸງ຺ເກນ, ເຍນ ມໍ ວິນ຺ທຖ ເສຏ຺ຐິ.

‘‘ຕສ຺ສປິ ຆຣມ຺ຫິ ມາສໍ, ອວສິໍ ອຖ ໂສປິ ມໍ ປຏິຈ຺ຉຣຍິ [ປຏິຈ຺ຉສິ (ສີ. ກ.), ປຏິຈ຺ຉຕິ (ສ຺ຍາ.), ປຏິຈ຺ຉຣຕິ (ກ.)];

ທາສີວ ¶ ອຸປຏ຺ຐຫນ຺ຕິໍ, ອທູສິກໍ ສີລສມ຺ປນ຺ນໍ.

‘‘ຠິກ຺ຂາຍ ຈ ວິຈຣນ຺ຕໍ, ທມກໍ ທນ຺ຕໍ ເມ ປິຕາ ຠຓຕິ;

‘ໂຫຫິສິ [ໂສຫິສິ (ສພ຺ພຕ຺ຖ)] ເມ ຊາມາຕາ, ນິກ຺ຂິປ ໂປຏ຺ຐິຎ຺ຈ [ໂປນ຺ຕິໍ (ສີ. ສ຺ຍາ.)] ຆຏິກຎ຺ຈ’.

‘‘ໂສປິ ວສິຕ຺ວາ ປກ຺ຂໍ [ປກ຺ກມຖ (ສີ.)], ອຖ ຕາຕໍ ຠຓຕິ ‘ເທຫິ ເມ ໂປຏ຺ຐິໍ;

ຆຏິກຎ຺ຈ ມລ຺ລກຎ຺ຈ, ປຸນປິ ຠິກ຺ຂໍ ຈຣິສ຺ສາມິ’.

‘‘ອຖ ¶ ນໍ ຠຓຕີ ຕາໂຕ, ອມ຺ມາ ສພ຺ໂພ ຈ ເມ ຎາຕິຄຓວຄ຺ໂຄ;

‘ກິໍ ເຕ ນ ກີຣຕິ ອິຘ, ຠຓ ຂິປ຺ປໍ ຕໍ ເຕ ກຣິຫິ’ຕິ.

‘‘ເອວໍ ຠຓິໂຕ ຠຓຕິ, ‘ຍທິ ເມ ອຕ຺ຕາ ສກ຺ໂກຕິ ອລໍ ມຍ຺ຫໍ;

ອິສິທາສິຍາ ນ ສຫ ວຈ຺ຉໍ, ເອກຆເຣຫໍ ສຫ ວຕ຺ຖຸໍ’.

‘‘ວິສ຺ສຊ຺ຊິໂຕ ຄໂຕ ໂສ, ອຫມ຺ປິ ເອກາກິນີ ວິຈິນ຺ເຕມິ;

‘ອາປຸຈ຺ຉິຕູນ ຄຈ຺ຉໍ, ມຣິຕຸເຍ [ມຣິຕາເຍ (ສີ.), ມຣິຕຸໍ (ສ຺ຍາ.)] ວາ ປພ຺ພຊິສ຺ສໍ ວາ’.

‘‘ອຖ ອຍ຺ຍາ ຊິນທຕ຺ຕາ, ອາຄຈ຺ຉີ ໂຄຈຣາຍ ຈຣມານາ;

ຕາຕກຸລໍ ¶ ວິນຍຘຣີ, ພຫຸສ຺ສຸຕາ ສີລສມ຺ປນ຺ນາ.

‘‘ຕໍ ທິສ຺ວານ ອມ຺ຫາກໍ, ອຸຏ຺ຐາຍາສນໍ ຕສ຺ສາ ປຎ຺ຎາປຍິໍ;

ນິສິນ຺ນາຍ ຈ ປາເທ, ວນ຺ທິຕ຺ວາ ໂຠຊນມທາສິໍ.

‘‘ອນ຺ເນນ ¶ ຈ ປາເນນ ຈ, ຂຊ຺ເຊນ ຈ ຍຎ຺ຈ ຕຕ຺ຖ ສນ຺ນິຫິຕໍ;

ສນ຺ຕປ຺ປຍິຕ຺ວາ ອວຈໍ, ‘ອຍ຺ເຍ ອິຈ຺ຉາມິ ປພ຺ພຊິຕຸໍ’.

‘‘ອຖ ມໍ ຠຓຕີ ຕາໂຕ, ‘ອິເຘວ ປຸຕ຺ຕກ [ປຸຕ຺ຕິເກ (ສ຺ຍາ. ກ.)] ຈຣາຫິ ຕ຺ວໍ ຘມ຺ມໍ;

ອນ຺ເນນ ຈ ປາເນນ ຈ, ຕປ຺ປຍ ສມເຓ ທ຺ວິຊາຕີ ຈ’.

‘‘ອຖຫໍ ຠຓາມິ ຕາຕໍ, ໂຣທນ຺ຕີ ອຎ຺ຊລິໍ ປຓາເມຕ຺ວາ;

‘ປາປຎ຺ຫິ ມຍາ ປກຕໍ, ກມ຺ມໍ ຕໍ ນິຊ຺ຊເຣສ຺ສາມິ’.

‘‘ອຖ ¶ ມໍ ຠຓຕີ ຕາໂຕ, ‘ປາປຸຓ ໂພຘິຎ຺ຈ ອຄ຺ຄຘມ຺ມຎ຺ຈ;

ນິພ຺ພານຎ຺ຈ ລຠສ຺ສຸ, ຍໍ ສຈ຺ຉິກຣີ ທ຺ວິປທເສຏ຺ໂຐ’.

‘‘ມາຕາປິຕູ ອຠິວາທຍິຕ຺ວາ, ສພ຺ພຎ຺ຈ ຎາຕິຄຓວຄ຺ຄໍ;

ສຕ຺ຕາຫໍ ປພ຺ພຊິຕາ, ຕິສ຺ໂສ ວິຊ຺ຊາ ອຜສ຺ສຍິໍ.

‘‘ຊານາມິ ອຕ຺ຕໂນ ສຕ຺ຕ, ຊາຕິໂຍ ຍສ຺ສຍໍ ຜລວິປາໂກ;

ຕໍ ຕວ ອາຈິກ຺ຂິສ຺ສໍ, ຕໍ ເອກມນາ ນິສາເມຫິ.

‘‘ນຄຣມ຺ຫິ ເອຣກຈ຺ເຉ [ເອຣກກຈ຺ເຉ (ສ຺ຍາ. ກ.)], ສຸວຓ຺ຓກາໂຣ ອຫໍ ປຫູຕຘໂນ;

ໂຍພ຺ພນມເທນ ມຕ຺ໂຕ ໂສ, ປຣທາຣໍ ອເສວິຫໍ.

‘‘ໂສຫໍ ຕໂຕ ຈວິຕ຺ວາ, ນິຣຍມ຺ຫິ ອປຈ຺ຈິສໍ ຈິຣໍ;

ປກ຺ໂກ ຕໂຕ ຈ ອຸຏ຺ຐຫິຕ຺ວາ, ມກ຺ກຏິຍາ ກຸຈ຺ຉິໂມກ຺ກມິໍ.

‘‘ສຕ຺ຕາຫຊາຕກໍ ¶ ¶ ມໍ, ມຫາກປິ ຍູຖໂປ ນິລ຺ລຈ຺ເຉສິ;

ຕສ຺ເສຕໍ ກມ຺ມຜລໍ, ຍຖາປິ ຄນ຺ຕ຺ວານ ປຣທາຣໍ.

‘‘ໂສຫໍ ຕໂຕ ຈວິຕ຺ວາ, ກາລໍ ກຣິຕ຺ວາ ສິນ຺ຘວາຣຎ຺ເຎ;

ກາຓາຍ ຈ ຂຎ຺ຊາຍ ຈ, ເອຬກິຍາ ກຸຈ຺ຉິໂມກ຺ກມິໍ.

‘‘ທ຺ວາທສ ວສ຺ສານິ ອຫໍ, ນິລ຺ລຈ຺ຉິໂຕ ທາຣເກ ປຣິວຫິຕ຺ວາ;

ກິມິນາວຏ຺ໂຏ ອກລ຺ໂລ, ຍຖາປິ ຄນ຺ຕ຺ວານ ປຣທາຣໍ.

‘‘ໂສຫໍ ຕໂຕ ຈວິຕ຺ວາ, ໂຄວາຓິຊກສ຺ສ ຄາວິຍາ ຊາໂຕ;

ວຈ຺ໂຉ ລາຂາຕມ຺ໂພ, ນິລ຺ລຈ຺ຉິໂຕ ທ຺ວາທເສ ມາເສ.

‘‘ໂວຒູນ [ເຕ ປຸນ (ສ຺ຍາ. ກ.), ໂວຘຸນ (ກ. ອຏ຺ຐ.)] ນງ຺ຄລມຫໍ, ສກຏຎ຺ຈ ຘາຣຍາມິ;

ອນ຺ໂຘວຏ຺ໂຏ ອກລ຺ໂລ, ຍຖາປິ ຄນ຺ຕ຺ວານ ປຣທາຣໍ.

‘‘ໂສຫໍ ຕໂຕ ຈວິຕ຺ວາ, ວີຖິຍາ ທາສິຍາ ຆເຣ ຊາໂຕ;

ເນວ ມຫິລາ ນ ປຸຣິໂສ, ຍຖາປິ ຄນ຺ຕ຺ວານ ປຣທາຣໍ.

‘‘ຕິໍສຕິວສ຺ສມ຺ຫິ ¶ ¶ ມໂຕ, ສາກຏິກກຸລມ຺ຫິ ທາຣິກາ ຊາຕາ;

ກປຓມ຺ຫິ ອປ຺ປໂຠເຄ, ຘນິກ [ອຓິກ (ອຏ຺ຐ.), ຕໍສໍວຓ຺ຓນາຍມ຺ປິ ອຕ຺ຖຍຸຕ຺ຕິ ຄເວສິຕພ຺ພາ] ປຸຣິສປາຕພຫຸລມ຺ຫິ.

‘‘ຕໍ ມໍ ຕໂຕ ສຕ຺ຖວາໂຫ, ອຸສ຺ສນ຺ນາຍ ວິປຸລາຍ ວຑ຺ຒິຍາ;

ໂອກຑ຺ຒຕິ ວິລປນ຺ຕິໍ, ອຈ຺ຉິນ຺ທິຕ຺ວາ ກຸລຆຣສ຺ມາ.

‘‘ອຖ ໂສຬສເມ ວສ຺ເສ, ທິສ຺ວາ ມໍ ປຕ຺ຕໂຍພ຺ພນໍ ກຎ຺ຎໍ;

ໂອຣຸນ຺ຘຕສ຺ສ ປຸຕ຺ໂຕ, ຄິຣິທາໂສ ນາມ ນາເມນ.

‘‘ຕສ຺ສປິ ອຎ຺ຎາ ຠຣິຍາ, ສີລວຕີ ຄຸຓວຕີ ຍສວຕີ ຈ;

ອນຸຣຕ຺ຕາ ¶ [ອນຸວຕ຺ຕາ (ກ.)] ຠຕ຺ຕາຣໍ, ຕສ຺ສາຫໍ [ຕສ຺ສ ຕໍ (?)] ວິທ຺ເທສນມກາສິໍ.

‘‘ຕສ຺ເສຕໍ ກມ຺ມຜລໍ, ຍໍ ມໍ ອປກີຣິຕູນ ຄຈ຺ຉນ຺ຕິ;

ທາສີວ ອຸປຏ຺ຐຫນ຺ຕິໍ, ຕສ຺ສປິ ອນ຺ໂຕ ກໂຕ ມຍາ’’ຕິ.

ມນ຺ຕາວຕິຍາ ¶ ນຄເຣ, ຣຎ຺ໂຎ ໂກຎ຺ຈສ຺ສ ອຄ຺ຄມເຫສິຍາ;

ຘີຕາ ອາສິໍ ສຸເມຘາ, ປສາທິຕາ ສາສນກເຣຫິ.

ສີລວຕີ ຈິຕ຺ຕກຖາ, ພຫຸສ຺ສຸຕາ ພຸທ຺ຘສາສເນ ວິນີຕາ;

ມາຕາປິຕໂຣ ອຸປຄມ຺ມ, ຠຓຕິ ‘‘ອຸຠໂຍ ນິສາເມຖ.

‘‘ນິພ຺ພານາຠິຣຕາຫໍ, ອສສ຺ສຕໍ ຠວຄຕໍ ຍທິປິ ທິພ຺ພໍ;

ກິມງ຺ຄໍ ປນ [ກິມງ຺ຄ ປນ (ສີ. ສ຺ຍາ.), ກິໍ ປນ (?)] ຕຸຈ຺ຉາ ກາມາ, ອປ຺ປສ຺ສາທາ ພຫຸວິຆາຕາ.

‘‘ກາມາ ກຏຸກາ ອາສີວິສູປມາ, ເຍສຸ ມຸຈ຺ຉິຕາ ພາລາ;

ເຕ ທີຆຣຕ຺ຕໍ ນິຣເຍ, ສມປ຺ປິຕາ ຫຎ຺ຎນ຺ເຕ ທຸກ຺ຂິຕາ [ຫຎ຺ຎເຣ ທຸຂິຕາ (?)].

‘‘ໂສຈນ຺ຕິ ປາປກມ຺ມາ, ວິນິປາເຕ ປາປວທ຺ຘິໂນ ສທາ;

ກາເຍນ ຈ ວາຈາຍ ຈ, ມນສາ ຈ ອສໍວຸຕາ ພາລາ.

‘‘ພາລາ ¶ ເຕ ທຸປ຺ປຎ຺ຎາ, ອເຈຕນາ ທຸກ຺ຂສມຸທໂຍຣຸທ຺ຘາ;

ເທສນ຺ເຕ ¶ ອຊານນ຺ຕາ, ນ ພຸຊ຺ຌເຣ ອຣິຍສຈ຺ຈານິ.

‘‘ສຈ຺ຈານິ ¶ ອມ຺ມ ພຸທ຺ຘວຣເທສິຕານິ, ເຕ ພຫຸຕຣາ ອຊານນ຺ຕາ ເຍ;

ອຠິນນ຺ທນ຺ຕິ ຠວຄຕໍ, ປິເຫນ຺ຕິ ເທເວສຸ ອຸປປຕ຺ຕິໍ.

‘‘ເທເວສຸປິ ອຸປປຕ຺ຕິ, ອສສ຺ສຕາ ຠວຄເຕ ອນິຈ຺ຈມ຺ຫິ;

ນ ຈ ສນ຺ຕສນ຺ຕິ ພາລາ, ປຸນປ຺ປຸນໍ ຊາຍິຕພ຺ພສ຺ສ.

‘‘ຈຕ຺ຕາໂຣ ວິນິປາຕາ, ທຸເວ [ທ຺ເວ (ສພ຺ພຕ຺ຖ)] ຈ ຄຕິໂຍ ກຖຎ຺ຈິ ລພ຺ຠນ຺ຕິ;

ນ ຈ ວິນິປາຕຄຕານໍ, ປພ຺ພຊ຺ຊາ ອຕ຺ຖິ ນິຣເຍສຸ.

‘‘ອນຸຊານາຖ ມໍ ອຸຠໂຍ, ປພ຺ພຊິຕຸໍ ທສພລສ຺ສ ປາວຈເນ;

ອປ຺ໂປສ຺ສຸກ຺ກາ ຆຏິສ຺ສໍ, ຊາຕິມຣຓປ຺ປຫານາຍ.

‘‘ກິໍ ຠວຄເຕ [ຠວຄເຕນ (ສ຺ຍາ.)] ອຠິນນ຺ທິເຕນ, ກາຍກລິນາ ອສາເຣນ;

ຠວຕຓ຺ຫາຍ ນິໂຣຘາ, ອນຸຊານາຖ ປພ຺ພຊິສ຺ສາມິ.

‘‘ພຸທ຺ຘານໍ ¶ ອຸປ຺ປາໂທ ວິວຊ຺ຊິໂຕ, ອກ຺ຂໂຓ ຂໂຓ ລທ຺ໂຘ;

ສີລານິ ພ຺ຣຫ຺ມຈຣິຍໍ, ຍາວຊີວໍ ນ ທູເສຍ຺ຍໍ’’.

ເອວໍ ຠຓຕິ ສຸເມຘາ, ມາຕາປິຕໂຣ ‘‘ນ ຕາວ ອາຫາຣໍ;

ອາຫຣິສ຺ສໍ [ອາຫຣິຍາມິ (ສີ.), ອາຫາຣິສໍ (?)] ຄຫຏ຺ຐາ, ມຣຓວສໍ ຄຕາວ ເຫສ຺ສາມິ’’.

ມາຕາ ທຸກ຺ຂິຕາ ໂຣທຕິ ປິຕາ ຈ, ອສ຺ສາ ສພ຺ພໂສ ສມຠິຫໂຕ;

ຆເຏນ຺ຕິ ສຎ຺ຎາເປຕຸໍ, ປາສາທຕເລ ຉມາປຕິຕໍ.

‘‘ອຸຏ຺ເຐຫິ ປຸຕ຺ຕກ ກິໍ ໂສຈິເຕນ, ທິນ຺ນາສິ ວາຣຓວຕິມ຺ຫິ;

ຣາຊາ ¶ ອນີກຣຕ຺ໂຕ [ອຓີກທຕ຺ໂຕ (ສີ. ສ຺ຍາ.)], ອຠິຣູໂປ ຕສ຺ສ ຕ຺ວໍ ທິນ຺ນາ.

‘‘ອຄ຺ຄມເຫສີ ຠວິສ຺ສສິ, ອນິກຣຕ຺ຕສ຺ສ ຣາຊິໂນ ຠຣິຍາ;

ສີລານິ ພ຺ຣຫ຺ມຈຣິຍໍ, ປພ຺ພຊ຺ຊາ ທຸກ຺ກຣາ ປຸຕ຺ຕກ.

‘‘ຣຊ຺ເຊ ອາຓາຘນມິສ຺ສຣິຍໍ, ໂຠຄາ ສຸຂາ ທຫຣິກາສິ;

ຠຸຎ຺ຊາຫິ ກາມໂຠເຄ, ວາເຣຍ຺ຍໍ ໂຫຕຸ ເຕ ປຸຕ຺ຕ’’.

ອຖ ເນ ຠຓຕິ ສຸເມຘາ, ‘‘ມາ ເອທິສິການິ ຠວຄຕມສາຣໍ;

ປພ຺ພຊ຺ຊາ ວາ ໂຫຫິຕິ, ມຣຓໍ ວາ ເມ ນ ເຈວ ວາເຣຍ຺ຍໍ.

‘‘ກິມິວ ¶ ປູຕິກາຍມສຸຈິໍ, ສວນຄນ຺ຘໍ ຠຍານກໍ ກຸຓປໍ;

ອຠິສໍວິເສຍ຺ຍໍ ຠສ຺ຕໍ, ອສກິໍ ປຄ຺ຆຣິຕໍ ອສຸຈິປຸຓ຺ຓໍ.

‘‘ກິມິວ ¶ ຕາຫໍ ຊານນ຺ຕີ, ວິກຸລກໍ ມໍສໂສຓິຕຸປລິຕ຺ຕໍ;

ກິມິກຸລາລຍໍ ສກຸຓຠຕ຺ຕໍ, ກເຬວຣໍ ກິສ຺ສ ທິຍ຺ຍຕິ.

‘‘ນິພ຺ພຸຍ຺ຫຕິ ສຸສານໍ, ອຈິຣໍ ກາໂຍ ອເປຕວິຎ຺ຎາໂຓ;

ຉຸທ຺ໂຘ [ຉຑ຺ຑິໂຕ (ສ຺ຍາ.), ຉຸຏ຺ໂຐ (ກ.)] ກຬິງ຺ຄຣໍ ວິຍ, ຊິຄຸຈ຺ຉມາເນຫິ ຎາຕີຫິ.

‘‘ຉຸທ຺ຘູນ [ຉຑ຺ຑູນ (ສ຺ຍາ.), ຉຸຏ຺ຐູນ (ກ.)] ນໍ ສຸສາເນ, ປຣຠຕ຺ຕໍ ນ຺ຫາຍນ຺ຕິ [ນ຺ຫາຍເຣ (?)] ຊິຄຸຈ຺ຉນ຺ຕາ;

ນິຍກາ ມາຕາປິຕໂຣ, ກິໍ ປນ ສາຘາຣຓາ ຊນຕາ.

‘‘ອຊ຺ໂຌສິຕາ ອສາເຣ, ກເຬວເຣ ອຏ຺ຐິນ຺ຫາຣຸສງ຺ຆາເຕ;

ເຂຬສ຺ສຸຈ຺ຈາຣສ຺ສວ, ປຣິປຸຓ຺ເຓ [ເຂຬສ຺ສຸຈ຺ຈາຣປສ຺ສວປຣິປຸຓ຺ເຓ (ສີ.)] ປູຕິກາຍມ຺ຫິ.

‘‘ໂຍ ¶ ນໍ ວິນິພ຺ຠຸຊິຕ຺ວາ, ອພ຺ຠນ຺ຕຣມສ຺ສ ພາຫິຣໍ ກຍິຣາ ¶ ;

ຄນ຺ຘສ຺ສ ອສຫມານາ, ສກາປິ ມາຕາ ຊິຄຸຈ຺ເຉຍ຺ຍ.

‘‘ຂນ຺ຘຘາຕຸອາຍຕນໍ, ສງ຺ຂຕໍ ຊາຕິມູລກໍ ທຸກ຺ຂໍ;

ໂຍນິໂສ ອນຸວິຈິນນ຺ຕີ, ວາເຣຍ຺ຍໍ ກິສ຺ສ ອິຈ຺ເຉຍ຺ຍໍ.

‘‘ທິວເສ ທິວເສ ຕິສຕ຺ຕິ, ສຕານິ ນວນວາ ປເຕຍ຺ຍຸໍ ກາຍມ຺ຫິ;

ວສ຺ສສຕມ຺ປິ ຈ ຆາໂຕ, ເສຍ຺ໂຍ ທຸກ຺ຂສ຺ສ ເຈວໍ ຂໂຍ.

‘‘ອຊ຺ຌຸປຄຈ຺ເຉ ຆາຕໍ, ໂຍ ວິຎ຺ຎາເຍວໍ ສຕ຺ຖຸໂນ ວຈນໍ;

‘ທີໂຆ ເຕສໍ [ໂວ (ກ.)] ສໍສາໂຣ, ປຸນປ຺ປຸນໍ ຫຎ຺ຎມານານໍ’.

‘‘ເທເວສຸ ມນຸສ຺ເສສຸ ຈ, ຕິຣຈ຺ຉານໂຍນິຍາ ອສຸຣກາເຍ;

ເປເຕສຸ ¶ ຈ ນິຣເຍສຸ ຈ, ອປຣິມິຕາ ທິສ຺ສເຣ ຆາຕາ.

‘‘ຆາຕາ ນິຣເຍສຸ ພຫູ, ວິນິປາຕຄຕສ຺ສ ປີຬິຍມານສ຺ສ [ກິລິສ຺ສມານສ຺ສ (ສ຺ຍາ. ກ.)];

ເທເວສຸປິ ອຕ຺ຕາຓໍ, ນິພ຺ພານສຸຂາ ປຣໍ ນຕ຺ຖິ.

‘‘ປຕ຺ຕາ ເຕ ນິພ຺ພານໍ, ເຍ ຍຸຕ຺ຕາ ທສພລສ຺ສ ປາວຈເນ;

ອປ຺ໂປສ຺ສຸກ຺ກາ ຆເຏນ຺ຕິ, ຊາຕິມຣຓປ຺ປຫານາຍ.

‘‘ອຊ຺ເຊວ ຕາຕຠິນິກ຺ຂມິສ຺ສໍ, ໂຠເຄຫິ ກິໍ ອສາເຣຫິ;

ນິພ຺ພິນ຺ນາ ເມ ກາມາ, ວນ຺ຕສມາ ຕາລວຕ຺ຖຸກຕາ’’.

ສາ ເຈວໍ ຠຓຕິ ປິຕຣມນີກຣຕ຺ໂຕ ຈ ຍສ຺ສ ສາ ທິນ຺ນາ;

ອຸປຍາສິ ວາຣຓວເຕ, ວາເຣຍ຺ຍມຸປຏ຺ຐິເຕ ກາເລ.

ອຖ ອສິຕນິຈິຕມຸທຸເກ, ເກເສ ຂຄ຺ເຄນ ຉິນ຺ທິຍ ສຸເມຘາ;

ປາສາທໍ ປິທຫິຕ຺ວາ [ປິເຘຕ຺ວາ (ສີ. ສ຺ຍາ.), ປິຘິຕ຺ວາ (ກ.)], ປຐມຊ຺ຌານໍ ສມາປຊ຺ຊິ.

ສາ ¶ ¶ ຈ ຕຫິໍ ສມາປນ຺ນາ, ອນີກຣຕ຺ໂຕ ຈ ອາຄໂຕ ນຄຣໍ;

ປາສາເທ ຈ [ປາສາເທວ (ສີ. ສ຺ຍາ.)] ສຸເມຘາ, ອນິຈ຺ຈສຎ຺ຎໍ [ອນິຈ຺ຈສຎ຺ຎາ (ສພ຺ພຕ຺ຖ)] ສຸຠາເວຕິ.

ສາ ຈ ມນສິ ກໂຣຕິ, ອນີກຣຕ຺ໂຕ ຈ ອາຣຸຫີ ຕຸຣິຕໍ;

ມຓິກນກຠູສິຕງ຺ໂຄ, ກຕຎ຺ຊລີ ຍາຈຕິ ສຸເມຘໍ.

‘‘ຣຊ຺ເຊ ອາຓາຘນມິສ຺ສຣິຍໍ, ໂຠຄາ ສຸຂາ ທຫຣິກາສິ;

ຠຸຎ຺ຊາຫິ ກາມໂຠເຄ, ກາມສຸຂາ ທຸລ຺ລຠາ ໂລເກ.

‘‘ນິສ຺ສຏ຺ຐໍ ¶ ເຕ ຣຊ຺ຊໍ, ໂຠເຄ ຠຸຎ຺ຊສ຺ສຸ ເທຫິ ທານານິ;

ມາ ທຸມ຺ມນາ ອໂຫສິ, ມາຕາປິຕໂຣ ເຕ ທຸກ຺ຂິຕາ’’ [ມາຕາປິຕໂຣ ຈ ເຕ ທຸຂິຕາ (?)].

ຕໍ ຕໍ ຠຓຕິ ສຸເມຘາ, ກາເມຫິ ອນຕ຺ຖິກາ ວິຄຕໂມຫາ;

‘‘ມາ ກາເມ ອຠິນນ຺ທິ, ກາເມສ຺ວາທີນວໍ ປສ຺ສ.

‘‘ຈາຕຸທ຺ທີໂປ ຣາຊາ ມນ຺ຘາຕາ, ອາສິ ກາມໂຠຄິນ ມຄ຺ໂຄ;

ອຕິຕ຺ໂຕ ¶ ກາລງ຺ກໂຕ, ນ ຈສ຺ສ ປຣິປູຣິຕາ ອິຈ຺ຉາ.

‘‘ສຕ຺ຕ ຣຕນານິ ວສ຺ເສຍ຺ຍ, ວຸຏ຺ຐິມາ ທສທິສາ ສມນ຺ເຕນ;

ນ ຈຕ຺ຖິ ຕິຕ຺ຕິ ກາມານໍ, ອຕິຕ຺ຕາວ ມຣນ຺ຕິ ນຣາ.

‘‘ອສິສູນູປມາ ກາມາ, ກາມາ ສປ຺ປສິໂຣປມາ;

ອຸກ຺ໂກປມາ ອນຸທຫນ຺ຕິ, ອຏ຺ຐິກງ຺ກລ [ກງ຺ຂລ (ສີ.)] ສນ຺ນິຠາ.

‘‘ອນິຈ຺ຈາ ອທ຺ຘຸວາ ກາມາ, ພຫຸທຸກ຺ຂາ ມຫາວິສາ;

ອໂຍຄຸໂຬວ ສນ຺ຕຕ຺ໂຕ, ອຆມູລາ ທຸຂປ຺ຜລາ.

‘‘ຣຸກ຺ຂປ຺ຜລູປມາ ກາມາ, ມໍສເປສູປມາ ທຸຂາ;

ສຸປິໂນປມາ ¶ ວຎ຺ຈນິຍາ, ກາມາ ຍາຈິຕກູປມາ.

‘‘ສຕ຺ຕິສູລູປມາ ກາມາ, ໂຣໂຄ ຄຓ຺ໂຑ ອຆໍ ນິຆໍ;

ອງ຺ຄາຣກາສຸສທິສາ, ອຆມູລໍ ຠຍໍ ວໂຘ.

‘‘ເອວໍ ພຫຸທຸກ຺ຂາ ກາມາ, ອກ຺ຂາຕາ ອນ຺ຕຣາຍິກາ;

ຄຈ຺ຉຖ ນ ເມ ຠຄວເຕ, ວິສ຺ສາໂສ ອຕ຺ຖິ ອຕ຺ຕໂນ.

‘‘ກິໍ ມມ ປໂຣ ກຣິສ຺ສຕິ, ອຕ຺ຕໂນ ສີສມ຺ຫິ ຑຍ຺ຫມານມ຺ຫິ;

ອນຸພນ຺ເຘ ຊຣາມຣເຓ, ຕສ຺ສ ຆາຕາຍ ຆຏິຕພ຺ພໍ’’.

ທ຺ວາຣໍ ¶ ອປາປຸຣິຕ຺ວານຫໍ [ອວາປຸຣິຕ຺ວາຫໍ (ສີ.)], ມາຕາປິຕໂຣ ອນີກຣຕ຺ຕຎ຺ຈ;

ທິສ຺ວານ ຉມໍ ນິສິນ຺ເນ, ໂຣທນ຺ເຕ ອິທມໂວຈໍ.

‘‘ທີໂຆ ພາລານໍ ສໍສາໂຣ, ປຸນປ຺ປຸນຎ຺ຈ ໂຣທຕໍ;

ອນມຕຄ຺ເຄ ປິຕຸ ມຣເຓ, ຠາຕຸ ວເຘ ອຕ຺ຕໂນ ຈ ວເຘ.

‘‘ອສ຺ສຸ ຖຎ຺ຎໍ ຣຸຘິຣໍ, ສໍສາຣໍ ອນມຕຄ຺ຄໂຕ ສຣຖ;

ສຕ຺ຕານໍ ສໍສຣຕໍ, ສຣາຫິ ອຏ຺ຐີນຎ຺ຈ ສນ຺ນິຈຍໍ.

‘‘ສຣ ¶ ຈຕຸໂຣທຘີ [ສຣສ຺ສຸ ຈຕຸໂຣ ອຸທຘີ (?)], ອຸປນີເຕ ອສ຺ສຸຖຎ຺ຎຣຸຘິຣມ຺ຫິ;

ສຣ ເອກກປ຺ປມຏ຺ຐີນໍ, ສຎ຺ຈຍໍ ວິປຸເລນ ສມໍ.

‘‘ອນມຕຄ຺ເຄ ¶ ສໍສຣໂຕ, ມຫິໍ [ມຫາມຫິໍ (?)] ຊມ຺ພຸທີປມຸປນີຕໍ;

ໂກລຏ຺ຐິມຕ຺ຕຄຸຬິກາ, ມາຕາ ມາຕຸສ຺ເວວ ນປ຺ປໂຫນ຺ຕິ.

‘‘ຕິຓກຏ຺ຐສາຂາປລາສໍ [ສຣ ຕິຓກຏ຺ຐສາຂາປລາສໍ (ສີ.)], ອຸປນີຕໍ ອນມຕຄ຺ຄໂຕ ສຣ;

ຈຕຸຣງ຺ຄຸລິກາ ຆຏິກາ, ປິຕຸປິຕຸສ຺ເວວ ນປ຺ປໂຫນ຺ຕິ.

‘‘ສຣ ກາຓກຈ຺ຉປໍ ປຸພ຺ພສມຸທ຺ເທ, ອປຣໂຕ ຈ ຍຸຄຉິທ຺ທໍ;

ສິຣໍ ¶ [ສຣ (ສີ.)] ຕສ຺ສ ຈ ປຏິມຸກ຺ກໍ, ມນຸສ຺ສລາຠມ຺ຫິ ໂອປມ຺ມໍ.

‘‘ສຣ ຣູປໍ ເຜຓປິຓ຺ໂຑປມສ຺ສ, ກາຍກລິໂນ ອສາຣສ຺ສ;

ຂນ຺ເຘ ປສ຺ສ ອນິຈ຺ເຈ, ສຣາຫິ ນິຣເຍ ພຫຸວິຆາເຕ.

‘‘ສຣ ກຏສິໍ ວຑ຺ເຒນ຺ເຕ, ປຸນປ຺ປຸນໍ ຕາສຸ ຕາສຸ ຊາຕີສຸ;

ສຣ ກຸມ຺ຠີລຠຍານິ ຈ, ສຣາຫິ ຈຕ຺ຕາຣິ ສຈ຺ຈານິ.

‘‘ອມຕມ຺ຫິ ວິຊ຺ຊມາເນ, ກິໍ ຕວ ປຎ຺ຈກຏຸເກນ ປີເຕນ;

ສພ຺ພາ ຫິ ກາມຣຕິໂຍ, ກຏຸກຕຣາ ປຎ຺ຈກຏຸເກນ.

‘‘ອມຕມ຺ຫິ ວິຊ຺ຊມາເນ, ກິໍ ຕວ ກາເມຫິ ເຍ ປຣິຬາຫາ [ສປຣິຬາຫາ (ສີ. ອຏ຺ຐ.)];

ສພ຺ພາ ຫິ ກາມຣຕິໂຍ, ຊລິຕາ ກຸຖິຕາ ກມ຺ປິຕາ ສນ຺ຕາປິຕາ.

‘‘ອສປຕ຺ຕມ຺ຫິ ສມາເນ, ກິໍ ຕວ ກາເມຫິ ເຍ ພຫຸສປຕ຺ຕາ;

ຣາຊຄ຺ຄິໂຈຣອຸທກປ຺ປິເຍຫິ, ສາຘາຣຓາ ກາມາ ພຫຸສປຕ຺ຕາ.

‘‘ໂມກ຺ຂມ຺ຫິ ວິຊ຺ຊມາເນ, ກິໍ ຕວ ກາເມຫິ ເຍສຸ ວຘພນ຺ໂຘ;

ກາເມສຸ ຫິ ອສກາມາ, ວຘພນ຺ຘທຸຂານິ ອນຸໂຠນ຺ຕິ.

‘‘ອາທີປິຕາ ¶ ¶ ຕິຓຸກ຺ກາ, ຄຓ຺ຫນ຺ຕໍ ທຫນ຺ຕິ ເນວ ມຸຎ຺ຈນ຺ຕໍ;

ອຸກ຺ໂກປມາ ຫິ ກາມາ, ທຫນ຺ຕິ ເຍ ເຕ ນ ມຸຎ຺ຈນ຺ຕິ.

‘‘ມາ ອປ຺ປກສ຺ສ ເຫຕຸ, ກາມສຸຂສ຺ສ ວິປຸລໍ ຊຫີ ສຸຂໍ;

ມາ ປຸຖຸໂລໂມວ ພຬິສໍ, ຄິລິຕ຺ວາ ປຈ຺ຉາ ວິຫຎ຺ຎສິ.

‘‘ກາມໍ ¶ ກາເມສຸ ທມສ຺ສຸ, ຕາວ ສຸນໂຂວ ສງ຺ຂລາພທ຺ໂຘ;

ກາຫິນ຺ຕິ ຂຸ ຕໍ ກາມາ, ຉາຕາ ສຸນຂໍວ ຈຓ຺ຑາລາ.

‘‘ອປຣິມິຕຎ຺ຈ ¶ ທຸກ຺ຂໍ, ພຫູນິ ຈ ຈິຕ຺ຕໂທມນສ຺ສານິ;

ອນຸໂຠຫິສິ ກາມຍຸຕ຺ໂຕ, ປຏິນິສ຺ສຊ [ປຏິນິສ຺ສຣ (ສີ.)] ອທ຺ຘຸເວ ກາເມ.

‘‘ອຊຣມ຺ຫິ ວິຊ຺ຊມາເນ, ກິໍ ຕວ ກາເມຫິ [ເຍສຸ ຊຣາຍ ຈ; ມຣຓພ຺ຍາຘິຫິ ຄຫິຕາ (?)] ເຍສຸ ຊຣາ;

ມຣຓພ຺ຍາຘິຄຫິຕາ [ເຍສຸ ຊຣາຍ ຈ; ມຣຓພ຺ຍາຘິຫິ ຄຫິຕາ (?)], ສພ຺ພາ ສພ຺ພຕ຺ຖ ຊາຕິໂຍ.

‘‘ອິທມຊຣມິທມມຣໍ [ອິທໍ ອຊຣໍ ອິທໍ ອມຣໍ (?)], ອິທມຊຣາມຣໍ ປທມໂສກໍ;

ອສປຕ຺ຕມສມ຺ພາຘໍ, ອຂລິຕມຠຍໍ ນິຣຸປຕາປໍ.

‘‘ອຘິຄຕມິທໍ ພຫູຫິ, ອມຕໍ ອຊ຺ຊາປິ ຈ ລຠນີຍມິທໍ;

ໂຍ ໂຍນິໂສ ປຍຸຎ຺ຊຕິ, ນ ຈ ສກ຺ກາ ອຆຏມາເນນ’’.

ເອວໍ ຠຓຕິ ສຸເມຘາ, ສງ຺ຂາຣຄເຕ ຣຕິໍ ອລຠມານາ;

ອນຸເນນ຺ຕີ ອນິກຣຕ຺ຕໍ, ເກເສ ຈ ຉມໍ ຂິປິ ສຸເມຘາ.

ອຸຏ຺ຐາຍ ອນິກຣຕ຺ໂຕ, ປຎ຺ຊລິໂກ ຍາຈິຕສ຺ສາ ປິຕຣໍ ໂສ;

‘‘ວິສ຺ສຊ຺ເຊຖ ສຸເມຘໍ, ປພ຺ພຊິຕຸໍ ວິໂມກ຺ຂສຈ຺ຈທສ຺ສາ’’.

ວິສ຺ສຊ຺ຊິຕາ ມາຕາປິຕູຫິ, ປພ຺ພຊິ ໂສກຠຍຠີຕາ;

ຉ ອຠິຎ຺ຎາ ສຈ຺ຉິກຕາ, ອຄ຺ຄຜລໍ ສິກ຺ຂມານາຍ.

ອຈ຺ຉຣິຍມພ຺ຠຸຕໍ ¶ ຕໍ, ນິພ຺ພານໍ ອາສິ ຣາຊກຎ຺ຎາຍ;

ປຸພ຺ເພນິວາສຈຣິຕໍ, ຍຖາ ພ຺ຍາກຣິ ປຈ຺ຉິເມ ກາເລ.

‘‘ຠຄວຕິ ໂກຓາຄມເນ, ສງ຺ຆາຣາມມ຺ຫິ ນວນິເວສມ຺ຫິ;

ສຂິໂຍ ຕິສ຺ໂສ ຊນິໂຍ, ວິຫາຣທານໍ ອທາສິມ຺ຫ.

‘‘ທສກ຺ຂຕ຺ຕຸໍ ສຕກ຺ຂຕ຺ຕຸໍ, ທສສຕກ຺ຂຕ຺ຕຸໍ ສຕານິ ຈ ສຕກ຺ຂຕ຺ຕຸໍ;

ເທເວສຸ ¶ ອຸປ຺ປຊ຺ຊິມ຺ຫ, ໂກ ປນ ວາໂທ ມນຸສ຺ເສສຸ.

‘‘ເທເວສຸ ມຫິທ຺ຘິກາ ອຫຸມ຺ຫ, ມານຸສກມ຺ຫິ ໂກ ປນ ວາໂທ;

ສຕ຺ຕຣຕນສ຺ສ ມເຫສີ, ອິຕ຺ຖິຣຕນໍ ອຫໍ ອາສິໍ.

‘‘ໂສ ¶ ¶ ເຫຕຸ ໂສ ປຠໂວ, ຕໍ ມູລໍ ສາວ ສາສເນ ຂນ຺ຕີ;

ຕໍ ປຐມສໂມຘານໍ, ຕໍ ຘມ຺ມຣຕາຍ ນິພ຺ພານໍ’’.

ເອວໍ ກໂຣນ຺ຕິ ເຍ ສທ຺ທຫນ຺ຕິ, ວຈນໍ ອໂນມປຎ຺ຎສ຺ສ;

ນິພ຺ພິນ຺ທນ຺ຕິ ຠວຄເຕ, ນິພ຺ພິນ຺ທິຕ຺ວາ ວິຣຊ຺ຊນ຺ຕີຕິ.

ອິຕ຺ຖໍ ສຸທໍ ສຸເມຘາ ເຖຣີ ຄາຖາໂຍ ອຠາສິຕ຺ຖາຕິ.

ຄາຖາສຕານິ ຈຕ຺ຕາຣິ, ອສີຕິ ປຸນ ຈຸທ຺ທສ [ຄາຖາສງ຺ຂ຺ຍາ ອິຘ ອນຸກ຺ກມຓິກຄຓນາວເສນ ປາກຏາ];

ເຖຣິເຍກຸຕ຺ຕຣສຕາ [ເຖຣີເຍກຸຕ຺ຕຣຉສຕາ (?) ຕິໍສມຕ຺ຕາປິ ປຎ຺ຈສຕມຕ຺ຕາປິ ເຖຣິໂຍ ເອກໂຕ ອາຄຕາ ມນສິກາຕພ຺ພາ], ສພ຺ພາ ຕາ ອາສວກ຺ຂຍາຕິ.