ມູລ > ສຸຕ຺ຕປິຏກ > ຂຸທ຺ທກນິກາຍ

THA Vol 2
MMR Vol 2
VRI Vol 2
PTS Vol 0

Misc. Paragraph

ຂຸທ຺ທກນິກາເຍ

ຈຣິຍາປິຏກປາຬິ

ນໂມ ຕສ຺ສ ຠຄວໂຕ ອຣຫໂຕ ສມ຺ມາສມ຺ພຸທ຺ຘສ຺ສ

‘‘ກປ຺ເປ ¶ ¶ ¶ ¶ ຈ ສຕສຫສ຺ເສ, ຈຕຸໂຣ ຈ ອສງ຺ຂິເຍ;

ເອຕ຺ຖນ຺ຕເຣ ຍໍ ຈຣິຕໍ, ສພ຺ພໍ ຕໍ ໂພຘິປາຈນໍ.

‘‘ອຕີຕກປ຺ເປ ຈຣິຕໍ, ຐປຍິຕ຺ວາ ຠວາຠເວ;

ອິມມ຺ຫິ ກປ຺ເປ ຈຣິຕໍ, ປວກ຺ຂິສ຺ສໍ ສຸໂຓຫິ ເມ.

‘‘ຍທາ ອຫໍ ພ຺ຣຫາຣຎ຺ເຎ, ສຸຎ຺ເຎ ວິປິນການເນ;

ອຊ຺ໂຌຄາເຫຕ຺ວາ [ອຊ຺ໂຌຄເຫຕ຺ວາ (ສີ. ສ຺ຍາ.)] ວິຫຣາມິ, ອກິຕ຺ຕິ ນາມ ຕາປໂສ.

‘‘ຕທາ ¶ ມໍ ຕປເຕເຊນ, ສນ຺ຕຕ຺ໂຕ ຕິທິວາຠິຠູ;

ຘາເຣນ຺ໂຕ ພ຺ຣາຫ຺ມຓວຓ຺ຓໍ, ຠິກ຺ຂາຍ ມໍ ອຸປາຄມິ.

‘‘ປວນາ ອາຠຕໍ ປຓ຺ຓໍ, ອເຕລຎ຺ຈ ອໂລຓິກໍ;

ມມ ທ຺ວາເຣ ຐິຕໍ ທິສ຺ວາ, ສກຏາເຫນ ອາກິຣິໍ.

‘‘ຕສ຺ສ ທຕ຺ວານຫໍ ປຓ຺ຓໍ, ນິກ຺ກຸຊ຺ຊິຕ຺ວານ ຠາຊນໍ;

ປຸເນສນໍ ຊຫິຕ຺ວານ, ປາວິສິໍ ປຓ຺ຓສາລກໍ.

‘‘ທຸຕິຍມ຺ປິ ¶ ຕຕິຍມ຺ປິ, ອຸປຄຎ຺ຉິ ມມນ຺ຕິກໍ;

ອກມ຺ປິໂຕ ອໂນລຄ຺ໂຄ, ເອວເມວມທາສຫໍ.

‘‘ນ ¶ ເມ ຕປ຺ປຈ຺ຈຍາ ອຕ຺ຖິ, ສຣີຣສ຺ມິໍ ວິວຓ຺ຓິຍໍ;

ປີຕິສຸເຂນ ຣຕິຍາ, ວີຕິນາເມມິ ຕໍ ທິວໍ.

‘‘ຍທິ ມາສມ຺ປິ ທ຺ເວມາສໍ, ທກ຺ຂິເຓຍ຺ຍໍ ວຣໍ ລເຠ;

ອກມ຺ປິໂຕ ອໂນລີໂນ, ທເທຍ຺ຍໍ ທານມຸຕ຺ຕມໍ.

‘‘ນ ຕສ຺ສ ທານໍ ທທມາໂນ, ຍສໍ ລາຠຎ຺ຈ ປຕ຺ຖຍິໍ;

ສພ຺ພຎ຺ຎຸຕໍ ປຕ຺ຖຍາໂນ, ຕານິ ກມ຺ມານິ ອາຈຣິ’’ນ຺ຕິ.

‘‘ປຸນາປຣໍ ¶ ຍທາ ໂຫມິ, ພ຺ຣາຫ຺ມໂຓ ສງ຺ຂສວ຺ຫໂຍ;

ມຫາສມຸທ຺ທໍ ຕຣິຕຸກາໂມ, ອຸປຄຈ຺ຉາມິ ປຏ຺ຏນໍ.

‘‘ຕຕ຺ຖທ຺ທສໍ ປຏິປເຖ, ສຍມ຺ຠຸໍ ອປຣາຊິຕໍ;

ກນ຺ຕາຣທ຺ຘານໍ ປຏິປນ຺ນໍ [ກນ຺ຕາຣທ຺ຘານປຏິປນ຺ນໍ (ສີ. ສ຺ຍາ.)], ຕຕ຺ຕາຍ ກຐິນຠູມິຍາ.

‘‘ຕມຫໍ ປຏິປເຖ ທິສ຺ວາ, ອິມມຕ຺ຖໍ ວິຈິນ຺ຕຍິໍ;

‘ອິທໍ ເຂຕ຺ຕໍ ອນຸປ຺ປຕ຺ຕໍ, ປຸຎ຺ຎກາມສ຺ສ ຊນ຺ຕຸໂນ.

‘‘‘ຍຖາ ກສ຺ສໂກ ປຸຣິໂສ, ເຂຕ຺ຕໍ ທິສ຺ວາ ມຫາຄມໍ;

ຕຕ຺ຖ ພີຊໍ ນ ໂຣເປຕິ, ນ ໂສ ຘຎ຺ເຎນ ອຕ຺ຖິໂກ.

‘‘‘ເອວເມວາຫໍ ¶ ¶ ປຸຎ຺ຎກາໂມ, ທິສ຺ວາ ເຂຕ຺ຕວຣຸຕ຺ຕມໍ;

ຍທິ ຕຕ຺ຖ ກາຣໍ ນ ກໂຣມິ, ນາຫໍ ປຸຎ຺ເຎນ ອຕ຺ຖິໂກ.

‘‘‘ຍຖາ ອມຈ຺ໂຈ ມຸທ຺ທິກາໂມ, ຣຎ຺ໂຎ ອນ຺ເຕປຸເຣ ຊເນ;

ນ ເທຕິ ເຕສໍ ຘນຘຎ຺ຎໍ, ມຸທ຺ທິໂຕ ປຣິຫາຍຕິ.

‘‘‘ເອວເມວາຫໍ ປຸຎ຺ຎກາໂມ, ວິປຸລໍ ທິສ຺ວານ ທກ຺ຂິຓໍ;

ຍທິ ຕສ຺ສ ທານໍ ນ ທທາມິ, ປຣິຫາຍິສ຺ສາມິ ປຸຎ຺ຎໂຕ’.

‘‘ເອວາຫໍ ຈິນ຺ຕຍິຕ຺ວານ, ໂອໂຣຫິຕ຺ວາ ອຸປາຫນາ;

ຕສ຺ສ ປາທານິ ວນ຺ທິຕ຺ວາ, ອທາສິໍ ຉຕ຺ຕຸປາຫນໍ.

‘‘ເຕເນວາຫໍ ¶ ສຕຄຸຓໂຕ, ສຸຂຸມາໂລ ສຸເຂຘິໂຕ;

ອປິ ຈ ທານໍ ປຣິປູເຣນ຺ໂຕ, ເອວໍ ຕສ຺ສ ອທາສຫ’’ນ຺ຕິ.

‘‘ປຸນາປຣໍ ຍທາ ໂຫມິ, ອິນ຺ທປຕ຺ເຖ [ອິນ຺ທປຕ຺ເຕ (ສີ. ກ.)] ປຸຣຸຕ຺ຕເມ;

ຣາຊາ ຘນຎ຺ຈໂຍ ນາມ, ກຸສເລ ທສຫຸປາຄໂຕ.

‘‘ກລິງ຺ຄຣຏ຺ຐວິສຍາ, ພ຺ຣາຫ຺ມຓາ ອຸປຄຎ຺ຉຸ ມໍ;

ອາຍາຈຸໍ ມໍ ຫຕ຺ຖິນາຄໍ, ຘຎ຺ຎໍ ມງ຺ຄລສມ຺ມຕໍ.

‘‘‘ອວຸຏ຺ຐິໂກ ຊນປໂທ, ທຸພ຺ຠິກ຺ໂຂ ຉາຕໂກ ມຫາ;

ທທາຫິ ປວຣໍ ນາຄໍ, ນີລໍ ອຎ຺ຊນສວ຺ຫຍໍ.

‘‘‘ນ ¶ ¶ ເມ ຍາຈກມນຸປ຺ປຕ຺ເຕ, ປຏິກ຺ເຂໂປ ອນຸຈ຺ຉໂວ;

ມາ ເມ ຠິຊ຺ຊິ ສມາທານໍ, ທສ຺ສາມິ ວິປຸລໍ ຄຊໍ’.

‘‘ນາຄໍ ຄເຫຕ຺ວາ ໂສຓ຺ຑາຍ, ຠິງ຺ຄາເຣ [ຠິງ຺ກາເຣ (ສີ.)] ຣຕນາມເຍ;

ຊລໍ ຫຕ຺ເຖ ອາກິຣິຕ຺ວາ, ພ຺ຣາຫ຺ມຓານໍ ອທໍ ຄຊໍ.

‘‘ຕສ຺ສ ນາເຄ ປທິນ຺ນມ຺ຫິ, ອມຈ຺ຈາ ເອຕທພ຺ຣວຸໍ;

‘ກິໍ ນຸ ຕຸຍ຺ຫໍ ວຣໍ ນາຄໍ, ຍາຈການໍ ປທສ຺ສສິ.

‘‘‘ຘຎ຺ຎໍ ¶ ມງ຺ຄລສມ຺ປນ຺ນໍ, ສງ຺ຄາມວິຊຍຸຕ຺ຕມໍ;

ຕສ຺ມິໍ ນາເຄ ປທິນ຺ນມ຺ຫິ, ກິໍ ເຕ ຣຊ຺ຊໍ ກຣິສ຺ສຕິ.

‘‘‘ຣຊ຺ຊມ຺ປິ ເມ ທເທ ສພ຺ພໍ, ສຣີຣໍ ທຊ຺ຊມຕ຺ຕໂນ;

ສພ຺ພຎ຺ຎຸຕໍ ປິຍໍ ມຍ຺ຫໍ, ຕສ຺ມາ ນາຄໍ ອທາສຫ’’’ນ຺ຕິ.

‘‘ກຸສາວຕິມ຺ຫິ ນຄເຣ, ຍທາ ອາສິໍ ມຫີປຕິ;

ມຫາສຸທສ຺ສໂນ ນາມ, ຈກ຺ກວຕ຺ຕີ ມຫພ຺ພໂລ.

‘‘ຕຕ຺ຖາຫໍ ¶ ທິວເສ ຕິກ຺ຂຕ຺ຕຸໍ, ໂຆສາເປມິ ຕຫິໍ ຕຫິໍ;

‘ໂກ ກິໍ ອິຈ຺ຉຕິ ປຕ຺ເຖຕິ, ກສ຺ສ ກິໍ ທີຍຕູ ຘນໍ.

‘‘‘ໂກ ຉາຕໂກ ໂກ ຕສິໂຕ, ໂກ ມາລໍ ໂກ ວິເລປນໍ;

ນານາຣຕ຺ຕານິ ວຕ຺ຖານິ, ໂກ ນຄ຺ໂຄ ປຣິທຫິສ຺ສຕິ.

‘‘‘ໂກ ປເຖ ຉຕ຺ຕມາເທຕິ, ໂກປາຫນາ ມຸທູ ສຸຠາ’;

ອິຕິ ¶ ສາຍຎ຺ຈ ປາໂຕ ຈ, ໂຆສາເປມິ ຕຫິໍ ຕຫິໍ.

‘‘ນ ຕໍ ທສສຸ ຐາເນສຸ, ນປິ ຐານສເຕສຸ ວາ;

ອເນກສຕຐາເນສຸ, ປຏິຍຕ຺ຕໍ ຍາຈເກ ຘນໍ.

‘‘ທິວາ ວາ ຍທິ ວາ ຣຕ຺ຕິໍ, ຍທິ ເອຕິ ວນິພ຺ພໂກ;

ລທ຺ຘາ ຍທິຈ຺ຉກໍ ໂຠຄໍ, ປູຣຫຕ຺ໂຖວ ຄຈ຺ຉຕິ.

‘‘ເອວຣູປໍ ມຫາທານໍ, ອທາສິໍ ຍາວຊີວິກໍ;

ນປາຫໍ ເທສ຺ສໍ ຘນໍ ທມ຺ມິ, ນປິ ນຕ຺ຖິ ນິຈໂຍ ມຍິ.

‘‘ຍຖາປິ ອາຕຸໂຣ ນາມ, ໂຣຄໂຕ ປຣິມຸຕ຺ຕິຍາ;

ຘເນນ ເວຊ຺ຊໍ ຕປ຺ເປຕ຺ວາ, ໂຣຄໂຕ ປຣິມຸຈ຺ຈຕິ.

‘‘ຕເຖວາຫໍ ຊານມາໂນ, ປຣິປູເຣຕຸມເສສໂຕ;

ອູນມນໍ ປູຣຍິຕຸໍ, ເທມິ ທານໍ ວນິພ຺ພເກ;

ນິຣາລໂຍ ອປຈ຺ຈາໂສ, ສມ຺ໂພຘິມນຸປຕ຺ຕິຍາ’’ຕິ.

‘‘ປຸນາປຣໍ ¶ ¶ ຍທາ ໂຫມິ, ສຕ຺ຕຣາຊປຸໂຣຫິໂຕ;

ປູຊິໂຕ ນຣເທເວຫິ, ມຫາໂຄວິນ຺ທພ຺ຣາຫ຺ມໂຓ.

‘‘ຕທາຫໍ ສຕ຺ຕຣຊ຺ເຊສຸ, ຍໍ ເມ ອາສິ ອຸປາຍນໍ;

ເຕນ ເທມິ ມຫາທານໍ, ອກ຺ໂຂພ຺ຠໍ [ອກ຺ໂຂຠໍ (ສ຺ຍາ. ກໍ.)] ສາຄຣູປມໍ.

‘‘ນ ¶ ¶ ເມ ເທສ຺ສໍ ຘນໍ ຘຎ຺ຎໍ, ນປິ ນຕ຺ຖິ ນິຈໂຍ ມຍິ;

ສພ຺ພຎ຺ຎຸຕໍ ປິຍໍ ມຍ຺ຫໍ, ຕສ຺ມາ ເທມິ ວຣໍ ຘນ’’ນ຺ຕິ.

‘‘ປຸນາປຣໍ ຍທາ ໂຫມິ, ມິຖິລາຍໍ ປຸຣຸຕ຺ຕເມ;

ນິມິ ນາມ ມຫາຣາຊາ, ປຓ຺ຑິໂຕ ກຸສລຕ຺ຖິໂກ.

‘‘ຕທາຫໍ ມາປຍິຕ຺ວານ, ຈຕຸສ຺ສາລໍ ຈຕຸມ຺ມຸຂໍ;

ຕຕ຺ຖ ທານໍ ປວຕ຺ເຕສິໍ, ມິຄປກ຺ຂິນຣາທິນໍ.

‘‘ອຈ຺ຉາທນຎ຺ຈ ສຍນໍ, ອນ຺ນໍ ປານຎ຺ຈ ໂຠຊນໍ;

ອພ຺ໂພຈ຺ຉິນ຺ນໍ ກຣິຕ຺ວານ, ມຫາທານໍ ປວຕ຺ຕຍິໍ.

‘‘ຍຖາປິ ເສວໂກ ສາມິໍ, ຘນເຫຕຸມຸປາຄໂຕ;

ກາເຍນ ວາຈາ ມນສາ, ອາຣາຘນີຍເມສຕິ.

‘‘ຕເຖວາຫໍ ສພ຺ພຠເວ, ປຣິເຍສິສ຺ສາມິ ໂພຘິຊໍ;

ທາເນນ ສຕ຺ເຕ ຕປ຺ເປຕ຺ວາ, ອິຈ຺ຉາມິ ໂພຘິມຸຕ຺ຕມ’’ນ຺ຕິ.

‘‘ປຸນາປຣໍ ¶ ¶ ຍທາ ໂຫມິ, ເອກຣາຊສ຺ສ ອຕ຺ຣໂຊ;

ນຄເຣ ປຸປ຺ຜວຕິຍາ, ກຸມາໂຣ ຈນ຺ທສວ຺ຫໂຍ.

‘‘ຕທາຫໍ ¶ ຍຊນາ ມຸຕ຺ໂຕ, ນິກ຺ຂນ຺ໂຕ ຍຎ຺ຎວາຏໂຕ;

ສໍເວຄໍ ຊນຍິຕ຺ວານ, ມຫາທານໍ ປວຕ຺ຕຍິໍ.

‘‘ນາຫໍ ປິວາມິ ຂາທາມິ, ນປິ ຠຸຎ຺ຊາມິ ໂຠຊນໍ;

ທກ຺ຂິເຓຍ຺ເຍ ອທຕ຺ວານ, ອປິ ຉປ຺ປຎ຺ຈຣຕ຺ຕິໂຍ.

‘‘ຍຖາປິ ¶ ວາຓິໂຊ ນາມ, ກຕ຺ວານ ຠຓ຺ຑສຎ຺ຈຍໍ;

ຍຕ຺ຖ ລາໂຠ ມຫາ ໂຫຕິ, ຕຕ຺ຖ ຕໍ [ຕຕ຺ຖ ນໍ (ສີ.), ຕຕ຺ຖ (ກ.)] ຫຣຕິ ຠຓ຺ຑກໍ.

‘‘ຕເຖວ ສກຠຸຕ຺ຕາປິ, ປເຣ ທິນ຺ນໍ ມຫປ຺ຜລໍ;

ຕສ຺ມາ ປຣສ຺ສ ທາຕພ຺ພໍ, ສຕຠາໂຄ ຠວິສ຺ສຕິ.

‘‘ເອຕມຕ຺ຖວສໍ ຎຕ຺ວາ, ເທມິ ທານໍ ຠວາຠເວ;

ນ ປຏິກ຺ກມາມິ ທານໂຕ, ສມ຺ໂພຘິມນຸປຕ຺ຕິຍາ’’ຕິ.

‘‘ອຣິຏ຺ຐສວ຺ຫເຍ ນຄເຣ, ສິວິນາມາສິ ຂຕ຺ຕິໂຍ;

ນິສຊ຺ຊ ປາສາທວເຣ, ເອວໍ ຈິນ຺ເຕສຫໍ ຕທາ.

‘‘‘ຍໍ ກິຎ຺ຈິ ມານຸສໍ ທານໍ, ອທິນ຺ນໍ ເມ ນ ວິຊ຺ຊຕິ;

ໂຍປິ ຍາເຈຍ຺ຍ ມໍ ຈກ຺ຂຸໍ, ທເທຍ຺ຍໍ ອວິກມ຺ປິໂຕ’.

‘‘ມມ ສງ຺ກປ຺ປມຎ຺ຎາຍ, ສກ຺ໂກ ເທວານມິສ຺ສໂຣ;

ນິສິນ຺ໂນ ເທວປຣິສາຍ, ອິທໍ ວຈນມພ຺ຣວິ.

‘‘‘ນິສຊ຺ຊ ¶ ປາສາທວເຣ, ສິວິຣາຊາ ມຫິທ຺ຘິໂກ;

ຈິນ຺ເຕນ຺ໂຕ ວິວິຘໍ ທານໍ, ອເທຍ຺ຍໍ ໂສ ນ ປສ຺ສຕິ.

‘‘‘ຕຖໍ ¶ ນຸ ວິຕຖໍ ເນຕໍ, ຫນ຺ທ ວີມໍສຍາມິ ຕໍ;

ມຸຫຸຕ຺ຕໍ ອາຄເມຍ຺ຍາຖ, ຍາວ ຊານາມິ ຕໍ ມນໍ’.

‘‘ປເວຘມາໂນ ປລິຕສິໂຣ, ວລິຄຕ຺ໂຕ [ວລິຕຄຕ຺ໂຕ (ສີ.)] ຊຣາຕຸໂຣ;

ອນ຺ຘວຓ຺ໂຓວ ຫຸຕ຺ວານ, ຣາຊານໍ ອຸປສງ຺ກມິ.

‘‘ໂສ ¶ ຕທາ ປຄ຺ຄເຫຕ຺ວານ, ວາມໍ ທກ຺ຂິຓພາຫຸ ຈ;

ສິຣສ຺ມິໍ ອຎ຺ຊລິໍ ກຕ຺ວາ, ອິທໍ ວຈນມພ຺ຣວິ.

‘‘‘ຍາຈາມິ ຕໍ ມຫາຣາຊ, ຘມ຺ມິກ ຣຏ຺ຐວຑ຺ຒນ;

ຕວ ທານຣຕາ ກິຕ຺ຕິ, ອຸຄ຺ຄຕາ ເທວມານຸເສ.

‘‘‘ອຸໂຠປິ ¶ ເນຕ຺ຕາ ນຍນາ, ອນ຺ຘາ ອຸປຫຕາ ມມ;

ເອກໍ ເມ ນຍນໍ ເທຫິ, ຕ຺ວມ຺ປິ ເອເກນ ຍາປຍ’.

‘‘ຕສ຺ສາຫໍ ວຈນໍ ສຸຕ຺ວາ, ຫຏ຺ໂຐ ສໍວິຄ຺ຄມານໂສ;

ກຕຎ຺ຊລີ ເວທຊາໂຕ, ອິທໍ ວຈນມພ຺ຣວິໍ.

‘‘‘ອິທານາຫໍ ຈິນ຺ຕຍິຕ຺ວານ, ປາສາທໂຕ ອິຘາຄໂຕ;

ຕ຺ວໍ ມມ ຈິຕ຺ຕມຎ຺ຎາຍ, ເນຕ຺ຕໍ ຍາຈິຕຸມາຄໂຕ.

‘‘‘ອໂຫ ເມ ມານສໍ ສິທ຺ຘໍ, ສງ຺ກປ຺ໂປ ປຣິປູຣິໂຕ;

ອທິນ຺ນປຸພ຺ພໍ ທານວຣໍ, ອຊ຺ຊ ທສ຺ສາມິ ຍາຈເກ.

‘‘‘ເອຫິ ສິວກ ອຸຏ຺ເຐຫິ, ມາ ທນ຺ຘຍິ ມາ ປເວຘຍິ;

ອຸໂຠປິ ນຍນໍ ເທຫິ, ອຸປ຺ປາເຏຕ຺ວາ ວຓິພ຺ພເກ’.

‘‘ຕໂຕ ¶ ໂສ ໂຈທິໂຕ ມຍ຺ຫໍ, ສິວໂກ ວຈນໍ ກໂຣ;

ອຸທ຺ຘຣິຕ຺ວານ ປາທາສິ, ຕາລມິຎ຺ຊໍວ ຍາຈເກ.

‘‘ທທມານສ຺ສ ເທນ຺ຕສ຺ສ, ທິນ຺ນທານສ຺ສ ເມ ສໂຕ;

ຈິຕ຺ຕສ຺ສ ອຎ຺ຎຖາ ນຕ຺ຖິ, ໂພຘິຍາເຍວ ກາຣຓາ.

‘‘ນ ເມ ເທສ຺ສາ ອຸໂຠ ຈກ຺ຂູ, ອຕ຺ຕາ ນ ເມ ນ ເທສ຺ສິໂຍ;

ສພ຺ພຎ຺ຎຸຕໍ ປິຍໍ ມຍ຺ຫໍ, ຕສ຺ມາ ຈກ຺ຂຸໍ ອທາສຫ’’ນ຺ຕິ.

‘‘ຍາ ¶ ເມ ອໂຫສິ ຊນິກາ, ຜຸສ຺ສຕີ [ຜຸສຕີ (ສີ.)] ນາມ ຂຕ຺ຕິຍາ;

ສາ ອຕີຕາສຸ ຊາຕີສຸ, ສກ຺ກສ຺ສ ມເຫສີ ປິຍາ.

‘‘ຕສ຺ສາ ອາຍຸກ຺ຂຍໍ ຎຕ຺ວາ, ເທວິນ຺ໂທ ເອຕທພ຺ຣວິ;

‘ທທາມິ ເຕ ທສ ວເຣ, ວຣຠທ຺ເທ ຍທິຈ຺ຉສິ’.

‘‘ເອວໍ ວຸຕ຺ຕາ ຈ ສາ ເທວີ, ສກ຺ກໍ ປຸນິທມພ຺ຣວິ;

‘ກິໍ ນຸ ເມ ອປຣາຘຕ຺ຖິ, ກິໍ ນຸ ເທສ຺ສາ ອຫໍ ຕວ;

ຣມ຺ມາ ຈາເວສິ ມໍ ຐານາ, ວາໂຕວ ຘຣຓີຣຸຫໍ’.

‘‘ເອວໍ ¶ ວຸຕ຺ໂຕ ຈ ໂສ ສກ຺ໂກ, ປຸນ ຕສ຺ສິທມພ຺ຣວິ;

‘ນ ເຈວ ເຕ ກຕໍ ປາປໍ, ນ ຈ ເມ ຕ຺ວໍສິ ອປ຺ປິຍາ.

‘‘‘ເອຕ຺ຕກໍເຍວ ¶ ເຕ ອາຍຸ, ຈວນກາໂລ ຠວິສ຺ສຕິ;

ປຏິຄ຺ຄຓ຺ຫ ມຍາ ທິນ຺ເນ, ວເຣ ທສ ວຣຸຕ຺ຕເມ’.

‘‘ສກ຺ເກນ ¶ ສາ ທິນ຺ນວຣາ, ຕຸຏ຺ຐຫຏ຺ຐາ ປໂມທິຕາ;

ມມໍ ອພ຺ຠນ຺ຕຣໍ ກຕ຺ວາ, ຜຸສ຺ສຕີ ທສ ວເຣ ວຣີ.

‘‘ຕໂຕ ຈຸຕາ ສາ ຜຸສ຺ສຕີ, ຂຕ຺ຕິເຍ ອຸປປຊ຺ຊຖ;

ເຊຕຸຕ຺ຕຣມ຺ຫິ ນຄເຣ, ສຎ຺ຊເຍນ ສມາຄມິ.

‘‘ຍທາຫໍ ຜຸສ຺ສຕິຍາ ກຸຈ຺ຉິໍ, ໂອກ຺ກນ຺ໂຕ ປິຍມາຕຸຍາ;

ມມ ເຕເຊນ ເມ ມາຕາ, ສທາ ທານຣຕາ ອຫຸ.

‘‘ອຘເນ ອາຕຸເຣ ຊິຓ຺ເຓ, ຍາຈເກ ອທ຺ຘິເກ [ປຖິເກ (ກ.)] ຊເນ;

ສມເຓ ພ຺ຣາຫ຺ມເຓ ຂີເຓ, ເທຕິ ທານໍ ອກິຎ຺ຈເນ.

‘‘ທສ ມາເສ ຘາຣຍິຕ຺ວານ, ກໂຣນ຺ເຕ ປຸຣໍ ປທກ຺ຂິຓໍ;

ເວສ຺ສານໍ ວີຖິຍາ ມຊ຺ເຌ, ຊເນສິ ຜຸສ຺ສຕີ ມມໍ.

‘‘ນ ມຍ຺ຫໍ ມຕ຺ຕິກໍ ນາມໍ, ນປິ ເປຕ຺ຕິກສມ຺ຠວໍ;

ຊາເຕຕ຺ຖ ເວສ຺ສວີຖິຍາ, ຕສ຺ມາ ເວສ຺ສນ຺ຕໂຣ ອຫຸ.

‘‘ຍທາຫໍ ທາຣໂກ ໂຫມິ, ຊາຕິຍາ ອຏ຺ຐວສ຺ສິໂກ;

ຕທາ ນິສຊ຺ຊ ປາສາເທ, ທານໍ ທາຕຸໍ ວິຈິນ຺ຕຍິໍ.

‘‘‘ຫທຍໍ ¶ ທເທຍ຺ຍໍ ຈກ຺ຂຸໍ, ມໍສມ຺ປິ ຣຸຘິຣມ຺ປິ ຈ;

ທເທຍ຺ຍໍ ກາຍໍ ສາເວຕ຺ວາ, ຍທິ ໂກຈິ ຍາຈເຍ ມມໍ’.

‘‘ສຠາວໍ ຈິນ຺ຕຍນ຺ຕສ຺ສ, ອກມ຺ປິຕມສຓ຺ຐິຕໍ;

ອກມ຺ປິ ຕຕ຺ຖ ປຖວີ, ສິເນຣຸວນວຏໍສກາ.

‘‘ອນ຺ວທ຺ຘມາເສ ປນ຺ນຣເສ, ປຸຓ຺ຓມາເສ ອຸໂປສເຖ;

ປຈ຺ຈຍໍ ນາຄມາຣຸຍ຺ຫ, ທານໍ ທາຕຸໍ ອຸປາຄມິໍ.

‘‘ກລິງ຺ຄຣຏ຺ຐວິສຍາ ¶ , ພ຺ຣາຫ຺ມຓາ ອຸປຄຎ຺ຉຸ ມໍ;

ອຍາຈຸໍ ມໍ ຫຕ຺ຖິນາຄໍ, ຘຎ຺ຎໍ ມງ຺ຄລສມ຺ມຕໍ.

‘‘ອວຸຏ຺ຐິໂກ ¶ ຊນປໂທ, ທຸພ຺ຠິກ຺ໂຂ ຉາຕໂກ ມຫາ;

ທທາຫິ ປວຣໍ ນາຄໍ, ສພ຺ພເສຕໍ ຄຊຸຕ຺ຕມໍ.

‘‘ທທາມິ ນ ວິກມ຺ປາມິ, ຍໍ ມໍ ຍາຈນ຺ຕິ ພ຺ຣາຫ຺ມຓາ;

ສນ຺ຕໍ ນປ຺ປຕິຄູຫາມິ [ນປ຺ປຕິຄຸຍ຺ຫາມິ (ສີ. ກ.)], ທາເນ ເມ ຣມເຕ ມໂນ.

‘‘ນ ເມ ຍາຈກມນຸປ຺ປຕ຺ເຕ, ປຏິກ຺ເຂໂປ ອນຸຈ຺ຉໂວ;

‘ມາ ເມ ຠິຊ຺ຊິ ສມາທານໍ, ທສ຺ສາມິ ວິປຸລໍ ຄຊໍ’.

‘‘ນາຄໍ ຄເຫຕ຺ວາ ໂສຓ຺ຑາຍ, ຠິງ຺ຄາເຣ ຣຕນາມເຍ;

ຊລໍ ຫຕ຺ເຖ ອາກິຣິຕ຺ວາ, ພ຺ຣາຫ຺ມຓານໍ ອທໍ ຄຊໍ.

‘‘ປຸນາປຣໍ ທທນ຺ຕສ຺ສ, ສພ຺ພເສຕໍ ຄຊຸຕ຺ຕມໍ;

ຕທາປິ ປຖວີ ກມ຺ປິ, ສິເນຣຸວນວຏໍສກາ.

‘‘ຕສ຺ສ ນາຄສ຺ສ ທາເນນ, ສິວໂຍ ກຸທ຺ຘາ ສມາຄຕາ;

ປພ຺ພາເຊສຸໍ ສກາ ຣຏ຺ຐາ, ‘ວງ຺ກໍ ຄຈ຺ຉຕຸ ປພ຺ພຕໍ’.

‘‘ເຕສໍ ນິຈ຺ຉຸຠມານານໍ, ອກມ຺ປິຕ຺ຖມສຓ຺ຐິຕໍ;

ມຫາທານໍ ປວຕ຺ເຕຕຸໍ, ເອກໍ ວຣມຍາຈິສໍ.

‘‘ຍາຈິຕາ ¶ ສິວໂຍ ສພ຺ເພ, ເອກໍ ວຣມທໍສຸ ເມ;

ສາວຍິຕ຺ວາ ກຓ຺ຓເຠຣິໍ, ມຫາທານໍ ທທາມຫໍ.

‘‘ອເຖຕ຺ຖ ວຕ຺ຕຕີ ສທ຺ໂທ, ຕຸມຸໂລ ເຠຣໂວ ມຫາ;

ທາເນນິມໍ ນີຫຣນ຺ຕິ, ປຸນ ທານໍ ທທາຕຍໍ.

‘‘ຫຕ຺ຖິໍ ¶ ອສ຺ເສ ຣເຖ ທຕ຺ວາ, ທາສິໍ ທາສໍ ຄວໍ ຘນໍ;

ມຫາທານໍ ທທິຕ຺ວານ, ນຄຣາ ນິກ຺ຂມິໍ ຕທາ.

‘‘ນິກ຺ຂມິຕ຺ວານ ¶ ນຄຣາ, ນິວຕ຺ຕິຕ຺ວາ ວິໂລກິເຕ;

ຕທາປິ ປຖວີ ກມ຺ປິ, ສິເນຣຸວນວຏໍສກາ.

‘‘ຈຕຸວາຫິໍ ຣຖໍ ທຕ຺ວາ, ຐຕ຺ວາ ຈາຕຸມ຺ມຫາປເຖ;

ເອກາກິໂຍ ອທຸຕິໂຍ, ມທ຺ທິເທວິໍ ອິທມພ຺ຣວິໍ.

‘‘‘ຕ຺ວໍ ມທ຺ທິ ກຓ຺ຫໍ ຄຓ຺ຫາຫິ, ລຫຸກາ ເອສາ ກນິຏ຺ຐິກາ;

ອຫໍ ຊາລິໍ ຄເຫສ຺ສາມິ, ຄຣຸໂກ ຠາຕິໂກ ຫິ ໂສ’.

‘‘ປທຸມໍ ¶ ປຸຓ຺ຑຣີກໍວ, ມທ຺ທີ ກຓ຺ຫາຊິນຄ຺ຄຫີ;

ອຫໍ ສຸວຓ຺ຓພິມ຺ພໍວ, ຊາລິໍ ຂຕ຺ຕິຍມຄ຺ຄຫິໍ.

‘‘ອຠິຊາຕາ ສຸຂຸມາລາ, ຂຕ຺ຕິຍາ ຈຕຸໂຣ ຊນາ;

ວິສມໍ ສມໍ ອກ຺ກມນ຺ຕາ, ວງ຺ກໍ ຄຈ຺ຉາມ ປພ຺ພຕໍ.

‘‘ເຍ ເກຈິ ມນຸຊາ ເອນ຺ຕິ, ອນຸມຄ຺ເຄ ປຏິປ຺ປເຖ;

ມຄ຺ຄນ຺ເຕ ປຏິປຸຈ຺ຉາມ, ‘ກຸຫິໍ ວງ຺ກນ຺ຕ [ວງ຺ກຕ (ສີ.)] ປພ຺ພໂຕ’.

‘‘ເຕ ຕຕ຺ຖ ອມ຺ເຫ ປສ຺ສິຕ຺ວາ, ກຣຸຓໍ ຄິຣມຸທີຣຍຸໍ;

ທຸກ຺ຂໍ ເຕ ປຏິເວເທນ຺ຕິ, ທູເຣ ວງ຺ກນ຺ຕປພ຺ພໂຕ.

‘‘ຍທິ ປສ຺ສນ຺ຕິ ປວເນ, ທາຣກາ ຜລິເນ ທຸເມ;

ເຕສໍ ຜລານໍ ເຫຕຸມ຺ຫິ, ອຸປໂຣທນ຺ຕິ ທາຣກາ.

‘‘ໂຣທນ຺ເຕ ທາຣເກ ທິສ຺ວາ, ອຸພ຺ພິທ຺ຘາ [ອຸພ຺ພິຄ຺ຄາ (ສ຺ຍາ. ກໍ.)] ວິປຸລາ ທຸມາ;

ສຍເມໂວຓມິຕ຺ວານ, ອຸປຄຈ຺ຉນ຺ຕິ ທາຣເກ.

‘‘ອິທໍ ¶ ອຈ຺ຉຣິຍໍ ທິສ຺ວາ, ອພ຺ຠຸຕໍ ໂລມຫໍສນໍ;

ສາຫຸກາຣໍ [ສາຘຸກາຣໍ (ສພ຺ພຕ຺ຖ)] ປວຕ຺ເຕສິ, ມທ຺ທີ ສພ຺ພງ຺ຄໂສຠນາ.

‘‘ອຈ຺ເຉຣໍ ວຕ ໂລກສ຺ມິໍ, ອພ຺ຠຸຕໍ ໂລມຫໍສນໍ;

ເວສ຺ສນ຺ຕຣສ຺ສ ເຕເຊນ, ສຍເມໂວຓຕາ ທຸມາ.

‘‘ສງ຺ຂິປິໍສຸ ປຖໍ ຍກ຺ຂາ, ອນຸກມ຺ປາຍ ທາຣເກ;

ນິກ຺ຂນ຺ຕທິວເສເນວ [ນິກ຺ຂນ຺ຕທິວເສເຍວ (ສີ.)], ເຈຕຣຏ຺ຐມຸປາຄມຸໍ.

‘‘ສຏ຺ຐິຣາຊສຫສ຺ສານິ, ຕທາ ວສນ຺ຕິ ມາຕຸເລ;

ສພ຺ເພ ປຎ຺ຊລິກາ ຫຸຕ຺ວາ, ໂຣທມານາ ອຸປາຄມຸໍ.

‘‘ຕຕ຺ຖ ວຕ຺ເຕຕ຺ວາ ສລ຺ລາປໍ, ເຈເຕຫິ ເຈຕປຸຕ຺ເຕຫິ;

ເຕ ຕໂຕ ນິກ຺ຂມິຕ຺ວານ, ວງ຺ກໍ ອຄມຸ ປພ຺ພຕໍ.

‘‘ອາມນ຺ຕຍິຕ຺ວາ ¶ ເທວິນ຺ໂທ, ວິສ຺ສກມ຺ມໍ [ວິສຸກມ຺ມໍ (ກ.)] ມຫິທ຺ຘິກໍ;

ອສ຺ສມໍ ສຸກຕໍ ຣມ຺ມໍ, ປຓ຺ຓສາລໍ ສຸມາປຍ.

‘‘ສກ຺ກສ຺ສ ວຈນໍ ສຸຕ຺ວາ, ວິສ຺ສກມ຺ໂມ ມຫິທ຺ຘິໂກ;

ອສ຺ສມໍ ¶ ສຸກຕໍ ຣມ຺ມໍ, ປຓ຺ຓສາລໍ ສຸມາປຍິ.

‘‘ອຊ຺ໂຌຄາເຫຕ຺ວາ ¶ ປວນໍ, ອປ຺ປສທ຺ທໍ ນິຣາກຸລໍ;

ຈຕຸໂຣ ຊນາ ມຍໍ ຕຕ຺ຖ, ວສາມ ປພ຺ພຕນ຺ຕເຣ.

‘‘ອຫຎ຺ຈ ມທ຺ທິເທວີ ຈ, ຊາລີ ກຓ຺ຫາຊິນາ ຈຸໂຠ;

ອຎ຺ຎມຎ຺ຎໍ ໂສກນຸທາ, ວສາມ ອສ຺ສເມ ຕທາ.

‘‘ທາຣເກ ອນຸຣກ຺ຂນ຺ໂຕ, ອສຸຎ຺ໂຎ ໂຫມິ ອສ຺ສເມ;

ມທ຺ທີ ຜລໍ ອາຫຣິຕ຺ວາ, ໂປເສຕິ ສາ ຕໂຍ ຊເນ.

‘‘ປວເນ ¶ ວສມານສ຺ສ, ອທ຺ຘິໂກ ມໍ ອຸປາຄມິ;

ອາຍາຈິ ປຸຕ຺ຕເກ ມຍ຺ຫໍ, ຊາລິໍ ກຓ຺ຫາຊິນໍ ຈຸໂຠ.

‘‘ຍາຈກໍ ອຸປຄຕໍ ທິສ຺ວາ, ຫາໂສ ເມ ອຸປປຊ຺ຊຖ;

ອຸໂຠ ປຸຕ຺ເຕ ຄເຫຕ຺ວານ, ອທາສິໍ ພ຺ຣາຫ຺ມເຓ ຕທາ.

‘‘ສເກ ປຸຕ຺ເຕ ຈຊນ຺ຕສ຺ສ, ຊູຊເກ ພ຺ຣາຫ຺ມເຓ ຍທາ;

ຕທາປິ ປຖວີ ກມ຺ປິ, ສິເນຣຸວນວຏໍສກາ.

‘‘ປຸນເທວ ສກ຺ໂກ ໂອຣຸຍ຺ຫ, ຫຸຕ຺ວາ ພ຺ຣາຫ຺ມຓສນ຺ນິໂຠ;

ອາຍາຈິ ມໍ ມທ຺ທິເທວິໍ, ສີລວນ຺ຕິໍ ປຕິພ຺ພຕໍ.

‘‘ມທ຺ທິໍ ຫຕ຺ເຖ ຄເຫຕ຺ວານ, ອຸທກຎ຺ຊລິ ປູຣິຍ;

ປສນ຺ນມນສງ຺ກປ຺ໂປ, ຕສ຺ສ ມທ຺ທິໍ ອທາສຫໍ.

‘‘ມທ຺ທິຍາ ທີຍມານາຍ, ຄຄເນ ເທວາ ປໂມທິຕາ;

ຕທາປິ ປຖວີ ກມ຺ປິ, ສິເນຣຸວນວຏໍສກາ.

‘‘ຊາລິໍ ກຓ຺ຫາຊິນໍ ຘີຕໍ, ມທ຺ທິເທວິໍ ປຕິພ຺ພຕໍ;

ຈຊມາໂນ ນ ຈິນ຺ເຕສິໍ, ໂພຘິຍາເຍວ ກາຣຓາ.

‘‘ນ ເມ ເທສ຺ສາ ອຸໂຠ ປຸຕ຺ຕາ, ມທ຺ທິເທວີ ນ ເທສ຺ສິຍາ;

ສພ຺ພຎ຺ຎຸຕໍ ປິຍໍ ມຍ຺ຫໍ, ຕສ຺ມາ ປິເຍ ອທາສຫໍ.

‘‘ປຸນາປຣໍ ພ຺ຣຫາຣຎ຺ເຎ, ມາຕາປິຕຸສມາຄເມ;

ກຣຸຓໍ ປຣິເທວນ຺ເຕ, ສລ຺ລປນ຺ເຕ ສຸຂໍ ທຸຂໍ.

‘‘ຫິໂຣຕ຺ຕປ຺ເປນ ¶ ຄຣຸນາ [ຄຣຸນໍ (ສ຺ຍາ. ກ.)], ອຸຠິນ຺ນໍ ອຸປສງ຺ກມິ;

ຕທາປິ ປຖວີ ກມ຺ປິ, ສິເນຣຸວນວຏໍສກາ.

‘‘ປຸນາປຣໍ ¶ ¶ ພ຺ຣຫາຣຎ຺ຎາ, ນິກ຺ຂມິຕ຺ວາ ສຎາຕິຠິ;

ປວິສາມິ ປຸຣໍ ຣມ຺ມໍ, ເຊຕຸຕ຺ຕຣໍ ປຸຣຸຕ຺ຕມໍ.

‘‘ຣຕນານິ ສຕ຺ຕ ວສ຺ສິໍສຸ, ມຫາເມໂຆ ປວສ຺ສຖ;

ຕທາປິ ປຖວີ ກມ຺ປິ, ສິເນຣຸວນວຏໍສກາ.

‘‘ອເຈຕນາຍໍ ປຖວີ, ອວິຎ຺ຎາຍ ສຸຂໍ ທຸຂໍ;

ສາປິ ທານພລາ ມຍ຺ຫໍ, ສຕ຺ຕກ຺ຂຕ຺ຕຸໍ ປກມ຺ປຖາ’’ຕິ.

‘‘ປຸນາປຣໍ ¶ ຍທາ ໂຫມິ, ສສໂກ ປວນຈາຣໂກ;

ຕິຓປຓ຺ຓສາກຜລຠກ຺ໂຂ, ປຣເຫຐນວິວຊ຺ຊິໂຕ.

‘‘ມກ຺ກໂຏ ຈ ສິງ຺ຄາໂລ ຈ, ສຸຕ຺ຕໂປໂຕ ຈຫໍ ຕທາ;

ວສາມ ເອກສາມນ຺ຕາ, ສາຍໍ ປາໂຕ ຈ ທິສ຺ສເຣ [ສາຍໍ ປາໂຕ ປທິສ຺ສເຣ (ກ.)].

‘‘ອຫໍ ເຕ ອນຸສາສາມິ, ກິຣິເຍ ກລ຺ຍາຓປາປເກ;

‘ປາປານິ ປຣິວຊ຺ເຊຖ, ກລ຺ຍາເຓ ອຠິນິວິສ຺ສຖ’.

‘‘ອຸໂປສຖມ຺ຫິ ທິວເສ, ຈນ຺ທໍ ທິສ຺ວານ ປູຣິຕໍ;

ເອເຕສໍ ຕຕ຺ຖ ອາຈິກ຺ຂິໍ, ທິວໂສ ອຊ຺ຊຸໂປສໂຖ.

‘‘ທານານິ ປຏິຍາເທຖ, ທກ຺ຂິເຓຍ຺ຍສ຺ສ ທາຕເວ;

ທຕ຺ວາ ທານໍ ທກ຺ຂິເຓຍ຺ເຍ, ອຸປວສ຺ສຖຸໂປສຖໍ.

‘‘ເຕ ¶ ເມ ສາຘູຕິ ວຕ຺ວານ, ຍຖາສຕ຺ຕິ ຍຖາພລໍ;

ທານານິ ປຏິຍາເທຕ຺ວາ, ທກ຺ຂິເຓຍ຺ຍໍ ຄເວສິສຸໍ [ຄເວສຍ຺ຍຸໍ (ກ.)].

‘‘ອຫໍ ນິສຊ຺ຊ ຈິນ຺ເຕສິໍ, ທານໍ ທກ຺ຂິຓນຸຈ຺ຉວໍ;

‘ຍທິຫໍ ລເຠ ທກ຺ຂິເຓຍ຺ຍໍ, ກິໍ ເມ ທານໍ ຠວິສ຺ສຕິ.

‘‘‘ນ ¶ ເມ ອຕ຺ຖິ ຕິລາ ມຸຄ຺ຄາ, ມາສາ ວາ ຕຓ຺ຑຸລາ ຆຕໍ;

ອຫໍ ຕິເຓນ ຍາເປມິ, ນ ສກ຺ກາ ຕິຓ ທາຕເວ.

‘‘‘ຍທິ ¶ ໂກຈິ ເອຕິ ທກ຺ຂິເຓຍ຺ໂຍ, ຠິກ຺ຂາຍ ມມ ສນ຺ຕິເກ;

ທຊ຺ຊາຫໍ ສກມຕ຺ຕານໍ, ນ ໂສ ຕຸຈ຺ໂຉ ຄມິສ຺ສຕິ’.

‘‘ມມ ສງ຺ກປ຺ປມຎ຺ຎາຍ, ສກ຺ໂກ ພ຺ຣາຫ຺ມຓວຓ຺ຓິນາ;

ອາສຍໍ ເມ ອຸປາຄຈ຺ຉິ, ທານວີມໍສນາຍ ເມ.

‘‘ຕມຫໍ ທິສ຺ວານ ສນ຺ຕຸຏ຺ໂຐ, ອິທໍ ວຈນມພ຺ຣວິໍ;

‘ສາຘຸ ໂຂສິ ອນຸປ຺ປຕ຺ໂຕ, ຆາສເຫຕຸ ມມນ຺ຕິເກ.

‘‘‘ອທິນ຺ນປຸພ຺ພໍ ທານວຣໍ, ອຊ຺ຊ ທສ຺ສາມິ ເຕ ອຫໍ;

ຕຸວໍ ສີລຄຸຓູເປໂຕ, ອຍຸຕ຺ຕໍ ເຕ ປຣເຫຐນໍ.

‘‘‘ເອຫິ ອຄ຺ຄິໍ ປທີເປຫິ, ນານາກຏ຺ເຐ ສມານຍ;

ອຫໍ ປຈິສ຺ສມຕ຺ຕານໍ, ປກ຺ກໍ ຕ຺ວໍ ຠກ຺ຂຍິສ຺ສສິ’.

‘‘‘ສາຘູ’ຕິ ໂສ ຫຏ຺ຐມໂນ, ນານາກຏ຺ເຐ ສມານຍິ;

ມຫນ຺ຕໍ ອກາສິ ຈິຕກໍ, ກຕ຺ວາ ອງ຺ຄາຣຄພ຺ຠກໍ.

‘‘ອຄ຺ຄິໍ ຕຕ຺ຖ ປທີເປສິ, ຍຖາ ໂສ ຂິປ຺ປໍ ມຫາ ຠເວ;

ໂຜເຏຕ຺ວາ ຣຊຄເຕ ຄຕ຺ເຕ, ເອກມນ຺ຕໍ ອຸປາວິສິໍ.

‘‘ຍທາ ¶ ມຫາກຏ຺ຐປຸຎ຺ໂຊ, ອາທິຕ຺ໂຕ ຘມຘມາຍຕິ [ຘຸມຘຸມາຍຕິ (ສີ.), ຘມມາຍຕິ (ກ.)];

ຕທຸປ຺ປຕິຕ຺ວາ ປປຕິໍ, ມຊ຺ເຌ ຊາລສິຂນ຺ຕເຣ.

‘‘ຍຖາ ¶ ສີໂຕທກໍ ນາມ, ປວິຏ຺ຐໍ ຍສ຺ສ ກສ຺ສຈິ;

ສເມຕິ ທຣຖປຣິຬາຫໍ, ອສ຺ສາທໍ ເທຕິ ປີຕິ ຈ.

‘‘ຕເຖວ ຊລິຕໍ ອຄ຺ຄິໍ, ປວິຏ຺ຐສ຺ສ ມມໍ ຕທາ;

ສພ຺ພໍ ສເມຕິ ທຣຖໍ, ຍຖາ ສີໂຕທກໍ ວິຍ.

‘‘ຉວິໍ ຈມ຺ມໍ ມໍສໍ ນ຺ຫາຣຸໍ, ອຏ຺ຐິໍ ຫທຍພນ຺ຘນໍ;

ເກວລໍ ສກລໍ ກາຍໍ, ພ຺ຣາຫ຺ມຓສ຺ສ ອທາສຫ’’ນ຺ຕິ.

ອກິຕ຺ຕິພ຺ຣາຫ຺ມໂຓ ¶ ສງ຺ໂຂ, ກຸຣຸຣາຊາ ຘນຎ຺ຈໂຍ;

ມຫາສຸທສ຺ສໂນ ຣາຊາ, ມຫາໂຄວິນ຺ທພ຺ຣາຫ຺ມໂຓ.

ນິມິ ຈນ຺ທກຸມາໂຣ ຈ, ສິວິ ເວສ຺ສນ຺ຕໂຣ ສໂສ;

ອຫເມວ ຕທາ ອາສິໍ, ໂຍ ເຕ ທານວເຣ ອທາ.

ເອເຕ ທານປຣິກ຺ຂາຣາ, ເອເຕ ທານສ຺ສ ປາຣມີ;

ຊີວິຕໍ ຍາຈເກ ທຕ຺ວາ, ອິມໍ ປາຣມິ ປູຣຍິໍ.

ຠິກ຺ຂາຍ ອຸປຄຕໍ ທິສ຺ວາ, ສກຕ຺ຕານໍ ປຣິຈ຺ຈຊິໍ;

ທາເນນ ເມ ສໂມ ນຕ຺ຖິ, ເອສາ ເມ ທານປາຣມີຕິ.

‘‘ຍທາ ¶ ¶ ¶ ¶ ອໂຫສິໍ ປວເນ, ກຸຎ຺ຊໂຣ ມາຕຸໂປສໂກ;

ນ ຕທາ ອຕ຺ຖິ ມຫິຍາ, ຄຸເຓນ ມມ ສາທິໂສ.

‘‘ປວເນ ທິສ຺ວາ ວນຈໂຣ, ຣຎ຺ໂຎ ມໍ ປຏິເວທຍິ;

‘ຕວານຸຈ຺ຉໂວ ມຫາຣາຊ, ຄໂຊ ວສຕິ ການເນ.

‘‘‘ນ ຕສ຺ສ ປຣິກ຺ຂາຍຕ຺ໂຖ, ນປິ ອາຬກກາສຸຍາ;

ສຫ ຄຫິເຕ [ສມໍ ຄຫິເຕ (ສີ.)] ໂສຓ຺ຑາຍ, ສຍເມວ ອິເຘຫິ’ຕິ.

‘‘ຕສ຺ສ ຕໍ ວຈນໍ ສຸຕ຺ວາ, ຣາຊາປິ ຕຸຏ຺ຐມານໂສ;

ເປເສສິ ຫຕ຺ຖິທມກໍ, ເຉກາຈຣິຍໍ ສຸສິກ຺ຂິຕໍ.

‘‘ຄນ຺ຕ຺ວາ ໂສ ຫຕ຺ຖິທມໂກ, ອທ຺ທສ ປທຸມສ຺ສເຣ;

ຠິສມຸຬາລໍ [ຠິສມູລໍ (ກ.)] ອຸທ຺ຘຣນ຺ຕໍ, ຍາປນຕ຺ຖາຍ ມາຕຸຍາ.

‘‘ວິຎ຺ຎາຍ ເມ ສີລຄຸຓໍ, ລກ຺ຂຓໍ ອຸປຘາຣຍິ;

‘ເອຫິ ປຸຕ຺ຕາ’ຕິ ປຕ຺ວານ, ມມ ໂສຓ຺ຑາຍ ອຄ຺ຄຫິ.

‘‘ຍໍ ເມ ຕທາ ປາກຕິກໍ, ສຣີຣານຸຄຕໍ ພລໍ;

ອຊ຺ຊ ນາຄສຫສ຺ສານໍ, ພເລນ ສມສາທິສໍ.

‘‘ຍທິຫໍ ເຕສໍ ປກຸປ຺ເປຍ຺ຍໍ, ອຸເປຕານໍ ຄຫຓາຍ ມໍ;

ປຏິພໂລ ຠເວ ເຕສໍ, ຍາວ ຣຊ຺ຊມ຺ປິ ມານຸສໍ.

‘‘ອປິ ¶ ຈາຫໍ ສີລຣກ຺ຂາຍ, ສີລປາຣມິປູຣິຍາ;

ນ ກໂຣມິ ຈິຕ຺ເຕ ອຎ຺ຎຖຕ຺ຕໍ, ປກ຺ຂິປນ຺ຕໍ ມມາຬເກ.

‘‘ຍທິ ເຕ ມໍ ຕຕ຺ຖ ໂກຏ຺ເຏຍ຺ຍຸໍ, ຜຣສູຫິ ໂຕມເຣຫິ ຈ;

ເນວ ເຕສໍ ປກຸປ຺ເປຍ຺ຍໍ, ສີລຂຓ຺ຑຠຍາ ມມາ’’ຕິ.

‘‘ປຸນາປຣໍ ¶ ¶ ¶ ຍທາ ໂຫມິ, ຠູຣິທຕ຺ໂຕ ມຫິທ຺ຘິໂກ;

ວິຣູປກ຺ເຂນ ມຫາຣຎ຺ຎາ, ເທວໂລກມຄຎ຺ຉຫໍ.

‘‘ຕຕ຺ຖ ປສ຺ສິຕ຺ວາຫໍ ເທເວ, ເອກນ຺ຕໍ ສຸຂສມປ຺ປິເຕ;

ຕໍ ສຄ຺ຄຄມນຕ຺ຖາຍ, ສີລພ຺ພຕໍ ສມາທິຍິໍ.

‘‘ສຣີຣກິຈ຺ຈໍ ກຕ຺ວານ, ຠຸຕ຺ວາ ຍາປນມຕ຺ຕກໍ;

ຈຕຸໂຣ ອງ຺ເຄ ອຘິຏ຺ຐາຍ, ເສມິ ວມ຺ມິກມຸທ຺ຘນິ.

‘‘ຉວິຍາ ຈມ຺ເມນ ມໍເສນ, ນຫາຣຸອຏ຺ຐິເກຫິ ວາ;

ຍສ຺ສ ເອເຕນ ກຣຓີຍໍ, ທິນ຺ນໍເຍວ ຫຣາຕຸ ໂສ.

‘‘ສໍສິໂຕ ອກຕຎ຺ຎຸນາ, ອາລມ຺ປາຍໂນ [ອາລມ຺ພໂຓ (ສີ.)] ມມຄ຺ຄຫິ;

ເປຬາຍ ປກ຺ຂິປິຕ຺ວານ, ກີເຬຕິ ມໍ ຕຫິໍ ຕຫິໍ.

‘‘ເປຬາຍ ປກ຺ຂິປນ຺ເຕປິ, ສມ຺ມທ຺ທນ຺ເຕປິ ປາຓິນາ;

ອາລມ຺ປາຍເນ [ອາລມ຺ພເຓ (ສີ.)] ນ ກຸປ຺ປາມິ, ສີລຂຓ຺ຑຠຍາ ມມ.

‘‘ສກຊີວິຕປຣິຈ຺ຈາໂຄ ¶ , ຕິຓໂຕ ລຫຸໂກ ມມ;

ສີລວີຕິກ຺ກໂມ ມຍ຺ຫໍ, ປຖວີອຸປ຺ປຕນໍ ວິຍ.

‘‘ນິຣນ຺ຕຣໍ ຊາຕິສຕໍ, ຈເຊຍ຺ຍໍ ມມ ຊີວິຕໍ;

ເນວ ສີລໍ ປຠິນ຺ເທຍ຺ຍໍ, ຈຕຸທ຺ທີປານ ເຫຕຸປິ.

‘‘ອປິ ຈາຫໍ ສີລຣກ຺ຂາຍ, ສີລປາຣມິປູຣິຍາ;

ນ ກໂຣມິ ຈິຕ຺ເຕ ອຎ຺ຎຖຕ຺ຕໍ, ປກ຺ຂິປນ຺ຕມ຺ປິ ເປຬເກ’’ຕິ.

‘‘ປຸນາປຣໍ ຍທາ ໂຫມິ, ຈມ຺ເປຍ຺ຍໂກ ມຫິທ຺ຘິໂກ;

ຕທາປິ ຘມ຺ມິໂກ ອາສິໍ, ສີລພ຺ພຕສມປ຺ປິໂຕ.

‘‘ຕທາປິ ¶ ມໍ ຘມ຺ມຈາຣິໍ, ອຸປວຸຕ຺ຖໍ ອຸໂປສຖໍ;

ອຫິຕຸຓ຺ຑິໂກ ຄເຫຕ຺ວານ, ຣາຊທ຺ວາຣມ຺ຫິ ກີຬຕິ.

‘‘ຍໍ ¶ ຍໍ ໂສ ວຓ຺ຓໍ ຈິນ຺ຕຍິ, ນີລໍວ ປີຕໂລຫິຕໍ;

ຕສ຺ສ ຈິຕ຺ຕານຸວຕ຺ຕນ຺ໂຕ, ໂຫມິ ຈິນ຺ຕິຕສນ຺ນິໂຠ.

‘‘ຖລໍ ¶ ກເຣຍ຺ຍມຸທກໍ, ອຸທກມ຺ປິ ຖລໍ ກເຣ;

ຍທິຫໍ ຕສ຺ສ ປກຸປ຺ເປຍ຺ຍໍ, ຂເຓນ ຉາຣິກໍ ກເຣ.

‘‘ຍທິ ຈິຕ຺ຕວສີ ເຫສ຺ສໍ, ປຣິຫາຍິສ຺ສາມິ ສີລໂຕ;

ສີເລນ ປຣິຫີນສ຺ສ, ອຸຕ຺ຕມຕ຺ໂຖ ນ ສິຊ຺ຌຕິ.

‘‘ກາມໍ ¶ ຠິຊ຺ຊຕຸຍໍ ກາໂຍ, ອິເຘວ ວິກິຣີຍຕຸ;

ເນວ ສີລໍ ປຠິນ຺ເທຍ຺ຍໍ, ວິກິຣນ຺ເຕ ຠຸສໍ ວິຍາ’’ຕິ.

‘‘ປຸນາປຣໍ ຍທາ ໂຫມິ, ຈູຬໂພຘິ ສຸສີລວາ;

ຠວໍ ທິສ຺ວານ ຠຍໂຕ, ເນກ຺ຂມ຺ມໍ ອຠິນິກ຺ຂມິໍ.

‘‘ຍາ ເມ ທຸຕິຍິກາ ອາສິ, ພ຺ຣາຫ຺ມຓີ ກນກສນ຺ນິຠາ;

ສາປິ ວຏ຺ເຏ ອນເປກ຺ຂາ, ເນກ຺ຂມ຺ມໍ ອຠິນິກ຺ຂມິ.

‘‘ນິຣາລຍາ ຉິນ຺ນພນ຺ຘູ, ອນເປກ຺ຂາ ກຸເລ ຄເຓ;

ຈຣນ຺ຕາ ຄາມນິຄມໍ, ພາຣາຓສິມຸປາຄມຸໍ.

‘‘ຕຕ຺ຖ ວສາມ ນິປກາ, ອສໍສຏ຺ຐາ ກຸເລ ຄເຓ;

ນິຣາກຸເລ ອປ຺ປສທ຺ເທ, ຣາຊຸຍ຺ຍາເນ ວສາມຸໂຠ.

‘‘ອຸຍ຺ຍານທສ຺ສນໍ ຄນ຺ຕ຺ວາ, ຣາຊາ ອທ຺ທສ ພ຺ຣາຫ຺ມຓິໍ;

ອຸປຄມ຺ມ ມມໍ ປຸຈ຺ຉິ, ‘ຕຸຍ຺ເຫສາ ກາ ກສ຺ສ ຠຣິຍາ’.

‘‘ເອວໍ ວຸຕ຺ເຕ ອຫໍ ຕສ຺ສ, ອິທໍ ວຈນມພ຺ຣວິໍ;

‘ນ ມຍ຺ຫໍ ຠຣິຍາ ເອສາ, ສຫຘມ຺ມາ ເອກສາສນີ’.

‘‘ຕິສ຺ສາ ¶ [ຕສ຺ສາ (ສີ.)] ສາຣຕ຺ຕຄຘິໂຕ, ຄາຫາເປຕ຺ວານ ເຈຏເກ;

ນິປ຺ປີຬຍນ຺ໂຕ ພລສາ, ອນ຺ເຕປຸຣໍ ປເວສຍິ.

‘‘ໂອທປຕ຺ຕກິຍາ ¶ ມຍ຺ຫໍ, ສຫຊາ ເອກສາສນີ;

ອາກຑ຺ຒິຕ຺ວາ ນຍນ຺ຕິຍາ, ໂກໂປ ເມ ອຸປປຊ຺ຊຖ.

‘‘ສຫ ¶ ໂກເປ ສມຸປ຺ປນ຺ເນ, ສີລພ຺ພຕມນຸສ຺ສຣິໍ;

ຕຕ຺ເຖວ ໂກປໍ ນິຄ຺ຄຓ຺ຫິໍ, ນາທາສິໍ ວຑ຺ຒິຕູປຣິ.

‘‘ຍທິ ນໍ ພ຺ຣາຫ຺ມຓິໍ ໂກຈິ, ໂກຏ຺ເຏຍ຺ຍ ຕິຓ຺ຫສຕ຺ຕິຍາ;

ເນວ ສີລໍ ປຠິນ຺ເທຍ຺ຍໍ, ໂພຘິຍາເຍວ ກາຣຓາ.

‘‘ນ ເມສາ ພ຺ຣາຫ຺ມຓີ ເທສ຺ສາ, ນປິ ເມ ພລໍ ນ ວິຊ຺ຊຕິ;

ສພ຺ພຎ຺ຎຸຕໍ ປິຍໍ ມຍ຺ຫໍ, ຕສ຺ມາ ສີລານຸຣກ຺ຂິສ’’ນ຺ຕິ.

‘‘ປຸນາປຣໍ ¶ ຍທາ ໂຫມິ, ມຫິໍໂສ ປວນຈາຣໂກ;

ປວຑ຺ຒກາໂຍ ພລວາ, ມຫນ຺ໂຕ ຠີມທສ຺ສໂນ.

‘‘ປພ຺ຠາເຣ ຄິຣິທຸຄ຺ເຄ [ວນທຸຄ຺ເຄ (ສີ.)] ຈ, ຣຸກ຺ຂມູເລ ທກາສເຍ;

ໂຫເຕຕ຺ຖ ຐານໍ ມຫິໍສານໍ, ໂກຈິ ໂກຈິ ຕຫິໍ ຕຫິໍ.

‘‘ວິຈຣນ຺ໂຕ ພ຺ຣຫາຣຎ຺ເຎ, ຐານໍ ອທ຺ທສ ຠທ຺ທກໍ;

ຕໍ ຐານໍ ອຸປຄນ຺ຕ຺ວານ, ຕິຏ຺ຐາມິ ຈ ສຍາມິ ຈ.

‘‘ອເຖຕ຺ຖ ກປິມາຄນ຺ຕ຺ວາ, ປາໂປ ອນຣິໂຍ ລຫຸ;

ຂນ຺ເຘ ນລາເຏ ຠມຸເກ, ມຸຕ຺ເຕຕິ ໂອຫເນຕິຕໍ.

‘‘ສກິມ຺ປິ ທິວສໍ ທຸຕິຍໍ, ຕຕິຍໍ ຈຕຸຕ຺ຖມ຺ປິ ຈ;

ທູເສຕິ ມໍ ສພ຺ພກາລໍ, ເຕນ ໂຫມິ ອຸປທ຺ທຸໂຕ.

‘‘ມມໍ ¶ ອຸປທ຺ທຸຕໍ ທິສ຺ວາ, ຍກ຺ໂຂ ມໍ ອິທມພ຺ຣວິ;

‘ນາເສເຫຕໍ ຉວໍ ປາປໍ, ສິງ຺ເຄຫິ ຈ ຂຸເຣຫິ ຈ’.

‘‘ເອວໍ ¶ ວຸຕ຺ເຕ ຕທາ ຍກ຺ເຂ, ອຫໍ ຕໍ ອິທມພ຺ຣວິໍ;

‘ກິໍ ຕ຺ວໍ ມກ຺ເຂສິ ກຸຓເປນ, ປາເປນ ອນຣິເຍນ ມໍ.

‘‘‘ຍທິຫໍ ¶ ຕສ຺ສ ປກຸປ຺ເປຍ຺ຍໍ, ຕໂຕ ຫີນຕໂຣ ຠເວ;

ສີລຎ຺ຈ ເມ ປຠິຊ຺ເຊຍ຺ຍ, ວິຎ຺ຎູ ຈ ຄຣເຫຍ຺ຍຸ ມໍ.

‘‘‘ຫີຬິຕາ ຊີວິຕາ ວາປິ, ປຣິສຸທ຺ເຘນ ມຕໍ ວຣໍ;

ກ຺ຍາຫໍ ຊີວິຕເຫຕູປິ, ກາຫາມິໍ ປຣເຫຐນໍ’.

‘‘ມເມວາຍໍ ມຎ຺ຎມາໂນ, ອຎ຺ເຎເປວໍ ກຣິສ຺ສຕິ;

ເຕວ ຕສ຺ສ ວຘິສ຺ສນ຺ຕິ, ສາ ເມ ມຸຕ຺ຕິ ຠວິສ຺ສຕິ.

‘‘ຫີນມຊ຺ຌິມອຸກ຺ກຏ຺ເຐ, ສຫນ຺ໂຕ ອວມານິຕໍ;

ເອວໍ ລຠຕິ ສປ຺ປຎ຺ໂຎ, ມນສາ ຍຖາ ປຕ຺ຖິຕ’’ນ຺ຕິ.

‘‘ປຸນາປຣໍ ຍທາ ໂຫມິ, ສຸຕຕ຺ຕກນກສນ຺ນິໂຠ;

ມິຄຣາຊາ ຣຸຣຸນາມ, ປຣມສີລສມາຫິໂຕ.

‘‘ຣມ຺ເມ ປເທເສ ຣມຓີເຍ, ວິວິຕ຺ເຕ ອມນຸສ຺ສເກ;

ຕຕ຺ຖ ວາສໍ ອຸປຄຎ຺ຉິໍ, ຄງ຺ຄາກູເລ ມໂນຣເມ.

‘‘ອຖ ¶ ອຸປຣິ ຄງ຺ຄາຍ, ຘນິເກຫິ ປຣິປີຬິໂຕ;

ປຸຣິໂສ ຄງ຺ຄາຍ ປປຕິ, ‘ຊີວາມິ ວາ ມຣາມິ ວາ’.

‘‘ຣຕ຺ຕິນ຺ທິວໍ ¶ ໂສ ຄງ຺ຄາຍ, ວຸຍ຺ຫມາໂນ ມໂຫທເກ;

ຣວນ຺ໂຕ ກຣຸຓໍ ຣວໍ, ມຊ຺ເຌ ຄງ຺ຄາຍ ຄຈ຺ຉຕິ.

‘‘ຕສ຺ສາຫໍ ສທ຺ທໍ ສຸຕ຺ວານ, ກຣຸຓໍ ປຣິເທວໂຕ;

ຄງ຺ຄາຍ ຕີເຣ ຐຕ຺ວານ, ອປຸຈ຺ຉິໍ ‘ໂກສິ ຕ຺ວໍ ນໂຣ’.

‘‘ໂສ ເມ ປຸຏ຺ໂຐ ຈ ພ຺ຍາກາສິ, ອຕ຺ຕໂນ ກຣຓໍ ຕທາ;

‘ຘນິເກຫິ ຠີໂຕ ຕສິໂຕ, ປກ຺ຂນ຺ໂທຫໍ ມຫານທິໍ’.

‘‘ຕສ຺ສ ¶ ກຕ຺ວານ ກາຣຸຎ຺ຎໍ, ຈຊິຕ຺ວາ ມມ ຊີວິຕໍ;

ປວິສິຕ຺ວາ ນີຫຣິໍ ຕສ຺ສ, ອນ຺ຘກາຣມ຺ຫິ ຣຕ຺ຕິຍາ.

‘‘ອສ຺ສຕ຺ຖກາລມຎ຺ຎາຍ, ຕສ຺ສາຫໍ ອິທມພ຺ຣວິໍ;

‘ເອກໍ ຕໍ ວຣໍ ຍາຈາມິ, ມາ ມໍ ກສ຺ສຈິ ປາວທ’.

‘‘ນຄຣໍ ¶ ຄນ຺ຕ຺ວານ ອາຈິກ຺ຂິ, ປຸຈ຺ຉິໂຕ ຘນເຫຕຸໂກ;

ຣາຊານໍ ໂສ ຄເຫຕ຺ວານ, ອຸປຄຎ຺ຉິ ມມນ຺ຕິກໍ.

‘‘ຍາວຕາ ກຣຓໍ ສພ຺ພໍ, ຣຎ຺ໂຎ ອາໂຣຈິຕໍ ມຍາ;

ຣາຊາ ສຸຕ຺ວານ ວຈນໍ, ອຸສຸໍ ຕສ຺ສ ປກປ຺ປຍິ;

‘ອິເຘວ ຆາຕຍິສ຺ສາມິ, ມິຕ຺ຕທຸພ຺ຠິໍ [ມິຕ຺ຕທູຠິໍ (ສີ.)] ອນາຣິຍໍ’.

‘‘ຕມຫໍ ອນຸຣກ຺ຂນ຺ໂຕ, ນິມ຺ມິນິໍ ມມ ອຕ຺ຕນາ;

‘ຕິຏ຺ຐເຕໂສ ມຫາຣາຊ, ກາມກາໂຣ ຠວາມິ ເຕ’.

‘‘ອນຸຣກ຺ຂິໍ ມມ ສີລໍ, ນາຣກ຺ຂິໍ ມມ ຊີວິຕໍ;

ສີລວາ ຫິ ຕທາ ອາສິໍ, ໂພຘິຍາເຍວ ກາຣຓາ’’ຕິ.

‘‘ປຸນາປຣໍ ¶ ຍທາ ໂຫມິ, ຊຏິໂລ ອຸຄ຺ຄຕາປໂນ;

ມາຕງ຺ໂຄ ນາມ ນາເມນ, ສີລວາ ສຸສມາຫິໂຕ.

‘‘ອຫຎ຺ຈ ພ຺ຣາຫ຺ມໂຓ ເອໂກ, ຄງ຺ຄາກູເລ ວສາມຸໂຠ;

ອຫໍ ວສາມິ ອຸປຣິ, ເຫຏ຺ຐາ ວສຕິ ພ຺ຣາຫ຺ມໂຓ.

‘‘ວິຈຣນ຺ໂຕ ອນຸກູລມ຺ຫິ, ອຸທ຺ຘໍ ເມ ອສ຺ສມທ຺ທສ;

ຕຕ຺ຖ ມໍ ປຣິຠາເສຕ຺ວາ, ອຠິສປິ ມຸທ຺ຘຜາລນໍ.

‘‘ຍທິຫໍ ຕສ຺ສ ປກຸປ຺ເປຍ຺ຍໍ, ຍທິ ສີລໍ ນ ໂຄປເຍ;

ໂອໂລເກຕ຺ວານຫໍ ຕສ຺ສ, ກເຣຍ຺ຍໍ ຉາຣິກໍ ວິຍ.

‘‘ຍໍ ¶ ໂສ ຕທາ ມໍ ອຠິສປິ, ກຸປິໂຕ ທຸຏ຺ຐມານໂສ;

ຕສ຺ເສວ ມຕ຺ຖເກ ນິປຕິ, ໂຍເຄນ ຕໍ ປໂມຈຍິໍ.

‘‘ອນຸຣກ຺ຂິໍ ¶ ມມ ສີລໍ, ນາຣກ຺ຂິໍ ມມ ຊີວິຕໍ;

ສີລວາ ຫິ ຕທາ ອາສິໍ, ໂພຘິຍາເຍວ ກາຣຓາ’’ຕິ.

‘‘ປຸນາປຣໍ ¶ ຍທາ ໂຫມິ, ມຫາປກ຺ໂຂ ມຫິທ຺ຘິໂກ;

ຘມ຺ໂມ ນາມ ມຫາຍກ຺ໂຂ, ສພ຺ພໂລການຸກມ຺ປໂກ.

‘‘ທສກຸສລກມ຺ມປເຖ ¶ , ສມາທເປນ຺ໂຕ ມຫາຊນໍ;

ຈຣາມິ ຄາມນິຄມໍ, ສມິຕ຺ໂຕ ສປຣິຊ຺ຊໂນ.

‘‘ປາໂປ ກທຣິໂຍ ຍກ຺ໂຂ, ທີເປນ຺ໂຕ ທສ ປາປເກ;

ໂສເປຕ຺ຖ ມຫິຍາ ຈຣຕິ, ສມິຕ຺ໂຕ ສປຣິຊ຺ຊໂນ.

‘‘ຘມ຺ມວາທີ ອຘມ຺ໂມ ຈ, ອຸໂຠ ປຈ຺ຈນິກາ ມຍໍ;

ຘຸເຣ ຘຸຣໍ ຆຏ຺ຏຍນ຺ຕາ, ສມິມ຺ຫາ ປຏິປເຖ ອຸໂຠ.

‘‘ກລໂຫ ວຕ຺ຕຕີ ເຠສ຺ມາ, ກລ຺ຍາຓປາປກສ຺ສ ຈ;

ມຄ຺ຄາ ໂອກ຺ກມນຕ຺ຖາຍ, ມຫາຍຸທ຺ໂຘ ອຸປຏ຺ຐິໂຕ.

‘‘ຍທິຫໍ ຕສ຺ສ ກຸປ຺ເປຍ຺ຍໍ, ຍທິ ຠິນ຺ເທ ຕໂປຄຸຓໍ;

ສຫປຣິຊນໍ ຕສ຺ສ, ຣຊຠູຕໍ ກເຣຍ຺ຍຫໍ.

‘‘ອປິຈາຫໍ ສີລຣກ຺ຂາຍ, ນິພ຺ພາເປຕ຺ວານ ມານສໍ;

ສຫ ຊເນໂນກ຺ກມິຕ຺ວາ, ປຖໍ ປາປສ຺ສ ທາສຫໍ.

‘‘ສຫ ປຖໂຕ ໂອກ຺ກນ຺ເຕ, ກຕ຺ວາ ຈິຕ຺ຕສ຺ສ ນິພ຺ພຸຕິໍ;

ວິວຣໍ ອທາສິ ປຖວີ, ປາປຍກ຺ຂສ຺ສ ຕາວເທ’’ຕິ.

‘‘ປຎ຺ຈາລຣຏ຺ເຐ ¶ ¶ ນຄຣວເຣ, ກປິລາຍໍ [ກມ຺ປິລາຍໍ (ສີ.), ກປ຺ປິລາຍໍ (ສ຺ຍາ.)] ປຸຣຸຕ຺ຕເມ;

ຣາຊາ ຊຍທ຺ທິໂສ ນາມ, ສີລຄຸຓມຸປາຄໂຕ.

‘‘ຕສ຺ສ ¶ ຣຎ຺ໂຎ ອຫໍ ປຸຕ຺ໂຕ, ສຸຕຘມ຺ໂມ ສຸສີລວາ;

ອລີນສຕ຺ໂຕ ຄຸຓວາ, ອນຸຣກ຺ຂປຣິຊໂນ ສທາ.

‘‘ປິຕາ ເມ ມິຄວໍ ຄນ຺ຕ຺ວາ, ໂປຣິສາທໍ ອຸປາຄມິ;

ໂສ ເມ ປິຕຸມຄ຺ຄເຫສິ, ‘ຠກ຺ໂຂສິ ມມ ມາ ຈລິ’.

‘‘ຕສ຺ສ ¶ ຕໍ ວຈນໍ ສຸຕ຺ວາ, ຠີໂຕ ຕສິຕເວຘິໂຕ;

ອູຣຸກ຺ຂມ຺ໂຠ ອຫຸ ຕສ຺ສ, ທິສ຺ວານ ໂປຣິສາທກໍ.

‘‘ມິຄວໍ ຄເຫຕ຺ວາ ມຸຎ຺ຈສ຺ສຸ, ກຕ຺ວາ ອາຄມນໍ ປຸນ;

ພ຺ຣາຫ຺ມຓສ຺ສ ຘນໍ ທຕ຺ວາ, ປິຕາ ອາມນ຺ຕຍີ ມມໍ.

‘‘‘ຣຊ຺ຊໍ ປຸຕ຺ຕ ປຏິປຊ຺ຊ, ມາ ປມຊ຺ຊິ ປຸຣໍ ອິທໍ;

ກຕໍ ເມ ໂປຣິສາເທນ, ມມ ອາຄມນໍ ປຸນ’.

‘‘ມາຕາປິຕູ ຈ ວນ຺ທິຕ຺ວາ, ນິມ຺ມິນິຕ຺ວານ ອຕ຺ຕນາ;

ນິກ຺ຂິປິຕ຺ວາ ຘນຸໍ ຂຄ຺ຄໍ, ໂປຣິສາທໍ ອຸປາຄມິໍ.

‘‘ສສຕ຺ຖຫຕ຺ຖູປຄຕໍ, ກທາຈິ ໂສ ຕສິສ຺ສຕິ;

ເຕນ ຠິຊ຺ຊິສ຺ສຕິ ສີລໍ, ປຣິຕ຺ຕາສໍ [ປຣິຕາສໍ (ສີ.)] ກເຕ ມຍິ.

‘‘ສີລຂຓ຺ຑຠຍາ ມຍ຺ຫໍ, ຕສ຺ສ ເທສ຺ສໍ ນ ພ຺ຍາຫຣິໍ;

ເມຕ຺ຕຈິຕ຺ໂຕ ຫິຕວາທີ, ອິທໍ ວຈນມພ຺ຣວິໍ.

‘‘‘ອຸຊ຺ຊາເລຫິ ມຫາອຄ຺ຄິໍ, ປປຕິສ຺ສາມິ ຣຸກ຺ຂໂຕ;

ຕ຺ວໍ ປກ຺ກກາລມຎ຺ຎາຍ [ສຸປກ຺ກກາລມຎ຺ຎາຍ (ປີ.)], ຠກ຺ຂຍ ມໍ ປິຕາມຫ’.

‘‘ອິຕິ ສີລວຕໍ ເຫຕຸ, ນາຣກ຺ຂິໍ ມມ ຊີວິຕໍ;

ປພ຺ພາເຊສິໍ ຈຫໍ ຕສ຺ສ, ສທາ ປາຓາຕິປາຕິກ’’ນ຺ຕິ.

‘‘ປຸນາປຣໍ ¶ ¶ ¶ ຍທາ ໂຫມິ, ສງ຺ຂປາໂລ ມຫິທ຺ຘິໂກ;

ທາຐາວຸໂຘ ໂຆຣວິໂສ, ທ຺ວິຊິວ຺ໂຫ ອຸຣຄາຘິຠູ.

‘‘ຈຕຸປ຺ປເຖ ມຫາມຄ຺ເຄ, ນານາຊນສມາກຸເລ;

ຈຕຸໂຣ ອງ຺ເຄ ອຘິຏ຺ຐາຍ, ຕຕ຺ຖ ວາສມກປ຺ປຍິໍ.

‘‘ຉວິຍາ ຈມ຺ເມນ ມໍເສນ, ນຫາຣຸອຏ຺ຐິເກຫິ ວາ;

ຍສ຺ສ ເອເຕນ ກຣຓີຍໍ, ທິນ຺ນໍເຍວ ຫຣາຕຸ ໂສ.

‘‘ອທ຺ທສໍສຸ ¶ ໂຠຊປຸຕ຺ຕາ, ຂຣາ ລຸທ຺ທາ ອກາຣຸຓາ;

ອຸປຄຎ຺ຉຸໍ ມມໍ ຕຕ຺ຖ, ທຓ຺ຑມຸຄ຺ຄຣປາຓິໂນ.

‘‘ນາສາຍ ວິນິວິຊ຺ຌິຕ຺ວາ, ນງ຺ຄຸຏ຺ເຐ ປິຏ຺ຐິກຓ຺ຏເກ;

ກາເຊ ອາໂຣປຍິຕ຺ວານ, ໂຠຊປຸຕ຺ຕາ ຫຣິໍສຸ ມໍ.

‘‘ສສາຄຣນ຺ຕໍ ປຖວິໍ, ສການນໍ ສປພ຺ພຕໍ;

ອິຈ຺ຉມາໂນ ຈຫໍ ຕຕ຺ຖ, ນາສາວາເຕນ ຌາປເຍ.

‘‘ສູເລຫິ ວິນິວິຊ຺ຌນ຺ເຕ, ໂກຏ຺ຏຍນ຺ເຕປິ ສຕ຺ຕິຠິ;

ໂຠຊປຸຕ຺ເຕ ນ ກຸປ຺ປາມິ, ເອສາ ເມ ສີລປາຣມີ’’ຕິ.

ຫຕ຺ຖິນາໂຄ ¶ ຠູຣິທຕ຺ໂຕ, ຈມ຺ເປຍ຺ໂຍ ໂພຘິ ມຫິໍໂສ;

ຣຸຣຸ ມາຕງ຺ໂຄ ຘມ຺ໂມ ຈ, ອຕ຺ຣໂຊ ຈ ຊຍທ຺ທິໂສ.

ເອເຕ ນວ ສີລພລາ, ປຣິກ຺ຂາຣາ ປເທສິກາ;

ຊີວິຕໍ ປຣິຣກ຺ຂິຕ຺ວາ, ສີລານິ ອນຸຣກ຺ຂິສໍ.

ສງ຺ຂປາລສ຺ສ ເມ ສໂຕ, ສພ຺ພກາລມ຺ປິ ຊີວິຕໍ;

ຍສ຺ສ ກສ຺ສຈິ ນິຍ຺ຍຕ຺ຕໍ, ຕສ຺ມາ ສາ ສີລປາຣມີຕິ.

‘‘ຍທາຫໍ ¶ ¶ ¶ ອມິຕຍໂສ, ຣາຊປຸຕ຺ໂຕ ຍຸຘຎ຺ຊໂຍ;

ອຸສ຺ສາວພິນ຺ທຸໍ ສູຣິຍາຕເປ, ປຕິຕໍ ທິສ຺ວານ ສໍວິຊິໍ.

‘‘ຕຎ຺ເຎວາຘິປຕິໍ ກຕ຺ວາ, ສໍເວຄມນຸພ຺ຣູຫຍິໍ;

ມາຕາປິຕູ ຈ ວນ຺ທິຕ຺ວາ, ປພ຺ພຊ຺ຊມນຸຍາຈຫໍ.

‘‘ຍາຈນ຺ຕິ ມໍ ປຎ຺ຊລິກາ, ສເນຄມາ ສຣຏ຺ຐກາ;

‘ອຊ຺ເຊວ ປຸຕ຺ຕ ປຏິປຊ຺ຊ, ອິທ຺ຘໍ ຜີຕໍ ມຫາມຫິໍ’.

‘‘ສຣາຊເກ ສໂຫໂຣເຘ, ສເນຄເມ ສຣຏ຺ຐເກ;

ກຣຸຓໍ ປຣິເທວນ຺ເຕ, ອນເປກ຺ໂຂວ ປຣິຈ຺ຈຊິໍ.

‘‘ເກວລໍ ປຖວິໍ ຣຊ຺ຊໍ, ຎາຕິປຣິຊນໍ ຍສໍ;

ຈຊມາໂນ ນ ຈິນ຺ເຕສິໍ, ໂພຘິຍາເຍວ ກາຣຓາ.

‘‘ມາຕາປິຕາ ນ ເມ ເທສ຺ສາ, ນປິ ເມ ເທສ຺ສໍ ມຫາຍສໍ;

ສພ຺ພຎ຺ຎຸຕໍ ປິຍໍ ມຍ຺ຫໍ, ຕສ຺ມາ ຣຊ຺ຊໍ ປຣິຈ຺ຈຊິ’’ນ຺ຕິ.

‘‘ປຸນາປຣໍ ¶ ຍທາ ໂຫມິ, ອິນ຺ທປຕ຺ເຖ ປຸຣຸຕ຺ຕເມ;

ກາມິໂຕ ທຍິໂຕ ປຸຕ຺ໂຕ, ໂສມນສ຺ໂສຕິ ວິສ຺ສຸໂຕ.

‘‘ສີລວາ ຄຸຓສມ຺ປນ຺ໂນ, ກລ຺ຍາຓປຏິຠານວາ;

ວຸຑ຺ຒາປຈາຍີ ຫິຣີມາ, ສງ຺ຄເຫສຸ ຈ ໂກວິໂທ.

‘‘ຕສ຺ສ ¶ ຣຎ຺ໂຎ ປຕິກໂຣ, ອໂຫສິ ກຸຫກຕາປໂສ;

ອາຣາມໍ ມາລາວຈ຺ຉຎ຺ຈ, ໂຣປຍິຕ຺ວານ ຊີວຕິ.

‘‘ຕມຫໍ ¶ ທິສ຺ວານ ກຸຫກໍ, ຖຸສຣາສິໍວ ອຕຓ຺ຑຸລໍ;

ທຸມໍວ ອນ຺ໂຕ ສຸສິຣໍ, ກທລິໍວ ອສາຣກໍ.

‘‘ນຕ຺ຖິມສ຺ສ ¶ ສຕໍ ຘມ຺ໂມ, ສາມຎ຺ຎາປຄໂຕ ອຍໍ;

ຫິຣີສຸກ຺ກຘມ຺ມຊຫິໂຕ, ຊີວິຕວຸຕ຺ຕິກາຣຓາ.

‘‘ກຸປິໂຕ ອຫຸ [ອໂຫສິ (ສີ.), ອາສິ (ສ຺ຍາ.)] ປຈ຺ຈນ຺ໂຕ, ອຏວີຫິ ປຣນ຺ຕິຫິ;

ຕໍ ນິເສເຘຕຸໍ ຄຈ຺ຉນ຺ໂຕ, ອນຸສາສິ ປິຕາ ມມໍ.

‘‘‘ມາ ປມຊ຺ຊິ ຕຸວໍ ຕາຕ, ຊຏິລໍ ອຸຄ຺ຄຕາປນໍ;

ຍທິຈ຺ຉກໍ ປວຕ຺ເຕຫິ, ສພ຺ພກາມທໂທ ຫິ ໂສ’.

‘‘ຕມຫໍ ຄນ຺ຕ຺ວານຸປຏ຺ຐານໍ, ອິທໍ ວຈນມພ຺ຣວິໍ;

‘ກຈ຺ຈິ ເຕ ຄຫປຕິ ກຸສລໍ, ກິໍ ວາ ເຕ ອາຫຣີຍຕຸ’.

‘‘ເຕນ ໂສ ກຸປິໂຕ ອາສິ, ກຸຫໂກ ມານນິສ຺ສິໂຕ;

‘ຆາຕາເປມິ ຕຸວໍ ອຊ຺ຊ, ຣຏ຺ຐາ ປພ຺ພາຊຍາມິ ວາ’.

‘‘ນິເສຘຍິຕ຺ວາ ¶ ປຈ຺ຈນ຺ຕໍ, ຣາຊາ ກຸຫກມພ຺ຣວິ;

‘ກຈ຺ຈິ ເຕ ຠນ຺ເຕ ຂມນີຍໍ, ສມ຺ມາໂນ ເຕ ປວຕ຺ຕິໂຕ’.

‘‘ຕສ຺ສ ອາຈິກ຺ຂຕີ ປາໂປ, ກຸມາໂຣ ຍຖາ ນາສິໂຍ;

ຕສ຺ສ ຕໍ ວຈນໍ ສຸຕ຺ວາ, ອາຓາເປສິ ມຫີປຕິ.

‘‘‘ສີສໍ ຕຕ຺ເຖວ ຉິນ຺ທິຕ຺ວາ, ກຕ຺ວານ ຈຕຸຂຓ຺ຑິກໍ;

ຣຖິຍາ ຣຖິຍໍ ທສ຺ເສຖ, ສາ ຄຕິ ຊຏິລຫີຬິຕາ’.

‘‘ຕຕ຺ຖ ກາຣຓິກາ ຄນ຺ຕ຺ວາ, ຈຓ຺ຑາ ລຸທ຺ທາ ອກາຣຸຓາ;

ມາຕຸອງ຺ເກ ນິສິນ຺ນສ຺ສ, ອາກຑ຺ຒິຕ຺ວາ ນຍນ຺ຕິ ມໍ.

‘‘ເຕສາຫໍ ເອວມວຈໍ, ພນ຺ຘຕໍ ຄາຬ຺ຫພນ຺ຘນໍ;

‘ຣຎ຺ໂຎ ທສ຺ເສຖ ມໍ ຂິປ຺ປໍ, ຣາຊກິຣິຍານິ ອຕ຺ຖິ ເມ’.

‘‘ເຕ ມໍ ຣຎ຺ໂຎ ທສ຺ສຍິໍສຸ, ປາປສ຺ສ ປາປເສວິໂນ;

ທິສ຺ວານ ຕໍ ສຎ຺ຎາເປສິໍ, ມມຎ຺ຈ ວສມານຍິໍ.

‘‘ໂສ ມໍ ຕຕ຺ຖ ຂມາເປສິ, ມຫາຣຊ຺ຊມທາສິ ເມ;

ໂສຫໍ ຕມໍ ທາລຍິຕ຺ວາ, ປພ຺ພຊິໍ ອນຄາຣິຍໍ.

‘‘ນ ¶ ເມ ເທສ຺ສໍ ມຫາຣຊ຺ຊໍ, ກາມໂຠໂຄ ນ ເທສ຺ສິໂຍ;

ສພ຺ພຎ຺ຎຸຕໍ ປິຍໍ ມຍ຺ຫໍ, ຕສ຺ມາ ຣຊ຺ຊໍ ປຣິຈ຺ຈຊິ’’ນ຺ຕິ.

‘‘ປຸນາປຣໍ ¶ ¶ ¶ ຍທາ ໂຫມິ, ກາສິຣາຊສ຺ສ ອຕ຺ຣໂຊ;

ອໂຍຆຣມ຺ຫິ ສໍວຑ຺ໂຒ, ນາເມນາສິ ອໂຍຆໂຣ.

‘‘ທຸກ຺ເຂນ ຊີວິໂຕ ລທ຺ໂຘ, ສໍປີເຬ ປຕິໂປສິໂຕ;

ອຊ຺ເຊວ ປຸຕ຺ຕ ປຏິປຊ຺ຊ, ເກວລໍ ວສຸຘໍ ອິມໍ.

‘‘ສຣຏ຺ຐກໍ ສນິຄມໍ, ສຊນໍ ວນ຺ທິຕ຺ວ ຂຕ຺ຕິຍໍ;

ອຎ຺ຊລິໍ ປຄ຺ຄເຫຕ຺ວານ, ອິທໍ ວຈນມພ຺ຣວິໍ.

‘‘‘ເຍ ເກຈິ ມຫິຍາ ສຕ຺ຕາ, ຫີນມຸກ຺ກຏ຺ຐມຊ຺ຌິມາ;

ນິຣາຣກ຺ຂາ ສເກ ເຄເຫ, ວຑ຺ຒນ຺ຕິ ສກຎາຕິຠິ.

‘‘‘ອິທໍ ໂລເກ ອຸຕ຺ຕຣິຍໍ, ສໍປີເຬ ມມ ໂປສນໍ;

ອໂຍຆຣມ຺ຫິ ສໍວຑ຺ໂຒ, ອປ຺ປເຠ ຈນ຺ທສູຣິເຍ.

‘‘‘ປູຕິກຸຓປສມ຺ປຸຓ຺ຓາ, ມຸຈ຺ຈິຕ຺ວາ ມາຕຸ ກຸຈ຺ຉິໂຕ;

ຕໂຕ ໂຆຣຕເຣ ທຸກ຺ເຂ, ປຸນ ປກ຺ຂິຕ຺ຕໂຍຆເຣ.

‘‘‘ຍທິຫໍ ຕາທິສໍ ປຕ຺ວາ, ທຸກ຺ຂໍ ປຣມທາຣຸຓໍ;

ຣຊ຺ເຊສຸ ຍທິ ຣຊ຺ຊາມິ [ຣຎ຺ຊາມິ (ສີ.)], ປາປານໍ ອຸຕ຺ຕໂມ ສິຍໍ.

‘‘‘ອຸກ຺ກຓ຺ຐິໂຕມ຺ຫິ ກາເຍນ, ຣຊ຺ເຊນມ຺ຫິ ອນຕ຺ຖິໂກ;

ນິພ຺ພຸຕິໍ ປຣິເຍສິສ຺ສໍ, ຍຕ຺ຖ ມໍ ມຈ຺ຈຸ ນ ມທ຺ທິເຍ’.

‘‘ເອວາຫໍ ຈິນ຺ຕຍິຕ຺ວານ, ວິຣວນ຺ເຕ ມຫາຊເນ;

ນາໂຄວ ພນ຺ຘນໍ ເຉຕ຺ວາ, ປາວິສິໍ ການນໍ ວນໍ.

‘‘ມາຕາປິຕາ ¶ ¶ ນ ເມ ເທສ຺ສາ, ນປິ ເມ ເທສ຺ສໍ ມຫາຍສໍ;

ສພ຺ພຎ຺ຎຸຕໍ ປິຍໍ ມຍ຺ຫໍ, ຕສ຺ມາ ຣຊ຺ຊໍ ປຣິຈ຺ຈຊິ’’ນ຺ຕິ.

‘‘ປຸນາປຣໍ ຍທາ ໂຫມິ, ກາສີນໍ ປຸຣວຣຸຕ຺ຕເມ;

ຠຄິນີ ຈ ຠາຕໂຣ ສຕ຺ຕ, ນິພ຺ພຕ຺ຕາ ໂສຕ຺ຖິເຍ ກຸເລ.

‘‘ເອເຕສໍ ¶ ປຸພ຺ພໂຊ ອາສິໍ, ຫິຣີສຸກ຺ກມຸປາຄໂຕ;

ຠວໍ ທິສ຺ວານ ຠຍໂຕ, ເນກ຺ຂມ຺ມາຠິຣໂຕ ອຫໍ.

‘‘ມາຕາປິຕູຫິ ¶ ປຫິຕາ, ສຫາຍາ ເອກມານສາ;

ກາເມຫິ ມໍ ນິມນ຺ເຕນ຺ຕິ, ‘ກຸລວໍສໍ ຘເຣຫິ’ຕິ.

‘‘ຍໍ ເຕສໍ ວຈນໍ ວຸຕ຺ຕໍ, ຄິຫີຘມ຺ເມ ສຸຂາວຫໍ;

ຕໍ ເມ ອໂຫສິ ກຐິນໍ, ຕຕ຺ຕ [ສນ຺ຕຕ຺ຕ (ກ.)] ຜາລສມໍ ວິຍ.

‘‘ເຕ ມໍ ຕທາ ອຸກ຺ຂິປນ຺ຕໍ, ປຸຈ຺ຉິໍສຸ ປຕ຺ຖິຕໍ ມມ;

‘ກິໍ ຕ຺ວໍ ປຕ຺ຖຍເສ ສມ຺ມ, ຍທິ ກາເມ ນ ຠຸຎ຺ຊສິ’.

‘‘ເຕສາຫໍ ເອວມວຈໍ, ອຕ຺ຖກາໂມ ຫິເຕສິນໍ;

‘ນາຫໍ ປຕ຺ເຖມິ ຄິຫີຠາວໍ, ເນກ຺ຂມ຺ມາຠິຣໂຕ ອຫໍ’.

‘‘ເຕ ມຍ຺ຫໍ ວຈນໍ ສຸຕ຺ວາ, ປິຕຸມາຕຸ ຈ ສາວຍຸໍ;

ມາຕາປິຕາ ເອວມາຫຸ, ‘ສພ຺ເພວ ປພ຺ພຊາມ ໂຠ’.

‘‘ອຸໂຠ ¶ ມາຕາປິຕາ ມຍ຺ຫໍ, ຠຄິນີ ຈ ສຕ຺ຕ ຠາຕໂຣ;

ອມິຕຘນໍ ຉຑ຺ຑຍິຕ຺ວາ, ປາວິສິມ຺ຫາ ມຫາວນ’’ນ຺ຕິ.

‘‘ປຸນາປຣໍ ¶ ຍທາ ໂຫມິ, ນຄເຣ ພ຺ຣຫ຺ມວຑ຺ຒເນ;

ຕຕ຺ຖ ກຸລວເຣ ເສຏ຺ເຐ, ມຫາສາເລ ອຊາຍຫໍ.

‘‘ຕທາປິ ໂລກໍ ທິສ຺ວານ, ອນ຺ຘີຠູຕໍ ຕໂມຕ຺ຖຏໍ;

ຈິຕ຺ຕໍ ຠວໂຕ ປຕິກຸຏຕິ, ຕຸຕ຺ຕເວຄຫຕໍ ວິຍ.

‘‘ທິສ຺ວານ ວິວິຘໍ ປາປໍ, ເອວໍ ຈິນ຺ເຕສຫໍ ຕທາ;

‘ກທາຫໍ ເຄຫາ ນິກ຺ຂມ຺ມ, ປວິສິສ຺ສາມິ ການນໍ’.

‘‘ຕທາປິ ມໍ ນິມນ຺ເຕສຸໍ, ກາມໂຠເຄຫິ ຎາຕໂຍ;

ເຕສມ຺ປິ ຉນ຺ທມາຈິກ຺ຂິໍ, ‘ມາ ນິມນ຺ເຕຖ ເຕຫິ ມໍ’.

‘‘ໂຍ ¶ ເມ ກນິຏ຺ຐໂກ ຠາຕາ, ນນ຺ໂທ ນາມາສິ ປຓ຺ຑິໂຕ;

ໂສປິ ມໍ ອນຸສິກ຺ຂນ຺ໂຕ, ປພ຺ພຊ຺ຊໍ ສມໂຣຈຍິ.

‘‘ອຫໍ ໂສໂຓ ຈ ນນ຺ໂທ ຈ, ອຸໂຠ ມາຕາປິຕາ ມມ;

ຕທາປິ ໂຠເຄ ຉຑ຺ເຑຕ຺ວາ, ປາວິສິມ຺ຫາ ມຫາວນ’’ນ຺ຕິ.

‘‘ປຸນາປຣໍ ¶ ¶ ຍທາ ໂຫມິ, ກາສິຣາຊສ຺ສ ອຕ຺ຣໂຊ;

ມູຄປກ຺ໂຂຕິ ນາເມນ, ເຕມິໂຍຕິ ວທນ຺ຕິ ມໍ.

‘‘ໂສຬສິຕ຺ຖິສຫສ຺ສານໍ, ນ ວິຊ຺ຊຕິ ປຸໂມ ຕທາ [ສທາ (ສີ.)];

ອໂຫຣຕ຺ຕານໍ ອຈ຺ຈເຍນ, ນິພ຺ພຕ຺ໂຕ ອຫເມກໂກ.

‘‘ກິຈ຺ຉາ ລທ຺ຘໍ ປິຍໍ ປຸຕ຺ຕໍ, ອຠິຊາຕໍ ຊຸຕິນ຺ຘຣໍ;

ເສຕຈ຺ຉຕ຺ຕໍ ຘາຣຍິຕ຺ວານ, ສຍເນ ໂປເສຕິ ມໍ ປິຕາ.

‘‘ນິທ຺ທາຍມາໂນ ສຍນວເຣ, ປພຸຊ຺ຌິຕ຺ວານຫໍ ຕທາ;

ອທ຺ທສໍ ປຓ຺ຑຣໍ ຉຕ຺ຕໍ, ເຍນາຫໍ ນິຣຍໍ ຄໂຕ.

‘‘ສຫ ¶ ທິຏ຺ຐສ຺ສ ເມ ຉຕ຺ຕໍ, ຕາໂສ ອຸປ຺ປຊ຺ຊິ ເຠຣໂວ;

ວິນິຈ຺ຉຍໍ ສມາປນ຺ໂນ, ‘ກຖາຫໍ ອິມໍ ມຸຎ຺ຈິສ຺ສໍ’.

‘‘ປຸພ຺ພສາໂລຫິຕາ ມຍ຺ຫໍ, ເທວຕາ ອຕ຺ຖກາມິນີ;

ສາ ມໍ ທິສ຺ວານ ທຸກ຺ຂິຕໍ, ຕີສຸ ຐາເນສຸ ໂຍຊຍິ.

‘‘‘ມາ ປຓ຺ຑິຈ຺ຈຍໍ ວິຠາວຍ, ພາລມໂຕ ຠວ ສພ຺ພປາຓິນໍ;

ສພ຺ໂພ ຕໍ ຊໂນ ໂອຈິນາຍຕຸ, ເອວໍ ຕວ ອຕ຺ໂຖ ຠວິສ຺ສຕິ’.

‘‘ເອວໍ ວຸຕ຺ຕາຍຫໍ ຕສ຺ສາ, ອິທໍ ວຈນມພ຺ຣວິໍ;

‘ກໂຣມິ ເຕ ຕໍ ວຈນໍ, ຍໍ ຕ຺ວໍ ຠຓສິ ເທວເຕ;

ອຕ຺ຖກາມາສິ ເມ ອມ຺ມ, ຫິຕກາມາສິ ເທວເຕ’.

‘‘ຕສ຺ສາຫໍ ວຈນໍ ສຸຕ຺ວາ, ສາຄເຣວ ຖລໍ ລຠິໍ;

ຫຏ຺ໂຐ ¶ ສໍວິຄ຺ຄມານໂສ, ຕໂຍ ອງ຺ເຄ ອຘິຏ຺ຐຫິໍ.

‘‘ມູໂຄ ¶ ອໂຫສິໍ ພຘິໂຣ, ປກ຺ໂຂ ຄຕິວິວຊ຺ຊິໂຕ;

ເອເຕ ອງ຺ເຄ ອຘິຏ຺ຐາຍ, ວສ຺ສານິ ໂສຬສໍ ວສິໍ.

‘‘ຕໂຕ ເມ ຫຕ຺ຖປາເທ ຈ, ຊິວ຺ຫໍ ໂສຕຎ຺ຈ ມທ຺ທິຍ;

ອນູນຕໍ ເມ ປສ຺ສິຕ຺ວາ, ‘ກາຬກຓ຺ຓີ’ຕິ ນິນ຺ທິສຸໍ.

‘‘ຕໂຕ ຊານປທາ ສພ຺ເພ, ເສນາປຕິປຸໂຣຫິຕາ;

ສພ຺ເພ ເອກມນາ ຫຸຕ຺ວາ, ຉຑ຺ຑນໍ ອນຸໂມທິສຸໍ.

‘‘ໂສຫໍ ເຕສໍ ມຕິໍ ສຸຕ຺ວາ, ຫຏ຺ໂຐ ສໍວິຄ຺ຄມານໂສ;

ຍສ຺ສຕ຺ຖາຍ ຕໂປຈິຓ຺ໂຓ, ໂສ ເມ ອຕ຺ໂຖ ສມິຊ຺ຌຖ.

‘‘ນ຺ຫາເປຕ຺ວາ ອນຸລິມ຺ປິຕ຺ວາ, ເວເຐຕ຺ວາ ຣາຊເວຐນໍ;

ຉຕ຺ເຕນ ອຠິສິຎ຺ຈິຕ຺ວາ, ກາເຣສຸໍ ປຸຣໍ ປທກ຺ຂິຓໍ.

‘‘ສຕ຺ຕາຫໍ ຘາຣຍິຕ຺ວານ, ອຸຄ຺ຄເຕ ຣວິມຓ຺ຑເລ;

ຣເຖນ ມໍ ນີຫຣິຕ຺ວາ, ສາຣຖີ ວນມຸປາຄມິ.

‘‘ເອໂກກາເສ ¶ ຣຖໍ ກຕ຺ວາ, ສຊ຺ຊສ຺ສໍ ຫຕ຺ຖມຸຈ຺ຈິໂຕ [ຫຕ຺ຖມຸຎ຺ຈິໂຕ (ສີ. ສ຺ຍາ.)];

ສາຣຖີ ຂຓຕີ ກາສຸໍ, ນິຂາຕຸໍ ປຖວິຍາ ມມໍ.

‘‘ອຘິຏ຺ຐິຕມຘິຏ຺ຐານໍ, ຕຊ຺ເຊນ຺ໂຕ ວິວິຘກາຣຓາ;

ນ ຠິນ຺ທິໍ ຕມຘິຏ຺ຐານໍ, ໂພຘິຍາເຍວ ກາຣຓາ.

‘‘ມາຕາປິຕາ ນ ເມ ເທສ຺ສາ, ອຕ຺ຕາ ເມ ນ ຈ ເທສ຺ສິໂຍ;

ສພ຺ພຎ຺ຎຸຕໍ ປິຍໍ ມຍ຺ຫໍ, ຕສ຺ມາ ວຕມຘິຏ຺ຐຫິໍ.

‘‘ເອເຕ ¶ ¶ ອງ຺ເຄ ອຘິຏ຺ຐາຍ, ວສ຺ສານິ ໂສຬສໍ ວສິໍ;

ອຘິຏ຺ຐາເນນ ເມ ສໂມ ນຕ຺ຖິ, ເອສາ ເມ ອຘິຏ຺ຐານປາຣມີ’’ຕິ.

‘‘ຍທາ ອຫໍ ກປິ ອາສິໍ, ນທີກູເລ ທຣີສເຍ;

ປີຬິໂຕ ສຸສຸມາເຣນ, ຄມນໍ ນ ລຠາມຫໍ.

‘‘ຍມ຺ໂຫກາເສ ¶ ອຫໍ ຐຕ຺ວາ, ໂອຣາ ປາຣໍ ປຕາມຫໍ;

ຕຕ຺ຖຈ຺ຉິ ສຕ຺ຕຸ ວຘໂກ, ກຸມ຺ຠີໂລ ລຸທ຺ທທສ຺ສໂນ.

‘‘ໂສ ມໍ ອສໍສິ ‘ເອຫີ’ຕິ, ‘ອຫໍເປມີ’ຕິ ຕໍ ວຕິໍ;

ຕສ຺ສ ມຕ຺ຖກມກ຺ກມ຺ມ, ປຣກູເລ ປຕິຏ຺ຐຫິໍ.

‘‘ນ ຕສ຺ສ ອລິກໍ ຠຓິຕໍ, ຍຖາ ວາຈໍ ອກາສຫໍ;

ສຈ຺ເຈນ ເມ ສໂມ ນຕ຺ຖິ, ເອສາ ເມ ສຈ຺ຈປາຣມີ’’ຕິ.

‘‘ປຸນາປຣໍ ຍທາ ໂຫມິ, ຕາປໂສ ສຈ຺ຈສວ຺ຫໂຍ;

ສຈ຺ເຈນ ໂລກໍ ປາເລສິໍ, ສມຄ຺ຄໍ ຊນມກາສຫ’’ນ຺ຕິ.

‘‘ປຸນາປຣໍ ¶ ¶ ¶ ຍທາ ໂຫມິ, ມຄເຘ ວຏ຺ຏໂປຕໂກ;

ອຊາຕປກ຺ໂຂ ຕຣຸໂຓ, ມໍສເປສິ ກຸລາວເກ.

‘‘ມຸຂຕຸຓ຺ຑເກນາຫຣິຕ຺ວາ [ມຸຂຕຸຓ຺ເຑນາຫຣິຕ຺ວາ (ສີ.)], ມາຕາ ໂປສຍຕີ ມມໍ;

ຕສ຺ສາ ຜສ຺ເສນ ຊີວາມິ, ນຕ຺ຖິ ເມ ກາຍິກໍ ພລໍ.

‘‘ສໍວຈ຺ຉເຣ ຄິມ຺ຫສມເຍ, ທວຑາໂຫ [ວນທາໂຫ (ກ.)] ປທິປ຺ປຕິ;

ອຸປຄຈ຺ຉຕິ ອມ຺ຫາກໍ, ປາວໂກ ກຓ຺ຫວຕ຺ຕນີ.

‘‘ຘມຘມາ ອິຕິເອວໍ, ສທ຺ທາຍນ຺ໂຕ ມຫາສິຂີ;

ອນຸປຸພ຺ເພນ ຌາເປນ຺ໂຕ, ອຄ຺ຄິ ມມມຸປາຄມິ.

‘‘ອຄ຺ຄິເວຄຠຍາຕີຕາ, ຕສິຕາ ມາຕາປິຕາ ມມ;

ກຸລາວເກ ມໍ ຉຑ຺ເຑຕ຺ວາ, ອຕ຺ຕານໍ ປຣິໂມຈຍຸໍ.

‘‘ປາເທ ¶ ປກ຺ເຂ ປຊຫາມິ, ນຕ຺ຖິ ເມ ກາຍິກໍ ພລໍ;

ໂສຫໍ ອຄຕິໂກ ຕຕ຺ຖ, ເອວໍ ຈິນ຺ເຕສຫໍ ຕທາ.

‘‘‘ເຍສາຫໍ ອຸປຘາເວຍ຺ຍໍ, ຠີໂຕ ຕສິຕເວຘິໂຕ;

ເຕ ມໍ ໂອຫາຍ ປກ຺ກນ຺ຕາ, ກຖໍ ເມ ອຊ຺ຊ ກາຕເວ.

‘‘‘ອຕ຺ຖິ ໂລເກ ສີລຄຸໂຓ, ສຈ຺ຈໍ ໂສເຈຍ຺ຍນຸທ຺ທຍາ;

ເຕນ ສຈ຺ເຈນ ກາຫາມິ, ສຈ຺ຈກິຣິຍມຸຕ຺ຕມໍ.

‘‘‘ອາເວຊ຺ເຊຕ຺ວາ ຘມ຺ມພລໍ, ສຣິຕ຺ວາ ປຸພ຺ພເກ ຊິເນ;

ສຈ຺ຈພລມວສ຺ສາຍ, ສຈ຺ຈກິຣິຍມກາສຫໍ.

‘‘‘ສນ຺ຕິ ¶ ປກ຺ຂາ ອປຕນາ, ສນ຺ຕິ ປາທາ ອວຎ຺ຈນາ;

ມາຕາປິຕາ ຈ ນິກ຺ຂນ຺ຕາ, ຊາຕເວທ ປຏິກ຺ກມ’.

‘‘ສຫສຈ຺ເຈ ກເຕ ມຍ຺ຫໍ, ມຫາປຊ຺ຊລິໂຕ ສິຂີ;

ວຊ຺ເຊສິ ໂສຬສກຣີສານິ, ອຸທກໍ ປຕ຺ວາ ຍຖາ ສິຂີ;

ສຈ຺ເຈນ ເມ ສໂມ ນຕ຺ຖິ, ເອສາ ເມ ສຈ຺ຈປາຣມີ’’ຕິ.

‘‘ປຸນາປຣໍ ¶ ¶ ຍທາ ໂຫມິ, ມຈ຺ຉຣາຊາ ມຫາສເຣ;

ອຸຓ຺ເຫ ສູຣິຍສນ຺ຕາເປ, ສເຣ ອຸທກ ຂີຍຖ.

‘‘ຕໂຕ ກາກາ ຈ ຄິຊ຺ຌາ ຈ, ກງ຺ກາ [ພກາ (ສີ.)] ກຸລລເສນກາ;

ຠກ຺ຂຍນ຺ຕິ ທິວາຣຕ຺ຕິໍ, ມຈ຺ເຉ ອຸປນິສີທິຍ.

‘‘ເອວໍ ຈິນ຺ເຕສຫໍ ຕຕ຺ຖ, ສຫ ຎາຕີຫິ ປີຬິໂຕ;

‘ເກນ ນຸ ໂຂ ອຸປາເຍນ, ຎາຕີ ທຸກ຺ຂາ ປໂມຈເຍ’.

‘‘ວິຈິນ຺ຕຍິຕ຺ວາ ຘມ຺ມຕ຺ຖໍ, ສຈ຺ຈໍ ອທ຺ທສ ປສ຺ສຍໍ;

ສຈ຺ເຈ ຐຕ຺ວາ ປໂມເຈສິໍ, ຎາຕີນໍ ຕໍ ອຕິກ຺ຂຍໍ.

‘‘ອນຸສ຺ສຣິຕ຺ວາ ສຕໍ ຘມ຺ມໍ, ປຣມຕ຺ຖໍ ວິຈິນ຺ຕຍໍ;

ອກາສິ ສຈ຺ຈກິຣິຍໍ, ຍໍ ໂລເກ ຘຸວສສ຺ສຕໍ.

‘‘‘ຍໂຕ ¶ ສຣາມິ ອຕ຺ຕານໍ, ຍໂຕ ປຕ຺ໂຕສ຺ມິ ວິຎ຺ຎຸຕໍ;

ນາຠິຊານາມິ ສຎ຺ຈິຈ຺ຈ, ເອກປາຓມ຺ປິ ຫິໍສິຕໍ.

‘‘‘ເອເຕນ ¶ ສຈ຺ຈວຊ຺ເຊນ, ປຊ຺ຊຸນ຺ໂນ ອຠິວສ຺ສຕຸ;

ອຠິຕ຺ຖນຍ ປຊ຺ຊຸນ຺ນ, ນິຘິໍ ກາກສ຺ສ ນາສຍ;

ກາກໍ ໂສກາຍ ຣນ຺ເຘຫິ, ມຈ຺ເຉ ໂສກາ ປໂມຈຍ’.

‘‘ສຫກເຕ ສຈ຺ຈວເຣ, ປຊ຺ຊຸນ຺ໂນ ອຠິຄຊ຺ຊິຍ;

ຖລໍ ນິນ຺ນຎ຺ຈ ປູເຣນ຺ໂຕ, ຂເຓນ ອຠິວສ຺ສຖ.

‘‘ເອວຣູປໍ ສຈ຺ຈວຣໍ, ກຕ຺ວາ ວີຣິຍມຸຕ຺ຕມໍ;

ວສ຺ສາເປສິໍ ມຫາເມຆໍ, ສຈ຺ຈເຕຊພລສ຺ສິໂຕ;

ສຈ຺ເຈນ ເມ ສໂມ ນຕ຺ຖິ, ເອສາ ເມ ສຈ຺ຈປາຣມີ’’ຕິ.

‘‘ປຸນາປຣໍ ¶ ຍທາ ໂຫມິ, ກຓ຺ຫທີປາຍໂນ ອິສິ;

ປໂຣປຎ຺ຎາສວສ຺ສານິ, ອນຠິຣໂຕຈຣິໍ ອຫໍ.

‘‘ນ ໂກຈິ ເອຕໍ ຊານາຕິ, ອນຠິຣຕິມນໍ ມມ;

ອຫຎ຺ຫິ ກສ຺ສຈິ ນາຈິກ຺ຂິໍ, ອຣຕິ ເມ ຈຣຕິ ມານເສ.

‘‘ສພ຺ຣຫ຺ມຈາຣີ ¶ ມຓ຺ຑພ຺ໂຍ, ສຫາໂຍ ເມ ມຫາອິສິ;

ປຸພ຺ພກມ຺ມສມາຍຸຕ຺ໂຕ, ສູລມາໂຣປນໍ ລຠິ.

‘‘ຕມຫໍ ອຸປຏ຺ຐຫິຕ຺ວານ, ອາໂຣຄ຺ຍມນຸປາປຍິໍ;

ອາປຸຈ຺ຉິຕ຺ວານ ອາຄຎ຺ຉິໍ, ຍໍ ມຍ຺ຫໍ ສກມສ຺ສມໍ.

‘‘ສຫາໂຍ ¶ ພ຺ຣາຫ຺ມໂຓ ມຍ຺ຫໍ, ຠຣິຍໍ ອາທາຍ ປຸຕ຺ຕກໍ;

ຕໂຍ ຊນາ ສມາຄນ຺ຕ຺ວາ, ອາຄຎ຺ຉຸໍ ປາຫຸນາຄຕໍ.

‘‘ສມ຺ໂມທມາໂນ ເຕຫິ ສຫ, ນິສິນ຺ໂນ ສກມສ຺ສເມ;

ທາຣໂກ ວຏ຺ຏມນຸກ຺ຂິປໍ, ອາສີວິສມໂກປຍິ.

‘‘ຕໂຕ ໂສ ວຏ຺ຏຄຕໍ ມຄ຺ຄໍ, ອນ຺ເວສນ຺ໂຕ ກຸມາຣໂກ;

ອາສີວິສສ຺ສ ຫຕ຺ເຖນ, ອຸຕ຺ຕມງ຺ຄໍ ປຣາມສິ.

‘‘ຕສ຺ສ ¶ ອາມສເນ ກຸທ຺ໂຘ, ສປ຺ໂປ ວິສພລສ຺ສິໂຕ;

ກຸປິໂຕ ປຣມໂກເປນ, ອຑໍສິ ທາຣກໍ ຂເຓ.

‘‘ສຫທຏ຺ໂຐ ອາສີວິເສນ [ອຕິວິເສນ (ປີ. ກ.)], ທາຣໂກ ປປຕິ [ປຕຕິ (ກ.)] ຠູມິຍໍ;

ເຕນາຫໍ ທຸກ຺ຂິໂຕ ອາສິໍ, ມມ ວາຫສິ ຕໍ ທຸກ຺ຂໍ.

‘‘ຕ຺ຍາຫໍ ອສ຺ສາສຍິຕ຺ວານ, ທຸກ຺ຂິເຕ ໂສກສລ຺ລິເຕ;

ປຐມໍ ອກາສິໍ ກິຣິຍໍ, ອຄ຺ຄໍ ສຈ຺ຈໍ ວຣຸຕ຺ຕມໍ.

‘‘‘ສຕ຺ຕາຫເມວາຫໍ ປສນ຺ນຈິຕ຺ໂຕ, ປຸຎ຺ຎຕ຺ຖິໂກ ອຈຣິໍ ພ຺ຣຫ຺ມຈຣິຍໍ;

ອຖາປຣໍ ຍໍ ຈຣິຕໍ ມເມທໍ, ວສ຺ສານິ ປຎ຺ຎາສສມາຘິການິ.

‘‘‘ອກາມໂກ ວາຫິ ອຫໍ ຈຣາມິ, ເອເຕນ ສຈ຺ເຈນ ສຸວຕ຺ຖິ ໂຫຕຸ;

‘‘ສຫ ¶ ¶ ສຈ຺ເຈ ກເຕ ມຍ຺ຫໍ, ວິສເວເຄນ ເວຘິໂຕ;

ອພຸຊ຺ຌິຕ຺ວານ ວຸຏ຺ຐາສິ, ອໂຣໂຄ ຈາສິ ມາຓໂວ;

ສຈ຺ເຈນ ເມ ສໂມ ນຕ຺ຖິ, ເອສາ ເມ ສຈ຺ຈປາຣມີ’’ຕິ.

‘‘ປຸນາປຣໍ ຍທາ ໂຫມິ, ສຸຕໂສໂມ ມຫີປຕິ;

ຄຫິໂຕ ໂປຣິສາເທນ, ພ຺ຣາຫ຺ມເຓ ສງ຺ຄຣໍ ສຣິໍ.

‘‘ຂຕ຺ຕິຍານໍ ເອກສຕໍ, ອາວຸຓິຕ຺ວາ ກຣຕ຺ຕເລ;

ເອເຕສໍ ປມິລາເປຕ຺ວາ, ຍຎ຺ຎຕ຺ເຖ ອຸປນຍີ ມມໍ.

‘‘ອປຸຈ຺ຉິ ¶ ມໍ ໂປຣິສາໂທ, ‘ກິໍ ຕ຺ວໍ ອິຈ຺ຉສິ ນິສ຺ສຊໍ;

ຍຖາມຕິ ເຕ ກາຫາມິ, ຍທິ ເມ ຕ຺ວໍ ປຸເນຫິສິ’.

‘‘ຕສ຺ສ ¶ ປຏິສ຺ສຸຓິຕ຺ວານ, ປຓ຺ເຫ ອາຄມນໍ ມມ;

ອຸປຄນ຺ຕ຺ວາ ປຸຣໍ ຣມ຺ມໍ, ຣຊ຺ຊໍ ນິຍ຺ຍາທຍິໍ ຕທາ.

‘‘ອນຸສ຺ສຣິຕ຺ວາ ສຕໍ ຘມ຺ມໍ, ປຸພ຺ພກໍ ຊິນເສວິຕໍ;

ພ຺ຣາຫ຺ມຓສ຺ສ ຘນໍ ທຕ຺ວາ, ໂປຣິສາທໍ ອຸປາຄມິໍ.

‘‘ນຕ຺ຖິ ເມ ສໍສໂຍ ຕຕ຺ຖ, ຆາຕຍິສ຺ສຕິ ວາ ນ ວາ;

ສຈ຺ຈວາຈານຸຣກ຺ຂນ຺ໂຕ, ຊີວິຕໍ ຈຊິຕຸມຸປາຄມິໍ;

ສຈ຺ເຈນ ເມ ສໂມ ນຕ຺ຖິ, ເອສາ ເມ ສຈ຺ຈປາຣມີ’’ຕິ.

‘‘ສາໂມ ¶ ¶ ຍທາ ວເນ ອາສິໍ, ສກ຺ເກນ ອຠິນິມ຺ມິໂຕ;

ປວເນ ສີຫພ຺ຍຄ຺ເຆ ຈ, ເມຕ຺ຕາຍມຸປນາມຍິໍ.

‘‘ສີຫພ຺ຍຄ຺ເຆຫິ ທີປີຫິ, ອຈ຺ເຉຫິ ມຫິເສຫິ ຈ;

ປສທມິຄວຣາເຫຫິ, ປຣິວາເຣຕ຺ວາ ວເນ ວສິໍ.

‘‘ນ ມໍ ໂກຈິ ອຸຕ຺ຕສຕິ, ນປິ ຠາຍາມິ ກສ຺ສຈິ;

ເມຕ຺ຕາພເລນຸປຕ຺ຖທ຺ໂຘ, ຣມາມິ ປວເນ ຕທາ’’ຕິ.

‘‘ປຸນາປຣໍ ຍທາ ໂຫມິ, ເອກຣາຊາຕິ ວິສ຺ສຸໂຕ;

ປຣມໍ ສີລໍ ອຘິຏ຺ຐາຍ, ປສາສາມິ ມຫາມຫິໍ.

‘‘ທສ ກຸສລກມ຺ມປເຖ, ວຕ຺ຕາມິ ອນວເສສໂຕ;

ຈຕູຫິ ສງ຺ຄຫວຕ຺ຖູຫິ, ສງ຺ຄຓ຺ຫາມິ [ສງ຺ຄຫາມິ (ກ.)] ມຫາຊນໍ.

‘‘ເອວໍ ເມ ອປ຺ປມຕ຺ຕສ຺ສ, ອິຘ ໂລເກ ປຣຕ຺ຖ ຈ;

ທພ຺ພເສໂນ ¶ ອຸປຄນ຺ຕ຺ວາ, ອຈ຺ຉິນ຺ທນ຺ໂຕ ປຸຣໍ ມມ.

‘‘ຣາຊູປຊີເວ ¶ ນິຄເມ, ສພລຏ຺ເຐ ສຣຏ຺ຐເກ;

ສພ຺ພໍ ຫຕ຺ຖຄຕໍ ກຕ຺ວາ, ກາສຸຍາ ນິຂຓີ ມມໍ.

‘‘ອມຈ຺ຈມຓ຺ຑລໍ ຣຊ຺ຊໍ, ຜີຕໍ ອນ຺ເຕປຸຣໍ ມມ;

ອຈ຺ຉິນ຺ທິຕ຺ວານ ຄຫິຕໍ, ປິຍໍ ປຸຕ຺ຕໍວ ປສ຺ສຫໍ;

ເມຕ຺ຕາຍ ເມ ສໂມ ນຕ຺ຖິ, ເອສາ ເມ ເມຕ຺ຕາປາຣມີ’’ຕິ.

‘‘ສຸສາເນ ¶ ¶ ເສຍ຺ຍໍ ກປ຺ເປມິ, ຉວຏ຺ຐິກໍ ອຸປນິຘາຍຫໍ;

ຄາມຓ຺ຑລາ [ໂຄມຓ຺ຑລາ (ສີ.), ຄາມມຓ຺ຑລາ (ສ຺ຍາ.)] ອຸປາຄນ຺ຕ຺ວາ, ຣູປໍ ທສ຺ເສນ຺ຕິນປ຺ປກໍ.

‘‘ອປເຣ ຄນ຺ຘມາລຎ຺ຈ, ໂຠຊນໍ ວິວິຘໍ ພຫຸໍ;

ອຸປາຍນານູປເນນ຺ຕິ, ຫຏ຺ຐາ ສໍວິຄ຺ຄມານສາ.

‘‘ເຍ ເມ ທຸກ຺ຂໍ ອຸປຫຣນ຺ຕິ, ເຍ ຈ ເທນ຺ຕິ ສຸຂໍ ມມ;

ສພ຺ເພສໍ ສມໂກ ໂຫມິ, ທຍາ ໂກໂປ ນ ວິຊ຺ຊຕິ.

‘‘ສຸຂທຸກ຺ເຂ ຕຸລາຠູໂຕ, ຍເສສຸ ອຍເສສຸ ຈ;

ສພ຺ພຕ຺ຖ ສມໂກ ໂຫມິ, ເອສາ ເມ ອຸເປກ຺ຂາປາຣມີ’’ຕິ.

ຍຸຘຎ຺ຊໂຍ ໂສມນສ຺ໂສ, ອໂຍຆຣຠິເສນ ຈ;

ໂສຓນນ຺ໂທ ມູຄປກ຺ໂຂ, ກປິຣາຊາ ສຈ຺ຈສວ຺ຫໂຍ.

ວຏ຺ຏໂກ ມຈ຺ຉຣາຊາ ຈ, ກຓ຺ຫທີປາຍໂນ ອິສິ;

ສຸຕໂສໂມ ປຸນ ອາສິໍ [ອາສິ (ສ຺ຍາ.)], ສາໂມ ຈ ເອກຣາຊຫຸ;

ອຸເປກ຺ຂາປາຣມີ ອາສິ, ອິຕິ ວຸຕ຺ຖໍ [ວຸຕ຺ຕໍ (ສພ຺ພຕ຺ຖ) ອຏ຺ຐກຖາ ໂອໂລເກຕພ຺ພາ] ມເຫສິນາ.

ເອວໍ ¶ ພຫຸພ຺ພິຘໍ ທຸກ຺ຂໍ, ສມ຺ປຕ຺ຕີ ຈ ພຫຸພ຺ພິຘາ [ສມ຺ປຕ຺ຕິ ຈ ພຫຸວິຘາ (ສີ.), ສມ຺ປຕ຺ຕິໍ ຈ ພຫຸວິຘໍ (ກ.)];

ຠວາຠເວ ອນຸຠວິຕ຺ວາ, ປຕ຺ໂຕ ສມ຺ໂພຘິມຸຕ຺ຕມໍ.

ທຕ຺ວາ ທາຕພ຺ພກໍ ທານໍ, ສີລໍ ປູເຣຕ຺ວາ ອເສສໂຕ;

ເນກ຺ຂມ຺ເມ ປາຣມິໍ ຄນ຺ຕ຺ວາ, ປຕ຺ໂຕ ສມ຺ໂພຘິມຸຕ຺ຕມໍ.

ປຓ຺ຑິເຕ ¶ ປຣິປຸຈ຺ຉິຕ຺ວາ, ວີຣິຍໍ ກຕ຺ວານ ມຸຕ຺ຕມໍ;

ຂນ຺ຕິຍາ ປາຣມິໍ ຄນ຺ຕ຺ວາ, ປຕ຺ໂຕ ສມ຺ໂພຘິມຸຕ຺ຕມໍ.

ກຕ຺ວາ ທຬ຺ຫມຘິຏ຺ຐານໍ, ສຈ຺ຈວາຈານຸຣກ຺ຂິຍ;

ເມຕ຺ຕາຍ ¶ ປາຣມິໍ ຄນ຺ຕ຺ວາ, ປຕ຺ໂຕ ສມ຺ໂພຘິມຸຕ຺ຕມໍ.

ລາຠາລາເຠ ¶ ຍສາຍເສ, ສມ຺ມານນາວມານເນ;

ສພ຺ພຕ຺ຖ ສມໂກ ຫຸຕ຺ວາ, ປຕ຺ໂຕ ສມ຺ໂພຘິມຸຕ຺ຕມໍ.

ໂກສຊ຺ຊໍ ຠຍໂຕ ທິສ຺ວາ, ວີຣິຍາຣມ຺ຠຎ຺ຈ ເຂມໂຕ;

ອາຣທ຺ຘວີຣິຍາ ໂຫຖ, ເອສາ ພຸທ຺ຘານຸສາສນີ.

ວິວາທໍ ຠຍໂຕ ທິສ຺ວາ, ອວິວາທຎ຺ຈ ເຂມໂຕ;

ສມຄ຺ຄາ ສຂິລາ ໂຫຖ, ເອສາ ພຸທ຺ຘານຸສາສນີ.

ປມາທໍ ຠຍໂຕ ທິສ຺ວາ, ອປ຺ປມາທຎ຺ຈ ເຂມໂຕ;

ຠາເວຖຏ຺ຐງ຺ຄິກໍ ມຄ຺ຄໍ, ເອສາ ພຸທ຺ຘານຸສາສນີ.

ອິຕ຺ຖໍ ສຸທໍ ຠຄວາ ອຕ຺ຕໂນ ປຸພ຺ພຈຣິຍໍ ສມ຺ຠາວຍມາໂນ ພຸທ຺ຘາປທານິຍໍ ນາມ ຘມ຺ມປຣິຍາຍໍ ອຠາສິຕ຺ຖາຕິ.