📜

നമോ തസ്സ ഭഗവതോ അരഹതോ സമ്മാസമ്ബുദ്ധസ്സ

പജ്ജമധു

ആനന്ദ രഞ്ഞ രതനാദി മഹാ യതിന്ദ,

നിച്ചപ്പബുദ്ധ പദുമപ്പിയ സേവിനങ്ഗീ;

ബുദ്ധപ്പിയേന ഘന ബുദ്ധ ഗുണപ്പിയേന,

ഥേരാലിനാ രചിത പജ്ജമധും പിബന്തു.

൧.

ഉണ്ണാപപുണ്ണസസിമണ്ദലതോ ഗലിത്വാ,

പാദമ്ബുജങ്ഗുലി ദലട്ഠ സുധാ ലവാനം;

പന്തീവ സത്ഥു നഖപന്തി പജാവിസേസം,

പീണേതു സുദ്ധ സുഖിതമ്മണ തുണ്ഡപീതാ.

൨.

ഖിത്തായ മാരരിപുനാ പരിവത്യ സത്ഥു,

പാദസ്സയാ ജിത ദിസായ സിതത്തലായ;

യാ ജേതി കഞ്ചന സരാവലിയാ സിരിം സാ,

ദേതന്ഗിനം രണജയങ്ഗുലിപന്തികന്താ.

൩.

സോവണ്ണ വണ്ണ സുഖുമച്ഛവി സോമ്മ കുമ്മ,

പിട്ഠീവ പിട്ഠി കമതുന്നതി ഭാതി യേസം;

തേസുപ്പതിട്ഠിതസുകോമലദീഘപണ്ഹി,

പാദാ ജിനസ്സ പദദന്തു പദം ജനസ്സ.

൪.

അച്ഛേര പങ്കജസിരം സിരിയാ സകായ,

യേ മദ്ദിനോ വിയ ചരന്തി സരോജ സീസേ;

സഞ്ചുമ്ബിതാ വിയ ച താനി പരാഗ രാഗാ,

തേ നീരജാ മുനിപദാ പദദന്തു ലക്ഖിം.

൫.

അഗാമി കാല ജന മങ്ഗല ഭത്തു ഭാവം,

വ്യാകത്തുമത്ര കുസലേനിവ നിമ്മിതാനി;

യാത്രാസുമട്ഠസതമങ്ഗലക്ഖണാനി,

സാധേതു നം പദയുഗം ജയമങ്ഗലാനി.

൬.

സസ്സേവിജന്തുവരസന്തിപുരപ്പവേസേ,

നിച്ചം സുസജ്ജ ഠപിതാനിവ മങ്ഗലായ;

യേ തേ ദധന്തി കലമങ്ഗലലക്ഖണാനി,

വത്തന്തു തേ ജിനപദാ ജയമങ്ഗലായ.

൭.

സബ്ബേഭിഭൂയ സപദേസു നിപാതനസ്സ,

സഞ്ഞാണകം വിയ യദസ്സിതസബ്ബലോകോ;

പാദാത്യധോകതതിലോകസിരോവരാ പി,

ലോകം പുണന്തു ജയമങ്ഗലകാരണാനി.

൮.

ലോകത്തയേകസരണത്തവിഭാവനായ,

സജ്ജോ വ തിട്ഠതി യഹിം സുവിഭത്തലോകോ;

തം സബ്ബലോകപടിബിമ്ബിതദപ്പണാഭം,

പാദദ്വയം ജനസുസജ്ജനഹേതു ഹോതു.

൯.

ലോകുത്തരായ സിരിയാധിഗമായ സുട്ഠു,

രജന്തി യത്ഥ ദിഗുണാനിവ പാതു ഭൂതാ;

ചക്കാസനാഭിസഹനേമിസഹസ്സരാനി,

ത്യങ്ഘീ ദിസന്തു സകലിസ്സരിയം ജനസ്സ.

൧൦.

യത്രുല്ലസന്തി ദുവിധാനിവ പാതൂ ഭൂതാ,

ധമ്മസ്സസബ്ബഭുവനസ്സ ച ഇസ്സരത്തേ;

ചക്കാനി ചക്കസദിസാനി സുദസ്സനസ്സ,

താനജ്ജ ജന്തു സരണാ ചരണാനി ഹോന്തു.

൧൧.

സത്തേസു വച്ഛതു സിരീ സിരിവച്ഛകേന,

സോവത്ഥി സോത്ഥിമനുതിട്ഠതു പുഗ്ഗലേസു;

നന്ദിം ജനാനമനുവത്തതു നന്ദിവത്തീ,

സീസാനലംകുരുതു പാദവതംസകോ പി.

൧൨.

ഭദ്ദായ പീഠമുപഗച്ഛതു ഭദ്ദപീഠം,

വുദ്ധിം ജനാനമനുവത്തതു വദ്ധമാനം;

പുണ്ണത്തമങ്ഗിമനുകുബ്ബതു പുണ്ണകുമ്ഭോ,

പാതി ച പാതു സതതം ജനതം അപായാ.

൧൩.

സേതാതപത്തമപനേതമഘാതപേ തം,

ഖഗ്ഗോ വിഛിന്ദതു സദാ ദുരിതാരിവഗ്ഗേ;

സംക്ലേസദാഹമപനേതു സതാലവണ്ട,

സംവീജനീ കുമതിമക്ഖികമോരഹത്ഥോ.

൧൪.

ആകഡ്ഢനോ ജനവിലോചനമത്തനിന്നം,

വാരേതു സബ്ബഗതിവാരനമങ്കുസോ സോ;

പാദമ്ബുജസ്സിരിവിലാസനികേതനം വ,

പാസാദലഖണമുപേതു മനോപസാദം.

൧൫.

പാണീനമത്തഭജതം വരപുണ്ണപത്തം,

സമ്മാ ദദാതു പദനിസ്സിതപുണ്ണപത്തോ;

പാദേസു ജന്തു മനബന്ധനദാമഭൂതം,

ദാമം ദമേതു വിമലം ജനതമ്മനാനി.

൧൬.

ഉണ്ഹീസകുപ്പലമണീപദുമേഹി പാദാ,

സസ്സേവിജന്തുകരണാനി വിഭൂസയന്തു;

സന്നേത്തനാവുപഗതാനമനഗ്ഘകാനി,

ബോജ്ഝങ്ഗസത്തരതനാനി ദദേ സമുദ്ദോ.

൧൭.

ഉത്തുങ്ഗ നിച്ചലഗുങാ ജിതതായ നിച്ചം,

സേവീവ പാദസിരി നിച്ച സമുബ്ബഹം വ;

അത്രാപി സക്കഭവനുബ്ബഹണേ നിയുത്തോ,

പാദട്ഠമേരു ഭവതം ഭവതം വിഭൂത്യാ.

൧൮.

സോ ചക്കവാളസിഖരീ പ്യവതം സമന്താ,

സബ്ബൂപസഗ്ഗവിസരാജനതം സമഗ്ഗം;

ദീപാ പുഥൂപി ചതുരോ ദ്വിസഹസ്സ ഖുദ്ദാ,

ധാരേന്ത്വപായപതമാനമദത്വ ജന്തും.

൧൯.

സൂരോ പബോധയതു ജന്തു സരോരുഹാനി,

ചന്ദോ പസാദ കുമുദാനി മനോദഹേസു;

നക്ഖത്തജാതമഖിലം സുഭതായ ഹോതു,

ചക്കം ധജം രിപുജയായ ജയദ്ധജായ.

൨൦.

ജേതും സസംസദ-സുദസ്സന-ചക്കവത്തി,

ചക്കാനുഗന്തലലിതം യഹിമാവഹേയ്യ;

ചക്കാണുവത്തി പരിസാവത-ചക്കവത്തി,

നംവത്തതം പദയുഗം ജനതാ ഹിതായ.

൨൧.

പുജേതുമാഗത വതാ വജിരാസനട്ഠ,

മിന്ദേന ഛഡ്ഡിത മഹാവിജയുത്തരാഖ്യം;

സംഖം പവിട്ഠമിവ മാരഭയാ പദാധോ,

പാദട്ഠസംഖമിഹ വത്തതു സന്തിയാ വോ.

൨൨.

സോവണ്ണമച്ഛയുഗലം സിവഭത്ത ഭോഗേ,

ഇച്ഛാ ബഹൂപകരണം ഭവതം ജനാനം;

കുമ്ഭീലധിഗ്ഗഹിതതോ വ പദുത്ഥചിത്താ,

പാദമ്ബുജാകര വിഗാഹി തു നോപഹോന്തു.

൨൩.

സത്താപഗാ ജനമനോജ മലേ ജഹന്തു,

സംക്ലേസദാഹമപനേന്തു ദഹാ ച സത്ത;

സേലാ ച സത്ത വിദധന്തു ജനസ്സ താനം,

ലോകപ്പസിദ്ധിജനനേ ഭവതം പതാകാ.

൨൪.

പാടങ്കി സന്തി ഗമനേ ഭവതൂപകാരാ,

ദാഹേത്തനേസു ജഹതം പദചാമരം തം;

സല്ലോകലോചനമഹുസ്സവ-ഉസ്സിതം വ,

വത്തേയ്യ തോരണമനുത്തരമങ്ഗലായ.

൨൫.

യസ്മിം മിഗിന്ദ ഗത ഭീതി ബലാവ ദഡ്ഢ,

ദാനാ നതാ സിരവിദാരണ പീളിതാവ;

നാലാഗിരീ കരിവരോ ഗിരിമേഖലോ ച,

തം സീഹവിക്കമപദം ഹനതാ ഘദന്തിം.

൨൬.

പാപാഹിനോ ഹനതു പാദസുവണ്ണരാജാ,

വ്യഗ്ഘാധിപോ കലിജനേ അദതം അസേസം;

വാലാഹ-അസ്സപതി സമ്പതിതും അദത്വാ,

പായേസു പാപയതു സന്തിപുരമ്പജായോ.

൨൭.

ഛദ്ദന്ത ദന്തി ലലിതം ഗലിതം രുസമ്ഹാ,

ലുദ്ദേത്ത ദുബ്ഭിനി ദിസേ അചലം ദധാനോ;

പാദട്ഠഹത്ഥിപതി സമ്പതി ജന്തുതാസേ,

താസേതു ഹാസമപരന്ദിസതം സതാനം.

൨൮.

സബ്ബങ്ഗിനോ ചരണുപോസഥ ഹത്ഥിരാജാ,

പാപേതു സബ്ബചതുദീപികരജ്ജലക്ഖിം;

കിത്തീവ പാദപരിചാരികതാ നിയുത്താ,

കേലസസേലപടിമാ ഹിതമാചരേയ്യ.

൨൯.

സാമിസ്സ ഹംസസമയേ ദഹപാസബദ്ധ,

മാസീന വേസഗമകോ വിയ പാദഹംസോ;

നിഗ്ഘോസ ഗന്തിജിതതോ വിയ മൂഗപക്ഖോ,

യാരേതു സബ്ബ ജനതാ ഭവഗന്തുകത്തം.

൩൦.

ഓഹായ ദിബ്ബസരസിം ഖിലലോക സബ്ബ,

രമ്മങ്ഘിവാപിമവഗാഹിതവാവ പാദേ;

ഏരാവണോ കരിവരോ മനസാഭിരുള്ഹേ,

ജന്തും പുരിന്ദദപുരം നയതം വ സീഘം.

൩൧.

ഹിത്വാ സകമ്ഭവനമങ്ഘിനിസേവനത്ഥ,

മാഗമ്മ രമ്മ തരതായിഹ നിസ്സിതോ വ;

പാലേത്വ മൂനി പദവാപിതരങ്ഗഭങ്ഗി,

മന്ഗീ കരോന്തതനുവാസുകി നാഗരാജാ.

൩൨.

നാഥസ്സ കഞ്ചനസിഖാവലജാതിലീല,

മാവികരം വ പദനിസ്സിതമോരരാജാ;

തം ധമ്മദേസനരവേനിവ ലുദ്ദകസ്സ,

ലോകസ്സ പാപഫണിനോ ഹനതം അസേസം.

൩൩.

സംസാരസാഗരഗതേ സധനേ ജനേ തേ,

നേതമ്പദേ കലചതുമ്മുഖഹേമനാവാ;

നിബ്ബാണപട്ടനവരം ഭരുകച്ഛകന്തം,

സുപ്പാരപണ്ഡിത ഗതാ വിയ ആസുനാവാ.

൩൪.

സമ്ബോധി ഞാണ പരിപാചയതോ മുനിസ്സ,

ഭത്തോ യഥാ ഹിമവതദ്ദി സമാധിഹേതു;

ഏവമ്മനേന ഭജതം ഹിമവദ്ദിപാദേ,

സമ്ബോധിഞാണ പരിപാചനഹേതു ഹോതു.

൩൫.

ദള്ഹം പരാജിതതയാ മുനിനാ സരേന,

സുഞ്ഞസ്സരോപഗത പഞ്ജര ബന്ധനോവ;

സോ പാദപഞ്ജരഗതോ കരവീകപക്ഖീ,

സബ്ബേസമപ്പീയാവചഞ്ജഹതാ ഭവന്തം.

൩൬.

തേ ചക്കവാക മകരാ അപി കോഞ്ച ജീവം,

ജീവാദി പക്ഖിവിസരാ സരസീവ ഭുത്തം;

വേസ്സന്തരേന ചരണമ്ബുജി നിബ്ഭജന്താ,

ജന്തു തഹിം വിയ പദേ സുരമേന്തു നിച്ചം.

൩൭.

തം ചന്ദകിന്നരഗതിംവ ഗതസ്സ ബോധി,

സത്തസ്സ തസ്സ സപജാപതികസ്സ ഭാവം;

സംസൂചയന്ത പദ കിന്നര കിന്നരീ വേ,

സാമഗ്ഗിമഗ്ഗ പടി പത്തിസു പാപയന്തു.

൩൮.

സംരാജധാനിമുസഭോ വഹതഗ്ഗ ഭാരം,

പീതിപ്പയോ പജനയേയ്യ സവച്ഛധേനു;

സസ്സേവിനോ അഭിരമേന്തു ഛകാമസഗ്ഗാ,

ധാരേന്തു ഝായിമിഹ സോളസ ധാതുധാമാ.

൩൯.

സുത്വാ ജിനസ്സ കരവീക സരമ്മനുഞ്ഞം,

അഞ്ഞോഞ്ഞ ഭീതിരഹിതാ അപി പച്ചനീകാ;

ഹിത്വാ ഗതിം വിയ ഠിതാ പദസത്തരൂപാ,

സബ്ബം ഭവസ്സിത ജനാനഗതിം ഹനന്തു.

൪൦.

സോവണ്ണ കാഹള യുഗോ പമമിന്ദിരായ,

സന്നീരപുപ്ഫ മുകുലോപമമുസ്സവായ;

നിച്ചം സുസജ്ജ ഠപിതം മുനി തിട്ഠതന്തേ,

ജങ്ഘാദ്വയം ജനവിലോചന മങ്ഗലായ.

൪൧.

ലഖ്യാ വിലാസ മുകുരദ്വയ സന്നികാസം,

താഡങ്ക മണ്ഡന വിഡമ്ബകമംസു സണ്ഡം;

ജാനുദ്വയം ലളിത സാഗര ബുബ്ബലാഭം,

ഹോതം ജഗത്തയ നിജത്ത വിഭൂസിതുന്തേ.

൪൨.

ഛദ്ദന്തി ദിന്ന വരദന്ത യുഗോപമാനാ,

തം ഹത്ഥി സോണ്ഡ കമ പുണ്ണ ഗുണാ തവോരൂ;

ലീല പയോധി സിരി കേളി സുവണ്ണരമ്ഭാ,

ഖന്ധാവ ദേന്തു പരിപുണ്ണ ഗുനേ ജനാനാം.

൪൩.

ജങ്ഘക്ഖ കദ്വ്യ സമപ്പിത ചിത്തപാദ,

ചക്കദ്വയീ മനമനോജഹയോ മുനേ തേ;

സോനീ രഥോ സിരിവഹോ മനസാ ഭിരുള്ഹം,

ലോകത്തയം സിവപുരം ലഹു പാപയാതു.

൪൪.

രമ്മോര പാകട തടാക തടാ സവന്ത,

രോമാവലീ ജല പനാലിക കോടികട്ഠാ;

നാഭീ ഗഭീര സരസീ സിരി കേളിതാ തേ,

സസ്സേവിനം വ്യസന ഘമ്മമലം സമേതു.

൪൫.

കന്തിച്ഛടാ ലുളിത രൂപ പയോധി നാഭി,

ആവട്ട വട്ടിത നിമുജ്ജിത സബ്ബലോകോ;

സോഭഗ്ഗ തോയ നിവഹം വിസസോ പിവിത്വാ,

ലോകുത്തരാദി സുഖ മുച്ഛിതതം പയാതു.

൪൬.

ഗമ്ഭീര ചിത്തരഹദം പരിപൂരയിത്വാ,

തം സന്ദമാന കരുണമ്ബു പവാഹ തുല്യാ;

രോമാലിവല്ലിഹരി നാഭി സുഭാലവാലാ,

ദേതം ലഹും സിവഫലം ഭജതം മുനേ തേ.

൪൭.

ചാരൂര സാരിഫലകോ കുടിലഗ്ഗ ലോമ,

പന്തീ വിഭത്തി സഹിതോ സിരി കേളി സജ്ജോ;

സഗ്ഗാപവഗ്ഗ സുഖ ജൂതക കേളി ഹേതു,

ഹോതം തിലോക സുഖ ജൂതക സോണ്ഡകാനം.

൪൮.

ഗമ്ഭീര ചിത്ത രഹദോ ദര ഗാഹമാന,

മേത്താദയാ കരി വധൂ കര സന്നി കാസാ;

സബ്ബങ്ഗിനം സിവഫലം തനു ദേവ രുക്ഖേ,

സാഖാ സഖാ തവ ഭുജാ ഭജതം ദദന്തു.

൪൯.

നിഹാര ബിന്ദു സഹിതഗ്ഗദലോപ സോഭി,

ബ്യാലമ്ബ രത്ത പദുമദ്വയ ഭങ്ഗി ഭാജാ;

പാപാരിസീസലുനതേനിവ രത്ത രത്താ,

രത്താ കരാ തവ ഭവുമ്ഭുവി മങ്ഗലായ.

൫൦.

രുപസ്സിരീ ചരിത ചങ്കമ വിബ്ഭമാ തേ,

പിട്ഠീ യഥാ കലല മുദ്ധനി സേതു ഭൂതാ;

ഏവം ഭവണ്ണവ സമുത്തരണായ സേതു,

ഹോതമ്മഹാകനക സംകമ സന്നികാസാ.

൫൧.

സദ്ധമ്മ ദേസന മനോഹര ഭേരിനാദ,

സംചാരണേ സിവപുരം വിസിതും ജനാനം;

ഗീവാ സുവണ്ണമയ ചാരു മുതിങ്ഗ ഭേരി,

ഭാവമ്ഭജാ ഭവതു ഭൂത വിഭൂതിയാ തേ.

൫൨.

ലഖീ നിവാസ വദനമ്ബുജ മത്ത നിന്ന,

മാകഡ്ഢയം ജന വിലോചന ചഞ്ചരീകേ;

സോരബ്ഭ ധമ്മ മകരന്ദ നിസന്ദമാനം,

പിണേതു തേന സരസേന സഭാ ജനേ തേ.

൫൩.

ലഖീ സമാരുഹിത വത്തരഥേ രഥങ്ഗ,

ദ്വന്ദാനു കാരി മിഗ രാജ കപോല ലീലം;

താദങ്ക മണ്ഡലയുഗം വിയ കണ്ണഭാജം,

ഗണ്ഡത്ഥലദ്വ്യമലംകുരുതം ജനത്തേ.

൫൪.

ലാവണ്ണ മണ്ണവ പവാള ലതാ ദ്വയാഭം,

തന്ദേഹ ദേവ തരു പല്ലവ കന്തേ മന്തം;

വത്താരവിന്ദ മകരന്ദ പരാജിസോഭം,

രത്താധരദ്വയമധോ കുരുതം ജനാഘം.

൫൫.

ഉണ്ണാ സകുന്തിഗത മത്ഥക നത്ഥു കൂപ,

സുബ്ഭൂ ലകാര സഹിതോട്ഠ പവാള നാവാ;

ഗത്തുത്തരരണ്ണവ ഗതാ തവ ജന്തുകാനം,

ഹോതം ഭവണ്ണവ സമുത്തരനയ നാഥ.

൫൬.

ഇസം വികാസ പദുമോദര കേസരാലി,

ലീലാ വിനദ്ധ രുചിരാ തവ ദന്ത പന്തി;

വാനീ വധൂ ധരിത മാലതി മാല്യ തുല്യാ,

തസ്സം ജാനസ്സ മനരഞ്ജന മാചരേയ്യ.

൫൭.

സദ്ധമ്മ നിജ്ഝര സുരത്ത സിലാതലാഭാ,

ജിവ്ഹാ വചീ നട വധൂ കല രങ്ഗ ഭൂതാ;

സദ്ധമ്മ സേട്ഠ തരണീ നിഹിതപ്പിയാ തേ,

സംസാര സാഗര സമുത്തരണായ ഹോതു.

൫൮.

ദന്തംസു കഞ്ചുകീത രത്തധരോ പധാനേ,

ജിവ്ഹാ സുരത്ത സയനേ മുഖ മന്ദിരട്ഠേ;

ആമോക്ഖ മുത്തി വധുയാ സയിതായ തുയ്ഹം,

കുബ്ബന്തു സംഗമ മലം ജന സോതു കാമി.

൫൯.

ഉണ്ണാ തഥാഭിനവ പത്ത വരാഭി രാമാ,

ലീലോല്ലസന്ത ഭമുകദ്വയ നീല പത്താ;

ഘാനോരു ചാരു കദലീ വദനാ ലവാലാ,

തുയ്ഹം പവത്തതു ചിരം ജന മങ്ഗലായ.

൬൦.

ബാലത്ഥലീ ഹരി സിലാതല പിട്ഠികട്ഠ,

ഭൂവല്ലരിദ്വയ മയൂര യുഗസ്സ തുയ്ഹം;

പഞ്ചപ്പഭാ രുചിര പിച്ഛ യുഗസ്സിരീകം,

നേത്തദ്വയം മനസി പുഞ്ഛതു പാപധൂലിം.

൬൧.

ഇന്ദീവരാന്തഗത ഭിങ്ഗിക പന്തി ഭങ്ഗി,

പഞമ്ബുജസ്സരതതേ വിയ ഗച്ഛപന്തീ;

നേത്തമ്ബുജസ്സിരി തിരോകരണീവ തുയ്ഹം,

പമ്ഹാവലീ സിരിഗതേഹ തിരോ കരോന്തു.

൬൨.

വത്തുല്ലസമ്ബുജ വിലോചന ഹംസ തുണ്ഡ,

കഞ്ജംസു പിഞ്ജര മുലാല ലതാ ദ്വ്യാഭം;

ദോലാദ്വയംവ സവണദ്വ്യമത്ത ലക്ഖ്യാ,

ഹോതം തവജ്ജ ജനതാ മതിചാരഹേതു.

൬൩.

വമ്മീക മത്ഥക സയാനക ഭൂരിദത്ത,

ഭോഗിന്ദ ഭോഗവലി വിബ്ഭമമാ വഹന്തി;

ഘാനോപരിട്ഠിതമുനേ തവ തുണ്ണമുണ്ണാ,

തഗ്ഗാഹിനോ വിയ ജനസ്സ ദദാതു വിത്തം.

൬൪.

രൂപിന്ദിരായ വിജയേ ഖില ലോക രൂപം,

ഘാണോരു ചാരു പരിഘോപരി ബദ്ധ സിദ്ധാ;

നീലാഭ വാത വിലുഥന്ത വയദ്ധജാഭാ,

തിട്ഠന്തു സജ്ജ ദുരിതാരി ജയായ തേ ഭൂ.

൬൫.

ഉണ്ണസ്സിതോപല നിവേസിത ബുന്ദ സന്ധി,

ഘാണോരു പിണ്ഡകമഘാ തപ രുന്ധിതുന്തേ;

ഹോതമ്മുഖമ്ബുജ സിരീ സിരസുസ്സിതാഭം,

ഭൂ നീല പട്ടിക ലലാത സുവണ്ണ ഛത്തം.

൬൬.

രുപങ്ക വേദന വിലോചന ബാന ദിട്ഠീ,

ധാരാ നിസാന മണിവട്ട സിരീ സിരോ തേ;

സിദ്ധാ മതോസധ കതഞ്ജന പുഞ്ജ ലക്ഖീ,

ഹോതം ജനസ്സ നയനാമയ നാസനായ.

൬൭.

സക്ഖന്ധ ബാഹുയുഗ തോരന മജ്ഝ ഗീവാ,

ധരപ്പിതസ്സിരിഘതോ പരി മുസ്സവായ;

നീലുപ്പലാവ ഠപിതാ സവിഭത്തി കന്തേ,

കേസാ ഭവന്തു ഭുവനത്തയ മങ്ഗലായ.

൬൮.

ഹേമഗ്ഘിയേ ഠപിത നീല സിലാ കപാലേ,

പജ്ജോത ജാല ലലിതം മുനി സാരയന്തീ;

രൂപസ്സിരീ സിരസി ഭൂസിത ഹേമ മാലാ,

കാരാ കരോതു സുഭഗം തവ കേതു മാലാ.

൬൯.

ഭ്യാമപ്പഭാലി തവ കഞ്ചന മോര കാലേ,

സുരോദയേ വിതത ചന്ദക ചക്കലക്ഖീ;

മേഘാവനദ്ധ സിഖരുന്നത ഹേമ സേലാ,

യന്തിന്ദചാപ വികതീവ ദദാതു സോഭം.

൭൦.

പട്ഠായ തേ പണിധിതോ സുചി ദാന സീല,

നേക്ഖമ്മ പഞ്ഞ വിരിയക്ഖമ സച്ചധിട്ഠാ;

മേത്താ ഉപേക്ഖിതി ഇമേ ദസ പൂരതോവ,

പൂരേന്തു പാരമി ഗുണാ ജനതാനമത്തേ.

൭൧.

പത്തുത്തരുത്തരദസാ പണിധാന ബീജാ,

ചേതോരധരായ കരുണാ ജല സേഖ വുദ്ധാ;

സബ്ബഞ്ഞു ഞാണ ഫലദാ സതി വാട ഗുത്താ,

തം സമ്ഫലന്ദിസതു പാരമിതാ ലതാ തേ.

൭൨.

ആബോധി പുണ്ണമി പദിട്ഠ ദിനാദിതോ തേ,

സമ്ഭാര കാല സിത പക്ഖ കമാഭി വുദ്ധോ;

സമ്പുണ്ണ പാരമി ഗുണാമതരംസി തംവ,

സബ്ബങ്ഗി കുന്ദ കുമുദാനി പബോധയേയ്യ.

൭൩.

ആപച്ഛിമബ്ഭവ സിവപ്ഫല ലാഭ ദാനാ,

ദാനപ്പബന്ധമപിദാന ഫലപ്പഭന്ദം;

സംവഡ്ഢയി ത്വം അഭിപത്ഥനതോ യഥേവം,

ജന്തുത്തരുത്തര ഫലം ഖലു സമ്ഭുനന്തു.

൭൪.

ആരമ്ഭതോപ്പഭുതി യാവ തവഗ്ഗമഗ്ഗാ,

വിക്ഖാലിത ഘകലുസം സുചി സീല തോയം;

മേത്താ ദയാ മധുര സീതലതായുപേതം,

സോധേതു ത്വംവ ഭവ നിസ്സിത ജന്തു മേതം.

൭൫.

ആപച്ചിമത്തമഭിനിക്ഖമനാഭിയോഗാ,

പട്ഠായ തമ്പഭവതോ പരിപുണ്ണ ഗേഹാ;

ത്വം സബ്ബ ജാതി ഗഹതോ അപി നിക്ഖമിത്ഥോ,

ഏവം ജനാ ഭവ ദുഖാ ഖലു നിക്ഖമന്തു.

൭൬.

ഏകഗ്ഗതോ പല തലേ നിസിതാ ചിരന്ധി,

ധാരാ സുചിത്തു സുതലേ സതി ദണ്ഡ ബദ്ധേ;

നിബ്ബിജ്ഝി ലക്ഖണ ധനുട്ഠിതി സന്തി ലക്ഖം,

ഖിത്താ തയോനമനു വിജ്ഝതു ജന്തു ഖിത്താ.

൭൭.

ത്വം പാരമീ ജല നിധിം ചതുരിഹ ബാഹു,

സത്തീഹി സുത്തരി ചിരം ജനകോവ സിന്ധും;

സമ്പന്ന വിക്കമ ഫലോസി യഥാ ചസോവ,

ഏവം ജനാ വിരിയതപ്ഫലമേ ധയന്തു.

൭൮.

സത്ത പരധ ദഹനേസു ചിരം സുധന്തം,

ഖന്തീ സുവണ്ണ കത രൂപ സമന്തിമത്താ;

സബ്ബാ പരാധമസഹി ത്വംഅസയ്ഹമേവം,

സബ്ബേ ജനാപി ഖമനേന ഭജന്തു സന്തിം.

൭൯.

ലക്ഖാധികം ചതുര സംഖിയ കപ്പ കാലം,

സച്ചേന സുട്ഠു പരിഭാവിത വാചിനോ തേ;

വാചായ സച്ച ഫുസിതായ സമേന്തി ജന്തു,

ഏവം വിസുദ്ധ വചനാ ജനതാ ഭവന്തു.

൮൦.

ആദിന്ന ധമ്മ മഹിയത്ഥിര സുപ്പതിട്ഠാ,

ധിട്ഠാന പാരമി മഹാ വജിരദ്ദി തുയ്ഹം;

സത്തേന കേന പി യഥാഹി അഭേജ്ജ നേജ്ജോ,

ഏവം ജനാപി കുസലേസു അധിട്ഠ ഹന്തു.

൮൧.

ത്വം സബ്ബ സത്ത ചിരഭാവിത മേത്ത ചിത്ത,

തോയേഹി സംസമിത കോധ മഹാ ഹുതാസോ;

ലോകുത്തരം തദിതരം ഹിതമാവഹിത്ഥോ,

ഏവം ജനേസു ജനതാ ഹിതമാവഹന്തൂ.

൮൨.

മിത്തോപകാര പടിപക്ഖ ജനാപകാരേ,

ത്വം നിബ്ബികാര മനസോ ചിരഭാവനായ;

പത്തോസിലാഭ പഭുതട്ടുസു നിബ്ബികാരം,

ഏവം ജനാനുനയ കോപ നുദാ ഭവന്തു.

൮൩.

സമ്പന്ന ഹേതു വിഭവോ തുസിതേ വിമാനം,

യുത്തം ഗുണേഹി നവഭിപ്പദവീ വിമാനം;

ത്വം വാധിപരമിധിരോഹിനിയാ തിലോകോ,

ആരോഹതു ഭയ സുഖം പദവീ വിമാനം.

൮൪.

ത്വംവേരഹംസി സമബുജ്ഝി യഥാച സമ്മാ,

സമ്പന്ന വിജ്ജ ചരണോ സുഗതോസി ഹോന്തു;

ലോകം വിദോ പുരിസദമ്മസുസാരഥീ സി,

സത്ഥാസി ബുജ്ഝി ഭഗവാ സി തഥേവ ജന്തു.

൮൫.

സച്ചിത്ത ഭൂ നിദഹിതം ജനതായ തുയ്ഹം,

കല്യാണവണ്ണരതനണ്ണവജാതിഭിന്നം;

ദുക്ഖഗ്ഗി ചോര ജലുപദ്ദുതജാതി ഗേഹേ,

തസ്സാ സുഖം ഭവതു ജീവിതുമാപദായ.

൮൬.

വാചാ വിചിത്ത വര തന്തു ഗതങ്ഗി കണ്ഠേ,

സ്വാ മുത്ത സഗ്ഗുണ മഹാ രതനാ വലീ തേ;

വേവണ്ണി യത്തനി ഭവം സകലമ്പഹായ,

ഹോതഞ്ജനസ്സ സിരി സങ്ഗമ മങ്ഗലായ.

൮൭.

തം സഗ്ഗുണത്ഥവ ദഹട്ഠ സുതിപ്പനാലി,

നിസ്സന്ദമാന ഗുണനീര നിപാന തിന്തേ;

ഖേത്തേത്ത സഞ്ഞിനി ജനാ കത ലോമ ഹംസ,

ബീജങ്കുരീ കുസല സസ്സ ഫലം ലഭന്തു.

൮൮.

ആപായികപ്പഭുതി ദുക്ഖ നിദാഘ കാല,

സന്താപിതാ നിഖില ലോക മനോ കദമ്ബാ;

തം വങ്ണ മേഘ ഫുസനാ ഹസനങ്കുരേഹി,

ഇദ്ധാ ഭവന്തു മതി വല്ലരി വേല്ലീതാ തേ.

൮൯.

ഹേതുദ്ദസാ ഫലദസാ സമവട്ഠിതം തം,

സബ്ബത്ഥ സത്ത ഹിതമാവഹണേന സിദ്ധം;

ചിന്താപഥാതിഗനുഭാവ വിഭാവനന്തേ,

ഭൂതാനമത്ഥു ചരിതബ്ഭുതമത്ഥ സിധ്യാ.

൯൦.

അങ്ഗാരകാസുമഭിലങ്ഘിയ ദാന കാലേ,

ഭത്തത്തനോ പദ പടിച്ഛക പങ്കജാ ച;

യാതക്ഖണേ തവ പദേ ധടമുട്ഠഹിത്വാ,

പങ്കേരുഹാം സിവ മധും സരതം ദദന്തു.

൯൧.

സച്ചേന മച്ഛ പതി വസ്സിത വസ്സധാരാ,

സത്തേ ദയായ തവ വസ്സിത വസ്സധാരാ;

ഗിമ്ഹേ ജനസ്സ സമയിംസു യഥാ തഥാതാ,

ധമമ്ബുവുട്ഠിവ സമേന്തു കിലേസ ദാഹേ.

൯൨.

ഛദ്ദന്ത നാഗ പതിനാ ഖമതാ പരാധം,

ഛേത്വാ കരേ ഠപിത ദന്തവരാവ ലുദ്ദം;

ലോകേ ഹിതായ ഠപിതാ തവ ദന്ത ധാതു,

സേട്ഠാ ജനം സിവ പുരം ലഹു പാപയന്തു.

൯൩.

തം തേമിയാഖ്യ യതിനോസ്സമ മാലകമ്ഹി,

ഓകിണ്ണ മുത്ത കനകാ വുജ വിപ്പകിണ്ണാ;

കാരുഞ്ഞ വാരിദ ചുതോ ദക ബിന്ദു ബന്ധൂ,

ധാതു സമേന്തു തവ ജന്തുസു ദുക്ഖദാഹേ.

൯൪.

രട്ഠസ്സ അത്ഥ ചരണായ അസമ്മുഖസ്സ,

രാമേന ദിന്ന തിണ സംഖത പാദുകാവ;

ഭുത്താ തയാ ചിരമസമ്മുഖ നാഗതസ്സ,

ലോകസ്സ അത്ഥമനു തിട്ഠതു പത്ത ധാതു.

൯൫.

വുത്തോ ജനാനമുപദിസ്സ വരാഹ രഞ്ഞാ,

സത്ഥിം സഹസ്സ സരദം വിയ ഞായ ധമ്മോ;

ആദേയ്യ ഹേയ്യമുപദിസ്സ തയാ പവുത്തോ,

ധമ്മോ പവത്തതു ചിരം ജനതാ ഹിതായ.

൯൬.

മാരാരി മദ്ദന ഹിതാധിഗമം കരോതാ,

ഭത്തോ തയാ വര മഹാ ജയ ബോധി രാജാ;

സഗ്ഗാ പവവഗ്ഗ ഹിതഹേതു ജനസ്സ ഹന്ത്വാ,

സബ്ബന്തരായമിഹ തിട്ഠതു സുട്ഠു സജ്ജോ.

൯൭.

സാമോദ വണ്ണ ഭജനീ ഗുണ മഞ്ജരീയം,

ചരിയാ ലതാ വികസിതാ തവ സപ്ഫലങ്ഗം;

ഓകിണ്ണ ചിത്ത മധുപേ രസ പീണയന്തി,

സമ്ഭാവിതാ ഭുവി പവത്തതു മത്ഥകേഹി.

൯൮.

സമ്ബുദ്ധ സേലവലയന്തര ജാനനവ്ഹാ,

നോത്തത്തതോ തിപഥഗാ യതി സാഗരട്ഠാ;

ധമ്മാ പഗാ സുതി വസേ തരിതേ പുണന്തി,

സമ്ഭാര സസ്സമിഹ വത്തതു പചയന്തി.

൯൯.

പഞ്ഞാണ കൂപ സിത പഗ്ഗഹ വായു ഗാഹീ,

സദ്ധാ ലകാര സഹിതാ സതി പോത വാഹാ;

സമ്പാപയാതു ഭവ സാഗര പാര തീര,

സപ്പത്തനം വരധനേ പതി പത്തി നാവാ.

൧൦൦.

ബോജ്ഝങ്ഗ സത്ത രതനാകര ധമ്മ ഖന്ധ,

ഗമ്ഭീര നീര ചയ സാസന സാഗരോ സം;

സോ സീല്യനന്ത തനു വേടിഥ ഞാണ മന്ഥ,

സേലേന മന്ഥിതവതം ദിസതാ മതം വേ.

൧൦൧.

വുത്തേന തേന വിധിനാ വിധിനാ തതോ തം,

ലദ്ധാ നുഭൂതമമതം ഖില ദോസ നാസം;

അച്ചന്ത രോഗ ജരതാ മരണാ ഭി ഭൂതം,

ഭൂതം കരോതു അമരം അജരം അരോഗം.

൧൦൨.

സദ്ധമ്മ രാജ രവിനിഗ്ഗത ധമ്മരംസി,

ഫുല്ലോ ധുതങ്ഗദല സംവര കേസരാലി;

സങ്ഘാരവിന്ദ നികരോ സമധും സമാധി,

സക്കിണ്ണികോ ദിസതു സാസന വാപി ജതോ.

൧൦൩.

ആനന്ദ രഞ്ഞ രതനാദി മഹാ യതിന്ദ,

നിച്ചപ്പബുദ്ധ പദുമപ്പിയ സേവിനങ്ഗീ;

ബുദ്ധപ്പിയേന ഘന ബുദ്ധ ഗുണപ്പിയേന,

ഥേരാലിനാ രചിത പജ്ജമധും പിബന്തു.

൧൦൪.

ഇത്ഥം രൂപ ഗുണാനുകിത്തനവസാ തം തം ഹിതാ സിം സതോ,

വത്ഥാനുസ്സതി വത്തിത ഇഹ യഥാ സത്തേസു മേത്താ ച മേ;

ഏവം താഭി ഭവന്ത രുത്തര തരാ വത്തന്തു താ ബോധി മേ,

സംയോഗോച ധനേഹി സന്തിഹി ഭവേ കല്യാന മിത്തേഹി ച.