📜

നമോ തസ്സ ഭഗവതോ അരഹതോ സമ്മാസമ്ബുദ്ധസ്സ

അഭിധാനപ്പദീപികാ

ബുദ്ധപ്പണാമോ

൧.

തഥാഗതോ ¶ യോ കരുണാകരോ കരോ,

പയാത’മോസജ്ജ സുഖപ്പദം പദം;

അകാ പരത്ഥം കലിസമ്ഭവേ ഭവേ,

നമാമി തം കേവലദുക്കരം കരം.

ധമ്മപ്പണാമോ

൨.

അപൂജയും യം മുനികുഞ്ജരാ ജരാ,

രുജാദിമുത്താ യഹിമുത്തരേ തരേ;

ഠിതാ തിവട്ടമ്ബുനിധിം നരാനരാ,

തരിംസു തം ധമ്മമഘപ്പഹം പഹം.

സങ്ഘപ്പണാമോ

൩.

ഗതം മുനിന്ദോ’രസസൂനുതം നുതം,

സുപുഞ്ഞഖേത്തം ഭുവനേ സുതം സുതം;

ഗണമ്പി പാണീകതസംവരം വരം,

സദാ ഗുണോഘേന നിരന്തര’ന്തരം.

പടിഞ്ഞാ

൪.

നാമലിങ്ഗേസു കോസല്ല, മത്ഥനിച്ഛയകാരണം;

യതോ മഹബ്ബലം ബുദ്ധ, വചനേ പാടവത്ഥിനം.

൫.

നാമലിങ്ഗാന്യ’തോ ¶ ബുദ്ധ, ഭാസിതസ്സാ’രഹാന്യ’ഹം;

ദസ്സയന്തോ പകാസേസ്സ, മഭിധാനപ്പദീപികം.

പരിഭാസാ

൬.

ഭിയ്യോ രൂപന്തരാ സാഹ, ചരിയേന ച കത്ഥചി;

ക്വചാ’ ഹച്ചവിധാനേന ഞേയ്യം ഥീപുന്നപുംസകം.

൭.

അഭിന്നലിങ്ഗാനംയേവ, ദ്വന്ദോ ച, ലിങ്ഗവാചകാ;

ഗാഥാപാദന്തമജ്ഝട്ഠാ, പുബ്ബം യന്ത്യപരേ പരം.

൮.

പുമിത്ഥിയം പദം ദ്വീസു, സബ്ബലിങ്ഗേ ച തീസ്വിതി;

അഭിധാനന്തരാരമ്ഭേ, ഞേയ്യം ത്വ’ന്ത മഥാദി ച.

൯.

ഭിയ്യോ പയോഗ മാഗമ്മ, സോഗതേ ആഗമേ ക്വചി;

നിഘണ്ഡു യുത്തി ഞ്ചാനീയ, നാമലിങ്ഗം കഥീയതീതി.

൧. സഗ്ഗകണ്ഡ

൧.

ബുദ്ധോ ദസബലോ സത്ഥാ, സബ്ബഞ്ഞൂ ദ്വിപദുത്തമോ;

മുനിന്ദോ ഭഗവാ നാഥോ, ചക്ഖുമ’ങ്ഗീരസോ മുനി.

൨.

ലോകനാഥോ’ നധിവരോ, മഹേസി ച വിനായകോ;

സമന്തചക്ഖു സുഗതോ, ഭൂരിപഞ്ഞോ ച മാരജി.

൩.

നരസീഹോ നരവരോ, ധമ്മരാജാ മഹാമുനി;

ദേവദേവോ ലോകഗരു, ധമ്മസ്സാമീ തഥാഗതോ.

൪.

സയമ്ഭൂ സമ്മാസമ്ബുദ്ധോ, വരപഞ്ഞോ ച നായകോ;

ജിനോ, സക്കോ തു സിദ്ധത്ഥോ, സുദ്ധോദനി ച ഗോതമോ.

൫.

സക്യസീഹോ തഥാ സക്യ, മുനി ചാദിച്ചബന്ധു ച;

൬.

മോക്ഖോ നിരോധോ നിബ്ബാനം, ദീപോ തണ്ഹക്ഖയോ പരം;

താണം ലേണ മരൂപഞ്ച, സന്തം സച്ച മനാലയം.

൭.

അസങ്ഖതം സിവ മമതം സുദുദ്ദസം,

പരായണം സരണ മനീതികം തഥാ;

അനാസവം ധുവ മനിദസ്സനാ’ കതാ,

പലോകിതം നിപുണ മനന്ത മക്ഖരം.

൮.

ദുക്ഖക്ഖയോ ¶ ബ്യാബജ്ഝഞ്ച [ബ്യാപജ്ജം (ടീകാ)], വിവട്ടം ഖേമ കേവലം;

അപവഗ്ഗോ വിരാഗോ ച, പണീത മച്ചുതം പദം.

൯.

യോഗക്ഖേമോ പാര മപി, മുത്തി സന്തി വിസുദ്ധിയോ;

വിമുത്യ’ സങ്ഖതധാതു, സുദ്ധി നിബ്ബുതിയോ സിയും.

൧൦.

ഖീണാസവോ ത്വ’സേക്ഖോ ച, വീതരാഗോ തഥാ’ രഹാ;

ദേവലോകോ ദിവോ സഗ്ഗോ [നാകോ (സീ.)],

തിദിവോ തിദസാലയോ.

൧൧.

തിദസാ ത്വ’മരാ ദേവാ, വിബുധാ ച സുധാസിനോ;

സുരാ മരൂ ദിവോകാ ചാ, മതപാ സഗ്ഗവാസിനോ.

൧൨.

നിജ്ജരാ’ നിമിസാ ദിബ്ബാ, അപുമേ ദേവതാനി ച [ദേവതാ ഏവ ദേവതാനി, സകത്ഥേ നിപച്ചയോ (ടീകാ)];

൧൩.

സിദ്ധോ ഭൂതോ ച ഗന്ധബ്ബോ, ഗുയ്ഹകോ യക്ഖ രക്ഖസാ;

കുമ്ഭണ്ഡോ ച പിസാചാ’ദീ, നിദ്ദിട്ഠാ ദേവയോനിയോ.

൧൪.

പുബ്ബദേവാ സുരരിപൂ, അസുരാ ദാനവാ പുമേ;

തബ്ബിസേസാ പഹാരാദോ, സമ്ബരോ ബലിആദയോ.

൧൫.

പിതാമഹോ പിതാ ബ്രഹ്മാ, ലോകേസോ കമലാസനോ;

തഥാ ഹിരഞ്ഞഗബ്ഭോ ച, സുരജേട്ഠോ പജാപതി.

൧൬.

വാസുദേവോ ഹരി [ഹരീ (ടീകാ)] കണ്ഹോ, കേസവോ ചക്കപാണ്യ’ഥ;

മഹിസ്സരോ സിവോ സൂലീ, ഇസ്സരോ പസുപത്യ’പി.

൧൭.

ഹരോ വുത്തോ കുമാരോ തു, ഖന്ധോ സത്തിധരോ ഭവേ;

൧൮.

സക്കോ പുരിന്ദദോ ദേവ, രാജാ വജിരപാണി ച;

സുജമ്പതി സഹസ്സക്ഖോ, മഹിന്ദോ വജിരാവുധോ.

൧൯.

വാസവോ ച ദസസത, നയനോ തിദിവാധിഭൂ;

സുരനാഥോ ച വജിര, ഹത്ഥോ ച ഭൂതപത്യ’പി.

൨൦.

മഘവാ കോസിയോ ഇന്ദോ, വത്രഭൂ പാകസാസനോ;

വിഡോജോ ഥ സുജാ തസ്സ [സുജാതാ’സ്സ (ടീകാ)], ഭരിയാ ഥ പുരം ഭവേ.

൨൧.

മസക്കസാരാ ¶ [മസക്കസാരോ (സീ.)] വസ്സോക, സാരാ ചേവാ’ മരാവതീ;

വേജയന്തോ തു പാസാദോ,

സുധമ്മാ തു സഭാ മതാ.

൨൨.

വേജയന്തോ രഥോ തസ്സ,

വുത്തോ മാതലി സാരഥി;

ഏരാവണോ ഗജോ പണ്ഡു, കമ്ബലോ തു സിലാസനം.

൨൩.

സുവീരോച്ചാദയോ പുത്താ, നന്ദാ പോക്ഖരണീ ഭവേ;

നന്ദനം മിസ്സകം ചിത്ത, ലതാ ഫാരുസകം വനാ.

൨൪.

അസനി ദ്വീസു കുലിസം, വജിരം പുന്നപുംസകേ;

അച്ഛരായോത്ഥിയം വുത്താ, രമ്ഭാ അലമ്ബുസാദയോ;

ദേവിത്ഥിയോ ഥ ഗന്ധബ്ബാ, പഞ്ചസിഖോതി ആദയോ.

൨൫.

വിമാനോ നിത്ഥിയം ബ്യമ്ഹം, പീയൂസം ത്വമതം സുധാ;

സിനേരു മേരു തിദിവാ, ധാരോ നേരു സുമേരു ച.

൨൬.

യുഗന്ധരോ ഈസധരോ, കരവീകോ സുദസ്സനോ;

നേമിന്ധരോ വിനതകോ, അസ്സകണ്ണോ കുലാചലാ.

൨൭.

മന്ദാകിനീ തഥാ’കാസ, ഗങ്ഗാ സുരനദീ പ്യഥ;

൨൮.

കോവിളാരോ തഥാ പാരി, ച്ഛത്തകോ പാരിജാതകോ;

കപ്പരുക്ഖോ തു സന്താനാ, ദയോ ദേവദ്ദുമാ സിയും.

൨൯.

പാചീ പതീഝു’ ദീചി’ത്ഥീ, പുബ്ബ പച്ഛിമ ഉത്തരാ;

ദിസാഥ ദക്ഖിണാ’ പാചീ, വിദിസാ’നുദിസാ ഭവേ.

൩൦.

ഏരാവതോ [ഏരാവണോ (സീ.), അമരകോസേ പന ഏരാവതോ ഏവ അത്ഥി] പുണ്ഡരീകോ, വാമനോ കുമുദോ’ ഞ്ജനോ;

പുപ്ഫദന്തോ സബ്ബഭുമ്മോ, സുപ്പതീകോ ദിസാഗജാ.

൩൧.

ധതരട്ഠോ ച ഗന്ധബ്ബാ, ധിപോ, കുമ്ഭണ്ഡസാമി തു;

വിരുള്ഹകോ, വിരൂപക്ഖോ, തു നാഗാധിപതീരിതോ.

൩൨.

യക്ഖാധിപോ വേസ്സവണോ, കുവേരോ നരവാഹനോ;

അളകാ [അലകാ (അമരകോസ)] ളകമന്ദാസ്സ, പുരീ, പഹരണം ഗദാ;

ചതുദ്ദിസാന മധിപാ, പുബ്ബാദീനം കമാ ഇമേ.

൩൩.

ജാതവേദോ ¶ സിഖീ ജോതി, പാവകോ ദഹനോ’ നലോ;

ഹുതാവഹോ’ ച്ചിമാ ധൂമ, കേത്വ’ഗ്ഗി ഗിനി ഭാനുമാ.

൩൪.

തേജോ ധൂമസിഖോ വായു, സഖോ ച കണ്ഹവത്തനീ;

വേസ്സാനരോ ഹുതാസോ ഥ, സിഖാജാല’ച്ചി ചാപുമേ.

൩൫.

വിപ്ഫുലിങ്ഗം ഫുലിങ്ഗഞ്ച, ഭസ്മാ [‘ഭസ്മാ’ തിപദം രാജാദിഗണേ പരിയാപന്നം (രൂപസിദ്ധി-ഉണാദി), ഭസ്മം (സീ.)] തു സേട്ഠി ഛാരികാ;

൩൬.

കുക്കുളോ തു’ണ്ഹഭസ്മസ്മി, മങ്ഗാരോ’ലാത മുമ്മുകം [തികം ദിത്തകട്ഠാദിന്ധനേ (ടീകാ)];

സമിധാ ഇധുമം ചേ’ധോ, ഉപാദാനം തഥിന്ധനം.

൩൭.

അഥോ’ഭാസോ പകാസോ ചാ,

'ലോകോ’ജ്ജോതാ’തപാ സമാ;

മാലുതോ പവനോ വായു, വാതോ’നില സമീരണാ;

ഗന്ധവാഹോ തഥാ വായോ, സമീരോ ച സദാഗതി.

൩൮.

വായുഭേദാ ഇമേ ഛു’ദ്ധ, ങ്ഗമോ ചാധോഗമോ തഥാ;

കുച്ഛിട്ഠോ ച കോട്ഠാസയോ, അസ്സാസങ്ഗാനുസാരിനോ.

൩൯.

അഥോ അപാനം പസ്സാസോ,

അസ്സാസോ ആന മുച്ചതേ.

൪൦.

വേഗോ ജവോ രയോ ഖിപ്പം, തു സീഘം തുരിതം ലഹു;

ആസു തുണ്ണ മരം ചാവി, ലമ്ബിതം തുവടംപി ച.

൪൧.

സതതം നിച്ച മവിരതാ, നാരത സന്തത മനവരതഞ്ച ധുവം;

ഭുസ മതിസയോ ച ദള്ഹം, തിബ്ബേ’കന്താ’തിമത്ത, ബാള്ഹാനി;

ഖിപ്പാദീ പണ്ഡകേ ദബ്ബേ, ദബ്ബഗാ തേസു യേ തിസു.

൪൨.

അവിഗ്ഗഹോ തു കാമോ ച, മനോഭൂ മദനോ ഭവേ;

അന്തകോ വസവത്തീ ച, പാപിമാ ച പജാപതി.

൪൩.

പമത്തബന്ധു കണ്ഹോ ച, മാരോ നമുചി, തസ്സ തു;

തണ്ഹാ’രതീ രഗാ ധീതൂ, ഹത്ഥീ തു ഗിരിമേഖലോ.

൪൪.

യമരാജാ ച വേസായീ, യമോ’സ്സ നയനാവുധം;

വേപചിത്തി പുലോമോ ച, കിമ്പുരിസോ തു കിന്നരോ.

൪൫.

അന്തലിക്ഖം ഖ’മാദിച്ച, പഥോ’ബ്ഭം ഗഗന’മ്ബരം;

വേഹാസോ ചാനിലപഥോ, ആകാസോ നിത്ഥിയം നഭം.

൪൬.

ദേവോ ¶ വേഹായസോ താരാ,

പഥോ സുരപഥോ അഘം.

൪൭.

മേഘോ വലാഹകോ ദേവോ, പജ്ജുന്നോ’മ്ബുധരോ ഘനോ;

ധാരാധരോ ച ജീമൂതോ, വാരിവാഹോ തഥാ’മ്ബുദോ.

൪൮.

അബ്ഭം തീസ്വഥ വസ്സഞ്ച, വസ്സനം വുട്ഠി നാരിയം;

സതേരതാ’ക്ഖണാ വിജ്ജു, വിജ്ജുതാ ചാചിരപ്പഭാ.

൪൯.

മേഘനാദേ തു ധനിതം, ഗജ്ജിതം രസിതാദി ച;

ഇന്ദാവുധം ഇന്ദധനു, വാതക്ഖിത്തമ്ബു സീകരോ.

൫൦.

ആസാരോ ധാരാ സമ്പാതോ,

കരകാ തു ഘനോപലം;

ദുദ്ദിനം മേഘച്ഛന്നാഹേ, പിധാനം ത്വപധാരണം.

൫൧.

തിരോധാന’ന്തരധാനാ, പിധാന ഛാദനാനി ച;

ഇന്ദു ചന്ദോ ച നക്ഖത്ത, രാജാ സോമോ നിസാകരോ.

൫൨.

ഓസധീസോ ഹിമരംസി, സസങ്കോ ചന്ദിമാ സസീ;

സീതരംസി നിസാനാഥോ, ഉളുരാജാ ച മാ പുമേ.

൫൩.

കലാ സോളസമോ ഭാഗോ, ബിമ്ബം തു മണ്ഡലം ഭവേ;

അഡ്ഢോ ത്വദ്ധോ ഉപഡ്ഢോ ച, വാ ഖണ്ഡം സകലം പുമേ.

൫൪.

അദ്ധം വുത്തം സമേ ഭാഗേ, പസാദോ തു പസന്നതാ;

കോമുദീ ചന്ദികാ ജുണ്ഹാ, കന്തി സോഭാ ജുതി ച്ഛവി.

൫൫.

കലങ്കോ ലഞ്ഛനം ലക്ഖം, അങ്കോ’ഭിഞ്ഞാണ ലക്ഖണം;

ചിഹനം ചാപി സോഭാ തു, പരമാ സുസമാ ഥ ച.

൫൬.

സീതം ഗുണേ, ഗുണിലിങ്ഗാ, സീത സിസിര സീതലാ;

ഹിമം തുഹിന മുസ്സാവോ, നീഹാരോ മഹികാ പ്യഥ.

൫൭.

നക്ഖത്തം ജോതി ഭം താരാ, അപുമേ താരകോ’ളു ച;

൫൮.

അസ്സയുജോ ഭരണിത്ഥീ, സകത്തികാ രോഹിണീ പിച;

മിഗസിര [മഗസിര (സീ.)] മദ്ദാ ച പുനബ്ബസു, ഫുസ്സോ [പുസ്സോ (ടീ.)] ചാസിലേസ’പി.

൫൯.

മാഘാ [മഘ (സീ.)] ച ഫഗ്ഗുനീ ദ്വേ ച, ഹത്ഥാ ചിത്താ ച സ്വാതിപി;

വിസാഖാ’ നുരാധാ ജേട്ഠാ, മൂലാ’ സാള്ഹാ ദുവേ തഥാ.

൬൦.

സവണോ ¶ ച ധനിട്ഠാ ച, സതഭിസജോ പുബ്ബു’ത്തരഭദ്ദപദാ;

രേവത്യപീതി കമതോ, സത്താധികവീസനക്ഖത്താ.

൬൧.

സോബ്ഭാനു കഥിതോ രാഹു, സൂരാദീ തു നവഗ്ഗഹാ;

രാസി മേസാദികോ ഭദ്ദ, പദാ പോട്ഠപദാ സമാ.

൬൨.

ആദിച്ചോ സൂരിയോ സൂരോ, സതരംസി ദിവാകരോ;

വേരോചനോ ദിനകരോ, ഉണ്ഹരംസി പഭങ്കരോ.

൬൩.

അംസുമാലീ ദിനപതി, തപനോ രവി ഭാനുമാ;

രംസിമാ ഭാകരോ ഭാനു, അക്കോ സഹസ്സരംസി ച.

൬൪.

രംസി ആഭാ പഭാ ദിത്തി, രുചി ഭാ ജുതി ദീധിതി;

മരീചി ദ്വീസു ഭാന്വം’സു, മയൂഖോ കിരണോ കരോ.

൬൫.

പരിധി പരിവേസോ ഥ, മരീചി മിഗതണ്ഹികാ;

സൂരസ്സോദയതോ പുബ്ബു’, ട്ഠിതരംസി സിയാ’ രുണോ.

൬൬.

കാലോ’ദ്ധാ സമയോ വേലാ,

തബ്ബിസേസാ ഖണാദയോ;

ഖണോ ദസച്ഛരാകാലോ,

ഖണാ ദസ ലയോ ഭവേ.

൬൭.

ലയാ ദസ ഖണലയോ,

മുഹുത്തോ തേ സിയാ ദസ;

ദസ ഖണമുഹുത്തോ തേ, ദിവസോ തു അഹം ദിനം.

൬൮.

പഭാതഞ്ച വിഭാതഞ്ച, പച്ചൂസോ കല്ല മപ്യഥ;

അഭിദോസോ പദോസോ ഥ,

സായോ സഞ്ഝാ ദിനച്ചയോ.

൬൯.

നിസാ ച രജനീ രത്തി, തിയാമാ സംവരീ ഭവേ;

ജുണ്ഹാ തു ചന്ദികായുത്താ, തമുസ്സന്നാ തിമിസികാ.

൭൦.

നിസീഥോ മജ്ഝിമാ രത്തി, അഡ്ഢരത്തോ മഹാനിസാ;

അന്ധകാരോ തമോ നിത്ഥീ, തിമിസം തിമിരം മതം.

൭൧.

ചതുരങ്ഗതമം ഏവം, കാളപക്ഖചതുദ്ദസീ;

വനസണ്ഡോ ഘനോ മേഘ, പടലം ചാ’ഡ്ഢരത്തി ച.

൭൨.

അന്ധതമം ¶ ഘനതമേ, പഹാരോ യാമ, സഞ്ഞിതോ;

പാടിപദോ തു ദുതിയാ, തതിയാദീ തിഥീ [തിഥി], തായതി പാലേതീതി തിഥി, താ+ഇതി (ണ്വാദി) ദ്വിസു.

൭൩.

പന്നരസീ പഞ്ചദസീ, പുണ്ണമാസീ തു പുണ്ണമാ;

അമാവസീ പ്യമാവാസീ, ഥിയം പന്നരസീ’ പരാ.

൭൪.

ഘടികാ സട്ഠ്യ’ ഹോരത്തോ, പക്ഖോ തേ ദസ പഞ്ച ച;

തേ തു പുബ്ബാപരാ സുക്ക,

കാളാ, മാസോ തു തേ ദുവേ.

൭൫.

ചിത്തോ വേസാഖ, ജേട്ഠോ ചാ, സാള്ഹോ ദ്വീസു ച സാവണോ;

പോട്ഠപാദ’സ്സയുജാ ച, മാസാ ദ്വാദസ കത്തികോ.

൭൬.

മാഗസിരോ തഥാ ഫുസ്സോ, കമേന മാഘ ഫഗ്ഗുണാ;

കത്തിക’സ്സയുജാ മാസാ, പച്ഛിമ പുബ്ബകത്തികാ.

൭൭.

സാവണോ നിക്ഖമനീയോ,

ചിത്തമാസോ തു രമ്മകോ.

൭൮.

ചതുരോ ചതുരോ മാസാ, കത്തികകാളപക്ഖതോ;

കമാ ഹേമന്ത ഗിമ്ഹാന, വസ്സാനാ ഉതുയോ ദ്വിസു.

൭൯.

ഹേമന്തോ സിസിര മുതൂ,

ഛ വാ വസന്തോ ച ഗിമ്ഹ വസ്സാനാ;

സരദോതി കമാ മാസാ, ദ്വേ ദ്വേ വുത്താനുസാരേന.

൮൦.

ഉണ്ഹോ നിദാഘോ ഗിമ്ഹോഥ,

വസ്സോ വസ്സാന പാവുസാ;

ഉതൂഹി തീഹി വസ്സാനാ, ദികേഹി ദക്ഖിണായനം.

൮൧.

ഉത്തരായന മഞ്ഞേഹി, തീഹി വസ്സായനദ്വയം;

വസ്സ സംവച്ഛരാ നിത്ഥീ, സരദോ ഹായനോ സമാ.

൮൨.

കപ്പക്ഖയോ തു സംവട്ടോ, യുഗന്ത പലയാ അപി;

അലക്ഖീ കാലകണ്ണിത്ഥീ, അഥ ലക്ഖീ സിരി’ത്ഥിയം.

൮൩.

ദനു ദാനവമാതാ ഥ, ദേവമാതാ പനാ’ദിതി;

൮൪.

പാപഞ്ച കിബ്ബിസം വേരാ, ഘം ദുച്ചരിത ദുക്കടം;

അപുഞ്ഞാ’കുസലം കണ്ഹം, കലുസം ദുരിതാ’ഗു ച.

൮൫.

കുസലം ¶ സുകതം സുക്കം, പുഞ്ഞം ധമ്മ മനിത്ഥിയം;

സുചരിത മഥോ ദിട്ഠ, ധമ്മികം ഇഹലോകികം.

൮൬.

സന്ദിട്ഠിക മഥോ പാര, ലോകികം സമ്പരായികം;

തക്കാലം തു തദാത്വം ചോ,

ത്തരകാലോ തു ആയതി.

൮൭.

ഹാസോ’ ത്തമനതാ പീതി, വിത്തി തുട്ഠി ച നാരിയം;

ആനന്ദോ പമുദാ’മോദോ, സന്തോസോ നന്ദി സമ്മദോ.

൮൮.

പാമോജ്ജഞ്ച പമോദോ ഥ, സുഖം സാതഞ്ച ഫാസ്വ’ഥ;

ഭദ്ദം സേയ്യോ സുഭം ഖേമം, കല്യാണം മങ്ഗലം സിവം.

൮൯.

ദുക്ഖഞ്ച കസിരം കിച്ഛം, നീഘോ ച ബ്യസനം അഘം;

ദബ്ബേ തു പാപപുഞ്ഞാനി, തീസ്വാകിച്ഛം സുഖാദി ച.

൯൦.

ഭാഗ്യം നിയതി ഭാഗോ ച, ഭാഗധേയ്യം വിധീ’രിതോ;

അഥോ ഉപ്പത്തി നിബ്ബത്തി, ജാതി ജനന മുബ്ഭവോ.

൯൧.

നിമിത്തം കാരണം ഠാനം, പദം ബീജം നിബന്ധനം;

നിദാനം പഭവോ ഹേതു, സമ്ഭവോ സേതു പച്ചയോ.

൯൨.

കാരണം യം സമാസന്നം, പദട്ഠാനന്തി തം മതം;

ജീവോ തു പുരിസോ’ത്താ ഥ, പധാനം പകതിത്ഥിയം.

൯൩.

പാണോ സരീരീ ഭൂതം വാ, സത്തോ ദേഹീ ച പുഗ്ഗലോ;

ജീവോ പാണീ പജാ ജന്തു,

ജനോ ലോകോ തഥാഗതോ.

൯൪.

രൂപം സദ്ദോ ഗന്ധ രസാ, ഫസ്സോ ധമ്മോ ച ഗോചരാ;

ആലമ്ബാ വിസയാ തേ ഛാ, രമ്മണാ ലമ്ബണാനി ച.

൯൫.

സുക്കോ ഗോരോ സിതോ’ദാതാ,

ധവലോ സേത, പണ്ഡരാ;

സോണോ തു ലോഹിതോ രത്തോ,

തമ്ബ മഞ്ജിട്ഠ രോഹിതാ.

൯൬.

നീലോ കണ്ഹാ’സിതാ കാളോ,

മേചകോ സാമ സാമലാ;

സിതപീതേതു പണ്ഡു’ത്തോ, ഈസംപണ്ഡുതു ധൂസരോ.

൯൭.

അരുണോ ¶ കിഞ്ചിരത്തോ ഥ,

പാടലോ സേതലോഹിതോ;

അഥോ പീതോ ഹലിദ്യാഭോ,

പലാസോ ഹരിതോ ഹരി.

൯൮.

കളാരോ കപിലോ നീല, പീതേ ഥ രോചനപ്പഭേ;

പിങ്ഗോ പിസങ്ഗോ പ്യഥവാ, കളാരാദീ തു പിങ്ഗലേ.

൯൯.

കമ്മാസോ സബലോ ചിത്തോ,

സാവോ തു കണ്ഹപീതകേ;

വാച്ചലിങ്ഗാ ഗുണിന്യേതേ, ഗുണേ സുക്കാദയോ പുമേ.

൧൦൦.

നച്ചം നട്ടഞ്ച നടനം, നത്തനം ലാസനം ഭവേ;

നച്ചം തു വാദിതം ഗീത, മിതി നാടുമിദം തയം.

൧൦൧.

നച്ചട്ഠാനം സിയാ രങ്ഗോ, ഭിനയോ സൂച്യസൂചനം;

അങ്ഗഹാരോ’ങ്ഗവിക്ഖേപോ, നട്ടകോ നടകോ നടോ.

൧൦൨.

സിങ്ഗാരോ കരുണോ വീര, ബ്ഭുത ഹസ്സ ഭയാനകാ;

സന്തോ ബീഭച്ഛ രുദ്ദാനി, നവ നാട്യരസാ ഇമേ.

൧൦൩.

പോസസ്സ നാരിയം പോസേ, ഇത്ഥിയാ സങ്ഗമം പതി;

യാ പിഹാ ഏസ സിങ്ഗാരോ, രതികീളാദികാരണോ.

൧൦൪.

ഉത്തമ പ്പകതിപ്പായോ, ഇത്ഥിപുരിസഹേതുകോ;

സോ സമ്ഭോഗോ വിയോഗോതി,

സിങ്ഗാരോ ദുവിധോ മതോ.

൧൦൫.

ഭാസിതം ¶ ലപിതം ഭാസാ, വോഹാരോ വചനം വചോ;

ഉത്തി വാചാ ഗിരാ വാണീ, ഭാരതീ കഥിതാ [കഥാ (കത്ഥചി)] വചീ.

൧൦൬.

ഏകാഖ്യാതോ പദചയോ, സിയാ വാക്യംസകാരകോ;

ആമേഡിതന്തി വിഞ്ഞേയ്യം, ദ്വത്തിക്ഖത്തു മുദീരണം.

൧൦൭.

ഭയേ കോധേ പസംസായം, തുരിതേ കോതൂഹലേ’ച്ഛരേ;

ഹാസേ സോകേ പസാദേ ച, കരേ ആമേഡിതം ബുധോ.

൧൦൮.

ഇരു നാരീ യജു സാമ, മിതി വേദാ തയോ സിയും;

ഏതേ ഏവ തയീ നാരീ, വേദോ മന്തോ സുതിത്ഥിയം.

൧൦൯.

അട്ഠകോ വാമകോ വാമ, ദേവോ ചങ്ഗീരസോ ഭഗു;

യമദഗ്ഗി ച വാസിട്ഠോ, ഭാരദ്വാജോ ച കസ്സപോ;

വേസ്സാമിത്തോതി മന്താനം, കത്താരോ ഇസയോ ഇമേ.

൧൧൦.

കപ്പോ ബ്യാകരണം ജോതി, സത്ഥം സിക്ഖാ നിരുത്തി ച;

ഛന്ദോവിചിതി ചേതാനി, വേദങ്ഗാനി വദന്തി ഛ.

൧൧൧.

ഇതിഹാസോ പുരാവുത്ത, പ്പബന്ധോ ഭാരതാദികോ;

നാമപ്പകാസകം സത്ഥം, രുക്ഖാദീനം നിഘണ്ഡു സോ.

൧൧൨.

വിതണ്ഡസത്ഥം വിഞ്ഞേയ്യം, യം തം ലോകായതം ഇതി;

കേടുഭം തു ക്രിയാകപ്പ, വികപ്പോ കവിനം ഹിതോ.

൧൧൩.

ആഖ്യായികോപലദ്ധത്ഥാ, പബന്ധകപ്പനാ കഥാ;

ദണ്ഡനീത്യ’ത്ഥസത്ഥസ്മിം, വുത്തന്തോ തു പവത്തി ച.

൧൧൪.

സഞ്ഞാ, ഖ്യാ, വ്ഹാ സമഞ്ഞാ ചാ, ഭിധാനം നാമ മവ്ഹയോ;

നാമധേയ്യാ’ ധിവചനം, പടിവാക്യം തു ഉത്തരം.

൧൧൫.

പഞ്ഹോ തീസ്വ നുയോഗോ ച, പുച്ഛാ പ്യഥ നിദസ്സനം;

ഉപോഗ്ഘാതോ ച ദിട്ഠന്തോ, തഥോ’ദാഹരണം ഭവേ.

൧൧൬.

സമാ സങ്ഖേപ സംഹാരാ, സമാസോ സങ്ഗഹോ പ്യഥ;

സതം ധാരയസീ ത്യാദ്യ, ബ്ഭക്ഖാനം തുച്ഛഭാസനം.

൧൧൭.

വോഹാരോ തു വിവാദോ ഥ, സപനം സപഥോപി ച;

യസോ സിലോകോ കിത്തിത്ഥീ,

ഘോസനാ തു’ച്ചസദ്ദനം.

൧൧൮.

പടിഘോസോ പടിരവോ, ഥോ’ പഞ്ഞാസോ വചീമുഖം;

കത്ഥനാ ച സിലാഘാ ച, വണ്ണനാ ച നുതി ത്ഥുതി.

൧൧൯.

ഥോമനഞ്ച [ഥോമനം വാ (കത്ഥചി ഥോമനം ഥോമനാ ദ്വിലിങ്ഗേ)] പസംസാഥ, കേകാ നാദോ സിഖണ്ഡിനം;

ഗജാനം കോഞ്ചനാദോ ഥ,

മതാ ഹേസാ ഹയദ്ധനി.

൧൨൦.

പരിയായോ വേവചനം, സാകച്ഛാ തു ച സംകഥാ;

ഉപവാദോ ചു’പക്കോസാ, വണ്ണവാദാ’നുവാദോ ച;

ജനവാദാ’പവാദാപി, പരിവാദോ ച തുല്യത്ഥാ.

൧൨൧.

ഖേപോ ¶ നിന്ദാ തഥാ കുച്ഛാ, ജിഗുച്ഛാ ഗരഹാ ഭവേ;

നിന്ദാപുബ്ബോ ഉപാരമ്ഭോ, പരിഭാസന മുച്ചതേ.

൧൨൨.

അട്ഠാനരിയവോഹാര, വസേന യാ പവത്തിതാ;

അഭിവാക്യം സിയാ വാചാ, സാ വീതിക്കമദീപനീ.

൧൨൩.

മുഹുംഭാസാ നുലാപോഥ, പലാപോ നത്ഥികാ ഗിരാ;

ആദോഭാസന മാലാപോ,

വിലാപോ തു പരിദ്ദവോ.

൧൨൪.

വിപ്പലാപോ വിരോധോത്തി, സന്ദേസോത്തി തു വാചികം;

സമ്ഭാസനം തു സല്ലാപോ, വിരോധരഹിതം മിഥു.

൧൨൫.

ഫരുസം നിട്ഠുരം വാക്യം, മനുഞ്ഞം ഹദയങ്ഗമം;

സംകുലം തു കിലിട്ഠഞ്ച, പുബ്ബാപരവിരോധിനീ.

൧൨൬.

സമുദായത്ഥരഹിതം, അബദ്ധമിതി [അബന്ധ (ക.)] കിത്തിതം;

വിതഥം തു മുസാ ചാഥ [ആഹതം തു മുസാത്ഥകം (കത്ഥചി, അമരകോസേ)], ഫരുസാദീ തിലിങ്ഗികാ.

൧൨൭.

സമ്മാ ബ്യയഞ്ചാ വിതഥം, സച്ചം തച്ഛം യഥാതഥം;

തബ്ബന്താ തീസ്വ ലീകം ത്വ, സച്ചം മിച്ഛാ മുസാ ബ്യയം.

൧൨൮.

രവോ നിനാദോ നിനദോ ച സദ്ദോ,

നിഗ്ഘോസ നാദ ദ്ധനയോ ച രാവോ;

ആരാവ സംരാവ വിരാവ ഘോസാ,

രവാ സുതിത്ഥീ സര നിസ്സനാ ച.

൧൨൯.

വിസ്സട്ഠ മഞ്ജു വിഞ്ഞേയ്യാ, സവനീയാ വിസാരിനോ;

ബിന്ദു ഗമ്ഭീര നിന്നാദീ, ത്യേവ മട്ഠങ്ഗികോ സരോ.

൧൩൦.

തിരച്ഛാനഗതാനഞ്ഹി, രുതം വസ്സിത മുച്ചതേ;

കോലാഹലോ കലഹലോ,

ഗീതം ഗാനഞ്ച ഗീതികാ.

൧൩൧.

സരാ സത്ത തയോ ഗാമാ, ചേകവീസതി മുച്ഛനാ;

താനാ [ഠാനാനി (ബഹൂസു)] ചേകൂനപഞ്ഞാസ, ഇച്ചേതം സരമണ്ഡലം.

൧൩൨.

ഉസഭോ ധേവതോ ചേവ, ഛജ്ജ ഗന്ധാര മജ്ഝിമാ;

പഞ്ചമോ ച നിസാദോതി, സത്തേ’തേ ഗദിതാ സരാ.

൧൩൩.

നദന്തി ¶ ഉസഭം ഗാവോ, തുരഗാ ധേവതം തഥാ;

ഛജ്ജം മയൂരാ ഗന്ധാര, മജാ കോഞ്ചാ ച മജ്ഝിമം.

൧൩൪.

പഞ്ചമം പരപുട്ഠാദീ, നിസാദമ്പി ച വാരണാ;

ഛജ്ജോ ച മജ്ഝിമോ ഗാമാ,

തയോ സാധാരണോതി ച.

൧൩൫.

സരേസു തേസു പച്ചേകേ, തിസ്സോ തിസ്സോ ഹി മുച്ഛനാ;

സിയും തഥേവ താനാനി [ഠാനാനി (ബഹൂസു)], സത്ത സത്തേവ ലബ്ഭരേ.

൧൩൬.

തിസ്സോ ദുവേ ചതസ്സോ ച, ചതസ്സോ കമതോ സരേ;

തിസ്സോ ദുവേ ചതസ്സോതി, ദ്വാവീസതി സുതീ സിയും.

൧൩൭.

ഉച്ചതരേ രവേ താരോ, ഥാബ്യത്തേ മധുരേ കലോ;

ഗമ്ഭീരേ തു രവേ മന്ദോ, താരാദീ തീസ്വഥോ കലേ;

കാകലീ സുഖുമേ വുത്തോ,

ക്രിയാദിസമതാ ലയോ.

൧൩൮.

വീണാ ച വല്ലകീ സത്ത, തന്തീ സാ പരിവാദിനീ;

പോക്ഖരോ ദോണി വീണായ,

ഉപവീണോ തു വേഠകോ.

൧൩൯.

ആതതഞ്ചേവ വിതത, മാതതവിതതം ഘനം;

സുസിരം ചേതി തൂരിയം, പഞ്ചങ്ഗിക മുദീരിതം.

൧൪൦.

ആതതം നാമ ചമ്മാവ, നദ്ധേസു ഭേരിയാദിസു;

തലേ’കേകയുതം കുമ്ഭ, ഥുണ ദദ്ദരികാദികം.

൧൪൧.

വിതതം ചോ’ഭയതലം, തൂരിയം മുരജാദികം;

ആതതവിതതം സബ്ബ, വിനദ്ധം പണവാദികം.

൧൪൨.

സുസിരം വംസസങ്ഖാദി, സമ്മതാലാദികം ഘനം;

ആതോജ്ജം തു ച വാദിത്തം, വാദിതം വജ്ജ മുച്ചതേ.

൧൪൩.

ഭേരീ (ഭേരി) ദുന്ദുഭി വുത്തോ ഥ,

മുദിങ്ഗോ മുരജോസ്സ തു;

ആലിങ്ഗ, ങ്ക്യോ, ദ്ധകാ ഭേദാ,

തിണവോ തു ച ഡിണ്ഡിമോ.

൧൪൪.

ആലമ്ബരോ ¶ തു പണവോ, കോണോ വീണാദിവാദനം;

ദദ്ദരീ പടഹോ ഭേരി, പ്പഭേദാ മദ്ദലാദയോ.

൧൪൫.

ജനപ്പിയേ വിമദ്ദുട്ഠേ, ഗന്ധേ പരിമലോ ഭവേ;

സോ ത്വാ മോദോ ദൂരഗാമീ, വിസ്സന്താ തീസ്വിതോ പരം.

൧൪൬.

ഇട്ഠഗന്ധോ ച സുരഭി, സുഗന്ധോ ച സുഗന്ധി ച;

പൂതിഗന്ധി തു ദുഗ്ഗന്ധോ, ഥ വിസ്സം ആമഗന്ധി യം.

൧൪൭.

കുങ്കുമഞ്ചേവ യവന, പുപ്ഫഞ്ച തഗരം തഥാ;

തുരുക്ഖോതി ചതുജ്ജാതി, ഗന്ധാ ഏതേ പകാസിതാ.

൧൪൮.

കസാവോ നിത്ഥിയം തിത്തോ, മധുരോ ലവണോ ഇമേ;

അമ്ബിലോ കടുകോ ചേതി, ഛ രസാ തബ്ബതീ തിസു.

൧൪൯.

സിയാ ഫസ്സോ ച ഫോട്ഠബ്ബോ,

വിസയീ ത്വക്ഖ മിന്ദ്രിയം;

നയനം ത്വക്ഖി നേത്തഞ്ച, ലോചനം ച’ച്ഛി ചക്ഖു ച.

൧൫൦.

സോതം സദ്ദഗ്ഗഹോ കണ്ണോ, സവനം സുതി നത്ഥു തു;

നാസാ ച നാസികാ ഘാനം, ജിവ്ഹാതു രസനാ ഭവേ.

൧൫൧.

സരീരം വപു ഗത്തഞ്ചാ, ത്തഭാവോ ബോന്ദി വിഗ്ഗഹോ;

ദേഹം വാ പുരിസേ കായോ, ഥിയം തനു കളേവരം.

൧൫൨.

ചിത്തം ചേതോ മനോ നിത്ഥീ, വിഞ്ഞാണം ഹദയം തഥാ;

മാനസം ധീ തു പഞ്ഞാ ച, ബുദ്ധി മേധാ മതി മുതി.

൧൫൩.

ഭൂരീ മന്താ ച പഞ്ഞാണം, ഞാണം വിജ്ജാ ച യോനി ച;

പടിഭാന മമോഹോ ഥ, പഞ്ഞാഭേദാ വിപസ്സനാ.

൧൫൪.

സമ്മാദിട്ഠി പഭുതികാ, വീമംസാ തു വിചാരണാ;

സമ്പജഞ്ഞം തു നേപക്കം, വേദയിതം തു വേദനാ.

൧൫൫.

തക്കോ വിതക്കോ സങ്കപ്പോ,

പ്പനോ’ ഹാ’ യു തു ജീവിതം;

ഏകഗ്ഗതാ തു സമഥോ, അവിക്ഖേപോ സമാധി ച.

൧൫൬.

ഉസ്സാഹാ’ തപ്പ പഗ്ഗാഹാ, വായാമോ ച പരക്കമോ;

പധാനം വീരിയം ചേഹാ, ഉയ്യാമോ ച ധിതി ത്ഥിയം.

൧൫൭.

ചത്താരി വീരിയങ്ഗാനി, തചസ്സ ച നഹാരുനോ;

അവസിസ്സന മട്ഠിസ്സ, മംസലോഹിതസുസ്സനം.

൧൫൮.

ഉസ്സോള്ഹീ ¶ ത്വ ധിമത്തേഹാ, സതി ത്വ നുസ്സതി ത്ഥിയ;

ലജ്ജാ ഹിരീ സമാനാ ഥ, ഓത്തപ്പം പാപഭീരുതാ.

൧൫൯.

മജ്ഝത്തതാ തു’പേക്ഖാ ച, അദുക്ഖമസുഖാ സിയാ;

ചിത്താഭോഗോ മനക്കാരോ,

അധിമോക്ഖോ തു നിച്ഛയോ.

൧൬൦.

ദയാ’ നുകമ്പാ കാരുഞ്ഞം, കരുണാ ച അനുദ്ദയാ;

ഥിയം വേരമണീ ചേവ, വിരത്യാ’ രതി ചാപ്യഥ.

൧൬൧.

തിതിക്ഖാ ഖന്തി ഖമനം, ഖമാ മേത്താ തു മേത്യ’ഥ;

ദസ്സനം ദിട്ഠി ലദ്ധിത്ഥീ, സിദ്ധന്തോ സമയോ ഭവേ.

൧൬൨.

തണ്ഹാ ച തസിണാ ഏജാ, ജാലിനീ ച വിസത്തികാ;

ഛന്ദോ ജടാ നികന്ത്യാ’സാ, സിബ്ബിനീ ഭവനേത്തി ച.

൧൬൩.

അഭിജ്ഝാ വനഥോ വാനം, ലോഭോ രാഗോ ച ആലയോ;

പിഹാ മനോരഥോ ഇച്ഛാ, ഭിലാസോ കാമ ദോഹളാ;

ആകങ്ഖാ രുചി വുത്താ സാ, ത്വധികാ ലാലസാ ദ്വിസു.

൧൬൪.

വേരം വിരോധോ വിദ്ദേസോ, ദോസോ ച പടിഘഞ്ച വാ;

കോധാ’ ഘാതാ കോപ രോസാ,

ബ്യാപാദോ’ നഭിരദ്ധി ച.

൧൬൫.

ബദ്ധവേര മുപനാഹോ, സിയാ സോകോ തു സോചനം;

രോദിതം കന്ദിതം രുണ്ണം, പരിദേവോ പരിദ്ദവോ.

൧൬൬.

ഭീതിത്ഥി ഭയ മുത്താസോ, ഭേരവം തു മഹബ്ഭയം;

൧൬൭.

ഭേരവം ഭീസനം ഭീമം, ദാരുണഞ്ച ഭയാനകം;

ഘോരം പടിഭയം ഭേസ്മം, ഭയങ്കര മിമേ തീസു.

൧൬൮.

ഇസ്സാ ഉസൂയാ മച്ഛേരം, തു മച്ഛരിയ മച്ഛരം;

മോഹോ’വിജ്ജാ തഥാ’ഞാണം, മാനോ വിധാ ച ഉന്നതി.

൧൬൯.

ഉദ്ധച്ച മുദ്ധടം ചാഥ [ഉദ്ധവംഉദ്ധം ധാവതി ചിത്ത മേതേനാതി ഉദ്ധവം (ടീകാ)], താപോ കുക്കുച്ചമേവ ച;

പച്ഛാതാപോ നുതാപോ ച, വിപ്പടിസാരോ പകാസിതോ.

൧൭൦.

മനോവിലേഖ സന്ദേഹാ, സംസയോ ച കഥംകഥാ;

ദ്വേള്ഹകം വിചികിച്ഛാ ച, കങ്ഖാ സങ്കാ വിമത്യപി.

൧൭൧.

ഗബ്ബോ ¶ ഭിമാനോ’ഹംകാരോ, ചിന്താതു ഝാന മുച്ചതേ;

നിച്ഛയോ നിണ്ണയോ വുത്തോ, പടിഞ്ഞാ തു പടിസ്സവോ.

൧൭൨.

അവമാനം തിരക്കാരോ, പരിഭവോ പ്യ’ നാദരോ;

പരാഭവോ പ്യ’ വഞ്ഞാ ഥ, ഉമ്മാദോ ചിത്തവിബ്ഭമോ.

൧൭൩.

പേമം സിനേഹോ സ്നേഹോ ഥ, ചിത്തപീളാ വിസഞ്ഞിതാ;

പമാദോ സതിവോസ്സഗ്ഗോ, കോതൂഹലം കുതൂഹലം.

൧൭൪.

വിലാസോ ലലിതം ലീലാ, ഹാവോ ഹേളാ ച വിബ്ഭമോ;

ഇച്ചാദികാ സിയും നാരി, സിങ്ഗാരഭാവജാ കിരിയാ.

൧൭൫.

ഹസനം ഹസിതം ഹാസോ, മന്ദോ സോ മിഹിതം സിതം;

അട്ടഹാസോ മഹാഹാസോ,

രോമഞ്ചോ ലോമഹംസനം.

൧൭൬.

പരിഹാസോ ദവോ ഖിഡ്ഡാ, കേളി കീളാ ച കീളിതം;

നിദ്ദാ തു സുപിനം സോപ്പം, മിദ്ധഞ്ച പചലായികാ.

൧൭൭.

ഥിയം നികതി കൂടഞ്ച, ദമ്ഭോ സാഠ്യഞ്ച കേതവം;

സഭാവോ തു നിസ്സഗ്ഗോ ച, സരൂപം പകതിത്ഥിയം.

൧൭൮.

സീലഞ്ച ലക്ഖണം ഭാവോ,

ഉസ്സവോ തു ഛണോ മഹോ [മതോ (ടീ.)].

൧൭൯.

ധാരേന്തോ ജന്തു സസ്നേഹ, മഭിധാനപ്പദീപികം;

ഖുദ്ദകാദ്യത്ഥജാതാനി [ഖുദ്ദകാന്യത്ഥജാതാനി (ക.)], സമ്പസ്സതി യഥാസുഖം.

സഗ്ഗകണ്ഡോ നിട്ഠിതോ.

൨. ഭൂകണ്ഡ

൧. ഭൂമിവഗ്ഗ

൧൮൦.

വഗ്ഗാ ഭൂമി, പുരീ, മച്ച, ചതുബ്ബണ്ണ, വനാദിഹി;

പാതാലേന ച വുച്ചന്തേ, സങ്ഗോ’പങ്ഗേഹി’ധ’ക്കമാ.

൧൮൧.

വസുന്ധരാ ഛമാ ഭൂമി, പഥവീ മേദനീ മഹീ;

ഉബ്ബീ വസുമതീ ഗോ കു, വസുധാ ധരണീ ധരാ;

പുഥവീ ജഗതീ ഭൂരീ, ഭൂ ച ഭൂതധരാ’ വനീ.

൧൮൨.

ഖാരാ ¶ തു മത്തികാ ഊസോ, ഊസവാ തൂസരോ തിസു;

ഥലം ഥലീത്ഥീ ഭൂഭാഗേ, ഥദ്ധലൂഖമ്ഹി ജങ്ഗലോ.

൧൮൩.

പുബ്ബവിദേഹോ ചാപര, ഗോയാനം ജമ്ബുദീപോ ച;

ഉത്തരകുരു ചേതി സിയും, ചത്താരോമേ മഹാദീപാ.

൧൮൪.

പുമ്ബഹുത്തേ കുരൂ സക്കാ, കോസലാ മഗധാ സിവീ;

കലിങ്ഗാ’വന്തി പഞ്ചാലാ, വജ്ജീ ഗന്ധാര ചേതയോ.

൧൮൫.

വങ്ഗാ വിദേഹാ കമ്ബോജാ, മദ്ദാ ഭഗ്ഗ’ങ്ഗ സീഹളാ;

കസ്മീരാ കാസി പണ്ഡവാദീ, സിയും ജനപദന്തരാ.

൧൮൬.

ലോകോ ച ഭുവനം വുത്തം, ദേസോ തു വിസയോ പ്യഥ;

മിലക്ഖദേസോ പച്ചന്തോ, മജ്ഝദേസോ തു മജ്ഝിമോ.

൧൮൭.

അനൂപോ സലിലപ്പായോ, കച്ഛം പുമ നപുംസകേ;

സദ്ദലോ ഹരിതേ ദേസേ, തിണേനാ, ഭിനവേന ഹി.

൧൮൮.

നദ്യമ്ബുജീവനോ ദേസോ, വുട്ഠിനിപ്പജ്ജസസ്സകോ;

യോ നദീമാതികോ ദേവ,

മാതികോ ച കമേന സോ.

൧൮൯.

തീസ്വനൂപാദ്യഥോ ചന്ദ, സൂരാദോ സസ്സതീരിതോ;

രട്ഠം തു വിജിതഞ്ചാഥ, പുരിസേ സേതു ആലിയം.

൧൯൦.

ഉപാന്തഭൂ പരിസരോ, ഗോട്ഠം തു ഗോകുലം വജോ;

മഗ്ഗോ പന്ഥോ പഥോ അദ്ധാ, അഞ്ജസം വടുമം തഥാ.

൧൯൧.

പജ്ജോ [പജ്ജാ…. (ക.)], യനഞ്ച പദവീ, വത്തനീ പദ്ധതിത്ഥിയം;

തബ്ഭേദാ ജങ്ഘ, സകട, മഗ്ഗാ തേ ച മഹദ്ധനി.

൧൯൨.

ഏകപദ്യേകപദികേ, കന്താരോ തു ച ദുഗ്ഗമേ;

൧൯൩.

പടിമഗ്ഗോ പടിപഥോ, അദ്ധാനം ദീഘ മഞ്ജസം;

സുപ്പഥോ തു സുപന്ഥോ ച, ഉപ്പഥം ത്വപഥം ഭവേ.

൧൯൪.

ഛത്തിംസപരമാണൂന, മേകോ ണു ച ഛത്തിംസ തേ;

തജ്ജാരീ താപി ഛത്തിംസ, രഥരേണു ഛത്തിംസ തേ.

൧൯൫.

ലിക്ഖാതാ സത്ത ഊകാ താ, ധഞ്ഞമാസോതി സത്ത തേ;

സത്ത ങ്ഗുല’ മമു ദ്വിച്ഛ, വിദത്ഥി താ ദുവേ സിയും.

൧൯൬.

രതനം ¶ താനി സത്തേവ, യട്ഠി താ വീസതൂ സഭം;

ഗാവുത മുസഭാസീതി, യോജനം ചതുഗാവുതം.

൧൯൭.

ധനുപഞ്ചസതം കോസോ, കരീസം ചതുരമ്ബണം;

അബ്ഭന്തരം തു ഹത്ഥാന, മട്ഠവീസ പമാണതോ.

ഭൂമിവഗ്ഗോ നിട്ഠിതോ.

൨. ഭൂകണ്ഡ

൨. പുരവഗ്ഗ

൧൯൮.

പുരം നഗര മിത്ഥീ വാ, ഠാനീയം പുടഭേദനം;

ഥിയം തു രാജധാനീ [രാജഠാനീ (ടീ.)] ച, ഖന്ധാവാരോ ഭവേ ഥ ച.

൧൯൯.

സാഖാനഗര മഞ്ഞത്ര, യം തം മൂലപുരാ പുരം;

ബാരാണസീ ച സാവത്ഥി, വേസാലീ മിഥിലാ, ളവീ.

൨൦൦.

കോസമ്ബു, ജ്ജേനിയോ തക്ക, സിലാ ചമ്പാ ച സാഗലം;

സുസുമാരഗിരം [സംസുമാര (ടീകാ)] രാജ, ഗഹം കപിലവത്ഥു ച.

൨൦൧.

സാകേത, മിന്ദപത്ഥഞ്ചോ, ക്കട്ഠാ പാടലിപുത്തകം;

ജേതുത്തരഞ്ച സങ്കസ്സം, കുസിനാരാദയോ പുരീ.

൨൦൨.

രച്ഛാ ച വിസിഖാ വുത്താ, രഥികാ വീഥി ചാപ്യഥ;

ബ്യൂഹോ രച്ഛാ അനിബ്ബിദ്ധാ, നിബ്ബിദ്ധാ തു പഥദ്ധി ച.

൨൦൩.

ചതുക്കം ചച്ചരേ മഗ്ഗ, സന്ധി സിങ്ഘാടകം ഭവേ;

പാകാരോ വരണോ ചാഥ, ഉദാപോ [ഉദ്ദാപ, ഉദ്ദാപ] ഉപകാരികാ.

൨൦൪.

കുട്ടം തു ഭിത്തി നാരീ ഥ, ഗോപുരം ദ്വാരകോട്ഠകോ;

ഏസികാ ഇന്ദഖീലോ ച, അട്ടോ ത്വട്ടാലകോ ഭവേ.

൨൦൫.

തോരണം തു ബഹിദ്വാരം, പരിഖാതു ച ദീഘികാ;

മന്ദിരം സദനാ, ഗാരം, നികായോ നിലയാ, ലയോ.

൨൦൬.

ആവാസോ ഭവനം വേസ്മം, നികേതനം നിവേസനം;

ഘരം ഗഹഞ്ചാ, വസഥോ, സരണഞ്ച പതിസ്സയോ.

൨൦൭.

ഓകം സാലാ ഖയോ വാസോ, ഥിയം കുടി വസത്യ’പി;

ഗേഹഞ്ചാ, നിത്ഥി സദുമം, ചേതിയാ, യതനാനി തു.

൨൦൮.

പാസാദോ ¶ ചേവ യൂപോ ഥ, മുണ്ഡച്ഛദോ ച ഹമ്മിയം;

യൂപോതു ഗജകുമ്ഭമ്ഹി, ഹത്ഥിനഖോ പതിട്ഠിതോ.

൨൦൯.

സുപണ്ണവങ്കച്ഛദന, മഡ്ഢയോഗോ സിയാ ഥ ച;

ഏകകൂടയുതോ മാളോ,

പാസാദോ ചതുരസ്സകോ.

൨൧൦.

സഭായഞ്ച സഭാ ചാഥ, മണ്ഡപം വാ ജനാലയോ;

അഥോ ആസനസാലായം, പടിക്കമന മീരിതം.

൨൧൧.

ജിനസ്സ വാസഭവന, മിത്ഥീ ഗന്ധകുടി പ്യഥ;

ഥിയം രസവതീ പാക, ട്ഠാനഞ്ചേവ മഹാനസം.

൨൧൨.

ആവേസനം സിപ്പസാലാ, സോണ്ഡാ തു പാനമന്ദിരം;

വച്ചട്ഠാനം വച്ചകുടി, മുനീനം ഠാന മസ്സമോ.

൨൧൩.

പണ്യവിക്കയസാലാ കു, ആപണോ പണ്യവീഥികാ;

ഉദോസിതോ ഭണ്ഡസാലാ, ചങ്കമനം തു ചങ്കമോ.

൨൧൪.

ജന്താഘരം ത്വഗ്ഗിസാലാ, പപാ പാനീയസാലികാ;

ഗബ്ഭോ ഓവരകോ വാസാ, ഗാരം തു സയനിഗ്ഗഹം.

൨൧൫.

ഇത്ഥാഗാരം തു ഓരോധോ, സുദ്ധന്തോ’ ന്തേപുരമ്പി ച;

അസബ്ബവിസയട്ഠാനം, രഞ്ഞം കച്ഛന്തരം മതം.

൨൧൬.

സോപാനോ വാ’രോഹണഞ്ച,

നിസ്സേണീ സാ, ധിരോഹിണീ;

വാതപാനം ഗവക്ഖോ ച, ജാലഞ്ച സീഹപഞ്ജരം.

൨൧൭.

ആലോകസന്ധി വുത്തോ ഥ, ലങ്ഗീ’ത്ഥീ പലിഘോ ഭവേ;

കപിസീസോ, ഗ്ഗലത്ഥമ്ഭോ, നിബ്ബം തു ഛദ്ദകോടിയം.

൨൧൮.

ഛദനം പടലം ഛദ്ദ, മജിരം ചച്ചരോ, ങ്ഗണം;

പഘാനോ പഘനാ, ലിന്ദോ, പമുഖം ദ്വാരബന്ധനം.

൨൧൯.

പിട്ഠസങ്ഘാടകം ദ്വാര, ബാഹാ കൂടം തു കണ്ണികാ;

ദ്വാരഞ്ച പടിഹാരോ ഥ, ഉമ്മാരോ ദേഹനീ, ത്ഥിയം.

൨൨൦.

ഏളകോ ഇന്ദഖീലോ ഥ, ഥമ്ഭോ ഥൂണോ പുമിത്ഥിയം;

പാടികാ, ഡ്ഢേന്ദുപാസാണേ, ഗിഞ്ജകാ തു ച ഇട്ഠകാ.

൨൨൧.

വലഭിച്ഛാദിദാരുമ്ഹി, വങ്കേ ഗോപാനസീ, ത്ഥിയം;

കപോതപാലികായം തു, വിടങ്കോ നിത്ഥിയം ഭവേ.

൨൨൨.

കുഞ്ചികാവിവരം ¶ താള, ച്ഛിഗ്ഗലോ പ്യഥ കുഞ്ചികാ;

താളോ’വാപുരണം ചാഥ, വേദികാ വേദി കഥ്യതേ.

൨൨൩.

സങ്ഘാതോ പക്ഖപാസോ ച, മന്ദിരങ്ഗാ തുലാ അപി;

ഥിയം സമ്മുജ്ജനീ ചേവ, സമ്മജ്ജനീ ച സോധനീ.

൨൨൪.

സങ്കടീരം തു സങ്കാര, ട്ഠാനം സങ്കാരകൂടകം;

അഥോ കചവരോ, ക്ലാപോ, സങ്കാരോ ച കസമ്ബുപി.

൨൨൫.

ഘരാദിഭൂമി തം വത്ഥു, ഗാമോ സംവസഥോ ഥ സോ;

പാകടോ നിഗമോ ഭോഗ, മച്ചാദിഭ്യോ ധി തൂദിതോ [‘അധിഭൂ’തി ഈരിതോ കഥിതോ (ടീ.)].

൨൨൬.

സീമാ ച മരിയാദാ ഥ,

ഘോസോ ഗോപാലഗാമകോതി.

പുരവഗ്ഗോ നിട്ഠിതോ.

൩. നരവഗ്ഗ

൨൨൭.

മനുസ്സോ മാനുസോ മച്ചോ, മാനവോ മനുജോ നരോ;

പോസോ പുമാ ച പുരിസോ,

പോരിസോ പ്യഥ പണ്ഡിതോ.

൨൨൮.

ബുധോ വിദ്വാ വിഭാവീ ച, സന്തോ സപ്പഞ്ഞ കോവിദാ;

ധീമാ സുധീ കവി ബ്യത്തോ, വിചക്ഖണോ വിസാരദോ.

൨൨൯.

മേധാവീ മതിമാ പഞ്ഞോ, വിഞ്ഞൂ ച വിദൂരോ വിദൂ;

ധീരോ വിപസ്സീ ദോസഞ്ഞൂ, ബുദ്ധോ ച ദബ്ബ വിദ്ദസു.

൨൩൦.

ഇത്ഥീ സീമന്തിനീ നാരീ, ഥീ വധൂ വനിതാ, ങ്ഗനാ;

പമദാ സുന്ദരീ കന്താ, രമണീ ദയിതാ, ബലാ.

൨൩൧.

മാതുഗാമോ ച മഹിലാ, ലലനാ ഭീരു കാമിനീ;

കുമാരികാ തു കഞ്ഞാ ഥ, യുവതീ തരുണീ ഭവേ.

൨൩൨.

മഹേസീ സാഭിസേകാഞ്ഞാ,

ഭോഗിനീ രാജനാരിയോ;

ധവത്ഥിനീ തു സങ്കേതം, യാതി യാ സാ, ഭിസാരികാ.

൨൩൩.

ഗണികാ ¶ വേസിയാ വണ്ണ, ദാസീ നഗരസോഭിനീ;

രൂപൂപജീവിനീ വേസീ, കുലടാ തു ച ബന്ധകീ.

൨൩൪.

വരാരോഹോ, ത്തമാ മത്ത, കാസിനീ വരവണ്ണിനീ;

പതിബ്ബതാ ത്വപി സതീ, കുലിത്ഥീ കുലപാലികാ.

൨൩൫.

വിധവാ പതിസുഞ്ഞാ ഥ, പതിമ്ബരാ സയമ്ബരാ;

വിജാതാ തു പസൂതാ ച, ജാതാപച്ചാ പസൂതികാ.

൨൩൬.

ദൂതീ സഞ്ചാരികാ ദാസീ, തു ചേടീ കുടധാരികാ;

വാരുണീ, ക്ഖണികാ തുല്യാ, ഖത്തിയാനീ തു ഖത്തിയാ.

൨൩൭.

ദാരോ ജായാ കലത്തഞ്ച, ഘരണീ ഭരിയാ പിയാ,

പജാപതീ ച ദുതിയാ, സാ പാദപരിചാരികാ.

൨൩൮.

സഖീ ത്വാ’ലീ വയസ്സാ ഥ, ജാരീ ചേവാ’തിചാരിനീ;

പുമേ തൂ’തു രജോ പുപ്ഫം, ഉതുനീ തു രജസ്സലാ.

൨൩൯.

പുപ്ഫവതീ ഗരുഗബ്ഭാ, പന്നസത്താ ച ഗബ്ഭിനീ;

ഗബ്ഭാസയോ ജലാബുപി, കലലം പുന്നപുംസകേ.

൨൪൦.

ധവോതു സാമികോ ഭത്താ, കന്തോ പതി വരോ പിയോ;

അഥോ പപതി ജാരോ ഥാ,

പച്ചം പുത്തോ’ത്രജോ സുതോ.

൨൪൧.

തനുജോ തനയോ സൂനു, പുത്താദീ ധീതരി’ത്ഥിയം;

നാരിയം ദുഹിതാ ധീതാ,

സജാതോ ത്വോ’രസോ സുതോ.

൨൪൨.

ജായാപതീ ജനിപതീ, ജയമ്പതീ തു ദമ്പതീ [ദമ്പതീതി പദം പുല്ലിങ്ഗ ബഹുവചനന്തം ഇകാരന്തം, തുദമ്പതി (ടീ.)];

അഥ വസ്സവരോ വുത്തോ, പണ്ഡകോ ച നപുംസകം.

൨൪൩.

ബന്ധവോ ബന്ധു സജനോ, സഗോത്തോ ഞാതി ഞാതകോ;

സാലോഹിതോ സപിണ്ഡോ ച,

താതോ തു ജനകോ പിതാ.

൨൪൪.

അമ്മ, മ്ബാ ജനനീ മാതാ, ജനേത്തി ജനികാ ഭവേ;

ഉപമാതാ തു ധാതി’ത്ഥീ,

സാലോ ജായായ ഭാതികോ.

൨൪൫.

നനന്ദാ ¶ സാമിഭഗിനീ, മാതാമഹീ തു അയ്യികാ;

മാതുലോ മാതുഭാതാ,സ്സ, മാതുലാനീ പജാപതി.

൨൪൬.

ജായാപതീനം ജനനീ, സസ്സു വുത്താഥ തപ്പിതാ;

സസുരോ ഭാഗിനേയ്യോതു, പുത്തോ ഭഗിനിയാ ഭവേ.

൨൪൭.

നത്താ വുത്തോ പപുത്തോ ഥ, സാമിഭാതാ തു ദേവരോ;

ധീതുപതി തു ജാമാതാ,

അയ്യകോ തു പിതാമഹോ.

൨൪൮.

മാതുച്ഛാ മാതുഭഗിനീ, പിതുച്ഛാ ഭഗിനീ പിതു;

പപിതാമഹോ പയ്യകോ,

സുണ്ഹാ തു സുണിസാ ഹുസാ.

൨൪൯.

സോദരിയോ സഗബ്ഭോ ച, സോദരോ സഹജോ പ്യഥ;

മാതാപിതൂ തേ പിതരോ, പുത്താ തു പുത്തധീതരോ.

൨൫൦.

സസുരാ സസ്സുസസുരാ, ഭാതുഭഗിനീ ഭാതരോ;

ബാലത്തം ബാലതാ ബാല്യം, യോബ്ബഞ്ഞംതു ച യോബ്ബനം.

൨൫൧.

സുക്കാ തു പലിതം കേസാ, ദയോ ഥ ജരതാ ജരാ;

പുഥുകോ പില്ലകോ ഛാപോ, കുമാരോ ബാല പോതകാ.

൨൫൨.

അഥു’ ത്താനസയു’ത്താന, സേയ്യകാ ഥനപോപി ച;

൨൫൩.

തരുണോ ച വയട്ഠോ ച, ദഹരോ ച യുവാ സുസു;

മാണവോദാരകോചാഥ, സുകുമാരോ സുഖേധിതോ.

൨൫൪.

മഹല്ലകോ ച വുദ്ധോ ച, ഥേരോ ജിണ്ണോ ച ജിണ്ണകോ;

അഗ്ഗജോ പുബ്ബജോ ജേട്ഠോ, കനിയോ കനിട്ഠോ നുജോ.

൨൫൫.

വലിത്തചോ തു വലിനോ; തീസു’ത്താനസയാദയോ;

൨൫൬.

സീസോ’ത്തമങ്ഗാനി സിരോ, മുദ്ധാ ച മത്ഥകോ ഭവേ;

കേസോ തു കുന്തലോ വാലോ, ത്തമങ്ഗരുഹ മുദ്ധജാ.

൨൫൭.

ധമ്മില്ലോ സംയതാ കേസാ,

കാകപക്ഖോ സിഖണ്ഡകോ;

പാസോ ഹത്ഥോ കേസചയേ;

താപസാനം തഹിം ജടാ.

൨൫൮.

ഥിയം വേണീ പവേണീ ച;

അഥോ ചൂളാ സിഖാ സിയാ;

സീമന്തോ തു മതോ നാരി, കേസമജ്ഝമ്ഹി പദ്ധതി.

൨൫൯.

ലോമം ¶ തനുരുഹം രോമം, പമ്ഹം പഖുമ മക്ഖിഗം;

മസ്സു വുത്തം പുമമുഖേ, ഭൂ ത്വിത്ഥീ ഭമുകോ ഭമു.

൨൬൦.

ബപ്പോ [ഖപ്പോ (ടീ.)] നേത്തജല’സ്സൂനി, നേത്തതാരാ കനീനികാ;

വദനം തു മുഖം തുണ്ഡം, വത്തം ലപന മാനനം.

൨൬൧.

ദ്വിജോ ലപനജോ ദന്തോ, ദസനോ രദനോ രദോ;

ദാഠാ തുദന്തഭേദസ്മിം, അപാങ്ഗോ ത്വക്ഖികോടിസു.

൨൬൨.

ദന്താവരണ മോട്ഠോ ചാ, പ്യ’ധരോ ദസനച്ഛദോ;

ഗണ്ഡോ കപോലോ ഹന്വിത്ഥീ [ഗണ്ഡത്ഥീ (ടീ.) ഹന്വത്ഥീ=ഹനു+ഇത്ഥീ; ഹന+ഉ (ണ്വാദി)],

ചുബുകം ത്വ’ ധരാ അധോ.

൨൬൩.

ഗലോ ച കണ്ഠോ ഗീവാ ച, കന്ധരാ ച സിരോധരാ;

കമ്ബുഗീവാ തു യാ ഗീവാ, സുവണ്ണാലിങ്ഗസന്നിഭാ;

അങ്കിതാ തീഹി ലേഖാഹി, കമ്ബുഗീവാ ഥവാ മതാ.

൨൬൪.

അംസോ നിത്ഥീ ഭുജസിരോ, ഖന്ധോ തസ്സന്ധി ജത്തു തം;

ബാഹുമൂലം തു കച്ഛോ, ധോ, ത്വ’സ്സ പസ്സ മനിത്ഥിയം.

൨൬൫.

ബാഹു ഭുജാദ്വീസു ബാഹാ, ഹത്ഥോ തു കര പാണയോ;

മണിബന്ധോ പകോട്ഠന്തോ, കപ്പരോ തു കപോണ്യ’ഥ.

൨൬൬.

മണിബന്ധ കനിട്ഠാനം, പാണിസ്സ കരഭോ,ന്തരം;

കരസാഖാ, ങ്ഗുലീ താ തു, പഞ്ച, ങ്ഗുട്ഠോ ച തജ്ജനീ;

മജ്ഝിമാ നാമികാ ചാപി, കനിട്ഠാ’തി കമാ സിയും.

൨൬൭.

പദേസോ താലഗോകണ്ണാ, വിദത്ഥി,ത്ഥീ കമാ തതേ;

തജ്ജന്യാദിയുതേ’ങ്ഗുട്ഠേ, പസതോ പാണി കുഞ്ചിതോ.

൨൬൮.

രതനം കുക്കു ഹത്ഥോ ഥ, പുമേ കരപുടോ,ഞ്ജലി;

കരജോ തു നഖോ നിത്ഥീ, ഖടകോ മുട്ഠി ച ദ്വീസു.

൨൬൯.

ബ്യാമോ സഹകരാ ബാഹു, ദ്വേ പസ്സദ്വയവിത്ഥതാ;

ഉദ്ധന്തത ഭുജപോസ, പ്പമാണേ പോരിസം തിസു.

൨൭൦.

ഉരോ ച ഹദയം ചാഥ, ഥനോ കുച പയോധരാ;

ചൂചുകം തു ഥനഗ്ഗസ്മിം, പിട്ഠം തു പിട്ഠി നാരിയം.

൨൭൧.

മജ്ഝോ’നിത്ഥീ ¶ വിലഗ്ഗോ ച, മജ്ഝിമം കുച്ഛി [ചതുക്കം ഉദരേ; ൯൪൪-ഗാഥാപി പസ്സിതബ്ബാ] തു ദ്വിസു;

ഗഹണീത്ഥ്യുദരം ഗബ്ഭോ, കോട്ഠോന്തോ കുച്ഛിസമ്ഭവേ.

൨൭൨.

ജഘനം തു നിതമ്ബോ ച, സോണീ ച കടി നാരിയം;

അങ്ഗജാതം രഹസ്സങ്ഗം, വത്ഥഗുയ്ഹഞ്ച മേഹനം.

൨൭൩.

നിമിത്തഞ്ച വരങ്ഗഞ്ച, ബീജഞ്ച ഫലമേവ ച;

ലിങ്ഗം അണ്ഡം തു കോസോ ച,

യോനി ത്വിത്ഥീപുമേഭഗം.

൨൭൪.

അസുചി സമ്ഭവോ സുക്കം, പായു തു പുരിസേ ഗുദം;

വാ പുമേ ഗൂഥ കരീസ, വച്ചാനി ച മലം ഛകം.

൨൭൫.

ഉച്ചാരോ മീള്ഹ മുക്കാരോ, പസ്സാവോ മുത്ത മുച്ചതേ;

പൂതിമുത്തഞ്ച ഗോമുത്തേ, സ്സാദീനം ഛകണം മലേ.

൨൭൬.

ദ്വീസ്വധോ നാഭിയാ വത്ഥി, ഉച്ഛങ്ഗ’ങ്കാ തു’ഭോ പുമേ;

ഊരു സത്ഥി പുമേ ഊരു, പബ്ബം തു ജാണു ജണ്ണു ച.

൨൭൭.

ഗോപ്ഫകോ പാദഗണ്ഠിപി, പുമേ തു പണ്ഹി പാസണി;

പാദഗ്ഗം പപദോ പാദോ, തു പദോ ചരണഞ്ച വാ.

൨൭൮.

അങ്ഗംത്വ’വയവോ വുത്തോ, ഫാസുലികാ തു ഫാസുകാ;

പണ്ഡകേ അട്ഠി ധാത്വിത്ഥീ, ഗലന്തട്ഠി തു അക്ഖകോ.

൨൭൯.

കപ്പരോ തു കപാലം വാ, കണ്ഡരാ തു മഹാസിരാ;

പുമേ ന്ഹാരു ചിത്ഥീ സിരാ, ധമനീ ഥ രസഗ്ഗസാ.

൨൮൦.

രസഹരണ്യ’ഥോ മംസ, മാമിസം പിസിതം ഭവേ;

തിലിങ്ഗികം തു വല്ലൂര, മുത്തത്തം അഥ ലോഹിതം.

൨൮൧.

രുധിരം സോണിതം രത്തം, ലാലാ ഖേളോ ഏലാ ഭവേ;

പുരിസേ മായു പിത്തഞ്ച, സേമ്ഹോ നിത്ഥീ സിലേസുമോ.

൨൮൨.

വസാ വിലീനസ്നേഹോ ഥ, മേദോ ചേവ വപാ ഭവേ;

ആകപ്പോ വേസോ നേപച്ഛം, മണ്ഡനം തു പസാധനം.

൨൮൩.

വിഭൂസനം ചാഭരണം, അലങ്കാരോ പിലന്ധനം;

കിരീട മകുടാ’നിത്ഥീ, ചൂളാമണി സിരോമണി.

൨൮൪.

സിരോവേഠന ¶ മുണ്ഹീസം, കുണ്ഡലം കണ്ണവേഠനം;

കണ്ണികാ കണ്ണപൂരോ ച, സിയാ കണ്ണവിഭൂസനം.

൨൮൫.

കണ്ഠഭൂസാ തു ഗീവേയ്യം, ഹാരോ മുത്താവലി’ത്ഥിയം;

നിയുരോ വലയോ നിത്ഥീ, കടകം പരിഹാരകം.

൨൮൬.

കങ്കണം കരഭൂസാ ഥ, കിങ്കിണീ [കിംകണീ കിം കണികാ (ക.)] ഖുദ്ദഘണ്ടികാ;

അങ്ഗുലീയക മങ്ഗുല്യാ, ഭരണം, സാക്ഖരം തു തം.

൨൮൭.

മുദ്ദികാ’ങ്ഗുലിമുദ്ദാ ഥ, രസനാ മേഖലാ ഭവേ;

കേയൂര മങ്ഗദഞ്ചേവ, ബാഹുമൂലവിഭൂസനം.

൨൮൮.

പാദങ്ഗദം തു മഞ്ജീരോ, പാദകടക നൂപുരാ;

൨൮൯.

അലങ്കാരപ്പഭേദാ തു, മുഖഫുല്ലം തഥോ’ണ്ണതം;

ഉഗ്ഗത്ഥനം ഗിങ്ഗമക, മിച്ചേവമാദയോ സിയും.

൨൯൦.

ചേല മച്ഛാദനം വത്ഥം, വാസോ വസന മംസുകം;

അമ്ബരഞ്ച പടോ നിത്ഥീ, ദുസ്സം ചോലോ ച സാടകോ.

൨൯൧.

ഖോമം ദുകൂലം കോസേയ്യം, പത്തുണ്ണം കമ്ബലോ ച വാ;

സാണം കോടമ്ബുരം ഭങ്ഗ, ന്ത്യാദി വത്ഥന്തരം മതം.

൨൯൨.

നിവാസന ന്തരീയാന്യ, ന്തരമന്തരവാസകോ;

പാവാരോ തു’ത്തരാസങ്ഗോ, ഉപസംബ്യാന മുത്തരം.

൨൯൩.

ഉത്തരീയ മഥോ വത്ഥ, മഹതന്തി മതം നവം;

നന്തകം കപ്പടോ ജിണ്ണ, വസനം തു പടച്ചരം.

൨൯൪.

കഞ്ചുകോ വാരവാണം വാ, ഥ വത്ഥാവയവേ ദസാ;

നാലിപട്ടോതി കഥിതോ, ഉത്തമങ്ഗമ്ഹി കഞ്ചുകോ.

൨൯൫.

ആയാമോ ദീഘതാ രോഹോ,

പരിണാഹോ വിസാലതാ.

൨൯൬.

അരഹദ്ധജോ ച കാസായ, കാസാവാനി ച ചീവരം;

മണ്ഡലം തു തദങ്ഗാനി, വിവട്ട കുസിആദയോ.

൨൯൭.

ഫല,ത്തച, കിമി, രോമാ, ന്യേതാ വത്ഥസ്സ യോനിയോ;

ഫാലം കപ്പാസികം തീസു, ഖോമാദീ തു തചബ്ഭവാ.

൨൯൮.

കോസേയ്യം ¶ കിമിജം, രോമ, മയം തു കമ്ബലം ഭവേ;

സമാനത്ഥാ ജവനികാ, സാ തിരോകരണീ പ്യഥ.

൨൯൯.

പുന്നപുംസക മുല്ലോചം, വിതാനം ദ്വയ മീരിതം;

നഹാനഞ്ച സിനാനേ ഥോ, ബ്ബട്ടനു’മ്മജ്ജനം സമം.

൩൦൦.

വിസേസകോ തു തിലകോ, ത്യൂഭോ നിത്ഥീ ച ചിത്തകം;

ചന്ദനോ നിത്ഥിയം ഗന്ധ, സാരോ മലയജോ പ്യഥ.

൩൦൧.

ഗോസീസം തേലപണ്ണികം, പുമേ വാ ഹരിചന്ദനം;

തിലപണ്ണീ തു പത്തങ്ഗ, രഞ്ജനം രത്തചന്ദനം.

൩൦൨.

കാളാനുസാരീ കാളിയം, ലോഹം ത്വാ’ഗരു ചാ’ഗളു;

കാളാഗരുതു കാളേ’സ്മിം, തുരുക്ഖോതു ച പിണ്ഡകോ.

൩൦൩.

കത്ഥൂരികാ മിഗമദോ, കുട്ഠം തു അജപാലകം;

ലവങ്ഗം ദേവകുസുമം, കസ്മീരജം തു കുങ്കുമം.

൩൦൪.

യക്ഖധൂപോ സജ്ജുലസോ, തക്കോലം തു ച കോലകം;

കോസഫല മഥോ ജാതി, കോസം ജാതിഫലം ഭവേ.

൩൦൫.

ഘനസാരോ സിതബ്ഭോ ച, കപ്പൂരം പുന്നപുംസകേ;

അലത്തകോ യാവകോ ച, ലാഖാ ജതു നപുംസകേ.

൩൦൬.

സിരിവാസോ തു സരല, ദ്ദവോ’ ഞ്ജനം തു കജ്ജലം;

വാസചുണ്ണം വാസയോഗോ, വണ്ണകം തു വിലേപനം.

൩൦൭.

ഗന്ധമാല്യാദിസങ്ഖാരോ, യോ തം വാസന മുച്ചതേ;

മാലാ മാല്യം പുപ്ഫദാമേ [പുപ്ഫം ദാമം (ക.)], ഭാവിതം വാസിതം തിസു.

൩൦൮.

ഉത്തംസോ സേഖരാ’ വേളാ, മുദ്ധമാല്യേ വടംസകോ;

സേയ്യാ ച സയനം സേനം, പല്ലങ്കോ തു ച മഞ്ചകോ.

൩൦൯.

മഞ്ചാധാരോ പടിപാദോ, മഞ്ചങ്ഗേ ത്വടനീ ത്ഥിയം,

൩൧൦.

കുളീരപാദോ ആഹച്ച, പാദോ ചേവ മസാരകോ;

ചത്താരോ ബുന്ദികാബദ്ധോ, തിമേ മഞ്ചന്തരാ സിയും.

൩൧൧.

ബിബ്ബോഹനം ചോ’ പധാനം, പീഠികാ പീഠ മാസനം;

കോച്ഛം തു ഭദ്ദപീഠേ ഥാ, സന്ദീ പീഠന്തരേ മതാ.

൩൧൨.

മഹന്തോ ¶ കോജവോ ദീഘ,

ലോമകോ ഗോനകോ മതോ;

ഉണ്ണാമയം ത്വത്ഥരണം, ചിത്തകം വാനചിത്തകം.

൩൧൩.

ഘനപുപ്ഫം പടലികാ, സേതം തു പടികാ പ്യഥ;

ദ്വിദസേകദസാന്യു’ ദ്ദ,ലോമി ഏകന്തലോമിനോ.

൩൧൪.

തദേവ സോളസിത്ഥീനം, നച്ചയോഗ്ഗഞ്ഹി കുത്തകം;

സീഹബ്യഗ്ഘാദിരൂപേഹി, ചിത്തം വികതികാ ഭവേ.

൩൧൫.

കട്ടിസ്സം കോസേയ്യം രതന, പരിസിബ്ബിത മത്ഥരണം കമാ;

കോസിയകട്ടിസ്സമയം, കോസിയസുത്തേന പകതഞ്ച.

൩൧൬.

ദീപോ പദീപോ പജ്ജോതോ, പുമേ ത്വാദാസ ദപ്പണാ;

ഗേണ്ഡുകോ കണ്ഡുകോ താല, വണ്ടം തു ബീജനീത്ഥിയം.

൩൧൭.

ചങ്കോടകോ കരണ്ഡോ ച, സമുഗ്ഗോ സമ്പുടോ ഭവേ;

ഗാമധമ്മോ അസദ്ധമ്മോ, ബ്യവായോ മേഥുനം രതി.

൩൧൮.

വിവാഹോ പയമാ പാണി, ഗ്ഗഹോ പരിണയോ പ്യഥ;

തിവഗ്ഗോ ധമ്മ, കാമ,ത്ഥാ, ചതുവഗ്ഗോ സമോക്ഖകാ.

൩൧൯.

ഖുജ്ജോ ച ഗണ്ഡുലോ രസ്സ, വാമനാ തു ലകുണ്ഡകോ;

പങ്ഗുലോ പീഠസപ്പീ ച, പങ്ഗു ഛിന്നിരിയാപഥോ.

൩൨൦.

പക്ഖോ ഖഞ്ജോ തു ഖോണ്ഡോ ഥ,

മൂഗോ സുഞ്ഞവചോ ഭവേ;

കുണീ ഹത്ഥാദിവങ്കോ ച, വലിരോ തു ച കേകരോ.

൩൨൧.

നിക്കേസസീസോ ഖല്ലാടോ,

മുണ്ഡോ തു ഭണ്ഡു മുണ്ഡികോ;

കാണോ അക്ഖീന മേകേന,

സുഞ്ഞോ അന്ധോ ദ്വയേന ഥ.

൩൨൨.

ബധിരോ സുതിഹീനോ ഥ, ഗിലാനോ ബ്യാധിതാ’തുരാ;

ഉമ്മാദവതി ഉമ്മത്തോ, ഖുജ്ജാദീ വാച്ചലിങ്ഗികാ.

൩൨൩.

ആതങ്കോ ആമയോ ബ്യാധി, ഗദോ രോഗോ രുജാപി ച;

ഗേലഞ്ഞാകല്ല മാബാധോ,

സോസോ തു ച ഖയോ സിയാ.

൩൨൪.

പീനസോ [പീനാസോതിപി പാഠോ] ¶ നാസികാരോഗോ,

ഘാനേ സിങ്ഘാനികാ സ്സവോ;

ഞേയ്യം ത്വ’രു വണോ നിത്ഥീ, ഫോടോ തു പിളകാ ഭവേ.

൩൨൫.

പുബ്ബോ പൂയോ ഥ രത്താതി, സാരോ പക്ഖന്ദികാ പ്യഥ;

അപമാരോ അപസ്മാരോ, പാദഫോടോ വിപാദികാ.

൩൨൬.

വുഡ്ഢിരോഗോ തു വാതണ്ഡം, സീപദം ഭാരപാദതാ;

കണ്ഡൂ കണ്ഡൂതി കണ്ഡൂയാ, ഖജ്ജു കണ്ഡൂവനം പ്യഥ.

൩൨൭.

പാമം വിതച്ഛികാ കച്ഛു, സോഥോ തു സയഥൂ’ദിതോ;

ദുന്നാമകഞ്ച അരിസം, ഛദ്ദികാ വമഥൂ’ദിതോ.

൩൨൮.

ദവഥു പരിതാപോ ഥ, തിലകോ തിലകാളകോ;

വിസൂചികാ ഇതി മഹാ, വിരേകോ ഥ ഭഗന്ദലോ [ഭഗന്ദരോ (ക.)].

൩൨൯.

മേഹോ ജരോ കാസ സാസാ, കുട്ഠം സൂലാമയന്തരാ;

വുത്തോ വേജ്ജോ ഭിസക്കോ ച, രോഗഹാരീ തികിച്ഛകോ.

൩൩൦.

സല്ലവേജ്ജോ സല്ലകത്തോ, തികിച്ഛാ തു പതിക്രിയാ;

ഭേസജ്ജ മഗദോ ചേവ, ഭേസജം മോ’സധം പ്യഥ.

൩൩൧.

കുസലാ നാമയാ രോഗ്യം,

അഥ കല്ലോ നിരാമയോതി,

നരവഗ്ഗോ നിട്ഠിതോ.

൪. ചതുബ്ബണ്ണവഗ്ഗ

ഖത്തിയവഗ്ഗ

൩൩൨.

കുലം വംസോ ച സന്താനാ, ഭിജനാ ഗോത്ത മന്വയോ;

ഥിയം സന്തത്യ ഥോ വണ്ണാ, ചത്താരോ ഖത്തിയാദയോ.

൩൩൩.

കുലീനോ സജ്ജനോ സാധു,

സഭ്യോ ചായ്യോ മഹാകുലോ;

രാജാ ഭൂപതി ഭൂപാലോ, പത്ഥിവോ ച നരാധിപോ.

൩൩൪.

ഭൂനാഥോ ¶ ജഗതിപാലോ, ദിസമ്പതി ജനാധിപോ;

രട്ഠാധിപോ നരദേവോ, ഭൂമിപോ ഭൂഭുജോ പ്യഥ.

൩൩൫.

രാജഞ്ഞോ ഖത്തിയോ ഖത്തം, മുദ്ധാഭിസിത്ത ബാഹുജാ;

സബ്ബഭുമ്മോ ചക്കവത്തീ, ഭൂപോഞ്ഞോ മണ്ഡലിസ്സരോ.

൩൩൬.

പുമേ ലിച്ഛവി വജ്ജീ ച, സക്യോ തു സാകിയോ ഥ ച;

ഭദ്ദകച്ചാനാ [ഭദ്ദാ കച്ചാനാ (ടീ.)] രാഹുല, മാതാ ബിമ്ബാ യസോധരാ.

൩൩൭.

കോടീനം ഹേട്ഠിമന്തേന, സതം യേസം നിധാനഗം;

കഹാപണാനം ദിവസ, വളഞ്ജോ വീസതമ്ബണം.

൩൩൮.

തേ ഖത്തിയമഹാസാലാ, സീതി കോടിധനാനി തു;

നിധാനഗാനി ദിവസ, വളഞ്ജോ ച ദസമ്ബണം.

൩൩൯.

യേസം ദ്വിജമഹാസാലാ, തദുപഡ്ഢേ നിധാനഗേ;

വളഞ്ജേ ച ഗഹപതി, മഹാസാലാ ധനേ സിയും.

൩൪൦.

മഹാമത്തോ പധാനഞ്ച, മതിസജീവോ മന്തിനീ;

സജീവോ സചിവാ, മച്ചോ, സേനാനീ തു ചമൂപതി.

൩൪൧.

ന്യാസാദീനം വിവാദാനം, അക്ഖദസ്സോ പദട്ഠരി;

ദോവാരികോ പതീഹാരോ, ദ്വാരട്ഠോ ദ്വാരപാലകോ.

൩൪൨.

അനീകട്ഠോതി രാജൂനം, അങ്ഗരക്ഖഗണോ മതോ;

കഞ്ചുകീ സോവിദല്ലോ ച, അനുജീവീ തു സേവകോ.

൩൪൩.

അജ്ഝക്ഖോ ധികതോ ചേവ,

ഹേരഞ്ഞികോ തു നിക്ഖികോ;

സദേസാനന്തരോ സത്തു, മിത്തോരാജാ തതോ പരം.

൩൪൪.

അമിത്തോ രിപു വേരീ ച, സപത്താ രാതി സത്വ’രി; (സത്തു+അരി)

പച്ചത്ഥികോ പരിപന്ഥീ, പടിപക്ഖാ ഹിതാപരോ.

൩൪൫.

പച്ചാമിത്തോ വിപക്ഖോ ച, പച്ചനീക വിരോധിനോ;

വിദ്ദേസീ ച ദിസോ ദിട്ഠോ,ഥാ നുരോധോ നുവത്തനം.

൩൪൬.

മിത്തോ നിത്ഥീ വയസ്സോ ച, സഹായോ [സുഹജ്ജോ (ടീ.)] സുഹദോ സഖാ;

സമ്ഭത്തോ ദള്ഹമിത്തോ ഥ, സന്ദിട്ഠോ ദിട്ഠമത്തകോ.

൩൪൭.

ചരോ ച ഗുള്ഹപുരിസോ, പഥാവീ പഥികോ’ദ്ധഗൂ;

ദൂതോ തു സന്ദേസഹരോ, ഗണകോ തു മുഹുത്തികോ.

൩൪൮.

ലേഖകോ ¶ ലിപികാരോ ച, വണ്ണോ തു അക്ഖരോ പ്യഥ;

ഭേദോ ദണ്ഡോ സാമ ദാനാ, ന്യുപായാ ചതുരോ ഇമേ.

൩൪൯.

ഉപജാപോതു ഭേദോ ച, ദണ്ഡോ തു സാഹസം ദമോ;

൩൫൦.

സാമ്യ’ മച്ചോ സഖാ കോസോ, ദുഗ്ഗഞ്ച വിജിതം ബലം;

രജ്ജങ്ഗാനീതി സത്തേതേ, സിയും പകതിയോ പിച.

൩൫൧.

പഭാവു’സ്സാഹ, മന്താനം, വസാ തിസ്സോ ഹി സത്തിയോ;

പഭാവോ ദണ്ഡജോ തേജോ,

പതാപോ തു ച കോസജോ.

൩൫൨.

മന്തോ ച മന്തനം സോ തു, ചതുക്കണ്ണോ ദ്വിഗോചരോ;

തിഗോചരോ തു ഛക്കണ്ണോ, രഹസ്സം ഗുയ്ഹ മുച്ചതേ.

൩൫൩.

തീസു വിവിത്ത വിജന, ഛന്നാ, രഹോ രഹോ ബ്യയം;

വിസ്സാസോ തു ച വിസ്സമ്ഭോ,

യുത്തം ത്വോ’പായികം തിസു.

൩൫൪.

ഓവാദോ ചാനുസിട്ഠിത്ഥീ, പുമവജ്ജേ നുസാസനം;

ആണാ ച സാസനം ഞേയ്യം, ഉദ്ദാനം തു ച ബന്ധനം.

൩൫൫.

ആഗു വുത്ത [മന്തു (ക.)] മപരാധോ, കരോ തു ബലി മുച്ചതേ;

പുണ്ണപത്തോ തുട്ഠിദായോ, ഉപദാ തു ച പാഭതം.

൩൫൬.

തഥോ’പായന മുക്കോചോ, പണ്ണാകാരോ പഹേണകം;

സുങ്കം ത്വനിത്ഥീ ഗുമ്ബാദി, ദേയ്യേ ഥാ’യോ ധനാഗമോ.

൩൫൭.

ആതപത്തം തഥാ ഛത്തം, രഞ്ഞം തു ഹേമമാസനം;

സീഹാസനം അഥോ വാള, ബീജനീത്ഥീ ച ചാമരം.

൩൫൮.

ഖഗ്ഗോ ച ഛത്ത മുണ്ഹീസം, പാദുകാ വാലബീജനീ;

ഇമേ കകുധഭണ്ഡാനി, ഭവന്തി പഞ്ച രാജുനം.

൩൫൯.

ഭദ്ദകുമ്ഭോ പുണ്ണകുമ്ഭോ, ഭിങ്കാരോ ജലദായകോ;

ഹത്ഥി,സ്സ,രഥ,പത്തീ തു, സേനാ ഹി ചതുരങ്ഗിനീ.

൩൬൦.

കുഞ്ജരോ വാരണോ ഹത്ഥീ, മാതങ്ഗോ ദ്വിരദോ ഗജോ;

നാഗോ ദ്വിപോ ഇഭോ ദന്തീ,

യൂഥജേട്ഠോ തു യൂഥപോ.

൩൬൧.

കാളാവക ¶ ഗങ്ഗേയ്യാ, പണ്ഡര തമ്ബാ ച പിങ്ഗലോ ഗന്ധോ;

മങ്ഗല ഹേമോ’പോസഥ,

ഛദ്ദന്താ ഗജകുലാനി ഏതാനി.

൩൬൨.

കലഭോ ചേവ ഭിങ്കോഥ, പഭിന്നോ മത്ത ഗജ്ജിതാ;

ഹത്ഥിഘടാ തു ഗജതാ, ഹത്ഥീനീ തു കരേണുകാ.

൩൬൩.

കുമ്ഭോ ഹത്ഥിസിരോപിണ്ഡാ, കണ്ണമൂലം തു ചൂലികാ;

ആസനം ഖന്ധദേസമ്ഹി, പുച്ഛമൂലം തു മേചകോ.

൩൬൪.

ആലാന മാള്ഹകോ ഥമ്ഭോ, നിത്ഥീതു നിഗളോ’ന്ദുകോ;

സങ്ഖലം തീസ്വഥോ ഗണ്ഡോ,

കടോ ദാനം തു സോ മദോ.

൩൬൫.

സോണ്ഡോ തു ദ്വീസു ഹത്ഥോ ഥ,

കരഗ്ഗം പോക്ഖരം ഭവേ;

മജ്ഝമ്ഹി ബന്ധനം കച്ഛാ, കപ്പനോ തു കുഥാദയോ.

൩൬൬.

ഓപവയ്ഹോ രാജവയ്ഹോ, സജ്ജിതോ തു ച കപ്പിതോ;

തോമരോ നിത്ഥിയം പാദേ, സിയാ വിജ്ഝനകണ്ടകോ.

൩൬൭.

തുത്തം തു കണ്ണമൂലമ്ഹി, മത്ഥകമ്ഹി തു അങ്കുസോ;

ഹത്ഥാരോഹോ ഹത്ഥിമേണ്ഡോ,

ഹത്ഥിപോ ഹത്ഥിഗോപകോ.

൩൬൮.

ഗാമണീയോ തു മാതങ്ഗ, ഹയാദ്യാചരിയോ ഭവേ;

ഹയോ തുരങ്ഗോ തുരഗോ,

വാഹോ അസ്സോ ച സിന്ധവോ.

൩൬൯.

ഭേദോ അസ്സതരോ തസ്സാ,

ജാനിയോ തു കുലീനകോ;

സുഖവാഹീ വിനീതോ ഥ,

കിസോരോ ഹയപോതകോ.

൩൭൦.

ഘോടകോ തു ഖളുങ്കോ ഥ, ജവനോ ച ജവാധികോ;

മുഖാധാനം ഖലീനോ വാ, കസാ ത്വ സ്സാഭിതാളിനീ.

൩൭൧.

കുസാ തു നാസരജ്ജുമ്ഹി, വളവാ’സ്സാ ഖുരോ സഫം;

പുച്ഛ മനിത്ഥീ നങ്ഗുട്ഠം, വാലഹത്ഥോ ച വാലധി.

൩൭൨.

സന്ദനോ ¶ ച രഥോ ഫുസ്സ, രഥോ തു നരണായ സോ;

ചമ്മാവുതോ ച വേയഗ്ഘോ,

ദേപ്പോ ബ്യഗ്ഘസ്സ ദീപിനോ.

൩൭൩.

സിവികാ യാപ്യയാനഞ്ചാ, നിത്ഥീ തു സകടോ പ്യ’നം [(സകടോ പി+അനം)];

ചക്കം രഥങ്ഗ മാഖ്യാതം, തസ്സന്തോ നേമി നാരിയം.

൩൭൪.

തമ്മജ്ഝേ പിണ്ഡികാ നാഭി, കുബ്ബരോ തു യുഗന്ധരോ;

അക്ഖഗ്ഗകീലേ ആണീത്ഥീ, വരുഥോ രഥഗുത്യ’ഥ.

൩൭൫.

ധുരോ മുഖേ രഥസ്സങ്ഗാ, ത്വ ക്ഖോ പക്ഖരആദയോ;

യാനഞ്ച വാഹനം യോഗ്ഗം, സബ്ബഹത്ഥ്യാദിവാഹനേ.

൩൭൬.

രഥചാരീ തു സൂതോ ച, പാജിതാ ചേവ സാരഥീ;

രഥാരോഹോ ച രഥികോ,

രഥീ യോധോ തു യോ ഭടോ.

൩൭൭.

പദാതി പത്തീ തു പുമേ, പദഗോ പദികോ മതോ;

സന്നാഹോ കങ്കടോ വമ്മം, കവചോ വാ ഉരച്ഛദോ.

൩൭൮.

ജാലികാ ഥ ച സന്നദ്ധോ, സജ്ജോ ച വമ്മികോ ഭവേ;

ആമുക്കോ പടിമുക്കോ ഥ, പുരേചാരീ പുരേചരോ.

൩൭൯.

പുബ്ബങ്ഗമോ പുരേഗാമീ, മന്ദഗാമീ തു മന്ഥരോ;

ജവനോ തുരിതോ വേഗീ, ജേതബ്ബം ജേയ്യ മുച്ചതേ.

൩൮൦.

സൂര വീരാ തു വിക്കന്തോ, സഹായോ നുചരോ സമാ;

സന്നദ്ധപ്പഭുതീ തീസു, പാഥേയ്യം തു ച സമ്ബലം.

൩൮൧.

വാഹിനീ ധജിനീ സേനാ, ചമൂ ചക്കം ബലം തഥാ;

അനീകോ വാ ഥ വിന്യാസോ,

ബ്യൂഹോ സേനായ കഥ്യതേ.

൩൮൨.

ഹത്ഥീ ദ്വാദസപോസോ,തി,

പുരിസോ തുരഗോ, രഥോ;

ചതുപോസോതി ഏതേന, ലക്ഖണേനാ ധമന്തതോ.

൩൮൩.

ഹത്ഥാനീകം ഹയാനീകം, രഥാനീകം തയോ തയോ;

ഗജാദയോ സസത്ഥാ തു, പത്താനീകം ചതുജ്ജനാ.

൩൮൪.

സട്ഠിവംസകലാപേസു, ¶ പച്ചേകം സട്ഠിദണ്ഡിസു;

ധൂലീകതേസു സേനായ, യന്തിയാ ക്ഖോഭനീ [അക്ഖോഭിണീ (ക.)] ത്ഥിയം.

൩൮൫.

സമ്പത്തി സമ്പദാ ലക്ഖീ, സിരീ വിപത്തി ആപദാ;

അഥാ വുധഞ്ച [ആയുധന്തിപി പാഠോ] ഹേതി’ത്ഥീ, സത്ഥം പഹരണം ഭവേ.

൩൮൬.

മുത്താമുത്ത മമുത്തഞ്ച, പാണിതോ മുത്തമേവ ച;

യന്തമുത്തന്തി സകലം, ആയുധം തം ചതുബ്ബിധം.

൩൮൭.

മുത്താമുത്തഞ്ച യട്ഠ്യാദി, അമുത്തം ഛുരികാദികം;

പാണിമുത്തം തു സത്യാദി, യന്തമുത്തം സരാദികം.

൩൮൮.

ഇസ്സാസോ ധനു കോദണ്ഡം, ചാപോ നിത്ഥീ സരാസനം;

അഥോ ഗുണോ ജിയാ ജ്യാ ഥ,

സരോ പത്തി ച സായകോ.

൩൮൯.

വാണോ കണ്ഡ മുസു ദ്വീസു, ഖുരപ്പോ [ഉരപ്പോ (ക.)] തേജനാ’സനം;

തൂണീത്ഥിയം കലാപോ ച, തൂണോ തൂണീര വാണധി.

൩൯൦.

പക്ഖോ തു വാജോ ദിദ്ധോ തു, വിസപ്പിതോ സരോ ഭവേ;

ലക്ഖം വേജ്ഝം സരബ്യഞ്ച, സരാഭ്യാസോ തു’പാസനം.

൩൯൧.

മണ്ഡലഗ്ഗോ തു നേത്തിംസോ, അസി ഖഗ്ഗോ ച സായകോ;

കോസിത്ഥീ തബ്ബിധാനേ ഥോ, ഥരു ഖഗ്ഗാദിമുട്ഠിയം.

൩൯൨.

ഖേടകം ഫലകം ചമ്മം, ഇല്ലീ തു കരപാലികാ;

ഛുരികാ സത്യ’സിപുത്തീ, ലഗുളോ തു ച മുഗ്ഗരോ.

൩൯൩.

സല്ലോ നിത്ഥി സങ്കു പുമേ, വാസീ തു തച്ഛനീത്ഥിയം;

കുഠാരീ [കുധാരീ (ടീ.)] ത്ഥീഫരസുസോ, ടങ്കോ പാസാണദാരണോ.

൩൯൪.

കണയോ ഭിന്ദിവാളോ ച, ചക്കം കുന്തോ ഗദാ തഥാ;

സത്യാ’ദീ സത്ഥഭേദാ ഥ,

കോണോ’സ്സോ കോടി നാരിയം.

൩൯൫.

നിയ്യാനം ഗമനം യാത്രാ, പട്ഠാനഞ്ച ഗമോ ഗതി;

ചുണ്ണോ പംസു രജോ ചേവ, ധൂലീ’ത്ഥീ രേണു ച ദ്വിസു.

൩൯൬.

മാഗധോ ¶ മധുകോ വുത്തോ, വന്ദീ തു ഥുതിപാഠകോ;

വേതാളികോ ബോധകരോ,

ചക്കികോ തു ച ഘണ്ടികോ.

൩൯൭.

കേതു ധജോ പടാകാ ച, കദലീ കേതനം പ്യഥ;

യോ’ഹംകാരോ’ഞ്ഞമഞ്ഞസ്സ, സാ’ ഹമഹമികാ ഭവേ.

൩൯൮.

ബലം ഥാമോ സഹം സത്തി, വിക്കമോ ത്വതിസൂരതാ;

രണേ ജിതസ്സ യം പാനം, ജയപാനന്തി തം മതം.

൩൯൯.

സങ്ഗാമോ സമ്പഹാരോ ചാ, നിത്ഥിയം സമരം രണം;

ആജിത്ഥീ ആഹവോ യുദ്ധ, മായോധനഞ്ച സംയുഗം.

൪൦൦.

ഭണ്ഡനം തു വിവാദോ ച, വിഗ്ഗഹോ കലഹ മേധഗാ;

മുച്ഛാ മോഹോ ഥ പസയ്ഹോ,

ബലക്കാരോ ഹഠോ ഭവേ.

൪൦൧.

ഉപ്പാദോ [ഉപ്പാതോ (ക.)൧൦൨൭-ഗാഥാ പസ്സിതബ്ബാ] ഭൂതവികതി, യാ സുഭാസുഭസൂചികാ;

ഈതി ത്വിത്ഥീ അജഞ്ഞഞ്ച, ഉപസഗ്ഗോ ഉപദ്ദവോ.

൪൦൨.

നിബ്ബുദ്ധം [നിയുദ്ധം (ക.)] മല്ലയുദ്ധമ്ഹി, ജയോ തു വിജയോ ഭവേ;

പരാജയോ രണേ ഭങ്ഗോ, പലായന മപക്കമോ.

൪൦൩.

മാരണം ഹനനം ഘാതോ, നാസനഞ്ച നിസൂദനം;

ഹിംസനം സരണം ഹിംസാ, വധോ സസന ഘാതനം.

൪൦൪.

മരണം കാലകിരിയാ, പലയോ മച്ചു അച്ചയോ;

നിധനോ നിത്ഥിയം നാസോ, കാലോ’ന്തോ ചവനം ഭവേ.

൪൦൫.

തീസു പേതോ പരേതോ ച,

മതോ ഥ ചിതകോ ചിതോ;

ആളഹനം സുസാനഞ്ചാ, നിത്ഥിയം കുണപോ ഛവോ.

൪൦൬.

കബന്ധോ നിത്ഥിയം ദേഹോ, സിരോസുഞ്ഞോ സഹക്രിയോ;

അഥ സിവഥികാ വുത്താ, സുസാനസ്മിഞ്ഹി ആമകേ.

൪൦൭.

വന്ദീത്ഥിയം കരമരോ, പാണോ ത്വ’സു പകാസിതോ;

കാരാ തു ബന്ധനാഗാരം, കാരണാ തു ച യാതനാ.

ഇതി ഖത്തിയവഗ്ഗോ.

൪൦൮.

ബ്രഹ്മബന്ധു ¶ ദ്വിജോ വിപ്പോ, ബ്രഹ്മാ ഭോവാദീ ബ്രാഹ്മണോ;

സോത്തിയോ ഛന്ദസോ സോ ഥ,

സിസ്സ’ ന്തേവാസിനോ പുമേ.

൪൦൯.

ബ്രഹ്മചാരീ ഗഹട്ഠോ ച, വനപ്പത്ഥോ ച ഭിക്ഖുതി;

ഭവന്തി ചത്താരോ ഏതേ, അസ്സമാ പുന്നപുംസകേ.

൪൧൦.

ചരന്താ സഹ സീലാദീ, സബ്രഹ്മചാരിനോ മിഥു;

ഉപജ്ഝായോ ഉപജ്ഝാ ഥാ, ചരിയോ നിസ്സയദാദികോ [നിസ്സയദായകോ (ടീ.)].

൪൧൧.

ഉപനീയാ ഥവാ പുബ്ബം, വേദ മജ്ഝാപയേ ദ്വിജോ;

യോ സങ്ഗം സരഹസ്സഞ്ചാ, ചരിയോ ബ്രാഹ്മണേസു സോ.

൪൧൨.

പാരമ്പരിയ മേതിഹ്യം, ഉപദേസോ തഥേ’തിഹാ;

യാഗോ തു കതു യഞ്ഞോ ഥ, വേദീത്ഥീ ഭൂ പരിക്ഖതാ.

൪൧൩.

അസ്സമേധോ ച പുരിസ, മേധോ ചേവ നിരഗ്ഗളോ;

സമ്മാപാസോ വാജപേയ്യ, മിതി യാഗാ മഹാ ഇമേ.

൪൧൪.

ഇത്വിജോ [ഇദിത്വിജോ (ടീ.)] യാജകോ ചാഥ,

സഭ്യോ സാമാജികോ പ്യഥ;

പരിസാ സഭാ സമജ്ജാ ച, തഥാ സമിതി സംസദോ.

൪൧൫.

ചതസ്സോ പരിസാ ഭിക്ഖു, ഭിക്ഖുനീ ച ഉപാസകാ;

ഉപാസികായോതി ഇമാ, ഥവാ ട്ഠ പരിസാ സിയും.

൪൧൬.

താവതിംസ,ദ്വിജ,ക്ഖത്ത,മാര,ഗ്ഗഹപതിസ്സ ച;

സമണാനം വസാ ചാതു, മഹാരാജിക, ബ്രഹ്മുനം.

൪൧൭.

ഗായത്തിപ്പമുഖം ഛന്ദം, ചതുവീസ’ക്ഖരം തു യം;

വേദാന മാദിഭൂതം സാ, സാവിത്തീ തിപദം സിയാ.

൪൧൮.

ഹബ്യപാകേ ചരു മതോ, സുജാ തു ഹോമദബ്ബിയം;

പരമന്നം തു പായാസോ, ഹബ്യം തു ഹവി കഥ്യതേ.

൪൧൯.

യൂപോ ഥൂണായം നിമ്മന്ത്യ, ദാരുമ്ഹി ത്വ’രണീ ദ്വിസു;

ഗാഹപ്പച്ചാ’ഹവനീയോ, ദക്ഖിണഗ്ഗി തയോ’ ഗ്ഗയോ.

൪൨൦.

ചാഗോ വിസ്സജ്ജനം ദാനം, വോസ്സഗ്ഗോ ചാപദേസനം;

വിസ്സാണനം വിതരണം, വിഹായിതാ പവജ്ജനം.

൪൨൧.

പഞ്ച ¶ മഹാപരിച്ചാഗോ, വുത്തോ സേട്ഠ, ധനസ്സ ച;

വസേന പുത്ത ദാരാനം, രജ്ജസ്സ’ ങ്ഗാന മേവ ച.

൪൨൨.

അന്നം പാനം ഘരം വത്ഥം, യാനം മാലാ വിലേപനം;

ഗന്ധോ സേയ്യാ പദീപേയ്യം, ദാനവത്ഥൂ സിയും ദസ.

൪൨൩.

മതത്ഥം തദഹേ ദാനം, തീസ്വേത മുദ്ധദേഹികം;

പിതുദാനം തു നിവാപോ, സദ്ധം തു തംവ സാത്ഥതോ.

൪൨൪.

പുമേ അതിഥി ആഗന്തു, പാഹുനാ വേസികാ പ്യഥ;

അഞ്ഞത്ഥ ഗന്തു മിച്ഛന്തോ, ഗമികോ ഥാ ഗ്ഘ മഗ്ഘിയം.

൪൨൫.

പജ്ജം പാദോദകാദോ ഥ, സത്താ’ഗന്ത്വാദയോ തിസു;

അപചിത്യ’ച്ചനാ പൂജാ, പഹാരോ ബലി മാനനാ.

൪൨൬.

നമസ്സാ തു നമക്കാരോ, വന്ദനാ ചാഭിവാദനം;

പത്ഥനാ പണിധാനഞ്ച, പുരിസേ പണിധീരിതോ.

൪൨൭.

അജ്ഝേസനാ തു സക്കാര, പുബ്ബങ്ഗമനിയോജനം;

൪൨൮.

പരിയേസനാ ന്വേസനാ, പരിയേട്ഠി ഗവേസനാ;

ഉപാസനം തു സുസ്സൂസാ, സാ പാരിചരിയാ ഭവേ.

൪൨൯.

മോന മഭാസനം തുണ്ഹീ, ഭാവോ ഥ പടിപാടി സാ;

അനുക്കമോ പരിയായോ, അനുപുബ്ബ്യ’പുമേ കമോ.

൪൩൦.

തപോ ച സംയമോ സീലം, നിയമോ തു വതഞ്ച വാ;

വീതിക്കമോ’ ജ്ഝചാരോ ഥ, വിവേകോ പുഥുഗത്തതാ.

൪൩൧.

ഖുദ്ദാനുഖുദ്ദകം ആഭി, സമാചാരിക മുച്ചതേ;

ആദിബ്രഹ്മചരിയം തു, തദഞ്ഞം സീല മീരിതം.

൪൩൨.

യോ പാപേഹി ഉപാവത്തോ, വാസോ സദ്ധിം ഗുണേഹി സോ;

ഉപവാസോതി വിഞ്ഞേയ്യോ, സബ്ബഭോഗവിവജ്ജിതോ.

൪൩൩.

തപസ്സീ ഭിക്ഖു സമണോ, പബ്ബജിതോ തപോധനോ;

വാചംയമോ തു മുനി ച, താപസോ തു ഇസീ രിതോ.

൪൩൪.

യേസംയതിന്ദ്രിയഗണാ, യതയോ വസിനോ ച തേ;

സാരിപുത്തോ’പതിസ്സോ തു, ധമ്മസേനാപതീ രിതോ.

൪൩൫.

കോലിതോ മോഗ്ഗല്ലാനോ ഥ,

അരിയോ ധിഗതോ സിയാ;

സോതാപന്നാദികാ സേഖാ, നരിയോ തു പുഥുജ്ജനോ.

൪൩൬.

അഞ്ഞാ ¶ തു അരഹത്തഞ്ച, ഥൂപോ തു ചേതിയം ഭവേ;

ധമ്മഭണ്ഡാഗാരികോ ച, ആനന്ദോ ദ്വേ സമാ ഥ ച.

൪൩൭.

വിസാഖാ മിഗാരമാതാ, സുദത്തോ’ നാഥപിണ്ഡികോ;

൪൩൮.

ഭിക്ഖുപി സാമണേരോ ച, സിക്ഖമാനാ ച ഭിക്ഖുനീ;

സാമണേരീതി കഥിതാ, പഞ്ചേതേ സഹധമ്മികാ.

൪൩൯.

പത്തോ തിചീവരം കായ, ബന്ധനം വാസി സൂചി ച;

പരിസ്സാവന മിച്ചേതേ, പരിക്ഖാരാ’ട്ഠ ഭാസിതാ.

൪൪൦.

സാമണേരോ ച സമണു, ദ്ദേസോ ചാഥ ദിഗമ്ബരോ;

അചേളകോ നിഗണ്ഠോ ച, ജടിലോ തു ജടാധരോ.

൪൪൧.

കുടീസകാദികാ ചതു, ത്തിംസ ദ്വാസട്ഠി ദിട്ഠിയോ;

ഇതി ഛന്നവുതി ഏതേ, പാസണ്ഡാ സമ്പകാസിതാ.

൪൪൨.

പവിത്തോ പയതോ പൂതോ, ചമ്മം തു അജിനം പ്യഥ;

ദന്തപോണോ ദന്തകട്ഠം, വക്കലോ വാ തിരീടകം.

൪൪൩.

പത്തോ പാതിത്ഥിയംനിത്ഥീ, കമണ്ഡലു തു കുണ്ഡികാ;

അഥാലമ്ബണദണ്ഡസ്മിം, കത്തരയട്ഠി നാരിയം.

൪൪൪.

യം ദേഹസാധനാപേക്ഖം, നിച്ചം കമ്മമയം യമോ;

ആഗന്തുസാധനം കമ്മം, അനിച്ചം നിയമോ ഭവേ.

ഇതി ബ്രാഹ്മണവഗ്ഗോ.

൪൪൫.

വേസ്സോ ച വേസിയാനോ ഥ, ജീവനം വുത്തി ജീവികാ;

ആജീവോ വത്തനം ചാഥ, കസികമ്മം കസിത്ഥിയം.

൪൪൬.

വാണിജ്ജഞ്ച വണിജ്ജാ ഥ, ഗോരക്ഖാ പസുപാലനം;

വേസ്സസ്സ വുത്തിയോ തിസ്സോ, ഗഹട്ഠാ’ഗാരികാ ഗിഹി.

൪൪൭.

ഖേത്താജീവോ കസ്സകോ ഥ, ഖേത്തം കേദാര മുച്ചതേ;

ലേഡ്ഡു’ത്തോ മത്തികാഖണ്ഡോ, ഖണിത്തി’ത്ഥ്യ’വദാരണം.

൪൪൮.

ദാത്തം ലവിത്ത മസിതം [‘‘അസിത’’ സദ്ദോ പുംനപുംസകേ-൧൦൦൫-ഗാഥാ പസ്സിതബ്ബാ], പതോദോ തുത്ത പാജനം;

യോത്തം തു രജ്ജു രസ്മിത്ഥീ, ഫാലോ തു കസകോ ഭവേ.

൪൪൯.

നങ്ഗലഞ്ച ഹലം സീരോ, ഈസാ നങ്ഗലദണ്ഡകോ;

സമ്മാ തു യുഗകീലസ്മിം, സീതാ തു ഹലപദ്ധതി.

൪൫൦.

മുഗ്ഗാദികേ ¶ പരണ്ണഞ്ച, പുബ്ബണ്ണം സാലിആദികേ;

സാലി വീഹി ച കുദ്രൂസോ, ഗോധുമോ വരകോ യവോ;

കങ്ഗൂതി സത്ത ധഞ്ഞാനി, നീവാരാദീ തു തബ്ഭിദാ.

൪൫൧.

ചണകോ ച കളായോ ഥ,

സിദ്ധത്ഥോ സാസപോ ഭവേ.

൪൫൨.

അഥ കങ്ഗു പിയങ്ഗു’ത്ഥീ, ഉമ്മാ തു അതസീ ഭവേ;

കിട്ഠഞ്ച സസ്സം ധഞ്ഞഞ്ച [വിഞ്ഞേയ്യം (ടീ.)], വീഹി ഥമ്ബകരീ [ഥമ്ഭകരീ (ക.)] രിതോ.

൪൫൩.

കണ്ഡോ തു നാള മഥ സോ, പലാലം നിത്ഥി നിപ്ഫലോ;

ഭുസം കലിങ്ഗരോ ചാഥ, ഥുസോ ധഞ്ഞത്തചേ ഥ ച.

൪൫൪.

സേതട്ടികാ സസ്സരോഗോ,

കണോ തു കുണ്ഡകോ ഭവേ;

ഖലോ ച ധഞ്ഞകരണം, ഥമ്ബോ [ഥമ്ഭോ (ക.)] ഗുമ്ബോ തിണാദിനം.

൪൫൫.

അയോഗ്ഗോ മുസലോ നിത്ഥീ, കുല്ലോ സുപ്പ മനിത്ഥിയം;

അഥോ’ദ്ധനഞ്ച ചുല്ലി’ത്ഥീ, കിലഞ്ജോ തു കടോ ഭവേ.

൪൫൬.

കുമ്ഭീ’ത്ഥീ പിഠരോ കുണ്ഡം, ഖളോപ്യു’ക്ഖലി ഥാല്യു’ഖാ;

കോലമ്ബോ ചാഥ മണികം, ഭാണകോ ച അരഞ്ജരോ.

൪൫൭.

ഘടോ ദ്വീസു കുടോ നിത്ഥീ, കുമ്ഭോ കലസ, വാരകാ;

കംസോ ഭുഞ്ജനപത്തോ ഥാ, മത്തം പത്തോ ച ഭാജനം.

൪൫൮.

അണ്ഡുപകം ചുമ്ബടകം, സരാവോ തു ച മല്ലകോ;

പുമേ കടച്ഛുദബ്ബി’ത്ഥീ, കുസൂലോ കോട്ഠ മുച്ചതേ.

൪൫൯.

സാകോ അനിത്ഥിയം ഡാകോ, സിങ്ഗീവേരംതു അദ്ദകം;

മഹോസധം തു തം സുക്ഖം, മരിചം തു ച കോലകം.

൪൬൦.

സോവീരം കഞ്ജിയം വുത്തം, ആരനാളം ഥുസോദകം;

ധഞ്ഞമ്ബിലം ബിളങ്ഗോ ഥ, ലവണം ലോണ മുച്ചതേ.

൪൬൧.

സാമുദ്ദം സിന്ധവോ നിത്ഥീ, കാളലോണം തു ഉബ്ഭിദം;

ബിളകം [ബിളാല (ക.)] ചേതി പഞ്ചേതേ, പഭേദാ ലവണസ്സ ഹി.

൪൬൨.

ഗുളോ ച ഫാണിതം ഖണ്ഡോ, മച്ഛണ്ഡീ സക്ഖരാ ഇതി;

ഇമേ ഉച്ഛുവികാരാ ഥ, ഗുളസ്മിം വിസകണ്ടകം.

൪൬൩.

ലാജാ ¶ സിയാ’ക്ഖതം ചാഥ, ധാനാ ഭട്ഠയവേ ഭവേ;

അബദ്ധസത്തു മന്ഥോ ച, പൂപാ’ പൂപാ തു പിട്ഠകോ.

൪൬൪.

ഭത്തകാരോ സൂപകാരോ, സൂദോ ആളാരികോ തഥാ;

ഓദനികോ ച രസകോ, സൂപോ തു ബ്യഞ്ജനം ഭവേ.

൪൬൫.

ഓദനോ വാ കുരം ഭത്തം, ഭിക്ഖാ ചാ’ന്ന മഥാ സനം;

ആഹാരോ ഭോജനം ഘാസോ,

തരലം യാഗു നാരിയം.

൪൬൬.

ഖജ്ജം തു ഭോജ്ജ ലേയ്യാനി, പേയ്യന്തി ചതുധാ’സനം;

നിസ്സാവോ ച തഥാ’ചാമോ,

ആലോപോ കബളോ ഭവേ.

൪൬൭.

മണ്ഡോ നിത്ഥീരസഗ്ഗസ്മിം, വിഘാസോ ഭുത്തസേസകേ;

വിഘാസാദോ ച ദമകോ, പിപാസാ തു ച തസ്സനം.

൪൬൮.

ഖുദ്ദാ ജിഘച്ഛാ, മംസസ്സ, പടിച്ഛാദനിയം രസോ;

ഉദ്രേകോ ചേവ ഉഗ്ഗാരോ, സോഹിച്ചം തിത്തി തപ്പനം.

൪൬൯.

കാമം ത്വിട്ഠം നികാമഞ്ച, പരിയത്തം യഥച്ഛിതം;

കയവിക്കയികോ സത്ഥ,വാഹാ’ പണിക വാണിജാ.

൪൭൦.

വിക്കയികോ തു വിക്കേതാ,

കയികോ തു ച കായികോ;

ഉത്തമണ്ണോ ച ധനികോ, ധമണ്ണോ തു ഇണായികോ.

൪൭൧.

ഉദ്ധാരോ തു ഇണം വുത്തം, മൂലം തു പാഭതം ഭവേ;

സച്ചാപനം സച്ചംകാരോ, വിക്കേയ്യം പണിയ്യം തിസു.

൪൭൨.

പടിദാനം പരിവത്തോ, ന്യാസോ തൂ’പനിധീ രിതോ;

൪൭൩.

അട്ഠാരസന്താ സങ്ഖ്യേയ്യേ, സങ്ഖ്യാ ഏകാദയോ തിസു;

സങ്ഖ്യാനേ തു ച സങ്ഖ്യേയ്യേ, ഏകത്തേ വീസതാദയോ;

വഗ്ഗഭേദേ ബഹുത്തേപി, താ ആനവുതി നാരിയം.

൪൭൪.

സതം സഹസ്സം നിയുതം [നഹുതം-നയുതം (കത്ഥചി)], ലക്ഖം കോടി പകോടിയോ;

കോടിപകോടി നഹുതം, തഥാ നിന്നഹുതമ്പി ച.

൪൭൫.

അക്ഖോഭനീത്ഥിയം ¶ [അക്ഖോഭിണീ (ക.)] ബിന്ദു, അബ്ബുദഞ്ച നിരബ്ബുദം;

അഹഹം അബബം ചേവാ, ടടം സോഗന്ധി കുപ്പലം.

൪൭൬.

കുമുദം പുണ്ഡരീകഞ്ച, പദുമം കഥാനമ്പി ച;

മഹാകഥാനാ’സങ്ഖ്യേയ്യാ, നി’ച്ചേതാസു സതാദി ച.

൪൭൭.

കോട്യാദികം ദസഗുണം, സതലക്ഖഗുണം കമാ;

ചതുത്ഥോ’ഡ്ഢേന അഡ്ഢുഡ്ഢോ,

തതിയോ ഡ്ഢതിയോ തഥാ.

൪൭൮.

അഡ്ഢതേയ്യോ ദിയഡ്ഢോ തു,

ദിവഡ്ഢോ ദുതിയോ ഭവേ;

തുലാ, പത്ഥ, ങ്ഗുലി, വസാ, തിധാ മാന മഥോ സിയാ.

൪൭൯.

ചത്താരോ വിഹയോ ഗുഞ്ജാ,

ദ്വേ ഗുഞ്ജാ മാസകോ ഭവേ;

ദ്വേ അക്ഖാ മാസകാ പഞ്ച, ക്ഖാനം ധരണമട്ഠകം.

൪൮൦.

സുവണ്ണോ പഞ്ചധരണം, നിക്ഖം ത്വനിത്ഥി പഞ്ച തേ;

പാദോ ഭാഗേ ചതുത്ഥേ ഥ, ധരണാനി പലം ദസ.

൪൮൧.

തുലാ പലസതം ചാഥ, ഭാരോ വീസതി താ തുലാ;

അഥോ കഹാപണോ നിത്ഥീ, കഥ്യതേ കരിസാപണോ.

൪൮൨.

കുഡുവോ പസതോ ഏകോ,

പത്ഥോ തേ ചതുരോ സിയും;

ആള്ഹകോ ചതുരോ പത്ഥാ, ദോണം വാചതുരാ’ള്ഹകം.

൪൮൩.

മാനികാ ചതുരോ ദോണാ, ഖാരീത്ഥീ ചതുമാനികാ;

ഖാരിയോ വീസ വാഹോ ഥ,

സിയാ കുമ്ഭോ ദസമ്ബണം.

൪൮൪.

ആള്ഹകോ നിത്ഥിയം തുമ്ഭോ, പത്ഥോതു നാളി നാരിയം;

വാഹോ തു സകടോ ചേകാ,

ദസ ദോണാ തു അമ്ബണം.

൪൮൫.

പടിവീസോ ച കോട്ഠാസോ,

അംസോ ഭാഗോ ധനം തു സോ;

ദബ്ബം വിത്തം സാപതേയ്യം, വസ്വ’ത്ഥോ വിഭവോ ഭവേ.

൪൮൬.

കോസോ ¶ ഹിരഞ്ഞഞ്ച കതാ, കതം കഞ്ചന, രൂപിയം;

കുപ്പം തദഞ്ഞം തമ്ബാദി, രൂപിയം ദ്വയ മാഹതം.

൪൮൭.

സുവണ്ണം കനകം ജാത, രൂപം സോണ്ണഞ്ച കഞ്ചനം;

സത്ഥുവണ്ണോ ഹരീ കമ്ബു, ചാരു ഹേമഞ്ച ഹാടകം.

൪൮൮.

തപനിയം ഹിരഞ്ഞം ത, ബ്ഭേദാ ചാമീകരമ്പി ച;

സാതകുമ്ഭം തഥാ ജമ്ബു, നദം സിങ്ഗീ ച നാരിയം.

൪൮൯.

രൂപിയം രജതം സജ്ഝു, രൂപീ സജ്ഝം അഥോ വസു;

രതനഞ്ച മണി ദ്വീസു, പുപ്ഫരാഗാദീ തബ്ഭിദാ.

൪൯൦.

സുവണ്ണം രജതം മുത്താ, മണി വേളുരിയാനി ച;

വജിരഞ്ച പവാളന്തി, സത്താ’ഹു രതനാനി’ മേ.

൪൯൧.

ലോഹിതങ്കോ ച പദുമ, രാഗോ രത്തമണി പ്യഥ;

വംസവണ്ണോ വേളുരിയം, പവാളം വാ ച വിദ്ദുമോ.

൪൯൨.

മസാരഗല്ലം കബരമണി, അഥ മുത്താ ച മുത്തികം;

രീതി [രീരീ (ടീ.)] ത്ഥീ ആരകൂടോ വാ, അമലം ത്വ’ബ്ഭകം ഭവേ.

൪൯൩.

ലോഹോ നിത്ഥീ അയോ കാളാ,

യസഞ്ച പാരദോ രസോ;

കാളതിപു തു സീസഞ്ച, ഹരിതാലം തു പീതനം.

൪൯൪.

ചിനപിട്ഠഞ്ച സിന്ദൂരം, അഥ തൂലോ തഥാ പിചു;

ഖുദ്ദജം തു മധു ഖുദ്ദം, മധുച്ഛിട്ഠം തു സിത്ഥകം.

൪൯൫.

ഗോപാലോ ഗോപ ഗോസങ്ഖ്യാ,

ഗോമാ തു ഗോമികോ പ്യഥ;

ഉസഭോ ബലീബദ്ധോ [ബലിബദ്ദ (ക.)] ച, ഗോണോ ഗോവസഭോ വുസോ.

൪൯൬.

വുദ്ധോ ജരഗ്ഗവോ സോ ഥ, ദമ്മോ വച്ഛതരോ സമാ;

ധുരവാഹീ തു ധോരയ്ഹോ, ഗോവിന്ദോ ധികതോ ഗവം.

൪൯൭.

വഹോ ച ഖന്ധദേസോ ഥ, കകുധോ [കകുദോ (ക.)] കകു വുച്ചതേ;

അഥോ വിസാണം സിങ്ഗഞ്ച, രത്തഗാവീ തു രോഹിണീ.

൪൯൮.

ഗാവീ ച സിങ്ഗിനീ ഗോ ച, വഞ്ഝാ തു കഥ്യതേ വസാ;

നവപ്പസൂതികാ ധേനു, വച്ഛകാമാ തു വച്ഛലാ.

൪൯൯.

ഗഗ്ഗരീ ¶ മന്ഥനീത്ഥീ ദ്വേ, സന്ദാനം ദാമമുച്ചതേ;

ഗോമിള്ഹോ ഗോമയോ നിത്ഥീ, അഥോ സപ്പി ഘതം ഭവേ.

൫൦൦.

നവുദ്ധടം തു നോനീതം, ദമിമണ്ഡം തു മത്ഥു ച,

ഖീരം ദുദ്ധം പയോ ഥഞ്ഞം, തക്കം തു മഥിതം പ്യഥ.

൫൦൧.

ഖീരം ദധി ഘതം തക്കം, നോനീതം പഞ്ച ഗോരസാ;

ഉരബ്ഭോ മേണ്ഡ മേസാ ച, ഉരണോ അവി ഏളകോ.

൫൦൨.

വസ്സോ ത്വജോ ഛഗലകോ,

ഓട്ഠോ തു കരഭോ ഭവേ;

ഗദ്രഭോ തു ഖരോ വുത്തോ, ഉരണീ തു അജീ അജാ.

ഇതി വേസ്സവഗ്ഗോ.

൫൦൩.

സുദ്ദോ’ന്തവണ്ണോ വസലോ, സംകിണ്ണാ മാഗധാദയോ;

മാഗധോ സുദ്ദഖത്താജോ, ഉഗ്ഗോ സുദ്ദായ ഖത്തജോ.

൫൦൪.

ദ്വിജാഖത്തിയജോ സൂതോ, കാരുതു സിപ്പികോപുമേ;

സങ്ഘാതോതു സജാതീനം, തേസം സേണീ ദ്വിസുച്ചതേ.

൫൦൫.

തച്ഛകോ തന്തവായോ ച, രജകോ ച നഹാപിതോ;

പഞ്ചമോ ചമ്മകാരോതി, കാരവോ പഞ്ചിമേ സിയും.

൫൦൬.

തച്ഛകോ വഡ്ഢകീ മതോ, പലഗണ്ഡോ ഥപത്യപി;

രഥകാരോ ഥ സുവണ്ണ, കാരോ നാളിന്ധമോ ഭവേ.

൫൦൭.

തന്തവായോ പേസകാരോ,

മാലാകാരോ തു മാലികോ;

കുമ്ഭകാരോ കുലാലോ ഥ,

തുന്നവായോ ച സൂചികോ.

൫൦൮.

ചമ്മകാരോ രഥകാരോ, കപ്പകോ തു നഹാപിതോ;

രങ്ഗാജീവോ ചിത്തകാരോ, പുക്കുസോ പുപ്ഫഛഡ്ഡകോ.

൫൦൯.

വേനോ വിലീവകാരോ ച, നളകാരോ സമാ തയോ;

ചുന്ദകാരോ ഭമകാരോ,

കമ്മാരോ ലോഹകാരകോ.

൫൧൦.

നിന്നേജകോ ച രജകോ, നേത്തികോ ഉദഹാരകോ;

വീണാവാദീ വേണികോ ഥ, ഉസുകാരോ’ സുവഡ്ഢകീ.

൫൧൧.

വേണുധമോ ¶ വേണവികോ,

പാണിവാദോ തു പാണിഘോ [പാണിയോ (കത്ഥചി)];

പൂപിയോ പൂപപണിയോ, സോണ്ഡികോ മജ്ജവിക്കയീ.

൫൧൨.

മായാ തു സമ്ബരീ മായാ, കാരോ തു ഇന്ദജാലികോ;

൫൧൩.

ഓരബ്ഭികാ സൂകരികാ, മാഗവികാ തേ ച സാകുണികാ;

ഹന്ത്വാ ജീവന്തേ’ളക, സൂകര, മിഗ, പക്ഖിനോ കമതോ.

൫൧൪.

വാഗുരികോ ജാലികോ ഥ,

ഭാരവാഹോ തു ഭാരികോ;

വേതനികോ തു ഭതകോ, കമ്മകരോ ഥ കിം കരോ;

ദാസോ ച ചേടകോ പേസ്സോ, ഭച്ചോ ച പരിചാരികോ.

൫൧൫.

അന്തോജാതോ ധനക്കീതോ, ദാസബ്യോ’പഗതോ സയം;

ദാസാ കരമരാനീതോ, ച്ചേവം തേ ചതുധാ സിയും.

൫൧൬.

അദാസോ തു ഭുജിസ്സോ ഥ,

നീചോ ജമ്മോ നിഹീനകോ;

നിക്കോസജ്ജോ അകിലാസു,

മന്ദോ തു അലസോ പ്യഥ.

൫൧൭.

സപാകോ ചേവ ചണ്ഡാലോ, മാതങ്ഗോ സപചോ ഭവേ;

തബ്ഭേദാ മിലക്ഖജാതീ, കിരാത, സവരാദയോ.

൫൧൮.

നേസാദോ ലുദ്ദകോ ബ്യാധോ,

മിഗവോ തു മിഗബ്യധോ;

സാരമേയ്യോ ച സുനഖോ, സുനോ സോണോ ച കുക്കുരോ.

൫൧൯.

സ്വാനോ സുവാനോ സാളൂരോ,

സൂനോ സാനോ ച സാ പുമേ;

ഉമ്മത്താദിത മാപന്നോ, അളക്കോതി സുനോ മതോ.

൫൨൦.

സാബന്ധനം തു ഗദ്ദൂലോ, ദീപകോ തു ച ചേതകോ;

ബന്ധനം ഗണ്ഠി പാസോ ഥ, വാഗുരാ [വാകരാ (സീ. ടീ.)] മിഗബന്ധനീ.

൫൨൧.

ഥിയം കുവേണീ കുമീനം, ആനയോ ജാല മുച്ചതേ;

ആഘാതനം വധട്ഠാനം, സൂനാ തു അധികോട്ടനം.

൫൨൨.

തക്കരോ ¶ മോസകോ ചോരോ,

ഥേനേ’കാഗാരികോ സമാ;

ഥേയ്യഞ്ച ചോരികാ മോസോ,

വേമോ വായനദണ്ഡകോ.

൫൨൩.

സുത്തം തന്തു പുമേ തന്തം, പോത്ഥം ലേപ്യാദികമ്മനി;

പഞ്ചാലികാ പോത്ഥലികാ, വത്ഥദന്താദിനിമ്മിതാ.

൫൨൪.

ഉഗ്ഘാടനം ഘടീയന്തം, കൂപമ്ബുബ്ബാഹനം ഭവേ;

മഞ്ജൂസാ പേളാ പിടകോ, ത്വിത്ഥിയം പച്ഛി പേടകോ.

൫൨൫.

ബ്യാഭങ്ഗീ ത്വിത്ഥിയം കാജോ, സിക്കാ ത്വത്രാ’വലമ്ബനം;

ഉപാഹനോ വാ പാദു’ത്ഥീ, തബ്ഭേദാ പാദുകാ പ്യഥ.

൫൨൬.

വരത്താ വദ്ധികാ നദ്ധി, ഭസ്താ ചമ്മപസിബ്ബകം;

സോണ്ണാദ്യാവത്തനീ മൂസാ,

ഥ കൂടം വാ അയോഘനോ.

൫൨൭.

കമ്മാരഭണ്ഡാ സണ്ഡാസോ, മുട്ഠ്യാ’ധികരണീത്ഥീയം;

തബ്ഭസ്താ ഗഗ്ഗരീ നാരീ, സത്തം തു പിപ്ഫലം ഭവേ.

൫൨൮.

സാണോ തു നികസോ വുത്തോ,

ആരാ തു സൂചിവിജ്ഝനം;

ഖരോ ച കകചോ നിത്ഥീ, സിപ്പം കമ്മം കലാദികം.

൫൨൯.

പടിമാ പടിബിമ്ബഞ്ച, ബിമ്ബോ പടിനിധീരിതോ;

തീസു സമോ പടിഭാഗോ, സന്നികാസോ സരിക്ഖകോ.

൫൩൦.

സമാനോ സദിസോ തുല്യോ,

സങ്കാസോ സന്നിഭോ നിഭോ;

ഓപമ്മ മുപമാനം ചു, പമാ ഭതി തു നാരിയം.

൫൩൧.

നിബ്ബേസോ വേതനം മൂല്യം, ജൂതം ത്വനിത്ഥി കേതവം;

ധുത്തോ’ക്ഖധുത്തോ കിതവോ, ജൂതകാര, ക്ഖദേവിനോ.

൫൩൨.

പാടിഭോഗോതു പടിഭൂ, അക്ഖോ തു പാസകോ ഭവേ;

പുമേവാ’ ട്ഠപദം [അട്ഠാപദം (ടീ. സീ.)] സാരി, ഫലകേ ഥ പണോ, ബ്ഭുതോ.

൫൩൩.

കിണ്ണം ¶ തു മദിരാബീജേ, മധു മധ്വാസവേ മതം;

മദിരാ വാരുണീ മജ്ജം, സുരാ ഭവോ തു മേരയം.

൫൩൪.

സരകോ ചസകോ നിത്ഥീ, ആപാനം പാനമണ്ഡലം;

൫൩൫.

യേ’ത്ര ഭൂരിപ്പയോഗത്താ, യോഗികേകസ്മി മീരിതാ;

ലിങ്ഗന്തരേപി തേ ഞേയ്യാ, തദ്ധമ്മത്താ’ഞ്ഞവുത്തിയന്തി.

ഇതി സുദ്ദവഗ്ഗോ.

ചതുബ്ബണ്ണവഗ്ഗോ നിട്ഠിതോ.

൫. അരഞ്ഞവഗ്ഗ

൫൩൬.

അരഞ്ഞം കാനനം ദായോ, ഗഹനം വിപിനം വനം;

അടവീ’ത്ഥീ മഹാരഞ്ഞം, ത്വ, രഞ്ഞാനീത്ഥിയം ഭവേ.

൫൩൭.

നഗരാ നാതിദൂരസ്മിം, സന്തേഹി യോ ഭിരോപിതോ;

തരുസണ്ഡോ സ ആരാമോ, തഥോ പവന മുച്ചതേ.

൫൩൮.

സബ്ബസാധാരണാ’രഞ്ഞം, രഞ്ഞ മുയ്യാന മുച്ചതേ;

ഞേയ്യം തദേവ പമദ, വന മന്തേപുരോചിതം.

൫൩൯.

പന്തി വീഥ്യാ’വലി സേണീ, പാളി ലേഖാ തു രാജി ച;

പാദപോ വിടപീ രുക്ഖോ, അഗോ സാലോ മഹീരുഹോ.

൫൪൦.

ദുമോ തരു കുജോ സാഖീ, ഗച്ഛോ തു ഖുദ്ദപാദപോ;

ഫലന്തി യേ വിനാ പുപ്ഫം, തേ വുച്ചന്തി വനപ്പതീ.

൫൪൧.

ഫലപാകാവസാനേ യോ,

മരത്യോ സധി സാ ഭവേ;

തീസു വഞ്ച്യാ’ഫലാ ചാഥ, ഫലിനോ ഫലവാ ഫലീ.

൫൪൨.

സമ്ഫുല്ലിതോ തു വികചോ, ഫുല്ലോ വികസിതോ തിസു;

സിരോ’ഗ്ഗം സിഖരോ നിത്ഥീ, സാഖാ തു കഥിതാ ലതാ.

൫൪൩.

ദലം പലാസം ഛദനം, പണ്ണം പത്തം ഛദോ പ്യഥ;

പല്ലവോ വാ കിസലയം, നവുബ്ഭിന്നേ തു അങ്കുരോ.

൫൪൪.

മകുലം വാ കുടുമലോ, ഖാരകോ തു ച ജാലകം;

കലികാ കോരകോ നിത്ഥീ, വണ്ടം പുപ്ഫാദിബന്ധനം.

൫൪൫.

പസവോ ¶ കുസുമം പുപ്ഫം, പരാഗോ പുപ്ഫജോ രജോ;

മകരന്ദോ മധു മതം, ഥവകോ തു ച ഗോച്ഛകോ.

൫൪൬.

ഫലേ ത്വാ’മേ സലാടു’ത്തോ,

ഫലം തു പക്ക മുച്ചതേ;

ചമ്പക’മ്ബാദികുസുമ, ഫലനാമം നപുംസകേ.

൫൪൭.

മല്ലികാദീ തു കുസുമേ, സലിങ്ഗാ വീഹയോ ഫലേ;

ജമ്ബൂ’ത്ഥീ ജമ്ബവം ജമ്ബൂ, വിടപോ വിടഭീ’ത്ഥിയം.

൫൪൮.

മൂല മാരബ്ഭ സാഖന്തോ, ഖന്ധോ ഭാഗോ തരുസ്സ ഥ;

കോടരോ നിത്ഥിയം രുക്ഖ, ച്ഛിദ്ദേ കട്ഠം തു ദാരു ച.

൫൪൯.

ബുന്ദോ മൂലഞ്ച പാദോ ഥ, സങ്കു’ത്തോ ഖാണുനിത്ഥിയം;

കരഹാടം തു കന്ദോ ഥ, കളീരോ മത്ഥകോ ഭവേ.

൫൫൦.

വല്ലരീ മഞ്ജരീ നാരീ, വല്ലീ തു കഥിതാ ലതാ;

ഥമ്ഭോ ഗുമ്ബോ ച അക്ഖന്ധേ, ലതാ വിരൂ പതാനിനീ.

൫൫൧.

അസ്സത്ഥോ ബോധി ച ദ്വീസു, നിഗ്രോധോ തു വടോ ഭവേ;

കബിട്ഠോ ച കപിത്ഥോ ച, യഞ്ഞങ്ഗോ തു ഉദുമ്ബരോ.

൫൫൨.

കോവിളാരോ യുഗപത്തോ, ഉദ്ദാലോ വാതഘാതകോ;

രാജരുക്ഖോ കതമാലീ, ന്ദീവരോ ബ്യാധിഘാതകോ.

൫൫൩.

ദന്തസഠോ ച ജമ്ഭീരോ, വരണോ തു കരേരി ച;

കിം സുകോ പാലിഭദ്ദോഥ, വഞ്ജുലോ തു ച വേതസോ.

൫൫൪.

അമ്ബാടകോപീതനകോ, മധുകോ തു മധുദ്ദുമോ;

അഥോ ഗുളഫലോ പീലു, സോഭഞ്ജനോ ച സിഗ്ഗു ച.

൫൫൫.

സത്തപണ്ണി ഛത്തപണ്ണോ, തിനിസോ ത്വ തിമുത്തകോ;

കിം സുകോ തു പലാസോ ഥ,

അരിട്ഠോ ഫേനിലോ ഭവേ.

൫൫൬.

മാലൂര ബേലുവാബില്ലോ, പുന്നാഗോ തു ച കേസരോ;

സാലവോ തു ച ലോദ്ദോ ഥ, പിയാലോ സന്നകദ്ദു ച.

൫൫൭.

ലികോചകോ തഥാ’ങ്കോലോ,

അഥ ഗുഗ്ഗുലു കോസികോ;

അമ്ബോ ചൂതോ സഹോ ത്വേസോ,

സഹകാരോ സുഗന്ധവാ.

൫൫൮.

പുണ്ഡരീകോ ¶ ച സേതമ്ബോ, സേലു തു ബഹുവാരകോ;

സേപണ്ണീ കാസ്മിരീ ചാഥ, കോലീ ച ബദരീത്ഥിയം.

൫൫൯.

കോലം ചാനിത്ഥീ ബദരോ, പിലക്ഖോ പിപ്പലീ’ത്ഥിയം;

പാടലീ കണ്ഹവന്താ ച, സാദുകണ്ടോ വികങ്കതോ.

൫൬൦.

തിന്ദുകോ കാളക്ഖന്ധോ ച, തിമ്ബരൂസക തിമ്ബരൂ;

ഏരാവതോ തു നാരങ്ഗോ, കുലകോ കാകതിന്ദുകോ.

൫൬൧.

കദമ്ബോ പിയകോ നീപോ, ഭല്ലീ ഭല്ലാതകോ തിസു;

ഝാവുകോ പിചുലോ ചാഥ, തിലകോ ഖുരകോ ഭവേ.

൫൬൨.

ചിഞ്ചാ ച തിന്തിണീ ചാഥ, ഗദ്ദഭണ്ഡോ കപീതനോ;

സാലോ’സ്സകണ്ണോ സജ്ജോ ഥ,

അജ്ജുനോ കകുധോ ഭവേ.

൫൬൩.

നിചുലോ മുചലിന്ദോ ച, നീപോ ഥ പിയകോ തഥാ;

അസനോ പീതസാലോ ഥ,

ഗോലീസോ ഝാടലോ ഭവേ.

൫൬൪.

ഖീരികാ രാജായതനം, കുമ്ഭീ കുമുദികാ ഭവേ;

യൂപോ [പൂഗോ (ക.)] തു കമുകോ ചാഥ, പട്ടി ലാഖാപസാദനോ.

൫൬൫.

ഇങ്ഗുദീ താപസതരു, ഭുജപത്തോ തു ആഭുജീ;

പിച്ഛിലാ സിമ്ബലീ ദ്വീസു, രോചനോ കോടസിമ്ബലീ.

൫൬൬.

പകിരിയോ പൂതികോ ഥ, രോഹീ രോഹിതകോ ഭവേ;

ഏരണ്ഡോ തു ച ആമണ്ഡോ, അഥ സത്തുഫലാ സമീ.

൫൬൭.

നത്തമാലോ കരഞ്ജോ ഥ, ഖദിരോ ദന്തധാവനോ;

സോമവക്കോ തു കദരോ, സല്ലോതു മദനോ ഭവേ.

൫൬൮.

അഥാപി ഇന്ദസാലോ ച, സല്ലകീ ഖാരകോ സിയാ;

ദേവദാരു ഭദ്ദദാരു, ചമ്പേയ്യോ തു ച ചമ്പകോ.

൫൬൯.

പനസോ കണ്ടകിഫലോ, അഭയാ തു ഹരീതകീ;

അക്ഖോ വിഭീതകോ തീസു, അമതാ’മലകീ തിസു.

൫൭൦.

ലബുജോ ലികുചോ ചാഥ, കണികാരോ ദുമുപ്പലോ;

നിമ്ബോ’രിട്ഠോ പുചിമന്ദോ, കരകോ തു ച ദാളിമോ.

൫൭൧.

സരലോ ¶ പൂതികട്ഠഞ്ച, കപിലാ തു ച സിംസപാ;

സാമാ പിയങ്ഗു കങ്ഗുപി, സിരീസോ തു ച ഭണ്ഡിലോ.

൫൭൨.

സോണകോ ദീഘവന്തോ ച,

വകുലോ തു ച കേസരോ;

കാകോദുമ്ബരികാ ഫേഗ്ഗു, നാഗോ തു നാഗമാലികാ.

൫൭൩.

അസോകോ വഞ്ജുലോ ചാഥ, തക്കാരീ വേജയന്തികാ;

താപിഞ്ഛോ ച തമാലോ ഥ, കുടജോ ഗിരിമല്ലികാ.

൫൭൪.

ഇന്ദയവോ ഫലേ തസ്സാ, ഗ്ഗിമന്ഥോ കണികാ ഭവേ;

നിഗുണ്ഠി’ത്ഥീ സിന്ദുവാരോ, തിണസുഞ്ഞം [തിണസൂലം (ടീ.)] തു മല്ലികാ.

൫൭൫.

സേഫാലികാ നീലികാ ഥ, അപ്ഫോടാ വനമല്ലികാ;

ബന്ധുകോ ജയസുമനം, ഭണ്ഡികോ ബന്ധുജീവകോ.

൫൭൬.

സുമനാ ജാതിസുമനാ, മാലതീ ജാതി വസ്സികീ;

യൂഥികാ മാഗധീ ചാഥ, സത്തലാ നവമല്ലികാ.

൫൭൭.

വാസന്തീ,ത്ഥീ അതിമുത്തോ, കരവീരോ’സ്സമാരകോ;

മാതുലുങ്ഗോ ബീജപൂരോ, ഉമ്മത്തോ തു ച മാതുലോ.

൫൭൮.

കരമന്ദോ സുസേനോ ച, കുന്ദം തു മാഘ്യ മുച്ചതേ;

ദേവതാസോ [ദേവതാഡോ (സീ. അമരകോസ)] തു ജീമൂതോ,

ഥാ’മിലാതോ മഹാസഹാ.

൫൭൯.

അഥോ സേരേയ്യകോ ദാസീ,

കിം കിരാതോ കുരണ്ടകോ;

അജ്ജുകോ സിതപണ്ണാസോ, സമീരണോ ഫണിജ്ജകോ.

൫൮൦.

ജപാ തു ജയസുമനം, കരീരോ കകചോ ഭവേ;

രുക്ഖാദനീ ച വന്ദാകാ, ചിത്തകോ ത്വ’ഗ്ഗിസഞ്ഞിതോ.

൫൮൧.

അക്കോ വികീരണോ തസ്മിം,

ത്വ’ ളക്കോ സേതപുപ്ഫകേ;

പൂതിലതാ ഗളോചീ ച, മുബ്ബാ മധുരസാ പ്യഥ.

൫൮൨.

കപികച്ഛു ദുഫസ്സോ ഥ, മഞ്ജിട്ഠാ വികസാ ഭവേ;

അമ്ബട്ഠാ ച തഥാ പാഠാ, കടുകാ കടുരോഹിണീ.

൫൮൩.

അപാമഗ്ഗോ ¶ സേഖരികോ, പിപ്പലീ മാഗധീ മതാ;

ഗോകണ്ടകോ ച സിങ്ഘാടോ, കോലവല്ലീ’ഭപിപ്പലീ.

൫൮൪.

ഗോലോമീ തു വചാ ചാഥ, ഗിരികണ്യ’പരാജിതാ;

സീഹപുച്ഛീ പഞ്ഹിപണ്ണീ, സാലപണ്ണീ തു ച’ത്ഥിരാ; (ചഥിരാ).

൫൮൫.

നിദിദ്ധികാ തു ബ്യഗ്ഘീ ച, അഥ നീലീ ച നീലിനീ;

ജിഞ്ജുകോ [ജിഞ്ജുകാ (ക.)] ചേവ ഗുഞ്ജാ ഥ, സതമൂലീ സതാവരീ.

൫൮൬.

മഹോസധം ത്വ’തിവിസാ, ബാകുചീ സോമവല്ലികാ;

ദാബ്ബീ ദാരുഹലിദ്ദാ ഥ, ബിളങ്ഗം ചിത്രതണ്ഡുലാ.

൫൮൭.

നുഹീ ചേവ മഹാനാമോ, മുദ്ദികാ തു മധുരസാ;

അഥാപി മധുകം യട്ഠി, മധുകാമധുയട്ഠികാ [മധുലട്ഠികാ (സീ. ടീ.)].

൫൮൮.

വാതിങ്ഗണോ ച ഭണ്ഡാകീ, വാത്താകീ ബ്രഹതീ പ്യഥ;

നാഗബലാ ചേവ ഝസാ, ലാങ്ഗലീ തു ച സാരദീ.

൫൮൯.

രമ്ഭാ ച കദലീ മോചോ, കപ്പാസീ ബദരാ ഭവേ;

നാഗലതാ തു തമ്ബൂലീ, അഗ്ഗിജാലാ തു ധാതകീ.

൫൯൦.

തിവുതാ തിപുടാ ചാഥ, സാമാ കാളാ ച കഥ്യതേ;

അഥോ സിങ്ഗീ ച ഉസഭോ, രേണുകാ കപിളാ ഭവേ.

൫൯൧.

ഹിരിവേരഞ്ച വാലഞ്ച, രത്തഫലാ തു ബിമ്ബികാ;

സേലേയ്യ’ മസ്മപുപ്ഫഞ്ച, ഏലാ തു ബഹുലാ ഭവേ.

൫൯൨.

കുട്ഠഞ്ച ബ്യാധി കഥിതോ, വാനേയ്യം തു കുടന്നടം;

ഓസധി ജാതിമത്തമ്ഹി, ഓസധം സബ്ബ’ മജാതിയം.

൫൯൩.

മൂലം പത്തം കളീര’ഗ്ഗം, കന്ദം മിഞ്ജാ ഫലം തഥാ;

തചോ പുപ്ഫഞ്ച ഛത്തന്തി, സാകം ദസവിധം മതം.

൫൯൪.

പപുന്നാടോ ഏളഗലോ,

തണ്ഡുലേയ്യോ’പ്പമാരിസോ;

ജീവന്തി ജീവനീ ചാഥ, മധുരകോ ച ജീവകോ.

൫൯൫.

മഹാകന്ദോ ച ലസുണം, പലണ്ഡു തു സുകന്ദകോ;

പടോലോ തിത്തകോ ചാഥ, ഭിങ്ഗരാജോ ച മക്കവോ.

൫൯൬.

പുനന്നവാ ¶ സോഥഘാതീ, വിതുന്നം സുനിസണ്ണകം;

കാരവേല്ലോ തു സുസവീ, തുമ്ബ്യാ’ലാബു ച ലാബു സാ.

൫൯൭.

ഏളാലുകഞ്ച കക്കാരീ, കുമ്ഭണ്ഡോ തു ച വല്ലിഭോ;

ഇന്ദവാരുണീ വിസാലാ, വത്ഥുകം വത്ഥുലേയ്യകോ.

൫൯൮.

മൂലകോ നിത്ഥിയം ചുച്ചു, തമ്ബകോ ച കലമ്ബകോ;

സാകഭേദാ കാസമദ്ദ, ഝജ്ഝരീ ഫഗ്ഗവാ’ദയോ.

൫൯൯.

സദ്ദലോ ചേവ ദുബ്ബാ ച, ഗോലോമീ സാ സിതാ ഭവേ;

ഗുന്ദാ ച ഭദ്ദമുത്തഞ്ച, രസാലോ തു’ച്ഛു വേളു തു.

൬൦൦.

തചസാരോ വേണു വംസോ, പബ്ബം തു ഫലു ഗണ്ഠിസോ;

കീചകാ തേ സിയും വേണൂ, യേ നദന്ത്യാ’നിലദ്ധുതാ.

൬൦൧.

നളോ ച ധമനോ പോട, ഗലോ തു കാസ മിത്ഥി ന;

തേജനോ തു സരോ, മൂലം, തൂ’ സീരം ബീരണസ്സ ഹി.

൬൦൨.

കുസോ വരഹിസം ദബ്ബോ, ഭൂതിണകം തു ഭൂതിണം;

ഘാസോ തു യവസോ ചാഥ,

പൂഗോ തു കമുകോ ഭവേ.

൬൦൩.

താലോ വിഭേദികാ ചാഥ, ഖജ്ജുരീ സിന്ദി വുച്ചതി;

൬൦൪.

ഹിന്താല, താല, ഖജ്ജൂരീ, നാലികേരാ തഥേവ ച;

താലീ ച കേതകീ നാരീ, പൂഗോ ച തിണപാദപാതി.

ഇതി അരഞ്ഞവഗ്ഗോ.

൬. അരഞ്ഞാദിവഗ്ഗ

൬൦൫.

പബ്ബതോ ഗിരി സേലോ’ദ്ദി, നഗാ’ചല, സിലുച്ചയാ;

സിഖരീ ഭൂധരോഥ ബ്ഭ, പാസാണാ’സ്മോ’പലോ സിലാ.

൬൦൬.

ഗിജ്ഝകൂടോ ച വേഭാരോ, വേപുല്ലോ’സിഗിലീ നഗാ;

വിഞ്ഝോ പണ്ഡവ വങ്കാദീ, പുബ്ബസേലോ തു ചോ’ദയോ;

മന്ദരോ പരസേലോ’ത്ഥോ, ഹിമവാ തു ഹിമാചലോ.

൬൦൭.

ഗന്ധമാദന കേലാസ, ചിത്തകൂട സുദസ്സനാ;

കാലകൂടോ തികൂടാ’സ്സ, പത്ഥോ തു സാനു നിത്ഥിയം.

൬൦൮.

കൂടോ ¶ വാ സിഖരം സിങ്ഗം, പപാതോ തു തടോ ഭവേ;

നിതമ്ബോ കടകോ നിത്ഥീ, നിജ്ഝരോ പസവോ’മ്ബുനോ.

൬൦൯.

ദരീ’ത്ഥീ കന്ദരോ ദ്വീസു, ലേണം തു ഗബ്ഭരം ഗുഹാ;

സിലാപോക്ഖരണീ സോണ്ഡീ, കുഞ്ജം നികുഞ്ജ മിത്ഥി ന.

൬൧൦.

ഉദ്ധ മധിച്ചകാ സേല, സ്സാസന്നാ ഭൂമ്യു പച്ചകാ;

പാദോ തു’പന്തസേലോ ഥ,

ധാതു’ത്തോ ഗേരികാദികോ.

ഇതി സേലവഗ്ഗോ.

൬൧൧.

മിഗിന്ദോ കേസരീ സീഹോ, തരച്ഛോ തു മിഗാദനോ;

ബ്യഗ്ഘോ തു പുണ്ഡരീകോ ഥ, സദ്ദൂലോ ദീപിനീ’രിതോ.

൬൧൨.

അച്ഛോ ഇക്കോ ച ഇസ്സോ തു,

കാളസീഹോ ഇസോ പ്യഥ;

രോഹിസോ രോഹിതോ ചാഥ,

ഗോകണ്ണോ ഗണി കണ്ടകാ.

൬൧൩.

ഖഗ്ഗ ഖഗ്ഗവിസാണാ തു, പലാസാദോ ച ഗണ്ഡകോ;

ബ്യഗ്ഘാദികേ വാളമിഗോ, സാപദോ ഥ പ്ലവങ്ഗമോ.

൬൧൪.

മക്കടോ വാനരോ സാഖാ, മിഗോ കപി വലീമുഖോ;

പലവങ്ഗോ, കണ്ഹതുണ്ഡോ,

ഗോനങ്ഗുലോ [ഗോനങ്ഗലോ (ടീ.)] തി സോ മതോ.

൬൧൫.

സിങ്ഗാലോ [സിഗാലോ (സീ.)] ജമ്ബുകോ കോത്ഥു, ഭേരവോ ച സിവാ പ്യഥ;

ബിളാരോ ബബ്ബു മഞ്ജാരോ, കോകോ തു ച വകോ ഭവേ.

൬൧൬.

മഹിംസോ [മഹിസോ (സീ.)] ച ലുലായോ ഥ,

ഗവജോ ഗവയോ സമാ;

സല്ലോ തു സല്ലകോ ഥാ’സ്സ,

ലോമമ്ഹി സലലം സലം.

൬൧൭.

ഹരിണോ മിഗ സാരങ്ഗാ, മഗോ അജിനയോനി ച;

സൂകരോ തു വരോഹോ ഥ,

പേലകോ ച സസോ ഭവേ.

൬൧൮.

ഏണേയ്യോ ¶ ഏണീമിഗോ ച, പമ്പടകോ തു പമ്പകോ;

വാതമിഗോ തു ചലനീ, മൂസികോ ത്വാ’ഖു ഉന്ദുരോ.

൬൧൯.

ചമരോ പസദോ ചേവ, കുരുങ്ഗോ മിഗമാതുകാ;

രുരു രങ്കു ച നീകോ ച, സരഭാദീ മിഗന്തരാ.

൬൨൦.

പിയകോ ചമൂരു കദലീ, മിഗാദീ ചമ്മയോനയോ;

മിഗാ തു പസവോ സീഹാ, ദയോ സബ്ബചതുപ്പദാ.

൬൨൧.

ലൂതാ തു ലൂതികാ ഉണ്ണ, നാഭി മക്കടകോ സിയാ;

വിച്ഛികോ ത്വാ’ളി കഥിതോ, സരബൂ ഘരഗോളികാ.

൬൨൨.

ഗോധാ കുണ്ഡോ പ്യഥോ കണ്ണ, ജലൂകാ സതപദ്യഥ;

കലന്ദകോ കാളകാ ഥ, നകുലോ മങ്ഗുസോ ഭവേ.

൬൨൩.

കകണ്ടകോ ച സരടോ, കീടോ തു പുളവോ കിമി;

പാണകോ ചാപ്യഥോ ഉച്ചാ,

ലിങ്ഗോ ലോമസപാണകോ.

൬൨൪.

വിഹങ്ഗോ വിഹഗോ പക്ഖീ, വിഹങ്ഗമ ഖഗ’ണ്ഡജാ;

സകുണോ ച സകുന്തോ വി, പതങ്ഗോ സകുണീ ദ്വിജോ.

൬൨൫.

വക്കങ്ഗോ പത്തയാനോ ച, പതന്തോ നീളജോ ഭവേ;

തബ്ഭേദാ വട്ടകാ ജീവ, ഞ്ജീവോ ചകോര തിത്തിരാ.

൬൨൬.

സാളികാ കരവീകോ ച, രവിഹംസോ കുകുത്ഥകോ;

കാരണ്ഡവോ ച പിലവോ [ബിലവോ (ടീ.)], പോക്ഖരസാതകാ’ദയോ.

൬൨൭.

പതത്തം പേഖുണം പത്തം, പക്ഖോ പിഞ്ഛം ഛദോ ഗരു;

അണ്ഡം തു പക്ഖിബീജേ ഥ, നീളോ നിത്ഥീ കുലാവകം.

൬൨൮.

സുപണ്ണമാതാ വിനതാ, മിഥുനം ഥീപുമദ്വയം;

യുഗം തു യുഗലം ദ്വന്ദം, യമകം യമലം യമം.

൬൨൯.

സമൂഹോ ഗണ സങ്ഘാതാ, സമുദായോ ച സഞ്ചയോ;

സന്ദോഹോ നിവഹോ ഓഘോ, വിസരോ നികരോ ചയോ.

൬൩൦.

കായോ ഖന്ധോ സമുദയോ, ഘടാ സമിതി സംഹതി;

രാസി പുഞ്ജോ സമവായോ, പൂഗോ ജാതം കദമ്ബകം.

൬൩൧.

ബ്യൂഹോ ¶ വിതാന ഗുമ്ബാ ച, കലാപോ ജാല മണ്ഡലം;

സമാനാനം ഗണോ വഗ്ഗോ,

സങ്ഘോ സത്ഥോ തു ജന്തുനം.

൬൩൨.

സജാതികാനം തു കുലം, നികായോ തു സധമ്മിനം;

യൂഥോ നിത്ഥീ സജാതിയ, തിരച്ഛാനാനമുച്ചതേ.

൬൩൩.

സുപണ്ണോ വേനതേയ്യോ ച, ഗരുളോ വിഹഗാധിപോ;

പരപുട്ഠോ പരഭതോ, കുണാലോ കോകിലോ പികോ.

൬൩൪.

മോരോ മയൂരോ വരഹീ, നീലഗീവ സിഖണ്ഡിനോ;

കലാപീ ച സിഖീ കേകീ, ചൂളാ തു ച സിഖാ ഭവേ.

൬൩൫.

സിഖണ്ഡോ വരഹഞ്ചേവ, കലാപോ പിഞ്ഛ മപ്യഥ;

ചന്ദകോ മേചകോ ചാഥ, ഛപ്പദോ ച മധുബ്ബതോ.

൬൩൬.

മധുലീഹോ മധുകരോ, മധുപോ ഭമരോ അലി;

പാരാവതോ കപോതോ ച, കകുടോ ച പാരേവതോ.

൬൩൭.

ഗിജ്ഝോ ഗദ്ധോഥ കുലലോ, സേനോ ബ്യഗ്ഘീനസോ പ്യഥ;

തബ്ഭേദാ സകുണഗ്ഘി’ത്ഥീ, ആടോ ദബ്ബിമുഖദ്വിജോ.

൬൩൮.

ഉഹുങ്കാരോ ഉലൂകോ ച, കോസിയോ വായസാരി ച;

കാകോ ത്വ’രിട്ഠോ ധങ്കോ ച, ബലിപുട്ഠോ ച വായസോ.

൬൩൯.

കാകോലോ വനകാകോ ഥ,

ലാപോ ലടുകികാ പ്യഥ;

വാരണോ ഹത്ഥിലിങ്ഗോ ച, ഹത്ഥിസോണ്ഡവിഹങ്ഗമോ.

൬൪൦.

ഉക്കുസോ കുരരോ കോല,ട്ഠിപക്ഖിമ്ഹി ച കുക്കുഹോ;

സുവോ തു കീരോ ച സുകോ, തമ്ബചൂളോ തു കുക്കുടോ.

൬൪൧.

വനകുക്കുടോ ച നിജ്ജിവ്ഹോ, അഥ കോഞ്ചാ ച കുന്തനീ;

ചക്കവാകോ തു ചക്കവ്ഹോ, സാരങ്ഗോതു ച ചാതകോ.

൬൪൨.

തുലിയോ പക്ഖിബിളാലോ,

സതപത്തോ തു സാരസോ;

ബകോ തു സുക്കകാകോഥ,

ബലാകാ വിസകണ്ഠികാ.

൬൪൩.

ലോഹപിട്ഠോ തഥാ കങ്കോ, ഖഞ്ജരീടോ തു ഖഞ്ജനോ;

കലവിങ്കോ തു ചാടകോ, ദിന്ദിഭോ തു കികീ ഭവേ.

൬൪൪.

കാദമ്ബോ ¶ കാളഹംസോഥ, സകുന്തോ ഭാസപക്ഖിനി;

ധൂമ്യാടോ തു കലിങ്ഗോഥ,

ദാത്യൂഹോ കാളകണ്ഠകോ.

൬൪൫.

ഖുദ്ദാദീ മക്ഖികാഭേദാ, ഡംസോ പിങ്ഗലമക്ഖികാ;

ആസാടികാ മക്ഖികാണ്ഡം, പതങ്ഗോ സലഭോ ഭവേ.

൬൪൬.

സൂചിമുഖോ ച മകസോ, ചീരീ തു ഝല്ലികാ [ഝില്ലികാ (ക.)] ഥ ച;

ജതുകാ ജിനപത്താ ഥ, ഹംസോ സേതച്ഛദോ ഭവേ.

൬൪൭.

തേ രാജഹംസാ രത്തേഹി, പാദതുണ്ഡേഹി ഭാസിതാ;

മല്ലികാ’ഖ്യാ ധതരട്ഠാ, മലീനേഹ്യ’സിതേഹി ച.

൬൪൮. തിരച്ഛോ തു തിരച്ഛാനോ, തിരച്ഛാനഗതോ സിയാതി.

ഇതി അരഞ്ഞാദിവഗ്ഗോ.

൭. പാതാലവഗ്ഗ

൬൪൯.

അധോഭുവനം പാതാലം, നാഗലോകോ രസാതലം;

രന്ധം തു വിവരം ഛിദ്ദം, കുഹരം സുസിരം ബിലം.

൬൫൦.

സുസി’ത്ഥീ ഛിഗ്ഗലം സോബ്ഭം, സച്ഛിദ്ദേ സുസിരം തിസു;

ഥിയം തു കാസു ആവാടോ, സപ്പരാജാ തു വാസുകീ.

൬൫൧.

അനന്തോ നാഗരാജാ ഥ, വാഹസോ’ജഗരോ ഭവേ;

ഗോനസോ തു തിലിച്ഛോ ഥ,

ദേഡ്ഡുഭോ രാജുലോ ഭവേ.

൬൫൨.

കമ്ബലോ’സ്സതരോ മേരു, പാദേ നാഗാഥ ധമ്മനീ;

സിലുത്തോ ഘരസപ്പോ ഥ, നീലസപ്പോ സിലാഭു ച.

൬൫൩.

ആസിവിസോ ഭുജങ്ഗോ’ഹി, ഭുജഗോ ച ഭുജങ്ഗമോ;

സരീസപോ ഫണീ സപ്പാ, ലഗദ്ദാ ഭോഗി പന്നഗാ.

൬൫൪.

ദ്വിജിവ്ഹോ ഉരഗോ വാളോ, ദീഘോ ച ദീഘപിട്ഠികോ;

പാദൂദരോ വിസധരോ, ഭോഗോ തു ഫണിനോ തനു.

൬൫൫.

ആസീ’ത്ഥീ ¶ സപ്പദാഠാ ഥ, നിമ്മോകോ കഞ്ചുകോ സമാ;

വിസം ത്വ’നിത്ഥീ ഗരളം, തബ്ഭേദാ വാ ഹലാഹലോ.

൬൫൬.

കാളകൂടാദയോ ചാഥ, വാളഗ്ഗാത്യ’ഹിതുണ്ഡികോ;

൬൫൭.

നിരയോ ദുഗ്ഗതി’ത്ഥീ ച, നരകോ, സോ മഹാ’ട്ഠധാ;

സഞ്ജീവോ കാളസുത്തോ ച, മഹാരോരുവ രോരുവാ;

പതാപനോ അവീചി’ത്ഥീ, സങ്ഘാതോ താപനോ ഇതി.

൬൫൮.

ഥിയം വേതരണീ ലോഹ, കുമ്ഭീ തത്ഥ ജലാസയാ;

കാരണികോ നിരയപോ,

നേരയികോ തു നാരകോ.

൬൫൯.

അണ്ണവോ സാഗരോ സിന്ധു, സമുദ്ദോ രതനാകരോ;

ജലനിഝു’ ദധി, തസ്സ, ഭേദാ ഖീരണ്ണവാദയോ.

൬൬൦.

വേലാ’സ്സ കൂലദേസോ ഥ,

ആവട്ടോ സലിലബ്ഭമോ;

ഥേവോ തു ബിന്ദു ഫുസിതം, ഭമോ തു ജലനിഗ്ഗമോ.

൬൬൧.

ആപോ പയോ ജലം വാരി, പാനീയം സലിലം ദകം;

അണ്ണോ നീരം വനം വാലം, തോയം അമ്ബു’ദകഞ്ച കം.

൬൬൨.

തരങ്ഗോ ച തഥാ ഭങ്ഗോ, ഊമി വീചി പുമിത്ഥിയം;

ഉല്ലോലോ തു ച കല്ലോലോ, മഹാവീചീസു കഥ്യതേ.

൬൬൩.

ജമ്ബാലോ കലലം പങ്കോ, ചിക്ഖല്ലം കദ്ദമോ പ്യഥ;

പുലിനം വാലുകാ വണ്ണു, മരൂ’രു സികതാ ഭവേ.

൬൬൪.

അന്തരീപഞ്ച ദീപോ വാ, ജലമജ്ഝഗതം ഥലം;

തീരം തു കൂലം രോധഞ്ച, പതീരഞ്ച തടം തിസു.

൬൬൫.

പാരം പരമ്ഹി തീരമ്ഹി, ഓരം ത്വ’പാര മുച്ചതേ;

ഉളുമ്പോ [ഉളുപോ (ക.)] തു പ്ലവോ കുല്ലോ, തരോ ച പച്ചരീ’ത്ഥിയം.

൬൬൬.

തരണീ തരി നാവാ ച, കൂപകോ തു ച കുമ്ഭകം;

പച്ഛാബന്ധോ ഗോടവിസോ, കണ്ണധാരോ തു നാവികോ.

൬൬൭.

അരിത്തം കേനിപാതോ ഥ,

പോതവാഹോ നിയാമകോ;

സംയത്തികാ തു നാവായ, വാണിജ്ജമാചരന്തി യേ.

൬൬൮.

നാവായ’ങ്ഗാ’ ¶ ലങ്കാരോ ച, വടാകാരോ ഫിയാദയോ;

പോതോ പവഹനം വുത്തം, ദോണി ത്വി’ത്ഥീ തഥാ’മ്ബണം [അമ്മണം (സീ.)].

൬൬൯.

ഗഭീര നിന്ന ഗമ്ഭീരാ, ഥോ ത്താനം തബ്ബിപക്ഖകേ;

അഗാധം ത്വ’തലമ്ഫസ്സം, അനച്ഛോ കലുസാ’വിലാ.

൬൭൦.

അച്ഛോ പസന്നോ വിമലോ, ഗഭീരപ്പഭുതീ തിസു;

ധീവരോ മച്ഛികോ മച്ഛ, ബന്ധ കേവട്ട ജാലികാ.

൬൭൧.

മച്ഛോ മീനോ ജലചരോ, പുഥുലോമോ’മ്ബുജോ ഝസോ;

രോഹിതോ മഗ്ഗുരോ സിങ്ഗീ, ബലജോ മുഞ്ജ പാവുസാ.

൬൭൨.

സത്തവങ്കോ സവങ്കോ ച, നളമീനോ ച ഗണ്ഡകോ;

സുസുകാ സഫരീ മച്ഛ, പ്പഭേദാ മകരാദയോ.

൬൭൩.

മഹാമച്ഛാ തിമി തിമി, ങ്ഗലോ തിമിരപിങ്ഗലോ;

ആനന്ദോ തിമിനന്ദോ ച, അജ്ഝാരോഹോ മഹാതിമി.

൬൭൪.

പാസാണമച്ഛോ പാഠീനോ, വങ്കോ തു ബളിസോ ഭവേ;

സുസുമാരോ [സംസുമാരോ (ടീ.), സുംസുമാരോ (സീ.)] തു കുമ്ഭീലോ,

നക്കോ കുമ്മോ തു കച്ഛപോ.

൬൭൫.

കക്കടകോ കുളീരോ ച, ജലൂകാ തു ച രത്തപാ;

മണ്ഡൂകോ ദദ്ദുരോ ഭേകോ;

ഗണ്ഡുപ്പാദോ മഹീലതാ.

൬൭൬.

അഥ സിപ്പീ ച സുത്തി’ത്ഥീ, സങ്ഖേ തു കമ്ബു’നിത്ഥിയം;

ഖുദ്ദസങ്ഖ്യേ സങ്ഖനഖോ, ജലസുത്തി ച സമ്ബുകോ.

൬൭൭.

ജലാസയോ ജലാധാരോ, ഗമ്ഭീരോ രഹദോ ഥ ച;

ഉദപാനോ പാനകൂപോ, ഖാതം പോക്ഖരണീ’ത്ഥിയം.

൬൭൮.

തളാകോ ച സരോ’നിത്ഥീ, വാപീ ച സരസീ’ത്ഥിയം;

ദഹോ’മ്ബുജാകരോ ചാഥ, പല്ലലം ഖുദ്ദകോ സരോ.

൬൭൯.

അനോതത്തോ തഥാ കണ്ണ, മുണ്ഡോ ച രഥകാരകോ;

ഛദ്ദന്തോ ച കുണാലോ ച, വുത്താ മന്ദാകിനീ’ത്ഥിയം.

൬൮൦.

തഥാ സീഹപ്പപാതോതി, ഏതേ സത്ത മഹാസരാ;

ആഹാവോ തു നിപാനഞ്ചാ, ഖാതം തു ദേവഖാതകം.

൬൮൧.

സവന്തീ ¶ നിന്നഗാ സിന്ധു, സരിതാ ആപഗാ നദീ;

ഭാഗീരഥീ തു ഗങ്ഗാ ഥ, സമ്ഭേദോ സിന്ധുസങ്ഗമോ.

൬൮൨.

ഗങ്ഗാ’ചിരവതീ ചേവ, യമുനാ സരഭൂ (സരബൂ [സരയൂ (ക.)] ) മഹീ;

ഇമാ മഹാനദീ പഞ്ച, ചന്ദഭാഗാ സരസ്സതീ [സരസ്വതീ (സീ. ടീ.)].

൬൮൩.

നേരഞ്ജരാ ച കാവേരീ, നമ്മദാദീ ച നിന്നഗാ;

വാരിമഗ്ഗോ പണാലീ’ത്ഥീ [പനാളീ (ടീ.)], പുമേ ചന്ദനികാ തു ച.

൬൮൪.

ജമ്ബാലീ ഓലിഗല്ലോ ച, ഗാമദ്വാരമ്ഹി കാസുയം;

സരോരുഹം സതപത്തം, അരവിന്ദഞ്ച വാരിജം.

൬൮൫.

അനിത്ഥീ പദുമം പങ്കേ, രുഹം നലിന പോക്ഖരം;

മുളാലപുപ്ഫം കമലം, ഭിസപുപ്ഫം കുസേസയം.

൬൮൬.

പുണ്ഡരീകം സിതം, രത്തം, കോകനദം കോകാസകോ;

കിഞ്ജക്ഖോ കേസരോ നിത്ഥീ, ദണ്ഡോ തു നാല മുച്ചതേ.

൬൮൭.

ഭിസം മുളാലോ നിത്ഥീ ച, ബീജകോസോ തു കണ്ണികാ;

പദുമാദിസമൂഹേ തു, ഭവേ സണ്ഡമനിത്ഥിയം.

൬൮൮.

ഉപ്പലം കുവലയഞ്ച, നീലം ത്വി’ന്ദീവരം സിയാ;

സേതേതു കുമുദഞ്ചസ്സ, കന്ദോ സാലൂക മുച്ചതേ.

൬൮൯.

സോഗന്ധികം കല്ലഹാരം, ദകസീതലികം പ്യഥ;

സേവാലോ നീലികാ ചാഥ, ഭിസിന്യ’മ്ബുജിനീ ഭവേ.

൬൯൦. സേവാലാ തിലബീജഞ്ച, സങ്ഖേ ച പണകാദയോതി.

ഇതി പാതാലവഗ്ഗോ.

ഭൂകണ്ഡോ ദുതിയോ.

൩. സാമഞ്ഞകണ്ഡ

൧. വിസേസ്യാധീനവഗ്ഗ

൬൯൧.

വിസേസ്യാധീന സംകിണ്ണാ, നേകത്ഥേഹ്യ’ബ്യയേഹി ച;

സാ’ങ്ഗോ’പാങ്ഗേഹി കഥ്യന്തേ, കണ്ഡേ വഗ്ഗാ ഇഹ ക്കമാ.

൬൯൨.

ഗുണദബ്ബക്രിയാസദ്ദാ, ¶ സിയും സബ്ബേ വിസേസനാ;

വിസേസ്യാധീനഭാവേന, വിസേസ്യസമലിങ്ഗിനോ.

൬൯൩.

സോഭനം രുചിരം സാധു, മനുഞ്ഞം ചാരു സുന്ദരം;

വഗ്ഗു മനോരമം കന്തം, ഹാരീ മഞ്ജു ച പേസലം.

൬൯൪.

ഭദ്ദം വാമഞ്ച കല്യാണം, മനാപം ലദ്ധകം സുഭം;

ഉത്തമോ പവരോ ജേട്ഠോ, പമുഖാ’നുത്തരോ വരോ.

൬൯൫.

മുഖ്യോ പധാനം പാമോക്ഖോ, പര മഗ്ഗഞ്ഞ മുത്തരം;

പണീതം പരമം സേയ്യോ, ഗാമണീ സേട്ഠ സത്തമാ.

൬൯൬.

വിസിട്ഠാ’രിയ നാഗേ’കോ, സഭഗ്ഗാ മോക്ഖ പുങ്ഗവാ;

സീഹ കുഞ്ജര സദ്ദൂലാ, ദീ തു സമാസഗാ പുമേ.

൬൯൭.

ചിത്ത’ക്ഖി പീതിജനന, മബ്യാസേക മസേചനം;

ഇട്ഠം തു സുഭഗം ഹജ്ജം, ദയിതം വല്ലഭം പിയം.

൬൯൮.

തുച്ഛഞ്ച രിത്തകം സുഞ്ഞം, അഥാ’സാരഞ്ച ഫേഗ്ഗു ച;

മേജ്ഝം പൂതം പവിത്തോ ഥ, അവിരദ്ധോ അപണ്ണകോ.

൬൯൯.

ഉക്കട്ഠോ ച പകട്ഠോ ഥ, നിഹീനോ ഹീന ലാമകാ;

പതികിട്ഠം നികിട്ഠഞ്ച, ഇത്തരാ’വജ്ജ കുച്ഛിതാ.

൭൦൦.

അധമോ’മക ഗാരയ്ഹാ,

മലീനോ തു മലീമസോ;

ബ്രഹാ മഹന്തം വിപുലം, വിസാലം പുഥുലം പുഥു.

൭൦൧.

ഗരു’രു വിത്ഥിണ്ണ മഥോ, പീനം ഥൂലഞ്ച പീവരം;

ഥുല്ലഞ്ച വഠരഞ്ചാ ഥ, ആചിതം നിചിതം ഭവേ.

൭൦൨.

സബ്ബം സമത്ത മഖിലം, നിഖിലം സകലം തഥാ;

നിസ്സേസം കസിണാ’സേസം, സമഗ്ഗഞ്ച അനൂനകം,

൭൦൩.

ഭൂരി പഹുതം പചുരം, ഭിയ്യോ സമ്ബഹുലം ബഹു;

യേഭുയ്യം ബഹുലം ചാഥ, ബാഹിരം പരിബാഹിരം.

൭൦൪.

പരോസതാദീ തേ, യേസം, പരം മത്തം സതാദിതോ;

പരിത്തം സുഖുമം ഖുദ്ദം, ഥോക മപ്പം കിസം തനു.

൭൦൫.

ചുല്ലം മത്തേ’ത്ഥിയം ലേസ,

ലവാ’ണുഹി കണോ പുമേ;

സമീപം നികടാ’സന്നോ, പകട്ഠാ’ഭ്യാസ സന്തികം.

൭൦൬.

അവിദൂരഞ്ച ¶ സാമന്തം, സന്നികട്ഠ മുപന്തികം;

സകാസം അന്തികം ഞത്തം, ദൂരം തു വിപ്പകട്ഠകം.

൭൦൭.

നിരന്തരം ഘനം സന്ദം, വിരളം പേലവം തനു;

അഥാ യതം ദീഘ മഥോ, നിത്തലം വട്ട വട്ടുലം.

൭൦൮.

ഉച്ചോ തു ഉന്നതോ തുങ്ഗോ, ഉദഗ്ഗോ ചേവ ഉച്ഛിതോ;

നീചോ രസ്സോ വാമനോ ഥ, അജിമ്ഹോ പഗുണോ ഉജു.

൭൦൯.

അളാരം വേല്ലിതം വങ്കം, കുടിലം ജിമ്ഹ കുഞ്ചിതം;

ധുവോ ച സസ്സതോ നിച്ചോ, സദാതന സനന്തനാ.

൭൧൦.

കൂടട്ഠോ ത്വേ’കരൂപേന, കാലബ്യാപീ പകാസിതോ;

ലഹു സല്ലഹുകം ചാഥ, സങ്ഖ്യാതം ഗണിതം മിതം.

൭൧൧.

തിണ്ഹം തു തിഖിണം തിബ്ബം, ചണ്ഡം ഉഗ്ഗം ഖരം ഭവേ;

ജങ്ഗമഞ്ച ചരഞ്ചേവ, തസം ഞേയ്യം ചരാചരം.

൭൧൨.

കമ്പനം ചലനം ചാഥ, അതിരിത്തോ തഥാ’ധികോ;

ഥാവരോ ജങ്ഗമാ അഞ്ഞോ, ലോലം തു ചഞ്ചലം ചലം.

൭൧൩.

തരലഞ്ച പുരാണോ തു, പുരാതന സനന്തനാ;

ചിരന്തനോ ഥ പച്ചഗ്ഘോ, നൂതനോ’ഭിനവോ നവോ.

൭൧൪.

കുരൂരം കഠിനം ദള്ഹം, നിട്ഠുരം കക്ഖളം ഭവേ;

അനിത്ഥ്യ’ന്തോ പരിയന്തോ, പന്തോ ച പച്ഛിമ’ന്തിമാ.

൭൧൫.

ജിഘഞ്ഞം ചരിമം പുബ്ബം, ത്വ’ഗ്ഗം പഠമ മാദി സോ;

പതിരൂപോ നുച്ഛവികം, അഥ മോഘം നിരത്ഥകം.

൭൧൬.

ബ്യത്തം പുട [ഫുടം (സീ.)] ഞ്ച മുദു തു, സുകുമാരഞ്ച കോമലം;

പച്ചക്ഖം ഇന്ദ്രിയഗ്ഗയ്ഹം, അപച്ചക്ഖം അതിന്ദ്രിയം.

൭൧൭.

ഇതരാ’ഞ്ഞതരോ ഏകോ, അഞ്ഞോ ബഹുവിധോ തു ച;

നാനാരൂപോ ച വിവിധോ, അബാധം തു നിരഗ്ഗലം.

൭൧൮.

അഥേ’കാകീ ച ഏകച്ചോ, ഏകോ ച ഏകകോ സമാ;

സാധാരണഞ്ച സാമഞ്ഞം, സമ്ബാധോ തു ച സംകടം.

൭൧൯.

വാമം കളേവരം സബ്യം; അപസബ്യം തു ദക്ഖിണം;

പടികൂലം ത്വ’പസബ്യം, ഗഹനം കലിലം സമാ.

൭൨൦.

ഉച്ചാവചം ¶ ബഹുഭേദം, സംകിണ്ണാ’ കിണ്ണ സംകുലാ;

കതഹത്ഥോ ച കുസലോ, പവീണാ’ഭിഞ്ഞ സിക്ഖിതാ.

൭൨൧.

നിപുണോ ച പടു ഛേകോ, ചാതുരോ ദക്ഖ പേസലാ;

ബാലോ ദത്തു ജലോ മൂള്ഹോ, മന്ദോ വിഞ്ഞൂ ച ബാലിസോ.

൭൨൨.

പുഞ്ഞവാ സുകതീ ധഞ്ഞോ, മഹുസ്സാഹോ മഹാധിതി;

മഹാതണ്ഹോ മഹിച്ഛോ ഥ, ഹദയീ ഹദയാലു ച.

൭൨൩.

സുമനോ ഹട്ഠചിത്തോ ഥ, ദുമ്മനോ വിമനോ പ്യഥ;

വദാനിയോ വദഞ്ഞൂ ച, ദാനസോണ്ഡോ ബഹുപ്പദോ.

൭൨൪.

ഖ്യാതോ പതീതോ പഞ്ഞാതോ,

ഭിഞ്ഞാതോ പഥിതോ സുതോ,

വിസ്സുതോ വിദിതോ ചേവ, പസിദ്ധോ പാകടോ ഭവേ.

൭൨൫.

ഇസ്സരോ നായകോ സാമീ, പതീ’സാ’ധിപതീ പഭൂ;

അയ്യാ’ധിപാ’ധിഭൂ നേതാ,

ഇബ്ഭോ ത്വ’ഡ്ഢോ തഥാ ധനീ.

൭൨൬.

ദാനാരഹോ ദക്ഖിണേയ്യോ, സിനിദ്ധോ തു ച വച്ഛലോ;

പരിക്ഖകോ കാരണികോ,

ആസത്തോ തു ച തപ്പരോ.

൭൨൭.

കാരുണികോ ദയാലുപി, സൂരതോ ഉസ്സുകോ തു ച;

ഇട്ഠത്ഥേ ഉയ്യുതോ ചാഥ, ദീഘസുത്തോ ചിരക്രിയോ.

൭൨൮.

പരാധീനോ പരായത്തോ, ആയത്തോ തു ച സന്തകോ;

പരിഗ്ഗഹോ അധീനോ ച, സച്ഛന്ദോ തു ച സേരിനി.

൭൨൯.

അനിസമ്മകാരീ ജമ്മോ, അതിതണ്ഹോ തു ലോലുപോ;

ഗിദ്ധോ തു ലുദ്ധോ ലോലോ ഥ,

കുണ്ഠോ മന്ദോ ക്രിയാസു ഹി.

൭൩൦.

കാമയിതാ തു കമിതാ, കാമനോ കാമി കാമുകോ;

സോണ്ഡോ മത്തോ വിധേയ്യോ തു,

അസ്സവോ സുബ്ബചോ സമാ.

൭൩൧.

പഗബ്ഭോ ¶ പടിഭായുത്തോ, ഭീസീലോ ഭീരു ഭീരുകോ;

അധീരോ [അവീരോ (ടീ.)] കാതരോ ചാഥ,

ഹിംസാസീലോ ച ഘാതുകോ.

൭൩൨.

കോധനോ രോസനോ [ദോസനോ (സീ.)] കോപീ,

ചണ്ഡോ ത്വച്ചന്തകോധനോ;

സഹനോ ഖമനോ ഖന്താ, തിതിക്ഖവാ ച ഖന്തിമാ.

൭൩൩.

സദ്ധായുത്തോ തു സദ്ധാലു, ധജവാ തു ധജാലു ച [ലജ്ജാലുതു ച ലജ്ജവാ (ക.)];

നിദ്ദാലു നിദ്ദാസീലോ ഥ, ഭസ്സരോ ഭാസുരോ ഭവേ.

൭൩൪.

നഗ്ഗോ ദിഗമ്ബരോ’വത്ഥോ, ഘസ്മരോ തു ച ഭക്ഖകോ;

ഏളമൂഗോ തു വത്തുഞ്ച, സോതും ചാ’കുസലോ ഭവേ.

൭൩൫.

മുഖരോ ദുമ്മുഖാ’ബദ്ധ, മുഖാ ചാപ്പിയവാദിനി;

വാചാലോ ബഹുഗാരയ്ഹ, വചേ വത്താ തു സോ വദോ.

൭൩൬.

നിജോ സകോ അത്തനിയോ,

വിമ്ഹയോ’ച്ഛരിയ’ബ്ഭുതോ;

വിഹത്ഥോ ബ്യാകുലോ ചാഥ,

ആതതായീ വധുദ്യതോ.

൭൩൭.

സീസച്ഛേജ്ജമ്ഹി വജ്ഝോ ഥ, നികതോ ച സഠോ’നുജു;

സൂചകോ പിസുണോ കണ്ണേ,

ജപോ ധുത്തോ തു വഞ്ചകോ.

൭൩൮.

അനിസമ്മ ഹി യോ കിച്ചം, പുരിസോ വധബന്ധനാദി മാചരതി;

അവിനിച്ഛിതകാരിത്താ, സോഖലു ചപലോതി വിഞ്ഞേയ്യോ.

൭൩൯.

ഖുദ്ദോ കദരിയോ ഥദ്ധ, മച്ഛരീ കപണോ പ്യഥ;

അകിഞ്ചനോ ദലിദ്ദോ ച, ദീനോ നിദ്ധന ദുഗ്ഗതാ.

൭൪൦.

അസമ്ഭാവിതസമ്പത്തം, കാകതാലിയ മുച്ചതേ;

അഥ യാചനകോ അത്ഥീ, യാചകോ ച വനിബ്ബകോ.

൭൪൧.

അണ്ഡജാ പക്ഖിസപ്പാദീ, നരാദീ തു ജലാബുജാ;

സേദജാ കിമിഡംസാദീ, ദേവാദീ ത്വോ’ പപാതികാ.

൭൪൨.

ജണ്ണുതഗ്ഘോ ¶ ജണ്ണുമത്തോ, കപ്പോ തു കിഞ്ചിദൂനകേ;

അന്തഗ്ഗതം ഭു പരിയാ, പന്ന മന്തോഗധോ’ഗധാ.

൭൪൩.

രാധിതോ സാധിതോ ചാഥ, നിപ്പക്കം കുഥിതം ഭവേ;

ആപന്നോ ത്വാ’പദപ്പത്തോ, വിവസോ ത്വവസോ ഭവേ.

൭൪൪.

നുണ്ണോ നുത്താ’ത്ത, ഖിത്താ ചേ’, രിതാ വിദ്ധാ ഥ കമ്പിതോ;

ധൂതോ ആധൂത ചലിതാ, നിസിതം തു ച തേജിതം.

൭൪൫.

പത്തബ്ബം ഗമ്മ മാപജ്ജം [ആസജ്ജം (ക.)], പക്കം പരിണതം സമാ;

വേഠിതം തു വലയിതം, രുദ്ധം സംവുത മാവുതം.

൭൪൬.

പരിക്ഖിത്തഞ്ച നിവുതം, വിസടം വിത്ഥതം തതം;

ലിത്തോ തു ദിദ്ധോ ഗൂള്ഹോ തു,

ഗുത്തോ പുട്ഠോ തു പോസിതോ.

൭൪൭.

ലജ്ജിതോ ഹീളിതോ ചാഥ, സനിതം ധനിതം പ്യഥ;

സന്ദാനിതോ സിതോ ബദ്ധോ,

കീലിതോ സംയതോ ഭവേ.

൭൪൮.

സിദ്ധേ നിപ്ഫന്ന നിബ്ബത്താ, ദാരിതേ ഭിന്ന ഭേദിതാ;

ഛന്നോ തു ഛാദിതേ ചാഥ, വിദ്ധേ ഛിദ്ദിത വേധിതാ.

൭൪൯.

ആഹടോ ആഭതാ’നീതാ,

ദന്തോ തു ദമിതോ സിയാ;

സന്തോ തു സമിതോ ചേവ,

പുണ്ണോ തു പൂരിതോ ഭവേ.

൭൫൦.

അപചായിതോ മഹിതോ, പൂജിതാ’രഹിതോ’ച്ചിതോ;

മാനിതോ ചാ’പചിതോ ച, തച്ഛിതം തുതനൂകതേ.

൭൫൧.

സന്തത്തോ ധൂപിതോ ചോപ,

ചരിതോ തു ഉപാസിതോ;

ഭട്ഠം തു ഗലിതം പന്നം, ചുതഞ്ച ധംസിതം ഭവേ.

൭൫൨.

പീതോ പമുദിതോ ഹട്ഠോ,

മത്തോ തുട്ഠോ ഥ കന്തിതോ;

സഞ്ഛിന്നോ ലൂന ദാതാ ഥ,

പസത്ഥോ വണ്ണിതോ ഥുതോ.

൭൫൩.

തിന്തോ’ല്ല’ദ്ദ ¶ കിലിന്നോ’ന്നാ, മഗ്ഗിതം പരിയേസിതം;

അന്വേസിതം ഗവേസിതം, ലദ്ധം തു പത്ത മുച്ചതേ.

൭൫൪.

രക്ഖിതം ഗോപിതം ഗുത്തം, താതം ഗോപായിതാ’വിതാ;

പാലിതം അഥ ഓസ്സട്ഠം, ചത്തം ഹീനം സമുജ്ഝിതം.

൭൫൫.

ഭാസിതം ലപിതം വുത്താ, ഭിഹിതാ’ഖ്യാത ജപ്പിതാ;

ഉദീരിതഞ്ച കഥിതം, ഗദിതം ഭണിതോ’ദിതാ.

൭൫൬.

അവഞ്ഞാതാ’വഗണിതാ, പരിഭൂതാ’വമാനിതാ;

ജിഘച്ഛിതോ തു ഖുദിതോ,

ഛാതോ ചേവ ബുഭുക്ഖിതോ.

൭൫൭.

ബുദ്ധം ഞാതം പടിപന്നം, വിദിതാ’വഗതം മതം;

ഗിലിതോ ഖാദിതോ ഭുത്തോ,

ഭക്ഖിതോ’ജ്ഝോഹടാ’സിതാ.

ഇതി വിസേസ്യാധീനവഗ്ഗോ.

൨. സംകിണ്ണവഗ്ഗ

൭൫൮.

ഞേയ്യം ലിങ്ഗ മിഹ ക്വാപി, പച്ചയത്ഥവസേന ച;

ക്രിയാ തു കിരിയം കമ്മം,

സന്തി തു സമഥോ സമോ;

ദമോ ച ദമഥോ ദന്തി, വത്തം തു സുദ്ധകമ്മനി;

അഥോ ആസങ്ഗവചനം, തീസു വുത്തം പരായണം.

൭൫൯.

ഭേദോ വിദാരോ ഫുടനം, തപ്പനം തു ച പീണനം;

അക്കോസന മഭിസങ്ഗോ,

ഭിക്ഖാ തു യാചനാ’ത്ഥനാ.

൭൬൦.

നിന്നിമിത്തം യദിച്ഛാ ഥാ’, പുച്ഛനാ നന്ദനാനി ച;

സഭാജന മഥോ ഞായോ,

നയോ ഫാതി തു വുദ്ധിയം.

൭൬൧.

കിലമഥോ കിലമനം, പസവോ തു പസൂതിയം;

ഉക്കംസോ ത്വതിസയോ ഥ,

ജയോ ച ജയനം ജിതി.

൭൬൨.

വസോ ¶ കന്തി, ബ്യധോ വേധോ,

ഗഹോ ഗാഹോ വരോ വുതി;

പചാ പാകോ ഹവോ ഹുതി [ഹൂഭി (സീ. അമരകോസ)],

വേദോ വേദന മിത്ഥി വാ.

൭൬൩.

ജീരണം ജാനി താണം തു, രക്ഖണം പമിതിപ്പമാ;

സിലേസോ സന്ധി ച ഖയോ,

ത്വപചയോ രവോ രണോ.

൭൬൪.

നിഗാദോ നിഗദോ മാദോ, മദോ പസിതി ബന്ധനം;

ആകരോ ത്വിങ്ഗിതം ഇങ്ഗോ,

അഥ’ത്ഥാപഗമോ ബ്യയോ.

൭൬൫.

അന്തരായോ ച പച്ചൂഹോ,

വികാരോ തു വികത്യ’പി;

പവിസിലേസോ വിധുരം, ഉപവേസനമാസനം.

൭൬൬.

അജ്ഝാസയോ അധിപ്പായോ, ആസയോ ചാഭിസന്ധി ച;

ഭാവോ ധിമുത്തി ഛന്ദോ ഥ,

ദോസോ ആദീനവോ ഭവേ.

൭൬൭.

ആനിസംസോ ഗുണോ ചാഥ,

മജ്ഝം വേമജ്ഝ മുച്ചതേ;

മജ്ഝന്ഹികോ [മജ്ഝന്തികോ (ടീ. സീ. പീ.)] തു മജ്ഝന്ഹോ, വേമത്തം തു ച നാനതാ.

൭൬൮.

വാ ജാഗരോ ജാഗരിയം [ജാഗരിയോ (ടീ.)], പവാഹോ തു പവത്തി ച;

ബ്യാസോ പപഞ്ചോ വിത്ഥാരോ,

യാമോ തു സംയമോ യമോ.

൭൬൯.

സമ്ബാഹനം മദ്ദനഞ്ച, പസരോ തു വിസപ്പനം;

സന്ഥവോ തു പരിചയോ,

മേലകോ സങ്ഗ സങ്ഗമാ.

൭൭൦.

സന്നിധി സന്നികട്ഠമ്ഹി, വിനാസോ തു അദസ്സനം;

ലവോ ഭിലാവോ ലവനം,

പത്ഥാവോ’വസരോ സമാ.

൭൭൧.

ഓസാനം ¶ പരിയോസാനം, ഉക്കംസോ’തിസയോ ഭവേ [അവസാനം സമാപനം (?)];

സന്നിവേസോ ച സണ്ഠാനം, അഥാ’ബ്ഭന്തര മന്തരം.

൭൭൨.

പാടിഹീരം പാടിഹേരം, പാടിഹാരിയ മുച്ചതേ;

കിച്ചം തു കരണീയഞ്ച, സങ്ഖാരോ വാസനാ ഭവേ.

൭൭൩.

പവനം പവ നിപ്പാവാ, തസരോ സുത്തവേഠനം;

സങ്കമോ ദുഗ്ഗസഞ്ചാരോ, പക്കമോ തു ഉപക്കമോ.

൭൭൪.

പാഠോ നിപാഠോ നിപഠോ, വിചയോ മഗ്ഗനാ പുമേ;

ആലിങ്ഗനം പരിസ്സങ്ഗോ, സിലേസോ ഉപഗൂഹനം.

൭൭൫.

ആലോകനഞ്ച നിജ്ഝാനം, ഇക്ഖണം ദസ്സനം പ്യഥ;

പച്ചാദേസോ നിരസനം, പച്ചക്ഖാനം നിരാകതി.

൭൭൬.

വിപല്ലാസോ’ഞ്ഞഥാഭാവോ, ബ്യത്തയോ വിപരീയയോ;

വിപരിയാസോ’തിക്കമോ, ത്വ’തിപാതോ ഉപച്ചയോ.

ഇതി സംകിണ്ണവഗ്ഗോ.

൩. അനേകത്ഥവഗ്ഗ

൭൭൭.

അനേകത്ഥേ പവക്ഖാമി, ഗാഥാ’ദ്ധപാദതോ കമാ;

ഏത്ഥ ലിങ്ഗവിസേസത്ഥ, മേകസ്സ പുനരുത്തതാ.

൭൭൮.

സമയോ സമവായേ ച, സമൂഹേ കാരണേ ഖണേ;

പടിവേധേ സിയാ കാലേ, പഹാനേ ലാഭ ദിട്ഠിസു.

൭൭൯.

വണ്ണോ സണ്ഠാന രൂപേസു, ജാതി,ച്ഛവീസു കാരണേ;

പമാണേ ച പസംസായം, അക്ഖരേ ച യസേ ഗുണേ.

൭൮൦.

ഉദ്ദേസേ പാതിമോക്ഖസ്സ, പണ്ണത്തിയ മുപോസഥോ;

ഉപവാസേ ച അട്ഠങ്ഗേ, ഉപോസഥദിനേ സിയാ.

൭൮൧.

രഥങ്ഗേ ലക്ഖണേ ധമ്മോ, രചക്കേ’സ്വീരിയാപഥേ;

ചക്കം സമ്പത്തിയം ചക്ക, രതനേ മണ്ഡലേ ബലേ.

൭൮൨.

കുലാലഭണ്ഡേ ആണായ, മായുധേ ദാന രാസിസു;

൭൮൩.

ദാനസ്മിം ¶ ബ്രഹ്മചരിയ, മപ്പമഞ്ഞാസു സാസനേ;

മേഥുനാരതിയം വേയ്യാ, വച്ചേ സദാരതുട്ഠിയം;

പഞ്ചസീലാ’രിയമഗ്ഗോ, പോസഥങ്ഗ ധിതീസു [ഠിതീസു (ക.)] ച.

൭൮൪.

ധമ്മോ സഭാവേ പരിയത്തിപഞ്ഞാ,

ഞായേസു സച്ചപ്പകതീസു പുഞ്ഞേ;

ഞേയ്യേ ഗുണാ’ചാര സമാധിസൂപി,

നിസ്സത്തതാ’പത്തിസു കാരണാദോ.

൭൮൫.

അത്ഥോ പയോജനേ സദ്ദാ, ഭിധേയ്യേ വുദ്ധിയം ധനേ;

വത്ഥുമ്ഹി കാരണേ നാസേ, ഹിതേ പച്ഛിമപബ്ബതേ.

൭൮൬.

യേഭുയ്യതാ’ബ്യാമിസ്സേസു, വിസംയോഗേ ച കേവലം;

ദള്ഹത്ഥേ’നതിരേകേ ചാ, നവസേസമ്ഹി തം തിസു.

൭൮൭.

ഗുണോ പടല രാസീസു, ആനിസംസേ ച ബന്ധനേ;

അപ്പധാനേ ച സീലാദോ, സുക്കാദിമ്ഹി ജിയായ ച.

൭൮൮.

രുക്ഖാദോ വിജ്ജമാനേ ചാ, രഹന്തേ ഖന്ധപഞ്ചകേ;

ഭൂതോ സത്ത മഹാഭൂതാ, മനുസ്സേസു ന നാരിയം.

൭൮൯.

വാച്ചലിങ്ഗോ അതീതസ്മിം, ജാതേ പത്തേ സമേ മതോ;

൭൯൦.

സുന്ദരേ ദള്ഹികമ്മേ ചാ, യാചനേ സമ്പടിച്ഛനേ;

സജ്ജനേ സമ്പഹംസായം, സാധ്വാ’ഭിധേയ്യലിങ്ഗികം.

൭൯൧.

അന്തോ നിത്ഥീ സമീപേ ചാ, വസാനേ പദപൂരണേ;

ദേഹാവയവേ കോട്ഠാസേ, നാസ സീമാസു ലാമകേ.

൭൯൨.

നികായേ സന്ധി സാമഞ്ഞ, പ്പസൂതീസു കുലേ ഭവേ;

വിസേസേ സുമനായഞ്ച, ജാതി സങ്ഖതലക്ഖണേ.

൭൯൩.

ഭവഭേദേ പതിട്ഠായം, നിട്ഠാ’ജ്ഝാസയബുദ്ധിസു;

വാസട്ഠാനേ ച ഗമനേ, വിസടത്തേ [വിസരത്ത വിസദത്തേ] ഗതീരിതാ.

൭൯൪.

ഫലേ വിപസ്സനാ ദിബ്ബ, ചക്ഖു സബ്ബഞ്ഞുതാസു ച;

പച്ചവേക്ഖണഞാണമ്ഹി, മഗ്ഗേ ച ഞാണദസ്സനം.

൭൯൫.

കമ്മാരുദ്ധന അങ്ഗാര, കപല്ല ദീപികാസു ച;

സുവണ്ണകാരമൂസായം, ഉക്കാ വേഗേ ച വായുനോ.

൭൯൬.

കേസോഹാരണ, ¶ ജീവിത, വുത്തിസു വപനേ ച വാപസമകരണേ;

കഥനേ പമുത്തഭാവ, ജ്ഝേനാദോ [ജ്ഝേസനാദോ (സീ.)] വുത്ത മപി തീസു.

൭൯൭.

ഗമനേ വിസ്സുതേ ചാ’വ, ധാരിതോ’പചിതേസു ച;

അനുയോഗേ കിലിന്നേ ച, സുതോ’ ഭിധേയ്യലിങ്ഗികോ.

൭൯൮.

സോതവിഞ്ഞേയ്യ സത്ഥേസു, സുതം പുത്തേ സുതോ സിയാ;

൭൯൯.

കപ്പോ കാലേ യുഗേ ലേസേ, പഞ്ഞത്തി പരമായുസു;

സദിസേ തീസു സമണ, വോഹാര കപ്പബിന്ദുസു;

സമന്തത്ഥേ’ന്തരകപ്പാ, ദികേ തക്കേ വിധിമ്ഹി ച.

൮൦൦.

നിബ്ബാന മഗ്ഗ വിരതി, സപഥേ സച്ചഭാസിതേ;

തച്ഛേ ചാ’രിയസച്ചമ്ഹി, ദിട്ഠിയം സച്ച മീരിതം.

൮൦൧.

സഞ്ജാതിദേസേ ഹേതുമ്ഹി, വാസട്ഠാനാ’കരേസു ച;

സമോസരണട്ഠാനേ ചാ, യതനം പദപൂരണേ.

൮൦൨.

അന്തരം മജ്ഝ വത്ഥ’ഞ്ഞ, ഖണോ’കാസോ’ധി ഹേതുസു;

ബ്യവധാനേ വിനട്ഠേ ച, ഭേദേ ഛിദ്ദേ മനസ്യ’പി.

൮൦൩.

ആരോഗ്യേ കുസലം ഇട്ഠ, വിപാകേ കുസലോ തഥാ;

അനവജ്ജമ്ഹി ഛേകേ ച, കഥിതോ വാച്ചലിങ്ഗികോ.

൮൦൪.

ദ്രവാ’ചാരേസു വീരിയേ, മധുരാദീസു പാരദേ;

സിങ്ഗാരാദോ ധാതുഭേദേ, കിച്ചേ സമ്പത്തിയം രസോ.

൮൦൫.

ബോധി സബ്ബഞ്ഞുതഞ്ഞാണേ, രിയമഗ്ഗേ ച നാരിയം;

പഞ്ഞത്തിയം പുമേ’ സ്സത്ഥ, രുക്ഖമ്ഹി പുരിസിത്ഥിയം.

൮൦൬.

സേവിതോ യേന യോ നിച്ചം, തത്ഥാപി വിസയോ സിയാ;

രൂപാദികേ ജനപദേ, തഥാ ദേസേ ച ഗോചരേ.

൮൦൭.

ഭാവോ പദത്ഥേ സത്തായ, മധിപ്പായ ക്രിയാസു ച;

സഭാവസ്മിഞ്ച ലീലായം, പുരിസി’ത്ഥിന്ദ്രിയേസു ച.

൮൦൮.

സോ ബന്ധവേ’ത്തനി ച സം, സോ ധനസ്മി മനിത്ഥിയം;

സാ പുമേ സുനഖേ വുത്തോ, ത്തനിയേ സോ തിലിങ്ഗികോ.

൮൦൯.

സുവണ്ണം കനകേ വുത്തം, സുവണ്ണോ ഗരുളേ തഥാ;

പഞ്ചധരണമത്തേ ച, ഛവി സമ്പത്തിയമ്പി ച.

൮൧൦.

വരോ ¶ ദേവാദികാ [ദേവാദിതോ (സീ.)] ഇട്ഠേ, ജാമാതരി പതിമ്ഹി ച,

ഉത്തമേ വാച്ചലിങ്ഗോ സോ, വരം മന്ദപ്പിയേ ബ്യയം.

൮൧൧.

മകുലേ ധനരാസിമ്ഹി, സിയാ കോസ മനിത്ഥിയം;

നേത്തിംസാദി പിധാനേ ച, ധനുപഞ്ചസതേപി ച.

൮൧൨.

പിതാമഹേ ജിനേ സേട്ഠേ, ബ്രാഹ്മണേ ച പിതൂസ്വപി;

ബ്രഹ്മാ വുത്തോ തഥാ ബ്രഹ്മം, വേദേ തപസി വുച്ചതേ.

൮൧൩.

ഹത്ഥീനം മജ്ഝബന്ധേ ച, പകോട്ഠേ കച്ഛബന്ധനേ;

മേഖലായം മതാ കച്ഛാ, കച്ഛോ വുത്തോ ലതായ ച.

൮൧൪.

തഥേവ ബാഹുമൂലമ്ഹി, അനൂപമ്ഹി തിണേപി ച;

൮൧൫.

പമാണം ഹേതു സത്ഥേസു, മാനേ ച സച്ചവാദിനി;

പമാതരി ച നിച്ചമ്ഹി, മരിയാദായ മുച്ചതേ.

൮൧൬.

സത്തം ദബ്ബ’ത്തഭാവേസു, പാണേസു ച ബലേ, സിയാ [ബലേ സക്കാ (ടീ.)];

സത്തായഞ്ച, ജനേസത്തോ, ആസത്തേ സോ തിലിങ്ഗികോ.

൮൧൭.

സേമ്ഹാദോ രസരത്താദോ, മഹാഭൂതേ പഭാദികേ;

ധാതു ദ്വീസ്വ’ട്ഠിചക്ഖാ’ദി, ഭ്വാ’ദീസു ഗേരികാദിസു.

൮൧൮.

അമച്ചാദോ സഭാവേ ച, യോനിയം പകതീ’രിതാ;

സത്വാദിസാമ്യാ’വത്ഥായം, പച്ചയാ പഠമേപി ച.

൮൧൯.

പദം ഠാനേ പരിത്താണേ, നിബ്ബാനമ്ഹി ച കാരണേ;

സദ്ദേ വത്ഥുമ്ഹി കോട്ഠാസേ, പാദേ തല്ലഞ്ഛനേ മതം.

൮൨൦.

ലോഹമുഗ്ഗര മേഘേസു, ഘനോ, താലാദികേ ഘനം,;

നിരന്തരേ ച കഠിനേ, വാച്ചലിങ്ഗിക മുച്ചതേ.

൮൨൧.

ഖുദ്ദാ ച മക്ഖികാഭേദേ, മധുമ്ഹി ഖുദ്ദ, മപ്പകേ;

അധമേ കപണേ ചാപി, ബഹുമ്ഹി ചതൂസു ത്തിസു.

൮൨൨.

തക്കേ മരണലിങ്ഗേ ച, അരിട്ഠം അസുഭേ സുഭേ,;

അരിട്ഠോ ആസവേ കാകേ, നിമ്ബേ ച ഫേനിലദ്ദുമേ.

൮൨൩.

മാനഭണ്ഡേ പലസതേ, സദിസത്തേ തുലാ തഥാ;

ഗേഹാനം ദാരുബന്ധത്ഥ, പീഠികായഞ്ച ദിസ്സതി.

൮൨൪.

മിത്തകാരേ ¶ ലഞ്ജദാനേ, ബലേ രാസി വിപത്തിസു [ബലരാസി വിപത്തിസു (ക.)];

യുദ്ധേ ചേവ പടിഞ്ഞായം, സങ്ഗരോ സമ്പകാസിതോ.

൮൨൫.

ഖന്ധേ ഭവേ നിമിത്തമ്ഹി, രൂപം വണ്ണേ ച പച്ചയേ;

സഭാവ സദ്ദ സണ്ഠാന, രൂപജ്ഝാന വപൂസു ച.

൮൨൬.

വത്ഥു കിലേസ കാമേസു, ഇച്ഛായം മദനേ രതേ;

കാമോ, കാമം നികാമേ, ചാ, നുഞ്ഞായം കാമ മബ്യയം.

൮൨൭.

പോക്ഖരം പദുമേ ദേഹേ, വജ്ജഭണ്ഡമുഖേപി ച;

സുന്ദരത്തേ ച സലിലേ, മാതങ്ഗകരകോടിയം.

൮൨൮.

രാസിനിച്ചല മായാസു, ദമ്ഭാ’സച്ചേസ്വ’യോഘനേ;

ഗിരിസിങ്ഗമ്ഹി സീരങ്ഗേ, യന്തേ കൂട മനിത്ഥിയം.

൮൨൯.

വുദ്ധിയം ജനനേ കാമ, ധാത്വാദീമ്ഹി ച പത്തിയം;

സത്തായഞ്ചേവ സംസാരേ, ഭവോ സസ്സതദിട്ഠിയം.

൮൩൦.

പടിവാക്യോ’ത്തരാസങ്ഗേ, സു’ത്തരം ഉത്തരോ തിസു;

സേട്ഠേ ദിസാദിഭേദേ ച, പരസ്മി മുപരീ’രിതോ.

൮൩൧.

നേക്ഖമ്മം പഠമജ്ഝാനേ, പബ്ബജ്ജായം വിമുത്തിയം;

വിപസ്സനായ നിസ്സേസ, കുസലമ്ഹി ച ദിസ്സതി.

൮൩൨.

സങ്ഖാരോ സങ്ഖതേ പുഞ്ഞാ, ഭിസങ്ഖാരാദികേപി ച;

പയോഗേ കായസങ്ഖാരാ, ദ്യ’ഭിസങ്ഖരണേസു ച.

൮൩൩.

ആരമ്മണേ ച സംസട്ഠേ, വോകിണ്ണേ നിസ്സയേ തഥാ;

തബ്ഭാവേ ചാപ്യഭിധേയ്യ, ലിങ്ഗോ സഹഗതോ ഭവേ.

൮൩൪.

തീസു ഛന്നം പതിരൂപേ, ഛാദിതേ ച നിഗൂഹിതേ;

നിവാസന പാരുപനേ, രഹോ പഞ്ഞത്തിയം പുമേ.

൮൩൫.

ബുദ്ധസമന്തചക്ഖൂസു, ചക്ഖു പഞ്ഞായ മീരിതം;

ധമ്മചക്ഖുമ്ഹി ച മംസ, ദിബ്ബചക്ഖുദ്വയേസു ച.

൮൩൬.

വാച്ചലിങ്ഗോ അഭിക്കന്തോ, സുന്ദരമ്ഹി അഭിക്കമേ;

അഭിരൂപേ ഖയേ വുത്തോ, തഥേവ’ബ്ഭനുമോദനേ.

൮൩൭.

കാരണേ ദേസനായഞ്ച, വാരേ വേവചനേപി ച;

പാകാരസ്മിം [പകാരസ്മിം (ക.)] അവസരേ, പരിയായോ കഥീയതി.

൮൩൮.

വിഞ്ഞാണേ ¶ ചിത്തകമ്മേ ച, വിചിത്തേ ചിത്ത മുച്ചതേ;

പഞ്ഞത്തി ചിത്തമാസേസു, ചിത്തോ, താരന്തരേ ഥിയം.

൮൩൯.

സാമം വേദന്തരേ സാന്ത്വേ, തം പീതേ സാമലേ തിസു;

സയമത്ഥേ ബ്യയം സാമം, സാമാ ച സാരിവായപി.

൮൪൦.

പുമേ ആചരിയാദിമ്ഹി, ഗരു [ഗുരു (ക. ടീ.)] മാതാപിതൂസ്വപി;

ഗരു തീസു മഹന്തേ ച, ദുജ്ജരാ’ലഹുകേസു ച.

൮൪൧.

അച്ചിതേ വിജ്ജമാനേ ച, പസത്ഥേ സച്ച സാധുസു;

ഖിന്നേ ച സമിതേ ചേവ, സന്തോഭിധേയ്യലിങ്ഗികോതി.

ഇതി ഗാഥാഅനേകത്ഥവഗ്ഗോ.

൮൪൨.

ദേവോ വിസുദ്ധിദേവാ’ദോ, മേഘ മച്ചു നഭേസു ച;

അഥോപി തരുണേ സത്തേ, ചോരേപി മാണവോ ഭവേ.

൮൪൩.

ആദി കോട്ഠാസ കോടീസു, പുരതോ’ഗ്ഗംവരേ തീസു;

പച്ചനീകോ’ത്തമേസ്വ’ഞ്ഞേ, പച്ഛാഭാഗേ പരോ തിസു.

൮൪൪.

യോനി കാമ സിരി’സ്സരേ, ധമ്മു’യ്യാമ യസേ ഭഗം;

ഉളാരോ തീസു വിപുലേ, സേട്ഠേ ച മധുരേ സിയാ.

൮൪൫.

സമ്പന്നോ തീസു സമ്പുണ്ണേ, മധുരേ ച സമങ്ഗിനി;

സങ്ഖാ തു ഞാണേ കോട്ഠാസ, പഞ്ഞത്തി ഗണനേസു ച.

൮൪൬.

ഠാനം ഇസ്സരിയോ’കാസ, ഹേതൂസു ഠിതിയമ്പി ച;

അഥോ മാനേ പകാരേച, കോട്ഠാസേച വിധോ ദ്വിസു.

൮൪൭.

പഞ്ഞോ’പവാസ ഖന്തീസു, ദമോ ഇന്ദ്രിയസംവരേ;

ഞാണേ ച സോമനസ്സേച, വേദോ ഛന്ദസി ചോ’ച്ചതേ.

൮൪൮.

ഖന്ധകോട്ഠാസ, പസ്സാവ, മഗ്ഗ, ഹേതൂസു യോനി സാ [യോനി സോ (ടീ.)];

കാലേ തു കൂലേ സീമായം, വേലാ രാസിമ്ഹി ഭാസിതാ.

൮൪൯.

വോഹാരോ സദ്ദ പണ്ണത്തി, വണിജ്ജാ ചേതനാസു ച;

നാഗോ തു’രഗ ഹത്ഥീസു, നാഗരുക്ഖേ തഥു’ത്തമേ.

൮൫൦.

സേട്ഠാ’സഹായ സങ്ഖ്യാ’ഞ്ഞ,

തുല്യേസ്വേ’കോതിലിങ്ഗികോ;

രാഗേ തു മാനസോ ചിത്താ, രഹത്തേസു ച മാനസം.

൮൫൧.

മൂലം ¶ ഭേ സന്തികേ മൂല, മൂലേ ഹേതുമ്ഹി പാഭതേ;

രൂപാദ്യം’സ പകണ്ഡേസു, ഖന്ധോ രാസി ഗുണേസു ച.

൮൫൨.

ആരമ്ഭോ വീരിയേ കമ്മേ, ആദികമ്മേ വികോപനേ;

അഥോ ഹദയവത്ഥുമ്ഹി, ചിത്തേ ച ഹദയം ഉരേ.

൮൫൩.

പച്ഛാതാപാ’നുബന്ധേസു, രാഗാദോ’നുസയോ ഭവേ;

മാതങ്ഗമുദ്ധപിണ്ഡേ തു, ഘടേ കുമ്ഭോ ദസമ്ബണേ.

൮൫൪.

പരിവാരോ പരിജനേ, ഖഗ്ഗകോസേ പരിച്ഛദേ;

ആലമ്ബരോ തു സാരമ്ഭേ, ഭേരിഭേദേ ച ദിസ്സതി.

൮൫൫.

ഖണോ കാലവിസേസേ ച, നിബ്യാപാരട്ഠിതിമ്ഹി ച;

കുലേ ത്വ’ഭിജനോ വുത്തോ, ഉപ്പത്തിഭൂമിയമ്പി ച.

൮൫൬.

ആഹാരോ കബളീകാരാ, ഹാരാദീസു ച കാരണേ;

വിസ്സാസേ യാചനായഞ്ച, പേമേ ച പണയോ മതോ.

൮൫൭.

ണാദോ സദ്ധാ, ചീവരാദി, ഹേത്വാ’ധാരേസു പച്ചയോ;

കീളാ ദിബ്ബവിഹാരാദോ, വിഹാരോ സുഗതാലയേ.

൮൫൮.

സമത്ഥനേ മതോ ചിത്തേ, കഗ്ഗതായം സമാധി ച;

യോഗോ സങ്ഗതി [സങ്ഗേ ച (ടീ.)] കാമാദോ,

ഝാനോ’പായേസു യുത്തിയം.

൮൫൯.

ഭോഗോ സപ്പഫണ’ങ്ഗേസു, കോടില്ലേ ഭുഞ്ജനേ ധനേ;

ഭൂമിഭാഗേ കിലേസേ ച, മലേ ചാ’ങ്ഗണ മുച്ചതേ.

൮൬൦.

ധനാദിദപ്പേ പഞ്ഞായ, അഭിമാനോ മതോ ഥ ച;

അപദേസോ നിമിത്തേ ച, ഛലേ ച കഥനേ മതോ.

൮൬൧.

ചിത്തേ കായേ സഭാവേ ച, സോ അത്താ പരമ’ത്തനി;

അഥ ഗുമ്ബോ ച ഥമ്ബസ്മിം [ഥമ്ഭസ്മിം (ടീ.)], സമൂഹേ ബലസജ്ജനേ.

൮൬൨.

അന്തോഘരേ കുസൂലേ ച, കോട്ഠോ ന്തോകുച്ഛിയം പ്യഥ;

സോപാനങ്ഗമ്ഹി ഉണ്ഹീസോ, മകുടേ സീസവേഠനേ.

൮൬൩.

നിയ്യാസേ സേഖരേ ദ്വാരേ, നിയ്യൂഹോ നാഗദന്തകേ;

അഥോ സിഖണ്ഡേ തൂണീരേ, കലാപോ നികരേ മതോ.

൮൬൪.

ചൂളാ സംയതകേസേസു, മകുടേ മോളി ച ദ്വിസു;

സങ്ഖോ ത്വ’നിത്ഥിയം കമ്ബു, നലാട’ട്ഠീസു [ലലാടട്ഠീസു (സീ.)] ഗോപ്ഫകേ.

൮൬൫.

പക്ഖോ ¶ കാലേ ബലേ സാധ്യേ, സഖീ വാജേസു പങ്ഗുലേ;

ദേസേ’ണ്ണവേ പുമേ സിന്ധു, സരിതായം സ നാരിയം.

൮൬൬.

ഗജേ കരേണു പുരിസേ, സോ ഹത്ഥിനിയ മിത്ഥിയം;

രതനേ വജിരോ നിത്ഥീ, മണിവേധി’ന്ദഹേതിസു.

൮൬൭.

വിസാണം തീസു മാതങ്ഗ, ദന്തേ ച പസുസിങ്ഗകേ;

കോടിയം തു മതോ കോണോ, തഥാ വാദിത്തവാദനേ.

൮൬൮.

വണിപ്പഥേ ച നഗരേ, വേദേ ച നിഗമോ ഥ ച;

വിവാദാദോ’ ധികരണം, സിയാ’ധാരേ ച കാരണേ.

൮൬൯.

പസുമ്ഹി വസുധായഞ്ച, വാചാദോ ഗോ പുമിത്ഥിയം;

ഹരിതേ തു സുവണ്ണേ ച, വാസുദേവേ ഹരീ’രിതോ.

൮൭൦.

ആയത്തേ പരിവാരേ ച, ഭരിയായം പരിഗ്ഗഹോ;

ഉത്തംസോ ത്വ’ വതംസോ ച, കണ്ണപൂരേ ച സേഖരേ.

൮൭൧.

വിജ്ജുയം വജിരേ ചേവാ, സനി’ത്ഥിപുരിസേ പ്യഥ;

കോണേ സങ്ഖ്യാവിസേസസ്മിം, ഉക്കംസേ കോടി നാരിയം.

൮൭൨.

ചൂളാ ജാലാ പധാന’ഗ്ഗ, മോരചൂളാസു സാ സിഖാ;

സപ്പദാഠായ മാസീ’ത്ഥീ, ഇട്ഠസ്സാ’സീസനായപി.

൮൭൩.

വസാ വിലീന തേലസ്മിം, വസഗാ വഞ്ഝഗാവിസു;

അഭിലാസേ തു കിരണേ, അഭിസങ്ഗേ രുചി’ത്ഥിയം.

൮൭൪.

സഞ്ഞാ സഞ്ജാനനേ നാമേ, ചേതനായഞ്ച ദിസ്സതി;

അംസേ സിപ്പേ കലാ കാലേ, ഭാഗേ ചന്ദസ്സ സോളസേ.

൮൭൫.

ബീജകോസേ ഘരകൂടേ, കണ്ണഭൂസായ കണ്ണികാ;

ആഗാമികാലേ ദീഘത്തേ, പഭാവേ ച മതാ’യതി.

൮൭൬.

ഉണ്ണാ മേസാദിലോമേ, ച, ഭൂമജ്ഝേ രോമധാതുയം;

വാരുണീ ത്വിത്ഥിയം വുത്താ, നട്ടകീ മദിരാദിസു.

൮൭൭.

ക്രിയചിത്തേ ച കരണേ, കിരിയം കമ്മനി ക്രിയാ;

സുനിസായം തു കഞ്ഞായ, ജായായ ച വധൂ മതാ.

൮൭൮.

പമാണി’സ്സരിയേ മത്താ, അക്ഖരാവയവേ’പ്പകേ;

സുത്തം പാവചനേ രിട്ഠേ [സിദ്ധേ (ടീ.)], തന്തേ തം സുപിതേ തിസു.

൮൭൯.

രാജലിങ്ഗോ’സഭങ്ഗേസു, ¶ രുക്ഖേ ച കകുദോ [കകുധോ (ടീ. സീ.)] പ്യഥ;

നിമിത്ത’ക്ഖര സൂപേസു, ബ്യഞ്ജനം ചിഹനേ പദേ.

൮൮൦.

വോഹാരേ ജേതു മിച്ഛായം, കീളാദോ ചാപി ദേവനം;

ഭരിയായം തു കേദാരേ, സരീരേ ഖേത്ത മീരിതം.

൮൮൧.

സുസ്സൂസായഞ്ച വിഞ്ഞേയ്യം, ഇസ്സാഭ്യാസേ പ്യു’പാസനം;

സൂലം തു നിത്ഥിയം ഹേതി, ഭേദേ സംകു രുജാസു ച.

൮൮൨.

തന്തി വീണാഗുണേ, തന്തം, മുഖ്യസിദ്ധന്ത തന്തുസു;

രഥാദ്യങ്ഗേ തു ച യുഗോ, കപ്പമ്ഹി യുഗലേ യുഗം.

൮൮൩.

ഇത്ഥിപുപ്ഫേ ച രേണുമ്ഹി, രജോ പകതിജേ ഗുണേ;

ന്യാസപ്പണേ തു ദാനമ്ഹി, നിയ്യാതന മുദീരിതം.

൮൮൪.

ഗരു’പായാ’വതാരേസു, തിത്ഥം പൂതമ്ബു ദിട്ഠിസു;

പണ്ഡകേ ജോതി നക്ഖത്ത, രംസീസ്വ’ഗ്ഗിമ്ഹി ജോതി സോ.

൮൮൫.

കണ്ഡോ നിത്ഥീ സരേ ദണ്ഡേ, വഗ്ഗേ ചാവസരേ പ്യഥ;

ഉദ്ധംബാഹുദ്വയമാനേ [ബാഹുദ്വയുമ്മാനേ (സീ. ക.)], സൂരത്തേപി ച പോരിസം.

൮൮൬.

ഉട്ഠാനം പോരിസേ’ഹാസു, നിസിന്നാദ്യു’ഗ്ഗമേ പ്യഥ;

അനിസ്സയമഹീഭാഗേ, ത്വി’രീണം ഊസരേ സിയാ.

൮൮൭.

ആരാധനം സാധനേ ച, പത്തിയം പരിതോസനേ;

പധാനേ തു ച സാനുമ്ഹി, വിസാണേ സിങ്ഗ മുച്ചതേ.

൮൮൮.

ദിട്ഠാ’ദിമഗ്ഗേ ഞാണ’ക്ഖി, ക്ഖണ ലദ്ധീസു ദസ്സനം;

ഹേമേ പഞ്ചസുവണ്ണേ ച, നിക്ഖോ നിത്ഥീ പസാധനേ.

൮൮൯.

തിഥിഭേദേ ച സാഖാദി, ഫളുമ്ഹി പബ്ബ മുച്ചതേ;

നാഗലോകേ തു പാതാലം, ഭാസിതം ബലവാമുഖേ.

൮൯൦.

കാമജേ കോപജേ ദോസേ, ബ്യസനഞ്ച വിപത്തിയം;

അഥോ’പകരണേ സിദ്ധി, കാരകേസു ച സാധനം.

൮൯൧.

തീസ്വീരിതോ [തീസ്വിതോ (ടീ.)] ദാനസീലേ, വദഞ്ഞൂ വഗ്ഗുവാദിനി;

പുരക്ഖതോ ഭിസിത്തേ ച, പൂജിതേ പുരതോകതേ.

൮൯൨.

മന്ദോ ഭാഗ്യവിഹീനേ ചാ, പ്പകേ മൂള്ഹാ’പടൂസ്വപി;

വുദ്ധിയുത്തേ സമുന്നദ്ധേ, ഉപ്പന്നേ ഉസ്സിതം ഭവേ.

൮൯൩.

രഥങ്ഗേ’ക്ഖോ ¶ സുവണ്ണസ്മിം, പാസകേ, അക്ഖ മിന്ദ്രിയേ;

സസ്സതേ ച ധുവോ തീസു, ധുവം തക്കേ ച നിച്ഛിതേ.

൮൯൪.

ഹരേ സിവോ, സിവം ഭദ്ദ, മോക്ഖേസു, ജമ്ബുകേ സിവാ;

സേനായം സത്തിയഞ്ചേവ, ഥൂലത്തേ ച ബലം ഭവേ.

൮൯൫.

സങ്ഖ്യാ നരകഭേദേസു, പദുമം വാരിജേ പ്യഥ;

ദേവഭേദേ വസു പുമേ, പണ്ഡകം രതനേ ധനേ.

൮൯൬.

നിബ്ബാനം അത്ഥഗമനേ, അപവഗ്ഗേ സിയാ ഥ ച;

സേതമ്ബുജേ പുണ്ഡരീകം, ബ്യഗ്ഘേ രുക്ഖന്തരേ പുമേ.

൮൯൭.

ഉപഹാരേ ബലി പുമേ, കരസ്മിംചാ’സുരന്തരേ;

സുക്കം തു സമ്ഭവേ, സുക്കോ, ധവലേ, കുസലേ തിസു.

൮൯൮.

ദായോ ദാനേ വിഭത്തബ്ബ, ധനേ ച പിതുനം വനേ [ധനേ (ടീ.)];

പഭുത്താ’യത്തതാ’യത്താ’, ഭിലാസേസു വസോ ഭവേ.

൮൯൯.

പരിഭാസന മക്കോസേ, നിയമേ ഭാസനേ ഥ ച,

ധനമ്ഹി സേളനം യോധ, സീഹനാദമ്ഹി ദിസ്സതി.

൯൦൦.

പഭവോ ജാതിഹേതുമ്ഹി, ഠാനേ ചാദ്യുപലദ്ധിയം;

അഥോ’തു നാരിപുപ്ഫസ്മിം, ഹേമന്താദിമ്ഹി ച ദ്വിസു.

൯൦൧.

കരണം സാധകതമേ, ക്രിയാ ഗത്തേസു ഇന്ദ്രിയേ;

താതോ [താളോ (സീ.)] തു കുഞ്ചികായഞ്ച, തൂരിയങ്ഗേ ദുമന്തരേ.

൯൦൨.

പുപ്ഫേ ഫലേ ച പസവോ, ഉപ്പാദേ ഗബ്ഭമോചനേ;

ഗായനേ ഗായകേ അസ്സേ, ഗന്ധബ്ബോ ദേവതാന്തരേ.

൯൦൩.

വിനാ പുപ്ഫം ഫലഗ്ഗാഹി, രുക്ഖേ വനപ്പതി;

ആഹതേ ഹേമരജതേ, രൂപിയം രജതേപി ച.

൯൦൪.

ഖഗാദിബന്ധനേ പാസോ, കേസപുബ്ബോ ചയേ പ്യഥ;

താരാ’ക്ഖിമജ്ഝേ നക്ഖത്തേ, താരോ ഉച്ചതരസ്സരേ.

൯൦൫.

പത്തേ ച ലോഹഭേദസ്മിം, കംസോ ചതുകഹാപണേ;

മജ്ഝിമോ ദേഹമജ്ഝസ്മിം, മജ്ഝഭവേ ച സോ തിസു.

൯൦൬.

ആവേസനംഭൂതാവേസേ, സിപ്പസാലാ ഘരേസു ച;

സോഭാ സമ്പത്തീസു സിരീ, ലക്ഖീത്ഥീ ദേവതായ ച.

൯൦൭.

കുമാരോ ¶ യുവരാജേ ച, ഖന്ദേ വുത്തോ സുസുമ്ഹി ച;

അഥാ’നിത്ഥീ പവാളോ ച, മണിഭേദേ തഥാ’ങ്കുരേ.

൯൦൮.

പണോ വേതന മൂലേസു, വോഹാരേ ച ധനേ മതോ;

പടിഗ്ഗഹോ തു ഗഹണേ, കഥിതോ ഭാജനന്തരേ.

൯൦൯.

അസുഭേ ച സുഭേ കമ്മേ, ഭാഗ്യം വുത്തം ദ്വയേ പ്യഥ;

പിപ്ഫലം തരുഭേദേ ച, വത്ഥച്ഛേദനസത്ഥകേ.

൯൧൦.

അപവഗ്ഗോ പരിച്ചാഗാ’, വസാനേസു വിമുത്തിയം;

ലിങ്ഗം തു അങ്ഗജാതസ്മിം, പുമത്താദിമ്ഹി ലക്ഖണേ.

൯൧൧.

ചാഗേ സഭാവേ നിമ്മാനേ, സഗ്ഗോ ജ്ഝായേ ദിവേപ്യഥ;

രോഹിതോ ലോഹിതേ മച്ഛ, ഭേദേ ചേവ മിഗന്തരേ.

൯൧൨.

നിട്ഠാ നിപ്ഫത്തിയം ചേവാ, വസാനമ്ഹി അദസ്സനേ;

കണ്ടകോ തു സപത്തസ്മിം, രുക്ഖങ്ഗേ ലോമഹംസനേ.

൯൧൩.

മുഖ്യോ’പായേസു വദനേ, ആദിസ്മിം മുഖ മീരിതം;

ദബ്ബം ഭബ്ബേ ഗുണാധാരേ, വിത്തേ ച ബുധ ദാരുസു.

൯൧൪.

മാനം പമാണേ പത്ഥാദോ, മാനോ വുത്തോ വിധായ ച;

അഥോ പരിസ്സമേ വുത്തോ, വായാമോ വീരിയേപി ച.

൯൧൫.

സരോരുഹേ സതപത്തം, സതപത്തോ ഖഗന്തരേ;

ഛിദ്ദേ തു ഛിദ്ദവന്തേ ച, സുസിരം തൂരിയന്തരേ.

൯൧൬.

ഏകസ്മിം സദിസേ സന്തേ, സമാനം വാച്ചലിങ്ഗികം;

അഥോ ഗാരവ ഭീതീസു, സംവേഗേ സമ്ഭമോ മതോ.

൯൧൭.

ജുണ്ഹാ ചന്ദപ്പഭായഞ്ച, തദുപേതനിസായ ച;

വിമാനം ദേവതാവാസേ, സത്തഭൂമിഘരമ്ഹി ച.

൯൧൮.

മാസേ ജേട്ഠോ, തിവുദ്ധാ’തി, പ്പസത്ഥേസു ച തീസു സോ;

ധമ്മേ ച മങ്ഗലേ സേയ്യോ, സോ പസത്ഥതരേ തിസു.

൯൧൯.

ആദിച്ചാദിമ്ഹി ഗഹണേ, നിബന്ധേ ച ഘരേ ഗഹോ;

കാചോ തു മത്തികാഭേദേ, സിക്കായം നയനാമയേ.

൯൨൦.

തീസു ഗാമണി സേട്ഠസ്മിം, അധിപേ ഗാമജേട്ഠകേ;

ബിമ്ബം തു പടിബിമ്ബേ ച, മണ്ഡലേ ബിമ്ബികാഫലേ.

൯൨൧.

ഭാജനാദി പരിക്ഖാരേ, ഭണ്ഡം മൂലധനേപി ച;

മഗ്ഗോ ത്വരിയമഗ്ഗേ ച, സമ്മാദിട്ഠാദികേ, പഥേ.

൯൨൨.

സമാ ¶ വസ്സേ, സമോ ഖേദ, സന്തീസു, സോ നിഭേ തിസു;

ചാപേത്വിസ്സാസ, മുസുനോ, ഇസ്സാസോ ഖേപകമ്ഹി ച.

൯൨൩.

ബാലോ തീസ്വാ’ദിവയസാ, സമങ്ഗിനി അപണ്ഡിതേ;

രത്തം തു സോണിതേ, തമ്ബാ, നുരത്ത, രഞ്ജിതേ തിസു.

൯൨൪.

തചേ കായേ ച തന്വിത്ഥീ, തീസ്വ’പ്പേ വിരളേ കിസേ;

ഉതുഭേദേ തു സിസിരോ, ഹിമേ സോ സീതലേ തിസു.

൯൨൫.

സക്ഖരാ ഗുളഭേദേ ച, കഥലേപി ച ദിസ്സതി;

അനുഗ്ഗഹേ തു സങ്ഖേപേ, ഗഹണേ സങ്ഗഹോ മതോ.

൯൨൬.

ദക്ഖേ ച തിഖിണേ ബ്യത്തേ, രോഗമുത്തേ പടുത്തിസു;

രാജാ തു ഖത്തിയേ വുത്തോ, നരനാഥേ പഭുമ്ഹി ച.

൯൨൭.

ഖലഞ്ച ധഞ്ഞകരണേ, കക്കേ നീചേ ഖലോ ഭവേ;

അഥു’പ്പാദേ സമുദയോ, സമൂഹേ പച്ചയേപി ച.

൯൨൮.

ബ്രഹ്മചാരീ ഗഹട്ഠാദോ, അസ്സമോ ച തപോവനേ;

ഭയങ്കരേ തു കഠിനേ, കുരൂരോ തീസു നിദ്ദയേ.

൯൨൯.

കനിട്ഠോ കനിയോ തീസു, അത്യപ്പേ’തിയുവേ പ്യഥ;

സീഘമ്ഹി ലഹു തം, ഇട്ഠ, നിസ്സാരാ’ഗരുസുത്തിസു.

൯൩൦.

അധരോ തീസ്വധോ ഹീനേ, പുമേ ദന്തച്ഛദേ പ്യഥ;

സുസ്സുസാ സോതു മിച്ഛായ, സാ പാരിചരിയായ ച.

൯൩൧.

ഹത്ഥോ പാണിമ്ഹി രതനേ, ഗണേ സോണ്ഡായ ഭന്തരേ;

ആവാടേ ഉദപാനേ ച, കൂപോ കുമ്ഭേ ച ദിസ്സതി.

൯൩൨.

ആദോ പധാനേ പഠമം, പമുഖഞ്ച തിലിങ്ഗികം;

വജ്ജഭേദേ ച വിത തം, തം വിത്ഥാരേ തിലിങ്ഗികം.

൯൩൩.

സാരോ ബലേ ഥിരംസേ ച, ഉത്തമേ സോ തിലിങ്ഗികോ;

ഭാരോ തു ഖന്ധഭാരാദോ, ദ്വിസഹസ്സപലേപി ച.

൯൩൪.

മന്ദിരേ രോഗഭേദേ ച, ഖയോ അപചയമ്ഹി ച;

വാളോ തു സാപദേ സപ്പേ, കുരൂരേ സോ തിലിങ്ഗികോ.

൯൩൫.

സാലോ സജ്ജദ്ദുമേ രുക്ഖേ, സാലാഗേഹേ ച ദിസ്സതി;

സോതേ തു സവനം വുത്തം, യജനേ സുതിയമ്പി ച.

൯൩൬.

തീസു പതോ പരേതോ ച, മതേ ച പേതയോനിജേ;

ഖ്യാതേ തു ഹട്ഠേ വിഞ്ഞാതേ, പതീതം വാച്ചലിങ്ഗികം.

൯൩൭.

അധിപ്പായേ ¶ ച ആധാരേ, ആസയോ കഥിതോ ഥ ച;

പത്തം പക്ഖേ ദലേ, പത്തോ, ഭാജനേ സോ ഗതേ തിസു.

൯൩൮.

കുസലേ സുകതം, സുട്ഠു, കതേ ച സുകതോ തിസു;

തപസ്സീ ത്വ’നുകമ്പായാ, രഹേ വുത്തോ തപോധനേ.

൯൩൯.

തീസു സുരാദിലോലസ്മിം, സോണ്ഡോ ഹത്ഥികരേ ദ്വിസു;

അസ്സാദനേ തു രസനം, ജിവ്ഹായഞ്ച ധനിമ്ഹി ച.

൯൪൦.

പണീതോ തീസു മധുരേ, ഉത്തമേ വിഹിതേ പ്യഥ;

അഞ്ജസേ വിസിഖായഞ്ച, പന്തിയം വീഥി നാരിയം.

൯൪൧.

പാപസ്മിം ഗഗനേ ദുക്ഖേ, ബ്യസനേ ചാ’ഘ മുച്ചതേ;

സമൂഹേ പടലം നേത്ത, രോഗേ വുത്തം ഛദിമ്ഹി ച.

൯൪൨.

സന്ധി സങ്ഘട്ടനേ വുത്തോ, സന്ധി’ത്ഥി പടിസന്ധിയം;

സത്തന്നം പൂരണേ സേട്ഠേ, തിസന്തേ സത്തമോ തിസു.

൯൪൩.

ഓജാ തു യാപനായഞ്ച, ഓജോ ദിത്തി ബലേസു ച;

അഥോ നിസാമനം വുത്തം, ദസ്സനേ സവനേപി ച.

൯൪൪.

ഗബ്ഭോ കുച്ഛിട്ഠസത്തേ ച, കുച്ഛി ഓവരകേസു ച;

ഖണ്ഡനേ ത്വ’പദാനഞ്ച, ഇതിവുത്തേ ച കമ്മനി.

൯൪൫.

ചിത്തകേ രുക്ഖഭേദേ ച, തിലകോ തിലകാളകേ;

സീലാദോ പടിപത്തി’ത്ഥീ, ബോധേ പത്തി പവത്തിസു.

൯൪൬.

അസുമ്ഹി [ആയുമ്ഹി (ടീ.), ൪൦൭-ഗാഥാ പസ്സിതബ്ബാ] ച ബലേ പാണോ, സത്തേ ഹദയഗാ’നിലേ;

ഛന്ദോ വസേ അധിപ്പായേ, വേദേ’ച്ഛാ’നുട്ഠുഭാദിസു.

൯൪൭.

കാമോഘാദോ, സമൂഹസ്മിം, ഓഘോവേഗേ ജലസ്സ ച;

കപാലം സിരസട്ഠിമ്ഹി, ഘടാദി സകലേപി ച.

൯൪൮.

വേണ്വാദിസാഖാജാലസ്മിം, ലഗ്ഗകേസേ ജടാ’ലയേ;

സരണം തു വധേ ഗേഹേ, രക്ഖിതസ്മിഞ്ച രക്ഖണേ.

൯൪൯.

ഥിയം കന്താ പിയേ, കന്തോ, മനുഞ്ഞേ, സോ തിലിങ്ഗികോ;

ഗവക്ഖേ തു സമൂഹേ ച, ജാലം മച്ഛാദിബന്ധനേ.

൯൫൦.

പുച്ഛായം ഗരഹായഞ്ചാ, നിയമേ കിം തിലിങ്ഗികം;

സസദ്ധേ തീസു നിവാപേ, സദ്ധം, സദ്ധാ ച പച്ചയേ.

൯൫൧.

ബീജം ¶ ഹേതുമ്ഹി അട്ഠിസ്മിം, അങ്ഗജാതേ ച ദിസ്സതി;

പുബ്ബോ പൂയേ’ഗ്ഗതോ [അഗ്ഗതേ (ടീ.)] ആദോ,

സോ ദിസാദോ തിലിങ്ഗികോ.

൯൫൨.

ഫലചിത്തേ ഹേതുകതേ, ലാഭേ ധഞ്ഞാദികേ ഫലം;

ആഗമനേ തു ദീഘാദി, നികായേസു ച ആഗമോ.

൯൫൩.

സന്താനോ ദേവരുക്ഖേ ച, വുത്തോ സന്തതിയം പ്യഥ;

ഉത്തരവിപരീതേ ച, സേട്ഠേ ചാ’നുത്തരം തിസു.

൯൫൪.

സത്തിസമ്പത്തിയം വുത്തോ, കന്തിമത്തേ ച വിക്കമോ;

ഛായാ തു ആതപാഭാവേ, പടിബിമ്ബേ പഭായ ച.

൯൫൫.

ഗിമ്ഹേ ഘമ്മോ നിദാഘോ ച, ഉണ്ഹേ സേദജലേ പ്യഥ;

കപ്പനം കന്തനേ വുത്തം, വികപ്പേ സജ്ജനേ’ത്ഥിയം.

൯൫൬.

അങ്ഗാ ദേസേ ബഹുമ്ഹ’ങ്ഗം, അങ്ഗോ ദേസേ വപുമ്ഹ’[ങ്ഗ (ടീ.)] തഥാ’വയവഹേതുസു;

ദേവാലയേ ച ഥൂപസ്മിം, ചേതിയം ചേതിയ’ദ്ദുമേ.

൯൫൭.

സജ്ജനോ സാധുപുരിസേ, സജ്ജനം കപ്പനേ പ്യഥ;

സുപിനം സുപിനേ സുത്ത, വിഞ്ഞാണേ ത മനിത്ഥിയം.

൯൫൮.

പച്ചക്ഖേ സന്നിധാനേ ച, സന്നിധി പരികിത്തിതോ;

ഭിയ്യോ ബഹുതരത്ഥേ സോ, പുനരത്ഥേ’ബ്യയം ഭവേ.

൯൫൯.

വിസലിത്തസരേ ദിദ്ധോ, ദിദ്ധോ ലിത്തേ തിലിങ്ഗികോ;

വാസേ ധൂമാദിസങ്ഖാരേ, ധിവാസോ സമ്പടിച്ഛനേ.

൯൬൦.

വുത്തോ വിസാരദോ തീസു, സുപ്പഗബ്ഭേ ച പണ്ഡിതേ;

അഥ സിത്ഥം മധുച്ഛിട്ഠേ, വുത്തം ഓദനസമ്ഭവേ.

൯൬൧.

ദ്രവേ വണ്ണേ രസഭേദേ, കസായോ സുരഭിമ്ഹി ച;

അഥോ ഉഗ്ഗമനം വുത്തം, ഉപ്പത്തു’ദ്ധഗതീസു ച.

൯൬൨.

ലൂഖേ നിട്ഠുരവാചായം, ഫരുസം വാച്ചലിങ്ഗികം;

പവാഹോ ത്വ’മ്ബുവേഗേ ച, സന്ദിസ്സതി പവത്തിയം.

൯൬൩.

നിസ്സയേ തപ്പരേ ഇട്ഠേ, പരായണപദം തിസു;

കവചേ വാരവാണേ ച, നിമ്മോകേപി ച കഞ്ചുകോ.

൯൬൪.

ലോഹഭേദേ ¶ മതം തമ്ബം, തമ്ബോ രത്തേ തിലിങ്ഗികോ;

തീസു ത്വ’വസിതം ഞാതേ, അവസാനഗതേ മതം.

൯൬൫.

ബോധനേ ച പദാനേ ച, വിഞ്ഞേയ്യം പടിപാദനം;

സേലേ നിജ്ജലദേസേ ച, ദേവതാസു മരൂ’രിതോ.

൯൬൬.

സത്ഥം ആയുധ ഗന്ഥേസു, ലോഹേ, സത്ഥോ ച സഞ്ചയേ;

ജീവികായം വിവരണേ, വത്തനേ വുത്തി നാരിയം.

൯൬൭.

വീരിയേ സൂരഭാവേ ച, കഥീയതി പരക്കമോ;

അഥ കമ്ബു മതോ സങ്ഖേ, സുവണ്ണേ വലയേപി ച.

൯൬൮.

സരോ കണ്ഡേ അകാരാദോ, സദ്ദേ വാപിമ്ഹി’നിത്ഥിയം;

ദുപ്ഫസ്സേ തിഖിണേ തീസു, ഗദ്രഭേ കകചേ ഖരോ.

൯൬൯.

സുരായു’പദ്ദവേ കാമാ, സവാദിമ്ഹി ച ആസവോ;

ദേഹേ വുത്തോ രഥങ്ഗേ ച, ചതുരോ’പധിസൂ’പധി.

൯൭൦.

വത്ഥു’ത്തം കാരണേ ദബ്ബേ, ഭൂഭേദേ രതനത്തയേ;

യക്ഖോ ദേവേ മഹാരാജേ, കുവേരാ’നുചരേ നരേ.

൯൭൧.

ദാരുക്ഖന്ധേ പീഠികായം, ആപണേ പീഠ മാസനേ;

പരിവാരേ പരിക്ഖാരോ, സമ്ഭാരേ ച വിഭൂസനേ.

൯൭൨.

വോഹാരസ്മിഞ്ച ഠപനേ, പഞ്ഞത്തി’ത്ഥീ പകാസനേ;

പടിഭാനം തു പഞ്ഞായം, ഉപട്ഠിത ഗിരായ ച.

൯൭൩.

വചനാവയവേ മൂലേ, കഥിതോ ഹേതു കാരണേ;

ഉദരേ തു തഥാ പാചാ, നലസ്മിം ഗഹണീ’ത്ഥിയം.

൯൭൪.

പിയോ ഭത്തരി, ജായായം, പിയാ, ഇട്ഠേ പിയോ തിസു;

യമരാജേ തു യുഗളേ, സംയമേ ച യമോ ഭവേ.

൯൭൫.

മുദ്ദികസ്സ ച പുപ്ഫസ്സ, രസേ ഖുദ്ദേ മധൂ’രിതം;

ഉല്ലോചേ തു ച വിത്ഥാരേ, വിതാനം പുന്നപുംസകേ.

൯൭൬.

അപവഗ്ഗേ ച സലിലേ, സുധായം അമതം മതം;

മോഹേ തു തിമിരേ സങ്ഖ്യാ, ഗുണേ തമ മനിത്ഥിയം.

൯൭൭.

ഖരേ ചാ’കാരിയേ തീസു, രസമ്ഹി പുരിസേ കടു;

പണ്ഡകേ സുകതേ, പുഞ്ഞം, മനുഞ്ഞേ പവനേ തിസു.

൯൭൮.

രുക്ഖോ ദുമമ്ഹി, ഫരുസാ, സിനിദ്ധേസു ച സോ തിസു;

ഉപ്പത്തിയം തു ഹേതുമ്ഹി, സങ്ഗേ സുക്കേ ച സമ്ഭവോ.

൯൭൯.

നിമിത്തം ¶ കാരണേ വുത്തം, അങ്ഗജാതേ ച ലഞ്ഛനേ;

ആദി സീമാപകാരേസു, സമീപേ’വയവേ മതോ.

൯൮൦.

വേദേ ച മന്തനേ മന്തോ, മന്താ പഞ്ഞായ മുച്ചതേ;

അനയോ ബ്യസനേ ചേവ, സന്ദിസ്സതി വിപത്തിയം.

൯൮൧.

അരുണോ രംസിഭേദേ ചാ, ബ്യത്തരാഗേ ച ലോഹിതേ;

അനുബന്ധോ തു പകതാ, നിവത്തേ നസ്സനക്ഖരേ.

൯൮൨.

അവതാരോ’വതരണേ, തിത്ഥമ്ഹി വിവരേ പ്യഥ;

ആകാരോ കാരണേ വുത്തോ, സണ്ഠാനേ ഇങ്ഗിതേപി ച.

൯൮൩.

സുദ്ദിത്ഥി തനയേ ഖത്താ, ഉഗ്ഗോ, തിബ്ബമ്ഹി സോ തിസു;

പധാനം തു മഹാമത്തേ, പകത്യ’ഗ്ഗ’ധിതീസു ച.

൯൮൪.

കല്ലം പഭാതേ, നിരോഗ, സജ്ജദക്ഖേസു [യുത്തദക്ഖേസു (ക.)] തീസു തം;

കുഹനാ കൂടചരിയായം, കുഹനോ കുഹകേ തിസു.

൯൮൫.

കപോതോ പക്ഖിഭേദേ ച, ദിട്ഠോ പാരാവതേ ഥ ച;

സാരദോ സാരദബ്ഭൂതേ, അപഗബ്ഭേ മതോ തിസു.

൯൮൬.

തീസു ഖരേ ച കഠിനേ, കക്കസോ സാഹസപ്പിയേ [സാഹസപ്പിയേ=സാഹസ+അപ്പിയേ (ടീ.)];

അകാരിയേ തു ഗുയ്ഹങ്ഗേ, ചീരേ കോപീന മുച്ചതേ.

൯൮൭.

മിഗഭേദേ പടാകായം, മോചേ ച കദലീ’ത്ഥിയം;

ദക്ഖിണാ ദാനഭേദസ്മിം, വാമതോ’ഞ്ഞമ്ഹി ദക്ഖിണോ.

൯൮൮.

ദുതിയാ ഭരിയായഞ്ച, ദ്വിന്നം പൂരണിയം മതാ;

അഥുപ്പാദേ സിയാ ധൂമ, കേതു വേസ്സാനരേപി ച.

൯൮൯.

ഭവനിഗ്ഗമനേ യാനേ, ദ്വാരേ നിസ്സരണം സിയാ;

നിയാമകോ പോതവാഹേ, തിലിങ്ഗോ സോ നിയന്തരി.

൯൯൦.

അപവഗ്ഗേ വിനാസേ ച, നിരോധോ രോധനേ പ്യഥ;

ഭയേ പടിഭയം വുത്തം, തിലിങ്ഗം തം ഭയംകരേ.

൯൯൧.

പിടകം ഭാജനേ വുത്തം, തഥേവ പരിയത്തിയം;

ജരാസിഥിലചമ്മസ്മിം, ഉദരങ്ഗേ മതാ വലി.

൯൯൨.

ഭിന്നം വിദാരിതേ’ഞ്ഞസ്മിം, നിസ്സിതേ വാച്ചലിങ്ഗികം;

ഉപജാപേ മതോ ഭേദോ, വിസേസേ ച വിദാരണേ.

൯൯൩.

മണ്ഡലം ¶ ഗാമസന്ദോഹേ, ബിമ്ബേ പരിധിരാസിസു;

ആണായ മാഗമേ ലേഖേ; സാസനം അനുസാസനേ.

൯൯൪.

അഗ്ഗേ തു സിഖരം ചാ’യോ, മയവിജ്ഝനകണ്ടകേ;

ഗുണുക്കംസേ ച വിഭവേ, സമ്പത്തി ചേവ സമ്പദാ.

൯൯൫.

ഭൂഖന്തീസു ഖമാ, യോഗ്യേ, ഹിതേ സക്കേ [യുത്തേ (ടീ.) ൧൦൦൧-ഗാഥാ പസ്സിതബ്ബാ] ഖമോ തിസു;

അദ്ധോ ഭാഗേ പഥേ കാലേ, ഏകംസേ’ദ്ധോ’ബ്യയം ഭവേ;

അഥോ കരീസം വച്ചസ്മിം, വുച്ചതേ ചതുരമ്ബണേ.

൯൯൬.

ഉസഭോ’സധ ഗോ [ഉസഭോ ഉസഭേ (ടീ.)] സേട്ഠേ, സൂ’സഭം വീസയട്ഠിയം;

സേതുസ്മിം തന്തി പന്തീസു, നാരിയം പാളി കഥ്യതേ.

൯൯൭.

കടോ ജയേ’ത്ഥിനിമിത്തേ, കിലഞ്ജേ സോ കതേ തിസു;

മഹിയം ജഗതീ വുത്താ, മന്ദിരാലിന്ദവത്ഥുമ്ഹി.

൯൯൮.

വിതക്കേ മഥിതേ തക്കോ, തഥാ സൂചിഫലേ മതോ;

സുദസ്സനം സക്കപുരേ, തീസു തം ദുദ്ദസേ’തരേ.

൯൯൯.

ദീപോ’ന്തരീപ പജ്ജോത, പതിട്ഠാ നിബ്ബുതീസു ച;

ബദ്ധനിസ്സിത സേതേസു, തീസു തം മിഹിതേ സിതം.

൧൦൦൦.

ഥിയം പജാപതി ദാരേ, ബ്രഹ്മേ മാരേ സുരേ പുമേ;

വാസുദേവേ’ന്തകേ കണ്ഹോ, സോ പാപേ അസിതേ തിസു.

൧൦൦൧.

ഉപചാരോ ഉപട്ഠാനേ, ആസന്നേ അഞ്ഞരോപനേ;

സക്കോ ഇന്ദേ ജനപദേ, സാകിയേ, സോ ഖമേ തിസു.

൧൦൦൨.

വജ്ജനേ പരിഹാരോ ച, സക്കാരേ ചേവ രക്ഖണേ;

സോതാപന്നാദികേ അഗ്ഗേ, അരിയോ തീസു, ദ്വിജേ പുമേ.

൧൦൦൩.

സുസുകോ സുസുമാരേ ച, ബാലകേ ച ഉലൂപിനി;

ഇന്ദീവരം മതം നീലു, പ്പലേ ഉദ്ദാലപാദപേ.

൧൦൦൪.

അസനോ പിയകേ കണ്ഡേ, ഭക്ഖണേ ഖിപനേ’ സനം;

യുഗേ’ധികാരേ [വികാരേ (ടീ.)] വീരിയേ, പധാനേ ചാ’ന്തികേ ധുരോ.

൧൦൦൫.

കാളേ ച ഭക്ഖിതേ തീസു, ലവിത്തേ അസിതോ പുമേ;

പവാരണാ പടിക്ഖേപേ, കഥിതാ’ജ്ഝേസനായ ച.

൧൦൦൬.

ഉമ്മാരേ ¶ ഏസികത്ഥമ്ഭേ, ഇന്ദഖീലോ മതോ ഥ ച;

പോത്ഥകം മകചിവത്ഥേ, ഗന്ഥേ ലേപ്യാദി കമ്മനി.

൧൦൦൭.

ധഞ്ഞം സാല്യാദികേ വുത്തം, ധഞ്ഞോ പുഞ്ഞവതി ത്തിസു;

പാണി ഹത്ഥേ ച സത്തേ ഭൂ, സണ്ഹകരണിയം മതോ.

൧൦൦൮.

തീസു പീതം ഹലിദ്യാഭേ, ഹട്ഠേ ച പായിതേ സിയാ;

ബ്യൂഹോ നിബ്ബിദ്ധരച്ഛായം, ബലന്യാസേ ഗണേ മതോ.

൧൦൦൯.

ലോഹിതാദിമ്ഹി ലോഭേ ച, രാഗോ ച രഞ്ജനേ മതോ;

പദരോ ഫലകേ ഭങ്ഗേ, പവുദ്ധ ദരിയം പിച.

൧൦൧൦.

സിങ്ഘാടകം കസേരുസ്സ, ഫലേ, മഗ്ഗസമാഗമേ;

ബഹുലായഞ്ച ഖേളമ്ഹി, ഏളാ, ദോസേ’ള മീരിതം.

൧൦൧൧.

ആധാരോ ചാ’ധികരണേ, പത്താധാരേ’ ലവാലകേ;

കാരോ’ ഗഭേദേ സക്കാരേ, കാരാ തു ബന്ധനാലയേ.

൧൦൧൨.

കരകാ മേഘപാസാണേ, കരകോ കുണ്ഡികായ ച;

പാപനേ ച പദാതിസ്മിം, ഗമനേ പത്തി നാരിയം.

൧൦൧൩.

ഛിദ്ദം രന്ധഞ്ച വിവരം, സുസിരേ ദൂസനേപി ച;

മുത്താ തു മുത്തികേ, മുത്തം, പസ്സാവേ, മുച്ചിതേ തിസു.

൧൦൧൪.

നിസേധേ വാരണം, ഹത്ഥി, ലിങ്ഗ ഹത്ഥീസു വാരണോ;

ദാനം ചാഗേ മദേ സുദ്ധേ, ഖണ്ഡനേ ലവനേ ഖയേ.

൧൦൧൫.

മനോതോസേ ച നിബ്ബാനേ, ത്ഥങ്ഗമേ നിബ്ബുതി’ത്ഥിയം;

നേഗമോ നിഗമുബ്ഭൂതേ, തഥാ’പണോപജീവിനി.

൧൦൧൬.

ഹരിതസ്മിഞ്ച പണ്ണേ ച, പലാസോ കിം സുകദ്ദുമേ;

പകാസോ പാകടേതീസു, ആലോകസ്മിം പുമേ മതോ.

൧൦൧൭.

പക്കം ഫലമ്ഹി, തം നാസു, മ്മുഖേ [നാസമുഖേ (ക.)] പരിണതേ തിസു;

പിണ്ഡോ ആജീവനേ ദേഹേ, പിണ്ഡനേ ഗോളകേ മതോ.

൧൦൧൮.

വട്ടോ പരിബ്ബയേ കമ്മാ, ദികേ, സോ വട്ടുലേ തിസു;

പച്ചാഹാരേ പടിഹാരോ, ദ്വാരേ ച ദ്വാരപാലകേ.

൧൦൧൯.

നാരിയം ഭീരു കഥിതാ, ഭീരുകേ സോ തിലിങ്ഗികോ;

വികടം ഗൂഥമുത്താദോ, വികടോ വികതേ തിസു.

൧൦൨൦.

വാമം ¶ സബ്യമ്ഹി, തം ചാരു, വിപരീതേസു തീസ്വ’ഥ;

സങ്ഖ്യാഭേദേ സരബ്യേ ച, ചിഹണേ ലക്ഖ മുച്ചതേ.

൧൦൨൧.

സേണീ’ത്ഥീ സമസിപ്പീനം, ഗണേ ചാ’വലിയം പിച;

സുധായം ധൂലിയം ചുണ്ണോ, ചുണ്ണഞ്ച വാസചുണ്ണകേ.

൧൦൨൨.

ജേതബ്ബേ’തിപ്പസത്ഥേ’തി, വുദ്ധേ ജേയ്യം തിസൂ’രിതം;

തക്കേ തു മഥിതം ഹോത്യാ,

ലോലിതേ മഥിതോ തിസു.

൧൦൨൩.

അബ്ഭുതോ’ച്ഛരിയേ തീസു, പണേ ചേവാ’ബ്ഭുതോ പുമേ;

മേചകോ പുച്ഛമൂലമ്ഹി, കണ്ഹേപി മേചകോ തിസു.

൧൦൨൪.

വസവത്തീ പുമേ മാരേ, വസവത്താപകേ തിസു;

സമ്ഭവേ ചാ’സുചി പുമേ, അമേജ്ഝേ തീസു ദിസ്സതി.

൧൦൨൫.

അച്ഛോ ഇക്കേ പുമേ വുത്തോ, പസന്നമ്ഹി തിലിങ്ഗികോ;

ബളിസേ സേലഭേദേ ച, വങ്കോ, സോ കുടിലേ തിസു.

൧൦൨൬.

കുണപമ്ഹി ഛവോ ഞേയ്യോ,

ലാമകേ സോ തിലിങ്ഗികോ;

സബ്ബസ്മിം സകലോ തീസു, അദ്ധമ്ഹി പുരിസേ സിയാ.

൧൦൨൭.

ചന്ദഗ്ഗാഹാദികേ ചേവു, പ്പാദോ ഉപ്പത്തിയം പിച;

പദുസ്സനേ പദോസോ ച, കഥിതോ സംവരീമുഖേ.

൧൦൨൮.

രുധിരേ ലോഹിതം വുത്തം, രത്തമ്ഹി ലോഹിതോ തിസു;

ഉത്തമങ്ഗേ പുമേ മുദ്ധാ, മുദ്ധോ മൂള്ഹേ തിലിങ്ഗികോ.

൧൦൨൯.

രട്ഠമ്ഹി വിജിതം വുത്തം, ജിതേ ച വിജിതോ തിസു;

പരിത്തം തു പരിത്താണേ, പരിത്തോ തീസു അപ്പകേ.

൧൦൩൦.

കുമ്ഭണ്ഡോ ദേവഭേദേ ച, ദിസ്സതി വല്ലിജാതിയം;

ചതുത്ഥംസേ പദേ പാദോ, പച്ചന്തസേലരംസിസു.

൧൦൩൧.

വങ്ഗോ ലോഹന്തരേ വങ്ഗാ, ദേസേ പുമേ ബഹുമ്ഹി ച;

കമ്മാരഭണ്ഡഭേദേ ച, ഖടകേ മുട്ഠി ച ദ്വിസു.

൧൦൩൨.

അമ്ബണം ദോണിയം ചേ’കാ, ദസദോണപ്പമാണകേ;

അധിട്ഠിതിയ മാധാരേ, ഠാനേ’ധിട്ഠാന മുച്ചതേ.

൧൦൩൩.

പുമേ മഹേസീ സുഗതേ, ദേവിയം നാരിയം മതാ;

ഉപദ്ദവേ ഉപസഗ്ഗോ, ദിസ്സതി പാദികേപി ച.

൧൦൩൪.

വക്കം ¶ കോട്ഠാസഭേദസ്മിം, വക്കോ വങ്കേ തിസു’ച്ചതേ;

വിജ്ജാ വേദേ ച സിപ്പേ ച, തിവിജ്ജാദോ ച ബുദ്ധിയം.

൧൦൩൫.

സമാധിമ്ഹി പുമേ’കഗ്ഗോ, നാകുലേ വാച്ചലിങ്ഗികോ;

പജ്ജം സിലോകേ, പജ്ജോ’ദ്ധേ, പജ്ജോ പാദഹിതേ തിസു.

൧൦൩൬.

കതകോ രുക്ഖഭേദസ്മിം, കതകോ കിത്തിമേ തിസു;

വിധേയ്യേ അസ്സവോ തീസു, പുബ്ബമ്ഹീ പുരിസേ സിയാ.

൧൦൩൭.

കല്യാണേ കഥിതം ഖേമം, തീസു ലദ്ധത്ഥരക്ഖണേ;

അഥോ നിയോജനേ വുത്തം, കാരിയേപി പയോജനം.

൧൦൩൮.

അസ്സത്ഥോ തീസു അസ്സാസ, പ്പത്തേ, ബോധിദ്ദുമേ പുമേ;

തീസു ലുദ്ദോ കുരൂരേ ച, നേസാദമ്ഹി പുമേ സിയാ.

൧൦൩൯.

വിലഗ്ഗോ തീസു ലഗ്ഗസ്മിം, പുമേ മജ്ഝമ്ഹി ദിസ്സതി;

അഡ്ഢോ ത്വനിത്ഥിയം ഭാഗേ, ധനിമ്ഹി വാച്ചലിങ്ഗികോ.

൧൦൪൦.

കട്ഠം ദാരുമ്ഹി, തം കിച്ഛേ, ഗഹനേ കസിതേ തിസു;

സസന്താനേ ച വിസയേ, ഗോചരേ’ ജ്ഝത്ത മുച്ചതേതി.

ഇതി അദ്ധാനേകത്ഥവഗ്ഗോ.

൧൦൪൧.

ഭുവനേ ച ജനേ ലോകോ, മോരേത്വഗ്ഗിമ്ഹി സോ സിഖീ;

സിലോകോ തു യസേ പജ്ജേ,

രുക്ഖേ തു സാമികേ ധവോ.

൧൦൪൨.

വടബ്യാമേസു നിഗ്രോധോ, ധങ്കോ തു വായസേ ബകേ;

വാരോ ത്വ’വസരാ’ഹേസു, കുചേത്വബ്ഭേ പയോധരോ.

൧൦൪൩.

ഉച്ഛങ്ഗേ ലക്ഖണേ ചാ’ങ്കോ, രസ്മി’ത്ഥീ ജുതി രജ്ജുസു;

ദിട്ഠോ’ഭാസേസു ആലോകോ,

ബുദ്ധോ തു പണ്ഡിതേ ജിനേ.

൧൦൪൪.

സൂരം’സൂസു പുമേ ഭാനൂ, ദണ്ഡോ തു മുഗ്ഗരേ ദമേ;

ദേവമച്ഛേസ്വ’നിമിസോ, പത്ഥോ തു മാനസാനുസു.

൧൦൪൫.

ആതങ്കോ രോഗ താപേസു,

മാതങ്ഗോ സപചേ ഗജേ;

മിഗോ പസു കുരുങ്ഗേസു, ഉലൂകി’ന്ദേസു കോസിയോ.

൧൦൪൬.

വിഗ്ഗഹോ ¶ കലഹേ കായേ, പുരിസോ മാണവ’ത്തസു;

ദായാദോ ബന്ധവേ പുത്തേ, സിരേ സീസം തിപുമ്ഹി ച.

൧൦൪൭.

ബലിഹത്ഥം’സൂസു കരോ, ദന്തേ വിപ്പേ’ണ്ഡജേ ദ്വിജോ;

വത്തം പജ്ജാ’നനാ’ചാരേ, ധഞ്ഞങ്ഗേ സുഖുമേ കണോ.

൧൦൪൮.

ഥമ്ഭോ ഥൂണ ജളത്തേസു, സൂപോ കുമ്മാസ ബ്യഞ്ജനേ;

ഗണ്ഡോ ഫോടേ കപോലമ്ഹി, അഗ്ഘോ മൂല്യേ ച പൂജനേ.

൧൦൪൯.

പകാരോ തുല്യ ഭേദേസു, സകുന്തോ ഭാസപക്ഖിസു;

ഭാഗ്യേ വിധി വിധാനേ ച, സരേ ഖഗ്ഗേ ച സായകോ.

൧൦൫൦.

സാരങ്ഗോ ചാതകേ ഏണേ, പത്തീ തു സരപക്ഖിസു;

സേദേ പാകോ വിപാകേ ഥ,

ഭിക്ഖുഭേദേ ചയേ ഗണോ.

൧൦൫൧.

രാസി പുഞ്ജേ ച മേസാ’ദോ,

അസ്സേ ലോണേ ച സിന്ധവോ;

സംവട്ടേ പലയോ നാസേ, പൂഗോ കമുകരാസിസു.

൧൦൫൨.

അമതേ തു സുധാ ലേപേ, അഭിഖ്യാ നാമ രംസിസു;

സത്തി സാമത്ഥിയേ സത്ഥേ, മഹീ നജ്ജന്തരേ ഭുവി;

ലീലാ ക്രിയാ വിലാസേസു,

സത്തേ തു അത്രജേ പജാ.

൧൦൫൩.

ഞാണേ ലാഭേ ഉപലദ്ധി, പവേണീ കുഥവേണിസു;

പവത്തി വുത്തി വത്താസു, വേതനേ ഭരണേ ഭതി.

൧൦൫൪.

ആചാരേപി മരിയാദാ, ഭൂതി സത്താ സമിദ്ധിസു;

സോപ്പേ പമാദേ തന്ദീ ച, യാത്രാ ഗമന വുത്തിസു.

൧൦൫൫.

നിന്ദാ കുച്ഛാ’പവാദേസു, കങ്ഗു ധഞ്ഞ പിയങ്ഗുസു;

മോക്ഖേസിവേ സമേസന്തി, വിഭാഗേ ഭത്തി സേവനേ.

൧൦൫൬.

ഇച്ഛായം ജുതിയം കന്തി, രഞ്ജനേ സൂരതേ രതി;

ഗേഹേ വസതി വാസേ ഥ, നദീ സേനാസു വാഹിനീ.

൧൦൫൭.

പത്ഥേ നാളേ ച നാളി’ത്ഥീ, ഗണേ സമിതി സങ്ഗമേ;

തണ്ഹാ ലോഭേ പിപാസായം, മഗ്ഗ വുത്തീസു വത്തനീ.

൧൦൫൮.

പാണ്യങ്ഗേ നാഭി ചക്കന്തേ, യാചേ വിഞ്ഞത്തി ഞാപനേ;

വിത്തി തോസേ വേദനായം, ഠാനേ തു ജീവിതേ ഠിതി.

൧൦൫൯.

തരങ്ഗേ ¶ ചാ’ന്തരേ വീചി, ധീരത്തേ ധാരണേ ധിതി;

ഭൂ ഭൂമിയഞ്ച ഭമുകേ, സദ്ദേ വേദേ സവേ സുതി.

൧൦൬൦.

ഗോത്തം നാമേ ച വംസേ ഥ, നഗരേ ച ഘരേ പുരം;

ഓകം തു നിസ്സയേ ഗേഹേ, കുലം തു ഗോത്തരാസിസു.

൧൦൬൧.

ഹേമേ വിത്തേ ഹിരഞ്ഞഞ്ച, പഞ്ഞാണം ത്വ’ങ്ക വുദ്ധിസു;

അഥാ’മ്ബരഞ്ച ഖേ വത്ഥേ, ഗുയ്ഹം ലിങ്ഗേ രഹസ്യ’പി.

൧൦൬൨.

തപോ ധമ്മേ വതേ ചേവ, പാപേ ത്വാ’ഗുമ്ഹി കിബ്ബിസം;

രതനം മണി സേട്ഠേസു, വസ്സം ഹായന വുട്ഠിസു.

൧൦൬൩.

വനം അരഞ്ഞ വാരീസു, ഖീരമ്ഹി തു ജലേ പയോ;

അക്ഖരം ലിപി മോക്ഖേസു, മേഥൂനം സങ്ഗമേ രതേ.

൧൦൬൪.

സോതം കണ്ണേ പയോവേഗേ, രിട്ഠം പാപാ’സുഭേസു ച;

ആഗു പാപാ’പരാധേസു, കേതുമ്ഹി ചിഹനേ ധജോ.

൧൦൬൫.

ഗോപുരം ദ്വാരമത്തേപി, മന്ദിരം നഗരേ ഘരേ;

വാച്ചലിങ്ഗാ പരമിതോ, ബ്യത്തോ തു പണ്ഡിതേ ഫുടേ.

൧൦൬൬.

വല്ലഭോ ദയിതേ’ജ്ഝക്ഖേ, ജലേ ഥൂലോ മഹത്യപി;

കുരൂരേ ഭേരവേ ഭീമോ,

ലോലോ തു ലോലുപേ ചലേ.

൧൦൬൭.

ബീഭച്ഛോ വികതേ ഭീമേ, കോമലേ തിഖിണേ മുദു;

ഇട്ഠേ ച മധുരേ സാദു, സാദുമ്ഹി മധുരോ പിയേ.

൧൦൬൮.

സിതേ തു സുദ്ധേ ഓദാതോ, ദ്വിജിവ്ഹോ സൂചകാ’ഹിസു;

സക്കേ സമത്ഥോ സമ്ബന്ധേ, സമത്തം നിട്ഠിതാ’ഖിലേ.

൧൦൬൯.

സുദ്ധോ കേവല പൂതേസു, ജിഘഞ്ഞോ’ന്താ’ധമേസു ച;

പോണോ’പനത നിന്നേസു, അഞ്ഞ നീചേസു ചേ’തരോ.

൧൦൭൦.

സുചി സുദ്ധേ സിതേ പൂതേ, പേസലോ ദക്ഖചാരുസു;

അധമോ കുച്ഛിതേ ഊനേ, അപ്പിയേ പ്യ’ലികോ ഭവേ.

൧൦൭൧.

ബ്യാപേ അസുദ്ധേ സംകിണ്ണോ, ഭബ്ബം യോഗ്യേ ച ഭാവിനി;

സുഖുമോ അപ്പകാ’ണൂസു, വുദ്ധോ ഥേരേ ച പണ്ഡിതേ.

൧൦൭൨.

സുഭേ സാധുമ്ഹി ഭദ്ദോ ഥ, ത്യാ’ദോ ച വിപുലേ ബഹു;

ധീരോ ബുധേ ധിതിമന്തേ, വേല്ലിതം കുടിലേ ധുതേ.

൧൦൭൩.

വിസദോ ¶ ബ്യത്ത സേതേസു, തരുണോ തു യുവേ നവേ;

യോഗ്ഗം യാനേ, ഖമേ യോഗ്ഗോ,

പിണ്ഡിതം ഗണിതേ ഘനേ.

൧൦൭൪.

ബുധേ’ഭിജാതോ കുലജേ, വുദ്ധോ’രൂസു മഹല്ലകോ;

കല്യാണം സുന്ദരേ ചാപി, ഹിമോ തു സീതലേപി ച.

൧൦൭൫.

ലോലേ തു സീഘേ ചപലോ, വുത്തേ ഉദിത മുഗ്ഗതേ;

ആദിത്തേ ഗബ്ബിതേ ദിത്തോ, പിട്ഠം തു ചുണ്ണിതേപി ച.

൧൦൭൬.

വിഗതേ വായിതേ [വായനേ (ക.)] വീതം, ഭാവിതം വഡ്ഢിതേപി ച;

ഭജ്ജിതേ പതിതേ ഭട്ഠോ, പുട്ഠോ പുച്ഛിത പോസിതേ.

൧൦൭൭.

ജാതോ ഭൂതേ ചയേ ജാതം,

പടിഭാഗോ സമാ’രിസു;

സൂരോ വീരേ രവിസൂരേ, ദുട്ഠോ കുദ്ധേ ച ദൂസിതേ.

൧൦൭൮.

ദിട്ഠോ’രിമ്ഹി’ക്ഖിതേ ദിട്ഠോ [ദിട്ഠം (ക.)],

മൂള്ഹേ പോതേ ച ബാലിസോ;

നിന്ദായം ഖേപനേ ഖേപോ, നിയമോ നിച്ഛയേ വതേ.

൧൦൭൯.

സലാകായം കുസോ ദബ്ഭേ,

ബാല്യാദോ തു ഖയേ വയോ;

ലേപ ഗബ്ബേസ്വ’വലേപോ, അണ്ഡജോ മീനപക്ഖിസു.

൧൦൮൦.

ബിലാലേ നകുലേ ബബ്ബു, മന്ഥോ മന്ഥനസത്തുസു;

വാലോ കേസേ’സ്സാദിലോമേ,

സങ്ഘാതോ ഘാതരാസിസു.

൧൦൮൧.

ഗോപഗാമേ രവേ ഘോസോ, സൂതോ സാരഥിവന്ദിസു;

മാല്യം തു പുപ്ഫേ തദ്ദാമേ, വാഹോ തു സകടേ ഹയേ.

൧൦൮൨.

ഖയേ’ച്ചനേ ചാ’പചയോ, കാലോ സമയ മച്ചുസു;

ഭേ താരകാ നേത്തമജ്ഝേ, സീമാ’ വധി, ട്ഠിതീസു ച.

൧൦൮൩.

ആഭോഗോ പുണ്ണതാ’വജ്ജേ-

സ്വാ’ളി’ത്ഥീ സഖി സേതുസു;

സത്തേ ഥൂലേ തീസു ദള്ഹോ, ലതാ സാഖായ വല്ലിയം.

൧൦൮൪.

മുത്തി’ത്ഥീ ¶ മോചനേ മോക്ഖേ,

കായോ തു ദേഹ രാസിസു;

നീചേ പുഥുജ്ജനോ മൂള്ഹേ, ഭത്താ സാമിനി ധാരകേ.

൧൦൮൫.

സിഖാ, പിഞ്ഛേസു സിഖണ്ഡോ, സത്തേ ത്വ’ത്തനി പുഗ്ഗലോ;

സമ്ബാധോ സംകടേ ഗുയ്ഹേ,

നാസേ ഖേപേ പരാഭവോ.

൧൦൮൬.

വച്ചോ രൂപേ കരീസേ ഥ, ജുതി’ത്ഥീ കന്തിരംസിസു;

൧൦൮൭.

ലബ്ഭം യുത്തേ ച ലദ്ധബ്ബേ, ഖണ്ഡേ പണ്ണേ ദലം മതം;

സല്ലം കണ്ഡേ സലാകായം, സുചിത്തേ ധാവനം ഗതേ;

ഭന്തത്ഥേ വിബ്ഭമോ ഹാവേ, മോഹോ’വിജ്ജായ മുച്ഛനേ.

൧൦൮൮.

സേദോ ഘമ്മജലേ പാകേ,

ഗോളേ ഉച്ഛുമയേ ഗുളോ;

മിത്തേ സഹായേ ച സഖാ, വിഭൂ നിച്ചപ്പഭൂസു സോ.

൧൦൮൯.

ഖഗ്ഗേ കുരൂരേ നേത്തിംസോ, പരസ്മിം അത്ര തീസ്വ’മു;

കലങ്കോ’ങ്കാ’പവാദേസു,

ദേസേ ജനപദോ ജനേ.

൧൦൯൦.

പജ്ജേ ഗാഥാ വചീഭേദേ, വംസോ ത്വ’ന്വയവേണുസു;

യാനം രഥാദോ ഗമനേ, സരൂപസ്മിം അധോ തലം.

൧൦൯൧.

മജ്ഝോ വിലഗ്ഗേ വേമജ്ഝേ, പുപ്ഫം തു കുസുമോ’തുസു;

സീലം സഭാവേ സുബ്ബതേ, പുങ്ഗവോ ഉസഭേ വരേ.

൧൦൯൨.

കോസേ ഖഗാദിബീജേ’ണ്ഡം, കുഹരം ഗബ്ഭരേ ബിലേ;

നേത്തിംസേ ഗണ്ഡകേ ഖഗ്ഗോ, കദമ്ബോ തു ദുമേ ചയേ.

൧൦൯൩.

ഭേ’ധേനുയം രോഹിണീ’ത്ഥീ, വരങ്ഗം യോനിയം സിരേ;

അക്കോസേ സപഥേ സാപോ, പങ്കം പാപേ ച കദ്ദമേ.

൧൦൯൪.

ഭോഗവത്യു’രഗേ ഭോഗീ, സ്സരോ തു സിവസാമിസു;

ബലേ പഭാവേ വീരിയം, തേജോ തേസു ച ദിത്തിയം.

൧൦൯൫.

ധാരാ സന്തതി ഖഗ്ഗങ്ഗേ, വാനം തണ്ഹായ സിബ്ബനേ;

ഖത്താ സൂതേ പടിഹാരേ, വിത്തി പീളാസു വേദനാ.

൧൦൯൬.

ഥിയം ¶ മതി’ച്ഛാപഞ്ഞാസു, പാപേ യുദ്ധേ രവേ രണോ;

ലവോതു ബിന്ദു’ച്ഛേദേസു, പലാലേ’ [പലാസേ (ടീ.), പലാപേ-ടീ (൪൫൩-൧൧൨൪) ഗാഥാ പസ്സിതബ്ബാ] തിസയേ ഭുസം.

൧൦൯൭.

ബാധാ ദുക്ഖേ നിസേധേ ച, മൂലപദേപി മാതികാ;

സ്നേഹോ തേലേ’ധികപ്പേമേ,

ഘരാ’പേക്ഖാസു ആലയോ.

൧൦൯൮.

കേതുസ്മിം കേതനം ഗേഹേ, ഠാനേ ഭൂമി’ത്ഥിയം ഭുവി;

ലേഖ്യേ ലേഖോ രാജി ലേഖാ, പൂജിതേ ഭഗവാ ജിനേ.

൧൦൯൯.

ഗദാ സത്ഥേ ഗദോ രോഗേ, നിസജ്ജാ പീഠേസ്വാ’സനം;

തഥാഗതോ ജിനേ സത്തേ,

ചയേ ദേഹേ സമുസ്സയോ.

൧൧൦൦.

ബിലം കോട്ഠാസ ഛിദ്ദേസു, വജ്ജം ദോസേ ച ഭേരിയം;

കാലേ ദീഘഞ്ജസേ’ദ്ധാനം, ആലിയം സേതു കാരണേ.

൧൧൦൧.

ഓകാസോ കാരണേ ദേസേ,

സഭാ ഗേഹേ ച സംസദേ;

യൂപോ ഥമ്ഭേ ച പാസാദേ, അയനം ഗമനേ പഥേ.

൧൧൦൨.

അക്കോ രുക്ഖന്തരേ സൂരേ,

അസ്സോ കോണേ ഹയേപി ച;

അംസോ ഖന്ധേ ച കോട്ഠാസേ,

ജാലം സൂസ്വ’ച്ചി നോ പുമേ.

൧൧൦൩.

നാസാ’സത്തേസ്വ’ ഭാവോ ഥ,

അന്ന മോദന ഭുത്തിസു;

ജീവം പാനേ ജനേ ജീവോ,

ഘാസോ ത്വ’ന്നേ ച ഭക്ഖണേ.

൧൧൦൪.

ഛദനേ’ച്ഛാദനം വത്ഥേ, നികായോ ഗേഹരാസിസു;

അന്നാദോ ആമിസം മംസേ; ദിക്ഖാ തു യജനേ’ച്ചനേ.

൧൧൦൫.

ക്രിയായം കാരികാ പജ്ജേ,

കേതു തു ചിഹനേ ധജേ;

കുസുമം ഥീരജേ പുപ്ഫേ, വാനരേ തു ബുധേ കവി.

൧൧൦൬.

അധരേ ¶ ഖരഭേ ഓട്ഠോ, ലുദ്ദോ തു ലുദ്ദകേപി ച;

കലുസം ത്വാ’വിലേ പാപേ, പാപേ കലി പരാജയേ.

൧൧൦൭.

കന്താരോ വന, ദുഗ്ഗേസു, ചരോ ചാരമ്ഹി ചഞ്ചലേ;

ജനാവാസേ ഗണേ ഗാമോ, ചമ്മം തു ഫലകേ തചേ.

൧൧൦൮.

ആമോദോ ഹാസ ഗന്ധേസു,

ചാരു തു കനകേപി ച;

സത്തായം ഭവനം ഗേഹേ, ലേസേ തു ഖലിതേ ഛലം.

൧൧൦൯.

വേരം പാപേ ച പടിഘേ, തചോ ചമ്മനി വക്കലേ;

ഉച്ചേ’ധിരോഹേ ആരോഹോ, നേത്തം വത്ഥന്തര’ക്ഖിസു.

൧൧൧൦.

പടിഹാരേ മുഖേ ദ്വാരം, പേതേ ഞാതേ മതോ തിസു;

മാസോ പരണ്ണ കാലേസു, നഗ്ഗോ ത്വ’ചേലകേപി ച.

൧൧൧൧.

ദോസേ ഘാതേ ച പടിഘോ, മിഗാദോ ഛഗലേ പസു;

അരൂപേ ചാ’വ്ഹയേ നാമം, ദരോ ദരഥ ഭീതിസു.

൧൧൧൨.

യാചനേ ഭോജനേ ഭിക്ഖാ,

ഭാരേ ത്വ’തിസയേ ഭരോ;

ദബ്ബി’ന്ദജായാസു സുജാ, മേഘേ ത്വ’ബ്ഭം വിഹായസേ.

൧൧൧൩.

മോദകോ ഖജ്ജഭേദേപി, മണികേ രതനേ മണി;

സേലാ’രാമേസു മലയോ,

സഭാവ’ങ്കേസു ലക്ഖണം.

൧൧൧൪.

ഹവി സപ്പിമ്ഹി ഹോതബ്ബേ, സിരോ സേട്ഠേ ച മുദ്ധനി;

വിചാരേപി വിവേകോ ഥ, സിഖരീ പബ്ബതേ ദുമേ.

൧൧൧൫.

വേഗോ ജവേ പവാഹേ ച, സങ്കു തു ഖിലഹേതിസു;

നിഗ്ഗഹീതേ കണേ ബിന്ദു, വരാഹോ സൂകരേ ഗജേ.

൧൧൧൬.

നേത്തന്തേ ചിത്തകേ’പാങ്ഗം, സിദ്ധത്ഥോ സാസപേ ജിനേ;

ഹാരോ മുത്താഗുണേ ഗാഹേ,

ഖാരകോ മകുളേ രസേ.

൧൧൧൭.

അച്ചയോ’ തിക്കമേ ദോസേ,

സേലരുക്ഖേസ്വ’ഗോ നഗോ;

സ്വപ്പേ’വധാരണേ മത്തം, അപചിത്യ’ച്ചനേ ഖയേ.

൧൧൧൮.

ഛിദ്ദോ’തരണേസ്വോ’താരോ,

ബ്രഹ്മേ ¶ ച ജനകേ പിതാ;

പിതാമഹോ’യ്യകേ ബ്രഹ്മേ,

പോതോ നാവായ ബാലകേ.

൧൧൧൯.

രുക്ഖേ വണ്ണേ സുനേ സോണോ,

സഗ്ഗേ തു ഗഗനേ ദിവോ;

വത്ഥേ ഗന്ധേ ഘരേ വാസോ, ചുല്ലോ ഖുദ്ദേ ച ഉദ്ധനേ.

൧൧൨൦.

കണ്ണോ കോണേ ച സവണേ,

മാലാ പുപ്ഫേ ച പന്തിയം;

ഭാഗോ ഭാഗ്യേ’കദേസേസു,

കുട്ഠം രോഗേ’ ജപാലകേ.

൧൧൨൧.

സേയ്യാ സേനാസനേ സേനേ, ചുന്ദഭണ്ഡമ്ഹി ച’ബ്ഭമോ;

വത്ഥാദിലോമം’സു കരേ, നിപാതോ പതനേ’ബ്യയേ.

൧൧൨൨.

സാഖായം വിടപോ ഥമ്ഭേ, സത്തു ഖജ്ജന്തരേ ദിസേ;

സാമികോ പതി’യിരേസു, പട്ഠാനം ഗതി ഹേതുസു.

൧൧൨൩.

രാഗേ രങ്ഗോ നച്ചട്ഠാനേ, പാനം പേയ്യേ ച പീതിയം;

ഇണു’ക്ഖേപേസു ഉദ്ധാരോ, ഉമ്മാരേ ഏളകോ അജേ.

൧൧൨൪.

പഹാരോ പോഥനേ യാമേ,

സരദോ ഹായനോ’തുസു;

കുണ്ഡികായാ’ള്ഹകേ തുമ്ബോ,

പലാലോ [പലാപോ (ക.) ൪൫൩-ഗാഥാ പസ്സിതബ്ബാ] തു ഭുസമ്ഹി ച.

൧൧൨൫.

മതാ’വാടേ ചയേ കാസു, പനിസാ കാരണേ രഹോ;

കാസോ പോടഗലേ രോഗേ,

ദോസോ കോധേ ഗുണേ’തരേ.

൧൧൨൬.

യുത്യ’ട്ടാല’ട്ടിതേസ്വ’ട്ടോ, കീളായം കാനനേ ദവോ;

ഉപ്പത്തിയം ചോ’പ്പതനം, ഉയ്യാനം ഗമനേ വനേ.

൧൧൨൭.

വോകാരോ ലാമകേ ഖന്ധേ, മൂലോ’പദാസു പാഭതം;

ദസാ’ വത്ഥാ പടന്തേസു, കാരണം ഘാത, ഹേതുസു.

൧൧൨൮.

ഹത്ഥിദാനേ ¶ മദോ ഗബ്ബേ, ഘടാ ഘടന രാസിസു;

ഉപഹാരോ’ഭിഹാരേപി, ചയോ ബന്ധന രാസിസു.

൧൧൨൯.

ഗന്ധോ ഥോകേ ഘായനീയേ,

ചാഗോ തു ദാനഹാനിസു;

പാനേ പമോദേ പീതി’ത്ഥീ, ഇണേ ഗിവാ ഗലേപി ച.

൧൧൩൦.

പതിട്ഠാ നിസ്സയേ ഠാനേ, ബലക്കാരേപി സാഹസം;

ഭങ്ഗോ ഭേദേ പടേ ഭങ്ഗം, ഛത്തം തു ഛവകേപി ച.

൧൧൩൧.

ഞാണേ ഭുവി ച ഭൂരി’ത്തീ, അനങ്ഗേ മദനോ ദുമേ;

പമാതരിപി മാതാ ഥ, വേഠു’ണീസേസു വേഠനം.

൧൧൩൨.

മാരിസോ തണ്ഡുലേയ്യേ’യ്യേ,

മോക്ഖോ നിബ്ബാന മുത്തിസു;

ഇന്ദോ’ധിപതി സക്കേസ്വാ, രമ്മണം ഹേതു ഗോചരേ.

൧൧൩൩.

അങ്കേ സണ്ഠാന മാകാരേ,

ഖേത്തേ [വപ്പേ (പാകാരമൂലേ നേത്തജലേ ഉസുമേ ച വപ്പോ-ടീ)] വപ്പോ തടേപി ച;

സമ്മുത്യ’നുഞ്ഞാ വോഹാരേ, സ്വ’ഥ ലാജാസു ചാ’ക്ഖതം.

൧൧൩൪.

സത്രം യാഗേ സദാദാനേ,

സോമോ തു ഓസധി’ന്ദുസു;

സങ്ഘാതോ യുഗഗേഹങ്ഗേ, ഖാരോ ഊസേ ച ഭസ്മനി.

൧൧൩൫.

ആതാപോ വീരിയേ താപേ,

ഭാഗേ സീമായ ഓധി ചാതി.

ഇതി പാദാനേകത്ഥവഗ്ഗോ.

അനേകത്ഥവഗ്ഗോ നിട്ഠിതോ.

൩. സാമഞ്ഞകണ്ഡ

൪. അബ്യയവഗ്ഗ

൧൧൩൬.

അബ്യയം വുച്ചതേ ദാനി, ചിരസ്സം തു ചിരം തഥാ;

ചിരേന ചിരരത്തായ, സഹ സദ്ധിം സമം അമാ.

൧൧൩൭.

പുനപ്പുനം ¶ അഭിണ്ഹഞ്ചാ, സകിം ചാ’ഭിക്ഖണം മുഹും;

വജ്ജനേ തു വിനാ നാനാ, അന്തരേന രിതേ പുഥു.

൧൧൩൮.

ബലവം സുട്ഠു ചാ’തീവാ, തിസയേ കിമുത സ്വ’തി;

അഹോ തു കിം കിമൂ’ ദാഹു, വികപ്പേ കിമുതോ’ദ ച.

൧൧൩൯.

അവ്ഹാനേ ഭോ അരേ അമ്ഭോ,

ഹമ്ഭോ രേ ജേ’ങ്ഗ ആവുസോ;

ഹേ ഹരേ ഥ കഥം കിംസു, നനു കച്ചി നു കിം സമാ.

൧൧൪൦.

അധുനേ’തരഹീ’ദാനി, സമ്പതി അഞ്ഞദത്ഥു തു;

തഗ്ഘേ’ കംസേ സസക്കഞ്ചാ, ദ്ധാ കാമം ജാതു വേ ഹവേ.

൧൧൪൧.

യാവതാ താവതാ യാവ, താവ കിത്താവതാ തഥാ;

ഏത്താവതാ ച കീവേ’തി, പരിച്ഛേദത്ഥവാചകാ.

൧൧൪൨.

യഥാ തഥാ യഥേവേ’വം, യഥാനാമ യഥാഹി ച;

സേയ്യഥാപ്യേ’വമേവം, വാ, തഥേവ ച യഥാപി ച.

൧൧൪൩.

ഏവമ്പി ച സേയ്യഥാപി, നാമ യഥരിവാ’പി ച;

പടിഭാഗത്ഥേ യഥാച, വിയ തഥരിവാ’പി ച.

൧൧൪൪.

സം സാമഞ്ച സയം ചാഥ, ആമ സാഹു ലഹൂ’പി ച;

ഓപായികം പതിരൂപം, സാധ്വേ’വം സമ്പടിച്ഛനേ.

൧൧൪൫.

യം തം യതോ തതോ യേന,

തേനേ’തി കാരണേ സിയും;

അസാകല്യേ തു ചന ചി, നിപ്ഫലേ തു മുധാ ഭവേ.

൧൧൪൬.

കദാചി ജാതു തുല്യാ’ഥ, സബ്ബതോ ച സമന്തതോ;

പരിതോ ച സമന്താപി, അഥ മിച്ഛാ മുസാ ഭവേ.

൧൧൪൭.

നിസേധേ ന അനോമാ’ലം, നഹി ചേതു സചേ യദി;

അനുകുല്യേ തു സദ്ധഞ്ച,

നത്തം [രത്തം (ടീ.)] ദോസോ ദിവാ ത്വ’ഹേ.

൧൧൪൮.

ഈസം കിഞ്ചി മനം അപ്പേ, സഹസാ തു അതക്കിതേ;

പുരേ ഗ്ഗതോ തു പുരതോ, പേച്ചാ’മുത്രഭവന്തരേ.

൧൧൪൯.

അഹോ ¶ ഹീ വിമ്ഹയേ തുണ്ഹീ,

തു മോനേ ഥാ’വി പാതു ച;

തങ്ഖണേ സജ്ജു സപദി, ബലക്കാരേ പസയ്ഹ ച.

൧൧൫൦.

സുദം ഖോ [വോ (ക.)] അസ്സു യഗ്ഘേ വേ,ഹാ’ദയോ പദപൂരണേ;

അന്തരേന’ന്തരാ അന്തോ, വസ്സം നൂന ച നിച്ഛയേ.

൧൧൫൧.

ആനന്ദേ സഞ്ച ദിട്ഠാ ഥ, വിരോധകഥനേ നനു;

കാമപ്പവേദനേ കച്ചി, ഉസൂയോപഗമേ’ത്ഥു ച.

൧൧൫൨.

ഏവാ’വധാരണേ ഞേയ്യം, യഥാത്തം തു യഥാതഥം;

നീചം അപ്പേ, മഹത്യു’ച്ചം, അഥ പാതോ പഗേ സമാ.

൧൧൫൩.

നിച്ചേ സദാ സനം [സനാ (ക.)] പായോ,

ബാഹുല്യേ ബാഹിരം ബഹി;

ബഹിദ്ധാ ബാഹിരാ ബാഹ്യേ, സീഘേതു സണികം ഭവേ.

൧൧൫൪.

അത്ഥം അദസ്സനേ ദുട്ഠു, നിന്ദായം, വന്ദനേ നമോ;

സമ്മാ സുട്ഠു പസംസായം, അഥോ സത്തായ മത്ഥി ച.

൧൧൫൫.

സായം സായേ’ജ്ജ അത്രാ’ഹേ,

സുവേ തു സ്വേ അനാഗതേ;

തതോ പരേ പരസുവേ, ഹിയ്യോതു ദിവസേ ഗതേ.

൧൧൫൬.

യത്ഥ യത്ര യഹിംചാഥ, തത്ഥ തത്ര തഹിംതഹം;

അഥോ ഉദ്ധഞ്ച ഉപരി, ഹേട്ഠാ തു ച അധോ സമാ.

൧൧൫൭.

ചോദനേ ഇങ്ഘ ഹന്ദാ’ഥ, ആരാദൂരാ ച ആരകാ;

പരമ്മുഖാ തു ച രഹോ, സമ്മുഖാ ത്വാ’വി പാതു ച.

൧൧൫൮.

സംസയത്ഥമ്ഹി അപ്പേവ, അപ്പേവനാമ നൂ’തി ച;

നിദസ്സനേ ഇതി’ത്ഥഞ്ച, ഏവം, കിച്ഛേ കഥഞ്ചി ച.

൧൧൫൯.

ഹാ ഖേദേ സച്ഛി പച്ചക്ഖേ,

ധുവം ഥിരേ’വധാരണേ;

തിരോ തു തിരിയം ചാഥ, കുച്ഛായം ദുട്ഠു കു’ച്ചതേ.

൧൧൬൦.

സുവത്ഥി ആസിട്ഠത്ഥമ്ഹി, നിന്ദായം തു ധീ [ധി (ക.)] കഥ്യതേ;

കുഹിഞ്ചനം കുഹിം കുത്ര, കുത്ഥ കത്ഥ കഹം ക്വ ഥ.

൧൧൬൧.

ഇഹേ’ധാ’ത്ര ¶ തു ഏത്ഥാ’ത്ഥ,

അഥ സബ്ബത്ര സബ്ബധി;

കദാ കുദാചനം ചാഥ, തദാനി ച തദാ സമാ.

൧൧൬൨.

ആദികമ്മേ ഭുസത്ഥേ ച, സമ്ഭവോ’തിണ്ണ തിത്തിസു;

നിയോഗി’സ്സരിയ’പ്പീതി, ദാന പൂജാ’ഗ്ഗ, സന്തിസു.

൧൧൬൩.

ദസ്സനേ തപ്പരേ സങ്ഗേ, പസംസാ, ഗതി, സുദ്ധിസു;

ഹിംസാ, പകാരന്തോ’ഭാവ, വിയോഗാ’വയവേസു ച;

പോ’പസഗ്ഗോ ദിസായോഗേ, പത്ഥനാ, ധിതിആദിസു.

൧൧൬൪.

പരാസദ്ദോ പരിഹാനി, പരാജയ ഗതീസു ച;

ഭുസത്ഥേ പടിലോമത്ഥേ, വിക്കമാ’മസനാദിസു.

൧൧൬൫.

നിസ്സേസാ’ഭാവ സന്യാസ, ഭുസത്ഥ മോക്ഖ രാസിസു;

ഗേഹാ’ദേസോ’പമാഹീന, പസാദനിഗ്ഗതാ’ച്ചയേ.

൧൧൬൬.

ദസ്സനോ’സാനനിക്ഖന്താ, ധോഭാഗേസ്വ’വധാരണേ;

സാമീപ്യേ ബന്ധനേ ഛേക, ന്തോഭാഗോ’പരതീസു ച.

൧൧൬൭.

പാതുഭാവേ വിയോഗേ ച, നിസേധാദോ നി ദിസ്സതി;

അഥോ നീഹരണേ ചേവാ, വരണാദോ ച നീ സിയാ.

൧൧൬൮.

ഉദ്ധകമ്മ വിയോഗ ത്ത, ലാഭ തിത്തി സമിദ്ധിസു;

പാതുഭാവ’ച്ചയാഭാവ, പബലത്തേ പകാസനേ;

ദക്ഖ’ഗ്ഗതാസു കഥനേ, സത്തിമോക്ഖാദികേ ഉ ച.

൧൧൬൯.

ദു കുച്ഛിതേ’സദത്ഥേസു, വിരൂപത്തേ പ്യ’സോഭനേ;

സിയാ’ഭാവാ’സമിദ്ധീസു, കിച്ഛേ ചാ’നന്ദനാദികേ.

൧൧൭൦.

സം സമോധാന സങ്ഖേപ, സമന്തത്ത സമിദ്ധിസു;

സമ്മാ ഭുസ സഹ പ്പത്ഥാ, ഭിമുഖത്ഥേസു സങ്ഗതേ;