📜
സമന്തകൂടവണ്ണനാ ¶
നമോ തസ്സ ഭഗവതോ അരഹതോ സമ്മാസമ്ബുദ്ധസ്സ
സതതവിതത കിത്തിം ധസ്തകന്ദപ്പദപ്പം
തിഭവഹിതവിധാനം സബ്ബലോകേകകേതും,
അമിതമതിമനഗ്ഘം സന്തിദം മേരുസാരം
സുഗതമഹമുദാരം രൂപസാരം നമാമി;
ഹതദുരിതതുസാരം മോഹപങ്കോപതാപം
മനകമലവികാസം ജന്തുനം സേസകാനം,
കുമതികുമുദനാസം ബുദ്ധപുബ്ബാചലഗ്ഗാ
ഉദിതമഹമുദാരം ധമ്മഭാനും നമാമി;
സകലവിമലസീലം ധുതപാപാരിജാലം
സുരനരമഹനീയം പാഹുനേയ്യാഹുനേയ്യം,
ഉജുപഥപടിപന്നം പുഞ്ഞഖേത്തം ജനാനം
ഗണമഹമഭിവന്ദേ സാരദം സാദരേന;
ഇതി കളിത പണാമാ ഹന്ത്വ സബ്ബോപസഗ്ഗേ
സുഗതവിമല പാദമ്ഭോജസമ്പാത പൂതം,
സുമനസിഖരിരാജം വണ്ണയിസ്സം സുരാനം
വസതി മതുലമേതം സാധുജന്തു സുണന്തു;
സവണാ ലപനാ ചേവ സതിയാ ചാപി വന്ദനാ,
യസ്സ സമ്മാ സുഖീ ഹോതീ നിബ്ബാണഞ്ചാധിഗച്ഛതി;
൬. ¶
തസ്മാ സപ്പുരിസേഹേ’ദം പത്ഥേന്തേഹി തിസമ്പദം,
സവണീയഞ്ഹി സാധൂഹി അചിക്ഖിത്തേന ചേതസാ;
യോ ലോകതിലകോ നാഥോ പൂരേത്വാ ദസ പാരമീ,
ജാതോസി തുസിതേ കായേ സന്തുസിതോ’തി വിസ്സുതോ;
ആരാധിതോ സുരാദീഹി കാലോ മാരിസ തേ അയം,
തിണ്ണോ താരയിമം ലോകം ബഹൂ അപ്പരജക്ഖകാ;
ഏതദത്ഥായ തേ വീര പൂരിതാ ദസ പാരമീ,
ബാഹും പിതുസ്സ പുത്തോ’വ ലോകോ ആലമ്ബതേ തുവം;
തേസം തം വചനം സുത്വാ മഹാസത്തോ മഹാമതീ,
വിലോകനേ വിലോകേത്വാ പഞ്ചാമല വിലോചനോ;
ജമ്ബുദീപഗ്ഗകമലേ കണ്ണികാ’വ മനോരമാ,
പുരീ കപിളവത്ഥൂ’സി വിസാണാ’വ സുധാസിനം;
സിങ്ഗീനിക്ഖമയാഭാസ തുങ്ഗസിങ്ഗസമങ്ഗിതാ,
മണിസീഹപഞ്ജരാകിണ്ണ പാസാദാ യത്ഥ ഭാസരേ;
സഘനേ ഗഗനേ നിച്ചം സതേരതസതാനി’വ,
അനിലേരിതപജ്ജോത സോണ്ണകേതു അഹൂ യഹിം;
ജനാനം നീലനേത്തേഹി വദനേഹി തു യാ പുരീ,
മധുപാലിസമോനദ്ധ കഞ്ജിനീ സിരിമാവഹേ;
രങ്ഗതുങ്ഗതുരങ്ഗേഹി ഗജ്ജിതേഹി ച യാ പുരീ,
സഘോസുത്തുങ്ഗകല്ലോല ലോലസാഗരസന്തിഭാ;
അവ്ഹമാനാ’വ ദേവാനം പുരലഖ്യാ ഭുജാ ഇവ,
മന്ദാനിലേരിതാ തുങ്ഗ നാനാരാഗദ്ധജാ യഹിം;
നാനാവേസധരാ യസ്മിം നാനാഭൂസണ ഭൂസിതാ,
നാനാസമ്പത്തിസംയുത്താ നാനാവിജ്ജാസു പാരഗാ;
൧൮. ¶
നവയോബ്ബന ഉദ്ദാമാ രൂപേന ച മനോഹരാ,
സച്ചേസു നിരതാ നിച്ചം അനക്കുട്ഠകുലാ സിയും;
നിച്ചം കീളാ വിദദ്ധാഹി നരനാരീഹി സേവിതാ,
യാ പുരീ സാധുരൂപാ’സി മധുരാലാപിനീഹി ച;
തസ്മിം സദ്ധാദയോപേത ഓക്കാകകുലകേതുകോ,
സുദ്ധോദനവ്ഹയോ ആസീ വിസ്സുതോ ഭുവനത്തയേ;
യസ്സങ്ഘികമലേ സബ്ബ ഭുഭുജാനം മഹീതലേ,
കിരീടമണിഹിങ്ഗാലി കീളന്തീ’വ നിരന്തരം;
യസ്സ പത്ഥടതേജേന പുരനേതാപി ദിവാകരോ,
വഹനീച’മ്ബരേ ലീലം ഓസധീപതിനോ ദിവാ;
യസ്സ ദാനപ്പവാഹോ തു നാനായാചക ജന്തുനം,
മനോദധീസു വേലന്തേതിക്കമന്തോവ സത്തതം;
മതിയാ സുരമന്തീവ ധനേന ധനദോ വിയ,
രൂപേന കുസുമേസു’വ യോ ജുമ്ഹതി മഹീതലേ;
തസ്സാഭിസിത്താ രജ്ജേന മഹാമായാതി വിസ്സുതാ,
ചന്ദികാ വിയ ചന്ദസ്സ ഗിരിരാജാ’വ കപാലിതോ;
ലക്ഖീ’വ വാസുദേവസ്സ സീതാ’വ രാമരാജിനോ,
മഹേസീസി വരാരോഹാ സുന്ദരീ സുന്ദരാധരാ;
തസ്സാ കുച്ഛികരണ്ഡമ്ഹി അനഗ്ഘരതനം വിയ,
ഖത്തിംസാഹി നിമിത്തേഹി വിമ്ഹാപേന്തോ സദേവകം;
സിതമ്ബുജകരോ സന്തോ സിതേഭച്ഛാപകോ വിയ,
കത്വാ പദക്ഖിണം മാതു പടിസന്ധിമഗണ്ഹി സോ;
ദസേകാദസമാസേന തസ്സേവം ആസി ചേതനാ,
പസ്സിതും സകഞാതീനം ഗന്ത്വാന നഗരം തദാ;
൩൦. ¶
നിവേദേത്വാ തമത്ഥം സാ രഞ്ഞോ തേന സുസജ്ജിതേ,
സപരിച്ഛദാ തദാ മഗ്ഗേ ഗച്ഛന്തി അന്തരാപഥേ;
ദേവതാനം മനോനന്ദകര നന്ദന സന്നിഭം,
ദിസ്വാന ലുമ്ബിനിം നാമ ഉയ്യാനം മനനന്ദനം;
തസ്മിം കീളിതുമുസ്സാഹാ പവിസിത്വാന തം വനം,
കീളന്തി ഉപഗന്ത്വാന മങ്ഗലം സാലപാദപം;
വിലോല പല്ലവാകിണ്ണം സുഫുല്ലകുസുമോനതം,
ഗഹേത്വാ സാലസാഖം സാ സുരത്തകര പല്ലവാ;
ദേവേഹി ഗഹിതാ’രക്ഖാ മഹമാനേ സദേവകേ,
ജനേസി തനയം മായാ തത്രട്ഠാ ലോകലോചനം;
ബ്രഹ്മാനോ ലോകപാലാ ച മനുസ്സാ കമതോ തദാ,
സോണ്ണജാലാജിനാദീഹി ഗണ്ഹിംസു ജനനന്ദനം;
മഹിം പതിട്ഠിതോ ധീരോ പസ്സിത്വാന തതോ ദിസാ,
ഉത്തരാഭിമുഖോ സത്തപദം ഗണ്ത്വാ’മ്ബുജേ ഠിതോ;
ദിസന്തമവലോകേത്വാ സുഫുല്ലമ്ബുജലോചനോ,
നിച്ഛാരേസാസഭിം വാചം അഗ്ഗോ സേട്ഠോ’തിആദിനാ;
ബ്രഹ്മാമരനരാദീഹി പൂജിതോ ച നമസ്സിതോ,
കമേന അഭിവഡ്ഢന്തോ ജുണ്ഹപക്ഖേ സസീ യഥാ;
ബ്രഹ്മൂനം ഛത്തഛായായ മന്ദാരകുസുമന്തരേ,
സാനന്ദാമന്ദദേവേഹി ധുതചാമരമജ്ഝഗോ;
ദിബ്ബേഹി രൂപസദ്ദേഹി ഗന്ധേഹി ച രസേഹി ച,
ഫോട്ഠബ്ബേഹി ച ദിബ്ബേഹി മോദമാനോ അനേകധാ;
ദിബ്ബേഹി രമണീയേഹി നച്ചേഹി വാദിതേഹി ച,
പദാനേകസഹസ്സേഹി ഥൂയമാനഗുണാകരോ;
൪൨. ¶
പത്വാ സോളസമം വസ്സം ഞാതിസങ്ഘസ്സ മജ്ഝഗോ,
ദസ്സേത്വാ’സേസസിപ്പം തം ലോകേ വിജ്ജതി യം തദാ;
ഞാതിസങ്ഘം പമോദേന്തോ ദേവേ ച മനുജേ’പി ച,
ലദ്ധാ യസോധരം ദേവിം’നുകൂലം ജാതിജാതിയം;
സോണ്ണദപ്പണസങ്കാസ സോമ്മാനന വിഭുസിതം,
നീലനീരജസങ്കാസ വിസാലായത ലോചനം;
സിങ്ഗാരമന്ദിരദ്വാരേ ധജോപമഭമുദ്വയം,
ഹേമകാഹലസങ്കാസ നാസികം രൂപലക്ഖിയാ
നീലവേല്ലിതധമ്മില്ല ജിമുതോഭയ കോടിയം,
നിച്ചവിജ്ജുല്ലതാചക്ക മനുഞ്ഞകണ്ണപാസകം;
സാതകുമ്ഭനിഭാഭാസ പയോധരഘടദ്വം,
സുവണ്ണദ്ദിതടായാത നിജ്ഝരാകാരഹാരകം
ദേഹദേവദ്ദുമാലമ്ബ പാരോഹാഭഭുജദ്വയം,
അങ്ഗുലീപല്ലവന്തമ്ബു ബിന്ദുചാരു നഖാവലിം;
ദേഹമാലാലിമാലാഭ രോമരാജിവിരാജിതം,
രൂപണ്ണവതരങ്ഗാഹ വലിത്തയ വിചിത്തകം;
സോണ്ണരമ്ഭാസമാവട്ട പിണോരുദ്വയ സുന്ദരം,
സന്നിരകലികാകാര ചാരുജങ്ഘാ വിഭൂസിതം;
പച്ചക്ഖരൂപലക്ഖിഞ്ച ലീലാനിചയ സന്നിഭം,
ഗുണാനമാകരം സാധു വേലംവ രതിസാഗരേ;
കന്തോ വസന്തരാജാ’വ കന്ദപ്പോ’വ സുരൂപവാ,
സസീ’വ ദസ്സനീയോ ച സൂരിയോ വിയ തേജവാ;
അചലത്തേന മേരൂവ ഗമ്ഭീരേനണ്ണവോ വിയ,
ബ്രഹ്മസ്സരോ പിയംവാദീ പഞ്ഗ്ഞായ ച അനൂപമോ;
൫൪. ¶
വസന്തോ സോ മഹാവീരോ പുരസ്മിം കപിലവ്ഹയേ,
ദിസ്വാ നിമിത്തേ ചതുരോ ഉയ്യാന ഗമനഞ്ജസേ;
പബ്ബജ്ജാഭിരതോ നാഥോ ഗന്ത്വാ ഉയ്യാനഭൂമിയം,
സുഫുല്ലചമ്പകാസോക നാഗാദാ’ഗേഹി മണ്ഡിതം;
ഫുല്ലപങ്കജ കള്ഹാര ജലാജലയ സതാകുലം,
മന്ദമന്ദാനിലായാത നാനാമോദേഹി വാസിതം;
സരാ സരം സമായാത മധുബ്ബത നിസേവിതം,
ഫലപുപ്ഫരസുദ്ദാമ ദ്വിജ സങ്ഘ നികൂജിതം;
നച്ചന്ത മത്തമോരാനം നിച്ചം മണ്ഡപസന്തിഭം,
ദിബ്ബന്ത മിഗസഗ്ഘാനം കീളാമണ്ഡപ സന്നിഭം;
സമീര സിസിരോദാര ധാരാസീകര വാരിഹി,
ധാരാമണ്ഡപ പന്തീഹി ജനാനന്ദകരം വരം;
ഉയ്യാനവനമാഗമ്മ ദേവരാജാവ നന്ദനം,
കീളന്തോ നിജപുത്തസ്സ സുത്വാന ജാതസാസനം;
നിവത്തോ വിസ്സകമ്മേന സഹസ്സക്ഖോവ ഭൂസിതോ,
പുരം പവിസമാനോവ കിസാ ഗോതമി ഭാസിതം;
സുത്വാന നിബ്ബുതപദം തദാ ചിത്താനുകൂലകം,
സന്തുട്ഠോ സാനുരാഗോ ച ലക്ഖഗ്ഘം താരഭാസുരം;
ഹാരം തിസ്സായ പേസേത്വാ ഗന്ത്വാന സകമന്ദിരം,
ദേവരാജവിലാസേന നിസീദി പവരാസനേ;
അഥാഗമ്മ തദാ നേകനാടികാ പരിവാരയും,
വജ്ജന്തി ഭേരിയോ താസു പഗ്ഗയ്ഹ കാചി നാരിയോ;
നാനാലയസമാകിണ്ണം ഗീതം ഗായന്തി കാചി’പി,
ധമന്തി സുസിരം കാചി കാചി വാദേന്തി തന്തിയോ;
൬൬. ¶
ചാരു ബിമ്ബാധരാരമ്മ പയോധരഭരാ സുഭാ,
വിസാലായത നീലക്ഖാ സോമസോമ്മാനനാ തദാ;
നച്ചന്തി പുരതോ തസ്സ ഭേരിമണ്ഡല മജ്ഝഗാ,
ദേവകഞ്ഞാവ രങ്ഗമ്ഹീ രസഭാവനിരന്തരം;
ദിസ്വാന സോ തമച്ഛരിയം വിരത്തോ വിസയേ തദാ,
ഉരത്താളഞ്ച അദ്ദക്ഖി സബ്ബന്തം ഭേരിതാളനം;
പരിദേവം’ചുപട്ഠാസി ഗീതം സംസാരസാഗരേ,
വായുവേഗ വികാരം’വ നച്ചം ചിന്തേസി നായകോ;
’കദാഹം ഘരമോസ്സജ്ജ പബ്ബജ്ജാസിരി മുബ്ബഹേ?’
ഇച്ചേവം ചിന്തയന്തോ സോ സുപന്തോവ സയീ തഹിം;
’യം നിസ്സായ മയം ഏത്ഥ നച്ചഗീതേസു വ്യാവടാ,
സോ’യം’ദാനി സുപീ’ അമ്ഹേ കസ്സദാനി കരോമ തം?;
ഇതി ചിന്തിയ തേ തത്ഥ തുരിയേസു സകേ സകേ,
ആലമ്ബാ സയിതാ കഞ്ഞാ സുസഞ്ഞാഞ്ഞമനിസ്സിതാ;
ഖാദന്തി കാചി ദന്താനി കാചി ലാലാ വഹന്തിയോ,
കാചി രുദന്തിയോ തത്ഥ വിലപന്തി അഥാ’പരാ;
കാകച്ഛന്തി’പി സേമ്ഹമ്പി ഗിലന്തി ച ചമന്തി ച,
കരോന്തി നാദം നാസായ ഘരൂ’തി ച ഖിപന്തി ച;
മുത്തയന്തി തദാ കാചി രഹസ്സം വിചരന്തി ച,
ദുഗ്ഗന്ധം വാതി തം ഠാനം സുസാനം ആമകം യഥാ;
പബുദ്ധോ അഡ്ഢരത്തമ്ഹി ഗതേ തത്ഥ നിസീദിയ,
അദ്ദക്ഖി താസം നേകാനി വികാരാനി തഹിം തദാ;
തസ്സേവം പേക്ഖമാനസ്സ ഭവേ സംവിഗ്ഗചേതസോ,
ആദിത്തംവ ഉപട്ഠാസി മനേ ഖലു ഭവത്തയം;
൭൮. ¶
ദാവാനല സമാദിത്ത മഹാരഞ്ഞായഥാ ഗജോ,
തഥേവാസി നരിന്ദസ്സ ഗേഹതോ ഗമനേ മതീ;
തതോ വുട്ഠായ സയനാ കരോന്തോ അഭിനിക്ഖമം,
വിതക്കേസി മഹാരാജാ പസ്സിതും സകമത്രജം;
പവിസിത്വാ തതോ ഗബ്ഭം സനികം സന്തമാനസോ,
പസ്സിത്വാ സഹ പുത്തേന നിദ്ദായന്തിം യസോധരം;
ചിരാഗതം മഹാപേമം ധാരയം സകമാനസേ,
ബുദ്ധോ ഹുത്വാപി’മം സക്കാ പസ്സിതും ഇതി ചിന്തിയ;
ഗതോ നാഥോ തതോ ഠാനാ ബോധിയാ ബദ്ധമാനസോ
തദഹേവാസി ബുദ്ധോതി കാമുകോ കോ ന ചിന്തയേ;
സിനേരു മുദ്ധരന്തോവ പാദുദ്ധരിയ നിക്ഖമം,
ഛന്നമാഹൂയ ആനീതം കന്ഥകം തുരഗാധിപം;
അസ്സരാജം തമാരുയ്ഹ സഹ ഛന്നേന രത്തിയം,
ദേവേഹി വിവടദ്വരാ പടിപജ്ജി മഹാപഥം;
ചക്കവാളേസു നേകേസു ദേവതാ സുസമാഗതാ,
ദീപധൂപദ്ധജേഹേ ച ഗന്ധമാലേഹി പൂജയും;
പുരതോ സട്ഠീസഹസ്സാനി ദണ്ഡദീപാനി ധാരയും,
തഥാ ദക്ഖിണപസ്സമ്ഹി വാമപസ്സേ ച പച്ഛതോ;
ഗഗനാ പുപ്ഫവസ്സാനി വസ്സാപേസും ഛ ദേവതാ,
മന്ദാരവം കോകനദം സുഗന്ധം ചിത്തപാട ലിം;
ചമ്പകാ സോക പുന്നാഗ നാഗപൂഗാഗ സമ്ഭവം,
മാലതീവസ്സികീയാദീ നാനാവല്ലീഹി സമ്ഭവം;
പദുമുപ്പല കലഹാര കുമുദാദ്യാമ്ബു സമ്ഭവം,
സുഗന്ധമധു മത്താഹി ഛപ്പദാലീഹി കൂജിതം;
൯൦. ¶
പുപ്ഫവസ്സം പവസ്സിത്ഥ തിംസയോജനമഞ്ജസേ,
പസത്തോ തത്ഥ തുരഗോ ദുക്ഖതോ അഗമീ തദാ;
ഏവം പൂജാവിധാനേഹി ഗന്ത്വാ’നോമം മഹാനദിം,
സിതസേകത സങ്കിണ്ണം ബഹുമീനകുലാകുലം;
തീരട്ഠോ പസ്സി സോ ധീരോ ഗങ്ഗാനാരിം രസാവഹം,
കരോന്തിം വീചിബാഭാതി ഏണേപുപ്ഫോപഹാരകം;
അസ്സേന തം മഹാനോമം ലങ്ഘാപേത്വാ മഹാമതീ,
പരതീരേ പതിട്ഠാസി വിമലേ വാലുകാ തലേ;
പബ്ബജിതും മയേത്ഥേവ യുത്തം നോ മേ പപഞ്ചിതും,
ഇതി ചിന്തിയ ഓഭായ ധാരിതാഭരണാനി സോ;
ഛന്നസ്സ പടിയാദേത്വാ കന്ഥകഞ്ച ഹയാധിപം,
നിസിതം ഖഗ്ഗമുഗ്ഗയ്ഹ സമോലിം ഛിന്ദി കുന്തലം;
ഏവമാവജ്ജയം നാഥോ സചേ’ഹം സുഗതോ ഭവേ,
തിട്ഠതു ഗഗനേ ഗന്ത്വാ ഇതി ഉക്ഖിപി ച’മ്ബരം;
തതോ സക്കോ മഹഗ്ഘേന മണിചങ്ഗോടകേന തം,
പടിഗ്ഗഹേത്വാ സിരസം നേത്വാ ദേവപുരം ചരം;
കാരേത്വാ മണിഥൂപം സോ നീധേത്വാ തം സിരോരുഹം,
അത്ഥാഹം പതിമാനേതി സഹദേവേഹി നേകധാ;
മഹാബ്രഹ്മോപനീതട്ഠപരിക്ഖാരം മഹാമതീ,
പടിഗ്ഗഹേത്വാ കാസാവം നിവത്ഥോ പാരുതോ തദാ;
പുബ്ബേ വിയമ്ബരം ഗയ്ഹ അമ്ബരേ ഖിപി നായകോ,
പടിഗ്ഗഹേത്വാ തം ബ്രഹ്മാ നേത്വാ ബ്രഹ്മപുരം ചരം;
ദ്വാദസയോജനുബ്ബേധം കത്വാ ഥൂപവരം സുഭം,
തത്ഥ തം നിദഹിത്വാന പണിപാതേതി സബ്ബദാ;
൧൦൨. ¶
സമ്പുണ്ണ മനസങ്കപ്പോ പബ്ബജ്ജാസിരി മുബ്ബഹം,
ഛാദേന്തോ കാമലേനേവ മരും ചങക്കമി നായകോ;
തതോ അമ്ബവനം ഗന്ത്വാ വിന്ദന്തോ പീതിജം സുഖം,
വീതിനാമയി സത്താഹം രമ്മേ പാദപമണ്ഡപേ;
തതോ രാജഗഹം ഗന്ത്വാ പാരുപിത്വാ ചീവരം,
ഗഹേത്വാ മണിവണ്ണം സോ പത്തം കരതലമ്ബുജാ;
ബത്തിംസ ലക്ഖണൂപേതോ അനുബ്യഞ്ജന മണ്ഡിതോ,
ബ്രഹ്മുജ്ജുഗത്തോ ഭഗവാ പുരസേട്ഠമുപാഗമി;
വിസിഖന്തരേന ഗച്ഛന്തം ലോകേകനയനം ജനാ,
ദിസ്വാ ഏവം വിചിന്തേസും നായം യോ സോ ജനാധിപോ;
കാമം പുരവധുസോമ്മ വത്തസമ്ബന്ധകാരണാ,
ചന്ദോ’യമാഗതോ അജ്ജ സകവേസേന നോ മതി;
സുത്വാന തം തദാ കേചി ഹസന്താ വചനന്തരം,
നായം സസീ സസങേകാ സോ ഭാനുമേസോ’തി നോ മതി;
ബോധേതുമാഗതോ കാമം പോരീനം വദനമ്ബുജേ,
സകീയേനേവ രൂപേന വിമ്ഹയം പോരിമാനുസേ;
കിം ഭോ ഉമ്മത്തകാ അത്ഥ ഏവം മാ വദഥാ’ധുനാ,
സതരംസീ ഉണ്ഹരംസീ ന സോ ഏസോ അവിഗ്ഗഹോ;
കാമേനാലസജന്തുഹി കീളിതും പുരമാഗതോ,
സരൂപേന ന നോ അത്ഥി സംസയോ ബലു മാനസേ;
തേസം തം വചനം സുത്വാ ഹസന്താ കേചി ജന്തുനോ,
തുമ്ഹേ ഖലൂ ന ജാനാഥ സബാണേ സധനൂ ഹി സോ;
ഇസ്സരോ കന്തരൂപേന തുങ്ഗമന്ദിരതാ പുരം,
കേലാസോ ഇതി സമ്പത്തോ ജഹാഥ വിമതിം ഇധ;
൧൧൪. ¶
തേസമ്പി വചനം സുത്വാ ഹസന്തേകേ ജനാ തദാ,
നായം ഹരോ തിനേത്തോ സോ കേസവേസോ ഇധാഗതോ;
വിചിണന്തോ സിരിം അജ്ജ പുരസേട്ഠമുപാഗതം,
വേസേനഞ്ഞേന മഞ്ഞാമ ഏത്ഥ നോ നത്ഥി സംസയോ;
പഹരിത്വാ കരം കേചി സുത്വാ തം വചനം നരാ,
ഹസന്തേവം തദാവോചും വാസുദേവോ ന വേ അയം;
കാമം സരോജനാഭോ സോ വാമനോ കണ്ഹവിഗ്ഗഹോ,
അയമഞ്ഞതരചണ്ണേന ആഗതോ പാകസാസനോ;
പുരം ദേവപുരന്തേതം മഞ്ഞമാനോ മഹാജുതിം,
പസ്സിതുന്തി പടിഞ്ഞാതോ മാ ഭോന്തോ വിലപന്തു വേ;
സുത്വാ തേസം ഗിരം കേചി കേളിം കത്വാന നേകധാ,
തുമ്ഹേ സക്കം ന ജാനാഥ സോ ഹി ഭോ വജിരായുധോ;
ഏസോ ഹി ഭോ മഹാബ്രഹ്മാ ബ്രഹ്മലോകാ ഇധാഗതോ,
പമത്താ കിന്നു വേദമ്ഹീ ബ്രഹ്മബന്ധു പുരേ ഇധ;
അഥേസം വചനം സുത്വാ കേചി പണ്ഡിതജാതികാ,
നേതേ ചന്ദാദയോ കാമം മാ മോഹം ഭോ പകാസഥ;
ചതുരാനനോ മഹാബ്രഹ്മാ സോമസോമ്മാനനോ അയം,
സമന്തപോത്ഥകോ ബ്രഹ്മാ പത്തഹത്ഥോ’യമബ്ഭുതോ;
കാമം പാരമിതാപുണ്ണ പസത്ഥോ പുരിസോ അയം,
നിച്ചം വന്ദഥ പൂജേഥ ഥോമേഥേതം മഹാജുതിം;
ഏവം വദന്താ സബ്ബേ തേ നാഗരാ പുരിസുത്തമം,
ഗന്ധപുപ്ഫേഹി പുജേന്താ നമസ്സന്താ തമന്വഗും;
നേത്താരിത്തേഹി പാജേന്താ മുനിനോ രൂപസാഗരേ,
ജന്തവോ മനനാവായോ പാരം പസ്സിംസു നോ തദാ;
൧൨൬. ¶
തദാ ലോകേകനയനോ സപദാനേന വീഥിയം,
ചരം യാപനമത്തംവ ലദ്ധാഗമ്മ പുരാ ബഹി;
പണ്ഡവം ഗിരിമാസജ്ജ തസ്സച്ഛായായ സോ മുനി;
സങ്ഘാടിം പഞ്ഞപേത്വാന നിസജ്ജ പുരിസാസഭോ;
അദിട്ഠപുബ്ബം ദിസ്വാന പത്തേ മിസ്സകഭോജനം,
സഞ്ജാതപടികൂലോ തം നുദിത്വാ പച്ചവേക്ഖണാ;
അമതം വിയ തം ഭുത്വാ വിക്ഖാലേത്വാ മുഖം ദകാ,
പത്തേ വത്തം ചരിത്വാന മുഹുത്തം തത്ഥ വിസ്സമി;
പവത്തിം തം നിസാമേത്വാ ബിമ്ബിസാരോ നരിസ്സരോ,
സീഘം തമുപഗന്ത്വാന കതാനുഞ്ഞോ നിസീദിയ;
നിമന്തയിത്വാ രജ്ജേന അനിച്ഛന്തേ യതിസ്സരേ,
അനുഗ്ഗഹായ മേ യുത്തം ബുദ്ധഭൂതേനിധാഗമം;
ഏവം നിമന്തിതോ തേനാധിവാസേത്വാ മഹാമതീ,
അഗമാസുരുവേലായ മതുലോരു പരക്കമോ;
പധാനം പദഹിത്വാന ഛബ്ബസ്സമതിദുക്കരം,
പകാസേത്വാന ലോകസ്സ മോക്ഖം നത്ഥിതി തേന സോ;
തതോപ്പഭുതി വത്തന്തോ മജ്ഝിമപ്പടി പത്തിയം,
കായസ്സാനുഗ്ഗഹം കത്വാ തതോ സമ്പിണിതി’ന്ദ്രിയോ;
മൂലേ’ജപാലനിഗ്രോധപാദപസ്സ മഹാമുനി,
നിസീദി നിജസോഭാഹി ഓഭാസേന്തോ ദിസോദിസം;
തദാ സേനാനി നിഗമേ സുജാതാ ഖീര ദായികാ,
സമ്പുണ്ണമനസങ്കപ്പാ യാചിത്വാ വടദേവതം;
ധീരം ദേവോതി മഞ്ഞന്തി തുട്ഠഹട്ഠാ പമോദിതാ,
ഹേമപാതിം സപായാസം ദത്വാന ഇദമ’ബ്രുവി;
൧൩൮. ¶
യഥാ മയ്ഹം മഹാദേവ ഇദ്ധാ പത്ഥിത പത്ഥനാ,
തഥേവ തവ സങ്കപ്പോ ഖിപ്പമേവ സമിജ്ഝതു;
ഇതി വത്വാന വന്ദിത്വാ കത്വാ ച നം പദക്ഖിണം,
പക്കന്തായ സുജാതായ ധീരോ പാതിം സമാദിയ;
ഉപഗന്ത്വാനാതിരമ്മം നദിം സോ നീലവാഹിനിം,
സുപ്പതിട്ഠിതനാമമ്ഹി നദീതിത്ഥേ നിസീദിയ;
ഭുഞ്ജിത്വാ ഊനപണ്ണാസ പിണ്ഡം കത്വാന ഭോജനം,
വിസ്സജ്ജേത്വാ തതോ പാതിം പടിസോതം നരാസഭോ;
തതോ സാലവനുയ്യാനേ വിസ്സമന്തോ ദിവാദിനേ,
ദിസ്വാന സുപിനേ പഞ്ച അത്ഥം തേസം വിചിന്തിയ;
ആബോധിമൂലതോ മഗ്ഗേ ദേവേഹി സമലങ്കതേ,
മണിതോരണപാലീഹി പുണ്ണകുമ്ഭദ്ധാജാദിഹി;
സായണ്ഹസമയേ നാഥോ ഗച്ഛന്തോ ബോധി സന്തികം,
ദിസ്വാന സോത്ഥിയം നാമ ഥൂയമാനം ദിജുത്തമം;
തേന ദിന്നട്ഠ മുട്ഠിന്തു ഗഹേത്വാ നീലസദ്ദലം,
ബോധിമൂലമുപാഗമ്മ കത്വാന തം പദക്ഖിണം;
അകാസി തീണസന്ഥാരം പാചീനാഭിമുഖം തദാ,
തതോ മഹിം ദ്വിധാ കത്വാ സമുട്ഠാസി മഹാസനം;
ഉച്ചം ചുദ്ദസഹത്ഥേന നാനാ ചിത്ത വിചിത്തിതം,
അഭട്ഠനഹിത്ഥ തത്രട്ഠോ ഇച്ചേവം ദള്ഹമാനസോ;
കാമം തചോ നഹാരൂ ച അട്ഠി ച അവസിസ്സതു,
ഉപസുസ്സതു മേ ഗത്തേ സബ്ബന്തം മംസലോഹിതം;
ന ഉട്ഠഹാമബുജ്ഝിത്വാ ന ജഹേ വീരിയം മമ,
അധിട്ഠഹിത്വാ ഏവം സോ നിസീദി വജിരാസനേ;
൧൫൦. ¶
അനതിക്കമം ഠപേത്വാന ചരണം ചരണുപരി,
കമലം കമലേനേവ മണിബന്ധം വിധായ സോ;
ബാലാസോകദലാസത്ത പരം വാ’സോകപല്ലവം,
നിധായ നയനാനത്ദ പാണിം പാണിതലേ ജിനോ;
യഥാ സഞ്ഝാഘനാലീഢ തുങ്ഗകഞ്ചന പബ്ബതോ,
സുരത്തചീവരച്ഛന്ന ചാരിഗത്ത വിരാജിതോ;
ഉദയാവലകോടിമ്ഹി ദിപ്പന്തോവ ദിവാകരോ
കന്ധരോപരി ദിപ്പന്ത മുഖമണ്ഡലമണ്ഡിതോ;
യഥാ ചാമികരബ്യമ്ഹേ സുനീലം സീഹപഞ്ജരം,
അസമ്പകമ്പപമ്ഹേഹി പിഹിതദ്ധസുലോചനോ;
നീലുപ്പലകലാപംച ജനനേത്താലിപാതനം,
സജ്ഝുദണ്ഡസമാബദ്ധ ബോധിക്ഖന്ധമഫസ്സി സോ;
നിസിന്നോ ബോധിതോ ഛേജ്ജ പവാളതരുണങ്കുരാ,
പതമാനാ സമന്താസും തേജം വിയ കുബുദ്ധീനം;
ദേവാ തത്ഥ സമാഗഞ്ജും ഖിപ്പം ദസസഹസ്സിയം,
കമലാസനോരഗാ ചേവ സിദ്ധവിജ്ജാധരാദയോ
സഹമ്പതി മഹാബ്രഹ്മാ ബ്രഹ്മസേനാപുരക്ഖതോ,
സിതാതപത്തം ധാരേന്തോ ഠീതോ സമ്ബുദ്ധ സന്തികേ;
വീസം രതന സതായാമം വിജയുത്തര നാമകം,
സങ്ഖം ധമേന്തോ അട്ഠാസി സാദരോ പാകസാസനോ;
സുയാമോ സഹ സേനായ ഥോമയന്തോ നരാധിപം,
മണിതാലവണ്ടം പഗ്ഗയ്ഹ മന്ദമന്ദേന വീജതി;
ജിതകിത്തി ലതഗ്ഗമ്ഹി സസ്സ പുപ്ഫംച പുപ്ഫീതം,
വാളവിജനിമുഗ്ഗയ്ഹ അട്ഠാ സന്തുസിതോ തഹിം;
൧൬൨. ¶
ബേലുവം വീണമാദായ ഗീതം നാനാലയാനുഗം,
പഞ്ചസിഖോ ഠിതോ തത്ഥ ഗായമാനോ അനേകധാ;
മഹാകാലോ’പി നാഗിന്ദോ നാഗസങ്ഘപുരക്ഖതോ,
ഥോമേന്തോ തത്ഥ അട്ഠാസി നവാരഹഗുണാദിഹി;
രങ്ഗഭുമിം മാപയിത്വാ ഗഹേത്വാന വരങ്ഗനാ,
ഉപഹാരം കരോന്തട്ഠാ തിമ്ബരൂ സൂരിയവച്ചസാ;
ആഗന്ത്വാ സഹ സേനായ സിതങ്ഗോ സിതഭുസനോ,
ധതരട്ഠോ ഠിതോ പുബ്ബേ ആരക്ഖം കുരുമാനകോ;
പൂരേന്തോ സകസേനായ ദക്ഖിണസ്സം വിരൂള്ഹകോ,
ആരക്ഖം കുരുമാനട്ഠാ നീലങ്ഗോ നീലഭുസനോ;
വിരൂപക്ഖോ’പി അട്ഠാസി പാലയം പച്ഛിമം ദിസം,
രത്തങ്ഗാഭരണോ വമ്മീ നിജസേനാപുരക്ഖതോ;
ഉത്തരസ്സം സസേനായ ആരക്ഖം കുരുമാനകോ,
സോണ്ണവണ്ണങ്ഗാഭരണോ അട്ഠാസി നരവാഹനോ;
കിമേത്ഥ ബഹുലാപേന ജാതിക്ഖേത്തമ്ഹി ദേവതാ,
നാഗതാ നേവ വാഹേസും സബ്ബേ ഏത്ഥേ’വ ഓസടാ;
ഗഗനാതോതിണ്ണകേതു പാദേഹി പഥവീതലേ,
നാഗാദയോ ന ധുതാസും കേതുനം ബഹു കാ കഥാ;
ന ധൂതാ ധജപാദേഹി വായുതുദ്ദാമവുത്തിഹി,
താരകാ ഗഗനേ ബ്രൂമോ കിന്നു തത്ഥ ധജാലുതാ;
പുബ്ബദിസാ ചക്കവാള സിലായുഗ്ഗതകേതുനം,
പാദാനി പരഭാഗാദി ചക്കവാളസിലന്വഗും;
ചക്കവാള മഹാമേരു യുഗന്ധര നഗാദയോ,
പുപ്ഫാവതംസകാ’വാസും നാനാവണ്ണേഹി സങ്ഖതാ;
൧൭൪. ¶
വാമാമന്ദമകരന്ദ ബിന്ദുസന്ദോഹ സുന്ദരം,
ഉല്ലോല പദുമാകിണ്ണ വിതാനം വാസി അമ്ബരം;
ഖിത്തസോഗന്ധചുണ്ണാനി ദേവബ്രഹ്മാദിനാ തഹിം,
വിതാനം വിയ ഖായന്തി ചക്കവാളഗ്ഗമണ്ഡപേ;
കപ്പൂരാഗരുധൂപേഹീ തത്ഥ തത്ഥുഗ്ഗതേഹി മാ,
കാലബ്ഭകൂടച്ഛന്നോവ ആസി മഞ്ഞം കഥേമു കിം;
ജാതിക്ഖേത്തേസു ദേവേഹി കതഗ്ഘികുസുമാദിനാ,
നോസീനാ ധരണീ ഭാരാ ദിസേഭാനം ബലം അഹോ;
അമ്ബരാലമ്ബമാനാനീ പുപ്ഫദാമാനി ഭൂതലം,
ആകഡ്ഢനായ ദേവേഹി ബദ്ധരജ്ജുവ ഭാസരേ
അഞ്ഞോഞ്ഞകരമുഗ്ഗയ്ഹ ഗഗനേ സുരസുത്ദരീ,
പരിബ്ഭമന്താ ഗായന്തി തത്ഥ തത്ഥ മനോരമം;
ഉഭോ ഭുജേ വികാസേത്വാ മണ്ഡിതം സുരസുത്ദരീ,
ഭമന്തി ഭന്തഭേണ്ഡുവ തത്ഥ തത്ഥമ്ബരേ യുഗാ;
നീലുപ്പലകലാപാദീ ഗഹേത്വാന സുരങ്ഗനാ,
ഠീതാസും പരിവാരേത്വാ പൂജമാനാ നരിസ്സരം;
രത്നപല്ലവകലഹാര കമലുപ്പല സങ്ഗതേ,
സന്നീരകുസുമാകിണ്ണേ പുണ്ണേസോഗന്ധവാരിഹീ;
കഞ്ചനാദിഘടേ ഗയ്ഹ അമ്ബരേ സുരസുന്ദരീ,
കത്വാന സുഗതം മജ്ഝേ പൂജയിംസു സമന്തതോ
കഞ്ചനാദാസഹത്ഥാ ച കാചീ കഞ്ഞാ തഥാ ഠിതാ,
താലവണ്ടേ ഗഹേത്വാന ഠീതാസും കാചി ദേവതാ;
കാചി മങ്ഗല സംയുത്ത വചനാ തവ പത്ഥനാ,
സമിജ്ഝതുതി ഘോസേന്തീ പരിവാരേത്വാ ഠിതാ ജിനം;
൧൮൬. ¶
സിരിവച്ഛാദി പഗ്ഗയ്ഹ അട്ഠമങ്ഗലമുത്തമം,
ഠിതാസും ഗഗനേ നാരീ പരിവാരേത്വാ മുനിസ്സരം;
നച്ചന്തി കേചി കീളന്തി സേലേന്തി ച ലലന്തി ച,
വാദേന്തി കേചി ഗായന്തി വേലുക്ഖേപം കരോന്തി ച;
നേകപുപ്ഫഗ്ഘിപന്തീ ച തഥാ ദീപഗ്ഘിപന്തി ച,
മണിചാമീകരാസജ്ഝു അഗ്ഘികാ പന്തിയോ തഥാ;
ആബ്രഹ്മഭവനുഗ്ഗമ്മ ചക്കവാളസമന്തതോ,
തിട്ഠന്തി ജലമാനായോ ബുദ്ധസ്സ മങ്ഗലുസ്സവേ;
സത്തരതനസമ്ഭുതാ നാനാ തോരണപന്തീയോ,
ഹേമരമ്ഭാമയാ ചാപി തഥാ ദുസ്സമയാ സിയും;
നാനാവണ്ണേഹി നേകേഹി ഛത്തേഹി ച നിരന്തരം,
ചക്കവാളോദരം ആസി സരംച കമലാകുലം;
തത്ഥ തത്ഥുജ്ജലാനേക യന്തദീപാവലീ മഹീ,
താരകാജാലകാകിണ്ണ ഗഗനങ്ഗനസന്തിഭാ;
ധജന്തരിത ഛത്താ’സും ചക്കവാളഗിരൂപരി,
നിരന്തരാ’സും തത്ഥേവ ഘടദീപാ ച തോരണ;
നാനാതുരിയനാദേഹി നാനാസങ്ഗീതിതാഹി ച,
സാധുവാദേഹി നേകേഹി ചക്കവാളോ ഫുടോ അഹൂ;
അഹോ മഹന്തതാ തസ്സ ബുദ്ധസ്സ കതമങ്ഗലേ,
പൂജാവിസേസം തം കോ ഹി മുഖേനേകേന ഭാസതീ;
ചതുമ്മുഖോ സഹസ്സക്ഖോ ദ്വിസഹസ്സനയനോ ഫണീ,
ദസകണ്ഠോ’പി തം സബ്ബം നേവ സക്കോന്തി ഭാസിതും;
ഏവം സുരാസുരബ്രഹ്മ വേനതേയ്യോരഗാദിഹി,
നിരന്തരം കതാനേക മഹാമഹ സമാകുലേ;
൧൯൮. ¶
തസ്മിന്തു വാസരേ മാരോ പസ്സിത്വാ ഭുവനം ഇദം,
ആമന്തേത്വാ സാനുവരേ ആഹേവം സകുതൂഹലോ;
സബ്ബേ ദിബ്ബവിമാനാ ഭോ സുഞ്ഞാ ദിസ്സന്തി ഛഡ്ഡിതാ,
പുരപാലമ്പഹാപേത്വാ ക്വ ഗതാ’സും സദേവകാ;
കിമ്ഭോ മാര ന ജാനാസി മത്തോ സുത്തോ’സി അജ്ജ കിം,
സുദ്ധോദനിയ സിദ്ധത്ഥോ മായായ തനയോ അയം;
പുരേത്വാ പാരമീ സബ്ബാ കത്വാന അഭിനിക്ഖമം,
ബോധിമുലേ നിസിന്നോ സി അജ്ജ ബുദ്ധോ ഭവാമീതി;
തസ്സ പൂജാവിധാനത്ഥം ദസസഹസ്സീസു ദേവതാ,
സമാഗതാ ഹട്ഠതുട്ഠാ കരോന്തജ്ജ മഹാമഹം;
കിന്നു തേ ബധിരം സോതം കിന്നു പരിഹായി ലോചനം,
ധജഗ്ഗാ തേ ന ദിസ്സന്തി ഉല്ലോലം തേ ന സൂയതി;
തേസം തം വചനം സുത്വാ അന്തകോ ഖലു പാപിമാ,
ദുക്ഖിതോ ദുമ്മനോ തേസം സോചന്തോ ഇദമ്ബ്രുവി;
അഹോ വതാ’തിപരിഹാനി സംസാരസ്സ മഹാ അയം,
അസാരോ ഖലു സംസാരോ സിദ്ധത്ഥേ വിഭവം ഗതേ;
അഹോ വതാ’തി നട്ഠമ്ഹാ തിവട്ടം പരിപുരിതം,
ഹോതി ഭോ ദഹനാ ദഡ്ഢവനംവാതി അലക്ഖികം;
നിരാലോകം തിലോകം ഭോ അസുരം വാസരം യഥാ,
പരിമോസരതനം ഹോതി രജ്ജം വേദം ജഗത്തയം;
മമേസ വിസയം ഹിത്വാ യാതി സിദ്ധത്ഥദാരകോ,
തേന യാതേന മഗ്ഗേന നിക്ഖമന്തി ബഹുജ്ജനാ;
ഭവന്തം ന കരോതേസോ യാവ സുദ്ധോദനത്രജോ,
ഏഥ ഗച്ഛാമ സിദ്ധത്ഥമസിദ്ധത്ഥം കരോമ ഭോ;
മാപേഥ ഭേരവം വണ്ണം ബീഭച്ഛം ദുദ്ദസം ഖരം,
സദ്ദേനേവ പലാപേഥ തൂലഭട്ടംവ വായുനാ;
൨൧൧. ¶
തസ്സ തം വചനം സുത്വാ മാരസേനാ സമാഗമും,
നാനാവേസധരാ ഹുത്വാ നാനായുധ സമങ്ഗിനോ;
യോജനാനം തദാ മാരോ ദിയഡ്ഢസതമുച്ചതോ,
ഗിരിമേഖലമാരുയ്ഹ സേനായ സഹസാ’ഗമീ;
ദിസ്വാന ദുരതോ ഏത്തം ദേവാ മാരം സവാഹിനിം,
ഭയട്ടാപഗമും ഖിപ്പം ധാവമാനാ ദിസോദിസം;
സംഖിപ്പ ഖിപ്പം സച്ഛത്തം ബ്രഹ്മാ ധാവി പരമ്മുഖോ,
കത്വാന പിട്ഠിയം സങ്ഖം സക്കോ ധാവി വിസങ്കിതോ;
മഹാകാലോ’പി നാഗിന്ദോ നിമുജ്ജ മഹിയം തദാ,
വത്തദത്തകരോ ഭീരു സകേ നിപതി മഞ്ചകേ;
സം സം പൂജാവിധാനന്തു ഛഡ്ഡേത്വാന സദേവകാ,
ഗതാസും സുഞ്ഞകം ആസി ചക്കവാളമിദം തദാ;
നിസ്സിരീകം പദേസം തം അസോഭം അസമഞ്ജസം,
അഹോസി പതിതാനേക പൂജാഭണ്ഡസമാകുലം;
ഏകോവ തത്ഥ സുഗതോ നിസീദി വജിരാസനേ,
പജ്ജലം നിജസിരിയാ സൂരിയോവ യുഗന്ധരേ;
അകമ്പോ ച അസന്ത്രാസീ ലോമഹംസ വിവജ്ജിതോ,
അഭീതോ സീഹരാജാവ മിഗച്ഛാപാനമഗ്ഗതോ;
തതോ ധമ്മിസ്സരസ്സഗ്ഗേ ദുന്നിമിത്താനി ജായരും,
അന്ധകാരം ദിസാ ആസും ധൂമകേതു ച അമ്ബരേ;
ദിനം ദുദ്ദിനകം ആസി ഹതരംസി ദിവാകരോ,
ഉക്കാപതോ’പി പഞ്ഞായി ദിസാഡാഹോപപജ്ജഥ;
അഘനേ ഗഗനേ ആസും ഇന്ദചാപവിരജ്ജുതീ,
അനലാസനിയോ’ദിത്താ തത്ഥ തത്ഥ പതന്തീ ച
കാകോലസങ്ഘാ വസ്സിംസു ഉണ്ണ സകുണകോസിയാ,
ചരിംസു അമ്ബരേ’പേതാ കബന്ധാ ച ഭയാവഹാ;
൨൨൪. ¶
സേനം സംവിദഹിത്വാന തതോ മാരോ അഭിദ്ദവി,
ആഗന്ത്വാ ചക്കവാളമ്ഹി ഠിതോ ജിനമുദിക്ഖിയ;
ഏകകസ്സ മനുസ്സസ്സ സന്തികോപഗമം മമ,
ന യുത്തഞ്ഹി ഗജോ യാതി ഗജം നോ യാതി കോത്ഥുകം;
നേതം ഗരു പലാപേതും കാലോ ഇതി വിചിന്തിയ,
മാപേസി കുപിതോ ഖിപ്പം കപ്പനില സമാനിലം;
ഖിപന്തോ ഗഗനേ ഖിപ്പം ഉദ്ധരിത്വാ വനസ്പതീ,
കത്വാന വനമുമ്മൂലം വിദ്ധംസേന്തോ അസേസകം;
ചാലേത്വാ താലസാലാദിം ലുഞ്ചിത്വാ ഗഗനേ ഖിപം,
പാതേന്തോ ചക്കവാളന്തേ വാജിസീഹ ഗജാദയോ;
പഹരിത്വാ വിവത്തേത്വാ ഗിരികൂടാനി ഉക്ഖിപം,
ഭമയന്തോ നഭോമജ്ഝേ ധാവതേവ തതോ തതോ;
സിലാഹി സിലാസങ്ഘട്ട മഹാനാദം പവത്തയം,
പാതേന്തോ ദഹനഞ്ചാപി ധൂമമമ്ബര മുക്ഖിപം;
ഭമയന്തോ ഗഹേത്വാന അമ്ബരേ ഛദനിട്ഠികാ,
പാസാദേ പരിവത്തേത്വാ പഹരന്തോ നഗാദിസു;
ഖനന്തോ പഥവിം പംസും ഗഹേത്വാമ്ബരമണ്ഡലേ,
ബന്ധന്തോവ പരം ഭുമിം ഭിന്ദന്തോ തുങ്ഗപബ്ബതേ;
ഭയാനകേന സദ്ദേന ഉപഗമ്മ മഹാമുനിം,
ചാലേതും നേവ സോ സക്ഖി അംസുമത്തമ്പി ചീവരേ;
തദാസി വിജയോ തസ്സ സമ്ബുദ്ധസ്സ സിരീമതോ,
പഠമേ മാരയുദ്ധമ്ഹി മാരസ്സാസി പരാജയോ;
ഏവം മഹാനുഭാവോതി മന്ത്വാന നരസാരഥിം,
നിച്ചം വന്ദഥ പൂജേഥ സോ ഹി വോ സരണം സദാ;
ഇതി പഠമോ വിജയോ.
൨൩൬. ¶
ദിസ്വാ നമുചി ധീരസ്സ മാലുതേനാനുപദ്ദവം,
ദുക്ഖീ ച ദുമ്മനോ ആസി കോധേനാതുരമാനസോ;
ഹോതു ദാനി മഹോഘേന പവാഹേമി ഇമം യതിം,
മാപേത്വാന മഹാമേഘം സോചനായ അലം മമ;
ഇതി ചിന്തിയ സോ മാരോ മഹാമേഘമമാപയി,
ദിസാസുമ്പിഹിതാ സബ്ബാ അന്ധകാരോ അവത്ഥരി;
ഉപരൂപരി ഗുണാ ഹുത്വാ സഹസ്സാനി സതാനി’പി,
ധാരാധരാ മഹാധാരാ വത്തയിംസു സമന്തതോ;
സോദാമിനീസഹസ്സേഹി വിനദ്ധംവ നഭം അഹൂ,
തത്ഥ തത്ഥ ദിസാഭാഗേ ഇന്ദചാപാ അവത്തഥ;
മഹാരജതരജ്ജൂഹി സിബ്ബിതാവ നഭാവനീ,
ധരാധരോരുധാരാഹി നിരന്തരപവത്തിഹി;
തത്ഥ തത്ഥ പതന്താനി ഘോരാസനിസതാ അഹും,
മഹാഭീമ നഭോ ഭേരിസ്സനാ ആസും തഹിം തഹിം;
ഉദ്ധരന്തോ മഹാസേലേ മഹോഘോ ച തദുബ്ഭവേ,
കേലാസ സിഖരാകാര ഏണേപുഞ്ജേ സമുബ്ബഹം;
മഹാഥൂപപ്പമാണാദി മഹാബുബ്ബുലമുബ്ബഹം,
ഗമ്ഭീരോ പുഥുലോ ചണ്ഡോ ഉപഗമ്മ ജിനന്തികം;
സരീരേ ലോമമത്തമ്പി തേമേതുമസമത്ഥകോ,
ഗതോ മഹോഘോ ബുദ്ധസ്സ’ഭോ’നുഭാവമഹന്തതാ;
തദാസി വിജയോ തസ്സ സമ്ബുദ്ധസ്സ സിരീമതോ,
ദുതിയേ മാരയുദ്ധമ്ഹി മാരസ്സാസീ പരാജയോ;
ഏവം മഹാനുഭാവോതി മന്ത്വാന നര സാരഥിം,
നിച്ചം വന്ദഥ പൂജേഥ സോ ഹി വോ സരണം സദാ;
ദുതിയോ വിജയോ.
൨൪൮. ¶
തതോ മാരോ അസക്കോന്തോ വസ്സോഘേന ഉപദ്ദവം,
കാതും തസ്സ ഉസൂയാദി കോപാകുലമനോ തദാ;
ഭവതജ്ജ കിമേതേന മാരണേ തസ്സ കിം ഗരു,
ഇദാനങ്ഗാരവുട്ഠീഹി ഝാപേമി സഹസാ ഇമം;
ഇതി ചിന്തിയ സോ മാരോ മാപേത്വാങ്ഗാര വുട്ഠിയോ,
പേസേസി നഭസാ തസ്സ സമ്ബുദ്ധസ്സ ഉപന്തികം;
മഹാപബ്ബതസങ്കാസ ജലിതങ്ഗാര രാസയോ,
ധാവിംസു നഹസാ തത്ഥ അച്ചിമന്തോ മഹബ്ഭയാ;
ചിച്ചിടായന സദ്ദേഹി പൂരയന്തോ ദിസന്തരം,
ധൂപായന്തോ ഫുലിങ്ഗേഹി മാരസ്സാപി ഭയാവഹാ;
ഉജ്ജാലേന്താ മഹാരുക്ഖേ പബ്ബതേ’പി ച സമ്മുഖേ,
നരകോദരുഗ്ഗതാ അഗ്ഗീ രാസീവാതി ഭയാവഹാ;
ഉപഗന്ത്വാ മുഹുത്തേന നിസിന്നം മുനിപുങ്ഗവം,
മധുമത്താലിഝങ്കാര നാദാകുലദിസാമുഖാ;
പാതേന്തി സതതാമന്ദ മകരന്ദജ ബിന്ദവോ,
മാലാവതംസകാ ഹുത്വാ പാദമുലേ പതിംസു താ;
തദാസി വിജയോ തസ്സ സമ്ബുദ്ധസ്സ സിരീമതോ,
തതിയേ മാര യുദ്ധമ്ഹി മാരസ്സാസി പരാജയോ;
ഏവം മഹാനുഭാവോതി മന്ത്വാന നരസാരഥിം,
നിച്ചം വന്ദഥ പൂജേഥ സോ ഹി വോ സരണം സദാ;
തതിയോ വിജയോ.
തേനാനുപദ്ദുതം ബുദ്ധം പസ്സിത്വാന പജാപതി,
ദുക്ഖിതോ ദുമ്മനോ ഹുത്വാ ഏവം ചിന്തേസി ദുമ്മതി;
പാസാണവസ്സം മാപേത്വാ ചുണ്ണേത്വാ പനിമം യതിം,
വിദ്ധംസേമീതി ചിന്തേത്വാ മാപേസൂപലവസ്സകം;
൨൬൦. ¶
തസ്മിം വസ്സേ’തി ബീഭച്ഛാ ധൂമായന്താ സജോതികാ,
ജലിതങ്ഗാരസങ്കാസാ പാസാണുച്ചാവചാ ബഹൂ;
കരാനഞ്ഞോഞ്ഞസങ്ഘട്ടാ മഹന്തം ഭേരവം രവം,
ദുദ്ദിനം ധൂമജാലാഹി കുരുമാനാ സമന്തതോ;
സത്ഥൂപഗന്ത്വാഭിമുഖം സന്തമാലാഗുലാ വിയ,
പതിംസു സിരിപാദേ തേ അമന്ദാമോദവാഹിനോ;
തദാസി വിജയോ തസ്സ സമ്ബുദ്ധസ്സ സിരീമതോ,
ചതുത്ഥേ മാരയുദ്ധമ്ഹി മാരസ്സാസി പരാജയോ;
ഏവം മഹാനുഭാവോതി മന്ത്വാന നരസാരഥിം,
നിച്ചം വന്ദഥ പൂജേഥ സോ ഹി വോ സരണം സദാ;
ചതുത്ഥോ വിജയോ.
ദിസ്വാനത്തമനോ മാരോ ദിത്തോ കോധഗ്ഗിനാ തദാ,
മാപേത്വാ’യുധവസ്സം സോ പേസേസി തദുപന്തികം;
നേത്തിംസച്ഛൂരികാ സത്തി ഹേണ്ഡിവാല ഗദാദയോ,
തിണ്ഗധാരാ പജ്ജലിതാ അചിരജ്ജുതി സന്നിഭാ;
യഥാ പുപ്ഫോപഹാരോപഗന്ത്വാന ഗഗനങ്ഗനാ,
ഏവം സമ്ബുദ്ധപാദേസു പതിംസു പരിവത്തിതാ;
തദാസി വിജയോ തസ്സ സമ്ബുദ്ധസ്സ സിരീമതോ,
പഞ്ചമേ മാരയുദ്ധമ്ഹി മാരസ്സാസി പരാജയോ;
ഏവം മഹാനുഭാവോതി മന്ത്വാന നരസാരഥിം,
നിച്ചം വന്ദഥ പൂജേഥ സോ ഹി വോ സരണം സദാ;
പഞ്ചമോ വിജയോ.
തം ദിസ്വാ പാപിമാ കുദ്ധോ യം യം തസ്സ കരോമ’ഹം,
തം തം’ദാനീ ന സക്കോതി കിഞ്ചി കാകുമു’പക്കമം;
൨൭൧. ¶
മാപേസി കുക്കുലം വസ്സം മാരമീത’ധുനാ മുനിം,
സോ’ഗാ’കാസാ സമ്പദിത്തോ ധൂമായന്തോവ പജ്ജലം;
ജിനസ്സാഭിമുഖം ഗന്ത്വാ കുക്കുലോ പരിവത്തിയ,
ചന്ദനസ്സ സിതബ്ഭസ്സ ധൂലീ ഹുത്വാന പഗ്ഘരി;
തദാസി വിജയോ തസ്സ സമ്ബുദ്ധസ്സ സിരീമതോ,
ഛട്ഠേ നമുചി യുദ്ധമ്ഹി മാരസ്സാസീ പരാജയോ;
ഏവം മഹാനുഭാവോതി മന്ത്വാന നരസാരഥിം,
നിച്ചം വന്ദഥ പൂജേഥ സോ ഹി വോ സരണം സദാ;
ഛട്ഠോ വിജയോ.
തതോ ദിസ്വാന തം കണ്ഹോ കണ്ഹസേനാ പുരക്ഖതോ,
സങ്കുദ്ധോ പേസയി തത്ഥ വസ്സം സോ സികതാമയം;
ഖദീരങ്ഗാര സങ്കാസാ വാലുകാ ഗഗനാഗതാ,
ഭസ്സന്താ ജിനപാദന്തേ വാസചുണ്ണത്തമാഗതാ;
തദാസി വിജയോ തസ്സ സമ്ബുദ്ധസ്സ സിരീമതോ,
സത്തമേ മാരയുദ്ധമ്ഹി മാരസ്സാസി പരാജയോ;
ഏവം മഹാനുഭാവോതി മന്ത്വാന നര സാരഥിം,
നിച്ചം വന്ദഥ പൂജേഥ സോ ഹി വോ സരണം സദാ;
സത്തമോ വിജയോ.
തമ്പി ദിസ്വാ അസജ്ജന്തോ അഹിരീ കോപകേതുകോ,
മാപേത്വാ പലിപന്ദാനി തത്ഥ ഓസീദയാമി തം;
ഇതി ചിന്തിയ മാപേത്വാ പേസേസി പലിപം ഘനം,
ധൂപായന്തോ പജ്ജലന്തോ ഗന്ത്വാ സോ നഭസാ ലഹും;
സമ്ബുദ്ധസിരിപാദമ്ഹി സമ്പത്തോ നിബ്ബുതോ തതോ,
നാനാസുഗന്ധസമ്ഭുത ഗന്ധകദ്ദമതം ഗതോ;
൨൮൨. ¶
തദാസി വിജയോ തസ്സ സമ്ബുദ്ധസ്സ സിരീമതോ,
അട്ഠമേ മാരയുദ്ധമ്ഹി മാരസ്സാസി പരാജയോ;
ഏവം മഹാനുഭാവോതി മന്ത്വാന നരസാരഥിം,
നിച്ചം വന്ദഥ പൂജേഥ സോ ഹി വോ സരണം സദാ;
ഓലോകേന്തോ തതോ മാരോ മാരാരിം സിരിയുജ്ജലം,
ദിസ്വാ ചിത്തമ്പസാദേതുമസക്കോന്തോ’തി കോപവാ;
അജ്ജേതമന്ധകാരസ്മിം പക്ഖിപിത്വാ പമോഹിതും,
മയ്ഹം ഭാരോതി ചിന്തേത്വാ മാപേസി തിമിരം ഘനം;
ലോകന്തരേസു സമ്ഭുത തിമിസോ’വ ഭയാവഹോ,
ഗന്ത്വാന ഗഗനാ സോ ഹി പത്വാന മുനിസന്തികം;
യഥാ തിമിരമായാതി വിനാസം സുരിയുഗ്ഗതേ,
ഏവമാസി ജിനഗ്ഗമ്ഹി അന്ധകാരോ തഥാവിധോ;
തദാസി വിജയോ തസ്സ സമ്ബുദ്ധസ്സ സിരീമതോ,
നവമേ മാരയുദ്ധമ്ഹി മാരസ്സാസി പരാജയോ;
ഏവം മഹാനുഭാവോതി മന്ത്വാന നരസാരഥിം,
നിച്ചം വന്ദഥ പൂജേഥ സോ ഹി വോ സരണം സദാ;
നവമോ വിജയോ.
ഏവം നവഹി വുട്ഠിഹി കത്വാ മാരോ മഹാ ഭവം,
ന തസ്സോപദ്ദവം ദിസ്വാ ദിത്തകോപാനലാകുലോ;
ഗഹേത്വാന തതോ ഖിപ്പം ഠപിതം അത്തഗുത്തിയാ,
ചക്കായുധം മഹാതേജം കുപിതോ ഖിപി വേഗസാ;
ധാരാധരം തമുഗ്ഗയ്ഹ കുദ്ധോ പഹരതേ യദീ,
കലീരംവ അസജ്ജന്തോ വിഖണ്ഡേതി പജാപതി;
തഥേവ സോ മഹിം കുദ്ധോ മാരോ ഖിപതി വേഗവാ,
ന ഭവന്തോസധാ പാണാ വിസുസ്സന്തി സരാദയോ;
൨൯൪. ¶
തഥേവ കുപിതോ തേന ഖിപതേ സോ മഹമ്ബുധിം,
വിലയം ജലജാ യന്തി സുസ്സതേ സോ മഹണ്ണവോ;
ഏവം മഹാനുഭാവോ സോ ഗച്ഛന്തോ ജലമ്ബരേ,
പത്വാന പതിതോ നാഥം ഹുത്വാന പുപ്ഫചുമ്ബടം;
തദാസി വിജയോ തസ്സ സമ്ബുദ്ധസ്സ സിരീമതോ,
ദസമേ മാരയുദ്ധമ്ഹി മാരസ്സാസി പരാജയോ;
ഏവം മഹാനുഭാവോതി മന്ത്വാന നരസാരഥിം,
നിച്ചം വന്ദഥ പൂജേഥ സോ ഹി വോ സരണം സദാ;
ദസമോ വിജയോ.
ഇതി കോപഗ്ഗിനാ ദിത്തമനം മാരം തദാ ജിനോ,
കരുണാജലസേകേന നിബ്ബാപേന്തോ നിസീദി സോ;
ഏവം കത്വാപി സോ കുദ്ധോ അലദ്ധവിജയോ തദാ,
ആമന്തേസി സകം സേനം പലയാനലഭേരവം;
ഏഥാസു വത’രേ മയ്ഹം അസ്സവാ മാരകിങ്കരാ,
നാനാവേസധരാ ഹോഥ ധാരേഥ വിവിധായുധേ;
സദ്ദേഹേതം പലാപേഥ യാഥ ഗണ്ഹഥ ബന്ധഥ,
പാദേ ഗഹേത്വാ ഖിപഥ ചക്കവാളന്തരം ഇതോ;
അഥഗാ സഹ വാചാഹി ഭിംസാ സാ മാരവാഹിനീ,
തുരങ്ഗ വ്യഗ്ഘ മാതങ്ഗ സീഹാദിരൂപ ഭിംസനാ;
സാ മാരസ്സുഭതോ പസ്സേ ചതുവീസതിയോജനേ,
ഠിതാ പച്ഛിമഭാഗമ്ഹീ ചക്കവാളസിലാവധിം;
ബഹലത്തേന സാ ആസി സമ്പുണ്ണ നവയോജനാ,
യക്ഖ പേത പിസാചാദി വേസേഹി ഭയവാഹിനീ;
സംവട്ട വാതസമ്പാത ഖുഭീതമ്ബുധിനോ വിയ,
ഉല്ലോല ഭിമഘോസോ തു ഗതോ ബ്രഹ്മപുരാവധിം;
൩൦൬. ¶
ദന്ത സങ്ഘട്ട സഞ്ജാത ജാലാമാലാ സമാകുലാ,
തേസംഗാരാ’വ ദിത്താസും കോധുമ്മീലിത ലോചനാ
വഹന്തി ധൂമക്ഖന്ധാനി മുഖകോടര കോടിഹീ,
നീഹടാ നീഹടാ ജിവ്ഹാ സുഭീമോരഗതം ഗതാ;
ഉദ്ധരിത്വാന താലാദി കരിത്വാന സരാസനേ,
ഭുജങ്ഗേ ച ഗുണേ കേചി ഗാള്ഹമാകഡ്ഢയന്തി ച;
പുണ്ഡരീകച്ഛ സീഹാദീ ഖിപന്താഭിമുഖേ തദാ,
ധാവന്തേകേ സമുഗ്ഗയ്ഹ പുരതോ ദിത്തപബ്ബതേ;
ഭയാനകാതി നേകാനി സീസാനേക കലേബരേ,
മാപയിത്വാന പുരതോ ധാവന്തി കേചി കിങ്കരാ;
സീസേന സീഹസങ്കാസാ ഗത്തേന മനുജോപമാ,
ബുദ്ധസ്സാഭിമുഖം കേചി ധാവന്തി മാര കിങ്കരാ;
കണ്ഠീരവാകാരദേഹാ മുഖേന ഖലു രക്ഖസാ,
ഹുത്വാന അഭിധാവന്തി കേചിമാരസ്സ കിങ്കരാ;
ദണ്ഡമാനവകാ സീസഭാഗേനാ’തിഭയാവഹാ,
ഗത്തേന രക്ഖസാ ഹുത്വാ കേചി ധാവന്തി കിങകരാ;
ദീപച്ഛേഭ തുരങ്ഗാനം വ്യഗ്ഘ ഖഗ്ഗവിസാണിനം,
വരാഹ മഹിസാദീനം കണ്ണപാവുര ഭോഗിനം;
സീസാകാര മഹാസീസേ തബ്ബിരുദ്ധേ കലേബരേ,
മാപേത്വാ അഭിധാവന്തി കേചി മാരസ്സ കിങ്കരാ;
ആകഡ്ഢേന്താ കപോലാനം കരസാഖാഹി സമ്മുഖേ,
ദസ്സയന്താ മഹാദാഠം കേചേന്തി മാരകിങ്കരാ;
തിഖിണഗ്ഗനഖാ കേചി ഫാലയന്താ സകോദരേ,
അന്തേ ഗലേ പിലന്ധിത്വാ ധാവന്തി കിങ്കരാപരേ;
ഗിലന്താ കേചി ഫണിനോ ഉഗ്ഗിരന്താ തഥേവ ച,
സീസ കന്ധര കണ്ണന്ത ബാഹു അങ്ഗുലി ആദിസു;
൩൧൯. ¶
സകലേസു സരീരേസു വിസധൂമഗ്ഗി സങ്കുലേ,
ധാരേന്താ’സിവിസേ കേചി ധാവന്ത്യഗ്ഗേ ഭയാവഹാ;
പദിത്തായോഗുലേ ഗയ്ഹ ഖിപന്തേകേ അനേകധാ,
ദിത്തപബ്ബതമുദ്ധച്ച കേചി അഗ്ഗികപാലകേ,
ഖിപന്നാ അഭിധാവന്തി ദട്ഠോട്ഠാ ഭീമലോചനാ;
ലാലയന്താ സകാ ജിവ്ഹാ ഖന്ധേ കത്വാന മുഗ്ഗരേ,
മത്തഭുജങ്ഗ വേസേന ധാവന്തി അപരേ ഭടാ;
പിബന്താ ലോഹിതാനേകേ ഖാദന്താ പിസിതേ പരേ,
പിസാചാവ’ചരും കേചി മുനിരാജസ്സ അഗ്ഗതോ;
ഉല്ലങ്ഘന്താ ച സേലേന്താ ധാവന്താ ജലിതായുധാ,
ഭിമവേസധരാ യക്ഖാ കേചേന്തി ഭകുടീമുഖാ;
പണുണ്ണ സരവസ്സേഹി കുന്തതോമര വുട്ഠിഹി,
ഭേണ്ഡിവാലാ’സിചക്കേഹി നിബ്ഭരാസി ദിഗന്തരം;
യം ദിട്ഠ സുത മത്തേന മരണം ചിത്ത വിബ്ഭമം,
യാതി ലോകോ കഥം കോ തം നിസ്സേസം ഭാസതേ നരോ;
നേകദന്തസഹസ്സേഹി നിക്ഖന്തഗ്ഗിസിഖായുതം,
ദാനനിജ്ഝരസമ്പാതം ഭീമഗജ്ജനഗജ്ജിതം;
നേകസത കരഗ്ഗേഹി ധതായോലഗുളാദികം,
സന്നദ്ധം കവചാദീഹി ഗിരിംച ഗിരിമേഖലം;
ആരൂള്ഹോ പാപിമാ തത്ഥ ഉസ്സാപേത്വാ ജയദ്ധജം,
വിസാലാവത്ത ദാഠഗ്ഗോ ചിപിടഗ്ഗ ഭഗ്ഗ നാസികോ;
ദട്ഠോട്ഠ ഭീമവദനോ ഭകുടീ വലി ലലാടകോ,
കോധാനലേഹി സന്ദിദ്ധ മഹക്ഖോ തമ്ബദാഠീകോ;
നീലപബ്ബത സങ്കാസ വിസമങ്ഗോ മഹോദരോ,
ഗോനസോരഗ സപ്പാദി അങ്ഗീകത സുഭിംസനോ;
൩൩൧. ¶
സഹസ്സബാഹും മാപേത്വാ ഛൂരികാ യട്ഠി സത്തി ച,
കോദണ്ഡചണ്ഡബാണേ ച ചക്ക കുന്തഗദാദി ച;
സങ്കു വേതാലികാ ഫരസു പാസമുഗ്ഗര അങ്കുസേ,
ഗഹേത്വാ കണയഞ്ചാഥ തിസൂല വജിരായുധേ;
പരിവത്തേസി ആകാസേ തേസമഞ്ഞോഞ്ഞ ഘട്ടനാ,
ഉഗ്ഗതേഹി ഫുലിങ്ഗേഹി ധാവന്തേഹി സമന്തതോ;
അഗ്ഗി ചക്കപരീതംച കുരുമാനോ നിജം തനും,
ആവഹന്തോ ഭയം ബ്രഹ്മ സുര സിദ്ധാദീനം തദാ,
സ മാരസേനോ സോ മാരോ ഭഗവന്തമുപാഗമി;
ഉദയാവലകൂടമ്ഹി ഭാസന്തോവ പഭാകരോ,
സുപ്പതിട്ഠിതമേരൂ’വ തികൂടാചല മുദ്ധനി;
കത്വാന പിട്ഠിതോ ബോധിം ഭൂരുഹം വജിരാസനേ,
നിസിന്നോ ഭഗവാ’തീവ നിച്ചലോ അതിരോചതി;
അകമ്പോ സോ മുനീ ഏവമഗ്ഗേ’കാസി നിജം ബലം,
സമ്മപ്പധാനസംയുത്തോ ദയാമേത്തോ മഹേസികോ;
ചതുബുദ്ധഭുമിസങ്ഖാത ജയഭുമിമുദിക്ഖിയ,
ചതുസ്സങ്ഗഹവത്ഥൂനം യോജേത്വാ ദ്വാരകോട്ഠകേ;
യോജേത്വാന ഥിരം തത്ഥ സദ്ധാദിബലകോട്ഠകേ,
സതിപട്ഠാനപാകാരേ അഭേജ്ജിന്ദ്രിയ ഗോപുരേ;
ഥിരഞാണയുധാകിണ്ണേ മേത്താ സന്നാഹ വമ്മിതോ,
അഭീത ഭാരതീ ഭുരി ഭേരിസങ്ഖ പുരക്ഖതോ;
ചതുരങ്ഗവിരിയുത്തുങ്ഗ മാതങ്ഗക്ഖന്ധസങ്ഗതോ,
പുഞ്ഞസമ്ഭാരഭാരേന കമ്പയം വസുധാതലം;
ചരിയത്തയ സങ്ഖാത’മുസ്സാപിത ജയദ്ധജോ,
ഏവം വിധായ മാരാരി മാരസങ്ഗാമ മണ്ഡലം;
ദാനാദയോ മഹായോധേ ആഹൂയ സഹജാതകേ,
സുണാഥ ഭോ ഗിരം മയ്ഹം ഭവതജ്ജ മഹാ ഭവോ;
൩൪൪. ¶
ഏഥ യാഥ സമഗ്ഗത്ഥ ന ഓസ്സക്കഥ സുജ്ഝഥ,
വിജേതും മാരയുദ്ധമ്ഹീ ന സക്കാ’സേസജന്തുഹി;
അജ്ജ ഗച്ഛതി നിട്ഠാനം സോ ഭോ പാരമിതാഭടാ,
സഹുസ്സാഹാ മമഗ്ഗമ്ഹി ദസ്സേഥ വീരിയം സകം;
അഥ ദാനഭടോ ആഹ അപ്ഫോടം ദിഗുണം ഭുജം,
പസ്സദാനി മഹാവീര ബലം മേ മാരധംസനേ;
പരമത്ഥപാരമി യോധം തഥേ’വ ഉപപാരമിം,
ഉഭോ പസ്സേ കരിത്വാന സസേനോ ധാവി ദപ്പവാ;
തഥേവ സീലനാമവ്ഹോ പാരമീഭട’മുത്തമോ,
നിക്ഖമ്മ സഹ സേനായ മാരസേനമഭിദ്ദവീ;
തഥാനേക്ഖമ്മനാമോപി സന്നദ്ധോ’സഭടോ ഭടോ,
മാരസേനാമിഗേ ഹന്തും ധാവി ദീപീ’വ സാഹസോ;
പഞ്ഞായോധോ’പി ഗച്ഛന്തോ സാടോപോ ധാവി ദപ്പവാ,
മാരമേരുമഹാ അജ്ജ സസേനുമ്മൂലയാമിതി;
വീരിയപാരമിതാ യോധോ ദട്ഠോട്ഠോ ഭീമഗജ്ജനോ,
സോസേമി മമ തേജേന വദം’ഗാ മാര സാഗരം;
ഖന്തിസച്ചവ്ഹയാ ചേവ തതോ’ധിട്ഠാനകോ ഭടോ,
ആസു ധാവിംസു പാതേതും മാരസ്സ മകരദ്ധജം;
മേത്താനാമോ മഹായോധോ മാരോ മയ്ഹമലന്തി’ഗാ,
ഉപേക്ഖകോ’പീ സോ യോധോ മാരസേനം പദാലിതും;
പേസേത്വേവം ജിനോ സേനം’സരീരം ദള്ഹവിക്കമം,
നിസിദി തസ്സ തേജേന നിരുസ്സാഹാസി സാ ചമൂ;
അഹോ ഭോ വിമ്ഹയം ദാനി സുണാഥ മുനിനോ മമ,
ജേതി ഏകോ നിസിന്നോവ സമാരം മാരവാഹിനിം;
കോപാനലേന സന്ദിത്തം ദുട്ഠ രുട്ഠം പജാപതിം,
അദുട്ഠോ ജേതി സമ്ബുദ്ധോ ആനുഭാവോ ഹി താദിസോ;
൩൫൭. ¶
ദിത്തായുധേ ഖിപന്തേ’പി വിജ്ഝന്തേ വസവത്തിനീ,
നിരായുധോ’വ തം ജേതി ആനുഭാവോ ഹി താദിസോ;
സഹാടോപം സഹങകാരം മാരം സാഡമ്ബരം തദാ,
നിച്ചലോ ജേതി സമ്ബുദ്ധോ ആനുഭാവോ ഹി താദിസോ;
ഹത്ഥസ്സ രഥപത്തീഹി ധാവന്തം തമിതോചിതോ,
നിസിന്നോവ ജിനോ ജേതി ആനുഭാവോ ഹി താദിസോ;
ഭാസന്തം നേകധാ കണ്ണ കഠോര ഗിരമന്തകം,
നിസ്സദ്ദോ ജേതി സമ്ബുദ്ധോ ആനുഭാവോ ഹി താദിസോ;
മാരോപാഗമ്മ അട്ഠാസി ലങ്ഘിതും അസമത്ഥകോ,
ബുദ്ധതേജഗ്ഗി പാകാരം ദിത്തമബ്ഭുഗ്ഗതം ഥിരം;
തദാഹ നമുചി കുദ്ധോ ഭുജമുക്ഖിപ്പ’മീദിസം,
ഖിപ്പം സിദ്ധത്ഥ ഹേ ഗച്ഛ സന്തകേദം മമാസനം;
നോ ചേ ഗച്ഛസി തേ ഹദയം ഫാലേമി നഖസത്തിഹി,
വിചുണ്ണേമി തുവം പാദേ ഗഹേത്വാ പഥവീതലേ;
പസ്സ മേ മഹതിം സേനം പസ്സ ആയുധസഞ്ചയം,
തേന തം അഭിമദ്ദാമി തുവടം ഗച്ഛിദം മമ;
അഥസ്സ വചനം സുത്വാ ജിനോ’ഹ മധുരങ്ഗിരോ,
കദാ തേ പൂരിതാ മാര പല്ലങ്കത്ഥായ പാരമീ;
കദാ അദാസി സീസാദീ ദാനം സീലം കഥം തവ,
തദത്ഥായ കഥാപേഹി കേ തേ പച്ചക്ഖകാരകാ;
അഥാ’ഹ ഫരുസോ മാരോ നേതം ഗരു മുനേ മമ,
അയം സാ പരിസാ സബ്ബാ തസ്സ പച്ചക്ഖകാരകം;
ഉഗ്ഘോസേസി മഹാസേനാ പക്ഖീ’ഹന്തി വിസും വിസും,
ഭുമുദ്രിയന മത്തോവ തതോ കോലാഹലോ അഹു;
അഥാഹ മാരോ സമണ അഹം സക്ഖി കഥാപയിം,
തവ കോ സക്ഖി യജ്ജത്ഥി കഥാപേഹി ലഹും മമ;
൩൭൦. ¶
അഥാഹ ഭഗവാ തസ്സ ഗമ്ഭീരം മധുരം ഗിരം,
നിച്ഛാരേന്താ മയൂരസ്സ സുനാദം ഫണിനോ യഥാ;
തവേവ മേ ന സന്തീധ പച്ചക്ഖത്ഥം സചേതനാ,
അചേതനാവ മേദാനി സന്തി പച്ചക്ഖവാദിനോ;
ഇതി വത്വാന മാരാരി സഞ്ത്ധാ ജിമൂത ഗബ്ഭതോ,
നിക്ഖന്ത വിജ്ജുസങ്കാസം കരം ചാമീകരജ്ജുതിം;
രത്ത ചീവരഗബ്ഭമ്ഹാ നീഹരിത്വാ ജിനോ തദാ,
ധരണ്യഭിമുഖം’കാസി ഉദ്ദിസ്സ ഭുമികാമിനിം;
ദാനമാനാദികമ്മേ മേ കമ്പന്തീ ജാതിജാതിയം,
കിമജ്ജ നിസ്സണാസീ’തി ജിനോ വാചമുദാഹരീ;
സക്ഖി’ഹന്തി വദന്തീവ തതോ ഭുമിവരങ്ഗനാ,
സളിലാവനിപരിയന്താ ഗജ്ജന്തി നച്ചി താവദേ;
മഹീ സാഗര ഊമീ’വ ഉട്ഠാപേന്തി മഹൂമിയോ,
ഛദ്ധാ കമ്പി കുലാലസ്സ ചക്കംവാതി പരിബ്ഭമി;
ഹിമവാ ഗിരിരാജാ ച യുഗന്ധര നഗാദയോ,
കൂടബാഗാ സമുക്ഖിപ്പ നച്ചിംസു നടകാ വിയ;
ദിസ്വാ സുത്വാ തമച്ഛേരം ഗയേനുബ്ബിഗ്ഗ മാനസാ,
മാരസേനാ പഭിന്നാസി ഭിന്നവേലോവ സാഗരോ;
ഭയേനട്ടസ്സരാ ഭന്താ പതന്തഞ്ഞോഞ്ഞ ഘട്ടനാ,
വികിരിത്വാ കചേ പിട്ഠേ ധാവിംസു മാരകിങ്കരാ;
ഗഹിതായുധാനി ഛഡ്ഡേന്താ പിദഹന്താനനം കരാ,
നിവത്ഥവത്ഥമത്തേ’പി ധാവിംസു അനപേക്ഖകാ;
അങ്ഗുലിയോ മുഖേ കേചി പക്ഖിപന്തി രുദന്തി ച,
കേചി വന്ദന്തി യാവന്തി അഭയം സാമി ദേഹി നോ;
സിദ്ധത്ഥോ’യം ജിതോ കിന്നു നിസ്സാസാ രുദ്ധഭാസനാ,
പിട്ഠിപസ്സമുദിക്ഖന്തി ധാവിംസു ചകിതാ പരേ;
൩൮൩. ¶
ഗിരിമേഖലോ’പി നാഗിന്ദോ ജന്നുകേന പതീ തദാ,
മാരോ’പി പതിതോ ഖിപ്പം ധാവിത്വാ’ദസ്സനം ഗതോ;
തങ്കണേ ഉഗ്ഗതോ ആസി സത്ഥു കിത്തി ജയദ്ധജോ,
അവഹേന്തോവ സുരാദീനം ബ്രഹ്മലോകാവധിം ഗതോ;
തദാസി വിജയോ തസ്സ സമ്ബുദ്ധസ്സ സിരീമതോ,
ചരിമേ മാരയുദ്ധമ്ഹി മാരസ്സാസി പരാജയോ;
ഏവം മഹാനുഭാവോതി മന്ത്വാന നരസാരഥിം,
നിച്ചം വന്ദഥ പൂജേഥ സോ ഹി വോ സരണം സദാ;
ഏകാദസമോ വിജയോ.
ലദ്ധാഭിവിജയേ ബുദ്ധേ നിസിന്നേ വജിരാസനേ,
പരിവാരയും ഗതാഗമ്മ പുരേ വിയ സുരാദയോ;
ദേവാ തേ നിഖിലാ നേത്വാ നാനാപൂജാവിധിം തതോ,
സന്തുട്ഠാ മുനിനോ’കാസും മഹന്തം ജയമങ്ഗലം;
സമ്പത്താഥ നിസാകന്താ മാനേതുംച മുനിസ്സരം,
പുബ്ബാപരമ്ബരേ ലഗ്ഗ സസീണക്കണ്ണ ഭുസണ;
സുനീലാകാസ ധമ്മില്ലേ ധത്ത താരാലിമാലികാ,
വീജേന്തീവ ദിസാ ബാഹാ ഫുല്ലചൂതക ചാമരേ;
മല്ലികാ മുകുലാസത്ത സമ്മത്താലിഗണാ തദാ,
ധമേന്താ വിയ സങ്ഖാനി കൂജേന്തി മധുരം ഗിരം;
സാമോദ മകരന്ദേഹി മന്ദമന്ദാനിലാഗതാ,
സജുണ്ഹാ ജിനബിമ്ബമ്ഹി ഉതും ഗാഹേന്തി സീതലം;
അവിജ്ജാദി മഹാമൂലം തിവട്ടത്ഥിര ഖന്ധകം,
സംസാര വിസരുക്ഖം സോ ആരദ്ധുമ്മുലിതും തദാ;
ഭാവേന്തോ പുരിമേ യാമേ സരന്തോ ഖന്ധസന്തതിം,
പുബ്ബേനിവാസാനുസ്സതി ഞാണം ലദ്ധാ നരിസ്സരോ;
൩൯൫. ¶
തഥാ മജ്ഝിമ യാമമ്ഹി ദിബ്ബചക്ഖു വിസോധനാ,
ചുതുപപാത ഞാണഞ്ച അധിഗംത്വാന സബ്ബസോ;
രത്തിയാ പച്ഛിമേ യാമേ ചിന്തയന്തോ ജരാദയോ,
വിപസ്സിത്വാ നാമരൂപേ ആരോപേത്വാ തിലക്ഖണം;
സമ്മസന്തോ കിലേസേഹി വിവേചേത്വാ സകം മനം,
ആസവാനം ഖയേ ഞാണാ ലദ്ധാ അഗ്ഗഫലം തദാ;
പത്തോ നിബ്ബാണനഗരം ബോജ്ഝങ്ഗ രതനിസ്സരോ,
സദ്ധമ്മരാജാ ഹുത്വാന പീതിവാചമുദാഹരീ;
അനേകജാതി സംസാരം സന്ധാവിസ്സം അനിബ്ബിസം,
ഗഹകാരകം ഗവേസന്തോ ദുക്ഖാ ജാതി പുനപ്പുനം;
ഗഹകാരക ദിട്ഠോസി പുന ഗേഹം ന കാഹസി,
സബ്ബാ തേ ഫാസുകാ ഭഗ്ഗാ ഗഹകൂടം വിസങ്ഖിതം,
വിസങ്ഖാരഗതം ചിത്തം തണ്ഹാനം ഖയമജ്ഝഗാ;
ഇച്ചേവ മഗ്ഗമതദാനവിധിപ്പവീണ,
കാരുഞ്ഞപുഞ്ഞഹദയേന മഹോദയേന,
പത്വാ ഭവണ്ണവമപാരമനന്തദുക്ഖം,
യേനോചിതാ പരമപാരമിതാ ജിനേന;
യോചേവ സബ്ബവിഭവം പണുദിത്വ രജ്ജം
നിക്ഖമ്മ പത്വ ചലപത്തമഹീരുഹസ്സ,
മൂലേ നിസജ്ജ സബലം പബലഞ്ച മാരം,
പാപാരയോ ച വിജിതോ സ ദദാതു സന്തിം;
അഭിസമ്ബോധി കഥാ.
തിലോകനാഥോ സുഗതോ തതോ തദാ
ഉദാനവാചം സമുദാഹരിത്വാ,
പല്ലങ്കമാഭുജ്ജ ദുമിന്ദമൂലേ
ചിന്തേസി ഏവം വജിരാസനസ്മിം;
൪൦൪. ¶
ദാനാദയോ പാരമിതാ ചിനിത്വാ
അസങ്ഖകപ്പാനി ച ഖേപയിത്വാ,
അസ്സേവ പല്ലങ്കവരസ്സ ഹേതു
സന്ധാവിതം തം ഭജിതം വയജ്ജ;
യാവസ്സു പുണ്ണ മമ ചേതനായോ
താവേത്ഥ അച്ഛാമി ന വുട്ഠഹാമി,
മംത്വാന സോ നേകസഹസ്സസങ്ഖാ
ജിനോ സമാപത്തി വലഞ്ജി തത്ഥ;
ദേവാതിദേവോ തിഭവേകനാഥോ
ഹതാവകാസോ ജിതപഞ്ചമാരോ,
പിതാമഹാദീഹി മഹീയമാനോ
ഖേപേസി സത്ഥാ ദിവസാനി സത്ത;
ഇതി പഠമ സത്താഹം.
യസ്മാസനം നേവ ജഹാതി തസ്മാ
തിസന്ധിയുത്തേന നിസീദിതേവ,
അജ്ജാപി കത്തബ്ബമനേന അത്ഥി
ദേവാനമിച്ഛാസി മനമ്ഹി കങ്ഖാ;
തേസം മനം സോ മനസാ വിദിത്വാ
വിനോദനത്ഥം വിമതിന്തു തേസം,
ഉട്ഠായ തമ്ഹാ നഭമുപ്പതിത്വാ
ദസ്സേസി തേസം മുനിപാടിഹേരം;
വിനോദയിത്വാ സുഗതോ തദേവം
സുധാസിനം ചേതസി കങ്ഖരാസിം,
പല്ലങ്കതോ ഉത്തരപുബ്ബകണ്ണം
ആകാസതോരുയ്ഹ ജലം രവീവ;
ജിനോ ദുമിന്ദസ്സ ച ആസനസ്സ
ബഹൂപകാരത്തമനുസ്സരന്തോ,
ഠിതോ പദം കിഞ്ചി അകോപയന്തോ
ഇതോ ചിതോ ലോക ന മുജ്ജഹന്തോ;
൪൧൧. ¶
നീലായതക്ഖാമലകന്തിതോയ
ധാരാനിപാതേന ദുമിന്ദരാജം,
നിസിഞ്ചമാനോ ദിവസാനി സത്ത
പൂജേസി തം’നിമിസലോചനേഹി;
അജ്ജാപി തസ്മിം ധരണിപ്പദേസേ
കതസ്സ ഥൂപസ്സ തദേവ നാമം,
അഹോസി ദേവാ ച നരോ’രഗാ ച
മഹേന്തി തേ തേന ദിവം പയന്തി;
ഇതി ദുതിയ സത്താഹം.
ദേവാ തതോ ദേവവരസ്സ തസ്സ
സുചങ്കമം’കംസു മണീഹി നാനാ,
പല്ലങ്കതോ ഠാനവരസ്സ മജ്ഝേ
പുബ്ബാപരാസായനമന്തരാലേ;
നരിന്ദ നാഗിന്ദ സുരിന്ദ പൂജിതോ
ഛബ്ബണ്ണരംസീഹി സമുജ്ജലന്തോ,
നീലമ്ബരേ താരകിതോ സസീ’വ
സോ ചങ്കമീ സത്ത അഹാനി തത്ഥ;
അജ്ജാപി തസ്മിം ധരണിപ്പദേസേ
കതസ്സ ഥൂപസ്സ തദേവ നാമം,
അഹോസി ദേവാ ച നരോരഗാ ച
മഹേന്തി തേ തേന ദിവം പയന്തി;
ഇതി തതിയ സത്താഹം.
തതോ ദുമിന്ദസ്സ സുരാസുരിന്ദാ
മഹീതലേ പച്ഛിമോത്തരായം,
മാപിംസു നാനാരതനാലയഗ്ഗം
നിസജ്ജ പല്ലങ്കവരേ തഹിം സോ;
൪൧൭. ¶
സുദുദ്ദസാഗാധമപാരപാരം
സമന്തപട്ഠാനതരങ്ഗഭങ്ഗിം,
ധമ്മോദധിം ഞാണസുമേരുമത്ഥാ
സാലോലയം ഖേപയഹാനി സത്ത;
അജ്ജാപി തസ്മിം ധരണിപ്പദേസേ
കതസ്സ ഥൂപസ്സ തദേവ നാമം,
അഹോസി ദേവാ ച നരോരഗാ ച
മഹേന്തി തേ തേന ദിവം പയന്തി;
ഇതി ചതുത്ഥ സത്താഹം.
തതോ ജിനോ ഗന്ത്വ’ജപാലമൂലേ
വിമുത്തിജം സാദുഫലം’നുഭോന്തോ,
സത്താഹമത്തം അതിവത്തയീ സോ
ദേവാതിദേവോ കരുണാഗുണഗ്ഗോ;
തദാഗതാ മാരവധൂ മുനിത്ദം
പലോഭിതും യാ പിതുനോ സകാസാ,
താസം പയോഗമ്പിധ ബിന്ദുമത്തം
കഥീയതേ തം സമുപാഗതത്താ;
തദാ സ മാരോ സമരേ ജിനേന
പരാജിതോ സോചനകോ’പഗംത്വാ,
പജ്ഝായമാനോ’ഥ അധോമുഖോ’ച
നിസീദി തുണ്ഹീ വിലിഖം ഛമായം;
പരാജയം മയ്ഹ മമേവ ദോസോ
ന തസ്സ കസ്മാഹമയം’ച നാസിം,
സീസക്ഖിമംസാദി ച പുത്തദാരേ
നാദന്തി ഏവം മനസീ കരോന്തോ;
പവത്തിമേതം മകരദ്ധജസ്സ
സുത്വാന തണ്ഹാ അരതീ രഗാ ച,
യത്ഥച്ഛി മാരോ പരിസോചയന്തോ
തത്ഥാഗമും താ ചകിതാ ഖണേന;
൪൨൪. ¶
ദിസ്വാന തം തത്ഥ തഥാ നിസിന്നം
നിസ്സാസരുദ്ധം ഗിരമുഗ്ഗിരന്തീ,
തുസാര ബിന്ദുനിവഹേഹി’സാര
പങ്കേരുഹാകാര വിസാലനേത്താ;
ഹാ താത ഹാ താത കിമാസി തേദം
നട്ഠന്നു തേ കിം വദ പത്ഥസീ കിം,
കോ തേ ദിസോ കേന പരാജിതോ’സി
കിമാനയിസ്സാമ ഹനാമ കം നോ;
കിമ്ഹോതിയോദാനി ന പസ്സഥേതം
സുദ്ധോദനീയം തതകിത്തിഘോസം,
മുഖമ്ഹി മയ്ഹം മസിമക്ഖയന്തം
അതിച്ച യന്തം വിസയം പസയ്ഹ;
ന ഭാരിയാ താത മനുസ്സഭൂതം
കത്തും വസം കോ വസമേതി നാമ്ഹം,
തം രാഗപാസേന ഗജം’വ മത്തം
സുബന്ധകം ബന്ധിയ ആനയേമ;
ന രാഗപാസേന ഹി ആനനീയോ
മാരസ്സ ധേയ്യം സമതിക്കമീവ,
അപേതരാഗോ അരഹാ അകമ്പോ
സോവാമ തസ്മാ സുഭഗാ തനുജാ;
സചേതനോ സോ ഹി മനുസ്സഭുതോ
അചേതനഞ്ചേ സമുപാഗമാമ,
കരോമ തം നോ വസഗം കിമേത്ഥ
ചിത്തം ബലം പസ്സഥ നോ ഖണേന;
രൂപേന നേത്തം സുമനോഹരേന
ഗന്ധേന ഘാണം സവണം സരേന,
ഫസ്സേന ഗത്തം രസസാ രസഞ്ഞം
മനഞ്ച പാസേന ച കാമജേന
൪൩൧. ¶
സുബാഹുപാസേന ച തസ്സ ഗീവം
ബാഹുദ്വയം ധാരിതമാലദാമാ,
ബന്ധിത്വദാനേവ തമാ’നയാമ
ബലഞ്ഹി നോ പസ്സഥ താത’ദാനി;
വത്വാന ഏവം വചനം പിതുസ്സ
പണമ്മ പാദാനി പഗബ്ഭിതന്താ,
യത്ഥച്ഛി മാരാരി വിരോചമാനോ
തത്ഥാ’ഗമും ഖിപ്പമുദഗ്ഗചിത്താ;
സാമോദമാലാകുലകേസഭാര
പയോധരാ കുങക്കുമഹാരിഹാരാ,
ബിമ്ബാധരാ ചാരുസഭാ പഭാസാ
ഉമ്മാദയന്തീ ജനമാനസാനി;
മുദ്ധേന മിസ്സം മധുരേ നിമുഗ്ഗം
സ്നേഹേന തിന്തം രസതോ’നുവിദ്ധം,
ഭാസിംസു വാചം ഹദയങ്ഗമന്താ
വിലോകനേനേവ ധിതിം ഹരന്തീ;
വസന്തകന്തോ നവയോബ്ബനോ’സി
സുവണ്ണവണ്ണോ ഹദയങ്ഗമോ’സി
ഏകോ നിസിന്നോ’സി വടസ്സ മൂലേ
സിമന്തിനീ സാമി കുഹിന്നു തുയ്ഹം;
തരങ്ഗഹീനോ’പി തരങ്ഗമാലീ
സസങ്കഹീനാ രജനീ ച സാമീ,
ഹംസാ’ലിഹീനാ സരസീ സുഫുല്ലാ
നാഭാതി കന്താ വിരതോ ധവോ’പി;
വസന്തകാലോ ച വനം സുഫുല്ലം
നിസാകരാഭാ ഭമരാലിഗീതം,
സുഗന്ധമന്ദോപഗതാ സമീരാ
വിരോചസി ത്വമ്പി ച യോബ്ബനേന;
൪൩൮. ¶
മയമ്പി ചേത്ഥേവ സമാഗതമ്ഹ
മനോ’നുകൂലാ ച മനുഞ്ഞരൂപാ,
കരോതി കിംത്വ’ജ്ജ സകാമദാഹോ
കാമാകരോ’ദാനി സമാഗതോ നോ;
മാ തേദിസം യോബ്ബനരൂപസാരം
സുവിഗ്ഗഹം ഛാദയ ചീവരേന,
തേനേവ നോ നേത്തമനമ്ഹി സാമി
മാ ദേഹി ദാഹം തവ ദാസിഭുതേ;
നഖംസു സുത്തേ’രുണപാനിപാദേ
നേത്തിന്ദനീലാനി’വ ആവുണന്തോ,
ത്വമച്ഛി നോ സാമി മുഖമ്ബുജേസു
ന ഏന്തി കിന്തേ നയനാലിമാലാ;
സുധാസിലാഗീഞ്ജക ലോഹദാരു
ജാതേഹി ത്വം ധീര ന നിമ്മിതോ’സി,
രൂപീ’സി സോമ്മോ’സി തഥാപി സാമി
കിം കാമരാഗം മനസാ നുദേസി;
അയഞ്ച ബാലാ ചതുരാ രതീസു
ബാലേതി കങ്ഖം ജഹ മാനസമ്ഹി,
കിം മഞ്ജരീ ഭിജ്ജതി സമ്പഫുല്ലാ
മത്താലിരാജേ പരിചുമ്ബമാനേ;
അയഞ്ച രാമാ രമണീയരൂപാ
പീണോരുഗണ്ഡാ കുവമണ്ഡലാ ച,
തം കാമിനിം കാമയ ഫുല്ലകഞ്ജേ
ഹംസോ യഥാ കേസര സമ്പഗിദ്ധോ;
ചിന്താമണിം ഭദ്ദഘടഞ്ച കപ്പ
തരും സമാപജ്ജ ദളിദ്ദഭാവാ,
നാപേന്തി സത്താ ഖലു ദുബ്ഭഗത്താ
തഥേവ നോ’സീ തവ പാദസേവാ;
൪൪൫. ¶
ഏവഞ്ഹി താ രഞ്ജനമഞ്ജുഭാസാ
സഹസ്സമേകഞ്ച സതാനി അട്ഠ,
വേസാനി സമ്മാ അഭിനിമ്മിണിത്വാ
പലോഭയുന്തം ബഹൂധാ മുനിന്ദം;
തതോ തണ്ഹാ?.
യക്ഖോസി മത്തോസി സിലാമയോസി
അചേതനോസാ’ഥ അയോമയോസി,
അവീതരാഗഞ്ഹി സചേതനഞ്ചേ
അനേനുപായേനു’പസങ്കമാമ;
ഫലേയ്യ ഖീപ്പം ഹദയഞ്ഹി തസ്സ
ഉണ്ഹംവ രത്തം മുഖതു’ഗ്ഗമേയ്യ,
സിയാവ ഖിപ്പം അപി ചിത്തഖേപം
ഉമ്മാദഭാവംച സ പാപുണേയ്യ;
യഥാ പലുത്തോ ഹരിതോപലമ്ഹി
ഖിത്തോ നളോ സുസ്സതി ആതപേന,
ഏവം വിസുസ്സേതി വിസാദമേതി
സോ മുച്ഛതി മുയ്ഹതി ദുക്ഖമേതി;
സോകാവകിണ്ണേ നു വനമ്ഹി ഝായസി
വിത്തന്നു ജിതോ ഉദ പത്ഥയാനോ,
ആഗുന്നൂ ഗാമസ്മിം അകാസി കിഞ്ചി
ജനേന കസ്മാ ന കരോസി സക്ഖിം;
സത്ഥാ?.
അത്ഥസ്സ പത്തിം ഹദയസ്സ സന്തിം
ഛേത്വാന സേനം പിയസാതരൂപം
ഏകോ’ഹം ഝായം സുഖമനുബോധിം
ജനേന തസ്മാ ന കരോമ സക്ഖിം;
ഇമാ ¶ ദ്വേ പാലിയം?.
പലുട്ഠഗത്തം ദഹനേന മക്കടിം
സുസാനപേതിഞ്ച ജിഗുച്ഛനീയം,
ജേഗുച്ഛിയം ജങ്ഗമ മീള്ഹരാസിം
ദിസ്വാന കോ തം വരയേ സപഞ്ഞോ;
അഥ അരതി?.
കഥം വിഹാരീ ബഹുലോ ച ഭിക്ഖു
പഞ്ചോഘതിണ്ണേ അതരീധ ഛട്ഠം,
കഥം ഝായിം ബഹുലം കാമസഞ്ഞാ
പരിബാഹിരാ ഹോന്തി അലദ്ധ യോ തം;
സത്ഥാ?.
പസ്സദ്ധകായോ സുവിമുത്തചിത്തോ
അസങ്ഖരാനോ സതിമാ അനോകോ,
അഞ്ഞായ ധമ്മം അവിതക്ക ഝായീ
ന കുപ്പതീ നസ്സരതീ ന ഥീനോ;
ഏവം വിഹാരീ ബഹുലോ ച ഭിക്ഖു
പഞ്ചോഘതിണ്ണേ അതരീധ ഛട്ഠം,
ഏവം ഝായിം ബഹുലം കാമസഞ്ഞാ
പരിബാഹിരാ ഹോന്തി അലദ്ധ യോ തം;
അഥ രഗാ?.
അച്ഛേച്ഛി തണ്ഹം ഗണസങ്ഘചാരീ
അദ്ധാ തരിസ്സന്തീ ബഹൂ ച സദ്ധാ,
ബഹും വതായം ജനത’മനോകോ
അച്ഛിജ്ജ നേസ്സതി മച്ചുരാജസ്സ പാരം;
സത്ഥാ? ¶ .
നയന്തി വേ മഹാവീരാ സദ്ധമ്മേന തഥാഗതാ,
ധമ്മേന നയമാനാനം കാ ഉസൂയാ വിജാനതം;
ഇമാ പഞ്ച പാലിയം?.
സുത്വാന തം ധമ്മവരം ജിനസ്സ
പമത്തബന്ധുസ്സ രഗാദിരാമാ,
പലോഭിതും നേ’വ സമത്ഥകാ തം
അഗംസു ഖിപ്പം പിതുനോ സകാസം;
മാരോ തദാരാ’വ സമേക്ഖമാനോ
ദിസ്വാഗതാ കേവലമേവ തായോ,
മാ കത്ഥ കാമം മമ ഭാസിതാനി
കാമത്ഥ പാതും മിഗതണ്ഹികാപം;
ബാലാ കുമുദനാളേഹി പബ്ബതം അഭിമന്ഥഥ,
ഗിരിം നഖേന ഖണഥ അയോ ദന്തേഹി ഖാദഥ;
സേലംവ സിരസി ഊഹച്ച പാതാലേ ഗാധമേസഥ,
ഖാനുംവ ഉരസാ’സജ്ജ നിബ്ബിജ്ജാപേഥ ഗോതമാ;
ഇമാ ദ്വേ പാലിയം?.
വത്വാന ഏവം വിമനോ സ മാരോ
സടീതുകോ സമ്ഭവനം പയാസി,
സത്ഥാഥ രാഗാ പരിമുത്തചിത്തോ
ജഹാസി തസ്മിം ദിവസാനി സത്ത;
അജ്ജാപി തം സാഖിവരമ്പിതേന
’നുഭുതമത്തേന മഹേന്തി സബ്ബേ,
തേനേവ തേ സഗ്ഗഗതാ വിമാനേ
മോദന്തി കാമേഹി അനൂപമേഹി;
ഇതി പഞ്ചമ സത്താഹം.
൪൬൩. ¶
തതോ മുനിന്ദോ മുചലിന്ദമൂലേ
നിസീദി ഗന്ത്വാ പവരാസനമ്ഹി,
യുഗന്ധരേ ബാലരവീ’വ രംസി
ജാലാഹി ലോകം പരിപൂരയന്തോ;
അഥാന മേഘോ ജലദാ സതേഹി
പപൂരയം ഖം ഥനയം സവിജ്ജു,
സസീതവാതോ കിരമമ്ബുധാരം
വിരോചമാനോ വിസകണ്ഠികാഹി;
അമന്ദനണ്ദോ മുചലിന്ദഭോഗീ
ദിസ്വാ മുനിന്ദം മുചലിന്ദമൂലേ,
പരിക്ഖിപിത്വാന വിസാലഭോഗാ
ഛാദേത്വ സമ്മാ സഫണോ ഫണേന;
അജ്ഝേസി സോ തസ്സ അനുഗ്ഗഹായ
നിസീദി ഗന്ത്വാ ഭുജഗാ’സനമ്ഹി,
സത്ഥാ തദാ രൂപിയമന്ദിരേവ
സത്താമഹത്തം സുവിമുത്തചിത്തോ;
അജ്ജാപി തം സാഖിവരമ്പി തേന
’നുഭുതമത്തേന മഹേന്തി സബ്ബേ,
തേനേവ തേ സഗ്ഗഗതാ വിമാനേ
മോദന്തി കാമേഹി അനൂപമേഹി;
ഇതി ഛട്ഠമ സത്താഹം.
തതോ’പഗന്ത്വാ യതിരാജ രാജാ
നിസീദി രാജായതനസ്സ മൂലേ,
വിമുത്തിജം പീതിസുഖം’നുഭോന്തോ
സത്താഹമത്തം കരുണാഗുണഗ്ഗോ;
അജ്ജാപി തം സാഖിവരമ്പി തേന
’നുഭുതമത്തേന മഹേന്തീ സബ്ബേ,
തേനേവ തേ സഗ്ഗഗതാ വിമാനേ
മോദന്തി കാമേഹി അനൂപമേഹി;
ഇതി സത്തമ സത്താഹം.
൪൭൦. ¶
ആഹാര കിച്ചാദി വിവജ്ജിതസ്സ
സുഖാനുഭോന്തസ്സ വിമുത്തിജാനി,
സമ്പീണിതങ്ഗസ്സ ജിനസ്സ തസ്സ
ഇച്ചച്ചഗും സത്തദിനാനി സത്ത;
ദേവാനമിന്ദേന തതോ’പനീത
മുഖോദകാദിമ്പരിഭുഞ്ജിയാന,
നിസിന്നമത്തേ യതിരാജ രാജേ
തത്ഥാ’ഗമും ദ്വേ വാണിജാ ഖണേന;
ഉസ്സാഹിതാ ദേവവരേന സമ്മാ
സാലോഹിതാ തസ്സ തപുസ്സ-ഭല്ലികാ,
മന്ഥഞ്ച സാദും മധുപിണ്ഡികഞ്ച
ആദായ നാഥം ഇദമബ്രുവുന്തേ;
ഇദഞ്ഹി നോ ധീര അനുഗ്ഗഹായ
പടിഗ്ഗഹേത്വ പരിഭുഞ്ജ ദാനം,
ഹിതായ തം ഹോതി സുഖായ ചേവ
അനപ്പകപ്പേസു അനാഗതേസു;
പടിഗ്ഗഹേത്വാ മുനി ദേവദിന്ന
പത്തേന പച്ചഗ്ഘസിലാമയേന,
ഭുത്വാന തേസം അനുമോദനത്ഥം
ദേസേസി ധമ്മം വരദം പസത്ഥം;
ദ്വേ ഭാതികാ വാണീജകാ ജിനസ്സ
ധമ്മം സുണിത്വാന പസന്നചിത്താ,
ദ്വേ വാചികോപാസകതം ഗതാസും
യാചിംസു തേ തം പുന പൂജനീയം;
പരാമസിത്വാന സിരം തതോ സോ
അദാ ജിനോ കുന്തല ധാതുമുട്ഠിം,
തേ തേന തുട്ഠാ സുമനാ പതീതാ
മഹിംസു നേത്വാ വിഭവാനുരൂപം;
൪൭൭. ¶
സത്ഥാ’ഥ ഗന്ത്വാ അജപാലമൂലേ
സഹസ്സ രംസീവ യുഗന്ധരമ്ഹി,
നിസജ്ജ ലോകം അനുലോകയന്തോ
വിതക്കി ഏവം മനസാ വിതക്കം;
മയജ്ഝപന്നോ വരധമ്മസാരോ
സസസ്സ സിന്ധൂ’വ അഗാധപാരോ,
അബുദ്ധസത്തേഹി തമജ്ജ കസ്സ
പകാസയിസ്സഞ്ഹി ജളോ ഹി ലോകോ;
ദേസേമി ചേ ധമ്മവരം പണീതം
കിലന്തഭാവോവ മമസ്സ അസ്മാ,
കിമത്തദുക്ഖേ നിതി ചിന്തയന്തോ
നുയ്യാമമാകാ മുനി ദേസനമ്ഹി;
സഹമ്പതീ നാമ തതോ വിധാതാ
സചേതസാ തസ്സ മനം വിദിത്വാ,
വിനസ്സതീദം ഖലു സബ്ബലോകം
അദേസിതേ തേനി’തി കമ്പമാനോ;
സകാസമാഗമ്മ ജിനസ്സ തസ്സ
സഗാരവോ ബ്രഹ്മഗണേന തത്ഥ,
നിഹച്ച ജാനും പഥവീതലമ്ഹി
നമസ്സമാനോ ഇദമബ്രൂവീ സോ;
ത്വം ദേവദേവോ സ സുമേധകാലേ
പലോകിതം ലോകമുദിക്ഖമാനോ,
വിഹായ ദീപങ്കരപാദമൂലേ
ലദ്ധാ’മതം തം കരുണാഗുണേന;
പവിസ്സ സംസാരവനം വിദുഗ്ഗം
മംസക്ഖിസീസാദിമ’ദാസി ദാനം,
വേദേസി ദുക്ഖം അമിതം അസയ്ഹം
തം തേ പരത്ഥം’വ ന അത്തഹേതും;
൪൮൪. ¶
സന്തീധ സത്താ ഖലു മന്ദരാഗാ
ഞാതും സമത്ഥാ സുഗതസ്സ ധമ്മം,
ആരാധിതോ മേ കരുണാഗുണഗ്ഗോ
ദേസേഹി ധമ്മം അനുകമ്പമാനോ;
കാലേ വികാസന്തി ഖരംസു മിസ്സാ
ഥലമ്ബുജാതാ കുസുമാനി നാനാ,
തഥേ’വ തേ ധമ്മകരാഭിഫുട്ഠാ
വികാസമായന്തീ ജനാ അനേകാ
സമ്പന്ന വിജ്ജാചരണോ സതീമാ
ജുതിന്ധരോ അന്തിമദേഹധാരീ,
പടിഗ്ഗഹേത്വാസ്സ നിമന്തണം സോ
ജനേസി സത്തേ കരുണാ മനസ്മിം;
അപാരുതാ തേസം അമതസ്സ ദ്വാരാ
യേ സോതവന്തോ പമുഞ്ചന്തു സദ്ധം,
വിഹിംസസഞ്ഞീ പഗുണം ന ഭാസിം
ധമ്മം പണീതം മനുജേസു ബ്രഹ്മേ;
പടിഗ്ഗഹേസീതി ഉദഗ്ഗചിത്തോ
അജ്ഝേസനം മേ ചതുരാണനോ സോ,
നത്വാന നാഥം സഹപാരിസജ്ജോ
പക്കാമി തമ്ഹാ ഭവനം ഖണേന;
തതോ ജിനോ തേന ഗഹിതനുഞ്ഞോ
ദേസേമി കസ്സേതി ഉദിക്ഖമാനോ,
ആളാര-ഉദ്ദേ സമുദിക്ഖ ധീരോ,
മന്ത്വാന തേസം അചിരച്ചുതിത്തം;
കഹന്നുഖോ’ഹം വരധമ്മചക്കം
അഞ്ഞേന കേനാപി അവത്തനീയം,
ലോകസ്സ ചിന്താമണിസന്തിഭഗ്ഗം
പവത്തയിസ്സന്തീ വിചിന്തയന്തോ;
൪൯൧. ¶
ദിസ്വാന ഭിക്ഖൂ മുനി പഞ്ചവഗ്ഗേ
ആദായ പത്തഞ്ച തിചീവരഞ്ച,
ബാരാണസീയം മിഗദായമേന്തോ
അദ്ധാനമഗ്ഗം പടിപജ്ജി സത്ഥാ;
തത്ഥാമരബ്രഹ്മഗണേഹി പൂത
പഥേ ഫണീ പക്ഖി ചതുപ്പദാ ച,
ആരഞ്ഞദേവാ തരുപബ്ബതാ ച
മഹിംസു നേകേഹി സുവിമ്ഹയേഹി;
തതോപഗാ സോ മിഗദായമഗ്ഗേ
ദിസ്വാ യതീസം യതയോ’പഗന്ത്വാ,
അകംസു വത്തം പടിപത്തിസാരാ
പവത്തയീ തത്ഥ സ ധമ്മചക്കം;
അഞ്ഞാദികോണ്ഡഞ്ഞവസിപ്പധാനാ
കോടീനമട്ഠാരസ കഞ്ജയോനീ,
അസീതികോടീ’പി സുധാസി സങ്ഘാ
അഞ്ഞാസുമഗ്ഗം കമതോ തദാ തേ;
അതിച്ചയാതമ്ഹി നിദാഘകാലേ
വസ്സാനകാലേ സമുപാഗതസ്മിം,
തത്ഥേവ വസ്സം ഉപഗമ്മ ധീരോ
തേമാസമത്തം അവസീ വസീസോ;
തതോ യസം തസ്സ സഹായകേപി
പതിട്ഠപേത്വാ അരഹത്തമഗ്ഗേ,
ഭുതിം ജനാനം അനുബ്രൂഹയന്തോ
വസ്സസ്സ അന്തം അകരീ തഹിം സോ;
വസ്സച്ചയേ ലോകവിദൂ മുനിന്ദോ
ആമന്തയീ തേ യതയോ സപുത്തേ,
തേ’ഥാഗമും നിബ്ബണഥാ കതഞ്ജലീ
’ദമബ്രുവി തേസമ’നന്ത പഞ്ഞോ;
൪൯൮. ¶
ഉഗ്ഘോസയന്താ മമ ധമ്മഘോസം
സമാഹനന്താ മമ ധമ്മഭേരിം,
സാധും ധമേന്താ മമ ധമ്മസങ്ഖം
ചരാഥ തുമ്ഹേ സനരാമരാനം;
ജയദ്ധജം മേ ഭുവനുക്ഖിപന്താ
ഉസ്സാപയന്താ മമ ധമ്മകേതും,
അഥുക്ഖിപന്താ മമ ധമ്മകുന്തം
ചരാഥ ലോകേസു സദേവകേസു;
സുസജ്ജിതത്തം അമതസ്സ മഗ്ഗം
സകണ്ടകത്തം നരകായനസ്സ,
മാരാനനസ്മിം മസിമക്ഖിതത്തം
കഥേഥ ലോകസ്സ സദേവകസ്സ;
ബുദ്ധന്തരം സുപ്പിഹിതം അചാരം
പുരസ്സ മോക്ഖസ്സ വിസാലദ്വാരം,
അവാപുരീ നോ ഭഗവാ’ധുനാ ഭോ
യഥജ്ജ സബ്ബേതീ നിവേദയവ്ഹോ;
ഉപ്പന്നഭാവം ഭുവനേ മമജ്ജ
തഥേവ ധമ്മസ്സ ച പാതുഭാവം,
ഉപ്പന്നഭാവഞ്ച മമോരസാനം
പകാസയന്താ ജഗതിം ചരാഥ;
വനമ്ഹി പന്തേ ഗിരിഗബ്ഭരായം
രുക്ഖസ്സ മൂലേ’പി ച സുഞ്ഞാ’ഗാരേ,
വസം യതത്താ മമ ധമ്മമഗ്ഗം
ദേസേഥ ലോകേ സനരാമരാനം;
വത്വാന ഏവം യതയോ ദിസാസു
പേസേത്വ നാഥോ ഉരുവേലഗാമീ,
പടിപജ്ജി മഗ്ഗം അഥ അന്തരാലേ
കപ്പാസികവ്ഹം വിപിനം പവിസ്സ;
൫൦൫. ¶
തസ്മിം രമന്തേ സമതിംസമത്തേ
രാജോരസേ സോ പവരോ വിനേത്വാ,
ദത്വാ’മതം ധമ്മമഥുദ്ദിസിത്വാ
അഗോരുവേലം ഗജരാജഗാമീ;
തത്ഥോരുവേലാധികകസ്സപോതി
പസിദ്ധനാമസ്സ സസിസ്സകസ്സ,
അഗ്ഗം ഫലം സോ പരിപാവയന്തോ
വസീ വസന്തേ വസീനം വരിട്ഠോ;
തദാഹരും നേഗമ നാഗരാ ച
യഞ്ഞം മഹാകസ്സപ താപസസ്സ,
ജിനോ വിദിത്വാസ്സ മനം മനേന
വസീ വിസും തസ്സ പസാദ ഹേതു;
കഥം?
ഗന്ത്വാന ഉത്തരകുരും ഭഗവാ തദാനി
പിണ്ഡഞ്ചരിത്വ രമണീയ ഹിമാലയദ്ദിം,
ആഗമ്മ സാദുരസ നീര ഭരാഭിരാമേ
’നോതത്തകേ മുനിവരോ പരിഭുഞ്ജിയാന;
ചിന്തേസി ഏവമഹമപ്പതരംവ കാലം
ഠസ്സാമി സാസന മമഞ്ഹി അനാഗതേസു,
ലങ്കാതലേ ഭവതി തത്ഥ ഇദാനി യക്ഖ
സമ്ബാധമത്ഥി മമ തത്ഥ ഗതേസു’ദാനി;
സബ്ബാ’മനുസ്സജ ഭയം പവിനസ്സതീ’തി
മന്ത്വാ തതോ യതിവരോ കരുണായ സത്തേ,
സഞ്ഝാഘനേഹി പരിനദ്ധ രവീവ രത്ത
നിഗ്രോധപക്ക സദിസം ചരപംസുകൂലം;
ധാരേത്വ സേലമയ സുന്ദര പത്തഹത്ഥോ
ഛബ്ബണ്ണരംസി നിവഹം ദിസി പൂരയന്തോ,
സമ്ബോധിതോ നവമ ഫുസ്സജ പുണ്ണമായം
ലങ്കാതലം വിജയിതും നഭസാ’ഗമാസി;
൫൧൨. ¶
ബ്രഹ്മാസുരാമര ഫണി ഗരുളാ ച സിദ്ധ
വിജ്ജാധരാദി ജനതാ സഹപാരിസജ്ജാ,
കേതാ’തപത്ത ഘട ദീപുരു തോരണേഹി
പൂജം അകംസു മഹതിം ഗഗനായനമ്ഹി;
ലങ്കങ്ഗനാ ഉരസി ഭാസുര താര ഹാര
സങ്കാസ സീതല മനോഹര നീര പൂരാ,
തസ്മിം മഹാദിപദ വാലുക നാമ ഗങ്ഗാ
ഭുമജ്ഝഗാസി ജന നേത്ത ഹരാഭിരാമാ;
തസ്സാവിദൂര സുചി രമ്മതരേ പദേസേ
ആയാമതോ മിതതിയോജന വിത്ഥതേന,
ചത്താരി ഗാവുതമിതം നയനാഭിരാമം
ആസാര സീതജല നിജ്ഝര ഭുരിഘോസം;
മത്താലിപാലി ഖഗ ഗീതിജ മിസ്സരാഗം
സമ്മത്ത ചിത്ത മിഗസങ്ഘ നിസേവിതം തം,
നച്ചന്ത നേകസിഖി സങ്ഗത പാദപിണ്ഡം
ഉയ്യാനമാസി ഉരുനാഗവനാഭിധാനം;
രമ്മേ തദാ രതനദീപവരമ്ഹി ലങ്കാ
ലോകാഭിധാന ഹരികണ്ഡക യക്ഖദാസേ,
ഓദുമ്ബരേ സുമനകൂടക തണ്ഡുലേയ്യേ
സേലേസു മാരഗിരി മിസ്സകരിട്ഠനാമേ;
യേ’ഞ്ഞേപി സന്തി ഗിരയോ വനരാമണേയ്യാ
ഗങ്ഗാ നദീ ഗിരിഗുഹാ സികതാതലാ ച,
തത്ഥാവസന്തി രഹസാ ഫരുസാനിരുദ്ദാ
പാണാതിപാത നിരതാ സഠകൂട യക്ഖാ;
സങ്ഗമ്മ തേ മഹതി നാഗവനമ്ഹി തമ്ഹി
സമ്മന്തയിംസു സഭടാ സഹ പാരിസജ്ജാ,
ത്വം കോ’സി രേ! ഇതി പരോ അപരം ഖരേന
തിക്ഖേന വാദകണയേന അരുന്തുദന്താ;
൫൧൯. ¶
കുജ്ഝിംസു തേ അഥിതരീതര കാരണേന
വാക്യേന യുദ്ധ പരിരദ്ധ പഗബ്ഭിതത്താ,
സങ്ഖാഭിതാപഗ പതീവ’നവട്ഠചിത്താ
സാരമ്ഭഗബ്ബിതമനാ പരിരാവയന്തി;
തസ്മിം ഖണേ’ഭിമതദോ സുഗതോ നഭമ്ഹി
ആഗമ്മ തേസ’മനുകമ്പിത മാനസേന,
ഗോപാനസീ സമ മനോഹര രംസിമാലി
തത്ഥച്ഛി ഖേ ഗുണമണീ മണികണ്ണികാവ;
തേസം ജിനോ കലഹവൂപസമായ ഹേതു
മാപേസി വുട്ഠി തിമിരാ’നിലസീതഭീതിം,
തത്ഥാസി ഗജ്ജിതഘനോ സുരചാപഖിത്ത
ധാരാസരേഹി വിതുദം നിസിവാര സങ്ഘം;
അന്ധാവ തേ ഘനതരേ തിമിരേ നിമുഗ്ഗാ
മുള്ഹാ ദിസഞ്ച വിദിസം ന വിദിംസു ഭീതാ,
ചണ്ഡാനിലുദ്ധട മഹാ ഗിരികൂടരുക്ഖ
സമ്പാത ഭീത രുദിതാ ഗതിമേസയന്തി;
സീതേന തേ അഥ ദിജേ പരികോടയന്താ
അഞ്ഞോഞ്ഞഗത്തമവലമ്ബ പരോദയിംസു,
രൂപാനി നേകഭയദാനി ച ഘോസണാനി
വത്തിംസു തേന വിവിധം ഭയമാസി തേസം;
ബുദ്ധാപി ദുക്ഖിതമനാ പരദുക്ഖകേന
കസ്മാ കരോന്തി അനയം’തി ന ചിന്തനീയം,
ലോകോ ഹനാതി വിടപി ഫലദാന ഹേതു
സത്ഥേന സോമ രിപുഗാഹക വാസരമ്ഹി;
സത്ഥാ തതോ തമനുദോ സഭയേ സസോകേ
ദിസ്വാന ഗുയ്ഹക ജനേ കരുണായിതത്തോ,
വുട്ഠിം തമഞ്ച പവനം പണുദിത്വ സബ്ബം
ദസ്സേസി അത്തമഖിലം ദുമണീവ ഖമ്ഹി;
൫൨൬. ¶
ദിസ്വാന തേ മുനിവര’ഞ്ജലി പങ്കജേഹി
സജ്ജേത്വ സീസ സരസീ ഇദമ’ബ്രുവിംസു,
യാചാമ നോ’ഭയപദം ഭവതോ സകാസാ
ദാസേസു ധീര കരുണം കരണീയമേവ;
ഏവം തദാ’വച ജിനോ മധുരസ്സരേന
ആമന്ത തേ നിസിചരേ’വനതേ സമേക്ഖ,
തുമ്ഹേ ദദാഥ യദി ഠാനമമേകദേസം
സബ്ബേ അപേന്തീ ഘനവാതജ സീതദുക്ഖാ;
യജ്ജേവമീതിമ’പയാതി കരോമ ഭോ തം
ഗണ്ഹാഹി ധീര യദി ഇച്ഛസി സബ്ബദീപം,
വത്വാന തേഹി പരിദിന്ന ഛമായ മഗ്ഗോ
ഓഗമ്മ തത്ഥ പുഥു പത്ഥരി ചമ്മ കണ്ഡം;
തസ്മിം നിസജ്ജ കസിണം സമാപജ്ജ തേജോ
ജാലാകുലം ജലിത മഗ്ഗീമമാപയീ സോ,
സോ ധൂമകേതു ഗഗനുഗ്ഗത തുങ്ഗസിങ്ഗോ
സന്ദഡ്ഢയം ഗിരിവനാനു’രുഘോസയന്തോ;
രുക്ഖേഹി രുക്ഖവന പബ്ബത ലങ്ഘനേന
സാഖാമിഗേ ച വിഹഗേ അനുബന്ധയം’വ,
വേസ്സാനരോ വനമരൂ മിഗസൂകരേ’പി
സന്ധാവി ഗുയ്ഹക ജനേ ഇതി ചിന്തയന്തോ;
ദിസ്വാന തത്ഥ പചുരാതന വിപ്ഫുലിങ്ഗ
സമ്മിസ്സ ജാല ദഹനം ഗുഹകാ സമേച്ച,
ധാവും വികിണ്ണകച ബപ്പജല’ദ്ദനേത്താ
ദാരത്തജേഹി സഹിതാ ഗതിമേസമാനാ;
സമ്ബുദ്ധതേജ പരിദഡ്ഢ സരീരചിത്താ
ആഹച്ച സാഗരതടം പരിധാവമാനാ,
തസ്മിമ്പി തേ പവിസിതും സരണം ന ലദ്ധാ
ഛമ്ഹി തതോ സപദി സന്നിപതിംസു സബ്ബേ;
൫൩൩. ¶
ദിസ്വാന തേ മുനിവരോ സഹയേ സസോകേ
രമ്മം തദാ ജലധിമജ്ഝഗതം മഹന്തം,
ഇദ്ധീഹി സേഹി ഗിരിദീപമി’ധാനയിത്വാ
ആരോപയിത്വ നിഖിലേ പുന തത്ഥ’കാസി;
കത്വേവമേ’സമസമോ’പസമന്ത’മീതിം
തത്ഥേവ ഭാസുരതരോ ഭഗവാ നിസീദി,
ബ്രഹ്മാമരാ’സുരഫണീ ഗരുളാദി സിദ്ധാ
സങ്ഗമ്മ’കംസു മഹതിം മഹമ’ഗ്ഗരൂപം;
ദേസേസി സംസദി ജിനോ സുതിസാധു ധമ്മം
തസ്മിം സദാസവനുദം സിവദം ജനാനം,
സുത്വാന നേകസതകോടി പമാണ പാണാ
ലദ്ധാ തദാ സമഭവും ചരധമ്മചക്ഖും;
തസ്മിം ദിനേ സുമനകൂട വരാധിവാസോ
തേജിദ്ധിബുദ്ധിവിഭവോ സുമനാഭിധാനോ,
ദേവോ പസന്നഹദയോ രതനത്തയമ്ഹി
സമ്പാപുണിത്ഥ പഠമം ഫലമുത്തമം സോ;
ഉട്ഠായ തുട്ഠവദനോ കതപഞ്ജലീകോ
മുഗ്ഗോ ജിനഗ്ഗ നഖരംസി പയോദധിമ്ഹി
വന്ദിത്വ ഏവമവചാ’തുല വീര ധീര
ലോകഗ്ഗ പുഗ്ഗല വരം ദദ സാമി ധീസ;
ദാസോസ്മി തേ ചരണ പങ്കജ പൂജകോഹം
സദ്ധാദയാദി വിഭവോ തനയോ’ഹമസ്മി,
തുമ്ഹേ വിനാ ഖണലവം വസിതും ന ഇച്ഛേ
തസ്മാ ദദാതു ഭഗവാ മമ പൂജനീയം;
സുത്വാന തം ധിതിമതീ പരിമജ്ജ സീസം
സംസത്ത ഛപ്പദ സരോരുഹ സന്നിഭേന,
ഹത്ഥേന നീല സക കുന്തല ധാതുമുട്ഠിം
ദജ്ജാഥ സോ മണിമയേന കരണ്ഡകേന;
൫൪൦. ¶
പഗ്ഗയ്ഹ ബാഹുയുഗലേന ഠീതോ നമിത്വാ
മുദ്ധാ ദധാസി മകുടം വിയ പീണിതത്തോ,
കത്വാ’ഥ സോ വര മഹം തിദിവേഹി സദ്ധി
’മപ്പേത്വ ധീര ഫരിഭുത്ത വസുന്ധരായം;
സോ’കാസി നീലരതനേഹി മഹാരഹേഹി
ഉബ്ബേധതോ രതന സത്ത പമാണ ഥൂപം,
നാഥേ ധരന്തസമയേവ പതിട്ഠഹീ സോ
ഥൂപോ തിലോകസുഖദോ മണി കാമദോ’വ;
പച്ഛാ തിലോകസരണേ പരിനിബ്ബുതമ്ഹി
ഖീണാ സവോ സമഹിമോ സരഭു യതിന്ദോ,
ആദായ തം ചിതകതോ ജിനഗീവധാതും
തസ്മിം നിധായ’കരി ബാരസ ഹത്ഥഥൂപം;
ചൂളാഭയഹ്വവനിപോ സമയേ’പരസ്മിം
ബത്തിംസ ഹത്ഥമ’കരിയത്ഥ വരോരുഥൂപം,
ദുട്ഠാദിഗാമണി നുപോ ദമിളേ ഹനന്തോ
കാരേസി കഞ്ചുകമഥോ ചതുസട്ഠിഹത്ഥം;
ഏവം സ സീഹലമഹാസരമജഝരൂള്ഹം
സേതമ്ബുജം’വ മധുപാവലി സേവനീയം,
ഭുമങ്ഗനാ കരതലേ സിതവിത്ഥലീലോ
ഥൂപോ ദദാതു മസമോപസമം ജനാനം;
ലങ്കോപസഗ്ഗമ’വധൂയ വിധായ ഖേമം
ലങ്കം നിജായ വരകുന്തല ധാതുയാ തം,
കത്വാന ഭാസുരതരം മുനി മങ്ഗലായ
പായാസി താരക പഥേ’നുരുവേലമേവ;
തസ്മിം വിധായ ബഹുവിമ്ഹിത പാടിഹേരം
ഭേത്വാ സസിസ്സകി’സിനോ പുന ദിട്ഠിജാലം,
ദത്വാന നിബ്ബുതിപദം സഹസിസ്സകസ്സ
നിബ്ബാണ സുന്ദര പുരം പരിപൂരയിത്ഥ;
൫൪൭. ¶
തമ്ഹാ വികാസിത കുസേസയ കാനനാഭ
വീതാസവേഹി നിവുതോ സുഗതേഭഗാമീ,
പായാസി രാജഗഹ ഗാമീ’മുദാരമഗ്ഗം
വേനേയ്യ ജന്തു കമലാകര ഭാനുരൂപോ;
തസ്മിം ഗതേ ജിനവരേ വര ബിമ്ബിസാരോ
പൂജം അകാസി മഹതിം സഹ ദേവതാഹി,
തസ്മിഞ്ഹി സംസദി ലഭിംസു അനപ്പപാണാ
മഗ്ഗേ ഫലേ ച സരണേ ച പതിട്ഠഹിംസു
രാജാ തതോ വിപുല വേലുവനാഭിരാമം
സാലങ്കതം വിവിധ പാദപ മണ്ഡപേഹി,
പാദാസി ദക്ഖിണകരേ ജലപാതനേന
കത്വാ ധരാധരധരം ഹിമവഞ്ച കമ്പം;
തസ്മിം സമന്തനയനോ നയനാഭിരാമോ
ഭുതിം ജനസ്സ സതതം അഭിവഡ്ഢയന്തോ,
ധമ്മമ്ബു വുട്ഠി നികരം പരിവസ്സയന്തോ
വസ്സം വസീ അദുതിയോ ദുതിയമ്ഹി വസ്സേ;
ദേവിന്ദ മോലി സമലങ്കത പാദപിട്ഠോ
ലോകസ്സ അത്ഥചരണേ സതതാഭിയുത്തോ,
തത്ഥേവ സോ ഹി തതിയേ’പി ചതുത്ഥവസ്സേ
വാസം അകാസി സുഗതോ സിരിസന്തിവാസോ;
ലോകസ്സ ധമ്മ മ’മലം സതതം വഹന്തോ
സാവത്ഥിയം രുചിര ജേതവനേ’ഭിരാമേ,
വാസം അകാസി സുഖദോ മുനിപഞ്ചമസ്മിം
വേനേയ്യ സത്തസമയം സമുദിക്ഖമാനോ;
ഇതി ലങ്കായ പഠമാ’ഗമനം.
അഥ ഭഗവതി തസ്മിം ജേതനാമേ വനസ്മിം
നിവസതി സതിലങ്കാ മങ്ഗലാ’വാസരൂപാ,
ഉപവനമിവ നാകേ നന്ദനം ദേവതാനം
അമര ഉരഗവാസാ രമ്മരൂപാ ബഭൂവ;
൫൫൪. ¶
തഹിമതി രുചിരസ്മിം വഡ്ഢമാനാദി സേലേ
മധുര സലിലവാഹേ രമ്മകല്യാണികാദോ,
ഉദധി ഭുജഗവാസേ നാഗദീപന്തികേ ച
മഹതി മഹിമ യുത്താ നാഗസങ്ഘാ വസന്തി;
പചുര മഹിമ യുത്തോ വഡ്ഢമാനാചലസ്മിം
അധിപതി ഭുജഗാനം ആസി ചൂലോദരവ്ഹോ,
മഹുദര ഇതി നാമോ നാഗദീപോദധിമ്ഹി
നിവസതി അഥ തേസം പബ്ബതേയ്യോ’രഗിന്ദോ;
ഇതര ഭുജഗ രഞ്ഞോ ധീതരം നാഗകഞ്ഞം
പിയതരമ’ഭിരൂപം’കാസി ദാരം തദാ ഹി,
അഥ ച ദുഹിതുയാ സോ ദീയമാനം ദദന്തോ
രുചിര മണീമയഗ്ഘം ആസനഞ്ചാപദാസി;
ദുഹിതരി മതകാലേ തേ’ഥ പല്ലങ്കഹേതു
ജലജ ഥലജ നാഗാ യുദ്ധസജ്ജാ അഹേസും,
അഥ ഥലജ ഭുജങ്ഗാ ഭങ്ഗകല്ലോലമാലാ
സദിസ ലൂലിത ചിത്താ ഗബ്ബിതേവം രവന്തി;
കിമു’ദധിജ ഫണീനം കിത്തി സമ്പത്തിയാ നോ
അപി യസപരിവാരാ കിം ബലേനിദ്ധിയാ കിം,
അഹമഹമീതി ഗബ്ബാ കിം കിമിസ്സായ തേസം
ഭവതി തിമിര’രീനം ഭാനുമഗ്ഗുന്നതീ കാ;
അഥ ജലജ’ലഗദ്ദാ ഗജ്ജനം ഗജ്ജയന്താ
ഭയജനക പഗബ്ഭാ ഫോടയന്താ ഭൂജാനം,
അഹമഹ പഭൂ രേ!രേ! പബ്ബതേയ്യാന’മേതം
പടുതരഡസിതോട്ഠാ കക്ഖ’ളേവം രവന്തി;
പടുതര ഗരുനാദാ താവ ഗജ്ജന്തി ദന്തീ
നയന പഥമു’പേന്തേ യാവ കണ്ഠിരവാനം,
തഥരിവ ഥലജാതാ ജുമ്ഹയന്താ സമഗ്ഗാ
നയന പഥഗതാ നോ സുഞ്ഞദപ്പാ ഭവന്തി;
൫൬൧. ¶
ഇതി തദുഭയസേനാ ഘട്ടയന്താ’ഞ്ഞമഞ്ഞം
വിവിധ പഹരണ്ഹോ ഉഗ്ഗിരന്തീ ഗിരന്തി,
സതത ഖുഭിത വേലാ സാഗരൂമീവ ഭന്താ
ലുലിത ലുലിത ചിത്താ യുദ്ധനിന്നാ ഠിതാസും;
അഥ തദഹു മുനിന്ദോ യാമിനീയാമ’മന്തേ
പതിനിയ മതിജാലം ലോകമോലോകയന്തോ,
സമര വസഗതാനം ഭോഗീനം ഭാവിഭുതിം
തദുപരി ച’ഭിവുദ്ധിം പസ്സി ലങ്കാതലസ്സ;
അഥ മുനി മധുമാസേ’പോസഥേ കാലപക്ഖേ
കത നിഖില വിധാനോ ഗയ്ഹ സങ്ഘാടികാദിം,
അനുഗതികമുദിക്ഖം പഞ്ചനേത്തോ സമന്താ
സുമന സുമന നാമം പസ്സി ദേവം സമിദ്ധിം;
തദഹു സുമനദേവോ ജേതനാമേ സുരമ്മേ
അധിവസതി വിഹാരേ ദ്വാരകോട്ഠോപകട്ഠേ,
ഠിത വിടപ സമിദ്ധേ ഖീരികാപാദപസ്മിം
സുഗത മഭിനമന്തോ അന്വഹം പൂജയന്തോ;
തമസമ്മുനി ദിസ്വാ’മന്തയിത്വാ’ഗതേ തം
ഇദമവച മയാ ഭോ സദ്ധിമാഗച്ഛ ലങ്കം,
സഹ തവ ഭവനമ്ഹാ പുബ്ബവുത്ഥപ്പദേസേ
തവ ഭവതി പതിട്ഠാ ഭോഗിനഞ്ജാ’ഭിവുദ്ധി;
അഥ മുനിവചനം സോ മുദ്ധനാമ’ഗ്ഗഹേത്വാ
സമുദിതഹദയോ തം രുക്ഖമുദ്ധച്ച മൂലാ,
സുഗതമുപരി കത്വാ ധാരയന്തോ സുഫുല്ലം
ബരിഹി ബരിഹി ഛത്താകാരമാഗാ നഭമ്ഹീ;
ദസബല തനുഭാ’ഭിസ്സങ്ഗമാ സോ ദുമന്ദോ
തരല മണീവ നാനാ’ഭാഹി സമ്ഭാവനീയോ,
വിലസിത ഇവ സബ്ബേ രുക്ഖസേലാദയോ’പി
അപഗത സകവണ്ണാവണ്ണവന്താ വിരേജും;
൫൬൮. ¶
ഖഗ ഭുജഗ സുരാദി മസ്സിതാ ഛപ്പഭാഹി
നിജപതി നിജജായാ സ്വഞ്ഞമഞ്ഞാസു മുയ്ഹും,
അസിത ഗഗന മജ്ഝേ സോഭമാനോ മുനിന്ദോ
വിതത വിവിധ രംസീ രംസിമാലീവ ഗഞ്ഛി;
ജലദ പടല സണ്ഡേ വജ്ഝമുദ്ദാളയിത്വാ
ബഹി വിലസിതകായോ സോമ്മദോസാകരോ,വ
കതുപരി തരുഛായോ ജോതമാനോ സമാനോ
ഉരഗ സമരഠാനം ഗന്ഥ്വാ’കാസേ നിസജ്ജ;
ഘനതര തിമിരം സോ ഇദ്ധിയാ സങ്ഘരിത്വാ
തഹിമതിരവ ഭീമം ഘോരസംരമ്ഭവന്തം,
അസനി സത നിപാതം വസ്സധാരാ കരാലം
ഉരുതര തത മേഘം മാപയീ സീതവാതം;
ഇതി തിഭുവനനാഥോ ദപ്പിതേ നാഗസങ്ഘേ
വിമദ കരണ ഹേതു ദസ്സയീ ഭേരവാനീ,
അഥ’പഗത പഗബ്ഭേ തേ വിദിത്വാന സത്ഥാ
അപനുദി ഭയജാതം തങ്ഖണംയേവ തത്ഥ;
തരുണ തരണിസോഭാ കേതുമാലാവിലാസിം
സുഭരുചി മുഖവന്ദം ലക്ഖണാകിണ്ണഗത്തം,
തിഭവ വിഭവദായിം തം വിദിത്വാന നാഗാ
ചുതപഹരണ ഹത്ഥാ വന്ദമാനാ മഹിംസു;
സിരസീ നിഹിതപാണീ രത്തപങ്കേരുഹേഹി
വികച വദന നേത്താ’മന്ദ കഞ്ജുപ്പലേഹി,
സക സക ധത നാനാവണ്ണ വമ്മാദികേഹി
വിവിധ കുസുമവത്ഥാ’മന്ദ ദീപദ്ധജേഹി;
ഉരഗ ഭവനവാസാ നാഗകഞ്ഞാ സമേച്ച
കുച കലസ സഹസ്സം ധാരയന്തി സലീലം,
ലലിത കണക വല്ലി ലീലമാധത്ത ഗത്താ
ഥുതി മുഖര മുഖാ താ സാധു കീളം അകംസു;
൫൭൫. ¶
അഥ മുനി ഉരഗാനം വിഗ്ഗഹം തം സമേതും
സുതിമന കമനീയം നിച്ഛരം ബ്രഹ്മഘോസം,
അജരമമര മഗ്ഗം സുപ്പസത്ഥം സുധിഹി
വരമതി വരധമ്മം ദേസയീ നം ഫണീനം;
ന ഭോ ഭോ സംസാരേ ഖലു ഭവതി സാരം ലവമ്പി
വിസേസാ തം സീതം ജലിത ദഹനേ വിജ്ജതി കദാ,
സദാ രാഗം രോഗം ബ്യധതി ജനതം നേകദുരിതം
തഥാപാ’യും പാതോ രവിരഭിമുഖുസ്സാവ സദിസം;
സരീരോ’യം ബത്തിംസ വിധ കുണപോ സാര രഹിതോ
പരിത്തം യോബ്ബഞ്ഞം കുസുമ സദിസം നിഗ്ഗതസിരി,
പഹന്ത്വാ ഗന്തബ്ബം ഭവജ വിഭവം സമ്ഭതമിദം
അഥേവം സന്തേ ഭോ വരയതി ഭവം കോ നു ഹി ബുധോ;
പലാസീ മക്ഖീ കോധൂപഹ മതോ മാനവിഭവോ
ജനോ’തീതോ’തോ ഭോ പയതി നരകം ദാരുണതരം,
ഫണീ മജ്ജാരോ സാ ഗുഹക കപയോ ഭൂയ ബഹുസോ
വധേന്തഞ്ഞോഞ്ഞം തേ നനുഭവമിദം ദുക്ഖമ’നിസം;
പുരേ കാകോ’ലുകാ അഥ വനഭവാ ഫന്ദന ഇസാ
കരിത്വാ’ട്ഠാനേ’ഘം ചിരമനുഭവും ദുക്ഖമനിസം,
അഹോ കപ്പട്ഠന്തം സരഥ ദുരിതം വേരജമിദം
ന ഹേത്ഥസ്സാദോ ഭോ’ണുമപി കലഹേ മേത്തിമ’മതം;
ബലം ബാലാനം ഭോ സക സക വധായേവ ഭവതി
അതീതേകാ ഖുദ്ദാ ലടുകികദിജാ നട്ഠതനയാ,
ഗജം ബാലം മത്തം പവിധി ന ബലം ഹോതി സരണം
അഥട്ഠാനേ കിം ഭോ കുരുഥ വീരിയം ഭുതി ഹനനം;
ന ദുക്ഖം തേസം യേ വിഗത കലഹാ ഏകമനസാ
അതീതേ ഭോ ലാപാ അഘടിത മാനാ പേയ്യവചനാ,
സുഖം വാസം’കാസും യദഹനി ഭവും തേ’ഥ വിധുരാ
വസം വ്യാധസ്സാഗും തദഹനി അഹോ!മേധഗ ബലം;
൫൮൨. ¶
ഇതി തിഖിണ സുധിമാ കത്തുമേതേ സമഗ്ഗേ
അവദി പവര ധമ്മം സാധു വിഞ്ഞുപ്പസത്ഥം,
അഥ മുദിതമനാ തേ പീണിതാ തസ്സ നാഗാ
മണിമയമ’തുലം തം ആസനം പൂജയിംസു;
അഥ മുനി ഗഗനമ്ബോരുയ്ഹ ഭുമിപ്പദേസം
തരുണ രവിവ തസ്മിം ആസനേ ആസി ഭാസം,
അഥ ഭുജഗഗണാ തേ ദിബ്ബ ഖജ്ജാദികേഹി
പരിവിസിയ മുനിന്ദം സാധു ധമ്മം സുണിംസു;
അഥ ജല ഥലജാനം തത്ഥ യുദ്ധാ’ഗതാനം
അഗണിത ഭൂജഗാനം’സീതികോടീ ഭുജങ്ഗാ,
വിമല സരണസീലേ സുപ്പതിട്ഠാ സുതുട്ഠാ
അകരു’മതിമുളാരം സത്ഥു പൂജാവിധാനം;
അഥ മഹുദര രഞ്ഗ്ഞോ മാതുലോ നാഗരാജാ
മനിനയനകനാമോ രമ്മകള്യാണദേസാ,
ഉരഗ സമര ഹേതൂ ആഗതോ നാഗദീപം
സുഗതവര സരീരം ദിസ്വ നത്വാലപേവം;
യദി സുഗത! ഇമം ത്വം നാഗതോ അസ്സ ഠാനം
മയമപഗത പാണാ ഹോമ ഝത്വാ’ഞ്ഞമഞ്ഞം,
രുധിരവഹ വികിണ്ണോ അസ്സ ഭുമിപ്പദേസോ
പസമി ദഹന ദിത്തം അമ്ബുദേനേവ തം ത്വം;
മമ ഭഗവ! പുരാമേ ദിട്ഠപുബ്ബം തവേതം
രുചിര സിരിസരീരം രംസിജാലാ’ഭികിണ്ണം,
അപി സുമധുര ധമ്മം ദേസയന്തേ സുരാനം
ദസബല സുതപുബ്ബം ആനുഭാവഞ്ച തുയ്ഹം;
അഹമസമ പുരേ തേ വിസ്സുതോയേവ ദാസോ
യദി മനസി ദയാ തേ ഹോതി ദാസേ പുനാ’പി,
പവര രതനദീപേ ഹോതി കള്യാണിഗങ്ഗാ
മമ വസതി തഹിം തം ദട്ഠുകാമോ’ഭിയാചേ;
൫൮൯. ¶
ഇതി യതിപതി തസ്സാ’രാധനം പഗ്ഗഹേത്വാ
സക പരിചിത ഭുമ്യാ ചേതിയത്ഥം വിധായ,
മണിമയ പരിഭുത്തം ആസനം ചാ’പി തേസം
സ സുമന തരു രാജം പൂജനത്ഥം വിധായ;
ദസബല പരിഭുത്തം സബ്ബമേതം ഭുജങ്ഗാ
മണിരിവ രുചീദം തേ ധാതുയോയേവ തസ്മാ,
മഹഥ നമഥ നിച്ചം മംവ സഗ്ഗാ’പവഗ്ഗം
ദദതി ഇതി ച വത്വാ ഓവദിത്വാന സത്ഥാ;
നഭതല’മു’പഗന്ത്വാ ദേവനാഗേ മഹേന്തേ
ദിസി ദിസി വിസരന്തോ നീലപീതാദി രംസി,
മന നയന ഹരന്തോ ജന്തുനം ലോകസാരോ
അഗമി രവി’വ ഖമ്ഹാ ജേതനാമം വിഹാരം;
അഥ മനുജമരാനം നത്തസിദ്ധാദികാനം
സതത’മമത ധമ്മം ദേസയന്തോ ഫണീനം,
വനഭവന സുരമ്മേ മങ്കുലവ്ഹേ നഗിന്ദേ
അകരി മുനി നിവാസം ഛട്ഠമേ ഹായനമ്ഹി;
സുരപുരുപവനേ’ഥോ പാരിജാതസ്സ മൂലേ
അരുണ മുദുസിലായം ഭാസമാനോ മുനിന്ദോ
സുനിപുണ’മഭിധമ്മം ദേസയന്തോ സുരാനം
അകരി വരനിവാസം സത്തമേ തത്ഥ വസ്സേ;
അഥ സുഖദ മുനിന്ദോ ജേതനാമേ വിഹാരേ
അവസി വിമലപഞ്ഞോ അട്ഠമേ സാരദസ്മിം,
അജര’മമര സന്തിം ഫസമാനോ പരേസം
വിവിധ നയ വിചിത്തം ദേസനം ദേസയന്തോ;
ഇതി ലങ്കായ ദുതിയാഗമനം.
ഏവം ജിനോ ജേതവനേ വസന്തോ
നീസ്സായ സാവത്ഥിപുരം വിഹാസി,
സാ കിദിസീ ആസി പുരീ തദാനീ
തം കീദിസം ജേതവനം വിഹാരം;
൫൯൬. ¶
ഭൂമങ്ഗനായാഹിത ഉത്തമങ്ഗേ
ഭാസന്ത നാനാരതനാഭിരാമാ,
വിസാലമോലീവ വിസാലഭോഗാ
സാ ജമ്ബുദീപമ്ഹീ ബഭുവ രമ്മാ;
സിരീനികേതേ സിരിമാവഹന്തീ
വിരാജതേ യാ വസുധാ തലസ്മിം,
സാ ദേവരാജസ്സ’മരാവതീ’വ
രഞ്ഞോ കുവേരസ്സ’ലകാവ രമ്മാ;
സാ പുഞ്ഞപഞ്ഞാലു ജനാധിവുത്ഥാ
സോണ്ണാദി പുണ്ണാപനാകിണ്ണവീഥീ,
ഉത്തുങ്ഗ മാതങ്ഗ തുരങ്ഗ രങ്ഗാ
സാ രാജതേ കഞ്ചന മന്ദിരാലീ;
രരാജ സാ ഭാസുര രാജപുത്താ
പുഞ്ഞങ്ഗനാലാസ വിലാസയന്തീ,
വേദങ്ഗപാരങ്ഗത വിപ്പചാരാ
ദ്വിപഞ്ച സദ്ദേഹി ച നിച്ചഘോസാ;
അനേകസിപ്പീ സത സമ്പകിണ്ണാ
നാനാദിസാഹാ’ഗത സത്ഥവാഹാ,
പഹുതഖീണാസവപാദപൂതാ
ബഭാസ സാ മങ്ഗല മന്ദിരം’വ;
ഭവന്തരേ യോ ചരിയം ചരന്തോ
സുവോ’പനിസ്സായ വസം ഗുണേന,
യഞ്ഞങ്ഗസാഖിം മതസീനപത്തം
അകാ സമിദ്ധം ഫലപല്ലവേഹി;
ഇദാനി പത്വാന ഭവസ്സ അന്തം
നിസ്സായ യം സോ വസതേ മുനിന്ദോ,
തസ്സാ ഗുണം കോ ഹി അസേസയിത്വാ
കഥേതി സാ വസ്സൂ’പമായ തസ്സാ;
൬൦൩. ¶
തസ്സോപകട്ഠേ രതനംവ’നഗ്ഘം
മനോഹരോ ഉത്തമസത്തസേവി,
ജനാനമാകഖിങതദോ വിഹാരോ
ബഭുവ ജേതാദി വനവ്ഹയേന;
സമഫുല്ല പുപ്ഫരസ മോദിത ഛപ്പദാലീ
ഝങ്കാര നാദ പരിവാദിത തന്തിനാദാ,
സമ്മത്ത’നന്ത ദിജ കുജിത ഗീതവന്താ
തിട്ഠന്തി യത്ഥ തരവോ നടകാവ ഛേകാ;
ഖീരണ്ണവാഹരിയ ധോവിയ ഖീരനീരാ
സോസേത്വ സജ്ഝുമലയേ സസികന്തി മസ്സം
യത്ഥോകിരിത്വ തനിതാ വിയ വാലുകായോ
സാ മാലകാവലി ബഭാസ പയോദധി’വ;
വിജ്ജോതമാന രതനപ്പമുഖാനനമ്ഹി
സോപാന മാല പദഗണ്ഠിദുജേഹി ഹാസം,
കത്വേവ ദേവഭവനാനമഹം വിരാഗ
വന്തീ’തി ഗന്ധകുടി യത്ഥ പഹാസയിത്ഥ;
കമ്മാര ഗഗ്ഗരി മുഖോ’പരി സമ്പപുണ്ണാ
അങ്ഗാര കന്തര വിനിഗ്ഗത ജാലകാവ,
സമ്ബുദ്ധദേഹ പരിനിഗ്ഗത രംസിമാലാ
ദായഗ്ഗ നിഗ്ഗത കരാ വിസരന്തി യസ്മിം;
തുമ്ഹേ സരാഗ ജനസങ്ഗമതോ’തി ഗീതാ
ധഞ്ഞാ മയന്തീ വിമലേഹീ സമങ്ഗിതത്താ,
തുട്ഠാവ ഹാസ മകരാ സുരപാദപാനം
രാജേന്തി യത്ഥ യതിനിസ്സിത പാദപിന്ദാ;
പുന്നാഗ നീപ വകുല’ജ്ജുന രാജരുക്ഖ
നാഗാ’ഗ ചൂത യുഗപത്തക ചമ്പകാനം,
പുപ്ഫാഭികിണ്ണ ധരണീ രതനേഹി നാനാ
പച്ഛന്ന ദിബ്ബഭവനം വിയ ഭാതി യത്ഥ;
൬൧൦. ¶
ബ്രഹ്മാസുരാസുര നരോരഗ ലിങ്ഗിസിദ്ധ
വിജ്ജാധരാദി ജനതാ കതവന്ദനേഹി,
തേഹേവ ഘുട്ഠ ഥുതിമങ്ഗല ഗീതികാഹി
യത്ഥോപഗാന മനനേത്തഗണാ മുദേന്തി;
നിഗ്ഘോസിതാമല സുസീതല നിജ്ഝരേഹി
സമ്മത്ത നേകദിജ ഘുട്ഠ ജലാസയേഹി,
കിഞ്ജക്ഖ പത്ത പരികിണ്ണ സിലാതലേഹി
തുസ്സന്തി യത്ഥ സതതം യതീനം മനാതി;
യോ നേക കപ്പ സത സഞ്ചിത പുഞ്ഞരാസി
ഹിത്വാ’മിതം കപിലവത്ഥു മഹാസിരിമ്പി,
ആഗമ്മ യത്ഥ നീരതോ സുഗതോ മഹേസി
കോ തത്ഥ ഭുതി മതുലം കഥികോ കഥേതി;
തസ്മിം ജിനോ വസതി ജേതവനേ വിഹാരേ
ഇന്ദോ യഥാ രുചിര നന്ദന കാനനമ്ഹി,
ബ്രഹ്മാ’വ ബ്രഹ്മഭവനേ സപിതാമഹേഹി
താരാവലീ പരിവുതോ ഗഗനേ’വ വന്ദോ;
തദാഗമ്മ മഹാനാഗോ മണി അക്ഖികനാമകോ,
ലങ്കാതോ ജിനപാദസ്മിം ഫണിം പച്ചേദ’മബ്രുവി;
സമ്ബുദ്ധാ ധീര ലോകസ്മിം ലോകസ്സത്ഥാഭിവുദ്ധിയാ,
ജായന്തി സാമി തുമ്ഹാകം ദയായന്തോ’ഗധാ മയം;
തേന മേ ദാസഭുതസ്സ സംസാരന്ദുഘരാ ഥിരാ,
മുത്തിം യദിച്ഛസേ മയ്ഹം ഗഹണീയം നിമന്തണം;
സുത്വാന തം മഹാനാഗോ മഹാനാഗ നിമന്തണം,
പടിഗ്ഗഹേസി തം തുണ്ഹീഭാവേന കരുണായ സോ;
ഞത്വാ തം സുമനോ നാഗോ ലഹുമാഗമ്മ സീഹലം,
കള്യാണാപഗപസ്സമ്ഹി മനോനന്ദന ഭുതലേ;
സജ്ഝു കമ്ബുമണി മുത്ത പവാല വജിരാമയേ,
വഹാരഹേ മഹാഥൂനേ ഘടകാദിം നിധാപിയ;
൬൨൦. ¶
ദത്വാ തുലാദയോ സേസ മന്ദിരങ്ഗേ തഥേവ ച,
വിടങ്ക വ്യാല സീഹാദി പന്തിയോ’പി തഥേവഹി;
സാതകുമ്ഹമയാ’നേക ചിത്തേഹി സാധു ചിത്തിതം,
നിമ്മായ ഗോപാനസിയോ പക്ഖപാസേ ച കണ്ണികം;
സിങ്ഗി നിക്ഖേന സിങ്ഗഞ്ച ഛദനിന്ദമണീഹി ച,
സോണ്ണ കിങ്കിണി മാലായോ കണ്ണമാലാ ച മാപിയ;
ചിത്തവിതാനം ബന്ധിത്വാ മുത്തോലമ്ബേ തഹിം തഹിം,
കത്വാന ഗന്ധദാമേഹി പുപ്ഫദാമേഹി സങ്കുലം;
ഇന്ദനീലമയം ഭുമി മജ്ഝേ’നഗ്ഘ മഹാസനം,
മാപേസി പരിതോ സേസ ഭിക്ഖൂനഞ്ച സുഭാസനേ;
രതനേഹേ’വാപസ്സയേ വേദികാ ഏളികാമയേ,
മുത്താ വാലുക സങ്കിണ്ണം മാലകഞ്ച മനോരമം;
സത്ത രതന സമ്ഭുത തോരണൂ’പരി തോരണേ,
സന്തീര കുസുമാ’കിണ്ണ ഹാടകാദി ഘടാകുലം;
നേക രാഗദ്ധജാകിണ്ണ വിതാന സമലങ്കതം,
ദീപ ധൂപാലി സങ്കിണ്ണ ഗന്ധപുപ്ഫ സമാകുലം;
ഏവമാദിഹി നേകേഹി വണ്ണേഹി സമലങ്കതം,
മാപേത്വാ മണ്ഡപം സേട്ഠം ദേവമണ്ഡപ സന്തിഭം;
സീത വാലുക സഞ്ഛന്നം മുദു പാദപടത്ഥതം,
മാപേത്വേവം മഹാമഗ്ഗം സുരഞ്ജസ സമഞ്ജസം;
സഞ്ചിനിത്വാന തേ നാഗാ ഖജ്ജ ഭോജ്ജ ഫലാഫലേ,
ദിബ്ബന്നപാനേ പചുരേ പടിമഗ്ഗം ഗമും തദാ;
തതോ കാരുണികോ നാഥോ ബോധിതോ അട്ഠമേ സമേ,
വേസാഖ പുണ്ണമാസിമ്ഹി സന്നിപാതിയ സാവകേ;
ഏഥജ്ജ ഭിക്ഖവോ ലങ്കം നാഗാനം’നുഗ്ഗഹായ ഭോ,
മണിഅക്ഖികോ നിമന്തേസി പസന്നോ ബുദ്ധസാസനേ;
സുത്വാന വചനം തസ്സ സമ്ബുദ്ധസ്സ സിരീമതോ,
അസ്സവാ പേസലാ ഭിക്ഖൂ പച്ചസ്സോസും സമാഹിതാ;
൬൩൪. ¶
സാരിപുത്തോ തതോ ഥേരോ പഞ്ഞായ’ഗ്ഗ ധുരന്ധരോ,
പത്തചീവരമാ’ദായ അഗമാ ജിനു’പന്തികം;
മോഗ്ഗല്ലാനോ മഹാഥേരോ ദുതിയോ അഗ്ഗസാവകോ,
പത്തചീവരമാദായ സോപാഗ ജിന സന്തികം;
ധൂതപാപോ ധുതങ്ഗഗ്ഗോ മഹാകസ്സപ നാമകോ,
പത്തചീവരമാദായ ആഗമാ ജിനസന്തികം;
സാസനേ വിനയഞ്ഞ നമഗ്ഗോ’ പാലിവ്ഹയോ യത,
പത്തചീവരമാദായ ജിനന്തികമു’പാഗമി;
ദിബ്ബചക്ഖൂനമഗ്ഗോ യോ രുദ്ധപാപാരി ദപ്പകോ,
ഥേരോ’നുരുദ്ധോ വരദോ സോപാഗ മുനിസന്തികം;
മണിവ കാമദോ കാമമു’പവാനോ’തി വിസ്സുതോ,
ഞാണീ ഗണീ ദക്ഖിണേയ്യോ ഥേരോപാഗ ജിനന്തികം;
ബക്കുലോ വിമലോ സീല സമാധാദി ഗുണാകരോ,
ആഗതോ സപരിക്ഖാരോ ഭിക്ഖൂനം സമിതിം തദാ;
ബുദ്ധസാസന ധോരയ്ഹോ ഥേരോ അങ്ഗുലിമാലകോ,
സഹാ’ഗന്തും മുനിന്ദേന സന്നദ്ധോ സഹസാ ഗതോ;
സാസനോദയ സേലഗ്ഗേ സൂരിയോ വിയ ഭാതി യോ,
സോ’യം രാഹുലഥേരോ’പി ലഹു’ഗാ പിതു സന്തികം;
ഭദ്ദാചാരോ ഭദ്ദിയവ്ഹോ ഥേരോ ഭദ്ദഘടോ വിയ,
പാകടോ ഭുവനേ സോ’പി ഗതോ സമ്ബുദ്ധ സന്തികം;
ദേവദ്ദുമോ’വ ലോകസ്സ യോ ദദാതി’ച്ഛിതി’ച്ഛിതം,
ജിനോരസോപി സേലവ്ഹോ ഗതോ സമ്ബുദ്ധസന്തികം;
യാമിനീ സാമികോ’വാതി ഭാതി യോ സാസനമ്ബരേ,
മഹാനാമ മഹാഥേരോ സോപാഗ മുനിസന്തികം;
മനോസിലാതലഗ്ഗമ്ഹി ജുമ്ഹമാനോ’വ കേസരീ,
സുഭുതിവ്ഹ മഹാഥേരോ ബുദ്ധുപന്തിക മാഗതോ;
ബുദ്ധസാസന ഛദ്ദന്ത സരസീ സാരസോ വിയ,
വിസ്സുതോ തിസ്സഥേരോ’പി ഗതോ ഭിക്ഖുസമാഗമം;
൬൪൮. ¶
ജിനസാസന സമ്ഫുല്ലസരസീരുഹ മജ്ഝഗോ,
മധുബ്ബത നിഭോ രാധഥേരോ’പി സഹസാ ഗതോ;
ഭഗു ദബ്ബോപ’സേനോ ച കോണ്ഡഞ്ഞ’സ്സജി സീവലി,
ഏതേ ജിനത്രജാ ഥേരാ ഗതാസും മുനിസന്തികം;
കുമാരകസ്സപോ പുണ്ണോസോണോസോഭിത രേവതാ,
ഥേരാപേതേ അഭിഞ്ഞാതാ ഗതാസും സത്ഥുസന്തികം;
വങ്ഗീസോ സാഗതോ നന്ദോ ഭാരദ്വാജോ ഗവമ്പതി,
പത്തചീവരമാദായ ഗതാസും ജിനസന്തികം;
ഏവമാദി മഹാനാഗാ പഞ്ചസത ജിനോരസാ,
സമാഗഞ്ഛും സഹാഗന്തും മുനിനാ ലോകസാമിനം;
തതോ സോ ജഗദാനന്ദോ കരുണായാഭിരാധിതോ,
മേരും പരിക്ഖിപന്തോവ അനേകജ്ജുതി വിജ്ജുയാ;
നിവാസേത്വാ സുദ്ധരംസി വിസരന്തരവാസകം,
തസ്സൂപരി ജിനോ രത്തം ബന്ധിത്വാ കായബന്ധം;
അച്ചുഗ്ഗതം മഹാഥൂപം ചാരു ചാമീകരജ്ജുതിം,
പടിച്ഛാദയമാനോവ രത്തകമ്ബല കഞ്ചുനാ;
വണ്ണ നിഗ്രോധപക്കംവ സുരത്തം പംസുകുലികം,
സങ്ഘാടിയാ കരിത്വാന സഗുണം ഉത്തരീയകം;
ഹുത്വാന സുപടിച്ഛന്തോ പാരുപിത്വാന സാധുകം,
പത്തത്ഥായ പസാരേസി ജാലാകുലകരഞ്ജിനോ;
ലോകനാഥപ്പഭാവേന തതോ പത്തമധുബ്ബതോ,
പാണി സരോരുഹസ്സന്തോ സമ്പത്തോസി തമഗ്ഗഹി;
തതോ സസിസ്സകോ നാഥോ ഉഗ്ഗന്ത്വാ ഗഗനങ്ഗനം,
നാനാവണ്ണമ്ബുദേ തത്ഥ മദ്ദന്തോ ഗന്തുമാരഹഭി;
തതോ സമ്ബുദ്ധ ദേഹസ്മാ നിക്ഖന്താസും ഛ രംസിയോ,
ഹേമകണ്ണികതോ യാത മണിഗോപാനസീ യഥാ;
ബാണിന്ദീവര പുപ്ഫേഹി മേവ’കിന്ദമണിഹി ച,
ഛാദേന്തി വിയ നക്ഖത്താ നീലം’സു മുനിദേഹതോ;
൬൬൨. ¶
ചമ്പകുദ്ദാലമാലാഭീ ഹേമചുണ്ണമ്ബരേഹി ച,
പൂരയന്തി വിയാസങ്ഗ പീതംസൂ ജിനദേഹതോ;
ഭണ്ഡീപുപ്ഫകദമ്ബേഹി ലോഹിതങ്കമണിഹി ച,
ലോഹിതാഭാ പപൂരേന്തി ദിസാ’ഗാ മുനിദേഹതോ;
ഹാര മല്ലിക മാലാഹി സോമംസു ഫലികാദിഹി,
പൂരയന്തി വിയാസങ്ഗ ഓദാതാ മുനിദേഹതോ;
പിഞ്ജുമഞ്ജേട്ഠരാസീഹി പദുമാഭമണീഹി ച,
ദിസം ഛാദയമാനാഗാ മഞ്ജിട്ഠാഭാ ജിനങ്ഗതോ;
നേകിന്ദചാപ കിണ്ണംവ ദിവസം രതനുത്ഥതം,
ചിത്തപടംവ മുഞ്ചന്തം മിസ്സാഭാഗാ ജിനങ്ഗതോ;
ഗിരികൂട കൂടാഗാര മത്താ ഛബ്ബണ്ണ രംസിയോ,
ആവേലവേലാ ധാവന്തി ദിപ്പമാനേതരേതരാ;
ഗച്ഛമാനാ’ഹനിത്വാന ചക്കവാള സിലുച്ചയേ,
ഉഗ്ഗന്ത്വാ പരതോ യന്തീ നീര നിജ്ഝര സന്നീഭാ;
സമ്മുഖേ സമ്മുഖേ തായോ രുക്ഖപബ്ബത ആദയോ,
കാരയന്താ സകം വണ്ണം ധാവന്താ’പി ച സിന്ധവോ;
ഉദ്ധമുഗ്ഗതരംസീഹി രഞ്ജിതാ ജലദാ തദാ,
നാനാവണ്ണേ പുനേവാസി നൂതനോ രവിമണ്ഡലോ;
ജിനപ്പഹാ പവാഹേസു നിമുഗ്ഗാ ദേവതാ ഗതാ,
പൂജേതുംവ നിജത്തേഹി നാനാവണ്ണാ സിയും തദാ;
പവിട്ഠാ ബുദ്ധരംസീനമന്തരം ദേവധീതരോ,
അസഞ്ജാനീയ മുയ്ഹിംസു മുഹുത്തം അത്തനോ ധവം;
സുരാ സുരോരഗ ബ്രഹ്മ സിദ്ധ വിജ്ജാധരാദയോ,
ചാമരച്ഛത്തകേതുഹി പൂജയന്താ ജിനന്ത്വഗും;
അഗ്ഘികം പന്തിയോ കേചി തോരണൂപരി തോരണേ,
ഘടദീപാലിയോ തന്ഥ കരോന്തി അഭിതോ’ഭിതോ;
പാദപടേ പത്ഥരന്തി വിതത്വന്തി വിതാനകേ,
തത്ഥൂപരി അനേകാനീ കുസുമാനോ’കിരന്തി ച;
൬൭൬. ¶
കതമം ദേവലോകന്നുയാതി ലോകഗ്ഗനായകോ,
യാതി കിം ബുഹ്മലോകന്നു അമ്ഹാകം ഭവനന്നു ഖോ;
കത്ഥ നു ഖോ ദേവദേവോ കസ്സനുഗ്ഗഹബുദ്ധീയാ,
യാതീ’തി കങ്ഖിതാ കേചി സംസരന്തി ഇതോചിതോ;
മാപേത്വാ അഭിതോ മഗ്ഗേ മണ്ഡപേ രതനാമയേ,
സയനാസനം പഞ്ഞപേത്വാ കാചി തിട്ഠന്തി ദേവതാ;
തഹിം തഹിം പട്ഠപേന്താ സുധന്ത മധുരോദകം,
യാവമാനാ ജിനം കേചി തിട്ഠന്തി ച മഹന്തി ച;
ഏവം മഹാമഹേ നാഥോ വത്തമാനേ അനൂപമേ,
ജലം സമ്ബുദ്ധസിരിയാ നൂതനോ സൂരിയോ വിയ;
ബ്രഹ്മസേനാഭിതോ യാന ബ്രഹ്മാവാഥ സഹമ്പതി,
സുരസേനാഭിതോ യാന സക്കോവ സമലങ്കതോ;
ഗഗാലിമഭിതോ യാന ഗഹങ്ഗാ മണി സന്നിഭോ,
ധതരട്ഠഖഗിന്ദോവ ഹംസസേനാലി പുബ്ബഗോ;
അപേത രാഗദോസേഹി വീതമോഹേഹി സബ്ബസോ,
പടിസമ്ഭിദത്ത സമ്പത്ത സാവകേഹി അനുഗ്ഗതോ;
യേസം യേസം മനസ്മിം യം യമത്ഥി കിഞ്ചി സംസയം,
തേസം തം തം പണുദേന്തോ ദേസനായ സുധാസിനം;
തത്ഥ തത്ഥാനുരൂപേന പാടിഹാരിയ കമ്ബുനാ,
ലോകസ്സ നയനാലീ സോ തോസസ്സുസു നിമുജ്ജയം;
സമ്പത്തോ’ലങ്കതം ലങ്കമഥാഗു ഫണിനോ തദാ,
പടിമഗ്ഗം കരോന്താ തേ തത്ഥ തത്ഥ മഹാമഹം;
ഉരഗാനമന്തരേ ദേവാ ബ്രഹ്മാസും തേസമന്തരേ,
ഏവം സമ്മിസ്സകോ ലോകേ ബ്രഹ്മലോകാ പപൂരയി;
യേ പസ്സന്തി ജിനം തത്ഥ സസിസ്സം സിരിയാ ജലം,
സുലദ്ധാ തേഹി നേത്താനി തേസമക്ഖീനി ലോചനാ;
യേ സുണന്തി തദാ ധമ്മം ധമ്മിസ്സര പഭാവിതം,
സുലദ്ധാ തേഹി സോതാനി തേസം സോതാനി സോതകാ;
൬൯൦. ¶
യേ ലപന്തി തദാ ബുദ്ധഗുണഞ്ഹി ഗുണഭൂസണാ,
സുലദ്ധാ തേഹി വേ ജിവ്ഹാ തേസം ജിവ്ഹാ രസഞ്ഞകാ
യേ വന്ദന്തി ജിനം യന്തം സസങ്ഘം ഗഗനങ്ഗനേ,
സുലദ്ധാ തേഹി ഹത്ഥാനി തേസംയേവ ഭുജാ ഭുജാ;
തദാ തഥാഗതം ദിസ്വാ യേ സന്തുട്ഠാ തഥാഗതം,
തഥാഗതാനം സബ്ബേസം യോ തോസോ ഹോതു സബ്ബദാ;
ഗതോ കല്യാണീയം നാഥോ മഹേന്തേവം സദേവകേ,
തേസം പൂജാവിധാനം കോ മുഖേനേകേന ഭാസതി;
തതോ ഗങ്ഗാ മനുഞ്ഞഞ്ഹി സമ്പത്തം തം സപുത്തകം,
തരങ്ഗ മുദു ബാഹാഹി ഗഹേത്വാ ചരണമ്ബുജേ;
പാദേ പക്ഖാലയി സമ്മാ ഫേണ പുപ്ഫുപഹാരികാ,
തതോ തതോതും ഗണ്ഹിത്വാ അകാ ദേഹസ്സനുഗ്ഗഹം;
തതോ സോ യാചിതോ സത്ഥാ നാഗസങ്ഘേഹി വന്ദിയ,
അഗമാ മണ്ഡപം രമ്മം മനോനന്ദനമാവഹം;
ഗന്ത്വാ മണ്ഡപ മജ്ഝമ്ഹി ബുദ്ധാരഹ മഹാസനേ,
നിസീദോഭാസയം ആസാ രവീവ ഉദയാവലേ;
തതോ ഭിക്ഖു നിസീദിംസു പത്ത പത്താസനേ തദാ,
ബഭാസ മണ്ഡപം’തീവ സരംവ പദുമാകുലം;
ജനനേത്താലിനോ’ഗമ്മ വസീ സോമ്മമുഖമ്ബുജേ,
പതന്താ കുസലാമോദേ ഗണ്ഹന്താ തിത്തിനോ ഗതാ;
തഥാ സഭിക്ഖുകാ നാഗാ മുനിനോ രൂപസാഗരേ,
നേത്തിന്ദ മണിനാവാഹി പാരം ഗന്തും ന തേ പഭു;
തതോ സസങ്ഘം സുഗതം സജനോ മണി അക്ഖികോ,
സക്കച്ചം സകഹത്ഥേഹി അന്നപാനേന തപ്പയീ;
അഥോനീത പത്തപാണിമ’ച്ചയിത്വാ തഥാഗതം,
ഭത്തിനിന്നോ നിമന്തേസി ദേസനത്ഥാനുമോദനം;
തതോ ബ്രഹ്മസ്സരോ സത്ഥാ നിച്ഛരം ബ്രഹ്മഘോസനം,
വിഞ്ഞാപേന്തോ ജനേ സബ്ബേ സകസദ്ദേന ദേസനം;
ദേസേസ്വേവം ജിനോ ധമ്മ’മനിലാസനകാദിനം,
പീതിപാമോജ്ജ ജനനം നിബ്ബാണാമത’മാവഹം;
ഭോ ഭോ സുണാഥ ഭുജഗാ ഭവസാഗരമ്ഹി
പാപാരിനക്കമകരാകുല ദുഗ്ഗമമ്ഹി,
മഗ്ഗാ ജനാ ഖലു ലഭന്തി കദാ പതിട്ഠം,
ഓഹായ ബുദ്ധഥിരസാരതരിം വിസാലം;
ലദ്ധാന ദുല്ലഭതരം മുനിപാതുഭൂത
കാലം ചിരേന ഭുജഗാ ന പമാദയിത്ഥ,
ജാതീ ജരാ മരണ ദുക്ഖ പരിദ്ദവാ ച
സംസാരികസ്സ ന തതോപ’ഗതസ്സ ഹോതി;
താരുഞ്ഞമമ്ബുജസിരിംവ പരിത്തകാലം
പാണം തുസാരലവ’സാരതരം ജനാനം,
ഭോഗം ദധാതി ജലധിമ്ഹി തരങ്ഗഭങ്ഗിം
നിച്ചം മനോ ദഹതി സോകസിഖീഭി നാനാ;
കത്വാന രാഗമിസയോ’പി ഖഗാ ദുപഞ്ഞാ
ഥിരൂപി നാരികുസുമേസുപി രൂപഗിദ്ധാ,
പത്താ’നയം ഖലു പുരേ പരിഹീന ഝാനാ
രൂപേ ന രജ്ജഥ തതോ ഖലു സാധുപഞ്ഞാ;
സദ്ദാനുരാഗമനുഗോപി പുരേ സിഖണ്ഡീ
സുത്വാന മോരി മധുരം ഗിരമഞ്ജിതങ്ഗോ,
വ്യാധസ്സ ഹത്ഥമഗമാസി ഭവേസു തസ്മാ
നത്ഥേവ സദ്ദസമദുക്ഖകരം ജനാനം;
ഓഹായ നേകകുസുമേസു പരാഗരാഗം
മത്തേഭകുമ്ഭ മഗമാ മദഗന്ധലുദ്ധോ,
ഭിങ്ഗോ പഭഗ്ഗ തനുകോ കരികണ്ണതാലാ
നത്ഥേവ ഗന്ധസദിസം തിഭവേസു പാസം;
ഗമ്ഭീര നീരധിഭവോ പവുരാസനോ’പി
മിച്ഛോ ഗിലിത്വ ബലിസം രസഗേധഹേതു,
പപ്പോതി ദുക്ഖമതുലം ന രസേസു സാത
മത്ഥിതി മന്ത്വ പജഭാഥ രസേസു ഗേധം;
൭൧൨. ¶
ഭോ ബുഹ്മലോകാ’ഗത സുദ്ധസത്തോ
ബുദ്ധത്തമേവ നിയതോ അപി ബോധിസത്തോ,
ഥിസങ്ഗമായ പരിഹായി സരജ്ജതോ’പി
തസ്മാ ഹി ഫസ്സസദിസോ അനയോ നവത്ഥി;
ഭേരണ്ഡ പേലക കപു’ദ്ദക ഹേതുഹീന
സത്താപി ദാനരുചി ദാനമണിപ്പഭാവാ,
പത്താ’പവഗ്ഗ വരസാരപുരം ഭുജങ്ഗാ
കോ നപ്പദാതി ധനികോ സിവ’മേസമാനോ;
പാലേത്വ സീലമ’മലം വിസകണ്ഠികാപി
ഇന്ദസ്സ നന്ദനവനേ’സി പിയാ മഹേസീ,
തസ്മാ പസത്ഥവിഭവം യദി പത്ഥയവ്ഹോ
പാലേഥ സീലമ’മലം ഖലു ജിവിതം’വ;
സഗ്ഗോ വിസാല രതനാലയ സമ്പകിണ്ണോ
സാനന്ദ’മന്ദ സുരസുന്ദരി സുന്ദരോ സോ,
ഫുല്ലമ്ബുജാകര വനാദിഹി നന്ദനീയോ
തത്ഥാമരാ വിയ’മരാ’വിരതം രമന്തി;
തമ്ഹാപി ഭോ രുചിര ബ്രഹ്മനികായ ഭുതി
രമ്മാ തതോപി മഹിതം അമതം വരിട്ഠം,
തസ്മാത്തകാമ നിരതാ ജനതാ സപഞ്ഞാ
തണ്ഹക്ഖയായ സതതം വീരിയം കരോഥ;
ഏവം സദ്ധമ്മമഗ്ഗം വരമതി സുഗതോ ദേസയി പന്നഗാനം
സുത്വാ തേ സമ്പഹട്ഠാ മഹമഹമകരും നിജ്ജരാദീഹി സദ്ധിം,
തേസം വേ ദേസനായം സുരവിടപി സമാ സാത്ഥികാ തത്ഥ ജാതാ
സോ നാഥോ തഞ്ച ധമ്മം ഭഗവതി തനയാ തേ ച വോ പാലയന്തു
കല്യാണി ദേസാഗമനം.
൭൧൮. ¶
നഗാധിരാജേ സുമനാഭിധാനേ
വസം സുമേധോ സുമനാഭിധാനോ,
ദേവോ തദാ’ഗമ്മ സപാരിസജ്ജോ
കല്യാണിയം തത്ഥ ഫണീഹി സദ്ധിം;
ദത്വാ’പവഗ്ഗസ്സ നിദാനദാനം
സുത്വാന ധമ്മം സുതിസീതിഭുതം,
പഹട്ഠചിത്തോ ഉപഗമ്മ ബുദ്ധം
നത്വാഹ ഏവം കതപഞ്ജലീകോ;
ന വേ ഫണീനം നപി മാനുസാനം
നാനിമ്മിസാനം ന പിതാമഹാനം,
ഹിതത്ഥ മേവാഖില ലോകനാഥാ
ജായന്തീ ലോകേ കരുണാഗുണഗ്ഗാ;
അന്തോഗധാ നൂന മയമ്പി തുയ്ഹം
ദയായ തസ്മാ ഫണീനം വിമേസം,
കരോഹി മയ്ഹം ഭവനമ്ഹി ധീര
പാദം’സുനാ’തീവ പവിത്തരൂപം;
യോ’യം നഗോ ദിസ്സതി’തോ പുരത്ഥ
ഭുമങ്ഗനാ മോലിസിരിം വഹന്തോ,
സമന്തകൂടോതി സമന്തചക്ഖു
ജാനാതി ലോകോ വസതിം മമേതം;
യോ നീല നാനാ വനരാജി രാജിതോ
ആസാര ധാരാ ഗിരി നിജ്ഝരാകുലോ,
ആപീത നീലാരുണ പല്ലവാവലീ
ജിമൂതകൂടോ വിയ ഭാതി ഉഗ്ഗതോ;
യോ സിന്ധുവാരിം ഉരസാ പഭേജ്ജ
ആഗമ്മ തേ പാദപണാമ ഹേതു,
വിജ്ജോതമാനോ വിയചക്കപാണി
മഹാതി തുങ്ഗഗ്ഗ ധരാധരിന്ദോ;
൭൨൫. ¶
ഗങ്ഗാവധൂ കുടകിരീടധാരീ
സാമന്ത സേലിന്ദ ചമൂപതീകോ,
യോ’യം ധരാധാര മഹാമഹീപോ
ര രാജ ലങ്കാ നഗരങ്ഗണമ്ഹി;
പാരോഹ ദന്തോ ചിതകൂട കുമ്ഭോ
അനേക സോണ്ഡിക്ഖ സവന്തി ഹത്ഥോ,
യോ നിജ്ഝരാസാര മദപ്പവാഹോ
ഗജോരിവാ’ഭാതി സുരാധിപസ്സ;
സമ്ഫൂല്ല പുപ്ഫത്ഥബകാ’നപത്താ
സത്ധത്ത രത്തങ്കുരമോലിമാലാ,
കന്താലതാ’ലിങ്ഗിത ഖന്ധദേഹാ
തിട്ഠന്തി ഭൂപാവ യഹിം കുജിന്ദാ;
സിദ്ധങ്ഗനാ രത്തപദമ്ബുജാലീ
സമ്ഹിന്ന ഹത്ഥാഭരണാലി യുത്താ,
കേകീകലാപുപ്പല മാലമാലീ
സിലാതലാകഞ്ജ നിഭന്തി യത്ഥ;
മങ്ഗുര പാഠീന സവങ്ക സിങ്ഗു
രോഹിച്ച മുഞ്ജാ?മര പാവുസേഹി,
കുലീരനക്കാദ’നിമേസകേഹി
നികീളീതം ദദ്ദര രത്തപേഹി;
നിച്ചഞ്ഹി സംരാവ വിരാചിതാനം
ബലാക കാദമ്ബ കദമ്ബകാനം,
ആപാനസാലാ വിയ സാരസാനം
ഹംസാലിനം മങ്ഗല വാസഭൂതം;
നിരന്തരാമോദ മുദാവഗേഹി
സുഫുല്ല കോകാസ’രവിന്ദകേഹി,
സോഗന്ധി’കിന്ദീവര കേരവേഹി
കിഞ്ജക്ഖ ഛന്നണ്ണതലേഹി ചിത്തം;
൭൩൨. ¶
സീതച്ഛ സാതോദക സമ്പപുണ്ണ
സരോജിനീ ലങ്കത ഭുമിഭാഗോ,
യോ’യം പുരേ ഭാതി മനുഞ്ഞരൂപോ
സമന്തകൂടോ സ സമന്തകൂടോ;
ദലിത വിപിനസണ്ഡാ യത്ഥ സേലേ സമന്താ
സമുപഗത ജനാനം ചിത്തമാമോദയന്തി,
മധുക വട കരേരി ബോധി ജമ്ബീര ഭല്ലി
ഖദിര’ഭയ കദമ്ബാ ഫുല്ല സേല്ലൂ പലാസാ;
പണസ’മത പിലക്ഖാ കണ്ഹവണ്ട’ക്ഖ ചിഞ്ചാ
ലബുജ ബദരി നീപാ ഫന്ദനി’ന്ദീവരാവ
മകുല’സന പിയാലാ ഗദ്ദഭണ്ഡ’ജ്ജുനാ ച
കമുക സല്ല തിന്ദു’ദുമ്ബരമ്ബസ്സ’കണ്ണാ;
പുന്നാഗ ചമ്പക ദുമുപ്പല ദാഡിമാ ച
ഖജ്ജൂരി താല ഗിരിമല്ലിക’സോക താലാ,
ഹിന്താല നാഗ നിവുലാ യുഗപത്ത’രിട്ഠ
സേതമ്ബ ഏരവതകാപി ച കേതകാ ച
സമഫുല്ലഭണ്ഡി സുമന’ജ്ജക യൂഥികാ ച
വാസന്തി ചിത്തക ജപാ രവിമാലതീ ച,
കുന്ദസ്സ’മാരക കുരണ്ഡക ബീജപൂര
സേഫാലികാ ച തിണസൂല സമീരണാ ച;
വോചു’ച്ജു കീചക ഹലിദ്ദി വിളങ്ഗി ബിമ്ബി
നീലീ വചാ’തിവിസാലാബു ച നാഗവല്ലീ,
വല്ലീഹ സാരദ’പരാജിതവാരു’സീരാ
ഫലാദി നേക വനരാജി വിരാജിതോ സോ;
തിട്ഠന്തി കേചി തരവോ സുരഭിം കിരന്താ
തത്ഥേവ കേചി ഫലിതാ മധുരപ്ഫലാനി,
അന്ദോലിതാ ഫലിതപല്ലവിതാ ലതായോ
സന്ധാരയം വിടപ ജത്തുസു ഭന്തി കേചി;
൭൩൯. ¶
സാമന്തഗേ ജനഗണേ സതതം ദുമിന്ദാ
സമ്പീണയന്തി ദലിതാ ഫലിനോ ച യസ്മിം,
തേ അവ്ഹയന്തി വിയ ലോചന ഗോചരേഹി
വാതേ’രിതേഹി തരുണാരുണ പല്ലവേഹി;
തസ്മിം വനേ വനസുരാ നിജവസുന്ദരീഹി
രമ്മേ സിലാതലദഹേ സികതാതലേ ച,
നച്ചന്തി തന്തി തുരിയാനി ച വാദയന്തി
ഗായന്തി മാലഭരിനോ സതതം പതീതാ;
സിദ്ധാ ച സിദ്ധവനിതാ ഹി തഹിം തഹിം തേ
ദിബ്ബന്തി പുപ്ഫഫല പത്തരസാഹിനന്ദി,
അച്ഛന്തി തത്ഥ ഗിരിപാദപ രാമണേയ്യേ
യോഗേഹി സങ്ഗത മനാ ബഹിതാപസാപി;
തസ്മിം വനേ ഹരിണ രോഹിത പുണ്ഡരീക
ഗോകണ്ണ സല്ല സസ ജമ്ബുക സൂകരാ ച,
സാഖാമിഗേ’ണിവഗ ബബ്ബു രുരൂ കുരുങ്ഗ
ഗോധാ’ഖു പമ്പക കപീ ഗവയാ ച’നേകാ;
തേ വഗ്ഗ വഗ്ഗ ചരിനോ ഹയമാരകാദീ
നാനാ ചതുപ്പദഗണാ മുദിതാ വസന്തി,
പക്ഖീപി കോസിയ കപോതക നീലഗീവ
ധങ്കാ’ട ലാപ പരപുട്ഠ മധുബ്ബതാവ;
നിജ്ജിവ്ഹ ദിന്ദിഹ ചകോരക സാളികാ ച
ചക്കവ്ഹ കീര കുരരാ കുലലാ ച കങ്കാ,
ചിത്രച്ഛദാ മധുര കൂജക നേകപക്ഖീ
സങ്ഗമ്മ യത്ഥ നിവസന്തി മനുഞ്ഞരൂപാ;
തേസം വനന്തമഥ നാടകമണ്ഡലാ’ച
ഗീതാലയം വിയ അഹോസി ച ഗായകാനം,
ആപാനഭുമി സദിസം മിഗപക്ഖികാനം
നിച്ചുസ്സവം രതികരം നയനാഭിരാമം;
൭൪൬. ¶
ഏവം വിധോ വിപിനരാജി വിരാജിതേഹി
കൂടേഹി നേകസുര സുന്ദരി മണ്ഡിതേഹി,
അത്യുച്ച നീലസിഖിഗീവ സമാന വണ്ണോ
ഏസോ സമന്തഗിരി മേ വസതീ മുനിന്ദ;
ഏവം പതീത മനസോ സുമനാഭിധാനോ
വത്വാന നത്വമസമം ഗമനോപയുത്തം,
കാസാഥ സോപി മുനി തസ്സ വചം പടിച്ച
സബ്ഭിക്ഖു നിക്ഖമി ജിനോ ഗഗനായനമ്ഹി;
നിച്ചേതനാപി ഗിരിപാദപ ആദയോപി
നാഗാ സുപണ്ണ മിഗ പക്ഖിക ഹേതുകാപി,
വിജ്ജാധരാമര’സുരാ ചതുരാണനാപി
സങ്ഗമ്മ’കംസു സുമനാ മഹമബ്ഭുതം തേ;
മുനിന്ദേ പയന്തേ സമിദ്ധം തിലോകം
ഗിരിന്ദാഭിനന്ദാ ദുമിന്ദാ പബുദ്ധാ,
മിഗിന്ദാ സുതുട്ഠാ ഖഗിന്ദാ സുഘുട്ഠാ
പവുട്ഠോ മഹിന്ദോ പണട്ഠോ നിദാഘോ;
ഗച്ഛന്തേ ഗഗനായനേന സുഗതേ ഭാനു’സി സന്തോ തദാ
വാരേസും സൂരിയാതപഞ്ച ജലദാ സിഞ്ജിംസു ഭുമ്യാ ജലം,
മന്ദാമന്ദ സുഗന്ധ മുദ്ധ പവനോ പാപേതി സിതം സുഖം,
ദേവാദി ധജ ഛത്ത ചാമരകരാ പൂജേന്തി മാനേന്തി ച;
സന്നീര ഹിന്താല’ഗ സിന്ദി പൂഗ
താലമ്ബസാലാദി മഹീരുഹിത്ദാ,
തിട്ഠന്തി തേ ചാമരഹത്ഥകാ’വ
പുപ്ഫേഹി ഛന്നോ ഗഗനങ്ഗനോപി;
അനേന വിധിനാ ജഗദേക നാഥോ
പവത്തമാനേസു മഹാമഹേസു,
ദിസഞ്ച വിദിസം പരിപൂരയന്തോ
ജബ്ബണ്ണരംസീഹി അഗാ നഗിന്ദം;
൭൫൩. ¶
തസ്മിം സമന്തനഗമുദ്ധനി ലോകനാഥോ
ഛബ്ബണ്ണരംസി നികരം ദിസി പത്ഥരന്തോ,
ഭിക്ഖൂഹി സോ പരിവുതോ പരസാഗരന്തം
ഓലോകയം ഠിതിമകാസി അഅനോമവണ്ണോ;
ലങ്കാവധൂ സുമനകൂട കിരീട കൂടം
സജ്ജേസി’നഗ്ഘ ജന രാജ മണീ മഹന്തോ,
ഇച്ഛത്ഥദം സിവദമപ്പടിമം തിലോകേ
തം’ദാനി ഭോ ഭജഥ സേവഥ സബ്ബകാലം;
കാസും തദാ സുരവരാ സുരസുന്ദരീഹി
ലങ്കായ സേലസിഖരേസു മഹാസമജ്ജം,
വജ്ജിംസു ഭേരി വികതീ സയമേവ സബ്ബാ
ഭസ്സിംസു ദിബ്ബകുസുമാഭരണാ നഭമ്ഹാ;
ലങ്കമ്ബരം നിഖിലമാസി ച ഛത്തഛത്തം
നാനാ വിരാഗ ധജ കേതു സമാകുലഞ്ച,
നാനാസുഗന്ധ കുസുമാദി ദിസന്തരാലം,
നാനഗ്ഘികാവലി വിരാജിത മന്തളിക്ഖം;
തസ്മിം ദിനേ’സി രതനം മണിതോരണേഹി
ദീപാലി പുണ്ണഘടപന്തീഹി ദസ്സനീയം,
സമ്ബുദ്ധ ദേഹപരിതോഗത ഛപ്പഭാഹി
രത്തം നഭാവനി ചരാചര സബ്ബദബ്ബം;
മാലാവതംസ സമകാ ഗിരയോ സമന്താ
ഹുത്വാ നമന്തി ച ഭമന്തി സചേതനാ’വ,
സബ്ബേപി തത്ഥ തരവോച ലതാദയോ ച
നച്ചന്തി ദിബ്ബനടകാ വിയ ഓനതഗ്ഗാ;
ഏവം തദാ മഹത വിമ്ഹയ പാടിഹേരേ
ബുദ്ധാനുഭാവ ജനിതേ ഇധ വത്തമാനേ,
തത്വാന ധീരചരണം സമനോ സുധാസീ
ഏവം വദീ പരമ പിതിമനോ ഉദഗ്ഗോ;
൭൬൦. ¶
യേ തേ മുദു കോമല രത്തപാദാ
സുരത്ത ഫുല്ലമ്ബുരുഹോപമാനാ,
വട്ടാനുപുബ്ബായത അങ്ഗുലികാ
സുതമ്ബതുങ്ഗഗ്ഗ നഖാവലീകാ;
സുവണ്ണകുമ്മു’ന്നത പാദപിട്ഠി
നിഗുള്ഹ ഗോപ്ഫായത പണ്ഹിഭാഗാ
സമച്ഛമായം സകലം പതിട്ഠിതാ
ന ലിമ്പതേ സുച്ഛവിതാ രജാദി;
സമ്മത്ത ഹത്ഥോസഭ ഹംസ സീഹ
സമാന ലീലായ യഹിം പയാതി,
നിന്നുന്നതാ ഭേരിതലാ’വ ഭുമി
ഹോതാഥ പുപ്ഫാദി സുമണ്ഡിതാ ച;
അപേന്തി മഗ്ഗാ സയമേവ ഖാണു
സകണ്ടമൂലാ കഠലാ ച സബ്ബേ,
ഗമ്ഭീര നീരാപഗ പങ്കദുഗ്ഗാ
ഹിത്വാ സഭാവം രമണീയമേന്തി;
വജന്തി ഭുമിം ഗിരയോ പുരത്ഥ
പസാരിതേ പാദവരേ ജിനസ്സ,
നിബ്ബാതി അഗ്ഗീ നരകോദരേപി
ഗണ്ഹന്തി പാദേ പദുമാദയോ ച;
ഇദഞ്ഹി തേ പാദതലേ യതീസ
സനാഭി നേമി ഘടികാവലീഹി,
സുസണ്ഠിതം ചാ’രസഹസ്സവന്തം
സന്ദിസ്സതേ ചക്കവരം മഹന്തം;
തമേവ ചക്കം പരിവാരയിത്വാ
സിരിവച്ഛ സോവത്ഥി’വതംസകാ ച,
പാസാദ ഭദ്രാസന പുണ്ണപാതി
സിതാതപത്താസി മയൂരഹത്ഥാ;
൭൬൭. ¶
നീലാദിഭേദാ കമലുപ്പലാ ച
സമേരു സത്തദ്ദി മഹാസമുദ്ദാ,
സത്താപഗാ സത്ത മഹാസരാ ച
ഹിമാലയോ ചക്കവാളദ്ദികോ ച;
ചന്ദക്കതാരാ ച ഛദേവലോകാ
പിതാമഹാവാസ മനുസ്സലോകം,
സുവണ്ണ നാവാ സിവികാ ച സങ്ഖം
കേലാസസേലം ധജതോരണാ ച;
ചിന്താമണുണ്ഹീസ സവച്ഛ ധേനൂ
മീനദ്വയം ചക്കവത്തി സസേനോ,
സീഹ’സ്സ മാതങ്ഗ വിയഗ്ഘരാജാ
ഹംസോസഭോ കിമ്പുരിസോ മയൂരോ;
കോഞ്ചാ ച ഏരാവണ ഹത്ഥിരാജാ
സചക്കവാകാ മകരാദയോ ച,
നാനാ മഹാമങ്ഗല ലക്ഖണാ തേ
വിരോചമാനാ വിലസന്തി നിച്ചം;
ജാതക്ഖണേ യസ്സ മഹിം പഭേജ്ജ
വിസാല സത്തുദ്ദയ പങ്കജാനി,
പടിഗ്ഗഹേസും ചരണാനി യാനി
തേ താനിമാനച്ഛരിയാനി ലോകേ;
വന്ദാപനത്ഥായു’പനീതകാലേ
പിതൂഹി തേ ദേവല താപസിന്ദം,
പാദാനി ഗന്ത്വാന ജടാസു തസ്സ
ആസും തവേ’തങ്ഘിയുഗം അഹോ ഭോ;
സുദ്ധോദനവ്ഹസ്സ നരാധിപസ്സ
സന്തോസ തോയേഹി പപൂരിതസ്സ,
സിരോ വിസുദ്ധമ്ബു രുഹാകരസ്സ
സരോരു ഹാസും ചരണാനി തുയ്ഹം;
൭൭൪. ¶
യേ ചങ്കമേ ചങ്കമണാവസാനേ
ഓനമ്മ മേരൂദയ പബ്ബനിണ്ദാ,
പടിഗ്ഗഹേസും ചരണാനി യാനി
തേ താനിമാ’നച്ഛരിയാനി ലോകേ;
യം വന്ദമാനോ തിദിവാധിപോ സോ
യസ്സാനുഭാവേന ഗതായുകോപി,
സകിയഠാനേ’സിനപുനാപി തേ’വം
പാദമ്ബുജം ധീര!മഹാനുഭാവം;
ദേഹീനമഗ്ഗോപി നിസാകരാരി
മാനുന്നതോ സോ സയിതസ്സ തുയ്ഹം,
പാദസ്സ അന്തമ്പി ന സക്ഖി ദട്ഠും
അച്ഛേര രൂപം ഇദമങ്ഘികഞ്ജം;
ഗങ്ഗായ ഗങ്ഗാപതി സന്നിധാനേ
തീരേ തദാ നമ്മദ ജിമ്ഹഗസ്സ,
പാദസ്സ ലഞ്ഛം അകരീ മുനിന്ദ
മയ്ഹം’പി ഹോതം കരുണാ തവേസാ;
ആരാധിതോ സച്ചക താപസേന
അകാ തുവം സച്ചക ബദ്ധസേലേ,
പാദസ്സ ലഞ്ഛം ജഗതോ ഹിതായ
മയ്ഹമ്പി ഹോതം തമനുഗ്ഗഹന്തേ;
സുത്വാന നാഥോ ഗിരമേതമസ്സ
പസ്സം മഹാഭുതി’മനാഗതേസു,
ലോകസ്സ ലോകേഹി മഹീയ മാനോ
അകാസി വാമേന പദേന ലഞ്ഛം;
സമ്ബോധിതോ അട്ഠമ സാരദസ്മിം
വേസാഖമാസേ മുണി പുണ്ണമായം,
പാദസ്സ’ഭിഞ്ഞാണമകാ’പരണ്ഹേ
സദേവകേ സസ്സമണേ മഹേന്തേ;
൭൮൧. ¶
പതങക്ഗികാ സിത്ഥക മത്ഥകമ്ഹി
യഥങ്കിതാ ഖത്തിയ മുദ്ദികായ,
ആസേവ’മേവം ജിനപാദലഞ്ഛം
സമന്തകൂടമ്ഹി നമസ്സനീയം;
അകാലമേഘോ ച തതോ പവസ്സി
വസ്സിംസു നാനാരതനാനി ഖമ്ഹാ,
തഥാ പരിതോ കുസുമമ്ബരാനി
സുവണ്ണചുണ്ണാനി ജിനേകവണ്ണാ;
തതോ’പഗന്ത്വാ സുഗതേഭഗാമീ
തസ്മിം നിതമ്ബേ ഗിരിഗബ്ഭരായം,
ദിവാവിഹാരായ നിസീദി യത്ഥ
സുപാകടം തം ഭഗവാഗുഹാ’തി;
തതോരഹന്താ സുഗതോരസാ തേ
ഗന്ധാദിനാ സാധു മഹേത്വ സബ്ബേ,
വന്ദിത്വ കത്വാന പദക്ഖിണന്തം
തഹം തഹം’കംസു ദിവാവിഹാരം;
ലതങ്ഗനായോ വിടപീധവാന
മാലമ്ബ സാഖാപുഥുലം’സപസ്സേ,
സുഫുല്ല നമഞ്ജൂകര മഞ്ജരീഹി
നമസ്സമാനാ’വ സദോനതഗ്ഗാ;
തിട്ഠന്തി രുക്ഖാ നടകാ’വ തത്ഥ
സുഫുല്ല സാഖാകര’മുക്ഖിപിത്വാ,
നമസ്സമാനാ വിയ ഓനതഗ്ഗാ
വത്തന്തി മാനച്ഛരിയാനി നിച്ചം;
തഥേവ ഉച്ചാവച പബ്ബതാ ച
നമസ്സമാനാ വിയ പാദലഞ്ഛം,
തിട്ഠന്തി നിന്നഗ്ഗ സിഖാ സമന്താ
ഇദമ്പി നിച്ചബഭുതമേവ തത്ഥ;
൭൮൮. ¶
തസ്മിം നഗേ പാദവരങ്കിതസ്മിം
ഖലമണ്ഡലോകാസ പദേസമത്തേ,
സമോസരന്തേ ബഹുകേ ജനേപി
ഹോതേവ ഓകാസമ,ഹോ പദങ്കം;
സമോസരിത്വാന മഹേത്വ സത്തേ
നിക്ഖന്തമത്തേ ജലദാ സമേച്ച,
സോധേന്തി മാല’മ്ബുവഹേഹി സാധു
ഇദമ്പി നിച്ചബ്ഭുതമേവ തത്ഥ;
പാദേന ഫുട്ഠസ്സ സിലാതലസ്സ
ഏതാദിസാനച്ഛരിയാനി ഹോന്തി,
ലോകേകനാഥസ്സ അനാസവസ്സ
മഹബ്ഭുതം കോനു കഥം ഭണേയ്യ;
ദിവാവിഹാരം ഭഗവാ സസങ്ഘോ
കത്വാന തസ്മിം പന കിഞ്ചികാലം,
മഹീയമാനേസു സദേവകേസു
തതോ ഗതോ രോഹണമമ്ബരമ്ഹാ;
തസ്മിം സസങ്ഘോ മുനി ദീഘവാപിയം
ഥൂപസ്സ ഠാനേ പരമായ ഭുമിയാ,
ഗരും കരോന്തോ പന തം മഹീതലം
നിരോധഭാവേന നിസീദി സത്രജോ;
തതോ’നുരാധം ഭഗവാ നഭമ്ഹാ
ഗന്ത്വാന ബോധിട്ഠിതഭുമിയാ ച,
ഠാനേ മഹാമങ്ഗലചേതിയസ്സ
തഥേവ അക്ഖന്തിനഹിതസ്സ ഠാനേ;
നിസീദി പത്വാന നിരാധപീതിം
സസാവകോ പേക്ഖമ’നാഗതദ്ധം,
പതിട്ഠിതാ മേ പന ബോധിധാതു
കരോന്തി ലോകേ’തി ജനസ്സ വുദ്ധിം;
൭൯൫. ¶
വുട്ഠായ തുട്ഠോ ഭഗവാ നിരോധാ
ഗതോ സിലാഥൂപവരസ്സ ഠാനം,
ഠിതോ തഹിം ധമ്മമഥുദ്ദിസിത്വാ
ഗതോ നഭാ ജേതവനം സുരമ്മം;
ഏവം സോ ധമ്മരാജാ ജനഹിതവിഹിതോ വീത ദോസാരിവഗ്ഗോ
ലങ്കാരാമായ രമ്മേ സുമനഗിരിസിരേ’കാസി യം പാദലഞ്ഛം
തം വോ സഗ്ഗാ’പവഗ്ഗം ദദതി മുനിസമം ചിത്ത മത്തേ പസന്നേ
തസ്മാ ഭോ!ഭോ! പഹട്ഠാ നമഥ മഹഥ തം സാധു സാധുപ്പസത്ഥം;
ഇതി സമന്തകൂട വണ്ണനാ നിട്ഠിതാ.
ഗ്രന്ഥ സമാപ്തിയ.
അനന്തരാ സമത്തായം സുമണദ്ദിസു വണ്ണനാ,
തഥേവ സാധൂ സങ്കപ്പാ ഖിപ്പം പപ്പോന്തു പാണിനം;
യോ യാചിതോ’രഞ്ഞവാസീ ഗുണാധാര സുധീമതാ,
രാഹുലത്ഥേരനാമേന വിസ്സുതേന മഹീതലേ;
ഭുവനോദരമ്ഹി പഞ്ഞാതോ രവീവമ്ബര മണ്ഡലേ,
അരഞ്ഞരതനാനന്ദ മഹാഥേരോ മഹാഗണീ;
ജീവിതം വിയ യോ സത്ഥുസാസനസ്സ മഹാകവീ,
സാരോ സുപ്പടിപത്തീസു സത്ഥസാഗര പാരഗോ;
തസ്സ സിസ്സോ’സി യോ വിപ്പഗാമ വംസേക കേതുകോ
ഞാതാഗമോ’രഞ്ഞവാസീ സീലാദി ഗുണഭൂസണോ;
യോ’കാ സീഹലഭാസായ സീഹലം സദ്ദലക്ഖണം,
തേന വേദേഹഥേരേന കതായമ്പിയസീലിനാ;
സിദ്ധിരത്ഥു.