တီကာ > အဘိဓမ္မပိဋက (ဋီကာ) > အဘိဓမ္မာဝတာရော-နာမရူပပရိစ္ဆေဒေါ

တသ္မာ အနဝဇ္ဇဣဋ္ဌဝိပါကလက္ခဏံ ကုသလံ၊ အကုသလဝိဒ္ဓံသနရသံ၊ ဝေါဒါနပစ္စုပဋ္ဌာနံ။ ဝဇ္ဇပဋိပက္ခတ္တာ အနဝဇ္ဇလက္ခဏံ ဝါ ကုသလံ၊ ဝေါဒါနဘာဝရသံ၊ ဣဋ္ဌဝိပါကပစ္စုပဋ္ဌာနံ၊ ယောနိသောမနသိကာရပဒဋ္ဌာနံ။ သာဝဇ္ဇာနိဋ္ဌဝိပါကလက္ခဏမကုသလံ။ တဒုဘယဝိပရီတလက္ခဏမဗျာကတံ၊ အဝိပါကာရဟံ ဝါ။

တတ္ထ ¶ ကုသလစိတ္တံ ဧကဝီသတိဝိဓံ ဟောတိ၊ တဒိဒံ ဘူမိတော စတုဗ္ဗိဓံ ဟောတိ – ကာမာဝစရံ၊ ရူပါဝစရံ၊ အရူပါဝစရံ၊ လောကုတ္တရဉ္စေတိ။

တတ္ထ ကာမာဝစရကုသလစိတ္တံ ဘူမိတော ဧကဝိဓံ၊ သဝတ္ထုကာဝတ္ထုကဘေဒတော ဒုဝိဓံ၊ ဟီနမဇ္ဈိမပဏီတဘေဒတော တိဝိဓံ၊ သောမနဿုပေက္ခာဉာဏပ္ပယောဂဘေဒတော အဋ္ဌဝိဓံ ဟောတိ။ သေယျထိဒံ – သောမနဿသဟဂတံ ဉာဏသမ္ပယုတ္တံ အသင်္ခါရိကမေကံ၊ သသင်္ခါရိကမေကံ၊ သောမနဿသဟဂတံ ဉာဏဝိပ္ပယုတ္တံ အသင်္ခါရိကမေကံ၊ သသင်္ခါရိကမေကံ၊ ဥပေက္ခာသဟဂတံ ဉာဏသမ္ပယုတ္တံ အသင်္ခါရိကမေကံ၊ သသင်္ခါရိကမေကံ၊ ဥပေက္ခာသဟဂတံ ဉာဏဝိပ္ပယုတ္တံ အသင်္ခါရိကမေကံ၊ သသင်္ခါရိကမေကန္တိ ဣဒံ အဋ္ဌဝိဓမ္ပိ ကာမာဝစရကုသလစိတ္တံ နာမ။

ဥဒ္ဒါနတော ဒုဝေ ကာမာ၊ က္လေသဝတ္ထုဝသာ ပန၊

ကိလေသော ဆန္ဒရာဂေါဝ၊ ဝတ္ထု တေဘူမဝဋ္ဋကံ။

ကိလေသကာမော ¶ ကာမေတိ၊ ဝတ္ထု ကာမီယတီတိ စ၊

သိဇ္ဈတိ ဒုဝိဓောပေသ၊ ကာမော ဝေါ ကာရကဒွယေ။

ယသ္မိံ ¶ ပန ပဒေသေ သော၊ ကာမောယံ ဒုဝိဓောပိ စ၊

သမ္ပတ္တီနံ ဝသေနာဝ-စရတီတိ စ သော ပန။

ပဒေသော စတုပါယာနံ၊ ဆန္နံ ဒေဝါနမေဝ စ၊

မနုဿာနံ ဝသေနေဝ၊ ဧကာဒသဝိဓော ပန။

ကာမောဝစရတီတေတ္ထ၊ ကာမာဝစရသညိတော၊

အဿာဘိလက္ခိတတ္တာ ဟိ၊ သသတ္ထာဝစရော ဝိယ။

သွာယံ ရူပဘဝေါ ရူပံ၊ ဧဝံ ကာမောတိ သညိတော၊

ဥတ္တရဿ ပဒဿေဝ၊ လောပံ ကတွာ ဥဒီရိတော။

တသ္မိံ ¶ ကာမေ ဣဒံ စိတ္တံ၊ သဒါဝစရတီတိ စ၊

ကာမာဝစရမိစ္စေဝံ၊ ကထိတံ ကာမဃာတိနာ။

ပဋိသန္ဓိံ ဘဝေ ကာမေ၊ အဝစာရယတီတိ ဝါ၊

ကာမာဝစရမိစ္စေဝံ၊ ပရိယာပန္နန္တိ တတြ ဝါ။

ဣဒံ အဋ္ဌဝိဓံ စိတ္တံ၊ ကာမာဝစရသညိတံ၊

ဒသပုညကြိယဝတ္ထု-ဝသေနေဝ ပဝတ္တတိ။

ဝေယျာဝစ္စံ ဒေသနာ စာနုမောဒေါ၊

ဒိဋ္ဌိဇ္ဇုတ္တံ သံသုတိစ္စာပစာယော၊

ဉေယျော ဧဝံ ပုညဝတ္ထုပ္ပဘေဒေါ။

ဂစ္ဆန္တိ သင်္ဂဟံ ဒါနေ၊ ပတ္တိဒါနာနုမောဒနာ၊

တထာ သီလမယေ ပုညေ၊ ဝေယျာဝစ္စာပစာယနာ။

ဒေသနာ သဝနံ ဒိဋ္ဌိ-ဥဇုကာ ဘာဝနာမယေ၊

ပုန တီဏေဝ သမ္ဘောန္တိ၊ ဒသ ပုညကြိယာပိ စ။

သဗ္ဗာနုဿတိပုညဉ္စ၊ ပသံသာ သရဏတ္တယံ၊

ယန္တိ ဒိဋ္ဌိဇုကမ္မသ္မိံ၊ သင်္ဂဟံ နတ္ထိ သံသယော။

ပုရိမာ ¶ မုဉ္စနာ စေဝ၊ ပရာ တိဿောပိ စေတနာ၊

ဟောတိ ဒါနမယံ ပုညံ၊ ဧဝံ သေသေသု ဒီပယေ။

ဣဒါနိ အဿ ပနဋ္ဌဝိဓဿာပိ ကာမာဝစရကုသလစိတ္တဿ အယမုပ္ပတ္တိက္ကမော ဝေဒိတဗ္ဗော။ ယဒါ ဟိ ယော ဒေယျဓမ္မပ္ပဋိဂ္ဂါဟကာဒိသမ္ပတ္တိံ၊ အညံ ဝါ သောမနဿဟေတုံ အာဂမ္မ ဟဋ္ဌပဟဋ္ဌော ‘‘အတ္ထိ ဒိန္န’’န္တိ အာဒိနယပ္ပဝတ္တံ သမ္မာဒိဋ္ဌိံ ပုရက္ခတွာ ပရေဟိ အနုဿာဟိတော ဒါနာဒီနိ ပုညာနိ ကရောတိ၊ တဒါဿ သောမနဿသဟဂတံ ဉာဏသမ္ပယုတ္တံ ¶ အသင်္ခါရိကံ ¶ ပဌမံ မဟာကုသလစိတ္တံ ဥပ္ပဇ္ဇတိ။ ယဒါ ပန ဝုတ္တနယေနေဝ ဟဋ္ဌပဟဋ္ဌော သမ္မာဒိဋ္ဌိံ ပုရက္ခတွာ ပရေဟိ ဥဿာဟိတော ကရောတိ၊ တဒါဿ တမေဝ စိတ္တံ သသင်္ခါရိကံ ဟောတိ။ ဣမသ္မိံ ပနတ္ထေ သင်္ခါရောတိ အတ္တနော ဝါ ပရဿ ဝါ ပဝတ္တဿ ပုဗ္ဗပ္ပယောဂဿာဓိဝစနံ။ ယဒါ ပန ဉာတိဇနဿ ပဋိပတ္တိဒဿနေန ဇာတပရိစယာ ဗာလကာ ဘိက္ခူ ဒိသွာ သောမနဿဇာတာ သဟသာ ယံ ကိဉ္စိ ဟတ္ထဂတံ ဒဒန္တိ ဝါ ဝန္ဒန္တိ ဝါ၊ တဒါ တေသံ တတိယစိတ္တမုပ္ပဇ္ဇတိ။ ယဒါ ပန တေ ‘‘ဒေထ ဝန္ဒထ၊ အယျေ’’တိ ဝဒန္တိ၊ ဧဝံ ဉာတိဇနေန ဥဿာဟိတာ ဟုတွာ ဟတ္ထဂတံ ဒဒန္တိ ဝါ ဝန္ဒန္တိ ဝါ၊ တဒါ တေသံ စတုတ္ထစိတ္တမုပ္ပဇ္ဇတိ။ ယဒါ ပန ဒေယျဓမ္မပ္ပဋိဂ္ဂါဟကာဒီနံ အသမ္ပတ္တိံ ဝါ အညေသံ ဝါ သောမနဿဟေတူနံ အဘာဝံ အာဂမ္မ စတူသုပိ ဝိကပ္ပေသု သောမနဿရဟိတာ ဟောန္တိ၊ တဒါ သေသာနိ စတ္တာရိ ဥပေက္ခာသဟဂတာနိ ဥပ္ပဇ္ဇန္တိ။ ဧဝံ သောမနဿုပေက္ခာဉာဏပ္ပယောဂဘေဒတော အဋ္ဌဝိဓံ ကာမာဝစရကုသလစိတ္တံ ဝေဒိတဗ္ဗံ။

ဒသပုညကြိယာဒီနံ၊ ဝသေန စ ဗဟူနိပိ၊

ဧတာနိ ပန စိတ္တာနိ၊ ဘဝန္တီတိ ပကာသယေ။

သတ္တရသ သဟဿာနိ၊ ဒွေ သတာနိ အသီတိ စ၊

ကာမာဝစရပုညာနိ၊ ဘဝန္တီတိ ဝိနိဒ္ဒိသေ။

တံ ပန ယထာနုရူပံ ကာမာဝစရသုဂတိယံ ဘဝဘောဂသမ္ပတ္တိံ အဘိနိပ္ဖာဒေတိ။

ဣတရေသု ပန ရူပါဝစရကုသလစိတ္တံ သဝတ္ထုကတော ဧကဝိဓံ၊ ဒွီသု ဘဝေသု ဥပ္ပဇ္ဇနတော ဒုဝိဓံ၊ ဟီနမဇ္ဈိမပဏီတဘေဒတော တိဝိဓံ၊ ပဋိပဒါဒိဘေဒတော စတုဗ္ဗိဓံ၊ ဈာနင်္ဂယောဂဘေဒတော ပဉ္စဝိဓံ။ သေယျထိဒံ – ကာမစ္ဆန္ဒဗျာပါဒထိနမိဒ္ဓဥဒ္ဓစ္စကုက္ကုစ္စဝိစိကိစ္ဆာဝိပ္ပဟီနံ ဝိတက္ကဝိစာရပီတိသုခစိတ္တေကဂ္ဂတာသမ္ပယုတ္တံ ¶ ပဌမံ၊ ဝိတက္ကဝိပ္ပဟီနံ ဝိစာရပီတိသုခစိတ္တေကဂ္ဂတာသမ္ပယုတ္တံ ¶ ဒုတိယံ၊ ဝိတက္ကဝိစာရဝိပ္ပဟီနံ ပီတိသုခစိတ္တေကဂ္ဂတာသမ္ပယုတ္တံ တတိယံ၊ ဝိတက္ကဝိစာရပီတိဝိပ္ပဟီနံ သုခစိတ္တေကဂ္ဂတာသမ္ပယုတ္တံ စတုတ္ထံ၊ ဝိတက္ကဝိစာရပီတိသုခဝိပ္ပဟီနံ ဥပေက္ခာစိတ္တေကဂ္ဂတာသမ္ပယုတ္တံ ပဉ္စမန္တိ ဣဒံ ပဉ္စဝိဓံ ¶ ရူပါဝစရကုသလစိတ္တံ နာမ။

တံ ပန ယထာသမ္ဘဝံ ပထဝီကသိဏာဒီသု အာရမ္မဏေသု ပဝတ္တိဝသေန အနေကဝိဓံ ဟောတိ။ သဗ္ဗံ ပနေတံ ရူပါဝစရဘာဝနာပုညဝသပ္ပဝတ္တံ ယထာနုရူပံ ရူပါဝစရူပပတ္တိနိပ္ဖာဒကံ ဟောတိ။ ဧဝံ တာဝ ရူပါဝစရကုသလံ ဝေဒိတဗ္ဗံ။

သေသေသု ပန ဒွီသု အရူပါဝစရကုသလစိတ္တံ တာဝ ဥပေက္ခာဝေဒနာယောဂဘေဒတော ဧကဝိဓံ၊ သဝတ္ထုကာဝတ္ထုကဘေဒတော ဒုဝိဓံ၊ ဟီနမဇ္ဈိမပဏီတဘေဒတော တိဝိဓံ၊ အာရမ္မဏဘေဒတော စတုဗ္ဗိဓံ။ ကသိဏုဂ္ဃာဋိမာကာသံ၊ တတ္ထ ပဝတ္တဝိညာဏံ၊ တဿ အပဂမော၊ အာကိဉ္စညာယတနန္တိ ဣဒမဿ စတုဗ္ဗိဓမာရမ္မဏံ။ ယထာပဋိပါဋိယာ ဧတဿာရမ္မဏဿ ဘေဒတော စတုဗ္ဗိဓံ ဟောတိ။ သေယျထိဒံ – သဗ္ဗသော ရူပသညာနံ သမတိက္ကမာ ပဋိဃသညာနံ အတ္ထင်္ဂမာ နာနတ္တသညာနံ အမနသိကာရာ အာကာသာနဉ္စာယတနသညာသဟဂတံ၊ ဝိညာဏဉ္စာယတနသညာသဟဂတံ၊ အာကိဉ္စညာယတနသညာသဟဂတံ၊ နေဝသညာနာသညာယတနသညာသဟဂတန္တိ ဣဒံ စတုဗ္ဗိဓံ အရူပါဝစရကုသလစိတ္တံ နာမ။ သဗ္ဗံ ပနေတံ အရူပါဝစရဘာဝနာပုညဝသပ္ပဝတ္တံ ယထာနုရူပံ အရူပူပပတ္တိနိပ္ဖာဒကံ ဟောတိ။ ဧဝံ အရူပါဝစရကုသလစိတ္တံ ဝေဒိတဗ္ဗံ။

ဣတရံ ပန လောကုတ္တရကုသလစိတ္တံ နိဗ္ဗာနာရမ္မဏတော ဧကဝိဓံ၊ နိယတာနိယတဝတ္ထုကဘေဒတော ဒုဝိဓံ၊ တီဟိ ဝိမောက္ခမုခေဟိ ပတ္တဗ္ဗတော တိဝိဓံ၊ စတုမဂ္ဂယောဂဘေဒတော စတုဗ္ဗိဓံ ¶ ။ သေယျထိဒံ – သက္ကာယဒိဋ္ဌိဝိစိကိစ္ဆာသီလဗ္ဗတပရာမာသသညောဇနပ္ပဟာနကရံ သောတာပတ္တိမဂ္ဂစိတ္တံ၊ ရာဂဒေါသမောဟာနံ တနုတ္တကရံ သကဒါဂါမိမဂ္ဂစိတ္တံ၊ ကာမရာဂဗျာပါဒါနံ နိရဝသေသပ္ပဟာနကရံ အနာဂါမိမဂ္ဂစိတ္တံ၊ ရူပရာဂအရူပရာဂမာနဥဒ္ဓစ္စအဝိဇ္ဇာပဟာနကရံ အရဟတ္တမဂ္ဂစိတ္တန္တိ ဣဒံ စတုဗ္ဗိဓံ လောကုတ္တရကုသလစိတ္တံ နာမ။ ဧကေကံ ပနေတ္ထ ဈာနင်္ဂယောဂဘေဒတော ပဉ္စဝိဓံ ဟောတိ၊ တသ္မာ ဝီသတိဝိဓံ ဟောတိ။ သဗ္ဗံ ပနေတံ လောကုတ္တရဘာဝနာပုညဝသပ္ပဝတ္တံ မဂ္ဂါနုရူပဖလပ္ပဝတ္တိယာ စတ္တာရော အရိယပုဂ္ဂလေ အဘိနိပ္ဖာဒေတိ။ ဧဝံ လောကုတ္တရကုသလံ ဝေဒိတဗ္ဗံ။

ကာမေ ¶ ¶ အဋ္ဌေဝ ရူပေ စ၊ ပဉ္စ စတ္တာရိရူပိသု၊

စတ္တာရာနုတ္တရာနေဝံ၊ ကုသလာနေကဝီသတိ။

အကုသလံ ပန ဘူမိတော ဧကဝိဓံ ကာမာဝစရမေဝ၊ နိယတာနိယတဝတ္ထုဝသေန စ ဧကဟေတုကဒုဟေတုကဝသေန စ ပဋိသန္ဓိဇနကာဇနကဝသေန စ ဒုဝိဓံ၊ တီဟိ ဝေဒနာဟိ ယောဂတော စ လောဘမူလံ ဒေါသမူလံ မောဟမူလန္တိ မူလတော စ တိဝိဓံ ဟောတိ။ တတ္ထ လောဘမူလံ ပန သောမနဿုပေက္ခာဒိဋ္ဌိပ္ပယောဂဘေဒတော အဋ္ဌဝိဓံ ဟောတိ။ သေယျထိဒံ – သောမနဿသဟဂတံ ဒိဋ္ဌိဂတသမ္ပယုတ္တံ အသင်္ခါရိကမေကံ၊ သသင်္ခါရိကမေကံ၊ သောမနဿသဟဂတံ ဒိဋ္ဌိဂတဝိပ္ပယုတ္တံ အသင်္ခါရိကမေကံ၊ သသင်္ခါရိကမေကံ၊ ဥပေက္ခာသဟဂတံ ဒိဋ္ဌိဂတသမ္ပယုတ္တံ အသင်္ခါရိကမေကံ၊ သသင်္ခါရိကမေကံ၊ ဥပေက္ခာသဟဂတံ ဒိဋ္ဌိဂတဝိပ္ပယုတ္တံ အသင်္ခါရိကမေကံ၊ သသင်္ခါရိကမေကန္တိ။

ယဒါ ¶ ဟိ ‘‘နတ္ထိ ကာမေသု အာဒီနဝေါ’’တိအာဒိနာ နယေန မိစ္ဆာဒိဋ္ဌိံ ပုရက္ခတွာ ကေဝလံ ဟဋ္ဌတုဋ္ဌော ကာမေ ဝါ ပရိဘုဉ္ဇတိ၊ ဒိဋ္ဌမင်္ဂလာဒီနိ ဝါ သာရတော ပစ္စေတိ သဘာဝတိက္ခေနေဝ အနုဿာဟိတေန စိတ္တေန၊ တဒါဿ ပဌမံ အကုသလစိတ္တံ ဥပ္ပဇ္ဇတိ။ ယဒါ ပန မန္ဒေန သမုဿာဟိတေန၊ တဒါ ဒုတိယံ။ ယဒါ မိစ္ဆာဒိဋ္ဌိံ အပုရက္ခတွာ ကေဝလံ ဟဋ္ဌတုဋ္ဌော မေထုနံ ဓမ္မံ ဝါ ပရိဘုဉ္ဇတိ၊ ပရသမ္ပတ္တိံ ဝါ အဘိဇ္ဈာယတိ၊ ပရဿ ဘဏ္ဍံ ဝါ ဟရတိ သဘာဝတိက္ခေနေဝ အနုဿာဟိတေန စိတ္တေန၊ တဒါ တတိယံ။ ယဒါ မန္ဒေန သမုဿာဟိတေန၊ တဒါ စတုတ္ထံ ဥပ္ပဇ္ဇတိ။ ယဒါ ပန ကာမာနံ ဝါ အသမ္ပတ္တိံ အာဂမ္မ အညေသံ ဝါ သောမနဿဟေတူနံ အဘာဝေန စတူသုပိ ဝိကပ္ပေသု သောမနဿရဟိတာ ဟောန္တိ၊ တဒါ သေသာနိ စတ္တာရိ ဥပေက္ခာသဟဂတာနိ ဥပ္ပဇ္ဇန္တီတိ။ ဧဝံ သောမနဿုပေက္ခာဒိဋ္ဌိပ္ပယောဂဘေဒတော အဋ္ဌဝိဓံ လောဘမူလံ ဝေဒိတဗ္ဗံ။

ဒေါသမူလံ ပန ဧကန္တသဝတ္ထုကတော ဧကဝိဓံ၊ အသင်္ခါရသသင်္ခါရဘေဒတော ဒုဝိဓံ ဒေါမနဿသဟဂတံ ပဋိဃသမ္ပယုတ္တံ အသင်္ခါရံ၊ သသင်္ခါရန္တိ။ အဿ ပန ပါဏာတိပါတာဒီသု တိက္ခမန္ဒပ္ပဝတ္တိကာလေ ဥပ္ပတ္တိ ဝေဒိတဗ္ဗာ။

မောဟမူလမ္ပိ ¶ ¶ ဝိစိကိစ္ဆုဒ္ဓစ္စယောဂတော ဒုဝိဓံ ဟောတိ ဥပေက္ခာသဟဂတံ ဝိစိကိစ္ဆာသမ္ပယုတ္တံ၊ ဥပေက္ခာသဟဂတံ ဥဒ္ဓစ္စသမ္ပယုတ္တန္တိ။ တဿ အသန္နိဋ္ဌာနဝိက္ခေပကာလေသု ပဝတ္တိ ဝေဒိတဗ္ဗာတိ။

ဧဝံ တာဝ ဒွါဒသဝိဓံ အကုသလစိတ္တံ ဝေဒိတဗ္ဗံ၊ သဗ္ဗံ ပနေတံ ယထာနုရူပံ အပါယေသု ဥပပတ္တိယာ၊ သုဂတိယမ္ပိ ဒုက္ခဝိသေသဿ အဘိနိပ္ဖာဒကံ ဟောတိ။

လောဘမူလဝသေနဋ္ဌ၊ ဒေါသမူလဝသာ ဒုဝေ၊

မောဟမူလဝသေန ဒွေ၊ ဧဝံ ဒွါဒသဓာ သိယုံ။

ပါပါပါပေသွပါပေန ¶ ၊ ယံ ဝုတ္တံ ပါပမာနသံ၊

ပါပါပါပပ္ပဟီနေန၊ တံ မယာ သမုဒါဟဋံ။

ဣတရံ ပန အဗျာကတမဝိပါကာရဟတော ဧကဝိဓံ ဟောတိ၊ ဇာတိဘေဒတော ဒုဝိဓံ ဝိပါကစိတ္တံ ကိရိယစိတ္တန္တိ။ တတ္ထ ဝိပါကစိတ္တံ ဘူမိဘေဒတော စတုဗ္ဗိဓံ ကာမာဝစရံ ရူပါဝစရံ အရူပါဝစရံ လောကုတ္တရန္တိ။ တတ္ထ ကာမာဝစရံ ဒုဝိဓံ ကုသလဝိပါကံ အကုသလဝိပါကန္တိ။ ကုသလဝိပါကံ ဒုဝိဓံ သဟေတုကမဟေတုကဉ္စေတိ။

တတ္ထ သဟေတုကဝိပါကစိတ္တံ သကကုသလံ ဝိယ သောမနဿုပေက္ခာဉာဏပ္ပယောဂဘေဒတော အဋ္ဌဝိဓံ။ သေယျထိဒံ – သောမနဿသဟဂတံ ဉာဏသမ္ပယုတ္တံ အသင်္ခါရံ၊ သသင်္ခါရံ၊ သောမနဿသဟဂတံ ဉာဏဝိပ္ပယုတ္တံ အသင်္ခါရံ၊ သသင်္ခါရံ၊ ဥပေက္ခာသဟဂတံ ဉာဏသမ္ပယုတ္တံ အသင်္ခါရံ၊ သသင်္ခါရံ၊ ဥပေက္ခာသဟဂတံ ဉာဏဝိပ္ပယုတ္တံ အသင်္ခါရံ၊ သသင်္ခါရန္တိ ဣဒံ အဋ္ဌဝိဓံ သဟေတုကဝိပါကံ နာမ။

ယထာ ပနဿ ကုသလံ ဒါနာဒိဝသေန ဆသု အာရမ္မဏေသု ပဝတ္တတိ၊ န ဣဒံ တထာ။ ဣဒံ ဟိ ပဋိသန္ဓိဘဝင်္ဂစုတိတဒါရမ္မဏဝသေန ပရိတ္တဓမ္မပရိယာပန္နေသုယေဝ ဆသု အာရမ္မဏေသု ပဝတ္တတိ။ သမ္ပယုတ္တဓမ္မာနဉ္စ ဝိသေသေ အသတိပိ အာဒါသတလာဒီသု မုခနိမိတ္တံ ဝိယ နိရုဿာဟံ ဝိပါကံ၊ မုခံ ဝိယ သဥဿာဟံ ကုသလန္တိ ဝေဒိတဗ္ဗံ။ ဣမေသံ ပန ဝိပစ္စနဋ္ဌာနံ ဝေဒိတဗ္ဗံ။ ဣမာနိ ဟိ ပဋိသန္ဓိဘဝင်္ဂစုတိတဒါရမ္မဏာနိ ဟုတွာ ဝိပစ္စန္တိ။

ကာမာဝစရဒေဝါနံ ¶ ၊ မနုဿာနံ ဣမေ ပန၊

ဒုဟေတုကတိဟေတူနံ၊ ဘဝန္တိ ပဋိသန္ဓိယော။

တတော ပဝတ္တိယံ ဟုတွာ၊ ဘဝင်္ဂံ ယာဝတာယုကံ၊

ဗလဝါရမ္မဏေ ဟုတွာ၊ တဒါရမ္မဏမေဝ စ။

တတော ¶ ¶ မရဏကာလသ္မိံ၊ စုတိ ဟုတွာ ပဝတ္တရေ၊

ဧဝံ စတူသု ဌာနေသု၊ ဝိပစ္စန္တီတိ နိဒ္ဒိသေ။

သဘူမိကုသလေဟေဝ၊ မဟာပါကာ သမာ ဝိနာ၊

ကမ္မဒွါရဉ္စ ကမ္မဉ္စ၊ ပုညာနံ ကြိယဝတ္ထုကံ။

အဝိညတ္တိဇနတ္တာ ဟိ၊ အဝိပါကသဘာဝတော၊

အပ္ပဝတ္တနတော စေဝ၊ ပါကာ ပုညေဟိ နော သမာ။

ပရိတ္တာရမ္မဏတ္တာ ဟိ၊ တေသမေကန္တတော ပန၊

ကရုဏာမုဒိတာ တေသု၊ န ဇာယန္တိ ကဒါစိပိ။

တထာ ဝိရတိယော တိဿော၊ န ပနေတေသု ဇာယရေ၊

ပဉ္စ သိက္ခာပဒါ ဝုတ္တာ၊ ကုသလာတိ ဟိ သတ္ထုနာ။

တထာဓိပတိနောပေတ္ထ၊ န သန္တီတိ ဝိနိဒ္ဒိသေ၊

ဆန္ဒာဒီနိ ဓုရံ ကတွာ၊ အနုပ္ပဇ္ဇနတော ပန။

အသင်္ခါရသသင်္ခါရ-ဝိဓာနံ ပန ပုညတော၊

ဉေယျံ ပစ္စယတော စေဝ၊ ဝိပါကေသု စ ဝိညုနာ။

ဟီနာဒီနံ ဝိပါကတ္တာ၊ ပုညာနံ ပုညဝါဒိနာ၊

ဟီနာဒယော ဘဝန္တီတိ၊ ဝိပါကာ ပရိဒီပိတာ။

ဣဒံ အဋ္ဌဝိဓံ စိတ္တံ၊ ဧကန္တေန သဝတ္ထုကံ၊

ဇာယတေ ကာမလောကသ္မိံ၊ န ပနညတ္ထ ဇာယတေ။

ဧဝံ တာဝ သဟေတုကဝိပါကစိတ္တံ ဝေဒိတဗ္ဗံ။

အဟေတုကဝိပါကစိတ္တံ ¶ ပန အလောဘာဒိဟေတုဝိရဟိတံ ဥပေက္ခာသဟဂတံ စက္ခုဝိညာဏံ၊ ဥပေက္ခာသဟဂတံ သောတဝိညာဏံ၊ ဥပေက္ခာသဟဂတံ ဃာနဝိညာဏံ၊ ဥပေက္ခာသဟဂတံ ဇိဝှာဝိညာဏံ၊ သုခသဟဂတံ ကာယဝိညာဏံ၊ ဥပေက္ခာသဟဂတံ အဟေတုကမနောဓာတုသမ္ပဋိစ္ဆနံ၊ သောမနဿသဟဂတံ အဟေတုကမနောဝိညာဏဓာတုသန္တီရဏံ ¶ ၊ ဥပေက္ခာသဟဂတံ အဟေတုကမနောဝိညာဏဓာတုသန္တီရဏန္တိ ဣဒံ ပန အဋ္ဌဝိဓံ အဟေတုကဝိပါကစိတ္တံ နာမ။

ဣဒံ ပန အဋ္ဌဝိဓံ နိယတဝတ္ထုကတော ဧကဝိဓံ၊ နိယတာနိယတာရမ္မဏတော ဒုဝိဓံ။ တတ္ထ ဝိညာဏပဉ္စကံ နိယတာရမ္မဏံ၊ သေသတ္တယံ အနိယတာရမ္မဏံ။ သုခသောမနဿုပေက္ခာဝေဒနာယောဂတော တိဝိဓံ။ တတ္ထ သုခသဟဂတံ ကာယဝိညာဏံ၊ ဒွိဋ္ဌာနိကံ သန္တီရဏံ သောမနဿုပေက္ခာယုတ္တံ၊ သေသမုပေက္ခာယုတ္တန္တိ။

ဒိဋ္ဌာရမ္မဏသုတာရမ္မဏမုတာရမ္မဏဒိဋ္ဌသုတမုတာရမ္မဏဒိဋ္ဌ-သုတမုတဝိညာတာရမ္မဏဝသေန ပဉ္စဝိဓံ။ တတ္ထ ဒိဋ္ဌာရမ္မဏံ စက္ခုဝိညာဏံ၊ သုတာရမ္မဏံ ¶ သောတဝိညာဏံ၊ မုတာရမ္မဏံ ဃာနဇိဝှာကာယဝိညာဏတ္တယံ၊ ဒိဋ္ဌသုတမုတာရမ္မဏံ မနောဓာတုသမ္ပဋိစ္ဆနံ၊ ဒိဋ္ဌသုတမုတဝိညာတာရမ္မဏံ သေသမနောဝိညာဏဓာတုဒွယန္တိ။

ဝတ္ထုတော ဆဗ္ဗိဓံ။ ကထံ? စက္ခုဝိညာဏဿ စက္ခုမေဝ ဝတ္ထု၊ တထာ သောတဃာနဇိဝှာကာယဝိညာဏာနံ သောတဃာနဇိဝှာကာယဝတ္ထု၊ အဝသေသတ္တယဿ ဟဒယဝတ္ထုမေဝါတိ။

အာရမ္မဏတော သတ္တဝိဓံ ဟောတိ။ ကထံ? ရူပါရမ္မဏမေဝ စက္ခုဝိညာဏံ၊ တထာ သဒ္ဒဂန္ဓရသဖောဋ္ဌဗ္ဗာရမ္မဏာနိ ပဋိပါဋိယာ သောတဃာနဇိဝှာကာယဝိညာဏာနိ၊ ရူပါဒိပဉ္စာရမ္မဏာ မနောဓာတု၊ သေသမနောဝိညာဏဓာတုဒွယံ ဆဠာရမ္မဏန္တိ။

တံ သဗ္ဗံ ပန အဟေတုကဝိပါကစိတ္တံ ကိစ္စတော အဋ္ဌဝိဓံ ဟောတိ။ ကထံ? ဒဿနကိစ္စံ စက္ခုဝိညာဏံ၊ သဝနဃာယနသာယနဖုသနသမ္ပဋိစ္ဆနသန္တီရဏတဒါရမ္မဏကိစ္စာနိ အဝသေသာနိ။

တတ္ထ ¶ စက္ခုတော ပဝတ္တံ ဝိညာဏံ၊ စက္ခုမှိ သန္နိဿိတံ ဝိညာဏန္တိ ဝါ စက္ခုဝိညာဏံ၊ တထာ သောတဝိညာဏာဒီနိ။ တတ္ထ စက္ခုသန္နိဿိတရူပဝိဇာနနလက္ခဏံ စက္ခုဝိညာဏံ ¶ ၊ ရူပမတ္တာရမ္မဏရသံ၊ ရူပါဘိမုခဘာဝပစ္စုပဋ္ဌာနံ၊ ရူပါရမ္မဏာယ ကိရိယာမနောဓာတုယာ အပဂမပဒဋ္ဌာနံ။ တထာ သောတဃာနဇိဝှာကာယဝိညာဏာနိ သောတာဒိသန္နိဿိတသဒ္ဒါဒိဝိဇာနနလက္ခဏာနိ၊ သဒ္ဒါဒိမတ္တာရမ္မဏရသာနိ၊ သဒ္ဒါဒီသု အဘိမုခဘာဝပစ္စုပဋ္ဌာနာနိ၊ သဒ္ဒါဒိအာရမ္မဏာနံ ကိရိယာမနောဓာတူနံ အပဂမပဒဋ္ဌာနာနိ။ မနောဓာတုသမ္ပဋိစ္ဆနံ ပန စက္ခုဝိညာဏာဒီနံ အနန္တရာ ရူပါဒိဝိဇာနနလက္ခဏံ၊ ရူပါဒိသမ္ပဋိစ္ဆနရသံ၊ တထာဘာဝပစ္စုပဋ္ဌာနံ၊ စက္ခုဝိညာဏာဒီနံ အပဂမပဒဋ္ဌာနံ။

သေသာ ပန ဒွေ အဟေတုကမနောဝိညာဏဓာတုယော ဆဠာရမ္မဏဝိဇာနနလက္ခဏာ၊ သန္တီရဏာဒိရသာ၊ တထာဘာဝပစ္စုပဋ္ဌာနာ၊ ဟဒယဝတ္ထုပဒဋ္ဌာနာတိ ဝေဒိတဗ္ဗာ။ တတ္ထ ပဌမာ ဧကန္တမိဋ္ဌာရမ္မဏေ ပဝတ္တိသဗ္ဘာဝတော သောမနဿယုတ္တာဝ ဟုတွာ ပဉ္စဒွါရေ သန္တီရဏကိစ္စံ သာဓယမာနာ ပဉ္စသု ဒွါရေသု ဌတွာ ဝိပစ္စတိ၊ ဆသု ပန ဒွါရေသု ဗလဝါရမ္မဏေ တဒါရမ္မဏံ ဟုတွာ ဝိပစ္စတိ။ ဒုတိယာ ¶ ပန ဣဋ္ဌမဇ္ဈတ္တာရမ္မဏေ ပဝတ္တိသဗ္ဘာဝတော ဥပေက္ခာသဟဂတာ ဟုတွာ သန္တီရဏတဒါရမ္မဏပဋိသန္ဓိဘဝင်္ဂစုတိဝသေန ပဝတ္တနတော ပဉ္စသု ဌာနေသု ဝိပစ္စတိ။ ကထံ? မနုဿလောကေ တာဝ ဇစ္စန္ဓဇစ္စဗဓိရဇစ္စဇဠဇစ္စုမ္မတ္တကပဏ္ဍကဥဘတောဗျဉ္ဇနနပုံသကာဒီနံ ပဋိသန္ဓိဂ္ဂဟဏကာလေ ပဋိသန္ဓိ ဟုတွာ ဝိပစ္စတိ။ ပဋိသန္ဓိယာ ဝီတိဝတ္တာယ ပဝတ္တိယံ ယာဝတာယုကံ ဘဝင်္ဂံ ဟုတွာ ဝိပစ္စတိ။ ဣဋ္ဌမဇ္ဈတ္တေ ပဉ္စာရမ္မဏဝီထိယာ သန္တီရဏံ ဟုတွာ၊ ဗလဝါရမ္မဏေ ဆဒွါရေ တဒါရမ္မဏံ ဟုတွာ၊ မရဏကာလေ စုတိ ဟုတွာတိ ဣမေသု ပန ပဉ္စသု ဌာနေသု ဝိပစ္စတီတိ။ ဧဝံ တာဝ အဟေတုကဝိပါကစိတ္တာနိ ဝေဒိတဗ္ဗာနိ။

ကာမာဝစရပုညဿ ¶ ၊ ဝိပါကာ ဟောန္တိ သောဠသ၊

တံ တိဟေတုကပုညဿ၊ ဝသေန ပရိဒီပယေ။

ဣဒါနိ ရူပါဝစရဝိပါကစိတ္တာနိ ဝုစ္စန္တိ။ တာနိ နိယတဝတ္ထုကတော ဧကဝိဓာနိ၊ ဈာနင်္ဂယောဂဘေဒတော ပဉ္စဝိဓာနိ။ ကထံ? ဝိတက္ကဝိစာရပီတိသုခစိတ္တေကဂ္ဂတာသမ္ပယုတ္တံ ပဌမံ၊ ဝိစာရပီတိသုခစိတ္တေကဂ္ဂတာသမ္ပယုတ္တံ ဒုတိယံ၊ ပီတိသုခစိတ္တေကဂ္ဂတာသမ္ပယုတ္တံ တတိယံ၊ သုခစိတ္တေကဂ္ဂတာသမ္ပယုတ္တံ စတုတ္ထံ၊ ဥပေက္ခာစိတ္တေကဂ္ဂတာသမ္ပယုတ္တံ ပဉ္စမန္တိ ဣမာနိ ပဉ္စပိ ရူပါဝစရဝိပါကစိတ္တာနိ ဥပပတ္တိယံ ပဋိသန္ဓိဘဝင်္ဂစုတိဝသေန ပဝတ္တန္တိ။

ဣဒါနိ ¶ အရူပါဝစရဝိပါကစိတ္တာနိ ဝုစ္စန္တိ။ တာနိ သကကုသလာနိ ဝိယ အာရမ္မဏဘေဒတော စတုဗ္ဗိဓာနိ ဟောန္တိ။ ကထံ? အာကာသာနဉ္စာယတနသညာသဟဂတံ၊ ဝိညာဏဉ္စာယတနသညာသဟဂတံ၊ အာကိဉ္စညာယတနသညာသဟဂတံ၊ နေဝသညာနာသညာယတနသညာသဟဂတန္တိ ဣမာနိ စတ္တာရိ အရူပါဝစရဝိပါကစိတ္တာနိ။

ကုသလာနုဂတံ ကတွာ၊ ဘာဇိတံ ကိံ မဟဂ္ဂတံ၊

ကာမာဝစရပုညံဝ၊ နာသမာနဖလံ ယတော။

အတ္တနော ကုသလေဟေဝ၊ သမာနံ သဗ္ဗထာ ဣဒံ၊

ဂဇာဒီနံ ယထာ ဆာယာ၊ ဂဇာဒိသဒိသာ တထာ။

ကာမာဝစရပုညံဝ၊ နာပရာပရိယဝေဒနံ၊

ဈာနာ အပရိဟီနဿ၊ သတ္တဿ ဘဝဂါမိနော။

ကုသလာနန္တရံယေဝ ¶ ၊ ဖလံ ဥပ္ပဇ္ဇတီတိ စ၊

ဉာပနတ္ထံ ပနေတဿ၊ ကုသလာနုဂတံ ကတံ။

ပဋိပ္ပဒါက္ကမော စေဝ၊ ဟီနာဒီနဉ္စ ဘေဒတော၊

ဈာနာဂမနတော စေတ္ထ၊ ဝေဒိတဗ္ဗော ဝိဘာဝိနာ။

အဘာဝေါဓိပတီနဉ္စ ¶ ၊ အယမေဝ ဝိသေသကော၊

သေသံ သဗ္ဗံ စ သေသေန၊ ကုသလေန သမံ မတံ။ –

ဧဝံ ရူပါဝစရာရူပါဝစရဝိပါကာ ဝေဒိတဗ္ဗာ။

ဣဒါနိ လောကုတ္တရဝိပါကစိတ္တာနိ ဟောန္တိ။ တာနိ စတုမဂ္ဂယုတ္တစိတ္တဖလတ္တာ စတုဗ္ဗိဓာနိ ဟောန္တိ။ ကထံ? သောတာပတ္တိမဂ္ဂဖလစိတ္တံ၊ သကဒါဂါမိမဂ္ဂဖလစိတ္တံ၊ အနာဂါမိမဂ္ဂဖလစိတ္တံ၊ အရဟတ္တမဂ္ဂဖလစိတ္တန္တိ။ ဧဝံ ပနေတ္ထ ဧကေကံ ဈာနင်္ဂယောဂဘေဒတော ပဉ္စဝိဓံ၊ ပုန မဂ္ဂဝီထိဖလသမာပတ္တိဝသေန ပဝတ္တိတော ဒုဝိဓံ။ ဧဝံ လောကုတ္တရကုသလဝိပါကစိတ္တာနိ ဝေဒိတဗ္ဗာနိ။

သုညတံ ¶ အနိမိတ္တန္တိ၊ တထာပဏိဟိတန္တိပိ၊

ဧတာနိ တီဏိ နာမာနိ၊ မဂ္ဂဿာနန္တရေ ဖလေ။

လဗ္ဘန္တိ ပရဘာဂသ္မိံ၊ ဝဠဉ္ဇနဖလေသု န၊

ဝိပဿနာဝသေနေဝ၊ တာနိ နာမာနိ လဗ္ဘရေ။

ဟောန္တိ သာဓိပတီနေဝ၊ လောကုတ္တရဖလာနိ တု၊

ဝိပါကေဓိပတီ နတ္ထိ၊ ဌပေတွာ တု အနာသဝေ။

အတ္တနော မဂ္ဂဘာဝေန၊ မဂ္ဂေါ ‘‘မဂ္ဂေါ’’တိ ဝုစ္စတိ၊

ဖလံ မဂ္ဂမုပါဒါယ၊ မဂ္ဂေါ နာမာတိ ဝုစ္စတိ။ –

ဧဝံ လောကုတ္တရဝိပါကာ ဝေဒိတဗ္ဗာ။

ဣဒါနိ သတ္တာကုသလဝိပါကာနိ ဝုစ္စန္တိ။ အကုသလဝိပါကံ ဥပေက္ခာသဟဂတံ စက္ခုဝိညာဏံ၊ ဥပေက္ခာသဟဂတံ သောတဝိညာဏံ၊ ဥပေက္ခာသဟဂတံ ဃာနဝိညာဏံ၊ ဥပေက္ခာသဟဂတံ ဇိဝှာဝိညာဏံ၊ ဒုက္ခသဟဂတံ ကာယဝိညာဏံ၊ ဥပေက္ခာသဟဂတံ အဟေတုကမနောဓာတုသမ္ပဋိစ္ဆနံ၊ ဥပေက္ခာသဟဂတံ အဟေတုကမနောဝိညာဏဓာတုသန္တီရဏန္တိ ဣမာနိ သတ္တ အကုသလဝိပါကစိတ္တာနိ။

ဧတ္ထ ¶ ပန ဥပေက္ခာသဟဂတာဟေတုကမနောဝိညာဏဓာတု ဧကာဒသဝိဓေနာပိ အကုသလစိတ္တေန ကမ္မေ အာယူဟိတေ ကမ္မကမ္မနိမိတ္တဂတိနိမိတ္တေသု အညတရံ အာရမ္မဏံ ကတွာ စတူသု အပါယေသု ပဋိသန္ဓိ ဟုတွာ ဝိပစ္စတိ၊ ပဋိသန္ဓိယာ ဝီတိဝတ္တာယ ¶ ဒုတိယစိတ္တဝါရံ တတော ပဋ္ဌာယ ယာဝတာယုကံ ဘဝင်္ဂံ ဟုတွာ၊ အနိဋ္ဌမဇ္ဈတ္တာရမ္မဏာယ ပဉ္စဝိညာဏဝီထိယာ သန္တီရဏံ ဟုတွာ၊ ဗလဝါရမ္မဏေ ဆသု ဒွါရေသု တဒါရမ္မဏံ ဟုတွာ၊ မရဏကာလေ စုတိ ဟုတွာ ဝိပစ္စတိ။ ဧဝံ ပဉ္စသု ဌာနေသု ဝိပစ္စတိ။ ကေဝလံ ဟိ တာနိ ကုသလဝိပါကာဟေတုကစိတ္တာနိ ကုသလကမ္မပစ္စယာနိ၊ ဣမာနိ အကုသလကမ္မပစ္စယာနိ။ အယမိမေသံ၊ တေသဉ္စ ဝိသေသော။

အနိဋ္ဌာနိဋ္ဌမဇ္ဈတ္တဂေါစရေ ဝတ္တရေ ဣမေ၊

သုခါဒိတ္တယယုတ္တာ တေ၊ ဒုက္ခုပေက္ခာယုတာ ဣမေ။

ဧဝံ ¶ ကာမာဝစရကုသလဝိပါကသဟေတုကမဋ္ဌဝိဓံ၊ အဟေတုကမဋ္ဌဝိဓံ၊ ဈာနင်္ဂယောဂဘေဒတော ရူပါဝစရဝိပါကံ ပဉ္စဝိဓံ၊ အာရမ္မဏဘေဒတော အရူပါဝစရဝိပါကံ စတုဗ္ဗိဓံ၊ မဂ္ဂသမ္ပယုတ္တစိတ္တဖလဘေဒတော လောကုတ္တရဝိပါကံ စတုဗ္ဗိဓံ၊ စက္ခုဝိညာဏာဒိဘေဒတော အကုသလဝိပါကံ သတ္တဝိဓန္တိ ဆတ္တိံသဝိဓံ ဝိပါကစိတ္တံ ဝေဒိတဗ္ဗံ။

ဧဝံ ဆတ္တိံသဓာ ပါကံ၊ ပါကသာသနပူဇိတော၊

သဝိပါကာဝိပါကေသု၊ ကုသလော သုဂတောဗြဝိ။

ကိရိယာဗျာကတစိတ္တံ ပန အဝိပါကတော ဧကဝိဓံ၊ ပရိတ္တမဟဂ္ဂတတော ဒုဝိဓံ၊ ကာမာဝစရရူပါဝစရအရူပါဝစရဘူမိဘေဒတော တိဝိဓံ။ တတ္ထ ကာမာဝစရံ ဒုဝိဓံ သဟေတုကမဟေတုကန္တိ။ တတ္ထ သဟေတုကံ ဧကဝိဓံ အရဟတော ဧဝ ဥပ္ပဇ္ဇနတော။ သောမနဿုပေက္ခာဉာဏပ္ပယောဂဘေဒတော ကာမာဝစရကုသလံ ဝိယ အဋ္ဌဝိဓံ ဟောတိ။ သေယျထိဒံ – သောမနဿသဟဂတံ ဉာဏသမ္ပယုတ္တံ အသင်္ခါရိကံ၊ သသင်္ခါရိကံ၊ သောမနဿသဟဂတံ ¶ ဉာဏဝိပ္ပယုတ္တံ အသင်္ခါရိကံ၊ သသင်္ခါရိကံ၊ ဥပေက္ခာသဟဂတံ ဉာဏသမ္ပယုတ္တံ အသင်္ခါရိကံ၊ သသင်္ခါရိကံ၊ ဥပေက္ခာသဟဂတံ ဉာဏဝိပ္ပယုတ္တံ အသင်္ခါရိကံ၊ သသင်္ခါရိကန္တိ ဣမာနိ အဋ္ဌ သဟေတုကကိရိယစိတ္တာနိ။ ဧတာနိ ပန ယထာနုရူပံ ဒါနာဒိဝသေန ခီဏာသဝါနံယေဝ ပဝတ္တန္တိ။ ဧဝံ သဟေတုကကိရိယစိတ္တာနိ ဝေဒိတဗ္ဗာနိ။

အဟေတုကကိရိယစိတ္တံ ပန တိဝိဓံ ကိရိယာဟေတုကမနောဓာတုဥပေက္ခာသဟဂတာဝဇ္ဇနစိတ္တံ၊ ကိရိယာဟေတုကမနောဝိညာဏဓာတုသောမနဿသဟဂတံ ဟသိတုပ္ပာဒစိတ္တံ၊ ကိရိယာဟေတုကမနောဝိညာဏဓာတုဥပေက္ခာသဟဂတံ ဝေါဋ္ဌဗ္ဗနစိတ္တန္တိ ¶ ။

တတ္ထ ကိရိယာဟေတုကမနောဓာတု ဥပေက္ခာသဟဂတာ ဟဒယဝတ္ထုံ နိဿာယ စက္ခုဒွါရေ ဣဋ္ဌဣဋ္ဌမဇ္ဈတ္တအနိဋ္ဌအနိဋ္ဌမဇ္ဈတ္တေသု ရူပါရမ္မဏေသု ယေန ကေနစိ ပသာဒေ ဃဋ္ဋိတေ တံ တံ အာရမ္မဏံ ဂဟေတွာ အာဝဇ္ဇနဝသေန စက္ခုဝိညာဏဿ ပုရေစာရီ ဟုတွာ ဘဝင်္ဂံ အာဝဋ္ဋယမာနာ ဥပ္ပဇ္ဇတိ။ သောတဒွါရာဒီသုပိ ဧသေဝ နယော။ ဣတရာ ပန ဒွေ အဟေတုကမနောဝိညာဏဓာတုယော သာဓာရဏာသာဓာရဏာတိ ဒုဝိဓာ ဟောန္တိ။ တတ္ထ အသာဓာရဏာ ပန ကိရိယာဟေတုကမနောဝိညာဏဓာတု သောမနဿသဟဂတာ ခီဏာသဝဿေဝ ဆသု ဒွါရေသု ဆသု အနုဠာရေသု အာရမ္မဏေသု ဟသိတုပ္ပာဒကိစ္စာ နိယတဝတ္ထုကာ ဥပ္ပဇ္ဇတိ။ သာဓာရဏာ ပန အဟေတုကမနောဝိညာဏဓာတု ဥပေက္ခာသဟဂတာ ဆဠာရမ္မဏဝိဇာနနလက္ခဏာ ¶ ၊ တထာဘာဝပစ္စုပဋ္ဌာနာ၊ သာ တီသု ဘဝေသု သဗ္ဗေသံ သစိတ္တကသတ္တာနံ သာဓာရဏာ၊ န ကဿစိ ပန သစိတ္တကဿ န ဥပ္ပဇ္ဇတိ နာမ။ ဥပ္ပဇ္ဇမာနာ ပနာယံ ပဉ္စဒွါရမနောဒွါရေသု ဝေါဋ္ဌဗ္ဗနာဝဇ္ဇနကိစ္စာ ဥပ္ပဇ္ဇတိ။ ဆ အသာဓာရဏဉာဏာနိပိ ဧတာယ ဂဟိတာရမ္မဏမေဝ ဂဏှန္တိ။ သဗ္ဗာရမ္မဏဂဟဏသမတ္ထတာယ ¶ သဗ္ဗညုတညာဏဂတိကာတိ ဝေဒိတဗ္ဗာ။ ဣမာနိ တီဏိ အဟေတုကကိရိယစိတ္တာနိ။

ဣဓ ဌတွာ ဟသနစိတ္တာနိ ပရိဂ္ဂဏှိတဗ္ဗာနိ။ တေရသ ဟသနစိတ္တာနိ။ ကုသလတော စတူဟိ သောမနဿသဟဂတေဟိ၊ အကုသလတော စတူဟီတိ ဣမေဟိ အဋ္ဌဟိ စိတ္တေဟိ ပုထုဇ္ဇနာ ဟသန္တိ၊ သေခါ ပန ကုသလတော စတူဟိ၊ အကုသလတော ဒွီဟိ ဒိဋ္ဌိဂတဝိပ္ပယုတ္တသောမနဿသဟဂတေဟီတိ ဆဟိ ဟသန္တိ၊ ခီဏာသဝါ ကိရိယတော ပဉ္စဟိ သောမနဿသဟဂတေဟိ ဟသန္တီတိ။

သောမနဿယုတာနဋ္ဌ၊ ကုသလာကုသလာနိ စ၊

ကြိယတော ပန ပဉ္စေဝံ၊ ဟာသစိတ္တာနိ တေရသ။

ပုထုဇ္ဇနာ ဟသန္တေတ္ထ၊ စိတ္တေဟိ ပန အဋ္ဌဟိ၊

ဆဟိ သေခါ အသေခါ စ၊ ဟသန္တိ ပန ပဉ္စဟိ။

ဣဒါနိ ရူပါဝစရကိရိယစိတ္တာနိ ဟောန္တိ။ ဝိတက္ကဝိစာရပီတိသုခစိတ္တေကဂ္ဂတာသမ္ပယုတ္တံ ပဌမံ၊ ဝိစာရပီတိသုခစိတ္တေကဂ္ဂတာသမ္ပယုတ္တံ ဒုတိယံ၊ ပီတိသုခစိတ္တေကဂ္ဂတာသမ္ပယုတ္တံ တတိယံ၊ သုခစိတ္တေကဂ္ဂတာသမ္ပယုတ္တံ စတုတ္ထံ၊ ဥပေက္ခာစိတ္တေကဂ္ဂတာသမ္ပယုတ္တံ ပဉ္စမန္တိ ဣမာနိ ပဉ္စ ရူပါဝစရကိရိယစိတ္တာနိ။

ဣဒါနိ ¶ အရူပါဝစရကိရိယစိတ္တာနိ ဝုစ္စန္တိ။ အာကာသာနဉ္စာယတနသညာသဟဂတံ၊ ဝိညာဏဉ္စာယတနသညာသဟဂတံ၊ အာကိဉ္စညာယတနသညာသဟဂတံ၊ နေဝသညာနာသညာယတနသညာသဟဂတန္တိ ဣမာနိ စတ္တာရိ အရူပါဝစရကိရိယစိတ္တာနိ။ ဣမာနိ ပန ရူပါရူပကိရိယစိတ္တာနိ သကသကဘူမိကုသလသဒိသာနိ။ ကေဝလံ ပနေတာနိ ကိရိယစိတ္တာနိ ခီဏာသဝါနံယေဝ ဥပ္ပဇ္ဇန္တိ၊ ကုသလာနိ ပန သေခပုထုဇ္ဇနာနံ။ ဣမာနိ စ ခီဏာသဝါနံ ဘာဝနာကာရဝသပ္ပဝတ္တာနိ၊ တာနိ ပန သေခပုထုဇ္ဇနာနံ ဘာဝနာပုညဝသပ္ပဝတ္တာနီတိ အယမေဝ ဣမေသံ၊ တေသဉ္စ ဝိသေသော။

ယာ ¶ ¶ ပုထုဇ္ဇနကာလသ္မိံ၊ အဘိနိဗ္ဗတ္တိတာ ပန၊

ရူပါရူပသမာပတ္တိ၊ သာ ခီဏာသဝဘိက္ခုနော။

ယာဝ ခီဏာသဝေါ ဘိက္ခု၊ န သမာပဇ္ဇတေဝ နံ၊

တာဝ တာ ကုသလာ ဧဝ၊ သမာပန္နာ သစေ ကြိယာ။

ဧဝံ သောမနဿာဒိဘေဒတော ကာမာဝစရသဟေတုကကိရိယစိတ္တမဋ္ဌဝိဓံ၊ မနောဓာတုမနောဝိညာဏဓာတုဒွယဘေဒတော အဟေတုကံ တိဝိဓံ၊ ဈာနင်္ဂယောဂဘေဒတော ရူပါဝစရံ ပဉ္စဝိဓံ၊ အာရမ္မဏဘေဒတော အရူပါဝစရံ စတုဗ္ဗိဓံ၊ ဧဝံ ဘူမိဝသေန ဝီသတိဝိဓံ ကိရိယစိတ္တံ ဝေဒိတဗ္ဗန္တိ။

ဧကာဒသဝိဓံ ကာမေ၊ ရူပေ ပဉ္စ အရူပိသု၊

စတ္တာရီတိ စ သဗ္ဗာနိ၊ ကြိယာစိတ္တာနိ ဝီသတိ။

လောကုတ္တရကြိယစိတ္တံ၊ ပန ကသ္မာ န ဝိဇ္ဇတိ၊

ဧကစိတ္တက္ခဏတ္တာ ဟိ၊ မဂ္ဂဿာတိ န ဝိဇ္ဇတိ။

ကြိယာကြိယာပတ္တိဝိဘာဂဒေသကော၊

ကြိယာကြိယံ စိတ္တမဝေါစ ယံ ဇိနော၊

ကြိယာကြိယံ တန္တု မယာ သမီရိတံ။

ဧတ္တာဝတာ ဧကဝီသတိဝိဓံ ကုသလံ၊ ဒွါဒသဝိဓံ အကုသလံ ဆတ္တိံသဝိဓံ ဝိပါကံ၊ ဝီသတိဝိဓံ ကိရိယစိတ္တန္တိ အာဒိမှိ နိက္ခိတ္တံ စိတ္တံ ဧကူနနဝုတိပ္ပဘေဒေန ဝိဓိနာ ပကာသိတံ ဟောတီတိ။

ဧကဝီသတိ ¶ ပုညာနိ၊ ဒွါဒသာကုသလာနိ စ၊

ဆတ္တိံသေဝ ဝိပါကာနိ၊ ကြိယစိတ္တာနိ ဝီသတိ။

ဧကူနနဝုတိ သဗ္ဗေ၊ စိတ္တုပ္ပာဒါ မဟေသိနာ၊

အဋ္ဌ လောကုတ္တရေ ကတွာ၊ နိဒ္ဒိဋ္ဌာ ဟိ သမာသတော။

ပိဋကေ ¶ ¶ အဘိဓမ္မသ္မိံ၊ ယေ ဘိက္ခူ ပါဋဝတ္ထိနော၊

တေဟာယံ ဥဂ္ဂဟေတဗ္ဗော၊ စိန္တေတဗ္ဗော ပုနပ္ပုနံ။

အဘိဓမ္မာဝတာရေန၊ အဘိဓမ္မမဟောဒဓိံ၊

ယေ တရန္တိ ဣမံ လောကံ၊ ပရဉ္စေဝ တရန္တိ တေတိ။

ဣတိ အဘိဓမ္မာဝတာရေ စိတ္တနိဒ္ဒေသော နာမ

စိတ္တာနန္တရမုဒ္ဒိဋ္ဌာ ¶ ၊ ယေ စ စေတသိကာ မယာ၊

တေသံ ဒါနိ ကရိဿာမိ၊ ဝိဘာဇနမိတော ပရံ။

တတ္ထ စိတ္တသမ္ပယုတ္တာ၊ စိတ္တေ ဘဝါ ဝါ စေတသိကာ။ တေပိ စိတ္တံ ဝိယ သာရမ္မဏတော ဧကဝိဓာ၊ သဝိပါကာဝိပါကတော ဒုဝိဓာ၊ ကုသလာကုသလာဗျာကတဘေဒတော တိဝိဓာ၊ ကာမာဝစရာဒိဘေဒတော စတုဗ္ဗိဓာ။

တတ္ထ ကာမာဝစရစိတ္တသမ္ပယုတ္တာ ကာမာဝစရာ။ တေသု ကာမာဝစရပဌမမဟာကုသလစိတ္တသမ္ပယုတ္တာ တာဝ နိယတာ သရူပေန အာဂတာ ဧကူနတိံသ ဓမ္မာ ဟောန္တိ။ သေယျထိဒံ – ဖဿော ဝေဒနာ သညာ စေတနာ ဝိတက္ကော ဝိစာရော ပီတိ စိတ္တေကဂ္ဂတာ သဒ္ဓါ သတိ ဝီရိယံ ပညာ ဇီဝိတိန္ဒြိယံ အလောဘော အဒေါသော ဟိရီ ဩတ္တပ္ပံ ကာယပ္ပဿဒ္ဓိ စိတ္တပ္ပဿဒ္ဓိ ကာယလဟုတာ စိတ္တလဟုတာ ကာယမုဒုတာ စိတ္တမုဒုတာ ကာယကမ္မညတာ စိတ္တကမ္မညတာ ကာယပါဂုညတာ စိတ္တပါဂုညတာ ကာယုဇုကတာ စိတ္တုဇုကတာတိ။ ပုန ဆန္ဒော၊ အဓိမောက္ခော၊ တတြမဇ္ဈတ္တတာ၊ မနသိကာရော စာတိ စတ္တာရော နိယတယေဝါပနကာ ဟောန္တိ။ ဣမေဟိ စတူဟိ တေတ္တိံသ ဟောန္တိ ¶ ။ ပုန ကရုဏာ မုဒိတာ ကာယဒုစ္စရိတဝိရတိ ¶ ဝစီဒုစ္စရိတဝိရတိ မိစ္ဆာဇီဝဝိရတိ စေတိ ဣမေ ပဉ္စ အနိယတာ။ ဣမေ ပန ကဒါစိ ဥပ္ပဇ္ဇန္တိ။

ဣမေသု ပန ကရုဏာမုဒိတာဝသေန ဘာဝနာကာလေ ကရုဏာပုဗ္ဗဘာဂေါ ဝါ မုဒိတာပုဗ္ဗဘာဂေါ ဝါ ဧတာ ဥပ္ပဇ္ဇန္တိ၊ န ပနေကတော ဥပ္ပဇ္ဇန္တိ။ ယဒါ ပန ဣမိနာ စိတ္တေန မိစ္ဆာကမ္မန္တာဒီဟိ ဝိရမတိ၊ တဒါ သမ္မာကမ္မန္တာဒီနိ ပရိပူရေန္တိ၊ ဧကာ ဝိရတိ ဥပ္ပဇ္ဇတိ၊ ကရုဏာမုဒိတာဟိ သဟ၊ အညမညေန စ န ဥပ္ပဇ္ဇန္တိ။ တသ္မာ ဧတေသု ဧကေန သဟ စတုတ္တိံသေဝ ဓမ္မာ ဟောန္တိ။

အာဒိနာ ¶ ပုညစိတ္တေန၊ တေတ္တိံသ နိယတာ မတာ၊

ကရုဏာမုဒိတေကေန၊ စတုတ္တိံသ ဘဝန္တိ တေ။

ကသ္မာ ပနေတ္ထ မေတ္တာ စ၊ ဥပေက္ခာ စ န ဥဒ္ဓဋာ၊

ယေဝါပနကဓမ္မေသု၊ ဓမ္မရာဇေန သတ္ထုနာ။

အဗျာပါဒေန မေတ္တာပိ၊ တတြမဇ္ဈတ္တတာယ စ၊

ဥပေက္ခာ ဂဟိတာ ယသ္မာ၊ တသ္မာ န ဂဟိတာ ဥဘော။

ကသ္မာ ယေဝါပနာ ဓမ္မာ၊ ဗုဒ္ဓေနာဒိစ္စဗန္ဓုနာ၊

သရူပေနေဝ သဗ္ဗေတေ၊ ပါဠိယံ န စ ဥဒ္ဓဋာ။

ယသ္မာ အနိယတာ ကေစိ၊ ယသ္မာ ရာသိံ ဘဇန္တိ န၊

ယသ္မာ စ ဒုဗ္ဗလာ ကေစိ၊ တသ္မာ ဝုတ္တာ န ပါဠိယံ။

ဆန္ဒာဓိမောက္ခမုဒိတာ မနသိ စ ကာရော၊

မဇ္ဈတ္တတာ စ ကရုဏာ ဝိရတိတ္တယံ စ၊

ပုညေသု တေန နိယတာနိယတာ စ သဗ္ဗေ၊

ယေဝါပနာ မုနိဝရေန န စေဝ ဝုတ္တာ။

ကသ္မာ ပနေတ္ထ ဖဿောဝ၊ ပဌမံ သမုဒီရိတော၊

ပဌမာဘိနိပါတတ္တာ၊ စိတ္တဿာရမ္မဏေ ကိရ။

ဖုသိတွာ ¶ ¶ ပန ဖဿေန၊ ဝေဒနာယ စ ဝေဒယေ၊

သဉ္ဇာနာတိ စ သညာယ၊ စေတနာယ စ စေတယေ။

ဗလဝပစ္စယတ္တာ စ၊ သဟဇာတာနမေဝ ဟိ၊

ဖဿောဝ ပဌမံ ဝုတ္တော၊ တသ္မာ ဣဓ မဟေသိနာ။

အကာရဏမိဒံ သဗ္ဗံ၊ စိတ္တာနံ တု သဟေဝ စ၊

ဧကုပ္ပာဒါဒိဘာဝေန၊ စိတ္တဇာနံ ပဝတ္တိတော။

အယံ တု ပဌမုပ္ပန္နော၊ အယံ ပစ္ဆာတိ နတ္ထိဒံ၊

ဗလဝပစ္စယတ္တေပိ၊ ကာရဏဉ္စ န ဒိဿတိ။

ဒေသနာက္ကမတော စေဝ၊ ပဌမံ သမုဒီရိတော၊

ဣစ္စေဝံ ပန ဝိညေယျံ၊ ဝိညုနာ န ဝိသေသတော။

န စ ပရိယေသိတဗ္ဗောယံ၊ တသ္မာ ပုဗ္ဗာပရက္ကမော၊

ဝစနတ္ထလက္ခဏာဒီဟိ၊ ဓမ္မာ ဧဝ ဝိဇာနတာ။

ယသ္မာ ပန ဣမေ ဓမ္မာ ဝစနတ္ထလက္ခဏာဒီဟိ ဝုစ္စမာနာ ပါကဋာ ဟောန္တိ သုဝိညေယျာဝ၊ တသ္မာ တေသံ ဝစနတ္ထလက္ခဏာဒီနိ ပဝက္ခာမိ။ သေယျထိဒံ – ဖုသတီတိ ဖဿော။ သွာယံ ဖုသနလက္ခဏော၊ သင်္ဃဋ္ဋနရသော၊ သန္နိပါတပစ္စုပဋ္ဌာနော၊ ဖလဋ္ဌေန ဝေဒနာပစ္စုပဋ္ဌာနော ဝါ၊ အာပါထဂတဝိသယပဒဋ္ဌာနော။ အယံ ဟိ အရူပဓမ္မောပိ သမာနော အာရမ္မဏေသု ဖုသနာကာရေနေဝ ¶ ပဝတ္တတိ၊ သော ဒွိန္နံ မေဏ္ဍာနံ သန္နိပါတော ဝိယ ဒဋ္ဌဗ္ဗော။

သုန္ဒရံ မနောတိ သုမနော၊ သုမနဿ ဘာဝေါ သောမနဿံ၊ သောမနဿမေဝ ဝေဒနာ သောမနဿဝေဒနာ။ သာ ဝေဒယိတလက္ခဏာ၊ ဣဋ္ဌာကာရာနုဘဝနရသာ ရာဇာ ဝိယ သုဘောဇနရသံ၊ စေတသိကအဿာဒပစ္စုပဋ္ဌာနာ၊ ပဿဒ္ဓိပဒဋ္ဌာနာ။

နီလာဒိဘေဒံ ¶ အာရမ္မဏံ သဉ္ဇာနာတီတိ သညာ။ သာ သဉ္ဇာနနလက္ခဏာ၊ ပစ္စာဘိညာဏကရဏရသာ ဝဍ္ဎကိဿ အဘိညာဏကရဏမိဝ၊ ယထာဂဟိတနိမိတ္တဝသေန အဘိနိဝေသကရဏပစ္စုပဋ္ဌာနာ၊ ယထောပဋ္ဌိတဝိသယပဒဋ္ဌာနာ။

စေတယတီတိ ¶ စေတနာ။ သဒ္ဓိံ အတ္တနာ သမ္ပယုတ္တဓမ္မေ အာရမ္မဏေ အဘိသန္ဒဟတီတိ အတ္ထော။ သာ စေတယိတလက္ခဏာ၊ အာယူဟနရသာ၊ သံဝိဒဟနပစ္စုပဋ္ဌာနာ သကကိစ္စပရကိစ္စသာဓကာ ဇေဋ္ဌသိဿမဟာဝဍ္ဎကိအာဒယော ဝိယ။

ဝိတက္ကေတီတိ ဝိတက္ကော။ ဝိတက္ကနံ ဝါ ဝိတက္ကော။ သွာယံ အာရမ္မဏေ စိတ္တဿ အဘိနိရောပနလက္ခဏော၊ အာဟနနပရိယာဟနနရသော၊ အာရမ္မဏေ စိတ္တဿ အာနယနပစ္စုပဋ္ဌာနော။

အာရမ္မဏေ တေန စိတ္တံ ဝိစရတီတိ ဝိစာရော။ ဝိစရဏံ ဝါ ဝိစာရော။ အနုသဉ္စရဏန္တိ ဝုတ္တံ ဟောတိ။ သွာယံ အာရမ္မဏာနုမဇ္ဇနလက္ခဏော၊ တတ္ထ သဟဇာတာနုယောဇနရသော၊ စိတ္တဿ အနုပဗန္ဓပစ္စုပဋ္ဌာနော။

ပိနယတီတိ ပီတိ။ သာ သမ္ပိယာယနလက္ခဏာ၊ ကာယစိတ္တပီဏနရသာ၊ ဖရဏရသာ ဝါ၊ ဩဒဂျပစ္စုပဋ္ဌာနာ။

စိတ္တဿ ဧကဂ္ဂဘာဝေါ စိတ္တေကဂ္ဂတာ။ သမာဓိဿေတံ နာမံ။ သော အဝိသာရလက္ခဏော၊ အဝိက္ခေပလက္ခဏော ဝါ၊ သဟဇာတာနံ သမ္ပိဏ္ဍနရသော နှာနိယစုဏ္ဏာနံ ဥဒကံ ဝိယ၊ ဥပသမပစ္စုပဋ္ဌာနော၊ ဝိသေသတော သုခပဒဋ္ဌာနော။

သဒ္ဒဟန္တိ ဧတာယ၊ သယံ ဝါ သဒ္ဒဟတိ၊ သဒ္ဒဟနမတ္တမေဝ ဝါ ဧသာတိ သဒ္ဓါ။ သာ ပနေသာ သဒ္ဒဟနလက္ခဏာ၊ ပသာဒနရသာ ဥဒကပ္ပသာဒကမဏိ ဝိယ၊ အကာလုသိယပစ္စုပဋ္ဌာနာ၊ သဒ္ဓေယျဝတ္ထုပဒဋ္ဌာနာ။

သရန္တိ ¶ ဧတာယ၊ သယံ ဝါ သရတိ၊ သရဏမတ္တမေဝ ဝါ ဧသာတိ သတိ။ သာ အပိလာပနလက္ခဏာ၊ အသမ္မောသရသာ၊ အာရက္ခပစ္စုပဋ္ဌာနာ၊ ထိရသညာပဒဋ္ဌာနာ။

ဝီရဘာဝေါ ¶ ဝီရိယံ။ ဝီရာနံ ဝါ ကမ္မံ ဝီရိယံ။ တံ ပနေတံ ဥဿာဟနလက္ခဏံ၊ သဟဇာတာနံ ဥပတ္ထမ္ဘနရသံ၊ အသံသီဒနဘာဝပစ္စုပဋ္ဌာနံ၊ သံဝေဂပဒဋ္ဌာနံ။

ပဇာနာတီတိ ¶ ပညာ။ သာ ပနေသာ ဝိဇာနနလက္ခဏာ၊ ဝိသယောဘာသနရသာ ပဒီပေါ ဝိယ၊ အသမ္မောဟပစ္စုပဋ္ဌာနာ အရညဂတသုဒေသကော ဝိယ။

ဇီဝန္တိ တေန တံသမ္ပယုတ္တဓမ္မာတိ ဇီဝိတံ။ တံ ပန အတ္တနာ အဝိနိဗ္ဘုတ္တာနံ ဓမ္မာနံ အနုပါလနလက္ခဏံ၊ တေသံ ပဝတ္တနရသံ၊ တေသံယေဝ ဌပနပစ္စုပဋ္ဌာနံ၊ ယာပယိတဗ္ဗဓမ္မပဒဋ္ဌာနံ။ သန္တေပိ စ တေသံ အနုပါလနလက္ခဏာဒိမှိ ဝိဓာနေ အတ္ထိက္ခဏေယေဝ တံ တေ ဓမ္မေ အနုပါလေတိ ဥဒကံ ဝိယ ဥပ္ပလာဒီနိ၊ ယထာသကံ ပစ္စယုပ္ပန္နေပိ စ ဓမ္မေ အနုပါလေတိ ဓာတိ ဝိယ ကုမာရံ၊ သယံပဝတ္တိတဓမ္မသမ္ဗန္ဓေနေဝ ပဝတ္တတိ နိယာမကော ဝိယ၊ န ဘင်္ဂတော ဥဒ္ဓံ ပဝတ္တယတိ အတ္တနော စ ပဝတ္တယိတဗ္ဗာနဉ္စ အဘာဝါ၊ န ဘင်္ဂက္ခဏေ ဌပေတိ သယံ ဘိဇ္ဇမာနတ္တာ ခီယမာနော ဝိယ ဝတ္တိသ္နေဟောဝ ပဒီပသိခန္တိ။

န လုဗ္ဘန္တိ တေန၊ သယံ ဝါ န လုဗ္ဘတိ၊ အလုဗ္ဘနမတ္တမေဝ ဝါ တန္တိ အလောဘော။ သော အာရမ္မဏေ စိတ္တဿ အလဂ္ဂဘာဝလက္ခဏော ကမလဒလေ ဇလဗိန္ဒု ဝိယ၊ အပရိဂ္ဂဟရသော မုတ္တဘိက္ခု ဝိယ၊ အနလ္လီနဘာဝပစ္စုပဋ္ဌာနော အသုစိမှိ ပတိတပုရိသော ဝိယ။

န ဒုဿန္တိ တေန၊ သယံ ဝါ န ဒုဿတိ၊ အဒုဿနမတ္တမေဝ ဝါ တန္တိ အဒေါသော။ သော အစဏ္ဍိက္ကလက္ခဏော၊ အဝိရောဓလက္ခဏော ဝါ အနုကူလမိတ္တော ဝိယ၊ အာဃာတဝိနယနရသော၊ ပရိဠာဟဝိနယနရသော ¶ ဝါ စန္ဒနံ ဝိယ၊ သောမ္မဘာဝပစ္စုပဋ္ဌာနော ပုဏ္ဏစန္ဒော ဝိယ။

ကာယဒုစ္စရိတာဒီဟိ ဟိရီယတီတိ ဟိရီ။ လဇ္ဇာယေတံ အဓိဝစနံ။ တေဟိယေဝ ဩတ္တပ္ပတီတိ ဩတ္တပ္ပံ။ ပါပတော ဥဗ္ဗေဂဿေတံ အဓိဝစနံ။ တတ္ထ ပါပတော ဇိဂုစ္ဆနလက္ခဏာ ဟိရီ၊ ဩတ္တာသလက္ခဏံ ဩတ္တပ္ပံ။ ဥဘောပိ ပါပါနံ အကရဏရသာ၊ ပါပတော သင်္ကောစနပစ္စုပဋ္ဌာနာ၊ အတ္တဂါရဝပရဂါရဝပဒဋ္ဌာနာ။ ဣမေ ဓမ္မာ လောကပါလာတိ ဒဋ္ဌဗ္ဗာ။

ကာယပဿမ္ဘနံ ကာယပဿဒ္ဓိ။ စိတ္တပဿမ္ဘနံ စိတ္တပဿဒ္ဓိ။ ကာယောတိ စေတ္ထ ဝေဒနာဒယော တယော ခန္ဓာ။ ဥဘောပိ ပနေတာ ဧကတော ဟုတွာ ကာယစိတ္တဒရထဝူပသမလက္ခဏာ ¶ ၊ ကာယစိတ္တဒရထနိမ္မဒနရသာ၊ ကာယစိတ္တာနံ အပရိပ္ဖန္ဒနသီတိဘာဝပစ္စုပဋ္ဌာနာ၊ ကာယစိတ္တပဒဋ္ဌာနာ၊ ကာယစိတ္တာနံ အဝူပသမတာဥဒ္ဓစ္စာဒိကိလေသပ္ပဋိပက္ခဘူတာတိ ဝေဒိတဗ္ဗာ။

ကာယလဟုဘာဝေါ ¶ ကာယလဟုတာ။ စိတ္တလဟုဘာဝေါ စိတ္တလဟုတာ။ ကာယစိတ္တာနံ ဂရုဘာဝဝူပသမလက္ခဏာ၊ ကာယစိတ္တဂရုဘာဝနိမ္မဒနရသာ၊ ကာယစိတ္တာနံ အဒန္ဓတာပစ္စုပဋ္ဌာနာ၊ ကာယစိတ္တပဒဋ္ဌာနာ၊ ကာယစိတ္တာနံ ဂရုဘာဝကရထိနမိဒ္ဓါဒိကိလေသပ္ပဋိပက္ခဘူတာတိ ဝေဒိတဗ္ဗာ။

ကာယမုဒုဘာဝေါ ကာယမုဒုတာ။ စိတ္တမုဒုဘာဝေါ စိတ္တမုဒုတာ။ ကာယစိတ္တာနံ ထဒ္ဓဘာဝဝူပသမလက္ခဏာ၊ ကာယစိတ္တာနံ ထဒ္ဓဘာဝနိမ္မဒနရသာ၊ အပ္ပဋိဃာတပစ္စုပဋ္ဌာနာ၊ ကာယစိတ္တပဒဋ္ဌာနာ၊ ကာယစိတ္တာနံ ထဒ္ဓဘာဝကရဒိဋ္ဌိမာနာဒိကိလေသပ္ပဋိပက္ခဘူတာတိ ဝေဒိတဗ္ဗာ။

ကာယကမ္မညဘာဝေါ ကာယကမ္မညတာ။ စိတ္တကမ္မညဘာဝေါ စိတ္တကမ္မညတာ။ ကာယစိတ္တာနံ အကမ္မညဘာဝဝူပသမလက္ခဏာ၊ ကာယစိတ္တာနံ အကမ္မညဘာဝနိမ္မဒနရသာ၊ ကာယစိတ္တာနံ အာရမ္မဏကရဏသမ္ပတ္တိပစ္စုပဋ္ဌာနာ၊ ကာယစိတ္တပဒဋ္ဌာနံ၊ ကာယစိတ္တာနံ ¶ အကမ္မညဘာဝကရအဝသေသနီဝရဏာဒိကိလေသပ္ပဋိပက္ခဘူတာတိ ဝေဒိတဗ္ဗာ။

ကာယပါဂုညဘာဝေါ ကာယပါဂုညတာ။ စိတ္တပါဂုညဘာဝေါ စိတ္တပါဂုညတာ။ ကာယစိတ္တာနံ အဂေလညဘာဝလက္ခဏာ၊ ကာယစိတ္တာနံ ဂေလညနိမ္မဒနရသာ၊ နိရာဒီနဝပစ္စုပဋ္ဌာနာ၊ ကာယစိတ္တပဒဋ္ဌာနာ၊ ကာယစိတ္တာနံ ဂေလညဘာဝကရအဿဒ္ဓါဒိကိလေသပ္ပဋိပက္ခဘူတာတိ ဒဋ္ဌဗ္ဗာ။

ကာယဿ ဥဇုကဘာဝေါ ကာယုဇုကတာ။ စိတ္တဿ ဥဇုကဘာဝေါ စိတ္တုဇုကတာ။ ကာယစိတ္တာနံ အကုဋိလဘာဝလက္ခဏာ၊ ကာယစိတ္တာနံ အဇ္ဇဝလက္ခဏာ ဝါ၊ ကာယစိတ္တာနံ ကုဋိလဘာဝနိမ္မဒနရသာ၊ အဇိမှတာပစ္စုပဋ္ဌာနာ၊ ကာယစိတ္တပဒဋ္ဌာနာ၊ ကာယစိတ္တာနံ ကုဋိလဘာဝကရမာယာသာဌေယျာဒိကိလေသပ္ပဋိပက္ခဘူတာတိ ဒဋ္ဌဗ္ဗာ။

ဆန္ဒောတိ ကတ္တုကမျတာယေတံ အဓိဝစနံ။ တသ္မာ သော ကတ္တုကမျတာလက္ခဏော ဆန္ဒော၊ အာရမ္မဏပရိယေသနရသော၊ အာရမ္မဏေန အတ္ထိကတာပစ္စုပဋ္ဌာနော၊ တဒေဝဿ ပဒဋ္ဌာနော။

အဓိမုစ္စနံ ¶ အဓိမောက္ခော။ သော သန္နိဋ္ဌာနလက္ခဏော၊ အသံသပ္ပနရသော၊ နိစ္ဆယပစ္စုပဋ္ဌာနော၊ သန္နိဋ္ဌေယျဓမ္မပဒဋ္ဌာနော၊ အာရမ္မဏေ နိစ္စလဘာဝေန ဣန္ဒခီလော ဝိယ ဒဋ္ဌဗ္ဗော။

တေသု ¶ တေသု ဓမ္မေသု မဇ္ဈတ္တဘာဝေါ တတြမဇ္ဈတ္တတာ။ သာ စိတ္တစေတသိကာနံ သမဝါဟိတလက္ခဏာ၊ ဦနာဓိကတာနိဝါရဏရသာ၊ ပက္ခပါတုပစ္ဆေဒနရသာ ဝါ၊ မဇ္ဈတ္တဘာဝပစ္စုပဋ္ဌာနာ။

ကိရိယာ ကာရော၊ မနသ္မိံ ကာရော မနသိကာရော။ ပုရိမမနတော ဝိသဒိသံ မနံ ကရောတီတိ စ မနသိကာရော။

သွာယံ ¶ အာရမ္မဏပဋိပါဒကော၊ ဝီထိပဋိပါဒကော၊ ဇဝနပဋိပါဒကောတိ တိပ္ပကာရော။ တတ္ထ အာရမ္မဏပဋိပါဒကော မနသ္မိံ ကာရော မနသိကာရော။ သော သာရဏလက္ခဏော၊ သမ္ပယုတ္တာနံ အာရမ္မဏေ သံယောဇနရသော၊ အာရမ္မဏာဘိမုခဘာဝပစ္စုပဋ္ဌာနော၊ အာရမ္မဏပဒဋ္ဌာနော၊ သင်္ခါရက္ခန္ဓပရိယာပန္နော အာရမ္မဏပဋိပါဒကတ္တေန သမ္ပယုတ္တာနံ သာရထီ ဝိယ ဒဋ္ဌဗ္ဗော။ ဝီထိပဋိပါဒကောတိ ပဉ္စဒွါရာဝဇ္ဇနဿေတံ အဓိဝစနံ၊ ဇဝနပဋိပါဒကောတိ မနောဒွါရာဝဇ္ဇနဿေတံ အဓိဝစနံ၊ န တေ ဣဓ အဓိပ္ပေတာ။

ကရုဏာတိ ပရဒုက္ခေ သတိ သာဓူနံ ဟဒယကမ္ပနံ ကရောတီတိ ကရုဏာ၊ ကိနာတိ ဝိနာသေတိ ဝါ ပရဒုက္ခန္တိ ကရုဏာ။ သာ ပရဒုက္ခာပနယနာကာရပ္ပဝတ္တိလက္ခဏာ၊ ပရဒုက္ခာသဟနရသာ၊ အဝိဟိံသာပစ္စုပဋ္ဌာနာ၊ ဒုက္ခာဘိဘူတာနံ အနာထဘာဝဒဿနပဒဋ္ဌာနာ။

မောဒန္တိ တာယ၊ သယံ ဝါ မောဒတီတိ မုဒိတာ။ သာ ပမောဒနလက္ခဏာ၊ အနိဿာယနရသာ၊ အရတိဝိဃာတပစ္စုပဋ္ဌာနာ၊ သတ္တာနံ သမ္ပတ္တိဒဿနပဒဋ္ဌာနာ။ ကေစိ ပန မေတ္တုပေက္ခာယောပိ အနိယတေ ဣစ္ဆန္တိ၊ တံ န ဂဟေတဗ္ဗံ။ အတ္ထတော ဟိ အဒေါသော ဧဝ မေတ္တာ၊ တတြမဇ္ဈတ္တုပေက္ခာယေဝ ဥပေက္ခာတိ။

ကာယဒုစ္စရိတတော ဝိရတိ ကာယဒုစ္စရိတဝိရတိ။ ဧသေဝ နယော သေသေသုပိ ဒွီသု။ လက္ခဏာဒိတော ပန ဧတာ တိဿောပိ ဝိရတိယော ကာယဒုစ္စရိတာဒိဝတ္ထူနံ အဝီတိက္ကမလက္ခဏာ၊ ကာယဒုစ္စရိတာဒိဝတ္ထုတော သင်္ကောစနရသာ၊ အကိရိယပစ္စုပဋ္ဌာနာ၊ သဒ္ဓါဟိရိဩတ္တပ္ပအပ္ပိစ္ဆတာဒိဂုဏပဒဋ္ဌာနာ။ ကေစိ ပန ဣမာသု ဧကေကံ နိယတံ ဝိရတိံ ဣစ္ဆန္တိ။ ဧဝံ ကာမာဝစရပဌမမဟာကုသလစိတ္တေန ဣမေ တေတ္တိံသ ဝါ စတုတ္တိံသ ဝါ ဓမ္မာ သမ္ပယောဂံ ဂစ္ဆန္တီတိ ဝေဒိတဗ္ဗာ။

ယထာ ¶ ¶ ¶ စ ပဌမေန၊ ဧဝံ ဒုတိယစိတ္တေနာပိ။ သသင်္ခါရဘာဝမတ္တမေဝ ဟိ ဧတ္ထ ဝိသေသော။ ပုန တတိယေန ဉာဏဝိပ္ပယောဂတော ဌပေတွာ အမောဟံ အဝသေသာ ဒွတ္တိံသ ဝါ တေတ္တိံသ ဝါ ဝေဒိတဗ္ဗာ။ တထာ စတုတ္ထေနာပိ သသင်္ခါရဘာဝမတ္တမေဝ ဝိသေသော၊ ပဌမေ ဝုတ္တေသု ပန ဌပေတွာ ပီတိံ အဝသေသာ ပဉ္စမေန သမ္ပယောဂံ ဂစ္ဆန္တိ။ သောမနဿဋ္ဌာနေ စေတ္ထ ဥပေက္ခာဝေဒနာ ပဝိဋ္ဌာ။ သာ ပန ဣဋ္ဌာနိဋ္ဌဝိပရီတာနုဘဝနလက္ခဏာ၊ ပက္ခပါတုပစ္ဆေဒနရသာ။ ယထာ စ ပဉ္စမေန၊ ဧဝံ ဆဋ္ဌေနာပိ။ သသင်္ခါရမတ္တမေဝ ဟောတိ ဝိသေသော။ သတ္တမေန ပန ဌပေတွာ ပညံ အဝသေသာ ဧကတိံသ ဝါ ဒွတ္တိံသ ဝါ ဓမ္မာ ဟောန္တိ၊ တထာ အဋ္ဌမေနာပိ။ သသင်္ခါရမတ္တမေဝ ဝိသေသော။ ဧဝံ တာဝ ကာမာဝစရကုသလစေတသိကာ ဝေဒိတဗ္ဗာ။

ဥပေက္ခာယုတ္တစိတ္တေသု၊ န ဒုက္ခသုခပီတိယော၊

ဇာယန္တေဝ ဝိသုံ ပဉ္စ၊ ကရုဏာမုဒိတာဒယော။

အဝသေသေသု ပန ရူပါဝစရစိတ္တသမ္ပယုတ္တာ ရူပါဝစရာ၊ တတ္ထ ပဌမစိတ္တသမ္ပယုတ္တာ တာဝ ကာမာဝစရပဌမစိတ္တေ ဝုတ္တေသု ဌပေတွာ ဝိရတိတ္တယံ အဝသေသာ ဝေဒိတဗ္ဗာ။ ဝိရတိယော ပန ကာမာဝစရကုသလလောကုတ္တရေသွေဝ ဥပ္ပဇ္ဇန္တိ၊ န အညေသု။ ဒုတိယေန ဝိတက္ကဝဇ္ဇာ ဒွတ္တိံသ ဝါ တေတ္တိံသ ဝါ။ တတိယေန ဝိစာရဝဇ္ဇာ ဧကတိံသ ဝါ ဒွတ္တိံသ ဝါ။ စတုတ္ထေန တတော ပီတိဝဇ္ဇာ တိံသ ဝါ ဧကတိံသ ဝါ။ ပဉ္စမေန တတော ကရုဏာမုဒိတာဝဇ္ဇာ တိံသ ဟောန္တိ၊ သောမနဿဋ္ဌာနေ ဥပေက္ခာ ပဝိဋ္ဌာ။ ဧဝံ ရူပါဝစရကုသလစေတသိကာ ဝေဒိတဗ္ဗာ။

အရူပါဝစရစိတ္တသမ္ပယုတ္တာ အရူပါဝစရာ၊ တေ ပန ရူပါဝစရပဉ္စမေ ဝုတ္တနယေန ဝေဒိတဗ္ဗာ။ အရူပါဝစရဘာဝေါဝေတ္ထ ဝိသေသော။

လောကုတ္တရစိတ္တသမ္ပယုတ္တာ ¶ လောကုတ္တရာ၊ တေ ပန ပဌမဇ္ဈာနိကေ မဂ္ဂစိတ္တေ ပဌမရူပါဝစရစိတ္တေ ဝုတ္တနယေန ဒုတိယဇ္ဈာနိကာဒိဘေဒေပိ မဂ္ဂစိတ္တေ ဒုတိယရူပါဝစရစိတ္တာဒီသု ဝုတ္တနယေနေဝ ဝေဒိတဗ္ဗာ။ ကရုဏာမုဒိတာနမဘာဝေါ စ နိယတဝိရတိဘာဝေါ စ လောကုတ္တရဘာဝေါ စေတ္ထ ဝိသေသော။ ဧဝံ တာဝ ကုသလစိတ္တသမ္ပယုတ္တစေတသိကာ ဝေဒိတဗ္ဗာ။

အကုသလာ ပန စေတသိကာ ဘူမိတော ဧကဝိဓာ ကာမာဝစရာယေဝ၊ တေသု လောဘမူလပဌမာကုသလစိတ္တသမ္ပယုတ္တာ ¶ တာဝ နိယတာ သရူပေနာဂတာ ပန္နရသ၊ ယေဝါပနကာ နိယတာ စတ္တာရောတိ ¶ ဧကူနဝီသတိ ဟောန္တိ။ အနိယတာ ဆ ယေဝါပနကာတိ သဗ္ဗေ ပဉ္စဝီသတိ ဟောန္တိ။ သေယျထိဒံ – ဖဿော သောမနဿဝေဒနာ သညာ စေတနာ ဝိတက္ကော ဝိစာရော ပီတိ စိတ္တဿေကဂ္ဂတာ ဝီရိယံ ဇီဝိတံ အဟိရိကံ အနောတ္တပ္ပံ လောဘော မောဟော မိစ္ဆာဒိဋ္ဌီတိ ဣမေ သရူပေနာဂတာ ပန္နရသ၊ ဆန္ဒော အဓိမောက္ခော ဥဒ္ဓစ္စံ မနသိကာရောတိ ဣမေ စတ္တာရော နိယတယေဝါပနကာ၊ ဣမေ ပန ပဋိပါဋိယာ ဒသသု စိတ္တေသု နိယတာ ဟောန္တိ၊ မာနော ဣဿာ မစ္ဆရိယံ ကုက္ကုစ္စံ ထိနမိဒ္ဓန္တိ ဣမေ ဆယေဝ အနိယတယေဝါပနကာ။

ဧဝံ ယေဝါပနာ သဗ္ဗေ၊ နိယတာနိယတာ ဒသ၊

နိဒ္ဒိဋ္ဌာ ပါပစိတ္တေသု၊ ဟတပါပေန တာဒိနာ။

တတ္ထ ဖဿောတိ အကုသလစိတ္တသဟဇာတော ဖဿော။ ဧသ နယော သေသေသုပိ။ န ဟိရီယတီတိ အဟိရိကော၊ အဟိရိကဿ ဘာဝေါ အဟိရိကံ။ ကာယဒုစ္စရိတာဒီဟိ ဩတ္တပ္ပတီတိ ဩတ္တပ္ပံ၊ န ဩတ္တပ္ပံ အနောတ္တပ္ပံ။ တတ္ထ ကာယဒုစ္စရိတာဒီဟိ အဇိဂုစ္ဆနလက္ခဏံ၊ အလဇ္ဇာလက္ခဏံ ဝါ အဟိရိကံ၊ အနောတ္တပ္ပံ တေဟေဝ အသာရဇ္ဇနလက္ခဏံ၊ အနုတ္တာသလက္ခဏံ ဝါ။

လုဗ္ဘန္တိ ¶ တေန၊ သယံ ဝါ လုဗ္ဘတိ၊ လုဗ္ဘနမတ္တမေဝ ဝါ တန္တိ လောဘော။ သော အာရမ္မဏဂဟဏလက္ခဏော မက္ကဋာလေပေါ ဝိယ၊ အဘိသင်္ဂရသော တတ္တကပါလေ ပက္ခိတ္တမံသပေသိ ဝိယ၊ အပရိစ္စာဂပစ္စုပဋ္ဌာနော တေလဉ္ဇနရာဂေါ ဝိယ၊ သံယောဇနိယေသု ဓမ္မေသု အဿာဒဒဿနပဒဋ္ဌာနော။

မုယှန္တိ တေန၊ သယံ ဝါ မုယှတိ၊ မုယှနမတ္တမေဝ ဝါ တန္တိ မောဟော။ သော စိတ္တဿ အန္ဓဘာဝလက္ခဏော၊ အညာဏလက္ခဏော ဝါ၊ အသမ္ပဋိဝေဓရသော၊ အာရမ္မဏသဘာဝစ္ဆာဒနရသော ဝါ၊ အန္ဓကာရပစ္စုပဋ္ဌာနော၊ အယောနိသောမနသိကာရပဒဋ္ဌာနော။

မိစ္ဆာ ပဿန္တိ တာယ၊ သယံ ဝါ မိစ္ဆာ ပဿတိ၊ မိစ္ဆာဒဿနမတ္တမေဝ ဝါ ဧသာတိ မိစ္ဆာဒိဋ္ဌိ။ သာ အယောနိသောအဘိနိဝေသလက္ခဏာ၊ ပရာမာသရသာ၊ မိစ္ဆာဘိနိဝေသပစ္စုပဋ္ဌာနာ၊ အရိယာနံ အဒဿနကာမတာဒိပဒဋ္ဌာနာ။

ဥဒ္ဓတဘာဝေါ ¶ ဥဒ္ဓစ္စံ။ တံ အဝူပသမလက္ခဏံ ဝါတာဘိဃာတစလဇလံ ဝိယ၊ အနဝဋ္ဌာနရသံ ဝါတာဘိဃာတစလဓဇပဋာကာ ဝိယ၊ ဘန္တတ္တပစ္စုပဋ္ဌာနံ ပါသာဏာဘိဃာတသမုဒ္ဓတဘသ္မံ ဝိယ၊ အယောနိသောမနသိကာရပဒဋ္ဌာနံ။

မညတီတိ ¶ မာနော။ သော ဥဏ္ဏတိလက္ခဏော၊ သမ္ပဂ္ဂဟဏရသော၊ ကေတုကမျတာပစ္စုပဋ္ဌာနော၊ ဒိဋ္ဌိဝိပ္ပယုတ္တလောဘပဒဋ္ဌာနော။

ဣဿတီတိ ဣဿာ။ သာ ပရသမ္ပတ္တီနံ ဥသူယနလက္ခဏာ၊ တတ္ထေဝ အနဘိရတိရသာ၊ တတော ဝိမုခဘာဝပစ္စုပဋ္ဌာနာ၊ ပရသမ္ပတ္တိပဒဋ္ဌာနာ။

မစ္ဆရဘာဝေါ မစ္ဆရိယံ။ တံ အတ္တနော သမ္ပတ္တီနံ နိဂုဟဏလက္ခဏံ၊ တာသံယေဝ ပရေဟိ သာဓာရဏဘာဝအက္ခမနရသံ၊ သင်္ကောစနပစ္စုပဋ္ဌာနံ၊ အတ္တသမ္ပတ္တိပဒဋ္ဌာနံ။

ကုစ္ဆိတံ ¶ ကတံ ကုကတံ၊ တဿ ဘာဝေါ ကုက္ကုစ္စံ။ တံ ပစ္ဆာနုတာပလက္ခဏံ၊ ကတာကတာနုသောစနရသံ၊ ဝိပ္ပဋိသာရပစ္စုပဋ္ဌာနံ၊ ကတာကတပဒဋ္ဌာနံ။

ထိနတာ ထိနံ။ မိဒ္ဓတာ မိဒ္ဓံ။ အနုဿာဟနသံသီဒနတာ၊ အသတ္တိဝိဃာတော စာတိ အတ္ထော။ ထိနဉ္စ မိဒ္ဓဉ္စ ထိနမိဒ္ဓံ။ တတ္ထ ထိနံ အနုဿာဟနလက္ခဏံ၊ ဝီရိယဝိနောဒနရသံ၊ သံသီဒနဘာဝပစ္စုပဋ္ဌာနံ။ မိဒ္ဓံ အကမ္မညတာလက္ခဏံ၊ ဩနဟနရသံ၊ လီနတာပစ္စုပဋ္ဌာနံ၊ ဥဘယမ္ပိ အယောနိသောမနသိကာရပဒဋ္ဌာနံ။ သေသာ ကုသလေ ဝုတ္တနယေန ဝေဒိတဗ္ဗာ။

ဧတ္ထ ပန ဝိတက္ကဝီရိယသမာဓီနံ မိစ္ဆာသင်္ကပ္ပမိစ္ဆာဝါယာမမိစ္ဆာသမာဓယော ဝိသေသကာ။ ဣတိ ဣမေ ဧကူနဝီသတိ စေတသိကာ ပဌမာကုသလစိတ္တေန သမ္ပယောဂံ ဂစ္ဆန္တီတိ ဝေဒိတဗ္ဗာ။ ယထာ စ ပဌမေန၊ ဧဝံ ဒုတိယေနာပိ။ သသင်္ခါရဘာဝေါ စေတ္ထ ထိနမိဒ္ဓဿ နိယတဘာဝေါ စ ဝိသေသော။ တတိယေန ပဌမေ ဝုတ္တေသု ဌပေတွာ ဒိဋ္ဌိံ သေသာ အဋ္ဌာရသ ဝေဒိတဗ္ဗာ။ မာနော ပနေတ္ထ အနိယတော ဟောတိ၊ ဒိဋ္ဌိယာ သဟ န ဥပ္ပဇ္ဇတီတိ။ စတုတ္ထေန ဒုတိယေ ဝုတ္တေသု ဌပေတွာ ဒိဋ္ဌိံ အဝသေသာ ဝေဒိတဗ္ဗာ။ ဧတ္ထာပိ စ မာနော အနိယတော ဟောတိ။ ပဉ္စမေန ပဌမေ ဝုတ္တေသု ဌပေတွာ ပီတိံ အဝသေသာ သမ္ပယောဂံ ဂစ္ဆန္တီတိ။ သောမနဿဋ္ဌာနေ ပနေတ္ထ ဥပေက္ခာ ပဝိဋ္ဌာ။ ဆဋ္ဌေနာပိ ပဉ္စမေ ဝုတ္တသဒိသာ ဧဝ။ သသင်္ခါရတာ ¶ ၊ ထိနမိဒ္ဓဿ နိယတဘာဝေါ စ ဝိသေသော။ သတ္တမေန ပဉ္စမေ ဝုတ္တေသု ဌပေတွာ ဒိဋ္ဌိံ အဝသေသာ ဝေဒိတဗ္ဗာ။ မာနော ပနေတ္ထ အနိယတော။ အဋ္ဌမေန ဆဋ္ဌေ ဝုတ္တေသု ဌပေတွာ ဒိဋ္ဌိံ အဝသေသာ ဝေဒိတဗ္ဗာ။ ဧတ္ထာပိ မာနော ¶ အနိယတော ဟောတိ။ ဧဝံ လောဘမူလစေတသိကာ ဝေဒိတဗ္ဗာ။

ဒေါမနဿသဟဂတေသု ပဋိဃသမ္ပယုတ္တေသု ဒေါသမူလေသု ဒွီသု ပဌမေန အသင်္ခါရိကေန သမ္ပယုတ္တာ နိယတာ သရူပေနာဂတာ ¶ တေရသ။ သေယျထိဒံ – ဖဿော ဒေါမနဿဝေဒနာ သညာ စေတနာ စိတ္တေကဂ္ဂတာ ဝိတက္ကော ဝိစာရော ဝီရိယံ ဇီဝိတံ အဟိရိကံ အနောတ္တပ္ပံ ဒေါသော မောဟော စေတိ ဣမေ တေရသ ဓမ္မာ ဆန္ဒာဒီဟိ စတူဟိ နိယတယေဝါပနကေဟိ သတ္တရသ ဟောန္တိ ဣဿာမစ္ဆရိယကုက္ကုစ္စေသု အနိယတေသု တီသု ဧကေန သဟ အဋ္ဌာရသ ဟောန္တိ၊ ဧတေပိ တယော န ဧကတော ဥပ္ပဇ္ဇန္တိ။

တတ္ထ ဒုဋ္ဌု မနောတိ ဒုမနော၊ ဒုမနဿ ဘာဝေါ ဒေါမနဿံ၊ ဒေါမနဿဝေဒနာယေတံ အဓိဝစနံ။ တေန သဟဂတံ ဒေါမနဿသဟဂတံ။ တံ အနိဋ္ဌာရမ္မဏာနုဘဝနလက္ခဏံ၊ အနိဋ္ဌာကာရသမ္ဘောဂရသံ၊ စေတသိကာဗာဓပစ္စုပဋ္ဌာနံ၊ ဧကန္တေနေဝ ဟဒယဝတ္ထုပဒဋ္ဌာနံ။

ဒုဿန္တိ တေန၊ သယံ ဝါ ဒုဿတိ၊ ဒုဿနမတ္တမေဝ ဝါ တန္တိ ဒေါသော။ သော စဏ္ဍိက္ကလက္ခဏော ပဟတာသီဝိသော ဝိယ၊ ဝိသပ္ပနရသော ဝိသနိပါတော ဝိယ၊ အတ္တနော နိဿယဒဟနရသော ဝါ ဒါဝဂ္ဂိ ဝိယ၊ ဒုဿနပစ္စုပဋ္ဌာနော လဒ္ဓါကာသော ဝိယ သပတ္တော၊ အာဃာတဝတ္ထုပဒဋ္ဌာနော။ အဝသေသာ ဟေဋ္ဌာ ဝုတ္တပ္ပကာရာဝ။ ဣတိ ဣမေ သတ္တရသ ဝါ အဋ္ဌာရသ ဝါ နဝမေန သမ္ပယောဂံ ဂစ္ဆန္တီတိ ဝေဒိတဗ္ဗာ။ ယထာ စ နဝမေန၊ ဧဝံ ဒသမေနာပိ။ သသင်္ခါရတာ၊ ပနေတ္ထ ထိနမိဒ္ဓသမ္ဘဝေါ စ ဝိသေသော။

ဒွီသု ပန မောဟမူလေသု ဝိစိကိစ္ဆာသမ္ပယုတ္တေန ဧကာဒသမေန သမ္ပယုတ္တာ တာဝ ဖဿော ဥပေက္ခာဝေဒနာ သညာ စေတနာ ဝိတက္ကော ဝိစာရော ဝီရိယံ ဇီဝိတံ စိတ္တဋ္ဌိတိ အဟိရိကံ အနောတ္တပ္ပံ မောဟော ဝိစိကိစ္ဆာတိ သရူပေနာဂတာ တေရသ၊ ဥဒ္ဓစ္စံ မနသိကာရောတိ ဒွေ ယေဝါပနကာ နိယတာ။ တေဟိ သဒ္ဓိံ ပန္နရသ ဟောန္တိ။

တတ္ထ ¶ ပဝတ္တဋ္ဌိတိမတ္တာ ဧကဂ္ဂတာ။ ဝိဂတာ စိကိစ္ဆာတိ ဝိစိကိစ္ဆာ။ သဘာဝံ ဝိစိနန္တော ¶ ဧတာယ ကိစ္ဆတိ ကိလမတီတိ ဝိစိကိစ္ဆာ။ သာ သံသယလက္ခဏာ၊ ကမ္ပနရသာ၊ အနိစ္ဆယပစ္စုပဋ္ဌာနာ၊ အယောနိသောမနသိကာရပဒဋ္ဌာနာ။ သေသာ ဝုတ္တနယာ ဧဝ။

ဒွါဒသမေန ဥဒ္ဓစ္စသမ္ပယုတ္တေန သမ္ပယုတ္တာ သရူပေနာဂတာ ¶ ဝိစိကိစ္ဆာသဟဂတေ ဝုတ္တေသု ဝိစိကိစ္ဆာဟီနာ ဥဒ္ဓစ္စံ သရူပေန အာဂတံ၊ တသ္မာ တေရသေဝ ဟောန္တိ။ ဝိစိကိစ္ဆာယ အဘာဝေန ပနေတ္ထ အဓိမောက္ခော ဥပ္ပဇ္ဇတိ၊ တေန သဒ္ဓိံ စုဒ္ဒသ ဟောန္တိ။ အဓိမောက္ခသမ္ဘဝတော သမာဓိ ဗလဝါ ဟောတိ၊ အဓိမောက္ခမနသိကာရာ ဒွေ ယေဝါပနကာ၊ တေဟိ သဟ ပန္နရသေဝ ဟောန္တိ။ ဧဝံ တာဝ အကုသလစေတသိကာ ဝေဒိတဗ္ဗာ။

ဣဒါနိ အဗျာကတာ ဝုစ္စန္တိ၊ အဗျာကတာ ပန ဒုဝိဓာ ဝိပါကကိရိယဘေဒတော။ တတ္ထ ဝိပါကာ ကုသလာ ဝိယ ဘူမိဝသေန စတုဗ္ဗိဓာ ကာမာဝစရံ ရူပါဝစရံ အရူပါဝစရံ လောကုတ္တရဉ္စေတိ။ တတ္ထ ကာမာဝစရဝိပါကာ သဟေတုကာဟေတုကဝသေန ဒုဝိဓာ။ တတ္ထ သဟေတုကဝိပါကသမ္ပယုတ္တာ သဟေတုကာ။ တေ သဟေတုကကာမာဝစရကုသလသမ္ပယုတ္တသဒိသာ။ ယာ ပန ကရုဏာမုဒိတာ အနိယတာ၊ တာ သတ္တာရမ္မဏတ္တာ ဝိပါကေသု နုပ္ပဇ္ဇန္တိ။ ကာမာဝစရဝိပါကာနံ ဧကန္တပရိတ္တာရမ္မဏတ္တာ ဝိရတိယော ပနေတ္ထ ဧကန္တကုသလတ္တာ န လဗ္ဘန္တိ။ ဝိဘင်္ဂေ ‘‘ပဉ္စ သိက္ခာပဒါ ကုသလာယေဝါ’’တိ ဟိ ဝုတ္တံ။ ဧဝံ ကာမာဝစရသဟေတုကဝိပါကစေတသိကာ ဝေဒိတဗ္ဗာ။

တေတ္တိံသာဒိဒွယေ ဓမ္မာ၊ ဒွတ္တိံသေဝ တတော ပရေ၊

ဗာတ္တိံသ ပဉ္စမေ ဆဋ္ဌေ၊ ဧကတိံသ တတော ပရေ။

အဟေတုကစိတ္တသမ္ပယုတ္တာ ¶ ပန အဟေတုကာ။ တေသု စက္ခုဝိညာဏသမ္ပယုတ္တာ တာဝ ဖဿော ဥပေက္ခာဝေဒနာ သညာ စေတနာ ဇီဝိတံ စိတ္တဋ္ဌိတီတိ သရူပေနာဂတာ ဆ၊ မနသိကာရေန စ သတ္တ ဟောန္တိ။ သောတဃာနဇိဝှာကာယဝိညာဏသမ္ပယုတ္တာပိ သတ္တ သတ္တေဝ စေတသိကာ။ တတ္ထ ကာယဝိညာဏသမ္ပယုတ္တေသု ပန ဥပေက္ခာဌာနေ သုခဝေဒနာ ပဝိဋ္ဌာ။ သာ ကာယိကသာတလက္ခဏာ၊ ပီဏနရသာ၊ သေသာ ဝုတ္တနယာ ဧဝ။

ဣဋ္ဌာရမ္မဏယောဂသ္မိံ၊ စက္ခုဝိညာဏကာဒိသု၊

သတိ ကသ္မာ ဥပေက္ခာဝ၊ ဝုတ္တာ စတူသု သတ္ထုနာ။

ဥပါဒါယ ¶ စ ရူပေန၊ ဥပါဒါရူပကေ ပန၊

သင်္ဃဋ္ဋနာနိဃံသဿ၊ ဒုဗ္ဗလတ္တာတိ ဒီပယေ။

ပသာဒံ ပနတိက္ကမ္မ၊ ကူဋံဝ ပိစုပိဏ္ဍကံ၊

ဘူတရူပေန ဘူတာနံ၊ ဃဋ္ဋနာယ သုခါဒိကံ။

တသ္မာ ¶ ကာယဝိညာဏံ သုခါဒိသမ္ပယုတ္တန္တိ ဝေဒိတဗ္ဗံ။ မနောဓာတုနာ သမ္ပယုတ္တာ သရူပေနာဂတာ စက္ခုဝိညာဏေန သဒ္ဓိံ ဝုတ္တာ ဆ၊ ဝိတက္ကဝိစာရေဟိ သဟ အဋ္ဌ၊ အဓိမောက္ခမနသိကာရေဟိ ဒွီဟိ ယေဝါပနကေဟိ ဒသ ဓမ္မာ ဟောန္တိ။ တထာ မနောဝိညာဏဓာတုဥပေက္ခာသဟဂတေန။ သောမနဿသဟဂတေန ပီတိအဓိကာ ဝေဒနာပရိဝတ္တနဉ္စ နာနတ္တံ။ တသ္မာဝေတ္ထ ဧကာဒသ ဓမ္မာ ဟောန္တိ။ ဧဝံ အဟေတုကာပိ ကာမာဝစရဝိပါကစေတသိကာ ဝေဒိတဗ္ဗာ။

ရူပါဝစရဝိပါကစိတ္တသမ္ပယုတ္တာ ပန ရူပါဝစရာ။ အရူပါဝစရဝိပါကစိတ္တသမ္ပယုတ္တာ အရူပါဝစရာ။ တေ သဗ္ဗေပိ အတ္တနော အတ္တနော ကုသလစိတ္တသမ္ပယုတ္တစေတသိကေဟိ သဒိသာယေဝါတိ။

လောကုတ္တရဝိပါကစိတ္တသမ္ပယုတ္တာ ¶ လောကုတ္တရာ။ တေ သဗ္ဗေ တေသံယေဝ လောကုတ္တရဝိပါကစိတ္တာနံ သဒိသာ ကုသလစိတ္တသမ္ပယုတ္တေဟိ စေတသိကေဟိ သဒိသာ။ ဧဝံ ရူပါဝစရာရူပါဝစရလောကုတ္တရဝိပါကစေတသိကာ ဝေဒိတဗ္ဗာ။

အကုသလဝိပါကစိတ္တသမ္ပယုတ္တာ ပန အကုသလဝိပါကစေတသိကာ နာမ။ တေ ပန ကုသလဝိပါကာဟေတုကစိတ္တေသု စက္ခုဝိညာဏာဒီသု ဝုတ္တစေတသိကသဒိသာ။ ဧတ္ထ ပန ကာယဝိညာဏေ ဒုက္ခဝေဒနာ ပဝိဋ္ဌာ။ သာ ကာယိကာဗာဓလက္ခဏာ။ သေသာ ဝုတ္တနယာယေဝါတိ။ ဧဝံ ဆတ္တိံသ ဝိပါကစိတ္တသမ္ပယုတ္တစေတသိကာ ဝေဒိတဗ္ဗာ။

ကိရိယာဗျာကတာ စ စေတသိကာ ဘူမိတော တိဝိဓာ ဟောန္တိ ကာမာဝစရာ ရူပါဝစရာ အရူပါဝစရာတိ။ တတ္ထ ကာမာဝစရာ သဟေတုကာဟေတုကတော ဒုဝိဓာ ဟောန္တိ။ တေသု သဟေတုကကိရိယစိတ္တသမ္ပယုတ္တာ သဟေတုကာ၊ တေ ပန အဋ္ဌဟိ ကာမာဝစရကုသလစိတ္တသမ္ပယုတ္တေဟိ သမာနာ ဌပေတွာ ဝိရတိတ္တယံ အနိယတယေဝါပနကေသု ကရုဏာမုဒိတာယေဝ ဥပ္ပဇ္ဇန္တိ။ အဟေတုကကိရိယစိတ္တသမ္ပယုတ္တာ အဟေတုကာ၊ တေ ကုသလဝိပါကာဟေတုကမနောဓာတုမနောဝိညာဏဓာတုစိတ္တသမ္ပယုတ္တေဟိ သမာနာ။ မနောဝိညာဏဓာတုဒွယေ ¶ ပန ဝီရိယိန္ဒြိယံ အဓိကံ။ ဝီရိယိန္ဒြိယသမ္ဘဝတော ပနေတ္ထ ဗလပ္ပတ္တော သမာဓိ ဟောတိ။ ဟသိတုပ္ပာဒစိတ္တေန သမ္ပယုတ္တာ ဒွါဒသ ဓမ္မာ ဟောန္တိ ပီတိယာ သဟ။ အယမေတ္ထ ဝိသေသော။

ရူပါဝစရကိရိယစိတ္တသမ္ပယုတ္တာ ပန ရူပါဝစရာ။ အရူပါဝစရကိရိယစိတ္တသမ္ပယုတ္တာ အရူပါဝစရာ။ တေ သဗ္ဗေပိ သကသကဘူမိကုသလစိတ္တသမ္ပယုတ္တေဟိ သမာနာတိ။ ဧဝံ ဝီသတိ ကိရိယစိတ္တသမ္ပယုတ္တာ စ စေတသိကာ ဝေဒိတဗ္ဗာ။

ဧတ္တာဝတာ ¶ ¶ ကုသလာကုသလဝိပါကကိရိယဘေဒဘိန္နေန ဧကူနနဝုတိယာ စိတ္တေန သမ္ပယုတ္တာ စေတသိကာ နိဒ္ဒိဋ္ဌာ ဟောန္တိ။

ဣတိ အဘိဓမ္မာဝတာရေ စေတသိကနိဒ္ဒေသော နာမ

သဗ္ဗေ ¶ ¶ စေတသိကာ ဝုတ္တာ၊ ဗုဒ္ဓေနာဒိစ္စဗန္ဓုနာ၊

နာမသာမညတောယေဝ၊ ဒွေပညာသ ဘဝန္တိ တေ။

သေယျထိဒံ – ဖဿော ဝေဒနာ သညာ စေတနာ ဝိတက္ကော ဝိစာရော ပီတိ စိတ္တေကဂ္ဂတာ ဝီရိယံ ဇီဝိတံ ဆန္ဒော အဓိမောက္ခော မနသိကာရော တတြမဇ္ဈတ္တတာ သဒ္ဓါ သတိ ဟိရီ ဩတ္တပ္ပံ အလောဘော အဒေါသော အမောဟော ကာယပ္ပဿဒ္ဓိအာဒီနိ ဆ ယုဂါနိ၊ တိဿော ဝိရတိယော၊ ကရုဏာ မုဒိတာ လောဘော ဒေါသော မောဟော ဥဒ္ဓစ္စံ မာနော ဒိဋ္ဌိ ဣဿာ မစ္ဆရိယံ ကုက္ကုစ္စံ ထိနံ မိဒ္ဓံ ဝိစိကိစ္ဆာ အဟိရိကံ အနောတ္တပ္ပဉ္စာတိ။

စတုပညာသဓာ ¶ ကာမေ၊ ရူပေ ပဉ္စဒသေရိတာ၊

တေ ဟောန္တိ ဒွါဒသာရူပေ၊ စတ္တာလီသမနာသဝါ။

ဧကဝီသသတံ သဗ္ဗေ၊ စိတ္တုပ္ပာဒါ သမာသတော၊

ဧတေသု တေသမုပ္ပတ္တိံ၊ ဥဒ္ဓရိတွာ ပနေကကံ။

ဖဿာဒီနံ တု ဓမ္မာနံ၊ ပဝက္ခာမိ ဣတော ပရံ၊

ပါဋဝတ္ထာယ ဘိက္ခူနံ၊ စိတ္တစေတသိကေသွဟံ။

ဧကဂ္ဂတာ မနက္ကာရော၊ ဇီဝိတံ ဖဿပဉ္စကံ၊

အဋ္ဌေတေ အဝိနိဗ္ဘောဂါ၊ ဧကုပ္ပာဒါ သဟက္ခယာ။

ဖဿော စ ဝေဒနာ သညာ၊ စေတနာ ဇီဝိတိန္ဒြိယံ၊

ဧကဂ္ဂတာ မနက္ကာရော၊ သဗ္ဗသာဓာရဏာ ဣမေ။

ဝိတက္ကော ပဉ္စပညာသ-စိတ္တေသု သမုဒီရိတော၊

စာရော ဆသဋ္ဌိစိတ္တေသု၊ ဇာယတေ နတ္ထိ သံသယော။

ဧကပညာသစိတ္တေသု ¶ ၊ ပီတိ တေသဋ္ဌိယာ သုခံ၊

ဥပေက္ခာ ပဉ္စပညာသ-စိတ္တေ ဒုက္ခံ တု တီသု ဟိ။

ဟောတိ ဒွါသဋ္ဌိစိတ္တေသု၊ သောမနဿိန္ဒြိယံ ပန၊

ဒုက္ခိန္ဒြိယံ ပနေကသ္မိံ၊ တထေကမှိ သုခိန္ဒြိယံ။

ပဉ္စုတ္တရသတေ ¶ စိတ္တေ၊ ဝီရိယံ အာဟ နာယကော၊

စတုတ္တရသတေ စိတ္တေ၊ သမာဓိန္ဒြိယမဗြဝိ။

သဗ္ဗာဟေတုကစိတ္တာနိ၊ ဌပေတွာ စေကဟေတုကေ၊

ဧကုတ္တရသတေ စိတ္တေ၊ ဆန္ဒဿုပ္ပတ္တိမုဒ္ဒိသေ။

ဌပေတွာ ဒသ ဝိညာဏေ၊ ဝိစိကိစ္ဆာယုတမ္ပိ စ၊

ဒသုတ္တရသတေ စိတ္တေ၊ အဓိမောက္ခော ဥဒီရိတော။

သဒ္ဓါ ¶ သတိ ဟိရောတ္တပ္ပံ၊ အလောဘာဒေါသမဇ္ဈတာ၊

ဆဠေဝ ယုဂဠာ စာတိ၊ ဓမ္မာ ဧကူနဝီသတိ။

ဧကနဝုတိယာ စိတ္တေ၊ ဇာယန္တိ နိယတာ ဣမေ၊

အဟေတုကေသု စိတ္တေသု၊ အပုညေသု န ဇာယရေ။

ဧကူနာသီတိယာ စိတ္တေ၊ ပညာ ဇာယတိ သဗ္ဗဒါ၊

အဋ္ဌဝီသတိယာ စိတ္တေ၊ ကရုဏာမုဒိတာ သိယုံ။

ကာမာဝစရပုညေသု၊ သဗ္ဗလောကုတ္တရေသု စ၊

စတ္တာလီသဝိဓေ စိတ္တေ၊ သာဋ္ဌကေ ဝိရတိတ္တယံ။

သဒ္ဓါ သတိ ဟိရောတ္တပ္ပံ၊ အလောဘာဒိတ္တယမ္ပိ စ၊

ယုဂဠာနိ ဆ မဇ္ဈတ္တံ၊ ကရုဏာမုဒိတာပိ စ။

တထာ ဝိရတိယော တိဿော၊ သဗ္ဗေ တေ ပဉ္စဝီသတိ၊

ကုသလာဗျာကတာ စာပိ၊ ကုသလေန ပကာသိတာ။

အဟိရီကမနောတ္တပ္ပံ၊ မောဟော ဥဒ္ဓစ္စမေဝ စ၊

ဒွါဒသာပုညစိတ္တေသု၊ နိယတာယေဝ ဇာယရေ။

လောဘော ¶ ဒေါသော စ မောဟော စ၊ မာနော ဒိဋ္ဌိ စ သံသယော၊

မိဒ္ဓမုဒ္ဓစ္စကုက္ကုစ္စံ၊ ထိနံ မစ္ဆရိယမ္ပိ စ။

အဟိရီကမနောတ္တပ္ပံ၊ ဣဿာ စ ဒေါမနဿကံ၊

ဧတေ အကုသလာ ဝုတ္တာ၊ ဧကန္တေန မဟေသိနာ။

လောဘော အဋ္ဌသု နိဒ္ဒိဋ္ဌော၊ ဝုတ္တာ စတူသု ဒိဋ္ဌိတု၊

မာနော ဒိဋ္ဌိဝိယုတ္တေသု၊ ဒေါသောဒွီသွေဝ ဇာယတေ။

ဣဿာမစ္ဆေရကုက္ကုစ္စာ၊ ဒွီသု ဇာယန္တိ နော သဟ၊

ဝိစိကိစ္ဆာ ပနေကသ္မိံ၊ ထိနမိဒ္ဓံ တု ပဉ္စသု။

ဖဿော ¶ စ ဝေဒနာ သညာ၊ စေတနာ ဇီဝိတံ မနော၊

ဝိတက္ကော စ ဝိစာရော စ၊ ပီတိ ဝီရိယသမာဓိ စ။

ဆန္ဒော စေဝါဓိမောက္ခော စ၊ မနသိကာရော စ စုဒ္ဒသ၊

ကုသလာကုသလာ စေဝ၊ ဟောန္တိ အဗျာကတာပိ စ။

ဧကူနတိံသစိတ္တေသု၊ ဈာနံ ပဉ္စင်္ဂိကံ မတံ၊

စတုဈာနင်္ဂယုတ္တာနိ၊ သတ္တတိံသာတိ နိဒ္ဒိသေ။

ဧကာဒသဝိဓံ စိတ္တံ၊ တိဝင်္ဂိကမုဒီရိတံ၊

စတုတိံသဝိဓံ စိတ္တံ၊ ဒုဝင်္ဂိကမုဒီရိတံ။

သဘာဝေနာဝိတက္ကေသု ¶ ၊ ဈာနင်္ဂါနိ န ဥဒ္ဓရေ၊

သဗ္ဗာဟေတုကစိတ္တေသု၊ မဂ္ဂင်္ဂါနိ န ဥဒ္ဓရေ။

တီဏိ သောဠသစိတ္တေသု၊ ဣန္ဒြိယာနိ ဝဒေ ဗုဓော၊

ဧကသ္မိံ ပန စတ္တာရိ၊ ပဉ္စ တေရသသုဒ္ဓရေ။

သတ္တ ဒွါဒသစိတ္တေသု၊ ဣန္ဒြိယာနိ ဇိနောဗြဝိ၊

ဧကေနူနေသု အဋ္ဌေဝ၊ စတ္တာလီသမနေသု စ။

စတ္တာလီသာယ ¶ စိတ္တေသု၊ နဝကံ နာယကောဗြဝိ၊

ဧဝံ ဣန္ဒြိယယောဂေါပိ၊ ဝေဒိတဗ္ဗော ဝိဘာဝိနာ။

အမဂ္ဂင်္ဂါနိ နာမေတ္ထ၊ အဋ္ဌာရသ အဟေတုကာ၊

ဈာနင်္ဂါနိ န ဝိဇ္ဇန္တိ၊ ဝိညာဏေသု ဒွိပဉ္စသု။

ဧကံ စိတ္တံ ဒုမဂ္ဂင်္ဂံ၊ တိမဂ္ဂင်္ဂါနိ သတ္တသု၊

စတ္တာလီသာယ စိတ္တေသု၊ မဂ္ဂေါ သော စတုရင်္ဂိကော။

ပဉ္စဒ္ဒသသု စိတ္တေသု၊ မဂ္ဂေါ ပဉ္စင်္ဂိကော မတော၊

ဝုတ္တော ဒွတ္တိံသစိတ္တေသု၊ မဂ္ဂေါ သတ္တင်္ဂိကောပိ စ။

မဂ္ဂေါ ¶ အဋ္ဌသု စိတ္တေသု၊ မတော အဋ္ဌင်္ဂိကောတိ ဟိ၊

ဧဝံ တု သဗ္ဗစိတ္တေသု၊ မဂ္ဂင်္ဂါနိ သမုဒ္ဓရေ။

ဗလာနိ ဒွေ ဒွိစိတ္တေသု၊ ဧကသ္မိံ တီဏိ ဒီပယေ၊

ဧကာဒသသု စတ္တာရိ၊ ဆ ဒွါဒသသု နိဒ္ဒိသေ။

ဧကူနာသီတိယာ သတ္တ၊ သောဠသေဝါဗလာနိ တု၊

စိတ္တမေဝံ တု ဝိညေယျံ၊ သဗလံ အဗလမ္ပိ စ။

ဈာနင်္ဂမဂ္ဂင်္ဂဗလိန္ဒြိယာနိ၊

စိတ္တေသု ဇာယန္တိ ဟိ ယေသု ယာနိ၊

ဝုတ္တာနိ သဗ္ဗာနိပိ တာနိ တေသု။

ဣတိ အဘိဓမ္မာဝတာရေ စေတသိကဝိဘာဂနိဒ္ဒေသော နာမ

ဣတော ¶ ¶ ပရံ ပဝက္ခာမိ၊ နယမေကဝိဓာဒိကံ၊

အာဘိဓမ္မိကဘိက္ခူနံ၊ ဗုဒ္ဓိယာ ပန ဝုဒ္ဓိယာ။

သဗ္ဗမေကဝိဓံ စိတ္တံ၊ ဝိဇာနနသဘာဝတော၊

ဒုဝိဓဉ္စ ဘဝေ စိတ္တံ၊ အဟေတုကသဟေတုတော။

ပုညာပုညဝိပါကာ ဟိ၊ ကာမေ ဒသ စ ပဉ္စ စ၊

ကြိယာ တိဿောတိ သဗ္ဗေပိ၊ အဋ္ဌာရသ အဟေတုကာ။

ဧကသတ္တတိ သေသာနိ၊ စိတ္တုပ္ပာဒါ မဟေသိနာ၊

သဟေတုကာတိ နိဒ္ဒိဋ္ဌာ၊ တာဒိနာ ဟေတုဝါဒိနာ။

သဝတ္ထုကာဝတ္ထုကတော ¶ ၊ တထောဘယဝသေန စ၊

သဗ္ဗံ ဝုတ္တပကာရံ တု၊ တိဝိဓံ ဟောတိ မာနသံ။

သဗ္ဗော ကာမဝိပါကော စ၊ ရူပေ ပဉ္စဒသာပိ စ၊

အာဒိမဂ္ဂေါ သိတုပ္ပာဒေါ၊ မနောဓာတု ကြိယာပိ စ။

ဒေါမနဿဒွယဉ္စာပိ၊ တေစတ္တာလီသ မာနသာ၊

နုပ္ပဇ္ဇန္တိ ဝိနာ ဝတ္ထုံ၊ ဧကန္တေန သဝတ္ထုကာ။

အရူပါဝစရပါကာ စ၊ ဧကန္တေန အဝတ္ထုကာ၊

ဒွါစတ္တာလီသ သေသာနိ၊ စိတ္တာနုဘယထာ သိယုံ။

ဧကေကာရမ္မဏံ စိတ္တံ၊ ပဉ္စာရမ္မဏမေဝ စ၊

ဆဠာရမ္မဏကဉ္စေတိ၊ ဧဝမ္ပိ တိဝိဓံ သိယာ။

ဝိညာဏာနိ စ ဒွေပဉ္စ၊ အဋ္ဌ လောကုတ္တရာနိ စ၊

သဗ္ဗံ မဟဂ္ဂတဉ္စေဝ၊ ဌပေတွာဘိညမာနသံ။

တေစတ္တာလီသ ¶ ဝိညေယျာ၊ ဧကေကာရမ္မဏာ ပန၊

မနောဓာတုတ္တယံ တတ္ထ၊ ပဉ္စာရမ္မဏမီရိတံ။

တေစတ္တာလီသ သေသာနိ၊ ဆဠာရမ္မဏိကာ မတာ၊

တထာ စ တိဝိဓံ စိတ္တံ၊ ကုသလာကုသလာဒိတော။

အဟေတုံ ဧကဟေတုဉ္စ၊ ဒွိဟေတုဉ္စ တိဟေတုကံ၊

ဧဝံ စတုဗ္ဗိဓံ စိတ္တံ၊ ဝိညာတဗ္ဗံ ဝိဘာဝိနာ။

ဟေဋ္ဌာ မယာပိ နိဒ္ဒိဋ္ဌာ၊ အဋ္ဌာရသ အဟေတုကာ၊

ဝိစိကိစ္ဆုဒ္ဓစ္စသံယုတ္တံ၊ ဧကဟေတုမုဒီရိတံ။

ကာမေ ¶ ဒွါဒသဓာ ပုည-ဝိပါကကြိယတော ပန၊

ဒသဓာကုသလာ စာတိ၊ ဗာဝီသတိ ဒုဟေတုကာ။

ကာမေ ¶ ဒွါဒသဓာ ပုည-ဝိပါကကြိယတော ပန၊

သဗ္ဗံ မဟဂ္ဂတဉ္စေဝ၊ အပ္ပမာဏံ တိဟေတုကံ။

ရူပီရိယာပထဝိညတ္တိ-ဇနကာဇနကာဒိတော၊

ဧဝဉ္စာပိ ဟိ တံ စိတ္တံ၊ ဟောတိ သဗ္ဗံ စတုဗ္ဗိဓံ။

ဒွါဒသာကုသလာ တတ္ထ၊ ကုသလာ ကာမဓာတုယာ၊

တထာ ဒသ ကြိယာ ကာမေ၊ အဘိညာမာနသံ ဒွယံ။

သမုဋ္ဌာပေန္တိ ရူပါနိ၊ ကပ္ပေန္တိ ဣရိယာပထံ၊

ဇနယန္တိ စ ဝိညတ္တိံ၊ ဣမေ ဒွတ္တိံသ မာနသာ။

ကုသလာ စ ကြိယာ စေဝ၊ တေ မဟဂ္ဂတမာနသာ၊

အဋ္ဌာနာသဝစိတ္တာနိ၊ ဆဗ္ဗီသတိ စ မာနသာ။

သမုဋ္ဌာပေန္တိ ရူပါနိ၊ ကပ္ပေန္တိ ဣရိယာပထံ၊

စောပနံ န စ ပါပေန္တိ၊ ဒွိကိစ္စာ နိယတာ ဣမေ။

ဌပေတွာ ဒသ ဝိညာဏေ၊ ဝိပါကာ ဒွီသု ဘူမိသု၊

ကြိယာ စေဝ မနောဓာတု၊ ဣမာနေကူနဝီသတိ။

သမုဋ္ဌာပေန္တိ ¶ ရူပါနိ၊ န ကရောန္တိတရဒွယံ၊

ပုန ဒွေပဉ္စဝိညာဏာ၊ ဝိပါကာ စ အရူပိသု။

သဗ္ဗေသံ သန္ဓိစိတ္တဉ္စ၊ စုတိစိတ္တဉ္စာရဟတော၊

န ကရောန္တိ တိကိစ္စာနိ၊ ဣမေ သောဠသ မာနသာ။

ဧကဒွိတိစတုဋ္ဌာန-ပဉ္စဋ္ဌာနပဘေဒတော၊

ပဉ္စဓာ စိတ္တမက္ခာသိ၊ ပဉ္စနိမ္မလလောစနော။

ကုသလာကုသလာ သဗ္ဗေ၊ စိတ္တုပ္ပာဒါ မဟာကြိယာ၊

မဟဂ္ဂတာ ကြိယာ စေဝ၊ စတ္တာရော ဖလမာနသာ။

သဗ္ဗေဝ ¶ ပဉ္စပညာသ၊ နိပ္ပပဉ္စေန သတ္ထုနာ၊

ဇဝနဋ္ဌာနတောယေဝ၊ ဧကဋ္ဌာနေ နိယာမိတာ။

ပုန ဒွေပဉ္စဝိညာဏာ၊ ဒဿနေ သဝနေ တထာ၊

ဃာယနေ သာယနေ ဌာနေ၊ ဖုသနေ ပဋိပါဋိယာ။

မနောဓာတုတ္တိကံ ဌာနေ၊ အာဝဇ္ဇနေ ပဋိစ္ဆနေ၊

အဋ္ဌသဋ္ဌိ ဘဝန္တေတေ၊ ဧကဋ္ဌာနိကတံ ဂတာ။

ပုန ဒွိဋ္ဌာနိကံ နာမ၊ စိတ္တဒွယမုဒီရိတံ၊

သောမနဿယုတံ ပဉ္စ-ဒွါရေ သန္တီရဏံ သိယာ။

တဒါရမ္မဏံ ဆဒွါရေ၊ ဗလဝါရမ္မဏေ သတိ၊

တထာ ဝေါဋ္ဌဗ္ဗနံ ဟောတိ၊ ပဉ္စဒွါရေသု ဝေါဋ္ဌဗော။

မနောဒွါရေသု သဗ္ဗေသံ၊ ဟောတိ အာဝဇ္ဇနံ ပန၊

ဣဒံ ဒွိဋ္ဌာနိကံ နာမ၊ ဟောတိ စိတ္တဒွယံ ပန။

ပဋိသန္ဓိဘဝင်္ဂဿ၊ စုတိယာ ဌာနတော ပန၊

မဟဂ္ဂတဝိပါကာ တေ၊ နဝ တိဋ္ဌာနိကာ မတာ။

အဋ္ဌ ¶ ကာမာ မဟာပါကာ၊ ပဋိသန္ဓိဘဝင်္ဂတော၊

တဒါရမ္မဏတော စေဝ၊ စုတိဋ္ဌာနဝသေန စ။

စတုဋ္ဌာနိကစိတ္တာနိ ¶ ၊ အဋ္ဌ ဟောန္တီတိ နိဒ္ဒိသေ၊

ကုသလာကုသလပါကံ တု-ပေက္ခာသဟဂတဒွယံ။

သန္တီရဏံ ဘဝေ ပဉ္စ-ဒွါရေ ဆဒွါရိကေသု စ၊

တဒါရမ္မဏတံ ယာတိ၊ ဗလဝါရမ္မဏေ သတိ။

ပဋိသန္ဓိဘဝင်္ဂါနံ၊ စုတိဋ္ဌာနဝသေန စ၊

ပဉ္စဋ္ဌာနိကစိတ္တန္တိ၊ ဣဒံ ဒွယမုဒီရိတံ။

ပဉ္စကိစ္စံ ¶ ဒွယံ စိတ္တံ၊ စတုကိစ္စံ ပနဋ္ဌကံ၊

တိကိစ္စံ နဝကံ ဒွေ တု၊ ဒွိကိစ္စာ သေသမေကကံ။

ဘဝင်္ဂါဝဇ္ဇနဉ္စေဝ၊ ဒဿနံ သမ္ပဋိစ္ဆနံ၊

သန္တီရဏံ ဝေါဋ္ဌဗ္ဗနံ၊ ဇဝနံ ဘဝတိ သတ္တမံ။

ဆဗ္ဗိဓံ ဟောတိ တံ ဆန္နံ၊ ဝိညာဏာနံ ပဘေဒတော၊

သတ္တဓာ သတ္တဝိညာဏ-ဓာတူနံ တု ပဘေဒတော။

ဧကေကာရမ္မဏံ ဆက္ကံ၊ ပဉ္စာရမ္မဏဘေဒတော၊

ဆဠာရမ္မဏတော စေဝ၊ ဟောတိ အဋ္ဌဝိဓံ မနော။

တတ္ထ ဒွေပဉ္စဝိညာဏာ၊ ဟောန္တိ ဧကေကဂေါစရာ၊

ရူပါရမ္မဏိကာ ဒွေ တု၊ ဒွေ ဒွေ သဒ္ဒါဒိဂေါစရာ။

သဗ္ဗံ မဟဂ္ဂတံ စိတ္တံ၊ ပဉ္စာဘိညာဝိဝဇ္ဇိတံ၊

သဗ္ဗံ လောကုတ္တရဉ္စေတိ၊ ဧကေကာရမ္မဏံ ဘဝေ။

ဧကေကာရမ္မဏံ ဆက္က-မိဒံ ဉေယျံ ဝိဘာဝိနာ၊

ပဉ္စာရမ္မဏိကံ နာမ၊ မနောဓာတုတ္တယံ ဘဝေ။

ကာမာဝစရစိတ္တာနိ၊ စတ္တာလီသံ တထေကကံ၊

အဘိညာနိ စ သဗ္ဗာနိ၊ ဆဠာရမ္မဏိကာနိတိ။

စိတ္တံ နဝဝိဓံ ဟောတိ၊ သတ္တဝိညာဏဓာတုသု၊

ပစ္ဆိမဉ္စ တိဓာ ကတွာ၊ ကုသလာကုသလာဒိတော။

ပုညာပုညဝသေနေဝ ¶ ၊ ဝိပါကကြိယဘေဒတော၊

ဆသတ္တတိဝိဓော ဘေဒေါ၊ မနောဝိညာဏဓာတုယာ။

မနောဓာတုံ ဒွိဓာ ကတွာ၊ ဝိပါကကြိယဘေဒတော၊

နဝဓာ ပုဗ္ဗဝုတ္တေဟိ၊ ဒသဓာ ဟောတိ မာနသံ။

ဓာတုဒွယံ ¶ တိဓာ ကတွာ၊ ပစ္ဆိမံ ပုန ပဏ္ဍိတော၊

ဧကာဒသဝိဓံ စိတ္တံ၊ ဟောတီတိ ပရိဒီပယေ။

မနောဝိညာဏဓာတုမ္ပိ၊ ကုသလာကုသလာဒိတော၊

စတုဓာ ဝိဘဇိတွာန၊ ဝဒေ ဒွါဒသဓာ ဌိတံ။

ဘဝေ ¶ စုဒ္ဒသဓာ စိတ္တံ၊ စုဒ္ဒသဋ္ဌာနဘေဒတော၊

ပဋိသန္ဓိဘဝင်္ဂဿ၊ စုတိယာဝဇ္ဇနဿ စ။

ပဉ္စန္နံ ဒဿနာဒီနံ၊ သမ္ပဋိစ္ဆနစေတသော၊

သန္တီရဏဿ ဝေါဋ္ဌဗ္ဗ-ဇဝနာနံ ဝသေန စ။

တဒါရမ္မဏစိတ္တဿ၊ တထေဝ ဌာနဘေဒတော၊

ဧဝံ စုဒ္ဒသဓာ စိတ္တံ၊ ဟောတီတိ ပရိဒီပယေ။

ဘူမိပုဂ္ဂလနာနာတ္တ-ဝသေန စ ပဝတ္တိတော၊

ဗဟုဓာ ပနိဒံ စိတ္တံ၊ ဟောတီတိ စ ဝိဘာဝယေ။

ဣတိ အဘိဓမ္မာဝတာရေ ဧကဝိဓာဒိနိဒ္ဒေသော နာမ

ဘူမိပုဂ္ဂလစိတ္တုပ္ပတ္တိနိဒ္ဒေသော

ဣတော ¶ ¶ ပရံ ပဝက္ခာမိ၊ ဗုဒ္ဓိဝုဒ္ဓိကရံ နယံ၊

စိတ္တာနံ ဘူမီသုပ္ပတ္တိံ၊ ပုဂ္ဂလာနံ ဝသေန စ။

ဒေဝါစေဝ ¶ မနုဿာ စ၊ တိဿော ဝါပါယဘူမိယော၊

ဂတိယော ပဉ္စ နိဒ္ဒိဋ္ဌာ၊ သတ္ထုနာ တု တယော ဘဝါ။

ဘူမိယော တတ္ထ တိံသေဝ၊ တာသု တိံသေဝ ပုဂ္ဂလာ၊

ဘူမီသွေတာသု ဥပ္ပန္နာ၊ သဗ္ဗေ စ ပန ပုဂ္ဂလာ။

ပဋိသန္ဓိကစိတ္တာနံ၊ ဝသေနေကူနဝီသတိ၊

ပဋိသန္ဓိ စ နာမေသာ၊ ဒုဝိဓာ သမုဒီရိတာ။

အစိတ္တကာ သစိတ္တာ စ၊ အသညီနမစိတ္တကာ၊

သေသာ သစိတ္တကာ ဉေယျာ၊ သာ ပနေကူနဝီသတိ။

ပဋိသန္ဓိဝသေနေဝ၊ ဟောန္တိ ဝီသတိ ပုဂ္ဂလာ၊

ဣဓ စိတ္တာဓိကာရတ္တာ၊ အစိတ္တာ န စ ဥဒ္ဓဋာ။

အဟေတုဒွိတိဟေတူတိ၊ ပုဂ္ဂလာ တိဝိဓာ သိယုံ၊

အရိယာ ပန အဋ္ဌာတိ၊ သဗ္ဗေ ဧကာဒသေရိတာ။

ဧတေသံ ပန သဗ္ဗေသံ၊ ပုဂ္ဂလာနံ ပဘေဒတော၊

စိတ္တာနံ ဘူမီသုပ္ပတ္တိံ၊ ဘဏတော မေ နိဗောဓထ။

တိံသဘူမီသု စိတ္တာနိ၊ ကတိ ဇာယန္တိ မေ ဝဒ၊

စုဒ္ဒသေဝ တု စိတ္တာနိ၊ ဟောန္တိ သဗ္ဗာသု ဘူမိသု။

သဒါ ဝီသတိ စိတ္တာနိ၊ ကာမေယေဝ ဘဝေ သိယုံ၊

ပဉ္စ ရူပဘဝေယေဝ၊ စတ္တာရေဝ အရူပိသု။

ကာမရူပဘဝေသွေဝ ¶ ၊ အဋ္ဌာရသ ဘဝန္တိ ဟိ၊

ဒွေစတ္တာလီသ စိတ္တာနိ၊ ဟောန္တိ တီသု ဘဝေသုပိ။

ဌပေတွာ ပန သဗ္ဗာသံ၊ စတဿောပါယဘူမိယော၊

တေရသေဝ စ စိတ္တာနိ၊ ဟောန္တိ ဆဗ္ဗီသဘူမိသု။

အပရာနိ ¶ စတဿောပိ၊ ဌပေတွာရုပ္ပဘူမိယော၊

စိတ္တာနိ ပန ဇာယန္တိ၊ ဆ စ ဆဗ္ဗီသဘူမိသု။

သုဒ္ဓါဝါသိကဒေဝါနံ ¶ ၊ ဌပေတွာ ပဉ္စ ဘူမိယော၊

ပဉ္စ စိတ္တာနိ ဇာယန္တေ၊ ပဉ္စဝီသတိဘူမိသု။

အပရာနိ ဒုဝေ ဟောန္တိ၊ ပဉ္စဝီသတိဘူမိသု၊

ဌပေတွာ နေဝသညဉ္စ၊ စတဿောပါယဘူမိယော။

ဒွေပိ စိတ္တာနိ ဇာယန္တိ၊ စတုဝီသတိဘူမိသု၊

အာကိဉ္စညံ နေဝသညဉ္စ၊ ဌပေတွာပါယဘူမိယော။

အပါယဘူမိယော ဟိတွာ၊ တိဿော အာရုပ္ပဘူမိယော၊

ဒွေယေဝ ပန စိတ္တာနိ၊ ဟောန္တိ တေဝီသဘူမိသု။

အရူပေ စ အပါယေ စ၊ ဌပေတွာ အဋ္ဌ ဘူမိယော၊

ဧကာဒသဝိဓံ စိတ္တံ၊ ဟောန္တိ ဒွါဝီသဘူမိသု။

သုဒ္ဓါဝါသေ အပါယေ စ၊ ဌပေတွာ နဝ ဘူမိယော၊

ဧကဝီသာသု နိစ္စမ္ပိ၊ စတ္တာရောဝ ဘဝန္တိ ဟိ။

ဧကံ သတ္တရသသွေဝ၊ စိတ္တံ ဇာယတိ ဘူမိသု၊

သုဒ္ဓါဝါသေ ဌပေတွာ တု၊ အပါယာရုပ္ပဘူမိယော။

ဒွါဒသေဝ တု ဇာယန္တေ၊ ဧကာဒသသု ဘူမိသု၊

ဌပေတွာ ပန သဗ္ဗာပိ၊ ဘူမိယော ဟိ မဟဂ္ဂတာ။

ကာမာဝစရဒေဝါနံ၊ မနုဿာနံ ဝသေန တု၊

အဋ္ဌ စိတ္တာနိ ဇာယန္တေ၊ သဒါ သတ္တသု ဘူမိသု။

ပဉ္စမဇ္ဈာနပါကေကော ¶ ၊ ဇာယတေ ဆသု ဘူမိသု၊

စတ္တာရိ ပန စိတ္တာနိ၊ တီသု တီသွေဝ ဘူမိသု။

စတ္တာရိ ¶ ပန စိတ္တာနိ၊ ဟောန္တိ ဧကေကဘူမိသု၊

အရူပါဝစရပါကာနံ၊ ဝသေန ပရိဒီပယေ။

နရကာဒီသွပါယေသု၊ စတူသုပိ စ ဇာယရေ၊

ဒွေပညာသာဝသေသာနိ၊ နုပ္ပဇ္ဇန္တိ ကဒါစိပိ။

ကာမေ ဒေဝမနုဿာနံ၊ နဝ ပါကာ မဟဂ္ဂတာ၊

နေဝ ဇာယန္တိ ဇာယန္တိ၊ အသီတိ ဟဒယာ သဒါ။

ကာမေ အဋ္ဌ မဟာပါကာ၊ ဒေါမနဿဒွယမ္ပိ စ၊

တထာ ဃာနာဒိဝိညာဏ-တ္တယံ ပါကာ အပုညဇာ။

နတ္ထိ အာရုပ္ပပါကာ စ၊ ရူပါဝစရဘူမိယံ၊

ဣမေဟိ သဟ စိတ္တေဟိ၊ တယော မဂ္ဂါ ဖလဒွယံ။

စတ္တာရော ဒိဋ္ဌိသံယုတ္တာ၊ ဝိစိကိစ္ဆာယုတမ္ပိ စ၊

စတ္တာရော ဟေဋ္ဌိမာ ပါကာ၊ သုဒ္ဓါဝါသေ န လဗ္ဘရေ။

သေသာနိ ဧကပညာသ၊ စိတ္တာနိ ပန လဗ္ဘရေ၊

ရူပါဝစရိကာ သဗ္ဗေ၊ ဝိပါကာ ကာမဓာတုယာ။

ဒေါမနဿာဒိမဂ္ဂေါ စ၊ ကြိယာ စ ဒွေ အဟေတုကာ၊

တေစတ္တာလီသ စိတ္တာနိ၊ နတ္ထိ အာရုပ္ပဘူမိယံ။

ဧဝံ ¶ ဘူမိဝသေနေဝ၊ စိတ္တုပ္ပတ္တိံ ဝိဘာဝယေ၊

တထာ ဧကာဒသန္နမ္ပိ၊ ပုဂ္ဂလာနံ ဝသေန စ။

အဟေတုကဿ သတ္တဿ၊ ဇာယန္တေ ပဉ္စဘူမိသု၊

ဒွေပညာသာဝသေသာနိ၊ န ဇာယန္တိ ကဒါစိပိ။

အဟေတုကဿ ဝုတ္တေဟိ၊ ကာမပါကာ ဒုဟေတုကာ၊

ဒုဟေတုကဿ ဇာယန္တေ၊ စတ္တာလီသံ တထေကကံ။

သဗ္ဗေ မဟဂ္ဂတာ စေဝ၊ သဗ္ဗေပိ စ အနာသဝါ၊

တိဟေတုကာ ဝိပါကာ စ၊ ကာမေ နဝ ကြိယာပိ စ။

ဒုဟေတုနော န ဇာယန္တိ၊ စတ္တာလီသံ တထာဋ္ဌ စ၊

ကာမာဝစရသတ္တဿ၊ တိဟေတုပဋိသန္ဓိနော။

ပုထုဇ္ဇနဿ ဇာယန္တေ၊ စတုပညာသ မာနသာ၊

ဒွိဟေတုကဿ ဝုတ္တာနိ၊ စတ္တာလီသံ တထေကကံ။

စတ္တာရော ဉာဏသံယုတ္တာ၊ ဝိပါကာ ကာမဓာတုယာ၊

ရူပါရူပေသု ပုညာနိ၊ စတုပညာသ မာနသာ။

ပုထုဇ္ဇနဿ ဇာယန္တေ၊ ပဉ္စတိံသ န ဇာယရေ၊

ဆဒေဝေသု မနုဿေသု၊ သောတာပန္နဿ ဒေဟိနော။

ပညာသေဝဿ စိတ္တာနိ၊ ဇာယန္တီတိ ဝိနိဒ္ဒိသေ၊

နဝတိံသေဝ စိတ္တာနိ၊ နုပ္ပဇ္ဇန္တီတိ ဒီပယေ။

သောတာပန္နဿ ဝုတ္တာနိ၊ ဌပေတွာ ပဌမံ ဖလံ၊

အတ္တနောဝ ဖလေနဿ၊ သကဒါဂါမိနော သိယုံ။

သောတာပန္နဿ ¶ ¶ ဝုတ္တာနိ၊ ဌပေတွာ ပဋိဃဒွယံ၊

ဒုတိယံ စ ဖလံ ဟိတွာ၊ ယာနိ စိတ္တာနိ တာနိတိ၊

အနာဂါမိဿ သတ္တဿ၊ ဇာယန္တီတိ ဝိနိဒ္ဒိသေ။

ကတိ စိတ္တာနိ ဇာယန္တေ၊ ကာမေ အရဟတော ပန၊

စတ္တာရီသဉ္စ စတ္တာရိ၊ ကာမေ အရဟတော သိယုံ။

မဂ္ဂဋ္ဌာနံ စတုန္နမ္ပိ၊ ပုဂ္ဂလာနံ သကံ သကံ၊

မဂ္ဂစိတ္တံ သိယာ တေသံ၊ ဧကစိတ္တက္ခဏာ ဟိ တေ။

ပုထုဇ္ဇနဿ တီသွေဝ၊ ပဌမဇ္ဈာနဘူမိသု၊

ပဉ္စတိံသေဝ စိတ္တာနိ၊ ဇာယန္တေတိ ဝိနိဒ္ဒိသေ။

ဃာနာဒီသု စ ဝိညာဏ-တ္တယံ သတ္တ အပုညဇာ၊

မဟာပါကာ တထာ ပါကာ၊ ဥပရိဇ္ဈာနဘူမိကာ။

ဝိပါကာပိ စ အာရုပ္ပာ၊ ဒေါမနဿဒွယမ္ပိ စ၊

အဋ္ဌာရသ ကြိယာ စေဝ၊ အဋ္ဌ လောကုတ္တရာနိ စ။

ပဌမဇ္ဈာနနိဗ္ဗတ္တ-ပုထုဇ္ဇနသရီရိနော၊

ဧတာနိ စတုပညာသ၊ စိတ္တာနိ န စ လဗ္ဘရေ။

သောတာပန္နဿ ¶ စိတ္တာနိ၊ တတ္ထေကတိံသ ဇာယရေ၊

ပုထုဇ္ဇနဿ ဝုတ္တေသု၊ ဟိတွာ စာပုညပဉ္စကံ။

သကဒါဂါမိနော တတ္ထ၊ ဌပေတွာ ပဌမံ ဖလံ၊

ဧကတိံသေဝ ဇာယန္တေ၊ ပက္ခိပိတွာ သကံ ဖလံ။

အနာဂါမိဿ တတ္ထေဝ၊ ဌပေတွာ ဒုတိယံ ဖလံ၊

ဧကတိံသေဝ ဇာယန္တေ၊ ဖလစိတ္တေန အတ္တနော။

ဝိညာဏံ စက္ခုသောတာနံ၊ ပုညဇံ သမ္ပဋိစ္ဆနံ၊

သန္တီရဏဒွယဉ္စေဝ၊ ကြိယစိတ္တာနိ ဝီသတိ။

အရဟတ္တဖလံ ¶ ¶ ပါကော၊ ပဌမဇ္ဈာနသမ္ဘဝေါ၊

သတ္တဝီသတိ စိတ္တာနိ၊ အရဟန္တဿ ဇာယရေ။

ပုထုဇ္ဇနဿ တီသွေဝ၊ ဒုတိယဇ္ဈာနဘူမိသု၊

ဆတ္တိံသ ဒုတိယဇ္ဈာန-တတိယဇ္ဈာနပါကတော။

ပုထုဇ္ဇနဿ ဝုတ္တေသု၊ ဟိတွာ ဝါပုညပဉ္စကံ၊

သောတာပန္နဿ ဗာတ္တိံသ၊ ဖလေန သဟ အတ္တနော။

သောတာပန္နဿ ဝုတ္တေသု၊ ဌပေတွာ ပဌမံ ဖလံ၊

ဗာတ္တိံသ ဖလစိတ္တေန၊ သကဒါဂါမိဿ အတ္တနော။

သကဒါဂါမီသု ဝုတ္တေသု၊ ဌပေတွာ ဒုတိယံ ဖလံ၊

အနာဂါမိဖလေနဿ၊ ဗာတ္တိံသေဝ ဘဝန္တိ ဟိ။

အရဟန္တဿ တီသွေဝ၊ အဋ္ဌဝီသတိ အတ္တနော၊

ဖလေန ဒုတိယဇ္ဈာန-တတိယဇ္ဈာနပါကတော။

ပရိတ္တကသုဘာဒီနံ၊ ဒေဝါနံ တီသု ဘူမိသု၊

ပဉ္စတိံသေဝ ဇာယန္တေ၊ စတုတ္ထဇ္ဈာနပါကတော။

သောတာပန္နဿ တတ္ထေက-တိံသ စိတ္တာနိ ဇာယရေ၊

သကဒါဂါမိနော ဧဝံ၊ တထာနာဂါမိနောပိ စ။

ခီဏာသဝဿ တတ္ထေဝ၊ သတ္တဝီသတိ မာနသာ၊

တထာ ဝေဟပ္ဖလေ စာပိ၊ သဗ္ဗေသံ ဟောန္တိ မာနသာ။

ဧကတိံသေဝ စိတ္တာနိ၊ သုဒ္ဓါဝါသိကဘူမိသု၊

အနာဂါမိကသတ္တဿ၊ ဟောန္တီတိ ပရိဒီပယေ။

အရဟတော ပန တတ္ထေဝ၊ မာနသာ သတ္တဝီသတိ၊

ဧဝံ ရူပီသု စိတ္တာနိ၊ ဝိညေယျာနိ ဝိဘာဝိနာ။

စတုဝီသတိ ¶ စိတ္တာနိ၊ ပဌမာရုပ္ပဘူမိယံ၊

ပုထုဇ္ဇနဿ သတ္တဿ၊ ဇာယန္တီတိ ဝိနိဒ္ဒိသေ။

သောတာပန္နဿ ¶ တတ္ထေဝ၊ ဌပေတွာပုညပဉ္စကံ၊

သမဝီသတိ စိတ္တာနိ၊ ဖလေန သဟ အတ္တနော။

သကဒါဂါမိနော တတ္ထ၊ တထာနာဂါမိနောပိ စ၊

ဇာယန္တိ ဝီသ စိတ္တာနိ၊ ပုဗ္ဗပုဗ္ဗဖလံ ဝိနာ။

ခီဏာသဝဿ တတ္ထေဝ၊ ဒသပဉ္စ စ မာနသာ၊

ပုထုဇ္ဇနဿ သတ္တဿ၊ ဒုတိယာရုပ္ပဘူမိယံ။

ဟောန္တိ ¶ တေဝီသ စိတ္တာနိ၊ ဣတိ ဝတွာ ဝိဘာဝယေ၊

တိဏ္ဏန္နမ္ပေတ္ထ သေခါနံ၊ စိတ္တာနေကူနဝီသတိ။

စုဒ္ဒသေဝ တု စိတ္တာနိ၊ ဒုတိယာရုပ္ပဘူမိယံ၊

ကြိယာဒွါဒသ ပါကေကော၊ ဖလံ ခီဏာသဝဿ တု။

ပုထုဇ္ဇနဿ သတ္တဿ၊ တတိယာရုပ္ပဘူမိယံ၊

ဗာဝီသတိ စ စိတ္တာနိ၊ ဘဝန္တီတိ ပကာသယေ။

အဋ္ဌာရသေဝ စိတ္တာနိ၊ သောတာပန္နဿ ဇာယရေ၊

သကဒါဂါမိနော တာနိ၊ ဌပေတွာ ပဌမံ ဖလံ။

သကဒါဂါမိဝုတ္တေသု၊ ဌပေတွာ ဒုတိယံ ဖလံ၊

အဋ္ဌာရသေဝ စိတ္တာနိ၊ အနာဂါမိဿ ဇာယရေ။

တေရသေဝ စ စိတ္တာနိ၊ တတိယာရုပ္ပဘူမိယံ၊

ခီဏာသဝဿ သတ္တဿ၊ ဘဝန္တီတိ ဝိနိဒ္ဒိသေ။

ဧကဝီသတိ စိတ္တာနိ၊ စတုတ္ထာရုပ္ပဘူမိယံ၊

ပုထုဇ္ဇနဿ သတ္တဿ၊ ဇာယန္တီတိ ဝိနိဒ္ဒိသေ။

သောတာပန္နဿ ¶ သတ္တဿ၊ သတ္တရသ ပကာသယေ၊

သကဒါဂါမိနော တာနိ၊ ဌပေတွာ ပဌမံ ဖလံ။

သကဒါဂါမိဝုတ္တေသု၊ ဌပေတွာ ဒုတိယံ ဖလံ၊

ဟောန္တိ သတ္တရသေဝဿ၊ အနာဂါမိဿ မာနသာ။

ဒွါဒသေဝ ¶ တု စိတ္တာနိ၊ စတုတ္ထာရုပ္ပဘူမိယံ၊

ဇာယန္တိ အရဟန္တဿ၊ ဣတိ ဝတွာ ဝိဘာဝယေ။

ဟေဋ္ဌိမာနံ အရူပီနံ၊ ဗြဟ္မာနံ ဥပရူပရိ၊

အရူပကုသလာ စေဝ၊ ဥပ္ပဇ္ဇန္တိ ကြိယာပိ စ။

ဥဒ္ဓမုဒ္ဓမရူပီနံ၊ ဟေဋ္ဌိမာ ဟေဋ္ဌိမာ ပန၊

အာရုပ္ပာနေဝ ဇာယန္တေ၊ ဒိဋ္ဌာဒီနဝတော ကိရ။

ဌပေတွာ ပဌမံ မဂ္ဂံ၊ ကုသလာနုတ္တရာ တယော၊

ကာမာဝစရပုညာနိ၊ အပုညာနိ တထာ ဒသ။

စတ္တာရာရုပ္ပပုညာနိ၊ သဗ္ဗေ ပါကာ အနုတ္တရာ၊

ပဌမာရုပ္ပပါကော စ၊ နဝ ကာမကြိယာပိ စ။

အာရုပ္ပာပိ ကြိယာ သဗ္ဗာ၊ တေစတ္တာလီသ မာနသာ၊

ဥပ္ပဇ္ဇန္တိ ပနေတာနိ၊ ပဌမာရုပ္ပဘူမိယံ။

သဗ္ဗော ကာမဝိပါကော စ၊ သဗ္ဗော ရူပေါမဟဂ္ဂတော၊

စိတ္တုပ္ပာဒေါ မနောဓာတု၊ ဒေါမနဿဒွယမ္ပိ စ။

အာဒိမဂ္ဂေါ တယော ပါကာ၊ အာရုပ္ပာ စ တထူပရိ၊

ဆစတ္တာလီသ နတ္ထေတ္ထ၊ ပဌမာရုပ္ပဘူမိယံ။

ဝုတ္တေသု ပန စိတ္တေသု၊ ပဌမာရုပ္ပဘူမိယံ၊

ဌပေတွာ ပဌမာရုပ္ပ-တ္တယံ ပါကော စ အတ္တနော။

တာလီသေတာနိ ¶ ဇာယန္တေ၊ ဒုတိယာရုပ္ပဘူမိယံ၊

ဧဝံ သေသဒွယေ ဉေယျာ၊ ဟိတွာ ဟေဋ္ဌိမဟေဋ္ဌိမံ။

အတ္တနော ¶ အတ္တနော ပါကာ၊ စတ္တာရော စ အနာသဝါ၊

ဝိပါကာ ဟောန္တိ သဗ္ဗေဝ၊ စတူသွာရုပ္ပဘူမိသု။

ဝေါဋ္ဌဗ္ဗနေန စိတ္တေန၊ ကာမေ အဋ္ဌ မဟာကြိယာ၊

စတဿောပိ စ အာရုပ္ပာ၊ တေရသေဝ ကြိယာ သိယုံ။

ခီဏာသဝဿ ¶ ဇာယန္တေ၊ ပဌမာရုပ္ပဘူမိယံ၊

ဒွါဒသေဝ ကြိယာ ဟောန္တိ၊ ဒုတိယာရုပ္ပဘူမိယံ။

ဧကာဒသ ကြိယာ ဟောန္တိ၊ တတိယာရုပ္ပဘူမိယံ၊

ဒသေဝ စ ကြိယာ ဉေယျာ၊ စတုတ္ထာရုပ္ပဘူမိယံ။

အရဟတော ပန စိတ္တာနိ၊ ဟောန္တိ ဧကူနဝီသတိ၊

အရဟတ္တံ ကြိယာ သဗ္ဗာ၊ ဌပေတွာဝဇ္ဇနဒွယံ။

စတုန္နဉ္စ ဖလဋ္ဌာနံ၊ တိဟေတုကပုထုဇ္ဇနေ၊

တေရသေဝ စ စိတ္တာနိ၊ ဘဝန္တီတိ ပကာသယေ။

စတ္တာရော ဉာဏသံယုတ္တာ၊ မဟာပါကာ တထာ နဝ၊

ရူပါရူပဝိပါကာ စ၊ တေရသေဝ ဘဝန္တိမေ။

စတုန္နဉ္စ ဖလဋ္ဌာနံ၊ ဒုဟေတုကပုထုဇ္ဇနေ၊

ဉာဏဟီနာနိ စတ္တာရိ၊ ဝိပါကာ ဧဝ ဇာယရေ။

ပုထုဇ္ဇနာနံ တိဏ္ဏမ္ပိ၊ စတုန္နံ အရိယဒေဟိနံ၊

သတ္တရသေဝ စိတ္တာနိ၊ သတ္တန္နမ္ပိ ဘဝန္တိ ဟိ။

ဝိညာဏာနိ ဒုဝေ ပဉ္စ၊ မနောဓာတုတ္တယမ္ပိ စ၊

သန္တီရဏာနိ ဝေါဋ္ဌဗ္ဗံ၊ ဟောန္တိ သတ္တရသေဝိမေ။

ဟေဋ္ဌာ တိဏ္ဏံ ဖလဋ္ဌာနံ၊ တိဟေတုကပုထုဇ္ဇနေ၊

နဝေဝ ကုသလာ ဟောန္တိ၊ စတုန္နမ္ပိ မဟဂ္ဂတာ။

တိဏ္ဏံ ¶ ပုထုဇ္ဇနာနဉ္စ၊ တိဏ္ဏမရိယာနမာဒိတော၊

တေရသေဝ တု စိတ္တာနိ၊ ဥပ္ပဇ္ဇန္တီတိ နိဒ္ဒိသေ။

အဋ္ဌေဝ ကာမပုညာနိ၊ ဒိဋ္ဌိဟီနာ အပုညတော၊

စတ္တာရောပိ စ ဥဒ္ဓစ္စ-သံယုတ္တဉ္စာတိ တေရသ။

ဟေဋ္ဌာ ဒွိန္နံ ဖလဋ္ဌာနံ၊ တထာ သဗ္ဗပုထုဇ္ဇနေ၊

ဒေါမနဿယုတ္တံ စိတ္တံ၊ ဒွယမေဝ တု ဇာယတေ။

တိဏ္ဏံ ¶ ပုထုဇ္ဇနာနံ တု၊ ပဉ္စေဝ ပန ဇာယရေ၊

စတ္တာရိ ဒိဋ္ဌိယုတ္တာနိ၊ ဝိစိကိစ္ဆာယုတမ္ပိ စ။

မဂ္ဂဋ္ဌာနံ စတုန္နမ္ပိ၊ မဂ္ဂစိတ္တံ သကံ သကံ၊

ဧကမေဝ ဘဝေ တေသံ၊ ဣတိ ဝတွာ ဝိဘာဝယေ။

မယာ ဘဝေသု စိတ္တာနံ၊ ပုဂ္ဂလာနံ ဝသေန စ၊

ဘိက္ခူနံ ပါဋဝတ္ထာယ၊ စိတ္တုပ္ပတ္တိ ပကာသိတာ။

ဧဝံ သဗ္ဗမိဒံ စိတ္တံ၊ ဘူမိပုဂ္ဂလဘေဒတော၊

ဗဟုဓာပိ စ ဟောတီတိ၊ ဝိညာတဗ္ဗံ ဝိဘာဝိနာ။

သက္ကာ ¶ ဝုတ္တာနုသာရေန၊ ဘေဒေါ ဉာတုံ ဝိဘာဝိနာ၊

ဂန္ထဝိတ္ထာရဘီတေန၊ သံခိတ္တံ ပနိဒံ မယာ။

ပုဗ္ဗာပရံ ဝိလောကေတွာ၊ စိန္တေတွာ စ ပုနပ္ပုနံ၊

အတ္ထံ ဥပပရိက္ခိတွာ၊ ဂဟေတဗ္ဗံ ဝိဘာဝိနာ။

သဒါ သာဓု စိန္တေတိ ဝါစေတိ ယော တံ၊

ဣတိ အဘိဓမ္မာဝတာရေ ဘူမိပုဂ္ဂလဝသေန စိတ္တုပ္ပတ္တိနိဒ္ဒေသော နာမ

ဧတေသံ ¶ ¶ ¶ ပန စိတ္တာနံ၊ အာရမ္မဏမိတော ပရံ၊

ဒဿယိဿာမဟံ တေန၊ ဝိနာ နတ္ထိ ဟိ သမ္ဘဝေါ။

ရူပံ သဒ္ဒံ ဂန္ဓံ ရသံ၊ ဖောဋ္ဌဗ္ဗံ ဓမ္မမေဝ စ၊

ဆဓာ အာရမ္မဏံ အာဟု၊ ဆဠာရမ္မဏကောဝိဒါ။

တတ္ထ ဘူတေ ဥပါဒါယ၊ ဝဏ္ဏော စတုသမုဋ္ဌိတော၊

သနိဒဿနပဋိဃော၊ ရူပါရမ္မဏသညိတော။

ဒုဝိဓော ဟိ သမုဒ္ဒိဋ္ဌော၊ သဒ္ဒေါ စိတ္တောတုသမ္ဘဝေါ၊

သဝိညာဏကသဒ္ဒေါဝ၊ ဟောတိ စိတ္တသမုဋ္ဌိတော။

ဓရီယတီတိ ဂစ္ဆန္တော၊ ဂန္ဓော သူစနတောပိ ဝါ၊

အယံ စတုသမုဋ္ဌာနော၊ ဂန္ဓာရမ္မဏသမ္မတော။

ရသမာနာ ရသန္တီတိ၊ ရသောတိ ပရိကိတ္တိတော၊

သောဝ စတုသမုဋ္ဌာနော၊ ရသာရမ္မဏနာမကော။

ဖုသီယတီတိ ဖောဋ္ဌဗ္ဗံ၊ ပထဝီတေဇဝါယဝေါ၊

ဖောဋ္ဌဗ္ဗံ စတုသမ္ဘူတံ၊ ဖောဋ္ဌဗ္ဗာရမ္မဏံ မတံ။

သဗ္ဗံ နာမဉ္စ ရူပဉ္စ၊ ဟိတွာ ရူပါဒိပဉ္စကံ၊

လက္ခဏာနိ စ ပညတ္တိ-ဓမ္မာရမ္မဏသညိတံ။

ဆာရမ္မဏာနိ ¶ လဗ္ဘန္တိ၊ ကာမာဝစရဘူမိယံ၊

တီဏိ ရူပေ ပနာရူပေ၊ ဓမ္မာရမ္မဏမေကကံ။

ခဏဝတ္ထုပရိတ္တတ္တာ ¶ ၊ အာပါထံ န ဝဇန္တိ ယေ၊

တေ ဓမ္မာရမ္မဏာ ဟောန္တိ၊ ယေသံ ရူပါဒယော ကိရ။

တေ ပဋိက္ခိပိတဗ္ဗာဝ၊ အညမညဿ ဂေါစရံ၊

နေဝ ပစ္စနုဘောန္တာနံ၊ မနော တေသံ တု ဂေါစရံ။

တဉ္စ ¶ ‘‘ပစ္စနုဘောတီ’’တိ၊ ဝုတ္တတ္တာ ပန သတ္ထုနာ၊

ရူပါဒါရမ္မဏာနေဝ၊ ဟောန္တိ ရူပါဒယော ပန။

ဒိဗ္ဗစက္ခာဒိဉာဏာနံ၊ ရူပါဒီနေဝ ဂေါစရာ၊

အနာပါထဂတာနေဝ၊ တာနီတိပိ န ယုဇ္ဇတိ။

ယံ ရူပါရမ္မဏံ ဟောန္တံ၊ တံ ဓမ္မာရမ္မဏံ ကထံ၊

ဧဝံ သတိ ပနေတေသံ၊ နိယမောတိ ကထံ ဘဝေ။

သဗ္ဗံ အာရမ္မဏံ ဧတံ၊ ဆဗ္ဗိဓံ သမုဒီရိတံ၊

တံ ပရိတ္တတ္တိကာဒီနံ၊ ဝသေန ဗဟုဓာ မတံ။

သဗ္ဗော ကာမဝိပါကော စ၊ ကြိယာဟေတုဒွယမ္ပိ စ၊

ပဉ္စဝီသတိ ဧကန္တံ၊ ပရိတ္တာရမ္မဏာ သိယုံ။

ဣဋ္ဌာဒိဘေဒါ ပဉ္စေဝ၊ ရူပသဒ္ဒါဒယော ပန၊

ဝိညာဏာနံ ဒွိပဉ္စန္နံ၊ ဂေါစရာ ပဋိပါဋိယာ။

ရူပါဒိပဉ္စကံ သဗ္ဗံ၊ မနောဓာတုတ္တယဿ တု၊

တေရသန္နံ ပနေတေသံ၊ ရူပက္ခန္ဓောဝ ဂေါစရော။

နာရူပံ န စ ပညတ္တိံ၊ နာတီတံ န စနာဂတံ၊

အာရမ္မဏံ ကရောန္တေ စ၊ ဝတ္တမာနော ဟိ ဂေါစရော။

တေရသေတာနိ စိတ္တာနိ၊ ဇာယန္တေ ကာမဓာတုယံ၊

စတ္တာရိ ရူပါဝစရေ၊ နေဝ ကိဉ္စိ အရူပိသု။

မဟာပါကာနမဋ္ဌန္နံ ¶ ¶ ၊ သန္တီရဏတ္တယဿပိ၊

ဆသု ဒွါရေသု ရူပါဒိဆပရိတ္တာနိ ဂေါစရာ။

ရူပါဒယော ပရိတ္တာ ဆ၊ ဟသိတုပ္ပာဒဂေါစရာ၊

ပဉ္စဒွါရေ ပဋုပ္ပန္နာ၊ မနောဒွါရေ တိကာလိကာ။

ဒုတိယာရုပ္ပစိတ္တဉ္စ၊ စတုတ္ထာရုပ္ပမာနသံ၊

ဆဗ္ဗိဓံ နိယတံ ဟောတိ၊ တံ မဟဂ္ဂတဂေါစရံ။

နိဗ္ဗာနာရမ္မဏတ္တာ ဟိ၊ ဧကန္တေန အနညတော၊

အဋ္ဌာနာသဝစိတ္တာနံ၊ အပ္ပမာဏောဝ ဂေါစရော။

စတ္တာရော ဉာဏဟီနာ စ၊ ကာမာဝစရပုညတော၊

ကြိယတောပိ စ စတ္တာရော၊ ဒွါဒသာကုသလာနိ စ။

ပရိတ္တာရမ္မဏာ စေဝ၊ တေ မဟဂ္ဂတဂေါစရာ၊

ပညတ္တာရမ္မဏတ္တာ ဟိ၊ နဝတ္တဗ္ဗာဝ ဟောန္တိ တေ။

စတ္တာရော ဉာဏသံယုတ္တာ၊ ပုညတော ကြိယတောပိ စ၊

တထာဘိညာဒွယဉ္စေဝ၊ ကြိယာဝေါဋ္ဌဗ္ဗနမ္ပိ စ။

ဧကာဒသန္နမေတေသံ၊ တိဝိဓော ဟောတိ ဂေါစရော၊

ပညတ္တာရမ္မဏတ္တာ ဟိ၊ နဝတ္တဗ္ဗာပိ ဟောန္တိမေ။

ယာနိ ဝုတ္တာဝသေသာနိ၊ စိတ္တာနိ ပန တာနိ ဟိ၊

နဝတ္တဗ္ဗာရမ္မဏာနီတိ၊ ဝိညေယျာနိ ဝိဘာဝိနာ။

ဒုတိယာရုပ္ပစိတ္တဉ္စ ¶ ၊ စတုတ္ထာရုပ္ပမာနသံ၊

ဆဗ္ဗိဓံ ပန ဧကန္တ-အတီတာရမ္မဏံ သိယာ။

ဝိညာဏာနံ ဒွိပဉ္စန္နံ၊ မနောဓာတုတ္တယဿ စ၊

ပဉ္စ ရူပါဒယော ဓမ္မာ၊ ပစ္စုပ္ပန္နာဝ ဂေါစရာ။

အဋ္ဌ ¶ ¶ ကာမမဟာပါကာ၊ သန္တီရဏတ္တယမ္ပိ စ၊

ဟသိတုပ္ပာဒစိတ္တန္တိ၊ ဒွါဒသေတေ တု မာနသာ။

သိယာတီတာရမ္မဏာ ပစ္စု-ပ္ပန္နာနာဂတဂေါစရာ၊

ကုသလာကုသလာ ကာမေ၊ ကြိယတော နဝ မာနသာ။

အဘိညာမာနသာ ဒွေပိ၊ သိယာတီတာဒိဂေါစရာ၊

သန္တပညတ္တိကာလေပိ၊ နဝတ္တဗ္ဗာ ဘဝန္တိမေ။

သေသာနိ ပန သဗ္ဗာနိ၊ ရူပါရူပဘဝေသုပိ၊

နဝတ္တဗ္ဗာနိ ဟောန္တေဝ၊ အတီတာရမ္မဏာဒိနာ။

ကာမတော စ ကြိယာ ပဉ္စ၊ ရူပတော ပဉ္စမီ ကြိယာ၊

စိတ္တာနံ ဆန္နမေတေသံ၊ နတ္ထိ ကိဉ္စိ အဂေါစရံ။

နိဗ္ဗာနဉ္စ ဖလံ မဂ္ဂံ၊ ရူပဉ္စာရူပမေဝ စ၊

သက္ကောန္တိ ဂေါစရံ ကာတုံ၊ ကတိ စိတ္တာနိ မေ ဝဒ။

သက္ကောန္တိ ဂေါစရံ ကာတုံ၊ စိတ္တာနေကာဒသာပိ စ၊

နိဗ္ဗာနဉ္စ ဖလံ မဂ္ဂံ၊ ရူပဉ္စာရူပမေဝ စ။

စိတ္တေသု ပန သဗ္ဗေသု၊ ကတိ စိတ္တာနိ မေ ဝဒ၊

အရဟတ္တဖလံ မဂ္ဂံ၊ ကာတုံ သက္ကောန္တိ ဂေါစရံ။

သဗ္ဗေသု ပန စိတ္တေသု၊ ဆ စ စိတ္တာနိ မေ သုဏ၊

အရဟတ္တဖလံ မဂ္ဂံ၊ ကာတုံ သက္ကောန္တိ ဂေါစရံ။

စတ္တာရော ဉာဏသံယုတ္တာ၊ ကြိယာ ဝေါဋ္ဌဗ္ဗနမ္ပိ စ၊

ကြိယာဘိညာ မနောဓာတု၊ ဆ စ သက္ကောန္တိ ဂေါစရံ။

စတ္တာရော ¶ ¶ ဉာဏသံယုတ္တာ-ဘိညာစိတ္တဉ္စ ပုညတော၊

နာရဟတ္တံ ဖလံ မဂ္ဂံ၊ ကာတုံ သက္ကောန္တိ ဂေါစရံ။

ကသ္မာ အရဟတော မဂ္ဂ-စိတ္တံ ဝါ ဖလမာနသံ၊

ပုထုဇ္ဇနာ ဝါ သေက္ခာ ဝါ၊ န သက္ကောန္တိ ဟိ ဇာနိတုံ။

သကဒါဂါမီ န ဇာနာတိ၊ အနာဂါမိဿ မာနသံ၊

အနာဂါမီ န ဇာနာတိ၊ အရဟန္တဿ မာနသံ။

ဟေဋ္ဌိမော ¶ ဟေဋ္ဌိမော နေဝ၊ ဇာနာတိ ဥပရူပရိ၊

ဥပရူပရိ ဇာနာတိ၊ ဟေဋ္ဌိမဿ စ မာနသံ။

ကုသလာရမ္မဏံ ကာမေ၊ ကုသလာကုသလဿ စ၊

အဘိညာမာနသဿာပိ၊ ကုသလဿ ကြိယဿ စ။

ဧတေသံ ပန ရာသီနံ၊ ဆန္နံ အာရမ္မဏံ သိယာ။

ရူပါဝစရပုညာနိ၊ ကာမပါကံ တတော ဝိနာ၊

ပဉ္စန္နံ ပန ရာသီနံ၊ ဟောန္တိ အာရမ္မဏာနိ ဟိ။

အာရုပ္ပကုသလဉ္စာပိ၊ တေဘူမကုသလဿ စ၊

တေဘူမကကြိယဿာပိ၊ တထေဝါကုသလဿပိ။

အရူပါဝစရပါကာနံ ¶ ¶ ၊ ဒွိန္နံ ပန စတုတ္ထဒု၊

ဣမေသံ အဋ္ဌရာသီနံ၊ ဟောတာရမ္မဏပစ္စယော။

အပရိယာပန္နပုညမ္ပိ၊ ကာမာဝစရတောပိ စ၊

ရူပတော ပဉ္စမဿာပိ၊ ကုသလဿ ကြိယဿ စ။

စတုန္နံ ပန ရာသီနံ၊ ဟောတိ အာရမ္မဏံ သဒါ၊

တထေဝါကုသလံ ကာမ-ရူပါဝစရတော ပန။

ကုသလဿ ကြိယဿာပိ၊ တထေဝါကုသလဿ စ၊

ကာမာဝစရပါကာနံ၊ ဆန္နံ ရာသီနမီရိတံ။

ဝိပါကာရမ္မဏံ ကာမေ၊ ကာမာဝစရတောပိ စ၊

ရူပါဝစရတော စေဝ၊ ကုသလဿ ကြိယဿ စ။

ကာမာဝစရပါကာနံ၊ တထေဝါကုသလဿ စ၊

ဆန္နဉ္စ ပန ရာသီနံ၊ ဟောတာရမ္မဏပစ္စယော။

ဝိပါကာရမ္မဏံ ရူပေ၊ ကာမာဝစရတောပိ စ၊

ရူပါဝစရတော စေဝ၊ ကုသလဿ ကြိယဿ စ။

အပုညဿာတိ ပဉ္စန္နံ၊ ရာသီနံ ဟောတိ ဂေါစရော၊

အရူပါဝစရပါကေသု၊ အယမေဝ နယော မတော။

အပရိယာပန္နပါကမ္ပိ၊ ကာမတော ရူပတောပိ စ၊

ကုသလဿ ကြိယဿာပိ၊ ဟောတိ အာရမ္မဏံ ပန။

ကြိယစိတ္တမိဒံ ကာမေ၊ ကာမာဝစရတောပိ စ၊

ရူပါဝစရတော စေဝ၊ ကုသလဿ ကြိယဿ စ။

ဆန္နံ ရာသီနမေတေသံ၊ ဟောတာရမ္မဏပစ္စယော။

ယံ ¶ ကြိယာမာနသံ ရူပေ၊ ကာမပါကံ တတော ဝိနာ၊

ပဉ္စန္နံ ပန ရာသီနံ၊ ဟောတိ အာရမ္မဏံ ပန။

ကြိယာစိတ္တံ ¶ ¶ ပနာရုပ္ပေ၊ တေသံ ပဉ္စန္နမေဝ စ၊

အာရုပ္ပဿ ကြိယဿာပိ၊ ဆန္နံ ဟောတေဝ ဂေါစရော။

ရူပံ စတုသမုဋ္ဌာနံ၊ ရူပါရမ္မဏသညိတံ၊

အဘိညာဒွယစိတ္တဿ၊ ကာမပါကကြိယဿ စ၊

ဆန္နံ ရာသီနမေတေသံ၊ ဟောတာရမ္မဏပစ္စယော။

နိဗ္ဗာနာရမ္မဏံ ကာမ-ရူပါဝစရတော ပန၊

ကုသလဿုဘယဿာပိ၊ ကာမရူပကြိယဿ စ။

အပရိယာပန္နတော စေဝ၊ ဖလဿ ကုသလဿ စ၊

ဆန္နံ ရာသီနမေတေသံ၊ ဟောတာရမ္မဏပစ္စယော။

နာနပ္ပကာရကံ သဗ္ဗံ၊ ပညတ္တာရမ္မဏံ ပန၊

ရူပါရူပဝိပါကဿ၊ တေဘူမကကြိယဿ စ၊

နဝန္နံ ပန ရာသီနံ၊ ဟောတာရမ္မဏပစ္စယော။

ရူပါရမ္မဏိကာ ဒွေ တု၊ ဒွေ ဒွေ သဒ္ဓါဒိဂေါစရာ၊

ပဉ္စာရမ္မဏိကာ နာမ၊ စိတ္တုပ္ပာဒါ တယော မတာ။

ဣဓေကစတ္တာလီသေဝ၊ ဆဠာရမ္မဏိကာ မတာ၊

ကာမာဝစရစိတ္တာန-မယမာရမ္မဏက္ကမော။

ပဉ္စာဘိညာ ဝိဝဇ္ဇေတွာ၊ ရူပါရူပါ အနာသဝါ၊

စိတ္တုပ္ပာဒါ ဣမေ သဗ္ဗေ၊ ဓမ္မာရမ္မဏဂေါစရာ။

ပဌမာရုပ္ပကုသလံ၊ ဒုတိယာရုပ္ပစေတသော၊

ကုသလဿ ဝိပါကဿ၊ ကြိယဿာရမ္မဏံ ဘဝေ။

ပဌမာရုပ္ပပါကောယံ ¶ ၊ ဒုတိယာရုပ္ပစေတသော၊

ကုသလဿ ဝိပါကဿ၊ ကြိယဿာရမ္မဏံ န ဟိ။

ပဌမံ ¶ တု ကြိယာစိတ္တံ၊ ဒုတိယာရုပ္ပစေတသော၊

န ပုညဿ န ပါကဿ၊ ဟောတိ အာရမ္မဏံ ပန။

ပဌမံ တု ကြိယာစိတ္တံ၊ ဒုတိယာရုပ္ပစေတသော၊

ကြိယဿာရမ္မဏံ ဟောတိ၊ ဣတိ ဉေယျံ ဝိဘာဝိနာ။

ပုထုဇ္ဇနဿ သေက္ခဿ၊ အရူပါရမ္မဏံ ဒွိဓာ၊

ကုသလံ ကုသလဿာပိ၊ ဝိပါကဿ စ တံ သိယာ။

ခီဏာသဝဿ ဘိက္ခုဿ၊ ပဌမာရုပ္ပမာနသံ၊

အာရမ္မဏံ တိဓာ ဟောတိ၊ ဣတိ ဝုတ္တံ မဟေသိနာ။

ကြိယဿာပိ ကြိယာ ဟောတိ၊ ကုသလမ္ပိ ကြိယဿ စ၊

ကုသလံ တု ဝိပါကဿ၊ ဧဝံ ဟောတိ တိဓာ ပန။

တတိယာရုပ္ပစိတ္တမ္ပိ၊ စတုတ္ထာရုပ္ပစေတသော၊

ဧဝမေဝ ဒွိဓာ စေဝ၊ တိဓာ စာရမ္မဏံ သိယာ။

ဣတိ အဘိဓမ္မာဝတာရေ အာရမ္မဏဝိဘာဂေါ နာမ

ဝိပါကစိတ္တပ္ပဝတ္တိနိဒ္ဒေသော

ဧကူနတိံသ ကမ္မာနိ၊ ပါကာ ဒွတ္တိံသ ဒဿိတာ၊

တီသု ဒွါရေသု ကမ္မာနိ၊ ဝိပါကာ ဆသု ဒိဿရေ။

ကုသလံ ကာမလောကသ္မိံ၊ ပဝတ္တေ ပဋိသန္ဓိယံ၊

တံ တံ ပစ္စယမာဂမ္မ၊ ဒဒါတိ ဝိဝိဓံ ဖလံ။

ဧကာယ စေတနာယေကာ၊ ပဋိသန္ဓိ ပကာသိတာ၊

နာနာကမ္မေဟိ နာနာ စ၊ ဘဝန္တိ ပဋိသန္ဓိယော။

တိဟေတုကံ တု ယံ ကမ္မံ၊ ကာမာဝစရသညိတံ၊

တိဟေတုကံ ဒုဟေတုဉ္စ၊ ဝိပါကံ ဒေတျဟေတုကံ။

ဒုဟေတုကံ တု ယံ ကမ္မံ၊ တံ န ဒေတိ တိဟေတုကံ၊

ဒုဟေတုကမဟေတုဉ္စ၊ ဝိပါကံ ဒေတိ အတ္တနော။

အသင်္ခါရမသင်္ခါရံ ¶ ၊ သသင်္ခါရမ္ပိ ဒေတိ ဟိ၊

သသင်္ခါရမသင်္ခါရံ၊ သသင်္ခါရံ ဖလံ တထာ။

ဧကာယ စေတနာယေတ္ထ၊ ကုသလဿ စ သောဠသ၊

ဝိဓာ ဝိပါကစိတ္တာနိ၊ ဘဝန္တီတိ ပကာသယေ။

အာရမ္မဏေန ဟောတေဝ၊ ဝေဒနာပရိဝတ္တနံ၊

တဒါရမ္မဏစိတ္တမ္ပိ၊ ဇဝနေန နိယာမိတံ။

ကာမာဝစရစိတ္တေန၊ ကုသလေနာဒိနာ ပန၊

တုလျေန ပါကစိတ္တေန၊ ဂဟိတာ ပဋိသန္ဓိ စေ။

ဗလဝါရမ္မဏေ ¶ ဣဋ္ဌေ၊ စက္ခုဿာပါထမာဂတေ၊

မနောဓာတု ဘဝင်္ဂသ္မိံ၊ တာယ အာဝဋ္ဋိတေ ပန။

ဝီထိစိတ္တေသု ဇာတေသု၊ စက္ခုဝိညာဏကာဒိသု၊

ဇာယတေ ဇဝနံ ဟုတွာ၊ ပဌမံ ကာမမာနသံ။

သတ္တက္ခတ္တုံ ဇဝိတွာန၊ ပဌမေ ကုသလေ ဂတေ၊

တဒေဝါရမ္မဏံ ကတွာ၊ တေနေဝ သဒိသံ ပုန။

ဝိပါကံ ဇာယတေ စိတ္တံ၊ တဒါရမ္မဏသညိတံ၊

သန္ဓိယာ တုလျတော မူလ-ဘဝင်္ဂန္တိ ပဝုစ္စတေ။

တဉ္စ သန္တီရဏံ ဧတ္ထ၊ ဒဿနံ သမ္ပဋိစ္ဆနံ၊

ဂဏနူပဂစိတ္တာနိ၊ စတ္တာရေဝ ဘဝန္တိ ဟိ။

ယဒါ ဟိ ဒုတိယံ စိတ္တံ၊ ကုသလံ ဇဝနံ တဒါ၊

တေန တုလျဝိပါကမ္ပိ၊ တဒါရမ္မဏကံ သိယာ။

သန္ဓိယာ အသမာနတ္တာ၊ ဒွေ နာမာနိဿ လဗ္ဘရေ၊

‘‘အာဂန္တုကဘဝင်္ဂ’’န္တိ၊ ‘‘တဒါရမ္မဏက’’န္တိ စ။

ယဒါ ¶ ¶ ဟိ တတိယံ ပုညံ၊ ဇဝနံ ဟောတိ တေန စ၊

သဒိသံ တတိယံ ပါကံ၊ တဒါရမ္မဏကံ သိယာ။

‘‘အာဂန္တုကဘဝင်္ဂ’’န္တိ၊ ဣဒမ္ပိ စ ပဝုစ္စတိ၊

ဣမိနာ ပန သဒ္ဓိံ ဆ၊ ပုရိမာနိ စ ပဉ္စပိ။

ယဒါ စတုတ္ထံ ကုသလံ၊ ဇဝနံ ဟောတိ တေန စ၊

တုလျံ စတုတ္ထံ ပါကံ တု၊ တဒါရမ္မဏတံ ဝဇေ။

အာဂန္တုကဘဝင်္ဂံ တု၊ တဒါရမ္မဏနာမကံ၊

ပုရိမာနိ ဆ ပါကာနိ၊ ဣမိနာ ဟောန္တိ သတ္တ တု။

တသ္မိံ ဒွါရေ ယဒါ ဣဋ္ဌ-မဇ္ဈတ္တာရမ္မဏံ ပန၊

အာဂစ္ဆတိ တဒါပါထံ၊ တဒါ ဝုတ္တနယေနိဓ။

အာရမ္မဏဝသေနေဝ၊ ဝေဒနာ ပရိဝတ္တတိ၊

ဥပေက္ခာသဟိတံ တသ္မာ၊ ဟောတိ သန္တီရဏံ မနော။

ဥပေက္ခာသဟိတေသွေဝ၊ ဇဝနေသု စတူသုပိ၊

တေဟိ တုလျာနိ စတ္တာရိ၊ ပါကစိတ္တာနိ ဇာယရေ။

ဝေဒနာယာသမာနတ္တာ၊ အစ္စန္တံ ပုရိမေဟိ တု၊

ဟောန္တိ ပိဋ္ဌိဘဝင်္ဂါနိ၊ စတ္တာရီတိ စ နာမတော။

ပဉ္စိမာနိ ဝိပါကာနိ၊ ပုရိမေဟိ စ သတ္တဟိ၊

သဒ္ဓိံ ဒွါဒသ ပါကာနိ၊ ဘဝန္တီတိ ဝိနိဒ္ဒိသေ။

စက္ခုဒွါရေ တထာ ဧဝံ၊ သောတာဒီသွပိ နိဒ္ဒိသေ၊

ဒွါဒသ ဒွါဒသ ပါကာ၊ သမသဋ္ဌိ ဘဝန္တိမေ။

ဧကာယ စေတနာယေဝ၊ ကမ္မေ အာယူဟိတေ ပန၊

သမသဋ္ဌိ ဝိပါကာနိ၊ ဥပ္ပဇ္ဇန္တိ န သံသယော။

ဂဟိတာဂဟဏေနေတ္ထ ¶ ¶ ၊ စက္ခုဒွါရေသု ဒွါဒသ၊

သောတဝိညာဏကာဒီနိ၊ စတ္တာရီတိ စ သောဠသ။

ဧဝမေဝ ¶ သသင်္ခါရ-တိဟေတုကုသလေနပိ၊

အသင်္ခါရသသင်္ခါရု-ပေက္ခာသဟဂတေဟိပိ။

ကမ္မေ အာယူဟိတေ တေသံ၊ ဝိပါကေဟိ စ တီဟိပိ၊

ဧသေဝ စ နယော တေဟိ၊ ဒိန္နာယ ပဋိသန္ဓိယာ။

ပဌမံ ဣဋ္ဌမဇ္ဈတ္တ-ဂေါစရဿ ဝသေနိဓ၊

ပဝတ္တိံ ပန ဒဿေတွာ၊ ဥပေက္ခာသဟိတဒွယေ။

ဒဿေတဗ္ဗာ တပ္ပစ္ဆာ တု၊ ဣဋ္ဌသ္မိံ ဂေါစရေ ဣဓ၊

ဧကေကသ္မိံ ပန ဒွါရေ၊ ဒွါဒသ ဒွါဒသေဝ တု။

ဂဟိတာဂဟဏေနေတ္ထ၊ ပါကစိတ္တာနိ သောဠသ၊

ပုဗ္ဗေ ဝုတ္တနယေနေဝ၊ ဉေယျံ သဗ္ဗမသေသတော။

တိဟေတုကေန ကမ္မေန၊ ပဋိသန္ဓိ တိဟေတုကာ၊

ဘဝတီတိ အယံ ဝါရော၊ ဝုတ္တော ဧတ္တာဝတာ မယာ။

သန္ဓိမေကံ တု ကမ္မေကံ၊ ဇနေတိ န တတော ပရံ၊

အနေကာနိ ဝိပါကာနိ၊ သဉ္ဇနေတိ ပဝတ္တိယံ။

ဧကသ္မာ ဟိ ယထာ ဗီဇာ၊ ဇာယတေ ဧကမင်္ကုရံ၊

သုဗဟူနိ ဖလာနိဿ၊ ဟောန္တိ ဟေတုပဝတ္တိတော။

ဒုဟေတုကေန ကမ္မေန၊ ပဋိသန္ဓိ ဒုဟေတုကာ၊

ဟောတီတိ ဟိ အယံ ဝါရော၊ အနုပုဗ္ဗေန အာဂတော။

ဒုဟေတုကေန ကမ္မေန၊ သောမနဿယုတေနိဓ၊

အသင်္ခါရိကစိတ္တေန၊ ကမ္မေ အာယူဟိတေ ပန။

တေန ¶ တုလျေန ပါကေန၊ ဂဟိတာ ပဋိသန္ဓိ စေ၊

ဣဋ္ဌေ အာရမ္မဏေ စက္ခု-ဒွါရေ အာပါထမာဂတေ။

သောမနဿယုတေ ဉာဏ-ဟီနေ ကုသလမာနသေ၊

သတ္တက္ခတ္တုံ ဇဝိတွာန၊ ဂတေ တသ္မိံ ဒုဟေတုကေ။

တဒေဝါရမ္မဏံ ¶ ကတွာ၊ ဇာယတေ တဒနန္တရံ၊

တံသရိက္ခကမေကံ တု၊ အသင်္ခါရိကမာနသံ။

တံ ဟိ မူလဘဝင်္ဂန္တိ၊ တဒါရမ္မဏမိစ္စပိ၊

ဥဘယမ္ပိ စ တဿေဝ၊ နာမန္တိ ပရိဒီပိတံ။

ဒုဟေတုကသသင်္ခါရေ၊ ဇဝိတေပိ စ တံသမံ၊

ဟောတာဂန္တုကသင်္ခါတံ၊ တဒါရမ္မဏမာနသံ။

တထေဝ စ ဒုဟေတူနံ၊ ဣဋ္ဌမဇ္ဈတ္တဂေါစရေ၊

ဒွိန္နံ ဥပေက္ခာယုတ္တာနံ၊ ဇဝနာနမနန္တရံ။

ဒွေ တာဒိသာနိ ဇာယန္တေ၊ တဒါရမ္မဏမာနသာ၊

တေသံ ‘‘ပိဋ္ဌိဘဝင်္ဂ’’န္တိ၊ နာမံ ‘‘အာဂန္တုက’’န္တိ စ။

သန္တီရဏဒွယဉ္စေဝ၊ ဒဿနံ သမ္ပဋိစ္ဆနံ၊

ဣမာနိ စ ဘဝင်္ဂါနိ၊ စက္ခုဒွါရေ ပနဋ္ဌ ဟိ။

ဧဝမဋ္ဌဋ္ဌ ¶ ကတွာန၊ ဒွါရေသုပိ စ ပဉ္စသု၊

စတ္တာလီသ ဝိပါကာနိ၊ ဘဝန္တီတိ ပဝတ္တိယံ။

ဂဟိတာဂဟဏေနေတ္ထ၊ စက္ခုဒွါရေ ပနဋ္ဌ စ၊

သောတဃာနာဒိနာ သဒ္ဓိံ၊ ဒွါဒသေဝ ဘဝန္တိ ဟိ။

ဧကာယ စေတနာယေဝံ၊ ကမ္မေ အာယူဟိတေ ပန၊

ဒွါဒသေဝ ဝိပါကာနိ၊ ဘဝန္တီတိ ပကာသိတံ။

ဒုဟေတုကတ္တယေနာပိ ¶ ၊ သေသေန သဒိသေန တု၊

ပါကေနာဒိန္နသန္ဓိယာ၊ အယမေဝ နယော မတော။

ဒုဟေတုကေန ကမ္မေန၊ ပဋိသန္ဓိ ဒုဟေတုကာ၊

ဟောတီတိပိ အယံ ဝါရော၊ ဝုတ္တော ဧတ္တာဝတာ မယာ။

ဒုဟေတုကေန ကမ္မေန၊ ပဋိသန္ဓိ အဟေတုကာ၊

ဟောတီတိ စ အယံ ဝါရော၊ အနုပုဗ္ဗေန အာဂတော။

ဒုဟေတုကေသု ¶ စိတ္တေသု၊ ကုသလေသု စတူသုပိ၊

တေသု အညတရေနေဝ၊ ကမ္မေ အာယူဟိတေ ပန။

တဿေဝ ပါကဘူတာယ၊ အာဒိန္နပဋိသန္ဓိနော၊

ဥပေက္ခာသဟိတာဟေတု၊ မနောဝိညာဏဓာတုယာ။

ပဋိသန္ဓိ န ဝတ္တဗ္ဗာ၊ သာ ကမ္မသဒိသာတိ ဟိ၊

ကမ္မံ ဒုဟေတုကံ ဟောတိ၊ ပဋိသန္ဓိ အဟေတုကာ။

တဿ ဗုဒ္ဓိမုပေတဿ၊ ဣဋ္ဌမဇ္ဈတ္တဂေါစရေ၊

အာပါထမာဂတေ စက္ခု-ဒွါရေ ပုန စ ဒေဟိနော။

ဒုဟေတူနံ စတုန္နမ္ပိ၊ ပုညာနံ ယဿ ကဿစိ၊

ဇဝနဿာဝသာနသ္မိံ၊ အဟေတုကမိဒံ မနော။

တဒါရမ္မဏဘာဝေန၊ ဇာယတေ နတ္ထိ သံသယော၊

တံ တု မူလဘဝင်္ဂဉ္စ၊ တဒါရမ္မဏမေဝ စ။

ဝီထိစိတ္တေသု ဇာတေသု၊ စက္ခုဝိညာဏကာဒိသု၊

ဥပေက္ခာသဟိတံယေဝ၊ ဟောတိ သန္တီရဏမ္ပိ စ။

တေသု ဧကံ ဌပေတွာန၊ ဂဟိတာဂဟဏေနိဓ၊

ဂဏနူပဂစိတ္တာနိ၊ တီဏိယေဝ ဘဝန္တိ ဟိ။

ဣဋ္ဌေ ¶ အာရမ္မဏေ စက္ခု-ဒွါရေ အာပါထမာဂတေ၊

တဒါ သန္တီရဏဉ္စေဝ၊ တဒါရမ္မဏမာနသံ။

သောမနဿယုတံယေဝ၊ ဂဟေတွာ တေသု ဧကကံ၊

ပုရိမာနိ စ တီဏီတိ၊ စတ္တာရောဝ ဘဝန္တိ ဟိ။

ဧဝံ စတ္တာရိ စိတ္တာနိ၊ ဒွါရေသုပိ စ ပဉ္စသု၊

ဟောန္တိ ဝီသတိ စိတ္တာနိ၊ ဝိပါကာနိ ပဝတ္တိယံ။

စက္ခုဒွါရေ တု စတ္တာရိ၊ ဂဟိတာဂဟဏေနိဓ၊

သောတဃာနာဒိနာ သဒ္ဓိံ၊ ဟောတေဝါဟေတုကဋ္ဌကံ။

အဟေတုပဋိသန္ဓိဿ ¶ ၊ န တဒါရမ္မဏံ ဘဝေ၊

ဒုဟေတုကံ တိဟေတုံ ဝါ၊ ဒုဟေတုပဋိသန္ဓိနော။

ဇာတာ ¶ သုဂတိယံ ယေန၊ ပါကေန ပဋိသန္ဓိ တု၊

တေန တုလျမ္ပိ ဟီနံ ဝါ၊ တဒါရမ္မဏကံ ဘဝေ။

မနုဿလောကံ သန္ဓာယ၊ ဝုတ္တဉ္စာဟေတုကဋ္ဌကံ၊

စတူသုပိ အပါယေသု၊ ပဝတ္တေ ပန လဗ္ဘတိ။

ထေရော နေရယိကာနံ တု၊ ဓမ္မံ ဒေသေတိ ဝဿတိ၊

ဂန္ဓံ ဝါယုဉ္စ မာပေတိ၊ ယဒါ တေသံ တဒါ ပန။

ထေရံ ဒိသွာ စ သုတွာ စ၊ ဓမ္မံ ဂန္ဓဉ္စ ဃာယတံ၊

ပိဝတဉ္စ ဇလံ ဝါယုံ၊ ဖုသတံ မုဒုမေဝ စ။

စက္ခုဝိညာဏကာဒီနိ၊ ပုညဇာနေဝ ပဉ္စပိ၊

သန္တီရဏဒွယံ ဧကာ၊ မနောဓာတူတိ အဋ္ဌကံ။

အယံ တာဝ ကထာ ဣဋ္ဌ-ဣဋ္ဌမဇ္ဈတ္တဂေါစရေ၊

ကာမာဝစရပုညာနံ၊ ဇဝနာနံ ဝသေနိဓ။

နိယမတ္ထံ ¶ တု ယံ ဝုတ္တံ၊ တဒါရမ္မဏစေတသော၊

ကုသလံ ပန သန္ဓာယ၊ တံ ဝုတ္တန္တိ ဟိ ဒီပိတံ။

ဣဓာကုသလစိတ္တေသု၊ သောမနဿယုတေသုပိ၊

ဣဋ္ဌေ အာရမ္မဏေ တေသု၊ ဇဝိတေသု စတူသုပိ။

သောမနဿယုတာဟေတု-မနောဝိညာဏဓာတု ဟိ၊

တဒါရမ္မဏဘာဝေန၊ ဇာယတေ တဒနန္တရံ။

ဆသွာကုသလစိတ္တေသု၊ ဥပေက္ခာယ ယုတေသု ဟိ၊

ဂေါစရေ ဣဋ္ဌမဇ္ဈတ္တေ၊ ဇဝိတေသု အနန္တရံ။

ဥပေက္ခာသဟိတာဟေတု-မနောဝိညာဏဓာတု ဟိ၊

တဒါရမ္မဏဘာဝေန၊ ဇာယတေ ပန ပုညဇာ။

ဣဋ္ဌာရမ္မဏယောဂသ္မိံ ¶ ၊ ကင်္ခတော ဥဒ္ဓတဿ ဝါ၊

သောမနဿယုတံ ဟောတိ၊ တဒါရမ္မဏမာနသံ။

သောမနဿယုတေ စိတ္တေ၊ ဇဝနေ ဇဝိတေ ပန၊

ဂဝေသိတဗ္ဗာ ပဉ္စေဝ၊ တဒါရမ္မဏမာနသာ။

ဥပေက္ခာသဟိတေ စိတ္တေ၊ ဇဝနေ ဇဝိတေ ပန၊

ဆဠေဝ ဂဝေသိတဗ္ဗာ၊ တဒါရမ္မဏမာနသာ။

တိဟေတုသောမနဿေန၊ အာဒိန္နပဋိသန္ဓိနော၊

ဈာနတော ပရိဟီနဿ၊ တံ ဈာနံ ပစ္စဝေက္ခတော။

ဒေါမနဿယုတံ စိတ္တံ၊ ဟောတိ ဝိပ္ပဋိသာရိနော၊

တဿ ကိံ ဇာယတေ ဗြူဟိ၊ တဒါရမ္မဏမာနသံ။

ပဋ္ဌာနေ ပဋိသိဒ္ဓါ ဟိ၊ ဒေါမနဿအနန္တရံ၊

သောမနဿဿ ဥပ္ပတ္တိ၊ ဒေါမနဿဿ စဿ ဝါ။

မဟဂ္ဂတံ ¶ ပနာရဗ္ဘ၊ ဇဝနေ ဇဝိတေပိ စ၊

တတ္ထေဝ ပဋိသိဒ္ဓံ တု၊ တဒါရမ္မဏမာနသံ။

တသ္မာ ¶ ဘဝင်္ဂပါတောဝ၊ တဒါရမ္မဏမေဝ ဝါ၊

န ဟောတိ ကိံ နု ကာတဗ္ဗံ၊ ဝဒ တွံ အာဘိဓမ္မိက။

ဥပေက္ခာသဟိတာဟေတု-မနောဝိညာဏဓာတု တု၊

ပုညာပုညဝိပါကာ ဟိ၊ တဒါရမ္မဏိကာ သိယာ။

အာဝဇ္ဇနံ ကိမဿာတိ၊ နတ္ထိ တံ ဇာယတေ ကထံ၊

ဘဝင်္ဂါဝဇ္ဇနာနံ ကိံ၊ မဂ္ဂဿာနန္တရဿ စ။

ဖလဿပိ နိရောဓာ စ၊ ဝုဋ္ဌဟန္တဿ ဘိက္ခုနော၊

ဖလစိတ္တဿ ဝါ ဧဝံ၊ နတ္ထိ အာဝဇ္ဇနံ ကိရ။

ဝိနာ အာဝဇ္ဇနေနာပိ၊ ဟောတိ ဇာယတု မာနသံ၊

ကိမဿာရမ္မဏံ ဗြူဟိ၊ ယဒိ ဇာနာသိ ပဏ္ဍိတ။

ဝိနာ ¶ အာရမ္မဏေနေဝ၊ န ဟိ ဇာယတိ မာနသံ၊

ရူပါဒီသု ပရိတ္တေသု၊ ယံ ကိဉ္စာရဗ္ဘ ဇာယတေ။

ဥတုဗီဇနိယာမော စ၊ ကမ္မဓမ္မနိယာမတာ၊

စိတ္တဿ စ နိယာမောတိ၊ ဉေယျာ ပဉ္စ နိယာမတာ။

တတ္ထ ဧကပ္ပဟာရေန၊ ဖလပုပ္ဖာဒိဓာရဏံ၊

ရုက္ခာနံ ပန သဗ္ဗေသံ၊ အယံ ဥတုနိယာမတာ။

တေသံ တေသံ တု ဗီဇာနံ၊ တံတံတုလျဖလုဗ္ဘဝေါ၊

မတ္ထကေ နာဠိကေရဿ၊ ဆိဒ္ဒတ္တံ ဗီဇဇော အယံ။

တိဟေတုကံ တိဟေတုဉ္စ၊ ဒုဟေတုဉ္စ အဟေတုကံ၊

ဝိပါကံ တု ယတော ဒေတိ၊ အယံ ကမ္မနိယာမတာ။

ဇာတိယံ ¶ ဗောဓိသတ္တဿ၊ မေဒနီကမ္ပနာဒိကံ၊

ဝိသေသတ္တမနေကမ္ပိ၊ အယံ ဓမ္မနိယာမတာ။

ဂေါစရေန ပသာဒသ္မိံ၊ ဃဋ္ဋိတေ ပန တေနိဓ၊

ဥပ္ပတ္တာဝဇ္ဇနာဒီနံ၊ အယံ စိတ္တနိယာမတာ။

ဣတိ အဘိဓမ္မာဝတာရေ ဝိပါကစိတ္တပ္ပဝတ္တိနိဒ္ဒေသော နာမ

ဣဒါနိ ¶ ¶ ပန သဗ္ဗေသံ၊ ဧတေသံ မာနသံ မယာ၊

ပါဋဝတ္ထာယ ဘိက္ခူနံ၊ ကထီယတိ ပကိဏ္ဏကံ။

ပန္ထမက္ကဋကော နာမ၊ ဒိသာသု ပန ပဉ္စသု၊

တတ္ထ သုတ္တံ ပသာရေတွာ၊ ဇာလမဇ္ဈေ နိပဇ္ဇတိ။

ပဌမာယ ဒိသာယေတ္ထ၊ သုတ္တေ ပန ပသာရိတေ၊

ပါဏကေန ပဋင်္ဂေန၊ ဃဋ္ဋိတေ မက္ခိကာယ ဝါ။

နိပန္နဋ္ဌာနတော ကိဉ္စိ၊ စလိတွာ ဥဏ္ဏနာဘိ တု၊

ဂန္တွာ သုတ္တာနုသာရေန၊ ယူသံ ပိဝတိ တဿ သာ။

ပုနာဂန္တွာန တတ္ထေဝ၊ နိပဇ္ဇတိ ယထာသုခံ၊

ဧဝမေဝ ကရောတေဝ၊ ဒိသာသု ဒုတိယာဒိသု။

ပသာဒါ ¶ ပဉ္စ ဒဋ္ဌဗ္ဗာ၊ သုတ္တံ ပဉ္စဒိသာသွိဝ၊

စိတ္တံ ပန စ ဒဋ္ဌဗ္ဗံ၊ မဇ္ဈေ မက္ကဋကော ဝိယ။

ပါဏကာဒီဟိ သုတ္တဿ၊ တဿ သင်္ဃဋ္ဋနာ ဝိယ၊

ပသာဒါနံ တု ဒဋ္ဌဗ္ဗာ၊ ဃဋ္ဋနာရမ္မဏေန ဟိ။

စလနံ ဝိယ တံမဇ္ဈေ၊ နိပန္နာယုဏ္ဏနာဘိယာ၊

ပသာဒဃဋ္ဋနံ တတ္ထ၊ ဂဟေတွာရမ္မဏံ ပန။

မနောဓာတုကြိယာစိတ္တံ၊ ဘဝင်္ဂါဝဋ္ဋနံ မတံ၊

တဿာ သုတ္တာနုသာရံဝ၊ ဝီထိစိတ္တပဝတ္တနံ။

သီသေ ပနဿ ဝိဇ္ဈိတွာ၊ ယူသပါနံဝ စေတသော၊

အာရမ္မဏေသု ဒဋ္ဌဗ္ဗံ၊ ဇဝနဿ ပဝတ္တနံ။

ပုနာဂန္တွာ ¶ ယထာ သုတ္တ-ဇာလမဇ္ဈေ နိပဇ္ဇနံ၊

ဝတ္ထုံယေဝ စ နိဿာယ၊ စိတ္တဿ ပရိဝတ္တနံ။

ဣဒံ တု ပန ဩပမ္မံ၊ အတ္ထံ ဒီပေတိ ကိံ တု ဟိ၊

အာရမ္မဏေန ပဌမံ၊ ပသာဒေ ဃဋ္ဋိတေ ပန။

ပသာဒဝတ္ထုတော စိတ္တာ၊ ဝတ္ထုသန္နိဿိတံ မနော၊

တတော ဟိ ပဌမံယေဝ၊ ဇာယတီတိ ဟိ ဒီပိတံ။

ဧကေကာရမ္မဏံ ¶ ဒွီသု၊ ဒွီသု ဒွါရေသု သဗ္ဗသော၊

အာဂစ္ဆတိ တေနာပါထံ၊ အယမတ္ထောပိ ဒီပိတော။

ရူပံ စက္ခုပသာဒမှိ၊ ဃဋ္ဋိတွာ တင်္ခဏေ ပန၊

မနောဒွါရေ တထာပါထ-မာဂစ္ဆတိ နိသံသယော။

ခဂေါ ယထာ ဟိ ရုက္ခဂ္ဂေ၊ နိလီယန္တောဝ သာခိနော၊

သာခံ ဃဋ္ဋေတိ တဿီဓ၊ ဆာယာ ဖရတိ ဘူမိယံ။

သာခါယ ¶ ဃဋ္ဋနစ္ဆာယာ၊ ဖရဏာနိ စ သဗ္ဗသော၊

အပုဗ္ဗာစရိမံ ဧက-က္ခဏသ္မိံယေဝ ဇာယရေ။

ဘဝင်္ဂစလနဿာပိ၊ ပစ္စယတ္တေန အတ္ထတော။

တထေဝ စ မနောဒွါရေ၊ အာပါထဂမနမ္ပိ စ၊

အပုဗ္ဗာစရိမံ ဧက-က္ခဏသ္မိံယေဝ ဟောတိတိ။

တတော ဘဝင်္ဂံ ဆိန္ဒိတွာ၊ စက္ခုဒွါရေ ယထာက္ကမံ၊

အာဝဇ္ဇနေ သမုပ္ပန္နေ၊ ဒဿနေ သမ္ပဋိစ္ဆနေ။

သန္တီရဏေ သမုပ္ပန္နေ၊ တတော ဝေါဋ္ဌဗ္ဗနေပိ စ၊

ကုသလံ ဇဝနံ စိတ္တံ၊ တထာကုသလမေဝ ဝါ။

ဧသော ဧဝ နယော သောတ-ဒွါရာဒီသုပိ ဝိညုနာ၊

အဝိသေသေန ဝိညေယျော၊ သဒ္ဒါဒီနံ တု ဃဋ္ဋနေ။

ဒေါဝါရိကောပမာဒီနိ ¶ ၊ ဧတဿတ္ထဿ ဒီပနေ၊

ဥဒ္ဓရိတွာန တာနေတ္ထ၊ ဒဿေတဗ္ဗာနိ ဝိညုနာ။

အသမ္ဘေဒေန စက္ခုဿ၊ ရူပါပါထဂမေန စ၊

အာလောကနိဿယေနာပိ၊ သမနက္ကာရဟေတုနာ။