📜
နမော တဿ ဘဂဝတော အရဟတော သမ္မာသမ္ဗုဒ္ဓဿ
ကမလာဉ္ဇလိ
ကမလာသန ကမလာပတိ ပမထာဓိပ ဝဇိရာ၊
ယုဓဒါနဝ မနုဇောရဂ ဘုဇဂါသန ပတိနံ၊
မကုဋာဟိတ မနိဒီဓိတိ ဘမရာဝလိ ဘဇိတံ၊
ပဏမာ’မဟံ အနဃံ မုနိ စရဏာမလ ကမလံ။
ကမလာလယ သဒိ’သင်္ကိတ ကလမင်္ဂလ ရုစိရံ၊
ဇုတိရဉ္ဇိတံ အဘိနိဇ္ဇိတ သုဘကဉ္စန နလိနံ၊
ဇနိတာ စိရ သမယေ နိဇ ပိတု ဘူပတိ နမိတံ၊
ပဏမာ’မဟံ အနဃံ မုနိ စရဏာမလ ကမလံ။
သရဏာဂတ ရဇနီပတိ ဒိနသေခရ နမိတံ၊
ဘဇိတာခိလ ဇနပါဝနံ အဘိကင်္ခိတ သုခဒံ၊
ဝသုဓာတလ သယမုဂ္ဂတ သရသီရုဟ မဟိတံ၊
ပဏမာ’မဟံ အနဃံ မုနိ စရဏာမလ ကမလံ။
ဒိရဒါသန တရုပန္တိက ဃဋိတာသနံ အဘယံ၊
ဝိဇယာသန သမဓိဋ္ဌိတ စတုရင်္ဂိက ဝိရိယံ၊
ဓရမာနက သုရိယေဟနိ ဝိဇိတန္တက ဓဇိနိံ၊
ပဏမာ’မဟံ အဘိပါတိတ နမုစိဒ္ဓဇ ဝိဘဝံ။
သဒယောဒိတ ပိယဘာရတိ ဝိဇိတန္တက သမရံ၊
ဒသပါရမိ ဗလကမ္ပိတ သဓရာဓရ ဓရနိံ၊
ဂိရိမေခလ ဝရဝါရန သိရသာနတ စရဏံ၊
ပဏမာ’မဟံ အဘိနန္ဒိတ သနရာမရ ဘုဝနံ။
နိခိလာသဝ ဝိဂမေ’နတိဝိမလီကတ ဟဒယံ၊
တဒနန္တရ ဝိဒိတာခိလ မတိဂေါစရ ဝိသယံ၊
ဝိသယီကတ ဘုဝနတ္တယံ အတိလောကိယ စရိတံ၊
ပဏမာ’မဟံ အပရာဇိတံ အရဟံ မုနိံ အသမံ။
မုဒုဘာရတိ မဓုပါသိတ နလိနောပမ ဝဒနံ၊
ရုစိရာယတ နလိနီဒလ နိဘ လောစန ယုဂလံ၊
ဥဒယောဒိတ ရဝိမဏ္ဍလ ဇလိတာမလ နိဋိလံ၊
ပဏမာ’မဟ အကုတောဘယံ အနဃံ မုနိ ပမုခံ။
အသိတမ္ဗုဒ ရုစိကုဉ္စိတ မုဒု ကုန္တလ လလိတံ၊
ဘုဝနောဒရ ဝိတတာမိတ ဇုတိသဉ္စယ ဇလိတံ၊
မဒမောဒိတ ဒိရဒေါပမ ဂတိဝိဗ္ဘမ ရုစိရံ၊
ပဏမာ’မဟံ အမတန္ဒဒ မုနိပုင်္ဂဝံ အသမံ။
ကရုဏာရသ ပရိဘာဝိတ သဝဏာမတ ဝစနံ၊
ဝိရုဒါဝလိ သတဃောသိတ ယသပူရိတ ဘုဝနံ၊
သုမနောဟရ ဝရလက္ခဏ သိရိသဉ္စယ သဒနံ၊
ပဏမာ’မဟံ ဥဒိတာမလ သသိမဏ္ဍလ ဝဒနံ။
ဝိနယာရဟ ဇနမာနသ ကုမုဒါကရ သသိနံ၊
တသိနာပဂ ပရိသောသန သတဒီဓိတိ တုလိတံ၊
တမနာသဝ မုနိသေဝိတံ အပလောကိတ သုခဒံ၊
ပဏမာ’မဟံ အနိကေတနံ အခိလာဂတိ ဝိဂတံ။
သဟိတာခိလ ဘယဘေရဝံ အဘယာဂတ သရနံ၊
အဇရာမရ သုခဒါယကံ အနိရာကတ ကရုဏံ၊
တမုပါသက ဇနသေဝိတ သုပတိဋ္ဌိတ စရဏံ၊
ပဏမာ’မဟံ အဟိတာပဟံ အနဃုတ္တမ စရဏံ။
ကရုဏာမတ ရသပုရိတ ဝီမလာခိလ ဟဒယံ၊
ဝိဟိတာမိတ ဇနတာဟိတံ အနုကမ္ပိတ ဘုဝနံ၊
ဘုဝနေ သုတံ အဝနီပတိ သတ သေဝိတ စရဏံ၊
ပဏမာ’မဟံ အနဃံ မုနိံ အဃနာသန စတုရံ။
အရတီရတိ ပရိပီလိတ ယတိမာနသ ဒမနံ၊
နိဇသာသန ဝိနိဝါရိတ ပုထုတိတ္ထိယ သမဏံ၊
ပရဝါဒိက ဇနတာကတ ပရိဘာသိတ ခမနံ၊
ပဏမာ’မဟံ အတိဒေဝတ ဝရ ဂေါတမ သမဏံ။
သရဏာဂတ ဘယနာသန ဝဇိရာလယ ပဏိဘံ၊
ဘဝသာဂရ ပတိတာမိတ ဇနတာရန နိရတံ၊
သိရသာဝဟံ အမလဉ္ဇလိ ပုဋပင်္ကဇ မကုလံ၊
ပဏမာ’မဟံ အခိလလာယ ဝိဂတံ မုနိံ အတုလံ။
ဝိမလီကတ ဇနမာနသ ဝိဂတာသဝ ဘဂဝံ၊
ဘဝပါရဂ ဝိဘဝါမတ သုခဒါယက သတတံ၊
ပရမာဒရ ဂရုဂါရဝ ဝိနတံ ဇိန ပယတံ၊
ပဒပင်္ကဇ ရဇသာ မမ သမလင်္ကုရု သိရသံ။
ပဝနာဟတ ဒုမပလ္လဝံ ဣဝ နာရတ စပလံ၊
ဘဝလာလသ မလိနီကတံ အဇိတိန္ဒြိယ နိဝဟံ၊
စိရ သဉ္စိတ ဒုရိတာဟတံ အနိဝါရိတ တိမိသံ၊
ဝိမလီကုရု ကရုဏာဘရ သုတရံ မမ ဟဒယံ။
အဒယေ ဒယံ အနယေ နယံ အပိ ယော ဂုဏံ အဂုဏေ၊
အဟိတေ ဟိတံ အကရော ကွစိဒ အပိ ကေနစိ နကတံ၊
သဒယေ ဇိန သုနယေ ဂုဏသဒနေ တယိ နိတရံ၊
သုဟိတေ ဟိတစရိတေ’နဃ ရမတေ မမ ဟဒယံ။
ဘဝသင်္ကဋ ပတိတေနပိ ဘဝတာ စိရ စရိတံ၊
ဝိသမေ သမ စရဏံ ခလု ဒသပါရမိ ဘရဏံ၊
သရတော’ဟနိ သရတော နိသိ သုပိနေနပိ သတတံ၊
ရမတေ ဇိန သုမတေ တွယိ သဒယံ မမ ဟဒယံ။
အတိဒုဒ္ဒဒံ အဒဒီ ဘဝံ အတိဒုက္ကရံ အကရီ၊
အတိဒုက္ခမံ အခမီ ဝတ ကရုဏာနိဓိ’ရသမော၊
ဣတိ တေ ဂုဏံ အနဃံ မုနိ သရတော မမ ဟဒယံ၊
ရမတေ’ဟနိ ရမတေ နိသိ ရမတေ တွယိ သတတံ။
အတိဒုစ္စရံ အစရီ ဘဝံ အတိဒုဒ္ဒမံ အဒမီ၊
အတိဒုဒ္ဒယံ အဒယီ ဝတ သဒယာပရ ဟဒယော၊
ဣတိ တေ ဂုဏံ အနဃံ မုနိ သရတော မမ ဟဒယံ၊
ရမတေ’ဟနိ ရမတေ နိသိ ရမတေ တွယိ သတတံ။
အတိဒုဂ္ဂမံ အဂမီ ဘဝံ အတိဒုဇ္ဇယံ အဇယီ၊
အတိဒုဿဟံ အသဟီ ဝတ သမုပေက္ခိတ မနသော၊
ဣတိ တေ ဂုဏံ အနဃံ မုနိ သရတော မမ ဟဒယံ၊
ရမတေ’ဟနိ ရမတေ နိသိ ရမတေ တွယိ သတတံ။
အတိဒါရုန ပလယာနလ သဒိသာနလ ဇလိတေ၊
နိရယေ ဝိနိပတိတော စိရံ အဃတာပိတ မနသော၊
န သရိံ သကိဒ အပိ တေ ပိတ ဘဇိတုံ ပဒနလိနံ၊
ခမ ဂေါတမ နရသာရထိ တမိဒံ မမ ခလိတံ။
တိရိယဂ္ဂတ-ဂတိယံ စိရံ အနဝဋ္ဌိတ စရိတော၊
အတိနိဋ္ဌုရ ဝဓတဇ္ဇိတ ဘယကမ္ပိတ ဟဒယော၊
န သရိံ သကိဒပိ တေ ပိတ ဘဇိတုံ ပဒနလိနံ၊
ခမ ဂေါတမ ပုရိသုတ္တမ တမိဒံ မမ ခလိတံ။
ပရိဒေဝန နိရတော စိရံ အထ ပေတ္တိယ ဝိသယေ၊
သုဇိဃစ္ဆိတ သုပိပါသိတ ပရိသောသိတ ဇဌရေ၊
န သရိံ သကိဒပိ တေ ပိတ ဘဇိတုံ ပဒနလိနံ၊
ခမ ဂေါတမ ဒိပဒုတ္တမ တမိဒံ မမ ခလိတံ။
ဝိဝသော ဘုသံ အဃဒူသိတ မနသာသုရ ဝိသယေ၊
ဇနိတော ဃနတိမိရေ စိရံ အတိဒုက္ခိတ ဟဒယော၊
န သရိံ သကိဒပိ တေ ပိတ ဘဇိတုံ ပဒနလိနံ၊
ခမ ဂေါတမ ဝသိသတ္တမ တမိဒံ မမ ခလိတံ။
မနသာ စိရ ဝိဟိတံ သရံ အတိကိဗ္ဗိသ စရိတံ၊
သမထေနထ သုဝိရာဇိယ တံ အသညိတံ ဥပဂေါ၊
န သရိံ သကိဒ အပိ တေ ပိတ ဘဇိတုံ ပဒ နလိနံ၊
ခမ ဂေါတမ ဝသိပုင်္ဂဝ တမိဒံ မမ ခလိတံ။
ဝိဇိဂုစ္ဆိယ ဒုရိတံ နိဇ ဝပုသာ ကတံ အမိတံ၊
တနု ဝဇ္ဇိတံ ဥပဂေါ ဘဝံ ဣဟ ဘာဝိတ သမထော၊
န သရိံ သကိဒပိ တေ ပိတ ဘဇိတုံ ပဒနလိနံ၊
ခမ ဂေါတမ ယတိကုဉ္ဇရ တမိဒံ မမ ခလိတံ။
ရတနတ္တယ ရဟိတေ ဘုသ ဗဟုလီကတ ဒုရိတေ၊
ဇနိတော ပရဝိသယေ ဗုဓဇန နိန္ဒိယ စရိတေ၊
န သရိံ သကိဒပိ တေ ပိတ ဘဇိတုံ ပဒနလိနံ၊
ခမ ဂေါတမ ကရုဏာနိဓိ တမိဒံ မမ ခလိတံ။
ဇနိတော ယဒိ မနုဇေသုပိ ဝိကလိန္ဒြိယ နိဝဟော၊
တနုနာ ကရစရဏာဒိဟိ ဝိကတေ’နိဟ ဒုခိတော၊
န သရိံ သကိဒပိ တေ ပိတ ဘဇိတုံ ပဒနလိနံ၊
ခမ ဂေါတမ မတိသာဂရ တမိဒံ မမ ခလိတံ။
ဝိဓိနာဟိတ မတိဘာဝန ရဟိတော တမပိဟိတော၊
ဝိသဒေသုပိ ကုသလာဒိသု တထဒဿန ဝိမုခေါ၊
န သရိံ သကိဒပိ တေ ပိတ ဘဇိတုံ ပဒနလိနံ၊
ခမ ဂေါတမ နရကေသရိ တမိဒံ မမ ခလိတံ။
သုစိရေနပိ ဘုဝိ ဒုလ္လဘံ အသမံ ခဏံ အလဘံ၊
သနရာမရ ဇနတာဟိတ သုခဒံ မုနိ ဇနနံ၊
န သရိံ သကိဒပိ တေ ပိတ ဘဇိတုံ ပဒနလိနံ၊
ခမ ဂေါတမ ဝဒတံဝရ တမိဒံ မမ ခလိတံ။
နိသိတာယုဓ ဝဓသဇ္ဇိတ ခဠနိဒ္ဒယ ဟဒယော၊
ပရဟိံသန ရုစိ ဘိံသန ယမသောဒရ သဒိသော၊
န သရိံ သကိဒပိ တေ ပိတ ဘဇိတုံ ပဒနလိနံ၊
ခမ ဂေါတမ မုနိသတ္တမ တမိဒံ မမ ခလိတံ။
ပရသန္တက ဟရဏေ ကတမတိ ဗဉ္စန ဗဟုလော၊
ဃရသန္ဓိက ပရိပန္ထိက သဟသာကတိ နိရတော၊
န သရိံ သကိဒပိ တေ ပိတ ဘဇိတုံ ပဒနလိနံ၊
ခမ ဂေါတမ မုနိပုင်္ဂဝ တမိဒံ မမ ခလိတံ။
နဝယောဗ္ဗန မဒဂဗ္ဗိတ ပရိမုစ္ဆိတ ဟဒယော၊
သုစိသဇ္ဇန ဝိဇိဂုစ္ဆိယ ပရဒါရိက နိရတော၊
န သရိံ သကိဒပိ တေ ပိတ ဘဇိတုံ ပဒနလိနံ၊
ခမ ဂေါတမ ကရုဏာဘရ တမိဒံ မမ ခလိတံ။
မဒိရာသဝရတ နာဂရဇန သန္တတ ဘဇိတော၊
ဂရုဂါရဝ ဟိရိဒူရိတ တိရိယဂ္ဂတ စရိတော၊
န သရိံ သကိဒပိ တေ ပိတ ဘဇိတုံ ပဒနလိနံ၊
ခမ ဂေါတမ ဝိဟတာသဝ တမိဒံ မမ ခလိတံ။
သပိတာမဟ ပပိတာမဟ နိစိတံ ဓနံ အမိတံ၊
ပိတုသဉ္စိတမပိ နာသိယ ကိတဝေါ ဟတဝိဘဝေါ၊
န သရိံ သကိဒပိ တေ ပိတ ဘဇိတုံ ပဒနလိနံ၊
ခမ ဂေါတမ ဝိဇိတန္တက တမိဒံ မမ ခလိတံ။
ဝိတထာလိက ဝစနော ပရပိယသုညတ ကရဏော၊
ဖရုသံ ဘဏံ အတိနိပ္ဖလ ဗဟုဘာသန နိပုဏော၊
န သရိံ သကိဒပိ တေ ပိတ ဘဇိတုံ ပဒနလိနံ၊
ခမ ဂေါတမ ဘုဝနေသုတ တမိဒံ မမ ခလိတံ။
ပရသမ္ပဒံ အဘိဈာယန နိရန္တရ ဒုခိတော၊
နဘိရဇ္ဈန ပရမော ကွစိ ဖလဒဿန ရဟိတော၊
န သရိံ သကိဒပိ တေ ပိတ ဘဇိတုံ ပဒနလိနံ၊
ခမ ဂေါတမ ဂုဏသာဂရ တမိဒံ မမ ခလိတံ။
ဘဝတော ဘဝံ အပရာပရံ အယတာစိရံ ဣတိ မေ၊
ဝပုသာ အထ ဝစသာပိ စ မနသာ ကတံ အမိတံ၊
ခမ ဂေါတမ ဒုရိတာပဟ ဒုရိတံ ဗဟုဝိဟိတံ၊
ဒဒ မေ သိဝပဒံ အစ္စုတံ အမတံ ဘဝဝိဂတံ။
တိမိရာဝုတ ကုဏပါကုလ ဝိဇိဂုစ္ဆိယ ပဝနေ၊
ဇနိကာသုစိ ဇဌရေ ဗဟု ကိမိသန္တတိ သဒနေ၊
အသယိံ ဘဝဂဟဏေ စရံ အဟံ အပ္ပဋိသရဏေ၊
သရနံ ဘဝ ဘဂဝံ မမ ဘဝနီရဓိ တရဏေ။
ဗဟိ နိက္ခမံ အသကိံ ဘဂတိရိယံ ပထ ပတိတော၊
အဂဒင်္ကရ ကတ သလ္လက သတခဏ္ဍိတ ကရဏော၊
အမရိံ ဘဝဂဟဏေ စရံ အဟံ အပ္ပဋိသရဏေ၊
သရဏံ ဘဝ ဘဂဝံ မမ ဘဝနီရဓိ တရနေ။
ပတိတော ဗဟိ ရတိပိလ္လက တနုရာမယ မထိတော၊
ဝဒိတုံ ကိမု ဝိဒိတုမ္ပိ စ န သဟံ မတိရဟိတော၊
အမရိံ ဘဝဂဟဏေ စရံ အဟံ အပ္ပဋိသရဏေ၊
သရဏံ ဘဝ ဘဂဝံ မမ ဘဝနီရဓိ တရဏေ။
ဇနိတော ယဒိ သုခိတော ဇနဒယိတော ပိယဇနကော၊
ပုထုကော ဗဟုဝိဓ-ကီလနနိရတော ဂဒဂဟိတော၊
အမရိံ ဘဝဂဟဏေ စရံ အဟံ အပ္ပဋိသရဏေ၊
သရဏံ ဘဝ ဘဂဝံ မမ ဘဝနီရဓိ တရဏေ။
တရုနောပိ ဟိ ဃရဗန္ဓန ဂထိတောမိတ ဝိဘဝေါ၊
သဟသာ ဂဒဂဟိတော ပိယဘရိယာသုတ ဝိယုတော၊
အမရိံ ဘဝဂဟဏေ စရံ အဟံ အပ္ပဋိသရဏေ၊
သရဏံ ဘဝ ဘဂဝံ မမ ဘဝနီရဓိ တရဏေ။
အဇရံ တနုံ အဘိမညိယ နဝယောဗ္ဗန ဝသိကော၊
ဇရသာ ပရိမထိတော ပရံ အနနုဋ္ဌိတ ကုသလော၊
အမရိံ ဘဝဂဟဏေ စရံ အဟံ အပ္ပဋိသရဏေ၊
သရဏံ ဘဝ ဘဂဝံ မမ ဘဝနီရဓိ တရဏေ။
နိရုဇော ဓုဝံ အရုဇံ တနုံ အဘိမညိယ သမဒေါ၊
ကုသလာသယ ဝိမုခေါ ဘုသံ အဝသော ဂဒနိဟတော၊
အမရိံ ဘဝဂဟဏေ စရံ အဟံ အပ္ပဋိသရဏေ၊
သရဏံ ဘဝ ဘဂဝံ မမ ဘဝနီရဓိ တရဏေ။
ပဝိစိန္တိယ သကဇီဝိတံ အမရံ ဓုဝံ အနိဃံ၊
ဣတိ ဇီဝိတမဒဂဗ္ဗိတ မတိရုဇ္ဈိတ ကုသလော၊
အမရိံ ဘဝဂဟဏေ စရံ အဟံ အပ္ပဋိသရဏေ၊
သရဏံ ဘဝ ဘဂဝံ မမ ဘဝနီရဓိ တရဏေ။
ပရဟိံသန ဓနမောသန ပရဒါရိက နိရတော၊
ဓရနီပတိ ဂဟိတော ဗဟု ဝဓဗန္ဓန နိဟတော၊
အမရိံ ဘဝဂဟဏေ စရံ အဟံ အပ္ပဋိသရဏေ၊
သရဏံ ဘဝ ဘဂဝံ မမ ဘဝနီရဓိ တရဏေ။
နရကောဒက ပတိတော ဂိရိတရုမတ္ထက ဂလိတော၊
မိဂဝါဠက ဂဟိတော ဝိသဓရ ဇာတိဟိ ဍသိတော၊
အမရိံ ဘဝဂဟဏေ စရံ အဟံ အပ္ပဋိသရဏေ၊
သရဏံ ဘဝ ဘဂဝံ မမ ဘဝနီရဓိ တရဏေ။
အဘိစာရက ဝိဓိကောပိတ နိသိစာရက ဂဟိတော၊
သဝိသောဒန သဟသာဒန ပဘုတီဟိ စ ခလိတော၊
အမရိံ ဘဝဂဟဏေ စရံ အဟံ အပ္ပဋိသရဏေ၊
သရဏံ ဘဝ ဘဂဝံ မမ ဘဝနီရဓိ တရဏေ။
သယမေဝစ သဇနောပရိ ကုပိတော မတိဝိယုတော၊
သဝိသာဒန ဂလကန္တန ပဘုတာမိတ ခလိတော၊
အမရိံ ဘဝဂဟဏေ စရံ အဟံ အပ္ပဋိသရဏေ၊
သရဏံ ဘဝ ဘဂဝံ မမ ဘဝနီရဓိ တရဏေ။
ပိတုပူဇန နိရတာသယ သုခိတော ပိတုဒယိတော၊
မရဏေနစ ပိတုနော ဘုသံ အနုသောစန နိရတော၊
ပရုဒိံ စိရံ အတိဒုဿဟ ကသိရေ ဘဝဂဟဏေ၊
သရဏံ ဘဝ ဘဂဝံ မမ ဘဝနီရဓိ တရဏေ။
သမုပဋ္ဌိယ ဇနိကံ နိဇံ အဘိဝါဒန ပရမော၊
မရဏေနစ ဇနိကာယနုသရိတာ ဂုဏမဟိမံ၊
ပရုဒိံ စိရံ အတိဒုဿဟ ကသိရေ ဘဝဂဟဏေ၊
သရဏံ ဘဝ ဘဂဝံ မမ ဘဝနီရဓိ တရဏေ။
ဂုရုဒေဝတ ပတိမာနန ပရမော ပိယသုဝစော၊
သမုပါသိတစရဏော ဂုရုမရဏေနတိဒုခိတော၊
ပရုဒိံ စိရံ အတိဒုဿဟ ကသိရေ ဘဝဂဟဏေ၊
သရဏံ ဘဝ ဘဂဝံ မမ ဘဝနီရဓိ တရဏေ။
ဃရမေဓိတံ ဥပဂေါမိတဝိဘဝေါ ရတိဗဟုလော၊
မရဏေ ပိယဘရိယာသုတဒုဟိတူ’နတိကရုဏံ၊
ပရုဒိံ စိရံ အတိဒုဿဟ ကသိရေ ဘဝဂဟဏေ၊
သရဏံ ဘဝ ဘဂဝံ မမ ဘဝနီရဓိ တရဏေ။
ပိယပုဗ္ဗဇ သဟဇာနုဇ ဘဂိဏိဒွယ မရဏေ၊
နိဇ ဗန္ဓဝ-သခ-သိဿက မရဏေ ပျတိကရုဏံ၊
ပရုဒိံ စိရံ အတိဒုဿဟ ကသိရေ ဘဝဂဟဏေ၊
သရဏံ ဘဝ ဘဂဝံ မမ ဘဝနီရဓိ တရဏေ။
ဇဂတီပတိ ဂဟဏာ ရိပုဇနတက္ကရ ဟရဏာ၊
သရိတောဒက ဝဟဏာ ပုထုဇလိတာနလ ဒဟဏာ၊
ပရုဒိံ ဟတဝိဘဝေါ စိရမိဟ ဒုဂ္ဂတိဂဟဏေ၊
သရဏံ ဘဝ ဘဂဝံ မမ ဘဝနီရဓိ တရဏေ။
အတိဒုဂ္ဂမ ဝိသမာကုလ ဘဝသင်္ကဋ ပတိတေ၊
ဗျသနံ စိရမိတိ ဒုဿဟံ အနုဘူယပိ ဝိမိတံ၊
န ဇဟေ သုခလဝဝဉ္စိတဟဒယော ဘဝတသိနံ၊
တမပါကုရု ကရုဏာနိဓိ တသိနံ မမ ကသိဏံ။
ဇနနာဝဓိ မရဏံ ဝိယ မရဏာဝဓိ ဇနနံ၊
ဥဘယေနပိ ဘယမေဝဟိ ဘဝတော မမ နိယတံ၊
သိဝမေဝစ ဇနနာဝဓိ မရဏာဝဓိ ရဟိတံ၊
ဒဒ မေ သိဝံ အမတန္ဒဒ တံ အနာသဝ ဘဂဝံ။
စိရဒိက္ခိတမပိ မေ မနံ အနိဝါရိတ တသိနံ၊
ဘဝတော ဘဝ ရတိပီလိတံ အဟဟော ကလိဃဋိတံ!
တမတော ပိတ ဘယတော မမမဝ မေ ဘဝ သရဏံ၊
ဘဂဝံ ပဋိသရဏံ မမ ဘဝနီရဓိ တရဏံ။