အည > ဝံသ-ဂန္ထ-သင်္ဂဟော

ဝိနယပိဋကံ၊ အဘိဓမ္မပိဋကံ သုတ္တန္တပိဋကန္တိ။ တတ္ထ ကတမံ ဝိနယ ပိဋကံ? ပါရာဇိကကဏ္ဍံ၊ ပါစိတ္တိယကဏ္ဍံ၊ မဟာဝဂ္ဂကဏ္ဍံ၊ စုလ္လဝဂ္ဂကဏ္ဍံ၊ ပရိဝါရကဏ္ဍန္တိ။ ဣမာနိ ကဏ္ဍာနိ ဝိနယပိဋကံ နာမ။

ကတမံ အဘိဓမ္မပိဋကံ? ဓမ္မသင်္ဂဏီ-ပကရဏံ၊ ဝိဘင်္ဂ-ပကရဏံ၊ ဓာတုကထာ-ပကရဏံ၊ ပုဂ္ဂလပညတ္တိ-ပကရဏံ၊ ကထာဝတ္ထု-ပကရဏံ၊ ယမက-ပကရဏံ၊ ပဋ္ဌာန-ပကရဏန္တိ။ ဣမာနိ သတ္တ ပကရဏာနိ အဘိဓမ္မပိဋကံ နာမ။ ကတမံ သုတ္တန္တပိဋကံ? သီလက္ခန္ဓဝဂ္ဂါဒိကံ၊ အဝသေသံ ဗုဒ္ဓဝစနံ သုတ္တန္တပိဋကံ နာမ။

ကထံ နိကာယတော? နိကာယာ ပဉ္စ ဝိဓာ ဟောန္တိ။ ဒီဃနိကာယော၊ မဇ္ဈိမနိကာယော၊ သံယုတ္တနိကာယော၊ အင်္ဂုတ္တရနိကာယော၊ ခုဒ္ဒကနိကာယောတိ။

တတ္ထ ကတမော ဒီဃ-နိကာယော? သီလက္ခန္ဓဝဂ္ဂေါ၊ မဟာဝဂ္ဂေါ၊ ပါထိကဝဂ္ဂေါတိ၊ ဣမေ တယော ဝဂ္ဂါ ဒီဃနိကာယော နာမ။ ဣမေသု တီသု ဝဂ္ဂေသု၊ စတုတိံသ ဝဂ္ဂါနိ စ ဟောန္တိ။ [စတုတိံသေဝ သုတ္တန္တာ၊ သီလက္ခန္ဓဝဂ္ဂါဒိကာ၊ ယဿ ဘဝန္တိ သော ယေဝ ဒီဃနိကာယ နာမ ဟောတိ။]

ကတမော မဇ္ဈိမနိကာယော? မူလပဏ္ဏာသော၊ မဇ္ဈိမပဏ္ဏာသော၊ ဥပရိပဏ္ဏာသောတိ၊ ဣမေ တယော ပဏ္ဏာသာ မဇ္ဈိမနိကာယော နာမ။ ဣမေသု တီသု ပဏ္ဏာသေသု ဒွေပညာသာဓိက-သုတ္တ-သတာနိ ဟောန္တိ [ဒိယဍ္ဎသတသုတ္တန္တာ၊ ဒွိ သုတ္တံ ယဿ သန္တိသော၊ မဇ္ဈိမနိကာယော နာမော မူလပဏ္ဏာသမာဒိ ဟောတိ။]

ကတမော သံယုတ္တနိကာယော? သဂါထာဝဂ္ဂေါ၊ နိဒါနဝဂ္ဂေါ၊ ခန္ဓကဝဂ္ဂေါ၊ သဠာယတနဝဂ္ဂေါ၊ မဟာဝဂ္ဂေါတိ၊ ဣမေ ပဉ္စ ဝဂ္ဂါ သံယုတ္တနိကာယော နာမ။ ဣမေသု ပဉ္စသု ဝဂ္ဂေသု ဒွါသဋ္ဌိသုတ္တသတ္တသတာဓိကသတ္တ-သုတ္တသဟဿာနိ ဟောန္တိ။ [ဒွါသဋ္ဌိ-သတ္တ-သတာနိ၊ သတ္တသဟဿကာနိ စ။] သုတ္တာနိ ယဿ ဟောန္တိ သော၊ သဂါထာဒိကဝဂ္ဂကော၊ သံယုတ္တနိကာယော နာမော ဝေဒိတဗ္ဗော စ ဝိညူနာတိ။

ကတမော အင်္ဂုတ္တရနိကာယော? ဧက္ကနိပါတော၊ ဒုက္ကနိပါတော၊ တိက္ကနိပါတော၊ စတုက္ကနိပါတော၊ ပဉ္စကနိပါတော၊ ဆက္ကနိပါတော၊ သတ္တကနိပါတော၊ အဋ္ဌကနိပါတော၊ နဝကနိပါတော၊ ဒသကနိပါတော၊ ဧကာဒသနိပါတောတိ၊ ဣမေ ဧကာဒသ နိပါတာ အင်္ဂုတ္တရနိကာယော နာမ။ ဣမေသု ဧကာဒသ နိပါတေသု သတ္တ-ပညာသ-ပဉ္စ-သတာဓိကနဝ-သုတ္တ-သဟဿာနိ ဟောန္တိ။ [နဝသုတ္တသဟဿာနိ၊ ပဉ္စသတမတ္တာနိ စ၊ သတ္တပညာသာဓိကာနိ၊ သုတ္တာနိ ယဿ ဟောန္တိ သော၊ အင်္ဂုတ္တရနိကာယောတိ၊ ဧက္ကနိပါတကာဒိကောတိ။]

ကတမော ခုဒ္ဒကနိကာယော? ခုဒ္ဒကပါဌော၊ ဓမ္မပဒံ၊ ဥဒါနံ၊ ဣတိဝုတ္တကံ၊ သုတ္တနိပါတော၊ ဝိမာနဝတ္ထု၊ ပေတဝတ္ထု၊ ထေရကထာ၊ ထေရီကထာ၊ ဇာတကံ၊ မဟာနိဒ္ဒေသော၊ ပဋိသမ္ဘိဒါမဂ္ဂေါ၊ အပဒါနံ၊ ဗုဒ္ဓဝံသော၊ စရိယာပိဋကံ၊ ဝိနယပိဋကံ၊ အဘိဓမ္မပိဋကန္တိ။ ဣမေသု သတ္တရသသု ဂန္ထေသု အနေကာနိ သုတ္တ-သဟဿာနိ ဟောန္တိ။ [အနေကာနိ သုတ္တ-သဟဿာနိ၊ နိဒ္ဒိဋ္ဌာနိ မဟေသိနာ၊ နိကာယေ ပဉ္စမေ ဣမေ၊ ခုဒ္ဒကေ ဣတိ ဝိသုတေတိ။]

ကထံ အင်္ဂတော အင်္ဂဟိ နဝ ဝိဓံ ဟောတိ? သုတ္တံ၊ ဂေယျံ၊ ဝေယျာကရဏံ၊ ဂါထာ၊ ဥဒါနံ၊ ဣတိဝုတ္တကံ၊ ဇာတကံ၊ အဗ္ဘုတဓမ္မံ၊ ဝေဒလ္လန္တိ၊ နဝပ္ပဘေဒံ ဟောတိ။ တတ္ထ ဥဘတော ဝိဘင်္ဂနိဒ္ဒေသခန္ဓကပရိဝါရာ၊ သုတ္တနိပါတေ၊ မင်္ဂလသုတ္တ၊ ရတနသုတ္တ၊ တုဝဋ္ဋကသုတ္တာနိ။ အညမ္ပိ သုတ္တနာမကံ တထာဂတဝစနံ၊ သုတ္တန္တိ ဝေဒိတဗ္ဗံ။ သဗ္ဗံ သဂါထကံ ဂေယျန္တိ ဝေဒိတဗ္ဗံ။ ဝိသေသနသံယုတ္တကေ သကလောပိ သဂါထကဝဂ္ဂေါ၊ သကလံ အဘိဓမ္မပိဋကံ နိဂါထကဉ္စ သုတ္တယဉ္စ အညမ္ပိ အဋ္ဌဟိ အင်္ဂေဟိ အသင်္ဂဟိတံ ဗုဒ္ဓဝစနံ တံ ဝေယျာကရဏန္တိ ဝေဒိတဗ္ဗံ။ ဓမ္မပဒံ၊ ထေရကထာ၊ ထေရီကထာ၊ သုတ္တနိပါတေ၊ နော သုတ္တနာမိကာ သုဒ္ဓိကဂါထာ၊ ဂါထာတိ ဝေဒိတဗ္ဗာ။ သောမနဿ ဉာဏမယိကဂါထာ ပဋိက-သံယုတ္တာ ဒွေ အသီတိသုတ္တန္တာ ဥဒါနန္တိ ဝေဒိတဗ္ဗာ။ ဝုတ္တဉှေတံ ဘဂဝတာတိအာဒိနယပ္ပဝတ္တာ ဒသုတ္တရသတသုတ္တန္တာ၊ ဣတိဝုတ္တကန္တိ ဝေဒိတဗ္ဗာ။ အပဏ္ဏကဇာတကာဒီနိ ပညာသာဒိကာနိ။ ပဉ္စဇာတကသတာနိ၊ ဇာတကန္တိ ဝေဒိတဗ္ဗံ။ စတ္တာရော မေ ဘိက္ခဝေ အစ္ဆရိယာ အဘူတဓမ္မာ၊ အာနန္ဒေတိအာဒိနယပ္ပဝတ္တာ သဗ္ဗေပိ အစ္ဆရိယ အဘူတဓမ္မပဋိသံယုတ္တာ သုတ္တန္တာ အဘူတဓမ္မန္တိ ဝေဒိတဗ္ဗာ။ စုလ္လဝေဒလ္လ၊ မဟာဝေဒလ္လ၊ သမ္မာဒိဋ္ဌိ၊ သက္ကပဉှ၊ သင်္ခါရဘာဇနိယ၊ မဟာပုဏ္ဏမသုတ္တန္တာဒယော သဗ္ဗေပိ ဝေဒဉ္စ တုဋ္ဌိဉ္စ လဒ္ဓါ [ပုစ္ဆ] လဒ္ဓါ ပုစ္ဆိတသုတ္တန္တာ၊ ဝေဒလ္လန္တိ ဝေဒိတဗ္ဗာ။ ကတမာနိ စတုရာသီတိ ဓမ္မက္ခန္ဓသဟဿာနိ ဒုဇာနာနိ၊ စတုရာသီတိ ဓမ္မက္ခန္ဓသဟဿာနိ သစေ ဝိတ္ထာရေန ကထိဿံ အတိပပဉ္စော ဘဝိဿတိ။ တသ္မာ နယ ဝသေန ကထိဿာမိ။ ဧကံ ဝတ္ထု၊ ဧကော ဓမ္မက္ခန္ဓော၊ ဧကံ နိဒါနံ ဧကော ဓမ္မက္ခန္ဓော၊ ဧကံ ပဉှာ ပုစ္ဆန္တံ ဧကော ဓမ္မက္ခန္ဓော၊ ဧကံ ပဉှာ ဝိသဇ္ဇနံ ဧကော ဓမ္မက္ခန္ဓော၊ စတုရာသီတိ ဓမ္မက္ခန္ဓသဟဿာနိ ကေန ဘာသိတာနိ၊ ကတ္ထ ဘာသိတာနိ၊ ကဒါ ဘာသိတာနိ၊ ကမာရဗ္ဘ ဘာသိတာနိ၊ ကိမတ္ထံ ဘာသိတာနိ၊ ကေန ဓာရိတာနိ၊ ကေနာဘတာနိ၊ ကိမတ္ထံ ပရိယာပုဏိတဗ္ဗာနိ။ တတြာယံ ဝိသဇ္ဇနာ၊ ကေန ဘာသိတာနီတိ? ဗုဒ္ဓါနု ဗုဒ္ဓေဟိ ဘာသိတာနိ။ ကတ္ထ ဘာသိတာနီတိ? ဒေဝေသု စ မာနုဿေသု စ၊ ဘာသိတာနိ။ ကဒါ ဘာသိတာနီတိ? ဘဂဝတော ဓရမာနကာလေ စေဝ ပစ္ဆိမကာလေ စ ဘာသိတာနိ။ ကတမာရဗ္ဘ ဘာသိတာနီတိ? ပဉ္စဝဂ္ဂိယာဒိကေ ဝေနေယျ ဗန္ဓဝေ အာရဗ္ဘ ဘာသိတာနီတိ။ ကိမတ္ထံ ဘာသိတာနီတိ? တိဝဇ္ဇဉ္စ အဝဇ္ဇဉ္စ ဉတွာ ဝဇ္ဇံ ပဟာယ အဝဇ္ဇေ ပဋိပတ္တိတွာ နိဗ္ဗာနပရိယန္တေ။ ဒိဋ္ဌ-ဓမ္မိကသမ္ပရာယိကတ္ထေ သမ္ပာပုဏိတုံ။

ကေန ဓာရိတာနီတိ? အနုဗုဒ္ဓေဟိ စေဝ သိဿာနုသိဿေဟိ စ ဓာရိတာနိ။ ကေနာ ဘတာနီတိ? အာစရိယ ပရံပရေဟိ အာဘတာနိ။ ကိမတ္ထံ ပရိယာပုဏိတဗ္ဗာနီတိ? ဝဇ္ဇဉ္စ အဝဇ္ဇဉ္စ ဉတွာ ဝဇ္ဇံ ပဟာယ အဝဇ္ဇေ ပဋိပတ္တိတွာ နိဗ္ဗာနပရိယန္တေ ဒိဋ္ဌဓမ္မိကသမ္ပရာယိကတ္ထေ၊ သံပါပုဏိတုံ၊ ယဒေဝံ တာယ နိဗ္ဗာနပရိယန္တေ ဒိဋ္ဌဓမ္မိကသမ္ပရာယိကတ္ထေ သာဓိကာနိ ဟောန္တိ။ တေဝ တတ္ထ ကေဟိ အပ္ပမတ္တေန ပရိယာပုဏိတဗ္ဗာနိ ဓာရေတဗ္ဗာနိ ဓာရေတဗ္ဗာနိ ဝါစေတဗ္ဗာနိ သဇ္ဈာယံ ကာတဗ္ဗာနီတိ [ဣတိ စုလ္လဂန္ထဝံသေ ပိဋကတ္တယ ဒီပကော နာမ ပဌမော ပရိစ္ဆေဒေါ။]

အာစရိယော ပန အတ္ထိ။ ပေါရာဏာစရိယာ အတ္ထိ၊ အဋ္ဌကထာစရိယာ အတ္ထိ၊ ဂန္ထကာရကာစရိယာ အတ္ထိ၊ တိဝိဓနာမိကာစရိယာ။ ကတမေ ပေါရာဏာစရိယာ? ပဌမသင်္ဂါယနာယံ ပဉ္စသတာ ခီဏာသဝါ ပဉ္စန္နံ နိကာယာနံ နာမဉ္စ အတ္ထဉ္စ အဓိပ္ပာယဉ္စ ယဒဉ္စ ဗျဉ္ဇန သောဓနဉ္စ အဝသေသံ ကိစ္စံ ကရိံသု။ ဒုတိယသင်္ဂါယနာယံ သတ္တသတာ ခီဏာသဝါ တေသံယေဝ သဒ္ဒတ္ထာဒိကံ ကိစ္စံ ပုန ကရိံသု။ တတိယသင်္ဂါယနာယံ သဟဿမတ္တာ ခီဏာသဝါ တေသံယေဝ သဒ္ဒတ္ထာဒိကံ ကိစ္စံ ပုန ကရိံသု။ ဣစ္စေဝံ ဒွေသတာဓိကာ ဒွေသဟဿ ခီဏာသဝါ မဟာကစ္စာယနံ ဌပေတွာ အဝသေသာ ပေါရာဏာစရိယာ နာမ။ ယေ ပေါရာဏာစရိယာ တေယေဝ အဋ္ဌကထာစရိယာ နာမ။ ကတမေ ဂန္ထကာရကာစရိယာ? မဟာအဋ္ဌကထိကာပေဘဒအနေကာစရိယာ ဂန္ထကာရကာစရိယာ နာမ။ ကတမေ တိဝိဓ နာမာစရိယာ မဟာကစ္စာယနော တိဝိဓနာမံ။ ကတမေ ဂန္ထာ မဟာကစ္စာယနေန ကတာ? ကစ္စာယနဂန္ထော၊ မဟာနိရုတ္တိဂန္ထော၊ စုလ္လနိရုတ္တိဂန္ထော၊ ယမကဂန္ထော၊ နေတ္တိဂန္ထော၊ ပေဋကောပဒေသဂန္ထောတိ၊ ဣမေ ဆ ဂန္ထာ မဟာကစ္စာယနေန ကတာ။ ကတမေ အနေကာစရိယေန ကတာ ဂန္ထာ? မဟာပစ္စရိကာစရိယော မဟာပစ္စရိယံ နာမ ဂန္ထံ အကာသိ။ မဟာကုရုန္ဒိကာစရိယော ကုရုန္ဒိ နာမ ဂန္ထံ အကာသိ။ အညတရော အာစရိယော မဟာပစ္စရိယ ဂန္ထဿ အဋ္ဌကထံ အကာသိ။ အညတရော အာစရိယော ကုရုန္ဒိ ဂန္ထဿ အဋ္ဌကထံ အကာသိ၊ မဟာဗုဒ္ဓဃောသာ နာမစရိယော ဝိသုဒ္ဓိမဂ္ဂေါ ဒီဃနိကာယဿ သုမင်္ဂလဝိလာသနိ နာမ အဋ္ဌကထာ၊ မဇ္ဈိမနိကာယဿ ပပဉ္စသူဒနီ နာမ အဋ္ဌကထာ၊ သံယုတ္တနိကာယဿ သာရတ္ထပ္ပကာသိနီ နာမ အဋ္ဌကထာ၊ အင်္ဂုတ္တရနိကာယဿ မနောရထပူရဏီ နာမ အဋ္ဌကထာ၊ ပဉ္စဝိနယ ဂန္ထာနံ သမန္တပါသာဒိကာ နာမ အဋ္ဌကထာ၊ သတ္တန္နံ အဘိဓမ္မဂန္ထာနံ ပရမတ္ထကထာ နာမ အဋ္ဌကထာ၊ ပါတိမောက္ခ သံခါတာယ မာတိကာယ ကင်္ခါဝိတရဏီတိ ဝိသုဒ္ဓိ နာမ အဋ္ဌကထာ၊ ဓမ္မပဒဿ အဋ္ဌကထာ၊ ဇာတကဿ အဋ္ဌကထာ၊ ခုဒ္ဒကပါဌဿ အဋ္ဌကထာ၊ သုတ္တနိပါတဿ အဋ္ဌကထာ၊ အပဒါနဿ အဋ္ဌကထာတိ၊ ဣမေ တေရသ ဂန္ထေ အကာသိ။ ဗုဒ္ဓဒတ္တောနာမာစရိယော ဝိနယ ဝိနိစ္ဆယော၊ ဥတ္တရဝိနိစ္ဆယော၊ အဘိဓမ္မာဝတာရော၊ ဗုဒ္ဓဝံသဿ မဓုရတ္ထဝိလာသိနီ နာမ အဋ္ဌကထာတိ၊ ဣမေ စတ္တာရော ဂန္ထေ အကာသိ။ အာနန္ဒောနာမာစရိယာ သတ္တာဘိဓမ္မဂန္ထဋ္ဌကထာယ မူဋီကံ နာမ ဋီကံ အကာသိ။ ဓမ္မပါလာစရိယော နေတ္တိပ္ပကရဏဋ္ဌကထာ၊ ဣတိဝုတ္တကဋ္ဌကထာ၊ ဥဒါနဋ္ဌကထာ၊ စရိယာပိဋကဋ္ဌကထာ၊ ထေရကထဋ္ဌကထာ၊ ထေရီကထဋ္ဌကထာ၊ ဝိမာနဝတ္ထုဿ ဝိမလဝိလာသိနိ နာမ အဋ္ဌကထာ၊ ပေတဝတ္ထုဿ ဝိမလဝိလာသိနိ နာမ အဋ္ဌကထာ၊ ဝိသုဒ္ဓိမဂ္ဂဿ ပရမတ္ထမဉ္ဇူသာ နာမ ဋီကာ၊ ဒီဃနိကာယဿ အဋ္ဌကထာဒီနံ စတုန္နံ အဋ္ဌကထာနံ လီနတ္ထပ္ပကာသနိ နာမ ဋီကာ၊ ဇာတကဋ္ဌကထာယ လီနတ္ထပ္ပကာသနိ နာမ ဋီကာ၊ နေတ္တိပကရဏဋ္ဌကထာယ ဋီကာ၊ ဗုဒ္ဓဝံသဋ္ဌကထာယ ပရမတ္ထဒီပနီ နာမ ဋီကာ၊ အဘိဓမ္မဋ္ဌကထာယဋီကာ လီနတ္ထဝဏ္ဏနာ နာမ အနုဋီကာတိ ဣမေ စုဒ္ဒသ မတ္တေ ဂန္ထေ အကာသိ။

ဒွေ ပုဗ္ဗာစရိယာနာမာ စရိယာနိရုတ္တိ မဉ္ဇူသံ နာမ စုလ္လနိရုတ္တိ ဋီကဉ္စ မဟာနိရုတ္တိ သင်္ခေပဉ္စ အကံသု။ မဟာဝဇိရဗုဒ္ဓိနာမာစရိယော ဝိနယဂဏ္ဌိနာမ ပကရဏံ အကာသိ။ ဒီပင်္ကရသင်္ခါတော ဝိမလဗုဒ္ဓိ နာမာစရိယော မုခမတ္တဒီပနီ နာမကံ နျာသပ္ပကရဏံ အကာသိ။ စုလ္လဝဇိရဗုဒ္ဓိ နာမာစရိယော အတ္ထဗျာချာနံ နာမ ပကရဏံ အကာသိ။

ဒီပင်္ကရော နာမာစရိယော ရူပသိဒ္ဓိ ပကရဏံ၊ ရူပသိဒ္ဓိ ဋီကံ၊ သမ္ပပဉ္စ သုတ္တဉ္စေတိ တိဝိဓံ ပကရဏံ အကာသိ။ အာနန္ဒာစရိယဿ ဇေဋ္ဌသိဿော ဓမ္မပါလော နာမာစရိယော သစ္စသင်္ခေပံ နာမ ပကရဏံ အကာသိ။ ကဿပေါ နာမာစရိယော မောဟဝိစ္ဆေဒနီ၊ ဝိမတိစ္ဆေဒနီ၊ ဒသဗုဒ္ဓဝံသော၊ အနာဂတဝံသောတိ၊ စတုဝိဓံ ပကရဏံ အကာသိ။

မဟာနာမော နာမာစရိယော၊ သဒ္ဓမ္မပကာသနီ နာမ ပဋိသမ္ဘိဒါမဂ္ဂဿ အဋ္ဌကထံ အကာသိ။ ဒီပဝံသော၊ ထူပဝံသော၊ ဗောဓိဝံသော၊ စူလဝံသော၊ မဟာဝံသော၊ ပဋိသမ္ဘိဒါမဂ္ဂဋ္ဌကထာ ဂဏ္ဌိ စေတိ ဣမေ ဆ ဂန္ထာ မဟာနာမာစရိ ဝိသုံ ဝိသုံ ကတာ။

နဝေါ မဟာနာမော နာမာစရိယော နဝံ မဟာဝံသ နာမ ပကရဏံ အကာသိ။ ဥပသေနော နာမာစရိယော သဒ္ဓမ္မပဇ္ဇောတိကံ နာမ မဟာနိဒ္ဒေသဿ အဋ္ဌကထံ အကာသိ။ မောဂ္ဂလာနော နာမာစရိယော မောဂ္ဂလာနဗျာကရဏံ နာမ ပကရဏံ အကာသိ။ သင်္ဃရက္ခိတော နာမာစရိယော၊ သုဗောဓာလင်္ကာရံ နာမ ပကရဏံ အကာသိ။ ဝုတ္တောဒယကာရော နာမာစရိယော ဝုတ္တောဒယံ နာမ ပကရဏံ အကာသိ။ ဓမ္မသိရိ နာမာစရိယော ခုဒ္ဒကသိက္ခံ နာမ ပကရဏံ အကာသိ။ ပုရာဏခုဒ္ဒသိက္ခာယ ဋီကာ၊ မူလသိက္ခာ စေတိ၊ ဣမေ ဒွေ ဂန္ထာ ဒွေဟာစရိယေဟိ ဝိသုံ ဝိသုံ ကတာ။

အနုရုဒ္ဓါ နာမာစရိယော ပရမတ္ထဝိနိစ္ဆယံ၊ နာမရူပပရိစ္ဆေဒံ၊ အဘိဓမ္မတ္ထသင်္ဂဟံ စေတိ တိဝိဓံ ပကရဏံ အကာသိ။ ခေမော နာမာစရိယော ခေမံ နာမ ပကရဏံ အကာသိ။ သာရိပုတ္တော နာမာစရိယော ဝိနယဋ္ဌကထာယ သာရတ္ထဒီပနီ နာမ ဋီကံ၊ ဝိနယသင်္ဂဟပကရဏံ၊ ဝိနယသင်္ဂဟဿဋီကံ၊ အင်္ဂုတ္တရဋ္ဌကထာယ သာရတ္ထမဉ္ဇူသံ နာမ နဝံ ဋီကံ၊ ပဉ္စိကာ ဋီကဉ္စေတိ၊ ဣမေ ပဉ္စ ဂန္ထေ အကာသိ။ ဗုဒ္ဓနာဂေါ နာမာစရိယော ဝိနယတ္ထမဉ္ဇူသံ နာမ ကင်္ခါဝိတရဏီယာ ဋီကံ အကာသိ။ နဝေါ မောဂ္ဂလာနော နာမာစရိယော အဘိဓာနပ္ပဒီပိကံ နာမ ပကရဏံ အကာသိ။ ဝါစိဿရော နာမာစရိယော မဟာသာမိ နာမ သုဗောဓာလင်္ကာရဿ ဋီကာ၊ ဝုတ္တောဒယ ဝိဝရဏံ၊ သုမင်္ဂလပ္ပသာဒနိ နာမ ခုဒ္ဒသိက္ခာယ ဋီကာ၊ သမ္ဗန္ဓစိန္တာ၊ သမ္ဗန္ဓစိန္တာယ ဋီကာ၊ ဗာလာဝတာရော၊ မောဂ္ဂလာနဗျာကရဏဿ ပဉ္စိကာယ ဋီကာ၊ ယောဂဝိနိစ္ဆယော၊ ဝိနယဝိနိစ္ဆယဿ ဋီကာ၊ ဥတ္တရဝိနိစ္ဆယဿ ဋီကာ၊ နာမရူပ-ပရိစ္ဆေဒဿ ဝိဘာဂေါ၊ သဒ္ဒတ္ထဿ ပဒရူပဝိဘာဝနံ၊ ခေမဿ ပကရဏဿ ဋီကာ၊ သီမာလင်္ကာရော၊ မူလသိက္ခာယ ဋီကာ၊ ရူပဝိဘာဂေါ၊ ပစ္စယသင်္ဂဟော၊ သစ္စသင်္ခေပဿ ဋီကာ စေတိ၊ ဣမေ အဋ္ဌာရသ ဂန္ထေ အကာသိ။

သုမင်္ဂလော နာမာစရိယော အဘိဓမ္မာဝတာရဿဋီကံ၊ အဘိဓမ္မတ္ထသင်္ဂဟဿဋီကဉ္စ ဒုဝိဓံ ပကရဏံ အကာသိ။ ဗုဒ္ဓပိယော နာမာစရိယော သာရတ္ထသင်္ဂဟံ နာမ ပကရဏံ အကာသိ။ ဓမ္မကိတ္တိ နာမာစရိယော ဒန္တဓာတု ပကရဏံ အကာသိ။ မေဓင်္ကရော နာမာစရိယော ဇိနစရိတံ နာမ ပကရဏံ အကာသိ။ ဗုဒ္ဓရက္ခိတော နာမာစရိယော ဇိနလင်္ကာရံ၊ ဇိနလင်္ကာရဿ ဋီကဉ္စာတိ ဒုဝိဓံ ပကရဏံ အကာသိ။ ဥပတိဿော နာမာစရိယော အနာဂတဝံသဿ အဋ္ဌကထံ အကာသိ။

ကင်္ခါဝိတရဏီယာ လီနတ္ထပ္ပကာသိနိ၊ နိသန္ဒေဟော၊ ဓမ္မာနုသာရဏီ၊ ဉေယျာသန္တတိ၊ ဉေယျာသန္တတိယာ ဋီကာ၊ သုမတာဒါဝတာရော၊ လောကပညတ္တိ ပကရဏံ၊ တထာဂတုပ္ပတ္တိ ပကရဏံ၊ နလာဋဓာတု ဝဏ္ဏနာ၊ သီဟဠဝတ္ထု၊ ဓမ္မဒီပကော၊ ပဋိပတ္တိသင်္ဂဟော၊ ဝိသုဒ္ဓိမဂ္ဂဏ္ဌိ၊ အဘိဓမ္မဂဏ္ဌိ၊ နေတ္တိပကရဏဂဏ္ဌိ၊ ဝိသုဒ္ဓိမဂ္ဂစုလ္လနဝဋီကာ၊ သောတဗ္ဗမာလိနီ၊ ပသာဒဇနနီ၊ ဩကာသလောကော၊ သုဗောဓာလင်္ကာရဿ နဝ ဋီကာ စေတိ၊ ဣမေ ဝီသတိ ဂန္ထာ ဝီသတာစရိယေဟိ ဝိသုံ ဝိသုံ ကတာ။

သဒ္ဓမ္မသိရိ နာမာစရိယော သဒ္ဒတ္ထဘေဒစိန္တာ နာမ ပကရဏံ အကာသိ။ ဒေဝေါ နာမာစရိယော သုမန ကူဋဝဏ္ဏနံ နာမ ပကရဏံ အကာသိ။ စုလ္လဗုဒ္ဓဃောသော နာမာစရိယော သောတတ္ထကိနိဒါနံ နာမ ပကရဏံ အကာသိ။ ရဋ္ဌပါလော နာမာစရိယော မဓုရသင်္ဂါဟဏီကိတ္တိ နာမ ပကရဏံ အကာသိ။ သုဘူတစန္ဒော နာမာစရိယော လိင်္ဂတ္ထဝိဝရဏ-ပကရဏံ အကာသိ။ အဂ္ဂဝံသော နာမာစရိယော သဒ္ဒနီတိ ပကရဏံ နာမ အကာသိ။ ဝဇိရဗုဒ္ဓိ နာမာစရိယော မဟာဋီကံ နာမ နျာသပကရဏဋီကံ အကာသိ။ ဂုဏသာဂရော နာမာစရိယော မုခမတ္တသာရံ၊ မုခမတ္တသာရဿ ဋီကဉ္စ ဒုဝိဓံ ပကရဏံ အကာသိ။ အဘယော နာမာစရိယော သဒ္ဒတ္ထဘေဒစိန္တာယ မဟာဋီကံ အကာသိ။ ဉာဏသာဂရော နာမာစရိယော လိင်္ဂတ္ထဝိဝရဏပ္ပကာသနံ နာမ ပကရဏံ အကာသိ။ အညတရော အာစရိယော ဂူဠတ္ထဋီကံ၊ ဗာလပ္ပဗောဓနဉ္စ ဒုဝိဓံ ပကရဏံ အကာသိ။ အညတရော အာစရိယော သဒ္ဒတ္ထ-ဘေဒစိန္တာယ မဇ္ဈိမဋီကံ အကာသိ။ ဥတ္တမော နာမာစရိယော ဗာလာဝတာရဋီကံ၊ လိင်္ဂတ္ထဝိဝရဏဋီကဉ္စ ဒုဝိဓံ ပကရဏံ အကာသိ။ အညတရော အာစရိယော သဒ္ဒတ္ထဘေဒစိန္တာယ နဝ-ဋီကံ အကာသိ။ ဧကော အမစ္စော အဘိဓာနပ္ပဒီပိကာယဋီကံ၊ ဂဏ္ဌိပကရဏဿ ဒဏ္ဍီပ္ပကရဏဿ မာဂဓဘူတံ ဋီကံ၊ ကောလဒ္ဓဇနဿ သကဋဘာသာယ ကတဋီကဉ္စ တိဝိဓံ ပကရဏံ အကာသိ။ ဓမ္မသေနာပတိ နာမာစရိယော ကာရိကံ၊ ဧတိမာသပိဒီပနီ၊ မနောဟာရဉ္စ တိဝိဓံ ပကရဏံ အကာသိ။ အညတရော အာစရိယော ကာရိကာယ ဋီကံ အကာသိ။ အညတရော အာစရိယော ဧတိမာသပိဒီပိကာယ ဋီကံ အကာသိ။

အညတရော အာစရိယော သဒ္ဒဗိန္ဒု နာမ ပကရဏံ အကာသိ။ သဒ္ဓမ္မဂုရု နာမာစရိယော သဒ္ဒဝုတ္တိပ္ပကာသကံ နာမ ပကရဏံ အကာသိ။ သာရိပုတ္တော နာမာစရိယော သဒ္ဒဝုတ္တိပ္ပကာသကဿ ဋီကံ အကာသိ။ အညတရော အာစရိယော ကစ္စာယနသာရံ နာမ ပကရဏံ ကစ္စာယနသာရဿ ဋီကဉ္စ ဒုဝိဓံ ပကရဏံ အကာသိ။ နဝေါ မေဓင်္ကရော နာမာစရိယော လောကဒီပကသာရံ နာမ ပကရဏံ အကာသိ။ အဂ္ဂပဏ္ဍိတော နာမာစရိယော လောကုပ္ပတ္တိ နာမ ပကရဏံ အကာသိ။ စီဝရော နာမာစရိယော ဇင်္ဃဒါသကဿ ဋီကံ အကာသိ။ မာတိကတ္ထဒီပနီ၊ အဘိဓမ္မတ္ထသင်္ဂဟဝဏ္ဏနာ၊ သီမာလင်္ကာရဿဋီကာ၊ ဝိနယသမုဋ္ဌာနဒီပနီ ဋီကာ၊ ဂဏ္ဌိ သာရော၊ ပဋ္ဌာနဂဏနာ နယော၊ သုတ္တနိဒ္ဒေသော၊ ပါတိမောက္ခော၊ စေတိ၊ ဣမေ အဋ္ဌ ဂန္ထေ သဒ္ဓမ္မဇောတိပါလာစရိယော အကာသိ။ ဝိမလဗုဒ္ဓိ နာမာစရိယော အဘိဓမ္မ-ပန္နရသဋ္ဌာနံ နာမ ပကရဏံ အကာသိ။ နဝေါ ဝိမလဗုဒ္ဓိ နာမာစရိယော သဒ္ဒသာရတ္ထဇာလိနီ၊ သဒ္ဒသာရတ္ထဇာလိနိယာ ဋီကာ၊ ဝုတ္တောဒယ ဋီကာ၊ ပရမတ္ထမဉ္ဇူသာ နာမ အဘိဓမ္မသင်္ဂဟဋီကာယ အနုဋီကာ ဒသဂဏ္ဌိဝဏ္ဏနာ၊ မာဂဓဘူတာဝိဒဂ္ဂမုခမဏ္ဍနဋီကာ စေတိ ဣမေ ဆ ဂန္ထေ အကာသိ။ အညတရော အာစရိယော ပဉ္စပကရဏဋီကာယ နဝါနုဋီကံ အကာသိ။ အရိယဝံသော နာမာစရိယော အဘိဓမ္မသင်္ဂဟ-ဋီကာယ [ပရမတ္ထ] မဏိသာရမဉ္ဇူသံ နာမ နဝါနုဋီကံ အကာသိ။ အဘိဓမ္မတ္ထသင်္ဂဟဿ ဋီကာ၊ ပေဋကောပဒေသဿ ဋီကာ၊ စတုဘာဏဝါရဿ အဋ္ဌကထာ၊ မဟာသာရပကာသနီ၊ မဟာဒီပနီ၊ သာရတ္ထဒီပနီ ဂတိ ပကရဏံ၊ ဟတ္ထသာရော၊ ဘုမ္မသင်္ဂဟော၊ ဘုမ္မနိဒ္ဒေသော၊ ဒသဝတ္ထုကာယဝိရတိဋီကာ၊ ဇောတနာ နိရုတ္တိ၊ ဝိဘတ္တိကထာ၊ ကစ္စာယနဝိဝရဏာ၊ သဒ္ဓမ္မမာလိနီ၊ ပဉ္စဂတိ ဝဏ္ဏနာ၊ ဗာလစိတ္တပဗောဓနံ၊ ဓမ္မစက္ကသုတ္တဿ နဝဋ္ဌကထာ၊ ဒန္တဓာတု ပကရဏဿ ဋီကာ စေတိ၊ ဣမေ ဝီသတိ ဂန္ထာ နာနာစရိယေဟိ ကတာ၊ အညာနိ ပန ပကရဏာနိ အတ္ထိ။

ကတမာနိ သဒ္ဓမ္မော ပါယနော၊ ဗာလပ္ပဗောဓနပကရဏဿ ဋီကာ စ၊ ဇိနာလင်္ကာရပကရဏဿ နဝဋီကာ စ၊ လိင်္ဂတ္ထဝိဝရဏံ၊ လိင်္ဂဝိနိစ္ဆယော၊ ပါတိမောက္ခဝိဝရဏံ၊ ပရမတ္ထကထာဝိဝရဏံ၊ သမန္တပါသာဒိကာ ဝိဝရဏံ၊ စတုဘာဏဝါရဋ္ဌကထာ ဝိဝရဏံ၊ အဘိဓမ္မတ္ထသင်္ဂဟဝိဝရဏံ၊ သစ္စသင်္ခေပဝိဝရဏံ၊ သဒ္ဒတ္ထဘေဒစိန္တာဝိဝရဏံ၊ သဒ္ဒဝုတ္တိဝိဝရဏံ၊ ကစ္စာယနသာရဝိဝရဏံ၊ အဘိဓမ္မတ္ထသင်္ဂဟဿ ဋီကာ ဝိဝရဏံ၊ မဟာဝေဿန္တရာဇာတကဿ ဝိဝရဏံ၊ သက္ကာဘိမတံ၊ မဟာဝေဿန္တရဇာတကဿ နဝဋ္ဌကထာ၊ ပဌမ သံဗောဓိ၊ လောကနေတ္တိ စ၊ ဗုဒ္ဓဃောသာစရိယနိဒါနံ မိလိန္ဒပဉှာ ဝဏ္ဏနာ၊ စတုရာ ရက္ခာ၊ စတုရက္ခာယ အဋ္ဌကထာ၊ သဒ္ဒဝုတ္တိပကရဏဿ နဝဋီကာ၊ ဣစ္စေဝံ ပဉ္စဝီသတိ ပမာဏာနိ ပကရဏာနိ လင်္ကော ဒီပါဒီသုဋ္ဌာနေသု ပဏ္ဍိတေဟိ ကတာနိ အဟေသုံ၊ သမ္ဗုဒ္ဓေဂါထာ စ၊ နရဒေဝ နာမ ဂါထာ စ၊ ဒါတဝေ စီရတ္တိ ဂါထာ စ၊ ဝီသတိ ဩဝါဒဂါထာ စ၊ ဒါနသတ္တရိ၊ သီလသတ္တရိ၊ သပ္ပာဒါနဝဏ္ဏနာ၊ အနန္တဗုဒ္ဓဝန္ဒနဂါထာ စ၊ အဋ္ဌဝီသတိ ဗုဒ္ဓဝန္ဒနဂါထာ စ၊ အတီတာနာဂတပစ္စုပ္ပန္နဝန္ဒနဂါထာ စ၊ အသီတိမဟာသာဝကဝန္ဒနဂါထာ စ၊ နဝဟာရဂုဏဝဏ္ဏနာ စာတိ၊ ဣမေ ဗုဒ္ဓပဏာမ-ဂါထာဒိကာ ဂါထာ ယော ပဏ္ဍိတေဟိ လင်္ကာဒီပါဒိသုဋ္ဌာနေသု ကတာ အဟေသုံ [ဣတိ စုလ္လဂန္ထဝံသေ ဂန္ထကာရကာစရိယ ဒီပကော နာမ ဒုတိယော ပရိစ္ဆေဒေါ]

၃။ အာစရိယာနံ သဉ္ဇာတဋ္ဌာနပရိစ္ဆေဒေါ

အာစရိယေသု စ အတ္ထိ ဇမ္ဗုဒီပိကာစရိယာ အတ္ထိ၊ လင်္ကာဒီပိကာစရိယာ။ ကတမေ ဇမ္ဗုဒီပိကာစရိယာ? ကတမေ လင်္ကာဒီပိကာစရိယာ? မဟာကစ္စာယနော ဇမ္ဗုဒီပိကာစရိယော သော ဟိ အဝန္တိရဋ္ဌေ ဥဇ္ဇေနီ နဂရေ စန္ဒပဇ္ဇောတဿ နာမ ရညော ပုရောဟိတော ဟုတွာ ကာမာနံ အာဒီနဝံ ဒိသွာ၊ ဃရာဝါသံ ပဟာယ သတ္ထုသာသနေ ပဗ္ဗဇ္ဇိတွာ ဟေဋ္ဌာ ဝုတ္တပ္ပကာရေ ဂန္ထေ အကာသိ။ မဟာအဋ္ဌကထာစရိယော ဇမ္ဗုဒီပိကော၊ မဟာပစ္စရိကာစရိယော၊ မဟာကုရုန္ဒိကာစရိယော၊ အညတရော အာစရိယာ ဒွေတိ ဣမေ စ ဘူဝါစရိယာ။ လင်္ကာဒီပိကာစရိယာ နာမ တေ ကိရ ဗုဒ္ဓဃောသာစရိယဿ ပူရေ ဘူတာစရိယေ ကာလေ အဟေသုံ။ မဟာဗုဒ္ဓဃောသာစရိယော ဇမ္ဗုဒီပိကော။ သော ကိရ မဂဓရဋ္ဌေ ဃောသကဂါမေ ရညော ပုရောဟိတဿ ကေသိ နာမ ဗြာဟ္မဏဿ ပုတ္တော၊ သတ္ထုသာသနေ ပဗ္ဗဇ္ဇိတွာ လင်္ကာဒီပံ ဂတော ဟေဋ္ဌာ ဝုတ္တပ္ပကာရေ ဂန္ထေ အကာသိ။

ဗုဒ္ဓဒတ္တာစရိယော၊ အာနန္ဒာစရိယော၊ ဓမ္မပါလာစရိယော၊ ဒွေ ဗုဗ္ဗာစရိယော၊ မဟာဝဇိရ-ဗုဒ္ဓါစရိယော၊ စုလ္လဝဇိရ-ဗုဒ္ဓါစရိယော၊ ဝိမလဗုဒ္ဓသင်္ခါတော ဒီပင်္ကရာစရိယော၊ စုလ္လဒီပင်္ကရာစရိယော၊ စုလ္လဓမ္မပါလာစရိယော၊ ကဿပါစရိယောတိ ဣမေ ဧကာဒသစရိယာ ဇမ္ဗုဒီပိကာ ဟေဋ္ဌာ ဝုတ္တပကာရေ ဂန္ထေ အကံသု။ မဟာနာမာစရိယော၊ အညတရာစရိယာ၊ စုလ္လမဟာနာမာစရိယော၊ ဥပသေနာစရိယော၊ မောဂ္ဂလာနာစရိယော၊ သင်္ဃရက္ခိတာစရိယော၊ ဝုတ္တောဒယကာရာစရိယော၊ ဓမ္မသိရာစရိယော၊ အညတရာ ဒွါစရိယာ၊ အနုရုဒ္ဓါစရိယော၊ ခေမာစရိယော၊ သာရိပုတ္တာစရိယော၊ ဗုဒ္ဓနာဂါစရိယော၊ စုလ္လမောဂ္ဂလာနာစရိယော၊ ဝါစိဿဝါစရိယော၊ သုမင်္ဂလာစရိယော၊ ဗုဒ္ဓပိယာစရိယော၊ ဓမ္မကိတ္တိ အာစရိယော မေဓင်္ကရာစရိယော၊ ဗုဒ္ဓရက္ခိတာစရိယော၊ ဥပတိဿာ စရိယော၊ အညတရာ ဝီသတာစရိယာ၊ သဒ္ဓမ္မသိရာစရိယော၊ ဒေဝါစရိယော၊ စုလ္လဗုဒ္ဓဃောသာစရိယော၊ သာရိပုတ္တာစရိယော၊ ရဋ္ဌပါလာစရိယောတိ ဣမေ ဒွေ ပညာသာစရိယာ လင်္ကာဒီပိကာစရိယာ နာမ။ သုဘူတစန္ဒာစရိယော၊ အဂ္ဂဝံသာစရိယော၊ နဝေါ ဝဇိရဗုဒ္ဓါစရိယော၊ ဂုဏသာဂရာစရိယော၊ အဘယာစရိယော၊ ဉာဏသာဂရာစရိယော၊ အညတရာ ဒွါစရိယာ၊ ဥတ္တမာစရိယော၊ အညတရော အာစရိယော၊ အညတရော မဟာမစ္စော၊ ဓမ္မသေနာပတာစရိယော၊ အညတရာ တယော အာစရိယာ၊ သဒ္ဓမ္မဂုရု အာစရိယော၊ သာရိပုတ္တာစရိယော၊ အညတရော ဧကာ အာစရိယော၊ မေဓင်္ကရာစရိယော၊ အဂ္ဂပဏ္ဍိတာစရိယော၊ စီဝရာစရိယော၊ သဒ္ဓမ္မဇောတိပါလာစရိယော၊ ဝိမလဗုဒ္ဓါစရိယောတိ ဣမေ တေဝီသတိ အာစရိယာ ဇမ္ဗုဒီပိကာ ဟေဋ္ဌာ ဝုတ္တပ္ပကာရေ ဂန္ထေ ပုက္ကာမ သင်္ခါတေ အရိမဒ္ဒန နဂရေ အကံသု။

နဝေါဝိမလဗုဒ္ဓါစရိယော ဇမ္ဗုဒီပိကော ဟေဋ္ဌာ ဝုတ္တပ္ပကာရေ ဂန္ထေ ပံယနဂရေ အကာသိ။ အညတရာစရိယော အရိယဝံသာစရိယောတိ ဣမေ ဒွါစရိယာ ဇမ္ဗုဒီပိကာ ဟေဋ္ဌာ ဝုတ္တပ္ပကာရေ ဂန္ထေ အတိ [နဝိ] ပုရေ အကံသု၊ အညတရာ ဝီသတာစရိယာ ဇမ္ဗုဒီပိကာ ဟေဋ္ဌာ ဝုတ္တပ္ပကာရေ ဂန္ထေ ကိဉ္စိ ပုရာဒိဃရေ အကံသု။

[ဣတိ စုလ္လဂန္ထဝံသေ အာစရိယာနံ သဉ္ဇာတဋ္ဌာန ဒီပကော နာမ တတိယော ပရိစ္ဆေဒေါ။]

ဂန္ထာ ပန သိယာ အာယာစနေန အာစရိယေဟိ ကတာ၊ သိယာ အနာယာစနေန အာစရိယေဟိ ကတာ။ ကတမေ ဂန္ထာ အာယာစနေန၊ ကတမေ အနာယာစနေန ကတာ? မဟာကစ္စာယန ဂန္ထော၊ မဟာအဋ္ဌကထာ ဂန္ထော၊ မဟာပစ္စရိယ ဂန္ထော၊ မဟာကုရုန္ဒိ ဂန္ထော၊ မဟာပစ္စရိယဂန္ထဿ အဋ္ဌကထာ ဂန္ထော၊ မဟာကုရုန္ဒိ ဂန္ထဿ အဋ္ဌကထာ ဂန္ထောတိ။ ဣမေဟိ ဆ ဂန္ထေဟိ အတ္တနော မတိယာ သာသနုဂ္ဂဟနတ္ထာယ သဒ္ဓမ္မဌိတိယာ ကတာ။

ဗုဒ္ဓဃောသာစရိယ ဂန္ထေသု ပန ဝိသုဒ္ဓိမဂ္ဂေါ၊ သင်္ဃပါလေန နာမ သင်္ဃထေရေန အာယာစိတေန ဗုဒ္ဓဃောသာစရိယေန ကတော။ ဒီဃနိကာယဿ အဋ္ဌကထာ ဂန္ထော ဒါဌာ နာမေန သင်္ဃထေရေန အာယာစိတေန ဗုဒ္ဓဃောသာစရိယေန ကတော။ မဇ္ဈိမနိကာယဿ အဋ္ဌကထာ ဂန္ထော ဗုဒ္ဓမိတ္တနာမေန ထေရေန အာယာစိတေန ဗုဒ္ဓဃောသာစရိယေန ကတော။ သံယုတ္တနိကာယဿ အဋ္ဌကထာ ဂန္ထော ဇောတိပါလေန နာမ ထေရေန အာယာစိတေန ဗုဒ္ဓဃောသာစရိယေန ကတော။ အင်္ဂုတ္တရနိကာယဿ အဋ္ဌကထာ ဂန္ထော ဘဒ္ဒန္တာ နာမ ထေရေန သဟအာဇီဝကေန ဥပါသကေန စ အာယာစိတေန ဗုဒ္ဓဃောသာစရိယေန ကတော။ သမန္တပါသာဒိကာ နာမ အဋ္ဌကထာ ဂန္ထော ဗုဒ္ဓသိရိ နာမေန ထေရေန အာယာစိတေန ဗုဒ္ဓဃောသာစရိယေန ကတော။ သတ္တန္နံ အဘိဓမ္မ-ဂန္ထာနံ အဋ္ဌကထာ ဂန္ထော စုလ္လဗုဒ္ဓဃောသေန ဘိက္ခုနာ အာယာစိတေန ဗုဒ္ဓဃောသာစရိယေန ကတော။ ဓမ္မပဒဿအဋ္ဌကထာ ဂန္ထော ကုမာရကဿပနာမေန ထေရေန အာယာစိတေန ဗုဒ္ဓဃောသာစရိယေန ကတော။ ဇာတကဿအဋ္ဌကထာ ဂန္ထော အတ္ထဒဿီ၊ ဗုဒ္ဓမိတ္တ၊ ဗုဒ္ဓပိယဒေဝ သင်္ခါတေဟိ တီဟိ ထေရေဟိ အာယာစိတေန ဗုဒ္ဓဃောသာစရိယေန ကတော။ ခုဒ္ဒကပါဌဿ အဋ္ဌကထာ ဂန္ထော၊ သုတ္တနိပါတဿ အဋ္ဌကထာ ဂန္ထော အတ္တနော မတိယာ ဗုဒ္ဓဃောသာစရိယေန ကတော။ အပဒါနဿ အဋ္ဌကထာ ဂန္ထော ပဉ္စနိကာယ ဝိညူဟိ ပဉ္စဟိ ထေရေဟိ အာယာစိတေန ဗုဒ္ဓဃောသာစရိယေန ကတော။

ဗုဒ္ဓဃောသာစရိယ-ဂန္ထဒီပနာ နိဋ္ဌိတာ။

ဗုဒ္ဓတ္တာစရိယ ဂန္ထေသု ပန ဝိနယ-ဝိနိစ္ဆယဂန္ထော အတ္တနော သိဿေန ဗုဒ္ဓသီဟေန နာမ ထေရေန အာယာစိတေန ဗုဒ္ဓတ္တာစရိယာ ကတော။ ဥတ္တရ-ဝိနိစ္ဆယဂန္ထော သင်္ဃပါလေန နာမေန ထေရေန အာယာစိတေန ဗုဒ္ဓဒတ္တာစရိယေန ကတော။ အဘိဓမ္မာဝတာရော နာမ ဂန္ထော အတ္တနော သိဿေန သုမတိ ထေရေန အာယာစိတေန ဗုဒ္ဓဒတ္တာစရိယေန ကတော။ ဗုဒ္ဓဝံသဿ အဋ္ဌကထာ ဂန္ထော တေနေဝ ဗုဒ္ဓသီဟနာမ ထေရေန အာယာစိတေန ဗုဒ္ဓဒတ္တာစရိယေန ကတော။

ဗုဒ္ဓဒတ္တာစရိယ-ဂန္ထဒီပနာ နိဋ္ဌိတာ။

အဘိဓမ္မကထာယ မူလဋီကာ နာမ ဋီကာ ဂန္ထော ဗုဒ္ဓမိတ္တာ နာမ ထေရေန အာယာစိတေန အာနန္ဒာစရိယေန ကတော။

နေတ္တိပကရဏဿ အဋ္ဌကထာ ဂန္ထော ဓမ္မရက္ခိတ နာမ ထေရေန အာယာစိတေန ဓမ္မပါလာစရိယေန ကတော။ ဣတိဝုတ္တကအဋ္ဌကထာ ဂန္ထော၊ ဥဒါနအဋ္ဌကထာ ဂန္ထော၊ စရိယာပိဋကအဋ္ဌကထာ ဂန္ထော၊ ထေရကထာအဋ္ဌကထာ ဂန္ထော၊ ထေရိကထာအဋ္ဌကထာ ဂန္ထော၊ ဝိမာနဝတ္ထုအဋ္ဌကထာ ဂန္ထော၊ ပေတဝတ္ထုအဋ္ဌကထာ ဂန္ထော၊ ဣမေ သတ္တ ဂန္ထာ အတ္တနော မတိယာ ဓမ္မပါလာစရိယေန ကတော။ ဝိသုဒ္ဓိမဂ္ဂဋီကာ ဂန္ထော ဒါဌာ နာမေန နာမ ထေရေန အာယာစိတေန ဓမ္မပါလာစရိယေန ကတော၊ ဒီဃနိကာယ-အဋ္ဌကထာဒီနံ စတုန္နံ အဋ္ဌကထာနံ ဋီကာ ဂန္ထော၊ အဘိဓမ္မဋ္ဌကထာယ အနုဋီကာ ဂန္ထော၊ နေတ္တိပကရဏဋ္ဌကထာယ ဋီကာ ဂန္ထော၊ ဗုဒ္ဓဝံသဋ္ဌကထာယ ဋီကာ ဂန္ထော၊ ဇာတကဋ္ဌကထာယ ဋီကာ ဂန္ထော စေတိ ဣမေ ပဉ္စ ဂန္ထာ အတ္တနော မတိယာ ဓမ္မပါလာစရိယေန ကတော။

ဓမ္မပါလာစရိယ-ဂန္ထဒီပနာ နိဋ္ဌိတာ။

နိရုတ္တိမဉ္ဇူသာ နာမ စုလ္လနိရုတ္တိဋီကာ ဂန္ထော၊ မဟာနိရုတ္တိသင်္ခေပေါ နာမ ဂန္ထော စ အတ္တနော မတိယာ ပုဗ္ဗာစရိယေဟိ ဝိံသု ကတော။

ပဉ္စ ဝိနယပကရဏာနံ ဝိနယဂဏ္ဌိ နာမ ဂန္ထော အတ္တနော မတိယာ မဟာဝဇိရဗုဒ္ဓါစရိယေန ကတော။ နျာသသင်္ခါတော မုခမတ္တဒီပနီ နာမ ဂန္ထော အတ္တနော မတိယာ ဝိမလဗုဒ္ဓိ အာစရိယေန ကတော။ အတ္ထဗျက္ချာနော နာမ ဂန္ထော အတ္တနော မတိယာ စုလ္လဝဇိရဗုဒ္ဓါစရိယေန ကတော။ ရူပသိဒ္ဓိ တဿ စ ဂန္ထဿ ဋီကာ ဂန္ထော သဗ္ဗ ပဉ္စသုတ္တဉ္စ အတ္တနော မတိယာ ဒီပင်္ကရာစရိယေန ကတော။ သစ္စသင်္ခေပေါ နာမ ဂန္ထော အတ္တနော မတိယာ စုလ္လဓမ္မပါလာစရိယေန ကတော။ မောဟစ္ဆေဒနီ ဂန္ထော၊ ဝိမတိစ္ဆေဒနီ ဂန္ထော၊ ဒသ ဗုဒ္ဓဝံသော၊ အနာဂတဝံသော စ။ အတ္တနော မတိယာ ကဿပါစရိယေန ကတော။ ပဋိသမ္ဘိဒါမဂ္ဂဿ အဋ္ဌကထာ ဂန္ထော မဟာနာမေန ဥပါသကေန အာယာစိတေန မဟာနာမာစရိယေန ကတော။ ဒီပဝံသော၊ ထူပဝံသော၊ ဗောဓိဝံသော၊ စုလ္လဝံသော၊ ပေါရာဏဝံသော၊ မဟာဝံသော စာတိ ဣမေ ဆ ဂန္ထာ အတ္တနော မတိယာ မဟာနာမာစရိယေဟိ ဝိသုံ ကတာ။ နဝေါ မဟာဝံသဂန္ထော အတ္တနော မတိယာ စုလ္လမဟာနာမာစရိယေန ကတော။ သဒ္ဓမ္မပဇ္ဇောတိကာ နာမ မဟာနိဒ္ဒေသဿ အဋ္ဌကထာ ဂန္ထော ဒေဝေန ထေရေန အာယာစိတေန ဥပသေနာစရိယေန ကတော။ မောဂ္ဂလာနဗျာကရဏဂန္ထေ အတ္တနော မတိယာ မောဂ္ဂလာနာစရိယေန ကတော။ သုဗောဓာလင်္ကာရ နာမ ဂန္ထော အတ္တနော မတိယာ သင်္ဃရက္ခိတာစရိယေန ကတော။ ဝုတ္တောဒယ ဂန္ထော အတ္တနော မတိယာ ဝုတ္တောဒယကာရာစရိယေန ကတော။ ခုဒ္ဒသိက္ခာ နာမ ဂန္ထော အတ္တနော မတိယာ ဓမ္မသိရာစရိယေန ကတော။ ပေါရာဏခုဒ္ဒသိက္ခာ ဋီကာ စ မူလသိက္ခာ စာတိ၊ ဣမေ ဒွေ ဂန္ထေ အတ္တနော မတိယာ အညတရေဟိ ဒွိဟာစရိယေဟိ ဝိံသု ကတာ။

ပရမတ္ထဝိနိစ္ဆယံ နာမ ဂန္ထော သင်္ဃရက္ခိတေန ထေရေန အာယာစိတေန အနုရုဒ္ဓါစရိယေန ကတော။ နာမရူပ-ပရိစ္ဆေဒေါ နာမ ဂန္ထော အတ္တနော မတိယာ အနုရုဒ္ဓါစရိယေန ကတော။ အဘိဓမ္မတ္ထသင်္ဂဟံ နာမ ဂန္ထော နမ္မ နာမေန ဥပါသကေန အာယာစိတေန အနုရုဒ္ဓါစရိယေန ကတော။ ခေမော နာမ ဂန္ထော အတ္တနော မတိယာ ခေမာစရိယေန ကတော။ သာရတ္ထဒီပနီ နာမ ဝိနယဋ္ဌကထာယ ဋီကာ ဂန္ထော၊ ဝိနယသင်္ဂဟံ၊ ဝိနယသင်္ဂဟဿ ဋီကာ ဂန္ထော၊ အင်္ဂုတ္တရဋ္ဌကထာယ နဝေါ ဋီကာ ဂန္ထောတိ ဣမေ စတ္တာရော ဂန္ထာ ပရက္ကမဗာဟု နာမေန လင်္ကာဒီပိဿရေန ရညာ အာယာစိတေန သာရိပုတ္တာစရိယေန ကတော။ သကဋသဒ္ဒသတ္ထဿ ပဉ္စိကာယ ဋီကာ ဂန္ထော အတ္တနော မတိယာ သာရိပုတ္တာစရိယေန ကတော။ ကင်္ခါဝိတရဏိယာ ဝိနယတ္ထမဉ္ဇူသာ နာမ ဋီကာ ဂန္ထော သုမေဓာ နာမထေရေန အာယာစိတေန ဗုဒ္ဓနာဂါစရိယေန ကတော။ အဘိဓာနပ္ပဒီပိကော နာမ ဂန္ထော အတ္တနော မတိယာ စူလမောဂ္ဂလာနာစရိယေန ကတော။ သုဗောဓာလင်္ကာရဿ မဟာသာမိ နာမ ဋီကာ၊ ဝုတ္တောဒယ ဝိဝရဏဉ္စာတိ ဣမေ ဒွေ ဂန္ထာ အတ္တနော မတိယာ ဝါစိဿရေန ကတာ။ ခုဒ္ဒသိက္ခာယ သုမင်္ဂလပ္ပသာဒနိ နာမ နဝေါ ဋီကာ ဂန္ထော သုမင်္ဂလေန အာယာစိတေန နဝါစိဿရေန ကတော။ သမ္ဗန္ဓစိန္တာဋီကာ ဗာလာဝတာရော၊ မောဂ္ဂလာနဗျာကရဏဿ ဋီကာ စာတိ ဣမေ တယော ဂန္ထာ၊ သုမင်္ဂလ၊ ဗုဒ္ဓမိတ္တ၊ မဟာကဿပ သင်္ခါတေဟိ တီဟိ ထေရေဟိ စ၊ ဓမ္မကိတ္တိ နာမ ဥပါသကေန၊ ဝါနိဇ္ဇာ ဘာတု ဥပါသကေန စ အာယာစိတေန ဝါစိဿရေန ကတော။ နာမရူပပရိစ္ဆေဒဿ ဝိဘာဂေါ၊ သဒ္ဒတ္ထဿ ပဒရူပ-ဝိဘာဝနံ၊ ခေမပကရဏဿ ဋီကာ၊ သီမာလင်္ကာရော၊ မူလသိက္ခာယ ဋီကာ၊ ရူပဝိဘာဂေါ၊ ပစ္စယသင်္ဂဟော စာတိ ဣမေ သတ္တ ဂန္ထာ အတ္တနော မတိယာ ဝါစိဿရေန ကတာ။ သစ္စသင်္ခေပဿ ဋီကာ ဂန္ထော သာရိပုတ္တ-နာမေန ထေရေန အာယာစိတေန ဝါစိဿရေန ကတော။ အဘိဓမ္မာဝတာရဿ ဋီကာ၊ အဘိဓမ္မတ္ထသင်္ဂဟဿ ဋီကာ စာတိ ဣမေ ဒွေ ဂန္ထာ အတ္တနော မတိယာ သုမင်္ဂလာစရိယေန ကတာ။ သာရတ္ထသင်္ဂဟံ နာမ ဂန္ထော အတ္တနော မတိယာ ဗုဒ္ဓပ္ပိယေန ကတော ဒန္တဓာတုဝဏ္ဏနာ နာမ ပကရဏံ

လင်္ကာဒီပိဿရဿ ရညော သေနာပတိနာ အာယာစိတေန ဓမ္မကိတ္တိနာမာစရိယေန ကတံ။ ဇိနစရိတံ နာမ ပကရဏံ အတ္တနော မတိယာ မေဓင်္ကရာစရိယေန ကတံ။ ဇိနာလင်္ကာရော၊ ဇိနာလင်္ကာရဿ ဋီကာ အတ္တနော မတိယာ ဗုဒ္ဓရက္ခိတာစရိယေန ကတော။ အမတဓရဿ နာမ အနာဂတဝံသဿ အတ္တနော မတိယာ အဋ္ဌကထာ ဥပတိဿာစရိယေန ကတာ။ ကင်္ခါဝိတရဏီယာ လီနတ္ထပကာသိနီ၊ နိသန္ဒေဟော၊ ဓမ္မာနုသာရဏီ၊ ဉေယျာ-သန္တတိ၊ ဉေယျာ-သန္တတိယာ ဋီကာ၊ သုမတာဝတာရော၊ လောကပညတ္တိ ပကရဏံ၊ တထာဂတုပ္ပတ္တိ ပကရဏံ၊ နလာဋဓာတုဝဏ္ဏနာ၊ သီဟဠဝတ္ထု၊ ဓမ္မဒီပကော ပဋိပတ္တိ သင်္ဂဟော၊ ဝိသုဒ္ဓိမဂ္ဂဿ ဂဏ္ဌိ၊ အဘိဓမ္မဂဏ္ဌိ၊ နေတ္တိပကရဏဂဏ္ဌိ၊ ဝိသုဒ္ဓိမဂ္ဂစူလ-နဝဋီကာ၊ သောတဗ္ဗမာလိနီ၊ ပသာဒဇနနီ၊ ဩကဿလောကော၊ သုဗောဓာလင်္ကာရဿ နဝ ဋီကာ စေတိ၊ ဣမေ ဝီသတိ ဂန္ထာ အတ္တနော မတိယာ ဝီသတာစရိယေဟိ ဝိံသု ဝိံသု ကတာ။

သဒ္ဒတ္ထ ဘေဒစိန္တာ နာမ ပကရဏံ အတ္တနော မတိယာ သဒ္ဓမ္မသိရိနာမာစရိယေန ကတံ။ သုမန-ကူဋဝဏ္ဏနံ နာမ ပကရဏံ၊ ရာဟုလာ နာမ ထေရေန အာယာစိတေန ဝါစိဿရေနဒေဝထေရေန ကတံ။ သောတတ္ထ ကိံ မဟာနိဒါနံ နာမ ပကရဏံ အတ္တနော မတိယာ စုလ္လဗုဒ္ဓဃောသာစရိယေန ကတံ။ မဓုရသင်္ဂါဟနိ နာမ ပကရဏံ အတ္တနော မတိယာ ရဋ္ဌပါလာစရိယေန ကတံ။ လိင်္ဂတ္ထဝိဝရဏံ နာမ ပကရဏံ အတ္တနော မတိယာ သုဘူတစန္ဒာစရိယေန ကတံ။ သဒ္ဒနီတိပကရဏံ အတ္တနော မတိယာ အဂ္ဂဝံသာစရိယေန ကတံ။ နျာသပကရဏဿ မဟာဋီကာ နာမ ဋီကာ အတ္တနော မတိယာ ဝဇိရဗုဒ္ဓါစရိယေန ကတာ။ မုခမတ္တသာရော အတ္တနော မတိယာ ဂုဏသာဂရာစရိယေန ကတော။ မုခမတ္တသာရဿ ဋီကာ သုတသမ္ပန္န နာမေန ဓမ္မရာဇိနော ဂုရုနာ သင်္ဃထေရေန အာယာစိတေန ဂုဏသာဂရာစရိယေန ကတာ။ သဒ္ဒတ္ထဘေဒစိန္တာယ မဟာဋီကာ အတ္တနော မတိယာ အဘယာစရိယေန ကတာ။ လိင်္ဂတ္ထဝိဝရဏပ္ပကာသကံ နာမ ပကရဏံ အတ္တနော မတိယာ ဉာဏသာဂရာစရိယေန ကတံ။ ဂုဠှတ္ထဿ ဋီကာ ဗာလပ္ပဗောဓနဉ္စ ဒုဝိဓံ ပကရဏံ အတ္တနော မတိယာ အညတရာစရိယေန ကတံ။ သဒ္ဒတ္ထဘေဒစိန္တာယ မဇ္ဈိမဋီကာ အတ္တနော မတိယာ အညတရာစရိယေန ကတာ။ ဗာလာဝတာရဿ ဋီကာ၊ လိင်္ဂတ္ထဝိဝရဏာ ဋီကာ စ အတ္တနော မတိယာ ဥတ္တမာစရိယေန ကတာ။ သဒ္ဒတ္ထဘေဒစိန္တာယ နဝ ဋီကာ အတ္တနော မတိယာ အညတရာစရိယေန ကတာ။ အဘိဓာနပ္ပဒီပိကာယ ဋီကာ ဒဏ္ဍီပကရဏဿ မဂဃ-ဘူတာ ဋီကာ စာတိ ဒုဝိဓာ ဋီကာယော အတ္တနော မတိ၊ သီဟသူရ နာမ ရညော ဧကေန အမစ္စေန ကတာ။ ကောလဒ္ဓဇနဿဋီကာ ပါသာဒိကေန နာမ ထေရေန အာယာစိတေန တေနေဝ မဟာမစ္စေန ကတာ။ ကာရိကံ နာမ ပကရဏံ ဉာဏဂမ္ဘီရနာမေန ဘိက္ခုနာ အာယာစိတေန ဓမ္မသေနာပတာစရိယေန ကတံ။ ဧတိမာသမိဒီပနီ [ဝါ ဧတိမာသမိဒီပိကာ] နာမ ပကရဏံ မနောဟာရဉ္စ အတ္တနော မတိယာ တေနေဝ ဓမ္မသေနာပတာစရိယေန ကတံ။ ကာရိကာယ ဋီကာ အတ္တနော မတိယာ အညတရာစရိယေန ကတာ။ ဧတိမာသမိဒီပိကာယ ဋီကာ အတ္တနော မတိယာ အညတရာစရိယေန ကတာ။

သဒ္ဒဗိန္ဒုပကရဏံ အတ္တနော မတိယာ ဓမ္မရာဇဿ ဂုရုနာ အညတရာစရိယေန ကတံ။ သဒ္ဒဝုတ္တိပ္ပကာသကံ နာမ ပကရဏံ အညတရေန ဘိက္ခုနာ အာယာစိတေန သဒ္ဓမ္မဂုရု နာမာစရိယေန ကတံ။ သဒ္ဒဝုတ္တိပ္ပကာသကဿ ဋီကာ အတ္တနော မတိယာ သာရိပုတ္တာစရိယေန ကတာ။

ကစ္စာယန သာရော စ ကစ္စာယနသာရဿ ဋီကာ စာတိ ဒုဝိဓံ ပကရဏံ အတ္တနော မတိယာ အညတရာစရိယေန ကတံ။ လောကဒီပကသာရံ နာမ ပကရဏံ အတ္တနော မတိယာ နဝေနမေဓင်္ကရာစရိယေန ကတံ။ လောကုပ္ပတ္တိပကရဏံ အတ္တနော မတိယာ အဂ္ဂပဏ္ဍိတာစရိယေန ကတံ။ ဇင်္ဃဒါသကဿ ဋီကာ ဘူတာ မဂဓဋီကာ အတ္တနော မတိယာ စီဝရာစရိယေန ကတာ။ မာတိကတ္ထဒီပနီ၊ အဘိဓမ္မတ္ထသင်္ဂဟဝဏ္ဏနာ၊ သီမာလင်္ကာရဿဋီကာ၊ ဂဏ္ဌိသာရော၊ ပဋ္ဌာနဂဏနာနယော စာတိ ဣမေ ပဉ္စ ပကရဏာနိ အတ္တနော မတိယာ သဒ္ဓမ္မဇောတိပါလာစရိယေန ကတာနိ။ သင်္ခေပဝဏ္ဏနာ ပရက္ကမဗာဟု-နာမေန ဇမ္ဗုဒီပိဿရေန ရညော အာယာစိတေ တေနေဝ သဒ္ဓမ္မဇောတိပါလာစရိယေန ကတာ။ ကစ္စာယနဿ သုတ္တနိဒ္ဒေသော အတ္တနော သိဿေန ဓမ္မစာရိနာ ထေရေန အာယာစိတေန သဒ္ဓမ္မဇောတိပါလာစရိယေန ကတော။ ဝိနယသမုဋ္ဌာနဒီပနီ နာမ ပကရဏံ၊ အတ္တနော ဂုရုနာ သင်္ဃထေရေန အာယာစိတေန သဒ္ဓမ္မ-ဇောတိပါလာစရိယေန ကတံ။

သတ္တပကရဏာနိ ပန တေန ပုက္ကာမနဂရေ ကတာနိ။ သင်္ခေပဝဏ္ဏနာဝ လင်္ကာဒီပေ ကတာ။ အဘိဓမ္မ-ပန္နရသဋ္ဌာနဝဏ္ဏာနံ နာမ ပကရဏံ အတ္တနော မတိယာ နဝေန-ဝိမလဗုဒ္ဓါစရိယေန ကတာ။ သဒ္ဒသာရတ္ထဇာလိနီ နာမ ပကရဏံ အတ္တနော မတိယာ နဝေန-ဝိမလဗုဒ္ဓါစရိယေန ကတံ။ သဒ္ဒသာရတ္ထ-ဇာလိနိယာ ဋီကာ၊ ပံယနဂရေ ရညော ဂုရုနာ သင်္ဃရာဇေန အာယာစိတေန တေနေဝ နဝေန ဝိမလဗုဒ္ဓါစရိယေန ကတာ။ ဝုတ္တောဒယဿ ဋီကာ၊ အဘိဓမ္မသင်္ဂဟဿ ဋီကာယ ပရမတ္ထမဉ္ဇူသာ နာမ အနုဋီကာ၊ ဒသဂဏ္ဌိဝဏ္ဏနံ နာမ ပကရဏံ၊ မဂဓဘူတဝိဒဂ္ဂမုခမဏ္ဍနိယာဋီကာ စာတိ ဣမာနိ စတ္တာရိ ပကရဏာနိ အတ္တနော မတိယာ တေနေဝ နဝေန ဝိမလဗုဒ္ဓါစရိယေန ကတာနိ။

ပဉ္စပကရဏဋီကာယ နဝါနုဋီကာ အတ္တနော မတိယာ အညတရော စရိယေန ကတာ။ အဘိဓမ္မသင်္ဂဟဿ နဝဋီကာ အတ္တနော မတိယာ အညတရာစရိယေန ကတာ။ အဘိဓမ္မတ္ထသင်္ဂဟဋီကာယ [မဏိ] မဉ္ဇူသာ [မဏိသာရမဉ္ဇူသာ] နာမ နဝါနုဋီကာ အတ္တနော မတိယာ အရိယဝံသာစရိယေန ကတာ။

ပေဋကောပဒေသဿ ဋီကာ အတ္တနော မတိယာ ဥဒုမ္ဗရိနာမာစရိယေန ပုက္ကာမနဂရေ ကတာ။ စတုဘာဏဝါရဿ အဋ္ဌကထာ၊ မဟာသာရပကာသိနိ၊ မဟာဒီပနီ၊ သာရတ္ထဒီပနီ၊ ဂတိပကရဏံ၊ ဟတ္ထာသာရော၊ ဘုမ္မသင်္ဂဟော၊ ဘုမ္မနိဒ္ဒေသော၊ ဒသဝတ္ထုကာယဝိရတိဋီကာ၊ စောဒနာနိရုတ္တိ၊ ဝိဘတ္တိကထာ၊ သဒ္ဓမ္မမာလိနိ၊ ပဉ္စဂတိဝဏ္ဏနာ၊ ဗာလစိတ္တ-ပဗောဓနံ၊ ဓမ္မစက္ကသုတ္တဿ နဝဋ္ဌကထာ၊ ဒန္တဓာတု-ပကရဏဿ ဋီကာ စ သဒ္ဓမ္မောပါယနော ဗာလပ္ပဗောဓနဋီကာ စ၊ ဇိနာလင်္ကာရဿ နဝဋီကာ စ၊ လိင်္ဂတ္ထ-ဝိဝရဏံ၊ လိင်္ဂတ္ထ-ဝိနိစ္ဆယော၊ ပါတိမောက္ခဝိဝရဏံ၊ ပရမတ္ထကထာဝိဝရဏံ၊ သမန္တပါသာဒိကဝိဝရဏံ၊ စတုဘာဏဝါရဋ္ဌကထာ ဝိဝရဏံ၊ အဘိဓမ္မသင်္ဂဟဝိဝရဏံ၊ သစ္စသင်္ခေပဝိဝရဏံ၊ သဒ္ဒတ္ထဘေဒစိန္တာဝိဝရဏံ၊ သဒ္ဒဝုတ္တိဝိဝရဏံ၊ ကစ္စာယနသာရဝိဝရဏံ၊ ကစ္စာယနဝိဝရဏံ၊ အဘိဓမ္မသင်္ဂဟဿဋီကာဝိဝရဏံ၊ မဟာဝေဿန္တရဇာတကဿ ဝိဝရဏံ၊ သက္ကာဘိမတံ၊ မဟာဝေဿန္တရဇာတကဿ နဝဋ္ဌကထာ၊ ပဌမ-သမ္ဗောဓိ စ လောကနေတ္တိ၊ ဗုဒ္ဓဃောသာစရိယနိဒါနံ၊ မိလိန္ဒ-ပဉှော ဝဏ္ဏနာ၊ စတုရာရက္ခာ၊ စတုရာရက္ခာယအဋ္ဌကထာ၊ သဒ္ဒဝုတ္တိပ္ပကရဏဿ နဝဋီကာ စာတိ ဣမာနိ၊ တိစတ္တာလီသ ပကရဏာနိ အတ္တနော မတိယာ သာသနဿ ဇာတိယာ သဒ္ဓမ္မဿ ဌိတိယာ စ လင်္ကာဒီပါဒီသု ဝိံသု ဝိံသု ကတာနိ။

သမ္ဗုဒ္ဓေ ဂါထာ စ…ပေ… နဝဟာရဂုဏဝဏ္ဏနာ စာတိ ဣမေ ဗုဒ္ဓပဏာမာဒိကာ ဂါထာယော။ အတ္တနော အတ္တနော ဗုဒ္ဓဂုဏပကာသနတ္ထာယ အတ္တနော စ ပရေ စ အနန္တပညာပဝတ္တနတ္ထာယ စ ပဏ္ဍိတေဟိ လင်္ကာဒီပါဒီသု ဝိံသု ဝိံသု ကတာ။

[ဣတိ စုလ္လ-ဂန္ထဝံသေ အာယာစကာစရိယဒီပကော နာမ စတုတ္ထော ပရိစ္ဆေဒေါ။]

နာမံ အာရောပနံ ပေါတ္ထကံ ဂန္ထကာရဿ စ။ လေခံလေခါပနဉ္စေဝ၊ ဝဒါမိ တဒနန္တရန္တိ။ တတ္ထ စတုရာသီတိယာ ဓမ္မက္ခန္ဓသဟဿာနိ ပိဋက၊ နိကာယင်္ဂ၊ ဝဂ္ဂ၊ နိပါတာဒိကံ နာမံ၊ ကေနာရောပိတံ၊ ကတ္ထ အာရောပိတံ၊ ကဒါ အာရောပိတံ၊ ကိမတ္ထံ အာရောပိတန္တိ? တတြာယံ ပိဝိသဇ္ဇနာကေန အာရောပိတန္တိ ပဉ္စသတခီဏာသဝေဟိ အာရောပိတံ။ တေဟိ သဗ္ဗဗုဒ္ဓဝစနံ သင်္ဂါယန္တိ၊ ဣဒံ ပိဋကံ၊ အယံ နိကာယော၊ ဣဒံ အင်္ဂံ၊ အယံ ဝဂ္ဂေါ၊ အယံ နိပါတောတိ။ ဧဝမာဒိကံ နာမံ အာရောပေန္တိ။ ကတ္ထ အာရောပိတန္တိ? ရာဇဂဟေ ဝေဘာရပဗ္ဗတဿ ပါဒေ ဓမ္မမဏ္ဍပ္ပေ အာရောပိတံ။ ကဒါ အာရောပိတန္တိ? ဘဂဝတော ပရိနိဗ္ဗုတေ ပဌမသင်္ဂါယနကာလေ အာရောပိတံ။ ကိမတ္ထံ အာရောပိတန္တိ? ဓမ္မက္ခန္ဓာနံ ဝေါဟာရသုခတ္ထာယ သုခဓာရဏတ္ထာယ စ အာရောပိတံ။ သင်္ဂီတိကာလေ ပဉ္စသတာ ခီဏာသဝါ တေသဉ္စ ဓမ္မက္ခန္ဓာနံ နာမ ဝဂ္ဂနိပါတတော။ ဣမဿ ဓမ္မက္ခန္ဓဿ အယံ နာမော ဟောတု၊ ဣမဿ စ ပကရဏဿ အယံ နာမောတိ၊ အဗြဝုံ သဗ္ဗံ နာမာဒိကံ ကိစ္စံ အကံသု။ တေ ခီဏာသဝါ၊ ယဒိ နာမာဒိကံ ကိစ္စံ အကတံ န သုပါကတံ တသ္မာ ဝေါဟာရသုခတ္ထာယနာမာဒိကံ ကိစ္စံ ကတံ အနာဂတေ ပနတ္ထာယ နာမာဒိကံ ပဝတ္တိတံ အသဉ္ဇာတနာမော န သုဋ္ဌု ပါကတော သဗ္ဗသော ဘဝေတိ။ ဓမ္မက္ခန္ဓာနံ နာမ ဒီပနာ နိဋ္ဌိတာ။

စတုရာသီတိ ဓမ္မက္ခန္ဓသဟဿာနိ ကေန ပေါတ္ထကေ အာရောပိတာနိ၊ ကဒါ အာရောပိတာနိ၊ ကိမတ္ထံ အာရောပိတာနီတိ။ တတြာယံ ဝိသဇ္ဇနာ ကေနာရောပိတာနိတိ? ခီဏာသဝမဟာနာဂေဟိ အာရောပိတာနိ။ ကတ္ထ အာရောပိတာနီတိ? လင်္ကာဒီပေ အာရောပိတာနိ။ ကဒါ အာရောပိတာနီတိ? သဒ္ဓါတိဿဿရာဇိနော ပုတ္တဿ ဝဋ္ဋဂါမနိ ရာဇဿ ကာလေ အာရောပိတာနိ။ ကိမတ္ထံ အာရောပိတာနီတိ? ဓမ္မက္ခန္ဓာနံ အဝိဓံသနတ္ထာယ သဒ္ဓမ္မဋ္ဌိတိယာ စ အာရောပိတာနိ။

ဓရမာနော ဟိ ဘဂဝါ၊ အမှာကံ သုဂတောဓီရော၊

နိကာယေ ပဉ္စဒေသေတိ၊ ယာဝ နိဗ္ဗာနဂမနာ။

သဗ္ဗေပိ တေ ဘိက္ခု အာဒိ၊ မနသာ ဝစသာဟာရော၊

သဗ္ဗေ စ ဝါစုဂ္ဂတာ ဟောန္တိ၊ မဟာပညာသတိဝရာ။

နိဗ္ဗူတေ လောကနာထမှိ၊ တတော ဝဿသတံ ဘဝေ၊

အရိယာနရိယာ စာပိ စ၊ သဗ္ဗေ ဝါစုဂ္ဂတာ ဓုဝံ။

တတော ပရံ အဋ္ဌရသံ၊ ဒွိသတံဝဿ ဂဏနံ၊

သဗ္ဗေ ပုထုဇ္ဇနာ စေဝ၊ အရိယာ စ သဗ္ဗေပိတေ။

မနသာဝစသာယေဝ၊ ဝါစုဂ္ဂတာဝ သဗ္ဗဒါ၊

ဒုဋ္ဌဂါမဏိရညော စ၊ ကာလေ ဝါစုဂ္ဂတာ ဓုဝံ။

အရိယာနရိယာပိ စ၊ နိကာယေ ဓာရဏာသဒါ၊

တတော ပရမှိ ရာဇာ စ၊ တတော စုတော စ တုသိတေ။

ဥပ္ပဇ္ဇိ ဒေဝ လောကေ သော၊ ဒေဝေဟိ ပရိဝါရိတော၊

သဒ္ဓါ တိဿောတိ နာမေန၊ တဿ ကနိဋ္ဌကော ဟိတော။

တတော လဒ္ဓရဋ္ဌော ဟောတိ၊ ဗုဒ္ဓသာသနပါလကော။

တဒါ ကာလေ ဘိက္ခူ အာသုံ၊ သဗ္ဗေ ဝါစုဂ္ဂတာ သဒါ၊

နိကာယေ ပဉ္စဝေဓေဝ၊ ယာဝ ရညော စ ဓာရဏာ၊

တတော စုတော သော ရာဇာ စ၊ တုဿီတေ ဥပပဇ္ဇတိ၊

ဒေဝလောကေဋ္ဌိတော သန္တော၊ တဒါ ဝါစုဂ္ဂတာ တတော။

တဿ ပုတ္တာပိ အဟေသုံ၊ အနေကာ ဝရဇ္ဇံ ဂတာ၊

အနုက္ကမေန စုတတေ၊ ဒေဝလောကံ ဂတာ ဓုဝံ၊

တဒါပိတေ သဗ္ဗေ ဘိက္ခူ၊ ဝါစုဂ္ဂတာဝ သဗ္ဗဒါ၊

နိကာယေ ပဉ္စဝိဓေဝ၊ ဓာရဏာဝသတိမတာ။

တတော ပရံ ပေါတ္ထကေသု၊ နိကာယာ ပဉ္စ ပိဋ္ဌိတာ၊

တဒါ အဋ္ဌကထာ ဋီကာ၊ သဗ္ဗေ ဂန္ထာ ပေါတ္ထကေ ဂတာ၊

သဗ္ဗေ ပေါတ္ထေသု ယေ ဂန္ထာ၊ ပါဠိ အဋ္ဌကထာ ဋီကာ၊

သံဋ္ဌိတာသံ ဌိတာ ဟောန္တိ၊ သဗ္ဗေပိ နော န သန္တိတေ။

တဒါ တေ ပေါတ္ထကေယေဝ၊ နိကာယာ ပိဌိတာ ခိလာ၊

တဒါ အဋ္ဌကထာဒီနိ၊ ဘဝန္တီတိ ဝဒန္တိ စ။

ပရိဟာရော ပဏ္ဍိတေဟိ ဝတ္တဗ္ဗောဝ၊

လင်္ကာဒီပဿ ရညောဝ၊ သဒ္ဓါ တိဿဿ ရာဇိနော။

ပုတ္တကော လင်္ကာဒီပဿ၊ ဣဿရော ဓမ္မိကော ဝရော၊

တဒါ ခီဏာသဝါ သဗ္ဗေ၊ ဩလောကေန္တိ အနဂတေ။

ခီဏာသဝါ ပဿန္တိ တေ၊ ဒုပညေဝ ပုထုဇ္ဇနေ၊

သဗ္ဗေပိ တေ ဘိက္ခူ အာသုံ၊ ဗဟုံတရာ ပုထုဇ္ဇနာ၊

န သက္ခိဿန္တိ တေ ပဉ္စ၊ နိကာယေ ဝါစုဂ္ဂတံ ဣတိ၊

ပေါတ္ထကေသု သဗ္ဗေ ပဉ္စ၊ အာရောပေန္တိ ခီဏာသဝါ။

သဒ္ဓမ္မဋ္ဌိတိ စိရတ္တာယ၊ ဇနာနံ ပုညတ္ထာယ စ၊

တတော ပဋ္ဌာယတေ သဗ္ဗေ၊ နိကာယာ ဟောန္တိ ပေါတ္ထကေ၊

အဋ္ဌကထာ ဋီကာ သဗ္ဗေ၊ တေ ဟောန္တိ ပေါတ္ထကေဋ္ဌိတာ။

တတော ပဋ္ဌာယတေ သဗ္ဗေ၊ ဘိက္ခု အာဒိ မဟာဂဏာ၊

ပေါတ္ထကေသု ဌိတေယေဝ၊ သဗ္ဗေ ပဿန္တိ သဗ္ဗဒါ။

[ပေါတ္ထကေ အာရောပန ဒီပကာ နိဋ္ဌိတာ။]

ယော ကောစိ ပဏ္ဍိတော ဓီရော၊ အဋ္ဌကထာဒိကံ ဂန္ထံ ကရောတိ ဝါ ကာရာပေတိ ဝါ၊ တဿ အနန္တကော ဟောတိ ပုညသံစယော၊ အနန္တကော ဟောတိ ပုညာနိသံသော။ စတုရာသီတိ စေတိယသဟဿ ကရဏသဒိသော၊ စတုရာသီတိ ဗုဒ္ဓရူပသဟဿ ကရဏသဒိသော၊ စတုရာသီတိ ဗောဓိရုက္ခသဟဿရောပနသဒိသော၊ စတုရာသီတိ ဝိဟာရသဟဿ ကရဏသဒိသော၊ ယော စ ဗုဒ္ဓဝစနမဉ္ဇူသံ ကရောတိ ဝါ ကာရာပေတိ ဝါ၊ ယော စ ဗုဒ္ဓဝစနံ မဏ္ဍနံ ကရောတိ ဝါ ကာရာပေတိ ဝါ၊ ယော စ ဗုဒ္ဓဝစနံ လေခံ ကရောတိ ဝါ ကာရာပေတိ ဝါ၊ ယော စ ပေါတ္ထကံ ဝါ၊ ယော စ ပေါတ္ထကမူလံ ဝါ၊ ဒေတိ ဝါ ဒါပေတိ ဝါ၊ ယော စ တေလံ ဝါ စုဏ္ဏံ ဝါ၊ ဓညံ ဝါ ပေါတ္ထကဘဉ္ဇနတ္ထာယ ယံ ကိဉ္စိ နိတ္ထံ ဝါ ပေါတ္ထကဆိဒ္ဒေ အာဝုနတ္ထာယ၊ ယံ ကိဉ္စိ သုတ္တံ ဝါ ကဋ္ဌဖလကဒွယံ ဝါ ပေါတ္ထကံ ပုဋနတ္ထာယ ယံ ကိဉ္စိ ဝတ္ထံ ဝါ၊ ပေါတ္ထက-ဗန္ဓနတ္ထာယ၊ ယံ ကိဉ္စိ ယောတ္တံ ဝါ ပေါတ္ထကလာပ ပူဋနတ္ထာယ ယံ ကိဉ္စိ ထဝိကံ ဒေတိ ဝါ ဒါပေတိ ဝါ။

ယော စ ဟရိတာလေန ဝါ မနောသိလာယ ဝါ၊ သုဝဏ္ဏေန ဝါ ရဇတေန ဝါ ပေါတ္ထကမဏ္ဍနံ ဝါ ကဋ္ဌဖလကမဏ္ဍနံ ဝါ ကရောတိ ဝါ ကာရာပေတိ ဝါ၊ တဿ အနန္တကော ဟောတိ ပုညသံစယော၊ အနန္တကော ဟောတိ ပုညာနိသံသော။ စတုရာသီတိ စေတိယသဟဿ ကရဏသဒိသော၊ စတုရာသီတိ ဝိဟာရသဟဿ ကရဏသဒိသော။

ဘဝေ နိဗ္ဗတ္တမာနော သော၊ သီလဂုဏမုပါဂတာ၊

မဟာ တေဇော သဒါ ဟောတိ၊ သီဟနာဒေါ ဝိသာရဒေါ။

အာယုဝဏ္ဏဗလုပ္ပေတော၊ ဓမ္မကာမော ဘဝေ သဒ္ဒါ၊

ဒေဝမနုဿလောကေသု၊ မဟေသက္ခော အနာမယော။

ဘဝေ နိဗ္ဗတ္တမာနော သော၊ ပညဝါ သုသမာဟိတော၊

အဓိပစ္စ ပရိဝါရော၊ သဗ္ဗသုခါဓိ ဂစ္ဆတိ။

သဒ္ဒေါဟီရိမာ ဝဒညူ၊ သံဝိဂ္ဂ မာနသော ဘဝေ၊

အင်္ဂပစ္စင်္ဂ သမ္ပန္နော၊ အာရောဟ ပရိဏာဟဝါ။

သဗ္ဗေ သတ္တာပိ ယော လောကေ၊ သဗ္ဗတ္ထ ပူဇိတာဘဝေ၊

ဒေဝမနုဿ သဉ္စရော၊ မိတ္တသဟာယ ပါလိတော။

ဒေဝမနုဿ သမ္ပတ္တိံ၊ အနုဘောတိ ပုနပ္ပုနံ၊

အရဟတ္တ ဖလံ ပတ္တော၊ နိဗ္ဗာနံ ပါပုဏိဿတိ။

ပဋိသမ္ဘိဒါ စတဿော၊ အဘိညာ ဆဗ္ဗိဓေ ဝရေ၊

ဝိမောက္ခေ အဋ္ဌကေ သေဋ္ဌေ၊ ဂမိဿတိ အနာဂတေ။

တသ္မာဟိ ပဏ္ဍိတော ပေါသော၊ သံပဿံ ဟိတ မတ္တနော၊

ကာရေယျ သာမ ဂန္ထေ စ၊ အညေ စာပိ ကာရာပယေ။

ပေါတ္ထကေ စ ဌိတေ ဂန္ထေ၊ ပါဠိ အဋ္ဌကထာဒိကေ၊

ဓမ္မမဉ္ဇူသာ ဂန္ထေ စ၊ လေခံ ကရေ ကာရာပယေ။

ပေါတ္ထကံ ပေါတ္ထကမူလဉ္စ၊ တေသံ စုလ္လထူသမ္ပိ စ၊

ပိလောတိကာဒိကံ သုတ္တံ၊ ကဋ္ဌဖလဒွယမှိ စ။

ဓမ္မဗန္ဓနတ္ထာယ စ၊ ယံ ကိဉ္စိ မဟဂ္ဃံ ဝတ္ထံ၊

ဓမ္မဗန္ဓနယောတ္တဉ္စ၊ ယံ ကိဉ္စိ ထဝိကမ္ပိ စ။

ဒဒေယျ ဓမ္မခေတ္တမှိ၊ ဝိပ္ပဿန္နေန စေတသာ၊

အညော စာပိ ဒဇ္ဇာပေယျ၊ မိတ္တသဟာယဗန္ဓဝေတိ။

ဂန္ထာကရလေခလေခါပနာနိသံသ ဒီပနာ နိဋ္ဌိတာ။

[ဣတိ စူလဂန္ထဝံသေ ပကိဏ္ဏကဒီပကော နာမ ပဉ္စမော ပရိစ္ဆေဒေါ။]

သောဟံ ဟံသာရဋ္ဌ ဇာတော၊ နန္တပညောတိ ဝိဿုတော

သဒ္ဓါ သီလ ဝီရပ္ပေတော၊ ဓမ္မရသံ ဂဝေသနော။

သောဟံ တတော ဂန္တွာ စိမံ၊ ဇိန နဝံ ယံ ပူရံ၊

သဗ္ဗ ဓမ္မံ ဝိစိနန္တော၊ ဝီသတိ ဝဿမာဂတော။

သဗ္ဗ ဓမ္မံ ဝိဿေဇ္ဇေန္တော၊ ကိကာရေ နေဝ ဘိက္ခုနော၊

ဆ ဝဿာနံ ဂဏံ ဘိတွာ၊ ကာမာနံ အဘိမဒ္ဒနံ။

သန္တိ သဘာ စ နိဗ္ဗာနံ၊ ဂဝေသိဉ္စ ပုနပ္ပုနံ၊

ဝသန္တောဟံ၊ ဝနာရမ္မံ၊ ပိဋကတ္တယ သင်္ဂဟံ၊

ဂန္ထဝံသံ ဣမံ ခုဒ္ဒံ၊ အရိယသင်္ဃဒါသကန္တိ။

ဣတိ ပါမောဇ္ဇတ္ထာယ အရညဝါသိနာ၊ နန္ဒပညာစရိယေန ကတော စူဠဂန္ထဝံသော နိဋ္ဌိတော။

ဓမ္မဝဋံသကနာမေန ဝိသုတော ထေရော၊ ယံ ပကရဏံ လိက္ခိတံ တံ ပရိပုဏ္ဏံ တေန ပုညေန တံ ပိဋကံ ပရိသိပ္ပံ ပရိနိဋ္ဌိတံ။

မမေဝ သိဿသမူဟာနဉ္စ ပရိသိပ္ပံ ပရိနိဋ္ဌိတံ။ တဝေ သိဿာနူ သိဿာနိ စ၊ ပရိသိပ္ပံ ပရိနိဋ္ဌိတံ။